# Jātaka — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

ja1:0.1	Jātaka
ja1:0.2	Ekakanipāta
ja1:0.3	Apaṇṇakavagga
ja1:0.4	1. Apaṇṇakajātaka
ja1:1.1	Namo tassa Bhagavato Arahato Sammāsambuddhassa.
ja1:2.1	“Apaṇṇakaṁ ṭhānameke,
ja1:2.2	Dutiyaṁ āhu takkikā;
ja1:2.3	Etadaññāya medhāvī,
ja1:2.4	Taṁ gaṇhe yadapaṇṇakan”ti.
ja1:3.1	Apaṇṇakajātakaṁ paṭhamaṁ.
ja2:0.1	Jātaka
ja2:0.2	Ekakanipāta
ja2:0.3	Apaṇṇakavagga
ja2:0.4	2. Vaṇṇupathajātaka
ja2:1.1	“Akilāsuno vaṇṇupathe khaṇantā,
ja2:1.2	Udaṅgaṇe tattha papaṁ avinduṁ;
ja2:1.3	Evaṁ munī viriyabalūpapanno,
ja2:1.4	Akilāsu vinde hadayassa santin”ti.
ja2:2.1	Vaṇṇupathajātakaṁ dutiyaṁ.
ja3:0.1	Jātaka
ja3:0.2	Ekakanipāta
ja3:0.3	Apaṇṇakavagga
ja3:0.4	3. Serivavāṇijajātaka
ja3:1.1	“Idha ce naṁ virādhesi,
ja3:1.2	saddhammassa niyāmataṁ;
ja3:1.3	Ciraṁ tvaṁ anutappesi,
ja3:1.4	serivāyaṁva vāṇijo”ti.
ja3:2.1	Serivavāṇijajātakaṁ tatiyaṁ.
ja4:0.1	Jātaka
ja4:0.2	Ekakanipāta
ja4:0.3	Apaṇṇakavagga
ja4:0.4	4. Cūḷaseṭṭhijātaka
ja4:1.1	“Appakenapi medhāvī,
ja4:1.2	pābhatena vicakkhaṇo;
ja4:1.3	Samuṭṭhāpeti attānaṁ,
ja4:1.4	aṇuṁ aggiṁva sandhaman”ti.
ja4:2.1	Cūḷaseṭṭhijātakaṁ catutthaṁ.
ja5:0.1	Jātaka
ja5:0.2	Ekakanipāta
ja5:0.3	Apaṇṇakavagga
ja5:0.4	5. Taṇḍulanāḷijātaka
ja5:1.1	“Kimagghati taṇḍulanāḷikāyaṁ,
ja5:1.2	Assāna mūlāya vadehi rāja;
ja5:1.3	Bārāṇasiṁ santarabāhirantaṁ,
ja5:1.4	Ayamagghati taṇḍulanāḷikā”ti.
ja5:2.1	Taṇḍulanāḷijātakaṁ pañcamaṁ.
ja6:0.1	Jātaka
ja6:0.2	Ekakanipāta
ja6:0.3	Apaṇṇakavagga
ja6:0.4	6. Devadhammajātaka
ja6:1.1	“Hiriottappasampannā,
ja6:1.2	sukkadhammasamāhitā;
ja6:1.3	Santo sappurisā loke,
ja6:1.4	devadhammāti vuccare”ti.
ja6:2.1	Devadhammajātakaṁ chaṭṭhaṁ.
ja7:0.1	Jātaka
ja7:0.2	Ekakanipāta
ja7:0.3	Apaṇṇakavagga
ja7:0.4	7. Kaṭṭhahārijātaka
ja7:1.1	“Putto tyāhaṁ mahārāja,
ja7:1.2	tvaṁ maṁ posa janādhipa;
ja7:1.3	Aññepi devo poseti,
ja7:1.4	kiñca devo sakaṁ pajan”ti.
ja7:2.1	Kaṭṭhahārijātakaṁ sattamaṁ.
ja8:0.1	Jātaka
ja8:0.2	Ekakanipāta
ja8:0.3	Apaṇṇakavagga
ja8:0.4	8. Gāmaṇijātaka
ja8:1.1	“Api ataramānānaṁ,
ja8:1.2	phalāsāva samijjhati;
ja8:1.3	Vipakkabrahmacariyosmi,
ja8:1.4	evaṁ jānāhi gāmaṇī”ti.
ja8:2.1	Gāmaṇijātakaṁ aṭṭhamaṁ.
ja9:0.1	Jātaka
ja9:0.2	Ekakanipāta
ja9:0.3	Apaṇṇakavagga
ja9:0.4	9. Maghadevajātaka
ja9:1.1	“Uttamaṅgaruhā mayhaṁ,
ja9:1.2	ime jātā vayoharā;
ja9:1.3	Pātubhūtā devadūtā,
ja9:1.4	pabbajjāsamayo mamā”ti.
ja9:2.1	Maghadevajātakaṁ navamaṁ.
ja10:0.1	Jātaka
ja10:0.2	Ekakanipāta
ja10:0.3	Apaṇṇakavagga
ja10:0.4	10. Sukhavihārijātaka
ja10:1.1	“Yañca aññe na rakkhanti,
ja10:1.2	yo ca aññe na rakkhati;
ja10:1.3	Sa ve rāja sukhaṁ seti,
ja10:1.4	kāmesu anapekkhavā”ti.
ja10:2.1	Sukhavihārijātakaṁ dasamaṁ.
ja10:2.2	Apaṇṇakavaggo paṭhamo.
ja10:3.1	Tassuddānaṁ
ja10:4.1	Varāpaṇṇaka vaṇṇupatha serivaro,
ja10:4.2	Suvicakkhaṇa taṇḍulanāḷikassā;
ja10:4.3	Hiri puttavaruttagāmaṇinā,
ja10:4.4	Yo ca na rakkhati tena dasāti.
ja11:0.1	Jātaka
ja11:0.2	Ekakanipāta
ja11:0.3	Sīlavagga
ja11:0.4	1. Lakkhaṇamigajātaka
ja11:1.1	“Hoti sīlavataṁ attho,
ja11:1.2	paṭisanthāravuttinaṁ;
ja11:1.3	Lakkhaṇaṁ passa āyantaṁ,
ja11:1.4	ñātisaṅghapurakkhataṁ;
ja11:1.5	Atha passasimaṁ kāḷaṁ,
ja11:1.6	suvihīnaṁva ñātibhī”ti.
ja11:2.1	Lakkhaṇamigajātakaṁ paṭhamaṁ.
ja12:0.1	Jātaka
ja12:0.2	Ekakanipāta
ja12:0.3	Sīlavagga
ja12:0.4	2. Nigrodhamigajātaka
ja12:1.1	“Nigrodhameva seveyya,
ja12:1.2	na sākhamupasaṁvase;
ja12:1.3	Nigrodhasmiṁ mataṁ seyyo,
ja12:1.4	yañce sākhasmi jīvitan”ti.
ja12:2.1	Nigrodhamigajātakaṁ dutiyaṁ.
ja13:0.1	Jātaka
ja13:0.2	Ekakanipāta
ja13:0.3	Sīlavagga
ja13:0.4	3. Kaṇḍijātaka
ja13:1.1	“Dhiratthu kaṇḍinaṁ sallaṁ,
ja13:1.2	purisaṁ gāḷhavedhinaṁ;
ja13:1.3	Dhiratthu taṁ janapadaṁ,
ja13:1.4	yatthitthī pariṇāyikā;
ja13:1.5	Te cāpi dhikkitā sattā,
ja13:1.6	ye itthīnaṁ vasaṅgatā”ti.
ja13:2.1	Kaṇḍijātakaṁ tatiyaṁ.
ja14:0.1	Jātaka
ja14:0.2	Ekakanipāta
ja14:0.3	Sīlavagga
ja14:0.4	4. Vātamigajātaka
ja14:1.1	“Na kiratthi rasehi pāpiyo,
ja14:1.2	Āvāsehi va santhavehi vā;
ja14:1.3	Vātamigaṁ gahananissitaṁ,
ja14:1.4	Vasamānesi rasehi sañjayo”ti.
ja14:2.1	Vātamigajātakaṁ catutthaṁ.
ja15:0.1	Jātaka
ja15:0.2	Ekakanipāta
ja15:0.3	Sīlavagga
ja15:0.4	5. Kharādiyajātaka
ja15:1.1	“Aṭṭhakkhuraṁ kharādiye,
ja15:1.2	migaṁ vaṅkātivaṅkinaṁ;
ja15:1.3	Sattahi kālātikkantaṁ,
ja15:1.4	na naṁ ovaditussahe”ti.
ja15:2.1	Kharādiyajātakaṁ pañcamaṁ.
ja16:0.1	Jātaka
ja16:0.2	Ekakanipāta
ja16:0.3	Sīlavagga
ja16:0.4	6. Tipallatthamigajātaka
ja16:1.1	“Migaṁ tipallatthamanekamāyaṁ,
ja16:1.2	Aṭṭhakkhuraṁ aḍḍharattāpapāyiṁ;
ja16:1.3	Ekena sotena chamāssasanto,
ja16:1.4	Chahi kalāhitibhoti bhāgineyyo”ti.
ja16:2.1	Tipallatthamigajātakaṁ chaṭṭhaṁ.
ja17:0.1	Jātaka
ja17:0.2	Ekakanipāta
ja17:0.3	Sīlavagga
ja17:0.4	7. Mālutajātaka
ja17:1.1	“Kāḷe vā yadi vā juṇhe,
ja17:1.2	yadā vāyati māluto;
ja17:1.3	Vātajāni hi sītāni,
ja17:1.4	ubhotthamaparājitā”ti.
ja17:2.1	Mālutajātakaṁ sattamaṁ.
ja18:0.1	Jātaka
ja18:0.2	Ekakanipāta
ja18:0.3	Sīlavagga
ja18:0.4	8. Matakabhattajātaka
ja18:1.1	“Evañce sattā jāneyyuṁ,
ja18:1.2	dukkhāyaṁ jātisambhavo;
ja18:1.3	Na pāṇo pāṇinaṁ haññe,
ja18:1.4	pāṇaghātī hi socatī”ti.
ja18:2.1	Matakabhattajātakaṁ aṭṭhamaṁ.
ja19:0.1	Jātaka
ja19:0.2	Ekakanipāta
ja19:0.3	Sīlavagga
ja19:0.4	9. Āyācitabhattajātaka
ja19:1.1	“Sace mucce pecca mucce,
ja19:1.2	Muccamāno hi bajjhati;
ja19:1.3	Na hevaṁ dhīrā muccanti,
ja19:1.4	Mutti bālassa bandhanan”ti.
ja19:2.1	Āyācitabhattajātakaṁ navamaṁ.
ja20:0.1	Jātaka
ja20:0.2	Ekakanipāta
ja20:0.3	Sīlavagga
ja20:0.4	10. Naḷapānajātaka
ja20:1.1	“Disvā padamanuttiṇṇaṁ,
ja20:1.2	Disvānotaritaṁ padaṁ;
ja20:1.3	Naḷena vāriṁ pissāma,
ja20:1.4	Neva maṁ tvaṁ vadhissasī”ti.
ja20:2.1	Naḷapānajātakaṁ dasamaṁ.
ja20:2.2	Sīlavaggo dutiyo.
ja20:3.1	Tassuddānaṁ
ja20:4.1	Atha lakkhaṇa sākha dhiratthu puna,
ja20:4.2	Na kiratthi rasehi kharādiyā;
ja20:4.3	Atibhoti vara māluta pāṇa,
ja20:4.4	Muccena naḷaavhayanena bhavanti dasāti.
ja21:0.1	Jātaka
ja21:0.2	Ekakanipāta
ja21:0.3	Kuruṅgavagga
ja21:0.4	1. Kuruṅgamigajātaka
ja21:1.1	“Ñātametaṁ kuruṅgassa,
ja21:1.2	yaṁ tvaṁ sepaṇṇi siyyasi;
ja21:1.3	Aññaṁ sepaṇṇi gacchāmi,
ja21:1.4	na me te ruccate phalan”ti.
ja21:2.1	Kuruṅgamigajātakaṁ paṭhamaṁ.
ja22:0.1	Jātaka
ja22:0.2	Ekakanipāta
ja22:0.3	Kuruṅgavagga
ja22:0.4	2. Kukkurajātaka
ja22:1.1	“Ye kukkurā rājakulamhi vaddhā,
ja22:1.2	Koleyyakā vaṇṇabalūpapannā;
ja22:1.3	Teme na vajjhā mayamasma vajjhā,
ja22:1.4	Nāyaṁ saghaccā dubbalaghātikāyan”ti.
ja22:2.1	Kukkurajātakaṁ dutiyaṁ.
ja23:0.1	Jātaka
ja23:0.2	Ekakanipāta
ja23:0.3	Kuruṅgavagga
ja23:0.4	3. Bhojājānīyajātaka
ja23:1.1	“Api passena semāno,
ja23:1.2	sallebhi sallalīkato;
ja23:1.3	Seyyova vaḷavā bhojjo,
ja23:1.4	yuñja maññeva sārathī”ti.
