# Therīapadāna — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

thi-ap1:0.1	Therīapadāna
thi-ap1:0.2	Sumedhāvagga
thi-ap1:0.3	Sumedhātherīapadāna
thi-ap1:1.1	Namo tassa Bhagavato Arahato Sammāsambuddhassa.
thi-ap1:2.1	Atha therikāpadānāni suṇātha—
thi-ap1:3.1	“Bhagavati koṇāgamane,
thi-ap1:3.2	Saṅghārāmamhi navanivesanamhi;
thi-ap1:3.3	Sakhiyo tisso janiyo,
thi-ap1:3.4	Vihāradānaṁ adāsimha.
thi-ap1:4.1	Dasakkhattuṁ satakkhattuṁ,
thi-ap1:4.2	Dasasatakkhattuṁ satānañca satakkhattuṁ;
thi-ap1:4.3	Devesu upapajjimha,
thi-ap1:4.4	Ko vādo mānuse bhave.
thi-ap1:5.1	Deve mahiddhikā ahumha,
thi-ap1:5.2	mānusakamhi ko vādo;
thi-ap1:5.3	Sattaratanamahesī,
thi-ap1:5.4	itthiratanaṁ ahaṁ bhaviṁ.
thi-ap1:6.1	Idha sañcitakusalā,
thi-ap1:6.2	susamiddhakulappajā;
thi-ap1:6.3	Dhanañjānī ca khemā ca,
thi-ap1:6.4	ahampi ca tayo janā.
thi-ap1:7.1	Ārāmaṁ sukataṁ katvā,
thi-ap1:7.2	sabbāvayavamaṇḍitaṁ;
thi-ap1:7.3	Buddhappamukhasaṅghassa,
thi-ap1:7.4	niyyādetvā samoditā.
thi-ap1:8.1	Yattha yatthūpapajjāmi,
thi-ap1:8.2	tassa kammassa vāhasā;
thi-ap1:8.3	Devesu aggataṁ pattā,
thi-ap1:8.4	manussesu tatheva ca.
thi-ap1:9.1	Imasmiṁyeva kappamhi,
thi-ap1:9.2	brahmabandhu mahāyaso;
thi-ap1:9.3	Kassapo nāma gottena,
thi-ap1:9.4	uppajji vadataṁ varo.
thi-ap1:10.1	Upaṭṭhāko mahesissa,
thi-ap1:10.2	tadā āsi narissaro;
thi-ap1:10.3	Kāsirājā kikī nāma,
thi-ap1:10.4	bārāṇasipuruttame.
thi-ap1:11.1	Tassāsuṁ satta dhītaro,
thi-ap1:11.2	rājakaññā sukhedhitā;
thi-ap1:11.3	Buddhopaṭṭhānaniratā,
thi-ap1:11.4	brahmacariyaṁ cariṁsu tā.
thi-ap1:12.1	Tāsaṁ sahāyikā hutvā,
thi-ap1:12.2	sīlesu susamāhitā;
thi-ap1:12.3	Datvā dānāni sakkaccaṁ,
thi-ap1:12.4	agāreva vataṁ cariṁ.
thi-ap1:13.1	Tena kammena sukatena,
thi-ap1:13.2	cetanāpaṇidhīhi ca;
thi-ap1:13.3	Jahitvā mānusaṁ dehaṁ,
thi-ap1:13.4	tāvatiṁsūpagā ahaṁ.
thi-ap1:14.1	Tato cutā yāmamagaṁ,
thi-ap1:14.2	tatohaṁ tusitaṁ gatā;
thi-ap1:14.3	Tato ca nimmānaratiṁ,
thi-ap1:14.4	vasavattipuraṁ tato.
thi-ap1:15.1	Yattha yatthūpapajjāmi,
thi-ap1:15.2	puññakammasamohitā;
thi-ap1:15.3	Tattha tattheva rājūnaṁ,
thi-ap1:15.4	mahesittamakārayiṁ.
thi-ap1:16.1	Tato cutā manussatte,
thi-ap1:16.2	rājūnaṁ cakkavattinaṁ;
thi-ap1:16.3	Maṇḍalīnañca rājūnaṁ,
thi-ap1:16.4	mahesittamakārayiṁ.
thi-ap1:17.1	Sampattimanubhotvāna,
thi-ap1:17.2	devesu mānusesu ca;
thi-ap1:17.3	Sabbattha sukhitā hutvā,
thi-ap1:17.4	nekajātīsu saṁsariṁ.
thi-ap1:18.1	So hetu ca so pabhavo,
thi-ap1:18.2	Tammūlaṁ sāsane khamaṁ;
thi-ap1:18.3	Paṭhamaṁ taṁ samodhānaṁ,
thi-ap1:18.4	Taṁ dhammaratāya nibbānaṁ.
thi-ap1:19.1	Kilesā jhāpitā mayhaṁ,
thi-ap1:19.2	bhavā sabbe samūhatā;
thi-ap1:19.3	Nāgīva bandhanaṁ chetvā,
thi-ap1:19.4	viharāmi anāsavā.
thi-ap1:20.1	Svāgataṁ vata me āsi,
thi-ap1:20.2	buddhaseṭṭhassa santike;
thi-ap1:20.3	Tisso vijjā anuppattā,
thi-ap1:20.4	kataṁ buddhassa sāsanaṁ.
thi-ap1:21.1	Paṭisambhidā catasso,
thi-ap1:21.2	vimokkhāpi ca aṭṭhime;
thi-ap1:21.3	Chaḷabhiññā sacchikatā,
thi-ap1:21.4	kataṁ buddhassa sāsanaṁ”.
thi-ap1:22.1	Itthaṁ sudaṁ sumedhā bhikkhunī imā gāthāyo abhāsitthāti.
thi-ap1:23.1	Sumedhātheriyāpadānaṁ paṭhamaṁ.
thi-ap2:0.1	Therīapadāna
thi-ap2:0.2	Sumedhāvagga
thi-ap2:0.3	2 Mekhalādāyikātherīapadāna
thi-ap2:1.1	“Siddhatthassa bhagavato,
thi-ap2:1.2	thūpakārāpikā ahuṁ;
thi-ap2:1.3	Mekhalikā mayā dinnā,
thi-ap2:1.4	navakammāya satthuno.
thi-ap2:2.1	Niṭṭhite ca mahāthūpe,
thi-ap2:2.2	mekhalaṁ punadāsahaṁ;
thi-ap2:2.3	Lokanāthassa munino,
thi-ap2:2.4	pasannā sehi pāṇibhi.
thi-ap2:3.1	Catunnavutito kappe,
thi-ap2:3.2	yaṁ mekhalamadaṁ tadā;
thi-ap2:3.3	Duggatiṁ nābhijānāmi,
thi-ap2:3.4	thūpakārassidaṁ phalaṁ.
thi-ap2:4.1	Kilesā jhāpitā mayhaṁ,
thi-ap2:4.2	…pe…
thi-ap2:4.3	viharāmi anāsavā.
thi-ap2:5.1	Svāgataṁ vata me āsi,
thi-ap2:5.2	…pe…
thi-ap2:5.3	kataṁ buddhassa sāsanaṁ.
thi-ap2:6.1	Paṭisambhidā catasso,
thi-ap2:6.2	…pe…
thi-ap2:6.3	kataṁ buddhassa sāsanaṁ”.
thi-ap2:7.1	Itthaṁ sudaṁ mekhalādāyikā bhikkhunī imā gāthāyo abhāsitthāti.
thi-ap2:8.1	Mekhalādāyikātheriyāpadānaṁ dutiyaṁ.
thi-ap3:0.1	Therīapadāna
thi-ap3:0.2	Sumedhāvagga
thi-ap3:0.3	Maṇḍapadāyikātherīapadāna
thi-ap3:1.1	“Koṇāgamanabuddhassa,
thi-ap3:1.2	maṇḍapo kārito mayā;
thi-ap3:1.3	Dhuvaṁ ticīvaraṁdāsiṁ,
thi-ap3:1.4	buddhassa lokabandhuno.
thi-ap3:2.1	Yaṁ yaṁ janapadaṁ yāmi,
thi-ap3:2.2	nigame rājadhāniyo;
thi-ap3:2.3	Sabbattha pūjitā homi,
thi-ap3:2.4	puññakammassidaṁ phalaṁ.
thi-ap3:3.1	Kilesā jhāpitā mayhaṁ,
thi-ap3:3.2	…pe…
thi-ap3:3.3	viharāmi anāsavā.
thi-ap3:4.1	Svāgataṁ vata me āsi,
thi-ap3:4.2	…pe…
thi-ap3:4.3	kataṁ buddhassa sāsanaṁ.
thi-ap3:5.1	Paṭisambhidā catasso,
thi-ap3:5.2	…pe…
thi-ap3:5.3	kataṁ buddhassa sāsanaṁ”.
thi-ap3:6.1	Itthaṁ sudaṁ maṇḍapadāyikā bhikkhunī imā gāthāyo abhāsitthāti.
thi-ap3:7.1	Maṇḍapadāyikātheriyāpadānaṁ tatiyaṁ.
thi-ap4:0.1	Therīapadāna
thi-ap4:0.2	Sumedhāvagga
thi-ap4:0.3	4 Saṅkamanatthātherīapadāna
thi-ap4:1.1	“Vipassissa bhagavato,
thi-ap4:1.2	lokajeṭṭhassa tādino;
thi-ap4:1.3	Rathiyaṁ paṭipannassa,
thi-ap4:1.4	tārayantassa pāṇino.
thi-ap4:2.1	Gharato nikkhamitvāna,
thi-ap4:2.2	avakujjā nipajjahaṁ;
thi-ap4:2.3	Anukampako lokanātho,
thi-ap4:2.4	sirasi akkamī mama.
thi-ap4:3.1	Akkamitvāna sirasi,
thi-ap4:3.2	agamā lokanāyako;
thi-ap4:3.3	Tena cittappasādena,
thi-ap4:3.4	tusitaṁ agamāsahaṁ.
thi-ap4:4.1	Kilesā jhāpitā mayhaṁ,
thi-ap4:4.2	…pe…
thi-ap4:4.3	viharāmi anāsavā.
thi-ap4:5.1	Svāgataṁ vata me āsi,
thi-ap4:5.2	…pe…
thi-ap4:5.3	kataṁ buddhassa sāsanaṁ.
thi-ap4:6.1	Paṭisambhidā catasso,
thi-ap4:6.2	…pe…
thi-ap4:6.3	kataṁ buddhassa sāsanaṁ”.
thi-ap4:7.1	Itthaṁ sudaṁ saṅkamanatthā bhikkhunī imā gāthāyo abhāsitthāti.
thi-ap4:8.1	Saṅkamanatthātheriyāpadānaṁ catutthaṁ.
thi-ap5:0.1	Therīapadāna
thi-ap5:0.2	Sumedhāvagga
thi-ap5:0.3	Naḷamālikātherīapadāna
thi-ap5:1.1	“Candabhāgānadītīre,
thi-ap5:1.2	ahosiṁ kinnarī tadā;
thi-ap5:1.3	Addasaṁ virajaṁ buddhaṁ,
thi-ap5:1.4	sayambhuṁ aparājitaṁ.
thi-ap5:2.1	Pasannacittā sumanā,
thi-ap5:2.2	vedajātā katañjalī;
thi-ap5:2.3	Naḷamālaṁ gahetvāna,
thi-ap5:2.4	sayambhuṁ abhipūjayiṁ.
thi-ap5:3.1	Tena kammena sukatena,
thi-ap5:3.2	cetanāpaṇidhīhi ca;
thi-ap5:3.3	Jahitvā kinnarīdehaṁ,
thi-ap5:3.4	agacchiṁ tidasaṅgatiṁ.
thi-ap5:4.1	Chattiṁsadevarājūnaṁ,
thi-ap5:4.2	mahesittamakārayiṁ;
thi-ap5:4.3	Dasannaṁ cakkavattīnaṁ,
thi-ap5:4.4	mahesittamakārayiṁ;
thi-ap5:4.5	Saṁvejetvāna me cittaṁ,
thi-ap5:4.6	pabbajiṁ anagāriyaṁ.
thi-ap5:5.1	Kilesā jhāpitā mayhaṁ,
thi-ap5:5.2	bhavā sabbe samūhatā;
thi-ap5:5.3	Sabbāsavā parikkhīṇā,
thi-ap5:5.4	natthi dāni punabbhavo.
thi-ap5:6.1	Catunnavutito kappe,
thi-ap5:6.2	yaṁ pupphamabhipūjayiṁ;
thi-ap5:6.3	Duggatiṁ nābhijānāmi,
thi-ap5:6.4	pupphapūjāyidaṁ phalaṁ.
thi-ap5:7.1	Kilesā jhāpitā mayhaṁ,
thi-ap5:7.2	…pe…
thi-ap5:7.3	viharāmi anāsavā.
thi-ap5:8.1	Svāgataṁ vata me āsi,
thi-ap5:8.2	…pe…
thi-ap5:8.3	kataṁ buddhassa sāsanaṁ.
thi-ap5:9.1	Paṭisambhidā catasso,
thi-ap5:9.2	…pe…
thi-ap5:9.3	kataṁ buddhassa sāsanaṁ”.
thi-ap5:10.1	Itthaṁ sudaṁ naḷamālikā therī imā gāthāyo abhāsitthāti.
thi-ap5:11.1	Naḷamālikātheriyāpadānaṁ pañcamaṁ.
thi-ap6:0.1	Therīapadāna
thi-ap6:0.2	Sumedhāvagga
thi-ap6:0.3	Ekapiṇḍapātadāyikātherīapadāna
thi-ap6:1.1	“Nagare bandhumatiyā,
thi-ap6:1.2	bandhumā nāma khattiyo;
thi-ap6:1.3	Tassa rañño ahuṁ bhariyā,
thi-ap6:1.4	ekajjhaṁ cārayāmahaṁ.
thi-ap6:2.1	Rahogatā nisīditvā,
thi-ap6:2.2	evaṁ cintesahaṁ tadā;
thi-ap6:2.3	‘Ādāya gamanīyaṁ hi,
thi-ap6:2.4	kusalaṁ natthi me kataṁ.
thi-ap6:3.1	Mahābhitāpaṁ kaṭukaṁ,
thi-ap6:3.2	ghorarūpaṁ sudāruṇaṁ;
thi-ap6:3.3	Nirayaṁ nūna gacchāmi,
thi-ap6:3.4	ettha me natthi saṁsayo’.
thi-ap6:4.1	Rājānaṁ upasaṅkamma,
thi-ap6:4.2	idaṁ vacanamabraviṁ;
thi-ap6:4.3	‘Ekaṁ me samaṇaṁ dehi,
thi-ap6:4.4	bhojayissāmi khattiya’.
thi-ap6:5.1	Adāsi me mahārājā,
thi-ap6:5.2	samaṇaṁ bhāvitindriyaṁ;
thi-ap6:5.3	Tassa pattaṁ gahetvāna,
thi-ap6:5.4	paramannena pūrayiṁ.
thi-ap6:6.1	Pūrayitvā paramannaṁ,
thi-ap6:6.2	gandhālepaṁ akāsahaṁ;
thi-ap6:6.3	Jālena pidahitvāna,
thi-ap6:6.4	vatthayugena chādayiṁ.
thi-ap6:7.1	Ārammaṇaṁ mamaṁ etaṁ,
thi-ap6:7.2	sarāmi yāvajīvihaṁ;
thi-ap6:7.3	Tattha cittaṁ pasādetvā,
thi-ap6:7.4	tāvatiṁsamagacchahaṁ.
thi-ap6:8.1	Tiṁsānaṁ devarājūnaṁ,
thi-ap6:8.2	mahesittamakārayiṁ;
thi-ap6:8.3	Manasā patthitaṁ mayhaṁ,
thi-ap6:8.4	nibbattati yathicchitaṁ.
thi-ap6:9.1	Vīsānaṁ cakkavattīnaṁ,
thi-ap6:9.2	mahesittamakārayiṁ;
thi-ap6:9.3	Ocitattāva hutvāna,
thi-ap6:9.4	saṁsarāmi bhavesvahaṁ.
thi-ap6:10.1	Sabbabandhanamuttāhaṁ,
thi-ap6:10.2	apetā me upādikā;
thi-ap6:10.3	Sabbāsavā parikkhīṇā,
thi-ap6:10.4	natthi dāni punabbhavo.
thi-ap6:11.1	Ekanavutito kappe,
thi-ap6:11.2	yaṁ dānamadadiṁ tadā;
thi-ap6:11.3	Duggatiṁ nābhijānāmi,
thi-ap6:11.4	piṇḍapātassidaṁ phalaṁ.
thi-ap6:12.1	Kilesā jhāpitā mayhaṁ,
thi-ap6:12.2	…pe…
thi-ap6:12.3	viharāmi anāsavā.
thi-ap6:13.1	Svāgataṁ vata me āsi,
thi-ap6:13.2	…pe…
thi-ap6:13.3	kataṁ buddhassa sāsanaṁ.
thi-ap6:14.1	Paṭisambhidā catasso,
thi-ap6:14.2	…pe…
thi-ap6:14.3	kataṁ buddhassa sāsanaṁ”.
thi-ap6:15.1	Itthaṁ sudaṁ ekapiṇḍapātadāyikā bhikkhunī imā gāthāyo abhāsitthāti.
thi-ap6:16.1	Ekapiṇḍapātadāyikātheriyāpadānaṁ chaṭṭhaṁ.
thi-ap7:0.1	Therīapadāna
thi-ap7:0.2	Sumedhāvagga
thi-ap7:0.3	7 Kaṭacchubhikkhādāyikātherīapadāna
thi-ap7:1.1	“Piṇḍacāraṁ carantassa,
thi-ap7:1.2	tissanāmassa satthuno;
thi-ap7:1.3	Kaṭacchubhikkhaṁ paggayha,
thi-ap7:1.4	buddhaseṭṭhassa dāsahaṁ.
thi-ap7:2.1	Paṭiggahetvā sambuddho,
thi-ap7:2.2	tisso lokagganāyako;
thi-ap7:2.3	Vīthiyā saṇṭhito satthā,
thi-ap7:2.4	akā me anumodanaṁ.
thi-ap7:3.1	‘Kaṭacchubhikkhaṁ datvāna,
thi-ap7:3.2	tāvatiṁsaṁ gamissasi;
thi-ap7:3.3	Chattiṁsadevarājūnaṁ,
thi-ap7:3.4	mahesittaṁ karissasi.
thi-ap7:4.1	Paññāsaṁ cakkavattīnaṁ,
thi-ap7:4.2	mahesittaṁ karissasi;
thi-ap7:4.3	Manasā patthitaṁ sabbaṁ,
thi-ap7:4.4	paṭilacchasi sabbadā.
thi-ap7:5.1	Sampattiṁ anubhotvāna,
thi-ap7:5.2	pabbajissasikiñcanā;
thi-ap7:5.3	Sabbāsave pariññāya,
thi-ap7:5.4	nibbāyissasināsavā’.
thi-ap7:6.1	Idaṁ vatvāna sambuddho,
thi-ap7:6.2	tisso lokagganāyako;
thi-ap7:6.3	Nabhaṁ abbhuggamī vīro,
thi-ap7:6.4	haṁsarājāva ambare.
thi-ap7:7.1	Sudinnaṁ me dānavaraṁ,
thi-ap7:7.2	suyiṭṭhā yāgasampadā;
thi-ap7:7.3	Kaṭacchubhikkhaṁ datvāna,
thi-ap7:7.4	pattāhaṁ acalaṁ padaṁ.
thi-ap7:8.1	Dvenavute ito kappe,
thi-ap7:8.2	yaṁ dānamadadiṁ tadā;
thi-ap7:8.3	Duggatiṁ nābhijānāmi,
thi-ap7:8.4	bhikkhādānassidaṁ phalaṁ.
thi-ap7:9.1	Kilesā jhāpitā mayhaṁ,
thi-ap7:9.2	…pe…
thi-ap7:9.3	viharāmi anāsavā.
thi-ap7:10.1	Svāgataṁ vata me āsi,
thi-ap7:10.2	…pe…
thi-ap7:10.3	kataṁ buddhassa sāsanaṁ.
thi-ap7:11.1	Paṭisambhidā catasso,
thi-ap7:11.2	…pe…
thi-ap7:11.3	kataṁ buddhassa sāsanaṁ”.
thi-ap7:12.1	Itthaṁ sudaṁ kaṭacchubhikkhādāyikā bhikkhunī imā gāthāyo abhāsitthāti.
thi-ap7:13.1	Kaṭacchubhikkhādāyikātheriyāpadānaṁ sattamaṁ.
thi-ap8:0.1	Therīapadāna
thi-ap8:0.2	Sumedhāvagga
thi-ap8:0.3	Sattuppalamālikātherīapadāna
thi-ap8:1.1	“Nagare aruṇavatiyā,
thi-ap8:1.2	aruṇo nāma khattiyo;
thi-ap8:1.3	Tassa rañño ahuṁ bhariyā,
thi-ap8:1.4	vāritaṁ vārayāmahaṁ.
thi-ap8:2.1	Satta mālā gahetvāna,
thi-ap8:2.2	uppalā devagandhikā;
thi-ap8:2.3	Nisajja pāsādavare,
thi-ap8:2.4	evaṁ cintesi tāvade.
thi-ap8:3.1	‘Kiṁ me imāhi mālāhi,
thi-ap8:3.2	sirasāropitāhi me;
thi-ap8:3.3	Varaṁ me buddhaseṭṭhassa,
thi-ap8:3.4	ñāṇamhi abhiropitaṁ’.
thi-ap8:4.1	Sambuddhaṁ paṭimānentī,
thi-ap8:4.2	dvārāsanne nisīdahaṁ;
thi-ap8:4.3	‘Yadā ehiti sambuddho,
thi-ap8:4.4	pūjayissaṁ mahāmuniṁ’.
thi-ap8:5.1	Kakudho vilasantova,
thi-ap8:5.2	migarājāva kesarī;
thi-ap8:5.3	Bhikkhusaṅghena sahito,
thi-ap8:5.4	āgacchi vīthiyā jino.
thi-ap8:6.1	Buddhassa raṁsiṁ disvāna,
thi-ap8:6.2	haṭṭhā saṁviggamānasā;
thi-ap8:6.3	Dvāraṁ avāpuritvāna,
thi-ap8:6.4	buddhaseṭṭhamapūjayiṁ.
thi-ap8:7.1	Satta uppalapupphāni,
thi-ap8:7.2	parikiṇṇāni ambare;
thi-ap8:7.3	Chadiṁ karonto buddhassa,
thi-ap8:7.4	matthake dhārayanti te.
thi-ap8:8.1	Udaggacittā sumanā,
thi-ap8:8.2	vedajātā katañjalī;
thi-ap8:8.3	Tattha cittaṁ pasādetvā,
thi-ap8:8.4	tāvatiṁsamagacchahaṁ.
thi-ap8:9.1	Mahānelassa chādanaṁ,
thi-ap8:9.2	dhārenti mama muddhani;
thi-ap8:9.3	Dibbagandhaṁ pavāyāmi,
thi-ap8:9.4	sattuppalassidaṁ phalaṁ.
thi-ap8:10.1	Kadāci nīyamānāya,
thi-ap8:10.2	ñātisaṅghena me tadā;
thi-ap8:10.3	Yāvatā parisā mayhaṁ,
thi-ap8:10.4	mahānelaṁ dharīyati.
thi-ap8:11.1	Sattatidevarājūnaṁ,
thi-ap8:11.2	mahesittamakārayiṁ;
thi-ap8:11.3	Sabbattha issarā hutvā,
thi-ap8:11.4	saṁsarāmi bhavābhave.
thi-ap8:12.1	Tesaṭṭhi cakkavattīnaṁ,
thi-ap8:12.2	mahesittamakārayiṁ;
thi-ap8:12.3	Sabbe mamanuvattanti,
thi-ap8:12.4	ādeyyavacanā ahuṁ.
thi-ap8:13.1	Uppalasseva me vaṇṇo,
thi-ap8:13.2	gandho ceva pavāyati;
thi-ap8:13.3	Dubbaṇṇiyaṁ na jānāmi,
thi-ap8:13.4	buddhapūjāyidaṁ phalaṁ.
thi-ap8:14.1	Iddhipādesu kusalā,
thi-ap8:14.2	bojjhaṅgabhāvanāratā;
thi-ap8:14.3	Abhiññāpāramippattā,
thi-ap8:14.4	buddhapūjāyidaṁ phalaṁ.
thi-ap8:15.1	Satipaṭṭhānakusalā,
thi-ap8:15.2	samādhijhānagocarā;
thi-ap8:15.3	Sammappadhānamanuyuttā,
thi-ap8:15.4	buddhapūjāyidaṁ phalaṁ.
thi-ap8:16.1	Vīriyaṁ me dhuradhorayhaṁ,
thi-ap8:16.2	yogakkhemādhivāhanaṁ;
thi-ap8:16.3	Sabbāsavā parikkhīṇā,
thi-ap8:16.4	natthi dāni punabbhavo.
thi-ap8:17.1	Ekatiṁse ito kappe,
thi-ap8:17.2	yaṁ pupphamabhipūjayiṁ;
thi-ap8:17.3	Duggatiṁ nābhijānāmi,
thi-ap8:17.4	buddhapūjāyidaṁ phalaṁ.
thi-ap8:18.1	Kilesā jhāpitā mayhaṁ,
thi-ap8:18.2	…pe…
thi-ap8:18.3	viharāmi anāsavā.
thi-ap8:19.1	Svāgataṁ vata me āsi,
thi-ap8:19.2	…pe…
thi-ap8:19.3	kataṁ buddhassa sāsanaṁ.
thi-ap8:20.1	Paṭisambhidā catasso,
thi-ap8:20.2	…pe…
thi-ap8:20.3	kataṁ buddhassa sāsanaṁ”.
thi-ap8:21.1	Itthaṁ sudaṁ sattuppalamālikā bhikkhunī imā gāthāyo abhāsitthāti.
thi-ap8:22.1	Sattuppalamālikātheriyāpadānaṁ aṭṭhamaṁ.
thi-ap9:0.1	Therīapadāna
thi-ap9:0.2	Sumedhāvagga
thi-ap9:0.3	Pañcadīpikātherīapadāna
thi-ap9:1.1	“Nagare haṁsavatiyā,
thi-ap9:1.2	cārikī āsahaṁ tadā;
thi-ap9:1.3	Ārāmena ca ārāmaṁ,
thi-ap9:1.4	carāmi kusalatthikā.
thi-ap9:2.1	Kāḷapakkhamhi divase,
thi-ap9:2.2	addasaṁ bodhimuttamaṁ;
thi-ap9:2.3	Tattha cittaṁ pasādetvā,
thi-ap9:2.4	bodhimūle nisīdahaṁ.
thi-ap9:3.1	Garucittaṁ upaṭṭhetvā,
thi-ap9:3.2	sire katvāna añjaliṁ;
thi-ap9:3.3	Somanassaṁ pavedetvā,
thi-ap9:3.4	evaṁ cintesi tāvade.
thi-ap9:4.1	‘Yadi buddho amitaguṇo,
thi-ap9:4.2	asamappaṭipuggalo;
thi-ap9:4.3	Dassetu pāṭihīraṁ me,
thi-ap9:4.4	bodhi obhāsatu ayaṁ’.
thi-ap9:5.1	Saha āvajjite mayhaṁ,
thi-ap9:5.2	bodhi pajjali tāvade;
thi-ap9:5.3	Sabbasoṇṇamayā āsi,
thi-ap9:5.4	disā sabbā virocati.
thi-ap9:6.1	Sattarattindivaṁ tattha,
thi-ap9:6.2	bodhimūle nisīdahaṁ;
thi-ap9:6.3	Sattame divase patte,
thi-ap9:6.4	dīpapūjaṁ akāsahaṁ.
thi-ap9:7.1	Āsanaṁ parivāretvā,
thi-ap9:7.2	pañca dīpāni pajjaluṁ;
thi-ap9:7.3	Yāva udeti sūriyo,
thi-ap9:7.4	dīpā me pajjaluṁ tadā.
thi-ap9:8.1	Tena kammena sukatena,
thi-ap9:8.2	cetanāpaṇidhīhi ca;
thi-ap9:8.3	Jahitvā mānusaṁ dehaṁ,
thi-ap9:8.4	tāvatiṁsamagacchahaṁ.
thi-ap9:9.1	Tattha me sukataṁ byamhaṁ,
thi-ap9:9.2	pañcadīpāti vuccati;
thi-ap9:9.3	Saṭṭhiyojanamubbedhaṁ,
thi-ap9:9.4	tiṁsayojanavitthataṁ.
thi-ap9:10.1	Asaṅkhiyāni dīpāni,
thi-ap9:10.2	parivāre jalanti me;
thi-ap9:10.3	Yāvatā devabhavanaṁ,
thi-ap9:10.4	dīpālokena jotati.
thi-ap9:11.1	Parammukhā nisīditvā,
thi-ap9:11.2	yadi icchāmi passituṁ;
thi-ap9:11.3	Uddhaṁ adho ca tiriyaṁ,
thi-ap9:11.4	sabbaṁ passāmi cakkhunā.
thi-ap9:12.1	Yāvatā abhikaṅkhāmi,
thi-ap9:12.2	daṭṭhuṁ sugataduggate;
thi-ap9:12.3	Tattha āvaraṇaṁ natthi,
thi-ap9:12.4	rukkhesu pabbatesu vā.
thi-ap9:13.1	Asīti devarājūnaṁ,
thi-ap9:13.2	mahesittamakārayiṁ;
thi-ap9:13.3	Satānaṁ cakkavattīnaṁ,
thi-ap9:13.4	mahesittamakārayiṁ.
thi-ap9:14.1	Yaṁ yaṁ yonupapajjāmi,
thi-ap9:14.2	devattaṁ atha mānusaṁ;
thi-ap9:14.3	Dīpasatasahassāni,
thi-ap9:14.4	parivāre jalanti me.
thi-ap9:15.1	Devalokā cavitvāna,
thi-ap9:15.2	uppajjiṁ mātukucchiyaṁ;
thi-ap9:15.3	Mātukucchigatā santī,
thi-ap9:15.4	akkhi me na nimīlati.
thi-ap9:16.1	Dīpasatasahassāni,
thi-ap9:16.2	puññakammasamaṅgitā;
thi-ap9:16.3	Jalanti sūtikāgehe,
thi-ap9:16.4	pañcadīpānidaṁ phalaṁ.
thi-ap9:17.1	Pacchime bhave sampatte,
thi-ap9:17.2	mānasaṁ vinivattayiṁ;
thi-ap9:17.3	Ajarāmataṁ sītibhāvaṁ,
thi-ap9:17.4	nibbānaṁ phassayiṁ ahaṁ.
thi-ap9:18.1	Jātiyā sattavassāhaṁ,
thi-ap9:18.2	arahattamapāpuṇiṁ;
thi-ap9:18.3	Upasampādayī buddho,
thi-ap9:18.4	guṇamaññāya gotamo.
thi-ap9:19.1	Maṇḍape rukkhamūle vā,
thi-ap9:19.2	pāsādesu guhāsu vā;
thi-ap9:19.3	Suññāgāre vasantiyā,
thi-ap9:19.4	pañcadīpā jalanti me.
thi-ap9:20.1	Dibbacakkhuvisuddhaṁ me,
thi-ap9:20.2	samādhikusalā ahaṁ;
thi-ap9:20.3	Abhiññāpāramippattā,
thi-ap9:20.4	pañcadīpānidaṁ phalaṁ.
thi-ap9:21.1	Sabbavositavosānā,
thi-ap9:21.2	katakiccā anāsavā;
thi-ap9:21.3	Pañcadīpā mahāvīra,
thi-ap9:21.4	pāde vandāmi cakkhuma.
thi-ap9:22.1	Satasahassito kappe,
thi-ap9:22.2	yaṁ dīpamadadiṁ tadā;
thi-ap9:22.3	Duggatiṁ nābhijānāmi,
thi-ap9:22.4	pañcadīpānidaṁ phalaṁ.
thi-ap9:23.1	Kilesā jhāpitā mayhaṁ,
thi-ap9:23.2	…pe…
thi-ap9:23.3	viharāmi anāsavā.
thi-ap9:24.1	Svāgataṁ vata me āsi,
thi-ap9:24.2	…pe…
thi-ap9:24.3	kataṁ buddhassa sāsanaṁ.
thi-ap9:25.1	Paṭisambhidā catasso,
thi-ap9:25.2	…pe…
thi-ap9:25.3	kataṁ buddhassa sāsanaṁ”.
thi-ap9:26.1	Itthaṁ sudaṁ pañcadīpikā bhikkhunī imā gāthāyo abhāsitthāti.
thi-ap9:27.1	Pañcadīpikātheriyāpadānaṁ navamaṁ.
thi-ap10:0.1	Therīapadāna
thi-ap10:0.2	Sumedhāvagga
thi-ap10:0.3	Udakadāyikātherīapadāna
thi-ap10:1.1	“Nagare bandhumatiyā,
thi-ap10:1.2	ahosiṁ udahārikā;
thi-ap10:1.3	Udahārena jīvāmi,
thi-ap10:1.4	tena posemi dārake.
thi-ap10:2.1	Deyyadhammo ca me natthi,
thi-ap10:2.2	puññakkhette anuttare;
thi-ap10:2.3	Koṭṭhakaṁ upasaṅkamma,
thi-ap10:2.4	udakaṁ paṭṭhapesahaṁ.
thi-ap10:3.1	Tena kammena sukatena,
thi-ap10:3.2	tāvatiṁsamagacchahaṁ;
thi-ap10:3.3	Tattha me sukataṁ byamhaṁ,
thi-ap10:3.4	udahārena nimmitaṁ.
thi-ap10:4.1	Accharānaṁ sahassassa,
thi-ap10:4.2	ahañhi pavarā tadā;
thi-ap10:4.3	Dasaṭṭhānehi tā sabbā,
thi-ap10:4.4	abhibhomi sadā ahaṁ.
thi-ap10:5.1	Paññāsaṁ devarājūnaṁ,
thi-ap10:5.2	mahesittamakārayiṁ;
thi-ap10:5.3	Vīsaticakkavattīnaṁ,
thi-ap10:5.4	mahesittamakārayiṁ.
thi-ap10:6.1	Duve bhave saṁsarāmi,
thi-ap10:6.2	devatte atha mānuse;
thi-ap10:6.3	Duggatiṁ nābhijānāmi,
thi-ap10:6.4	dakadānassidaṁ phalaṁ.
thi-ap10:7.1	Pabbatagge dumagge vā,
thi-ap10:7.2	antalikkhe ca bhūmiyaṁ;
thi-ap10:7.3	Yadā udakamicchāmi,
thi-ap10:7.4	khippaṁ paṭilabhāmahaṁ.
thi-ap10:8.1	Avuṭṭhikā disā natthi,
thi-ap10:8.2	santattā kuthitāpi ca;
thi-ap10:8.3	Mama saṅkappamaññāya,
thi-ap10:8.4	mahāmegho pavassati.
thi-ap10:9.1	Kadāci nīyamānāya,
thi-ap10:9.2	ñātisaṅghena me tadā;
thi-ap10:9.3	Yadā icchāmahaṁ vassaṁ,
thi-ap10:9.4	mahāmegho ajāyatha.
thi-ap10:10.1	Uṇhaṁ vā pariḷāho vā,
thi-ap10:10.2	sarīre me na vijjati;
thi-ap10:10.3	Kāye ca me rajo natthi,
thi-ap10:10.4	dakadānassidaṁ phalaṁ.
thi-ap10:11.1	Visuddhamanasā ajja,
thi-ap10:11.2	apetamanapāpikā;
thi-ap10:11.3	Sabbāsavaparikkhīṇā,
thi-ap10:11.4	natthi dāni punabbhavo.
thi-ap10:12.1	Ekanavutito kappe,
thi-ap10:12.2	yaṁ dakaṁ adadiṁ tadā;
thi-ap10:12.3	Duggatiṁ nābhijānāmi,
thi-ap10:12.4	dakadānassidaṁ phalaṁ.
thi-ap10:13.1	Kilesā jhāpitā mayhaṁ,
thi-ap10:13.2	…pe…
thi-ap10:13.3	viharāmi anāsavā.
thi-ap10:14.1	Svāgataṁ vata me āsi,
thi-ap10:14.2	…pe…
thi-ap10:14.3	kataṁ buddhassa sāsanaṁ.
thi-ap10:15.1	Paṭisambhidā catasso,
thi-ap10:15.2	…pe…
thi-ap10:15.3	kataṁ buddhassa sāsanaṁ”.
thi-ap10:16.1	Itthaṁ sudaṁ udakadāyikā bhikkhunī imā gāthāyo abhāsitthāti.
thi-ap10:17.1	Udakadāyikātheriyāpadānaṁ dasamaṁ.
thi-ap10:18.1	Sumedhāvaggo paṭhamo.
thi-ap10:19.1	Tassuddānaṁ
thi-ap10:20.1	Sumedhā mekhalādāyī,
thi-ap10:20.2	maṇḍapaṁ saṅkamaṁ dadā;
thi-ap10:20.3	Naḷamālī piṇḍadadā,
thi-ap10:20.4	kaṭacchu uppalappadā.
thi-ap10:21.1	Dīpadā dakadā ceva,
thi-ap10:21.2	gāthāyo gaṇitā iha;
thi-ap10:21.3	Ekagāthāsatañceva,
thi-ap10:21.4	tiṁsati ca taduttari.
thi-ap11:0.1	Therīapadāna
thi-ap11:0.2	Ekūposathikavagga
thi-ap11:0.3	1 Ekūposathikātherīapadāna
thi-ap11:1.1	“Nagare bandhumatiyā,
thi-ap11:1.2	bandhumā nāma khattiyo;
thi-ap11:1.3	Divase puṇṇamāya so,
thi-ap11:1.4	upavasi uposathaṁ.
thi-ap11:2.1	Ahaṁ tena samayena,
thi-ap11:2.2	kumbhadāsī ahaṁ tahiṁ;
thi-ap11:2.3	Disvā sarājakaṁ senaṁ,
thi-ap11:2.4	evāhaṁ cintayiṁ tadā.
thi-ap11:3.1	‘Rājāpi rajjaṁ chaḍḍetvā,
thi-ap11:3.2	upavasi uposathaṁ;
thi-ap11:3.3	Saphalaṁ nūna taṁ kammaṁ,
thi-ap11:3.4	janakāyo pamodito’.
thi-ap11:4.1	Yoniso paccavekkhitvā,
thi-ap11:4.2	duggaccañca daliddataṁ;
thi-ap11:4.3	Mānasaṁ sampahaṁsitvā,
thi-ap11:4.4	upavasiṁ uposathaṁ.
thi-ap11:5.1	Ahaṁ uposathaṁ katvā,
thi-ap11:5.2	sammāsambuddhasāsane;
thi-ap11:5.3	Tena kammena sukatena,
thi-ap11:5.4	tāvatiṁsamagacchahaṁ.
thi-ap11:6.1	Tattha me sukataṁ byamhaṁ,
thi-ap11:6.2	ubbhayojanamuggataṁ;
thi-ap11:6.3	Kūṭāgāravarūpetaṁ,
thi-ap11:6.4	mahāsanasubhūsitaṁ.
thi-ap11:7.1	Accharā satasahassā,
thi-ap11:7.2	upatiṭṭhanti maṁ sadā;
thi-ap11:7.3	Aññe deve atikkamma,
thi-ap11:7.4	atirocāmi sabbadā.
thi-ap11:8.1	Catusaṭṭhi devarājūnaṁ,
thi-ap11:8.2	mahesittamakārayiṁ;
thi-ap11:8.3	Tesaṭṭhi cakkavattīnaṁ,
thi-ap11:8.4	mahesittamakārayiṁ.
thi-ap11:9.1	Suvaṇṇavaṇṇā hutvāna,
thi-ap11:9.2	bhavesu saṁsarāmahaṁ;
thi-ap11:9.3	Sabbattha pavarā homi,
thi-ap11:9.4	uposathassidaṁ phalaṁ.
thi-ap11:10.1	Hatthiyānaṁ assayānaṁ,
thi-ap11:10.2	rathayānañca sīvikaṁ;
thi-ap11:10.3	Labhāmi sabbamevetaṁ,
thi-ap11:10.4	uposathassidaṁ phalaṁ.
thi-ap11:11.1	Soṇṇamayaṁ rūpimayaṁ,
thi-ap11:11.2	athopi phalikāmayaṁ;
thi-ap11:11.3	Lohitaṅgamayañceva,
thi-ap11:11.4	sabbaṁ paṭilabhāmahaṁ.
thi-ap11:12.1	Koseyyakambaliyāni,
thi-ap11:12.2	khomakappāsikāni ca;
thi-ap11:12.3	Mahagghāni ca vatthāni,
thi-ap11:12.4	sabbaṁ paṭilabhāmahaṁ.
thi-ap11:13.1	Annaṁ pānaṁ khādanīyaṁ,
thi-ap11:13.2	vatthasenāsanāni ca;
thi-ap11:13.3	Sabbametaṁ paṭilabhe,
thi-ap11:13.4	uposathassidaṁ phalaṁ.
thi-ap11:14.1	Varagandhañca mālañca,
thi-ap11:14.2	cuṇṇakañca vilepanaṁ;
thi-ap11:14.3	Sabbametaṁ paṭilabhe,
thi-ap11:14.4	uposathassidaṁ phalaṁ.
thi-ap11:15.1	Kūṭāgārañca pāsādaṁ,
thi-ap11:15.2	maṇḍapaṁ hammiyaṁ guhaṁ;
thi-ap11:15.3	Sabbametaṁ paṭilabhe,
thi-ap11:15.4	uposathassidaṁ phalaṁ.
thi-ap11:16.1	Jātiyā sattavassāhaṁ,
thi-ap11:16.2	pabbajiṁ anagāriyaṁ;
thi-ap11:16.3	Aḍḍhamāse asampatte,
thi-ap11:16.4	arahattamapāpuṇiṁ.
thi-ap11:17.1	Kilesā jhāpitā mayhaṁ,
thi-ap11:17.2	bhavā sabbe samūhatā;
thi-ap11:17.3	Sabbāsavā parikkhīṇā,
thi-ap11:17.4	natthi dāni punabbhavo.
thi-ap11:18.1	Ekanavutito kappe,
thi-ap11:18.2	yaṁ kammamakariṁ tadā;
thi-ap11:18.3	Duggatiṁ nābhijānāmi,
thi-ap11:18.4	uposathassidaṁ phalaṁ.
thi-ap11:19.1	Kilesā jhāpitā mayhaṁ,
thi-ap11:19.2	…pe…
thi-ap11:19.3	viharāmi anāsavā.
thi-ap11:20.1	Svāgataṁ vata me āsi,
thi-ap11:20.2	…pe…
thi-ap11:20.3	kataṁ buddhassa sāsanaṁ.
thi-ap11:21.1	Paṭisambhidā catasso,
thi-ap11:21.2	…pe…
thi-ap11:21.3	kataṁ buddhassa sāsanaṁ”.
thi-ap11:22.1	Itthaṁ sudaṁ ekūposathikā bhikkhunī imā gāthāyo abhāsitthāti.
thi-ap11:23.1	Ekūposathikātheriyāpadānaṁ paṭhamaṁ.
thi-ap12:0.1	Therīapadāna
thi-ap12:0.2	Ekūposathikavagga
thi-ap12:0.3	2 Saḷalapupphikātherīapadāna
thi-ap12:1.1	“Candabhāgānadītīre,
thi-ap12:1.2	ahosiṁ kinnarī tadā;
thi-ap12:1.3	Addasāhaṁ devadevaṁ,
thi-ap12:1.4	caṅkamantaṁ narāsabhaṁ.
thi-ap12:2.1	Ocinitvāna saḷalaṁ,
thi-ap12:2.2	buddhaseṭṭhassadāsahaṁ;
thi-ap12:2.3	Upasiṅghi mahāvīro,
thi-ap12:2.4	saḷalaṁ devagandhikaṁ.
thi-ap12:3.1	Paṭiggahetvā sambuddho,
thi-ap12:3.2	vipassī lokanāyako;
thi-ap12:3.3	Upasiṅghi mahāvīro,
thi-ap12:3.4	pekkhamānāya me tadā.
thi-ap12:4.1	Añjaliṁ paggahetvāna,
thi-ap12:4.2	vanditvā dvipaduttamaṁ;
thi-ap12:4.3	Sakaṁ cittaṁ pasādetvā,
thi-ap12:4.4	tato pabbatamāruhiṁ.
thi-ap12:5.1	Ekanavutito kappe,
thi-ap12:5.2	yaṁ pupphamadadiṁ tadā;
thi-ap12:5.3	Duggatiṁ nābhijānāmi,
thi-ap12:5.4	buddhapūjāyidaṁ phalaṁ.
thi-ap12:6.1	Kilesā jhāpitā mayhaṁ,
thi-ap12:6.2	…pe…
thi-ap12:6.3	viharāmi anāsavā.
thi-ap12:7.1	Svāgataṁ vata me āsi,
thi-ap12:7.2	…pe…
thi-ap12:7.3	kataṁ buddhassa sāsanaṁ.
thi-ap12:8.1	Paṭisambhidā catasso,
thi-ap12:8.2	…pe…
thi-ap12:8.3	kataṁ buddhassa sāsanaṁ”.
thi-ap12:9.1	Itthaṁ sudaṁ saḷalapupphikā bhikkhunī imā gāthāyo abhāsitthāti.
thi-ap12:10.1	Saḷalapupphikātheriyāpadānaṁ dutiyaṁ.
thi-ap13:0.1	Therīapadāna
thi-ap13:0.2	Ekūposathikavagga
thi-ap13:0.3	Modakadāyikātherīapadāna
thi-ap13:1.1	“Nagare bandhumatiyā,
thi-ap13:1.2	kumbhadāsī ahosahaṁ;
thi-ap13:1.3	Mama bhāgaṁ gahetvāna,
thi-ap13:1.4	gacchaṁ udakahārikā.
thi-ap13:2.1	Panthamhi samaṇaṁ disvā,
thi-ap13:2.2	santacittaṁ samāhitaṁ;
thi-ap13:2.3	Pasannacittā sumanā,
thi-ap13:2.4	modake tīṇidāsahaṁ.
thi-ap13:3.1	Tena kammena sukatena,
thi-ap13:3.2	cetanāpaṇidhīhi ca;
thi-ap13:3.3	Ekanavutikappāni,
thi-ap13:3.4	vinipātaṁ nagacchahaṁ.
