# Suttanipāta — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

snp1.1:0.1	Sutta Nipāta 1.1
snp1.1:0.2	Uragasutta
snp1.1:1.1	Yo uppatitaṁ vineti kodhaṁ,
snp1.1:1.2	Visaṭaṁ sappavisaṁva osadhehi;
snp1.1:1.3	So bhikkhu jahāti orapāraṁ,
snp1.1:1.4	Urago jiṇṇamivattacaṁ purāṇaṁ.
snp1.1:2.1	Yo rāgamudacchidā asesaṁ,
snp1.1:2.2	Bhisapupphaṁva saroruhaṁ vigayha;
snp1.1:2.3	So bhikkhu jahāti orapāraṁ,
snp1.1:2.4	Urago jiṇṇamivattacaṁ purāṇaṁ.
snp1.1:3.1	Yo taṇhamudacchidā asesaṁ,
snp1.1:3.2	Saritaṁ sīghasaraṁ visosayitvā;
snp1.1:3.3	So bhikkhu jahāti orapāraṁ,
snp1.1:3.4	Urago jiṇṇamivattacaṁ purāṇaṁ.
snp1.1:4.1	Yo mānamudabbadhī asesaṁ,
snp1.1:4.2	Naḷasetuṁva sudubbalaṁ mahogho;
snp1.1:4.3	So bhikkhu jahāti orapāraṁ,
snp1.1:4.4	Urago jiṇṇamivattacaṁ purāṇaṁ.
snp1.1:5.1	Yo nājjhagamā bhavesu sāraṁ,
snp1.1:5.2	Vicinaṁ pupphamivā udumbaresu;
snp1.1:5.3	So bhikkhu jahāti orapāraṁ,
snp1.1:5.4	Urago jiṇṇamivattacaṁ purāṇaṁ.
snp1.1:6.1	Yassantarato na santi kopā,
snp1.1:6.2	Itibhavābhavatañca vītivatto;
snp1.1:6.3	So bhikkhu jahāti orapāraṁ,
snp1.1:6.4	Urago jiṇṇamivattacaṁ purāṇaṁ.
snp1.1:7.1	Yassa vitakkā vidhūpitā,
snp1.1:7.2	Ajjhattaṁ suvikappitā asesā;
snp1.1:7.3	So bhikkhu jahāti orapāraṁ,
snp1.1:7.4	Urago jiṇṇamivattacaṁ purāṇaṁ.
snp1.1:8.1	Yo nāccasārī na paccasārī,
snp1.1:8.2	Sabbaṁ accagamā imaṁ papañcaṁ;
snp1.1:8.3	So bhikkhu jahāti orapāraṁ,
snp1.1:8.4	Urago jiṇṇamivattacaṁ purāṇaṁ.
snp1.1:9.1	Yo nāccasārī na paccasārī,
snp1.1:9.2	Sabbaṁ vitathamidanti ñatva loke;
snp1.1:9.3	So bhikkhu jahāti orapāraṁ,
snp1.1:9.4	Urago jiṇṇamivattacaṁ purāṇaṁ.
snp1.1:10.1	Yo nāccasārī na paccasārī,
snp1.1:10.2	Sabbaṁ vitathamidanti vītalobho;
snp1.1:10.3	So bhikkhu jahāti orapāraṁ,
snp1.1:10.4	Urago jiṇṇamivattacaṁ purāṇaṁ.
snp1.1:11.1	Yo nāccasārī na paccasārī,
snp1.1:11.2	Sabbaṁ vitathamidanti vītarāgo;
snp1.1:11.3	So bhikkhu jahāti orapāraṁ,
snp1.1:11.4	Urago jiṇṇamivattacaṁ purāṇaṁ.
snp1.1:12.1	Yo nāccasārī na paccasārī,
snp1.1:12.2	Sabbaṁ vitathamidanti vītadoso;
snp1.1:12.3	So bhikkhu jahāti orapāraṁ,
snp1.1:12.4	Urago jiṇṇamivattacaṁ purāṇaṁ.
snp1.1:13.1	Yo nāccasārī na paccasārī,
snp1.1:13.2	Sabbaṁ vitathamidanti vītamoho;
snp1.1:13.3	So bhikkhu jahāti orapāraṁ,
snp1.1:13.4	Urago jiṇṇamivattacaṁ purāṇaṁ.
snp1.1:14.1	Yassānusayā na santi keci,
snp1.1:14.2	Mūlā ca akusalā samūhatāse;
snp1.1:14.3	So bhikkhu jahāti orapāraṁ,
snp1.1:14.4	Urago jiṇṇamivattacaṁ purāṇaṁ.
snp1.1:15.1	Yassa darathajā na santi keci,
snp1.1:15.2	Oraṁ āgamanāya paccayāse;
snp1.1:15.3	So bhikkhu jahāti orapāraṁ,
snp1.1:15.4	Urago jiṇṇamivattacaṁ purāṇaṁ.
snp1.1:16.1	Yassa vanathajā na santi keci,
snp1.1:16.2	Vinibandhāya bhavāya hetukappā;
snp1.1:16.3	So bhikkhu jahāti orapāraṁ,
snp1.1:16.4	Urago jiṇṇamivattacaṁ purāṇaṁ.
snp1.1:17.1	Yo nīvaraṇe pahāya pañca,
snp1.1:17.2	Anigho tiṇṇakathaṅkatho visallo;
snp1.1:17.3	So bhikkhu jahāti orapāraṁ,
snp1.1:17.4	Urago jiṇṇamivattacaṁ purāṇanti.
snp1.1:17.5	Uragasuttaṁ paṭhamaṁ.
snp1.2:0.1	Sutta Nipāta 1.2
snp1.2:0.2	Dhaniyasutta
snp1.2:1.1	“Pakkodano duddhakhīrohamasmi,
snp1.2:1.2	(iti dhaniyo gopo)
snp1.2:1.3	Anutīre mahiyā samānavāso;
snp1.2:1.4	Channā kuṭi āhito gini,
snp1.2:1.5	Atha ce patthayasī pavassa deva”.
snp1.2:2.1	“Akkodhano vigatakhilohamasmi,
snp1.2:2.2	(iti bhagavā)
snp1.2:2.3	Anutīre mahiyekarattivāso;
snp1.2:2.4	Vivaṭā kuṭi nibbuto gini,
snp1.2:2.5	Atha ce patthayasī pavassa deva”.
snp1.2:3.1	“Andhakamakasā na vijjare,
snp1.2:3.2	(iti dhaniyo gopo)
snp1.2:3.3	Kacche rūḷhatiṇe caranti gāvo;
snp1.2:3.4	Vuṭṭhimpi saheyyumāgataṁ,
snp1.2:3.5	Atha ce patthayasī pavassa deva”.
snp1.2:4.1	“Baddhāsi bhisī susaṅkhatā,
snp1.2:4.2	(iti bhagavā)
snp1.2:4.3	Tiṇṇo pāragato vineyya oghaṁ;
snp1.2:4.4	Attho bhisiyā na vijjati,
snp1.2:4.5	Atha ce patthayasī pavassa deva”.
snp1.2:5.1	“Gopī mama assavā alolā,
snp1.2:5.2	(iti dhaniyo gopo)
snp1.2:5.3	Dīgharattaṁ saṁvāsiyā manāpā;
snp1.2:5.4	Tassā na suṇāmi kiñci pāpaṁ,
snp1.2:5.5	Atha ce patthayasī pavassa deva”.
snp1.2:6.1	“Cittaṁ mama assavaṁ vimuttaṁ,
snp1.2:6.2	(iti bhagavā)
snp1.2:6.3	Dīgharattaṁ paribhāvitaṁ sudantaṁ;
snp1.2:6.4	Pāpaṁ pana me na vijjati,
snp1.2:6.5	Atha ce patthayasī pavassa deva”.
snp1.2:7.1	“Attavetanabhatohamasmi,
snp1.2:7.2	(iti dhaniyo gopo)
snp1.2:7.3	Puttā ca me samāniyā arogā;
snp1.2:7.4	Tesaṁ na suṇāmi kiñci pāpaṁ,
snp1.2:7.5	Atha ce patthayasī pavassa deva”.
snp1.2:8.1	“Nāhaṁ bhatakosmi kassaci,
snp1.2:8.2	(iti bhagavā)
snp1.2:8.3	Nibbiṭṭhena carāmi sabbaloke;
snp1.2:8.4	Attho bhatiyā na vijjati,
snp1.2:8.5	Atha ce patthayasī pavassa deva”.
snp1.2:9.1	“Atthi vasā atthi dhenupā,
snp1.2:9.2	(iti dhaniyo gopo)
snp1.2:9.3	Godharaṇiyo paveṇiyopi atthi;
snp1.2:9.4	Usabhopi gavampatīdha atthi,
snp1.2:9.5	Atha ce patthayasī pavassa deva”.
snp1.2:10.1	“Natthi vasā natthi dhenupā,
snp1.2:10.2	(iti bhagavā)
snp1.2:10.3	Godharaṇiyo paveṇiyopi natthi;
snp1.2:10.4	Usabhopi gavampatīdha natthi,
snp1.2:10.5	Atha ce patthayasī pavassa deva”.
snp1.2:11.1	“Khilā nikhātā asampavedhī,
snp1.2:11.2	(iti dhaniyo gopo)
snp1.2:11.3	Dāmā muñjamayā navā susaṇṭhānā;
snp1.2:11.4	Na hi sakkhinti dhenupāpi chettuṁ,
snp1.2:11.5	Atha ce patthayasī pavassa deva”.
snp1.2:12.1	“Usabhoriva chetva bandhanāni,
snp1.2:12.2	(iti bhagavā)
snp1.2:12.3	Nāgo pūtilataṁva dālayitvā;
snp1.2:12.4	Nāhaṁ punupessaṁ gabbhaseyyaṁ,
snp1.2:12.5	Atha ce patthayasī pavassa deva”.
snp1.2:13.1	Ninnañca thalañca pūrayanto,
snp1.2:13.2	Mahāmegho pavassi tāvadeva;
snp1.2:13.3	Sutvā devassa vassato,
snp1.2:13.4	Imamatthaṁ dhaniyo abhāsatha.
snp1.2:14.1	“Lābhā vata no anappakā,
snp1.2:14.2	Ye mayaṁ bhagavantaṁ addasāma;
snp1.2:14.3	Saraṇaṁ taṁ upema cakkhuma,
snp1.2:14.4	Satthā no hohi tuvaṁ mahāmuni.
snp1.2:15.1	Gopī ca ahañca assavā,
snp1.2:15.2	Brahmacariyaṁ sugate carāmase;
snp1.2:15.3	Jātimaraṇassa pāragū,
snp1.2:15.4	Dukkhassantakarā bhavāmase”.
snp1.2:16.1	“Nandati puttehi puttimā,
snp1.2:16.2	(iti māro pāpimā)
snp1.2:16.3	Gomā gohi tatheva nandati;
snp1.2:16.4	Upadhī hi narassa nandanā,
snp1.2:16.5	Na hi so nandati yo nirūpadhi”.
snp1.2:17.1	“Socati puttehi puttimā,
snp1.2:17.2	(iti bhagavā)
snp1.2:17.3	Gomā gohi tatheva socati;
snp1.2:17.4	Upadhī hi narassa socanā,
snp1.2:17.5	Na hi so socati yo nirūpadhī”ti.
snp1.2:17.6	Dhaniyasuttaṁ dutiyaṁ.
snp1.3:0.1	Sutta Nipāta 1.3
snp1.3:0.2	Khaggavisāṇasutta
snp1.3:1.1	“Sabbesu bhūtesu nidhāya daṇḍaṁ,
snp1.3:1.2	Aviheṭhayaṁ aññatarampi tesaṁ;
snp1.3:1.3	Na puttamiccheyya kuto sahāyaṁ,
snp1.3:1.4	Eko care khaggavisāṇakappo”.
snp1.3:2.1	“Saṁsaggajātassa bhavanti snehā,
snp1.3:2.2	Snehanvayaṁ dukkhamidaṁ pahoti;
snp1.3:2.3	Ādīnavaṁ snehajaṁ pekkhamāno,
snp1.3:2.4	Eko care khaggavisāṇakappo”.
snp1.3:3.1	“Mitte suhajje anukampamāno,
snp1.3:3.2	Hāpeti atthaṁ paṭibaddhacitto;
snp1.3:3.3	Etaṁ bhayaṁ santhave pekkhamāno,
snp1.3:3.4	Eko care khaggavisāṇakappo”.
snp1.3:4.1	“Vaṁso visālova yathā visatto,
snp1.3:4.2	Puttesu dāresu ca yā apekkhā;
snp1.3:4.3	Vaṁsakkaḷīrova asajjamāno,
snp1.3:4.4	Eko care khaggavisāṇakappo”.
snp1.3:5.1	“Migo araññamhi yathā abaddho,
snp1.3:5.2	Yenicchakaṁ gacchati gocarāya;
snp1.3:5.3	Viññū naro seritaṁ pekkhamāno,
snp1.3:5.4	Eko care khaggavisāṇakappo”.
snp1.3:6.1	“Āmantanā hoti sahāyamajjhe,
snp1.3:6.2	Vāse ṭhāne gamane cārikāya;
snp1.3:6.3	Anabhijjhitaṁ seritaṁ pekkhamāno,
snp1.3:6.4	Eko care khaggavisāṇakappo”.
snp1.3:7.1	“Khiḍḍā ratī hoti sahāyamajjhe,
snp1.3:7.2	Puttesu ca vipulaṁ hoti pemaṁ;
snp1.3:7.3	Piyavippayogaṁ vijigucchamāno,
snp1.3:7.4	Eko care khaggavisāṇakappo”.
snp1.3:8.1	“Cātuddiso appaṭigho ca hoti,
snp1.3:8.2	Santussamāno itarītarena;
snp1.3:8.3	Parissayānaṁ sahitā achambhī,
snp1.3:8.4	Eko care khaggavisāṇakappo”.
snp1.3:9.1	“Dussaṅgahā pabbajitāpi eke,
snp1.3:9.2	Atho gahaṭṭhā gharamāvasantā;
snp1.3:9.3	Appossukko paraputtesu hutvā,
snp1.3:9.4	Eko care khaggavisāṇakappo”.
snp1.3:10.1	“Oropayitvā gihibyañjanāni,
snp1.3:10.2	Sañchinnapatto yathā koviḷāro;
snp1.3:10.3	Chetvāna vīro gihibandhanāni,
snp1.3:10.4	Eko care khaggavisāṇakappo”.
snp1.3:11.1	“Sace labhetha nipakaṁ sahāyaṁ,
snp1.3:11.2	Saddhiṁ caraṁ sādhuvihāridhīraṁ;
snp1.3:11.3	Abhibhuyya sabbāni parissayāni,
snp1.3:11.4	Careyya tenattamano satīmā”.
snp1.3:12.1	“No ce labhetha nipakaṁ sahāyaṁ,
snp1.3:12.2	Saddhiṁ caraṁ sādhuvihāridhīraṁ;
snp1.3:12.3	Rājāva raṭṭhaṁ vijitaṁ pahāya,
snp1.3:12.4	Eko care mātaṅgaraññeva nāgo”.
snp1.3:13.1	“Addhā pasaṁsāma sahāyasampadaṁ,
snp1.3:13.2	Seṭṭhā samā sevitabbā sahāyā;
snp1.3:13.3	Ete aladdhā anavajjabhojī,
snp1.3:13.4	Eko care khaggavisāṇakappo”.
snp1.3:14.1	“Disvā suvaṇṇassa pabhassarāni,
snp1.3:14.2	Kammāraputtena suniṭṭhitāni;
snp1.3:14.3	Saṅghaṭṭamānāni duve bhujasmiṁ,
snp1.3:14.4	Eko care khaggavisāṇakappo”.
snp1.3:15.1	“Evaṁ dutīyena sahā mamassa,
snp1.3:15.2	Vācābhilāpo abhisajjanā vā;
snp1.3:15.3	Etaṁ bhayaṁ āyatiṁ pekkhamāno,
snp1.3:15.4	Eko care khaggavisāṇakappo”.
snp1.3:16.1	“Kāmā hi citrā madhurā manoramā,
snp1.3:16.2	Virūparūpena mathenti cittaṁ;
snp1.3:16.3	Ādīnavaṁ kāmaguṇesu disvā,
snp1.3:16.4	Eko care khaggavisāṇakappo”.
snp1.3:17.1	“Ītī ca gaṇḍo ca upaddavo ca,
snp1.3:17.2	Rogo ca sallañca bhayañca metaṁ;
snp1.3:17.3	Etaṁ bhayaṁ kāmaguṇesu disvā,
snp1.3:17.4	Eko care khaggavisāṇakappo”.
snp1.3:18.1	“Sītañca uṇhañca khudaṁ pipāsaṁ,
snp1.3:18.2	Vātātape ḍaṁsasarīsape ca;
snp1.3:18.3	Sabbānipetāni abhisambhavitvā,
snp1.3:18.4	Eko care khaggavisāṇakappo”.
snp1.3:19.1	“Nāgova yūthāni vivajjayitvā,
snp1.3:19.2	Sañjātakhandho padumī uḷāro;
snp1.3:19.3	Yathābhirantaṁ viharaṁ araññe,
snp1.3:19.4	Eko care khaggavisāṇakappo”.
snp1.3:20.1	“Aṭṭhānataṁ saṅgaṇikāratassa,
snp1.3:20.2	Yaṁ phassaye sāmayikaṁ vimuttiṁ;
snp1.3:20.3	Ādiccabandhussa vaco nisamma,
snp1.3:20.4	Eko care khaggavisāṇakappo”.
snp1.3:21.1	“Diṭṭhīvisūkāni upātivatto,
snp1.3:21.2	Patto niyāmaṁ paṭiladdhamaggo;
snp1.3:21.3	Uppannañāṇomhi anaññaneyyo,
snp1.3:21.4	Eko care khaggavisāṇakappo”.
snp1.3:22.1	“Nillolupo nikkuho nippipāso,
snp1.3:22.2	Nimmakkho niddhantakasāvamoho;
snp1.3:22.3	Nirāsayo sabbaloke bhavitvā,
snp1.3:22.4	Eko care khaggavisāṇakappo”.
snp1.3:23.1	“Pāpaṁ sahāyaṁ parivajjayetha,
snp1.3:23.2	Anatthadassiṁ visame niviṭṭhaṁ;
snp1.3:23.3	Sayaṁ na seve pasutaṁ pamattaṁ,
snp1.3:23.4	Eko care khaggavisāṇakappo”.
snp1.3:24.1	“Bahussutaṁ dhammadharaṁ bhajetha,
snp1.3:24.2	Mittaṁ uḷāraṁ paṭibhānavantaṁ;
snp1.3:24.3	Aññāya atthāni vineyya kaṅkhaṁ,
snp1.3:24.4	Eko care khaggavisāṇakappo”.
snp1.3:25.1	“Khiḍḍaṁ ratiṁ kāmasukhañca loke,
snp1.3:25.2	Analaṅkaritvā anapekkhamāno;
snp1.3:25.3	Vibhūsanaṭṭhānā virato saccavādī,
snp1.3:25.4	Eko care khaggavisāṇakappo”.
snp1.3:26.1	“Puttañca dāraṁ pitarañca mātaraṁ,
snp1.3:26.2	Dhanāni dhaññāni ca bandhavāni;
snp1.3:26.3	Hitvāna kāmāni yathodhikāni,
snp1.3:26.4	Eko care khaggavisāṇakappo”.
snp1.3:27.1	“Saṅgo eso parittamettha sokhyaṁ,
snp1.3:27.2	Appassādo dukkhamettha bhiyyo;
snp1.3:27.3	Gaḷo eso iti ñatvā matīmā,
snp1.3:27.4	Eko care khaggavisāṇakappo”.
snp1.3:28.1	“Sandālayitvāna saṁyojanāni,
snp1.3:28.2	Jālaṁva bhetvā salilambucārī;
snp1.3:28.3	Aggīva daḍḍhaṁ anivattamāno,
snp1.3:28.4	Eko care khaggavisāṇakappo”.
snp1.3:29.1	“Okkhittacakkhu na ca pādalolo,
snp1.3:29.2	Guttindriyo rakkhitamānasāno;
snp1.3:29.3	Anavassuto apariḍayhamāno,
snp1.3:29.4	Eko care khaggavisāṇakappo”.
snp1.3:30.1	“Ohārayitvā gihibyañjanāni,
snp1.3:30.2	Sañchannapatto yathā pārichatto;
snp1.3:30.3	Kāsāyavattho abhinikkhamitvā,
snp1.3:30.4	Eko care khaggavisāṇakappo”.
snp1.3:31.1	“Rasesu gedhaṁ akaraṁ alolo,
snp1.3:31.2	Anaññaposī sapadānacārī;
snp1.3:31.3	Kule kule appaṭibaddhacitto,
snp1.3:31.4	Eko care khaggavisāṇakappo”.
snp1.3:32.1	“Pahāya pañcāvaraṇāni cetaso,
snp1.3:32.2	Upakkilese byapanujja sabbe;
snp1.3:32.3	Anissito chetva sinehadosaṁ,
snp1.3:32.4	Eko care khaggavisāṇakappo”.
snp1.3:33.1	“Vipiṭṭhikatvāna sukhaṁ dukhañca,
snp1.3:33.2	Pubbeva ca somanassadomanassaṁ;
snp1.3:33.3	Laddhānupekkhaṁ samathaṁ visuddhaṁ,
snp1.3:33.4	Eko care khaggavisāṇakappo”.
snp1.3:34.1	“Āraddhaviriyo paramatthapattiyā,
snp1.3:34.2	Alīnacitto akusītavutti;
snp1.3:34.3	Daḷhanikkamo thāmabalūpapanno,
snp1.3:34.4	Eko care khaggavisāṇakappo”.
snp1.3:35.1	“Paṭisallānaṁ jhānamariñcamāno,
snp1.3:35.2	Dhammesu niccaṁ anudhammacārī;
snp1.3:35.3	Ādīnavaṁ sammasitā bhavesu,
snp1.3:35.4	Eko care khaggavisāṇakappo”.
snp1.3:36.1	“Taṇhakkhayaṁ patthayamappamatto,
snp1.3:36.2	Aneḷamūgo sutavā satīmā;
snp1.3:36.3	Saṅkhātadhammo niyato padhānavā,
snp1.3:36.4	Eko care khaggavisāṇakappo”.
snp1.3:37.1	“Sīhova saddesu asantasanto,
snp1.3:37.2	Vātova jālamhi asajjamāno;
snp1.3:37.3	Padumaṁva toyena alippamāno,
snp1.3:37.4	Eko care khaggavisāṇakappo”.
snp1.3:38.1	“Sīho yathā dāṭhabalī pasayha,
snp1.3:38.2	Rājā migānaṁ abhibhuyya cārī;
snp1.3:38.3	Sevetha pantāni senāsanāni,
snp1.3:38.4	Eko care khaggavisāṇakappo”.
snp1.3:39.1	“Mettaṁ upekkhaṁ karuṇaṁ vimuttiṁ,
snp1.3:39.2	Āsevamāno muditañca kāle;
snp1.3:39.3	Sabbena lokena avirujjhamāno,
snp1.3:39.4	Eko care khaggavisāṇakappo”.
snp1.3:40.1	“Rāgañca dosañca pahāya mohaṁ,
snp1.3:40.2	Sandālayitvāna saṁyojanāni;
snp1.3:40.3	Asantasaṁ jīvitasaṅkhayamhi,
snp1.3:40.4	Eko care khaggavisāṇakappo”.
snp1.3:41.1	“Bhajanti sevanti ca kāraṇatthā,
snp1.3:41.2	Nikkāraṇā dullabhā ajja mittā;
snp1.3:41.3	Attaṭṭhapaññā asucī manussā,
snp1.3:41.4	Eko care khaggavisāṇakappo”.
snp1.3:41.5	Khaggavisāṇasuttaṁ tatiyaṁ.
snp1.4:0.1	Sutta Nipāta 1.4
snp1.4:0.2	Kasibhāradvājasutta
snp1.4:1.1	Evaṁ me sutaṁ—
snp1.4:1.2	ekaṁ samayaṁ bhagavā magadhesu viharati dakkhiṇāgirismiṁ ekanāḷāyaṁ brāhmaṇagāme.
snp1.4:1.3	Tena kho pana samayena kasibhāradvājassa brāhmaṇassa pañcamattāni naṅgalasatāni payuttāni honti vappakāle.
snp1.4:1.4	Atha kho bhagavā pubbaṇhasamayaṁ nivāsetvā pattacīvaramādāya yena kasibhāradvājassa brāhmaṇassa kammanto tenupasaṅkami.
snp1.4:1.5	Tena kho pana samayena kasibhāradvājassa brāhmaṇassa parivesanā vattati.
snp1.4:1.6	Atha kho bhagavā yena parivesanā tenupasaṅkami; upasaṅkamitvā ekamantaṁ aṭṭhāsi.
snp1.4:2.1	Addasā kho kasibhāradvājo brāhmaṇo bhagavantaṁ piṇḍāya ṭhitaṁ.
snp1.4:2.2	Disvāna bhagavantaṁ etadavoca:
snp1.4:2.3	“ahaṁ kho, samaṇa, kasāmi ca vapāmi ca; kasitvā ca vapitvā ca bhuñjāmi.
snp1.4:2.4	Tvampi, samaṇa, kasassu ca vapassu ca; kasitvā ca vapitvā ca bhuñjassū”ti.
snp1.4:3.1	“Ahampi kho, brāhmaṇa, kasāmi ca vapāmi ca; kasitvā ca vapitvā ca bhuñjāmī”ti.
snp1.4:3.2	“Na kho pana mayaṁ passāma bhoto gotamassa yugaṁ vā naṅgalaṁ vā phālaṁ vā pācanaṁ vā balībadde vā.
snp1.4:3.3	Atha ca pana bhavaṁ gotamo evamāha:
snp1.4:3.4	‘ahampi kho, brāhmaṇa, kasāmi ca vapāmi ca; kasitvā ca vapitvā ca bhuñjāmī’”ti.
snp1.4:4.1	Atha kho kasibhāradvājo brāhmaṇo bhagavantaṁ gāthāya ajjhabhāsi:
snp1.4:5.1	“Kassako paṭijānāsi,
snp1.4:5.2	na ca passāma te kasiṁ;
snp1.4:5.3	Kasiṁ no pucchito brūhi,
snp1.4:5.4	yathā jānemu te kasiṁ”.
snp1.4:6.1	“Saddhā bījaṁ tapo vuṭṭhi,
snp1.4:6.2	paññā me yuganaṅgalaṁ;
snp1.4:6.3	Hirī īsā mano yottaṁ,
snp1.4:6.4	sati me phālapācanaṁ.
snp1.4:7.1	Kāyagutto vacīgutto,
snp1.4:7.2	āhāre udare yato;
snp1.4:7.3	Saccaṁ karomi niddānaṁ,
snp1.4:7.4	soraccaṁ me pamocanaṁ.
snp1.4:8.1	Vīriyaṁ me dhuradhorayhaṁ,
snp1.4:8.2	yogakkhemādhivāhanaṁ;
snp1.4:8.3	Gacchati anivattantaṁ,
snp1.4:8.4	yattha gantvā na socati.
snp1.4:9.1	Evamesā kasī kaṭṭhā,
snp1.4:9.2	Sā hoti amatapphalā;
snp1.4:9.3	Etaṁ kasiṁ kasitvāna,
snp1.4:9.4	Sabbadukkhā pamuccatī”ti.
snp1.4:10.1	Atha kho kasibhāradvājo brāhmaṇo mahatiyā kaṁsapātiyā pāyasaṁ vaḍḍhetvā bhagavato upanāmesi:
snp1.4:10.2	“bhuñjatu bhavaṁ gotamo pāyasaṁ.
snp1.4:10.3	Kassako bhavaṁ;
snp1.4:10.4	yañhi bhavaṁ gotamo amatapphalaṁ kasiṁ kasatī”ti.
snp1.4:11.1	“Gāthābhigītaṁ me abhojaneyyaṁ,
snp1.4:11.2	Sampassataṁ brāhmaṇa nesa dhammo;
snp1.4:11.3	Gāthābhigītaṁ panudanti buddhā,
snp1.4:11.4	Dhamme satī brāhmaṇa vuttiresā.
snp1.4:12.1	Aññena ca kevalinaṁ mahesiṁ,
snp1.4:12.2	Khīṇāsavaṁ kukkuccavūpasantaṁ;
snp1.4:12.3	Annena pānena upaṭṭhahassu,
snp1.4:12.4	Khettaṁ hi taṁ puññapekkhassa hotī”ti.
snp1.4:13.1	“Atha kassa cāhaṁ, bho gotama, imaṁ pāyasaṁ dammī”ti?
snp1.4:13.2	“Na khvāhaṁ taṁ, brāhmaṇa, passāmi sadevake loke samārake sabrahmake sassamaṇabrāhmaṇiyā pajāya sadevamanussāya, yassa so pāyaso bhutto sammā pariṇāmaṁ gaccheyya, aññatra tathāgatassa vā tathāgatasāvakassa vā.
snp1.4:13.3	Tena hi tvaṁ, brāhmaṇa, taṁ pāyasaṁ appaharite vā chaḍḍehi appāṇake vā udake opilāpehī”ti.
snp1.4:14.1	Atha kho kasibhāradvājo brāhmaṇo taṁ pāyasaṁ appāṇake udake opilāpesi.
snp1.4:14.2	Atha kho so pāyaso udake pakkhitto cicciṭāyati ciṭiciṭāyati sandhūpāyati sampadhūpāyati.
snp1.4:14.3	Seyyathāpi nāma phālo divasaṁ santatto udake pakkhitto cicciṭāyati ciṭiciṭāyati sandhūpāyati sampadhūpāyati;
snp1.4:14.4	evamevaṁ so pāyaso udake pakkhitto cicciṭāyati ciṭiciṭāyati sandhūpāyati sampadhūpāyati.
snp1.4:15.1	Atha kho kasibhāradvājo brāhmaṇo saṁviggo lomahaṭṭhajāto yena bhagavā tenupasaṅkami; upasaṅkamitvā bhagavato pādesu sirasā nipatitvā bhagavantaṁ etadavoca:
snp1.4:15.2	“abhikkantaṁ, bho gotama, abhikkantaṁ, bho gotama.
snp1.4:15.3	Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya, ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.
snp1.4:15.4	Esāhaṁ bhavantaṁ gotamaṁ saraṇaṁ gacchāmi dhammañca bhikkhusaṅghañca,
snp1.4:15.5	labheyyāhaṁ bhoto gotamassa santike pabbajjaṁ, labheyyaṁ upasampadan”ti.
snp1.4:16.1	Alattha kho kasibhāradvājo brāhmaṇo bhagavato santike pabbajjaṁ, alattha upasampadaṁ.
snp1.4:16.2	Acirūpasampanno kho panāyasmā bhāradvājo eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
snp1.4:16.3	“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
snp1.4:16.4	Aññataro ca panāyasmā bhāradvājo arahataṁ ahosīti.
snp1.4:16.5	Kasibhāradvājasuttaṁ catutthaṁ.
snp1.5:0.1	Sutta Nipāta 1.5
snp1.5:0.2	Cundasutta
snp1.5:1.1	“Pucchāmi muniṁ pahūtapaññaṁ,
snp1.5:1.2	(iti cundo kammāraputto)
snp1.5:1.3	Buddhaṁ dhammassāmiṁ vītataṇhaṁ;
snp1.5:1.4	Dvipaduttamaṁ sārathīnaṁ pavaraṁ,
snp1.5:1.5	Kati loke samaṇā tadiṅgha brūhi”.
snp1.5:2.1	“Caturo samaṇā na pañcamatthi,
snp1.5:2.2	(cundāti bhagavā)
snp1.5:2.3	Te te āvikaromi sakkhipuṭṭho;
snp1.5:2.4	Maggajino maggadesako ca,
snp1.5:2.5	Magge jīvati yo ca maggadūsī”.
snp1.5:3.1	“Kaṁ maggajinaṁ vadanti buddhā,
snp1.5:3.2	(iti cundo kammāraputto)
snp1.5:3.3	Maggakkhāyī kathaṁ atulyo hoti;
snp1.5:3.4	Magge jīvati me brūhi puṭṭho,
snp1.5:3.5	Atha me āvikarohi maggadūsiṁ”.
snp1.5:4.1	“Yo tiṇṇakathaṅkatho visallo,
snp1.5:4.2	Nibbānābhirato anānugiddho;
snp1.5:4.3	Lokassa sadevakassa netā,
snp1.5:4.4	Tādiṁ maggajinaṁ vadanti buddhā.
snp1.5:5.1	Paramaṁ paramanti yodha ñatvā,
snp1.5:5.2	Akkhāti vibhajate idheva dhammaṁ;
snp1.5:5.3	Taṁ kaṅkhachidaṁ muniṁ anejaṁ,
snp1.5:5.4	Dutiyaṁ bhikkhunamāhu maggadesiṁ.
snp1.5:6.1	Yo dhammapade sudesite,
snp1.5:6.2	Magge jīvati saññato satīmā;
snp1.5:6.3	Anavajjapadāni sevamāno,
snp1.5:6.4	Tatiyaṁ bhikkhunamāhu maggajīviṁ.
snp1.5:7.1	Chadanaṁ katvāna subbatānaṁ,
snp1.5:7.2	Pakkhandī kuladūsako pagabbho;
snp1.5:7.3	Māyāvī asaññato palāpo,
snp1.5:7.4	Patirūpena caraṁ sa maggadūsī.
snp1.5:8.1	Ete ca paṭivijjhi yo gahaṭṭho,
snp1.5:8.2	Sutavā ariyasāvako sapañño;
snp1.5:8.3	Sabbe netādisāti ñatvā,
snp1.5:8.4	Iti disvā na hāpeti tassa saddhā;
snp1.5:8.5	Kathaṁ hi duṭṭhena asampaduṭṭhaṁ,
snp1.5:8.6	Suddhaṁ asuddhena samaṁ kareyyā”ti.
snp1.5:8.7	Cundasuttaṁ pañcamaṁ.
snp1.6:0.1	Sutta Nipāta 1.6
snp1.6:0.2	Parābhavasutta
snp1.6:1.1	Evaṁ me sutaṁ—
snp1.6:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
snp1.6:1.3	Atha kho aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi.
snp1.6:1.4	Ekamantaṁ ṭhitā kho sā devatā bhagavantaṁ gāthāya ajjhabhāsi:
snp1.6:2.1	“Parābhavantaṁ purisaṁ,
snp1.6:2.2	mayaṁ pucchāma gotama;
snp1.6:2.3	Bhavantaṁ puṭṭhumāgamma,
snp1.6:2.4	kiṁ parābhavato mukhaṁ”.
snp1.6:3.1	“Suvijāno bhavaṁ hoti,
snp1.6:3.2	suvijāno parābhavo;
snp1.6:3.3	Dhammakāmo bhavaṁ hoti,
snp1.6:3.4	dhammadessī parābhavo”.
snp1.6:4.1	“Iti hetaṁ vijānāma,
snp1.6:4.2	paṭhamo so parābhavo;
snp1.6:4.3	Dutiyaṁ bhagavā brūhi,
snp1.6:4.4	kiṁ parābhavato mukhaṁ”.
snp1.6:5.1	“Asantassa piyā honti,
snp1.6:5.2	sante na kurute piyaṁ;
snp1.6:5.3	Asataṁ dhammaṁ roceti,
snp1.6:5.4	taṁ parābhavato mukhaṁ”.
snp1.6:6.1	“Iti hetaṁ vijānāma,
snp1.6:6.2	dutiyo so parābhavo;
snp1.6:6.3	Tatiyaṁ bhagavā brūhi,
snp1.6:6.4	kiṁ parābhavato mukhaṁ”.
snp1.6:7.1	“Niddāsīlī sabhāsīlī,
snp1.6:7.2	anuṭṭhātā ca yo naro;
snp1.6:7.3	Alaso kodhapaññāṇo,
snp1.6:7.4	taṁ parābhavato mukhaṁ”.
snp1.6:8.1	“Iti hetaṁ vijānāma,
snp1.6:8.2	tatiyo so parābhavo;
snp1.6:8.3	Catutthaṁ bhagavā brūhi,
snp1.6:8.4	kiṁ parābhavato mukhaṁ”.
snp1.6:9.1	“Yo mātaraṁ pitaraṁ vā,
snp1.6:9.2	jiṇṇakaṁ gatayobbanaṁ;
snp1.6:9.3	Pahu santo na bharati,
snp1.6:9.4	taṁ parābhavato mukhaṁ”.
snp1.6:10.1	“Iti hetaṁ vijānāma,
snp1.6:10.2	catuttho so parābhavo;
snp1.6:10.3	Pañcamaṁ bhagavā brūhi,
snp1.6:10.4	kiṁ parābhavato mukhaṁ”.
snp1.6:11.1	“Yo brāhmaṇaṁ samaṇaṁ vā,
snp1.6:11.2	Aññaṁ vāpi vanibbakaṁ;
snp1.6:11.3	Musāvādena vañceti,
snp1.6:11.4	Taṁ parābhavato mukhaṁ”.
snp1.6:12.1	“Iti hetaṁ vijānāma,
snp1.6:12.2	Pañcamo so parābhavo;
snp1.6:12.3	Chaṭṭhamaṁ bhagavā brūhi,
snp1.6:12.4	Kiṁ parābhavato mukhaṁ”.
snp1.6:13.1	“Pahūtavitto puriso,
snp1.6:13.2	Sahirañño sabhojano;
snp1.6:13.3	Eko bhuñjati sādūni,
snp1.6:13.4	Taṁ parābhavato mukhaṁ”.
snp1.6:14.1	“Iti hetaṁ vijānāma,
snp1.6:14.2	Chaṭṭhamo so parābhavo;
snp1.6:14.3	Sattamaṁ bhagavā brūhi,
snp1.6:14.4	Kiṁ parābhavato mukhaṁ”.
snp1.6:15.1	“Jātitthaddho dhanatthaddho,
snp1.6:15.2	Gottatthaddho ca yo naro;
snp1.6:15.3	Saññātiṁ atimaññeti,
snp1.6:15.4	Taṁ parābhavato mukhaṁ”.
snp1.6:16.1	“Iti hetaṁ vijānāma,
snp1.6:16.2	Sattamo so parābhavo;
snp1.6:16.3	Aṭṭhamaṁ bhagavā brūhi,
snp1.6:16.4	Kiṁ parābhavato mukhaṁ”.
snp1.6:17.1	“Itthidhutto surādhutto,
snp1.6:17.2	Akkhadhutto ca yo naro;
snp1.6:17.3	Laddhaṁ laddhaṁ vināseti,
snp1.6:17.4	Taṁ parābhavato mukhaṁ”.
snp1.6:18.1	“Iti hetaṁ vijānāma,
snp1.6:18.2	Aṭṭhamo so parābhavo;
snp1.6:18.3	Navamaṁ bhagavā brūhi,
snp1.6:18.4	Kiṁ parābhavato mukhaṁ”.
snp1.6:19.1	“Sehi dārehi asantuṭṭho,
snp1.6:19.2	Vesiyāsu padussati;
snp1.6:19.3	Dussati paradāresu,
snp1.6:19.4	Taṁ parābhavato mukhaṁ”.
snp1.6:20.1	“Iti hetaṁ vijānāma,
snp1.6:20.2	Navamo so parābhavo;
snp1.6:20.3	Dasamaṁ bhagavā brūhi,
snp1.6:20.4	Kiṁ parābhavato mukhaṁ”.
snp1.6:21.1	“Atītayobbano poso,
snp1.6:21.2	Āneti timbarutthaniṁ;
snp1.6:21.3	Tassā issā na supati,
snp1.6:21.4	Taṁ parābhavato mukhaṁ”.
snp1.6:22.1	“Iti hetaṁ vijānāma,
snp1.6:22.2	Dasamo so parābhavo;
snp1.6:22.3	Ekādasamaṁ bhagavā brūhi,
snp1.6:22.4	Kiṁ parābhavato mukhaṁ”.
snp1.6:23.1	“Itthiṁ soṇḍiṁ vikiraṇiṁ,
snp1.6:23.2	Purisaṁ vāpi tādisaṁ;
snp1.6:23.3	Issariyasmiṁ ṭhapeti,
snp1.6:23.4	Taṁ parābhavato mukhaṁ”.
snp1.6:24.1	“Iti hetaṁ vijānāma,
snp1.6:24.2	Ekādasamo so parābhavo;
snp1.6:24.3	Dvādasamaṁ bhagavā brūhi,
snp1.6:24.4	Kiṁ parābhavato mukhaṁ”.
snp1.6:25.1	“Appabhogo mahātaṇho,
snp1.6:25.2	Khattiye jāyate kule;
snp1.6:25.3	So ca rajjaṁ patthayati,
snp1.6:25.4	Taṁ parābhavato mukhaṁ.
snp1.6:26.1	Ete parābhave loke,
snp1.6:26.2	Paṇḍito samavekkhiya;
snp1.6:26.3	Ariyo dassanasampanno,
snp1.6:26.4	Sa lokaṁ bhajate sivan”ti.
snp1.6:26.5	Parābhavasuttaṁ chaṭṭhaṁ.
snp1.7:0.1	Sutta Nipāta 1.7
snp1.7:0.2	Vasalasutta
snp1.7:1.1	Evaṁ me sutaṁ—
snp1.7:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
snp1.7:1.3	Atha kho bhagavā pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi.
snp1.7:1.4	Tena kho pana samayena aggikabhāradvājassa brāhmaṇassa nivesane aggi pajjalito hoti āhuti paggahitā.
snp1.7:1.5	Atha kho bhagavā sāvatthiyaṁ sapadānaṁ piṇḍāya caramāno yena aggikabhāradvājassa brāhmaṇassa nivesanaṁ tenupasaṅkami.
snp1.7:2.1	Addasā kho aggikabhāradvājo brāhmaṇo bhagavantaṁ dūratova āgacchantaṁ.
snp1.7:2.2	Disvāna bhagavantaṁ etadavoca:
snp1.7:2.3	“tatreva, muṇḍaka;
snp1.7:2.4	tatreva, samaṇaka;
snp1.7:2.5	tatreva, vasalaka, tiṭṭhāhī”ti.
snp1.7:3.1	Evaṁ vutte, bhagavā aggikabhāradvājaṁ brāhmaṇaṁ etadavoca:
snp1.7:3.2	“jānāsi pana tvaṁ, brāhmaṇa, vasalaṁ vā vasalakaraṇe vā dhamme”ti?
snp1.7:3.3	“Na khvāhaṁ, bho gotama, jānāmi vasalaṁ vā vasalakaraṇe vā dhamme;
snp1.7:3.4	sādhu me bhavaṁ gotamo tathā dhammaṁ desetu, yathāhaṁ jāneyyaṁ vasalaṁ vā vasalakaraṇe vā dhamme”ti.
snp1.7:3.5	“Tena hi, brāhmaṇa, suṇāhi, sādhukaṁ manasi karohi; bhāsissāmī”ti.
snp1.7:3.6	“Evaṁ, bho”ti kho aggikabhāradvājo brāhmaṇo bhagavato paccassosi.
snp1.7:3.7	Bhagavā etadavoca:
snp1.7:4.1	“Kodhano upanāhī ca,
snp1.7:4.2	pāpamakkhī ca yo naro;
snp1.7:4.3	Vipannadiṭṭhi māyāvī,
snp1.7:4.4	taṁ jaññā vasalo iti.
snp1.7:5.1	Ekajaṁ vā dvijaṁ vāpi,
snp1.7:5.2	yodha pāṇaṁ vihiṁsati;
snp1.7:5.3	Yassa pāṇe dayā natthi,
snp1.7:5.4	taṁ jaññā vasalo iti.
snp1.7:6.1	Yo hanti parirundhati,
snp1.7:6.2	gāmāni nigamāni ca;
snp1.7:6.3	Niggāhako samaññāto,
snp1.7:6.4	taṁ jaññā vasalo iti.
snp1.7:7.1	Gāme vā yadi vā raññe,
snp1.7:7.2	yaṁ paresaṁ mamāyitaṁ;
snp1.7:7.3	Theyyā adinnamādeti,
snp1.7:7.4	taṁ jaññā vasalo iti.
snp1.7:8.1	Yo have iṇamādāya,
snp1.7:8.2	cujjamāno palāyati;
snp1.7:8.3	Na hi te iṇamatthīti,
snp1.7:8.4	taṁ jaññā vasalo iti.
snp1.7:9.1	Yo ve kiñcikkhakamyatā,
snp1.7:9.2	panthasmiṁ vajantaṁ janaṁ;
snp1.7:9.3	Hantvā kiñcikkhamādeti,
snp1.7:9.4	taṁ jaññā vasalo iti.
snp1.7:10.1	Attahetu parahetu,
snp1.7:10.2	dhanahetu ca yo naro;
snp1.7:10.3	Sakkhipuṭṭho musā brūti,
snp1.7:10.4	taṁ jaññā vasalo iti.
snp1.7:11.1	Yo ñātīnaṁ sakhīnaṁ vā,
snp1.7:11.2	dāresu paṭidissati;
snp1.7:11.3	Sāhasā sampiyena vā,
snp1.7:11.4	taṁ jaññā vasalo iti.
snp1.7:12.1	Yo mātaraṁ pitaraṁ vā,
snp1.7:12.2	jiṇṇakaṁ gatayobbanaṁ;
snp1.7:12.3	Pahu santo na bharati,
snp1.7:12.4	taṁ jaññā vasalo iti.
snp1.7:13.1	Yo mātaraṁ pitaraṁ vā,
snp1.7:13.2	Bhātaraṁ bhaginiṁ sasuṁ;
snp1.7:13.3	Hanti roseti vācāya,
snp1.7:13.4	Taṁ jaññā vasalo iti.
snp1.7:14.1	Yo atthaṁ pucchito santo,
snp1.7:14.2	Anatthamanusāsati;
snp1.7:14.3	Paṭicchannena manteti,
snp1.7:14.4	Taṁ jaññā vasalo iti.
snp1.7:15.1	Yo katvā pāpakaṁ kammaṁ,
snp1.7:15.2	Mā maṁ jaññāti icchati;
snp1.7:15.3	Yo paṭicchannakammanto,
snp1.7:15.4	Taṁ jaññā vasalo iti.
snp1.7:16.1	Yo ve parakulaṁ gantvā,
snp1.7:16.2	Bhutvāna sucibhojanaṁ;
snp1.7:16.3	Āgataṁ nappaṭipūjeti,
snp1.7:16.4	Taṁ jaññā vasalo iti.
snp1.7:17.1	Yo brāhmaṇaṁ samaṇaṁ vā,
snp1.7:17.2	Aññaṁ vāpi vanibbakaṁ;
snp1.7:17.3	Musāvādena vañceti,
snp1.7:17.4	Taṁ jaññā vasalo iti.
snp1.7:18.1	Yo brāhmaṇaṁ samaṇaṁ vā,
snp1.7:18.2	Bhattakāle upaṭṭhite;
snp1.7:18.3	Roseti vācā na ca deti,
snp1.7:18.4	Taṁ jaññā vasalo iti.
snp1.7:19.1	Asataṁ yodha pabrūti,
snp1.7:19.2	Mohena paliguṇṭhito;
snp1.7:19.3	Kiñcikkhaṁ nijigīsāno,
snp1.7:19.4	Taṁ jaññā vasalo iti.
snp1.7:20.1	Yo cattānaṁ samukkaṁse,
snp1.7:20.2	Pare ca mavajānāti;
snp1.7:20.3	Nihīno sena mānena,
snp1.7:20.4	Taṁ jaññā vasalo iti.
snp1.7:21.1	Rosako kadariyo ca,
snp1.7:21.2	Pāpiccho maccharī saṭho;
snp1.7:21.3	Ahiriko anottappī,
snp1.7:21.4	Taṁ jaññā vasalo iti.
snp1.7:22.1	Yo buddhaṁ paribhāsati,
snp1.7:22.2	Atha vā tassa sāvakaṁ;
snp1.7:22.3	Paribbājaṁ gahaṭṭhaṁ vā,
snp1.7:22.4	Taṁ jaññā vasalo iti.
snp1.7:23.1	Yo ve anarahaṁ santo,
snp1.7:23.2	Arahaṁ paṭijānāti;
snp1.7:23.3	Coro sabrahmake loke,
snp1.7:23.4	Eso kho vasalādhamo;
snp1.7:23.5	Ete kho vasalā vuttā,
snp1.7:23.6	Mayā yete pakāsitā.
snp1.7:24.1	Na jaccā vasalo hoti,
snp1.7:24.2	Na jaccā hoti brāhmaṇo;
snp1.7:24.3	Kammunā vasalo hoti,
snp1.7:24.4	Kammunā hoti brāhmaṇo.
snp1.7:25.1	Tadamināpi jānātha,
snp1.7:25.2	Yathāmedaṁ nidassanaṁ;
snp1.7:25.3	Caṇḍālaputto sopāko,
snp1.7:25.4	Mātaṅgo iti vissuto.
snp1.7:26.1	So yasaṁ paramaṁ patto,
snp1.7:26.2	Mātaṅgo yaṁ sudullabhaṁ;
snp1.7:26.3	Āgacchuṁ tassupaṭṭhānaṁ,
snp1.7:26.4	Khattiyā brāhmaṇā bahū.
snp1.7:27.1	Devayānaṁ abhiruyha,
snp1.7:27.2	Virajaṁ so mahāpathaṁ;
snp1.7:27.3	Kāmarāgaṁ virājetvā,
snp1.7:27.4	Brahmalokūpago ahu;
snp1.7:27.5	Na naṁ jāti nivāresi,
snp1.7:27.6	Brahmalokūpapattiyā.
snp1.7:28.1	Ajjhāyakakule jātā,
snp1.7:28.2	Brāhmaṇā mantabandhavā;
snp1.7:28.3	Te ca pāpesu kammesu,
snp1.7:28.4	Abhiṇhamupadissare.
snp1.7:29.1	Diṭṭheva dhamme gārayhā,
snp1.7:29.2	Samparāye ca duggati;
snp1.7:29.3	Na ne jāti nivāreti,
snp1.7:29.4	Duggatyā garahāya vā.
snp1.7:30.1	Na jaccā vasalo hoti,
snp1.7:30.2	Na jaccā hoti brāhmaṇo;
snp1.7:30.3	Kammunā vasalo hoti,
snp1.7:30.4	Kammunā hoti brāhmaṇo”ti.
snp1.7:31.1	Evaṁ vutte, aggikabhāradvājo brāhmaṇo bhagavantaṁ etadavoca:
snp1.7:31.2	“abhikkantaṁ, bho gotama …pe…
snp1.7:31.3	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
snp1.7:31.4	Vasalasuttaṁ sattamaṁ.
snp1.8:0.1	Sutta Nipāta 1.8
snp1.8:0.2	Mettasutta
snp1.8:1.1	“Karaṇīyamatthakusalena,
snp1.8:1.2	Yanta santaṁ padaṁ abhisamecca;
snp1.8:1.3	Sakko ujū ca suhujū ca,
snp1.8:1.4	Sūvaco cassa mudu anatimānī.
snp1.8:2.1	Santussako ca subharo ca,
snp1.8:2.2	Appakicco ca sallahukavutti;
snp1.8:2.3	Santindriyo ca nipako ca,
snp1.8:2.4	Appagabbho kulesvananugiddho.
snp1.8:3.1	Na ca khuddamācare kiñci,
snp1.8:3.2	Yena viññū pare upavadeyyuṁ;
snp1.8:3.3	Sukhino va khemino hontu,
snp1.8:3.4	Sabbasattā bhavantu sukhitattā.
snp1.8:4.1	Ye keci pāṇabhūtatthi,
snp1.8:4.2	Tasā vā thāvarā vanavasesā;
snp1.8:4.3	Dīghā vā ye va mahantā,
snp1.8:4.4	Majjhimā rassakā aṇukathūlā.
snp1.8:5.1	Diṭṭhā vā ye va adiṭṭhā,
snp1.8:5.2	Ye va dūre vasanti avidūre;
snp1.8:5.3	Bhūtā va sambhavesī va,
snp1.8:5.4	Sabbasattā bhavantu sukhitattā.
snp1.8:6.1	Na paro paraṁ nikubbetha,
snp1.8:6.2	Nātimaññetha katthaci na kañci;
snp1.8:6.3	Byārosanā paṭighasañña,
snp1.8:6.4	Nāññamaññassa dukkhamiccheyya.
snp1.8:7.1	Mātā yathā niyaṁ puttam
snp1.8:7.2	Āyusā ekaputtamanurakkhe;
snp1.8:7.3	Evampi sabbabhūtesu,
snp1.8:7.4	Mānasaṁ bhāvaye aparimāṇaṁ.
snp1.8:8.1	Mettañca sabbalokasmi,
snp1.8:8.2	Mānasaṁ bhāvaye aparimāṇaṁ;
snp1.8:8.3	Uddhaṁ adho ca tiriyañca,
snp1.8:8.4	Asambādhaṁ averamasapattaṁ.
snp1.8:9.1	Tiṭṭhaṁ caraṁ nisinno va,
snp1.8:9.2	Sayāno yāvatāssa vitamiddho;
snp1.8:9.3	Etaṁ satiṁ adhiṭṭheyya,
snp1.8:9.4	Brahmametaṁ vihāramidhamāhu.
snp1.8:10.1	Diṭṭhiñca anupaggamma,
snp1.8:10.2	Sīlavā dassanena sampanno;
snp1.8:10.3	Kāmesu vinaya gedhaṁ,
snp1.8:10.4	Na hi jātuggabbhaseyya punaretī”ti.
snp1.8:10.5	Mettasuttaṁ aṭṭhamaṁ.
snp1.9:0.1	Sutta Nipāta 1.9
snp1.9:0.2	Hemavatasutta
snp1.9:1.1	“Ajja pannaraso uposatho,
snp1.9:1.2	(iti sātāgiro yakkho)
snp1.9:1.3	Dibbā ratti upaṭṭhitā;
snp1.9:1.4	Anomanāmaṁ satthāraṁ,
snp1.9:1.5	Handa passāma gotamaṁ”.