ja23:2.1	Bhojājānīyajātakaṁ tatiyaṁ.
ja24:0.1	Jātaka
ja24:0.2	Ekakanipāta
ja24:0.3	Kuruṅgavagga
ja24:0.4	4. Ājaññajātaka
ja24:1.1	“Yadā yadā yattha yadā,
ja24:1.2	yattha yattha yadā yadā;
ja24:1.3	Ājañño kurute vegaṁ,
ja24:1.4	hāyanti tattha vāḷavā”ti.
ja24:2.1	Ājaññajātakaṁ catutthaṁ.
ja25:0.1	Jātaka
ja25:0.2	Ekakanipāta
ja25:0.3	Kuruṅgavagga
ja25:0.4	5. Titthajātaka
ja25:1.1	“Aññamaññehi titthehi,
ja25:1.2	assaṁ pāyehi sārathi;
ja25:1.3	Accāsanassa puriso,
ja25:1.4	pāyāsassapi tappatī”ti.
ja25:2.1	Titthajātakaṁ pañcamaṁ.
ja26:0.1	Jātaka
ja26:0.2	Ekakanipāta
ja26:0.3	Kuruṅgavagga
ja26:0.4	6. Mahiḷāmukhajātaka
ja26:1.1	“Purāṇacorāna vaco nisamma,
ja26:1.2	Mahiḷāmukho pothayamanvacārī;
ja26:1.3	Susaññatānañhi vaco nisamma,
ja26:1.4	Gajuttamo sabbaguṇesu aṭṭhā”ti.
ja26:2.1	Mahiḷāmukhajātakaṁ chaṭṭhaṁ.
ja27:0.1	Jātaka
ja27:0.2	Ekakanipāta
ja27:0.3	Kuruṅgavagga
ja27:0.4	7. Abhiṇhajātaka
ja27:1.1	“Nālaṁ kabaḷaṁ padātave,
ja27:1.2	Na ca piṇḍaṁ na kuse na ghaṁsituṁ;
ja27:1.3	Maññāmi abhiṇhadassanā,
ja27:1.4	Nāgo snehamakāsi kukkure”ti.
ja27:2.1	Abhiṇhajātakaṁ sattamaṁ.
ja28:0.1	Jātaka
ja28:0.2	Ekakanipāta
ja28:0.3	Kuruṅgavagga
ja28:0.4	8. Nandivisālajātaka
ja28:1.1	“Manuññameva bhāseyya,
ja28:1.2	nāmanuññaṁ kudācanaṁ;
ja28:1.3	Manuññaṁ bhāsamānassa,
ja28:1.4	garuṁ bhāraṁ udaddhari;
ja28:1.5	Dhanañca naṁ alābhesi,
ja28:1.6	tena cattamano ahū”ti.
ja28:2.1	Nandivisālajātakaṁ aṭṭhamaṁ.
ja29:0.1	Jātaka
ja29:0.2	Ekakanipāta
ja29:0.3	Kuruṅgavagga
ja29:0.4	9. Kaṇhajātaka
ja29:1.1	“Yato yato garu dhuraṁ,
ja29:1.2	yato gambhīravattanī;
ja29:1.3	Tadāssu kaṇhaṁ yuñjanti,
ja29:1.4	svāssu taṁ vahate dhuran”ti.
ja29:2.1	Kaṇhajātakaṁ navamaṁ.
ja30:0.1	Jātaka
ja30:0.2	Ekakanipāta
ja30:0.3	Kuruṅgavagga
ja30:0.4	10. Munikajātaka
ja30:1.1	“Mā munikassa pihayi,
ja30:1.2	āturannāni bhuñjati;
ja30:1.3	Appossukko bhusaṁ khāda,
ja30:1.4	etaṁ dīghāyulakkhaṇan”ti.
ja30:2.1	Munikajātakaṁ dasamaṁ.
ja30:2.2	Kuruṅgavaggo tatiyo.
ja30:3.1	Tassuddānaṁ
ja30:4.1	Kuruṅgassa kukkuragojavaro,
ja30:4.2	Puna vāḷavassasirivhayano;
ja30:4.3	Mahiḷāmukhanāmanuññavaro,
ja30:4.4	Vahate dhura munikena dasāti.
ja31:0.1	Jātaka
ja31:0.2	Ekakanipāta
ja31:0.3	Kulāvakavagga
ja31:0.4	1. Kulāvakajātaka
ja31:1.1	“Kulāvakā mātali simbalismiṁ,
ja31:1.2	Īsāmukhena parivajjayassu;
ja31:1.3	Kāmaṁ cajāma asuresu pāṇaṁ,
ja31:1.4	Māme dijā vikkulāvā ahesun”ti.
ja31:2.1	Kulāvakajātakaṁ paṭhamaṁ.
ja32:0.1	Jātaka
ja32:0.2	Ekakanipāta
ja32:0.3	Kulāvakavagga
ja32:0.4	2. Naccajātaka
ja32:1.1	“Rudaṁ manuññaṁ rucirā ca piṭṭhi,
ja32:1.2	Veḷuriyavaṇṇūpanibhā ca gīvā;
ja32:1.3	Byāmamattāni ca pekhuṇāni,
ja32:1.4	Naccena te dhītaraṁ no dadāmī”ti.
ja32:2.1	Naccajātakaṁ dutiyaṁ.
ja33:0.1	Jātaka
ja33:0.2	Ekakanipāta
ja33:0.3	Kulāvakavagga
ja33:0.4	3. Sammodamānajātaka
ja33:1.1	“Sammodamānā gacchanti,
ja33:1.2	jālamādāya pakkhino;
ja33:1.3	Yadā te vivadissanti,
ja33:1.4	tadā ehinti me vasan”ti.
ja33:2.1	Sammodamānajātakaṁ tatiyaṁ.
ja34:0.1	Jātaka
ja34:0.2	Ekakanipāta
ja34:0.3	Kulāvakavagga
ja34:0.4	4. Macchajātaka
ja34:1.1	“Na maṁ sītaṁ na maṁ uṇhaṁ,
ja34:1.2	na maṁ jālasmi bādhanaṁ;
ja34:1.3	Yañca maṁ maññate macchī,
ja34:1.4	aññaṁ so ratiyā gato”ti.
ja34:2.1	Macchajātakaṁ catutthaṁ.
ja35:0.1	Jātaka
ja35:0.2	Ekakanipāta
ja35:0.3	Kulāvakavagga
ja35:0.4	5. Vaṭṭakajātaka
ja35:1.1	“Santi pakkhā apatanā,
ja35:1.2	santi pādā avañcanā;
ja35:1.3	Mātāpitā ca nikkhantā,
ja35:1.4	jātaveda paṭikkamā”ti.
ja35:2.1	Vaṭṭakajātakaṁ pañcamaṁ.
ja36:0.1	Jātaka
ja36:0.2	Ekakanipāta
ja36:0.3	Kulāvakavagga
ja36:0.4	6. Sakuṇajātaka
ja36:1.1	“Yaṁ nissitā jagatiruhaṁ vihaṅgamā,
ja36:1.2	Svāyaṁ aggiṁ pamuñcati;
ja36:1.3	Disā bhajatha vakkaṅgā,
ja36:1.4	Jātaṁ saraṇato bhayan”ti.
ja36:2.1	Sakuṇajātakaṁ chaṭṭhaṁ.
ja37:0.1	Jātaka
ja37:0.2	Ekakanipāta
ja37:0.3	Kulāvakavagga
ja37:0.4	7. Tittirajātaka
ja37:1.1	“Ye vuḍḍhamapacāyanti,
ja37:1.2	narā dhammassa kovidā;
ja37:1.3	Diṭṭheva dhamme pāsaṁsā,
ja37:1.4	samparāye ca suggatī”ti.
ja37:2.1	Tittirajātakaṁ sattamaṁ.
ja38:0.1	Jātaka
ja38:0.2	Ekakanipāta
ja38:0.3	Kulāvakavagga
ja38:0.4	8. Bakajātaka
ja38:1.1	“Nāccantaṁ nikatippañño,
ja38:1.2	nikatyā sukhamedhati;
ja38:1.3	Ārādheti nikatippañño,
ja38:1.4	bako kakkaṭakāmivā”ti.
ja38:2.1	Bakajātakaṁ aṭṭhamaṁ.
ja39:0.1	Jātaka
ja39:0.2	Ekakanipāta
ja39:0.3	Kulāvakavagga
ja39:0.4	9. Nandajātaka
ja39:1.1	“Maññe sovaṇṇayo rāsi,
ja39:1.2	soṇṇamālā ca nandako;
ja39:1.3	Yattha dāso āmajāto,
ja39:1.4	ṭhito thullāni gajjatī”ti.
ja39:2.1	Nandajātakaṁ navamaṁ.
ja40:0.1	Jātaka
ja40:0.2	Ekakanipāta
ja40:0.3	Kulāvakavagga
ja40:0.4	10. Khadiraṅgārajātaka
ja40:1.1	“Kāmaṁ patāmi nirayaṁ,
ja40:1.2	uddhampādo avaṁsiro;
ja40:1.3	Nānariyaṁ karissāmi,
ja40:1.4	handa piṇḍaṁ paṭiggahā”ti.
ja40:2.1	Khadiraṅgārajātakaṁ dasamaṁ.
ja40:2.2	Kulāvakavaggo catuttho.
ja40:3.1	Tassuddānaṁ
ja40:4.1	Sirimātali dhītara pakkhivaro,
ja40:4.2	Ratiyāgato mātāpitā ca puna;
ja40:4.3	Jagatīruha vuḍḍha sukakkaṭako,
ja40:4.4	Tathā nandakapiṇḍavarena dasāti.
ja41:0.1	Jātaka
ja41:0.2	Ekakanipāta
ja41:0.3	Atthakāmavagga
ja41:0.4	1. Losakajātaka
ja41:1.1	“Yo atthakāmassa hitānukampino,
ja41:1.2	Ovajjamāno na karoti sāsanaṁ;
ja41:1.3	Ajiyā pādamolamba,
ja41:1.4	Mittako viya socatī”ti.
ja41:2.1	Losakajātakaṁ paṭhamaṁ.
ja42:0.1	Jātaka
ja42:0.2	Ekakanipāta
ja42:0.3	Atthakāmavagga
ja42:0.4	2. Kapotajātaka
ja42:1.1	“Yo atthakāmassa hitānukampino,
ja42:1.2	Ovajjamāno na karoti sāsanaṁ;
ja42:1.3	Kapotakassa vacanaṁ akatvā,
ja42:1.4	Amittahatthatthagatova setī”ti.
ja42:2.1	Kapotajātakaṁ dutiyaṁ.
ja43:0.1	Jātaka
ja43:0.2	Ekakanipāta
ja43:0.3	Atthakāmavagga
ja43:0.4	3. Veḷukajātaka
ja43:1.1	“Yo atthakāmassa hitānukampino,
ja43:1.2	Ovajjamāno na karoti sāsanaṁ;
ja43:1.3	Evaṁ so nihato seti,
ja43:1.4	Veḷukassa yathā pitā”ti.
ja43:2.1	Veḷukajātakaṁ tatiyaṁ.
ja44:0.1	Jātaka
ja44:0.2	Ekakanipāta
ja44:0.3	Atthakāmavagga
ja44:0.4	4. Makasajātaka
ja44:1.1	“Seyyo amitto matiyā upeto,
ja44:1.2	Na tveva mitto mativippahīno;
ja44:1.3	Makasaṁ vadhissanti hi eḷamūgo,
ja44:1.4	Putto pitu abbhidā uttamaṅgan”ti.
ja44:2.1	Makasajātakaṁ catutthaṁ.
ja45:0.1	Jātaka
ja45:0.2	Ekakanipāta
ja45:0.3	Atthakāmavagga
ja45:0.4	5. Rohiṇijātaka
ja45:1.1	“Seyyo amitto medhāvī,
ja45:1.2	Yañce bālānukampako;
ja45:1.3	Passa rohiṇikaṁ jammiṁ,
ja45:1.4	Mātaraṁ hantvāna socatī”ti.
ja45:2.1	Rohiṇijātakaṁ pañcamaṁ.
ja46:0.1	Jātaka
ja46:0.2	Ekakanipāta
ja46:0.3	Atthakāmavagga
ja46:0.4	6. Ārāmadūsakajātaka
ja46:1.1	“Na ve anatthakusalena,
ja46:1.2	atthacariyā sukhāvahā;
ja46:1.3	Hāpeti atthaṁ dummedho,
ja46:1.4	kapi ārāmiko yathā”ti.
ja46:2.1	Ārāmadūsakajātakaṁ chaṭṭhaṁ.
ja47:0.1	Jātaka
ja47:0.2	Ekakanipāta
ja47:0.3	Atthakāmavagga
ja47:0.4	7. Vāruṇidūsakajātaka
ja47:1.1	“Na ve anatthakusalena,
ja47:1.2	atthacariyā sukhāvahā;
ja47:1.3	Hāpeti atthaṁ dummedho,
ja47:1.4	koṇḍañño vāruṇiṁ yathā”ti.
ja47:2.1	Vāruṇidūsakajātakaṁ sattamaṁ.