thi-ap13:4.1	Sampatti taṁ karitvāna,
thi-ap13:4.2	sabbaṁ anubhaviṁ ahaṁ;
thi-ap13:4.3	Modake tīṇi datvāna,
thi-ap13:4.4	pattāhaṁ acalaṁ padaṁ.
thi-ap13:5.1	Kilesā jhāpitā mayhaṁ,
thi-ap13:5.2	…pe…
thi-ap13:5.3	viharāmi anāsavā.
thi-ap13:6.1	Svāgataṁ vata me āsi,
thi-ap13:6.2	…pe…
thi-ap13:6.3	kataṁ buddhassa sāsanaṁ.
thi-ap13:7.1	Paṭisambhidā catasso,
thi-ap13:7.2	…pe…
thi-ap13:7.3	kataṁ buddhassa sāsanaṁ”.
thi-ap13:8.1	Itthaṁ sudaṁ modakadāyikā bhikkhunī imā gāthāyo abhāsitthāti.
thi-ap13:9.1	Modakadāyikātheriyāpadānaṁ tatiyaṁ.
thi-ap14:0.1	Therīapadāna
thi-ap14:0.2	Ekūposathikavagga
thi-ap14:0.3	Ekāsanadāyikātherīapadāna
thi-ap14:1.1	“Nagare haṁsavatiyā,
thi-ap14:1.2	ahosiṁ bālikā tadā;
thi-ap14:1.3	Mātā ca me pitā ceva,
thi-ap14:1.4	kammantaṁ agamaṁsu te.
thi-ap14:2.1	Majjhanhikamhi sūriye,
thi-ap14:2.2	addasaṁ samaṇaṁ ahaṁ;
thi-ap14:2.3	Vīthiyā anugacchantaṁ,
thi-ap14:2.4	āsanaṁ paññapesahaṁ.
thi-ap14:3.1	Gonakāvikatikāhi,
thi-ap14:3.2	paññapetvā mamāsanaṁ;
thi-ap14:3.3	Pasannacittā sumanā,
thi-ap14:3.4	idaṁ vacanamabraviṁ.
thi-ap14:4.1	‘Santattā kuthitā bhūmi,
thi-ap14:4.2	sūro majjhanhike ṭhito;
thi-ap14:4.3	Mālutā ca na vāyanti,
thi-ap14:4.4	kālo cevettha mehiti.
thi-ap14:5.1	Paññattamāsanamidaṁ,
thi-ap14:5.2	tavatthāya mahāmuni;
thi-ap14:5.3	Anukampaṁ upādāya,
thi-ap14:5.4	nisīda mama āsane’.
thi-ap14:6.1	Nisīdi tattha samaṇo,
thi-ap14:6.2	sudanto suddhamānaso;
thi-ap14:6.3	Tassa pattaṁ gahetvāna,
thi-ap14:6.4	yathārandhaṁ adāsahaṁ.
thi-ap14:7.1	Tena kammena sukatena,
thi-ap14:7.2	cetanāpaṇidhīhi ca;
thi-ap14:7.3	Jahitvā mānusaṁ dehaṁ,
thi-ap14:7.4	tāvatiṁsamagacchahaṁ.
thi-ap14:8.1	Tattha me sukataṁ byamhaṁ,
thi-ap14:8.2	āsanena sunimmitaṁ;
thi-ap14:8.3	Saṭṭhiyojanamubbedhaṁ,
thi-ap14:8.4	tiṁsayojanavitthataṁ.
thi-ap14:9.1	Soṇṇamayā maṇimayā,
thi-ap14:9.2	athopi phalikāmayā;
thi-ap14:9.3	Lohitaṅgamayā ceva,
thi-ap14:9.4	pallaṅkā vividhā mama.
thi-ap14:10.1	Tūlikāvikatikāhi,
thi-ap14:10.2	kaṭṭissacittakāhi ca;
thi-ap14:10.3	Uddaekantalomī ca,
thi-ap14:10.4	pallaṅkā me susaṇṭhitā.
thi-ap14:11.1	Yadā icchāmi gamanaṁ,
thi-ap14:11.2	hāsakhiḍḍasamappitā;
thi-ap14:11.3	Saha pallaṅkaseṭṭhena,
thi-ap14:11.4	gacchāmi mama patthitaṁ.
thi-ap14:12.1	Asīti devarājūnaṁ,
thi-ap14:12.2	mahesittamakārayiṁ;
thi-ap14:12.3	Sattati cakkavattīnaṁ,
thi-ap14:12.4	mahesittamakārayiṁ.
thi-ap14:13.1	Bhavābhave saṁsarantī,
thi-ap14:13.2	mahābhogaṁ labhāmahaṁ;
thi-ap14:13.3	Bhoge me ūnatā natthi,
thi-ap14:13.4	ekāsanassidaṁ phalaṁ.
thi-ap14:14.1	Duve bhave saṁsarāmi,
thi-ap14:14.2	devatte atha mānuse;
thi-ap14:14.3	Aññe bhave na jānāmi,
thi-ap14:14.4	ekāsanassidaṁ phalaṁ.
thi-ap14:15.1	Duve kule pajāyāmi,
thi-ap14:15.2	khattiye cāpi brāhmaṇe;
thi-ap14:15.3	Uccākulīnā sabbattha,
thi-ap14:15.4	ekāsanassidaṁ phalaṁ.
thi-ap14:16.1	Domanassaṁ na jānāmi,
thi-ap14:16.2	cittasantāpanaṁ mama;
thi-ap14:16.3	Vevaṇṇiyaṁ na jānāmi,
thi-ap14:16.4	ekāsanassidaṁ phalaṁ.
thi-ap14:17.1	Dhātiyo maṁ upaṭṭhanti,
thi-ap14:17.2	khujjā celāpikā bahū;
thi-ap14:17.3	Aṅkena aṅkaṁ gacchāmi,
thi-ap14:17.4	ekāsanassidaṁ phalaṁ.
thi-ap14:18.1	Aññā nhāpenti bhojenti,
thi-ap14:18.2	aññā ramenti maṁ sadā;
thi-ap14:18.3	Aññā gandhaṁ vilimpanti,
thi-ap14:18.4	ekāsanassidaṁ phalaṁ.
thi-ap14:19.1	Maṇḍape rukkhamūle vā,
thi-ap14:19.2	suññāgāre vasantiyā;
thi-ap14:19.3	Mama saṅkappamaññāya,
thi-ap14:19.4	pallaṅko upatiṭṭhati.
thi-ap14:20.1	Ayaṁ pacchimako mayhaṁ,
thi-ap14:20.2	carimo vattate bhavo;
thi-ap14:20.3	Ajjāpi rajjaṁ chaḍḍetvā,
thi-ap14:20.4	pabbajiṁ anagāriyaṁ.
thi-ap14:21.1	Satasahassito kappe,
thi-ap14:21.2	yaṁ dānamadadiṁ tadā;
thi-ap14:21.3	Duggatiṁ nābhijānāmi,
thi-ap14:21.4	ekāsanassidaṁ phalaṁ.
thi-ap14:22.1	Kilesā jhāpitā mayhaṁ,
thi-ap14:22.2	…pe…
thi-ap14:22.3	viharāmi anāsavā.
thi-ap14:23.1	Svāgataṁ vata me āsi,
thi-ap14:23.2	…pe…
thi-ap14:23.3	kataṁ buddhassa sāsanaṁ.
thi-ap14:24.1	Paṭisambhidā catasso,
thi-ap14:24.2	…pe…
thi-ap14:24.3	kataṁ buddhassa sāsanaṁ”.
thi-ap14:25.1	Itthaṁ sudaṁ ekāsanadāyikā bhikkhunī imā gāthāyo abhāsitthāti.
thi-ap14:26.1	Ekāsanadāyikātheriyāpadānaṁ catutthaṁ.
thi-ap15:0.1	Therīapadāna
thi-ap15:0.2	Ekūposathikavagga
thi-ap15:0.3	Pañcadīpadāyikātherīapadāna
thi-ap15:1.1	“Nagare haṁsavatiyā,
thi-ap15:1.2	cārikī āsahaṁ tadā;
thi-ap15:1.3	Ārāmena ca ārāmaṁ,
thi-ap15:1.4	carāmi kusalatthikā.
thi-ap15:2.1	Kāḷapakkhamhi divase,
thi-ap15:2.2	addasaṁ bodhimuttamaṁ;
thi-ap15:2.3	Tattha cittaṁ pasādetvā,
thi-ap15:2.4	bodhimūle nisīdahaṁ.
thi-ap15:3.1	Garucittaṁ upaṭṭhetvā,
thi-ap15:3.2	sire katvāna añjaliṁ;
thi-ap15:3.3	Somanassaṁ pavedetvā,
thi-ap15:3.4	evaṁ cintesi tāvade.
thi-ap15:4.1	‘Yadi buddho amitaguṇo,
thi-ap15:4.2	asamappaṭipuggalo;
thi-ap15:4.3	Dassetu pāṭihīraṁ me,
thi-ap15:4.4	bodhi obhāsatu ayaṁ’.
thi-ap15:5.1	Saha āvajjite mayhaṁ,
thi-ap15:5.2	bodhi pajjali tāvade;
thi-ap15:5.3	Sabbasoṇṇamayā āsi,
thi-ap15:5.4	disā sabbā virocati.
thi-ap15:6.1	Sattarattindivaṁ tattha,
thi-ap15:6.2	bodhimūle nisīdahaṁ;
thi-ap15:6.3	Sattame divase patte,
thi-ap15:6.4	dīpapūjaṁ akāsahaṁ.
thi-ap15:7.1	Āsanaṁ parivāretvā,
thi-ap15:7.2	pañca dīpāni pajjaluṁ;
thi-ap15:7.3	Yāva udeti sūriyo,
thi-ap15:7.4	dīpā me pajjaluṁ tadā.
thi-ap15:8.1	Tena kammena sukatena,
thi-ap15:8.2	cetanāpaṇidhīhi ca;
thi-ap15:8.3	Jahitvā mānusaṁ dehaṁ,
thi-ap15:8.4	tāvatiṁsamagacchahaṁ.
thi-ap15:9.1	Tattha me sukataṁ byamhaṁ,
thi-ap15:9.2	pañcadīpāti vuccati;
thi-ap15:9.3	Saṭṭhiyojanamubbedhaṁ,
thi-ap15:9.4	tiṁsayojanavitthataṁ.
thi-ap15:10.1	Asaṅkhiyāni dīpāni,
thi-ap15:10.2	parivāre jaliṁsu me;
thi-ap15:10.3	Yāvatā devabhavanaṁ,
thi-ap15:10.4	dīpālokena jotati.
thi-ap15:11.1	Parammukhā nisīditvā,
thi-ap15:11.2	yadi icchāmi passituṁ;
thi-ap15:11.3	Uddhaṁ adho ca tiriyaṁ,
thi-ap15:11.4	sabbaṁ passāmi cakkhunā.
thi-ap15:12.1	Yāvatā abhikaṅkhāmi,
thi-ap15:12.2	daṭṭhuṁ sugataduggate;
thi-ap15:12.3	Tattha āvaraṇaṁ natthi,
thi-ap15:12.4	rukkhesu pabbatesu vā.
thi-ap15:13.1	Asīti devarājūnaṁ,
thi-ap15:13.2	mahesittamakārayiṁ;
thi-ap15:13.3	Satānaṁ cakkavattīnaṁ,
thi-ap15:13.4	mahesittamakārayiṁ.
thi-ap15:14.1	Yaṁ yaṁ yonupapajjāmi,
thi-ap15:14.2	devattaṁ atha mānusaṁ;
thi-ap15:14.3	Dīpasatasahassāni,
thi-ap15:14.4	parivāre jalanti me.
thi-ap15:15.1	Devalokā cavitvāna,
thi-ap15:15.2	uppajjiṁ mātukucchiyaṁ;
thi-ap15:15.3	Mātukucchigatā santī,
thi-ap15:15.4	akkhi me na nimīlati.
thi-ap15:16.1	Dīpasatasahassāni,
thi-ap15:16.2	puññakammasamaṅgitā;
thi-ap15:16.3	Jalanti sūtikāgehe,
thi-ap15:16.4	pañcadīpānidaṁ phalaṁ.
thi-ap15:17.1	Pacchime bhave sampatte,
thi-ap15:17.2	mānasaṁ vinivattayiṁ;
thi-ap15:17.3	Ajarāmataṁ sītibhāvaṁ,
thi-ap15:17.4	nibbānaṁ phassayiṁ ahaṁ.
thi-ap15:18.1	Jātiyā sattavassāhaṁ,
thi-ap15:18.2	arahattamapāpuṇiṁ;
thi-ap15:18.3	Upasampādayī buddho,
thi-ap15:18.4	guṇamaññāya gotamo.
thi-ap15:19.1	Maṇḍape rukkhamūle vā,
thi-ap15:19.2	suññāgāre vasantiyā;
thi-ap15:19.3	Sadā pajjalate dīpaṁ,
thi-ap15:19.4	pañcadīpānidaṁ phalaṁ.
thi-ap15:20.1	Dibbacakkhuvisuddhaṁ me,
thi-ap15:20.2	samādhikusalā ahaṁ;
thi-ap15:20.3	Abhiññāpāramippattā,
thi-ap15:20.4	pañcadīpānidaṁ phalaṁ.
thi-ap15:21.1	Sabbavositavosānā,
thi-ap15:21.2	katakiccā anāsavā;
thi-ap15:21.3	Pañcadīpā mahāvīra,
thi-ap15:21.4	pāde vandāmi cakkhuma.
thi-ap15:22.1	Satasahassito kappe,
thi-ap15:22.2	yaṁ dīpamadadiṁ tadā;
thi-ap15:22.3	Duggatiṁ nābhijānāmi,
thi-ap15:22.4	pañcadīpānidaṁ phalaṁ.
thi-ap15:23.1	Kilesā jhāpitā mayhaṁ,
thi-ap15:23.2	…pe…
thi-ap15:23.3	viharāmi anāsavā.
thi-ap15:24.1	Svāgataṁ vata me āsi,
thi-ap15:24.2	…pe…
thi-ap15:24.3	kataṁ buddhassa sāsanaṁ.
thi-ap15:25.1	Paṭisambhidā catasso,
thi-ap15:25.2	…pe…
thi-ap15:25.3	kataṁ buddhassa sāsanaṁ”.
thi-ap15:26.1	Itthaṁ sudaṁ pañcadīpadāyikā bhikkhunī imā gāthāyo abhāsitthāti.
thi-ap15:27.1	Pañcadīpadāyikātheriyāpadānaṁ pañcamaṁ.
thi-ap16:0.1	Therīapadāna
thi-ap16:0.2	Ekūposathikavagga
thi-ap16:0.3	6 Naḷamālikātherīapadāna
thi-ap16:1.1	“Candabhāgānadītīre,
thi-ap16:1.2	ahosiṁ kinnarī tadā;
thi-ap16:1.3	Addasaṁ virajaṁ buddhaṁ,
thi-ap16:1.4	sayambhuṁ aparājitaṁ.
thi-ap16:2.1	Pasannacittā sumanā,
thi-ap16:2.2	vedajātā katañjalī;
thi-ap16:2.3	Naḷamālaṁ gahetvāna,
thi-ap16:2.4	sayambhuṁ abhipūjayiṁ.
thi-ap16:3.1	Tena kammena sukatena,
thi-ap16:3.2	cetanāpaṇidhīhi ca;
thi-ap16:3.3	Jahitvā kinnarīdehaṁ,
thi-ap16:3.4	tāvatiṁsamagacchahaṁ.
thi-ap16:4.1	Chattiṁsadevarājūnaṁ,
thi-ap16:4.2	mahesittamakārayiṁ;
thi-ap16:4.3	Manasā patthitaṁ mayhaṁ,
thi-ap16:4.4	nibbattati yathicchitaṁ.
thi-ap16:5.1	Dasannaṁ cakkavattīnaṁ,
thi-ap16:5.2	mahesittamakārayiṁ;
thi-ap16:5.3	Ocitattāva hutvāna,
thi-ap16:5.4	saṁsarāmi bhavesvahaṁ.
thi-ap16:6.1	Kusalaṁ vijjate mayhaṁ,
thi-ap16:6.2	pabbajiṁ anagāriyaṁ;
thi-ap16:6.3	Pūjārahā ahaṁ ajja,
thi-ap16:6.4	sakyaputtassa sāsane.
thi-ap16:7.1	Visuddhamanasā ajja,
thi-ap16:7.2	apetamanapāpikā;
thi-ap16:7.3	Sabbāsavā parikkhīṇā,
thi-ap16:7.4	natthi dāni punabbhavo.
thi-ap16:8.1	Catunnavutito kappe,
thi-ap16:8.2	yaṁ buddhamabhipūjayiṁ;
thi-ap16:8.3	Duggatiṁ nābhijānāmi,
thi-ap16:8.4	naḷamālāyidaṁ phalaṁ.
thi-ap16:9.1	Kilesā jhāpitā mayhaṁ,
thi-ap16:9.2	…pe…
thi-ap16:9.3	viharāmi anāsavā.
thi-ap16:10.1	Svāgataṁ vata me āsi,
thi-ap16:10.2	…pe…
thi-ap16:10.3	kataṁ buddhassa sāsanaṁ.
thi-ap16:11.1	Paṭisambhidā catasso,
thi-ap16:11.2	…pe…
thi-ap16:11.3	kataṁ buddhassa sāsanaṁ”.
thi-ap16:12.1	Itthaṁ sudaṁ naḷamālikā bhikkhunī imā gāthāyo abhāsitthāti.
thi-ap16:13.1	Naḷamālikātheriyāpadānaṁ chaṭṭhaṁ.
thi-ap17:0.1	Therīapadāna
thi-ap17:0.2	Ekūposathikavagga
thi-ap17:0.3	Mahāpajāpatigotamītherīapadāna
thi-ap17:1.1	Ekadā lokapajjoto,
thi-ap17:1.2	vesāliyaṁ mahāvane;
thi-ap17:1.3	Kūṭāgāre susālāyaṁ,
thi-ap17:1.4	vasate narasārathi.
thi-ap17:2.1	Tadā jinassa mātucchā,
thi-ap17:2.2	mahāgotami bhikkhunī;
thi-ap17:2.3	Tahiṁ kate pure ramme,
thi-ap17:2.4	vasī bhikkhunupassaye.
thi-ap17:3.1	Bhikkhunīhi vimuttāhi,
thi-ap17:3.2	satehi saha pañcahi;
thi-ap17:3.3	Rahogatāya tassevaṁ,
thi-ap17:3.4	citassāsi vitakkitaṁ.
thi-ap17:4.1	“Buddhassa parinibbānaṁ,
thi-ap17:4.2	sāvakaggayugassa vā;
thi-ap17:4.3	Rāhulānandanandānaṁ,
thi-ap17:4.4	nāhaṁ lacchāmi passituṁ.
thi-ap17:5.1	Buddhassa parinibbānā,
thi-ap17:5.2	sāvakaggayugassa vā;
thi-ap17:5.3	Mahākassapanandānaṁ,
thi-ap17:5.4	ānandarāhulāna ca.
thi-ap17:6.1	Paṭikaccāyusaṅkhāraṁ,
thi-ap17:6.2	osajjitvāna nibbutiṁ;
thi-ap17:6.3	Gaccheyyaṁ lokanāthena,
thi-ap17:6.4	anuññātā mahesinā”.
thi-ap17:7.1	Tathā pañcasatānampi,
thi-ap17:7.2	bhikkhunīnaṁ vitakkitaṁ;
thi-ap17:7.3	Āsi khemādikānampi,
thi-ap17:7.4	etadeva vitakkitaṁ.
thi-ap17:8.1	Bhūmicālo tadā āsi,
thi-ap17:8.2	nāditā devadundubhī;
thi-ap17:8.3	Upassayādhivatthāyo,
thi-ap17:8.4	devatā sokapīḷitā.
thi-ap17:9.1	Vilapantā sukaruṇaṁ,
thi-ap17:9.2	tatthassūni pavattayuṁ;
thi-ap17:9.3	Mittā bhikkhuniyo tāhi,
thi-ap17:9.4	upagantvāna gotamiṁ.
thi-ap17:10.1	Nipacca sirasā pāde,
thi-ap17:10.2	idaṁ vacanamabravuṁ;
thi-ap17:10.3	Tattha toyalavāsittā,
thi-ap17:10.4	mayamayye rahogatā.
thi-ap17:11.1	Sā calā calitā bhūmi,
thi-ap17:11.2	nāditā devadundubhī;
thi-ap17:11.3	Paridevā ca suyyante,
thi-ap17:11.4	kimatthaṁ nūna gotamī.
thi-ap17:12.1	Tadā avoca sā sabbaṁ,
thi-ap17:12.2	yathāparivitakkitaṁ;
thi-ap17:12.3	Tāyopi sabbā āhaṁsu,
thi-ap17:12.4	yathāparivitakkitaṁ.
thi-ap17:13.1	“Yadi te rucitaṁ ayye,
thi-ap17:13.2	nibbānaṁ paramaṁ sivaṁ;
thi-ap17:13.3	Nibbāyissāma sabbāpi,
thi-ap17:13.4	buddhānuññāya subbate.
thi-ap17:14.1	Mayaṁ sahāva nikkhantā,
thi-ap17:14.2	gharāpi ca bhavāpi ca;
thi-ap17:14.3	Sahāyeva gamissāma,
thi-ap17:14.4	nibbānaṁ padamuttamaṁ”.
thi-ap17:15.1	“Nibbānāya vajantīnaṁ,
thi-ap17:15.2	kiṁ vakkhāmī”ti sā vadaṁ;
thi-ap17:15.3	Saha sabbāhi niggañchi,
thi-ap17:15.4	bhikkhunīnilayā tadā.
thi-ap17:16.1	“Upassaye yādhivatthā,
thi-ap17:16.2	devatā tā khamantu me;
thi-ap17:16.3	Bhikkhunīnilayassedaṁ,
thi-ap17:16.4	pacchimaṁ dassanaṁ mama.
thi-ap17:17.1	Na jarā maccu vā yattha,
thi-ap17:17.2	appiyehi samāgamo;
thi-ap17:17.3	Piyehi na viyogotthi,
thi-ap17:17.4	taṁ vajissaṁ asaṅkhataṁ”.
thi-ap17:18.1	Avītarāgā taṁ sutvā,
thi-ap17:18.2	vacanaṁ sugatorasā;
thi-ap17:18.3	Sokaṭṭā parideviṁsu,
thi-ap17:18.4	“aho no appapuññatā.
thi-ap17:19.1	Bhikkhunīnilayo suñño,
thi-ap17:19.2	bhūto tāhi vinā ayaṁ;
thi-ap17:19.3	Pabhāte viya tārāyo,
thi-ap17:19.4	na dissanti jinorasā.
thi-ap17:20.1	Nibbānaṁ gotamī yāti,
thi-ap17:20.2	satehi saha pañcahi;
thi-ap17:20.3	Nadīsatehiva saha,
thi-ap17:20.4	gaṅgā pañcahi sāgaraṁ”.
thi-ap17:21.1	Rathiyāya vajantiyo,
thi-ap17:21.2	disvā saddhā upāsikā;
thi-ap17:21.3	Gharā nikkhamma pādesu,
thi-ap17:21.4	nipacca idamabravuṁ.
thi-ap17:22.1	“Pasīdassu mahābhoge,
thi-ap17:22.2	anāthāyo vihāya no;
thi-ap17:22.3	Tayā na yuttā nibbātuṁ,
thi-ap17:22.4	icchaṭṭā vilapiṁsu tā”.
thi-ap17:23.1	Tāsaṁ sokapahānatthaṁ,
thi-ap17:23.2	avoca madhuraṁ giraṁ;
thi-ap17:23.3	“Ruditena alaṁ puttā,
thi-ap17:23.4	hāsakāloyamajja vo.
thi-ap17:24.1	Pariññātaṁ mayā dukkhaṁ,
thi-ap17:24.2	dukkhahetu vivajjito;
thi-ap17:24.3	Nirodho me sacchikato,
thi-ap17:24.4	maggo cāpi subhāvito.
thi-ap17:25.1	Paṭhamaṁ bhāṇavāraṁ.
thi-ap17:26.1	Pariciṇṇo mayā satthā,
thi-ap17:26.2	kataṁ buddhassa sāsanaṁ;
thi-ap17:26.3	Ohito garuko bhāro,
thi-ap17:26.4	bhavanetti samūhatā.
thi-ap17:27.1	Yassatthāya pabbajitā,
thi-ap17:27.2	agārasmānagāriyaṁ;
thi-ap17:27.3	So me attho anuppatto,
thi-ap17:27.4	sabbasaṁyojanakkhayo.
thi-ap17:28.1	Buddho tassa ca saddhammo,
thi-ap17:28.2	anūno yāva tiṭṭhati;
thi-ap17:28.3	Nibbātuṁ tāva kālo me,
thi-ap17:28.4	mā maṁ socatha puttikā.
thi-ap17:29.1	Koṇḍaññānandanandādī,
thi-ap17:29.2	tiṭṭhanti rāhulo jino;
thi-ap17:29.3	Sukhito sahito saṅgho,
thi-ap17:29.4	hatadabbā ca titthiyā.
thi-ap17:30.1	Okkākavaṁsassa yaso,
thi-ap17:30.2	ussito māramaddano;
thi-ap17:30.3	Nanu sampati kālo me,
thi-ap17:30.4	nibbānatthāya puttikā.
thi-ap17:31.1	Cirappabhuti yaṁ mayhaṁ,
thi-ap17:31.2	patthitaṁ ajja sijjhate;
thi-ap17:31.3	Ānandabherikāloyaṁ,
thi-ap17:31.4	kiṁ vo assūhi puttikā.
thi-ap17:32.1	Sace mayi dayā atthi,
thi-ap17:32.2	yadi catthi kataññutā;
thi-ap17:32.3	Saddhammaṭṭhitiyā sabbā,
thi-ap17:32.4	karotha vīriyaṁ daḷhaṁ.
thi-ap17:33.1	Thīnaṁ adāsi pabbajjaṁ,
thi-ap17:33.2	sambuddho yācito mayā;
thi-ap17:33.3	Tasmā yathāhaṁ nandissaṁ,
thi-ap17:33.4	tathā tamanutiṭṭhatha”.
thi-ap17:34.1	Tā evamanusāsitvā,
thi-ap17:34.2	bhikkhunīhi purakkhatā;
thi-ap17:34.3	Upecca buddhaṁ vanditvā,
thi-ap17:34.4	idaṁ vacanamabravi.
thi-ap17:35.1	“Ahaṁ sugata te mātā,
thi-ap17:35.2	tvañca vīra pitā mama;
thi-ap17:35.3	Saddhammasukhada nātha,
thi-ap17:35.4	tayā jātāmhi gotama.
thi-ap17:36.1	Saṁvaddhitoyaṁ sugata,
thi-ap17:36.2	rūpakāyo mayā tava;
thi-ap17:36.3	Anindito dhammakāyo,
thi-ap17:36.4	mama saṁvaddhito tayā.
thi-ap17:37.1	Muhuttaṁ taṇhāsamaṇaṁ,
thi-ap17:37.2	khīraṁ tvaṁ pāyito mayā;
thi-ap17:37.3	Tayāhaṁ santamaccantaṁ,
thi-ap17:37.4	dhammakhīrañhi pāyitā.
thi-ap17:38.1	Bandhanārakkhane mayhaṁ,
thi-ap17:38.2	anaṇo tvaṁ mahāmune;
thi-ap17:38.3	Puttakāmā thiyo yācaṁ,
thi-ap17:38.4	labhanti tādisaṁ sutaṁ.
thi-ap17:39.1	Mandhātādinarindānaṁ,
thi-ap17:39.2	yā mātā sā bhavaṇṇave;
thi-ap17:39.3	Nimuggāhaṁ tayā putta,
thi-ap17:39.4	tāritā bhavasāgarā.
thi-ap17:40.1	Rañño mātā mahesīti,
thi-ap17:40.2	sulabhaṁ nāmamitthinaṁ;
thi-ap17:40.3	Buddhamātāti yaṁ nāmaṁ,
thi-ap17:40.4	etaṁ paramadullabhaṁ.
thi-ap17:41.1	Tañca laddhaṁ mahāvīra,
thi-ap17:41.2	paṇidhānaṁ mamaṁ tayā;
thi-ap17:41.3	Aṇukaṁ vā mahantaṁ vā,
thi-ap17:41.4	taṁ sabbaṁ pūritaṁ mayā.
thi-ap17:42.1	Parinibbātumicchāmi,
thi-ap17:42.2	vihāyemaṁ kaḷevaraṁ;
thi-ap17:42.3	Anujānāhi me vīra,
thi-ap17:42.4	dukkhantakara nāyaka.
thi-ap17:43.1	Cakkaṅkusadhajākiṇṇe,
thi-ap17:43.2	pāde kamalakomale;
thi-ap17:43.3	Pasārehi paṇāmaṁ te,
thi-ap17:43.4	karissaṁ puttauttame.
thi-ap17:44.1	Suvaṇṇarāsisaṅkāsaṁ,
thi-ap17:44.2	sarīraṁ kuru pākaṭaṁ;
thi-ap17:44.3	Katvā dehaṁ sudiṭṭhaṁ te,
thi-ap17:44.4	santiṁ gacchāmi nāyaka”.
thi-ap17:45.1	Dvattiṁsalakkhaṇūpetaṁ,
thi-ap17:45.2	suppabhālaṅkataṁ tanuṁ;
thi-ap17:45.3	Sañjhāghanāva bālakkaṁ,
thi-ap17:45.4	mātucchaṁ dassayī jino.
thi-ap17:46.1	Phullāravindasaṅkāse,
thi-ap17:46.2	taruṇādiccasappabhe;
thi-ap17:46.3	Cakkaṅkite pādatale,
thi-ap17:46.4	tato sā sirasā pati.
thi-ap17:47.1	“Paṇamāmi narādicca,
thi-ap17:47.2	ādiccakulaketukaṁ;
thi-ap17:47.3	Pacchime maraṇe mayhaṁ,
thi-ap17:47.4	na taṁ ikkhāmahaṁ puno.
thi-ap17:48.1	Itthiyo nāma lokagga,
thi-ap17:48.2	sabbadosākarā matā;
thi-ap17:48.3	Yadi ko catthi doso me,
thi-ap17:48.4	khamassu karuṇākara.
thi-ap17:49.1	Itthikānañca pabbajjaṁ,
thi-ap17:49.2	haṁ taṁ yāciṁ punappunaṁ;
thi-ap17:49.3	Tattha ce atthi doso me,
thi-ap17:49.4	taṁ khamassu narāsabha.
thi-ap17:50.1	Mayā bhikkhuniyo vīra,
thi-ap17:50.2	tavānuññāya sāsitā;
thi-ap17:50.3	Tatra ce atthi dunnītaṁ,
thi-ap17:50.4	taṁ khamassu khamādhipa”.
thi-ap17:51.1	“Akkhante nāma khantabbaṁ,
thi-ap17:51.2	kiṁ bhave guṇabhūsane;
thi-ap17:51.3	Kimuttaraṁ te vakkhāmi,
thi-ap17:51.4	nibbānāya vajantiyā.
thi-ap17:52.1	Suddhe anūne mama bhikkhusaṅghe,
thi-ap17:52.2	Lokā ito nissarituṁ khamante;
thi-ap17:52.3	Pabhātakāle byasanaṅgatānaṁ,
thi-ap17:52.4	Disvāna niyyātiva candalekhā”.
thi-ap17:53.1	Tadetarā bhikkhuniyo jinaggaṁ,
thi-ap17:53.2	Tārāva candānugatā sumeruṁ;
thi-ap17:53.3	Padakkhiṇaṁ kacca nipacca pāde,
thi-ap17:53.4	Ṭhitā mukhantaṁ samudikkhamānā.
thi-ap17:54.1	“Na tittipubbaṁ tava dassanena,
thi-ap17:54.2	Cakkhuṁ na sotaṁ tava bhāsitena;
thi-ap17:54.3	Cittaṁ mamaṁ kevalamekameva,
thi-ap17:54.4	Pappuyya taṁ dhammarasena titti.
thi-ap17:55.1	Nadato parisāyaṁ te,
thi-ap17:55.2	vāditabbapahārino;
thi-ap17:55.3	Ye te dakkhanti vadanaṁ,
thi-ap17:55.4	dhaññā te narapuṅgava.
thi-ap17:56.1	Dīghaṅgulī tambanakhe,
thi-ap17:56.2	subhe āyatapaṇhike;
thi-ap17:56.3	Ye pāde paṇamissanti,
thi-ap17:56.4	tepi dhaññā guṇandhara.
thi-ap17:57.1	Madhurāni pahaṭṭhāni,
thi-ap17:57.2	dosagghāni hitāni ca;
thi-ap17:57.3	Ye te vākyāni suyyanti,
thi-ap17:57.4	tepi dhaññā naruttama.
thi-ap17:58.1	Dhaññāhaṁ te mahāvīra,
thi-ap17:58.2	pādapūjanatapparā;
thi-ap17:58.3	Tiṇṇasaṁsārakantārā,
thi-ap17:58.4	suvākyena sirīmato”.
thi-ap17:59.1	Tato sā anusāvetvā,
thi-ap17:59.2	bhikkhusaṅghampi subbatā;
thi-ap17:59.3	Rāhulānandanande ca,
thi-ap17:59.4	vanditvā idamabravi.
thi-ap17:60.1	“Āsīvisālayasame,
thi-ap17:60.2	rogāvāse kaḷevare;
thi-ap17:60.3	Nibbindā dukkhasaṅghāṭe,
thi-ap17:60.4	jarāmaraṇagocare.
thi-ap17:61.1	Nānākalimalākiṇṇe,
thi-ap17:61.2	parāyatte nirīhake;
thi-ap17:61.3	Tena nibbātumicchāmi,
thi-ap17:61.4	anumaññatha puttakā”.
thi-ap17:62.1	Nando rāhulabhaddo ca,
thi-ap17:62.2	vītasokā nirāsavā;
thi-ap17:62.3	Ṭhitācalaṭṭhiti thirā,
thi-ap17:62.4	dhammatamanucintayuṁ.
thi-ap17:63.1	“Dhiratthu saṅkhataṁ lolaṁ,
thi-ap17:63.2	asāraṁ kadalūpamaṁ;
thi-ap17:63.3	Māyāmarīcisadisaṁ,
thi-ap17:63.4	ittaraṁ anavaṭṭhitaṁ.
thi-ap17:64.1	Yattha nāma jinassāyaṁ,
thi-ap17:64.2	mātucchā buddhaposikā;
thi-ap17:64.3	Gotamī nidhanaṁ yāti,
thi-ap17:64.4	aniccaṁ sabbasaṅkhataṁ”.
thi-ap17:65.1	Ānando ca tadā sekho,
thi-ap17:65.2	sokaṭṭo jinavacchalo;
thi-ap17:65.3	Tatthassūni karonto so,
thi-ap17:65.4	karuṇaṁ paridevati.
thi-ap17:66.1	“Hā santiṁ gotamī yāti,
thi-ap17:66.2	nūna buddhopi nibbutiṁ;
thi-ap17:66.3	Gacchati na cireneva,
thi-ap17:66.4	aggiriva nirindhano”.
thi-ap17:67.1	Evaṁ vilāpamānaṁ taṁ,
thi-ap17:67.2	ānandaṁ āha gotamī;
thi-ap17:67.3	Sutasāgaragambhīra-
thi-ap17:67.4	buddhopaṭṭhānatappara.
thi-ap17:68.1	“Na yuttaṁ socituṁ putta,
thi-ap17:68.2	hāsakāle upaṭṭhite;
thi-ap17:68.3	Tayā me saraṇaṁ putta,
thi-ap17:68.4	nibbānaṁ tamupāgataṁ.
thi-ap17:69.1	Tayā tāta samajjhiṭṭho,
thi-ap17:69.2	pabbajjaṁ anujāni no;
thi-ap17:69.3	Mā putta vimano hohi,
thi-ap17:69.4	saphalo te parissamo.
thi-ap17:70.1	Yaṁ na diṭṭhaṁ purāṇehi,
thi-ap17:70.2	titthikācariyehipi;
thi-ap17:70.3	Taṁ padaṁ sukumārīhi,
thi-ap17:70.4	sattavassāhi veditaṁ.
thi-ap17:71.1	Buddhasāsanapāleta,
thi-ap17:71.2	pacchimaṁ dassanaṁ tava;
thi-ap17:71.3	Tattha gacchāmahaṁ putta,
thi-ap17:71.4	gato yattha na dissate.
thi-ap17:72.1	Kadāci dhammaṁ desento,
thi-ap17:72.2	khipī lokagganāyako;
thi-ap17:72.3	Tadāhaṁ āsīsavācaṁ,
thi-ap17:72.4	avocaṁ anukampikā.
thi-ap17:73.1	‘Ciraṁ jīva mahāvīra,
thi-ap17:73.2	kappaṁ tiṭṭha mahāmune;
thi-ap17:73.3	Sabbalokassa atthāya,
thi-ap17:73.4	bhavassu ajarāmaro’.
thi-ap17:74.1	Taṁ tathāvādiniṁ buddho,
thi-ap17:74.2	mamaṁ so etadabravi;
thi-ap17:74.3	‘Na hevaṁ vandiyā buddhā,
thi-ap17:74.4	yathā vandasi gotamī’.
thi-ap17:75.1	‘Kathaṁ carahi sabbaññū,
thi-ap17:75.2	vanditabbā tathāgatā;
thi-ap17:75.3	Kathaṁ avandiyā buddhā,
thi-ap17:75.4	taṁ me akkhāhi pucchito’.
thi-ap17:76.1	‘Āraddhavīriye pahitatte,
thi-ap17:76.2	Niccaṁ daḷhaparakkame;
thi-ap17:76.3	Samagge sāvake passa,
thi-ap17:76.4	Etaṁ buddhānavandanaṁ’.
thi-ap17:77.1	Tato upassayaṁ gantvā,
thi-ap17:77.2	ekikāhaṁ vicintayiṁ;
thi-ap17:77.3	‘Samaggaparisaṁ nātho,
thi-ap17:77.4	rodhesi tibhavantago.
thi-ap17:78.1	Handāhaṁ parinibbissaṁ,
thi-ap17:78.2	mā vipattitamaddasaṁ’;
thi-ap17:78.3	Evāhaṁ cintayitvāna,
thi-ap17:78.4	disvāna isisattamaṁ.
thi-ap17:79.1	Parinibbānakālaṁ me,
thi-ap17:79.2	ārocesiṁ vināyakaṁ;
thi-ap17:79.3	Tato so samanuññāsi,
thi-ap17:79.4	‘kālaṁ jānāhi gotamī’.
thi-ap17:80.1	Kilesā jhāpitā mayhaṁ,
thi-ap17:80.2	…pe…
thi-ap17:80.3	viharāmi anāsavā.
thi-ap17:81.1	Svāgataṁ vata me āsi,
thi-ap17:81.2	…pe…
thi-ap17:81.3	kataṁ buddhassa sāsanaṁ.
thi-ap17:82.1	Paṭisambhidā catasso,
thi-ap17:82.2	…pe…
thi-ap17:82.3	kataṁ buddhassa sāsanaṁ”.
thi-ap17:83.1	“Thīnaṁ dhammābhisamaye,
thi-ap17:83.2	ye bālā vimatiṁ gatā;
thi-ap17:83.3	Tesaṁ diṭṭhippahānatthaṁ,
thi-ap17:83.4	iddhiṁ dassehi gotamī”.
thi-ap17:84.1	Tadā nipacca sambuddhaṁ,
thi-ap17:84.2	uppatitvāna ambaraṁ;
thi-ap17:84.3	Iddhī anekā dassesi,
thi-ap17:84.4	buddhānuññāya gotamī.
thi-ap17:85.1	Ekikā bahudhā āsi,
thi-ap17:85.2	bahukā cekikā tathā;
thi-ap17:85.3	Āvibhāvaṁ tirobhāvaṁ,
thi-ap17:85.4	tirokuṭṭaṁ tironagaṁ.
thi-ap17:86.1	Asajjamānā agamā,
thi-ap17:86.2	bhūmiyampi nimujjatha;
thi-ap17:86.3	Abhijjamāne udake,
thi-ap17:86.4	agañchi mahiyā yathā.
thi-ap17:87.1	Sakuṇīva tathākāse,
thi-ap17:87.2	pallaṅkena kamī tadā;
thi-ap17:87.3	Vasaṁ vattesi kāyena,
thi-ap17:87.4	yāva brahmanivesanaṁ.
thi-ap17:88.1	Sineruṁ daṇḍaṁ katvāna,
thi-ap17:88.2	chattaṁ katvā mahāmahiṁ;
thi-ap17:88.3	Samūlaṁ parivattetvā,
thi-ap17:88.4	dhārayaṁ caṅkamī nabhe.
thi-ap17:89.1	Chassūrodayakāleva,
thi-ap17:89.2	lokañcākāsi dhūmikaṁ;
thi-ap17:89.3	Yugante viya lokaṁ sā,
thi-ap17:89.4	jālāmālākulaṁ akā.
thi-ap17:90.1	Mucalindaṁ mahāselaṁ,
thi-ap17:90.2	merumūlanadantare;
thi-ap17:90.3	Sāsapāriva sabbāni,
thi-ap17:90.4	ekenaggahi muṭṭhinā.
thi-ap17:91.1	Aṅgulaggena chādesi,
thi-ap17:91.2	bhākaraṁ sanisākaraṁ;
thi-ap17:91.3	Candasūrasahassāni,
thi-ap17:91.4	āveḷamiva dhārayi.
thi-ap17:92.1	Catusāgaratoyāni,
thi-ap17:92.2	dhārayī ekapāṇinā;
thi-ap17:92.3	Yugantajaladākāraṁ,
thi-ap17:92.4	mahāvassaṁ pavassatha.
thi-ap17:93.1	Cakkavattiṁ saparisaṁ,
thi-ap17:93.2	māpayī sā nabhattale;
thi-ap17:93.3	Garuḷaṁ dviradaṁ sīhaṁ,
thi-ap17:93.4	vinadantaṁ padassayi.
thi-ap17:94.1	Ekikā abhinimmitvā,
thi-ap17:94.2	Appameyyaṁ bhikkhunīgaṇaṁ;
thi-ap17:94.3	Puna antaradhāpetvā,
thi-ap17:94.4	Ekikā munimabravi.
thi-ap17:95.1	“Mātucchā te mahāvīra,
thi-ap17:95.2	tava sāsanakārikā;
thi-ap17:95.3	Anuppattā sakaṁ atthaṁ,
thi-ap17:95.4	pāde vandāmi cakkhuma”.
thi-ap17:96.1	Dassetvā vividhā iddhī,
thi-ap17:96.2	orohitvā nabhattalā;
thi-ap17:96.3	Vanditvā lokapajjotaṁ,
thi-ap17:96.4	ekamantaṁ nisīdi sā.
thi-ap17:97.1	“Sā vīsavassasatikā,
thi-ap17:97.2	jātiyāhaṁ mahāmune;
thi-ap17:97.3	Alamettāvatā vīra,
thi-ap17:97.4	nibbāyissāmi nāyaka”.
thi-ap17:98.1	Tadātivimhitā sabbā,
thi-ap17:98.2	parisā sā katañjalī;
thi-ap17:98.3	“Avocayye kathaṁ āsi,
thi-ap17:98.4	atuliddhiparakkamā”.
thi-ap17:99.1	“Padumuttaro nāma jino,
thi-ap17:99.2	sabbadhammesu cakkhumā;
thi-ap17:99.3	Ito satasahassamhi,
thi-ap17:99.4	kappe uppajji nāyako.
thi-ap17:100.1	Tadāhaṁ haṁsavatiyaṁ,
thi-ap17:100.2	jātāmaccakule ahuṁ;
thi-ap17:100.3	Sabbopakārasampanne,
thi-ap17:100.4	iddhe phīte mahaddhane.
thi-ap17:101.1	Kadāci pitunā saddhiṁ,
thi-ap17:101.2	dāsīgaṇapurakkhatā;
thi-ap17:101.3	Mahatā parivārena,
thi-ap17:101.4	taṁ upecca narāsabhaṁ.
thi-ap17:102.1	Vāsavaṁ viya vassantaṁ,
thi-ap17:102.2	dhammameghaṁ anāsavaṁ;
thi-ap17:102.3	Saradādiccasadisaṁ,
thi-ap17:102.4	raṁsijālasamujjalaṁ.
thi-ap17:103.1	Disvā cittaṁ pasādetvā,
thi-ap17:103.2	sutvā cassa subhāsitaṁ;
thi-ap17:103.3	Mātucchaṁ bhikkhuniṁ agge,
thi-ap17:103.4	ṭhapentaṁ naranāyakaṁ.
thi-ap17:104.1	Sutvā datvā mahādānaṁ,
thi-ap17:104.2	sattāhaṁ tassa tādino;
thi-ap17:104.3	Sasaṅghassa naraggassa,
thi-ap17:104.4	paccayāni bahūni ca.
thi-ap17:105.1	Nipacca pādamūlamhi,
thi-ap17:105.2	taṁ ṭhānamabhipatthayiṁ;
thi-ap17:105.3	Tato mahāparisatiṁ,
thi-ap17:105.4	avoca isisattamo.
thi-ap17:106.1	‘Yā sasaṅghaṁ abhojesi,
thi-ap17:106.2	sattāhaṁ lokanāyakaṁ;
thi-ap17:106.3	Tamahaṁ kittayissāmi,
thi-ap17:106.4	suṇātha mama bhāsato.
thi-ap17:107.1	Satasahassito kappe,
thi-ap17:107.2	okkākakulasambhavo;
thi-ap17:107.3	Gotamo nāma gottena,
thi-ap17:107.4	satthā loke bhavissati.
thi-ap17:108.1	Tassa dhammesu dāyādā,
thi-ap17:108.2	orasā dhammanimmitā;
thi-ap17:108.3	Gotamī nāma nāmena,
thi-ap17:108.4	hessati satthu sāvikā.
thi-ap17:109.1	Tassa buddhassa mātucchā,
thi-ap17:109.2	jīvitāpādikā ayaṁ;
thi-ap17:109.3	Rattaññūnañca aggattaṁ,
thi-ap17:109.4	bhikkhunīnaṁ labhissati’.
thi-ap17:110.1	Taṁ sutvāna pamoditvā,
thi-ap17:110.2	yāvajīvaṁ tadā jinaṁ;
thi-ap17:110.3	Paccayehi upaṭṭhitvā,
thi-ap17:110.4	tato kālaṅkatā ahaṁ.
