# Vimānavatthu — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

vv1:0.1	Vimānavatthu
vv1:0.2	Itthivimāna
vv1:0.3	Pīṭhavagga
vv1:0.4	1. Paṭhamapīṭhavimānavatthu
vv1:1.1	Namo tassa Bhagavato Arahato Sammāsambuddhassa.
vv1:2.1	“Pīṭhaṁ te sovaṇṇamayaṁ uḷāraṁ,
vv1:2.2	Manojavaṁ gacchati yenakāmaṁ;
vv1:2.3	Alaṅkate malyadhare suvatthe,
vv1:2.4	Obhāsasi vijjurivabbhakūṭaṁ.
vv1:3.1	Kena tetādiso vaṇṇo,
vv1:3.2	kena te idha mijjhati;
vv1:3.3	Uppajjanti ca te bhogā,
vv1:3.4	ye keci manaso piyā.
vv1:4.1	Pucchāmi taṁ devi mahānubhāve,
vv1:4.2	Manussabhūtā kimakāsi puññaṁ;
vv1:4.3	Kenāsi evaṁ jalitānubhāvā,
vv1:4.4	Vaṇṇo ca te sabbadisā pabhāsatī”ti.
vv1:5.1	Sā devatā attamanā,
vv1:5.2	moggallānena pucchitā;
vv1:5.3	Pañhaṁ puṭṭhā viyākāsi,
vv1:5.4	yassa kammassidaṁ phalaṁ.
vv1:6.1	“Ahaṁ manussesu manussabhūtā,
vv1:6.2	Abbhāgatānāsanakaṁ adāsiṁ;
vv1:6.3	Abhivādayiṁ añjalikaṁ akāsiṁ,
vv1:6.4	Yathānubhāvañca adāsi dānaṁ.
vv1:7.1	Tena metādiso vaṇṇo,
vv1:7.2	tena me idha mijjhati;
vv1:7.3	Uppajjanti ca me bhogā,
vv1:7.4	ye keci manaso piyā.
vv1:8.1	Akkhāmi te bhikkhu mahānubhāva,
vv1:8.2	Manussabhūtā yamakāsi puññaṁ;
vv1:8.3	Tenamhi evaṁ jalitānubhāvā,
vv1:8.4	Vaṇṇo ca me sabbadisā pabhāsatī”ti.
vv1:9.1	Paṭhamapīṭhavimānaṁ paṭhamaṁ.
vv2:0.1	Vimānavatthu
vv2:0.2	Itthivimāna
vv2:0.3	Pīṭhavagga
vv2:0.4	2. Dutiyapīṭhavimānavatthu
vv2:1.1	“Pīṭhaṁ te veḷuriyamayaṁ uḷāraṁ,
vv2:1.2	Manojavaṁ gacchati yenakāmaṁ;
vv2:1.3	Alaṅkate malyadhare suvatthe,
vv2:1.4	Obhāsasi vijjurivabbhakūṭaṁ.
vv2:2.1	Kena tetādiso vaṇṇo,
vv2:2.2	kena te idha mijjhati;
vv2:2.3	Uppajjanti ca te bhogā,
vv2:2.4	ye keci manaso piyā.
vv2:3.1	Pucchāmi taṁ devi mahānubhāve,
vv2:3.2	Manussabhūtā kimakāsi puññaṁ;
vv2:3.3	Kenāsi evaṁ jalitānubhāvā,
vv2:3.4	Vaṇṇo ca te sabbadisā pabhāsatī”ti.
vv2:4.1	Sā devatā attamanā,
vv2:4.2	moggallānena pucchitā;
vv2:4.3	Pañhaṁ puṭṭhā viyākāsi,
vv2:4.4	yassa kammassidaṁ phalaṁ.
vv2:5.1	“Ahaṁ manussesu manussabhūtā,
vv2:5.2	Abbhāgatānāsanakaṁ adāsiṁ;
vv2:5.3	Abhivādayiṁ añjalikaṁ akāsiṁ,
vv2:5.4	Yathānubhāvañca adāsi dānaṁ.
vv2:6.1	Tena metādiso vaṇṇo,
vv2:6.2	tena me idha mijjhati;
vv2:6.3	Uppajjanti ca me bhogā,
vv2:6.4	ye keci manaso piyā.
vv2:7.1	Akkhāmi te bhikkhu mahānubhāva,
vv2:7.2	Manussabhūtā yamakāsi puññaṁ;
vv2:7.3	Tenamhi evaṁ jalitānubhāvā,
vv2:7.4	Vaṇṇo ca me sabbadisā pabhāsatī”ti.
vv2:8.1	Dutiyapīṭhavimānaṁ dutiyaṁ.
vv3:0.1	Vimānavatthu
vv3:0.2	Itthivimāna
vv3:0.3	Pīṭhavagga
vv3:0.4	3. Tatiyapīṭhavimānavatthu
vv3:1.1	“Pīṭhaṁ te sovaṇṇamayaṁ uḷāraṁ,
vv3:1.2	Manojavaṁ gacchati yenakāmaṁ;
vv3:1.3	Alaṅkate malyadhare suvatthe,
vv3:1.4	Obhāsasi vijjurivabbhakūṭaṁ.
vv3:2.1	Kena tetādiso vaṇṇo,
vv3:2.2	kena te idha mijjhati;
vv3:2.3	Uppajjanti ca te bhogā,
vv3:2.4	ye keci manaso piyā.
vv3:3.1	Pucchāmi taṁ devi mahānubhāve,
vv3:3.2	Manussabhūtā kimakāsi puññaṁ;
vv3:3.3	Kenāsi evaṁ jalitānubhāvā,
vv3:3.4	Vaṇṇo ca te sabbadisā pabhāsatī”ti.
vv3:4.1	Sā devatā attamanā,
vv3:4.2	moggallānena pucchitā;
vv3:4.3	Pañhaṁ puṭṭhā viyākāsi,
vv3:4.4	yassa kammassidaṁ phalaṁ.
vv3:5.1	“Appassa kammassa phalaṁ mamedaṁ,
vv3:5.2	Yenamhi evaṁ jalitānubhāvā;
vv3:5.3	Ahaṁ manussesu manussabhūtā,
vv3:5.4	Purimāya jātiyā manussaloke.
vv3:6.1	Addasaṁ virajaṁ bhikkhuṁ,
vv3:6.2	vippasannamanāvilaṁ;
vv3:6.3	Tassa adāsahaṁ pīṭhaṁ,
vv3:6.4	pasannā sehi pāṇibhi.
vv3:7.1	Tena metādiso vaṇṇo,
vv3:7.2	tena me idha mijjhati;
vv3:7.3	Uppajjanti ca me bhogā,
vv3:7.4	ye keci manaso piyā.
vv3:8.1	Akkhāmi te bhikkhu mahānubhāva,
vv3:8.2	Manussabhūtā yamakāsi puññaṁ;
vv3:8.3	Tenamhi evaṁ jalitānubhāvā,
vv3:8.4	Vaṇṇo ca me sabbadisā pabhāsatī”ti.
vv3:9.1	Tatiyapīṭhavimānaṁ tatiyaṁ.
vv4:0.1	Vimānavatthu
vv4:0.2	Itthivimāna
vv4:0.3	Pīṭhavagga
vv4:0.4	4. Catutthapīṭhavimānavatthu
vv4:1.1	“Pīṭhaṁ te veḷuriyamayaṁ uḷāraṁ,
vv4:1.2	Manojavaṁ gacchati yenakāmaṁ;
vv4:1.3	Alaṅkate malyadhare suvatthe,
vv4:1.4	Obhāsasi vijjurivabbhakūṭaṁ.
vv4:2.1	Kena tetādiso vaṇṇo,
vv4:2.2	kena te idha mijjhati;
vv4:2.3	Uppajjanti ca te bhogā,
vv4:2.4	ye keci manaso piyā.
vv4:3.1	Pucchāmi taṁ devi mahānubhāve,
vv4:3.2	Manussabhūtā kimakāsi puññaṁ;
vv4:3.3	Kenāsi evaṁ jalitānubhāvā,
vv4:3.4	Vaṇṇo ca te sabbadisā pabhāsatī”ti.
vv4:4.1	Sā devatā attamanā,
vv4:4.2	moggallānena pucchitā;
vv4:4.3	Pañhaṁ puṭṭhā viyākāsi,
vv4:4.4	yassa kammassidaṁ phalaṁ.
vv4:5.1	“Appassa kammassa phalaṁ mamedaṁ,
vv4:5.2	Yenamhi evaṁ jalitānubhāvā;
vv4:5.3	Ahaṁ manussesu manussabhūtā,
vv4:5.4	Purimāya jātiyā manussaloke.
vv4:6.1	Addasaṁ virajaṁ bhikkhuṁ,
vv4:6.2	vippasannamanāvilaṁ;
vv4:6.3	Tassa adāsahaṁ pīṭhaṁ,
vv4:6.4	pasannā sehi pāṇibhi.
vv4:7.1	Tena metādiso vaṇṇo,
vv4:7.2	tena me idha mijjhati;
vv4:7.3	Uppajjanti ca me bhogā,
vv4:7.4	ye keci manaso piyā.
vv4:8.1	Akkhāmi te bhikkhu mahānubhāva,
vv4:8.2	Manussabhūtā yamakāsi puññaṁ;
vv4:8.3	Tenamhi evaṁ jalitānubhāvā,
vv4:8.4	Vaṇṇo ca me sabbadisā pabhāsatī”ti.
vv4:9.1	Catutthapīṭhavimānaṁ catutthaṁ.
vv5:0.1	Vimānavatthu
vv5:0.2	Itthivimāna
vv5:0.3	Pīṭhavagga
vv5:0.4	5. Kuñjaravimānavatthu
vv5:1.1	“Kuñjaro te varāroho,
vv5:1.2	Nānāratanakappano;
vv5:1.3	Ruciro thāmavā javasampanno,
vv5:1.4	Ākāsamhi samīhati.
vv5:2.1	Padumi padmapattakkhi,
vv5:2.2	padmuppalajutindharo;
vv5:2.3	Padmacuṇṇābhikiṇṇaṅgo,
vv5:2.4	soṇṇapokkharamāladhā.
vv5:3.1	Padumānusaṭaṁ maggaṁ,
vv5:3.2	padmapattavibhūsitaṁ;
vv5:3.3	Ṭhitaṁ vaggu manugghātī,
vv5:3.4	mitaṁ gacchati vāraṇo.
vv5:4.1	Tassa pakkamamānassa,
vv5:4.2	soṇṇakaṁsā ratissarā;
vv5:4.3	Tesaṁ suyyati nigghoso,
vv5:4.4	tūriye pañcaṅgike yathā.
vv5:5.1	Tassa nāgassa khandhamhi,
vv5:5.2	sucivatthā alaṅkatā;
vv5:5.3	Mahantaṁ accharāsaṅghaṁ,
vv5:5.4	vaṇṇena atirocasi.
vv5:6.1	Dānassa te idaṁ phalaṁ,
vv5:6.2	atho sīlassa vā pana;
vv5:6.3	Atho añjalikammassa,
vv5:6.4	taṁ me akkhāhi pucchitā”ti.
vv5:7.1	Sā devatā attamanā,
vv5:7.2	moggallānena pucchitā;
vv5:7.3	Pañhaṁ puṭṭhā viyākāsi,
vv5:7.4	yassa kammassidaṁ phalaṁ.
vv5:8.1	“Disvāna guṇasampannaṁ,
vv5:8.2	jhāyiṁ jhānarataṁ sataṁ;
vv5:8.3	Adāsiṁ pupphābhikiṇṇaṁ,
vv5:8.4	āsanaṁ dussasanthataṁ.
vv5:9.1	Upaḍḍhaṁ padmamālāhaṁ,
vv5:9.2	āsanassa samantato;
vv5:9.3	Abbhokirissaṁ pattehi,
vv5:9.4	pasannā sehi pāṇibhi.
vv5:10.1	Tassa kammakusalassa,
vv5:10.2	idaṁ me īdisaṁ phalaṁ;
vv5:10.3	Sakkāro garukāro ca,
vv5:10.4	devānaṁ apacitā ahaṁ.
vv5:11.1	Yo ve sammāvimuttānaṁ,
vv5:11.2	santānaṁ brahmacārinaṁ;
vv5:11.3	Pasanno āsanaṁ dajjā,
vv5:11.4	evaṁ nande yathā ahaṁ.
vv5:12.1	Tasmā hi attakāmena,
vv5:12.2	mahattamabhikaṅkhatā;
vv5:12.3	Āsanaṁ dātabbaṁ hoti,
vv5:12.4	sarīrantimadhārinan”ti.
vv5:13.1	Kuñjaravimānaṁ pañcamaṁ.
vv6:0.1	Vimānavatthu
vv6:0.2	Itthivimāna
vv6:0.3	Pīṭhavagga
vv6:0.4	6. Paṭhamanāvāvimānavatthu
vv6:1.1	“Suvaṇṇacchadanaṁ nāvaṁ,
vv6:1.2	Nāri āruyha tiṭṭhasi;
vv6:1.3	Ogāhasi pokkharaṇiṁ,
vv6:1.4	Padmaṁ chindasi pāṇinā.
vv6:2.1	Kena tetādiso vaṇṇo,
vv6:2.2	kena te idha mijjhati;
vv6:2.3	Uppajjanti ca te bhogā,
vv6:2.4	ye keci manaso piyā.
vv6:3.1	Pucchāmi taṁ devi mahānubhāve,
vv6:3.2	Manussabhūtā kimakāsi puññaṁ;
vv6:3.3	Kenāsi evaṁ jalitānubhāvā,
vv6:3.4	Vaṇṇo ca te sabbadisā pabhāsatī”ti.
vv6:4.1	Sā devatā attamanā,
vv6:4.2	moggallānena pucchitā;
vv6:4.3	Pañhaṁ puṭṭhā viyākāsi,
vv6:4.4	yassa kammassidaṁ phalaṁ.
vv6:5.1	“Ahaṁ manussesu manussabhūtā,
vv6:5.2	Purimāya jātiyā manussaloke;
vv6:5.3	Disvāna bhikkhū tasite kilante,
vv6:5.4	Uṭṭhāya pātuṁ udakaṁ adāsiṁ.
vv6:6.1	Yo ve kilantāna pipāsitānaṁ,
vv6:6.2	Uṭṭhāya pātuṁ udakaṁ dadāti;
vv6:6.3	Sītodakā tassa bhavanti najjo,
vv6:6.4	Pahūtamalyā bahupuṇḍarīkā.
vv6:7.1	Taṁ āpagā anupariyanti sabbadā,
vv6:7.2	Sītodakā vālukasanthatā nadī;
vv6:7.3	Ambā ca sālā tilakā ca jambuyo,
vv6:7.4	Uddālakā pāṭaliyo ca phullā.
vv6:8.1	Taṁ bhūmibhāgehi upetarūpaṁ,
vv6:8.2	Vimānaseṭṭhaṁ bhusa sobhamānaṁ;
vv6:8.3	Tassīdha kammassa ayaṁ vipāko,
vv6:8.4	Etādisaṁ puññakatā labhanti.
vv6:9.1	Tena metādiso vaṇṇo,
vv6:9.2	tena me idha mijjhati;
vv6:9.3	Uppajjanti ca me bhogā,
vv6:9.4	ye keci manaso piyā.
vv6:10.1	Akkhāmi te bhikkhu mahānubhāva,
vv6:10.2	Manussabhūtā yamakāsi puññaṁ;
vv6:10.3	Tenamhi evaṁ jalitānubhāvā,
vv6:10.4	Vaṇṇo ca me sabbadisā pabhāsatī”ti.
vv6:11.1	Paṭhamanāvāvimānaṁ chaṭṭhaṁ.
vv7:0.1	Vimānavatthu
vv7:0.2	Itthivimāna
vv7:0.3	Pīṭhavagga
vv7:0.4	7. Dutiyanāvāvimānavatthu
vv7:1.1	“Suvaṇṇacchadanaṁ nāvaṁ,
vv7:1.2	Nāri āruyha tiṭṭhasi;
vv7:1.3	Ogāhasi pokkharaṇiṁ,
vv7:1.4	Padmaṁ chindasi pāṇinā.
vv7:2.1	Kena tetādiso vaṇṇo,
vv7:2.2	kena te idha mijjhati;
vv7:2.3	Uppajjanti ca te bhogā,
vv7:2.4	ye keci manaso piyā.
vv7:3.1	Pucchāmi taṁ devi mahānubhāve,
vv7:3.2	Manussabhūtā kimakāsi puññaṁ;
vv7:3.3	Kenāsi evaṁ jalitānubhāvā,
vv7:3.4	Vaṇṇo ca te sabbadisā pabhāsatī”ti.
vv7:4.1	Sā devatā attamanā,
vv7:4.2	moggallānena pucchitā;
vv7:4.3	Pañhaṁ puṭṭhā viyākāsi,
vv7:4.4	yassa kammassidaṁ phalaṁ.
vv7:5.1	“Ahaṁ manussesu manussabhūtā,
vv7:5.2	Purimāya jātiyā manussaloke;
vv7:5.3	Disvāna bhikkhuṁ tasitaṁ kilantaṁ,
vv7:5.4	Uṭṭhāya pātuṁ udakaṁ adāsiṁ.
vv7:6.1	Yo ve kilantassa pipāsitassa,
vv7:6.2	Uṭṭhāya pātuṁ udakaṁ dadāti;
vv7:6.3	Sītodakā tassa bhavanti najjo,
vv7:6.4	Pahūtamalyā bahupuṇḍarīkā.
vv7:7.1	Taṁ āpagā anupariyanti sabbadā,
vv7:7.2	Sītodakā vālukasanthatā nadī;
vv7:7.3	Ambā ca sālā tilakā ca jambuyo,
vv7:7.4	Uddālakā pāṭaliyo ca phullā.
vv7:8.1	Taṁ bhūmibhāgehi upetarūpaṁ,
vv7:8.2	Vimānaseṭṭhaṁ bhusa sobhamānaṁ;
vv7:8.3	Tassīdha kammassa ayaṁ vipāko,
vv7:8.4	Etādisaṁ puññakatā labhanti.
vv7:9.1	Tena metādiso vaṇṇo,
vv7:9.2	tena me idha mijjhati;
vv7:9.3	Uppajjanti ca me bhogā,
vv7:9.4	ye keci manaso piyā.
vv7:10.1	Akkhāmi te bhikkhu mahānubhāva,
vv7:10.2	Manussabhūtā yamakāsi puññaṁ;
vv7:10.3	Tenamhi evaṁ jalitānubhāvā,
vv7:10.4	Vaṇṇo ca me sabbadisā pabhāsatī”ti.
vv7:11.1	Dutiyanāvāvimānaṁ sattamaṁ.
vv8:0.1	Vimānavatthu
vv8:0.2	Itthivimāna
vv8:0.3	Pīṭhavagga
vv8:0.4	8. Tatiyanāvāvimānavatthu
vv8:1.1	“Suvaṇṇacchadanaṁ nāvaṁ,
vv8:1.2	Nāri āruyha tiṭṭhasi;
vv8:1.3	Ogāhasi pokkharaṇiṁ,
vv8:1.4	Padmaṁ chindasi pāṇinā.
vv8:2.1	Kūṭāgārā nivesā te,
vv8:2.2	vibhattā bhāgaso mitā;
vv8:2.3	Daddallamānā ābhanti,
vv8:2.4	samantā caturo disā.
vv8:3.1	Kena tetādiso vaṇṇo,
vv8:3.2	kena te idha mijjhati;
vv8:3.3	Uppajjanti ca te bhogā,
vv8:3.4	ye keci manaso piyā.
vv8:4.1	Pucchāmi taṁ devi mahānubhāve,
vv8:4.2	Manussabhūtā kimakāsi puññaṁ;
vv8:4.3	Kenāsi evaṁ jalitānubhāvā,
vv8:4.4	Vaṇṇo ca te sabbadisā pabhāsatī”ti.
vv8:5.1	Sā devatā attamanā,
vv8:5.2	sambuddheneva pucchitā;
vv8:5.3	Pañhaṁ puṭṭhā viyākāsi,
vv8:5.4	yassa kammassidaṁ phalaṁ.
vv8:6.1	“Ahaṁ manussesu manussabhūtā,
vv8:6.2	Purimāya jātiyā manussaloke;
vv8:6.3	Disvāna bhikkhū tasite kilante,
vv8:6.4	Uṭṭhāya pātuṁ udakaṁ adāsiṁ.
vv8:7.1	Yo ve kilantāna pipāsitānaṁ,
vv8:7.2	Uṭṭhāya pātuṁ udakaṁ dadāti;
vv8:7.3	Sītodakā tassa bhavanti najjo,
vv8:7.4	Pahūtamalyā bahupuṇḍarīkā.
vv8:8.1	Taṁ āpagā anupariyanti sabbadā,
vv8:8.2	Sītodakā vālukasanthatā nadī;
vv8:8.3	Ambā ca sālā tilakā ca jambuyo,
vv8:8.4	Uddālakā pāṭaliyo ca phullā.
vv8:9.1	Taṁ bhūmibhāgehi upetarūpaṁ,
vv8:9.2	Vimānaseṭṭhaṁ bhusa sobhamānaṁ;
vv8:9.3	Tassīdha kammassa ayaṁ vipāko,
vv8:9.4	Etādisaṁ puññakatā labhanti.
vv8:10.1	Kūṭāgārā nivesā me,
vv8:10.2	vibhattā bhāgaso mitā;
vv8:10.3	Daddallamānā ābhanti,
vv8:10.4	samantā caturo disā.
vv8:11.1	Tena metādiso vaṇṇo,
vv8:11.2	tena me idha mijjhati;
vv8:11.3	Uppajjanti ca me bhogā,
vv8:11.4	ye keci manaso piyā.
vv8:12.1	Akkhāmi te buddha mahānubhāva,
vv8:12.2	Manussabhūtā yamakāsi puññaṁ;
vv8:12.3	Tenamhi evaṁ jalitānubhāvā,
vv8:12.4	Vaṇṇo ca me sabbadisā pabhāsati;
vv8:12.5	Etassa kammassa phalaṁ mamedaṁ,
vv8:12.6	Atthāya buddho udakaṁ apāyī”ti.
vv8:13.1	Tatiyanāvāvimānaṁ aṭṭhamaṁ.
vv9:0.1	Vimānavatthu
vv9:0.2	Itthivimāna
vv9:0.3	Pīṭhavagga
vv9:0.4	9. Dīpavimānavatthu
vv9:1.1	“Abhikkantena vaṇṇena,
vv9:1.2	yā tvaṁ tiṭṭhasi devate;
vv9:1.3	Obhāsentī disā sabbā,
vv9:1.4	osadhī viya tārakā.
vv9:2.1	Kena tetādiso vaṇṇo,
vv9:2.2	kena te idha mijjhati;
vv9:2.3	Uppajjanti ca te bhogā,
vv9:2.4	ye keci manaso piyā.
vv9:3.1	Kena tvaṁ vimalobhāsā,
vv9:3.2	atirocasi devatā;
vv9:3.3	Kena te sabbagattehi,
vv9:3.4	sabbā obhāsate disā.
vv9:4.1	Pucchāmi taṁ devi mahānubhāve,
vv9:4.2	Manussabhūtā kimakāsi puññaṁ;
vv9:4.3	Kenāsi evaṁ jalitānubhāvā,
vv9:4.4	Vaṇṇo ca te sabbadisā pabhāsatī”ti.
vv9:5.1	Sā devatā attamanā,
vv9:5.2	moggallānena pucchitā;
vv9:5.3	Pañhaṁ puṭṭhā viyākāsi,
vv9:5.4	yassa kammassidaṁ phalaṁ.
vv9:6.1	“Ahaṁ manussesu manussabhūtā,
vv9:6.2	Purimāya jātiyā manussaloke;
vv9:6.3	Tamandhakāramhi timīsikāyaṁ,
vv9:6.4	Padīpakālamhi adāsi dīpaṁ.
vv9:7.1	Yo andhakāramhi timīsikāyaṁ,
vv9:7.2	Padīpakālamhi dadāti dīpaṁ;
vv9:7.3	Upapajjati jotirasaṁ vimānaṁ,
vv9:7.4	Pahūtamalyaṁ bahupuṇḍarīkaṁ.
vv9:8.1	Tena metādiso vaṇṇo,
vv9:8.2	tena me idha mijjhati;
vv9:8.3	Uppajjanti ca me bhogā,
vv9:8.4	ye keci manaso piyā.
vv9:9.1	Tenāhaṁ vimalobhāsā,
vv9:9.2	atirocāmi devatā;
vv9:9.3	Tena me sabbagattehi,
vv9:9.4	sabbā obhāsate disā.
vv9:10.1	Akkhāmi te bhikkhu mahānubhāva,
vv9:10.2	Manussabhūtā yamakāsi puññaṁ;
vv9:10.3	Tenamhi evaṁ jalitānubhāvā,
vv9:10.4	Vaṇṇo ca me sabbadisā pabhāsatī”ti.
vv9:11.1	Dīpavimānaṁ navamaṁ.
vv10:0.1	Vimānavatthu
vv10:0.2	Itthivimāna
vv10:0.3	Pīṭhavagga
vv10:0.4	10. Tiladakkhiṇavimānavatthu
vv10:1.1	“Abhikkantena vaṇṇena,
vv10:1.2	yā tvaṁ tiṭṭhasi devate;
vv10:1.3	Obhāsentī disā sabbā,
vv10:1.4	osadhī viya tārakā.
vv10:2.1	Kena tetādiso vaṇṇo,
vv10:2.2	kena te idha mijjhati;
vv10:2.3	Uppajjanti ca te bhogā,
vv10:2.4	ye keci manaso piyā.
vv10:3.1	Pucchāmi taṁ devi mahānubhāve,
vv10:3.2	Manussabhūtā kimakāsi puññaṁ;
vv10:3.3	Kenāsi evaṁ jalitānubhāvā,
vv10:3.4	Vaṇṇo ca te sabbadisā pabhāsatī”ti.
vv10:4.1	Sā devatā attamanā,
vv10:4.2	moggallānena pucchitā;
vv10:4.3	Pañhaṁ puṭṭhā viyākāsi,
vv10:4.4	yassa kammassidaṁ phalaṁ.
vv10:5.1	“Ahaṁ manussesu manussabhūtā,
vv10:5.2	Purimāya jātiyā manussaloke.
vv10:6.1	Addasaṁ virajaṁ buddhaṁ,
vv10:6.2	vippasannamanāvilaṁ;
vv10:6.3	Āsajja dānaṁ adāsiṁ,
vv10:6.4	akāmā tiladakkhiṇaṁ;
vv10:6.5	Dakkhiṇeyyassa buddhassa,
vv10:6.6	pasannā sehi pāṇibhi.
vv10:7.1	Tena metādiso vaṇṇo,
vv10:7.2	tena me idha mijjhati;
vv10:7.3	Uppajjanti ca me bhogā,
vv10:7.4	ye keci manaso piyā.
vv10:8.1	Akkhāmi te bhikkhu mahānubhāva,
vv10:8.2	Manussabhūtā yamakāsi puññaṁ;
vv10:8.3	Tenamhi evaṁ jalitānubhāvā,
vv10:8.4	Vaṇṇo ca me sabbadisā pabhāsatī”ti.
vv10:9.1	Tiladakkhiṇavimānaṁ dasamaṁ.
vv11:0.1	Vimānavatthu
vv11:0.2	Itthivimāna
vv11:0.3	Pīṭhavagga
vv11:0.4	11. Paṭhamapatibbatāvimānavatthu
vv11:1.1	“Koñcā mayūrā diviyā ca haṁsā,
vv11:1.2	Vaggussarā kokilā sampatanti;
vv11:1.3	Pupphābhikiṇṇaṁ rammamidaṁ vimānaṁ,
vv11:1.4	Anekacittaṁ naranārisevitaṁ.
vv11:2.1	Tatthacchasi devi mahānubhāve,
vv11:2.2	Iddhī vikubbanti anekarūpā;
vv11:2.3	Imā ca te accharāyo samantato,
vv11:2.4	Naccanti gāyanti pamodayanti ca.
vv11:3.1	Deviddhipattāsi mahānubhāve,
vv11:3.2	Manussabhūtā kimakāsi puññaṁ;
vv11:3.3	Kenāsi evaṁ jalitānubhāvā,
vv11:3.4	Vaṇṇo ca te sabbadisā pabhāsatī”ti.
vv11:4.1	Sā devatā attamanā,
vv11:4.2	moggallānena pucchitā;
vv11:4.3	Pañhaṁ puṭṭhā viyākāsi,
vv11:4.4	yassa kammassidaṁ phalaṁ.
vv11:5.1	“Ahaṁ manussesu manussabhūtā,
vv11:5.2	Patibbatānaññamanā ahosiṁ;
vv11:5.3	Mātāva puttaṁ anurakkhamānā,
vv11:5.4	Kuddhāpihaṁ nappharusaṁ avocaṁ.
vv11:6.1	Sacce ṭhitā mosavajjaṁ pahāya,
vv11:6.2	Dāne ratā saṅgahitattabhāvā;
vv11:6.3	Annañca pānañca pasannacittā,
vv11:6.4	Sakkacca dānaṁ vipulaṁ adāsiṁ.
vv11:7.1	Tena metādiso vaṇṇo,
vv11:7.2	tena me idha mijjhati;
vv11:7.3	Uppajjanti ca me bhogā,
vv11:7.4	ye keci manaso piyā.
vv11:8.1	Akkhāmi te bhikkhu mahānubhāva,
vv11:8.2	Manussabhūtā yamakāsi puññaṁ;
vv11:8.3	Tenamhi evaṁ jalitānubhāvā,
vv11:8.4	Vaṇṇo ca me sabbadisā pabhāsatī”ti.
vv11:9.1	Paṭhamapatibbatāvimānaṁ ekādasamaṁ.
vv12:0.1	Vimānavatthu
vv12:0.2	Itthivimāna
vv12:0.3	Pīṭhavagga
vv12:0.4	12. Dutiyapatibbatāvimānavatthu
vv12:1.1	“Veḷuriyathambhaṁ ruciraṁ pabhassaraṁ,
vv12:1.2	Vimānamāruyha anekacittaṁ;
vv12:1.3	Tatthacchasi devi mahānubhāve,
vv12:1.4	Uccāvacā iddhi vikubbamānā;
vv12:1.5	Imā ca te accharāyo samantato,
vv12:1.6	Naccanti gāyanti pamodayanti ca.
vv12:2.1	Deviddhipattāsi mahānubhāve,
vv12:2.2	Manussabhūtā kimakāsi puññaṁ;
vv12:2.3	Kenāsi evaṁ jalitānubhāvā,
vv12:2.4	Vaṇṇo ca te sabbadisā pabhāsatī”ti.
vv12:3.1	Sā devatā attamanā,
vv12:3.2	moggallānena pucchitā;
vv12:3.3	Pañhaṁ puṭṭhā viyākāsi,
vv12:3.4	yassa kammassidaṁ phalaṁ.
vv12:4.1	“Ahaṁ manussesu manussabhūtā,
vv12:4.2	Upāsikā cakkhumato ahosiṁ;
vv12:4.3	Pāṇātipātā viratā ahosiṁ,
vv12:4.4	Loke adinnaṁ parivajjayissaṁ.
vv12:5.1	Amajjapā no ca musā abhāṇiṁ,
vv12:5.2	Sakena sāminā ahosiṁ tuṭṭhā;
vv12:5.3	Annañca pānañca pasannacittā,
vv12:5.4	Sakkacca dānaṁ vipulaṁ adāsiṁ.
vv12:6.1	Tena metādiso vaṇṇo,
vv12:6.2	tena me idha mijjhati;
vv12:6.3	Uppajjanti ca me bhogā,
vv12:6.4	ye keci manaso piyā.
vv12:7.1	Akkhāmi te bhikkhu mahānubhāva,
vv12:7.2	Manussabhūtā yamakāsi puññaṁ;
vv12:7.3	Tenamhi evaṁ jalitānubhāvā,
vv12:7.4	Vaṇṇo ca me sabbadisā pabhāsatī”ti.
vv12:8.1	Dutiyapatibbatāvimānaṁ dvādasamaṁ.
vv13:0.1	Vimānavatthu
vv13:0.2	Itthivimāna
vv13:0.3	Pīṭhavagga
vv13:0.4	13. Paṭhamasuṇisāvimānavatthu
vv13:1.1	“Abhikkantena vaṇṇena,
vv13:1.2	yā tvaṁ tiṭṭhasi devate;
vv13:1.3	Obhāsentī disā sabbā,
vv13:1.4	osadhī viya tārakā.
vv13:2.1	Kena tetādiso vaṇṇo,
vv13:2.2	kena te idha mijjhati;
vv13:2.3	Uppajjanti ca te bhogā,
vv13:2.4	ye keci manaso piyā.
vv13:3.1	Pucchāmi taṁ devi mahānubhāve,
vv13:3.2	Manussabhūtā kimakāsi puññaṁ;
vv13:3.3	Kenāsi evaṁ jalitānubhāvā,
vv13:3.4	Vaṇṇo ca te sabbadisā pabhāsatī”ti.
vv13:4.1	Sā devatā attamanā,
vv13:4.2	moggallānena pucchitā;
vv13:4.3	Pañhaṁ puṭṭhā viyākāsi,
vv13:4.4	yassa kammassidaṁ phalaṁ.
vv13:5.1	“Ahaṁ manussesu manussabhūtā,
vv13:5.2	Suṇisā ahosiṁ sasurassa gehe.
vv13:6.1	Addasaṁ virajaṁ bhikkhuṁ,
vv13:6.2	vippasannamanāvilaṁ;
vv13:6.3	Tassa adāsahaṁ pūvaṁ,
vv13:6.4	pasannā sehi pāṇibhi;
vv13:6.5	Bhāgaḍḍhabhāgaṁ datvāna,
vv13:6.6	modāmi nandane vane.
vv13:7.1	Tena metādiso vaṇṇo,
vv13:7.2	tena me idha mijjhati;
vv13:7.3	Uppajjanti ca me bhogā,
vv13:7.4	ye keci manaso piyā.
vv13:8.1	Akkhāmi te bhikkhu mahānubhāva,
vv13:8.2	Manussabhūtā yamakāsi puññaṁ;
vv13:8.3	Tenamhi evaṁ jalitānubhāvā,
vv13:8.4	Vaṇṇo ca me sabbadisā pabhāsatī”ti.
vv13:9.1	Paṭhamasuṇisāvimānaṁ terasamaṁ.
vv14:0.1	Vimānavatthu
vv14:0.2	Itthivimāna
vv14:0.3	Pīṭhavagga
vv14:0.4	14. Dutiyasuṇisāvimānavatthu
vv14:1.1	“Abhikkantena vaṇṇena,
vv14:1.2	yā tvaṁ tiṭṭhasi devate;
vv14:1.3	Obhāsentī disā sabbā,
vv14:1.4	osadhī viya tārakā.
vv14:2.1	Kena tetādiso vaṇṇo,
vv14:2.2	kena te idha mijjhati;
vv14:2.3	Uppajjanti ca te bhogā,
vv14:2.4	ye keci manaso piyā.
vv14:3.1	Pucchāmi taṁ devi mahānubhāve,
vv14:3.2	Manussabhūtā kimakāsi puññaṁ;
vv14:3.3	Kenāsi evaṁ jalitānubhāvā,
vv14:3.4	Vaṇṇo ca te sabbadisā pabhāsatī”ti.
vv14:4.1	Sā devatā attamanā,
vv14:4.2	moggallānena pucchitā;
vv14:4.3	Pañhaṁ puṭṭhā viyākāsi,
vv14:4.4	yassa kammassidaṁ phalaṁ.
vv14:5.1	“Ahaṁ manussesu manussabhūtā,
vv14:5.2	Suṇisā ahosiṁ sasurassa gehe.
vv14:6.1	Addasaṁ virajaṁ bhikkhuṁ,
vv14:6.2	vippasannamanāvilaṁ;
vv14:6.3	Tassa adāsahaṁ bhāgaṁ,
vv14:6.4	pasannā sehi pāṇibhi;
vv14:6.5	Kummāsapiṇḍaṁ datvāna,
vv14:6.6	modāmi nandane vane.
vv14:7.1	Tena metādiso vaṇṇo,
vv14:7.2	tena me idha mijjhati;
vv14:7.3	Uppajjanti ca me bhogā,
vv14:7.4	ye keci manaso piyā.
vv14:8.1	Akkhāmi te bhikkhu mahānubhāva,
vv14:8.2	Manussabhūtā yamakāsi puññaṁ;
vv14:8.3	Tenamhi evaṁ jalitānubhāvā,
vv14:8.4	Vaṇṇo ca me sabbadisā pabhāsatī”ti.
