# Therīgāthā — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

thig1.1:0.1	Therīgāthā 1.1
thig1.1:0.2	Ekakanipāta
thig1.1:0.3	Aññatarātherīgāthā
thig1.1:1.0	Namo tassa Bhagavato Arahato Sammāsambuddhassa.
thig1.1:1.1	“Sukhaṁ supāhi therike,
thig1.1:1.2	Katvā coḷena pārutā;
thig1.1:1.3	Upasanto hi te rāgo,
thig1.1:1.4	Sukkhaḍākaṁ va kumbhiyan”ti.
thig1.1:2.1	Itthaṁ sudaṁ aññatarā therī apaññātā bhikkhunī gāthaṁ abhāsitthāti.
thig1.2:0.1	Therīgāthā 1.2
thig1.2:0.2	Ekakanipāta
thig1.2:0.3	Muttātherīgāthā
thig1.2:1.1	“Mutte muccassu yogehi,
thig1.2:1.2	cando rāhuggahā iva;
thig1.2:1.3	Vippamuttena cittena,
thig1.2:1.4	anaṇā bhuñja piṇḍakan”ti.
thig1.2:2.1	Itthaṁ sudaṁ bhagavā muttaṁ sikkhamānaṁ imāya gāthāya abhiṇhaṁ ovadatīti.
thig1.3:0.1	Therīgāthā 1.3
thig1.3:0.2	Ekakanipāta
thig1.3:0.3	Puṇṇātherīgāthā
thig1.3:1.1	“Puṇṇe pūrassu dhammehi,
thig1.3:1.2	Cando pannaraseriva;
thig1.3:1.3	Paripuṇṇāya paññāya,
thig1.3:1.4	Tamokhandhaṁ padālayā”ti.
thig1.3:2.1	Itthaṁ sudaṁ puṇṇā therī gāthaṁ abhāsitthāti.
thig1.4:0.1	Therīgāthā 1.4
thig1.4:0.2	Ekakanipāta
thig1.4:0.3	Tissātherīgāthā
thig1.4:1.1	“Tisse sikkhassu sikkhāya,
thig1.4:1.2	mā taṁ yogā upaccaguṁ;
thig1.4:1.3	Sabbayogavisaṁyuttā,
thig1.4:1.4	cara loke anāsavā”ti.
thig1.4:2.1	… Tissā therī ….
thig1.5:0.1	Therīgāthā 1.5
thig1.5:0.2	Ekakanipāta
thig1.5:0.3	Aññatarātissātherīgāthā
thig1.5:1.1	“Tisse yuñjassu dhammehi,
thig1.5:1.2	khaṇo taṁ mā upaccagā;
thig1.5:1.3	Khaṇātītā hi socanti,
thig1.5:1.4	nirayamhi samappitā”ti.
thig1.5:2.1	… Aññatarā tissā therī ….
thig1.6:0.1	Therīgāthā 1.6
thig1.6:0.2	Ekakanipāta
thig1.6:0.3	Dhīrātherīgāthā
thig1.6:1.1	“Dhīre nirodhaṁ phusehi,
thig1.6:1.2	Saññāvūpasamaṁ sukhaṁ;
thig1.6:1.3	Ārādhayāhi nibbānaṁ,
thig1.6:1.4	Yogakkhemamanuttaran”ti.
thig1.6:2.1	… Dhīrā therī ….
thig1.7:0.1	Therīgāthā 1.7
thig1.7:0.2	Ekakanipāta
thig1.7:0.3	Vīrātherīgāthā
thig1.7:1.1	“Vīrā vīrehi dhammehi,
thig1.7:1.2	bhikkhunī bhāvitindriyā;
thig1.7:1.3	Dhāreti antimaṁ dehaṁ,
thig1.7:1.4	jetvā māraṁ savāhinin”ti.
thig1.7:2.1	… Vīrā therī ….
thig1.8:0.1	Therīgāthā 1.8
thig1.8:0.2	Ekakanipāta
thig1.8:0.3	Mittātherīgāthā
thig1.8:1.1	“Saddhāya pabbajitvāna,
thig1.8:1.2	mitte mittaratā bhava;
thig1.8:1.3	Bhāvehi kusale dhamme,
thig1.8:1.4	yogakkhemassa pattiyā”ti.
thig1.8:2.1	… Mittā therī ….
thig1.9:0.1	Therīgāthā 1.9
thig1.9:0.2	Ekakanipāta
thig1.9:0.3	Bhadrātherīgāthā
thig1.9:1.1	“Saddhāya pabbajitvāna,
thig1.9:1.2	bhadre bhadraratā bhava;
thig1.9:1.3	Bhāvehi kusale dhamme,
thig1.9:1.4	yogakkhemamanuttaran”ti.
thig1.9:2.1	… Bhadrā therī ….
thig1.10:0.1	Therīgāthā 1.10
thig1.10:0.2	Ekakanipāta
thig1.10:0.3	Upasamātherīgāthā
thig1.10:1.1	“Upasame tare oghaṁ,
thig1.10:1.2	maccudheyyaṁ suduttaraṁ;
thig1.10:1.3	Dhārehi antimaṁ dehaṁ,
thig1.10:1.4	jetvā māraṁ savāhinin”ti.
thig1.10:2.1	… Upasamā therī ….
thig1.11:0.1	Therīgāthā 1.11
thig1.11:0.2	Ekakanipāta
thig1.11:0.3	Muttātherīgāthā
thig1.11:1.1	“Sumuttā sādhumuttāmhi,
thig1.11:1.2	tīhi khujjehi muttiyā;
thig1.11:1.3	Udukkhalena musalena,
thig1.11:1.4	patinā khujjakena ca;
thig1.11:1.5	Muttāmhi jātimaraṇā,
thig1.11:1.6	bhavanetti samūhatā”ti.
thig1.11:2.1	… Muttā therī ….
thig1.12:0.1	Therīgāthā 1.12
thig1.12:0.2	Ekakanipāta
thig1.12:0.3	Dhammadinnātherīgāthā
thig1.12:1.1	“Chandajātā avasāyī,
thig1.12:1.2	Manasā ca phuṭā siyā;
thig1.12:1.3	Kāmesu appaṭibaddhacittā,
thig1.12:1.4	Uddhaṁsotāti vuccatī”ti.
thig1.12:2.1	… Dhammadinnā therī ….
thig1.13:0.1	Therīgāthā 1.13
thig1.13:0.2	Ekakanipāta
thig1.13:0.3	Visākhātherīgāthā
thig1.13:1.1	“Karotha buddhasāsanaṁ,
thig1.13:1.2	yaṁ katvā nānutappati;
thig1.13:1.3	Khippaṁ pādāni dhovitvā,
thig1.13:1.4	ekamante nisīdathā”ti.
thig1.13:2.1	… Visākhā therī ….
thig1.14:0.1	Therīgāthā 1.14
thig1.14:0.2	Ekakanipāta
thig1.14:0.3	Sumanātherīgāthā
thig1.14:1.1	“Dhātuyo dukkhato disvā,
thig1.14:1.2	mā jātiṁ punarāgami;
thig1.14:1.3	Bhave chandaṁ virājetvā,
thig1.14:1.4	upasantā carissasī”ti.
thig1.14:2.1	… Sumanā therī ….
thig1.15:0.1	Therīgāthā 1.15
thig1.15:0.2	Ekakanipāta
thig1.15:0.3	Uttarātherīgāthā
thig1.15:1.1	“Kāyena saṁvutā āsiṁ,
thig1.15:1.2	vācāya uda cetasā;
thig1.15:1.3	Samūlaṁ taṇhamabbuyha,
thig1.15:1.4	sītibhūtāmhi nibbutā”ti.
thig1.15:2.1	… Uttarā therī ….
thig1.16:0.1	Therīgāthā 1.16
thig1.16:0.2	Ekakanipāta
thig1.16:0.3	Vuḍḍhapabbajitasumanātherīgāthā
thig1.16:1.1	“Sukhaṁ tvaṁ vuḍḍhike sehi,
thig1.16:1.2	katvā coḷena pārutā;
thig1.16:1.3	Upasanto hi te rāgo,
thig1.16:1.4	sītibhūtāsi nibbutā”ti.
thig1.16:2.1	… Sumanā vuḍḍhapabbajitā therī ….
thig1.17:0.1	Therīgāthā 1.17
thig1.17:0.2	Ekakanipāta
thig1.17:0.3	Dhammātherīgāthā
thig1.17:1.1	“Piṇḍapātaṁ caritvāna,
thig1.17:1.2	daṇḍamolubbha dubbalā;
thig1.17:1.3	Vedhamānehi gattehi,
thig1.17:1.4	tattheva nipatiṁ chamā;
thig1.17:1.5	Disvā ādīnavaṁ kāye,
thig1.17:1.6	atha cittaṁ vimucci me”ti.
thig1.17:2.1	… Dhammā therī ….
thig1.18:0.1	Therīgāthā 1.18
thig1.18:0.2	Ekakanipāta
thig1.18:0.3	Saṅghātherīgāthā
thig1.18:1.1	“Hitvā ghare pabbajitvā,
thig1.18:1.2	hitvā puttaṁ pasuṁ piyaṁ;
thig1.18:1.3	Hitvā rāgañca dosañca,
thig1.18:1.4	avijjañca virājiya;
thig1.18:1.5	Samūlaṁ taṇhamabbuyha,
thig1.18:1.6	upasantāmhi nibbutā”ti.
thig1.18:2.1	… Saṅghā therī ….
thig1.18:3.1	Ekakanipāto niṭṭhito.
thig2.1:0.1	Therīgāthā 2.1
thig2.1:0.2	Dukanipāta
thig2.1:0.3	Abhirūpanandātherīgāthā
thig2.1:1.1	“Āturaṁ asuciṁ pūtiṁ,
thig2.1:1.2	passa nande samussayaṁ;
thig2.1:1.3	Asubhāya cittaṁ bhāvehi,
thig2.1:1.4	ekaggaṁ susamāhitaṁ.
thig2.1:2.1	Animittañca bhāvehi,
thig2.1:2.2	mānānusayamujjaha;
thig2.1:2.3	Tato mānābhisamayā,
thig2.1:2.4	upasantā carissasī”ti.
thig2.1:3.1	Itthaṁ sudaṁ abhirūpanandā therī gāthāyo abhāsitthāti.
thig2.2:0.1	Therīgāthā 2.2
thig2.2:0.2	Dukanipāta
thig2.2:0.3	Jentātherīgāthā
thig2.2:1.1	“Ye ime satta bojjhaṅgā,
thig2.2:1.2	maggā nibbānapattiyā;
thig2.2:1.3	Bhāvitā te mayā sabbe,
thig2.2:1.4	yathā buddhena desitā.
thig2.2:2.1	Diṭṭho hi me so bhagavā,
thig2.2:2.2	antimoyaṁ samussayo;
thig2.2:2.3	Vikkhīṇo jātisaṁsāro,
thig2.2:2.4	natthi dāni punabbhavo”ti.
thig2.2:3.1	Itthaṁ sudaṁ jentā therī gāthāyo abhāsitthāti.
thig2.3:0.1	Therīgāthā 2.3
thig2.3:0.2	Dukanipāta
thig2.3:0.3	Sumaṅgalamātātherīgāthā
thig2.3:1.1	“Sumuttikā sumuttikā,
thig2.3:1.2	Sādhumuttikāmhi musalassa;
thig2.3:1.3	Ahiriko me chattakaṁ vāpi,
thig2.3:1.4	Ukkhalikā me deḍḍubhaṁ vāti.
thig2.3:2.1	Rāgañca ahaṁ dosañca,
thig2.3:2.2	Cicciṭi cicciṭīti vihanāmi;
thig2.3:2.3	Sā rukkhamūlamupagamma,
thig2.3:2.4	Aho sukhanti sukhato jhāyāmī”ti.
thig2.3:3.1	… Sumaṅgalamātā therī ….
thig2.4:0.1	Therīgāthā 2.4
thig2.4:0.2	Dukanipāta
thig2.4:0.3	Aḍḍhakāsitherīgāthā
thig2.4:1.1	“Yāva kāsijanapado,
thig2.4:1.2	suṅko me tatthako ahu;
thig2.4:1.3	Taṁ katvā negamo agghaṁ,
thig2.4:1.4	aḍḍhenagghaṁ ṭhapesi maṁ.
thig2.4:2.1	Atha nibbindahaṁ rūpe,
thig2.4:2.2	nibbindañca virajjahaṁ;
thig2.4:2.3	Mā puna jātisaṁsāraṁ,
thig2.4:2.4	sandhāveyyaṁ punappunaṁ;
thig2.4:2.5	Tisso vijjā sacchikatā,
thig2.4:2.6	kataṁ buddhassa sāsanan”ti.
thig2.4:3.1	… Aḍḍhakāsi therī ….
thig2.5:0.1	Therīgāthā 2.5
thig2.5:0.2	Dukanipāta
thig2.5:0.3	Cittātherīgāthā
thig2.5:1.1	“Kiñcāpi khomhi kisikā,
thig2.5:1.2	gilānā bāḷhadubbalā;
thig2.5:1.3	Daṇḍamolubbha gacchāmi,
thig2.5:1.4	pabbataṁ abhirūhiya.
thig2.5:2.1	Saṅghāṭiṁ nikkhipitvāna,
thig2.5:2.2	pattakañca nikujjiya;
thig2.5:2.3	Sele khambhesimattānaṁ,
thig2.5:2.4	tamokhandhaṁ padāliyā”ti.
thig2.5:3.1	… Cittā therī ….
thig2.6:0.1	Therīgāthā 2.6
thig2.6:0.2	Dukanipāta
thig2.6:0.3	Mettikātherīgāthā
thig2.6:1.1	“Kiñcāpi khomhi dukkhitā,
thig2.6:1.2	dubbalā gatayobbanā;
thig2.6:1.3	Daṇḍamolubbha gacchāmi,
thig2.6:1.4	pabbataṁ abhirūhiya.
thig2.6:2.1	Nikkhipitvāna saṅghāṭiṁ,
thig2.6:2.2	pattakañca nikujjiya;
thig2.6:2.3	Nisinnā camhi selamhi,
thig2.6:2.4	atha cittaṁ vimucci me;
thig2.6:2.5	Tisso vijjā anuppattā,
thig2.6:2.6	kataṁ buddhassa sāsanan”ti.
thig2.6:3.1	… Mettikā therī ….
thig2.7:0.1	Therīgāthā 2.7
thig2.7:0.2	Dukanipāta
thig2.7:0.3	Mittātherīgāthā
thig2.7:1.1	“Cātuddasiṁ pañcadasiṁ,
thig2.7:1.2	yā ca pakkhassa aṭṭhamī;
thig2.7:1.3	Pāṭihāriyapakkhañca,
thig2.7:1.4	aṭṭhaṅgasusamāgataṁ.
thig2.7:2.1	Uposathaṁ upāgacchiṁ,
thig2.7:2.2	devakāyābhinandinī;
thig2.7:2.3	Sājja ekena bhattena,
thig2.7:2.4	muṇḍā saṅghāṭipārutā;
thig2.7:2.5	Devakāyaṁ na patthehaṁ,
thig2.7:2.6	vineyya hadaye daran”ti.
thig2.7:3.1	… Mittā therī ….
thig2.8:0.1	Therīgāthā 2.8
thig2.8:0.2	Dukanipāta
thig2.8:0.3	Abhayamātutherīgāthā
thig2.8:1.1	“Uddhaṁ pādatalā amma,
thig2.8:1.2	adho ve kesamatthakā;
thig2.8:1.3	Paccavekkhassumaṁ kāyaṁ,
thig2.8:1.4	asuciṁ pūtigandhikaṁ.
thig2.8:2.1	Evaṁ viharamānāya,
thig2.8:2.2	sabbo rāgo samūhato;
thig2.8:2.3	Pariḷāho samucchinno,
thig2.8:2.4	sītibhūtāmhi nibbutā”ti.
thig2.8:3.1	… Abhayamātā therī ….
thig2.9:0.1	Therīgāthā 2.9
thig2.9:0.2	Dukanipāta
thig2.9:0.3	Abhayātherīgāthā
thig2.9:1.1	“Abhaye bhiduro kāyo,
thig2.9:1.2	yattha satā puthujjanā;
thig2.9:1.3	Nikkhipissāmimaṁ dehaṁ,
thig2.9:1.4	sampajānā satīmatī.
thig2.9:2.1	Bahūhi dukkhadhammehi,
thig2.9:2.2	appamādaratāya me;
thig2.9:2.3	Taṇhakkhayo anuppatto,
thig2.9:2.4	kataṁ buddhassa sāsanan”ti.
thig2.9:3.1	… Abhayā therī ….
thig2.10:0.1	Therīgāthā 2.10
thig2.10:0.2	Dukanipāta
thig2.10:0.3	Sāmātherīgāthā
thig2.10:1.1	“Catukkhattuṁ pañcakkhattuṁ,
thig2.10:1.2	vihārā upanikkhamiṁ;
thig2.10:1.3	Aladdhā cetaso santiṁ,
thig2.10:1.4	citte avasavattinī;
thig2.10:1.5	Tassā me aṭṭhamī ratti,
thig2.10:1.6	yato taṇhā samūhatā.
thig2.10:2.1	Bahūhi dukkhadhammehi,
thig2.10:2.2	appamādaratāya me;
thig2.10:2.3	Taṇhakkhayo anuppatto,
thig2.10:2.4	kataṁ buddhassa sāsanan”ti.
thig2.10:3.1	… Sāmā therī ….
thig2.10:4.1	Dukanipāto niṭṭhito.
thig3.1:0.1	Therīgāthā 3.1
thig3.1:0.2	Tikanipāta
thig3.1:0.3	Aparāsāmātherīgāthā
thig3.1:1.1	“Paṇṇavīsativassāni,
thig3.1:1.2	yato pabbajitāya me;
thig3.1:1.3	Nābhijānāmi cittassa,
thig3.1:1.4	samaṁ laddhaṁ kudācanaṁ.
thig3.1:2.1	Aladdhā cetaso santiṁ,
thig3.1:2.2	citte avasavattinī;
thig3.1:2.3	Tato saṁvegamāpādiṁ,
thig3.1:2.4	saritvā jinasāsanaṁ.
thig3.1:3.1	Bahūhi dukkhadhammehi,
thig3.1:3.2	appamādaratāya me;
thig3.1:3.3	Taṇhakkhayo anuppatto,
thig3.1:3.4	kataṁ buddhassa sāsanaṁ;
thig3.1:3.5	Ajja me sattamī ratti,
thig3.1:3.6	yato taṇhā visositā”ti.
thig3.1:4.1	… Aparā sāmā therī ….
thig3.2:0.1	Therīgāthā 3.2
thig3.2:0.2	Tikanipāta
thig3.2:0.3	Uttamātherīgāthā
thig3.2:1.1	“Catukkhattuṁ pañcakkhattuṁ,
thig3.2:1.2	vihārā upanikkhamiṁ;
thig3.2:1.3	Aladdhā cetaso santiṁ,
thig3.2:1.4	citte avasavattinī.
thig3.2:2.1	Sā bhikkhuniṁ upagacchiṁ,
thig3.2:2.2	yā me saddhāyikā ahu;
thig3.2:2.3	Sā me dhammamadesesi,
thig3.2:2.4	khandhāyatanadhātuyo.
thig3.2:3.1	Tassā dhammaṁ suṇitvāna,
thig3.2:3.2	Yathā maṁ anusāsi sā;
thig3.2:3.3	Sattāhaṁ ekapallaṅkena,
thig3.2:3.4	Nisīdiṁ pītisukhasamappitā;
thig3.2:3.5	Aṭṭhamiyā pāde pasāresiṁ,
thig3.2:3.6	Tamokhandhaṁ padāliyā”ti.
thig3.2:4.1	… Uttamā therī ….
thig3.3:0.1	Therīgāthā 3.3
thig3.3:0.2	Tikanipāta
thig3.3:0.3	Aparāuttamātherīgāthā
thig3.3:1.1	“Ye ime satta bojjhaṅgā,
thig3.3:1.2	maggā nibbānapattiyā;
thig3.3:1.3	Bhāvitā te mayā sabbe,
thig3.3:1.4	yathā buddhena desitā.
thig3.3:2.1	Suññatassānimittassa,
thig3.3:2.2	lābhinīhaṁ yadicchakaṁ;
thig3.3:2.3	Orasā dhītā buddhassa,
thig3.3:2.4	nibbānābhiratā sadā.