thi-ap17:111.1	Tāvatiṁsesu devesu,
thi-ap17:111.2	sabbakāmasamiddhisu;
thi-ap17:111.3	Nibbattā dasahaṅgehi,
thi-ap17:111.4	aññe abhibhaviṁ ahaṁ.
thi-ap17:112.1	Rūpasaddehi gandhehi,
thi-ap17:112.2	rasehi phusanehi ca;
thi-ap17:112.3	Āyunāpi ca vaṇṇena,
thi-ap17:112.4	sukhena yasasāpi ca.
thi-ap17:113.1	Tathevādhipateyyena,
thi-ap17:113.2	adhigayha virocahaṁ;
thi-ap17:113.3	Ahosiṁ amarindassa,
thi-ap17:113.4	mahesī dayitā tahiṁ.
thi-ap17:114.1	Saṁsāre saṁsarantīhaṁ,
thi-ap17:114.2	kammavāyusameritā;
thi-ap17:114.3	Kāsissa rañño visaye,
thi-ap17:114.4	ajāyiṁ dāsagāmake.
thi-ap17:115.1	Pañcadāsasatānūnā,
thi-ap17:115.2	nivasanti tahiṁ tadā;
thi-ap17:115.3	Sabbesaṁ tattha yo jeṭṭho,
thi-ap17:115.4	tassa jāyā ahosahaṁ.
thi-ap17:116.1	Sayambhuno pañcasatā,
thi-ap17:116.2	gāmaṁ piṇḍāya pāvisuṁ;
thi-ap17:116.3	Te disvāna ahaṁ tuṭṭhā,
thi-ap17:116.4	saha sabbāhi itthibhi.
thi-ap17:117.1	Pūgā hutvāva sabbāyo,
thi-ap17:117.2	catumāse upaṭṭhahuṁ;
thi-ap17:117.3	Ticīvarāni datvāna,
thi-ap17:117.4	saṁsarimha sasāmikā.
thi-ap17:118.1	Tato cutā sabbāpi tā,
thi-ap17:118.2	tāvatiṁsagatā mayaṁ;
thi-ap17:118.3	Pacchime ca bhave dāni,
thi-ap17:118.4	jātā devadahe pure.
thi-ap17:119.1	Pitā añjanasakko me,
thi-ap17:119.2	mātā mama sulakkhaṇā;
thi-ap17:119.3	Tato kapilavatthusmiṁ,
thi-ap17:119.4	suddhodanagharaṁ gatā.
thi-ap17:120.1	Sesā sakyakule jātā,
thi-ap17:120.2	sakyānaṁ gharamāgamuṁ;
thi-ap17:120.3	Ahaṁ visiṭṭhā sabbāsaṁ,
thi-ap17:120.4	jinassāpādikā ahuṁ.
thi-ap17:121.1	Mama puttobhinikkhamma,
thi-ap17:121.2	buddho āsi vināyako;
thi-ap17:121.3	Pacchāhaṁ pabbajitvāna,
thi-ap17:121.4	satehi saha pañcahi.
thi-ap17:122.1	Sākiyānīhi dhīrāhi,
thi-ap17:122.2	saha santisukhaṁ phusiṁ;
thi-ap17:122.3	Ye tadā pubbajātiyaṁ,
thi-ap17:122.4	amhākaṁ āsu sāmino.
thi-ap17:123.1	Sahapuññassa kattāro,
thi-ap17:123.2	mahāsamayakārakā;
thi-ap17:123.3	Phusiṁsu arahattaṁ te,
thi-ap17:123.4	sugatenānukampitā”.
thi-ap17:124.1	Tadetarā bhikkhuniyo,
thi-ap17:124.2	āruhiṁsu nabhattalaṁ;
thi-ap17:124.3	Saṅgatā viya tārāyo,
thi-ap17:124.4	virociṁsu mahiddhikā.
thi-ap17:125.1	Iddhī anekā dassesuṁ,
thi-ap17:125.2	piḷandhavikatiṁ yathā;
thi-ap17:125.3	Kammāro kanakasseva,
thi-ap17:125.4	kammaññassa susikkhito.
thi-ap17:126.1	Dassetvā pāṭihīrāni,
thi-ap17:126.2	vicittāni bahūni ca;
thi-ap17:126.3	Tosetvā vādipavaraṁ,
thi-ap17:126.4	muniṁ saparisaṁ tadā.
thi-ap17:127.1	Orohitvāna gaganā,
thi-ap17:127.2	vanditvā isisattamaṁ;
thi-ap17:127.3	Anuññātā naraggena,
thi-ap17:127.4	yathāṭhāne nisīdisuṁ.
thi-ap17:128.1	“Ahonukampikā amhaṁ,
thi-ap17:128.2	sabbāsaṁ cira gotamī;
thi-ap17:128.3	Vāsitā tava puññehi,
thi-ap17:128.4	pattā no āsavakkhayaṁ.
thi-ap17:129.1	Kilesā jhāpitā amhaṁ,
thi-ap17:129.2	bhavā sabbe samūhatā;
thi-ap17:129.3	Nāgīva bandhanaṁ chetvā,
thi-ap17:129.4	viharāma anāsavā.
thi-ap17:130.1	Svāgataṁ vata no āsi,
thi-ap17:130.2	buddhaseṭṭhassa santike;
thi-ap17:130.3	Tisso vijjā anuppattā,
thi-ap17:130.4	kataṁ buddhassa sāsanaṁ.
thi-ap17:131.1	Paṭisambhidā catasso,
thi-ap17:131.2	vimokkhāpi ca aṭṭhime;
thi-ap17:131.3	Chaḷabhiññā sacchikatā,
thi-ap17:131.4	kataṁ buddhassa sāsanaṁ.
thi-ap17:132.1	Iddhīsu ca vasī homa,
thi-ap17:132.2	dibbāya sotadhātuyā;
thi-ap17:132.3	Cetopariyañāṇassa,
thi-ap17:132.4	vasī homa mahāmune.
thi-ap17:133.1	Pubbenivāsaṁ jānāma,
thi-ap17:133.2	dibbacakkhu visodhitaṁ;
thi-ap17:133.3	Sabbāsavaparikkhīṇā,
thi-ap17:133.4	natthi dāni punabbhavā.
thi-ap17:134.1	Atthe dhamme ca nerutte,
thi-ap17:134.2	paṭibhāne ca vijjati;
thi-ap17:134.3	Ñāṇaṁ amhaṁ mahāvīra,
thi-ap17:134.4	uppannaṁ tava santike.
thi-ap17:135.1	Asmābhi pariciṇṇosi,
thi-ap17:135.2	mettacittā hi nāyaka;
thi-ap17:135.3	Anujānāhi sabbāsaṁ,
thi-ap17:135.4	nibbānāya mahāmune”.
thi-ap17:136.1	“Nibbāyissāma iccevaṁ,
thi-ap17:136.2	kiṁ vakkhāmi vadantiyo;
thi-ap17:136.3	Yassadāni ca vo kālaṁ,
thi-ap17:136.4	maññathā”ti jinobravi.
thi-ap17:137.1	Gotamīādikā tāyo,
thi-ap17:137.2	tadā bhikkhuniyo jinaṁ;
thi-ap17:137.3	Vanditvā āsanā tamhā,
thi-ap17:137.4	vuṭṭhāya agamiṁsu tā.
thi-ap17:138.1	Mahatā janakāyena,
thi-ap17:138.2	saha lokagganāyako;
thi-ap17:138.3	Anusaṁyāyī so vīro,
thi-ap17:138.4	mātucchaṁ yāvakoṭṭhakaṁ.
thi-ap17:139.1	Tadā nipati pādesu,
thi-ap17:139.2	gotamī lokabandhuno;
thi-ap17:139.3	Saheva tāhi sabbāhi,
thi-ap17:139.4	“pacchimaṁ pādavandanaṁ.
thi-ap17:140.1	Idaṁ pacchimakaṁ mayhaṁ,
thi-ap17:140.2	lokanāthassa dassanaṁ;
thi-ap17:140.3	Na puno amatākāraṁ,
thi-ap17:140.4	passissāmi mukhaṁ tava.
thi-ap17:141.1	Na ca me vandanaṁ vīra,
thi-ap17:141.2	tava pāde sukomale;
thi-ap17:141.3	Samphusissati lokagga,
thi-ap17:141.4	ajja gacchāmi nibbutiṁ”.
thi-ap17:142.1	“Rūpena kiṁ tavānena,
thi-ap17:142.2	diṭṭhe dhamme yathātathe;
thi-ap17:142.3	Sabbaṁ saṅkhatamevetaṁ,
thi-ap17:142.4	anassāsikamittaraṁ”.
thi-ap17:143.1	Sā saha tāhi gantvāna,
thi-ap17:143.2	bhikkhunupassayaṁ sakaṁ;
thi-ap17:143.3	Aḍḍhapallaṅkamābhujja,
thi-ap17:143.4	nisīdi paramāsane.
thi-ap17:144.1	Tadā upāsikā tattha,
thi-ap17:144.2	buddhasāsanavacchalā;
thi-ap17:144.3	Tassā pavattiṁ sutvāna,
thi-ap17:144.4	upesuṁ pādavandikā.
thi-ap17:145.1	Karehi uraṁ pahantā,
thi-ap17:145.2	chinnamūlā yathā latā;
thi-ap17:145.3	Rodantā karuṇaṁ ravaṁ,
thi-ap17:145.4	sokaṭṭā bhūmipātitā.
thi-ap17:146.1	“Mā no saraṇade nāthe,
thi-ap17:146.2	vihāya gami nibbutiṁ;
thi-ap17:146.3	Nipatitvāna yācāma,
thi-ap17:146.4	sabbāyo sirasā mayaṁ”.
thi-ap17:147.1	Yā padhānatamā tāsaṁ,
thi-ap17:147.2	saddhā paññā upāsikā;
thi-ap17:147.3	Tassā sīsaṁ pamajjantī,
thi-ap17:147.4	idaṁ vacanamabravi.
thi-ap17:148.1	“Alaṁ puttā visādena,
thi-ap17:148.2	mārapāsānuvattinā;
thi-ap17:148.3	Aniccaṁ saṅkhataṁ sabbaṁ,
thi-ap17:148.4	viyogantaṁ calācalaṁ”.
thi-ap17:149.1	Tato sā tā visajjitvā,
thi-ap17:149.2	paṭhamaṁ jhānamuttamaṁ;
thi-ap17:149.3	Dutiyañca tatiyañca,
thi-ap17:149.4	samāpajji catutthakaṁ.
thi-ap17:150.1	Ākāsāyatanañceva,
thi-ap17:150.2	viññāṇāyatanaṁ tathā;
thi-ap17:150.3	Ākiñcaṁ nevasaññañca,
thi-ap17:150.4	samāpajji yathākkamaṁ.
thi-ap17:151.1	Paṭilomena jhānāni,
thi-ap17:151.2	samāpajjittha gotamī;
thi-ap17:151.3	Yāvatā paṭhamaṁ jhānaṁ,
thi-ap17:151.4	tato yāvacatutthakaṁ.
thi-ap17:152.1	Tato vuṭṭhāya nibbāyi,
thi-ap17:152.2	dīpaccīva nirāsavā;
thi-ap17:152.3	Bhūmicālo mahā āsi,
thi-ap17:152.4	nabhasā vijjutā pati.
thi-ap17:153.1	Panāditā dundubhiyo,
thi-ap17:153.2	parideviṁsu devatā;
thi-ap17:153.3	Pupphavuṭṭhī ca gaganā,
thi-ap17:153.4	abhivassatha medaniṁ.
thi-ap17:154.1	Kampito merurājāpi,
thi-ap17:154.2	raṅgamajjhe yathā naṭo;
thi-ap17:154.3	Sokena cātidīnova,
thi-ap17:154.4	viravo āsi sāgaro.
thi-ap17:155.1	Devā nāgāsurā brahmā,
thi-ap17:155.2	saṁviggāhiṁsu taṅkhaṇe;
thi-ap17:155.3	“Aniccā vata saṅkhārā,
thi-ap17:155.4	yathāyaṁ vilayaṁ gatā”.
thi-ap17:156.1	Yā ce maṁ parivāriṁsu,
thi-ap17:156.2	satthu sāsanakārikā;
thi-ap17:156.3	Tāyopi anupādānā,
thi-ap17:156.4	dīpacci viya nibbutā.
thi-ap17:157.1	Hā yogā vippayogantā,
thi-ap17:157.2	hāniccaṁ sabbasaṅkhataṁ;
thi-ap17:157.3	Hā jīvitaṁ vināsantaṁ,
thi-ap17:157.4	iccāsi paridevanā.
thi-ap17:158.1	Tato devā ca brahmā ca,
thi-ap17:158.2	lokadhammānuvattanaṁ;
thi-ap17:158.3	Kālānurūpaṁ kubbanti,
thi-ap17:158.4	upetvā isisattamaṁ.
thi-ap17:159.1	Tadā āmantayī satthā,
thi-ap17:159.2	ānandaṁ sutasāgaraṁ;
thi-ap17:159.3	“Gacchānanda nivedehi,
thi-ap17:159.4	bhikkhūnaṁ mātu nibbutiṁ”.
thi-ap17:160.1	Tadānando nirānando,
thi-ap17:160.2	assunā puṇṇalocano;
thi-ap17:160.3	Gaggarena sarenāha,
thi-ap17:160.4	“samāgacchantu bhikkhavo.
thi-ap17:161.1	Pubbadakkhiṇapacchāsu,
thi-ap17:161.2	uttarāya ca santike;
thi-ap17:161.3	Suṇantu bhāsitaṁ mayhaṁ,
thi-ap17:161.4	bhikkhavo sugatorasā.
thi-ap17:162.1	Yā vaḍḍhayi payattena,
thi-ap17:162.2	sarīraṁ pacchimaṁ mune;
thi-ap17:162.3	Sā gotamī gatā santiṁ,
thi-ap17:162.4	tārāva sūriyodaye.
thi-ap17:163.1	Buddhamātāti paññattiṁ,
thi-ap17:163.2	ṭhapayitvā gatāsamaṁ;
thi-ap17:163.3	Na yattha pañcanettopi,
thi-ap17:163.4	gatiṁ dakkhati nāyako.
thi-ap17:164.1	Yassatthi sugate saddhā,
thi-ap17:164.2	yo ca piyo mahāmune;
thi-ap17:164.3	Buddhamātussa sakkāraṁ,
thi-ap17:164.4	karotu sugatoraso”.
thi-ap17:165.1	Sudūraṭṭhāpi taṁ sutvā,
thi-ap17:165.2	sīghamāgacchu bhikkhavo;
thi-ap17:165.3	Keci buddhānubhāvena,
thi-ap17:165.4	keci iddhīsu kovidā.
thi-ap17:166.1	Kūṭāgāravare ramme,
thi-ap17:166.2	sabbasoṇṇamaye subhe;
thi-ap17:166.3	Mañcakaṁ samāropesuṁ,
thi-ap17:166.4	yattha suttāsi gotamī.
thi-ap17:167.1	Cattāro lokapālā te,
thi-ap17:167.2	aṁsehi samadhārayuṁ;
thi-ap17:167.3	Sesā sakkādikā devā,
thi-ap17:167.4	kūṭāgāre samaggahuṁ.
thi-ap17:168.1	Kūṭāgārāni sabbāni,
thi-ap17:168.2	āsuṁ pañcasatānipi;
thi-ap17:168.3	Saradādiccavaṇṇāni,
thi-ap17:168.4	vissakammakatāni hi.
thi-ap17:169.1	Sabbā tāpi bhikkhuniyo,
thi-ap17:169.2	āsuṁ mañcesu sāyitā;
thi-ap17:169.3	Devānaṁ khandhamāruḷhā,
thi-ap17:169.4	niyyanti anupubbaso.
thi-ap17:170.1	Sabbaso chāditaṁ āsi,
thi-ap17:170.2	vitānena nabhattalaṁ;
thi-ap17:170.3	Satārā candasūrā ca,
thi-ap17:170.4	lañchitā kanakāmayā.
thi-ap17:171.1	Paṭākā ussitānekā,
thi-ap17:171.2	vitatā pupphakañcukā;
thi-ap17:171.3	Ogatākāsapadumā,
thi-ap17:171.4	mahiyā pupphamuggataṁ.
thi-ap17:172.1	Dissanti candasūriyā,
thi-ap17:172.2	pajjalanti ca tārakā;
thi-ap17:172.3	Majjhaṁ gatopi cādicco,
thi-ap17:172.4	na tāpesi sasī yathā.
thi-ap17:173.1	Devā dibbehi gandhehi,
thi-ap17:173.2	mālehi surabhīhi ca;
thi-ap17:173.3	Vāditehi ca naccehi,
thi-ap17:173.4	saṅgītīhi ca pūjayuṁ.
thi-ap17:174.1	Nāgāsurā ca brahmāno,
thi-ap17:174.2	yathāsatti yathābalaṁ;
thi-ap17:174.3	Pūjayiṁsu ca niyyantiṁ,
thi-ap17:174.4	nibbutaṁ buddhamātaraṁ.
thi-ap17:175.1	Sabbāyo purato nītā,
thi-ap17:175.2	nibbutā sugatorasā;
thi-ap17:175.3	Gotamī niyyate pacchā,
thi-ap17:175.4	sakkatā buddhaposikā.
thi-ap17:176.1	Purato devamanujā,
thi-ap17:176.2	sanāgāsurabrahmakā;
thi-ap17:176.3	Pacchā sasāvako buddho,
thi-ap17:176.4	pūjatthaṁ yāti mātuyā.
thi-ap17:177.1	Buddhassa parinibbānaṁ,
thi-ap17:177.2	nedisaṁ āsi yādisaṁ;
thi-ap17:177.3	Gotamīparinibbānaṁ,
thi-ap17:177.4	atevacchariyaṁ ahu.
thi-ap17:178.1	Buddho buddhassa nibbāne,
thi-ap17:178.2	nopaṭiyādi bhikkhavo;
thi-ap17:178.3	Buddho gotaminibbāne,
thi-ap17:178.4	sāriputtādikā tathā.
thi-ap17:179.1	Citakāni karitvāna,
thi-ap17:179.2	sabbagandhamayāni te;
thi-ap17:179.3	Gandhacuṇṇapakiṇṇāni,
thi-ap17:179.4	jhāpayiṁsu ca tā tahiṁ.
thi-ap17:180.1	Sesabhāgāni ḍayhiṁsu,
thi-ap17:180.2	aṭṭhī sesāni sabbaso;
thi-ap17:180.3	Ānando ca tadāvoca,
thi-ap17:180.4	saṁvegajanakaṁ vaco.
thi-ap17:181.1	“Gotamī nidhanaṁ yātā,
thi-ap17:181.2	ḍayhañcassā sarīrakaṁ;
thi-ap17:181.3	Saṅketaṁ buddhanibbānaṁ,
thi-ap17:181.4	na cirena bhavissati”.
thi-ap17:182.1	Tato gotamidhātūni,
thi-ap17:182.2	tassā pattagatāni so;
thi-ap17:182.3	Upanāmesi nāthassa,
thi-ap17:182.4	ānando buddhacodito.
thi-ap17:183.1	Pāṇinā tāni paggayha,
thi-ap17:183.2	avoca isisattamo;
thi-ap17:183.3	“Mahato sāravantassa,
thi-ap17:183.4	yathā rukkhassa tiṭṭhato.
thi-ap17:184.1	Yo so mahattaro khandho,
thi-ap17:184.2	palujjeyya aniccatā;
thi-ap17:184.3	Tathā bhikkhunisaṅghassa,
thi-ap17:184.4	gotamī parinibbutā.
thi-ap17:185.1	Aho acchariyaṁ mayhaṁ,
thi-ap17:185.2	nibbutāyapi mātuyā;
thi-ap17:185.3	Sarīramattasesāya,
thi-ap17:185.4	natthi sokapariddavo.
thi-ap17:186.1	Na sociyā paresaṁ sā,
thi-ap17:186.2	tiṇṇasaṁsārasāgarā;
thi-ap17:186.3	Parivajjitasantāpā,
thi-ap17:186.4	sītibhūtā sunibbutā.
thi-ap17:187.1	Paṇḍitāsi mahāpaññā,
thi-ap17:187.2	puthupaññā tatheva ca;
thi-ap17:187.3	Rattaññū bhikkhunīnaṁ sā,
thi-ap17:187.4	evaṁ dhāretha bhikkhavo.
thi-ap17:188.1	Iddhīsu ca vasī āsi,
thi-ap17:188.2	dibbāya sotadhātuyā;
thi-ap17:188.3	Cetopariyañāṇassa,
thi-ap17:188.4	vasī āsi ca gotamī.
thi-ap17:189.1	Pubbenivāsamaññāsi,
thi-ap17:189.2	dibbacakkhu visodhitaṁ;
thi-ap17:189.3	Sabbāsavā parikkhīṇā,
thi-ap17:189.4	natthi tassā punabbhavo.
thi-ap17:190.1	Atthadhammaniruttīsu,
thi-ap17:190.2	paṭibhāne tatheva ca;
thi-ap17:190.3	Parisuddhaṁ ahu ñāṇaṁ,
thi-ap17:190.4	tasmā socaniyā na sā.
thi-ap17:191.1	Ayoghanahatasseva,
thi-ap17:191.2	jalato jātavedassa;
thi-ap17:191.3	Anupubbūpasantassa,
thi-ap17:191.4	yathā na ñāyate gati.
thi-ap17:192.1	Evaṁ sammā vimuttānaṁ,
thi-ap17:192.2	kāmabandhoghatārinaṁ;
thi-ap17:192.3	Paññāpetuṁ gati natthi,
thi-ap17:192.4	pattānaṁ acalaṁ sukhaṁ.
thi-ap17:193.1	Attadīpā tato hotha,
thi-ap17:193.2	satipaṭṭhānagocarā;
thi-ap17:193.3	Bhāvetvā sattabojjhaṅge,
thi-ap17:193.4	dukkhassantaṁ karissatha”.
thi-ap17:194.1	Itthaṁ sudaṁ mahāpajāpatigotamī imā gāthāyo abhāsitthāti.
thi-ap17:195.1	Mahāpajāpatigotamītheriyāpadānaṁ sattamaṁ.
thi-ap18:0.1	Therīapadāna
thi-ap18:0.2	Ekūposathikavagga
thi-ap18:0.3	Khemātherīapadāna
thi-ap18:1.1	“Padumuttaro nāma jino,
thi-ap18:1.2	sabbadhammesu cakkhumā;
thi-ap18:1.3	Ito satasahassamhi,
thi-ap18:1.4	kappe uppajji nāyako.
thi-ap18:2.1	Tadāhaṁ haṁsavatiyaṁ,
thi-ap18:2.2	jātā seṭṭhikule ahuṁ;
thi-ap18:2.3	Nānāratanapajjote,
thi-ap18:2.4	mahāsukhasamappitā.
thi-ap18:3.1	Upetvā taṁ mahāvīraṁ,
thi-ap18:3.2	assosiṁ dhammadesanaṁ;
thi-ap18:3.3	Tato jātappasādāhaṁ,
thi-ap18:3.4	upemi saraṇaṁ jinaṁ.
thi-ap18:4.1	Mātaraṁ pitarañcāhaṁ,
thi-ap18:4.2	āyācitvā vināyakaṁ;
thi-ap18:4.3	Nimantayitvā sattāhaṁ,
thi-ap18:4.4	bhojayiṁ sahasāvakaṁ.
thi-ap18:5.1	Atikkante ca sattāhe,
thi-ap18:5.2	mahāpaññānamuttamaṁ;
thi-ap18:5.3	Bhikkhuniṁ etadaggamhi,
thi-ap18:5.4	ṭhapesi narasārathi.
thi-ap18:6.1	Taṁ sutvā muditā hutvā,
thi-ap18:6.2	puno tassa mahesino;
thi-ap18:6.3	Kāraṁ katvāna taṁ ṭhānaṁ,
thi-ap18:6.4	paṇipacca paṇīdahiṁ.
thi-ap18:7.1	Tato mama jino āha,
thi-ap18:7.2	‘sijjhataṁ paṇidhī tava;
thi-ap18:7.3	Sasaṅghe me kataṁ kāraṁ,
thi-ap18:7.4	appameyyaphalaṁ tayā.
thi-ap18:8.1	Satasahassito kappe,
thi-ap18:8.2	okkākakulasambhavo;
thi-ap18:8.3	Gotamo nāma gottena,
thi-ap18:8.4	satthā loke bhavissati.
thi-ap18:9.1	Tassa dhammesu dāyādā,
thi-ap18:9.2	orasā dhammanimmitā;
thi-ap18:9.3	Etadaggamanuppattā,
thi-ap18:9.4	khemā nāma bhavissati’.
thi-ap18:10.1	Tena kammena sukatena,
thi-ap18:10.2	cetanāpaṇidhīhi ca;
thi-ap18:10.3	Jahitvā mānusaṁ dehaṁ,
thi-ap18:10.4	tāvatiṁsūpagā ahaṁ.
thi-ap18:11.1	Tato cutā yāmamagaṁ,
thi-ap18:11.2	tatohaṁ tusitaṁ gatā;
thi-ap18:11.3	Tato ca nimmānaratiṁ,
thi-ap18:11.4	vasavattipuraṁ tato.
thi-ap18:12.1	Yattha yatthūpapajjāmi,
thi-ap18:12.2	tassa kammassa vāhasā;
thi-ap18:12.3	Tattha tattheva rājūnaṁ,
thi-ap18:12.4	mahesittamakārayiṁ.
thi-ap18:13.1	Tato cutā manussatte,
thi-ap18:13.2	rājūnaṁ cakkavattinaṁ;
thi-ap18:13.3	Maṇḍalīnañca rājūnaṁ,
thi-ap18:13.4	mahesittamakārayiṁ.
thi-ap18:14.1	Sampattiṁ anubhotvāna,
thi-ap18:14.2	devesu manujesu ca;
thi-ap18:14.3	Sabbattha sukhitā hutvā,
thi-ap18:14.4	nekakappesu saṁsariṁ.
thi-ap18:15.1	Ekanavutito kappe,
thi-ap18:15.2	vipassī lokanāyako;
thi-ap18:15.3	Uppajji cārudassano,
thi-ap18:15.4	sabbadhammavipassako.
thi-ap18:16.1	Tamahaṁ lokanāyakaṁ,
thi-ap18:16.2	upetvā narasārathiṁ;
thi-ap18:16.3	Dhammaṁ bhaṇitaṁ sutvāna,
thi-ap18:16.4	pabbajiṁ anagāriyaṁ.
thi-ap18:17.1	Dasavassasahassāni,
thi-ap18:17.2	tassa vīrassa sāsane;
thi-ap18:17.3	Brahmacariyaṁ caritvāna,
thi-ap18:17.4	yuttayogā bahussutā.
thi-ap18:18.1	Paccayākārakusalā,
thi-ap18:18.2	catusaccavisāradā;
thi-ap18:18.3	Nipuṇā cittakathikā,
thi-ap18:18.4	satthusāsanakārikā.
thi-ap18:19.1	Tato cutāhaṁ tusitaṁ,
thi-ap18:19.2	upapannā yasassinī;
thi-ap18:19.3	Abhibhomi tahiṁ aññe,
thi-ap18:19.4	brahmacārīphalenahaṁ.
thi-ap18:20.1	Yattha yatthūpapannāhaṁ,
thi-ap18:20.2	mahābhogā mahaddhanā;
thi-ap18:20.3	Medhāvinī rūpavatī,
thi-ap18:20.4	vinītaparisāpi ca.
thi-ap18:21.1	Bhavāmi tena kammena,
thi-ap18:21.2	yogena jinasāsane;
thi-ap18:21.3	Sabbā sampattiyo mayhaṁ,
thi-ap18:21.4	sulabhā manaso piyā.
thi-ap18:22.1	Yopi me bhavate bhattā,
thi-ap18:22.2	yattha yattha gatāyapi;
thi-ap18:22.3	Vimāneti na maṁ koci,
thi-ap18:22.4	paṭipattibalena me.
thi-ap18:23.1	Imamhi bhaddake kappe,
thi-ap18:23.2	brahmabandhu mahāyaso;
thi-ap18:23.3	Nāmena koṇāgamano,
thi-ap18:23.4	uppajji vadataṁ varo.
thi-ap18:24.1	Tadā hi bārāṇasiyaṁ,
thi-ap18:24.2	susamiddhakulappajā;
thi-ap18:24.3	Dhanañjānī sumedhā ca,
thi-ap18:24.4	ahampi ca tayo janā.
thi-ap18:25.1	Saṅghārāmamadāsimha,
thi-ap18:25.2	dānasahāyikā pure;
thi-ap18:25.3	Saṅghassa ca vihārampi,
thi-ap18:25.4	uddissa kārikā mayaṁ.
thi-ap18:26.1	Tato cutā mayaṁ sabbā,
thi-ap18:26.2	tāvatiṁsūpagā ahuṁ;
thi-ap18:26.3	Yasasā aggataṁ pattā,
thi-ap18:26.4	manussesu tatheva ca.
thi-ap18:27.1	Imasmiṁyeva kappamhi,
thi-ap18:27.2	brahmabandhu mahāyaso;
thi-ap18:27.3	Kassapo nāma gottena,
thi-ap18:27.4	uppajji vadataṁ varo.
thi-ap18:28.1	Upaṭṭhāko mahesissa,
thi-ap18:28.2	tadā āsi narissaro;
thi-ap18:28.3	Kāsirājā kikī nāma,
thi-ap18:28.4	bārāṇasipuruttame.
thi-ap18:29.1	Tassāsiṁ jeṭṭhikā dhītā,
thi-ap18:29.2	samaṇī iti vissutā;
thi-ap18:29.3	Dhammaṁ sutvā jinaggassa,
thi-ap18:29.4	pabbajjaṁ samarocayiṁ.
thi-ap18:30.1	Anujāni na no tāto,
thi-ap18:30.2	agāreva tadā mayaṁ;
thi-ap18:30.3	Vīsavassasahassāni,
thi-ap18:30.4	vicarimha atanditā.
thi-ap18:31.1	Komāribrahmacariyaṁ,
thi-ap18:31.2	rājakaññā sukhedhitā;
thi-ap18:31.3	Buddhopaṭṭhānaniratā,
thi-ap18:31.4	muditā satta dhītaro.
thi-ap18:32.1	Samaṇī samaṇaguttā ca,
thi-ap18:32.2	bhikkhunī bhikkhudāyikā;
thi-ap18:32.3	Dhammā ceva sudhammā ca,
thi-ap18:32.4	sattamī saṅghadāyikā.
thi-ap18:33.1	Ahaṁ uppalavaṇṇā ca,
thi-ap18:33.2	paṭācārā ca kuṇḍalā;
thi-ap18:33.3	Kisāgotamī dhammadinnā,
thi-ap18:33.4	visākhā hoti sattamī.
thi-ap18:34.1	Kadāci so narādicco,
thi-ap18:34.2	dhammaṁ desesi abbhutaṁ;
thi-ap18:34.3	Mahānidānasuttantaṁ,
thi-ap18:34.4	sutvā taṁ pariyāpuṇiṁ.
thi-ap18:35.1	Tehi kammehi sukatehi,
thi-ap18:35.2	cetanāpaṇidhīhi ca;
thi-ap18:35.3	Jahitvā mānusaṁ dehaṁ,
thi-ap18:35.4	tāvatiṁsamagacchahaṁ.
thi-ap18:36.1	Pacchime ca bhave dāni,
thi-ap18:36.2	sākalāya puruttame;
thi-ap18:36.3	Rañño maddassa dhītāmhi,
thi-ap18:36.4	manāpā dayitā piyā.
thi-ap18:37.1	Saha me jātamattamhi,
thi-ap18:37.2	khemaṁ tamhi pure ahu;
thi-ap18:37.3	Tato khemāti nāmaṁ me,
thi-ap18:37.4	guṇato upapajjatha.
thi-ap18:38.1	Yadāhaṁ yobbanaṁ pattā,
thi-ap18:38.2	rūpalāvaññabhūsitā;
thi-ap18:38.3	Tadā adāsi maṁ tāto,
thi-ap18:38.4	bimbisārassa rājino.
thi-ap18:39.1	Tassāhaṁ suppiyā āsiṁ,
thi-ap18:39.2	rūpake lāyane ratā;
thi-ap18:39.3	Rūpānaṁ dosavādīti,
thi-ap18:39.4	na upesiṁ mahādayaṁ.
thi-ap18:40.1	Bimbisāro tadā rājā,
thi-ap18:40.2	mamānuggahabuddhiyā;
thi-ap18:40.3	Vaṇṇayitvā veḷuvanaṁ,
thi-ap18:40.4	gāyake gāpayī mamaṁ.
thi-ap18:41.1	Rammaṁ veḷuvanaṁ yena,
thi-ap18:41.2	na diṭṭhaṁ sugatālayaṁ;
thi-ap18:41.3	Na tena nandanaṁ diṭṭhaṁ,
thi-ap18:41.4	iti maññāmase mayaṁ.
thi-ap18:42.1	Yena veḷuvanaṁ diṭṭhaṁ,
thi-ap18:42.2	naranandananandanaṁ;
thi-ap18:42.3	Sudiṭṭhaṁ nandanaṁ tena,
thi-ap18:42.4	amarindasunandanaṁ.
thi-ap18:43.1	Vihāya nandanaṁ devā,
thi-ap18:43.2	otaritvā mahītalaṁ;
thi-ap18:43.3	Rammaṁ veḷuvanaṁ disvā,
thi-ap18:43.4	na tappanti suvimhitā.
thi-ap18:44.1	Rājapuññena nibbattaṁ,
thi-ap18:44.2	buddhapuññena bhūsitaṁ;
thi-ap18:44.3	Ko vattā tassa nissesaṁ,
thi-ap18:44.4	vanassa guṇasañcayaṁ.
thi-ap18:45.1	Taṁ sutvā vanasamiddhaṁ,
thi-ap18:45.2	mama sotamanoharaṁ;
thi-ap18:45.3	Daṭṭhukāmā tamuyyānaṁ,
thi-ap18:45.4	rañño ārocayiṁ tadā.
thi-ap18:46.1	Mahatā parivārena,
thi-ap18:46.2	tadā ca so mahīpati;
thi-ap18:46.3	Maṁ pesesi tamuyyānaṁ,
thi-ap18:46.4	dassanāya samussukaṁ.
thi-ap18:47.1	‘Gaccha passa mahābhoge,
thi-ap18:47.2	vanaṁ nettarasāyanaṁ;
thi-ap18:47.3	Yaṁ sadā bhāti siriyā,
thi-ap18:47.4	sugatābhānurañjitaṁ’.
thi-ap18:48.1	‘Yadā ca piṇḍāya muni,
thi-ap18:48.2	giribbajapuruttamaṁ;
thi-ap18:48.3	Paviṭṭhohaṁ tadāyeva,
thi-ap18:48.4	vanaṁ daṭṭhumupāgamiṁ’.
thi-ap18:49.1	Tadā taṁ phullavipinaṁ,
thi-ap18:49.2	nānābhamarakūjitaṁ;
thi-ap18:49.3	Kokilāgītasahitaṁ,
thi-ap18:49.4	mayūragaṇanaccitaṁ.
thi-ap18:50.1	Appasaddamanākiṇṇaṁ,
thi-ap18:50.2	nānācaṅkamabhūsitaṁ;
thi-ap18:50.3	Kuṭimaṇḍapasaṅkiṇṇaṁ,
thi-ap18:50.4	yogīvaravirājitaṁ.
thi-ap18:51.1	Vicarantī amaññissaṁ,
thi-ap18:51.2	‘saphalaṁ nayanaṁ mama’;
thi-ap18:51.3	Tatthāpi taruṇaṁ bhikkhuṁ,
thi-ap18:51.4	yuttaṁ disvā vicintayiṁ.
thi-ap18:52.1	‘Īdise vipine ramme,
thi-ap18:52.2	ṭhitoyaṁ navayobbane;
thi-ap18:52.3	Vasantamiva kantena,
thi-ap18:52.4	rūpena ca samanvito.
thi-ap18:53.1	Nisinno rukkhamūlamhi,
thi-ap18:53.2	muṇḍo saṅghāṭipāruto;
thi-ap18:53.3	Jhāyate vatayaṁ bhikkhu,
thi-ap18:53.4	hitvā visayajaṁ ratiṁ.
thi-ap18:54.1	Nanu nāma gahaṭṭhena,
thi-ap18:54.2	kāmaṁ bhutvā yathāsukhaṁ;
thi-ap18:54.3	Pacchā jiṇṇena dhammoyaṁ,
thi-ap18:54.4	caritabbo subhaddako’.
thi-ap18:55.1	‘Suññakan’ti viditvāna,
thi-ap18:55.2	‘gandhagehaṁ jinālayaṁ’;
thi-ap18:55.3	Upetvā jinamaddakkhaṁ,
thi-ap18:55.4	udayantaṁva bhākaraṁ.
thi-ap18:56.1	Ekakaṁ sukhamāsīnaṁ,
thi-ap18:56.2	bījamānaṁ varitthiyā;
thi-ap18:56.3	Disvānevaṁ vicintesiṁ,
thi-ap18:56.4	‘nāyaṁ lūkho narāsabho.
thi-ap18:57.1	Sā kaññā kanakābhāsā,
thi-ap18:57.2	padumānanalocanā;
thi-ap18:57.3	Bimboṭṭhī kundadasanā,
thi-ap18:57.4	manonettarasāyanā.
thi-ap18:58.1	Hemadolābhasavanā,
thi-ap18:58.2	kalikākārasutthanī;
thi-ap18:58.3	Vedimajjhāva sussoṇī,
thi-ap18:58.4	rambhoru cārubhūsanā.
thi-ap18:59.1	Rattaṁsakupasambyānā,
thi-ap18:59.2	nīlamaṭṭhanivāsanā;
thi-ap18:59.3	Atappaneyyarūpena,
thi-ap18:59.4	hāsabhāvasamanvitā’.
thi-ap18:60.1	Disvā tamevaṁ cintesiṁ,
thi-ap18:60.2	‘ahoyamabhirūpinī;
thi-ap18:60.3	Na mayānena nettena,
thi-ap18:60.4	diṭṭhapubbā kudācanaṁ’.
thi-ap18:61.1	Tato jarābhibhūtā sā,
thi-ap18:61.2	vivaṇṇā vikatānanā;
thi-ap18:61.3	Bhinnadantā setasirā,
thi-ap18:61.4	salālā vadanāsuci.
thi-ap18:62.1	Saṅkhittakaṇṇā setakkhī,
thi-ap18:62.2	lambāsubhapayodharā;
thi-ap18:62.3	Valivitatasabbaṅgī,
thi-ap18:62.4	sirāvitatadehinī.
thi-ap18:63.1	Nataṅgā daṇḍadutiyā,
thi-ap18:63.2	upphāsulikatā kisā;
thi-ap18:63.3	Pavedhamānā patitā,
thi-ap18:63.4	nissasantī muhuṁ muhuṁ.
thi-ap18:64.1	Tato me āsi saṁvego,
thi-ap18:64.2	abbhuto lomahaṁsano;
thi-ap18:64.3	‘Dhiratthu rūpaṁ asuciṁ,
thi-ap18:64.4	ramante yattha bālisā’.
thi-ap18:65.1	Tadā mahākāruṇiko,
thi-ap18:65.2	disvā saṁviggamānasaṁ;
thi-ap18:65.3	Udaggacitto sugato,
thi-ap18:65.4	imā gāthā abhāsatha.
thi-ap18:66.1	‘Āturaṁ asuciṁ pūtiṁ,
thi-ap18:66.2	passa kheme samussayaṁ;
thi-ap18:66.3	Uggharantaṁ paggharantaṁ,
thi-ap18:66.4	bālānaṁ abhinanditaṁ.
thi-ap18:67.1	Asubhāya cittaṁ bhāvehi,
thi-ap18:67.2	ekaggaṁ susamāhitaṁ;
thi-ap18:67.3	Sati kāyagatā tyatthu,
thi-ap18:67.4	nibbidā bahulā bhava.
thi-ap18:68.1	Yathā idaṁ tathā etaṁ,
thi-ap18:68.2	yathā etaṁ tathā idaṁ;
thi-ap18:68.3	Ajjhattañca bahiddhā ca,
thi-ap18:68.4	kāye chandaṁ virājaya.
thi-ap18:69.1	Animittañca bhāvehi,
thi-ap18:69.2	mānānusayamujjaha;
thi-ap18:69.3	Tato mānābhisamayā,
thi-ap18:69.4	upasantā carissasi.
thi-ap18:70.1	Ye rāgarattānupatanti sotaṁ,
thi-ap18:70.2	Sayaṁ kataṁ makkaṭakova jālaṁ;
thi-ap18:70.3	Etampi chetvāna paribbajanti,
thi-ap18:70.4	Anapekkhino kāmasukhaṁ pahāya’.
thi-ap18:71.1	Tato kallitacittaṁ maṁ,
thi-ap18:71.2	ñatvāna narasārathi;
thi-ap18:71.3	Mahānidānaṁ desesi,
thi-ap18:71.4	suttantaṁ vinayāya me.
thi-ap18:72.1	Sutvā suttantaseṭṭhaṁ taṁ,
thi-ap18:72.2	pubbasaññamanussariṁ;
thi-ap18:72.3	Tattha ṭhitāvahaṁ santī,
thi-ap18:72.4	dhammacakkhuṁ visodhayiṁ.
thi-ap18:73.1	Nipatitvā mahesissa,
thi-ap18:73.2	pādamūlamhi tāvade;
thi-ap18:73.3	Accayaṁ desanatthāya,
thi-ap18:73.4	idaṁ vacanamabraviṁ.
thi-ap18:74.1	‘Namo te sabbadassāvī,
thi-ap18:74.2	namo te karuṇākara;
thi-ap18:74.3	Namo te tiṇṇasaṁsāra,
thi-ap18:74.4	namo te amataṁdada.
thi-ap18:75.1	Diṭṭhigahanapakkhandā,
thi-ap18:75.2	kāmarāgavimohitā;
thi-ap18:75.3	Tayā sammā upāyena,
thi-ap18:75.4	vinītā vinaye ratā.
thi-ap18:76.1	Adassanena vibhogā,
thi-ap18:76.2	tādisānaṁ mahesinaṁ;
thi-ap18:76.3	Anubhonti mahādukkhaṁ,
thi-ap18:76.4	sattā saṁsārasāgare.
thi-ap18:77.1	Yadāhaṁ lokasaraṇaṁ,
thi-ap18:77.2	araṇaṁ araṇantaguṁ;
thi-ap18:77.3	Nāddasāmi adūraṭṭhaṁ,
thi-ap18:77.4	desayāmi tamaccayaṁ.
thi-ap18:78.1	Mahāhitaṁ varadadaṁ,
thi-ap18:78.2	ahitoti visaṅkitā;
thi-ap18:78.3	Nopesiṁ rūpaniratā,
thi-ap18:78.4	desayāmi tamaccayaṁ’.
thi-ap18:79.1	Tadā madhuranigghoso,
thi-ap18:79.2	mahākāruṇiko jino;
thi-ap18:79.3	Avoca tiṭṭha khemeti,
thi-ap18:79.4	siñcanto amatena maṁ.
thi-ap18:80.1	Tadā paṇamya sirasā,
thi-ap18:80.2	katvā ca naṁ padakkhiṇaṁ;
thi-ap18:80.3	Gantvā disvā narapatiṁ,
thi-ap18:80.4	idaṁ vacanamabraviṁ.
thi-ap18:81.1	‘Aho sammā upāyo te,
thi-ap18:81.2	cintitoyamarindama;
thi-ap18:81.3	Vanadassanakāmāya,
thi-ap18:81.4	diṭṭho nibbānato muni.
thi-ap18:82.1	Yadi te ruccate rāja,
thi-ap18:82.2	sāsane tassa tādino;
thi-ap18:82.3	Pabbajissāmi rūpehaṁ,
thi-ap18:82.4	nibbinnā munivāṇinā’.
thi-ap18:83.1	Dutiyaṁ bhāṇavāraṁ.
thi-ap18:84.1	Añjaliṁ paggahetvāna,
thi-ap18:84.2	tadāha sa mahīpati;
thi-ap18:84.3	‘Anujānāmi te bhadde,
thi-ap18:84.4	pabbajjā tava sijjhatu’.
thi-ap18:85.1	Pabbajitvā tadā cāhaṁ,
thi-ap18:85.2	addhamāse upaṭṭhite;
thi-ap18:85.3	Dīpodayañca bhedañca,
thi-ap18:85.4	disvā saṁviggamānasā.
thi-ap18:86.1	Nibbinnā sabbasaṅkhāre,
thi-ap18:86.2	paccayākārakovidā;
thi-ap18:86.3	Caturoghe atikkamma,
thi-ap18:86.4	arahattamapāpuṇiṁ.
thi-ap18:87.1	Iddhīsu ca vasī āsiṁ,
thi-ap18:87.2	dibbāya sotadhātuyā;
thi-ap18:87.3	Cetopariyañāṇassa,
thi-ap18:87.4	vasī cāpi bhavāmahaṁ.
thi-ap18:88.1	Pubbenivāsaṁ jānāmi,
thi-ap18:88.2	dibbacakkhu visodhitaṁ;
thi-ap18:88.3	Sabbāsavā parikkhīṇā,
thi-ap18:88.4	natthi dāni punabbhavo.
thi-ap18:89.1	Atthadhammaniruttīsu,
thi-ap18:89.2	paṭibhāne tatheva ca;
thi-ap18:89.3	Parisuddhaṁ mama ñāṇaṁ,
thi-ap18:89.4	uppannaṁ buddhasāsane.
thi-ap18:90.1	Kusalāhaṁ visuddhīsu,
thi-ap18:90.2	kathāvatthuvisāradā;
thi-ap18:90.3	Abhidhammanayaññū ca,
thi-ap18:90.4	vasippattāmhi sāsane.
thi-ap18:91.1	Tato toraṇavatthusmiṁ,
thi-ap18:91.2	raññā kosalasāminā;
thi-ap18:91.3	Pucchitā nipuṇe pañhe,
thi-ap18:91.4	byākarontī yathātathaṁ.
thi-ap18:92.1	Tadā sa rājā sugataṁ,
thi-ap18:92.2	upasaṅkamma pucchatha;
thi-ap18:92.3	Tatheva buddho byākāsi,
thi-ap18:92.4	yathā te byākatā mayā.
thi-ap18:93.1	Jino tasmiṁ guṇe tuṭṭho,
thi-ap18:93.2	etadagge ṭhapesi maṁ;
thi-ap18:93.3	Mahāpaññānamaggāti,
thi-ap18:93.4	bhikkhunīnaṁ naruttamo.