ja48:0.1	Jātaka
ja48:0.2	Ekakanipāta
ja48:0.3	Atthakāmavagga
ja48:0.4	8. Vedabbajātaka
ja48:1.1	“Anupāyena yo atthaṁ,
ja48:1.2	Icchati so vihaññati;
ja48:1.3	Cetā haniṁsu vedabbaṁ,
ja48:1.4	Sabbe te byasanamajjhagūti.
ja48:2.1	Vedabbajātakaṁ aṭṭhamaṁ.
ja49:0.1	Jātaka
ja49:0.2	Ekakanipāta
ja49:0.3	Atthakāmavagga
ja49:0.4	9. Nakkhattajātaka
ja49:1.1	Nakkhattaṁ paṭimānentaṁ,
ja49:1.2	attho bālaṁ upaccagā;
ja49:1.3	Attho atthassa nakkhattaṁ,
ja49:1.4	kiṁ karissanti tārakā”ti.
ja49:2.1	Nakkhattajātakaṁ navamaṁ.
ja50:0.1	Jātaka
ja50:0.2	Ekakanipāta
ja50:0.3	Atthakāmavagga
ja50:0.4	10. Dummedhajātaka
ja50:1.1	“Dummedhānaṁ sahassena,
ja50:1.2	yañño me upayācito;
ja50:1.3	Idāni khohaṁ yajissāmi,
ja50:1.4	bahu adhammiko jano”ti.
ja50:2.1	Dummedhajātakaṁ dasamaṁ.
ja50:2.2	Atthakāmavaggo pañcamo.
ja50:3.1	Tassuddānaṁ
ja50:4.1	Atha mittaka mātu kapotavaro,
ja50:4.2	Tathā veḷuka eḷamūgo rohiṇī;
ja50:4.3	Kapi vāruṇi cetacarā ca puna,
ja50:4.4	Tathā tāraka yaññavarena dasāti.
ja50:5.1	Paṭhamo paṇṇāsako.
ja51:0.1	Jātaka
ja51:0.2	Ekakanipāta
ja51:0.3	Āsīsavagga
ja51:0.4	1. Mahāsīlavajātaka
ja51:1.1	“Āsīsetheva puriso,
ja51:1.2	na nibbindeyya paṇḍito;
ja51:1.3	Passāmi vohaṁ attānaṁ,
ja51:1.4	yathā icchiṁ tathā ahū”ti.
ja51:2.1	Mahāsīlavajātakaṁ paṭhamaṁ.
ja52:0.1	Jātaka
ja52:0.2	Ekakanipāta
ja52:0.3	Āsīsavagga
ja52:0.4	2. Cūḷajanakajātaka
ja52:1.1	“Vāyametheva puriso,
ja52:1.2	na nibbindeyya paṇḍito;
ja52:1.3	Passāmi vohaṁ attānaṁ,
ja52:1.4	udakā thalamubbhatan”ti.
ja52:2.1	Cūḷajanakajātakaṁ dutiyaṁ.
ja53:0.1	Jātaka
ja53:0.2	Ekakanipāta
ja53:0.3	Āsīsavagga
ja53:0.4	3. Puṇṇapātijātaka
ja53:1.1	“Tatheva puṇṇā pātiyo,
ja53:1.2	aññāyaṁ vattate kathā;
ja53:1.3	Ākāraṇena jānāmi,
ja53:1.4	na cāyaṁ bhaddikā surā”ti.
ja53:2.1	Puṇṇapātijātakaṁ tatiyaṁ.
ja54:0.1	Jātaka
ja54:0.2	Ekakanipāta
ja54:0.3	Āsīsavagga
ja54:0.4	4. Kiṁphalajātaka
ja54:1.1	“Nāyaṁ rukkho durāruho,
ja54:1.2	napi gāmato ārakā;
ja54:1.3	Ākāraṇena jānāmi,
ja54:1.4	nāyaṁ sāduphalo dumo”ti.
ja54:2.1	Kiṁphalajātakaṁ catutthaṁ.
ja55:0.1	Jātaka
ja55:0.2	Ekakanipāta
ja55:0.3	Āsīsavagga
ja55:0.4	5. Pañcāvudhajātaka
ja55:1.1	“Yo alīnena cittena,
ja55:1.2	alīnamanaso naro;
ja55:1.3	Bhāveti kusalaṁ dhammaṁ,
ja55:1.4	yogakkhemassa pattiyā;
ja55:1.5	Pāpuṇe anupubbena,
ja55:1.6	sabbasaṁyojanakkhayan”ti.
ja55:2.1	Pañcāvudhajātakaṁ pañcamaṁ.
ja56:0.1	Jātaka
ja56:0.2	Ekakanipāta
ja56:0.3	Āsīsavagga
ja56:0.4	6. Kañcanakkhandhajātaka
ja56:1.1	“Yo pahaṭṭhena cittena,
ja56:1.2	pahaṭṭhamanaso naro;
ja56:1.3	Bhāveti kusalaṁ dhammaṁ,
ja56:1.4	yogakkhemassa pattiyā;
ja56:1.5	Pāpuṇe anupubbena,
ja56:1.6	sabbasaṁyojanakkhayan”ti.
ja56:2.1	Kañcanakkhandhajātakaṁ chaṭṭhaṁ.
ja57:0.1	Jātaka
ja57:0.2	Ekakanipāta
ja57:0.3	Āsīsavagga
ja57:0.4	7. Vānarindajātaka
ja57:1.1	“Yassete caturo dhammā,
ja57:1.2	vānarinda yathā tava;
ja57:1.3	Saccaṁ dhammo dhiti cāgo,
ja57:1.4	diṭṭhaṁ so ativattatī”ti.
ja57:2.1	Vānarindajātakaṁ sattamaṁ.
ja58:0.1	Jātaka
ja58:0.2	Ekakanipāta
ja58:0.3	Āsīsavagga
ja58:0.4	8. Tayodhammajātaka
ja58:1.1	“Yassa ete tayo dhammā,
ja58:1.2	vānarinda yathā tava;
ja58:1.3	Dakkhiyaṁ sūriyaṁ paññā,
ja58:1.4	diṭṭhaṁ so ativattatī”ti.
ja58:2.1	Tayodhammajātakaṁ aṭṭhamaṁ.
ja59:0.1	Jātaka
ja59:0.2	Ekakanipāta
ja59:0.3	Āsīsavagga
ja59:0.4	9. Bherivādakajātaka
ja59:1.1	“Dhame dhame nātidhame,
ja59:1.2	atidhantañhi pāpakaṁ;
ja59:1.3	Dhantena hi sataṁ laddhaṁ,
ja59:1.4	atidhantena nāsitan”ti.
ja59:2.1	Bherivādakajātakaṁ navamaṁ.
ja60:0.1	Jātaka
ja60:0.2	Ekakanipāta
ja60:0.3	Āsīsavagga
ja60:0.4	10. Saṅkhadhamajātaka
ja60:1.1	“Dhame dhame nātidhame,
ja60:1.2	atidhantañhi pāpakaṁ;
ja60:1.3	Dhantenādhigatā bhogā,
ja60:1.4	te tāto vidhamī dhaman”ti.
ja60:2.1	Saṅkhadhamajātakaṁ dasamaṁ.
ja60:2.2	Āsīsavaggo chaṭṭho.
ja60:3.1	Tassuddānaṁ
ja60:4.1	Yathā icchiṁ tathāhudakā thalā,
ja60:4.2	Sura sāduphalo ca alīnamano;
ja60:4.3	Sampahaṭṭhamano caturo ca tayo,
ja60:4.4	Sataladdhaka bhogadhanena dasāti.
ja61:0.1	Jātaka
ja61:0.2	Ekakanipāta
ja61:0.3	Itthivagga
ja61:0.4	1. Asātamantajātaka
ja61:1.1	“Asā lokitthiyo nāma,
ja61:1.2	velā tāsaṁ na vijjati;
ja61:1.3	Sārattā ca pagabbhā ca,
ja61:1.4	sikhī sabbaghaso yathā;
ja61:1.5	Tā hitvā pabbajissāmi,
ja61:1.6	vivekamanubrūhayan”ti.
ja61:2.1	Asātamantajātakaṁ paṭhamaṁ.
ja62:0.1	Jātaka
ja62:0.2	Ekakanipāta
ja62:0.3	Itthivagga
ja62:0.4	2. Aṇḍabhūtajātaka
ja62:1.1	“Yaṁ brāhmaṇo avādesi,
ja62:1.2	vīṇaṁ samukhaveṭhito;
ja62:1.3	Aṇḍabhūtā bhatā bhariyā,
ja62:1.4	tāsu ko jātu vissase”ti.
ja62:2.1	Aṇḍabhūtajātakaṁ dutiyaṁ.
ja63:0.1	Jātaka
ja63:0.2	Ekakanipāta
ja63:0.3	Itthivagga
ja63:0.4	3. Takkapaṇḍitajātaka
ja63:1.1	“Kodhanā akataññū ca,
ja63:1.2	pisuṇā mittabhedikā;
ja63:1.3	Brahmacariyaṁ cara bhikkhu,
ja63:1.4	so sukhaṁ na vihāhasīti.
ja63:2.1	Takkapaṇḍitajātakaṁ tatiyaṁ.
ja64:0.1	Jātaka
ja64:0.2	Ekakanipāta
ja64:0.3	Itthivagga
ja64:0.4	4. Durājānajātaka
ja64:1.1	Mā su nandi icchati maṁ,
ja64:1.2	mā su soci na micchati;
ja64:1.3	Thīnaṁ bhāvo durājāno,
ja64:1.4	macchassevodake gatan”ti.
ja64:2.1	Durājānajātakaṁ catutthaṁ.
ja65:0.1	Jātaka
ja65:0.2	Ekakanipāta
ja65:0.3	Itthivagga
ja65:0.4	5. Anabhiratijātaka
ja65:1.1	“Yathā nadī ca pantho ca,
ja65:1.2	pānāgāraṁ sabhā papā;
ja65:1.3	Evaṁ lokitthiyo nāma,
ja65:1.4	nāsaṁ kujjhanti paṇḍitā”ti.
ja65:2.1	Anabhiratijātakaṁ pañcamaṁ.
ja66:0.1	Jātaka
ja66:0.2	Ekakanipāta
ja66:0.3	Itthivagga
ja66:0.4	6. Mudulakkhaṇajātaka
ja66:1.1	“Ekā icchā pure āsi,
ja66:1.2	aladdhā mudulakkhaṇaṁ;
ja66:1.3	Yato laddhā aḷārakkhī,
ja66:1.4	icchā icchaṁ vijāyathā”ti.
ja66:2.1	Mudulakkhaṇajātakaṁ chaṭṭhaṁ.
ja67:0.1	Jātaka
ja67:0.2	Ekakanipāta
ja67:0.3	Itthivagga
ja67:0.4	7. Ucchaṅgajātaka
ja67:1.1	“Ucchaṅge deva me putto,
ja67:1.2	Pathe dhāvantiyā pati;
ja67:1.3	Tañca desaṁ na passāmi,
ja67:1.4	Yato sodariyamānayeti.
ja67:2.1	Ucchaṅgajātakaṁ sattamaṁ.
ja68:0.1	Jātaka
ja68:0.2	Ekakanipāta
ja68:0.3	Itthivagga
ja68:0.4	8. Sāketajātaka
ja68:1.1	Yasmiṁ mano nivisati,
ja68:1.2	cittañcāpi pasīdati;
ja68:1.3	Adiṭṭhapubbake pose,
ja68:1.4	kāmaṁ tasmimpi vissase”ti.
ja68:2.1	Sāketajātakaṁ aṭṭhamaṁ.
ja69:0.1	Jātaka
ja69:0.2	Ekakanipāta
ja69:0.3	Itthivagga
ja69:0.4	9. Visavantajātaka
ja69:1.1	“Dhiratthu taṁ visaṁ vantaṁ,
ja69:1.2	yamahaṁ jīvitakāraṇā;
ja69:1.3	Vantaṁ paccāvamissāmi,
ja69:1.4	mataṁ me jīvitā varan”ti.
ja69:2.1	Visavantajātakaṁ navamaṁ.
ja70:0.1	Jātaka
ja70:0.2	Ekakanipāta
ja70:0.3	Itthivagga
ja70:0.4	10. Kuddālajātaka
ja70:1.1	“Na taṁ jitaṁ sādhu jitaṁ,
ja70:1.2	yaṁ jitaṁ avajīyati;
ja70:1.3	Taṁ kho jitaṁ sādhu jitaṁ,
ja70:1.4	yaṁ jitaṁ nāvajīyatī”ti.
ja70:2.1	Kuddālajātakaṁ dasamaṁ.
ja70:2.2	Itthivaggo sattamo.
ja70:3.1	Tassuddānaṁ
ja70:4.1	Sikhīsabbaghasopi ca vīṇavaro,
ja70:4.2	Pisuṇā mittabhedikā nandī nadī;
ja70:4.3	Mudulakkhaṇa sodariyā ca mano,
ja70:4.4	Visa sādhujitena bhavanti dasāti.
