# Petavatthu — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

pv1:0.1	Petavatthu
pv1:0.2	Uragavagga
pv1:0.3	1. Khettūpamapetavatthu
pv1:1.1	Namo tassa Bhagavato Arahato Sammāsambuddhassa.
pv1:2.1	“Khettūpamā arahanto,
pv1:2.2	dāyakā kassakūpamā;
pv1:2.3	Bījūpamaṁ deyyadhammaṁ,
pv1:2.4	etto nibbattate phalaṁ.
pv1:3.1	Etaṁ bījaṁ kasi khettaṁ,
pv1:3.2	petānaṁ dāyakassa ca;
pv1:3.3	Taṁ petā paribhuñjanti,
pv1:3.4	dātā puññena vaḍḍhati.
pv1:4.1	Idheva kusalaṁ katvā,
pv1:4.2	Pete ca paṭipūjiya;
pv1:4.3	Saggañca kamatiṭṭhānaṁ,
pv1:4.4	Kammaṁ katvāna bhaddakan”ti.
pv1:5.1	Khettūpamapetavatthu paṭhamaṁ.
pv2:0.1	Petavatthu
pv2:0.2	Uragavagga
pv2:0.3	2. Sūkaramukhapetavatthu
pv2:1.1	“Kāyo te sabbasovaṇṇo,
pv2:1.2	sabbā obhāsate disā;
pv2:1.3	Mukhaṁ te sūkarasseva,
pv2:1.4	kiṁ kammamakarī pure”.
pv2:2.1	“Kāyena saññato āsiṁ,
pv2:2.2	vācāyāsimasaññato;
pv2:2.3	Tena metādiso vaṇṇo,
pv2:2.4	yathā passasi nārada.
pv2:3.1	Taṁ tyāhaṁ nārada brūmi,
pv2:3.2	Sāmaṁ diṭṭhamidaṁ tayā;
pv2:3.3	Mākāsi mukhasā pāpaṁ,
pv2:3.4	Mā kho sūkaramukho ahū”ti.
pv2:4.1	Sūkaramukhapetavatthu dutiyaṁ.
pv3:0.1	Petavatthu
pv3:0.2	Uragavagga
pv3:0.3	3. Pūtimukhapetavatthu
pv3:1.1	“Dibbaṁ subhaṁ dhāresi vaṇṇadhātuṁ,
pv3:1.2	Vehāyasaṁ tiṭṭhasi antalikkhe;
pv3:1.3	Mukhañca te kimayo pūtigandhaṁ,
pv3:1.4	Khādanti kiṁ kammamakāsi pubbe”.
pv3:2.1	“Samaṇo ahaṁ pāpotiduṭṭhavāco,
pv3:2.2	Tapassirūpo mukhasā asaññato;
pv3:2.3	Laddhā ca me tapasā vaṇṇadhātu,
pv3:2.4	Mukhañca me pesuṇiyena pūti.
pv3:3.1	Tayidaṁ tayā nārada sāmaṁ diṭṭhaṁ,
pv3:3.2	Anukampakā ye kusalā vadeyyuṁ;
pv3:3.3	‘Mā pesuṇaṁ mā ca musā abhāṇi,
pv3:3.4	Yakkho tuvaṁ hohisi kāmakāmī’”ti.
pv3:4.1	Pūtimukhapetavatthu tatiyaṁ.
pv4:0.1	Petavatthu
pv4:0.2	Uragavagga
pv4:0.3	4. Piṭṭhadhītalikapetavatthu
pv4:1.1	“Yaṁ kiñcārammaṇaṁ katvā,
pv4:1.2	dajjā dānaṁ amaccharī;
pv4:1.3	Pubbapete ca ārabbha,
pv4:1.4	atha vā vatthudevatā.
pv4:2.1	Cattāro ca mahārāje,
pv4:2.2	lokapāle yasassine;
pv4:2.3	Kuveraṁ dhataraṭṭhañca,
pv4:2.4	virūpakkhaṁ virūḷhakaṁ;
pv4:2.5	Te ceva pūjitā honti,
pv4:2.6	dāyakā ca anipphalā.
pv4:3.1	Na hi ruṇṇaṁ vā soko vā,
pv4:3.2	yā caññā paridevanā;
pv4:3.3	Na taṁ petassa atthāya,
pv4:3.4	evaṁ tiṭṭhanti ñātayo.
pv4:4.1	Ayañca kho dakkhiṇā dinnā,
pv4:4.2	saṅghamhi suppatiṭṭhitā;
pv4:4.3	Dīgharattaṁ hitāyassa,
pv4:4.4	ṭhānaso upakappatī”ti.
pv4:5.1	Piṭṭhadhītalikapetavatthu catutthaṁ.
pv5:0.1	Petavatthu
pv5:0.2	Uragavagga
pv5:0.3	5. Tirokuṭṭapetavatthu
pv5:1.1	“Tirokuṭṭesu tiṭṭhanti,
pv5:1.2	sandhisiṅghāṭakesu ca;
pv5:1.3	Dvārabāhāsu tiṭṭhanti,
pv5:1.4	āgantvāna sakaṁ gharaṁ.
pv5:2.1	Pahūte annapānamhi,
pv5:2.2	khajjabhojje upaṭṭhite;
pv5:2.3	Na tesaṁ koci sarati,
pv5:2.4	sattānaṁ kammapaccayā.
pv5:3.1	Evaṁ dadanti ñātīnaṁ,
pv5:3.2	ye honti anukampakā;
pv5:3.3	Suciṁ paṇītaṁ kālena,
pv5:3.4	kappiyaṁ pānabhojanaṁ;
pv5:3.5	‘Idaṁ vo ñātīnaṁ hotu,
pv5:3.6	sukhitā hontu ñātayo’.
pv5:4.1	Te ca tattha samāgantvā,
pv5:4.2	ñātipetā samāgatā;
pv5:4.3	Pahūte annapānamhi,
pv5:4.4	sakkaccaṁ anumodare.
pv5:5.1	‘Ciraṁ jīvantu no ñātī,
pv5:5.2	yesaṁ hetu labhāmase;
pv5:5.3	Amhākañca katā pūjā,
pv5:5.4	dāyakā ca anipphalā’.
pv5:6.1	Na hi tattha kasī atthi,
pv5:6.2	gorakkhettha na vijjati;
pv5:6.3	Vaṇijjā tādisī natthi,
pv5:6.4	hiraññena kayākayaṁ;
pv5:6.5	Ito dinnena yāpenti,
pv5:6.6	petā kālagatā tahiṁ.
pv5:7.1	Unname udakaṁ vuṭṭhaṁ,
pv5:7.2	yathā ninnaṁ pavattati;
pv5:7.3	Evamevaṁ ito dinnaṁ,
pv5:7.4	petānaṁ upakappati.
pv5:8.1	Yathā vārivahā pūrā,
pv5:8.2	paripūrenti sāgaraṁ;
pv5:8.3	Evamevaṁ ito dinnaṁ,
pv5:8.4	petānaṁ upakappati.
pv5:9.1	‘Adāsi me akāsi me,
pv5:9.2	ñāti mittā sakhā ca me’;
pv5:9.3	Petānaṁ dakkhiṇaṁ dajjā,
pv5:9.4	pubbe katamanussaraṁ.
pv5:10.1	Na hi ruṇṇaṁ vā soko vā,
pv5:10.2	yā caññā paridevanā;
pv5:10.3	Na taṁ petānamatthāya,
pv5:10.4	evaṁ tiṭṭhanti ñātayo.
pv5:11.1	Ayañca kho dakkhiṇā dinnā,
pv5:11.2	saṅghamhi suppatiṭṭhitā;
pv5:11.3	Dīgharattaṁ hitāyassa,
pv5:11.4	ṭhānaso upakappati.
pv5:12.1	So ñātidhammo ca ayaṁ nidassito,
pv5:12.2	Petāna pūjā ca katā uḷārā;
pv5:12.3	Balañca bhikkhūnamanuppadinnaṁ,
pv5:12.4	Tumhehi puññaṁ pasutaṁ anappakan”ti.
pv5:13.1	Tirokuṭṭapetavatthu pañcamaṁ.
pv6:0.1	Petavatthu
pv6:0.2	Uragavagga
pv6:0.3	6. Pañcaputtakhādapetivatthu
pv6:1.1	“Naggā dubbaṇṇarūpāsi,
pv6:1.2	duggandhā pūti vāyasi;
pv6:1.3	Makkhikāhi parikiṇṇā,
pv6:1.4	kā nu tvaṁ idha tiṭṭhasī”ti.
pv6:2.1	“Ahaṁ bhadante petīmhi,
pv6:2.2	duggatā yamalokikā;
pv6:2.3	Pāpakammaṁ karitvāna,
pv6:2.4	petalokaṁ ito gatā.
pv6:3.1	Kālena pañca puttāni,
pv6:3.2	sāyaṁ pañca punāpare;
pv6:3.3	Vijāyitvāna khādāmi,
pv6:3.4	tepi nā honti me alaṁ.
pv6:4.1	Pariḍayhati dhūmāyati,
pv6:4.2	khudāya hadayaṁ mama;
pv6:4.3	Pānīyaṁ na labhe pātuṁ,
pv6:4.4	passa maṁ byasanaṁ gatan”ti.
pv6:5.1	“Kiṁ nu kāyena vācāya,
pv6:5.2	manasā dukkaṭaṁ kataṁ;
pv6:5.3	Kissa kammavipākena,
pv6:5.4	puttamaṁsāni khādasī”ti.
pv6:6.1	“Sapatī me gabbhinī āsi,
pv6:6.2	tassā pāpaṁ acetayiṁ;
pv6:6.3	Sāhaṁ paduṭṭhamanasā,
pv6:6.4	akariṁ gabbhapātanaṁ.
pv6:7.1	Tassā dvemāsiko gabbho,
pv6:7.2	lohitaññeva pagghari;
pv6:7.3	Tadassā mātā kupitā,
pv6:7.4	mayhaṁ ñātī samānayi;
pv6:7.5	Sapathañca maṁ kāresi,
pv6:7.6	paribhāsāpayī ca maṁ.
pv6:8.1	Sāhaṁ ghorañca sapathaṁ,
pv6:8.2	musāvādaṁ abhāsisaṁ;
pv6:8.3	Puttamaṁsāni khādāmi,
pv6:8.4	sace taṁ pakataṁ mayā.
pv6:9.1	Tassa kammassa vipākena,
pv6:9.2	musāvādassa cūbhayaṁ;
pv6:9.3	Puttamaṁsāni khādāmi,
pv6:9.4	pubbalohitamakkhitā”ti.
pv6:10.1	Pañcaputtakhādapetivatthu chaṭṭhaṁ.
pv7:0.1	Petavatthu
pv7:0.2	Uragavagga
pv7:0.3	7. Sattaputtakhādapetivatthu
pv7:1.1	“Naggā dubbaṇṇarūpāsi,
pv7:1.2	duggandhā pūti vāyasi;
pv7:1.3	Makkhikāhi parikiṇṇā,
pv7:1.4	kā nu tvaṁ idha tiṭṭhasī”ti.
pv7:2.1	“Ahaṁ bhadante petīmhi,
pv7:2.2	duggatā yamalokikā;
pv7:2.3	Pāpakammaṁ karitvāna,
pv7:2.4	petalokaṁ ito gatā.
pv7:3.1	Kālena satta puttāni,
pv7:3.2	sāyaṁ satta punāpare;
pv7:3.3	Vijāyitvāna khādāmi,
pv7:3.4	tepi nā honti me alaṁ.
pv7:4.1	Pariḍayhati dhūmāyati,
pv7:4.2	khudāya hadayaṁ mama;
pv7:4.3	Nibbutiṁ nādhigacchāmi,
pv7:4.4	aggidaḍḍhāva ātape”ti.
pv7:5.1	“Kiṁ nu kāyena vācāya,
pv7:5.2	manasā dukkaṭaṁ kataṁ;
pv7:5.3	Kissa kammavipākena,
pv7:5.4	puttamaṁsāni khādasī”ti.
pv7:6.1	“Ahū mayhaṁ duve puttā,
pv7:6.2	ubho sampattayobbanā;
pv7:6.3	Sāhaṁ puttabalūpetā,
pv7:6.4	sāmikaṁ atimaññisaṁ.
pv7:7.1	Tato me sāmiko kuddho,
pv7:7.2	sapatiṁ mayhamānayi;
pv7:7.3	Sā ca gabbhaṁ alabhittha,
pv7:7.4	tassā pāpaṁ acetayiṁ.
pv7:8.1	Sāhaṁ paduṭṭhamanasā,
pv7:8.2	akariṁ gabbhapātanaṁ;
pv7:8.3	Tassā temāsiko gabbho,
pv7:8.4	pūtilohitako pati.
pv7:9.1	Tadassā mātā kupitā,
pv7:9.2	mayhaṁ ñātī samānayi;
pv7:9.3	Sapathañca maṁ kāresi,
pv7:9.4	paribhāsāpayī ca maṁ.
pv7:10.1	Sāhaṁ ghorañca sapathaṁ,
pv7:10.2	musāvādaṁ abhāsisaṁ;
pv7:10.3	‘Puttamaṁsāni khādāmi,
pv7:10.4	sace taṁ pakataṁ mayā’.
pv7:11.1	Tassa kammassa vipākena,
pv7:11.2	musāvādassa cūbhayaṁ;
pv7:11.3	Puttamaṁsāni khādāmi,
pv7:11.4	pubbalohitamakkhitā”ti.
pv7:12.1	Sattaputtakhādapetivatthu sattamaṁ.
pv8:0.1	Petavatthu
pv8:0.2	Uragavagga
pv8:0.3	8. Goṇapetavatthu
pv8:1.1	“Kiṁ nu ummattarūpova,
pv8:1.2	lāyitvā haritaṁ tiṇaṁ;
pv8:1.3	Khāda khādāti lapasi,
pv8:1.4	gatasattaṁ jaraggavaṁ.
pv8:2.1	Na hi annena pānena,
pv8:2.2	mato goṇo samuṭṭhahe;
pv8:2.3	Tvaṁsi bālo ca dummedho,
pv8:2.4	yathā taññova dummatī”ti.
pv8:3.1	“Ime pādā idaṁ sīsaṁ,
pv8:3.2	ayaṁ kāyo savāladhi;
pv8:3.3	Nettā tatheva tiṭṭhanti,
pv8:3.4	ayaṁ goṇo samuṭṭhahe.
pv8:4.1	Nāyyakassa hatthapādā,
pv8:4.2	kāyo sīsañca dissati;
pv8:4.3	Rudaṁ mattikathūpasmiṁ,
pv8:4.4	nanu tvaññeva dummatī”ti.
pv8:5.1	“Ādittaṁ vata maṁ santaṁ,
pv8:5.2	ghatasittaṁva pāvakaṁ;
pv8:5.3	Vārinā viya osiñcaṁ,
pv8:5.4	sabbaṁ nibbāpaye daraṁ.
pv8:6.1	Abbahī vata me sallaṁ,
pv8:6.2	sokaṁ hadayanissitaṁ;
pv8:6.3	Yo me sokaparetassa,
pv8:6.4	pitusokaṁ apānudi.
pv8:7.1	Svāhaṁ abbūḷhasallosmi,
pv8:7.2	sītibhūtosmi nibbuto;
pv8:7.3	Na socāmi na rodāmi,
pv8:7.4	tava sutvāna māṇava”.
pv8:8.1	Evaṁ karonti sappaññā,
pv8:8.2	ye honti anukampakā;
pv8:8.3	Vinivattayanti sokamhā,
pv8:8.4	sujāto pitaraṁ yathāti.
pv8:9.1	Goṇapetavatthu aṭṭhamaṁ.
pv9:0.1	Petavatthu
pv9:0.2	Uragavagga
pv9:0.3	9. Mahāpesakārapetivatthu
pv9:1.1	“Gūthañca muttaṁ ruhirañca pubbaṁ,
pv9:1.2	Paribhuñjati kissa ayaṁ vipāko;
pv9:1.3	Ayaṁ nu kiṁ kammamakāsi nārī,
pv9:1.4	Yā sabbadā lohitapubbabhakkhā.
pv9:2.1	Navāni vatthāni subhāni ceva,
pv9:2.2	Mudūni suddhāni ca lomasāni;
pv9:2.3	Dinnānimissā kitakā bhavanti,
pv9:2.4	Ayaṁ nu kiṁ kammamakāsi nārī”ti.
pv9:3.1	“Bhariyā mamesā ahū bhadante,
pv9:3.2	Adāyikā maccharinī kadariyā;
pv9:3.3	Sā maṁ dadantaṁ samaṇabrāhmaṇānaṁ,
pv9:3.4	Akkosati ca paribhāsati ca.
pv9:4.1	‘Gūthañca muttaṁ ruhirañca pubbaṁ,
pv9:4.2	Paribhuñja tvaṁ asuciṁ sabbakālaṁ;
pv9:4.3	Etaṁ te paralokasmiṁ hotu,
pv9:4.4	Vatthā ca te kitakasamā bhavantu’;
pv9:4.5	Etādisaṁ duccaritaṁ caritvā,
pv9:4.6	Idhāgatā cirarattāya khādatī”ti.
pv9:5.1	Mahāpesakārapetivatthu navamaṁ.
pv10:0.1	Petavatthu
pv10:0.2	Uragavagga
pv10:0.3	10. Khallāṭiyapetivatthu
pv10:1.1	“Kā nu antovimānasmiṁ,
pv10:1.2	tiṭṭhantī nūpanikkhami;
pv10:1.3	Upanikkhamassu bhadde,
pv10:1.4	passāma taṁ bahiṭṭhitan”ti.
pv10:2.1	“Aṭṭīyāmi harāyāmi,
pv10:2.2	naggā nikkhamituṁ bahi;
pv10:2.3	Kesehamhi paṭicchannā,
pv10:2.4	puññaṁ me appakaṁ katan”ti.
pv10:3.1	“Handuttarīyaṁ dadāmi te,
pv10:3.2	idaṁ dussaṁ nivāsaya;
pv10:3.3	Idaṁ dussaṁ nivāsetvā,
pv10:3.4	ehi nikkhama sobhane;
pv10:3.5	Upanikkhamassu bhadde,
pv10:3.6	passāma taṁ bahiṭṭhitan”ti.
pv10:4.1	“Hatthena hatthe te dinnaṁ,
pv10:4.2	na mayhaṁ upakappati;
pv10:4.3	Esetthupāsako saddho,
pv10:4.4	sammāsambuddhasāvako.
pv10:5.1	Etaṁ acchādayitvāna,
pv10:5.2	mama dakkhiṇamādisa;
pv10:5.3	Tathāhaṁ sukhitā hessaṁ,
pv10:5.4	sabbakāmasamiddhinī”ti.
pv10:6.1	Tañca te nhāpayitvāna,
pv10:6.2	vilimpetvāna vāṇijā;
pv10:6.3	Vatthehacchādayitvāna,
pv10:6.4	tassā dakkhiṇamādisuṁ.
pv10:7.1	Samanantarānuddiṭṭhe,
pv10:7.2	vipāko udapajjatha;
pv10:7.3	Bhojanacchādanapānīyaṁ,
pv10:7.4	dakkhiṇāya idaṁ phalaṁ.
pv10:8.1	Tato suddhā sucivasanā,
pv10:8.2	kāsikuttamadhārinī;
pv10:8.3	Hasantī vimānā nikkhami,
pv10:8.4	dakkhiṇāya idaṁ phalanti.
pv10:9.1	“Sucittarūpaṁ ruciraṁ,
pv10:9.2	vimānaṁ te pabhāsati;
pv10:9.3	Devate pucchitācikkha,
pv10:9.4	kissa kammassidaṁ phalan”ti.
pv10:10.1	“Bhikkhuno caramānassa,
pv10:10.2	doṇinimmajjaniṁ ahaṁ;
pv10:10.3	Adāsiṁ ujubhūtassa,
pv10:10.4	vippasannena cetasā.
pv10:11.1	Tassa kammassa kusalassa,
pv10:11.2	vipākaṁ dīghamantaraṁ;
pv10:11.3	Anubhomi vimānasmiṁ,
pv10:11.4	tañca dāni parittakaṁ.
pv10:12.1	Uddhaṁ catūhi māsehi,
pv10:12.2	kālakiriyā bhavissati;
pv10:12.3	Ekantakaṭukaṁ ghoraṁ,
pv10:12.4	nirayaṁ papatissahaṁ.
pv10:13.1	Catukkaṇṇaṁ catudvāraṁ,
pv10:13.2	vibhattaṁ bhāgaso mitaṁ;
pv10:13.3	Ayopākārapariyantaṁ,
pv10:13.4	ayasā paṭikujjitaṁ.
pv10:14.1	Tassa ayomayā bhūmi,
pv10:14.2	jalitā tejasā yutā;
pv10:14.3	Samantā yojanasataṁ,
pv10:14.4	pharitvā tiṭṭhati sabbadā.
pv10:15.1	Tatthāhaṁ dīghamaddhānaṁ,
pv10:15.2	dukkhaṁ vedissa vedanaṁ;
pv10:15.3	Phalañca pāpakammassa,
pv10:15.4	tasmā socāmahaṁ bhusan”ti.
pv10:16.1	Khallāṭiyapetivatthu dasamaṁ.
pv11:0.1	Petavatthu
pv11:0.2	Uragavagga
pv11:0.3	11. Nāgapetavatthu
pv11:1.1	“Puratova setena paleti hatthinā,
pv11:1.2	Majjhe pana assatarīrathena;
pv11:1.3	Pacchā ca kaññā sivikāya nīyati,
pv11:1.4	Obhāsayantī dasa sabbaso disā.
pv11:2.1	Tumhe pana muggarahatthapāṇino,
pv11:2.2	Rudammukhā chinnapabhinnagattā;
pv11:2.3	Manussabhūtā kimakattha pāpaṁ,
pv11:2.4	Yenaññamaññassa pivātha lohitan”ti.
pv11:3.1	“Puratova yo gacchati kuñjarena,
pv11:3.2	Setena nāgena catukkamena;
pv11:3.3	Amhāka putto ahu jeṭṭhako so,
pv11:3.4	Dānāni datvāna sukhī pamodati.
pv11:4.1	Yo so majjhe assatarīrathena,
pv11:4.2	Catubbhi yuttena suvaggitena;
pv11:4.3	Amhāka putto ahu majjhimo so,
pv11:4.4	Amaccharī dānavatī virocati.
pv11:5.1	Yā sā ca pacchā sivikāya nīyati,
pv11:5.2	Nārī sapaññā migamandalocanā;
pv11:5.3	Amhāka dhītā ahu sā kaniṭṭhikā,
pv11:5.4	Bhāgaḍḍhabhāgena sukhī pamodati.
pv11:6.1	Ete ca dānāni adaṁsu pubbe,
pv11:6.2	Pasannacittā samaṇabrāhmaṇānaṁ;
pv11:6.3	Mayaṁ pana maccharino ahumha,
pv11:6.4	Paribhāsakā samaṇabrāhmaṇānaṁ;
pv11:6.5	Ete ca datvā paricārayanti,
pv11:6.6	Mayañca sussāma naḷova chinno”ti.
pv11:7.1	“Kiṁ tumhākaṁ bhojanaṁ kiṁ sayānaṁ,
pv11:7.2	Kathañca yāpetha supāpadhammino;
pv11:7.3	Pahūtabhogesu anappakesu,
pv11:7.4	Sukhaṁ virādhāya dukkhajja pattā”ti.
pv11:8.1	“Aññamaññaṁ vadhitvāna,
pv11:8.2	pivāma pubbalohitaṁ;
pv11:8.3	Bahuṁ pitvā na dhātā homa,
pv11:8.4	nacchādimhase mayaṁ.
pv11:9.1	Icceva maccā paridevayanti,
pv11:9.2	Adāyakā pecca yamassa ṭhāyino;
pv11:9.3	Ye te vidicca adhigamma bhoge,
pv11:9.4	Na bhuñjare nāpi karonti puññaṁ.
pv11:10.1	Te khuppipāsūpagatā parattha,
pv11:10.2	Pacchā ciraṁ jhāyare ḍayhamānā;
pv11:10.3	Kammāni katvāna dukhudrāni,
pv11:10.4	Anubhonti dukkhaṁ kaṭukapphalāni.
pv11:11.1	Ittaraṁ hi dhanaṁ dhaññaṁ,
pv11:11.2	ittaraṁ idha jīvitaṁ;
pv11:11.3	Ittaraṁ ittarato ñatvā,
pv11:11.4	dīpaṁ kayirātha paṇḍito.
pv11:12.1	Ye te evaṁ pajānanti,
pv11:12.2	narā dhammassa kovidā;
pv11:12.3	Te dāne nappamajjanti,
pv11:12.4	sutvā arahataṁ vaco”ti.
pv11:13.1	Nāgapetavatthu ekādasamaṁ.
pv12:0.1	Petavatthu
pv12:0.2	Uragavagga
pv12:0.3	12. Uragapetavatthu
pv12:1.1	“Uragova tacaṁ jiṇṇaṁ,
pv12:1.2	hitvā gacchati saṁ tanuṁ;
pv12:1.3	Evaṁ sarīre nibbhoge,
pv12:1.4	pete kālaṅkate sati.
pv12:2.1	Ḍayhamāno na jānāti,
pv12:2.2	ñātīnaṁ paridevitaṁ;
pv12:2.3	Tasmā etaṁ na rodāmi,
pv12:2.4	gato so tassa yā gati”.
pv12:3.1	“Anabbhito tato āgā,
pv12:3.2	nānuññāto ito gato;
pv12:3.3	Yathāgato tathā gato,
pv12:3.4	tattha kā paridevanā.
pv12:4.1	Ḍayhamāno na jānāti,
pv12:4.2	ñātīnaṁ paridevitaṁ;
pv12:4.3	Tasmā etaṁ na rodāmi,
pv12:4.4	gato so tassa yā gati”.
pv12:5.1	“Sace rode kisā assaṁ,
pv12:5.2	tattha me kiṁ phalaṁ siyā;
pv12:5.3	Ñātimittasuhajjānaṁ,
pv12:5.4	bhiyyo no aratī siyā.
pv12:6.1	Ḍayhamāno na jānāti,
pv12:6.2	ñātīnaṁ paridevitaṁ;
pv12:6.3	Tasmā etaṁ na rodāmi,
pv12:6.4	gato so tassa yā gati”.
pv12:7.1	“Yathāpi dārako candaṁ,
pv12:7.2	gacchantamanurodati;
pv12:7.3	Evaṁ sampadamevetaṁ,
pv12:7.4	yo petamanusocati.
pv12:8.1	Ḍayhamāno na jānāti,
pv12:8.2	ñātīnaṁ paridevitaṁ;
pv12:8.3	Tasmā etaṁ na rodāmi,
pv12:8.4	gato so tassa yā gati”.
pv12:9.1	“Yathāpi brahme udakumbho,
pv12:9.2	bhinno appaṭisandhiyo;
pv12:9.3	Evaṁ sampadamevetaṁ,
pv12:9.4	yo petamanusocati.
pv12:10.1	Ḍayhamāno na jānāti,
pv12:10.2	ñātīnaṁ paridevitaṁ;
pv12:10.3	Tasmā etaṁ na rodāmi,
pv12:10.4	gato so tassa yā gatī”ti.
pv12:11.1	Uragapetavatthu dvādasamaṁ.
pv12:12.1	Uragavaggo paṭhamo.
pv12:13.1	Tassuddānaṁ
pv12:14.1	Khettañca sūkaraṁ pūti,
pv12:14.2	piṭṭhaṁ cāpi tirokuṭṭaṁ;
pv12:14.3	Pañcāpi sattaputtañca,
pv12:14.4	goṇaṁ pesakārakañca;
pv12:14.5	Tathā khallāṭiyaṁ nāgaṁ,
pv12:14.6	dvādasaṁ uragañcevāti.
pv13:0.1	Petavatthu
pv13:0.2	Ubbarivagga
pv13:0.3	1. Saṁsāramocakapetivatthu
pv13:1.1	“Naggā dubbaṇṇarūpāsi,
pv13:1.2	kisā dhamanisanthatā;
pv13:1.3	Upphāsulike kisike,
pv13:1.4	kā nu tvaṁ idha tiṭṭhasī”ti.
pv13:2.1	“Ahaṁ bhadante petīmhi,
pv13:2.2	duggatā yamalokikā;
pv13:2.3	Pāpakammaṁ karitvāna,
pv13:2.4	petalokaṁ ito gatā”ti.
pv13:3.1	“Kiṁ nu kāyena vācāya,
pv13:3.2	manasā dukkaṭaṁ kataṁ;
pv13:3.3	Kissa kammavipākena,
pv13:3.4	petalokaṁ ito gatā”ti.
pv13:4.1	“Anukampakā mayhaṁ nāhesuṁ bhante,
pv13:4.2	Pitā ca mātā athavāpi ñātakā;
pv13:4.3	Ye maṁ niyojeyyuṁ dadāhi dānaṁ,
pv13:4.4	Pasannacittā samaṇabrāhmaṇānaṁ.