thi-ap18:94.1	Kilesā jhāpitā mayhaṁ,
thi-ap18:94.2	…pe…
thi-ap18:94.3	viharāmi anāsavā.
thi-ap18:95.1	Svāgataṁ vata me āsi,
thi-ap18:95.2	…pe…
thi-ap18:95.3	kataṁ buddhassa sāsanaṁ.
thi-ap18:96.1	Paṭisambhidā catasso,
thi-ap18:96.2	…pe…
thi-ap18:96.3	kataṁ buddhassa sāsanaṁ”.
thi-ap18:97.1	Itthaṁ sudaṁ khemā bhikkhunī imā gāthāyo abhāsitthāti.
thi-ap18:98.1	Khemātheriyāpadānaṁ aṭṭhamaṁ.
thi-ap19:0.1	Therīapadāna
thi-ap19:0.2	Ekūposathikavagga
thi-ap19:0.3	Uppalavaṇṇātherīapadāna
thi-ap19:1.1	“Bhikkhunī uppalavaṇṇā,
thi-ap19:1.2	iddhiyā pāramiṁ gatā;
thi-ap19:1.3	Vanditvā satthuno pāde,
thi-ap19:1.4	idaṁ vacanamabravi.
thi-ap19:2.1	‘Nitthiṇṇā jātisaṁsāraṁ,
thi-ap19:2.2	pattāhaṁ acalaṁ padaṁ;
thi-ap19:2.3	Sabbadukkhaṁ mayā khīṇaṁ,
thi-ap19:2.4	ārocemi mahāmuni.
thi-ap19:3.1	Yāvatā parisā atthi,
thi-ap19:3.2	pasannā jinasāsane;
thi-ap19:3.3	Yassā ca meparādhotthi,
thi-ap19:3.4	khamantu jinasammukhā.
thi-ap19:4.1	Saṁsāre saṁsarantiyā,
thi-ap19:4.2	khalitaṁ me sace bhave;
thi-ap19:4.3	Ārocemi mahāvīra,
thi-ap19:4.4	aparādhaṁ khamassu taṁ’.
thi-ap19:5.1	‘Iddhiñcāpi nidassehi,
thi-ap19:5.2	mama sāsanakārike;
thi-ap19:5.3	Catasso parisā ajja,
thi-ap19:5.4	kaṅkhaṁ chindāhi yāvatā’.
thi-ap19:6.1	‘Dhītā tuyhaṁ mahāvīra,
thi-ap19:6.2	paññavanta jutindhara;
thi-ap19:6.3	Bahuñca dukkaraṁ kammaṁ,
thi-ap19:6.4	kataṁ me atidukkaraṁ.
thi-ap19:7.1	Uppalasseva me vaṇṇo,
thi-ap19:7.2	nāmenuppalanāmikā;
thi-ap19:7.3	Sāvikā te mahāvīra,
thi-ap19:7.4	pāde vandāmi cakkhuma.
thi-ap19:8.1	Rāhulo ca ahañceva,
thi-ap19:8.2	nekajātisate bahū;
thi-ap19:8.3	Ekasmiṁ sambhave jātā,
thi-ap19:8.4	samānachandamānasā.
thi-ap19:9.1	Nibbatti ekato hoti,
thi-ap19:9.2	jātiyāpi ca ekato;
thi-ap19:9.3	Pacchime bhave sampatte,
thi-ap19:9.4	ubhopi nānāsambhavā.
thi-ap19:10.1	Putto ca rāhulo nāma,
thi-ap19:10.2	dhītā uppalasavhayā;
thi-ap19:10.3	Passa vīra mamaṁ iddhiṁ,
thi-ap19:10.4	balaṁ dassemi satthuno’.
thi-ap19:11.1	Mahāsamudde caturo,
thi-ap19:11.2	pakkhipi hatthapātiyaṁ;
thi-ap19:11.3	Telaṁ hatthagatañceva,
thi-ap19:11.4	khiḍḍo komārako yathā.
thi-ap19:12.1	Ubbattayitvā pathaviṁ,
thi-ap19:12.2	pakkhipi hatthapātiyaṁ;
thi-ap19:12.3	Cittaṁ muñjaṁ yathā nāma,
thi-ap19:12.4	luñci komārako yuvā.
thi-ap19:13.1	Cakkavāḷasamaṁ pāṇiṁ,
thi-ap19:13.2	chādayitvāna matthake;
thi-ap19:13.3	Vassāpetvāna phusitaṁ,
thi-ap19:13.4	nānāvaṇṇaṁ punappunaṁ.
thi-ap19:14.1	Bhūmiṁ udukkhalaṁ katvā,
thi-ap19:14.2	dhaññaṁ katvāna sakkharaṁ;
thi-ap19:14.3	Sineruṁ musalaṁ katvā,
thi-ap19:14.4	maddi komārikā yathā.
thi-ap19:15.1	‘Dhītāhaṁ buddhaseṭṭhassa,
thi-ap19:15.2	nāmenuppalasavhayā;
thi-ap19:15.3	Abhiññāsu vasībhūtā,
thi-ap19:15.4	tava sāsanakārikā.
thi-ap19:16.1	Nānāvikubbanaṁ katvā,
thi-ap19:16.2	dassetvā lokanāyakaṁ;
thi-ap19:16.3	Nāmagottañca sāvetvā,
thi-ap19:16.4	pāde vandāmi cakkhuma.
thi-ap19:17.1	Iddhīsu ca vasī homi,
thi-ap19:17.2	dibbāya sotadhātuyā;
thi-ap19:17.3	Cetopariyañāṇassa,
thi-ap19:17.4	vasī homi mahāmune.
thi-ap19:18.1	Pubbenivāsaṁ jānāmi,
thi-ap19:18.2	dibbacakkhu visodhitaṁ;
thi-ap19:18.3	Sabbāsavā parikkhīṇā,
thi-ap19:18.4	natthi dāni punabbhavo.
thi-ap19:19.1	Atthadhammaniruttīsu,
thi-ap19:19.2	Paṭibhāne tatheva ca;
thi-ap19:19.3	Ñāṇaṁ me vimalaṁ suddhaṁ,
thi-ap19:19.4	Sabhāvena mahesino.
thi-ap19:20.1	Purimānaṁ jinaggānaṁ,
thi-ap19:20.2	saṅgamaṁ te nidassitaṁ;
thi-ap19:20.3	Adhikāraṁ bahuṁ mayhaṁ,
thi-ap19:20.4	tuyhatthāya mahāmuni.
thi-ap19:21.1	Yaṁ mayā pūritaṁ kammaṁ,
thi-ap19:21.2	Kusalaṁ sara me muni;
thi-ap19:21.3	Tavatthāya mahāvīra,
thi-ap19:21.4	Puññaṁ upacitaṁ mayā.
thi-ap19:22.1	Abhabbaṭṭhāne vajjetvā,
thi-ap19:22.2	vārayantī anācaraṁ;
thi-ap19:22.3	Tavatthāya mahāvīra,
thi-ap19:22.4	cattaṁ me jīvituttamaṁ.
thi-ap19:23.1	Dasakoṭisahassāni,
thi-ap19:23.2	adāsiṁ mama jīvitaṁ;
thi-ap19:23.3	Pariccattā ca me homi,
thi-ap19:23.4	tavatthāya mahāmuni’.
thi-ap19:24.1	Tadātivimhitā sabbā,
thi-ap19:24.2	sirasāva katañjalī;
thi-ap19:24.3	‘Avocayye kathaṁ āsi,
thi-ap19:24.4	atuliddhiparakkamā’.
thi-ap19:25.1	Satasahassito kappe,
thi-ap19:25.2	nāgakaññā ahaṁ tadā;
thi-ap19:25.3	Vimalā nāma nāmena,
thi-ap19:25.4	kaññānaṁ sādhusammatā.
thi-ap19:26.1	Mahorago mahānāgo,
thi-ap19:26.2	pasanno jinasāsane;
thi-ap19:26.3	Padumuttaraṁ mahātejaṁ,
thi-ap19:26.4	nimantesi sasāvakaṁ.
thi-ap19:27.1	Ratanamayaṁ maṇḍapaṁ,
thi-ap19:27.2	pallaṅkaṁ ratanāmayaṁ;
thi-ap19:27.3	Ratanaṁ vālukākiṇṇaṁ,
thi-ap19:27.4	upabhogaṁ ratanāmayaṁ.
thi-ap19:28.1	Maggañca paṭiyādesi,
thi-ap19:28.2	ratanaddhajabhūsitaṁ;
thi-ap19:28.3	Paccuggantvāna sambuddhaṁ,
thi-ap19:28.4	vajjanto tūriyehi so.
thi-ap19:29.1	Parisāhi ca catūhi,
thi-ap19:29.2	parivuto lokanāyako;
thi-ap19:29.3	Mahoragassa bhavane,
thi-ap19:29.4	nisīdi paramāsane.
thi-ap19:30.1	Annaṁ pānaṁ khādanīyaṁ,
thi-ap19:30.2	bhojanañca mahārahaṁ;
thi-ap19:30.3	Varaṁ varañca pādāsi,
thi-ap19:30.4	nāgarājā mahāyasaṁ.
thi-ap19:31.1	Bhuñjitvāna sambuddho,
thi-ap19:31.2	pattaṁ dhovitvā yoniso;
thi-ap19:31.3	Anumodanīyaṅkāsi,
thi-ap19:31.4	nāgakaññā mahiddhikā.
thi-ap19:32.1	Sabbaññuṁ phullitaṁ disvā,
thi-ap19:32.2	nāgakaññā mahāyasaṁ;
thi-ap19:32.3	Pasannaṁ satthuno cittaṁ,
thi-ap19:32.4	sunibandhañca mānasaṁ.
thi-ap19:33.1	Mamañca cittamaññāya,
thi-ap19:33.2	jalajuttamanāmako;
thi-ap19:33.3	Tasmiṁ khaṇe mahāvīro,
thi-ap19:33.4	bhikkhuniṁ dassayiddhiyā.
thi-ap19:34.1	Iddhī anekā dassesi,
thi-ap19:34.2	bhikkhunī sā visāradā;
thi-ap19:34.3	Pamoditā vedajātā,
thi-ap19:34.4	satthāraṁ idamabravi.
thi-ap19:35.1	‘Addasāhaṁ imaṁ iddhiṁ,
thi-ap19:35.2	sumanaṁ itarāyapi;
thi-ap19:35.3	Kathaṁ ahosi sā vīra,
thi-ap19:35.4	iddhiyā suvisāradā’.
thi-ap19:36.1	‘Orasā mukhato jātā,
thi-ap19:36.2	dhītā mama mahiddhikā;
thi-ap19:36.3	Mamānusāsanikarā,
thi-ap19:36.4	iddhiyā suvisāradā’.
thi-ap19:37.1	Buddhassa vacanaṁ sutvā,
thi-ap19:37.2	evaṁ patthesahaṁ tadā;
thi-ap19:37.3	‘Ahampi tādisā homi,
thi-ap19:37.4	iddhiyā suvisāradā.
thi-ap19:38.1	Pamoditāhaṁ sumanā,
thi-ap19:38.2	patthe uttamamānasā;
thi-ap19:38.3	Anāgatamhi addhāne,
thi-ap19:38.4	īdisā homi nāyaka’.
thi-ap19:39.1	Maṇimayamhi pallaṅke,
thi-ap19:39.2	maṇḍapamhi pabhassare;
thi-ap19:39.3	Annapānena tappetvā,
thi-ap19:39.4	sasaṅghaṁ lokanāyakaṁ.
thi-ap19:40.1	Nāgānaṁ pavaraṁ pupphaṁ,
thi-ap19:40.2	aruṇaṁ nāma uppalaṁ;
thi-ap19:40.3	‘Vaṇṇaṁ me īdisaṁ hotu’,
thi-ap19:40.4	pūjesiṁ lokanāyakaṁ.
thi-ap19:41.1	Tena kammena sukatena,
thi-ap19:41.2	cetanāpaṇidhīhi ca;
thi-ap19:41.3	Jahitvā mānusaṁ dehaṁ,
thi-ap19:41.4	tāvatiṁsamagacchahaṁ.
thi-ap19:42.1	Tato cutāhaṁ manuje,
thi-ap19:42.2	upapannā sayambhuno;
thi-ap19:42.3	Uppalehi paṭicchannaṁ,
thi-ap19:42.4	piṇḍapātamadāsahaṁ.
thi-ap19:43.1	Ekanavutito kappe,
thi-ap19:43.2	vipassī nāma nāyako;
thi-ap19:43.3	Uppajji cārudassano,
thi-ap19:43.4	sabbadhammesu cakkhumā.
thi-ap19:44.1	Seṭṭhidhītā tadā hutvā,
thi-ap19:44.2	bārāṇasipuruttame;
thi-ap19:44.3	Nimantetvāna sambuddhaṁ,
thi-ap19:44.4	sasaṅghaṁ lokanāyakaṁ.
thi-ap19:45.1	Mahādānaṁ daditvāna,
thi-ap19:45.2	uppalehi vināyakaṁ;
thi-ap19:45.3	Pūjayitvā cetasāva,
thi-ap19:45.4	vaṇṇasobhaṁ apatthayiṁ.
thi-ap19:46.1	Imamhi bhaddake kappe,
thi-ap19:46.2	brahmabandhu mahāyaso;
thi-ap19:46.3	Kassapo nāma gottena,
thi-ap19:46.4	uppajji vadataṁ varo.
thi-ap19:47.1	Upaṭṭhāko mahesissa,
thi-ap19:47.2	tadā āsi narissaro;
thi-ap19:47.3	Kāsirājā kikī nāma,
thi-ap19:47.4	bārāṇasipuruttame.
thi-ap19:48.1	Tassāsiṁ dutiyā dhītā,
thi-ap19:48.2	samaṇaguttasavhayā;
thi-ap19:48.3	Dhammaṁ sutvā jinaggassa,
thi-ap19:48.4	pabbajjaṁ samarocayiṁ.
thi-ap19:49.1	Anujāni na no tāto,
thi-ap19:49.2	agāreva tadā mayaṁ;
thi-ap19:49.3	Vīsavassasahassāni,
thi-ap19:49.4	vicarimha atanditā.
thi-ap19:50.1	Komāribrahmacariyaṁ,
thi-ap19:50.2	rājakaññā sukhedhitā;
thi-ap19:50.3	Buddhopaṭṭhānaniratā,
thi-ap19:50.4	muditā sattadhītaro.
thi-ap19:51.1	Samaṇī samaṇaguttā ca,
thi-ap19:51.2	bhikkhunī bhikkhudāyikā;
thi-ap19:51.3	Dhammā ceva sudhammā ca,
thi-ap19:51.4	sattamī saṅghadāyikā.
thi-ap19:52.1	Ahaṁ khemā ca sappaññā,
thi-ap19:52.2	paṭācārā ca kuṇḍalā;
thi-ap19:52.3	Kisāgotamī dhammadinnā,
thi-ap19:52.4	visākhā hoti sattamī.
thi-ap19:53.1	Tehi kammehi sukatehi,
thi-ap19:53.2	cetanāpaṇidhīhi ca;
thi-ap19:53.3	Jahitvā mānusaṁ dehaṁ,
thi-ap19:53.4	tāvatiṁsamagacchahaṁ.
thi-ap19:54.1	Tato cutā manussesu,
thi-ap19:54.2	upapannā mahākule;
thi-ap19:54.3	Pītaṁ maṭṭhaṁ varaṁ dussaṁ,
thi-ap19:54.4	adaṁ arahato ahaṁ.
thi-ap19:55.1	Tato cutāriṭṭhapure,
thi-ap19:55.2	jātā vippakule ahaṁ;
thi-ap19:55.3	Dhītā tiriṭivacchassa,
thi-ap19:55.4	ummādantī manoharā.
thi-ap19:56.1	Tato cutā janapade,
thi-ap19:56.2	kule aññatare ahaṁ;
thi-ap19:56.3	Pasūtā nātiphītamhi,
thi-ap19:56.4	sāliṁ gopemahaṁ tadā.
thi-ap19:57.1	Disvā paccekasambuddhaṁ,
thi-ap19:57.2	pañcalājāsatānihaṁ;
thi-ap19:57.3	Datvā padumacchannāni,
thi-ap19:57.4	pañca puttasatānihaṁ.
thi-ap19:58.1	Patthayiṁ tepi patthesuṁ,
thi-ap19:58.2	madhuṁ datvā sayambhuno;
thi-ap19:58.3	Tato cutā araññehaṁ,
thi-ap19:58.4	ajāyiṁ padumodare.
thi-ap19:59.1	Kāsirañño mahesīhaṁ,
thi-ap19:59.2	hutvā sakkatapūjitā;
thi-ap19:59.3	Ajaniṁ rājaputtānaṁ,
thi-ap19:59.4	anūnaṁ satapañcakaṁ.
thi-ap19:60.1	Yadā te yobbanappattā,
thi-ap19:60.2	kīḷantā jalakīḷitaṁ;
thi-ap19:60.3	Disvā opattapadumaṁ,
thi-ap19:60.4	āsuṁ paccekanāyakā.
thi-ap19:61.1	Sāhaṁ tehi vinābhūtā,
thi-ap19:61.2	sutavīrehi sokinī;
thi-ap19:61.3	Cutā isigilipasse,
thi-ap19:61.4	gāmakamhi ajāyihaṁ.
thi-ap19:62.1	Yadā buddhā sutamatī,
thi-ap19:62.2	sutānaṁ bhattunopi ca;
thi-ap19:62.3	Yāguṁ ādāya gacchantī,
thi-ap19:62.4	aṭṭha paccekanāyake.
thi-ap19:63.1	Bhikkhāya gāmaṁ gacchante,
thi-ap19:63.2	disvā putte anussariṁ;
thi-ap19:63.3	Khīradhārā viniggacchi,
thi-ap19:63.4	tadā me puttapemasā.
thi-ap19:64.1	Tato tesaṁ adaṁ yāguṁ,
thi-ap19:64.2	pasannā sehi pāṇibhi;
thi-ap19:64.3	Tato cutāhaṁ tidasaṁ,
thi-ap19:64.4	nandanaṁ upapajjahaṁ.
thi-ap19:65.1	Anubhotvā sukhaṁ dukkhaṁ,
thi-ap19:65.2	saṁsaritvā bhavābhave;
thi-ap19:65.3	Tavatthāya mahāvīra,
thi-ap19:65.4	pariccattañca jīvitaṁ.
thi-ap19:66.1	Evaṁ bahuvidhaṁ dukkhaṁ,
thi-ap19:66.2	sampattī ca bahubbidhā;
thi-ap19:66.3	Pacchime bhave sampatte,
thi-ap19:66.4	jātā sāvatthiyaṁ pure.
thi-ap19:67.1	Mahādhanaseṭṭhikule,
thi-ap19:67.2	sukhite sajjite tathā;
thi-ap19:67.3	Nānāratanapajjote,
thi-ap19:67.4	sabbakāmasamiddhine.
thi-ap19:68.1	Sakkatā pūjitā ceva,
thi-ap19:68.2	mānitāpacitā tathā;
thi-ap19:68.3	Rūpasobhaggasampannā,
thi-ap19:68.4	kulesu atisakkatā.
thi-ap19:69.1	Atīva patthitā cāsiṁ,
thi-ap19:69.2	rūpabhogasirīhi ca;
thi-ap19:69.3	Patthitā seṭṭhiputtehi,
thi-ap19:69.4	anekehi satehipi.
thi-ap19:70.1	Agāraṁ pajahitvāna,
thi-ap19:70.2	pabbajiṁ anagāriyaṁ;
thi-ap19:70.3	Aḍḍhamāse asampatte,
thi-ap19:70.4	catusaccamapāpuṇiṁ.
thi-ap19:71.1	Iddhiyā abhinimmitvā,
thi-ap19:71.2	caturassaṁ rathaṁ ahaṁ;
thi-ap19:71.3	Buddhassa pāde vandissaṁ,
thi-ap19:71.4	lokanāthassa tādino.
thi-ap19:72.1	‘Supupphitaggaṁ upagamma pādapaṁ,
thi-ap19:72.2	Ekā tuvaṁ tiṭṭhasi sālamūle;
thi-ap19:72.3	Na cāpi te dutiyo atthi koci,
thi-ap19:72.4	Bāle na tvaṁ bhāyasi dhuttakānaṁ’.
thi-ap19:73.1	‘Sataṁ sahassānipi dhuttakānaṁ,
thi-ap19:73.2	Samāgatā edisakā bhaveyyuṁ;
thi-ap19:73.3	Lomaṁ na iñje na sampavedhe,
thi-ap19:73.4	Kiṁ me tuvaṁ māra karissaseko.
thi-ap19:74.1	Esā antaradhāyāmi,
thi-ap19:74.2	kucchiṁ vā pavisāmi te;
thi-ap19:74.3	Bhamukantarikāyampi,
thi-ap19:74.4	tiṭṭhantiṁ maṁ na dakkhasi.
thi-ap19:75.1	Cittasmiṁ vasībhūtāmhi,
thi-ap19:75.2	iddhipādā subhāvitā;
thi-ap19:75.3	Sabbabandhanamuttāmhi,
thi-ap19:75.4	na taṁ bhāyāmi āvuso.
thi-ap19:76.1	Sattisūlūpamā kāmā,
thi-ap19:76.2	khandhāsaṁ adhikuṭṭanā;
thi-ap19:76.3	Yaṁ tvaṁ kāmaratiṁ brūsi,
thi-ap19:76.4	aratī dāni sā mama.
thi-ap19:77.1	Sabbattha vihatā nandī,
thi-ap19:77.2	tamokhandho padālito;
thi-ap19:77.3	Evaṁ jānāhi pāpima,
thi-ap19:77.4	nihato tvamasi antaka’.
thi-ap19:78.1	Jino tamhi guṇe tuṭṭho,
thi-ap19:78.2	etadagge ṭhapesi maṁ;
thi-ap19:78.3	Aggā iddhimatīnanti,
thi-ap19:78.4	parisāsu vināyako.
thi-ap19:79.1	Pariciṇṇo mayā satthā,
thi-ap19:79.2	kataṁ buddhassa sāsanaṁ;
thi-ap19:79.3	Ohito garuko bhāro,
thi-ap19:79.4	bhavanettisamūhatā.
thi-ap19:80.1	Yassatthāya pabbajitā,
thi-ap19:80.2	agārasmānagāriyaṁ;
thi-ap19:80.3	So me attho anuppatto,
thi-ap19:80.4	sabbasaṁyojanakkhayo.
thi-ap19:81.1	Cīvaraṁ piṇḍapātañca,
thi-ap19:81.2	paccayaṁ sayanāsanaṁ;
thi-ap19:81.3	Khaṇena upanāmenti,
thi-ap19:81.4	sahassāni samantato.
thi-ap19:82.1	Kilesā jhāpitā mayhaṁ,
thi-ap19:82.2	…pe…
thi-ap19:82.3	viharāmi anāsavā.
thi-ap19:83.1	Svāgataṁ vata me āsi,
thi-ap19:83.2	…pe…
thi-ap19:83.3	kataṁ buddhassa sāsanaṁ.
thi-ap19:84.1	Paṭisambhidā catasso,
thi-ap19:84.2	…pe…
thi-ap19:84.3	kataṁ buddhassa sāsanaṁ”.
thi-ap19:85.1	Itthaṁ sudaṁ uppalavaṇṇā bhikkhunī imā gāthāyo abhāsitthāti.
thi-ap19:86.1	Uppalavaṇṇātheriyāpadānaṁ navamaṁ.
thi-ap20:0.1	Therīapadāna
thi-ap20:0.2	Ekūposathikavagga
thi-ap20:0.3	Paṭācārātherīapadāna
thi-ap20:1.1	“Padumuttaro nāma jino,
thi-ap20:1.2	sabbadhammāna pāragū;
thi-ap20:1.3	Ito satasahassamhi,
thi-ap20:1.4	kappe uppajji nāyako.
thi-ap20:2.1	Tadāhaṁ haṁsavatiyaṁ,
thi-ap20:2.2	jātā seṭṭhikule ahuṁ;
thi-ap20:2.3	Nānāratanapajjote,
thi-ap20:2.4	mahāsukhasamappitā.
thi-ap20:3.1	Upetvā taṁ mahāvīraṁ,
thi-ap20:3.2	assosiṁ dhammadesanaṁ;
thi-ap20:3.3	Tato jātapasādāhaṁ,
thi-ap20:3.4	upesiṁ saraṇaṁ jinaṁ.
thi-ap20:4.1	Tato vinayadhārīnaṁ,
thi-ap20:4.2	aggaṁ vaṇṇesi nāyako;
thi-ap20:4.3	Bhikkhuniṁ lajjiniṁ tādiṁ,
thi-ap20:4.4	kappākappavisāradaṁ.
thi-ap20:5.1	Tadā muditacittāhaṁ,
thi-ap20:5.2	taṁ ṭhānamabhikaṅkhinī;
thi-ap20:5.3	Nimantetvā dasabalaṁ,
thi-ap20:5.4	sasaṅghaṁ lokanāyakaṁ.
thi-ap20:6.1	Bhojayitvāna sattāhaṁ,
thi-ap20:6.2	daditvāva ticīvaraṁ;
thi-ap20:6.3	Nipacca sirasā pāde,
thi-ap20:6.4	idaṁ vacanamabraviṁ.
thi-ap20:7.1	‘Yā tayā vaṇṇitā vīra,
thi-ap20:7.2	ito aṭṭhamake muni;
thi-ap20:7.3	Tādisāhaṁ bhavissāmi,
thi-ap20:7.4	yadi sijjhati nāyaka’.
thi-ap20:8.1	Tadā avoca maṁ satthā,
thi-ap20:8.2	‘bhadde mā bhāyi assasa;
thi-ap20:8.3	Anāgatamhi addhāne,
thi-ap20:8.4	lacchase taṁ manorathaṁ.
thi-ap20:9.1	Satasahassito kappe,
thi-ap20:9.2	okkākakulasambhavo;
thi-ap20:9.3	Gotamo nāma gottena,
thi-ap20:9.4	satthā loke bhavissati.
thi-ap20:10.1	Tassa dhammesu dāyādā,
thi-ap20:10.2	orasā dhammanimmitā;
thi-ap20:10.3	Paṭācārāti nāmena,
thi-ap20:10.4	hessati satthu sāvikā’.
thi-ap20:11.1	Tadāhaṁ muditā hutvā,
thi-ap20:11.2	yāvajīvaṁ tadā jinaṁ;
thi-ap20:11.3	Mettacittā paricariṁ,
thi-ap20:11.4	sasaṅghaṁ lokanāyakaṁ.
thi-ap20:12.1	Tena kammena sukatena,
thi-ap20:12.2	cetanāpaṇidhīhi ca;
thi-ap20:12.3	Jahitvā mānusaṁ dehaṁ,
thi-ap20:12.4	tāvatiṁsamagacchahaṁ.
thi-ap20:13.1	Imamhi bhaddake kappe,
thi-ap20:13.2	brahmabandhu mahāyaso;
thi-ap20:13.3	Kassapo nāma gottena,
thi-ap20:13.4	uppajji vadataṁ varo.
thi-ap20:14.1	Upaṭṭhāko mahesissa,
thi-ap20:14.2	tadā āsi narissaro;
thi-ap20:14.3	Kāsirājā kikī nāma,
thi-ap20:14.4	bārāṇasipuruttame.
thi-ap20:15.1	Tassāsiṁ tatiyā dhītā,
thi-ap20:15.2	bhikkhunī iti vissutā;
thi-ap20:15.3	Dhammaṁ sutvā jinaggassa,
thi-ap20:15.4	pabbajjaṁ samarocayiṁ.
thi-ap20:16.1	Anujāni na no tāto,
thi-ap20:16.2	agāreva tadā mayaṁ;
thi-ap20:16.3	Vīsavassasahassāni,
thi-ap20:16.4	vicarimha atanditā.
thi-ap20:17.1	Komāribrahmacariyaṁ,
thi-ap20:17.2	rājakaññā sukhedhitā;
thi-ap20:17.3	Buddhopaṭṭhānaniratā,
thi-ap20:17.4	muditā sattadhītaro.
thi-ap20:18.1	Samaṇī samaṇaguttā ca,
thi-ap20:18.2	bhikkhunī bhikkhudāyikā;
thi-ap20:18.3	Dhammā ceva sudhammā ca,
thi-ap20:18.4	sattamī saṅghadāyikā.
thi-ap20:19.1	Ahaṁ uppalavaṇṇā ca,
thi-ap20:19.2	khemā bhaddā ca bhikkhunī;
thi-ap20:19.3	Kisāgotamī dhammadinnā,
thi-ap20:19.4	visākhā hoti sattamī.
thi-ap20:20.1	Tehi kammehi sukatehi,
thi-ap20:20.2	cetanāpaṇidhīhi ca;
thi-ap20:20.3	Jahitvā mānusaṁ dehaṁ,
thi-ap20:20.4	tāvatiṁsamagacchahaṁ.
thi-ap20:21.1	Pacchime ca bhave dāni,
thi-ap20:21.2	jātā seṭṭhikule ahaṁ;
thi-ap20:21.3	Sāvatthiyaṁ puravare,
thi-ap20:21.4	iddhe phīte mahaddhane.
thi-ap20:22.1	Yadā ca yobbanūpetā,
thi-ap20:22.2	vitakkavasagā ahaṁ;
thi-ap20:22.3	Naraṁ jārapatiṁ disvā,
thi-ap20:22.4	tena saddhiṁ agacchahaṁ.
thi-ap20:23.1	Ekaputtapasūtāhaṁ,
thi-ap20:23.2	dutiyo kucchiyā mamaṁ;
thi-ap20:23.3	Tadāhaṁ mātāpitaro,
thi-ap20:23.4	okkhāmīti sunicchitā.
thi-ap20:24.1	Nārocesiṁ patiṁ mayhaṁ,
thi-ap20:24.2	tadā tamhi pavāsite;
thi-ap20:24.3	Ekikā niggatā gehā,
thi-ap20:24.4	gantuṁ sāvatthimuttamaṁ.
thi-ap20:25.1	Tato me sāmi āgantvā,
thi-ap20:25.2	sambhāvesi pathe mamaṁ;
thi-ap20:25.3	Tadā me kammajā vātā,
thi-ap20:25.4	uppannā atidāruṇā.
thi-ap20:26.1	Uṭṭhito ca mahāmegho,
thi-ap20:26.2	pasūtisamaye mama;
thi-ap20:26.3	Dabbatthāya tadā gantvā,
thi-ap20:26.4	sāmi sappena mārito.
thi-ap20:27.1	Tadā vijātadukkhena,
thi-ap20:27.2	anāthā kapaṇā ahaṁ;
thi-ap20:27.3	Kunnadiṁ pūritaṁ disvā,
thi-ap20:27.4	gacchantī sakulālayaṁ.
thi-ap20:28.1	Bālaṁ ādāya atariṁ,
thi-ap20:28.2	pārakūle ca ekakaṁ;
thi-ap20:28.3	Sāyetvā bālakaṁ puttaṁ,
thi-ap20:28.4	itaraṁ taraṇāyahaṁ.
thi-ap20:29.1	Nivattā ukkuso hāsi,
thi-ap20:29.2	taruṇaṁ vilapantakaṁ;
thi-ap20:29.3	Itarañca vahī soto,
thi-ap20:29.4	sāhaṁ sokasamappitā.
thi-ap20:30.1	Sāvatthinagaraṁ gantvā,
thi-ap20:30.2	assosiṁ sajane mate;
thi-ap20:30.3	Tadā avocaṁ sokaṭṭā,
thi-ap20:30.4	mahāsokasamappitā.
thi-ap20:31.1	‘Ubho puttā kālaṅkatā,
thi-ap20:31.2	panthe mayhaṁ patī mato;
thi-ap20:31.3	Mātā pitā ca bhātā ca,
thi-ap20:31.4	ekacitamhi ḍayhare’.
thi-ap20:32.1	Tadā kisā ca paṇḍu ca,
thi-ap20:32.2	anāthā dīnamānasā;
thi-ap20:32.3	Ito tato bhamantīhaṁ,
thi-ap20:32.4	addasaṁ narasārathiṁ.
thi-ap20:33.1	Tato avoca maṁ satthā,
thi-ap20:33.2	‘putte mā soci assasa;
thi-ap20:33.3	Attānaṁ te gavesassu,
thi-ap20:33.4	kiṁ niratthaṁ vihaññasi.
thi-ap20:34.1	Na santi puttā tāṇāya,
thi-ap20:34.2	na ñātī napi bandhavā;
thi-ap20:34.3	Antakenādhipannassa,
thi-ap20:34.4	natthi ñātīsu tāṇatā’.
thi-ap20:35.1	Taṁ sutvā munino vākyaṁ,
thi-ap20:35.2	paṭhamaṁ phalamajjhagaṁ;
thi-ap20:35.3	Pabbajitvāna naciraṁ,
thi-ap20:35.4	arahattamapāpuṇiṁ.
thi-ap20:36.1	Iddhīsu ca vasī homi,
thi-ap20:36.2	dibbāya sotadhātuyā;
thi-ap20:36.3	Paracittāni jānāmi,
thi-ap20:36.4	satthusāsanakārikā.
thi-ap20:37.1	Pubbenivāsaṁ jānāmi,
thi-ap20:37.2	dibbacakkhu visodhitaṁ;
thi-ap20:37.3	Khepetvā āsave sabbe,
thi-ap20:37.4	visuddhāsiṁ sunimmalā.
thi-ap20:38.1	Tatohaṁ vinayaṁ sabbaṁ,
thi-ap20:38.2	santike sabbadassino;
thi-ap20:38.3	Uggahiṁ sabbavitthāraṁ,
thi-ap20:38.4	byāhariñca yathātathaṁ.
thi-ap20:39.1	Jino tasmiṁ guṇe tuṭṭho,
thi-ap20:39.2	etadagge ṭhapesi maṁ;
thi-ap20:39.3	‘Aggā vinayadhārīnaṁ,
thi-ap20:39.4	paṭācārāva ekikā’.
thi-ap20:40.1	Pariciṇṇo mayā satthā,
thi-ap20:40.2	kataṁ buddhassa sāsanaṁ;
thi-ap20:40.3	Ohito garuko bhāro,
thi-ap20:40.4	bhavanetti samūhatā.
thi-ap20:41.1	Yassatthāya pabbajitā,
thi-ap20:41.2	agārasmānagāriyaṁ;
thi-ap20:41.3	So me attho anuppatto,
thi-ap20:41.4	sabbasaṁyojanakkhayo.
thi-ap20:42.1	Kilesā jhāpitā mayhaṁ,
thi-ap20:42.2	…pe…
thi-ap20:42.3	viharāmi anāsavā.
thi-ap20:43.1	Svāgataṁ vata me āsi,
thi-ap20:43.2	…pe…
thi-ap20:43.3	kataṁ buddhassa sāsanaṁ.
thi-ap20:44.1	Paṭisambhidā catasso,
thi-ap20:44.2	…pe…
thi-ap20:44.3	kataṁ buddhassa sāsanaṁ”.
thi-ap20:45.1	Itthaṁ sudaṁ paṭācārā bhikkhunī imā gāthāyo abhāsitthāti.
thi-ap20:46.1	Paṭācārātheriyāpadānaṁ dasamaṁ.
thi-ap20:47.1	Ekūposathikavaggo dutiyo.
thi-ap20:48.1	Tassuddānaṁ
thi-ap20:49.1	Ekūposathikā ceva,
thi-ap20:49.2	saḷalā cātha modakā;
thi-ap20:49.3	Ekāsanā pañcadīpā,
thi-ap20:49.4	naḷamālī ca gotamī.
thi-ap20:50.1	Khemā uppalavaṇṇā ca,
thi-ap20:50.2	paṭācārā ca bhikkhunī;
thi-ap20:50.3	Gāthā satāni pañceva,
thi-ap20:50.4	nava cāpi taduttari.
thi-ap21:0.1	Therīapadāna
thi-ap21:0.2	Kuṇḍalakesīvagga
thi-ap21:0.3	1 Kuṇḍalakesātherīapadāna
thi-ap21:1.1	“Padumuttaro nāma jino,
thi-ap21:1.2	sabbadhammāna pāragū;
thi-ap21:1.3	Ito satasahassamhi,
thi-ap21:1.4	kappe uppajji nāyako.
thi-ap21:2.1	Tadāhaṁ haṁsavatiyaṁ,
thi-ap21:2.2	jātā seṭṭhikule ahuṁ;
thi-ap21:2.3	Nānāratanapajjote,
thi-ap21:2.4	mahāsukhasamappitā.
thi-ap21:3.1	Upetvā taṁ mahāvīraṁ,
thi-ap21:3.2	assosiṁ dhammadesanaṁ;
thi-ap21:3.3	Tato jātappasādāhaṁ,
thi-ap21:3.4	upesiṁ saraṇaṁ jinaṁ.
thi-ap21:4.1	Tadā mahākāruṇiko,
thi-ap21:4.2	padumuttaranāmako;
thi-ap21:4.3	Khippābhiññānamagganti,
thi-ap21:4.4	ṭhapesi bhikkhuniṁ subhaṁ.
thi-ap21:5.1	Taṁ sutvā muditā hutvā,
thi-ap21:5.2	dānaṁ datvā mahesino;
thi-ap21:5.3	Nipacca sirasā pāde,
thi-ap21:5.4	taṁ ṭhānamabhipatthayiṁ.
thi-ap21:6.1	Anumodi mahāvīro,
thi-ap21:6.2	‘bhadde yaṁ tebhipatthitaṁ;
thi-ap21:6.3	Samijjhissati taṁ sabbaṁ,
thi-ap21:6.4	sukhinī hohi nibbutā.
thi-ap21:7.1	Satasahassito kappe,
thi-ap21:7.2	okkākakulasambhavo;
thi-ap21:7.3	Gotamo nāma gottena,
thi-ap21:7.4	satthā loke bhavissati.
thi-ap21:8.1	Tassa dhammesu dāyādā,
thi-ap21:8.2	orasā dhammanimmitā;
thi-ap21:8.3	Bhaddākuṇḍalakesāti,
thi-ap21:8.4	hessati satthu sāvikā’.
thi-ap21:9.1	Tena kammena sukatena,
thi-ap21:9.2	cetanāpaṇidhīhi ca;
thi-ap21:9.3	Jahitvā mānusaṁ dehaṁ,
thi-ap21:9.4	tāvatiṁsamagacchahaṁ.
thi-ap21:10.1	Tato cutā yāmamagaṁ,
thi-ap21:10.2	tatohaṁ tusitaṁ gatā;
thi-ap21:10.3	Tato ca nimmānaratiṁ,
thi-ap21:10.4	vasavattipuraṁ tato.
thi-ap21:11.1	Yattha yatthūpapajjāmi,
thi-ap21:11.2	tassa kammassa vāhasā;
thi-ap21:11.3	Tattha tattheva rājūnaṁ,
thi-ap21:11.4	mahesittamakārayiṁ.
thi-ap21:12.1	Tato cutā manussesu,
thi-ap21:12.2	rājūnaṁ cakkavattinaṁ;
thi-ap21:12.3	Maṇḍalīnañca rājūnaṁ,
thi-ap21:12.4	mahesittamakārayiṁ.
thi-ap21:13.1	Sampattiṁ anubhotvāna,
thi-ap21:13.2	devesu mānusesu ca;
thi-ap21:13.3	Sabbattha sukhitā hutvā,
thi-ap21:13.4	nekakappesu saṁsariṁ.
thi-ap21:14.1	Imamhi bhaddake kappe,
thi-ap21:14.2	brahmabandhu mahāyaso;
thi-ap21:14.3	Kassapo nāma gottena,
thi-ap21:14.4	uppajji vadataṁ varo.
thi-ap21:15.1	Upaṭṭhāko mahesissa,
thi-ap21:15.2	tadā āsi narissaro;
thi-ap21:15.3	Kāsirājā kikī nāma,
thi-ap21:15.4	bārāṇasipuruttame.
thi-ap21:16.1	Tassa dhītā catutthāsiṁ,
thi-ap21:16.2	bhikkhudāyīti vissutā;
thi-ap21:16.3	Dhammaṁ sutvā jinaggassa,
thi-ap21:16.4	pabbajjaṁ samarocayiṁ.
thi-ap21:17.1	Anujāni na no tāto,
thi-ap21:17.2	agāreva tadā mayaṁ;
thi-ap21:17.3	Vīsavassasahassāni,
thi-ap21:17.4	vicarimha atanditā.
thi-ap21:18.1	Komāribrahmacariyaṁ,
thi-ap21:18.2	rājakaññā sukhedhitā;
thi-ap21:18.3	Buddhopaṭṭhānaniratā,
thi-ap21:18.4	muditā satta dhītaro.
thi-ap21:19.1	Samaṇī samaṇaguttā ca,
thi-ap21:19.2	bhikkhunī bhikkhudāyikā;
thi-ap21:19.3	Dhammā ceva sudhammā ca,
thi-ap21:19.4	sattamī saṅghadāyikā.
thi-ap21:20.1	Khemā uppalavaṇṇā ca,
thi-ap21:20.2	paṭācārā ahaṁ tadā;
thi-ap21:20.3	Kisāgotamī dhammadinnā,
thi-ap21:20.4	visākhā hoti sattamī.
thi-ap21:21.1	Tehi kammehi sukatehi,
thi-ap21:21.2	cetanāpaṇidhīhi ca;
thi-ap21:21.3	Jahitvā mānusaṁ dehaṁ,
thi-ap21:21.4	tāvatiṁsamagacchahaṁ.
thi-ap21:22.1	Pacchime ca bhave dāni,
thi-ap21:22.2	giribbajapuruttame;
thi-ap21:22.3	Jātā seṭṭhikule phīte,
thi-ap21:22.4	yadāhaṁ yobbane ṭhitā.
thi-ap21:23.1	Coraṁ vadhatthaṁ nīyantaṁ,
thi-ap21:23.2	disvā rattā tahiṁ ahaṁ;
thi-ap21:23.3	Pitā me taṁ sahassena,
thi-ap21:23.4	mocayitvā vadhā tato.
thi-ap21:24.1	Adāsi tassa maṁ tāto,
thi-ap21:24.2	viditvāna manaṁ mama;
thi-ap21:24.3	Tassāhamāsiṁ visaṭṭhā,
thi-ap21:24.4	atīva dayitā hitā.
thi-ap21:25.1	So me bhūsanalobhena,
thi-ap21:25.2	balimajjhāsayo diso;
thi-ap21:25.3	Corappapātaṁ netvāna,
thi-ap21:25.4	pabbataṁ cetayī vadhaṁ.
thi-ap21:26.1	Tadāhaṁ paṇamitvāna,
thi-ap21:26.2	sattukaṁ sukatañjalī;
thi-ap21:26.3	Rakkhantī attano pāṇaṁ,
thi-ap21:26.4	idaṁ vacanamabraviṁ.
thi-ap21:27.1	‘Idaṁ suvaṇṇakeyūraṁ,
thi-ap21:27.2	muttā veḷuriyā bahū;
thi-ap21:27.3	Sabbaṁ harassu bhaddante,
thi-ap21:27.4	mañca dāsīti sāvaya’.
thi-ap21:28.1	‘Oropayassu kalyāṇī,
thi-ap21:28.2	mā bāḷhaṁ paridevasi;
thi-ap21:28.3	Na cāhaṁ abhijānāmi,
thi-ap21:28.4	ahantvā dhanamābhataṁ’.
thi-ap21:29.1	‘Yato sarāmi attānaṁ,
thi-ap21:29.2	yato pattosmi viññutaṁ;
thi-ap21:29.3	Na cāhaṁ abhijānāmi,
thi-ap21:29.4	aññaṁ piyataraṁ tayā.
thi-ap21:30.1	Ehi taṁ upagūhissaṁ,
thi-ap21:30.2	katvāna taṁ padakkhiṇaṁ;
thi-ap21:30.3	Na ca dāni puno atthi,
thi-ap21:30.4	mama tuyhañca saṅgamo’.
thi-ap21:31.1	‘Na hi sabbesu ṭhānesu,
thi-ap21:31.2	puriso hoti paṇḍito;
thi-ap21:31.3	Itthīpi paṇḍitā hoti,
thi-ap21:31.4	tattha tattha vicakkhaṇā.
thi-ap21:32.1	Na hi sabbesu ṭhānesu,
thi-ap21:32.2	puriso hoti paṇḍito;
thi-ap21:32.3	Itthīpi paṇḍitā hoti,
thi-ap21:32.4	lahuṁ atthavicintikā’.
thi-ap21:33.1	Lahuñca vata khippañca,
thi-ap21:33.2	nikaṭṭhe samacetayiṁ;
thi-ap21:33.3	Migaṁ uṇṇā yathā evaṁ,
thi-ap21:33.4	tadāhaṁ sattukaṁ vadhiṁ.
thi-ap21:34.1	Yo ca uppatitaṁ atthaṁ,
thi-ap21:34.2	na khippamanubujjhati;
thi-ap21:34.3	So haññate mandamati,
thi-ap21:34.4	corova girigabbhare.
thi-ap21:35.1	Yo ca uppatitaṁ atthaṁ,
thi-ap21:35.2	khippameva nibodhati;
thi-ap21:35.3	Muccate sattusambādhā,
thi-ap21:35.4	tadāhaṁ sattukā yathā.
thi-ap21:36.1	Tadāhaṁ pātayitvāna,
thi-ap21:36.2	giriduggamhi sattukaṁ;
thi-ap21:36.3	Santikaṁ setavatthānaṁ,
thi-ap21:36.4	upetvā pabbajiṁ ahaṁ.
thi-ap21:37.1	Saṇḍāsena ca kese me,
thi-ap21:37.2	luñcitvā sabbaso tadā;
thi-ap21:37.3	Pabbajitvāna samayaṁ,
thi-ap21:37.4	ācikkhiṁsu nirantaraṁ.
thi-ap21:38.1	Tato taṁ uggahetvāhaṁ,
thi-ap21:38.2	nisīditvāna ekikā;
thi-ap21:38.3	Samayaṁ taṁ vicintesiṁ,
thi-ap21:38.4	suvāno mānusaṁ karaṁ.
thi-ap21:39.1	Chinnaṁ gayha samīpe me,
thi-ap21:39.2	pātayitvā apakkami;
thi-ap21:39.3	Disvā nimittamalabhiṁ,
thi-ap21:39.4	hatthaṁ taṁ puḷavākulaṁ.