ja71:0.1	Jātaka
ja71:0.2	Ekakanipāta
ja71:0.3	Varuṇavagga
ja71:0.4	1. Varuṇajātaka
ja71:1.1	“Yo pubbe karaṇīyāni,
ja71:1.2	pacchā so kātumicchati;
ja71:1.3	Varuṇakaṭṭhabhañjova,
ja71:1.4	sa pacchā manutappatī”ti.
ja71:2.1	Varuṇajātakaṁ paṭhamaṁ.
ja72:0.1	Jātaka
ja72:0.2	Ekakanipāta
ja72:0.3	Varuṇavagga
ja72:0.4	2. Sīlavahatthijātaka
ja72:1.1	“Akataññussa posassa,
ja72:1.2	niccaṁ vivaradassino;
ja72:1.3	Sabbañce pathaviṁ dajjā,
ja72:1.4	neva naṁ abhirādhaye”ti.
ja72:2.1	Sīlavahatthijātakaṁ dutiyaṁ.
ja73:0.1	Jātaka
ja73:0.2	Ekakanipāta
ja73:0.3	Varuṇavagga
ja73:0.4	3. Saccaṅkirajātaka
ja73:1.1	“Saccaṁ kirevamāhaṁsu,
ja73:1.2	narā ekacciyā idha;
ja73:1.3	Kaṭṭhaṁ niplavitaṁ seyyo,
ja73:1.4	na tvevekacciyo naro”ti.
ja73:2.1	Saccaṅkirajātakaṁ tatiyaṁ.
ja74:0.1	Jātaka
ja74:0.2	Ekakanipāta
ja74:0.3	Varuṇavagga
ja74:0.4	4. Rukkhadhammajātaka
ja74:1.1	“Sādhū sambahulā ñātī,
ja74:1.2	api rukkhā araññajā;
ja74:1.3	Vāto vahati ekaṭṭhaṁ,
ja74:1.4	brahantampi vanappatin”ti.
ja74:2.1	Rukkhadhammajātakaṁ catutthaṁ.
ja75:0.1	Jātaka
ja75:0.2	Ekakanipāta
ja75:0.3	Varuṇavagga
ja75:0.4	5. Macchajātaka
ja75:1.1	“Abhitthanaya pajjunna,
ja75:1.2	nidhiṁ kākassa nāsaya;
ja75:1.3	Kākaṁ sokāya randhehi,
ja75:1.4	mañca sokā pamocayā”ti.
ja75:2.1	Macchajātakaṁ pañcamaṁ.
ja76:0.1	Jātaka
ja76:0.2	Ekakanipāta
ja76:0.3	Varuṇavagga
ja76:0.4	6. Asaṅkiyajātaka
ja76:1.1	“Asaṅkiyomhi gāmamhi,
ja76:1.2	araññe natthi me bhayaṁ;
ja76:1.3	Ujuṁ maggaṁ samārūḷho,
ja76:1.4	mettāya karuṇāya cā”ti.
ja76:2.1	Asaṅkiyajātakaṁ chaṭṭhaṁ.
ja77:0.1	Jātaka
ja77:0.2	Ekakanipāta
ja77:0.3	Varuṇavagga
ja77:0.4	7. Mahāsupinajātaka
ja77:1.1	“Usabhā rukkhā gāviyo gavā ca,
ja77:1.2	Asso kaṁso siṅgālī ca kumbho;
ja77:1.3	Pokkharaṇī ca apākacandanaṁ,
ja77:1.4	Lābūni sīdanti silā plavan”ti.
ja77:2.1	Maṇḍūkiyo kaṇhasappe gilanti,
ja77:2.2	Kākaṁ supaṇṇā parivārayanti;
ja77:2.3	Tasā vakā eḷakānaṁ bhayāhi,
ja77:2.4	Vipariyāso vattati nayidha matthīti.
ja77:3.1	Mahāsupinajātakaṁ sattamaṁ.
ja78:0.1	Jātaka
ja78:0.2	Ekakanipāta
ja78:0.3	Varuṇavagga
ja78:0.4	8. Illisajātaka
ja78:1.1	“Ubho khañjā ubho kuṇī,
ja78:1.2	ubho visamacakkhukā;
ja78:1.3	Ubhinnaṁ piḷakā jātā,
ja78:1.4	nāhaṁ passāmi illisan”ti.
ja78:2.1	Illisajātakaṁ aṭṭhamaṁ.
ja79:0.1	Jātaka
ja79:0.2	Ekakanipāta
ja79:0.3	Varuṇavagga
ja79:0.4	9. Kharassarajātaka
ja79:1.1	“Yato viluttā ca hatā ca gāvo,
ja79:1.2	Daḍḍhāni gehāni jano ca nīto;
ja79:1.3	Athāgamā puttahatāya putto,
ja79:1.4	Kharassaraṁ ḍiṇḍimaṁ vādayanto”ti.
ja79:2.1	Kharassarajātakaṁ navamaṁ.
ja80:0.1	Jātaka
ja80:0.2	Ekakanipāta
ja80:0.3	Varuṇavagga
ja80:0.4	10. Bhīmasenajātaka
ja80:1.1	“Yaṁ te pavikatthitaṁ pure,
ja80:1.2	Atha te pūtisarā sajanti pacchā;
ja80:1.3	Ubhayaṁ na sameti bhīmasena,
ja80:1.4	Yuddhakathā ca idañca te vihaññan”ti.
ja80:2.1	Bhīmasenajātakaṁ dasamaṁ.
ja80:2.2	Varuṇavaggo aṭṭhamo.
ja80:3.1	Tassuddānaṁ
ja80:4.1	Varuṇā akataññūvare tu saccavaraṁ,
ja80:4.2	Savanappatinā ca abhitthanaya;
ja80:4.3	Karuṇāya silāplava illisato,
ja80:4.4	Puna ḍiṇḍimapūtisarena dasāti.
ja81:0.1	Jātaka
ja81:0.2	Ekakanipāta
ja81:0.3	Apāyimhavagga
ja81:0.4	1. Surāpānajātaka
ja81:1.1	“Apāyimha anaccimha,
ja81:1.2	agāyimha rudimha ca;
ja81:1.3	Visaññikaraṇiṁ pitvā,
ja81:1.4	diṭṭhā nāhumha vānarā”ti.
ja81:2.1	Surāpānajātakaṁ paṭhamaṁ.
ja82:0.1	Jātaka
ja82:0.2	Ekakanipāta
ja82:0.3	Apāyimhavagga
ja82:0.4	2. Mittavindakajātaka
ja82:1.1	“Atikkamma ramaṇakaṁ,
ja82:1.2	sadāmattañca dūbhakaṁ;
ja82:1.3	Svāsi pāsāṇamāsīno,
ja82:1.4	yasmā jīvaṁ na mokkhasī”ti.
ja82:2.1	Mittavindakajātakaṁ dutiyaṁ.
ja83:0.1	Jātaka
ja83:0.2	Ekakanipāta
ja83:0.3	Apāyimhavagga
ja83:0.4	3. Kāḷakaṇṇijātaka
ja83:1.1	“Mitto have sattapadena hoti,
ja83:1.2	Sahāyo pana dvādasakena hoti;
ja83:1.3	Māsaḍḍhamāsena ca ñāti hoti,
ja83:1.4	Tatuttariṁ attasamopi hoti;
ja83:1.5	Sohaṁ kathaṁ attasukhassa hetu,
ja83:1.6	Cirasanthutaṁ kāḷakaṇṇiṁ jaheyyan”ti.
ja83:2.1	Kāḷakaṇṇijātakaṁ tatiyaṁ
ja84:0.1	Jātaka
ja84:0.2	Ekakanipāta
ja84:0.3	Apāyimhavagga
ja84:0.4	4. Atthassadvārajātaka
ja84:1.1	“Ārogyamicche paramañca lābhaṁ,
ja84:1.2	Sīlañca vuddhānumataṁ sutañca;
ja84:1.3	Dhammānuvattī ca alīnatā ca,
ja84:1.4	Atthassa dvārā pamukhā chaḷete”ti.
ja84:2.1	Atthassadvārajātakaṁ catutthaṁ.
ja85:0.1	Jātaka
ja85:0.2	Ekakanipāta
ja85:0.3	Apāyimhavagga
ja85:0.4	5. Kiṁpakkajātaka
ja85:1.1	“Āyatiṁ dosaṁ nāññāya,
ja85:1.2	yo kāme paṭisevati;
ja85:1.3	Vipākante hananti naṁ,
ja85:1.4	kiṁpakkamiva bhakkhitan”ti.
ja85:2.1	Kiṁpakkajātakaṁ pañcamaṁ.
ja86:0.1	Jātaka
ja86:0.2	Ekakanipāta
ja86:0.3	Apāyimhavagga
ja86:0.4	6. Sīlavīmaṁsakajātaka
ja86:1.1	“Sīlaṁ kireva kalyāṇaṁ,
ja86:1.2	sīlaṁ loke anuttaraṁ;
ja86:1.3	Passa ghoraviso nāgo,
ja86:1.4	sīlavāti na haññatī”ti.
ja86:2.1	Sīlavīmaṁsakajātakaṁ chaṭṭhaṁ.
ja87:0.1	Jātaka
ja87:0.2	Ekakanipāta
ja87:0.3	Apāyimhavagga
ja87:0.4	7. Maṅgalajātaka
ja87:1.1	“Yassa maṅgalā samūhatāse,
ja87:1.2	Uppātā supinā ca lakkhaṇā ca;
ja87:1.3	So maṅgaladosavītivatto,
ja87:1.4	Yugayogādhigato na jātumetī”ti.
ja87:2.1	Maṅgalajātakaṁ sattamaṁ.
ja88:0.1	Jātaka
ja88:0.2	Ekakanipāta
ja88:0.3	Apāyimhavagga
ja88:0.4	8. Sārambhajātaka
ja88:1.1	“Kalyāṇimeva muñceyya,
ja88:1.2	na hi muñceyya pāpikaṁ;
ja88:1.3	Mokkho kalyāṇiyā sādhu,
ja88:1.4	mutvā tappati pāpikan”ti.
ja88:2.1	Sārambhajātakaṁ aṭṭhamaṁ.
ja89:0.1	Jātaka
ja89:0.2	Ekakanipāta
ja89:0.3	Apāyimhavagga
ja89:0.4	9. Kuhakajātaka
ja89:1.1	“Vācāva kira te āsi,
ja89:1.2	saṇhā sakhilabhāṇino;
ja89:1.3	Tiṇamatte asajjittho,
ja89:1.4	no ca nikkhasataṁ haran”ti.
ja89:2.1	Kuhakajātakaṁ navamaṁ.
ja90:0.1	Jātaka
ja90:0.2	Ekakanipāta
ja90:0.3	Apāyimhavagga
ja90:0.4	10. Akataññujātaka
ja90:1.1	“Yo pubbe katakalyāṇo,
ja90:1.2	katattho nāvabujjhati;
ja90:1.3	Pacchā kicce samuppanne,
ja90:1.4	kattāraṁ nādhigacchatī”ti.
ja90:2.1	Akataññujātakaṁ dasamaṁ.
ja90:2.2	Apāyimhavaggo navamo.
ja90:3.1	Tassuddānaṁ
ja90:4.1	Apāyimha ca dūbhaka sattapadaṁ,
ja90:4.2	Chaḷadvara ca āyatinā ca puna;
ja90:4.3	Ahisīlava maṅgali pāpikassā,
ja90:4.4	Sataṁnikkha katatthavarena dasāti.
ja91:0.1	Jātaka
ja91:0.2	Ekakanipāta
ja91:0.3	Littavagga
ja91:0.4	1. Littajātaka
ja91:1.1	“Littaṁ paramena tejasā,
ja91:1.2	Gilamakkhaṁ puriso na bujjhati;
ja91:1.3	Gila re gila pāpadhuttaka,
ja91:1.4	Pacchā te kaṭukaṁ bhavissatī”ti.
ja91:2.1	Littajātakaṁ paṭhamaṁ.
ja92:0.1	Jātaka
ja92:0.2	Ekakanipāta
ja92:0.3	Littavagga
ja92:0.4	2. Mahāsārajātaka
ja92:1.1	“Ukkaṭṭhe sūramicchanti,
ja92:1.2	mantīsu akutūhalaṁ;
ja92:1.3	Piyañca annapānamhi,
ja92:1.4	atthe jāte ca paṇḍitan”ti.
ja92:2.1	Mahāsārajātakaṁ dutiyaṁ.
ja93:0.1	Jātaka
ja93:0.2	Ekakanipāta
ja93:0.3	Littavagga
ja93:0.4	3. Visāsabhojanajātaka
ja93:1.1	“Na vissase avissatthe,
ja93:1.2	vissatthepi na vissase;
ja93:1.3	Vissāsā bhayamanveti,
ja93:1.4	sīhaṁva migamātukāti.
ja93:2.1	Visāsabhojanajātakaṁ tatiyaṁ.