thig3.3:3.1	Sabbe kāmā samucchinnā,
thig3.3:3.2	ye dibbā ye ca mānusā;
thig3.3:3.3	Vikkhīṇo jātisaṁsāro,
thig3.3:3.4	natthi dāni punabbhavo”ti.
thig3.3:4.1	… Aparā uttamā therī ….
thig3.4:0.1	Therīgāthā 3.4
thig3.4:0.2	Tikanipāta
thig3.4:0.3	Dantikātherīgāthā
thig3.4:1.1	“Divāvihārā nikkhamma,
thig3.4:1.2	gijjhakūṭamhi pabbate;
thig3.4:1.3	Nāgaṁ ogāhamuttiṇṇaṁ,
thig3.4:1.4	nadītīramhi addasaṁ.
thig3.4:2.1	Puriso aṅkusamādāya,
thig3.4:2.2	‘dehi pādan’ti yācati;
thig3.4:2.3	Nāgo pasārayī pādaṁ,
thig3.4:2.4	puriso nāgamāruhi.
thig3.4:3.1	Disvā adantaṁ damitaṁ,
thig3.4:3.2	manussānaṁ vasaṁ gataṁ;
thig3.4:3.3	Tato cittaṁ samādhesiṁ,
thig3.4:3.4	khalu tāya vanaṁ gatā”ti.
thig3.4:4.1	… Dantikā therī ….
thig3.5:0.1	Therīgāthā 3.5
thig3.5:0.2	Tikanipāta
thig3.5:0.3	Ubbiritherīgāthā
thig3.5:1.1	“Amma jīvāti vanamhi kandasi,
thig3.5:1.2	Attānaṁ adhigaccha ubbiri;
thig3.5:1.3	Cullāsītisahassāni,
thig3.5:1.4	Sabbā jīvasanāmikā;
thig3.5:1.5	Etamhāḷāhane daḍḍhā,
thig3.5:1.6	Tāsaṁ kamanusocasi”.
thig3.5:2.1	“Abbahī vata me sallaṁ,
thig3.5:2.2	duddasaṁ hadayassitaṁ;
thig3.5:2.3	Yaṁ me sokaparetāya,
thig3.5:2.4	dhītusokaṁ byapānudi.
thig3.5:3.1	Sājja abbūḷhasallāhaṁ,
thig3.5:3.2	Nicchātā parinibbutā;
thig3.5:3.3	Buddhaṁ dhammañca saṅghañca,
thig3.5:3.4	Upemi saraṇaṁ munin”ti.
thig3.5:4.1	… Ubbirī therī ….
thig3.6:0.1	Therīgāthā 3.6
thig3.6:0.2	Tikanipāta
thig3.6:0.3	Sukkātherīgāthā
thig3.6:1.1	“Kiṁme katā rājagahe manussā,
thig3.6:1.2	Madhuṁ pītāva acchare;
thig3.6:1.3	Ye sukkaṁ na upāsanti,
thig3.6:1.4	Desentiṁ buddhasāsanaṁ.
thig3.6:2.1	Tañca appaṭivānīyaṁ,
thig3.6:2.2	asecanakamojavaṁ;
thig3.6:2.3	Pivanti maññe sappaññā,
thig3.6:2.4	valāhakamivaddhagū.
thig3.6:3.1	Sukkā sukkehi dhammehi,
thig3.6:3.2	vītarāgā samāhitā;
thig3.6:3.3	Dhāreti antimaṁ dehaṁ,
thig3.6:3.4	jetvā māraṁ savāhinin”ti.
thig3.6:4.1	… Sukkā therī ….
thig3.7:0.1	Therīgāthā 3.7
thig3.7:0.2	Tikanipāta
thig3.7:0.3	Selātherīgāthā
thig3.7:1.1	“Natthi nissaraṇaṁ loke,
thig3.7:1.2	kiṁ vivekena kāhasi;
thig3.7:1.3	Bhuñjāhi kāmaratiyo,
thig3.7:1.4	māhu pacchānutāpinī”.
thig3.7:2.1	“Sattisūlūpamā kāmā,
thig3.7:2.2	khandhāsaṁ adhikuṭṭanā;
thig3.7:2.3	Yaṁ tvaṁ ‘kāmaratiṁ’ brūsi,
thig3.7:2.4	‘aratī’ dāni sā mama.
thig3.7:3.1	Sabbattha vihatā nandī,
thig3.7:3.2	Tamokhandho padālito;
thig3.7:3.3	Evaṁ jānāhi pāpima,
thig3.7:3.4	Nihato tvamasi antakā”ti.
thig3.7:4.1	… Selā therī ….
thig3.8:0.1	Therīgāthā 3.8
thig3.8:0.2	Tikanipāta
thig3.8:0.3	Somātherīgāthā
thig3.8:1.1	“Yaṁ taṁ isīhi pattabbaṁ,
thig3.8:1.2	ṭhānaṁ durabhisambhavaṁ;
thig3.8:1.3	Na taṁ dvaṅgulapaññāya,
thig3.8:1.4	sakkā pappotumitthiyā”.
thig3.8:2.1	“Itthibhāvo no kiṁ kayirā,
thig3.8:2.2	cittamhi susamāhite;
thig3.8:2.3	Ñāṇamhi vattamānamhi,
thig3.8:2.4	sammā dhammaṁ vipassato.
thig3.8:3.1	Sabbattha vihatā nandī,
thig3.8:3.2	Tamokhandho padālito;
thig3.8:3.3	Evaṁ jānāhi pāpima,
thig3.8:3.4	Nihato tvamasi antakā”ti.
thig3.8:4.1	… Somā therī ….
thig3.8:5.1	Tikanipāto niṭṭhito.
thig4.1:0.1	Therīgāthā 4.1
thig4.1:0.2	Catukkanipāta
thig4.1:0.3	Bhaddākāpilānītherīgāthā
thig4.1:1.1	“Putto buddhassa dāyādo,
thig4.1:1.2	kassapo susamāhito;
thig4.1:1.3	Pubbenivāsaṁ yovedi,
thig4.1:1.4	saggāpāyañca passati.
thig4.1:2.1	Atho jātikkhayaṁ patto,
thig4.1:2.2	abhiññāvosito muni;
thig4.1:2.3	Etāhi tīhi vijjāhi,
thig4.1:2.4	tevijjo hoti brāhmaṇo.
thig4.1:3.1	Tatheva bhaddā kāpilānī,
thig4.1:3.2	tevijjā maccuhāyinī;
thig4.1:3.3	Dhāreti antimaṁ dehaṁ,
thig4.1:3.4	jetvā māraṁ savāhiniṁ.
thig4.1:4.1	Disvā ādīnavaṁ loke,
thig4.1:4.2	ubho pabbajitā mayaṁ;
thig4.1:4.3	Tyamha khīṇāsavā dantā,
thig4.1:4.4	sītibhūtamha nibbutā”ti.
thig4.1:5.1	… Bhaddā kāpilānī therī ….
thig4.1:6.1	Catukkanipāto niṭṭhito.
thig5.1:0.1	Therīgāthā 5.1
thig5.1:0.2	Pañcakanipāta
thig5.1:0.3	Aññataratherīgāthā
thig5.1:1.1	“Paṇṇavīsativassāni,
thig5.1:1.2	yato pabbajitā ahaṁ;
thig5.1:1.3	Nāccharāsaṅghātamattampi,
thig5.1:1.4	cittassūpasamajjhagaṁ.
thig5.1:2.1	Aladdhā cetaso santiṁ,
thig5.1:2.2	kāmarāgenavassutā;
thig5.1:2.3	Bāhā paggayha kandantī,
thig5.1:2.4	vihāraṁ pāvisiṁ ahaṁ.
thig5.1:3.1	Sā bhikkhuniṁ upāgacchiṁ,
thig5.1:3.2	yā me saddhāyikā ahu;
thig5.1:3.3	Sā me dhammamadesesi,
thig5.1:3.4	khandhāyatanadhātuyo.
thig5.1:4.1	Tassā dhammaṁ suṇitvāna,
thig5.1:4.2	ekamante upāvisiṁ;
thig5.1:4.3	Pubbenivāsaṁ jānāmi,
thig5.1:4.4	dibbacakkhu visodhitaṁ.
thig5.1:5.1	Cetopariccañāṇañca,
thig5.1:5.2	sotadhātu visodhitā;
thig5.1:5.3	Iddhīpi me sacchikatā,
thig5.1:5.4	patto me āsavakkhayo;
thig5.1:5.5	Chaḷabhiññā sacchikatā,
thig5.1:5.6	kataṁ buddhassa sāsanan”ti.
thig5.1:6.1	… Aññatarā therī ….
thig5.2:0.1	Therīgāthā 5.2
thig5.2:0.2	Pañcakanipāta
thig5.2:0.3	Vimalātherīgāthā
thig5.2:1.1	“Mattā vaṇṇena rūpena,
thig5.2:1.2	sobhaggena yasena ca;
thig5.2:1.3	Yobbanena cupatthaddhā,
thig5.2:1.4	aññāsamatimaññihaṁ.
thig5.2:2.1	Vibhūsetvā imaṁ kāyaṁ,
thig5.2:2.2	sucittaṁ bālalāpanaṁ;
thig5.2:2.3	Aṭṭhāsiṁ vesidvāramhi,
thig5.2:2.4	luddo pāsamivoḍḍiya.
thig5.2:3.1	Piḷandhanaṁ vidaṁsentī,
thig5.2:3.2	guyhaṁ pakāsikaṁ bahuṁ;
thig5.2:3.3	Akāsiṁ vividhaṁ māyaṁ,
thig5.2:3.4	ujjagghantī bahuṁ janaṁ.
thig5.2:4.1	Sājja piṇḍaṁ caritvāna,
thig5.2:4.2	muṇḍā saṅghāṭipārutā;
thig5.2:4.3	Nisinnā rukkhamūlamhi,
thig5.2:4.4	avitakkassa lābhinī.
thig5.2:5.1	Sabbe yogā samucchinnā,
thig5.2:5.2	ye dibbā ye ca mānusā;
thig5.2:5.3	Khepetvā āsave sabbe,
thig5.2:5.4	sītibhūtāmhi nibbutā”ti.
thig5.2:6.1	… Vimalā purāṇagaṇikā therī ….
thig5.3:0.1	Therīgāthā 5.3
thig5.3:0.2	Pañcakanipāta
thig5.3:0.3	Sīhātherīgāthā
thig5.3:1.1	“Ayoniso manasikārā,
thig5.3:1.2	kāmarāgena aṭṭitā;
thig5.3:1.3	Ahosiṁ uddhatā pubbe,
thig5.3:1.4	citte avasavattinī.
thig5.3:2.1	Pariyuṭṭhitā klesehi,
thig5.3:2.2	subhasaññānuvattinī;
thig5.3:2.3	Samaṁ cittassa na labhiṁ,
thig5.3:2.4	rāgacittavasānugā.
thig5.3:3.1	Kisā paṇḍu vivaṇṇā ca,
thig5.3:3.2	satta vassāni cārihaṁ;
thig5.3:3.3	Nāhaṁ divā vā rattiṁ vā,
thig5.3:3.4	sukhaṁ vindiṁ sudukkhitā.
thig5.3:4.1	Tato rajjuṁ gahetvāna,
thig5.3:4.2	pāvisiṁ vanamantaraṁ;
thig5.3:4.3	Varaṁ me idha ubbandhaṁ,
thig5.3:4.4	yañca hīnaṁ punācare.
thig5.3:5.1	Daḷhapāsaṁ karitvāna,
thig5.3:5.2	rukkhasākhāya bandhiya;
thig5.3:5.3	Pakkhipiṁ pāsaṁ gīvāyaṁ,
thig5.3:5.4	atha cittaṁ vimucci me”ti.
thig5.3:6.1	… Sīhā therī ….
thig5.4:0.1	Therīgāthā 5.4
thig5.4:0.2	Pañcakanipāta
thig5.4:0.3	Sundarīnandātherīgāthā
thig5.4:1.1	“Āturaṁ asuciṁ pūtiṁ,
thig5.4:1.2	passa nande samussayaṁ;
thig5.4:1.3	Asubhāya cittaṁ bhāvehi,
thig5.4:1.4	ekaggaṁ susamāhitaṁ.
thig5.4:2.1	Yathā idaṁ tathā etaṁ,
thig5.4:2.2	yathā etaṁ tathā idaṁ;
thig5.4:2.3	Duggandhaṁ pūtikaṁ vāti,
thig5.4:2.4	bālānaṁ abhinanditaṁ.
thig5.4:3.1	Evametaṁ avekkhantī,
thig5.4:3.2	rattindivamatanditā;
thig5.4:3.3	Tato sakāya paññāya,
thig5.4:3.4	abhinibbijjha dakkhisaṁ”.
thig5.4:4.1	“Tassā me appamattāya,
thig5.4:4.2	vicinantiyā yoniso;
thig5.4:4.3	Yathābhūtaṁ ayaṁ kāyo,
thig5.4:4.4	diṭṭho santarabāhiro.
thig5.4:5.1	Atha nibbindahaṁ kāye,
thig5.4:5.2	ajjhattañca virajjahaṁ;
thig5.4:5.3	Appamattā visaṁyuttā,
thig5.4:5.4	upasantāmhi nibbutā”ti.
thig5.4:6.1	… Sundarīnandā therī ….
thig5.5:0.1	Therīgāthā 5.5
thig5.5:0.2	Pañcakanipāta
thig5.5:0.3	Nanduttarātherīgāthā
thig5.5:1.1	“Aggiṁ candañca sūriyañca,
thig5.5:1.2	devatā ca namassihaṁ;
thig5.5:1.3	Nadītitthāni gantvāna,
thig5.5:1.4	udakaṁ oruhāmihaṁ.
thig5.5:2.1	Bahūvatasamādānā,
thig5.5:2.2	aḍḍhaṁ sīsassa olikhiṁ;
thig5.5:2.3	Chamāya seyyaṁ kappemi,
thig5.5:2.4	rattiṁ bhattaṁ na bhuñjahaṁ.
thig5.5:3.1	Vibhūsāmaṇḍanaratā,
thig5.5:3.2	nhāpanucchādanehi ca;
thig5.5:3.3	Upakāsiṁ imaṁ kāyaṁ,
thig5.5:3.4	kāmarāgena aṭṭitā.
thig5.5:4.1	Tato saddhaṁ labhitvāna,
thig5.5:4.2	pabbajiṁ anagāriyaṁ;
thig5.5:4.3	Disvā kāyaṁ yathābhūtaṁ,
thig5.5:4.4	kāmarāgo samūhato.
thig5.5:5.1	Sabbe bhavā samucchinnā,
thig5.5:5.2	icchā ca patthanāpi ca;
thig5.5:5.3	Sabbayogavisaṁyuttā,
thig5.5:5.4	santiṁ pāpuṇi cetaso”ti.
thig5.5:6.1	… Nanduttarā therī ….
thig5.6:0.1	Therīgāthā 5.6
thig5.6:0.2	Pañcakanipāta
thig5.6:0.3	Mittākāḷītherīgāthā
thig5.6:1.1	“Saddhāya pabbajitvāna,
thig5.6:1.2	agārasmānagāriyaṁ;
thig5.6:1.3	Vicariṁhaṁ tena tena,
thig5.6:1.4	lābhasakkāraussukā.
thig5.6:2.1	Riñcitvā paramaṁ atthaṁ,
thig5.6:2.2	hīnamatthaṁ asevihaṁ;
thig5.6:2.3	Kilesānaṁ vasaṁ gantvā,
thig5.6:2.4	sāmaññatthaṁ na bujjhihaṁ.
thig5.6:3.1	Tassā me ahu saṁvego,
thig5.6:3.2	nisinnāya vihārake;
thig5.6:3.3	Ummaggapaṭipannāmhi,
thig5.6:3.4	taṇhāya vasamāgatā.
thig5.6:4.1	Appakaṁ jīvitaṁ mayhaṁ,
thig5.6:4.2	jarā byādhi ca maddati;
thig5.6:4.3	Purāyaṁ bhijjati kāyo,
thig5.6:4.4	na me kālo pamajjituṁ.
thig5.6:5.1	Yathābhūtamavekkhantī,
thig5.6:5.2	khandhānaṁ udayabbayaṁ;
thig5.6:5.3	Vimuttacittā uṭṭhāsiṁ,
thig5.6:5.4	kataṁ buddhassa sāsanan”ti.
thig5.6:6.1	… Mittā kāḷī therī ….
thig5.7:0.1	Therīgāthā 5.7
thig5.7:0.2	Pañcakanipāta
thig5.7:0.3	Sakulātherīgāthā
thig5.7:1.1	“Agārasmiṁ vasantīhaṁ,
thig5.7:1.2	dhammaṁ sutvāna bhikkhuno;
thig5.7:1.3	Addasaṁ virajaṁ dhammaṁ,
thig5.7:1.4	nibbānaṁ padamaccutaṁ.
thig5.7:2.1	Sāhaṁ puttaṁ dhītarañca,
thig5.7:2.2	dhanadhaññañca chaḍḍiya;
thig5.7:2.3	Kese chedāpayitvāna,
thig5.7:2.4	pabbajiṁ anagāriyaṁ.
thig5.7:3.1	Sikkhamānā ahaṁ santī,
thig5.7:3.2	bhāventī maggamañjasaṁ;
thig5.7:3.3	Pahāsiṁ rāgadosañca,
thig5.7:3.4	tadekaṭṭhe ca āsave.
thig5.7:4.1	Bhikkhunī upasampajja,
thig5.7:4.2	pubbajātimanussariṁ;
thig5.7:4.3	Dibbacakkhu visodhitaṁ,
thig5.7:4.4	vimalaṁ sādhubhāvitaṁ.
thig5.7:5.1	Saṅkhāre parato disvā,
thig5.7:5.2	hetujāte palokite;
thig5.7:5.3	Pahāsiṁ āsave sabbe,
thig5.7:5.4	sītibhūtāmhi nibbutā”ti.
thig5.7:6.1	… Sakulā therī ….
thig5.8:0.1	Therīgāthā 5.8
thig5.8:0.2	Pañcakanipāta
thig5.8:0.3	Soṇātherīgāthā
thig5.8:1.1	“Dasa putte vijāyitvā,
thig5.8:1.2	asmiṁ rūpasamussaye;
thig5.8:1.3	Tatohaṁ dubbalā jiṇṇā,
thig5.8:1.4	bhikkhuniṁ upasaṅkamiṁ.
thig5.8:2.1	Sā me dhammamadesesi,
thig5.8:2.2	khandhāyatanadhātuyo;
thig5.8:2.3	Tassā dhammaṁ suṇitvāna,
thig5.8:2.4	kese chetvāna pabbajiṁ.
thig5.8:3.1	Tassā me sikkhamānāya,
thig5.8:3.2	dibbacakkhu visodhitaṁ;
thig5.8:3.3	Pubbenivāsaṁ jānāmi,
thig5.8:3.4	yattha me vusitaṁ pure.
thig5.8:4.1	Animittañca bhāvemi,
thig5.8:4.2	ekaggā susamāhitā;
thig5.8:4.3	Anantarāvimokkhāsiṁ,
thig5.8:4.4	anupādāya nibbutā.
thig5.8:5.1	Pañcakkhandhā pariññātā,
thig5.8:5.2	tiṭṭhanti chinnamūlakā;
thig5.8:5.3	Dhi tavatthu jare jamme,
thig5.8:5.4	natthi dāni punabbhavo”ti.
thig5.8:6.1	… Soṇā therī ….
thig5.9:0.1	Therīgāthā 5.9
thig5.9:0.2	Pañcakanipāta
thig5.9:0.3	Bhaddākuṇḍalakesātherīgāthā
thig5.9:1.1	“Lūnakesī paṅkadharī,
thig5.9:1.2	ekasāṭī pure cariṁ;
thig5.9:1.3	Avajje vajjamatinī,
thig5.9:1.4	vajje cāvajjadassinī.
thig5.9:2.1	Divāvihārā nikkhamma,
thig5.9:2.2	gijjhakūṭamhi pabbate;
thig5.9:2.3	Addasaṁ virajaṁ buddhaṁ,
thig5.9:2.4	bhikkhusaṅghapurakkhataṁ.
thig5.9:3.1	Nihacca jāṇuṁ vanditvā,
thig5.9:3.2	sammukhā añjaliṁ akaṁ;
thig5.9:3.3	‘Ehi bhadde’ti maṁ avaca,
thig5.9:3.4	sā me āsūpasampadā.