pv13:5.1	Ito ahaṁ vassasatāni pañca,
pv13:5.2	Yaṁ evarūpā vicarāmi naggā;
pv13:5.3	Khudāya taṇhāya ca khajjamānā,
pv13:5.4	Pāpassa kammassa phalaṁ mamedaṁ.
pv13:6.1	Vandāmi taṁ ayya pasannacittā,
pv13:6.2	Anukampa maṁ vīra mahānubhāva;
pv13:6.3	Datvā ca me ādisa yaṁ hi kiñci,
pv13:6.4	Mocehi maṁ duggatiyā bhadante”ti.
pv13:7.1	Sādhūti so paṭissutvā,
pv13:7.2	sāriputtonukampako;
pv13:7.3	Bhikkhūnaṁ ālopaṁ datvā,
pv13:7.4	pāṇimattañca coḷakaṁ;
pv13:7.5	Thālakassa ca pānīyaṁ,
pv13:7.6	tassā dakkhiṇamādisi.
pv13:8.1	Samanantarānuddiṭṭhe,
pv13:8.2	vipāko udapajjatha;
pv13:8.3	Bhojanacchādanapānīyaṁ,
pv13:8.4	dakkhiṇāya idaṁ phalaṁ.
pv13:9.1	Tato suddhā sucivasanā,
pv13:9.2	kāsikuttamadhārinī;
pv13:9.3	Vicittavatthābharaṇā,
pv13:9.4	sāriputtaṁ upasaṅkami.
pv13:10.1	“Abhikkantena vaṇṇena,
pv13:10.2	yā tvaṁ tiṭṭhasi devate;
pv13:10.3	Obhāsentī disā sabbā,
pv13:10.4	osadhī viya tārakā.
pv13:11.1	Kena te tādiso vaṇṇo,
pv13:11.2	kena te idha mijjhati;
pv13:11.3	Uppajjanti ca te bhogā,
pv13:11.4	ye keci manaso piyā.
pv13:12.1	Pucchāmi taṁ devi mahānubhāve,
pv13:12.2	Manussabhūtā kimakāsi puññaṁ;
pv13:12.3	Kenāsi evaṁ jalitānubhāvā,
pv13:12.4	Vaṇṇo ca te sabbadisā pabhāsatī”ti.
pv13:13.1	“Uppaṇḍukiṁ kisaṁ chātaṁ,
pv13:13.2	naggaṁ sampatitacchaviṁ;
pv13:13.3	Muni kāruṇiko loke,
pv13:13.4	taṁ maṁ addakkhi duggataṁ.
pv13:14.1	Bhikkhūnaṁ ālopaṁ datvā,
pv13:14.2	pāṇimattañca coḷakaṁ;
pv13:14.3	Thālakassa ca pānīyaṁ,
pv13:14.4	mama dakkhiṇamādisi.
pv13:15.1	Ālopassa phalaṁ passa,
pv13:15.2	bhattaṁ vassasataṁ dasa;
pv13:15.3	Bhuñjāmi kāmakāminī,
pv13:15.4	anekarasabyañjanaṁ.
pv13:16.1	Pāṇimattassa coḷassa,
pv13:16.2	vipākaṁ passa yādisaṁ;
pv13:16.3	Yāvatā nandarājassa,
pv13:16.4	vijitasmiṁ paṭicchadā.
pv13:17.1	Tato bahutarā bhante,
pv13:17.2	vatthānacchādanāni me;
pv13:17.3	Koseyyakambalīyāni,
pv13:17.4	khomakappāsikāni ca.
pv13:18.1	Vipulā ca mahagghā ca,
pv13:18.2	tepākāsevalambare;
pv13:18.3	Sāhaṁ taṁ paridahāmi,
pv13:18.4	yaṁ yaṁ hi manaso piyaṁ.
pv13:19.1	Thālakassa ca pānīyaṁ,
pv13:19.2	vipākaṁ passa yādisaṁ;
pv13:19.3	Gambhīrā caturassā ca,
pv13:19.4	pokkharañño sunimmitā.
pv13:20.1	Setodakā suppatitthā,
pv13:20.2	sītā appaṭigandhiyā;
pv13:20.3	Padumuppalasañchannā,
pv13:20.4	vārikiñjakkhapūritā.
pv13:21.1	Sāhaṁ ramāmi kīḷāmi,
pv13:21.2	modāmi akutobhayā;
pv13:21.3	Muniṁ kāruṇikaṁ loke,
pv13:21.4	bhante vanditumāgatā”ti.
pv13:22.1	Saṁsāramocakapetivatthu paṭhamaṁ.
pv14:0.1	Petavatthu
pv14:0.2	Ubbarivagga
pv14:0.3	2. Sāriputtattheramātupetivatthu
pv14:1.1	“Naggā dubbaṇṇarūpāsi,
pv14:1.2	kisā dhamanisanthatā;
pv14:1.3	Upphāsulike kisike,
pv14:1.4	kā nu tvaṁ idha tiṭṭhasi”.
pv14:2.1	“Ahaṁ te sakiyā mātā,
pv14:2.2	pubbe aññāsu jātīsu;
pv14:2.3	Upapannā pettivisayaṁ,
pv14:2.4	khuppipāsasamappitā.
pv14:3.1	Chaḍḍitaṁ khipitaṁ kheḷaṁ,
pv14:3.2	siṅghāṇikaṁ silesumaṁ;
pv14:3.3	Vasañca ḍayhamānānaṁ,
pv14:3.4	vijātānañca lohitaṁ.
pv14:4.1	Vaṇikānañca yaṁ ghāna-
pv14:4.2	sīsacchinnāna lohitaṁ;
pv14:4.3	Khudāparetā bhuñjāmi,
pv14:4.4	itthipurisanissitaṁ.
pv14:5.1	Pubbalohitaṁ bhakkhāmi,
pv14:5.2	pasūnaṁ mānusāna ca;
pv14:5.3	Aleṇā anagārā ca,
pv14:5.4	nīlamañcaparāyaṇā.
pv14:6.1	Dehi puttaka me dānaṁ,
pv14:6.2	datvā anvādisāhi me;
pv14:6.3	Appeva nāma mucceyyaṁ,
pv14:6.4	pubbalohitabhojanā”ti.
pv14:7.1	Mātuyā vacanaṁ sutvā,
pv14:7.2	upatissonukampako;
pv14:7.3	Āmantayi moggallānaṁ,
pv14:7.4	anuruddhañca kappinaṁ.
pv14:8.1	Catasso kuṭiyo katvā,
pv14:8.2	saṅghe cātuddise adā;
pv14:8.3	Kuṭiyo annapānañca,
pv14:8.4	mātu dakkhiṇamādisī.
pv14:9.1	Samanantarānuddiṭṭhe,
pv14:9.2	vipāko udapajjatha;
pv14:9.3	Bhojanaṁ pānīyaṁ vatthaṁ,
pv14:9.4	dakkhiṇāya idaṁ phalaṁ.
pv14:10.1	Tato suddhā sucivasanā,
pv14:10.2	kāsikuttamadhārinī;
pv14:10.3	Vicittavatthābharaṇā,
pv14:10.4	kolitaṁ upasaṅkami.
pv14:11.1	“Abhikkantena vaṇṇena,
pv14:11.2	yā tvaṁ tiṭṭhasi devate;
pv14:11.3	Obhāsentī disā sabbā,
pv14:11.4	osadhī viya tārakā.
pv14:12.1	Kena tetādiso vaṇṇo,
pv14:12.2	kena te idha mijjhati;
pv14:12.3	Uppajjanti ca te bhogā,
pv14:12.4	ye keci manaso piyā.
pv14:13.1	Pucchāmi taṁ devi mahānubhāve,
pv14:13.2	Manussabhūtā kimakāsi puññaṁ;
pv14:13.3	Kenāsi evaṁ jalitānubhāvā,
pv14:13.4	Vaṇṇo ca te sabbadisā pabhāsatī”ti.
pv14:14.1	“Sāriputtassāhaṁ mātā,
pv14:14.2	pubbe aññāsu jātīsu;
pv14:14.3	Upapannā pettivisayaṁ,
pv14:14.4	khuppipāsasamappitā.
pv14:15.1	Chaḍḍitaṁ khipitaṁ kheḷaṁ,
pv14:15.2	siṅghāṇikaṁ silesumaṁ;
pv14:15.3	Vasañca ḍayhamānānaṁ,
pv14:15.4	vijātānañca lohitaṁ.
pv14:16.1	Vaṇikānañca yaṁ ghāna-
pv14:16.2	sīsacchinnāna lohitaṁ;
pv14:16.3	Khudāparetā bhuñjāmi,
pv14:16.4	itthipurisanissitaṁ.
pv14:17.1	Pubbalohitaṁ bhakkhissaṁ,
pv14:17.2	pasūnaṁ mānusāna ca;
pv14:17.3	Aleṇā anagārā ca,
pv14:17.4	nīlamañcaparāyaṇā.
pv14:18.1	Sāriputtassa dānena,
pv14:18.2	modāmi akutobhayā;
pv14:18.3	Muniṁ kāruṇikaṁ loke,
pv14:18.4	bhante vanditumāgatā”ti.
pv14:19.1	Sāriputtattherassa mātupetivatthu dutiyaṁ.
pv15:0.1	Petavatthu
pv15:0.2	Ubbarivagga
pv15:0.3	3. Mattāpetivatthu
pv15:1.1	“Naggā dubbaṇṇarūpāsi,
pv15:1.2	kisā dhamanisanthatā;
pv15:1.3	Upphāsulike kisike,
pv15:1.4	kā nu tvaṁ idha tiṭṭhasī”ti.
pv15:2.1	“Ahaṁ mattā tuvaṁ tissā,
pv15:2.2	sapattī te pure ahuṁ;
pv15:2.3	Pāpakammaṁ karitvāna,
pv15:2.4	petalokaṁ ito gatā”ti.
pv15:3.1	“Kiṁ nu kāyena vācāya,
pv15:3.2	manasā dukkaṭaṁ kataṁ;
pv15:3.3	Kissa kammavipākena,
pv15:3.4	petalokaṁ ito gatā”ti.
pv15:4.1	“Caṇḍī ca pharusā cāsiṁ,
pv15:4.2	issukī maccharī saṭhā;
pv15:4.3	Tāhaṁ duruttaṁ vatvāna,
pv15:4.4	petalokaṁ ito gatā”ti.
pv15:5.1	“Sabbaṁ ahampi jānāmi,
pv15:5.2	yathā tvaṁ caṇḍikā ahu;
pv15:5.3	Aññañca kho taṁ pucchāmi,
pv15:5.4	kenāsi paṁsukunthitā”ti.
pv15:6.1	“Sīsaṁnhātā tuvaṁ āsi,
pv15:6.2	sucivatthā alaṅkatā;
pv15:6.3	Ahañca kho adhimattaṁ,
pv15:6.4	samalaṅkatatarā tayā.
pv15:7.1	Tassā me pekkhamānāya,
pv15:7.2	sāmikena samantayi;
pv15:7.3	Tato me issā vipulā,
pv15:7.4	kodho me samajāyatha.
pv15:8.1	Tato paṁsuṁ gahetvāna,
pv15:8.2	paṁsunā taṁ hi okiriṁ;
pv15:8.3	Tassa kammavipākena,
pv15:8.4	tenamhi paṁsukunthitā”ti.
pv15:9.1	“Sabbaṁ ahampi jānāmi,
pv15:9.2	paṁsunā maṁ tvamokiri;
pv15:9.3	Aññañca kho taṁ pucchāmi,
pv15:9.4	kena khajjasi kacchuyā”ti.
pv15:10.1	“Bhesajjahārī ubhayo,
pv15:10.2	vanantaṁ agamimhase;
pv15:10.3	Tvañca bhesajjamāhari,
pv15:10.4	ahañca kapikacchuno.
pv15:11.1	Tassā tyājānamānāya,
pv15:11.2	seyyaṁ tyāhaṁ samokiriṁ;
pv15:11.3	Tassa kammavipākena,
pv15:11.4	tena khajjāmi kacchuyā”ti.
pv15:12.1	“Sabbaṁ ahampi jānāmi,
pv15:12.2	seyyaṁ me tvaṁ samokiri;
pv15:12.3	Aññañca kho taṁ pucchāmi,
pv15:12.4	kenāsi naggiyā tuvan”ti.
pv15:13.1	“Sahāyānaṁ samayo āsi,
pv15:13.2	ñātīnaṁ samitī ahu;
pv15:13.3	Tvañca āmantitā āsi,
pv15:13.4	sasāminī no ca kho ahaṁ.
pv15:14.1	Tassā tyājānamānāya,
pv15:14.2	dussaṁ tyāhaṁ apānudiṁ;
pv15:14.3	Tassa kammavipākena,
pv15:14.4	tenamhi naggiyā ahan”ti.
pv15:15.1	“Sabbaṁ ahampi jānāmi,
pv15:15.2	dussaṁ me tvaṁ apānudi;
pv15:15.3	Aññañca kho taṁ pucchāmi,
pv15:15.4	kenāsi gūthagandhinī”ti.
pv15:16.1	“Tava gandhañca mālañca,
pv15:16.2	paccagghañca vilepanaṁ;
pv15:16.3	Gūthakūpe atāresiṁ,
pv15:16.4	taṁ pāpaṁ pakataṁ mayā;
pv15:16.5	Tassa kammavipākena,
pv15:16.6	tenamhi gūthagandhinī”ti.
pv15:17.1	“Sabbaṁ ahampi jānāmi,
pv15:17.2	taṁ pāpaṁ pakataṁ tayā;
pv15:17.3	Aññañca kho taṁ pucchāmi,
pv15:17.4	kenāsi duggatā tuvan”ti.
pv15:18.1	“Ubhinnaṁ samakaṁ āsi,
pv15:18.2	yaṁ gehe vijjate dhanaṁ;
pv15:18.3	Santesu deyyadhammesu,
pv15:18.4	dīpaṁ nākāsimattano;
pv15:18.5	Tassa kammavipākena,
pv15:18.6	tenamhi duggatā ahaṁ.
pv15:19.1	Tadeva maṁ tvaṁ avaca,
pv15:19.2	‘pāpakammaṁ nisevasi;
pv15:19.3	Na hi pāpehi kammehi,
pv15:19.4	sulabhā hoti suggatī’”ti.
pv15:20.1	“Vāmato maṁ tvaṁ paccesi,
pv15:20.2	athopi maṁ usūyasi;
pv15:20.3	Passa pāpānaṁ kammānaṁ,
pv15:20.4	vipāko hoti yādiso.
pv15:21.1	Te gharā tā ca dāsiyo,
pv15:21.2	tānevābharaṇānime;
pv15:21.3	Te aññe paricārenti,
pv15:21.4	na bhogā honti sassatā.
pv15:22.1	Idāni bhūtassa pitā,
pv15:22.2	āpaṇā gehamehiti;
pv15:22.3	Appeva te dade kiñci,
pv15:22.4	mā su tāva ito agā”ti.
pv15:23.1	“Naggā dubbaṇṇarūpāmhi,
pv15:23.2	kisā dhamanisanthatā;
pv15:23.3	Kopīnametaṁ itthīnaṁ,
pv15:23.4	mā maṁ bhūtapitāddasā”ti.
pv15:24.1	“Handa kiṁ vā tyāhaṁ dammi,
pv15:24.2	Kiṁ vā tedha karomahaṁ;
pv15:24.3	Yena tvaṁ sukhitā assa,
pv15:24.4	Sabbakāmasamiddhinī”ti.
pv15:25.1	“Cattāro bhikkhū saṅghato,
pv15:25.2	cattāro pana puggale;
pv15:25.3	Aṭṭha bhikkhū bhojayitvā,
pv15:25.4	mama dakkhiṇamādisa;
pv15:25.5	Tadāhaṁ sukhitā hessaṁ,
pv15:25.6	sabbakāmasamiddhinī”ti.
pv15:26.1	Sādhūti sā paṭissutvā,
pv15:26.2	bhojayitvāṭṭha bhikkhavo;
pv15:26.3	Vatthehacchādayitvāna,
pv15:26.4	tassā dakkhiṇamādisī.
pv15:27.1	Samanantarānuddiṭṭhe,
pv15:27.2	vipāko udapajjatha;
pv15:27.3	Bhojanacchādanapānīyaṁ,
pv15:27.4	dakkhiṇāya idaṁ phalaṁ.
pv15:28.1	Tato suddhā sucivasanā,
pv15:28.2	kāsikuttamadhārinī;
pv15:28.3	Vicittavatthābharaṇā,
pv15:28.4	sapattiṁ upasaṅkami.
pv15:29.1	“Abhikkantena vaṇṇena,
pv15:29.2	yā tvaṁ tiṭṭhasi devate;
pv15:29.3	Obhāsentī disā sabbā,
pv15:29.4	osadhī viya tārakā.
pv15:30.1	Kena tetādiso vaṇṇo,
pv15:30.2	kena te idha mijjhati;
pv15:30.3	Uppajjanti ca te bhogā,
pv15:30.4	ye keci manaso piyā.
pv15:31.1	Pucchāmi taṁ devi mahānubhāve,
pv15:31.2	Manussabhūtā kimakāsi puññaṁ;
pv15:31.3	Kenāsi evaṁ jalitānubhāvā,
pv15:31.4	Vaṇṇo ca te sabbadisā pabhāsatī”ti.
pv15:32.1	“Ahaṁ mattā tuvaṁ tissā,
pv15:32.2	sapattī te pure ahuṁ;
pv15:32.3	Pāpakammaṁ karitvāna,
pv15:32.4	petalokaṁ ito gatā.
pv15:33.1	Tava dinnena dānena,
pv15:33.2	modāmi akutobhayā;
pv15:33.3	Ciraṁ jīvāhi bhagini,
pv15:33.4	saha sabbehi ñātibhi;
pv15:33.5	Asokaṁ virajaṁ ṭhānaṁ,
pv15:33.6	āvāsaṁ vasavattinaṁ.
pv15:34.1	Idha dhammaṁ caritvāna,
pv15:34.2	Dānaṁ datvāna sobhane;
pv15:34.3	Vineyya maccheramalaṁ samūlaṁ,
pv15:34.4	Aninditā saggamupehi ṭhānan”ti.
pv15:35.1	Mattāpetivatthu tatiyaṁ.
pv16:0.1	Petavatthu
pv16:0.2	Ubbarivagga
pv16:0.3	4. Nandāpetivatthu
pv16:1.1	“Kāḷī dubbaṇṇarūpāsi,
pv16:1.2	pharusā bhīrudassanā;
pv16:1.3	Piṅgalāsi kaḷārāsi,
pv16:1.4	na taṁ maññāmi mānusin”ti.
pv16:2.1	“Ahaṁ nandā nandisena,
pv16:2.2	bhariyā te pure ahuṁ;
pv16:2.3	Pāpakammaṁ karitvāna,
pv16:2.4	petalokaṁ ito gatā”ti.
pv16:3.1	“Kiṁ nu kāyena vācāya,
pv16:3.2	manasā dukkaṭaṁ kataṁ;
pv16:3.3	Kissa kammavipākena,
pv16:3.4	petalokaṁ ito gatā”ti.
pv16:4.1	“Caṇḍī ca pharusā cāsiṁ,
pv16:4.2	tayi cāpi agāravā;
pv16:4.3	Tāhaṁ duruttaṁ vatvāna,
pv16:4.4	petalokaṁ ito gatā”ti.
pv16:5.1	“Handuttarīyaṁ dadāmi te,
pv16:5.2	imaṁ dussaṁ nivāsaya;
pv16:5.3	Imaṁ dussaṁ nivāsetvā,
pv16:5.4	ehi nessāmi taṁ gharaṁ.
pv16:6.1	Vatthañca annapānañca,
pv16:6.2	lacchasi tvaṁ gharaṁ gatā;
pv16:6.3	Putte ca te passissasi,
pv16:6.4	suṇisāyo ca dakkhasī”ti.
pv16:7.1	“Hatthena hatthe te dinnaṁ,
pv16:7.2	na mayhaṁ upakappati;
pv16:7.3	Bhikkhū ca sīlasampanne,
pv16:7.4	vītarāge bahussute.
pv16:8.1	Tappehi annapānena,
pv16:8.2	mama dakkhiṇamādisa;
pv16:8.3	Tadāhaṁ sukhitā hessaṁ,
pv16:8.4	sabbakāmasamiddhinī”ti.
pv16:9.1	Sādhūti so paṭissutvā,
pv16:9.2	dānaṁ vipulamākiri;
pv16:9.3	Annaṁ pānaṁ khādanīyaṁ,
pv16:9.4	vatthasenāsanāni ca;
pv16:9.5	Chattaṁ gandhañca mālañca,
pv16:9.6	vividhā ca upāhanā.
pv16:10.1	Bhikkhū ca sīlasampanne,
pv16:10.2	vītarāge bahussute;
pv16:10.3	Tappetvā annapānena,
pv16:10.4	tassā dakkhiṇamādisī.
pv16:11.1	Samanantarānuddiṭṭhe,
pv16:11.2	vipāko udapajjatha;
pv16:11.3	Bhojanacchādanapānīyaṁ,
pv16:11.4	dakkhiṇāya idaṁ phalaṁ.
pv16:12.1	Tato suddhā sucivasanā,
pv16:12.2	kāsikuttamadhārinī;
pv16:12.3	Vicittavatthābharaṇā,
pv16:12.4	sāmikaṁ upasaṅkami.
pv16:13.1	“Abhikkantena vaṇṇena,
pv16:13.2	yā tvaṁ tiṭṭhasi devate;
pv16:13.3	Obhāsentī disā sabbā,
pv16:13.4	osadhī viya tārakā.
pv16:14.1	Kena tetādiso vaṇṇo,
pv16:14.2	kena te idha mijjhati;
pv16:14.3	Uppajjanti ca te bhogā,
pv16:14.4	ye keci manaso piyā.
pv16:15.1	Pucchāmi taṁ devi mahānubhāve,
pv16:15.2	Manussabhūtā kimakāsi puññaṁ;
pv16:15.3	Kenāsi evaṁ jalitānubhāvā,
pv16:15.4	Vaṇṇo ca te sabbadisā pabhāsatī”ti.
pv16:16.1	“Ahaṁ nandā nandisena,
pv16:16.2	bhariyā te pure ahuṁ;
pv16:16.3	Pāpakammaṁ karitvāna,
pv16:16.4	petalokaṁ ito gatā.
pv16:17.1	Tava dinnena dānena,
pv16:17.2	modāmi akutobhayā;
pv16:17.3	Ciraṁ jīva gahapati,
pv16:17.4	saha sabbehi ñātibhi;
pv16:17.5	Asokaṁ virajaṁ khemaṁ,
pv16:17.6	āvāsaṁ vasavattinaṁ.
pv16:18.1	Idha dhammaṁ caritvāna,
pv16:18.2	Dānaṁ datvā gahapati;
pv16:18.3	Vineyya maccheramalaṁ samūlaṁ,
pv16:18.4	Anindito saggamupehi ṭhānan”ti.
pv16:19.1	Nandāpetivatthu catutthaṁ.
pv17:0.1	Petavatthu
pv17:0.2	Ubbarivagga
pv17:0.3	5. Maṭṭhakuṇḍalīpetavatthu
pv17:1.1	“Alaṅkato maṭṭhakuṇḍalī,
pv17:1.2	Māladhārī haricandanussado;
pv17:1.3	Bāhā paggayha kandasi,
pv17:1.4	Vanamajjhe kiṁ dukkhito tuvan”ti.
pv17:2.1	“Sovaṇṇamayo pabhassaro,
pv17:2.2	Uppanno rathapañjaro mama;
pv17:2.3	Tassa cakkayugaṁ na vindāmi,
pv17:2.4	Tena dukkhena jahāmi jīvitan”ti.
pv17:3.1	“Sovaṇṇamayaṁ maṇimayaṁ,
pv17:3.2	Lohitakamayaṁ atha rūpiyamayaṁ;
pv17:3.3	Ācikkha me bhaddamāṇava,
pv17:3.4	Cakkayugaṁ paṭipādayāmi te”ti.
pv17:4.1	So māṇavo tassa pāvadi,
pv17:4.2	“Candasūriyā ubhayettha dissare;
pv17:4.3	Sovaṇṇamayo ratho mama,
pv17:4.4	Tena cakkayugena sobhatī”ti.
pv17:5.1	“Bālo kho tvaṁ asi māṇava,
pv17:5.2	Yo tvaṁ patthayase apatthiyaṁ;
pv17:5.3	Maññāmi tuvaṁ marissasi,
pv17:5.4	Na hi tvaṁ lacchasi candasūriye”ti.
pv17:6.1	“Gamanāgamanampi dissati,
pv17:6.2	Vaṇṇadhātu ubhayattha vīthiyā;
pv17:6.3	Peto kālakato na dissati,
pv17:6.4	Ko nidha kandataṁ bālyataro”ti.
pv17:7.1	“Saccaṁ kho vadesi māṇava,
pv17:7.2	Ahameva kandataṁ bālyataro;
pv17:7.3	Candaṁ viya dārako rudaṁ,
pv17:7.4	Petaṁ kālakatābhipatthayinti.
pv17:8.1	Ādittaṁ vata maṁ santaṁ,
pv17:8.2	ghatasittaṁva pāvakaṁ;
pv17:8.3	Vārinā viya osiñcaṁ,
pv17:8.4	sabbaṁ nibbāpaye daraṁ.
pv17:9.1	Abbahī vata me sallaṁ,
pv17:9.2	sokaṁ hadayanissitaṁ;
pv17:9.3	Yo me sokaparetassa,
pv17:9.4	puttasokaṁ apānudi.
pv17:10.1	Svāhaṁ abbūḷhasallosmi,
pv17:10.2	sītibhūtosmi nibbuto;
pv17:10.3	Na socāmi na rodāmi,
pv17:10.4	tava sutvāna māṇavā”ti.
pv17:11.1	“Devatā nusi gandhabbo,
pv17:11.2	adu sakko purindado;
pv17:11.3	Ko vā tvaṁ kassa vā putto,
pv17:11.4	kathaṁ jānemu taṁ mayan”ti.
pv17:12.1	“Yañca kandasi yañca rodasi,
pv17:12.2	Puttaṁ āḷāhane sayaṁ dahitvā;
pv17:12.3	Svāhaṁ kusalaṁ karitvā kammaṁ,
pv17:12.4	Tidasānaṁ sahabyataṁ gato”ti.
pv17:13.1	“Appaṁ vā bahuṁ vā nāddasāma,
pv17:13.2	Dānaṁ dadantassa sake agāre;
pv17:13.3	Uposathakammaṁ vā tādisaṁ,
pv17:13.4	Kena kammena gatosi devalokan”ti.
pv17:14.1	“Ābādhikohaṁ dukkhito gilāno,
pv17:14.2	Āturarūpomhi sake nivesane;
pv17:14.3	Buddhaṁ vigatarajaṁ vitiṇṇakaṅkhaṁ,
pv17:14.4	Addakkhiṁ sugataṁ anomapaññaṁ.
pv17:15.1	Svāhaṁ muditamano pasannacitto,
pv17:15.2	Añjaliṁ akariṁ tathāgatassa;
pv17:15.3	Tāhaṁ kusalaṁ karitvāna kammaṁ,
pv17:15.4	Tidasānaṁ sahabyataṁ gato”ti.
pv17:16.1	“Acchariyaṁ vata abbhutaṁ vata,
pv17:16.2	Añjalikammassa ayamīdiso vipāko;
pv17:16.3	Ahampi muditamano pasannacitto,
pv17:16.4	Ajjeva buddhaṁ saraṇaṁ vajāmī”ti.
pv17:17.1	“Ajjeva buddhaṁ saraṇaṁ vajāhi,
pv17:17.2	Dhammañca saṅghañca pasannacitto;
pv17:17.3	Tatheva sikkhāya padāni pañca,
pv17:17.4	Akhaṇḍaphullāni samādiyassu.
pv17:18.1	Pāṇātipātā viramassu khippaṁ,
pv17:18.2	Loke adinnaṁ parivajjayassu;
pv17:18.3	Amajjapo mā ca musā bhaṇāhi,
pv17:18.4	Sakena dārena ca hohi tuṭṭho”ti.
pv17:19.1	“Atthakāmosi me yakkha,
pv17:19.2	hitakāmosi devate;
pv17:19.3	Karomi tuyhaṁ vacanaṁ,
pv17:19.4	tvaṁsi ācariyo mamāti.
pv17:20.1	Upemi saraṇaṁ buddhaṁ,
pv17:20.2	dhammañcāpi anuttaraṁ;
pv17:20.3	Saṅghañca naradevassa,
pv17:20.4	gacchāmi saraṇaṁ ahaṁ.
pv17:21.1	Pāṇātipātā viramāmi khippaṁ,
pv17:21.2	Loke adinnaṁ parivajjayāmi;
pv17:21.3	Amajjapo no ca musā bhaṇāmi,
pv17:21.4	Sakena dārena ca homi tuṭṭho”ti.