thi-ap21:40.1	Tato uṭṭhāya saṁviggā,
thi-ap21:40.2	apucchiṁ sahadhammike;
thi-ap21:40.3	Te avocuṁ ‘vijānanti,
thi-ap21:40.4	taṁ atthaṁ sakyabhikkhavo’.
thi-ap21:41.1	Sāhaṁ tamatthaṁ pucchissaṁ,
thi-ap21:41.2	upetvā buddhasāvake;
thi-ap21:41.3	Te mamādāya gacchiṁsu,
thi-ap21:41.4	buddhaseṭṭhassa santikaṁ.
thi-ap21:42.1	So me dhammamadesesi,
thi-ap21:42.2	khandhāyatanadhātuyo;
thi-ap21:42.3	Asubhāniccadukkhāti,
thi-ap21:42.4	anattāti ca nāyako.
thi-ap21:43.1	Tassa dhammaṁ suṇitvāhaṁ,
thi-ap21:43.2	dhammacakkhuṁ visodhayiṁ;
thi-ap21:43.3	Tato viññātasaddhammā,
thi-ap21:43.4	pabbajjaṁ upasampadaṁ.
thi-ap21:44.1	Āyācito tadā āha,
thi-ap21:44.2	‘ehi bhadde’ti nāyako;
thi-ap21:44.3	Tadāhaṁ upasampannā,
thi-ap21:44.4	parittaṁ toyamaddasaṁ.
thi-ap21:45.1	Pādapakkhālanenāhaṁ,
thi-ap21:45.2	ñatvā saudayabbayaṁ;
thi-ap21:45.3	Tathā sabbepi saṅkhāre,
thi-ap21:45.4	īdisaṁ cintayiṁ tadā.
thi-ap21:46.1	Tato cittaṁ vimucci me,
thi-ap21:46.2	anupādāya sabbaso;
thi-ap21:46.3	Khippābhiññānamaggaṁ me,
thi-ap21:46.4	tadā paññāpayī jino.
thi-ap21:47.1	Iddhīsu ca vasī homi,
thi-ap21:47.2	dibbāya sotadhātuyā;
thi-ap21:47.3	Paracittāni jānāmi,
thi-ap21:47.4	satthusāsanakārikā.
thi-ap21:48.1	Pubbenivāsaṁ jānāmi,
thi-ap21:48.2	dibbacakkhu visodhitaṁ;
thi-ap21:48.3	Khepetvā āsave sabbe,
thi-ap21:48.4	visuddhāsiṁ sunimmalā.
thi-ap21:49.1	Pariciṇṇo mayā satthā,
thi-ap21:49.2	kataṁ buddhassa sāsanaṁ;
thi-ap21:49.3	Ohito garuko bhāro,
thi-ap21:49.4	bhavanetti samūhatā.
thi-ap21:50.1	Yassatthāya pabbajitā,
thi-ap21:50.2	agārasmānagāriyaṁ;
thi-ap21:50.3	So me attho anuppatto,
thi-ap21:50.4	sabbasaṁyojanakkhayo.
thi-ap21:51.1	Atthadhammaniruttīsu,
thi-ap21:51.2	paṭibhāne tatheva ca;
thi-ap21:51.3	Ñāṇaṁ me vimalaṁ suddhaṁ,
thi-ap21:51.4	buddhaseṭṭhassa sāsane.
thi-ap21:52.1	Kilesā jhāpitā mayhaṁ,
thi-ap21:52.2	bhavā sabbe samūhatā;
thi-ap21:52.3	Nāgīva bandhanaṁ chetvā,
thi-ap21:52.4	viharāmi anāsavā.
thi-ap21:53.1	Svāgataṁ vata me āsi,
thi-ap21:53.2	mama buddhassa santike;
thi-ap21:53.3	Tisso vijjā anuppattā,
thi-ap21:53.4	kataṁ buddhassa sāsanaṁ.
thi-ap21:54.1	Paṭisambhidā catasso,
thi-ap21:54.2	vimokkhāpi ca aṭṭhime;
thi-ap21:54.3	Chaḷabhiññā sacchikatā,
thi-ap21:54.4	kataṁ buddhassa sāsanaṁ”.
thi-ap21:55.1	Itthaṁ sudaṁ bhaddākuṇḍalakesā bhikkhunī imā gāthāyo abhāsitthāti.
thi-ap21:56.1	Kuṇḍalakesātheriyāpadānaṁ paṭhamaṁ.
thi-ap22:0.1	Therīapadāna
thi-ap22:0.2	Kuṇḍalakesīvagga
thi-ap22:0.3	Kisāgotamītherīapadāna
thi-ap22:1.1	“Padumuttaro nāma jino,
thi-ap22:1.2	sabbadhammāna pāragū;
thi-ap22:1.3	Ito satasahassamhi,
thi-ap22:1.4	kappe uppajji nāyako.
thi-ap22:2.1	Tadāhaṁ haṁsavatiyaṁ,
thi-ap22:2.2	jātā aññatare kule;
thi-ap22:2.3	Upetvā taṁ naravaraṁ,
thi-ap22:2.4	saraṇaṁ samupāgamiṁ.
thi-ap22:3.1	Dhammañca tassa assosiṁ,
thi-ap22:3.2	catusaccūpasañhitaṁ;
thi-ap22:3.3	Madhuraṁ paramassādaṁ,
thi-ap22:3.4	vaṭṭasantisukhāvahaṁ.
thi-ap22:4.1	Tadā ca bhikkhuniṁ vīro,
thi-ap22:4.2	lūkhacīvaradhāriniṁ;
thi-ap22:4.3	Ṭhapento etadaggamhi,
thi-ap22:4.4	vaṇṇayī purisuttamo.
thi-ap22:5.1	Janetvānappakaṁ pītiṁ,
thi-ap22:5.2	sutvā bhikkhuniyā guṇe;
thi-ap22:5.3	Kāraṁ katvāna buddhassa,
thi-ap22:5.4	yathāsatti yathābalaṁ.
thi-ap22:6.1	Nipacca munivaraṁ taṁ,
thi-ap22:6.2	taṁ ṭhānamabhipatthayiṁ;
thi-ap22:6.3	Tadānumodi sambuddho,
thi-ap22:6.4	ṭhānalābhāya nāyako.
thi-ap22:7.1	‘Satasahassito kappe,
thi-ap22:7.2	okkākakulasambhavo;
thi-ap22:7.3	Gotamo nāma gottena,
thi-ap22:7.4	satthā loke bhavissati.
thi-ap22:8.1	Tassa dhammesu dāyādā,
thi-ap22:8.2	orasā dhammanimmitā;
thi-ap22:8.3	Kisāgotamī nāmena,
thi-ap22:8.4	hessati satthu sāvikā’.
thi-ap22:9.1	Taṁ sutvā muditā hutvā,
thi-ap22:9.2	yāvajīvaṁ tadā jinaṁ;
thi-ap22:9.3	Mettacittā paricariṁ,
thi-ap22:9.4	paccayehi vināyakaṁ.
thi-ap22:10.1	Tena kammena sukatena,
thi-ap22:10.2	cetanāpaṇidhīhi ca;
thi-ap22:10.3	Jahitvā mānusaṁ dehaṁ,
thi-ap22:10.4	tāvatiṁsamagacchahaṁ.
thi-ap22:11.1	Imamhi bhaddake kappe,
thi-ap22:11.2	brahmabandhu mahāyaso;
thi-ap22:11.3	Kassapo nāma gottena,
thi-ap22:11.4	uppajji vadataṁ varo.
thi-ap22:12.1	Upaṭṭhāko mahesissa,
thi-ap22:12.2	tadā āsi narissaro;
thi-ap22:12.3	Kāsirājā kikī nāma,
thi-ap22:12.4	bārāṇasipuruttame.
thi-ap22:13.1	Pañcamī tassa dhītāsiṁ,
thi-ap22:13.2	dhammā nāmena vissutā;
thi-ap22:13.3	Dhammaṁ sutvā jinaggassa,
thi-ap22:13.4	pabbajjaṁ samarocayiṁ.
thi-ap22:14.1	Anujāni na no tāto,
thi-ap22:14.2	agāreva tadā mayaṁ;
thi-ap22:14.3	Vīsavassasahassāni,
thi-ap22:14.4	vicarimha atanditā.
thi-ap22:15.1	Komāribrahmacariyaṁ,
thi-ap22:15.2	rājakaññā sukhedhitā;
thi-ap22:15.3	Buddhopaṭṭhānaniratā,
thi-ap22:15.4	muditā satta dhītaro.
thi-ap22:16.1	Samaṇī samaṇaguttā ca,
thi-ap22:16.2	bhikkhunī bhikkhudāyikā;
thi-ap22:16.3	Dhammā ceva sudhammā ca,
thi-ap22:16.4	sattamī saṅghadāyikā.
thi-ap22:17.1	Khemā uppalavaṇṇā ca,
thi-ap22:17.2	paṭācārā ca kuṇḍalā;
thi-ap22:17.3	Ahañca dhammadinnā ca,
thi-ap22:17.4	visākhā hoti sattamī.
thi-ap22:18.1	Tehi kammehi sukatehi,
thi-ap22:18.2	cetanāpaṇidhīhi ca;
thi-ap22:18.3	Jahitvā mānusaṁ dehaṁ,
thi-ap22:18.4	tāvatiṁsamagacchahaṁ.
thi-ap22:19.1	Pacchime ca bhave dāni,
thi-ap22:19.2	jātā seṭṭhikule ahaṁ;
thi-ap22:19.3	Duggate adhane naṭṭhe,
thi-ap22:19.4	gatā ca sadhanaṁ kulaṁ.
thi-ap22:20.1	Patiṁ ṭhapetvā sesā me,
thi-ap22:20.2	dessanti adhanā iti;
thi-ap22:20.3	Yadā ca pasūtā āsiṁ,
thi-ap22:20.4	sabbesaṁ dayitā tadā.
thi-ap22:21.1	Yadā so taruṇo bhaddo,
thi-ap22:21.2	komalako sukhedhito;
thi-ap22:21.3	Sapāṇamiva kanto me,
thi-ap22:21.4	tadā yamavasaṁ gato.
thi-ap22:22.1	Sokaṭṭādīnavadanā,
thi-ap22:22.2	assunettā rudammukhā;
thi-ap22:22.3	Mataṁ kuṇapamādāya,
thi-ap22:22.4	vilapantī gamāmahaṁ.
thi-ap22:23.1	Tadā ekena sandiṭṭhā,
thi-ap22:23.2	upetvābhisakkuttamaṁ;
thi-ap22:23.3	Avocaṁ ‘dehi bhesajjaṁ,
thi-ap22:23.4	puttasañjīvananti bho’.
thi-ap22:24.1	‘Na vijjante matā yasmiṁ,
thi-ap22:24.2	gehe siddhatthakaṁ tato;
thi-ap22:24.3	Āharā’ti jino āha,
thi-ap22:24.4	vinayopāyakovido.
thi-ap22:25.1	Tadā gamitvā sāvatthiṁ,
thi-ap22:25.2	na labhiṁ tādisaṁ gharaṁ;
thi-ap22:25.3	Kuto siddhatthakaṁ tasmā,
thi-ap22:25.4	tato laddhā satiṁ ahaṁ.
thi-ap22:26.1	Kuṇapaṁ chaḍḍayitvāna,
thi-ap22:26.2	upesiṁ lokanāyakaṁ;
thi-ap22:26.3	Dūratova mamaṁ disvā,
thi-ap22:26.4	avoca madhurassaro.
thi-ap22:27.1	‘Yo ca vassasataṁ jīve,
thi-ap22:27.2	apassaṁ udayabbayaṁ;
thi-ap22:27.3	Ekāhaṁ jīvitaṁ seyyo,
thi-ap22:27.4	passato udayabbayaṁ.
thi-ap22:28.1	Na gāmadhammo nigamassa dhammo,
thi-ap22:28.2	Na cāpiyaṁ ekakulassa dhammo;
thi-ap22:28.3	Sabbassa lokassa sadevakassa,
thi-ap22:28.4	Eseva dhammo yadidaṁ aniccatā’.
thi-ap22:29.1	Sāhaṁ sutvānimā gāthā,
thi-ap22:29.2	dhammacakkhuṁ visodhayiṁ;
thi-ap22:29.3	Tato viññātasaddhammā,
thi-ap22:29.4	pabbajiṁ anagāriyaṁ.
thi-ap22:30.1	Tathā pabbajitā santī,
thi-ap22:30.2	yuñjantī jinasāsane;
thi-ap22:30.3	Na cireneva kālena,
thi-ap22:30.4	arahattamapāpuṇiṁ.
thi-ap22:31.1	Iddhīsu ca vasī homi,
thi-ap22:31.2	dibbāya sotadhātuyā;
thi-ap22:31.3	Paracittāni jānāmi,
thi-ap22:31.4	satthusāsanakārikā.
thi-ap22:32.1	Pubbenivāsaṁ jānāmi,
thi-ap22:32.2	dibbacakkhu visodhitaṁ;
thi-ap22:32.3	Khepetvā āsave sabbe,
thi-ap22:32.4	visuddhāsiṁ sunimmalā.
thi-ap22:33.1	Pariciṇṇo mayā satthā,
thi-ap22:33.2	kataṁ buddhassa sāsanaṁ;
thi-ap22:33.3	Ohito garuko bhāro,
thi-ap22:33.4	bhavanetti samūhatā.
thi-ap22:34.1	Yassatthāya pabbajitā,
thi-ap22:34.2	agārasmānagāriyaṁ;
thi-ap22:34.3	So me attho anuppatto,
thi-ap22:34.4	sabbasaṁyojanakkhayo.
thi-ap22:35.1	Atthadhammaniruttīsu,
thi-ap22:35.2	paṭibhāne tatheva ca;
thi-ap22:35.3	Ñāṇaṁ me vimalaṁ suddhaṁ,
thi-ap22:35.4	buddhaseṭṭhassa vāhasā.
thi-ap22:36.1	Saṅkārakūṭā āhitvā,
thi-ap22:36.2	susānā rathiyāpi ca;
thi-ap22:36.3	Tato saṅghāṭikaṁ katvā,
thi-ap22:36.4	lūkhaṁ dhāremi cīvaraṁ.
thi-ap22:37.1	Jino tasmiṁ guṇe tuṭṭho,
thi-ap22:37.2	lūkhacīvaradhāraṇe;
thi-ap22:37.3	Ṭhapesi etadaggamhi,
thi-ap22:37.4	parisāsu vināyako.
thi-ap22:38.1	Kilesā jhāpitā mayhaṁ,
thi-ap22:38.2	…pe…
thi-ap22:38.3	viharāmi anāsavā.
thi-ap22:39.1	Svāgataṁ vata me āsi,
thi-ap22:39.2	…pe…
thi-ap22:39.3	kataṁ buddhassa sāsanaṁ.
thi-ap22:40.1	Paṭisambhidā catasso,
thi-ap22:40.2	…pe…
thi-ap22:40.3	kataṁ buddhassa sāsanaṁ”.
thi-ap22:41.1	Itthaṁ sudaṁ kisāgotamī bhikkhunī imā gāthāyo abhāsitthāti.
thi-ap22:42.1	Kisāgotamītheriyāpadānaṁ dutiyaṁ.
thi-ap23:0.1	Therīapadāna
thi-ap23:0.2	Kuṇḍalakesīvagga
thi-ap23:0.3	Dhammadinnātherīapadāna
thi-ap23:1.1	“Padumuttaro nāma jino,
thi-ap23:1.2	sabbadhammāna pāragū;
thi-ap23:1.3	Ito satasahassamhi,
thi-ap23:1.4	kappe uppajji nāyako.
thi-ap23:2.1	Tadāhaṁ haṁsavatiyaṁ,
thi-ap23:2.2	kule aññatare ahuṁ;
thi-ap23:2.3	Parakammakārī āsiṁ,
thi-ap23:2.4	nipakā sīlasaṁvutā.
thi-ap23:3.1	Padumuttarabuddhassa,
thi-ap23:3.2	sujāto aggasāvako;
thi-ap23:3.3	Vihārā abhinikkhamma,
thi-ap23:3.4	piṇḍapātāya gacchati.
thi-ap23:4.1	Ghaṭaṁ gahetvā gacchantī,
thi-ap23:4.2	tadā udakahārikā;
thi-ap23:4.3	Taṁ disvā adadaṁ pūpaṁ,
thi-ap23:4.4	pasannā sehi pāṇibhi.
thi-ap23:5.1	Paṭiggahetvā tattheva,
thi-ap23:5.2	nisinno paribhuñji so;
thi-ap23:5.3	Tato netvāna taṁ gehaṁ,
thi-ap23:5.4	adāsiṁ tassa bhojanaṁ.
thi-ap23:6.1	Tato me ayyako tuṭṭho,
thi-ap23:6.2	akarī suṇisaṁ sakaṁ;
thi-ap23:6.3	Sassuyā saha gantvāna,
thi-ap23:6.4	sambuddhaṁ abhivādayiṁ.
thi-ap23:7.1	Tadā so dhammakathikaṁ,
thi-ap23:7.2	bhikkhuniṁ parikittayaṁ;
thi-ap23:7.3	Ṭhapesi etadaggamhi,
thi-ap23:7.4	taṁ sutvā muditā ahaṁ.
thi-ap23:8.1	Nimantayitvā sugataṁ,
thi-ap23:8.2	sasaṅghaṁ lokanāyakaṁ;
thi-ap23:8.3	Mahādānaṁ daditvāna,
thi-ap23:8.4	taṁ ṭhānamabhipatthayiṁ.
thi-ap23:9.1	Tato maṁ sugato āha,
thi-ap23:9.2	ghananinnādasussaro;
thi-ap23:9.3	‘Mamupaṭṭhānanirate,
thi-ap23:9.4	sasaṅghaparivesike.
thi-ap23:10.1	Saddhammassavane yutte,
thi-ap23:10.2	guṇavaddhitamānase;
thi-ap23:10.3	Bhadde bhavassu muditā,
thi-ap23:10.4	lacchase paṇidhīphalaṁ.
thi-ap23:11.1	Satasahassito kappe,
thi-ap23:11.2	okkākakulasambhavo;
thi-ap23:11.3	Gotamo nāma gottena,
thi-ap23:11.4	satthā loke bhavissati.
thi-ap23:12.1	Tassa dhammesu dāyādā,
thi-ap23:12.2	orasā dhammanimmitā;
thi-ap23:12.3	Dhammadinnāti nāmena,
thi-ap23:12.4	hessati satthu sāvikā’.
thi-ap23:13.1	Taṁ sutvā muditā hutvā,
thi-ap23:13.2	yāvajīvaṁ mahāmuniṁ;
thi-ap23:13.3	Mettacittā paricariṁ,
thi-ap23:13.4	paccayehi vināyakaṁ.
thi-ap23:14.1	Tena kammena sukatena,
thi-ap23:14.2	cetanāpaṇidhīhi ca;
thi-ap23:14.3	Jahitvā mānusaṁ dehaṁ,
thi-ap23:14.4	tāvatiṁsamagacchahaṁ.
thi-ap23:15.1	Imamhi bhaddake kappe,
thi-ap23:15.2	brahmabandhu mahāyaso;
thi-ap23:15.3	Kassapo nāma gottena,
thi-ap23:15.4	uppajji vadataṁ varo.
thi-ap23:16.1	Upaṭṭhāko mahesissa,
thi-ap23:16.2	tadā āsi narissaro;
thi-ap23:16.3	Kāsirājā kikī nāma,
thi-ap23:16.4	bārāṇasipuruttame.
thi-ap23:17.1	Chaṭṭhā tassāsahaṁ dhītā,
thi-ap23:17.2	sudhammā iti vissutā;
thi-ap23:17.3	Dhammaṁ sutvā jinaggassa,
thi-ap23:17.4	pabbajjaṁ samarocayiṁ.
thi-ap23:18.1	Anujāni na no tāto,
thi-ap23:18.2	agāreva tadā mayaṁ;
thi-ap23:18.3	Vīsavassasahassāni,
thi-ap23:18.4	vicarimha atanditā.
thi-ap23:19.1	Tatiyaṁ bhāṇavāraṁ.
thi-ap23:20.1	Komāribrahmacariyaṁ,
thi-ap23:20.2	rājakaññā sukhedhitā;
thi-ap23:20.3	Buddhopaṭṭhānaniratā,
thi-ap23:20.4	muditā satta dhītaro.
thi-ap23:21.1	Samaṇī samaṇaguttā ca,
thi-ap23:21.2	bhikkhunī bhikkhudāyikā;
thi-ap23:21.3	Dhammā ceva sudhammā ca,
thi-ap23:21.4	sattamī saṅghadāyikā.
thi-ap23:22.1	Khemā uppalavaṇṇā ca,
thi-ap23:22.2	paṭācārā ca kuṇḍalā;
thi-ap23:22.3	Gotamī ca ahañceva,
thi-ap23:22.4	visākhā hoti sattamī.
thi-ap23:23.1	Tehi kammehi sukatehi,
thi-ap23:23.2	cetanāpaṇidhīhi ca;
thi-ap23:23.3	Jahitvā mānusaṁ dehaṁ,
thi-ap23:23.4	tāvatiṁsamagacchahaṁ.
thi-ap23:24.1	Pacchime ca bhave dāni,
thi-ap23:24.2	giribbajapuruttame;
thi-ap23:24.3	Jātā seṭṭhikule phīte,
thi-ap23:24.4	sabbakāmasamiddhine.
thi-ap23:25.1	Yadā rūpaguṇūpetā,
thi-ap23:25.2	paṭhame yobbane ṭhitā;
thi-ap23:25.3	Tadā parakulaṁ gantvā,
thi-ap23:25.4	vasiṁ sukhasamappitā.
thi-ap23:26.1	Upetvā lokasaraṇaṁ,
thi-ap23:26.2	suṇitvā dhammadesanaṁ;
thi-ap23:26.3	Anāgāmiphalaṁ patto,
thi-ap23:26.4	sāmiko me subuddhimā.
thi-ap23:27.1	Tadāhaṁ anujānetvā,
thi-ap23:27.2	pabbajiṁ anagāriyaṁ;
thi-ap23:27.3	Na cireneva kālena,
thi-ap23:27.4	arahattamapāpuṇiṁ.
thi-ap23:28.1	Tadā upāsako so maṁ,
thi-ap23:28.2	upagantvā apucchatha;
thi-ap23:28.3	Gambhīre nipuṇe pañhe,
thi-ap23:28.4	te sabbe byākariṁ ahaṁ.
thi-ap23:29.1	Jino tasmiṁ guṇe tuṭṭho,
thi-ap23:29.2	etadagge ṭhapesi maṁ;
thi-ap23:29.3	‘Bhikkhuniṁ dhammakathikaṁ,
thi-ap23:29.4	nāññaṁ passāmi edisiṁ.
thi-ap23:30.1	Dhammadinnā yathā dhīrā,
thi-ap23:30.2	evaṁ dhāretha bhikkhavo’;
thi-ap23:30.3	Evāhaṁ paṇḍitā homi,
thi-ap23:30.4	nāyakenānukampitā.
thi-ap23:31.1	Pariciṇṇo mayā satthā,
thi-ap23:31.2	kataṁ buddhassa sāsanaṁ;
thi-ap23:31.3	Ohito garuko bhāro,
thi-ap23:31.4	bhavanetti samūhatā.
thi-ap23:32.1	Yassatthāya pabbajitā,
thi-ap23:32.2	agārasmānagāriyaṁ;
thi-ap23:32.3	So me attho anuppatto,
thi-ap23:32.4	sabbasaṁyojanakkhayo.
thi-ap23:33.1	Iddhīsu ca vasī homi,
thi-ap23:33.2	dibbāya sotadhātuyā;
thi-ap23:33.3	Paracittāni jānāmi,
thi-ap23:33.4	satthusāsanakārikā.
thi-ap23:34.1	Pubbenivāsaṁ jānāmi,
thi-ap23:34.2	dibbacakkhu visodhitaṁ;
thi-ap23:34.3	Khepetvā āsave sabbe,
thi-ap23:34.4	visuddhāsiṁ sunimmalā.
thi-ap23:35.1	Kilesā jhāpitā mayhaṁ,
thi-ap23:35.2	…pe…
thi-ap23:35.3	viharāmi anāsavā.
thi-ap23:36.1	Svāgataṁ vata me āsi,
thi-ap23:36.2	…pe…
thi-ap23:36.3	kataṁ buddhassa sāsanaṁ.
thi-ap23:37.1	Paṭisambhidā catasso,
thi-ap23:37.2	…pe…
thi-ap23:37.3	kataṁ buddhassa sāsanaṁ”.
thi-ap23:38.1	Itthaṁ sudaṁ dhammadinnā bhikkhunī imā gāthāyo abhāsitthāti.
thi-ap23:39.1	Dhammadinnātheriyāpadānaṁ tatiyaṁ.
thi-ap24:0.1	Therīapadāna
thi-ap24:0.2	Kuṇḍalakesīvagga
thi-ap24:0.3	Sakulātherīapadāna
thi-ap24:1.1	“Padumuttaro nāma jino,
thi-ap24:1.2	sabbadhammāna pāragū;
thi-ap24:1.3	Ito satasahassamhi,
thi-ap24:1.4	kappe uppajji nāyako.
thi-ap24:2.1	Hitāya sabbasattānaṁ,
thi-ap24:2.2	sukhāya vadataṁ varo;
thi-ap24:2.3	Atthāya purisājañño,
thi-ap24:2.4	paṭipanno sadevake.
thi-ap24:3.1	Yasaggapatto sirimā,
thi-ap24:3.2	kittivaṇṇagato jino;
thi-ap24:3.3	Pūjito sabbalokassa,
thi-ap24:3.4	disāsabbāsu vissuto.
thi-ap24:4.1	Uttiṇṇavicikiccho so,
thi-ap24:4.2	vītivattakathaṅkatho;
thi-ap24:4.3	Sampuṇṇamanasaṅkappo,
thi-ap24:4.4	patto sambodhimuttamaṁ.
thi-ap24:5.1	Anuppannassa maggassa,
thi-ap24:5.2	uppādetā naruttamo;
thi-ap24:5.3	Anakkhātañca akkhāsi,
thi-ap24:5.4	asañjātañca sañjanī.
thi-ap24:6.1	Maggaññū ca maggavidū,
thi-ap24:6.2	maggakkhāyī narāsabho;
thi-ap24:6.3	Maggassa kusalo satthā,
thi-ap24:6.4	sārathīnaṁ varuttamo.
thi-ap24:7.1	Mahākāruṇiko satthā,
thi-ap24:7.2	dhammaṁ desesi nāyako;
thi-ap24:7.3	Nimugge kāmapaṅkamhi,
thi-ap24:7.4	samuddharati pāṇine.
thi-ap24:8.1	Tadāhaṁ haṁsavatiyaṁ,
thi-ap24:8.2	jātā khattiyanandanā;
thi-ap24:8.3	Surūpā sadhanā cāpi,
thi-ap24:8.4	dayitā ca sirīmatī.
thi-ap24:9.1	Ānandassa mahārañño,
thi-ap24:9.2	dhītā paramasobhaṇā;
thi-ap24:9.3	Vemātā bhaginī cāpi,
thi-ap24:9.4	padumuttaranāmino.
thi-ap24:10.1	Rājakaññāhi sahitā,
thi-ap24:10.2	sabbābharaṇabhūsitā;
thi-ap24:10.3	Upāgamma mahāvīraṁ,
thi-ap24:10.4	assosiṁ dhammadesanaṁ.
thi-ap24:11.1	Tadā hi so lokagaru,
thi-ap24:11.2	bhikkhuniṁ dibbacakkhukaṁ;
thi-ap24:11.3	Kittayaṁ parisāmajjhe,
thi-ap24:11.4	aggaṭṭhāne ṭhapesi taṁ.
thi-ap24:12.1	Suṇitvā tamahaṁ haṭṭhā,
thi-ap24:12.2	dānaṁ datvāna satthuno;
thi-ap24:12.3	Pūjitvāna ca sambuddhaṁ,
thi-ap24:12.4	dibbacakkhuṁ apatthayiṁ.
thi-ap24:13.1	Tato avoca maṁ satthā,
thi-ap24:13.2	‘nande lacchasi patthitaṁ;
thi-ap24:13.3	Padīpadhammadānānaṁ,
thi-ap24:13.4	phalametaṁ sunicchitaṁ.
thi-ap24:14.1	Satasahassito kappe,
thi-ap24:14.2	okkākakulasambhavo;
thi-ap24:14.3	Gotamo nāma gottena,
thi-ap24:14.4	satthā loke bhavissati.
thi-ap24:15.1	Tassa dhammesu dāyādā,
thi-ap24:15.2	orasā dhammanimmitā;
thi-ap24:15.3	Sakulā nāma nāmena,
thi-ap24:15.4	hessati satthu sāvikā’.
thi-ap24:16.1	Tena kammena sukatena,
thi-ap24:16.2	cetanāpaṇidhīhi ca;
thi-ap24:16.3	Jahitvā mānusaṁ dehaṁ,
thi-ap24:16.4	tāvatiṁsamagacchahaṁ.
thi-ap24:17.1	Imamhi bhaddake kappe,
thi-ap24:17.2	brahmabandhu mahāyaso;
thi-ap24:17.3	Kassapo nāma gottena,
thi-ap24:17.4	uppajji vadataṁ varo.
thi-ap24:18.1	Paribbājakinī āsiṁ,
thi-ap24:18.2	tadāhaṁ ekacārinī;
thi-ap24:18.3	Bhikkhāya vicaritvāna,
thi-ap24:18.4	alabhiṁ telamattakaṁ.
thi-ap24:19.1	Tena dīpaṁ padīpetvā,
thi-ap24:19.2	upaṭṭhiṁ sabbasaṁvariṁ;
thi-ap24:19.3	Cetiyaṁ dvipadaggassa,
thi-ap24:19.4	vippasannena cetasā.
thi-ap24:20.1	Tena kammena sukatena,
thi-ap24:20.2	cetanāpaṇidhīhi ca;
thi-ap24:20.3	Jahitvā mānusaṁ dehaṁ,
thi-ap24:20.4	tāvatiṁsamagacchahaṁ.
thi-ap24:21.1	Yattha yatthūpapajjāmi,
thi-ap24:21.2	tassa kammassa vāhasā;
thi-ap24:21.3	Pajjalanti mahādīpā,
thi-ap24:21.4	tattha tattha gatāya me.
thi-ap24:22.1	Tirokuṭṭaṁ tiroselaṁ,
thi-ap24:22.2	samatiggayha pabbataṁ;
thi-ap24:22.3	Passāmahaṁ yadicchāmi,
thi-ap24:22.4	dīpadānassidaṁ phalaṁ.
thi-ap24:23.1	Visuddhanayanā homi,
thi-ap24:23.2	yasasā ca jalāmahaṁ;
thi-ap24:23.3	Saddhāpaññāvatī ceva,
thi-ap24:23.4	dīpadānassidaṁ phalaṁ.
thi-ap24:24.1	Pacchime ca bhave dāni,
thi-ap24:24.2	jātā vippakule ahaṁ;
thi-ap24:24.3	Pahūtadhanadhaññamhi,
thi-ap24:24.4	mudite rājapūjite.
thi-ap24:25.1	Ahaṁ sabbaṅgasampannā,
thi-ap24:25.2	sabbābharaṇabhūsitā;
thi-ap24:25.3	Purappavese sugataṁ,
thi-ap24:25.4	vātapāne ṭhitā ahaṁ.
thi-ap24:26.1	Disvā jalantaṁ yasasā,
thi-ap24:26.2	devamanussasakkataṁ;
thi-ap24:26.3	Anubyañjanasampannaṁ,
thi-ap24:26.4	lakkhaṇehi vibhūsitaṁ.
thi-ap24:27.1	Udaggacittā sumanā,
thi-ap24:27.2	pabbajjaṁ samarocayiṁ;
thi-ap24:27.3	Na cireneva kālena,
thi-ap24:27.4	arahattamapāpuṇiṁ.
thi-ap24:28.1	Iddhīsu ca vasī homi,
thi-ap24:28.2	dibbāya sotadhātuyā;
thi-ap24:28.3	Paracittāni jānāmi,
thi-ap24:28.4	satthusāsanakārikā.
thi-ap24:29.1	Pubbenivāsaṁ jānāmi,
thi-ap24:29.2	dibbacakkhu visodhitaṁ;
thi-ap24:29.3	Khepetvā āsave sabbe,
thi-ap24:29.4	visuddhāsiṁ sunimmalā.
thi-ap24:30.1	Pariciṇṇo mayā satthā,
thi-ap24:30.2	kataṁ buddhassa sāsanaṁ;
thi-ap24:30.3	Ohito garuko bhāro,
thi-ap24:30.4	bhavanetti samūhatā.
thi-ap24:31.1	Yassatthāya pabbajitā,
thi-ap24:31.2	agārasmānagāriyaṁ;
thi-ap24:31.3	So me attho anuppatto,
thi-ap24:31.4	sabbasaṁyojanakkhayo.
thi-ap24:32.1	Tato mahākāruṇiko,
thi-ap24:32.2	etadagge ṭhapesi maṁ;
thi-ap24:32.3	Dibbacakkhukānaṁ aggā,
thi-ap24:32.4	sakulāti naruttamo.
thi-ap24:33.1	Kilesā jhāpitā mayhaṁ,
thi-ap24:33.2	…pe…
thi-ap24:33.3	viharāmi anāsavā.
thi-ap24:34.1	Svāgataṁ vata me āsi,
thi-ap24:34.2	…pe…
thi-ap24:34.3	kataṁ buddhassa sāsanaṁ.
thi-ap24:35.1	Paṭisambhidā catasso,
thi-ap24:35.2	…pe…
thi-ap24:35.3	kataṁ buddhassa sāsanaṁ”.
thi-ap24:36.1	Itthaṁ sudaṁ sakulā bhikkhunī imā gāthāyo abhāsitthāti.
thi-ap24:37.1	Sakulātheriyāpadānaṁ catutthaṁ.
thi-ap25:0.1	Therīapadāna
thi-ap25:0.2	Kuṇḍalakesīvagga
thi-ap25:0.3	5 Nandātherīapadāna
thi-ap25:1.1	“Padumuttaro nāma jino,
thi-ap25:1.2	sabbadhammāna pāragū;
thi-ap25:1.3	Ito satasahassamhi,
thi-ap25:1.4	kappe uppajji nāyako.
thi-ap25:2.1	Ovādako viññāpako,
thi-ap25:2.2	tārako sabbapāṇinaṁ;
thi-ap25:2.3	Desanākusalo buddho,
thi-ap25:2.4	tāresi janataṁ bahuṁ.
thi-ap25:3.1	Anukampako kāruṇiko,
thi-ap25:3.2	hitesī sabbapāṇinaṁ;
thi-ap25:3.3	Sampatte titthiye sabbe,
thi-ap25:3.4	pañcasīle patiṭṭhapi.
thi-ap25:4.1	Evaṁ nirākulaṁ āsi,
thi-ap25:4.2	suññataṁ titthiyehi ca;
thi-ap25:4.3	Vicittaṁ arahantehi,
thi-ap25:4.4	vasībhūtehi tādibhi.
thi-ap25:5.1	Ratanānaṭṭhapaññāsaṁ,
thi-ap25:5.2	uggatova mahāmuni;
thi-ap25:5.3	Kañcanagghiyasaṅkāso,
thi-ap25:5.4	bāttiṁsavaralakkhaṇo.
thi-ap25:6.1	Vassasatasahassāni,
thi-ap25:6.2	āyu vijjati tāvade;
thi-ap25:6.3	Tāvatā tiṭṭhamāno so,
thi-ap25:6.4	tāresi janataṁ bahuṁ.
thi-ap25:7.1	Tadāhaṁ haṁsavatiyaṁ,
thi-ap25:7.2	jātā seṭṭhikule ahuṁ;
thi-ap25:7.3	Nānāratanapajjote,
thi-ap25:7.4	mahāsukhasamappitā.
thi-ap25:8.1	Upetvā taṁ mahāvīraṁ,
thi-ap25:8.2	assosiṁ dhammadesanaṁ;
thi-ap25:8.3	Amataṁ paramassādaṁ,
thi-ap25:8.4	paramatthanivedakaṁ.
thi-ap25:9.1	Tadā nimantayitvāna,
thi-ap25:9.2	sasaṅghaṁ lokanāyakaṁ;
thi-ap25:9.3	Datvā tassa mahādānaṁ,
thi-ap25:9.4	pasannā sehi pāṇibhi.
thi-ap25:10.1	Jhāyinīnaṁ bhikkhunīnaṁ,
thi-ap25:10.2	aggaṭṭhānamapatthayiṁ;
thi-ap25:10.3	Nipacca sirasā dhīraṁ,
thi-ap25:10.4	sasaṅghaṁ lokanāyakaṁ.
thi-ap25:11.1	Tadā adantadamako,
thi-ap25:11.2	tilokasaraṇo pabhū;
thi-ap25:11.3	Byākāsi narasārathi,
thi-ap25:11.4	‘lacchase taṁ supatthitaṁ.
thi-ap25:12.1	Satasahassito kappe,
thi-ap25:12.2	okkākakulasambhavo;
thi-ap25:12.3	Gotamo nāma gottena,
thi-ap25:12.4	satthā loke bhavissati.
thi-ap25:13.1	Tassa dhammesu dāyādā,
thi-ap25:13.2	orasā dhammanimmitā;
thi-ap25:13.3	Nandāti nāma nāmena,
thi-ap25:13.4	hessati satthu sāvikā’.
thi-ap25:14.1	Taṁ sutvā muditā hutvā,
thi-ap25:14.2	yāvajīvaṁ tadā jinaṁ;
thi-ap25:14.3	Mettacittā paricariṁ,
thi-ap25:14.4	paccayehi vināyakaṁ.
thi-ap25:15.1	Tena kammena sukatena,
thi-ap25:15.2	cetanāpaṇidhīhi ca;
thi-ap25:15.3	Jahitvā mānusaṁ dehaṁ,
thi-ap25:15.4	tāvatiṁsamagacchahaṁ.
thi-ap25:16.1	Tato cutā yāmamagaṁ,
thi-ap25:16.2	tatohaṁ tusitaṁ gatā;
thi-ap25:16.3	Tato ca nimmānaratiṁ,
thi-ap25:16.4	vasavattipuraṁ tato.
thi-ap25:17.1	Yattha yatthūpapajjāmi,
thi-ap25:17.2	tassa kammassa vāhasā;
thi-ap25:17.3	Tattha tattheva rājūnaṁ,
thi-ap25:17.4	mahesittamakārayiṁ.
thi-ap25:18.1	Tato cutā manussatte,
thi-ap25:18.2	rājānaṁ cakkavattinaṁ;
thi-ap25:18.3	Maṇḍalīnañca rājūnaṁ,
thi-ap25:18.4	mahesittamakārayiṁ.
thi-ap25:19.1	Sampattiṁ anubhotvāna,
thi-ap25:19.2	devesu manujesu ca;
thi-ap25:19.3	Sabbattha sukhitā hutvā,
thi-ap25:19.4	nekakappesu saṁsariṁ.
thi-ap25:20.1	Pacchime bhave sampatte,
thi-ap25:20.2	suramme kapilavhaye;
thi-ap25:20.3	Rañño suddhodanassāhaṁ,
thi-ap25:20.4	dhītā āsiṁ aninditā.
thi-ap25:21.1	Siriyā rūpiniṁ disvā,
thi-ap25:21.2	nanditaṁ āsi taṁ kulaṁ;
thi-ap25:21.3	Tena nandāti me nāmaṁ,
thi-ap25:21.4	sundaraṁ pavaraṁ ahu.
thi-ap25:22.1	Yuvatīnañca sabbāsaṁ,
thi-ap25:22.2	kalyāṇīti ca vissutā;
thi-ap25:22.3	Tasmimpi nagare ramme,
thi-ap25:22.4	ṭhapetvā taṁ yasodharaṁ.
thi-ap25:23.1	Jeṭṭho bhātā tilokaggo,
thi-ap25:23.2	pacchimo arahā tathā;
thi-ap25:23.3	Ekākinī gahaṭṭhāhaṁ,
thi-ap25:23.4	mātarā paricoditā.
thi-ap25:24.1	‘Sākiyamhi kule jātā,
thi-ap25:24.2	putte buddhānujā tuvaṁ;
thi-ap25:24.3	Nandenapi vinā bhūtā,
thi-ap25:24.4	agāre kiṁ nu acchasi.
thi-ap25:25.1	Jarāvasānaṁ yobbaññaṁ,
thi-ap25:25.2	rūpaṁ asucisammataṁ;
thi-ap25:25.3	Rogantamapicārogyaṁ,
thi-ap25:25.4	jīvitaṁ maraṇantikaṁ.
thi-ap25:26.1	Idampi te subhaṁ rūpaṁ,
thi-ap25:26.2	sasīkantaṁ manoharaṁ;
thi-ap25:26.3	Bhūsanānaṁ alaṅkāraṁ,
thi-ap25:26.4	sirisaṅghāṭasannibhaṁ.
thi-ap25:27.1	Puñjitaṁ lokasāraṁva,
thi-ap25:27.2	nayanānaṁ rasāyanaṁ;
thi-ap25:27.3	Puññānaṁ kittijananaṁ,
thi-ap25:27.4	ukkākakulanandanaṁ.
thi-ap25:28.1	Na cireneva kālena,
thi-ap25:28.2	jarā samadhisessati;
thi-ap25:28.3	Vihāya gehaṁ kāruññe,
thi-ap25:28.4	cara dhammamanindite’.
thi-ap25:29.1	Sutvāhaṁ mātu vacanaṁ,
thi-ap25:29.2	pabbajiṁ anagāriyaṁ;
thi-ap25:29.3	Dehena na tu cittena,
thi-ap25:29.4	rūpayobbanalāḷitā.
thi-ap25:30.1	Mahatā ca payattena,
thi-ap25:30.2	jhānajjhena paraṁ mama;
thi-ap25:30.3	Kātuñca vadate mātā,
thi-ap25:30.4	na cāhaṁ tattha ussukā.
thi-ap25:31.1	Tato mahākāruṇiko,
thi-ap25:31.2	disvā maṁ kāmalālasaṁ;
thi-ap25:31.3	Nibbindanatthaṁ rūpasmiṁ,
thi-ap25:31.4	mama cakkhupathe jino.
thi-ap25:32.1	Sakena ānubhāvena,
thi-ap25:32.2	itthiṁ māpesi sobhiniṁ;
thi-ap25:32.3	Dassanīyaṁ suruciraṁ,
thi-ap25:32.4	mamatopi surūpiniṁ.
thi-ap25:33.1	Tamahaṁ vimhitā disvā,
thi-ap25:33.2	ativimhitadehiniṁ;
thi-ap25:33.3	Cintayiṁ ‘saphalaṁ meti,
thi-ap25:33.4	nettalābhañca mānusaṁ.
thi-ap25:34.1	Tamahaṁ ehi subhage,
thi-ap25:34.2	yenattho taṁ vadehi me;
thi-ap25:34.3	Kulaṁ te nāmagottañca,
thi-ap25:34.4	vada me yadi te piyaṁ.
thi-ap25:35.1	Na vañcakālo subhage,
thi-ap25:35.2	ucchaṅge maṁ nivāsaya;
thi-ap25:35.3	Sīdantīva mamaṅgāni,
thi-ap25:35.4	pasuppaya muhuttakaṁ’.
thi-ap25:36.1	Tato sīsaṁ mamaṅge sā,
thi-ap25:36.2	katvā sayi sulocanā;
thi-ap25:36.3	Tassā nalāṭe patitā,
thi-ap25:36.4	luddhā paramadāruṇā.
thi-ap25:37.1	Saha tassā nipātena,
thi-ap25:37.2	piḷakā upapajjatha;
thi-ap25:37.3	Pagghariṁsu pabhinnā ca,
thi-ap25:37.4	kuṇapā pubbalohitā.
thi-ap25:38.1	Pabhinnaṁ vadanañcāpi,
thi-ap25:38.2	kuṇapaṁ pūtigandhanaṁ;
thi-ap25:38.3	Uddhumātaṁ vinilañca,
thi-ap25:38.4	pubbañcāpi sarīrakaṁ.
thi-ap25:39.1	Sā paveditasabbaṅgī,
thi-ap25:39.2	nissasantī muhuṁ muhuṁ;
thi-ap25:39.3	Vedayantī sakaṁ dukkhaṁ,
thi-ap25:39.4	karuṇaṁ paridevayi.
thi-ap25:40.1	‘Dukkhena dukkhitā homi,
thi-ap25:40.2	phusayanti ca vedanā;
thi-ap25:40.3	Mahādukkhe nimuggamhi,
thi-ap25:40.4	saraṇaṁ hohi me sakhī.
thi-ap25:41.1	Kuhiṁ vadanasobhaṁ te,
thi-ap25:41.2	kuhiṁ te tuṅganāsikā;
thi-ap25:41.3	Tambabimbavaroṭṭhaṁ te,
thi-ap25:41.4	vadanaṁ te kuhiṁ gataṁ.
thi-ap25:42.1	Kuhiṁ sasīnibhaṁ vaṇṇaṁ,
thi-ap25:42.2	kambugīvā kuhiṁ gatā;
thi-ap25:42.3	Doḷālolāva te kaṇṇā,
thi-ap25:42.4	vevaṇṇaṁ samupāgatā.
thi-ap25:43.1	Makuḷakhārakākārā,
thi-ap25:43.2	kalikāva payodharā;
thi-ap25:43.3	Pabhinnā pūtikuṇapā,
thi-ap25:43.4	duṭṭhagandhittamāgatā.
thi-ap25:44.1	Vedimajjhāva sussoṇī,
thi-ap25:44.2	sūnāva nītakibbisā;
thi-ap25:44.3	Jātā amejjhabharitā,
thi-ap25:44.4	aho rūpamasassataṁ.
thi-ap25:45.1	Sabbaṁ sarīrasañjātaṁ,
thi-ap25:45.2	pūtigandhaṁ bhayānakaṁ;
thi-ap25:45.3	Susānamiva bībhacchaṁ,
thi-ap25:45.4	ramante yattha bālisā’.
thi-ap25:46.1	Tadā mahākāruṇiko,
thi-ap25:46.2	bhātā me lokanāyako;
thi-ap25:46.3	Disvā saṁviggacittaṁ maṁ,
thi-ap25:46.4	imā gāthā abhāsatha.
thi-ap25:47.1	‘Āturaṁ kuṇapaṁ pūtiṁ,
thi-ap25:47.2	passa nande samussayaṁ;
thi-ap25:47.3	Asubhāya cittaṁ bhāvehi,
thi-ap25:47.4	ekaggaṁ susamāhitaṁ.