snp1.9:2.1	“Kacci mano supaṇihito,
snp1.9:2.2	(iti hemavato yakkho)
snp1.9:2.3	Sabbabhūtesu tādino;
snp1.9:2.4	Kacci iṭṭhe aniṭṭhe ca,
snp1.9:2.5	Saṅkappassa vasīkatā”.
snp1.9:3.1	“Mano cassa supaṇihito,
snp1.9:3.2	(iti sātāgiro yakkho)
snp1.9:3.3	Sabbabhūtesu tādino;
snp1.9:3.4	Atho iṭṭhe aniṭṭhe ca,
snp1.9:3.5	Saṅkappassa vasīkatā”.
snp1.9:4.1	“Kacci adinnaṁ nādiyati,
snp1.9:4.2	(iti hemavato yakkho)
snp1.9:4.3	Kacci pāṇesu saññato;
snp1.9:4.4	Kacci ārā pamādamhā,
snp1.9:4.5	Kacci jhānaṁ na riñcati”.
snp1.9:5.1	“Na so adinnaṁ ādiyati,
snp1.9:5.2	(iti sātāgiro yakkho)
snp1.9:5.3	Atho pāṇesu saññato;
snp1.9:5.4	Atho ārā pamādamhā,
snp1.9:5.5	Buddho jhānaṁ na riñcati”.
snp1.9:6.1	“Kacci musā na bhaṇati,
snp1.9:6.2	(iti hemavato yakkho)
snp1.9:6.3	Kacci na khīṇabyappatho;
snp1.9:6.4	Kacci vebhūtiyaṁ nāha,
snp1.9:6.5	Kacci samphaṁ na bhāsati”.
snp1.9:7.1	“Musā ca so na bhaṇati,
snp1.9:7.2	(iti sātāgiro yakkho)
snp1.9:7.3	Atho na khīṇabyappatho;
snp1.9:7.4	Atho vebhūtiyaṁ nāha,
snp1.9:7.5	Mantā atthañca bhāsati”.
snp1.9:8.1	“Kacci na rajjati kāmesu,
snp1.9:8.2	(iti hemavato yakkho)
snp1.9:8.3	Kacci cittaṁ anāvilaṁ;
snp1.9:8.4	Kacci mohaṁ atikkanto,
snp1.9:8.5	Kacci dhammesu cakkhumā”.
snp1.9:9.1	“Na so rajjati kāmesu,
snp1.9:9.2	(iti sātāgiro yakkho)
snp1.9:9.3	Atho cittaṁ anāvilaṁ;
snp1.9:9.4	Sabbamohaṁ atikkanto,
snp1.9:9.5	Buddho dhammesu cakkhumā”.
snp1.9:10.1	“Kacci vijjāya sampanno,
snp1.9:10.2	(iti hemavato yakkho)
snp1.9:10.3	Kacci saṁsuddhacāraṇo;
snp1.9:10.4	Kaccissa āsavā khīṇā,
snp1.9:10.5	Kacci natthi punabbhavo”.
snp1.9:11.1	“Vijjāya ceva sampanno,
snp1.9:11.2	(iti sātāgiro yakkho)
snp1.9:11.3	Atho saṁsuddhacāraṇo;
snp1.9:11.4	Sabbassa āsavā khīṇā,
snp1.9:11.5	Natthi tassa punabbhavo”.
snp1.9:12.1	“Sampannaṁ munino cittaṁ,
snp1.9:12.2	Kammunā byappathena ca;
snp1.9:12.3	Vijjācaraṇasampannaṁ,
snp1.9:12.4	Dhammato naṁ pasaṁsati”.
snp1.9:13.1	“Sampannaṁ munino cittaṁ,
snp1.9:13.2	Kammunā byappathena ca;
snp1.9:13.3	Vijjācaraṇasampannaṁ,
snp1.9:13.4	Dhammato anumodasi.
snp1.9:14.1	Sampannaṁ munino cittaṁ,
snp1.9:14.2	Kammunā byappathena ca;
snp1.9:14.3	Vijjācaraṇasampannaṁ,
snp1.9:14.4	Handa passāma gotamaṁ”.
snp1.9:15.1	“Eṇijaṅghaṁ kisaṁ vīraṁ,
snp1.9:15.2	Appāhāraṁ alolupaṁ;
snp1.9:15.3	Muniṁ vanasmiṁ jhāyantaṁ,
snp1.9:15.4	Ehi passāma gotamaṁ.
snp1.9:16.1	Sīhaṁvekacaraṁ nāgaṁ,
snp1.9:16.2	Kāmesu anapekkhinaṁ;
snp1.9:16.3	Upasaṅkamma pucchāma,
snp1.9:16.4	Maccupāsappamocanaṁ.
snp1.9:17.1	Akkhātāraṁ pavattāraṁ,
snp1.9:17.2	Sabbadhammāna pāraguṁ;
snp1.9:17.3	Buddhaṁ verabhayātītaṁ,
snp1.9:17.4	Mayaṁ pucchāma gotamaṁ”.
snp1.9:18.1	“Kismiṁ loko samuppanno,
snp1.9:18.2	(iti hemavato yakkho)
snp1.9:18.3	Kismiṁ kubbati santhavaṁ;
snp1.9:18.4	Kissa loko upādāya,
snp1.9:18.5	Kismiṁ loko vihaññati”.
snp1.9:19.1	“Chasu loko samuppanno,
snp1.9:19.2	(hemavatāti bhagavā)
snp1.9:19.3	Chasu kubbati santhavaṁ;
snp1.9:19.4	Channameva upādāya,
snp1.9:19.5	Chasu loko vihaññati”.
snp1.9:20.1	“Katamaṁ taṁ upādānaṁ,
snp1.9:20.2	Yattha loko vihaññati;
snp1.9:20.3	Niyyānaṁ pucchito brūhi,
snp1.9:20.4	Kathaṁ dukkhā pamuccati”.
snp1.9:21.1	“Pañca kāmaguṇā loke,
snp1.9:21.2	Manochaṭṭhā paveditā;
snp1.9:21.3	Ettha chandaṁ virājetvā,
snp1.9:21.4	Evaṁ dukkhā pamuccati.
snp1.9:22.1	Etaṁ lokassa niyyānaṁ,
snp1.9:22.2	Akkhātaṁ vo yathātathaṁ;
snp1.9:22.3	Etaṁ vo ahamakkhāmi,
snp1.9:22.4	Evaṁ dukkhā pamuccati”.
snp1.9:23.1	“Ko sūdha tarati oghaṁ,
snp1.9:23.2	Kodha tarati aṇṇavaṁ;
snp1.9:23.3	Appatiṭṭhe anālambe,
snp1.9:23.4	Ko gambhīre na sīdati”.
snp1.9:24.1	“Sabbadā sīlasampanno,
snp1.9:24.2	Paññavā susamāhito;
snp1.9:24.3	Ajjhattacintī satimā,
snp1.9:24.4	Oghaṁ tarati duttaraṁ.
snp1.9:25.1	Virato kāmasaññāya,
snp1.9:25.2	Sabbasaṁyojanātigo;
snp1.9:25.3	Nandībhavaparikkhīṇo,
snp1.9:25.4	So gambhīre na sīdati”.
snp1.9:26.1	“Gambhīrapaññaṁ nipuṇatthadassiṁ,
snp1.9:26.2	Akiñcanaṁ kāmabhave asattaṁ;
snp1.9:26.3	Taṁ passatha sabbadhi vippamuttaṁ,
snp1.9:26.4	Dibbe pathe kamamānaṁ mahesiṁ.
snp1.9:27.1	Anomanāmaṁ nipuṇatthadassiṁ,
snp1.9:27.2	Paññādadaṁ kāmālaye asattaṁ;
snp1.9:27.3	Taṁ passatha sabbaviduṁ sumedhaṁ,
snp1.9:27.4	Ariye pathe kamamānaṁ mahesiṁ.
snp1.9:28.1	Sudiṭṭhaṁ vata no ajja,
snp1.9:28.2	Suppabhātaṁ suhuṭṭhitaṁ;
snp1.9:28.3	Yaṁ addasāma sambuddhaṁ,
snp1.9:28.4	Oghatiṇṇamanāsavaṁ.
snp1.9:29.1	Ime dasasatā yakkhā,
snp1.9:29.2	Iddhimanto yasassino;
snp1.9:29.3	Sabbe taṁ saraṇaṁ yanti,
snp1.9:29.4	Tvaṁ no satthā anuttaro.
snp1.9:30.1	Te mayaṁ vicarissāma,
snp1.9:30.2	Gāmā gāmaṁ nagā nagaṁ;
snp1.9:30.3	Namassamānā sambuddhaṁ,
snp1.9:30.4	Dhammassa ca sudhammatan”ti.
snp1.9:30.5	Hemavatasuttaṁ navamaṁ.
snp1.10:0.1	Sutta Nipāta 1.10
snp1.10:0.2	Āḷavakasutta
snp1.10:1.1	Evaṁ me sutaṁ—
snp1.10:1.2	ekaṁ samayaṁ bhagavā āḷaviyaṁ viharati āḷavakassa yakkhassa bhavane.
snp1.10:1.3	Atha kho āḷavako yakkho yena bhagavā tenupasaṅkami; upasaṅkamitvā bhagavantaṁ etadavoca:
snp1.10:1.4	“nikkhama, samaṇā”ti.
snp1.10:1.5	“Sādhāvuso”ti bhagavā nikkhami.
snp1.10:1.6	“Pavisa, samaṇā”ti.
snp1.10:1.7	“Sādhāvuso”ti bhagavā pāvisi.
snp1.10:2.1	Dutiyampi kho …pe…
snp1.10:2.2	tatiyampi kho āḷavako yakkho bhagavantaṁ etadavoca:
snp1.10:2.3	“nikkhama, samaṇā”ti.
snp1.10:2.4	“Sādhāvuso”ti bhagavā nikkhami.
snp1.10:2.5	“Pavisa, samaṇā”ti.
snp1.10:2.6	“Sādhāvuso”ti bhagavā pāvisi.
snp1.10:3.1	Catutthampi kho āḷavako yakkho bhagavantaṁ etadavoca:
snp1.10:3.2	“nikkhama, samaṇā”ti.
snp1.10:3.3	“Na khvāhaṁ taṁ, āvuso, nikkhamissāmi.
snp1.10:3.4	Yaṁ te karaṇīyaṁ, taṁ karohī”ti.
snp1.10:4.1	“Pañhaṁ taṁ, samaṇa, pucchissāmi.
snp1.10:4.2	Sace me na byākarissasi, cittaṁ vā te khipissāmi, hadayaṁ vā te phālessāmi, pādesu vā gahetvā pāragaṅgāya khipissāmī”ti.
snp1.10:5.1	“Na khvāhaṁ taṁ, āvuso, passāmi sadevake loke samārake sabrahmake sassamaṇabrāhmaṇiyā pajāya sadevamanussāya yo me cittaṁ vā khipeyya hadayaṁ vā phāleyya pādesu vā gahetvā pāragaṅgāya khipeyya.
snp1.10:5.2	Api ca tvaṁ, āvuso, puccha yadākaṅkhasī”ti.
snp1.10:5.3	Atha kho āḷavako yakkho bhagavantaṁ gāthāya ajjhabhāsi:
snp1.10:6.1	“Kiṁ sūdha vittaṁ purisassa seṭṭhaṁ,
snp1.10:6.2	Kiṁ su suciṇṇaṁ sukhamāvahāti;
snp1.10:6.3	Kiṁ su have sādutaraṁ rasānaṁ,
snp1.10:6.4	Kathaṁjīviṁ jīvitamāhu seṭṭhaṁ”.
snp1.10:7.1	“Saddhīdha vittaṁ purisassa seṭṭhaṁ,
snp1.10:7.2	Dhammo suciṇṇo sukhamāvahāti;
snp1.10:7.3	Saccaṁ have sādutaraṁ rasānaṁ,
snp1.10:7.4	Paññājīviṁ jīvitamāhu seṭṭhaṁ”.
snp1.10:8.1	“Kathaṁ su tarati oghaṁ,
snp1.10:8.2	kathaṁ su tarati aṇṇavaṁ;
snp1.10:8.3	Kathaṁ su dukkhamacceti,
snp1.10:8.4	kathaṁ su parisujjhati”.
snp1.10:9.1	“Saddhāya tarati oghaṁ,
snp1.10:9.2	appamādena aṇṇavaṁ;
snp1.10:9.3	Vīriyena dukkhamacceti,
snp1.10:9.4	paññāya parisujjhati”.
snp1.10:10.1	“Kathaṁ su labhate paññaṁ,
snp1.10:10.2	kathaṁ su vindate dhanaṁ;
snp1.10:10.3	Kathaṁ su kittiṁ pappoti,
snp1.10:10.4	kathaṁ mittāni ganthati;
snp1.10:10.5	Asmā lokā paraṁ lokaṁ,
snp1.10:10.6	kathaṁ pecca na socati”.
snp1.10:11.1	“Saddahāno arahataṁ,
snp1.10:11.2	dhammaṁ nibbānapattiyā;
snp1.10:11.3	Sussūsaṁ labhate paññaṁ,
snp1.10:11.4	appamatto vicakkhaṇo.
snp1.10:12.1	Patirūpakārī dhuravā,
snp1.10:12.2	uṭṭhātā vindate dhanaṁ;
snp1.10:12.3	Saccena kittiṁ pappoti,
snp1.10:12.4	dadaṁ mittāni ganthati.
snp1.10:13.1	Yassete caturo dhammā,
snp1.10:13.2	saddhassa gharamesino;
snp1.10:13.3	Saccaṁ dhammo dhiti cāgo,
snp1.10:13.4	sa ve pecca na socati.
snp1.10:14.1	Iṅgha aññepi pucchassu,
snp1.10:14.2	puthū samaṇabrāhmaṇe;
snp1.10:14.3	Yadi saccā damā cāgā,
snp1.10:14.4	khantyā bhiyyodha vijjati”.
snp1.10:15.1	“Kathaṁ nu dāni puccheyyaṁ,
snp1.10:15.2	Puthū samaṇabrāhmaṇe;
snp1.10:15.3	Yohaṁ ajja pajānāmi,
snp1.10:15.4	Yo attho samparāyiko.
snp1.10:16.1	Atthāya vata me buddho,
snp1.10:16.2	Vāsāyāḷavimāgamā;
snp1.10:16.3	Yohaṁ ajja pajānāmi,
snp1.10:16.4	Yattha dinnaṁ mahapphalaṁ.
snp1.10:17.1	So ahaṁ vicarissāmi,
snp1.10:17.2	Gāmā gāmaṁ purā puraṁ;
snp1.10:17.3	Namassamāno sambuddhaṁ,
snp1.10:17.4	Dhammassa ca sudhammatan”ti.
snp1.10:17.5	Āḷavakasuttaṁ dasamaṁ.
snp1.11:0.1	Sutta Nipāta 1.11
snp1.11:0.2	Vijayasutta
snp1.11:1.1	Caraṁ vā yadi vā tiṭṭhaṁ,
snp1.11:1.2	nisinno uda vā sayaṁ;
snp1.11:1.3	Samiñjeti pasāreti,
snp1.11:1.4	esā kāyassa iñjanā.
snp1.11:2.1	Aṭṭhinahārusaṁyutto,
snp1.11:2.2	tacamaṁsāvalepano;
snp1.11:2.3	Chaviyā kāyo paṭicchanno,
snp1.11:2.4	yathābhūtaṁ na dissati.
snp1.11:3.1	Antapūro udarapūro,
snp1.11:3.2	yakanapeḷassa vatthino;
snp1.11:3.3	Hadayassa papphāsassa,
snp1.11:3.4	vakkassa pihakassa ca.
snp1.11:4.1	Siṅghāṇikāya kheḷassa,
snp1.11:4.2	sedassa ca medassa ca;
snp1.11:4.3	Lohitassa lasikāya,
snp1.11:4.4	pittassa ca vasāya ca.
snp1.11:5.1	Athassa navahi sotehi,
snp1.11:5.2	asucī savati sabbadā;
snp1.11:5.3	Akkhimhā akkhigūthako,
snp1.11:5.4	kaṇṇamhā kaṇṇagūthako.
snp1.11:6.1	Siṅghāṇikā ca nāsato,
snp1.11:6.2	mukhena vamatekadā;
snp1.11:6.3	Pittaṁ semhañca vamati,
snp1.11:6.4	kāyamhā sedajallikā.
snp1.11:7.1	Athassa susiraṁ sīsaṁ,
snp1.11:7.2	matthaluṅgassa pūritaṁ;
snp1.11:7.3	Subhato naṁ maññati bālo,
snp1.11:7.4	avijjāya purakkhato.
snp1.11:8.1	Yadā ca so mato seti,
snp1.11:8.2	Uddhumāto vinīlako;
snp1.11:8.3	Apaviddho susānasmiṁ,
snp1.11:8.4	Anapekkhā honti ñātayo.
snp1.11:9.1	Khādanti naṁ suvānā ca,
snp1.11:9.2	siṅgālā ca vakā kimī;
snp1.11:9.3	Kākā gijjhā ca khādanti,
snp1.11:9.4	ye caññe santi pāṇino.
snp1.11:10.1	Sutvāna buddhavacanaṁ,
snp1.11:10.2	Bhikkhu paññāṇavā idha;
snp1.11:10.3	So kho naṁ parijānāti,
snp1.11:10.4	Yathābhūtañhi passati.
snp1.11:11.1	Yathā idaṁ tathā etaṁ,
snp1.11:11.2	Yathā etaṁ tathā idaṁ;
snp1.11:11.3	Ajjhattañca bahiddhā ca,
snp1.11:11.4	Kāye chandaṁ virājaye.
snp1.11:12.1	Chandarāgaviratto so,
snp1.11:12.2	Bhikkhu paññāṇavā idha;
snp1.11:12.3	Ajjhagā amataṁ santiṁ,
snp1.11:12.4	Nibbānaṁ padamaccutaṁ.
snp1.11:13.1	Dvipādakoyaṁ asuci,
snp1.11:13.2	Duggandho parihīrati;
snp1.11:13.3	Nānākuṇapaparipūro,
snp1.11:13.4	Vissavanto tato tato.
snp1.11:14.1	Etādisena kāyena,
snp1.11:14.2	Yo maññe uṇṇametave;
snp1.11:14.3	Paraṁ vā avajāneyya,
snp1.11:14.4	Kimaññatra adassanāti.
snp1.11:14.5	Vijayasuttaṁ ekādasamaṁ.
snp1.12:0.1	Sutta Nipāta 1.12
snp1.12:0.2	Munisutta
snp1.12:1.1	Santhavāto bhayaṁ jātaṁ,
snp1.12:1.2	niketā jāyate rajo;
snp1.12:1.3	Aniketamasanthavaṁ,
snp1.12:1.4	etaṁ ve munidassanaṁ.
snp1.12:2.1	Yo jātamucchijja na ropayeyya,
snp1.12:2.2	Jāyantamassa nānuppavecche;
snp1.12:2.3	Tamāhu ekaṁ muninaṁ carantaṁ,
snp1.12:2.4	Addakkhi so santipadaṁ mahesi.
snp1.12:3.1	Saṅkhāya vatthūni pamāya bījaṁ,
snp1.12:3.2	Sinehamassa nānuppavecche;
snp1.12:3.3	Sa ve munī jātikhayantadassī,
snp1.12:3.4	Takkaṁ pahāya na upeti saṅkhaṁ.
snp1.12:4.1	Aññāya sabbāni nivesanāni,
snp1.12:4.2	Anikāmayaṁ aññatarampi tesaṁ;
snp1.12:4.3	Sa ve munī vītagedho agiddho,
snp1.12:4.4	Nāyūhatī pāragato hi hoti.
snp1.12:5.1	Sabbābhibhuṁ sabbaviduṁ sumedhaṁ,
snp1.12:5.2	Sabbesu dhammesu anūpalittaṁ;
snp1.12:5.3	Sabbañjahaṁ taṇhakkhaye vimuttaṁ,
snp1.12:5.4	Taṁ vāpi dhīrā muni vedayanti.
snp1.12:6.1	Paññābalaṁ sīlavatūpapannaṁ,
snp1.12:6.2	Samāhitaṁ jhānarataṁ satīmaṁ;
snp1.12:6.3	Saṅgā pamuttaṁ akhilaṁ anāsavaṁ,
snp1.12:6.4	Taṁ vāpi dhīrā muni vedayanti.
snp1.12:7.1	Ekaṁ carantaṁ munimappamattaṁ,
snp1.12:7.2	Nindāpasaṁsāsu avedhamānaṁ;
snp1.12:7.3	Sīhaṁva saddesu asantasantaṁ,
snp1.12:7.4	Vātaṁva jālamhi asajjamānaṁ;
snp1.12:7.5	Padmaṁva toyena alippamānaṁ,
snp1.12:7.6	Netāramaññesamanaññaneyyaṁ;
snp1.12:7.7	Taṁ vāpi dhīrā muni vedayanti.
snp1.12:8.1	Yo ogahaṇe thambhorivābhijāyati,
snp1.12:8.2	Yasmiṁ pare vācāpariyantaṁ vadanti;
snp1.12:8.3	Taṁ vītarāgaṁ susamāhitindriyaṁ,
snp1.12:8.4	Taṁ vāpi dhīrā muni vedayanti.
snp1.12:9.1	Yo ve ṭhitatto tasaraṁva ujju,
snp1.12:9.2	Jigucchati kammehi pāpakehi;
snp1.12:9.3	Vīmaṁsamāno visamaṁ samañca,
snp1.12:9.4	Taṁ vāpi dhīrā muni vedayanti.
snp1.12:10.1	Yo saññatatto na karoti pāpaṁ,
snp1.12:10.2	Daharo majjhimo ca muni yatatto;
snp1.12:10.3	Arosaneyyo na so roseti kañci,
snp1.12:10.4	Taṁ vāpi dhīrā muni vedayanti.
snp1.12:11.1	Yadaggato majjhato sesato vā,
snp1.12:11.2	Piṇḍaṁ labhetha paradattūpajīvī;
snp1.12:11.3	Nālaṁ thutuṁ nopi nipaccavādī,
snp1.12:11.4	Taṁ vāpi dhīrā muni vedayanti.
snp1.12:12.1	Muniṁ carantaṁ virataṁ methunasmā,
snp1.12:12.2	Yo yobbane nopanibajjhate kvaci;
snp1.12:12.3	Madappamādā virataṁ vippamuttaṁ,
snp1.12:12.4	Taṁ vāpi dhīrā muni vedayanti.
snp1.12:13.1	Aññāya lokaṁ paramatthadassiṁ,
snp1.12:13.2	Oghaṁ samuddaṁ atitariya tādiṁ;
snp1.12:13.3	Taṁ chinnaganthaṁ asitaṁ anāsavaṁ,
snp1.12:13.4	Taṁ vāpi dhīrā muni vedayanti.
snp1.12:14.1	Asamā ubho dūravihāravuttino,
snp1.12:14.2	Gihī dāraposī amamo ca subbato;
snp1.12:14.3	Parapāṇarodhāya gihī asaññato,
snp1.12:14.4	Niccaṁ munī rakkhati pāṇine yato.
snp1.12:15.1	Sikhī yathā nīlagīvo vihaṅgamo,
snp1.12:15.2	Haṁsassa nopeti javaṁ kudācanaṁ;
snp1.12:15.3	Evaṁ gihī nānukaroti bhikkhuno,
snp1.12:15.4	Munino vivittassa vanamhi jhāyatoti.
snp1.12:15.5	Munisuttaṁ dvādasamaṁ.
snp1.12:15.6	Uragavaggo paṭhamo.
snp1.12:16.0	Tassuddānaṁ
snp1.12:16.1	Urago dhaniyo ceva,
snp1.12:16.2	visāṇañca tathā kasi;
snp1.12:16.3	Cundo parābhavo ceva,
snp1.12:16.4	vasalo mettabhāvanā.
snp1.12:17.1	Sātāgiro āḷavako,
snp1.12:17.2	Vijayo ca tathā muni;
snp1.12:17.3	Dvādasetāni suttāni,
snp1.12:17.4	Uragavaggoti vuccatīti.
snp2.1:0.1	Sutta Nipāta 2.1
snp2.1:0.2	Ratanasutta
snp2.1:1.1	Yānīdha bhūtāni samāgatāni,
snp2.1:1.2	Bhummāni vā yāni va antalikkhe;
snp2.1:1.3	Sabbeva bhūtā sumanā bhavantu,
snp2.1:1.4	Athopi sakkacca suṇantu bhāsitaṁ.
snp2.1:2.1	Tasmā hi bhūtā nisāmetha sabbe,
snp2.1:2.2	Mettaṁ karotha mānusiyā pajāya;
snp2.1:2.3	Divā ca ratto ca haranti ye baliṁ,
snp2.1:2.4	Tasmā hi ne rakkhatha appamattā.
snp2.1:3.1	Yaṁ kiñci vittaṁ idha vā huraṁ vā,
snp2.1:3.2	Saggesu vā yaṁ ratanaṁ paṇītaṁ;
snp2.1:3.3	Na no samaṁ atthi tathāgatena,
snp2.1:3.4	Idampi buddhe ratanaṁ paṇītaṁ;
snp2.1:3.5	Etena saccena suvatthi hotu.
snp2.1:4.1	Khayaṁ virāgaṁ amataṁ paṇītaṁ,
snp2.1:4.2	Yadajjhagā sakyamunī samāhito;
snp2.1:4.3	Na tena dhammena samatthi kiñci,
snp2.1:4.4	Idampi dhamme ratanaṁ paṇītaṁ;
snp2.1:4.5	Etena saccena suvatthi hotu.
snp2.1:5.1	Yaṁ buddhaseṭṭho parivaṇṇayī suciṁ,
snp2.1:5.2	Samādhimānantarikaññamāhu;
snp2.1:5.3	Samādhinā tena samo na vijjati,
snp2.1:5.4	Idampi dhamme ratanaṁ paṇītaṁ;
snp2.1:5.5	Etena saccena suvatthi hotu.
snp2.1:6.1	Ye puggalā aṭṭha sataṁ pasatthā,
snp2.1:6.2	Cattāri etāni yugāni honti;
snp2.1:6.3	Te dakkhiṇeyyā sugatassa sāvakā,
snp2.1:6.4	Etesu dinnāni mahapphalāni;
snp2.1:6.5	Idampi saṅghe ratanaṁ paṇītaṁ,
snp2.1:6.6	Etena saccena suvatthi hotu.
snp2.1:7.1	Ye suppayuttā manasā daḷhena,
snp2.1:7.2	Nikkāmino gotamasāsanamhi;
snp2.1:7.3	Te pattipattā amataṁ vigayha,
snp2.1:7.4	Laddhā mudhā nibbutiṁ bhuñjamānā;
snp2.1:7.5	Idampi saṅghe ratanaṁ paṇītaṁ,
snp2.1:7.6	Etena saccena suvatthi hotu.
snp2.1:8.1	Yathindakhīlo pathavissito siyā,
snp2.1:8.2	Catubbhi vātehi asampakampiyo;
snp2.1:8.3	Tathūpamaṁ sappurisaṁ vadāmi,
snp2.1:8.4	Yo ariyasaccāni avecca passati;
snp2.1:8.5	Idampi saṅghe ratanaṁ paṇītaṁ,
snp2.1:8.6	Etena saccena suvatthi hotu.
snp2.1:9.1	Ye ariyasaccāni vibhāvayanti,
snp2.1:9.2	Gambhīrapaññena sudesitāni;
snp2.1:9.3	Kiñcāpi te honti bhusaṁ pamattā,
snp2.1:9.4	Na te bhavaṁ aṭṭhamamādiyanti;
snp2.1:9.5	Idampi saṅghe ratanaṁ paṇītaṁ,
snp2.1:9.6	Etena saccena suvatthi hotu.
snp2.1:10.1	Sahāvassa dassanasampadāya,
snp2.1:10.2	Tayassu dhammā jahitā bhavanti;
snp2.1:10.3	Sakkāyadiṭṭhī vicikicchitañca,
snp2.1:10.4	Sīlabbataṁ vāpi yadatthi kiñci.
snp2.1:11.1	Catūhapāyehi ca vippamutto,
snp2.1:11.2	Chaccābhiṭhānāni abhabba kātuṁ;
snp2.1:11.3	Idampi saṅghe ratanaṁ paṇītaṁ,
snp2.1:11.4	Etena saccena suvatthi hotu.
snp2.1:12.1	Kiñcāpi so kamma karoti pāpakaṁ,
snp2.1:12.2	Kāyena vācā uda cetasā vā;
snp2.1:12.3	Abhabba so tassa paṭicchadāya,
snp2.1:12.4	Abhabbatā diṭṭhapadassa vuttā;
snp2.1:12.5	Idampi saṅghe ratanaṁ paṇītaṁ,
snp2.1:12.6	Etena saccena suvatthi hotu.
snp2.1:13.1	Vanappagumbe yatha phussitagge,
snp2.1:13.2	Gimhānamāse paṭhamasmiṁ gimhe;
snp2.1:13.3	Tathūpamaṁ dhammavaraṁ adesayi,
snp2.1:13.4	Nibbānagāmiṁ paramaṁ hitāya;
snp2.1:13.5	Idampi buddhe ratanaṁ paṇītaṁ,
snp2.1:13.6	Etena saccena suvatthi hotu.
snp2.1:14.1	Varo varaññū varado varāharo,
snp2.1:14.2	Anuttaro dhammavaraṁ adesayi;
snp2.1:14.3	Idampi buddhe ratanaṁ paṇītaṁ,
snp2.1:14.4	Etena saccena suvatthi hotu.
snp2.1:15.1	Khīṇaṁ purāṇaṁ nava natthi sambhavaṁ,
snp2.1:15.2	Virattacittāyatike bhavasmiṁ;
snp2.1:15.3	Te khīṇabījā avirūḷhichandā,
snp2.1:15.4	Nibbanti dhīrā yathāyaṁ padīpo;
snp2.1:15.5	Idampi saṅghe ratanaṁ paṇītaṁ,
snp2.1:15.6	Etena saccena suvatthi hotu.
snp2.1:16.1	Yānīdha bhūtāni samāgatāni,
snp2.1:16.2	Bhummāni vā yāni va antalikkhe;
snp2.1:16.3	Tathāgataṁ devamanussapūjitaṁ,
snp2.1:16.4	Buddhaṁ namassāma suvatthi hotu.
snp2.1:17.1	Yānīdha bhūtāni samāgatāni,
snp2.1:17.2	Bhummāni vā yāni va antalikkhe;
snp2.1:17.3	Tathāgataṁ devamanussapūjitaṁ,
snp2.1:17.4	Dhammaṁ namassāma suvatthi hotu.
snp2.1:18.1	Yānīdha bhūtāni samāgatāni,
snp2.1:18.2	Bhummāni vā yāni va antalikkhe;
snp2.1:18.3	Tathāgataṁ devamanussapūjitaṁ,
snp2.1:18.4	Saṅghaṁ namassāma suvatthi hotūti.
snp2.1:18.5	Ratanasuttaṁ paṭhamaṁ.
snp2.2:0.1	Sutta Nipāta 2.2
snp2.2:0.2	Āmagandhasutta
snp2.2:1.1	“Sāmākaciṅgūlakacīnakāni ca,
snp2.2:1.2	Pattapphalaṁ mūlaphalaṁ gavipphalaṁ;
snp2.2:1.3	Dhammena laddhaṁ satamasnamānā,
snp2.2:1.4	Na kāmakāmā alikaṁ bhaṇanti.
snp2.2:2.1	Yadasnamāno sukataṁ suniṭṭhitaṁ,
snp2.2:2.2	Parehi dinnaṁ payataṁ paṇītaṁ;
snp2.2:2.3	Sālīnamannaṁ paribhuñjamāno,
snp2.2:2.4	So bhuñjasī kassapa āmagandhaṁ.
snp2.2:3.1	Na āmagandho mama kappatīti,
snp2.2:3.2	Icceva tvaṁ bhāsasi brahmabandhu;
snp2.2:3.3	Sālīnamannaṁ paribhuñjamāno,
snp2.2:3.4	Sakuntamaṁsehi susaṅkhatehi;
snp2.2:3.5	Pucchāmi taṁ kassapa etamatthaṁ,
snp2.2:3.6	Kathaṁpakāro tava āmagandho”.
snp2.2:4.1	“Pāṇātipāto vadhachedabandhanaṁ,
snp2.2:4.2	Theyyaṁ musāvādo nikativañcanāni ca;
snp2.2:4.3	Ajjhenakuttaṁ paradārasevanā,
snp2.2:4.4	Esāmagandho na hi maṁsabhojanaṁ.
snp2.2:5.1	Ye idha kāmesu asaññatā janā,
snp2.2:5.2	Rasesu giddhā asucibhāvamassitā;
snp2.2:5.3	Natthikadiṭṭhī visamā durannayā,
snp2.2:5.4	Esāmagandho na hi maṁsabhojanaṁ.
snp2.2:6.1	Ye lūkhasā dāruṇā piṭṭhimaṁsikā,
snp2.2:6.2	Mittadduno nikkaruṇātimānino;
snp2.2:6.3	Adānasīlā na ca denti kassaci,
snp2.2:6.4	Esāmagandho na hi maṁsabhojanaṁ.
snp2.2:7.1	Kodho mado thambho paccupaṭṭhāpanā,
snp2.2:7.2	Māyā usūyā bhassasamussayo ca;
snp2.2:7.3	Mānātimāno ca asabbhi santhavo,
snp2.2:7.4	Esāmagandho na hi maṁsabhojanaṁ.
snp2.2:8.1	Ye pāpasīlā iṇaghātasūcakā,
snp2.2:8.2	Vohārakūṭā idha pāṭirūpikā;
snp2.2:8.3	Narādhamā yedha karonti kibbisaṁ,
snp2.2:8.4	Esāmagandho na hi maṁsabhojanaṁ.
snp2.2:9.1	Ye idha pāṇesu asaññatā janā,
snp2.2:9.2	Paresamādāya vihesamuyyutā;
snp2.2:9.3	Dussīlaluddā pharusā anādarā,
snp2.2:9.4	Esāmagandho na hi maṁsabhojanaṁ.
snp2.2:10.1	Etesu giddhā viruddhātipātino,
snp2.2:10.2	Niccuyyutā pecca tamaṁ vajanti ye;
snp2.2:10.3	Patanti sattā nirayaṁ avaṁsirā,
snp2.2:10.4	Esāmagandho na hi maṁsabhojanaṁ.
snp2.2:11.1	Na macchamaṁsānamanāsakattaṁ,
snp2.2:11.2	Na naggiyaṁ na muṇḍiyaṁ jaṭājallaṁ;
snp2.2:11.3	Kharājināni nāggihuttassupasevanā,
snp2.2:11.4	Ye vāpi loke amarā bahū tapā;
snp2.2:11.5	Mantāhutī yaññamutūpasevanā,
snp2.2:11.6	Sodhenti maccaṁ avitiṇṇakaṅkhaṁ.
snp2.2:12.1	Sotesu gutto viditindriyo care,
snp2.2:12.2	Dhamme ṭhito ajjavamaddave rato;
snp2.2:12.3	Saṅgātigo sabbadukkhappahīno,
snp2.2:12.4	Na lippati diṭṭhasutesu dhīro”.
snp2.2:13.1	Iccetamatthaṁ bhagavā punappunaṁ,
snp2.2:13.2	Akkhāsi naṁ vedayi mantapāragū;
snp2.2:13.3	Citrāhi gāthāhi munī pakāsayi,
snp2.2:13.4	Nirāmagandho asito durannayo.
snp2.2:14.1	Sutvāna buddhassa subhāsitaṁ padaṁ,
snp2.2:14.2	Nirāmagandhaṁ sabbadukkhappanūdanaṁ;
snp2.2:14.3	Nīcamano vandi tathāgatassa,
snp2.2:14.4	Tattheva pabbajjamarocayitthāti.
snp2.2:14.5	Āmagandhasuttaṁ dutiyaṁ.
snp2.3:0.1	Sutta Nipāta 2.3
snp2.3:0.2	Hirisutta
snp2.3:1.1	Hiriṁ tarantaṁ vijigucchamānaṁ,
snp2.3:1.2	Tavāhamasmi iti bhāsamānaṁ;
snp2.3:1.3	Sayhāni kammāni anādiyantaṁ,
snp2.3:1.4	Neso mamanti iti naṁ vijaññā.
snp2.3:2.1	Ananvayaṁ piyaṁ vācaṁ,
snp2.3:2.2	yo mittesu pakubbati;
snp2.3:2.3	Akarontaṁ bhāsamānaṁ,
snp2.3:2.4	parijānanti paṇḍitā.
snp2.3:3.1	Na so mitto yo sadā appamatto,
snp2.3:3.2	Bhedāsaṅkī randhamevānupassī;
snp2.3:3.3	Yasmiñca seti urasīva putto,
snp2.3:3.4	Sa ve mitto yo parehi abhejjo.
snp2.3:4.1	Pāmujjakaraṇaṁ ṭhānaṁ,
snp2.3:4.2	pasaṁsāvahanaṁ sukhaṁ;
snp2.3:4.3	Phalānisaṁso bhāveti,
snp2.3:4.4	vahanto porisaṁ dhuraṁ.
snp2.3:5.1	Pavivekarasaṁ pitvā,
snp2.3:5.2	Rasaṁ upasamassa ca;
snp2.3:5.3	Niddaro hoti nippāpo,
snp2.3:5.4	Dhammapītirasaṁ pivanti.
snp2.3:5.5	Hirisuttaṁ tatiyaṁ.
snp2.4:0.1	Sutta Nipāta 2.4
snp2.4:0.2	Maṅgalasutta
snp2.4:1.1	Evaṁ me sutaṁ—
snp2.4:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
snp2.4:1.3	Atha kho aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi.
snp2.4:1.4	Ekamantaṁ ṭhitā kho sā devatā bhagavantaṁ gāthāya ajjhabhāsi:
snp2.4:2.1	“Bahū devā manussā ca,
snp2.4:2.2	maṅgalāni acintayuṁ;
snp2.4:2.3	Ākaṅkhamānā sotthānaṁ,
snp2.4:2.4	brūhi maṅgalamuttamaṁ”.
snp2.4:3.1	“Asevanā ca bālānaṁ,
snp2.4:3.2	paṇḍitānañca sevanā;
snp2.4:3.3	Pūjā ca pūjaneyyānaṁ,
snp2.4:3.4	etaṁ maṅgalamuttamaṁ.
snp2.4:4.1	Patirūpadesavāso ca,
snp2.4:4.2	pubbe ca katapuññatā;
snp2.4:4.3	Attasammāpaṇidhi ca,
snp2.4:4.4	etaṁ maṅgalamuttamaṁ.
snp2.4:5.1	Bāhusaccañca sippañca,
snp2.4:5.2	vinayo ca susikkhito;
snp2.4:5.3	Subhāsitā ca yā vācā,
snp2.4:5.4	etaṁ maṅgalamuttamaṁ.
snp2.4:6.1	Mātāpitu upaṭṭhānaṁ,
snp2.4:6.2	puttadārassa saṅgaho;
snp2.4:6.3	Anākulā ca kammantā,
snp2.4:6.4	etaṁ maṅgalamuttamaṁ.
snp2.4:7.1	Dānañca dhammacariyā ca,
snp2.4:7.2	ñātakānañca saṅgaho;
snp2.4:7.3	Anavajjāni kammāni,
snp2.4:7.4	etaṁ maṅgalamuttamaṁ.
snp2.4:8.1	Āratī viratī pāpā,
snp2.4:8.2	majjapānā ca saṁyamo;
snp2.4:8.3	Appamādo ca dhammesu,
snp2.4:8.4	etaṁ maṅgalamuttamaṁ.
snp2.4:9.1	Gāravo ca nivāto ca,
snp2.4:9.2	santuṭṭhi ca kataññutā;
snp2.4:9.3	Kālena dhammassavanaṁ,
snp2.4:9.4	etaṁ maṅgalamuttamaṁ.
snp2.4:10.1	Khantī ca sovacassatā,
snp2.4:10.2	samaṇānañca dassanaṁ;
snp2.4:10.3	Kālena dhammasākacchā,
snp2.4:10.4	etaṁ maṅgalamuttamaṁ.
snp2.4:11.1	Tapo ca brahmacariyañca,
snp2.4:11.2	Ariyasaccāna dassanaṁ;
snp2.4:11.3	Nibbānasacchikiriyā ca,
snp2.4:11.4	Etaṁ maṅgalamuttamaṁ.
snp2.4:12.1	Phuṭṭhassa lokadhammehi,
snp2.4:12.2	Cittaṁ yassa na kampati;
snp2.4:12.3	Asokaṁ virajaṁ khemaṁ,
snp2.4:12.4	Etaṁ maṅgalamuttamaṁ.
snp2.4:13.1	Etādisāni katvāna,
snp2.4:13.2	Sabbattha maparājitā;
snp2.4:13.3	Sabbattha sotthiṁ gacchanti,
snp2.4:13.4	Taṁ tesaṁ maṅgalamuttaman”ti.
snp2.4:13.5	Maṅgalasuttaṁ catutthaṁ.
snp2.5:0.1	Sutta Nipāta 2.5
snp2.5:0.2	Sūcilomasutta
snp2.5:1.1	Evaṁ me sutaṁ—
snp2.5:1.2	ekaṁ samayaṁ bhagavā gayāyaṁ viharati ṭaṅkitamañce sūcilomassa yakkhassa bhavane.
snp2.5:1.3	Tena kho pana samayena kharo ca yakkho sūcilomo ca yakkho bhagavato avidūre atikkamanti.
snp2.5:1.4	Atha kho kharo yakkho sūcilomaṁ yakkhaṁ etadavoca:
snp2.5:1.5	“eso samaṇo”ti.
snp2.5:1.6	“Neso samaṇo, samaṇako eso.
snp2.5:1.7	Yāvāhaṁ jānāmi yadi vā so samaṇo, yadi vā so samaṇako”ti.
snp2.5:2.1	Atha kho sūcilomo yakkho yena bhagavā tenupasaṅkami; upasaṅkamitvā bhagavato kāyaṁ upanāmesi.
snp2.5:2.2	Atha kho bhagavā kāyaṁ apanāmesi.
snp2.5:2.3	Atha kho sūcilomo yakkho bhagavantaṁ etadavoca:
snp2.5:2.4	“bhāyasi maṁ, samaṇā”ti?
snp2.5:2.5	“Na khvāhaṁ taṁ, āvuso, bhāyāmi;
snp2.5:2.6	api ca te samphasso pāpako”ti.
snp2.5:3.1	“Pañhaṁ taṁ, samaṇa, pucchissāmi.
snp2.5:3.2	Sace me na byākarissasi, cittaṁ vā te khipissāmi, hadayaṁ vā te phālessāmi, pādesu vā gahetvā pāragaṅgāya khipissāmī”ti.
snp2.5:4.1	“Na khvāhaṁ taṁ, āvuso, passāmi sadevake loke samārake sabrahmake sassamaṇabrāhmaṇiyā pajāya sadevamanussāya yo me cittaṁ vā khipeyya hadayaṁ vā phāleyya pādesu vā gahetvā pāragaṅgāya khipeyya.
snp2.5:4.2	Api ca tvaṁ, āvuso, puccha yadākaṅkhasī”ti.
snp2.5:4.3	Atha kho sūcilomo yakkho bhagavantaṁ gāthāya ajjhabhāsi:
snp2.5:5.1	“Rāgo ca doso ca kutonidānā,
snp2.5:5.2	Aratī ratī lomahaṁso kutojā;
snp2.5:5.3	Kuto samuṭṭhāya manovitakkā,
snp2.5:5.4	Kumārakā dhaṅkamivossajanti”.
snp2.5:6.1	“Rāgo ca doso ca itonidānā,
snp2.5:6.2	Aratī ratī lomahaṁso itojā;
snp2.5:6.3	Ito samuṭṭhāya manovitakkā,
snp2.5:6.4	Kumārakā dhaṅkamivossajanti.
snp2.5:7.1	Snehajā attasambhūtā,
snp2.5:7.2	Nigrodhasseva khandhajā;
snp2.5:7.3	Puthū visattā kāmesu,
snp2.5:7.4	Māluvāva vitatāvane.
snp2.5:8.1	Ye naṁ pajānanti yatonidānaṁ,
snp2.5:8.2	Te naṁ vinodenti suṇohi yakkha;
snp2.5:8.3	Te duttaraṁ oghamimaṁ taranti,
snp2.5:8.4	Atiṇṇapubbaṁ apunabbhavāyā”ti.
snp2.5:8.5	Sūcilomasuttaṁ pañcamaṁ.
snp2.6:0.1	Sutta Nipāta 2.6
snp2.6:0.2	Kapilasutta (dhammacariyasutta)
snp2.6:1.1	Dhammacariyaṁ brahmacariyaṁ,
snp2.6:1.2	Etadāhu vasuttamaṁ;
snp2.6:1.3	Pabbajitopi ce hoti,
snp2.6:1.4	Agārā anagāriyaṁ.
snp2.6:2.1	So ce mukharajātiko,
snp2.6:2.2	vihesābhirato mago;
snp2.6:2.3	Jīvitaṁ tassa pāpiyo,
snp2.6:2.4	rajaṁ vaḍḍheti attano.
snp2.6:3.1	Kalahābhirato bhikkhu,
snp2.6:3.2	Mohadhammena āvuto;
snp2.6:3.3	Akkhātampi na jānāti,
snp2.6:3.4	Dhammaṁ buddhena desitaṁ.
snp2.6:4.1	Vihesaṁ bhāvitattānaṁ,
snp2.6:4.2	avijjāya purakkhato;
snp2.6:4.3	Saṅkilesaṁ na jānāti,
snp2.6:4.4	maggaṁ nirayagāminaṁ.
snp2.6:5.1	Vinipātaṁ samāpanno,
snp2.6:5.2	gabbhā gabbhaṁ tamā tamaṁ;
snp2.6:5.3	Sa ve tādisako bhikkhu,
snp2.6:5.4	pecca dukkhaṁ nigacchati.
snp2.6:6.1	Gūthakūpo yathā assa,
snp2.6:6.2	sampuṇṇo gaṇavassiko;
snp2.6:6.3	Yo ca evarūpo assa,
snp2.6:6.4	dubbisodho hi sāṅgaṇo.
snp2.6:7.1	Yaṁ evarūpaṁ jānātha,
snp2.6:7.2	bhikkhavo gehanissitaṁ;
snp2.6:7.3	Pāpicchaṁ pāpasaṅkappaṁ,
snp2.6:7.4	pāpaācāragocaraṁ.
snp2.6:8.1	Sabbe samaggā hutvāna,
snp2.6:8.2	abhinibbajjiyātha naṁ;
snp2.6:8.3	Kāraṇḍavaṁ niddhamatha,
snp2.6:8.4	kasambuṁ apakassatha.
snp2.6:9.1	Tato palāpe vāhetha,
snp2.6:9.2	Assamaṇe samaṇamānine;
snp2.6:9.3	Niddhamitvāna pāpicche,
snp2.6:9.4	Pāpaācāragocare.
snp2.6:10.1	Suddhā suddhehi saṁvāsaṁ,
snp2.6:10.2	Kappayavho patissatā;
snp2.6:10.3	Tato samaggā nipakā,
snp2.6:10.4	Dukkhassantaṁ karissathāti.
snp2.6:10.5	Dhammacariyasuttaṁ chaṭṭhaṁ.
snp2.7:0.1	Sutta Nipāta 2.7
snp2.7:0.2	Brāhmaṇadhammikasutta
snp2.7:1.1	Evaṁ me sutaṁ—
snp2.7:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
snp2.7:1.3	Atha kho sambahulā kosalakā brāhmaṇamahāsālā jiṇṇā vuḍḍhā mahallakā addhagatā vayoanuppattā yena bhagavā tenupasaṅkamiṁsu; upasaṅkamitvā bhagavatā saddhiṁ sammodiṁsu.
snp2.7:1.4	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te brāhmaṇamahāsālā bhagavantaṁ etadavocuṁ:
snp2.7:1.5	“sandissanti nu kho, bho gotama, etarahi brāhmaṇā porāṇānaṁ brāhmaṇānaṁ brāhmaṇadhamme”ti?
snp2.7:1.6	“Na kho, brāhmaṇā, sandissanti etarahi brāhmaṇā porāṇānaṁ brāhmaṇānaṁ brāhmaṇadhamme”ti.
snp2.7:1.7	“Sādhu no bhavaṁ gotamo porāṇānaṁ brāhmaṇānaṁ brāhmaṇadhammaṁ bhāsatu, sace bhoto gotamassa agarū”ti.
snp2.7:1.8	“Tena hi, brāhmaṇā, suṇātha, sādhukaṁ manasi karotha, bhāsissāmī”ti.
snp2.7:1.9	“Evaṁ, bho”ti kho te brāhmaṇamahāsālā bhagavato paccassosuṁ.
snp2.7:1.10	Bhagavā etadavoca:
snp2.7:2.1	“Isayo pubbakā āsuṁ,
snp2.7:2.2	saññatattā tapassino;
snp2.7:2.3	Pañca kāmaguṇe hitvā,
snp2.7:2.4	attadatthamacārisuṁ.
snp2.7:3.1	Na pasū brāhmaṇānāsuṁ,
snp2.7:3.2	na hiraññaṁ na dhāniyaṁ;
snp2.7:3.3	Sajjhāyadhanadhaññāsuṁ,
snp2.7:3.4	brahmaṁ nidhimapālayuṁ.
snp2.7:4.1	Yaṁ nesaṁ pakataṁ āsi,
snp2.7:4.2	dvārabhattaṁ upaṭṭhitaṁ;
snp2.7:4.3	Saddhāpakatamesānaṁ,
snp2.7:4.4	dātave tadamaññisuṁ.
snp2.7:5.1	Nānārattehi vatthehi,
snp2.7:5.2	sayanehāvasathehi ca;
snp2.7:5.3	Phītā janapadā raṭṭhā,
snp2.7:5.4	te namassiṁsu brāhmaṇe.
snp2.7:6.1	Avajjhā brāhmaṇā āsuṁ,
snp2.7:6.2	ajeyyā dhammarakkhitā;
snp2.7:6.3	Na ne koci nivāresi,
snp2.7:6.4	kuladvāresu sabbaso.
snp2.7:7.1	Aṭṭhacattālīsaṁ vassāni,
snp2.7:7.2	(komāra) Brahmacariyaṁ cariṁsu te;
snp2.7:7.3	Vijjācaraṇapariyeṭṭhiṁ,
snp2.7:7.4	Acaruṁ brāhmaṇā pure.
snp2.7:8.1	Na brāhmaṇā aññamagamuṁ,
snp2.7:8.2	napi bhariyaṁ kiṇiṁsu te;
snp2.7:8.3	Sampiyeneva saṁvāsaṁ,
snp2.7:8.4	saṅgantvā samarocayuṁ.
snp2.7:9.1	Aññatra tamhā samayā,
snp2.7:9.2	utuveramaṇiṁ pati;
snp2.7:9.3	Antarā methunaṁ dhammaṁ,
snp2.7:9.4	nāssu gacchanti brāhmaṇā.
snp2.7:10.1	Brahmacariyañca sīlañca,
snp2.7:10.2	ajjavaṁ maddavaṁ tapaṁ;
snp2.7:10.3	Soraccaṁ avihiṁsañca,
snp2.7:10.4	khantiñcāpi avaṇṇayuṁ.
snp2.7:11.1	Yo nesaṁ paramo āsi,
snp2.7:11.2	Brahmā daḷhaparakkamo;
snp2.7:11.3	Sa vāpi methunaṁ dhammaṁ,
snp2.7:11.4	Supinantepi nāgamā.
snp2.7:12.1	Tassa vattamanusikkhantā,
snp2.7:12.2	Idheke viññujātikā;
snp2.7:12.3	Brahmacariyañca sīlañca,
snp2.7:12.4	Khantiñcāpi avaṇṇayuṁ.
snp2.7:13.1	Taṇḍulaṁ sayanaṁ vatthaṁ,
snp2.7:13.2	Sappitelañca yāciya;
snp2.7:13.3	Dhammena samodhānetvā,
snp2.7:13.4	Tato yaññamakappayuṁ.
snp2.7:14.1	Upaṭṭhitasmiṁ yaññasmiṁ,
snp2.7:14.2	Nāssu gāvo haniṁsu te;
snp2.7:14.3	Yathā mātā pitā bhātā,
snp2.7:14.4	Aññe vāpi ca ñātakā;
snp2.7:14.5	Gāvo no paramā mittā,
snp2.7:14.6	Yāsu jāyanti osadhā.
snp2.7:15.1	Annadā baladā cetā,
snp2.7:15.2	Vaṇṇadā sukhadā tathā;
snp2.7:15.3	Etamatthavasaṁ ñatvā,
snp2.7:15.4	Nāssu gāvo haniṁsu te.
snp2.7:16.1	Sukhumālā mahākāyā,
snp2.7:16.2	Vaṇṇavanto yasassino;
snp2.7:16.3	Brāhmaṇā sehi dhammehi,
snp2.7:16.4	Kiccākiccesu ussukā;
snp2.7:16.5	Yāva loke avattiṁsu,
snp2.7:16.6	Sukhamedhitthayaṁ pajā.
snp2.7:17.1	Tesaṁ āsi vipallāso,
snp2.7:17.2	Disvāna aṇuto aṇuṁ;
snp2.7:17.3	Rājino ca viyākāraṁ,
snp2.7:17.4	Nāriyo samalaṅkatā.
snp2.7:18.1	Rathe cājaññasaṁyutte,
snp2.7:18.2	Sukate cittasibbane;
snp2.7:18.3	Nivesane nivese ca,
snp2.7:18.4	Vibhatte bhāgaso mite.
snp2.7:19.1	Gomaṇḍalaparibyūḷhaṁ,
snp2.7:19.2	Nārīvaragaṇāyutaṁ;
snp2.7:19.3	Uḷāraṁ mānusaṁ bhogaṁ,
snp2.7:19.4	Abhijjhāyiṁsu brāhmaṇā.
snp2.7:20.1	Te tattha mante ganthetvā,
snp2.7:20.2	Okkākaṁ tadupāgamuṁ;
snp2.7:20.3	Pahūtadhanadhaññosi,
snp2.7:20.4	Yajassu bahu te vittaṁ;
snp2.7:20.5	Yajassu bahu te dhanaṁ.