ja94:0.1	Jātaka
ja94:0.2	Ekakanipāta
ja94:0.3	Littavagga
ja94:0.4	4. Lomahaṁsajātaka
ja94:1.1	Sotatto sosindo ceva,
ja94:1.2	eko bhiṁsanake vane;
ja94:1.3	Naggo na caggimāsīno,
ja94:1.4	esanāpasuto munī”ti.
ja94:2.1	Lomahaṁsajātakaṁ catutthaṁ.
ja95:0.1	Jātaka
ja95:0.2	Ekakanipāta
ja95:0.3	Littavagga
ja95:0.4	5. Mahāsudassanajātaka
ja95:1.1	“Aniccā vata saṅkhārā,
ja95:1.2	uppādavayadhammino;
ja95:1.3	Uppajjitvā nirujjhanti,
ja95:1.4	tesaṁ vūpasamo sukho”ti.
ja95:2.1	Mahāsudassanajātakaṁ pañcamaṁ.
ja96:0.1	Jātaka
ja96:0.2	Ekakanipāta
ja96:0.3	Littavagga
ja96:0.4	6. Telapattajātaka
ja96:1.1	“Samatittikaṁ anavasekaṁ,
ja96:1.2	Telapattaṁ yathā parihareyya;
ja96:1.3	Evaṁ sacittamanurakkhe,
ja96:1.4	Patthayāno disaṁ agatapubban”ti.
ja96:2.1	Telapattajātakaṁ chaṭṭhaṁ.
ja97:0.1	Jātaka
ja97:0.2	Ekakanipāta
ja97:0.3	Littavagga
ja97:0.4	7. Nāmasiddhijātaka
ja97:1.1	“Jīvakañca mataṁ disvā,
ja97:1.2	dhanapāliñca duggataṁ;
ja97:1.3	Panthakañca vane mūḷhaṁ,
ja97:1.4	pāpako punarāgato”ti.
ja97:2.1	Nāmasiddhijātakaṁ sattamaṁ.
ja98:0.1	Jātaka
ja98:0.2	Ekakanipāta
ja98:0.3	Littavagga
ja98:0.4	8. Kūṭavāṇijajātaka
ja98:1.1	“Sādhu kho paṇḍito nāma,
ja98:1.2	na tveva atipaṇḍito;
ja98:1.3	Atipaṇḍitena puttena,
ja98:1.4	manamhi upakūḷitoti.
ja98:2.1	Kūṭavāṇijajātakaṁ aṭṭhamaṁ.
ja99:0.1	Jātaka
ja99:0.2	Ekakanipāta
ja99:0.3	Littavagga
ja99:0.4	9. Parosahassajātaka
ja99:1.1	Parosahassampi samāgatānaṁ,
ja99:1.2	Kandeyyuṁ te vassasataṁ apaññā;
ja99:1.3	Ekova seyyo puriso sapañño,
ja99:1.4	Yo bhāsitassa vijānāti atthan”ti.
ja99:2.1	Parosahassajātakaṁ navamaṁ.
ja100:0.1	Jātaka
ja100:0.2	Ekakanipāta
ja100:0.3	Littavagga
ja100:0.4	10. Asātarūpajātaka
ja100:1.1	“Asātaṁ sātarūpena,
ja100:1.2	piyarūpena appiyaṁ;
ja100:1.3	Dukkhaṁ sukhassa rūpena,
ja100:1.4	pamattamativattatī”ti.
ja100:2.1	Asātarūpajātakaṁ dasamaṁ.
ja100:2.2	Littavaggo dasamo.
ja100:3.1	Tassuddānaṁ
ja100:4.1	Gilamakkhakutūhala mātukassā,
ja100:4.2	Muninā ca aniccata pattavaraṁ;
ja100:4.3	Dhanapālivaro atipaṇḍitako,
ja100:4.4	Saparosahassaasātadasāti.
ja100:5.1	Majjhimo paṇṇāsako.
ja101:0.1	Jātaka
ja101:0.2	Ekakanipāta
ja101:0.3	Parosatavagga
ja101:0.4	1. Parosatajātaka
ja101:1.1	“Parosatañcepi samāgatānaṁ,
ja101:1.2	Jhāyeyyuṁ te vassasataṁ apaññā;
ja101:1.3	Ekova seyyo puriso sapañño,
ja101:1.4	Yo bhāsitassa vijānāti atthan”ti.
ja101:2.1	Parosatajātakaṁ paṭhamaṁ.
ja102:0.1	Jātaka
ja102:0.2	Ekakanipāta
ja102:0.3	Parosatavagga
ja102:0.4	2. Paṇṇikajātaka
ja102:1.1	“Yo dukkhaphuṭṭhāya bhaveyya tāṇaṁ,
ja102:1.2	So me pitā dubbhi vane karoti;
ja102:1.3	Sā kassa kandāmi vanassa majjhe,
ja102:1.4	Yo tāyitā so sahasaṁ karotī”ti.
ja102:2.1	Paṇṇikajātakaṁ dutiyaṁ.
ja103:0.1	Jātaka
ja103:0.2	Ekakanipāta
ja103:0.3	Parosatavagga
ja103:0.4	3. Verijātaka
ja103:1.1	“Yattha verī nivisati,
ja103:1.2	na vase tattha paṇḍito;
ja103:1.3	Ekarattaṁ dirattaṁ vā,
ja103:1.4	dukkhaṁ vasati verisū”ti.
ja103:2.1	Verijātakaṁ tatiyaṁ.
ja104:0.1	Jātaka
ja104:0.2	Ekakanipāta
ja104:0.3	Parosatavagga
ja104:0.4	4. Mittavindakajātaka
ja104:1.1	“Catubbhi aṭṭhajjhagamā,
ja104:1.2	aṭṭhāhipi ca soḷasa;
ja104:1.3	Soḷasāhi ca bāttiṁsa,
ja104:1.4	atricchaṁ cakkamāsado;
ja104:1.5	Icchāhatassa posassa,
ja104:1.6	cakkaṁ bhamati matthake”ti.
ja104:2.1	Mittavindakajātakaṁ catutthaṁ.
ja105:0.1	Jātaka
ja105:0.2	Ekakanipāta
ja105:0.3	Parosatavagga
ja105:0.4	5. Dubbalakaṭṭhajātaka
ja105:1.1	“Bahumpetaṁ vane kaṭṭhaṁ,
ja105:1.2	vāto bhañjati dubbalaṁ;
ja105:1.3	Tassa ce bhāyasī nāga,
ja105:1.4	kiso nūna bhavissasī”ti.
ja105:2.1	Dubbalakaṭṭhajātakaṁ pañcamaṁ.
ja106:0.1	Jātaka
ja106:0.2	Ekakanipāta
ja106:0.3	Parosatavagga
ja106:0.4	6. Udañcanījātaka
ja106:1.1	“Sukhaṁ vata maṁ jīvantaṁ,
ja106:1.2	Pacamānā udañcanī;
ja106:1.3	Corī jāyappavādena,
ja106:1.4	Telaṁ loṇañca yācatī”ti.
ja106:2.1	Udañcanījātakaṁ chaṭṭhaṁ.
ja107:0.1	Jātaka
ja107:0.2	Ekakanipāta
ja107:0.3	Parosatavagga
ja107:0.4	7. Sālittakajātaka
ja107:1.1	“Sādhu kho sippakaṁ nāma,
ja107:1.2	api yādisa kīdisaṁ;
ja107:1.3	Passa khañjappahārena,
ja107:1.4	laddhā gāmā catuddisā”ti.
ja107:2.1	Sālittakajātakaṁ sattamaṁ.
ja108:0.1	Jātaka
ja108:0.2	Ekakanipāta
ja108:0.3	Parosatavagga
ja108:0.4	8. Bāhiyajātaka
ja108:1.1	“Sikkheyya sikkhitabbāni,
ja108:1.2	santi sacchandino janā;
ja108:1.3	Bāhiyā hi suhannena,
ja108:1.4	rājānamabhirādhayī”ti.
ja108:2.1	Bāhiyajātakaṁ aṭṭhamaṁ.
ja109:0.1	Jātaka
ja109:0.2	Ekakanipāta
ja109:0.3	Parosatavagga
ja109:0.4	9. Kuṇḍapūvajātaka
ja109:1.1	“Yathanno puriso hoti,
ja109:1.2	tathannā tassa devatā;
ja109:1.3	Āharetaṁ kuṇḍapūvaṁ,
ja109:1.4	mā me bhāgaṁ vināsayā”ti.
ja109:2.1	Kuṇḍapūvajātakaṁ navamaṁ.
ja110:0.1	Jātaka
ja110:0.2	Ekakanipāta
ja110:0.3	Parosatavagga
ja110:0.4	10. Sabbasaṁhārakapañhajātaka
ja110:1.1	“Sabbasaṁhārako natthi,
ja110:1.2	suddhaṁ kaṅgu pavāyati;
ja110:1.3	Alikaṁ bhāyatiyaṁ dhuttī,
ja110:1.4	saccamāha mahallikā”ti.
ja110:2.1	Sabbasaṁhārakapañhajātakaṁ dasamaṁ.
ja110:2.2	Parosatavaggo ekādasamo.
ja110:3.1	Tassuddānaṁ
ja110:4.1	Saparosatatāyitaverī puna,
ja110:4.2	Bhamacakkatha nāgasirivhayano;
ja110:4.3	Sukhakañca vata sippaka bāhiyā,
ja110:4.4	Kuṇḍapūva mahallikakā ca dasāti.
ja111:0.1	Jātaka
ja111:0.2	Ekakanipāta
ja111:0.3	Haṁcivagga
ja111:0.4	1. Gadrabhapañhajātaka
ja111:1.1	“Haṁci tuvaṁ evamaññasi seyyo,
ja111:1.2	Puttena pitāti rājaseṭṭha;
ja111:1.3	Handassatarassa te ayaṁ,
ja111:1.4	Assatarassa hi gadrabho pitā”ti.
ja111:2.1	Gadrabhapañhajātakaṁ paṭhamaṁ.
ja112:0.1	Jātaka
ja112:0.2	Ekakanipāta
ja112:0.3	Haṁcivagga
ja112:0.4	2. Amarādevīpañhajātaka
ja112:1.1	“Yena sattubilaṅgā ca,
ja112:1.2	Diguṇapalāso ca pupphito;
ja112:1.3	Yena dadāmi tena vadāmi,
ja112:1.4	Yena na dadāmi na tena vadāmi;
ja112:1.5	Esa maggo yavamajjhakassa,
ja112:1.6	Etaṁ channapathaṁ vijānāhī”ti.
ja112:2.1	Amarādevīpañhajātakaṁ dutiyaṁ.
ja113:0.1	Jātaka
ja113:0.2	Ekakanipāta
ja113:0.3	Haṁcivagga
ja113:0.4	3. Siṅgālajātaka
ja113:1.1	“Saddahāsi siṅgālassa,
ja113:1.2	surāpītassa brāhmaṇa;
ja113:1.3	Sippikānaṁ sataṁ natthi,
ja113:1.4	kuto kaṁsasatā duve”ti.
ja113:2.1	Siṅgālajātakaṁ tatiyaṁ.
ja114:0.1	Jātaka
ja114:0.2	Ekakanipāta
ja114:0.3	Haṁcivagga
ja114:0.4	4. Mitacintijātaka
ja114:1.1	“Bahucintī appacintī,
ja114:1.2	ubho jāle abajjhare;
ja114:1.3	Mitacintī pamocesī,
ja114:1.4	ubho tattha samāgatā”ti.
ja114:2.1	Mitacintijātakaṁ catutthaṁ.
ja115:0.1	Jātaka
ja115:0.2	Ekakanipāta
ja115:0.3	Haṁcivagga
ja115:0.4	5. Anusāsikajātaka
ja115:1.1	“Yāyañña manusāsati,
ja115:1.2	sayaṁ loluppacārinī;
ja115:1.3	Sāyaṁ vipakkhikā seti,
ja115:1.4	hatā cakkena sāsikāti.
ja115:2.1	Anusāsikajātakaṁ pañcamaṁ.
ja116:0.1	Jātaka
ja116:0.2	Ekakanipāta
ja116:0.3	Haṁcivagga
ja116:0.4	6. Dubbacajātaka
ja116:1.1	Atikaramakarācariya,
ja116:1.2	Mayhampetaṁ na ruccati;
ja116:1.3	Catutthe laṅghayitvāna,
ja116:1.4	Pañcamāyasi āvuto”ti.
ja116:2.1	Dubbacajātakaṁ chaṭṭhaṁ.
ja117:0.1	Jātaka
ja117:0.2	Ekakanipāta
ja117:0.3	Haṁcivagga
ja117:0.4	7. Tittirajātaka
ja117:1.1	“Accuggatātilapatā,
ja117:1.2	ativelaṁ pabhāsitā;
ja117:1.3	Vācā hanati dummedhaṁ,
ja117:1.4	tittiraṁvātivassitan”ti.
ja117:2.1	Tittirajātakaṁ sattamaṁ.
ja118:0.1	Jātaka
ja118:0.2	Ekakanipāta
ja118:0.3	Haṁcivagga
ja118:0.4	8. Vaṭṭakajātaka
ja118:1.1	“Nācintayanto puriso,
ja118:1.2	visesamadhigacchati;
ja118:1.3	Cintitassa phalaṁ passa,
ja118:1.4	muttosmi vadhabandhanā”ti.