vv14:9.1	Dutiyasuṇisāvimānaṁ cuddasamaṁ.
vv15:0.1	Vimānavatthu
vv15:0.2	Itthivimāna
vv15:0.3	Pīṭhavagga
vv15:0.4	15. Uttarāvimānavatthu
vv15:1.1	“Abhikkantena vaṇṇena,
vv15:1.2	yā tvaṁ tiṭṭhasi devate;
vv15:1.3	Obhāsentī disā sabbā,
vv15:1.4	osadhī viya tārakā.
vv15:2.1	Kena tetādiso vaṇṇo,
vv15:2.2	kena te idha mijjhati;
vv15:2.3	Uppajjanti ca te bhogā,
vv15:2.4	ye keci manaso piyā.
vv15:3.1	Pucchāmi taṁ devi mahānubhāve,
vv15:3.2	Manussabhūtā kimakāsi puññaṁ;
vv15:3.3	Kenāsi evaṁ jalitānubhāvā,
vv15:3.4	Vaṇṇo ca te sabbadisā pabhāsatī”ti.
vv15:4.1	Sā devatā attamanā,
vv15:4.2	moggallānena pucchitā;
vv15:4.3	Pañhaṁ puṭṭhā viyākāsi,
vv15:4.4	yassa kammassidaṁ phalaṁ.
vv15:5.1	“Issā ca maccheramatho paḷāso,
vv15:5.2	Nāhosi mayhaṁ gharamāvasantiyā;
vv15:5.3	Akkodhanā bhattu vasānuvattinī,
vv15:5.4	Uposathe niccahamappamattā.
vv15:6.1	Cātuddasiṁ pañcadasiṁ,
vv15:6.2	yā ca pakkhassa aṭṭhamī;
vv15:6.3	Pāṭihāriyapakkhañca,
vv15:6.4	aṭṭhaṅgasusamāgataṁ.
vv15:7.1	Uposathaṁ upavasissaṁ,
vv15:7.2	sadā sīlesu saṁvutā;
vv15:7.3	Saññamā saṁvibhāgā ca,
vv15:7.4	vimānaṁ āvasāmahaṁ.
vv15:8.1	Pāṇātipātā viratā,
vv15:8.2	musāvādā ca saññatā;
vv15:8.3	Theyyā ca aticārā ca,
vv15:8.4	majjapānā ca ārakā.
vv15:9.1	Pañcasikkhāpade ratā,
vv15:9.2	ariyasaccāna kovidā;
vv15:9.3	Upāsikā cakkhumato,
vv15:9.4	gotamassa yasassino.
vv15:10.1	Sāhaṁ sakena sīlena,
vv15:10.2	yasasā ca yasassinī;
vv15:10.3	Anubhomi sakaṁ puññaṁ,
vv15:10.4	sukhitā camhināmayā.
vv15:11.1	Tena metādiso vaṇṇo,
vv15:11.2	tena me idha mijjhati;
vv15:11.3	Uppajjanti ca me bhogā,
vv15:11.4	ye keci manaso piyā.
vv15:12.1	Akkhāmi te bhikkhu mahānubhāva,
vv15:12.2	Manussabhūtā yamahaṁ akāsiṁ;
vv15:12.3	Tenamhi evaṁ jalitānubhāvā,
vv15:12.4	Vaṇṇo ca me sabbadisā pabhāsatīti.
vv15:13.1	Mama ca, bhante, vacanena bhagavato pāde sirasā vandeyyāsi—
vv15:13.2	‘uttarā nāma, bhante, upāsikā bhagavato pāde sirasā vandatī’ti.
vv15:13.3	Anacchariyaṁ kho panetaṁ, bhante, yaṁ maṁ bhagavā aññatarasmiṁ sāmaññaphale byākareyya, taṁ bhagavā sakadāgāmiphale byākāsī”ti.
vv15:14.1	Uttarāvimānaṁ pannarasamaṁ.
vv16:0.1	Vimānavatthu
vv16:0.2	Itthivimāna
vv16:0.3	Pīṭhavagga
vv16:0.4	16. Sirimāvimānavatthu
vv16:1.1	“Yuttā ca te paramaalaṅkatā hayā,
vv16:1.2	Adhomukhā aghasigamā balī javā;
vv16:1.3	Abhinimmitā pañcarathāsatā ca te,
vv16:1.4	Anventi taṁ sārathicoditā hayā.
vv16:2.1	Sā tiṭṭhasi rathavare alaṅkatā,
vv16:2.2	Obhāsayaṁ jalamiva joti pāvako;
vv16:2.3	Pucchāmi taṁ varatanu anomadassane,
vv16:2.4	Kasmā nu kāyā anadhivaraṁ upāgami”.
vv16:3.1	“Kāmaggapattānaṁ yamāhunuttaraṁ,
vv16:3.2	Nimmāya nimmāya ramanti devatā;
vv16:3.3	Tasmā kāyā accharā kāmavaṇṇinī,
vv16:3.4	Idhāgatā anadhivaraṁ namassituṁ”.
vv16:4.1	“Kiṁ tvaṁ pure sucaritamācarīdha,
vv16:4.2	Kenacchasi tvaṁ amitayasā sukhedhitā;
vv16:4.3	Iddhī ca te anadhivarā vihaṅgamā,
vv16:4.4	Vaṇṇo ca te dasa disā virocati.
vv16:5.1	Devehi tvaṁ parivutā sakkatā casi,
vv16:5.2	Kuto cutā sugatigatāsi devate;
vv16:5.3	Kassa vā tvaṁ vacanakarānusāsaniṁ,
vv16:5.4	Ācikkha me tvaṁ yadi buddhasāvikā”ti.
vv16:6.1	“Nagantare nagaravare sumāpite,
vv16:6.2	Paricārikā rājavarassa sirimato;
vv16:6.3	Nacce gīte paramasusikkhitā ahuṁ,
vv16:6.4	Sirimāti maṁ rājagahe avediṁsu.
vv16:7.1	Buddho ca me isinisabho vināyako,
vv16:7.2	Adesayī samudayadukkhaniccataṁ;
vv16:7.3	Asaṅkhataṁ dukkhanirodhasassataṁ,
vv16:7.4	Maggañcimaṁ akuṭilamañjasaṁ sivaṁ.
vv16:8.1	Sutvānahaṁ amatapadaṁ asaṅkhataṁ,
vv16:8.2	Tathāgatassanadhivarassa sāsanaṁ;
vv16:8.3	Sīlesvahaṁ paramasusaṁvutā ahuṁ,
vv16:8.4	Dhamme ṭhitā naravarabuddhadesite.
vv16:9.1	Ñatvānahaṁ virajapadaṁ asaṅkhataṁ,
vv16:9.2	Tathāgatenanadhivarena desitaṁ;
vv16:9.3	Tatthevahaṁ samathasamādhimāphusiṁ,
vv16:9.4	Sāyeva me paramaniyāmatā ahu.
vv16:10.1	Laddhānahaṁ amatavaraṁ visesanaṁ,
vv16:10.2	Ekaṁsikā abhisamaye visesiya;
vv16:10.3	Asaṁsayā bahujanapūjitā ahaṁ,
vv16:10.4	Khiḍḍāratiṁ paccanubhomanappakaṁ.
vv16:11.1	Evaṁ ahaṁ amatadasamhi devatā,
vv16:11.2	Tathāgatassanadhivarassa sāvikā;
vv16:11.3	Dhammaddasā paṭhamaphale patiṭṭhitā,
vv16:11.4	Sotāpannā na ca pana matthi duggati.
vv16:12.1	Sā vandituṁ anadhivaraṁ upāgamiṁ,
vv16:12.2	Pāsādike kusalarate ca bhikkhavo;
vv16:12.3	Namassituṁ samaṇasamāgamaṁ sivaṁ,
vv16:12.4	Sagāravā sirimato dhammarājino.
vv16:13.1	Disvā muniṁ muditamanamhi pīṇitā,
vv16:13.2	Tathāgataṁ naravaradammasārathiṁ;
vv16:13.3	Taṇhacchidaṁ kusalarataṁ vināyakaṁ,
vv16:13.4	Vandāmahaṁ paramahitānukampakan”ti.
vv16:14.1	Sirimāvimānaṁ soḷasamaṁ.
vv17:0.1	Vimānavatthu
vv17:0.2	Itthivimāna
vv17:0.3	Pīṭhavagga
vv17:0.4	17. Kesakārīvimānavatthu
vv17:1.1	“Idaṁ vimānaṁ ruciraṁ pabhassaraṁ,
vv17:1.2	Veḷuriyathambhaṁ satataṁ sunimmitaṁ;
vv17:1.3	Suvaṇṇarukkhehi samantamotthataṁ,
vv17:1.4	Ṭhānaṁ mamaṁ kammavipākasambhavaṁ.
vv17:2.1	Tatrūpapannā purimaccharā imā,
vv17:2.2	Sataṁ sahassāni sakena kammunā;
vv17:2.3	Tuvaṁsi ajjhupagatā yasassinī,
vv17:2.4	Obhāsayaṁ tiṭṭhasi pubbadevatā.
vv17:3.1	Sasī adhiggayha yathā virocati,
vv17:3.2	Nakkhattarājāriva tārakāgaṇaṁ;
vv17:3.3	Tatheva tvaṁ accharāsaṅgaṇaṁ imaṁ,
vv17:3.4	Daddallamānā yasasā virocasi.
vv17:4.1	Kuto nu āgamma anomadassane,
vv17:4.2	Upapannā tvaṁ bhavanaṁ mamaṁ idaṁ;
vv17:4.3	Brahmaṁva devā tidasā sahindakā,
vv17:4.4	Sabbe na tappāmase dassanena tan”ti.
vv17:5.1	“Yametaṁ sakka anupucchase mamaṁ,
vv17:5.2	‘Kuto cutā tvaṁ idha āgatā’ti;
vv17:5.3	Bārāṇasī nāma puratthi kāsinaṁ,
vv17:5.4	Tattha ahosiṁ pure kesakārikā.
vv17:6.1	Buddhe ca dhamme ca pasannamānasā,
vv17:6.2	Saṅghe ca ekantagatā asaṁsayā;
vv17:6.3	Akhaṇḍasikkhāpadā āgatapphalā,
vv17:6.4	Sambodhidhamme niyatā anāmayā”ti.
vv17:7.1	“Tantyābhinandāmase svāgatañca te,
vv17:7.2	Dhammena ca tvaṁ yasasā virocasi;
vv17:7.3	Buddhe ca dhamme ca pasannamānase,
vv17:7.4	Saṅghe ca ekantagate asaṁsaye;
vv17:7.5	Akhaṇḍasikkhāpade āgatapphale,
vv17:7.6	Sambodhidhamme niyate anāmaye”ti.
vv17:8.1	Kesakārīvimānaṁ sattarasamaṁ.
vv17:9.1	Tassuddānaṁ
vv17:10.1	Pañca pīṭhā tayo nāvā,
vv17:10.2	dīpatiladakkhiṇā dve;
vv17:10.3	Pati dve suṇisā uttarā,
vv17:10.4	sirimā kesakārikā;
vv17:10.5	Vaggo tena pavuccatīti.
vv17:11.1	Itthivimāne paṭhamo vaggo.
vv18:0.1	Vimānavatthu
vv18:0.2	Itthivimāna
vv18:0.3	Cittalatāvagga
vv18:0.4	1. Dāsivimānavatthu
vv18:1.1	“Api sakkova devindo,
vv18:1.2	ramme cittalatāvane;
vv18:1.3	Samantā anupariyāsi,
vv18:1.4	nārīgaṇapurakkhatā;
vv18:1.5	Obhāsentī disā sabbā,
vv18:1.6	osadhī viya tārakā.
vv18:2.1	Kena tetādiso vaṇṇo,
vv18:2.2	kena te idha mijjhati;
vv18:2.3	Uppajjanti ca te bhogā,
vv18:2.4	ye keci manaso piyā.
vv18:3.1	Pucchāmi taṁ devi mahānubhāve,
vv18:3.2	Manussabhūtā kimakāsi puññaṁ;
vv18:3.3	Kenāsi evaṁ jalitānubhāvā,
vv18:3.4	Vaṇṇo ca te sabbadisā pabhāsatī”ti.
vv18:4.1	Sā devatā attamanā,
vv18:4.2	moggallānena pucchitā;
vv18:4.3	Pañhaṁ puṭṭhā viyākāsi,
vv18:4.4	yassa kammassidaṁ phalaṁ.
vv18:5.1	“Ahaṁ manussesu manussabhūtā,
vv18:5.2	Dāsī ahosiṁ parapessiyā kule.
vv18:6.1	Upāsikā cakkhumato,
vv18:6.2	gotamassa yasassino;
vv18:6.3	Tassā me nikkamo āsi,
vv18:6.4	sāsane tassa tādino.
vv18:7.1	Kāmaṁ bhijjatuyaṁ kāyo,
vv18:7.2	neva atthettha saṇṭhanaṁ;
vv18:7.3	Sikkhāpadānaṁ pañcannaṁ,
vv18:7.4	maggo sovatthiko sivo.
vv18:8.1	Akaṇṭako agahano,
vv18:8.2	uju sabbhi pavedito;
vv18:8.3	Nikkamassa phalaṁ passa,
vv18:8.4	yathidaṁ pāpuṇitthikā.
vv18:9.1	Āmantanikā raññomhi,
vv18:9.2	sakkassa vasavattino;
vv18:9.3	Saṭṭhi tūriyasahassāni,
vv18:9.4	paṭibodhaṁ karonti me.
vv18:10.1	Ālambo gaggaro bhīmo,
vv18:10.2	sādhuvādī ca saṁsayo;
vv18:10.3	Pokkharo ca suphasso ca,
vv18:10.4	viṇāmokkhā ca nāriyo.
vv18:11.1	Nandā ceva sunandā ca,
vv18:11.2	soṇadinnā sucimhitā;
vv18:11.3	Alambusā missakesī ca,
vv18:11.4	puṇḍarīkāti dāruṇī.
vv18:12.1	Eṇīphassā suphassā ca,
vv18:12.2	subhaddā muduvādinī;
vv18:12.3	Etā caññā ca seyyāse,
vv18:12.4	accharānaṁ pabodhikā.
vv18:13.1	Tā maṁ kālenupāgantvā,
vv18:13.2	abhibhāsanti devatā;
vv18:13.3	Handa naccāma gāyāma,
vv18:13.4	handa taṁ ramayāmase.
vv18:14.1	Nayidaṁ akatapuññānaṁ,
vv18:14.2	katapuññānamevidaṁ;
vv18:14.3	Asokaṁ nandanaṁ rammaṁ,
vv18:14.4	tidasānaṁ mahāvanaṁ.
vv18:15.1	Sukhaṁ akatapuññānaṁ,
vv18:15.2	idha natthi parattha ca;
vv18:15.3	Sukhañca katapuññānaṁ,
vv18:15.4	idha ceva parattha ca.
vv18:16.1	Tesaṁ sahabyakāmānaṁ,
vv18:16.2	kattabbaṁ kusalaṁ bahuṁ;
vv18:16.3	Katapuññā hi modanti,
vv18:16.4	sagge bhogasamaṅgino”ti.
vv18:17.1	Dāsivimānaṁ paṭhamaṁ.
vv19:0.1	Vimānavatthu
vv19:0.2	Itthivimāna
vv19:0.3	Cittalatāvagga
vv19:0.4	2. Lakhumāvimānavatthu
vv19:1.1	“Abhikkantena vaṇṇena,
vv19:1.2	yā tvaṁ tiṭṭhasi devate;
vv19:1.3	Obhāsentī disā sabbā,
vv19:1.4	osadhī viya tārakā.
vv19:2.1	Kena tetādiso vaṇṇo,
vv19:2.2	kena te idha mijjhati;
vv19:2.3	Uppajjanti ca te bhogā,
vv19:2.4	ye keci manaso piyā.
vv19:3.1	Pucchāmi taṁ devi mahānubhāve,
vv19:3.2	Manussabhūtā kimakāsi puññaṁ;
vv19:3.3	Kenāsi evaṁ jalitānubhāvā,
vv19:3.4	Vaṇṇo ca te sabbadisā pabhāsatī”ti.
vv19:4.1	Sā devatā attamanā,
vv19:4.2	moggallānena pucchitā;
vv19:4.3	Pañhaṁ puṭṭhā viyākāsi,
vv19:4.4	yassa kammassidaṁ phalaṁ.
vv19:5.1	“Kevaṭṭadvārā nikkhamma,
vv19:5.2	ahu mayhaṁ nivesanaṁ;
vv19:5.3	Tattha sañcaramānānaṁ,
vv19:5.4	sāvakānaṁ mahesinaṁ.
vv19:6.1	Odanaṁ kummāsaṁ ḍākaṁ,
vv19:6.2	loṇasovīrakañcahaṁ;
vv19:6.3	Adāsiṁ ujubhūtesu,
vv19:6.4	vippasannena cetasā.
vv19:7.1	Cātuddasiṁ pañcadasiṁ,
vv19:7.2	yā ca pakkhassa aṭṭhamī;
vv19:7.3	Pāṭihāriyapakkhañca,
vv19:7.4	aṭṭhaṅgasusamāgataṁ.
vv19:8.1	Uposathaṁ upavasissaṁ,
vv19:8.2	sadā sīlesu saṁvutā;
vv19:8.3	Saññamā saṁvibhāgā ca,
vv19:8.4	vimānaṁ āvasāmahaṁ.
vv19:9.1	Pāṇātipātā viratā,
vv19:9.2	musāvādā ca saññatā;
vv19:9.3	Theyyā ca aticārā ca,
vv19:9.4	majjapānā ca ārakā.
vv19:10.1	Pañcasikkhāpade ratā,
vv19:10.2	ariyasaccāna kovidā;
vv19:10.3	Upāsikā cakkhumato,
vv19:10.4	gotamassa yasassino.
vv19:11.1	Tena metādiso vaṇṇo,
vv19:11.2	…pe…
vv19:11.3	Vaṇṇo ca me sabbadisā pabhāsatīti.
vv19:12.1	Mama ca, bhante, vacanena bhagavato pāde sirasā vandeyyāsi—
vv19:12.2	‘lakhumā nāma, bhante, upāsikā bhagavato pāde sirasā vandatī’ti.
vv19:12.3	Anacchariyaṁ kho panetaṁ, bhante, yaṁ maṁ bhagavā aññatarasmiṁ sāmaññaphale byākareyya.
vv19:12.4	Taṁ bhagavā sakadāgāmiphale byākāsī”ti.
vv19:13.1	Lakhumāvimānaṁ dutiyaṁ.
vv20:0.1	Vimānavatthu
vv20:0.2	Itthivimāna
vv20:0.3	Cittalatāvagga
vv20:0.4	3. Ācāmadāyikāvimānavatthu
vv20:1.1	“Piṇḍāya te carantassa,
vv20:1.2	tuṇhībhūtassa tiṭṭhato;
vv20:1.3	Daliddā kapaṇā nārī,
vv20:1.4	parāgāraṁ apassitā.
vv20:2.1	Yā te adāsi ācāmaṁ,
vv20:2.2	pasannā sehi pāṇibhi;
vv20:2.3	Sā hitvā mānusaṁ dehaṁ,
vv20:2.4	kaṁ nu sā disataṁ gatā”ti.
vv20:3.1	“Piṇḍāya me carantassa,
vv20:3.2	tuṇhībhūtassa tiṭṭhato;
vv20:3.3	Daliddā kapaṇā nārī,
vv20:3.4	parāgāraṁ apassitā.
vv20:4.1	Yā me adāsi ācāmaṁ,
vv20:4.2	pasannā sehi pāṇibhi;
vv20:4.3	Sā hitvā mānusaṁ dehaṁ,
vv20:4.4	vippamuttā ito cutā.
vv20:5.1	Nimmānaratino nāma,
vv20:5.2	santi devā mahiddhikā;
vv20:5.3	Tattha sā sukhitā nārī,
vv20:5.4	modatācāmadāyikā”ti.
vv20:6.1	“Aho dānaṁ varākiyā,
vv20:6.2	kassape suppatiṭṭhitaṁ;
vv20:6.3	Parābhatena dānena,
vv20:6.4	ijjhittha vata dakkhiṇā.
vv20:7.1	Yā mahesittaṁ kāreyya,
vv20:7.2	cakkavattissa rājino;
vv20:7.3	Nārī sabbaṅgakalyāṇī,
vv20:7.4	bhattu cānomadassikā;
vv20:7.5	Etassācāmadānassa,
vv20:7.6	kalaṁ nāgghati soḷasiṁ.
vv20:8.1	Sataṁ nikkhā sataṁ assā,
vv20:8.2	sataṁ assatarīrathā;
vv20:8.3	Sataṁ kaññāsahassāni,
vv20:8.4	āmuttamaṇikuṇḍalā;
vv20:8.5	Etassācāmadānassa,
vv20:8.6	kalaṁ nāgghanti soḷasiṁ.
vv20:9.1	Sataṁ hemavatā nāgā,
vv20:9.2	īsādantā urūḷhavā;
vv20:9.3	Suvaṇṇakacchā mātaṅgā,
vv20:9.4	hemakappanavāsasā;
vv20:9.5	Etassācāmadānassa,
vv20:9.6	kalaṁ nāgghati soḷasiṁ.
vv20:10.1	Catunnamapi dīpānaṁ,
vv20:10.2	issaraṁ yodha kāraye;
vv20:10.3	Etassācāmadānassa,
vv20:10.4	kalaṁ nāgghati soḷasin”ti.
vv20:11.1	Ācāmadāyikāvimānaṁ tatiyaṁ.
vv21:0.1	Vimānavatthu
vv21:0.2	Itthivimāna
vv21:0.3	Cittalatāvagga
vv21:0.4	4. Caṇḍālivimānavatthu
vv21:1.1	“Caṇḍāli vanda pādāni,
vv21:1.2	gotamassa yasassino;
vv21:1.3	Tameva anukampāya,
vv21:1.4	aṭṭhāsi isisattamo.
vv21:2.1	Abhippasādehi manaṁ,
vv21:2.2	arahantamhi tādini;
vv21:2.3	Khippaṁ pañjalikā vanda,
vv21:2.4	parittaṁ tava jīvitan”ti.
vv21:3.1	Coditā bhāvitattena,
vv21:3.2	sarīrantimadhārinā;
vv21:3.3	Caṇḍālī vandi pādāni,
vv21:3.4	gotamassa yasassino.
vv21:4.1	Tamenaṁ avadhī gāvī,
vv21:4.2	caṇḍāliṁ pañjaliṁ ṭhitaṁ;
vv21:4.3	Namassamānaṁ sambuddhaṁ,
vv21:4.4	andhakāre pabhaṅkaranti.
vv21:5.1	“Khīṇāsavaṁ vigatarajaṁ anejaṁ,
vv21:5.2	Ekaṁ araññamhi raho nisinnaṁ;
vv21:5.3	Deviddhipattā upasaṅkamitvā,
vv21:5.4	Vandāmi taṁ vīra mahānubhāvan”ti.
vv21:6.1	“Suvaṇṇavaṇṇā jalitā mahāyasā,
vv21:6.2	Vimānamoruyha anekacittā;
vv21:6.3	Parivāritā accharāsaṅgaṇena,
vv21:6.4	Kā tvaṁ subhe devate vandase maman”ti.
vv21:7.1	“Ahaṁ bhaddante caṇḍālī,
vv21:7.2	tayā vīrena pesitā;
vv21:7.3	Vandiṁ arahato pāde,
vv21:7.4	gotamassa yasassino.
vv21:8.1	Sāhaṁ vanditvā pādāni,
vv21:8.2	cutā caṇḍālayoniyā;
vv21:8.3	Vimānaṁ sabbato bhaddaṁ,
vv21:8.4	upapannamhi nandane.
vv21:9.1	Accharānaṁ satasahassaṁ,
vv21:9.2	purakkhatvāna tiṭṭhati;
vv21:9.3	Tāsāhaṁ pavarā seṭṭhā,
vv21:9.4	vaṇṇena yasasāyunā.
vv21:10.1	Pahūtakatakalyāṇā,
vv21:10.2	Sampajānā paṭissatā;
vv21:10.3	Muniṁ kāruṇikaṁ loke,
vv21:10.4	Taṁ bhante vanditumāgatā”ti.
vv21:11.1	Idaṁ vatvāna caṇḍālī,
vv21:11.2	kataññū katavedinī;
vv21:11.3	Vanditvā arahato pāde,
vv21:11.4	tatthevantaradhāyathāti.
vv21:12.1	Caṇḍālivimānaṁ catutthaṁ.
vv22:0.1	Vimānavatthu
vv22:0.2	Itthivimāna
vv22:0.3	Cittalatāvagga
vv22:0.4	5. Bhadditthivimānavatthu
vv22:1.1	“Nīlā pītā ca kāḷā ca,
vv22:1.2	mañjiṭṭhā atha lohitā;
vv22:1.3	Uccāvacānaṁ vaṇṇānaṁ,
vv22:1.4	kiñjakkhaparivāritā.
vv22:2.1	Mandāravānaṁ pupphānaṁ,
vv22:2.2	mālaṁ dhāresi muddhani;
vv22:2.3	Nayime aññesu kāyesu,
vv22:2.4	rukkhā santi sumedhase.
vv22:3.1	Kena kāyaṁ upapannā,
vv22:3.2	tāvatiṁsaṁ yasassinī;
vv22:3.3	Devate pucchitācikkha,
vv22:3.4	kissa kammassidaṁ phalan”ti.
vv22:4.1	“Bhadditthikāti maṁ aññaṁsu,
vv22:4.2	Kimilāyaṁ upāsikā;
vv22:4.3	Saddhā sīlena sampannā,
vv22:4.4	Saṁvibhāgaratā sadā.
vv22:5.1	Acchādanañca bhattañca,
vv22:5.2	senāsanaṁ padīpiyaṁ;
vv22:5.3	Adāsiṁ ujubhūtesu,
vv22:5.4	vippasannena cetasā.
vv22:6.1	Cātuddasiṁ pañcadasiṁ,
vv22:6.2	yā ca pakkhassa aṭṭhamī;
vv22:6.3	Pāṭihāriyapakkhañca,
vv22:6.4	aṭṭhaṅgasusamāgataṁ.
vv22:7.1	Uposathaṁ upavasissaṁ,
vv22:7.2	sadā sīlesu saṁvutā;
vv22:7.3	Saññamā saṁvibhāgā ca,
vv22:7.4	vimānaṁ āvasāmahaṁ.
vv22:8.1	Pāṇātipātā viratā,
vv22:8.2	musāvādā ca saññatā;
vv22:8.3	Theyyā ca aticārā ca,
vv22:8.4	majjapānā ca ārakā.
vv22:9.1	Pañcasikkhāpade ratā,
vv22:9.2	Ariyasaccāna kovidā;
vv22:9.3	Upāsikā cakkhumato,
vv22:9.4	Appamādavihārinī;
vv22:9.5	Katāvāsā katakusalā tato cutā,
vv22:9.6	Sayaṁpabhā anuvicarāmi nandanaṁ.
vv22:10.1	Bhikkhū cāhaṁ paramahitānukampake,
vv22:10.2	Abhojayiṁ tapassiyugaṁ mahāmuniṁ;
vv22:10.3	Katāvāsā katakusalā tato cutā,
vv22:10.4	Sayaṁpabhā anuvicarāmi nandanaṁ.
vv22:11.1	Aṭṭhaṅgikaṁ aparimitaṁ sukhāvahaṁ,
vv22:11.2	Uposathaṁ satatamupāvasiṁ ahaṁ;
vv22:11.3	Katāvāsā katakusalā tato cutā,
vv22:11.4	Sayaṁpabhā anuvicarāmi nandanan”ti.
vv22:12.1	Bhadditthivimānaṁ pañcamaṁ.
vv23:0.1	Vimānavatthu
vv23:0.2	Itthivimāna
vv23:0.3	Cittalatāvagga
vv23:0.4	6. Soṇadinnāvimānavatthu
vv23:1.1	“Abhikkantena vaṇṇena,
vv23:1.2	yā tvaṁ tiṭṭhasi devate;
vv23:1.3	Obhāsentī disā sabbā,
vv23:1.4	osadhī viya tārakā.
vv23:2.1	Kena tetādiso vaṇṇo,
vv23:2.2	kena te idha mijjhati;
vv23:2.3	Uppajjanti ca te bhogā,
vv23:2.4	ye keci manaso piyā.
vv23:3.1	Pucchāmi taṁ devi mahānubhāve,
vv23:3.2	Manussabhūtā kimakāsi puññaṁ;
vv23:3.3	Kenāsi evaṁ jalitānubhāvā,
vv23:3.4	Vaṇṇo ca te sabbadisā pabhāsatī”ti.
vv23:4.1	Sā devatā attamanā,
vv23:4.2	moggallānena pucchitā;
vv23:4.3	Pañhaṁ puṭṭhā viyākāsi,
vv23:4.4	yassa kammassidaṁ phalaṁ.
vv23:5.1	“Soṇadinnāti maṁ aññaṁsu,
vv23:5.2	nāḷandāyaṁ upāsikā;
vv23:5.3	Saddhā sīlena sampannā,
vv23:5.4	saṁvibhāgaratā sadā.
vv23:6.1	Acchādanañca bhattañca,
vv23:6.2	senāsanaṁ padīpiyaṁ;
vv23:6.3	Adāsiṁ ujubhūtesu,
vv23:6.4	vippasannena cetasā.
vv23:7.1	Cātuddasiṁ pañcadasiṁ,
vv23:7.2	yā ca pakkhassa aṭṭhamī;
vv23:7.3	Pāṭihāriyapakkhañca,
vv23:7.4	aṭṭhaṅgasusamāgataṁ.
vv23:8.1	Uposathaṁ upavasissaṁ,
vv23:8.2	sadā sīlesu saṁvutā;
vv23:8.3	Saññamā saṁvibhāgā ca,
vv23:8.4	vimānaṁ āvasāmahaṁ.
vv23:9.1	Pāṇātipātā viratā,
vv23:9.2	musāvādā ca saññatā;
vv23:9.3	Theyyā ca aticārā ca,
vv23:9.4	majjapānā ca ārakā.
vv23:10.1	Pañcasikkhāpade ratā,
vv23:10.2	ariyasaccāna kovidā;
vv23:10.3	Upāsikā cakkhumato,
vv23:10.4	gotamassa yasassino.
vv23:11.1	Tena metādiso vaṇṇo,
vv23:11.2	…pe…
vv23:11.3	Vaṇṇo ca me sabbadisā pabhāsatī”ti.
vv23:12.1	Soṇadinnāvimānaṁ chaṭṭhaṁ.
vv24:0.1	Vimānavatthu
vv24:0.2	Itthivimāna
vv24:0.3	Cittalatāvagga
vv24:0.4	7. Uposathāvimānavatthu
vv24:1.1	“Abhikkantena vaṇṇena,
vv24:1.2	yā tvaṁ tiṭṭhasi devate;
vv24:1.3	Obhāsentī disā sabbā,
vv24:1.4	osadhī viya tārakā.
vv24:2.1	Kena tetādiso vaṇṇo,
vv24:2.2	…pe…
vv24:2.3	Vaṇṇo ca te sabbadisā pabhāsatī”ti.
vv24:3.1	Sā devatā attamanā,
vv24:3.2	…pe…
vv24:3.3	yassa kammassidaṁ phalaṁ.
vv24:4.1	“Uposathāti maṁ aññaṁsu,
vv24:4.2	sāketāyaṁ upāsikā;
vv24:4.3	Saddhā sīlena sampannā,
vv24:4.4	saṁvibhāgaratā sadā.
vv24:5.1	Acchādanañca bhattañca,
vv24:5.2	senāsanaṁ padīpiyaṁ;
vv24:5.3	Adāsiṁ ujubhūtesu,
vv24:5.4	vippasannena cetasā.
vv24:6.1	Cātuddasiṁ pañcadasiṁ,
vv24:6.2	yā ca pakkhassa aṭṭhamī;
vv24:6.3	Pāṭihāriyapakkhañca,
vv24:6.4	aṭṭhaṅgasusamāgataṁ.
vv24:7.1	Uposathaṁ upavasissaṁ,
vv24:7.2	sadā sīlesu saṁvutā;
vv24:7.3	Saññamā saṁvibhāgā ca,
vv24:7.4	vimānaṁ āvasāmahaṁ.
vv24:8.1	Pāṇātipātā viratā,
vv24:8.2	musāvādā ca saññatā;
vv24:8.3	Theyyā ca aticārā ca,
vv24:8.4	majjapānā ca ārakā.
vv24:9.1	Pañcasikkhāpade ratā,
vv24:9.2	ariyasaccāna kovidā;
vv24:9.3	Upāsikā cakkhumato,
vv24:9.4	gotamassa yasassino.
vv24:10.1	Tena metādiso vaṇṇo,
vv24:10.2	…pe…
vv24:10.3	Vaṇṇo ca me sabbadisā pabhāsatī”ti.
vv24:11.1	“Abhikkhaṇaṁ nandanaṁ sutvā,
vv24:11.2	Chando me udapajjatha;
vv24:11.3	Tattha cittaṁ paṇidhāya,
vv24:11.4	Upapannāmhi nandanaṁ.
vv24:12.1	Nākāsiṁ satthu vacanaṁ,
vv24:12.2	buddhassādiccabandhuno;
vv24:12.3	Hīne cittaṁ paṇidhāya,
vv24:12.4	sāmhi pacchānutāpinī”ti.
vv24:13.1	“Kīva ciraṁ vimānamhi,
vv24:13.2	idha vacchasuposathe;
vv24:13.3	Devate pucchitācikkha,
vv24:13.4	yadi jānāsi āyuno”ti.
vv24:14.1	“Saṭṭhi vassasahassāni,
vv24:14.2	tisso ca vassakoṭiyo;
vv24:14.3	Idha ṭhatvā mahāmuni,
vv24:14.4	ito cutā gamissāmi;
vv24:14.5	Manussānaṁ sahabyatan”ti.
vv24:15.1	“Mā tvaṁ uposathe bhāyi,
vv24:15.2	sambuddhenāsi byākatā;
vv24:15.3	Sotāpannā visesayi,
vv24:15.4	pahīnā tava duggatī”ti.
vv24:16.1	Uposathāvimānaṁ sattamaṁ.
vv25:0.1	Vimānavatthu
vv25:0.2	Itthivimāna
vv25:0.3	Cittalatāvagga
vv25:0.4	8. Niddāvimānavatthu
vv25:1.1	“Abhikkantena vaṇṇena,
vv25:1.2	yā tvaṁ tiṭṭhasi devate;
vv25:1.3	Obhāsentī disā sabbā,
vv25:1.4	osadhī viya tārakā.
vv25:2.1	Kena tetādiso vaṇṇo,
vv25:2.2	…pe…
vv25:2.3	Vaṇṇo ca te sabbadisā pabhāsatī”ti.
vv25:3.1	Sā devatā attamanā,
vv25:3.2	…pe…
vv25:3.3	yassa kammassidaṁ phalaṁ.
vv25:4.1	“Niddāti mamaṁ aññaṁsu,
vv25:4.2	Rājagahasmiṁ upāsikā;
vv25:4.3	Saddhā sīlena sampannā,
vv25:4.4	Saṁvibhāgaratā sadā.
vv25:5.1	Acchādanañca bhattañca,
vv25:5.2	senāsanaṁ padīpiyaṁ;
vv25:5.3	Adāsiṁ ujubhūtesu,
vv25:5.4	vippasannena cetasā.
vv25:6.1	Cātuddasiṁ pañcadasiṁ,
vv25:6.2	yā ca pakkhassa aṭṭhamī;
vv25:6.3	Pāṭihāriyapakkhañca,
vv25:6.4	aṭṭhaṅgasusamāgataṁ.
vv25:7.1	Uposathaṁ upavasissaṁ,
vv25:7.2	sadā sīlesu saṁvutā;
vv25:7.3	Saññamā saṁvibhāgā ca,
vv25:7.4	vimānaṁ āvasāmahaṁ.
vv25:8.1	Pāṇātipātā viratā,
vv25:8.2	musāvādā ca saññatā;
vv25:8.3	Theyyā ca aticārā ca,
vv25:8.4	majjapānā ca ārakā.
vv25:9.1	Pañcasikkhāpade ratā,
vv25:9.2	ariyasaccāna kovidā;
vv25:9.3	Upāsikā cakkhumato,
vv25:9.4	gotamassa yasassino.
vv25:10.1	Tena metādiso vaṇṇo,
vv25:10.2	…pe…
vv25:10.3	vaṇṇo ca me sabbadisā pabhāsatī”ti.