snp2.7:21.1	Tato ca rājā saññatto,
snp2.7:21.2	Brāhmaṇehi rathesabho;
snp2.7:21.3	Assamedhaṁ purisamedhaṁ,
snp2.7:21.4	Sammāpāsaṁ vājapeyyaṁ niraggaḷaṁ;
snp2.7:21.5	Ete yāge yajitvāna,
snp2.7:21.6	Brāhmaṇānamadā dhanaṁ.
snp2.7:22.1	Gāvo sayanañca vatthañca,
snp2.7:22.2	Nāriyo samalaṅkatā;
snp2.7:22.3	Rathe cājaññasaṁyutte,
snp2.7:22.4	Sukate cittasibbane.
snp2.7:23.1	Nivesanāni rammāni,
snp2.7:23.2	Suvibhattāni bhāgaso;
snp2.7:23.3	Nānādhaññassa pūretvā,
snp2.7:23.4	Brāhmaṇānamadā dhanaṁ.
snp2.7:24.1	Te ca tattha dhanaṁ laddhā,
snp2.7:24.2	Sannidhiṁ samarocayuṁ;
snp2.7:24.3	Tesaṁ icchāvatiṇṇānaṁ,
snp2.7:24.4	Bhiyyo taṇhā pavaḍḍhatha;
snp2.7:24.5	Te tattha mante ganthetvā,
snp2.7:24.6	Okkākaṁ puna mupāgamuṁ.
snp2.7:25.1	Yathā āpo ca pathavī ca,
snp2.7:25.2	Hiraññaṁ dhanadhāniyaṁ;
snp2.7:25.3	Evaṁ gāvo manussānaṁ,
snp2.7:25.4	Parikkhāro so hi pāṇinaṁ;
snp2.7:25.5	Yajassu bahu te vittaṁ,
snp2.7:25.6	Yajassu bahu te dhanaṁ.
snp2.7:26.1	Tato ca rājā saññatto,
snp2.7:26.2	Brāhmaṇehi rathesabho;
snp2.7:26.3	Nekā satasahassiyo,
snp2.7:26.4	Gāvo yaññe aghātayi.
snp2.7:27.1	Na pādā na visāṇena,
snp2.7:27.2	Nāssu hiṁsanti kenaci;
snp2.7:27.3	Gāvo eḷakasamānā,
snp2.7:27.4	Soratā kumbhadūhanā;
snp2.7:27.5	Tā visāṇe gahetvāna,
snp2.7:27.6	Rājā satthena ghātayi.
snp2.7:28.1	Tato devā pitaro ca,
snp2.7:28.2	Indo asurarakkhasā;
snp2.7:28.3	Adhammo iti pakkanduṁ,
snp2.7:28.4	Yaṁ satthaṁ nipatī gave.
snp2.7:29.1	Tayo rogā pure āsuṁ,
snp2.7:29.2	Icchā anasanaṁ jarā;
snp2.7:29.3	Pasūnañca samārambhā,
snp2.7:29.4	Aṭṭhānavutimāgamuṁ.
snp2.7:30.1	Eso adhammo daṇḍānaṁ,
snp2.7:30.2	Okkanto purāṇo ahu;
snp2.7:30.3	Adūsikāyo haññanti,
snp2.7:30.4	Dhammā dhaṁsanti yājakā.
snp2.7:31.1	Evameso aṇudhammo,
snp2.7:31.2	Porāṇo viññugarahito;
snp2.7:31.3	Yattha edisakaṁ passati,
snp2.7:31.4	Yājakaṁ garahatī jano.
snp2.7:32.1	Evaṁ dhamme viyāpanne,
snp2.7:32.2	Vibhinnā suddavessikā;
snp2.7:32.3	Puthū vibhinnā khattiyā,
snp2.7:32.4	Patiṁ bhariyāvamaññatha.
snp2.7:33.1	Khattiyā brahmabandhū ca,
snp2.7:33.2	Ye caññe gottarakkhitā;
snp2.7:33.3	Jātivādaṁ nirākatvā,
snp2.7:33.4	Kāmānaṁ vasamanvagun”ti.
snp2.7:34.1	Evaṁ vutte, te brāhmaṇamahāsālā bhagavantaṁ etadavocuṁ:
snp2.7:34.2	“abhikkantaṁ, bho gotama …pe…
snp2.7:34.3	upāsake no bhavaṁ gotamo dhāretu ajjatagge pāṇupete saraṇaṁ gate”ti.
snp2.7:34.4	Brāhmaṇadhammikasuttaṁ sattamaṁ.
snp2.8:0.1	Sutta Nipāta 2.8
snp2.8:0.2	Dhamma (nāvā) sutta
snp2.8:1.1	Yasmā hi dhammaṁ puriso vijaññā,
snp2.8:1.2	Indaṁva naṁ devatā pūjayeyya;
snp2.8:1.3	So pūjito tasmi pasannacitto,
snp2.8:1.4	Bahussuto pātukaroti dhammaṁ.
snp2.8:2.1	Tadaṭṭhikatvāna nisamma dhīro,
snp2.8:2.2	Dhammānudhammaṁ paṭipajjamāno;
snp2.8:2.3	Viññū vibhāvī nipuṇo ca hoti,
snp2.8:2.4	Yo tādisaṁ bhajati appamatto.
snp2.8:3.1	Khuddañca bālaṁ upasevamāno,
snp2.8:3.2	Anāgatatthañca usūyakañca;
snp2.8:3.3	Idheva dhammaṁ avibhāvayitvā,
snp2.8:3.4	Avitiṇṇakaṅkho maraṇaṁ upeti.
snp2.8:4.1	Yathā naro āpagamotaritvā,
snp2.8:4.2	Mahodakaṁ salilaṁ sīghasotaṁ;
snp2.8:4.3	So vuyhamāno anusotagāmī,
snp2.8:4.4	Kiṁ so pare sakkhati tārayetuṁ.
snp2.8:5.1	Tatheva dhammaṁ avibhāvayitvā,
snp2.8:5.2	Bahussutānaṁ anisāmayatthaṁ;
snp2.8:5.3	Sayaṁ ajānaṁ avitiṇṇakaṅkho,
snp2.8:5.4	Kiṁ so pare sakkhati nijjhapetuṁ.
snp2.8:6.1	Yathāpi nāvaṁ daḷhamāruhitvā,
snp2.8:6.2	Phiyena rittena samaṅgibhūto;
snp2.8:6.3	So tāraye tattha bahūpi aññe,
snp2.8:6.4	Tatrūpayaññū kusalo mutīmā.
snp2.8:7.1	Evampi yo vedagu bhāvitatto,
snp2.8:7.2	Bahussuto hoti avedhadhammo;
snp2.8:7.3	So kho pare nijjhapaye pajānaṁ,
snp2.8:7.4	Sotāvadhānūpanisūpapanne.
snp2.8:8.1	Tasmā have sappurisaṁ bhajetha,
snp2.8:8.2	Medhāvinañceva bahussutañca;
snp2.8:8.3	Aññāya atthaṁ paṭipajjamāno,
snp2.8:8.4	Viññātadhammo sa sukhaṁ labhethāti.
snp2.8:8.5	Nāvāsuttaṁ aṭṭhamaṁ.
snp2.9:0.1	Sutta Nipāta 2.9
snp2.9:0.2	Kiṁsīlasutta
snp2.9:1.1	“Kiṁsīlo kiṁsamācāro,
snp2.9:1.2	kāni kammāni brūhayaṁ;
snp2.9:1.3	Naro sammā niviṭṭhassa,
snp2.9:1.4	uttamatthañca pāpuṇe”.
snp2.9:2.1	“Vuḍḍhāpacāyī anusūyako siyā,
snp2.9:2.2	Kālaññū cassa garūnaṁ dassanāya;
snp2.9:2.3	Dhammiṁ kathaṁ erayitaṁ khaṇaññū,
snp2.9:2.4	Suṇeyya sakkacca subhāsitāni.
snp2.9:3.1	Kālena gacche garūnaṁ sakāsaṁ,
snp2.9:3.2	Thambhaṁ niraṅkatvā nivātavutti;
snp2.9:3.3	Atthaṁ dhammaṁ saṁyamaṁ brahmacariyaṁ,
snp2.9:3.4	Anussare ceva samācare ca.
snp2.9:4.1	Dhammārāmo dhammarato,
snp2.9:4.2	Dhamme ṭhito dhammavinicchayaññū;
snp2.9:4.3	Nevācare dhammasandosavādaṁ,
snp2.9:4.4	Tacchehi nīyetha subhāsitehi.
snp2.9:5.1	Hassaṁ jappaṁ paridevaṁ padosaṁ,
snp2.9:5.2	Māyākataṁ kuhanaṁ giddhi mānaṁ;
snp2.9:5.3	Sārambhaṁ kakkasaṁ kasāvañca mucchaṁ,
snp2.9:5.4	Hitvā care vītamado ṭhitatto.
snp2.9:6.1	Viññātasārāni subhāsitāni,
snp2.9:6.2	Sutañca viññātasamādhisāraṁ;
snp2.9:6.3	Na tassa paññā ca sutañca vaḍḍhati,
snp2.9:6.4	Yo sāhaso hoti naro pamatto.
snp2.9:7.1	Dhamme ca ye ariyapavedite ratā,
snp2.9:7.2	Anuttarā te vacasā manasā kammunā ca;
snp2.9:7.3	Te santisoraccasamādhisaṇṭhitā,
snp2.9:7.4	Sutassa paññāya ca sāramajjhagū”ti.
snp2.9:7.5	Kiṁsīlasuttaṁ navamaṁ.
snp2.10:0.1	Sutta Nipāta 2.10
snp2.10:0.2	Uṭṭhānasutta
snp2.10:1.1	Uṭṭhahatha nisīdatha,
snp2.10:1.2	ko attho supitena vo;
snp2.10:1.3	Āturānañhi kā niddā,
snp2.10:1.4	sallaviddhāna ruppataṁ.
snp2.10:2.1	Uṭṭhahatha nisīdatha,
snp2.10:2.2	Daḷhaṁ sikkhatha santiyā;
snp2.10:2.3	Mā vo pamatte viññāya,
snp2.10:2.4	Maccurājā amohayittha vasānuge.
snp2.10:3.1	Yāya devā manussā ca,
snp2.10:3.2	sitā tiṭṭhanti atthikā;
snp2.10:3.3	Tarathetaṁ visattikaṁ,
snp2.10:3.4	khaṇo vo mā upaccagā;
snp2.10:3.5	Khaṇātītā hi socanti,
snp2.10:3.6	nirayamhi samappitā.
snp2.10:4.1	Pamādo rajo pamādo,
snp2.10:4.2	Pamādānupatito rajo;
snp2.10:4.3	Appamādena vijjāya,
snp2.10:4.4	Abbahe sallamattanoti.
snp2.10:4.5	Uṭṭhānasuttaṁ dasamaṁ.
snp2.11:0.1	Sutta Nipāta 2.11
snp2.11:0.2	Rāhulasutta
snp2.11:1.1	“Kacci abhiṇhasaṁvāsā,
snp2.11:1.2	nāvajānāsi paṇḍitaṁ;
snp2.11:1.3	Ukkādhāro manussānaṁ,
snp2.11:1.4	kacci apacito tayā”.
snp2.11:2.1	“Nāhaṁ abhiṇhasaṁvāsā,
snp2.11:2.2	avajānāmi paṇḍitaṁ;
snp2.11:2.3	Ukkādhāro manussānaṁ,
snp2.11:2.4	niccaṁ apacito mayā”.
snp2.11:3.1	“Pañca kāmaguṇe hitvā,
snp2.11:3.2	piyarūpe manorame;
snp2.11:3.3	Saddhāya gharā nikkhamma,
snp2.11:3.4	dukkhassantakaro bhava.
snp2.11:4.1	Mitte bhajassu kalyāṇe,
snp2.11:4.2	pantañca sayanāsanaṁ;
snp2.11:4.3	Vivittaṁ appanigghosaṁ,
snp2.11:4.4	mattaññū hohi bhojane.
snp2.11:5.1	Cīvare piṇḍapāte ca,
snp2.11:5.2	paccaye sayanāsane;
snp2.11:5.3	Etesu taṇhaṁ mākāsi,
snp2.11:5.4	mā lokaṁ punarāgami.
snp2.11:6.1	Saṁvuto pātimokkhasmiṁ,
snp2.11:6.2	indriyesu ca pañcasu;
snp2.11:6.3	Sati kāyagatā tyatthu,
snp2.11:6.4	nibbidābahulo bhava.
snp2.11:7.1	Nimittaṁ parivajjehi,
snp2.11:7.2	subhaṁ rāgūpasañhitaṁ;
snp2.11:7.3	Asubhāya cittaṁ bhāvehi,
snp2.11:7.4	ekaggaṁ susamāhitaṁ.
snp2.11:8.1	Animittañca bhāvehi,
snp2.11:8.2	Mānānusayamujjaha;
snp2.11:8.3	Tato mānābhisamayā,
snp2.11:8.4	Upasanto carissatī”ti.
snp2.11:9.1	Itthaṁ sudaṁ bhagavā āyasmantaṁ rāhulaṁ imāhi gāthāhi abhiṇhaṁ ovadatīti.
snp2.11:9.2	Rāhulasuttaṁ ekādasamaṁ.
snp2.12:0.1	Sutta Nipāta 2.12
snp2.12:0.2	Nigrodhakappa (vaṅgīsa) sutta
snp2.12:1.1	Evaṁ me sutaṁ—
snp2.12:1.2	ekaṁ samayaṁ bhagavā āḷaviyaṁ viharati aggāḷave cetiye.
snp2.12:1.3	Tena kho pana samayena āyasmato vaṅgīsassa upajjhāyo nigrodhakappo nāma thero aggāḷave cetiye aciraparinibbuto hoti.
snp2.12:1.4	Atha kho āyasmato vaṅgīsassa rahogatassa paṭisallīnassa evaṁ cetaso parivitakko udapādi—
snp2.12:1.5	parinibbuto nu kho me upajjhāyo udāhu no parinibbutoti?
snp2.12:1.6	Atha kho āyasmā vaṅgīso sāyanhasamayaṁ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā vaṅgīso bhagavantaṁ etadavoca—
snp2.12:1.7	idha mayhaṁ, bhante, rahogatassa paṭisallīnassa evaṁ cetaso parivitakko udapādi—
snp2.12:1.8	parinibbuto nu kho me upajjhāyo, udāhu no parinibbutoti.
snp2.12:1.9	Atha kho āyasmā vaṅgīso uṭṭhāyāsanā ekaṁsaṁ cīvaraṁ katvā yena bhagavā tenañjaliṁ paṇāmetvā bhagavantaṁ gāthāya ajjhabhāsi:
snp2.12:2.1	“Pucchāmi satthāramanomapaññaṁ,
snp2.12:2.2	Diṭṭheva dhamme yo vicikicchānaṁ chettā;
snp2.12:2.3	Aggāḷave kālamakāsi bhikkhu,
snp2.12:2.4	Ñāto yasassī abhinibbutatto.
snp2.12:3.1	Nigrodhakappo iti tassa nāmaṁ,
snp2.12:3.2	Tayā kataṁ bhagavā brāhmaṇassa;
snp2.12:3.3	So taṁ namassaṁ acari mutyapekkho,
snp2.12:3.4	Āraddhaviriyo daḷhadhammadassī.
snp2.12:4.1	Taṁ sāvakaṁ sakya mayampi sabbe,
snp2.12:4.2	Aññātumicchāma samantacakkhu;
snp2.12:4.3	Samavaṭṭhitā no savanāya sotā,
snp2.12:4.4	Tuvaṁ no satthā tvamanuttarosi.
snp2.12:5.1	Chindeva no vicikicchaṁ brūhi metaṁ,
snp2.12:5.2	Parinibbutaṁ vedaya bhūripañña;
snp2.12:5.3	Majjheva no bhāsa samantacakkhu,
snp2.12:5.4	Sakkova devāna sahassanetto.
snp2.12:6.1	Ye keci ganthā idha mohamaggā,
snp2.12:6.2	Aññāṇapakkhā vicikicchaṭhānā;
snp2.12:6.3	Tathāgataṁ patvā na te bhavanti,
snp2.12:6.4	Cakkhuñhi etaṁ paramaṁ narānaṁ.
snp2.12:7.1	No ce hi jātu puriso kilese,
snp2.12:7.2	Vāto yathā abbhaghanaṁ vihāne;
snp2.12:7.3	Tamovassa nivuto sabbaloko,
snp2.12:7.4	Na jotimantopi narā tapeyyuṁ.
snp2.12:8.1	Dhīrā ca pajjotakarā bhavanti,
snp2.12:8.2	Taṁ taṁ ahaṁ vīra tatheva maññe;
snp2.12:8.3	Vipassinaṁ jānamupāgamumhā,
snp2.12:8.4	Parisāsu no āvikarohi kappaṁ.
snp2.12:9.1	Khippaṁ giraṁ eraya vaggu vagguṁ,
snp2.12:9.2	Haṁsova paggayha saṇikaṁ nikūja;
snp2.12:9.3	Bindussarena suvikappitena,
snp2.12:9.4	Sabbeva te ujjugatā suṇoma.
snp2.12:10.1	Pahīnajātimaraṇaṁ asesaṁ,
snp2.12:10.2	Niggayha dhonaṁ vadessāmi dhammaṁ;
snp2.12:10.3	Na kāmakāro hi puthujjanānaṁ,
snp2.12:10.4	Saṅkheyyakāro ca tathāgatānaṁ.
snp2.12:11.1	Sampannaveyyākaraṇaṁ tavedaṁ,
snp2.12:11.2	Samujjupaññassa samuggahītaṁ;
snp2.12:11.3	Ayamañjalī pacchimo suppaṇāmito,
snp2.12:11.4	Mā mohayī jānamanomapañña.
snp2.12:12.1	Parovaraṁ ariyadhammaṁ viditvā,
snp2.12:12.2	Mā mohayī jānamanomavīra;
snp2.12:12.3	Vāriṁ yathā ghammani ghammatatto,
snp2.12:12.4	Vācābhikaṅkhāmi sutaṁ pavassa.
snp2.12:13.1	Yadatthikaṁ brahmacariyaṁ acarī,
snp2.12:13.2	Kappāyano kaccissa taṁ amoghaṁ;
snp2.12:13.3	Nibbāyi so ādu saupādiseso,
snp2.12:13.4	Yathā vimutto ahu taṁ suṇoma”.
snp2.12:14.1	“Acchecchi taṇhaṁ idha nāmarūpe,
snp2.12:14.2	(iti bhagavā)
snp2.12:14.3	Kaṇhassa sotaṁ dīgharattānusayitaṁ;
snp2.12:14.4	Atāri jātiṁ maraṇaṁ asesaṁ”,
snp2.12:14.5	Iccabravī bhagavā pañcaseṭṭho.
snp2.12:15.1	“Esa sutvā pasīdāmi,
snp2.12:15.2	Vaco te isisattama;
snp2.12:15.3	Amoghaṁ kira me puṭṭhaṁ,
snp2.12:15.4	Na maṁ vañcesi brāhmaṇo.
snp2.12:16.1	Yathāvādī tathākārī,
snp2.12:16.2	Ahu buddhassa sāvako;
snp2.12:16.3	Acchidā maccuno jālaṁ,
snp2.12:16.4	Tataṁ māyāvino daḷhaṁ.
snp2.12:17.1	Addasā bhagavā ādiṁ,
snp2.12:17.2	Upādānassa kappiyo;
snp2.12:17.3	Accagā vata kappāyano,
snp2.12:17.4	Maccudheyyaṁ suduttaran”ti.
snp2.12:17.5	Nigrodhakappasuttaṁ dvādasamaṁ.
snp2.13:0.1	Sutta Nipāta 2.13
snp2.13:0.2	Sammāparibbājanīyasutta
snp2.13:1.1	“Pucchāmi muniṁ pahūtapaññaṁ,
snp2.13:1.2	Tiṇṇaṁ pāraṅgataṁ parinibbutaṁ ṭhitattaṁ;
snp2.13:1.3	Nikkhamma gharā panujja kāme,
snp2.13:1.4	Kathaṁ bhikkhu sammā so loke paribbajeyya”.
snp2.13:2.1	“Yassa maṅgalā samūhatā,
snp2.13:2.2	(iti bhagavā)
snp2.13:2.3	Uppātā supinā ca lakkhaṇā ca;
snp2.13:2.4	So maṅgaladosavippahīno,
snp2.13:2.5	Sammā so loke paribbajeyya.
snp2.13:3.1	Rāgaṁ vinayetha mānusesu,
snp2.13:3.2	Dibbesu kāmesu cāpi bhikkhu;
snp2.13:3.3	Atikkamma bhavaṁ samecca dhammaṁ,
snp2.13:3.4	Sammā so loke paribbajeyya.
snp2.13:4.1	Vipiṭṭhikatvāna pesuṇāni,
snp2.13:4.2	Kodhaṁ kadarīyaṁ jaheyya bhikkhu;
snp2.13:4.3	Anurodhavirodhavippahīno,
snp2.13:4.4	Sammā so loke paribbajeyya.
snp2.13:5.1	Hitvāna piyañca appiyañca,
snp2.13:5.2	Anupādāya anissito kuhiñci;
snp2.13:5.3	Saṁyojaniyehi vippamutto,
snp2.13:5.4	Sammā so loke paribbajeyya.
snp2.13:6.1	Na so upadhīsu sārameti,
snp2.13:6.2	Ādānesu vineyya chandarāgaṁ;
snp2.13:6.3	So anissito anaññaneyyo,
snp2.13:6.4	Sammā so loke paribbajeyya.
snp2.13:7.1	Vacasā manasā ca kammunā ca,
snp2.13:7.2	Aviruddho sammā viditvā dhammaṁ;
snp2.13:7.3	Nibbānapadābhipatthayāno,
snp2.13:7.4	Sammā so loke paribbajeyya.
snp2.13:8.1	Yo vandati manti nunnameyya,
snp2.13:8.2	Akkuṭṭhopi na sandhiyetha bhikkhu;
snp2.13:8.3	Laddhā parabhojanaṁ na majje,
snp2.13:8.4	Sammā so loke paribbajeyya.
snp2.13:9.1	Lobhañca bhavañca vippahāya,
snp2.13:9.2	Virato chedanabandhanā ca bhikkhu;
snp2.13:9.3	So tiṇṇakathaṅkatho visallo,
snp2.13:9.4	Sammā so loke paribbajeyya.
snp2.13:10.1	Sāruppaṁ attano viditvā,
snp2.13:10.2	No ca bhikkhu hiṁseyya kañci loke;
snp2.13:10.3	Yathātathiyaṁ viditvā dhammaṁ,
snp2.13:10.4	Sammā so loke paribbajeyya.
snp2.13:11.1	Yassānusayā na santi keci,
snp2.13:11.2	Mūlā ca akusalā samūhatāse;
snp2.13:11.3	So nirāso anāsisāno,
snp2.13:11.4	Sammā so loke paribbajeyya.
snp2.13:12.1	Āsavakhīṇo pahīnamāno,
snp2.13:12.2	Sabbaṁ rāgapathaṁ upātivatto;
snp2.13:12.3	Danto parinibbuto ṭhitatto,
snp2.13:12.4	Sammā so loke paribbajeyya.
snp2.13:13.1	Saddho sutavā niyāmadassī,
snp2.13:13.2	Vaggagatesu na vaggasāri dhīro;
snp2.13:13.3	Lobhaṁ dosaṁ vineyya paṭighaṁ,
snp2.13:13.4	Sammā so loke paribbajeyya.
snp2.13:14.1	Saṁsuddhajino vivaṭṭacchado,
snp2.13:14.2	Dhammesu vasī pāragū anejo;
snp2.13:14.3	Saṅkhāranirodhañāṇakusalo,
snp2.13:14.4	Sammā so loke paribbajeyya.
snp2.13:15.1	Atītesu anāgatesu cāpi,
snp2.13:15.2	Kappātīto aticcasuddhipañño;
snp2.13:15.3	Sabbāyatanehi vippamutto,
snp2.13:15.4	Sammā so loke paribbajeyya.
snp2.13:16.1	Aññāya padaṁ samecca dhammaṁ,
snp2.13:16.2	Vivaṭaṁ disvāna pahānamāsavānaṁ;
snp2.13:16.3	Sabbupadhīnaṁ parikkhayāno,
snp2.13:16.4	Sammā so loke paribbajeyya”.
snp2.13:17.1	“Addhā hi bhagavā tatheva etaṁ,
snp2.13:17.2	Yo so evaṁvihārī danto bhikkhu;
snp2.13:17.3	Sabbasaṁyojanayogavītivatto,
snp2.13:17.4	Sammā so loke paribbajeyyā”ti.
snp2.13:17.5	Sammāparibbājanīyasuttaṁ terasamaṁ.
snp2.14:0.1	Sutta Nipāta 2.14
snp2.14:0.2	Dhammikasutta
snp2.14:1.1	Evaṁ me sutaṁ—
snp2.14:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
snp2.14:1.3	Atha kho dhammiko upāsako pañcahi upāsakasatehi saddhiṁ yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho dhammiko upāsako bhagavantaṁ gāthāhi ajjhabhāsi:
snp2.14:2.1	“Pucchāmi taṁ gotama bhūripañña,
snp2.14:2.2	Kathaṅkaro sāvako sādhu hoti;
snp2.14:2.3	Yo vā agārā anagārameti,
snp2.14:2.4	Agārino vā panupāsakāse.
snp2.14:3.1	Tuvañhi lokassa sadevakassa,
snp2.14:3.2	Gatiṁ pajānāsi parāyaṇañca;
snp2.14:3.3	Na catthi tulyo nipuṇatthadassī,
snp2.14:3.4	Tuvañhi buddhaṁ pavaraṁ vadanti.
snp2.14:4.1	Sabbaṁ tuvaṁ ñāṇamavecca dhammaṁ,
snp2.14:4.2	Pakāsesi satte anukampamāno;
snp2.14:4.3	Vivaṭṭacchadosi samantacakkhu,
snp2.14:4.4	Virocasi vimalo sabbaloke.
snp2.14:5.1	Āgañchi te santike nāgarājā,
snp2.14:5.2	Erāvaṇo nāma jinoti sutvā;
snp2.14:5.3	Sopi tayā mantayitvājjhagamā,
snp2.14:5.4	Sādhūti sutvāna patītarūpo.
snp2.14:6.1	Rājāpi taṁ vessavaṇo kuvero,
snp2.14:6.2	Upeti dhammaṁ paripucchamāno;
snp2.14:6.3	Tassāpi tvaṁ pucchito brūsi dhīra,
snp2.14:6.4	So cāpi sutvāna patītarūpo.
snp2.14:7.1	Ye kecime titthiyā vādasīlā,
snp2.14:7.2	Ājīvakā vā yadi vā nigaṇṭhā;
snp2.14:7.3	Paññāya taṁ nātitaranti sabbe,
snp2.14:7.4	Ṭhito vajantaṁ viya sīghagāmiṁ.
snp2.14:8.1	Ye kecime brāhmaṇā vādasīlā,
snp2.14:8.2	Vuddhā cāpi brāhmaṇā santi keci;
snp2.14:8.3	Sabbe tayi atthabaddhā bhavanti,
snp2.14:8.4	Ye cāpi aññe vādino maññamānā.
snp2.14:9.1	Ayañhi dhammo nipuṇo sukho ca,
snp2.14:9.2	Yoyaṁ tayā bhagavā suppavutto;
snp2.14:9.3	Tameva sabbepi sussūsamānā,
snp2.14:9.4	Taṁ no vada pucchito buddhaseṭṭha.
snp2.14:10.1	Sabbepime bhikkhavo sannisinnā,
snp2.14:10.2	Upāsakā cāpi tatheva sotuṁ;
snp2.14:10.3	Suṇantu dhammaṁ vimalenānubuddhaṁ,
snp2.14:10.4	Subhāsitaṁ vāsavasseva devā”.
snp2.14:11.1	“Suṇātha me bhikkhavo sāvayāmi vo,
snp2.14:11.2	Dhammaṁ dhutaṁ tañca carātha sabbe;
snp2.14:11.3	Iriyāpathaṁ pabbajitānulomikaṁ,
snp2.14:11.4	Sevetha naṁ atthadaso mutīmā.
snp2.14:12.1	No ve vikāle vicareyya bhikkhu,
snp2.14:12.2	Gāme ca piṇḍāya careyya kāle;
snp2.14:12.3	Akālacāriñhi sajanti saṅgā,
snp2.14:12.4	Tasmā vikāle na caranti buddhā.
snp2.14:13.1	Rūpā ca saddā ca rasā ca gandhā,
snp2.14:13.2	Phassā ca ye sammadayanti satte;
snp2.14:13.3	Etesu dhammesu vineyya chandaṁ,
snp2.14:13.4	Kālena so pavise pātarāsaṁ.
snp2.14:14.1	Piṇḍañca bhikkhu samayena laddhā,
snp2.14:14.2	Eko paṭikkamma raho nisīde;
snp2.14:14.3	Ajjhattacintī na mano bahiddhā,
snp2.14:14.4	Nicchāraye saṅgahitattabhāvo.
snp2.14:15.1	Sacepi so sallape sāvakena,
snp2.14:15.2	Aññena vā kenaci bhikkhunā vā;
snp2.14:15.3	Dhammaṁ paṇītaṁ tamudāhareyya,
snp2.14:15.4	Na pesuṇaṁ nopi parūpavādaṁ.
snp2.14:16.1	Vādañhi eke paṭiseniyanti,
snp2.14:16.2	Na te pasaṁsāma parittapaññe;
snp2.14:16.3	Tato tato ne pasajanti saṅgā,
snp2.14:16.4	Cittañhi te tattha gamenti dūre.
snp2.14:17.1	Piṇḍaṁ vihāraṁ sayanāsanañca,
snp2.14:17.2	Āpañca saṅghāṭirajūpavāhanaṁ;
snp2.14:17.3	Sutvāna dhammaṁ sugatena desitaṁ,
snp2.14:17.4	Saṅkhāya seve varapaññasāvako.
snp2.14:18.1	Tasmā hi piṇḍe sayanāsane ca,
snp2.14:18.2	Āpe ca saṅghāṭirajūpavāhane;
snp2.14:18.3	Etesu dhammesu anūpalitto,
snp2.14:18.4	Bhikkhu yathā pokkhare vāribindu.
snp2.14:19.1	Gahaṭṭhavattaṁ pana vo vadāmi,
snp2.14:19.2	Yathākaro sāvako sādhu hoti;
snp2.14:19.3	Na hesa labbhā sapariggahena,
snp2.14:19.4	Phassetuṁ yo kevalo bhikkhudhammo.
snp2.14:20.1	Pāṇaṁ na hane na ca ghātayeyya,
snp2.14:20.2	Na cānujaññā hanataṁ paresaṁ;
snp2.14:20.3	Sabbesu bhūtesu nidhāya daṇḍaṁ,
snp2.14:20.4	Ye thāvarā ye ca tasā santi loke.
snp2.14:21.1	Tato adinnaṁ parivajjayeyya,
snp2.14:21.2	Kiñci kvaci sāvako bujjhamāno;
snp2.14:21.3	Na hāraye harataṁ nānujaññā,
snp2.14:21.4	Sabbaṁ adinnaṁ parivajjayeyya.
snp2.14:22.1	Abrahmacariyaṁ parivajjayeyya,
snp2.14:22.2	Aṅgārakāsuṁ jalitaṁva viññū;
snp2.14:22.3	Asambhuṇanto pana brahmacariyaṁ,
snp2.14:22.4	Parassa dāraṁ na atikkameyya.
snp2.14:23.1	Sabhaggato vā parisaggato vā,
snp2.14:23.2	Ekassa veko na musā bhaṇeyya;
snp2.14:23.3	Na bhāṇaye bhaṇataṁ nānujaññā,
snp2.14:23.4	Sabbaṁ abhūtaṁ parivajjayeyya.
snp2.14:24.1	Majjañca pānaṁ na samācareyya,
snp2.14:24.2	Dhammaṁ imaṁ rocaye yo gahaṭṭho;
snp2.14:24.3	Na pāyaye pivataṁ nānujaññā,
snp2.14:24.4	Ummādanantaṁ iti naṁ viditvā.
snp2.14:25.1	Madā hi pāpāni karonti bālā,
snp2.14:25.2	Kārenti caññepi jane pamatte;
snp2.14:25.3	Etaṁ apuññāyatanaṁ vivajjaye,
snp2.14:25.4	Ummādanaṁ mohanaṁ bālakantaṁ.
snp2.14:26.1	Pāṇaṁ na hane na cādinnamādiye,
snp2.14:26.2	Musā na bhāse na ca majjapo siyā;
snp2.14:26.3	Abrahmacariyā virameyya methunā,
snp2.14:26.4	Rattiṁ na bhuñjeyya vikālabhojanaṁ.
snp2.14:27.1	Mālaṁ na dhāre na ca gandhamācare,
snp2.14:27.2	Mañce chamāyaṁ va sayetha santhate;
snp2.14:27.3	Etañhi aṭṭhaṅgikamāhuposathaṁ,
snp2.14:27.4	Buddhena dukkhantagunā pakāsitaṁ.
snp2.14:28.1	Tato ca pakkhassupavassuposathaṁ,
snp2.14:28.2	Cātuddasiṁ pañcadasiñca aṭṭhamiṁ;
snp2.14:28.3	Pāṭihāriyapakkhañca pasannamānaso,
snp2.14:28.4	Aṭṭhaṅgupetaṁ susamattarūpaṁ.
snp2.14:29.1	Tato ca pāto upavutthuposatho,
snp2.14:29.2	Annena pānena ca bhikkhusaṅghaṁ;
snp2.14:29.3	Pasannacitto anumodamāno,
snp2.14:29.4	Yathārahaṁ saṁvibhajetha viññū.
snp2.14:30.1	Dhammena mātāpitaro bhareyya,
snp2.14:30.2	Payojaye dhammikaṁ so vaṇijjaṁ;
snp2.14:30.3	Etaṁ gihī vattayamappamatto,
snp2.14:30.4	Sayampabhe nāma upeti deve”ti.
snp2.14:30.5	Dhammikasuttaṁ cuddasamaṁ.
snp2.14:30.6	Cūḷavaggo dutiyo.
snp2.14:31.0	Tassuddānaṁ
snp2.14:31.1	Ratanāmagandho hiri ca,
snp2.14:31.2	maṅgalaṁ sūcilomena;
snp2.14:31.3	Dhammacariyañca brāhmaṇo,
snp2.14:31.4	nāvā kiṁsīlamuṭṭhānaṁ.
snp2.14:32.1	Rāhulo puna kappo ca,
snp2.14:32.2	paribbājaniyaṁ tathā;
snp2.14:32.3	Dhammikañca viduno āhu,
snp2.14:32.4	cūḷavagganti cuddasāti.
snp3.1:0.1	Sutta Nipāta 3.1
snp3.1:0.2	Pabbajjāsutta
snp3.1:1.1	“Pabbajjaṁ kittayissāmi,
snp3.1:1.2	yathā pabbaji cakkhumā;
snp3.1:1.3	Yathā vīmaṁsamāno so,
snp3.1:1.4	pabbajjaṁ samarocayi.
snp3.1:2.1	Sambādhoyaṁ gharāvāso,
snp3.1:2.2	rajassāyatanaṁ iti;
snp3.1:2.3	Abbhokāsova pabbajjā,
snp3.1:2.4	iti disvāna pabbaji.
snp3.1:3.1	Pabbajitvāna kāyena,
snp3.1:3.2	pāpakammaṁ vivajjayi;
snp3.1:3.3	Vacīduccaritaṁ hitvā,
snp3.1:3.4	ājīvaṁ parisodhayi.
snp3.1:4.1	Agamā rājagahaṁ buddho,
snp3.1:4.2	magadhānaṁ giribbajaṁ;
snp3.1:4.3	Piṇḍāya abhihāresi,
snp3.1:4.4	ākiṇṇavaralakkhaṇo”.
snp3.1:5.1	Tamaddasā bimbisāro,
snp3.1:5.2	pāsādasmiṁ patiṭṭhito;
snp3.1:5.3	Disvā lakkhaṇasampannaṁ,
snp3.1:5.4	imamatthaṁ abhāsatha.
snp3.1:6.1	“Imaṁ bhonto nisāmetha,
snp3.1:6.2	abhirūpo brahā suci;
snp3.1:6.3	Caraṇena ca sampanno,
snp3.1:6.4	yugamattañca pekkhati.
snp3.1:7.1	Okkhittacakkhu satimā,
snp3.1:7.2	nāyaṁ nīcakulāmiva;
snp3.1:7.3	Rājadūtābhidhāvantu,
snp3.1:7.4	kuhiṁ bhikkhu gamissati”.
snp3.1:8.1	Te pesitā rājadūtā,
snp3.1:8.2	piṭṭhito anubandhisuṁ;
snp3.1:8.3	Kuhiṁ gamissati bhikkhu,
snp3.1:8.4	kattha vāso bhavissati.
snp3.1:9.1	Sapadānaṁ caramāno,
snp3.1:9.2	guttadvāro susaṁvuto;
snp3.1:9.3	Khippaṁ pattaṁ apūresi,
snp3.1:9.4	sampajāno paṭissato.
snp3.1:10.1	Piṇḍacāraṁ caritvāna,
snp3.1:10.2	Nikkhamma nagarā muni;
snp3.1:10.3	Paṇḍavaṁ abhihāresi,
snp3.1:10.4	Ettha vāso bhavissati.
snp3.1:11.1	Disvāna vāsūpagataṁ,
snp3.1:11.2	Tayo dūtā upāvisuṁ;
snp3.1:11.3	Tesu ekova āgantvā,
snp3.1:11.4	Rājino paṭivedayi.
snp3.1:12.1	“Esa bhikkhu mahārāja,
snp3.1:12.2	Paṇḍavassa puratthato;
snp3.1:12.3	Nisinno byagghusabhova,
snp3.1:12.4	Sīhova girigabbhare”.
snp3.1:13.1	Sutvāna dūtavacanaṁ,
snp3.1:13.2	Bhaddayānena khattiyo;
snp3.1:13.3	Taramānarūpo niyyāsi,
snp3.1:13.4	Yena paṇḍavapabbato.
snp3.1:14.1	Sa yānabhūmiṁ yāyitvā,
snp3.1:14.2	Yānā oruyha khattiyo;
snp3.1:14.3	Pattiko upasaṅkamma,
snp3.1:14.4	Āsajja naṁ upāvisi.
snp3.1:15.1	Nisajja rājā sammodi,
snp3.1:15.2	Kathaṁ sāraṇīyaṁ tato;
snp3.1:15.3	Kathaṁ so vītisāretvā,
snp3.1:15.4	Imamatthaṁ abhāsatha.
snp3.1:16.1	“Yuvā ca daharo cāsi,
snp3.1:16.2	Paṭhamuppattiko susu;
snp3.1:16.3	Vaṇṇārohena sampanno,
snp3.1:16.4	Jātimā viya khattiyo.
snp3.1:17.1	Sobhayanto anīkaggaṁ,
snp3.1:17.2	Nāgasaṅghapurakkhato;
snp3.1:17.3	Dadāmi bhoge bhuñjassu,
snp3.1:17.4	Jātiṁ akkhāhi pucchito”.
snp3.1:18.1	“Ujuṁ janapado rāja,
snp3.1:18.2	Himavantassa passato;
snp3.1:18.3	Dhanaviriyena sampanno,
snp3.1:18.4	Kosalesu niketino.
snp3.1:19.1	Ādiccā nāma gottena,
snp3.1:19.2	Sākiyā nāma jātiyā;
snp3.1:19.3	Tamhā kulā pabbajitomhi,
snp3.1:19.4	Na kāme abhipatthayaṁ.
snp3.1:20.1	Kāmesvādīnavaṁ disvā,
snp3.1:20.2	Nekkhammaṁ daṭṭhu khemato;
snp3.1:20.3	Padhānāya gamissāmi,
snp3.1:20.4	Ettha me rañjatī mano”ti.
snp3.1:20.5	Pabbajjāsuttaṁ paṭhamaṁ.
snp3.2:0.1	Sutta Nipāta 3.2
snp3.2:0.2	Padhānasutta
snp3.2:1.1	“Taṁ maṁ padhānapahitattaṁ,
snp3.2:1.2	nadiṁ nerañjaraṁ pati;
snp3.2:1.3	Viparakkamma jhāyantaṁ,
snp3.2:1.4	yogakkhemassa pattiyā.
snp3.2:2.1	Namucī karuṇaṁ vācaṁ,
snp3.2:2.2	bhāsamāno upāgami;
snp3.2:2.3	‘Kiso tvamasi dubbaṇṇo,
snp3.2:2.4	santike maraṇaṁ tava.
snp3.2:3.1	Sahassabhāgo maraṇassa,
snp3.2:3.2	ekaṁso tava jīvitaṁ;
snp3.2:3.3	Jīva bho jīvitaṁ seyyo,
snp3.2:3.4	jīvaṁ puññāni kāhasi.
snp3.2:4.1	Carato ca te brahmacariyaṁ,
snp3.2:4.2	Aggihuttañca jūhato;
snp3.2:4.3	Pahūtaṁ cīyate puññaṁ,
snp3.2:4.4	Kiṁ padhānena kāhasi.
snp3.2:5.1	Duggo maggo padhānāya,
snp3.2:5.2	dukkaro durabhisambhavo’”;
snp3.2:5.3	Imā gāthā bhaṇaṁ māro,
snp3.2:5.4	aṭṭhā buddhassa santike.
snp3.2:6.1	Taṁ tathāvādinaṁ māraṁ,
snp3.2:6.2	bhagavā etadabravi;
snp3.2:6.3	“Pamattabandhu pāpima,
snp3.2:6.4	yenatthena idhāgato.
snp3.2:7.1	Aṇumattopi puññena,
snp3.2:7.2	Attho mayhaṁ na vijjati;
snp3.2:7.3	Yesañca attho puññena,
snp3.2:7.4	Te māro vattumarahati.
snp3.2:8.1	Atthi saddhā tathā viriyaṁ,
snp3.2:8.2	paññā ca mama vijjati;
snp3.2:8.3	Evaṁ maṁ pahitattampi,
snp3.2:8.4	kiṁ jīvamanupucchasi.
snp3.2:9.1	Nadīnamapi sotāni,
snp3.2:9.2	ayaṁ vāto visosaye;
snp3.2:9.3	Kiñca me pahitattassa,
snp3.2:9.4	lohitaṁ nupasussaye.
snp3.2:10.1	Lohite sussamānamhi,
snp3.2:10.2	Pittaṁ semhañca sussati;
snp3.2:10.3	Maṁsesu khīyamānesu,
snp3.2:10.4	Bhiyyo cittaṁ pasīdati;
snp3.2:10.5	Bhiyyo sati ca paññā ca,
snp3.2:10.6	Samādhi mama tiṭṭhati.
snp3.2:11.1	Tassa mevaṁ viharato,
snp3.2:11.2	Pattassuttamavedanaṁ;
snp3.2:11.3	Kāmesu nāpekkhate cittaṁ,
snp3.2:11.4	Passa sattassa suddhataṁ.
snp3.2:12.1	Kāmā te paṭhamā senā,
snp3.2:12.2	Dutiyā arati vuccati;
snp3.2:12.3	Tatiyā khuppipāsā te,
snp3.2:12.4	Catutthī taṇhā pavuccati.
snp3.2:13.1	Pañcamaṁ thinamiddhaṁ te,
snp3.2:13.2	Chaṭṭhā bhīrū pavuccati;
snp3.2:13.3	Sattamī vicikicchā te,
snp3.2:13.4	Makkho thambho te aṭṭhamo.
snp3.2:14.1	Lābho siloko sakkāro,
snp3.2:14.2	Micchāladdho ca yo yaso;
snp3.2:14.3	Yo cattānaṁ samukkaṁse,
snp3.2:14.4	Pare ca avajānati.
snp3.2:15.1	Esā namuci te senā,
snp3.2:15.2	Kaṇhassābhippahārinī;
snp3.2:15.3	Na naṁ asūro jināti,
snp3.2:15.4	Jetvā ca labhate sukhaṁ.
snp3.2:16.1	Esa muñjaṁ parihare,
snp3.2:16.2	Dhiratthu mama jīvitaṁ;
snp3.2:16.3	Saṅgāme me mataṁ seyyo,
snp3.2:16.4	Yañce jīve parājito.
snp3.2:17.1	Pagāḷhettha na dissanti,
snp3.2:17.2	Eke samaṇabrāhmaṇā;
snp3.2:17.3	Tañca maggaṁ na jānanti,
snp3.2:17.4	Yena gacchanti subbatā.
snp3.2:18.1	Samantā dhajiniṁ disvā,
snp3.2:18.2	Yuttaṁ māraṁ savāhanaṁ;
snp3.2:18.3	Yuddhāya paccuggacchāmi,
snp3.2:18.4	Mā maṁ ṭhānā acāvayi.
snp3.2:19.1	Yaṁ te taṁ nappasahati,
snp3.2:19.2	Senaṁ loko sadevako;
snp3.2:19.3	Taṁ te paññāya bhecchāmi,
snp3.2:19.4	Āmaṁ pattaṁva asmanā.
snp3.2:20.1	Vasīkaritvā saṅkappaṁ,
snp3.2:20.2	Satiñca sūpatiṭṭhitaṁ;
snp3.2:20.3	Raṭṭhā raṭṭhaṁ vicarissaṁ,
snp3.2:20.4	Sāvake vinayaṁ puthū.
snp3.2:21.1	Te appamattā pahitattā,
snp3.2:21.2	Mama sāsanakārakā;
snp3.2:21.3	Akāmassa te gamissanti,
snp3.2:21.4	Yattha gantvā na socare”.
snp3.2:22.1	“Satta vassāni bhagavantaṁ,
snp3.2:22.2	Anubandhiṁ padāpadaṁ;
snp3.2:22.3	Otāraṁ nādhigacchissaṁ,
snp3.2:22.4	Sambuddhassa satīmato.
snp3.2:23.1	Medavaṇṇaṁva pāsāṇaṁ,
snp3.2:23.2	Vāyaso anupariyagā;
snp3.2:23.3	Apettha muduṁ vindema,
snp3.2:23.4	Api assādanā siyā.
snp3.2:24.1	Aladdhā tattha assādaṁ,
snp3.2:24.2	Vāyasetto apakkami;
snp3.2:24.3	Kākova selamāsajja,
snp3.2:24.4	Nibbijjāpema gotamaṁ”.
snp3.2:25.1	Tassa sokaparetassa,
snp3.2:25.2	Vīṇā kacchā abhassatha;
snp3.2:25.3	Tato so dummano yakkho,
snp3.2:25.4	Tatthevantaradhāyathāti.
snp3.2:25.5	Padhānasuttaṁ dutiyaṁ.
snp3.3:0.1	Sutta Nipāta 3.3
snp3.3:0.2	Subhāsitasutta
snp3.3:1.1	Evaṁ me sutaṁ—
snp3.3:1.2	eka samayaṁ bhagavā sāvatthiyaṁ viharati jetavane anāthapiṇḍikassa ārāme.
snp3.3:1.3	Tatra kho bhagavā bhikkhū āmantesi:
snp3.3:1.4	“bhikkhavo”ti.
snp3.3:1.5	“Bhadante”ti te bhikkhū bhagavato paccassosuṁ.
snp3.3:1.6	Bhagavā etadavoca:
snp3.3:2.1	“Catūhi, bhikkhave, aṅgehi samannāgatā vācā subhāsitā hoti, na dubbhāsitā, anavajjā ca ananuvajjā ca viññūnaṁ.
snp3.3:2.2	Katamehi catūhi?
snp3.3:2.3	Idha, bhikkhave, bhikkhu subhāsitaṁyeva bhāsati no dubbhāsitaṁ, dhammaṁyeva bhāsati no adhammaṁ, piyaṁyeva bhāsati no appiyaṁ, saccaṁyeva bhāsati no alikaṁ.
snp3.3:2.4	Imehi kho, bhikkhave, catūhi aṅgehi samannāgatā vācā subhāsitā hoti, no dubbhāsitā, anavajjā ca ananuvajjā ca viññūnan”ti.
snp3.3:2.5	Idamavoca bhagavā.
snp3.3:2.6	Idaṁ vatvāna sugato, athāparaṁ etadavoca satthā:
snp3.3:3.1	“Subhāsitaṁ uttamamāhu santo,
snp3.3:3.2	Dhammaṁ bhaṇe nādhammaṁ taṁ dutiyaṁ;
snp3.3:3.3	Piyaṁ bhaṇe nāppiyaṁ taṁ tatiyaṁ,
snp3.3:3.4	Saccaṁ bhaṇe nālikaṁ taṁ catutthan”ti.
snp3.3:4.1	Atha kho āyasmā vaṅgīso uṭṭhāyāsanā ekaṁsaṁ cīvaraṁ katvā yena bhagavā tenañjaliṁ paṇāmetvā bhagavantaṁ etadavoca:
snp3.3:4.2	“paṭibhāti maṁ, bhagavā, paṭibhāti maṁ, sugatā”ti.
snp3.3:4.3	“Paṭibhātu taṁ, vaṅgīsā”ti bhagavā avoca.
snp3.3:4.4	Atha kho āyasmā vaṅgīso bhagavantaṁ sammukhā sāruppāhi gāthāhi abhitthavi:
snp3.3:5.1	“Tameva vācaṁ bhāseyya,
snp3.3:5.2	yāyattānaṁ na tāpaye;
snp3.3:5.3	Pare ca na vihiṁseyya,
snp3.3:5.4	sā ve vācā subhāsitā.
snp3.3:6.1	Piyavācameva bhāseyya,
snp3.3:6.2	yā vācā paṭinanditā;
snp3.3:6.3	Yaṁ anādāya pāpāni,
snp3.3:6.4	paresaṁ bhāsate piyaṁ.
snp3.3:7.1	Saccaṁ ve amatā vācā,
snp3.3:7.2	esa dhammo sanantano;
snp3.3:7.3	Sacce atthe ca dhamme ca,
snp3.3:7.4	āhu santo patiṭṭhitā.
snp3.3:8.1	Yaṁ buddho bhāsati vācaṁ,
snp3.3:8.2	Khemaṁ nibbānapattiyā;
snp3.3:8.3	Dukkhassantakiriyāya,
snp3.3:8.4	Sā ve vācānamuttamā”ti.
snp3.3:8.5	Subhāsitasuttaṁ tatiyaṁ.
snp3.4:0.1	Sutta Nipāta 3.4
snp3.4:0.2	Pūraḷāsa (sundarikabhāradvāja) sutta
snp3.4:1.1	Evaṁ me sutaṁ—
snp3.4:1.2	ekaṁ samayaṁ bhagavā kosalesu viharati sundarikāya nadiyā tīre.
snp3.4:1.3	Tena kho pana samayena sundarikabhāradvājo brāhmaṇo sundarikāya nadiyā tīre aggiṁ juhati, aggihuttaṁ paricarati.
snp3.4:1.4	Atha kho sundarikabhāradvājo brāhmaṇo aggiṁ juhitvā aggihuttaṁ paricaritvā uṭṭhāyāsanā samantā catuddisā anuvilokesi:
snp3.4:1.5	“ko nu kho imaṁ habyasesaṁ bhuñjeyyā”ti?
snp3.4:1.6	Addasā kho sundarikabhāradvājo brāhmaṇo bhagavantaṁ avidūre aññatarasmiṁ rukkhamūle sasīsaṁ pārutaṁ nisinnaṁ;
snp3.4:1.7	disvāna vāmena hatthena habyasesaṁ gahetvā dakkhiṇena hatthena kamaṇḍaluṁ gahetvā yena bhagavā tenupasaṅkami.
snp3.4:2.1	Atha kho bhagavā sundarikabhāradvājassa brāhmaṇassa padasaddena sīsaṁ vivari.
snp3.4:2.2	Atha kho sundarikabhāradvājo brāhmaṇo: “muṇḍo ayaṁ bhavaṁ, muṇḍako ayaṁ bhavan”ti tatova puna nivattitukāmo ahosi.
snp3.4:2.3	Atha kho sundarikabhāradvājassa brāhmaṇassa etadahosi:
snp3.4:2.4	“muṇḍāpi hi idhekacce brāhmaṇā bhavanti, yannūnāhaṁ upasaṅkamitvā jātiṁ puccheyyan”ti.
snp3.4:2.5	Atha kho sundarikabhāradvājo brāhmaṇo yena bhagavā tenupasaṅkami; upasaṅkamitvā bhagavantaṁ etadavoca:
snp3.4:2.6	“kiṁjacco bhavan”ti?
snp3.4:3.1	Atha kho bhagavā sundarikabhāradvājaṁ brāhmaṇaṁ gāthāhi ajjhabhāsi:
snp3.4:4.1	“Na brāhmaṇo nomhi na rājaputto,
snp3.4:4.2	Na vessāyano uda koci nomhi;
snp3.4:4.3	Gottaṁ pariññāya puthujjanānaṁ,
snp3.4:4.4	Akiñcano manta carāmi loke.
snp3.4:5.1	Saṅghāṭivāsī agaho carāmi,
snp3.4:5.2	Nivuttakeso abhinibbutatto;
snp3.4:5.3	Alippamāno idha māṇavehi,
snp3.4:5.4	Akallaṁ maṁ brāhmaṇa pucchasi gottapañhaṁ”.
snp3.4:6.1	“Pucchanti ve bho brāhmaṇā brāhmaṇebhi,
snp3.4:6.2	Saha brāhmaṇo no bhavan”ti.
snp3.4:7.1	“Brāhmaṇo hi ce tvaṁ brūsi,
snp3.4:7.2	Mañca brūsi abrāhmaṇaṁ;
snp3.4:7.3	Taṁ taṁ sāvittiṁ pucchāmi,
snp3.4:7.4	Tipadaṁ catuvīsatakkharaṁ”.
snp3.4:8.1	“Kiṁ nissitā isayo manujā,
snp3.4:8.2	Khattiyā brāhmaṇā devatānaṁ;
snp3.4:8.3	Yaññamakappayiṁsu puthū idha loke”.
snp3.4:9.1	“Yadantagū vedagū yaññakāle,
snp3.4:9.2	Yassāhutiṁ labhe tassijjheti brūmi”.