thi-ap25:48.1	Yathā idaṁ tathā etaṁ,
thi-ap25:48.2	yathā etaṁ tathā idaṁ;
thi-ap25:48.3	Duggandhaṁ pūtikaṁ vāti,
thi-ap25:48.4	bālānaṁ abhinanditaṁ.
thi-ap25:49.1	Evametaṁ avekkhantī,
thi-ap25:49.2	rattindivamatanditā;
thi-ap25:49.3	Tato sakāya paññāya,
thi-ap25:49.4	abhinibbijjha dakkhasi’.
thi-ap25:50.1	Tatohaṁ atisaṁviggā,
thi-ap25:50.2	sutvā gāthā subhāsitā;
thi-ap25:50.3	Tatraṭṭhitāvahaṁ santī,
thi-ap25:50.4	arahattamapāpuṇiṁ.
thi-ap25:51.1	Yattha yattha nisinnāhaṁ,
thi-ap25:51.2	sadā jhānaparāyaṇā;
thi-ap25:51.3	Jino tasmiṁ guṇe tuṭṭho,
thi-ap25:51.4	etadagge ṭhapesi maṁ.
thi-ap25:52.1	Kilesā jhāpitā mayhaṁ,
thi-ap25:52.2	…pe…
thi-ap25:52.3	viharāmi anāsavā.
thi-ap25:53.1	Svāgataṁ vata me āsi,
thi-ap25:53.2	…pe…
thi-ap25:53.3	kataṁ buddhassa sāsanaṁ.
thi-ap25:54.1	Paṭisambhidā catasso,
thi-ap25:54.2	…pe…
thi-ap25:54.3	kataṁ buddhassa sāsanaṁ”.
thi-ap25:55.1	Itthaṁ sudaṁ nandā bhikkhunī janapadakalyāṇī imā gāthāyo abhāsitthāti.
thi-ap25:56.1	Nandātheriyāpadānaṁ pañcamaṁ.
thi-ap26:0.1	Therīapadāna
thi-ap26:0.2	Kuṇḍalakesīvagga
thi-ap26:0.3	Soṇātherīapadāna
thi-ap26:1.1	“Padumuttaro nāma jino,
thi-ap26:1.2	sabbadhammāna pāragū;
thi-ap26:1.3	Ito satasahassamhi,
thi-ap26:1.4	kappe uppajji nāyako.
thi-ap26:2.1	Tadā seṭṭhikule jātā,
thi-ap26:2.2	sukhitā pūjitā piyā;
thi-ap26:2.3	Upetvā taṁ munivaraṁ,
thi-ap26:2.4	assosiṁ madhuraṁ vacaṁ.
thi-ap26:3.1	Āraddhavīriyānaggaṁ,
thi-ap26:3.2	vaṇṇesi bhikkhuniṁ jino;
thi-ap26:3.3	Taṁ sutvā muditā hutvā,
thi-ap26:3.4	kāraṁ katvāna satthuno.
thi-ap26:4.1	Abhivādiya sambuddhaṁ,
thi-ap26:4.2	ṭhānaṁ taṁ patthayiṁ tadā;
thi-ap26:4.3	Anumodi mahāvīro,
thi-ap26:4.4	‘sijjhataṁ paṇidhī tava.
thi-ap26:5.1	Satasahassito kappe,
thi-ap26:5.2	okkākakulasambhavo;
thi-ap26:5.3	Gotamo nāma gottena,
thi-ap26:5.4	satthā loke bhavissati.
thi-ap26:6.1	Tassa dhammesu dāyādā,
thi-ap26:6.2	orasā dhammanimmitā;
thi-ap26:6.3	Soṇāti nāma nāmena,
thi-ap26:6.4	hessati satthu sāvikā’.
thi-ap26:7.1	Taṁ sutvā muditā hutvā,
thi-ap26:7.2	yāvajīvaṁ tadā jinaṁ;
thi-ap26:7.3	Mettacittā paricariṁ,
thi-ap26:7.4	paccayehi vināyakaṁ.
thi-ap26:8.1	Tena kammena sukatena,
thi-ap26:8.2	cetanāpaṇidhīhi ca;
thi-ap26:8.3	Jahitvā mānusaṁ dehaṁ,
thi-ap26:8.4	tāvatiṁsamagacchahaṁ.
thi-ap26:9.1	Pacchime ca bhave dāni,
thi-ap26:9.2	jātā seṭṭhikule ahaṁ;
thi-ap26:9.3	Sāvatthiyaṁ puravare,
thi-ap26:9.4	iddhe phīte mahaddhane.
thi-ap26:10.1	Yadā ca yobbanappattā,
thi-ap26:10.2	gantvā patikulaṁ ahaṁ;
thi-ap26:10.3	Dasa puttāni ajaniṁ,
thi-ap26:10.4	surūpāni visesato.
thi-ap26:11.1	Sukhedhitā ca te sabbe,
thi-ap26:11.2	jananettamanoharā;
thi-ap26:11.3	Amittānampi rucitā,
thi-ap26:11.4	mama pageva te piyā.
thi-ap26:12.1	Tato mayhaṁ akāmāya,
thi-ap26:12.2	dasaputtapurakkhato;
thi-ap26:12.3	Pabbajittha sa me bhattā,
thi-ap26:12.4	devadevassa sāsane.
thi-ap26:13.1	Tadekikā vicintesiṁ,
thi-ap26:13.2	‘jīvitenālamatthu me;
thi-ap26:13.3	Cattāya patiputtehi,
thi-ap26:13.4	vuḍḍhāya ca varākiyā.
thi-ap26:14.1	Ahampi tattha gacchissaṁ,
thi-ap26:14.2	sampatto yattha me pati’;
thi-ap26:14.3	Evāhaṁ cintayitvāna,
thi-ap26:14.4	pabbajiṁ anagāriyaṁ.
thi-ap26:15.1	Tato ca maṁ bhikkhuniyo,
thi-ap26:15.2	ekaṁ bhikkhunupassaye;
thi-ap26:15.3	Vihāya gacchumovādaṁ,
thi-ap26:15.4	‘tāpehi udakaṁ’ iti.
thi-ap26:16.1	Tadā udakamāhitvā,
thi-ap26:16.2	okiritvāna kumbhiyā;
thi-ap26:16.3	Culle ṭhapetvā āsīnā,
thi-ap26:16.4	tato cittaṁ samādahiṁ.
thi-ap26:17.1	Khandhe aniccato disvā,
thi-ap26:17.2	dukkhato ca anattato;
thi-ap26:17.3	Khepetvā āsave sabbe,
thi-ap26:17.4	arahattamapāpuṇiṁ.
thi-ap26:18.1	Tadāgantvā bhikkhuniyo,
thi-ap26:18.2	uṇhodakamapucchisuṁ;
thi-ap26:18.3	Tejodhātumadhiṭṭhāya,
thi-ap26:18.4	khippaṁ santāpayiṁ jalaṁ.
thi-ap26:19.1	Vimhitā tā jinavaraṁ,
thi-ap26:19.2	etamatthamasāvayuṁ;
thi-ap26:19.3	Taṁ sutvā mudito nātho,
thi-ap26:19.4	imaṁ gāthaṁ abhāsatha.
thi-ap26:20.1	‘Yo ca vassasataṁ jīve,
thi-ap26:20.2	kusīto hīnavīriyo;
thi-ap26:20.3	Ekāhaṁ jīvitaṁ seyyo,
thi-ap26:20.4	vīriyamārabhato daḷhaṁ’.
thi-ap26:21.1	Ārādhito mahāvīro,
thi-ap26:21.2	mayā suppaṭipattiyā;
thi-ap26:21.3	Āraddhavīriyānaggaṁ,
thi-ap26:21.4	mamāha sa mahāmuni.
thi-ap26:22.1	Kilesā jhāpitā mayhaṁ,
thi-ap26:22.2	…pe…
thi-ap26:22.3	viharāmi anāsavā.
thi-ap26:23.1	Svāgataṁ vata me āsi,
thi-ap26:23.2	…pe…
thi-ap26:23.3	kataṁ buddhassa sāsanaṁ.
thi-ap26:24.1	Paṭisambhidā catasso,
thi-ap26:24.2	…pe…
thi-ap26:24.3	kataṁ buddhassa sāsanaṁ”.
thi-ap26:25.1	Itthaṁ sudaṁ soṇā bhikkhunī imā gāthāyo abhāsitthāti.
thi-ap26:26.1	Soṇātheriyāpadānaṁ chaṭṭhaṁ.
thi-ap27:0.1	Therīapadāna
thi-ap27:0.2	Kuṇḍalakesīvagga
thi-ap27:0.3	Bhaddākāpilānītherīapadāna
thi-ap27:1.1	“Padumuttaro nāma jino,
thi-ap27:1.2	sabbadhammāna pāragū;
thi-ap27:1.3	Ito satasahassamhi,
thi-ap27:1.4	kappe uppajji nāyako.
thi-ap27:2.1	Tadāhu haṁsavatiyaṁ,
thi-ap27:2.2	videho nāma nāmato;
thi-ap27:2.3	Seṭṭhī pahūtaratano,
thi-ap27:2.4	tassa jāyā ahosahaṁ.
thi-ap27:3.1	Kadāci so narādiccaṁ,
thi-ap27:3.2	Upecca saparijjano;
thi-ap27:3.3	Dhammamassosi buddhassa,
thi-ap27:3.4	Sabbadukkhabhayappahaṁ.
thi-ap27:4.1	Sāvakaṁ dhutavādānaṁ,
thi-ap27:4.2	aggaṁ kittesi nāyako;
thi-ap27:4.3	Sutvā sattāhikaṁ dānaṁ,
thi-ap27:4.4	datvā buddhassa tādino.
thi-ap27:5.1	Nipacca sirasā pāde,
thi-ap27:5.2	taṁ ṭhānamabhipatthayiṁ;
thi-ap27:5.3	Sa hāsayanto parisaṁ,
thi-ap27:5.4	tadā hi narapuṅgavo.
thi-ap27:6.1	Seṭṭhino anukampāya,
thi-ap27:6.2	imā gāthā abhāsatha;
thi-ap27:6.3	‘Lacchase patthitaṁ ṭhānaṁ,
thi-ap27:6.4	nibbuto hohi puttaka.
thi-ap27:7.1	Satasahassito kappe,
thi-ap27:7.2	okkākakulasambhavo;
thi-ap27:7.3	Gotamo nāma gottena,
thi-ap27:7.4	satthā loke bhavissati.
thi-ap27:8.1	Tassa dhammesu dāyādo,
thi-ap27:8.2	oraso dhammanimmito;
thi-ap27:8.3	Kassapo nāma gottena,
thi-ap27:8.4	hessati satthu sāvako’.
thi-ap27:9.1	Taṁ sutvā mudito hutvā,
thi-ap27:9.2	yāvajīvaṁ tadā jinaṁ;
thi-ap27:9.3	Mettacitto paricari,
thi-ap27:9.4	paccayehi vināyakaṁ.
thi-ap27:10.1	Sāsanaṁ jotayitvāna,
thi-ap27:10.2	so madditvā kutitthiye;
thi-ap27:10.3	Veneyyaṁ vinayitvā ca,
thi-ap27:10.4	nibbuto so sasāvako.
thi-ap27:11.1	Nibbute tamhi lokagge,
thi-ap27:11.2	pūjanatthāya satthuno;
thi-ap27:11.3	Ñātimitte samānetvā,
thi-ap27:11.4	saha tehi akārayi.
thi-ap27:12.1	Sattayojanikaṁ thūpaṁ,
thi-ap27:12.2	ubbiddhaṁ ratanāmayaṁ;
thi-ap27:12.3	Jalantaṁ sataraṁsiṁva,
thi-ap27:12.4	sālarājaṁva phullitaṁ.
thi-ap27:13.1	Sattasatasahassāni,
thi-ap27:13.2	pātiyo tattha kārayi;
thi-ap27:13.3	Naḷaggī viya jotantī,
thi-ap27:13.4	rataneheva sattahi.
thi-ap27:14.1	Gandhatelena pūretvā,
thi-ap27:14.2	dīpānujjalayī tahiṁ;
thi-ap27:14.3	Pūjanatthāya mahesissa,
thi-ap27:14.4	sabbabhūtānukampino.
thi-ap27:15.1	Sattasatasahassāni,
thi-ap27:15.2	puṇṇakumbhāni kārayi;
thi-ap27:15.3	Rataneheva puṇṇāni,
thi-ap27:15.4	pūjanatthāya mahesino.
thi-ap27:16.1	Majjhe aṭṭhaṭṭhakumbhīnaṁ,
thi-ap27:16.2	ussitā kañcanagghiyo;
thi-ap27:16.3	Atirocanti vaṇṇena,
thi-ap27:16.4	saradeva divākaro.
thi-ap27:17.1	Catudvāresu sobhanti,
thi-ap27:17.2	toraṇā ratanāmayā;
thi-ap27:17.3	Ussitā phalakā rammā,
thi-ap27:17.4	sobhanti ratanāmayā.
thi-ap27:18.1	Virocanti parikkhittā,
thi-ap27:18.2	avaṭaṁsā sunimmitā;
thi-ap27:18.3	Ussitāni paṭākāni,
thi-ap27:18.4	ratanāni virocare.
thi-ap27:19.1	Surattaṁ sukataṁ cittaṁ,
thi-ap27:19.2	cetiyaṁ ratanāmayaṁ;
thi-ap27:19.3	Atirocati vaṇṇena,
thi-ap27:19.4	sasañjhova divākaro.
thi-ap27:20.1	Thūpassa vediyo tisso,
thi-ap27:20.2	haritālena pūrayi;
thi-ap27:20.3	Ekaṁ manosilāyekaṁ,
thi-ap27:20.4	añjanena ca ekikaṁ.
thi-ap27:21.1	Pūjaṁ etādisaṁ rammaṁ,
thi-ap27:21.2	kāretvā varavādino;
thi-ap27:21.3	Adāsi dānaṁ saṅghassa,
thi-ap27:21.4	yāvajīvaṁ yathābalaṁ.
thi-ap27:22.1	Sahāva seṭṭhinā tena,
thi-ap27:22.2	tāni puññāni sabbaso;
thi-ap27:22.3	Yāvajīvaṁ karitvāna,
thi-ap27:22.4	sahāva sugatiṁ gatā.
thi-ap27:23.1	Sampattiyonubhotvāna,
thi-ap27:23.2	devatte atha mānuse;
thi-ap27:23.3	Chāyā viya sarīrena,
thi-ap27:23.4	saha teneva saṁsariṁ.
thi-ap27:24.1	Ekanavutito kappe,
thi-ap27:24.2	vipassī nāma nāyako;
thi-ap27:24.3	Uppajji cārudassano,
thi-ap27:24.4	sabbadhammavipassako.
thi-ap27:25.1	Tadāyaṁ bandhumatiyaṁ,
thi-ap27:25.2	brāhmaṇo sādhusammato;
thi-ap27:25.3	Aḍḍho santo guṇenāpi,
thi-ap27:25.4	dhanena ca suduggato.
thi-ap27:26.1	Tadāpi tassāhaṁ āsiṁ,
thi-ap27:26.2	brāhmaṇī samacetasā;
thi-ap27:26.3	Kadāci so dijavaro,
thi-ap27:26.4	saṅgamesi mahāmuniṁ.
thi-ap27:27.1	Nisinnaṁ janakāyamhi,
thi-ap27:27.2	desentaṁ amataṁ padaṁ;
thi-ap27:27.3	Sutvā dhammaṁ pamudito,
thi-ap27:27.4	adāsi ekasāṭakaṁ.
thi-ap27:28.1	Gharamekena vatthena,
thi-ap27:28.2	Gantvānetaṁ sa mabravi;
thi-ap27:28.3	‘Anumoda mahāpuññaṁ,
thi-ap27:28.4	Dinnaṁ buddhassa sāṭakaṁ’.
thi-ap27:29.1	Tadāhaṁ añjaliṁ katvā,
thi-ap27:29.2	anumodiṁ supīṇitā;
thi-ap27:29.3	‘Sudinno sāṭako sāmi,
thi-ap27:29.4	buddhaseṭṭhassa tādino’.
thi-ap27:30.1	Sukhito sajjito hutvā,
thi-ap27:30.2	saṁsaranto bhavābhave;
thi-ap27:30.3	Bārāṇasipure ramme,
thi-ap27:30.4	rājā āsi mahīpati.
thi-ap27:31.1	Tadā tassa mahesīhaṁ,
thi-ap27:31.2	itthigumbassa uttamā;
thi-ap27:31.3	Tassāti dayitā āsiṁ,
thi-ap27:31.4	pubbasnehena bhattuno.
thi-ap27:32.1	Piṇḍāya vicarante te,
thi-ap27:32.2	aṭṭha paccekanāyake;
thi-ap27:32.3	Disvā pamudito hutvā,
thi-ap27:32.4	datvā piṇḍaṁ mahārahaṁ.
thi-ap27:33.1	Puno nimantayitvāna,
thi-ap27:33.2	katvā ratanamaṇḍapaṁ;
thi-ap27:33.3	Kammārehi kataṁ pattaṁ,
thi-ap27:33.4	sovaṇṇaṁ vata tattakaṁ.
thi-ap27:34.1	Samānetvāna te sabbe,
thi-ap27:34.2	tesaṁ dānamadāsi so;
thi-ap27:34.3	Soṇṇāsane paviṭṭhānaṁ,
thi-ap27:34.4	pasanno sehi pāṇibhi.
thi-ap27:35.1	Tampi dānaṁ sahādāsiṁ,
thi-ap27:35.2	kāsirājenahaṁ tadā;
thi-ap27:35.3	Punāhaṁ bārāṇasiyaṁ,
thi-ap27:35.4	jātā kāsikagāmake.
thi-ap27:36.1	Kuṭumbikakule phīte,
thi-ap27:36.2	sukhito so sabhātuko;
thi-ap27:36.3	Jeṭṭhassa bhātuno jāyā,
thi-ap27:36.4	ahosiṁ supatibbatā.
thi-ap27:37.1	Paccekabuddhaṁ disvāna,
thi-ap27:37.2	kaniyassa mama bhattuno;
thi-ap27:37.3	Bhāgannaṁ tassa datvāna,
thi-ap27:37.4	āgate tamhi pāvadiṁ.
thi-ap27:38.1	Nābhinandittha so dānaṁ,
thi-ap27:38.2	tato tassa adāsahaṁ;
thi-ap27:38.3	Ukhā āniya taṁ annaṁ,
thi-ap27:38.4	puno tasseva so adā.
thi-ap27:39.1	Tadannaṁ chaḍḍayitvāna,
thi-ap27:39.2	duṭṭhā buddhassahaṁ tadā;
thi-ap27:39.3	Pattaṁ kalalapuṇṇaṁ taṁ,
thi-ap27:39.4	adāsiṁ tassa tādino.
thi-ap27:40.1	Dāne ca gahaṇe ceva,
thi-ap27:40.2	apace padusepi ca;
thi-ap27:40.3	Samacittamukhaṁ disvā,
thi-ap27:40.4	tadāhaṁ saṁvijiṁ bhusaṁ.
thi-ap27:41.1	Puno pattaṁ gahetvāna,
thi-ap27:41.2	sodhayitvā sugandhinā;
thi-ap27:41.3	Pasannacittā pūretvā,
thi-ap27:41.4	saghataṁ sakkaraṁ adaṁ.
thi-ap27:42.1	Yattha yatthūpapajjāmi,
thi-ap27:42.2	surūpā homi dānato;
thi-ap27:42.3	Buddhassa apakārena,
thi-ap27:42.4	duggandhā vadanena ca.
thi-ap27:43.1	Puna kassapavīrassa,
thi-ap27:43.2	nidhāyantamhi cetiye;
thi-ap27:43.3	Sovaṇṇaṁ iṭṭhakaṁ varaṁ,
thi-ap27:43.4	adāsiṁ muditā ahaṁ.
thi-ap27:44.1	Catujjātena gandhena,
thi-ap27:44.2	nicayitvā tamiṭṭhakaṁ;
thi-ap27:44.3	Muttā duggandhadosamhā,
thi-ap27:44.4	sabbaṅgasusamāgatā.
thi-ap27:45.1	Sattapātisahassāni,
thi-ap27:45.2	rataneheva sattahi;
thi-ap27:45.3	Kāretvā ghatapūrāni,
thi-ap27:45.4	vaṭṭīni ca sahassaso.
thi-ap27:46.1	Pakkhipitvā padīpetvā,
thi-ap27:46.2	ṭhapayiṁ sattapantiyo;
thi-ap27:46.3	Pūjanatthaṁ lokanāthassa,
thi-ap27:46.4	vippasannena cetasā.
thi-ap27:47.1	Tadāpi tamhi puññamhi,
thi-ap27:47.2	bhāginīhaṁ visesato;
thi-ap27:47.3	Puna kāsīsu sañjāto,
thi-ap27:47.4	sumitto iti vissuto.
thi-ap27:48.1	Tassāhaṁ bhariyā āsiṁ,
thi-ap27:48.2	sukhitā sajjitā piyā;
thi-ap27:48.3	Tadā paccekamunino,
thi-ap27:48.4	adāsiṁ ghanaveṭhanaṁ.
thi-ap27:49.1	Tassāpi bhāginī āsiṁ,
thi-ap27:49.2	moditvā dānamuttamaṁ;
thi-ap27:49.3	Punāpi kāsiraṭṭhamhi,
thi-ap27:49.4	jāto koliyajātiyā.
thi-ap27:50.1	Tadā koliyaputtānaṁ,
thi-ap27:50.2	satehi saha pañcahi;
thi-ap27:50.3	Pañcapaccekabuddhānaṁ,
thi-ap27:50.4	satāni samupaṭṭhahi.
thi-ap27:51.1	Temāsaṁ tappayitvāna,
thi-ap27:51.2	adāsi ca ticīvaraṁ;
thi-ap27:51.3	Jāyā tassa tadā āsiṁ,
thi-ap27:51.4	puññakammapathānugā.
thi-ap27:52.1	Tato cuto ahu rājā,
thi-ap27:52.2	nando nāma mahāyaso;
thi-ap27:52.3	Tassāpi mahesī āsiṁ,
thi-ap27:52.4	sabbakāmasamiddhinī.
thi-ap27:53.1	Tadā rājā bhavitvāna,
thi-ap27:53.2	brahmadatto mahīpati;
thi-ap27:53.3	Padumavatīputtānaṁ,
thi-ap27:53.4	paccekamuninaṁ tadā.
thi-ap27:54.1	Satāni pañcanūnāni,
thi-ap27:54.2	yāvajīvaṁ upaṭṭhahiṁ;
thi-ap27:54.3	Rājuyyāne nivāsetvā,
thi-ap27:54.4	nibbutāni ca pūjayiṁ.
thi-ap27:55.1	Cetiyāni ca kāretvā,
thi-ap27:55.2	pabbajitvā ubho mayaṁ;
thi-ap27:55.3	Bhāvetvā appamaññāyo,
thi-ap27:55.4	brahmalokaṁ agamhase.
thi-ap27:56.1	Tato cuto mahātitthe,
thi-ap27:56.2	sujāto pipphalāyano;
thi-ap27:56.3	Mātā sumanadevīti,
thi-ap27:56.4	kosigotto dijo pitā.
thi-ap27:57.1	Ahaṁ madde janapade,
thi-ap27:57.2	sākalāya puruttame;
thi-ap27:57.3	Kappilassa dijassāsiṁ,
thi-ap27:57.4	dhītā mātā sucīmati.
thi-ap27:58.1	Ghanakañcanabimbena,
thi-ap27:58.2	nimminitvāna maṁ pitā;
thi-ap27:58.3	Adā kassapadhīrassa,
thi-ap27:58.4	kāmehi vajjitassamaṁ.
thi-ap27:59.1	Kadāci so kāruṇiko,
thi-ap27:59.2	gantvā kammantapekkhako;
thi-ap27:59.3	Kākādikehi khajjante,
thi-ap27:59.4	pāṇe disvāna saṁviji.
thi-ap27:60.1	Gharevāhaṁ tile jāte,
thi-ap27:60.2	disvānātapatāpane;
thi-ap27:60.3	Kimī kākehi khajjante,
thi-ap27:60.4	saṁvegamalabhiṁ tadā.
thi-ap27:61.1	Tadā so pabbajī dhīro,
thi-ap27:61.2	ahaṁ tamanupabbajiṁ;
thi-ap27:61.3	Pañcavassāni nivasiṁ,
thi-ap27:61.4	paribbājavate ahaṁ.
thi-ap27:62.1	Yadā pabbajitā āsi,
thi-ap27:62.2	gotamī jinaposikā;
thi-ap27:62.3	Tadāhaṁ tamupagantvā,
thi-ap27:62.4	buddhena anusāsitā.
thi-ap27:63.1	Na cireneva kālena,
thi-ap27:63.2	arahattamapāpuṇiṁ;
thi-ap27:63.3	Aho kalyāṇamittattaṁ,
thi-ap27:63.4	kassapassa sirīmato.
thi-ap27:64.1	Suto buddhassa dāyādo,
thi-ap27:64.2	kassapo susamāhito;
thi-ap27:64.3	Pubbenivāsaṁ yo vedi,
thi-ap27:64.4	saggāpāyañca passati.
thi-ap27:65.1	Atho jātikkhayaṁ patto,
thi-ap27:65.2	abhiññāvosito muni;
thi-ap27:65.3	Etāhi tīhi vijjāhi,
thi-ap27:65.4	tevijjo hoti brāhmaṇo.
thi-ap27:66.1	Tatheva bhaddākāpilānī,
thi-ap27:66.2	tevijjā maccuhāyinī;
thi-ap27:66.3	Dhāreti antimaṁ dehaṁ,
thi-ap27:66.4	jitvā māraṁ savāhanaṁ.
thi-ap27:67.1	Disvā ādīnavaṁ loke,
thi-ap27:67.2	ubho pabbajitā mayaṁ;
thi-ap27:67.3	Tyamha khīṇāsavā dantā,
thi-ap27:67.4	sītibhūtāmha nibbutā.
thi-ap27:68.1	Kilesā jhāpitā mayhaṁ,
thi-ap27:68.2	…pe…
thi-ap27:68.3	viharāmi anāsavā.
thi-ap27:69.1	Svāgataṁ vata me āsi,
thi-ap27:69.2	…pe…
thi-ap27:69.3	kataṁ buddhassa sāsanaṁ.
thi-ap27:70.1	Paṭisambhidā catasso,
thi-ap27:70.2	…pe…
thi-ap27:70.3	kataṁ buddhassa sāsanaṁ”.
thi-ap27:71.1	Itthaṁ sudaṁ bhaddākāpilānī bhikkhunī imā gāthāyo abhāsitthāti.
thi-ap27:72.1	Bhaddākāpilānītheriyāpadānaṁ sattamaṁ.
thi-ap28:0.1	Therīapadāna
thi-ap28:0.2	Kuṇḍalakesīvagga
thi-ap28:0.3	Yasodharātherīapadāna
thi-ap28:1.1	Ekasmiṁ samaye ramme,
thi-ap28:1.2	iddhe rājagahe pure;
thi-ap28:1.3	Pabbhāramhi varekamhi,
thi-ap28:1.4	vasante naranāyake.
thi-ap28:2.1	Vasantiyā tamhi nagare,
thi-ap28:2.2	ramme bhikkhunupassaye;
thi-ap28:2.3	Yasodharābhikkhuniyā,
thi-ap28:2.4	evaṁ āsi vitakkitaṁ.
thi-ap28:3.1	“Suddhodano mahārājā,
thi-ap28:3.2	gotamī ca pajāpatī;
thi-ap28:3.3	Abhiññātā mahātherā,
thi-ap28:3.4	theriyo ca mahiddhikā.
thi-ap28:4.1	Santiṁ gatāva āsuṁ te,
thi-ap28:4.2	dīpaccīva nirāsavā;
thi-ap28:4.3	Lokanāthe dharanteva,
thi-ap28:4.4	ahampi ca sivaṁ padaṁ.
thi-ap28:5.1	Gamissāmī”ti cintetvā,
thi-ap28:5.2	passantī āyumattano;
thi-ap28:5.3	Passitvā āyusaṅkhāraṁ,
thi-ap28:5.4	tadaheva khayaṁ gataṁ.
thi-ap28:6.1	Pattacīvaramādāya,
thi-ap28:6.2	nikkhamitvā sakassamā;
thi-ap28:6.3	Purakkhatā bhikkhunībhi,
thi-ap28:6.4	satehi sahassehi sā.
thi-ap28:7.1	Mahiddhikā mahāpaññā,
thi-ap28:7.2	sambuddhaṁ upasaṅkami;
thi-ap28:7.3	Sambuddhaṁ abhivādetvā,
thi-ap28:7.4	satthuno cakkalakkhaṇe;
thi-ap28:7.5	Nisinnā ekamantamhi,
thi-ap28:7.6	idaṁ vacanamabravi.
thi-ap28:8.1	“Aṭṭhasattativassāhaṁ,
thi-ap28:8.2	pacchimo vattate vayo;
thi-ap28:8.3	Pabbhāramhi anuppattā,
thi-ap28:8.4	ārocemi mahāmuni.
thi-ap28:9.1	Paripakko vayo mayhaṁ,
thi-ap28:9.2	parittaṁ mama jīvitaṁ;
thi-ap28:9.3	Pahāya vo gamissāmi,
thi-ap28:9.4	kataṁ me saraṇamattano.
thi-ap28:10.1	Vayamhi pacchime kāle,
thi-ap28:10.2	maraṇaṁ uparuddhati;
thi-ap28:10.3	Ajjarattiṁ mahāvīra,
thi-ap28:10.4	pāpuṇissāmi nibbutiṁ.
thi-ap28:11.1	Natthi jāti jarā byādhi,
thi-ap28:11.2	maraṇañca mahāmune;
thi-ap28:11.3	Ajarāmaraṇaṁ puraṁ,
thi-ap28:11.4	gamissāmi asaṅkhataṁ.
thi-ap28:12.1	Yāvatā parisā nāma,
thi-ap28:12.2	samupāsanti satthuno;
thi-ap28:12.3	Aparādhamajānantī,
thi-ap28:12.4	khamantaṁ sammukhā mune.
thi-ap28:13.1	Saṁsaritvā ca saṁsāre,
thi-ap28:13.2	khalitañce mamaṁ tayi;
thi-ap28:13.3	Ārocemi mahāvīra,
thi-ap28:13.4	aparādhaṁ khamassu me”.
thi-ap28:14.1	Sutvāna vacanaṁ tassā,
thi-ap28:14.2	munindo idamabravi;
thi-ap28:14.3	“Kimuttaraṁ te vakkhāmi,
thi-ap28:14.4	nibbānāya vajantiyā.
thi-ap28:15.1	Iddhiñcāpi nidassehi,
thi-ap28:15.2	mama sāsanakārike;
thi-ap28:15.3	Parisānañca sabbāsaṁ,
thi-ap28:15.4	kaṅkhaṁ chindassu yāvatā”.
thi-ap28:16.1	Sutvā taṁ munino vācaṁ,
thi-ap28:16.2	bhikkhunī sā yasodharā;
thi-ap28:16.3	Vanditvā munirājaṁ taṁ,
thi-ap28:16.4	idaṁ vacanamabravi.
thi-ap28:17.1	“Yasodharā ahaṁ vīra,
thi-ap28:17.2	agāre te pajāpati;
thi-ap28:17.3	Sākiyamhi kule jātā,
thi-ap28:17.4	itthiaṅge patiṭṭhitā.
thi-ap28:18.1	Thīnaṁ satasahassānaṁ,
thi-ap28:18.2	navutīnaṁ chaduttari;
thi-ap28:18.3	Agāre te ahaṁ vīra,
thi-ap28:18.4	pāmokkhā sabbā issarā.
thi-ap28:19.1	Rūpācāraguṇūpetā,
thi-ap28:19.2	yobbanaṭṭhā piyaṁvadā;
thi-ap28:19.3	Sabbā maṁ apacāyanti,
thi-ap28:19.4	devatā viya mānusā.
thi-ap28:20.1	Kaññāsatasahassapamukhā,
thi-ap28:20.2	Sakyaputtanivesane;
thi-ap28:20.3	Samānasukhadukkhatā,
thi-ap28:20.4	Devatā viya nandane.
thi-ap28:21.1	Kāmadhātumatikkamma,
thi-ap28:21.2	saṇṭhitā rūpadhātuyā;
thi-ap28:21.3	Rūpena sadisā natthi,
thi-ap28:21.4	ṭhapetvā lokanāyakaṁ”.
thi-ap28:22.1	Sambuddhaṁ abhivādetvā,
thi-ap28:22.2	iddhiṁ dassesi satthuno;
thi-ap28:22.3	Nekā nānāvidhākārā,
thi-ap28:22.4	mahāiddhīpi dassayī.
thi-ap28:23.1	Cakkavāḷasamaṁ kāyaṁ,
thi-ap28:23.2	sīsaṁ uttarato kuru;
thi-ap28:23.3	Ubho pakkhā duve dīpā,
thi-ap28:23.4	jambudīpaṁ sarīrato.
thi-ap28:24.1	Dakkhiṇañca saraṁ piñchaṁ,
thi-ap28:24.2	nānāsākhā tu pattakā;
thi-ap28:24.3	Candañca sūriyañcakkhi,
thi-ap28:24.4	merupabbatato sikhaṁ.
thi-ap28:25.1	Cakkavāḷagiriṁ tuṇḍaṁ,
thi-ap28:25.2	jamburukkhaṁ samūlakaṁ;
thi-ap28:25.3	Bījamānā upāgantvā,
thi-ap28:25.4	vandantī lokanāyakaṁ.
thi-ap28:26.1	Hatthivaṇṇaṁ tathevassaṁ,
thi-ap28:26.2	pabbataṁ jaladhiṁ tathā;
thi-ap28:26.3	Candimaṁ sūriyaṁ meruṁ,
thi-ap28:26.4	sakkavaṇṇañca dassayi.
thi-ap28:27.1	“Yasodharā ahaṁ vīra,
thi-ap28:27.2	pāde vandāmi cakkhuma”;
thi-ap28:27.3	Sahassalokadhātūnaṁ,
thi-ap28:27.4	phullapadmena chādayi.
thi-ap28:28.1	Brahmavaṇṇañca māpetvā,
thi-ap28:28.2	dhammaṁ desesi suññataṁ;
thi-ap28:28.3	“Yasodharā ahaṁ vīra,
thi-ap28:28.4	pāde vandāmi cakkhuma.
thi-ap28:29.1	Iddhīsu ca vasī homi,
thi-ap28:29.2	dibbāya sotadhātuyā;
thi-ap28:29.3	Cetopariyañāṇassa,
thi-ap28:29.4	vasī homi mahāmuni.
thi-ap28:30.1	Pubbenivāsaṁ jānāmi,
thi-ap28:30.2	dibbacakkhu visodhitaṁ;
thi-ap28:30.3	Sabbāsavā parikkhīṇā,
thi-ap28:30.4	natthi dāni punabbhavo.
thi-ap28:31.1	Atthadhammaniruttīsu,
thi-ap28:31.2	paṭibhāne tatheva ca;
thi-ap28:31.3	Ñāṇaṁ mayhaṁ mahāvīra,
thi-ap28:31.4	uppannaṁ tava santike.
thi-ap28:32.1	Pubbānaṁ lokanāthānaṁ,
thi-ap28:32.2	saṅgamaṁ te nidassitaṁ;
thi-ap28:32.3	Adhikāraṁ bahuṁ mayhaṁ,
thi-ap28:32.4	tuyhatthāya mahāmune.
thi-ap28:33.1	Yaṁ mayhaṁ pūritaṁ kammaṁ,
thi-ap28:33.2	Kusalaṁ sarase mune;
thi-ap28:33.3	Tuyhatthāya mahāvīra,
thi-ap28:33.4	Puññaṁ upacitaṁ mayā.
thi-ap28:34.1	Abhabbaṭṭhāne vajjetvā,
thi-ap28:34.2	vārayitvā anācaraṁ;
thi-ap28:34.3	Tuyhatthāya mahāvīra,
thi-ap28:34.4	sañcattaṁ jīvitaṁ mayā.
thi-ap28:35.1	Nekakoṭisahassāni,
thi-ap28:35.2	bhariyatthāyadāsi maṁ;
thi-ap28:35.3	Na tattha vimanā homi,
thi-ap28:35.4	tuyhatthāya mahāmuni.
thi-ap28:36.1	Nekakoṭisahassāni,
thi-ap28:36.2	upakārāyadāsi maṁ;
thi-ap28:36.3	Na tattha vimanā homi,
thi-ap28:36.4	tuyhatthāya mahāmuni.
thi-ap28:37.1	Nekakoṭisahassāni,
thi-ap28:37.2	bhojanatthāyadāsi maṁ;
thi-ap28:37.3	Na tattha vimanā homi,
thi-ap28:37.4	tuyhatthāya mahāmuni.
thi-ap28:38.1	Nekakoṭisahassāni,
thi-ap28:38.2	jīvitāni pariccajiṁ;
thi-ap28:38.3	Bhayamokkhaṁ karissanti,
thi-ap28:38.4	dadāmi mama jīvitaṁ.
thi-ap28:39.1	Aṅgagate alaṅkāre,
thi-ap28:39.2	vatthe nānāvidhe bahū;
thi-ap28:39.3	Itthimaṇḍe na gūhāmi,
thi-ap28:39.4	tuyhatthāya mahāmuni.
thi-ap28:40.1	Dhanadhaññapariccāgaṁ,
thi-ap28:40.2	gāmāni nigamāni ca;
thi-ap28:40.3	Khettaṁ puttā ca dhītā ca,
thi-ap28:40.4	pariccattā mahāmuni.
thi-ap28:41.1	Hatthī assā gavā cāpi,
thi-ap28:41.2	dāsiyo paricārikā;
thi-ap28:41.3	Tuyhatthāya mahāvīra,
thi-ap28:41.4	pariccattā asaṅkhiyā.
thi-ap28:42.1	Yaṁ mayhaṁ paṭimantesi,
thi-ap28:42.2	dānaṁ dassāmi yācake;
thi-ap28:42.3	Vimanaṁ me na passāmi,
thi-ap28:42.4	dadato dānamuttamaṁ.
thi-ap28:43.1	Nānāvidhaṁ bahuṁ dukkhaṁ,
thi-ap28:43.2	saṁsāre ca bahubbidhe;
thi-ap28:43.3	Tuyhatthāya mahāvīra,
thi-ap28:43.4	anubhuttaṁ asaṅkhiyaṁ.
thi-ap28:44.1	Sukhappattānumodāmi,
thi-ap28:44.2	na ca dukkhesu dummanā;
thi-ap28:44.3	Sabbattha tulitā homi,
thi-ap28:44.4	tuyhatthāya mahāmuni.
thi-ap28:45.1	Anumaggena sambuddho,
thi-ap28:45.2	yaṁ dhammaṁ abhinīhari;
thi-ap28:45.3	Anubhotvā sukhaṁ dukkhaṁ,
thi-ap28:45.4	patto bodhiṁ mahāmuni.
thi-ap28:46.1	Brahmadevañca sambuddhaṁ,
thi-ap28:46.2	gotamaṁ lokanāyakaṁ;
thi-ap28:46.3	Aññesaṁ lokanāthānaṁ,
thi-ap28:46.4	saṅgamaṁ te bahuṁ mayā.
thi-ap28:47.1	Adhikāraṁ bahuṁ mayhaṁ,
thi-ap28:47.2	tuyhatthāya mahāmuni;
thi-ap28:47.3	Gavesato buddhadhamme,
thi-ap28:47.4	ahaṁ te paricārikā.
thi-ap28:48.1	Kappe ca satasahasse,
thi-ap28:48.2	caturo ca asaṅkhiye;
thi-ap28:48.3	Dīpaṅkaro mahāvīro,
thi-ap28:48.4	uppajji lokanāyako.
thi-ap28:49.1	Paccantadesavisaye,
thi-ap28:49.2	nimantetvā tathāgataṁ;
thi-ap28:49.3	Tassa āgamanaṁ maggaṁ,
thi-ap28:49.4	sodhenti tuṭṭhamānasā.
thi-ap28:50.1	Tena kālena so āsi,
thi-ap28:50.2	sumedho nāma brāhmaṇo;
thi-ap28:50.3	Maggañca paṭiyādesi,
thi-ap28:50.4	āyato sabbadassino.
thi-ap28:51.1	Tena kālenahaṁ āsiṁ,
thi-ap28:51.2	kaññā brāhmaṇasambhavā;
thi-ap28:51.3	Sumittā nāma nāmena,
thi-ap28:51.4	upagacchiṁ samāgamaṁ.
thi-ap28:52.1	Aṭṭha uppalahatthāni,
thi-ap28:52.2	pūjanatthāya satthuno;
thi-ap28:52.3	Ādāya janasammajjhe,
thi-ap28:52.4	addasaṁ isimuggataṁ.
thi-ap28:53.1	Cirānugataṁ dayitaṁ,
thi-ap28:53.2	atikkantaṁ manoharaṁ;
thi-ap28:53.3	Disvā tadā amaññissaṁ,
thi-ap28:53.4	saphalaṁ jīvitaṁ mama.
thi-ap28:54.1	Parakkamaṁ taṁ saphalaṁ,
thi-ap28:54.2	addasaṁ isino tadā;
thi-ap28:54.3	Pubbakammena sambuddhe,
thi-ap28:54.4	cittañcāpi pasīdi me.
thi-ap28:55.1	Bhiyyo cittaṁ pasādesiṁ,
thi-ap28:55.2	ise uggatamānase;
thi-ap28:55.3	Deyyaṁ aññaṁ na passāmi,
thi-ap28:55.4	demi pupphāni te isi.
thi-ap28:56.1	‘Pañca hatthā tava hontu,
thi-ap28:56.2	tayo hontu mamaṁ ise;
thi-ap28:56.3	Tena saddhiṁ samā hontu,
thi-ap28:56.4	bodhatthāya tavaṁ ise’.
thi-ap28:57.1	Catutthaṁ bhāṇavāraṁ.
thi-ap28:58.1	Isi gahetvā pupphāni,
thi-ap28:58.2	āgacchantaṁ mahāyasaṁ;
thi-ap28:58.3	Pūjesi janasammajjhe,
thi-ap28:58.4	bodhatthāya mahāisi.
thi-ap28:59.1	Passitvā janasammajjhe,
thi-ap28:59.2	dīpaṅkaro mahāmuni;
thi-ap28:59.3	Viyākāsi mahāvīro,
thi-ap28:59.4	isi muggatamānasaṁ.
thi-ap28:60.1	Aparimeyye ito kappe,
thi-ap28:60.2	dīpaṅkaro mahāmuni;
thi-ap28:60.3	Mama kammaṁ viyākāsi,
thi-ap28:60.4	ujubhāvaṁ mahāmuni.
thi-ap28:61.1	‘Samacittā samakammā,
thi-ap28:61.2	samakārī bhavissati;
thi-ap28:61.3	Piyā hessati kammena,
thi-ap28:61.4	tuyhatthāya mahāisi.
thi-ap28:62.1	Sudassanā supiyā ca,
thi-ap28:62.2	manāpā piyavādinī;
thi-ap28:62.3	Tassa dhammesu dāyādā,
thi-ap28:62.4	viharissati iddhikā.
thi-ap28:63.1	Yathāpi bhaṇḍasāmuggaṁ,
thi-ap28:63.2	anurakkhati sāmino;
thi-ap28:63.3	Evaṁ kusaladhammānaṁ,
thi-ap28:63.4	anurakkhissate ayaṁ.
thi-ap28:64.1	Tassa te anukampantī,
thi-ap28:64.2	pūrayissati pāramī;
thi-ap28:64.3	Sīhova pañjaraṁ bhetvā,
thi-ap28:64.4	pāpuṇissati bodhiyaṁ’.
thi-ap28:65.1	Aparimeyye ito kappe,
thi-ap28:65.2	yaṁ maṁ buddho viyākarī;
thi-ap28:65.3	Taṁ vācaṁ anumodentī,
thi-ap28:65.4	evaṅkārī bhaviṁ ahaṁ.
thi-ap28:66.1	Tassa kammassa sukatassa,
thi-ap28:66.2	tattha cittaṁ pasādayiṁ;
thi-ap28:66.3	Devamanussakaṁ yoniṁ,
thi-ap28:66.4	anubhotvā asaṅkhiyaṁ.
thi-ap28:67.1	Sukhadukkhenubhotvāhaṁ,
thi-ap28:67.2	devesu mānusesu ca;
thi-ap28:67.3	Pacchime bhave sampatte,
thi-ap28:67.4	ajāyiṁ sākiye kule.
thi-ap28:68.1	Rūpavatī bhogavatī,
thi-ap28:68.2	yasasīlavatī tato;
thi-ap28:68.3	Sabbaṅgasampadā homi,
thi-ap28:68.4	kulesu abhisakkatā.
thi-ap28:69.1	Lābhaṁ silokaṁ sakkāraṁ,
thi-ap28:69.2	lokadhammasamāgamaṁ;
thi-ap28:69.3	Cittañca dukkhitaṁ natthi,
thi-ap28:69.4	vasāmi akutobhayā.
thi-ap28:70.1	Vuttañhetaṁ bhagavatā,
thi-ap28:70.2	‘rañño antepure tadā;
thi-ap28:70.3	Khattiyānaṁ pure vīra,
thi-ap28:70.4	upakārañca niddisi.
thi-ap28:71.1	Upakārā ca yā nārī,
thi-ap28:71.2	yā ca nārī sukhe dukhe;
thi-ap28:71.3	Atthakkhāyī ca yā nārī,
thi-ap28:71.4	yā ca nārīnukampikā’.
thi-ap28:72.1	Pañcakoṭisatā buddhā,
thi-ap28:72.2	navakoṭisatāni ca;
thi-ap28:72.3	Etesaṁ devadevānaṁ,
thi-ap28:72.4	mahādānaṁ pavattayiṁ.
thi-ap28:73.1	Adhikāraṁ mahā mayhaṁ,
thi-ap28:73.2	dhammarāja suṇohi me;
thi-ap28:73.3	Ekādasakoṭisatā,
thi-ap28:73.4	buddhā dvādasa koṭiyo.
thi-ap28:74.1	Etesaṁ devadevānaṁ,
thi-ap28:74.2	mahādānaṁ pavattayiṁ;
thi-ap28:74.3	Adhikāraṁ mahā mayhaṁ,
thi-ap28:74.4	dhammarāja suṇohi me.