pv17:22.1	Maṭṭhakuṇḍalīpetavatthu pañcamaṁ.
pv18:0.1	Petavatthu
pv18:0.2	Ubbarivagga
pv18:0.3	6. Kaṇhapetavatthu
pv18:1.1	“Uṭṭhehi kaṇha kiṁ sesi,
pv18:1.2	Ko attho supanena te;
pv18:1.3	Yo ca tuyhaṁ sako bhātā,
pv18:1.4	Hadayaṁ cakkhu ca dakkhiṇaṁ;
pv18:1.5	Tassa vātā balīyanti,
pv18:1.6	Sasaṁ jappati kesavā”ti.
pv18:2.1	“Tassa taṁ vacanaṁ sutvā,
pv18:2.2	rohiṇeyyassa kesavo;
pv18:2.3	Taramānarūpo vuṭṭhāsi,
pv18:2.4	bhātusokena aṭṭito.
pv18:3.1	Kiṁ nu ummattarūpova,
pv18:3.2	kevalaṁ dvārakaṁ imaṁ;
pv18:3.3	Saso sasoti lapasi,
pv18:3.4	kīdisaṁ sasamicchasi.
pv18:4.1	Sovaṇṇamayaṁ maṇimayaṁ,
pv18:4.2	Lohamayaṁ atha rūpiyamayaṁ;
pv18:4.3	Saṅkhasilāpavāḷamayaṁ,
pv18:4.4	Kārayissāmi te sasaṁ.
pv18:5.1	Santi aññepi sasakā,
pv18:5.2	araññavanagocarā;
pv18:5.3	Tepi te ānayissāmi,
pv18:5.4	kīdisaṁ sasamicchasī”ti.
pv18:6.1	“Nāhamete sase icche,
pv18:6.2	ye sasā pathavissitā;
pv18:6.3	Candato sasamicchāmi,
pv18:6.4	taṁ me ohara kesavā”ti.
pv18:7.1	“So nūna madhuraṁ ñāti,
pv18:7.2	jīvitaṁ vijahissasi;
pv18:7.3	Apatthiyaṁ patthayasi,
pv18:7.4	candato sasamicchasī”ti.
pv18:8.1	“Evañce kaṇha jānāsi,
pv18:8.2	yathaññamanusāsasi;
pv18:8.3	Kasmā pure mataṁ puttaṁ,
pv18:8.4	ajjāpi manusocasi.
pv18:9.1	Na yaṁ labbhā manussena,
pv18:9.2	amanussena vā pana;
pv18:9.3	Jāto me mā mari putto,
pv18:9.4	kuto labbhā alabbhiyaṁ.
pv18:10.1	Na mantā mūlabhesajjā,
pv18:10.2	osadhehi dhanena vā;
pv18:10.3	Sakkā ānayituṁ kaṇha,
pv18:10.4	yaṁ petamanusocasi.
pv18:11.1	Mahaddhanā mahābhogā,
pv18:11.2	raṭṭhavantopi khattiyā;
pv18:11.3	Pahūtadhanadhaññāse,
pv18:11.4	tepi no ajarāmarā.
pv18:12.1	Khattiyā brāhmaṇā vessā,
pv18:12.2	suddā caṇḍālapukkusā;
pv18:12.3	Ete caññe ca jātiyā,
pv18:12.4	tepi no ajarāmarā.
pv18:13.1	Ye mantaṁ parivattenti,
pv18:13.2	chaḷaṅgaṁ brahmacintitaṁ;
pv18:13.3	Ete caññe ca vijjāya,
pv18:13.4	tepi no ajarāmarā.
pv18:14.1	Isayo vāpi ye santā,
pv18:14.2	saññatattā tapassino;
pv18:14.3	Sarīraṁ tepi kālena,
pv18:14.4	vijahanti tapassino.
pv18:15.1	Bhāvitattā arahanto,
pv18:15.2	katakiccā anāsavā;
pv18:15.3	Nikkhipanti imaṁ dehaṁ,
pv18:15.4	puññapāpaparikkhayā”ti.
pv18:16.1	“Ādittaṁ vata maṁ santaṁ,
pv18:16.2	ghatasittaṁva pāvakaṁ;
pv18:16.3	Vārinā viya osiñcaṁ,
pv18:16.4	sabbaṁ nibbāpaye daraṁ.
pv18:17.1	Abbahī vata me sallaṁ,
pv18:17.2	sokaṁ hadayanissitaṁ;
pv18:17.3	Yo me sokaparetassa,
pv18:17.4	puttasokaṁ apānudi.
pv18:18.1	Svāhaṁ abbūḷhasallosmi,
pv18:18.2	sītibhūtosmi nibbuto;
pv18:18.3	Na socāmi na rodāmi,
pv18:18.4	tava sutvāna bhātika”.
pv18:19.1	Evaṁ karonti sappaññā,
pv18:19.2	ye honti anukampakā;
pv18:19.3	Nivattayanti sokamhā,
pv18:19.4	ghaṭo jeṭṭhaṁva bhātaraṁ.
pv18:20.1	Yassa etādisā honti,
pv18:20.2	amaccā paricārakā;
pv18:20.3	Subhāsitena anventi,
pv18:20.4	ghaṭo jeṭṭhaṁva bhātaranti.
pv18:21.1	Kaṇhapetavatthu chaṭṭhaṁ.
pv19:0.1	Petavatthu
pv19:0.2	Ubbarivagga
pv19:0.3	7. Dhanapālaseṭṭhipetavatthu
pv19:1.1	“Naggo dubbaṇṇarūposi,
pv19:1.2	kiso dhamanisanthato;
pv19:1.3	Upphāsuliko kisiko,
pv19:1.4	ko nu tvamasi mārisa”.
pv19:2.1	“Ahaṁ bhadante petomhi,
pv19:2.2	duggato yamalokiko;
pv19:2.3	Pāpakammaṁ karitvāna,
pv19:2.4	petalokaṁ ito gato”.
pv19:3.1	“Kiṁ nu kāyena vācāya,
pv19:3.2	manasā dukkaṭaṁ kataṁ;
pv19:3.3	Kissa kammavipākena,
pv19:3.4	petalokaṁ ito gato”.
pv19:4.1	“Nagaraṁ atthi paṇṇānaṁ,
pv19:4.2	erakacchanti vissutaṁ;
pv19:4.3	Tattha seṭṭhi pure āsiṁ,
pv19:4.4	dhanapāloti maṁ vidū.
pv19:5.1	Asīti sakaṭavāhānaṁ,
pv19:5.2	hiraññassa ahosi me;
pv19:5.3	Pahūtaṁ me jātarūpaṁ,
pv19:5.4	muttā veḷuriyā bahū.
pv19:6.1	Tāva mahaddhanassāpi,
pv19:6.2	na me dātuṁ piyaṁ ahu;
pv19:6.3	Pidahitvā dvāraṁ bhuñjiṁ,
pv19:6.4	mā maṁ yācanakāddasuṁ.
pv19:7.1	Assaddho maccharī cāsiṁ,
pv19:7.2	kadariyo paribhāsako;
pv19:7.3	Dadantānaṁ karontānaṁ,
pv19:7.4	vārayissaṁ bahū jane.
pv19:8.1	Vipāko natthi dānassa,
pv19:8.2	saṁyamassa kuto phalaṁ;
pv19:8.3	Pokkharaññodapānāni,
pv19:8.4	ārāmāni ca ropite;
pv19:8.5	Papāyo ca vināsesiṁ,
pv19:8.6	dugge saṅkamanāni ca.
pv19:9.1	Svāhaṁ akatakalyāṇo,
pv19:9.2	katapāpo tato cuto;
pv19:9.3	Upapanno pettivisayaṁ,
pv19:9.4	khuppipāsasamappito.
pv19:10.1	Pañcapaṇṇāsavassāni,
pv19:10.2	yato kālaṅkato ahaṁ;
pv19:10.3	Nābhijānāmi bhuttaṁ vā,
pv19:10.4	pītaṁ vā pana pāniyaṁ.
pv19:11.1	Yo saṁyamo so vināso,
pv19:11.2	yo vināso so saṁyamo;
pv19:11.3	Petā hi kira jānanti,
pv19:11.4	yo saṁyamo so vināso.
pv19:12.1	Ahaṁ pure saṁyamissaṁ,
pv19:12.2	nādāsiṁ bahuke dhane;
pv19:12.3	Santesu deyyadhammesu,
pv19:12.4	dīpaṁ nākāsimattano;
pv19:12.5	Svāhaṁ pacchānutappāmi,
pv19:12.6	attakammaphalūpago.
pv19:13.1	Uddhaṁ catūhi māsehi,
pv19:13.2	kālaṅkiriyā bhavissati;
pv19:13.3	Ekantakaṭukaṁ ghoraṁ,
pv19:13.4	nirayaṁ papatissahaṁ.
pv19:14.1	Catukkaṇṇaṁ catudvāraṁ,
pv19:14.2	vibhattaṁ bhāgaso mitaṁ;
pv19:14.3	Ayopākārapariyantaṁ,
pv19:14.4	ayasā paṭikujjitaṁ.
pv19:15.1	Tassa ayomayā bhūmi,
pv19:15.2	jalitā tejasā yutā;
pv19:15.3	Samantā yojanasataṁ,
pv19:15.4	pharitvā tiṭṭhati sabbadā.
pv19:16.1	Tatthāhaṁ dīghamaddhānaṁ,
pv19:16.2	Dukkhaṁ vedissa vedanaṁ;
pv19:16.3	Phalaṁ pāpassa kammassa,
pv19:16.4	Tasmā socāmahaṁ bhusaṁ.
pv19:17.1	Taṁ vo vadāmi bhaddaṁ vo,
pv19:17.2	yāvantettha samāgatā;
pv19:17.3	Mākattha pāpakaṁ kammaṁ,
pv19:17.4	āvi vā yadi vā raho.
pv19:18.1	Sace taṁ pāpakaṁ kammaṁ,
pv19:18.2	karissatha karotha vā;
pv19:18.3	Na vo dukkhā pamutyatthi,
pv19:18.4	uppaccāpi palāyataṁ.
pv19:19.1	Matteyyā hotha petteyyā,
pv19:19.2	kule jeṭṭhāpacāyikā;
pv19:19.3	Sāmaññā hotha brahmaññā,
pv19:19.4	evaṁ saggaṁ gamissathā”ti.
pv19:20.1	Dhanapālaseṭṭhipetavatthu sattamaṁ.
pv20:0.1	Petavatthu
pv20:0.2	Ubbarivagga
pv20:0.3	8. Cūḷaseṭṭhipetavatthu
pv20:1.1	“Naggo kiso pabbajitosi bhante,
pv20:1.2	Rattiṁ kuhiṁ gacchasi kissa hetu;
pv20:1.3	Ācikkha me taṁ api sakkuṇemu,
pv20:1.4	Sabbena vittaṁ paṭipādaye tuvan”ti.
pv20:2.1	“Bārāṇasī nagaraṁ dūraghuṭṭhaṁ,
pv20:2.2	Tatthāhaṁ gahapati aḍḍhako ahu dīno;
pv20:2.3	Adātā gedhitamano āmisasmiṁ,
pv20:2.4	Dussīlyena yamavisayamhi patto.
pv20:3.1	So sūcikāya kilamito tehi,
pv20:3.2	Teneva ñātīsu yāmi āmisakiñcikkhahetu;
pv20:3.3	Adānasīlā na ca saddahanti,
pv20:3.4	Dānaphalaṁ hoti paramhi loke.
pv20:4.1	Dhītā ca mayhaṁ lapate abhikkhaṇaṁ,
pv20:4.2	‘Dassāmi dānaṁ pitūnaṁ pitāmahānaṁ’;
pv20:4.3	Tamupakkhaṭaṁ parivisayanti brāhmaṇā,
pv20:4.4	‘Yāmi ahaṁ andhakavindaṁ bhottun’”ti.
pv20:5.1	Tamavoca rājā “anubhaviyāna tampi,
pv20:5.2	Eyyāsi khippaṁ ahamapi kassaṁ pūjaṁ;
pv20:5.3	Ācikkha me taṁ yadi atthi hetu,
pv20:5.4	Saddhāyitaṁ hetuvaco suṇomā”ti.
pv20:6.1	“Tathā”ti vatvā agamāsi tattha,
pv20:6.2	Bhuñjiṁsu bhattaṁ na ca dakkhiṇārahā;
pv20:6.3	Paccāgami rājagahaṁ punāparaṁ,
pv20:6.4	Pāturahosi purato janādhipassa.
pv20:7.1	Disvāna petaṁ punadeva āgataṁ,
pv20:7.2	Rājā avoca “ahamapi kiṁ dadāmi;
pv20:7.3	Ācikkha me taṁ yadi atthi hetu,
pv20:7.4	Yena tuvaṁ cirataraṁ pīṇito siyā”ti.
pv20:8.1	“Buddhañca saṅghaṁ parivisiyāna rāja,
pv20:8.2	Annena pānena ca cīvarena;
pv20:8.3	Taṁ dakkhiṇaṁ ādisa me hitāya,
pv20:8.4	Evaṁ ahaṁ cirataraṁ pīṇito siyā”ti.
pv20:9.1	Tato ca rājā nipatitvā tāvade,
pv20:9.2	Dānaṁ sahatthā atulaṁ daditvā saṅghe;
pv20:9.3	Ārocesi pakataṁ tathāgatassa,
pv20:9.4	Tassa ca petassa dakkhiṇaṁ ādisittha.
pv20:10.1	So pūjito ativiya sobhamāno,
pv20:10.2	Pāturahosi purato janādhipassa;
pv20:10.3	“Yakkhohamasmi paramiddhipatto,
pv20:10.4	Na mayhamatthi samā sadisā mānusā.
pv20:11.1	Passānubhāvaṁ aparimitaṁ mamayidaṁ,
pv20:11.2	Tayānudiṭṭhaṁ atulaṁ datvā saṅghe;
pv20:11.3	Santappito satataṁ sadā bahūhi,
pv20:11.4	Yāmi ahaṁ sukhito manussadevā”ti.
pv20:12.1	Cūḷaseṭṭhipetavatthu aṭṭhamaṁ.
pv20:12.2	Bhāṇavāraṁ paṭhamaṁ.
pv21:0.1	Petavatthu
pv21:0.2	Ubbarivagga
pv21:0.3	9. Aṅkurapetavatthu
pv21:1.1	“Yassa atthāya gacchāma,
pv21:1.2	kambojaṁ dhanahārakā;
pv21:1.3	Ayaṁ kāmadado yakkho,
pv21:1.4	imaṁ yakkhaṁ nayāmase.
pv21:2.1	Imaṁ yakkhaṁ gahetvāna,
pv21:2.2	Sādhukena pasayha vā;
pv21:2.3	Yānaṁ āropayitvāna,
pv21:2.4	Khippaṁ gacchāma dvārakan”ti.
pv21:3.1	“Yassa rukkhassa chāyāya,
pv21:3.2	nisīdeyya sayeyya vā;
pv21:3.3	Na tassa sākhaṁ bhañjeyya,
pv21:3.4	mittadubbho hi pāpako”ti.
pv21:4.1	“Yassa rukkhassa chāyāya,
pv21:4.2	nisīdeyya sayeyya vā;
pv21:4.3	Khandhampi tassa chindeyya,
pv21:4.4	attho ce tādiso siyā”ti.
pv21:5.1	“Yassa rukkhassa chāyāya,
pv21:5.2	nisīdeyya sayeyya vā;
pv21:5.3	Na tassa pattaṁ bhindeyya,
pv21:5.4	mittadubbho hi pāpako”ti.
pv21:6.1	“Yassa rukkhassa chāyāya,
pv21:6.2	nisīdeyya sayeyya vā;
pv21:6.3	Samūlampi taṁ abbuhe,
pv21:6.4	attho ce tādiso siyā”ti.
pv21:7.1	“Yassekarattimpi ghare vaseyya,
pv21:7.2	Yatthannapānaṁ puriso labhetha;
pv21:7.3	Na tassa pāpaṁ manasāpi cintaye,
pv21:7.4	Kataññutā sappurisehi vaṇṇitā.
pv21:8.1	Yassekarattimpi ghare vaseyya,
pv21:8.2	Annena pānena upaṭṭhito siyā;
pv21:8.3	Na tassa pāpaṁ manasāpi cintaye,
pv21:8.4	Adubbhapāṇī dahate mittadubbhiṁ.
pv21:9.1	Yo pubbe katakalyāṇo,
pv21:9.2	pacchā pāpena hiṁsati;
pv21:9.3	Allapāṇihato poso,
pv21:9.4	na so bhadrāni passatī”ti.
pv21:10.1	“Nāhaṁ devena vā manussena vā,
pv21:10.2	Issariyena vāhaṁ suppasayho;
pv21:10.3	Yakkhohamasmi paramiddhipatto,
pv21:10.4	Dūraṅgamo vaṇṇabalūpapanno”ti.
pv21:11.1	“Pāṇi te sabbaso vaṇṇo,
pv21:11.2	pañcadhāro madhussavo;
pv21:11.3	Nānārasā paggharanti,
pv21:11.4	maññehaṁ taṁ purindadan”ti.
pv21:12.1	“Nāmhi devo na gandhabbo,
pv21:12.2	nāpi sakko purindado;
pv21:12.3	Petaṁ maṁ aṅkura jānāhi,
pv21:12.4	roruvamhā idhāgatan”ti.
pv21:13.1	“Kiṁsīlo kiṁsamācāro,
pv21:13.2	roruvasmiṁ pure tuvaṁ;
pv21:13.3	Kena te brahmacariyena,
pv21:13.4	puññaṁ pāṇimhi ijjhatī”ti.
pv21:14.1	“Tunnavāyo pure āsiṁ,
pv21:14.2	roruvasmiṁ tadā ahaṁ;
pv21:14.3	Sukicchavutti kapaṇo,
pv21:14.4	na me vijjati dātave.
pv21:15.1	Nivesanañca me āsi,
pv21:15.2	asayhassa upantike;
pv21:15.3	Saddhassa dānapatino,
pv21:15.4	katapuññassa lajjino.
pv21:16.1	Tattha yācanakāyanti,
pv21:16.2	nānāgottā vanibbakā;
pv21:16.3	Te ca maṁ tattha pucchanti,
pv21:16.4	asayhassa nivesanaṁ.
pv21:17.1	Kattha gacchāma bhaddaṁ vo,
pv21:17.2	kattha dānaṁ padīyati;
pv21:17.3	Tesāhaṁ puṭṭho akkhāmi,
pv21:17.4	asayhassa nivesanaṁ.
pv21:18.1	Paggayha dakkhiṇaṁ bāhuṁ,
pv21:18.2	ettha gacchatha bhaddaṁ vo;
pv21:18.3	Ettha dānaṁ padīyati,
pv21:18.4	asayhassa nivesane.
pv21:19.1	Tena pāṇi kāmadado,
pv21:19.2	tena pāṇi madhussavo;
pv21:19.3	Tena me brahmacariyena,
pv21:19.4	puññaṁ pāṇimhi ijjhatī”ti.
pv21:20.1	“Na kira tvaṁ adā dānaṁ,
pv21:20.2	Sakapāṇīhi kassaci;
pv21:20.3	Parassa dānaṁ anumodamāno,
pv21:20.4	Pāṇiṁ paggayha pāvadi.
pv21:21.1	Tena pāṇi kāmadado,
pv21:21.2	tena pāṇi madhussavo;
pv21:21.3	Tena te brahmacariyena,
pv21:21.4	puññaṁ pāṇimhi ijjhati.
pv21:22.1	Yo so dānamadā bhante,
pv21:22.2	pasanno sakapāṇibhi;
pv21:22.3	So hitvā mānusaṁ dehaṁ,
pv21:22.4	kiṁ nu so disataṁ gato”ti.
pv21:23.1	“Nāhaṁ pajānāmi asayhasāhino,
pv21:23.2	Aṅgīrasassa gatiṁ āgatiṁ vā;
pv21:23.3	Sutañca me vessavaṇassa santike,
pv21:23.4	Sakkassa sahabyataṁ gato asayho”ti.
pv21:24.1	“Alameva kātuṁ kalyāṇaṁ,
pv21:24.2	dānaṁ dātuṁ yathārahaṁ;
pv21:24.3	Pāṇiṁ kāmadadaṁ disvā,
pv21:24.4	ko puññaṁ na karissati.
pv21:25.1	So hi nūna ito gantvā,
pv21:25.2	anuppatvāna dvārakaṁ;
pv21:25.3	Dānaṁ paṭṭhapayissāmi,
pv21:25.4	yaṁ mamassa sukhāvahaṁ.
pv21:26.1	Dassāmannañca pānañca,
pv21:26.2	vatthasenāsanāni ca;
pv21:26.3	Papañca udapānañca,
pv21:26.4	dugge saṅkamanāni cā”ti.
pv21:27.1	“Kena te aṅgulī kuṇā,
pv21:27.2	mukhañca kuṇalīkataṁ;
pv21:27.3	Akkhīni ca paggharanti,
pv21:27.4	kiṁ pāpaṁ pakataṁ tayā”ti.
pv21:28.1	“Aṅgīrasassa gahapatino,
pv21:28.2	Saddhassa gharamesino;
pv21:28.3	Tassāhaṁ dānavissagge,
pv21:28.4	Dāne adhikato ahuṁ.
pv21:29.1	Tattha yācanake disvā,
pv21:29.2	āgate bhojanatthike;
pv21:29.3	Ekamantaṁ apakkamma,
pv21:29.4	akāsiṁ kuṇaliṁ mukhaṁ.
pv21:30.1	Tena me aṅgulī kuṇā,
pv21:30.2	mukhañca kuṇalīkataṁ;
pv21:30.3	Akkhīni me paggharanti,
pv21:30.4	taṁ pāpaṁ pakataṁ mayā”ti.
pv21:31.1	“Dhammena te kāpurisa,
pv21:31.2	mukhañca kuṇalīkataṁ;
pv21:31.3	Akkhīni ca paggharanti,
pv21:31.4	yaṁ taṁ parassa dānassa;
pv21:31.5	Akāsi kuṇaliṁ mukhaṁ.
pv21:32.1	Kathaṁ hi dānaṁ dadamāno,
pv21:32.2	kareyya parapattiyaṁ;
pv21:32.3	Annaṁ pānaṁ khādanīyaṁ,
pv21:32.4	vatthasenāsanāni ca.
pv21:33.1	So hi nūna ito gantvā,
pv21:33.2	anuppatvāna dvārakaṁ;
pv21:33.3	Dānaṁ paṭṭhapayissāmi,
pv21:33.4	yaṁ mamassa sukhāvahaṁ.
pv21:34.1	Dassāmannañca pānañca,
pv21:34.2	vatthasenāsanāni ca;
pv21:34.3	Papañca udapānañca,
pv21:34.4	dugge saṅkamanāni cā”ti.
pv21:35.1	Tato hi so nivattitvā,
pv21:35.2	anuppatvāna dvārakaṁ;
pv21:35.3	Dānaṁ paṭṭhapayi aṅkuro,
pv21:35.4	yaṁtumassa sukhāvahaṁ.
pv21:36.1	Adā annañca pānañca,
pv21:36.2	vatthasenāsanāni ca;
pv21:36.3	Papañca udapānañca,
pv21:36.4	vippasannena cetasā.
pv21:37.1	Ko chāto ko ca tasito,
pv21:37.2	ko vatthaṁ paridahissati;
pv21:37.3	Kassa santāni yoggāni,
pv21:37.4	ito yojentu vāhanaṁ.
pv21:38.1	Ko chatticchati gandhañca,
pv21:38.2	ko mālaṁ ko upāhanaṁ;
pv21:38.3	Itissu tattha ghosenti,
pv21:38.4	kappakā sūdamāgadhā;
pv21:38.5	Sadā sāyañca pāto ca,
pv21:38.6	aṅkurassa nivesane.
pv21:39.1	“‘Sukhaṁ supati aṅkuro’,
pv21:39.2	iti jānāti maṁ jano;
pv21:39.3	Dukkhaṁ supāmi sindhaka,
pv21:39.4	yaṁ na passāmi yācake.
pv21:40.1	‘Sukhaṁ supati aṅkuro’,
pv21:40.2	iti jānāti maṁ jano;
pv21:40.3	Dukkhaṁ sindhaka supāmi,
pv21:40.4	appake su vanibbake”ti.
pv21:41.1	“Sakko ce te varaṁ dajjā,
pv21:41.2	tāvatiṁsānamissaro;
pv21:41.3	Kissa sabbassa lokassa,
pv21:41.4	varamāno varaṁ vare”ti.
pv21:42.1	“Sakko ce me varaṁ dajjā,
pv21:42.2	tāvatiṁsānamissaro;
pv21:42.3	Kāluṭṭhitassa me sato,
pv21:42.4	sūriyuggamanaṁ pati;
pv21:42.5	Dibbā bhakkhā pātubhaveyyuṁ,
pv21:42.6	sīlavanto ca yācakā.
pv21:43.1	Dadato me na khīyetha,
pv21:43.2	datvā nānutapeyyahaṁ;
pv21:43.3	Dadaṁ cittaṁ pasādeyyaṁ,
pv21:43.4	etaṁ sakkaṁ varaṁ vare”ti.
pv21:44.1	“Na sabbavittāni pare pavecche,
pv21:44.2	Dadeyya dānañca dhanañca rakkhe;
pv21:44.3	Tasmā hi dānā dhanameva seyyo,
pv21:44.4	Atippadānena kulā na honti.
pv21:45.1	Adānamatidānañca,
pv21:45.2	Nappasaṁsanti paṇḍitā;
pv21:45.3	Tasmā hi dānā dhanameva seyyo,
pv21:45.4	Samena vatteyya sa dhīradhammo”ti.
pv21:46.1	“Aho vata re ahameva dajjaṁ,
pv21:46.2	Santo ca maṁ sappurisā bhajeyyuṁ;
pv21:46.3	Meghova ninnāni paripūrayanto,
pv21:46.4	Santappaye sabbavanibbakānaṁ.
pv21:47.1	Yassa yācanake disvā,
pv21:47.2	mukhavaṇṇo pasīdati;
pv21:47.3	Datvā attamano hoti,
pv21:47.4	taṁ gharaṁ vasato sukhaṁ.
pv21:48.1	Yassa yācanake disvā,
pv21:48.2	mukhavaṇṇo pasīdati;
pv21:48.3	Datvā attamano hoti,
pv21:48.4	esā yaññassa sampadā.
pv21:49.1	Pubbeva dānā sumano,
pv21:49.2	dadaṁ cittaṁ pasādaye;
pv21:49.3	Datvā attamano hoti,
pv21:49.4	esā yaññassa sampadā”ti.
pv21:50.1	Saṭṭhi vāhasahassāni,
pv21:50.2	aṅkurassa nivesane;
pv21:50.3	Bhojanaṁ dīyate niccaṁ,
pv21:50.4	puññapekkhassa jantuno.
pv21:51.1	Tisahassāni sūdāni hi,
pv21:51.2	āmuttamaṇikuṇḍalā;
pv21:51.3	Aṅkuraṁ upajīvanti,
pv21:51.4	dāne yaññassa vāvaṭā.
pv21:52.1	Saṭṭhi purisasahassāni,
pv21:52.2	āmuttamaṇikuṇḍalā;
pv21:52.3	Aṅkurassa mahādāne,
pv21:52.4	kaṭṭhaṁ phālenti māṇavā.
pv21:53.1	Soḷasitthisahassāni,
pv21:53.2	sabbālaṅkārabhūsitā;
pv21:53.3	Aṅkurassa mahādāne,
pv21:53.4	vidhā piṇḍenti nāriyo.
pv21:54.1	Soḷasitthisahassāni,
pv21:54.2	sabbālaṅkārabhūsitā;
pv21:54.3	Aṅkurassa mahādāne,
pv21:54.4	dabbigāhā upaṭṭhitā.
pv21:55.1	Bahuṁ bahūnaṁ pādāsi,
pv21:55.2	ciraṁ pādāsi khattiyo;
pv21:55.3	Sakkaccañca sahatthā ca,
pv21:55.4	cittīkatvā punappunaṁ.
pv21:56.1	Bahū māse ca pakkhe ca,
pv21:56.2	utusaṁvaccharāni ca;
pv21:56.3	Mahādānaṁ pavattesi,
pv21:56.4	aṅkuro dīghamantaraṁ.
pv21:57.1	Evaṁ datvā yajitvā ca,
pv21:57.2	aṅkuro dīghamantaraṁ;
pv21:57.3	So hitvā mānusaṁ dehaṁ,
pv21:57.4	tāvatiṁsūpago ahu.
pv21:58.1	Kaṭacchubhikkhaṁ datvāna,
pv21:58.2	anuruddhassa indako;
pv21:58.3	So hitvā mānusaṁ dehaṁ,
pv21:58.4	tāvatiṁsūpago ahu.
