# Theragāthā — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

thag1.1:0.1	Theragāthā 1.1
thag1.1:0.2	Ekakanipāta
thag1.1:0.3	Paṭhamavagga
thag1.1:0.4	Subhūtittheragāthā
thag1.1:1.0.1	Nidānagāthā
thag1.1:1.0.2	Namo tassa Bhagavato Arahato Sammāsambuddhassa.
thag1.1:1.1	Sīhānaṁva nadantānaṁ,
thag1.1:1.2	dāṭhīnaṁ girigabbhare;
thag1.1:1.3	Suṇātha bhāvitattānaṁ,
thag1.1:1.4	gāthā atthūpanāyikā.
thag1.1:2.1	Yathānāmā yathāgottā,
thag1.1:2.2	yathādhammavihārino;
thag1.1:2.3	Yathādhimuttā sappaññā,
thag1.1:2.4	vihariṁsu atanditā.
thag1.1:3.1	Tattha tattha vipassitvā,
thag1.1:3.2	phusitvā accutaṁ padaṁ;
thag1.1:3.3	Katantaṁ paccavekkhantā,
thag1.1:3.4	imamatthamabhāsisuṁ.
thag1.1:4.0	Subhūtittheragāthā
thag1.1:4.1	“Channā me kuṭikā sukhā nivātā,
thag1.1:4.2	Vassa deva yathāsukhaṁ;
thag1.1:4.3	Cittaṁ me susamāhitaṁ vimuttaṁ,
thag1.1:4.4	Ātāpī viharāmi vassa devā”ti.
thag1.1:4.5	Itthaṁ sudaṁ āyasmā subhūtitthero gāthaṁ abhāsitthāti.
thag1.2:0.1	Theragāthā 1.2
thag1.2:0.2	Ekakanipāta
thag1.2:0.3	Paṭhamavagga
thag1.2:0.4	Mahākoṭṭhikattheragāthā
thag1.2:1.1	“Upasanto uparato,
thag1.2:1.2	mantabhāṇī anuddhato;
thag1.2:1.3	Dhunāti pāpake dhamme,
thag1.2:1.4	dumapattaṁva māluto”ti.
thag1.2:1.5	Itthaṁ sudaṁ āyasmā mahākoṭṭhiko thero gāthaṁ abhāsitthāti.
thag1.3:0.1	Theragāthā 1.3
thag1.3:0.2	Ekakanipāta
thag1.3:0.3	Paṭhamavagga
thag1.3:0.4	Kaṅkhārevatattheragāthā
thag1.3:1.1	“Paññaṁ imaṁ passa tathāgatānaṁ,
thag1.3:1.2	Aggi yathā pajjalito nisīthe;
thag1.3:1.3	Ālokadā cakkhudadā bhavanti,
thag1.3:1.4	Ye āgatānaṁ vinayanti kaṅkhan”ti.
thag1.3:1.5	Itthaṁ sudaṁ āyasmā kaṅkhārevato thero gāthaṁ abhāsitthāti.
thag1.4:0.1	Theragāthā 1.4
thag1.4:0.2	Ekakanipāta
thag1.4:0.3	Paṭhamavagga
thag1.4:0.4	Puṇṇattheragāthā
thag1.4:1.1	“Sabbhireva samāsetha,
thag1.4:1.2	paṇḍitehatthadassibhi;
thag1.4:1.3	Atthaṁ mahantaṁ gambhīraṁ,
thag1.4:1.4	duddasaṁ nipuṇaṁ aṇuṁ;
thag1.4:1.5	Dhīrā samadhigacchanti,
thag1.4:1.6	appamattā vicakkhaṇā”ti.
thag1.4:1.7	Itthaṁ sudaṁ āyasmā puṇṇo mantāṇiputto thero gāthaṁ abhāsitthāti.
thag1.5:0.1	Theragāthā 1.5
thag1.5:0.2	Ekakanipāta
thag1.5:0.3	Paṭhamavagga
thag1.5:0.4	Dabbattheragāthā
thag1.5:1.1	“Yo duddamiyo damena danto,
thag1.5:1.2	Dabbo santusito vitiṇṇakaṅkho;
thag1.5:1.3	Vijitāvī apetabheravo hi,
thag1.5:1.4	Dabbo so parinibbuto ṭhitatto”ti.
thag1.5:1.5	Itthaṁ sudaṁ āyasmā dabbo thero gāthaṁ abhāsitthāti.
thag1.6:0.1	Theragāthā 1.6
thag1.6:0.2	Ekakanipāta
thag1.6:0.3	Paṭhamavagga
thag1.6:0.4	Sītavaniyattheragāthā
thag1.6:1.1	“Yo sītavanaṁ upagā bhikkhu,
thag1.6:1.2	Eko santusito samāhitatto;
thag1.6:1.3	Vijitāvī apetalomahaṁso,
thag1.6:1.4	Rakkhaṁ kāyagatāsatiṁ dhitimā”ti.
thag1.6:1.5	Itthaṁ sudaṁ āyasmā sītavaniyo thero gāthaṁ abhāsitthāti.
thag1.7:0.1	Theragāthā 1.7
thag1.7:0.2	Ekakanipāta
thag1.7:0.3	Paṭhamavagga
thag1.7:0.4	Bhalliyattheragāthā
thag1.7:1.1	“Yopānudī maccurājassa senaṁ,
thag1.7:1.2	Naḷasetuṁva sudubbalaṁ mahogho;
thag1.7:1.3	Vijitāvī apetabheravo hi,
thag1.7:1.4	Danto so parinibbuto ṭhitatto”ti.
thag1.7:1.5	Itthaṁ sudaṁ āyasmā bhalliyo thero gāthaṁ abhāsitthāti.
thag1.8:0.1	Theragāthā 1.8
thag1.8:0.2	Ekakanipāta
thag1.8:0.3	Paṭhamavagga
thag1.8:0.4	Vīrattheragāthā
thag1.8:1.1	“Yo duddamiyo damena danto,
thag1.8:1.2	Vīro santusito vitiṇṇakaṅkho;
thag1.8:1.3	Vijitāvī apetalomahaṁso,
thag1.8:1.4	Vīro so parinibbuto ṭhitatto”ti.
thag1.8:1.5	Itthaṁ sudaṁ āyasmā vīro thero gāthaṁ abhāsitthāti.
thag1.9:0.1	Theragāthā 1.9
thag1.9:0.2	Ekakanipāta
thag1.9:0.3	Paṭhamavagga
thag1.9:0.4	Pilindavacchattheragāthā
thag1.9:1.1	“Svāgataṁ na durāgataṁ,
thag1.9:1.2	Nayidaṁ dumantitaṁ mama;
thag1.9:1.3	Saṁvibhattesu dhammesu,
thag1.9:1.4	Yaṁ seṭṭhaṁ tadupāgamin”ti.
thag1.9:1.5	Itthaṁ sudaṁ āyasmā pilindavaccho thero gāthaṁ abhāsitthāti.
thag1.10:0.1	Theragāthā 1.10
thag1.10:0.2	Ekakanipāta
thag1.10:0.3	Paṭhamavagga
thag1.10:0.4	Puṇṇamāsattheragāthā
thag1.10:1.1	“Vihari apekkhaṁ idha vā huraṁ vā,
thag1.10:1.2	Yo vedagū samito yatatto;
thag1.10:1.3	Sabbesu dhammesu anūpalitto,
thag1.10:1.4	Lokassa jaññā udayabbayañcā”ti.
thag1.10:1.5	Itthaṁ sudaṁ āyasmā puṇṇamāso thero gāthaṁ abhāsitthāti.
thag1.10:1.6	vaggo paṭhamo.
thag1.10:2.0	Tassuddānaṁ
thag1.10:2.1	Subhūti koṭṭhiko thero,
thag1.10:2.2	kaṅkhārevatasammato;
thag1.10:2.3	Mantāṇiputto dabbo ca,
thag1.10:2.4	sītavaniyo ca bhalliyo;
thag1.10:2.5	Vīro pilindavaccho ca,
thag1.10:2.6	puṇṇamāso tamonudoti.
thag1.11:0.1	Theragāthā 1.11
thag1.11:0.2	Ekakanipāta
thag1.11:0.3	Dutiyavagga
thag1.11:0.4	Cūḷavacchattheragāthā
thag1.11:1.1	“Pāmojjabahulo bhikkhu,
thag1.11:1.2	dhamme buddhappavedite;
thag1.11:1.3	Adhigacche padaṁ santaṁ,
thag1.11:1.4	saṅkhārūpasamaṁ sukhan”ti.
thag1.11:1.5	… Cūḷavaccho thero ….
thag1.12:0.1	Theragāthā 1.12
thag1.12:0.2	Ekakanipāta
thag1.12:0.3	Dutiyavagga
thag1.12:0.4	Mahāvacchattheragāthā
thag1.12:1.1	“Paññābalī sīlavatūpapanno,
thag1.12:1.2	Samāhito jhānarato satīmā;
thag1.12:1.3	Yadatthiyaṁ bhojanaṁ bhuñjamāno,
thag1.12:1.4	Kaṅkhetha kālaṁ idha vītarāgo”ti.
thag1.12:1.5	… Mahāvaccho thero ….
thag1.13:0.1	Theragāthā 1.13
thag1.13:0.2	Ekakanipāta
thag1.13:0.3	Dutiyavagga
thag1.13:0.4	Vanavacchattheragāthā
thag1.13:1.1	“Nīlabbhavaṇṇā rucirā,
thag1.13:1.2	sītavārī sucindharā;
thag1.13:1.3	Indagopakasañchannā,
thag1.13:1.4	te selā ramayanti man”ti.
thag1.13:1.5	… Vanavaccho thero ….
thag1.14:0.1	Theragāthā 1.14
thag1.14:0.2	Ekakanipāta
thag1.14:0.3	Dutiyavagga
thag1.14:0.4	Sivakasāmaṇeragāthā
thag1.14:1.1	“Upajjhāyo maṁ avaca,
thag1.14:1.2	ito gacchāma sīvaka;
thag1.14:1.3	Gāme me vasati kāyo,
thag1.14:1.4	araññaṁ me gato mano;
thag1.14:1.5	Semānakopi gacchāmi,
thag1.14:1.6	natthi saṅgo vijānatan”ti.
thag1.14:1.7	… Vanavacchassa therassa (siviko) sāmaṇero ….
thag1.15:0.1	Theragāthā 1.15
thag1.15:0.2	Ekakanipāta
thag1.15:0.3	Dutiyavagga
thag1.15:0.4	Kuṇḍadhānattheragāthā
thag1.15:1.1	“Pañca chinde pañca jahe,
thag1.15:1.2	pañca cuttari bhāvaye;
thag1.15:1.3	Pañca saṅgātigo bhikkhu,
thag1.15:1.4	oghatiṇṇoti vuccatī”ti.
thag1.15:1.5	… Kuṇḍadhāno thero ….
thag1.16:0.1	Theragāthā 1.16
thag1.16:0.2	Ekakanipāta
thag1.16:0.3	Dutiyavagga
thag1.16:0.4	Belaṭṭhasīsattheragāthā
thag1.16:1.1	“Yathāpi bhaddo ājañño,
thag1.16:1.2	naṅgalāvattanī sikhī;
thag1.16:1.3	Gacchati appakasirena,
thag1.16:1.4	evaṁ rattindivā mama;
thag1.16:1.5	Gacchanti appakasirena,
thag1.16:1.6	sukhe laddhe nirāmise”ti.
thag1.16:1.7	… Belaṭṭhasīso thero ….
thag1.17:0.1	Theragāthā 1.17
thag1.17:0.2	Ekakanipāta
thag1.17:0.3	Dutiyavagga
thag1.17:0.4	Dāsakattheragāthā
thag1.17:1.1	“Middhī yadā hoti mahagghaso ca,
thag1.17:1.2	Niddāyitā samparivattasāyī;
thag1.17:1.3	Mahāvarāhova nivāpapuṭṭho,
thag1.17:1.4	Punappunaṁ gabbhamupeti mando”ti.
thag1.17:1.5	… Dāsako thero ….
thag1.18:0.1	Theragāthā 1.18
thag1.18:0.2	Ekakanipāta
thag1.18:0.3	Dutiyavagga
thag1.18:0.4	Siṅgālapituttheragāthā
thag1.18:1.1	“Ahu buddhassa dāyādo,
thag1.18:1.2	bhikkhu bhesakaḷāvane;
thag1.18:1.3	Kevalaṁ aṭṭhisaññāya,
thag1.18:1.4	apharī pathaviṁ imaṁ;
thag1.18:1.5	Maññehaṁ kāmarāgaṁ so,
thag1.18:1.6	khippameva pahissatī”ti.
thag1.18:1.7	… Siṅgālapitā thero ….
thag1.19:0.1	Theragāthā 1.19
thag1.19:0.2	Ekakanipāta
thag1.19:0.3	Dutiyavagga
thag1.19:0.4	Kulattheragāthā
thag1.19:1.1	“Udakañhi nayanti nettikā,
thag1.19:1.2	Usukārā namayanti tejanaṁ;
thag1.19:1.3	Dāruṁ namayanti tacchakā,
thag1.19:1.4	Attānaṁ damayanti subbatā”ti.
thag1.19:1.5	… Kulo thero ….
thag1.20:0.1	Theragāthā 1.20
thag1.20:0.2	Ekakanipāta
thag1.20:0.3	Dutiyavagga
thag1.20:0.4	Ajitattheragāthā
thag1.20:1.1	“Maraṇe me bhayaṁ natthi,
thag1.20:1.2	nikanti natthi jīvite;
thag1.20:1.3	Sandehaṁ nikkhipissāmi,
thag1.20:1.4	sampajāno paṭissato”ti.
thag1.20:1.5	… Ajito thero …
thag1.20:1.6	vaggo dutiyo.
thag1.20:2.0	Tassuddānaṁ
thag1.20:2.1	Cūḷavaccho mahāvaccho,
thag1.20:2.2	vanavaccho ca sīvako;
thag1.20:2.3	Kuṇḍadhāno ca belaṭṭhi,
thag1.20:2.4	dāsako ca tatopari;
thag1.20:2.5	Siṅgālapitiko thero,
thag1.20:2.6	kulo ca ajito dasāti.
thag1.21:0.1	Theragāthā 1.21
thag1.21:0.2	Ekakanipāta
thag1.21:0.3	Tatiyavagga
thag1.21:0.4	Nigrodhattheragāthā
thag1.21:1.1	“Nāhaṁ bhayassa bhāyāmi,
thag1.21:1.2	Satthā no amatassa kovido;
thag1.21:1.3	Yattha bhayaṁ nāvatiṭṭhati,
thag1.21:1.4	Tena maggena vajanti bhikkhavo”ti.
thag1.21:1.5	… Nigrodho thero ….
thag1.22:0.1	Theragāthā 1.22
thag1.22:0.2	Ekakanipāta
thag1.22:0.3	Tatiyavagga
thag1.22:0.4	Cittakattheragāthā
thag1.22:1.1	“Nīlā sugīvā sikhino,
thag1.22:1.2	Morā kārambhiyaṁ abhinadanti;
thag1.22:1.3	Te sītavātakīḷitā,
thag1.22:1.4	Suttaṁ jhāyaṁ nibodhentī”ti.
thag1.22:1.5	… Cittako thero ….
thag1.23:0.1	Theragāthā 1.23
thag1.23:0.2	Ekakanipāta
thag1.23:0.3	Tatiyavagga
thag1.23:0.4	Gosālattheragāthā
thag1.23:1.1	“Ahaṁ kho veḷugumbasmiṁ,
thag1.23:1.2	bhutvāna madhupāyasaṁ;
thag1.23:1.3	Padakkhiṇaṁ sammasanto,
thag1.23:1.4	khandhānaṁ udayabbayaṁ;
thag1.23:1.5	Sānuṁ paṭigamissāmi,
thag1.23:1.6	vivekamanubrūhayan”ti.
thag1.23:1.7	… Gosālo thero ….
thag1.24:0.1	Theragāthā 1.24
thag1.24:0.2	Ekakanipāta
thag1.24:0.3	Tatiyavagga
thag1.24:0.4	Sugandhattheragāthā
thag1.24:1.1	“Anuvassiko pabbajito,
thag1.24:1.2	passa dhammasudhammataṁ;
thag1.24:1.3	Tisso vijjā anuppattā,
thag1.24:1.4	kataṁ buddhassa sāsanan”ti.
thag1.24:1.5	… Sugandho thero ….
thag1.25:0.1	Theragāthā 1.25
thag1.25:0.2	Ekakanipāta
thag1.25:0.3	Tatiyavagga
thag1.25:0.4	Nandiyattheragāthā
thag1.25:1.1	“Obhāsajātaṁ phalagaṁ,
thag1.25:1.2	cittaṁ yassa abhiṇhaso;
thag1.25:1.3	Tādisaṁ bhikkhumāsajja,
thag1.25:1.4	kaṇha dukkhaṁ nigacchasī”ti.
thag1.25:1.5	… Nandiyo thero ….
thag1.26:0.1	Theragāthā 1.26
thag1.26:0.2	Ekakanipāta
thag1.26:0.3	Tatiyavagga
thag1.26:0.4	Abhayattheragāthā
thag1.26:1.1	“Sutvā subhāsitaṁ vācaṁ,
thag1.26:1.2	buddhassādiccabandhuno;
thag1.26:1.3	Paccabyadhiṁ hi nipuṇaṁ,
thag1.26:1.4	vālaggaṁ usunā yathā”ti.
thag1.26:1.5	… Abhayo thero ….
thag1.27:0.1	Theragāthā 1.27
thag1.27:0.2	Ekakanipāta
thag1.27:0.3	Tatiyavagga
thag1.27:0.4	Lomasakaṅgiyattheragāthā
thag1.27:1.1	“Dabbaṁ kusaṁ poṭakilaṁ,
thag1.27:1.2	usīraṁ muñjapabbajaṁ;
thag1.27:1.3	Urasā panudissāmi,
thag1.27:1.4	vivekamanubrūhayan”ti.
thag1.27:1.5	… Lomasakaṅgiyo thero ….
thag1.28:0.1	Theragāthā 1.28
thag1.28:0.2	Ekakanipāta
thag1.28:0.3	Tatiyavagga
thag1.28:0.4	Jambugāmikaputtattheragāthā
thag1.28:1.1	“Kacci no vatthapasuto,
thag1.28:1.2	Kacci no bhūsanārato;
thag1.28:1.3	Kacci sīlamayaṁ gandhaṁ,
thag1.28:1.4	Kiṁ tvaṁ vāyasi netarā pajā”ti.
thag1.28:1.5	… Jambugāmikaputto thero ….
thag1.29:0.1	Theragāthā 1.29
thag1.29:0.2	Ekakanipāta
thag1.29:0.3	Tatiyavagga
thag1.29:0.4	Hāritattheragāthā
thag1.29:1.1	“Samunnamayamattānaṁ,
thag1.29:1.2	usukārova tejanaṁ;
thag1.29:1.3	Cittaṁ ujuṁ karitvāna,
thag1.29:1.4	avijjaṁ bhinda hāritā”ti.
thag1.29:1.5	… Hārito thero ….
thag1.30:0.1	Theragāthā 1.30
thag1.30:0.2	Ekakanipāta
thag1.30:0.3	Tatiyavagga
thag1.30:0.4	Uttiyattheragāthā
thag1.30:1.1	“Ābādhe me samuppanne,
thag1.30:1.2	sati me udapajjatha;
thag1.30:1.3	Ābādho me samuppanno,
thag1.30:1.4	kālo me nappamajjitun”ti.
thag1.30:1.5	… Uttiyo thero …
thag1.30:1.6	vaggo tatiyo.
thag1.30:2.0	Tassuddānaṁ
thag1.30:2.1	Nigrodho cittako thero,
thag1.30:2.2	gosālathero sugandho;
thag1.30:2.3	Nandiyo abhayo thero,
thag1.30:2.4	thero lomasakaṅgiyo;
thag1.30:2.5	Jambugāmikaputto ca,
thag1.30:2.6	hārito uttiyo isīti.
thag1.31:0.1	Theragāthā 1.31
thag1.31:0.2	Ekakanipāta
thag1.31:0.3	Catutthavagga
thag1.31:0.4	Gahvaratīriyattheragāthā
thag1.31:1.1	“Phuṭṭho ḍaṁsehi makasehi,
thag1.31:1.2	araññasmiṁ brahāvane;
thag1.31:1.3	Nāgo saṅgāmasīseva,
thag1.31:1.4	sato tatrādhivāsaye”ti.
thag1.31:1.5	… Gahvaratīriyo thero ….
thag1.32:0.1	Theragāthā 1.32
thag1.32:0.2	Ekakanipāta
thag1.32:0.3	Catutthavagga
thag1.32:0.4	Suppiyattheragāthā
thag1.32:1.1	“Ajaraṁ jīramānena,
thag1.32:1.2	tappamānena nibbutiṁ;
thag1.32:1.3	Nimiyaṁ paramaṁ santiṁ,
thag1.32:1.4	yogakkhemaṁ anuttaran”ti.
thag1.32:1.5	… Suppiyo thero ….
thag1.33:0.1	Theragāthā 1.33
thag1.33:0.2	Ekakanipāta
thag1.33:0.3	Catutthavagga
thag1.33:0.4	Sopākattheragāthā
thag1.33:1.1	“Yathāpi ekaputtasmiṁ,
thag1.33:1.2	piyasmiṁ kusalī siyā;
thag1.33:1.3	Evaṁ sabbesu pāṇesu,
thag1.33:1.4	sabbattha kusalo siyā”ti.
thag1.33:1.5	… Sopāko thero ….
thag1.34:0.1	Theragāthā 1.34
thag1.34:0.2	Ekakanipāta
thag1.34:0.3	Catutthavagga
thag1.34:0.4	Posiyattheragāthā
thag1.34:1.1	“Anāsannavarā etā,
thag1.34:1.2	niccameva vijānatā;
thag1.34:1.3	Gāmā araññamāgamma,
thag1.34:1.4	tato gehaṁ upāvisi;
thag1.34:1.5	Tato uṭṭhāya pakkāmi,
thag1.34:1.6	anāmantetvā posiyo”ti.
thag1.34:1.7	… Posiyo thero ….
thag1.35:0.1	Theragāthā 1.35
thag1.35:0.2	Ekakanipāta
thag1.35:0.3	Catutthavagga
thag1.35:0.4	Sāmaññakānittheragāthā
thag1.35:1.1	“Sukhaṁ sukhattho labhate tadācaraṁ,
thag1.35:1.2	Kittiñca pappoti yasassa vaḍḍhati;
thag1.35:1.3	Yo ariyamaṭṭhaṅgikamañjasaṁ ujuṁ,
thag1.35:1.4	Bhāveti maggaṁ amatassa pattiyā”ti.
thag1.35:1.5	… Sāmaññakānitthero ….
thag1.36:0.1	Theragāthā 1.36
thag1.36:0.2	Ekakanipāta
thag1.36:0.3	Catutthavagga
thag1.36:0.4	Kumāputtattheragāthā
thag1.36:1.1	“Sādhu sutaṁ sādhu caritakaṁ,
thag1.36:1.2	Sādhu sadā aniketavihāro;
thag1.36:1.3	Atthapucchanaṁ padakkhiṇakammaṁ,
thag1.36:1.4	Etaṁ sāmaññamakiñcanassā”ti.
thag1.36:1.5	… Kumāputto thero ….
thag1.37:0.1	Theragāthā 1.37
thag1.37:0.2	Ekakanipāta
thag1.37:0.3	Catutthavagga
thag1.37:0.4	Kumāputtasahāyakattheragāthā
thag1.37:1.1	“Nānājanapadaṁ yanti,
thag1.37:1.2	Vicarantā asaññatā;
thag1.37:1.3	Samādhiñca virādhenti,
thag1.37:1.4	Kiṁsu raṭṭhacariyā karissati;
thag1.37:1.5	Tasmā vineyya sārambhaṁ,
thag1.37:1.6	Jhāyeyya apurakkhato”ti.
thag1.37:1.7	… Kumāputtattherassa sahāyako thero ….
thag1.38:0.1	Theragāthā 1.38
thag1.38:0.2	Ekakanipāta
thag1.38:0.3	Catutthavagga
thag1.38:0.4	Gavampatittheragāthā
thag1.38:1.1	“Yo iddhiyā sarabhuṁ aṭṭhapesi,
thag1.38:1.2	So gavampati asito anejo;
thag1.38:1.3	Taṁ sabbasaṅgātigataṁ mahāmuniṁ,
thag1.38:1.4	Devā namassanti bhavassa pāragun”ti.
thag1.38:1.5	… Gavampatitthero ….
thag1.39:0.1	Theragāthā 1.39
thag1.39:0.2	Ekakanipāta
thag1.39:0.3	Catutthavagga
thag1.39:0.4	Tissattheragāthā
thag1.39:1.1	“Sattiyā viya omaṭṭho,
thag1.39:1.2	ḍayhamānova matthake;
thag1.39:1.3	Kāmarāgappahānāya,
thag1.39:1.4	sato bhikkhu paribbaje”ti.
thag1.39:1.5	… Tisso thero ….
thag1.40:0.1	Theragāthā 1.40
thag1.40:0.2	Ekakanipāta
thag1.40:0.3	Catutthavagga
thag1.40:0.4	Vaḍḍhamānattheragāthā
thag1.40:1.1	“Sattiyā viya omaṭṭho,
thag1.40:1.2	ḍayhamānova matthake;
thag1.40:1.3	Bhavarāgappahānāya,
thag1.40:1.4	sato bhikkhu paribbaje”ti.
thag1.40:1.5	… Vaḍḍhamāno thero …
thag1.40:1.6	vaggo catuttho.
thag1.40:2.0	Tassuddānaṁ
thag1.40:2.1	Gahvaratīriyo suppiyo,
thag1.40:2.2	sopāko ceva posiyo;
thag1.40:2.3	Sāmaññakāni kumāputto,
thag1.40:2.4	kumāputtasahāyako;
thag1.40:2.5	Gavampati tissatthero,
thag1.40:2.6	vaḍḍhamāno mahāyasoti.
thag1.41:0.1	Theragāthā 1.41
thag1.41:0.2	Ekakanipāta
thag1.41:0.3	Pañcamavagga
thag1.41:0.4	Sirivaḍḍhattheragāthā
thag1.41:1.1	“Vivaramanupatanti vijjutā,
thag1.41:1.2	Vebhārassa ca paṇḍavassa ca;
thag1.41:1.3	Nagavivaragato ca jhāyati,
thag1.41:1.4	Putto appaṭimassa tādino”ti.
thag1.41:1.5	… Sirivaḍḍho thero ….
thag1.42:0.1	Theragāthā 1.42
thag1.42:0.2	Ekakanipāta
thag1.42:0.3	Pañcamavagga
thag1.42:0.4	Khadiravaniyattheragāthā
thag1.42:1.1	“Cāle upacāle sīsūpacāle (…),
thag1.42:1.2	Patissatā nu kho viharatha;
thag1.42:1.3	Āgato vo vālaṁ viya vedhī”ti.
thag1.42:1.4	… Khadiravaniyo thero ….
thag1.43:0.1	Theragāthā 1.43
thag1.43:0.2	Ekakanipāta
thag1.43:0.3	Pañcamavagga
thag1.43:0.4	Sumaṅgalattheragāthā
thag1.43:1.1	“Sumuttiko sumuttiko,
thag1.43:1.2	Sāhu sumuttikomhi tīhi khujjakehi;
thag1.43:1.3	Asitāsu mayā naṅgalāsu mayā,
thag1.43:1.4	Khuddakuddālāsu mayā.
thag1.43:1.5	Yadipi idhameva idhameva,
thag1.43:1.6	Atha vāpi alameva alameva;
thag1.43:1.7	Jhāya sumaṅgala jhāya sumaṅgala,
thag1.43:1.8	Appamatto vihara sumaṅgalā”ti.
thag1.43:1.9	… Sumaṅgalo thero ….
thag1.44:0.1	Theragāthā 1.44
thag1.44:0.2	Ekakanipāta
thag1.44:0.3	Pañcamavagga
thag1.44:0.4	Sānuttheragāthā
thag1.44:1.1	“Mataṁ vā amma rodanti,
thag1.44:1.2	Yo vā jīvaṁ na dissati;
thag1.44:1.3	Jīvantaṁ maṁ amma passantī,
thag1.44:1.4	Kasmā maṁ amma rodasī”ti.
thag1.44:1.5	… Sānutthero ….
thag1.45:0.1	Theragāthā 1.45
thag1.45:0.2	Ekakanipāta
thag1.45:0.3	Pañcamavagga
thag1.45:0.4	Ramaṇīyavihārittheragāthā
thag1.45:1.1	“Yathāpi bhaddo ājañño,
thag1.45:1.2	khalitvā patitiṭṭhati;
thag1.45:1.3	Evaṁ dassanasampannaṁ,
thag1.45:1.4	sammāsambuddhasāvakan”ti.
thag1.45:1.5	… Ramaṇīyavihāritthero ….
thag1.46:0.1	Theragāthā 1.46
thag1.46:0.2	Ekakanipāta
thag1.46:0.3	Pañcamavagga
thag1.46:0.4	Samiddhittheragāthā
thag1.46:1.1	“Saddhāyāhaṁ pabbajito,
thag1.46:1.2	Agārasmānagāriyaṁ;
thag1.46:1.3	Sati paññā ca me vuḍḍhā,
thag1.46:1.4	Cittañca susamāhitaṁ;
thag1.46:1.5	Kāmaṁ karassu rūpāni,
thag1.46:1.6	Neva maṁ byādhayissasī”ti.
thag1.46:1.7	… Samiddhitthero ….
thag1.47:0.1	Theragāthā 1.47
thag1.47:0.2	Ekakanipāta
thag1.47:0.3	Pañcamavagga
thag1.47:0.4	Ujjayattheragāthā
thag1.47:1.1	“Namo te buddha vīratthu,
thag1.47:1.2	vippamuttosi sabbadhi;
thag1.47:1.3	Tuyhāpadāne viharaṁ,
thag1.47:1.4	viharāmi anāsavo”ti.
thag1.47:1.5	… Ujjayo thero ….
thag1.48:0.1	Theragāthā 1.48
thag1.48:0.2	Ekakanipāta
thag1.48:0.3	Pañcamavagga
thag1.48:0.4	Sañjayattheragāthā
thag1.48:1.1	“Yato ahaṁ pabbajito,
thag1.48:1.2	Agārasmānagāriyaṁ;
thag1.48:1.3	Nābhijānāmi saṅkappaṁ,
thag1.48:1.4	Anariyaṁ dosasaṁhitan”ti.
thag1.48:1.5	… Sañjayo thero ….
thag1.49:0.1	Theragāthā 1.49
thag1.49:0.2	Ekakanipāta
thag1.49:0.3	Pañcamavagga
thag1.49:0.4	Rāmaṇeyyakattheragāthā
thag1.49:1.1	“Cihacihābhinadite,
thag1.49:1.2	sippikābhirutehi ca;
thag1.49:1.3	Na me taṁ phandati cittaṁ,
thag1.49:1.4	ekattanirataṁ hi me”ti.
thag1.49:1.5	… Rāmaṇeyyako thero ….
thag1.50:0.1	Theragāthā 1.50
thag1.50:0.2	Ekakanipāta
thag1.50:0.3	Pañcamavagga
thag1.50:0.4	Vimalattheragāthā
thag1.50:1.1	“Dharaṇī ca siñcati vāti,
thag1.50:1.2	Māluto vijjutā carati nabhe;
thag1.50:1.3	Upasamanti vitakkā,
thag1.50:1.4	Cittaṁ susamāhitaṁ mamā”ti.
thag1.50:1.5	… Vimalo thero …
thag1.50:1.6	vaggo pañcamo.
thag1.50:2.0	Tassuddānaṁ
thag1.50:2.1	Sirīvaḍḍho revato thero,
thag1.50:2.2	sumaṅgalo sānusavhayo;
thag1.50:2.3	Ramaṇīyavihārī ca,
thag1.50:2.4	samiddhiujjayasañjayā;
thag1.50:2.5	Rāmaṇeyyo ca so thero,
thag1.50:2.6	vimalo ca raṇañjahoti.
thag1.51:0.1	Theragāthā 1.51
thag1.51:0.2	Ekakanipāta
thag1.51:0.3	Chaṭṭhavagga
thag1.51:0.4	Godhikattheragāthā
thag1.51:1.1	“Vassati devo yathā sugītaṁ,
thag1.51:1.2	Channā me kuṭikā sukhā nivātā;
thag1.51:1.3	Cittaṁ susamāhitañca mayhaṁ,
thag1.51:1.4	Atha ce patthayasi pavassa devā”ti.
thag1.51:1.5	… Godhiko thero ….
thag1.52:0.1	Theragāthā 1.52
thag1.52:0.2	Ekakanipāta
thag1.52:0.3	Chaṭṭhavagga
thag1.52:0.4	Subāhuttheragāthā
thag1.52:1.1	“Vassati devo yathā sugītaṁ,
thag1.52:1.2	Channā me kuṭikā sukhā nivātā;
thag1.52:1.3	Cittaṁ susamāhitañca kāye,
thag1.52:1.4	Atha ce patthayasi pavassa devā”ti.
thag1.52:1.5	… Subāhutthero ….
thag1.53:0.1	Theragāthā 1.53
thag1.53:0.2	Ekakanipāta
thag1.53:0.3	Chaṭṭhavagga
thag1.53:0.4	Valliyattheragāthā
thag1.53:1.1	“Vassati devo yathā sugītaṁ,
thag1.53:1.2	Channā me kuṭikā sukhā nivātā;
thag1.53:1.3	Tassaṁ viharāmi appamatto,
thag1.53:1.4	Atha ce patthayasi pavassa devā”ti.
thag1.53:1.5	… Valliyo thero ….
thag1.54:0.1	Theragāthā 1.54
thag1.54:0.2	Ekakanipāta
thag1.54:0.3	Chaṭṭhavagga
thag1.54:0.4	Uttiyattheragāthā
thag1.54:1.1	“Vassati devo yathā sugītaṁ,
thag1.54:1.2	Channā me kuṭikā sukhā nivātā;
thag1.54:1.3	Tassaṁ viharāmi adutiyo,
thag1.54:1.4	Atha ce patthayasi pavassa devā”ti.
thag1.54:1.5	… Uttiyo thero ….
thag1.55:0.1	Theragāthā 1.55
thag1.55:0.2	Ekakanipāta
thag1.55:0.3	Chaṭṭhavagga
thag1.55:0.4	Añjanavaniyattheragāthā
thag1.55:1.1	“Āsandiṁ kuṭikaṁ katvā,
thag1.55:1.2	ogayha añjanaṁ vanaṁ;
thag1.55:1.3	Tisso vijjā anuppattā,
thag1.55:1.4	kataṁ buddhassa sāsanan”ti.
thag1.55:1.5	… Añjanavaniyo thero ….
thag1.56:0.1	Theragāthā 1.56
thag1.56:0.2	Ekakanipāta
thag1.56:0.3	Chaṭṭhavagga
thag1.56:0.4	Kuṭivihārittheragāthā
thag1.56:1.1	“Ko kuṭikāyaṁ bhikkhu kuṭikāyaṁ,
thag1.56:1.2	Vītarāgo susamāhitacitto;
thag1.56:1.3	Evaṁ jānāhi āvuso,
thag1.56:1.4	Amoghā te kuṭikā katā”ti.
thag1.56:1.5	… Kuṭivihāritthero ….
thag1.57:0.1	Theragāthā 1.57
thag1.57:0.2	Ekakanipāta
thag1.57:0.3	Chaṭṭhavagga
thag1.57:0.4	Dutiyakuṭivihārittheragāthā
thag1.57:1.1	“Ayamāhu purāṇiyā kuṭi,
thag1.57:1.2	Aññaṁ patthayase navaṁ kuṭiṁ;
thag1.57:1.3	Āsaṁ kuṭiyā virājaya,
thag1.57:1.4	Dukkhā bhikkhu puna navā kuṭī”ti.
thag1.57:1.5	… Dutiyakuṭivihāritthero ….
thag1.58:0.1	Theragāthā 1.58
thag1.58:0.2	Ekakanipāta
thag1.58:0.3	Chaṭṭhavagga
thag1.58:0.4	Ramaṇīyakuṭikattheragāthā
thag1.58:1.1	“Ramaṇīyā me kuṭikā,
thag1.58:1.2	Saddhādeyyā manoramā;
thag1.58:1.3	Na me attho kumārīhi,
thag1.58:1.4	Yesaṁ attho tahiṁ gacchatha nāriyo”ti.
thag1.58:1.5	… Ramaṇīyakuṭiko thero ….
thag1.59:0.1	Theragāthā 1.59
thag1.59:0.2	Ekakanipāta
thag1.59:0.3	Chaṭṭhavagga
thag1.59:0.4	Kosalavihārittheragāthā
thag1.59:1.1	“Saddhāyāhaṁ pabbajito,
thag1.59:1.2	araññe me kuṭikā katā;
thag1.59:1.3	Appamatto ca ātāpī,
thag1.59:1.4	sampajāno patissato”ti.
thag1.59:1.5	… Kosalavihāritthero ….
thag1.60:0.1	Theragāthā 1.60
thag1.60:0.2	Ekakanipāta
thag1.60:0.3	Chaṭṭhavagga
thag1.60:0.4	Sīvalittheragāthā
thag1.60:1.1	“Te me ijjhiṁsu saṅkappā,
thag1.60:1.2	yadattho pāvisiṁ kuṭiṁ;
thag1.60:1.3	Vijjāvimuttiṁ paccesaṁ,
thag1.60:1.4	mānānusayamujjahan”ti.
thag1.60:1.5	… Sīvalitthero …
thag1.60:1.6	vaggo chaṭṭho.
thag1.60:2.0	Tassuddānaṁ
thag1.60:2.1	Godhiko ca subāhu ca,
thag1.60:2.2	valliyo uttiyo isi;
thag1.60:2.3	Añjanavaniyo thero,
thag1.60:2.4	duve kuṭivihārino;
thag1.60:2.5	Ramaṇīyakuṭiko ca,
thag1.60:2.6	kosalavhayasīvalīti.
thag1.61:0.1	Theragāthā 1.61
thag1.61:0.2	Ekakanipāta
thag1.61:0.3	Sattamavagga
thag1.61:0.4	Vappattheragāthā
thag1.61:1.1	“Passati passo passantaṁ,
thag1.61:1.2	apassantañca passati;
thag1.61:1.3	Apassanto apassantaṁ,
thag1.61:1.4	passantañca na passatī”ti.
thag1.61:1.5	… Vappo thero ….
thag1.62:0.1	Theragāthā 1.62
thag1.62:0.2	Ekakanipāta
thag1.62:0.3	Sattamavagga
thag1.62:0.4	Vajjiputtattheragāthā
thag1.62:1.1	“Ekakā mayaṁ araññe viharāma,
thag1.62:1.2	Apaviddhaṁva vanasmiṁ dārukaṁ;
thag1.62:1.3	Tassa me bahukā pihayanti,
thag1.62:1.4	Nerayikā viya saggagāminan”ti.
thag1.62:1.5	… Vajjiputto thero ….
thag1.63:0.1	Theragāthā 1.63
thag1.63:0.2	Ekakanipāta
thag1.63:0.3	Sattamavagga
thag1.63:0.4	Pakkhattheragāthā
thag1.63:1.1	“Cutā patanti patitā,
thag1.63:1.2	giddhā ca punarāgatā;
thag1.63:1.3	Kataṁ kiccaṁ rataṁ rammaṁ,
thag1.63:1.4	sukhenanvāgataṁ sukhan”ti.
thag1.63:1.5	… Pakkho thero ….
thag1.64:0.1	Theragāthā 1.64
thag1.64:0.2	Ekakanipāta
thag1.64:0.3	Sattamavagga
thag1.64:0.4	Vimalakoṇḍaññattheragāthā
thag1.64:1.1	“Dumavhayāya uppanno,
thag1.64:1.2	jāto paṇḍaraketunā;
thag1.64:1.3	Ketuhā ketunāyeva,
thag1.64:1.4	mahāketuṁ padhaṁsayī”ti.
thag1.64:1.5	… Vimalakoṇḍañño thero ….
thag1.65:0.1	Theragāthā 1.65
thag1.65:0.2	Ekakanipāta
thag1.65:0.3	Sattamavagga
thag1.65:0.4	Ukkhepakatavacchattheragāthā
thag1.65:1.1	“Ukkhepakatavacchassa,
thag1.65:1.2	Saṅkalitaṁ bahūhi vassehi;
thag1.65:1.3	Taṁ bhāsati gahaṭṭhānaṁ,
thag1.65:1.4	Sunisinno uḷārapāmojjo”ti.
thag1.65:1.5	… Ukkhepakatavaccho thero ….
thag1.66:0.1	Theragāthā 1.66
thag1.66:0.2	Ekakanipāta
thag1.66:0.3	Sattamavagga
thag1.66:0.4	Meghiyattheragāthā
thag1.66:1.1	“Anusāsi mahāvīro,
thag1.66:1.2	sabbadhammāna pāragū;
thag1.66:1.3	Tassāhaṁ dhammaṁ sutvāna,
thag1.66:1.4	vihāsiṁ santike sato;
thag1.66:1.5	Tisso vijjā anuppattā,
thag1.66:1.6	kataṁ buddhassa sāsanan”ti.
thag1.66:1.7	… Meghiyo thero ….
thag1.67:0.1	Theragāthā 1.67
thag1.67:0.2	Ekakanipāta
thag1.67:0.3	Sattamavagga
thag1.67:0.4	Ekadhammasavanīyattheragāthā
thag1.67:1.1	“Kilesā jhāpitā mayhaṁ,
thag1.67:1.2	bhavā sabbe samūhatā;
thag1.67:1.3	Vikkhīṇo jātisaṁsāro,
thag1.67:1.4	natthi dāni punabbhavo”ti.
thag1.67:1.5	… Ekadhammasavanīyo thero ….
thag1.68:0.1	Theragāthā 1.68
thag1.68:0.2	Ekakanipāta
thag1.68:0.3	Sattamavagga
thag1.68:0.4	Ekudāniyattheragāthā
thag1.68:1.1	“Adhicetaso appamajjato,
thag1.68:1.2	Munino monapathesu sikkhato;
thag1.68:1.3	Sokā na bhavanti tādino,
thag1.68:1.4	Upasantassa sadā satīmato”ti.
thag1.68:1.5	… Ekudāniyo thero ….
thag1.69:0.1	Theragāthā 1.69
thag1.69:0.2	Ekakanipāta
thag1.69:0.3	Sattamavagga
thag1.69:0.4	Channattheragāthā
thag1.69:1.1	“Sutvāna dhammaṁ mahato mahārasaṁ,
thag1.69:1.2	Sabbaññutaññāṇavarena desitaṁ;
thag1.69:1.3	Maggaṁ papajjiṁ amatassa pattiyā,
thag1.69:1.4	So yogakkhemassa pathassa kovido”ti.
thag1.69:1.5	… Channo thero ….
thag1.70:0.1	Theragāthā 1.70
thag1.70:0.2	Ekakanipāta
thag1.70:0.3	Sattamavagga
thag1.70:0.4	Puṇṇattheragāthā
thag1.70:1.1	“Sīlameva idha aggaṁ,
thag1.70:1.2	paññavā pana uttamo;
thag1.70:1.3	Manussesu ca devesu,
thag1.70:1.4	sīlapaññāṇato jayan”ti.
thag1.70:1.5	… Puṇṇo thero …
thag1.70:1.6	vaggo sattamo.
thag1.70:2.0	Tassuddānaṁ
thag1.70:2.1	Vappo ca vajjiputto ca,
thag1.70:2.2	pakkho vimalakoṇḍañño;
thag1.70:2.3	Ukkhepakatavaccho ca,
thag1.70:2.4	meghiyo ekadhammiko;
thag1.70:2.5	Ekudāniyachannā ca,
thag1.70:2.6	puṇṇatthero mahabbaloti.
thag1.71:0.1	Theragāthā 1.71
thag1.71:0.2	Ekakanipāta
thag1.71:0.3	Aṭṭhamavagga
thag1.71:0.4	Vacchapālattheragāthā
thag1.71:1.1	“Susukhumanipuṇatthadassinā,
thag1.71:1.2	Matikusalena nivātavuttinā;
thag1.71:1.3	Saṁsevitavuddhasīlinā,
thag1.71:1.4	Nibbānaṁ na hi tena dullabhan”ti.
thag1.71:1.5	… Vacchapālo thero ….
thag1.72:0.1	Theragāthā 1.72
thag1.72:0.2	Ekakanipāta
thag1.72:0.3	Aṭṭhamavagga
thag1.72:0.4	Ātumattheragāthā
thag1.72:1.1	“Yathā kaḷīro susu vaḍḍhitaggo,
thag1.72:1.2	Dunnikkhamo hoti pasākhajāto;
thag1.72:1.3	Evaṁ ahaṁ bhariyāyānitāya,
thag1.72:1.4	Anumaññaṁ maṁ pabbajitomhi dānī”ti.
thag1.72:1.5	… Ātumo thero ….
thag1.73:0.1	Theragāthā 1.73
thag1.73:0.2	Ekakanipāta
thag1.73:0.3	Aṭṭhamavagga
thag1.73:0.4	Māṇavattheragāthā
thag1.73:1.1	“Jiṇṇañca disvā dukhitañca byādhitaṁ,
thag1.73:1.2	Matañca disvā gatamāyusaṅkhayaṁ;
thag1.73:1.3	Tato ahaṁ nikkhamitūna pabbajiṁ,
thag1.73:1.4	Pahāya kāmāni manoramānī”ti.
thag1.73:1.5	… Māṇavo thero ….
thag1.74:0.1	Theragāthā 1.74
thag1.74:0.2	Ekakanipāta
thag1.74:0.3	Aṭṭhamavagga
thag1.74:0.4	Suyāmanattheragāthā
thag1.74:1.1	“Kāmacchando ca byāpādo,
thag1.74:1.2	Thinamiddhañca bhikkhuno;
thag1.74:1.3	Uddhaccaṁ vicikicchā ca,
thag1.74:1.4	Sabbasova na vijjatī”ti.
thag1.74:1.5	… Suyāmano thero ….
thag1.75:0.1	Theragāthā 1.75
thag1.75:0.2	Ekakanipāta
thag1.75:0.3	Aṭṭhamavagga
thag1.75:0.4	Susāradattheragāthā
thag1.75:1.1	“Sādhu suvihitāna dassanaṁ,
thag1.75:1.2	Kaṅkhā chijjati buddhi vaḍḍhati;
thag1.75:1.3	Bālampi karonti paṇḍitaṁ,
thag1.75:1.4	Tasmā sādhu sataṁ samāgamo”ti.
thag1.75:1.5	… Susārado thero ….
thag1.76:0.1	Theragāthā 1.76
thag1.76:0.2	Ekakanipāta
thag1.76:0.3	Aṭṭhamavagga
thag1.76:0.4	Piyañjahattheragāthā
thag1.76:1.1	“Uppatantesu nipate,
thag1.76:1.2	nipatantesu uppate;
thag1.76:1.3	Vase avasamānesu,
thag1.76:1.4	ramamānesu no rame”ti.
thag1.76:1.5	… Piyañjaho thero ….
thag1.77:0.1	Theragāthā 1.77
thag1.77:0.2	Ekakanipāta
thag1.77:0.3	Aṭṭhamavagga
thag1.77:0.4	Hatthārohaputtattheragāthā
thag1.77:1.1	“Idaṁ pure cittamacāri cārikaṁ,
thag1.77:1.2	Yenicchakaṁ yatthakāmaṁ yathāsukhaṁ;
thag1.77:1.3	Tadajjahaṁ niggahessāmi yoniso,
thag1.77:1.4	Hatthippabhinnaṁ viya aṅkusaggaho”ti.
thag1.77:1.5	… Hatthārohaputto thero ….
thag1.78:0.1	Theragāthā 1.78
thag1.78:0.2	Ekakanipāta
thag1.78:0.3	Aṭṭhamavagga
thag1.78:0.4	Meṇḍasirattheragāthā
thag1.78:1.1	“Anekajātisaṁsāraṁ,
thag1.78:1.2	sandhāvissaṁ anibbisaṁ;
thag1.78:1.3	Tassa me dukkhajātassa,
thag1.78:1.4	dukkhakkhandho aparaddho”ti.
thag1.78:1.5	… Meṇḍasiro thero ….
thag1.79:0.1	Theragāthā 1.79
thag1.79:0.2	Ekakanipāta
thag1.79:0.3	Aṭṭhamavagga
thag1.79:0.4	Rakkhitattheragāthā
thag1.79:1.1	“Sabbo rāgo pahīno me,
thag1.79:1.2	sabbo doso samūhato;
thag1.79:1.3	Sabbo me vigato moho,
thag1.79:1.4	sītibhūtosmi nibbuto”ti.
thag1.79:1.5	… Rakkhito thero ….
thag1.80:0.1	Theragāthā 1.80
thag1.80:0.2	Ekakanipāta
thag1.80:0.3	Aṭṭhamavagga
thag1.80:0.4	Uggattheragāthā
thag1.80:1.1	“Yaṁ mayā pakataṁ kammaṁ,
thag1.80:1.2	appaṁ vā yadi vā bahuṁ;
thag1.80:1.3	Sabbametaṁ parikkhīṇaṁ,
thag1.80:1.4	natthi dāni punabbhavo”ti.
thag1.80:1.5	… Uggo thero …
thag1.80:1.6	vaggo aṭṭhamo.
thag1.80:2.0	Tassuddānaṁ
thag1.80:2.1	Vacchapālo ca yo thero,
thag1.80:2.2	ātumo māṇavo isi;
thag1.80:2.3	Suyāmano susārado,
thag1.80:2.4	thero yo ca piyañjaho;
thag1.80:2.5	Ārohaputto meṇḍasiro,
thag1.80:2.6	rakkhito uggasavhayoti.
thag1.81:0.1	Theragāthā 1.81
thag1.81:0.2	Ekakanipāta
thag1.81:0.3	Navamavagga
thag1.81:0.4	Samitiguttattheragāthā
thag1.81:1.1	“Yaṁ mayā pakataṁ pāpaṁ,
thag1.81:1.2	pubbe aññāsu jātisu;
thag1.81:1.3	Idheva taṁ vedanīyaṁ,
thag1.81:1.4	vatthu aññaṁ na vijjatī”ti.
thag1.81:1.5	… Samitigutto thero ….
thag1.82:0.1	Theragāthā 1.82
thag1.82:0.2	Ekakanipāta
thag1.82:0.3	Navamavagga
thag1.82:0.4	Kassapattheragāthā
thag1.82:1.1	“Yena yena subhikkhāni,
thag1.82:1.2	sivāni abhayāni ca;
thag1.82:1.3	Tena puttaka gacchassu,
thag1.82:1.4	mā sokāpahato bhavā”ti.
thag1.82:1.5	… Kassapo thero ….
thag1.83:0.1	Theragāthā 1.83
thag1.83:0.2	Ekakanipāta
thag1.83:0.3	Navamavagga
thag1.83:0.4	Sīhattheragāthā
thag1.83:1.1	“Sīhappamatto vihara,
thag1.83:1.2	rattindivamatandito;
thag1.83:1.3	Bhāvehi kusalaṁ dhammaṁ,
thag1.83:1.4	jaha sīghaṁ samussayan”ti.
thag1.83:1.5	… Sīho thero ….
thag1.84:0.1	Theragāthā 1.84
thag1.84:0.2	Ekakanipāta
thag1.84:0.3	Navamavagga
thag1.84:0.4	Nītattheragāthā
thag1.84:1.1	“Sabbarattiṁ supitvāna,
thag1.84:1.2	divā saṅgaṇike rato;
thag1.84:1.3	Kudāssu nāma dummedho,
thag1.84:1.4	dukkhassantaṁ karissatī”ti.
thag1.84:1.5	… Nīto thero ….
thag1.85:0.1	Theragāthā 1.85
thag1.85:0.2	Ekakanipāta
thag1.85:0.3	Navamavagga
thag1.85:0.4	Sunāgattheragāthā
thag1.85:1.1	“Cittanimittassa kovido,
thag1.85:1.2	Pavivekarasaṁ vijāniya;
thag1.85:1.3	Jhāyaṁ nipako patissato,
thag1.85:1.4	Adhigaccheyya sukhaṁ nirāmisan”ti.
thag1.85:1.5	… Sunāgo thero ….
thag1.86:0.1	Theragāthā 1.86
thag1.86:0.2	Ekakanipāta
thag1.86:0.3	Navamavagga
thag1.86:0.4	Nāgitattheragāthā
thag1.86:1.1	“Ito bahiddhā puthu aññavādinaṁ,
thag1.86:1.2	Maggo na nibbānagamo yathā ayaṁ;
thag1.86:1.3	Itissu saṅghaṁ bhagavānusāsati,
thag1.86:1.4	Satthā sayaṁ pāṇitaleva dassayan”ti.
thag1.86:1.5	… Nāgito thero ….
thag1.87:0.1	Theragāthā 1.87
thag1.87:0.2	Ekakanipāta
thag1.87:0.3	Navamavagga
thag1.87:0.4	Paviṭṭhattheragāthā
thag1.87:1.1	“Khandhā diṭṭhā yathābhūtaṁ,
thag1.87:1.2	bhavā sabbe padālitā;
thag1.87:1.3	Vikkhīṇo jātisaṁsāro,
thag1.87:1.4	natthi dāni punabbhavo”ti.
thag1.87:1.5	… Paviṭṭho thero ….
thag1.88:0.1	Theragāthā 1.88
thag1.88:0.2	Ekakanipāta
thag1.88:0.3	Navamavagga
thag1.88:0.4	Ajjunattheragāthā
thag1.88:1.1	“Asakkhiṁ vata attānaṁ,
thag1.88:1.2	uddhātuṁ udakā thalaṁ;
thag1.88:1.3	Vuyhamāno mahogheva,
thag1.88:1.4	saccāni paṭivijjhahan”ti.
thag1.88:1.5	… Ajjuno thero ….