thi-ap28:75.1	Vīsakoṭisatā buddhā,
thi-ap28:75.2	tiṁsakoṭisatāni ca;
thi-ap28:75.3	Etesaṁ devadevānaṁ,
thi-ap28:75.4	mahādānaṁ pavattayiṁ.
thi-ap28:76.1	Adhikāraṁ mahā mayhaṁ,
thi-ap28:76.2	dhammarāja suṇohi me;
thi-ap28:76.3	Cattālīsakoṭisatā,
thi-ap28:76.4	paññāsa koṭisatāni ca.
thi-ap28:77.1	Etesaṁ devadevānaṁ,
thi-ap28:77.2	mahādānaṁ pavattayiṁ;
thi-ap28:77.3	Adhikāraṁ mahā mayhaṁ,
thi-ap28:77.4	dhammarāja suṇohi me.
thi-ap28:78.1	Saṭṭhikoṭisatā buddhā,
thi-ap28:78.2	sattatikoṭisatāni ca;
thi-ap28:78.3	Etesaṁ devadevānaṁ,
thi-ap28:78.4	mahādānaṁ pavattayiṁ.
thi-ap28:79.1	Adhikāraṁ mahā mayhaṁ,
thi-ap28:79.2	dhammarāja suṇohi me;
thi-ap28:79.3	Asītikoṭisatā buddhā,
thi-ap28:79.4	navutikoṭisatāni ca.
thi-ap28:80.1	Etesaṁ devadevānaṁ,
thi-ap28:80.2	mahādānaṁ pavattayiṁ;
thi-ap28:80.3	Adhikāraṁ mahā mayhaṁ,
thi-ap28:80.4	dhammarāja suṇohi me.
thi-ap28:81.1	Koṭisatasahassāni,
thi-ap28:81.2	honti lokagganāyakā;
thi-ap28:81.3	Etesaṁ devadevānaṁ,
thi-ap28:81.4	mahādānaṁ pavattayiṁ.
thi-ap28:82.1	Adhikāraṁ mahā mayhaṁ,
thi-ap28:82.2	dhammarāja suṇohi me;
thi-ap28:82.3	Navakoṭisahassāni,
thi-ap28:82.4	apare lokanāyakā.
thi-ap28:83.1	Etesaṁ devadevānaṁ,
thi-ap28:83.2	mahādānaṁ pavattayiṁ;
thi-ap28:83.3	Adhikāraṁ mahā mayhaṁ,
thi-ap28:83.4	dhammarāja suṇohi me.
thi-ap28:84.1	Koṭisatasahassāni,
thi-ap28:84.2	pañcāsītimahesinaṁ;
thi-ap28:84.3	Pañcāsītikoṭisatā,
thi-ap28:84.4	sattatiṁsā ca koṭiyo.
thi-ap28:85.1	Etesaṁ devadevānaṁ,
thi-ap28:85.2	mahādānaṁ pavattayiṁ;
thi-ap28:85.3	Adhikāraṁ mahā mayhaṁ,
thi-ap28:85.4	dhammarāja suṇohi me.
thi-ap28:86.1	Paccekabuddhā vītarāgā,
thi-ap28:86.2	aṭṭhaṭṭhamakakoṭiyo;
thi-ap28:86.3	Adhikāraṁ mahā mayhaṁ,
thi-ap28:86.4	dhammarāja suṇohi me.
thi-ap28:87.1	Khīṇāsavā vītamalā,
thi-ap28:87.2	asaṅkhiyā buddhasāvakā;
thi-ap28:87.3	Adhikāraṁ mahā mayhaṁ,
thi-ap28:87.4	dhammarāja suṇohi me.
thi-ap28:88.1	Evaṁ dhamme suciṇṇānaṁ,
thi-ap28:88.2	sadā dhammassa cārinaṁ;
thi-ap28:88.3	Dhammacārī sukhaṁ seti,
thi-ap28:88.4	asmiṁ loke paramhi ca.
thi-ap28:89.1	Dhammaṁ care sucaritaṁ,
thi-ap28:89.2	na naṁ duccaritaṁ care;
thi-ap28:89.3	Dhammacārī sukhaṁ seti,
thi-ap28:89.4	asmiṁ loke paramhi ca.
thi-ap28:90.1	Nibbinditvāna saṁsāre,
thi-ap28:90.2	pabbajiṁ anagāriyaṁ;
thi-ap28:90.3	Sahassaparivārena,
thi-ap28:90.4	pabbajitvā akiñcanā.
thi-ap28:91.1	Agāraṁ vijahitvāna,
thi-ap28:91.2	pabbajiṁ anagāriyaṁ;
thi-ap28:91.3	Aḍḍhamāse asampatte,
thi-ap28:91.4	catusaccamapāpuṇiṁ.
thi-ap28:92.1	Cīvaraṁ piṇḍapātañca,
thi-ap28:92.2	paccayaṁ sayanāsanaṁ;
thi-ap28:92.3	Upanenti bahū janā,
thi-ap28:92.4	sāgareyeva ūmiyo.
thi-ap28:93.1	Kilesā jhāpitā mayhaṁ,
thi-ap28:93.2	…pe…
thi-ap28:93.3	viharāmi anāsavā.
thi-ap28:94.1	Svāgataṁ vata me āsi,
thi-ap28:94.2	…pe…
thi-ap28:94.3	kataṁ buddhassa sāsanaṁ.
thi-ap28:95.1	Paṭisambhidā catasso,
thi-ap28:95.2	…pe…
thi-ap28:95.3	kataṁ buddhassa sāsanaṁ.
thi-ap28:96.1	Evaṁ bahuvidhaṁ dukkhaṁ,
thi-ap28:96.2	sampattī ca bahubbidhā;
thi-ap28:96.3	Visuddhibhāvaṁ sampattā,
thi-ap28:96.4	labhāmi sabbasampadā.
thi-ap28:97.1	Yā dadāti sakattānaṁ,
thi-ap28:97.2	puññatthāya mahesino;
thi-ap28:97.3	Sahāyasampadā honti,
thi-ap28:97.4	nibbānapadamasaṅkhataṁ.
thi-ap28:98.1	Parikkhīṇaṁ atītañca,
thi-ap28:98.2	Paccuppannaṁ anāgataṁ;
thi-ap28:98.3	Sabbakammaṁ mamaṁ khīṇaṁ,
thi-ap28:98.4	Pāde vandāmi cakkhuma”.
thi-ap28:99.1	Itthaṁ sudaṁ yasodharā bhikkhunī bhagavato sammukhā imā gāthāyo abhāsitthāti.
thi-ap28:100.1	Yasodharātheriyāpadānaṁ aṭṭhamaṁ.
thi-ap29:0.1	Therīapadāna
thi-ap29:0.2	Kuṇḍalakesīvagga
thi-ap29:0.3	9 Yasodharāpamukhadasabhikkhunīsahassaapadāna
thi-ap29:1.1	“Kappe ca satasahasse,
thi-ap29:1.2	caturo ca asaṅkhiye;
thi-ap29:1.3	Dīpaṅkaro nāma jino,
thi-ap29:1.4	uppajji lokanāyako.
thi-ap29:2.1	Dīpaṅkaro mahāvīro,
thi-ap29:2.2	viyākāsi vināyako;
thi-ap29:2.3	Sumedhañca sumittañca,
thi-ap29:2.4	samānasukhadukkhataṁ.
thi-ap29:3.1	Sadevakañca passanto,
thi-ap29:3.2	vicaranto sadevakaṁ;
thi-ap29:3.3	Tesaṁ pakittane amhe,
thi-ap29:3.4	upagamma samāgamaṁ.
thi-ap29:4.1	Amhaṁ sabbapati hohi,
thi-ap29:4.2	anāgatasamāgame;
thi-ap29:4.3	Sabbāva tuyhaṁ bhariyā,
thi-ap29:4.4	manāpā piyavādikā.
thi-ap29:5.1	Dānaṁ sīlamayaṁ sabbaṁ,
thi-ap29:5.2	bhāvanā ca subhāvitā;
thi-ap29:5.3	Dīgharattañca no sabbaṁ,
thi-ap29:5.4	pariccattaṁ mahāmune.
thi-ap29:6.1	Gandhaṁ vilepanaṁ mālaṁ,
thi-ap29:6.2	dīpañca ratanāmayaṁ;
thi-ap29:6.3	Yaṁ kiñci patthitaṁ sabbaṁ,
thi-ap29:6.4	pariccattaṁ mahāmuni.
thi-ap29:7.1	Aññaṁ vāpi kataṁ kammaṁ,
thi-ap29:7.2	paribhogañca mānusaṁ;
thi-ap29:7.3	Dīgharattañhi no sabbaṁ,
thi-ap29:7.4	pariccattaṁ mahāmuni.
thi-ap29:8.1	Anekajātisaṁsāraṁ,
thi-ap29:8.2	bahuṁ puññampi no kataṁ;
thi-ap29:8.3	Issaramanubhotvāna,
thi-ap29:8.4	saṁsaritvā bhavābhave.
thi-ap29:9.1	Pacchime bhave sampatte,
thi-ap29:9.2	sakyaputtanivesane;
thi-ap29:9.3	Nānākulūpapannāyo,
thi-ap29:9.4	accharā kāmavaṇṇinī.
thi-ap29:10.1	Lābhaggena yasaṁ pattā,
thi-ap29:10.2	pūjitā sabbasakkatā;
thi-ap29:10.3	Lābhiyo annapānānaṁ,
thi-ap29:10.4	sadā sammānitā mayaṁ.
thi-ap29:11.1	Agāraṁ pajahitvāna,
thi-ap29:11.2	pabbajimhanagāriyaṁ;
thi-ap29:11.3	Aḍḍhamāse asampatte,
thi-ap29:11.4	sabbā pattāmha nibbutiṁ.
thi-ap29:12.1	Lābhiyo annapānānaṁ,
thi-ap29:12.2	vatthasenāsanāni ca;
thi-ap29:12.3	Upenti paccayā sabbe,
thi-ap29:12.4	sadā sakkatapūjitā.
thi-ap29:13.1	Kilesā jhāpitā amhaṁ,
thi-ap29:13.2	…pe…
thi-ap29:13.3	viharāma anāsavā.
thi-ap29:14.1	Svāgataṁ vata no āsi,
thi-ap29:14.2	…pe…
thi-ap29:14.3	kataṁ buddhassa sāsanaṁ.
thi-ap29:15.1	Paṭisambhidā catasso,
thi-ap29:15.2	…pe…
thi-ap29:15.3	kataṁ buddhassa sāsanaṁ”.
thi-ap29:16.1	Itthaṁ sudaṁ yasodharāpamukhāni dasabhikkhunīsahassāni bhagavato sammukhā imā gāthāyo abhāsitthāti.
thi-ap29:17.1	Yasodharāpamukhadasabhikkhunīsahassāpadānaṁ navamaṁ.
thi-ap30:0.1	Therīapadāna
thi-ap30:0.2	Kuṇḍalakesīvagga
thi-ap30:0.3	10 Yasodharāpamukhaaṭṭhārasabhikkhunīsahassaapadāna
thi-ap30:1.1	Aṭṭhārasasahassāni,
thi-ap30:1.2	bhikkhunī sakyasambhavā;
thi-ap30:1.3	Yasodharāpamukhāni,
thi-ap30:1.4	sambuddhaṁ upasaṅkamuṁ.
thi-ap30:2.1	Aṭṭhārasasahassāni,
thi-ap30:2.2	sabbā honti mahiddhikā;
thi-ap30:2.3	Vandantī munino pāde,
thi-ap30:2.4	ārocenti yathābalaṁ.
thi-ap30:3.1	“Jāti khīṇā jarā byādhi,
thi-ap30:3.2	maraṇañca mahāmuni;
thi-ap30:3.3	Anāsavaṁ padaṁ santaṁ,
thi-ap30:3.4	amataṁ yāma nāyaka.
thi-ap30:4.1	Khalitañce pure atthi,
thi-ap30:4.2	sabbāsampi mahāmuni;
thi-ap30:4.3	Aparādhamajānantī,
thi-ap30:4.4	khama amhaṁ vināyaka”.
thi-ap30:5.1	“Iddhiñcāpi nidassetha,
thi-ap30:5.2	mama sāsanakārikā;
thi-ap30:5.3	Parisānañca sabbāsaṁ,
thi-ap30:5.4	kaṅkhaṁ chindatha yāvatā”.
thi-ap30:6.1	“Yasodharā mahāvīra,
thi-ap30:6.2	manāpā piyadassanā;
thi-ap30:6.3	Sabbā tuyhaṁ mahāvīra,
thi-ap30:6.4	agārasmiṁ pajāpati.
thi-ap30:7.1	Thīnaṁ satasahassānaṁ,
thi-ap30:7.2	navutīnaṁ chaduttari;
thi-ap30:7.3	Agāre te mayaṁ vīra,
thi-ap30:7.4	pāmokkhā sabbā issarā.
thi-ap30:8.1	Rūpācāraguṇūpetā,
thi-ap30:8.2	yobbanaṭṭhā piyaṁvadā;
thi-ap30:8.3	Sabbā no apacāyanti,
thi-ap30:8.4	devatā viya mānusā.
thi-ap30:9.1	Aṭṭhārasasahassāni,
thi-ap30:9.2	sabbā sākiyasambhavā;
thi-ap30:9.3	Yasodharāsahassāni,
thi-ap30:9.4	pāmokkhā issarā tadā.
thi-ap30:10.1	Kāmadhātumatikkamma,
thi-ap30:10.2	saṇṭhitā rūpadhātuyā;
thi-ap30:10.3	Rūpena sadisā natthi,
thi-ap30:10.4	sahassānaṁ mahāmuni”.
thi-ap30:11.1	Sambuddhaṁ abhivādetvā,
thi-ap30:11.2	iddhiṁ dassaṁsu satthuno;
thi-ap30:11.3	Nekā nānāvidhākārā,
thi-ap30:11.4	mahāiddhīpi dassayuṁ.
thi-ap30:12.1	Cakkavāḷasamaṁ kāyaṁ,
thi-ap30:12.2	sīsaṁ uttarato kuru;
thi-ap30:12.3	Ubho pakkhā duve dīpā,
thi-ap30:12.4	jambudīpaṁ sarīrato.
thi-ap30:13.1	Dakkhiṇañca saraṁ piñchaṁ,
thi-ap30:13.2	nānāsākhā tu pattakā;
thi-ap30:13.3	Candañca sūriyañcakkhi,
thi-ap30:13.4	merupabbatato sikhaṁ.
thi-ap30:14.1	Cakkavāḷagiriṁ tuṇḍaṁ,
thi-ap30:14.2	jamburukkhaṁ samūlakaṁ;
thi-ap30:14.3	Bījamānā upāgantvā,
thi-ap30:14.4	vandantī lokanāyakaṁ.
thi-ap30:15.1	Hatthivaṇṇaṁ tathevassaṁ,
thi-ap30:15.2	pabbataṁ jaladhiṁ tathā;
thi-ap30:15.3	Candañca sūriyaṁ meruṁ,
thi-ap30:15.4	sakkavaṇṇañca dassayuṁ.
thi-ap30:16.1	“Yasodharā mayaṁ vīra,
thi-ap30:16.2	pāde vandāma cakkhuma;
thi-ap30:16.3	Tava cirapabhāvena,
thi-ap30:16.4	nipphannā naranāyaka.
thi-ap30:17.1	Iddhīsu ca vasī homa,
thi-ap30:17.2	dibbāya sotadhātuyā;
thi-ap30:17.3	Cetopariyañāṇassa,
thi-ap30:17.4	vasī homa mahāmune.
thi-ap30:18.1	Pubbenivāsaṁ jānāmi,
thi-ap30:18.2	dibbacakkhu visodhitaṁ;
thi-ap30:18.3	Sabbāsavā parikkhīṇā,
thi-ap30:18.4	natthi dāni punabbhavo.
thi-ap30:19.1	Atthadhammaniruttīsu,
thi-ap30:19.2	paṭibhāne tatheva ca;
thi-ap30:19.3	Ñāṇaṁ amhaṁ mahāvīra,
thi-ap30:19.4	uppannaṁ tava santike.
thi-ap30:20.1	Pubbānaṁ lokanāthānaṁ,
thi-ap30:20.2	saṅgamaṁ no nidassitaṁ;
thi-ap30:20.3	Adhikārā bahū amhaṁ,
thi-ap30:20.4	tuyhatthāya mahāmune.
thi-ap30:21.1	Yaṁ amhaṁ pūritaṁ kammaṁ,
thi-ap30:21.2	kusalaṁ sarase mune;
thi-ap30:21.3	Tuyhatthāya mahāvīra,
thi-ap30:21.4	puññānupacitāni no.
thi-ap30:22.1	Abhabbaṭṭhāne vajjetvā,
thi-ap30:22.2	vārayimha anācaraṁ;
thi-ap30:22.3	Tuyhatthāya mahāvīra,
thi-ap30:22.4	cattāni jīvitāni no.
thi-ap30:23.1	Nekakoṭisahassāni,
thi-ap30:23.2	bhariyatthāyadāsi no;
thi-ap30:23.3	Na tattha vimanā homa,
thi-ap30:23.4	tuyhatthāya mahāmune.
thi-ap30:24.1	Nekakoṭisahassāni,
thi-ap30:24.2	upakārāyadāsi no;
thi-ap30:24.3	Na tattha vimanā homa,
thi-ap30:24.4	tuyhatthāya mahāmune.
thi-ap30:25.1	Nekakoṭisahassāni,
thi-ap30:25.2	bhojanatthāyadāsi no;
thi-ap30:25.3	Na tattha vimanā homa,
thi-ap30:25.4	tuyhatthāya mahāmune.
thi-ap30:26.1	Nekakoṭisahassāni,
thi-ap30:26.2	jīvitāni cajimhase;
thi-ap30:26.3	Bhayamokkhaṁ karissāma,
thi-ap30:26.4	jīvitāni cajimhase.
thi-ap30:27.1	Aṅgagate alaṅkāre,
thi-ap30:27.2	vatthe nānāvidhe bahū;
thi-ap30:27.3	Itthibhaṇḍe na gūhāma,
thi-ap30:27.4	tuyhatthāya mahāmune.
thi-ap30:28.1	Dhanadhaññapariccāgaṁ,
thi-ap30:28.2	gāmāni nigamāni ca;
thi-ap30:28.3	Khettaṁ puttā ca dhītā ca,
thi-ap30:28.4	pariccattā mahāmune.
thi-ap30:29.1	Hatthī assā gavā cāpi,
thi-ap30:29.2	dāsiyo paricārikā;
thi-ap30:29.3	Tuyhatthāya mahāvīra,
thi-ap30:29.4	pariccattaṁ asaṅkhiyaṁ.
thi-ap30:30.1	Yaṁ amhe paṭimantesi,
thi-ap30:30.2	‘dānaṁ dassāma yācake’;
thi-ap30:30.3	Vimanaṁ no na passāma,
thi-ap30:30.4	dadato dānamuttamaṁ.
thi-ap30:31.1	Nānāvidhaṁ bahuṁ dukkhaṁ,
thi-ap30:31.2	saṁsāre ca bahubbidhe;
thi-ap30:31.3	Tuyhatthāya mahāvīra,
thi-ap30:31.4	anubhuttaṁ asaṅkhiyaṁ.
thi-ap30:32.1	Sukhappattānumodāma,
thi-ap30:32.2	na ca dukkhesu dummanā;
thi-ap30:32.3	Sabbattha tulitā homa,
thi-ap30:32.4	tuyhatthāya mahāmune.
thi-ap30:33.1	Anumaggena sambuddho,
thi-ap30:33.2	yaṁ dhammaṁ abhinīhari;
thi-ap30:33.3	Anubhotvā sukhaṁ dukkhaṁ,
thi-ap30:33.4	patto bodhiṁ mahāmune.
thi-ap30:34.1	Brahmadevañca sambuddhaṁ,
thi-ap30:34.2	gotamaṁ lokanāyakaṁ;
thi-ap30:34.3	Aññesaṁ lokanāthānaṁ,
thi-ap30:34.4	saṅgamaṁ tehi no bahū.
thi-ap30:35.1	Adhikāraṁ bahuṁ amhe,
thi-ap30:35.2	tuyhatthāya mahāmune;
thi-ap30:35.3	Gavesato buddhadhamme,
thi-ap30:35.4	mayaṁ te paricārikā.
thi-ap30:36.1	Kappe ca satasahasse,
thi-ap30:36.2	caturo ca asaṅkhiye;
thi-ap30:36.3	Dīpaṅkaro mahāvīro,
thi-ap30:36.4	uppajji lokanāyako.
thi-ap30:37.1	Paccantadesavisaye,
thi-ap30:37.2	nimantetvā tathāgataṁ;
thi-ap30:37.3	Tassa āgamanaṁ maggaṁ,
thi-ap30:37.4	sodhenti tuṭṭhamānasā.
thi-ap30:38.1	Tena kālena so āsi,
thi-ap30:38.2	sumedho nāma brāhmaṇo;
thi-ap30:38.3	Maggañca paṭiyādesi,
thi-ap30:38.4	āyato sabbadassino.
thi-ap30:39.1	Tena kālena ahumha,
thi-ap30:39.2	sabbā brāhmaṇasambhavā;
thi-ap30:39.3	Thalūdajāni pupphāni,
thi-ap30:39.4	āharimha samāgamaṁ.
thi-ap30:40.1	Tasmiṁ so samaye buddho,
thi-ap30:40.2	dīpaṅkaro mahāyaso;
thi-ap30:40.3	Viyākāsi mahāvīro,
thi-ap30:40.4	isimuggatamānasaṁ.
thi-ap30:41.1	Calatī ravatī puthavī,
thi-ap30:41.2	saṅkampati sadevake;
thi-ap30:41.3	Tassa kammaṁ pakittente,
thi-ap30:41.4	isimuggatamānasaṁ.
thi-ap30:42.1	Devakaññā manussā ca,
thi-ap30:42.2	mayañcāpi sadevakā;
thi-ap30:42.3	Nānāpūjanīyaṁ bhaṇḍaṁ,
thi-ap30:42.4	pūjayitvāna patthayuṁ.
thi-ap30:43.1	Tesaṁ buddho viyākāsi,
thi-ap30:43.2	jotidīpa sanāmako;
thi-ap30:43.3	‘Ajja ye patthitā atthi,
thi-ap30:43.4	te bhavissanti sammukhā’.
thi-ap30:44.1	Aparimeyye ito kappe,
thi-ap30:44.2	yaṁ no buddho viyākari;
thi-ap30:44.3	Taṁ vācamanumodentā,
thi-ap30:44.4	evaṅkārī ahumha no.
thi-ap30:45.1	Tassa kammassa sukatassa,
thi-ap30:45.2	tassa cittaṁ pasādayuṁ;
thi-ap30:45.3	Devamānusikaṁ yoniṁ,
thi-ap30:45.4	anubhotvā asaṅkhiyaṁ.
thi-ap30:46.1	Sukhadukkhenubhotvāna,
thi-ap30:46.2	devesu mānusesu ca;
thi-ap30:46.3	Pacchime bhave sampatte,
thi-ap30:46.4	jātāmha sākiye kule.
thi-ap30:47.1	Rūpavatī bhogavatī,
thi-ap30:47.2	yasasīlavatī tato;
thi-ap30:47.3	Sabbaṅgasampadā homa,
thi-ap30:47.4	kulesu abhisakkatā.
thi-ap30:48.1	Lābhaṁ silokaṁ sakkāraṁ,
thi-ap30:48.2	lokadhammasamāgamaṁ;
thi-ap30:48.3	Cittañca dukkhitaṁ natthi,
thi-ap30:48.4	vasāma akutobhayā.
thi-ap30:49.1	Vuttañhetaṁ bhagavatā,
thi-ap30:49.2	‘rañño antepure tadā;
thi-ap30:49.3	Khattiyānaṁ pure vīra,
thi-ap30:49.4	upakārañca niddisi.
thi-ap30:50.1	Upakārā ca yā nārī,
thi-ap30:50.2	yā ca nārī sukhe dukhe;
thi-ap30:50.3	Atthakkhāyī ca yā nārī,
thi-ap30:50.4	yā ca nārīnukampikā.
thi-ap30:51.1	Dhammaṁ care sucaritaṁ,
thi-ap30:51.2	na naṁ duccaritaṁ care;
thi-ap30:51.3	Dhammacārī sukhaṁ seti,
thi-ap30:51.4	asmiṁ loke paramhi ca’.
thi-ap30:52.1	Agāraṁ vijahitvāna,
thi-ap30:52.2	pabbajimhanagāriyaṁ;
thi-ap30:52.3	Aḍḍhamāse asampatte,
thi-ap30:52.4	catusaccaṁ phusimha no.
thi-ap30:53.1	Cīvaraṁ piṇḍapātañca,
thi-ap30:53.2	paccayaṁ sayanāsanaṁ;
thi-ap30:53.3	Upanenti bahū amhe,
thi-ap30:53.4	sāgarasseva ūmiyo.
thi-ap30:54.1	Kilesā jhāpitā amhaṁ,
thi-ap30:54.2	bhavā sabbe samūhatā;
thi-ap30:54.3	Nāgīva bandhanaṁ chetvā,
thi-ap30:54.4	viharāma anāsavā.
thi-ap30:55.1	Svāgataṁ vata no āsi,
thi-ap30:55.2	mama buddhassa santike;
thi-ap30:55.3	Tisso vijjā anuppattā,
thi-ap30:55.4	kataṁ buddhassa sāsanaṁ.
thi-ap30:56.1	Paṭisambhidā catasso,
thi-ap30:56.2	vimokkhāpi ca aṭṭhime;
thi-ap30:56.3	Chaḷabhiññā sacchikatā,
thi-ap30:56.4	kataṁ buddhassa sāsanaṁ.
thi-ap30:57.1	Evaṁ bahuvidhaṁ dukkhaṁ,
thi-ap30:57.2	sampattī ca bahubbidhā;
thi-ap30:57.3	Visuddhabhāvaṁ sampattā,
thi-ap30:57.4	labhāma sabbasampadā.
thi-ap30:58.1	Yā dadanti sakattānaṁ,
thi-ap30:58.2	puññatthāya mahesino;
thi-ap30:58.3	Sahāyasampadā honti,
thi-ap30:58.4	nibbānapadamasaṅkhataṁ.
thi-ap30:59.1	Parikkhīṇaṁ atītañca,
thi-ap30:59.2	paccuppannaṁ anāgataṁ;
thi-ap30:59.3	Sabbakammampi no khīṇaṁ,
thi-ap30:59.4	pāde vandāma cakkhuma”.
thi-ap30:60.1	“Nibbānāya vadantīnaṁ,
thi-ap30:60.2	Kiṁ vo vakkhāma uttari;
thi-ap30:60.3	Santasaṅkhatadosañhi,
thi-ap30:60.4	Pappotha amataṁ padaṁ”.
thi-ap30:61.1	Itthaṁ sudaṁ yasodharāpamukhāni aṭṭhārasabhikkhunīsahassāni bhagavato sammukhā imā gāthāyo abhāsitthāti.
thi-ap30:62.1	Yasodharāpamukhaaṭṭhārasabhikkhunīsahassāpadānaṁ dasamaṁ.
thi-ap30:63.1	Kuṇḍalakesīvaggo tatiyo.
thi-ap30:64.1	Tassuddānaṁ
thi-ap30:65.1	Kuṇḍalā gotamī ceva,
thi-ap30:65.2	dhammadinnā ca sakulā;
thi-ap30:65.3	Varanandā ca soṇā ca,
thi-ap30:65.4	kāpilānī yasodharā.
thi-ap30:66.1	Dasasahassabhikkhunī,
thi-ap30:66.2	aṭṭhārasasahassakā;
thi-ap30:66.3	Gāthāsatāni cattāri,
thi-ap30:66.4	cha ca sattatimeva ca.
thi-ap31:0.1	Therīapadāna
thi-ap31:0.2	Khattiyāvagga
thi-ap31:0.3	1 Yasavatīpamukhaaṭṭhārasabhikkhunīsahassaapadāna
thi-ap31:1.1	“Bhavā sabbe parikkhīṇā,
thi-ap31:1.2	bhavā santi vimocitā;
thi-ap31:1.3	Sabbāsavā ca no natthi,
thi-ap31:1.4	ārocema mahāmune.
thi-ap31:2.1	Purimaṁ kusalaṁ kammaṁ,
thi-ap31:2.2	yaṁ kiñci sādhupatthitaṁ;
thi-ap31:2.3	Paribhogamayaṁ dinnaṁ,
thi-ap31:2.4	tuyhatthāya mahāmune.
thi-ap31:3.1	Buddhapaccekabuddhānaṁ,
thi-ap31:3.2	sāvakānañca patthitaṁ;
thi-ap31:3.3	Paribhogamayaṁ dinnaṁ,
thi-ap31:3.4	tuyhatthāya mahāmune.
thi-ap31:4.1	Uccanīcamayaṁ kammaṁ,
thi-ap31:4.2	bhikkhūnaṁ sādhupatthitaṁ;
thi-ap31:4.3	Uccākulaparikammaṁ,
thi-ap31:4.4	katametaṁ mahāmune.
thi-ap31:5.1	Teneva sukkamūlena,
thi-ap31:5.2	coditā kammasampadā;
thi-ap31:5.3	Mānusikamatikkantā,
thi-ap31:5.4	jāyiṁsu khattiye kule.
thi-ap31:6.1	Uppatte ca kate kamme,
thi-ap31:6.2	jātiyā vāpi ekato;
thi-ap31:6.3	Pacchime ekato jātā,
thi-ap31:6.4	khattiyā kulasambhavā.
thi-ap31:7.1	Rūpavatī bhogavatī,
thi-ap31:7.2	lābhasakkārapūjitā;
thi-ap31:7.3	Antepure mahāvīra,
thi-ap31:7.4	devānaṁ viya nandane.
thi-ap31:8.1	Nibbinditvā agāramhā,
thi-ap31:8.2	pabbajimhanagāriyaṁ;
thi-ap31:8.3	Katipāhaṁ upādāya,
thi-ap31:8.4	sabbā pattāmha nibbutiṁ.
thi-ap31:9.1	Cīvaraṁ piṇḍapātañca,
thi-ap31:9.2	paccayaṁ sayanāsanaṁ;
thi-ap31:9.3	Upanenti bahū amhe,
thi-ap31:9.4	sadā sakkatapūjitā.
thi-ap31:10.1	Kilesā jhāpitā amhaṁ,
thi-ap31:10.2	bhavā sabbe samūhatā;
thi-ap31:10.3	Nāgīva bandhanaṁ chetvā,
thi-ap31:10.4	viharāma anāsavā.
thi-ap31:11.1	Svāgataṁ vata no āsi,
thi-ap31:11.2	mama buddhassa santike;
thi-ap31:11.3	Tisso vijjā anuppattā,
thi-ap31:11.4	kataṁ buddhassa sāsanaṁ.
thi-ap31:12.1	Paṭisambhidā catasso,
thi-ap31:12.2	vimokkhāpi ca aṭṭhime;
thi-ap31:12.3	Chaḷabhiññā sacchikatā,
thi-ap31:12.4	kataṁ buddhassa sāsanaṁ”.
thi-ap31:13.1	Itthaṁ sudaṁ yasavatīpamukhāni khattiyakaññābhikkhuniyo aṭṭhārasasahassāni bhagavato sammukhā imā gāthāyo abhāsitthāti.
thi-ap31:14.1	Yasavatīpamukhaaṭṭhārasabhikkhunīsahassāpadānaṁ paṭhamaṁ.
thi-ap32:0.1	Therīapadāna
thi-ap32:0.2	Khattiyāvagga
thi-ap32:0.3	2 Caturāsītibhikkhunīsahassaapadāna
thi-ap32:1.1	“Cullāsītisahassāni,
thi-ap32:1.2	brāhmaññakulasambhavā;
thi-ap32:1.3	Sukhumālahatthapādā,
thi-ap32:1.4	pure tuyhaṁ mahāmune.
thi-ap32:2.1	Vessasuddakule jātā,
thi-ap32:2.2	devā nāgā ca kinnarā;
thi-ap32:2.3	Cātuddīpā bahū kaññā,
thi-ap32:2.4	pure tuyhaṁ mahāmune.
thi-ap32:3.1	Kāci pabbajitā atthi,
thi-ap32:3.2	sabbadassāvino bahū;
thi-ap32:3.3	Devā ca kinnarā nāgā,
thi-ap32:3.4	phusissanti anāgate.
thi-ap32:4.1	Anubhotvā yasaṁ sabbaṁ,
thi-ap32:4.2	Patvāna sabbasampadā;
thi-ap32:4.3	Tumhaṁ pasādaṁ paṭiladdhā,
thi-ap32:4.4	Bujjhissanti anāgate.
thi-ap32:5.1	Amhe brāhmaṇadhītā tu,
thi-ap32:5.2	brāhmaññakulasambhavā;
thi-ap32:5.3	Pekkhato no mahāvīra,
thi-ap32:5.4	pāde vandāma cakkhuma.
thi-ap32:6.1	Upāhatā bhavā sabbe,
thi-ap32:6.2	mūlataṇhā samūhatā;
thi-ap32:6.3	Samucchinnā anusayā,
thi-ap32:6.4	puññasaṅkhāradālitā.
thi-ap32:7.1	Samādhigocarā sabbā,
thi-ap32:7.2	samāpattivasī katā;
thi-ap32:7.3	Jhānena dhammaratiyā,
thi-ap32:7.4	viharissāma no sadā.
thi-ap32:8.1	Bhavanetti avijjā ca,
thi-ap32:8.2	saṅkhārāpi ca khepitā;
thi-ap32:8.3	Sududdasaṁ padaṁ gantvā,
thi-ap32:8.4	anujānātha nāyaka”.
thi-ap32:9.1	“Upakārā mamaṁ tumhe,
thi-ap32:9.2	dīgharattaṁ katāvino;
thi-ap32:9.3	Catunnaṁ saṁsayaṁ chetvā,
thi-ap32:9.4	sabbā gacchantu nibbutiṁ”.
thi-ap32:10.1	Vanditvā munino pāde,
thi-ap32:10.2	katvā iddhivikubbanaṁ;
thi-ap32:10.3	Kāci dassenti ālokaṁ,
thi-ap32:10.4	andhakāramathāparā.
thi-ap32:11.1	Dassenti candasūriye,
thi-ap32:11.2	sāgarañca samacchakaṁ;
thi-ap32:11.3	Sineruṁ paribhaṇḍañca,
thi-ap32:11.4	dassenti pārichattakaṁ.
thi-ap32:12.1	Tāvatiṁsañca bhavanaṁ,
thi-ap32:12.2	yāmaṁ dassenti iddhiyā;
thi-ap32:12.3	Tusitaṁ nimmite deve,
thi-ap32:12.4	vasavattī mahissare.
thi-ap32:13.1	Brahmāno kāci dassenti,
thi-ap32:13.2	caṅkamañca mahārahaṁ;
thi-ap32:13.3	Brahmavaṇṇañca māpetvā,
thi-ap32:13.4	dhammaṁ desenti suññataṁ.
thi-ap32:14.1	Nānāvikubbanaṁ katvā,
thi-ap32:14.2	iddhiṁ dassiya satthuno;
thi-ap32:14.3	Dassayiṁsu balaṁ sabbā,
thi-ap32:14.4	pāde vandiṁsu satthuno.
thi-ap32:15.1	“Iddhīsu ca vasī homa,
thi-ap32:15.2	dibbāya sotadhātuyā;
thi-ap32:15.3	Cetopariyañāṇassa,
thi-ap32:15.4	vasī homa mahāmune.
thi-ap32:16.1	Pubbenivāsaṁ jānāma,
thi-ap32:16.2	dibbacakkhu visodhitaṁ;
thi-ap32:16.3	Sabbāsavā parikkhīṇā,
thi-ap32:16.4	natthi dāni punabbhavo.
thi-ap32:17.1	Atthadhammaniruttīsu,
thi-ap32:17.2	paṭibhāne tatheva ca;
thi-ap32:17.3	Ñāṇaṁ amhaṁ mahāvīra,
thi-ap32:17.4	uppannaṁ tava santike.
thi-ap32:18.1	Pubbānaṁ lokanāthānaṁ,
thi-ap32:18.2	saṅgamaṁ no nidassitaṁ;
thi-ap32:18.3	Adhikāraṁ bahuṁ amhaṁ,
thi-ap32:18.4	tuyhatthāya mahāmune.
thi-ap32:19.1	Yaṁ amhehi kataṁ kammaṁ,
thi-ap32:19.2	kusalaṁ sara taṁ mune;
thi-ap32:19.3	Tuyhatthāya mahāvīra,
thi-ap32:19.4	puññānupacitāni no.
thi-ap32:20.1	Satasahassito kappe,
thi-ap32:20.2	padumuttaro mahāmuni;
thi-ap32:20.3	Puraṁ haṁsavatī nāma,
thi-ap32:20.4	sambuddhassa kulāsayaṁ.
thi-ap32:21.1	Dvārena haṁsavatiyā,
thi-ap32:21.2	gaṅgā sandati sabbadā;
thi-ap32:21.3	Ubbāḷhā nadiyā bhikkhū,
thi-ap32:21.4	gamanaṁ na labhanti te.
thi-ap32:22.1	Divasaṁ dve tayo ceva,
thi-ap32:22.2	sattāhaṁ māsikaṁ tato;
thi-ap32:22.3	Catumāsampi sampuṇṇaṁ,
thi-ap32:22.4	gamanaṁ na labhanti te.
thi-ap32:23.1	Tadā ahu sattasāro,
thi-ap32:23.2	jaṭilo nāma raṭṭhiko;
thi-ap32:23.3	Oruddhe bhikkhavo disvā,
thi-ap32:23.4	setuṁ gaṅgāya kārayi.
thi-ap32:24.1	Tadā satasahassehi,
thi-ap32:24.2	setuṁ gaṅgāya kārayi;
thi-ap32:24.3	Saṅghassa orime tīre,
thi-ap32:24.4	vihārañca akārayi.
thi-ap32:25.1	Itthiyo purisā ceva,
thi-ap32:25.2	uccanīcakulāni ca;
thi-ap32:25.3	Tassa setuṁ vihārañca,
thi-ap32:25.4	samabhāgaṁ akaṁsu te.
thi-ap32:26.1	Amhe aññe ca mānujā,
thi-ap32:26.2	vippasannena cetasā;
thi-ap32:26.3	Tassa dhammesu dāyādā,
thi-ap32:26.4	nagare janapadesu ca.
thi-ap32:27.1	Itthī pumā kumārā ca,
thi-ap32:27.2	bahū ceva kumārikā;
thi-ap32:27.3	Setuno ca vihārassa,
thi-ap32:27.4	vālukā ākiriṁsu te.
thi-ap32:28.1	Vīthiṁ sammajjanaṁ katvā,
thi-ap32:28.2	kadalīpuṇṇaghaṭe dhaje;
thi-ap32:28.3	Dhūpaṁ cuṇṇañca mālañca,
thi-ap32:28.4	kāraṁ katvāna satthuno.
thi-ap32:29.1	Setuvihāre kāretvā,
thi-ap32:29.2	nimantetvā vināyakaṁ;
thi-ap32:29.3	Mahādānaṁ daditvāna,
thi-ap32:29.4	sambodhiṁ abhipatthayiṁ.
thi-ap32:30.1	Padumuttaro mahāvīro,
thi-ap32:30.2	tārako sabbapāṇinaṁ;
thi-ap32:30.3	Anumodanīyaṅkāsi,
thi-ap32:30.4	jaṭilassa mahāmuni.
thi-ap32:31.1	‘Satasahassātikkante,
thi-ap32:31.2	kappo hessati bhaddako;
thi-ap32:31.3	Bhavābhavenubhotvāna,
thi-ap32:31.4	pāpuṇissati bodhiyaṁ.
thi-ap32:32.1	Kāci hatthaparikammaṁ,
thi-ap32:32.2	katāvī naranāriyo;
thi-ap32:32.3	Anāgatamhi addhāne,
thi-ap32:32.4	sabbā hessanti sammukhā’.
thi-ap32:33.1	Tena kammavipākena,
thi-ap32:33.2	cetanāpaṇidhīhi ca;
thi-ap32:33.3	Uppannā devabhavanaṁ,
thi-ap32:33.4	tuyhaṁ tā paricārikā.
thi-ap32:34.1	Dibbasukhaṁ asaṅkhiyaṁ,
thi-ap32:34.2	mānusañca asaṅkhiyaṁ;
thi-ap32:34.3	Tuyhaṁ te paricārema,
thi-ap32:34.4	saṁsarimha bhavābhave.
thi-ap32:35.1	Satasahassito kappe,
thi-ap32:35.2	sukataṁ kammasampadaṁ;
thi-ap32:35.3	Sukhumālī manussānaṁ,
thi-ap32:35.4	atho devapure vare.
thi-ap32:36.1	Rūpabhogayase ceva,
thi-ap32:36.2	atho kittiñca sakkataṁ;
thi-ap32:36.3	Labhāma satataṁ sabbaṁ,
thi-ap32:36.4	sukataṁ kammasampadaṁ.
thi-ap32:37.1	Pacchime bhave sampatte,
thi-ap32:37.2	jātāmha brāhmaṇe kule;
thi-ap32:37.3	Sukhumālahatthapādā,
thi-ap32:37.4	sakyaputtanivesane.
thi-ap32:38.1	Sabbakālampi pathaviṁ,
thi-ap32:38.2	na passāma na laṅkataṁ;
thi-ap32:38.3	Cikkhallabhūmimasuciṁ,
thi-ap32:38.4	na passāma mahāmune.
thi-ap32:39.1	Agāraṁ vasante amhe,
thi-ap32:39.2	sakkāraṁ sabbakālikaṁ;
thi-ap32:39.3	Upanenti sadā sabbaṁ,
thi-ap32:39.4	pubbakammaphalena no.
thi-ap32:40.1	Agāraṁ pajahitvāna,
thi-ap32:40.2	pabbajitvānagāriyaṁ;
thi-ap32:40.3	Saṁsārapathanitthiṇṇā,
thi-ap32:40.4	vītarāgā bhavāmase.
thi-ap32:41.1	Cīvaraṁ piṇḍapātañca,
thi-ap32:41.2	paccayaṁ sayanāsanaṁ;
thi-ap32:41.3	Upanenti sadā amhe,
thi-ap32:41.4	sahassāni tato tato.
thi-ap32:42.1	Kilesā jhāpitā amhaṁ,
thi-ap32:42.2	…pe…
thi-ap32:42.3	viharāma anāsavā.
thi-ap32:43.1	Svāgataṁ vata no āsi,
thi-ap32:43.2	…pe…
thi-ap32:43.3	kataṁ buddhassa sāsanaṁ.
thi-ap32:44.1	Paṭisambhidā catasso,
thi-ap32:44.2	…pe…
thi-ap32:44.3	kataṁ buddhassa sāsanaṁ”.
thi-ap32:45.1	Itthaṁ sudaṁ caturāsītibrāhmaṇakaññābhikkhunīsahassāni bhagavato sammukhā imā gāthāyo abhāsitthāti.
thi-ap32:46.1	Caturāsītibhikkhunīsahassāpadānaṁ dutiyaṁ.
thi-ap33:0.1	Therīapadāna
thi-ap33:0.2	Khattiyāvagga
thi-ap33:0.3	Uppaladāyikātherīapadāna
thi-ap33:1.1	“Nagare aruṇavatiyā,
thi-ap33:1.2	aruṇo nāma khattiyo;
thi-ap33:1.3	Tassa rañño ahuṁ bhariyā,
thi-ap33:1.4	ekajjhaṁ cārayāmahaṁ.
thi-ap33:2.1	Rahogatā nisīditvā,
thi-ap33:2.2	evaṁ cintesahaṁ tadā;
thi-ap33:2.3	‘Kusalaṁ me kataṁ natthi,
thi-ap33:2.4	ādāya gamiyaṁ mama.
thi-ap33:3.1	Mahābhitāpaṁ kaṭukaṁ,
thi-ap33:3.2	ghorarūpaṁ sudāruṇaṁ;
thi-ap33:3.3	Nirayaṁ nūna gacchāmi,
thi-ap33:3.4	ettha me natthi saṁsayo’.
thi-ap33:4.1	Evāhaṁ cintayitvāna,
thi-ap33:4.2	pahaṁsetvāna mānasaṁ;
thi-ap33:4.3	Rājānaṁ upagantvāna,
thi-ap33:4.4	idaṁ vacanamabraviṁ.
thi-ap33:5.1	‘Itthī nāma mayaṁ deva,
thi-ap33:5.2	purisānittarā ahu;
thi-ap33:5.3	Ekaṁ me samaṇaṁ dehi,
thi-ap33:5.4	bhojayissāmi khattiya’.
thi-ap33:6.1	Adāsi me tadā rājā,
thi-ap33:6.2	samaṇaṁ bhāvitindriyaṁ;
thi-ap33:6.3	Tassa pattaṁ gahetvāna,
thi-ap33:6.4	paramannena pūrayiṁ.
thi-ap33:7.1	Pūretvā paramaṁ annaṁ,
thi-ap33:7.2	saha sugandhalepanaṁ;
thi-ap33:7.3	Mahācelena chāditvā,
thi-ap33:7.4	adāsiṁ tuṭṭhamānasā.
thi-ap33:8.1	Tena kammena sukatena,
thi-ap33:8.2	cetanāpaṇidhīhi ca;
thi-ap33:8.3	Jahitvā mānusaṁ dehaṁ,
thi-ap33:8.4	tāvatiṁsamagacchahaṁ.
thi-ap33:9.1	Sahassadevarājūnaṁ,
thi-ap33:9.2	mahesittamakārayiṁ;
thi-ap33:9.3	Sahassacakkavattīnaṁ,
thi-ap33:9.4	mahesittamakārayiṁ.
thi-ap33:10.1	Padesarajjaṁ vipulaṁ,
thi-ap33:10.2	gaṇanāto asaṅkhiyaṁ;
thi-ap33:10.3	Nānāvidhaṁ bahuṁ aññaṁ,
thi-ap33:10.4	tassa kammaphalaṁ tato.
thi-ap33:11.1	Uppalasseva me vaṇṇo,
thi-ap33:11.2	abhirūpā sudassanā;
thi-ap33:11.3	Itthisabbaṅgasampannā,
thi-ap33:11.4	abhijātā jutindharā.
thi-ap33:12.1	Pacchime bhave sampatte,
thi-ap33:12.2	ajāyiṁ sākiye kule;
thi-ap33:12.3	Nārīsahassapāmokkhā,
thi-ap33:12.4	suddhodanasutassahaṁ.