vv25:11.1	Niddāvimānaṁ aṭṭhamaṁ.
vv26:0.1	Vimānavatthu
vv26:0.2	Itthivimāna
vv26:0.3	Cittalatāvagga
vv26:0.4	9. Suniddāvimānavatthu
vv26:1.1	“Abhikkantena vaṇṇena,
vv26:1.2	…pe…
vv26:1.3	osadhī viya tārakā.
vv26:2.1	Kena tetādiso vaṇṇo,
vv26:2.2	…pe…
vv26:2.3	vaṇṇo ca te sabbadisā pabhāsatī”ti.
vv26:3.1	Sā devatā attamanā,
vv26:3.2	…pe…
vv26:3.3	yassa kammassidaṁ phalaṁ.
vv26:4.1	“Suniddāti maṁ aññaṁsu,
vv26:4.2	rājagahasmiṁ upāsikā;
vv26:4.3	Saddhā sīlena sampannā,
vv26:4.4	saṁvibhāgaratā sadā.
vv26:5.1	(…)
vv26:6.1	Pañcasikkhāpade ratā,
vv26:6.2	ariyasaccāna kovidā;
vv26:6.3	Upāsikā cakkhumato,
vv26:6.4	gotamassa yasassino.
vv26:7.1	Tena metādiso vaṇṇo,
vv26:7.2	…pe…
vv26:7.3	vaṇṇo ca me sabbadisā pabhāsatī”ti.
vv26:8.1	Suniddāvimānaṁ navamaṁ.
vv27:0.1	Vimānavatthu
vv27:0.2	Itthivimāna
vv27:0.3	Cittalatāvagga
vv27:0.4	10. Paṭhamabhikkhādāyikāvimānavatthu
vv27:1.1	“Abhikkantena vaṇṇena,
vv27:1.2	yā tvaṁ tiṭṭhasi devate;
vv27:1.3	Obhāsentī disā sabbā,
vv27:1.4	osadhī viya tārakā.
vv27:2.1	Kena tetādiso vaṇṇo,
vv27:2.2	…pe…
vv27:2.3	vaṇṇo ca te sabbadisā pabhāsatī”ti.
vv27:3.1	Sā devatā attamanā,
vv27:3.2	…pe…
vv27:3.3	yassa kammassidaṁ phalaṁ.
vv27:4.1	“Ahaṁ manussesu manussabhūtā,
vv27:4.2	Purimāya jātiyā manussaloke.
vv27:5.1	Addasaṁ virajaṁ buddhaṁ,
vv27:5.2	vippasannamanāvilaṁ;
vv27:5.3	Tassa adāsahaṁ bhikkhaṁ,
vv27:5.4	pasannā sehi pāṇibhi.
vv27:6.1	Tena metādiso vaṇṇo,
vv27:6.2	…pe…
vv27:6.3	Vaṇṇo ca me sabbadisā pabhāsatī”ti.
vv27:7.1	Paṭhamabhikkhādāyikāvimānaṁ dasamaṁ.
vv28:0.1	Vimānavatthu
vv28:0.2	Itthivimāna
vv28:0.3	Cittalatāvagga
vv28:0.4	11. Dutiyabhikkhādāyikāvimānavatthu
vv28:1.1	“Abhikkantena vaṇṇena,
vv28:1.2	yā tvaṁ tiṭṭhasi devate;
vv28:1.3	Obhāsentī disā sabbā,
vv28:1.4	osadhī viya tārakā.
vv28:2.1	Kena tetādiso vaṇṇo,
vv28:2.2	…pe…
vv28:2.3	vaṇṇo ca te sabbadisā pabhāsatī”ti.
vv28:3.1	Sā devatā attamanā,
vv28:3.2	…pe…
vv28:3.3	yassa kammassidaṁ phalaṁ.
vv28:4.1	“Ahaṁ manussesu manussabhūtā,
vv28:4.2	Purimāya jātiyā manussaloke.
vv28:5.1	Addasaṁ virajaṁ bhikkhuṁ,
vv28:5.2	vippasannamanāvilaṁ;
vv28:5.3	Tassa adāsahaṁ bhikkhaṁ,
vv28:5.4	pasannā sehi pāṇibhi.
vv28:6.1	Tena metādiso vaṇṇo,
vv28:6.2	…pe…
vv28:6.3	Vaṇṇo ca me sabbadisā pabhāsatī”ti.
vv28:7.1	Dutiyabhikkhādāyikāvimānaṁ ekādasamaṁ.
vv28:8.1	Tassuddānaṁ
vv28:9.1	Dāsī ceva lakhumā ca,
vv28:9.2	atha ācāmadāyikā;
vv28:9.3	Caṇḍālī bhadditthī ceva,
vv28:9.4	soṇadinnā uposathā;
vv28:9.5	Niddā ceva suniddā ca,
vv28:9.6	dve ca bhikkhāya dāyikā;
vv28:9.7	Vaggo tena pavuccatīti.
vv28:10.1	Itthivimāne dutiyo vaggo.
vv28:11.1	Bhāṇavāraṁ paṭhamaṁ.
vv29:0.1	Vimānavatthu
vv29:0.2	Itthivimāna
vv29:0.3	Pāricchattakavagga
vv29:0.4	1. Uḷāravimānavatthu
vv29:1.1	“Uḷāro te yaso vaṇṇo,
vv29:1.2	sabbā obhāsate disā;
vv29:1.3	Nāriyo naccanti gāyanti,
vv29:1.4	devaputtā alaṅkatā.
vv29:2.1	Modenti parivārenti,
vv29:2.2	tava pūjāya devate;
vv29:2.3	Sovaṇṇāni vimānāni,
vv29:2.4	tavimāni sudassane.
vv29:3.1	Tuvaṁsi issarā tesaṁ,
vv29:3.2	sabbakāmasamiddhinī;
vv29:3.3	Abhijātā mahantāsi,
vv29:3.4	devakāye pamodasi;
vv29:3.5	Devate pucchitācikkha,
vv29:3.6	kissa kammassidaṁ phalan”ti.
vv29:4.1	“Ahaṁ manussesu manussabhūtā,
vv29:4.2	Purimāya jātiyā manussaloke;
vv29:4.3	Dussīlakule suṇisā ahosiṁ,
vv29:4.4	Assaddhesu kadariyesu ahaṁ.
vv29:5.1	Saddhā sīlena sampannā,
vv29:5.2	saṁvibhāgaratā sadā;
vv29:5.3	Piṇḍāya caramānassa,
vv29:5.4	apūvaṁ te adāsahaṁ.
vv29:6.1	Tadāhaṁ sassuyācikkhiṁ,
vv29:6.2	samaṇo āgato idha;
vv29:6.3	Tassa adāsahaṁ pūvaṁ,
vv29:6.4	pasannā sehi pāṇibhi.
vv29:7.1	Itissā sassu paribhāsi,
vv29:7.2	avinītāsi tvaṁ vadhu;
vv29:7.3	Na maṁ sampucchituṁ icchi,
vv29:7.4	samaṇassa dadāmahaṁ.
vv29:8.1	Tato me sassu kupitā,
vv29:8.2	pahāsi musalena maṁ;
vv29:8.3	Kūṭaṅgacchi avadhi maṁ,
vv29:8.4	nāsakkhiṁ jīvituṁ ciraṁ.
vv29:9.1	Sā ahaṁ kāyassa bhedā,
vv29:9.2	vippamuttā tato cutā;
vv29:9.3	Devānaṁ tāvatiṁsānaṁ,
vv29:9.4	upapannā sahabyataṁ.
vv29:10.1	Tena metādiso vaṇṇo,
vv29:10.2	…pe…
vv29:10.3	Vaṇṇo ca me sabbadisā pabhāsatī”ti.
vv29:11.1	Uḷāravimānaṁ paṭhamaṁ.
vv30:0.1	Vimānavatthu
vv30:0.2	Itthivimāna
vv30:0.3	Pāricchattakavagga
vv30:0.4	2. Ucchudāyikāvimānavatthu
vv30:1.1	“Obhāsayitvā pathaviṁ sadevakaṁ,
vv30:1.2	Atirocasi candimasūriyā viya;
vv30:1.3	Siriyā ca vaṇṇena yasena tejasā,
vv30:1.4	Brahmāva deve tidase sahindake.
vv30:2.1	Pucchāmi taṁ uppalamāladhārinī,
vv30:2.2	Āveḷinī kañcanasannibhattace;
vv30:2.3	Alaṅkate uttamavatthadhārinī,
vv30:2.4	Kā tvaṁ subhe devate vandase mamaṁ.
vv30:3.1	Kiṁ tvaṁ pure kammamakāsi attanā,
vv30:3.2	Manussabhūtā purimāya jātiyā;
vv30:3.3	Dānaṁ suciṇṇaṁ atha sīlasaṁyamaṁ,
vv30:3.4	Kenūpapannā sugatiṁ yasassinī;
vv30:3.5	Devate pucchitācikkha,
vv30:3.6	Kissa kammassidaṁ phalan”ti.
vv30:4.1	“Idāni bhante imameva gāmaṁ,
vv30:4.2	Piṇḍāya amhākaṁ gharaṁ upāgami;
vv30:4.3	Tato te ucchussa adāsi khaṇḍikaṁ,
vv30:4.4	Pasannacittā atulāya pītiyā.
vv30:5.1	Sassu ca pacchā anuyuñjate mamaṁ,
vv30:5.2	Kahaṁ nu ucchuṁ vadhuke avākiri;
vv30:5.3	Na chaḍḍitaṁ no pana khāditaṁ mayā,
vv30:5.4	Santassa bhikkhussa sayaṁ adāsahaṁ.
vv30:6.1	Tuyhaṁ nvidaṁ issariyaṁ atho mama,
vv30:6.2	Itissā sassu paribhāsate mamaṁ;
vv30:6.3	Pīṭhaṁ gahetvā pahāraṁ adāsi me,
vv30:6.4	Tato cutā kālakatāmhi devatā.
vv30:7.1	Tadeva kammaṁ kusalaṁ kataṁ mayā,
vv30:7.2	Sukhañca kammaṁ anubhomi attanā;
vv30:7.3	Devehi saddhiṁ paricārayāmahaṁ,
vv30:7.4	Modāmahaṁ kāmaguṇehi pañcahi.
vv30:8.1	Tadeva kammaṁ kusalaṁ kataṁ mayā,
vv30:8.2	Sukhañca kammaṁ anubhomi attanā;
vv30:8.3	Devindaguttā tidasehi rakkhitā,
vv30:8.4	Samappitā kāmaguṇehi pañcahi.
vv30:9.1	Etādisaṁ puññaphalaṁ anappakaṁ,
vv30:9.2	Mahāvipākā mama ucchudakkhiṇā;
vv30:9.3	Devehi saddhiṁ paricārayāmahaṁ,
vv30:9.4	Modāmahaṁ kāmaguṇehi pañcahi.
vv30:10.1	Etādisaṁ puññaphalaṁ anappakaṁ,
vv30:10.2	Mahājutikā mama ucchudakkhiṇā;
vv30:10.3	Devindaguttā tidasehi rakkhitā,
vv30:10.4	Sahassanettoriva nandane vane.
vv30:11.1	Tuvañca bhante anukampakaṁ viduṁ,
vv30:11.2	Upecca vandiṁ kusalañca pucchisaṁ;
vv30:11.3	Tato te ucchussa adāsi khaṇḍikaṁ,
vv30:11.4	Pasannacittā atulāya pītiyā”ti.
vv30:12.1	Ucchudāyikāvimānaṁ dutiyaṁ.
vv31:0.1	Vimānavatthu
vv31:0.2	Itthivimāna
vv31:0.3	Pāricchattakavagga
vv31:0.4	3. Pallaṅkavimānavatthu
vv31:1.1	“Pallaṅkaseṭṭhe maṇisoṇṇacitte,
vv31:1.2	Pupphābhikiṇṇe sayane uḷāre;
vv31:1.3	Tatthacchasi devi mahānubhāve,
vv31:1.4	Uccāvacā iddhi vikubbamānā.
vv31:2.1	Imā ca te accharāyo samantato,
vv31:2.2	Naccanti gāyanti pamodayanti;
vv31:2.3	Deviddhipattāsi mahānubhāve,
vv31:2.4	Manussabhūtā kimakāsi puññaṁ;
vv31:2.5	Kenāsi evaṁ jalitānubhāvā,
vv31:2.6	Vaṇṇo ca te sabbadisā pabhāsatī”ti.
vv31:3.1	“Ahaṁ manussesu manussabhūtā,
vv31:3.2	Aḍḍhe kule suṇisā ahosiṁ;
vv31:3.3	Akkodhanā bhattuvasānuvattinī,
vv31:3.4	Uposathe appamattā ahosiṁ.
vv31:4.1	Manussabhūtā daharā apāpikā,
vv31:4.2	Pasannacittā patimābhirādhayiṁ;
vv31:4.3	Divā ca ratto ca manāpacārinī,
vv31:4.4	Ahaṁ pure sīlavatī ahosiṁ.
vv31:5.1	Pāṇātipātā viratā acorikā,
vv31:5.2	Saṁsuddhakāyā sucibrahmacārinī;
vv31:5.3	Amajjapā no ca musā abhāṇiṁ,
vv31:5.4	Sikkhāpadesu paripūrakārinī.
vv31:6.1	Cātuddasiṁ pañcadasiṁ,
vv31:6.2	yā ca pakkhassa aṭṭhamī;
vv31:6.3	Pāṭihāriyapakkhañca,
vv31:6.4	pasannamānasā ahaṁ.
vv31:7.1	Aṭṭhaṅgupetaṁ anudhammacārinī,
vv31:7.2	Uposathaṁ pītimanā upāvasiṁ;
vv31:7.3	Imañca ariyaṁ aṭṭhaṅgavarehupetaṁ,
vv31:7.4	Samādiyitvā kusalaṁ sukhudrayaṁ;
vv31:7.5	Patimhi kalyāṇī vasānuvattinī,
vv31:7.6	Ahosiṁ pubbe sugatassa sāvikā.
vv31:8.1	Etādisaṁ kusalaṁ jīvaloke,
vv31:8.2	Kammaṁ karitvāna visesabhāginī;
vv31:8.3	Kāyassa bhedā abhisamparāyaṁ,
vv31:8.4	Deviddhipattā sugatimhi āgatā.
vv31:9.1	Vimānapāsādavare manorame,
vv31:9.2	Parivāritā accharāsaṅgaṇena;
vv31:9.3	Sayaṁpabhā devagaṇā ramenti maṁ,
vv31:9.4	Dīghāyukiṁ devavimānamāgatan”ti.
vv31:10.1	Pallaṅkavimānaṁ tatiyaṁ.
vv32:0.1	Vimānavatthu
vv32:0.2	Itthivimāna
vv32:0.3	Pāricchattakavagga
vv32:0.4	4. Latāvimānavatthu
vv32:1.1	Latā ca sajjā pavarā ca devatā,
vv32:1.2	Accimatī rājavarassa sirīmato;
vv32:1.3	Sutā ca rañño vessavaṇassa dhītā,
vv32:1.4	Rājīmatī dhammaguṇehi sobhatha.
vv32:2.1	Pañcettha nāriyo āgamaṁsu nhāyituṁ,
vv32:2.2	Sītodakaṁ uppaliniṁ sivaṁ nadiṁ;
vv32:2.3	Tā tattha nhāyitvā rametvā devatā,
vv32:2.4	Naccitvā gāyitvā sutā lataṁ bravi.
vv32:3.1	“Pucchāmi taṁ uppalamāladhārini,
vv32:3.2	Āveḷini kañcanasannibhattace;
vv32:3.3	Timiratambakkhi nabheva sobhane,
vv32:3.4	Dīghāyukī kena kato yaso tava.
vv32:4.1	Kenāsi bhadde patino piyatarā,
vv32:4.2	Visiṭṭhakalyāṇitarassu rūpato;
vv32:4.3	Padakkhiṇā naccanagītavādite,
vv32:4.4	Ācikkha no tvaṁ naranāripucchitā”ti.
vv32:5.1	“Ahaṁ manussesu manussabhūtā,
vv32:5.2	Uḷārabhoge kule suṇisā ahosiṁ;
vv32:5.3	Akkodhanā bhattuvasānuvattinī,
vv32:5.4	Uposathe appamattā ahosiṁ.
vv32:6.1	Manussabhūtā daharā apāpikā,
vv32:6.2	Pasannacittā patimābhirādhayiṁ;
vv32:6.3	Sadevaraṁ sassasuraṁ sadāsakaṁ,
vv32:6.4	Abhirādhayiṁ tamhi kato yaso mama.
vv32:7.1	Sāhaṁ tena kusalena kammunā,
vv32:7.2	Catubbhi ṭhānehi visesamajjhagā;
vv32:7.3	Āyuñca vaṇṇañca sukhaṁ balañca,
vv32:7.4	Khiḍḍāratiṁ paccanubhomanappakaṁ”.
vv32:8.1	“Sutaṁ nu taṁ bhāsati yaṁ ayaṁ latā,
vv32:8.2	Yaṁ no apucchimha akittayī no;
vv32:8.3	Patino kiramhākaṁ visiṭṭha nārīnaṁ,
vv32:8.4	Gatī ca tāsaṁ pavarā ca devatā.
vv32:9.1	Patīsu dhammaṁ pacarāma sabbā,
vv32:9.2	Patibbatā yattha bhavanti itthiyo;
vv32:9.3	Patīsu dhammaṁ pacaritva sabbā,
vv32:9.4	Lacchāmase bhāsati yaṁ ayaṁ latā.
vv32:10.1	Sīho yathā pabbatasānugocaro,
vv32:10.2	Mahindharaṁ pabbatamāvasitvā;
vv32:10.3	Pasayha hantvā itare catuppade,
vv32:10.4	Khudde mige khādati maṁsabhojano.
vv32:11.1	Tatheva saddhā idha ariyasāvikā,
vv32:11.2	Bhattāraṁ nissāya patiṁ anubbatā;
vv32:11.3	Kodhaṁ vadhitvā abhibhuyya maccharaṁ,
vv32:11.4	Saggamhi sā modati dhammacārinī”ti.
vv32:12.1	Latāvimānaṁ catutthaṁ.
vv33:0.1	Vimānavatthu
vv33:0.2	Itthivimāna
vv33:0.3	Pāricchattakavagga
vv33:0.4	Guttilavimānavatthu
vv33:1.0.1	1. Vatthuttamadāyikāvimānavatthu
vv33:1.1	“Sattatantiṁ sumadhuraṁ,
vv33:1.2	Rāmaṇeyyaṁ avācayiṁ;
vv33:1.3	So maṁ raṅgamhi avheti,
vv33:1.4	‘Saraṇaṁ me hohi kosiyā’”ti.
vv33:2.1	“Ahaṁ te saraṇaṁ homi,
vv33:2.2	Ahamācariyapūjako;
vv33:2.3	Na taṁ jayissati sisso,
vv33:2.4	Sissamācariya jessasī”ti.
vv33:3.1	“Abhikkantena vaṇṇena,
vv33:3.2	yā tvaṁ tiṭṭhasi devate;
vv33:3.3	Obhāsentī disā sabbā,
vv33:3.4	osadhī viya tārakā.
vv33:4.1	Kena tetādiso vaṇṇo,
vv33:4.2	kena te idha mijjhati;
vv33:4.3	Uppajjanti ca te bhogā,
vv33:4.4	ye keci manaso piyā.
vv33:5.1	Pucchāmi taṁ devi mahānubhāve,
vv33:5.2	Manussabhūtā kimakāsi puññaṁ;
vv33:5.3	Kenāsi evaṁ jalitānubhāvā,
vv33:5.4	Vaṇṇo ca te sabbadisā pabhāsatī”ti.
vv33:6.1	Sā devatā attamanā,
vv33:6.2	moggallānena pucchitā;
vv33:6.3	Pañhaṁ puṭṭhā viyākāsi,
vv33:6.4	yassa kammassidaṁ phalaṁ.
vv33:7.1	“Vatthuttamadāyikā nārī,
vv33:7.2	Pavarā hoti naresu nārīsu;
vv33:7.3	Evaṁ piyarūpadāyikā manāpaṁ,
vv33:7.4	Dibbaṁ sā labhate upecca ṭhānaṁ.
vv33:8.1	Tassā me passa vimānaṁ,
vv33:8.2	Accharā kāmavaṇṇinīhamasmi;
vv33:8.3	Accharāsahassassāhaṁ,
vv33:8.4	Pavarā passa puññānaṁ vipākaṁ.
vv33:9.1	Tena metādiso vaṇṇo,
vv33:9.2	tena me idha mijjhati;
vv33:9.3	Uppajjanti ca me bhogā,
vv33:9.4	ye keci manaso piyā.
vv33:10.1	Akkhāmi te bhikkhu mahānubhāva,
vv33:10.2	Manussabhūtā yamakāsi puññaṁ;
vv33:10.3	Tenamhi evaṁ jalitānubhāvā,
vv33:10.4	Vaṇṇo ca me sabbadisā pabhāsatī”ti.
vv33:11.1	(Anantaraṁ caturavimānaṁ yathā vatthadāyikāvimānaṁ tathā vitthāretabbaṁ.)
vv33:12.0	2. Pupphuttamadāyikāvimānavatthu
vv33:12.1	“Abhikkantena vaṇṇena,
vv33:12.2	…pe…
vv33:12.3	osadhī viya tārakā.
vv33:13.1	Kena tetādiso vaṇṇo,
vv33:13.2	…pe…
vv33:13.3	ye keci manaso piyā.
vv33:14.1	Pucchāmi taṁ devi mahānubhāve,
vv33:14.2	…pe…
vv33:14.3	Vaṇṇo ca te sabbadisā pabhāsatī”ti.
vv33:15.1	Sā devatā attamanā,
vv33:15.2	…pe…
vv33:15.3	yassa kammassidaṁ phalaṁ.
vv33:16.1	“Pupphuttamadāyikā nārī,
vv33:16.2	Pavarā hoti naresu nārīsu;
vv33:16.3	Evaṁ piyarūpadāyikā manāpaṁ,
vv33:16.4	Dibbaṁ sā labhate upecca ṭhānaṁ.
vv33:17.1	Tassā me passa vimānaṁ,
vv33:17.2	Accharā kāmavaṇṇinīhamasmi;
vv33:17.3	Accharāsahassassāhaṁ,
vv33:17.4	Pavarā passa puññānaṁ vipākaṁ.
vv33:18.1	Tena metādiso vaṇṇo,
vv33:18.2	…pe…
vv33:18.3	Vaṇṇo ca me sabbadisā pabhāsatī”ti.
vv33:19.0	3. Gandhuttamadāyikāvimānavatthu
vv33:19.1	“Abhikkantena vaṇṇena,
vv33:19.2	…pe…
vv33:19.3	osadhī viya tārakā.
vv33:20.1	Kena tetādiso vaṇṇo,
vv33:20.2	…pe…
vv33:20.3	ye keci manaso piyā.
vv33:21.1	Pucchāmi taṁ devi mahānubhāve,
vv33:21.2	…pe…
vv33:21.3	Vaṇṇo ca te sabbadisā pabhāsatī”ti.
vv33:22.1	Sā devatā attamanā,
vv33:22.2	…pe…
vv33:22.3	yassa kammassidaṁ phalaṁ.
vv33:23.1	“Gandhuttamadāyikā nārī,
vv33:23.2	Pavarā hoti naresu nārīsu;
vv33:23.3	Evaṁ piyarūpadāyikā manāpaṁ,
vv33:23.4	Dibbaṁ sā labhate upecca ṭhānaṁ.
vv33:24.1	Tassā me passa vimānaṁ,
vv33:24.2	Accharā kāmavaṇṇinīhamasmi;
vv33:24.3	Accharāsahassassāhaṁ,
vv33:24.4	Pavarā passa puññānaṁ vipākaṁ.
vv33:25.1	Tena metādiso vaṇṇo,
vv33:25.2	…pe…
vv33:25.3	Vaṇṇo ca me sabbadisā pabhāsatī”ti.
vv33:26.0	4. Phaluttamadāyikāvimānavatthu
vv33:26.1	“Abhikkantena vaṇṇena,
vv33:26.2	…pe…
vv33:26.3	osadhī viya tārakā.
vv33:27.1	Kena tetādiso vaṇṇo,
vv33:27.2	…pe…
vv33:27.3	ye keci manaso piyā.
vv33:28.1	Pucchāmi taṁ devi mahānubhāve,
vv33:28.2	…pe…
vv33:28.3	Vaṇṇo ca te sabbadisā pabhāsatī”ti.
vv33:29.1	Sā devatā attamanā,
vv33:29.2	…pe…
vv33:29.3	yassa kammassidaṁ phalaṁ.
vv33:30.1	“Phaluttamadāyikā nārī,
vv33:30.2	Pavarā hoti naresu nārīsu;
vv33:30.3	Evaṁ piyarūpadāyikā manāpaṁ,
vv33:30.4	Dibbaṁ sā labhate upecca ṭhānaṁ.
vv33:31.1	Tassā me passa vimānaṁ,
vv33:31.2	Accharā kāmavaṇṇinīhamasmi;
vv33:31.3	Accharāsahassassāhaṁ,
vv33:31.4	Pavarā passa puññānaṁ vipākaṁ.
vv33:32.1	Tena metādiso vaṇṇo,
vv33:32.2	…pe…
vv33:32.3	Vaṇṇo ca me sabbadisā pabhāsatī”ti.
vv33:33.0	5. Rasuttamadāyikāvimānavatthu
vv33:33.1	“Abhikkantena vaṇṇena,
vv33:33.2	…pe…
vv33:33.3	osadhī viya tārakā.
vv33:34.1	Kena tetādiso vaṇṇo,
vv33:34.2	…pe…
vv33:34.3	ye keci manaso piyā.
vv33:35.1	Pucchāmi taṁ devi mahānubhāve,
vv33:35.2	…pe…
vv33:35.3	Vaṇṇo ca te sabbadisā pabhāsatī”ti.
vv33:36.1	Sā devatā attamanā,
vv33:36.2	…pe…
vv33:36.3	yassa kammassidaṁ phalaṁ.
vv33:37.1	“Rasuttamadāyikā nārī,
vv33:37.2	Pavarā hoti naresu nārīsu;
vv33:37.3	Evaṁ piyarūpadāyikā manāpaṁ,
vv33:37.4	Dibbaṁ sā labhate upecca ṭhānaṁ.
vv33:38.1	Tassā me passa vimānaṁ,
vv33:38.2	Accharā kāmavaṇṇinīhamasmi;
vv33:38.3	Accharāsahassassāhaṁ,
vv33:38.4	Pavarā passa puññānaṁ vipākaṁ.
vv33:39.1	Tena metādiso vaṇṇo,
vv33:39.2	…pe…
vv33:39.3	Vaṇṇo ca me sabbadisā pabhāsatī”ti.
vv33:40.0	6. Gandhapañcaṅgulikadāyikāvimānavatthu
vv33:40.1	“Abhikkantena vaṇṇena,
vv33:40.2	…pe…
vv33:40.3	osadhī viya tārakā.
vv33:41.1	Kena tetādiso vaṇṇo,
vv33:41.2	…pe…
vv33:41.3	Vaṇṇo ca te sabbadisā pabhāsatī”ti.
vv33:42.1	Sā devatā attamanā,
vv33:42.2	…pe…
vv33:42.3	yassa kammassidaṁ phalaṁ.
vv33:43.1	“Gandhapañcaṅgulikaṁ ahamadāsiṁ,
vv33:43.2	Kassapassa bhagavato thūpamhi;
vv33:43.3	Evaṁ piyarūpadāyikā manāpaṁ,
vv33:43.4	Dibbaṁ sā labhate upecca ṭhānaṁ.
vv33:44.1	Tassā me passa vimānaṁ,
vv33:44.2	Accharā kāmavaṇṇinīhamasmi;
vv33:44.3	Accharāsahassassāhaṁ,
vv33:44.4	Pavarā passa puññānaṁ vipākaṁ.
vv33:45.1	Tena metādiso vaṇṇo,
vv33:45.2	…pe…
vv33:45.3	Vaṇṇo ca me sabbadisā pabhāsatī”ti.
vv33:46.1	(Anantaraṁ caturavimānaṁ yathā gandhapañcaṅgulikadāyikāvimānaṁ tathā vitthāretabbaṁ.)
vv33:47.0	7. Ekūposathavimānavatthu
vv33:47.1	“Abhikkantena vaṇṇena,
vv33:47.2	…pe…
vv33:47.3	vaṇṇo ca te sabbadisā pabhāsatī”ti.
vv33:48.1	Sā devatā attamanā,
vv33:48.2	…pe…
vv33:48.3	yassa kammassidaṁ phalaṁ.
vv33:49.1	“Bhikkhū ca ahaṁ bhikkhuniyo ca,
vv33:49.2	Addasāsiṁ panthapaṭipanne;
vv33:49.3	Tesāhaṁ dhammaṁ sutvāna,
vv33:49.4	Ekūposathaṁ upavasissaṁ.
vv33:50.1	Tassā me passa vimānaṁ,
vv33:50.2	Accharā kāmavaṇṇinīhamasmi;
vv33:50.3	Accharāsahassassāhaṁ,
vv33:50.4	Pavarā passa puññānaṁ vipākaṁ.
vv33:51.1	Tena metādiso vaṇṇo,
vv33:51.2	…pe…
vv33:51.3	Vaṇṇo ca me sabbadisā pabhāsatī”ti.
vv33:52.0	8. Udakadāyikāvimānavatthu
vv33:52.1	“Abhikkantena vaṇṇena,
vv33:52.2	…pe…
vv33:52.3	vaṇṇo ca te sabbadisā pabhāsatī”ti.
vv33:53.1	Sā devatā attamanā,
vv33:53.2	…pe…
vv33:53.3	yassa kammassidaṁ phalaṁ.
vv33:54.1	“Udake ṭhitā udakamadāsiṁ,
vv33:54.2	Bhikkhuno cittena vippasannena;
vv33:54.3	Evaṁ piyarūpadāyikā manāpaṁ,
vv33:54.4	Dibbaṁ sā labhate upecca ṭhānaṁ.
vv33:55.1	Tassā me passa vimānaṁ,
vv33:55.2	Accharā kāmavaṇṇinīhamasmi;
vv33:55.3	Accharāsahassassāhaṁ,
vv33:55.4	Pavarā passa puññānaṁ vipākaṁ.
vv33:56.1	Tena metādiso vaṇṇo,
vv33:56.2	…pe…
vv33:56.3	Vaṇṇo ca me sabbadisā pabhāsatī”ti.
vv33:57.0	9. Upaṭṭhānavimānavatthu
vv33:57.1	“Abhikkantena vaṇṇena,
vv33:57.2	…pe…
vv33:57.3	Vaṇṇo ca te sabbadisā pabhāsatī”ti.
vv33:58.1	Sā devatā attamanā,
vv33:58.2	…pe…
vv33:58.3	yassa kammassidaṁ phalaṁ.
vv33:59.1	“Sassuñcāhaṁ sasurañca,
vv33:59.2	Caṇḍike kodhane ca pharuse ca;
vv33:59.3	Anusūyikā upaṭṭhāsiṁ,
vv33:59.4	Appamattā sakena sīlena.
vv33:60.1	Tassā me passa vimānaṁ,
vv33:60.2	Accharā kāmavaṇṇinīhamasmi;
vv33:60.3	Accharāsahassassāhaṁ,
vv33:60.4	Pavarā passa puññānaṁ vipākaṁ.
vv33:61.1	Tena metādiso vaṇṇo,
vv33:61.2	…pe…
vv33:61.3	vaṇṇo ca me sabbadisā pabhāsatī”ti.
vv33:62.0	10. Aparakammakārinīvimānavatthu
vv33:62.1	“Abhikkantena vaṇṇena,
vv33:62.2	…pe…
vv33:62.3	vaṇṇo ca te sabbadisā pabhāsatī”ti.
vv33:63.1	Sā devatā attamanā,
vv33:63.2	…pe…
vv33:63.3	yassa kammassidaṁ phalaṁ.
vv33:64.1	“Parakammakarī āsiṁ,
vv33:64.2	Atthenātanditā dāsī;
vv33:64.3	Akkodhanānatimāninī,
vv33:64.4	Saṁvibhāginī sakassa bhāgassa.
vv33:65.1	Tassā me passa vimānaṁ,
vv33:65.2	Accharā kāmavaṇṇinīhamasmi;
vv33:65.3	Accharāsahassassāhaṁ,
vv33:65.4	Pavarā passa puññānaṁ vipākaṁ.
vv33:66.1	Tena metādiso vaṇṇo,
vv33:66.2	…pe…
vv33:66.3	Vaṇṇo ca me sabbadisā pabhāsatī”ti.
vv33:67.0	11. Khīrodanadāyikāvimānavatthu
vv33:67.1	“Abhikkantena vaṇṇena,
vv33:67.2	…pe…
vv33:67.3	osadhī viya tārakā.
vv33:68.1	Kena tetādiso vaṇṇo,
vv33:68.2	…pe…
vv33:68.3	Vaṇṇo ca te sabbadisā pabhāsatī”ti.
vv33:69.1	Sā devatā attamanā,
vv33:69.2	…pe…
vv33:69.3	yassa kammassidaṁ phalaṁ.
vv33:70.1	“Khīrodanaṁ ahamadāsiṁ,
vv33:70.2	Bhikkhuno piṇḍāya carantassa;
vv33:70.3	Evaṁ karitvā kammaṁ,
vv33:70.4	Sugatiṁ upapajja modāmi.
vv33:71.1	Tassā me passa vimānaṁ,
vv33:71.2	Accharā kāmavaṇṇinīhamasmi;
vv33:71.3	Accharāsahassassāhaṁ,
vv33:71.4	Pavarā passa puññānaṁ vipākaṁ.
vv33:72.1	Tena metādiso vaṇṇo,
vv33:72.2	…pe…
vv33:72.3	Vaṇṇo ca me sabbadisā pabhāsatī”ti.
vv33:73.1	Anantaraṁ pañcavīsativimānaṁ yathā khīrodanadāyikāvimānaṁ tathā vitthāretabbaṁ.
vv33:74.0	12. Phāṇitadāyikāvimānavatthu
vv33:74.1	“Abhikkantena vaṇṇena,
vv33:74.2	…pe…
vv33:74.3	sabbadisā pabhāsatī”ti.
vv33:75.1	Sā devatā attamanā,
vv33:75.2	…pe…
vv33:75.3	yassa kammassidaṁ phalaṁ.