thag1.89:0.1	Theragāthā 1.89
thag1.89:0.2	Ekakanipāta
thag1.89:0.3	Navamavagga
thag1.89:0.4	(Paṭhama) Devasabhattheragāthā
thag1.89:1.1	“Uttiṇṇā paṅkapalipā,
thag1.89:1.2	pātālā parivajjitā;
thag1.89:1.3	Mutto oghā ca ganthā ca,
thag1.89:1.4	sabbe mānā visaṁhatā”ti.
thag1.89:1.5	… Devasabho thero ….
thag1.90:0.1	Theragāthā 1.90
thag1.90:0.2	Ekakanipāta
thag1.90:0.3	Navamavagga
thag1.90:0.4	Sāmidattattheragāthā
thag1.90:1.1	“Pañcakkhandhā pariññātā,
thag1.90:1.2	tiṭṭhanti chinnamūlakā;
thag1.90:1.3	Vikkhīṇo jātisaṁsāro,
thag1.90:1.4	natthi dāni punabbhavo”ti.
thag1.90:1.5	… Sāmidatto thero …
thag1.90:1.6	vaggo navamo.
thag1.90:2.0	Tassuddānaṁ
thag1.90:2.1	Thero samitigutto ca,
thag1.90:2.2	kassapo sīhasavhayo;
thag1.90:2.3	Nīto sunāgo nāgito,
thag1.90:2.4	paviṭṭho ajjuno isi;
thag1.90:2.5	Devasabho ca yo thero,
thag1.90:2.6	sāmidatto mahabbaloti.
thag1.91:0.1	Theragāthā 1.91
thag1.91:0.2	Ekakanipāta
thag1.91:0.3	Dasamavagga
thag1.91:0.4	Paripuṇṇakattheragāthā
thag1.91:1.1	“Na tathā mataṁ satarasaṁ,
thag1.91:1.2	Sudhannaṁ yaṁ mayajja paribhuttaṁ;
thag1.91:1.3	Aparimitadassinā gotamena,
thag1.91:1.4	Buddhena desito dhammo”ti.
thag1.91:1.5	… Paripuṇṇako thero ….
thag1.92:0.1	Theragāthā 1.92
thag1.92:0.2	Ekakanipāta
thag1.92:0.3	Dasamavagga
thag1.92:0.4	Vijayattheragāthā
thag1.92:1.1	“Yassāsavā parikkhīṇā,
thag1.92:1.2	āhāre ca anissito;
thag1.92:1.3	Suññato animitto ca,
thag1.92:1.4	vimokkho yassa gocaro;
thag1.92:1.5	Ākāseva sakuntānaṁ,
thag1.92:1.6	padaṁ tassa durannayan”ti.
thag1.92:1.7	… Vijayo thero ….
thag1.93:0.1	Theragāthā 1.93
thag1.93:0.2	Ekakanipāta
thag1.93:0.3	Dasamavagga
thag1.93:0.4	Erakattheragāthā
thag1.93:1.1	“Dukkhā kāmā eraka,
thag1.93:1.2	Na sukhā kāmā eraka;
thag1.93:1.3	Yo kāme kāmayati,
thag1.93:1.4	Dukkhaṁ so kāmayati eraka;
thag1.93:1.5	Yo kāme na kāmayati,
thag1.93:1.6	Dukkhaṁ so na kāmayati erakā”ti.
thag1.93:1.7	… Erako thero ….
thag1.94:0.1	Theragāthā 1.94
thag1.94:0.2	Ekakanipāta
thag1.94:0.3	Dasamavagga
thag1.94:0.4	Mettajittheragāthā
thag1.94:1.1	“Namo hi tassa bhagavato,
thag1.94:1.2	sakyaputtassa sirīmato;
thag1.94:1.3	Tenāyaṁ aggappattena,
thag1.94:1.4	aggadhammo sudesito”ti.
thag1.94:1.5	… Mettaji thero ….
thag1.95:0.1	Theragāthā 1.95
thag1.95:0.2	Ekakanipāta
thag1.95:0.3	Dasamavagga
thag1.95:0.4	Cakkhupālattheragāthā
thag1.95:1.1	“Andhohaṁ hatanettosmi,
thag1.95:1.2	kantāraddhānapakkhando;
thag1.95:1.3	Sayamānopi gacchissaṁ,
thag1.95:1.4	na sahāyena pāpenā”ti.
thag1.95:1.5	… Cakkhupālo thero ….
thag1.96:0.1	Theragāthā 1.96
thag1.96:0.2	Ekakanipāta
thag1.96:0.3	Dasamavagga
thag1.96:0.4	Khaṇḍasumanattheragāthā
thag1.96:1.1	“Ekapupphaṁ cajitvāna,
thag1.96:1.2	asīti vassakoṭiyo;
thag1.96:1.3	Saggesu paricāretvā,
thag1.96:1.4	sesakenamhi nibbuto”ti.
thag1.96:1.5	… Khaṇḍasumano thero ….
thag1.97:0.1	Theragāthā 1.97
thag1.97:0.2	Ekakanipāta
thag1.97:0.3	Dasamavagga
thag1.97:0.4	Tissattheragāthā
thag1.97:1.1	“Hitvā satapalaṁ kaṁsaṁ,
thag1.97:1.2	Sovaṇṇaṁ satarājikaṁ;
thag1.97:1.3	Aggahiṁ mattikāpattaṁ,
thag1.97:1.4	Idaṁ dutiyābhisecanan”ti.
thag1.97:1.5	… Tisso thero ….
thag1.98:0.1	Theragāthā 1.98
thag1.98:0.2	Ekakanipāta
thag1.98:0.3	Dasamavagga
thag1.98:0.4	Abhayattheragāthā
thag1.98:1.1	“Rūpaṁ disvā sati muṭṭhā,
thag1.98:1.2	Piyaṁ nimittaṁ manasikaroto;
thag1.98:1.3	Sārattacitto vedeti,
thag1.98:1.4	Tañca ajjhosa tiṭṭhati;
thag1.98:1.5	Tassa vaḍḍhanti āsavā,
thag1.98:1.6	Bhavamūlopagāmino”ti.
thag1.98:1.7	… Abhayo thero ….
thag1.99:0.1	Theragāthā 1.99
thag1.99:0.2	Ekakanipāta
thag1.99:0.3	Dasamavagga
thag1.99:0.4	Uttiyattheragāthā
thag1.99:1.1	“Saddaṁ sutvā sati muṭṭhā,
thag1.99:1.2	Piyaṁ nimittaṁ manasikaroto;
thag1.99:1.3	Sārattacitto vedeti,
thag1.99:1.4	Tañca ajjhosa tiṭṭhati;
thag1.99:1.5	Tassa vaḍḍhanti āsavā,
thag1.99:1.6	Saṁsāraṁ upagāmino”ti.
thag1.99:1.7	… Uttiyo thero ….
thag1.100:0.1	Theragāthā 1.100
thag1.100:0.2	Ekakanipāta
thag1.100:0.3	Dasamavagga
thag1.100:0.4	(Dutiya) Devasabhattheragāthā
thag1.100:1.1	“Sammappadhānasampanno,
thag1.100:1.2	Satipaṭṭhānagocaro;
thag1.100:1.3	Vimuttikusumasañchanno,
thag1.100:1.4	Parinibbissatyanāsavo”ti.
thag1.100:1.5	… Devasabho thero ….
thag1.100:1.6	vaggo dasamo.
thag1.100:2.0	Tassuddānaṁ
thag1.100:2.1	Paripuṇṇako ca vijayo,
thag1.100:2.2	erako mettajī muni;
thag1.100:2.3	Cakkhupālo khaṇḍasumano,
thag1.100:2.4	tisso ca abhayo tathā;
thag1.100:2.5	Uttiyo ca mahāpañño,
thag1.100:2.6	thero devasabhopi cāti.
thag1.101:0.1	Theragāthā 1.101
thag1.101:0.2	Ekakanipāta
thag1.101:0.3	Ekādasamavagga
thag1.101:0.4	Belaṭṭhānikattheragāthā
thag1.101:1.1	“Hitvā gihittaṁ anavositatto,
thag1.101:1.2	Mukhanaṅgalī odariko kusīto;
thag1.101:1.3	Mahāvarāhova nivāpapuṭṭho,
thag1.101:1.4	Punappunaṁ gabbhamupeti mando”ti.
thag1.101:1.5	… Belaṭṭhāniko thero ….
thag1.102:0.1	Theragāthā 1.102
thag1.102:0.2	Ekakanipāta
thag1.102:0.3	Ekādasamavagga
thag1.102:0.4	Setucchattheragāthā
thag1.102:1.1	“Mānena vañcitāse,
thag1.102:1.2	Saṅkhāresu saṅkilissamānāse;
thag1.102:1.3	Lābhālābhena mathitā,
thag1.102:1.4	Samādhiṁ nādhigacchantī”ti.
thag1.102:1.5	… Setuccho thero ….
thag1.103:0.1	Theragāthā 1.103
thag1.103:0.2	Ekakanipāta
thag1.103:0.3	Ekādasamavagga
thag1.103:0.4	Bandhurattheragāthā
thag1.103:1.1	“Nāhaṁ etena atthiko,
thag1.103:1.2	Sukhito dhammarasena tappito;
thag1.103:1.3	Pitvā rasaggamuttamaṁ,
thag1.103:1.4	Na ca kāhāmi visena santhavan”ti.
thag1.103:1.5	… Bandhuro thero ….
thag1.104:0.1	Theragāthā 1.104
thag1.104:0.2	Ekakanipāta
thag1.104:0.3	Ekādasamavagga
thag1.104:0.4	Khitakattheragāthā
thag1.104:1.1	“Lahuko vata me kāyo,
thag1.104:1.2	Phuṭṭho ca pītisukhena vipulena;
thag1.104:1.3	Tūlamiva eritaṁ mālutena,
thag1.104:1.4	Pilavatīva me kāyo”ti.
thag1.104:1.5	… Khitako thero ….
thag1.105:0.1	Theragāthā 1.105
thag1.105:0.2	Ekakanipāta
thag1.105:0.3	Ekādasamavagga
thag1.105:0.4	Malitavambhattheragāthā
thag1.105:1.1	“Ukkaṇṭhitopi na vase,
thag1.105:1.2	ramamānopi pakkame;
thag1.105:1.3	Na tvevānatthasaṁhitaṁ,
thag1.105:1.4	vase vāsaṁ vicakkhaṇo”ti.
thag1.105:1.5	… Malitavambho thero ….
thag1.106:0.1	Theragāthā 1.106
thag1.106:0.2	Ekakanipāta
thag1.106:0.3	Ekādasamavagga
thag1.106:0.4	Suhemantattheragāthā
thag1.106:1.1	“Sataliṅgassa atthassa,
thag1.106:1.2	satalakkhaṇadhārino;
thag1.106:1.3	Ekaṅgadassī dummedho,
thag1.106:1.4	satadassī ca paṇḍito”ti.
thag1.106:1.5	… Suhemanto thero ….
thag1.107:0.1	Theragāthā 1.107
thag1.107:0.2	Ekakanipāta
thag1.107:0.3	Ekādasamavagga
thag1.107:0.4	Dhammasavattheragāthā
thag1.107:1.1	“Pabbajiṁ tulayitvāna,
thag1.107:1.2	agārasmānagāriyaṁ;
thag1.107:1.3	Tisso vijjā anuppattā,
thag1.107:1.4	kataṁ buddhassa sāsanan”ti.
thag1.107:1.5	… Dhammasavo thero ….
thag1.108:0.1	Theragāthā 1.108
thag1.108:0.2	Ekakanipāta
thag1.108:0.3	Ekādasamavagga
thag1.108:0.4	Dhammasavapituttheragāthā
thag1.108:1.1	“Sa vīsavassasatiko,
thag1.108:1.2	pabbajiṁ anagāriyaṁ;
thag1.108:1.3	Tisso vijjā anuppattā,
thag1.108:1.4	kataṁ buddhassa sāsanan”ti.
thag1.108:1.5	… Dhammasavapitu thero ….
thag1.109:0.1	Theragāthā 1.109
thag1.109:0.2	Ekakanipāta
thag1.109:0.3	Ekādasamavagga
thag1.109:0.4	Saṅgharakkhitattheragāthā
thag1.109:1.1	“Na nūnāyaṁ paramahitānukampino,
thag1.109:1.2	Rahogato anuvigaṇeti sāsanaṁ;
thag1.109:1.3	Tathāhayaṁ viharati pākatindriyo,
thag1.109:1.4	Migī yathā taruṇajātikā vane”ti.
thag1.109:1.5	… Saṅgharakkhito thero ….
thag1.110:0.1	Theragāthā 1.110
thag1.110:0.2	Ekakanipāta
thag1.110:0.3	Ekādasamavagga
thag1.110:0.4	Usabhattheragāthā
thag1.110:1.1	“Nagā nagaggesu susaṁvirūḷhā,
thag1.110:1.2	Udaggameghena navena sittā;
thag1.110:1.3	Vivekakāmassa araññasaññino,
thag1.110:1.4	Janeti bhiyyo usabhassa kalyatan”ti.
thag1.110:1.5	… Usabho thero …
thag1.110:1.6	vaggo ekādasamo.
thag1.110:2.0	Tassuddānaṁ
thag1.110:2.1	Belaṭṭhāniko setuccho,
thag1.110:2.2	Bandhuro khitako isi;
thag1.110:2.3	Malitavambho suhemanto,
thag1.110:2.4	Dhammasavo dhammasavapitā;
thag1.110:2.5	Saṅgharakkhitatthero ca,
thag1.110:2.6	Usabho ca mahāmunīti.
thag1.111:0.1	Theragāthā 1.111
thag1.111:0.2	Ekakanipāta
thag1.111:0.3	Dvādasamavagga
thag1.111:0.4	Jentattheragāthā
thag1.111:1.1	“Duppabbajjaṁ ve duradhivāsā gehā,
thag1.111:1.2	Dhammo gambhīro duradhigamā bhogā;
thag1.111:1.3	Kicchā vutti no itarītareneva,
thag1.111:1.4	Yuttaṁ cintetuṁ satatamaniccatan”ti.
thag1.111:1.5	… Jento thero ….
thag1.112:0.1	Theragāthā 1.112
thag1.112:0.2	Ekakanipāta
thag1.112:0.3	Dvādasamavagga
thag1.112:0.4	Vacchagottattheragāthā
thag1.112:1.1	“Tevijjohaṁ mahājhāyī,
thag1.112:1.2	cetosamathakovido;
thag1.112:1.3	Sadattho me anuppatto,
thag1.112:1.4	kataṁ buddhassa sāsanan”ti.
thag1.112:1.5	… Vacchagotto thero ….
thag1.113:0.1	Theragāthā 1.113
thag1.113:0.2	Ekakanipāta
thag1.113:0.3	Dvādasamavagga
thag1.113:0.4	Vanavacchattheragāthā
thag1.113:1.1	“Acchodikā puthusilā,
thag1.113:1.2	gonaṅgulamigāyutā;
thag1.113:1.3	Ambusevālasañchannā,
thag1.113:1.4	te selā ramayanti man”ti.
thag1.113:1.5	… Vanavaccho thero ….
thag1.114:0.1	Theragāthā 1.114
thag1.114:0.2	Ekakanipāta
thag1.114:0.3	Dvādasamavagga
thag1.114:0.4	Adhimuttattheragāthā
thag1.114:1.1	“Kāyaduṭṭhullagaruno,
thag1.114:1.2	hiyyamānamhi jīvite;
thag1.114:1.3	Sarīrasukhagiddhassa,
thag1.114:1.4	kuto samaṇasādhutā”ti.
thag1.114:1.5	… Adhimutto thero ….
thag1.115:0.1	Theragāthā 1.115
thag1.115:0.2	Ekakanipāta
thag1.115:0.3	Dvādasamavagga
thag1.115:0.4	Mahānāmattheragāthā
thag1.115:1.1	“Esāvahiyyase pabbatena,
thag1.115:1.2	Bahukuṭajasallakikena;
thag1.115:1.3	Nesādakena girinā,
thag1.115:1.4	Yasassinā paricchadenā”ti.
thag1.115:1.5	… Mahānāmo thero ….
thag1.116:0.1	Theragāthā 1.116
thag1.116:0.2	Ekakanipāta
thag1.116:0.3	Dvādasamavagga
thag1.116:0.4	Pārāpariyattheragāthā
thag1.116:1.1	“Chaphassāyatane hitvā,
thag1.116:1.2	guttadvāro susaṁvuto;
thag1.116:1.3	Aghamūlaṁ vamitvāna,
thag1.116:1.4	patto me āsavakkhayo”ti.
thag1.116:1.5	… Pārāpariyo thero ….
thag1.117:0.1	Theragāthā 1.117
thag1.117:0.2	Ekakanipāta
thag1.117:0.3	Dvādasamavagga
thag1.117:0.4	Yasattheragāthā
thag1.117:1.1	“Suvilitto suvasano,
thag1.117:1.2	sabbābharaṇabhūsito;
thag1.117:1.3	Tisso vijjā ajjhagamiṁ,
thag1.117:1.4	kataṁ buddhassa sāsanan”ti.
thag1.117:1.5	… Yaso thero ….
thag1.118:0.1	Theragāthā 1.118
thag1.118:0.2	Ekakanipāta
thag1.118:0.3	Dvādasamavagga
thag1.118:0.4	Kimilattheragāthā
thag1.118:1.1	“Abhisattova nipatati,
thag1.118:1.2	Vayo rūpaṁ aññamiva tatheva santaṁ;
thag1.118:1.3	Tasseva sato avippavasato,
thag1.118:1.4	Aññasseva sarāmi attānan”ti.
thag1.118:1.5	… Kimilo thero ….
thag1.119:0.1	Theragāthā 1.119
thag1.119:0.2	Ekakanipāta
thag1.119:0.3	Dvādasamavagga
thag1.119:0.4	Vajjiputtattheragāthā
thag1.119:1.1	“Rukkhamūlagahanaṁ pasakkiya,
thag1.119:1.2	Nibbānaṁ hadayasmiṁ opiya;
thag1.119:1.3	Jhāya gotama mā ca pamādo,
thag1.119:1.4	Kiṁ te biḷibiḷikā karissatī”ti.
thag1.119:1.5	… Vajjiputto thero ….
thag1.120:0.1	Theragāthā 1.120
thag1.120:0.2	Ekakanipāta
thag1.120:0.3	Dvādasamavagga
thag1.120:0.4	Isidattattheragāthā
thag1.120:1.1	“Pañcakkhandhā pariññātā,
thag1.120:1.2	tiṭṭhanti chinnamūlakā;
thag1.120:1.3	Dukkhakkhayo anuppatto,
thag1.120:1.4	patto me āsavakkhayo”ti.
thag1.120:1.5	… Isidatto thero …
thag1.120:1.6	vaggo dvādasamo.
thag1.120:2.0	Tassuddānaṁ
thag1.120:2.1	Jento ca vacchagotto ca,
thag1.120:2.2	vaccho ca vanasavhayo;
thag1.120:2.3	Adhimutto mahānāmo,
thag1.120:2.4	pārāpariyo yasopi ca;
thag1.120:2.5	Kimilo vajjiputto ca,
thag1.120:2.6	isidatto mahāyasoti.
thag1.120:2.7	Ekakanipāto niṭṭhito.
thag1.120:3.0	Tatruddānaṁ
thag1.120:3.1	Vīsuttarasataṁ therā,
thag1.120:3.2	katakiccā anāsavā;
thag1.120:3.3	Ekakeva nipātamhi,
thag1.120:3.4	susaṅgītā mahesibhīti.
thag2.1:0.1	Theragāthā 2.1
thag2.1:0.2	Dukanipāta
thag2.1:0.3	Paṭhamavagga
thag2.1:0.4	Uttarattheragāthā
thag2.1:1.1	“Natthi koci bhavo nicco,
thag2.1:1.2	saṅkhārā vāpi sassatā;
thag2.1:1.3	Uppajjanti ca te khandhā,
thag2.1:1.4	cavanti aparāparaṁ.
thag2.1:2.1	Etamādīnavaṁ ñatvā,
thag2.1:2.2	bhavenamhi anatthiko;
thag2.1:2.3	Nissaṭo sabbakāmehi,
thag2.1:2.4	patto me āsavakkhayo”ti.
thag2.1:2.5	Itthaṁ sudaṁ āyasmā uttaro thero gāthāyo abhāsitthāti.
thag2.2:0.1	Theragāthā 2.2
thag2.2:0.2	Dukanipāta
thag2.2:0.3	Paṭhamavagga
thag2.2:0.4	Piṇḍolabhāradvājattheragāthā
thag2.2:1.1	“Nayidaṁ anayena jīvitaṁ,
thag2.2:1.2	Nāhāro hadayassa santiko;
thag2.2:1.3	Āhāraṭṭhitiko samussayo,
thag2.2:1.4	Iti disvāna carāmi esanaṁ.
thag2.2:2.1	Paṅkoti hi naṁ pavedayuṁ,
thag2.2:2.2	Yāyaṁ vandanapūjanā kulesu;
thag2.2:2.3	Sukhumaṁ sallaṁ durubbahaṁ,
thag2.2:2.4	Sakkāro kāpurisena dujjaho”ti.
thag2.2:2.5	Itthaṁ sudaṁ āyasmā piṇḍolabhāradvājo thero gāthāyo abhāsitthāti.
thag2.3:0.1	Theragāthā 2.3
thag2.3:0.2	Dukanipāta
thag2.3:0.3	Paṭhamavagga
thag2.3:0.4	Valliyattheragāthā
thag2.3:1.1	“Makkaṭo pañcadvārāyaṁ,
thag2.3:1.2	kuṭikāyaṁ pasakkiya;
thag2.3:1.3	Dvārena anupariyeti,
thag2.3:1.4	ghaṭṭayanto muhuṁ muhuṁ.
thag2.3:2.1	Tiṭṭha makkaṭa mā dhāvi,
thag2.3:2.2	na hi te taṁ yathā pure;
thag2.3:2.3	Niggahītosi paññāya,
thag2.3:2.4	neva dūraṁ gamissatī”ti.
thag2.3:2.5	… Valliyo thero ….
thag2.4:0.1	Theragāthā 2.4
thag2.4:0.2	Dukanipāta
thag2.4:0.3	Paṭhamavagga
thag2.4:0.4	Gaṅgātīriyattheragāthā
thag2.4:1.1	“Tiṇṇaṁ me tālapattānaṁ,
thag2.4:1.2	gaṅgātīre kuṭī katā;
thag2.4:1.3	Chavasittova me patto,
thag2.4:1.4	paṁsukūlañca cīvaraṁ.
thag2.4:2.1	Dvinnaṁ antaravassānaṁ,
thag2.4:2.2	ekā vācā me bhāsitā;
thag2.4:2.3	Tatiye antaravassamhi,
thag2.4:2.4	tamokhandho padālito”ti.
thag2.4:2.5	… Gaṅgātīriyo thero ….
thag2.5:0.1	Theragāthā 2.5
thag2.5:0.2	Dukanipāta
thag2.5:0.3	Paṭhamavagga
thag2.5:0.4	Ajinattheragāthā
thag2.5:1.1	“Api ce hoti tevijjo,
thag2.5:1.2	maccuhāyī anāsavo;
thag2.5:1.3	Appaññātoti naṁ bālā,
thag2.5:1.4	avajānanti ajānatā.
thag2.5:2.1	Yo ca kho annapānassa,
thag2.5:2.2	lābhī hotidha puggalo;
thag2.5:2.3	Pāpadhammopi ce hoti,
thag2.5:2.4	so nesaṁ hoti sakkato”ti.
thag2.5:2.5	… Ajino thero ….
thag2.6:0.1	Theragāthā 2.6
thag2.6:0.2	Dukanipāta
thag2.6:0.3	Paṭhamavagga
thag2.6:0.4	Meḷajinattheragāthā
thag2.6:1.1	“Yadāhaṁ dhammamassosiṁ,
thag2.6:1.2	bhāsamānassa satthuno;
thag2.6:1.3	Na kaṅkhamabhijānāmi,
thag2.6:1.4	sabbaññūaparājite.
thag2.6:2.1	Satthavāhe mahāvīre,
thag2.6:2.2	sārathīnaṁ varuttame;
thag2.6:2.3	Magge paṭipadāyaṁ vā,
thag2.6:2.4	kaṅkhā mayhaṁ na vijjatī”ti.
thag2.6:2.5	… Meḷajino thero ….
thag2.7:0.1	Theragāthā 2.7
thag2.7:0.2	Dukanipāta
thag2.7:0.3	Paṭhamavagga
thag2.7:0.4	Rādhattheragāthā
thag2.7:1.1	“Yathā agāraṁ ducchannaṁ,
thag2.7:1.2	vuṭṭhī samativijjhati;
thag2.7:1.3	Evaṁ abhāvitaṁ cittaṁ,
thag2.7:1.4	rāgo samativijjhati.
thag2.7:2.1	Yathā agāraṁ succhannaṁ,
thag2.7:2.2	Vuṭṭhī na samativijjhati;
thag2.7:2.3	Evaṁ subhāvitaṁ cittaṁ,
thag2.7:2.4	Rāgo na samativijjhatī”ti.
thag2.7:2.5	… Rādho thero ….
thag2.8:0.1	Theragāthā 2.8
thag2.8:0.2	Dukanipāta
thag2.8:0.3	Paṭhamavagga
thag2.8:0.4	Surādhattheragāthā
thag2.8:1.1	“Khīṇā hi mayhaṁ jāti,
thag2.8:1.2	vusitaṁ jinasāsanaṁ;
thag2.8:1.3	Pahīno jālasaṅkhāto,
thag2.8:1.4	bhavanetti samūhatā.
thag2.8:2.1	Yassatthāya pabbajito,
thag2.8:2.2	agārasmānagāriyaṁ;
thag2.8:2.3	So me attho anuppatto,
thag2.8:2.4	sabbasaṁyojanakkhayo”ti.
thag2.8:2.5	… Surādho thero ….
thag2.9:0.1	Theragāthā 2.9
thag2.9:0.2	Dukanipāta
thag2.9:0.3	Paṭhamavagga
thag2.9:0.4	Gotamattheragāthā
thag2.9:1.1	“Sukhaṁ supanti munayo,
thag2.9:1.2	ye itthīsu na bajjhare;
thag2.9:1.3	Sadā ve rakkhitabbāsu,
thag2.9:1.4	yāsu saccaṁ sudullabhaṁ.
thag2.9:2.1	Vadhaṁ carimha te kāma,
thag2.9:2.2	anaṇā dāni te mayaṁ;
thag2.9:2.3	Gacchāma dāni nibbānaṁ,
thag2.9:2.4	yattha gantvā na socatī”ti.
thag2.9:2.5	… Gotamo thero ….
thag2.10:0.1	Theragāthā 2.10
thag2.10:0.2	Dukanipāta
thag2.10:0.3	Paṭhamavagga
thag2.10:0.4	Vasabhattheragāthā
thag2.10:1.1	“Pubbe hanati attānaṁ,
thag2.10:1.2	pacchā hanati so pare;
thag2.10:1.3	Suhataṁ hanti attānaṁ,
thag2.10:1.4	vītaṁseneva pakkhimā.
thag2.10:2.1	Na brāhmaṇo bahivaṇṇo,
thag2.10:2.2	anto vaṇṇo hi brāhmaṇo;
thag2.10:2.3	Yasmiṁ pāpāni kammāni,
thag2.10:2.4	sa ve kaṇho sujampatī”ti.
thag2.10:2.5	… Vasabho thero …
thag2.10:2.6	vaggo paṭhamo.
thag2.10:3.0	Tassuddānaṁ
thag2.10:3.1	Uttaro ceva piṇḍolo,
thag2.10:3.2	valliyo tīriyo isi;
thag2.10:3.3	Ajino ca meḷajino,
thag2.10:3.4	rādho surādho gotamo;
thag2.10:3.5	Vasabhena ime honti,
thag2.10:3.6	dasa therā mahiddhikāti.
thag2.11:0.1	Theragāthā 2.11
thag2.11:0.2	Dukanipāta
thag2.11:0.3	Dutiyavagga
thag2.11:0.4	Mahācundattheragāthā
thag2.11:1.1	“Sussūsā sutavaddhanī,
thag2.11:1.2	sutaṁ paññāya vaddhanaṁ;
thag2.11:1.3	Paññāya atthaṁ jānāti,
thag2.11:1.4	ñāto attho sukhāvaho.
thag2.11:2.1	Sevetha pantāni senāsanāni,
thag2.11:2.2	Careyya saṁyojanavippamokkhaṁ;
thag2.11:2.3	Sace ratiṁ nādhigaccheyya tattha,
thag2.11:2.4	Saṅghe vase rakkhitatto satimā”ti.
thag2.11:2.5	… Mahācundo thero ….
thag2.12:0.1	Theragāthā 2.12
thag2.12:0.2	Dukanipāta
thag2.12:0.3	Dutiyavagga
thag2.12:0.4	Jotidāsattheragāthā
thag2.12:1.1	“Ye kho te veṭhamissena,
thag2.12:1.2	nānattena ca kammunā;
thag2.12:1.3	Manusse uparundhanti,
thag2.12:1.4	pharusūpakkamā janā;
thag2.12:1.5	Tepi tattheva kīranti,
thag2.12:1.6	na hi kammaṁ panassati.
thag2.12:2.1	Yaṁ karoti naro kammaṁ,
thag2.12:2.2	Kalyāṇaṁ yadi pāpakaṁ;
thag2.12:2.3	Tassa tasseva dāyādo,
thag2.12:2.4	Yaṁ yaṁ kammaṁ pakubbatī”ti.
thag2.12:2.5	… Jotidāso thero ….
thag2.13:0.1	Theragāthā 2.13
thag2.13:0.2	Dukanipāta
thag2.13:0.3	Dutiyavagga
thag2.13:0.4	Heraññakānittheragāthā
thag2.13:1.1	“Accayanti ahorattā,
thag2.13:1.2	jīvitaṁ uparujjhati;
thag2.13:1.3	Āyu khīyati maccānaṁ,
thag2.13:1.4	kunnadīnaṁva odakaṁ.
thag2.13:2.1	Atha pāpāni kammāni,
thag2.13:2.2	karaṁ bālo na bujjhati;
thag2.13:2.3	Pacchāssa kaṭukaṁ hoti,
thag2.13:2.4	vipāko hissa pāpako”ti.
thag2.13:2.5	… Heraññakānitthero ….
thag2.14:0.1	Theragāthā 2.14
thag2.14:0.2	Dukanipāta
thag2.14:0.3	Dutiyavagga
thag2.14:0.4	Somamittattheragāthā
thag2.14:1.1	“Parittaṁ dārumāruyha,
thag2.14:1.2	yathā sīde mahaṇṇave;
thag2.14:1.3	Evaṁ kusītamāgamma,
thag2.14:1.4	sādhujīvīpi sīdati;
thag2.14:1.5	Tasmā taṁ parivajjeyya,
thag2.14:1.6	kusītaṁ hīnavīriyaṁ.
thag2.14:2.1	Pavivittehi ariyehi,
thag2.14:2.2	pahitattehi jhāyibhi;
thag2.14:2.3	Niccaṁ āraddhavīriyehi,
thag2.14:2.4	paṇḍitehi sahāvase”ti.
thag2.14:2.5	… Somamitto thero ….
thag2.15:0.1	Theragāthā 2.15
thag2.15:0.2	Dukanipāta
thag2.15:0.3	Dutiyavagga
thag2.15:0.4	Sabbamittattheragāthā
thag2.15:1.1	“Jano janamhi sambaddho,
thag2.15:1.2	janamevassito jano;
thag2.15:1.3	Jano janena heṭhīyati,
thag2.15:1.4	heṭheti ca jano janaṁ.
thag2.15:2.1	Ko hi tassa janenattho,
thag2.15:2.2	janena janitena vā;
thag2.15:2.3	Janaṁ ohāya gacchaṁ taṁ,
thag2.15:2.4	heṭhayitvā bahuṁ janan”ti.
thag2.15:2.5	… Sabbamitto thero ….
thag2.16:0.1	Theragāthā 2.16
thag2.16:0.2	Dukanipāta
thag2.16:0.3	Dutiyavagga
thag2.16:0.4	Mahākāḷattheragāthā
thag2.16:1.1	“Kāḷī itthī brahatī dhaṅkarūpā,
thag2.16:1.2	Satthiñca bhetvā aparañca satthiṁ;
thag2.16:1.3	Bāhañca bhetvā aparañca bāhaṁ,
thag2.16:1.4	Sīsañca bhetvā dadhithālakaṁva;
thag2.16:1.5	Esā nisinnā abhisandahitvā.
thag2.16:2.1	Yo ve avidvā upadhiṁ karoti,
thag2.16:2.2	Punappunaṁ dukkhamupeti mando;
thag2.16:2.3	Tasmā pajānaṁ upadhiṁ na kayirā,
thag2.16:2.4	Māhaṁ puna bhinnasiro sayissan”ti.
thag2.16:2.5	… Mahākāḷo thero ….
thag2.17:0.1	Theragāthā 2.17
thag2.17:0.2	Dukanipāta
thag2.17:0.3	Dutiyavagga
thag2.17:0.4	Tissattheragāthā
thag2.17:1.1	“Bahū sapatte labhati,
thag2.17:1.2	muṇḍo saṅghāṭipāruto;
thag2.17:1.3	Lābhī annassa pānassa,
thag2.17:1.4	vatthassa sayanassa ca.
thag2.17:2.1	Etamādīnavaṁ ñatvā,
thag2.17:2.2	sakkāresu mahabbhayaṁ;
thag2.17:2.3	Appalābho anavassuto,
thag2.17:2.4	sato bhikkhu paribbaje”ti.
thag2.17:2.5	… Tisso thero ….
thag2.18:0.1	Theragāthā 2.18
thag2.18:0.2	Dukanipāta
thag2.18:0.3	Dutiyavagga
thag2.18:0.4	Kimilattheragāthā
thag2.18:1.1	“Pācīnavaṁsadāyamhi,
thag2.18:1.2	sakyaputtā sahāyakā;
thag2.18:1.3	Pahāyānappake bhoge,
thag2.18:1.4	uñchāpattāgate ratā.
thag2.18:2.1	Āraddhavīriyā pahitattā,
thag2.18:2.2	Niccaṁ daḷhaparakkamā;
thag2.18:2.3	Ramanti dhammaratiyā,
thag2.18:2.4	Hitvāna lokiyaṁ ratin”ti.
thag2.18:2.5	… Kimilo thero ….
thag2.19:0.1	Theragāthā 2.19
thag2.19:0.2	Dukanipāta
thag2.19:0.3	Dutiyavagga
thag2.19:0.4	Nandattheragāthā
thag2.19:1.1	“Ayoniso manasikārā,
thag2.19:1.2	maṇḍanaṁ anuyuñjisaṁ;
thag2.19:1.3	Uddhato capalo cāsiṁ,
thag2.19:1.4	kāmarāgena aṭṭito.
thag2.19:2.1	Upāyakusalenāhaṁ,
thag2.19:2.2	buddhenādiccabandhunā;
thag2.19:2.3	Yoniso paṭipajjitvā,
thag2.19:2.4	bhave cittaṁ udabbahin”ti.
thag2.19:2.5	… Nando thero ….
thag2.20:0.1	Theragāthā 2.20
thag2.20:0.2	Dukanipāta
thag2.20:0.3	Dutiyavagga
thag2.20:0.4	Sirimattheragāthā
thag2.20:1.1	“Pare ca naṁ pasaṁsanti,
thag2.20:1.2	attā ce asamāhito;
thag2.20:1.3	Moghaṁ pare pasaṁsanti,
thag2.20:1.4	attā hi asamāhito.
thag2.20:2.1	Pare ca naṁ garahanti,
thag2.20:2.2	attā ce susamāhito;
thag2.20:2.3	Moghaṁ pare garahanti,
thag2.20:2.4	attā hi susamāhito”ti.
thag2.20:2.5	… Sirimā thero ….
thag2.20:2.6	vaggo dutiyo.
thag2.20:3.0	Tassuddānaṁ
thag2.20:3.1	Cundo ca jotidāso ca,
thag2.20:3.2	thero heraññakāni ca;
thag2.20:3.3	Somamitto sabbamitto,
thag2.20:3.4	kāḷo tisso ca kimilo;
thag2.20:3.5	Nando ca sirimā ceva,
thag2.20:3.6	dasa therā mahiddhikāti.
thag2.21:0.1	Theragāthā 2.21
thag2.21:0.2	Dukanipāta
thag2.21:0.3	Tatiyavagga
thag2.21:0.4	Uttarattheragāthā
thag2.21:1.1	“Khandhā mayā pariññātā,
thag2.21:1.2	taṇhā me susamūhatā;
thag2.21:1.3	Bhāvitā mama bojjhaṅgā,
thag2.21:1.4	patto me āsavakkhayo.
thag2.21:2.1	Sohaṁ khandhe pariññāya,
thag2.21:2.2	abbahitvāna jāliniṁ;
thag2.21:2.3	Bhāvayitvāna bojjhaṅge,
thag2.21:2.4	nibbāyissaṁ anāsavo”ti.
thag2.21:2.5	… Uttaro thero ….
thag2.22:0.1	Theragāthā 2.22
thag2.22:0.2	Dukanipāta
thag2.22:0.3	Tatiyavagga
thag2.22:0.4	Bhaddajittheragāthā
thag2.22:1.1	“Panādo nāma so rājā,
thag2.22:1.2	yassa yūpo suvaṇṇayo;
thag2.22:1.3	Tiriyaṁ soḷasubbedho,
thag2.22:1.4	ubbhamāhu sahassadhā.
thag2.22:2.1	Sahassakaṇḍo satageṇḍu,
thag2.22:2.2	dhajālu haritāmayo;
thag2.22:2.3	Anaccuṁ tattha gandhabbā,
thag2.22:2.4	chasahassāni sattadhā”ti.
thag2.22:2.5	… Bhaddajitthero ….
thag2.23:0.1	Theragāthā 2.23
thag2.23:0.2	Dukanipāta
thag2.23:0.3	Tatiyavagga
thag2.23:0.4	Sobhitattheragāthā
thag2.23:1.1	“Satimā paññavā bhikkhu,
thag2.23:1.2	āraddhabalavīriyo;
thag2.23:1.3	Pañca kappasatānāhaṁ,
thag2.23:1.4	ekarattiṁ anussariṁ.
thag2.23:2.1	Cattāro satipaṭṭhāne,
thag2.23:2.2	satta aṭṭha ca bhāvayaṁ;
thag2.23:2.3	Pañca kappasatānāhaṁ,
thag2.23:2.4	ekarattiṁ anussarin”ti.
thag2.23:2.5	… Sobhito thero ….
thag2.24:0.1	Theragāthā 2.24
thag2.24:0.2	Dukanipāta
thag2.24:0.3	Tatiyavagga
thag2.24:0.4	Valliyattheragāthā
thag2.24:1.1	“Yaṁ kiccaṁ daḷhavīriyena,
thag2.24:1.2	yaṁ kiccaṁ boddhumicchatā;
thag2.24:1.3	Karissaṁ nāvarajjhissaṁ,
thag2.24:1.4	passa vīriyaṁ parakkamaṁ.
thag2.24:2.1	Tvañca me maggamakkhāhi,
thag2.24:2.2	añjasaṁ amatogadhaṁ;
thag2.24:2.3	Ahaṁ monena monissaṁ,
thag2.24:2.4	gaṅgāsotova sāgaran”ti.
thag2.24:2.5	… Valliyo thero ….
thag2.25:0.1	Theragāthā 2.25
thag2.25:0.2	Dukanipāta
thag2.25:0.3	Tatiyavagga
thag2.25:0.4	Vītasokattheragāthā
thag2.25:1.1	“Kese me olikhissanti,
thag2.25:1.2	kappako upasaṅkami;
thag2.25:1.3	Tato ādāsamādāya,
thag2.25:1.4	sarīraṁ paccavekkhisaṁ.
thag2.25:2.1	Tuccho kāyo adissittha,
thag2.25:2.2	andhakāro tamo byagā;
thag2.25:2.3	Sabbe coḷā samucchinnā,
thag2.25:2.4	natthi dāni punabbhavo”ti.
thag2.25:2.5	… Vītasoko thero ….
thag2.26:0.1	Theragāthā 2.26
thag2.26:0.2	Dukanipāta
thag2.26:0.3	Tatiyavagga
thag2.26:0.4	Puṇṇamāsattheragāthā
thag2.26:1.1	“Pañca nīvaraṇe hitvā,
thag2.26:1.2	yogakkhemassa pattiyā;
thag2.26:1.3	Dhammādāsaṁ gahetvāna,
thag2.26:1.4	ñāṇadassanamattano.
thag2.26:2.1	Paccavekkhiṁ imaṁ kāyaṁ,
thag2.26:2.2	sabbaṁ santarabāhiraṁ;
thag2.26:2.3	Ajjhattañca bahiddhā ca,
thag2.26:2.4	tuccho kāyo adissathā”ti.
thag2.26:2.5	… Puṇṇamāso thero ….
thag2.27:0.1	Theragāthā 2.27
thag2.27:0.2	Dukanipāta
thag2.27:0.3	Tatiyavagga
thag2.27:0.4	Nandakattheragāthā
thag2.27:1.1	“Yathāpi bhaddo ājañño,
thag2.27:1.2	khalitvā patitiṭṭhati;
thag2.27:1.3	Bhiyyo laddhāna saṁvegaṁ,
thag2.27:1.4	adīno vahate dhuraṁ.
thag2.27:2.1	Evaṁ dassanasampannaṁ,
thag2.27:2.2	sammāsambuddhasāvakaṁ;
thag2.27:2.3	Ājānīyaṁ maṁ dhāretha,
thag2.27:2.4	puttaṁ buddhassa orasan”ti.
thag2.27:2.5	… Nandako thero ….
thag2.28:0.1	Theragāthā 2.28
thag2.28:0.2	Dukanipāta
thag2.28:0.3	Tatiyavagga
thag2.28:0.4	Bharatattheragāthā
thag2.28:1.1	“Ehi nandaka gacchāma,
thag2.28:1.2	upajjhāyassa santikaṁ;
thag2.28:1.3	Sīhanādaṁ nadissāma,
thag2.28:1.4	buddhaseṭṭhassa sammukhā.
thag2.28:2.1	Yāya no anukampāya,
thag2.28:2.2	amhe pabbājayī muni;
thag2.28:2.3	So no attho anuppatto,
thag2.28:2.4	sabbasaṁyojanakkhayo”ti.
thag2.28:2.5	… Bharato thero ….
thag2.29:0.1	Theragāthā 2.29
thag2.29:0.2	Dukanipāta
thag2.29:0.3	Tatiyavagga
thag2.29:0.4	Bhāradvājattheragāthā
thag2.29:1.1	“Nadanti evaṁ sappaññā,
thag2.29:1.2	sīhāva girigabbhare;
thag2.29:1.3	Vīrā vijitasaṅgāmā,
thag2.29:1.4	jetvā māraṁ savāhiniṁ.
thag2.29:2.1	Satthā ca pariciṇṇo me,
thag2.29:2.2	dhammo saṅgho ca pūjito;
thag2.29:2.3	Ahañca vitto sumano,
thag2.29:2.4	puttaṁ disvā anāsavan”ti.
thag2.29:2.5	… Bhāradvājo thero ….
thag2.30:0.1	Theragāthā 2.30
thag2.30:0.2	Dukanipāta
thag2.30:0.3	Tatiyavagga
thag2.30:0.4	Kaṇhadinnattheragāthā
thag2.30:1.1	“Upāsitā sappurisā,
thag2.30:1.2	sutā dhammā abhiṇhaso;
thag2.30:1.3	Sutvāna paṭipajjissaṁ,
thag2.30:1.4	añjasaṁ amatogadhaṁ.
thag2.30:2.1	Bhavarāgahatassa me sato,
thag2.30:2.2	Bhavarāgo puna me na vijjati;
thag2.30:2.3	Na cāhu na ca me bhavissati,
thag2.30:2.4	Na ca me etarahi vijjatī”ti.
thag2.30:2.5	… Kaṇhadinno thero …
thag2.30:2.6	vaggo tatiyo.
thag2.30:3.0	Tassuddānaṁ
thag2.30:3.1	Uttaro bhaddajitthero,
thag2.30:3.2	sobhito valliyo isi;
thag2.30:3.3	Vītasoko ca yo thero,
thag2.30:3.4	puṇṇamāso ca nandako;
thag2.30:3.5	Bharato bhāradvājo ca,
thag2.30:3.6	kaṇhadinno mahāmunīti.
thag2.31:0.1	Theragāthā 2.31
thag2.31:0.2	Dukanipāta
thag2.31:0.3	Catutthavagga
thag2.31:0.4	Migasirattheragāthā
thag2.31:1.1	“Yato ahaṁ pabbajito,
thag2.31:1.2	sammāsambuddhasāsane;
thag2.31:1.3	Vimuccamāno uggacchiṁ,
thag2.31:1.4	kāmadhātuṁ upaccagaṁ.
thag2.31:2.1	Brahmuno pekkhamānassa,
thag2.31:2.2	tato cittaṁ vimucci me;
thag2.31:2.3	Akuppā me vimuttīti,
thag2.31:2.4	sabbasaṁyojanakkhayā”ti.
thag2.31:2.5	… Migasiro thero ….
thag2.32:0.1	Theragāthā 2.32
thag2.32:0.2	Dukanipāta
thag2.32:0.3	Catutthavagga
thag2.32:0.4	Sivakattheragāthā
thag2.32:1.1	“Aniccāni gahakāni,
thag2.32:1.2	tattha tattha punappunaṁ;
thag2.32:1.3	Gahakāraṁ gavesanto,
thag2.32:1.4	dukkhā jāti punappunaṁ.
thag2.32:2.1	Gahakāraka diṭṭhosi,
thag2.32:2.2	puna gehaṁ na kāhasi;
thag2.32:2.3	Sabbā te phāsukā bhaggā,
thag2.32:2.4	thūṇikā ca vidālitā;
thag2.32:2.5	Vimariyādikataṁ cittaṁ,
thag2.32:2.6	idheva vidhamissatī”ti.
thag2.32:2.7	… Sivako thero ….
thag2.33:0.1	Theragāthā 2.33
thag2.33:0.2	Dukanipāta
thag2.33:0.3	Catutthavagga
thag2.33:0.4	Upavāṇattheragāthā
thag2.33:1.1	“Arahaṁ sugato loke,
thag2.33:1.2	vātehābādhiko muni;
thag2.33:1.3	Sace uṇhodakaṁ atthi,
thag2.33:1.4	munino dehi brāhmaṇa.
thag2.33:2.1	Pūjito pūjaneyyānaṁ,
thag2.33:2.2	sakkareyyāna sakkato;
thag2.33:2.3	Apacitopaceyyānaṁ,
thag2.33:2.4	tassa icchāmi hātave”ti.
thag2.33:2.5	… Upavāṇo thero ….
thag2.34:0.1	Theragāthā 2.34
thag2.34:0.2	Dukanipāta
thag2.34:0.3	Catutthavagga
thag2.34:0.4	Isidinnattheragāthā
thag2.34:1.1	“Diṭṭhā mayā dhammadharā upāsakā,
thag2.34:1.2	Kāmā aniccā iti bhāsamānā;
thag2.34:1.3	Sārattarattā maṇikuṇḍalesu,
thag2.34:1.4	Puttesu dāresu ca te apekkhā.
thag2.34:2.1	Addhā na jānanti yatodha dhammaṁ,
thag2.34:2.2	Kāmā aniccā iti cāpi āhu;
thag2.34:2.3	Rāgañca tesaṁ na balatthi chettuṁ,
thag2.34:2.4	Tasmā sitā puttadāraṁ dhanañcā”ti.
thag2.34:2.5	… Isidinno thero ….
thag2.35:0.1	Theragāthā 2.35
thag2.35:0.2	Dukanipāta
thag2.35:0.3	Catutthavagga
thag2.35:0.4	Sambulakaccānattheragāthā
thag2.35:1.1	“Devo ca vassati, devo ca gaḷagaḷāyati,
thag2.35:1.2	Ekako cāhaṁ bherave bile viharāmi;
thag2.35:1.3	Tassa mayhaṁ ekakassa bherave bile viharato,
thag2.35:1.4	Natthi bhayaṁ vā chambhitattaṁ vā lomahaṁso vā.
thag2.35:2.1	Dhammatā mamesā yassa me,
thag2.35:2.2	Ekakassa bherave bile;
thag2.35:2.3	Viharato natthi bhayaṁ vā,
thag2.35:2.4	Chambhitattaṁ vā lomahaṁso vā”ti.
thag2.35:2.5	… Sambulakaccāno thero ….
thag2.36:0.1	Theragāthā 2.36
thag2.36:0.2	Dukanipāta
thag2.36:0.3	Catutthavagga
thag2.36:0.4	Nitakattheragāthā
thag2.36:1.1	“Kassa selūpamaṁ cittaṁ,
thag2.36:1.2	ṭhitaṁ nānupakampati;
thag2.36:1.3	Virattaṁ rajanīyesu,
thag2.36:1.4	kuppanīye na kuppati;
thag2.36:1.5	Yassevaṁ bhāvitaṁ cittaṁ,
thag2.36:1.6	kuto taṁ dukkhamessati.
thag2.36:2.1	Mama selūpamaṁ cittaṁ,
thag2.36:2.2	ṭhitaṁ nānupakampati;
thag2.36:2.3	Virattaṁ rajanīyesu,
thag2.36:2.4	kuppanīye na kuppati;
thag2.36:2.5	Mamevaṁ bhāvitaṁ cittaṁ,
thag2.36:2.6	kuto maṁ dukkhamessatī”ti.
thag2.36:2.7	… Nitako thero ….
thag2.37:0.1	Theragāthā 2.37
thag2.37:0.2	Dukanipāta
thag2.37:0.3	Catutthavagga
thag2.37:0.4	Soṇapoṭiriyattheragāthā
thag2.37:1.1	“Na tāva supituṁ hoti,
thag2.37:1.2	ratti nakkhattamālinī;
thag2.37:1.3	Paṭijaggitumevesā,
thag2.37:1.4	ratti hoti vijānatā”.
thag2.37:2.1	“Hatthikkhandhāvapatitaṁ,
thag2.37:2.2	kuñjaro ce anukkame;
thag2.37:2.3	Saṅgāme me mataṁ seyyo,
thag2.37:2.4	yañce jīve parājito”ti.
thag2.37:2.5	… Soṇo poṭiriyo thero ….
thag2.38:0.1	Theragāthā 2.38
thag2.38:0.2	Dukanipāta
thag2.38:0.3	Catutthavagga
thag2.38:0.4	Nisabhattheragāthā
thag2.38:1.1	“Pañca kāmaguṇe hitvā,
thag2.38:1.2	Piyarūpe manorame;
thag2.38:1.3	Saddhāya gharā nikkhamma,
thag2.38:1.4	Dukkhassantakaro bhave.
thag2.38:2.1	Nābhinandāmi maraṇaṁ,
thag2.38:2.2	nābhinandāmi jīvitaṁ;
thag2.38:2.3	Kālañca paṭikaṅkhāmi,
thag2.38:2.4	sampajāno patissato”ti.
thag2.38:2.5	… Nisabho thero ….
thag2.39:0.1	Theragāthā 2.39
thag2.39:0.2	Dukanipāta
thag2.39:0.3	Catutthavagga
thag2.39:0.4	Usabhattheragāthā
thag2.39:1.1	“Ambapallavasaṅkāsaṁ,
thag2.39:1.2	aṁse katvāna cīvaraṁ;
thag2.39:1.3	Nisinno hatthigīvāyaṁ,
thag2.39:1.4	gāmaṁ piṇḍāya pāvisiṁ.
thag2.39:2.1	Hatthikkhandhato oruyha,
thag2.39:2.2	saṁvegaṁ alabhiṁ tadā;
thag2.39:2.3	Sohaṁ ditto tadā santo,
thag2.39:2.4	patto me āsavakkhayo”ti.
thag2.39:2.5	… Usabho thero ….
thag2.40:0.1	Theragāthā 2.40
thag2.40:0.2	Dukanipāta
thag2.40:0.3	Catutthavagga
thag2.40:0.4	Kappaṭakurattheragāthā
thag2.40:1.1	“Ayamiti kappaṭo kappaṭakuro,
thag2.40:1.2	Acchāya atibharitāya;
thag2.40:1.3	Amataghaṭikāyaṁ dhammakaṭamatto,
thag2.40:1.4	Katapadaṁ jhānāni ocetuṁ.
thag2.40:2.1	Mā kho tvaṁ kappaṭa pacālesi,
thag2.40:2.2	Mā tvaṁ upakaṇṇamhi tāḷessaṁ;
thag2.40:2.3	Na hi tvaṁ kappaṭa mattamaññāsi,
thag2.40:2.4	Saṅghamajjhamhi pacalāyamāno”ti.
thag2.40:2.5	… Kappaṭakuro thero …
thag2.40:2.6	vaggo catuttho.
thag2.40:3.0	Tassuddānaṁ
thag2.40:3.1	Migasiro sivako ca,
thag2.40:3.2	upavāṇo ca paṇḍito;
thag2.40:3.3	Isidinno ca kaccāno,
thag2.40:3.4	nitako ca mahāvasī;
thag2.40:3.5	Poṭiriyaputto nisabho,
thag2.40:3.6	usabho kappaṭakuroti.
thag2.41:0.1	Theragāthā 2.41
thag2.41:0.2	Dukanipāta
thag2.41:0.3	Pañcamavagga
thag2.41:0.4	Kumārakassapattheragāthā
thag2.41:1.1	“Aho buddhā aho dhammā,
thag2.41:1.2	aho no satthu sampadā;
thag2.41:1.3	Yattha etādisaṁ dhammaṁ,
thag2.41:1.4	sāvako sacchikāhiti.
thag2.41:2.1	Asaṅkheyyesu kappesu,
thag2.41:2.2	sakkāyādhigatā ahū;
thag2.41:2.3	Tesamayaṁ pacchimako,
thag2.41:2.4	carimoyaṁ samussayo;
thag2.41:2.5	Jātimaraṇasaṁsāro,
thag2.41:2.6	natthi dāni punabbhavo”ti.
thag2.41:2.7	… Kumārakassapo thero ….