thig5.9:4.1	Ciṇṇā aṅgā ca magadhā,
thig5.9:4.2	vajjī kāsī ca kosalā;
thig5.9:4.3	Anaṇā paṇṇāsa vassāni,
thig5.9:4.4	raṭṭhapiṇḍaṁ abhuñjahaṁ.
thig5.9:5.1	Puññaṁ vata pasavi bahuṁ,
thig5.9:5.2	Sappañño vatāyaṁ upāsako;
thig5.9:5.3	Yo bhaddāya cīvaraṁ adāsi,
thig5.9:5.4	Vippamuttāya sabbaganthehī”ti.
thig5.9:6.1	… Bhaddā kuṇḍalakesā therī ….
thig5.10:0.1	Therīgāthā 5.10
thig5.10:0.2	Pañcakanipāta
thig5.10:0.3	Paṭācārātherīgāthā
thig5.10:1.1	“Naṅgalehi kasaṁ khettaṁ,
thig5.10:1.2	bījāni pavapaṁ chamā;
thig5.10:1.3	Puttadārāni posentā,
thig5.10:1.4	dhanaṁ vindanti māṇavā.
thig5.10:2.1	Kimahaṁ sīlasampannā,
thig5.10:2.2	satthusāsanakārikā;
thig5.10:2.3	Nibbānaṁ nādhigacchāmi,
thig5.10:2.4	akusītā anuddhatā.
thig5.10:3.1	Pāde pakkhālayitvāna,
thig5.10:3.2	udakesu karomahaṁ;
thig5.10:3.3	Pādodakañca disvāna,
thig5.10:3.4	thalato ninnamāgataṁ.
thig5.10:4.1	Tato cittaṁ samādhesiṁ,
thig5.10:4.2	assaṁ bhadraṁvajāniyaṁ;
thig5.10:4.3	Tato dīpaṁ gahetvāna,
thig5.10:4.4	vihāraṁ pāvisiṁ ahaṁ;
thig5.10:4.5	Seyyaṁ olokayitvāna,
thig5.10:4.6	mañcakamhi upāvisiṁ.
thig5.10:5.1	Tato sūciṁ gahetvāna,
thig5.10:5.2	vaṭṭiṁ okassayāmahaṁ;
thig5.10:5.3	Padīpasseva nibbānaṁ,
thig5.10:5.4	vimokkho ahu cetaso”ti.
thig5.10:6.1	… Paṭācārā therī ….
thig5.11:0.1	Therīgāthā 5.11
thig5.11:0.2	Pañcakanipāta
thig5.11:0.3	Tiṁsamattātherīgāthā
thig5.11:1.1	“Musalāni gahetvāna,
thig5.11:1.2	dhaññaṁ koṭṭenti māṇavā;
thig5.11:1.3	Puttadārāni posentā,
thig5.11:1.4	dhanaṁ vindanti māṇavā.
thig5.11:2.1	Karotha buddhasāsanaṁ,
thig5.11:2.2	yaṁ katvā nānutappati;
thig5.11:2.3	Khippaṁ pādāni dhovitvā,
thig5.11:2.4	ekamante nisīdatha;
thig5.11:2.5	Cetosamathamanuyuttā,
thig5.11:2.6	karotha buddhasāsanaṁ”.
thig5.11:3.1	Tassā tā vacanaṁ sutvā,
thig5.11:3.2	paṭācārāya sāsanaṁ;
thig5.11:3.3	Pāde pakkhālayitvāna,
thig5.11:3.4	ekamantaṁ upāvisuṁ;
thig5.11:3.5	Cetosamathamanuyuttā,
thig5.11:3.6	akaṁsu buddhasāsanaṁ.
thig5.11:4.1	Rattiyā purime yāme,
thig5.11:4.2	pubbajātimanussaruṁ;
thig5.11:4.3	Rattiyā majjhime yāme,
thig5.11:4.4	dibbacakkhuṁ visodhayuṁ;
thig5.11:4.5	Rattiyā pacchime yāme,
thig5.11:4.6	tamokhandhaṁ padālayuṁ.
thig5.11:5.1	Uṭṭhāya pāde vandiṁsu,
thig5.11:5.2	“katā te anusāsanī;
thig5.11:5.3	Indaṁva devā tidasā,
thig5.11:5.4	saṅgāme aparājitaṁ;
thig5.11:5.5	Purakkhatvā vihassāma,
thig5.11:5.6	tevijjāmha anāsavā”ti.
thig5.11:6.1	Itthaṁ sudaṁ tiṁsamattā therī bhikkhuniyo paṭācārāya santike aññaṁ byākariṁsūti.
thig5.12:0.1	Therīgāthā 5.12
thig5.12:0.2	Pañcakanipāta
thig5.12:0.3	Candātherīgāthā
thig5.12:1.1	“Duggatāhaṁ pure āsiṁ,
thig5.12:1.2	vidhavā ca aputtikā;
thig5.12:1.3	Vinā mittehi ñātīhi,
thig5.12:1.4	bhattacoḷassa nādhigaṁ.
thig5.12:2.1	Pattaṁ daṇḍañca gaṇhitvā,
thig5.12:2.2	bhikkhamānā kulā kulaṁ;
thig5.12:2.3	Sītuṇhena ca ḍayhantī,
thig5.12:2.4	satta vassāni cārihaṁ.
thig5.12:3.1	Bhikkhuniṁ puna disvāna,
thig5.12:3.2	annapānassa lābhiniṁ;
thig5.12:3.3	Upasaṅkamma avocaṁ,
thig5.12:3.4	‘pabbajjaṁ anagāriyaṁ’.
thig5.12:4.1	Sā ca maṁ anukampāya,
thig5.12:4.2	pabbājesi paṭācārā;
thig5.12:4.3	Tato maṁ ovaditvāna,
thig5.12:4.4	paramatthe niyojayi.
thig5.12:5.1	Tassāhaṁ vacanaṁ sutvā,
thig5.12:5.2	akāsiṁ anusāsaniṁ;
thig5.12:5.3	Amogho ayyāyovādo,
thig5.12:5.4	tevijjāmhi anāsavā”ti.
thig5.12:6.1	… Candā therī ….
thig5.12:7.1	Pañcakanipāto niṭṭhito.
thig6.1:0.1	Therīgāthā 6.1
thig6.1:0.2	Chakkanipāta
thig6.1:0.3	Pañcasatamattātherīgāthā
thig6.1:1.1	“Yassa maggaṁ na jānāsi,
thig6.1:1.2	āgatassa gatassa vā;
thig6.1:1.3	Taṁ kuto cāgataṁ sattaṁ,
thig6.1:1.4	‘mama putto’ti rodasi.
thig6.1:2.1	Maggañca khossa jānāsi,
thig6.1:2.2	āgatassa gatassa vā;
thig6.1:2.3	Na naṁ samanusocesi,
thig6.1:2.4	evaṁdhammā hi pāṇino.
thig6.1:3.1	Ayācito tatāgacchi,
thig6.1:3.2	nānuññāto ito gato;
thig6.1:3.3	Kutoci nūna āgantvā,
thig6.1:3.4	vasitvā katipāhakaṁ;
thig6.1:3.5	Itopi aññena gato,
thig6.1:3.6	tatopaññena gacchati.
thig6.1:4.1	Peto manussarūpena,
thig6.1:4.2	saṁsaranto gamissati;
thig6.1:4.3	Yathāgato tathā gato,
thig6.1:4.4	kā tattha paridevanā”.
thig6.1:5.1	“Abbahī vata me sallaṁ,
thig6.1:5.2	duddasaṁ hadayassitaṁ;
thig6.1:5.3	Yā me sokaparetāya,
thig6.1:5.4	puttasokaṁ byapānudi.
thig6.1:6.1	Sājja abbūḷhasallāhaṁ,
thig6.1:6.2	Nicchātā parinibbutā;
thig6.1:6.3	Buddhaṁ dhammañca saṅghañca,
thig6.1:6.4	Upemi saraṇaṁ muniṁ”.
thig6.1:7.1	Itthaṁ sudaṁ pañcasatamattā therī bhikkhuniyo … pe….
thig6.2:0.1	Therīgāthā 6.2
thig6.2:0.2	Chakkanipāta
thig6.2:0.3	Vāseṭṭhītherīgāthā
thig6.2:1.1	“Puttasokenahaṁ aṭṭā,
thig6.2:1.2	khittacittā visaññinī;
thig6.2:1.3	Naggā pakiṇṇakesī ca,
thig6.2:1.4	tena tena vicārihaṁ.
thig6.2:2.1	Vīthi saṅkārakūṭesu,
thig6.2:2.2	susāne rathiyāsu ca;
thig6.2:2.3	Acariṁ tīṇi vassāni,
thig6.2:2.4	khuppipāsāsamappitā.
thig6.2:3.1	Athaddasāsiṁ sugataṁ,
thig6.2:3.2	nagaraṁ mithilaṁ pati;
thig6.2:3.3	Adantānaṁ dametāraṁ,
thig6.2:3.4	sambuddhamakutobhayaṁ.
thig6.2:4.1	Sacittaṁ paṭiladdhāna,
thig6.2:4.2	vanditvāna upāvisiṁ;
thig6.2:4.3	So me dhammamadesesi,
thig6.2:4.4	anukampāya gotamo.
thig6.2:5.1	Tassa dhammaṁ suṇitvāna,
thig6.2:5.2	pabbajiṁ anagāriyaṁ;
thig6.2:5.3	Yuñjantī satthuvacane,
thig6.2:5.4	sacchākāsiṁ padaṁ sivaṁ.
thig6.2:6.1	Sabbe sokā samucchinnā,
thig6.2:6.2	pahīnā etadantikā;
thig6.2:6.3	Pariññātā hi me vatthū,
thig6.2:6.4	yato sokāna sambhavo”ti.
thig6.2:7.1	… Vāseṭṭhī therī ….
thig6.3:0.1	Therīgāthā 6.3
thig6.3:0.2	Chakkanipāta
thig6.3:0.3	Khemātherīgāthā
thig6.3:1.1	“Daharā tvaṁ rūpavatī,
thig6.3:1.2	ahampi daharo yuvā;
thig6.3:1.3	Pañcaṅgikena turiyena,
thig6.3:1.4	ehi kheme ramāmase”.
thig6.3:2.1	“Iminā pūtikāyena,
thig6.3:2.2	āturena pabhaṅgunā;
thig6.3:2.3	Aṭṭiyāmi harāyāmi,
thig6.3:2.4	kāmataṇhā samūhatā.
thig6.3:3.1	Sattisūlūpamā kāmā,
thig6.3:3.2	khandhāsaṁ adhikuṭṭanā;
thig6.3:3.3	Yaṁ ‘tvaṁ kāmaratiṁ’ brūsi,
thig6.3:3.4	‘aratī’ dāni sā mama.
thig6.3:4.1	Sabbattha vihatā nandī,
thig6.3:4.2	tamokhandho padālito;
thig6.3:4.3	Evaṁ jānāhi pāpima,
thig6.3:4.4	nihato tvamasi antaka.
thig6.3:5.1	Nakkhattāni namassantā,
thig6.3:5.2	aggiṁ paricaraṁ vane;
thig6.3:5.3	Yathābhuccamajānantā,
thig6.3:5.4	bālā suddhimamaññatha.
thig6.3:6.1	Ahañca kho namassantī,
thig6.3:6.2	sambuddhaṁ purisuttamaṁ;
thig6.3:6.3	Pamuttā sabbadukkhehi,
thig6.3:6.4	satthusāsanakārikā”ti.
thig6.3:7.1	… Khemā therī ….
thig6.4:0.1	Therīgāthā 6.4
thig6.4:0.2	Chakkanipāta
thig6.4:0.3	Sujātātherīgāthā
thig6.4:1.1	“Alaṅkatā suvasanā,
thig6.4:1.2	mālinī candanokkhitā;
thig6.4:1.3	Sabbābharaṇasañchannā,
thig6.4:1.4	dāsīgaṇapurakkhatā.
thig6.4:2.1	Annaṁ pānañca ādāya,
thig6.4:2.2	khajjaṁ bhojjaṁ anappakaṁ;
thig6.4:2.3	Gehato nikkhamitvāna,
thig6.4:2.4	uyyānamabhihārayiṁ.
thig6.4:3.1	Tattha ramitvā kīḷitvā,
thig6.4:3.2	āgacchantī sakaṁ gharaṁ;
thig6.4:3.3	Vihāraṁ daṭṭhuṁ pāvisiṁ,
thig6.4:3.4	sākete añjanaṁ vanaṁ.
thig6.4:4.1	Disvāna lokapajjotaṁ,
thig6.4:4.2	vanditvāna upāvisiṁ;
thig6.4:4.3	So me dhammamadesesi,
thig6.4:4.4	anukampāya cakkhumā.
thig6.4:5.1	Sutvā ca kho mahesissa,
thig6.4:5.2	saccaṁ sampaṭivijjhahaṁ;
thig6.4:5.3	Tattheva virajaṁ dhammaṁ,
thig6.4:5.4	phusayiṁ amataṁ padaṁ.
thig6.4:6.1	Tato viññātasaddhammā,
thig6.4:6.2	pabbajiṁ anagāriyaṁ;
thig6.4:6.3	Tisso vijjā anuppattā,
thig6.4:6.4	amoghaṁ buddhasāsanan”ti.
thig6.4:7.1	… Sujātā therī ….
thig6.5:0.1	Therīgāthā 6.5
thig6.5:0.2	Chakkanipāta
thig6.5:0.3	Anopamātherīgāthā
thig6.5:1.1	“Ucce kule ahaṁ jātā,
thig6.5:1.2	bahuvitte mahaddhane;
thig6.5:1.3	Vaṇṇarūpena sampannā,
thig6.5:1.4	dhītā majjhassa atrajā.
thig6.5:2.1	Patthitā rājaputtehi,
thig6.5:2.2	seṭṭhiputtehi gijjhitā;
thig6.5:2.3	Pitu me pesayī dūtaṁ,
thig6.5:2.4	detha mayhaṁ anopamaṁ.
thig6.5:3.1	Yattakaṁ tulitā esā,
thig6.5:3.2	tuyhaṁ dhītā anopamā;
thig6.5:3.3	Tato aṭṭhaguṇaṁ dassaṁ,
thig6.5:3.4	hiraññaṁ ratanāni ca.
thig6.5:4.1	Sāhaṁ disvāna sambuddhaṁ,
thig6.5:4.2	lokajeṭṭhaṁ anuttaraṁ;
thig6.5:4.3	Tassa pādāni vanditvā,
thig6.5:4.4	ekamantaṁ upāvisiṁ.
thig6.5:5.1	So me dhammamadesesi,
thig6.5:5.2	anukampāya gotamo;
thig6.5:5.3	Nisinnā āsane tasmiṁ,
thig6.5:5.4	phusayiṁ tatiyaṁ phalaṁ.
thig6.5:6.1	Tato kesāni chetvāna,
thig6.5:6.2	pabbajiṁ anagāriyaṁ;
thig6.5:6.3	Ajja me sattamī ratti,
thig6.5:6.4	yato taṇhā visositā”ti.
thig6.5:7.1	… Anopamā therī ….
thig6.6:0.1	Therīgāthā 6.6
thig6.6:0.2	Chakkanipāta
thig6.6:0.3	Mahāpajāpatigotamītherīgāthā
thig6.6:1.1	“Buddha vīra namo tyatthu,
thig6.6:1.2	sabbasattānamuttama;
thig6.6:1.3	Yo maṁ dukkhā pamocesi,
thig6.6:1.4	aññañca bahukaṁ janaṁ.
thig6.6:2.1	Sabbadukkhaṁ pariññātaṁ,
thig6.6:2.2	Hetutaṇhā visositā;
thig6.6:2.3	Bhāvito aṭṭhaṅgiko maggo,
thig6.6:2.4	Nirodho phusito mayā.
thig6.6:3.1	Mātā putto pitā bhātā,
thig6.6:3.2	ayyakā ca pure ahuṁ;
thig6.6:3.3	Yathābhuccamajānantī,
thig6.6:3.4	saṁsariṁhaṁ anibbisaṁ.
thig6.6:4.1	Diṭṭho hi me so bhagavā,
thig6.6:4.2	antimoyaṁ samussayo;
thig6.6:4.3	Vikkhīṇo jātisaṁsāro,
thig6.6:4.4	natthi dāni punabbhavo.
thig6.6:5.1	Āraddhavīriye pahitatte,
thig6.6:5.2	Niccaṁ daḷhaparakkame;
thig6.6:5.3	Samagge sāvake passe,
thig6.6:5.4	Esā buddhāna vandanā.
thig6.6:6.1	Bahūnaṁ vata atthāya,
thig6.6:6.2	Māyā janayi gotamaṁ;
thig6.6:6.3	Byādhimaraṇatunnānaṁ,
thig6.6:6.4	Dukkhakkhandhaṁ byapānudī”ti.
thig6.6:7.1	… Mahāpajāpatigotamī therī ….
thig6.7:0.1	Therīgāthā 6.7
thig6.7:0.2	Chakkanipāta
thig6.7:0.3	Guttātherīgāthā
thig6.7:1.1	“Gutte yadatthaṁ pabbajjā,
thig6.7:1.2	hitvā puttaṁ vasuṁ piyaṁ;
thig6.7:1.3	Tameva anubrūhehi,
thig6.7:1.4	mā cittassa vasaṁ gami.
thig6.7:2.1	Cittena vañcitā sattā,
thig6.7:2.2	mārassa visaye ratā;
thig6.7:2.3	Anekajātisaṁsāraṁ,
thig6.7:2.4	sandhāvanti aviddasū.
thig6.7:3.1	Kāmacchandañca byāpādaṁ,
thig6.7:3.2	sakkāyadiṭṭhimeva ca;
thig6.7:3.3	Sīlabbataparāmāsaṁ,
thig6.7:3.4	vicikicchañca pañcamaṁ.
thig6.7:4.1	Saṁyojanāni etāni,
thig6.7:4.2	pajahitvāna bhikkhunī;
thig6.7:4.3	Orambhāgamanīyāni,
thig6.7:4.4	nayidaṁ punarehisi.
thig6.7:5.1	Rāgaṁ mānaṁ avijjañca,
thig6.7:5.2	uddhaccañca vivajjiya;
thig6.7:5.3	Saṁyojanāni chetvāna,
thig6.7:5.4	dukkhassantaṁ karissasi.
thig6.7:6.1	Khepetvā jātisaṁsāraṁ,
thig6.7:6.2	pariññāya punabbhavaṁ;
thig6.7:6.3	Diṭṭheva dhamme nicchātā,
thig6.7:6.4	upasantā carissatī”ti.
thig6.7:7.1	… Guttā therī ….
thig6.8:0.1	Therīgāthā 6.8
thig6.8:0.2	Chakkanipāta
thig6.8:0.3	Vijayātherīgāthā
thig6.8:1.1	“Catukkhattuṁ pañcakkhattuṁ,
thig6.8:1.2	vihārā upanikkhamiṁ;
thig6.8:1.3	Aladdhā cetaso santiṁ,
thig6.8:1.4	citte avasavattinī.
thig6.8:2.1	Bhikkhuniṁ upasaṅkamma,
thig6.8:2.2	sakkaccaṁ paripucchahaṁ;
thig6.8:2.3	Sā me dhammamadesesi,
thig6.8:2.4	dhātuāyatanāni ca.
thig6.8:3.1	Cattāri ariyasaccāni,
thig6.8:3.2	indriyāni balāni ca;
thig6.8:3.3	Bojjhaṅgaṭṭhaṅgikaṁ maggaṁ,
thig6.8:3.4	uttamatthassa pattiyā.
thig6.8:4.1	Tassāhaṁ vacanaṁ sutvā,
thig6.8:4.2	karontī anusāsaniṁ;
thig6.8:4.3	Rattiyā purime yāme,
thig6.8:4.4	pubbajātimanussariṁ.
thig6.8:5.1	Rattiyā majjhime yāme,
thig6.8:5.2	dibbacakkhuṁ visodhayiṁ;
thig6.8:5.3	Rattiyā pacchime yāme,
thig6.8:5.4	tamokhandhaṁ padālayiṁ.
thig6.8:6.1	Pītisukhena ca kāyaṁ,
thig6.8:6.2	Pharitvā vihariṁ tadā;
thig6.8:6.3	Sattamiyā pāde pasāresiṁ,
thig6.8:6.4	Tamokhandhaṁ padāliyā”ti.