vv33:76.1	“Phāṇitaṁ ahamadāsiṁ,
vv33:76.2	Bhikkhuno piṇḍāya carantassa;
vv33:76.3	…pe…
vv33:77.0	13. Ucchukhaṇḍikadāyikāvatthu
vv33:77.1	“Ucchukhaṇḍikaṁ ahamadāsiṁ,
vv33:77.2	Bhikkhuno piṇḍāya carantassa;
vv33:77.3	…pe…
vv33:78.0	14. Timbarusakadāyikāvimānavatthu
vv33:78.1	“Timbarusakaṁ ahamadāsiṁ,
vv33:78.2	Bhikkhuno piṇḍāya carantassa;
vv33:78.3	…pe…
vv33:79.0	15. Kakkārikadāyikāvimānavatthu
vv33:79.1	“Kakkārikaṁ ahamadāsiṁ,
vv33:79.2	Bhikkhuno piṇḍāya carantassa;
vv33:79.3	…pe…
vv33:80.0	16. Eḷālukadāyikāvimānavatthu
vv33:80.1	“Eḷālukaṁ ahamadāsiṁ,
vv33:80.2	Bhikkhuno piṇḍāya carantassa;
vv33:80.3	…pe…
vv33:81.0	17. Valliphaladāyikāvimānavatthu
vv33:81.1	“Valliphalaṁ ahamadāsiṁ,
vv33:81.2	Bhikkhuno piṇḍāya carantassa;
vv33:81.3	…pe…
vv33:82.0	18. Phārusakadāyikāvimānavatthu
vv33:82.1	“Phārusakaṁ ahamadāsiṁ,
vv33:82.2	Bhikkhuno piṇḍāya carantassa;
vv33:82.3	…pe…
vv33:83.0	19. Hatthappatāpakadāyikāvimānavatthu
vv33:83.1	“Hatthappatāpakaṁ ahamadāsiṁ,
vv33:83.2	Bhikkhuno piṇḍāya carantassa;
vv33:83.3	…pe…
vv33:84.0	20. Sākamuṭṭhidāyikāvimānavatthu
vv33:84.1	“Sākamuṭṭhiṁ ahamadāsiṁ,
vv33:84.2	Bhikkhuno panthapaṭipannassa;
vv33:84.3	…pe…
vv33:85.0	21. Pupphakamuṭṭhidāyikāvimānavatthu
vv33:85.1	“Pupphakamuṭṭhiṁ ahamadāsiṁ,
vv33:85.2	Bhikkhuno piṇḍāya carantassa;
vv33:85.3	…pe…
vv33:86.0	22. Mūlakadāyikāvimānavatthu
vv33:86.1	“Mūlakaṁ ahamadāsiṁ,
vv33:86.2	Bhikkhuno piṇḍāya carantassa;
vv33:86.3	…pe…
vv33:87.0	23. Nimbamuṭṭhidāyikāvimānavatthu
vv33:87.1	“Nimbamuṭṭhiṁ ahamadāsiṁ,
vv33:87.2	Bhikkhuno piṇḍāya carantassa;
vv33:87.3	…pe…
vv33:88.0	24. Ambakañjikadāyikāvimānavatthu
vv33:88.1	“Ambakañjikaṁ ahamadāsiṁ,
vv33:88.2	Bhikkhuno piṇḍāya carantassa;
vv33:88.3	…pe…
vv33:89.0	25. Doṇinimmajjanidāyikāvimānavatthu
vv33:89.1	“Doṇinimmajjaniṁ ahamadāsiṁ,
vv33:89.2	Bhikkhuno piṇḍāya carantassa;
vv33:89.3	…pe…
vv33:90.0	26. Kāyabandhanadāyikāvimānavatthu
vv33:90.1	“Kāyabandhanaṁ ahamadāsiṁ,
vv33:90.2	Bhikkhuno piṇḍāya carantassa;
vv33:90.3	…pe…
vv33:91.0	27. Aṁsabaddhakadāyikāvimānavatthu
vv33:91.1	“Aṁsabaddhakaṁ ahamadāsiṁ,
vv33:91.2	Bhikkhuno piṇḍāya carantassa;
vv33:91.3	…pe…
vv33:92.0	28. Āyogapaṭṭadāyikāvimānavatthu
vv33:92.1	“Āyogapaṭṭaṁ ahamadāsiṁ,
vv33:92.2	Bhikkhuno piṇḍāya carantassa;
vv33:92.3	…pe…
vv33:93.0	29. Vidhūpanadāyikāvimānavatthu
vv33:93.1	“Vidhūpanaṁ ahamadāsiṁ,
vv33:93.2	Bhikkhuno piṇḍāya carantassa;
vv33:93.3	…pe…
vv33:94.0	30. Tālavaṇṭadāyikāvimānavatthu
vv33:94.1	“Tālavaṇṭaṁ ahamadāsiṁ,
vv33:94.2	Bhikkhuno piṇḍāya carantassa;
vv33:94.3	…pe…
vv33:95.0	31. Morahatthadāyikāvimānavatthu
vv33:95.1	“Morahatthaṁ ahamadāsiṁ,
vv33:95.2	Bhikkhuno piṇḍāya carantassa;
vv33:95.3	…pe…
vv33:96.0	32. Chattadāyikāvimānavatthu
vv33:96.1	“Chattaṁ ahamadāsiṁ,
vv33:96.2	Bhikkhuno piṇḍāya carantassa;
vv33:96.3	…pe…
vv33:97.0	33. Upāhanadāyikāvimānavatthu
vv33:97.1	“Upāhanaṁ ahamadāsiṁ,
vv33:97.2	Bhikkhuno piṇḍāya carantassa;
vv33:97.3	…pe…
vv33:98.0	34. Pūvadāyikāvimānavatthu
vv33:98.1	“Pūvaṁ ahamadāsiṁ,
vv33:98.2	Bhikkhuno piṇḍāya carantassa;
vv33:98.3	…pe…
vv33:99.0	35. Modakadāyikāvimānavatthu
vv33:99.1	“Modakaṁ ahamadāsiṁ,
vv33:99.2	Bhikkhuno piṇḍāya carantassa;
vv33:99.3	…pe…
vv33:100.0	36. Sakkhalikadāyikāvimānavatthu
vv33:100.1	“Sakkhalikaṁ ahamadāsiṁ,
vv33:100.2	Bhikkhuno piṇḍāya carantassa;
vv33:100.3	…pe…
vv33:101.1	Tassā me passa vimānaṁ,
vv33:101.2	Accharā kāmavaṇṇinīhamasmi;
vv33:101.3	Accharāsahassassāhaṁ,
vv33:101.4	Pavarā passa puññānaṁ vipākaṁ.
vv33:102.1	Tena metādiso vaṇṇo,
vv33:102.2	…pe…
vv33:102.3	Vaṇṇo ca me sabbadisā pabhāsatī”ti.
vv33:103.1	“Svāgataṁ vata me ajja,
vv33:103.2	suppabhātaṁ suhuṭṭhitaṁ;
vv33:103.3	Yaṁ addasāmi devatāyo,
vv33:103.4	accharā kāmavaṇṇiniyo.
vv33:104.1	Imāsāhaṁ dhammaṁ sutvā,
vv33:104.2	Kāhāmi kusalaṁ bahuṁ;
vv33:104.3	Dānena samacariyāya,
vv33:104.4	Saññamena damena ca;
vv33:104.5	Svāhaṁ tattha gamissāmi,
vv33:104.6	Yattha gantvā na socare”ti.
vv33:105.1	Guttilavimānaṁ pañcamaṁ.
vv34:0.1	Vimānavatthu
vv34:0.2	Itthivimāna
vv34:0.3	Pāricchattakavagga
vv34:0.4	6. Daddallavimānavatthu
vv34:1.1	“Daddallamānā vaṇṇena,
vv34:1.2	yasasā ca yasassinī;
vv34:1.3	Sabbe deve tāvatiṁse,
vv34:1.4	vaṇṇena atirocasi.
vv34:2.1	Dassanaṁ nābhijānāmi,
vv34:2.2	idaṁ paṭhamadassanaṁ;
vv34:2.3	Kasmā kāyā nu āgamma,
vv34:2.4	nāmena bhāsase maman”ti.
vv34:3.1	“Ahaṁ bhadde subhaddāsiṁ,
vv34:3.2	pubbe mānusake bhave;
vv34:3.3	Sahabhariyā ca te āsiṁ,
vv34:3.4	bhaginī ca kaniṭṭhikā.
vv34:4.1	Sā ahaṁ kāyassa bhedā,
vv34:4.2	vippamuttā tato cutā;
vv34:4.3	Nimmānaratīnaṁ devānaṁ,
vv34:4.4	upapannā sahabyatan”ti.
vv34:5.1	“Pahūtakatakalyāṇā,
vv34:5.2	te deve yanti pāṇino;
vv34:5.3	Yesaṁ tvaṁ kittayissasi,
vv34:5.4	subhadde jātimattano.
vv34:6.1	Atha tvaṁ kena vaṇṇena,
vv34:6.2	kena vā anusāsitā;
vv34:6.3	Kīdiseneva dānena,
vv34:6.4	subbatena yasassinī.
vv34:7.1	Yasaṁ etādisaṁ pattā,
vv34:7.2	visesaṁ vipulamajjhagā;
vv34:7.3	Devate pucchitācikkha,
vv34:7.4	kissa kammassidaṁ phalan”ti.
vv34:8.1	“Aṭṭheva piṇḍapātāni,
vv34:8.2	yaṁ dānaṁ adadaṁ pure;
vv34:8.3	Dakkhiṇeyyassa saṅghassa,
vv34:8.4	pasannā sehi pāṇibhi.
vv34:9.1	Tena metādiso vaṇṇo,
vv34:9.2	…pe…
vv34:9.3	vaṇṇo ca me sabbadisā pabhāsatī”ti.
vv34:10.1	“Ahaṁ tayā bahutare bhikkhū,
vv34:10.2	Saññate brahmacārayo;
vv34:10.3	Tappesiṁ annapānena,
vv34:10.4	Pasannā sehi pāṇibhi.
vv34:11.1	Tayā bahutaraṁ datvā,
vv34:11.2	hīnakāyūpagā ahaṁ;
vv34:11.3	Kathaṁ tvaṁ appataraṁ datvā,
vv34:11.4	visesaṁ vipulamajjhagā;
vv34:11.5	Devate pucchitācikkha,
vv34:11.6	kissa kammassidaṁ phalan”ti.
vv34:12.1	“Manobhāvanīyo bhikkhu,
vv34:12.2	sandiṭṭho me pure ahu;
vv34:12.3	Tāhaṁ bhattena nimantesiṁ,
vv34:12.4	revataṁ attanaṭṭhamaṁ.
vv34:13.1	So me atthapurekkhāro,
vv34:13.2	anukampāya revato;
vv34:13.3	Saṅghe dehīti maṁvoca,
vv34:13.4	tassāhaṁ vacanaṁ kariṁ.
vv34:14.1	Sā dakkhiṇā saṅghagatā,
vv34:14.2	appameyye patiṭṭhitā;
vv34:14.3	Puggalesu tayā dinnaṁ,
vv34:14.4	na taṁ tava mahapphalan”ti.
vv34:15.1	“Idānevāhaṁ jānāmi,
vv34:15.2	saṅghe dinnaṁ mahapphalaṁ;
vv34:15.3	Sāhaṁ gantvā manussattaṁ,
vv34:15.4	vadaññū vītamaccharā;
vv34:15.5	Saṅghe dānāni dassāmi,
vv34:15.6	appamattā punappunan”ti.
vv34:16.1	“Kā esā devatā bhadde,
vv34:16.2	tayā mantayate saha;
vv34:16.3	Sabbe deve tāvatiṁse,
vv34:16.4	vaṇṇena atirocatī”ti.
vv34:17.1	“Manussabhūtā devinda,
vv34:17.2	pubbe mānusake bhave;
vv34:17.3	Sahabhariyā ca me āsi,
vv34:17.4	bhaginī ca kaniṭṭhikā;
vv34:17.5	Saṅghe dānāni datvāna,
vv34:17.6	katapuññā virocatī”ti.
vv34:18.1	“Dhammena pubbe bhaginī,
vv34:18.2	tayā bhadde virocati;
vv34:18.3	Yaṁ saṅghamhi appameyye,
vv34:18.4	patiṭṭhāpesi dakkhiṇaṁ”.
vv34:19.1	“Pucchito hi mayā buddho,
vv34:19.2	gijjhakūṭamhi pabbate;
vv34:19.3	Vipākaṁ saṁvibhāgassa,
vv34:19.4	yattha dinnaṁ mahapphalaṁ.
vv34:20.1	Yajamānānaṁ manussānaṁ,
vv34:20.2	puññapekkhāna pāṇinaṁ;
vv34:20.3	Karotaṁ opadhikaṁ puññaṁ,
vv34:20.4	yattha dinnaṁ mahapphalaṁ.
vv34:21.1	Taṁ me buddho viyākāsi,
vv34:21.2	jānaṁ kammaphalaṁ sakaṁ;
vv34:21.3	Vipākaṁ saṁvibhāgassa,
vv34:21.4	yattha dinnaṁ mahapphalaṁ.
vv34:22.1	Cattāro ca paṭipannā,
vv34:22.2	cattāro ca phale ṭhitā;
vv34:22.3	Esa saṅgho ujubhūto,
vv34:22.4	paññāsīlasamāhito.
vv34:23.1	Yajamānānaṁ manussānaṁ,
vv34:23.2	puññapekkhāna pāṇinaṁ;
vv34:23.3	Karotaṁ opadhikaṁ puññaṁ,
vv34:23.4	saṅghe dinnaṁ mahapphalaṁ.
vv34:24.1	Eso hi saṅgho vipulo mahaggato,
vv34:24.2	Esappameyyo udadhīva sāgaro;
vv34:24.3	Ete hi seṭṭhā naravīrasāvakā,
vv34:24.4	Pabhaṅkarā dhammamudīrayanti.
vv34:25.1	Tesaṁ sudinnaṁ suhutaṁ suyiṭṭhaṁ,
vv34:25.2	Ye saṅghamuddissa dadanti dānaṁ;
vv34:25.3	Sā dakkhiṇā saṅghagatā patiṭṭhitā,
vv34:25.4	Mahapphalā lokavidūna vaṇṇitā.
vv34:26.1	Etādisaṁ yaññamanussarantā,
vv34:26.2	Ye vedajātā vicaranti loke;
vv34:26.3	Vineyya maccheramalaṁ samūlaṁ,
vv34:26.4	Aninditā saggamupenti ṭhānan”ti.
vv34:27.1	Daddallavimānaṁ chaṭṭhaṁ.
vv35:0.1	Vimānavatthu
vv35:0.2	Itthivimāna
vv35:0.3	Pāricchattakavagga
vv35:0.4	7. Pesavatīvimānavatthu
vv35:1.1	“Phalikarajatahemajālachannaṁ,
vv35:1.2	Vividhacitratalamaddasaṁ surammaṁ;
vv35:1.3	Byamhaṁ sunimmitaṁ toraṇūpapannaṁ,
vv35:1.4	Rucakupakiṇṇamidaṁ subhaṁ vimānaṁ.
vv35:2.1	Bhāti ca dasa disā nabheva suriyo,
vv35:2.2	Sarade tamonudo sahassaraṁsī;
vv35:2.3	Tathā tapati midaṁ tava vimānaṁ,
vv35:2.4	Jalamiva dhūmasikho nise nabhagge.
vv35:3.1	Musatīva nayanaṁ sateratāva,
vv35:3.2	Ākāse ṭhapitamidaṁ manuññaṁ;
vv35:3.3	Vīṇāmurajasammatāḷaghuṭṭhaṁ,
vv35:3.4	Iddhaṁ indapuraṁ yathā tavedaṁ.
vv35:4.1	Padumakumuduppalakuvalayaṁ,
vv35:4.2	Yodhika bandhukanojakā ca santi;
vv35:4.3	Sālakusumitapupphitā asokā,
vv35:4.4	Vividhadumaggasugandhasevitamidaṁ.
vv35:5.1	Saḷalalabujabhujaka saṁyuttā,
vv35:5.2	Kusakasuphullitalatāvalambinīhi;
vv35:5.3	Maṇijālasadisā yasassinī,
vv35:5.4	Rammā pokkharaṇī upaṭṭhitā te.
vv35:6.1	Udakaruhā ca yetthi pupphajātā,
vv35:6.2	Thalajā ye ca santi rukkhajātā;
vv35:6.3	Mānusakāmānussakā ca dibbā,
vv35:6.4	Sabbe tuyhaṁ nivesanamhi jātā.
vv35:7.1	Kissa saṁyamadamassayaṁ vipāko,
vv35:7.2	Kenāsi kammaphalenidhūpapannā;
vv35:7.3	Yathā ca te adhigatamidaṁ vimānaṁ,
vv35:7.4	Tadanupadaṁ avacāsiḷārapamhe”ti.
vv35:8.1	“Yathā ca me adhigatamidaṁ vimānaṁ,
vv35:8.2	Koñcamayūracakorasaṅghacaritaṁ;
vv35:8.3	Dibyapilavahaṁsarājaciṇṇaṁ,
vv35:8.4	Dijakāraṇḍavakokilābhinaditaṁ.
vv35:9.1	Nānāsantānakapuppharukkhavividhā,
vv35:9.2	Pāṭalijambuasokarukkhavantaṁ;
vv35:9.3	Yathā ca me adhigatamidaṁ vimānaṁ,
vv35:9.4	Taṁ te pavedayāmi suṇohi bhante.
vv35:10.1	Magadhavarapuratthimena,
vv35:10.2	Nāḷakagāmo nāma atthi bhante;
vv35:10.3	Tattha ahosiṁ pure suṇisā,
vv35:10.4	Pesavatīti tattha jāniṁsu mamaṁ.
vv35:11.1	Sāhamapacitatthadhammakusalaṁ,
vv35:11.2	Devamanussapūjitaṁ mahantaṁ;
vv35:11.3	Upatissaṁ nibbutamappameyyaṁ,
vv35:11.4	Muditamanā kusumehi abbhukiriṁ.
vv35:12.1	Paramagatigatañca pūjayitvā,
vv35:12.2	Antimadehadharaṁ isiṁ uḷāraṁ;
vv35:12.3	Pahāya mānusakaṁ samussayaṁ,
vv35:12.4	Tidasagatā idha māvasāmi ṭhānan”ti.
vv35:13.1	Pesavatīvimānaṁ sattamaṁ.
vv36:0.1	Vimānavatthu
vv36:0.2	Itthivimāna
vv36:0.3	Pāricchattakavagga
vv36:0.4	8. Mallikāvimānavatthu
vv36:1.1	“Pītavatthe pītadhaje,
vv36:1.2	pītālaṅkārabhūsite;
vv36:1.3	Pītantarāhi vaggūhi,
vv36:1.4	apiḷandhāva sobhasi.
vv36:2.1	Kā kambukāyūradhare,
vv36:2.2	kañcanāveḷabhūsite;
vv36:2.3	Hemajālakasañchanne,
vv36:2.4	nānāratanamālinī.
vv36:3.1	Sovaṇṇamayā lohitaṅgamayā ca,
vv36:3.2	Muttāmayā veḷuriyamayā ca;
vv36:3.3	Masāragallā sahalohitaṅgā,
vv36:3.4	Pārevatakkhīhi maṇīhi cittatā.
vv36:4.1	Koci koci ettha mayūrasussaro,
vv36:4.2	Haṁsassa rañño karavīkasussaro;
vv36:4.3	Tesaṁ saro suyyati vaggurūpo,
vv36:4.4	Pañcaṅgikaṁ tūriyamivappavāditaṁ.
vv36:5.1	Ratho ca te subho vaggu,
vv36:5.2	nānāratanacittito;
vv36:5.3	Nānāvaṇṇāhi dhātūhi,
vv36:5.4	suvibhattova sobhati.
vv36:6.1	Tasmiṁ rathe kañcanabimbavaṇṇe,
vv36:6.2	Yā tvaṁ ṭhitā bhāsasimaṁ padesaṁ;
vv36:6.3	Devate pucchitācikkha,
vv36:6.4	Kissa kammassidaṁ phalan”ti.
vv36:7.1	“Sovaṇṇajālaṁ maṇisoṇṇacittitaṁ,
vv36:7.2	Muttācitaṁ hemajālena channaṁ;
vv36:7.3	Parinibbute gotame appameyye,
vv36:7.4	Pasannacittā ahamābhiropayiṁ.
vv36:8.1	Tāhaṁ kammaṁ karitvāna,
vv36:8.2	kusalaṁ buddhavaṇṇitaṁ;
vv36:8.3	Apetasokā sukhitā,
vv36:8.4	sampamodāmanāmayā”ti.
vv36:9.1	Mallikāvimānaṁ aṭṭhamaṁ.
vv37:0.1	Vimānavatthu
vv37:0.2	Itthivimāna
vv37:0.3	Pāricchattakavagga
vv37:0.4	9. Visālakkhivimānavatthu
vv37:1.1	“Kā nāma tvaṁ visālakkhi,
vv37:1.2	ramme cittalatāvane;
vv37:1.3	Samantā anupariyāsi,
vv37:1.4	nārīgaṇapurakkhatā.
vv37:2.1	Yadā devā tāvatiṁsā,
vv37:2.2	pavisanti imaṁ vanaṁ;
vv37:2.3	Sayoggā sarathā sabbe,
vv37:2.4	citrā honti idhāgatā.
vv37:3.1	Tuyhañca idha pattāya,
vv37:3.2	uyyāne vicarantiyā;
vv37:3.3	Kāye na dissatī cittaṁ,
vv37:3.4	kena rūpaṁ tavedisaṁ;
vv37:3.5	Devate pucchitācikkha,
vv37:3.6	kissa kammassidaṁ phalan”ti.
vv37:4.1	“Yena kammena devinda,
vv37:4.2	rūpaṁ mayhaṁ gatī ca me;
vv37:4.3	Iddhi ca ānubhāvo ca,
vv37:4.4	taṁ suṇohi purindada.
vv37:5.1	Ahaṁ rājagahe ramme,
vv37:5.2	sunandā nāmupāsikā;
vv37:5.3	Saddhā sīlena sampannā,
vv37:5.4	saṁvibhāgaratā sadā.
vv37:6.1	Acchādanañca bhattañca,
vv37:6.2	senāsanaṁ padīpiyaṁ;
vv37:6.3	Adāsiṁ ujubhūtesu,
vv37:6.4	vippasannena cetasā.
vv37:7.1	Cātuddasiṁ pañcadasiṁ,
vv37:7.2	yā ca pakkhassa aṭṭhamī;
vv37:7.3	Pāṭihāriyapakkhañca,
vv37:7.4	aṭṭhaṅgasusamāgataṁ.
vv37:8.1	Uposathaṁ upavasissaṁ,
vv37:8.2	sadā sīlesu saṁvutā;
vv37:8.3	Saññamā saṁvibhāgā ca,
vv37:8.4	vimānaṁ āvasāmahaṁ.
vv37:9.1	Pāṇātipātā viratā,
vv37:9.2	musāvādā ca saññatā;
vv37:9.3	Theyyā ca aticārā ca,
vv37:9.4	majjapānā ca ārakā.
vv37:10.1	Pañcasikkhāpade ratā,
vv37:10.2	ariyasaccāna kovidā;
vv37:10.3	Upāsikā cakkhumato,
vv37:10.4	gotamassa yasassino.
vv37:11.1	Tassā me ñātikulā dāsī,
vv37:11.2	sadā mālābhihārati;
vv37:11.3	Tāhaṁ bhagavato thūpe,
vv37:11.4	sabbamevābhiropayiṁ.
vv37:12.1	Uposathe cahaṁ gantvā,
vv37:12.2	mālāgandhavilepanaṁ;
vv37:12.3	Thūpasmiṁ abhiropesiṁ,
vv37:12.4	pasannā sehi pāṇibhi.
vv37:13.1	Tena kammena devinda,
vv37:13.2	rūpaṁ mayhaṁ gatī ca me;
vv37:13.3	Iddhī ca ānubhāvo ca,
vv37:13.4	yaṁ mālaṁ abhiropayiṁ.
vv37:14.1	Yañca sīlavatī āsiṁ,
vv37:14.2	na taṁ tāva vipaccati;
vv37:14.3	Āsā ca pana me devinda,
vv37:14.4	sakadāgāminī siyan”ti.
vv37:15.1	Visālakkhivimānaṁ navamaṁ.
vv38:0.1	Vimānavatthu
vv38:0.2	Itthivimāna
vv38:0.3	Pāricchattakavagga
vv38:0.4	10. Pāricchattakavimānavatthu
vv38:1.1	“Pāricchattake koviḷāre,
vv38:1.2	ramaṇīye manorame;
vv38:1.3	Dibbamālaṁ ganthamānā,
vv38:1.4	gāyantī sampamodasi.
vv38:2.1	Tassā te naccamānāya,
vv38:2.2	aṅgamaṅgehi sabbaso;
vv38:2.3	Dibbā saddā niccharanti,
vv38:2.4	savanīyā manoramā.
vv38:3.1	Tassā te naccamānāya,
vv38:3.2	aṅgamaṅgehi sabbaso;
vv38:3.3	Dibbā gandhā pavāyanti,
vv38:3.4	sucigandhā manoramā.
vv38:4.1	Vivattamānā kāyena,
vv38:4.2	yā veṇīsu piḷandhanā;
vv38:4.3	Tesaṁ suyyati nigghoso,
vv38:4.4	tūriye pañcaṅgike yathā.
vv38:5.1	Vaṭaṁsakā vātadhutā,
vv38:5.2	vātena sampakampitā;
vv38:5.3	Tesaṁ suyyati nigghoso,
vv38:5.4	tūriye pañcaṅgike yathā.
vv38:6.1	Yāpi te sirasmiṁ mālā,
vv38:6.2	sucigandhā manoramā;
vv38:6.3	Vāti gandho disā sabbā,
vv38:6.4	rukkho mañjūsako yathā.
vv38:7.1	Ghāyase taṁ sucigandhaṁ,
vv38:7.2	rūpaṁ passasi amānusaṁ;
vv38:7.3	Devate pucchitācikkha,
vv38:7.4	kissa kammassidaṁ phalan”ti.
vv38:8.1	“Pabhassaraṁ accimantaṁ,
vv38:8.2	vaṇṇagandhena saṁyutaṁ;
vv38:8.3	Asokapupphamālāhaṁ,
vv38:8.4	buddhassa upanāmayiṁ.
vv38:9.1	Tāhaṁ kammaṁ karitvāna,
vv38:9.2	kusalaṁ buddhavaṇṇitaṁ;
vv38:9.3	Apetasokā sukhitā,
vv38:9.4	sampamodāmanāmayā”ti.
vv38:10.1	Pāricchattakavimānaṁ dasamaṁ.
vv38:11.1	Tassuddānaṁ
vv38:12.1	Uḷāro ucchu pallaṅko,
vv38:12.2	latā ca guttilena ca;
vv38:12.3	Daddallapesamallikā,
vv38:12.4	visālakkhi pāricchattako;
vv38:12.5	Vaggo tena pavuccatīti.
vv38:13.1	Pāricchattakavaggo tatiyo.
vv39:0.1	Vimānavatthu
vv39:0.2	Itthivimāna
vv39:0.3	Mañjiṭṭhakavagga
vv39:0.4	1. Mañjiṭṭhakavimānavatthu
vv39:1.1	“Mañjiṭṭhake vimānasmiṁ,
vv39:1.2	soṇṇavālukasanthate;
vv39:1.3	Pañcaṅgikena tūriyena,
vv39:1.4	ramasi suppavādite.
vv39:2.1	Tamhā vimānā oruyha,
vv39:2.2	nimmitā ratanāmayā;
vv39:2.3	Ogāhasi sālavanaṁ,
vv39:2.4	pupphitaṁ sabbakālikaṁ.
vv39:3.1	Yassa yasseva sālassa,
vv39:3.2	mūle tiṭṭhasi devate;
vv39:3.3	So so muñcati pupphāni,
vv39:3.4	onamitvā dumuttamo.
vv39:4.1	Vāteritaṁ sālavanaṁ,
vv39:4.2	ādhutaṁ dijasevitaṁ;
vv39:4.3	Vāti gandho disā sabbā,
vv39:4.4	rukkho mañjūsako yathā.
vv39:5.1	Ghāyase taṁ sucigandhaṁ,
vv39:5.2	rūpaṁ passasi amānusaṁ;
vv39:5.3	Devate pucchitācikkha,
vv39:5.4	kissa kammassidaṁ phalan”ti.
vv39:6.1	“Ahaṁ manussesu manussabhūtā,
vv39:6.2	Dāsī ayirakule ahuṁ;
vv39:6.3	Buddhaṁ nisinnaṁ disvāna,
vv39:6.4	Sālapupphehi okiriṁ.
vv39:7.1	Vaṭaṁsakañca sukataṁ,
vv39:7.2	sālapupphamayaṁ ahaṁ;
vv39:7.3	Buddhassa upanāmesiṁ,
vv39:7.4	pasannā sehi pāṇibhi.
vv39:8.1	Tāhaṁ kammaṁ karitvāna,
vv39:8.2	kusalaṁ buddhavaṇṇitaṁ;
vv39:8.3	Apetasokā sukhitā,
vv39:8.4	sampamodāmanāmayā”ti.
vv39:9.1	Mañjiṭṭhakavimānaṁ paṭhamaṁ.
vv40:0.1	Vimānavatthu
vv40:0.2	Itthivimāna
vv40:0.3	Mañjiṭṭhakavagga
vv40:0.4	2. Pabhassaravimānavatthu
vv40:1.1	“Pabhassaravaravaṇṇanibhe,
vv40:1.2	Surattavatthavasane;
vv40:1.3	Mahiddhike candanaruciragatte,
vv40:1.4	Kā tvaṁ subhe devate vandase mamaṁ.
vv40:2.1	Pallaṅko ca te mahaggho,
vv40:2.2	Nānāratanacittito ruciro;
vv40:2.3	Yattha tvaṁ nisinnā virocasi,
vv40:2.4	Devarājāriva nandane vane.
vv40:3.1	Kiṁ tvaṁ pure sucaritamācarī bhadde,
vv40:3.2	Kissa kammassa vipākaṁ;
vv40:3.3	Anubhosi devalokasmiṁ,
vv40:3.4	Devate pucchitācikkha;
vv40:3.5	Kissa kammassidaṁ phalan”ti.
vv40:4.1	“Piṇḍāya te carantassa,
vv40:4.2	Mālaṁ phāṇitañca adadaṁ bhante;
vv40:4.3	Tassa kammassidaṁ vipākaṁ,
vv40:4.4	Anubhomi devalokasmiṁ.
vv40:5.1	Hoti ca me anutāpo,
vv40:5.2	Aparaddhaṁ dukkhitañca me bhante;
vv40:5.3	Sāhaṁ dhammaṁ nāssosiṁ,
vv40:5.4	Sudesitaṁ dhammarājena.
vv40:6.1	Taṁ taṁ vadāmi bhaddante,
vv40:6.2	‘Yassa me anukampiyo koci;
vv40:6.3	Dhammesu taṁ samādapetha’,
vv40:6.4	Sudesitaṁ dhammarājena.
vv40:7.1	Yesaṁ atthi saddhā buddhe,
vv40:7.2	dhamme ca saṅgharatane;
vv40:7.3	Te maṁ ativirocanti,
vv40:7.4	āyunā yasasā siriyā.
vv40:8.1	Patāpena vaṇṇena uttaritarā,
vv40:8.2	Aññe mahiddhikatarā mayā devā”ti.
vv40:9.1	Pabhassaravimānaṁ dutiyaṁ.
vv41:0.1	Vimānavatthu
vv41:0.2	Itthivimāna
vv41:0.3	Mañjiṭṭhakavagga
vv41:0.4	3. Nāgavimānavatthu
vv41:1.1	“Alaṅkatā maṇikañcanācitaṁ,
vv41:1.2	Sovaṇṇajālacitaṁ mahantaṁ;
vv41:1.3	Abhiruyha gajavaraṁ sukappitaṁ,
vv41:1.4	Idhāgamā vehāyasaṁ antalikkhe.
vv41:2.1	Nāgassa dantesu duvesu nimmitā,
vv41:2.2	Acchodakā paduminiyo suphullā;
vv41:2.3	Padumesu ca tūriyagaṇā pabhijjare,
vv41:2.4	Imā ca naccanti manoharāyo.
vv41:3.1	Deviddhipattāsi mahānubhāve,
vv41:3.2	Manussabhūtā kimakāsi puññaṁ;
vv41:3.3	Kenāsi evaṁ jalitānubhāvā,
vv41:3.4	Vaṇṇo ca te sabbadisā pabhāsatī”ti.
vv41:4.1	“Bārāṇasiyaṁ upasaṅkamitvā,
vv41:4.2	Buddhassahaṁ vatthayugaṁ adāsiṁ;
vv41:4.3	Pādāni vanditvā chamā nisīdiṁ,
vv41:4.4	Vittā cahaṁ añjalikaṁ akāsiṁ.
vv41:5.1	Buddho ca me kañcanasannibhattaco,
vv41:5.2	Adesayi samudayadukkhaniccataṁ;
vv41:5.3	Asaṅkhataṁ dukkhanirodhasassataṁ,
vv41:5.4	Maggaṁ adesayi yato vijānisaṁ.
vv41:6.1	Appāyukī kālakatā tato cutā,
vv41:6.2	Upapannā tidasagaṇaṁ yasassinī;
vv41:6.3	Sakkassahaṁ aññatarā pajāpati,
vv41:6.4	Yasuttarā nāma disāsu vissutā”ti.
vv41:7.1	Nāgavimānaṁ tatiyaṁ.
vv42:0.1	Vimānavatthu
vv42:0.2	Itthivimāna
vv42:0.3	Mañjiṭṭhakavagga
vv42:0.4	4. Alomavimānavatthu
vv42:1.1	“Abhikkantena vaṇṇena,
vv42:1.2	yā tvaṁ tiṭṭhasi devate;
vv42:1.3	Obhāsentī disā sabbā,
vv42:1.4	osadhī viya tārakā.
vv42:2.1	Kena tetādiso vaṇṇo,
vv42:2.2	…pe…
vv42:2.3	Vaṇṇo ca te sabbadisā pabhāsatī”ti.
vv42:3.1	Sā devatā attamanā,
vv42:3.2	…pe…
vv42:3.3	yassa kammassidaṁ phalaṁ.
vv42:4.1	“Ahañca bārāṇasiyaṁ,
vv42:4.2	buddhassādiccabandhuno;
vv42:4.3	Adāsiṁ sukkhakummāsaṁ,
vv42:4.4	pasannā sehi pāṇibhi.
vv42:5.1	Sukkhāya aloṇikāya ca,
vv42:5.2	Passa phalaṁ kummāsapiṇḍiyā;
vv42:5.3	Alomaṁ sukhitaṁ disvā,
vv42:5.4	Ko puññaṁ na karissati.
vv42:6.1	Tena metādiso vaṇṇo,
vv42:6.2	…pe…
vv42:6.3	Vaṇṇo ca me sabbadisā pabhāsatī”ti.
vv42:7.1	Alomavimānaṁ catutthaṁ.
vv43:0.1	Vimānavatthu
vv43:0.2	Itthivimāna
vv43:0.3	Mañjiṭṭhakavagga
vv43:0.4	5. Kañjikadāyikāvimānavatthu
vv43:1.1	“Abhikkantena vaṇṇena,
vv43:1.2	…pe…
vv43:1.3	osadhī viya tārakā.
vv43:2.1	Kena tetādiso vaṇṇo,
vv43:2.2	…pe…
vv43:2.3	Vaṇṇo ca te sabbadisā pabhāsatī”ti.
vv43:3.1	Sā devatā attamanā,
vv43:3.2	…pe…
vv43:3.3	yassa kammassidaṁ phalaṁ.
vv43:4.1	“Ahaṁ andhakavindamhi,
vv43:4.2	buddhassādiccabandhuno;
vv43:4.3	Adāsiṁ kolasampākaṁ,
vv43:4.4	kañjikaṁ teladhūpitaṁ.
vv43:5.1	Pipphalyā lasuṇena ca,
vv43:5.2	missaṁ lāmañjakena ca;
vv43:5.3	Adāsiṁ ujubhūtasmiṁ,
vv43:5.4	vippasannena cetasā.
vv43:6.1	Yā mahesittaṁ kāreyya,
vv43:6.2	cakkavattissa rājino;
vv43:6.3	Nārī sabbaṅgakalyāṇī,
vv43:6.4	bhattu cānomadassikā;
vv43:6.5	Ekassa kañjikadānassa,
vv43:6.6	kalaṁ nāgghati soḷasiṁ.
vv43:7.1	Sataṁ nikkhā sataṁ assā,
vv43:7.2	sataṁ assatarīrathā;
vv43:7.3	Sataṁ kaññāsahassāni,
vv43:7.4	āmuttamaṇikuṇḍalā;
vv43:7.5	Ekassa kañjikadānassa,
vv43:7.6	kalaṁ nāgghanti soḷasiṁ.
vv43:8.1	Sataṁ hemavatā nāgā,
vv43:8.2	īsādantā urūḷhavā;
vv43:8.3	Suvaṇṇakacchā mātaṅgā,
vv43:8.4	hemakappanavāsasā;
vv43:8.5	Ekassa kañjikadānassa,
vv43:8.6	kalaṁ nāgghanti soḷasiṁ.
vv43:9.1	Catunnamapi dīpānaṁ,
vv43:9.2	issaraṁ yodha kāraye;
vv43:9.3	Ekassa kañjikadānassa,
vv43:9.4	kalaṁ nāgghati soḷasin”ti.
vv43:10.1	Kañjikadāyikāvimānaṁ pañcamaṁ.
vv44:0.1	Vimānavatthu
vv44:0.2	Itthivimāna
vv44:0.3	Mañjiṭṭhakavagga
vv44:0.4	6. Vihāravimānavatthu
vv44:1.1	“Abhikkantena vaṇṇena,
vv44:1.2	…pe…
vv44:1.3	osadhī viya tārakā.
vv44:2.1	Tassā te naccamānāya,
vv44:2.2	aṅgamaṅgehi sabbaso;
vv44:2.3	Dibbā saddā niccharanti,
vv44:2.4	savanīyā manoramā.
vv44:3.1	Tassā te naccamānāya,
vv44:3.2	aṅgamaṅgehi sabbaso;
vv44:3.3	Dibbā gandhā pavāyanti,
vv44:3.4	sucigandhā manoramā.
vv44:4.1	Vivattamānā kāyena,
vv44:4.2	yā veṇīsu piḷandhanā;
vv44:4.3	Tesaṁ suyyati nigghoso,
vv44:4.4	tūriye pañcaṅgike yathā.