ja118:2.1	Vaṭṭakajātakaṁ aṭṭhamaṁ.
ja119:0.1	Jātaka
ja119:0.2	Ekakanipāta
ja119:0.3	Haṁcivagga
ja119:0.4	9. Akālarāvijātaka
ja119:1.1	“Amātāpitarasaṁvaddho,
ja119:1.2	anācerakule vasaṁ;
ja119:1.3	Nāyaṁ kālaṁ akālaṁ vā,
ja119:1.4	abhijānāti kukkuṭo”ti.
ja119:2.1	Akālarāvijātakaṁ navamaṁ.
ja120:0.1	Jātaka
ja120:0.2	Ekakanipāta
ja120:0.3	Haṁcivagga
ja120:0.4	10. Bandhanamokkhajātaka
ja120:1.1	“Abaddhā tattha bajjhanti,
ja120:1.2	yattha bālā pabhāsare;
ja120:1.3	Baddhāpi tattha muccanti,
ja120:1.4	yattha dhīrā pabhāsare”ti.
ja120:2.1	Bandhanamokkhajātakaṁ dasamaṁ.
ja120:2.2	Haṁcivaggo dvādasamo.
ja120:3.1	Tassuddānaṁ
ja120:4.1	Atha gadrabha sattuva kaṁsasataṁ,
ja120:4.2	Bahucinti sāsikāyātikara;
ja120:4.3	Ativela visesamanācariyova,
ja120:4.4	Dhīrāpabhāsaratena dasāti.
ja121:0.1	Jātaka
ja121:0.2	Ekakanipāta
ja121:0.3	Kusanāḷivagga
ja121:0.4	1. Kusanāḷijātaka
ja121:1.1	“Kare sarikkho atha vāpi seṭṭho,
ja121:1.2	Nihīnako vāpi kareyya eko;
ja121:1.3	Kareyyumete byasane uttamatthaṁ,
ja121:1.4	Yathā ahaṁ kusanāḷi rucāyan”ti.
ja121:2.1	Kusanāḷijātakaṁ paṭhamaṁ.
ja122:0.1	Jātaka
ja122:0.2	Ekakanipāta
ja122:0.3	Kusanāḷivagga
ja122:0.4	2. Dummedhajātaka
ja122:1.1	“Yasaṁ laddhāna dummedho,
ja122:1.2	anatthaṁ carati attano;
ja122:1.3	Attano ca paresañca,
ja122:1.4	hiṁsāya paṭipajjatī”ti.
ja122:2.1	Dummedhajātakaṁ dutiyaṁ.
ja123:0.1	Jātaka
ja123:0.2	Ekakanipāta
ja123:0.3	Kusanāḷivagga
ja123:0.4	3. Naṅgalīsajātaka
ja123:1.1	“Asabbatthagāmiṁ vācaṁ,
ja123:1.2	Bālo sabbattha bhāsati;
ja123:1.3	Nāyaṁ dadhiṁ vedi na naṅgalīsaṁ,
ja123:1.4	Dadhippayaṁ maññati naṅgalīsan”ti.
ja123:2.1	Naṅgalīsajātakaṁ tatiyaṁ.
ja124:0.1	Jātaka
ja124:0.2	Ekakanipāta
ja124:0.3	Kusanāḷivagga
ja124:0.4	4. Ambajātaka
ja124:1.1	“Vāyametheva puriso,
ja124:1.2	na nibbindeyya paṇḍito;
ja124:1.3	Vāyāmassa phalaṁ passa,
ja124:1.4	bhuttā ambā anītihan”ti.
ja124:2.1	Ambajātakaṁ catutthaṁ.
ja125:0.1	Jātaka
ja125:0.2	Ekakanipāta
ja125:0.3	Kusanāḷivagga
ja125:0.4	5. Kaṭāhakajātaka
ja125:1.1	“Bahumpi so vikattheyya,
ja125:1.2	aññaṁ janapadaṁ gato;
ja125:1.3	Anvāgantvāna dūseyya,
ja125:1.4	bhuñja bhoge kaṭāhakā”ti.
ja125:2.1	Kaṭāhakajātakaṁ pañcamaṁ.
ja126:0.1	Jātaka
ja126:0.2	Ekakanipāta
ja126:0.3	Kusanāḷivagga
ja126:0.4	6. Asilakkhaṇajātaka
ja126:1.1	“Tadevekassa kalyāṇaṁ,
ja126:1.2	tadevekassa pāpakaṁ;
ja126:1.3	Tasmā sabbaṁ na kalyāṇaṁ,
ja126:1.4	sabbaṁ vāpi na pāpakan”ti.
ja126:2.1	Asilakkhaṇajātakaṁ chaṭṭhaṁ.
ja127:0.1	Jātaka
ja127:0.2	Ekakanipāta
ja127:0.3	Kusanāḷivagga
ja127:0.4	7. Kalaṇḍukajātaka
ja127:1.1	“Te desā tāni vatthūni,
ja127:1.2	ahañca vanagocaro;
ja127:1.3	Anuvicca kho taṁ gaṇheyyuṁ,
ja127:1.4	piva khīraṁ kalaṇḍukā”ti.
ja127:2.1	Kalaṇḍukajātakaṁ sattamaṁ.
ja128:0.1	Jātaka
ja128:0.2	Ekakanipāta
ja128:0.3	Kusanāḷivagga
ja128:0.4	8. Biḷāravatajātaka
ja128:1.1	“Yo ve dhammaṁ dhajaṁ katvā,
ja128:1.2	Nigūḷho pāpamācare;
ja128:1.3	Vissāsayitvā bhūtāni,
ja128:1.4	Biḷāraṁ nāma taṁ vatan”ti.
ja128:2.1	Biḷāravatajātakaṁ aṭṭhamaṁ.
ja129:0.1	Jātaka
ja129:0.2	Ekakanipāta
ja129:0.3	Kusanāḷivagga
ja129:0.4	9. Aggikabhāradvājajātaka
ja129:1.1	“Nāyaṁ sikhā puññahetu,
ja129:1.2	ghāsahetu ayaṁ sikhā;
ja129:1.3	Nāguṭṭhigaṇanaṁ yāti,
ja129:1.4	alaṁ te hotu aggikā”ti.
ja129:2.1	Aggikabhāradvājajātakaṁ navamaṁ.
ja130:0.1	Jātaka
ja130:0.2	Ekakanipāta
ja130:0.3	Kusanāḷivagga
ja130:0.4	10. Kosiyajātaka
ja130:1.1	“Yathā vācā ca bhuñjassu,
ja130:1.2	yathā bhuttañca byāhara;
ja130:1.3	Ubhayaṁ te na sameti,
ja130:1.4	vācā bhuttañca kosiye”ti.
ja130:2.1	Kosiyajātakaṁ dasamaṁ.
ja130:2.2	Kusanāḷivaggo terasamo.
ja130:3.1	Tassuddānaṁ
ja130:4.1	Kusanāḷisirivhayano ca yasaṁ,
ja130:4.2	Dadhi mamba kaṭāhakapañcamako;
ja130:4.3	Atha pāpaka khīra biḷāravataṁ,
ja130:4.4	Sikhi kosiyasavhayanena dasāti.
ja131:0.1	Jātaka
ja131:0.2	Ekakanipāta
ja131:0.3	Asampadānavagga
ja131:0.4	1. Asampadānajātaka
ja131:1.1	“Asampadānenitarītarassa,
ja131:1.2	Bālassa mittāni kalī bhavanti;
ja131:1.3	Tasmā harāmi bhusaṁ aḍḍhamānaṁ,
ja131:1.4	Mā me mitti jīyittha sassatāyan”ti.
ja131:2.1	Asampadānajātakaṁ paṭhamaṁ.
ja132:0.1	Jātaka
ja132:0.2	Ekakanipāta
ja132:0.3	Asampadānavagga
ja132:0.4	2. Bhīrukajātaka
ja132:1.1	“Kusalūpadese dhitiyā daḷhāya ca,
ja132:1.2	Anivattitattābhayabhīrutāya ca;
ja132:1.3	Na rakkhasīnaṁ vasamāgamimhase,
ja132:1.4	Sa sotthibhāvo mahatā bhayena me”ti.
ja132:2.1	Bhīrukajātakaṁ dutiyaṁ.
ja133:0.1	Jātaka
ja133:0.2	Ekakanipāta
ja133:0.3	Asampadānavagga
ja133:0.4	3. Ghatāsanajātaka
ja133:1.1	“Khemaṁ yahiṁ tattha arī udīrito,
ja133:1.2	Dakassa majjhe jalate ghatāsano;
ja133:1.3	Na ajja vāso mahiyā mahīruhe,
ja133:1.4	Disā bhajavho saraṇājja no bhayan”ti.
ja133:2.1	Ghatāsanajātakaṁ tatiyaṁ.
ja134:0.1	Jātaka
ja134:0.2	Ekakanipāta
ja134:0.3	Asampadānavagga
ja134:0.4	4. Jhānasodhanajātaka
ja134:1.1	“Ye saññino tepi duggatā,
ja134:1.2	Yepi asaññino tepi duggatā;
ja134:1.3	Etaṁ ubhayaṁ vivajjaya,
ja134:1.4	Taṁ samāpattisukhaṁ anaṅgaṇan”ti.
ja134:2.1	Jhānasodhanajātakaṁ catutthaṁ.
ja135:0.1	Jātaka
ja135:0.2	Ekakanipāta
ja135:0.3	Asampadānavagga
ja135:0.4	5. Candābhajātaka
ja135:1.1	“Candābhaṁ sūriyābhañca,
ja135:1.2	yodha paññāya gādha”ti.
ja135:1.3	Avitakkena jhānena,
ja135:1.4	hoti ābhassarūpagoti.
ja135:2.1	Candābhajātakaṁ pañcamaṁ.
ja136:0.1	Jātaka
ja136:0.2	Ekakanipāta
ja136:0.3	Asampadānavagga
ja136:0.4	6. Suvaṇṇahaṁsajātaka
ja136:1.1	“Yaṁ laddhaṁ tena tuṭṭhabbaṁ,
ja136:1.2	Atilobho hi pāpako;
ja136:1.3	Haṁsarājaṁ gahetvāna,
ja136:1.4	Suvaṇṇā parihāyathā”ti.
ja136:2.1	Suvaṇṇahaṁsajātakaṁ chaṭṭhaṁ.
ja137:0.1	Jātaka
ja137:0.2	Ekakanipāta
ja137:0.3	Asampadānavagga
ja137:0.4	7. Babbujātaka
ja137:1.1	“Yattheko labhate babbu,
ja137:1.2	dutiyo tattha jāyati;
ja137:1.3	Tatiyo ca catuttho ca,
ja137:1.4	idaṁ te babbukā bilan”ti.
ja137:2.1	Babbujātakaṁ sattamaṁ.
ja138:0.1	Jātaka
ja138:0.2	Ekakanipāta
ja138:0.3	Asampadānavagga
ja138:0.4	8. Godhajātaka
ja138:1.1	“Kiṁ te jaṭāhi dummedha,
ja138:1.2	kiṁ te ajinasāṭiyā;
ja138:1.3	Abbhantaraṁ te gahanaṁ,
ja138:1.4	bāhiraṁ parimajjasī”ti.
ja138:2.1	Godhajātakaṁ aṭṭhamaṁ.
ja139:0.1	Jātaka
ja139:0.2	Ekakanipāta
ja139:0.3	Asampadānavagga
ja139:0.4	9. Ubhatobhaṭṭhajātaka
ja139:1.1	“Akkhī bhinnā paṭo naṭṭho,
ja139:1.2	sakhigehe ca bhaṇḍanaṁ;
ja139:1.3	Ubhato paduṭṭhā kammantā,
ja139:1.4	udakamhi thalamhi cā”ti.
ja139:2.1	Ubhatobhaṭṭhajātakaṁ navamaṁ.
ja140:0.1	Jātaka
ja140:0.2	Ekakanipāta
ja140:0.3	Asampadānavagga
ja140:0.4	10. Kākajātaka
ja140:1.1	“Niccaṁ ubbiggahadayā,
ja140:1.2	sabbalokavihesakā;
ja140:1.3	Tasmā nesaṁ vasā natthi,
ja140:1.4	kākānamhāka ñātinan”ti.
ja140:2.1	Kākajātakaṁ dasamaṁ.
ja140:2.2	Asampadānavaggo cuddasamo.
ja140:3.1	Tassuddānaṁ
ja140:4.1	Itarītara rakkhasi khemiyo ca,
ja140:4.2	Parosatapañhena ābhassaro puna;
ja140:4.3	Atha haṁsavaruttamababbujaṭaṁ,
ja140:4.4	Paṭanaṭṭhaka kākavarena dasāti.
ja141:0.1	Jātaka
ja141:0.2	Ekakanipāta
ja141:0.3	Kakaṇṭakavagga
ja141:0.4	1. Godhajātaka
ja141:1.1	“Na pāpajanasaṁsevī,
ja141:1.2	accantasukhamedhati;
ja141:1.3	Godhākulaṁ kakaṇṭāva,
ja141:1.4	kaliṁ pāpeti attanan”ti.