thig6.8:7.1	… Vijayā therī ….
thig6.8:8.1	Chakkanipāto niṭṭhito.
thig7.1:0.1	Therīgāthā 7.1
thig7.1:0.2	Sattakanipāta
thig7.1:0.3	Uttarātherīgāthā
thig7.1:1.1	“Musalāni gahetvāna,
thig7.1:1.2	dhaññaṁ koṭṭenti māṇavā;
thig7.1:1.3	Puttadārāni posentā,
thig7.1:1.4	dhanaṁ vindanti māṇavā.
thig7.1:2.1	Ghaṭetha buddhasāsane,
thig7.1:2.2	yaṁ katvā nānutappati;
thig7.1:2.3	Khippaṁ pādāni dhovitvā,
thig7.1:2.4	ekamantaṁ nisīdatha.
thig7.1:3.1	Cittaṁ upaṭṭhapetvāna,
thig7.1:3.2	ekaggaṁ susamāhitaṁ;
thig7.1:3.3	Paccavekkhatha saṅkhāre,
thig7.1:3.4	parato no ca attato”.
thig7.1:4.1	“Tassāhaṁ vacanaṁ sutvā,
thig7.1:4.2	paṭācārānusāsaniṁ;
thig7.1:4.3	Pāde pakkhālayitvāna,
thig7.1:4.4	ekamante upāvisiṁ.
thig7.1:5.1	Rattiyā purime yāme,
thig7.1:5.2	pubbajātimanussariṁ;
thig7.1:5.3	Rattiyā majjhime yāme,
thig7.1:5.4	dibbacakkhuṁ visodhayiṁ.
thig7.1:6.1	Rattiyā pacchime yāme,
thig7.1:6.2	tamokhandhaṁ padālayiṁ;
thig7.1:6.3	Tevijjā atha vuṭṭhāsiṁ,
thig7.1:6.4	katā te anusāsanī.
thig7.1:7.1	Sakkaṁva devā tidasā,
thig7.1:7.2	saṅgāme aparājitaṁ;
thig7.1:7.3	Purakkhatvā vihassāmi,
thig7.1:7.4	tevijjāmhi anāsavā”.
thig7.1:8.1	… Uttarā therī ….
thig7.2:0.1	Therīgāthā 7.2
thig7.2:0.2	Sattakanipāta
thig7.2:0.3	Cālātherīgāthā
thig7.2:1.1	“Satiṁ upaṭṭhapetvāna,
thig7.2:1.2	bhikkhunī bhāvitindriyā;
thig7.2:1.3	Paṭivijjhi padaṁ santaṁ,
thig7.2:1.4	saṅkhārūpasamaṁ sukhaṁ”.
thig7.2:2.1	“Kaṁ nu uddissa muṇḍāsi,
thig7.2:2.2	samaṇī viya dissasi;
thig7.2:2.3	Na ca rocesi pāsaṇḍe,
thig7.2:2.4	kimidaṁ carasi momuhā”.
thig7.2:3.1	“Ito bahiddhā pāsaṇḍā,
thig7.2:3.2	diṭṭhiyo upanissitā;
thig7.2:3.3	Na te dhammaṁ vijānanti,
thig7.2:3.4	na te dhammassa kovidā.
thig7.2:4.1	Atthi sakyakule jāto,
thig7.2:4.2	buddho appaṭipuggalo;
thig7.2:4.3	So me dhammamadesesi,
thig7.2:4.4	diṭṭhīnaṁ samatikkamaṁ.
thig7.2:5.1	Dukkhaṁ dukkhasamuppādaṁ,
thig7.2:5.2	Dukkhassa ca atikkamaṁ;
thig7.2:5.3	Ariyaṁ caṭṭhaṅgikaṁ maggaṁ,
thig7.2:5.4	Dukkhūpasamagāminaṁ.
thig7.2:6.1	Tassāhaṁ vacanaṁ sutvā,
thig7.2:6.2	vihariṁ sāsane ratā;
thig7.2:6.3	Tisso vijjā anuppattā,
thig7.2:6.4	kataṁ buddhassa sāsanaṁ.
thig7.2:7.1	Sabbattha vihatā nandī,
thig7.2:7.2	tamokhandho padālito;
thig7.2:7.3	Evaṁ jānāhi pāpima,
thig7.2:7.4	nihato tvamasi antaka”.
thig7.2:8.1	… Cālā therī ….
thig7.3:0.1	Therīgāthā 7.3
thig7.3:0.2	Sattakanipāta
thig7.3:0.3	Upacālātherīgāthā
thig7.3:1.1	“Satimatī cakkhumatī,
thig7.3:1.2	bhikkhunī bhāvitindriyā;
thig7.3:1.3	Paṭivijjhi padaṁ santaṁ,
thig7.3:1.4	akāpurisasevitaṁ”.
thig7.3:2.1	“Kiṁ nu jātiṁ na rocesi,
thig7.3:2.2	jāto kāmāni bhuñjati;
thig7.3:2.3	Bhuñjāhi kāmaratiyo,
thig7.3:2.4	māhu pacchānutāpinī”.
thig7.3:3.1	“Jātassa maraṇaṁ hoti,
thig7.3:3.2	hatthapādāna chedanaṁ;
thig7.3:3.3	Vadhabandhapariklesaṁ,
thig7.3:3.4	jāto dukkhaṁ nigacchati.
thig7.3:4.1	Atthi sakyakule jāto,
thig7.3:4.2	sambuddho aparājito;
thig7.3:4.3	So me dhammamadesesi,
thig7.3:4.4	jātiyā samatikkamaṁ.
thig7.3:5.1	Dukkhaṁ dukkhasamuppādaṁ,
thig7.3:5.2	dukkhassa ca atikkamaṁ;
thig7.3:5.3	Ariyaṁ caṭṭhaṅgikaṁ maggaṁ,
thig7.3:5.4	dukkhūpasamagāminaṁ.
thig7.3:6.1	Tassāhaṁ vacanaṁ sutvā,
thig7.3:6.2	vihariṁ sāsane ratā;
thig7.3:6.3	Tisso vijjā anuppattā,
thig7.3:6.4	kataṁ buddhassa sāsanaṁ.
thig7.3:7.1	Sabbattha vihatā nandī,
thig7.3:7.2	tamokhandho padālito;
thig7.3:7.3	Evaṁ jānāhi pāpima,
thig7.3:7.4	nihato tvamasi antaka”.
thig7.3:8.1	… Upacālā therī ….
thig7.3:9.1	Sattakanipāto niṭṭhito.
thig8.1:0.1	Therīgāthā 8.1
thig8.1:0.2	Aṭṭhakanipāta
thig8.1:0.3	Sīsūpacālātherīgāthā
thig8.1:1.1	“Bhikkhunī sīlasampannā,
thig8.1:1.2	indriyesu susaṁvutā;
thig8.1:1.3	Adhigacche padaṁ santaṁ,
thig8.1:1.4	asecanakamojavaṁ”.
thig8.1:2.1	“Tāvatiṁsā ca yāmā ca,
thig8.1:2.2	tusitā cāpi devatā;
thig8.1:2.3	Nimmānaratino devā,
thig8.1:2.4	ye devā vasavattino;
thig8.1:2.5	Tattha cittaṁ paṇīdhehi,
thig8.1:2.6	yattha te vusitaṁ pure”.
thig8.1:3.1	“Tāvatiṁsā ca yāmā ca,
thig8.1:3.2	tusitā cāpi devatā;
thig8.1:3.3	Nimmānaratino devā,
thig8.1:3.4	ye devā vasavattino.
thig8.1:4.1	Kālaṁ kālaṁ bhavābhavaṁ,
thig8.1:4.2	sakkāyasmiṁ purakkhatā;
thig8.1:4.3	Avītivattā sakkāyaṁ,
thig8.1:4.4	jātimaraṇasārino.
thig8.1:5.1	Sabbo ādīpito loko,
thig8.1:5.2	sabbo loko padīpito;
thig8.1:5.3	Sabbo pajjalito loko,
thig8.1:5.4	sabbo loko pakampito.
thig8.1:6.1	Akampiyaṁ atuliyaṁ,
thig8.1:6.2	aputhujjanasevitaṁ;
thig8.1:6.3	Buddho dhammamadesesi,
thig8.1:6.4	tattha me nirato mano.
thig8.1:7.1	Tassāhaṁ vacanaṁ sutvā,
thig8.1:7.2	vihariṁ sāsane ratā;
thig8.1:7.3	Tisso vijjā anuppattā,
thig8.1:7.4	kataṁ buddhassa sāsanaṁ.
thig8.1:8.1	Sabbattha vihatā nandī,
thig8.1:8.2	tamokhandho padālito;
thig8.1:8.3	Evaṁ jānāhi pāpima,
thig8.1:8.4	nihato tvamasi antaka”.
thig8.1:9.1	… Sīsūpacālā therī ….
thig8.1:10.1	Aṭṭhakanipāto niṭṭhito.
thig9.1:0.1	Therīgāthā 9.1
thig9.1:0.2	Navakanipāta
thig9.1:0.3	Vaḍḍhamātutherīgāthā
thig9.1:1.1	“Mā su te vaḍḍha lokamhi,
thig9.1:1.2	vanatho āhu kudācanaṁ;
thig9.1:1.3	Mā puttaka punappunaṁ,
thig9.1:1.4	ahu dukkhassa bhāgimā.
thig9.1:2.1	Sukhañhi vaḍḍha munayo,
thig9.1:2.2	anejā chinnasaṁsayā;
thig9.1:2.3	Sītibhūtā damappattā,
thig9.1:2.4	viharanti anāsavā.
thig9.1:3.1	Tehānuciṇṇaṁ isībhi,
thig9.1:3.2	maggaṁ dassanapattiyā;
thig9.1:3.3	Dukkhassantakiriyāya,
thig9.1:3.4	tvaṁ vaḍḍha anubrūhaya”.
thig9.1:4.1	“Visāradāva bhaṇasi,
thig9.1:4.2	etamatthaṁ janetti me;
thig9.1:4.3	Maññāmi nūna māmike,
thig9.1:4.4	vanatho te na vijjati”.
thig9.1:5.1	“Ye keci vaḍḍha saṅkhārā,
thig9.1:5.2	hīnā ukkaṭṭhamajjhimā;
thig9.1:5.3	Aṇūpi aṇumattopi,
thig9.1:5.4	vanatho me na vijjati.
thig9.1:6.1	Sabbe me āsavā khīṇā,
thig9.1:6.2	appamattassa jhāyato;
thig9.1:6.3	Tisso vijjā anuppattā,
thig9.1:6.4	kataṁ buddhassa sāsanaṁ”.
thig9.1:7.1	“Uḷāraṁ vata me mātā,
thig9.1:7.2	patodaṁ samavassari;
thig9.1:7.3	Paramatthasañhitā gāthā,
thig9.1:7.4	yathāpi anukampikā.
thig9.1:8.1	Tassāhaṁ vacanaṁ sutvā,
thig9.1:8.2	anusiṭṭhiṁ janettiyā;
thig9.1:8.3	Dhammasaṁvegamāpādiṁ,
thig9.1:8.4	yogakkhemassa pattiyā.
thig9.1:9.1	Sohaṁ padhānapahitatto,
thig9.1:9.2	rattindivamatandito;
thig9.1:9.3	Mātarā codito santo,
thig9.1:9.4	aphusiṁ santimuttamaṁ”.
thig9.1:10.1	… Vaḍḍhamātā therī ….
thig9.1:11.1	Navakanipāto niṭṭhito.
thig10.1:0.1	Therīgāthā 10.1
thig10.1:0.2	Ekādasakanipāta
thig10.1:0.3	Kisāgotamītherīgāthā
thig10.1:1.1	“Kalyāṇamittatā muninā,
thig10.1:1.2	lokaṁ ādissa vaṇṇitā;
thig10.1:1.3	Kalyāṇamitte bhajamāno,
thig10.1:1.4	api bālo paṇḍito assa.
thig10.1:2.1	Bhajitabbā sappurisā,
thig10.1:2.2	Paññā tathā vaḍḍhati bhajantānaṁ;
thig10.1:2.3	Bhajamāno sappurise,
thig10.1:2.4	Sabbehipi dukkhehi pamucceyya.
thig10.1:3.1	Dukkhañca vijāneyya,
thig10.1:3.2	Dukkhassa ca samudayaṁ nirodhaṁ;
thig10.1:3.3	Aṭṭhaṅgikañca maggaṁ,
thig10.1:3.4	Cattāripi ariyasaccāni”.
thig10.1:4.1	“Dukkho itthibhāvo,
thig10.1:4.2	Akkhāto purisadammasārathinā;
thig10.1:4.3	Sapattikampi hi dukkhaṁ,
thig10.1:4.4	Appekaccā sakiṁ vijātāyo.
thig10.1:5.1	Galake api kantanti,
thig10.1:5.2	Sukhumāliniyo visāni khādanti;
thig10.1:5.3	Janamārakamajjhagatā,
thig10.1:5.4	Ubhopi byasanāni anubhonti”.
thig10.1:6.1	“Upavijaññā gacchantī,
thig10.1:6.2	addasāhaṁ patiṁ mataṁ;
thig10.1:6.3	Panthamhi vijāyitvāna,
thig10.1:6.4	appattāva sakaṁ gharaṁ.
thig10.1:7.1	Dve puttā kālakatā,
thig10.1:7.2	Patī ca panthe mato kapaṇikāya;
thig10.1:7.3	Mātā pitā ca bhātā,
thig10.1:7.4	Ḍayhanti ca ekacitakāyaṁ”.
thig10.1:8.1	“Khīṇakulīne kapaṇe,
thig10.1:8.2	Anubhūtaṁ te dukhaṁ aparimāṇaṁ;
thig10.1:8.3	Assū ca te pavattaṁ,
thig10.1:8.4	Bahūni ca jātisahassāni.
thig10.1:9.1	Vasitā susānamajjhe,
thig10.1:9.2	Athopi khāditāni puttamaṁsāni;
thig10.1:9.3	Hatakulikā sabbagarahitā,
thig10.1:9.4	Matapatikā amatamadhigacchiṁ.
thig10.1:10.1	Bhāvito me maggo,
thig10.1:10.2	Ariyo aṭṭhaṅgiko amatagāmī;
thig10.1:10.3	Nibbānaṁ sacchikataṁ,
thig10.1:10.4	Dhammādāsaṁ avekkhiṁhaṁ.
thig10.1:11.1	Ahamamhi kantasallā,
thig10.1:11.2	Ohitabhārā katañhi karaṇīyaṁ;
thig10.1:11.3	Kisā gotamī therī,
thig10.1:11.4	Vimuttacittā imaṁ bhaṇī”ti.
thig10.1:12.1	… Kisā gotamī therī ….
thig10.1:13.1	Ekādasakanipāto niṭṭhito.
thig11.1:0.1	Therīgāthā 11.1
thig11.1:0.2	Dvādasakanipāta
thig11.1:0.3	Uppalavaṇṇātherīgāthā
thig11.1:1.1	“Ubho mātā ca dhītā ca,
thig11.1:1.2	mayaṁ āsuṁ sapattiyo;
thig11.1:1.3	Tassā me ahu saṁvego,
thig11.1:1.4	abbhuto lomahaṁsano.
thig11.1:2.1	Dhiratthu kāmā asucī,
thig11.1:2.2	duggandhā bahukaṇṭakā;
thig11.1:2.3	Yattha mātā ca dhītā ca,
thig11.1:2.4	sabhariyā mayaṁ ahuṁ.
thig11.1:3.1	Kāmesvādīnavaṁ disvā,
thig11.1:3.2	nekkhammaṁ daṭṭhu khemato;
thig11.1:3.3	Sā pabbajjiṁ rājagahe,
thig11.1:3.4	agārasmānagāriyaṁ.
thig11.1:4.1	Pubbenivāsaṁ jānāmi,
thig11.1:4.2	dibbacakkhu visodhitaṁ;
thig11.1:4.3	Cetopariccañāṇañca,
thig11.1:4.4	sotadhātu visodhitā.
thig11.1:5.1	Iddhīpi me sacchikatā,
thig11.1:5.2	patto me āsavakkhayo;
thig11.1:5.3	Chaḷabhiññā sacchikatā,
thig11.1:5.4	kataṁ buddhassa sāsanaṁ.
thig11.1:6.1	Iddhiyā abhinimmitvā,
thig11.1:6.2	caturassaṁ rathaṁ ahaṁ;
thig11.1:6.3	Buddhassa pāde vanditvā,
thig11.1:6.4	lokanāthassa tādino”.
thig11.1:7.1	“Supupphitaggaṁ upagamma pādapaṁ,
thig11.1:7.2	Ekā tuvaṁ tiṭṭhasi sālamūle;
thig11.1:7.3	Na cāpi te dutiyo atthi koci,
thig11.1:7.4	Bāle na tvaṁ bhāyasi dhuttakānaṁ”.
thig11.1:8.1	“Sataṁ sahassānipi dhuttakānaṁ,
thig11.1:8.2	Samāgatā edisakā bhaveyyuṁ;
thig11.1:8.3	Lomaṁ na iñje napi sampavedhe,
thig11.1:8.4	Kiṁ me tuvaṁ māra karissaseko.
thig11.1:9.1	Esā antaradhāyāmi,
thig11.1:9.2	kucchiṁ vā pavisāmi te;
thig11.1:9.3	Bhamukantare tiṭṭhāmi,
thig11.1:9.4	tiṭṭhantiṁ maṁ na dakkhasi.
thig11.1:10.1	Cittamhi vasībhūtāhaṁ,
thig11.1:10.2	iddhipādā subhāvitā;
thig11.1:10.3	Chaḷabhiññā sacchikatā,
thig11.1:10.4	kataṁ buddhassa sāsanaṁ.
thig11.1:11.1	Sattisūlūpamā kāmā,
thig11.1:11.2	khandhāsaṁ adhikuṭṭanā;
thig11.1:11.3	Yaṁ tvaṁ ‘kāmaratiṁ’ brūsi,
thig11.1:11.4	‘āratī’ dāni sā mama.
thig11.1:12.1	Sabbattha vihatā nandī,
thig11.1:12.2	Tamokhandho padālito;
thig11.1:12.3	Evaṁ jānāhi pāpima,
thig11.1:12.4	Nihato tvamasi antakā”ti.
thig11.1:13.1	… Uppalavaṇṇā therī ….
thig11.1:14.1	Dvādasakanipāto niṭṭhito.
thig12.1:0.1	Therīgāthā 12.1
thig12.1:0.2	Soḷasakanipāta
thig12.1:0.3	Puṇṇātherīgāthā
thig12.1:1.1	“Udahārī ahaṁ sīte,
thig12.1:1.2	sadā udakamotariṁ;
thig12.1:1.3	Ayyānaṁ daṇḍabhayabhītā,
thig12.1:1.4	vācādosabhayaṭṭitā.
thig12.1:2.1	Kassa brāhmaṇa tvaṁ bhīto,
thig12.1:2.2	sadā udakamotari;
thig12.1:2.3	Vedhamānehi gattehi,
thig12.1:2.4	sītaṁ vedayase bhusaṁ”.
thig12.1:3.1	“Jānantī vata maṁ bhoti,
thig12.1:3.2	puṇṇike paripucchasi;
thig12.1:3.3	Karontaṁ kusalaṁ kammaṁ,
thig12.1:3.4	rundhantaṁ katapāpakaṁ.
thig12.1:4.1	Yo ca vuḍḍho daharo vā,
thig12.1:4.2	pāpakammaṁ pakubbati;
thig12.1:4.3	Dakābhisecanā sopi,
thig12.1:4.4	pāpakammā pamuccati”.
thig12.1:5.1	“Ko nu te idamakkhāsi,
thig12.1:5.2	ajānantassa ajānako;
thig12.1:5.3	Dakābhisecanā nāma,
thig12.1:5.4	pāpakammā pamuccati.
thig12.1:6.1	Saggaṁ nūna gamissanti,
thig12.1:6.2	sabbe maṇḍūkakacchapā;
thig12.1:6.3	Nāgā ca susumārā ca,
thig12.1:6.4	ye caññe udake carā.