pv21:59.1	Dasahi ṭhānehi aṅkuraṁ,
pv21:59.2	indako atirocati;
pv21:59.3	Rūpe sadde rase gandhe,
pv21:59.4	phoṭṭhabbe ca manorame.
pv21:60.1	Āyunā yasasā ceva,
pv21:60.2	vaṇṇena ca sukhena ca;
pv21:60.3	Ādhipaccena aṅkuraṁ,
pv21:60.4	indako atirocati.
pv21:61.1	(…)
pv21:62.1	Tāvatiṁse yadā buddho,
pv21:62.2	silāyaṁ paṇḍukambale;
pv21:62.3	Pāricchattakamūlamhi,
pv21:62.4	vihāsi purisuttamo.
pv21:63.1	Dasasu lokadhātūsu,
pv21:63.2	sannipatitvāna devatā;
pv21:63.3	Payirupāsanti sambuddhaṁ,
pv21:63.4	vasantaṁ nagamuddhani.
pv21:64.1	Na koci devo vaṇṇena,
pv21:64.2	sambuddhaṁ atirocati;
pv21:64.3	Sabbe deve atikkamma,
pv21:64.4	sambuddhova virocati.
pv21:65.1	Yojanāni dasa dve ca,
pv21:65.2	aṅkuroyaṁ tadā ahu;
pv21:65.3	Avidūreva buddhassa,
pv21:65.4	indako atirocati.
pv21:66.1	Oloketvāna sambuddho,
pv21:66.2	Aṅkurañcāpi indakaṁ;
pv21:66.3	Dakkhiṇeyyaṁ sambhāvento,
pv21:66.4	Idaṁ vacanamabravi.
pv21:67.1	“Mahādānaṁ tayā dinnaṁ,
pv21:67.2	aṅkura dīghamantaraṁ;
pv21:67.3	Atidūre nisinnosi,
pv21:67.4	āgaccha mama santike”ti.
pv21:68.1	Codito bhāvitattena,
pv21:68.2	aṅkuro idamabravi;
pv21:68.3	“Kiṁ mayhaṁ tena dānena,
pv21:68.4	dakkhiṇeyyena suññataṁ.
pv21:69.1	Ayaṁ so indako yakkho,
pv21:69.2	dajjā dānaṁ parittakaṁ;
pv21:69.3	Atirocati amhehi,
pv21:69.4	cando tāragaṇe yathā”ti.
pv21:70.1	“Ujjaṅgale yathā khette,
pv21:70.2	bījaṁ bahumpi ropitaṁ;
pv21:70.3	Na vipulaphalaṁ hoti,
pv21:70.4	napi toseti kassakaṁ.
pv21:71.1	Tatheva dānaṁ bahukaṁ,
pv21:71.2	dussīlesu patiṭṭhitaṁ;
pv21:71.3	Na vipulaphalaṁ hoti,
pv21:71.4	napi toseti dāyakaṁ.
pv21:72.1	Yathāpi bhaddake khette,
pv21:72.2	bījaṁ appampi ropitaṁ;
pv21:72.3	Sammā dhāraṁ pavecchante,
pv21:72.4	phalaṁ toseti kassakaṁ.
pv21:73.1	Tatheva sīlavantesu,
pv21:73.2	guṇavantesu tādisu;
pv21:73.3	Appakampi kataṁ kāraṁ,
pv21:73.4	puññaṁ hoti mahapphalan”ti.
pv21:74.1	Viceyya dānaṁ dātabbaṁ,
pv21:74.2	yattha dinnaṁ mahapphalaṁ;
pv21:74.3	Viceyya dānaṁ datvāna,
pv21:74.4	saggaṁ gacchanti dāyakā.
pv21:75.1	Viceyya dānaṁ sugatappasatthaṁ,
pv21:75.2	Ye dakkhiṇeyyā idha jīvaloke;
pv21:75.3	Etesu dinnāni mahapphalāni,
pv21:75.4	Bījāni vuttāni yathā sukhetteti.
pv21:76.1	Aṅkurapetavatthu navamaṁ.
pv22:0.1	Petavatthu
pv22:0.2	Ubbarivagga
pv22:0.3	10. Uttaramātupetivatthu
pv22:1.1	Divāvihāragataṁ bhikkhuṁ,
pv22:1.2	gaṅgātīre nisinnakaṁ;
pv22:1.3	Taṁ petī upasaṅkamma,
pv22:1.4	dubbaṇṇā bhīrudassanā.
pv22:2.1	Kesā cassā atidīghā,
pv22:2.2	yāvabhūmāvalambare;
pv22:2.3	Kesehi sā paṭicchannā,
pv22:2.4	samaṇaṁ etadabravi.
pv22:3.1	“Pañcapaṇṇāsavassāni,
pv22:3.2	yato kālaṅkatā ahaṁ;
pv22:3.3	Nābhijānāmi bhuttaṁ vā,
pv22:3.4	pītaṁ vā pana pāniyaṁ;
pv22:3.5	Dehi tvaṁ pāniyaṁ bhante,
pv22:3.6	tasitā pāniyāya me”ti.
pv22:4.1	“Ayaṁ sītodikā gaṅgā,
pv22:4.2	himavantato sandati;
pv22:4.3	Piva etto gahetvāna,
pv22:4.4	kiṁ maṁ yācasi pāniyan”ti.
pv22:5.1	“Sacāhaṁ bhante gaṅgāya,
pv22:5.2	sayaṁ gaṇhāmi pāniyaṁ;
pv22:5.3	Lohitaṁ me parivattati,
pv22:5.4	tasmā yācāmi pāniyan”ti.
pv22:6.1	“Kiṁ nu kāyena vācāya,
pv22:6.2	manasā dukkaṭaṁ kataṁ;
pv22:6.3	Kissa kammavipākena,
pv22:6.4	gaṅgā te hoti lohitan”ti.
pv22:7.1	“Putto me uttaro nāma,
pv22:7.2	saddho āsi upāsako;
pv22:7.3	So ca mayhaṁ akāmāya,
pv22:7.4	samaṇānaṁ pavecchati.
pv22:8.1	Cīvaraṁ piṇḍapātañca,
pv22:8.2	paccayaṁ sayanāsanaṁ;
pv22:8.3	Tamahaṁ paribhāsāmi,
pv22:8.4	maccherena upaddutā.
pv22:9.1	Yaṁ tvaṁ mayhaṁ akāmāya,
pv22:9.2	samaṇānaṁ pavecchasi;
pv22:9.3	Cīvaraṁ piṇḍapātañca,
pv22:9.4	paccayaṁ sayanāsanaṁ.
pv22:10.1	Etaṁ te paralokasmiṁ,
pv22:10.2	lohitaṁ hotu uttara;
pv22:10.3	Tassa kammassa vipākena,
pv22:10.4	gaṅgā me hoti lohitan”ti.
pv22:11.1	Uttaramātupetivatthu dasamaṁ.
pv23:0.1	Petavatthu
pv23:0.2	Ubbarivagga
pv23:0.3	11. Suttapetavatthu
pv23:1.1	“Ahaṁ pure pabbajitassa bhikkhuno,
pv23:1.2	Suttaṁ adāsiṁ upasaṅkamma yācitā;
pv23:1.3	Tassa vipāko vipulaphalūpalabbhati,
pv23:1.4	Bahukā ca me uppajjare vatthakoṭiyo.
pv23:2.1	Pupphābhikiṇṇaṁ ramitaṁ vimānaṁ,
pv23:2.2	Anekacittaṁ naranārisevitaṁ;
pv23:2.3	Sāhaṁ bhuñjāmi ca pārupāmi ca,
pv23:2.4	Pahūtavittā na ca tāva khīyati.
pv23:3.1	Tasseva kammassa vipākamanvayā,
pv23:3.2	Sukhañca sātañca idhūpalabbhati;
pv23:3.3	Sāhaṁ gantvā punadeva mānusaṁ,
pv23:3.4	Kāhāmi puññāni nayayyaputta man”ti.
pv23:4.1	“Satta tuvaṁ vassasatā idhāgatā,
pv23:4.2	Jiṇṇā ca vuḍḍhā ca tahiṁ bhavissasi;
pv23:4.3	Sabbeva te kālakatā ca ñātakā,
pv23:4.4	Kiṁ tattha gantvāna ito karissasī”ti.
pv23:5.1	“Satteva vassāni idhāgatāya me,
pv23:5.2	Dibbañca sukhañca samappitāya;
pv23:5.3	Sāhaṁ gantvāna punadeva mānusaṁ,
pv23:5.4	Kāhāmi puññāni nayayyaputta man”ti.
pv23:6.1	So taṁ gahetvāna pasayha bāhāyaṁ,
pv23:6.2	Paccānayitvāna theriṁ sudubbalaṁ;
pv23:6.3	“Vajjesi aññampi janaṁ idhāgataṁ,
pv23:6.4	‘Karotha puññāni sukhūpalabbhati’.
pv23:7.1	Diṭṭhā mayā akatena sādhunā,
pv23:7.2	Petā vihaññanti tatheva manussā;
pv23:7.3	Kammañca katvā sukhavedanīyaṁ,
pv23:7.4	Devā manussā ca sukhe ṭhitā pajā”ti.
pv23:8.1	Suttapetavatthu ekādasamaṁ.
pv24:0.1	Petavatthu
pv24:0.2	Ubbarivagga
pv24:0.3	12. Kaṇṇamuṇḍapetivatthu
pv24:1.1	“Soṇṇasopānaphalakā,
pv24:1.2	soṇṇavālukasanthatā;
pv24:1.3	Tattha sogandhiyā vaggū,
pv24:1.4	sucigandhā manoramā.
pv24:2.1	Nānārukkhehi sañchannā,
pv24:2.2	nānāgandhasameritā;
pv24:2.3	Nānāpadumasañchannā,
pv24:2.4	puṇḍarīkasamotatā.
pv24:3.1	Surabhiṁ sampavāyanti,
pv24:3.2	manuññā māluteritā;
pv24:3.3	Haṁsakoñcābhirudā ca,
pv24:3.4	cakkavakkābhikūjitā.
pv24:4.1	Nānādijagaṇākiṇṇā,
pv24:4.2	nānāsaragaṇāyutā;
pv24:4.3	Nānāphaladharā rukkhā,
pv24:4.4	nānāpupphadharā vanā.
pv24:5.1	Na manussesu īdisaṁ,
pv24:5.2	nagaraṁ yādisaṁ idaṁ;
pv24:5.3	Pāsādā bahukā tuyhaṁ,
pv24:5.4	sovaṇṇarūpiyāmayā;
pv24:5.5	Daddallamānā ābhenti,
pv24:5.6	samantā caturo disā.
pv24:6.1	Pañca dāsisatā tuyhaṁ,
pv24:6.2	yā temā paricārikā;
pv24:6.3	Tā kambukāyūradharā,
pv24:6.4	kañcanāveḷabhūsitā.
pv24:7.1	Pallaṅkā bahukā tuyhaṁ,
pv24:7.2	sovaṇṇarūpiyāmayā;
pv24:7.3	Kadalimigasañchannā,
pv24:7.4	sajjā gonakasanthatā.
pv24:8.1	Yattha tvaṁ vāsūpagatā,
pv24:8.2	sabbakāmasamiddhinī;
pv24:8.3	Sampattāyaḍḍharattāya,
pv24:8.4	tato uṭṭhāya gacchasi.
pv24:9.1	Uyyānabhūmiṁ gantvāna,
pv24:9.2	pokkharaññā samantato;
pv24:9.3	Tassā tīre tuvaṁ ṭhāsi,
pv24:9.4	harite saddale subhe.
pv24:10.1	Tato te kaṇṇamuṇḍo sunakho,
pv24:10.2	Aṅgamaṅgāni khādati;
pv24:10.3	Yadā ca khāyitā āsi,
pv24:10.4	Aṭṭhisaṅkhalikā katā;
pv24:10.5	Ogāhasi pokkharaṇiṁ,
pv24:10.6	Hoti kāyo yathā pure.
pv24:11.1	Tato tvaṁ aṅgapaccaṅgī,
pv24:11.2	sucāru piyadassanā;
pv24:11.3	Vatthena pārupitvāna,
pv24:11.4	āyāsi mama santikaṁ.
pv24:12.1	Kiṁ nu kāyena vācāya,
pv24:12.2	manasā dukkaṭaṁ kataṁ;
pv24:12.3	Kissa kammavipākena,
pv24:12.4	kaṇṇamuṇḍo sunakho tava;
pv24:12.5	Aṅgamaṅgāni khādatī”ti.
pv24:13.1	“Kimilāyaṁ gahapati,
pv24:13.2	saddho āsi upāsako;
pv24:13.3	Tassāhaṁ bhariyā āsiṁ,
pv24:13.4	dussīlā aticārinī.
pv24:14.1	So maṁ aticaramānāya,
pv24:14.2	sāmiko etadabravi;
pv24:14.3	‘Netaṁ channaṁ patirūpaṁ,
pv24:14.4	yaṁ tvaṁ aticarāsi maṁ’.
pv24:15.1	Sāhaṁ ghorañca sapathaṁ,
pv24:15.2	musāvādañca bhāsisaṁ;
pv24:15.3	‘Nāhaṁ taṁ aticarāmi,
pv24:15.4	kāyena uda cetasā.
pv24:16.1	Sacāhaṁ taṁ aticarāmi,
pv24:16.2	kāyena uda cetasā;
pv24:16.3	Kaṇṇamuṇḍoyaṁ sunakho,
pv24:16.4	aṅgamaṅgāni khādatu’.
pv24:17.1	Tassa kammassa vipākaṁ,
pv24:17.2	musāvādassa cūbhayaṁ;
pv24:17.3	Satteva vassasatāni,
pv24:17.4	anubhūtaṁ yato hi me;
pv24:17.5	Kaṇṇamuṇḍo ca sunakho,
pv24:17.6	aṅgamaṅgāni khādati.
pv24:18.1	Tvañca deva bahukāro,
pv24:18.2	atthāya me idhāgato;
pv24:18.3	Sumuttāhaṁ kaṇṇamuṇḍassa,
pv24:18.4	asokā akutobhayā.
pv24:19.1	Tāhaṁ deva namassāmi,
pv24:19.2	yācāmi pañjalīkatā;
pv24:19.3	Bhuñja amānuse kāme,
pv24:19.4	rama deva mayā sahā”ti.
pv24:20.1	“Bhuttā amānusā kāmā,
pv24:20.2	ramitomhi tayā saha;
pv24:20.3	Tāhaṁ subhage yācāmi,
pv24:20.4	khippaṁ paṭinayāhi man”ti.
pv24:21.1	Kaṇṇamuṇḍapetivatthu dvādasamaṁ.
pv25:0.1	Petavatthu
pv25:0.2	Ubbarivagga
pv25:0.3	13. Ubbaripetavatthu
pv25:1.1	Ahu rājā brahmadatto,
pv25:1.2	pañcālānaṁ rathesabho;
pv25:1.3	Ahorattānamaccayā,
pv25:1.4	rājā kālamakrubbatha.
pv25:2.1	Tassa āḷāhanaṁ gantvā,
pv25:2.2	bhariyā kandati ubbarī;
pv25:2.3	Brahmadattaṁ apassantī,
pv25:2.4	brahmadattāti kandati.
pv25:3.1	Isi ca tattha āgacchi,
pv25:3.2	sampannacaraṇo muni;
pv25:3.3	So ca tattha apucchittha,
pv25:3.4	ye tattha susamāgatā.
pv25:4.1	“Kassa idaṁ āḷāhanaṁ,
pv25:4.2	nānāgandhasameritaṁ;
pv25:4.3	Kassāyaṁ kandati bhariyā,
pv25:4.4	ito dūragataṁ patiṁ;
pv25:4.5	Brahmadattaṁ apassantī,
pv25:4.6	‘brahmadattā’ti kandati”.
pv25:5.1	Te ca tattha viyākaṁsu,
pv25:5.2	ye tattha susamāgatā;
pv25:5.3	“Brahmadattassa bhadante,
pv25:5.4	brahmadattassa mārisa.
pv25:6.1	Tassa idaṁ āḷāhanaṁ,
pv25:6.2	nānāgandhasameritaṁ;
pv25:6.3	Tassāyaṁ kandati bhariyā,
pv25:6.4	ito dūragataṁ patiṁ;
pv25:6.5	Brahmadattaṁ apassantī,
pv25:6.6	‘brahmadattā’ti kandati”.
pv25:7.1	“Chaḷāsītisahassāni,
pv25:7.2	brahmadattassanāmakā;
pv25:7.3	Imasmiṁ āḷāhane daḍḍhā,
pv25:7.4	tesaṁ kamanusocasī”ti.
pv25:8.1	“Yo rājā cūḷanīputto,
pv25:8.2	pañcālānaṁ rathesabho;
pv25:8.3	Taṁ bhante anusocāmi,
pv25:8.4	bhattāraṁ sabbakāmadan”ti.
pv25:9.1	“Sabbe vāhesuṁ rājāno,
pv25:9.2	brahmadattassanāmakā;
pv25:9.3	Sabbeva cūḷanīputtā,
pv25:9.4	pañcālānaṁ rathesabhā.
pv25:10.1	Sabbesaṁ anupubbena,
pv25:10.2	mahesittamakārayi;
pv25:10.3	Kasmā purimake hitvā,
pv25:10.4	pacchimaṁ anusocasī”ti.
pv25:11.1	“Ātume itthibhūtāya,
pv25:11.2	dīgharattāya mārisa;
pv25:11.3	Yassā me itthibhūtāya,
pv25:11.4	saṁsāre bahubhāsasī”ti.
pv25:12.1	“Ahu itthī ahu puriso,
pv25:12.2	pasuyonimpi āgamā;
pv25:12.3	Evametaṁ atītānaṁ,
pv25:12.4	pariyanto na dissatī”ti.
pv25:13.1	“Ādittaṁ vata maṁ santaṁ,
pv25:13.2	ghatasittaṁva pāvakaṁ;
pv25:13.3	Vārinā viya osiñcaṁ,
pv25:13.4	sabbaṁ nibbāpaye daraṁ.
pv25:14.1	Abbahī vata me sallaṁ,
pv25:14.2	sokaṁ hadayanissitaṁ;
pv25:14.3	Yo me sokaparetāya,
pv25:14.4	patisokaṁ apānudi.
pv25:15.1	Sāhaṁ abbūḷhasallāsmi,
pv25:15.2	sītibhūtāsmi nibbutā;
pv25:15.3	Na socāmi na rodāmi,
pv25:15.4	tava sutvā mahāmunī”ti.
pv25:16.1	Tassa taṁ vacanaṁ sutvā,
pv25:16.2	samaṇassa subhāsitaṁ;
pv25:16.3	Pattacīvaramādāya,
pv25:16.4	pabbaji anagāriyaṁ.
pv25:17.1	Sā ca pabbajitā santā,
pv25:17.2	agārasmā anagāriyaṁ;
pv25:17.3	Mettacittaṁ abhāvesi,
pv25:17.4	brahmalokūpapattiyā.
pv25:18.1	Gāmā gāmaṁ vicarantī,
pv25:18.2	nigame rājadhāniyo;
pv25:18.3	Uruvelā nāma so gāmo,
pv25:18.4	yattha kālamakrubbatha.
pv25:19.1	Mettacittaṁ ābhāvetvā,
pv25:19.2	brahmalokūpapattiyā;
pv25:19.3	Itthicittaṁ virājetvā,
pv25:19.4	brahmalokūpagā ahūti.
pv25:20.1	Ubbaripetavatthu terasamaṁ.
pv25:21.1	Ubbarivaggo dutiyo.
pv25:22.1	Tassuddānaṁ
pv25:23.1	Mocakaṁ mātā mattā ca,
pv25:23.2	Nandā kuṇḍalīnā ghaṭo;
pv25:23.3	Dve seṭṭhī tunnavāyo ca,
pv25:23.4	Uttara suttakaṇṇa ubbarīti.
pv26:0.1	Petavatthu
pv26:0.2	Cūḷavagga
pv26:0.3	1. Abhijjamānapetavatthu
pv26:1.1	“Abhijjamāne vārimhi,
pv26:1.2	gaṅgāya idha gacchasi;
pv26:1.3	Naggo pubbaddhapetova,
pv26:1.4	māladhārī alaṅkato;
pv26:1.5	Kuhiṁ gamissasi peta,
pv26:1.6	kattha vāso bhavissatī”ti.
pv26:2.1	“Cundaṭṭhilaṁ gamissāmi,
pv26:2.2	peto so iti bhāsati;
pv26:2.3	Antare vāsabhagāmaṁ,
pv26:2.4	bārāṇasiṁ ca santike”.
pv26:3.1	Tañca disvā mahāmatto,
pv26:3.2	koliyo iti vissuto;
pv26:3.3	Sattuṁ bhattañca petassa,
pv26:3.4	pītakañca yugaṁ adā.
pv26:4.1	Nāvāya tiṭṭhamānāya,
pv26:4.2	kappakassa adāpayi;
pv26:4.3	Kappakassa padinnamhi,
pv26:4.4	ṭhāne petassa dissatha.
pv26:5.1	Tato suvatthavasano,
pv26:5.2	māladhārī alaṅkato;
pv26:5.3	Ṭhāne ṭhitassa petassa,
pv26:5.4	dakkhiṇā upakappatha;
pv26:5.5	Tasmā dajjetha petānaṁ,
pv26:5.6	anukampāya punappunaṁ.
pv26:6.1	Sātunnavasanā eke,
pv26:6.2	aññe kesanivāsanā;
pv26:6.3	Petā bhattāya gacchanti,
pv26:6.4	pakkamanti disodisaṁ.
pv26:7.1	Dūre eke padhāvitvā,
pv26:7.2	aladdhāva nivattare;
pv26:7.3	Chātā pamucchitā bhantā,
pv26:7.4	bhūmiyaṁ paṭisumbhitā.
pv26:8.1	Te ca tattha papatitā,
pv26:8.2	bhūmiyaṁ paṭisumbhitā;
pv26:8.3	Pubbe akatakalyāṇā,
pv26:8.4	aggidaḍḍhāva ātape.
pv26:9.1	“Mayaṁ pubbe pāpadhammā,
pv26:9.2	gharaṇī kulamātaro;
pv26:9.3	Santesu deyyadhammesu,
pv26:9.4	dīpaṁ nākamha attano.
pv26:10.1	Pahūtaṁ annapānampi,
pv26:10.2	apissu avakirīyati;
pv26:10.3	Sammaggate pabbajite,
pv26:10.4	na ca kiñci adamhase.
pv26:11.1	Akammakāmā alasā,
pv26:11.2	Sādukāmā mahagghasā;
pv26:11.3	Ālopapiṇḍadātāro,
pv26:11.4	Paṭiggahe paribhāsimhase.
pv26:12.1	Te gharā tā ca dāsiyo,
pv26:12.2	tānevābharaṇāni no;
pv26:12.3	Te aññe paricārenti,
pv26:12.4	mayaṁ dukkhassa bhāgino.
pv26:13.1	Veṇī vā avaññā honti,
pv26:13.2	rathakārī ca dubbhikā;
pv26:13.3	Caṇḍālī kapaṇā honti,
pv26:13.4	kappakā ca punappunaṁ.
pv26:14.1	Yāni yāni nihīnāni,
pv26:14.2	kulāni kapaṇāni ca;
pv26:14.3	Tesu tesveva jāyanti,
pv26:14.4	esā maccharino gati.
pv26:15.1	Pubbe ca katakalyāṇā,
pv26:15.2	dāyakā vītamaccharā;
pv26:15.3	Saggaṁ te paripūrenti,
pv26:15.4	obhāsenti ca nandanaṁ.
pv26:16.1	Vejayante ca pāsāde,
pv26:16.2	ramitvā kāmakāmino;
pv26:16.3	Uccākulesu jāyanti,
pv26:16.4	sabhogesu tato cutā.
pv26:17.1	Kūṭāgāre ca pāsāde,
pv26:17.2	pallaṅke gonakatthate;
pv26:17.3	Bījitaṅgā morahatthehi,
pv26:17.4	kule jātā yasassino.
pv26:18.1	Aṅkato aṅkaṁ gacchanti,
pv26:18.2	māladhārī alaṅkatā;
pv26:18.3	Dhātiyo upatiṭṭhanti,
pv26:18.4	sāyaṁ pātaṁ sukhesino.
pv26:19.1	Nayidaṁ akatapuññānaṁ,
pv26:19.2	katapuññānamevidaṁ;
pv26:19.3	Asokaṁ nandanaṁ rammaṁ,
pv26:19.4	tidasānaṁ mahāvanaṁ.
pv26:20.1	Sukhaṁ akatapuññānaṁ,
pv26:20.2	idha natthi parattha ca;
pv26:20.3	Sukhañca katapuññānaṁ,
pv26:20.4	idha ceva parattha ca.
pv26:21.1	Tesaṁ sahabyakāmānaṁ,
pv26:21.2	kattabbaṁ kusalaṁ bahuṁ;
pv26:21.3	Katapuññā hi modanti,
pv26:21.4	sagge bhogasamaṅgino”ti.
pv26:22.1	Abhijjamānapetavatthu paṭhamaṁ.
pv27:0.1	Petavatthu
pv27:0.2	Cūḷavagga
pv27:0.3	2. Sāṇavāsītherapetavatthu
pv27:1.1	Kuṇḍināgariyo thero,
pv27:1.2	sāṇavāsinivāsiko;
pv27:1.3	Poṭṭhapādoti nāmena,
pv27:1.4	samaṇo bhāvitindriyo.
pv27:2.1	Tassa mātā pitā bhātā,
pv27:2.2	duggatā yamalokikā;
pv27:2.3	Pāpakammaṁ karitvāna,
pv27:2.4	petalokaṁ ito gatā.
pv27:3.1	Te duggatā sūcikaṭṭā,
pv27:3.2	kilantā naggino kisā;
pv27:3.3	Uttasantā mahattāsā,
pv27:3.4	na dassenti kurūrino.
pv27:4.1	Tassa bhātā vitaritvā,
pv27:4.2	naggo ekapathekako;
pv27:4.3	Catukuṇḍiko bhavitvāna,
pv27:4.4	therassa dassayītumaṁ.
pv27:5.1	Thero cāmanasikatvā,
pv27:5.2	tuṇhībhūto atikkami;
pv27:5.3	So ca viññāpayī theraṁ,
pv27:5.4	“bhātā petagato ahaṁ.
pv27:6.1	Mātā pitā ca te bhante,
pv27:6.2	duggatā yamalokikā;
pv27:6.3	Pāpakammaṁ karitvāna,
pv27:6.4	petalokaṁ ito gatā.
pv27:7.1	Te duggatā sūcikaṭṭā,
pv27:7.2	kilantā naggino kisā;
pv27:7.3	Uttasantā mahattāsā,
pv27:7.4	na dassenti kurūrino.
pv27:8.1	Anukampassu kāruṇiko,
pv27:8.2	datvā anvādisāhi no;
pv27:8.3	Tava dinnena dānena,
pv27:8.4	yāpessanti kurūrino”ti.
pv27:9.1	Thero caritvā piṇḍāya,
pv27:9.2	bhikkhū aññe ca dvādasa;
pv27:9.3	Ekajjhaṁ sannipatiṁsu,
pv27:9.4	bhattavissaggakāraṇā.
pv27:10.1	Thero sabbeva te āha,
pv27:10.2	“yathāladdhaṁ dadātha me;
pv27:10.3	Saṅghabhattaṁ karissāmi,
pv27:10.4	anukampāya ñātinaṁ”.
pv27:11.1	Niyyādayiṁsu therassa,
pv27:11.2	thero saṅghaṁ nimantayi;
pv27:11.3	Datvā anvādisi thero,
pv27:11.4	mātu pitu ca bhātuno;
pv27:11.5	“Idaṁ me ñātīnaṁ hotu,
pv27:11.6	sukhitā hontu ñātayo”.
pv27:12.1	Samanantarānuddiṭṭhe,
pv27:12.2	bhojanaṁ udapajjatha;
pv27:12.3	Suciṁ paṇītaṁ sampannaṁ,
pv27:12.4	anekarasabyañjanaṁ.
pv27:13.1	Tato uddassayī bhātā,
pv27:13.2	vaṇṇavā balavā sukhī;
pv27:13.3	“Pahūtaṁ bhojanaṁ bhante,
pv27:13.4	passa naggāmhase mayaṁ;
pv27:13.5	Tathā bhante parakkama,
pv27:13.6	yathā vatthaṁ labhāmase”ti.
pv27:14.1	Thero saṅkārakūṭamhā,
pv27:14.2	uccinitvāna nantake;
pv27:14.3	Pilotikaṁ paṭaṁ katvā,
pv27:14.4	saṅghe cātuddise adā.
pv27:15.1	Datvā anvādisī thero,
pv27:15.2	mātu pitu ca bhātuno;
pv27:15.3	“Idaṁ me ñātīnaṁ hotu,
pv27:15.4	sukhitā hontu ñātayo”.