ja141:2.1	Godhajātakaṁ paṭhamaṁ.
ja142:0.1	Jātaka
ja142:0.2	Ekakanipāta
ja142:0.3	Kakaṇṭakavagga
ja142:0.4	2. Siṅgālajātaka
ja142:1.1	“Etañhi te durājānaṁ,
ja142:1.2	yaṁ sesi matasāyikaṁ;
ja142:1.3	Yassa te kaḍḍhamānassa,
ja142:1.4	hatthā daṇḍo na muccatī”ti.
ja142:2.1	Siṅgālajātakaṁ dutiyaṁ.
ja143:0.1	Jātaka
ja143:0.2	Ekakanipāta
ja143:0.3	Kakaṇṭakavagga
ja143:0.4	3. Virocanajātaka
ja143:1.1	“Lasī ca te nipphalitā,
ja143:1.2	matthako ca padālito;
ja143:1.3	Sabbā te phāsukā bhaggā,
ja143:1.4	ajja kho tvaṁ virocasī”ti.
ja143:2.1	Virocanajātakaṁ tatiyaṁ.
ja144:0.1	Jātaka
ja144:0.2	Ekakanipāta
ja144:0.3	Kakaṇṭakavagga
ja144:0.4	4. Naṅguṭṭhajātaka
ja144:1.1	“Bahumpetaṁ asabbhi jātaveda,
ja144:1.2	Yaṁ taṁ vāladhinābhipūjayāma;
ja144:1.3	Maṁsārahassa natthajja maṁsaṁ,
ja144:1.4	Naṅguṭṭhampi bhavaṁ paṭiggahātū”ti.
ja144:2.1	Naṅguṭṭhajātakaṁ catutthaṁ.
ja145:0.1	Jātaka
ja145:0.2	Ekakanipāta
ja145:0.3	Kakaṇṭakavagga
ja145:0.4	5. Rādhajātaka
ja145:1.1	“Na tvaṁ rādha vijānāsi,
ja145:1.2	aḍḍharatte anāgate;
ja145:1.3	Abyayataṁ vilapasi,
ja145:1.4	virattā kosiyāyane”ti.
ja145:2.1	Rādhajātakaṁ pañcamaṁ.
ja146:0.1	Jātaka
ja146:0.2	Ekakanipāta
ja146:0.3	Kakaṇṭakavagga
ja146:0.4	6. Samuddakākajātaka
ja146:1.1	“Api nu hanukā santā,
ja146:1.2	mukhañca parisussati;
ja146:1.3	Oramāma na pārema,
ja146:1.4	pūrateva mahodadhī”ti.
ja146:2.1	Samuddakākajātakaṁ chaṭṭhaṁ.
ja147:0.1	Jātaka
ja147:0.2	Ekakanipāta
ja147:0.3	Kakaṇṭakavagga
ja147:0.4	7. Puppharattajātaka
ja147:1.1	“Nayidaṁ dukkhaṁ aduṁ dukkhaṁ,
ja147:1.2	Yaṁ maṁ tudati vāyaso;
ja147:1.3	Yaṁ sāmā puppharattena,
ja147:1.4	Kattikaṁ nānubhossatī”ti.
ja147:2.1	Puppharattajātakaṁ sattamaṁ.
ja148:0.1	Jātaka
ja148:0.2	Ekakanipāta
ja148:0.3	Kakaṇṭakavagga
ja148:0.4	8. Siṅgālajātaka
ja148:1.1	“Nāhaṁ punaṁ na ca punaṁ,
ja148:1.2	na cāpi apunappunaṁ;
ja148:1.3	Hatthibondiṁ pavekkhāmi,
ja148:1.4	tathā hi bhayatajjito”ti.
ja148:2.1	Siṅgālajātakaṁ aṭṭhamaṁ.
ja149:0.1	Jātaka
ja149:0.2	Ekakanipāta
ja149:0.3	Kakaṇṭakavagga
ja149:0.4	9. Ekapaṇṇajātaka
ja149:1.1	“Ekapaṇṇo ayaṁ rukkho,
ja149:1.2	na bhūmyā caturaṅgulo;
ja149:1.3	Phalena visakappena,
ja149:1.4	mahāyaṁ kiṁ bhavissatī”ti.
ja149:2.1	Ekapaṇṇajātakaṁ navamaṁ.
ja150:0.1	Jātaka
ja150:0.2	Ekakanipāta
ja150:0.3	Kakaṇṭakavagga
ja150:0.4	10. Sañjīvajātaka
ja150:1.1	“Asantaṁ yo paggaṇhāti,
ja150:1.2	asantaṁ cūpasevati;
ja150:1.3	Tameva ghāsaṁ kurute,
ja150:1.4	byaggho sañjīvako yathā”ti.
ja150:2.1	Sañjīvajātakaṁ dasamaṁ.
ja150:2.2	Kakaṇṭakavaggo pannarasamo.
ja150:3.1	Tassuddānaṁ
ja150:4.1	Sukhamedhati daṇḍavaro ca puna,
ja150:4.2	Lasi vāladhi pañcamarādhavaro;
ja150:4.3	Samahodadhi kattika bondi puna,
ja150:4.4	Caturaṅgulabyagghavarena dasāti.
ja150:5.1	Uparimapaṇṇāsako.
ja150:6.1	Atha vagguddānaṁ
ja150:7.1	Apaṇṇakaṁ sīlavaggakuruṅga,
ja150:7.2	Kulāvakaṁ atthakāmena pañcamaṁ;
ja150:7.3	Āsīso itthivaruṇaṁ apāyi,
ja150:7.4	Littavaggena te dasa;
ja150:7.5	Parosataṁ haṁci kusanāḷi,
ja150:7.6	Asampadaṁ kakaṇṭakavaggo.
ja150:8.1	Ekanipātamhilaṅkatanti.
ja150:9.1	Ekakanipātaṁ niṭṭhitaṁ.
ja151:0.1	Jātaka
ja151:0.2	Dukanipāta
ja151:0.3	Daḷhavagga
ja151:0.4	1. Rājovādajātaka
ja151:1.1	“Daḷhaṁ daḷhassa khipati,
ja151:1.2	balliko mudunā muduṁ;
ja151:1.3	Sādhumpi sādhunā jeti,
ja151:1.4	asādhumpi asādhunā;
ja151:1.5	Etādiso ayaṁ rājā,
ja151:1.6	maggā uyyāhi sārathi”.
ja151:2.1	“Akkodhena jine kodhaṁ,
ja151:2.2	asādhuṁ sādhunā jine;
ja151:2.3	Jine kadariyaṁ dānena,
ja151:2.4	saccenālikavādinaṁ;
ja151:2.5	Etādiso ayaṁ rājā,
ja151:2.6	maggā uyyāhi sārathī”ti.
ja151:3.1	Rājovādajātakaṁ paṭhamaṁ.
ja152:0.1	Jātaka
ja152:0.2	Dukanipāta
ja152:0.3	Daḷhavagga
ja152:0.4	2. Siṅgālajātaka
ja152:1.1	“Asamekkhitakammantaṁ,
ja152:1.2	turitābhinipātinaṁ;
ja152:1.3	Sāni kammāni tappenti,
ja152:1.4	uṇhaṁvajjhohitaṁ mukhe”.
ja152:2.1	“Sīho ca sīhanādena,
ja152:2.2	daddaraṁ abhinādayi;
ja152:2.3	Sutvā sīhassa nigghosaṁ,
ja152:2.4	siṅgālo daddare vasaṁ;
ja152:2.5	Bhīto santāsamāpādi,
ja152:2.6	hadayañcassa apphalī”ti.
ja152:3.1	Siṅgālajātakaṁ dutiyaṁ.
ja153:0.1	Jātaka
ja153:0.2	Dukanipāta
ja153:0.3	Daḷhavagga
ja153:0.4	3. Sūkarajātaka
ja153:1.1	“Catuppado ahaṁ samma,
ja153:1.2	tvampi samma catuppado;
ja153:1.3	Ehi samma nivattassu,
ja153:1.4	kiṁ nu bhīto palāyasi”.
ja153:2.1	“Asuci pūtilomosi,
ja153:2.2	duggandho vāsi sūkara;
ja153:2.3	Sace yujjhitukāmosi,
ja153:2.4	jayaṁ samma dadāmi te”ti.
ja153:3.1	Sūkarajātakaṁ tatiyaṁ.
ja154:0.1	Jātaka
ja154:0.2	Dukanipāta
ja154:0.3	Daḷhavagga
ja154:0.4	4. Uragajātaka
ja154:1.1	“Idhūragānaṁ pavaro paviṭṭho,
ja154:1.2	Selassa vaṇṇena pamokkhamicchaṁ;
ja154:1.3	Brahmañca vaṇṇaṁ apacāyamāno,
ja154:1.4	Bubhukkhito no vitarāmi bhottuṁ”.
ja154:2.1	“So brahmagutto cirameva jīva,
ja154:2.2	Dibyā ca te pātubhavantu bhakkhā;
ja154:2.3	Yo brahmavaṇṇaṁ apacāyamāno,
ja154:2.4	Bubhukkhito no vitarāsi bhottun”ti.
ja154:3.1	Uragajātakaṁ catutthaṁ.
ja155:0.1	Jātaka
ja155:0.2	Dukanipāta
ja155:0.3	Daḷhavagga
ja155:0.4	5. Bhaggajātaka
ja155:1.1	“Jīva vassasataṁ bhagga,
ja155:1.2	aparāni ca vīsatiṁ;
ja155:1.3	Mā maṁ pisācā khādantu,
ja155:1.4	jīva tvaṁ sarado sataṁ”.
ja155:2.1	“Tvampi vassasataṁ jīva,
ja155:2.2	aparāni ca vīsatiṁ;
ja155:2.3	Visaṁ pisācā khādantu,
ja155:2.4	jīva tvaṁ sarado satan”ti.
ja155:3.1	Bhaggajātakaṁ pañcamaṁ.
ja156:0.1	Jātaka
ja156:0.2	Dukanipāta
ja156:0.3	Daḷhavagga
ja156:0.4	6. Alīnacittajātaka
ja156:1.1	“Alīnacittaṁ nissāya,
ja156:1.2	pahaṭṭhā mahatī camū;
ja156:1.3	Kosalaṁ senāsantuṭṭhaṁ,
ja156:1.4	jīvaggāhaṁ agāhayi.
ja156:2.1	Evaṁ nissayasampanno,
ja156:2.2	bhikkhu āraddhavīriyo;
ja156:2.3	Bhāvayaṁ kusalaṁ dhammaṁ,
ja156:2.4	yogakkhemassa pattiyā;
ja156:2.5	Pāpuṇe anupubbena,
ja156:2.6	sabbasaṁyojanakkhayan”ti.
ja156:3.1	Alīnacittajātakaṁ chaṭṭhaṁ.
ja157:0.1	Jātaka
ja157:0.2	Dukanipāta
ja157:0.3	Daḷhavagga
ja157:0.4	7. Guṇajātaka
ja157:1.1	“Yena kāmaṁ paṇāmeti,
ja157:1.2	dhammo balavataṁ migī;
ja157:1.3	Unnadantī vijānāhi,
ja157:1.4	jātaṁ saraṇato bhayaṁ”.
ja157:2.1	“Api cepi dubbalo mitto,
ja157:2.2	mittadhammesu tiṭṭhati;
ja157:2.3	So ñātako ca bandhu ca,
ja157:2.4	so mitto so ca me sakhā;
ja157:2.5	Dāṭhini mātimaññittho,
ja157:2.6	siṅgālo mama pāṇado”ti.
ja157:3.1	Guṇajātakaṁ sattamaṁ.
ja158:0.1	Jātaka
ja158:0.2	Dukanipāta
ja158:0.3	Daḷhavagga
ja158:0.4	8. Suhanujātaka
ja158:1.1	“Nayidaṁ visamasīlena,
ja158:1.2	soṇena suhanū saha;
ja158:1.3	Suhanūpi tādisoyeva,
ja158:1.4	yo soṇassa sagocaro.
ja158:2.1	Pakkhandinā pagabbhena,
ja158:2.2	niccaṁ sandānakhādinā;
ja158:2.3	Sameti pāpaṁ pāpena,
ja158:2.4	sameti asatā asan”ti.
ja158:3.1	Suhanujātakaṁ aṭṭhamaṁ.
ja159:0.1	Jātaka
ja159:0.2	Dukanipāta
ja159:0.3	Daḷhavagga
ja159:0.4	9. Morajātaka
ja159:1.1	“Udetayañ cakkhumā ekarājā,
ja159:1.2	Harissavaṇṇo pathavippabhāso;
ja159:1.3	Taṁ taṁ namassāmi harissavaṇṇaṁ pathavippabhāsaṁ,
ja159:1.4	Tayājja guttā viharemu divasaṁ.