thig12.1:7.1	Orabbhikā sūkarikā,
thig12.1:7.2	macchikā migabandhakā;
thig12.1:7.3	Corā ca vajjhaghātā ca,
thig12.1:7.4	ye caññe pāpakammino;
thig12.1:7.5	Dakābhisecanā tepi,
thig12.1:7.6	pāpakammā pamuccare.
thig12.1:8.1	Sace imā nadiyo te,
thig12.1:8.2	pāpaṁ pubbe kataṁ vahuṁ;
thig12.1:8.3	Puññampimā vaheyyuṁ te,
thig12.1:8.4	tena tvaṁ paribāhiro.
thig12.1:9.1	Yassa brāhmaṇa tvaṁ bhīto,
thig12.1:9.2	sadā udakamotari;
thig12.1:9.3	Tameva brahme mā kāsi,
thig12.1:9.4	mā te sītaṁ chaviṁ hane”.
thig12.1:10.1	“Kummaggapaṭipannaṁ maṁ,
thig12.1:10.2	ariyamaggaṁ samānayi;
thig12.1:10.3	Dakābhisecanā bhoti,
thig12.1:10.4	imaṁ sāṭaṁ dadāmi te”.
thig12.1:11.1	“Tuyheva sāṭako hotu,
thig12.1:11.2	nāhamicchāmi sāṭakaṁ;
thig12.1:11.3	Sace bhāyasi dukkhassa,
thig12.1:11.4	sace te dukkhamappiyaṁ.
thig12.1:12.1	Mākāsi pāpakaṁ kammaṁ,
thig12.1:12.2	āvi vā yadi vā raho;
thig12.1:12.3	Sace ca pāpakaṁ kammaṁ,
thig12.1:12.4	karissasi karosi vā.
thig12.1:13.1	Na te dukkhā pamutyatthi,
thig12.1:13.2	upeccāpi palāyato;
thig12.1:13.3	Sace bhāyasi dukkhassa,
thig12.1:13.4	sace te dukkhamappiyaṁ.
thig12.1:14.1	Upehi saraṇaṁ buddhaṁ,
thig12.1:14.2	dhammaṁ saṅghañca tādinaṁ;
thig12.1:14.3	Samādiyāhi sīlāni,
thig12.1:14.4	taṁ te atthāya hehiti”.
thig12.1:15.1	“Upemi saraṇaṁ buddhaṁ,
thig12.1:15.2	dhammaṁ saṅghañca tādinaṁ;
thig12.1:15.3	Samādiyāmi sīlāni,
thig12.1:15.4	taṁ me atthāya hehiti.
thig12.1:16.1	Brahmabandhu pure āsiṁ,
thig12.1:16.2	ajjamhi saccabrāhmaṇo;
thig12.1:16.3	Tevijjo vedasampanno,
thig12.1:16.4	sottiyo camhi nhātako”ti.
thig12.1:17.1	… Puṇṇā therī ….
thig12.1:18.1	Soḷasakanipāto niṭṭhito.
thig13.1:0.1	Therīgāthā 13.1
thig13.1:0.2	Vīsatinipāta
thig13.1:0.3	Ambapālītherīgāthā
thig13.1:1.1	“Kāḷakā bhamaravaṇṇasādisā,
thig13.1:1.2	Vellitaggā mama muddhajā ahuṁ;
thig13.1:1.3	Te jarāya sāṇavākasādisā,
thig13.1:1.4	Saccavādivacanaṁ anaññathā.
thig13.1:2.1	Vāsitova surabhī karaṇḍako,
thig13.1:2.2	Pupphapūra mama uttamaṅgajo;
thig13.1:2.3	Taṁ jarāyatha salomagandhikaṁ,
thig13.1:2.4	Saccavādivacanaṁ anaññathā.
thig13.1:3.1	Kānanaṁva sahitaṁ suropitaṁ,
thig13.1:3.2	Kocchasūcivicitaggasobhitaṁ;
thig13.1:3.3	Taṁ jarāya viralaṁ tahiṁ tahiṁ,
thig13.1:3.4	Saccavādivacanaṁ anaññathā.
thig13.1:4.1	Kaṇhakhandhakasuvaṇṇamaṇḍitaṁ,
thig13.1:4.2	Sobhate suveṇīhilaṅkataṁ;
thig13.1:4.3	Taṁ jarāya khalitaṁ siraṁ kataṁ,
thig13.1:4.4	Saccavādivacanaṁ anaññathā.
thig13.1:5.1	Cittakārasukatāva lekhikā,
thig13.1:5.2	Sobhare su bhamukā pure mama;
thig13.1:5.3	Tā jarāya valibhippalambitā,
thig13.1:5.4	Saccavādivacanaṁ anaññathā.
thig13.1:6.1	Bhassarā surucirā yathā maṇī,
thig13.1:6.2	Nettahesumabhinīlamāyatā;
thig13.1:6.3	Te jarāyabhihatā na sobhare,
thig13.1:6.4	Saccavādivacanaṁ anaññathā.
thig13.1:7.1	Saṇhatuṅgasadisī ca nāsikā,
thig13.1:7.2	Sobhate su abhiyobbanaṁ pati;
thig13.1:7.3	Sā jarāya upakūlitā viya,
thig13.1:7.4	Saccavādivacanaṁ anaññathā.
thig13.1:8.1	Kaṅkaṇaṁva sukataṁ suniṭṭhitaṁ,
thig13.1:8.2	Sobhare su mama kaṇṇapāḷiyo;
thig13.1:8.3	Tā jarāya valibhippalambitā,
thig13.1:8.4	Saccavādivacanaṁ anaññathā.
thig13.1:9.1	Pattalīmakulavaṇṇasādisā,
thig13.1:9.2	Sobhare su dantā pure mama;
thig13.1:9.3	Te jarāya khaṇḍitā cāsitā,
thig13.1:9.4	Saccavādivacanaṁ anaññathā.
thig13.1:10.1	Kānanamhi vanasaṇḍacārinī,
thig13.1:10.2	Kokilāva madhuraṁ nikūjihaṁ;
thig13.1:10.3	Taṁ jarāya khalitaṁ tahiṁ tahiṁ,
thig13.1:10.4	Saccavādivacanaṁ anaññathā.
thig13.1:11.1	Saṇhakamburiva suppamajjitā,
thig13.1:11.2	Sobhate su gīvā pure mama;
thig13.1:11.3	Sā jarāya bhaggā vināmitā,
thig13.1:11.4	Saccavādivacanaṁ anaññathā.
thig13.1:12.1	Vaṭṭapalighasadisopamā ubho,
thig13.1:12.2	Sobhare su bāhā pure mama;
thig13.1:12.3	Tā jarāya yatha pāṭalibbalitā,
thig13.1:12.4	Saccavādivacanaṁ anaññathā.
thig13.1:13.1	Saṇhamuddikasuvaṇṇamaṇḍitā,
thig13.1:13.2	Sobhare su hatthā pure mama;
thig13.1:13.3	Te jarāya yathā mūlamūlikā,
thig13.1:13.4	Saccavādivacanaṁ anaññathā.
thig13.1:14.1	Pīnavaṭṭasahituggatā ubho,
thig13.1:14.2	Sobhare su thanakā pure mama;
thig13.1:14.3	Thevikīva lambanti nodakā,
thig13.1:14.4	Saccavādivacanaṁ anaññathā.
thig13.1:15.1	Kañcanassa phalakaṁva sammaṭṭhaṁ,
thig13.1:15.2	Sobhate su kāyo pure mama;
thig13.1:15.3	So valīhi sukhumāhi otato,
thig13.1:15.4	Saccavādivacanaṁ anaññathā.
thig13.1:16.1	Nāgabhogasadisopamā ubho,
thig13.1:16.2	Sobhare su ūrū pure mama;
thig13.1:16.3	Te jarāya yathā veḷunāḷiyo,
thig13.1:16.4	Saccavādivacanaṁ anaññathā.
thig13.1:17.1	Saṇhanūpurasuvaṇṇamaṇḍitā,
thig13.1:17.2	Sobhare su jaṅghā pure mama;
thig13.1:17.3	Tā jarāya tiladaṇḍakāriva,
thig13.1:17.4	Saccavādivacanaṁ anaññathā.
thig13.1:18.1	Tūlapuṇṇasadisopamā ubho,
thig13.1:18.2	Sobhare su pādā pure mama;
thig13.1:18.3	Te jarāya phuṭitā valīmatā,
thig13.1:18.4	Saccavādivacanaṁ anaññathā.
thig13.1:19.1	Ediso ahu ayaṁ samussayo,
thig13.1:19.2	Jajjaro bahudukkhānamālayo;
thig13.1:19.3	Sopalepapatito jarāgharo,
thig13.1:19.4	Saccavādivacanaṁ anaññathā”.
thig13.1:20.1	… Ambapālī therī ….
thig13.2:0.1	Therīgāthā 13.2
thig13.2:0.2	Vīsatinipāta
thig13.2:0.3	Rohinītherīgāthā
thig13.2:1.1	“‘Samaṇā’ti bhoti supi,
thig13.2:1.2	‘samaṇā’ti pabujjhasi;
thig13.2:1.3	Samaṇāneva kittesi,
thig13.2:1.4	samaṇī nūna bhavissasi.
thig13.2:2.1	Vipulaṁ annañca pānañca,
thig13.2:2.2	samaṇānaṁ paveccasi;
thig13.2:2.3	Rohinī dāni pucchāmi,
thig13.2:2.4	kena te samaṇā piyā.
thig13.2:3.1	Akammakāmā alasā,
thig13.2:3.2	paradattūpajīvino;
thig13.2:3.3	Āsaṁsukā sādukāmā,
thig13.2:3.4	kena te samaṇā piyā”.
thig13.2:4.1	“Cirassaṁ vata maṁ tāta,
thig13.2:4.2	samaṇānaṁ paripucchasi;
thig13.2:4.3	Tesaṁ te kittayissāmi,
thig13.2:4.4	paññāsīlaparakkamaṁ.
thig13.2:5.1	Kammakāmā analasā,
thig13.2:5.2	kammaseṭṭhassa kārakā;
thig13.2:5.3	Rāgaṁ dosaṁ pajahanti,
thig13.2:5.4	tena me samaṇā piyā.
thig13.2:6.1	Tīṇi pāpassa mūlāni,
thig13.2:6.2	dhunanti sucikārino;
thig13.2:6.3	Sabbaṁ pāpaṁ pahīnesaṁ,
thig13.2:6.4	tena me samaṇā piyā.
thig13.2:7.1	Kāyakammaṁ suci nesaṁ,
thig13.2:7.2	vacīkammañca tādisaṁ;
thig13.2:7.3	Manokammaṁ suci nesaṁ,
thig13.2:7.4	tena me samaṇā piyā.
thig13.2:8.1	Vimalā saṅkhamuttāva,
thig13.2:8.2	suddhā santarabāhirā;
thig13.2:8.3	Puṇṇā sukkāna dhammānaṁ,
thig13.2:8.4	tena me samaṇā piyā.
thig13.2:9.1	Bahussutā dhammadharā,
thig13.2:9.2	ariyā dhammajīvino;
thig13.2:9.3	Atthaṁ dhammañca desenti,
thig13.2:9.4	tena me samaṇā piyā.
thig13.2:10.1	Bahussutā dhammadharā,
thig13.2:10.2	ariyā dhammajīvino;
thig13.2:10.3	Ekaggacittā satimanto,
thig13.2:10.4	tena me samaṇā piyā.
thig13.2:11.1	Dūraṅgamā satimanto,
thig13.2:11.2	mantabhāṇī anuddhatā;
thig13.2:11.3	Dukkhassantaṁ pajānanti,
thig13.2:11.4	tena me samaṇā piyā.
thig13.2:12.1	Yasmā gāmā pakkamanti,
thig13.2:12.2	na vilokenti kiñcanaṁ;
thig13.2:12.3	Anapekkhāva gacchanti,
thig13.2:12.4	tena me samaṇā piyā.
thig13.2:13.1	Na te saṁ koṭṭhe openti,
thig13.2:13.2	na kumbhiṁ na khaḷopiyaṁ;
thig13.2:13.3	Pariniṭṭhitamesānā,
thig13.2:13.4	tena me samaṇā piyā.
thig13.2:14.1	Na te hiraññaṁ gaṇhanti,
thig13.2:14.2	na suvaṇṇaṁ na rūpiyaṁ;
thig13.2:14.3	Paccuppannena yāpenti,
thig13.2:14.4	tena me samaṇā piyā.
thig13.2:15.1	Nānākulā pabbajitā,
thig13.2:15.2	nānājanapadehi ca;
thig13.2:15.3	Aññamaññaṁ piyāyanti,
thig13.2:15.4	tena me samaṇā piyā”.
thig13.2:16.1	“Atthāya vata no bhoti,
thig13.2:16.2	kule jātāsi rohinī;
thig13.2:16.3	Saddhā buddhe ca dhamme ca,
thig13.2:16.4	saṅghe ca tibbagāravā.
thig13.2:17.1	Tuvaṁ hetaṁ pajānāsi,
thig13.2:17.2	puññakkhettaṁ anuttaraṁ;
thig13.2:17.3	Amhampi ete samaṇā,
thig13.2:17.4	paṭigaṇhanti dakkhiṇaṁ.
thig13.2:18.1	Patiṭṭhito hettha yañño,
thig13.2:18.2	vipulo no bhavissati”;
thig13.2:18.3	“Sace bhāyasi dukkhassa,
thig13.2:18.4	sace te dukkhamappiyaṁ.
thig13.2:19.1	Upehi saraṇaṁ buddhaṁ,
thig13.2:19.2	dhammaṁ saṅghañca tādinaṁ;
thig13.2:19.3	Samādiyāhi sīlāni,
thig13.2:19.4	taṁ te atthāya hehiti”.
thig13.2:20.1	“Upemi saraṇaṁ buddhaṁ,
thig13.2:20.2	dhammaṁ saṅghañca tādinaṁ;
thig13.2:20.3	Samādiyāmi sīlāni,
thig13.2:20.4	taṁ me atthāya hehiti.
thig13.2:21.1	Brahmabandhu pure āsiṁ,
thig13.2:21.2	so idānimhi brāhmaṇo;
thig13.2:21.3	Tevijjo sottiyo camhi,
thig13.2:21.4	vedagū camhi nhātako”.
thig13.2:22.1	… Rohinī therī ….
thig13.3:0.1	Therīgāthā 13.3
thig13.3:0.2	Vīsatinipāta
thig13.3:0.3	Cāpātherīgāthā
thig13.3:1.1	“Laṭṭhihattho pure āsi,
thig13.3:1.2	so dāni migaluddako;
thig13.3:1.3	Āsāya palipā ghorā,
thig13.3:1.4	nāsakkhi pārametave.
thig13.3:2.1	Sumattaṁ maṁ maññamānā,
thig13.3:2.2	cāpā puttamatosayi;
thig13.3:2.3	Cāpāya bandhanaṁ chetvā,
thig13.3:2.4	pabbajissaṁ punopahaṁ”.
thig13.3:3.1	“Mā me kujjhi mahāvīra,
thig13.3:3.2	mā me kujjhi mahāmuni;
thig13.3:3.3	Na hi kodhaparetassa,
thig13.3:3.4	suddhi atthi kuto tapo”.
thig13.3:4.1	“Pakkamissañca nāḷāto,
thig13.3:4.2	kodha nāḷāya vacchati;
thig13.3:4.3	Bandhantī itthirūpena,
thig13.3:4.4	samaṇe dhammajīvino”.
thig13.3:5.1	“Ehi kāḷa nivattassu,
thig13.3:5.2	bhuñja kāme yathā pure;
thig13.3:5.3	Ahañca te vasīkatā,
thig13.3:5.4	ye ca me santi ñātakā”.
thig13.3:6.1	“Etto cāpe catubbhāgaṁ,
thig13.3:6.2	yathā bhāsasi tvañca me;
thig13.3:6.3	Tayi rattassa posassa,
thig13.3:6.4	uḷāraṁ vata taṁ siyā”.
thig13.3:7.1	“Kāḷaṅginiṁva takkāriṁ,
thig13.3:7.2	pupphitaṁ girimuddhani;
thig13.3:7.3	Phullaṁ dālimalaṭṭhiṁva,
thig13.3:7.4	antodīpeva pāṭaliṁ.
thig13.3:8.1	Haricandanalittaṅgiṁ,
thig13.3:8.2	kāsikuttamadhāriniṁ;
thig13.3:8.3	Taṁ maṁ rūpavatiṁ santiṁ,
thig13.3:8.4	kassa ohāya gacchasi”.
thig13.3:9.1	“Sākuntikova sakuṇiṁ,
thig13.3:9.2	yathā bandhitumicchati;
thig13.3:9.3	Āharimena rūpena,
thig13.3:9.4	na maṁ tvaṁ bādhayissasi”.
thig13.3:10.1	“Imañca me puttaphalaṁ,
thig13.3:10.2	kāḷa uppāditaṁ tayā;
thig13.3:10.3	Taṁ maṁ puttavatiṁ santiṁ,
thig13.3:10.4	kassa ohāya gacchasi”.
thig13.3:11.1	“Jahanti putte sappaññā,
thig13.3:11.2	tato ñātī tato dhanaṁ;
thig13.3:11.3	Pabbajanti mahāvīrā,
thig13.3:11.4	nāgo chetvāva bandhanaṁ”.
thig13.3:12.1	“Idāni te imaṁ puttaṁ,
thig13.3:12.2	Daṇḍena churikāya vā;
thig13.3:12.3	Bhūmiyaṁ vā nisumbhissaṁ,
thig13.3:12.4	Puttasokā na gacchasi”.
thig13.3:13.1	“Sace puttaṁ siṅgālānaṁ,
thig13.3:13.2	kukkurānaṁ padāhisi;
thig13.3:13.3	Na maṁ puttakatte jammi,
thig13.3:13.4	punarāvattayissasi”.
thig13.3:14.1	“Handa kho dāni bhaddante,
thig13.3:14.2	kuhiṁ kāḷa gamissasi;
thig13.3:14.3	Katamaṁ gāmanigamaṁ,
thig13.3:14.4	nagaraṁ rājadhāniyo”.
thig13.3:15.1	“Ahumha pubbe gaṇino,
thig13.3:15.2	Assamaṇā samaṇamānino;
thig13.3:15.3	Gāmena gāmaṁ vicarimha,
thig13.3:15.4	Nagare rājadhāniyo.
thig13.3:16.1	Eso hi bhagavā buddho,
thig13.3:16.2	nadiṁ nerañjaraṁ pati;
thig13.3:16.3	Sabbadukkhappahānāya,
thig13.3:16.4	dhammaṁ deseti pāṇinaṁ;
thig13.3:16.5	Tassāhaṁ santikaṁ gacchaṁ,
thig13.3:16.6	so me satthā bhavissati”.
thig13.3:17.1	“Vandanaṁ dāni vajjāsi,
thig13.3:17.2	lokanāthaṁ anuttaraṁ;
thig13.3:17.3	Padakkhiṇañca katvāna,
thig13.3:17.4	ādiseyyāsi dakkhiṇaṁ”.
thig13.3:18.1	“Etaṁ kho labbhamamhehi,
thig13.3:18.2	yathā bhāsasi tvañca me;
thig13.3:18.3	Vandanaṁ dāni te vajjaṁ,
thig13.3:18.4	lokanāthaṁ anuttaraṁ;
thig13.3:18.5	Padakkhiṇañca katvāna,
thig13.3:18.6	ādisissāmi dakkhiṇaṁ”.
thig13.3:19.1	Tato ca kāḷo pakkāmi,
thig13.3:19.2	nadiṁ nerañjaraṁ pati;
thig13.3:19.3	So addasāsi sambuddhaṁ,
thig13.3:19.4	desentaṁ amataṁ padaṁ.
thig13.3:20.1	Dukkhaṁ dukkhasamuppādaṁ,
thig13.3:20.2	dukkhassa ca atikkamaṁ;
thig13.3:20.3	Ariyaṁ caṭṭhaṅgikaṁ maggaṁ,
thig13.3:20.4	dukkhūpasamagāminaṁ.
thig13.3:21.1	Tassa pādāni vanditvā,
thig13.3:21.2	Katvāna naṁ padakkhiṇaṁ;
thig13.3:21.3	Cāpāya ādisitvāna,
thig13.3:21.4	Pabbajiṁ anagāriyaṁ;
thig13.3:21.5	Tisso vijjā anuppattā,
thig13.3:21.6	Kataṁ buddhassa sāsanaṁ.
thig13.3:22.1	… Cāpā therī ….