thi-ap33:13.1	Nibbinditvā agārehaṁ,
thi-ap33:13.2	pabbajiṁ anagāriyaṁ;
thi-ap33:13.3	Sattamīrattisampattā,
thi-ap33:13.4	catusaccamapāpuṇiṁ.
thi-ap33:14.1	Cīvaraṁ piṇḍapātañca,
thi-ap33:14.2	paccayaṁ sayanāsanaṁ;
thi-ap33:14.3	Parimetuṁ na sakkomi,
thi-ap33:14.4	piṇḍapātassidaṁ phalaṁ.
thi-ap33:15.1	Yaṁ mayhaṁ pūritaṁ kammaṁ,
thi-ap33:15.2	Kusalaṁ sarase muni;
thi-ap33:15.3	Tuyhatthāya mahāvīra,
thi-ap33:15.4	Paricattaṁ bahuṁ mayā.
thi-ap33:16.1	Ekattiṁse ito kappe,
thi-ap33:16.2	yaṁ dānamadadiṁ tadā;
thi-ap33:16.3	Duggatiṁ nābhijānāmi,
thi-ap33:16.4	piṇḍapātassidaṁ phalaṁ.
thi-ap33:17.1	Dve gatiyo pajānāmi,
thi-ap33:17.2	devattaṁ atha mānusaṁ;
thi-ap33:17.3	Aññaṁ gatiṁ na jānāmi,
thi-ap33:17.4	piṇḍapātassidaṁ phalaṁ.
thi-ap33:18.1	Ucce kule pajānāmi,
thi-ap33:18.2	mahāsāle mahaddhane;
thi-ap33:18.3	Aññe kule na jānāmi,
thi-ap33:18.4	piṇḍapātassidaṁ phalaṁ.
thi-ap33:19.1	Bhavābhave saṁsaritvā,
thi-ap33:19.2	sukkamūlena coditā;
thi-ap33:19.3	Amanāpaṁ na passāmi,
thi-ap33:19.4	somanassakataṁ phalaṁ.
thi-ap33:20.1	Iddhīsu ca vasī homi,
thi-ap33:20.2	dibbāya sotadhātuyā;
thi-ap33:20.3	Cetopariyañāṇassa,
thi-ap33:20.4	vasī homi mahāmune.
thi-ap33:21.1	Pubbenivāsaṁ jānāmi,
thi-ap33:21.2	dibbacakkhu visodhitaṁ;
thi-ap33:21.3	Sabbāsavā parikkhīṇā,
thi-ap33:21.4	natthi dāni punabbhavo.
thi-ap33:22.1	Atthadhammaniruttīsu,
thi-ap33:22.2	paṭibhāne tatheva ca;
thi-ap33:22.3	Ñāṇaṁ mama mahāvīra,
thi-ap33:22.4	uppannaṁ tava santike.
thi-ap33:23.1	Kilesā jhāpitā mayhaṁ,
thi-ap33:23.2	…pe…
thi-ap33:23.3	viharāmi anāsavā.
thi-ap33:24.1	Svāgataṁ vata me āsi,
thi-ap33:24.2	…pe…
thi-ap33:24.3	kataṁ buddhassa sāsanaṁ.
thi-ap33:25.1	Paṭisambhidā catasso,
thi-ap33:25.2	…pe…
thi-ap33:25.3	kataṁ buddhassa sāsanaṁ”.
thi-ap33:26.1	Itthaṁ sudaṁ uppaladāyikā bhikkhunī bhagavato sammukhā imā gāthāyo abhāsitthāti.
thi-ap33:27.1	Uppaladāyikātheriyāpadānaṁ tatiyaṁ.
thi-ap34:0.1	Therīapadāna
thi-ap34:0.2	Khattiyāvagga
thi-ap34:0.3	4 Siṅgālamātutherīapadāna
thi-ap34:1.1	“Padumuttaro nāma jino,
thi-ap34:1.2	sabbadhammāna pāragū;
thi-ap34:1.3	Ito satasahassamhi,
thi-ap34:1.4	kappe uppajji nāyako.
thi-ap34:2.1	Tadāhaṁ haṁsavatiyaṁ,
thi-ap34:2.2	jātāmaccakule ahuṁ;
thi-ap34:2.3	Nānāratanapajjote,
thi-ap34:2.4	iddhe phīte mahaddhane.
thi-ap34:3.1	Pitunā saha gantvāna,
thi-ap34:3.2	mahājanapurakkhatā;
thi-ap34:3.3	Dhammaṁ buddhassa sutvāna,
thi-ap34:3.4	pabbajiṁ anagāriyaṁ.
thi-ap34:4.1	Pabbajitvāna kāyena,
thi-ap34:4.2	pāpakammaṁ vivajjayiṁ;
thi-ap34:4.3	Vacīduccaritaṁ hitvā,
thi-ap34:4.4	ājīvaṁ parisodhayiṁ.
thi-ap34:5.1	Buddhe pasannā dhamme ca,
thi-ap34:5.2	saṅghe ca tibbagāravā;
thi-ap34:5.3	Saddhammassavane yuttā,
thi-ap34:5.4	buddhadassanalālasā.
thi-ap34:6.1	Aggaṁ saddhādhimuttānaṁ,
thi-ap34:6.2	assosiṁ bhikkhuniṁ tadā;
thi-ap34:6.3	Taṁ ṭhānaṁ patthayitvāna,
thi-ap34:6.4	tisso sikkhā apūrayiṁ.
thi-ap34:7.1	Tato maṁ sugato āha,
thi-ap34:7.2	karuṇānugatāsayo;
thi-ap34:7.3	‘Yassa saddhā tathāgate,
thi-ap34:7.4	acalā suppatiṭṭhitā;
thi-ap34:7.5	Sīlañca yassa kalyāṇaṁ,
thi-ap34:7.6	ariyakantaṁ pasaṁsitaṁ.
thi-ap34:8.1	Saṅghe pasādo yassatthi,
thi-ap34:8.2	ujubhūtañca dassanaṁ;
thi-ap34:8.3	Adaliddoti taṁ āhu,
thi-ap34:8.4	amoghaṁ tassa jīvitaṁ.
thi-ap34:9.1	Tasmā saddhañca sīlañca,
thi-ap34:9.2	pasādaṁ dhammadassanaṁ;
thi-ap34:9.3	Anuyuñjetha medhāvī,
thi-ap34:9.4	saraṁ buddhāna sāsanaṁ’.
thi-ap34:10.1	Taṁ sutvāhaṁ pamuditā,
thi-ap34:10.2	apucchiṁ paṇidhiṁ mama;
thi-ap34:10.3	Tadā anomo amito,
thi-ap34:10.4	byākarittha vināyako;
thi-ap34:10.5	‘Buddhe pasannā kalyāṇī,
thi-ap34:10.6	lacchase taṁ supatthitaṁ.
thi-ap34:11.1	Satasahassito kappe,
thi-ap34:11.2	okkākakulasambhavo;
thi-ap34:11.3	Gotamo nāma gottena,
thi-ap34:11.4	satthā loke bhavissati.
thi-ap34:12.1	Tassa dhammesu dāyādā,
thi-ap34:12.2	orasā dhammanimmitā;
thi-ap34:12.3	Siṅgālakassa mātāti,
thi-ap34:12.4	hessati satthu sāvikā’.
thi-ap34:13.1	Taṁ sutvā muditā hutvā,
thi-ap34:13.2	yāvajīvaṁ tadā jinaṁ;
thi-ap34:13.3	Mettacittā paricariṁ,
thi-ap34:13.4	paṭipattīhi nāyakaṁ.
thi-ap34:14.1	Tena kammena sukatena,
thi-ap34:14.2	cetanāpaṇidhīhi ca;
thi-ap34:14.3	Jahitvā mānusaṁ dehaṁ,
thi-ap34:14.4	tāvatiṁsamagacchahaṁ.
thi-ap34:15.1	Pacchime ca bhave dāni,
thi-ap34:15.2	giribbajapuruttame;
thi-ap34:15.3	Jātā seṭṭhikule phīte,
thi-ap34:15.4	mahāratanasañcaye.
thi-ap34:16.1	Putto siṅgālako nāma,
thi-ap34:16.2	mamāsi vipathe rato;
thi-ap34:16.3	Diṭṭhigahanapakkhando,
thi-ap34:16.4	disāpūjanatapparo.
thi-ap34:17.1	Nānādisā namassantaṁ,
thi-ap34:17.2	piṇḍāya nagaraṁ vajaṁ;
thi-ap34:17.3	Taṁ disvā ovadī buddho,
thi-ap34:17.4	magge ṭhatvā vināyako.
thi-ap34:18.1	Tassa desayato dhammaṁ,
thi-ap34:18.2	panādo vimhayo ahu;
thi-ap34:18.3	Dvekoṭinaranārīnaṁ,
thi-ap34:18.4	dhammābhisamayo ahu.
thi-ap34:19.1	Tadāhaṁ parisaṁ gantvā,
thi-ap34:19.2	sutvā sugatabhāsitaṁ;
thi-ap34:19.3	Sotāpattiphalaṁ pattā,
thi-ap34:19.4	pabbajiṁ anagāriyaṁ.
thi-ap34:20.1	Na cireneva kālena,
thi-ap34:20.2	buddhadassanalālasā;
thi-ap34:20.3	Anussatiṁ taṁ bhāvetvā,
thi-ap34:20.4	arahattamapāpuṇiṁ.
thi-ap34:21.1	Dassanatthāya buddhassa,
thi-ap34:21.2	sabbadā ca vajāmahaṁ;
thi-ap34:21.3	Atittāyeva passāmi,
thi-ap34:21.4	rūpaṁ nayananandanaṁ.
thi-ap34:22.1	Sabbapāramisambhūtaṁ,
thi-ap34:22.2	lakkhīnilayanaṁ varaṁ;
thi-ap34:22.3	Rūpaṁ sabbasubhākiṇṇaṁ,
thi-ap34:22.4	atittā viharāmahaṁ.
thi-ap34:23.1	Jino tasmiṁ guṇe tuṭṭho,
thi-ap34:23.2	etadagge ṭhapesi maṁ;
thi-ap34:23.3	‘Siṅgālakassa yā mātā,
thi-ap34:23.4	aggā saddhādhimuttikā’.
thi-ap34:24.1	Iddhīsu ca vasī homi,
thi-ap34:24.2	dibbāya sotadhātuyā;
thi-ap34:24.3	Cetopariyañāṇassa,
thi-ap34:24.4	vasī homi mahāmuni.
thi-ap34:25.1	Pubbenivāsaṁ jānāmi,
thi-ap34:25.2	dibbacakkhu visodhitaṁ;
thi-ap34:25.3	Sabbāsavā parikkhīṇā,
thi-ap34:25.4	natthi dāni punabbhavo.
thi-ap34:26.1	Atthadhammaniruttīsu,
thi-ap34:26.2	paṭibhāne tatheva ca;
thi-ap34:26.3	Ñāṇaṁ mama mahāvīra,
thi-ap34:26.4	uppannaṁ tava santike.
thi-ap34:27.1	Kilesā jhāpitā mayhaṁ,
thi-ap34:27.2	…pe…
thi-ap34:27.3	viharāmi anāsavā.
thi-ap34:28.1	Svāgataṁ vata me āsi,
thi-ap34:28.2	…pe…
thi-ap34:28.3	kataṁ buddhassa sāsanaṁ.
thi-ap34:29.1	Paṭisambhidā catasso,
thi-ap34:29.2	…pe…
thi-ap34:29.3	kataṁ buddhassa sāsanaṁ”.
thi-ap34:30.1	Itthaṁ sudaṁ siṅgālamātā bhikkhunī imā gāthāyo abhāsitthāti.
thi-ap34:31.1	Siṅgālamātutheriyāpadānaṁ catutthaṁ.
thi-ap35:0.1	Therīapadāna
thi-ap35:0.2	Khattiyāvagga
thi-ap35:0.3	Sukkātherīapadāna
thi-ap35:1.1	“Ekanavutito kappe,
thi-ap35:1.2	vipassī nāma nāyako;
thi-ap35:1.3	Uppajji cārudassano,
thi-ap35:1.4	sabbadhammavipassako.
thi-ap35:2.1	Tadāhaṁ bandhumatiyaṁ,
thi-ap35:2.2	jātā aññatare kule;
thi-ap35:2.3	Dhammaṁ sutvāna munino,
thi-ap35:2.4	pabbajiṁ anagāriyaṁ.
thi-ap35:3.1	Bahussutā dhammadharā,
thi-ap35:3.2	paṭibhānavatī tathā;
thi-ap35:3.3	Vicittakathikā cāpi,
thi-ap35:3.4	jinasāsanakārikā.
thi-ap35:4.1	Tadā dhammakathaṁ katvā,
thi-ap35:4.2	hitāya janataṁ bahuṁ;
thi-ap35:4.3	Tato cutāhaṁ tusitaṁ,
thi-ap35:4.4	upapannā yasassinī.
thi-ap35:5.1	Ekattiṁse ito kappe,
thi-ap35:5.2	sikhī viya sikhī jino;
thi-ap35:5.3	Tapanto yasasā loke,
thi-ap35:5.4	uppajji vadataṁ varo.
thi-ap35:6.1	Tadāpi pabbajitvāna,
thi-ap35:6.2	buddhasāsanakovidā;
thi-ap35:6.3	Jotetvā jinavākyāni,
thi-ap35:6.4	tatopi tidivaṁ gatā.
thi-ap35:7.1	Ekattiṁseva kappamhi,
thi-ap35:7.2	vessabhū nāma nāyako;
thi-ap35:7.3	Uppajjittha mahāñāṇī,
thi-ap35:7.4	tadāpi ca tathevahaṁ.
thi-ap35:8.1	Pabbajitvā dhammadharā,
thi-ap35:8.2	jotayiṁ jinasāsanaṁ;
thi-ap35:8.3	Gantvā marupuraṁ rammaṁ,
thi-ap35:8.4	anubhosiṁ mahāsukhaṁ.
thi-ap35:9.1	Imamhi bhaddake kappe,
thi-ap35:9.2	kakusandho jinuttamo;
thi-ap35:9.3	Uppajji narasaraṇo,
thi-ap35:9.4	tadāpi ca tathevahaṁ.
thi-ap35:10.1	Pabbajitvā munimataṁ,
thi-ap35:10.2	jotayitvā yathāyukaṁ;
thi-ap35:10.3	Tato cutāhaṁ tidivaṁ,
thi-ap35:10.4	agaṁ sabhavanaṁ yathā.
thi-ap35:11.1	Imasmiṁyeva kappamhi,
thi-ap35:11.2	koṇāgamananāyako;
thi-ap35:11.3	Uppajji lokasaraṇo,
thi-ap35:11.4	araṇo amataṅgato.
thi-ap35:12.1	Tadāpi pabbajitvāna,
thi-ap35:12.2	sāsane tassa tādino;
thi-ap35:12.3	Bahussutā dhammadharā,
thi-ap35:12.4	jotayiṁ jinasāsanaṁ.
thi-ap35:13.1	Imasmiṁyeva kappamhi,
thi-ap35:13.2	kassapo munimuttamo;
thi-ap35:13.3	Uppajji lokasaraṇo,
thi-ap35:13.4	araṇo maraṇantagū.
thi-ap35:14.1	Tassāpi naravīrassa,
thi-ap35:14.2	pabbajitvāna sāsane;
thi-ap35:14.3	Pariyāpuṭasaddhammā,
thi-ap35:14.4	paripucchā visāradā.
thi-ap35:15.1	Susīlā lajjinī ceva,
thi-ap35:15.2	tīsu sikkhāsu kovidā;
thi-ap35:15.3	Bahuṁ dhammakathaṁ katvā,
thi-ap35:15.4	yāvajīvaṁ mahāmune.
thi-ap35:16.1	Tena kammavipākena,
thi-ap35:16.2	cetanāpaṇidhīhi ca;
thi-ap35:16.3	Jahitvā mānusaṁ dehaṁ,
thi-ap35:16.4	tāvatiṁsamagacchahaṁ.
thi-ap35:17.1	Pacchime ca bhave dāni,
thi-ap35:17.2	giribbajapuruttame;
thi-ap35:17.3	Jātā seṭṭhikule phīte,
thi-ap35:17.4	mahāratanasañcaye.
thi-ap35:18.1	Yadā bhikkhusahassena,
thi-ap35:18.2	parivuto lokanāyako;
thi-ap35:18.3	Upāgami rājagahaṁ,
thi-ap35:18.4	sahassakkhena vaṇṇito.
thi-ap35:19.1	Danto dantehi saha purāṇajaṭilehi,
thi-ap35:19.2	Vippamutto vippamuttehi;
thi-ap35:19.3	Siṅgīnikkhasavaṇṇo,
thi-ap35:19.4	Rājagahaṁ pāvisi bhagavā.
thi-ap35:20.1	Disvā buddhānubhāvaṁ taṁ,
thi-ap35:20.2	sutvāva guṇasañcayaṁ;
thi-ap35:20.3	Buddhe cittaṁ pasādetvā,
thi-ap35:20.4	pūjayiṁ taṁ yathābalaṁ.
thi-ap35:21.1	Aparena ca kālena,
thi-ap35:21.2	dhammadinnāya santike;
thi-ap35:21.3	Agārā nikkhamitvāna,
thi-ap35:21.4	pabbajiṁ anagāriyaṁ.
thi-ap35:22.1	Kesesu chijjamānesu,
thi-ap35:22.2	kilese jhāpayiṁ ahaṁ;
thi-ap35:22.3	Uggahiṁ sāsanaṁ sabbaṁ,
thi-ap35:22.4	pabbajitvā cirenahaṁ.
thi-ap35:23.1	Tato dhammamadesesiṁ,
thi-ap35:23.2	mahājanasamāgame;
thi-ap35:23.3	Dhamme desiyamānamhi,
thi-ap35:23.4	dhammābhisamayo ahu.
thi-ap35:24.1	Nekapāṇasahassānaṁ,
thi-ap35:24.2	taṁ viditvātivimhito;
thi-ap35:24.3	Abhippasanno me yakkho,
thi-ap35:24.4	bhamitvāna giribbajaṁ.
thi-ap35:25.1	Kiṁ me katā rājagahe manussā,
thi-ap35:25.2	Madhuṁ pītāva acchare;
thi-ap35:25.3	Ye sukkaṁ na upāsanti,
thi-ap35:25.4	Desentiṁ amataṁ padaṁ.
thi-ap35:26.1	Tañca appaṭivānīyaṁ,
thi-ap35:26.2	asecanakamojavaṁ;
thi-ap35:26.3	Pivanti maññe sappaññā,
thi-ap35:26.4	valāhakamivaddhagū.
thi-ap35:27.1	Iddhīsu ca vasī homi,
thi-ap35:27.2	dibbāya sotadhātuyā;
thi-ap35:27.3	Cetopariyañāṇassa,
thi-ap35:27.4	vasī homi mahāmune.
thi-ap35:28.1	Pubbenivāsaṁ jānāmi,
thi-ap35:28.2	dibbacakkhu visodhitaṁ;
thi-ap35:28.3	Sabbāsavā parikkhīṇā,
thi-ap35:28.4	natthi dāni punabbhavo.
thi-ap35:29.1	Atthadhammaniruttīsu,
thi-ap35:29.2	paṭibhāne tatheva ca;
thi-ap35:29.3	Ñāṇaṁ mama mahāvīra,
thi-ap35:29.4	uppannaṁ tava santike.
thi-ap35:30.1	Kilesā jhāpitā mayhaṁ,
thi-ap35:30.2	…pe…
thi-ap35:30.3	viharāmi anāsavā.
thi-ap35:31.1	Svāgataṁ vata me āsi,
thi-ap35:31.2	…pe…
thi-ap35:31.3	kataṁ buddhassa sāsanaṁ.
thi-ap35:32.1	Paṭisambhidā catasso,
thi-ap35:32.2	…pe…
thi-ap35:32.3	kataṁ buddhassa sāsanaṁ”.
thi-ap35:33.1	Itthaṁ sudaṁ sukkā bhikkhunī imā gāthāyo abhāsitthāti.
thi-ap35:34.1	Sukkātheriyāpadānaṁ pañcamaṁ.
thi-ap35:34.2	Pañcamaṁ bhāṇavāraṁ.
thi-ap36:0.1	Therīapadāna
thi-ap36:0.2	Khattiyāvagga
thi-ap36:0.3	6 Abhirūpanandātherīapadāna
thi-ap36:1.1	“Ekanavutito kappe,
thi-ap36:1.2	vipassī nāma nāyako;
thi-ap36:1.3	Uppajji cārudassano,
thi-ap36:1.4	sabbadhammesu cakkhumā.
thi-ap36:2.1	Tadāhaṁ bandhumatiyaṁ,
thi-ap36:2.2	iddhe phīte mahākule;
thi-ap36:2.3	Jātā surūpā dayitā,
thi-ap36:2.4	pūjanīyā janassa ca.
thi-ap36:3.1	Upagantvā mahāvīraṁ,
thi-ap36:3.2	vipassiṁ lokanāyakaṁ;
thi-ap36:3.3	Dhammaṁ suṇitvā saraṇaṁ,
thi-ap36:3.4	upesiṁ naranāyakaṁ.
thi-ap36:4.1	Sīlesu saṁvutā hutvā,
thi-ap36:4.2	nibbute ca naruttame;
thi-ap36:4.3	Dhātuthūpassa upari,
thi-ap36:4.4	soṇṇacchattamapūjayiṁ.
thi-ap36:5.1	Muttacāgā sīlavatī,
thi-ap36:5.2	yāvajīvaṁ tato cutā;
thi-ap36:5.3	Jahitvā mānusaṁ dehaṁ,
thi-ap36:5.4	tāvatiṁsūpagā ahaṁ.
thi-ap36:6.1	Tadā dasahi ṭhānehi,
thi-ap36:6.2	adhibhotvāna sesake;
thi-ap36:6.3	Rūpasaddehi gandhehi,
thi-ap36:6.4	rasehi phusanehi ca.
thi-ap36:7.1	Āyunāpi ca vaṇṇena,
thi-ap36:7.2	sukhena yasasāpi ca;
thi-ap36:7.3	Tathevādhipateyyena,
thi-ap36:7.4	adhigayha virocahaṁ.
thi-ap36:8.1	Pacchime ca bhave dāni,
thi-ap36:8.2	jātāhaṁ kapilavhaye;
thi-ap36:8.3	Dhītā khemakasakkassa,
thi-ap36:8.4	nandā nāmāti vissutā.
thi-ap36:9.1	Abhirūpasampadampi,
thi-ap36:9.2	ahu me kantisūcakaṁ;
thi-ap36:9.3	Yadāhaṁ yobbanappattā,
thi-ap36:9.4	rūpalāvaññabhūsitā.
thi-ap36:10.1	Tadā mamatthe sakyānaṁ,
thi-ap36:10.2	vivādo sumahā ahu;
thi-ap36:10.3	Pabbājesi tato tāto,
thi-ap36:10.4	‘mā sakyā vinassiṁsu’ti.
thi-ap36:11.1	Pabbajitvā tathāgataṁ,
thi-ap36:11.2	rūpadessiṁ naruttamaṁ;
thi-ap36:11.3	Sutvāna nopagacchāmi,
thi-ap36:11.4	mama rūpena gabbitā.
thi-ap36:12.1	Ovādampi na gacchāmi,
thi-ap36:12.2	buddhadassanabhīrutā;
thi-ap36:12.3	Tadā jino upāyena,
thi-ap36:12.4	upanetvā sasantikaṁ.
thi-ap36:13.1	Tissitthiyo nidassesi,
thi-ap36:13.2	iddhiyā maggakovido;
thi-ap36:13.3	Accharārūpasadisaṁ,
thi-ap36:13.4	taruṇiṁ jaritaṁ mataṁ.
thi-ap36:14.1	Tāyo disvā susaṁviggā,
thi-ap36:14.2	virattāse kaḷevare;
thi-ap36:14.3	Aṭṭhāsiṁ bhavanibbindā,
thi-ap36:14.4	tadā maṁ āha nāyako.
thi-ap36:15.1	‘Āturaṁ asuciṁ pūtiṁ,
thi-ap36:15.2	passa nande samussayaṁ;
thi-ap36:15.3	Uggharantaṁ paggharantaṁ,
thi-ap36:15.4	bālānaṁ abhinanditaṁ.
thi-ap36:16.1	Asubhāya cittaṁ bhāvehi,
thi-ap36:16.2	ekaggaṁ susamāhitaṁ;
thi-ap36:16.3	Yathā idaṁ tathā etaṁ,
thi-ap36:16.4	yathā etaṁ tathā idaṁ.
thi-ap36:17.1	Evametaṁ avekkhantī,
thi-ap36:17.2	rattindivamatanditā;
thi-ap36:17.3	Tato sakāya paññāya,
thi-ap36:17.4	abhinibbijjha vacchasi’.
thi-ap36:18.1	Tassā me appamattāya,
thi-ap36:18.2	vicarantiyā yoniso;
thi-ap36:18.3	Yathābhūtaṁ ayaṁ kāyo,
thi-ap36:18.4	diṭṭho santarabāhiro.
thi-ap36:19.1	Atha nibbindahaṁ kāye,
thi-ap36:19.2	ajjhattañca virajjahaṁ;
thi-ap36:19.3	Appamattā visaṁyuttā,
thi-ap36:19.4	upasantāmhi nibbutā.
thi-ap36:20.1	Iddhīsu ca vasī homi,
thi-ap36:20.2	dibbāya sotadhātuyā;
thi-ap36:20.3	Cetopariyañāṇassa,
thi-ap36:20.4	vasī homi mahāmune.
thi-ap36:21.1	Pubbenivāsaṁ jānāmi,
thi-ap36:21.2	dibbacakkhu visodhitaṁ;
thi-ap36:21.3	Sabbāsavā parikkhīṇā,
thi-ap36:21.4	natthi dāni punabbhavo.
thi-ap36:22.1	Atthadhammaniruttīsu,
thi-ap36:22.2	paṭibhāne tatheva ca;
thi-ap36:22.3	Ñāṇaṁ mama mahāvīra,
thi-ap36:22.4	uppannaṁ tava santike.
thi-ap36:23.1	Kilesā jhāpitā mayhaṁ,
thi-ap36:23.2	…pe…
thi-ap36:23.3	viharāmi anāsavā.
thi-ap36:24.1	Svāgataṁ vata me āsi,
thi-ap36:24.2	…pe…
thi-ap36:24.3	kataṁ buddhassa sāsanaṁ.
thi-ap36:25.1	Paṭisambhidā catasso,
thi-ap36:25.2	…pe…
thi-ap36:25.3	kataṁ buddhassa sāsanaṁ”.
thi-ap36:26.1	Itthaṁ sudaṁ abhirūpanandā bhikkhunī imā gāthāyo abhāsitthāti.
thi-ap36:27.1	Abhirūpanandātheriyāpadānaṁ chaṭṭhaṁ.
thi-ap37:0.1	Therīapadāna
thi-ap37:0.2	Khattiyāvagga
thi-ap37:0.3	7 Aḍḍhakāsitherīapadāna
thi-ap37:1.1	“Imamhi bhaddake kappe,
thi-ap37:1.2	brahmabandhu mahāyaso;
thi-ap37:1.3	Kassapo nāma gottena,
thi-ap37:1.4	uppajji vadataṁ varo.
thi-ap37:2.1	Tadāhaṁ pabbajitvāna,
thi-ap37:2.2	tassa buddhassa sāsane;
thi-ap37:2.3	Saṁvutā pātimokkhamhi,
thi-ap37:2.4	indriyesu ca pañcasu.
thi-ap37:3.1	Mattaññunī ca asane,
thi-ap37:3.2	yuttā jāgariyepi ca;
thi-ap37:3.3	Vasantī yuttayogāhaṁ,
thi-ap37:3.4	bhikkhuniṁ vigatāsavaṁ.
thi-ap37:4.1	Akkosiṁ duṭṭhacittāhaṁ,
thi-ap37:4.2	gaṇiketi bhaṇiṁ tadā;
thi-ap37:4.3	Tena pāpena kammena,
thi-ap37:4.4	nirayamhi apaccisaṁ.
thi-ap37:5.1	Tena kammāvasesena,
thi-ap37:5.2	ajāyiṁ gaṇikākule;
thi-ap37:5.3	Bahusova parādhīnā,
thi-ap37:5.4	pacchimāya ca jātiyaṁ.
thi-ap37:6.1	Kāsīsu seṭṭhikulajā,
thi-ap37:6.2	brahmacārībalenahaṁ;
thi-ap37:6.3	Accharā viya devesu,
thi-ap37:6.4	ahosiṁ rūpasampadā.
thi-ap37:7.1	Disvāna dassanīyaṁ maṁ,
thi-ap37:7.2	giribbajapuruttame;
thi-ap37:7.3	Gaṇikatte nivesesuṁ,
thi-ap37:7.4	akkosanabalena me.
thi-ap37:8.1	Sāhaṁ sutvāna saddhammaṁ,
thi-ap37:8.2	buddhaseṭṭhena desitaṁ;
thi-ap37:8.3	Pubbavāsanasampannā,
thi-ap37:8.4	pabbajiṁ anagāriyaṁ.
thi-ap37:9.1	Tadūpasampadatthāya,
thi-ap37:9.2	gacchantī jinasantikaṁ;
thi-ap37:9.3	Magge dhutte ṭhite sutvā,
thi-ap37:9.4	labhiṁ dūtopasampadaṁ.
thi-ap37:10.1	Sabbakammaṁ parikkhīṇaṁ,
thi-ap37:10.2	puññaṁ pāpaṁ tatheva ca;
thi-ap37:10.3	Sabbasaṁsāramuttiṇṇā,
thi-ap37:10.4	gaṇikattañca khepitaṁ.
thi-ap37:11.1	Iddhīsu ca vasī homi,
thi-ap37:11.2	dibbāya sotadhātuyā;
thi-ap37:11.3	Cetopariyañāṇassa,
thi-ap37:11.4	vasī homi mahāmune.
thi-ap37:12.1	Pubbenivāsaṁ jānāmi,
thi-ap37:12.2	dibbacakkhu visodhitaṁ;
thi-ap37:12.3	Sabbāsavā parikkhīṇā,
thi-ap37:12.4	natthi dāni punabbhavo.
thi-ap37:13.1	Atthadhammaniruttīsu,
thi-ap37:13.2	paṭibhāne tatheva ca;
thi-ap37:13.3	Ñāṇaṁ mama mahāvīra,
thi-ap37:13.4	uppannaṁ tava santike.
thi-ap37:14.1	Kilesā jhāpitā mayhaṁ,
thi-ap37:14.2	…pe…
thi-ap37:14.3	viharāmi anāsavā.
thi-ap37:15.1	Svāgataṁ vata me āsi,
thi-ap37:15.2	…pe…
thi-ap37:15.3	kataṁ buddhassa sāsanaṁ.
thi-ap37:16.1	Paṭisambhidā catasso,
thi-ap37:16.2	…pe…
thi-ap37:16.3	kataṁ buddhassa sāsanaṁ”.
thi-ap37:17.1	Itthaṁ sudaṁ aḍḍhakāsi bhikkhunī imā gāthāyo abhāsitthāti.
thi-ap37:18.1	Aḍḍhakāsitheriyāpadānaṁ sattamaṁ.
thi-ap38:0.1	Therīapadāna
thi-ap38:0.2	Khattiyāvagga
thi-ap38:0.3	8 Puṇṇikātherīapadāna
thi-ap38:1.1	“Vipassino bhagavato,
thi-ap38:1.2	sikhino vessabhussa ca;
thi-ap38:1.3	Kakusandhassa munino,
thi-ap38:1.4	koṇāgamanatādino.
thi-ap38:2.1	Kassapassa ca buddhassa,
thi-ap38:2.2	pabbajitvāna sāsane;
thi-ap38:2.3	Bhikkhunī sīlasampannā,
thi-ap38:2.4	nipakā saṁvutindriyā.
thi-ap38:3.1	Bahussutā dhammadharā,
thi-ap38:3.2	dhammatthapaṭipucchikā;
thi-ap38:3.3	Uggahetā ca dhammānaṁ,
thi-ap38:3.4	sotā payirupāsitā.
thi-ap38:4.1	Desentī janamajjhehaṁ,
thi-ap38:4.2	ahosiṁ jinasāsane;
thi-ap38:4.3	Bāhusaccena tenāhaṁ,
thi-ap38:4.4	pesalā atimaññisaṁ.
thi-ap38:5.1	Pacchime ca bhave dāni,
thi-ap38:5.2	sāvatthiyaṁ puruttame;
thi-ap38:5.3	Anāthapiṇḍino gehe,
thi-ap38:5.4	jātāhaṁ kumbhadāsiyā.
thi-ap38:6.1	Gatā udakahāriyaṁ,
thi-ap38:6.2	sotthiyaṁ dijamaddasaṁ;
thi-ap38:6.3	Sītaṭṭaṁ toyamajjhamhi,
thi-ap38:6.4	taṁ disvā idamabraviṁ.
thi-ap38:7.1	‘Udahārī ahaṁ sīte,
thi-ap38:7.2	sadā udakamotariṁ;
thi-ap38:7.3	Ayyānaṁ daṇḍabhayabhītā,
thi-ap38:7.4	vācādosabhayaṭṭitā.
thi-ap38:8.1	Kassa brāhmaṇa tvaṁ bhīto,
thi-ap38:8.2	sadā udakamotari;
thi-ap38:8.3	Vedhamānehi gattehi,
thi-ap38:8.4	sītaṁ vedayase bhusaṁ’.
thi-ap38:9.1	‘Jānantī vata maṁ bhoti,
thi-ap38:9.2	puṇṇike paripucchasi;
thi-ap38:9.3	Karontaṁ kusalaṁ kammaṁ,
thi-ap38:9.4	rundhantaṁ katapāpakaṁ.
thi-ap38:10.1	Yo ce vuḍḍho daharo vā,
thi-ap38:10.2	pāpakammaṁ pakubbati;
thi-ap38:10.3	Dakābhisiñcanā sopi,
thi-ap38:10.4	pāpakammā pamuccati’.
thi-ap38:11.1	Uttarantassa akkhāsiṁ,
thi-ap38:11.2	dhammatthasaṁhitaṁ padaṁ;
thi-ap38:11.3	Tañca sutvā sa saṁviggo,
thi-ap38:11.4	pabbajitvārahā ahu.
thi-ap38:12.1	Pūrentī ūnakasataṁ,
thi-ap38:12.2	jātā dāsikule yato;
thi-ap38:12.3	Tato puṇṇāti nāmaṁ me,
thi-ap38:12.4	bhujissaṁ maṁ akaṁsu te.
thi-ap38:13.1	Seṭṭhiṁ tatonujānetvā,
thi-ap38:13.2	pabbajiṁ anagāriyaṁ;
thi-ap38:13.3	Na cireneva kālena,
thi-ap38:13.4	arahattamapāpuṇiṁ.
thi-ap38:14.1	Iddhīsu ca vasī homi,
thi-ap38:14.2	dibbāya sotadhātuyā;
thi-ap38:14.3	Cetopariyañāṇassa,
thi-ap38:14.4	vasī homi mahāmune.
thi-ap38:15.1	Pubbenivāsaṁ jānāmi,
thi-ap38:15.2	dibbacakkhu visodhitaṁ;
thi-ap38:15.3	Sabbāsavā parikkhīṇā,
thi-ap38:15.4	natthi dāni punabbhavo.
thi-ap38:16.1	Atthadhammaniruttīsu,
thi-ap38:16.2	paṭibhāne tatheva ca;
thi-ap38:16.3	Ñāṇaṁ me vimalaṁ suddhaṁ,
thi-ap38:16.4	buddhaseṭṭhassa vāhasā.
thi-ap38:17.1	Bhāvanāya mahāpaññā,
thi-ap38:17.2	suteneva sutāvinī;
thi-ap38:17.3	Mānena nīcakulajā,
thi-ap38:17.4	na hi kammaṁ vinassati.
thi-ap38:18.1	Kilesā jhāpitā mayhaṁ,
thi-ap38:18.2	…pe…
thi-ap38:18.3	viharāmi anāsavā.
thi-ap38:19.1	Svāgataṁ vata me āsi,
thi-ap38:19.2	…pe…
thi-ap38:19.3	kataṁ buddhassa sāsanaṁ.
thi-ap38:20.1	Paṭisambhidā catasso,
thi-ap38:20.2	…pe…
thi-ap38:20.3	kataṁ buddhassa sāsanaṁ”.
thi-ap38:21.1	Itthaṁ sudaṁ puṇṇikā bhikkhunī imā gāthāyo abhāsitthāti.
thi-ap38:22.1	Puṇṇikātheriyāpadānaṁ aṭṭhamaṁ.
thi-ap39:0.1	Therīapadāna
thi-ap39:0.2	Khattiyāvagga
thi-ap39:0.3	9 Ambapālitherīapadāna
thi-ap39:1.1	“Yo raṁsiphusitāveḷo,
thi-ap39:1.2	phusso nāma mahāmuni;
thi-ap39:1.3	Tassāhaṁ bhaginī āsiṁ,
thi-ap39:1.4	ajāyiṁ khattiye kule.
thi-ap39:2.1	Tassa dhammaṁ suṇitvāhaṁ,
thi-ap39:2.2	vippasannena cetasā;
thi-ap39:2.3	Mahādānaṁ daditvāna,
thi-ap39:2.4	patthayiṁ rūpasampadaṁ.
thi-ap39:3.1	Ekattiṁse ito kappe,
thi-ap39:3.2	sikhī lokagganāyako;
thi-ap39:3.3	Uppanno lokapajjoto,
thi-ap39:3.4	tilokasaraṇo jino.
thi-ap39:4.1	Tadāruṇapure ramme,
thi-ap39:4.2	brāhmaññakulasambhavā;
thi-ap39:4.3	Vimuttacittaṁ kupitā,
thi-ap39:4.4	bhikkhuniṁ abhisāpayiṁ.
thi-ap39:5.1	‘Vesikāva anācārā’,
thi-ap39:5.2	jinasāsanadūsikā;
thi-ap39:5.3	Evaṁ akkosayitvāna,
thi-ap39:5.4	tena pāpena kammunā.
thi-ap39:6.1	Dāruṇaṁ nirayaṁ gantvā,
thi-ap39:6.2	mahādukkhasamappitā;
thi-ap39:6.3	Tato cutā manussesu,
thi-ap39:6.4	upapannā tapassinī.
thi-ap39:7.1	Dasajātisahassāni,
thi-ap39:7.2	gaṇikattamakārayiṁ;
thi-ap39:7.3	Tamhā pāpā na muccissaṁ,
thi-ap39:7.4	bhutvā duṭṭhavisaṁ yathā.
thi-ap39:8.1	Brahmacariyamasevissaṁ,
thi-ap39:8.2	kassape jinasāsane;
thi-ap39:8.3	Tena kammavipākena,
thi-ap39:8.4	ajāyiṁ tidase pure.
thi-ap39:9.1	Pacchime bhave sampatte,
thi-ap39:9.2	ahosiṁ opapātikā;
thi-ap39:9.3	Ambasākhantare jātā,
thi-ap39:9.4	ambapālīti tenahaṁ.
thi-ap39:10.1	Parivutā pāṇakoṭīhi,
thi-ap39:10.2	pabbajiṁ jinasāsane;
thi-ap39:10.3	Pattāhaṁ acalaṁ ṭhānaṁ,
thi-ap39:10.4	dhītā buddhassa orasā.
thi-ap39:11.1	Iddhīsu ca vasī homi,
thi-ap39:11.2	sotadhātuvisuddhiyā;
thi-ap39:11.3	Cetopariyañāṇassa,
thi-ap39:11.4	vasī homi mahāmuni.
thi-ap39:12.1	Pubbenivāsaṁ jānāmi,
thi-ap39:12.2	dibbacakkhu visodhitaṁ;
thi-ap39:12.3	Sabbāsavā parikkhīṇā,
thi-ap39:12.4	natthi dāni punabbhavo.
thi-ap39:13.1	Atthadhammaniruttīsu,
thi-ap39:13.2	paṭibhāne tatheva ca;
thi-ap39:13.3	Ñāṇaṁ me vimalaṁ suddhaṁ,
thi-ap39:13.4	buddhaseṭṭhassa vāhasā.
thi-ap39:14.1	Kilesā jhāpitā mayhaṁ,
thi-ap39:14.2	…pe…
thi-ap39:14.3	viharāmi anāsavā.
thi-ap39:15.1	Svāgataṁ vata me āsi,
thi-ap39:15.2	…pe…
thi-ap39:15.3	kataṁ buddhassa sāsanaṁ.
thi-ap39:16.1	Paṭisambhidā catasso,
thi-ap39:16.2	…pe…
thi-ap39:16.3	kataṁ buddhassa sāsanaṁ”.
thi-ap39:17.1	Itthaṁ sudaṁ ambapāli bhikkhunī imā gāthāyo abhāsitthāti.
thi-ap39:18.1	Ambapālitheriyāpadānaṁ navamaṁ.
thi-ap40:0.1	Therīapadāna
thi-ap40:0.2	Khattiyāvagga
thi-ap40:0.3	10 Pesalātherīapadāna
thi-ap40:1.1	“Imamhi bhaddake kappe,
thi-ap40:1.2	brahmabandhu mahāyaso;
thi-ap40:1.3	Kassapo nāma gottena,
thi-ap40:1.4	uppajji vadataṁ varo.
thi-ap40:2.1	Sāvatthiyaṁ pure vare,
thi-ap40:2.2	upāsakakule ahaṁ;
thi-ap40:2.3	Pasūtā taṁ jinavaraṁ,
thi-ap40:2.4	disvā sutvā ca desanaṁ.
thi-ap40:3.1	Taṁ vīraṁ saraṇaṁ gantvā,
thi-ap40:3.2	sīlāni ca samādiyiṁ;
thi-ap40:3.3	Kadāci so mahāvīro,
thi-ap40:3.4	mahājanasamāgame.
thi-ap40:4.1	Attano abhisambodhiṁ,
thi-ap40:4.2	pakāsesi narāsabho;
thi-ap40:4.3	Ananussutadhammesu,
thi-ap40:4.4	pubbe dukkhādikesu ca.
thi-ap40:5.1	Cakkhu ñāṇañca paññā ca,
thi-ap40:5.2	vijjāloko ca āsi me;
thi-ap40:5.3	Taṁ sutvā uggahetvāna,
thi-ap40:5.4	paripucchiñca bhikkhavo.
thi-ap40:6.1	Tena kammena sukatena,
thi-ap40:6.2	cetanāpaṇidhīhi ca;
thi-ap40:6.3	Jahitvā mānusaṁ dehaṁ,
thi-ap40:6.4	tāvatiṁsamagacchahaṁ.
thi-ap40:7.1	Pacchime ca bhave dāni,
thi-ap40:7.2	Jātā seṭṭhimahākule;
thi-ap40:7.3	Upecca buddhaṁ saddhammaṁ,
thi-ap40:7.4	Sutvā saccūpasaṁhitaṁ.
thi-ap40:8.1	Pabbajitvācireneva,
thi-ap40:8.2	saccatthāni vicintayaṁ;
thi-ap40:8.3	Khepetvā āsave sabbe,
thi-ap40:8.4	arahattamapāpuṇiṁ.
thi-ap40:9.1	Iddhīsu ca vasī homi,
thi-ap40:9.2	dibbāya sotadhātuyā;
thi-ap40:9.3	Cetopariyañāṇassa,
thi-ap40:9.4	vasī homi mahāmune.
thi-ap40:10.1	Pubbenivāsaṁ jānāmi,
thi-ap40:10.2	dibbacakkhu visodhitaṁ;
thi-ap40:10.3	Sabbāsavā parikkhīṇā,
thi-ap40:10.4	natthi dāni punabbhavo.
thi-ap40:11.1	Atthadhammaniruttīsu,
thi-ap40:11.2	paṭibhāne tatheva ca;
thi-ap40:11.3	Ñāṇaṁ me vimalaṁ suddhaṁ,
thi-ap40:11.4	buddhaseṭṭhassa vāhasā.
thi-ap40:12.1	Kilesā jhāpitā mayhaṁ,
thi-ap40:12.2	bhavā sabbe samūhatā;
thi-ap40:12.3	Nāgīva bandhanaṁ chetvā,
thi-ap40:12.4	viharāmi anāsavā.
thi-ap40:13.1	Svāgataṁ vata me āsi,
thi-ap40:13.2	mama buddhassa santike;
thi-ap40:13.3	Tisso vijjā anuppattā,
thi-ap40:13.4	kataṁ buddhassa sāsanaṁ.
thi-ap40:14.1	Paṭisambhidā catasso,
thi-ap40:14.2	Vimokkhāpi ca aṭṭhime;
thi-ap40:14.3	Chaḷabhiññā sacchikatā,
thi-ap40:14.4	Kataṁ buddhassa sāsanaṁ”.
thi-ap40:15.1	Itthaṁ sudaṁ pesalā bhikkhunī imā gāthāyo abhāsitthāti.
thi-ap40:16.1	Pesalātheriyāpadānaṁ dasamaṁ.
thi-ap40:16.2	Khattiyāvaggo catuttho.
thi-ap40:17.1	Tassuddānaṁ
thi-ap40:18.1	Khattiyā brāhmaṇī ceva,
thi-ap40:18.2	tathā uppaladāyikā;
thi-ap40:18.3	Siṅgālamātā sukkā ca,
thi-ap40:18.4	abhirūpā aḍḍhakāsikā.
thi-ap40:19.1	Puṇṇā ca ambapālī ca,
thi-ap40:19.2	pesalāti ca tā dasa;
thi-ap40:19.3	Gāthāyo dvisatānettha,
thi-ap40:19.4	dvicattālīsa cuttari.
thi-ap40:20.1	Atha vagguddānaṁ
thi-ap40:21.1	Sumedhā ekūposathā,
thi-ap40:21.2	kuṇḍalakesī khattiyā;
thi-ap40:21.3	Sahassaṁ tisatā gāthā,
thi-ap40:21.4	sattatālīsa piṇḍitā.
thi-ap40:22.1	Saha uddānagāthāhi,
thi-ap40:22.2	gaṇitāyo vibhāvibhi;
thi-ap40:22.3	Sahassaṁ tisataṁ gāthā,
thi-ap40:22.4	sattapaññāsameva cāti.
thi-ap40:23.1	Therikāpadānaṁ samattaṁ.
thi-ap40:24.1	Apadānapāḷi samattā.