thag2.42:0.1	Theragāthā 2.42
thag2.42:0.2	Dukanipāta
thag2.42:0.3	Pañcamavagga
thag2.42:0.4	Dhammapālattheragāthā
thag2.42:1.1	“Yo have daharo bhikkhu,
thag2.42:1.2	yuñjati buddhasāsane;
thag2.42:1.3	Jāgaro sa hi suttesu,
thag2.42:1.4	amoghaṁ tassa jīvitaṁ.
thag2.42:2.1	Tasmā saddhañca sīlañca,
thag2.42:2.2	pasādaṁ dhammadassanaṁ;
thag2.42:2.3	Anuyuñjetha medhāvī,
thag2.42:2.4	saraṁ buddhāna sāsanan”ti.
thag2.42:2.5	… Dhammapālo thero ….
thag2.43:0.1	Theragāthā 2.43
thag2.43:0.2	Dukanipāta
thag2.43:0.3	Pañcamavagga
thag2.43:0.4	Brahmālittheragāthā
thag2.43:1.1	“Kassindriyāni samathaṅgatāni,
thag2.43:1.2	Assā yathā sārathinā sudantā;
thag2.43:1.3	Pahīnamānassa anāsavassa,
thag2.43:1.4	Devāpi kassa pihayanti tādinoti.
thag2.43:2.1	Mayhindriyāni samathaṅgatāni,
thag2.43:2.2	Assā yathā sārathinā sudantā;
thag2.43:2.3	Pahīnamānassa anāsavassa,
thag2.43:2.4	Devāpi mayhaṁ pihayanti tādino”ti.
thag2.43:2.5	… Brahmāli thero ….
thag2.44:0.1	Theragāthā 2.44
thag2.44:0.2	Dukanipāta
thag2.44:0.3	Pañcamavagga
thag2.44:0.4	Mogharājattheragāthā
thag2.44:1.1	“Chavipāpaka cittabhaddaka,
thag2.44:1.2	Mogharāja satataṁ samāhito;
thag2.44:1.3	Hemantikasītakālarattiyo,
thag2.44:1.4	Bhikkhu tvaṁsi kathaṁ karissasi”.
thag2.44:2.1	“Sampannasassā magadhā,
thag2.44:2.2	kevalā iti me sutaṁ;
thag2.44:2.3	Palālacchannako seyyaṁ,
thag2.44:2.4	yathaññe sukhajīvino”ti.
thag2.44:2.5	… Mogharājā thero ….
thag2.45:0.1	Theragāthā 2.45
thag2.45:0.2	Dukanipāta
thag2.45:0.3	Pañcamavagga
thag2.45:0.4	Visākhapañcālaputtattheragāthā
thag2.45:1.1	“Na ukkhipe no ca parikkhipe pare,
thag2.45:1.2	Na okkhipe pāragataṁ na eraye;
thag2.45:1.3	Na cattavaṇṇaṁ parisāsu byāhare,
thag2.45:1.4	Anuddhato sammitabhāṇi subbato.
thag2.45:2.1	Susukhumanipuṇatthadassinā,
thag2.45:2.2	Matikusalena nivātavuttinā;
thag2.45:2.3	Saṁsevitavuddhasīlinā,
thag2.45:2.4	Nibbānaṁ na hi tena dullabhan”ti.
thag2.45:2.5	… Visākho pañcālaputto thero ….
thag2.46:0.1	Theragāthā 2.46
thag2.46:0.2	Dukanipāta
thag2.46:0.3	Pañcamavagga
thag2.46:0.4	Cūḷakattheragāthā
thag2.46:1.1	“Nadanti morā susikhā supekhuṇā,
thag2.46:1.2	Sunīlagīvā sumukhā sugajjino;
thag2.46:1.3	Susaddalā cāpi mahāmahī ayaṁ,
thag2.46:1.4	Subyāpitambu suvalāhakaṁ nabhaṁ.
thag2.46:2.1	Sukallarūpo sumanassa jhāyataṁ,
thag2.46:2.2	Sunikkamo sādhu subuddhasāsane;
thag2.46:2.3	Susukkasukkaṁ nipuṇaṁ sududdasaṁ,
thag2.46:2.4	Phusāhi taṁ uttamamaccutaṁ padan”ti.
thag2.46:2.5	… Cūḷako thero ….
thag2.47:0.1	Theragāthā 2.47
thag2.47:0.2	Dukanipāta
thag2.47:0.3	Pañcamavagga
thag2.47:0.4	Anūpamattheragāthā
thag2.47:1.1	“Nandamānāgataṁ cittaṁ,
thag2.47:1.2	sūlamāropamānakaṁ;
thag2.47:1.3	Tena teneva vajasi,
thag2.47:1.4	yena sūlaṁ kaliṅgaraṁ.
thag2.47:2.1	Tāhaṁ cittakaliṁ brūmi,
thag2.47:2.2	taṁ brūmi cittadubbhakaṁ;
thag2.47:2.3	Satthā te dullabho laddho,
thag2.47:2.4	mānatthe maṁ niyojayī”ti.
thag2.47:2.5	… Anūpamo thero ….
thag2.48:0.1	Theragāthā 2.48
thag2.48:0.2	Dukanipāta
thag2.48:0.3	Pañcamavagga
thag2.48:0.4	Vajjitattheragāthā
thag2.48:1.1	“Saṁsaraṁ dīghamaddhānaṁ,
thag2.48:1.2	gatīsu parivattisaṁ;
thag2.48:1.3	Apassaṁ ariyasaccāni,
thag2.48:1.4	andhabhūto puthujjano.
thag2.48:2.1	Tassa me appamattassa,
thag2.48:2.2	saṁsārā vinaḷīkatā;
thag2.48:2.3	Sabbā gatī samucchinnā,
thag2.48:2.4	natthi dāni punabbhavo”ti.
thag2.48:2.5	… Vajjito thero ….
thag2.49:0.1	Theragāthā 2.49
thag2.49:0.2	Dukanipāta
thag2.49:0.3	Pañcamavagga
thag2.49:0.4	Sandhitattheragāthā
thag2.49:1.1	“Assatthe haritobhāse,
thag2.49:1.2	saṁvirūḷhamhi pādape;
thag2.49:1.3	Ekaṁ buddhagataṁ saññaṁ,
thag2.49:1.4	alabhitthaṁ patissato.
thag2.49:2.1	Ekatiṁse ito kappe,
thag2.49:2.2	yaṁ saññamalabhiṁ tadā;
thag2.49:2.3	Tassā saññāya vāhasā,
thag2.49:2.4	patto me āsavakkhayo”ti.
thag2.49:2.5	… Sandhito thero …
thag2.49:2.6	vaggo pañcamo.
thag2.49:3.0	Tassuddānaṁ
thag2.49:3.1	Kumārakassapo thero,
thag2.49:3.2	dhammapālo ca brahmāli;
thag2.49:3.3	Mogharājā visākho ca,
thag2.49:3.4	cūḷako ca anūpamo;
thag2.49:3.5	Vajjito sandhito thero,
thag2.49:3.6	kilesarajavāhanoti.
thag2.49:3.7	Dukanipāto niṭṭhito.
thag2.49:4.0	Tatruddānaṁ
thag2.49:4.1	Gāthādukanipātamhi,
thag2.49:4.2	navuti ceva aṭṭha ca;
thag2.49:4.3	Therā ekūnapaññāsaṁ,
thag2.49:4.4	bhāsitā nayakovidāti.
thag3.1:0.1	Theragāthā 3.1
thag3.1:0.2	Tikanipāta
thag3.1:0.3	Paṭhamavagga
thag3.1:0.4	Aṅgaṇikabhāradvājattheragāthā
thag3.1:1.1	“Ayoni suddhimanvesaṁ,
thag3.1:1.2	aggiṁ paricariṁ vane;
thag3.1:1.3	Suddhimaggaṁ ajānanto,
thag3.1:1.4	akāsiṁ amaraṁ tapaṁ.
thag3.1:2.1	Taṁ sukhena sukhaṁ laddhaṁ,
thag3.1:2.2	passa dhammasudhammataṁ;
thag3.1:2.3	Tisso vijjā anuppattā,
thag3.1:2.4	kataṁ buddhassa sāsanaṁ.
thag3.1:3.1	Brahmabandhu pure āsiṁ,
thag3.1:3.2	idāni khomhi brāhmaṇo;
thag3.1:3.3	Tevijjo nhātako camhi,
thag3.1:3.4	sottiyo camhi vedagū”ti.
thag3.1:3.5	… Aṅgaṇikabhāradvājo thero ….
thag3.2:0.1	Theragāthā 3.2
thag3.2:0.2	Tikanipāta
thag3.2:0.3	Paṭhamavagga
thag3.2:0.4	Paccayattheragāthā
thag3.2:1.1	“Pañcāhāhaṁ pabbajito,
thag3.2:1.2	sekho appattamānaso;
thag3.2:1.3	Vihāraṁ me paviṭṭhassa,
thag3.2:1.4	cetaso paṇidhī ahu.
thag3.2:2.1	Nāsissaṁ na pivissāmi,
thag3.2:2.2	vihārato na nikkhame;
thag3.2:2.3	Napi passaṁ nipātessaṁ,
thag3.2:2.4	taṇhāsalle anūhate.
thag3.2:3.1	Tassa mevaṁ viharato,
thag3.2:3.2	passa vīriyaparakkamaṁ;
thag3.2:3.3	Tisso vijjā anuppattā,
thag3.2:3.4	kataṁ buddhassa sāsanan”ti.
thag3.2:3.5	… Paccayo thero ….
thag3.3:0.1	Theragāthā 3.3
thag3.3:0.2	Tikanipāta
thag3.3:0.3	Paṭhamavagga
thag3.3:0.4	Bākulattheragāthā
thag3.3:1.1	“Yo pubbe karaṇīyāni,
thag3.3:1.2	pacchā so kātumicchati;
thag3.3:1.3	Sukhā so dhaṁsate ṭhānā,
thag3.3:1.4	pacchā ca manutappati.
thag3.3:2.1	Yañhi kayirā tañhi vade,
thag3.3:2.2	yaṁ na kayirā na taṁ vade;
thag3.3:2.3	Akarontaṁ bhāsamānaṁ,
thag3.3:2.4	parijānanti paṇḍitā.
thag3.3:3.1	Susukhaṁ vata nibbānaṁ,
thag3.3:3.2	sammāsambuddhadesitaṁ;
thag3.3:3.3	Asokaṁ virajaṁ khemaṁ,
thag3.3:3.4	yattha dukkhaṁ nirujjhatī”ti.
thag3.3:3.5	… Bākulo thero ….
thag3.4:0.1	Theragāthā 3.4
thag3.4:0.2	Tikanipāta
thag3.4:0.3	Paṭhamavagga
thag3.4:0.4	Dhaniyattheragāthā
thag3.4:1.1	“Sukhañce jīvituṁ icche,
thag3.4:1.2	sāmaññasmiṁ apekkhavā;
thag3.4:1.3	Saṅghikaṁ nātimaññeyya,
thag3.4:1.4	cīvaraṁ pānabhojanaṁ.
thag3.4:2.1	Sukhañce jīvituṁ icche,
thag3.4:2.2	sāmaññasmiṁ apekkhavā;
thag3.4:2.3	Ahi mūsikasobbhaṁva,
thag3.4:2.4	sevetha sayanāsanaṁ.
thag3.4:3.1	Sukhañce jīvituṁ icche,
thag3.4:3.2	sāmaññasmiṁ apekkhavā;
thag3.4:3.3	Itarītarena tusseyya,
thag3.4:3.4	ekadhammañca bhāvaye”ti.
thag3.4:3.5	… Dhaniyo thero ….
thag3.5:0.1	Theragāthā 3.5
thag3.5:0.2	Tikanipāta
thag3.5:0.3	Paṭhamavagga
thag3.5:0.4	Mātaṅgaputtattheragāthā
thag3.5:1.1	“Atisītaṁ atiuṇhaṁ,
thag3.5:1.2	atisāyamidaṁ ahu;
thag3.5:1.3	Iti vissaṭṭhakammante,
thag3.5:1.4	khaṇā accenti māṇave.
thag3.5:2.1	Yo ca sītañca uṇhañca,
thag3.5:2.2	tiṇā bhiyyo na maññati;
thag3.5:2.3	Karaṁ purisakiccāni,
thag3.5:2.4	so sukhā na vihāyati.
thag3.5:3.1	Dabbaṁ kusaṁ poṭakilaṁ,
thag3.5:3.2	usīraṁ muñjapabbajaṁ;
thag3.5:3.3	Urasā panudissāmi,
thag3.5:3.4	vivekamanubrūhayan”ti.
thag3.5:3.5	… Mātaṅgaputto thero ….
thag3.6:0.1	Theragāthā 3.6
thag3.6:0.2	Tikanipāta
thag3.6:0.3	Paṭhamavagga
thag3.6:0.4	Khujjasobhitattheragāthā
thag3.6:1.1	“Ye cittakathī bahussutā,
thag3.6:1.2	Samaṇā pāṭaliputtavāsino;
thag3.6:1.3	Tesaññataroyamāyuvā,
thag3.6:1.4	Dvāre tiṭṭhati khujjasobhito”.
thag3.6:2.1	“Ye cittakathī bahussutā,
thag3.6:2.2	Samaṇā pāṭaliputtavāsino;
thag3.6:2.3	Tesaññataroyamāyuvā,
thag3.6:2.4	Dvāre tiṭṭhati māluterito”.
thag3.6:3.1	“Suyuddhena suyiṭṭhena,
thag3.6:3.2	saṅgāmavijayena ca;
thag3.6:3.3	Brahmacariyānuciṇṇena,
thag3.6:3.4	evāyaṁ sukhamedhatī”ti.
thag3.6:3.5	… Khujjasobhito thero ….
thag3.7:0.1	Theragāthā 3.7
thag3.7:0.2	Tikanipāta
thag3.7:0.3	Paṭhamavagga
thag3.7:0.4	Vāraṇattheragāthā
thag3.7:1.1	“Yodha koci manussesu,
thag3.7:1.2	parapāṇāni hiṁsati;
thag3.7:1.3	Asmā lokā paramhā ca,
thag3.7:1.4	ubhayā dhaṁsate naro.
thag3.7:2.1	Yo ca mettena cittena,
thag3.7:2.2	sabbapāṇānukampati;
thag3.7:2.3	Bahuñhi so pasavati,
thag3.7:2.4	puññaṁ tādisako naro.
thag3.7:3.1	Subhāsitassa sikkhetha,
thag3.7:3.2	samaṇūpāsanassa ca;
thag3.7:3.3	Ekāsanassa ca raho,
thag3.7:3.4	cittavūpasamassa cā”ti.
thag3.7:3.5	… Vāraṇo thero ….
thag3.8:0.1	Theragāthā 3.8
thag3.8:0.2	Tikanipāta
thag3.8:0.3	Paṭhamavagga
thag3.8:0.4	Vassikattheragāthā
thag3.8:1.1	“Ekopi saddho medhāvī,
thag3.8:1.2	assaddhānīdha ñātinaṁ;
thag3.8:1.3	Dhammaṭṭho sīlasampanno,
thag3.8:1.4	hoti atthāya bandhunaṁ.
thag3.8:2.1	Niggayha anukampāya,
thag3.8:2.2	coditā ñātayo mayā;
thag3.8:2.3	Ñātibandhavapemena,
thag3.8:2.4	kāraṁ katvāna bhikkhusu.
thag3.8:3.1	Te abbhatītā kālaṅkatā,
thag3.8:3.2	pattā te tidivaṁ sukhaṁ;
thag3.8:3.3	Bhātaro mayhaṁ mātā ca,
thag3.8:3.4	modanti kāmakāmino”ti.
thag3.8:3.5	… Vassiko thero ….
thag3.9:0.1	Theragāthā 3.9
thag3.9:0.2	Tikanipāta
thag3.9:0.3	Paṭhamavagga
thag3.9:0.4	Yasojattheragāthā
thag3.9:1.1	“Kālapabbaṅgasaṅkāso,
thag3.9:1.2	kiso dhamanisanthato;
thag3.9:1.3	Mattaññū annapānamhi,
thag3.9:1.4	adīnamānaso naro”.
thag3.9:2.1	“Phuṭṭho ḍaṁsehi makasehi,
thag3.9:2.2	araññasmiṁ brahāvane;
thag3.9:2.3	Nāgo saṅgāmasīseva,
thag3.9:2.4	sato tatrādhivāsaye.
thag3.9:3.1	Yathā brahmā tathā eko,
thag3.9:3.2	yathā devo tathā duve;
thag3.9:3.3	Yathā gāmo tathā tayo,
thag3.9:3.4	kolāhalaṁ tatuttarin”ti.
thag3.9:3.5	… Yasojo thero ….
thag3.10:0.1	Theragāthā 3.10
thag3.10:0.2	Tikanipāta
thag3.10:0.3	Paṭhamavagga
thag3.10:0.4	Sāṭimattiyattheragāthā
thag3.10:1.1	“Ahu tuyhaṁ pure saddhā,
thag3.10:1.2	sā te ajja na vijjati;
thag3.10:1.3	Yaṁ tuyhaṁ tuyhamevetaṁ,
thag3.10:1.4	natthi duccaritaṁ mama.
thag3.10:2.1	Aniccā hi calā saddhā,
thag3.10:2.2	evaṁ diṭṭhā hi sā mayā;
thag3.10:2.3	Rajjantipi virajjanti,
thag3.10:2.4	tattha kiṁ jiyyate muni.
thag3.10:3.1	Paccati munino bhattaṁ,
thag3.10:3.2	Thokaṁ thokaṁ kule kule;
thag3.10:3.3	Piṇḍikāya carissāmi,
thag3.10:3.4	Atthi jaṅghabalaṁ mamā”ti.
thag3.10:3.5	… Sāṭimattiyo thero ….
thag3.11:0.1	Theragāthā 3.11
thag3.11:0.2	Tikanipāta
thag3.11:0.3	Paṭhamavagga
thag3.11:0.4	Upālittheragāthā
thag3.11:1.1	“Saddhāya abhinikkhamma,
thag3.11:1.2	navapabbajito navo;
thag3.11:1.3	Mitte bhajeyya kalyāṇe,
thag3.11:1.4	suddhājīve atandite.
thag3.11:2.1	Saddhāya abhinikkhamma,
thag3.11:2.2	navapabbajito navo;
thag3.11:2.3	Saṅghasmiṁ viharaṁ bhikkhu,
thag3.11:2.4	sikkhetha vinayaṁ budho.
thag3.11:3.1	Saddhāya abhinikkhamma,
thag3.11:3.2	navapabbajito navo;
thag3.11:3.3	Kappākappesu kusalo,
thag3.11:3.4	careyya apurakkhato”ti.
thag3.11:3.5	… Upālitthero ….
thag3.12:0.1	Theragāthā 3.12
thag3.12:0.2	Tikanipāta
thag3.12:0.3	Paṭhamavagga
thag3.12:0.4	Uttarapālattheragāthā
thag3.12:1.1	“Paṇḍitaṁ vata maṁ santaṁ,
thag3.12:1.2	alamatthavicintakaṁ;
thag3.12:1.3	Pañca kāmaguṇā loke,
thag3.12:1.4	sammohā pātayiṁsu maṁ.
thag3.12:2.1	Pakkhando māravisaye,
thag3.12:2.2	daḷhasallasamappito;
thag3.12:2.3	Asakkhiṁ maccurājassa,
thag3.12:2.4	ahaṁ pāsā pamuccituṁ.
thag3.12:3.1	Sabbe kāmā pahīnā me,
thag3.12:3.2	bhavā sabbe padālitā;
thag3.12:3.3	Vikkhīṇo jātisaṁsāro,
thag3.12:3.4	natthi dāni punabbhavo”ti.
thag3.12:3.5	… Uttarapālo thero ….
thag3.13:0.1	Theragāthā 3.13
thag3.13:0.2	Tikanipāta
thag3.13:0.3	Paṭhamavagga
thag3.13:0.4	Abhibhūtattheragāthā
thag3.13:1.1	“Suṇātha ñātayo sabbe,
thag3.13:1.2	yāvantettha samāgatā;
thag3.13:1.3	Dhammaṁ vo desayissāmi,
thag3.13:1.4	dukkhā jāti punappunaṁ.
thag3.13:2.1	Ārambhatha nikkamatha,
thag3.13:2.2	Yuñjatha buddhasāsane;
thag3.13:2.3	Dhunātha maccuno senaṁ,
thag3.13:2.4	Naḷāgāraṁva kuñjaro.
thag3.13:3.1	Yo imasmiṁ dhammavinaye,
thag3.13:3.2	appamatto vihassati;
thag3.13:3.3	Pahāya jātisaṁsāraṁ,
thag3.13:3.4	dukkhassantaṁ karissatī”ti.
thag3.13:3.5	… Abhibhūto thero ….
thag3.14:0.1	Theragāthā 3.14
thag3.14:0.2	Tikanipāta
thag3.14:0.3	Paṭhamavagga
thag3.14:0.4	Gotamattheragāthā
thag3.14:1.1	“Saṁsaraṁ hi nirayaṁ agacchissaṁ,
thag3.14:1.2	Petalokamagamaṁ punappunaṁ;
thag3.14:1.3	Dukkhamamhipi tiracchānayoniyaṁ,
thag3.14:1.4	Nekadhā hi vusitaṁ ciraṁ mayā.
thag3.14:2.1	Mānusopi ca bhavobhirādhito,
thag3.14:2.2	Saggakāyamagamaṁ sakiṁ sakiṁ;
thag3.14:2.3	Rūpadhātusu arūpadhātusu,
thag3.14:2.4	Nevasaññisu asaññisuṭṭhitaṁ.
thag3.14:3.1	Sambhavā suviditā asārakā,
thag3.14:3.2	Saṅkhatā pacalitā saderitā;
thag3.14:3.3	Taṁ viditvā mahamattasambhavaṁ,
thag3.14:3.4	Santimeva satimā samajjhagan”ti.
thag3.14:3.5	… Gotamo thero ….
thag3.15:0.1	Theragāthā 3.15
thag3.15:0.2	Tikanipāta
thag3.15:0.3	Paṭhamavagga
thag3.15:0.4	Hāritattheragāthā
thag3.15:1.1	“Yo pubbe karaṇīyāni,
thag3.15:1.2	pacchā so kātumicchati;
thag3.15:1.3	Sukhā so dhaṁsate ṭhānā,
thag3.15:1.4	pacchā ca manutappati.
thag3.15:2.1	Yañhi kayirā tañhi vade,
thag3.15:2.2	yaṁ na kayirā na taṁ vade;
thag3.15:2.3	Akarontaṁ bhāsamānaṁ,
thag3.15:2.4	parijānanti paṇḍitā.
thag3.15:3.1	Susukhaṁ vata nibbānaṁ,
thag3.15:3.2	sammāsambuddhadesitaṁ;
thag3.15:3.3	Asokaṁ virajaṁ khemaṁ,
thag3.15:3.4	yattha dukkhaṁ nirujjhatī”ti.
thag3.15:3.5	… Hārito thero ….
thag3.16:0.1	Theragāthā 3.16
thag3.16:0.2	Tikanipāta
thag3.16:0.3	Paṭhamavagga
thag3.16:0.4	Vimalattheragāthā
thag3.16:1.1	“Pāpamitte vivajjetvā,
thag3.16:1.2	bhajeyyuttamapuggalaṁ;
thag3.16:1.3	Ovāde cassa tiṭṭheyya,
thag3.16:1.4	patthento acalaṁ sukhaṁ.
thag3.16:2.1	Parittaṁ dārumāruyha,
thag3.16:2.2	yathā sīde mahaṇṇave;
thag3.16:2.3	Evaṁ kusītamāgamma,
thag3.16:2.4	sādhujīvīpi sīdati;
thag3.16:2.5	Tasmā taṁ parivajjeyya,
thag3.16:2.6	kusītaṁ hīnavīriyaṁ.
thag3.16:3.1	Pavivittehi ariyehi,
thag3.16:3.2	pahitattehi jhāyibhi;
thag3.16:3.3	Niccaṁ āraddhavīriyehi,
thag3.16:3.4	paṇḍitehi sahāvase”ti.
thag3.16:3.5	… Vimalo thero …
thag3.16:3.6	Tikanipāto niṭṭhito.
thag3.16:4.0	Tatruddānaṁ
thag3.16:4.1	Aṅgaṇiko bhāradvājo,
thag3.16:4.2	paccayo bākulo isi;
thag3.16:4.3	Dhaniyo mātaṅgaputto,
thag3.16:4.4	sobhito vāraṇo isi.
thag3.16:5.1	Vassiko ca yasojo ca,
thag3.16:5.2	sāṭimattiyupāli ca;
thag3.16:5.3	Uttarapālo abhibhūto,
thag3.16:5.4	gotamo hāritopi ca.
thag3.16:6.1	Thero tikanipātamhi,
thag3.16:6.2	nibbāne vimalo kato;
thag3.16:6.3	Aṭṭhatālīsa gāthāyo,
thag3.16:6.4	therā soḷasa kittitāti.
thag4.1:0.1	Theragāthā 4.1
thag4.1:0.2	Catukkanipāta
thag4.1:0.3	Paṭhamavagga
thag4.1:0.4	Nāgasamālattheragāthā
thag4.1:1.1	“Alaṅkatā suvasanā,
thag4.1:1.2	mālinī candanussadā;
thag4.1:1.3	Majjhe mahāpathe nārī,
thag4.1:1.4	tūriye naccati naṭṭakī.
thag4.1:2.1	Piṇḍikāya paviṭṭhohaṁ,
thag4.1:2.2	gacchanto naṁ udikkhisaṁ;
thag4.1:2.3	Alaṅkataṁ suvasanaṁ,
thag4.1:2.4	maccupāsaṁva oḍḍitaṁ.
thag4.1:3.1	Tato me manasīkāro,
thag4.1:3.2	yoniso udapajjatha;
thag4.1:3.3	Ādīnavo pāturahu,
thag4.1:3.4	nibbidā samatiṭṭhatha.
thag4.1:4.1	Tato cittaṁ vimucci me,
thag4.1:4.2	passa dhammasudhammataṁ;
thag4.1:4.3	Tisso vijjā anuppattā,
thag4.1:4.4	kataṁ buddhassa sāsanan”ti.
thag4.1:4.5	… Nāgasamālo thero ….
thag4.2:0.1	Theragāthā 4.2
thag4.2:0.2	Catukkanipāta
thag4.2:0.3	Paṭhamavagga
thag4.2:0.4	Bhaguttheragāthā
thag4.2:1.1	“Ahaṁ middhena pakato,
thag4.2:1.2	vihārā upanikkhamiṁ;
thag4.2:1.3	Caṅkamaṁ abhiruhanto,
thag4.2:1.4	tattheva papatiṁ chamā.
thag4.2:2.1	Gattāni parimajjitvā,
thag4.2:2.2	punapāruyha caṅkamaṁ;
thag4.2:2.3	Caṅkame caṅkamiṁ sohaṁ,
thag4.2:2.4	ajjhattaṁ susamāhito.
thag4.2:3.1	Tato me manasīkāro,
thag4.2:3.2	yoniso udapajjatha;
thag4.2:3.3	Ādīnavo pāturahu,
thag4.2:3.4	nibbidā samatiṭṭhatha.
thag4.2:4.1	Tato cittaṁ vimucci me,
thag4.2:4.2	passa dhammasudhammataṁ;
thag4.2:4.3	Tisso vijjā anuppattā,
thag4.2:4.4	kataṁ buddhassa sāsanan”ti.
thag4.2:4.5	… Bhagutthero ….
thag4.3:0.1	Theragāthā 4.3
thag4.3:0.2	Catukkanipāta
thag4.3:0.3	Paṭhamavagga
thag4.3:0.4	Sabhiyattheragāthā
thag4.3:1.1	“Pare ca na vijānanti,
thag4.3:1.2	mayamettha yamāmase;
thag4.3:1.3	Ye ca tattha vijānanti,
thag4.3:1.4	tato sammanti medhagā.
thag4.3:2.1	Yadā ca avijānantā,
thag4.3:2.2	iriyantyamarā viya;
thag4.3:2.3	Vijānanti ca ye dhammaṁ,
thag4.3:2.4	āturesu anāturā.
thag4.3:3.1	Yaṁ kiñci sithilaṁ kammaṁ,
thag4.3:3.2	saṅkiliṭṭhañca yaṁ vataṁ;
thag4.3:3.3	Saṅkassaraṁ brahmacariyaṁ,
thag4.3:3.4	na taṁ hoti mahapphalaṁ.
thag4.3:4.1	Yassa sabrahmacārīsu,
thag4.3:4.2	gāravo nūpalabbhati;
thag4.3:4.3	Ārakā hoti saddhammā,
thag4.3:4.4	nabhaṁ puthaviyā yathā”ti.
thag4.3:4.5	… Sabhiyo thero ….
thag4.4:0.1	Theragāthā 4.4
thag4.4:0.2	Catukkanipāta
thag4.4:0.3	Paṭhamavagga
thag4.4:0.4	Nandakattheragāthā
thag4.4:1.1	“Dhiratthu pūre duggandhe,
thag4.4:1.2	mārapakkhe avassute;
thag4.4:1.3	Navasotāni te kāye,
thag4.4:1.4	yāni sandanti sabbadā.
thag4.4:2.1	Mā purāṇaṁ amaññittho,
thag4.4:2.2	māsādesi tathāgate;
thag4.4:2.3	Saggepi te na rajjanti,
thag4.4:2.4	kimaṅgaṁ pana mānuse.
thag4.4:3.1	Ye ca kho bālā dummedhā,
thag4.4:3.2	dummantī mohapārutā;
thag4.4:3.3	Tādisā tattha rajjanti,
thag4.4:3.4	mārakhittamhi bandhane.
thag4.4:4.1	Yesaṁ rāgo ca doso ca,
thag4.4:4.2	avijjā ca virājitā;
thag4.4:4.3	Tādī tattha na rajjanti,
thag4.4:4.4	chinnasuttā abandhanā”ti.
thag4.4:4.5	… Nandako thero ….
thag4.5:0.1	Theragāthā 4.5
thag4.5:0.2	Catukkanipāta
thag4.5:0.3	Paṭhamavagga
thag4.5:0.4	Jambukattheragāthā
thag4.5:1.1	“Pañcapaññāsavassāni,
thag4.5:1.2	rajojallamadhārayiṁ;
thag4.5:1.3	Bhuñjanto māsikaṁ bhattaṁ,
thag4.5:1.4	kesamassuṁ alocayiṁ.
thag4.5:2.1	Ekapādena aṭṭhāsiṁ,
thag4.5:2.2	āsanaṁ parivajjayiṁ;
thag4.5:2.3	Sukkhagūthāni ca khādiṁ,
thag4.5:2.4	uddesañca na sādiyiṁ.
thag4.5:3.1	Etādisaṁ karitvāna,
thag4.5:3.2	bahuṁ duggatigāminaṁ;
thag4.5:3.3	Vuyhamāno mahoghena,
thag4.5:3.4	buddhaṁ saraṇamāgamaṁ.
thag4.5:4.1	Saraṇagamanaṁ passa,
thag4.5:4.2	passa dhammasudhammataṁ;
thag4.5:4.3	Tisso vijjā anuppattā,
thag4.5:4.4	kataṁ buddhassa sāsanan”ti.
thag4.5:4.5	… Jambuko thero ….
thag4.6:0.1	Theragāthā 4.6
thag4.6:0.2	Catukkanipāta
thag4.6:0.3	Paṭhamavagga
thag4.6:0.4	Senakattheragāthā
thag4.6:1.1	“Svāgataṁ vata me āsi,
thag4.6:1.2	gayāyaṁ gayaphagguyā;
thag4.6:1.3	Yaṁ addasāsiṁ sambuddhaṁ,
thag4.6:1.4	desentaṁ dhammamuttamaṁ.
thag4.6:2.1	Mahappabhaṁ gaṇācariyaṁ,
thag4.6:2.2	aggapattaṁ vināyakaṁ;
thag4.6:2.3	Sadevakassa lokassa,
thag4.6:2.4	jinaṁ atuladassanaṁ.
thag4.6:3.1	Mahānāgaṁ mahāvīraṁ,
thag4.6:3.2	mahājutimanāsavaṁ;
thag4.6:3.3	Sabbāsavaparikkhīṇaṁ,
thag4.6:3.4	satthāramakutobhayaṁ.
thag4.6:4.1	Cirasaṅkiliṭṭhaṁ vata maṁ,
thag4.6:4.2	diṭṭhisandānabandhitaṁ;
thag4.6:4.3	Vimocayi so bhagavā,
thag4.6:4.4	sabbaganthehi senakan”ti.
thag4.6:4.5	… Senako thero ….
thag4.7:0.1	Theragāthā 4.7
thag4.7:0.2	Catukkanipāta
thag4.7:0.3	Paṭhamavagga
thag4.7:0.4	Sambhūtattheragāthā
thag4.7:1.1	“Yo dandhakāle tarati,
thag4.7:1.2	taraṇīye ca dandhaye;
thag4.7:1.3	Ayoni saṁvidhānena,
thag4.7:1.4	bālo dukkhaṁ nigacchati.
thag4.7:2.1	Tassatthā parihāyanti,
thag4.7:2.2	kāḷapakkheva candimā;
thag4.7:2.3	Āyasakyañca pappoti,
thag4.7:2.4	mittehi ca virujjhati.
thag4.7:3.1	Yo dandhakāle dandheti,
thag4.7:3.2	taraṇīye ca tāraye;
thag4.7:3.3	Yoniso saṁvidhānena,
thag4.7:3.4	sukhaṁ pappoti paṇḍito.
thag4.7:4.1	Tassatthā paripūrenti,
thag4.7:4.2	sukkapakkheva candimā;
thag4.7:4.3	Yaso kittiñca pappoti,
thag4.7:4.4	mittehi na virujjhatī”ti.
thag4.7:4.5	… Sambhūto thero ….
thag4.8:0.1	Theragāthā 4.8
thag4.8:0.2	Catukkanipāta
thag4.8:0.3	Paṭhamavagga
thag4.8:0.4	Rāhulattheragāthā
thag4.8:1.1	“Ubhayeneva sampanno,
thag4.8:1.2	rāhulabhaddoti maṁ vidū;
thag4.8:1.3	Yañcamhi putto buddhassa,
thag4.8:1.4	yañca dhammesu cakkhumā.
thag4.8:2.1	Yañca me āsavā khīṇā,
thag4.8:2.2	yañca natthi punabbhavo;
thag4.8:2.3	Arahā dakkhiṇeyyomhi,
thag4.8:2.4	tevijjo amataddaso.
thag4.8:3.1	Kāmandhā jālapacchannā,
thag4.8:3.2	taṇhāchādanachāditā;
thag4.8:3.3	Pamattabandhunā baddhā,
thag4.8:3.4	macchāva kumināmukhe.
thag4.8:4.1	Taṁ kāmaṁ ahamujjhitvā,
thag4.8:4.2	chetvā mārassa bandhanaṁ;
thag4.8:4.3	Samūlaṁ taṇhamabbuyha,
thag4.8:4.4	sītibhūtosmi nibbuto”ti.
thag4.8:4.5	… Rāhulo thero ….
thag4.9:0.1	Theragāthā 4.9
thag4.9:0.2	Catukkanipāta
thag4.9:0.3	Paṭhamavagga
thag4.9:0.4	Candanattheragāthā
thag4.9:1.1	“Jātarūpena sañchannā,
thag4.9:1.2	dāsīgaṇapurakkhatā;
thag4.9:1.3	Aṅkena puttamādāya,
thag4.9:1.4	bhariyā maṁ upāgami.
thag4.9:2.1	Tañca disvāna āyantiṁ,
thag4.9:2.2	sakaputtassa mātaraṁ;
thag4.9:2.3	Alaṅkataṁ suvasanaṁ,
thag4.9:2.4	maccupāsaṁva oḍḍitaṁ.
thag4.9:3.1	Tato me manasīkāro,
thag4.9:3.2	yoniso udapajjatha;
thag4.9:3.3	Ādīnavo pāturahu,
thag4.9:3.4	nibbidā samatiṭṭhatha.
thag4.9:4.1	Tato cittaṁ vimucci me,
thag4.9:4.2	passa dhammasudhammataṁ;
thag4.9:4.3	Tisso vijjā anuppattā,
thag4.9:4.4	kataṁ buddhassa sāsanan”ti.
thag4.9:4.5	… Candano thero ….
thag4.10:0.1	Theragāthā 4.10
thag4.10:0.2	Catukkanipāta
thag4.10:0.3	Paṭhamavagga
thag4.10:0.4	Dhammikattheragāthā
thag4.10:1.1	“Dhammo have rakkhati dhammacāriṁ,
thag4.10:1.2	Dhammo suciṇṇo sukhamāvahati;
thag4.10:1.3	Esānisaṁso dhamme suciṇṇe,
thag4.10:1.4	Na duggatiṁ gacchati dhammacārī.
thag4.10:2.1	Na hi dhammo adhammo ca,
thag4.10:2.2	ubho samavipākino;
thag4.10:2.3	Adhammo nirayaṁ neti,
thag4.10:2.4	dhammo pāpeti suggatiṁ.
thag4.10:3.1	Tasmā hi dhammesu kareyya chandaṁ,
thag4.10:3.2	Iti modamāno sugatena tādinā;
thag4.10:3.3	Dhamme ṭhitā sugatavarassa sāvakā,
thag4.10:3.4	Nīyanti dhīrā saraṇavaraggagāmino”.
thag4.10:4.1	“Vipphoṭito gaṇḍamūlo,
thag4.10:4.2	Taṇhājālo samūhato;
thag4.10:4.3	So khīṇasaṁsāro na catthi kiñcanaṁ,
thag4.10:4.4	Cando yathā dosinā puṇṇamāsiyan”ti.
thag4.10:4.5	… Dhammiko thero ….
thag4.11:0.1	Theragāthā 4.11
thag4.11:0.2	Catukkanipāta
thag4.11:0.3	Paṭhamavagga
thag4.11:0.4	Sappakattheragāthā
thag4.11:1.1	“Yadā balākā sucipaṇḍaracchadā,
thag4.11:1.2	Kāḷassa meghassa bhayena tajjitā;
thag4.11:1.3	Palehiti ālayamālayesinī,
thag4.11:1.4	Tadā nadī ajakaraṇī rameti maṁ.
thag4.11:2.1	Yadā balākā suvisuddhapaṇḍarā,
thag4.11:2.2	Kāḷassa meghassa bhayena tajjitā;
thag4.11:2.3	Pariyesati leṇamaleṇadassinī,
thag4.11:2.4	Tadā nadī ajakaraṇī rameti maṁ.
thag4.11:3.1	Kaṁ nu tattha na ramenti,
thag4.11:3.2	jambuyo ubhato tahiṁ;
thag4.11:3.3	Sobhenti āpagākūlaṁ,
thag4.11:3.4	mama leṇassa pacchato.
thag4.11:4.1	Tāmatamadasaṅghasuppahīnā,
thag4.11:4.2	Bhekā mandavatī panādayanti;
thag4.11:4.3	‘Nājja girinadīhi vippavāsasamayo,
thag4.11:4.4	Khemā ajakaraṇī sivā surammā’”ti.
thag4.11:4.5	… Sappako thero ….
thag4.12:0.1	Theragāthā 4.12
thag4.12:0.2	Catukkanipāta
thag4.12:0.3	Paṭhamavagga
thag4.12:0.4	Muditattheragāthā
thag4.12:1.1	“Pabbajiṁ jīvikatthohaṁ,
thag4.12:1.2	laddhāna upasampadaṁ;
thag4.12:1.3	Tato saddhaṁ paṭilabhiṁ,
thag4.12:1.4	daḷhavīriyo parakkamiṁ.
thag4.12:2.1	Kāmaṁ bhijjatuyaṁ kāyo,
thag4.12:2.2	maṁsapesī visīyaruṁ;
thag4.12:2.3	Ubho jaṇṇukasandhīhi,
thag4.12:2.4	jaṅghāyo papatantu me.
thag4.12:3.1	Nāsissaṁ na pivissāmi,
thag4.12:3.2	vihārā ca na nikkhame;
thag4.12:3.3	Napi passaṁ nipātessaṁ,
thag4.12:3.4	taṇhāsalle anūhate.
thag4.12:4.1	Tassa mevaṁ viharato,
thag4.12:4.2	passa vīriyaparakkamaṁ;
thag4.12:4.3	Tisso vijjā anuppattā,
thag4.12:4.4	kataṁ buddhassa sāsanan”ti.
thag4.12:4.5	… Mudito thero …
thag4.12:4.6	Catukkanipāto niṭṭhito.
thag4.12:5.0	Tatruddānaṁ
thag4.12:5.1	Nāgasamālo bhagu ca,
thag4.12:5.2	sabhiyo nandakopi ca;
thag4.12:5.3	Jambuko senako thero,
thag4.12:5.4	sambhūto rāhulopi ca.
thag4.12:6.1	Bhavati candano thero,
thag4.12:6.2	dasete buddhasāvakā;
thag4.12:6.3	Dhammiko sappako thero,
thag4.12:6.4	mudito cāpi te tayo;
thag4.12:6.5	Gāthāyo dve ca paññāsa,
thag4.12:6.6	therā sabbepi terasāti.
thag5.1:0.1	Theragāthā 5.1
thag5.1:0.2	Pañcakanipāta
thag5.1:0.3	Paṭhamavagga
thag5.1:0.4	Rājadattattheragāthā
thag5.1:1.1	“Bhikkhu sivathikaṁ gantvā,
thag5.1:1.2	Addasa itthimujjhitaṁ;
thag5.1:1.3	Apaviddhaṁ susānasmiṁ,
thag5.1:1.4	Khajjantiṁ kimihī phuṭaṁ.
thag5.1:2.1	Yañhi eke jigucchanti,
thag5.1:2.2	mataṁ disvāna pāpakaṁ;
thag5.1:2.3	Kāmarāgo pāturahu,
thag5.1:2.4	andhova savatī ahuṁ.
thag5.1:3.1	Oraṁ odanapākamhā,
thag5.1:3.2	tamhā ṭhānā apakkamiṁ;
thag5.1:3.3	Satimā sampajānohaṁ,
thag5.1:3.4	ekamantaṁ upāvisiṁ.
thag5.1:4.1	Tato me manasīkāro,
thag5.1:4.2	yoniso udapajjatha;
thag5.1:4.3	Ādīnavo pāturahu,
thag5.1:4.4	nibbidā samatiṭṭhatha.
thag5.1:5.1	Tato cittaṁ vimucci me,
thag5.1:5.2	passa dhammasudhammataṁ;
thag5.1:5.3	Tisso vijjā anuppattā,
thag5.1:5.4	kataṁ buddhassa sāsanan”ti.
thag5.1:5.5	… Rājadatto thero ….
thag5.2:0.1	Theragāthā 5.2
thag5.2:0.2	Pañcakanipāta
thag5.2:0.3	Paṭhamavagga
thag5.2:0.4	Subhūtattheragāthā
thag5.2:1.1	“Ayoge yuñjamattānaṁ,
thag5.2:1.2	puriso kiccamicchako;
thag5.2:1.3	Carañce nādhigaccheyya,
thag5.2:1.4	‘taṁ me dubbhagalakkhaṇaṁ’.
thag5.2:2.1	Abbūḷhaṁ aghagataṁ vijitaṁ,
thag5.2:2.2	Ekañce ossajeyya kalīva siyā;
thag5.2:2.3	Sabbānipi ce ossajeyya andhova siyā,
thag5.2:2.4	Samavisamassa adassanato.
thag5.2:3.1	Yañhi kayirā tañhi vade,
thag5.2:3.2	yaṁ na kayirā na taṁ vade;
thag5.2:3.3	Akarontaṁ bhāsamānaṁ,
thag5.2:3.4	parijānanti paṇḍitā.
thag5.2:4.1	Yathāpi ruciraṁ pupphaṁ,
thag5.2:4.2	vaṇṇavantaṁ agandhakaṁ;
thag5.2:4.3	Evaṁ subhāsitā vācā,
thag5.2:4.4	aphalā hoti akubbato.
thag5.2:5.1	Yathāpi ruciraṁ pupphaṁ,
thag5.2:5.2	Vaṇṇavantaṁ sugandhakaṁ;
thag5.2:5.3	Evaṁ subhāsitā vācā,
thag5.2:5.4	Saphalā hoti kubbato”ti.
thag5.2:5.5	… Subhūto thero ….
thag5.3:0.1	Theragāthā 5.3
thag5.3:0.2	Pañcakanipāta
thag5.3:0.3	Paṭhamavagga
thag5.3:0.4	Girimānandattheragāthā
thag5.3:1.1	“Vassati devo yathā sugītaṁ,
thag5.3:1.2	Channā me kuṭikā sukhā nivātā;
thag5.3:1.3	Tassaṁ viharāmi vūpasanto,
thag5.3:1.4	Atha ce patthayasī pavassa deva.
thag5.3:2.1	Vassati devo yathā sugītaṁ,
thag5.3:2.2	Channā me kuṭikā sukhā nivātā;
thag5.3:2.3	Tassaṁ viharāmi santacitto,
thag5.3:2.4	Atha ce patthayasī pavassa deva.
thag5.3:3.1	Vassati devo,
thag5.3:3.2	… pe …
thag5.3:3.3	tassaṁ viharāmi vītarāgo,
thag5.3:3.4	… pe …
thag5.3:4.1	Vassati devo,
thag5.3:4.2	… pe …
thag5.3:4.3	tassaṁ viharāmi vītadoso,
thag5.3:4.4	… pe …
thag5.3:5.1	Vassati devo,
thag5.3:5.2	… pe …
thag5.3:5.3	tassaṁ viharāmi vītamoho,
thag5.3:5.4	Atha ce patthayasī pavassa devā”ti.
thag5.3:5.5	… Girimānando thero ….
thag5.4:0.1	Theragāthā 5.4
thag5.4:0.2	Pañcakanipāta
thag5.4:0.3	Paṭhamavagga
thag5.4:0.4	Sumanattheragāthā
thag5.4:1.1	“Yaṁ patthayāno dhammesu,
thag5.4:1.2	upajjhāyo anuggahi;
thag5.4:1.3	Amataṁ abhikaṅkhantaṁ,
thag5.4:1.4	kataṁ kattabbakaṁ mayā.
thag5.4:2.1	Anuppatto sacchikato,
thag5.4:2.2	sayaṁ dhammo anītiho;
thag5.4:2.3	Visuddhañāṇo nikkaṅkho,
thag5.4:2.4	byākaromi tavantike.
thag5.4:3.1	Pubbenivāsaṁ jānāmi,
thag5.4:3.2	dibbacakkhu visodhitaṁ;
thag5.4:3.3	Sadattho me anuppatto,
thag5.4:3.4	kataṁ buddhassa sāsanaṁ.
thag5.4:4.1	Appamattassa me sikkhā,
thag5.4:4.2	sussutā tava sāsane;
thag5.4:4.3	Sabbe me āsavā khīṇā,
thag5.4:4.4	natthi dāni punabbhavo.
thag5.4:5.1	Anusāsi maṁ ariyavatā,
thag5.4:5.2	Anukampi anuggahi;
thag5.4:5.3	Amogho tuyhamovādo,
thag5.4:5.4	Antevāsimhi sikkhito”ti.
thag5.4:5.5	… Sumano thero ….
thag5.5:0.1	Theragāthā 5.5
thag5.5:0.2	Pañcakanipāta
thag5.5:0.3	Paṭhamavagga
thag5.5:0.4	Vaḍḍhattheragāthā
thag5.5:1.1	“Sādhū hi kira me mātā,
thag5.5:1.2	Patodaṁ upadaṁsayi;
thag5.5:1.3	Yassāhaṁ vacanaṁ sutvā,
thag5.5:1.4	Anusiṭṭho janettiyā;
thag5.5:1.5	Āraddhavīriyo pahitatto,
thag5.5:1.6	Patto sambodhimuttamaṁ.
thag5.5:2.1	Arahā dakkhiṇeyyomhi,
thag5.5:2.2	tevijjo amataddaso;
thag5.5:2.3	Jetvā namucino senaṁ,
thag5.5:2.4	viharāmi anāsavo.
thag5.5:3.1	Ajjhattañca bahiddhā ca,
thag5.5:3.2	ye me vijjiṁsu āsavā;
thag5.5:3.3	Sabbe asesā ucchinnā,
thag5.5:3.4	na ca uppajjare puna.
thag5.5:4.1	Visāradā kho bhaginī,
thag5.5:4.2	etamatthaṁ abhāsayi;
thag5.5:4.3	‘Apihā nūna mayipi,
thag5.5:4.4	vanatho te na vijjati’.
thag5.5:5.1	Pariyantakataṁ dukkhaṁ,
thag5.5:5.2	antimoyaṁ samussayo;
thag5.5:5.3	Jātimaraṇasaṁsāro,
thag5.5:5.4	natthi dāni punabbhavo”ti.
thag5.5:5.5	… Vaḍḍho thero ….
thag5.6:0.1	Theragāthā 5.6
thag5.6:0.2	Pañcakanipāta
thag5.6:0.3	Paṭhamavagga
thag5.6:0.4	Nadīkassapattheragāthā
thag5.6:1.1	“Atthāya vata me buddho,
thag5.6:1.2	nadiṁ nerañjaraṁ agā;
thag5.6:1.3	Yassāhaṁ dhammaṁ sutvāna,
thag5.6:1.4	micchādiṭṭhiṁ vivajjayiṁ.
thag5.6:2.1	Yajiṁ uccāvace yaññe,
thag5.6:2.2	aggihuttaṁ juhiṁ ahaṁ;
thag5.6:2.3	‘Esā suddhī’ti maññanto,
thag5.6:2.4	andhabhūto puthujjano.
thag5.6:3.1	Diṭṭhigahanapakkhando,
thag5.6:3.2	parāmāsena mohito;
thag5.6:3.3	Asuddhiṁ maññisaṁ suddhiṁ,
thag5.6:3.4	andhabhūto aviddasu.
thag5.6:4.1	Micchādiṭṭhi pahīnā me,
thag5.6:4.2	bhavā sabbe padālitā;
thag5.6:4.3	Juhāmi dakkhiṇeyyaggiṁ,
thag5.6:4.4	namassāmi tathāgataṁ.
thag5.6:5.1	Mohā sabbe pahīnā me,
thag5.6:5.2	bhavataṇhā padālitā;
thag5.6:5.3	Vikkhīṇo jātisaṁsāro,
thag5.6:5.4	natthi dāni punabbhavo”ti.
thag5.6:5.5	… Nadīkassapo thero ….
thag5.7:0.1	Theragāthā 5.7
thag5.7:0.2	Pañcakanipāta
thag5.7:0.3	Paṭhamavagga
thag5.7:0.4	Gayākassapattheragāthā
thag5.7:1.1	“Pāto majjhanhikaṁ sāyaṁ,
thag5.7:1.2	tikkhattuṁ divasassahaṁ;
thag5.7:1.3	Otariṁ udakaṁ sohaṁ,
thag5.7:1.4	gayāya gayaphagguyā.
thag5.7:2.1	‘Yaṁ mayā pakataṁ pāpaṁ,
thag5.7:2.2	pubbe aññāsu jātisu;
thag5.7:2.3	Taṁ dānīdha pavāhemi’,
thag5.7:2.4	evaṁdiṭṭhi pure ahuṁ.
thag5.7:3.1	Sutvā subhāsitaṁ vācaṁ,
thag5.7:3.2	dhammatthasahitaṁ padaṁ;
thag5.7:3.3	Tathaṁ yāthāvakaṁ atthaṁ,
thag5.7:3.4	yoniso paccavekkhisaṁ.
thag5.7:4.1	Ninhātasabbapāpomhi,
thag5.7:4.2	nimmalo payato suci;
thag5.7:4.3	Suddho suddhassa dāyādo,
thag5.7:4.4	putto buddhassa oraso.
thag5.7:5.1	Ogayhaṭṭhaṅgikaṁ sotaṁ,
thag5.7:5.2	sabbapāpaṁ pavāhayiṁ;
thag5.7:5.3	Tisso vijjā ajjhagamiṁ,
thag5.7:5.4	kataṁ buddhassa sāsanan”ti.
thag5.7:5.5	… Gayākassapo thero ….
thag5.8:0.1	Theragāthā 5.8
thag5.8:0.2	Pañcakanipāta
thag5.8:0.3	Paṭhamavagga
thag5.8:0.4	Vakkalittheragāthā
thag5.8:1.1	“Vātarogābhinīto tvaṁ,
thag5.8:1.2	viharaṁ kānane vane;
thag5.8:1.3	Paviṭṭhagocare lūkhe,
thag5.8:1.4	kathaṁ bhikkhu karissasi”.
thag5.8:2.1	“Pītisukhena vipulena,
thag5.8:2.2	pharamāno samussayaṁ;
thag5.8:2.3	Lūkhampi abhisambhonto,
thag5.8:2.4	viharissāmi kānane.
thag5.8:3.1	Bhāvento satipaṭṭhāne,
thag5.8:3.2	indriyāni balāni ca;
thag5.8:3.3	Bojjhaṅgāni ca bhāvento,
thag5.8:3.4	viharissāmi kānane.
thag5.8:4.1	Āraddhavīriye pahitatte,
thag5.8:4.2	Niccaṁ daḷhaparakkame;
thag5.8:4.3	Samagge sahite disvā,
thag5.8:4.4	Viharissāmi kānane.
thag5.8:5.1	Anussaranto sambuddhaṁ,
thag5.8:5.2	aggaṁ dantaṁ samāhitaṁ;
thag5.8:5.3	Atandito rattindivaṁ,
thag5.8:5.4	viharissāmi kānane”ti.
thag5.8:5.5	… Vakkalitthero ….
thag5.9:0.1	Theragāthā 5.9
thag5.9:0.2	Pañcakanipāta
thag5.9:0.3	Paṭhamavagga
thag5.9:0.4	Vijitasenattheragāthā
thag5.9:1.1	“Olaggessāmi te citta,
thag5.9:1.2	āṇidvāreva hatthinaṁ;
thag5.9:1.3	Na taṁ pāpe niyojessaṁ,
thag5.9:1.4	kāmajāla sarīraja.