thig13.4:0.1	Therīgāthā 13.4
thig13.4:0.2	Vīsatinipāta
thig13.4:0.3	Sundarītherīgāthā
thig13.4:1.1	“Petāni bhoti puttāni,
thig13.4:1.2	khādamānā tuvaṁ pure;
thig13.4:1.3	Tuvaṁ divā ca ratto ca,
thig13.4:1.4	atīva paritappasi.
thig13.4:2.1	Sājja sabbāni khāditvā,
thig13.4:2.2	sataputtāni brāhmaṇī;
thig13.4:2.3	Vāseṭṭhi kena vaṇṇena,
thig13.4:2.4	na bāḷhaṁ paritappasi”.
thig13.4:3.1	“Bahūni puttasatāni,
thig13.4:3.2	ñātisaṅghasatāni ca;
thig13.4:3.3	Khāditāni atītaṁse,
thig13.4:3.4	mama tuyhañca brāhmaṇa.
thig13.4:4.1	Sāhaṁ nissaraṇaṁ ñatvā,
thig13.4:4.2	jātiyā maraṇassa ca;
thig13.4:4.3	Na socāmi na rodāmi,
thig13.4:4.4	na cāpi paritappayiṁ”.
thig13.4:5.1	“Abbhutaṁ vata vāseṭṭhi,
thig13.4:5.2	vācaṁ bhāsasi edisiṁ;
thig13.4:5.3	Kassa tvaṁ dhammamaññāya,
thig13.4:5.4	giraṁ bhāsasi edisiṁ”.
thig13.4:6.1	“Esa brāhmaṇa sambuddho,
thig13.4:6.2	nagaraṁ mithilaṁ pati;
thig13.4:6.3	Sabbadukkhappahānāya,
thig13.4:6.4	dhammaṁ desesi pāṇinaṁ.
thig13.4:7.1	Tassa brahme arahato,
thig13.4:7.2	dhammaṁ sutvā nirūpadhiṁ;
thig13.4:7.3	Tattha viññātasaddhammā,
thig13.4:7.4	puttasokaṁ byapānudiṁ”.
thig13.4:8.1	“So ahampi gamissāmi,
thig13.4:8.2	nagaraṁ mithilaṁ pati;
thig13.4:8.3	Appeva maṁ so bhagavā,
thig13.4:8.4	sabbadukkhā pamocaye”.
thig13.4:9.1	Addasa brāhmaṇo buddhaṁ,
thig13.4:9.2	vippamuttaṁ nirūpadhiṁ;
thig13.4:9.3	Svassa dhammamadesesi,
thig13.4:9.4	muni dukkhassa pāragū.
thig13.4:10.1	Dukkhaṁ dukkhasamuppādaṁ,
thig13.4:10.2	dukkhassa ca atikkamaṁ;
thig13.4:10.3	Ariyaṁ caṭṭhaṅgikaṁ maggaṁ,
thig13.4:10.4	dukkhūpasamagāminaṁ.
thig13.4:11.1	Tattha viññātasaddhammo,
thig13.4:11.2	pabbajjaṁ samarocayi;
thig13.4:11.3	Sujāto tīhi rattīhi,
thig13.4:11.4	tisso vijjā aphassayi.
thig13.4:12.1	“Ehi sārathi gacchāhi,
thig13.4:12.2	rathaṁ niyyādayāhimaṁ;
thig13.4:12.3	Ārogyaṁ brāhmaṇiṁ vajja,
thig13.4:12.4	‘pabbaji dāni brāhmaṇo;
thig13.4:12.5	Sujāto tīhi rattīhi,
thig13.4:12.6	tisso vijjā aphassayi’”.
thig13.4:13.1	Tato ca rathamādāya,
thig13.4:13.2	sahassañcāpi sārathi;
thig13.4:13.3	Ārogyaṁ brāhmaṇiṁvoca,
thig13.4:13.4	“pabbaji dāni brāhmaṇo;
thig13.4:13.5	Sujāto tīhi rattīhi,
thig13.4:13.6	tisso vijjā aphassayi”.
thig13.4:14.1	“Etañcāhaṁ assarathaṁ,
thig13.4:14.2	sahassañcāpi sārathi;
thig13.4:14.3	Tevijjaṁ brāhmaṇaṁ sutvā,
thig13.4:14.4	puṇṇapattaṁ dadāmi te”.
thig13.4:15.1	“Tuyheva hotvassaratho,
thig13.4:15.2	sahassañcāpi brāhmaṇi;
thig13.4:15.3	Ahampi pabbajissāmi,
thig13.4:15.4	varapaññassa santike”.
thig13.4:16.1	“Hatthī gavassaṁ maṇikuṇḍalañca,
thig13.4:16.2	Phītañcimaṁ gahavibhavaṁ pahāya;
thig13.4:16.3	Pitā pabbajito tuyhaṁ,
thig13.4:16.4	Bhuñja bhogāni sundarī;
thig13.4:16.5	Tuvaṁ dāyādikā kule”.
thig13.4:17.1	“Hatthī gavassaṁ maṇikuṇḍalañca,
thig13.4:17.2	Rammaṁ cimaṁ gahavibhavaṁ pahāya;
thig13.4:17.3	Pitā pabbajito mayhaṁ,
thig13.4:17.4	Puttasokena aṭṭito;
thig13.4:17.5	Ahampi pabbajissāmi,
thig13.4:17.6	Bhātusokena aṭṭitā”.
thig13.4:18.1	“So te ijjhatu saṅkappo,
thig13.4:18.2	yaṁ tvaṁ patthesi sundarī;
thig13.4:18.3	Uttiṭṭhapiṇḍo uñcho ca,
thig13.4:18.4	paṁsukūlañca cīvaraṁ;
thig13.4:18.5	Etāni abhisambhontī,
thig13.4:18.6	paraloke anāsavā”.
thig13.4:19.1	“Sikkhamānāya me ayye,
thig13.4:19.2	dibbacakkhu visodhitaṁ;
thig13.4:19.3	Pubbenivāsaṁ jānāmi,
thig13.4:19.4	yattha me vusitaṁ pure.
thig13.4:20.1	Tuvaṁ nissāya kalyāṇi,
thig13.4:20.2	theri saṅghassa sobhane;
thig13.4:20.3	Tisso vijjā anuppattā,
thig13.4:20.4	kataṁ buddhassa sāsanaṁ.
thig13.4:21.1	Anujānāhi me ayye,
thig13.4:21.2	icche sāvatthi gantave;
thig13.4:21.3	Sīhanādaṁ nadissāmi,
thig13.4:21.4	buddhaseṭṭhassa santike”.
thig13.4:22.1	“Passa sundari satthāraṁ,
thig13.4:22.2	hemavaṇṇaṁ harittacaṁ;
thig13.4:22.3	Adantānaṁ dametāraṁ,
thig13.4:22.4	sambuddhamakutobhayaṁ”.
thig13.4:23.1	“Passa sundarimāyantiṁ,
thig13.4:23.2	vippamuttaṁ nirūpadhiṁ;
thig13.4:23.3	Vītarāgaṁ visaṁyuttaṁ,
thig13.4:23.4	katakiccamanāsavaṁ.
thig13.4:24.1	Bārāṇasito nikkhamma,
thig13.4:24.2	tava santikamāgatā;
thig13.4:24.3	Sāvikā te mahāvīra,
thig13.4:24.4	pāde vandati sundarī.
thig13.4:25.1	Tuvaṁ buddho tuvaṁ satthā,
thig13.4:25.2	tuyhaṁ dhītāmhi brāhmaṇa;
thig13.4:25.3	Orasā mukhato jātā,
thig13.4:25.4	katakiccā anāsavā”.
thig13.4:26.1	“Tassā te svāgataṁ bhadde,
thig13.4:26.2	tato te adurāgataṁ;
thig13.4:26.3	Evañhi dantā āyanti,
thig13.4:26.4	satthu pādāni vandikā;
thig13.4:26.5	Vītarāgā visaṁyuttā,
thig13.4:26.6	katakiccā anāsavā”.
thig13.4:27.1	… Sundarī therī ….
thig13.5:0.1	Therīgāthā 13.5
thig13.5:0.2	Vīsatinipāta
thig13.5:0.3	Subhākammāradhītutherīgāthā
thig13.5:1.1	“Daharāhaṁ suddhavasanā,
thig13.5:1.2	yaṁ pure dhammamassuṇiṁ;
thig13.5:1.3	Tassā me appamattāya,
thig13.5:1.4	saccābhisamayo ahu.
thig13.5:2.1	Tatohaṁ sabbakāmesu,
thig13.5:2.2	bhusaṁ aratimajjhagaṁ;
thig13.5:2.3	Sakkāyasmiṁ bhayaṁ disvā,
thig13.5:2.4	nekkhammameva pīhaye.
thig13.5:3.1	Hitvānahaṁ ñātigaṇaṁ,
thig13.5:3.2	dāsakammakarāni ca;
thig13.5:3.3	Gāmakhettāni phītāni,
thig13.5:3.4	ramaṇīye pamodite.
thig13.5:4.1	Pahāyahaṁ pabbajitā,
thig13.5:4.2	sāpateyyamanappakaṁ;
thig13.5:4.3	Evaṁ saddhāya nikkhamma,
thig13.5:4.4	saddhamme suppavedite.
thig13.5:5.1	Netaṁ assa patirūpaṁ,
thig13.5:5.2	Ākiñcaññañhi patthaye;
thig13.5:5.3	Yo jātarūpaṁ rajataṁ,
thig13.5:5.4	Chaḍḍetvā punarāgame.
thig13.5:6.1	Rajataṁ jātarūpaṁ vā,
thig13.5:6.2	na bodhāya na santiyā;
thig13.5:6.3	Netaṁ samaṇasāruppaṁ,
thig13.5:6.4	na etaṁ ariyaddhanaṁ.
thig13.5:7.1	Lobhanaṁ madanañcetaṁ,
thig13.5:7.2	mohanaṁ rajavaḍḍhanaṁ;
thig13.5:7.3	Sāsaṅkaṁ bahuāyāsaṁ,
thig13.5:7.4	natthi cettha dhuvaṁ ṭhiti.
thig13.5:8.1	Ettha rattā pamattā ca,
thig13.5:8.2	saṅkiliṭṭhamanā narā;
thig13.5:8.3	Aññamaññena byāruddhā,
thig13.5:8.4	puthu kubbanti medhagaṁ.
thig13.5:9.1	Vadho bandho parikleso,
thig13.5:9.2	jāni sokapariddavo;
thig13.5:9.3	Kāmesu adhipannānaṁ,
thig13.5:9.4	dissate byasanaṁ bahuṁ.
thig13.5:10.1	Taṁ maṁ ñātī amittāva,
thig13.5:10.2	kiṁ vo kāmesu yuñjatha;
thig13.5:10.3	Jānātha maṁ pabbajitaṁ,
thig13.5:10.4	kāmesu bhayadassiniṁ.
thig13.5:11.1	Na hiraññasuvaṇṇena,
thig13.5:11.2	parikkhīyanti āsavā;
thig13.5:11.3	Amittā vadhakā kāmā,
thig13.5:11.4	sapattā sallabandhanā.
thig13.5:12.1	Taṁ maṁ ñātī amittāva,
thig13.5:12.2	kiṁ vo kāmesu yuñjatha;
thig13.5:12.3	Jānātha maṁ pabbajitaṁ,
thig13.5:12.4	muṇḍaṁ saṅghāṭipārutaṁ.
thig13.5:13.1	Uttiṭṭhapiṇḍo uñcho ca,
thig13.5:13.2	paṁsukūlañca cīvaraṁ;
thig13.5:13.3	Etaṁ kho mama sāruppaṁ,
thig13.5:13.4	anagārūpanissayo.
thig13.5:14.1	Vantā mahesīhi kāmā,
thig13.5:14.2	ye dibbā ye ca mānusā;
thig13.5:14.3	Khemaṭṭhāne vimuttā te,
thig13.5:14.4	pattā te acalaṁ sukhaṁ.
thig13.5:15.1	Māhaṁ kāmehi saṅgacchiṁ,
thig13.5:15.2	yesu tāṇaṁ na vijjati;
thig13.5:15.3	Amittā vadhakā kāmā,
thig13.5:15.4	aggikkhandhūpamā dukhā.
thig13.5:16.1	Paripantho esa bhayo,
thig13.5:16.2	savighāto sakaṇṭako;
thig13.5:16.3	Gedho suvisamo ceso,
thig13.5:16.4	mahanto mohanāmukho.
thig13.5:17.1	Upasaggo bhīmarūpo,
thig13.5:17.2	kāmā sappasirūpamā;
thig13.5:17.3	Ye bālā abhinandanti,
thig13.5:17.4	andhabhūtā puthujjanā.
thig13.5:18.1	Kāmapaṅkena sattā hi,
thig13.5:18.2	bahū loke aviddasū;
thig13.5:18.3	Pariyantaṁ na jānanti,
thig13.5:18.4	jātiyā maraṇassa ca.
thig13.5:19.1	Duggatigamanaṁ maggaṁ,
thig13.5:19.2	manussā kāmahetukaṁ;
thig13.5:19.3	Bahuṁ ve paṭipajjanti,
thig13.5:19.4	attano rogamāvahaṁ.
thig13.5:20.1	Evaṁ amittajananā,
thig13.5:20.2	tāpanā saṅkilesikā;
thig13.5:20.3	Lokāmisā bandhanīyā,
thig13.5:20.4	kāmā maraṇabandhanā.
thig13.5:21.1	Ummādanā ullapanā,
thig13.5:21.2	kāmā cittappamaddino;
thig13.5:21.3	Sattānaṁ saṅkilesāya,
thig13.5:21.4	khippaṁ mārena oḍḍitaṁ.
thig13.5:22.1	Anantādīnavā kāmā,
thig13.5:22.2	bahudukkhā mahāvisā;
thig13.5:22.3	Appassādā raṇakarā,
thig13.5:22.4	sukkapakkhavisosanā.
thig13.5:23.1	Sāhaṁ etādisaṁ katvā,
thig13.5:23.2	byasanaṁ kāmahetukaṁ;
thig13.5:23.3	Na taṁ paccāgamissāmi,
thig13.5:23.4	nibbānābhiratā sadā.
thig13.5:24.1	Raṇaṁ karitvā kāmānaṁ,
thig13.5:24.2	sītibhāvābhikaṅkhinī;
thig13.5:24.3	Appamattā vihassāmi,
thig13.5:24.4	sabbasaṁyojanakkhaye.
thig13.5:25.1	Asokaṁ virajaṁ khemaṁ,
thig13.5:25.2	ariyaṭṭhaṅgikaṁ ujuṁ;
thig13.5:25.3	Taṁ maggaṁ anugacchāmi,
thig13.5:25.4	yena tiṇṇā mahesino”.
thig13.5:26.1	“Imaṁ passatha dhammaṭṭhaṁ,
thig13.5:26.2	subhaṁ kammāradhītaraṁ;
thig13.5:26.3	Anejaṁ upasampajja,
thig13.5:26.4	rukkhamūlamhi jhāyati.
thig13.5:27.1	Ajjaṭṭhamī pabbajitā,
thig13.5:27.2	saddhā saddhammasobhanā;
thig13.5:27.3	Vinītuppalavaṇṇāya,
thig13.5:27.4	tevijjā maccuhāyinī.
thig13.5:28.1	Sāyaṁ bhujissā anaṇā,
thig13.5:28.2	bhikkhunī bhāvitindriyā;
thig13.5:28.3	Sabbayogavisaṁyuttā,
thig13.5:28.4	katakiccā anāsavā”.
thig13.5:29.1	Taṁ sakko devasaṅghena,
thig13.5:29.2	upasaṅkamma iddhiyā;
thig13.5:29.3	Namassati bhūtapati,
thig13.5:29.4	subhaṁ kammāradhītaranti.
thig13.5:30.1	… Subhā kammāradhītā therī ….
thig13.5:31.1	Vīsatinipāto niṭṭhito.
thig14.1:0.1	Therīgāthā 14.1
thig14.1:0.2	Tiṁsanipāta
thig14.1:0.3	Subhājīvakambavanikātherīgāthā
thig14.1:1.1	Jīvakambavanaṁ rammaṁ,
thig14.1:1.2	Gacchantiṁ bhikkhuniṁ subhaṁ;
thig14.1:1.3	Dhuttako sannivāresi,
thig14.1:1.4	Tamenaṁ abravī subhā.
thig14.1:2.1	“Kiṁ te aparādhitaṁ mayā,
thig14.1:2.2	Yaṁ maṁ ovariyāna tiṭṭhasi;
thig14.1:2.3	Na hi pabbajitāya āvuso,
thig14.1:2.4	Puriso samphusanāya kappati.
thig14.1:3.1	Garuke mama satthusāsane,
thig14.1:3.2	Yā sikkhā sugatena desitā;
thig14.1:3.3	Parisuddhapadaṁ anaṅgaṇaṁ,
thig14.1:3.4	Kiṁ maṁ ovariyāna tiṭṭhasi.
thig14.1:4.1	Āvilacitto anāvilaṁ,
thig14.1:4.2	Sarajo vītarajaṁ anaṅgaṇaṁ;
thig14.1:4.3	Sabbattha vimuttamānasaṁ,
thig14.1:4.4	Kiṁ maṁ ovariyāna tiṭṭhasi”.
thig14.1:5.1	“Daharā ca apāpikā casi,
thig14.1:5.2	Kiṁ te pabbajjā karissati;
thig14.1:5.3	Nikkhipa kāsāyacīvaraṁ,
thig14.1:5.4	Ehi ramāma supupphite vane.
thig14.1:6.1	Madhurañca pavanti sabbaso,
thig14.1:6.2	Kusumarajena samuṭṭhitā dumā;
thig14.1:6.3	Paṭhamavasanto sukho utu,
thig14.1:6.4	Ehi ramāma supupphite vane.
thig14.1:7.1	Kusumitasikharā ca pādapā,
thig14.1:7.2	Abhigajjantiva māluteritā;
thig14.1:7.3	Kā tuyhaṁ rati bhavissati,
thig14.1:7.4	Yadi ekā vanamogahissasi.
thig14.1:8.1	Vāḷamigasaṅghasevitaṁ,
thig14.1:8.2	Kuñjaramattakareṇuloḷitaṁ;
thig14.1:8.3	Asahāyikā gantumicchasi,
thig14.1:8.4	Rahitaṁ bhiṁsanakaṁ mahāvanaṁ.
thig14.1:9.1	Tapanīyakatāva dhītikā,
thig14.1:9.2	Vicarasi cittalateva accharā;
thig14.1:9.3	Kāsikasukhumehi vaggubhi,
thig14.1:9.4	Sobhasī suvasanehi nūpame.
thig14.1:10.1	Ahaṁ tava vasānugo siyaṁ,
thig14.1:10.2	Yadi viharemase kānanantare;
thig14.1:10.3	Na hi matthi tayā piyattaro,
thig14.1:10.4	Pāṇo kinnarimandalocane.
thig14.1:11.1	Yadi me vacanaṁ karissasi,
thig14.1:11.2	Sukhitā ehi agāramāvasa;
thig14.1:11.3	Pāsādanivātavāsinī,
thig14.1:11.4	Parikammaṁ te karontu nāriyo.
thig14.1:12.1	Kāsikasukhumāni dhāraya,
thig14.1:12.2	Abhiropehi ca mālavaṇṇakaṁ;
thig14.1:12.3	Kañcanamaṇimuttakaṁ bahuṁ,
thig14.1:12.4	Vividhaṁ ābharaṇaṁ karomi te.
thig14.1:13.1	Sudhotarajapacchadaṁ subhaṁ,
thig14.1:13.2	Gonakatūlikasanthataṁ navaṁ;
thig14.1:13.3	Abhiruha sayanaṁ mahārahaṁ,
thig14.1:13.4	Candanamaṇḍitasāragandhikaṁ.
thig14.1:14.1	Uppalaṁ cudakā samuggataṁ,
thig14.1:14.2	Yathā taṁ amanussasevitaṁ;
thig14.1:14.3	Evaṁ tvaṁ brahmacārinī,
thig14.1:14.4	Sakesaṅgesu jaraṁ gamissasi”.
thig14.1:15.1	“Kiṁ te idha sārasammataṁ,
thig14.1:15.2	Kuṇapapūramhi susānavaḍḍhane;
thig14.1:15.3	Bhedanadhamme kaḷevare,
thig14.1:15.4	Yaṁ disvā vimano udikkhasi”.