pv27:16.1	Samanantarānuddiṭṭhe,
pv27:16.2	vatthāni udapajjisuṁ;
pv27:16.3	Tato suvatthavasano,
pv27:16.4	therassa dassayītumaṁ.
pv27:17.1	“Yāvatā nandarājassa,
pv27:17.2	vijitasmiṁ paṭicchadā;
pv27:17.3	Tato bahutarā bhante,
pv27:17.4	vatthānacchādanāni no.
pv27:18.1	Koseyyakambalīyāni,
pv27:18.2	khoma kappāsikāni ca;
pv27:18.3	Vipulā ca mahagghā ca,
pv27:18.4	tepākāsevalambare.
pv27:19.1	Te mayaṁ paridahāma,
pv27:19.2	yaṁ yaṁ hi manaso piyaṁ;
pv27:19.3	Tathā bhante parakkama,
pv27:19.4	yathā gehaṁ labhāmase”ti.
pv27:20.1	Thero paṇṇakuṭiṁ katvā,
pv27:20.2	saṅghe cātuddise adā;
pv27:20.3	Datvā anvādisī thero,
pv27:20.4	mātu pitu ca bhātuno;
pv27:20.5	“Idaṁ me ñātīnaṁ hotu,
pv27:20.6	sukhitā hontu ñātayo”.
pv27:21.1	Samanantarānuddiṭṭhe,
pv27:21.2	gharāni udapajjisuṁ;
pv27:21.3	Kūṭāgāranivesanā,
pv27:21.4	vibhattā bhāgaso mitā.
pv27:22.1	“Na manussesu īdisā,
pv27:22.2	yādisā no gharā idha;
pv27:22.3	Api dibbesu yādisā,
pv27:22.4	tādisā no gharā idha.
pv27:23.1	Daddallamānā ābhenti,
pv27:23.2	Samantā caturo disā;
pv27:23.3	Tathā bhante parakkama,
pv27:23.4	Yathā pānīyaṁ labhāmase”ti.
pv27:24.1	Thero karaṇaṁ pūretvā,
pv27:24.2	saṅghe cātuddise adā;
pv27:24.3	Datvā anvādisī thero,
pv27:24.4	mātu pitu ca bhātuno;
pv27:24.5	“Idaṁ me ñātīnaṁ hotu,
pv27:24.6	sukhitā hontu ñātayo”.
pv27:25.1	Samanantarānuddiṭṭhe,
pv27:25.2	pānīyaṁ udapajjatha;
pv27:25.3	Gambhīrā caturassā ca,
pv27:25.4	pokkharañño sunimmitā.
pv27:26.1	Sītodikā suppatitthā,
pv27:26.2	sītā appaṭigandhiyā;
pv27:26.3	Padumuppalasañchannā,
pv27:26.4	vārikiñjakkhapūritā.
pv27:27.1	Tattha nhatvā pivitvā ca,
pv27:27.2	therassa paṭidassayuṁ;
pv27:27.3	“Pahūtaṁ pānīyaṁ bhante,
pv27:27.4	pādā dukkhā phalanti no”.
pv27:28.1	“Āhiṇḍamānā khañjāma,
pv27:28.2	sakkhare kusakaṇṭake;
pv27:28.3	‘Tathā bhante parakkama,
pv27:28.4	yathā yānaṁ labhāmase’”ti.
pv27:29.1	Thero sipāṭikaṁ laddhā,
pv27:29.2	saṅghe cātuddise adā;
pv27:29.3	Datvā anvādisī thero,
pv27:29.4	mātu pitu ca bhātuno;
pv27:29.5	“Idaṁ me ñātīnaṁ hotu,
pv27:29.6	sukhitā hontu ñātayo”.
pv27:30.1	Samanantarānuddiṭṭhe,
pv27:30.2	petā rathena māgamuṁ;
pv27:30.3	“Anukampitamha bhadante,
pv27:30.4	bhattenacchādanena ca.
pv27:31.1	Gharena pānīyadānena,
pv27:31.2	yānadānena cūbhayaṁ;
pv27:31.3	Muniṁ kāruṇikaṁ loke,
pv27:31.4	bhante vanditumāgatā”ti.
pv27:32.1	Sāṇavāsītherapetavatthu dutiyaṁ.
pv28:0.1	Petavatthu
pv28:0.2	Cūḷavagga
pv28:0.3	3. Rathakārapetivatthu
pv28:1.1	“Veḷuriyathambhaṁ ruciraṁ pabhassaraṁ,
pv28:1.2	Vimānamāruyha anekacittaṁ;
pv28:1.3	Tatthacchasi devi mahānubhāve,
pv28:1.4	Pathaddhani pannaraseva cando.
pv28:2.1	Vaṇṇo ca te kanakassa sannibho,
pv28:2.2	Uttattarūpo bhusa dassaneyyo;
pv28:2.3	Pallaṅkaseṭṭhe atule nisinnā,
pv28:2.4	Ekā tuvaṁ natthi ca tuyha sāmiko.
pv28:3.1	Imā ca te pokkharaṇī samantā,
pv28:3.2	Pahūtamalyā bahupuṇḍarīkā;
pv28:3.3	Suvaṇṇacuṇṇehi samantamotthatā,
pv28:3.4	Na tattha paṅko paṇako ca vijjati.
pv28:4.1	Haṁsā cime dassanīyā manoramā,
pv28:4.2	Udakasmimanupariyanti sabbadā;
pv28:4.3	Samayya vaggūpanadanti sabbe,
pv28:4.4	Bindussarā dundubhīnaṁva ghoso.
pv28:5.1	Daddallamānā yasasā yasassinī,
pv28:5.2	Nāvāya ca tvaṁ avalamba tiṭṭhasi;
pv28:5.3	Āḷārapamhe hasite piyaṁvade,
pv28:5.4	Sabbaṅgakalyāṇi bhusaṁ virocasi.
pv28:6.1	Idaṁ vimānaṁ virajaṁ same ṭhitaṁ,
pv28:6.2	Uyyānavantaṁ ratinandivaḍḍhanaṁ;
pv28:6.3	Icchāmahaṁ nāri anomadassane,
pv28:6.4	Tayā saha nandane idha moditun”ti.
pv28:7.1	“Karohi kammaṁ idha vedanīyaṁ,
pv28:7.2	Cittañca te idha nihitaṁ bhavatu;
pv28:7.3	Katvāna kammaṁ idha vedanīyaṁ,
pv28:7.4	Evaṁ mamaṁ lacchasi kāmakāminin”ti.
pv28:8.1	“Sādhū”ti so tassā paṭissuṇitvā,
pv28:8.2	Akāsi kammaṁ tahiṁ vedanīyaṁ;
pv28:8.3	Katvāna kammaṁ tahiṁ vedanīyaṁ,
pv28:8.4	Upapajji so māṇavo tassā sahabyatanti.
pv28:9.1	Rathakārapetivatthu tatiyaṁ.
pv28:9.2	Bhāṇavāraṁ dutiyaṁ.
pv29:0.1	Petavatthu
pv29:0.2	Cūḷavagga
pv29:0.3	4. Bhusapetavatthu
pv29:1.1	“Bhusāni eko sāliṁ punāparo,
pv29:1.2	Ayañca nārī sakamaṁsalohitaṁ;
pv29:1.3	Tuvañca gūthaṁ asuciṁ akantaṁ,
pv29:1.4	Paribhuñjasi kissa ayaṁ vipāko”ti.
pv29:2.1	“Ayaṁ pure mātaraṁ hiṁsati,
pv29:2.2	Ayaṁ pana kūṭavāṇijo;
pv29:2.3	Ayaṁ maṁsāni khāditvā,
pv29:2.4	Musāvādena vañceti.
pv29:3.1	Ahaṁ manussesu manussabhūtā,
pv29:3.2	Agārinī sabbakulassa issarā;
pv29:3.3	Santesu pariguhāmi,
pv29:3.4	Mā ca kiñci ito adaṁ.
pv29:4.1	Musāvādena chādemi,
pv29:4.2	‘natthi etaṁ mama gehe;
pv29:4.3	Sace santaṁ niguhāmi,
pv29:4.4	gūtho me hotu bhojanaṁ’.
pv29:5.1	Tassa kammassa vipākena,
pv29:5.2	musāvādassa cūbhayaṁ;
pv29:5.3	Sugandhaṁ sālino bhattaṁ,
pv29:5.4	gūthaṁ me parivattati.
pv29:6.1	Avañjhāni ca kammāni,
pv29:6.2	Na hi kammaṁ vinassati;
pv29:6.3	Duggandhaṁ kiminaṁ mīḷaṁ,
pv29:6.4	Bhuñjāmi ca pivāmi cā”ti.
pv29:7.1	Bhusapetavatthu catutthaṁ.
pv30:0.1	Petavatthu
pv30:0.2	Cūḷavagga
pv30:0.3	5. Kumārapetavatthu
pv30:1.1	Accherarūpaṁ sugatassa ñāṇaṁ,
pv30:1.2	Satthā yathā puggalaṁ byākāsi;
pv30:1.3	Ussannapuññāpi bhavanti heke,
pv30:1.4	Parittapuññāpi bhavanti heke.
pv30:2.1	Ayaṁ kumāro sīvathikāya chaḍḍito,
pv30:2.2	Aṅguṭṭhasnehena yāpeti rattiṁ;
pv30:2.3	Na yakkhabhūtā na sarīsapā vā,
pv30:2.4	Viheṭhayeyyuṁ katapuññaṁ kumāraṁ.
pv30:3.1	Sunakhāpimassa palihiṁsu pāde,
pv30:3.2	Dhaṅkā siṅgālā parivattayanti;
pv30:3.3	Gabbhāsayaṁ pakkhigaṇā haranti,
pv30:3.4	Kākā pana akkhimalaṁ haranti.
pv30:4.1	Nayimassa rakkhaṁ vidahiṁsu keci,
pv30:4.2	Na osadhaṁ sāsapadhūpanaṁ vā;
pv30:4.3	Nakkhattayogampi na aggahesuṁ,
pv30:4.4	Na sabbadhaññānipi ākiriṁsu.
pv30:5.1	Etādisaṁ uttamakicchapattaṁ,
pv30:5.2	Rattābhataṁ sīvathikāya chaḍḍitaṁ;
pv30:5.3	Nonītapiṇḍaṁva pavedhamānaṁ,
pv30:5.4	Sasaṁsayaṁ jīvitasāvasesaṁ.
pv30:6.1	Tamaddasā devamanussapūjito,
pv30:6.2	Disvā ca taṁ byākari bhūripañño;
pv30:6.3	“Ayaṁ kumāro nagarassimassa,
pv30:6.4	Aggakuliko bhavissati bhogato ca”.
pv30:7.1	“Kissa vataṁ kiṁ pana brahmacariyaṁ,
pv30:7.2	Kissa suciṇṇassa ayaṁ vipāko;
pv30:7.3	Etādisaṁ byasanaṁ pāpuṇitvā,
pv30:7.4	Taṁ tādisaṁ paccanubhossatiddhin”ti.
pv30:8.1	Buddhapamukhassa bhikkhusaṅghassa,
pv30:8.2	Pūjaṁ akāsi janatā uḷāraṁ;
pv30:8.3	Tatrassa cittassahu aññathattaṁ,
pv30:8.4	Vācaṁ abhāsi pharusaṁ asabbhaṁ.
pv30:9.1	So taṁ vitakkaṁ pavinodayitvā,
pv30:9.2	Pītiṁ pasādaṁ paṭiladdhā pacchā;
pv30:9.3	Tathāgataṁ jetavane vasantaṁ,
pv30:9.4	Yāguyā upaṭṭhāsi sattarattaṁ.
pv30:10.1	Tassa vataṁ taṁ pana brahmacariyaṁ,
pv30:10.2	Tassa suciṇṇassa ayaṁ vipāko;
pv30:10.3	Etādisaṁ byasanaṁ pāpuṇitvā,
pv30:10.4	Taṁ tādisaṁ paccanubhossatiddhiṁ.
pv30:11.1	Ṭhatvāna so vassasataṁ idheva,
pv30:11.2	Sabbehi kāmehi samaṅgibhūto;
pv30:11.3	Kāyassa bhedā abhisamparāyaṁ,
pv30:11.4	Sahabyataṁ gacchati vāsavassāti.
pv30:12.1	Kumārapetavatthu pañcamaṁ.
pv31:0.1	Petavatthu
pv31:0.2	Cūḷavagga
pv31:0.3	6. Seriṇīpetivatthu
pv31:1.1	“Naggā dubbaṇṇarūpāsi,
pv31:1.2	kisā dhamanisanthatā;
pv31:1.3	Upphāsulike kisike,
pv31:1.4	kā nu tvaṁ idha tiṭṭhasī”ti.
pv31:2.1	“Ahaṁ bhadante petīmhi,
pv31:2.2	duggatā yamalokikā;
pv31:2.3	Pāpakammaṁ karitvāna,
pv31:2.4	petalokaṁ ito gatā”ti.
pv31:3.1	“Kiṁ nu kāyena vācāya,
pv31:3.2	manasā dukkaṭaṁ kataṁ;
pv31:3.3	Kissa kammavipākena,
pv31:3.4	petalokaṁ ito gatā”ti.
pv31:4.1	“Anāvaṭesu titthesu,
pv31:4.2	viciniṁ aḍḍhamāsakaṁ;
pv31:4.3	Santesu deyyadhammesu,
pv31:4.4	dīpaṁ nākāsimattano.
pv31:5.1	Nadiṁ upemi tasitā,
pv31:5.2	rittakā parivattati;
pv31:5.3	Chāyaṁ upemi uṇhesu,
pv31:5.4	ātapo parivattati.
pv31:6.1	Aggivaṇṇo ca me vāto,
pv31:6.2	ḍahanto upavāyati;
pv31:6.3	Etañca bhante arahāmi,
pv31:6.4	aññañca pāpakaṁ tato.
pv31:7.1	Gantvāna hatthiniṁ puraṁ,
pv31:7.2	vajjesi mayha mātaraṁ;
pv31:7.3	‘Dhītā ca te mayā diṭṭhā,
pv31:7.4	duggatā yamalokikā;
pv31:7.5	Pāpakammaṁ karitvāna,
pv31:7.6	petalokaṁ ito gatā’.
pv31:8.1	Atthi me ettha nikkhittaṁ,
pv31:8.2	anakkhātañca taṁ mayā;
pv31:8.3	Cattārisatasahassāni,
pv31:8.4	pallaṅkassa ca heṭṭhato.
pv31:9.1	Tato me dānaṁ dadatu,
pv31:9.2	tassā ca hotu jīvikā;
pv31:9.3	Dānaṁ datvā ca me mātā,
pv31:9.4	dakkhiṇaṁ anudicchatu;
pv31:9.5	Tadāhaṁ sukhitā hessaṁ,
pv31:9.6	sabbakāmasamiddhinī”ti.
pv31:10.1	“Sādhū”ti so paṭissutvā,
pv31:10.2	gantvāna hatthiniṁ puraṁ;
pv31:10.3	Avoca tassā mātaraṁ—
pv31:11.1	“Dhītā ca te mayā diṭṭhā,
pv31:11.2	duggatā yamalokikā;
pv31:11.3	Pāpakammaṁ karitvāna,
pv31:11.4	petalokaṁ ito gatā.
pv31:12.1	Sā maṁ tattha samādapesi, (…)
pv31:12.2	Vajjesi mayha mātaraṁ;
pv31:12.3	‘Dhītā ca te mayā diṭṭhā,
pv31:12.4	Duggatā yamalokikā;
pv31:12.5	Pāpakammaṁ karitvāna,
pv31:12.6	Petalokaṁ ito gatā.
pv31:13.1	Atthi ca me ettha nikkhittaṁ,
pv31:13.2	anakkhātañca taṁ mayā;
pv31:13.3	Cattārisatasahassāni,
pv31:13.4	pallaṅkassa ca heṭṭhato.
pv31:14.1	Tato me dānaṁ dadatu,
pv31:14.2	tassā ca hotu jīvikā;
pv31:14.3	Dānaṁ datvā ca me mātā,
pv31:14.4	dakkhiṇaṁ anudicchatu (…);
pv31:14.5	Tadāhaṁ sukhitā hessaṁ,
pv31:14.6	sabbakāmasamiddhinī’”ti.
pv31:15.1	Tato hi sā dānamadā,
pv31:15.2	tassā dakkhiṇamādisī;
pv31:15.3	Petī ca sukhitā āsi,
pv31:15.4	tassā cāsi sujīvikāti.
pv31:16.1	Seriṇīpetivatthu chaṭṭhaṁ.
pv32:0.1	Petavatthu
pv32:0.2	Cūḷavagga
pv32:0.3	7. Migaluddakapetavatthu
pv32:1.1	“Naranāripurakkhato yuvā,
pv32:1.2	Rajanīyehi kāmaguṇehi sobhasi;
pv32:1.3	Divasaṁ anubhosi kāraṇaṁ,
pv32:1.4	Kimakāsi purimāya jātiyā”ti.
pv32:2.1	“Ahaṁ rājagahe ramme,
pv32:2.2	ramaṇīye giribbaje;
pv32:2.3	Migaluddo pure āsiṁ,
pv32:2.4	lohitapāṇi dāruṇo.
pv32:3.1	Avirodhakaresu pāṇisu,
pv32:3.2	Puthusattesu paduṭṭhamānaso;
pv32:3.3	Vicariṁ atidāruṇo sadā,
pv32:3.4	Parahiṁsāya rato asaññato.
pv32:4.1	Tassa me sahāyo suhadayo,
pv32:4.2	Saddho āsi upāsako;
pv32:4.3	Sopi maṁ anukampanto,
pv32:4.4	Nivāresi punappunaṁ.
pv32:5.1	‘Mākāsi pāpakaṁ kammaṁ,
pv32:5.2	Mā tāta duggatiṁ agā;
pv32:5.3	Sace icchasi pecca sukhaṁ,
pv32:5.4	Virama pāṇavadhā asaṁyamā’.
pv32:6.1	Tassāhaṁ vacanaṁ sutvā,
pv32:6.2	Sukhakāmassa hitānukampino;
pv32:6.3	Nākāsiṁ sakalānusāsaniṁ,
pv32:6.4	Cirapāpābhirato abuddhimā.
pv32:7.1	So maṁ puna bhūrisumedhaso,
pv32:7.2	Anukampāya saṁyame nivesayi;
pv32:7.3	‘Sace divā hanasi pāṇino,
pv32:7.4	Atha te rattiṁ bhavatu saṁyamo’.
pv32:8.1	Svāhaṁ divā hanitvā pāṇino,
pv32:8.2	Virato rattimahosi saññato;
pv32:8.3	Rattāhaṁ paricāremi,
pv32:8.4	Divā khajjāmi duggato.
pv32:9.1	Tassa kammassa kusalassa,
pv32:9.2	Anubhomi rattiṁ amānusiṁ;
pv32:9.3	Divā paṭihatāva kukkurā,
pv32:9.4	Upadhāvanti samantā khādituṁ.
pv32:10.1	Ye ca te satatānuyogino,
pv32:10.2	Dhuvaṁ payuttā sugatassa sāsane;
pv32:10.3	Maññāmi te amatameva kevalaṁ,
pv32:10.4	Adhigacchanti padaṁ asaṅkhatan”ti.
pv32:11.1	Migaluddakapetavatthu sattamaṁ.
pv33:0.1	Petavatthu
pv33:0.2	Cūḷavagga
pv33:0.3	8. Dutiyamigaluddakapetavatthu
pv33:1.1	“Kūṭāgāre ca pāsāde,
pv33:1.2	pallaṅke gonakatthate;
pv33:1.3	Pañcaṅgikena turiyena,
pv33:1.4	ramasi suppavādite.
pv33:2.1	Tato ratyā vivasāne,
pv33:2.2	sūriyuggamanaṁ pati;
pv33:2.3	Apaviddho susānasmiṁ,
pv33:2.4	bahudukkhaṁ nigacchasi.
pv33:3.1	Kiṁ nu kāyena vācāya,
pv33:3.2	manasā dukkaṭaṁ kataṁ;
pv33:3.3	Kissa kammavipākena,
pv33:3.4	idaṁ dukkhaṁ nigacchasi”.
pv33:4.1	“Ahaṁ rājagahe ramme,
pv33:4.2	ramaṇīye giribbaje;
pv33:4.3	Migaluddo pure āsiṁ,
pv33:4.4	luddo cāsimasaññato.
pv33:5.1	Tassa me sahāyo suhadayo,
pv33:5.2	Saddho āsi upāsako;
pv33:5.3	Tassa kulupako bhikkhu,
pv33:5.4	Āsi gotamasāvako;
pv33:5.5	Sopi maṁ anukampanto,
pv33:5.6	Nivāresi punappunaṁ.
pv33:6.1	‘Mākāsi pāpakaṁ kammaṁ,
pv33:6.2	Mā tāta duggatiṁ agā;
pv33:6.3	Sace icchasi pecca sukhaṁ,
pv33:6.4	Virama pāṇavadhā asaṁyamā’.
pv33:7.1	Tassāhaṁ vacanaṁ sutvā,
pv33:7.2	Sukhakāmassa hitānukampino;
pv33:7.3	Nākāsiṁ sakalānusāsaniṁ,
pv33:7.4	Cirapāpābhirato abuddhimā.
pv33:8.1	So maṁ puna bhūrisumedhaso,
pv33:8.2	Anukampāya saṁyame nivesayi;
pv33:8.3	‘Sace divā hanasi pāṇino,
pv33:8.4	Atha te rattiṁ bhavatu saṁyamo’.
pv33:9.1	Svāhaṁ divā hanitvā pāṇino,
pv33:9.2	Virato rattimahosi saññato;
pv33:9.3	Rattāhaṁ paricāremi,
pv33:9.4	Divā khajjāmi duggato.
pv33:10.1	Tassa kammassa kusalassa,
pv33:10.2	Anubhomi rattiṁ amānusiṁ;
pv33:10.3	Divā paṭihatāva kukkurā,
pv33:10.4	Upadhāvanti samantā khādituṁ.
pv33:11.1	Ye ca te satatānuyogino,
pv33:11.2	Dhuvaṁ payuttā sugatassa sāsane;
pv33:11.3	Maññāmi te amatameva kevalaṁ,
pv33:11.4	Adhigacchanti padaṁ asaṅkhatan”ti.
pv33:12.1	Dutiyamigaluddakapetavatthu aṭṭhamaṁ.
pv34:0.1	Petavatthu
pv34:0.2	Cūḷavagga
pv34:0.3	9. Kūṭavinicchayikapetavatthu
pv34:1.1	“Mālī kiriṭī kāyūrī,
pv34:1.2	gattā te candanussadā;
pv34:1.3	Pasannamukhavaṇṇosi,
pv34:1.4	sūriyavaṇṇova sobhasi.
pv34:2.1	Amānusā pārisajjā,
pv34:2.2	ye teme paricārakā;
pv34:2.3	Dasa kaññāsahassāni,
pv34:2.4	yā temā paricārikā;
pv34:2.5	Tā kambukāyūradharā,
pv34:2.6	kañcanāveḷabhūsitā.
pv34:3.1	Mahānubhāvosi tuvaṁ,
pv34:3.2	lomahaṁsanarūpavā;
pv34:3.3	Piṭṭhimaṁsāni attano,
pv34:3.4	sāmaṁ ukkacca khādasi.
pv34:4.1	Kiṁ nu kāyena vācāya,
pv34:4.2	manasā dukkuṭaṁ kataṁ;
pv34:4.3	Kissa kammavipākena,
pv34:4.4	piṭṭhimaṁsāni attano;
pv34:4.5	Sāmaṁ ukkacca khādasī”ti.
pv34:5.1	“Attanohaṁ anatthāya,
pv34:5.2	jīvaloke acārisaṁ;
pv34:5.3	Pesuññamusāvādena,
pv34:5.4	nikativañcanāya ca.
pv34:6.1	Tatthāhaṁ parisaṁ gantvā,
pv34:6.2	Saccakāle upaṭṭhite;
pv34:6.3	Atthaṁ dhammaṁ nirākatvā,
pv34:6.4	Adhammamanuvattisaṁ.
pv34:7.1	Evaṁ so khādatattānaṁ,
pv34:7.2	yo hoti piṭṭhimaṁsiko;
pv34:7.3	Yathāhaṁ ajja khādāmi,
pv34:7.4	piṭṭhimaṁsāni attano.
pv34:8.1	Tayidaṁ tayā nārada sāmaṁ diṭṭhaṁ,
pv34:8.2	Anukampakā ye kusalā vadeyyuṁ;
pv34:8.3	Mā pesuṇaṁ mā ca musā abhāṇi,
pv34:8.4	Mā khosi piṭṭhimaṁsiko tuvan”ti.
pv34:9.1	Kūṭavinicchayikapetavatthu navamaṁ.
pv35:0.1	Petavatthu
pv35:0.2	Cūḷavagga
pv35:0.3	10. Dhātuvivaṇṇapetavatthu
pv35:1.1	“Antalikkhasmiṁ tiṭṭhanto,
pv35:1.2	Duggandho pūti vāyasi;
pv35:1.3	Mukhañca te kimayo pūtigandhaṁ,
pv35:1.4	Khādanti kiṁ kammamakāsi pubbe.
pv35:2.1	Tato satthaṁ gahetvāna,
pv35:2.2	okkantanti punappunaṁ;
pv35:2.3	Khārena paripphositvā,
pv35:2.4	okkantanti punappunaṁ.
pv35:3.1	Kiṁ nu kāyena vācāya,
pv35:3.2	manasā dukkaṭaṁ kataṁ;
pv35:3.3	Kissa kammavipākena,
pv35:3.4	idaṁ dukkhaṁ nigacchasī”ti.
pv35:4.1	“Ahaṁ rājagahe ramme,
pv35:4.2	ramaṇīye giribbaje;
pv35:4.3	Issaro dhanadhaññassa,
pv35:4.4	supahūtassa mārisa.
pv35:5.1	Tassāyaṁ me bhariyā ca,
pv35:5.2	dhītā ca suṇisā ca me;
pv35:5.3	Tā mālaṁ uppalañcāpi,
pv35:5.4	paccagghañca vilepanaṁ;
pv35:5.5	Thūpaṁ harantiyo vāresiṁ,
pv35:5.6	taṁ pāpaṁ pakataṁ mayā.
pv35:6.1	Chaḷāsītisahassāni,
pv35:6.2	mayaṁ paccattavedanā;
pv35:6.3	Thūpapūjaṁ vivaṇṇetvā,
pv35:6.4	paccāma niraye bhusaṁ.
pv35:7.1	Ye ca kho thūpapūjāya,
pv35:7.2	vattante arahato mahe;
pv35:7.3	Ādīnavaṁ pakāsenti,
pv35:7.4	vivecayetha ne tato.
pv35:8.1	Imā ca passa āyantiyo,
pv35:8.2	Māladhārī alaṅkatā;
pv35:8.3	Mālāvipākaṁnubhontiyo,
pv35:8.4	Samiddhā ca tā yasassiniyo.
pv35:9.1	Tañca disvāna accheraṁ,
pv35:9.2	abbhutaṁ lomahaṁsanaṁ;
pv35:9.3	Namo karonti sappaññā,
pv35:9.4	vandanti taṁ mahāmuniṁ.
pv35:10.1	Sohaṁ nūna ito gantvā,
pv35:10.2	yoniṁ laddhāna mānusiṁ;
pv35:10.3	Thūpapūjaṁ karissāmi,
pv35:10.4	appamatto punappunan”ti.
pv35:11.1	Dhātuvivaṇṇapetavatthu dasamaṁ.
pv35:12.1	Cūḷavaggo tatiyo.
pv35:13.1	Tassuddānaṁ
pv35:14.1	Abhijjamāno kuṇḍiyo,
pv35:14.2	rathakārī bhusena ca;
pv35:14.3	Kumāro gaṇikā ceva,
pv35:14.4	dve luddā piṭṭhipūjanā;
pv35:14.5	Vaggo tena pavuccatīti.
pv36:0.1	Petavatthu
pv36:0.2	Mahāvagga
pv36:0.3	1. Ambasakkarapetavatthu
pv36:1.1	Vesālī nāma nagaratthi vajjīnaṁ,
pv36:1.2	Tattha ahu licchavi ambasakkaro;
pv36:1.3	Disvāna petaṁ nagarassa bāhiraṁ,
pv36:1.4	Tattheva pucchittha taṁ kāraṇatthiko.
pv36:2.1	“Seyyā nisajjā nayimassa atthi,
pv36:2.2	Abhikkamo natthi paṭikkamo ca;
pv36:2.3	Asitapītakhāyitavatthabhogā,
pv36:2.4	Paricārikā sāpi imassa natthi.
pv36:3.1	Ye ñātakā diṭṭhasutā suhajjā,
pv36:3.2	Anukampakā yassa ahesuṁ pubbe;
pv36:3.3	Daṭṭhumpi te dāni na taṁ labhanti,
pv36:3.4	Virājitatto hi janena tena.