thag5.9:2.1	Tvaṁ olaggo na gacchasi,
thag5.9:2.2	Dvāravivaraṁ gajova alabhanto;
thag5.9:2.3	Na ca cittakali punappunaṁ,
thag5.9:2.4	Pasakka pāparato carissasi.
thag5.9:3.1	Yathā kuñjaraṁ adantaṁ,
thag5.9:3.2	Navaggahamaṅkusaggaho;
thag5.9:3.3	Balavā āvatteti akāmaṁ,
thag5.9:3.4	Evaṁ āvattayissaṁ taṁ.
thag5.9:4.1	Yathā varahayadamakusalo,
thag5.9:4.2	Sārathi pavaro dameti ājaññaṁ;
thag5.9:4.3	Evaṁ damayissaṁ taṁ,
thag5.9:4.4	Patiṭṭhito pañcasu balesu.
thag5.9:5.1	Satiyā taṁ nibandhissaṁ,
thag5.9:5.2	Payutto te damessāmi;
thag5.9:5.3	Vīriyadhuraniggahito,
thag5.9:5.4	Na yito dūraṁ gamissase cittā”ti.
thag5.9:5.5	… Vijitaseno thero ….
thag5.10:0.1	Theragāthā 5.10
thag5.10:0.2	Pañcakanipāta
thag5.10:0.3	Paṭhamavagga
thag5.10:0.4	Yasadattattheragāthā
thag5.10:1.1	“Upārambhacitto dummedho,
thag5.10:1.2	suṇāti jinasāsanaṁ;
thag5.10:1.3	Ārakā hoti saddhammā,
thag5.10:1.4	nabhaso pathavī yathā.
thag5.10:2.1	Upārambhacitto dummedho,
thag5.10:2.2	suṇāti jinasāsanaṁ;
thag5.10:2.3	Parihāyati saddhammā,
thag5.10:2.4	kāḷapakkheva candimā.
thag5.10:3.1	Upārambhacitto dummedho,
thag5.10:3.2	suṇāti jinasāsanaṁ;
thag5.10:3.3	Parisussati saddhamme,
thag5.10:3.4	maccho appodake yathā.
thag5.10:4.1	Upārambhacitto dummedho,
thag5.10:4.2	suṇāti jinasāsanaṁ;
thag5.10:4.3	Na virūhati saddhamme,
thag5.10:4.4	khette bījaṁva pūtikaṁ.
thag5.10:5.1	Yo ca tuṭṭhena cittena,
thag5.10:5.2	suṇāti jinasāsanaṁ;
thag5.10:5.3	Khepetvā āsave sabbe,
thag5.10:5.4	sacchikatvā akuppataṁ;
thag5.10:5.5	Pappuyya paramaṁ santiṁ,
thag5.10:5.6	parinibbātināsavo”ti.
thag5.10:5.7	… Yasadatto thero ….
thag5.11:0.1	Theragāthā 5.11
thag5.11:0.2	Pañcakanipāta
thag5.11:0.3	Paṭhamavagga
thag5.11:0.4	Soṇakuṭikaṇṇattheragāthā
thag5.11:1.1	“Upasampadā ca me laddhā,
thag5.11:1.2	vimutto camhi anāsavo;
thag5.11:1.3	So ca me bhagavā diṭṭho,
thag5.11:1.4	vihāre ca sahāvasiṁ.
thag5.11:2.1	Bahudeva rattiṁ bhagavā,
thag5.11:2.2	abbhokāsetināmayi;
thag5.11:2.3	Vihārakusalo satthā,
thag5.11:2.4	vihāraṁ pāvisī tadā.
thag5.11:3.1	Santharitvāna saṅghāṭiṁ,
thag5.11:3.2	seyyaṁ kappesi gotamo;
thag5.11:3.3	Sīho selaguhāyaṁva,
thag5.11:3.4	pahīnabhayabheravo.
thag5.11:4.1	Tato kalyāṇavākkaraṇo,
thag5.11:4.2	sammāsambuddhasāvako;
thag5.11:4.3	Soṇo abhāsi saddhammaṁ,
thag5.11:4.4	buddhaseṭṭhassa sammukhā.
thag5.11:5.1	Pañcakkhandhe pariññāya,
thag5.11:5.2	Bhāvayitvāna añjasaṁ;
thag5.11:5.3	Pappuyya paramaṁ santiṁ,
thag5.11:5.4	Parinibbissatyanāsavo”ti.
thag5.11:5.5	… Soṇo kuṭikaṇṇatthero ….
thag5.12:0.1	Theragāthā 5.12
thag5.12:0.2	Pañcakanipāta
thag5.12:0.3	Paṭhamavagga
thag5.12:0.4	Kosiyattheragāthā
thag5.12:1.1	“Yo ve garūnaṁ vacanaññu dhīro,
thag5.12:1.2	Vase ca tamhi janayetha pemaṁ;
thag5.12:1.3	So bhattimā nāma ca hoti paṇḍito,
thag5.12:1.4	Ñatvā ca dhammesu visesi assa.
thag5.12:2.1	Yaṁ āpadā uppatitā uḷārā,
thag5.12:2.2	Nakkhambhayante paṭisaṅkhayantaṁ;
thag5.12:2.3	So thāmavā nāma ca hoti paṇḍito,
thag5.12:2.4	Ñatvā ca dhammesu visesi assa.
thag5.12:3.1	Yo ve samuddova ṭhito anejo,
thag5.12:3.2	Gambhīrapañño nipuṇatthadassī;
thag5.12:3.3	Asaṁhāriyo nāma ca hoti paṇḍito,
thag5.12:3.4	Ñatvā ca dhammesu visesi assa.
thag5.12:4.1	Bahussuto dhammadharo ca hoti,
thag5.12:4.2	Dhammassa hoti anudhammacārī;
thag5.12:4.3	So tādiso nāma ca hoti paṇḍito,
thag5.12:4.4	Ñatvā ca dhammesu visesi assa.
thag5.12:5.1	Atthañca yo jānāti bhāsitassa,
thag5.12:5.2	Atthañca ñatvāna tathā karoti;
thag5.12:5.3	Atthantaro nāma sa hoti paṇḍito,
thag5.12:5.4	Ñatvā ca dhammesu visesi assā”ti.
thag5.12:5.5	… Kosiyo thero ….
thag5.12:5.6	Pañcakanipāto niṭṭhito.
thag5.12:6.0	Tatruddānaṁ
thag5.12:6.1	Rājadatto subhūto ca,
thag5.12:6.2	girimānandasumanā;
thag5.12:6.3	Vaḍḍho ca kassapo thero,
thag5.12:6.4	gayākassapavakkalī.
thag5.12:7.1	Vijito yasadatto ca,
thag5.12:7.2	soṇo kosiyasavhayo;
thag5.12:7.3	Saṭṭhi ca pañca gāthāyo,
thag5.12:7.4	therā ca ettha dvādasāti.
thag6.1:0.1	Theragāthā 6.1
thag6.1:0.2	Chakkanipāta
thag6.1:0.3	Paṭhamavagga
thag6.1:0.4	Uruveḷakassapattheragāthā
thag6.1:1.1	“Disvāna pāṭihīrāni,
thag6.1:1.2	gotamassa yasassino;
thag6.1:1.3	Na tāvāhaṁ paṇipatiṁ,
thag6.1:1.4	issāmānena vañcito.
thag6.1:2.1	Mama saṅkappamaññāya,
thag6.1:2.2	codesi narasārathi;
thag6.1:2.3	Tato me āsi saṁvego,
thag6.1:2.4	abbhuto lomahaṁsano.
thag6.1:3.1	Pubbe jaṭilabhūtassa,
thag6.1:3.2	yā me siddhi parittikā;
thag6.1:3.3	Tāhaṁ tadā nirākatvā,
thag6.1:3.4	pabbajiṁ jinasāsane.
thag6.1:4.1	Pubbe yaññena santuṭṭho,
thag6.1:4.2	kāmadhātupurakkhato;
thag6.1:4.3	Pacchā rāgañca dosañca,
thag6.1:4.4	mohañcāpi samūhaniṁ.
thag6.1:5.1	Pubbenivāsaṁ jānāmi,
thag6.1:5.2	dibbacakkhu visodhitaṁ;
thag6.1:5.3	Iddhimā paracittaññū,
thag6.1:5.4	dibbasotañca pāpuṇiṁ.
thag6.1:6.1	Yassa catthāya pabbajito,
thag6.1:6.2	agārasmānagāriyaṁ;
thag6.1:6.3	So me attho anuppatto,
thag6.1:6.4	sabbasaṁyojanakkhayo”ti.
thag6.1:6.5	… Uruveḷakassapo thero ….
thag6.2:0.1	Theragāthā 6.2
thag6.2:0.2	Chakkanipāta
thag6.2:0.3	Paṭhamavagga
thag6.2:0.4	Tekicchakārittheragāthā
thag6.2:1.1	“Atihitā vīhi,
thag6.2:1.2	khalagatā sālī;
thag6.2:1.3	Na ca labhe piṇḍaṁ,
thag6.2:1.4	kathamahaṁ kassaṁ”.
thag6.2:2.1	“Buddhamappameyyaṁ anussara pasanno,
thag6.2:2.2	Pītiyā phuṭasarīro hohisi satatamudaggo.
thag6.2:3.1	Dhammamappameyyaṁ anussara pasanno,
thag6.2:3.2	Pītiyā phuṭasarīro hohisi satatamudaggo.
thag6.2:4.1	Saṅghamappameyyaṁ anussara pasanno,
thag6.2:4.2	Pītiyā phuṭasarīro hohisi satatamudaggo”.
thag6.2:5.1	“Abbhokāse viharasi,
thag6.2:5.2	Sītā hemantikā imā ratyo;
thag6.2:5.3	Mā sītena pareto vihaññittho,
thag6.2:5.4	Pavisa tvaṁ vihāraṁ phusitaggaḷaṁ”.
thag6.2:6.1	“Phusissaṁ catasso appamaññāyo,
thag6.2:6.2	Tāhi ca sukhito viharissaṁ;
thag6.2:6.3	Nāhaṁ sītena vihaññissaṁ,
thag6.2:6.4	Aniñjito viharanto”ti.
thag6.2:6.5	… Tekicchakārī thero ….
thag6.3:0.1	Theragāthā 6.3
thag6.3:0.2	Chakkanipāta
thag6.3:0.3	Paṭhamavagga
thag6.3:0.4	Mahānāgattheragāthā
thag6.3:1.1	“Yassa sabrahmacārīsu,
thag6.3:1.2	gāravo nūpalabbhati;
thag6.3:1.3	Parihāyati saddhammā,
thag6.3:1.4	maccho appodake yathā.
thag6.3:2.1	Yassa sabrahmacārīsu,
thag6.3:2.2	gāravo nūpalabbhati;
thag6.3:2.3	Na virūhati saddhamme,
thag6.3:2.4	khette bījaṁva pūtikaṁ.
thag6.3:3.1	Yassa sabrahmacārīsu,
thag6.3:3.2	gāravo nūpalabbhati;
thag6.3:3.3	Ārakā hoti nibbānā,
thag6.3:3.4	dhammarājassa sāsane.
thag6.3:4.1	Yassa sabrahmacārīsu,
thag6.3:4.2	gāravo upalabbhati;
thag6.3:4.3	Na vihāyati saddhammā,
thag6.3:4.4	maccho bavhodake yathā.
thag6.3:5.1	Yassa sabrahmacārīsu,
thag6.3:5.2	gāravo upalabbhati;
thag6.3:5.3	So virūhati saddhamme,
thag6.3:5.4	khette bījaṁva bhaddakaṁ.
thag6.3:6.1	Yassa sabrahmacārīsu,
thag6.3:6.2	gāravo upalabbhati;
thag6.3:6.3	Santike hoti nibbānaṁ,
thag6.3:6.4	dhammarājassa sāsane”ti.
thag6.3:6.5	… Mahānāgo thero ….
thag6.4:0.1	Theragāthā 6.4
thag6.4:0.2	Chakkanipāta
thag6.4:0.3	Paṭhamavagga
thag6.4:0.4	Kullattheragāthā
thag6.4:1.1	“Kullo sivathikaṁ gantvā,
thag6.4:1.2	addasa itthimujjhitaṁ;
thag6.4:1.3	Apaviddhaṁ susānasmiṁ,
thag6.4:1.4	khajjantiṁ kimihī phuṭaṁ.
thag6.4:2.1	Āturaṁ asuciṁ pūtiṁ,
thag6.4:2.2	passa kulla samussayaṁ;
thag6.4:2.3	Uggharantaṁ paggharantaṁ,
thag6.4:2.4	bālānaṁ abhinanditaṁ.
thag6.4:3.1	Dhammādāsaṁ gahetvāna,
thag6.4:3.2	ñāṇadassanapattiyā;
thag6.4:3.3	Paccavekkhiṁ imaṁ kāyaṁ,
thag6.4:3.4	tucchaṁ santarabāhiraṁ.
thag6.4:4.1	Yathā idaṁ tathā etaṁ,
thag6.4:4.2	yathā etaṁ tathā idaṁ;
thag6.4:4.3	Yathā adho tathā uddhaṁ,
thag6.4:4.4	yathā uddhaṁ tathā adho.
thag6.4:5.1	Yathā divā tathā rattiṁ,
thag6.4:5.2	yathā rattiṁ tathā divā;
thag6.4:5.3	Yathā pure tathā pacchā,
thag6.4:5.4	yathā pacchā tathā pure.
thag6.4:6.1	Pañcaṅgikena turiyena,
thag6.4:6.2	Na ratī hoti tādisī;
thag6.4:6.3	Yathā ekaggacittassa,
thag6.4:6.4	Sammā dhammaṁ vipassato”ti.
thag6.4:6.5	… Kullo thero ….
thag6.5:0.1	Theragāthā 6.5
thag6.5:0.2	Chakkanipāta
thag6.5:0.3	Paṭhamavagga
thag6.5:0.4	Mālukyaputtattheragāthā
thag6.5:1.1	“Manujassa pamattacārino,
thag6.5:1.2	Taṇhā vaḍḍhati māluvā viya;
thag6.5:1.3	So plavatī hurā huraṁ,
thag6.5:1.4	Phalamicchaṁva vanasmi vānaro.
thag6.5:2.1	Yaṁ esā sahate jammī,
thag6.5:2.2	taṇhā loke visattikā;
thag6.5:2.3	Sokā tassa pavaḍḍhanti,
thag6.5:2.4	abhivaṭṭhaṁva bīraṇaṁ.
thag6.5:3.1	Yo cetaṁ sahate jammiṁ,
thag6.5:3.2	taṇhaṁ loke duraccayaṁ;
thag6.5:3.3	Sokā tamhā papatanti,
thag6.5:3.4	udabindūva pokkharā.
thag6.5:4.1	Taṁ vo vadāmi bhaddaṁ vo,
thag6.5:4.2	yāvantettha samāgatā;
thag6.5:4.3	Taṇhāya mūlaṁ khaṇatha,
thag6.5:4.4	usīratthova bīraṇaṁ;
thag6.5:4.5	Mā vo naḷaṁva sotova,
thag6.5:4.6	māro bhañji punappunaṁ.
thag6.5:5.1	Karotha buddhavacanaṁ,
thag6.5:5.2	khaṇo vo mā upaccagā;
thag6.5:5.3	Khaṇātītā hi socanti,
thag6.5:5.4	nirayamhi samappitā.
thag6.5:6.1	Pamādo rajo pamādo,
thag6.5:6.2	pamādānupatito rajo;
thag6.5:6.3	Appamādena vijjāya,
thag6.5:6.4	abbahe sallamattano”ti.
thag6.5:6.5	… Mālukyaputto thero ….
thag6.6:0.1	Theragāthā 6.6
thag6.6:0.2	Chakkanipāta
thag6.6:0.3	Paṭhamavagga
thag6.6:0.4	Sappadāsattheragāthā
thag6.6:1.1	“Paṇṇavīsativassāni,
thag6.6:1.2	yato pabbajito ahaṁ;
thag6.6:1.3	Accharāsaṅghātamattampi,
thag6.6:1.4	cetosantimanajjhagaṁ.
thag6.6:2.1	Aladdhā cittassekaggaṁ,
thag6.6:2.2	kāmarāgena aṭṭito;
thag6.6:2.3	Bāhā paggayha kandanto,
thag6.6:2.4	vihārā upanikkhamiṁ.
thag6.6:3.1	Satthaṁ vā āharissāmi,
thag6.6:3.2	Ko attho jīvitena me;
thag6.6:3.3	Kathaṁ hi sikkhaṁ paccakkhaṁ,
thag6.6:3.4	Kālaṁ kubbetha mādiso.
thag6.6:4.1	Tadāhaṁ khuramādāya,
thag6.6:4.2	mañcakamhi upāvisiṁ;
thag6.6:4.3	Parinīto khuro āsi,
thag6.6:4.4	dhamaniṁ chettumattano.
thag6.6:5.1	Tato me manasīkāro,
thag6.6:5.2	yoniso udapajjatha;
thag6.6:5.3	Ādīnavo pāturahu,
thag6.6:5.4	nibbidā samatiṭṭhatha.
thag6.6:6.1	Tato cittaṁ vimucci me,
thag6.6:6.2	passa dhammasudhammataṁ;
thag6.6:6.3	Tisso vijjā anuppattā,
thag6.6:6.4	kataṁ buddhassa sāsanan”ti.
thag6.6:6.5	… Sappadāso thero ….
thag6.7:0.1	Theragāthā 6.7
thag6.7:0.2	Chakkanipāta
thag6.7:0.3	Paṭhamavagga
thag6.7:0.4	Kātiyānattheragāthā
thag6.7:1.1	“Uṭṭhehi nisīda kātiyāna,
thag6.7:1.2	Mā niddābahulo ahu jāgarassu;
thag6.7:1.3	Mā taṁ alasaṁ pamattabandhu,
thag6.7:1.4	Kūṭeneva jinātu maccurājā.
thag6.7:2.1	Seyyathāpi mahāsamuddavego,
thag6.7:2.2	Evaṁ jātijarātivattate taṁ;
thag6.7:2.3	So karohi sudīpamattano tvaṁ,
thag6.7:2.4	Na hi tāṇaṁ tava vijjateva aññaṁ.
thag6.7:3.1	Satthā hi vijesi maggametaṁ,
thag6.7:3.2	Saṅgā jātijarābhayā atītaṁ;
thag6.7:3.3	Pubbāpararattamappamatto,
thag6.7:3.4	Anuyuñjassu daḷhaṁ karohi yogaṁ.
thag6.7:4.1	Purimāni pamuñca bandhanāni,
thag6.7:4.2	Saṅghāṭikhuramuṇḍabhikkhabhojī;
thag6.7:4.3	Mā khiḍḍāratiñca mā niddaṁ,
thag6.7:4.4	Anuyuñjittha jhāya kātiyāna.
thag6.7:5.1	Jhāyāhi jināhi kātiyāna,
thag6.7:5.2	Yogakkhemapathesu kovidosi;
thag6.7:5.3	Pappuyya anuttaraṁ visuddhiṁ,
thag6.7:5.4	Parinibbāhisi vārināva joti.
thag6.7:6.1	Pajjotakaro parittaraṁso,
thag6.7:6.2	Vātena vinamyate latāva;
thag6.7:6.3	Evampi tuvaṁ anādiyāno,
thag6.7:6.4	Māraṁ indasagotta niddhunāhi;
thag6.7:6.5	So vedayitāsu vītarāgo,
thag6.7:6.6	Kālaṁ kaṅkha idheva sītibhūto”ti.
thag6.7:6.7	… Kātiyāno thero ….
thag6.8:0.1	Theragāthā 6.8
thag6.8:0.2	Chakkanipāta
thag6.8:0.3	Paṭhamavagga
thag6.8:0.4	Migajālattheragāthā
thag6.8:1.1	“Sudesito cakkhumatā,
thag6.8:1.2	buddhenādiccabandhunā;
thag6.8:1.3	Sabbasaṁyojanātīto,
thag6.8:1.4	sabbavaṭṭavināsano.
thag6.8:2.1	Niyyāniko uttaraṇo,
thag6.8:2.2	taṇhāmūlavisosano;
thag6.8:2.3	Visamūlaṁ āghātanaṁ,
thag6.8:2.4	chetvā pāpeti nibbutiṁ.
thag6.8:3.1	Aññāṇamūlabhedāya,
thag6.8:3.2	kammayantavighāṭano;
thag6.8:3.3	Viññāṇānaṁ pariggahe,
thag6.8:3.4	ñāṇavajiranipātano.
thag6.8:4.1	Vedanānaṁ viññāpano,
thag6.8:4.2	upādānappamocano;
thag6.8:4.3	Bhavaṁ aṅgārakāsuṁva,
thag6.8:4.4	ñāṇena anupassano.
thag6.8:5.1	Mahāraso sugambhīro,
thag6.8:5.2	jarāmaccunivāraṇo;
thag6.8:5.3	Ariyo aṭṭhaṅgiko maggo,
thag6.8:5.4	dukkhūpasamano sivo.
thag6.8:6.1	Kammaṁ kammanti ñatvāna,
thag6.8:6.2	vipākañca vipākato;
thag6.8:6.3	Paṭiccuppannadhammānaṁ,
thag6.8:6.4	yathāvālokadassano;
thag6.8:6.5	Mahākhemaṅgamo santo,
thag6.8:6.6	pariyosānabhaddako”ti.
thag6.8:6.7	… Migajālo thero ….
thag6.9:0.1	Theragāthā 6.9
thag6.9:0.2	Chakkanipāta
thag6.9:0.3	Paṭhamavagga
thag6.9:0.4	Purohitaputtajentattheragāthā
thag6.9:1.1	“Jātimadena mattohaṁ,
thag6.9:1.2	bhogaissariyena ca;
thag6.9:1.3	Saṇṭhānavaṇṇarūpena,
thag6.9:1.4	madamatto acārihaṁ.
thag6.9:2.1	Nāttano samakaṁ kañci,
thag6.9:2.2	atirekaṁ ca maññisaṁ;
thag6.9:2.3	Atimānahato bālo,
thag6.9:2.4	patthaddho ussitaddhajo.
thag6.9:3.1	Mātaraṁ pitarañcāpi,
thag6.9:3.2	aññepi garusammate;
thag6.9:3.3	Na kañci abhivādesiṁ,
thag6.9:3.4	mānatthaddho anādaro.
thag6.9:4.1	Disvā vināyakaṁ aggaṁ,
thag6.9:4.2	sārathīnaṁ varuttamaṁ;
thag6.9:4.3	Tapantamiva ādiccaṁ,
thag6.9:4.4	bhikkhusaṅghapurakkhataṁ.
thag6.9:5.1	Mānaṁ madañca chaḍḍetvā,
thag6.9:5.2	vippasannena cetasā;
thag6.9:5.3	Sirasā abhivādesiṁ,
thag6.9:5.4	sabbasattānamuttamaṁ.
thag6.9:6.1	Atimāno ca omāno,
thag6.9:6.2	pahīnā susamūhatā;
thag6.9:6.3	Asmimāno samucchinno,
thag6.9:6.4	sabbe mānavidhā hatā”ti.
thag6.9:6.5	… Jento purohitaputto thero ….
thag6.10:0.1	Theragāthā 6.10
thag6.10:0.2	Chakkanipāta
thag6.10:0.3	Paṭhamavagga
thag6.10:0.4	Sumanattheragāthā
thag6.10:1.1	“Yadā navo pabbajito,
thag6.10:1.2	jātiyā sattavassiko;
thag6.10:1.3	Iddhiyā abhibhotvāna,
thag6.10:1.4	pannagindaṁ mahiddhikaṁ.
thag6.10:2.1	Upajjhāyassa udakaṁ,
thag6.10:2.2	anotattā mahāsarā;
thag6.10:2.3	Āharāmi tato disvā,
thag6.10:2.4	maṁ satthā etadabravi”.
thag6.10:3.1	“Sāriputta imaṁ passa,
thag6.10:3.2	āgacchantaṁ kumārakaṁ;
thag6.10:3.3	Udakakumbhamādāya,
thag6.10:3.4	ajjhattaṁ susamāhitaṁ.
thag6.10:4.1	Pāsādikena vattena,
thag6.10:4.2	kalyāṇairiyāpatho;
thag6.10:4.3	Sāmaṇeronuruddhassa,
thag6.10:4.4	iddhiyā ca visārado.
thag6.10:5.1	Ājānīyena ājañño,
thag6.10:5.2	sādhunā sādhukārito;
thag6.10:5.3	Vinīto anuruddhena,
thag6.10:5.4	katakiccena sikkhito.
thag6.10:6.1	So patvā paramaṁ santiṁ,
thag6.10:6.2	sacchikatvā akuppataṁ;
thag6.10:6.3	Sāmaṇero sa sumano,
thag6.10:6.4	mā maṁ jaññāti icchatī”ti.
thag6.10:6.5	… Sumano thero ….
thag6.11:0.1	Theragāthā 6.11
thag6.11:0.2	Chakkanipāta
thag6.11:0.3	Paṭhamavagga
thag6.11:0.4	Nhātakamunittheragāthā
thag6.11:1.1	“Vātarogābhinīto tvaṁ,
thag6.11:1.2	viharaṁ kānane vane;
thag6.11:1.3	Paviddhagocare lūkhe,
thag6.11:1.4	kathaṁ bhikkhu karissasi”.
thag6.11:2.1	“Pītisukhena vipulena,
thag6.11:2.2	pharitvāna samussayaṁ;
thag6.11:2.3	Lūkhampi abhisambhonto,
thag6.11:2.4	viharissāmi kānane.
thag6.11:3.1	Bhāvento satta bojjhaṅge,
thag6.11:3.2	indriyāni balāni ca;
thag6.11:3.3	Jhānasokhummasampanno,
thag6.11:3.4	viharissaṁ anāsavo.
thag6.11:4.1	Vippamuttaṁ kilesehi,
thag6.11:4.2	suddhacittaṁ anāvilaṁ;
thag6.11:4.3	Abhiṇhaṁ paccavekkhanto,
thag6.11:4.4	viharissaṁ anāsavo.
thag6.11:5.1	Ajjhattañca bahiddhā ca,
thag6.11:5.2	ye me vijjiṁsu āsavā;
thag6.11:5.3	Sabbe asesā ucchinnā,
thag6.11:5.4	na ca uppajjare puna.
thag6.11:6.1	Pañcakkhandhā pariññātā,
thag6.11:6.2	tiṭṭhanti chinnamūlakā;
thag6.11:6.3	Dukkhakkhayo anuppatto,
thag6.11:6.4	natthi dāni punabbhavo”ti.
thag6.11:6.5	… Nhātakamunitthero ….
thag6.12:0.1	Theragāthā 6.12
thag6.12:0.2	Chakkanipāta
thag6.12:0.3	Paṭhamavagga
thag6.12:0.4	Brahmadattattheragāthā
thag6.12:1.1	“Akkodhassa kuto kodho,
thag6.12:1.2	dantassa samajīvino;
thag6.12:1.3	Sammadaññāvimuttassa,
thag6.12:1.4	upasantassa tādino.
thag6.12:2.1	Tasseva tena pāpiyo,
thag6.12:2.2	yo kuddhaṁ paṭikujjhati;
thag6.12:2.3	Kuddhaṁ appaṭikujjhanto,
thag6.12:2.4	saṅgāmaṁ jeti dujjayaṁ.
thag6.12:3.1	Ubhinnamatthaṁ carati,
thag6.12:3.2	attano ca parassa ca;
thag6.12:3.3	Paraṁ saṅkupitaṁ ñatvā,
thag6.12:3.4	yo sato upasammati.
thag6.12:4.1	Ubhinnaṁ tikicchantaṁ taṁ,
thag6.12:4.2	attano ca parassa ca;
thag6.12:4.3	Janā maññanti bāloti,
thag6.12:4.4	ye dhammassa akovidā.
thag6.12:5.1	Uppajje te sace kodho,
thag6.12:5.2	āvajja kakacūpamaṁ;
thag6.12:5.3	Uppajje ce rase taṇhā,
thag6.12:5.4	puttamaṁsūpamaṁ sara.
thag6.12:6.1	Sace dhāvati cittaṁ te,
thag6.12:6.2	kāmesu ca bhavesu ca;
thag6.12:6.3	Khippaṁ niggaṇha satiyā,
thag6.12:6.4	kiṭṭhādaṁ viya duppasun”ti.
thag6.12:6.5	… Brahmadatto thero ….
thag6.13:0.1	Theragāthā 6.13
thag6.13:0.2	Chakkanipāta
thag6.13:0.3	Paṭhamavagga
thag6.13:0.4	Sirimaṇḍattheragāthā
thag6.13:1.1	“Channamativassati,
thag6.13:1.2	vivaṭaṁ nātivassati;
thag6.13:1.3	Tasmā channaṁ vivaretha,
thag6.13:1.4	evaṁ taṁ nātivassati.
thag6.13:2.1	Maccunābbhahato loko,
thag6.13:2.2	jarāya parivārito;
thag6.13:2.3	Taṇhāsallena otiṇṇo,
thag6.13:2.4	icchādhūpāyito sadā.
thag6.13:3.1	Maccunābbhahato loko,
thag6.13:3.2	parikkhitto jarāya ca;
thag6.13:3.3	Haññati niccamattāṇo,
thag6.13:3.4	pattadaṇḍova takkaro.
thag6.13:4.1	Āgacchantaggikhandhāva,
thag6.13:4.2	maccu byādhi jarā tayo;
thag6.13:4.3	Paccuggantuṁ balaṁ natthi,
thag6.13:4.4	javo natthi palāyituṁ.
thag6.13:5.1	Amoghaṁ divasaṁ kayirā,
thag6.13:5.2	appena bahukena vā;
thag6.13:5.3	Yaṁ yaṁ vijahate rattiṁ,
thag6.13:5.4	tadūnaṁ tassa jīvitaṁ.
thag6.13:6.1	Carato tiṭṭhato vāpi,
thag6.13:6.2	āsīnasayanassa vā;
thag6.13:6.3	Upeti carimā ratti,
thag6.13:6.4	na te kālo pamajjitun”ti.
thag6.13:6.5	… Sirimaṇḍo thero ….
thag6.14:0.1	Theragāthā 6.14
thag6.14:0.2	Chakkanipāta
thag6.14:0.3	Paṭhamavagga
thag6.14:0.4	Sabbakāmittheragāthā
thag6.14:1.1	“Dvipādakoyaṁ asuci,
thag6.14:1.2	duggandho parihīrati;
thag6.14:1.3	Nānākuṇapaparipūro,
thag6.14:1.4	vissavanto tato tato.
thag6.14:2.1	Migaṁ nilīnaṁ kūṭena,
thag6.14:2.2	baḷiseneva ambujaṁ;
thag6.14:2.3	Vānaraṁ viya lepena,
thag6.14:2.4	bādhayanti puthujjanaṁ.
thag6.14:3.1	Rūpā saddā rasā gandhā,
thag6.14:3.2	phoṭṭhabbā ca manoramā;
thag6.14:3.3	Pañca kāmaguṇā ete,
thag6.14:3.4	itthirūpasmi dissare.
thag6.14:4.1	Ye etā upasevanti,
thag6.14:4.2	rattacittā puthujjanā;
thag6.14:4.3	Vaḍḍhenti kaṭasiṁ ghoraṁ,
thag6.14:4.4	ācinanti punabbhavaṁ.
thag6.14:5.1	Yo cetā parivajjeti,
thag6.14:5.2	sappasseva padā siro;
thag6.14:5.3	Somaṁ visattikaṁ loke,
thag6.14:5.4	sato samativattati.
thag6.14:6.1	Kāmesvādīnavaṁ disvā,
thag6.14:6.2	nekkhammaṁ daṭṭhu khemato;
thag6.14:6.3	Nissaṭo sabbakāmehi,
thag6.14:6.4	patto me āsavakkhayo”ti.
thag6.14:6.5	… Sabbakāmitthero ….
thag6.14:6.6	Chakkanipāto niṭṭhito.
thag6.14:7.0	Tatruddānaṁ
thag6.14:7.1	Uruveḷakassapo ca,
thag6.14:7.2	thero tekicchakāri ca;
thag6.14:7.3	Mahānāgo ca kullo ca,
thag6.14:7.4	mālukyo sappadāsako;
thag6.14:7.5	Kātiyāno migajālo,
thag6.14:7.6	jento sumanasavhayo;
thag6.14:7.7	Nhātamuni brahmadatto,
thag6.14:7.8	sirimaṇḍo sabbakāmī ca;
thag6.14:7.9	Gāthāyo caturāsīti,
thag6.14:7.10	therā cettha catuddasāti.
thag7.1:0.1	Theragāthā 7.1
thag7.1:0.2	Sattakanipāta
thag7.1:0.3	Paṭhamavagga
thag7.1:0.4	Sundarasamuddattheragāthā
thag7.1:1.1	“Alaṅkatā suvasanā,
thag7.1:1.2	māladhārī vibhūsitā;
thag7.1:1.3	Alattakakatāpādā,
thag7.1:1.4	pādukāruyha vesikā.
thag7.1:2.1	Pādukā oruhitvāna,
thag7.1:2.2	purato pañjalīkatā;
thag7.1:2.3	Sā maṁ saṇhena mudunā,
thag7.1:2.4	mhitapubbaṁ abhāsatha.
thag7.1:3.1	Yuvāsi tvaṁ pabbajito,
thag7.1:3.2	tiṭṭhāhi mama sāsane;
thag7.1:3.3	Bhuñja mānusake kāme,
thag7.1:3.4	ahaṁ vittaṁ dadāmi te;
thag7.1:3.5	Saccaṁ te paṭijānāmi,
thag7.1:3.6	aggiṁ vā te harāmahaṁ.
thag7.1:4.1	Yadā jiṇṇā bhavissāma,
thag7.1:4.2	ubho daṇḍaparāyanā;
thag7.1:4.3	Ubhopi pabbajissāma,
thag7.1:4.4	ubhayattha kaṭaggaho.
thag7.1:5.1	Tañca disvāna yācantiṁ,
thag7.1:5.2	vesikaṁ pañjalīkataṁ;
thag7.1:5.3	Alaṅkataṁ suvasanaṁ,
thag7.1:5.4	maccupāsaṁva oḍḍitaṁ.
thag7.1:6.1	Tato me manasīkāro,
thag7.1:6.2	… pe
thag7.1:6.3	…
thag7.1:6.4	nibbidā samatiṭṭhatha.
thag7.1:7.1	Tato cittaṁ vimucci me,
thag7.1:7.2	… pe
thag7.1:7.3	…
thag7.1:7.4	kataṁ buddhassa sāsanan”ti.
thag7.1:7.5	… Sundarasamuddo thero ….
thag7.2:0.1	Theragāthā 7.2
thag7.2:0.2	Sattakanipāta
thag7.2:0.3	Paṭhamavagga
thag7.2:0.4	Lakuṇḍakabhaddiyattheragāthā
thag7.2:1.1	“Pare ambāṭakārāme,
thag7.2:1.2	vanasaṇḍamhi bhaddiyo;
thag7.2:1.3	Samūlaṁ taṇhamabbuyha,
thag7.2:1.4	tattha bhaddova jhāyati.
thag7.2:2.1	Ramanteke mudiṅgehi,
thag7.2:2.2	vīṇāhi paṇavehi ca;
thag7.2:2.3	Ahañca rukkhamūlasmiṁ,
thag7.2:2.4	rato buddhassa sāsane.
thag7.2:3.1	Buddho ce me varaṁ dajjā,
thag7.2:3.2	so ca labbhetha me varo;
thag7.2:3.3	Gaṇhehaṁ sabbalokassa,
thag7.2:3.4	niccaṁ kāyagataṁ satiṁ.
thag7.2:4.1	Ye maṁ rūpena pāmiṁsu,
thag7.2:4.2	ye ca ghosena anvagū;
thag7.2:4.3	Chandarāgavasūpetā,
thag7.2:4.4	na maṁ jānanti te janā.
thag7.2:5.1	Ajjhattañca na jānāti,
thag7.2:5.2	bahiddhā ca na passati;
thag7.2:5.3	Samantāvaraṇo bālo,
thag7.2:5.4	sa ve ghosena vuyhati.
thag7.2:6.1	Ajjhattañca na jānāti,
thag7.2:6.2	bahiddhā ca vipassati;
thag7.2:6.3	Bahiddhā phaladassāvī,
thag7.2:6.4	sopi ghosena vuyhati.
thag7.2:7.1	Ajjhattañca pajānāti,
thag7.2:7.2	bahiddhā ca vipassati;
thag7.2:7.3	Anāvaraṇadassāvī,
thag7.2:7.4	na so ghosena vuyhatī”ti.
thag7.2:7.5	… Lakuṇḍakabhaddiyo thero ….
thag7.3:0.1	Theragāthā 7.3
thag7.3:0.2	Sattakanipāta
thag7.3:0.3	Paṭhamavagga
thag7.3:0.4	Bhaddattheragāthā
thag7.3:1.1	“Ekaputto ahaṁ āsiṁ,
thag7.3:1.2	piyo mātu piyo pitu;
thag7.3:1.3	Bahūhi vatacariyāhi,
thag7.3:1.4	laddho āyācanāhi ca.
thag7.3:2.1	Te ca maṁ anukampāya,
thag7.3:2.2	atthakāmā hitesino;
thag7.3:2.3	Ubho pitā ca mātā ca,
thag7.3:2.4	buddhassa upanāmayuṁ.
thag7.3:3.1	‘Kicchā laddho ayaṁ putto,
thag7.3:3.2	sukhumālo sukhedhito;
thag7.3:3.3	Imaṁ dadāma te nātha,
thag7.3:3.4	jinassa paricārakaṁ’.
thag7.3:4.1	Satthā ca maṁ paṭiggayha,
thag7.3:4.2	ānandaṁ etadabravi;
thag7.3:4.3	‘Pabbājehi imaṁ khippaṁ,
thag7.3:4.4	hessatyājāniyo ayaṁ’.
thag7.3:5.1	Pabbājetvāna maṁ satthā,
thag7.3:5.2	vihāraṁ pāvisī jino;
thag7.3:5.3	Anoggatasmiṁ sūriyasmiṁ,
thag7.3:5.4	tato cittaṁ vimucci me.
thag7.3:6.1	Tato satthā nirākatvā,
thag7.3:6.2	paṭisallānavuṭṭhito;
thag7.3:6.3	‘Ehi bhaddā’ti maṁ āha,
thag7.3:6.4	sā me āsūpasampadā.
thag7.3:7.1	Jātiyā sattavassena,
thag7.3:7.2	laddhā me upasampadā;
thag7.3:7.3	Tisso vijjā anuppattā,
thag7.3:7.4	aho dhammasudhammatā”ti.
thag7.3:7.5	… Bhaddo thero ….
thag7.4:0.1	Theragāthā 7.4
thag7.4:0.2	Sattakanipāta
thag7.4:0.3	Paṭhamavagga
thag7.4:0.4	Sopākattheragāthā
thag7.4:1.1	“Disvā pāsādachāyāyaṁ,
thag7.4:1.2	caṅkamantaṁ naruttamaṁ;
thag7.4:1.3	Tattha naṁ upasaṅkamma,
thag7.4:1.4	vandissaṁ purisuttamaṁ.
thag7.4:2.1	Ekaṁsaṁ cīvaraṁ katvā,
thag7.4:2.2	saṁharitvāna pāṇayo;
thag7.4:2.3	Anucaṅkamissaṁ virajaṁ,
thag7.4:2.4	sabbasattānamuttamaṁ.
thag7.4:3.1	Tato pañhe apucchi maṁ,
thag7.4:3.2	pañhānaṁ kovido vidū;
thag7.4:3.3	Acchambhī ca abhīto ca,
thag7.4:3.4	byākāsiṁ satthuno ahaṁ.
thag7.4:4.1	Vissajjitesu pañhesu,
thag7.4:4.2	anumodi tathāgato;
thag7.4:4.3	Bhikkhusaṅghaṁ viloketvā,
thag7.4:4.4	imamatthaṁ abhāsatha.
thag7.4:5.1	‘Lābhā aṅgānaṁ magadhānaṁ,
thag7.4:5.2	Yesāyaṁ paribhuñjati;
thag7.4:5.3	Cīvaraṁ piṇḍapātañca,
thag7.4:5.4	Paccayaṁ sayanāsanaṁ;
thag7.4:5.5	Paccuṭṭhānañca sāmīciṁ,
thag7.4:5.6	Tesaṁ lābhāti cābravi.
thag7.4:6.1	Ajjatagge maṁ sopāka,
thag7.4:6.2	dassanāyopasaṅkama;
thag7.4:6.3	Esā ceva te sopāka,
thag7.4:6.4	bhavatu upasampadā’.
thag7.4:7.1	Jātiyā sattavassohaṁ,
thag7.4:7.2	laddhāna upasampadaṁ;
thag7.4:7.3	Dhāremi antimaṁ dehaṁ,
thag7.4:7.4	aho dhammasudhammatā”ti.
thag7.4:7.5	… Sopāko thero ….
thag7.5:0.1	Theragāthā 7.5
thag7.5:0.2	Sattakanipāta
thag7.5:0.3	Paṭhamavagga
thag7.5:0.4	Sarabhaṅgattheragāthā
thag7.5:1.1	“Sare hatthehi bhañjitvā,
thag7.5:1.2	katvāna kuṭimacchisaṁ;
thag7.5:1.3	Tena me sarabhaṅgoti,
thag7.5:1.4	nāmaṁ sammutiyā ahu.
thag7.5:2.1	Na mayhaṁ kappate ajja,
thag7.5:2.2	sare hatthehi bhañjituṁ;
thag7.5:2.3	Sikkhāpadā no paññattā,
thag7.5:2.4	gotamena yasassinā.
thag7.5:3.1	Sakalaṁ samattaṁ rogaṁ,
thag7.5:3.2	Sarabhaṅgo nāddasaṁ pubbe;
thag7.5:3.3	Soyaṁ rogo diṭṭho,
thag7.5:3.4	Vacanakarenātidevassa.
thag7.5:4.1	Yeneva maggena gato vipassī,
thag7.5:4.2	Yeneva maggena sikhī ca vessabhū;
thag7.5:4.3	Kakusandhakoṇāgamano ca kassapo,
thag7.5:4.4	Tenañjasena agamāsi gotamo.
thag7.5:5.1	Vītataṇhā anādānā,
thag7.5:5.2	satta buddhā khayogadhā;
thag7.5:5.3	Yehāyaṁ desito dhammo,
thag7.5:5.4	dhammabhūtehi tādibhi.
thag7.5:6.1	Cattāri ariyasaccāni,
thag7.5:6.2	anukampāya pāṇinaṁ;
thag7.5:6.3	Dukkhaṁ samudayo maggo,
thag7.5:6.4	nirodho dukkhasaṅkhayo.
thag7.5:7.1	Yasmiṁ nivattate dukkhaṁ,
thag7.5:7.2	saṁsārasmiṁ anantakaṁ;
thag7.5:7.3	Bhedā imassa kāyassa,
thag7.5:7.4	jīvitassa ca saṅkhayā;
thag7.5:7.5	Añño punabbhavo natthi,
thag7.5:7.6	suvimuttomhi sabbadhī”ti.
thag7.5:7.7	… Sarabhaṅgo thero …
thag7.5:7.8	Sattakanipāto niṭṭhito.
thag7.5:8.0	Tatruddānaṁ
thag7.5:8.1	Sundarasamuddo thero,
thag7.5:8.2	thero lakuṇḍabhaddiyo;
thag7.5:8.3	Bhaddo thero ca sopāko,
thag7.5:8.4	sarabhaṅgo mahāisi;
thag7.5:8.5	Sattake pañcakā therā,
thag7.5:8.6	gāthāyo pañcatiṁsatīti.
thag8.1:0.1	Theragāthā 8.1
thag8.1:0.2	Aṭṭhakanipāta
thag8.1:0.3	Paṭhamavagga
thag8.1:0.4	Mahākaccāyanattheragāthā
thag8.1:1.1	“Kammaṁ bahukaṁ na kāraye,
thag8.1:1.2	Parivajjeyya janaṁ na uyyame;
thag8.1:1.3	So ussukko rasānugiddho,
thag8.1:1.4	Atthaṁ riñcati yo sukhādhivāho.
thag8.1:2.1	Paṅkoti hi naṁ avedayuṁ,
thag8.1:2.2	Yāyaṁ vandanapūjanā kulesu;
thag8.1:2.3	Sukhumaṁ sallaṁ durubbahaṁ,
thag8.1:2.4	Sakkāro kāpurisena dujjaho.
thag8.1:3.1	Na parassupanidhāya,
thag8.1:3.2	kammaṁ maccassa pāpakaṁ;
thag8.1:3.3	Attanā taṁ na seveyya,
thag8.1:3.4	kammabandhū hi mātiyā.
thag8.1:4.1	Na pare vacanā coro,
thag8.1:4.2	na pare vacanā muni;
thag8.1:4.3	Attā ca naṁ yathāvedi,
thag8.1:4.4	devāpi naṁ tathā vidū.
thag8.1:5.1	Pare ca na vijānanti,
thag8.1:5.2	mayamettha yamāmase;
thag8.1:5.3	Ye ca tattha vijānanti,
thag8.1:5.4	tato sammanti medhagā.
thag8.1:6.1	Jīvate vāpi sappañño,
thag8.1:6.2	api vittaparikkhayo;
thag8.1:6.3	Paññāya ca alābhena,
thag8.1:6.4	vittavāpi na jīvati.
thag8.1:7.1	Sabbaṁ suṇāti sotena,
thag8.1:7.2	sabbaṁ passati cakkhunā;
thag8.1:7.3	Na ca diṭṭhaṁ sutaṁ dhīro,
thag8.1:7.4	sabbaṁ ujjhitumarahati.
thag8.1:8.1	Cakkhumāssa yathā andho,
thag8.1:8.2	sotavā badhiro yathā;
thag8.1:8.3	Paññavāssa yathā mūgo,
thag8.1:8.4	balavā dubbaloriva;
thag8.1:8.5	Atha atthe samuppanne,
thag8.1:8.6	sayetha matasāyikan”ti.
thag8.1:8.7	… Mahākaccāyano thero ….
thag8.2:0.1	Theragāthā 8.2
thag8.2:0.2	Aṭṭhakanipāta
thag8.2:0.3	Paṭhamavagga
thag8.2:0.4	Sirimittattheragāthā
thag8.2:1.1	“Akkodhanonupanāhī,
thag8.2:1.2	amāyo rittapesuṇo;
thag8.2:1.3	Sa ve tādisako bhikkhu,
thag8.2:1.4	evaṁ pecca na socati.
thag8.2:2.1	Akkodhanonupanāhī,
thag8.2:2.2	amāyo rittapesuṇo;
thag8.2:2.3	Guttadvāro sadā bhikkhu,
thag8.2:2.4	evaṁ pecca na socati.
thag8.2:3.1	Akkodhanonupanāhī,
thag8.2:3.2	amāyo rittapesuṇo;
thag8.2:3.3	Kalyāṇasīlo so bhikkhu,
thag8.2:3.4	evaṁ pecca na socati.
thag8.2:4.1	Akkodhanonupanāhī,
thag8.2:4.2	amāyo rittapesuṇo;
thag8.2:4.3	Kalyāṇamitto so bhikkhu,
thag8.2:4.4	evaṁ pecca na socati.
thag8.2:5.1	Akkodhanonupanāhī,
thag8.2:5.2	amāyo rittapesuṇo;
thag8.2:5.3	Kalyāṇapañño so bhikkhu,
thag8.2:5.4	evaṁ pecca na socati.
thag8.2:6.1	Yassa saddhā tathāgate,
thag8.2:6.2	acalā suppatiṭṭhitā;
thag8.2:6.3	Sīlañca yassa kalyāṇaṁ,
thag8.2:6.4	ariyakantaṁ pasaṁsitaṁ.
thag8.2:7.1	Saṅghe pasādo yassatthi,
thag8.2:7.2	ujubhūtañca dassanaṁ;
thag8.2:7.3	‘Adaliddo’ti taṁ āhu,
thag8.2:7.4	amoghaṁ tassa jīvitaṁ.
thag8.2:8.1	Tasmā saddhañca sīlañca,
thag8.2:8.2	pasādaṁ dhammadassanaṁ;
thag8.2:8.3	Anuyuñjetha medhāvī,
thag8.2:8.4	saraṁ buddhāna sāsanan”ti.
thag8.2:8.5	… Sirimitto thero ….
thag8.3:0.1	Theragāthā 8.3
thag8.3:0.2	Aṭṭhakanipāta
thag8.3:0.3	Paṭhamavagga
thag8.3:0.4	Mahāpanthakattheragāthā
thag8.3:1.1	“Yadā paṭhamamaddakkhiṁ,
thag8.3:1.2	satthāramakutobhayaṁ;
thag8.3:1.3	Tato me ahu saṁvego,
thag8.3:1.4	passitvā purisuttamaṁ.
thag8.3:2.1	Siriṁ hatthehi pādehi,
thag8.3:2.2	yo paṇāmeyya āgataṁ;
thag8.3:2.3	Etādisaṁ so satthāraṁ,
thag8.3:2.4	ārādhetvā virādhaye.
thag8.3:3.1	Tadāhaṁ puttadārañca,
thag8.3:3.2	dhanadhaññañca chaḍḍayiṁ;
thag8.3:3.3	Kesamassūni chedetvā,
thag8.3:3.4	pabbajiṁ anagāriyaṁ.
thag8.3:4.1	Sikkhāsājīvasampanno,
thag8.3:4.2	indriyesu susaṁvuto;
thag8.3:4.3	Namassamāno sambuddhaṁ,
thag8.3:4.4	vihāsiṁ aparājito.
thag8.3:5.1	Tato me paṇidhī āsi,
thag8.3:5.2	cetaso abhipatthito;
thag8.3:5.3	Na nisīde muhuttampi,
thag8.3:5.4	taṇhāsalle anūhate.
thag8.3:6.1	Tassa mevaṁ viharato,
thag8.3:6.2	passa vīriyaparakkamaṁ;
thag8.3:6.3	Tisso vijjā anuppattā,
thag8.3:6.4	kataṁ buddhassa sāsanaṁ.
thag8.3:7.1	Pubbenivāsaṁ jānāmi,
thag8.3:7.2	dibbacakkhu visodhitaṁ;
thag8.3:7.3	Arahā dakkhiṇeyyomhi,
thag8.3:7.4	vippamutto nirūpadhi.
thag8.3:8.1	Tato ratyā vivasāne,
thag8.3:8.2	sūriyuggamanaṁ pati;
thag8.3:8.3	Sabbaṁ taṇhaṁ visosetvā,
thag8.3:8.4	pallaṅkena upāvisin”ti.
thag8.3:8.5	… Mahāpanthako thero …
thag8.3:8.6	Aṭṭhakanipāto niṭṭhito.
thag8.3:9.0	Tatruddānaṁ
thag8.3:9.1	Mahākaccāyano thero,
thag8.3:9.2	sirimitto mahāpanthako;
thag8.3:9.3	Ete aṭṭhanipātamhi,
thag8.3:9.4	gāthāyo catuvīsatīti.
thag9.1:0.1	Theragāthā 9.1
thag9.1:0.2	Navakanipāta
thag9.1:0.3	Paṭhamavagga
thag9.1:0.4	Bhūtattheragāthā
thag9.1:1.1	“Yadā dukkhaṁ jarāmaraṇanti paṇḍito,
thag9.1:1.2	Aviddasū yattha sitā puthujjanā;
thag9.1:1.3	Dukkhaṁ pariññāya satova jhāyati,
thag9.1:1.4	Tato ratiṁ paramataraṁ na vindati.
thag9.1:2.1	Yadā dukkhassāvahaniṁ visattikaṁ,
thag9.1:2.2	Papañcasaṅghātadukhādhivāhiniṁ;
thag9.1:2.3	Taṇhaṁ pahantvāna satova jhāyati,
thag9.1:2.4	Tato ratiṁ paramataraṁ na vindati.
thag9.1:3.1	Yadā sivaṁ dvecaturaṅgagāminaṁ,
thag9.1:3.2	Magguttamaṁ sabbakilesasodhanaṁ;
thag9.1:3.3	Paññāya passitva satova jhāyati,
thag9.1:3.4	Tato ratiṁ paramataraṁ na vindati.
thag9.1:4.1	Yadā asokaṁ virajaṁ asaṅkhataṁ,
thag9.1:4.2	Santaṁ padaṁ sabbakilesasodhanaṁ;
thag9.1:4.3	Bhāveti saṁyojanabandhanacchidaṁ,
thag9.1:4.4	Tato ratiṁ paramataraṁ na vindati.
thag9.1:5.1	Yadā nabhe gajjati meghadundubhi,
thag9.1:5.2	Dhārākulā vihagapathe samantato;
thag9.1:5.3	Bhikkhū ca pabbhāragatova jhāyati,
thag9.1:5.4	Tato ratiṁ paramataraṁ na vindati.
thag9.1:6.1	Yadā nadīnaṁ kusumākulānaṁ,
thag9.1:6.2	Vicitta-vāneyya-vaṭaṁsakānaṁ;
thag9.1:6.3	Tīre nisinno sumanova jhāyati,
thag9.1:6.4	Tato ratiṁ paramataraṁ na vindati.
thag9.1:7.1	Yadā nisīthe rahitamhi kānane,
thag9.1:7.2	Deve gaḷantamhi nadanti dāṭhino;
thag9.1:7.3	Bhikkhū ca pabbhāragatova jhāyati,
thag9.1:7.4	Tato ratiṁ paramataraṁ na vindati.
thag9.1:8.1	Yadā vitakke uparundhiyattano,
thag9.1:8.2	Nagantare nagavivaraṁ samassito;
thag9.1:8.3	Vītaddaro vītakhilova jhāyati,
thag9.1:8.4	Tato ratiṁ paramataraṁ na vindati.
thag9.1:9.1	Yadā sukhī malakhilasokanāsano,
thag9.1:9.2	Niraggaḷo nibbanatho visallo;
thag9.1:9.3	Sabbāsave byantikatova jhāyati,
thag9.1:9.4	Tato ratiṁ paramataraṁ na vindatī”ti.
thag9.1:9.5	… Bhūto thero …
thag9.1:9.6	Navakanipāto niṭṭhito.