snp3.4:10.1	“Addhā hi tassa hutamijjhe,
snp3.4:10.2	(iti brāhmaṇo)
snp3.4:10.3	Yaṁ tādisaṁ vedagumaddasāma;
snp3.4:10.4	Tumhādisānañhi adassanena,
snp3.4:10.5	Añño jano bhuñjati pūraḷāsaṁ”.
snp3.4:11.1	“Tasmātiha tvaṁ brāhmaṇa atthena,
snp3.4:11.2	Atthiko upasaṅkamma puccha;
snp3.4:11.3	Santaṁ vidhūmaṁ anīghaṁ nirāsaṁ,
snp3.4:11.4	Appevidha abhivinde sumedhaṁ”.
snp3.4:12.1	“Yaññe ratohaṁ bho gotama,
snp3.4:12.2	Yaññaṁ yiṭṭhukāmo nāhaṁ pajānāmi;
snp3.4:12.3	Anusāsatu maṁ bhavaṁ,
snp3.4:12.4	Yattha hutaṁ ijjhate brūhi me taṁ”.
snp3.4:13.1	“Tena hi tvaṁ, brāhmaṇa, odahassu sotaṁ; dhammaṁ te desessāmi—
snp3.4:14.1	Mā jātiṁ pucchī caraṇañca puccha,
snp3.4:14.2	Kaṭṭhā have jāyati jātavedo;
snp3.4:14.3	Nīcākulīnopi munī dhitīmā,
snp3.4:14.4	Ājāniyo hoti hirīnisedho.
snp3.4:15.1	Saccena danto damasā upeto,
snp3.4:15.2	Vedantagū vūsitabrahmacariyo;
snp3.4:15.3	Kālena tamhi habyaṁ pavecche,
snp3.4:15.4	Yo brāhmaṇo puññapekkho yajetha.
snp3.4:16.1	Ye kāme hitvā agahā caranti,
snp3.4:16.2	Susaññatattā tasaraṁva ujjuṁ;
snp3.4:16.3	Kālena tesu habyaṁ pavecche,
snp3.4:16.4	Yo brāhmaṇo puññapekkho yajetha.
snp3.4:17.1	Ye vītarāgā susamāhitindriyā,
snp3.4:17.2	Candova rāhuggahaṇā pamuttā;
snp3.4:17.3	Kālena tesu habyaṁ pavecche,
snp3.4:17.4	Yo brāhmaṇo puññapekkho yajetha.
snp3.4:18.1	Asajjamānā vicaranti loke,
snp3.4:18.2	Sadā satā hitvā mamāyitāni;
snp3.4:18.3	Kālena tesu habyaṁ pavecche,
snp3.4:18.4	Yo brāhmaṇo puññapekkho yajetha.
snp3.4:19.1	Yo kāme hitvā abhibhuyyacārī,
snp3.4:19.2	Yo vedi jātīmaraṇassa antaṁ;
snp3.4:19.3	Parinibbuto udakarahadova sīto,
snp3.4:19.4	Tathāgato arahati pūraḷāsaṁ.
snp3.4:20.1	Samo samehi visamehi dūre,
snp3.4:20.2	Tathāgato hoti anantapañño;
snp3.4:20.3	Anūpalitto idha vā huraṁ vā,
snp3.4:20.4	Tathāgato arahati pūraḷāsaṁ.
snp3.4:21.1	Yamhi na māyā vasati na māno,
snp3.4:21.2	Yo vītalobho amamo nirāso;
snp3.4:21.3	Paṇunnakodho abhinibbutatto,
snp3.4:21.4	Yo brāhmaṇo sokamalaṁ ahāsi;
snp3.4:21.5	Tathāgato arahati pūraḷāsaṁ.
snp3.4:22.1	Nivesanaṁ yo manaso ahāsi,
snp3.4:22.2	Pariggahā yassa na santi keci;
snp3.4:22.3	Anupādiyāno idha vā huraṁ vā,
snp3.4:22.4	Tathāgato arahati pūraḷāsaṁ.
snp3.4:23.1	Samāhito yo udatāri oghaṁ,
snp3.4:23.2	Dhammaṁ caññāsi paramāya diṭṭhiyā;
snp3.4:23.3	Khīṇāsavo antimadehadhārī,
snp3.4:23.4	Tathāgato arahati pūraḷāsaṁ.
snp3.4:24.1	Bhavāsavā yassa vacī kharā ca,
snp3.4:24.2	Vidhūpitā atthagatā na santi;
snp3.4:24.3	Sa vedagū sabbadhi vippamutto,
snp3.4:24.4	Tathāgato arahati pūraḷāsaṁ.
snp3.4:25.1	Saṅgātigo yassa na santi saṅgā,
snp3.4:25.2	Yo mānasattesu amānasatto;
snp3.4:25.3	Dukkhaṁ pariññāya sakhettavatthuṁ,
snp3.4:25.4	Tathāgato arahati pūraḷāsaṁ.
snp3.4:26.1	Āsaṁ anissāya vivekadassī,
snp3.4:26.2	Paravediyaṁ diṭṭhimupātivatto;
snp3.4:26.3	Ārammaṇā yassa na santi keci,
snp3.4:26.4	Tathāgato arahati pūraḷāsaṁ.
snp3.4:27.1	Paroparā yassa samecca dhammā,
snp3.4:27.2	Vidhūpitā atthagatā na santi;
snp3.4:27.3	Santo upādānakhaye vimutto,
snp3.4:27.4	Tathāgato arahati pūraḷāsaṁ.
snp3.4:28.1	Saṁyojanaṁ jātikhayantadassī,
snp3.4:28.2	Yopānudi rāgapathaṁ asesaṁ;
snp3.4:28.3	Suddho nidoso vimalo akāco,
snp3.4:28.4	Tathāgato arahati pūraḷāsaṁ.
snp3.4:29.1	Yo attano attānaṁ nānupassati,
snp3.4:29.2	Samāhito ujjugato ṭhitatto;
snp3.4:29.3	Sa ve anejo akhilo akaṅkho,
snp3.4:29.4	Tathāgato arahati pūraḷāsaṁ.
snp3.4:30.1	Mohantarā yassa na santi keci,
snp3.4:30.2	Sabbesu dhammesu ca ñāṇadassī;
snp3.4:30.3	Sarīrañca antimaṁ dhāreti,
snp3.4:30.4	Patto ca sambodhimanuttaraṁ sivaṁ;
snp3.4:30.5	Ettāvatā yakkhassa suddhi,
snp3.4:30.6	Tathāgato arahati pūraḷāsaṁ”.
snp3.4:31.1	“Hutañca mayhaṁ hutamatthu saccaṁ,
snp3.4:31.2	Yaṁ tādisaṁ vedagunaṁ alatthaṁ;
snp3.4:31.3	Brahmā hi sakkhi paṭigaṇhātu me bhagavā,
snp3.4:31.4	Bhuñjatu me bhagavā pūraḷāsaṁ”.
snp3.4:32.1	“Gāthābhigītaṁ me abhojaneyyaṁ,
snp3.4:32.2	Sampassataṁ brāhmaṇa nesa dhammo;
snp3.4:32.3	Gāthābhigītaṁ panudanti buddhā,
snp3.4:32.4	Dhamme satī brāhmaṇa vuttiresā.
snp3.4:33.1	Aññena ca kevalinaṁ mahesiṁ,
snp3.4:33.2	Khīṇāsavaṁ kukkuccavūpasantaṁ;
snp3.4:33.3	Annena pānena upaṭṭhahassu,
snp3.4:33.4	Khettañhi taṁ puññapekkhassa hoti”.
snp3.4:34.1	“Sādhāhaṁ bhagavā tathā vijaññaṁ,
snp3.4:34.2	Yo dakkhiṇaṁ bhuñjeyya mādisassa;
snp3.4:34.3	Yaṁ yaññakāle pariyesamāno,
snp3.4:34.4	Pappuyya tava sāsanaṁ”.
snp3.4:35.1	“Sārambhā yassa vigatā,
snp3.4:35.2	Cittaṁ yassa anāvilaṁ;
snp3.4:35.3	Vippamutto ca kāmehi,
snp3.4:35.4	Thinaṁ yassa panūditaṁ.
snp3.4:36.1	Sīmantānaṁ vinetāraṁ,
snp3.4:36.2	Jātimaraṇakovidaṁ;
snp3.4:36.3	Muniṁ moneyyasampannaṁ,
snp3.4:36.4	Tādisaṁ yaññamāgataṁ.
snp3.4:37.1	Bhakuṭiṁ vinayitvāna,
snp3.4:37.2	Pañjalikā namassatha;
snp3.4:37.3	Pūjetha annapānena,
snp3.4:37.4	Evaṁ ijjhanti dakkhiṇā”.
snp3.4:38.1	“Buddho bhavaṁ arahati pūraḷāsaṁ,
snp3.4:38.2	Puññakhettamanuttaraṁ;
snp3.4:38.3	Āyāgo sabbalokassa,
snp3.4:38.4	Bhoto dinnaṁ mahapphalan”ti.
snp3.4:39.1	Atha kho sundarikabhāradvājo brāhmaṇo bhagavantaṁ etadavoca:
snp3.4:39.2	“abhikkantaṁ, bho gotama, abhikkantaṁ, bho gotama.
snp3.4:39.3	Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.
snp3.4:39.4	Esāhaṁ bhavantaṁ gotamaṁ saraṇaṁ gacchāmi dhammañca bhikkhusaṅghañca.
snp3.4:39.5	Labheyyāhaṁ bhoto gotamassa santike pabbajjaṁ, labheyyaṁ upasampadan”ti.
snp3.4:39.6	Alattha kho sundarikabhāradvājo brāhmaṇo …pe…
snp3.4:39.7	arahataṁ ahosīti.
snp3.4:39.8	Sundarikabhāradvājasuttaṁ catutthaṁ.
snp3.5:0.1	Sutta Nipāta 3.5
snp3.5:0.2	Māghasutta
snp3.5:1.1	Evaṁ me sutaṁ—
snp3.5:1.2	ekaṁ samayaṁ bhagavā rājagahe viharati gijjhakūṭe pabbate.
snp3.5:1.3	Atha kho māgho māṇavo yena bhagavā tenupasaṅkami; upasaṅkamitvā bhagavatā saddhiṁ sammodi.
snp3.5:1.4	Sammodanīyaṁ kathaṁ sāraṇīyaṁ vītisāretvā ekamantaṁ nisīdi.
snp3.5:1.5	Ekamantaṁ nisinno kho māgho māṇavo bhagavantaṁ etadavoca:
snp3.5:2.1	“Ahañhi, bho gotama, dāyako dānapati vadaññū yācayogo;
snp3.5:2.2	dhammena bhoge pariyesāmi;
snp3.5:2.3	dhammena bhoge pariyesitvā dhammaladdhehi bhogehi dhammādhigatehi ekassapi dadāmi dvinnampi tiṇṇampi catunnampi pañcannampi channampi sattannampi aṭṭhannampi navannampi dasannampi dadāmi, vīsāyapi tiṁsāyapi cattālīsāyapi paññāsāyapi dadāmi, satassapi dadāmi, bhiyyopi dadāmi.
snp3.5:2.4	Kaccāhaṁ, bho gotama, evaṁ dadanto evaṁ yajanto bahuṁ puññaṁ pasavāmī”ti?
snp3.5:3.1	“Taggha tvaṁ, māṇava, evaṁ dadanto evaṁ yajanto bahuṁ puññaṁ pasavasi.
snp3.5:3.2	Yo kho, māṇava, dāyako dānapati vadaññū yācayogo;
snp3.5:3.3	dhammena bhoge pariyesati;
snp3.5:3.4	dhammena bhoge pariyesitvā dhammaladdhehi bhogehi dhammādhigatehi ekassapi dadāti …pe… satassapi dadāti, bhiyyopi dadāti, bahuṁ so puññaṁ pasavatī”ti.
snp3.5:3.5	Atha kho māgho māṇavo bhagavantaṁ gāthāya ajjhabhāsi—
snp3.5:4.1	“Pucchāmahaṁ gotamaṁ vadaññuṁ,
snp3.5:4.2	(iti māgho māṇavo)
snp3.5:4.3	Kāsāyavāsiṁ agahaṁ carantaṁ;
snp3.5:4.4	Yo yācayogo dānapati gahaṭṭho,
snp3.5:4.5	Puññatthiko yajati puññapekkho;
snp3.5:4.6	Dadaṁ paresaṁ idha annapānaṁ,
snp3.5:4.7	Kathaṁ hutaṁ yajamānassa sujjhe”.
snp3.5:5.1	“Yo yācayogo dānapati gahaṭṭho,
snp3.5:5.2	(māghāti bhagavā)
snp3.5:5.3	Puññatthiko yajati puññapekkho;
snp3.5:5.4	Dadaṁ paresaṁ idha annapānaṁ,
snp3.5:5.5	Ārādhaye dakkhiṇeyyebhi tādi”.
snp3.5:6.1	“Yo yācayogo dānapati gahaṭṭho,
snp3.5:6.2	(iti māgho māṇavo)
snp3.5:6.3	Puññatthiko yajati puññapekkho;
snp3.5:6.4	Dadaṁ paresaṁ idha annapānaṁ,
snp3.5:6.5	Akkhāhi me bhagavā dakkhiṇeyye”.
snp3.5:7.1	“Ye ve asattā vicaranti loke,
snp3.5:7.2	Akiñcanā kevalino yatattā;
snp3.5:7.3	Kālena tesu habyaṁ pavecche,
snp3.5:7.4	Yo brāhmaṇo puññapekkho yajetha.
snp3.5:8.1	Ye sabbasaṁyojanabandhanacchidā,
snp3.5:8.2	Dantā vimuttā anīghā nirāsā;
snp3.5:8.3	Kālena tesu habyaṁ pavecche,
snp3.5:8.4	Yo brāhmaṇo puññapekkho yajetha.
snp3.5:9.1	Ye sabbasaṁyojanavippamuttā,
snp3.5:9.2	Dantā vimuttā anīghā nirāsā;
snp3.5:9.3	Kālena tesu habyaṁ pavecche,
snp3.5:9.4	Yo brāhmaṇo puññapekkho yajetha.
snp3.5:10.1	Rāgañca dosañca pahāya mohaṁ,
snp3.5:10.2	Khīṇāsavā vūsitabrahmacariyā;
snp3.5:10.3	Kālena tesu habyaṁ pavecche,
snp3.5:10.4	Yo brāhmaṇo puññapekkho yajetha.
snp3.5:11.1	Yesu na māyā vasati na māno,
snp3.5:11.2	Khīṇāsavā vūsitabrahmacariyā;
snp3.5:11.3	Kālena tesu habyaṁ pavecche,
snp3.5:11.4	Yo brāhmaṇo puññapekkho yajetha.
snp3.5:12.1	Ye vītalobhā amamā nirāsā,
snp3.5:12.2	Khīṇāsavā vūsitabrahmacariyā;
snp3.5:12.3	Kālena tesu habyaṁ pavecche,
snp3.5:12.4	Yo brāhmaṇo puññapekkho yajetha.
snp3.5:13.1	Ye ve na taṇhāsu upātipannā,
snp3.5:13.2	Vitareyya oghaṁ amamā caranti;
snp3.5:13.3	Kālena tesu habyaṁ pavecche,
snp3.5:13.4	Yo brāhmaṇo puññapekkho yajetha.
snp3.5:14.1	Yesaṁ taṇhā natthi kuhiñci loke,
snp3.5:14.2	Bhavābhavāya idha vā huraṁ vā;
snp3.5:14.3	Kālena tesu habyaṁ pavecche,
snp3.5:14.4	Yo brāhmaṇo puññapekkho yajetha.
snp3.5:15.1	Ye kāme hitvā agahā caranti,
snp3.5:15.2	Susaññatattā tasaraṁva ujjuṁ;
snp3.5:15.3	Kālena tesu habyaṁ pavecche,
snp3.5:15.4	Yo brāhmaṇo puññapekkho yajetha.
snp3.5:16.1	Ye vītarāgā susamāhitindriyā,
snp3.5:16.2	Candova rāhuggahaṇā pamuttā;
snp3.5:16.3	Kālena tesu habyaṁ pavecche,
snp3.5:16.4	Yo brāhmaṇo puññapekkho yajetha.
snp3.5:17.1	Samitāvino vītarāgā akopā,
snp3.5:17.2	Yesaṁ gatī natthidha vippahāya;
snp3.5:17.3	Kālena tesu habyaṁ pavecche,
snp3.5:17.4	Yo brāhmaṇo puññapekkho yajetha.
snp3.5:18.1	Jahitvā jātimaraṇaṁ asesaṁ,
snp3.5:18.2	Kathaṅkathiṁ sabbamupātivattā;
snp3.5:18.3	Kālena tesu habyaṁ pavecche,
snp3.5:18.4	Yo brāhmaṇo puññapekkho yajetha.
snp3.5:19.1	Ye attadīpā vicaranti loke,
snp3.5:19.2	Akiñcanā sabbadhi vippamuttā;
snp3.5:19.3	Kālena tesu habyaṁ pavecche,
snp3.5:19.4	Yo brāhmaṇo puññapekkho yajetha.
snp3.5:20.1	Ye hettha jānanti yathā tathā idaṁ,
snp3.5:20.2	Ayamantimā natthi punabbhavoti;
snp3.5:20.3	Kālena tesu habyaṁ pavecche,
snp3.5:20.4	Yo brāhmaṇo puññapekkho yajetha.
snp3.5:21.1	Yo vedagū jhānarato satīmā,
snp3.5:21.2	Sambodhipatto saraṇaṁ bahūnaṁ;
snp3.5:21.3	Kālena tamhi habyaṁ pavecche,
snp3.5:21.4	Yo brāhmaṇo puññapekkho yajetha”.
snp3.5:22.1	“Addhā amoghā mama pucchanā ahu,
snp3.5:22.2	(iti māgho māṇavo)
snp3.5:22.3	Akkhāsi me bhagavā dakkhiṇeyye;
snp3.5:22.4	Tvañhettha jānāsi yathā tathā idaṁ,
snp3.5:22.5	Tathā hi te vidito esa dhammo.
snp3.5:23.1	Yo yācayogo dānapati gahaṭṭho,
snp3.5:23.2	Puññatthiko yajati puññapekkho;
snp3.5:23.3	Dadaṁ paresaṁ idha annapānaṁ,
snp3.5:23.4	Akkhāhi me bhagavā yaññasampadaṁ”.
snp3.5:24.1	“Yajassu yajamāno,
snp3.5:24.2	(māghāti bhagavā)
snp3.5:24.3	Sabbattha ca vippasādehi cittaṁ;
snp3.5:24.4	Ārammaṇaṁ yajamānassa yañño,
snp3.5:24.5	Ettha patiṭṭhāya jahāti dosaṁ.
snp3.5:25.1	So vītarāgo pavineyya dosaṁ,
snp3.5:25.2	Mettaṁ cittaṁ bhāvayamappamāṇaṁ;
snp3.5:25.3	Rattindivaṁ satatamappamatto,
snp3.5:25.4	Sabbā disā pharati appamaññaṁ”.
snp3.5:26.1	“Ko sujjhati muccati bajjhatī ca,
snp3.5:26.2	Kenattanā gacchati brahmalokaṁ;
snp3.5:26.3	Ajānato me muni brūhi puṭṭho,
snp3.5:26.4	Bhagavā hi me sakkhi brahmajjadiṭṭho;
snp3.5:26.5	Tuvañhi no brahmasamosi saccaṁ,
snp3.5:26.6	Kathaṁ upapajjati brahmalokaṁ jutima”.
snp3.5:27.1	“Yo yajati tividhaṁ yaññasampadaṁ,
snp3.5:27.2	(māghāti bhagavā)
snp3.5:27.3	Ārādhaye dakkhiṇeyyebhi tādi;
snp3.5:27.4	Evaṁ yajitvā sammā yācayogo,
snp3.5:27.5	Upapajjati brahmalokanti brūmī”ti.
snp3.5:28.1	Evaṁ vutte, māgho māṇavo bhagavantaṁ etadavoca:
snp3.5:28.2	“abhikkantaṁ, bho gotama …pe…
snp3.5:28.3	ajjatagge pāṇupetaṁ saraṇaṁ gatan”ti.
snp3.5:28.4	Māghasuttaṁ pañcamaṁ.
snp3.6:0.1	Sutta Nipāta 3.6
snp3.6:0.2	Sabhiyasutta
snp3.6:1.1	Evaṁ me sutaṁ—
snp3.6:1.2	ekaṁ samayaṁ bhagavā rājagahe viharati veḷuvane kalandakanivāpe.
snp3.6:1.3	Tena kho pana samayena sabhiyassa paribbājakassa purāṇasālohitāya devatāya pañhā uddiṭṭhā honti:
snp3.6:1.4	“yo te, sabhiya, samaṇo vā brāhmaṇo vā ime pañhe puṭṭho byākaroti tassa santike brahmacariyaṁ careyyāsī”ti.
snp3.6:2.1	Atha kho sabhiyo paribbājako tassā devatāya santike te pañhe uggahetvā ye te samaṇabrāhmaṇā saṅghino gaṇino gaṇācariyā ñātā yasassino titthakarā sādhusammatā bahujanassa, seyyathidaṁ—
snp3.6:2.2	pūraṇo kassapo makkhaligosālo ajito kesakambalo pakudho kaccāno sañcayo belaṭṭhaputto nigaṇṭho nāṭaputto—
snp3.6:2.3	te upasaṅkamitvā te pañhe pucchati.
snp3.6:2.4	Te sabhiyena paribbājakena pañhe puṭṭhā na sampāyanti;
snp3.6:2.5	asampāyantā kopañca dosañca appaccayañca pātukaronti.
snp3.6:2.6	Api ca sabhiyaṁyeva paribbājakaṁ paṭipucchanti.
snp3.6:3.1	Atha kho sabhiyassa paribbājakassa etadahosi:
snp3.6:3.2	“ye kho te bhonto samaṇabrāhmaṇā saṅghino gaṇino gaṇācariyā ñātā yasassino titthakarā sādhusammatā bahujanassa, seyyathidaṁ—
snp3.6:3.3	pūraṇo kassapo …pe… nigaṇṭho nāṭaputto—
snp3.6:3.4	te mayā pañhe puṭṭhā na sampāyanti,
snp3.6:3.5	asampāyantā kopañca dosañca appaccayañca pātukaronti;
snp3.6:3.6	api ca maññevettha paṭipucchanti.
snp3.6:3.7	Yannūnāhaṁ hīnāyāvattitvā kāme paribhuñjeyyan”ti.
snp3.6:4.1	Atha kho sabhiyassa paribbājakassa etadahosi:
snp3.6:4.2	“ayampi kho samaṇo gotamo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa;
snp3.6:4.3	yannūnāhaṁ samaṇaṁ gotamaṁ upasaṅkamitvā ime pañhe puccheyyan”ti.
snp3.6:5.1	Atha kho sabhiyassa paribbājakassa etadahosi:
snp3.6:5.2	“yepi kho te bhonto samaṇabrāhmaṇā jiṇṇā vuḍḍhā mahallakā addhagatā vayoanuppattā therā rattaññū cirapabbajitā saṅghino gaṇino gaṇācariyā ñātā yasassino titthakarā sādhusammatā bahujanassa, seyyathidaṁ—
snp3.6:5.3	pūraṇo kassapo …pe… nigaṇṭho nāṭaputto—
snp3.6:5.4	tepi mayā pañhe puṭṭhā na sampāyanti,
snp3.6:5.5	asampāyantā kopañca dosañca appaccayañca pātukaronti, api ca maññevettha paṭipucchanti;
snp3.6:5.6	kiṁ pana me samaṇo gotamo ime pañhe puṭṭho byākarissati.
snp3.6:5.7	Samaṇo hi gotamo daharo ceva jātiyā, navo ca pabbajjāyā”ti.
snp3.6:6.1	Atha kho sabhiyassa paribbājakassa etadahosi:
snp3.6:6.2	“samaṇo kho daharoti na uññātabbo na paribhotabbo.
snp3.6:6.3	Daharopi cesa samaṇo gotamo mahiddhiko hoti mahānubhāvo, yannūnāhaṁ samaṇaṁ gotamaṁ upasaṅkamitvā ime pañhe puccheyyan”ti.
snp3.6:7.1	Atha kho sabhiyo paribbājako yena rājagahaṁ tena cārikaṁ pakkāmi.
snp3.6:7.2	Anupubbena cārikaṁ caramāno yena rājagahaṁ veḷuvanaṁ kalandakanivāpo, yena bhagavā tenupasaṅkami; upasaṅkamitvā bhagavatā saddhiṁ sammodi.
snp3.6:7.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi.
snp3.6:7.4	Ekamantaṁ nisinno kho sabhiyo paribbājako bhagavantaṁ gāthāya ajjhabhāsi—
snp3.6:8.1	“Kaṅkhī vecikicchī āgamaṁ,
snp3.6:8.2	(iti sabhiyo)
snp3.6:8.3	Pañhe pucchituṁ abhikaṅkhamāno;
snp3.6:8.4	Tesantakaro bhavāhi pañhe me puṭṭho,
snp3.6:8.5	Anupubbaṁ anudhammaṁ byākarohi me”.
snp3.6:9.1	“Dūrato āgatosi sabhiya,
snp3.6:9.2	(iti bhagavā)
snp3.6:9.3	Pañhe pucchituṁ abhikaṅkhamāno;
snp3.6:9.4	Tesantakaro bhavāmi pañhe te puṭṭho,
snp3.6:9.5	Anupubbaṁ anudhammaṁ byākaromi te.
snp3.6:10.1	Puccha maṁ sabhiya pañhaṁ,
snp3.6:10.2	Yaṁ kiñci manasicchasi;
snp3.6:10.3	Tassa tasseva pañhassa,
snp3.6:10.4	Ahaṁ antaṁ karomi te”ti.
snp3.6:11.1	Atha kho sabhiyassa paribbājakassa etadahosi:
snp3.6:11.2	“acchariyaṁ vata bho, abbhutaṁ vata bho.
snp3.6:11.3	Yaṁ vatāhaṁ aññesu samaṇabrāhmaṇesu okāsakammamattampi nālatthaṁ taṁ me idaṁ samaṇena gotamena okāsakammaṁ katan”ti.
snp3.6:11.4	Attamano pamudito udaggo pītisomanassajāto bhagavantaṁ pañhaṁ apucchi—
snp3.6:12.1	“Kiṁpattinamāhu bhikkhunaṁ,
snp3.6:12.2	(iti sabhiyo)
snp3.6:12.3	Sorataṁ kena kathañca dantamāhu;
snp3.6:12.4	Buddhoti kathaṁ pavuccati,
snp3.6:12.5	Puṭṭho me bhagavā byākarohi”.
snp3.6:13.1	“Pajjena katena attanā,
snp3.6:13.2	(sabhiyāti bhagavā)
snp3.6:13.3	Parinibbānagato vitiṇṇakaṅkho;
snp3.6:13.4	Vibhavañca bhavañca vippahāya,
snp3.6:13.5	Vusitavā khīṇapunabbhavo sa bhikkhu.
snp3.6:14.1	Sabbattha upekkhako satimā,
snp3.6:14.2	Na so hiṁsati kañci sabbaloke;
snp3.6:14.3	Tiṇṇo samaṇo anāvilo,
snp3.6:14.4	Ussadā yassa na santi sorato so.
snp3.6:15.1	Yassindriyāni bhāvitāni,
snp3.6:15.2	Ajjhattaṁ bahiddhā ca sabbaloke;
snp3.6:15.3	Nibbijjha imaṁ parañca lokaṁ,
snp3.6:15.4	Kālaṁ kaṅkhati bhāvito sa danto.
snp3.6:16.1	Kappāni viceyya kevalāni,
snp3.6:16.2	Saṁsāraṁ dubhayaṁ cutūpapātaṁ;
snp3.6:16.3	Vigatarajamanaṅgaṇaṁ visuddhaṁ,
snp3.6:16.4	Pattaṁ jātikhayaṁ tamāhu buddhan”ti.
snp3.6:17.1	Atha kho sabhiyo paribbājako bhagavato bhāsitaṁ abhinanditvā anumoditvā attamano pamudito udaggo pītisomanassajāto bhagavantaṁ uttariṁ pañhaṁ apucchi—
snp3.6:18.1	“Kiṁpattinamāhu brāhmaṇaṁ,
snp3.6:18.2	(iti sabhiyo)
snp3.6:18.3	Samaṇaṁ kena kathañca nhātakoti;
snp3.6:18.4	Nāgoti kathaṁ pavuccati,
snp3.6:18.5	Puṭṭho me bhagavā byākarohi”.
snp3.6:19.1	“Bāhitvā sabbapāpakāni,
snp3.6:19.2	(sabhiyāti bhagavā)
snp3.6:19.3	Vimalo sādhusamāhito ṭhitatto;
snp3.6:19.4	Saṁsāramaticca kevalī so,
snp3.6:19.5	Asito tādi pavuccate sa brahmā.
snp3.6:20.1	Samitāvi pahāya puññapāpaṁ,
snp3.6:20.2	Virajo ñatvā imaṁ parañca lokaṁ;
snp3.6:20.3	Jātimaraṇaṁ upātivatto,
snp3.6:20.4	Samaṇo tādi pavuccate tathattā.
snp3.6:21.1	Ninhāya sabbapāpakāni,
snp3.6:21.2	Ajjhattaṁ bahiddhā ca sabbaloke;
snp3.6:21.3	Devamanussesu kappiyesu,
snp3.6:21.4	Kappaṁ neti tamāhu nhātakoti.
snp3.6:22.1	Āguṁ na karoti kiñci loke,
snp3.6:22.2	Sabbasaṁyoge visajja bandhanāni;
snp3.6:22.3	Sabbattha na sajjatī vimutto,
snp3.6:22.4	Nāgo tādi pavuccate tathattā”ti.
snp3.6:23.1	Atha kho sabhiyo paribbājako …pe… bhagavantaṁ uttariṁ pañhaṁ apucchi—
snp3.6:24.1	“Kaṁ khettajinaṁ vadanti buddhā,
snp3.6:24.2	(iti sabhiyo)
snp3.6:24.3	Kusalaṁ kena kathañca paṇḍitoti;
snp3.6:24.4	Muni nāma kathaṁ pavuccati,
snp3.6:24.5	Puṭṭho me bhagavā byākarohi”.
snp3.6:25.1	“Khettāni viceyya kevalāni,
snp3.6:25.2	(sabhiyāti bhagavā)
snp3.6:25.3	Dibbaṁ mānusakañca brahmakhettaṁ;
snp3.6:25.4	Sabbakhettamūlabandhanā pamutto,
snp3.6:25.5	Khettajino tādi pavuccate tathattā.
snp3.6:26.1	Kosāni viceyya kevalāni,
snp3.6:26.2	Dibbaṁ mānusakañca brahmakosaṁ;
snp3.6:26.3	Sabbakosamūlabandhanā pamutto,
snp3.6:26.4	Kusalo tādi pavuccate tathattā.
snp3.6:27.1	Dubhayāni viceyya paṇḍarāni,
snp3.6:27.2	Ajjhattaṁ bahiddhā ca suddhipañño;
snp3.6:27.3	Kaṇhaṁ sukkaṁ upātivatto,
snp3.6:27.4	Paṇḍito tādi pavuccate tathattā.
snp3.6:28.1	Asatañca satañca ñatvā dhammaṁ,
snp3.6:28.2	Ajjhattaṁ bahiddhā ca sabbaloke;
snp3.6:28.3	Devamanussehi pūjanīyo,
snp3.6:28.4	Saṅgaṁ jālamaticca so munī”ti.
snp3.6:29.1	Atha kho sabhiyo paribbājako …pe… bhagavantaṁ uttariṁ pañhaṁ apucchi—
snp3.6:30.1	“Kiṁpattinamāhu vedaguṁ,
snp3.6:30.2	(iti sabhiyo)
snp3.6:30.3	Anuviditaṁ kena kathañca viriyavāti;
snp3.6:30.4	Ājāniyo kinti nāma hoti,
snp3.6:30.5	Puṭṭho me bhagavā byākarohi”.
snp3.6:31.1	“Vedāni viceyya kevalāni,
snp3.6:31.2	(sabhiyāti bhagavā)
snp3.6:31.3	Samaṇānaṁ yānidhatthi brāhmaṇānaṁ;
snp3.6:31.4	Sabbavedanāsu vītarāgo,
snp3.6:31.5	Sabbaṁ vedamaticca vedagū so.
snp3.6:32.1	Anuvicca papañcanāmarūpaṁ,
snp3.6:32.2	Ajjhattaṁ bahiddhā ca rogamūlaṁ;
snp3.6:32.3	Sabbarogamūlabandhanā pamutto,
snp3.6:32.4	Anuvidito tādi pavuccate tathattā.
snp3.6:33.1	Virato idha sabbapāpakehi,
snp3.6:33.2	Nirayadukkhaṁ aticca viriyavāso;
snp3.6:33.3	So vīriyavā padhānavā,
snp3.6:33.4	Dhīro tādi pavuccate tathattā.
snp3.6:34.1	Yassassu lunāni bandhanāni,
snp3.6:34.2	Ajjhattaṁ bahiddhā ca saṅgamūlaṁ;
snp3.6:34.3	Sabbasaṅgamūlabandhanā pamutto,
snp3.6:34.4	Ājāniyo tādi pavuccate tathattā”ti.
snp3.6:35.1	Atha kho sabhiyo paribbājako …pe… bhagavantaṁ uttariṁ pañhaṁ apucchi—
snp3.6:36.1	“Kiṁpattinamāhu sottiyaṁ,
snp3.6:36.2	(iti sabhiyo)
snp3.6:36.3	Ariyaṁ kena kathañca caraṇavāti;
snp3.6:36.4	Paribbājako kinti nāma hoti,
snp3.6:36.5	Puṭṭho me bhagavā byākarohi”.
snp3.6:37.1	“Sutvā sabbadhammaṁ abhiññāya loke,
snp3.6:37.2	(sabhiyāti bhagavā)
snp3.6:37.3	Sāvajjānavajjaṁ yadatthi kiñci;
snp3.6:37.4	Abhibhuṁ akathaṅkathiṁ vimuttaṁ,
snp3.6:37.5	Anighaṁ sabbadhimāhu sottiyoti.
snp3.6:38.1	Chetvā āsavāni ālayāni,
snp3.6:38.2	Vidvā so na upeti gabbhaseyyaṁ;
snp3.6:38.3	Saññaṁ tividhaṁ panujja paṅkaṁ,
snp3.6:38.4	Kappaṁ neti tamāhu ariyoti.
snp3.6:39.1	Yo idha caraṇesu pattipatto,
snp3.6:39.2	Kusalo sabbadā ājānāti dhammaṁ;
snp3.6:39.3	Sabbattha na sajjati vimuttacitto,
snp3.6:39.4	Paṭighā yassa na santi caraṇavā so.
snp3.6:40.1	Dukkhavepakkaṁ yadatthi kammaṁ,
snp3.6:40.2	Uddhamadho tiriyaṁ vāpi majjhe;
snp3.6:40.3	Paribbājayitvā pariññacārī,
snp3.6:40.4	Māyaṁ mānamathopi lobhakodhaṁ;
snp3.6:40.5	Pariyantamakāsi nāmarūpaṁ,
snp3.6:40.6	Taṁ paribbājakamāhu pattipattan”ti.
snp3.6:41.1	Atha kho sabhiyo paribbājako bhagavato bhāsitaṁ abhinanditvā anumoditvā attamano pamudito udaggo pītisomanassajāto uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ sammukhā sāruppāhi gāthāhi abhitthavi:
snp3.6:42.1	“Yāni ca tīṇi yāni ca saṭṭhi,
snp3.6:42.2	Samaṇappavādasitāni bhūripañña;
snp3.6:42.3	Saññakkharasaññanissitāni,
snp3.6:42.4	Osaraṇāni vineyya oghatamagā.
snp3.6:43.1	Antagūsi pāragū dukkhassa,
snp3.6:43.2	Arahāsi sammāsambuddho khīṇāsavaṁ taṁ maññe;
snp3.6:43.3	Jutimā mutimā pahūtapañño,
snp3.6:43.4	Dukkhassantakara atāresi maṁ.
snp3.6:44.1	Yaṁ me kaṅkhitamaññāsi,
snp3.6:44.2	Vicikicchā maṁ tārayi namo te;
snp3.6:44.3	Muni monapathesu pattipatta,
snp3.6:44.4	Akhila ādiccabandhu soratosi.
snp3.6:45.1	Yā me kaṅkhā pure āsi,
snp3.6:45.2	Taṁ me byākāsi cakkhumā;
snp3.6:45.3	Addhā munīsi sambuddho,
snp3.6:45.4	Natthi nīvaraṇā tava.
snp3.6:46.1	Upāyāsā ca te sabbe,
snp3.6:46.2	Viddhastā vinaḷīkatā;
snp3.6:46.3	Sītibhūto damappatto,
snp3.6:46.4	Dhitimā saccanikkamo.
snp3.6:47.1	Tassa te nāganāgassa,
snp3.6:47.2	Mahāvīrassa bhāsato;
snp3.6:47.3	Sabbe devānumodanti,
snp3.6:47.4	Ubho nāradapabbatā.
snp3.6:48.1	Namo te purisājañña,
snp3.6:48.2	Namo te purisuttama;
snp3.6:48.3	Sadevakasmiṁ lokasmiṁ,
snp3.6:48.4	Natthi te paṭipuggalo.
snp3.6:49.1	Tuvaṁ buddho tuvaṁ satthā,
snp3.6:49.2	Tuvaṁ mārābhibhū muni;
snp3.6:49.3	Tuvaṁ anusaye chetvā,
snp3.6:49.4	Tiṇṇo tāresimaṁ pajaṁ.
snp3.6:50.1	Upadhī te samatikkantā,
snp3.6:50.2	Āsavā te padālitā;
snp3.6:50.3	Sīhosi anupādāno,
snp3.6:50.4	Pahīnabhayabheravo.
snp3.6:51.1	Puṇḍarīkaṁ yathā vaggu,
snp3.6:51.2	Toye na upalimpati;
snp3.6:51.3	Evaṁ puññe ca pāpe ca,
snp3.6:51.4	Ubhaye tvaṁ na limpasi;
snp3.6:51.5	Pāde vīra pasārehi,
snp3.6:51.6	Sabhiyo vandati satthuno”ti.
snp3.6:52.1	Atha kho sabhiyo paribbājako bhagavato pādesu sirasā nipatitvā bhagavantaṁ etadavoca:
snp3.6:52.2	“abhikkantaṁ, bhante …pe…
snp3.6:52.3	esāhaṁ bhagavantaṁ saraṇaṁ gacchāmi dhammañca bhikkhusaṅghañca;
snp3.6:52.4	labheyyāhaṁ, bhante, bhagavato santike pabbajjaṁ, labheyyaṁ upasampadan”ti.
snp3.6:53.1	“Yo kho, sabhiya, aññatitthiyapubbo imasmiṁ dhammavinaye ākaṅkhati pabbajjaṁ, ākaṅkhati upasampadaṁ, so cattāro māse parivasati; catunnaṁ māsānaṁ accayena āraddhacittā bhikkhū pabbājenti, upasampādenti bhikkhubhāvāya.
snp3.6:53.2	Api ca mettha puggalavemattatā viditā”ti.
snp3.6:54.1	“Sace, bhante, aññatitthiyapubbā imasmiṁ dhammavinaye ākaṅkhantā pabbajjaṁ, ākaṅkhantā upasampadaṁ cattāro māse parivasanti, catunnaṁ māsānaṁ accayena āraddhacittā bhikkhū pabbājenti, upasampādenti bhikkhubhāvāya, ahaṁ cattāri vassāni parivasissāmi; catunnaṁ vassānaṁ accayena āraddhacittā bhikkhū pabbājentu upasampādentu bhikkhubhāvāyā”ti.
snp3.6:54.2	Alattha kho sabhiyo paribbājako bhagavato santike pabbajjaṁ alattha upasampadaṁ …pe…
snp3.6:54.3	aññataro kho panāyasmā sabhiyo arahataṁ ahosīti.
snp3.6:54.4	Sabhiyasuttaṁ chaṭṭhaṁ.
snp3.7:0.1	Sutta Nipāta 3.7
snp3.7:0.2	Selasutta
snp3.7:1.1	Evaṁ me sutaṁ—
snp3.7:1.2	ekaṁ samayaṁ bhagavā aṅguttarāpesu cārikaṁ caramāno mahatā bhikkhusaṅghena saddhiṁ aḍḍhateḷasehi bhikkhusatehi yena āpaṇaṁ nāma aṅguttarāpānaṁ nigamo tadavasari.
snp3.7:1.3	Assosi kho keṇiyo jaṭilo:
snp3.7:1.4	“samaṇo khalu, bho, gotamo sakyaputto sakyakulā pabbajito aṅguttarāpesu cārikaṁ caramāno mahatā bhikkhusaṅghena saddhiṁ aḍḍhateḷasehi bhikkhusatehi āpaṇaṁ anuppatto.
snp3.7:1.5	Taṁ kho pana bhavantaṁ gotamaṁ evaṁ kalyāṇo kittisaddo abbhuggato:
snp3.7:1.6	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
snp3.7:1.7	So imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti.
snp3.7:1.8	So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
snp3.7:1.9	Sādhu kho pana tathārūpānaṁ arahataṁ dassanaṁ hotī”ti.
snp3.7:2.1	Atha kho keṇiyo jaṭilo yena bhagavā tenupasaṅkami; upasaṅkamitvā bhagavatā saddhiṁ sammodi.
snp3.7:2.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi.
snp3.7:2.3	Ekamantaṁ nisinnaṁ kho keṇiyaṁ jaṭilaṁ bhagavā dhammiyā kathāya sandassesi samādapesi samuttejesi sampahaṁsesi.
snp3.7:2.4	Atha kho keṇiyo jaṭilo bhagavatā dhammiyā kathāya sandassito samādapito samuttejito sampahaṁsito bhagavantaṁ etadavoca:
snp3.7:2.5	“adhivāsetu me bhavaṁ gotamo svātanāya bhattaṁ saddhiṁ bhikkhusaṅghenā”ti.
snp3.7:2.6	Evaṁ vutte, bhagavā keṇiyaṁ jaṭilaṁ etadavoca:
snp3.7:2.7	“mahā kho, keṇiya, bhikkhusaṅgho aḍḍhateḷasāni bhikkhusatāni; tvañca brāhmaṇesu abhippasanno”ti.
snp3.7:3.1	Dutiyampi kho keṇiyo jaṭilo bhagavantaṁ etadavoca:
snp3.7:3.2	“kiñcāpi, bho gotama, mahā bhikkhusaṅgho aḍḍhateḷasāni bhikkhusatāni, ahañca brāhmaṇesu abhippasanno;
snp3.7:3.3	adhivāsetu me bhavaṁ gotamo svātanāya bhattaṁ saddhiṁ bhikkhusaṅghenā”ti.
snp3.7:3.4	Dutiyampi kho bhagavā keṇiyaṁ jaṭilaṁ etadavoca:
snp3.7:3.5	“mahā kho, keṇiya, bhikkhusaṅgho aḍḍhateḷasāni bhikkhusatāni; tvañca brāhmaṇesu abhippasanno”ti.
snp3.7:4.1	Tatiyampi kho keṇiyo jaṭilo bhagavantaṁ etadavoca:
snp3.7:4.2	“kiñcāpi, bho gotama, mahā bhikkhusaṅgho aḍḍhateḷasāni bhikkhusatāni, ahañca brāhmaṇesu abhippasanno,
snp3.7:4.3	adhivāsetu me bhavaṁ gotamo svātanāya bhattaṁ saddhiṁ bhikkhusaṅghenā”ti.
snp3.7:4.4	Adhivāsesi bhagavā tuṇhībhāvena.
snp3.7:4.5	Atha kho keṇiyo jaṭilo bhagavato adhivāsanaṁ viditvā uṭṭhāyāsanā yena sako assamo tenupasaṅkami; upasaṅkamitvā mittāmacce ñātisālohite āmantesi:
snp3.7:4.6	“suṇantu me bhavanto mittāmaccā ñātisālohitā,
snp3.7:4.7	samaṇo me gotamo nimantito svātanāya bhattaṁ saddhiṁ bhikkhusaṅghena,
snp3.7:4.8	yena me kāyaveyyāvaṭikaṁ kareyyāthā”ti.
snp3.7:4.9	“Evaṁ, bho”ti kho keṇiyassa jaṭilassa mittāmaccā ñātisālohitā keṇiyassa jaṭilassa paṭissutvā appekacce uddhanāni khaṇanti, appekacce kaṭṭhāni phālenti, appekacce bhājanāni dhovanti, appekacce udakamaṇikaṁ patiṭṭhāpenti, appekacce āsanāni paññāpenti.
snp3.7:4.10	Keṇiyo pana jaṭilo sāmaṁyeva maṇḍalamāḷaṁ paṭiyādeti.
snp3.7:5.1	Tena kho pana samayena selo brāhmaṇo āpaṇe paṭivasati, tiṇṇaṁ vedānaṁ pāragū sanighaṇḍukeṭubhānaṁ sākkharappabhedānaṁ itihāsapañcamānaṁ padako veyyākaraṇo lokāyatamahāpurisalakkhaṇesu anavayo, tīṇi ca māṇavakasatāni mante vāceti.
snp3.7:6.1	Tena kho pana samayena keṇiyo jaṭilo sele brāhmaṇe abhippasanno hoti.
snp3.7:6.2	Atha kho selo brāhmaṇo tīhi māṇavakasatehi parivuto jaṅghāvihāraṁ anucaṅkamamāno anuvicaramāno yena keṇiyassa jaṭilassa assamo tenupasaṅkami.
snp3.7:6.3	Addasā kho selo brāhmaṇo keṇiyassa jaṭilassa assame appekacce uddhanāni khaṇante …pe… appekacce āsanāni paññapente, keṇiyaṁ pana jaṭilaṁ sāmaṁyeva maṇḍalamāḷaṁ paṭiyādentaṁ.
snp3.7:6.4	Disvāna keṇiyaṁ jaṭilaṁ etadavoca:
snp3.7:6.5	“kiṁ nu kho bhoto keṇiyassa āvāho vā bhavissati, vivāho vā bhavissati, mahāyañño vā paccupaṭṭhito, rājā vā māgadho seniyo bimbisāro nimantito svātanāya saddhiṁ balakāyenā”ti?
snp3.7:7.1	“Na me, bho sela, āvāho vā bhavissati vivāho vā, nāpi rājā māgadho seniyo bimbisāro nimantito svātanāya saddhiṁ balakāyena;
snp3.7:7.2	api ca kho me mahāyañño paccupaṭṭhito.
snp3.7:7.3	Atthi samaṇo gotamo sakyaputto sakyakulā pabbajito aṅguttarāpesu cārikaṁ caramāno mahatā bhikkhusaṅghena saddhiṁ aḍḍhateḷasehi bhikkhusatehi āpaṇaṁ anuppatto.
snp3.7:7.4	Taṁ kho pana bhavantaṁ gotamaṁ …pe…
snp3.7:7.5	buddho bhagavāti.
snp3.7:7.6	So me nimantito svātanāya bhattaṁ saddhiṁ bhikkhusaṅghenā”ti.
snp3.7:7.7	“Buddhoti, bho keṇiya, vadesi”?
snp3.7:7.8	“Buddhoti, bho sela, vadāmi”.
snp3.7:7.9	“Buddhoti, bho keṇiya, vadesi”?
snp3.7:7.10	“Buddhoti, bho sela, vadāmī”ti.
snp3.7:8.1	Atha kho selassa brāhmaṇassa etadahosi:
snp3.7:8.2	“ghosopi kho eso dullabho lokasmiṁ, yadidaṁ buddhoti.
snp3.7:8.3	Āgatāni kho panamhākaṁ mantesu dvattiṁsamahāpurisalakkhaṇāni, yehi samannāgatassa mahāpurisassa dveva gatiyo bhavanti anaññā.
snp3.7:8.4	Sace agāraṁ ajjhāvasati rājā hoti cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato.
snp3.7:8.5	Tassimāni satta ratanāni bhavanti, seyyathidaṁ—
snp3.7:8.6	cakkaratanaṁ, hatthiratanaṁ, assaratanaṁ, maṇiratanaṁ, itthiratanaṁ, gahapatiratanaṁ, pariṇāyakaratanameva sattamaṁ.
snp3.7:8.7	Parosahassaṁ kho panassa puttā bhavanti sūrā vīraṅgarūpā parasenappamaddanā.
snp3.7:8.8	So imaṁ pathaviṁ sāgarapariyantaṁ adaṇḍena asatthena dhammena abhivijiya ajjhāvasati.
snp3.7:8.9	Sace kho pana agārasmā anagāriyaṁ pabbajati, arahaṁ hoti sammāsambuddho loke vivaṭṭacchado.
snp3.7:8.10	Kahaṁ pana, bho keṇiya, etarahi so bhavaṁ gotamo viharati arahaṁ sammāsambuddho”ti?
snp3.7:9.1	Evaṁ vutte, keṇiyo jaṭilo dakkhiṇaṁ bāhuṁ paggahetvā selaṁ brāhmaṇaṁ etadavoca:
snp3.7:9.2	“yenesā, bho sela, nīlavanarājī”ti.
snp3.7:9.3	Atha kho selo brāhmaṇo tīhi māṇavakasatehi saddhiṁ yena bhagavā tenupasaṅkami.
snp3.7:9.4	Atha kho selo brāhmaṇo te māṇavake āmantesi:
snp3.7:9.5	“appasaddā bhonto āgacchantu, pade padaṁ nikkhipantā.
snp3.7:9.6	Durāsadā hi te bhagavanto sīhāva ekacarā.
snp3.7:9.7	Yadā cāhaṁ, bho, samaṇena gotamena saddhiṁ manteyyaṁ, mā me bhonto antarantarā kathaṁ opātetha;
snp3.7:9.8	kathāpariyosānaṁ me bhavanto āgamentū”ti.
snp3.7:10.1	Atha kho selo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
snp3.7:10.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi.
snp3.7:10.3	Ekamantaṁ nisinno kho selo brāhmaṇo bhagavato kāye dvattiṁsamahāpurisalakkhaṇāni samannesi.
snp3.7:10.4	Addasā kho selo brāhmaṇo bhagavato kāye dvattiṁsamahāpurisalakkhaṇāni yebhuyyena ṭhapetvā dve.
snp3.7:10.5	Dvīsu mahāpurisalakkhaṇesu kaṅkhati vicikicchati nādhimuccati na sampasīdati—
snp3.7:10.6	kosohite ca vatthaguyhe pahūtajivhatāya cāti.
snp3.7:11.1	Atha kho bhagavato etadahosi:
snp3.7:11.2	“passati kho me ayaṁ selo brāhmaṇo dvattiṁsamahāpurisalakkhaṇāni yebhuyyena ṭhapetvā dve.
snp3.7:11.3	Dvīsu mahāpurisalakkhaṇesu kaṅkhati vicikicchati nādhimuccati na sampasīdati—
snp3.7:11.4	kosohite ca vatthaguyhe pahūtajivhatāya cā”ti.
snp3.7:11.5	Atha kho bhagavā tathārūpaṁ iddhābhisaṅkhāraṁ abhisaṅkhāsi, yathā addasa selo brāhmaṇo bhagavato kosohitaṁ vatthaguyhaṁ.
snp3.7:11.6	Atha kho bhagavā jivhaṁ ninnāmetvā ubhopi kaṇṇasotāni anumasi paṭimasi, ubhopi nāsikasotāni anumasi paṭimasi, kevalampi nalāṭamaṇḍalaṁ jivhāya chādesi.
snp3.7:12.1	Atha kho selassa brāhmaṇassa etadahosi:
snp3.7:12.2	“samannāgato kho samaṇo gotamo dvattiṁsamahāpurisalakkhaṇehi paripuṇṇehi, no aparipuṇṇehi.
snp3.7:12.3	No ca kho naṁ jānāmi buddho vā no vā.
snp3.7:12.4	Sutaṁ kho pana metaṁ brāhmaṇānaṁ vuḍḍhānaṁ mahallakānaṁ ācariyapācariyānaṁ bhāsamānānaṁ:
snp3.7:12.5	‘ye te bhavanti arahanto sammāsambuddhā, te sake vaṇṇe bhaññamāne attānaṁ pātukarontī’ti.
snp3.7:12.6	Yannūnāhaṁ samaṇaṁ gotamaṁ sammukhā sāruppāhi gāthāhi abhitthaveyyan”ti.
snp3.7:12.7	Atha kho selo brāhmaṇo bhagavantaṁ sammukhā sāruppāhi gāthāhi abhitthavi:
snp3.7:13.1	“Paripuṇṇakāyo suruci,
snp3.7:13.2	Sujāto cārudassano;
snp3.7:13.3	Suvaṇṇavaṇṇosi bhagavā,
snp3.7:13.4	Susukkadāṭhosi vīriyavā.
snp3.7:14.1	Narassa hi sujātassa,
snp3.7:14.2	ye bhavanti viyañjanā;
snp3.7:14.3	Sabbe te tava kāyasmiṁ,
snp3.7:14.4	mahāpurisalakkhaṇā.
snp3.7:15.1	Pasannanetto sumukho,
snp3.7:15.2	brahā uju patāpavā;
snp3.7:15.3	Majjhe samaṇasaṅghassa,
snp3.7:15.4	ādiccova virocasi.
snp3.7:16.1	Kalyāṇadassano bhikkhu,
snp3.7:16.2	kañcanasannibhattaco;
snp3.7:16.3	Kiṁ te samaṇabhāvena,
snp3.7:16.4	evaṁ uttamavaṇṇino.
snp3.7:17.1	Rājā arahasi bhavituṁ,
snp3.7:17.2	cakkavattī rathesabho;
snp3.7:17.3	Cāturanto vijitāvī,
snp3.7:17.4	jambusaṇḍassa issaro.
snp3.7:18.1	Khattiyā bhogirājāno,
snp3.7:18.2	anuyantā bhavantu te;
snp3.7:18.3	Rājābhirājā manujindo,
snp3.7:18.4	rajjaṁ kārehi gotama”.