pv36:4.1	Na oggatattassa bhavanti mittā,
pv36:4.2	Jahanti mittā vikalaṁ viditvā;
pv36:4.3	Atthañca disvā parivārayanti,
pv36:4.4	Bahū mittā uggatattassa honti.
pv36:5.1	Nihīnatto sabbabhogehi kiccho,
pv36:5.2	Sammakkhito samparibhinnagatto;
pv36:5.3	Ussāvabindūva palimpamāno,
pv36:5.4	Ajja suve jīvitassūparodho.
pv36:6.1	Etādisaṁ uttamakicchappattaṁ,
pv36:6.2	Uttāsitaṁ pucimandassa sūle;
pv36:6.3	‘Atha tvaṁ kena vaṇṇena vadesi yakkha,
pv36:6.4	Jīva bho jīvitameva seyyo’”ti.
pv36:7.1	“Sālohito esa ahosi mayhaṁ,
pv36:7.2	Ahaṁ sarāmi purimāya jātiyā;
pv36:7.3	Disvā ca me kāruññamahosi rāja,
pv36:7.4	Mā pāpadhammo nirayaṁ patāyaṁ.
pv36:8.1	Ito cuto licchavi esa poso,
pv36:8.2	Sattussadaṁ nirayaṁ ghorarūpaṁ;
pv36:8.3	Upapajjati dukkaṭakammakārī,
pv36:8.4	Mahābhitāpaṁ kaṭukaṁ bhayānakaṁ.
pv36:9.1	Anekabhāgena guṇena seyyo,
pv36:9.2	Ayameva sūlo nirayena tena;
pv36:9.3	Ekantadukkhaṁ kaṭukaṁ bhayānakaṁ,
pv36:9.4	Ekantatibbaṁ nirayaṁ patāyaṁ.
pv36:10.1	Idañca sutvā vacanaṁ mameso,
pv36:10.2	Dukkhūpanīto vijaheyya pāṇaṁ;
pv36:10.3	Tasmā ahaṁ santike na bhaṇāmi,
pv36:10.4	Mā me kato jīvitassūparodho”.
pv36:11.1	“Aññāto eso purisassa attho,
pv36:11.2	Aññampi icchāmase pucchituṁ tuvaṁ;
pv36:11.3	Okāsakammaṁ sace no karosi,
pv36:11.4	Pucchāma taṁ no na ca kujjhitabban”ti.
pv36:12.1	“Addhā paṭiññā me tadā ahu,
pv36:12.2	Nācikkhanā appasannassa hoti;
pv36:12.3	Akāmā saddheyyavacoti katvā,
pv36:12.4	Pucchassu maṁ kāmaṁ yathā visayhan”ti.
pv36:13.1	“Yaṁ kiñcahaṁ cakkhunā passissāmi,
pv36:13.2	Sabbampi tāhaṁ abhisaddaheyyaṁ;
pv36:13.3	Disvāva taṁ nopi ce saddaheyyaṁ,
pv36:13.4	Kareyyāsi me yakkha niyassakamman”ti.
pv36:14.1	“Saccappaṭiññā tava mesā hotu,
pv36:14.2	Sutvāna dhammaṁ labha suppasādaṁ;
pv36:14.3	Aññatthiko no ca paduṭṭhacitto,
pv36:14.4	Yaṁ te sutaṁ asutañcāpi dhammaṁ;
pv36:14.5	Sabbampi akkhissaṁ yathā pajānanti”.
pv36:15.1	“Setena assena alaṅkatena,
pv36:15.2	Upayāsi sūlāvutakassa santike;
pv36:15.3	Yānaṁ idaṁ abbhutaṁ dassaneyyaṁ,
pv36:15.4	Kissetaṁ kammassa ayaṁ vipāko”ti.
pv36:16.1	“Vesāliyā nagarassa majjhe,
pv36:16.2	Cikkhallamagge narakaṁ ahosi;
pv36:16.3	Gosīsamekāhaṁ pasannacitto,
pv36:16.4	Setaṁ gahetvā narakasmiṁ nikkhipiṁ.
pv36:17.1	Etasmiṁ pādāni patiṭṭhapetvā,
pv36:17.2	Mayañca aññe ca atikkamimhā;
pv36:17.3	Yānaṁ idaṁ abbhutaṁ dassaneyyaṁ,
pv36:17.4	Tasseva kammassa ayaṁ vipāko”ti.
pv36:18.1	“Vaṇṇo ca te sabbadisā pabhāsati,
pv36:18.2	Gandho ca te sabbadisā pavāyati;
pv36:18.3	Yakkhiddhipattosi mahānubhāvo,
pv36:18.4	Naggo cāsi kissa ayaṁ vipāko”ti.
pv36:19.1	“Akkodhano niccapasannacitto,
pv36:19.2	Saṇhāhi vācāhi janaṁ upemi;
pv36:19.3	Tasseva kammassa ayaṁ vipāko,
pv36:19.4	Dibbo me vaṇṇo satataṁ pabhāsati.
pv36:20.1	Yasañca kittiñca dhamme ṭhitānaṁ,
pv36:20.2	Disvāna mantemi pasannacitto;
pv36:20.3	Tasseva kammassa ayaṁ vipāko,
pv36:20.4	Dibbo me gandho satataṁ pavāyati.
pv36:21.1	Sahāyānaṁ titthasmiṁ nhāyantānaṁ,
pv36:21.2	Thale gahetvā nidahissa dussaṁ;
pv36:21.3	Khiḍḍatthiko no ca paduṭṭhacitto,
pv36:21.4	Tenamhi naggo kasirā ca vuttī”ti.
pv36:22.1	“Yo kīḷamāno pakaroti pāpaṁ,
pv36:22.2	Tassedisaṁ kammavipākamāhu;
pv36:22.3	Akīḷamāno pana yo karoti,
pv36:22.4	Kiṁ tassa kammassa vipākamāhū”ti.
pv36:23.1	“Ye duṭṭhasaṅkappamanā manussā,
pv36:23.2	Kāyena vācāya ca saṅkiliṭṭhā;
pv36:23.3	Kāyassa bhedā abhisamparāyaṁ,
pv36:23.4	Asaṁsayaṁ te nirayaṁ upenti.
pv36:24.1	Apare pana sugatimāsamānā,
pv36:24.2	Dāne ratā saṅgahitattabhāvā;
pv36:24.3	Kāyassa bhedā abhisamparāyaṁ,
pv36:24.4	Asaṁsayaṁ te sugatiṁ upentī”ti.
pv36:25.1	“Taṁ kinti jāneyyamahaṁ avecca,
pv36:25.2	Kalyāṇapāpassa ayaṁ vipāko;
pv36:25.3	Kiṁ vāhaṁ disvā abhisaddaheyyaṁ,
pv36:25.4	Ko vāpi maṁ saddahāpeyya etan”ti.
pv36:26.1	“Disvā ca sutvā abhisaddahassu,
pv36:26.2	Kalyāṇapāpassa ayaṁ vipāko;
pv36:26.3	Kalyāṇapāpe ubhaye asante,
pv36:26.4	Siyā nu sattā sugatā duggatā vā.
pv36:27.1	No cettha kammāni kareyyuṁ maccā,
pv36:27.2	Kalyāṇapāpāni manussaloke;
pv36:27.3	Nāhesuṁ sattā sugatā duggatā vā,
pv36:27.4	Hīnā paṇītā ca manussaloke.
pv36:28.1	Yasmā ca kammāni karonti maccā,
pv36:28.2	Kalyāṇapāpāni manussaloke;
pv36:28.3	Tasmā hi sattā sugatā duggatā vā,
pv36:28.4	Hīnā paṇītā ca manussaloke.
pv36:29.1	Dvayajja kammānaṁ vipākamāhu,
pv36:29.2	Sukhassa dukkhassa ca vedanīyaṁ;
pv36:29.3	Tā devatāyo paricārayanti,
pv36:29.4	Paccanti bālā dvayataṁ apassino.
pv36:30.1	Na matthi kammāni sayaṅkatāni,
pv36:30.2	Datvāpi me natthi yo ādiseyya;
pv36:30.3	Acchādanaṁ sayanamathannapānaṁ,
pv36:30.4	Tenamhi naggo kasirā ca vuttī”ti.
pv36:31.1	“Siyā nu kho kāraṇaṁ kiñci yakkha,
pv36:31.2	Acchādanaṁ yena tuvaṁ labhetha;
pv36:31.3	Ācikkha me tvaṁ yadatthi hetu,
pv36:31.4	Saddhāyikaṁ hetuvaco suṇomā”ti.
pv36:32.1	“Kappitako nāma idhatthi bhikkhu,
pv36:32.2	Jhāyī susīlo arahā vimutto;
pv36:32.3	Guttindriyo saṁvutapātimokkho,
pv36:32.4	Sītibhūto uttamadiṭṭhipatto.
pv36:33.1	Sakhilo vadaññū suvaco sumukho,
pv36:33.2	Svāgamo suppaṭimuttako ca;
pv36:33.3	Puññassa khettaṁ araṇavihārī,
pv36:33.4	Devamanussānañca dakkhiṇeyyo.
pv36:34.1	Santo vidhūmo anīgho nirāso,
pv36:34.2	Mutto visallo amamo avaṅko;
pv36:34.3	Nirūpadhī sabbapapañcakhīṇo,
pv36:34.4	Tisso vijjā anuppatto jutimā.
pv36:35.1	Appaññāto disvāpi na ca sujāno,
pv36:35.2	Munīti naṁ vajjisu voharanti;
pv36:35.3	Jānanti taṁ yakkhabhūtā anejaṁ,
pv36:35.4	Kalyāṇadhammaṁ vicarantaṁ loke.
pv36:36.1	Tassa tuvaṁ ekayugaṁ duve vā,
pv36:36.2	Mamuddisitvāna sace dadetha;
pv36:36.3	Paṭiggahītāni ca tāni assu,
pv36:36.4	Mamañca passetha sannaddhadussan”ti.
pv36:37.1	“Kasmiṁ padese samaṇaṁ vasantaṁ,
pv36:37.2	Gantvāna passemu mayaṁ idāni;
pv36:37.3	Yo majja kaṅkhaṁ vicikicchitañca,
pv36:37.4	Diṭṭhīvisūkāni vinodayeyyā”ti.
pv36:38.1	“Eso nisinno kapinaccanāyaṁ,
pv36:38.2	Parivārito devatāhi bahūhi;
pv36:38.3	Dhammiṁ kathaṁ bhāsati saccanāmo,
pv36:38.4	Sakasmimācerake appamatto”ti.
pv36:39.1	“Tathāhaṁ kassāmi gantvā idāni,
pv36:39.2	Acchādayissaṁ samaṇaṁ yugena;
pv36:39.3	Paṭiggahitāni ca tāni assu,
pv36:39.4	Tuvañca passemu sannaddhadussan”ti.
pv36:40.1	“Mā akkhaṇe pabbajitaṁ upāgami,
pv36:40.2	Sādhu vo licchavi nesa dhammo;
pv36:40.3	Tato ca kāle upasaṅkamitvā,
pv36:40.4	Tattheva passāhi raho nisinnan”ti.
pv36:41.1	Tathāti vatvā agamāsi tattha,
pv36:41.2	Parivārito dāsagaṇena licchavi;
pv36:41.3	So taṁ nagaraṁ upasaṅkamitvā,
pv36:41.4	Vāsūpagacchittha sake nivesane.
pv36:42.1	Tato ca kāle gihikiccāni katvā,
pv36:42.2	Nhatvā pivitvā ca khaṇaṁ labhitvā;
pv36:42.3	Viceyya peḷāto ca yugāni aṭṭha,
pv36:42.4	Gāhāpayī dāsagaṇena licchavi.
pv36:43.1	So taṁ padesaṁ upasaṅkamitvā,
pv36:43.2	Taṁ addasa samaṇaṁ santacittaṁ;
pv36:43.3	Paṭikkantaṁ gocarato nivattaṁ,
pv36:43.4	Sītibhūtaṁ rukkhamūle nisinnaṁ.
pv36:44.1	Tamenamavoca upasaṅkamitvā,
pv36:44.2	Appābādhaṁ phāsuvihārañca pucchi;
pv36:44.3	“Vesāliyaṁ licchavihaṁ bhadante,
pv36:44.4	Jānanti maṁ licchavi ambasakkaro.
pv36:45.1	Imāni me aṭṭha yugā subhāni,
pv36:45.2	Paṭigaṇha bhante padadāmi tuyhaṁ;
pv36:45.3	Teneva atthena idhāgatosmi,
pv36:45.4	Yathā ahaṁ attamano bhaveyyan”ti.
pv36:46.1	“Dūratova samaṇabrāhmaṇā ca,
pv36:46.2	Nivesanaṁ te parivajjayanti;
pv36:46.3	Pattāni bhijjanti ca te nivesane,
pv36:46.4	Saṅghāṭiyo cāpi vidālayanti.
pv36:47.1	Athāpare pādakuṭhārikāhi,
pv36:47.2	Avaṁsirā samaṇā pātayanti;
pv36:47.3	Etādisaṁ pabbajitā vihesaṁ,
pv36:47.4	Tayā kataṁ samaṇā pāpuṇanti.
pv36:48.1	Tiṇena telampi na tvaṁ adāsi,
pv36:48.2	Muḷhassa maggampi na pāvadāsi;
pv36:48.3	Andhassa daṇḍaṁ sayamādiyāsi,
pv36:48.4	Etādiso kadariyo asaṁvuto tuvaṁ;
pv36:48.5	Atha tvaṁ kena vaṇṇena kimeva disvā,
pv36:48.6	Amhehi saha saṁvibhāgaṁ karosī”ti.
pv36:49.1	“Paccemi bhante yaṁ tvaṁ vadesi,
pv36:49.2	Vihesayiṁ samaṇe brāhmaṇe ca;
pv36:49.3	Khiḍḍatthiko no ca paduṭṭhacitto,
pv36:49.4	Etampi me dukkaṭameva bhante.
pv36:50.1	Khiḍḍāya yakkho pasavitvā pāpaṁ,
pv36:50.2	Vedeti dukkhaṁ asamattabhogī;
pv36:50.3	Daharo yuvā nagganiyassa bhāgī,
pv36:50.4	Kiṁ su tato dukkhatarassa hoti.
pv36:51.1	Taṁ disvā saṁvegamalatthaṁ bhante,
pv36:51.2	Tappaccayā vāpi dadāmi dānaṁ;
pv36:51.3	Paṭigaṇha bhante vatthayugāni aṭṭha,
pv36:51.4	Yakkhassimā gacchantu dakkhiṇāyo”ti.
pv36:52.1	“Addhā hi dānaṁ bahudhā pasatthaṁ,
pv36:52.2	Dadato ca te akkhayadhammamatthu;
pv36:52.3	Paṭigaṇhāmi te vatthayugāni aṭṭha,
pv36:52.4	Yakkhassimā gacchantu dakkhiṇāyo”ti.
pv36:53.1	Tato hi so ācamayitvā licchavi,
pv36:53.2	Therassa datvāna yugāni aṭṭha;
pv36:53.3	Paṭiggahitāni ca tāni assu,
pv36:53.4	Yakkhañca passetha sannaddhadussaṁ.
pv36:54.1	Tamaddasā candanasāralittaṁ,
pv36:54.2	Ājaññamārūḷhamuḷāravaṇṇaṁ;
pv36:54.3	Alaṅkataṁ sādhunivatthadussaṁ,
pv36:54.4	Parivāritaṁ yakkhamahiddhipattaṁ.
pv36:55.1	So taṁ disvā attamano udaggo,
pv36:55.2	Pahaṭṭhacitto ca subhaggarūpo;
pv36:55.3	Kammañca disvāna mahāvipākaṁ,
pv36:55.4	Sandiṭṭhikaṁ cakkhunā sacchikatvā.
pv36:56.1	Tamenamavoca upasaṅkamitvā,
pv36:56.2	“Dassāmi dānaṁ samaṇabrāhmaṇānaṁ;
pv36:56.3	Na cāpi me kiñci adeyyamatthi,
pv36:56.4	Tuvañca me yakkha bahūpakāro”ti.
pv36:57.1	“Tuvañca me licchavi ekadesaṁ,
pv36:57.2	Adāsi dānāni amoghametaṁ;
pv36:57.3	Svāhaṁ karissāmi tayāva sakkhiṁ,
pv36:57.4	Amānuso mānusakena saddhin”ti.
pv36:58.1	“Gatī ca bandhū ca parāyaṇañca,
pv36:58.2	Mitto mamāsi atha devatā me;
pv36:58.3	Yācāmi taṁ pañjaliko bhavitvā,
pv36:58.4	Icchāmi taṁ yakkha punāpi daṭṭhun”ti.
pv36:59.1	“Sace tuvaṁ assaddho bhavissasi,
pv36:59.2	Kadariyarūpo vippaṭipannacitto;
pv36:59.3	Tvaṁ neva maṁ lacchasi dassanāya,
pv36:59.4	Disvā ca taṁ nopi ca ālapissaṁ.
pv36:60.1	Sace pana tvaṁ bhavissasi dhammagāravo,
pv36:60.2	Dāne rato saṅgahitattabhāvo;
pv36:60.3	Opānabhūto samaṇabrāhmaṇānaṁ,
pv36:60.4	Evaṁ mamaṁ lacchasi dassanāya.
pv36:61.1	Disvā ca taṁ ālapissaṁ bhadante,
pv36:61.2	Imañca sūlato lahuṁ pamuñca;
pv36:61.3	Yatonidānaṁ akarimha sakkhiṁ,
pv36:61.4	Maññāmi sūlāvutakassa kāraṇā.
pv36:62.1	Te aññamaññaṁ akarimha sakkhiṁ,
pv36:62.2	Ayañca sūlato lahuṁ pamutto;
pv36:62.3	Sakkacca dhammāni samācaranto,
pv36:62.4	Mucceyya so nirayā ca tamhā;
pv36:62.5	Kammaṁ siyā aññatra vedanīyaṁ.
pv36:63.1	Kappitakañca upasaṅkamitvā,
pv36:63.2	Teneva saha saṁvibhajitvā kāle;
pv36:63.3	Sayaṁ mukhenūpanisajja puccha,
pv36:63.4	So te akkhissati etamatthaṁ.
pv36:64.1	Tameva bhikkhuṁ upasaṅkamitvā,
pv36:64.2	Pucchassu aññatthiko no ca paduṭṭhacitto;
pv36:64.3	So te sutaṁ asutañcāpi dhammaṁ,
pv36:64.4	Sabbampi akkhissati yathā pajānan”ti.
pv36:65.1	So tattha rahassaṁ samullapitvā,
pv36:65.2	Sakkhiṁ karitvāna amānusena;
pv36:65.3	Pakkāmi so licchavīnaṁ sakāsaṁ,
pv36:65.4	Atha bravi parisaṁ sannisinnaṁ.
pv36:66.1	“Suṇantu bhonto mama ekavākyaṁ,
pv36:66.2	Varaṁ varissaṁ labhissāmi atthaṁ;
pv36:66.3	Sūlāvuto puriso luddakammo,
pv36:66.4	Paṇihitadaṇḍo anusattarūpo.
pv36:67.1	Ettāvatā vīsatirattimattā,
pv36:67.2	Yato āvuto neva jīvati na mato;
pv36:67.3	Tāhaṁ mocayissāmi dāni,
pv36:67.4	Yathāmatiṁ anujānātu saṅgho”ti.
pv36:68.1	“Etañca aññañca lahuṁ pamuñca,
pv36:68.2	Ko taṁ vadetha tathā karontaṁ;
pv36:68.3	Yathā pajānāsi tathā karohi,
pv36:68.4	Yathāmatiṁ anujānāti saṅgho”ti.
pv36:69.1	So taṁ padesaṁ upasaṅkamitvā,
pv36:69.2	Sūlāvutaṁ mocayi khippameva;
pv36:69.3	“Mā bhāyi sammā”ti ca taṁ avoca,
pv36:69.4	Tikicchakānañca upaṭṭhapesi.
pv36:70.1	“Kappitakañca upasaṅkamitvā,
pv36:70.2	Teneva saha saṁvibhajitvā kāle;
pv36:70.3	Sayaṁ mukhenūpanisajja licchavi,
pv36:70.4	Tatheva pucchittha naṁ kāraṇatthiko.
pv36:71.1	Sūlāvuto puriso luddakammo,
pv36:71.2	Paṇihitadaṇḍo anusattarūpo;
pv36:71.3	Ettāvatā vīsatirattimattā,
pv36:71.4	Yato āvuto neva jīvati na mato.
pv36:72.1	So mocito gantvā mayā idāni,
pv36:72.2	Etassa yakkhassa vaco hi bhante;
pv36:72.3	Siyā nu kho kāraṇaṁ kiñcideva,
pv36:72.4	Yena so nirayaṁ no vajeyya.
pv36:73.1	Ācikkha bhante yadi atthi hetu,
pv36:73.2	Saddhāyikaṁ hetuvaco suṇoma;
pv36:73.3	Na tesaṁ kammānaṁ vināsamatthi,
pv36:73.4	Avedayitvā idha byantibhāvo”ti.
pv36:74.1	“Sace sa dhammāni samācareyya,
pv36:74.2	Sakkacca rattindivamappamatto;
pv36:74.3	Mucceyya so nirayā ca tamhā,
pv36:74.4	Kammaṁ siyā aññatra vedanīyan”ti.
pv36:75.1	“Aññāto eso purisassa attho,
pv36:75.2	Mamampi dāni anukampa bhante;
pv36:75.3	Anusāsa maṁ ovada bhūripañña,
pv36:75.4	Yathā ahaṁ no nirayaṁ vajeyyan”ti.
pv36:76.1	“Ajjeva buddhaṁ saraṇaṁ upehi,
pv36:76.2	Dhammañca saṅghañca pasannacitto;
pv36:76.3	Tatheva sikkhāya padāni pañca,
pv36:76.4	Akhaṇḍaphullāni samādiyassu.
pv36:77.1	Pāṇātipātā viramassu khippaṁ,
pv36:77.2	Loke adinnaṁ parivajjayassu;
pv36:77.3	Amajjapo mā ca musā abhāṇī,
pv36:77.4	Sakena dārena ca hohi tuṭṭho;
pv36:77.5	Imañca ariyaṁ aṭṭhaṅgavarenupetaṁ,
pv36:77.6	Samādiyāhi kusalaṁ sukhudrayaṁ.
pv36:78.1	Cīvaraṁ piṇḍapātañca,
pv36:78.2	paccayaṁ sayanāsanaṁ;
pv36:78.3	Annaṁ pānaṁ khādanīyaṁ,
pv36:78.4	vatthasenāsanāni ca;
pv36:78.5	Dadāhi ujubhūtesu,
pv36:78.6	vippasannena cetasā.
pv36:79.1	Bhikkhūpi sīlasampanne,
pv36:79.2	vītarāge bahussute;
pv36:79.3	Tappehi annapānena,
pv36:79.4	sadā puññaṁ pavaḍḍhati.
pv36:80.1	Evañca dhammāni samācaranto,
pv36:80.2	Sakkacca rattindivamappamatto;
pv36:80.3	Muñca tuvaṁ nirayā ca tamhā,
pv36:80.4	Kammaṁ siyā aññatra vedanīyan”ti.
pv36:81.1	“Ajjeva buddhaṁ saraṇaṁ upemi,
pv36:81.2	Dhammañca saṅghañca pasannacitto;
pv36:81.3	Tatheva sikkhāya padāni pañca,
pv36:81.4	Akhaṇḍaphullāni samādiyāmi.
pv36:82.1	Pāṇātipātā viramāmi khippaṁ,
pv36:82.2	Loke adinnaṁ parivajjayāmi;
pv36:82.3	Amajjapo no ca musā bhaṇāmi,
pv36:82.4	Sakena dārena ca homi tuṭṭho;
pv36:82.5	Imañca ariyaṁ aṭṭhaṅgavarenupetaṁ,
pv36:82.6	Samādiyāmi kusalaṁ sukhudrayaṁ.
pv36:83.1	Cīvaraṁ piṇḍapātañca,
pv36:83.2	paccayaṁ sayanāsanaṁ;
pv36:83.3	Annaṁ pānaṁ khādanīyaṁ,
pv36:83.4	vatthasenāsanāni ca.
pv36:84.1	Bhikkhū ca sīlasampanne,
pv36:84.2	vītarāge bahussute;
pv36:84.3	Dadāmi na vikampāmi,
pv36:84.4	buddhānaṁ sāsane rato”ti.
pv36:85.1	Etādiso licchavi ambasakkaro,
pv36:85.2	Vesāliyaṁ aññataro upāsako;
pv36:85.3	Saddho mudū kārakaro ca bhikkhu,
pv36:85.4	Saṅghañca sakkacca tadā upaṭṭhahi.
pv36:86.1	Sūlāvuto ca arogo hutvā,
pv36:86.2	Serī sukhī pabbajjaṁ upāgami;
pv36:86.3	Bhikkhuñca āgamma kappitakuttamaṁ,
pv36:86.4	Ubhopi sāmaññaphalāni ajjhaguṁ.
pv36:87.1	Etādisā sappurisāna sevanā,
pv36:87.2	Mahapphalā hoti sataṁ vijānataṁ;
pv36:87.3	Sūlāvuto aggaphalaṁ aphassayi,
pv36:87.4	Phalaṁ kaniṭṭhaṁ pana ambasakkaroti.
pv36:88.1	Ambasakkarapetavatthu paṭhamaṁ.
pv37:0.1	Petavatthu
pv37:0.2	Mahāvagga
pv37:0.3	2. Serīsakapetavatthu
pv37:1.1	“Suṇotha yakkhassa vāṇijāna ca,
pv37:1.2	Samāgamo yattha tadā ahosi;
pv37:1.3	Yathā kathaṁ itaritarena cāpi,
pv37:1.4	Subhāsitaṁ tañca suṇātha sabbe.
pv37:2.1	Yo so ahu rājā pāyāsi nāma,
pv37:2.2	Bhummānaṁ sahabyagato yasassī;
pv37:2.3	So modamānova sake vimāne,
pv37:2.4	Amānuso mānuse ajjhabhāsī”ti.
pv37:3.1	“Vaṅke araññe amanussaṭṭhāne,
pv37:3.2	Kantāre appodake appabhakkhe;
pv37:3.3	Suduggame vaṇṇupathassa majjhe,
pv37:3.4	Vaṅkambhayā naṭṭhamanā manussā.
pv37:4.1	Nayidha phalā mūlamayā ca santi,
pv37:4.2	Upādānaṁ natthi kutodha bhakkho;
pv37:4.3	Aññatra paṁsūhi ca vālukāhi ca,
pv37:4.4	Tatāhi uṇhāhi ca dāruṇāhi ca.
pv37:5.1	Ujjaṅgalaṁ tattamivaṁ kapālaṁ,
pv37:5.2	Anāyasaṁ paralokena tulyaṁ;
pv37:5.3	Luddānamāvāsamidaṁ purāṇaṁ,
pv37:5.4	Bhūmippadeso abhisattarūpo.
pv37:6.1	Atha tumhe kena vaṇṇena,
pv37:6.2	Kimāsamānā imaṁ padesaṁ hi;
pv37:6.3	Anupaviṭṭhā sahasā samacca,
pv37:6.4	Lobhā bhayā atha vā sampamūḷhā”ti.
pv37:7.1	“Magadhesu aṅgesu ca satthavāhā,
pv37:7.2	Āropayitvā paṇiyaṁ puthuttaṁ;
pv37:7.3	Te yāmase sindhusovīrabhūmiṁ,
pv37:7.4	Dhanatthikā uddayaṁ patthayānā.
pv37:8.1	Divā pipāsaṁ nadhivāsayantā,
pv37:8.2	Yoggānukampañca samekkhamānā;
pv37:8.3	Etena vegena āyāma sabbe,
pv37:8.4	Rattiṁ maggaṁ paṭipannā vikāle.
pv37:9.1	Te duppayātā aparaddhamaggā,
pv37:9.2	Andhākulā vippanaṭṭhā araññe;
pv37:9.3	Suduggame vaṇṇupathassa majjhe,
pv37:9.4	Disaṁ na jānāma pamūḷhacittā.
pv37:10.1	Idañca disvāna adiṭṭhapubbaṁ,
pv37:10.2	Vimānaseṭṭhañca tavañca yakkha;
pv37:10.3	Tatuttariṁ jīvitamāsamānā,
pv37:10.4	Disvā patītā sumanā udaggā”ti.
pv37:11.1	“Pāraṁ samuddassa imañca vaṇṇuṁ,
pv37:11.2	Vettācaraṁ saṅkupathañca maggaṁ;
pv37:11.3	Nadiyo pana pabbatānañca duggā,
pv37:11.4	Puthuddisā gacchatha bhogahetu.