thag9.1:10.0	Tatruddānaṁ
thag9.1:10.1	Bhūto tathaddaso thero,
thag9.1:10.2	eko khaggavisāṇavā;
thag9.1:10.3	Navakamhi nipātamhi,
thag9.1:10.4	gāthāyopi imā navāti.
thag10.1:0.1	Theragāthā 10.1
thag10.1:0.2	Dasakanipāta
thag10.1:0.3	Paṭhamavagga
thag10.1:0.4	Kāḷudāyittheragāthā
thag10.1:1.1	“Aṅgārino dāni dumā bhadante,
thag10.1:1.2	Phalesino chadanaṁ vippahāya;
thag10.1:1.3	Te accimantova pabhāsayanti,
thag10.1:1.4	Samayo mahāvīra bhāgī rasānaṁ.
thag10.1:2.1	Dumāni phullāni manoramāni,
thag10.1:2.2	Samantato sabbadisā pavanti;
thag10.1:2.3	Pattaṁ pahāya phalamāsasānā,
thag10.1:2.4	Kālo ito pakkamanāya vīra.
thag10.1:3.1	Nevātisītaṁ na panātiuṇhaṁ,
thag10.1:3.2	Sukhā utu addhaniyā bhadante;
thag10.1:3.3	Passantu taṁ sākiyā koḷiyā ca,
thag10.1:3.4	Pacchāmukhaṁ rohiniyaṁ tarantaṁ.
thag10.1:4.1	Āsāya kasate khettaṁ,
thag10.1:4.2	bījaṁ āsāya vappati;
thag10.1:4.3	Āsāya vāṇijā yanti,
thag10.1:4.4	samuddaṁ dhanahārakā;
thag10.1:4.5	Yāya āsāya tiṭṭhāmi,
thag10.1:4.6	sā me āsā samijjhatu.
thag10.1:5.1	Punappunaṁ ceva vapanti bījaṁ,
thag10.1:5.2	Punappunaṁ vassati devarājā;
thag10.1:5.3	Punappunaṁ khettaṁ kasanti kassakā,
thag10.1:5.4	Punappunaṁ dhaññamupeti raṭṭhaṁ.
thag10.1:6.1	Punappunaṁ yācanakā caranti,
thag10.1:6.2	Punappunaṁ dānapatī dadanti;
thag10.1:6.3	Punappunaṁ dānapatī daditvā,
thag10.1:6.4	Punappunaṁ saggamupenti ṭhānaṁ.
thag10.1:7.1	Vīro have sattayugaṁ puneti,
thag10.1:7.2	Yasmiṁ kule jāyati bhūripañño;
thag10.1:7.3	Maññāmahaṁ sakkati devadevo,
thag10.1:7.4	Tayā hi jāto muni saccanāmo.
thag10.1:8.1	Suddhodano nāma pitā mahesino,
thag10.1:8.2	Buddhassa mātā pana māyanāmā;
thag10.1:8.3	Yā bodhisattaṁ parihariya kucchinā,
thag10.1:8.4	Kāyassa bhedā tidivamhi modati.
thag10.1:9.1	Sā gotamī kālakatā ito cutā,
thag10.1:9.2	Dibbehi kāmehi samaṅgibhūtā;
thag10.1:9.3	Sā modati kāmaguṇehi pañcahi,
thag10.1:9.4	Parivāritā devagaṇehi tehi”.
thag10.1:10.1	“Buddhassa puttomhi asayhasāhino,
thag10.1:10.2	Aṅgīrasassappaṭimassa tādino;
thag10.1:10.3	Pitupitā mayhaṁ tuvaṁsi sakka,
thag10.1:10.4	Dhammena me gotama ayyakosī”ti.
thag10.1:10.5	… Kāḷudāyī thero ….
thag10.2:0.1	Theragāthā 10.2
thag10.2:0.2	Dasakanipāta
thag10.2:0.3	Paṭhamavagga
thag10.2:0.4	Ekavihāriyattheragāthā
thag10.2:1.1	“Purato pacchato vāpi,
thag10.2:1.2	aparo ce na vijjati;
thag10.2:1.3	Atīva phāsu bhavati,
thag10.2:1.4	ekassa vasato vane.
thag10.2:2.1	Handa eko gamissāmi,
thag10.2:2.2	araññaṁ buddhavaṇṇitaṁ;
thag10.2:2.3	Phāsu ekavihārissa,
thag10.2:2.4	pahitattassa bhikkhuno.
thag10.2:3.1	Yogi-pītikaraṁ rammaṁ,
thag10.2:3.2	mattakuñjarasevitaṁ;
thag10.2:3.3	Eko attavasī khippaṁ,
thag10.2:3.4	pavisissāmi kānanaṁ.
thag10.2:4.1	Supupphite sītavane,
thag10.2:4.2	sītale girikandare;
thag10.2:4.3	Gattāni parisiñcitvā,
thag10.2:4.4	caṅkamissāmi ekako.
thag10.2:5.1	Ekākiyo adutiyo,
thag10.2:5.2	ramaṇīye mahāvane;
thag10.2:5.3	Kadāhaṁ viharissāmi,
thag10.2:5.4	katakicco anāsavo.
thag10.2:6.1	Evaṁ me kattukāmassa,
thag10.2:6.2	adhippāyo samijjhatu;
thag10.2:6.3	Sādhayissāmahaṁyeva,
thag10.2:6.4	nāñño aññassa kārako.
thag10.2:7.1	Esa bandhāmi sannāhaṁ,
thag10.2:7.2	pavisissāmi kānanaṁ;
thag10.2:7.3	Na tato nikkhamissāmi,
thag10.2:7.4	appatto āsavakkhayaṁ.
thag10.2:8.1	Mālute upavāyante,
thag10.2:8.2	sīte surabhigandhike;
thag10.2:8.3	Avijjaṁ dālayissāmi,
thag10.2:8.4	nisinno nagamuddhani.
thag10.2:9.1	Vane kusumasañchanne,
thag10.2:9.2	pabbhāre nūna sītale;
thag10.2:9.3	Vimuttisukhena sukhito,
thag10.2:9.4	ramissāmi giribbaje.
thag10.2:10.1	Sohaṁ paripuṇṇasaṅkappo,
thag10.2:10.2	cando pannaraso yathā;
thag10.2:10.3	Sabbāsavaparikkhīṇo,
thag10.2:10.4	natthi dāni punabbhavo”ti.
thag10.2:10.5	… Ekavihāriyo thero ….
thag10.3:0.1	Theragāthā 10.3
thag10.3:0.2	Dasakanipāta
thag10.3:0.3	Paṭhamavagga
thag10.3:0.4	Mahākappinattheragāthā
thag10.3:1.1	“Anāgataṁ yo paṭikacca passati,
thag10.3:1.2	Hitañca atthaṁ ahitañca taṁ dvayaṁ;
thag10.3:1.3	Viddesino tassa hitesino vā,
thag10.3:1.4	Randhaṁ na passanti samekkhamānā.
thag10.3:2.1	Ānāpānasatī yassa,
thag10.3:2.2	paripuṇṇā subhāvitā;
thag10.3:2.3	Anupubbaṁ paricitā,
thag10.3:2.4	yathā buddhena desitā;
thag10.3:2.5	Somaṁ lokaṁ pabhāseti,
thag10.3:2.6	abbhā muttova candimā.
thag10.3:3.1	Odātaṁ vata me cittaṁ,
thag10.3:3.2	appamāṇaṁ subhāvitaṁ;
thag10.3:3.3	Nibbiddhaṁ paggahītañca,
thag10.3:3.4	sabbā obhāsate disā.
thag10.3:4.1	Jīvate vāpi sappañño,
thag10.3:4.2	api vittaparikkhayo;
thag10.3:4.3	Paññāya ca alābhena,
thag10.3:4.4	vittavāpi na jīvati.
thag10.3:5.1	Paññā sutavinicchinī,
thag10.3:5.2	Paññā kittisilokavaddhanī;
thag10.3:5.3	Paññāsahito naro idha,
thag10.3:5.4	Api dukkhesu sukhāni vindati.
thag10.3:6.1	Nāyaṁ ajjatano dhammo,
thag10.3:6.2	nacchero napi abbhuto;
thag10.3:6.3	Yattha jāyetha mīyetha,
thag10.3:6.4	tattha kiṁ viya abbhutaṁ.
thag10.3:7.1	Anantaraṁ hi jātassa,
thag10.3:7.2	jīvitā maraṇaṁ dhuvaṁ;
thag10.3:7.3	Jātā jātā marantīdha,
thag10.3:7.4	evaṁdhammā hi pāṇino.
thag10.3:8.1	Na hetadatthāya matassa hoti,
thag10.3:8.2	Yaṁ jīvitatthaṁ paraporisānaṁ;
thag10.3:8.3	Matamhi ruṇṇaṁ na yaso na lokyaṁ,
thag10.3:8.4	Na vaṇṇitaṁ samaṇabrāhmaṇehi.
thag10.3:9.1	Cakkhuṁ sarīraṁ upahanti tena,
thag10.3:9.2	Nihīyati vaṇṇabalaṁ matī ca;
thag10.3:9.3	Ānandino tassa disā bhavanti,
thag10.3:9.4	Hitesino nāssa sukhī bhavanti.
thag10.3:10.1	Tasmā hi iccheyya kule vasante,
thag10.3:10.2	Medhāvino ceva bahussute ca;
thag10.3:10.3	Yesaṁ hi paññāvibhavena kiccaṁ,
thag10.3:10.4	Taranti nāvāya nadiṁva puṇṇan”ti.
thag10.3:10.5	… Mahākappino thero ….
thag10.4:0.1	Theragāthā 10.4
thag10.4:0.2	Dasakanipāta
thag10.4:0.3	Paṭhamavagga
thag10.4:0.4	Cūḷapanthakattheragāthā
thag10.4:1.1	“Dandhā mayhaṁ gatī āsi,
thag10.4:1.2	paribhūto pure ahaṁ;
thag10.4:1.3	Bhātā ca maṁ paṇāmesi,
thag10.4:1.4	‘gaccha dāni tuvaṁ gharaṁ’.
thag10.4:2.1	Sohaṁ paṇāmito santo,
thag10.4:2.2	saṅghārāmassa koṭṭhake;
thag10.4:2.3	Dummano tattha aṭṭhāsiṁ,
thag10.4:2.4	sāsanasmiṁ apekkhavā.
thag10.4:3.1	Bhagavā tattha āgacchi,
thag10.4:3.2	sīsaṁ mayhaṁ parāmasi;
thag10.4:3.3	Bāhāya maṁ gahetvāna,
thag10.4:3.4	saṅghārāmaṁ pavesayi.
thag10.4:4.1	Anukampāya me satthā,
thag10.4:4.2	pādāsi pādapuñchaniṁ;
thag10.4:4.3	‘Etaṁ suddhaṁ adhiṭṭhehi,
thag10.4:4.4	ekamantaṁ svadhiṭṭhitaṁ’.
thag10.4:5.1	Tassāhaṁ vacanaṁ sutvā,
thag10.4:5.2	vihāsiṁ sāsane rato;
thag10.4:5.3	Samādhiṁ paṭipādesiṁ,
thag10.4:5.4	uttamatthassa pattiyā.
thag10.4:6.1	Pubbenivāsaṁ jānāmi,
thag10.4:6.2	dibbacakkhu visodhitaṁ;
thag10.4:6.3	Tisso vijjā anuppattā,
thag10.4:6.4	kataṁ buddhassa sāsanaṁ.
thag10.4:7.1	Sahassakkhattumattānaṁ,
thag10.4:7.2	nimminitvāna panthako;
thag10.4:7.3	Nisīdambavane ramme,
thag10.4:7.4	yāva kālappavedanā.
thag10.4:8.1	Tato me satthā pāhesi,
thag10.4:8.2	dūtaṁ kālappavedakaṁ;
thag10.4:8.3	Paveditamhi kālamhi,
thag10.4:8.4	vehāsādupasaṅkamiṁ.
thag10.4:9.1	Vanditvā satthuno pāde,
thag10.4:9.2	ekamantaṁ nisīdahaṁ;
thag10.4:9.3	Nisinnaṁ maṁ viditvāna,
thag10.4:9.4	atha satthā paṭiggahi.
thag10.4:10.1	Āyāgo sabbalokassa,
thag10.4:10.2	āhutīnaṁ paṭiggaho;
thag10.4:10.3	Puññakkhettaṁ manussānaṁ,
thag10.4:10.4	paṭiggaṇhittha dakkhiṇan”ti.
thag10.4:10.5	… Cūḷapanthako thero ….
thag10.5:0.1	Theragāthā 10.5
thag10.5:0.2	Dasakanipāta
thag10.5:0.3	Paṭhamavagga
thag10.5:0.4	Kappattheragāthā
thag10.5:1.1	“Nānākulamalasampuṇṇo,
thag10.5:1.2	mahāukkārasambhavo;
thag10.5:1.3	Candanikaṁva paripakkaṁ,
thag10.5:1.4	mahāgaṇḍo mahāvaṇo.
thag10.5:2.1	Pubbaruhirasampuṇṇo,
thag10.5:2.2	gūthakūpena gāḷhito;
thag10.5:2.3	Āpopaggharaṇo kāyo,
thag10.5:2.4	sadā sandati pūtikaṁ.
thag10.5:3.1	Saṭṭhikaṇḍarasambandho,
thag10.5:3.2	maṁsalepanalepito;
thag10.5:3.3	Cammakañcukasannaddho,
thag10.5:3.4	pūtikāyo niratthako.
thag10.5:4.1	Aṭṭhisaṅghātaghaṭito,
thag10.5:4.2	nhārusuttanibandhano;
thag10.5:4.3	Nekesaṁ saṅgatībhāvā,
thag10.5:4.4	kappeti iriyāpathaṁ.
thag10.5:5.1	Dhuvappayāto maraṇāya,
thag10.5:5.2	maccurājassa santike;
thag10.5:5.3	Idheva chaḍḍayitvāna,
thag10.5:5.4	yenakāmaṅgamo naro.
thag10.5:6.1	Avijjāya nivuto kāyo,
thag10.5:6.2	catuganthena ganthito;
thag10.5:6.3	Oghasaṁsīdano kāyo,
thag10.5:6.4	anusayajālamotthato.
thag10.5:7.1	Pañcanīvaraṇe yutto,
thag10.5:7.2	vitakkena samappito;
thag10.5:7.3	Taṇhāmūlenānugato,
thag10.5:7.4	mohacchādanachādito.
thag10.5:8.1	Evāyaṁ vattate kāyo,
thag10.5:8.2	kammayantena yantito;
thag10.5:8.3	Sampatti ca vipatyantā,
thag10.5:8.4	nānābhāvo vipajjati.
thag10.5:9.1	Yemaṁ kāyaṁ mamāyanti,
thag10.5:9.2	andhabālā puthujjanā;
thag10.5:9.3	Vaḍḍhenti kaṭasiṁ ghoraṁ,
thag10.5:9.4	ādiyanti punabbhavaṁ.
thag10.5:10.1	Yemaṁ kāyaṁ vivajjenti,
thag10.5:10.2	Gūthalittaṁva pannagaṁ;
thag10.5:10.3	Bhavamūlaṁ vamitvāna,
thag10.5:10.4	Parinibbissantināsavā”ti.
thag10.5:10.5	… Kappo thero ….
thag10.6:0.1	Theragāthā 10.6
thag10.6:0.2	Dasakanipāta
thag10.6:0.3	Paṭhamavagga
thag10.6:0.4	Vaṅgantaputtaupasenattheragāthā
thag10.6:1.1	“Vivittaṁ appanigghosaṁ,
thag10.6:1.2	vāḷamiganisevitaṁ;
thag10.6:1.3	Seve senāsanaṁ bhikkhu,
thag10.6:1.4	paṭisallānakāraṇā.
thag10.6:2.1	Saṅkārapuñjā āhatvā,
thag10.6:2.2	susānā rathiyāhi ca;
thag10.6:2.3	Tato saṅghāṭikaṁ katvā,
thag10.6:2.4	lūkhaṁ dhāreyya cīvaraṁ.
thag10.6:3.1	Nīcaṁ manaṁ karitvāna,
thag10.6:3.2	sapadānaṁ kulā kulaṁ;
thag10.6:3.3	Piṇḍikāya care bhikkhu,
thag10.6:3.4	guttadvāro susaṁvuto.
thag10.6:4.1	Lūkhenapi vā santusse,
thag10.6:4.2	nāññaṁ patthe rasaṁ bahuṁ;
thag10.6:4.3	Rasesu anugiddhassa,
thag10.6:4.4	jhāne na ramatī mano.
thag10.6:5.1	Appiccho ceva santuṭṭho,
thag10.6:5.2	pavivitto vase muni;
thag10.6:5.3	Asaṁsaṭṭho gahaṭṭhehi,
thag10.6:5.4	anāgārehi cūbhayaṁ.
thag10.6:6.1	Yathā jaḷo va mūgo va,
thag10.6:6.2	attānaṁ dassaye tathā;
thag10.6:6.3	Nātivelaṁ sambhāseyya,
thag10.6:6.4	saṅghamajjhamhi paṇḍito.
thag10.6:7.1	Na so upavade kañci,
thag10.6:7.2	upaghātaṁ vivajjaye;
thag10.6:7.3	Saṁvuto pātimokkhasmiṁ,
thag10.6:7.4	mattaññū cassa bhojane.
thag10.6:8.1	Suggahītanimittassa,
thag10.6:8.2	cittassuppādakovido;
thag10.6:8.3	Samathaṁ anuyuñjeyya,
thag10.6:8.4	kālena ca vipassanaṁ.
thag10.6:9.1	Vīriyasātaccasampanno,
thag10.6:9.2	yuttayogo sadā siyā;
thag10.6:9.3	Na ca appatvā dukkhantaṁ,
thag10.6:9.4	vissāsaṁ eyya paṇḍito.
thag10.6:10.1	Evaṁ viharamānassa,
thag10.6:10.2	suddhikāmassa bhikkhuno;
thag10.6:10.3	Khīyanti āsavā sabbe,
thag10.6:10.4	nibbutiñcādhigacchatī”ti.
thag10.6:10.5	… Upaseno vaṅgantaputto thero ….
thag10.7:0.1	Theragāthā 10.7
thag10.7:0.2	Dasakanipāta
thag10.7:0.3	Paṭhamavagga
thag10.7:0.4	(Apara) Gotamattheragāthā
thag10.7:1.1	“Vijāneyya sakaṁ atthaṁ,
thag10.7:1.2	Avalokeyyātha pāvacanaṁ;
thag10.7:1.3	Yañcettha assa patirūpaṁ,
thag10.7:1.4	Sāmaññaṁ ajjhupagatassa.
thag10.7:2.1	Mittaṁ idha ca kalyāṇaṁ,
thag10.7:2.2	Sikkhā vipulaṁ samādānaṁ;
thag10.7:2.3	Sussūsā ca garūnaṁ,
thag10.7:2.4	Etaṁ samaṇassa patirūpaṁ.
thag10.7:3.1	Buddhesu sagāravatā,
thag10.7:3.2	Dhamme apaciti yathābhūtaṁ;
thag10.7:3.3	Saṅghe ca cittikāro,
thag10.7:3.4	Etaṁ samaṇassa patirūpaṁ.
thag10.7:4.1	Ācāragocare yutto,
thag10.7:4.2	Ājīvo sodhito agārayho;
thag10.7:4.3	Cittassa ca saṇṭhapanaṁ,
thag10.7:4.4	Etaṁ samaṇassa patirūpaṁ.
thag10.7:5.1	Cārittaṁ atha vārittaṁ,
thag10.7:5.2	Iriyāpathiyaṁ pasādaniyaṁ;
thag10.7:5.3	Adhicitte ca āyogo,
thag10.7:5.4	Etaṁ samaṇassa patirūpaṁ.
thag10.7:6.1	Āraññakāni senāsanāni,
thag10.7:6.2	Pantāni appasaddāni;
thag10.7:6.3	Bhajitabbāni muninā,
thag10.7:6.4	Etaṁ samaṇassa patirūpaṁ.
thag10.7:7.1	Sīlañca bāhusaccañca,
thag10.7:7.2	Dhammānaṁ pavicayo yathābhūtaṁ;
thag10.7:7.3	Saccānaṁ abhisamayo,
thag10.7:7.4	Etaṁ samaṇassa patirūpaṁ.
thag10.7:8.1	Bhāveyya ca aniccanti,
thag10.7:8.2	Anattasaññaṁ asubhasaññañca;
thag10.7:8.3	Lokamhi ca anabhiratiṁ,
thag10.7:8.4	Etaṁ samaṇassa patirūpaṁ.
thag10.7:9.1	Bhāveyya ca bojjhaṅge,
thag10.7:9.2	Iddhipādāni indriyāni balāni;
thag10.7:9.3	Aṭṭhaṅgamaggamariyaṁ,
thag10.7:9.4	Etaṁ samaṇassa patirūpaṁ.
thag10.7:10.1	Taṇhaṁ pajaheyya muni,
thag10.7:10.2	Samūlake āsave padāleyya;
thag10.7:10.3	Vihareyya vippamutto,
thag10.7:10.4	Etaṁ samaṇassa patirūpan”ti.
thag10.7:10.5	… Gotamo thero …
thag10.7:10.6	Dasakanipāto niṭṭhito.
thag10.7:11.0	Tatruddānaṁ
thag10.7:11.1	Kāḷudāyī ca so thero,
thag10.7:11.2	ekavihārī ca kappino;
thag10.7:11.3	Cūḷapanthako kappo ca,
thag10.7:11.4	upaseno ca gotamo;
thag10.7:11.5	Sattime dasake therā,
thag10.7:11.6	gāthāyo cettha sattatīti.
thag11.1:0.1	Theragāthā 11.1
thag11.1:0.2	Ekādasakanipāta
thag11.1:0.3	Paṭhamavagga
thag11.1:0.4	Saṅkiccattheragāthā
thag11.1:1.1	“Kiṁ tavattho vane tāta,
thag11.1:1.2	ujjuhānova pāvuse;
thag11.1:1.3	Verambhā ramaṇīyā te,
thag11.1:1.4	paviveko hi jhāyinaṁ”.
thag11.1:2.1	“Yathā abbhāni verambho,
thag11.1:2.2	vāto nudati pāvuse;
thag11.1:2.3	Saññā me abhikiranti,
thag11.1:2.4	vivekapaṭisaññutā.
thag11.1:3.1	Apaṇḍaro aṇḍasambhavo,
thag11.1:3.2	Sīvathikāya niketacāriko;
thag11.1:3.3	Uppādayateva me satiṁ,
thag11.1:3.4	Sandehasmiṁ virāganissitaṁ.
thag11.1:4.1	Yañca aññe na rakkhanti,
thag11.1:4.2	yo ca aññe na rakkhati;
thag11.1:4.3	Sa ve bhikkhu sukhaṁ seti,
thag11.1:4.4	kāmesu anapekkhavā.
thag11.1:5.1	Acchodikā puthusilā,
thag11.1:5.2	gonaṅgulamigāyutā;
thag11.1:5.3	Ambusevālasañchannā,
thag11.1:5.4	te selā ramayanti maṁ.
thag11.1:6.1	Vasitaṁ me araññesu,
thag11.1:6.2	kandarāsu guhāsu ca;
thag11.1:6.3	Senāsanesu pantesu,
thag11.1:6.4	vāḷamiganisevite.
thag11.1:7.1	‘Ime haññantu vajjhantu,
thag11.1:7.2	dukkhaṁ pappontu pāṇino’;
thag11.1:7.3	Saṅkappaṁ nābhijānāmi,
thag11.1:7.4	anariyaṁ dosasaṁhitaṁ.
thag11.1:8.1	Pariciṇṇo mayā satthā,
thag11.1:8.2	kataṁ buddhassa sāsanaṁ;
thag11.1:8.3	Ohito garuko bhāro,
thag11.1:8.4	bhavanetti samūhatā.
thag11.1:9.1	Yassa catthāya pabbajito,
thag11.1:9.2	agārasmānagāriyaṁ;
thag11.1:9.3	So me attho anuppatto,
thag11.1:9.4	sabbasaṁyojanakkhayo.
thag11.1:10.1	Nābhinandāmi maraṇaṁ,
thag11.1:10.2	nābhinandāmi jīvitaṁ;
thag11.1:10.3	Kālañca paṭikaṅkhāmi,
thag11.1:10.4	nibbisaṁ bhatako yathā.
thag11.1:11.1	Nābhinandāmi maraṇaṁ,
thag11.1:11.2	nābhinandāmi jīvitaṁ;
thag11.1:11.3	Kālañca paṭikaṅkhāmi,
thag11.1:11.4	sampajāno patissato”ti.
thag11.1:11.5	… Saṅkicco thero …
thag11.1:11.6	Ekādasakanipāto niṭṭhito.
thag11.1:12.0	Tatruddānaṁ
thag11.1:12.1	Saṅkiccathero ekova,
thag11.1:12.2	katakicco anāsavo;
thag11.1:12.3	Ekādasanipātamhi,
thag11.1:12.4	gāthā ekādaseva cāti.
thag12.1:0.1	Theragāthā 12.1
thag12.1:0.2	Dvādasakanipāta
thag12.1:0.3	Paṭhamavagga
thag12.1:0.4	Sīlavattheragāthā
thag12.1:1.1	“Sīlamevidha sikkhetha,
thag12.1:1.2	asmiṁ loke susikkhitaṁ;
thag12.1:1.3	Sīlañhi sabbasampattiṁ,
thag12.1:1.4	upanāmeti sevitaṁ.
thag12.1:2.1	Sīlaṁ rakkheyya medhāvī,
thag12.1:2.2	patthayāno tayo sukhe;
thag12.1:2.3	Pasaṁsaṁ vittilābhañca,
thag12.1:2.4	pecca sagge pamodanaṁ.
thag12.1:3.1	Sīlavā hi bahū mitte,
thag12.1:3.2	saññamenādhigacchati;
thag12.1:3.3	Dussīlo pana mittehi,
thag12.1:3.4	dhaṁsate pāpamācaraṁ.
thag12.1:4.1	Avaṇṇañca akittiñca,
thag12.1:4.2	dussīlo labhate naro;
thag12.1:4.3	Vaṇṇaṁ kittiṁ pasaṁsañca,
thag12.1:4.4	sadā labhati sīlavā.
thag12.1:5.1	Ādi sīlaṁ patiṭṭhā ca,
thag12.1:5.2	kalyāṇānañca mātukaṁ;
thag12.1:5.3	Pamukhaṁ sabbadhammānaṁ,
thag12.1:5.4	tasmā sīlaṁ visodhaye.
thag12.1:6.1	Velā ca saṁvaraṁ sīlaṁ,
thag12.1:6.2	cittassa abhihāsanaṁ;
thag12.1:6.3	Titthañca sabbabuddhānaṁ,
thag12.1:6.4	tasmā sīlaṁ visodhaye.
thag12.1:7.1	Sīlaṁ balaṁ appaṭimaṁ,
thag12.1:7.2	sīlaṁ āvudhamuttamaṁ;
thag12.1:7.3	Sīlamābharaṇaṁ seṭṭhaṁ,
thag12.1:7.4	sīlaṁ kavacamabbhutaṁ.
thag12.1:8.1	Sīlaṁ setu mahesakkho,
thag12.1:8.2	sīlaṁ gandho anuttaro;
thag12.1:8.3	Sīlaṁ vilepanaṁ seṭṭhaṁ,
thag12.1:8.4	yena vāti disodisaṁ.
thag12.1:9.1	Sīlaṁ sambalamevaggaṁ,
thag12.1:9.2	sīlaṁ pātheyyamuttamaṁ;
thag12.1:9.3	Sīlaṁ seṭṭho ativāho,
thag12.1:9.4	yena yāti disodisaṁ.
thag12.1:10.1	Idheva nindaṁ labhati,
thag12.1:10.2	peccāpāye ca dummano;
thag12.1:10.3	Sabbattha dummano bālo,
thag12.1:10.4	sīlesu asamāhito.
thag12.1:11.1	Idheva kittiṁ labhati,
thag12.1:11.2	pecca sagge ca summano;
thag12.1:11.3	Sabbattha sumano dhīro,
thag12.1:11.4	sīlesu susamāhito.
thag12.1:12.1	Sīlameva idha aggaṁ,
thag12.1:12.2	paññavā pana uttamo;
thag12.1:12.3	Manussesu ca devesu,
thag12.1:12.4	sīlapaññāṇato jayan”ti.
thag12.1:12.5	… Sīlavo thero ….
thag12.2:0.1	Theragāthā 12.2
thag12.2:0.2	Dvādasakanipāta
thag12.2:0.3	Paṭhamavagga
thag12.2:0.4	Sunītattheragāthā
thag12.2:1.1	“Nīce kulamhi jātohaṁ,
thag12.2:1.2	daliddo appabhojano;
thag12.2:1.3	Hīnakammaṁ mamaṁ āsi,
thag12.2:1.4	ahosiṁ pupphachaḍḍako.
thag12.2:2.1	Jigucchito manussānaṁ,
thag12.2:2.2	paribhūto ca vambhito;
thag12.2:2.3	Nīcaṁ manaṁ karitvāna,
thag12.2:2.4	vandissaṁ bahukaṁ janaṁ.
thag12.2:3.1	Athaddasāsiṁ sambuddhaṁ,
thag12.2:3.2	bhikkhusaṅghapurakkhataṁ;
thag12.2:3.3	Pavisantaṁ mahāvīraṁ,
thag12.2:3.4	magadhānaṁ puruttamaṁ.
thag12.2:4.1	Nikkhipitvāna byābhaṅgiṁ,
thag12.2:4.2	vandituṁ upasaṅkamiṁ;
thag12.2:4.3	Mameva anukampāya,
thag12.2:4.4	aṭṭhāsi purisuttamo.
thag12.2:5.1	Vanditvā satthuno pāde,
thag12.2:5.2	ekamantaṁ ṭhito tadā;
thag12.2:5.3	Pabbajjaṁ ahamāyāciṁ,
thag12.2:5.4	sabbasattānamuttamaṁ.
thag12.2:6.1	Tato kāruṇiko satthā,
thag12.2:6.2	sabbalokānukampako;
thag12.2:6.3	‘Ehi bhikkhū’ti maṁ āha,
thag12.2:6.4	sā me āsūpasampadā.
thag12.2:7.1	Sohaṁ eko araññasmiṁ,
thag12.2:7.2	viharanto atandito;
thag12.2:7.3	Akāsiṁ satthu vacanaṁ,
thag12.2:7.4	yathā maṁ ovadī jino.
thag12.2:8.1	Rattiyā paṭhamaṁ yāmaṁ,
thag12.2:8.2	Pubbajātimanussariṁ;
thag12.2:8.3	Rattiyā majjhimaṁ yāmaṁ,
thag12.2:8.4	Dibbacakkhuṁ visodhayiṁ;
thag12.2:8.5	Rattiyā pacchime yāme,
thag12.2:8.6	Tamokhandhaṁ padālayiṁ.
thag12.2:9.1	Tato ratyā vivasāne,
thag12.2:9.2	sūriyassuggamanaṁ pati;
thag12.2:9.3	Indo brahmā ca āgantvā,
thag12.2:9.4	maṁ namassiṁsu pañjalī.
thag12.2:10.1	‘Namo te purisājañña,
thag12.2:10.2	namo te purisuttama;
thag12.2:10.3	Yassa te āsavā khīṇā,
thag12.2:10.4	dakkhiṇeyyosi mārisa’.
thag12.2:11.1	Tato disvāna maṁ satthā,
thag12.2:11.2	devasaṅghapurakkhataṁ;
thag12.2:11.3	Sitaṁ pātukaritvāna,
thag12.2:11.4	imamatthaṁ abhāsatha.
thag12.2:12.1	‘Tapena brahmacariyena,
thag12.2:12.2	saṁyamena damena ca;
thag12.2:12.3	Etena brāhmaṇo hoti,
thag12.2:12.4	etaṁ brāhmaṇamuttaman’”ti.
thag12.2:12.5	… Sunīto thero …
thag12.2:12.6	Dvādasakanipāto niṭṭhito.
thag12.2:13.0	Tatruddānaṁ
thag12.2:13.1	Sīlavā ca sunīto ca,
thag12.2:13.2	therā dve te mahiddhikā;
thag12.2:13.3	Dvādasamhi nipātamhi,
thag12.2:13.4	gāthāyo catuvīsatīti.
thag13.1:0.1	Theragāthā 13.1
thag13.1:0.2	Terasanipāta
thag13.1:0.3	Paṭhamavagga
thag13.1:0.4	Soṇakoḷivisattheragāthā
thag13.1:1.1	“Yāhu raṭṭhe samukkaṭṭho,
thag13.1:1.2	rañño aṅgassa paddhagū;
thag13.1:1.3	Svajja dhammesu ukkaṭṭho,
thag13.1:1.4	soṇo dukkhassa pāragū.
thag13.1:2.1	Pañca chinde pañca jahe,
thag13.1:2.2	pañca cuttari bhāvaye;
thag13.1:2.3	Pañca saṅgātigo bhikkhu,
thag13.1:2.4	oghatiṇṇoti vuccati.
thag13.1:3.1	Unnaḷassa pamattassa,
thag13.1:3.2	bāhirāsassa bhikkhuno;
thag13.1:3.3	Sīlaṁ samādhi paññā ca,
thag13.1:3.4	pāripūriṁ na gacchati.
thag13.1:4.1	Yañhi kiccaṁ apaviddhaṁ,
thag13.1:4.2	akiccaṁ pana karīyati;
thag13.1:4.3	Unnaḷānaṁ pamattānaṁ,
thag13.1:4.4	tesaṁ vaḍḍhanti āsavā.
thag13.1:5.1	Yesañca susamāraddhā,
thag13.1:5.2	niccaṁ kāyagatā sati;
thag13.1:5.3	Akiccaṁ te na sevanti,
thag13.1:5.4	kicce sātaccakārino;
thag13.1:5.5	Satānaṁ sampajānānaṁ,
thag13.1:5.6	atthaṁ gacchanti āsavā.
thag13.1:6.1	Ujumaggamhi akkhāte,
thag13.1:6.2	gacchatha mā nivattatha;
thag13.1:6.3	Attanā codayattānaṁ,
thag13.1:6.4	nibbānamabhihāraye.
thag13.1:7.1	Accāraddhamhi vīriyamhi,
thag13.1:7.2	satthā loke anuttaro;
thag13.1:7.3	Vīṇopamaṁ karitvā me,
thag13.1:7.4	dhammaṁ desesi cakkhumā;
thag13.1:7.5	Tassāhaṁ vacanaṁ sutvā,
thag13.1:7.6	vihāsiṁ sāsane rato.
thag13.1:8.1	Samathaṁ paṭipādesiṁ,
thag13.1:8.2	uttamatthassa pattiyā;
thag13.1:8.3	Tisso vijjā anuppattā,
thag13.1:8.4	kataṁ buddhassa sāsanaṁ.
thag13.1:9.1	Nekkhamme adhimuttassa,
thag13.1:9.2	pavivekañca cetaso;
thag13.1:9.3	Abyāpajjādhimuttassa,
thag13.1:9.4	upādānakkhayassa ca.
thag13.1:10.1	Taṇhakkhayādhimuttassa,
thag13.1:10.2	asammohañca cetaso;
thag13.1:10.3	Disvā āyatanuppādaṁ,
thag13.1:10.4	sammā cittaṁ vimuccati.
thag13.1:11.1	Tassa sammā vimuttassa,
thag13.1:11.2	santacittassa bhikkhuno;
thag13.1:11.3	Katassa paṭicayo natthi,
thag13.1:11.4	karaṇīyaṁ na vijjati.
thag13.1:12.1	Selo yathā ekagghano,
thag13.1:12.2	vātena na samīrati;
thag13.1:12.3	Evaṁ rūpā rasā saddā,
thag13.1:12.4	gandhā phassā ca kevalā.
thag13.1:13.1	Iṭṭhā dhammā aniṭṭhā ca,
thag13.1:13.2	nappavedhenti tādino;
thag13.1:13.3	Ṭhitaṁ cittaṁ visaññuttaṁ,
thag13.1:13.4	vayañcassānupassatī”ti.
thag13.1:13.5	… Soṇo koḷiviso thero …
thag13.1:13.6	Terasanipāto niṭṭhito.
thag13.1:14.0	Tatruddānaṁ
thag13.1:14.1	Soṇo koḷiviso thero,
thag13.1:14.2	ekoyeva mahiddhiko;
thag13.1:14.3	Terasamhi nipātamhi,
thag13.1:14.4	gāthāyo cettha terasāti.
thag14.1:0.1	Theragāthā 14.1
thag14.1:0.2	Cuddasakanipāta
thag14.1:0.3	Paṭhamavagga
thag14.1:0.4	Khadiravaniyarevatattheragāthā
thag14.1:1.1	“Yadā ahaṁ pabbajito,
thag14.1:1.2	agārasmānagāriyaṁ;
thag14.1:1.3	Nābhijānāmi saṅkappaṁ,
thag14.1:1.4	anariyaṁ dosasaṁhitaṁ.
thag14.1:2.1	‘Ime haññantu vajjhantu,
thag14.1:2.2	dukkhaṁ pappontu pāṇino’;
thag14.1:2.3	Saṅkappaṁ nābhijānāmi,
thag14.1:2.4	imasmiṁ dīghamantare.
thag14.1:3.1	Mettañca abhijānāmi,
thag14.1:3.2	appamāṇaṁ subhāvitaṁ;
thag14.1:3.3	Anupubbaṁ paricitaṁ,
thag14.1:3.4	yathā buddhena desitaṁ.
thag14.1:4.1	Sabbamitto sabbasakho,
thag14.1:4.2	sabbabhūtānukampako;
thag14.1:4.3	Mettacittañca bhāvemi,
thag14.1:4.4	abyāpajjarato sadā.
thag14.1:5.1	Asaṁhīraṁ asaṅkuppaṁ,
thag14.1:5.2	cittaṁ āmodayāmahaṁ;
thag14.1:5.3	Brahmavihāraṁ bhāvemi,
thag14.1:5.4	akāpurisasevitaṁ.
thag14.1:6.1	Avitakkaṁ samāpanno,
thag14.1:6.2	sammāsambuddhasāvako;
thag14.1:6.3	Ariyena tuṇhībhāvena,
thag14.1:6.4	upeto hoti tāvade.
thag14.1:7.1	Yathāpi pabbato selo,
thag14.1:7.2	acalo suppatiṭṭhito;
thag14.1:7.3	Evaṁ mohakkhayā bhikkhu,
thag14.1:7.4	pabbatova na vedhati.
thag14.1:8.1	Anaṅgaṇassa posassa,
thag14.1:8.2	niccaṁ sucigavesino;
thag14.1:8.3	Vālaggamattaṁ pāpassa,
thag14.1:8.4	abbhamattaṁva khāyati.
thag14.1:9.1	Nagaraṁ yathā paccantaṁ,
thag14.1:9.2	guttaṁ santarabāhiraṁ;
thag14.1:9.3	Evaṁ gopetha attānaṁ,
thag14.1:9.4	khaṇo vo mā upaccagā.
thag14.1:10.1	Nābhinandāmi maraṇaṁ,
thag14.1:10.2	nābhinandāmi jīvitaṁ;
thag14.1:10.3	Kālañca paṭikaṅkhāmi,
thag14.1:10.4	nibbisaṁ bhatako yathā.
thag14.1:11.1	Nābhinandāmi maraṇaṁ,
thag14.1:11.2	… pe
thag14.1:11.3	…
thag14.1:11.4	sampajāno patissato.
thag14.1:12.1	Pariciṇṇo mayā satthā,
thag14.1:12.2	kataṁ buddhassa sāsanaṁ;
thag14.1:12.3	Ohito garuko bhāro,
thag14.1:12.4	bhavanetti samūhatā.
thag14.1:13.1	Yassa catthāya pabbajito,
thag14.1:13.2	agārasmānagāriyaṁ;
thag14.1:13.3	So me attho anuppatto,
thag14.1:13.4	sabbasaṁyojanakkhayo.
thag14.1:14.1	Sampādethappamādena,
thag14.1:14.2	esā me anusāsanī;
thag14.1:14.3	Handāhaṁ parinibbissaṁ,
thag14.1:14.4	vippamuttomhi sabbadhī”ti.
thag14.1:14.5	… Khadiravaniyarevato thero ….
thag14.2:0.1	Theragāthā 14.2
thag14.2:0.2	Cuddasakanipāta
thag14.2:0.3	Paṭhamavagga
thag14.2:0.4	Godattattheragāthā
thag14.2:1.1	“Yathāpi bhaddo ājañño,
thag14.2:1.2	dhure yutto dhurassaho;
thag14.2:1.3	Mathito atibhārena,
thag14.2:1.4	saṁyugaṁ nātivattati.
thag14.2:2.1	Evaṁ paññāya ye tittā,
thag14.2:2.2	samuddo vārinā yathā;
thag14.2:2.3	Na pare atimaññanti,
thag14.2:2.4	ariyadhammova pāṇinaṁ.
thag14.2:3.1	Kāle kālavasaṁ pattā,
thag14.2:3.2	bhavābhavavasaṁ gatā;
thag14.2:3.3	Narā dukkhaṁ nigacchanti,
thag14.2:3.4	tedha socanti māṇavā.
thag14.2:4.1	Unnatā sukhadhammena,
thag14.2:4.2	dukkhadhammena conatā;
thag14.2:4.3	Dvayena bālā haññanti,
thag14.2:4.4	yathābhūtaṁ adassino.
thag14.2:5.1	Ye ca dukkhe sukhasmiñca,
thag14.2:5.2	majjhe sibbinimaccagū;
thag14.2:5.3	Ṭhitā te indakhīlova,
thag14.2:5.4	na te unnataonatā.
thag14.2:6.1	Na heva lābhe nālābhe,
thag14.2:6.2	na yase na ca kittiyā;
thag14.2:6.3	Na nindāyaṁ pasaṁsāya,
thag14.2:6.4	na te dukkhe sukhamhi ca.
thag14.2:7.1	Sabbattha te na limpanti,
thag14.2:7.2	udabinduva pokkhare;
thag14.2:7.3	Sabbattha sukhitā dhīrā,
thag14.2:7.4	sabbattha aparājitā.
thag14.2:8.1	Dhammena ca alābho yo,
thag14.2:8.2	yo ca lābho adhammiko;
thag14.2:8.3	Alābho dhammiko seyyo,
thag14.2:8.4	yañce lābho adhammiko.
thag14.2:9.1	Yaso ca appabuddhīnaṁ,
thag14.2:9.2	viññūnaṁ ayaso ca yo;
thag14.2:9.3	Ayasova seyyo viññūnaṁ,
thag14.2:9.4	na yaso appabuddhinaṁ.
thag14.2:10.1	Dummedhehi pasaṁsā ca,
thag14.2:10.2	viññūhi garahā ca yā;
thag14.2:10.3	Garahāva seyyo viññūhi,
thag14.2:10.4	yañce bālappasaṁsanā.
thag14.2:11.1	Sukhañca kāmamayikaṁ,
thag14.2:11.2	dukkhañca pavivekiyaṁ;
thag14.2:11.3	Pavivekadukkhaṁ seyyo,
thag14.2:11.4	yañce kāmamayaṁ sukhaṁ.
thag14.2:12.1	Jīvitañca adhammena,
thag14.2:12.2	dhammena maraṇañca yaṁ;
thag14.2:12.3	Maraṇaṁ dhammikaṁ seyyo,
thag14.2:12.4	yañce jīve adhammikaṁ.
thag14.2:13.1	Kāmakopappahīnā ye,
thag14.2:13.2	santacittā bhavābhave;
thag14.2:13.3	Caranti loke asitā,
thag14.2:13.4	natthi tesaṁ piyāpiyaṁ.
thag14.2:14.1	Bhāvayitvāna bojjhaṅge,
thag14.2:14.2	indriyāni balāni ca;
thag14.2:14.3	Pappuyya paramaṁ santiṁ,
thag14.2:14.4	parinibbantināsavā”ti.
thag14.2:14.5	… Godatto thero …
thag14.2:14.6	Cuddasakanipāto niṭṭhito.
thag14.2:15.0	Tatruddānaṁ
thag14.2:15.1	Revato ceva godatto,
thag14.2:15.2	therā dve te mahiddhikā;
thag14.2:15.3	Cuddasamhi nipātamhi,
thag14.2:15.4	gāthāyo aṭṭhavīsatīti.
thag15.1:0.1	Theragāthā 15.1
thag15.1:0.2	Soḷasakanipāta
thag15.1:0.3	Paṭhamavagga
thag15.1:0.4	Aññāsikoṇḍaññattheragāthā
thag15.1:1.1	“Esa bhiyyo pasīdāmi,
thag15.1:1.2	sutvā dhammaṁ mahārasaṁ;
thag15.1:1.3	Virāgo desito dhammo,
thag15.1:1.4	anupādāya sabbaso”.
thag15.1:2.1	“Bahūni loke citrāni,
thag15.1:2.2	asmiṁ pathavimaṇḍale;
thag15.1:2.3	Mathenti maññe saṅkappaṁ,
thag15.1:2.4	subhaṁ rāgūpasaṁhitaṁ.
thag15.1:3.1	Rajamuhatañca vātena,
thag15.1:3.2	yathā meghopasammaye;
thag15.1:3.3	Evaṁ sammanti saṅkappā,
thag15.1:3.4	yadā paññāya passati.
thag15.1:4.1	Sabbe saṅkhārā aniccāti,
thag15.1:4.2	yadā paññāya passati;
thag15.1:4.3	Atha nibbindati dukkhe,
thag15.1:4.4	esa maggo visuddhiyā.
thag15.1:5.1	Sabbe saṅkhārā dukkhāti,
thag15.1:5.2	yadā paññāya passati;
thag15.1:5.3	Atha nibbindati dukkhe,
thag15.1:5.4	esa maggo visuddhiyā.
thag15.1:6.1	Sabbe dhammā anattāti,
thag15.1:6.2	yadā paññāya passati;
thag15.1:6.3	Atha nibbindati dukkhe,
thag15.1:6.4	esa maggo visuddhiyā.
thag15.1:7.1	Buddhānubuddho yo thero,
thag15.1:7.2	koṇḍañño tibbanikkamo;
thag15.1:7.3	Pahīnajātimaraṇo,
thag15.1:7.4	brahmacariyassa kevalī.
thag15.1:8.1	Oghapāso daḷhakhilo,
thag15.1:8.2	Pabbato duppadālayo;
thag15.1:8.3	Chetvā khilañca pāsañca,
thag15.1:8.4	Selaṁ bhetvāna dubbhidaṁ;
thag15.1:8.5	Tiṇṇo pāraṅgato jhāyī,
thag15.1:8.6	Mutto so mārabandhanā.
thag15.1:9.1	Uddhato capalo bhikkhu,
thag15.1:9.2	mitte āgamma pāpake;
thag15.1:9.3	Saṁsīdati mahoghasmiṁ,
thag15.1:9.4	ūmiyā paṭikujjito.
thag15.1:10.1	Anuddhato acapalo,
thag15.1:10.2	nipako saṁvutindriyo;
thag15.1:10.3	Kalyāṇamitto medhāvī,
thag15.1:10.4	dukkhassantakaro siyā.
thag15.1:11.1	Kālapabbaṅgasaṅkāso,
thag15.1:11.2	kiso dhamanisanthato;
thag15.1:11.3	Mattaññū annapānasmiṁ,
thag15.1:11.4	adīnamanaso naro.
thag15.1:12.1	Phuṭṭho ḍaṁsehi makasehi,
thag15.1:12.2	araññasmiṁ brahāvane;
thag15.1:12.3	Nāgo saṅgāmasīseva,
thag15.1:12.4	sato tatrādhivāsaye.
thag15.1:13.1	Nābhinandāmi maraṇaṁ,
thag15.1:13.2	… pe
thag15.1:13.3	…
thag15.1:13.4	nibbisaṁ bhatako yathā.
thag15.1:14.1	Nābhinandāmi maraṇaṁ,
thag15.1:14.2	… pe
thag15.1:14.3	…
thag15.1:14.4	sampajāno patissato.
thag15.1:15.1	Pariciṇṇo mayā satthā,
thag15.1:15.2	… pe
thag15.1:15.3	…
thag15.1:15.4	bhavanetti samūhatā.
thag15.1:16.1	Yassa catthāya pabbajito,
thag15.1:16.2	agārasmānagāriyaṁ;
thag15.1:16.3	So me attho anuppatto,
thag15.1:16.4	kiṁ me saddhivihārinā”ti.
thag15.1:16.5	… Aññāsikoṇḍañño thero ….
thag15.2:0.1	Theragāthā 15.2
thag15.2:0.2	Soḷasakanipāta
thag15.2:0.3	Paṭhamavagga
thag15.2:0.4	Udāyittheragāthā
thag15.2:1.1	“Manussabhūtaṁ sambuddhaṁ,
thag15.2:1.2	Attadantaṁ samāhitaṁ;
thag15.2:1.3	Iriyamānaṁ brahmapathe,
thag15.2:1.4	Cittassūpasame rataṁ.
thag15.2:2.1	Yaṁ manussā namassanti,
thag15.2:2.2	sabbadhammāna pāraguṁ;
thag15.2:2.3	Devāpi taṁ namassanti,
thag15.2:2.4	iti me arahato sutaṁ.
thag15.2:3.1	Sabbasaṁyojanātītaṁ,
thag15.2:3.2	vanā nibbanamāgataṁ;
thag15.2:3.3	Kāmehi nekkhammarataṁ,
thag15.2:3.4	muttaṁ selāva kañcanaṁ.
thag15.2:4.1	Sa ve accaruci nāgo,
thag15.2:4.2	himavāvaññe siluccaye;
thag15.2:4.3	Sabbesaṁ nāganāmānaṁ,
thag15.2:4.4	saccanāmo anuttaro.
thag15.2:5.1	Nāgaṁ vo kittayissāmi,
thag15.2:5.2	na hi āguṁ karoti so;
thag15.2:5.3	Soraccaṁ avihiṁsā ca,
thag15.2:5.4	pādā nāgassa te duve.
thag15.2:6.1	Sati ca sampajaññañca,
thag15.2:6.2	caraṇā nāgassa tepare;
thag15.2:6.3	Saddhāhattho mahānāgo,
thag15.2:6.4	upekkhāsetadantavā.
thag15.2:7.1	Sati gīvā siro paññā,
thag15.2:7.2	vīmaṁsā dhammacintanā;
thag15.2:7.3	Dhammakucchisamāvāso,
thag15.2:7.4	viveko tassa vāladhi.
thag15.2:8.1	So jhāyī assāsarato,
thag15.2:8.2	ajjhattaṁ susamāhito;
thag15.2:8.3	Gacchaṁ samāhito nāgo,
thag15.2:8.4	ṭhito nāgo samāhito.
thag15.2:9.1	Sayaṁ samāhito nāgo,
thag15.2:9.2	nisinnopi samāhito;
thag15.2:9.3	Sabbattha saṁvuto nāgo,
thag15.2:9.4	esā nāgassa sampadā.
thag15.2:10.1	Bhuñjati anavajjāni,
thag15.2:10.2	sāvajjāni na bhuñjati;
thag15.2:10.3	Ghāsamacchādanaṁ laddhā,
thag15.2:10.4	sannidhiṁ parivajjayaṁ.
thag15.2:11.1	Saṁyojanaṁ aṇuṁ thūlaṁ,
thag15.2:11.2	sabbaṁ chetvāna bandhanaṁ;
thag15.2:11.3	Yena yeneva gacchati,
thag15.2:11.4	anapekkhova gacchati.
thag15.2:12.1	Yathāpi udake jātaṁ,
thag15.2:12.2	puṇḍarīkaṁ pavaḍḍhati;
thag15.2:12.3	Nopalippati toyena,
thag15.2:12.4	sucigandhaṁ manoramaṁ.
thag15.2:13.1	Tatheva ca loke jāto,
thag15.2:13.2	buddho loke viharati;
thag15.2:13.3	Nopalippati lokena,
thag15.2:13.4	toyena padumaṁ yathā.
thag15.2:14.1	Mahāgini pajjalito,
thag15.2:14.2	anāhāropasammati;
thag15.2:14.3	Aṅgāresu ca santesu,
thag15.2:14.4	nibbutoti pavuccati.
thag15.2:15.1	Atthassāyaṁ viññāpanī,
thag15.2:15.2	upamā viññūhi desitā;
thag15.2:15.3	Viññissanti mahānāgā,
thag15.2:15.4	nāgaṁ nāgena desitaṁ.
thag15.2:16.1	Vītarāgo vītadoso,
thag15.2:16.2	Vītamoho anāsavo;
thag15.2:16.3	Sarīraṁ vijahaṁ nāgo,
thag15.2:16.4	Parinibbissatyanāsavo”ti.
thag15.2:16.5	… Udāyī thero …
thag15.2:16.6	Soḷasakanipāto niṭṭhito.
thag15.2:17.0	Tatruddānaṁ
thag15.2:17.1	Koṇḍañño ca udāyī ca,
thag15.2:17.2	therā dve te mahiddhikā;
thag15.2:17.3	Soḷasamhi nipātamhi,
thag15.2:17.4	gāthāyo dve ca tiṁsa cāti.
thag16.1:0.1	Theragāthā 16.1
thag16.1:0.2	Vīsatinipāta
thag16.1:0.3	Paṭhamavagga
thag16.1:0.4	Adhimuttattheragāthā
thag16.1:1.1	“Yaññatthaṁ vā dhanatthaṁ vā,
thag16.1:1.2	ye hanāma mayaṁ pure;
thag16.1:1.3	Avasesaṁ bhayaṁ hoti,
thag16.1:1.4	vedhanti vilapanti ca.
thag16.1:2.1	Tassa te natthi bhītattaṁ,
thag16.1:2.2	bhiyyo vaṇṇo pasīdati;
thag16.1:2.3	Kasmā na paridevesi,
thag16.1:2.4	evarūpe mahabbhaye”.
thag16.1:3.1	“Natthi cetasikaṁ dukkhaṁ,
thag16.1:3.2	anapekkhassa gāmaṇi;
thag16.1:3.3	Atikkantā bhayā sabbe,
thag16.1:3.4	khīṇasaṁyojanassa ve.