vv44:5.1	Vaṭaṁsakā vātadhutā,
vv44:5.2	vātena sampakampitā;
vv44:5.3	Tesaṁ suyyati nigghoso,
vv44:5.4	tūriye pañcaṅgike yathā.
vv44:6.1	Yāpi te sirasmiṁ mālā,
vv44:6.2	sucigandhā manoramā;
vv44:6.3	Vāti gandho disā sabbā,
vv44:6.4	rukkho mañjūsako yathā.
vv44:7.1	Ghāyase taṁ sucigandhaṁ,
vv44:7.2	rūpaṁ passasi amānusaṁ;
vv44:7.3	Devate pucchitācikkha,
vv44:7.4	kissa kammassidaṁ phalan”ti.
vv44:8.1	“Sāvatthiyaṁ mayhaṁ sakhī bhadante,
vv44:8.2	Saṅghassa kāresi mahāvihāraṁ;
vv44:8.3	Tatthappasannā ahamānumodiṁ,
vv44:8.4	Disvā agārañca piyañca metaṁ.
vv44:9.1	Tāyeva me suddhanumodanāya,
vv44:9.2	Laddhaṁ vimānabbhutadassaneyyaṁ;
vv44:9.3	Samantato soḷasayojanāni,
vv44:9.4	Vehāyasaṁ gacchati iddhiyā mama.
vv44:10.1	Kūṭāgārā nivesā me,
vv44:10.2	vibhattā bhāgaso mitā;
vv44:10.3	Daddallamānā ābhanti,
vv44:10.4	samantā satayojanaṁ.
vv44:11.1	Pokkharañño ca me ettha,
vv44:11.2	puthulomanisevitā;
vv44:11.3	Acchodakā vippasannā,
vv44:11.4	soṇṇavālukasanthatā.
vv44:12.1	Nānāpadumasañchannā,
vv44:12.2	puṇḍarīkasamotatā;
vv44:12.3	Surabhī sampavāyanti,
vv44:12.4	manuññā māluteritā.
vv44:13.1	Jambuyo panasā tālā,
vv44:13.2	nāḷikeravanāni ca;
vv44:13.3	Antonivesane jātā,
vv44:13.4	nānārukkhā aropimā.
vv44:14.1	Nānātūriyasaṅghuṭṭhaṁ,
vv44:14.2	accharāgaṇaghositaṁ;
vv44:14.3	Yopi maṁ supine passe,
vv44:14.4	sopi vitto siyā naro.
vv44:15.1	Etādisaṁ abbhutadassaneyyaṁ,
vv44:15.2	Vimānaṁ sabbasopabhaṁ;
vv44:15.3	Mama kammehi nibbattaṁ,
vv44:15.4	Alaṁ puññāni kātave”ti.
vv44:16.1	“Tāyeva te suddhanumodanāya,
vv44:16.2	Laddhaṁ vimānabbhutadassaneyyaṁ;
vv44:16.3	Yā ceva sā dānamadāsi nārī,
vv44:16.4	Tassā gatiṁ brūhi kuhiṁ uppannā sā”ti.
vv44:17.1	“Yā sā ahu mayhaṁ sakhī bhadante,
vv44:17.2	Saṅghassa kāresi mahāvihāraṁ;
vv44:17.3	Viññātadhammā sā adāsi dānaṁ,
vv44:17.4	Uppannā nimmānaratīsu devesu.
vv44:18.1	Pajāpatī tassa sunimmitassa,
vv44:18.2	Acintiyā kammavipākā tassā;
vv44:18.3	Yametaṁ pucchasi kuhiṁ uppannā sāti,
vv44:18.4	Taṁ te viyākāsiṁ anaññathā ahaṁ.
vv44:19.1	Tenahaññepi samādapetha,
vv44:19.2	Saṅghassa dānāni dadātha vittā;
vv44:19.3	Dhammañca suṇātha pasannamānasā,
vv44:19.4	Sudullabho laddho manussalābho.
vv44:20.1	Yaṁ maggaṁ maggādhipatī adesayi,
vv44:20.2	Brahmassaro kañcanasannibhattaco;
vv44:20.3	Saṅghassa dānāni dadātha vittā,
vv44:20.4	Mahapphalā yattha bhavanti dakkhiṇā.
vv44:21.1	Ye puggalā aṭṭha sataṁ pasatthā,
vv44:21.2	Cattāri etāni yugāni honti;
vv44:21.3	Te dakkhiṇeyyā sugatassa sāvakā,
vv44:21.4	Etesu dinnāni mahapphalāni.
vv44:22.1	Cattāro ca paṭipannā,
vv44:22.2	cattāro ca phale ṭhitā;
vv44:22.3	Esa saṅgho ujubhūto,
vv44:22.4	paññāsīlasamāhito.
vv44:23.1	Yajamānānaṁ manussānaṁ,
vv44:23.2	puññapekkhāna pāṇinaṁ;
vv44:23.3	Karotaṁ opadhikaṁ puññaṁ,
vv44:23.4	saṅghe dinnaṁ mahapphalaṁ.
vv44:24.1	Eso hi saṅgho vipulo mahaggato,
vv44:24.2	Esappameyyo udadhīva sāgaro;
vv44:24.3	Etehi seṭṭhā naravīrasāvakā,
vv44:24.4	Pabhaṅkarā dhammamudīrayanti.
vv44:25.1	Tesaṁ sudinnaṁ suhutaṁ suyiṭṭhaṁ,
vv44:25.2	Ye saṅghamuddissa dadanti dānaṁ;
vv44:25.3	Sā dakkhiṇā saṅghagatā patiṭṭhitā,
vv44:25.4	Mahapphalā lokavidūna vaṇṇitā.
vv44:26.1	Etādisaṁ yaññamanussarantā,
vv44:26.2	Ye vedajātā vicaranti loke;
vv44:26.3	Vineyya maccheramalaṁ samūlaṁ,
vv44:26.4	Aninditā saggamupenti ṭhānan”ti.
vv44:27.1	Vihāravimānaṁ chaṭṭhaṁ.
vv44:27.2	Bhāṇavāraṁ dutiyaṁ.
vv45:0.1	Vimānavatthu
vv45:0.2	Itthivimāna
vv45:0.3	Mañjiṭṭhakavagga
vv45:0.4	7. Caturitthivimānavatthu
vv45:1.1	“Abhikkantena vaṇṇena,
vv45:1.2	…pe…
vv45:1.3	Vaṇṇo ca te sabbadisā pabhāsatī”ti.
vv45:2.1	Sā devatā attamanā,
vv45:2.2	…pe…
vv45:2.3	yassa kammassidaṁ phalaṁ.
vv45:3.1	“Indīvarānaṁ hatthakaṁ ahamadāsiṁ,
vv45:3.2	Bhikkhuno piṇḍāya carantassa;
vv45:3.3	Esikānaṁ uṇṇatasmiṁ,
vv45:3.4	Nagaravare paṇṇakate ramme.
vv45:4.1	Tena metādiso vaṇṇo,
vv45:4.2	…pe…
vv45:4.3	Vaṇṇo ca me sabbadisā pabhāsatī”ti.
vv45:5.1	“Abhikkantena vaṇṇena,
vv45:5.2	…pe…
vv45:5.3	Vaṇṇo ca te sabbadisā pabhāsatī”ti.
vv45:6.1	Sā devatā attamanā,
vv45:6.2	…pe…
vv45:6.3	yassa kammassidaṁ phalaṁ.
vv45:7.1	“Nīluppalahatthakaṁ ahamadāsiṁ,
vv45:7.2	Bhikkhuno piṇḍāya carantassa;
vv45:7.3	Esikānaṁ uṇṇatasmiṁ,
vv45:7.4	Nagaravare paṇṇakate ramme.
vv45:8.1	Tena metādiso vaṇṇo,
vv45:8.2	…pe…
vv45:8.3	Vaṇṇo ca me sabbadisā pabhāsatī”ti.
vv45:9.1	“Abhikkantena vaṇṇena,
vv45:9.2	…pe…
vv45:9.3	Vaṇṇo ca te sabbadisā pabhāsatī”ti.
vv45:10.1	Sā devatā attamanā,
vv45:10.2	…pe…
vv45:10.3	yassa kammassidaṁ phalaṁ.
vv45:11.1	“Odātamūlakaṁ haritapattaṁ,
vv45:11.2	Udakasmiṁ sare jātaṁ ahamadāsiṁ;
vv45:11.3	Bhikkhuno piṇḍāya carantassa,
vv45:11.4	Esikānaṁ uṇṇatasmiṁ;
vv45:11.5	Nagaravare paṇṇakate ramme.
vv45:12.1	Tena metādiso vaṇṇo,
vv45:12.2	…pe…
vv45:12.3	Vaṇṇo ca me sabbadisā pabhāsatī”ti.
vv45:13.1	“Abhikkantena vaṇṇena,
vv45:13.2	…pe…
vv45:13.3	Vaṇṇo ca te sabbadisā pabhāsatī”ti.
vv45:14.1	Sā devatā attamanā,
vv45:14.2	…pe…
vv45:14.3	yassa kammassidaṁ phalaṁ.
vv45:15.1	“Ahaṁ sumanā sumanassa sumanamakuḷāni,
vv45:15.2	Dantavaṇṇāni ahamadāsiṁ;
vv45:15.3	Bhikkhuno piṇḍāya carantassa,
vv45:15.4	Esikānaṁ uṇṇatasmiṁ;
vv45:15.5	Nagaravare paṇṇakate ramme.
vv45:16.1	Tena metādiso vaṇṇo,
vv45:16.2	…pe…
vv45:16.3	Vaṇṇo ca me sabbadisā pabhāsatī”ti.
vv45:17.1	Caturitthivimānaṁ sattamaṁ.
vv46:0.1	Vimānavatthu
vv46:0.2	Itthivimāna
vv46:0.3	Mañjiṭṭhakavagga
vv46:0.4	8. Ambavimānavatthu
vv46:1.1	“Dibbaṁ te ambavanaṁ rammaṁ,
vv46:1.2	Pāsādettha mahallako;
vv46:1.3	Nānātūriyasaṅghuṭṭho,
vv46:1.4	Accharāgaṇaghosito.
vv46:2.1	Padīpo cettha jalati,
vv46:2.2	niccaṁ sovaṇṇayo mahā;
vv46:2.3	Dussaphalehi rukkhehi,
vv46:2.4	samantā parivārito.
vv46:3.1	Kena tetādiso vaṇṇo,
vv46:3.2	…pe…
vv46:3.3	Vaṇṇo ca te sabbadisā pabhāsatī”ti.
vv46:4.1	Sā devatā attamanā,
vv46:4.2	…pe…
vv46:4.3	yassa kammassidaṁ phalaṁ.
vv46:5.1	“Ahaṁ manussesu manussabhūtā,
vv46:5.2	Purimāya jātiyā manussaloke;
vv46:5.3	Vihāraṁ saṅghassa kāresiṁ,
vv46:5.4	Ambehi parivāritaṁ.
vv46:6.1	Pariyosite vihāre,
vv46:6.2	kārente niṭṭhite mahe;
vv46:6.3	Ambehi chādayitvāna,
vv46:6.4	katvā dussamaye phale.
vv46:7.1	Padīpaṁ tattha jāletvā,
vv46:7.2	bhojayitvā gaṇuttamaṁ;
vv46:7.3	Niyyādesiṁ taṁ saṅghassa,
vv46:7.4	pasannā sehi pāṇibhi.
vv46:8.1	Tena me ambavanaṁ rammaṁ,
vv46:8.2	pāsādettha mahallako;
vv46:8.3	Nānātūriyasaṅghuṭṭho,
vv46:8.4	accharāgaṇaghosito.
vv46:9.1	Padīpo cettha jalati,
vv46:9.2	niccaṁ sovaṇṇayo mahā;
vv46:9.3	Dussaphalehi rukkhehi,
vv46:9.4	samantā parivārito.
vv46:10.1	Tena metādiso vaṇṇo,
vv46:10.2	…pe…
vv46:10.3	Vaṇṇo ca me sabbadisā pabhāsatī”ti.
vv46:11.1	Ambavimānaṁ aṭṭhamaṁ.
vv47:0.1	Vimānavatthu
vv47:0.2	Itthivimāna
vv47:0.3	Mañjiṭṭhakavagga
vv47:0.4	9. Pītavimānavatthu
vv47:1.1	“Pītavatthe pītadhaje,
vv47:1.2	pītālaṅkārabhūsite;
vv47:1.3	Pītacandanalittaṅge,
vv47:1.4	pītauppalamālinī.
vv47:2.1	Pītapāsādasayane,
vv47:2.2	pītāsane pītabhājane;
vv47:2.3	Pītachatte pītarathe,
vv47:2.4	pītasse pītabījane.
vv47:3.1	Kiṁ kammamakarī bhadde,
vv47:3.2	pubbe mānusake bhave;
vv47:3.3	Devate pucchitācikkha,
vv47:3.4	kissa kammassidaṁ phalan”ti.
vv47:4.1	“Kosātakī nāma latatthi bhante,
vv47:4.2	Tittikā anabhicchitā;
vv47:4.3	Tassā cattāri pupphāni,
vv47:4.4	Thūpaṁ abhihariṁ ahaṁ.
vv47:5.1	Satthu sarīramuddissa,
vv47:5.2	vippasannena cetasā;
vv47:5.3	Nāssa maggaṁ avekkhissaṁ,
vv47:5.4	na taggamanasā satī.
vv47:6.1	Tato maṁ avadhī gāvī,
vv47:6.2	thūpaṁ apattamānasaṁ;
vv47:6.3	Tañcāhaṁ abhisañceyyaṁ,
vv47:6.4	bhiyyo nūna ito siyā.
vv47:7.1	Tena kammena devinda,
vv47:7.2	maghavā devakuñjara;
vv47:7.3	Pahāya mānusaṁ dehaṁ,
vv47:7.4	tava sahabyamāgatā”ti.
vv47:8.1	Idaṁ sutvā tidasādhipati,
vv47:8.2	Maghavā devakuñjaro;
vv47:8.3	Tāvatiṁse pasādento,
vv47:8.4	Mātaliṁ etadabravi.
vv47:9.1	“Passa mātali accheraṁ,
vv47:9.2	cittaṁ kammaphalaṁ idaṁ;
vv47:9.3	Appakampi kataṁ deyyaṁ,
vv47:9.4	puññaṁ hoti mahapphalaṁ.
vv47:10.1	Natthi citte pasannamhi,
vv47:10.2	appakā nāma dakkhiṇā;
vv47:10.3	Tathāgate vā sambuddhe,
vv47:10.4	atha vā tassa sāvake.
vv47:11.1	Ehi mātali amhepi,
vv47:11.2	bhiyyo bhiyyo mahemase;
vv47:11.3	Tathāgatassa dhātuyo,
vv47:11.4	sukho puññāna muccayo.
vv47:12.1	Tiṭṭhante nibbute cāpi,
vv47:12.2	same citte samaṁ phalaṁ;
vv47:12.3	Cetopaṇidhihetu hi,
vv47:12.4	sattā gacchanti suggatiṁ.
vv47:13.1	Bahūnaṁ vata atthāya,
vv47:13.2	uppajjanti tathāgatā;
vv47:13.3	Yattha kāraṁ karitvāna,
vv47:13.4	saggaṁ gacchanti dāyakā”ti.
vv47:14.1	Pītavimānaṁ navamaṁ.
vv48:0.1	Vimānavatthu
vv48:0.2	Itthivimāna
vv48:0.3	Mañjiṭṭhakavagga
vv48:0.4	10. Ucchuvimānavatthu
vv48:1.1	“Obhāsayitvā pathaviṁ sadevakaṁ,
vv48:1.2	Atirocasi candimasūriyā viya;
vv48:1.3	Siriyā ca vaṇṇena yasena tejasā,
vv48:1.4	Brahmāva deve tidase sahindake.
vv48:2.1	Pucchāmi taṁ uppalamāladhārinī,
vv48:2.2	Āveḷinī kañcanasannibhattace;
vv48:2.3	Alaṅkate uttamavatthadhārinī,
vv48:2.4	Kā tvaṁ subhe devate vandase mamaṁ.
vv48:3.1	Kiṁ tvaṁ pure kammamakāsi attanā,
vv48:3.2	Manussabhūtā purimāya jātiyā;
vv48:3.3	Dānaṁ suciṇṇaṁ atha sīlasaññamaṁ,
vv48:3.4	Kenupapannā sugatiṁ yasassinī;
vv48:3.5	Devate pucchitācikkha,
vv48:3.6	Kissa kammassidaṁ phalan”ti.
vv48:4.1	“Idāni bhante imameva gāmaṁ,
vv48:4.2	Piṇḍāya amhāka gharaṁ upāgami;
vv48:4.3	Tato te ucchussa adāsi khaṇḍikaṁ,
vv48:4.4	Pasannacittā atulāya pītiyā.
vv48:5.1	Sassu ca pacchā anuyuñjate mamaṁ,
vv48:5.2	Kahaṁ nu ucchuṁ vadhuke avākiri;
vv48:5.3	Na chaḍḍitaṁ no pana khāditaṁ mayā,
vv48:5.4	Santassa bhikkhussa sayaṁ adāsahaṁ.
vv48:6.1	Tuyhaṁ nvidaṁ issariyaṁ atho mama,
vv48:6.2	Itissā sassu paribhāsate mamaṁ;
vv48:6.3	Leḍḍuṁ gahetvā pahāraṁ adāsi me,
vv48:6.4	Tato cutā kālakatāmhi devatā.
vv48:7.1	Tadeva kammaṁ kusalaṁ kataṁ mayā,
vv48:7.2	Sukhañca kammaṁ anubhomi attanā;
vv48:7.3	Devehi saddhiṁ paricārayāmahaṁ,
vv48:7.4	Modāmahaṁ kāmaguṇehi pañcahi.
vv48:8.1	Tadeva kammaṁ kusalaṁ kataṁ mayā,
vv48:8.2	Sukhañca kammaṁ anubhomi attanā;
vv48:8.3	Devindaguttā tidasehi rakkhitā,
vv48:8.4	Samappitā kāmaguṇehi pañcahi.
vv48:9.1	Etādisaṁ puññaphalaṁ anappakaṁ,
vv48:9.2	Mahāvipākā mama ucchudakkhiṇā;
vv48:9.3	Devehi saddhiṁ paricārayāmahaṁ,
vv48:9.4	Modāmahaṁ kāmaguṇehi pañcahi.
vv48:10.1	Etādisaṁ puññaphalaṁ anappakaṁ,
vv48:10.2	Mahājutikā mama ucchudakkhiṇā;
vv48:10.3	Devindaguttā tidasehi rakkhitā,
vv48:10.4	Sahassanettoriva nandane vane.
vv48:11.1	Tuvañca bhante anukampakaṁ viduṁ,
vv48:11.2	Upecca vandiṁ kusalañca pucchisaṁ;
vv48:11.3	Tato te ucchussa adāsiṁ khaṇḍikaṁ,
vv48:11.4	Pasannacittā atulāya pītiyā”ti.
vv48:12.1	Ucchuvimānaṁ dasamaṁ.
vv49:0.1	Vimānavatthu
vv49:0.2	Itthivimāna
vv49:0.3	Mañjiṭṭhakavagga
vv49:0.4	11. Vandanavimānavatthu
vv49:1.1	“Abhikkantena vaṇṇena,
vv49:1.2	yā tvaṁ tiṭṭhasi devate;
vv49:1.3	Obhāsentī disā sabbā,
vv49:1.4	osadhī viya tārakā.
vv49:2.1	Kena tetādiso vaṇṇo,
vv49:2.2	…pe…
vv49:2.3	Vaṇṇo ca te sabbadisā pabhāsatī”ti.
vv49:3.1	Sā devatā attamanā,
vv49:3.2	…pe…
vv49:3.3	yassa kammassidaṁ phalaṁ.
vv49:4.1	“Ahaṁ manussesu manussabhūtā,
vv49:4.2	Disvāna samaṇe sīlavante;
vv49:4.3	Pādāni vanditvā manaṁ pasādayiṁ,
vv49:4.4	Vittā cahaṁ añjalikaṁ akāsiṁ.
vv49:5.1	Tena metādiso vaṇṇo,
vv49:5.2	…pe…
vv49:5.3	Vaṇṇo ca me sabbadisā pabhāsatī”ti.
vv49:6.1	Vandanavimānaṁ ekādasamaṁ.
vv50:0.1	Vimānavatthu
vv50:0.2	Itthivimāna
vv50:0.3	Mañjiṭṭhakavagga
vv50:0.4	12. Rajjumālāvimānavatthu
vv50:1.1	“Abhikkantena vaṇṇena,
vv50:1.2	yā tvaṁ tiṭṭhasi devate;
vv50:1.3	Hatthapāde ca viggayha,
vv50:1.4	naccasi suppavādite.
vv50:2.1	Tassā te naccamānāya,
vv50:2.2	aṅgamaṅgehi sabbaso;
vv50:2.3	Dibbā saddā niccharanti,
vv50:2.4	savanīyā manoramā.
vv50:3.1	Tassā te naccamānāya,
vv50:3.2	aṅgamaṅgehi sabbaso;
vv50:3.3	Dibbā gandhā pavāyanti,
vv50:3.4	sucigandhā manoramā.
vv50:4.1	Vivattamānā kāyena,
vv50:4.2	yā veṇīsu piḷandhanā;
vv50:4.3	Tesaṁ suyyati nigghoso,
vv50:4.4	tūriye pañcaṅgike yathā.
vv50:5.1	Vaṭaṁsakā vātadhutā,
vv50:5.2	vātena sampakampitā;
vv50:5.3	Tesaṁ suyyati nigghoso,
vv50:5.4	tūriye pañcaṅgike yathā.
vv50:6.1	Yāpi te sirasmiṁ mālā,
vv50:6.2	sucigandhā manoramā;
vv50:6.3	Vāti gandho disā sabbā,
vv50:6.4	rukkho mañjūsako yathā.
vv50:7.1	Ghāyase taṁ sucigandhaṁ,
vv50:7.2	rūpaṁ passasi amānusaṁ;
vv50:7.3	Devate pucchitācikkha,
vv50:7.4	kissa kammassidaṁ phalan”ti.
vv50:8.1	“Dāsī ahaṁ pure āsiṁ,
vv50:8.2	gayāyaṁ brāhmaṇassahaṁ;
vv50:8.3	Appapuññā alakkhikā,
vv50:8.4	rajjumālāti maṁ viduṁ.
vv50:9.1	Akkosānaṁ vadhānañca,
vv50:9.2	tajjanāya ca uggatā;
vv50:9.3	Kuṭaṁ gahetvā nikkhamma,
vv50:9.4	agañchiṁ udahāriyā.
vv50:10.1	Vipathe kuṭaṁ nikkhipitvā,
vv50:10.2	vanasaṇḍaṁ upāgamiṁ;
vv50:10.3	Idhevāhaṁ marissāmi,
vv50:10.4	ko attho jīvitena me.
vv50:11.1	Daḷhaṁ pāsaṁ karitvāna,
vv50:11.2	āsumbhitvāna pādape;
vv50:11.3	Tato disā vilokesiṁ,
vv50:11.4	‘ko nu kho vanamassito’.
vv50:12.1	Tatthaddasāsiṁ sambuddhaṁ,
vv50:12.2	sabbalokahitaṁ muniṁ;
vv50:12.3	Nisinnaṁ rukkhamūlasmiṁ,
vv50:12.4	jhāyantaṁ akutobhayaṁ.
vv50:13.1	Tassā me ahu saṁvego,
vv50:13.2	abbhuto lomahaṁsano;
vv50:13.3	Ko nu kho vanamassito,
vv50:13.4	manusso udāhu devatā.
vv50:14.1	Pāsādikaṁ pasādanīyaṁ,
vv50:14.2	vanā nibbanamāgataṁ;
vv50:14.3	Disvā mano me pasīdi,
vv50:14.4	nāyaṁ yādisakīdiso.
vv50:15.1	Guttindriyo jhānarato,
vv50:15.2	abahiggatamānaso;
vv50:15.3	Hito sabbassa lokassa,
vv50:15.4	buddho ayaṁ bhavissati.
vv50:16.1	Bhayabheravo durāsado,
vv50:16.2	sīhova guhamassito;
vv50:16.3	Dullabhāyaṁ dassanāya,
vv50:16.4	pupphaṁ odumbaraṁ yathā.
vv50:17.1	So maṁ mudūhi vācāhi,
vv50:17.2	ālapitvā tathāgato;
vv50:17.3	Rajjumāleti maṁvoca,
vv50:17.4	saraṇaṁ gaccha tathāgataṁ.
vv50:18.1	Tāhaṁ giraṁ suṇitvāna,
vv50:18.2	nelaṁ atthavatiṁ suciṁ;
vv50:18.3	Saṇhaṁ muduñca vagguñca,
vv50:18.4	sabbasokāpanūdanaṁ.
vv50:19.1	Kallacittañca maṁ ñatvā,
vv50:19.2	pasannaṁ suddhamānasaṁ;
vv50:19.3	Hito sabbassa lokassa,
vv50:19.4	anusāsi tathāgato.
vv50:20.1	Idaṁ dukkhanti maṁvoca,
vv50:20.2	Ayaṁ dukkhassa sambhavo;
vv50:20.3	Dukkha nirodho maggo ca,
vv50:20.4	Añjaso amatogadho.
vv50:21.1	Anukampakassa kusalassa,
vv50:21.2	Ovādamhi ahaṁ ṭhitā;
vv50:21.3	Ajjhagā amataṁ santiṁ,
vv50:21.4	Nibbānaṁ padamaccutaṁ.
vv50:22.1	Sāhaṁ avaṭṭhitāpemā,
vv50:22.2	dassane avikampinī;
vv50:22.3	Mūlajātāya saddhāya,
vv50:22.4	dhītā buddhassa orasā.
vv50:23.1	Sāhaṁ ramāmi kīḷāmi,
vv50:23.2	modāmi akutobhayā;
vv50:23.3	Dibbamālaṁ dhārayāmi,
vv50:23.4	pivāmi madhumaddavaṁ.
vv50:24.1	Saṭṭhitūriyasahassāni,
vv50:24.2	paṭibodhaṁ karonti me;
vv50:24.3	Āḷambo gaggaro bhīmo,
vv50:24.4	sādhuvādī ca saṁsayo.
vv50:25.1	Pokkharo ca suphasso ca,
vv50:25.2	vīṇāmokkhā ca nāriyo;
vv50:25.3	Nandā ceva sunandā ca,
vv50:25.4	soṇadinnā sucimhitā.
vv50:26.1	Alambusā missakesī ca,
vv50:26.2	puṇḍarīkātidāruṇī;
vv50:26.3	Eṇīphassā suphassā ca,
vv50:26.4	subhaddā muduvādinī.
vv50:27.1	Etā caññā ca seyyāse,
vv50:27.2	accharānaṁ pabodhikā;
vv50:27.3	Tā maṁ kālenupāgantvā,
vv50:27.4	abhibhāsanti devatā.
vv50:28.1	Handa naccāma gāyāma,
vv50:28.2	handa taṁ ramayāmase;
vv50:28.3	Nayidaṁ akatapuññānaṁ,
vv50:28.4	katapuññānamevidaṁ.
vv50:29.1	Asokaṁ nandanaṁ rammaṁ,
vv50:29.2	tidasānaṁ mahāvanaṁ;
vv50:29.3	Sukhaṁ akatapuññānaṁ,
vv50:29.4	idha natthi parattha ca.
vv50:30.1	Sukhañca katapuññānaṁ,
vv50:30.2	idha ceva parattha ca;
vv50:30.3	Tesaṁ sahabyakāmānaṁ,
vv50:30.4	kattabbaṁ kusalaṁ bahuṁ;
vv50:30.5	Katapuññā hi modanti,
vv50:30.6	sagge bhogasamaṅgino.
vv50:31.1	Bahūnaṁ vata atthāya,
vv50:31.2	uppajjanti tathāgatā;
vv50:31.3	Dakkhiṇeyyā manussānaṁ,
vv50:31.4	puññakhettānamākarā;
vv50:31.5	Yattha kāraṁ karitvāna,
vv50:31.6	sagge modanti dāyakā”ti.
vv50:32.1	Rajjumālāvimānaṁ dvādasamaṁ.
vv50:33.1	Tassuddānaṁ
vv50:34.1	Mañjiṭṭhā pabhassarā nāgā,
vv50:34.2	Alomākañjikadāyikā;
vv50:34.3	Vihāracaturitthambā,
vv50:34.4	Pītā ucchuvandanarajjumālā ca;
vv50:34.5	Vaggo tena pavuccatīti.
vv50:35.1	Mañjiṭṭhakavaggo catuttho.
vv50:36.1	Itthivimānaṁ samattaṁ.
vv51:0.1	Vimānavatthu
vv51:0.2	Purisavimāna
vv51:0.3	Mahārathavagga
vv51:0.4	1. Maṇḍūkadevaputtavimānavatthu
vv51:1.1	“Ko me vandati pādāni,
vv51:1.2	iddhiyā yasasā jalaṁ;
vv51:1.3	Abhikkantena vaṇṇena,
vv51:1.4	sabbā obhāsayaṁ disā”ti.
vv51:2.1	“Maṇḍūkohaṁ pure āsiṁ,
vv51:2.2	udake vārigocaro;
vv51:2.3	Tava dhammaṁ suṇantassa,
vv51:2.4	avadhī vacchapālako.
vv51:3.1	Muhuttaṁ cittapasādassa,
vv51:3.2	iddhiṁ passa yasañca me;
vv51:3.3	Ānubhāvañca me passa,
vv51:3.4	vaṇṇaṁ passa jutiñca me.
vv51:4.1	Ye ca te dīghamaddhānaṁ,
vv51:4.2	dhammaṁ assosuṁ gotama;
vv51:4.3	Pattā te acalaṭṭhānaṁ,
vv51:4.4	yattha gantvā na socare”ti.
vv51:5.1	Maṇḍūkadevaputtavimānaṁ paṭhamaṁ.
vv52:0.1	Vimānavatthu
vv52:0.2	Purisavimāna
vv52:0.3	Mahārathavagga
vv52:0.4	2. Revatīvimānavatthu
vv52:1.1	“Cirappavāsiṁ purisaṁ,
vv52:1.2	dūrato sotthimāgataṁ;
vv52:1.3	Ñātimittā suhajjā ca,
vv52:1.4	abhinandanti āgataṁ.
vv52:2.1	Tatheva katapuññampi,
vv52:2.2	asmā lokā paraṁ gataṁ;
vv52:2.3	Puññāni paṭigaṇhanti,
vv52:2.4	piyaṁ ñātīva āgataṁ”.
vv52:3.1	“Uṭṭhehi revate supāpadhamme,
vv52:3.2	Apārutadvāre adānasīle;
vv52:3.3	Nessāma taṁ yattha thunanti duggatā,
vv52:3.4	Samappitā nerayikā dukkhenā”ti.
vv52:4.1	Icceva vatvāna yamassa dūtā,
vv52:4.2	Te dve yakkhā lohitakkhā brahantā;
vv52:4.3	Paccekabāhāsu gahetvā revataṁ,
vv52:4.4	Pakkāmayuṁ devagaṇassa santike.
vv52:5.1	“Ādiccavaṇṇaṁ ruciraṁ pabhassaraṁ,
vv52:5.2	Byamhaṁ subhaṁ kañcanajālachannaṁ;
vv52:5.3	Kassetamākiṇṇajanaṁ vimānaṁ,
vv52:5.4	Suriyassa raṁsīriva jotamānaṁ.
vv52:6.1	Nārīgaṇā candanasāralittā,
vv52:6.2	Ubhato vimānaṁ upasobhayanti;
vv52:6.3	Taṁ dissati suriyasamānavaṇṇaṁ,
vv52:6.4	Ko modati saggapatto vimāne”ti.
vv52:7.1	“Bārāṇasiyaṁ nandiyo nāmāsi,
vv52:7.2	Upāsako amaccharī dānapati vadaññū;
vv52:7.3	Tassetamākiṇṇajanaṁ vimānaṁ,
vv52:7.4	Suriyassa raṁsīriva jotamānaṁ.
vv52:8.1	Nārīgaṇā candanasāralittā,
vv52:8.2	Ubhato vimānaṁ upasobhayanti;
vv52:8.3	Taṁ dissati suriyasamānavaṇṇaṁ,
vv52:8.4	So modati saggapatto vimāne”ti.
vv52:9.1	“Nandiyassāhaṁ bhariyā,
vv52:9.2	Agārinī sabbakulassa issarā;
vv52:9.3	Bhattu vimāne ramissāmi dānahaṁ,
vv52:9.4	Na patthaye nirayaṁ dassanāyā”ti.
vv52:10.1	“Eso te nirayo supāpadhamme,
vv52:10.2	Puññaṁ tayā akataṁ jīvaloke;
vv52:10.3	Na hi maccharī rosako pāpadhammo,
vv52:10.4	Saggūpagānaṁ labhati sahabyatan”ti.
vv52:11.1	“Kiṁ nu gūthañca muttañca,
vv52:11.2	asucī paṭidissati;
vv52:11.3	Duggandhaṁ kimidaṁ mīḷhaṁ,
vv52:11.4	kimetaṁ upavāyatī”ti.
vv52:12.1	“Esa saṁsavako nāma,
vv52:12.2	gambhīro sataporiso;
vv52:12.3	Yattha vassasahassāni,
vv52:12.4	tuvaṁ paccasi revate”ti.
vv52:13.1	“Kiṁ nu kāyena vācāya,
vv52:13.2	manasā dukkaṭaṁ kataṁ;
vv52:13.3	Kena saṁsavako laddho,
vv52:13.4	gambhīro sataporiso”ti.
vv52:14.1	“Samaṇe brāhmaṇe cāpi,
vv52:14.2	aññe vāpi vanibbake;
vv52:14.3	Musāvādena vañcesi,
vv52:14.4	taṁ pāpaṁ pakataṁ tayā.
vv52:15.1	Tena saṁsavako laddho,
vv52:15.2	gambhīro sataporiso;
vv52:15.3	Tattha vassasahassāni,
vv52:15.4	tuvaṁ paccasi revate.
vv52:16.1	Hatthepi chindanti athopi pāde,
vv52:16.2	Kaṇṇepi chindanti athopi nāsaṁ;
vv52:16.3	Athopi kākoḷagaṇā samecca,
vv52:16.4	Saṅgamma khādanti viphandamānan”ti.
vv52:17.1	“Sādhu kho maṁ paṭinetha,
vv52:17.2	kāhāmi kusalaṁ bahuṁ;
vv52:17.3	Dānena samacariyāya,
vv52:17.4	saṁyamena damena ca;
vv52:17.5	Yaṁ katvā sukhitā honti,
vv52:17.6	na ca pacchānutappare”ti.
vv52:18.1	“Pure tuvaṁ pamajjitvā,
vv52:18.2	idāni paridevasi;
vv52:18.3	Sayaṁ katānaṁ kammānaṁ,
vv52:18.4	vipākaṁ anubhossasī”ti.
vv52:19.1	“Ko devalokato manussalokaṁ,
vv52:19.2	Gantvāna puṭṭho me evaṁ vadeyya;
vv52:19.3	‘Nikkhittadaṇḍesu dadātha dānaṁ,
vv52:19.4	Acchādanaṁ seyyamathannapānaṁ;
vv52:19.5	Na hi maccharī rosako pāpadhammo,
vv52:19.6	Saggūpagānaṁ labhati sahabyataṁ’.
vv52:20.1	Sāhaṁ nūna ito gantvā,
vv52:20.2	yoniṁ laddhāna mānusiṁ;
vv52:20.3	Vadaññū sīlasampannā,
vv52:20.4	kāhāmi kusalaṁ bahuṁ;
vv52:20.5	Dānena samacariyāya,
vv52:20.6	saṁyamena damena ca.
vv52:21.1	Ārāmāni ca ropissaṁ,
vv52:21.2	dugge saṅkamanāni ca;
vv52:21.3	Papañca udapānañca,
vv52:21.4	vippasannena cetasā.
vv52:22.1	Cātuddasiṁ pañcadasiṁ,
vv52:22.2	yā ca pakkhassa aṭṭhamī;
vv52:22.3	Pāṭihāriyapakkhañca,
vv52:22.4	aṭṭhaṅgasusamāgataṁ.
vv52:23.1	Uposathaṁ upavasissaṁ,
vv52:23.2	sadā sīlesu saṁvutā;
vv52:23.3	Na ca dāne pamajjissaṁ,
vv52:23.4	sāmaṁ diṭṭhamidaṁ mayā”ti.