pv37:12.1	Pakkhandiyāna vijitaṁ paresaṁ,
pv37:12.2	Verajjake mānuse pekkhamānā;
pv37:12.3	Yaṁ vo sutaṁ vā atha vāpi diṭṭhaṁ,
pv37:12.4	Accherakaṁ taṁ vo suṇoma tātā”ti.
pv37:13.1	“Itopi accherataraṁ kumāra,
pv37:13.2	Na no sutaṁ vā atha vāpi diṭṭhaṁ;
pv37:13.3	Atītamānussakameva sabbaṁ,
pv37:13.4	Disvā na tappāma anomavaṇṇaṁ.
pv37:14.1	Vehāyasaṁ pokkharañño savanti,
pv37:14.2	Pahūtamalyā bahupuṇḍarīkā;
pv37:14.3	Dumā cime niccaphalūpapannā,
pv37:14.4	Atīva gandhā surabhiṁ pavāyanti.
pv37:15.1	Veḷūriyathambhā satamussitāse,
pv37:15.2	Silāpavāḷassa ca āyataṁsā;
pv37:15.3	Masāragallā sahalohitaṅgā,
pv37:15.4	Thambhā ime jotirasāmayāse.
pv37:16.1	Sahassathambhaṁ atulānubhāvaṁ,
pv37:16.2	Tesūpari sādhumidaṁ vimānaṁ;
pv37:16.3	Ratanantaraṁ kañcanavedimissaṁ,
pv37:16.4	Tapanīyapaṭṭehi ca sādhuchannaṁ.
pv37:17.1	Jambonaduttattamidaṁ sumaṭṭho,
pv37:17.2	Pāsādasopānaphalūpapanno;
pv37:17.3	Daḷho ca vaggu ca susaṅgato ca,
pv37:17.4	Atīva nijjhānakhamo manuñño.
pv37:18.1	Ratanantarasmiṁ bahuannapānaṁ,
pv37:18.2	Parivārito accharāsaṅgaṇena;
pv37:18.3	Murajaālambaratūriyaghuṭṭho,
pv37:18.4	Abhivanditosi thutivandanāya.
pv37:19.1	So modasi nārigaṇappabodhano,
pv37:19.2	Vimānapāsādavare manorame;
pv37:19.3	Acintiyo sabbaguṇūpapanno,
pv37:19.4	Rājā yathā vessavaṇo naḷinyā.
pv37:20.1	Devo nu āsi udavāsi yakkho,
pv37:20.2	Udāhu devindo manussabhūto;
pv37:20.3	Pucchanti taṁ vāṇijā satthavāhā,
pv37:20.4	Ācikkha ko nāma tuvaṁsi yakkho”ti.
pv37:21.1	“Serīsako nāma ahamhi yakkho,
pv37:21.2	Kantāriyo vaṇṇupathamhi gutto;
pv37:21.3	Imaṁ padesaṁ abhipālayāmi,
pv37:21.4	Vacanakaro vessavaṇassa rañño”ti.
pv37:22.1	“Adhiccaladdhaṁ pariṇāmajaṁ te,
pv37:22.2	Sayaṅkataṁ udāhu devehi dinnaṁ;
pv37:22.3	Pucchanti taṁ vāṇijā satthavāhā,
pv37:22.4	Kathaṁ tayā laddhamidaṁ manuññan”ti.
pv37:23.1	“Nādhiccaladdhaṁ na pariṇāmajaṁ me,
pv37:23.2	Na sayaṅkataṁ na hi devehi dinnaṁ;
pv37:23.3	Sakehi kammehi apāpakehi,
pv37:23.4	Puññehi me laddhamidaṁ manuññan”ti.
pv37:24.1	“Kiṁ te vataṁ kiṁ pana brahmacariyaṁ,
pv37:24.2	Kissa suciṇṇassa ayaṁ vipāko;
pv37:24.3	Pucchanti taṁ vāṇijā satthavāhā,
pv37:24.4	Kathaṁ tayā laddhamidaṁ vimānan”ti.
pv37:25.1	“Mamaṁ pāyāsīti ahu samaññā,
pv37:25.2	Rajjaṁ yadā kārayiṁ kosalānaṁ;
pv37:25.3	Natthikadiṭṭhi kadariyo pāpadhammo,
pv37:25.4	Ucchedavādī ca tadā ahosiṁ.
pv37:26.1	Samaṇo ca kho āsi kumārakassapo,
pv37:26.2	Bahussuto cittakathī uḷāro;
pv37:26.3	So me tadā dhammakathaṁ abhāsi,
pv37:26.4	Diṭṭhivisūkāni vinodayī me.
pv37:27.1	Tāhaṁ tassa dhammakathaṁ suṇitvā,
pv37:27.2	Upāsakattaṁ paṭivedayissaṁ;
pv37:27.3	Pāṇātipātā virato ahosiṁ,
pv37:27.4	Loke adinnaṁ parivajjayissaṁ;
pv37:27.5	Amajjapo no ca musā abhāṇiṁ,
pv37:27.6	Sakena dārena ca ahosi tuṭṭho.
pv37:28.1	Taṁ me vataṁ taṁ pana brahmacariyaṁ,
pv37:28.2	Tassa suciṇṇassa ayaṁ vipāko;
pv37:28.3	Teheva kammehi apāpakehi,
pv37:28.4	Puññehi me laddhamidaṁ vimānan”ti.
pv37:29.1	“Saccaṁ kirāhaṁsu narā sapaññā,
pv37:29.2	Anaññathā vacanaṁ paṇḍitānaṁ;
pv37:29.3	Yahiṁ yahiṁ gacchati puññakammo,
pv37:29.4	Tahiṁ tahiṁ modati kāmakāmī.
pv37:30.1	Yahiṁ yahiṁ sokapariddavo ca,
pv37:30.2	Vadho ca bandho ca parikkileso;
pv37:30.3	Tahiṁ tahiṁ gacchati pāpakammo,
pv37:30.4	Na muccati duggatiyā kadācī”ti.
pv37:31.1	“Sammūḷharūpova jano ahosi,
pv37:31.2	Asmiṁ muhutte kalalīkatova;
pv37:31.3	Janassimassa tuyhañca kumāra,
pv37:31.4	Appaccayo kena nu kho ahosī”ti.
pv37:32.1	“Ime ca sirīsavanā tātā,
pv37:32.2	Dibbā gandhā surabhī sampavanti;
pv37:32.3	Te sampavāyanti imaṁ vimānaṁ,
pv37:32.4	Divā ca ratto ca tamaṁ nihantvā.
pv37:33.1	Imesañca kho vassasataccayena,
pv37:33.2	Sipāṭikā phalati ekamekā;
pv37:33.3	Mānussakaṁ vassasataṁ atītaṁ,
pv37:33.4	Yadagge kāyamhi idhūpapanno.
pv37:34.1	Disvānahaṁ vassasatāni pañca,
pv37:34.2	Asmiṁ vimāne ṭhatvāna tātā;
pv37:34.3	Āyukkhayā puññakkhayā cavissaṁ,
pv37:34.4	Teneva sokena pamucchitosmī”ti.
pv37:35.1	“Kathaṁ nu soceyya tathāvidho so,
pv37:35.2	Laddhā vimānaṁ atulaṁ cirāya;
pv37:35.3	Ye cāpi kho ittaramupapannā,
pv37:35.4	Te nūna soceyyuṁ parittapuññā”ti.
pv37:36.1	“Anucchaviṁ ovadiyañca me taṁ,
pv37:36.2	Yaṁ maṁ tumhe peyyavācaṁ vadetha;
pv37:36.3	Tumhe ca kho tātā mayānuguttā,
pv37:36.4	Yenicchakaṁ tena paletha sotthin”ti.
pv37:37.1	“Gantvā mayaṁ sindhusovīrabhūmiṁ,
pv37:37.2	Dhanatthikā uddayaṁ patthayānā;
pv37:37.3	Yathāpayogā paripuṇṇacāgā,
pv37:37.4	Kāhāma serīsamahaṁ uḷāran”ti.
pv37:38.1	“Mā ceva serīsamahaṁ akattha,
pv37:38.2	Sabbañca vo bhavissati yaṁ vadetha;
pv37:38.3	Pāpāni kammāni vivajjayātha,
pv37:38.4	Dhammānuyogañca adhiṭṭhahātha.
pv37:39.1	Upāsako atthi imamhi saṅghe,
pv37:39.2	Bahussuto sīlavatūpapanno;
pv37:39.3	Saddho ca cāgī ca supesalo ca,
pv37:39.4	Vicakkhaṇo santusito mutīmā.
pv37:40.1	Sañjānamāno na musā bhaṇeyya,
pv37:40.2	Parūpaghātāya na cetayeyya;
pv37:40.3	Vebhūtikaṁ pesuṇaṁ no kareyya,
pv37:40.4	Saṇhañca vācaṁ sakhilaṁ bhaṇeyya.
pv37:41.1	Sagāravo sappatisso vinīto,
pv37:41.2	Apāpako adhisīle visuddho;
pv37:41.3	So mātaraṁ pitarañcāpi jantu,
pv37:41.4	Dhammena poseti ariyavutti.
pv37:42.1	Maññe so mātāpitūnaṁ kāraṇā,
pv37:42.2	Bhogāni pariyesati na attahetu;
pv37:42.3	Mātāpitūnañca yo accayena,
pv37:42.4	Nekkhammapoṇo carissati brahmacariyaṁ.
pv37:43.1	Ujū avaṅko asaṭho amāyo,
pv37:43.2	Na lesakappena ca vohareyya;
pv37:43.3	So tādiso sukatakammakārī,
pv37:43.4	Dhamme ṭhito kinti labhetha dukkhaṁ.
pv37:44.1	Taṁ kāraṇā pātukatomhi attanā,
pv37:44.2	Tasmā dhammaṁ passatha vāṇijāse;
pv37:44.3	Aññatra teniha bhasmī bhavetha,
pv37:44.4	Andhākulā vippanaṭṭhā araññe;
pv37:44.5	Taṁ khippamānena lahuṁ parena,
pv37:44.6	Sukho have sappurisena saṅgamo”ti.
pv37:45.1	“Kiṁ nāma so kiñca karoti kammaṁ,
pv37:45.2	Kiṁ nāmadheyyaṁ kiṁ pana tassa gottaṁ;
pv37:45.3	Mayampi naṁ daṭṭhukāmamha yakkha,
pv37:45.4	Yassānukampāya idhāgatosi;
pv37:45.5	Lābhā hi tassa yassa tuvaṁ pihesī”ti.
pv37:46.1	“Yo kappako sambhavanāmadheyyo,
pv37:46.2	Upāsako kocchaphalūpajīvī;
pv37:46.3	Jānātha naṁ tumhākaṁ pesiyo so,
pv37:46.4	Mā kho naṁ hīḷittha supesalo so”ti.
pv37:47.1	“Jānāmase yaṁ tvaṁ pavadesi yakkha,
pv37:47.2	Na kho naṁ jānāma sa edisoti;
pv37:47.3	Mayampi naṁ pūjayissāma yakkha,
pv37:47.4	Sutvāna tuyhaṁ vacanaṁ uḷāran”ti.
pv37:48.1	“Ye keci imasmiṁ satthe manussā,
pv37:48.2	Daharā mahantā athavāpi majjhimā;
pv37:48.3	Sabbeva te ālambantu vimānaṁ,
pv37:48.4	Passantu puññānaṁ phalaṁ kadariyā”ti.
pv37:49.1	Te tattha sabbeva “ahaṁ pure”ti,
pv37:49.2	Taṁ kappakaṁ tattha purakkhatvā;
pv37:49.3	Sabbeva te ālambiṁsu vimānaṁ,
pv37:49.4	Masakkasāraṁ viya vāsavassa.
pv37:50.1	Te tattha sabbeva “ahaṁ pure”ti,
pv37:50.2	Upāsakattaṁ paṭivedayiṁsu;
pv37:50.3	Pāṇātipātā paṭiviratā ahesuṁ,
pv37:50.4	Loke adinnaṁ parivajjayiṁsu;
pv37:50.5	Amajjapā no ca musā bhaṇiṁsu,
pv37:50.6	Sakena dārena ca ahesuṁ tuṭṭhā.
pv37:51.1	Te tattha sabbeva “ahaṁ pure”ti,
pv37:51.2	Upāsakattaṁ paṭivedayitvā;
pv37:51.3	Pakkāmi sattho anumodamāno,
pv37:51.4	Yakkhiddhiyā anumato punappunaṁ.
pv37:52.1	Gantvāna te sindhusovīrabhūmiṁ,
pv37:52.2	Dhanatthikā uddayaṁ patthayānā;
pv37:52.3	Yathāpayogā paripuṇṇalābhā,
pv37:52.4	Paccāgamuṁ pāṭaliputtamakkhataṁ.
pv37:53.1	Gantvāna te saṅgharaṁ sotthivanto,
pv37:53.2	Puttehi dārehi samaṅgibhūtā;
pv37:53.3	Ānandī vittā sumanā patītā,
pv37:53.4	Akaṁsu serīsamahaṁ uḷāraṁ;
pv37:53.5	Serīsakaṁ te pariveṇaṁ māpayiṁsu.
pv37:54.1	Etādisā sappurisāna sevanā,
pv37:54.2	Mahatthikā dhammaguṇāna sevanā;
pv37:54.3	Ekassa atthāya upāsakassa,
pv37:54.4	Sabbeva sattā sukhitā ahesunti.
pv37:55.1	Serīsakapetavatthu dutiyaṁ.
pv37:55.2	Bhāṇavāraṁ tatiyaṁ.
pv38:0.1	Petavatthu
pv38:0.2	Mahāvagga
pv38:0.3	3. Nandakapetavatthu
pv38:1.1	Rājā piṅgalako nāma,
pv38:1.2	Suraṭṭhānaṁ adhipati ahu;
pv38:1.3	Moriyānaṁ upaṭṭhānaṁ gantvā,
pv38:1.4	Suraṭṭhaṁ punarāgamā.
pv38:2.1	Uṇhe majjhanhike kāle,
pv38:2.2	Rājā paṅkaṁ upāgami;
pv38:2.3	Addasa maggaṁ ramaṇīyaṁ,
pv38:2.4	Petānaṁ taṁ vaṇṇupathaṁ.
pv38:3.1	Sārathiṁ āmantayī rājā—
pv38:4.1	“Ayaṁ maggo ramaṇīyo,
pv38:4.2	khemo sovatthiko sivo;
pv38:4.3	Iminā sārathi yāma,
pv38:4.4	suraṭṭhānaṁ santike ito”.
pv38:5.1	Tena pāyāsi soraṭṭho,
pv38:5.2	senāya caturaṅginiyā;
pv38:5.3	Ubbiggarūpo puriso,
pv38:5.4	soraṭṭhaṁ etadabravi.
pv38:6.1	“Kummaggaṁ paṭipannamhā,
pv38:6.2	bhiṁsanaṁ lomahaṁsanaṁ;
pv38:6.3	Purato dissati maggo,
pv38:6.4	pacchato ca na dissati.
pv38:7.1	Kummaggaṁ paṭipannamhā,
pv38:7.2	yamapurisāna santike;
pv38:7.3	Amānuso vāyati gandho,
pv38:7.4	ghoso suyyati dāruṇo”.
pv38:8.1	Saṁviggo rājā soraṭṭho,
pv38:8.2	sārathiṁ etadabravi;
pv38:8.3	“Kummaggaṁ paṭipannamhā,
pv38:8.4	bhiṁsanaṁ lomahaṁsanaṁ;
pv38:8.5	Purato dissati maggo,
pv38:8.6	pacchato ca na dissati.
pv38:9.1	Kummaggaṁ paṭipannamhā,
pv38:9.2	yamapurisāna santike;
pv38:9.3	Amānuso vāyati gandho,
pv38:9.4	ghoso suyyati dāruṇo”.
pv38:10.1	Hatthikkhandhaṁ samāruyha,
pv38:10.2	Olokento catuddisaṁ;
pv38:10.3	Addasa nigrodhaṁ ramaṇīyaṁ,
pv38:10.4	Pādapaṁ chāyāsampannaṁ;
pv38:10.5	Nīlabbhavaṇṇasadisaṁ,
pv38:10.6	Meghavaṇṇasirīnibhaṁ.
pv38:11.1	Sārathiṁ āmantayī rājā,
pv38:11.2	“kiṁ eso dissati brahā;
pv38:11.3	Nīlabbhavaṇṇasadiso,
pv38:11.4	meghavaṇṇasirīnibho”.
pv38:12.1	“Nigrodho so mahārāja,
pv38:12.2	pādapo chāyāsampanno;
pv38:12.3	Nīlabbhavaṇṇasadiso,
pv38:12.4	meghavaṇṇasirīnibho”.
pv38:13.1	Tena pāyāsi soraṭṭho,
pv38:13.2	yena so dissate brahā;
pv38:13.3	Nīlabbhavaṇṇasadiso,
pv38:13.4	meghavaṇṇasirīnibho.
pv38:14.1	Hatthikkhandhato oruyha,
pv38:14.2	rājā rukkhaṁ upāgami;
pv38:14.3	Nisīdi rukkhamūlasmiṁ,
pv38:14.4	sāmacco saparijjano;
pv38:14.5	Pūraṁ pānīyasarakaṁ,
pv38:14.6	pūve vitte ca addasa.
pv38:15.1	Puriso ca devavaṇṇī,
pv38:15.2	sabbābharaṇabhūsito;
pv38:15.3	Upasaṅkamitvā rājānaṁ,
pv38:15.4	soraṭṭhaṁ etadabravi.
pv38:16.1	“Svāgataṁ te mahārāja,
pv38:16.2	atho te adurāgataṁ;
pv38:16.3	Pivatu devo pānīyaṁ,
pv38:16.4	pūve khāda arindama”.
pv38:17.1	Pivitvā rājā pānīyaṁ,
pv38:17.2	sāmacco saparijjano;
pv38:17.3	Pūve khāditvā pitvā ca,
pv38:17.4	soraṭṭho etadabravi.
pv38:18.1	“Devatā nusi gandhabbo,
pv38:18.2	adu sakko purindado;
pv38:18.3	Ajānantā taṁ pucchāma,
pv38:18.4	kathaṁ jānemu taṁ mayan”ti.
pv38:19.1	“Nāmhi devo na gandhabbo,
pv38:19.2	nāpi sakko purindado;
pv38:19.3	Peto ahaṁ mahārāja,
pv38:19.4	suraṭṭhā idha māgato”ti.
pv38:20.1	“Kiṁsīlo kiṁsamācāro,
pv38:20.2	suraṭṭhasmiṁ pure tuvaṁ;
pv38:20.3	Kena te brahmacariyena,
pv38:20.4	ānubhāvo ayaṁ tavā”ti.
pv38:21.1	“Taṁ suṇohi mahārāja,
pv38:21.2	arindama raṭṭhavaḍḍhana;
pv38:21.3	Amaccā pārisajjā ca,
pv38:21.4	brāhmaṇo ca purohito.
pv38:22.1	Suraṭṭhasmiṁ ahaṁ deva,
pv38:22.2	puriso pāpacetaso;
pv38:22.3	Micchādiṭṭhi ca dussīlo,
pv38:22.4	kadariyo paribhāsako.
pv38:23.1	Dadantānaṁ karontānaṁ,
pv38:23.2	vārayissaṁ bahujjanaṁ;
pv38:23.3	Aññesaṁ dadamānānaṁ,
pv38:23.4	antarāyakaro ahaṁ.
pv38:24.1	Vipāko natthi dānassa,
pv38:24.2	saṁyamassa kuto phalaṁ;
pv38:24.3	Natthi ācariyo nāma,
pv38:24.4	adantaṁ ko damessati.
pv38:25.1	Samatulyāni bhūtāni,
pv38:25.2	kuto jeṭṭhāpacāyiko;
pv38:25.3	Natthi balaṁ vīriyaṁ vā,
pv38:25.4	kuto uṭṭhānaporisaṁ.
pv38:26.1	Natthi dānaphalaṁ nāma,
pv38:26.2	na visodheti verinaṁ;
pv38:26.3	Laddheyyaṁ labhate macco,
pv38:26.4	niyatipariṇāmajaṁ.
pv38:27.1	Natthi mātā pitā bhātā,
pv38:27.2	loko natthi ito paraṁ;
pv38:27.3	Natthi dinnaṁ natthi hutaṁ,
pv38:27.4	sunihitaṁ na vijjati.
pv38:28.1	Yopi haneyya purisaṁ,
pv38:28.2	parassa chindate siraṁ;
pv38:28.3	Na koci kañci hanati,
pv38:28.4	sattannaṁ vivaramantare.
pv38:29.1	Acchejjābhejjo hi jīvo,
pv38:29.2	Aṭṭhaṁso guḷaparimaṇḍalo;
pv38:29.3	Yojanānaṁ sataṁ pañca,
pv38:29.4	Ko jīvaṁ chettumarahati.
pv38:30.1	Yathā suttaguḷe khitte,
pv38:30.2	nibbeṭhentaṁ palāyati;
pv38:30.3	Evamevaṁ ca so jīvo,
pv38:30.4	nibbeṭhento palāyati.
pv38:31.1	Yathā gāmato nikkhamma,
pv38:31.2	aññaṁ gāmaṁ pavīsati;
pv38:31.3	Evamevaṁ ca so jīvo,
pv38:31.4	aññaṁ bondiṁ pavīsati.
pv38:32.1	Yathā gehato nikkhamma,
pv38:32.2	aññaṁ gehaṁ pavīsati;
pv38:32.3	Evamevaṁ ca so jīvo,
pv38:32.4	aññaṁ bondiṁ pavīsati.
pv38:33.1	Cullāsīti mahākappino,
pv38:33.2	satasahassāni hi;
pv38:33.3	Ye bālā ye ca paṇḍitā,
pv38:33.4	saṁsāraṁ khepayitvāna;
pv38:33.5	Dukkhassantaṁ karissare.
pv38:34.1	Mitāni sukhadukkhāni,
pv38:34.2	doṇehi piṭakehi ca;
pv38:34.3	Jino sabbaṁ pajānāti,
pv38:34.4	sammūḷhā itarā pajā.
pv38:35.1	Evaṁdiṭṭhi pure āsiṁ,
pv38:35.2	sammūḷho mohapāruto;
pv38:35.3	Micchādiṭṭhi ca dussīlo,
pv38:35.4	kadariyo paribhāsako.
pv38:36.1	Oraṁ me chahi māsehi,
pv38:36.2	kālakiriyā bhavissati;
pv38:36.3	Ekantakaṭukaṁ ghoraṁ,
pv38:36.4	nirayaṁ papatissahaṁ.
pv38:37.1	Catukkaṇṇaṁ catudvāraṁ,
pv38:37.2	vibhattaṁ bhāgaso mitaṁ;
pv38:37.3	Ayopākārapariyantaṁ,
pv38:37.4	ayasā paṭikujjitaṁ.
pv38:38.1	Tassa ayomayā bhūmi,
pv38:38.2	jalitā tejasā yutā;
pv38:38.3	Samantā yojanasataṁ,
pv38:38.4	pharitvā tiṭṭhati sabbadā.
pv38:39.1	Vassāni satasahassāni,
pv38:39.2	ghoso suyyati tāvade;
pv38:39.3	Lakkho eso mahārāja,
pv38:39.4	satabhāgavassakoṭiyo.
pv38:40.1	Koṭisatasahassāni,
pv38:40.2	niraye paccare janā;
pv38:40.3	Micchādiṭṭhī ca dussīlā,
pv38:40.4	ye ca ariyūpavādino.
pv38:41.1	Tatthāhaṁ dīghamaddhānaṁ,
pv38:41.2	dukkhaṁ vedissa vedanaṁ;
pv38:41.3	Phalaṁ pāpassa kammassa,
pv38:41.4	tasmā socāmahaṁ bhusaṁ.
pv38:42.1	Taṁ suṇohi mahārāja,
pv38:42.2	arindama raṭṭhavaḍḍhana;
pv38:42.3	Dhītā mayhaṁ mahārāja,
pv38:42.4	uttarā bhaddamatthu te.
pv38:43.1	Karoti bhaddakaṁ kammaṁ,
pv38:43.2	sīlesuposathe ratā;
pv38:43.3	Saññatā saṁvibhāgī ca,
pv38:43.4	vadaññū vītamaccharā.
pv38:44.1	Akhaṇḍakārī sikkhāya,
pv38:44.2	suṇhā parakulesu ca;
pv38:44.3	Upāsikā sakyamunino,
pv38:44.4	sambuddhassa sirīmato.
pv38:45.1	Bhikkhu ca sīlasampanno,
pv38:45.2	gāmaṁ piṇḍāya pāvisi;
pv38:45.3	Okkhittacakkhu satimā,
pv38:45.4	guttadvāro susaṁvuto.
pv38:46.1	Sapadānaṁ caramāno,
pv38:46.2	agamā taṁ nivesanaṁ;
pv38:46.3	‘Tamaddasa mahārāja,
pv38:46.4	uttarā bhaddamatthu te’.
pv38:47.1	Pūraṁ pānīyasarakaṁ,
pv38:47.2	pūve vitte ca sā adā;
pv38:47.3	‘Pitā me kālakato bhante,
pv38:47.4	tassetaṁ upakappatu’.
pv38:48.1	Samanantarānuddiṭṭhe,
pv38:48.2	vipāko udapajjatha;
pv38:48.3	Bhuñjāmi kāmakāmīhaṁ,
pv38:48.4	rājā vessavaṇo yathā.
pv38:49.1	Taṁ suṇohi mahārāja,
pv38:49.2	arindama raṭṭhavaḍḍhana;
pv38:49.3	Sadevakassa lokassa,
pv38:49.4	buddho aggo pavuccati;
pv38:49.5	Taṁ buddhaṁ saraṇaṁ gaccha,
pv38:49.6	saputtadāro arindama.
pv38:50.1	Aṭṭhaṅgikena maggena,
pv38:50.2	phusanti amataṁ padaṁ;
pv38:50.3	Taṁ dhammaṁ saraṇaṁ gaccha,
pv38:50.4	saputtadāro arindama.
pv38:51.1	Cattāro ca paṭipannā,
pv38:51.2	cattāro ca phale ṭhitā;
pv38:51.3	Esa saṅgho ujubhūto,
pv38:51.4	paññāsīlasamāhito;
pv38:51.5	Taṁ saṅghaṁ saraṇaṁ gaccha,
pv38:51.6	saputtadāro arindama.
pv38:52.1	Pāṇātipātā viramassu khippaṁ,
pv38:52.2	Loke adinnaṁ parivajjayassu;
pv38:52.3	Amajjapo mā ca musā abhāṇi,
pv38:52.4	Sakena dārena ca hohi tuṭṭho”ti.
pv38:53.1	“Atthakāmosi me yakkha,
pv38:53.2	hitakāmosi devate;
pv38:53.3	Karomi tuyhaṁ vacanaṁ,
pv38:53.4	tvaṁsi ācariyo mama.
pv38:54.1	Upemi saraṇaṁ buddhaṁ,
pv38:54.2	dhammañcāpi anuttaraṁ;
pv38:54.3	Saṅghañca naradevassa,
pv38:54.4	gacchāmi saraṇaṁ ahaṁ.
pv38:55.1	Pāṇātipātā viramāmi khippaṁ,
pv38:55.2	Loke adinnaṁ parivajjayāmi;
pv38:55.3	Amajjapo no ca musā bhaṇāmi,
pv38:55.4	Sakena dārena ca homi tuṭṭho.
pv38:56.1	Ophuṇāmi mahāvāte,
pv38:56.2	nadiyā sīghagāmiyā;
pv38:56.3	Vamāmi pāpikaṁ diṭṭhiṁ,
pv38:56.4	buddhānaṁ sāsane rato”.
pv38:57.1	Idaṁ vatvāna soraṭṭho,
pv38:57.2	viramitvā pāpadassanā;
pv38:57.3	Namo bhagavato katvā,
pv38:57.4	pāmokkho rathamāruhīti.
pv38:58.1	Nandakapetavatthu tatiyaṁ.
pv39:0.1	Petavatthu
pv39:0.2	Mahāvagga
pv39:0.3	4. Revatīpetavatthu
pv39:1.1	“Uṭṭhehi revate supāpadhamme,
pv39:1.2	Apārutadvāre adānasīle;
pv39:1.3	Nessāma taṁ yattha thunanti duggatā,
pv39:1.4	Samappitā nerayikā dukhenā”ti.
pv39:2.1	Icceva vatvāna yamassa dūtā,
pv39:2.2	Te dve yakkhā lohitakkhā brahantā;
pv39:2.3	Paccekabāhāsu gahetvā revataṁ,
pv39:2.4	Pakkāmayuṁ devagaṇassa santike.
pv39:3.1	“Ādiccavaṇṇaṁ ruciraṁ pabhassaraṁ,
pv39:3.2	Byamhaṁ subhaṁ kañcanajālachannaṁ;
pv39:3.3	Kassetamākiṇṇajanaṁ vimānaṁ,
pv39:3.4	Suriyassa raṁsīriva jotamānaṁ.