snp3.7:19.1	“Rājāhamasmi selāti,
snp3.7:19.2	(bhagavā)
snp3.7:19.3	Dhammarājā anuttaro;
snp3.7:19.4	Dhammena cakkaṁ vattemi,
snp3.7:19.5	Cakkaṁ appaṭivattiyaṁ”.
snp3.7:20.1	“Sambuddho paṭijānāsi,
snp3.7:20.2	(iti selo brāhmaṇo)
snp3.7:20.3	Dhammarājā anuttaro;
snp3.7:20.4	‘Dhammena cakkaṁ vattemi’,
snp3.7:20.5	Iti bhāsasi gotama.
snp3.7:21.1	Ko nu senāpati bhoto,
snp3.7:21.2	Sāvako satthuranvayo;
snp3.7:21.3	Ko te tamanuvatteti,
snp3.7:21.4	Dhammacakkaṁ pavattitaṁ”.
snp3.7:22.1	“Mayā pavattitaṁ cakkaṁ,
snp3.7:22.2	(selāti bhagavā)
snp3.7:22.3	Dhammacakkaṁ anuttaraṁ;
snp3.7:22.4	Sāriputto anuvatteti,
snp3.7:22.5	Anujāto tathāgataṁ.
snp3.7:23.1	Abhiññeyyaṁ abhiññātaṁ,
snp3.7:23.2	Bhāvetabbañca bhāvitaṁ;
snp3.7:23.3	Pahātabbaṁ pahīnaṁ me,
snp3.7:23.4	Tasmā buddhosmi brāhmaṇa.
snp3.7:24.1	Vinayassu mayi kaṅkhaṁ,
snp3.7:24.2	Adhimuccassu brāhmaṇa;
snp3.7:24.3	Dullabhaṁ dassanaṁ hoti,
snp3.7:24.4	Sambuddhānaṁ abhiṇhaso.
snp3.7:25.1	Yesaṁ ve dullabho loke,
snp3.7:25.2	Pātubhāvo abhiṇhaso;
snp3.7:25.3	Sohaṁ brāhmaṇa sambuddho,
snp3.7:25.4	Sallakatto anuttaro.
snp3.7:26.1	Brahmabhūto atitulo,
snp3.7:26.2	Mārasenappamaddano;
snp3.7:26.3	Sabbāmitte vasīkatvā,
snp3.7:26.4	Modāmi akutobhayo”.
snp3.7:27.1	“Imaṁ bhavanto nisāmetha,
snp3.7:27.2	Yathā bhāsati cakkhumā;
snp3.7:27.3	Sallakatto mahāvīro,
snp3.7:27.4	Sīhova nadatī vane.
snp3.7:28.1	Brahmabhūtaṁ atitulaṁ,
snp3.7:28.2	Mārasenappamaddanaṁ;
snp3.7:28.3	Ko disvā nappasīdeyya,
snp3.7:28.4	Api kaṇhābhijātiko.
snp3.7:29.1	Yo maṁ icchati anvetu,
snp3.7:29.2	Yo vā nicchati gacchatu;
snp3.7:29.3	Idhāhaṁ pabbajissāmi,
snp3.7:29.4	Varapaññassa santike”.
snp3.7:30.1	“Evañce ruccati bhoto,
snp3.7:30.2	Sammāsambuddhasāsane;
snp3.7:30.3	Mayampi pabbajissāma,
snp3.7:30.4	Varapaññassa santike”.
snp3.7:31.1	Brāhmaṇā tisatā ime,
snp3.7:31.2	Yācanti pañjalīkatā;
snp3.7:31.3	“Brahmacariyaṁ carissāma,
snp3.7:31.4	Bhagavā tava santike”.
snp3.7:32.1	“Svākkhātaṁ brahmacariyaṁ,
snp3.7:32.2	(selāti bhagavā)
snp3.7:32.3	Sandiṭṭhikamakālikaṁ;
snp3.7:32.4	Yattha amoghā pabbajjā,
snp3.7:32.5	Appamattassa sikkhato”ti.
snp3.7:33.1	Alattha kho selo brāhmaṇo sapariso bhagavato santike pabbajjaṁ, alattha upasampadaṁ.
snp3.7:33.2	Atha kho keṇiyo jaṭilo tassā rattiyā accayena sake assame paṇītaṁ khādanīyaṁ bhojanīyaṁ paṭiyādāpetvā bhagavato kālaṁ ārocāpesi:
snp3.7:33.3	“kālo, bho gotama, niṭṭhitaṁ bhattan”ti.
snp3.7:33.4	Atha kho bhagavā pubbaṇhasamayaṁ nivāsetvā pattacīvaramādāya yena keṇiyassa jaṭilassa assamo tenupasaṅkami; upasaṅkamitvā paññatte āsane nisīdi saddhiṁ bhikkhusaṅghena.
snp3.7:34.1	Atha kho keṇiyo jaṭilo buddhappamukhaṁ bhikkhusaṅghaṁ paṇītena khādanīyena bhojanīyena sahatthā santappesi sampavāresi.
snp3.7:34.2	Atha kho keṇiyo jaṭilo bhagavantaṁ bhuttāviṁ onītapattapāṇiṁ aññataraṁ nīcaṁ āsanaṁ gahetvā ekamantaṁ nisīdi.
snp3.7:34.3	Ekamantaṁ nisinnaṁ kho keṇiyaṁ jaṭilaṁ bhagavā imāhi gāthāhi anumodi:
snp3.7:35.1	“Aggihuttamukhā yaññā,
snp3.7:35.2	Sāvittī chandaso mukhaṁ;
snp3.7:35.3	Rājā mukhaṁ manussānaṁ,
snp3.7:35.4	Nadīnaṁ sāgaro mukhaṁ.
snp3.7:36.1	Nakkhattānaṁ mukhaṁ cando,
snp3.7:36.2	Ādicco tapataṁ mukhaṁ;
snp3.7:36.3	Puññaṁ ākaṅkhamānānaṁ,
snp3.7:36.4	Saṅgho ve yajataṁ mukhan”ti.
snp3.7:37.1	Atha kho bhagavā keṇiyaṁ jaṭilaṁ imāhi gāthāhi anumoditvā uṭṭhāyāsanā pakkāmi.
snp3.7:37.2	Atha kho āyasmā selo sapariso eko vūpakaṭṭho appamatto ātāpī pahitatto viharanto nacirasseva …pe…
snp3.7:37.3	aññataro kho panāyasmā selo sapariso arahataṁ ahosi.
snp3.7:38.1	Atha kho āyasmā selo sapariso yena bhagavā tenupasaṅkami, upasaṅkamitvā ekaṁsaṁ cīvaraṁ katvā yena bhagavā tenañjaliṁ paṇāmetvā bhagavantaṁ gāthāya ajjhabhāsi:
snp3.7:39.1	“Yaṁ taṁ saraṇamāgamha,
snp3.7:39.2	Ito aṭṭhami cakkhuma;
snp3.7:39.3	Sattarattena bhagavā,
snp3.7:39.4	Dantamha tava sāsane.
snp3.7:40.1	Tuvaṁ buddho tuvaṁ satthā,
snp3.7:40.2	Tuvaṁ mārābhibhū muni;
snp3.7:40.3	Tuvaṁ anusaye chetvā,
snp3.7:40.4	Tiṇṇo tāresimaṁ pajaṁ.
snp3.7:41.1	Upadhī te samatikkantā,
snp3.7:41.2	Āsavā te padālitā;
snp3.7:41.3	Sīhosi anupādāno,
snp3.7:41.4	Pahīnabhayabheravo.
snp3.7:42.1	Bhikkhavo tisatā ime,
snp3.7:42.2	Tiṭṭhanti pañjalīkatā;
snp3.7:42.3	Pāde vīra pasārehi,
snp3.7:42.4	Nāgā vandantu satthuno”ti.
snp3.7:42.5	Selasuttaṁ sattamaṁ.
snp3.8:0.1	Sutta Nipāta 3.8
snp3.8:0.2	Sallasutta
snp3.8:1.1	Animittamanaññātaṁ,
snp3.8:1.2	maccānaṁ idha jīvitaṁ;
snp3.8:1.3	Kasirañca parittañca,
snp3.8:1.4	tañca dukkhena saṁyutaṁ.
snp3.8:2.1	Na hi so upakkamo atthi,
snp3.8:2.2	yena jātā na miyyare;
snp3.8:2.3	Jarampi patvā maraṇaṁ,
snp3.8:2.4	evaṁdhammā hi pāṇino.
snp3.8:3.1	Phalānamiva pakkānaṁ,
snp3.8:3.2	pāto patanato bhayaṁ;
snp3.8:3.3	Evaṁ jātāna maccānaṁ,
snp3.8:3.4	niccaṁ maraṇato bhayaṁ.
snp3.8:4.1	Yathāpi kumbhakārassa,
snp3.8:4.2	katā mattikabhājanā;
snp3.8:4.3	Sabbe bhedanapariyantā,
snp3.8:4.4	evaṁ maccāna jīvitaṁ.
snp3.8:5.1	Daharā ca mahantā ca,
snp3.8:5.2	ye bālā ye ca paṇḍitā;
snp3.8:5.3	Sabbe maccuvasaṁ yanti,
snp3.8:5.4	sabbe maccuparāyaṇā.
snp3.8:6.1	Tesaṁ maccuparetānaṁ,
snp3.8:6.2	gacchataṁ paralokato;
snp3.8:6.3	Na pitā tāyate puttaṁ,
snp3.8:6.4	ñātī vā pana ñātake.
snp3.8:7.1	Pekkhataṁyeva ñātīnaṁ,
snp3.8:7.2	passa lālapataṁ puthu;
snp3.8:7.3	Ekamekova maccānaṁ,
snp3.8:7.4	govajjho viya nīyati.
snp3.8:8.1	Evamabbhāhato loko,
snp3.8:8.2	Maccunā ca jarāya ca;
snp3.8:8.3	Tasmā dhīrā na socanti,
snp3.8:8.4	Viditvā lokapariyāyaṁ.
snp3.8:9.1	Yassa maggaṁ na jānāsi,
snp3.8:9.2	āgatassa gatassa vā;
snp3.8:9.3	Ubho ante asampassaṁ,
snp3.8:9.4	niratthaṁ paridevasi.
snp3.8:10.1	Paridevayamāno ce,
snp3.8:10.2	Kiñcidatthaṁ udabbahe;
snp3.8:10.3	Sammūḷho hiṁsamattānaṁ,
snp3.8:10.4	Kayirā ce naṁ vicakkhaṇo.
snp3.8:11.1	Na hi ruṇṇena sokena,
snp3.8:11.2	Santiṁ pappoti cetaso;
snp3.8:11.3	Bhiyyassuppajjate dukkhaṁ,
snp3.8:11.4	Sarīraṁ cupahaññati.
snp3.8:12.1	Kiso vivaṇṇo bhavati,
snp3.8:12.2	Hiṁsamattānamattanā;
snp3.8:12.3	Na tena petā pālenti,
snp3.8:12.4	Niratthā paridevanā.
snp3.8:13.1	Sokamappajahaṁ jantu,
snp3.8:13.2	Bhiyyo dukkhaṁ nigacchati;
snp3.8:13.3	Anutthunanto kālaṅkataṁ,
snp3.8:13.4	Sokassa vasamanvagū.
snp3.8:14.1	Aññepi passa gamine,
snp3.8:14.2	Yathākammupage nare;
snp3.8:14.3	Maccuno vasamāgamma,
snp3.8:14.4	Phandantevidha pāṇino.
snp3.8:15.1	Yena yena hi maññanti,
snp3.8:15.2	Tato taṁ hoti aññathā;
snp3.8:15.3	Etādiso vinābhāvo,
snp3.8:15.4	Passa lokassa pariyāyaṁ.
snp3.8:16.1	Api vassasataṁ jīve,
snp3.8:16.2	Bhiyyo vā pana māṇavo;
snp3.8:16.3	Ñātisaṅghā vinā hoti,
snp3.8:16.4	Jahāti idha jīvitaṁ.
snp3.8:17.1	Tasmā arahato sutvā,
snp3.8:17.2	Vineyya paridevitaṁ;
snp3.8:17.3	Petaṁ kālaṅkataṁ disvā,
snp3.8:17.4	Neso labbhā mayā iti.
snp3.8:18.1	Yathā saraṇamādittaṁ,
snp3.8:18.2	Vārinā parinibbaye;
snp3.8:18.3	Evampi dhīro sapañño,
snp3.8:18.4	Paṇḍito kusalo naro;
snp3.8:18.5	Khippamuppatitaṁ sokaṁ,
snp3.8:18.6	Vāto tūlaṁva dhaṁsaye.
snp3.8:19.1	Paridevaṁ pajappañca,
snp3.8:19.2	Domanassañca attano;
snp3.8:19.3	Attano sukhamesāno,
snp3.8:19.4	Abbahe sallamattano.
snp3.8:20.1	Abbūḷhasallo asito,
snp3.8:20.2	santiṁ pappuyya cetaso;
snp3.8:20.3	Sabbasokaṁ atikkanto,
snp3.8:20.4	asoko hoti nibbutoti.
snp3.8:20.5	Sallasuttaṁ aṭṭhamaṁ.
snp3.9:0.1	Sutta Nipāta 3.9
snp3.9:0.2	Vāseṭṭhasutta
snp3.9:1.1	Evaṁ me sutaṁ—
snp3.9:1.2	ekaṁ samayaṁ bhagavā icchānaṅgale viharati icchānaṅgalavanasaṇḍe.
snp3.9:1.3	Tena kho pana samayena sambahulā abhiññātā abhiññātā brāhmaṇamahāsālā icchānaṅgale paṭivasanti, seyyathidaṁ—
snp3.9:1.4	caṅkī brāhmaṇo, tārukkho brāhmaṇo, pokkharasāti brāhmaṇo, jāṇussoṇi brāhmaṇo, todeyyo brāhmaṇo, aññe ca abhiññātā abhiññātā brāhmaṇamahāsālā.
snp3.9:1.5	Atha kho vāseṭṭhabhāradvājānaṁ māṇavānaṁ jaṅghāvihāraṁ anucaṅkamantānaṁ anuvicarantānaṁ ayamantarākathā udapādi:
snp3.9:1.6	“kathaṁ, bho, brāhmaṇo hotī”ti?
snp3.9:2.1	Bhāradvājo māṇavo evamāha:
snp3.9:2.2	“yato kho, bho, ubhato sujāto hoti mātito ca pitito ca saṁsuddhagahaṇiko yāva sattamā pitāmahayugā akkhitto anupakkuṭṭho jātivādena,
snp3.9:2.3	ettāvatā kho bho brāhmaṇo hotī”ti.
snp3.9:3.1	Vāseṭṭho māṇavo evamāha:
snp3.9:3.2	“yato kho, bho, sīlavā ca hoti vatasampanno ca,
snp3.9:3.3	ettāvatā kho, bho, brāhmaṇo hotī”ti.
snp3.9:3.4	Neva kho asakkhi bhāradvājo māṇavo vāseṭṭhaṁ māṇavaṁ saññāpetuṁ, na pana asakkhi vāseṭṭho māṇavo bhāradvājaṁ māṇavaṁ saññāpetuṁ.
snp3.9:4.1	Atha kho vāseṭṭho māṇavo bhāradvājaṁ māṇavaṁ āmantesi:
snp3.9:4.2	“ayaṁ kho, bho bhāradvāja, samaṇo gotamo sakyaputto sakyakulā pabbajito icchānaṅgale viharati icchānaṅgalavanasaṇḍe;
snp3.9:4.3	taṁ kho pana bhavantaṁ gotamaṁ evaṁ kalyāṇo kittisaddo abbhuggato:
snp3.9:4.4	‘itipi …pe… buddho bhagavā’ti.
snp3.9:4.5	Āyāma, bho bhāradvāja, yena samaṇo gotamo tenupasaṅkamissāma; upasaṅkamitvā samaṇaṁ gotamaṁ etamatthaṁ pucchissāma.
snp3.9:4.6	Yathā no samaṇo gotamo byākarissati tathā naṁ dhāressāmā”ti.
snp3.9:4.7	“Evaṁ, bho”ti kho bhāradvājo māṇavo vāseṭṭhassa māṇavassa paccassosi.
snp3.9:5.1	Atha kho vāseṭṭhabhāradvājā māṇavā yena bhagavā tenupasaṅkamiṁsu; upasaṅkamitvā bhagavatā saddhiṁ sammodiṁsu.
snp3.9:5.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu.
snp3.9:5.3	Ekamantaṁ nisinno kho vāseṭṭho māṇavo bhagavantaṁ gāthāhi ajjhabhāsi:
snp3.9:6.1	“Anuññātapaṭiññātā,
snp3.9:6.2	tevijjā mayamasmubho;
snp3.9:6.3	Ahaṁ pokkharasātissa,
snp3.9:6.4	tārukkhassāyaṁ māṇavo.
snp3.9:7.1	Tevijjānaṁ yadakkhātaṁ,
snp3.9:7.2	Tatra kevalinosmase;
snp3.9:7.3	Padakasma veyyākaraṇā,
snp3.9:7.4	Jappe ācariyasādisā.
snp3.9:8.1	Tesaṁ no jātivādasmiṁ,
snp3.9:8.2	vivādo atthi gotama;
snp3.9:8.3	Jātiyā brāhmaṇo hoti,
snp3.9:8.4	bhāradvājo iti bhāsati;
snp3.9:8.5	Ahañca kammunā brūmi,
snp3.9:8.6	evaṁ jānāhi cakkhuma.
snp3.9:9.1	Te na sakkoma saññāpetuṁ,
snp3.9:9.2	aññamaññaṁ mayaṁ ubho;
snp3.9:9.3	Bhavantaṁ puṭṭhumāgamhā,
snp3.9:9.4	sambuddhaṁ iti vissutaṁ.
snp3.9:10.1	Candaṁ yathā khayātītaṁ,
snp3.9:10.2	pecca pañjalikā janā;
snp3.9:10.3	Vandamānā namassanti,
snp3.9:10.4	evaṁ lokasmi gotamaṁ.
snp3.9:11.1	Cakkhuṁ loke samuppannaṁ,
snp3.9:11.2	mayaṁ pucchāma gotamaṁ;
snp3.9:11.3	Jātiyā brāhmaṇo hoti,
snp3.9:11.4	udāhu bhavati kammunā;
snp3.9:11.5	Ajānataṁ no pabrūhi,
snp3.9:11.6	yathā jānemu brāhmaṇaṁ”.
snp3.9:12.1	“Tesaṁ vo ahaṁ byakkhissaṁ,
snp3.9:12.2	(vāseṭṭhāti bhagavā)
snp3.9:12.3	Anupubbaṁ yathātathaṁ;
snp3.9:12.4	Jātivibhaṅgaṁ pāṇānaṁ,
snp3.9:12.5	Aññamaññā hi jātiyo.
snp3.9:13.1	Tiṇarukkhepi jānātha,
snp3.9:13.2	na cāpi paṭijānare;
snp3.9:13.3	Liṅgaṁ jātimayaṁ tesaṁ,
snp3.9:13.4	aññamaññā hi jātiyo.
snp3.9:14.1	Tato kīṭe paṭaṅge ca,
snp3.9:14.2	yāva kunthakipillike;
snp3.9:14.3	Liṅgaṁ jātimayaṁ tesaṁ,
snp3.9:14.4	aññamaññā hi jātiyo.
snp3.9:15.1	Catuppadepi jānātha,
snp3.9:15.2	Khuddake ca mahallake;
snp3.9:15.3	Liṅgaṁ jātimayaṁ tesaṁ,
snp3.9:15.4	Aññamaññā hi jātiyo.
snp3.9:16.1	Pādūdarepi jānātha,
snp3.9:16.2	Urage dīghapiṭṭhike;
snp3.9:16.3	Liṅgaṁ jātimayaṁ tesaṁ,
snp3.9:16.4	Aññamaññā hi jātiyo.
snp3.9:17.1	Tato macchepi jānātha,
snp3.9:17.2	Odake vārigocare;
snp3.9:17.3	Liṅgaṁ jātimayaṁ tesaṁ,
snp3.9:17.4	Aññamaññā hi jātiyo.
snp3.9:18.1	Tato pakkhīpi jānātha,
snp3.9:18.2	Pattayāne vihaṅgame;
snp3.9:18.3	Liṅgaṁ jātimayaṁ tesaṁ,
snp3.9:18.4	Aññamaññā hi jātiyo.
snp3.9:19.1	Yathā etāsu jātīsu,
snp3.9:19.2	Liṅgaṁ jātimayaṁ puthu;
snp3.9:19.3	Evaṁ natthi manussesu,
snp3.9:19.4	Liṅgaṁ jātimayaṁ puthu.
snp3.9:20.1	Na kesehi na sīsena,
snp3.9:20.2	Na kaṇṇehi na akkhibhi;
snp3.9:20.3	Na mukhena na nāsāya,
snp3.9:20.4	Na oṭṭhehi bhamūhi vā.
snp3.9:21.1	Na gīvāya na aṁsehi,
snp3.9:21.2	Na udarena na piṭṭhiyā;
snp3.9:21.3	Na soṇiyā na urasā,
snp3.9:21.4	Na sambādhe na methune.
snp3.9:22.1	Na hatthehi na pādehi,
snp3.9:22.2	Nāṅgulīhi nakhehi vā;
snp3.9:22.3	Na jaṅghāhi na ūrūhi,
snp3.9:22.4	Na vaṇṇena sarena vā;
snp3.9:22.5	Liṅgaṁ jātimayaṁ neva,
snp3.9:22.6	Yathā aññāsu jātisu.
snp3.9:23.1	Paccattañca sarīresu,
snp3.9:23.2	Manussesvetaṁ na vijjati;
snp3.9:23.3	Vokārañca manussesu,
snp3.9:23.4	Samaññāya pavuccati.
snp3.9:24.1	Yo hi koci manussesu,
snp3.9:24.2	Gorakkhaṁ upajīvati;
snp3.9:24.3	Evaṁ vāseṭṭha jānāhi,
snp3.9:24.4	Kassako so na brāhmaṇo.
snp3.9:25.1	Yo hi koci manussesu,
snp3.9:25.2	Puthusippena jīvati;
snp3.9:25.3	Evaṁ vāseṭṭha jānāhi,
snp3.9:25.4	Sippiko so na brāhmaṇo.
snp3.9:26.1	Yo hi koci manussesu,
snp3.9:26.2	Vohāraṁ upajīvati;
snp3.9:26.3	Evaṁ vāseṭṭha jānāhi,
snp3.9:26.4	Vāṇijo so na brāhmaṇo.
snp3.9:27.1	Yo hi koci manussesu,
snp3.9:27.2	Parapessena jīvati;
snp3.9:27.3	Evaṁ vāseṭṭha jānāhi,
snp3.9:27.4	Pessiko so na brāhmaṇo.
snp3.9:28.1	Yo hi koci manussesu,
snp3.9:28.2	Adinnaṁ upajīvati;
snp3.9:28.3	Evaṁ vāseṭṭha jānāhi,
snp3.9:28.4	Coro eso na brāhmaṇo.
snp3.9:29.1	Yo hi koci manussesu,
snp3.9:29.2	Issatthaṁ upajīvati;
snp3.9:29.3	Evaṁ vāseṭṭha jānāhi,
snp3.9:29.4	Yodhājīvo na brāhmaṇo.
snp3.9:30.1	Yo hi koci manussesu,
snp3.9:30.2	Porohiccena jīvati;
snp3.9:30.3	Evaṁ vāseṭṭha jānāhi,
snp3.9:30.4	Yājako eso na brāhmaṇo.
snp3.9:31.1	Yo hi koci manussesu,
snp3.9:31.2	Gāmaṁ raṭṭhañca bhuñjati;
snp3.9:31.3	Evaṁ vāseṭṭha jānāhi,
snp3.9:31.4	Rājā eso na brāhmaṇo.
snp3.9:32.1	Na cāhaṁ brāhmaṇaṁ brūmi,
snp3.9:32.2	Yonijaṁ mattisambhavaṁ;
snp3.9:32.3	Bhovādi nāma so hoti,
snp3.9:32.4	Sace hoti sakiñcano;
snp3.9:32.5	Akiñcanaṁ anādānaṁ,
snp3.9:32.6	Tamahaṁ brūmi brāhmaṇaṁ.
snp3.9:33.1	Sabbasaṁyojanaṁ chetvā,
snp3.9:33.2	Yo ve na paritassati;
snp3.9:33.3	Saṅgātigaṁ visaṁyuttaṁ,
snp3.9:33.4	Tamahaṁ brūmi brāhmaṇaṁ.
snp3.9:34.1	Chetvā naddhiṁ varattañca,
snp3.9:34.2	Sandānaṁ sahanukkamaṁ;
snp3.9:34.3	Ukkhittapalighaṁ buddhaṁ,
snp3.9:34.4	Tamahaṁ brūmi brāhmaṇaṁ.
snp3.9:35.1	Akkosaṁ vadhabandhañca,
snp3.9:35.2	Aduṭṭho yo titikkhati;
snp3.9:35.3	Khantībalaṁ balānīkaṁ,
snp3.9:35.4	Tamahaṁ brūmi brāhmaṇaṁ.
snp3.9:36.1	Akkodhanaṁ vatavantaṁ,
snp3.9:36.2	Sīlavantaṁ anussadaṁ;
snp3.9:36.3	Dantaṁ antimasārīraṁ,
snp3.9:36.4	Tamahaṁ brūmi brāhmaṇaṁ.
snp3.9:37.1	Vāri pokkharapatteva,
snp3.9:37.2	Āraggeriva sāsapo;
snp3.9:37.3	Yo na limpati kāmesu,
snp3.9:37.4	Tamahaṁ brūmi brāhmaṇaṁ.
snp3.9:38.1	Yo dukkhassa pajānāti,
snp3.9:38.2	Idheva khayamattano;
snp3.9:38.3	Pannabhāraṁ visaṁyuttaṁ,
snp3.9:38.4	Tamahaṁ brūmi brāhmaṇaṁ.
snp3.9:39.1	Gambhīrapaññaṁ medhāviṁ,
snp3.9:39.2	Maggāmaggassa kovidaṁ;
snp3.9:39.3	Uttamatthamanuppattaṁ,
snp3.9:39.4	Tamahaṁ brūmi brāhmaṇaṁ.
snp3.9:40.1	Asaṁsaṭṭhaṁ gahaṭṭhehi,
snp3.9:40.2	Anāgārehi cūbhayaṁ;
snp3.9:40.3	Anokasārimappicchaṁ,
snp3.9:40.4	Tamahaṁ brūmi brāhmaṇaṁ.
snp3.9:41.1	Nidhāya daṇḍaṁ bhūtesu,
snp3.9:41.2	Tasesu thāvaresu ca;
snp3.9:41.3	Yo na hanti na ghāteti,
snp3.9:41.4	Tamahaṁ brūmi brāhmaṇaṁ.
snp3.9:42.1	Aviruddhaṁ viruddhesu,
snp3.9:42.2	Attadaṇḍesu nibbutaṁ;
snp3.9:42.3	Sādānesu anādānaṁ,
snp3.9:42.4	Tamahaṁ brūmi brāhmaṇaṁ.
snp3.9:43.1	Yassa rāgo ca doso ca,
snp3.9:43.2	Māno makkho ca pātito;
snp3.9:43.3	Sāsaporiva āraggā,
snp3.9:43.4	Tamahaṁ brūmi brāhmaṇaṁ.
snp3.9:44.1	Akakkasaṁ viññāpaniṁ,
snp3.9:44.2	Giraṁ saccamudīraye;
snp3.9:44.3	Yāya nābhisaje kañci,
snp3.9:44.4	Tamahaṁ brūmi brāhmaṇaṁ.
snp3.9:45.1	Yodha dīghaṁ va rassaṁ vā,
snp3.9:45.2	Aṇuṁ thūlaṁ subhāsubhaṁ;
snp3.9:45.3	Loke adinnaṁ nādiyati,
snp3.9:45.4	Tamahaṁ brūmi brāhmaṇaṁ.
snp3.9:46.1	Āsā yassa na vijjanti,
snp3.9:46.2	Asmiṁ loke paramhi ca;
snp3.9:46.3	Nirāsāsaṁ visaṁyuttaṁ,
snp3.9:46.4	Tamahaṁ brūmi brāhmaṇaṁ.
snp3.9:47.1	Yassālayā na vijjanti,
snp3.9:47.2	Aññāya akathaṅkathī;
snp3.9:47.3	Amatogadhamanuppattaṁ,
snp3.9:47.4	Tamahaṁ brūmi brāhmaṇaṁ.
snp3.9:48.1	Yodha puññañca pāpañca,
snp3.9:48.2	Ubho saṅgamupaccagā;
snp3.9:48.3	Asokaṁ virajaṁ suddhaṁ,
snp3.9:48.4	Tamahaṁ brūmi brāhmaṇaṁ.
snp3.9:49.1	Candaṁva vimalaṁ suddhaṁ,
snp3.9:49.2	Vippasannamanāvilaṁ;
snp3.9:49.3	Nandībhavaparikkhīṇaṁ,
snp3.9:49.4	Tamahaṁ brūmi brāhmaṇaṁ.
snp3.9:50.1	Yomaṁ palipathaṁ duggaṁ,
snp3.9:50.2	Saṁsāraṁ mohamaccagā;
snp3.9:50.3	Tiṇṇo pāraṅgato jhāyī,
snp3.9:50.4	Anejo akathaṅkathī;
snp3.9:50.5	Anupādāya nibbuto,
snp3.9:50.6	Tamahaṁ brūmi brāhmaṇaṁ.
snp3.9:51.1	Yodha kāme pahantvāna,
snp3.9:51.2	Anāgāro paribbaje;
snp3.9:51.3	Kāmabhavaparikkhīṇaṁ,
snp3.9:51.4	Tamahaṁ brūmi brāhmaṇaṁ.
snp3.9:52.1	Yodha taṇhaṁ pahantvāna,
snp3.9:52.2	Anāgāro paribbaje;
snp3.9:52.3	Taṇhābhavaparikkhīṇaṁ,
snp3.9:52.4	Tamahaṁ brūmi brāhmaṇaṁ.
snp3.9:53.1	Hitvā mānusakaṁ yogaṁ,
snp3.9:53.2	Dibbaṁ yogaṁ upaccagā;
snp3.9:53.3	Sabbayogavisaṁyuttaṁ,
snp3.9:53.4	Tamahaṁ brūmi brāhmaṇaṁ.
snp3.9:54.1	Hitvā ratiñca aratiṁ,
snp3.9:54.2	Sītibhūtaṁ nirūpadhiṁ;
snp3.9:54.3	Sabbalokābhibhuṁ vīraṁ,
snp3.9:54.4	Tamahaṁ brūmi brāhmaṇaṁ.
snp3.9:55.1	Cutiṁ yo vedi sattānaṁ,
snp3.9:55.2	Upapattiñca sabbaso;
snp3.9:55.3	Asattaṁ sugataṁ buddhaṁ,
snp3.9:55.4	Tamahaṁ brūmi brāhmaṇaṁ.
snp3.9:56.1	Yassa gatiṁ na jānanti,
snp3.9:56.2	Devā gandhabbamānusā;
snp3.9:56.3	Khīṇāsavaṁ arahantaṁ,
snp3.9:56.4	Tamahaṁ brūmi brāhmaṇaṁ.
snp3.9:57.1	Yassa pure ca pacchā ca,
snp3.9:57.2	Majjhe ca natthi kiñcanaṁ;
snp3.9:57.3	Akiñcanaṁ anādānaṁ,
snp3.9:57.4	Tamahaṁ brūmi brāhmaṇaṁ.
snp3.9:58.1	Usabhaṁ pavaraṁ vīraṁ,
snp3.9:58.2	Mahesiṁ vijitāvinaṁ;
snp3.9:58.3	Anejaṁ nhātakaṁ buddhaṁ,
snp3.9:58.4	Tamahaṁ brūmi brāhmaṇaṁ.
snp3.9:59.1	Pubbenivāsaṁ yo vedi,
snp3.9:59.2	Saggāpāyañca passati;
snp3.9:59.3	Atho jātikkhayaṁ patto,
snp3.9:59.4	Tamahaṁ brūmi brāhmaṇaṁ.
snp3.9:60.1	Samaññā hesā lokasmiṁ,
snp3.9:60.2	Nāmagottaṁ pakappitaṁ;
snp3.9:60.3	Sammuccā samudāgataṁ,
snp3.9:60.4	Tattha tattha pakappitaṁ.
snp3.9:61.1	Dīgharattamanusayitaṁ,
snp3.9:61.2	Diṭṭhigatamajānataṁ;
snp3.9:61.3	Ajānantā no pabruvanti,
snp3.9:61.4	Jātiyā hoti brāhmaṇo.
snp3.9:62.1	Na jaccā brāhmaṇo hoti,
snp3.9:62.2	Na jaccā hoti abrāhmaṇo;
snp3.9:62.3	Kammunā brāhmaṇo hoti,
snp3.9:62.4	Kammunā hoti abrāhmaṇo.
snp3.9:63.1	Kassako kammunā hoti,
snp3.9:63.2	Sippiko hoti kammunā;
snp3.9:63.3	Vāṇijo kammunā hoti,
snp3.9:63.4	Pessiko hoti kammunā.
snp3.9:64.1	Coropi kammunā hoti,
snp3.9:64.2	Yodhājīvopi kammunā;
snp3.9:64.3	Yājako kammunā hoti,
snp3.9:64.4	Rājāpi hoti kammunā.
snp3.9:65.1	Evametaṁ yathābhūtaṁ,
snp3.9:65.2	Kammaṁ passanti paṇḍitā;
snp3.9:65.3	Paṭiccasamuppādadassā,
snp3.9:65.4	Kammavipākakovidā.
snp3.9:66.1	Kammunā vattati loko,
snp3.9:66.2	Kammunā vattati pajā;
snp3.9:66.3	Kammanibandhanā sattā,
snp3.9:66.4	Rathassāṇīva yāyato.
snp3.9:67.1	Tapena brahmacariyena,
snp3.9:67.2	Saṁyamena damena ca;
snp3.9:67.3	Etena brāhmaṇo hoti,
snp3.9:67.4	Etaṁ brāhmaṇamuttamaṁ.
snp3.9:68.1	Tīhi vijjāhi sampanno,
snp3.9:68.2	santo khīṇapunabbhavo;
snp3.9:68.3	Evaṁ vāseṭṭha jānāhi,
snp3.9:68.4	brahmā sakko vijānatan”ti.
snp3.9:69.1	Evaṁ vutte, vāseṭṭhabhāradvājā māṇavā bhagavantaṁ etadavocuṁ:
snp3.9:69.2	“abhikkantaṁ, bho gotama …pe…
snp3.9:69.3	upāsake no bhavaṁ gotamo dhāretu ajjatagge pāṇupete saraṇaṁ gate”ti.
snp3.9:69.4	Vāseṭṭhasuttaṁ navamaṁ.
snp3.10:0.1	Sutta Nipāta 3.10
snp3.10:0.2	Kokālikasutta
snp3.10:1.1	Evaṁ me sutaṁ—
snp3.10:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
snp3.10:1.3	Atha kho kokāliko bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho kokāliko bhikkhu bhagavantaṁ etadavoca:
snp3.10:1.4	“pāpicchā, bhante, sāriputtamoggallānā, pāpikānaṁ icchānaṁ vasaṁ gatā”ti.
snp3.10:2.1	Evaṁ vutte, bhagavā kokālikaṁ bhikkhuṁ etadavoca:
snp3.10:2.2	“mā hevaṁ, kokālika, mā hevaṁ, kokālika.
snp3.10:2.3	Pasādehi, kokālika, sāriputtamoggallānesu cittaṁ.
snp3.10:2.4	Pesalā sāriputtamoggallānā”ti.
snp3.10:3.1	Dutiyampi kho …pe…
snp3.10:3.2	tatiyampi kho kokāliko bhikkhu bhagavantaṁ etadavoca:
snp3.10:3.3	“kiñcāpi me, bhante, bhagavā saddhāyiko paccayiko, atha kho pāpicchāva sāriputtamoggallānā, pāpikānaṁ icchānaṁ vasaṁ gatā”ti.
snp3.10:3.4	Tatiyampi kho bhagavā kokālikaṁ bhikkhuṁ etadavoca:
snp3.10:3.5	“mā hevaṁ, kokālika, mā hevaṁ, kokālika.
snp3.10:3.6	Pasādehi, kokālika, sāriputtamoggallānesu cittaṁ.
snp3.10:3.7	Pesalā sāriputtamoggallānā”ti.
snp3.10:4.1	Atha kho kokāliko bhikkhu uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
snp3.10:4.2	Acirappakkantassa ca kokālikassa bhikkhuno sāsapamattīhi piḷakāhi sabbo kāyo phuṭo ahosi;
snp3.10:4.3	sāsapamattiyo hutvā muggamattiyo ahesuṁ; muggamattiyo hutvā kaḷāyamattiyo ahesuṁ; kaḷāyamattiyo hutvā kolaṭṭhimattiyo ahesuṁ; kolaṭṭhimattiyo hutvā kolamattiyo ahesuṁ; kolamattiyo hutvā āmalakamattiyo ahesuṁ; āmalakamattiyo hutvā beḷuvasalāṭukamattiyo ahesuṁ; beḷuvasalāṭukamattiyo hutvā billamattiyo ahesuṁ; billamattiyo hutvā pabhijjiṁsu; pubbañca lohitañca pagghariṁsu.
snp3.10:4.4	Atha kho kokāliko bhikkhu tenevābādhena kālamakāsi.
snp3.10:4.5	Kālaṅkato ca kokāliko bhikkhu padumaṁ nirayaṁ upapajji sāriputtamoggallānesu cittaṁ āghātetvā.
snp3.10:5.1	Atha kho brahmā sahampati abhikkantāya rattiyā abhikkantavaṇṇo kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho brahmā sahampati bhagavantaṁ etadavoca:
snp3.10:5.2	“kokāliko, bhante, bhikkhu kālaṅkato;
snp3.10:5.3	kālaṅkato ca, bhante, kokāliko bhikkhu padumaṁ nirayaṁ upapanno sāriputtamoggallānesu cittaṁ āghātetvā”ti.
snp3.10:5.4	Idamavoca brahmā sahampati;
snp3.10:5.5	idaṁ vatvā bhagavantaṁ abhivādetvā padakkhiṇaṁ katvā tatthevantaradhāyi.
snp3.10:6.1	Atha kho bhagavā tassā rattiyā accayena bhikkhū āmantesi:
snp3.10:6.2	“imaṁ, bhikkhave, rattiṁ brahmā sahampati abhikkantāya rattiyā …pe…
snp3.10:6.3	idamavoca, bhikkhave, brahmā sahampati, idaṁ vatvā maṁ padakkhiṇaṁ katvā tatthevantaradhāyī”ti.
snp3.10:7.1	Evaṁ vutte, aññataro bhikkhu bhagavantaṁ etadavoca:
snp3.10:7.2	“kīvadīghaṁ nu kho, bhante, padume niraye āyuppamāṇan”ti?
snp3.10:7.3	“Dīghaṁ kho, bhikkhu, padume niraye āyuppamāṇaṁ;
snp3.10:7.4	taṁ na sukaraṁ saṅkhātuṁ ettakāni vassāni iti vā ettakāni vassasatāni iti vā ettakāni vassasahassāni iti vā ettakāni vassasatasahassāni iti vā”ti.
snp3.10:7.5	“Sakkā pana, bhante, upamā kātun”ti?
snp3.10:7.6	“Sakkā, bhikkhū”ti bhagavā avoca:
snp3.10:8.1	“Seyyathāpi, bhikkhu, vīsatikhāriko kosalako tilavāho; tato puriso vassasatassa vassasatassa accayena ekamekaṁ tilaṁ uddhareyya.
snp3.10:8.2	Khippataraṁ kho so bhikkhu vīsatikhāriko kosalako tilavāho iminā upakkamena parikkhayaṁ pariyādānaṁ gaccheyya, na tveva eko abbudo nirayo.
snp3.10:8.3	Seyyathāpi, bhikkhu, vīsati abbudā nirayā evameko nirabbudo nirayo.
snp3.10:8.4	Seyyathāpi, bhikkhu, vīsati nirabbudā nirayā evameko ababo nirayo.
snp3.10:8.5	Seyyathāpi, bhikkhu, vīsati ababā nirayā evameko aṭaṭo nirayo.
snp3.10:8.6	Seyyathāpi, bhikkhu, vīsati aṭaṭā nirayā evameko ahaho nirayo.
snp3.10:8.7	Seyyathāpi, bhikkhu, vīsati ahahā nirayā evameko kumudo nirayo.
snp3.10:8.8	Seyyathāpi, bhikkhu, vīsati kumudā nirayā evameko sogandhiko nirayo.
snp3.10:8.9	Seyyathāpi, bhikkhu, vīsati sogandhikā nirayā evameko uppalako nirayo.
snp3.10:8.10	Seyyathāpi, bhikkhu, vīsati uppalakā nirayā evameko puṇḍarīko nirayo.
snp3.10:8.11	Seyyathāpi, bhikkhu, vīsati puṇḍarīkā nirayā evameko padumo nirayo.
snp3.10:8.12	Padumaṁ kho pana bhikkhu nirayaṁ kokāliko bhikkhu upapanno sāriputtamoggallānesu cittaṁ āghātetvā”ti.
snp3.10:8.13	Idamavoca bhagavā.
snp3.10:8.14	Idaṁ vatvāna sugato athāparaṁ etadavoca satthā:
snp3.10:9.1	“Purisassa hi jātassa,
snp3.10:9.2	kuṭhārī jāyate mukhe;
snp3.10:9.3	Yāya chindati attānaṁ,
snp3.10:9.4	bālo dubbhāsitaṁ bhaṇaṁ.
snp3.10:10.1	Yo nindiyaṁ pasaṁsati,
snp3.10:10.2	Taṁ vā nindati yo pasaṁsiyo;
snp3.10:10.3	Vicināti mukhena so kaliṁ,
snp3.10:10.4	Kalinā tena sukhaṁ na vindati.
snp3.10:11.1	Appamatto ayaṁ kali,
snp3.10:11.2	Yo akkhesu dhanaparājayo;
snp3.10:11.3	Sabbassāpi sahāpi attanā,
snp3.10:11.4	Ayameva mahattaro kali;
snp3.10:11.5	Yo sugatesu manaṁ padosaye.
snp3.10:12.1	Sataṁ sahassānaṁ nirabbudānaṁ,
snp3.10:12.2	Chattiṁsati pañca ca abbudāni;
snp3.10:12.3	Yamariyagarahī nirayaṁ upeti,
snp3.10:12.4	Vācaṁ manañca paṇidhāya pāpakaṁ.
snp3.10:13.1	Abhūtavādī nirayaṁ upeti,
snp3.10:13.2	Yo vāpi katvā na karomicāha;
snp3.10:13.3	Ubhopi te pecca samā bhavanti,
snp3.10:13.4	Nihīnakammā manujā parattha.
snp3.10:14.1	Yo appaduṭṭhassa narassa dussati,
snp3.10:14.2	Suddhassa posassa anaṅgaṇassa;
snp3.10:14.3	Tameva bālaṁ pacceti pāpaṁ,
snp3.10:14.4	Sukhumo rajo paṭivātaṁva khitto.
snp3.10:15.1	Yo lobhaguṇe anuyutto,
snp3.10:15.2	So vacasā paribhāsati aññe;
snp3.10:15.3	Asaddho kadariyo avadaññū,
snp3.10:15.4	Macchari pesuṇiyaṁ anuyutto.
snp3.10:16.1	Mukhadugga vibhūta anariya,
snp3.10:16.2	Bhūnahu pāpaka dukkaṭakāri;
snp3.10:16.3	Purisanta kalī avajāta,
snp3.10:16.4	Mā bahubhāṇidha nerayikosi.
snp3.10:17.1	Rajamākirasī ahitāya,
snp3.10:17.2	Sante garahasi kibbisakārī;
snp3.10:17.3	Bahūni duccaritāni caritvā,
snp3.10:17.4	Gacchasi kho papataṁ cirarattaṁ.
snp3.10:18.1	Na hi nassati kassaci kammaṁ,
snp3.10:18.2	Eti hataṁ labhateva suvāmi;
snp3.10:18.3	Dukkhaṁ mando paraloke,
snp3.10:18.4	Attani passati kibbisakārī.
snp3.10:19.1	Ayosaṅkusamāhataṭṭhānaṁ,
snp3.10:19.2	Tiṇhadhāramayasūlamupeti;
snp3.10:19.3	Atha tattaayoguḷasannibhaṁ,
snp3.10:19.4	Bhojanamatthi tathā patirūpaṁ.
snp3.10:20.1	Na hi vaggu vadanti vadantā,
snp3.10:20.2	Nābhijavanti na tāṇamupenti;
snp3.10:20.3	Aṅgāre santhate sayanti,
snp3.10:20.4	Ginisampajjalitaṁ pavisanti.
snp3.10:21.1	Jālena ca onahiyāna,
snp3.10:21.2	Tattha hananti ayomayakuṭebhi;
snp3.10:21.3	Andhaṁva timisamāyanti,
snp3.10:21.4	Taṁ vitatañhi yathā mahikāyo.
snp3.10:22.1	Atha lohamayaṁ pana kumbhiṁ,
snp3.10:22.2	Ginisampajjalitaṁ pavisanti;
snp3.10:22.3	Paccanti hi tāsu cirarattaṁ,
snp3.10:22.4	Agginisamāsu samuppilavāte.
snp3.10:23.1	Atha pubbalohitamisse,
snp3.10:23.2	Tattha kiṁ paccati kibbisakārī;
snp3.10:23.3	Yaṁ yaṁ disakaṁ adhiseti,
snp3.10:23.4	Tattha kilissati samphusamāno.
snp3.10:24.1	Puḷavāvasathe salilasmiṁ,
snp3.10:24.2	Tattha kiṁ paccati kibbisakārī;
snp3.10:24.3	Gantuṁ na hi tīramapatthi,
snp3.10:24.4	Sabbasamā hi samantakapallā.
snp3.10:25.1	Asipattavanaṁ pana tiṇhaṁ,
snp3.10:25.2	Taṁ pavisanti samucchidagattā;
snp3.10:25.3	Jivhaṁ balisena gahetvā,
snp3.10:25.4	Ārajayārajayā vihananti.
snp3.10:26.1	Atha vetaraṇiṁ pana duggaṁ,
snp3.10:26.2	Tiṇhadhārakhuradhāramupenti;
snp3.10:26.3	Tattha mandā papatanti,
snp3.10:26.4	Pāpakarā pāpāni karitvā.
snp3.10:27.1	Khādanti hi tattha rudante,
snp3.10:27.2	Sāmā sabalā kākolagaṇā ca;
snp3.10:27.3	Soṇā siṅgālā paṭigiddhā,
snp3.10:27.4	Kulalā vāyasā ca vitudanti.
snp3.10:28.1	Kicchā vatayaṁ idha vutti,
snp3.10:28.2	Yaṁ jano phusati kibbisakārī;
snp3.10:28.3	Tasmā idha jīvitasese,
snp3.10:28.4	Kiccakaro siyā naro na cappamajje.
snp3.10:29.1	Te gaṇitā vidūhi tilavāhā,
snp3.10:29.2	Ye padume niraye upanītā;
snp3.10:29.3	Nahutāni hi koṭiyo pañca bhavanti,
snp3.10:29.4	Dvādasa koṭisatāni punaññā.
snp3.10:30.1	Yāva dukhā nirayā idha vuttā,
snp3.10:30.2	Tatthapi tāva ciraṁ vasitabbaṁ;
snp3.10:30.3	Tasmā sucipesalasādhuguṇesu,
snp3.10:30.4	Vācaṁ manaṁ satataṁ parirakkhe”ti.
snp3.10:30.5	Kokālikasuttaṁ dasamaṁ.
snp3.11:0.1	Sutta Nipāta 3.11
snp3.11:0.2	Nālakasutta
snp3.11:1.1	Ānandajāte tidasagaṇe patīte,
snp3.11:1.2	Sakkañca indaṁ sucivasane ca deve;
snp3.11:1.3	Dussaṁ gahetvā atiriva thomayante,
snp3.11:1.4	Asito isi addasa divāvihāre.
snp3.11:2.1	Disvāna deve muditamane udagge,
snp3.11:2.2	Cittiṁ karitvāna idamavoca tattha;
snp3.11:2.3	“Kiṁ devasaṅgho atiriva kalyarūpo,
snp3.11:2.4	Dussaṁ gahetvā ramayatha kiṁ paṭicca.
snp3.11:3.1	Yadāpi āsī asurehi saṅgamo,
snp3.11:3.2	Jayo surānaṁ asurā parājitā;
snp3.11:3.3	Tadāpi netādiso lomahaṁsano,
snp3.11:3.4	Kimabbhutaṁ daṭṭhu marū pamoditā.
snp3.11:4.1	Seḷenti gāyanti ca vādayanti ca,
snp3.11:4.2	Bhujāni phoṭenti ca naccayanti ca;
snp3.11:4.3	Pucchāmi vohaṁ merumuddhavāsine,
snp3.11:4.4	Dhunātha me saṁsayaṁ khippa mārisā”.
snp3.11:5.1	“So bodhisatto ratanavaro atulyo,
snp3.11:5.2	Manussaloke hitasukhatthāya jāto;
snp3.11:5.3	Sakyāna gāme janapade lumbineyye,
snp3.11:5.4	Tenamha tuṭṭhā atiriva kalyarūpā.
snp3.11:6.1	So sabbasattuttamo aggapuggalo,
snp3.11:6.2	Narāsabho sabbapajānamuttamo;
snp3.11:6.3	Vattessati cakkamisivhaye vane,
snp3.11:6.4	Nadaṁva sīho balavā migābhibhū”.
snp3.11:7.1	Taṁ saddaṁ sutvā turitamavasarī so,
snp3.11:7.2	Suddhodanassa tada bhavanaṁ upāvisi;
snp3.11:7.3	Nisajja tattha idamavocāsi sakye,
snp3.11:7.4	“Kuhiṁ kumāro ahamapi daṭṭhukāmo”.
snp3.11:8.1	Tato kumāraṁ jalitamiva suvaṇṇaṁ,
snp3.11:8.2	Ukkāmukheva sukusalasampahaṭṭhaṁ;
snp3.11:8.3	Daddallamānaṁ siriyā anomavaṇṇaṁ,
snp3.11:8.4	Dassesu puttaṁ asitavhayassa sakyā.
snp3.11:9.1	Disvā kumāraṁ sikhimiva pajjalantaṁ,
snp3.11:9.2	Tārāsabhaṁva nabhasigamaṁ visuddhaṁ;
snp3.11:9.3	Suriyaṁ tapantaṁ saradarivabbhamuttaṁ,
snp3.11:9.4	Ānandajāto vipulamalattha pītiṁ.
snp3.11:10.1	Anekasākhañca sahassamaṇḍalaṁ,
snp3.11:10.2	Chattaṁ marū dhārayumantalikkhe;
snp3.11:10.3	Suvaṇṇadaṇḍā vītipatanti cāmarā,
snp3.11:10.4	Na dissare cāmarachattagāhakā.
snp3.11:11.1	Disvā jaṭī kaṇhasirivhayo isi,
snp3.11:11.2	Suvaṇṇanikkhaṁ viya paṇḍukambale;
snp3.11:11.3	Setañca chattaṁ dhariyanta muddhani,
snp3.11:11.4	Udaggacitto sumano paṭiggahe.
snp3.11:12.1	Paṭiggahetvā pana sakyapuṅgavaṁ,
snp3.11:12.2	Jigīsako lakkhaṇamantapāragū;
snp3.11:12.3	Pasannacitto giramabbhudīrayi,
snp3.11:12.4	“Anuttarāyaṁ dvipadānamuttamo”.
snp3.11:13.1	Athattano gamanamanussaranto,
snp3.11:13.2	Akalyarūpo gaḷayati assukāni;
snp3.11:13.3	Disvāna sakyā isimavocuṁ rudantaṁ,
snp3.11:13.4	“No ce kumāre bhavissati antarāyo”.
snp3.11:14.1	Disvāna sakye isimavoca akalye,
snp3.11:14.2	“Nāhaṁ kumāre ahitamanussarāmi;
snp3.11:14.3	Na cāpimassa bhavissati antarāyo,
snp3.11:14.4	Na orakāyaṁ adhimānasā bhavātha.
snp3.11:15.1	Sambodhiyaggaṁ phusissatāyaṁ kumāro,
snp3.11:15.2	So dhammacakkaṁ paramavisuddhadassī;
snp3.11:15.3	Vattessatāyaṁ bahujanahitānukampī,
snp3.11:15.4	Vitthārikassa bhavissati brahmacariyaṁ.
snp3.11:16.1	Mamañca āyu na ciramidhāvaseso,
snp3.11:16.2	Athantarā me bhavissati kālakiriyā;
snp3.11:16.3	Sohaṁ na sossaṁ asamadhurassa dhammaṁ,
snp3.11:16.4	Tenamhi aṭṭo byasanaṅgato aghāvī”.
snp3.11:17.1	So sākiyānaṁ vipulaṁ janetvā pītiṁ,
snp3.11:17.2	Antepuramhā niggamā brahmacārī;
snp3.11:17.3	So bhāgineyyaṁ sayaṁ anukampamāno,
snp3.11:17.4	Samādapesi asamadhurassa dhamme.
snp3.11:18.1	“Buddhoti ghosaṁ yada parato suṇāsi,
snp3.11:18.2	Sambodhipatto vivarati dhammamaggaṁ;
snp3.11:18.3	Gantvāna tattha samayaṁ paripucchamāno,
snp3.11:18.4	Carassu tasmiṁ bhagavati brahmacariyaṁ”.
snp3.11:19.1	Tenānusiṭṭho hitamanena tādinā,
snp3.11:19.2	Anāgate paramavisuddhadassinā;
snp3.11:19.3	So nālako upacitapuññasañcayo,
snp3.11:19.4	Jinaṁ patikkhaṁ parivasi rakkhitindriyo.
snp3.11:20.1	Sutvāna ghosaṁ jinavaracakkavattane,
snp3.11:20.2	Gantvāna disvā isinisabhaṁ pasanno;
snp3.11:20.3	Moneyyaseṭṭhaṁ munipavaraṁ apucchi,
snp3.11:20.4	Samāgate asitāvhayassa sāsaneti.