thag16.1:4.1	Khīṇāya bhavanettiyā,
thag16.1:4.2	diṭṭhe dhamme yathātathe;
thag16.1:4.3	Na bhayaṁ maraṇe hoti,
thag16.1:4.4	bhāranikkhepane yathā.
thag16.1:5.1	Suciṇṇaṁ brahmacariyaṁ me,
thag16.1:5.2	maggo cāpi subhāvito;
thag16.1:5.3	Maraṇe me bhayaṁ natthi,
thag16.1:5.4	rogānamiva saṅkhaye.
thag16.1:6.1	Suciṇṇaṁ brahmacariyaṁ me,
thag16.1:6.2	maggo cāpi subhāvito;
thag16.1:6.3	Nirassādā bhavā diṭṭhā,
thag16.1:6.4	visaṁ pitvāva chaḍḍitaṁ.
thag16.1:7.1	Pāragū anupādāno,
thag16.1:7.2	katakicco anāsavo;
thag16.1:7.3	Tuṭṭho āyukkhayā hoti,
thag16.1:7.4	mutto āghātanā yathā.
thag16.1:8.1	Uttamaṁ dhammataṁ patto,
thag16.1:8.2	sabbaloke anatthiko;
thag16.1:8.3	Ādittāva gharā mutto,
thag16.1:8.4	maraṇasmiṁ na socati.
thag16.1:9.1	Yadatthi saṅgataṁ kiñci,
thag16.1:9.2	bhavo vā yattha labbhati;
thag16.1:9.3	Sabbaṁ anissaraṁ etaṁ,
thag16.1:9.4	iti vuttaṁ mahesinā.
thag16.1:10.1	Yo taṁ tathā pajānāti,
thag16.1:10.2	yathā buddhena desitaṁ;
thag16.1:10.3	Na gaṇhāti bhavaṁ kiñci,
thag16.1:10.4	sutattaṁva ayoguḷaṁ.
thag16.1:11.1	Na me hoti ‘ahosin’ti,
thag16.1:11.2	‘bhavissan’ti na hoti me;
thag16.1:11.3	Saṅkhārā vigamissanti,
thag16.1:11.4	tattha kā paridevanā.
thag16.1:12.1	Suddhaṁ dhammasamuppādaṁ,
thag16.1:12.2	Suddhaṁ saṅkhārasantatiṁ;
thag16.1:12.3	Passantassa yathābhūtaṁ,
thag16.1:12.4	Na bhayaṁ hoti gāmaṇi.
thag16.1:13.1	Tiṇakaṭṭhasamaṁ lokaṁ,
thag16.1:13.2	yadā paññāya passati;
thag16.1:13.3	Mamattaṁ so asaṁvindaṁ,
thag16.1:13.4	‘natthi me’ti na socati.
thag16.1:14.1	Ukkaṇṭhāmi sarīrena,
thag16.1:14.2	bhavenamhi anatthiko;
thag16.1:14.3	Soyaṁ bhijjissati kāyo,
thag16.1:14.4	añño ca na bhavissati.
thag16.1:15.1	Yaṁ vo kiccaṁ sarīrena,
thag16.1:15.2	taṁ karotha yadicchatha;
thag16.1:15.3	Na me tappaccayā tattha,
thag16.1:15.4	doso pemañca hehiti”.
thag16.1:16.1	Tassa taṁ vacanaṁ sutvā,
thag16.1:16.2	abbhutaṁ lomahaṁsanaṁ;
thag16.1:16.3	Satthāni nikkhipitvāna,
thag16.1:16.4	māṇavā etadabravuṁ.
thag16.1:17.1	“Kiṁ bhadante karitvāna,
thag16.1:17.2	ko vā ācariyo tava;
thag16.1:17.3	Kassa sāsanamāgamma,
thag16.1:17.4	labbhate taṁ asokatā”.
thag16.1:18.1	“Sabbaññū sabbadassāvī,
thag16.1:18.2	jino ācariyo mama;
thag16.1:18.3	Mahākāruṇiko satthā,
thag16.1:18.4	sabbalokatikicchako.
thag16.1:19.1	Tenāyaṁ desito dhammo,
thag16.1:19.2	khayagāmī anuttaro;
thag16.1:19.3	Tassa sāsanamāgamma,
thag16.1:19.4	labbhate taṁ asokatā”.
thag16.1:20.1	Sutvāna corā isino subhāsitaṁ,
thag16.1:20.2	Nikkhippa satthāni ca āvudhāni ca;
thag16.1:20.3	Tamhā ca kammā viramiṁsu eke,
thag16.1:20.4	Eke ca pabbajjamarocayiṁsu.
thag16.1:21.1	Te pabbajitvā sugatassa sāsane,
thag16.1:21.2	Bhāvetva bojjhaṅgabalāni paṇḍitā;
thag16.1:21.3	Udaggacittā sumanā katindriyā,
thag16.1:21.4	Phusiṁsu nibbānapadaṁ asaṅkhatanti.
thag16.1:21.5	… Adhimutto thero ….
thag16.2:0.1	Theragāthā 16.2
thag16.2:0.2	Vīsatinipāta
thag16.2:0.3	Paṭhamavagga
thag16.2:0.4	Pārāpariyattheragāthā
thag16.2:1.1	“Samaṇassa ahu cintā,
thag16.2:1.2	pārāpariyassa bhikkhuno;
thag16.2:1.3	Ekakassa nisinnassa,
thag16.2:1.4	pavivittassa jhāyino.
thag16.2:2.1	Kimānupubbaṁ puriso,
thag16.2:2.2	kiṁ vataṁ kiṁ samācāraṁ;
thag16.2:2.3	Attano kiccakārīssa,
thag16.2:2.4	na ca kañci viheṭhaye.
thag16.2:3.1	Indriyāni manussānaṁ,
thag16.2:3.2	hitāya ahitāya ca;
thag16.2:3.3	Arakkhitāni ahitāya,
thag16.2:3.4	rakkhitāni hitāya ca.
thag16.2:4.1	Indriyāneva sārakkhaṁ,
thag16.2:4.2	indriyāni ca gopayaṁ;
thag16.2:4.3	Attano kiccakārīssa,
thag16.2:4.4	na ca kañci viheṭhaye.
thag16.2:5.1	Cakkhundriyañce rūpesu,
thag16.2:5.2	gacchantaṁ anivārayaṁ;
thag16.2:5.3	Anādīnavadassāvī,
thag16.2:5.4	so dukkhā na hi muccati.
thag16.2:6.1	Sotindriyañce saddesu,
thag16.2:6.2	gacchantaṁ anivārayaṁ;
thag16.2:6.3	Anādīnavadassāvī,
thag16.2:6.4	so dukkhā na hi muccati.
thag16.2:7.1	Anissaraṇadassāvī,
thag16.2:7.2	gandhe ce paṭisevati;
thag16.2:7.3	Na so muccati dukkhamhā,
thag16.2:7.4	gandhesu adhimucchito.
thag16.2:8.1	Ambilaṁ madhuraggañca,
thag16.2:8.2	tittakaggamanussaraṁ;
thag16.2:8.3	Rasataṇhāya gadhito,
thag16.2:8.4	hadayaṁ nāvabujjhati.
thag16.2:9.1	Subhānyappaṭikūlāni,
thag16.2:9.2	phoṭṭhabbāni anussaraṁ;
thag16.2:9.3	Ratto rāgādhikaraṇaṁ,
thag16.2:9.4	vividhaṁ vindate dukhaṁ.
thag16.2:10.1	Manaṁ cetehi dhammehi,
thag16.2:10.2	yo na sakkoti rakkhituṁ;
thag16.2:10.3	Tato naṁ dukkhamanveti,
thag16.2:10.4	sabbehetehi pañcahi.
thag16.2:11.1	Pubbalohitasampuṇṇaṁ,
thag16.2:11.2	bahussa kuṇapassa ca;
thag16.2:11.3	Naravīrakataṁ vagguṁ,
thag16.2:11.4	samuggamiva cittitaṁ.
thag16.2:12.1	Kaṭukaṁ madhurassādaṁ,
thag16.2:12.2	piyanibandhanaṁ dukhaṁ;
thag16.2:12.3	Khuraṁva madhunā littaṁ,
thag16.2:12.4	ullihaṁ nāvabujjhati.
thag16.2:13.1	Itthirūpe itthisare,
thag16.2:13.2	phoṭṭhabbepi ca itthiyā;
thag16.2:13.3	Itthigandhesu sāratto,
thag16.2:13.4	vividhaṁ vindate dukhaṁ.
thag16.2:14.1	Itthisotāni sabbāni,
thag16.2:14.2	sandanti pañca pañcasu;
thag16.2:14.3	Tesamāvaraṇaṁ kātuṁ,
thag16.2:14.4	yo sakkoti vīriyavā.
thag16.2:15.1	So atthavā so dhammaṭṭho,
thag16.2:15.2	so dakkho so vicakkhaṇo;
thag16.2:15.3	Kareyya ramamānopi,
thag16.2:15.4	kiccaṁ dhammatthasaṁhitaṁ.
thag16.2:16.1	Atho sīdati saññuttaṁ,
thag16.2:16.2	vajje kiccaṁ niratthakaṁ;
thag16.2:16.3	‘Na taṁ kiccan’ti maññitvā,
thag16.2:16.4	appamatto vicakkhaṇo.
thag16.2:17.1	Yañca atthena saññuttaṁ,
thag16.2:17.2	yā ca dhammagatā rati;
thag16.2:17.3	Taṁ samādāya vattetha,
thag16.2:17.4	sā hi ve uttamā rati.
thag16.2:18.1	Uccāvacehupāyehi,
thag16.2:18.2	Paresamabhijigīsati;
thag16.2:18.3	Hantvā vadhitvā atha socayitvā,
thag16.2:18.4	Ālopati sāhasā yo paresaṁ.
thag16.2:19.1	Tacchanto āṇiyā āṇiṁ,
thag16.2:19.2	nihanti balavā yathā;
thag16.2:19.3	Indriyānindriyeheva,
thag16.2:19.4	nihanti kusalo tathā.
thag16.2:20.1	Saddhaṁ vīriyaṁ samādhiñca,
thag16.2:20.2	satipaññañca bhāvayaṁ;
thag16.2:20.3	Pañca pañcahi hantvāna,
thag16.2:20.4	anīgho yāti brāhmaṇo.
thag16.2:21.1	So atthavā so dhammaṭṭho,
thag16.2:21.2	katvā vākyānusāsaniṁ;
thag16.2:21.3	Sabbena sabbaṁ buddhassa,
thag16.2:21.4	so naro sukhamedhatī”ti.
thag16.2:21.5	… Pārāpariyo thero ….
thag16.3:0.1	Theragāthā 16.3
thag16.3:0.2	Vīsatinipāta
thag16.3:0.3	Paṭhamavagga
thag16.3:0.4	Telakānittheragāthā
thag16.3:1.1	“Cirarattaṁ vatātāpī,
thag16.3:1.2	dhammaṁ anuvicintayaṁ;
thag16.3:1.3	Samaṁ cittassa nālatthaṁ,
thag16.3:1.4	pucchaṁ samaṇabrāhmaṇe.
thag16.3:2.1	‘Ko so pāraṅgato loke,
thag16.3:2.2	ko patto amatogadhaṁ;
thag16.3:2.3	Kassa dhammaṁ paṭicchāmi,
thag16.3:2.4	paramatthavijānanaṁ’.
thag16.3:3.1	Antovaṅkagato āsi,
thag16.3:3.2	macchova ghasamāmisaṁ;
thag16.3:3.3	Baddho mahindapāsena,
thag16.3:3.4	vepacityasuro yathā.
thag16.3:4.1	Añchāmi naṁ na muñcāmi,
thag16.3:4.2	asmā sokapariddavā;
thag16.3:4.3	Ko me bandhaṁ muñcaṁ loke,
thag16.3:4.4	sambodhiṁ vedayissati.
thag16.3:5.1	Samaṇaṁ brāhmaṇaṁ vā kaṁ,
thag16.3:5.2	ādisantaṁ pabhaṅgunaṁ;
thag16.3:5.3	Kassa dhammaṁ paṭicchāmi,
thag16.3:5.4	jarāmaccupavāhanaṁ.
thag16.3:6.1	Vicikicchākaṅkhāganthitaṁ,
thag16.3:6.2	sārambhabalasaññutaṁ;
thag16.3:6.3	Kodhappattamanatthaddhaṁ,
thag16.3:6.4	abhijappappadāraṇaṁ.
thag16.3:7.1	Taṇhādhanusamuṭṭhānaṁ,
thag16.3:7.2	dve ca pannarasāyutaṁ;
thag16.3:7.3	Passa orasikaṁ bāḷhaṁ,
thag16.3:7.4	bhetvāna yadi tiṭṭhati.
thag16.3:8.1	Anudiṭṭhīnaṁ appahānaṁ,
thag16.3:8.2	saṅkappaparatejitaṁ;
thag16.3:8.3	Tena viddho pavedhāmi,
thag16.3:8.4	pattaṁva māluteritaṁ.
thag16.3:9.1	Ajjhattaṁ me samuṭṭhāya,
thag16.3:9.2	khippaṁ paccati māmakaṁ;
thag16.3:9.3	Chaphassāyatanī kāyo,
thag16.3:9.4	yattha sarati sabbadā.
thag16.3:10.1	Taṁ na passāmi tekicchaṁ,
thag16.3:10.2	yo metaṁ sallamuddhare;
thag16.3:10.3	Nānārajjena satthena,
thag16.3:10.4	nāññena vicikicchitaṁ.
thag16.3:11.1	Ko me asattho avaṇo,
thag16.3:11.2	Sallamabbhantarapassayaṁ;
thag16.3:11.3	Ahiṁsaṁ sabbagattāni,
thag16.3:11.4	Sallaṁ me uddharissati.
thag16.3:12.1	Dhammappati hi so seṭṭho,
thag16.3:12.2	visadosappavāhako;
thag16.3:12.3	Gambhīre patitassa me,
thag16.3:12.4	thalaṁ pāṇiñca dassaye.
thag16.3:13.1	Rahadehamasmi ogāḷho,
thag16.3:13.2	ahāriyarajamattike;
thag16.3:13.3	Māyāusūyasārambha,
thag16.3:13.4	thinamiddhamapatthaṭe.
thag16.3:14.1	Uddhaccameghathanitaṁ,
thag16.3:14.2	saṁyojanavalāhakaṁ;
thag16.3:14.3	Vāhā vahanti kuddiṭṭhiṁ,
thag16.3:14.4	saṅkappā rāganissitā.
thag16.3:15.1	Savanti sabbadhi sotā,
thag16.3:15.2	latā ubbhijja tiṭṭhati;
thag16.3:15.3	Te sote ko nivāreyya,
thag16.3:15.4	taṁ lataṁ ko hi checchati.
thag16.3:16.1	Velaṁ karotha bhaddante,
thag16.3:16.2	sotānaṁ sannivāraṇaṁ;
thag16.3:16.3	Mā te manomayo soto,
thag16.3:16.4	rukkhaṁva sahasā luve.
thag16.3:17.1	Evaṁ me bhayajātassa,
thag16.3:17.2	apārā pāramesato;
thag16.3:17.3	Tāṇo paññāvudho satthā,
thag16.3:17.4	isisaṅghanisevito.
thag16.3:18.1	Sopāṇaṁ sugataṁ suddhaṁ,
thag16.3:18.2	dhammasāramayaṁ daḷhaṁ;
thag16.3:18.3	Pādāsi vuyhamānassa,
thag16.3:18.4	‘mā bhāyī’ti ca mabravi.
thag16.3:19.1	Satipaṭṭhānapāsādaṁ,
thag16.3:19.2	āruyha paccavekkhisaṁ;
thag16.3:19.3	Yaṁ taṁ pubbe amaññissaṁ,
thag16.3:19.4	sakkāyābhirataṁ pajaṁ.
thag16.3:20.1	Yadā ca maggamaddakkhiṁ,
thag16.3:20.2	nāvāya abhirūhanaṁ;
thag16.3:20.3	Anadhiṭṭhāya attānaṁ,
thag16.3:20.4	titthamaddakkhimuttamaṁ.
thag16.3:21.1	Sallaṁ attasamuṭṭhānaṁ,
thag16.3:21.2	bhavanettippabhāvitaṁ;
thag16.3:21.3	Etesaṁ appavattāya,
thag16.3:21.4	desesi maggamuttamaṁ.
thag16.3:22.1	Dīgharattānusayitaṁ,
thag16.3:22.2	cirarattamadhiṭṭhitaṁ;
thag16.3:22.3	Buddho mepānudī ganthaṁ,
thag16.3:22.4	visadosappavāhano”ti.
thag16.3:22.5	… Telakāni thero ….
thag16.4:0.1	Theragāthā 16.4
thag16.4:0.2	Vīsatinipāta
thag16.4:0.3	Paṭhamavagga
thag16.4:0.4	Raṭṭhapālattheragāthā
thag16.4:1.1	“Passa cittakataṁ bimbaṁ,
thag16.4:1.2	arukāyaṁ samussitaṁ;
thag16.4:1.3	Āturaṁ bahusaṅkappaṁ,
thag16.4:1.4	yassa natthi dhuvaṁ ṭhiti.
thag16.4:2.1	Passa cittakataṁ rūpaṁ,
thag16.4:2.2	maṇinā kuṇḍalena ca;
thag16.4:2.3	Aṭṭhiṁ tacena onaddhaṁ,
thag16.4:2.4	saha vatthehi sobhati.
thag16.4:3.1	Alattakakatā pādā,
thag16.4:3.2	mukhaṁ cuṇṇakamakkhitaṁ;
thag16.4:3.3	Alaṁ bālassa mohāya,
thag16.4:3.4	no ca pāragavesino.
thag16.4:4.1	Aṭṭhapadakatā kesā,
thag16.4:4.2	nettā añjanamakkhitā;
thag16.4:4.3	Alaṁ bālassa mohāya,
thag16.4:4.4	no ca pāragavesino.
thag16.4:5.1	Añjanīva navā cittā,
thag16.4:5.2	pūtikāyo alaṅkato;
thag16.4:5.3	Alaṁ bālassa mohāya,
thag16.4:5.4	no ca pāragavesino.
thag16.4:6.1	Odahi migavo pāsaṁ,
thag16.4:6.2	nāsadā vāguraṁ migo;
thag16.4:6.3	Bhutvā nivāpaṁ gacchāma,
thag16.4:6.4	kandante migabandhake.
thag16.4:7.1	Chinno pāso migavassa,
thag16.4:7.2	nāsadā vāguraṁ migo;
thag16.4:7.3	Bhutvā nivāpaṁ gacchāma,
thag16.4:7.4	socante migaluddake.
thag16.4:8.1	Passāmi loke sadhane manusse,
thag16.4:8.2	Laddhāna vittaṁ na dadanti mohā;
thag16.4:8.3	Luddhā dhanaṁ sannicayaṁ karonti,
thag16.4:8.4	Bhiyyova kāme abhipatthayanti.
thag16.4:9.1	Rājā pasayhappathaviṁ vijetvā,
thag16.4:9.2	Sasāgarantaṁ mahimāvasanto;
thag16.4:9.3	Oraṁ samuddassa atittarūpo,
thag16.4:9.4	Pāraṁ samuddassapi patthayetha.
thag16.4:10.1	Rājā ca aññe ca bahū manussā,
thag16.4:10.2	Avītataṇhā maraṇaṁ upenti;
thag16.4:10.3	Ūnāva hutvāna jahanti dehaṁ,
thag16.4:10.4	Kāmehi lokamhi na hatthi titti.
thag16.4:11.1	Kandanti naṁ ñātī pakiriya kese,
thag16.4:11.2	Aho vatā no amarāti cāhu;
thag16.4:11.3	Vatthena naṁ pārutaṁ nīharitvā,
thag16.4:11.4	Citaṁ samodhāya tato ḍahanti.
thag16.4:12.1	So ḍayhati sūlehi tujjamāno,
thag16.4:12.2	Ekena vatthena pahāya bhoge;
thag16.4:12.3	Na mīyamānassa bhavanti tāṇā,
thag16.4:12.4	Ñātī ca mittā atha vā sahāyā.
thag16.4:13.1	Dāyādakā tassa dhanaṁ haranti,
thag16.4:13.2	Satto pana gacchati yena kammaṁ;
thag16.4:13.3	Na mīyamānaṁ dhanamanveti kiñci,
thag16.4:13.4	Puttā ca dārā ca dhanañca raṭṭhaṁ.
thag16.4:14.1	Na dīghamāyuṁ labhate dhanena,
thag16.4:14.2	Na cāpi vittena jaraṁ vihanti;
thag16.4:14.3	Appaṁ hidaṁ jīvitamāhu dhīrā,
thag16.4:14.4	Asassataṁ vippariṇāmadhammaṁ.
thag16.4:15.1	Aḍḍhā daliddā ca phusanti phassaṁ,
thag16.4:15.2	Bālo ca dhīro ca tatheva phuṭṭho;
thag16.4:15.3	Bālo hi bālyā vadhitova seti,
thag16.4:15.4	Dhīro ca no vedhati phassaphuṭṭho.
thag16.4:16.1	Tasmā hi paññāva dhanena seyyā,
thag16.4:16.2	Yāya vosānamidhādhigacchati;
thag16.4:16.3	Abyositattā hi bhavābhavesu,
thag16.4:16.4	Pāpāni kammāni karoti mohā.
thag16.4:17.1	Upeti gabbhañca parañca lokaṁ,
thag16.4:17.2	Saṁsāramāpajja paramparāya;
thag16.4:17.3	Tassappapañño abhisaddahanto,
thag16.4:17.4	Upeti gabbhañca parañca lokaṁ.
thag16.4:18.1	Coro yathā sandhimukhe gahīto,
thag16.4:18.2	Sakammunā haññati pāpadhammo;
thag16.4:18.3	Evaṁ pajā pecca paramhi loke,
thag16.4:18.4	Sakammunā haññati pāpadhammo.
thag16.4:19.1	Kāmā hi citrā madhurā manoramā,
thag16.4:19.2	Virūparūpena mathenti cittaṁ;
thag16.4:19.3	Ādīnavaṁ kāmaguṇesu disvā,
thag16.4:19.4	Tasmā ahaṁ pabbajitomhi rāja.
thag16.4:20.1	Dumapphalānīva patanti māṇavā,
thag16.4:20.2	Daharā ca vuḍḍhā ca sarīrabhedā;
thag16.4:20.3	Etampi disvā pabbajitomhi rāja,
thag16.4:20.4	Apaṇṇakaṁ sāmaññameva seyyo.
thag16.4:21.1	Saddhāyāhaṁ pabbajito,
thag16.4:21.2	upeto jinasāsane;
thag16.4:21.3	Avañjhā mayhaṁ pabbajjā,
thag16.4:21.4	anaṇo bhuñjāmi bhojanaṁ.
thag16.4:22.1	Kāme ādittato disvā,
thag16.4:22.2	Jātarūpāni satthato;
thag16.4:22.3	Gabbhavokkantito dukkhaṁ,
thag16.4:22.4	Nirayesu mahabbhayaṁ.
thag16.4:23.1	Etamādīnavaṁ ñatvā,
thag16.4:23.2	saṁvegaṁ alabhiṁ tadā;
thag16.4:23.3	Sohaṁ viddho tadā santo,
thag16.4:23.4	sampatto āsavakkhayaṁ.
thag16.4:24.1	Pariciṇṇo mayā satthā,
thag16.4:24.2	kataṁ buddhassa sāsanaṁ;
thag16.4:24.3	Ohito garuko bhāro,
thag16.4:24.4	bhavanetti samūhatā.
thag16.4:25.1	Yassatthāya pabbajito,
thag16.4:25.2	agārasmānagāriyaṁ;
thag16.4:25.3	So me attho anuppatto,
thag16.4:25.4	sabbasaṁyojanakkhayo”ti.
thag16.4:25.5	… Raṭṭhapālo thero ….
thag16.5:0.1	Theragāthā 16.5
thag16.5:0.2	Vīsatinipāta
thag16.5:0.3	Paṭhamavagga
thag16.5:0.4	Mālukyaputtattheragāthā
thag16.5:1.1	“Rūpaṁ disvā sati muṭṭhā,
thag16.5:1.2	Piyaṁ nimittaṁ manasi karoto;
thag16.5:1.3	Sārattacitto vedeti,
thag16.5:1.4	Tañca ajjhosa tiṭṭhati.
thag16.5:2.1	Tassa vaḍḍhanti vedanā,
thag16.5:2.2	anekā rūpasambhavā;
thag16.5:2.3	Abhijjhā ca vihesā ca,
thag16.5:2.4	cittamassūpahaññati;
thag16.5:2.5	Evamācinato dukkhaṁ,
thag16.5:2.6	ārā nibbāna vuccati.
thag16.5:3.1	Saddaṁ sutvā sati muṭṭhā,
thag16.5:3.2	Piyaṁ nimittaṁ manasi karoto;
thag16.5:3.3	Sārattacitto vedeti,
thag16.5:3.4	Tañca ajjhosa tiṭṭhati.
thag16.5:4.1	Tassa vaḍḍhanti vedanā,
thag16.5:4.2	anekā saddasambhavā;
thag16.5:4.3	Abhijjhā ca vihesā ca,
thag16.5:4.4	cittamassūpahaññati;
thag16.5:4.5	Evamācinato dukkhaṁ,
thag16.5:4.6	ārā nibbāna vuccati.
thag16.5:5.1	Gandhaṁ ghatvā sati muṭṭhā,
thag16.5:5.2	Piyaṁ nimittaṁ manasi karoto;
thag16.5:5.3	Sārattacitto vedeti,
thag16.5:5.4	Tañca ajjhosa tiṭṭhati.
thag16.5:6.1	Tassa vaḍḍhanti vedanā,
thag16.5:6.2	anekā gandhasambhavā;
thag16.5:6.3	Abhijjhā ca vihesā ca,
thag16.5:6.4	cittamassūpahaññati;
thag16.5:6.5	Evamācinato dukkhaṁ,
thag16.5:6.6	ārā nibbāna vuccati.
thag16.5:7.1	Rasaṁ bhotvā sati muṭṭhā,
thag16.5:7.2	Piyaṁ nimittaṁ manasi karoto;
thag16.5:7.3	Sārattacitto vedeti,
thag16.5:7.4	Tañca ajjhosa tiṭṭhati.
thag16.5:8.1	Tassa vaḍḍhanti vedanā,
thag16.5:8.2	anekā rasasambhavā;
thag16.5:8.3	Abhijjhā ca vihesā ca,
thag16.5:8.4	cittamassūpahaññati;
thag16.5:8.5	Evamācinato dukkhaṁ,
thag16.5:8.6	ārā nibbāna vuccati.
thag16.5:9.1	Phassaṁ phussa sati muṭṭhā,
thag16.5:9.2	Piyaṁ nimittaṁ manasi karoto;
thag16.5:9.3	Sārattacitto vedeti,
thag16.5:9.4	Tañca ajjhosa tiṭṭhati.
thag16.5:10.1	Tassa vaḍḍhanti vedanā,
thag16.5:10.2	anekā phassasambhavā;
thag16.5:10.3	Abhijjhā ca vihesā ca,
thag16.5:10.4	cittamassūpahaññati;
thag16.5:10.5	Evamācinato dukkhaṁ,
thag16.5:10.6	ārā nibbāna vuccati.
thag16.5:11.1	Dhammaṁ ñatvā sati muṭṭhā,
thag16.5:11.2	Piyaṁ nimittaṁ manasi karoto;
thag16.5:11.3	Sārattacitto vedeti,
thag16.5:11.4	Tañca ajjhosa tiṭṭhati.
thag16.5:12.1	Tassa vaḍḍhanti vedanā,
thag16.5:12.2	anekā dhammasambhavā;
thag16.5:12.3	Abhijjhā ca vihesā ca,
thag16.5:12.4	cittamassūpahaññati;
thag16.5:12.5	Evamācinato dukkhaṁ,
thag16.5:12.6	ārā nibbāna vuccati.
thag16.5:13.1	Na so rajjati rūpesu,
thag16.5:13.2	rūpaṁ disvā patissato;
thag16.5:13.3	Virattacitto vedeti,
thag16.5:13.4	tañca nājjhosa tiṭṭhati.
thag16.5:14.1	Yathāssa passato rūpaṁ,
thag16.5:14.2	sevato cāpi vedanaṁ;
thag16.5:14.3	Khīyati nopacīyati,
thag16.5:14.4	evaṁ so caratī sato;
thag16.5:14.5	Evaṁ apacinato dukkhaṁ,
thag16.5:14.6	santike nibbāna vuccati.
thag16.5:15.1	Na so rajjati saddesu,
thag16.5:15.2	saddaṁ sutvā patissato;
thag16.5:15.3	Virattacitto vedeti,
thag16.5:15.4	tañca nājjhosa tiṭṭhati.
thag16.5:16.1	Yathāssa suṇato saddaṁ,
thag16.5:16.2	sevato cāpi vedanaṁ;
thag16.5:16.3	Khīyati nopacīyati,
thag16.5:16.4	evaṁ so caratī sato;
thag16.5:16.5	Evaṁ apacinato dukkhaṁ,
thag16.5:16.6	santike nibbāna vuccati.
thag16.5:17.1	Na so rajjati gandhesu,
thag16.5:17.2	gandhaṁ ghatvā patissato;
thag16.5:17.3	Virattacitto vedeti,
thag16.5:17.4	tañca nājjhosa tiṭṭhati.
thag16.5:18.1	Yathāssa ghāyato gandhaṁ,
thag16.5:18.2	sevato cāpi vedanaṁ;
thag16.5:18.3	Khīyati nopacīyati,
thag16.5:18.4	evaṁ so caratī sato;
thag16.5:18.5	Evaṁ apacinato dukkhaṁ,
thag16.5:18.6	santike nibbāna vuccati.
thag16.5:19.1	Na so rajjati rasesu,
thag16.5:19.2	rasaṁ bhotvā patissato;
thag16.5:19.3	Virattacitto vedeti,
thag16.5:19.4	tañca nājjhosa tiṭṭhati.
thag16.5:20.1	Yathāssa sāyarato rasaṁ,
thag16.5:20.2	sevato cāpi vedanaṁ;
thag16.5:20.3	Khīyati nopacīyati,
thag16.5:20.4	evaṁ so caratī sato;
thag16.5:20.5	Evaṁ apacinato dukkhaṁ,
thag16.5:20.6	santike nibbāna vuccati.
thag16.5:21.1	Na so rajjati phassesu,
thag16.5:21.2	phassaṁ phussa patissato;
thag16.5:21.3	Virattacitto vedeti,
thag16.5:21.4	tañca nājjhosa tiṭṭhati.
thag16.5:22.1	Yathāssa phusato phassaṁ,
thag16.5:22.2	sevato cāpi vedanaṁ;
thag16.5:22.3	Khīyati nopacīyati,
thag16.5:22.4	evaṁ so caratī sato;
thag16.5:22.5	Evaṁ apacinato dukkhaṁ,
thag16.5:22.6	santike nibbāna vuccati.
thag16.5:23.1	Na so rajjati dhammesu,
thag16.5:23.2	dhammaṁ ñatvā patissato;
thag16.5:23.3	Virattacitto vedeti,
thag16.5:23.4	tañca nājjhosa tiṭṭhati.
thag16.5:24.1	Yathāssa vijānato dhammaṁ,
thag16.5:24.2	sevato cāpi vedanaṁ;
thag16.5:24.3	Khīyati nopacīyati,
thag16.5:24.4	evaṁ so caratī sato;
thag16.5:24.5	Evaṁ apacinato dukkhaṁ,
thag16.5:24.6	santike nibbāna vuccati”.
thag16.5:24.7	… Mālukyaputto thero ….
thag16.6:0.1	Theragāthā 16.6
thag16.6:0.2	Vīsatinipāta
thag16.6:0.3	Paṭhamavagga
thag16.6:0.4	Selattheragāthā
thag16.6:1.1	“Paripuṇṇakāyo suruci,
thag16.6:1.2	Sujāto cārudassano;
thag16.6:1.3	Suvaṇṇavaṇṇosi bhagavā,
thag16.6:1.4	Susukkadāṭhosi vīriyavā.
thag16.6:2.1	Narassa hi sujātassa,
thag16.6:2.2	ye bhavanti viyañjanā;
thag16.6:2.3	Sabbe te tava kāyasmiṁ,
thag16.6:2.4	mahāpurisalakkhaṇā.
thag16.6:3.1	Pasannanetto sumukho,
thag16.6:3.2	brahā uju patāpavā;
thag16.6:3.3	Majjhe samaṇasaṅghassa,
thag16.6:3.4	ādiccova virocasi.
thag16.6:4.1	Kalyāṇadassano bhikkhu,
thag16.6:4.2	kañcanasannibhattaco;
thag16.6:4.3	Kiṁ te samaṇabhāvena,
thag16.6:4.4	evaṁ uttamavaṇṇino.
thag16.6:5.1	Rājā arahasi bhavituṁ,
thag16.6:5.2	cakkavattī rathesabho;
thag16.6:5.3	Cāturanto vijitāvī,
thag16.6:5.4	jambusaṇḍassa issaro.
thag16.6:6.1	Khattiyā bhogī rājāno,
thag16.6:6.2	anuyantā bhavanti te;
thag16.6:6.3	Rājābhirājā manujindo,
thag16.6:6.4	rajjaṁ kārehi gotama”.
thag16.6:7.1	“Rājāhamasmi sela,
thag16.6:7.2	(selāti bhagavā)
thag16.6:7.3	Dhammarājā anuttaro;
thag16.6:7.4	Dhammena cakkaṁ vattemi,
thag16.6:7.5	Cakkaṁ appaṭivattiyaṁ”.
thag16.6:8.1	“Sambuddho paṭijānāsi,
thag16.6:8.2	(iti selo brāhmaṇo)
thag16.6:8.3	Dhammarājā anuttaro;
thag16.6:8.4	‘Dhammena cakkaṁ vattemi’,
thag16.6:8.5	Iti bhāsatha gotama.
thag16.6:9.1	Ko nu senāpati bhoto,
thag16.6:9.2	sāvako satthuranvayo;
thag16.6:9.3	Ko tetamanuvatteti,
thag16.6:9.4	dhammacakkaṁ pavattitaṁ”.
thag16.6:10.1	“Mayā pavattitaṁ cakkaṁ,
thag16.6:10.2	(selāti bhagavā)
thag16.6:10.3	Dhammacakkaṁ anuttaraṁ;
thag16.6:10.4	Sāriputto anuvatteti,
thag16.6:10.5	Anujāto tathāgataṁ.
thag16.6:11.1	Abhiññeyyaṁ abhiññātaṁ,
thag16.6:11.2	bhāvetabbañca bhāvitaṁ;
thag16.6:11.3	Pahātabbaṁ pahīnaṁ me,
thag16.6:11.4	tasmā buddhosmi brāhmaṇa.
thag16.6:12.1	Vinayassu mayi kaṅkhaṁ,
thag16.6:12.2	adhimuccassu brāhmaṇa;
thag16.6:12.3	Dullabhaṁ dassanaṁ hoti,
thag16.6:12.4	sambuddhānaṁ abhiṇhaso.
thag16.6:13.1	Yesaṁ ve dullabho loke,
thag16.6:13.2	pātubhāvo abhiṇhaso;
thag16.6:13.3	Sohaṁ brāhmaṇa buddhosmi,
thag16.6:13.4	sallakatto anuttaro.
thag16.6:14.1	Brahmabhūto atitulo,
thag16.6:14.2	mārasenappamaddano;
thag16.6:14.3	Sabbāmitte vase katvā,
thag16.6:14.4	modāmi akutobhayo”.
thag16.6:15.1	“Idaṁ bhonto nisāmetha,
thag16.6:15.2	yathā bhāsati cakkhumā;
thag16.6:15.3	Sallakatto mahāvīro,
thag16.6:15.4	sīhova nadatī vane.
thag16.6:16.1	Brahmabhūtaṁ atitulaṁ,
thag16.6:16.2	mārasenappamaddanaṁ;
thag16.6:16.3	Ko disvā nappasīdeyya,
thag16.6:16.4	api kaṇhābhijātiko.
thag16.6:17.1	Yo maṁ icchati anvetu,
thag16.6:17.2	yo vā nicchati gacchatu;
thag16.6:17.3	Idhāhaṁ pabbajissāmi,
thag16.6:17.4	varapaññassa santike”.
thag16.6:18.1	“Etañce ruccati bhoto,
thag16.6:18.2	sammāsambuddhasāsanaṁ;
thag16.6:18.3	Mayampi pabbajissāma,
thag16.6:18.4	varapaññassa santike”.
thag16.6:19.1	“Brāhmaṇā tisatā ime,
thag16.6:19.2	yācanti pañjalīkatā;
thag16.6:19.3	‘Brahmacariyaṁ carissāma,
thag16.6:19.4	bhagavā tava santike’”.
thag16.6:20.1	“Svākkhātaṁ brahmacariyaṁ,
thag16.6:20.2	(selāti bhagavā)
thag16.6:20.3	Sandiṭṭhikamakālikaṁ;
thag16.6:20.4	Yattha amoghā pabbajjā,
thag16.6:20.5	Appamattassa sikkhato”.
thag16.6:21.1	“Yaṁ taṁ saraṇamāgamha,
thag16.6:21.2	ito aṭṭhame cakkhuma;
thag16.6:21.3	Sattarattena bhagavā,
thag16.6:21.4	dantāmha tava sāsane.
thag16.6:22.1	Tuvaṁ buddho tuvaṁ satthā,
thag16.6:22.2	tuvaṁ mārābhibhū muni;
thag16.6:22.3	Tuvaṁ anusaye chetvā,
thag16.6:22.4	tiṇṇo tāresimaṁ pajaṁ.
thag16.6:23.1	Upadhī te samatikkantā,
thag16.6:23.2	āsavā te padālitā;
thag16.6:23.3	Sīhova anupādāno,
thag16.6:23.4	pahīnabhayabheravo.
thag16.6:24.1	Bhikkhavo tisatā ime,
thag16.6:24.2	tiṭṭhanti pañjalīkatā;
thag16.6:24.3	Pāde vīra pasārehi,
thag16.6:24.4	nāgā vandantu satthuno”ti.
thag16.6:24.5	… Selo thero ….
thag16.7:0.1	Theragāthā 16.7
thag16.7:0.2	Vīsatinipāta
thag16.7:0.3	Paṭhamavagga
thag16.7:0.4	Kāḷigodhāputtabhaddiyattheragāthā
thag16.7:1.1	“Yātaṁ me hatthigīvāya,
thag16.7:1.2	sukhumā vatthā padhāritā;
thag16.7:1.3	Sālīnaṁ odano bhutto,
thag16.7:1.4	sucimaṁsūpasecano.
thag16.7:2.1	Sojja bhaddo sātatiko,
thag16.7:2.2	uñchāpattāgate rato;
thag16.7:2.3	Jhāyati anupādāno,
thag16.7:2.4	putto godhāya bhaddiyo.
thag16.7:3.1	Paṁsukūlī sātatiko,
thag16.7:3.2	uñchāpattāgate rato;
thag16.7:3.3	Jhāyati anupādāno,
thag16.7:3.4	putto godhāya bhaddiyo.
thag16.7:4.1	Piṇḍapātī sātatiko,
thag16.7:4.2	…
thag16.7:4.3	pe …
thag16.7:4.4	…
thag16.7:5.1	Tecīvarī sātatiko,
thag16.7:5.2	…
thag16.7:5.3	pe …
thag16.7:5.4	…
thag16.7:6.1	Sapadānacārī sātatiko,
thag16.7:6.2	…
thag16.7:6.3	pe …
thag16.7:6.4	…
thag16.7:7.1	Ekāsanī sātatiko,
thag16.7:7.2	…
thag16.7:7.3	pe …
thag16.7:7.4	…
thag16.7:8.1	Pattapiṇḍī sātatiko,
thag16.7:8.2	…
thag16.7:8.3	pe …
thag16.7:8.4	…
thag16.7:9.1	Khalupacchābhattī sātatiko,
thag16.7:9.2	…
thag16.7:9.3	pe …
thag16.7:9.4	…
thag16.7:10.1	Āraññiko sātatiko,
thag16.7:10.2	…
thag16.7:10.3	pe …
thag16.7:10.4	…
thag16.7:11.1	Rukkhamūliko sātatiko,
thag16.7:11.2	…
thag16.7:11.3	pe …
thag16.7:11.4	…
thag16.7:12.1	Abbhokāsī sātatiko,
thag16.7:12.2	…
thag16.7:12.3	pe …
thag16.7:12.4	…
thag16.7:13.1	Sosāniko sātatiko,
thag16.7:13.2	…
thag16.7:13.3	pe …
thag16.7:13.4	…
thag16.7:14.1	Yathāsanthatiko sātatiko,
thag16.7:14.2	…
thag16.7:14.3	pe …
thag16.7:14.4	…
thag16.7:15.1	Nesajjiko sātatiko,
thag16.7:15.2	…
thag16.7:15.3	pe …
thag16.7:15.4	…
thag16.7:16.1	Appiccho sātatiko,
thag16.7:16.2	…
thag16.7:16.3	pe …
thag16.7:16.4	…
thag16.7:17.1	Santuṭṭho sātatiko,
thag16.7:17.2	…
thag16.7:17.3	pe …
thag16.7:17.4	…
thag16.7:18.1	Pavivitto sātatiko,
thag16.7:18.2	…
thag16.7:18.3	pe …
thag16.7:18.4	…
thag16.7:19.1	Asaṁsaṭṭho sātatiko,
thag16.7:19.2	…
thag16.7:19.3	pe …
thag16.7:19.4	…
thag16.7:20.1	Āraddhavīriyo sātatiko,
thag16.7:20.2	…
thag16.7:20.3	pe …
thag16.7:20.4	…
thag16.7:21.1	Hitvā satapalaṁ kaṁsaṁ,
thag16.7:21.2	sovaṇṇaṁ satarājikaṁ;
thag16.7:21.3	Aggahiṁ mattikāpattaṁ,
thag16.7:21.4	idaṁ dutiyābhisecanaṁ.
thag16.7:22.1	Ucce maṇḍalipākāre,
thag16.7:22.2	daḷhamaṭṭālakoṭṭhake;
thag16.7:22.3	Rakkhito khaggahatthehi,
thag16.7:22.4	uttasaṁ vihariṁ pure.
thag16.7:23.1	Sojja bhaddo anutrāsī,
thag16.7:23.2	pahīnabhayabheravo;
thag16.7:23.3	Jhāyati vanamoggayha,
thag16.7:23.4	putto godhāya bhaddiyo.
thag16.7:24.1	Sīlakkhandhe patiṭṭhāya,
thag16.7:24.2	satiṁ paññañca bhāvayaṁ;
thag16.7:24.3	Pāpuṇiṁ anupubbena,
thag16.7:24.4	sabbasaṁyojanakkhayan”ti.
thag16.7:24.5	… Bhaddiyo kāḷigodhāya putto thero ….
thag16.8:0.1	Theragāthā 16.8
thag16.8:0.2	Vīsatinipāta
thag16.8:0.3	Paṭhamavagga
thag16.8:0.4	Aṅgulimālattheragāthā
thag16.8:1.1	“Gacchaṁ vadesi samaṇaṭṭhitomhi,
thag16.8:1.2	Mamañca brūsi ṭhitamaṭṭhitoti;
thag16.8:1.3	Pucchāmi taṁ samaṇa etamatthaṁ,
thag16.8:1.4	‘Kathaṁ ṭhito tvaṁ ahamaṭṭhitomhi’”.
thag16.8:2.1	“Ṭhito ahaṁ aṅgulimāla sabbadā,
thag16.8:2.2	Sabbesu bhūtesu nidhāya daṇḍaṁ;
thag16.8:2.3	Tuvañca pāṇesu asaññatosi,
thag16.8:2.4	Tasmā ṭhitohaṁ tuvamaṭṭhitosi”.
thag16.8:3.1	“Cirassaṁ vata me mahito mahesī,
thag16.8:3.2	Mahāvanaṁ samaṇo paccapādi;
thag16.8:3.3	Sohaṁ cajissāmi sahassapāpaṁ,
thag16.8:3.4	Sutvāna gāthaṁ tava dhammayuttaṁ”.
thag16.8:4.1	Icceva coro asimāvudhañca,
thag16.8:4.2	Sobbhe papāte narake anvakāsi;
thag16.8:4.3	Avandi coro sugatassa pāde,
thag16.8:4.4	Tattheva pabbajjamayāci buddhaṁ.
thag16.8:5.1	Buddho ca kho kāruṇiko mahesi,
thag16.8:5.2	Yo satthā lokassa sadevakassa;
thag16.8:5.3	“Tamehi bhikkhū”ti tadā avoca,
thag16.8:5.4	Eseva tassa ahu bhikkhubhāvo.
thag16.8:6.1	“Yo ca pubbe pamajjitvā,
thag16.8:6.2	pacchā so nappamajjati;
thag16.8:6.3	Somaṁ lokaṁ pabhāseti,
thag16.8:6.4	abbhā muttova candimā.
thag16.8:7.1	Yassa pāpaṁ kataṁ kammaṁ,
thag16.8:7.2	kusalena pidhīyati;
thag16.8:7.3	Somaṁ lokaṁ pabhāseti,
thag16.8:7.4	abbhā muttova candimā.
thag16.8:8.1	Yo have daharo bhikkhu,
thag16.8:8.2	yuñjati buddhasāsane;
thag16.8:8.3	Somaṁ lokaṁ pabhāseti,
thag16.8:8.4	abbhā muttova candimā.
thag16.8:9.1	Disāpi me dhammakathaṁ suṇantu,
thag16.8:9.2	Disāpi me yuñjantu buddhasāsane;
thag16.8:9.3	Disāpi me te manuje bhajantu,
thag16.8:9.4	Ye dhammamevādapayanti santo.
thag16.8:10.1	Disā hi me khantivādānaṁ,
thag16.8:10.2	avirodhappasaṁsinaṁ;
thag16.8:10.3	Suṇantu dhammaṁ kālena,
thag16.8:10.4	tañca anuvidhīyantu.
thag16.8:11.1	Na hi jātu so mamaṁ hiṁse,
thag16.8:11.2	aññaṁ vā pana kiñcanaṁ;
thag16.8:11.3	Pappuyya paramaṁ santiṁ,
thag16.8:11.4	rakkheyya tasathāvare.
thag16.8:12.1	Udakañhi nayanti nettikā,
thag16.8:12.2	Usukārā namayanti tejanaṁ;
thag16.8:12.3	Dāruṁ namayanti tacchakā,
thag16.8:12.4	Attānaṁ damayanti paṇḍitā.
thag16.8:13.1	Daṇḍeneke damayanti,
thag16.8:13.2	aṅkusebhi kasāhi ca;
thag16.8:13.3	Adaṇḍena asatthena,
thag16.8:13.4	ahaṁ dantomhi tādinā.
thag16.8:14.1	‘Ahiṁsako’ti me nāmaṁ,
thag16.8:14.2	hiṁsakassa pure sato;
thag16.8:14.3	Ajjāhaṁ saccanāmomhi,
thag16.8:14.4	na naṁ hiṁsāmi kiñcanaṁ.
thag16.8:15.1	Coro ahaṁ pure āsiṁ,
thag16.8:15.2	aṅgulimāloti vissuto;
thag16.8:15.3	Vuyhamāno mahoghena,
thag16.8:15.4	buddhaṁ saraṇamāgamaṁ.
thag16.8:16.1	Lohitapāṇi pure āsiṁ,
thag16.8:16.2	aṅgulimāloti vissuto;
thag16.8:16.3	Saraṇagamanaṁ passa,
thag16.8:16.4	bhavanetti samūhatā.
thag16.8:17.1	Tādisaṁ kammaṁ katvāna,
thag16.8:17.2	bahuṁ duggatigāminaṁ;
thag16.8:17.3	Phuṭṭho kammavipākena,
thag16.8:17.4	anaṇo bhuñjāmi bhojanaṁ.
thag16.8:18.1	Pamādamanuyuñjanti,
thag16.8:18.2	bālā dummedhino janā;
thag16.8:18.3	Appamādañca medhāvī,
thag16.8:18.4	dhanaṁ seṭṭhaṁva rakkhati.
thag16.8:19.1	Mā pamādamanuyuñjetha,
thag16.8:19.2	mā kāmaratisanthavaṁ;
thag16.8:19.3	Appamatto hi jhāyanto,
thag16.8:19.4	pappoti paramaṁ sukhaṁ.
thag16.8:20.1	Svāgataṁ nāpagataṁ,
thag16.8:20.2	netaṁ dummantitaṁ mama;
thag16.8:20.3	Savibhattesu dhammesu,
thag16.8:20.4	yaṁ seṭṭhaṁ tadupāgamaṁ.
thag16.8:21.1	Svāgataṁ nāpagataṁ,
thag16.8:21.2	netaṁ dummantitaṁ mama;
thag16.8:21.3	Tisso vijjā anuppattā,
thag16.8:21.4	kataṁ buddhassa sāsanaṁ.
thag16.8:22.1	Araññe rukkhamūle vā,
thag16.8:22.2	pabbatesu guhāsu vā;
thag16.8:22.3	Tattha tattheva aṭṭhāsiṁ,
thag16.8:22.4	ubbiggamanaso tadā.
thag16.8:23.1	Sukhaṁ sayāmi ṭhāyāmi,
thag16.8:23.2	sukhaṁ kappemi jīvitaṁ;
thag16.8:23.3	Ahatthapāso mārassa,
thag16.8:23.4	aho satthānukampito.
thag16.8:24.1	Brahmajacco pure āsiṁ,
thag16.8:24.2	udicco ubhato ahu;
thag16.8:24.3	Sojja putto sugatassa,
thag16.8:24.4	dhammarājassa satthuno.
thag16.8:25.1	Vītataṇho anādāno,
thag16.8:25.2	guttadvāro susaṁvuto;
thag16.8:25.3	Aghamūlaṁ vadhitvāna,
thag16.8:25.4	patto me āsavakkhayo.
thag16.8:26.1	Pariciṇṇo mayā satthā,
thag16.8:26.2	kataṁ buddhassa sāsanaṁ;
thag16.8:26.3	Ohito garuko bhāro,
thag16.8:26.4	bhavanetti samūhatā”ti.
thag16.8:26.5	… Aṅgulimālo thero ….
thag16.9:0.1	Theragāthā 16.9
thag16.9:0.2	Vīsatinipāta
thag16.9:0.3	Paṭhamavagga
thag16.9:0.4	Anuruddhattheragāthā
thag16.9:1.1	“Pahāya mātāpitaro,
thag16.9:1.2	bhaginī ñātibhātaro;
thag16.9:1.3	Pañca kāmaguṇe hitvā,
thag16.9:1.4	anuruddhova jhāyati.
thag16.9:2.1	Sameto naccagītehi,
thag16.9:2.2	sammatāḷappabodhano;
thag16.9:2.3	Na tena suddhimajjhagaṁ,
thag16.9:2.4	mārassa visaye rato.
thag16.9:3.1	Etañca samatikkamma,
thag16.9:3.2	rato buddhassa sāsane;
thag16.9:3.3	Sabboghaṁ samatikkamma,
thag16.9:3.4	anuruddhova jhāyati.
thag16.9:4.1	Rūpā saddā rasā gandhā,
thag16.9:4.2	phoṭṭhabbā ca manoramā;
thag16.9:4.3	Ete ca samatikkamma,
thag16.9:4.4	anuruddhova jhāyati.
thag16.9:5.1	Piṇḍapātamatikkanto,
thag16.9:5.2	eko adutiyo muni;
thag16.9:5.3	Esati paṁsukūlāni,
thag16.9:5.4	anuruddho anāsavo.
thag16.9:6.1	Vicinī aggahī dhovi,
thag16.9:6.2	rajayī dhārayī muni;
thag16.9:6.3	Paṁsukūlāni matimā,
thag16.9:6.4	anuruddho anāsavo.
thag16.9:7.1	Mahiccho ca asantuṭṭho,
thag16.9:7.2	saṁsaṭṭho yo ca uddhato;
thag16.9:7.3	Tassa dhammā ime honti,
thag16.9:7.4	pāpakā saṅkilesikā.
thag16.9:8.1	Sato ca hoti appiccho,
thag16.9:8.2	santuṭṭho avighātavā;
thag16.9:8.3	Pavivekarato vitto,
thag16.9:8.4	niccamāraddhavīriyo.
thag16.9:9.1	Tassa dhammā ime honti,
thag16.9:9.2	kusalā bodhipakkhikā;
thag16.9:9.3	Anāsavo ca so hoti,
thag16.9:9.4	iti vuttaṁ mahesinā.
thag16.9:10.1	Mama saṅkappamaññāya,
thag16.9:10.2	satthā loke anuttaro;
thag16.9:10.3	Manomayena kāyena,
thag16.9:10.4	iddhiyā upasaṅkami.
thag16.9:11.1	Yadā me ahu saṅkappo,
thag16.9:11.2	tato uttari desayi;
thag16.9:11.3	Nippapañcarato buddho,
thag16.9:11.4	nippapañcamadesayi.
thag16.9:12.1	Tassāhaṁ dhammamaññāya,
thag16.9:12.2	vihāsiṁ sāsane rato;
thag16.9:12.3	Tisso vijjā anuppattā,
thag16.9:12.4	kataṁ buddhassa sāsanaṁ.
thag16.9:13.1	Pañcapaññāsavassāni,
thag16.9:13.2	yato nesajjiko ahaṁ;
thag16.9:13.3	Pañcavīsativassāni,
thag16.9:13.4	yato middhaṁ samūhataṁ.
thag16.9:14.1	Nāhu assāsapassāsā,
thag16.9:14.2	ṭhitacittassa tādino;
thag16.9:14.3	Anejo santimārabbha,
thag16.9:14.4	cakkhumā parinibbuto.
thag16.9:15.1	Asallīnena cittena,
thag16.9:15.2	vedanaṁ ajjhavāsayi;
thag16.9:15.3	Pajjotasseva nibbānaṁ,
thag16.9:15.4	vimokkho cetaso ahu.