pv39:4.1	Nārīgaṇā candanasāralittā,
pv39:4.2	Ubhato vimānaṁ upasobhayanti;
pv39:4.3	Taṁ dissati suriyasamānavaṇṇaṁ,
pv39:4.4	Ko modati saggapatto vimāne”ti.
pv39:5.1	“Bārāṇasiyaṁ nandiyo nāmāsi,
pv39:5.2	Upāsako amaccharī dānapati vadaññū;
pv39:5.3	Tassetamākiṇṇajanaṁ vimānaṁ,
pv39:5.4	Suriyassa raṁsīriva jotamānaṁ.
pv39:6.1	Nārīgaṇā candanasāralittā,
pv39:6.2	Ubhato vimānaṁ upasobhayanti;
pv39:6.3	Taṁ dissati suriyasamānavaṇṇaṁ,
pv39:6.4	So modati saggapatto vimāne”ti.
pv39:7.1	“Nandiyassāhaṁ bhariyā,
pv39:7.2	Agārinī sabbakulassa issarā;
pv39:7.3	Bhattu vimāne ramissāmi dānahaṁ,
pv39:7.4	Na patthaye nirayadassanāyā”ti.
pv39:8.1	“Eso te nirayo supāpadhamme,
pv39:8.2	Puññaṁ tayā akataṁ jīvaloke;
pv39:8.3	Na hi maccharī rosako pāpadhammo,
pv39:8.4	Saggūpagānaṁ labhati sahabyatan”ti.
pv39:9.1	“Kiṁ nu gūthañca muttañca,
pv39:9.2	asucī paṭidissati;
pv39:9.3	Duggandhaṁ kimidaṁ mīḷhaṁ,
pv39:9.4	kimetaṁ upavāyatī”ti.
pv39:10.1	“Esa saṁsavako nāma,
pv39:10.2	gambhīro sataporiso;
pv39:10.3	Yattha vassasahassāni,
pv39:10.4	tuvaṁ paccasi revate”ti.
pv39:11.1	“Kiṁ nu kāyena vācāya,
pv39:11.2	manasā dukkaṭaṁ kataṁ;
pv39:11.3	Kena saṁsavako laddho,
pv39:11.4	gambhīro sataporiso”ti.
pv39:12.1	“Samaṇe brāhmaṇe cāpi,
pv39:12.2	aññe vāpi vanibbake;
pv39:12.3	Musāvādena vañcesi,
pv39:12.4	taṁ pāpaṁ pakataṁ tayā.
pv39:13.1	Tena saṁsavako laddho,
pv39:13.2	gambhīro sataporiso;
pv39:13.3	Tattha vassasahassāni,
pv39:13.4	tuvaṁ paccasi revate.
pv39:14.1	Hatthepi chindanti athopi pāde,
pv39:14.2	Kaṇṇepi chindanti athopi nāsaṁ;
pv39:14.3	Athopi kākoḷagaṇā samecca,
pv39:14.4	Saṅgamma khādanti viphandamānan”ti.
pv39:15.1	“Sādhu kho maṁ paṭinetha,
pv39:15.2	kāhāmi kusalaṁ bahuṁ;
pv39:15.3	Dānena samacariyāya,
pv39:15.4	saṁyamena damena ca;
pv39:15.5	Yaṁ katvā sukhitā honti,
pv39:15.6	na ca pacchānutappare”ti.
pv39:16.1	“Pure tuvaṁ pamajjitvā,
pv39:16.2	idāni paridevasi;
pv39:16.3	Sayaṁ katānaṁ kammānaṁ,
pv39:16.4	vipākaṁ anubhossasī”ti.
pv39:17.1	“Ko devalokato manussalokaṁ,
pv39:17.2	Gantvāna puṭṭho me evaṁ vadeyya;
pv39:17.3	‘Nikkhittadaṇḍesu dadātha dānaṁ,
pv39:17.4	Acchādanaṁ seyya mathannapānaṁ;
pv39:17.5	Na hi maccharī rosako pāpadhammo,
pv39:17.6	Saggūpagānaṁ labhati sahabyataṁ’.
pv39:18.1	Sāhaṁ nūna ito gantvā,
pv39:18.2	yoniṁ laddhāna mānusiṁ;
pv39:18.3	Vadaññū sīlasampannā,
pv39:18.4	kāhāmi kusalaṁ bahuṁ;
pv39:18.5	Dānena samacariyāya,
pv39:18.6	saṁyamena damena ca.
pv39:19.1	Ārāmāni ca ropissaṁ,
pv39:19.2	dugge saṅkamanāni ca;
pv39:19.3	Papañca udapānañca,
pv39:19.4	vippasannena cetasā.
pv39:20.1	Cātuddasiṁ pañcadasiṁ,
pv39:20.2	yā ca pakkhassa aṭṭhamī;
pv39:20.3	Pāṭihāriyapakkhañca,
pv39:20.4	aṭṭhaṅgasusamāgataṁ.
pv39:21.1	Uposathaṁ upavasissaṁ,
pv39:21.2	sadā sīlesu saṁvutā;
pv39:21.3	Na ca dāne pamajjissaṁ,
pv39:21.4	sāmaṁ diṭṭhamidaṁ mayā”ti.
pv39:22.1	Iccevaṁ vippalapantiṁ,
pv39:22.2	phandamānaṁ tato tato;
pv39:22.3	Khipiṁsu niraye ghore,
pv39:22.4	uddhampādaṁ avaṁsiraṁ.
pv39:23.1	“Ahaṁ pure maccharinī ahosiṁ,
pv39:23.2	Paribhāsikā samaṇabrāhmaṇānaṁ;
pv39:23.3	Vitathena ca sāmikaṁ vañcayitvā,
pv39:23.4	Paccāmahaṁ niraye ghorarūpe”ti.
pv39:24.1	Revatīpetavatthu catutthaṁ.
pv40:0.1	Petavatthu
pv40:0.2	Mahāvagga
pv40:0.3	5. Ucchupetavatthu
pv40:1.1	“Idaṁ mama ucchuvanaṁ mahantaṁ,
pv40:1.2	Nibbattati puññaphalaṁ anappakaṁ;
pv40:1.3	Taṁ dāni me na paribhogameti,
pv40:1.4	Ācikkha bhante kissa ayaṁ vipāko.
pv40:2.1	Haññāmi khajjāmi ca vāyamāmi,
pv40:2.2	Parisakkāmi paribhuñjituṁ kiñci;
pv40:2.3	Svāhaṁ chinnathāmo kapaṇo lālapāmi,
pv40:2.4	Kissa kammassa ayaṁ vipāko.
pv40:3.1	Vighāto cāhaṁ paripatāmi chamāyaṁ,
pv40:3.2	Parivattāmi vāricarova ghamme;
pv40:3.3	Rudato ca me assukā niggalanti,
pv40:3.4	Ācikkha bhante kissa ayaṁ vipāko.
pv40:4.1	Chāto kilanto ca pipāsito ca,
pv40:4.2	Santassito sātasukhaṁ na vinde;
pv40:4.3	Pucchāmi taṁ etamatthaṁ bhadante,
pv40:4.4	Kathaṁ nu ucchuparibhogaṁ labheyyan”ti.
pv40:5.1	“Pure tuvaṁ kammamakāsi attanā,
pv40:5.2	Manussabhūto purimāya jātiyā;
pv40:5.3	Ahañca taṁ etamatthaṁ vadāmi,
pv40:5.4	Sutvāna tvaṁ etamatthaṁ vijāna.
pv40:6.1	Ucchuṁ tuvaṁ khādamāno payāto,
pv40:6.2	Puriso ca te piṭṭhito anvagacchi;
pv40:6.3	So ca taṁ paccāsanto kathesi,
pv40:6.4	Tassa tuvaṁ na kiñci ālapittha.
pv40:7.1	So ca taṁ abhaṇantaṁ ayāci,
pv40:7.2	‘Dehayya ucchun’ti ca taṁ avoca;
pv40:7.3	Tassa tuvaṁ piṭṭhito ucchuṁ adāsi,
pv40:7.4	Tassetaṁ kammassa ayaṁ vipāko.
pv40:8.1	Iṅgha tvaṁ gantvāna piṭṭhito gaṇheyyāsi,
pv40:8.2	Gahetvāna taṁ khādassu yāvadatthaṁ;
pv40:8.3	Teneva tvaṁ attamano bhavissasi,
pv40:8.4	Haṭṭho cudaggo ca pamodito cā”ti.
pv40:9.1	Gantvāna so piṭṭhito aggahesi,
pv40:9.2	Gahetvāna taṁ khādi yāvadatthaṁ;
pv40:9.3	Teneva so attamano ahosi,
pv40:9.4	Haṭṭho cudaggo ca pamodito cāti.
pv40:10.1	Ucchupetavatthu pañcamaṁ.
pv41:0.1	Petavatthu
pv41:0.2	Mahāvagga
pv41:0.3	6. Kumārapetavatthu
pv41:1.1	“Sāvatthi nāma nagaraṁ,
pv41:1.2	himavantassa passato;
pv41:1.3	Tattha āsuṁ dve kumārā,
pv41:1.4	rājaputtāti me sutaṁ.
pv41:2.1	Sammattā rajanīyesu,
pv41:2.2	kāmassādābhinandino;
pv41:2.3	Paccuppannasukhe giddhā,
pv41:2.4	na te passiṁsunāgataṁ.
pv41:3.1	Te cutā ca manussattā,
pv41:3.2	paralokaṁ ito gatā;
pv41:3.3	Tedha ghosentyadissantā,
pv41:3.4	pubbe dukkaṭamattano.
pv41:4.1	Bahūsu vata santesu,
pv41:4.2	deyyadhamme upaṭṭhite;
pv41:4.3	Nāsakkhimhā ca attānaṁ,
pv41:4.4	parittaṁ kātuṁ sukhāvahaṁ.
pv41:5.1	Kiṁ tato pāpakaṁ assa,
pv41:5.2	yaṁ no rājakulā cutā;
pv41:5.3	Upapannā pettivisayaṁ,
pv41:5.4	khuppipāsasamappitā.
pv41:6.1	Sāmino idha hutvāna,
pv41:6.2	honti asāmino tahiṁ;
pv41:6.3	Bhamanti khuppipāsāya,
pv41:6.4	manussā unnatonatā.
pv41:7.1	Etamādīnavaṁ ñatvā,
pv41:7.2	issaramadasambhavaṁ;
pv41:7.3	Pahāya issaramadaṁ,
pv41:7.4	bhave saggagato naro;
pv41:7.5	Kāyassa bhedā sappañño,
pv41:7.6	saggaṁ so upapajjatī”ti.
pv41:8.1	Kumārapetavatthu chaṭṭhaṁ.
pv42:0.1	Petavatthu
pv42:0.2	Mahāvagga
pv42:0.3	7. Rājaputtapetavatthu
pv42:1.1	Pubbe katānaṁ kammānaṁ,
pv42:1.2	vipāko mathaye manaṁ;
pv42:1.3	Rūpe sadde rase gandhe,
pv42:1.4	phoṭṭhabbe ca manorame.
pv42:2.1	Naccaṁ gītaṁ ratiṁ khiḍḍaṁ,
pv42:2.2	anubhutvā anappakaṁ;
pv42:2.3	Uyyāne paricaritvā,
pv42:2.4	pavisanto giribbajaṁ.
pv42:3.1	Isiṁ sunetta maddakkhi,
pv42:3.2	attadantaṁ samāhitaṁ;
pv42:3.3	Appicchaṁ hirisampannaṁ,
pv42:3.4	uñche pattagate rataṁ.
pv42:4.1	Hatthikkhandhato oruyha,
pv42:4.2	laddhā bhanteti cābravi;
pv42:4.3	Tassa pattaṁ gahetvāna,
pv42:4.4	uccaṁ paggayha khattiyo.
pv42:5.1	Thaṇḍile pattaṁ bhinditvā,
pv42:5.2	hasamāno apakkami;
pv42:5.3	“Rañño kitavassāhaṁ putto,
pv42:5.4	kiṁ maṁ bhikkhu karissasi”.
pv42:6.1	Tassa kammassa pharusassa,
pv42:6.2	vipāko kaṭuko ahu;
pv42:6.3	Yaṁ rājaputto vedesi,
pv42:6.4	nirayamhi samappito.
pv42:7.1	Chaḷeva caturāsīti,
pv42:7.2	vassāni navutāni ca;
pv42:7.3	Bhusaṁ dukkhaṁ nigacchittho,
pv42:7.4	niraye katakibbiso.
pv42:8.1	Uttānopi ca paccittha,
pv42:8.2	nikujjo vāmadakkhiṇo;
pv42:8.3	Uddhampādo ṭhito ceva,
pv42:8.4	ciraṁ bālo apaccatha.
pv42:9.1	Bahūni vassasahassāni,
pv42:9.2	pūgāni nahutāni ca;
pv42:9.3	Bhusaṁ dukkhaṁ nigacchittho,
pv42:9.4	niraye katakibbiso.
pv42:10.1	Etādisaṁ kho kaṭukaṁ,
pv42:10.2	appaduṭṭhappadosinaṁ;
pv42:10.3	Paccanti pāpakammantā,
pv42:10.4	isimāsajja subbataṁ.
pv42:11.1	So tattha bahuvassāni,
pv42:11.2	vedayitvā bahuṁ dukhaṁ;
pv42:11.3	Khuppipāsahato nāma,
pv42:11.4	peto āsi tato cuto.
pv42:12.1	Etamādīnavaṁ ñatvā,
pv42:12.2	issaramadasambhavaṁ;
pv42:12.3	Pahāya issaramadaṁ,
pv42:12.4	nivātamanuvattaye.
pv42:13.1	Diṭṭheva dhamme pāsaṁso,
pv42:13.2	yo buddhesu sagāravo;
pv42:13.3	Kāyassa bhedā sappañño,
pv42:13.4	saggaṁ so upapajjatīti.
pv42:14.1	Rājaputtapetavatthu sattamaṁ.
pv43:0.1	Petavatthu
pv43:0.2	Mahāvagga
pv43:0.3	8. Gūthakhādakapetavatthu
pv43:1.1	“Gūthakūpato uggantvā,
pv43:1.2	ko nu dīno patiṭṭhasi;
pv43:1.3	Nissaṁsayaṁ pāpakammanto,
pv43:1.4	kiṁ nu saddahase tuvan”ti.
pv43:2.1	“Ahaṁ bhadante petomhi,
pv43:2.2	duggato yamalokiko;
pv43:2.3	Pāpakammaṁ karitvāna,
pv43:2.4	petalokaṁ ito gato”.
pv43:3.1	“Kiṁ nu kāyena vācāya,
pv43:3.2	manasā dukkaṭaṁ kataṁ;
pv43:3.3	Kissa kammavipākena,
pv43:3.4	idaṁ dukkhaṁ nigacchasī”ti.
pv43:4.1	“Ahu āvāsiko mayhaṁ,
pv43:4.2	issukī kulamaccharī;
pv43:4.3	Ajjhāsito mayhaṁ ghare,
pv43:4.4	kadariyo paribhāsako.
pv43:5.1	Tassāhaṁ vacanaṁ sutvā,
pv43:5.2	bhikkhavo paribhāsisaṁ;
pv43:5.3	Tassa kammavipākena,
pv43:5.4	petalokaṁ ito gato”ti.
pv43:6.1	“Amitto mittavaṇṇena,
pv43:6.2	yo te āsi kulūpako;
pv43:6.3	Kāyassa bhedā duppañño,
pv43:6.4	kiṁ nu pecca gatiṁ gato”ti.
pv43:7.1	“Tassevāhaṁ pāpakammassa,
pv43:7.2	sīse tiṭṭhāmi matthake;
pv43:7.3	So ca paravisayaṁ patto,
pv43:7.4	mameva paricārako.
pv43:8.1	Yaṁ bhadante hadantaññe,
pv43:8.2	etaṁ me hoti bhojanaṁ;
pv43:8.3	Ahañca kho yaṁ hadāmi,
pv43:8.4	etaṁ so upajīvatī”ti.
pv43:9.1	Gūthakhādakapetavatthu aṭṭhamaṁ.
pv44:0.1	Petavatthu
pv44:0.2	Mahāvagga
pv44:0.3	9. Gūthakhādakapetivatthu
pv44:1.1	“Gūthakūpato uggantvā,
pv44:1.2	kā nu dīnā patiṭṭhasi;
pv44:1.3	Nissaṁsayaṁ pāpakammantā,
pv44:1.4	kiṁ nu saddahase tuvan”ti.
pv44:2.1	“Ahaṁ bhadante petīmhi,
pv44:2.2	duggatā yamalokikā;
pv44:2.3	Pāpakammaṁ karitvāna,
pv44:2.4	petalokaṁ ito gatā”ti.
pv44:3.1	“Kiṁ nu kāyena vācāya,
pv44:3.2	manasā dukkaṭaṁ kataṁ;
pv44:3.3	Kissa kammavipākena,
pv44:3.4	idaṁ dukkhaṁ nigacchasī”ti.
pv44:4.1	“Ahu āvāsiko mayhaṁ,
pv44:4.2	issukī kulamaccharī;
pv44:4.3	Ajjhāsito mayhaṁ ghare,
pv44:4.4	kadariyo paribhāsako.
pv44:5.1	Tassāhaṁ vacanaṁ sutvā,
pv44:5.2	bhikkhavo paribhāsisaṁ;
pv44:5.3	Tassa kammavipākena,
pv44:5.4	petalokaṁ ito gatā”ti.
pv44:6.1	“Amitto mittavaṇṇena,
pv44:6.2	yo te āsi kulūpako;
pv44:6.3	Kāyassa bhedā duppañño,
pv44:6.4	kiṁ nu pecca gatiṁ gato”ti.
pv44:7.1	“Tassevāhaṁ pāpakammassa,
pv44:7.2	sīse tiṭṭhāmi matthake;
pv44:7.3	So ca paravisayaṁ patto,
pv44:7.4	mameva paricārako.
pv44:8.1	Yaṁ bhadante hadantaññe,
pv44:8.2	etaṁ me hoti bhojanaṁ;
pv44:8.3	Ahañca kho yaṁ hadāmi,
pv44:8.4	etaṁ so upajīvatī”ti.
pv44:9.1	Gūthakhādakapetivatthu navamaṁ.
pv45:0.1	Petavatthu
pv45:0.2	Mahāvagga
pv45:0.3	10. Gaṇapetavatthu
pv45:1.1	“Naggā dubbaṇṇarūpāttha,
pv45:1.2	kisā dhamanisanthatā;
pv45:1.3	Upphāsulikā kisikā,
pv45:1.4	ke nu tumhettha mārisā”ti.
pv45:2.1	“Mayaṁ bhadante petāmhā,
pv45:2.2	duggatā yamalokikā;
pv45:2.3	Pāpakammaṁ karitvāna,
pv45:2.4	petalokaṁ ito gatā”ti.
pv45:3.1	“Kiṁ nu kāyena vācāya,
pv45:3.2	manasā dukkaṭaṁ kataṁ;
pv45:3.3	Kissa kammavipākena,
pv45:3.4	petalokaṁ ito gatā”ti.
pv45:4.1	“Anāvaṭesu titthesu,
pv45:4.2	vicinimhaddhamāsakaṁ;
pv45:4.3	Santesu deyyadhammesu,
pv45:4.4	dīpaṁ nākamha attano.
pv45:5.1	Nadiṁ upema tasitā,
pv45:5.2	rittakā parivattati;
pv45:5.3	Chāyaṁ upema uṇhesu,
pv45:5.4	ātapo parivattati.
pv45:6.1	Aggivaṇṇo ca no vāto,
pv45:6.2	ḍahanto upavāyati;
pv45:6.3	Etañca bhante arahāma,
pv45:6.4	aññañca pāpakaṁ tato.
pv45:7.1	Api yojanāni gacchāma,
pv45:7.2	chātā āhāragedhino;
pv45:7.3	Aladdhāva nivattāma,
pv45:7.4	aho no appapuññatā.
pv45:8.1	Chātā pamucchitā bhantā,
pv45:8.2	bhūmiyaṁ paṭisumbhitā;
pv45:8.3	Uttānā paṭikirāma,
pv45:8.4	avakujjā patāmase.
pv45:9.1	Te ca tattheva patitā,
pv45:9.2	bhūmiyaṁ paṭisumbhitā;
pv45:9.3	Uraṁ sīsañca ghaṭṭema,
pv45:9.4	aho no appapuññatā.
pv45:10.1	Etañca bhante arahāma,
pv45:10.2	aññañca pāpakaṁ tato;
pv45:10.3	Santesu deyyadhammesu,
pv45:10.4	dīpaṁ nākamha attano.
pv45:11.1	Te hi nūna ito gantvā,
pv45:11.2	yoniṁ laddhāna mānusiṁ;
pv45:11.3	Vadaññū sīlasampannā,
pv45:11.4	kāhāma kusalaṁ bahun”ti.
pv45:12.1	Gaṇapetavatthu dasamaṁ.
pv46:0.1	Petavatthu
pv46:0.2	Mahāvagga
pv46:0.3	11. Pāṭaliputtapetavatthu
pv46:1.1	“Diṭṭhā tayā nirayā tiracchānayoni,
pv46:1.2	Petā asurā athavāpi mānusā devā;
pv46:1.3	Sayamaddasa kammavipākamattano,
pv46:1.4	Nessāmi taṁ pāṭaliputtamakkhataṁ;
pv46:1.5	Tattha gantvā kusalaṁ karohi kammaṁ”.
pv46:2.1	“Atthakāmosi me yakkha,
pv46:2.2	hitakāmosi devate;
pv46:2.3	Karomi tuyhaṁ vacanaṁ,
pv46:2.4	tvaṁsi ācariyo mama.
pv46:3.1	Diṭṭhā mayā nirayā tiracchānayoni,
pv46:3.2	Petā asurā athavāpi mānusā devā;
pv46:3.3	Sayamaddasaṁ kammavipākamattano,
pv46:3.4	Kāhāmi puññāni anappakānī”ti.
pv46:4.1	Pāṭaliputtapetavatthu ekādasamaṁ.
pv47:0.1	Petavatthu
pv47:0.2	Mahāvagga
pv47:0.3	12. Ambavanapetavatthu
pv47:1.1	“Ayañca te pokkharaṇī surammā,
pv47:1.2	Samā sutitthā ca mahodakā ca;
pv47:1.3	Supupphitā bhamaragaṇānukiṇṇā,
pv47:1.4	Kathaṁ tayā laddhā ayaṁ manuññā.
pv47:2.1	Idañca te ambavanaṁ surammaṁ,
pv47:2.2	Sabbotukaṁ dhārayate phalāni;
pv47:2.3	Supupphitaṁ bhamaragaṇānukiṇṇaṁ,
pv47:2.4	Kathaṁ tayā laddhamidaṁ vimānaṁ”.
pv47:3.1	“Ambapakkaṁ dakaṁ yāgu,
pv47:3.2	sītacchāyā manoramā;
pv47:3.3	Dhītāya dinnadānena,
pv47:3.4	tena me idha labbhati”.
pv47:4.1	“Sandiṭṭhikaṁ kammaṁ evaṁ passatha,
pv47:4.2	Dānassa damassa saṁyamassa vipākaṁ;
pv47:4.3	Dāsī ahaṁ ayyakulesu hutvā,
pv47:4.4	Suṇisā homi agārassa issarā”ti.
pv47:5.1	Ambavanapetavatthu dvādasamaṁ.
pv48:0.1	Petavatthu
pv48:0.2	Mahāvagga
pv48:0.3	13. Akkharukkhapetavatthu
pv48:1.1	“Yaṁ dadāti na taṁ hoti,
pv48:1.2	Detheva dānaṁ datvā ubhayaṁ tarati;
pv48:1.3	Ubhayaṁ tena dānena gacchati,
pv48:1.4	Jāgaratha māpamajjathā”ti.
pv48:2.1	Akkharukkhapetavatthu terasamaṁ.
pv49:0.1	Petavatthu
pv49:0.2	Mahāvagga
pv49:0.3	14. Bhogasaṁharaṇapetavatthu
pv49:1.1	“Mayaṁ bhoge saṁharimhā,
pv49:1.2	samena visamena ca;
pv49:1.3	Te aññe paribhuñjanti,
pv49:1.4	mayaṁ dukkhassa bhāginī”ti.
pv49:2.1	Bhogasaṁharaṇapetavatthu cuddasamaṁ.
pv50:0.1	Petavatthu
pv50:0.2	Mahāvagga
pv50:0.3	15. Seṭṭhiputtapetavatthu
pv50:1.1	“Saṭṭhivassasahassāni,
pv50:1.2	paripuṇṇāni sabbaso;
pv50:1.3	Niraye paccamānānaṁ,
pv50:1.4	kadā anto bhavissati.
pv50:2.1	Natthi anto kuto anto,
pv50:2.2	na anto paṭidissati;
pv50:2.3	Tathā hi pakataṁ pāpaṁ,
pv50:2.4	tuyhaṁ mayhañca mārisā.
pv50:3.1	Dujjīvitamajīvamha,
pv50:3.2	ye sante na dadamhase;
pv50:3.3	Santesu deyyadhammesu,
pv50:3.4	dīpaṁ nākamha attano.
pv50:4.1	Sohaṁ nūna ito gantvā,
pv50:4.2	yoniṁ laddhāna mānusiṁ;
pv50:4.3	Vadaññū sīlasampanno,
pv50:4.4	kāhāmi kusalaṁ bahun”ti.
pv50:5.1	Seṭṭhiputtapetavatthu pannarasamaṁ.
pv51:0.1	Petavatthu
pv51:0.2	Mahāvagga
pv51:0.3	16. Saṭṭhikūṭapetavatthu
pv51:1.1	“Kiṁ nu ummattarūpova,
pv51:1.2	Migo bhantova dhāvasi;
pv51:1.3	Nissaṁsayaṁ pāpakammanto,
pv51:1.4	Kiṁ nu saddāyase tuvan”ti.
pv51:2.1	“Ahaṁ bhadante petomhi,
pv51:2.2	duggato yamalokiko;
pv51:2.3	Pāpakammaṁ karitvāna,
pv51:2.4	petalokaṁ ito gato.
pv51:3.1	Saṭṭhi kūṭasahassāni,
pv51:3.2	paripuṇṇāni sabbaso;
pv51:3.3	Sīse mayhaṁ nipatanti,
pv51:3.4	te bhindanti ca matthakan”ti.
pv51:4.1	“Kiṁ nu kāyena vācāya,
pv51:4.2	manasā dukkaṭaṁ kataṁ;
pv51:4.3	Kissa kammavipākena,
pv51:4.4	idaṁ dukkhaṁ nigacchasi.
pv51:5.1	Saṭṭhi kūṭasahassāni,
pv51:5.2	paripuṇṇāni sabbaso;
pv51:5.3	Sīse tuyhaṁ nipatanti,
pv51:5.4	te bhindanti ca matthakan”ti.
pv51:6.1	“Athaddasāsiṁ sambuddhaṁ,
pv51:6.2	sunettaṁ bhāvitindriyaṁ;
pv51:6.3	Nisinnaṁ rukkhamūlasmiṁ,
pv51:6.4	jhāyantaṁ akutobhayaṁ.
pv51:7.1	Sālittakappahārena,
pv51:7.2	bhindissaṁ tassa matthakaṁ;
pv51:7.3	Tassa kammavipākena,
pv51:7.4	idaṁ dukkhaṁ nigacchisaṁ.
pv51:8.1	Saṭṭhi kūṭasahassāni,
pv51:8.2	Paripuṇṇāni sabbaso;
pv51:8.3	Sīse mayhaṁ nipatanti,
pv51:8.4	Te bhindanti ca matthakan”ti.
pv51:9.1	“Dhammena te kāpurisa,
pv51:9.2	saṭṭhikūṭasahassāni;
pv51:9.3	Paripuṇṇāni sabbaso,
pv51:9.4	sīse tuyhaṁ nipatanti;
pv51:9.5	Te bhindanti ca matthakan”ti.
pv51:10.1	Saṭṭhikūṭapetavatthu soḷasamaṁ.
pv51:11.1	Mahāvaggo catuttho.
pv51:12.1	Tassuddānaṁ
pv51:13.1	Ambasakkaro serīsako,
pv51:13.2	piṅgalo revati ucchu;
pv51:13.3	Dve kumārā duve gūthā,
pv51:13.4	gaṇapāṭaliambavanaṁ.
pv51:14.1	Akkharukkhabhogasaṁharā,
pv51:14.2	seṭṭhiputtasaṭṭhikūṭā;
pv51:14.3	Iti soḷasavatthūni,
pv51:14.4	vaggo tena pavuccati.
pv51:15.1	Atha vagguddānaṁ
pv51:16.1	Urago uparivaggo,
pv51:16.2	cūḷamahāti catudhā;
pv51:16.3	Vatthūni ekapaññāsaṁ,
pv51:16.4	catudhā bhāṇavārato.
pv51:17.1	Petavatthupāḷi niṭṭhitā.