vv52:24.1	Iccevaṁ vippalapantiṁ,
vv52:24.2	phandamānaṁ tato tato;
vv52:24.3	Khipiṁsu niraye ghore,
vv52:24.4	uddhampādaṁ avaṁsiraṁ.
vv52:25.1	“Ahaṁ pure maccharinī ahosiṁ,
vv52:25.2	Paribhāsikā samaṇabrāhmaṇānaṁ;
vv52:25.3	Vitathena ca sāmikaṁ vañcayitvā,
vv52:25.4	Paccāmahaṁ niraye ghorarūpe”ti.
vv52:26.1	Revatīvimānaṁ dutiyaṁ.
vv53:0.1	Vimānavatthu
vv53:0.2	Purisavimāna
vv53:0.3	Mahārathavagga
vv53:0.4	3. Chattamāṇavakavimānavatthu
vv53:1.1	“Yo vadataṁ pavaro manujesu,
vv53:1.2	Sakyamunī bhagavā katakicco;
vv53:1.3	Pāragato balaviriyasamaṅgī,
vv53:1.4	Taṁ sugataṁ saraṇatthamupehi.
vv53:2.1	Rāgavirāgamanejamasokaṁ,
vv53:2.2	Dhammamasaṅkhatamappaṭikūlaṁ;
vv53:2.3	Madhuramimaṁ paguṇaṁ suvibhattaṁ,
vv53:2.4	Dhammamimaṁ saraṇatthamupehi.
vv53:3.1	Yattha ca dinna mahapphalamāhu,
vv53:3.2	Catūsu sucīsu purisayugesu;
vv53:3.3	Aṭṭha ca puggaladhammadasā te,
vv53:3.4	Saṅghamimaṁ saraṇatthamupehi.
vv53:4.1	Na tathā tapati nabhe sūriyo,
vv53:4.2	Cando ca na bhāsati na phusso;
vv53:4.3	Yathā atulamidaṁ mahappabhāsaṁ,
vv53:4.4	Ko nu tvaṁ tidivā mahiṁ upāgā.
vv53:5.1	Chindati raṁsī pabhaṅkarassa,
vv53:5.2	Sādhikavīsatiyojanāni ābhā;
vv53:5.3	Rattimapi yathā divaṁ karoti,
vv53:5.4	Parisuddhaṁ vimalaṁ subhaṁ vimānaṁ.
vv53:6.1	Bahupadumavicitrapuṇḍarīkaṁ,
vv53:6.2	Vokiṇṇaṁ kusumehi nekacittaṁ;
vv53:6.3	Arajavirajahemajālachannaṁ,
vv53:6.4	Ākāse tapati yathāpi sūriyo.
vv53:7.1	Rattambarapītavāsasāhi,
vv53:7.2	Agarupiyaṅgucandanussadāhi;
vv53:7.3	Kañcanatanusannibhattacāhi,
vv53:7.4	Paripūraṁ gaganaṁva tārakāhi.
vv53:8.1	Naranāriyo bahuketthanekavaṇṇā,
vv53:8.2	Kusumavibhūsitābharaṇettha sumanā;
vv53:8.3	Anilapamuñcitā pavanti surabhiṁ,
vv53:8.4	Tapaniyavitatā suvaṇṇachannā.
vv53:9.1	Kissa saṁyamassa ayaṁ vipāko,
vv53:9.2	Kenāsi kammaphalenidhūpapanno;
vv53:9.3	Yathā ca te adhigatamidaṁ vimānaṁ,
vv53:9.4	Tadanupadaṁ avacāsi iṅgha puṭṭho”ti.
vv53:10.1	“Sayamidha pathe samecca māṇavena,
vv53:10.2	Satthānusāsi anukampamāno;
vv53:10.3	Tava ratanavarassa dhammaṁ sutvā,
vv53:10.4	Karissāmīti ca bravittha chatto.
vv53:11.1	Jinavarapavaraṁ upehi saraṇaṁ,
vv53:11.2	Dhammañcāpi tatheva bhikkhusaṅghaṁ;
vv53:11.3	Noti paṭhamaṁ avocahaṁ bhante,
vv53:11.4	Pacchā te vacanaṁ tathevakāsiṁ.
vv53:12.1	Mā ca pāṇavadhaṁ vividhaṁ carassu asuciṁ,
vv53:12.2	Na hi pāṇesu asaññataṁ avaṇṇayiṁsu sappaññā;
vv53:12.3	Noti paṭhamaṁ avocahaṁ bhante,
vv53:12.4	Pacchā te vacanaṁ tathevakāsiṁ.
vv53:13.1	Mā ca parajanassa rakkhitampi,
vv53:13.2	Ādātabbamamaññitho adinnaṁ;
vv53:13.3	Noti paṭhamaṁ avocahaṁ bhante,
vv53:13.4	Pacchā te vacanaṁ tathevakāsiṁ.
vv53:14.1	Mā ca parajanassa rakkhitāyo,
vv53:14.2	Parabhariyā agamā anariyametaṁ;
vv53:14.3	Noti paṭhamaṁ avocahaṁ bhante,
vv53:14.4	Pacchā te vacanaṁ tathevakāsiṁ.
vv53:15.1	Mā ca vitathaṁ aññathā abhāṇi,
vv53:15.2	Na hi musāvādaṁ avaṇṇayiṁsu sappaññā;
vv53:15.3	Noti paṭhamaṁ avocahaṁ bhante,
vv53:15.4	Pacchā te vacanaṁ tathevakāsiṁ.
vv53:16.1	Yena ca purisassa apeti saññā,
vv53:16.2	Taṁ majjaṁ parivajjayassu sabbaṁ;
vv53:16.3	Noti paṭhamaṁ avocahaṁ bhante,
vv53:16.4	Pacchā te vacanaṁ tathevakāsiṁ.
vv53:17.1	Svāhaṁ idha pañca sikkhā karitvā,
vv53:17.2	Paṭipajjitvā tathāgatassa dhamme;
vv53:17.3	Dvepathamagamāsiṁ coramajjhe,
vv53:17.4	Te maṁ tattha vadhiṁsu bhogahetu.
vv53:18.1	Ettakamidaṁ anussarāmi kusalaṁ,
vv53:18.2	Tato paraṁ na me vijjati aññaṁ;
vv53:18.3	Tena sucaritena kammunāhaṁ,
vv53:18.4	Uppanno tidivesu kāmakāmī.
vv53:19.1	Passa khaṇamuhuttasaññamassa,
vv53:19.2	Anudhammappaṭipattiyā vipākaṁ;
vv53:19.3	Jalamiva yasasā samekkhamānā,
vv53:19.4	Bahukā maṁ pihayanti hīnakammā.
vv53:20.1	Passa katipayāya desanāya,
vv53:20.2	Sugatiñcamhi gato sukhañca patto;
vv53:20.3	Ye ca te satataṁ suṇanti dhammaṁ,
vv53:20.4	Maññe te amataṁ phusanti khemaṁ.
vv53:21.1	Appampi kataṁ mahāvipākaṁ,
vv53:21.2	Vipulaṁ hoti tathāgatassa dhamme;
vv53:21.3	Passa katapuññatāya chatto,
vv53:21.4	Obhāseti pathaviṁ yathāpi sūriyo.
vv53:22.1	Kimidaṁ kusalaṁ kimācarema,
vv53:22.2	Icceke hi samecca mantayanti;
vv53:22.3	Te mayaṁ punareva laddha mānusattaṁ,
vv53:22.4	Paṭipannā viharemu sīlavanto.
vv53:23.1	Bahukāro anukampako ca satthā,
vv53:23.2	Iti me sati agamā divā divassa;
vv53:23.3	Svāhaṁ upagatomhi saccanāmaṁ,
vv53:23.4	Anukampassu punapi suṇemu dhammaṁ.
vv53:24.1	Ye cidha pajahanti kāmarāgaṁ,
vv53:24.2	Bhavarāgānusayañca pahāya mohaṁ;
vv53:24.3	Na ca te punamupenti gabbhaseyyaṁ,
vv53:24.4	Parinibbānagatā hi sītibhūtā”ti.
vv53:25.1	Chattamāṇavakavimānaṁ tatiyaṁ.
vv54:0.1	Vimānavatthu
vv54:0.2	Purisavimāna
vv54:0.3	Mahārathavagga
vv54:0.4	4. Kakkaṭakarasadāyakavimānavatthu
vv54:1.1	“Uccamidaṁ maṇithūṇaṁ vimānaṁ,
vv54:1.2	Samantato dvādasa yojanāni;
vv54:1.3	Kūṭāgārā sattasatā uḷārā,
vv54:1.4	Veḷuriyathambhā rucakatthatā subhā.
vv54:2.1	Tatthacchasi pivasi khādasi ca,
vv54:2.2	Dibbā ca vīṇā pavadanti vagguṁ;
vv54:2.3	Dibbā rasā kāmaguṇettha pañca,
vv54:2.4	Nāriyo ca naccanti suvaṇṇachannā.
vv54:3.1	Kena tetādiso vaṇṇo,
vv54:3.2	kena te idha mijjhati;
vv54:3.3	Uppajjanti ca te bhogā,
vv54:3.4	ye keci manaso piyā.
vv54:4.1	Pucchāmi taṁ deva mahānubhāva,
vv54:4.2	Manussabhūto kimakāsi puññaṁ;
vv54:4.3	Kenāsi evaṁ jalitānubhāvo,
vv54:4.4	Vaṇṇo ca te sabbadisā pabhāsatī”ti.
vv54:5.1	So devaputto attamano,
vv54:5.2	moggallānena pucchito;
vv54:5.3	Pañhaṁ puṭṭho viyākāsi,
vv54:5.4	yassa kammassidaṁ phalaṁ.
vv54:6.1	“Satisamuppādakaro,
vv54:6.2	dvāre kakkaṭako ṭhito;
vv54:6.3	Niṭṭhito jātarūpassa,
vv54:6.4	sobhati dasapādako.
vv54:7.1	Tena metādiso vaṇṇo,
vv54:7.2	tena me idha mijjhati;
vv54:7.3	Uppajjanti ca me bhogā,
vv54:7.4	ye keci manaso piyā.
vv54:8.1	Akkhāmi te bhikkhu mahānubhāva,
vv54:8.2	Manussabhūto yamakāsi puññaṁ;
vv54:8.3	Tenamhi evaṁ jalitānubhāvo,
vv54:8.4	Vaṇṇo ca me sabbadisā pabhāsatī”ti.
vv54:9.1	Kakkaṭakarasadāyakavimānaṁ catutthaṁ.
vv54:10.1	(Anantaraṁ pañcavimānaṁ yathā kakkaṭakarasadāyakavimānaṁ tathā vitthāretabbaṁ.)
vv55:0.1	Vimānavatthu
vv55:0.2	Purisavimāna
vv55:0.3	Mahārathavagga
vv55:0.4	5. Dvārapālavimānavatthu
vv55:1.1	“Uccamidaṁ maṇithūṇaṁ vimānaṁ,
vv55:1.2	Samantato dvādasa yojanāni;
vv55:1.3	Kūṭāgārā sattasatā uḷārā,
vv55:1.4	Veḷuriyathambhā rucakatthatā subhā.
vv55:2.1	Tatthacchasi pivasi khādasi ca,
vv55:2.2	Dibbā ca vīṇā pavadanti vagguṁ;
vv55:2.3	Dibbā rasā kāmaguṇettha pañca,
vv55:2.4	Nāriyo ca naccanti suvaṇṇachannā.
vv55:3.1	Kena tetādiso vaṇṇo,
vv55:3.2	…pe…
vv55:3.3	Vaṇṇo ca te sabbadisā pabhāsatī”ti.
vv55:4.1	So devaputto attamano,
vv55:4.2	moggallānena pucchito;
vv55:4.3	Pañhaṁ puṭṭho viyākāsi,
vv55:4.4	yassa kammassidaṁ phalaṁ.
vv55:5.1	“Dibbaṁ mamaṁ vassasahassamāyu,
vv55:5.2	Vācābhigītaṁ manasā pavattitaṁ;
vv55:5.3	Ettāvatā ṭhassati puññakammo,
vv55:5.4	Dibbehi kāmehi samaṅgibhūto.
vv55:6.1	Tena metādiso vaṇṇo,
vv55:6.2	…pe…
vv55:6.3	Vaṇṇo ca me sabbadisā pabhāsatī”ti.
vv55:7.1	Dvārapālavimānaṁ pañcamaṁ.
vv56:0.1	Vimānavatthu
vv56:0.2	Purisavimāna
vv56:0.3	Mahārathavagga
vv56:0.4	6. Paṭhamakaraṇīyavimānavatthu
vv56:1.1	“Uccamidaṁ maṇithūṇaṁ vimānaṁ,
vv56:1.2	Samantato dvādasa yojanāni;
vv56:1.3	Kūṭāgārā sattasatā uḷārā,
vv56:1.4	Veḷuriyathambhā rucakatthatā subhā.
vv56:2.1	Tatthacchasi pivasi khādasi ca,
vv56:2.2	Dibbā ca vīṇā pavadanti vagguṁ;
vv56:2.3	Dibbā rasā kāmaguṇettha pañca,
vv56:2.4	Nāriyo ca naccanti suvaṇṇachannā.
vv56:3.1	Kena tetādiso vaṇṇo,
vv56:3.2	…pe…
vv56:3.3	Vaṇṇo ca te sabbadisā pabhāsatī”ti.
vv56:4.1	So devaputto attamano,
vv56:4.2	…pe…
vv56:4.3	yassa kammassidaṁ phalaṁ.
vv56:5.1	“Karaṇīyāni puññāni,
vv56:5.2	paṇḍitena vijānatā;
vv56:5.3	Sammaggatesu buddhesu,
vv56:5.4	yattha dinnaṁ mahapphalaṁ.
vv56:6.1	Atthāya vata me buddho,
vv56:6.2	araññā gāmamāgato;
vv56:6.3	Tattha cittaṁ pasādetvā,
vv56:6.4	tāvatiṁsūpago ahaṁ.
vv56:7.1	Tena metādiso vaṇṇo,
vv56:7.2	…pe…
vv56:7.3	Vaṇṇo ca me sabbadisā pabhāsatī”ti.
vv56:8.1	Paṭhamakaraṇīyavimānaṁ chaṭṭhaṁ.
vv57:0.1	Vimānavatthu
vv57:0.2	Purisavimāna
vv57:0.3	Mahārathavagga
vv57:0.4	7. Dutiyakaraṇīyavimānavatthu
vv57:1.1	“Uccamidaṁ maṇithūṇaṁ vimānaṁ,
vv57:1.2	Samantato dvādasa yojanāni;
vv57:1.3	Kūṭāgārā sattasatā uḷārā,
vv57:1.4	Veḷuriyathambhā rucakatthatā subhā.
vv57:2.1	Tatthacchasi pivasi khādasi ca,
vv57:2.2	Dibbā ca vīṇā pavadanti vagguṁ;
vv57:2.3	Dibbā rasā kāmaguṇettha pañca,
vv57:2.4	Nāriyo ca naccanti suvaṇṇachannā.
vv57:3.1	Kena tetādiso vaṇṇo,
vv57:3.2	…pe…
vv57:3.3	Vaṇṇo ca te sabbadisā pabhāsatī”ti.
vv57:4.1	So devaputto attamano,
vv57:4.2	…pe…
vv57:4.3	yassa kammassidaṁ phalaṁ.
vv57:5.1	“Karaṇīyāni puññāni,
vv57:5.2	paṇḍitena vijānatā;
vv57:5.3	Sammaggatesu bhikkhūsu,
vv57:5.4	yattha dinnaṁ mahapphalaṁ.
vv57:6.1	Atthāya vata me bhikkhu,
vv57:6.2	araññā gāmamāgato;
vv57:6.3	Tattha cittaṁ pasādetvā,
vv57:6.4	tāvatiṁsūpago ahaṁ.
vv57:7.1	Tena metādiso vaṇṇo,
vv57:7.2	…pe…
vv57:7.3	Vaṇṇo ca me sabbadisā pabhāsatī”ti.
vv57:8.1	Dutiyakaraṇīyavimānaṁ sattamaṁ.
vv58:0.1	Vimānavatthu
vv58:0.2	Purisavimāna
vv58:0.3	Mahārathavagga
vv58:0.4	8. Paṭhamasūcivimānavatthu
vv58:1.1	“Uccamidaṁ maṇithūṇaṁ vimānaṁ,
vv58:1.2	Samantato dvādasa yojanāni;
vv58:1.3	Kūṭāgārā sattasatā uḷārā,
vv58:1.4	Veḷuriyathambhā rucakatthatā subhā.
vv58:2.1	Tatthacchasi pivasi khādasi ca,
vv58:2.2	Dibbā ca vīṇā pavadanti vagguṁ;
vv58:2.3	Dibbā rasā kāmaguṇettha pañca,
vv58:2.4	Nāriyo ca naccanti suvaṇṇachannā.
vv58:3.1	Kena tetādiso vaṇṇo,
vv58:3.2	…pe…
vv58:3.3	Vaṇṇo ca te sabbadisā pabhāsatī”ti.
vv58:4.1	So devaputto attamano,
vv58:4.2	…pe…
vv58:4.3	yassa kammassidaṁ phalaṁ.
vv58:5.1	“Yaṁ dadāti na taṁ hoti,
vv58:5.2	Yañceva dajjā tañceva seyyo;
vv58:5.3	Sūci dinnā sūcimeva seyyo.
vv58:6.1	Tena metādiso vaṇṇo,
vv58:6.2	…pe…
vv58:6.3	Vaṇṇo ca me sabbadisā pabhāsatī”ti.
vv58:7.1	Paṭhamasūcivimānaṁ aṭṭhamaṁ.
vv59:0.1	Vimānavatthu
vv59:0.2	Purisavimāna
vv59:0.3	Mahārathavagga
vv59:0.4	9. Dutiyasūcivimānavatthu
vv59:1.1	“Uccamidaṁ maṇithūṇaṁ vimānaṁ,
vv59:1.2	Samantato dvādasa yojanāni;
vv59:1.3	Kūṭāgārā sattasatā uḷārā,
vv59:1.4	Veḷuriyathambhā rucakatthatā subhā.
vv59:2.1	Tatthacchasi pivasi khādasi ca,
vv59:2.2	Dibbā ca vīṇā pavadanti vagguṁ;
vv59:2.3	Dibbā rasā kāmaguṇettha pañca,
vv59:2.4	Nāriyo ca naccanti suvaṇṇachannā.
vv59:3.1	Kena tetādiso vaṇṇo,
vv59:3.2	…pe…
vv59:3.3	Vaṇṇo ca te sabbadisā pabhāsatī”ti.
vv59:4.1	So devaputto attamano,
vv59:4.2	…pe…
vv59:4.3	yassa kammassidaṁ phalaṁ.
vv59:5.1	“Ahaṁ manussesu manussabhūto,
vv59:5.2	Purimajātiyā manussaloke.
vv59:6.1	Addasaṁ virajaṁ bhikkhuṁ,
vv59:6.2	vippasannamanāvilaṁ;
vv59:6.3	Tassa adāsahaṁ sūciṁ,
vv59:6.4	pasanno sehi pāṇibhi.
vv59:7.1	Tena metādiso vaṇṇo,
vv59:7.2	…pe…
vv59:7.3	Vaṇṇo ca me sabbadisā pabhāsatī”ti.
vv59:8.1	Dutiyasūcivimānaṁ navamaṁ.
vv60:0.1	Vimānavatthu
vv60:0.2	Purisavimāna
vv60:0.3	Mahārathavagga
vv60:0.4	10. Paṭhamanāgavimānavatthu
vv60:1.1	“Susukkakhandhaṁ abhiruyha nāgaṁ,
vv60:1.2	Akācinaṁ dantiṁ baliṁ mahājavaṁ;
vv60:1.3	Abhiruyha gajavaraṁ sukappitaṁ,
vv60:1.4	Idhāgamā vehāyasaṁ antalikkhe.
vv60:2.1	Nāgassa dantesu duvesu nimmitā,
vv60:2.2	Acchodakā paduminiyo suphullā;
vv60:2.3	Padumesu ca tūriyagaṇā pavajjare,
vv60:2.4	Imā ca naccanti manoharāyo.
vv60:3.1	Deviddhipattosi mahānubhāvo,
vv60:3.2	Manussabhūto kimakāsi puññaṁ;
vv60:3.3	Kenāsi evaṁ jalitānubhāvo,
vv60:3.4	Vaṇṇo ca te sabbadisā pabhāsatī”ti.
vv60:4.1	So devaputto attamano,
vv60:4.2	moggallānena pucchito;
vv60:4.3	Pañhaṁ puṭṭho viyākāsi,
vv60:4.4	yassa kammassidaṁ phalaṁ.
vv60:5.1	“Aṭṭheva muttapupphāni,
vv60:5.2	kassapassa mahesino;
vv60:5.3	Thūpasmiṁ abhiropesiṁ,
vv60:5.4	pasanno sehi pāṇibhi.
vv60:6.1	Tena metādiso vaṇṇo,
vv60:6.2	…pe…
vv60:6.3	vaṇṇo ca me sabbadisā pabhāsatī”ti.
vv60:7.1	Paṭhamanāgavimānaṁ dasamaṁ.
vv61:0.1	Vimānavatthu
vv61:0.2	Purisavimāna
vv61:0.3	Mahārathavagga
vv61:0.4	11. Dutiyanāgavimānavatthu
vv61:1.1	“Mahantaṁ nāgaṁ abhiruyha,
vv61:1.2	Sabbasetaṁ gajuttamaṁ;
vv61:1.3	Vanā vanaṁ anupariyāsi,
vv61:1.4	Nārīgaṇapurakkhato;
vv61:1.5	Obhāsento disā sabbā,
vv61:1.6	Osadhī viya tārakā.
vv61:2.1	Kena tetādiso vaṇṇo,
vv61:2.2	…pe…
vv61:2.3	Vaṇṇo ca te sabbadisā pabhāsatī”ti.
vv61:3.1	So devaputto attamano,
vv61:3.2	vaṅgīseneva pucchito;
vv61:3.3	Pañhaṁ puṭṭho viyākāsi,
vv61:3.4	yassa kammassidaṁ phalaṁ.
vv61:4.1	“Ahaṁ manussesu manussabhūto,
vv61:4.2	Upāsako cakkhumato ahosiṁ;
vv61:4.3	Pāṇātipātā virato ahosiṁ,
vv61:4.4	Loke adinnaṁ parivajjayissaṁ.
vv61:5.1	Amajjapo no ca musā abhāṇiṁ,
vv61:5.2	Sakena dārena ca tuṭṭho ahosiṁ;
vv61:5.3	Annañca pānañca pasannacitto,
vv61:5.4	Sakkacca dānaṁ vipulaṁ adāsiṁ.
vv61:6.1	Tena metādiso vaṇṇo,
vv61:6.2	…pe…
vv61:6.3	vaṇṇo ca me sabbadisā pabhāsatī”ti.
vv61:7.1	Dutiyanāgavimānaṁ ekādasamaṁ.
vv62:0.1	Vimānavatthu
vv62:0.2	Purisavimāna
vv62:0.3	Mahārathavagga
vv62:0.4	12. Tatiyanāgavimānavatthu
vv62:1.1	“Ko nu dibbena yānena,
vv62:1.2	sabbasetena hatthinā;
vv62:1.3	Tūriyatāḷitanigghoso,
vv62:1.4	antalikkhe mahīyati.
vv62:2.1	Devatā nusi gandhabbo,
vv62:2.2	adu sakko purindado;
vv62:2.3	Ajānantā taṁ pucchāma,
vv62:2.4	kathaṁ jānemu taṁ mayan”ti.
vv62:3.1	“Namhi devo na gandhabbo,
vv62:3.2	nāpi sakko purindado;
vv62:3.3	Sudhammā nāma ye devā,
vv62:3.4	tesaṁ aññataro ahan”ti.
vv62:4.1	“Pucchāma devaṁ sudhammaṁ,
vv62:4.2	Puthuṁ katvāna añjaliṁ;
vv62:4.3	Kiṁ katvā mānuse kammaṁ,
vv62:4.4	Sudhammaṁ upapajjatī”ti.
vv62:5.1	“Ucchāgāraṁ tiṇāgāraṁ,
vv62:5.2	vatthāgārañca yo dade;
vv62:5.3	Tiṇṇaṁ aññataraṁ datvā,
vv62:5.4	sudhammaṁ upapajjatī”ti.
vv62:6.1	Tatiyanāgavimānaṁ dvādasamaṁ.
vv63:0.1	Vimānavatthu
vv63:0.2	Purisavimāna
vv63:0.3	Mahārathavagga
vv63:0.4	13. Cūḷarathavimānavatthu
vv63:1.1	“Daḷhadhammā nisārassa,
vv63:1.2	dhanuṁ olubbha tiṭṭhasi;
vv63:1.3	Khattiyo nusi rājañño,
vv63:1.4	adu luddo vanecaro”ti.
vv63:2.1	“Assakādhipatissāhaṁ,
vv63:2.2	bhante putto vanecaro;
vv63:2.3	Nāmaṁ me bhikkhu te brūmi,
vv63:2.4	sujāto iti maṁ vidū.
vv63:3.1	Mige gavesamānohaṁ,
vv63:3.2	Ogāhanto brahāvanaṁ;
vv63:3.3	Migaṁ tañceva nāddakkhiṁ,
vv63:3.4	Tañca disvā ṭhito ahan”ti.
vv63:4.1	“Svāgataṁ te mahāpuñña,
vv63:4.2	atho te adurāgataṁ;
vv63:4.3	Etto udakamādāya,
vv63:4.4	pāde pakkhālayassu te.
vv63:5.1	Idampi pānīyaṁ sītaṁ,
vv63:5.2	ābhataṁ girigabbharā;
vv63:5.3	Rājaputta tato pitvā,
vv63:5.4	santhatasmiṁ upāvisā”ti.
vv63:6.1	“Kalyāṇī vata te vācā,
vv63:6.2	Savanīyā mahāmuni;
vv63:6.3	Nelā atthavatī vaggu,
vv63:6.4	Mantvā atthañca bhāsasi.
vv63:7.1	Kā te rati vane viharato,
vv63:7.2	Isinisabha vadehi puṭṭho;
vv63:7.3	Tava vacanapathaṁ nisāmayitvā,
vv63:7.4	Atthadhammapadaṁ samācaremase”ti.
vv63:8.1	“Ahiṁsā sabbapāṇīnaṁ,
vv63:8.2	kumāramhāka ruccati;
vv63:8.3	Theyyā ca aticārā ca,
vv63:8.4	majjapānā ca ārati.
vv63:9.1	Ārati samacariyā ca,
vv63:9.2	bāhusaccaṁ kataññutā;
vv63:9.3	Diṭṭheva dhamme pāsaṁsā,
vv63:9.4	dhammā ete pasaṁsiyāti.
vv63:10.1	Santike maraṇaṁ tuyhaṁ,
vv63:10.2	oraṁ māsehi pañcahi;
vv63:10.3	Rājaputta vijānāhi,
vv63:10.4	attānaṁ parimocayā”ti.
vv63:11.1	“Katamaṁ svāhaṁ janapadaṁ gantvā,
vv63:11.2	Kiṁ kammaṁ kiñca porisaṁ;
vv63:11.3	Kāya vā pana vijjāya,
vv63:11.4	Bhaveyyaṁ ajarāmaro”ti.
vv63:12.1	“Na vijjate so padeso,
vv63:12.2	kammaṁ vijjā ca porisaṁ;
vv63:12.3	Yattha gantvā bhave macco,
vv63:12.4	rājaputtājarāmaro.
vv63:13.1	Mahaddhanā mahābhogā,
vv63:13.2	raṭṭhavantopi khattiyā;
vv63:13.3	Pahūtadhanadhaññāse,
vv63:13.4	tepi no ajarāmarā.
vv63:14.1	Yadi te sutā andhakaveṇḍuputtā,
vv63:14.2	Sūrā vīrā vikkantappahārino;
vv63:14.3	Tepi āyukkhayaṁ pattā,
vv63:14.4	Viddhastā sassatīsamā.
vv63:15.1	Khattiyā brāhmaṇā vessā,
vv63:15.2	suddā caṇḍālapukkusā;
vv63:15.3	Ete caññe ca jātiyā,
vv63:15.4	tepi no ajarāmarā.
vv63:16.1	Ye mantaṁ parivattenti,
vv63:16.2	chaḷaṅgaṁ brahmacintitaṁ;
vv63:16.3	Ete caññe ca vijjāya,
vv63:16.4	tepi no ajarāmarā.
vv63:17.1	Isayo cāpi ye santā,
vv63:17.2	saññatattā tapassino;
vv63:17.3	Sarīraṁ tepi kālena,
vv63:17.4	vijahanti tapassino.
vv63:18.1	Bhāvitattāpi arahanto,
vv63:18.2	katakiccā anāsavā;
vv63:18.3	Nikkhipanti imaṁ dehaṁ,
vv63:18.4	puññapāpaparikkhayā”ti.
vv63:19.1	“Subhāsitā atthavatī,
vv63:19.2	gāthāyo te mahāmuni;
vv63:19.3	Nijjhattomhi subhaṭṭhena,
vv63:19.4	tvañca me saraṇaṁ bhavā”ti.
vv63:20.1	“Mā maṁ tvaṁ saraṇaṁ gaccha,
vv63:20.2	tameva saraṇaṁ vaja;
vv63:20.3	Sakyaputtaṁ mahāvīraṁ,
vv63:20.4	yamahaṁ saraṇaṁ gato”ti.
vv63:21.1	“Katarasmiṁ so janapade,
vv63:21.2	satthā tumhāka mārisa;
vv63:21.3	Ahampi daṭṭhuṁ gacchissaṁ,
vv63:21.4	jinaṁ appaṭipuggalan”ti.
vv63:22.1	“Puratthimasmiṁ janapade,
vv63:22.2	okkākakulasambhavo;
vv63:22.3	Tatthāsi purisājañño,
vv63:22.4	so ca kho parinibbuto”ti.
vv63:23.1	“Sace hi buddho tiṭṭheyya,
vv63:23.2	Satthā tumhāka mārisa;
vv63:23.3	Yojanāni sahassāni,
vv63:23.4	Gaccheyyaṁ payirupāsituṁ.
vv63:24.1	Yato ca kho parinibbuto,
vv63:24.2	satthā tumhāka mārisa;
vv63:24.3	Nibbutampi mahāvīraṁ,
vv63:24.4	gacchāmi saraṇaṁ ahaṁ.
vv63:25.1	Upemi saraṇaṁ buddhaṁ,
vv63:25.2	dhammañcāpi anuttaraṁ;
vv63:25.3	Saṅghañca naradevassa,
vv63:25.4	gacchāmi saraṇaṁ ahaṁ.
vv63:26.1	Pāṇātipātā viramāmi khippaṁ,
vv63:26.2	Loke adinnaṁ parivajjayāmi;
vv63:26.3	Amajjapo no ca musā bhaṇāmi,
vv63:26.4	Sakena dārena ca homi tuṭṭho”ti.
vv63:27.1	“Sahassaraṁsīva yathā mahappabho,
vv63:27.2	Disaṁ yathā bhāti nabhe anukkamaṁ;
vv63:27.3	Tathāpakāro tavāyaṁ mahāratho,
vv63:27.4	Samantato yojanasattamāyato.
vv63:28.1	Suvaṇṇapaṭṭehi samantamotthaṭo,
vv63:28.2	Urassa muttāhi maṇīhi cittito;
vv63:28.3	Lekhā suvaṇṇassa ca rūpiyassa ca,
vv63:28.4	Sobhenti veḷuriyamayā sunimmitā.
vv63:29.1	Sīsañcidaṁ veḷuriyassa nimmitaṁ,
vv63:29.2	Yugañcidaṁ lohitakāya cittitaṁ;
vv63:29.3	Yuttā suvaṇṇassa ca rūpiyassa ca,
vv63:29.4	Sobhanti assā ca ime manojavā.
vv63:30.1	So tiṭṭhasi hemarathe adhiṭṭhito,
vv63:30.2	Devānamindova sahassavāhano;
vv63:30.3	Pucchāmi tāhaṁ yasavanta kovidaṁ,
vv63:30.4	Kathaṁ tayā laddho ayaṁ uḷāro”ti.
vv63:31.1	“Sujāto nāmahaṁ bhante,
vv63:31.2	rājaputto pure ahuṁ;
vv63:31.3	Tvañca maṁ anukampāya,
vv63:31.4	saññamasmiṁ nivesayi.
vv63:32.1	Khīṇāyukañca maṁ ñatvā,
vv63:32.2	sarīraṁ pādāsi satthuno;
vv63:32.3	Imaṁ sujāta pūjehi,
vv63:32.4	taṁ te atthāya hehiti.
vv63:33.1	Tāhaṁ gandhehi mālehi,
vv63:33.2	pūjayitvā samuyyuto;
vv63:33.3	Pahāya mānusaṁ dehaṁ,
vv63:33.4	upapannomhi nandanaṁ.
vv63:34.1	Nandane ca vane ramme,
vv63:34.2	nānādijagaṇāyute;
vv63:34.3	Ramāmi naccagītehi,
vv63:34.4	accharāhi purakkhato”ti.
vv63:35.1	Cūḷarathavimānaṁ terasamaṁ.
vv64:0.1	Vimānavatthu
vv64:0.2	Purisavimāna
vv64:0.3	Mahārathavagga
vv64:0.4	14. Mahārathavimānavatthu
vv64:1.1	“Sahassayuttaṁ hayavāhanaṁ subhaṁ,
vv64:1.2	Āruyhimaṁ sandanaṁ nekacittaṁ;
vv64:1.3	Uyyānabhūmiṁ abhito anukkamaṁ,
vv64:1.4	Purindado bhūtapatīva vāsavo.
vv64:2.1	Sovaṇṇamayā te rathakubbarā ubho,
vv64:2.2	Phalehi aṁsehi atīva saṅgatā;
vv64:2.3	Sujātagumbā naravīraniṭṭhitā,
vv64:2.4	Virocatī pannaraseva cando.
vv64:3.1	Suvaṇṇajālāvatato ratho ayaṁ,
vv64:3.2	Bahūhi nānāratanehi cittito;
vv64:3.3	Sunandighoso ca subhassaro ca,
vv64:3.4	Virocatī cāmarahatthabāhubhi.
vv64:4.1	Imā ca nābhyo manasābhinimmitā,
vv64:4.2	Rathassa pādantaramajjhabhūsitā;
vv64:4.3	Imā ca nābhyo satarājicittitā,
vv64:4.4	Sateratā vijjurivappabhāsare.
vv64:5.1	Anekacittāvatato ratho ayaṁ,
vv64:5.2	Puthū ca nemī ca sahassaraṁsiko;
vv64:5.3	Tesaṁ saro suyyati vaggurūpo,
vv64:5.4	Pañcaṅgikaṁ tūriyamivappavāditaṁ.
vv64:6.1	Sirasmiṁ cittaṁ maṇicandakappitaṁ,
vv64:6.2	Sadā visuddhaṁ ruciraṁ pabhassaraṁ;
vv64:6.3	Suvaṇṇarājīhi atīva saṅgataṁ,
vv64:6.4	Veḷuriyarājīva atīva sobhati.
vv64:7.1	Ime ca vāḷī maṇicandakappitā,
vv64:7.2	Ārohakambū sujavā brahūpamā;
vv64:7.3	Brahā mahantā balino mahājavā,
vv64:7.4	Mano tavaññāya tatheva siṁsare.
vv64:8.1	Ime ca sabbe sahitā catukkamā,
vv64:8.2	Mano tavaññāya tatheva siṁsare;
vv64:8.3	Samaṁ vahantī mudukā anuddhatā,
vv64:8.4	Āmodamānā turagānamuttama.
vv64:9.1	Dhunanti vagganti patanti cambare,
vv64:9.2	Abbhuddhunantā sukate piḷandhane;
vv64:9.3	Tesaṁ saro suyyati vaggurūpo,
vv64:9.4	Pañcaṅgikaṁ tūriyamivappavāditaṁ.
vv64:10.1	Rathassa ghoso apiḷandhanāna ca,
vv64:10.2	Khurassa nādo abhihiṁsanāya ca;
vv64:10.3	Ghoso suvaggū samitassa suyyati,
vv64:10.4	Gandhabbatūriyāni vicitrasaṁvane.
vv64:11.1	Rathe ṭhitā tā migamandalocanā,
vv64:11.2	Āḷārapamhā hasitā piyaṁvadā;
vv64:11.3	Veḷuriyajālāvatatā tanucchavā,
vv64:11.4	Sadeva gandhabbasūraggapūjitā.