thag16.9:16.1	Ete pacchimakā dāni,
thag16.9:16.2	munino phassapañcamā;
thag16.9:16.3	Nāññe dhammā bhavissanti,
thag16.9:16.4	sambuddhe parinibbute.
thag16.9:17.1	Natthi dāni punāvāso,
thag16.9:17.2	devakāyasmi jālini;
thag16.9:17.3	Vikkhīṇo jātisaṁsāro,
thag16.9:17.4	natthi dāni punabbhavo.
thag16.9:18.1	Yassa muhuttena sahassadhā,
thag16.9:18.2	Loko saṁvidito sabrahmakappo;
thag16.9:18.3	Vasī iddhiguṇe cutūpapāte,
thag16.9:18.4	Kāle passati devatā sa bhikkhu.
thag16.9:19.1	Annabhāro pure āsiṁ,
thag16.9:19.2	daliddo ghāsahārako;
thag16.9:19.3	Samaṇaṁ paṭipādesiṁ,
thag16.9:19.4	upariṭṭhaṁ yasassinaṁ.
thag16.9:20.1	Somhi sakyakule jāto,
thag16.9:20.2	anuruddhoti maṁ vidū;
thag16.9:20.3	Upeto naccagītehi,
thag16.9:20.4	sammatāḷappabodhano.
thag16.9:21.1	Athaddasāsiṁ sambuddhaṁ,
thag16.9:21.2	satthāraṁ akutobhayaṁ;
thag16.9:21.3	Tasmiṁ cittaṁ pasādetvā,
thag16.9:21.4	pabbajiṁ anagāriyaṁ.
thag16.9:22.1	Pubbenivāsaṁ jānāmi,
thag16.9:22.2	yattha me vusitaṁ pure;
thag16.9:22.3	Tāvatiṁsesu devesu,
thag16.9:22.4	aṭṭhāsiṁ sakkajātiyā.
thag16.9:23.1	Sattakkhattuṁ manussindo,
thag16.9:23.2	ahaṁ rajjamakārayiṁ;
thag16.9:23.3	Cāturanto vijitāvī,
thag16.9:23.4	jambusaṇḍassa issaro;
thag16.9:23.5	Adaṇḍena asatthena,
thag16.9:23.6	dhammena anusāsayiṁ.
thag16.9:24.1	Ito satta tato satta,
thag16.9:24.2	saṁsārāni catuddasa;
thag16.9:24.3	Nivāsamabhijānissaṁ,
thag16.9:24.4	devaloke ṭhito tadā.
thag16.9:25.1	Pañcaṅgike samādhimhi,
thag16.9:25.2	sante ekodibhāvite;
thag16.9:25.3	Paṭippassaddhiladdhamhi,
thag16.9:25.4	dibbacakkhu visujjhi me.
thag16.9:26.1	Cutūpapātaṁ jānāmi,
thag16.9:26.2	sattānaṁ āgatiṁ gatiṁ;
thag16.9:26.3	Itthabhāvaññathābhāvaṁ,
thag16.9:26.4	jhāne pañcaṅgike ṭhito.
thag16.9:27.1	Pariciṇṇo mayā satthā,
thag16.9:27.2	… pe
thag16.9:27.3	…
thag16.9:27.4	bhavanetti samūhatā.
thag16.9:28.1	Vajjīnaṁ veḷuvagāme,
thag16.9:28.2	ahaṁ jīvitasaṅkhayā;
thag16.9:28.3	Heṭṭhato veḷugumbasmiṁ,
thag16.9:28.4	nibbāyissaṁ anāsavo”ti.
thag16.9:28.5	… Anuruddho thero ….
thag16.10:0.1	Theragāthā 16.10
thag16.10:0.2	Vīsatinipāta
thag16.10:0.3	Paṭhamavagga
thag16.10:0.4	Pārāpariyattheragāthā
thag16.10:1.1	Samaṇassa ahu cintā,
thag16.10:1.2	pupphitamhi mahāvane;
thag16.10:1.3	Ekaggassa nisinnassa,
thag16.10:1.4	pavivittassa jhāyino.
thag16.10:2.1	“Aññathā lokanāthamhi,
thag16.10:2.2	tiṭṭhante purisuttame;
thag16.10:2.3	Iriyaṁ āsi bhikkhūnaṁ,
thag16.10:2.4	aññathā dāni dissati.
thag16.10:3.1	Sītavātaparittāṇaṁ,
thag16.10:3.2	hirikopīnachādanaṁ;
thag16.10:3.3	Mattaṭṭhiyaṁ abhuñjiṁsu,
thag16.10:3.4	santuṭṭhā itarītare.
thag16.10:4.1	Paṇītaṁ yadi vā lūkhaṁ,
thag16.10:4.2	appaṁ vā yadi vā bahuṁ;
thag16.10:4.3	Yāpanatthaṁ abhuñjiṁsu,
thag16.10:4.4	agiddhā nādhimucchitā.
thag16.10:5.1	Jīvitānaṁ parikkhāre,
thag16.10:5.2	bhesajje atha paccaye;
thag16.10:5.3	Na bāḷhaṁ ussukā āsuṁ,
thag16.10:5.4	yathā te āsavakkhaye.
thag16.10:6.1	Araññe rukkhamūlesu,
thag16.10:6.2	kandarāsu guhāsu ca;
thag16.10:6.3	Vivekamanubrūhantā,
thag16.10:6.4	vihaṁsu tapparāyaṇā.
thag16.10:7.1	Nīcā niviṭṭhā subharā,
thag16.10:7.2	mudū atthaddhamānasā;
thag16.10:7.3	Abyāsekā amukharā,
thag16.10:7.4	atthacintā vasānugā.
thag16.10:8.1	Tato pāsādikaṁ āsi,
thag16.10:8.2	gataṁ bhuttaṁ nisevitaṁ;
thag16.10:8.3	Siniddhā teladhārāva,
thag16.10:8.4	ahosi iriyāpatho.
thag16.10:9.1	Sabbāsavaparikkhīṇā,
thag16.10:9.2	mahājhāyī mahāhitā;
thag16.10:9.3	Nibbutā dāni te therā,
thag16.10:9.4	parittā dāni tādisā.
thag16.10:10.1	Kusalānañca dhammānaṁ,
thag16.10:10.2	paññāya ca parikkhayā;
thag16.10:10.3	Sabbākāravarūpetaṁ,
thag16.10:10.4	lujjate jinasāsanaṁ.
thag16.10:11.1	Pāpakānañca dhammānaṁ,
thag16.10:11.2	kilesānañca yo utu;
thag16.10:11.3	Upaṭṭhitā vivekāya,
thag16.10:11.4	ye ca saddhammasesakā.
thag16.10:12.1	Te kilesā pavaḍḍhantā,
thag16.10:12.2	āvisanti bahuṁ janaṁ;
thag16.10:12.3	Kīḷanti maññe bālehi,
thag16.10:12.4	ummattehiva rakkhasā.
thag16.10:13.1	Kilesehābhibhūtā te,
thag16.10:13.2	tena tena vidhāvitā;
thag16.10:13.3	Narā kilesavatthūsu,
thag16.10:13.4	sasaṅgāmeva ghosite.
thag16.10:14.1	Pariccajitvā saddhammaṁ,
thag16.10:14.2	aññamaññehi bhaṇḍare;
thag16.10:14.3	Diṭṭhigatāni anventā,
thag16.10:14.4	idaṁ seyyoti maññare.
thag16.10:15.1	Dhanañca puttaṁ bhariyañca,
thag16.10:15.2	chaḍḍayitvāna niggatā;
thag16.10:15.3	Kaṭacchubhikkhahetūpi,
thag16.10:15.4	akicchāni nisevare.
thag16.10:16.1	Udarāvadehakaṁ bhutvā,
thag16.10:16.2	sayantuttānaseyyakā;
thag16.10:16.3	Kathaṁ vattenti paṭibuddhā,
thag16.10:16.4	yā kathā satthugarahitā.
thag16.10:17.1	Sabbakārukasippāni,
thag16.10:17.2	cittiṁ katvāna sikkhare;
thag16.10:17.3	Avūpasantā ajjhattaṁ,
thag16.10:17.4	sāmaññatthotiacchati.
thag16.10:18.1	Mattikaṁ telacuṇṇañca,
thag16.10:18.2	udakāsanabhojanaṁ;
thag16.10:18.3	Gihīnaṁ upanāmenti,
thag16.10:18.4	ākaṅkhantā bahuttaraṁ.
thag16.10:19.1	Dantaponaṁ kapitthañca,
thag16.10:19.2	pupphaṁ khādaniyāni ca;
thag16.10:19.3	Piṇḍapāte ca sampanne,
thag16.10:19.4	ambe āmalakāni ca.
thag16.10:20.1	Bhesajjesu yathā vejjā,
thag16.10:20.2	kiccākicce yathā gihī;
thag16.10:20.3	Gaṇikāva vibhūsāyaṁ,
thag16.10:20.4	issare khattiyā yathā.
thag16.10:21.1	Nekatikā vañcanikā,
thag16.10:21.2	kūṭasakkhī apāṭukā;
thag16.10:21.3	Bahūhi parikappehi,
thag16.10:21.4	āmisaṁ paribhuñjare.
thag16.10:22.1	Lesakappe pariyāye,
thag16.10:22.2	parikappenudhāvitā;
thag16.10:22.3	Jīvikatthā upāyena,
thag16.10:22.4	saṅkaḍḍhanti bahuṁ dhanaṁ.
thag16.10:23.1	Upaṭṭhāpenti parisaṁ,
thag16.10:23.2	kammato no ca dhammato;
thag16.10:23.3	Dhammaṁ paresaṁ desenti,
thag16.10:23.4	lābhato no ca atthato.
thag16.10:24.1	Saṅghalābhassa bhaṇḍanti,
thag16.10:24.2	saṅghato paribāhirā;
thag16.10:24.3	Paralābhopajīvantā,
thag16.10:24.4	ahirīkā na lajjare.
thag16.10:25.1	Nānuyuttā tathā eke,
thag16.10:25.2	muṇḍā saṅghāṭipārutā;
thag16.10:25.3	Sambhāvanaṁyevicchanti,
thag16.10:25.4	lābhasakkāramucchitā.
thag16.10:26.1	Evaṁ nānappayātamhi,
thag16.10:26.2	na dāni sukaraṁ tathā;
thag16.10:26.3	Aphusitaṁ vā phusituṁ,
thag16.10:26.4	phusitaṁ vānurakkhituṁ.
thag16.10:27.1	Yathā kaṇṭakaṭṭhānamhi,
thag16.10:27.2	careyya anupāhano;
thag16.10:27.3	Satiṁ upaṭṭhapetvāna,
thag16.10:27.4	evaṁ gāme munī care.
thag16.10:28.1	Saritvā pubbake yogī,
thag16.10:28.2	tesaṁ vattamanussaraṁ;
thag16.10:28.3	Kiñcāpi pacchimo kālo,
thag16.10:28.4	phuseyya amataṁ padaṁ.
thag16.10:29.1	Idaṁ vatvā sālavane,
thag16.10:29.2	samaṇo bhāvitindriyo;
thag16.10:29.3	Brāhmaṇo parinibbāyī,
thag16.10:29.4	isi khīṇapunabbhavo”ti.
thag16.10:29.5	… Pārāpariyo thero …
thag16.10:29.6	Vīsatinipāto niṭṭhito.
thag16.10:30.0	Tatruddānaṁ
thag16.10:30.1	Adhimutto pārāpariyo,
thag16.10:30.2	telakāni raṭṭhapālo;
thag16.10:30.3	Mālukyaselo bhaddiyo,
thag16.10:30.4	aṅguli dibbacakkhuko;
thag16.10:30.5	Pārāpariyo dasete,
thag16.10:30.6	vīsamhi parikittitā;
thag16.10:30.7	Gāthāyo dve satā honti,
thag16.10:30.8	pañcatālīsa uttarinti.
thag17.1:0.1	Theragāthā 17.1
thag17.1:0.2	Tiṁsanipāta
thag17.1:0.3	Paṭhamavagga
thag17.1:0.4	Phussattheragāthā
thag17.1:1.1	Pāsādike bahū disvā,
thag17.1:1.2	bhāvitatte susaṁvute;
thag17.1:1.3	Isi paṇḍarasagotto,
thag17.1:1.4	apucchi phussasavhayaṁ.
thag17.1:2.1	“Kiṁchandā kimadhippāyā,
thag17.1:2.2	kimākappā bhavissare;
thag17.1:2.3	Anāgatamhi kālamhi,
thag17.1:2.4	taṁ me akkhāhi pucchito”.
thag17.1:3.1	“Suṇohi vacanaṁ mayhaṁ,
thag17.1:3.2	isipaṇḍarasavhaya;
thag17.1:3.3	Sakkaccaṁ upadhārehi,
thag17.1:3.4	ācikkhissāmyanāgataṁ.
thag17.1:4.1	Kodhanā upanāhī ca,
thag17.1:4.2	makkhī thambhī saṭhā bahū;
thag17.1:4.3	Ussukī nānāvādā ca,
thag17.1:4.4	bhavissanti anāgate.
thag17.1:5.1	Aññātamānino dhamme,
thag17.1:5.2	gambhīre tīragocarā;
thag17.1:5.3	Lahukā agarū dhamme,
thag17.1:5.4	aññamaññamagāravā.
thag17.1:6.1	Bahū ādīnavā loke,
thag17.1:6.2	uppajjissantyanāgate;
thag17.1:6.3	Sudesitaṁ imaṁ dhammaṁ,
thag17.1:6.4	kilesessanti dummatī.
thag17.1:7.1	Guṇahīnāpi saṅghamhi,
thag17.1:7.2	voharantā visāradā;
thag17.1:7.3	Balavanto bhavissanti,
thag17.1:7.4	mukharā assutāvino.
thag17.1:8.1	Guṇavantopi saṅghamhi,
thag17.1:8.2	voharantā yathātthato;
thag17.1:8.3	Dubbalā te bhavissanti,
thag17.1:8.4	hirīmanā anatthikā.
thag17.1:9.1	Rajataṁ jātarūpañca,
thag17.1:9.2	khettaṁ vatthumajeḷakaṁ;
thag17.1:9.3	Dāsidāsañca dummedhā,
thag17.1:9.4	sādiyissantyanāgate.
thag17.1:10.1	Ujjhānasaññino bālā,
thag17.1:10.2	sīlesu asamāhitā;
thag17.1:10.3	Unnaḷā vicarissanti,
thag17.1:10.4	kalahābhiratā magā.
thag17.1:11.1	Uddhatā ca bhavissanti,
thag17.1:11.2	nīlacīvarapārutā;
thag17.1:11.3	Kuhā thaddhā lapā siṅgī,
thag17.1:11.4	carissantyariyā viya.
thag17.1:12.1	Telasaṇṭhehi kesehi,
thag17.1:12.2	capalā añjanakkhikā;
thag17.1:12.3	Rathiyāya gamissanti,
thag17.1:12.4	dantavaṇṇikapārutā.
thag17.1:13.1	Ajegucchaṁ vimuttehi,
thag17.1:13.2	surattaṁ arahaddhajaṁ;
thag17.1:13.3	Jigucchissanti kāsāvaṁ,
thag17.1:13.4	odātesu samucchitā.
thag17.1:14.1	Lābhakāmā bhavissanti,
thag17.1:14.2	kusītā hīnavīriyā;
thag17.1:14.3	Kicchantā vanapatthāni,
thag17.1:14.4	gāmantesu vasissare.
thag17.1:15.1	Ye ye lābhaṁ labhissanti,
thag17.1:15.2	micchājīvaratā sadā;
thag17.1:15.3	Te teva anusikkhantā,
thag17.1:15.4	bhajissanti asaṁyatā.
thag17.1:16.1	Ye ye alābhino lābhaṁ,
thag17.1:16.2	na te pujjā bhavissare;
thag17.1:16.3	Supesalepi te dhīre,
thag17.1:16.4	sevissanti na te tadā.
thag17.1:17.1	Milakkhurajanaṁ rattaṁ,
thag17.1:17.2	garahantā sakaṁ dhajaṁ;
thag17.1:17.3	Titthiyānaṁ dhajaṁ keci,
thag17.1:17.4	dhārissantyavadātakaṁ.
thag17.1:18.1	Agāravo ca kāsāve,
thag17.1:18.2	tadā tesaṁ bhavissati;
thag17.1:18.3	Paṭisaṅkhā ca kāsāve,
thag17.1:18.4	bhikkhūnaṁ na bhavissati.
thag17.1:19.1	Abhibhūtassa dukkhena,
thag17.1:19.2	sallaviddhassa ruppato;
thag17.1:19.3	Paṭisaṅkhā mahāghorā,
thag17.1:19.4	nāgassāsi acintiyā.
thag17.1:20.1	Chaddanto hi tadā disvā,
thag17.1:20.2	surattaṁ arahaddhajaṁ;
thag17.1:20.3	Tāvadeva bhaṇī gāthā,
thag17.1:20.4	gajo atthopasaṁhitā.
thag17.1:21.1	‘Anikkasāvo kāsāvaṁ,
thag17.1:21.2	yo vatthaṁ paridhassati;
thag17.1:21.3	Apeto damasaccena,
thag17.1:21.4	na so kāsāvamarahati.
thag17.1:22.1	Yo ca vantakasāvassa,
thag17.1:22.2	sīlesu susamāhito;
thag17.1:22.3	Upeto damasaccena,
thag17.1:22.4	sa ve kāsāvamarahati.
thag17.1:23.1	Vipannasīlo dummedho,
thag17.1:23.2	pākaṭo kāmakāriyo;
thag17.1:23.3	Vibbhantacitto nissukko,
thag17.1:23.4	na so kāsāvamarahati.
thag17.1:24.1	Yo ca sīlena sampanno,
thag17.1:24.2	vītarāgo samāhito;
thag17.1:24.3	Odātamanasaṅkappo,
thag17.1:24.4	sa ve kāsāvamarahati.
thag17.1:25.1	Uddhato unnaḷo bālo,
thag17.1:25.2	sīlaṁ yassa na vijjati;
thag17.1:25.3	Odātakaṁ arahati,
thag17.1:25.4	kāsāvaṁ kiṁ karissati.
thag17.1:26.1	Bhikkhū ca bhikkhuniyo ca,
thag17.1:26.2	duṭṭhacittā anādarā;
thag17.1:26.3	Tādīnaṁ mettacittānaṁ,
thag17.1:26.4	niggaṇhissantyanāgate.
thag17.1:27.1	Sikkhāpentāpi therehi,
thag17.1:27.2	bālā cīvaradhāraṇaṁ;
thag17.1:27.3	Na suṇissanti dummedhā,
thag17.1:27.4	pākaṭā kāmakāriyā.
thag17.1:28.1	Te tathā sikkhitā bālā,
thag17.1:28.2	aññamaññaṁ agāravā;
thag17.1:28.3	Nādiyissantupajjhāye,
thag17.1:28.4	khaḷuṅko viya sārathiṁ.
thag17.1:29.1	Evaṁ anāgataddhānaṁ,
thag17.1:29.2	paṭipatti bhavissati;
thag17.1:29.3	Bhikkhūnaṁ bhikkhunīnañca,
thag17.1:29.4	patte kālamhi pacchime.’
thag17.1:30.1	Purā āgacchate etaṁ,
thag17.1:30.2	anāgataṁ mahabbhayaṁ;
thag17.1:30.3	Subbacā hotha sakhilā,
thag17.1:30.4	aññamaññaṁ sagāravā.
thag17.1:31.1	Mettacittā kāruṇikā,
thag17.1:31.2	Hotha sīlesu saṁvutā;
thag17.1:31.3	Āraddhavīriyā pahitattā,
thag17.1:31.4	Niccaṁ daḷhaparakkamā.
thag17.1:32.1	Pamādaṁ bhayato disvā,
thag17.1:32.2	Appamādañca khemato;
thag17.1:32.3	Bhāvethaṭṭhaṅgikaṁ maggaṁ,
thag17.1:32.4	Phusantā amataṁ padan”ti.
thag17.1:32.5	… Phusso thero ….
thag17.2:0.1	Theragāthā 17.2
thag17.2:0.2	Tiṁsanipāta
thag17.2:0.3	Paṭhamavagga
thag17.2:0.4	Sāriputtattheragāthā
thag17.2:1.1	“Yathācārī yathāsato satīmā,
thag17.2:1.2	Yatasaṅkappajjhāyi appamatto;
thag17.2:1.3	Ajjhattarato samāhitatto,
thag17.2:1.4	Eko santusito tamāhu bhikkhuṁ.
thag17.2:2.1	Allaṁ sukkhaṁ vā bhuñjanto,
thag17.2:2.2	Na bāḷhaṁ suhito siyā;
thag17.2:2.3	Ūnūdaro mitāhāro,
thag17.2:2.4	Sato bhikkhu paribbaje.
thag17.2:3.1	Cattāro pañca ālope,
thag17.2:3.2	abhutvā udakaṁ pive;
thag17.2:3.3	Alaṁ phāsuvihārāya,
thag17.2:3.4	pahitattassa bhikkhuno.
thag17.2:4.1	Kappiyaṁ tañce chādeti,
thag17.2:4.2	cīvaraṁ idamatthikaṁ;
thag17.2:4.3	Alaṁ phāsuvihārāya,
thag17.2:4.4	pahitattassa bhikkhuno.
thag17.2:5.1	Pallaṅkena nisinnassa,
thag17.2:5.2	jaṇṇuke nābhivassati;
thag17.2:5.3	Alaṁ phāsuvihārāya,
thag17.2:5.4	pahitattassa bhikkhuno.
thag17.2:6.1	Yo sukhaṁ dukkhato adda,
thag17.2:6.2	dukkhamaddakkhi sallato;
thag17.2:6.3	Ubhayantarena nāhosi,
thag17.2:6.4	kena lokasmi kiṁ siyā.
thag17.2:7.1	Mā me kadāci pāpiccho,
thag17.2:7.2	kusīto hīnavīriyo;
thag17.2:7.3	Appassuto anādaro,
thag17.2:7.4	kena lokasmi kiṁ siyā.
thag17.2:8.1	Bahussuto ca medhāvī,
thag17.2:8.2	sīlesu susamāhito;
thag17.2:8.3	Cetosamathamanuyutto,
thag17.2:8.4	api muddhani tiṭṭhatu.
thag17.2:9.1	Yo papañcamanuyutto,
thag17.2:9.2	papañcābhirato mago;
thag17.2:9.3	Virādhayī so nibbānaṁ,
thag17.2:9.4	yogakkhemaṁ anuttaraṁ.
thag17.2:10.1	Yo ca papañcaṁ hitvāna,
thag17.2:10.2	nippapañcapathe rato;
thag17.2:10.3	Ārādhayī so nibbānaṁ,
thag17.2:10.4	yogakkhemaṁ anuttaraṁ.
thag17.2:11.1	Gāme vā yadi vāraññe,
thag17.2:11.2	Ninne vā yadi vā thale;
thag17.2:11.3	Yattha arahanto viharanti,
thag17.2:11.4	Taṁ bhūmirāmaṇeyyakaṁ.
thag17.2:12.1	Ramaṇīyāni araññāni,
thag17.2:12.2	yattha na ramatī jano;
thag17.2:12.3	Vītarāgā ramissanti,
thag17.2:12.4	na te kāmagavesino.
thag17.2:13.1	Nidhīnaṁva pavattāraṁ,
thag17.2:13.2	yaṁ passe vajjadassinaṁ;
thag17.2:13.3	Niggayhavādiṁ medhāviṁ,
thag17.2:13.4	tādisaṁ paṇḍitaṁ bhaje;
thag17.2:13.5	Tādisaṁ bhajamānassa,
thag17.2:13.6	seyyo hoti na pāpiyo.
thag17.2:14.1	Ovadeyyānusāseyya,
thag17.2:14.2	asabbhā ca nivāraye;
thag17.2:14.3	Satañhi so piyo hoti,
thag17.2:14.4	asataṁ hoti appiyo.
thag17.2:15.1	Aññassa bhagavā buddho,
thag17.2:15.2	dhammaṁ desesi cakkhumā;
thag17.2:15.3	Dhamme desiyamānamhi,
thag17.2:15.4	sotamodhesimatthiko.
thag17.2:16.1	Taṁ me amoghaṁ savanaṁ,
thag17.2:16.2	vimuttomhi anāsavo.
thag17.2:17.1	Neva pubbenivāsāya,
thag17.2:17.2	napi dibbassa cakkhuno;
thag17.2:17.3	Cetopariyāya iddhiyā,
thag17.2:17.4	cutiyā upapattiyā;
thag17.2:17.5	Sotadhātuvisuddhiyā,
thag17.2:17.6	paṇidhī me na vijjati”.
thag17.2:18.1	“Rukkhamūlaṁva nissāya,
thag17.2:18.2	muṇḍo saṅghāṭipāruto;
thag17.2:18.3	Paññāya uttamo thero,
thag17.2:18.4	upatissova jhāyati.
thag17.2:19.1	Avitakkaṁ samāpanno,
thag17.2:19.2	sammāsambuddhasāvako;
thag17.2:19.3	Ariyena tuṇhībhāvena,
thag17.2:19.4	upeto hoti tāvade.
thag17.2:20.1	Yathāpi pabbato selo,
thag17.2:20.2	acalo suppatiṭṭhito;
thag17.2:20.3	Evaṁ mohakkhayā bhikkhu,
thag17.2:20.4	pabbatova na vedhati”.
thag17.2:21.1	“Anaṅgaṇassa posassa,
thag17.2:21.2	niccaṁ sucigavesino;
thag17.2:21.3	Vālaggamattaṁ pāpassa,
thag17.2:21.4	abbhamattaṁva khāyati.
thag17.2:22.1	Nābhinandāmi maraṇaṁ,
thag17.2:22.2	nābhinandāmi jīvitaṁ;
thag17.2:22.3	Nikkhipissaṁ imaṁ kāyaṁ,
thag17.2:22.4	sampajāno patissato.
thag17.2:23.1	Nābhinandāmi maraṇaṁ,
thag17.2:23.2	nābhinandāmi jīvitaṁ;
thag17.2:23.3	Kālañca paṭikaṅkhāmi,
thag17.2:23.4	nibbisaṁ bhatako yathā”.
thag17.2:24.1	“Ubhayena midaṁ maraṇameva,
thag17.2:24.2	Nāmaraṇaṁ pacchā vā pure vā;
thag17.2:24.3	Paṭipajjatha mā vinassatha,
thag17.2:24.4	Khaṇo vo mā upaccagā.
thag17.2:25.1	Nagaraṁ yathā paccantaṁ,
thag17.2:25.2	guttaṁ santarabāhiraṁ;
thag17.2:25.3	Evaṁ gopetha attānaṁ,
thag17.2:25.4	khaṇo vo mā upaccagā;
thag17.2:25.5	Khaṇātītā hi socanti,
thag17.2:25.6	nirayamhi samappitā”.
thag17.2:26.1	“Upasanto uparato,
thag17.2:26.2	mantabhāṇī anuddhato;
thag17.2:26.3	Dhunāti pāpake dhamme,
thag17.2:26.4	dumapattaṁva māluto.
thag17.2:27.1	Upasanto uparato,
thag17.2:27.2	mantabhāṇī anuddhato;
thag17.2:27.3	Appāsi pāpake dhamme,
thag17.2:27.4	dumapattaṁva māluto.
thag17.2:28.1	Upasanto anāyāso,
thag17.2:28.2	vippasanno anāvilo;
thag17.2:28.3	Kalyāṇasīlo medhāvī,
thag17.2:28.4	dukkhassantakaro siyā”.
thag17.2:29.1	“Na vissase ekatiyesu evaṁ,
thag17.2:29.2	Agārisu pabbajitesu cāpi;
thag17.2:29.3	Sādhūpi hutvā na asādhu honti,
thag17.2:29.4	Asādhu hutvā puna sādhu honti.
thag17.2:30.1	Kāmacchando ca byāpādo,
thag17.2:30.2	thinamiddhañca bhikkhuno;
thag17.2:30.3	Uddhaccaṁ vicikicchā ca,
thag17.2:30.4	pañcete cittakelisā.
thag17.2:31.1	Yassa sakkariyamānassa,
thag17.2:31.2	asakkārena cūbhayaṁ;
thag17.2:31.3	Samādhi na vikampati,
thag17.2:31.4	appamādavihārino.
thag17.2:32.1	Taṁ jhāyinaṁ sātatikaṁ,
thag17.2:32.2	sukhumadiṭṭhivipassakaṁ;
thag17.2:32.3	Upādānakkhayārāmaṁ,
thag17.2:32.4	āhu sappuriso iti.
thag17.2:33.1	Mahāsamuddo pathavī,
thag17.2:33.2	pabbato anilopi ca;
thag17.2:33.3	Upamāya na yujjanti,
thag17.2:33.4	satthu varavimuttiyā.
thag17.2:34.1	Cakkānuvattako thero,
thag17.2:34.2	mahāñāṇī samāhito;
thag17.2:34.3	Pathavāpaggisamāno,
thag17.2:34.4	na rajjati na dussati.
thag17.2:35.1	Paññāpāramitaṁ patto,
thag17.2:35.2	mahābuddhi mahāmati;
thag17.2:35.3	Ajaḷo jaḷasamāno,
thag17.2:35.4	sadā carati nibbuto.
thag17.2:36.1	Pariciṇṇo mayā satthā,
thag17.2:36.2	… pe
thag17.2:36.3	…
thag17.2:36.4	bhavanetti samūhatā.
thag17.2:37.1	Sampādethappamādena,
thag17.2:37.2	esā me anusāsanī;
thag17.2:37.3	Handāhaṁ parinibbissaṁ,
thag17.2:37.4	vippamuttomhi sabbadhī”ti.
thag17.2:37.5	… Sāriputto thero …
thag17.3:0.1	Theragāthā 17.3
thag17.3:0.2	Tiṁsanipāta
thag17.3:0.3	Paṭhamavagga
thag17.3:0.4	Ānandattheragāthā
thag17.3:1.1	“Pisuṇena ca kodhanena ca,
thag17.3:1.2	Maccharinā ca vibhūtanandinā;
thag17.3:1.3	Sakhitaṁ na kareyya paṇḍito,
thag17.3:1.4	Pāpo kāpurisena saṅgamo.
thag17.3:2.1	Saddhena ca pesalena ca,
thag17.3:2.2	Paññavatā bahussutena ca;
thag17.3:2.3	Sakhitaṁ kareyya paṇḍito,
thag17.3:2.4	Bhaddo sappurisena saṅgamo.
thag17.3:3.1	Passa cittakataṁ bimbaṁ,
thag17.3:3.2	… pe
thag17.3:3.3	…
thag17.3:3.4	yassa natthi dhuvaṁ ṭhiti.
thag17.3:4.1	Passa cittakataṁ bimbaṁ,
thag17.3:4.2	… pe
thag17.3:4.3	…
thag17.3:4.4	vatthehi sobhati.
thag17.3:5.1	Alattakakatā,
thag17.3:5.2	… pe
thag17.3:5.3	…
thag17.3:5.4	no ca pāragavesino.
thag17.3:6.1	Aṭṭhapadakatā,
thag17.3:6.2	… pe
thag17.3:6.3	…
thag17.3:6.4	no ca pāragavesino.
thag17.3:7.1	Añjanīva navā,
thag17.3:7.2	… pe
thag17.3:7.3	…
thag17.3:7.4	no ca pāragavesino.
thag17.3:8.1	Bahussuto cittakathī,
thag17.3:8.2	buddhassa paricārako;
thag17.3:8.3	Pannabhāro visaññutto,
thag17.3:8.4	seyyaṁ kappeti gotamo.
thag17.3:9.1	Khīṇāsavo visaññutto,
thag17.3:9.2	saṅgātīto sunibbuto;
thag17.3:9.3	Dhāreti antimaṁ dehaṁ,
thag17.3:9.4	jātimaraṇapāragū.
thag17.3:10.1	Yasmiṁ patiṭṭhitā dhammā,
thag17.3:10.2	buddhassādiccabandhuno;
thag17.3:10.3	Nibbānagamane magge,
thag17.3:10.4	soyaṁ tiṭṭhati gotamo.
thag17.3:11.1	Dvāsīti buddhato gaṇhiṁ,
thag17.3:11.2	dve sahassāni bhikkhuto;
thag17.3:11.3	Caturāsītisahassāni,
thag17.3:11.4	ye me dhammā pavattino.
thag17.3:12.1	Appassutāyaṁ puriso,
thag17.3:12.2	balibaddova jīrati;
thag17.3:12.3	Maṁsāni tassa vaḍḍhanti,
thag17.3:12.4	paññā tassa na vaḍḍhati.
thag17.3:13.1	Bahussuto appassutaṁ,
thag17.3:13.2	yo sutenātimaññati;
thag17.3:13.3	Andho padīpadhārova,
thag17.3:13.4	tatheva paṭibhāti maṁ.
thag17.3:14.1	Bahussutaṁ upāseyya,
thag17.3:14.2	sutañca na vināsaye;
thag17.3:14.3	Taṁ mūlaṁ brahmacariyassa,
thag17.3:14.4	tasmā dhammadharo siyā.
thag17.3:15.1	Pubbāparaññū atthaññū,
thag17.3:15.2	niruttipadakovido;
thag17.3:15.3	Suggahītañca gaṇhāti,
thag17.3:15.4	atthañcopaparikkhati.
thag17.3:16.1	Khantyā chandikato hoti,
thag17.3:16.2	ussahitvā tuleti taṁ;
thag17.3:16.3	Samaye so padahati,
thag17.3:16.4	ajjhattaṁ susamāhito.
thag17.3:17.1	Bahussutaṁ dhammadharaṁ,
thag17.3:17.2	sappaññaṁ buddhasāvakaṁ;
thag17.3:17.3	Dhammaviññāṇamākaṅkhaṁ,
thag17.3:17.4	taṁ bhajetha tathāvidhaṁ.
thag17.3:18.1	Bahussuto dhammadharo,
thag17.3:18.2	kosārakkho mahesino;
thag17.3:18.3	Cakkhu sabbassa lokassa,
thag17.3:18.4	pūjanīyo bahussuto.
thag17.3:19.1	Dhammārāmo dhammarato,
thag17.3:19.2	dhammaṁ anuvicintayaṁ;
thag17.3:19.3	Dhammaṁ anussaraṁ bhikkhu,
thag17.3:19.4	saddhammā na parihāyati.
thag17.3:20.1	Kāyamaccheragaruno,
thag17.3:20.2	hiyyamāne anuṭṭhahe;
thag17.3:20.3	Sarīrasukhagiddhassa,
thag17.3:20.4	kuto samaṇaphāsutā.
thag17.3:21.1	Na pakkhanti disā sabbā,
thag17.3:21.2	dhammā na paṭibhanti maṁ;
thag17.3:21.3	Gate kalyāṇamittamhi,
thag17.3:21.4	andhakāraṁva khāyati.
thag17.3:22.1	Abbhatītasahāyassa,
thag17.3:22.2	atītagatasatthuno;
thag17.3:22.3	Natthi etādisaṁ mittaṁ,
thag17.3:22.4	yathā kāyagatā sati.
thag17.3:23.1	Ye purāṇā atītā te,
thag17.3:23.2	navehi na sameti me;
thag17.3:23.3	Svajja ekova jhāyāmi,
thag17.3:23.4	vassupetova pakkhimā”.
thag17.3:24.1	“Dassanāya abhikkante,
thag17.3:24.2	nānāverajjake bahū;
thag17.3:24.3	Mā vārayittha sotāro,
thag17.3:24.4	passantu samayo mamaṁ”.
thag17.3:25.1	“Dassanāya abhikkante,
thag17.3:25.2	nānāverajjake puthu;
thag17.3:25.3	Karoti satthā okāsaṁ,
thag17.3:25.4	na nivāreti cakkhumā.
thag17.3:26.1	Paṇṇavīsativassāni,
thag17.3:26.2	sekhabhūtassa me sato;
thag17.3:26.3	Na kāmasaññā uppajji,
thag17.3:26.4	passa dhammasudhammataṁ.
thag17.3:27.1	Paṇṇavīsativassāni,
thag17.3:27.2	sekhabhūtassa me sato;
thag17.3:27.3	Na dosasaññā uppajji,
thag17.3:27.4	passa dhammasudhammataṁ.
thag17.3:28.1	Paṇṇavīsativassāni,
thag17.3:28.2	bhagavantaṁ upaṭṭhahiṁ;
thag17.3:28.3	Mettena kāyakammena,
thag17.3:28.4	chāyāva anapāyinī.
thag17.3:29.1	Paṇṇavīsativassāni,
thag17.3:29.2	bhagavantaṁ upaṭṭhahiṁ;
thag17.3:29.3	Mettena vacīkammena,
thag17.3:29.4	chāyāva anapāyinī.
thag17.3:30.1	Paṇṇavīsativassāni,
thag17.3:30.2	bhagavantaṁ upaṭṭhahiṁ;
thag17.3:30.3	Mettena manokammena,
thag17.3:30.4	chāyāva anapāyinī.
thag17.3:31.1	Buddhassa caṅkamantassa,
thag17.3:31.2	piṭṭhito anucaṅkamiṁ;
thag17.3:31.3	Dhamme desiyamānamhi,
thag17.3:31.4	ñāṇaṁ me udapajjatha.
thag17.3:32.1	Ahaṁ sakaraṇīyomhi,
thag17.3:32.2	sekho appattamānaso;
thag17.3:32.3	Satthu ca parinibbānaṁ,
thag17.3:32.4	yo amhaṁ anukampako.
thag17.3:33.1	Tadāsi yaṁ bhiṁsanakaṁ,
thag17.3:33.2	tadāsi lomahaṁsanaṁ;
thag17.3:33.3	Sabbākāravarūpete,
thag17.3:33.4	sambuddhe parinibbute”.
thag17.3:34.1	“Bahussuto dhammadharo,
thag17.3:34.2	kosārakkho mahesino;
thag17.3:34.3	Cakkhu sabbassa lokassa,
thag17.3:34.4	ānando parinibbuto.
thag17.3:35.1	Bahussuto dhammadharo,
thag17.3:35.2	kosārakkho mahesino;
thag17.3:35.3	Cakkhu sabbassa lokassa,
thag17.3:35.4	andhakāre tamonudo.
thag17.3:36.1	Gatimanto satimanto,
thag17.3:36.2	dhitimanto ca yo isi;
thag17.3:36.3	Saddhammadhārako thero,
thag17.3:36.4	ānando ratanākaro”.
thag17.3:37.1	“Pariciṇṇo mayā satthā,
thag17.3:37.2	kataṁ buddhassa sāsanaṁ;
thag17.3:37.3	Ohito garuko bhāro,
thag17.3:37.4	natthi dāni punabbhavo”ti.
thag17.3:37.5	… Ānando thero …
thag17.3:37.6	Tiṁsanipāto niṭṭhito.
thag17.3:38.0	Tatruddānaṁ
thag17.3:38.1	Phusso patisso ānando,
thag17.3:38.2	tayotime pakittitā;
thag17.3:38.3	Gāthāyo tattha saṅkhātā,
thag17.3:38.4	sataṁ pañca ca uttarīti.
thag18.1:0.1	Theragāthā 18.1
thag18.1:0.2	Cattālīsanipāta
thag18.1:0.3	Paṭhamavagga
thag18.1:0.4	Mahākassapattheragāthā
thag18.1:1.1	“Na gaṇena purakkhato care,
thag18.1:1.2	Vimano hoti samādhi dullabho;
thag18.1:1.3	Nānājanasaṅgaho dukho,
thag18.1:1.4	Iti disvāna gaṇaṁ na rocaye.
thag18.1:2.1	Na kulāni upabbaje muni,
thag18.1:2.2	Vimano hoti samādhi dullabho;
thag18.1:2.3	So ussukko rasānugiddho,
thag18.1:2.4	Atthaṁ riñcati yo sukhāvaho.
thag18.1:3.1	Paṅkoti hi naṁ avedayuṁ,
thag18.1:3.2	Yāyaṁ vandanapūjanā kulesu;
thag18.1:3.3	Sukhumaṁ sallaṁ durubbahaṁ,
thag18.1:3.4	Sakkāro kāpurisena dujjaho.
thag18.1:4.1	Senāsanamhā oruyha,
thag18.1:4.2	nagaraṁ piṇḍāya pāvisiṁ;
thag18.1:4.3	Bhuñjantaṁ purisaṁ kuṭṭhiṁ,
thag18.1:4.4	sakkaccaṁ taṁ upaṭṭhahiṁ.
thag18.1:5.1	So me pakkena hatthena,
thag18.1:5.2	ālopaṁ upanāmayi;
thag18.1:5.3	Ālopaṁ pakkhipantassa,
thag18.1:5.4	aṅguli cettha chijjatha.
thag18.1:6.1	Kuṭṭamūlañca nissāya,
thag18.1:6.2	ālopaṁ taṁ abhuñjisaṁ;
thag18.1:6.3	Bhuñjamāne vā bhutte vā,
thag18.1:6.4	jegucchaṁ me na vijjati.
thag18.1:7.1	Uttiṭṭhapiṇḍo āhāro,
thag18.1:7.2	pūtimuttañca osadhaṁ;
thag18.1:7.3	Senāsanaṁ rukkhamūlaṁ,
thag18.1:7.4	paṁsukūlañca cīvaraṁ;
thag18.1:7.5	Yassete abhisambhutvā,
thag18.1:7.6	sa ve cātuddiso naro.
thag18.1:8.1	Yattha eke vihaññanti,
thag18.1:8.2	āruhantā siluccayaṁ;
thag18.1:8.3	Tassa buddhassa dāyādo,
thag18.1:8.4	sampajāno patissato;
thag18.1:8.5	Iddhibalenupatthaddho,
thag18.1:8.6	kassapo abhirūhati.
thag18.1:9.1	Piṇḍapātapaṭikkanto,
thag18.1:9.2	selamāruyha kassapo;
thag18.1:9.3	Jhāyati anupādāno,
thag18.1:9.4	pahīnabhayabheravo.
thag18.1:10.1	Piṇḍapātapaṭikkanto,
thag18.1:10.2	selamāruyha kassapo;
thag18.1:10.3	Jhāyati anupādāno,
thag18.1:10.4	ḍayhamānesu nibbuto.
thag18.1:11.1	Piṇḍapātapaṭikkanto,
thag18.1:11.2	selamāruyha kassapo;
thag18.1:11.3	Jhāyati anupādāno,
thag18.1:11.4	katakicco anāsavo.
thag18.1:12.1	Karerimālāvitatā,
thag18.1:12.2	bhūmibhāgā manoramā;
thag18.1:12.3	Kuñjarābhirudā rammā,
thag18.1:12.4	te selā ramayanti maṁ.
thag18.1:13.1	Nīlabbhavaṇṇā rucirā,
thag18.1:13.2	vārisītā sucindharā;
thag18.1:13.3	Indagopakasañchannā,
thag18.1:13.4	te selā ramayanti maṁ.
thag18.1:14.1	Nīlabbhakūṭasadisā,
thag18.1:14.2	kūṭāgāravarūpamā;
thag18.1:14.3	Vāraṇābhirudā rammā,
thag18.1:14.4	te selā ramayanti maṁ.
thag18.1:15.1	Abhivuṭṭhā rammatalā,
thag18.1:15.2	nagā isibhi sevitā;
thag18.1:15.3	Abbhunnaditā sikhīhi,
thag18.1:15.4	te selā ramayanti maṁ.
thag18.1:16.1	Alaṁ jhāyitukāmassa,
thag18.1:16.2	pahitattassa me sato;
thag18.1:16.3	Alaṁ me atthakāmassa,
thag18.1:16.4	pahitattassa bhikkhuno.
thag18.1:17.1	Alaṁ me phāsukāmassa,
thag18.1:17.2	pahitattassa bhikkhuno;
thag18.1:17.3	Alaṁ me yogakāmassa,
thag18.1:17.4	pahitattassa tādino.
thag18.1:18.1	Umāpupphena samānā,
thag18.1:18.2	gaganāvabbhachāditā;
thag18.1:18.3	Nānādijagaṇākiṇṇā,
thag18.1:18.4	te selā ramayanti maṁ.
thag18.1:19.1	Anākiṇṇā gahaṭṭhehi,
thag18.1:19.2	migasaṅghanisevitā;
thag18.1:19.3	Nānādijagaṇākiṇṇā,
thag18.1:19.4	te selā ramayanti maṁ.
thag18.1:20.1	Acchodikā puthusilā,
thag18.1:20.2	gonaṅgulamigāyutā;
thag18.1:20.3	Ambusevālasañchannā,
thag18.1:20.4	te selā ramayanti maṁ.
thag18.1:21.1	Na pañcaṅgikena turiyena,
thag18.1:21.2	Rati me hoti tādisī;
thag18.1:21.3	Yathā ekaggacittassa,
thag18.1:21.4	Sammā dhammaṁ vipassato.
thag18.1:22.1	Kammaṁ bahukaṁ na kāraye,
thag18.1:22.2	Parivajjeyya janaṁ na uyyame;
thag18.1:22.3	Ussukko so rasānugiddho,
thag18.1:22.4	Atthaṁ riñcati yo sukhāvaho.
thag18.1:23.1	Kammaṁ bahukaṁ na kāraye,
thag18.1:23.2	Parivajjeyya anattaneyyametaṁ;
thag18.1:23.3	Kicchati kāyo kilamati,
thag18.1:23.4	Dukkhito so samathaṁ na vindati.
thag18.1:24.1	Oṭṭhappahatamattena,
thag18.1:24.2	attānampi na passati;
thag18.1:24.3	Patthaddhagīvo carati,
thag18.1:24.4	ahaṁ seyyoti maññati.
thag18.1:25.1	Aseyyo seyyasamānaṁ,
thag18.1:25.2	bālo maññati attānaṁ;
thag18.1:25.3	Na taṁ viññū pasaṁsanti,
thag18.1:25.4	patthaddhamānasaṁ naraṁ.
thag18.1:26.1	Yo ca seyyohamasmīti,
thag18.1:26.2	nāhaṁ seyyoti vā pana;
thag18.1:26.3	Hīno taṁsadiso vāti,
thag18.1:26.4	vidhāsu na vikampati.
thag18.1:27.1	Paññavantaṁ tathā tādiṁ,
thag18.1:27.2	sīlesu susamāhitaṁ;
thag18.1:27.3	Cetosamathamanuttaṁ,
thag18.1:27.4	tañce viññū pasaṁsare.
thag18.1:28.1	Yassa sabrahmacārīsu,
thag18.1:28.2	gāravo nūpalabbhati;
thag18.1:28.3	Ārakā hoti saddhammā,
thag18.1:28.4	nabhato puthavī yathā.
thag18.1:29.1	Yesañca hiriottappaṁ,
thag18.1:29.2	sadā sammā upaṭṭhitaṁ;
thag18.1:29.3	Virūḷhabrahmacariyā te,
thag18.1:29.4	tesaṁ khīṇā punabbhavā.
thag18.1:30.1	Uddhato capalo bhikkhu,
thag18.1:30.2	paṁsukūlena pāruto;
thag18.1:30.3	Kapīva sīhacammena,
thag18.1:30.4	na so tenupasobhati.
thag18.1:31.1	Anuddhato acapalo,
thag18.1:31.2	nipako saṁvutindriyo;
thag18.1:31.3	Sobhati paṁsukūlena,
thag18.1:31.4	sīhova girigabbhare.
thag18.1:32.1	Ete sambahulā devā,
thag18.1:32.2	iddhimanto yasassino;
thag18.1:32.3	Dasadevasahassāni,
thag18.1:32.4	sabbe te brahmakāyikā.
thag18.1:33.1	Dhammasenāpatiṁ vīraṁ,
thag18.1:33.2	mahājhāyiṁ samāhitaṁ;
thag18.1:33.3	Sāriputtaṁ namassantā,
thag18.1:33.4	tiṭṭhanti pañjalīkatā.
thag18.1:34.1	‘Namo te purisājañña,
thag18.1:34.2	namo te purisuttama;
thag18.1:34.3	Yassa te nābhijānāma,
thag18.1:34.4	yampi nissāya jhāyati.
thag18.1:35.1	Accheraṁ vata buddhānaṁ,
thag18.1:35.2	gambhīro gocaro sako;
thag18.1:35.3	Ye mayaṁ nābhijānāma,
thag18.1:35.4	vālavedhisamāgatā’.
thag18.1:36.1	Taṁ tathā devakāyehi,
thag18.1:36.2	pūjitaṁ pūjanārahaṁ;
thag18.1:36.3	Sāriputtaṁ tadā disvā,
thag18.1:36.4	kappinassa sitaṁ ahu.
thag18.1:37.1	Yāvatā buddhakhettamhi,
thag18.1:37.2	ṭhapayitvā mahāmuniṁ;
thag18.1:37.3	Dhutaguṇe visiṭṭhohaṁ,
thag18.1:37.4	sadiso me na vijjati.
thag18.1:38.1	Pariciṇṇo mayā satthā,
thag18.1:38.2	kataṁ buddhassa sāsanaṁ;
thag18.1:38.3	Ohito garuko bhāro,
thag18.1:38.4	natthi dāni punabbhavo.
thag18.1:39.1	Na cīvare na sayane,
thag18.1:39.2	bhojane nupalimpati;
thag18.1:39.3	Gotamo anappameyyo,
thag18.1:39.4	muḷālapupphaṁ vimalaṁva;
thag18.1:39.5	Ambunā nekkhammaninno,
thag18.1:39.6	tibhavābhinissaṭo.
thag18.1:40.1	Satipaṭṭhānagīvo so,
thag18.1:40.2	saddhāhattho mahāmuni;
thag18.1:40.3	Paññāsīso mahāñāṇī,
thag18.1:40.4	sadā carati nibbuto”ti.
thag18.1:40.5	… Mahākassapo thero …
thag18.1:40.6	Cattālīsanipāto niṭṭhito.
thag18.1:41.0	Tatruddānaṁ
thag18.1:41.1	Cattālīsanipātamhi,
thag18.1:41.2	mahākassapasavhayo;
thag18.1:41.3	Ekova thero gāthāyo,
thag18.1:41.4	cattālīsa duvepi cāti.
thag19.1:0.1	Theragāthā 19.1
thag19.1:0.2	Paññāsanipāta
thag19.1:0.3	Paṭhamavagga
thag19.1:0.4	Tālapuṭattheragāthā
thag19.1:1.1	“Kadā nuhaṁ pabbatakandarāsu,
thag19.1:1.2	Ekākiyo addutiyo vihassaṁ;
thag19.1:1.3	Aniccato sabbabhavaṁ vipassaṁ,
thag19.1:1.4	Taṁ me idaṁ taṁ nu kadā bhavissati.
thag19.1:2.1	Kadā nuhaṁ bhinnapaṭandharo muni,
thag19.1:2.2	Kāsāvavattho amamo nirāso;
thag19.1:2.3	Rāgañca dosañca tatheva mohaṁ,
thag19.1:2.4	Hantvā sukhī pavanagato vihassaṁ.
thag19.1:3.1	Kadā aniccaṁ vadharoganīḷaṁ,
thag19.1:3.2	Kāyaṁ imaṁ maccujarāyupaddutaṁ;
thag19.1:3.3	Vipassamāno vītabhayo vihassaṁ,
thag19.1:3.4	Eko vane taṁ nu kadā bhavissati.
thag19.1:4.1	Kadā nuhaṁ bhayajananiṁ dukhāvahaṁ,
thag19.1:4.2	Taṇhālataṁ bahuvidhānuvattaniṁ;
thag19.1:4.3	Paññāmayaṁ tikhiṇamasiṁ gahetvā,
thag19.1:4.4	Chetvā vase tampi kadā bhavissati.
thag19.1:5.1	Kadā nu paññāmayamuggatejaṁ,
thag19.1:5.2	Satthaṁ isīnaṁ sahasādiyitvā;
thag19.1:5.3	Māraṁ sasenaṁ sahasā bhañjissaṁ,
thag19.1:5.4	Sīhāsane taṁ nu kadā bhavissati.
thag19.1:6.1	Kadā nuhaṁ sabbhi samāgamesu,
thag19.1:6.2	Diṭṭho bhave dhammagarūhi tādibhi;
thag19.1:6.3	Yāthāvadassīhi jitindriyehi,
thag19.1:6.4	Padhāniyo taṁ nu kadā bhavissati.
thag19.1:7.1	Kadā nu maṁ tandi khudā pipāsā,
thag19.1:7.2	Vātātapā kīṭasarīsapā vā;
thag19.1:7.3	Na bādhayissanti na taṁ giribbaje,
thag19.1:7.4	Atthatthiyaṁ taṁ nu kadā bhavissati.
thag19.1:8.1	Kadā nu kho yaṁ viditaṁ mahesinā,
thag19.1:8.2	Cattāri saccāni sududdasāni;
thag19.1:8.3	Samāhitatto satimā agacchaṁ,
thag19.1:8.4	Paññāya taṁ taṁ nu kadā bhavissati.
thag19.1:9.1	Kadā nu rūpe amite ca sadde,
thag19.1:9.2	Gandhe rase phusitabbe ca dhamme;
thag19.1:9.3	Ādittatohaṁ samathehi yutto,
thag19.1:9.4	Paññāya dacchaṁ tadidaṁ kadā me.
thag19.1:10.1	Kadā nuhaṁ dubbacanena vutto,
thag19.1:10.2	Tato nimittaṁ vimano na hessaṁ;
thag19.1:10.3	Atho pasatthopi tato nimittaṁ,
thag19.1:10.4	Tuṭṭho na hessaṁ tadidaṁ kadā me.
thag19.1:11.1	Kadā nu kaṭṭhe ca tiṇe latā ca,
thag19.1:11.2	Khandhe imehaṁ amite ca dhamme;
thag19.1:11.3	Ajjhattikāneva ca bāhirāni ca,
thag19.1:11.4	Samaṁ tuleyyaṁ tadidaṁ kadā me.
thag19.1:12.1	Kadā nu maṁ pāvusakālamegho,
thag19.1:12.2	Navena toyena sacīvaraṁ vane;
thag19.1:12.3	Isippayātamhi pathe vajantaṁ,
thag19.1:12.4	Ovassate taṁ nu kadā bhavissati.