snp3.11:20.5	Vatthugāthā niṭṭhitā.
snp3.11:21.1	“Aññātametaṁ vacanaṁ,
snp3.11:21.2	Asitassa yathātathaṁ;
snp3.11:21.3	Taṁ taṁ gotama pucchāmi,
snp3.11:21.4	Sabbadhammāna pāraguṁ.
snp3.11:22.1	Anagāriyupetassa,
snp3.11:22.2	Bhikkhācariyaṁ jigīsato;
snp3.11:22.3	Muni pabrūhi me puṭṭho,
snp3.11:22.4	Moneyyaṁ uttamaṁ padaṁ”.
snp3.11:23.1	“Moneyyaṁ te upaññissaṁ,
snp3.11:23.2	(iti bhagavā)
snp3.11:23.3	Dukkaraṁ durabhisambhavaṁ;
snp3.11:23.4	Handa te naṁ pavakkhāmi,
snp3.11:23.5	Santhambhassu daḷho bhava.
snp3.11:24.1	Samānabhāgaṁ kubbetha,
snp3.11:24.2	Gāme akkuṭṭhavanditaṁ;
snp3.11:24.3	Manopadosaṁ rakkheyya,
snp3.11:24.4	Santo anuṇṇato care.
snp3.11:25.1	Uccāvacā niccharanti,
snp3.11:25.2	Dāye aggisikhūpamā;
snp3.11:25.3	Nāriyo muniṁ palobhenti,
snp3.11:25.4	Tā su taṁ mā palobhayuṁ.
snp3.11:26.1	Virato methunā dhammā,
snp3.11:26.2	Hitvā kāme paropare;
snp3.11:26.3	Aviruddho asāratto,
snp3.11:26.4	Pāṇesu tasathāvare.
snp3.11:27.1	Yathā ahaṁ tathā ete,
snp3.11:27.2	Yathā ete tathā ahaṁ;
snp3.11:27.3	Attānaṁ upamaṁ katvā,
snp3.11:27.4	Na haneyya na ghātaye.
snp3.11:28.1	Hitvā icchañca lobhañca,
snp3.11:28.2	Yattha satto puthujjano;
snp3.11:28.3	Cakkhumā paṭipajjeyya,
snp3.11:28.4	Tareyya narakaṁ imaṁ.
snp3.11:29.1	Ūnūdaro mitāhāro,
snp3.11:29.2	Appicchassa alolupo;
snp3.11:29.3	Sadā icchāya nicchāto,
snp3.11:29.4	Aniccho hoti nibbuto.
snp3.11:30.1	Sa piṇḍacāraṁ caritvā,
snp3.11:30.2	Vanantamabhihāraye;
snp3.11:30.3	Upaṭṭhito rukkhamūlasmiṁ,
snp3.11:30.4	Āsanūpagato muni.
snp3.11:31.1	Sa jhānapasuto dhīro,
snp3.11:31.2	Vanante ramito siyā;
snp3.11:31.3	Jhāyetha rukkhamūlasmiṁ,
snp3.11:31.4	Attānamabhitosayaṁ.
snp3.11:32.1	Tato ratyā vivasāne,
snp3.11:32.2	Gāmantamabhihāraye;
snp3.11:32.3	Avhānaṁ nābhinandeyya,
snp3.11:32.4	Abhihārañca gāmato.
snp3.11:33.1	Na munī gāmamāgamma,
snp3.11:33.2	Kulesu sahasā care;
snp3.11:33.3	Ghāsesanaṁ chinnakatho,
snp3.11:33.4	Na vācaṁ payutaṁ bhaṇe.
snp3.11:34.1	Alatthaṁ yadidaṁ sādhu,
snp3.11:34.2	Nālatthaṁ kusalaṁ iti;
snp3.11:34.3	Ubhayeneva so tādī,
snp3.11:34.4	Rukkhaṁvupanivattati.
snp3.11:35.1	Sa pattapāṇi vicaranto,
snp3.11:35.2	Amūgo mūgasammato;
snp3.11:35.3	Appaṁ dānaṁ na hīḷeyya,
snp3.11:35.4	Dātāraṁ nāvajāniyā.
snp3.11:36.1	Uccāvacā hi paṭipadā,
snp3.11:36.2	Samaṇena pakāsitā;
snp3.11:36.3	Na pāraṁ diguṇaṁ yanti,
snp3.11:36.4	Nayidaṁ ekaguṇaṁ mutaṁ.
snp3.11:37.1	Yassa ca visatā natthi,
snp3.11:37.2	Chinnasotassa bhikkhuno;
snp3.11:37.3	Kiccākiccappahīnassa,
snp3.11:37.4	Pariḷāho na vijjati.
snp3.11:38.1	Moneyyaṁ te upaññissaṁ,
snp3.11:38.2	Khuradhārūpamo bhave;
snp3.11:38.3	Jivhāya tālumāhacca,
snp3.11:38.4	Udare saññato siyā.
snp3.11:39.1	Alīnacitto ca siyā,
snp3.11:39.2	Na cāpi bahu cintaye;
snp3.11:39.3	Nirāmagandho asito,
snp3.11:39.4	Brahmacariyaparāyaṇo.
snp3.11:40.1	Ekāsanassa sikkhetha,
snp3.11:40.2	Samaṇūpāsanassa ca;
snp3.11:40.3	Ekattaṁ monamakkhātaṁ,
snp3.11:40.4	Eko ce abhiramissasi;
snp3.11:40.5	Atha bhāhisi dasadisā.
snp3.11:41.1	Sutvā dhīrānaṁ nighosaṁ,
snp3.11:41.2	Jhāyīnaṁ kāmacāginaṁ;
snp3.11:41.3	Tato hiriñca saddhañca,
snp3.11:41.4	Bhiyyo kubbetha māmako.
snp3.11:42.1	Taṁ nadīhi vijānātha,
snp3.11:42.2	Sobbhesu padaresu ca;
snp3.11:42.3	Saṇantā yanti kusobbhā,
snp3.11:42.4	Tuṇhī yanti mahodadhī.
snp3.11:43.1	Yadūnakaṁ taṁ saṇati,
snp3.11:43.2	Yaṁ pūraṁ santameva taṁ;
snp3.11:43.3	Aḍḍhakumbhūpamo bālo,
snp3.11:43.4	Rahado pūrova paṇḍito.
snp3.11:44.1	Yaṁ samaṇo bahuṁ bhāsati,
snp3.11:44.2	Upetaṁ atthasañhitaṁ;
snp3.11:44.3	Jānaṁ so dhammaṁ deseti,
snp3.11:44.4	Jānaṁ so bahu bhāsati.
snp3.11:45.1	Yo ca jānaṁ saṁyatatto,
snp3.11:45.2	Jānaṁ na bahu bhāsati;
snp3.11:45.3	Sa munī monamarahati,
snp3.11:45.4	Sa munī monamajjhagā”ti.
snp3.11:45.5	Nālakasuttaṁ ekādasamaṁ.
snp3.12:0.1	Sutta Nipāta 3.12
snp3.12:0.2	Dvayatānupassanāsutta
snp3.12:1.1	Evaṁ me sutaṁ—
snp3.12:1.2	ekaṁ samayaṁ bhagavā sāvatthiyaṁ viharati pubbārāme migāramātupāsāde.
snp3.12:1.3	Tena kho pana samayena bhagavā tadahuposathe pannarase puṇṇāya puṇṇamāya rattiyā bhikkhusaṅghaparivuto abbhokāse nisinno hoti.
snp3.12:1.4	Atha kho bhagavā tuṇhībhūtaṁ tuṇhībhūtaṁ bhikkhusaṅghaṁ anuviloketvā bhikkhū āmantesi:
snp3.12:2.1	“‘Ye te, bhikkhave, kusalā dhammā ariyā niyyānikā sambodhagāmino, tesaṁ vo, bhikkhave, kusalānaṁ dhammānaṁ ariyānaṁ niyyānikānaṁ sambodhagāmīnaṁ kā upanisā savanāyā’ti, iti ce, bhikkhave, pucchitāro assu, te evamassu vacanīyā:
snp3.12:2.2	‘yāvadeva dvayatānaṁ dhammānaṁ yathābhūtaṁ ñāṇāyā’ti.
snp3.12:2.3	Kiñca dvayataṁ vadetha?
snp3.12:3.1	Idaṁ dukkhaṁ, ayaṁ dukkhasamudayoti ayamekānupassanā.
snp3.12:3.2	Ayaṁ dukkhanirodho, ayaṁ dukkhanirodhagāminī paṭipadāti, ayaṁ dutiyānupassanā.
snp3.12:3.3	Evaṁ sammā dvayatānupassino kho, bhikkhave, bhikkhuno appamattassa ātāpino pahitattassa viharato dvinnaṁ phalānaṁ aññataraṁ phalaṁ pāṭikaṅkhaṁ—
snp3.12:3.4	diṭṭheva dhamme aññā, sati vā upādisese anāgāmitā”ti.
snp3.12:4.1	Idamavoca bhagavā.
snp3.12:4.2	Idaṁ vatvāna sugato athāparaṁ etadavoca satthā:
snp3.12:5.1	“Ye dukkhaṁ nappajānanti,
snp3.12:5.2	atho dukkhassa sambhavaṁ;
snp3.12:5.3	Yattha ca sabbaso dukkhaṁ,
snp3.12:5.4	asesaṁ uparujjhati;
snp3.12:5.5	Tañca maggaṁ na jānanti,
snp3.12:5.6	dukkhūpasamagāminaṁ.
snp3.12:6.1	Cetovimuttihīnā te,
snp3.12:6.2	Atho paññāvimuttiyā;
snp3.12:6.3	Abhabbā te antakiriyāya,
snp3.12:6.4	Te ve jātijarūpagā.
snp3.12:7.1	Ye ca dukkhaṁ pajānanti,
snp3.12:7.2	atho dukkhassa sambhavaṁ;
snp3.12:7.3	Yattha ca sabbaso dukkhaṁ,
snp3.12:7.4	asesaṁ uparujjhati;
snp3.12:7.5	Tañca maggaṁ pajānanti,
snp3.12:7.6	dukkhūpasamagāminaṁ.
snp3.12:8.1	Cetovimuttisampannā,
snp3.12:8.2	Atho paññāvimuttiyā;
snp3.12:8.3	Bhabbā te antakiriyāya,
snp3.12:8.4	Na te jātijarūpagāti.
snp3.12:9.1	‘Siyā aññenapi pariyāyena sammā dvayatānupassanā’ti, iti ce, bhikkhave, pucchitāro assu;
snp3.12:9.2	‘siyā’tissu vacanīyā.
snp3.12:9.3	Kathañca siyā?
snp3.12:9.4	Yaṁ kiñci dukkhaṁ sambhoti sabbaṁ upadhipaccayāti, ayamekānupassanā.
snp3.12:9.5	Upadhīnaṁ tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:9.6	Evaṁ sammā …pe…
snp3.12:9.7	athāparaṁ etadavoca satthā:
snp3.12:10.1	“Upadhinidānā pabhavanti dukkhā,
snp3.12:10.2	Ye keci lokasmimanekarūpā;
snp3.12:10.3	Yo ve avidvā upadhiṁ karoti,
snp3.12:10.4	Punappunaṁ dukkhamupeti mando;
snp3.12:10.5	Tasmā pajānaṁ upadhiṁ na kayirā,
snp3.12:10.6	Dukkhassa jātippabhavānupassīti.
snp3.12:11.1	‘Siyā aññenapi pariyāyena sammā dvayatānupassanā’ti, iti ce, bhikkhave, pucchitāro assu;
snp3.12:11.2	‘siyā’tissu vacanīyā.
snp3.12:11.3	Kathañca siyā?
snp3.12:11.4	Yaṁ kiñci dukkhaṁ sambhoti sabbaṁ avijjāpaccayāti, ayamekānupassanā.
snp3.12:11.5	Avijjāya tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:11.6	Evaṁ sammā …pe…
snp3.12:11.7	athāparaṁ etadavoca satthā:
snp3.12:12.1	“Jātimaraṇasaṁsāraṁ,
snp3.12:12.2	ye vajanti punappunaṁ;
snp3.12:12.3	Itthabhāvaññathābhāvaṁ,
snp3.12:12.4	avijjāyeva sā gati.
snp3.12:13.1	Avijjā hāyaṁ mahāmoho,
snp3.12:13.2	Yenidaṁ saṁsitaṁ ciraṁ;
snp3.12:13.3	Vijjāgatā ca ye sattā,
snp3.12:13.4	Na te gacchanti punabbhavanti.
snp3.12:14.1	‘Siyā aññenapi …pe…
snp3.12:14.2	kathañca siyā?
snp3.12:14.3	Yaṁ kiñci dukkhaṁ sambhoti sabbaṁ saṅkhārapaccayāti, ayamekānupassanā.
snp3.12:14.4	Saṅkhārānaṁ tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:14.5	Evaṁ sammā …pe…
snp3.12:14.6	athāparaṁ etadavoca satthā:
snp3.12:15.1	“Yaṁ kiñci dukkhaṁ sambhoti,
snp3.12:15.2	sabbaṁ saṅkhārapaccayā;
snp3.12:15.3	Saṅkhārānaṁ nirodhena,
snp3.12:15.4	natthi dukkhassa sambhavo.
snp3.12:16.1	Etamādīnavaṁ ñatvā,
snp3.12:16.2	dukkhaṁ saṅkhārapaccayā;
snp3.12:16.3	Sabbasaṅkhārasamathā,
snp3.12:16.4	saññānaṁ uparodhanā;
snp3.12:16.5	Evaṁ dukkhakkhayo hoti,
snp3.12:16.6	etaṁ ñatvā yathātathaṁ.
snp3.12:17.1	Sammaddasā vedaguno,
snp3.12:17.2	Sammadaññāya paṇḍitā;
snp3.12:17.3	Abhibhuyya mārasaṁyogaṁ,
snp3.12:17.4	Na gacchanti punabbhavanti.
snp3.12:18.1	‘Siyā aññenapi …pe…
snp3.12:18.2	kathañca siyā?
snp3.12:18.3	Yaṁ kiñci dukkhaṁ sambhoti sabbaṁ viññāṇapaccayāti, ayamekānupassanā.
snp3.12:18.4	Viññāṇassa tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:18.5	Evaṁ sammā …pe…
snp3.12:18.6	athāparaṁ etadavoca satthā:
snp3.12:19.1	“Yaṁ kiñci dukkhaṁ sambhoti,
snp3.12:19.2	Sabbaṁ viññāṇapaccayā;
snp3.12:19.3	Viññāṇassa nirodhena,
snp3.12:19.4	Natthi dukkhassa sambhavo.
snp3.12:20.1	Etamādīnavaṁ ñatvā,
snp3.12:20.2	Dukkhaṁ viññāṇapaccayā;
snp3.12:20.3	Viññāṇūpasamā bhikkhu,
snp3.12:20.4	Nicchāto parinibbutoti.
snp3.12:21.1	‘Siyā aññenapi …pe…
snp3.12:21.2	kathañca siyā?
snp3.12:21.3	Yaṁ kiñci dukkhaṁ sambhoti sabbaṁ phassapaccayāti, ayamekānupassanā.
snp3.12:21.4	Phassassa tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:21.5	Evaṁ sammā …pe…
snp3.12:21.6	athāparaṁ etadavoca satthā:
snp3.12:22.1	“Tesaṁ phassaparetānaṁ,
snp3.12:22.2	Bhavasotānusārinaṁ;
snp3.12:22.3	Kummaggapaṭipannānaṁ,
snp3.12:22.4	Ārā saṁyojanakkhayo.
snp3.12:23.1	Ye ca phassaṁ pariññāya,
snp3.12:23.2	Aññāyupasame ratā;
snp3.12:23.3	Te ve phassābhisamayā,
snp3.12:23.4	Nicchātā parinibbutāti.
snp3.12:24.1	‘Siyā aññenapi …pe…
snp3.12:24.2	kathañca siyā?
snp3.12:24.3	Yaṁ kiñci dukkhaṁ sambhoti sabbaṁ vedanāpaccayāti, ayamekānupassanā.
snp3.12:24.4	Vedanānaṁ tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:24.5	Evaṁ sammā …pe…
snp3.12:24.6	athāparaṁ etadavoca satthā:
snp3.12:25.1	“Sukhaṁ vā yadi vā dukkhaṁ,
snp3.12:25.2	Adukkhamasukhaṁ saha;
snp3.12:25.3	Ajjhattañca bahiddhā ca,
snp3.12:25.4	Yaṁ kiñci atthi veditaṁ.
snp3.12:26.1	Etaṁ dukkhanti ñatvāna,
snp3.12:26.2	Mosadhammaṁ palokinaṁ;
snp3.12:26.3	Phussa phussa vayaṁ passaṁ,
snp3.12:26.4	Evaṁ tattha vijānati;
snp3.12:26.5	Vedanānaṁ khayā bhikkhu,
snp3.12:26.6	Nicchāto parinibbutoti.
snp3.12:27.1	‘Siyā aññenapi …pe…
snp3.12:27.2	kathañca siyā?
snp3.12:27.3	Yaṁ kiñci dukkhaṁ sambhoti sabbaṁ taṇhāpaccayāti, ayamekānupassanā.
snp3.12:27.4	Taṇhāya tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:27.5	Evaṁ sammā …pe…
snp3.12:27.6	athāparaṁ etadavoca satthā:
snp3.12:28.1	“Taṇhādutiyo puriso,
snp3.12:28.2	Dīghamaddhāna saṁsaraṁ;
snp3.12:28.3	Itthabhāvaññathābhāvaṁ,
snp3.12:28.4	Saṁsāraṁ nātivattati.
snp3.12:29.1	Etamādīnavaṁ ñatvā,
snp3.12:29.2	Taṇhaṁ dukkhassa sambhavaṁ;
snp3.12:29.3	Vītataṇho anādāno,
snp3.12:29.4	Sato bhikkhu paribbajeti.
snp3.12:30.1	‘Siyā aññenapi …pe…
snp3.12:30.2	kathañca siyā?
snp3.12:30.3	Yaṁ kiñci dukkhaṁ sambhoti sabbaṁ upādānapaccayāti, ayamekānupassanā.
snp3.12:30.4	Upādānānaṁ tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:30.5	Evaṁ sammā …pe…
snp3.12:30.6	athāparaṁ etadavoca satthā:
snp3.12:31.1	“Upādānapaccayā bhavo,
snp3.12:31.2	Bhūto dukkhaṁ nigacchati;
snp3.12:31.3	Jātassa maraṇaṁ hoti,
snp3.12:31.4	Eso dukkhassa sambhavo.
snp3.12:32.1	Tasmā upādānakkhayā,
snp3.12:32.2	Sammadaññāya paṇḍitā;
snp3.12:32.3	Jātikkhayaṁ abhiññāya,
snp3.12:32.4	Na gacchanti punabbhavanti.
snp3.12:33.1	‘Siyā aññenapi …pe…
snp3.12:33.2	kathañca siyā?
snp3.12:33.3	Yaṁ kiñci dukkhaṁ sambhoti sabbaṁ ārambhapaccayāti, ayamekānupassanā.
snp3.12:33.4	Ārambhānaṁ tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:33.5	Evaṁ sammā …pe…
snp3.12:33.6	athāparaṁ etadavoca satthā:
snp3.12:34.1	“Yaṁ kiñci dukkhaṁ sambhoti,
snp3.12:34.2	Sabbaṁ ārambhapaccayā;
snp3.12:34.3	Ārambhānaṁ nirodhena,
snp3.12:34.4	Natthi dukkhassa sambhavo.
snp3.12:35.1	Etamādīnavaṁ ñatvā,
snp3.12:35.2	Dukkhaṁ ārambhapaccayā;
snp3.12:35.3	Sabbārambhaṁ paṭinissajja,
snp3.12:35.4	Anārambhe vimuttino.
snp3.12:36.1	Ucchinnabhavataṇhassa,
snp3.12:36.2	Santacittassa bhikkhuno;
snp3.12:36.3	Vikkhīṇo jātisaṁsāro,
snp3.12:36.4	Natthi tassa punabbhavoti.
snp3.12:37.1	‘Siyā aññenapi …pe…
snp3.12:37.2	kathañca siyā?
snp3.12:37.3	Yaṁ kiñci dukkhaṁ sambhoti sabbaṁ āhārapaccayāti, ayamekānupassanā.
snp3.12:37.4	Āhārānaṁ tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:37.5	Evaṁ sammā …pe…
snp3.12:37.6	athāparaṁ etadavoca satthā:
snp3.12:38.1	“Yaṁ kiñci dukkhaṁ sambhoti,
snp3.12:38.2	Sabbaṁ āhārapaccayā;
snp3.12:38.3	Āhārānaṁ nirodhena,
snp3.12:38.4	Natthi dukkhassa sambhavo.
snp3.12:39.1	Etamādīnavaṁ ñatvā,
snp3.12:39.2	Dukkhaṁ āhārapaccayā;
snp3.12:39.3	Sabbāhāraṁ pariññāya,
snp3.12:39.4	Sabbāhāramanissito.
snp3.12:40.1	Ārogyaṁ sammadaññāya,
snp3.12:40.2	Āsavānaṁ parikkhayā;
snp3.12:40.3	Saṅkhāya sevī dhammaṭṭho,
snp3.12:40.4	Saṅkhyaṁ nopeti vedagūti.
snp3.12:41.1	‘Siyā aññenapi …pe…
snp3.12:41.2	kathañca siyā?
snp3.12:41.3	Yaṁ kiñci dukkhaṁ sambhoti sabbaṁ iñjitapaccayāti, ayamekānupassanā.
snp3.12:41.4	Iñjitānaṁ tveva asesavirāganirodhā natthi dukkhassa sambhavoti, ayaṁ dutiyānupassanā.
snp3.12:41.5	Evaṁ sammā …pe…
snp3.12:41.6	athāparaṁ etadavoca satthā:
snp3.12:42.1	“Yaṁ kiñci dukkhaṁ sambhoti,
snp3.12:42.2	Sabbaṁ iñjitapaccayā;
snp3.12:42.3	Iñjitānaṁ nirodhena,
snp3.12:42.4	Natthi dukkhassa sambhavo.
snp3.12:43.1	Etamādīnavaṁ ñatvā,
snp3.12:43.2	Dukkhaṁ iñjitapaccayā;
snp3.12:43.3	Tasmā hi ejaṁ vossajja,
snp3.12:43.4	Saṅkhāre uparundhiya;
snp3.12:43.5	Anejo anupādāno,
snp3.12:43.6	Sato bhikkhu paribbajeti.
snp3.12:44.1	‘Siyā aññenapi …pe…
snp3.12:44.2	kathañca siyā?
snp3.12:44.3	Nissitassa calitaṁ hotīti, ayamekānupassanā.
snp3.12:44.4	Anissito na calatīti, ayaṁ dutiyānupassanā.
snp3.12:44.5	Evaṁ sammā …pe…
snp3.12:44.6	athāparaṁ etadavoca satthā:
snp3.12:45.1	“Anissito na calati,
snp3.12:45.2	Nissito ca upādiyaṁ;
snp3.12:45.3	Itthabhāvaññathābhāvaṁ,
snp3.12:45.4	Saṁsāraṁ nātivattati.
snp3.12:46.1	Etamādīnavaṁ ñatvā,
snp3.12:46.2	Nissayesu mahabbhayaṁ;
snp3.12:46.3	Anissito anupādāno,
snp3.12:46.4	Sato bhikkhu paribbajeti.
snp3.12:47.1	‘Siyā aññenapi …pe…
snp3.12:47.2	kathañca siyā?
snp3.12:47.3	Rūpehi, bhikkhave, arūpā santatarāti, ayamekānupassanā.
snp3.12:47.4	Arūpehi nirodho santataroti, ayaṁ dutiyānupassanā.
snp3.12:47.5	Evaṁ sammā …pe…
snp3.12:47.6	athāparaṁ etadavoca satthā:
snp3.12:48.1	“Ye ca rūpūpagā sattā,
snp3.12:48.2	Ye ca arūpaṭṭhāyino;
snp3.12:48.3	Nirodhaṁ appajānantā,
snp3.12:48.4	Āgantāro punabbhavaṁ.
snp3.12:49.1	Ye ca rūpe pariññāya,
snp3.12:49.2	Arūpesu asaṇṭhitā;
snp3.12:49.3	Nirodhe ye vimuccanti,
snp3.12:49.4	Te janā maccuhāyinoti.
snp3.12:50.1	‘Siyā aññenapi …pe…
snp3.12:50.2	kathañca siyā?
snp3.12:50.3	Yaṁ, bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya idaṁ saccanti upanijjhāyitaṁ tadamariyānaṁ etaṁ musāti yathābhūtaṁ sammappaññāya sudiṭṭhaṁ, ayamekānupassanā.
snp3.12:50.4	Yaṁ, bhikkhave, sadevakassa …pe… sadevamanussāya idaṁ musāti upanijjhāyitaṁ, tadamariyānaṁ etaṁ saccanti yathābhūtaṁ sammappaññāya sudiṭṭhaṁ, ayaṁ dutiyānupassanā.
snp3.12:50.5	Evaṁ sammā …pe…
snp3.12:50.6	athāparaṁ etadavoca satthā:
snp3.12:51.1	“Anattani attamāniṁ,
snp3.12:51.2	Passa lokaṁ sadevakaṁ;
snp3.12:51.3	Niviṭṭhaṁ nāmarūpasmiṁ,
snp3.12:51.4	Idaṁ saccanti maññati.
snp3.12:52.1	Yena yena hi maññanti,
snp3.12:52.2	Tato taṁ hoti aññathā;
snp3.12:52.3	Tañhi tassa musā hoti,
snp3.12:52.4	Mosadhammañhi ittaraṁ.
snp3.12:53.1	Amosadhammaṁ nibbānaṁ,
snp3.12:53.2	Tadariyā saccato vidū;
snp3.12:53.3	Te ve saccābhisamayā,
snp3.12:53.4	Nicchātā parinibbutāti.
snp3.12:54.1	‘Siyā aññenapi pariyāyena sammā dvayatānupassanā’ti, iti ce, bhikkhave, pucchitāro assu;
snp3.12:54.2	‘siyā’tissu vacanīyā.
snp3.12:54.3	Kathañca siyā?
snp3.12:54.4	Yaṁ, bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya idaṁ sukhanti upanijjhāyitaṁ, tadamariyānaṁ etaṁ dukkhanti yathābhūtaṁ sammappaññāya sudiṭṭhaṁ, ayamekānupassanā.
snp3.12:54.5	Yaṁ, bhikkhave, sadevakassa …pe… sadevamanussāya idaṁ dukkhanti upanijjhāyitaṁ tadamariyānaṁ etaṁ sukhanti yathābhūtaṁ sammappaññāya sudiṭṭhaṁ, ayaṁ dutiyānupassanā.
snp3.12:54.6	Evaṁ sammā dvayatānupassino kho, bhikkhave, bhikkhuno appamattassa ātāpino pahitattassa viharato dvinnaṁ phalānaṁ aññataraṁ phalaṁ pāṭikaṅkhaṁ—
snp3.12:54.7	diṭṭheva dhamme aññā, sati vā upādisese anāgāmitāti.
snp3.12:54.8	Idamavoca bhagavā.
snp3.12:54.9	Idaṁ vatvāna sugato athāparaṁ etadavoca satthā:
snp3.12:55.1	“Rūpā saddā rasā gandhā,
snp3.12:55.2	Phassā dhammā ca kevalā;
snp3.12:55.3	Iṭṭhā kantā manāpā ca,
snp3.12:55.4	Yāvatatthīti vuccati.
snp3.12:56.1	Sadevakassa lokassa,
snp3.12:56.2	Ete vo sukhasammatā;
snp3.12:56.3	Yattha cete nirujjhanti,
snp3.12:56.4	Taṁ nesaṁ dukkhasammataṁ.
snp3.12:57.1	Sukhanti diṭṭhamariyehi,
snp3.12:57.2	Sakkāyassuparodhanaṁ;
snp3.12:57.3	Paccanīkamidaṁ hoti,
snp3.12:57.4	Sabbalokena passataṁ.
snp3.12:58.1	Yaṁ pare sukhato āhu,
snp3.12:58.2	Tadariyā āhu dukkhato;
snp3.12:58.3	Yaṁ pare dukkhato āhu,
snp3.12:58.4	Tadariyā sukhato vidū.
snp3.12:59.1	Passa dhammaṁ durājānaṁ,
snp3.12:59.2	Sampamūḷhetthaviddasu;
snp3.12:59.3	Nivutānaṁ tamo hoti,
snp3.12:59.4	Andhakāro apassataṁ.
snp3.12:60.1	Satañca vivaṭaṁ hoti,
snp3.12:60.2	Āloko passatāmiva;
snp3.12:60.3	Santike na vijānanti,
snp3.12:60.4	Magā dhammassa kovidā.
snp3.12:61.1	Bhavarāgaparetehi,
snp3.12:61.2	Bhavasotānusāribhi;
snp3.12:61.3	Māradheyyānupannehi,
snp3.12:61.4	Nāyaṁ dhammo susambudho.
snp3.12:62.1	Ko nu aññatra mariyehi,
snp3.12:62.2	Padaṁ sambuddhumarahati;
snp3.12:62.3	Yaṁ padaṁ sammadaññāya,
snp3.12:62.4	Parinibbanti anāsavā”ti.
snp3.12:63.1	Idamavoca bhagavā.
snp3.12:63.2	Attamanā te bhikkhū bhagavato bhāsitaṁ abhinandunti.
snp3.12:63.3	Imasmiñca pana veyyākaraṇasmiṁ bhaññamāne saṭṭhimattānaṁ bhikkhūnaṁ anupādāya āsavehi cittāni vimucciṁsūti.
snp3.12:63.4	Dvayatānupassanāsuttaṁ dvādasamaṁ.
snp3.12:64.0	Tassuddānaṁ
snp3.12:64.1	Saccaṁ upadhi avijjā ca,
snp3.12:64.2	saṅkhāre viññāṇapañcamaṁ;
snp3.12:64.3	Phassavedaniyā taṇhā,
snp3.12:64.4	upādānārambhaāhārā;
snp3.12:64.5	Iñjitaṁ calitaṁ rūpaṁ,
snp3.12:64.6	saccaṁ dukkhena soḷasāti.
snp3.12:64.7	Mahāvaggo tatiyo.
snp3.12:65.0	Tassuddānaṁ
snp3.12:65.1	Pabbajjā ca padhānañca,
snp3.12:65.2	subhāsitañca sundari;
snp3.12:65.3	Māghasuttaṁ sabhiyo ca,
snp3.12:65.4	selo sallañca vuccati.
snp3.12:66.1	Vāseṭṭho cāpi kokāli,
snp3.12:66.2	Nālako dvayatānupassanā;
snp3.12:66.3	Dvādasetāni suttāni,
snp3.12:66.4	Mahāvaggoti vuccatīti.
snp4.1:0.1	Sutta Nipāta 4.1
snp4.1:0.2	Kāmasutta
snp4.1:1.1	Kāmaṁ kāmayamānassa,
snp4.1:1.2	tassa ce taṁ samijjhati;
snp4.1:1.3	Addhā pītimano hoti,
snp4.1:1.4	laddhā macco yadicchati.
snp4.1:2.1	Tassa ce kāmayānassa,
snp4.1:2.2	chandajātassa jantuno;
snp4.1:2.3	Te kāmā parihāyanti,
snp4.1:2.4	sallaviddhova ruppati.
snp4.1:3.1	Yo kāme parivajjeti,
snp4.1:3.2	sappasseva padā siro;
snp4.1:3.3	Somaṁ visattikaṁ loke,
snp4.1:3.4	sato samativattati.
snp4.1:4.1	Khettaṁ vatthuṁ hiraññaṁ vā,
snp4.1:4.2	gavāssaṁ dāsaporisaṁ;
snp4.1:4.3	Thiyo bandhū puthu kāme,
snp4.1:4.4	yo naro anugijjhati.
snp4.1:5.1	Abalā naṁ balīyanti,
snp4.1:5.2	maddantenaṁ parissayā;
snp4.1:5.3	Tato naṁ dukkhamanveti,
snp4.1:5.4	nāvaṁ bhinnamivodakaṁ.
snp4.1:6.1	Tasmā jantu sadā sato,
snp4.1:6.2	Kāmāni parivajjaye;
snp4.1:6.3	Te pahāya tare oghaṁ,
snp4.1:6.4	Nāvaṁ sitvāva pāragūti.
snp4.1:6.5	Kāmasuttaṁ paṭhamaṁ.
snp4.2:0.1	Sutta Nipāta 4.2
snp4.2:0.2	Guhaṭṭhakasutta
snp4.2:1.1	Satto guhāyaṁ bahunābhichanno,
snp4.2:1.2	Tiṭṭhaṁ naro mohanasmiṁ pagāḷho;
snp4.2:1.3	Dūre vivekā hi tathāvidho so,
snp4.2:1.4	Kāmā hi loke na hi suppahāyā.
snp4.2:2.1	Icchānidānā bhavasātabaddhā,
snp4.2:2.2	Te duppamuñcā na hi aññamokkhā;
snp4.2:2.3	Pacchā pure vāpi apekkhamānā,
snp4.2:2.4	Ime va kāme purime va jappaṁ.
snp4.2:3.1	Kāmesu giddhā pasutā pamūḷhā,
snp4.2:3.2	Avadāniyā te visame niviṭṭhā;
snp4.2:3.3	Dukkhūpanītā paridevayanti,
snp4.2:3.4	Kiṁsū bhavissāma ito cutāse.
snp4.2:4.1	Tasmā hi sikkhetha idheva jantu,
snp4.2:4.2	Yaṁ kiñci jaññā visamanti loke;
snp4.2:4.3	Na tassa hetū visamaṁ careyya,
snp4.2:4.4	Appañhidaṁ jīvitamāhu dhīrā.
snp4.2:5.1	Passāmi loke pariphandamānaṁ,
snp4.2:5.2	Pajaṁ imaṁ taṇhagataṁ bhavesu;
snp4.2:5.3	Hīnā narā maccumukhe lapanti,
snp4.2:5.4	Avītataṇhāse bhavābhavesu.
snp4.2:6.1	Mamāyite passatha phandamāne,
snp4.2:6.2	Maccheva appodake khīṇasote;
snp4.2:6.3	Etampi disvā amamo careyya,
snp4.2:6.4	Bhavesu āsattimakubbamāno.
snp4.2:7.1	Ubhosu antesu vineyya chandaṁ,
snp4.2:7.2	Phassaṁ pariññāya anānugiddho;
snp4.2:7.3	Yadattagarahī tadakubbamāno,
snp4.2:7.4	Na lippatī diṭṭhasutesu dhīro.
snp4.2:8.1	Saññaṁ pariññā vitareyya oghaṁ,
snp4.2:8.2	Pariggahesu muni nopalitto;
snp4.2:8.3	Abbūḷhasallo caramappamatto,
snp4.2:8.4	Nāsīsatī lokamimaṁ parañcāti.
snp4.2:8.5	Guhaṭṭhakasuttaṁ dutiyaṁ.
snp4.3:0.1	Sutta Nipāta 4.3
snp4.3:0.2	Duṭṭhaṭṭhakasutta
snp4.3:1.1	Vadanti ve duṭṭhamanāpi eke,
snp4.3:1.2	Athopi ve saccamanā vadanti;
snp4.3:1.3	Vādañca jātaṁ muni no upeti,
snp4.3:1.4	Tasmā munī natthi khilo kuhiñci.
snp4.3:2.1	Sakañhi diṭṭhiṁ kathamaccayeyya,
snp4.3:2.2	Chandānunīto ruciyā niviṭṭho;
snp4.3:2.3	Sayaṁ samattāni pakubbamāno,
snp4.3:2.4	Yathā hi jāneyya tathā vadeyya.
snp4.3:3.1	Yo attano sīlavatāni jantu,
snp4.3:3.2	Anānupuṭṭhova paresa pāva;
snp4.3:3.3	Anariyadhammaṁ kusalā tamāhu,
snp4.3:3.4	Yo ātumānaṁ sayameva pāva.
snp4.3:4.1	Santo ca bhikkhu abhinibbutatto,
snp4.3:4.2	Itihanti sīlesu akatthamāno;
snp4.3:4.3	Tamariyadhammaṁ kusalā vadanti,
snp4.3:4.4	Yassussadā natthi kuhiñci loke.
snp4.3:5.1	Pakappitā saṅkhatā yassa dhammā,
snp4.3:5.2	Purakkhatā santi avīvadātā;
snp4.3:5.3	Yadattani passati ānisaṁsaṁ,
snp4.3:5.4	Taṁ nissito kuppapaṭiccasantiṁ.
snp4.3:6.1	Diṭṭhīnivesā na hi svātivattā,
snp4.3:6.2	Dhammesu niccheyya samuggahītaṁ;
snp4.3:6.3	Tasmā naro tesu nivesanesu,
snp4.3:6.4	Nirassatī ādiyatī ca dhammaṁ.
snp4.3:7.1	Dhonassa hi natthi kuhiñci loke,
snp4.3:7.2	Pakappitā diṭṭhi bhavābhavesu;
snp4.3:7.3	Māyañca mānañca pahāya dhono,
snp4.3:7.4	Sa kena gaccheyya anūpayo so.
snp4.3:8.1	Upayo hi dhammesu upeti vādaṁ,
snp4.3:8.2	Anūpayaṁ kena kathaṁ vadeyya;
snp4.3:8.3	Attā nirattā na hi tassa atthi,
snp4.3:8.4	Adhosi so diṭṭhimidheva sabbanti.
snp4.3:8.5	Duṭṭhaṭṭhakasuttaṁ tatiyaṁ.
snp4.4:0.1	Sutta Nipāta 4.4
snp4.4:0.2	Suddhaṭṭhakasutta
snp4.4:1.1	Passāmi suddhaṁ paramaṁ arogaṁ,
snp4.4:1.2	Diṭṭhena saṁsuddhi narassa hoti;
snp4.4:1.3	Evābhijānaṁ paramanti ñatvā,
snp4.4:1.4	Suddhānupassīti pacceti ñāṇaṁ.
snp4.4:2.1	Diṭṭhena ce suddhi narassa hoti,
snp4.4:2.2	Ñāṇena vā so pajahāti dukkhaṁ;
snp4.4:2.3	Aññena so sujjhati sopadhīko,
snp4.4:2.4	Diṭṭhī hi naṁ pāva tathā vadānaṁ.
snp4.4:3.1	Na brāhmaṇo aññato suddhimāha,
snp4.4:3.2	Diṭṭhe sute sīlavate mute vā;
snp4.4:3.3	Puññe ca pāpe ca anūpalitto,
snp4.4:3.4	Attañjaho nayidha pakubbamāno.
snp4.4:4.1	Purimaṁ pahāya aparaṁ sitāse,
snp4.4:4.2	Ejānugā te na taranti saṅgaṁ;
snp4.4:4.3	Te uggahāyanti nirassajanti,
snp4.4:4.4	Kapīva sākhaṁ pamuñcaṁ gahāyaṁ.
snp4.4:5.1	Sayaṁ samādāya vatāni jantu,
snp4.4:5.2	Uccāvacaṁ gacchati saññasatto;
snp4.4:5.3	Vidvā ca vedehi samecca dhammaṁ,
snp4.4:5.4	Na uccāvacaṁ gacchati bhūripañño.
snp4.4:6.1	Sa sabbadhammesu visenibhūto,
snp4.4:6.2	Yaṁ kiñci diṭṭhaṁ va sutaṁ mutaṁ vā;
snp4.4:6.3	Tameva dassiṁ vivaṭaṁ carantaṁ,
snp4.4:6.4	Kenīdha lokasmi vikappayeyya.
snp4.4:7.1	Na kappayanti na purekkharonti,
snp4.4:7.2	Accantasuddhīti na te vadanti;
snp4.4:7.3	Ādānaganthaṁ gathitaṁ visajja,
snp4.4:7.4	Āsaṁ na kubbanti kuhiñci loke.
snp4.4:8.1	Sīmātigo brāhmaṇo tassa natthi,
snp4.4:8.2	Ñatvā va disvā va samuggahītaṁ;
snp4.4:8.3	Na rāgarāgī na virāgaratto,
snp4.4:8.4	Tassīdha natthi paramuggahītanti.
snp4.4:8.5	Suddhaṭṭhakasuttaṁ catutthaṁ.
snp4.5:0.1	Sutta Nipāta 4.5
snp4.5:0.2	Paramaṭṭhakasutta
snp4.5:1.1	Paramanti diṭṭhīsu paribbasāno,
snp4.5:1.2	Yaduttari kurute jantu loke;
snp4.5:1.3	Hīnāti aññe tato sabbamāha,
snp4.5:1.4	Tasmā vivādāni avītivatto.
snp4.5:2.1	Yadattanī passati ānisaṁsaṁ,
snp4.5:2.2	Diṭṭhe sute sīlavate mute vā;
snp4.5:2.3	Tadeva so tattha samuggahāya,
snp4.5:2.4	Nihīnato passati sabbamaññaṁ.
snp4.5:3.1	Taṁ vāpi ganthaṁ kusalā vadanti,
snp4.5:3.2	Yaṁ nissito passati hīnamaññaṁ;
snp4.5:3.3	Tasmā hi diṭṭhaṁ va sutaṁ mutaṁ vā,
snp4.5:3.4	Sīlabbataṁ bhikkhu na nissayeyya.
snp4.5:4.1	Diṭṭhimpi lokasmiṁ na kappayeyya,
snp4.5:4.2	Ñāṇena vā sīlavatena vāpi;
snp4.5:4.3	Samoti attānamanūpaneyya,
snp4.5:4.4	Hīno na maññetha visesi vāpi.
snp4.5:5.1	Attaṁ pahāya anupādiyāno,
snp4.5:5.2	Ñāṇepi so nissayaṁ no karoti;
snp4.5:5.3	Sa ve viyattesu na vaggasārī,
snp4.5:5.4	Diṭṭhimpi so na pacceti kiñci.
snp4.5:6.1	Yassūbhayante paṇidhīdha natthi,
snp4.5:6.2	Bhavābhavāya idha vā huraṁ vā;
snp4.5:6.3	Nivesanā tassa na santi keci,
snp4.5:6.4	Dhammesu niccheyya samuggahītaṁ.
snp4.5:7.1	Tassīdha diṭṭhe va sute mute vā,
snp4.5:7.2	Pakappitā natthi aṇūpi saññā;
snp4.5:7.3	Taṁ brāhmaṇaṁ diṭṭhimanādiyānaṁ,
snp4.5:7.4	Kenīdha lokasmiṁ vikappayeyya.
snp4.5:8.1	Na kappayanti na purekkharonti,
snp4.5:8.2	Dhammāpi tesaṁ na paṭicchitāse;
snp4.5:8.3	Na brāhmaṇo sīlavatena neyyo,
snp4.5:8.4	Pāraṅgato na pacceti tādīti.
snp4.5:8.5	Paramaṭṭhakasuttaṁ pañcamaṁ.
snp4.6:0.1	Sutta Nipāta 4.6
snp4.6:0.2	Jarāsutta
snp4.6:1.1	Appaṁ vata jīvitaṁ idaṁ,
snp4.6:1.2	Oraṁ vassasatāpi miyyati;
snp4.6:1.3	Yo cepi aticca jīvati,
snp4.6:1.4	Atha kho so jarasāpi miyyati.
snp4.6:2.1	Socanti janā mamāyite,
snp4.6:2.2	Na hi santi niccā pariggahā;
snp4.6:2.3	Vinābhāvasantamevidaṁ,
snp4.6:2.4	Iti disvā nāgāramāvase.
snp4.6:3.1	Maraṇenapi taṁ pahīyati,
snp4.6:3.2	Yaṁ puriso mamidanti maññati;
snp4.6:3.3	Etampi viditvā paṇḍito,
snp4.6:3.4	Na mamattāya nametha māmako.
snp4.6:4.1	Supinena yathāpi saṅgataṁ,
snp4.6:4.2	Paṭibuddho puriso na passati;
snp4.6:4.3	Evampi piyāyitaṁ janaṁ,
snp4.6:4.4	Petaṁ kālaṅkataṁ na passati.
snp4.6:5.1	Diṭṭhāpi sutāpi te janā,
snp4.6:5.2	Yesaṁ nāmamidaṁ pavuccati;
snp4.6:5.3	Nāmaṁyevāvasissati,
snp4.6:5.4	Akkheyyaṁ petassa jantuno.
snp4.6:6.1	Sokapparidevamaccharaṁ,
snp4.6:6.2	Na jahanti giddhā mamāyite;
snp4.6:6.3	Tasmā munayo pariggahaṁ,
snp4.6:6.4	Hitvā acariṁsu khemadassino.
snp4.6:7.1	Patilīnacarassa bhikkhuno,
snp4.6:7.2	Bhajamānassa vivittamāsanaṁ;
snp4.6:7.3	Sāmaggiyamāhu tassa taṁ,
snp4.6:7.4	Yo attānaṁ bhavane na dassaye.
snp4.6:8.1	Sabbattha munī anissito,
snp4.6:8.2	Na piyaṁ kubbati nopi appiyaṁ;
snp4.6:8.3	Tasmiṁ paridevamaccharaṁ,
snp4.6:8.4	Paṇṇe vāri yathā na limpati.
snp4.6:9.1	Udabindu yathāpi pokkhare,
snp4.6:9.2	Padume vāri yathā na limpati;
snp4.6:9.3	Evaṁ muni nopalimpati,
snp4.6:9.4	Yadidaṁ diṭṭhasutaṁ mutesu vā.
snp4.6:10.1	Dhono na hi tena maññati,
snp4.6:10.2	Yadidaṁ diṭṭhasutaṁ mutesu vā;
snp4.6:10.3	Nāññena visuddhimicchati,
snp4.6:10.4	Na hi so rajjati no virajjatīti.
snp4.6:10.5	Jarāsuttaṁ chaṭṭhaṁ.
snp4.7:0.1	Sutta Nipāta 4.7
snp4.7:0.2	Tissametteyyasutta
snp4.7:1.1	“Methunamanuyuttassa,
snp4.7:1.2	(iccāyasmā tisso metteyyo)
snp4.7:1.3	Vighātaṁ brūhi mārisa;
snp4.7:1.4	Sutvāna tava sāsanaṁ,
snp4.7:1.5	Viveke sikkhissāmase”.
snp4.7:2.1	“Methunamanuyuttassa,
snp4.7:2.2	(metteyyāti bhagavā)
snp4.7:2.3	Mussate vāpi sāsanaṁ;
snp4.7:2.4	Micchā ca paṭipajjati,
snp4.7:2.5	Etaṁ tasmiṁ anāriyaṁ.
snp4.7:3.1	Eko pubbe caritvāna,
snp4.7:3.2	methunaṁ yo nisevati;
snp4.7:3.3	Yānaṁ bhantaṁva taṁ loke,
snp4.7:3.4	hīnamāhu puthujjanaṁ.
snp4.7:4.1	Yaso kitti ca yā pubbe,
snp4.7:4.2	hāyate vāpi tassa sā;
snp4.7:4.3	Etampi disvā sikkhetha,
snp4.7:4.4	methunaṁ vippahātave.
snp4.7:5.1	Saṅkappehi pareto so,
snp4.7:5.2	kapaṇo viya jhāyati;
snp4.7:5.3	Sutvā paresaṁ nigghosaṁ,
snp4.7:5.4	maṅku hoti tathāvidho.
snp4.7:6.1	Atha satthāni kurute,
snp4.7:6.2	paravādehi codito;
snp4.7:6.3	Esa khvassa mahāgedho,
snp4.7:6.4	mosavajjaṁ pagāhati.
snp4.7:7.1	Paṇḍitoti samaññāto,
snp4.7:7.2	ekacariyaṁ adhiṭṭhito;
snp4.7:7.3	Athāpi methune yutto,
snp4.7:7.4	mandova parikissati.
snp4.7:8.1	Etamādīnavaṁ ñatvā,
snp4.7:8.2	Muni pubbāpare idha;
snp4.7:8.3	Ekacariyaṁ daḷhaṁ kayirā,
snp4.7:8.4	Na nisevetha methunaṁ.
snp4.7:9.1	Vivekaññeva sikkhetha,
snp4.7:9.2	etaṁ ariyānamuttamaṁ;
snp4.7:9.3	Na tena seṭṭho maññetha,
snp4.7:9.4	sa ve nibbānasantike.
snp4.7:10.1	Rittassa munino carato,
snp4.7:10.2	Kāmesu anapekkhino;
snp4.7:10.3	Oghatiṇṇassa pihayanti,
snp4.7:10.4	Kāmesu gadhitā pajā”ti.
snp4.7:10.5	Tissametteyyasuttaṁ sattamaṁ.
snp4.8:0.1	Sutta Nipāta 4.8
snp4.8:0.2	Pasūrasutta
snp4.8:1.1	Idheva suddhī iti vādayanti,
snp4.8:1.2	Nāññesu dhammesu visuddhimāhu;
snp4.8:1.3	Yaṁ nissitā tattha subhaṁ vadānā,
snp4.8:1.4	Paccekasaccesu puthū niviṭṭhā.
snp4.8:2.1	Te vādakāmā parisaṁ vigayha,
snp4.8:2.2	Bālaṁ dahantī mithu aññamaññaṁ;
snp4.8:2.3	Vadanti te aññasitā kathojjaṁ,
snp4.8:2.4	Pasaṁsakāmā kusalā vadānā.
snp4.8:3.1	Yutto kathāyaṁ parisāya majjhe,
snp4.8:3.2	Pasaṁsamicchaṁ vinighāti hoti;
snp4.8:3.3	Apāhatasmiṁ pana maṅku hoti,
snp4.8:3.4	Nindāya so kuppati randhamesī.
snp4.8:4.1	Yamassa vādaṁ parihīnamāhu,
snp4.8:4.2	Apāhataṁ pañhavimaṁsakāse;
snp4.8:4.3	Paridevati socati hīnavādo,
snp4.8:4.4	Upaccagā manti anutthunāti.
snp4.8:5.1	Ete vivādā samaṇesu jātā,
snp4.8:5.2	Etesu ugghātinighāti hoti;
snp4.8:5.3	Etampi disvā virame kathojjaṁ,
snp4.8:5.4	Na haññadatthatthi pasaṁsalābhā.
snp4.8:6.1	Pasaṁsito vā pana tattha hoti,
snp4.8:6.2	Akkhāya vādaṁ parisāya majjhe;
snp4.8:6.3	So hassatī unnamatī ca tena,
snp4.8:6.4	Pappuyya tamatthaṁ yathā mano ahu.
snp4.8:7.1	Yā unnatī sāssa vighātabhūmi,
snp4.8:7.2	Mānātimānaṁ vadate paneso;
snp4.8:7.3	Etampi disvā na vivādayetha,
snp4.8:7.4	Na hi tena suddhiṁ kusalā vadanti.
snp4.8:8.1	Sūro yathā rājakhādāya puṭṭho,
snp4.8:8.2	Abhigajjameti paṭisūramicchaṁ;
snp4.8:8.3	Yeneva so tena palehi sūra,
snp4.8:8.4	Pubbeva natthi yadidaṁ yudhāya.
snp4.8:9.1	Ye diṭṭhimuggayha vivādayanti,
snp4.8:9.2	Idameva saccanti ca vādayanti;
snp4.8:9.3	Te tvaṁ vadassū na hi tedha atthi,
snp4.8:9.4	Vādamhi jāte paṭisenikattā.
snp4.8:10.1	Visenikatvā pana ye caranti,
snp4.8:10.2	Diṭṭhīhi diṭṭhiṁ avirujjhamānā;
snp4.8:10.3	Tesu tvaṁ kiṁ labhetho pasūra,
snp4.8:10.4	Yesīdha natthī paramuggahītaṁ.
snp4.8:11.1	Atha tvaṁ pavitakkamāgamā,
snp4.8:11.2	Manasā diṭṭhigatāni cintayanto;
snp4.8:11.3	Dhonena yugaṁ samāgamā,
snp4.8:11.4	Na hi tvaṁ sakkhasi sampayātaveti.
snp4.8:11.5	Pasūrasuttaṁ aṭṭhamaṁ.
snp4.9:0.1	Sutta Nipāta 4.9
snp4.9:0.2	Māgaṇḍiyasutta
snp4.9:1.1	“Disvāna taṇhaṁ aratiṁ ragañca,
snp4.9:1.2	Nāhosi chando api methunasmiṁ;
snp4.9:1.3	Kimevidaṁ muttakarīsapuṇṇaṁ,
snp4.9:1.4	Pādāpi naṁ samphusituṁ na icche”.
snp4.9:2.1	“Etādisañce ratanaṁ na icchasi,
snp4.9:2.2	Nāriṁ narindehi bahūhi patthitaṁ;
snp4.9:2.3	Diṭṭhigataṁ sīlavataṁ nu jīvitaṁ,
snp4.9:2.4	Bhavūpapattiñca vadesi kīdisaṁ”.
snp4.9:3.1	“Idaṁ vadāmīti na tassa hoti,
snp4.9:3.2	(māgaṇḍiyāti bhagavā)
snp4.9:3.3	Dhammesu niccheyya samuggahītaṁ;
snp4.9:3.4	Passañca diṭṭhīsu anuggahāya,
snp4.9:3.5	Ajjhattasantiṁ pacinaṁ adassaṁ”.
snp4.9:4.1	“Vinicchayā yāni pakappitāni,
snp4.9:4.2	(iti māgaṇḍiyo)
snp4.9:4.3	Te ve munī brūsi anuggahāya;
snp4.9:4.4	Ajjhattasantīti yametamatthaṁ,
snp4.9:4.5	Kathaṁ nu dhīrehi paveditaṁ taṁ”.
snp4.9:5.1	“Na diṭṭhiyā na sutiyā na ñāṇena,
snp4.9:5.2	(māgaṇḍiyāti bhagavā)
snp4.9:5.3	Sīlabbatenāpi na suddhimāha;
snp4.9:5.4	Adiṭṭhiyā assutiyā añāṇā,
snp4.9:5.5	Asīlatā abbatā nopi tena;
snp4.9:5.6	Ete ca nissajja anuggahāya,
snp4.9:5.7	Santo anissāya bhavaṁ na jappe”.