thig14.1:16.1	“Akkhīni ca tūriyāriva,
thig14.1:16.2	Kinnariyāriva pabbatantare;
thig14.1:16.3	Tava me nayanāni dakkhiya,
thig14.1:16.4	Bhiyyo kāmaratī pavaḍḍhati.
thig14.1:17.1	Uppalasikharopamāni te,
thig14.1:17.2	Vimale hāṭakasannibhe mukhe;
thig14.1:17.3	Tava me nayanāni dakkhiya,
thig14.1:17.4	Bhiyyo kāmaguṇo pavaḍḍhati.
thig14.1:18.1	Api dūragatā saramhase,
thig14.1:18.2	Āyatapamhe visuddhadassane;
thig14.1:18.3	Na hi matthi tayā piyattaro,
thig14.1:18.4	Nayanā kinnarimandalocane”.
thig14.1:19.1	“Apathena payātumicchasi,
thig14.1:19.2	Candaṁ kīḷanakaṁ gavesasi;
thig14.1:19.3	Meruṁ laṅghetumicchasi,
thig14.1:19.4	Yo tvaṁ buddhasutaṁ maggayasi.
thig14.1:20.1	Natthi hi loke sadevake,
thig14.1:20.2	Rāgo yatthapi dāni me siyā;
thig14.1:20.3	Napi naṁ jānāmi kīriso,
thig14.1:20.4	Atha maggena hato samūlako.
thig14.1:21.1	Iṅgālakuyāva ujjhito,
thig14.1:21.2	Visapattoriva aggito kato;
thig14.1:21.3	Napi naṁ passāmi kīriso,
thig14.1:21.4	Atha maggena hato samūlako.
thig14.1:22.1	Yassā siyā apaccavekkhitaṁ,
thig14.1:22.2	Satthā vā anupāsito siyā;
thig14.1:22.3	Tvaṁ tādisikaṁ palobhaya,
thig14.1:22.4	Jānantiṁ so imaṁ vihaññasi.
thig14.1:23.1	Mayhañhi akkuṭṭhavandite,
thig14.1:23.2	Sukhadukkhe ca satī upaṭṭhitā;
thig14.1:23.3	Saṅkhatamasubhanti jāniya,
thig14.1:23.4	Sabbattheva mano na limpati.
thig14.1:24.1	Sāhaṁ sugatassa sāvikā,
thig14.1:24.2	Maggaṭṭhaṅgikayānayāyinī;
thig14.1:24.3	Uddhaṭasallā anāsavā,
thig14.1:24.4	Suññāgāragatā ramāmahaṁ.
thig14.1:25.1	Diṭṭhā hi mayā sucittitā,
thig14.1:25.2	Sombhā dārukapillakāni vā;
thig14.1:25.3	Tantīhi ca khīlakehi ca,
thig14.1:25.4	Vinibaddhā vividhaṁ panaccakā.
thig14.1:26.1	Tamhuddhaṭe tantikhīlake,
thig14.1:26.2	Vissaṭṭhe vikale parikrite;
thig14.1:26.3	Na vindeyya khaṇḍaso kate,
thig14.1:26.4	Kimhi tattha manaṁ nivesaye.
thig14.1:27.1	Tathūpamā dehakāni maṁ,
thig14.1:27.2	Tehi dhammehi vinā na vattanti;
thig14.1:27.3	Dhammehi vinā na vattati,
thig14.1:27.4	Kimhi tattha manaṁ nivesaye.
thig14.1:28.1	Yathā haritālena makkhitaṁ,
thig14.1:28.2	Addasa cittikaṁ bhittiyā kataṁ;
thig14.1:28.3	Tamhi te viparītadassanaṁ,
thig14.1:28.4	Saññā mānusikā niratthikā.
thig14.1:29.1	Māyaṁ viya aggato kataṁ,
thig14.1:29.2	Supinanteva suvaṇṇapādapaṁ;
thig14.1:29.3	Upagacchasi andha rittakaṁ,
thig14.1:29.4	Janamajjheriva rupparūpakaṁ.
thig14.1:30.1	Vaṭṭaniriva koṭarohitā,
thig14.1:30.2	Majjhe pubbuḷakā saassukā;
thig14.1:30.3	Pīḷakoḷikā cettha jāyati,
thig14.1:30.4	Vividhā cakkhuvidhā ca piṇḍitā”.
thig14.1:31.1	Uppāṭiya cārudassanā,
thig14.1:31.2	Na ca pajjittha asaṅgamānasā;
thig14.1:31.3	“Handa te cakkhuṁ harassu taṁ”,
thig14.1:31.4	Tassa narassa adāsi tāvade.
thig14.1:32.1	Tassa ca viramāsi tāvade,
thig14.1:32.2	Rāgo tattha khamāpayī ca naṁ;
thig14.1:32.3	“Sotthi siyā brahmacārinī,
thig14.1:32.4	Na puno edisakaṁ bhavissati”.
thig14.1:33.1	“Āsādiya edisaṁ janaṁ,
thig14.1:33.2	Aggiṁ pajjalitaṁva liṅgiya;
thig14.1:33.3	Gaṇhiya āsīvisaṁ viya,
thig14.1:33.4	Api nu sotthi siyā khamehi no”.
thig14.1:34.1	Muttā ca tato sā bhikkhunī,
thig14.1:34.2	Agamī buddhavarassa santikaṁ;
thig14.1:34.3	Passiya varapuññalakkhaṇaṁ,
thig14.1:34.4	Cakkhu āsi yathā purāṇakanti.
thig14.1:35.1	… Subhā jīvakambavanikā therī ….
thig14.1:36.1	Tiṁsanipāto niṭṭhito.
thig15.1:0.1	Therīgāthā 15.1
thig15.1:0.2	Cattālīsanipāta
thig15.1:0.3	Isidāsītherīgāthā
thig15.1:1.1	Nagaramhi kusumanāme,
thig15.1:1.2	Pāṭaliputtamhi pathaviyā maṇḍe;
thig15.1:1.3	Sakyakulakulīnāyo,
thig15.1:1.4	Dve bhikkhuniyo hi guṇavatiyo.
thig15.1:2.1	Isidāsī tattha ekā,
thig15.1:2.2	Dutiyā bodhīti sīlasampannā ca;
thig15.1:2.3	Jhānajjhāyanaratāyo,
thig15.1:2.4	Bahussutāyo dhutakilesāyo.
thig15.1:3.1	Tā piṇḍāya caritvā,
thig15.1:3.2	Bhattatthaṁ kariya dhotapattāyo;
thig15.1:3.3	Rahitamhi sukhanisinnā,
thig15.1:3.4	Imā girā abbhudīresuṁ.
thig15.1:4.1	“Pāsādikāsi ayye,
thig15.1:4.2	Isidāsi vayopi te aparihīno;
thig15.1:4.3	Kiṁ disvāna byālikaṁ,
thig15.1:4.4	Athāsi nekkhammamanuyuttā”.
thig15.1:5.1	Evamanuyuñjiyamānā sā,
thig15.1:5.2	Rahite dhammadesanākusalā;
thig15.1:5.3	Isidāsī vacanamabravi,
thig15.1:5.4	“Suṇa bodhi yathāmhi pabbajitā”.
thig15.1:6.1	“Ujjeniyā puravare,
thig15.1:6.2	Mayhaṁ pitā sīlasaṁvuto seṭṭhi;
thig15.1:6.3	Tassamhi ekadhītā,
thig15.1:6.4	Piyā manāpā ca dayitā ca.
thig15.1:7.1	Atha me sāketato varakā,
thig15.1:7.2	Āgacchumuttamakulīnā;
thig15.1:7.3	Seṭṭhī pahūtaratano,
thig15.1:7.4	Tassa mamaṁ suṇhamadāsi tāto.
thig15.1:8.1	Sassuyā sasurassa ca,
thig15.1:8.2	Sāyaṁ pātaṁ paṇāmamupagamma;
thig15.1:8.3	Sirasā karomi pāde,
thig15.1:8.4	Vandāmi yathāmhi anusiṭṭhā.
thig15.1:9.1	Yā mayhaṁ sāmikassa,
thig15.1:9.2	Bhaginiyo bhātuno parijano vā;
thig15.1:9.3	Tamekavarakampi disvā,
thig15.1:9.4	Ubbiggā āsanaṁ demi.
thig15.1:10.1	Annena ca pānena ca,
thig15.1:10.2	Khajjena ca yañca tattha sannihitaṁ;
thig15.1:10.3	Chādemi upanayāmi ca,
thig15.1:10.4	Demi ca yaṁ yassa patirūpaṁ.
thig15.1:11.1	Kālena upaṭṭhahitvā,
thig15.1:11.2	Gharaṁ samupagamāmi ummāre;
thig15.1:11.3	Dhovantī hatthapāde,
thig15.1:11.4	Pañjalikā sāmikamupemi.
thig15.1:12.1	Kocchaṁ pasādaṁ añjaniñca,
thig15.1:12.2	Ādāsakañca gaṇhitvā;
thig15.1:12.3	Parikammakārikā viya,
thig15.1:12.4	Sayameva patiṁ vibhūsemi.
thig15.1:13.1	Sayameva odanaṁ sādhayāmi,
thig15.1:13.2	Sayameva bhājanaṁ dhovantī;
thig15.1:13.3	Mātāva ekaputtakaṁ,
thig15.1:13.4	Tathā bhattāraṁ paricarāmi.
thig15.1:14.1	Evaṁ maṁ bhattikataṁ,
thig15.1:14.2	Anurattaṁ kārikaṁ nihatamānaṁ;
thig15.1:14.3	Uṭṭhāyikaṁ analasaṁ,
thig15.1:14.4	Sīlavatiṁ dussate bhattā.
thig15.1:15.1	So mātarañca pitarañca,
thig15.1:15.2	Bhaṇati ‘āpucchahaṁ gamissāmi;
thig15.1:15.3	Isidāsiyā na saha vacchaṁ,
thig15.1:15.4	Ekāgārehaṁ saha vatthuṁ’.
thig15.1:16.1	‘Mā evaṁ putta avaca,
thig15.1:16.2	Isidāsī paṇḍitā paribyattā;
thig15.1:16.3	Uṭṭhāyikā analasā,
thig15.1:16.4	Kiṁ tuyhaṁ na rocate putta’.
thig15.1:17.1	‘Na ca me hiṁsati kiñci,
thig15.1:17.2	Na cahaṁ isidāsiyā saha vacchaṁ;
thig15.1:17.3	Dessāva me alaṁ me,
thig15.1:17.4	Apucchāhaṁ gamissāmi’.
thig15.1:18.1	Tassa vacanaṁ suṇitvā,
thig15.1:18.2	Sassu sasuro ca maṁ apucchiṁsu;
thig15.1:18.3	‘Kissa tayā aparaddhaṁ,
thig15.1:18.4	Bhaṇa vissaṭṭhā yathābhūtaṁ’.
thig15.1:19.1	‘Napihaṁ aparajjhaṁ kiñci,
thig15.1:19.2	Napi hiṁsemi na bhaṇāmi dubbacanaṁ;
thig15.1:19.3	Kiṁ sakkā kātuyye,
thig15.1:19.4	Yaṁ maṁ viddessate bhattā’.
thig15.1:20.1	Te maṁ pitugharaṁ paṭinayiṁsu,
thig15.1:20.2	Vimanā dukhena adhibhūtā;
thig15.1:20.3	Puttamanurakkhamānā,
thig15.1:20.4	‘Jitāmhase rūpiniṁ lakkhiṁ’.
thig15.1:21.1	Atha maṁ adāsi tāto,
thig15.1:21.2	Aḍḍhassa gharamhi dutiyakulikassa;
thig15.1:21.3	Tato upaḍḍhasuṅkena,
thig15.1:21.4	Yena maṁ vindatha seṭṭhi.
thig15.1:22.1	Tassapi gharamhi māsaṁ,
thig15.1:22.2	Avasiṁ atha sopi maṁ paṭiccharayi;
thig15.1:22.3	Dāsīva upaṭṭhahantiṁ,
thig15.1:22.4	Adūsikaṁ sīlasampannaṁ.
thig15.1:23.1	Bhikkhāya ca vicarantaṁ,
thig15.1:23.2	Damakaṁ dantaṁ me pitā bhaṇati;
thig15.1:23.3	‘Hohisi me jāmātā,
thig15.1:23.4	Nikkhipa poṭṭhiñca ghaṭikañca’.
thig15.1:24.1	Sopi vasitvā pakkhaṁ,
thig15.1:24.2	Atha tātaṁ bhaṇati ‘dehi me poṭṭhiṁ;
thig15.1:24.3	Ghaṭikañca mallakañca,
thig15.1:24.4	Punapi bhikkhaṁ carissāmi’.
thig15.1:25.1	Atha naṁ bhaṇatī tāto,
thig15.1:25.2	Ammā sabbo ca me ñātigaṇavaggo;
thig15.1:25.3	‘Kiṁ te na kīrati idha,
thig15.1:25.4	Bhaṇa khippaṁ taṁ te karihi’ti.
thig15.1:26.1	Evaṁ bhaṇito bhaṇati,
thig15.1:26.2	‘Yadi me attā sakkoti alaṁ mayhaṁ;
thig15.1:26.3	Isidāsiyā na saha vacchaṁ,
thig15.1:26.4	Ekagharehaṁ saha vatthuṁ’.
thig15.1:27.1	Vissajjito gato so,
thig15.1:27.2	Ahampi ekākinī vicintemi;
thig15.1:27.3	‘Āpucchitūna gacchaṁ,
thig15.1:27.4	Marituye vā pabbajissaṁ vā’.
thig15.1:28.1	Atha ayyā jinadattā,
thig15.1:28.2	Āgacchī gocarāya caramānā;
thig15.1:28.3	Tātakulaṁ vinayadharī,
thig15.1:28.4	Bahussutā sīlasampannā.
thig15.1:29.1	Taṁ disvāna amhākaṁ,
thig15.1:29.2	Uṭṭhāyāsanaṁ tassā paññāpayiṁ;
thig15.1:29.3	Nisinnāya ca pāde,
thig15.1:29.4	Vanditvā bhojanamadāsiṁ.
thig15.1:30.1	Annena ca pānena ca,
thig15.1:30.2	Khajjena ca yañca tattha sannihitaṁ;
thig15.1:30.3	Santappayitvā avacaṁ,
thig15.1:30.4	‘Ayye icchāmi pabbajituṁ’.
thig15.1:31.1	Atha maṁ bhaṇatī tāto,
thig15.1:31.2	‘Idheva puttaka carāhi tvaṁ dhammaṁ;
thig15.1:31.3	Annena ca pānena ca,
thig15.1:31.4	Tappaya samaṇe dvijātī ca’.
thig15.1:32.1	Athahaṁ bhaṇāmi tātaṁ,
thig15.1:32.2	Rodantī añjaliṁ paṇāmetvā;
thig15.1:32.3	‘Pāpañhi mayā pakataṁ,
thig15.1:32.4	Kammaṁ taṁ nijjaressāmi’.
thig15.1:33.1	Atha maṁ bhaṇatī tāto,
thig15.1:33.2	‘Pāpuṇa bodhiñca aggadhammañca;
thig15.1:33.3	Nibbānañca labhassu,
thig15.1:33.4	Yaṁ sacchikarī dvipadaseṭṭho’.
thig15.1:34.1	Mātāpitū abhivādayitvā,
thig15.1:34.2	Sabbañca ñātigaṇavaggaṁ;
thig15.1:34.3	Sattāhaṁ pabbajitā,
thig15.1:34.4	Tisso vijjā aphassayiṁ.
thig15.1:35.1	Jānāmi attano satta,
thig15.1:35.2	Jātiyo yassayaṁ phalavipāko;
thig15.1:35.3	Taṁ tava ācikkhissaṁ,
thig15.1:35.4	Taṁ ekamanā nisāmehi.
thig15.1:36.1	Nagaramhi erakacche,
thig15.1:36.2	Suvaṇṇakāro ahaṁ pahūtadhano;
thig15.1:36.3	Yobbanamadena matto,
thig15.1:36.4	So paradāraṁ asevihaṁ.
thig15.1:37.1	Sohaṁ tato cavitvā,
thig15.1:37.2	Nirayamhi apaccisaṁ ciraṁ;
thig15.1:37.3	Pakko tato ca uṭṭhahitvā,
thig15.1:37.4	Makkaṭiyā kucchimokkamiṁ.
thig15.1:38.1	Sattāhajātakaṁ maṁ,
thig15.1:38.2	Mahākapi yūthapo nillacchesi;
thig15.1:38.3	Tassetaṁ kammaphalaṁ,
thig15.1:38.4	Yathāpi gantvāna paradāraṁ.
thig15.1:39.1	Sohaṁ tato cavitvā,
thig15.1:39.2	Kālaṁ karitvā sindhavāraññe;
thig15.1:39.3	Kāṇāya ca khañjāya ca,
thig15.1:39.4	Eḷakiyā kucchimokkamiṁ.
thig15.1:40.1	Dvādasa vassāni ahaṁ,
thig15.1:40.2	Nillacchito dārake parivahitvā;
thig15.1:40.3	Kimināvaṭṭo akallo,
thig15.1:40.4	Yathāpi gantvāna paradāraṁ.
thig15.1:41.1	Sohaṁ tato cavitvā,
thig15.1:41.2	Govāṇijakassa gāviyā jāto;
thig15.1:41.3	Vaccho lākhātambo,
thig15.1:41.4	Nillacchito dvādase māse.
thig15.1:42.1	Voḍhūna naṅgalamahaṁ,
thig15.1:42.2	Sakaṭañca dhārayāmi;
thig15.1:42.3	Andhovaṭṭo akallo,
thig15.1:42.4	Yathāpi gantvāna paradāraṁ.
thig15.1:43.1	Sohaṁ tato cavitvā,
thig15.1:43.2	Vīthiyā dāsiyā ghare jāto;
thig15.1:43.3	Neva mahilā na puriso,
thig15.1:43.4	Yathāpi gantvāna paradāraṁ.
thig15.1:44.1	Tiṁsativassamhi mato,
thig15.1:44.2	Sākaṭikakulamhi dārikā jātā;
thig15.1:44.3	Kapaṇamhi appabhoge,
thig15.1:44.4	Dhanika purisapātabahulamhi.
thig15.1:45.1	Taṁ maṁ tato satthavāho,
thig15.1:45.2	Ussannāya vipulāya vaḍḍhiyā;
thig15.1:45.3	Okaḍḍhati vilapantiṁ,
thig15.1:45.4	Acchinditvā kulagharasmā.
thig15.1:46.1	Atha soḷasame vasse,
thig15.1:46.2	Disvā maṁ pattayobbanaṁ kaññaṁ;
thig15.1:46.3	Orundhatassa putto,
thig15.1:46.4	Giridāso nāma nāmena.
thig15.1:47.1	Tassapi aññā bhariyā,
thig15.1:47.2	Sīlavatī guṇavatī yasavatī ca;
thig15.1:47.3	Anurattā bhattāraṁ,
thig15.1:47.4	Tassāhaṁ viddesanamakāsiṁ.
thig15.1:48.1	Tassetaṁ kammaphalaṁ,
thig15.1:48.2	Yaṁ maṁ apakīritūna gacchanti;
thig15.1:48.3	Dāsīva upaṭṭhahantiṁ,
thig15.1:48.4	Tassapi anto kato mayā”ti.
thig15.1:49.1	… Isidāsī therī ….
thig15.1:50.1	Cattālīsanipāto niṭṭhito.
thig16.1:0.1	Therīgāthā 16.1
thig16.1:0.2	Mahānipāta
thig16.1:0.3	Sumedhātherīgāthā
thig16.1:1.1	Mantāvatiyā nagare,
thig16.1:1.2	Rañño koñcassa aggamahesiyā;
thig16.1:1.3	Dhītā āsiṁ sumedhā,
thig16.1:1.4	Pasāditā sāsanakarehi.
thig16.1:2.1	Sīlavatī cittakathā,
thig16.1:2.2	Bahussutā buddhasāsane vinitā;
thig16.1:2.3	Mātāpitaro upagamma,
thig16.1:2.4	Bhaṇati “ubhayo nisāmetha.
thig16.1:3.1	Nibbānābhiratāhaṁ,
thig16.1:3.2	Asassataṁ bhavagataṁ yadipi dibbaṁ;
thig16.1:3.3	Kimaṅgaṁ pana tucchā kāmā,
thig16.1:3.4	Appassādā bahuvighātā.