thag19.1:13.1	Kadā mayūrassa sikhaṇḍino vane,
thag19.1:13.2	Dijassa sutvā girigabbhare rutaṁ;
thag19.1:13.3	Paccuṭṭhahitvā amatassa pattiyā,
thag19.1:13.4	Sañcintaye taṁ nu kadā bhavissati.
thag19.1:14.1	Kadā nu gaṅgaṁ yamunaṁ sarassatiṁ,
thag19.1:14.2	Pātālakhittaṁ vaḷavāmukhañca;
thag19.1:14.3	Asajjamāno patareyyamiddhiyā,
thag19.1:14.4	Vibhiṁsanaṁ taṁ nu kadā bhavissati.
thag19.1:15.1	Kadā nu nāgova asaṅgacārī,
thag19.1:15.2	Padālaye kāmaguṇesu chandaṁ;
thag19.1:15.3	Nibbajjayaṁ sabbasubhaṁ nimittaṁ,
thag19.1:15.4	Jhāne yuto taṁ nu kadā bhavissati.
thag19.1:16.1	Kadā iṇaṭṭova daliddako nidhiṁ,
thag19.1:16.2	Ārādhayitvā dhanikehi pīḷito;
thag19.1:16.3	Tuṭṭho bhavissaṁ adhigamma sāsanaṁ,
thag19.1:16.4	Mahesino taṁ nu kadā bhavissati.
thag19.1:17.1	Bahūni vassāni tayāmhi yācito,
thag19.1:17.2	‘Agāravāsena alaṁ nu te idaṁ’;
thag19.1:17.3	Taṁ dāni maṁ pabbajitaṁ samānaṁ,
thag19.1:17.4	Kiṅkāraṇā citta tuvaṁ na yuñjasi.
thag19.1:18.1	Nanu ahaṁ citta tayāmhi yācito,
thag19.1:18.2	‘Giribbaje citrachadā vihaṅgamā’;
thag19.1:18.3	Mahindaghosatthanitābhigajjino,
thag19.1:18.4	Te taṁ ramessanti vanamhi jhāyinaṁ.
thag19.1:19.1	Kulamhi mitte ca piye ca ñātake,
thag19.1:19.2	Khiḍḍāratiṁ kāmaguṇañca loke;
thag19.1:19.3	Sabbaṁ pahāya imamajjhupāgato,
thag19.1:19.4	Athopi tvaṁ citta na mayha tussasi.
thag19.1:20.1	Mameva etaṁ na hi tvaṁ paresaṁ,
thag19.1:20.2	Sannāhakāle paridevitena kiṁ;
thag19.1:20.3	Sabbaṁ idaṁ calamiti pekkhamāno,
thag19.1:20.4	Abhinikkhamiṁ amatapadaṁ jigīsaṁ.
thag19.1:21.1	Suyuttavādī dvipadānamuttamo,
thag19.1:21.2	Mahābhisakko naradammasārathi;
thag19.1:21.3	‘Cittaṁ calaṁ makkaṭasannibhaṁ iti,
thag19.1:21.4	Avītarāgena sudunnivārayaṁ’.
thag19.1:22.1	Kāmā hi citrā madhurā manoramā,
thag19.1:22.2	Aviddasū yattha sitā puthujjanā;
thag19.1:22.3	Te dukkhamicchanti punabbhavesino,
thag19.1:22.4	Cittena nītā niraye nirākatā.
thag19.1:23.1	‘Mayūrakoñcābhirutamhi kānane,
thag19.1:23.2	Dīpīhi byagghehi purakkhato vasaṁ;
thag19.1:23.3	Kāye apekkhaṁ jaha mā virādhaya’,
thag19.1:23.4	Itissu maṁ citta pure niyuñjasi.
thag19.1:24.1	‘Bhāvehi jhānāni ca indriyāni ca,
thag19.1:24.2	Balāni bojjhaṅgasamādhibhāvanā;
thag19.1:24.3	Tisso ca vijjā phusa buddhasāsane’,
thag19.1:24.4	Itissu maṁ citta pure niyuñjasi.
thag19.1:25.1	‘Bhāvehi maggaṁ amatassa pattiyā,
thag19.1:25.2	Niyyānikaṁ sabbadukhakkhayogadhaṁ;
thag19.1:25.3	Aṭṭhaṅgikaṁ sabbakilesasodhanaṁ’,
thag19.1:25.4	Itissu maṁ citta pure niyuñjasi.
thag19.1:26.1	‘Dukkhanti khandhe paṭipassa yoniso,
thag19.1:26.2	Yato ca dukkhaṁ samudeti taṁ jaha;
thag19.1:26.3	Idheva dukkhassa karohi antaṁ’,
thag19.1:26.4	Itissu maṁ citta pure niyuñjasi.
thag19.1:27.1	‘Aniccaṁ dukkhanti vipassa yoniso,
thag19.1:27.2	Suññaṁ anattāti aghaṁ vadhanti ca;
thag19.1:27.3	Manovicāre uparundha cetaso’,
thag19.1:27.4	Itissu maṁ citta pure niyuñjasi.
thag19.1:28.1	‘Muṇḍo virūpo abhisāpamāgato,
thag19.1:28.2	Kapālahatthova kulesu bhikkhasu;
thag19.1:28.3	Yuñjassu satthuvacane mahesino’,
thag19.1:28.4	Itissu maṁ citta pure niyuñjasi.
thag19.1:29.1	‘Susaṁvutatto visikhantare caraṁ,
thag19.1:29.2	Kulesu kāmesu asaṅgamānaso;
thag19.1:29.3	Cando yathā dosinapuṇṇamāsiyā’,
thag19.1:29.4	Itissu maṁ citta pure niyuñjasi.
thag19.1:30.1	‘Āraññiko hohi ca piṇḍapātiko,
thag19.1:30.2	Sosāniko hohi ca paṁsukūliko;
thag19.1:30.3	Nesajjiko hohi sadā dhute rato’,
thag19.1:30.4	Itissu maṁ citta pure niyuñjasi.
thag19.1:31.1	Ropetva rukkhāni yathā phalesī,
thag19.1:31.2	Mūle taruṁ chettu tameva icchasi;
thag19.1:31.3	Tathūpamaṁ cittamidaṁ karosi,
thag19.1:31.4	Yaṁ maṁ aniccamhi cale niyuñjasi.
thag19.1:32.1	Arūpa dūraṅgama ekacāri,
thag19.1:32.2	Na te karissaṁ vacanaṁ idānihaṁ;
thag19.1:32.3	Dukkhā hi kāmā kaṭukā mahabbhayā,
thag19.1:32.4	Nibbānamevābhimano carissaṁ.
thag19.1:33.1	Nāhaṁ alakkhyā ahirikkatāya vā,
thag19.1:33.2	Na cittahetū na ca dūrakantanā;
thag19.1:33.3	Ājīvahetū ca ahaṁ na nikkhamiṁ,
thag19.1:33.4	Kato ca te citta paṭissavo mayā.
thag19.1:34.1	‘Appicchatā sappurisehi vaṇṇitā,
thag19.1:34.2	Makkhappahānaṁ vupasamo dukhassa’;
thag19.1:34.3	Itissu maṁ citta tadā niyuñjasi,
thag19.1:34.4	Idāni tvaṁ gacchasi pubbaciṇṇaṁ.
thag19.1:35.1	Taṇhā avijjā ca piyāpiyañca,
thag19.1:35.2	Subhāni rūpāni sukhā ca vedanā;
thag19.1:35.3	Manāpiyā kāmaguṇā ca vantā,
thag19.1:35.4	Vante ahaṁ āvamituṁ na ussahe.
thag19.1:36.1	Sabbattha te citta vaco kataṁ mayā,
thag19.1:36.2	Bahūsu jātīsu na mesi kopito;
thag19.1:36.3	Ajjhattasambhavo kataññutāya te,
thag19.1:36.4	Dukkhe ciraṁ saṁsaritaṁ tayā kate.
thag19.1:37.1	Tvaññeva no citta karosi brāhmaṇo,
thag19.1:37.2	Tvaṁ khattiyo rājadasī karosi;
thag19.1:37.3	Vessā ca suddā ca bhavāma ekadā,
thag19.1:37.4	Devattanaṁ vāpi taveva vāhasā.
thag19.1:38.1	Taveva hetū asurā bhavāmase,
thag19.1:38.2	Tvaṁmūlakaṁ nerayikā bhavāmase;
thag19.1:38.3	Atho tiracchānagatāpi ekadā,
thag19.1:38.4	Petattanaṁ vāpi taveva vāhasā.
thag19.1:39.1	Nanu dubbhissasi maṁ punappunaṁ,
thag19.1:39.2	Muhuṁ muhuṁ cāraṇikaṁva dassayaṁ;
thag19.1:39.3	Ummattakeneva mayā palobhasi,
thag19.1:39.4	Kiñcāpi te citta virādhitaṁ mayā.
thag19.1:40.1	Idaṁ pure cittamacāri cārikaṁ,
thag19.1:40.2	Yenicchakaṁ yatthakāmaṁ yathāsukhaṁ;
thag19.1:40.3	Tadajjahaṁ niggahessāmi yoniso,
thag19.1:40.4	Hatthippabhinnaṁ viya aṅkusaggaho.
thag19.1:41.1	Satthā ca me lokamimaṁ adhiṭṭhahi,
thag19.1:41.2	Aniccato addhuvato asārato;
thag19.1:41.3	Pakkhanda maṁ citta jinassa sāsane,
thag19.1:41.4	Tārehi oghā mahatā suduttarā.
thag19.1:42.1	Na te idaṁ citta yathā purāṇakaṁ,
thag19.1:42.2	Nāhaṁ alaṁ tuyha vase nivattituṁ;
thag19.1:42.3	Mahesino pabbajitomhi sāsane,
thag19.1:42.4	Na mādisā honti vināsadhārino.
thag19.1:43.1	Nagā samuddā saritā vasundharā,
thag19.1:43.2	Disā catasso vidisā adho divā;
thag19.1:43.3	Sabbe aniccā tibhavā upaddutā,
thag19.1:43.4	Kuhiṁ gato citta sukhaṁ ramissasi.
thag19.1:44.1	Dhitipparaṁ kiṁ mama citta kāhisi,
thag19.1:44.2	Na te alaṁ citta vasānuvattako;
thag19.1:44.3	Na jātu bhastaṁ ubhatomukhaṁ chupe,
thag19.1:44.4	Dhiratthu pūraṁ nava sotasandaniṁ.
thag19.1:45.1	Varāhaeṇeyyavigāḷhasevite,
thag19.1:45.2	Pabbhārakuṭṭe pakateva sundare;
thag19.1:45.3	Navambunā pāvusasitthakānane,
thag19.1:45.4	Tahiṁ guhāgehagato ramissasi.
thag19.1:46.1	Sunīlagīvā susikhā supekhunā,
thag19.1:46.2	Sucittapattacchadanā vihaṅgamā;
thag19.1:46.3	Sumañjughosatthanitābhigajjino,
thag19.1:46.4	Te taṁ ramessanti vanamhi jhāyinaṁ.
thag19.1:47.1	Vuṭṭhamhi deve caturaṅgule tiṇe,
thag19.1:47.2	Sampupphite meghanibhamhi kānane;
thag19.1:47.3	Nagantare viṭapisamo sayissaṁ,
thag19.1:47.4	Taṁ me mudū hehiti tūlasannibhaṁ.
thag19.1:48.1	Tathā tu kassāmi yathāpi issaro,
thag19.1:48.2	Yaṁ labbhati tenapi hotu me alaṁ;
thag19.1:48.3	Na tāhaṁ kassāmi yathā atandito,
thag19.1:48.4	Biḷārabhastaṁva yathā sumadditaṁ.
thag19.1:49.1	Tathā tu kassāmi yathāpi issaro,
thag19.1:49.2	Yaṁ labbhati tenapi hotu me alaṁ;
thag19.1:49.3	Viriyena taṁ mayha vasānayissaṁ,
thag19.1:49.4	Gajaṁva mattaṁ kusalaṅkusaggaho.
thag19.1:50.1	Tayā sudantena avaṭṭhitena hi,
thag19.1:50.2	Hayena yoggācariyova ujjunā;
thag19.1:50.3	Pahomi maggaṁ paṭipajjituṁ sivaṁ,
thag19.1:50.4	Cittānurakkhīhi sadā nisevitaṁ.
thag19.1:51.1	Ārammaṇe taṁ balasā nibandhisaṁ,
thag19.1:51.2	Nāgaṁva thambhamhi daḷhāya rajjuyā;
thag19.1:51.3	Taṁ me suguttaṁ satiyā subhāvitaṁ,
thag19.1:51.4	Anissitaṁ sabbabhavesu hehisi.
thag19.1:52.1	Paññāya chetvā vipathānusārinaṁ,
thag19.1:52.2	Yogena niggayha pathe nivesiya;
thag19.1:52.3	Disvā samudayaṁ vibhavañca sambhavaṁ,
thag19.1:52.4	Dāyādako hehisi aggavādino.
thag19.1:53.1	Catubbipallāsavasaṁ adhiṭṭhitaṁ,
thag19.1:53.2	Gāmaṇḍalaṁva parinesi citta maṁ;
thag19.1:53.3	Nanu saṁyojanabandhanacchidaṁ,
thag19.1:53.4	Saṁsevase kāruṇikaṁ mahāmuniṁ.
thag19.1:54.1	Migo yathā seri sucittakānane,
thag19.1:54.2	Rammaṁ giriṁ pāvusaabbhamāliniṁ;
thag19.1:54.3	Anākule tattha nage ramissaṁ,
thag19.1:54.4	Asaṁsayaṁ citta parā bhavissasi.
thag19.1:55.1	Ye tuyha chandena vasena vattino,
thag19.1:55.2	Narā ca nārī ca anubhonti yaṁ sukhaṁ;
thag19.1:55.3	Aviddasū māravasānuvattino,
thag19.1:55.4	Bhavābhinandī tava citta sāvakā”ti.
thag19.1:55.5	… Tālapuṭo thero …
thag19.1:55.6	Paññāsanipāto niṭṭhito.
thag19.1:56.0	Tatruddānaṁ
thag19.1:56.1	Paññāsamhi nipātamhi,
thag19.1:56.2	eko tālapuṭo suci;
thag19.1:56.3	Gāthāyo tattha paññāsa,
thag19.1:56.4	puna pañca ca uttarīti.
thag20.1:0.1	Theragāthā 20.1
thag20.1:0.2	Saṭṭhinipāta
thag20.1:0.3	Paṭhamavagga
thag20.1:0.4	Mahāmoggallānattheragāthā
thag20.1:1.1	“Āraññikā piṇḍapātikā,
thag20.1:1.2	uñchāpattāgate ratā;
thag20.1:1.3	Dālemu maccuno senaṁ,
thag20.1:1.4	ajjhattaṁ susamāhitā.
thag20.1:2.1	Āraññikā piṇḍapātikā,
thag20.1:2.2	uñchāpattāgate ratā;
thag20.1:2.3	Dhunāma maccuno senaṁ,
thag20.1:2.4	naḷāgāraṁva kuñjaro.
thag20.1:3.1	Rukkhamūlikā sātatikā,
thag20.1:3.2	uñchāpattāgate ratā;
thag20.1:3.3	Dālemu maccuno senaṁ,
thag20.1:3.4	ajjhattaṁ susamāhitā.
thag20.1:4.1	Rukkhamūlikā sātatikā,
thag20.1:4.2	uñchāpattāgate ratā;
thag20.1:4.3	Dhunāma maccuno senaṁ,
thag20.1:4.4	naḷāgāraṁva kuñjaro”.
thag20.1:5.1	“Aṭṭhikaṅkalakuṭike,
thag20.1:5.2	maṁsanhārupasibbite;
thag20.1:5.3	Dhiratthu pure duggandhe,
thag20.1:5.4	paragatte mamāyase.
thag20.1:6.1	Gūthabhaste taconaddhe,
thag20.1:6.2	uragaṇḍipisācini;
thag20.1:6.3	Nava sotāni te kāye,
thag20.1:6.4	yāni sandanti sabbadā.
thag20.1:7.1	Tava sarīraṁ navasotaṁ,
thag20.1:7.2	Duggandhakaraṁ paribandhaṁ;
thag20.1:7.3	Bhikkhu parivajjayate taṁ,
thag20.1:7.4	Mīḷhaṁ ca yathā sucikāmo.
thag20.1:8.1	Evañce taṁ jano jaññā,
thag20.1:8.2	yathā jānāmi taṁ ahaṁ;
thag20.1:8.3	Ārakā parivajjeyya,
thag20.1:8.4	gūthaṭṭhānaṁva pāvuse”.
thag20.1:9.1	“Evametaṁ mahāvīra,
thag20.1:9.2	yathā samaṇa bhāsasi;
thag20.1:9.3	Ettha ceke visīdanti,
thag20.1:9.4	paṅkamhiva jaraggavo”.
thag20.1:10.1	“Ākāsamhi haliddiyā,
thag20.1:10.2	yo maññetha rajetave;
thag20.1:10.3	Aññena vāpi raṅgena,
thag20.1:10.4	vighātudayameva taṁ.
thag20.1:11.1	Tadākāsasamaṁ cittaṁ,
thag20.1:11.2	ajjhattaṁ susamāhitaṁ;
thag20.1:11.3	Mā pāpacitte āsādi,
thag20.1:11.4	aggikhandhaṁva pakkhimā”.
thag20.1:12.1	“Passa cittakataṁ bimbaṁ,
thag20.1:12.2	arukāyaṁ samussitaṁ;
thag20.1:12.3	Āturaṁ bahusaṅkappaṁ,
thag20.1:12.4	yassa natthi dhuvaṁ ṭhiti.
thag20.1:13.1	Passa cittakataṁ rūpaṁ,
thag20.1:13.2	maṇinā kuṇḍalena ca;
thag20.1:13.3	Aṭṭhiṁ tacena onaddhaṁ,
thag20.1:13.4	saha vatthehi sobhati.
thag20.1:14.1	Alattakakatā pādā,
thag20.1:14.2	mukhaṁ cuṇṇakamakkhitaṁ;
thag20.1:14.3	Alaṁ bālassa mohāya,
thag20.1:14.4	no ca pāragavesino.
thag20.1:15.1	Aṭṭhapadakatā kesā,
thag20.1:15.2	nettā añjanamakkhitā;
thag20.1:15.3	Alaṁ bālassa mohāya,
thag20.1:15.4	no ca pāragavesino.
thag20.1:16.1	Añjanīva navā cittā,
thag20.1:16.2	pūtikāyo alaṅkato;
thag20.1:16.3	Alaṁ bālassa mohāya,
thag20.1:16.4	no ca pāragavesino.
thag20.1:17.1	Odahi migavo pāsaṁ,
thag20.1:17.2	nāsadā vāguraṁ migo;
thag20.1:17.3	Bhutvā nivāpaṁ gacchāma,
thag20.1:17.4	kaddante migabandhake.
thag20.1:18.1	Chinno pāso migavassa,
thag20.1:18.2	nāsadā vāguraṁ migo;
thag20.1:18.3	Bhutvā nivāpaṁ gacchāma,
thag20.1:18.4	socante migaluddake”.
thag20.1:19.1	“Tadāsi yaṁ bhiṁsanakaṁ,
thag20.1:19.2	tadāsi lomahaṁsanaṁ;
thag20.1:19.3	Anekākārasampanne,
thag20.1:19.4	sāriputtamhi nibbute.
thag20.1:20.1	Aniccā vata saṅkhārā,
thag20.1:20.2	uppādavayadhammino;
thag20.1:20.3	Upajjitvā nirujjhanti,
thag20.1:20.4	tesaṁ vūpasamo sukho.
thag20.1:21.1	Sukhumaṁ te paṭivijjhanti,
thag20.1:21.2	vālaggaṁ usunā yathā;
thag20.1:21.3	Ye pañcakkhandhe passanti,
thag20.1:21.4	parato no ca attato.
thag20.1:22.1	Ye ca passanti saṅkhāre,
thag20.1:22.2	parato no ca attato;
thag20.1:22.3	Paccabyādhiṁsu nipuṇaṁ,
thag20.1:22.4	vālaggaṁ usunā yathā.
thag20.1:23.1	Sattiyā viya omaṭṭho,
thag20.1:23.2	ḍayhamānova matthake;
thag20.1:23.3	Kāmarāgappahānāya,
thag20.1:23.4	sato bhikkhu paribbaje.
thag20.1:24.1	Sattiyā viya omaṭṭho,
thag20.1:24.2	ḍayhamānova matthake;
thag20.1:24.3	Bhavarāgappahānāya,
thag20.1:24.4	sato bhikkhu paribbaje.
thag20.1:25.1	Codito bhāvitattena,
thag20.1:25.2	sarīrantimadhārinā;
thag20.1:25.3	Migāramātupāsādaṁ,
thag20.1:25.4	pādaṅguṭṭhena kampayiṁ.
thag20.1:26.1	Nayidaṁ sithilamārabbha,
thag20.1:26.2	nayidaṁ appena thāmasā;
thag20.1:26.3	Nibbānamadhigantabbaṁ,
thag20.1:26.4	sabbaganthapamocanaṁ.
thag20.1:27.1	Ayañca daharo bhikkhu,
thag20.1:27.2	ayamuttamaporiso;
thag20.1:27.3	Dhāreti antimaṁ dehaṁ,
thag20.1:27.4	jetvā māraṁ savāhiniṁ.
thag20.1:28.1	Vivaramanupabhanti vijjutā,
thag20.1:28.2	Vebhārassa ca paṇḍavassa ca;
thag20.1:28.3	Nagavivaragato jhāyati,
thag20.1:28.4	Putto appaṭimassa tādino.
thag20.1:29.1	Upasanto uparato,
thag20.1:29.2	pantasenāsano muni;
thag20.1:29.3	Dāyādo buddhaseṭṭhassa,
thag20.1:29.4	brahmunā abhivandito”.
thag20.1:30.1	“Upasantaṁ uparataṁ,
thag20.1:30.2	pantasenāsanaṁ muniṁ;
thag20.1:30.3	Dāyādaṁ buddhaseṭṭhassa,
thag20.1:30.4	vanda brāhmaṇa kassapaṁ.
thag20.1:31.1	Yo ca jātisataṁ gacche,
thag20.1:31.2	sabbā brāhmaṇajātiyo;
thag20.1:31.3	Sottiyo vedasampanno,
thag20.1:31.4	manussesu punappunaṁ.
thag20.1:32.1	Ajjhāyakopi ce assa,
thag20.1:32.2	tiṇṇaṁ vedāna pāragū;
thag20.1:32.3	Etassa vandanāyetaṁ,
thag20.1:32.4	kalaṁ nāgghati soḷasiṁ.
thag20.1:33.1	Yo so aṭṭha vimokkhāni,
thag20.1:33.2	purebhattaṁ aphassayi;
thag20.1:33.3	Anulomaṁ paṭilomaṁ,
thag20.1:33.4	tato piṇḍāya gacchati.
thag20.1:34.1	Tādisaṁ bhikkhuṁ māsādi,
thag20.1:34.2	māttānaṁ khaṇi brāhmaṇa;
thag20.1:34.3	Abhippasādehi manaṁ,
thag20.1:34.4	arahantamhi tādine;
thag20.1:34.5	Khippaṁ pañjaliko vanda,
thag20.1:34.6	mā te vijaṭi matthakaṁ”.
thag20.1:35.1	“Neso passati saddhammaṁ,
thag20.1:35.2	saṁsārena purakkhato;
thag20.1:35.3	Adhogamaṁ jimhapathaṁ,
thag20.1:35.4	kummaggamanudhāvati.
thag20.1:36.1	Kimīva mīḷhasallitto,
thag20.1:36.2	saṅkhāre adhimucchito;
thag20.1:36.3	Pagāḷho lābhasakkāre,
thag20.1:36.4	tuccho gacchati poṭṭhilo”.
thag20.1:37.1	“Imañca passa āyantaṁ,
thag20.1:37.2	sāriputtaṁ sudassanaṁ;
thag20.1:37.3	Vimuttaṁ ubhatobhāge,
thag20.1:37.4	ajjhattaṁ susamāhitaṁ.
thag20.1:38.1	Visallaṁ khīṇasaṁyogaṁ,
thag20.1:38.2	tevijjaṁ maccuhāyinaṁ;
thag20.1:38.3	Dakkhiṇeyyaṁ manussānaṁ,
thag20.1:38.4	puññakkhettaṁ anuttaraṁ”.
thag20.1:39.1	“Ete sambahulā devā,
thag20.1:39.2	iddhimanto yasassino;
thag20.1:39.3	Dasa devasahassāni,
thag20.1:39.4	sabbe brahmapurohitā;
thag20.1:39.5	Moggallānaṁ namassantā,
thag20.1:39.6	tiṭṭhanti pañjalīkatā.
thag20.1:40.1	‘Namo te purisājañña,
thag20.1:40.2	namo te purisuttama;
thag20.1:40.3	Yassa te āsavā khīṇā,
thag20.1:40.4	dakkhiṇeyyosi mārisa’.
thag20.1:41.1	Pūjito naradevena,
thag20.1:41.2	uppanno maraṇābhibhū;
thag20.1:41.3	Puṇḍarīkaṁva toyena,
thag20.1:41.4	saṅkhārenupalippati.
thag20.1:42.1	Yassa muhuttena sahassadhā loko,
thag20.1:42.2	Saṁvidito sabrahmakappo vasi;
thag20.1:42.3	Iddhiguṇe cutupapāte kāle,
thag20.1:42.4	Passati devatā sa bhikkhu”.
thag20.1:43.1	“Sāriputtova paññāya,
thag20.1:43.2	sīlena upasamena ca;
thag20.1:43.3	Yopi pāraṅgato bhikkhu,
thag20.1:43.4	etāvaparamo siyā.
thag20.1:44.1	Koṭisatasahassassa,
thag20.1:44.2	Attabhāvaṁ khaṇena nimmine;
thag20.1:44.3	Ahaṁ vikubbanāsu kusalo,
thag20.1:44.4	Vasībhūtomhi iddhiyā.
thag20.1:45.1	Samādhivijjāvasipāramīgato,
thag20.1:45.2	Moggallānagotto asitassa sāsane;
thag20.1:45.3	Dhīro samucchindi samāhitindriyo,
thag20.1:45.4	Nāgo yathā pūtilataṁva bandhanaṁ.
thag20.1:46.1	Pariciṇṇo mayā satthā,
thag20.1:46.2	kataṁ buddhassa sāsanaṁ;
thag20.1:46.3	Ohito garuko bhāro,
thag20.1:46.4	bhavanetti samūhatā.
thag20.1:47.1	Yassa catthāya pabbajito,
thag20.1:47.2	agārasmānagāriyaṁ;
thag20.1:47.3	So me attho anuppatto,
thag20.1:47.4	sabbasaṁyojanakkhayo.
thag20.1:48.1	Kīdiso nirayo āsi,
thag20.1:48.2	yattha dussī apaccatha;
thag20.1:48.3	Vidhuraṁ sāvakamāsajja,
thag20.1:48.4	kakusandhañca brāhmaṇaṁ.
thag20.1:49.1	Sataṁ āsi ayosaṅkū,
thag20.1:49.2	sabbe paccattavedanā;
thag20.1:49.3	Īdiso nirayo āsi,
thag20.1:49.4	yattha dussī apaccatha;
thag20.1:49.5	Vidhuraṁ sāvakamāsajja,
thag20.1:49.6	kakusandhañca brāhmaṇaṁ.
thag20.1:50.1	Yo etamabhijānāti,
thag20.1:50.2	bhikkhu buddhassa sāvako;
thag20.1:50.3	Tādisaṁ bhikkhumāsajja,
thag20.1:50.4	kaṇha dukkhaṁ nigacchasi.
thag20.1:51.1	Majjhesarasmiṁ tiṭṭhanti,
thag20.1:51.2	vimānā kappaṭhāyino;
thag20.1:51.3	Veḷuriyavaṇṇā rucirā,
thag20.1:51.4	accimanto pabhassarā;
thag20.1:51.5	Accharā tattha naccanti,
thag20.1:51.6	puthu nānattavaṇṇiyo.
thag20.1:52.1	Yo etamabhijānāti,
thag20.1:52.2	… pe
thag20.1:52.3	…
thag20.1:52.4	kaṇha dukkhaṁ nigacchasi.
thag20.1:53.1	Yo ve buddhena codito,
thag20.1:53.2	bhikkhusaṅghassa pekkhato;
thag20.1:53.3	Migāramātupāsādaṁ,
thag20.1:53.4	pādaṅguṭṭhena kampayi.
thag20.1:54.1	Yo etamabhijānāti,
thag20.1:54.2	… pe
thag20.1:54.3	…
thag20.1:54.4	kaṇha dukkhaṁ nigacchasi.
thag20.1:55.1	Yo vejayantapāsādaṁ,
thag20.1:55.2	pādaṅguṭṭhena kampayi;
thag20.1:55.3	Iddhibalenupatthaddho,
thag20.1:55.4	saṁvejesi ca devatā.
thag20.1:56.1	Yo etamabhijānāti,
thag20.1:56.2	… pe
thag20.1:56.3	…
thag20.1:56.4	kaṇha dukkhaṁ nigacchasi.
thag20.1:57.1	Yo vejayantapāsāde,
thag20.1:57.2	sakkaṁ so paripucchati;
thag20.1:57.3	Api āvuso jānāsi,
thag20.1:57.4	taṇhakkhayavimuttiyo;
thag20.1:57.5	Tassa sakko viyākāsi,
thag20.1:57.6	pañhaṁ puṭṭho yathātathaṁ”.
thag20.1:58.1	“Yo etamabhijānāti,
thag20.1:58.2	… pe
thag20.1:58.3	…
thag20.1:58.4	kaṇha dukkhaṁ nigacchasi.
thag20.1:59.1	Yo brahmānaṁ paripucchati,
thag20.1:59.2	Sudhammāyaṁ ṭhito sabhaṁ;
thag20.1:59.3	Ajjāpi tyāvuso sā diṭṭhi,
thag20.1:59.4	Yā te diṭṭhi pure ahu;
thag20.1:59.5	Passasi vītivattantaṁ,
thag20.1:59.6	Brahmaloke pabhassaraṁ.
thag20.1:60.1	Tassa brahmā viyākāsi,
thag20.1:60.2	pañhaṁ puṭṭho yathātathaṁ;
thag20.1:60.3	Na me mārisa sā diṭṭhi,
thag20.1:60.4	yā me diṭṭhi pure ahu.
thag20.1:61.1	Passāmi vītivattantaṁ,
thag20.1:61.2	brahmaloke pabhassaraṁ;
thag20.1:61.3	Sohaṁ ajja kathaṁ vajjaṁ,
thag20.1:61.4	ahaṁ niccomhi sassato”.
thag20.1:62.1	“Yo etamabhijānāti,
thag20.1:62.2	… pe
thag20.1:62.3	…
thag20.1:62.4	kaṇha dukkhaṁ nigacchasi.
thag20.1:63.1	Yo mahāneruno kūṭaṁ,
thag20.1:63.2	vimokkhena aphassayi;
thag20.1:63.3	Vanaṁ pubbavidehānaṁ,
thag20.1:63.4	ye ca bhūmisayā narā.
thag20.1:64.1	Yo etamabhijānāti,
thag20.1:64.2	bhikkhu buddhassa sāvako;
thag20.1:64.3	Tādisaṁ bhikkhumāsajja,
thag20.1:64.4	kaṇha dukkhaṁ nigacchasi.
thag20.1:65.1	Na ve aggi cetayati,
thag20.1:65.2	ahaṁ bālaṁ ḍahāmīti;
thag20.1:65.3	Bālova jalitaṁ aggiṁ,
thag20.1:65.4	āsajja naṁ paḍayhati.
thag20.1:66.1	Evamevaṁ tuvaṁ māra,
thag20.1:66.2	āsajja naṁ tathāgataṁ;
thag20.1:66.3	Sayaṁ ḍahissasi attānaṁ,
thag20.1:66.4	bālo aggiṁva samphusaṁ.
thag20.1:67.1	Apuññaṁ pasavī māro,
thag20.1:67.2	āsajja naṁ tathāgataṁ;
thag20.1:67.3	Kiṁ nu maññasi pāpima,
thag20.1:67.4	na me pāpaṁ vipaccati.
thag20.1:68.1	Karato te cīyate pāpaṁ,
thag20.1:68.2	cirarattāya antaka;
thag20.1:68.3	Māra nibbinda buddhamhā,
thag20.1:68.4	āsaṁ mākāsi bhikkhusu”.
thag20.1:69.1	“Iti māraṁ atajjesi,
thag20.1:69.2	bhikkhu bhesakaḷāvane;
thag20.1:69.3	Tato so dummano yakkho,
thag20.1:69.4	tatthevantaradhāyathā”ti.
thag20.1:69.5	Itthaṁ sudaṁ āyasmā mahāmoggallāno thero gāthāyo abhāsitthāti.
thag20.1:69.6	Saṭṭhinipāto niṭṭhito.
thag20.1:70.0	Tatruddānaṁ
thag20.1:70.1	Saṭṭhikamhi nipātamhi,
thag20.1:70.2	moggallāno mahiddhiko;
thag20.1:70.3	Ekova theragāthāyo,
thag20.1:70.4	aṭṭhasaṭṭhi bhavanti tāti.
thag21.1:0.1	Theragāthā 21.1
thag21.1:0.2	Mahānipāta
thag21.1:0.3	Paṭhamavagga
thag21.1:0.4	Vaṅgīsattheragāthā
thag21.1:1.1	“Nikkhantaṁ vata maṁ santaṁ,
thag21.1:1.2	agārasmānagāriyaṁ;
thag21.1:1.3	Vitakkā upadhāvanti,
thag21.1:1.4	pagabbhā kaṇhato ime.
thag21.1:2.1	Uggaputtā mahissāsā,
thag21.1:2.2	sikkhitā daḷhadhammino;
thag21.1:2.3	Samantā parikireyyuṁ,
thag21.1:2.4	sahassaṁ apalāyinaṁ.
thag21.1:3.1	Sacepi ettakā bhiyyo,
thag21.1:3.2	āgamissanti itthiyo;
thag21.1:3.3	Neva maṁ byādhayissanti,
thag21.1:3.4	dhamme samhi patiṭṭhito.
thag21.1:4.1	Sakkhī hi me sutaṁ etaṁ,
thag21.1:4.2	buddhassādiccabandhuno;
thag21.1:4.3	Nibbānagamanaṁ maggaṁ,
thag21.1:4.4	tattha me nirato mano.
thag21.1:5.1	Evañce maṁ viharantaṁ,
thag21.1:5.2	pāpima upagacchasi;
thag21.1:5.3	Tathā maccu karissāmi,
thag21.1:5.4	na me maggampi dakkhasi.
thag21.1:6.1	Aratiñca ratiñca pahāya,
thag21.1:6.2	Sabbaso gehasitañca vitakkaṁ;
thag21.1:6.3	Vanathaṁ na kareyya kuhiñci,
thag21.1:6.4	Nibbanatho avanatho sa bhikkhu.
thag21.1:7.1	Yamidha pathaviñca vehāsaṁ,
thag21.1:7.2	Rūpagataṁ jagatogadhaṁ kiñci;
thag21.1:7.3	Parijīyati sabbamaniccaṁ,
thag21.1:7.4	Evaṁ samecca caranti mutattā.
thag21.1:8.1	Upadhīsu janā gadhitāse,
thag21.1:8.2	Diṭṭhasute paṭighe ca mute ca;
thag21.1:8.3	Ettha vinodaya chandamanejo,
thag21.1:8.4	Yo hettha na limpati muni tamāhu.
thag21.1:9.1	Atha saṭṭhisitā savitakkā,
thag21.1:9.2	Puthujjanatāya adhammā niviṭṭhā;
thag21.1:9.3	Na ca vaggagatassa kuhiñci,
thag21.1:9.4	No pana duṭṭhullagāhī sa bhikkhu.
thag21.1:10.1	Dabbo cirarattasamāhito,
thag21.1:10.2	Akuhako nipako apihālu;
thag21.1:10.3	Santaṁ padaṁ ajjhagamā muni,
thag21.1:10.4	Paṭicca parinibbuto kaṅkhati kālaṁ.
thag21.1:11.1	Mānaṁ pajahassu gotama,
thag21.1:11.2	Mānapathañca jahassu asesaṁ;
thag21.1:11.3	Mānapathamhi sa mucchito,
thag21.1:11.4	Vippaṭisārīhuvā cirarattaṁ.
thag21.1:12.1	Makkhena makkhitā pajā,
thag21.1:12.2	Mānahatā nirayaṁ papatanti;
thag21.1:12.3	Socanti janā cirarattaṁ,
thag21.1:12.4	Mānahatā nirayaṁ upapannā.
thag21.1:13.1	Na hi socati bhikkhu kadāci,
thag21.1:13.2	Maggajino sammā paṭipanno;
thag21.1:13.3	Kittiñca sukhañcānubhoti,
thag21.1:13.4	Dhammadasoti tamāhu tathattaṁ.
thag21.1:14.1	Tasmā akhilo idha padhānavā,
thag21.1:14.2	Nīvaraṇāni pahāya visuddho;
thag21.1:14.3	Mānañca pahāya asesaṁ,
thag21.1:14.4	Vijjāyantakaro samitāvī”.
thag21.1:15.1	“Kāmarāgena ḍayhāmi,
thag21.1:15.2	cittaṁ me pariḍayhati;
thag21.1:15.3	Sādhu nibbāpanaṁ brūhi,
thag21.1:15.4	anukampāya gotama”.
thag21.1:16.1	“Saññāya vipariyesā,
thag21.1:16.2	cittaṁ te pariḍayhati;
thag21.1:16.3	Nimittaṁ parivajjehi,
thag21.1:16.4	subhaṁ rāgūpasaṁhitaṁ. (…)
thag21.1:17.1	Asubhāya cittaṁ bhāvehi,
thag21.1:17.2	ekaggaṁ susamāhitaṁ;
thag21.1:17.3	Sati kāyagatā tyatthu,
thag21.1:17.4	nibbidābahulo bhava.
thag21.1:18.1	Animittañca bhāvehi,
thag21.1:18.2	mānānusayamujjaha;
thag21.1:18.3	Tato mānābhisamayā,
thag21.1:18.4	upasanto carissasi”.
thag21.1:19.1	“Tameva vācaṁ bhāseyya,
thag21.1:19.2	yāyattānaṁ na tāpaye;
thag21.1:19.3	Pare ca na vihiṁseyya,
thag21.1:19.4	sā ve vācā subhāsitā.
thag21.1:20.1	Piyavācameva bhāseyya,
thag21.1:20.2	yā vācā paṭinanditā;
thag21.1:20.3	Yaṁ anādāya pāpāni,
thag21.1:20.4	paresaṁ bhāsate piyaṁ.
thag21.1:21.1	Saccaṁ ve amatā vācā,
thag21.1:21.2	esa dhammo sanantano;
thag21.1:21.3	Sacce atthe ca dhamme ca,
thag21.1:21.4	āhu santo patiṭṭhitā.
thag21.1:22.1	Yaṁ buddho bhāsati vācaṁ,
thag21.1:22.2	khemaṁ nibbānapattiyā;
thag21.1:22.3	Dukkhassantakiriyāya,
thag21.1:22.4	sā ve vācānamuttamā”.
thag21.1:23.1	“Gambhīrapañño medhāvī,
thag21.1:23.2	maggāmaggassa kovido;
thag21.1:23.3	Sāriputto mahāpañño,
thag21.1:23.4	dhammaṁ deseti bhikkhunaṁ.
thag21.1:24.1	Saṅkhittenapi deseti,
thag21.1:24.2	vitthārenapi bhāsati;
thag21.1:24.3	Sālikāyiva nigghoso,
thag21.1:24.4	paṭibhānaṁ udiyyati.
thag21.1:25.1	Tassa taṁ desayantassa,
thag21.1:25.2	suṇanti madhuraṁ giraṁ;
thag21.1:25.3	Sarena rajanīyena,
thag21.1:25.4	savanīyena vaggunā;
thag21.1:25.5	Udaggacittā muditā,
thag21.1:25.6	sotaṁ odhenti bhikkhavo”.
thag21.1:26.1	“Ajja pannarase visuddhiyā,
thag21.1:26.2	Bhikkhū pañcasatā samāgatā;
thag21.1:26.3	Saṁyojanabandhanacchidā,
thag21.1:26.4	Anīghā khīṇapunabbhavā isī.
thag21.1:27.1	Cakkavattī yathā rājā,
thag21.1:27.2	amaccaparivārito;
thag21.1:27.3	Samantā anupariyeti,
thag21.1:27.4	sāgarantaṁ mahiṁ imaṁ.
thag21.1:28.1	Evaṁ vijitasaṅgāmaṁ,
thag21.1:28.2	satthavāhaṁ anuttaraṁ;
thag21.1:28.3	Sāvakā payirupāsanti,
thag21.1:28.4	tevijjā maccuhāyino.
thag21.1:29.1	Sabbe bhagavato puttā,
thag21.1:29.2	palāpettha na vijjati;
thag21.1:29.3	Taṇhāsallassa hantāraṁ,
thag21.1:29.4	vande ādiccabandhunaṁ.
thag21.1:30.1	Parosahassaṁ bhikkhūnaṁ,
thag21.1:30.2	sugataṁ payirupāsati;
thag21.1:30.3	Desentaṁ virajaṁ dhammaṁ,
thag21.1:30.4	nibbānaṁ akutobhayaṁ.
thag21.1:31.1	Suṇanti dhammaṁ vimalaṁ,
thag21.1:31.2	sammāsambuddhadesitaṁ;
thag21.1:31.3	Sobhati vata sambuddho,
thag21.1:31.4	bhikkhusaṅghapurakkhato.
thag21.1:32.1	‘Nāganāmo’si bhagavā,
thag21.1:32.2	isīnaṁ isisattamo;
thag21.1:32.3	Mahāmeghova hutvāna,
thag21.1:32.4	sāvake abhivassasi.
thag21.1:33.1	Divā vihārā nikkhamma,
thag21.1:33.2	satthudassanakamyatā;
thag21.1:33.3	Sāvako te mahāvīra,
thag21.1:33.4	pāde vandati vaṅgiso”.
thag21.1:34.1	“Ummaggapathaṁ mārassa,
thag21.1:34.2	Abhibhuyya carati pabhijja khīlāni;
thag21.1:34.3	Taṁ passatha bandhapamuñcakaraṁ,
thag21.1:34.4	Asitaṁva bhāgaso pavibhajja.
thag21.1:35.1	Oghassa hi nitaraṇatthaṁ,
thag21.1:35.2	Anekavihitaṁ maggaṁ akkhāsi;
thag21.1:35.3	Tasmiñca amate akkhāte,
thag21.1:35.4	Dhammadasā ṭhitā asaṁhīrā.
thag21.1:36.1	Pajjotakaro ativijjha,
thag21.1:36.2	Sabbaṭhitīnaṁ atikkamamaddasa;
thag21.1:36.3	Ñatvā ca sacchikatvā ca,
thag21.1:36.4	Aggaṁ so desayi dasaddhānaṁ.
thag21.1:37.1	Evaṁ sudesite dhamme,
thag21.1:37.2	Ko pamādo vijānataṁ dhammaṁ;
thag21.1:37.3	Tasmā hi tassa bhagavato sāsane,
thag21.1:37.4	Appamatto sadā namassamanusikkhe”.
thag21.1:38.1	“Buddhānubuddho yo thero,
thag21.1:38.2	koṇḍañño tibbanikkamo;
thag21.1:38.3	Lābhī sukhavihārānaṁ,
thag21.1:38.4	vivekānaṁ abhiṇhaso.
thag21.1:39.1	Yaṁ sāvakena pattabbaṁ,
thag21.1:39.2	satthu sāsanakārinā;
thag21.1:39.3	Sabbassa taṁ anuppattaṁ,
thag21.1:39.4	appamattassa sikkhato.
thag21.1:40.1	Mahānubhāvo tevijjo,
thag21.1:40.2	cetopariyakovido;
thag21.1:40.3	Koṇḍañño buddhadāyādo,
thag21.1:40.4	pāde vandati satthuno”.
thag21.1:41.1	“Nagassa passe āsīnaṁ,
thag21.1:41.2	muniṁ dukkhassa pāraguṁ;
thag21.1:41.3	Sāvakā payirupāsanti,
thag21.1:41.4	tevijjā maccuhāyino.
thag21.1:42.1	Cetasā anupariyeti,
thag21.1:42.2	moggallāno mahiddhiko;
thag21.1:42.3	Cittaṁ nesaṁ samanvesaṁ,
thag21.1:42.4	vippamuttaṁ nirūpadhiṁ.
thag21.1:43.1	Evaṁ sabbaṅgasampannaṁ,
thag21.1:43.2	muniṁ dukkhassa pāraguṁ;
thag21.1:43.3	Anekākārasampannaṁ,
thag21.1:43.4	payirupāsanti gotamaṁ”.
thag21.1:44.1	“Cando yathā vigatavalāhake nabhe,
thag21.1:44.2	Virocati vītamalova bhāṇumā;
thag21.1:44.3	Evampi aṅgīrasa tvaṁ mahāmuni,
thag21.1:44.4	Atirocasi yasasā sabbalokaṁ”.
thag21.1:45.1	“Kāveyyamattā vicarimha pubbe,
thag21.1:45.2	Gāmā gāmaṁ purā puraṁ;
thag21.1:45.3	Athaddasāma sambuddhaṁ,
thag21.1:45.4	Sabbadhammāna pāraguṁ.
thag21.1:46.1	So me dhammamadesesi,
thag21.1:46.2	muni dukkhassa pāragū;
thag21.1:46.3	Dhammaṁ sutvā pasīdimha,
thag21.1:46.4	saddhā no udapajjatha.
thag21.1:47.1	Tassāhaṁ vacanaṁ sutvā,
thag21.1:47.2	khandhe āyatanāni ca;
thag21.1:47.3	Dhātuyo ca viditvāna,
thag21.1:47.4	pabbajiṁ anagāriyaṁ.
thag21.1:48.1	Bahūnaṁ vata atthāya,
thag21.1:48.2	uppajjanti tathāgatā;
thag21.1:48.3	Itthīnaṁ purisānañca,
thag21.1:48.4	ye te sāsanakārakā.
thag21.1:49.1	Tesaṁ kho vata atthāya,
thag21.1:49.2	bodhimajjhagamā muni;
thag21.1:49.3	Bhikkhūnaṁ bhikkhunīnañca,
thag21.1:49.4	ye nirāmagataddasā.
thag21.1:50.1	Sudesitā cakkhumatā,
thag21.1:50.2	buddhenādiccabandhunā;
thag21.1:50.3	Cattāri ariyasaccāni,
thag21.1:50.4	anukampāya pāṇinaṁ.
thag21.1:51.1	Dukkhaṁ dukkhasamuppādaṁ,
thag21.1:51.2	Dukkhassa ca atikkamaṁ;
thag21.1:51.3	Ariyaṁ caṭṭhaṅgikaṁ maggaṁ,
thag21.1:51.4	Dukkhūpasamagāminaṁ.
thag21.1:52.1	Evamete tathā vuttā,
thag21.1:52.2	diṭṭhā me te yathā tathā;
thag21.1:52.3	Sadattho me anuppatto,
thag21.1:52.4	kataṁ buddhassa sāsanaṁ.
thag21.1:53.1	Svāgataṁ vata me āsi,
thag21.1:53.2	mama buddhassa santike;
thag21.1:53.3	Suvibhattesu dhammesu,
thag21.1:53.4	yaṁ seṭṭhaṁ tadupāgamiṁ.
thag21.1:54.1	Abhiññāpāramippatto,
thag21.1:54.2	sotadhātu visodhitā;
thag21.1:54.3	Tevijjo iddhipattomhi,
thag21.1:54.4	cetopariyakovido”.
thag21.1:55.1	“Pucchāmi satthāramanomapaññaṁ,
thag21.1:55.2	Diṭṭheva dhamme yo vicikicchānaṁ chettā;
thag21.1:55.3	Aggāḷave kālamakāsi bhikkhu,
thag21.1:55.4	Ñāto yasassī abhinibbutatto.
thag21.1:56.1	Nigrodhakappo iti tassa nāmaṁ,
thag21.1:56.2	Tayā kataṁ bhagavā brāhmaṇassa;
thag21.1:56.3	So taṁ namassaṁ acari mutyapekho,
thag21.1:56.4	Āraddhavīriyo daḷhadhammadassī.
thag21.1:57.1	Taṁ sāvakaṁ sakka mayampi sabbe,
thag21.1:57.2	Aññātumicchāma samantacakkhu;
thag21.1:57.3	Samavaṭṭhitā no savanāya sotā,
thag21.1:57.4	Tuvaṁ no satthā tvamanuttarosi.
thag21.1:58.1	Chinda no vicikicchaṁ brūhi metaṁ,
thag21.1:58.2	Parinibbutaṁ vedaya bhūripañña;
thag21.1:58.3	Majjheva no bhāsa samantacakkhu,
thag21.1:58.4	Sakkova devāna sahassanetto.
thag21.1:59.1	Ye keci ganthā idha mohamaggā,
thag21.1:59.2	Aññāṇapakkhā vicikicchaṭhānā;
thag21.1:59.3	Tathāgataṁ patvā na te bhavanti,
thag21.1:59.4	Cakkhuñhi etaṁ paramaṁ narānaṁ.
thag21.1:60.1	No ce hi jātu puriso kilese,
thag21.1:60.2	Vāto yathā abbhaghanaṁ vihāne;
thag21.1:60.3	Tamovassa nivuto sabbaloko,
thag21.1:60.4	Jotimantopi na pabhāseyyuṁ.
thag21.1:61.1	Dhīrā ca pajjotakarā bhavanti,
thag21.1:61.2	Taṁ taṁ ahaṁ vīra tatheva maññe;
thag21.1:61.3	Vipassinaṁ jānamupāgamimha,
thag21.1:61.4	Parisāsu no āvikarohi kappaṁ.
thag21.1:62.1	Khippaṁ giraṁ eraya vaggu vagguṁ,
thag21.1:62.2	Haṁsova paggayha saṇikaṁ nikūja;
thag21.1:62.3	Bindussarena suvikappitena,
thag21.1:62.4	Sabbeva te ujjugatā suṇoma.
thag21.1:63.1	Pahīnajātimaraṇaṁ asesaṁ,
thag21.1:63.2	Niggayha dhonaṁ vadessāmi dhammaṁ;
thag21.1:63.3	Na kāmakāro hi puthujjanānaṁ,
thag21.1:63.4	Saṅkheyyakāro ca tathāgatānaṁ.
thag21.1:64.1	Sampannaveyyākaraṇaṁ tavedaṁ,
thag21.1:64.2	Samujjupaññassa samuggahītaṁ;
thag21.1:64.3	Ayamañjali pacchimo suppaṇāmito,
thag21.1:64.4	Mā mohayī jānamanomapañña.
thag21.1:65.1	Paroparaṁ ariyadhammaṁ viditvā,
thag21.1:65.2	Mā mohayī jānamanomavīriya;
thag21.1:65.3	Vāriṁ yathā ghammani ghammatatto,
thag21.1:65.4	Vācābhikaṅkhāmi sutaṁ pavassa.
thag21.1:66.1	Yadatthikaṁ brahmacariyaṁ acarī,
thag21.1:66.2	Kappāyano kaccissataṁ amoghaṁ;
thag21.1:66.3	Nibbāyi so ādu saupādiseso,
thag21.1:66.4	Yathā vimutto ahu taṁ suṇoma”.
thag21.1:67.1	“Acchecchi taṇhaṁ idha nāmarūpe,
thag21.1:67.2	(iti bhagavā)
thag21.1:67.3	Kaṇhassa sotaṁ dīgharattānusayitaṁ;
thag21.1:67.4	Atāri jātiṁ maraṇaṁ asesaṁ,
thag21.1:67.5	Iccabravi bhagavā pañcaseṭṭho”.
thag21.1:68.1	“Esa sutvā pasīdāmi,
thag21.1:68.2	vaco te isisattama;
thag21.1:68.3	Amoghaṁ kira me puṭṭhaṁ,
thag21.1:68.4	na maṁ vañcesi brāhmaṇo.
thag21.1:69.1	Yathā vādī tathā kārī,
thag21.1:69.2	ahu buddhassa sāvako;
thag21.1:69.3	Acchecchi maccuno jālaṁ,
thag21.1:69.4	tataṁ māyāvino daḷhaṁ.
thag21.1:70.1	Addasa bhagavā ādiṁ,
thag21.1:70.2	upādānassa kappiyo;
thag21.1:70.3	Accagā vata kappāno,
thag21.1:70.4	maccudheyyaṁ suduttaraṁ.
thag21.1:71.1	Taṁ devadevaṁ vandāmi,
thag21.1:71.2	puttaṁ te dvipaduttama;
thag21.1:71.3	Anujātaṁ mahāvīraṁ,
thag21.1:71.4	nāgaṁ nāgassa orasan”ti.
thag21.1:71.5	Itthaṁ sudaṁ āyasmā vaṅgīso thero gāthāyo abhāsitthāti.
thag21.1:71.6	Mahānipāto niṭṭhito.
thag21.1:72.0	Tatruddānaṁ
thag21.1:72.1	Sattatimhi nipātamhi,
thag21.1:72.2	vaṅgīso paṭibhāṇavā;
thag21.1:72.3	Ekova thero natthañño,
thag21.1:72.4	gāthāyo ekasattatīti.
thag21.1:72.5	Niṭṭhitā theragāthāyo.
thag21.1:73.0	Tatruddānaṁ
thag21.1:73.1	Sahassaṁ honti tā gāthā,
thag21.1:73.2	tīṇi saṭṭhisatāni ca;
thag21.1:73.3	Therā ca dve satā saṭṭhi,
thag21.1:73.4	cattāro ca pakāsitā.
thag21.1:74.1	Sīhanādaṁ naditvāna,
thag21.1:74.2	buddhaputtā anāsavā;
thag21.1:74.3	Khemantaṁ pāpuṇitvāna,
thag21.1:74.4	aggikhandhāva nibbutāti.
thag21.1:74.5	Theragāthāpāḷi niṭṭhitā.