snp4.9:6.1	“No ce kira diṭṭhiyā na sutiyā na ñāṇena,
snp4.9:6.2	(iti māgaṇḍiyo)
snp4.9:6.3	Sīlabbatenāpi na suddhimāha;
snp4.9:6.4	Adiṭṭhiyā assutiyā añāṇā,
snp4.9:6.5	Asīlatā abbatā nopi tena;
snp4.9:6.6	Maññāmahaṁ momuhameva dhammaṁ,
snp4.9:6.7	Diṭṭhiyā eke paccenti suddhiṁ”.
snp4.9:7.1	“Diṭṭhañca nissāya anupucchamāno,
snp4.9:7.2	(māgaṇḍiyāti bhagavā)
snp4.9:7.3	Samuggahītesu pamohamāgā;
snp4.9:7.4	Ito ca nāddakkhi aṇumpi saññaṁ,
snp4.9:7.5	Tasmā tuvaṁ momuhato dahāsi.
snp4.9:8.1	Samo visesī uda vā nihīno,
snp4.9:8.2	Yo maññati so vivadetha tena;
snp4.9:8.3	Tīsu vidhāsu avikampamāno,
snp4.9:8.4	Samo visesīti na tassa hoti.
snp4.9:9.1	Saccanti so brāhmaṇo kiṁ vadeyya,
snp4.9:9.2	Musāti vā so vivadetha kena;
snp4.9:9.3	Yasmiṁ samaṁ visamaṁ vāpi natthi,
snp4.9:9.4	Sa kena vādaṁ paṭisaṁyujeyya.
snp4.9:10.1	Okaṁ pahāya aniketasārī,
snp4.9:10.2	Gāme akubbaṁ muni santhavāni;
snp4.9:10.3	Kāmehi ritto apurakkharāno,
snp4.9:10.4	Kathaṁ na viggayha janena kayirā.
snp4.9:11.1	Yehi vivitto vicareyya loke,
snp4.9:11.2	Na tāni uggayha vadeyya nāgo;
snp4.9:11.3	Jalambujaṁ kaṇḍakavārijaṁ yathā,
snp4.9:11.4	Jalena paṅkena canūpalittaṁ;
snp4.9:11.5	Evaṁ munī santivādo agiddho,
snp4.9:11.6	Kāme ca loke ca anūpalitto.
snp4.9:12.1	Na vedagū diṭṭhiyāyako na mutiyā,
snp4.9:12.2	Sa mānameti na hi tammayo so;
snp4.9:12.3	Na kammunā nopi sutena neyyo,
snp4.9:12.4	Anūpanīto sa nivesanesu.
snp4.9:13.1	Saññāvirattassa na santi ganthā,
snp4.9:13.2	Paññāvimuttassa na santi mohā;
snp4.9:13.3	Saññañca diṭṭhiñca ye aggahesuṁ,
snp4.9:13.4	Te ghaṭṭayantā vicaranti loke”ti.
snp4.9:13.5	Māgaṇḍiyasuttaṁ navamaṁ.
snp4.10:0.1	Sutta Nipāta 4.10
snp4.10:0.2	Purābhedasutta
snp4.10:1.1	“Kathaṁdassī kathaṁsīlo,
snp4.10:1.2	upasantoti vuccati;
snp4.10:1.3	Taṁ me gotama pabrūhi,
snp4.10:1.4	pucchito uttamaṁ naraṁ”.
snp4.10:2.1	“Vītataṇho purā bhedā,
snp4.10:2.2	(iti bhagavā)
snp4.10:2.3	Pubbamantamanissito;
snp4.10:2.4	Vemajjhe nupasaṅkheyyo,
snp4.10:2.5	Tassa natthi purakkhataṁ.
snp4.10:3.1	Akkodhano asantāsī,
snp4.10:3.2	avikatthī akukkuco;
snp4.10:3.3	Mantabhāṇī anuddhato,
snp4.10:3.4	sa ve vācāyato muni.
snp4.10:4.1	Nirāsatti anāgate,
snp4.10:4.2	atītaṁ nānusocati;
snp4.10:4.3	Vivekadassī phassesu,
snp4.10:4.4	diṭṭhīsu ca na nīyati.
snp4.10:5.1	Patilīno akuhako,
snp4.10:5.2	apihālu amaccharī;
snp4.10:5.3	Appagabbho ajeguccho,
snp4.10:5.4	pesuṇeyye ca no yuto.
snp4.10:6.1	Sātiyesu anassāvī,
snp4.10:6.2	atimāne ca no yuto;
snp4.10:6.3	Saṇho ca paṭibhānavā,
snp4.10:6.4	na saddho na virajjati.
snp4.10:7.1	Lābhakamyā na sikkhati,
snp4.10:7.2	alābhe ca na kuppati;
snp4.10:7.3	Aviruddho ca taṇhāya,
snp4.10:7.4	rasesu nānugijjhati.
snp4.10:8.1	Upekkhako sadā sato,
snp4.10:8.2	na loke maññate samaṁ;
snp4.10:8.3	Na visesī na nīceyyo,
snp4.10:8.4	tassa no santi ussadā.
snp4.10:9.1	Yassa nissayanā natthi,
snp4.10:9.2	ñatvā dhammaṁ anissito;
snp4.10:9.3	Bhavāya vibhavāya vā,
snp4.10:9.4	taṇhā yassa na vijjati.
snp4.10:10.1	Taṁ brūmi upasantoti,
snp4.10:10.2	Kāmesu anapekkhinaṁ;
snp4.10:10.3	Ganthā tassa na vijjanti,
snp4.10:10.4	Atarī so visattikaṁ.
snp4.10:11.1	Na tassa puttā pasavo,
snp4.10:11.2	Khettaṁ vatthuñca vijjati;
snp4.10:11.3	Attā vāpi nirattā vā,
snp4.10:11.4	Na tasmiṁ upalabbhati.
snp4.10:12.1	Yena naṁ vajjuṁ puthujjanā,
snp4.10:12.2	Atho samaṇabrāhmaṇā;
snp4.10:12.3	Taṁ tassa apurakkhataṁ,
snp4.10:12.4	Tasmā vādesu nejati.
snp4.10:13.1	Vītagedho amaccharī,
snp4.10:13.2	Na ussesu vadate muni;
snp4.10:13.3	Na samesu na omesu,
snp4.10:13.4	Kappaṁ neti akappiyo.
snp4.10:14.1	Yassa loke sakaṁ natthi,
snp4.10:14.2	Asatā ca na socati;
snp4.10:14.3	Dhammesu ca na gacchati,
snp4.10:14.4	Sa ve santoti vuccatī”ti.
snp4.10:14.5	Purābhedasuttaṁ dasamaṁ.
snp4.11:0.1	Sutta Nipāta 4.11
snp4.11:0.2	Kalahavivādasutta
snp4.11:1.1	“Kutopahūtā kalahā vivādā,
snp4.11:1.2	Paridevasokā sahamaccharā ca;
snp4.11:1.3	Mānātimānā sahapesuṇā ca,
snp4.11:1.4	Kutopahūtā te tadiṅgha brūhi”.
snp4.11:2.1	“Piyappahūtā kalahā vivādā,
snp4.11:2.2	Paridevasokā sahamaccharā ca;
snp4.11:2.3	Mānātimānā sahapesuṇā ca,
snp4.11:2.4	Maccherayuttā kalahā vivādā;
snp4.11:2.5	Vivādajātesu ca pesuṇāni”.
snp4.11:3.1	“Piyā su lokasmiṁ kutonidānā,
snp4.11:3.2	Ye cāpi lobhā vicaranti loke;
snp4.11:3.3	Āsā ca niṭṭhā ca kutonidānā,
snp4.11:3.4	Ye samparāyāya narassa honti”.
snp4.11:4.1	“Chandānidānāni piyāni loke,
snp4.11:4.2	Ye cāpi lobhā vicaranti loke;
snp4.11:4.3	Āsā ca niṭṭhā ca itonidānā,
snp4.11:4.4	Ye samparāyāya narassa honti”.
snp4.11:5.1	“Chando nu lokasmiṁ kutonidāno,
snp4.11:5.2	Vinicchayā cāpi kutopahūtā;
snp4.11:5.3	Kodho mosavajjañca kathaṅkathā ca,
snp4.11:5.4	Ye vāpi dhammā samaṇena vuttā”.
snp4.11:6.1	“Sātaṁ asātanti yamāhu loke,
snp4.11:6.2	Tamūpanissāya pahoti chando;
snp4.11:6.3	Rūpesu disvā vibhavaṁ bhavañca,
snp4.11:6.4	Vinicchayaṁ kubbati jantu loke.
snp4.11:7.1	Kodho mosavajjañca kathaṅkathā ca,
snp4.11:7.2	Etepi dhammā dvayameva sante;
snp4.11:7.3	Kathaṅkathī ñāṇapathāya sikkhe,
snp4.11:7.4	Ñatvā pavuttā samaṇena dhammā”.
snp4.11:8.1	“Sātaṁ asātañca kutonidānā,
snp4.11:8.2	Kismiṁ asante na bhavanti hete;
snp4.11:8.3	Vibhavaṁ bhavañcāpi yametamatthaṁ,
snp4.11:8.4	Etaṁ me pabrūhi yatonidānaṁ”.
snp4.11:9.1	“Phassanidānaṁ sātaṁ asātaṁ,
snp4.11:9.2	Phasse asante na bhavanti hete;
snp4.11:9.3	Vibhavaṁ bhavañcāpi yametamatthaṁ,
snp4.11:9.4	Etaṁ te pabrūmi itonidānaṁ”.
snp4.11:10.1	“Phasso nu lokasmi kutonidāno,
snp4.11:10.2	Pariggahā cāpi kutopahūtā;
snp4.11:10.3	Kismiṁ asante na mamattamatthi,
snp4.11:10.4	Kismiṁ vibhūte na phusanti phassā”.
snp4.11:11.1	“Nāmañca rūpañca paṭicca phasso,
snp4.11:11.2	Icchānidānāni pariggahāni;
snp4.11:11.3	Icchāyasantyā na mamattamatthi,
snp4.11:11.4	Rūpe vibhūte na phusanti phassā”.
snp4.11:12.1	“Kathaṁ sametassa vibhoti rūpaṁ,
snp4.11:12.2	Sukhaṁ dukhañcāpi kathaṁ vibhoti;
snp4.11:12.3	Etaṁ me pabrūhi yathā vibhoti,
snp4.11:12.4	Taṁ jāniyāmāti me mano ahu”.
snp4.11:13.1	“Na saññasaññī na visaññasaññī,
snp4.11:13.2	Nopi asaññī na vibhūtasaññī;
snp4.11:13.3	Evaṁ sametassa vibhoti rūpaṁ,
snp4.11:13.4	Saññānidānā hi papañcasaṅkhā”.
snp4.11:14.1	“Yaṁ taṁ apucchimha akittayī no,
snp4.11:14.2	Aññaṁ taṁ pucchāma tadiṅgha brūhi;
snp4.11:14.3	Ettāvataggaṁ nu vadanti heke,
snp4.11:14.4	Yakkhassa suddhiṁ idha paṇḍitāse;
snp4.11:14.5	Udāhu aññampi vadanti etto”.
snp4.11:15.1	“Ettāvataggampi vadanti heke,
snp4.11:15.2	Yakkhassa suddhiṁ idha paṇḍitāse;
snp4.11:15.3	Tesaṁ paneke samayaṁ vadanti,
snp4.11:15.4	Anupādisese kusalā vadānā.
snp4.11:16.1	Ete ca ñatvā upanissitāti,
snp4.11:16.2	Ñatvā munī nissaye so vimaṁsī;
snp4.11:16.3	Ñatvā vimutto na vivādameti,
snp4.11:16.4	Bhavābhavāya na sameti dhīro”ti.
snp4.11:16.5	Kalahavivādasuttaṁ ekādasamaṁ.
snp4.12:0.1	Sutta Nipāta 4.12
snp4.12:0.2	Cūḷabyūhasutta
snp4.12:1.1	“Sakaṁsakaṁdiṭṭhiparibbasānā,
snp4.12:1.2	Viggayha nānā kusalā vadanti;
snp4.12:1.3	Yo evaṁ jānāti sa vedi dhammaṁ,
snp4.12:1.4	Idaṁ paṭikkosamakevalī so.
snp4.12:2.1	Evampi viggayha vivādayanti,
snp4.12:2.2	Bālo paro akkusaloti cāhu;
snp4.12:2.3	Sacco nu vādo katamo imesaṁ,
snp4.12:2.4	Sabbeva hīme kusalāvadānā”.
snp4.12:3.1	“Parassa ce dhammamanānujānaṁ,
snp4.12:3.2	Bālomako hoti nihīnapañño;
snp4.12:3.3	Sabbeva bālā sunihīnapaññā,
snp4.12:3.4	Sabbevime diṭṭhiparibbasānā.
snp4.12:4.1	Sandiṭṭhiyā ceva na vīvadātā,
snp4.12:4.2	Saṁsuddhapaññā kusalā mutīmā;
snp4.12:4.3	Na tesaṁ koci parihīnapañño,
snp4.12:4.4	Diṭṭhī hi tesampi tathā samattā.
snp4.12:5.1	Na vāhametaṁ tathiyanti brūmi,
snp4.12:5.2	Yamāhu bālā mithu aññamaññaṁ;
snp4.12:5.3	Sakaṁ sakaṁ diṭṭhimakaṁsu saccaṁ,
snp4.12:5.4	Tasmā hi bāloti paraṁ dahanti”.
snp4.12:6.1	“Yamāhu saccaṁ tathiyanti eke,
snp4.12:6.2	Tamāhu aññe tucchaṁ musāti;
snp4.12:6.3	Evampi vigayha vivādayanti,
snp4.12:6.4	Kasmā na ekaṁ samaṇā vadanti”.
snp4.12:7.1	“Ekañhi saccaṁ na dutīyamatthi,
snp4.12:7.2	Yasmiṁ pajā no vivade pajānaṁ;
snp4.12:7.3	Nānā te saccāni sayaṁ thunanti,
snp4.12:7.4	Tasmā na ekaṁ samaṇā vadanti”.
snp4.12:8.1	“Kasmā nu saccāni vadanti nānā,
snp4.12:8.2	Pavādiyāse kusalāvadānā;
snp4.12:8.3	Saccāni sutāni bahūni nānā,
snp4.12:8.4	Udāhu te takkamanussaranti”.
snp4.12:9.1	“Na heva saccāni bahūni nānā,
snp4.12:9.2	Aññatra saññāya niccāni loke;
snp4.12:9.3	Takkañca diṭṭhīsu pakappayitvā,
snp4.12:9.4	Saccaṁ musāti dvayadhammamāhu.
snp4.12:10.1	Diṭṭhe sute sīlavate mute vā,
snp4.12:10.2	Ete ca nissāya vimānadassī;
snp4.12:10.3	Vinicchaye ṭhatvā pahassamāno,
snp4.12:10.4	Bālo paro akkusaloti cāha.
snp4.12:11.1	Yeneva bāloti paraṁ dahāti,
snp4.12:11.2	Tenātumānaṁ kusaloti cāha;
snp4.12:11.3	Sayamattanā so kusalāvadāno,
snp4.12:11.4	Aññaṁ vimāneti tadeva pāva.
snp4.12:12.1	Atisāradiṭṭhiyā so samatto,
snp4.12:12.2	Mānena matto paripuṇṇamānī;
snp4.12:12.3	Sayameva sāmaṁ manasābhisitto,
snp4.12:12.4	Diṭṭhī hi sā tassa tathā samattā.
snp4.12:13.1	Parassa ce hi vacasā nihīno,
snp4.12:13.2	Tumo sahā hoti nihīnapañño;
snp4.12:13.3	Atha ce sayaṁ vedagū hoti dhīro,
snp4.12:13.4	Na koci bālo samaṇesu atthi.
snp4.12:14.1	Aññaṁ ito yābhivadanti dhammaṁ,
snp4.12:14.2	Aparaddhā suddhimakevalī te;
snp4.12:14.3	Evampi titthyā puthuso vadanti,
snp4.12:14.4	Sandiṭṭhirāgena hi tebhirattā.
snp4.12:15.1	Idheva suddhiṁ iti vādayanti,
snp4.12:15.2	Nāññesu dhammesu visuddhimāhu;
snp4.12:15.3	Evampi titthyā puthuso niviṭṭhā,
snp4.12:15.4	Sakāyane tattha daḷhaṁ vadānā.
snp4.12:16.1	Sakāyane vāpi daḷhaṁ vadāno,
snp4.12:16.2	Kamettha bāloti paraṁ daheyya;
snp4.12:16.3	Sayaṁva so medhagamāvaheyya,
snp4.12:16.4	Paraṁ vadaṁ bālamasuddhidhammaṁ.
snp4.12:17.1	Vinicchaye ṭhatvā sayaṁ pamāya,
snp4.12:17.2	Uddhaṁsa lokasmiṁ vivādameti;
snp4.12:17.3	Hitvāna sabbāni vinicchayāni,
snp4.12:17.4	Na medhagaṁ kubbati jantu loke”ti.
snp4.12:17.5	Cūḷabyūhasuttaṁ dvādasamaṁ.
snp4.13:0.1	Sutta Nipāta 4.13
snp4.13:0.2	Mahābyūhasutta
snp4.13:1.1	“Ye kecime diṭṭhiparibbasānā,
snp4.13:1.2	Idameva saccanti vivādayanti;
snp4.13:1.3	Sabbeva te nindamanvānayanti,
snp4.13:1.4	Atho pasaṁsampi labhanti tattha”.
snp4.13:2.1	“Appañhi etaṁ na alaṁ samāya,
snp4.13:2.2	Duve vivādassa phalāni brūmi;
snp4.13:2.3	Etampi disvā na vivādayetha,
snp4.13:2.4	Khemābhipassaṁ avivādabhūmiṁ”.
snp4.13:3.1	“Yā kācimā sammutiyo puthujjā,
snp4.13:3.2	Sabbāva etā na upeti vidvā;
snp4.13:3.3	Anūpayo so upayaṁ kimeyya,
snp4.13:3.4	Diṭṭhe sute khantimakubbamāno”.
snp4.13:4.1	“Sīluttamā saññamenāhu suddhiṁ,
snp4.13:4.2	Vataṁ samādāya upaṭṭhitāse;
snp4.13:4.3	Idheva sikkhema athassa suddhiṁ,
snp4.13:4.4	Bhavūpanītā kusalāvadānā.
snp4.13:5.1	Sace cuto sīlavatato hoti,
snp4.13:5.2	Pavedhatī kamma virādhayitvā;
snp4.13:5.3	Pajappatī patthayatī ca suddhiṁ,
snp4.13:5.4	Satthāva hīno pavasaṁ gharamhā.
snp4.13:6.1	Sīlabbataṁ vāpi pahāya sabbaṁ,
snp4.13:6.2	Kammañca sāvajjanavajjametaṁ;
snp4.13:6.3	Suddhiṁ asuddhinti apatthayāno,
snp4.13:6.4	Virato care santimanuggahāya.
snp4.13:7.1	Tamūpanissāya jigucchitaṁ vā,
snp4.13:7.2	Atha vāpi diṭṭhaṁ va sutaṁ mutaṁ vā;
snp4.13:7.3	Uddhaṁsarā suddhimanutthunanti,
snp4.13:7.4	Avītataṇhāse bhavābhavesu.
snp4.13:8.1	Patthayamānassa hi jappitāni,
snp4.13:8.2	Pavedhitaṁ vāpi pakappitesu;
snp4.13:8.3	Cutūpapāto idha yassa natthi,
snp4.13:8.4	Sa kena vedheyya kuhiṁ va jappe”.
snp4.13:9.1	“Yamāhu dhammaṁ paramanti eke,
snp4.13:9.2	Tameva hīnanti panāhu aññe;
snp4.13:9.3	Sacco nu vādo katamo imesaṁ,
snp4.13:9.4	Sabbeva hīme kusalāvadānā”.
snp4.13:10.1	“Sakañhi dhammaṁ paripuṇṇamāhu,
snp4.13:10.2	Aññassa dhammaṁ pana hīnamāhu;
snp4.13:10.3	Evampi viggayha vivādayanti,
snp4.13:10.4	Sakaṁ sakaṁ sammutimāhu saccaṁ.
snp4.13:11.1	Parassa ce vambhayitena hīno,
snp4.13:11.2	Na koci dhammesu visesi assa;
snp4.13:11.3	Puthū hi aññassa vadanti dhammaṁ,
snp4.13:11.4	Nihīnato samhi daḷhaṁ vadānā.
snp4.13:12.1	Saddhammapūjāpi nesaṁ tatheva,
snp4.13:12.2	Yathā pasaṁsanti sakāyanāni;
snp4.13:12.3	Sabbeva vādā tathiyā bhaveyyuṁ,
snp4.13:12.4	Suddhī hi nesaṁ paccattameva.
snp4.13:13.1	Na brāhmaṇassa paraneyyamatthi,
snp4.13:13.2	Dhammesu niccheyya samuggahītaṁ;
snp4.13:13.3	Tasmā vivādāni upātivatto,
snp4.13:13.4	Na hi seṭṭhato passati dhammamaññaṁ.
snp4.13:14.1	Jānāmi passāmi tatheva etaṁ,
snp4.13:14.2	Diṭṭhiyā eke paccenti suddhiṁ;
snp4.13:14.3	Addakkhi ce kiñhi tumassa tena,
snp4.13:14.4	Atisitvā aññena vadanti suddhiṁ.
snp4.13:15.1	Passaṁ naro dakkhati nāmarūpaṁ,
snp4.13:15.2	Disvāna vā ñassati tānimeva;
snp4.13:15.3	Kāmaṁ bahuṁ passatu appakaṁ vā,
snp4.13:15.4	Na hi tena suddhiṁ kusalā vadanti.
snp4.13:16.1	Nivissavādī na hi subbināyo,
snp4.13:16.2	Pakappitaṁ diṭṭhi purakkharāno;
snp4.13:16.3	Yaṁ nissito tattha subhaṁ vadāno,
snp4.13:16.4	Suddhiṁ vado tattha tathaddasā so.
snp4.13:17.1	Na brāhmaṇo kappamupeti saṅkhā,
snp4.13:17.2	Na diṭṭhisārī napi ñāṇabandhu;
snp4.13:17.3	Ñatvā ca so sammutiyo puthujjā,
snp4.13:17.4	Upekkhatī uggahaṇanti maññe.
snp4.13:18.1	Vissajja ganthāni munīdha loke,
snp4.13:18.2	Vivādajātesu na vaggasārī;
snp4.13:18.3	Santo asantesu upekkhako so,
snp4.13:18.4	Anuggaho uggahaṇanti maññe.
snp4.13:19.1	Pubbāsave hitvā nave akubbaṁ,
snp4.13:19.2	Na chandagū nopi nivissavādī;
snp4.13:19.3	Sa vippamutto diṭṭhigatehi dhīro,
snp4.13:19.4	Na lippati loke anattagarahī.
snp4.13:20.1	Sa sabbadhammesu visenibhūto,
snp4.13:20.2	Yaṁ kiñci diṭṭhaṁ va sutaṁ mutaṁ vā;
snp4.13:20.3	Sa pannabhāro muni vippamutto,
snp4.13:20.4	Na kappiyo nūparato na patthiyo”ti.
snp4.13:20.5	Mahābyūhasuttaṁ terasamaṁ.
snp4.14:0.1	Sutta Nipāta 4.14
snp4.14:0.2	Tuvaṭakasutta
snp4.14:1.1	“Pucchāmi taṁ ādiccabandhu,
snp4.14:1.2	Vivekaṁ santipadañca mahesi;
snp4.14:1.3	Kathaṁ disvā nibbāti bhikkhu,
snp4.14:1.4	Anupādiyāno lokasmiṁ kiñci”.
snp4.14:2.1	“Mūlaṁ papañcasaṅkhāya,
snp4.14:2.2	(iti bhagavā)
snp4.14:2.3	Mantā asmīti sabbamuparundhe;
snp4.14:2.4	Yā kāci taṇhā ajjhattaṁ,
snp4.14:2.5	Tāsaṁ vinayā sadā sato sikkhe.
snp4.14:3.1	Yaṁ kiñci dhammamabhijaññā,
snp4.14:3.2	Ajjhattaṁ atha vāpi bahiddhā;
snp4.14:3.3	Na tena thāmaṁ kubbetha,
snp4.14:3.4	Na hi sā nibbuti sataṁ vuttā.
snp4.14:4.1	Seyyo na tena maññeyya,
snp4.14:4.2	Nīceyyo atha vāpi sarikkho;
snp4.14:4.3	Phuṭṭho anekarūpehi,
snp4.14:4.4	Nātumānaṁ vikappayaṁ tiṭṭhe.
snp4.14:5.1	Ajjhattamevupasame,
snp4.14:5.2	Na aññato bhikkhu santimeseyya;
snp4.14:5.3	Ajjhattaṁ upasantassa,
snp4.14:5.4	Natthi attā kuto nirattā vā.
snp4.14:6.1	Majjhe yathā samuddassa,
snp4.14:6.2	Ūmi no jāyatī ṭhito hoti;
snp4.14:6.3	Evaṁ ṭhito anejassa,
snp4.14:6.4	Ussadaṁ bhikkhu na kareyya kuhiñci”.
snp4.14:7.1	“Akittayī vivaṭacakkhu,
snp4.14:7.2	Sakkhidhammaṁ parissayavinayaṁ;
snp4.14:7.3	Paṭipadaṁ vadehi bhaddante,
snp4.14:7.4	Pātimokkhaṁ atha vāpi samādhiṁ”.
snp4.14:8.1	“Cakkhūhi neva lolassa,
snp4.14:8.2	Gāmakathāya āvaraye sotaṁ;
snp4.14:8.3	Rase ca nānugijjheyya,
snp4.14:8.4	Na ca mamāyetha kiñci lokasmiṁ.
snp4.14:9.1	Phassena yadā phuṭṭhassa,
snp4.14:9.2	Paridevaṁ bhikkhu na kareyya kuhiñci;
snp4.14:9.3	Bhavañca nābhijappeyya,
snp4.14:9.4	Bheravesu ca na sampavedheyya.
snp4.14:10.1	Annānamatho pānānaṁ,
snp4.14:10.2	Khādanīyānaṁ athopi vatthānaṁ;
snp4.14:10.3	Laddhā na sannidhiṁ kayirā,
snp4.14:10.4	Na ca parittase tāni alabhamāno.
snp4.14:11.1	Jhāyī na pādalolassa,
snp4.14:11.2	Virame kukkuccā nappamajjeyya;
snp4.14:11.3	Athāsanesu sayanesu,
snp4.14:11.4	Appasaddesu bhikkhu vihareyya.
snp4.14:12.1	Niddaṁ na bahulīkareyya,
snp4.14:12.2	Jāgariyaṁ bhajeyya ātāpī;
snp4.14:12.3	Tandiṁ māyaṁ hassaṁ khiḍḍaṁ,
snp4.14:12.4	Methunaṁ vippajahe savibhūsaṁ.
snp4.14:13.1	Āthabbaṇaṁ supinaṁ lakkhaṇaṁ,
snp4.14:13.2	No vidahe athopi nakkhattaṁ;
snp4.14:13.3	Virutañca gabbhakaraṇaṁ,
snp4.14:13.4	Tikicchaṁ māmako na seveyya.
snp4.14:14.1	Nindāya nappavedheyya,
snp4.14:14.2	Na uṇṇameyya pasaṁsito bhikkhu;
snp4.14:14.3	Lobhaṁ saha macchariyena,
snp4.14:14.4	Kodhaṁ pesuṇiyañca panudeyya.
snp4.14:15.1	Kayavikkaye na tiṭṭheyya,
snp4.14:15.2	Upavādaṁ bhikkhu na kareyya kuhiñci;
snp4.14:15.3	Gāme ca nābhisajjeyya,
snp4.14:15.4	Lābhakamyā janaṁ na lapayeyya.
snp4.14:16.1	Na ca katthitā siyā bhikkhu,
snp4.14:16.2	Na ca vācaṁ payuttaṁ bhāseyya;
snp4.14:16.3	Pāgabbhiyaṁ na sikkheyya,
snp4.14:16.4	Kathaṁ viggāhikaṁ na kathayeyya.
snp4.14:17.1	Mosavajje na nīyetha,
snp4.14:17.2	Sampajāno saṭhāni na kayirā;
snp4.14:17.3	Atha jīvitena paññāya,
snp4.14:17.4	Sīlabbatena nāññamatimaññe.
snp4.14:18.1	Sutvā rusito bahuṁ vācaṁ,
snp4.14:18.2	Samaṇānaṁ vā puthujanānaṁ;
snp4.14:18.3	Pharusena ne na paṭivajjā,
snp4.14:18.4	Na hi santo paṭisenikaronti.
snp4.14:19.1	Etañca dhammamaññāya,
snp4.14:19.2	Vicinaṁ bhikkhu sadā sato sikkhe;
snp4.14:19.3	Santīti nibbutiṁ ñatvā,
snp4.14:19.4	Sāsane gotamassa na pamajjeyya.
snp4.14:20.1	Abhibhū hi so anabhibhūto,
snp4.14:20.2	Sakkhidhammamanītihamadassī;
snp4.14:20.3	Tasmā hi tassa bhagavato sāsane,
snp4.14:20.4	Appamatto sadā namassamanusikkhe”ti.
snp4.14:20.5	Tuvaṭakasuttaṁ cuddasamaṁ.
snp4.15:0.1	Sutta Nipāta 4.15
snp4.15:0.2	Attadaṇḍasutta
snp4.15:1.1	“Attadaṇḍā bhayaṁ jātaṁ,
snp4.15:1.2	janaṁ passatha medhagaṁ;
snp4.15:1.3	Saṁvegaṁ kittayissāmi,
snp4.15:1.4	yathā saṁvijitaṁ mayā.
snp4.15:2.1	Phandamānaṁ pajaṁ disvā,
snp4.15:2.2	macche appodake yathā;
snp4.15:2.3	Aññamaññehi byāruddhe,
snp4.15:2.4	disvā maṁ bhayamāvisi.
snp4.15:3.1	Samantamasāro loko,
snp4.15:3.2	disā sabbā sameritā;
snp4.15:3.3	Icchaṁ bhavanamattano,
snp4.15:3.4	nāddasāsiṁ anositaṁ.
snp4.15:4.1	Osāne tveva byāruddhe,
snp4.15:4.2	Disvā me aratī ahu;
snp4.15:4.3	Athettha sallamaddakkhiṁ,
snp4.15:4.4	Duddasaṁ hadayanissitaṁ.
snp4.15:5.1	Yena sallena otiṇṇo,
snp4.15:5.2	disā sabbā vidhāvati;
snp4.15:5.3	Tameva sallamabbuyha,
snp4.15:5.4	na dhāvati na sīdati.
snp4.15:6.1	Tattha sikkhānugīyanti,
snp4.15:6.2	yāni loke gadhitāni;
snp4.15:6.3	Na tesu pasuto siyā,
snp4.15:6.4	nibbijjha sabbaso kāme;
snp4.15:6.5	Sikkhe nibbānamattano.
snp4.15:7.1	Sacco siyā appagabbho,
snp4.15:7.2	amāyo rittapesuṇo;
snp4.15:7.3	Akkodhano lobhapāpaṁ,
snp4.15:7.4	vevicchaṁ vitare muni.
snp4.15:8.1	Niddaṁ tandiṁ sahe thīnaṁ,
snp4.15:8.2	pamādena na saṁvase;
snp4.15:8.3	Atimāne na tiṭṭheyya,
snp4.15:8.4	nibbānamanaso naro.
snp4.15:9.1	Mosavajje na nīyetha,
snp4.15:9.2	rūpe snehaṁ na kubbaye;
snp4.15:9.3	Mānañca parijāneyya,
snp4.15:9.4	sāhasā virato care.
snp4.15:10.1	Purāṇaṁ nābhinandeyya,
snp4.15:10.2	Nave khantiṁ na kubbaye;
snp4.15:10.3	Hiyyamāne na soceyya,
snp4.15:10.4	Ākāsaṁ na sito siyā.
snp4.15:11.1	Gedhaṁ brūmi mahoghoti,
snp4.15:11.2	Ājavaṁ brūmi jappanaṁ;
snp4.15:11.3	Ārammaṇaṁ pakappanaṁ,
snp4.15:11.4	Kāmapaṅko duraccayo.
snp4.15:12.1	Saccā avokkamma muni,
snp4.15:12.2	Thale tiṭṭhati brāhmaṇo;
snp4.15:12.3	Sabbaṁ so paṭinissajja,
snp4.15:12.4	Sa ve santoti vuccati.
snp4.15:13.1	Sa ve vidvā sa vedagū,
snp4.15:13.2	Ñatvā dhammaṁ anissito;
snp4.15:13.3	Sammā so loke iriyāno,
snp4.15:13.4	Na pihetīdha kassaci.
snp4.15:14.1	Yodha kāme accatari,
snp4.15:14.2	Saṅgaṁ loke duraccayaṁ;
snp4.15:14.3	Na so socati nājjheti,
snp4.15:14.4	Chinnasoto abandhano.
snp4.15:15.1	Yaṁ pubbe taṁ visosehi,
snp4.15:15.2	Pacchā te māhu kiñcanaṁ;
snp4.15:15.3	Majjhe ce no gahessasi,
snp4.15:15.4	Upasanto carissasi.
snp4.15:16.1	Sabbaso nāmarūpasmiṁ,
snp4.15:16.2	Yassa natthi mamāyitaṁ;
snp4.15:16.3	Asatā ca na socati,
snp4.15:16.4	Sa ve loke na jīyati.
snp4.15:17.1	Yassa natthi idaṁ meti,
snp4.15:17.2	Paresaṁ vāpi kiñcanaṁ;
snp4.15:17.3	Mamattaṁ so asaṁvindaṁ,
snp4.15:17.4	Natthi meti na socati.
snp4.15:18.1	Aniṭṭhurī ananugiddho,
snp4.15:18.2	Anejo sabbadhī samo;
snp4.15:18.3	Tamānisaṁsaṁ pabrūmi,
snp4.15:18.4	Pucchito avikampinaṁ.
snp4.15:19.1	Anejassa vijānato,
snp4.15:19.2	Natthi kāci nisaṅkhati;
snp4.15:19.3	Virato so viyārabbhā,
snp4.15:19.4	Khemaṁ passati sabbadhi.
snp4.15:20.1	Na samesu na omesu,
snp4.15:20.2	Na ussesu vadate muni;
snp4.15:20.3	Santo so vītamaccharo,
snp4.15:20.4	Nādeti na nirassatī”ti.
snp4.15:20.5	Attadaṇḍasuttaṁ pannarasamaṁ.
snp4.16:0.1	Sutta Nipāta 4.16
snp4.16:0.2	Sāriputtasutta
snp4.16:1.1	“Na me diṭṭho ito pubbe,
snp4.16:1.2	(iccāyasmā sāriputto)
snp4.16:1.3	Na suto uda kassaci;
snp4.16:1.4	Evaṁ vagguvado satthā,
snp4.16:1.5	Tusitā gaṇimāgato.
snp4.16:2.1	Sadevakassa lokassa,
snp4.16:2.2	yathā dissati cakkhumā;
snp4.16:2.3	Sabbaṁ tamaṁ vinodetvā,
snp4.16:2.4	ekova ratimajjhagā.
snp4.16:3.1	Taṁ buddhaṁ asitaṁ tādiṁ,
snp4.16:3.2	akuhaṁ gaṇimāgataṁ;
snp4.16:3.3	Bahūnamidha baddhānaṁ,
snp4.16:3.4	atthi pañhena āgamaṁ.
snp4.16:4.1	Bhikkhuno vijigucchato,
snp4.16:4.2	bhajato rittamāsanaṁ;
snp4.16:4.3	Rukkhamūlaṁ susānaṁ vā,
snp4.16:4.4	pabbatānaṁ guhāsu vā.
snp4.16:5.1	Uccāvacesu sayanesu,
snp4.16:5.2	kīvanto tattha bheravā;
snp4.16:5.3	Yehi bhikkhu na vedheyya,
snp4.16:5.4	nigghose sayanāsane.
snp4.16:6.1	Katī parissayā loke,
snp4.16:6.2	gacchato agataṁ disaṁ;
snp4.16:6.3	Ye bhikkhu abhisambhave,
snp4.16:6.4	pantamhi sayanāsane.
snp4.16:7.1	Kyāssa byappathayo assu,
snp4.16:7.2	kyāssassu idha gocarā;
snp4.16:7.3	Kāni sīlabbatānāssu,
snp4.16:7.4	pahitattassa bhikkhuno.
snp4.16:8.1	Kaṁ so sikkhaṁ samādāya,
snp4.16:8.2	ekodi nipako sato;
snp4.16:8.3	Kammāro rajatasseva,
snp4.16:8.4	niddhame malamattano”.
snp4.16:9.1	“Vijigucchamānassa yadidaṁ phāsu,
snp4.16:9.2	(sāriputtāti bhagavā)
snp4.16:9.3	Rittāsanaṁ sayanaṁ sevato ce;
snp4.16:9.4	Sambodhikāmassa yathānudhammaṁ,
snp4.16:9.5	Taṁ te pavakkhāmi yathā pajānaṁ.
snp4.16:10.1	Pañcannaṁ dhīro bhayānaṁ na bhāye,
snp4.16:10.2	Bhikkhu sato sapariyantacārī;
snp4.16:10.3	Ḍaṁsādhipātānaṁ sarīsapānaṁ,
snp4.16:10.4	Manussaphassānaṁ catuppadānaṁ.
snp4.16:11.1	Paradhammikānampi na santaseyya,
snp4.16:11.2	Disvāpi tesaṁ bahubheravāni;
snp4.16:11.3	Athāparāni abhisambhaveyya,
snp4.16:11.4	Parissayāni kusalānuesī.
snp4.16:12.1	Ātaṅkaphassena khudāya phuṭṭho,
snp4.16:12.2	Sītaṁ athuṇhaṁ adhivāsayeyya;
snp4.16:12.3	So tehi phuṭṭho bahudhā anoko,
snp4.16:12.4	Viriyaṁ parakkammadaḷhaṁ kareyya.
snp4.16:13.1	Theyyaṁ na kāre na musā bhaṇeyya,
snp4.16:13.2	Mettāya phasse tasathāvarāni;
snp4.16:13.3	Yadāvilattaṁ manaso vijaññā,
snp4.16:13.4	Kaṇhassa pakkhoti vinodayeyya.
snp4.16:14.1	Kodhātimānassa vasaṁ na gacche,
snp4.16:14.2	Mūlampi tesaṁ palikhañña tiṭṭhe;
snp4.16:14.3	Athappiyaṁ vā pana appiyaṁ vā,
snp4.16:14.4	Addhā bhavanto abhisambhaveyya.
snp4.16:15.1	Paññaṁ purakkhatvā kalyāṇapīti,
snp4.16:15.2	Vikkhambhaye tāni parissayāni;
snp4.16:15.3	Aratiṁ sahetha sayanamhi pante,
snp4.16:15.4	Caturo sahetha paridevadhamme.
snp4.16:16.1	Kiṁsū asissāmi kuva vā asissaṁ,
snp4.16:16.2	Dukkhaṁ vata settha kvajja sessaṁ;
snp4.16:16.3	Ete vitakke paridevaneyye,
snp4.16:16.4	Vinayetha sekho aniketacārī.
snp4.16:17.1	Annañca laddhā vasanañca kāle,
snp4.16:17.2	Mattaṁ so jaññā idha tosanatthaṁ;
snp4.16:17.3	So tesu gutto yatacāri gāme,
snp4.16:17.4	Rusitopi vācaṁ pharusaṁ na vajjā.
snp4.16:18.1	Okkhittacakkhu na ca pādalolo,
snp4.16:18.2	Jhānānuyutto bahujāgarassa;
snp4.16:18.3	Upekkhamārabbha samāhitatto,
snp4.16:18.4	Takkāsayaṁ kukkucciyūpachinde.
snp4.16:19.1	Cudito vacībhi satimābhinande,
snp4.16:19.2	Sabrahmacārīsu khilaṁ pabhinde;
snp4.16:19.3	Vācaṁ pamuñce kusalaṁ nātivelaṁ,
snp4.16:19.4	Janavādadhammāya na cetayeyya.
snp4.16:20.1	Athāparaṁ pañca rajāni loke,
snp4.16:20.2	Yesaṁ satīmā vinayāya sikkhe;
snp4.16:20.3	Rūpesu saddesu atho rasesu,
snp4.16:20.4	Gandhesu phassesu sahetha rāgaṁ.
snp4.16:21.1	Etesu dhammesu vineyya chandaṁ,
snp4.16:21.2	Bhikkhu satimā suvimuttacitto;
snp4.16:21.3	Kālena so sammā dhammaṁ parivīmaṁsamāno,
snp4.16:21.4	Ekodibhūto vihane tamaṁ so”ti.
snp4.16:21.5	Sāriputtasuttaṁ soḷasamaṁ.
snp4.16:21.6	Aṭṭhakavaggo catuttho.
snp4.16:22.0	Tassuddānaṁ
snp4.16:22.1	Kāmaṁ guhañca duṭṭhā ca,
snp4.16:22.2	suddhañca paramā jarā;
snp4.16:22.3	Metteyyo ca pasūro ca,
snp4.16:22.4	māgaṇḍi purābhedanaṁ.
snp4.16:23.1	Kalahaṁ dve ca byūhāni,
snp4.16:23.2	punadeva tuvaṭṭakaṁ;
snp4.16:23.3	Attadaṇḍavaraṁ suttaṁ,
snp4.16:23.4	therapuṭṭhena soḷasa;
snp4.16:23.5	Iti etāni suttāni,
snp4.16:23.6	sabbānaṭṭhakavaggikāti.
snp5.1:0.1	Sutta Nipāta 5.1
snp5.1:0.2	Vatthugāthā
snp5.1:1.1	Kosalānaṁ purā rammā,
snp5.1:1.2	agamā dakkhiṇāpathaṁ;
snp5.1:1.3	Ākiñcaññaṁ patthayāno,
snp5.1:1.4	brāhmaṇo mantapāragū.
snp5.1:2.1	So assakassa visaye,
snp5.1:2.2	aḷakassa samāsane;
snp5.1:2.3	Vasi godhāvarīkūle,
snp5.1:2.4	uñchena ca phalena ca.
snp5.1:3.1	Tasseva upanissāya,
snp5.1:3.2	gāmo ca vipulo ahu;
snp5.1:3.3	Tato jātena āyena,
snp5.1:3.4	mahāyaññamakappayi.
snp5.1:4.1	Mahāyaññaṁ yajitvāna,
snp5.1:4.2	puna pāvisi assamaṁ;
snp5.1:4.3	Tasmiṁ paṭipaviṭṭhamhi,
snp5.1:4.4	añño āgañchi brāhmaṇo.
snp5.1:5.1	Ugghaṭṭapādo tasito,
snp5.1:5.2	paṅkadanto rajassiro;
snp5.1:5.3	So ca naṁ upasaṅkamma,
snp5.1:5.4	satāni pañca yācati.
snp5.1:6.1	Tamenaṁ bāvarī disvā,
snp5.1:6.2	āsanena nimantayi;
snp5.1:6.3	Sukhañca kusalaṁ pucchi,
snp5.1:6.4	idaṁ vacanamabravi.
snp5.1:7.1	“Yaṁ kho mama deyyadhammaṁ,
snp5.1:7.2	Sabbaṁ visajjitaṁ mayā;
snp5.1:7.3	Anujānāhi me brahme,
snp5.1:7.4	Natthi pañcasatāni me”.
snp5.1:8.1	“Sace me yācamānassa,
snp5.1:8.2	bhavaṁ nānupadassati;
snp5.1:8.3	Sattame divase tuyhaṁ,
snp5.1:8.4	muddhā phalatu sattadhā”.
snp5.1:9.1	Abhisaṅkharitvā kuhako,
snp5.1:9.2	bheravaṁ so akittayi;
snp5.1:9.3	Tassa taṁ vacanaṁ sutvā,
snp5.1:9.4	bāvarī dukkhito ahu.
snp5.1:10.1	Ussussati anāhāro,
snp5.1:10.2	Sokasallasamappito;
snp5.1:10.3	Athopi evaṁ cittassa,
snp5.1:10.4	Jhāne na ramatī mano.
snp5.1:11.1	Utrastaṁ dukkhitaṁ disvā,
snp5.1:11.2	Devatā atthakāminī;
snp5.1:11.3	Bāvariṁ upasaṅkamma,
snp5.1:11.4	Idaṁ vacanamabravi.
snp5.1:12.1	“Na so muddhaṁ pajānāti,
snp5.1:12.2	Kuhako so dhanatthiko;
snp5.1:12.3	Muddhani muddhapāte vā,
snp5.1:12.4	Ñāṇaṁ tassa na vijjati”.
snp5.1:13.1	“Bhotī carahi jānāsi,
snp5.1:13.2	Taṁ me akkhāhi pucchitā;
snp5.1:13.3	Muddhaṁ muddhādhipātañca,
snp5.1:13.4	Taṁ suṇoma vaco tava”.
snp5.1:14.1	“Ahampetaṁ na jānāmi,
snp5.1:14.2	Ñāṇamettha na vijjati;
snp5.1:14.3	Muddhani muddhādhipāte ca,
snp5.1:14.4	Jinānaṁ hettha dassanaṁ”.
snp5.1:15.1	“Atha ko carahi jānāti,
snp5.1:15.2	Asmiṁ pathavimaṇḍale;
snp5.1:15.3	Muddhaṁ muddhādhipātañca,
snp5.1:15.4	Taṁ me akkhāhi devate”.
snp5.1:16.1	“Purā kapilavatthumhā,
snp5.1:16.2	Nikkhanto lokanāyako;
snp5.1:16.3	Apacco okkākarājassa,
snp5.1:16.4	Sakyaputto pabhaṅkaro.
snp5.1:17.1	So hi brāhmaṇa sambuddho,
snp5.1:17.2	Sabbadhammāna pāragū;
snp5.1:17.3	Sabbābhiññābalappatto,
snp5.1:17.4	Sabbadhammesu cakkhumā;
snp5.1:17.5	Sabbakammakkhayaṁ patto,
snp5.1:17.6	Vimutto upadhikkhaye.
snp5.1:18.1	Buddho so bhagavā loke,
snp5.1:18.2	Dhammaṁ deseti cakkhumā;
snp5.1:18.3	Taṁ tvaṁ gantvāna pucchassu,
snp5.1:18.4	So te taṁ byākarissati”.
snp5.1:19.1	Sambuddhoti vaco sutvā,
snp5.1:19.2	Udaggo bāvarī ahu;
snp5.1:19.3	Sokassa tanuko āsi,
snp5.1:19.4	Pītiñca vipulaṁ labhi.
snp5.1:20.1	So bāvarī attamano udaggo,
snp5.1:20.2	Taṁ devataṁ pucchati vedajāto;
snp5.1:20.3	“Katamamhi gāme nigamamhi vā pana,
snp5.1:20.4	Katamamhi vā janapade lokanātho;
snp5.1:20.5	Yattha gantvāna passemu,
snp5.1:20.6	Sambuddhaṁ dvipaduttamaṁ”.
snp5.1:21.1	“Sāvatthiyaṁ kosalamandire jino,
snp5.1:21.2	Pahūtapañño varabhūrimedhaso;
snp5.1:21.3	So sakyaputto vidhuro anāsavo,
snp5.1:21.4	Muddhādhipātassa vidū narāsabho”.
snp5.1:22.1	Tato āmantayī sisse,
snp5.1:22.2	Brāhmaṇe mantapārage;
snp5.1:22.3	“Etha māṇavā akkhissaṁ,
snp5.1:22.4	Suṇātha vacanaṁ mama.
snp5.1:23.1	Yasseso dullabho loke,
snp5.1:23.2	Pātubhāvo abhiṇhaso;
snp5.1:23.3	Svājja lokamhi uppanno,
snp5.1:23.4	Sambuddho iti vissuto;
snp5.1:23.5	Khippaṁ gantvāna sāvatthiṁ,
snp5.1:23.6	Passavho dvipaduttamaṁ”.
snp5.1:24.1	“Kathaṁ carahi jānemu,
snp5.1:24.2	Disvā buddhoti brāhmaṇa;
snp5.1:24.3	Ajānataṁ no pabrūhi,
snp5.1:24.4	Yathā jānemu taṁ mayaṁ”.
snp5.1:25.1	“Āgatāni hi mantesu,
snp5.1:25.2	Mahāpurisalakkhaṇā;
snp5.1:25.3	Dvattiṁsāni ca byākkhātā,
snp5.1:25.4	Samattā anupubbaso.
snp5.1:26.1	Yassete honti gattesu,
snp5.1:26.2	Mahāpurisalakkhaṇā;
snp5.1:26.3	Dveyeva tassa gatiyo,
snp5.1:26.4	Tatiyā hi na vijjati.
snp5.1:27.1	Sace agāraṁ āvasati,
snp5.1:27.2	Vijeyya pathaviṁ imaṁ;
snp5.1:27.3	Adaṇḍena asatthena,
snp5.1:27.4	Dhammena manusāsati.
snp5.1:28.1	Sace ca so pabbajati,
snp5.1:28.2	Agārā anagāriyaṁ;
snp5.1:28.3	Vivaṭṭacchado sambuddho,
snp5.1:28.4	Arahā bhavati anuttaro.
snp5.1:29.1	Jātiṁ gottañca lakkhaṇaṁ,
snp5.1:29.2	Mante sisse punāpare;
snp5.1:29.3	Muddhaṁ muddhādhipātañca,
snp5.1:29.4	Manasāyeva pucchatha.
snp5.1:30.1	Anāvaraṇadassāvī,
snp5.1:30.2	Yadi buddho bhavissati;
snp5.1:30.3	Manasā pucchite pañhe,
snp5.1:30.4	Vācāya vissajessati”.
snp5.1:31.1	Bāvarissa vaco sutvā,
snp5.1:31.2	Sissā soḷasa brāhmaṇā;
snp5.1:31.3	Ajito tissametteyyo,
snp5.1:31.4	Puṇṇako atha mettagū.
snp5.1:32.1	Dhotako upasīvo ca,
snp5.1:32.2	Nando ca atha hemako;
snp5.1:32.3	Todeyya-kappā dubhayo,
snp5.1:32.4	Jatukaṇṇī ca paṇḍito.
snp5.1:33.1	Bhadrāvudho udayo ca,
snp5.1:33.2	Posālo cāpi brāhmaṇo;
snp5.1:33.3	Mogharājā ca medhāvī,
snp5.1:33.4	Piṅgiyo ca mahāisi.
snp5.1:34.1	Paccekagaṇino sabbe,
snp5.1:34.2	Sabbalokassa vissutā;
snp5.1:34.3	Jhāyī jhānaratā dhīrā,
snp5.1:34.4	Pubbavāsanavāsitā.
snp5.1:35.1	Bāvariṁ abhivādetvā,
snp5.1:35.2	Katvā ca naṁ padakkhiṇaṁ;
snp5.1:35.3	Jaṭājinadharā sabbe,
snp5.1:35.4	Pakkāmuṁ uttarāmukhā.
snp5.1:36.1	Aḷakassa patiṭṭhānaṁ,
snp5.1:36.2	Purimāhissatiṁ tadā;
snp5.1:36.3	Ujjeniñcāpi gonaddhaṁ,
snp5.1:36.4	Vedisaṁ vanasavhayaṁ.
snp5.1:37.1	Kosambiñcāpi sāketaṁ,
snp5.1:37.2	Sāvatthiñca puruttamaṁ;
snp5.1:37.3	Setabyaṁ kapilavatthuṁ,
snp5.1:37.4	Kusinārañca mandiraṁ.
snp5.1:38.1	Pāvañca bhoganagaraṁ,
snp5.1:38.2	Vesāliṁ māgadhaṁ puraṁ;
snp5.1:38.3	Pāsāṇakaṁ cetiyañca,
snp5.1:38.4	Ramaṇīyaṁ manoramaṁ.
snp5.1:39.1	Tasitovudakaṁ sītaṁ,
snp5.1:39.2	Mahālābhaṁva vāṇijo;
snp5.1:39.3	Chāyaṁ ghammābhitattova,
snp5.1:39.4	Turitā pabbatamāruhuṁ.
snp5.1:40.1	Bhagavā tamhi samaye,
snp5.1:40.2	Bhikkhusaṅghapurakkhato;
snp5.1:40.3	Bhikkhūnaṁ dhammaṁ deseti,
snp5.1:40.4	Sīhova nadatī vane.
snp5.1:41.1	Ajito addasa buddhaṁ,
snp5.1:41.2	Sataraṁsiṁva bhāṇumaṁ;
snp5.1:41.3	Candaṁ yathā pannarase,
snp5.1:41.4	Pāripūriṁ upāgataṁ.
snp5.1:42.1	Athassa gatte disvāna,
snp5.1:42.2	Paripūrañca byañjanaṁ;
snp5.1:42.3	Ekamantaṁ ṭhito haṭṭho,
snp5.1:42.4	Manopañhe apucchatha.
snp5.1:43.1	“Ādissa jammanaṁ brūhi,
snp5.1:43.2	Gottaṁ brūhi salakkhaṇaṁ;
snp5.1:43.3	Mantesu pāramiṁ brūhi,
snp5.1:43.4	Kati vāceti brāhmaṇo”.
snp5.1:44.1	“Vīsaṁ vassasataṁ āyu,
snp5.1:44.2	So ca gottena bāvarī;
snp5.1:44.3	Tīṇissa lakkhaṇā gatte,
snp5.1:44.4	Tiṇṇaṁ vedāna pāragū.
snp5.1:45.1	Lakkhaṇe itihāse ca,
snp5.1:45.2	Sanighaṇḍusakeṭubhe;
snp5.1:45.3	Pañcasatāni vāceti,
snp5.1:45.4	Sadhamme pāramiṁ gato”.
snp5.1:46.1	“Lakkhaṇānaṁ pavicayaṁ,
snp5.1:46.2	Bāvarissa naruttama;
snp5.1:46.3	Kaṅkhacchida pakāsehi,
snp5.1:46.4	Mā no kaṅkhāyitaṁ ahu”.