thig16.1:4.1	Kāmā kaṭukā āsī,
thig16.1:4.2	Visūpamā yesu mucchitā bālā;
thig16.1:4.3	Te dīgharattaṁ niraye,
thig16.1:4.4	Samappitā haññante dukkhitā.
thig16.1:5.1	Socanti pāpakammā,
thig16.1:5.2	Vinipāte pāpavaddhino sadā;
thig16.1:5.3	Kāyena ca vācāya ca,
thig16.1:5.4	Manasā ca asaṁvutā bālā.
thig16.1:6.1	Bālā te duppaññā,
thig16.1:6.2	Acetanā dukkhasamudayoruddhā;
thig16.1:6.3	Desente ajānantā,
thig16.1:6.4	Na bujjhare ariyasaccāni.
thig16.1:7.1	Saccāni amma buddhavaradesitāni,
thig16.1:7.2	Te bahutarā ajānantā ye;
thig16.1:7.3	Abhinandanti bhavagataṁ,
thig16.1:7.4	Pihenti devesu upapattiṁ.
thig16.1:8.1	Devesupi upapatti,
thig16.1:8.2	Asassatā bhavagate aniccamhi;
thig16.1:8.3	Na ca santasanti bālā,
thig16.1:8.4	Punappunaṁ jāyitabbassa.
thig16.1:9.1	Cattāro vinipātā,
thig16.1:9.2	Duve ca gatiyo kathañci labbhanti;
thig16.1:9.3	Na ca vinipātagatānaṁ,
thig16.1:9.4	Pabbajjā atthi nirayesu.
thig16.1:10.1	Anujānātha maṁ ubhayo,
thig16.1:10.2	Pabbajituṁ dasabalassa pāvacane;
thig16.1:10.3	Appossukkā ghaṭissaṁ,
thig16.1:10.4	Jātimaraṇappahānāya.
thig16.1:11.1	Kiṁ bhavagate abhinanditena,
thig16.1:11.2	Kāyakalinā asārena;
thig16.1:11.3	Bhavataṇhāya nirodhā,
thig16.1:11.4	Anujānātha pabbajissāmi.
thig16.1:12.1	Buddhānaṁ uppādo vivajjito,
thig16.1:12.2	Akkhaṇo khaṇo laddho;
thig16.1:12.3	Sīlāni brahmacariyaṁ,
thig16.1:12.4	Yāvajīvaṁ na dūseyyaṁ”.
thig16.1:13.1	Evaṁ bhaṇati sumedhā,
thig16.1:13.2	Mātāpitaro “na tāva āhāraṁ;
thig16.1:13.3	Āharissaṁ gahaṭṭhā,
thig16.1:13.4	Maraṇavasaṁ gatāva hessāmi”.
thig16.1:14.1	Mātā dukkhitā rodati pitā ca,
thig16.1:14.2	Assā sabbaso samabhihato;
thig16.1:14.3	Ghaṭenti saññāpetuṁ,
thig16.1:14.4	Pāsādatale chamāpatitaṁ.
thig16.1:15.1	“Uṭṭhehi puttaka kiṁ soci,
thig16.1:15.2	Tena dinnāsi vāraṇavatimhi;
thig16.1:15.3	Rājā anīkaratto,
thig16.1:15.4	Abhirūpo tassa tvaṁ dinnā.
thig16.1:16.1	Aggamahesī bhavissasi,
thig16.1:16.2	Anikarattassa rājino bhariyā;
thig16.1:16.3	Sīlāni brahmacariyaṁ,
thig16.1:16.4	Pabbajjā dukkarā puttaka.
thig16.1:17.1	Rajje āṇā dhanamissariyaṁ,
thig16.1:17.2	Bhogā sukhā daharikāsi;
thig16.1:17.3	Bhuñjāhi kāmabhoge,
thig16.1:17.4	Vāreyyaṁ hotu te putta”.
thig16.1:18.1	Atha ne bhaṇati sumedhā,
thig16.1:18.2	“Mā edisikāni bhavagatamasāraṁ;
thig16.1:18.3	Pabbajjā vā hohiti,
thig16.1:18.4	Maraṇaṁ vā me na ceva vāreyyaṁ.
thig16.1:19.1	Kimiva pūtikāyamasuciṁ,
thig16.1:19.2	Savanagandhaṁ bhayānakaṁ kuṇapaṁ;
thig16.1:19.3	Abhisaṁviseyyaṁ bhastaṁ,
thig16.1:19.4	Asakiṁ paggharitaṁ asucipuṇṇaṁ.
thig16.1:20.1	Kimiva tahaṁ jānantī,
thig16.1:20.2	Vikūlakaṁ maṁsasoṇitupalittaṁ;
thig16.1:20.3	Kimikulālayaṁ sakuṇabhattaṁ,
thig16.1:20.4	Kaḷevaraṁ kissa diyyati.
thig16.1:21.1	Nibbuyhati susānaṁ,
thig16.1:21.2	Aciraṁ kāyo apetaviññāṇo;
thig16.1:21.3	Chuddho kaḷiṅgaraṁ viya,
thig16.1:21.4	Jigucchamānehi ñātīhi.
thig16.1:22.1	Chuddhūna naṁ susāne,
thig16.1:22.2	Parabhattaṁ nhāyanti jigucchantā;
thig16.1:22.3	Niyakā mātāpitaro,
thig16.1:22.4	Kiṁ pana sādhāraṇā janatā.
thig16.1:23.1	Ajjhositā asāre,
thig16.1:23.2	Kaḷevare aṭṭhinhārusaṅghāte;
thig16.1:23.3	Kheḷassuccārassava,
thig16.1:23.4	Paripuṇṇe pūtikāyamhi.
thig16.1:24.1	Yo naṁ vinibbhujitvā,
thig16.1:24.2	Abbhantaramassa bāhiraṁ kayirā;
thig16.1:24.3	Gandhassa asahamānā,
thig16.1:24.4	Sakāpi mātā jiguccheyya.
thig16.1:25.1	Khandhadhātuāyatanaṁ,
thig16.1:25.2	Saṅkhataṁ jātimūlakaṁ dukkhaṁ;
thig16.1:25.3	Yoniso anuvicinantī,
thig16.1:25.4	Vāreyyaṁ kissa iccheyyaṁ.
thig16.1:26.1	Divase divase tisatti,
thig16.1:26.2	Satāni navanavā pateyyuṁ kāyamhi;
thig16.1:26.3	Vassasatampi ca ghāto,
thig16.1:26.4	Seyyo dukkhassa cevaṁ khayo.
thig16.1:27.1	Ajjhupagacche ghātaṁ,
thig16.1:27.2	Yo viññāyevaṁ satthuno vacanaṁ;
thig16.1:27.3	‘Dīgho tesaṁ saṁsāro,
thig16.1:27.4	Punappunaṁ haññamānānaṁ’.
thig16.1:28.1	Devesu manussesu ca,
thig16.1:28.2	Tiracchānayoniyā asurakāye;
thig16.1:28.3	Petesu ca nirayesu ca,
thig16.1:28.4	Aparimitā dissare ghātā.
thig16.1:29.1	Ghātā nirayesu bahū,
thig16.1:29.2	Vinipātagatassa pīḷiyamānassa;
thig16.1:29.3	Devesupi attāṇaṁ,
thig16.1:29.4	Nibbānasukhā paraṁ natthi.
thig16.1:30.1	Pattā te nibbānaṁ,
thig16.1:30.2	Ye yuttā dasabalassa pāvacane;
thig16.1:30.3	Appossukkā ghaṭenti,
thig16.1:30.4	Jātimaraṇappahānāya.
thig16.1:31.1	Ajjeva tātabhinikkha-
thig16.1:31.2	missaṁ bhogehi kiṁ asārehi;
thig16.1:31.3	Nibbinnā me kāmā,
thig16.1:31.4	Vantasamā tālavatthukatā”.
thig16.1:32.1	Sā cevaṁ bhaṇati pitaram-
thig16.1:32.2	anīkaratto ca yassa sā dinnā;
thig16.1:32.3	Upayāsi vāraṇavate,
thig16.1:32.4	Vāreyyamupaṭṭhite kāle.
thig16.1:33.1	Atha asitanicitamuduke,
thig16.1:33.2	Kese khaggena chindiya sumedhā;
thig16.1:33.3	Pāsādaṁ pidahitvā,
thig16.1:33.4	Paṭhamajjhānaṁ samāpajji.
thig16.1:34.1	Sā ca tahiṁ samāpannā,
thig16.1:34.2	Anīkaratto ca āgato nagaraṁ;
thig16.1:34.3	Pāsāde ca sumedhā,
thig16.1:34.4	Aniccasaññaṁ subhāveti.
thig16.1:35.1	Sā ca manasi karoti,
thig16.1:35.2	Anīkaratto ca āruhī turitaṁ;
thig16.1:35.3	Maṇikanakabhūsitaṅgo,
thig16.1:35.4	Katañjalī yācati sumedhaṁ.
thig16.1:36.1	“Rajje āṇādhanamissa-
thig16.1:36.2	riyaṁ bhogā sukhā daharikāsi;
thig16.1:36.3	Bhuñjāhi kāmabhoge,
thig16.1:36.4	Kāmasukhā dullabhā loke.
thig16.1:37.1	Nissaṭṭhaṁ te rajjaṁ,
thig16.1:37.2	Bhoge bhuñjassu dehi dānāni;
thig16.1:37.3	Mā dummanā ahosi,
thig16.1:37.4	Mātāpitaro te dukkhitā”.
thig16.1:38.1	Taṁ taṁ bhaṇati sumedhā,
thig16.1:38.2	Kāmehi anatthikā vigatamohā;
thig16.1:38.3	“Mā kāme abhinandi,
thig16.1:38.4	Kāmesvādīnavaṁ passa.
thig16.1:39.1	Cātuddīpo rājā,
thig16.1:39.2	Mandhātā āsi kāmabhoginamaggo;
thig16.1:39.3	Atitto kālaṅkato,
thig16.1:39.4	Na cassa paripūritā icchā.
thig16.1:40.1	Satta ratanāni vasseyya,
thig16.1:40.2	Vuṭṭhimā dasadisā samantena;
thig16.1:40.3	Na catthi titti kāmānaṁ,
thig16.1:40.4	Atittāva maranti narā.
thig16.1:41.1	Asisūnūpamā kāmā,
thig16.1:41.2	kāmā sappasiropamā;
thig16.1:41.3	Ukkopamā anudahanti,
thig16.1:41.4	aṭṭhikaṅkala sannibhā.
thig16.1:42.1	Aniccā adhuvā kāmā,
thig16.1:42.2	bahudukkhā mahāvisā;
thig16.1:42.3	Ayoguḷova santatto,
thig16.1:42.4	aghamūlā dukhapphalā.
thig16.1:43.1	Rukkhapphalūpamā kāmā,
thig16.1:43.2	maṁsapesūpamā dukhā;
thig16.1:43.3	Supinopamā vañcaniyā,
thig16.1:43.4	kāmā yācitakūpamā.
thig16.1:44.1	Sattisūlūpamā kāmā,
thig16.1:44.2	rogo gaṇḍo aghaṁ nighaṁ;
thig16.1:44.3	Aṅgārakāsusadisā,
thig16.1:44.4	aghamūlaṁ bhayaṁ vadho.
thig16.1:45.1	Evaṁ bahudukkhā kāmā,
thig16.1:45.2	akkhātā antarāyikā;
thig16.1:45.3	Gacchatha na me bhavagate,
thig16.1:45.4	vissāso atthi attano.
thig16.1:46.1	Kiṁ mama paro karissati,
thig16.1:46.2	Attano sīsamhi ḍayhamānamhi;
thig16.1:46.3	Anubandhe jarāmaraṇe,
thig16.1:46.4	Tassa ghātāya ghaṭitabbaṁ”.
thig16.1:47.1	Dvāraṁ apāpuritvānahaṁ,
thig16.1:47.2	Mātāpitaro anīkarattañca;
thig16.1:47.3	Disvāna chamaṁ nisinne,
thig16.1:47.4	Rodante idamavocaṁ.
thig16.1:48.1	“Dīgho bālānaṁ saṁsāro,
thig16.1:48.2	Punappunañca rodataṁ;
thig16.1:48.3	Anamatagge pitu maraṇe,
thig16.1:48.4	Bhātu vadhe attano ca vadhe.
thig16.1:49.1	Assu thaññaṁ rudhiraṁ,
thig16.1:49.2	Saṁsāraṁ anamataggato saratha;
thig16.1:49.3	Sattānaṁ saṁsarataṁ,
thig16.1:49.4	Sarāhi aṭṭhīnañca sannicayaṁ.
thig16.1:50.1	Sara caturodadhī,
thig16.1:50.2	Upanīte assuthaññarudhiramhi;
thig16.1:50.3	Sara ekakappamaṭṭhīnaṁ,
thig16.1:50.4	Sañcayaṁ vipulena samaṁ.
thig16.1:51.1	Anamatagge saṁsarato,
thig16.1:51.2	Mahiṁ jambudīpamupanītaṁ;
thig16.1:51.3	Kolaṭṭhimattaguḷikā,
thig16.1:51.4	Mātā mātusveva nappahonti.
thig16.1:52.1	Tiṇakaṭṭhasākhāpalāsaṁ,
thig16.1:52.2	Upanītaṁ anamataggato sara;
thig16.1:52.3	Caturaṅgulikā ghaṭikā,
thig16.1:52.4	Pitupitusveva nappahonti.
thig16.1:53.1	Sara kāṇakacchapaṁ pubba-
thig16.1:53.2	samudde aparato ca yugachiddaṁ;
thig16.1:53.3	Siraṁ tassa ca paṭimukkaṁ,
thig16.1:53.4	Manussalābhamhi opammaṁ.
thig16.1:54.1	Sara rūpaṁ pheṇapiṇḍopam-
thig16.1:54.2	assa kāyakalino asārassa;
thig16.1:54.3	Khandhe passa anicce,
thig16.1:54.4	Sarāhi niraye bahuvighāte.
thig16.1:55.1	Sara kaṭasiṁ vaḍḍhente,
thig16.1:55.2	Punappunaṁ tāsu tāsu jātīsu;
thig16.1:55.3	Sara kumbhīlabhayāni ca,
thig16.1:55.4	Sarāhi cattāri saccāni.
thig16.1:56.1	Amatamhi vijjamāne,
thig16.1:56.2	Kiṁ tava pañcakaṭukena pītena;
thig16.1:56.3	Sabbā hi kāmaratiyo,
thig16.1:56.4	Kaṭukatarā pañcakaṭukena.
thig16.1:57.1	Amatamhi vijjamāne,
thig16.1:57.2	Kiṁ tava kāmehi ye pariḷāhā;
thig16.1:57.3	Sabbā hi kāmaratiyo,
thig16.1:57.4	Jalitā kuthitā kampitā santāpitā.
thig16.1:58.1	Asapattamhi samāne,
thig16.1:58.2	Kiṁ tava kāmehi ye bahusapattā;
thig16.1:58.3	Rājaggicoraudakappiyehi,
thig16.1:58.4	Sādhāraṇā kāmā bahusapattā.
thig16.1:59.1	Mokkhamhi vijjamāne,
thig16.1:59.2	Kiṁ tava kāmehi yesu vadhabandho;
thig16.1:59.3	Kāmesu hi asakāmā,
thig16.1:59.4	Vadhabandhadukhāni anubhonti.
thig16.1:60.1	Ādīpitā tiṇukkā,
thig16.1:60.2	Gaṇhantaṁ dahanti neva muñcantaṁ;
thig16.1:60.3	Ukkopamā hi kāmā,
thig16.1:60.4	Dahanti ye te na muñcanti.
thig16.1:61.1	Mā appakassa hetu,
thig16.1:61.2	Kāmasukhassa vipulaṁ jahī sukhaṁ;
thig16.1:61.3	Mā puthulomova baḷisaṁ,
thig16.1:61.4	Gilitvā pacchā vihaññasi.
thig16.1:62.1	Kāmaṁ kāmesu damassu,
thig16.1:62.2	Tāva sunakhova saṅkhalābaddho;
thig16.1:62.3	Kāhinti khu taṁ kāmā,
thig16.1:62.4	Chātā sunakhaṁva caṇḍālā.
thig16.1:63.1	Aparimitañca dukkhaṁ,
thig16.1:63.2	Bahūni ca cittadomanassāni;
thig16.1:63.3	Anubhohisi kāmayutto,
thig16.1:63.4	Paṭinissaja addhuve kāme.
thig16.1:64.1	Ajaramhi vijjamāne,
thig16.1:64.2	Kiṁ tava kāmehi yesu jarā;
thig16.1:64.3	Maraṇabyādhigahitā,
thig16.1:64.4	Sabbā sabbattha jātiyo.
thig16.1:65.1	Idamajaramidamamaraṁ,
thig16.1:65.2	Idamajarāmaraṁ padamasokaṁ;
thig16.1:65.3	Asapattamasambādhaṁ,
thig16.1:65.4	Akhalitamabhayaṁ nirupatāpaṁ.
thig16.1:66.1	Adhigatamidaṁ bahūhi,
thig16.1:66.2	Amataṁ ajjāpi ca labhanīyamidaṁ;
thig16.1:66.3	Yo yoniso payuñjati,
thig16.1:66.4	Na ca sakkā aghaṭamānena”.
thig16.1:67.1	Evaṁ bhaṇati sumedhā,
thig16.1:67.2	Saṅkhāragate ratiṁ alabhamānā;
thig16.1:67.3	Anunentī anikarattaṁ,
thig16.1:67.4	Kese ca chamaṁ khipi sumedhā.
thig16.1:68.1	Uṭṭhāya anikaratto,
thig16.1:68.2	Pañjaliko yācatassā pitaraṁ so;
thig16.1:68.3	“Vissajjetha sumedhaṁ,
thig16.1:68.4	Pabbajituṁ vimokkhasaccadassā”.
thig16.1:69.1	Vissajjitā mātāpitūhi,
thig16.1:69.2	pabbaji sokabhayabhītā;
thig16.1:69.3	Cha abhiññā sacchikatā,
thig16.1:69.4	aggaphalaṁ sikkhamānāya.
thig16.1:70.1	Acchariyamabbhutaṁ taṁ,
thig16.1:70.2	Nibbānaṁ āsi rājakaññāya;
thig16.1:70.3	Pubbenivāsacaritaṁ,
thig16.1:70.4	Yathā byākari pacchime kāle.
thig16.1:71.1	“Bhagavati koṇāgamane,
thig16.1:71.2	Saṅghārāmamhi navanivesamhi;
thig16.1:71.3	Sakhiyo tisso janiyo,
thig16.1:71.4	Vihāradānaṁ adāsimha.
thig16.1:72.1	Dasakkhattuṁ satakkhattuṁ,
thig16.1:72.2	Dasasatakkhattuṁ satāni ca satakkhattuṁ;
thig16.1:72.3	Devesu uppajjimha,
thig16.1:72.4	Ko pana vādo manussesu.
thig16.1:73.1	Devesu mahiddhikā ahumha,
thig16.1:73.2	Mānusakamhi ko pana vādo;
thig16.1:73.3	Sattaratanassa mahesī,
thig16.1:73.4	Itthiratanaṁ ahaṁ āsiṁ.
thig16.1:74.1	So hetu so pabhavo,
thig16.1:74.2	Taṁ mūlaṁ sāva sāsane khantī;
thig16.1:74.3	Taṁ paṭhamasamodhānaṁ,
thig16.1:74.4	Taṁ dhammaratāya nibbānaṁ.
thig16.1:75.1	Evaṁ karonti ye sadda-
thig16.1:75.2	hanti vacanaṁ anomapaññassa;
thig16.1:75.3	Nibbindanti bhavagate,
thig16.1:75.4	Nibbinditvā virajjantī”ti.
thig16.1:76.1	Itthaṁ sudaṁ sumedhā therī gāthāyo abhāsitthāti.
thig16.1:76.2	Mahānipāto niṭṭhito.
thig16.1:77.0	Samattā therīgāthāyo
thig16.1:77.1	Gāthāsatāni cattāri,
thig16.1:77.2	asīti puna cuddasa;
thig16.1:77.3	Theriyekuttarasatā,
thig16.1:77.4	sabbā tā āsavakkhayāti.
thig16.1:77.5	Therīgāthāpāḷi niṭṭhitā.