vv64:12.1	Tā rattarattambarapītavāsasā,
vv64:12.2	Visālanettā abhirattalocanā;
vv64:12.3	Kule sujātā sutanū sucimhitā,
vv64:12.4	Rathe ṭhitā pañjalikā upaṭṭhitā.
vv64:13.1	Tā kambukeyūradharā suvāsasā,
vv64:13.2	Sumajjhimā ūruthanūpapannā;
vv64:13.3	Vaṭṭaṅguliyo sumukhā sudassanā,
vv64:13.4	Rathe ṭhitā pañjalikā upaṭṭhitā.
vv64:14.1	Aññā suveṇī susu missakesiyo,
vv64:14.2	Samaṁ vibhattāhi pabhassarāhi ca;
vv64:14.3	Anubbatā tā tava mānase ratā,
vv64:14.4	Rathe ṭhitā pañjalikā upaṭṭhitā.
vv64:15.1	Āveḷiniyo padumuppalacchadā,
vv64:15.2	Alaṅkatā candanasāravāsitā;
vv64:15.3	Anubbatā tā tava mānase ratā,
vv64:15.4	Rathe ṭhitā pañjalikā upaṭṭhitā.
vv64:16.1	Tā māliniyo padumuppalacchadā,
vv64:16.2	Alaṅkatā candanasāravāsitā;
vv64:16.3	Anubbatā tā tava mānase ratā,
vv64:16.4	Rathe ṭhitā pañjalikā upaṭṭhitā.
vv64:17.1	Kaṇṭhesu te yāni piḷandhanāni,
vv64:17.2	Hatthesu pādesu tatheva sīse;
vv64:17.3	Obhāsayantī dasa sabbaso disā,
vv64:17.4	Abbhuddayaṁ sāradikova bhāṇumā.
vv64:18.1	Vātassa vegena ca sampakampitā,
vv64:18.2	Bhujesu mālā apiḷandhanāni ca;
vv64:18.3	Muñcanti ghosaṁ ruciraṁ suciṁ subhaṁ,
vv64:18.4	Sabbehi viññūhi sutabbarūpaṁ.
vv64:19.1	Uyyānabhūmyā ca duvaddhato ṭhitā,
vv64:19.2	Rathā ca nāgā tūriyāni ca saro;
vv64:19.3	Tameva devinda pamodayanti,
vv64:19.4	Vīṇā yathā pokkharapattabāhubhi.
vv64:20.1	Imāsu vīṇāsu bahūsu vaggūsu,
vv64:20.2	Manuññarūpāsu hadayeritaṁ pītiṁ;
vv64:20.3	Pavajjamānāsu atīva accharā,
vv64:20.4	Bhamanti kaññā padumesu sikkhitā.
vv64:21.1	Yadā ca gītāni ca vāditāni ca,
vv64:21.2	Naccāni cimāni samenti ekato;
vv64:21.3	Athettha naccanti athettha accharā,
vv64:21.4	Obhāsayantī ubhato varitthiyo.
vv64:22.1	So modasi tūriyagaṇappabodhano,
vv64:22.2	Mahīyamāno vajirāvudhoriva;
vv64:22.3	Imāsu vīṇāsu bahūsu vaggūsu,
vv64:22.4	Manuññarūpāsu hadayeritaṁ pītiṁ.
vv64:23.1	Kiṁ tvaṁ pure kammamakāsi attanā,
vv64:23.2	Manussabhūto purimāya jātiyā;
vv64:23.3	Uposathaṁ kaṁ vā tuvaṁ upāvasi,
vv64:23.4	Kaṁ dhammacariyaṁ vatamābhirocayi.
vv64:24.1	Nayīdamappassa katassa kammuno,
vv64:24.2	Pubbe suciṇṇassa uposathassa vā;
vv64:24.3	Iddhānubhāvo vipulo ayaṁ tava,
vv64:24.4	Yaṁ devasaṅghaṁ abhirocase bhusaṁ.
vv64:25.1	Dānassa te idaṁ phalaṁ,
vv64:25.2	atho sīlassa vā pana;
vv64:25.3	Atho añjalikammassa,
vv64:25.4	taṁ me akkhāhi pucchito”ti.
vv64:26.1	So devaputto attamano,
vv64:26.2	moggallānena pucchito;
vv64:26.3	Pañhaṁ puṭṭho viyākāsi,
vv64:26.4	yassa kammassidaṁ phalanti.
vv64:27.1	“Jitindriyaṁ buddhamanomanikkamaṁ,
vv64:27.2	Naruttamaṁ kassapamaggapuggalaṁ;
vv64:27.3	Avāpurantaṁ amatassa dvāraṁ,
vv64:27.4	Devātidevaṁ satapuññalakkhaṇaṁ.
vv64:28.1	Tamaddasaṁ kuñjaramoghatiṇṇaṁ,
vv64:28.2	Suvaṇṇasiṅgīnadabimbasādisaṁ;
vv64:28.3	Disvāna taṁ khippamahuṁ sucīmano,
vv64:28.4	Tameva disvāna subhāsitaddhajaṁ.
vv64:29.1	Tamannapānaṁ athavāpi cīvaraṁ,
vv64:29.2	Suciṁ paṇītaṁ rasasā upetaṁ;
vv64:29.3	Pupphābhikkiṇamhi sake nivesane,
vv64:29.4	Patiṭṭhapesiṁ sa asaṅgamānaso.
vv64:30.1	Tamannapānena ca cīvarena ca,
vv64:30.2	Khajjena bhojjena ca sāyanena ca;
vv64:30.3	Santappayitvā dvipadānamuttamaṁ,
vv64:30.4	So saggaso devapure ramāmahaṁ.
vv64:31.1	Etenupāyena imaṁ niraggaḷaṁ,
vv64:31.2	Yaññaṁ yajitvā tividhaṁ visuddhaṁ;
vv64:31.3	Pahāyahaṁ mānusakaṁ samussayaṁ,
vv64:31.4	Indūpamo devapure ramāmahaṁ.
vv64:32.1	Āyuñca vaṇṇañca sukhaṁ balañca,
vv64:32.2	Paṇītarūpaṁ abhikaṅkhatā muni;
vv64:32.3	Annañca pānañca bahuṁ susaṅkhataṁ,
vv64:32.4	Patiṭṭhapetabbamasaṅgamānase.
vv64:33.1	Nayimasmiṁ loke parasmiṁ vā pana,
vv64:33.2	Buddhena seṭṭho va samo va vijjati;
vv64:33.3	Āhuneyyānaṁ paramāhutiṁ gato,
vv64:33.4	Puññatthikānaṁ vipulapphalesinan”ti.
vv64:34.1	Mahārathavimānaṁ cuddasamaṁ.
vv64:34.2	Mahārathavaggo pañcamo.
vv64:35.1	Tassuddānaṁ
vv64:36.1	Maṇḍūko revatī chatto,
vv64:36.2	Kakkaṭo dvārapālako;
vv64:36.3	Dve karaṇīyā dve sūci,
vv64:36.4	Tayo nāgā ca dve rathā;
vv64:36.5	Purisānaṁ paṭhamo vaggo pavuccatīti.
vv64:37.1	Bhāṇavāraṁ tatiyaṁ.
vv65:0.1	Vimānavatthu
vv65:0.2	Purisavimāna
vv65:0.3	Pāyāsivagga
vv65:0.4	1. Paṭhamaagāriyavimānavatthu
vv65:1.1	“Yathā vanaṁ cittalataṁ pabhāsati,
vv65:1.2	Uyyānaseṭṭhaṁ tidasānamuttamaṁ;
vv65:1.3	Tathūpamaṁ tuyhamidaṁ vimānaṁ,
vv65:1.4	Obhāsayaṁ tiṭṭhati antalikkhe.
vv65:2.1	Deviddhipattosi mahānubhāvo,
vv65:2.2	Manussabhūto kimakāsi puññaṁ;
vv65:2.3	Kenāsi evaṁ jalitānubhāvo,
vv65:2.4	Vaṇṇo ca te sabbadisā pabhāsatī”ti.
vv65:3.1	So devaputto attamano,
vv65:3.2	moggallānena pucchito;
vv65:3.3	Pañhaṁ puṭṭho viyākāsi,
vv65:3.4	yassa kammassidaṁ phalaṁ.
vv65:4.1	“Ahañca bhariyā ca manussaloke,
vv65:4.2	Opānabhūtā gharamāvasimha;
vv65:4.3	Annañca pānañca pasannacittā,
vv65:4.4	Sakkacca dānaṁ vipulaṁ adamha.
vv65:5.1	Tena metādiso vaṇṇo,
vv65:5.2	…pe…
vv65:5.3	Vaṇṇo ca me sabbadisā pabhāsatī”ti.
vv65:6.1	Paṭhamaagāriyavimānaṁ paṭhamaṁ.
vv66:0.1	Vimānavatthu
vv66:0.2	Purisavimāna
vv66:0.3	Pāyāsivagga
vv66:0.4	2. Dutiyaagāriyavimānavatthu
vv66:1.1	“Yathā vanaṁ cittalataṁ pabhāsati,
vv66:1.2	Uyyānaseṭṭhaṁ tidasānamuttamaṁ;
vv66:1.3	Tathūpamaṁ tuyhamidaṁ vimānaṁ,
vv66:1.4	Obhāsayaṁ tiṭṭhati antalikkhe.
vv66:2.1	Deviddhipattosi mahānubhāvo,
vv66:2.2	Manussabhūto kimakāsi puññaṁ;
vv66:2.3	Kenāsi evaṁ jalitānubhāvo,
vv66:2.4	Vaṇṇo ca te sabbadisā pabhāsatī”ti.
vv66:3.1	So devaputto attamano,
vv66:3.2	…pe…
vv66:3.3	yassa kammassidaṁ phalaṁ.
vv66:4.1	“Ahañca bhariyā ca manussaloke,
vv66:4.2	Opānabhūtā gharamāvasimha;
vv66:4.3	Annañca pānañca pasannacittā,
vv66:4.4	Sakkacca dānaṁ vipulaṁ adamha.
vv66:5.1	Tena metādiso vaṇṇo,
vv66:5.2	…pe…
vv66:5.3	Vaṇṇo ca me sabbadisā pabhāsatī”ti.
vv66:6.1	Dutiyaagāriyavimānaṁ dutiyaṁ.
vv67:0.1	Vimānavatthu
vv67:0.2	Purisavimāna
vv67:0.3	Pāyāsivagga
vv67:0.4	3. Phaladāyakavimānavatthu
vv67:1.1	“Uccamidaṁ maṇithūṇaṁ vimānaṁ,
vv67:1.2	Samantato soḷasa yojanāni;
vv67:1.3	Kūṭāgārā sattasatā uḷārā,
vv67:1.4	Veḷuriyathambhā rucakatthatā subhā.
vv67:2.1	Tatthacchasi pivasi khādasi ca,
vv67:2.2	Dibbā ca vīṇā pavadanti vagguṁ;
vv67:2.3	Aṭṭhaṭṭhakā sikkhitā sādhurūpā,
vv67:2.4	Dibbā ca kaññā tidasacarā uḷārā;
vv67:2.5	Naccanti gāyanti pamodayanti.
vv67:3.1	Deviddhipattosi mahānubhāvo,
vv67:3.2	Manussabhūto kimakāsi puññaṁ;
vv67:3.3	Kenāsi evaṁ jalitānubhāvo,
vv67:3.4	Vaṇṇo ca te sabbadisā pabhāsatī”ti.
vv67:4.1	So devaputto attamano,
vv67:4.2	…pe…
vv67:4.3	Yassa kammassidaṁ phalaṁ.
vv67:5.1	“Phaladāyī phalaṁ vipulaṁ labhati,
vv67:5.2	Dadamujugatesu pasannamānaso;
vv67:5.3	So hi pamodati saggagato tidive,
vv67:5.4	Anubhoti ca puññaphalaṁ vipulaṁ.
vv67:6.1	Tavevāhaṁ mahāmuni,
vv67:6.2	Adāsiṁ caturo phale.
vv67:7.1	Tasmā hi phalaṁ alameva dātuṁ,
vv67:7.2	Niccaṁ manussena sukhatthikena;
vv67:7.3	Dibbāni vā patthayatā sukhāni,
vv67:7.4	Manussasobhaggatamicchatā vā.
vv67:8.1	Tena metādiso vaṇṇo,
vv67:8.2	…pe…
vv67:8.3	Vaṇṇo ca me sabbadisā pabhāsatī”ti.
vv67:9.1	Phaladāyakavimānaṁ tatiyaṁ.
vv68:0.1	Vimānavatthu
vv68:0.2	Purisavimāna
vv68:0.3	Pāyāsivagga
vv68:0.4	4. Paṭhamaupassayadāyakavimānavatthu
vv68:1.1	“Cando yathā vigatavalāhake nabhe,
vv68:1.2	Obhāsayaṁ gacchati antalikkhe;
vv68:1.3	Tathūpamaṁ tuyhamidaṁ vimānaṁ,
vv68:1.4	Obhāsayaṁ tiṭṭhati antalikkhe.
vv68:2.1	Deviddhipattosi mahānubhāvo,
vv68:2.2	Manussabhūto kimakāsi puññaṁ;
vv68:2.3	Kenāsi evaṁ jalitānubhāvo,
vv68:2.4	Vaṇṇo ca te sabbadisā pabhāsatī”ti.
vv68:3.1	So devaputto attamano,
vv68:3.2	…pe…
vv68:3.3	yassa kammassidaṁ phalaṁ.
vv68:4.1	“Ahañca bhariyā ca manussaloke,
vv68:4.2	Upassayaṁ arahato adamha;
vv68:4.3	Annañca pānañca pasannacittā,
vv68:4.4	Sakkacca dānaṁ vipulaṁ adamha.
vv68:5.1	Tena metādiso vaṇṇo,
vv68:5.2	…pe…
vv68:5.3	Vaṇṇo ca me sabbadisā pabhāsatī”ti.
vv68:6.1	Paṭhamaupassayadāyakavimānaṁ catutthaṁ.
vv69:0.1	Vimānavatthu
vv69:0.2	Purisavimāna
vv69:0.3	Pāyāsivagga
vv69:0.4	5. Dutiyaupassayadāyakavimānavatthu
vv69:1.1	Suriyo yathā vigatavalāhake nabhe,
vv69:1.2	…pe…
vv69:2.1	(Yathā purimavimānaṁ tathā vitthāretabbaṁ.)
vv69:3.1	“Tena metādiso vaṇṇo,
vv69:3.2	…pe…
vv69:3.3	Vaṇṇo ca me sabbadisā pabhāsatī”ti.
vv69:4.1	Dutiyaupassayadāyakavimānaṁ pañcamaṁ.
vv70:0.1	Vimānavatthu
vv70:0.2	Purisavimāna
vv70:0.3	Pāyāsivagga
vv70:0.4	6. Bhikkhādāyakavimānavatthu
vv70:1.1	“Uccamidaṁ maṇithūṇaṁ vimānaṁ,
vv70:1.2	Samantato dvādasa yojanāni;
vv70:1.3	Kūṭāgārā sattasatā uḷārā,
vv70:1.4	Veḷuriyathambhā rucakatthatā subhā.
vv70:2.1	Deviddhipattosi mahānubhāvo,
vv70:2.2	Manussabhūto kimakāsi puññaṁ;
vv70:2.3	Kenāsi evaṁ jalitānubhāvo,
vv70:2.4	Vaṇṇo ca te sabbadisā pabhāsatī”ti.
vv70:3.1	So devaputto attamano,
vv70:3.2	…pe…
vv70:3.3	yassa kammassidaṁ phalaṁ.
vv70:4.1	“Ahaṁ manussesu manussabhūto,
vv70:4.2	Disvāna bhikkhuṁ tasitaṁ kilantaṁ;
vv70:4.3	Ekāhaṁ bhikkhaṁ paṭipādayissaṁ,
vv70:4.4	Samaṅgi bhattena tadā akāsiṁ.
vv70:5.1	Tena metādiso vaṇṇo,
vv70:5.2	…pe…
vv70:5.3	Vaṇṇo ca me sabbadisā pabhāsatī”ti.
vv70:6.1	Bhikkhādāyakavimānaṁ chaṭṭhaṁ.
vv71:0.1	Vimānavatthu
vv71:0.2	Purisavimāna
vv71:0.3	Pāyāsivagga
vv71:0.4	7. Yavapālakavimānavatthu
vv71:1.1	“Uccamidaṁ maṇithūṇaṁ vimānaṁ,
vv71:1.2	…pe…
vv71:1.3	Vaṇṇo ca te sabbadisā pabhāsatī”ti.
vv71:2.1	So devaputto attamano,
vv71:2.2	…pe…
vv71:2.3	yassa kammassidaṁ phalaṁ.
vv71:3.1	“Ahaṁ manussesu manussabhūto,
vv71:3.2	Ahosiṁ yavapālako;
vv71:3.3	Addasaṁ virajaṁ bhikkhuṁ,
vv71:3.4	Vippasannamanāvilaṁ.
vv71:4.1	Tassa adāsahaṁ bhāgaṁ,
vv71:4.2	pasanno sehi pāṇibhi;
vv71:4.3	Kummāsapiṇḍaṁ datvāna,
vv71:4.4	modāmi nandane vane.
vv71:5.1	Tena metādiso vaṇṇo,
vv71:5.2	…pe…
vv71:5.3	Vaṇṇo ca me sabbadisā pabhāsatī”ti.
vv71:6.1	Yavapālakavimānaṁ sattamaṁ.
vv72:0.1	Vimānavatthu
vv72:0.2	Purisavimāna
vv72:0.3	Pāyāsivagga
vv72:0.4	8. Paṭhamakuṇḍalīvimānavatthu
vv72:1.1	“Alaṅkato malyadharo suvattho,
vv72:1.2	Sukuṇḍalī kappitakesamassu;
vv72:1.3	Āmuttahatthābharaṇo yasassī,
vv72:1.4	Dibbe vimānamhi yathāpi candimā.
vv72:2.1	Dibbā ca vīṇā pavadanti vagguṁ,
vv72:2.2	Aṭṭhaṭṭhakā sikkhitā sādhurūpā;
vv72:2.3	Dibbā ca kaññā tidasacarā uḷārā,
vv72:2.4	Naccanti gāyanti pamodayanti.
vv72:3.1	Deviddhipattosi mahānubhāvo,
vv72:3.2	Manussabhūto kimakāsi puññaṁ;
vv72:3.3	Kenāsi evaṁ jalitānubhāvo,
vv72:3.4	Vaṇṇo ca te sabbadisā pabhāsatī”ti.
vv72:4.1	So devaputto attamano,
vv72:4.2	…pe…
vv72:4.3	yassa kammassidaṁ phalaṁ.
vv72:5.1	“Ahaṁ manussesu manussabhūto,
vv72:5.2	Disvāna samaṇe sīlavante;
vv72:5.3	Sampannavijjācaraṇe yasassī,
vv72:5.4	Bahussute taṇhakkhayūpapanne;
vv72:5.5	Annañca pānañca pasannacitto,
vv72:5.6	Sakkacca dānaṁ vipulaṁ adāsiṁ.
vv72:6.1	Tena metādiso vaṇṇo,
vv72:6.2	…pe…
vv72:6.3	Vaṇṇo ca me sabbadisā pabhāsatī”ti.
vv72:7.1	Paṭhamakuṇḍalīvimānaṁ aṭṭhamaṁ.
vv73:0.1	Vimānavatthu
vv73:0.2	Purisavimāna
vv73:0.3	Pāyāsivagga
vv73:0.4	9. Dutiyakuṇḍalīvimānavatthu
vv73:1.1	“Alaṅkato malyadharo suvattho,
vv73:1.2	Sukuṇḍalī kappitakesamassu;
vv73:1.3	Āmuttahatthābharaṇo yasassī,
vv73:1.4	Dibbe vimānamhi yathāpi candimā.
vv73:2.1	Dibbā ca vīṇā pavadanti vagguṁ,
vv73:2.2	Aṭṭhaṭṭhakā sikkhitā sādhurūpā;
vv73:2.3	Dibbā ca kaññā tidasacarā uḷārā,
vv73:2.4	Naccanti gāyanti pamodayanti.
vv73:3.1	Deviddhipattosi mahānubhāvo,
vv73:3.2	Manussabhūto kimakāsi puññaṁ;
vv73:3.3	Kenāsi evaṁ jalitānubhāvo,
vv73:3.4	Vaṇṇo ca te sabbadisā pabhāsatī”ti.
vv73:4.1	So devaputto attamano,
vv73:4.2	…pe…
vv73:4.3	yassa kammassidaṁ phalaṁ.
vv73:5.1	“Ahaṁ manussesu manussabhūto,
vv73:5.2	Disvāna samaṇe sādhurūpe;
vv73:5.3	Sampannavijjācaraṇe yasassī,
vv73:5.4	Bahussute sīlavante pasanne;
vv73:5.5	Annañca pānañca pasannacitto,
vv73:5.6	Sakkacca dānaṁ vipulaṁ adāsiṁ.
vv73:6.1	Tena metādiso vaṇṇo,
vv73:6.2	…pe…
vv73:6.3	Vaṇṇo ca me sabbadisā pabhāsatī”ti.
vv73:7.1	Dutiyakuṇḍalīvimānaṁ navamaṁ.
vv74:0.1	Vimānavatthu
vv74:0.2	Purisavimāna
vv74:0.3	Pāyāsivagga
vv74:0.4	10. (Uttara) Pāyāsivimānavatthu
vv74:1.1	“Yā devarājassa sabhā sudhammā,
vv74:1.2	Yatthacchati devasaṅgho samaggo;
vv74:1.3	Tathūpamaṁ tuyhamidaṁ vimānaṁ,
vv74:1.4	Obhāsayaṁ tiṭṭhati antalikkhe.
vv74:2.1	Deviddhipattosi mahānubhāvo,
vv74:2.2	Manussabhūto kimakāsi puññaṁ;
vv74:2.3	Kenāsi evaṁ jalitānubhāvo,
vv74:2.4	Vaṇṇo ca te sabbadisā pabhāsatī”ti.
vv74:3.1	So devaputto attamano,
vv74:3.2	…pe…
vv74:3.3	yassa kammassidaṁ phalaṁ.
vv74:4.1	“Ahaṁ manussesu manussabhūto,
vv74:4.2	Rañño pāyāsissa ahosiṁ māṇavo;
vv74:4.3	Laddhā dhanaṁ saṁvibhāgaṁ akāsiṁ,
vv74:4.4	Piyā ca me sīlavanto ahesuṁ;
vv74:4.5	Annañca pānañca pasannacitto,
vv74:4.6	Sakkacca dānaṁ vipulaṁ adāsiṁ.
vv74:5.1	Tena metādiso vaṇṇo,
vv74:5.2	…pe…
vv74:5.3	Vaṇṇo ca me sabbadisā pabhāsatī”ti.
vv74:6.1	Pāyāsivimānaṁ dasamaṁ.
vv74:7.1	Pāyāsivaggo chaṭṭho.
vv74:8.1	Tassuddānaṁ
vv74:9.1	Dve agārino phaladāyī,
vv74:9.2	Dve upassayadāyī bhikkhāya dāyī;
vv74:9.3	Yavapālako ceva dve,
vv74:9.4	Kuṇḍalino pāyāsīti.
vv74:10.1	Purisānaṁ dutiyo vaggo pavuccatīti.
vv75:0.1	Vimānavatthu
vv75:0.2	Purisavimāna
vv75:0.3	Sunikkhittavagga
vv75:0.4	1. Cittalatāvimānavatthu
vv75:1.1	“Yathā vanaṁ cittalataṁ pabhāsati,
vv75:1.2	Uyyānaseṭṭhaṁ tidasānamuttamaṁ;
vv75:1.3	Tathūpamaṁ tuyhamidaṁ vimānaṁ,
vv75:1.4	Obhāsayaṁ tiṭṭhati antalikkhe.
vv75:2.1	Deviddhipattosi mahānubhāvo,
vv75:2.2	Manussabhūto kimakāsi puññaṁ;
vv75:2.3	Kenāsi evaṁ jalitānubhāvo,
vv75:2.4	Vaṇṇo ca te sabbadisā pabhāsatī”ti.
vv75:3.1	So devaputto attamano,
vv75:3.2	…pe…
vv75:3.3	yassa kammassidaṁ phalaṁ.
vv75:4.1	“Ahaṁ manussesu manussabhūto,
vv75:4.2	Daliddo atāṇo kapaṇo kammakaro ahosiṁ;
vv75:4.3	Jiṇṇe ca mātāpitaro abhāriṁ,
vv75:4.4	Piyā ca me sīlavanto ahesuṁ;
vv75:4.5	Annañca pānañca pasannacitto,
vv75:4.6	Sakkacca dānaṁ vipulaṁ adāsiṁ.
vv75:5.1	Tena metādiso vaṇṇo,
vv75:5.2	…pe…
vv75:5.3	Vaṇṇo ca me sabbadisā pabhāsatī”ti.
vv75:6.1	Cittalatāvimānaṁ paṭhamaṁ.
vv76:0.1	Vimānavatthu
vv76:0.2	Purisavimāna
vv76:0.3	Sunikkhittavagga
vv76:0.4	2. Nandanavimānavatthu
vv76:1.1	“Yathā vanaṁ nandanaṁ pabhāsati,
vv76:1.2	Uyyānaseṭṭhaṁ tidasānamuttamaṁ;
vv76:1.3	Tathūpamaṁ tuyhamidaṁ vimānaṁ,
vv76:1.4	Obhāsayaṁ tiṭṭhati antalikkhe.
vv76:2.1	Deviddhipattosi mahānubhāvo,
vv76:2.2	Manussabhūto kimakāsi puññaṁ;
vv76:2.3	Kenāsi evaṁ jalitānubhāvo,
vv76:2.4	Vaṇṇo ca te sabbadisā pabhāsatī”ti.
vv76:3.1	So devaputto attamano,
vv76:3.2	…pe…
vv76:3.3	yassa kammassidaṁ phalaṁ.
vv76:4.1	“Ahaṁ manussesu manussabhūto,
vv76:4.2	Daliddo atāṇo kapaṇo kammakaro ahosiṁ;
vv76:4.3	Jiṇṇe ca mātāpitaro abhāriṁ,
vv76:4.4	Piyā ca me sīlavanto ahesuṁ;
vv76:4.5	Annañca pānañca pasannacitto,
vv76:4.6	Sakkacca dānaṁ vipulaṁ adāsiṁ.
vv76:5.1	Tena metādiso vaṇṇo,
vv76:5.2	…pe…
vv76:5.3	Vaṇṇo ca me sabbadisā pabhāsatī”ti.
vv76:6.1	Nandanavimānaṁ dutiyaṁ.
vv77:0.1	Vimānavatthu
vv77:0.2	Purisavimāna
vv77:0.3	Sunikkhittavagga
vv77:0.4	3. Maṇithūṇavimānavatthu
vv77:1.1	“Uccamidaṁ maṇithūṇaṁ vimānaṁ,
vv77:1.2	Samantato dvādasa yojanāni;
vv77:1.3	Kūṭāgārā sattasatā uḷārā,
vv77:1.4	Veḷuriyathambhā rucakatthatā subhā.
vv77:2.1	Tatthacchasi pivasi khādasi ca,
vv77:2.2	Dibbā ca vīṇā pavadanti vagguṁ;
vv77:2.3	Dibbā rasā kāmaguṇettha pañca,
vv77:2.4	Nāriyo ca naccanti suvaṇṇachannā.
vv77:3.1	Kena tetādiso vaṇṇo,
vv77:3.2	…pe…
vv77:3.3	vaṇṇo ca te sabbadisā pabhāsatī”ti.
vv77:4.1	So devaputto attamano,
vv77:4.2	…pe…
vv77:4.3	yassa kammassidaṁ phalaṁ.
vv77:5.1	“Ahaṁ manussesu manussabhūto,
vv77:5.2	Vivane pathe saṅkamanaṁ akāsiṁ;
vv77:5.3	Ārāmarukkhāni ca ropayissaṁ,
vv77:5.4	Piyā ca me sīlavanto ahesuṁ;
vv77:5.5	Annañca pānañca pasannacitto,
vv77:5.6	Sakkacca dānaṁ vipulaṁ adāsiṁ.
vv77:6.1	Tena metādiso vaṇṇo,
vv77:6.2	…pe…
vv77:6.3	Vaṇṇo ca me sabbadisā pabhāsatī”ti.
vv77:7.1	Maṇithūṇavimānaṁ tatiyaṁ.
vv78:0.1	Vimānavatthu
vv78:0.2	Purisavimāna
vv78:0.3	Sunikkhittavagga
vv78:0.4	4. Suvaṇṇavimānavatthu
vv78:1.1	“Sovaṇṇamaye pabbatasmiṁ,
vv78:1.2	vimānaṁ sabbatopabhaṁ;
vv78:1.3	Hemajālapaṭicchannaṁ,
vv78:1.4	kiṅkiṇijālakappitaṁ.
vv78:2.1	Aṭṭhaṁsā sukatā thambhā,
vv78:2.2	sabbe veḷuriyāmayā;
vv78:2.3	Ekamekāya aṁsiyā,
vv78:2.4	ratanā satta nimmitā.
vv78:3.1	Veḷuriyasuvaṇṇassa,
vv78:3.2	phalikā rūpiyassa ca;
vv78:3.3	Masāragallamuttāhi,
vv78:3.4	lohitaṅgamaṇīhi ca.
vv78:4.1	Citrā manoramā bhūmi,
vv78:4.2	na tatthuddhaṁsatī rajo;
vv78:4.3	Gopānasīgaṇā pītā,
vv78:4.4	kūṭaṁ dhārenti nimmitā.
vv78:5.1	Sopānāni ca cattāri,
vv78:5.2	nimmitā caturo disā;
vv78:5.3	Nānāratanagabbhehi,
vv78:5.4	ādiccova virocati.
vv78:6.1	Vediyā catasso tattha,
vv78:6.2	vibhattā bhāgaso mitā;
vv78:6.3	Daddallamānā ābhanti,
vv78:6.4	samantā caturo disā.
vv78:7.1	Tasmiṁ vimāne pavare,
vv78:7.2	devaputto mahappabho;
vv78:7.3	Atirocasi vaṇṇena,
vv78:7.4	udayantova bhāṇumā.
vv78:8.1	Dānassa te idaṁ phalaṁ,
vv78:8.2	atho sīlassa vā pana;
vv78:8.3	Atho añjalikammassa,
vv78:8.4	taṁ me akkhāhi pucchito”.
vv78:9.1	So devaputto attamano,
vv78:9.2	…pe…
vv78:9.3	yassa kammassidaṁ phalaṁ.
vv78:10.1	“Ahaṁ andhakavindasmiṁ,
vv78:10.2	buddhassādiccabandhuno;
vv78:10.3	Vihāraṁ satthu kāresiṁ,
vv78:10.4	pasanno sehi pāṇibhi.
vv78:11.1	Tattha gandhañca mālañca,
vv78:11.2	paccayañca vilepanaṁ;
vv78:11.3	Vihāraṁ satthu adāsiṁ,
vv78:11.4	vippasannena cetasā;
vv78:11.5	Tena mayhaṁ idaṁ laddhaṁ,
vv78:11.6	vasaṁ vattemi nandane.
vv78:12.1	Nandane ca vane ramme,
vv78:12.2	nānādijagaṇāyute;
vv78:12.3	Ramāmi naccagītehi,
vv78:12.4	accharāhi purakkhato”ti.
vv78:13.1	Suvaṇṇavimānaṁ catutthaṁ.
vv79:0.1	Vimānavatthu
vv79:0.2	Purisavimāna
vv79:0.3	Sunikkhittavagga
vv79:0.4	5. Ambavimānavatthu
vv79:1.1	“Uccamidaṁ maṇithūṇaṁ vimānaṁ,
vv79:1.2	Samantato dvādasa yojanāni;
vv79:1.3	Kūṭāgārā sattasatā uḷārā,
vv79:1.4	Veḷuriyathambhā rucakatthatā subhā.
vv79:2.1	Tatthacchasi pivasi khādasi ca,
vv79:2.2	Dibbā ca vīṇā pavadanti vagguṁ;
vv79:2.3	Dibbā rasā kāmaguṇettha pañca,
vv79:2.4	Nāriyo ca naccanti suvaṇṇachannā.
vv79:3.1	Kena tetādiso vaṇṇo,
vv79:3.2	…pe…
vv79:3.3	Vaṇṇo ca te sabbadisā pabhāsatī”ti.
vv79:4.1	So devaputto attamano,
vv79:4.2	…pe…
vv79:4.3	yassa kammassidaṁ phalaṁ.
vv79:5.1	“Gimhānaṁ pacchime māse,
vv79:5.2	patapante divaṅkare;
vv79:5.3	Paresaṁ bhatako poso,
vv79:5.4	ambārāmamasiñcati.
vv79:6.1	Atha tenāgamā bhikkhu,
vv79:6.2	sāriputtoti vissuto;
vv79:6.3	Kilantarūpo kāyena,
vv79:6.4	akilantova cetasā.
vv79:7.1	Tañca disvāna āyantaṁ,
vv79:7.2	Avocaṁ ambasiñcako;
vv79:7.3	Sādhu taṁ bhante nhāpeyyaṁ,
vv79:7.4	Yaṁ mamassa sukhāvahaṁ.
vv79:8.1	Tassa me anukampāya,
vv79:8.2	nikkhipi pattacīvaraṁ;
vv79:8.3	Nisīdi rukkhamūlasmiṁ,
vv79:8.4	chāyāya ekacīvaro.
vv79:9.1	Tañca acchena vārinā,
vv79:9.2	pasannamānaso naro;
vv79:9.3	Nhāpayī rukkhamūlasmiṁ,
vv79:9.4	chāyāya ekacīvaraṁ.
vv79:10.1	Ambo ca sitto samaṇo ca nhāpito,
vv79:10.2	Mayā ca puññaṁ pasutaṁ anappakaṁ;
vv79:10.3	Iti so pītiyā kāyaṁ,
vv79:10.4	Sabbaṁ pharati attano.
vv79:11.1	Tadeva ettakaṁ kammaṁ,
vv79:11.2	akāsiṁ tāya jātiyā;
vv79:11.3	Pahāya mānusaṁ dehaṁ,
vv79:11.4	upapannomhi nandanaṁ.
vv79:12.1	Nandane ca vane ramme,
vv79:12.2	nānādijagaṇāyute;
vv79:12.3	Ramāmi naccagītehi,
vv79:12.4	accharāhi purakkhato”ti.
vv79:13.1	Ambavimānaṁ pañcamaṁ.
vv80:0.1	Vimānavatthu
vv80:0.2	Purisavimāna
vv80:0.3	Sunikkhittavagga
vv80:0.4	6. Gopālavimānavatthu
vv80:1.1	“Disvāna devaṁ paṭipucchi bhikkhu,
vv80:1.2	Ucce vimānamhi ciraṭṭhitike;
vv80:1.3	Āmuttahatthābharaṇaṁ yasassiṁ,
vv80:1.4	Dibbe vimānamhi yathāpi candimā.
vv80:2.1	Alaṅkato malyadharo suvattho,
vv80:2.2	Sukuṇḍalī kappitakesamassu;
vv80:2.3	Āmuttahatthābharaṇo yasassī,
vv80:2.4	Dibbe vimānamhi yathāpi candimā.
vv80:3.1	Dibbā ca vīṇā pavadanti vagguṁ,
vv80:3.2	Aṭṭhaṭṭhakā sikkhitā sādhurūpā;
vv80:3.3	Dibbā ca kaññā tidasacarā uḷārā,
vv80:3.4	Naccanti gāyanti pamodayanti.
vv80:4.1	Deviddhipattosi mahānubhāvo,
vv80:4.2	Manussabhūto kimakāsi puññaṁ;
vv80:4.3	Kenāsi evaṁ jalitānubhāvo,
vv80:4.4	Vaṇṇo ca te sabbadisā pabhāsatī”ti.
vv80:5.1	So devaputto attamano,
vv80:5.2	…pe…
vv80:5.3	yassa kammassidaṁ phalaṁ.
vv80:6.1	“Ahaṁ manussesu manussabhūto,
vv80:6.2	Saṅgamma rakkhissaṁ paresaṁ dhenuyo;
vv80:6.3	Tato ca āgā samaṇo mamantike,
vv80:6.4	Gāvo ca māse agamaṁsu khādituṁ.
vv80:7.1	Dvayajja kiccaṁ ubhayañca kāriyaṁ,
vv80:7.2	Iccevahaṁ bhante tadā vicintayiṁ;
vv80:7.3	Tato ca saññaṁ paṭiladdha yoniso,
vv80:7.4	Dadāmi bhanteti khipiṁ anantakaṁ.