snp5.1:47.1	“Mukhaṁ jivhāya chādeti,
snp5.1:47.2	Uṇṇassa bhamukantare;
snp5.1:47.3	Kosohitaṁ vatthaguyhaṁ,
snp5.1:47.4	Evaṁ jānāhi māṇava”.
snp5.1:48.1	Pucchañhi kiñci asuṇanto,
snp5.1:48.2	Sutvā pañhe viyākate;
snp5.1:48.3	Vicinteti jano sabbo,
snp5.1:48.4	Vedajāto katañjalī.
snp5.1:49.1	“Ko nu devo vā brahmā vā,
snp5.1:49.2	Indo vāpi sujampati;
snp5.1:49.3	Manasā pucchite pañhe,
snp5.1:49.4	Kametaṁ paṭibhāsati”.
snp5.1:50.1	“Muddhaṁ muddhādhipātañca,
snp5.1:50.2	Bāvarī paripucchati;
snp5.1:50.3	Taṁ byākarohi bhagavā,
snp5.1:50.4	Kaṅkhaṁ vinaya no ise”.
snp5.1:51.1	“Avijjā muddhāti jānāhi,
snp5.1:51.2	Vijjā muddhādhipātinī;
snp5.1:51.3	Saddhāsatisamādhīhi,
snp5.1:51.4	Chandaviriyena saṁyutā”.
snp5.1:52.1	Tato vedena mahatā,
snp5.1:52.2	Santhambhitvāna māṇavo;
snp5.1:52.3	Ekaṁsaṁ ajinaṁ katvā,
snp5.1:52.4	Pādesu sirasā pati.
snp5.1:53.1	“Bāvarī brāhmaṇo bhoto,
snp5.1:53.2	Saha sissehi mārisa;
snp5.1:53.3	Udaggacitto sumano,
snp5.1:53.4	Pāde vandati cakkhuma”.
snp5.1:54.1	“Sukhito bāvarī hotu,
snp5.1:54.2	Saha sissehi brāhmaṇo;
snp5.1:54.3	Tvañcāpi sukhito hohi,
snp5.1:54.4	Ciraṁ jīvāhi māṇava.
snp5.1:55.1	Bāvarissa ca tuyhaṁ vā,
snp5.1:55.2	Sabbesaṁ sabbasaṁsayaṁ;
snp5.1:55.3	Katāvakāsā pucchavho,
snp5.1:55.4	Yaṁ kiñci manasicchatha”.
snp5.1:56.1	Sambuddhena katokāso,
snp5.1:56.2	Nisīditvāna pañjalī;
snp5.1:56.3	Ajito paṭhamaṁ pañhaṁ,
snp5.1:56.4	Tattha pucchi tathāgataṁ.
snp5.1:56.5	Vatthugāthā niṭṭhitā.
snp5.2:0.1	Sutta Nipāta 5.2
snp5.2:0.2	Ajitamāṇavapucchā
snp5.2:1.1	“Kenassu nivuto loko,
snp5.2:1.2	(iccāyasmā ajito)
snp5.2:1.3	Kenassu nappakāsati;
snp5.2:1.4	Kissābhilepanaṁ brūsi,
snp5.2:1.5	Kiṁsu tassa mahabbhayaṁ”.
snp5.2:2.1	“Avijjāya nivuto loko,
snp5.2:2.2	(ajitāti bhagavā)
snp5.2:2.3	Vevicchā pamādā nappakāsati;
snp5.2:2.4	Jappābhilepanaṁ brūmi,
snp5.2:2.5	Dukkhamassa mahabbhayaṁ”.
snp5.2:3.1	“Savanti sabbadhi sotā,
snp5.2:3.2	(iccāyasmā ajito)
snp5.2:3.3	Sotānaṁ kiṁ nivāraṇaṁ;
snp5.2:3.4	Sotānaṁ saṁvaraṁ brūhi,
snp5.2:3.5	Kena sotā pidhiyyare”.
snp5.2:4.1	“Yāni sotāni lokasmiṁ,
snp5.2:4.2	(ajitāti bhagavā)
snp5.2:4.3	Sati tesaṁ nivāraṇaṁ;
snp5.2:4.4	Sotānaṁ saṁvaraṁ brūmi,
snp5.2:4.5	Paññāyete pidhiyyare”.
snp5.2:5.1	“Paññā ceva sati yañca,
snp5.2:5.2	(iccāyasmā ajito)
snp5.2:5.3	Nāmarūpañca mārisa;
snp5.2:5.4	Etaṁ me puṭṭho pabrūhi,
snp5.2:5.5	Katthetaṁ uparujjhati”.
snp5.2:6.1	“Yametaṁ pañhaṁ apucchi,
snp5.2:6.2	ajita taṁ vadāmi te;
snp5.2:6.3	Yattha nāmañca rūpañca,
snp5.2:6.4	asesaṁ uparujjhati;
snp5.2:6.5	Viññāṇassa nirodhena,
snp5.2:6.6	etthetaṁ uparujjhati”.
snp5.2:7.1	“Ye ca saṅkhātadhammāse,
snp5.2:7.2	ye ca sekhā puthū idha;
snp5.2:7.3	Tesaṁ me nipako iriyaṁ,
snp5.2:7.4	puṭṭho pabrūhi mārisa”.
snp5.2:8.1	“Kāmesu nābhigijjheyya,
snp5.2:8.2	Manasānāvilo siyā;
snp5.2:8.3	Kusalo sabbadhammānaṁ,
snp5.2:8.4	Sato bhikkhu paribbaje”ti.
snp5.2:8.5	Ajitamāṇavapucchā paṭhamā.
snp5.3:0.1	Sutta Nipāta 5.3
snp5.3:0.2	Tissametteyyamāṇavapucchā
snp5.3:1.1	“Kodha santusito loke,
snp5.3:1.2	(iccāyasmā tissametteyyo)
snp5.3:1.3	Kassa no santi iñjitā;
snp5.3:1.4	Ko ubhantamabhiññāya,
snp5.3:1.5	Majjhe mantā na lippati;
snp5.3:1.6	Kaṁ brūsi mahāpurisoti,
snp5.3:1.7	Ko idha sibbinimaccagā”.
snp5.3:2.1	“Kāmesu brahmacariyavā,
snp5.3:2.2	(metteyyāti bhagavā)
snp5.3:2.3	Vītataṇho sadā sato;
snp5.3:2.4	Saṅkhāya nibbuto bhikkhu,
snp5.3:2.5	Tassa no santi iñjitā.
snp5.3:3.1	So ubhantamabhiññāya,
snp5.3:3.2	Majjhe mantā na lippati;
snp5.3:3.3	Taṁ brūmi mahāpurisoti,
snp5.3:3.4	So idha sibbinimaccagā”ti.
snp5.3:3.5	Tissametteyyamāṇavapucchā dutiyā.
snp5.4:0.1	Sutta Nipāta 5.4
snp5.4:0.2	Puṇṇakamāṇavapucchā
snp5.4:1.1	“Anejaṁ mūladassāviṁ,
snp5.4:1.2	(iccāyasmā puṇṇako)
snp5.4:1.3	Atthi pañhena āgamaṁ;
snp5.4:1.4	Kiṁ nissitā isayo manujā,
snp5.4:1.5	Khattiyā brāhmaṇā devatānaṁ;
snp5.4:1.6	Yaññamakappayiṁsu puthūdha loke,
snp5.4:1.7	Pucchāmi taṁ bhagavā brūhi me taṁ”.
snp5.4:2.1	“Ye kecime isayo manujā,
snp5.4:2.2	(puṇṇakāti bhagavā)
snp5.4:2.3	Khattiyā brāhmaṇā devatānaṁ;
snp5.4:2.4	Yaññamakappayiṁsu puthūdha loke,
snp5.4:2.5	Āsīsamānā puṇṇaka itthattaṁ;
snp5.4:2.6	Jaraṁ sitā yaññamakappayiṁsu”.
snp5.4:3.1	“Ye kecime isayo manujā,
snp5.4:3.2	(iccāyasmā puṇṇako)
snp5.4:3.3	Khattiyā brāhmaṇā devatānaṁ;
snp5.4:3.4	Yaññamakappayiṁsu puthūdha loke,
snp5.4:3.5	Kaccissu te bhagavā yaññapathe appamattā;
snp5.4:3.6	Atāruṁ jātiñca jarañca mārisa,
snp5.4:3.7	Pucchāmi taṁ bhagavā brūhi me taṁ”.
snp5.4:4.1	“Āsīsanti thomayanti abhijappanti juhanti,
snp5.4:4.2	(puṇṇakāti bhagavā)
snp5.4:4.3	Kāmābhijappanti paṭicca lābhaṁ;
snp5.4:4.4	Te yājayogā bhavarāgarattā,
snp5.4:4.5	Nātariṁsu jātijaranti brūmi”.
snp5.4:5.1	“Te ce nātariṁsu yājayogā,
snp5.4:5.2	(iccāyasmā puṇṇako)
snp5.4:5.3	Yaññehi jātiñca jarañca mārisa;
snp5.4:5.4	Atha ko carahi devamanussaloke,
snp5.4:5.5	Atāri jātiñca jarañca mārisa;
snp5.4:5.6	Pucchāmi taṁ bhagavā brūhi me taṁ”.
snp5.4:6.1	“Saṅkhāya lokasmi paroparāni,
snp5.4:6.2	(puṇṇakāti bhagavā)
snp5.4:6.3	Yassiñjitaṁ natthi kuhiñci loke;
snp5.4:6.4	Santo vidhūmo anīgho nirāso,
snp5.4:6.5	Atāri so jātijaranti brūmī”ti.
snp5.4:6.6	Puṇṇakamāṇavapucchā tatiyā.
snp5.5:0.1	Sutta Nipāta 5.5
snp5.5:0.2	Mettagūmāṇavapucchā
snp5.5:1.1	“Pucchāmi taṁ bhagavā brūhi me taṁ,
snp5.5:1.2	(iccāyasmā mettagū)
snp5.5:1.3	Maññāmi taṁ vedaguṁ bhāvitattaṁ;
snp5.5:1.4	Kuto nu dukkhā samudāgatā ime,
snp5.5:1.5	Ye keci lokasmimanekarūpā”.
snp5.5:2.1	“Dukkhassa ve maṁ pabhavaṁ apucchasi,
snp5.5:2.2	(mettagūti bhagavā)
snp5.5:2.3	Taṁ te pavakkhāmi yathā pajānaṁ;
snp5.5:2.4	Upadhinidānā pabhavanti dukkhā,
snp5.5:2.5	Ye keci lokasmimanekarūpā.
snp5.5:3.1	Yo ve avidvā upadhiṁ karoti,
snp5.5:3.2	Punappunaṁ dukkhamupeti mando;
snp5.5:3.3	Tasmā pajānaṁ upadhiṁ na kayirā,
snp5.5:3.4	Dukkhassa jātippabhavānupassī”.
snp5.5:4.1	“Yaṁ taṁ apucchimha akittayī no,
snp5.5:4.2	Aññaṁ taṁ pucchāma tadiṅgha brūhi;
snp5.5:4.3	Kathaṁ nu dhīrā vitaranti oghaṁ,
snp5.5:4.4	Jātiṁ jaraṁ sokapariddavañca;
snp5.5:4.5	Taṁ me muni sādhu viyākarohi,
snp5.5:4.6	Tathā hi te vidito esa dhammo”.
snp5.5:5.1	“Kittayissāmi te dhammaṁ,
snp5.5:5.2	(mettagūti bhagavā)
snp5.5:5.3	Diṭṭhe dhamme anītihaṁ;
snp5.5:5.4	Yaṁ viditvā sato caraṁ,
snp5.5:5.5	Tare loke visattikaṁ”.
snp5.5:6.1	“Tañcāhaṁ abhinandāmi,
snp5.5:6.2	mahesi dhammamuttamaṁ;
snp5.5:6.3	Yaṁ viditvā sato caraṁ,
snp5.5:6.4	tare loke visattikaṁ”.
snp5.5:7.1	“Yaṁ kiñci sampajānāsi,
snp5.5:7.2	(mettagūti bhagavā)
snp5.5:7.3	Uddhaṁ adho tiriyañcāpi majjhe;
snp5.5:7.4	Etesu nandiñca nivesanañca,
snp5.5:7.5	Panujja viññāṇaṁ bhave na tiṭṭhe.
snp5.5:8.1	Evaṁvihārī sato appamatto,
snp5.5:8.2	Bhikkhu caraṁ hitvā mamāyitāni;
snp5.5:8.3	Jātiṁ jaraṁ sokapariddavañca,
snp5.5:8.4	Idheva vidvā pajaheyya dukkhaṁ”.
snp5.5:9.1	“Etābhinandāmi vaco mahesino,
snp5.5:9.2	Sukittitaṁ gotamanūpadhīkaṁ;
snp5.5:9.3	Addhā hi bhagavā pahāsi dukkhaṁ,
snp5.5:9.4	Tathā hi te vidito esa dhammo.
snp5.5:10.1	Te cāpi nūnappajaheyyu dukkhaṁ,
snp5.5:10.2	Ye tvaṁ muni aṭṭhitaṁ ovadeyya;
snp5.5:10.3	Taṁ taṁ namassāmi samecca nāga,
snp5.5:10.4	Appeva maṁ bhagavā aṭṭhitaṁ ovadeyya”.
snp5.5:11.1	“Yaṁ brāhmaṇaṁ vedagumābhijaññā,
snp5.5:11.2	Akiñcanaṁ kāmabhave asattaṁ;
snp5.5:11.3	Addhā hi so oghamimaṁ atāri,
snp5.5:11.4	Tiṇṇo ca pāraṁ akhilo akaṅkho.
snp5.5:12.1	Vidvā ca yo vedagū naro idha,
snp5.5:12.2	Bhavābhave saṅgamimaṁ visajja;
snp5.5:12.3	So vītataṇho anīgho nirāso,
snp5.5:12.4	Atāri so jātijaranti brūmī”ti.
snp5.5:12.5	Mettagūmāṇavapucchā catutthī.
snp5.6:0.1	Sutta Nipāta 5.6
snp5.6:0.2	Dhotakamāṇavapucchā
snp5.6:1.1	“Pucchāmi taṁ bhagavā brūhi metaṁ,
snp5.6:1.2	(iccāyasmā dhotako)
snp5.6:1.3	Vācābhikaṅkhāmi mahesi tuyhaṁ;
snp5.6:1.4	Tava sutvāna nigghosaṁ,
snp5.6:1.5	Sikkhe nibbānamattano”.
snp5.6:2.1	“Tenahātappaṁ karohi,
snp5.6:2.2	(dhotakāti bhagavā)
snp5.6:2.3	Idheva nipako sato;
snp5.6:2.4	Ito sutvāna nigghosaṁ,
snp5.6:2.5	Sikkhe nibbānamattano”.
snp5.6:3.1	“Passāmahaṁ devamanussaloke,
snp5.6:3.2	Akiñcanaṁ brāhmaṇamiriyamānaṁ;
snp5.6:3.3	Taṁ taṁ namassāmi samantacakkhu,
snp5.6:3.4	Pamuñca maṁ sakka kathaṅkathāhi”.
snp5.6:4.1	“Nāhaṁ sahissāmi pamocanāya,
snp5.6:4.2	Kathaṅkathiṁ dhotaka kañci loke;
snp5.6:4.3	Dhammañca seṭṭhaṁ abhijānamāno,
snp5.6:4.4	Evaṁ tuvaṁ oghamimaṁ taresi”.
snp5.6:5.1	“Anusāsa brahme karuṇāyamāno,
snp5.6:5.2	Vivekadhammaṁ yamahaṁ vijaññaṁ;
snp5.6:5.3	Yathāhaṁ ākāsova abyāpajjamāno,
snp5.6:5.4	Idheva santo asito careyyaṁ”.
snp5.6:6.1	“Kittayissāmi te santiṁ,
snp5.6:6.2	(dhotakāti bhagavā)
snp5.6:6.3	Diṭṭhe dhamme anītihaṁ;
snp5.6:6.4	Yaṁ viditvā sato caraṁ,
snp5.6:6.5	Tare loke visattikaṁ”.
snp5.6:7.1	“Tañcāhaṁ abhinandāmi,
snp5.6:7.2	mahesi santimuttamaṁ;
snp5.6:7.3	Yaṁ viditvā sato caraṁ,
snp5.6:7.4	tare loke visattikaṁ”.
snp5.6:8.1	“Yaṁ kiñci sampajānāsi,
snp5.6:8.2	(dhotakāti bhagavā)
snp5.6:8.3	Uddhaṁ adho tiriyañcāpi majjhe;
snp5.6:8.4	Etaṁ viditvā saṅgoti loke,
snp5.6:8.5	Bhavābhavāya mākāsi taṇhan”ti.
snp5.6:8.6	Dhotakamāṇavapucchā pañcamī.
snp5.7:0.1	Sutta Nipāta 5.7
snp5.7:0.2	Upasīvamāṇavapucchā
snp5.7:1.1	“Eko ahaṁ sakka mahantamoghaṁ,
snp5.7:1.2	(iccāyasmā upasīvo)
snp5.7:1.3	Anissito no visahāmi tārituṁ;
snp5.7:1.4	Ārammaṇaṁ brūhi samantacakkhu,
snp5.7:1.5	Yaṁ nissito oghamimaṁ tareyyaṁ”.
snp5.7:2.1	“Ākiñcaññaṁ pekkhamāno satimā,
snp5.7:2.2	(upasīvāti bhagavā)
snp5.7:2.3	Natthīti nissāya tarassu oghaṁ;
snp5.7:2.4	Kāme pahāya virato kathāhi,
snp5.7:2.5	Taṇhakkhayaṁ nattamahābhipassa”.
snp5.7:3.1	“Sabbesu kāmesu yo vītarāgo,
snp5.7:3.2	(iccāyasmā upasīvo)
snp5.7:3.3	Ākiñcaññaṁ nissito hitvā maññaṁ;
snp5.7:3.4	Saññāvimokkhe parame vimutto,
snp5.7:3.5	Tiṭṭhe nu so tattha anānuyāyī”.
snp5.7:4.1	“Sabbesu kāmesu yo vītarāgo,
snp5.7:4.2	(upasīvāti bhagavā)
snp5.7:4.3	Ākiñcaññaṁ nissito hitvā maññaṁ;
snp5.7:4.4	Saññāvimokkhe parame vimutto,
snp5.7:4.5	Tiṭṭheyya so tattha anānuyāyī”.
snp5.7:5.1	“Tiṭṭhe ce so tattha anānuyāyī,
snp5.7:5.2	Pūgampi vassānaṁ samantacakkhu;
snp5.7:5.3	Tattheva so sītisiyā vimutto,
snp5.7:5.4	Cavetha viññāṇaṁ tathāvidhassa”.
snp5.7:6.1	“Accī yathā vātavegena khittā,
snp5.7:6.2	(upasīvāti bhagavā)
snp5.7:6.3	Atthaṁ paleti na upeti saṅkhaṁ;
snp5.7:6.4	Evaṁ munī nāmakāyā vimutto,
snp5.7:6.5	Atthaṁ paleti na upeti saṅkhaṁ”.
snp5.7:7.1	“Atthaṅgato so uda vā so natthi,
snp5.7:7.2	Udāhu ve sassatiyā arogo;
snp5.7:7.3	Taṁ me munī sādhu viyākarohi,
snp5.7:7.4	Tathā hi te vidito esa dhammo”.
snp5.7:8.1	“Atthaṅgatassa na pamāṇamatthi,
snp5.7:8.2	(upasīvāti bhagavā)
snp5.7:8.3	Yena naṁ vajjuṁ taṁ tassa natthi;
snp5.7:8.4	Sabbesu dhammesu samohatesu,
snp5.7:8.5	Samūhatā vādapathāpi sabbe”ti.
snp5.7:8.6	Upasīvamāṇavapucchā chaṭṭhī.
snp5.8:0.1	Sutta Nipāta 5.8
snp5.8:0.2	Nandamāṇavapucchā
snp5.8:1.1	“Santi loke munayo,
snp5.8:1.2	(iccāyasmā nando)
snp5.8:1.3	Janā vadanti tayidaṁ kathaṁsu;
snp5.8:1.4	Ñāṇūpapannaṁ no muniṁ vadanti,
snp5.8:1.5	Udāhu ve jīvitenūpapannaṁ”.
snp5.8:2.1	“Na diṭṭhiyā na sutiyā na ñāṇena, (…)
snp5.8:2.2	Munīdha nanda kusalā vadanti;
snp5.8:2.3	Visenikatvā anīghā nirāsā,
snp5.8:2.4	Caranti ye te munayoti brūmi”.
snp5.8:3.1	“Ye kecime samaṇabrāhmaṇāse,
snp5.8:3.2	(iccāyasmā nando)
snp5.8:3.3	Diṭṭhassutenāpi vadanti suddhiṁ;
snp5.8:3.4	Sīlabbatenāpi vadanti suddhiṁ,
snp5.8:3.5	Anekarūpena vadanti suddhiṁ.
snp5.8:3.6	Kaccissu te bhagavā tattha yatā carantā,
snp5.8:3.7	Atāru jātiñca jarañca mārisa;
snp5.8:3.8	Pucchāmi taṁ bhagavā brūhi me taṁ”.
snp5.8:4.1	“Ye kecime samaṇabrāhmaṇāse,
snp5.8:4.2	(nandāti bhagavā)
snp5.8:4.3	Diṭṭhassutenāpi vadanti suddhiṁ;
snp5.8:4.4	Sīlabbatenāpi vadanti suddhiṁ,
snp5.8:4.5	Anekarūpena vadanti suddhiṁ;
snp5.8:4.6	Kiñcāpi te tattha yatā caranti,
snp5.8:4.7	Nātariṁsu jātijaranti brūmi”.
snp5.8:5.1	“Ye kecime samaṇabrāhmaṇāse,
snp5.8:5.2	(iccāyasmā nando)
snp5.8:5.3	Diṭṭhassutenāpi vadanti suddhiṁ;
snp5.8:5.4	Sīlabbatenāpi vadanti suddhiṁ,
snp5.8:5.5	Anekarūpena vadanti suddhiṁ.
snp5.8:5.6	Te ce muni brūsi anoghatiṇṇe,
snp5.8:5.7	Atha ko carahi devamanussaloke;
snp5.8:5.8	Atāri jātiñca jarañca mārisa,
snp5.8:5.9	Pucchāmi taṁ bhagavā brūhi me taṁ”.
snp5.8:6.1	“Nāhaṁ sabbe samaṇabrāhmaṇāse,
snp5.8:6.2	(nandāti bhagavā)
snp5.8:6.3	Jātijarāya nivutāti brūmi;
snp5.8:6.4	Ye sīdha diṭṭhaṁ va sutaṁ mutaṁ vā,
snp5.8:6.5	Sīlabbataṁ vāpi pahāya sabbaṁ.
snp5.8:6.6	Anekarūpampi pahāya sabbaṁ,
snp5.8:6.7	Taṇhaṁ pariññāya anāsavāse;
snp5.8:6.8	Te ve narā oghatiṇṇāti brūmi”.
snp5.8:7.1	“Etābhinandāmi vaco mahesino,
snp5.8:7.2	Sukittitaṁ gotamanūpadhīkaṁ;
snp5.8:7.3	Ye sīdha diṭṭhaṁ va sutaṁ mutaṁ vā,
snp5.8:7.4	Sīlabbataṁ vāpi pahāya sabbaṁ.
snp5.8:7.5	Anekarūpampi pahāya sabbaṁ,
snp5.8:7.6	Taṇhaṁ pariññāya anāsavāse;
snp5.8:7.7	Ahampi te oghatiṇṇāti brūmī”ti.
snp5.8:7.8	Nandamāṇavapucchā sattamā.
snp5.9:0.1	Sutta Nipāta 5.9
snp5.9:0.2	Hemakamāṇavapucchā
snp5.9:1.1	“Ye me pubbe viyākaṁsu,
snp5.9:1.2	(iccāyasmā hemako)
snp5.9:1.3	Huraṁ gotamasāsanā;
snp5.9:1.4	Iccāsi iti bhavissati,
snp5.9:1.5	Sabbaṁ taṁ itihītihaṁ;
snp5.9:1.6	Sabbaṁ taṁ takkavaḍḍhanaṁ,
snp5.9:1.7	Nāhaṁ tattha abhiramiṁ.
snp5.9:2.1	Tvañca me dhammamakkhāhi,
snp5.9:2.2	taṇhānigghātanaṁ muni;
snp5.9:2.3	Yaṁ viditvā sato caraṁ,
snp5.9:2.4	tare loke visattikaṁ”.
snp5.9:3.1	“Idha diṭṭhasutamutaviññātesu,
snp5.9:3.2	Piyarūpesu hemaka;
snp5.9:3.3	Chandarāgavinodanaṁ,
snp5.9:3.4	Nibbānapadamaccutaṁ.
snp5.9:4.1	Etadaññāya ye satā,
snp5.9:4.2	Diṭṭhadhammābhinibbutā;
snp5.9:4.3	Upasantā ca te sadā,
snp5.9:4.4	Tiṇṇā loke visattikan”ti.
snp5.9:4.5	Hemakamāṇavapucchā aṭṭhamā.
snp5.10:0.1	Sutta Nipāta 5.10
snp5.10:0.2	Todeyyamāṇavapucchā
snp5.10:1.1	“Yasmiṁ kāmā na vasanti,
snp5.10:1.2	(iccāyasmā todeyyo)
snp5.10:1.3	Taṇhā yassa na vijjati;
snp5.10:1.4	Kathaṅkathā ca yo tiṇṇo,
snp5.10:1.5	Vimokkho tassa kīdiso”.
snp5.10:2.1	“Yasmiṁ kāmā na vasanti,
snp5.10:2.2	(todeyyāti bhagavā)
snp5.10:2.3	Taṇhā yassa na vijjati;
snp5.10:2.4	Kathaṅkathā ca yo tiṇṇo,
snp5.10:2.5	Vimokkho tassa nāparo”.
snp5.10:3.1	“Nirāsaso so uda āsasāno,
snp5.10:3.2	Paññāṇavā so uda paññakappī;
snp5.10:3.3	Muniṁ ahaṁ sakka yathā vijaññaṁ,
snp5.10:3.4	Taṁ me viyācikkha samantacakkhu”.
snp5.10:4.1	“Nirāsaso so na ca āsasāno,
snp5.10:4.2	Paññāṇavā so na ca paññakappī;
snp5.10:4.3	Evampi todeyya muniṁ vijāna,
snp5.10:4.4	Akiñcanaṁ kāmabhave asattan”ti.
snp5.10:4.5	Todeyyamāṇavapucchā navamā.
snp5.11:0.1	Sutta Nipāta 5.11
snp5.11:0.2	Kappamāṇavapucchā
snp5.11:1.1	“Majjhe sarasmiṁ tiṭṭhataṁ,
snp5.11:1.2	(iccāyasmā kappo)
snp5.11:1.3	Oghe jāte mahabbhaye;
snp5.11:1.4	Jarāmaccuparetānaṁ,
snp5.11:1.5	Dīpaṁ pabrūhi mārisa;
snp5.11:1.6	Tvañca me dīpamakkhāhi,
snp5.11:1.7	Yathāyidaṁ nāparaṁ siyā”.
snp5.11:2.1	“Majjhe sarasmiṁ tiṭṭhataṁ,
snp5.11:2.2	(kappāti bhagavā)
snp5.11:2.3	Oghe jāte mahabbhaye;
snp5.11:2.4	Jarāmaccuparetānaṁ,
snp5.11:2.5	Dīpaṁ pabrūmi kappa te.
snp5.11:3.1	Akiñcanaṁ anādānaṁ,
snp5.11:3.2	etaṁ dīpaṁ anāparaṁ;
snp5.11:3.3	Nibbānaṁ iti naṁ brūmi,
snp5.11:3.4	jarāmaccuparikkhayaṁ.
snp5.11:4.1	Etadaññāya ye satā,
snp5.11:4.2	Diṭṭhadhammābhinibbutā;
snp5.11:4.3	Na te māravasānugā,
snp5.11:4.4	Na te mārassa paddhagū”ti.
snp5.11:4.5	Kappamāṇavapucchā dasamā.
snp5.12:0.1	Sutta Nipāta 5.12
snp5.12:0.2	Jatukaṇṇimāṇavapucchā
snp5.12:1.1	“Sutvānahaṁ vīramakāmakāmiṁ,
snp5.12:1.2	(iccāyasmā jatukaṇṇi)
snp5.12:1.3	Oghātigaṁ puṭṭhumakāmamāgamaṁ;
snp5.12:1.4	Santipadaṁ brūhi sahajanetta,
snp5.12:1.5	Yathātacchaṁ bhagavā brūhi metaṁ.
snp5.12:2.1	Bhagavā hi kāme abhibhuyya iriyati,
snp5.12:2.2	Ādiccova pathaviṁ tejī tejasā;
snp5.12:2.3	Parittapaññassa me bhūripañña,
snp5.12:2.4	Ācikkha dhammaṁ yamahaṁ vijaññaṁ;
snp5.12:2.5	Jātijarāya idha vippahānaṁ”.
snp5.12:3.1	“Kāmesu vinaya gedhaṁ,
snp5.12:3.2	(jatukaṇṇīti bhagavā)
snp5.12:3.3	Nekkhammaṁ daṭṭhu khemato;
snp5.12:3.4	Uggahītaṁ nirattaṁ vā,
snp5.12:3.5	Mā te vijjittha kiñcanaṁ.
snp5.12:4.1	Yaṁ pubbe taṁ visosehi,
snp5.12:4.2	pacchā te māhu kiñcanaṁ;
snp5.12:4.3	Majjhe ce no gahessasi,
snp5.12:4.4	upasanto carissasi.
snp5.12:5.1	Sabbaso nāmarūpasmiṁ,
snp5.12:5.2	Vītagedhassa brāhmaṇa;
snp5.12:5.3	Āsavāssa na vijjanti,
snp5.12:5.4	Yehi maccuvasaṁ vaje”ti.
snp5.12:5.5	Jatukaṇṇimāṇavapucchā ekādasamā.
snp5.13:0.1	Sutta Nipāta 5.13
snp5.13:0.2	Bhadrāvudhamāṇavapucchā
snp5.13:1.1	“Okañjahaṁ taṇhacchidaṁ anejaṁ,
snp5.13:1.2	(iccāyasmā bhadrāvudho)
snp5.13:1.3	Nandiñjahaṁ oghatiṇṇaṁ vimuttaṁ;
snp5.13:1.4	Kappañjahaṁ abhiyāce sumedhaṁ,
snp5.13:1.5	Sutvāna nāgassa apanamissanti ito.
snp5.13:2.1	Nānājanā janapadehi saṅgatā,
snp5.13:2.2	Tava vīra vākyaṁ abhikaṅkhamānā;
snp5.13:2.3	Tesaṁ tuvaṁ sādhu viyākarohi,
snp5.13:2.4	Tathā hi te vidito esa dhammo”.
snp5.13:3.1	“Ādānataṇhaṁ vinayetha sabbaṁ,
snp5.13:3.2	(bhadrāvudhāti bhagavā
snp5.13:3.3	Uddhaṁ adho tiriyañcāpi majjhe;
snp5.13:3.4	Yaṁ yañhi lokasmimupādiyanti,
snp5.13:3.5	Teneva māro anveti jantuṁ.
snp5.13:4.1	Tasmā pajānaṁ na upādiyetha,
snp5.13:4.2	Bhikkhu sato kiñcanaṁ sabbaloke;
snp5.13:4.3	Ādānasatte iti pekkhamāno,
snp5.13:4.4	Pajaṁ imaṁ maccudheyye visattan”ti.
snp5.13:4.5	Bhadrāvudhamāṇavapucchā dvādasamā.
snp5.14:0.1	Sutta Nipāta 5.14
snp5.14:0.2	Udayamāṇavapucchā
snp5.14:1.1	“Jhāyiṁ virajamāsīnaṁ,
snp5.14:1.2	(iccāyasmā udayo)
snp5.14:1.3	Katakiccaṁ anāsavaṁ;
snp5.14:1.4	Pāraguṁ sabbadhammānaṁ,
snp5.14:1.5	Atthi pañhena āgamaṁ;
snp5.14:1.6	Aññāvimokkhaṁ pabrūhi,
snp5.14:1.7	Avijjāya pabhedanaṁ”.
snp5.14:2.1	“Pahānaṁ kāmacchandānaṁ,
snp5.14:2.2	(udayāti bhagavā)
snp5.14:2.3	Domanassāna cūbhayaṁ;
snp5.14:2.4	Thinassa ca panūdanaṁ,
snp5.14:2.5	Kukkuccānaṁ nivāraṇaṁ.
snp5.14:3.1	Upekkhāsatisaṁsuddhaṁ,
snp5.14:3.2	dhammatakkapurejavaṁ;
snp5.14:3.3	Aññāvimokkhaṁ pabrūmi,
snp5.14:3.4	avijjāya pabhedanaṁ”.
snp5.14:4.1	“Kiṁsu saṁyojano loko,
snp5.14:4.2	kiṁsu tassa vicāraṇaṁ;
snp5.14:4.3	Kissassa vippahānena,
snp5.14:4.4	nibbānaṁ iti vuccati”.
snp5.14:5.1	“Nandisaṁyojano loko,
snp5.14:5.2	vitakkassa vicāraṇaṁ;
snp5.14:5.3	Taṇhāya vippahānena,
snp5.14:5.4	nibbānaṁ iti vuccati”.
snp5.14:6.1	“Kathaṁ satassa carato,
snp5.14:6.2	viññāṇaṁ uparujjhati;
snp5.14:6.3	Bhagavantaṁ puṭṭhumāgamma,
snp5.14:6.4	taṁ suṇoma vaco tava”.
snp5.14:7.1	“Ajjhattañca bahiddhā ca,
snp5.14:7.2	Vedanaṁ nābhinandato;
snp5.14:7.3	Evaṁ satassa carato,
snp5.14:7.4	Viññāṇaṁ uparujjhatī”ti.
snp5.14:7.5	Udayamāṇavapucchā terasamā.
snp5.15:0.1	Sutta Nipāta 5.15
snp5.15:0.2	Posālamāṇavapucchā
snp5.15:1.1	“Yo atītaṁ ādisati,
snp5.15:1.2	(iccāyasmā posālo)
snp5.15:1.3	Anejo chinnasaṁsayo;
snp5.15:1.4	Pāraguṁ sabbadhammānaṁ,
snp5.15:1.5	Atthi pañhena āgamaṁ.
snp5.15:2.1	Vibhūtarūpasaññissa,
snp5.15:2.2	sabbakāyappahāyino;
snp5.15:2.3	Ajjhattañca bahiddhā ca,
snp5.15:2.4	natthi kiñcīti passato;
snp5.15:2.5	Ñāṇaṁ sakkānupucchāmi,
snp5.15:2.6	kathaṁ neyyo tathāvidho”.
snp5.15:3.1	“Viññāṇaṭṭhitiyo sabbā,
snp5.15:3.2	(posālāti bhagavā)
snp5.15:3.3	Abhijānaṁ tathāgato;
snp5.15:3.4	Tiṭṭhantamenaṁ jānāti,
snp5.15:3.5	Vimuttaṁ tapparāyaṇaṁ.
snp5.15:4.1	Ākiñcaññasambhavaṁ ñatvā,
snp5.15:4.2	Nandī saṁyojanaṁ iti;
snp5.15:4.3	Evametaṁ abhiññāya,
snp5.15:4.4	Tato tattha vipassati;
snp5.15:4.5	Etaṁ ñāṇaṁ tathaṁ tassa,
snp5.15:4.6	Brāhmaṇassa vusīmato”ti.
snp5.15:4.7	Posālamāṇavapucchā cuddasamā.
snp5.16:0.1	Sutta Nipāta 5.16
snp5.16:0.2	Mogharājamāṇavapucchā
snp5.16:1.1	“Dvāhaṁ sakkaṁ apucchissaṁ,
snp5.16:1.2	(iccāyasmā mogharājā)
snp5.16:1.3	Na me byākāsi cakkhumā;
snp5.16:1.4	Yāvatatiyañca devīsi,
snp5.16:1.5	Byākarotīti me sutaṁ.
snp5.16:2.1	Ayaṁ loko paro loko,
snp5.16:2.2	brahmaloko sadevako;
snp5.16:2.3	Diṭṭhiṁ te nābhijānāti,
snp5.16:2.4	gotamassa yasassino.
snp5.16:3.1	Evaṁ abhikkantadassāviṁ,
snp5.16:3.2	atthi pañhena āgamaṁ;
snp5.16:3.3	Kathaṁ lokaṁ avekkhantaṁ,
snp5.16:3.4	maccurājā na passati”.
snp5.16:4.1	“Suññato lokaṁ avekkhassu,
snp5.16:4.2	Mogharāja sadā sato;
snp5.16:4.3	Attānudiṭṭhiṁ ūhacca,
snp5.16:4.4	Evaṁ maccutaro siyā;
snp5.16:4.5	Evaṁ lokaṁ avekkhantaṁ,
snp5.16:4.6	Maccurājā na passatī”ti.
snp5.16:4.7	Mogharājamāṇavapucchā pannarasamā.
snp5.17:0.1	Sutta Nipāta 5.17
snp5.17:0.2	Piṅgiyamāṇavapucchā
snp5.17:1.1	“Jiṇṇohamasmi abalo vītavaṇṇo,
snp5.17:1.2	(iccāyasmā piṅgiyo)
snp5.17:1.3	Nettā na suddhā savanaṁ na phāsu;
snp5.17:1.4	Māhaṁ nassaṁ momuho antarāva,
snp5.17:1.5	Ācikkha dhammaṁ yamahaṁ vijaññaṁ;
snp5.17:1.6	Jātijarāya idha vippahānaṁ”.
snp5.17:2.1	“Disvāna rūpesu vihaññamāne,
snp5.17:2.2	(piṅgiyāti bhagavā)
snp5.17:2.3	Ruppanti rūpesu janā pamattā;
snp5.17:2.4	Tasmā tuvaṁ piṅgiya appamatto,
snp5.17:2.5	Jahassu rūpaṁ apunabbhavāya”.
snp5.17:3.1	“Disā catasso vidisā catasso,
snp5.17:3.2	Uddhaṁ adho dasa disā imāyo;
snp5.17:3.3	Na tuyhaṁ adiṭṭhaṁ asutaṁ amutaṁ,
snp5.17:3.4	Atho aviññātaṁ kiñcanamatthi loke;
snp5.17:3.5	Ācikkha dhammaṁ yamahaṁ vijaññaṁ,
snp5.17:3.6	Jātijarāya idha vippahānaṁ”.
snp5.17:4.1	“Taṇhādhipanne manuje pekkhamāno,
snp5.17:4.2	(piṅgiyāti bhagavā)
snp5.17:4.3	Santāpajāte jarasā parete;
snp5.17:4.4	Tasmā tuvaṁ piṅgiya appamatto,
snp5.17:4.5	Jahassu taṇhaṁ apunabbhavāyā”ti.
snp5.17:4.6	Piṅgiyamāṇavapucchā soḷasamā.
snp5.18:0.1	Sutta Nipāta 5.18
snp5.18:0.2	Pārāyanatthutigāthā
snp5.18:1.1	Idamavoca bhagavā magadhesu viharanto pāsāṇake cetiye,
snp5.18:1.2	paricārakasoḷasānaṁ brāhmaṇānaṁ ajjhiṭṭho puṭṭho puṭṭho pañhaṁ byākāsi.
snp5.18:1.3	Ekamekassa cepi pañhassa atthamaññāya dhammamaññāya dhammānudhammaṁ paṭipajjeyya, gaccheyyeva jarāmaraṇassa pāraṁ.
snp5.18:1.4	Pāraṅgamanīyā ime dhammāti, tasmā imassa dhammapariyāyassa pārāyananteva adhivacanaṁ.
snp5.18:2.1	Ajito tissametteyyo,
snp5.18:2.2	puṇṇako atha mettagū;
snp5.18:2.3	Dhotako upasīvo ca,
snp5.18:2.4	nando ca atha hemako.
snp5.18:3.1	Todeyya-kappā dubhayo,
snp5.18:3.2	jatukaṇṇī ca paṇḍito;
snp5.18:3.3	Bhadrāvudho udayo ca,
snp5.18:3.4	posālo cāpi brāhmaṇo;
snp5.18:3.5	Mogharājā ca medhāvī,
snp5.18:3.6	piṅgiyo ca mahāisi.
snp5.18:4.1	Ete buddhaṁ upāgacchuṁ,
snp5.18:4.2	sampannacaraṇaṁ isiṁ;
snp5.18:4.3	Pucchantā nipuṇe pañhe,
snp5.18:4.4	buddhaseṭṭhaṁ upāgamuṁ.
snp5.18:5.1	Tesaṁ buddho pabyākāsi,
snp5.18:5.2	pañhe puṭṭho yathātathaṁ;
snp5.18:5.3	Pañhānaṁ veyyākaraṇena,
snp5.18:5.4	tosesi brāhmaṇe muni.
snp5.18:6.1	Te tositā cakkhumatā,
snp5.18:6.2	buddhenādiccabandhunā;
snp5.18:6.3	Brahmacariyamacariṁsu,
snp5.18:6.4	varapaññassa santike.
snp5.18:7.1	Ekamekassa pañhassa,
snp5.18:7.2	yathā buddhena desitaṁ;
snp5.18:7.3	Tathā yo paṭipajjeyya,
snp5.18:7.4	gacche pāraṁ apārato.
snp5.18:8.1	Apārā pāraṁ gaccheyya,
snp5.18:8.2	bhāvento maggamuttamaṁ;
snp5.18:8.3	Maggo so pāraṁ gamanāya,
snp5.18:8.4	tasmā pārāyanaṁ iti.
snp5.19:0.1	Sutta Nipāta 5.19
snp5.19:0.2	Pārāyanānugītigāthā
snp5.19:1.1	“Pārāyanamanugāyissaṁ,
snp5.19:1.2	(iccāyasmā piṅgiyo)
snp5.19:1.3	Yathāddakkhi tathākkhāsi;
snp5.19:1.4	Vimalo bhūrimedhaso,
snp5.19:1.5	Nikkāmo nibbano nāgo;
snp5.19:1.6	Kissa hetu musā bhaṇe.
snp5.19:2.1	Pahīnamalamohassa,
snp5.19:2.2	mānamakkhappahāyino;
snp5.19:2.3	Handāhaṁ kittayissāmi,
snp5.19:2.4	giraṁ vaṇṇūpasañhitaṁ.
snp5.19:3.1	Tamonudo buddho samantacakkhu,
snp5.19:3.2	Lokantagū sabbabhavātivatto;
snp5.19:3.3	Anāsavo sabbadukkhappahīno,
snp5.19:3.4	Saccavhayo brahme upāsito me.
snp5.19:4.1	Dijo yathā kubbanakaṁ pahāya,
snp5.19:4.2	Bahupphalaṁ kānanamāvaseyya;
snp5.19:4.3	Evampahaṁ appadasse pahāya,
snp5.19:4.4	Mahodadhiṁ haṁsoriva ajjhapatto.
snp5.19:5.1	Ye me pubbe viyākaṁsu,
snp5.19:5.2	Huraṁ gotamasāsanā;
snp5.19:5.3	Iccāsi iti bhavissati,
snp5.19:5.4	Sabbaṁ taṁ itihītihaṁ;
snp5.19:5.5	Sabbaṁ taṁ takkavaḍḍhanaṁ.
snp5.19:6.1	Eko tamanudāsino,
snp5.19:6.2	jutimā so pabhaṅkaro;
snp5.19:6.3	Gotamo bhūripaññāṇo,
snp5.19:6.4	gotamo bhūrimedhaso.
snp5.19:7.1	Yo me dhammamadesesi,
snp5.19:7.2	Sandiṭṭhikamakālikaṁ;
snp5.19:7.3	Taṇhakkhayamanītikaṁ,
snp5.19:7.4	Yassa natthi upamā kvaci”.
snp5.19:8.1	“Kiṁ nu tamhā vippavasasi,
snp5.19:8.2	muhuttamapi piṅgiya;
snp5.19:8.3	Gotamā bhūripaññāṇā,
snp5.19:8.4	gotamā bhūrimedhasā.
snp5.19:9.1	Yo te dhammamadesesi,
snp5.19:9.2	Sandiṭṭhikamakālikaṁ;
snp5.19:9.3	Taṇhakkhayamanītikaṁ,
snp5.19:9.4	Yassa natthi upamā kvaci”.
snp5.19:10.1	“Nāhaṁ tamhā vippavasāmi,
snp5.19:10.2	Muhuttamapi brāhmaṇa;
snp5.19:10.3	Gotamā bhūripaññāṇā,
snp5.19:10.4	Gotamā bhūrimedhasā.
snp5.19:11.1	Yo me dhammamadesesi,
snp5.19:11.2	Sandiṭṭhikamakālikaṁ;
snp5.19:11.3	Taṇhakkhayamanītikaṁ,
snp5.19:11.4	Yassa natthi upamā kvaci.
snp5.19:12.1	Passāmi naṁ manasā cakkhunāva,
snp5.19:12.2	Rattindivaṁ brāhmaṇa appamatto;
snp5.19:12.3	Namassamāno vivasemi rattiṁ,
snp5.19:12.4	Teneva maññāmi avippavāsaṁ.
snp5.19:13.1	Saddhā ca pīti ca mano sati ca,
snp5.19:13.2	Nāpentime gotamasāsanamhā;
snp5.19:13.3	Yaṁ yaṁ disaṁ vajati bhūripañño,
snp5.19:13.4	Sa tena teneva natohamasmi.
snp5.19:14.1	Jiṇṇassa me dubbalathāmakassa,
snp5.19:14.2	Teneva kāyo na paleti tattha;
snp5.19:14.3	Saṅkappayantāya vajāmi niccaṁ,
snp5.19:14.4	Mano hi me brāhmaṇa tena yutto.
snp5.19:15.1	Paṅke sayāno pariphandamāno,
snp5.19:15.2	Dīpā dīpaṁ upaplaviṁ;
snp5.19:15.3	Athaddasāsiṁ sambuddhaṁ,
snp5.19:15.4	Oghatiṇṇamanāsavaṁ”.
snp5.19:16.1	“Yathā ahū vakkali muttasaddho,
snp5.19:16.2	Bhadrāvudho āḷavigotamo ca;
snp5.19:16.3	Evamevaṁ tvampi pamuñcassu saddhaṁ,
snp5.19:16.4	Gamissasi tvaṁ piṅgiya maccudheyyassa pāraṁ”.
snp5.19:17.1	“Esa bhiyyo pasīdāmi,
snp5.19:17.2	Sutvāna munino vaco;
snp5.19:17.3	Vivaṭṭacchado sambuddho,
snp5.19:17.4	Akhilo paṭibhānavā.
snp5.19:18.1	Adhideve abhiññāya,
snp5.19:18.2	Sabbaṁ vedi varovaraṁ;
snp5.19:18.3	Pañhānantakaro satthā,
snp5.19:18.4	Kaṅkhīnaṁ paṭijānataṁ.
snp5.19:19.1	Asaṁhīraṁ asaṅkuppaṁ,
snp5.19:19.2	Yassa natthi upamā kvaci;
snp5.19:19.3	Addhā gamissāmi na mettha kaṅkhā,
snp5.19:19.4	Evaṁ maṁ dhārehi adhimuttacittan”ti.
snp5.19:19.5	Pārāyanavaggo pañcamo.
snp5.19:19.6	Suttuddānaṁ
snp5.19:20.1	Urago dhaniyopi ca,
snp5.19:20.2	Khaggavisāṇo kasi ca;
snp5.19:20.3	Cundo bhavo punadeva,
snp5.19:20.4	Vasalo ca karaṇīyañca;
snp5.19:20.5	Hemavato atha yakkho,
snp5.19:20.6	Vijayasuttaṁ munisuttavaranti.
snp5.19:21.1	Paṭhamakaṭṭhavaro varavaggo,
snp5.19:21.2	Dvādasasuttadharo suvibhatto;
snp5.19:21.3	Desito cakkhumatā vimalena,
snp5.19:21.4	Suyyati vaggavaro uragoti.
snp5.19:22.1	Ratanāmagandho hirimaṅgalanāmo,
snp5.19:22.2	Sucilomakapilo ca brāhmaṇadhammo;
snp5.19:22.3	Nāvā kiṁsīlauṭṭhahano ca,
snp5.19:22.4	Rāhulo ca punapi vaṅgīso.
snp5.19:23.1	Sammāparibbājanīyopi cettha,
snp5.19:23.2	Dhammikasuttavaro suvibhatto;
snp5.19:23.3	Cuddasasuttadharo dutiyamhi,
snp5.19:23.4	Cūḷakavaggavaroti tamāhu.
snp5.19:24.1	Pabbajjapadhānasubhāsitanāmo,
snp5.19:24.2	Pūraḷāso punadeva māgho ca;
snp5.19:24.3	Sabhiyaṁ keṇiyameva sallanāmo,
snp5.19:24.4	Vāseṭṭhavaro kālikopi ca.
snp5.19:25.1	Nālakasuttavaro suvibhatto,
snp5.19:25.2	Taṁ anupassī tathā punadeva;
snp5.19:25.3	Dvādasasuttadharo tatiyamhi,
snp5.19:25.4	Suyyati vaggavaro mahānāmo.
snp5.19:26.1	Kāmaguhaṭṭhakaduṭṭhakanāmā,
snp5.19:26.2	Suddhavaro paramaṭṭhakanāmo;
snp5.19:26.3	Jarā mettiyavaro suvibhatto,
snp5.19:26.4	Pasūramāgaṇḍiyā purābhedo.
snp5.19:27.1	Kalahavivādo ubho viyuhā ca,
snp5.19:27.2	Tuvaṭakaattadaṇḍasāriputtā;
snp5.19:27.3	Soḷasasuttadharo catutthamhi,
snp5.19:27.4	Aṭṭhakavaggavaroti tamāhu.
snp5.19:28.1	Magadhe janapade ramaṇīye,
snp5.19:28.2	Desavare katapuññanivese;
snp5.19:28.3	Pāsāṇakacetiyavare suvibhatte,
snp5.19:28.4	Vasi bhagavā gaṇaseṭṭho.
snp5.19:29.1	Ubhayavāsamāgatiyamhi,
snp5.19:29.2	Dvādasayojaniyā parisāya;
snp5.19:29.3	Soḷasabrāhmaṇānaṁ kira puṭṭho,
snp5.19:29.4	Pucchāya soḷasapañhakammiyā;
snp5.19:29.5	Nippakāsayi dhammamadāsi.
snp5.19:30.1	Atthapakāsakabyañjanapuṇṇaṁ,
snp5.19:30.2	Dhammamadesesi parakhemajaniyaṁ;
snp5.19:30.3	Lokahitāya jino dvipadaggo,
snp5.19:30.4	Suttavaraṁ bahudhammavicitraṁ;
snp5.19:30.5	Sabbakilesapamocanahetuṁ,
snp5.19:30.6	Desayi suttavaraṁ dvipadaggo.
snp5.19:31.1	Byañjanamatthapadaṁ samayuttaṁ,
snp5.19:31.2	Akkharasaññitaopamagāḷhaṁ;
snp5.19:31.3	Lokavicāraṇañāṇapabhaggaṁ,
snp5.19:31.4	Desayi suttavaraṁ dvipadaggo.
snp5.19:32.1	Rāgamale amalaṁ vimalaggaṁ,
snp5.19:32.2	Dosamale amalaṁ vimalaggaṁ;
snp5.19:32.3	Mohamale amalaṁ vimalaggaṁ,
snp5.19:32.4	Lokavicāraṇañāṇapabhaggaṁ;
snp5.19:32.5	Desayi suttavaraṁ dvipadaggo.
snp5.19:33.1	Klesamale amalaṁ vimalaggaṁ,
snp5.19:33.2	Duccaritamale amalaṁ vimalaggaṁ;
snp5.19:33.3	Lokavicāraṇañāṇapabhaggaṁ,
snp5.19:33.4	Desayi suttavaraṁ dvipadaggo.
snp5.19:34.1	Āsavabandhanayogākilesaṁ,
snp5.19:34.2	Nīvaraṇāni ca tīṇi malāni;
snp5.19:34.3	Tassa kilesapamocanahetuṁ,
snp5.19:34.4	Desayi suttavaraṁ dvipadaggo.
snp5.19:35.1	Nimmalasabbakilesapanūdaṁ,
snp5.19:35.2	Rāgavirāgamanejamasokaṁ;
snp5.19:35.3	Santapaṇītasududdasadhammaṁ,
snp5.19:35.4	Desayi suttavaraṁ dvipadaggo.
snp5.19:36.1	Rāgañca dosakamabhañjitasantaṁ,
snp5.19:36.2	Yonicatuggatipañcaviññāṇaṁ;
snp5.19:36.3	Taṇhāratacchadanatāṇalatāpamokkhaṁ,
snp5.19:36.4	Desayi suttavaraṁ dvipadaggo.
snp5.19:37.1	Gambhīraduddasasaṇhanipuṇaṁ,
snp5.19:37.2	Paṇḍitavedaniyaṁ nipuṇatthaṁ;
snp5.19:37.3	Lokavicāraṇañāṇapabhaggaṁ,
snp5.19:37.4	Desayi suttavaraṁ dvipadaggo.
snp5.19:38.1	Navaṅgakusumamālagīveyyaṁ,
snp5.19:38.2	Indriyajhānavimokkhavibhattaṁ;
snp5.19:38.3	Aṭṭhaṅgamaggadharaṁ varayānaṁ,
snp5.19:38.4	Desayi suttavaraṁ dvipadaggo.
snp5.19:39.1	Somupamaṁ vimalaṁ parisuddhaṁ,
snp5.19:39.2	Aṇṇavamūpamaratanasucittaṁ;
snp5.19:39.3	Pupphasamaṁ ravimūpamatejaṁ,
snp5.19:39.4	Desayi suttavaraṁ dvipadaggo.
snp5.19:40.1	Khemasivaṁ sukhasītalasantaṁ,
snp5.19:40.2	Maccutatāṇaparaṁ paramatthaṁ;
snp5.19:40.3	Tassa sunibbutadassanahetuṁ,
snp5.19:40.4	Desayi suttavaraṁ dvipadaggoti.
snp5.19:40.5	Suttanipātapāḷi samattā.