vv80:8.1	So māsakhettaṁ turito avāsariṁ,
vv80:8.2	Purā ayaṁ bhañjati yassidaṁ dhanaṁ;
vv80:8.3	Tato ca kaṇho urago mahāviso,
vv80:8.4	Aḍaṁsi pāde turitassa me sato.
vv80:9.1	Svāhaṁ aṭṭomhi dukkhena pīḷito,
vv80:9.2	Bhikkhu ca taṁ sāmaṁ muñcitvānantakaṁ;
vv80:9.3	Ahāsi kummāsaṁ mamānukampayā,
vv80:9.4	Tato cuto kālakatomhi devatā.
vv80:10.1	Tadeva kammaṁ kusalaṁ kataṁ mayā,
vv80:10.2	Sukhañca kammaṁ anubhomi attanā;
vv80:10.3	Tayā hi bhante anukampito bhusaṁ,
vv80:10.4	Kataññutāya abhivādayāmi taṁ.
vv80:11.1	Sadevake loke samārake ca,
vv80:11.2	Añño muni natthi tayānukampako;
vv80:11.3	Tayā hi bhante anukampito bhusaṁ,
vv80:11.4	Kataññutāya abhivādayāmi taṁ.
vv80:12.1	Imasmiṁ loke parasmiṁ vā pana,
vv80:12.2	Añño munī natthi tayānukampako;
vv80:12.3	Tayā hi bhante anukampito bhusaṁ,
vv80:12.4	Kataññutāya abhivādayāmi tan”ti.
vv80:13.1	Gopālavimānaṁ chaṭṭhaṁ.
vv81:0.1	Vimānavatthu
vv81:0.2	Purisavimāna
vv81:0.3	Sunikkhittavagga
vv81:0.4	7. Kaṇḍakavimānavatthu
vv81:1.1	“Puṇṇamāse yathā cando,
vv81:1.2	nakkhattaparivārito;
vv81:1.3	Samantā anupariyāti,
vv81:1.4	tārakādhipatī sasī.
vv81:2.1	Tathūpamaṁ idaṁ byamhaṁ,
vv81:2.2	dibbaṁ devapuramhi ca;
vv81:2.3	Atirocati vaṇṇena,
vv81:2.4	udayantova raṁsimā.
vv81:3.1	Veḷuriyasuvaṇṇassa,
vv81:3.2	phalikā rūpiyassa ca;
vv81:3.3	Masāragallamuttāhi,
vv81:3.4	lohitaṅgamaṇīhi ca.
vv81:4.1	Citrā manoramā bhūmi,
vv81:4.2	veḷūriyassa santhatā;
vv81:4.3	Kūṭāgārā subhā rammā,
vv81:4.4	pāsādo te sumāpito.
vv81:5.1	Rammā ca te pokkharaṇī,
vv81:5.2	puthulomanisevitā;
vv81:5.3	Acchodakā vippasannā,
vv81:5.4	sovaṇṇavālukasanthatā.
vv81:6.1	Nānāpadumasañchannā,
vv81:6.2	puṇḍarīkasamotatā;
vv81:6.3	Surabhiṁ sampavāyanti,
vv81:6.4	manuññā māluteritā.
vv81:7.1	Tassā te ubhato passe,
vv81:7.2	vanagumbā sumāpitā;
vv81:7.3	Upetā puppharukkhehi,
vv81:7.4	phalarukkhehi cūbhayaṁ.
vv81:8.1	Sovaṇṇapāde pallaṅke,
vv81:8.2	muduke gonakatthate;
vv81:8.3	Nisinnaṁ devarājaṁva,
vv81:8.4	upatiṭṭhanti accharā.
vv81:9.1	Sabbābharaṇasañchannā,
vv81:9.2	nānāmālāvibhūsitā;
vv81:9.3	Ramenti taṁ mahiddhikaṁ,
vv81:9.4	vasavattīva modasi.
vv81:10.1	Bherisaṅkhamudiṅgāhi,
vv81:10.2	vīṇāhi paṇavehi ca;
vv81:10.3	Ramasi ratisampanno,
vv81:10.4	naccagīte suvādite.
vv81:11.1	Dibbā te vividhā rūpā,
vv81:11.2	dibbā saddā atho rasā;
vv81:11.3	Gandhā ca te adhippetā,
vv81:11.4	phoṭṭhabbā ca manoramā.
vv81:12.1	Tasmiṁ vimāne pavare,
vv81:12.2	devaputta mahappabho;
vv81:12.3	Atirocasi vaṇṇena,
vv81:12.4	udayantova bhāṇumā.
vv81:13.1	Dānassa te idaṁ phalaṁ,
vv81:13.2	atho sīlassa vā pana;
vv81:13.3	Atho añjalikammassa,
vv81:13.4	taṁ me akkhāhi pucchito”.
vv81:14.1	So devaputto attamano,
vv81:14.2	…pe…
vv81:14.3	yassa kammassidaṁ phalaṁ.
vv81:15.1	“Ahaṁ kapilavatthusmiṁ,
vv81:15.2	sākiyānaṁ puruttame;
vv81:15.3	Suddhodanassa puttassa,
vv81:15.4	kaṇḍako sahajo ahaṁ.
vv81:16.1	Yadā so aḍḍharattāyaṁ,
vv81:16.2	bodhāya mabhinikkhami;
vv81:16.3	So maṁ mudūhi pāṇīhi,
vv81:16.4	jāli tambanakhehi ca.
vv81:17.1	Satthiṁ ākoṭayitvāna,
vv81:17.2	vaha sammāti cabravi;
vv81:17.3	Ahaṁ lokaṁ tārayissaṁ,
vv81:17.4	patto sambodhimuttamaṁ.
vv81:18.1	Taṁ me giraṁ suṇantassa,
vv81:18.2	hāso me vipulo ahu;
vv81:18.3	Udaggacitto sumano,
vv81:18.4	abhisīsiṁ tadā ahaṁ.
vv81:19.1	Abhirūḷhañca maṁ ñatvā,
vv81:19.2	sakyaputtaṁ mahāyasaṁ;
vv81:19.3	Udaggacitto mudito,
vv81:19.4	vahissaṁ purisuttamaṁ.
vv81:20.1	Paresaṁ vijitaṁ gantvā,
vv81:20.2	uggatasmiṁ divākare;
vv81:20.3	Mamaṁ channañca ohāya,
vv81:20.4	anapekkho so apakkami.
vv81:21.1	Tassa tambanakhe pāde,
vv81:21.2	jivhāya parilehisaṁ;
vv81:21.3	Gacchantañca mahāvīraṁ,
vv81:21.4	rudamāno udikkhisaṁ.
vv81:22.1	Adassanenahaṁ tassa,
vv81:22.2	sakyaputtassa sirīmato;
vv81:22.3	Alatthaṁ garukābādhaṁ,
vv81:22.4	khippaṁ me maraṇaṁ ahu.
vv81:23.1	Tasseva ānubhāvena,
vv81:23.2	vimānaṁ āvasāmidaṁ;
vv81:23.3	Sabbakāmaguṇopetaṁ,
vv81:23.4	dibbaṁ devapuramhi ca.
vv81:24.1	Yañca me ahuvā hāso,
vv81:24.2	saddaṁ sutvāna bodhiyā;
vv81:24.3	Teneva kusalamūlena,
vv81:24.4	phusissaṁ āsavakkhayaṁ.
vv81:25.1	Sace hi bhante gaccheyyāsi,
vv81:25.2	satthu buddhassa santike;
vv81:25.3	Mamāpi naṁ vacanena,
vv81:25.4	sirasā vajjāsi vandanaṁ.
vv81:26.1	Ahampi daṭṭhuṁ gacchissaṁ,
vv81:26.2	jinaṁ appaṭipuggalaṁ;
vv81:26.3	Dullabhaṁ dassanaṁ hoti,
vv81:26.4	lokanāthāna tādinan”ti.
vv81:27.1	So kataññū katavedī,
vv81:27.2	satthāraṁ upasaṅkami;
vv81:27.3	Sutvā giraṁ cakkhumato,
vv81:27.4	dhammacakkhuṁ visodhayi.
vv81:28.1	Visodhetvā diṭṭhigataṁ,
vv81:28.2	vicikicchaṁ vatāni ca;
vv81:28.3	Vanditvā satthuno pāde,
vv81:28.4	tatthevantaradhāyathāti.
vv81:29.1	Kaṇḍakavimānaṁ sattamaṁ.
vv82:0.1	Vimānavatthu
vv82:0.2	Purisavimāna
vv82:0.3	Sunikkhittavagga
vv82:0.4	8. Anekavaṇṇavimānavatthu
vv82:1.1	“Anekavaṇṇaṁ darasokanāsanaṁ,
vv82:1.2	Vimānamāruyha anekacittaṁ;
vv82:1.3	Parivārito accharāsaṅgaṇena,
vv82:1.4	Sunimmito bhūtapatīva modasi.
vv82:2.1	Samassamo natthi kuto panuttaro,
vv82:2.2	Yasena puññena ca iddhiyā ca;
vv82:2.3	Sabbe ca devā tidasagaṇā samecca,
vv82:2.4	Taṁ taṁ namassanti sasiṁva devā;
vv82:2.5	Imā ca te accharāyo samantato,
vv82:2.6	Naccanti gāyanti pamodayanti.
vv82:3.1	Deviddhipattosi mahānubhāvo,
vv82:3.2	Manussabhūto kimakāsi puññaṁ;
vv82:3.3	Kenāsi evaṁ jalitānubhāvo,
vv82:3.4	Vaṇṇo ca te sabbadisā pabhāsatī”ti.
vv82:4.1	So devaputto attamano,
vv82:4.2	…pe…
vv82:4.3	yassa kammassidaṁ phalaṁ.
vv82:5.1	“Ahaṁ bhadante ahuvāsi pubbe,
vv82:5.2	Sumedhanāmassa jinassa sāvako;
vv82:5.3	Puthujjano ananubodhohamasmi,
vv82:5.4	So satta vassāni paribbajissahaṁ.
vv82:6.1	Sohaṁ sumedhassa jinassa satthuno,
vv82:6.2	Parinibbutassoghatiṇṇassa tādino;
vv82:6.3	Ratanuccayaṁ hemajālena channaṁ,
vv82:6.4	Vanditvā thūpasmiṁ manaṁ pasādayiṁ.
vv82:7.1	Na māsi dānaṁ na ca matthi dātuṁ,
vv82:7.2	Pare ca kho tattha samādapesiṁ;
vv82:7.3	Pūjetha naṁ pūjanīyassa dhātuṁ,
vv82:7.4	Evaṁ kira saggamito gamissatha.
vv82:8.1	Tadeva kammaṁ kusalaṁ kataṁ mayā,
vv82:8.2	Sukhañca dibbaṁ anubhomi attanā;
vv82:8.3	Modāmahaṁ tidasagaṇassa majjhe,
vv82:8.4	Na tassa puññassa khayampi ajjhagan”ti.
vv82:9.1	Anekavaṇṇavimānaṁ aṭṭhamaṁ.
vv83:0.1	Vimānavatthu
vv83:0.2	Purisavimāna
vv83:0.3	Sunikkhittavagga
vv83:0.4	9. Maṭṭhakuṇḍalīvimānavatthu
vv83:1.1	“Alaṅkato maṭṭhakuṇḍalī,
vv83:1.2	Māladhārī haricandanussado;
vv83:1.3	Bāhā paggayha kandasi,
vv83:1.4	Vanamajjhe kiṁ dukkhito tuvan”ti.
vv83:2.1	“Sovaṇṇamayo pabhassaro,
vv83:2.2	Uppanno rathapañjaro mama;
vv83:2.3	Tassa cakkayugaṁ na vindāmi,
vv83:2.4	Tena dukkhena jahāmi jīvitan”ti.
vv83:3.1	“Sovaṇṇamayaṁ maṇimayaṁ,
vv83:3.2	Lohitakamayaṁ atha rūpiyamayaṁ;
vv83:3.3	Ācikkha me bhaddamāṇava,
vv83:3.4	Cakkayugaṁ paṭipādayāmi te”ti.
vv83:4.1	So māṇavo tassa pāvadi,
vv83:4.2	“Candasūriyā ubhayettha dissare;
vv83:4.3	Sovaṇṇamayo ratho mama,
vv83:4.4	Tena cakkayugena sobhatī”ti.
vv83:5.1	“Bālo kho tvaṁ asi māṇava,
vv83:5.2	Yo tvaṁ patthayase apatthiyaṁ;
vv83:5.3	Maññāmi tuvaṁ marissasi,
vv83:5.4	Na hi tvaṁ lacchasi candasūriye”ti.
vv83:6.1	“Gamanāgamanampi dissati,
vv83:6.2	Vaṇṇadhātu ubhayattha vīthiyā;
vv83:6.3	Peto kālakato na dissati,
vv83:6.4	Ko nidha kandataṁ bālyataro”ti.
vv83:7.1	“Saccaṁ kho vadesi māṇava,
vv83:7.2	Ahameva kandataṁ bālyataro;
vv83:7.3	Candaṁ viya dārako rudaṁ,
vv83:7.4	Petaṁ kālakatābhipatthayinti.
vv83:8.1	Ādittaṁ vata maṁ santaṁ,
vv83:8.2	ghatasittaṁva pāvakaṁ;
vv83:8.3	Vārinā viya osiñcaṁ,
vv83:8.4	sabbaṁ nibbāpaye daraṁ.
vv83:9.1	Abbahī vata me sallaṁ,
vv83:9.2	sokaṁ hadayanissitaṁ;
vv83:9.3	Yo me sokaparetassa,
vv83:9.4	puttasokaṁ apānudi.
vv83:10.1	Svāhaṁ abbūḷhasallosmi,
vv83:10.2	sītibhūtosmi nibbuto;
vv83:10.3	Na socāmi na rodāmi,
vv83:10.4	tava sutvāna māṇavā”ti.
vv83:11.1	“Devatā nusi gandhabbo,
vv83:11.2	adu sakko purindado;
vv83:11.3	Ko vā tvaṁ kassa vā putto,
vv83:11.4	kathaṁ jānemu taṁ mayan”ti.
vv83:12.1	“Yañca kandasi yañca rodasi,
vv83:12.2	Puttaṁ āḷāhane sayaṁ dahitvā;
vv83:12.3	Svāhaṁ kusalaṁ karitvā kammaṁ,
vv83:12.4	Tidasānaṁ sahabyataṁ gato”ti.
vv83:13.1	“Appaṁ vā bahuṁ vā nāddasāma,
vv83:13.2	Dānaṁ dadantassa sake agāre;
vv83:13.3	Uposathakammaṁ vā tādisaṁ,
vv83:13.4	Kena kammena gatosi devalokan”ti.
vv83:14.1	“Ābādhikohaṁ dukkhito gilāno,
vv83:14.2	Āturarūpomhi sake nivesane;
vv83:14.3	Buddhaṁ vigatarajaṁ vitiṇṇakaṅkhaṁ,
vv83:14.4	Addakkhiṁ sugataṁ anomapaññaṁ.
vv83:15.1	Svāhaṁ muditamano pasannacitto,
vv83:15.2	Añjaliṁ akariṁ tathāgatassa;
vv83:15.3	Tāhaṁ kusalaṁ karitvāna kammaṁ,
vv83:15.4	Tidasānaṁ sahabyataṁ gato”ti.
vv83:16.1	“Acchariyaṁ vata abbhutaṁ vata,
vv83:16.2	Añjalikammassa ayamīdiso vipāko;
vv83:16.3	Ahampi muditamano pasannacitto,
vv83:16.4	Ajjeva buddhaṁ saraṇaṁ vajāmī”ti.
vv83:17.1	“Ajjeva buddhaṁ saraṇaṁ vajāhi,
vv83:17.2	Dhammañca saṅghañca pasannacitto;
vv83:17.3	Tatheva sikkhāya padāni pañca,
vv83:17.4	Akhaṇḍaphullāni samādiyassu.
vv83:18.1	Pāṇātipātā viramassu khippaṁ,
vv83:18.2	Loke adinnaṁ parivajjayassu;
vv83:18.3	Amajjapo mā ca musā bhaṇāhi,
vv83:18.4	Sakena dārena ca hohi tuṭṭho”ti.
vv83:19.1	“Atthakāmosi me yakkha,
vv83:19.2	hitakāmosi devate;
vv83:19.3	Karomi tuyhaṁ vacanaṁ,
vv83:19.4	tvaṁsi ācariyo mamāti.
vv83:20.1	Upemi saraṇaṁ buddhaṁ,
vv83:20.2	dhammañcāpi anuttaraṁ;
vv83:20.3	Saṅghañca naradevassa,
vv83:20.4	gacchāmi saraṇaṁ ahaṁ.
vv83:21.1	Pāṇātipātā viramāmi khippaṁ,
vv83:21.2	Loke adinnaṁ parivajjayāmi;
vv83:21.3	Amajjapo no ca musā bhaṇāmi,
vv83:21.4	Sakena dārena ca homi tuṭṭho”ti.
vv83:22.1	Maṭṭhakuṇḍalīvimānaṁ navamaṁ.
vv84:0.1	Vimānavatthu
vv84:0.2	Purisavimāna
vv84:0.3	Sunikkhittavagga
vv84:0.4	10. Serīsakavimānavatthu
vv84:1.1	“Suṇotha yakkhassa ca vāṇijāna ca,
vv84:1.2	Samāgamo yattha tadā ahosi;
vv84:1.3	Yathā kathaṁ itaritarena cāpi,
vv84:1.4	Subhāsitaṁ tañca suṇātha sabbe.
vv84:2.1	Yo so ahu rājā pāyāsi nāma,
vv84:2.2	Bhummānaṁ sahabyagato yasassī;
vv84:2.3	So modamānova sake vimāne,
vv84:2.4	Amānuso mānuse ajjhabhāsī”ti.
vv84:3.1	“Vaṅke araññe amanussaṭṭhāne,
vv84:3.2	Kantāre appodake appabhakkhe;
vv84:3.3	Suduggame vaṇṇupathassa majjhe,
vv84:3.4	Vaṅkaṁ bhayā naṭṭhamanā manussā.
vv84:4.1	Nayidha phalā mūlamayā ca santi,
vv84:4.2	Upādānaṁ natthi kutodha bhakkho;
vv84:4.3	Aññatra paṁsūhi ca vālukāhi ca,
vv84:4.4	Tatāhi uṇhāhi ca dāruṇāhi ca.
vv84:5.1	Ujjaṅgalaṁ tattamivaṁ kapālaṁ,
vv84:5.2	Anāyasaṁ paralokena tulyaṁ;
vv84:5.3	Luddānamāvāsamidaṁ purāṇaṁ,
vv84:5.4	Bhūmippadeso abhisattarūpo.
vv84:6.1	Atha tumhe kena vaṇṇena,
vv84:6.2	Kimāsamānā imaṁ padesaṁ hi;
vv84:6.3	Anupaviṭṭhā sahasā samecca,
vv84:6.4	Lobhā bhayā atha vā sampamūḷhā”ti.
vv84:7.1	“Magadhesu aṅgesu ca satthavāhā,
vv84:7.2	Āropayitvā paṇiyaṁ puthuttaṁ;
vv84:7.3	Te yāmase sindhusovīrabhūmiṁ,
vv84:7.4	Dhanatthikā uddayaṁ patthayānā.
vv84:8.1	Divā pipāsaṁ nadhivāsayantā,
vv84:8.2	Yoggānukampañca samekkhamānā;
vv84:8.3	Etena vegena āyāma sabbe,
vv84:8.4	Rattiṁ maggaṁ paṭipannā vikāle.
vv84:9.1	Te duppayātā aparaddhamaggā,
vv84:9.2	Andhākulā vippanaṭṭhā araññe;
vv84:9.3	Suduggame vaṇṇupathassa majjhe,
vv84:9.4	Disaṁ na jānāma pamūḷhacittā.
vv84:10.1	Idañca disvāna adiṭṭhapubbaṁ,
vv84:10.2	Vimānaseṭṭhañca tavañca yakkha;
vv84:10.3	Tatuttariṁ jīvitamāsamānā,
vv84:10.4	Disvā patītā sumanā udaggā”ti.
vv84:11.1	“Pāraṁ samuddassa imañca vaṇṇuṁ,
vv84:11.2	Vettācaraṁ saṅkupathañca maggaṁ;
vv84:11.3	Nadiyo pana pabbatānañca duggā,
vv84:11.4	Puthuddisā gacchatha bhogahetu.
vv84:12.1	Pakkhandiyāna vijitaṁ paresaṁ,
vv84:12.2	Verajjake mānuse pekkhamānā;
vv84:12.3	Yaṁ vo sutaṁ vā atha vāpi diṭṭhaṁ,
vv84:12.4	Accherakaṁ taṁ vo suṇoma tātā”ti.
vv84:13.1	“Itopi accherataraṁ kumāra,
vv84:13.2	Na no sutaṁ vā atha vāpi diṭṭhaṁ;
vv84:13.3	Atītamānussakameva sabbaṁ,
vv84:13.4	Disvā na tappāma anomavaṇṇaṁ.
vv84:14.1	Vehāyasaṁ pokkharañño savanti,
vv84:14.2	Pahūtamalyā bahupuṇḍarīkā;
vv84:14.3	Dumā cime niccaphalūpapannā,
vv84:14.4	Atīva gandhā surabhiṁ pavāyanti.
vv84:15.1	Veḷūriyathambhā satamussitāse,
vv84:15.2	Silāpavāḷassa ca āyataṁsā;
vv84:15.3	Masāragallā sahalohitaṅgā,
vv84:15.4	Thambhā ime jotirasāmayāse.
vv84:16.1	Sahassathambhaṁ atulānubhāvaṁ,
vv84:16.2	Tesūpari sādhumidaṁ vimānaṁ;
vv84:16.3	Ratanantaraṁ kañcanavedimissaṁ,
vv84:16.4	Tapanīyapaṭṭehi ca sādhuchannaṁ.
vv84:17.1	Jambonaduttattamidaṁ sumaṭṭho,
vv84:17.2	Pāsādasopānaphalūpapanno;
vv84:17.3	Daḷho ca vaggu ca susaṅgato ca,
vv84:17.4	Atīva nijjhānakhamo manuñño.
vv84:18.1	Ratanantarasmiṁ bahuannapānaṁ,
vv84:18.2	Parivārito accharāsaṅgaṇena;
vv84:18.3	Murajaālambaratūriyaghuṭṭho,
vv84:18.4	Abhivanditosi thutivandanāya.
vv84:19.1	So modasi nārigaṇappabodhano,
vv84:19.2	Vimānapāsādavare manorame;
vv84:19.3	Acintiyo sabbaguṇūpapanno,
vv84:19.4	Rājā yathā vessavaṇo naḷinyā.
vv84:20.1	Devo nu āsi udavāsi yakkho,
vv84:20.2	Udāhu devindo manussabhūto;
vv84:20.3	Pucchanti taṁ vāṇijā satthavāhā,
vv84:20.4	Ācikkha ko nāma tuvaṁsi yakkho”ti.
vv84:21.1	“Serīsako nāma ahamhi yakkho,
vv84:21.2	Kantāriyo vaṇṇupathamhi gutto;
vv84:21.3	Imaṁ padesaṁ abhipālayāmi,
vv84:21.4	Vacanakaro vessavaṇassa rañño”ti.
vv84:22.1	“Adhiccaladdhaṁ pariṇāmajaṁ te,
vv84:22.2	Sayaṅkataṁ udāhu devehi dinnaṁ;
vv84:22.3	Pucchanti taṁ vāṇijā satthavāhā,
vv84:22.4	Kathaṁ tayā laddhamidaṁ manuññan”ti.
vv84:23.1	“Nādhiccaladdhaṁ na pariṇāmajaṁ me,
vv84:23.2	Na sayaṅkataṁ na hi devehi dinnaṁ;
vv84:23.3	Sakehi kammehi apāpakehi,
vv84:23.4	Puññehi me laddhamidaṁ manuññan”ti.
vv84:24.1	“Kiṁ te vataṁ kiṁ pana brahmacariyaṁ,
vv84:24.2	Kissa suciṇṇassa ayaṁ vipāko;
vv84:24.3	Pucchanti taṁ vāṇijā satthavāhā,
vv84:24.4	Kathaṁ tayā laddhamidaṁ vimānan”ti.
vv84:25.1	“Mamaṁ pāyāsīti ahu samaññā,
vv84:25.2	Rajjaṁ yadā kārayiṁ kosalānaṁ;
vv84:25.3	Natthikadiṭṭhi kadariyo pāpadhammo,
vv84:25.4	Ucchedavādī ca tadā ahosiṁ.
vv84:26.1	Samaṇo ca kho āsi kumārakassapo,
vv84:26.2	Bahussuto cittakathī uḷāro;
vv84:26.3	So me tadā dhammakathaṁ abhāsi,
vv84:26.4	Diṭṭhivisūkāni vinodayī me.
vv84:27.1	Tāhaṁ tassa dhammakathaṁ suṇitvā,
vv84:27.2	Upāsakattaṁ paṭivedayissaṁ;
vv84:27.3	Pāṇātipātā virato ahosiṁ,
vv84:27.4	Loke adinnaṁ parivajjayissaṁ;
vv84:27.5	Amajjapo no ca musā abhāṇiṁ,
vv84:27.6	Sakena dārena ca ahosi tuṭṭho.
vv84:28.1	Taṁ me vataṁ taṁ pana brahmacariyaṁ,
vv84:28.2	Tassa suciṇṇassa ayaṁ vipāko;
vv84:28.3	Teheva kammehi apāpakehi,
vv84:28.4	Puññehi me laddhamidaṁ vimānan”ti.
vv84:29.1	“Saccaṁ kirāhaṁsu narā sapaññā,
vv84:29.2	Anaññathā vacanaṁ paṇḍitānaṁ;
vv84:29.3	Yahiṁ yahiṁ gacchati puññakammo,
vv84:29.4	Tahiṁ tahiṁ modati kāmakāmī.
vv84:30.1	Yahiṁ yahiṁ sokapariddavo ca,
vv84:30.2	Vadho ca bandho ca parikkileso;
vv84:30.3	Tahiṁ tahiṁ gacchati pāpakammo,
vv84:30.4	Na muccati duggatiyā kadācīti.
vv84:31.1	Sammūḷharūpova jano ahosi,
vv84:31.2	Asmiṁ muhutte kalalīkatova;
vv84:31.3	Janassimassa tuyhañca kumāra,
vv84:31.4	Appaccayo kena nu kho ahosī”ti.
vv84:32.1	“Ime ca sirīsavanā tātā,
vv84:32.2	Dibbā gandhā surabhī sampavanti;
vv84:32.3	Te sampavāyanti imaṁ vimānaṁ,
vv84:32.4	Divā ca ratto ca tamaṁ nihantvā.
vv84:33.1	Imesañca kho vassasataccayena,
vv84:33.2	Sipāṭikā phalati ekamekā;
vv84:33.3	Mānussakaṁ vassasataṁ atītaṁ,
vv84:33.4	Yadagge kāyamhi idhūpapanno.
vv84:34.1	Disvānahaṁ vassasatāni pañca,
vv84:34.2	Asmiṁ vimāne ṭhatvāna tātā;
vv84:34.3	Āyukkhayā puññakkhayā cavissaṁ,
vv84:34.4	Teneva sokena pamucchitosmī”ti.
vv84:35.1	“Kathaṁ nu soceyya tathāvidho so,
vv84:35.2	Laddhā vimānaṁ atulaṁ cirāya;
vv84:35.3	Ye cāpi kho ittaramupapannā,
vv84:35.4	Te nūna soceyyuṁ parittapuññā”ti.
vv84:36.1	“Anucchaviṁ ovadiyañca me taṁ,
vv84:36.2	Yaṁ maṁ tumhe peyyavācaṁ vadetha;
vv84:36.3	Tumhe ca kho tātā mayānuguttā,
vv84:36.4	Yenicchakaṁ tena paletha sotthin”ti.
vv84:37.1	“Gantvā mayaṁ sindhusovīrabhūmiṁ,
vv84:37.2	Dhanatthikā uddayaṁ patthayānā;
vv84:37.3	Yathāpayogā paripuṇṇacāgā,
vv84:37.4	Kāhāma serīsamahaṁ uḷāran”ti.
vv84:38.1	“Mā ceva serīsamahaṁ akattha,
vv84:38.2	Sabbañca vo bhavissati yaṁ vadetha;
vv84:38.3	Pāpāni kammāni vivajjayātha,
vv84:38.4	Dhammānuyogañca adhiṭṭhahātha.
vv84:39.1	Upāsako atthi imamhi saṅghe,
vv84:39.2	Bahussuto sīlavatūpapanno;
vv84:39.3	Saddho ca cāgī ca supesalo ca,
vv84:39.4	Vicakkhaṇo santusito mutīmā.
vv84:40.1	Sañjānamāno na musā bhaṇeyya,
vv84:40.2	Parūpaghātāya na cetayeyya;
vv84:40.3	Vebhūtikaṁ pesuṇaṁ no kareyya,
vv84:40.4	Saṇhañca vācaṁ sakhilaṁ bhaṇeyya.
vv84:41.1	Sagāravo sappatisso vinīto,
vv84:41.2	Apāpako adhisīle visuddho;
vv84:41.3	So mātaraṁ pitarañcāpi jantu,
vv84:41.4	Dhammena poseti ariyavutti.
vv84:42.1	Maññe so mātāpitūnaṁ kāraṇā,
vv84:42.2	Bhogāni pariyesati na attahetu;
vv84:42.3	Mātāpitūnañca yo accayena,
vv84:42.4	Nekkhammapoṇo carissati brahmacariyaṁ.
vv84:43.1	Ujū avaṅko asaṭho amāyo,
vv84:43.2	Na lesakappena ca vohareyya;
vv84:43.3	So tādiso sukatakammakārī,
vv84:43.4	Dhamme ṭhito kinti labhetha dukkhaṁ.
vv84:44.1	Taṁ kāraṇā pātukatomhi attanā,
vv84:44.2	Tasmā dhammaṁ passatha vāṇijāse;
vv84:44.3	Aññatra teniha bhasmī bhavetha,
vv84:44.4	Andhākulā vippanaṭṭhā araññe;
vv84:44.5	Taṁ khippamānena lahuṁ parena,
vv84:44.6	Sukho have sappurisena saṅgamo”ti.
vv84:45.1	“Kiṁ nāma so kiñca karoti kammaṁ,
vv84:45.2	Kiṁ nāmadheyyaṁ kiṁ pana tassa gottaṁ;
vv84:45.3	Mayampi naṁ daṭṭhukāmamha yakkha,
vv84:45.4	Yassānukampāya idhāgatosi;
vv84:45.5	Lābhā hi tassa yassa tuvaṁ pihesī”ti.
vv84:46.1	“Yo kappako sambhavanāmadheyyo,
vv84:46.2	Upāsako kocchaphalūpajīvī;
vv84:46.3	Jānātha naṁ tumhākaṁ pesiyo so,
vv84:46.4	Mā kho naṁ hīḷittha supesalo so”ti.
vv84:47.1	“Jānāmase yaṁ tvaṁ pavadesi yakkha,
vv84:47.2	Na kho naṁ jānāma sa edisoti;
vv84:47.3	Mayampi naṁ pūjayissāma yakkha,
vv84:47.4	Sutvāna tuyhaṁ vacanaṁ uḷāran”ti.
vv84:48.1	“Ye keci imasmiṁ satthe manussā,
vv84:48.2	Daharā mahantā athavāpi majjhimā;
vv84:48.3	Sabbeva te ālambantu vimānaṁ,
vv84:48.4	Passantu puññānaṁ phalaṁ kadariyā”ti.
vv84:49.1	Te tattha sabbeva “ahaṁ pure”ti,
vv84:49.2	Taṁ kappakaṁ tattha purakkhatvā;
vv84:49.3	Sabbeva te ālambiṁsu vimānaṁ,
vv84:49.4	Masakkasāraṁ viya vāsavassa.
vv84:50.1	Te tattha sabbeva “ahaṁ pure”ti,
vv84:50.2	Upāsakattaṁ paṭivedayiṁsu;
vv84:50.3	Pāṇātipātā viratā ahesuṁ,
vv84:50.4	Loke adinnaṁ parivajjayiṁsu;
vv84:50.5	Amajjapā no ca musā bhaṇiṁsu,
vv84:50.6	Sakena dārena ca ahesuṁ tuṭṭhā.
vv84:51.1	Te tattha sabbeva “ahaṁ pure”ti,
vv84:51.2	Upāsakattaṁ paṭivedayitvā;
vv84:51.3	Pakkāmi sattho anumodamāno,
vv84:51.4	Yakkhiddhiyā anumato punappunaṁ.
vv84:52.1	Gantvāna te sindhusovīrabhūmiṁ,
vv84:52.2	Dhanatthikā uddayaṁ patthayānā;
vv84:52.3	Yathāpayogā paripuṇṇalābhā,
vv84:52.4	Paccāgamuṁ pāṭaliputtamakkhataṁ.
vv84:53.1	Gantvāna te saṅgharaṁ sotthivanto,
vv84:53.2	Puttehi dārehi samaṅgibhūtā;
vv84:53.3	Ānandī vittā sumanā patītā,
vv84:53.4	Akaṁsu serīsamahaṁ uḷāraṁ;
vv84:53.5	Serīsakaṁ te pariveṇaṁ māpayiṁsu.
vv84:54.1	Etādisā sappurisāna sevanā,
vv84:54.2	Mahatthikā dhammaguṇāna sevanā;
vv84:54.3	Ekassa atthāya upāsakassa,
vv84:54.4	Sabbeva sattā sukhitā ahesunti.
vv84:55.1	Serīsakavimānaṁ dasamaṁ.
vv85:0.1	Vimānavatthu
vv85:0.2	Purisavimāna
vv85:0.3	Sunikkhittavagga
vv85:0.4	11. Sunikkhittavimānavatthu
vv85:1.1	“Uccamidaṁ maṇithūṇaṁ vimānaṁ,
vv85:1.2	Samantato dvādasa yojanāni;
vv85:1.3	Kūṭāgārā sattasatā uḷārā,
vv85:1.4	Veḷuriyathambhā rucakatthatā subhā.
vv85:2.1	Tatthacchasi pivasi khādasi ca,
vv85:2.2	Dibbā ca vīṇā pavadanti vagguṁ;
vv85:2.3	Dibbā rasā kāmaguṇettha pañca,
vv85:2.4	Nāriyo ca naccanti suvaṇṇachannā.
vv85:3.1	Kena tetādiso vaṇṇo,
vv85:3.2	kena te idha mijjhati;
vv85:3.3	Uppajjanti ca te bhogā,
vv85:3.4	ye keci manaso piyā.
vv85:4.1	Pucchāmi taṁ deva mahānubhāva,
vv85:4.2	Manussabhūto kimakāsi puññaṁ;
vv85:4.3	Kenāsi evaṁ jalitānubhāvo,
vv85:4.4	Vaṇṇo ca te sabbadisā pabhāsatī”ti.
vv85:5.1	So devaputto attamano,
vv85:5.2	moggallānena pucchito;
vv85:5.3	Pañhaṁ puṭṭho viyākāsi,
vv85:5.4	yassa kammassidaṁ phalaṁ.
vv85:6.1	“Dunnikkhittaṁ mālaṁ sunikkhipitvā,
vv85:6.2	Patiṭṭhapetvā sugatassa thūpe;
vv85:6.3	Mahiddhiko camhi mahānubhāvo,
vv85:6.4	Dibbehi kāmehi samaṅgibhūto.
vv85:7.1	Tena metādiso vaṇṇo,
vv85:7.2	tena me idha mijjhati;
vv85:7.3	Uppajjanti ca me bhogā,
vv85:7.4	ye keci manaso piyā.
vv85:8.1	Akkhāmi te bhikkhu mahānubhāva,
vv85:8.2	Manussabhūto yamahaṁ akāsiṁ;
vv85:8.3	Tenamhi evaṁ jalitānubhāvo,
vv85:8.4	Vaṇṇo ca me sabbadisā pabhāsatī”ti.
vv85:9.1	Sunikkhittavimānaṁ ekādasamaṁ.
vv85:9.2	Sunikkhittavaggo sattamo.
vv85:10.1	Tassuddānaṁ
vv85:11.1	Dve daliddā vanavihārā,
vv85:11.2	Bhatako gopālakaṇḍako;
vv85:11.3	Anekavaṇṇamaṭṭhakuṇḍalī,
vv85:11.4	Serīsako sunikkhittaṁ;
vv85:11.5	Purisānaṁ tatiyo vaggo pavuccatīti.
vv85:12.1	Bhāṇavāraṁ catutthaṁ.
vv85:13.1	Vimānavatthupāḷi niṭṭhitā.