ja159:2.1	Ye brāhmaṇā vedagū sabbadhamme,
ja159:2.2	Te me namo te ca maṁ pālayantu;
ja159:2.3	Namatthu buddhānaṁ namatthu bodhiyā,
ja159:2.4	Namo vimuttānaṁ namo vimuttiyā;
ja159:2.5	Imaṁ so parittaṁ katvā,
ja159:2.6	Moro carati esanā.
ja159:3.1	Apetayaṁ cakkhumā ekarājā,
ja159:3.2	Harissavaṇṇo pathavippabhāso;
ja159:3.3	Taṁ taṁ namassāmi harissavaṇṇaṁ pathavippabhāsaṁ,
ja159:3.4	Tayājja guttā viharemu rattiṁ.
ja159:4.1	Ye brāhmaṇā vedagū sabbadhamme,
ja159:4.2	Te me namo te ca maṁ pālayantu;
ja159:4.3	Namatthu buddhānaṁ namatthu bodhiyā,
ja159:4.4	Namo vimuttānaṁ namo vimuttiyā;
ja159:4.5	Imaṁ so parittaṁ katvā,
ja159:4.6	Moro vāsamakappayī”ti.
ja159:5.1	Morajātakaṁ navamaṁ.
ja160:0.1	Jātaka
ja160:0.2	Dukanipāta
ja160:0.3	Daḷhavagga
ja160:0.4	10. Vinīlajātaka
ja160:1.1	“Evameva nūna rājānaṁ,
ja160:1.2	vedehaṁ mithilaggahaṁ;
ja160:1.3	Assā vahanti ājaññā,
ja160:1.4	yathā haṁsā vinīlakaṁ”.
ja160:2.1	“Vinīla duggaṁ bhajasi,
ja160:2.2	abhūmiṁ tāta sevasi;
ja160:2.3	Gāmantakāni sevassu,
ja160:2.4	etaṁ mātālayaṁ tavāti.
ja160:3.1	Vinīlajātakaṁ dasamaṁ.
ja160:3.2	Daḷhavaggo paṭhamo.
ja160:4.1	Tassuddānaṁ
ja160:5.1	Varaballika daddara sūkarako,
ja160:5.2	Uraguttama pañcamabhaggavaro;
ja160:5.3	Mahatīcamu yāva siṅgālavaro,
ja160:5.4	Suhanuttama mora vinīlaṁ dasā”ti.
ja161:0.1	Jātaka
ja161:0.2	Dukanipāta
ja161:0.3	Santhavavagga
ja161:0.4	1. Indasamānagottajātaka
ja161:1.1	“Na santhavaṁ kāpurisena kayirā,
ja161:1.2	Ariyo anariyena pajānamatthaṁ;
ja161:1.3	Cirānuvutthopi karoti pāpaṁ,
ja161:1.4	Gajo yathā indasamānagottaṁ.
ja161:2.1	Yaṁ tveva jaññā sadiso mamanti,
ja161:2.2	Sīlena paññāya sutena cāpi;
ja161:2.3	Teneva mettiṁ kayirātha saddhiṁ,
ja161:2.4	Sukho have sappurisena saṅgamo”ti.
ja161:3.1	Indasamānagottajātakaṁ paṭhamaṁ.
ja162:0.1	Jātaka
ja162:0.2	Dukanipāta
ja162:0.3	Santhavavagga
ja162:0.4	2. Santhavajātaka
ja162:1.1	“Na santhavasmā paramatthi pāpiyo,
ja162:1.2	Yo santhavo kāpurisena hoti;
ja162:1.3	Santappito sappinā pāyasena,
ja162:1.4	Kicchākataṁ paṇṇakuṭiṁ adayhi.
ja162:2.1	Na santhavasmā paramatthi seyyo,
ja162:2.2	Yo santhavo sappurisena hoti;
ja162:2.3	Sīhassa byagghassa ca dīpino ca,
ja162:2.4	Sāmā mukhaṁ lehati santhavenā”ti.
ja162:3.1	Santhavajātakaṁ dutiyaṁ.
ja163:0.1	Jātaka
ja163:0.2	Dukanipāta
ja163:0.3	Santhavavagga
ja163:0.4	3. Susīmajātaka
ja163:1.1	“Kāḷā migā setadantā tavīme,
ja163:1.2	Parosataṁ hemajālābhichannā;
ja163:1.3	Te te dadāmīti susīma brūsi,
ja163:1.4	Anussaraṁ pettipitāmahānaṁ”.
ja163:2.1	“Kāḷā migā setadantā mamīme,
ja163:2.2	Parosataṁ hemajālābhichannā;
ja163:2.3	Te te dadāmīti vadāmi māṇava,
ja163:2.4	Anussaraṁ pettipitāmahānan”ti.
ja163:3.1	Susīmajātakaṁ tatiyaṁ.
ja164:0.1	Jātaka
ja164:0.2	Dukanipāta
ja164:0.3	Santhavavagga
ja164:0.4	4. Gijjhajātaka
ja164:1.1	“Yannu gijjho yojanasataṁ,
ja164:1.2	kuṇapāni avekkhati;
ja164:1.3	Kasmā jālañca pāsañca,
ja164:1.4	āsajjāpi na bujjhasi”.
ja164:2.1	“Yadā parābhavo hoti,
ja164:2.2	poso jīvitasaṅkhaye;
ja164:2.3	Atha jālañca pāsañca,
ja164:2.4	āsajjāpi na bujjhatī”ti.
ja164:3.1	Gijjhajātakaṁ catutthaṁ.
ja165:0.1	Jātaka
ja165:0.2	Dukanipāta
ja165:0.3	Santhavavagga
ja165:0.4	5. Nakulajātaka
ja165:1.1	“Sandhiṁ katvā amittena,
ja165:1.2	aṇḍajena jalābuja;
ja165:1.3	Vivariya dāṭhaṁ sesi,
ja165:1.4	kuto te bhayamāgataṁ”.
ja165:2.1	“Saṅketheva amittasmiṁ,
ja165:2.2	mittasmimpi na vissase;
ja165:2.3	Abhayā bhayamuppannaṁ,
ja165:2.4	api mūlāni kantatī”ti.
ja165:3.1	Nakulajātakaṁ pañcamaṁ.
ja166:0.1	Jātaka
ja166:0.2	Dukanipāta
ja166:0.3	Santhavavagga
ja166:0.4	6. Upasāḷakajātaka
ja166:1.1	“Upasāḷakanāmāni,
ja166:1.2	sahassāni catuddasa;
ja166:1.3	Asmiṁ padese daḍḍhāni,
ja166:1.4	natthi loke anāmataṁ.
ja166:2.1	Yamhi saccañca dhammo ca,
ja166:2.2	ahiṁsā saṁyamo damo;
ja166:2.3	Etaṁ ariyā sevanti,
ja166:2.4	etaṁ loke anāmatan”ti.
ja166:3.1	Upasāḷakajātakaṁ chaṭṭhaṁ.
ja167:0.1	Jātaka
ja167:0.2	Dukanipāta
ja167:0.3	Santhavavagga
ja167:0.4	7. Samiddhijātaka
ja167:1.1	“Abhutvā bhikkhasi bhikkhu,
ja167:1.2	Na hi bhutvāna bhikkhasi;
ja167:1.3	Bhutvāna bhikkhu bhikkhassu,
ja167:1.4	Mā taṁ kālo upaccagā.
ja167:2.1	Kālaṁ vohaṁ na jānāmi,
ja167:2.2	channo kālo na dissati;
ja167:2.3	Tasmā abhutvā bhikkhāmi,
ja167:2.4	mā maṁ kālo upaccagā”ti.
ja167:3.1	Samiddhijātakaṁ sattamaṁ.
ja168:0.1	Jātaka
ja168:0.2	Dukanipāta
ja168:0.3	Santhavavagga
ja168:0.4	8. Sakuṇagghijātaka
ja168:1.1	“Seno balasā patamāno,
ja168:1.2	lāpaṁ gocaraṭhāyinaṁ;
ja168:1.3	Sahasā ajjhappattova,
ja168:1.4	maraṇaṁ tenupāgami.
ja168:2.1	Sohaṁ nayena sampanno,
ja168:2.2	pettike gocare rato;
ja168:2.3	Apetasattu modāmi,
ja168:2.4	sampassaṁ atthamattano”ti.
ja168:3.1	Sakuṇagghijātakaṁ aṭṭhamaṁ.
ja169:0.1	Jātaka
ja169:0.2	Dukanipāta
ja169:0.3	Santhavavagga
ja169:0.4	9. Arakajātaka
ja169:1.1	“Yo ve mettena cittena,
ja169:1.2	sabbalokānukampati;
ja169:1.3	Uddhaṁ adho ca tiriyaṁ,
ja169:1.4	appamāṇena sabbaso.
ja169:2.1	Appamāṇaṁ hitaṁ cittaṁ,
ja169:2.2	paripuṇṇaṁ subhāvitaṁ;
ja169:2.3	Yaṁ pamāṇakataṁ kammaṁ,
ja169:2.4	na taṁ tatrāvasissatī”ti.
ja169:3.1	Arakajātakaṁ navamaṁ.
ja170:0.1	Jātaka
ja170:0.2	Dukanipāta
ja170:0.3	Santhavavagga
ja170:0.4	10. Kakaṇṭakajātaka
ja170:1.1	“Nāyaṁ pure uṇṇamati,
ja170:1.2	toraṇagge kakaṇṭako;
ja170:1.3	Mahosadha vijānāhi,
ja170:1.4	kena thaddho kakaṇṭako”.
ja170:2.1	“Aladdhapubbaṁ laddhāna,
ja170:2.2	aḍḍhamāsaṁ kakaṇṭako;
ja170:2.3	Atimaññati rājānaṁ,
ja170:2.4	vedehaṁ mithilaggahan”ti.
ja170:3.1	Kakaṇṭakajātakaṁ dasamaṁ.
ja170:3.2	Santhavavaggo dutiyo.
ja170:4.1	Tassuddānaṁ
ja170:5.1	Atha indasamāna sapaṇṇakuṭi,
ja170:5.2	Susimuttama gijjha jalābujako;
ja170:5.3	Upasāḷaka bhikkhu salāpavaro,
ja170:5.4	Atha mettavaro dasapuṇṇamatīti.
ja171:0.1	Jātaka
ja171:0.2	Dukanipāta
ja171:0.3	Kalyāṇavagga
ja171:0.4	1. Kalyāṇadhammajātaka
ja171:1.1	“Kalyāṇadhammoti yadā janinda,
ja171:1.2	Loke samaññaṁ anupāpuṇāti;
ja171:1.3	Tasmā na hiyyetha naro sapañño,
ja171:1.4	Hiriyāpi santo dhuramādiyanti.
ja171:2.1	Sāyaṁ samaññā idha majja pattā,
ja171:2.2	Kalyāṇadhammoti janinda loke;
ja171:2.3	Tāhaṁ samekkhaṁ idha pabbajissaṁ,
ja171:2.4	Na hi matthi chando idha kāmabhoge”ti.
ja171:3.1	Kalyāṇadhammajātakaṁ paṭhamaṁ.
ja172:0.1	Jātaka
ja172:0.2	Dukanipāta
ja172:0.3	Kalyāṇavagga
ja172:0.4	2. Daddarajātaka
ja172:1.1	“Ko nu saddena mahatā,
ja172:1.2	abhinādeti daddaraṁ;
ja172:1.3	Taṁ sīhā nappaṭinadanti,
ja172:1.4	ko nāmeso migādhibhū”.
ja172:2.1	“Adhamo migajātānaṁ,
ja172:2.2	siṅgālo tāta vassati;
ja172:2.3	Jātimassa jigucchantā,
ja172:2.4	tuṇhī sīhā samacchare”ti.
ja172:3.1	Daddarajātakaṁ dutiyaṁ.
ja173:0.1	Jātaka
ja173:0.2	Dukanipāta
ja173:0.3	Kalyāṇavagga
ja173:0.4	3. Makkaṭajātaka
ja173:1.1	“Tāta māṇavako eso,
ja173:1.2	tālamūlaṁ apassito;
ja173:1.3	Agārakañcidaṁ atthi,
ja173:1.4	handa demassagārakaṁ”.
ja173:2.1	“Mā kho tvaṁ tāta pakkosi,
ja173:2.2	dūseyya no agārakaṁ;
ja173:2.3	Netādisaṁ mukhaṁ hoti,
ja173:2.4	brāhmaṇassa susīlino”ti.
ja173:3.1	Makkaṭajātakaṁ tatiyaṁ.
ja174:0.1	Jātaka
ja174:0.2	Dukanipāta
ja174:0.3	Kalyāṇavagga
ja174:0.4	4. Dubbhiyamakkaṭajātaka
ja174:1.1	“Adamha te vāri pahūtarūpaṁ,
ja174:1.2	Ghammābhitattassa pipāsitassa;
ja174:1.3	So dāni pitvāna kiriṅkarosi,
ja174:1.4	Asaṅgamo pāpajanena seyyo”.
ja174:2.1	“Ko te suto vā diṭṭho vā,
ja174:2.2	sīlavā nāma makkaṭo;
ja174:2.3	Idāni kho taṁ ohacchaṁ,
ja174:2.4	esā asmāka dhammatā”ti.
ja174:3.1	Dubbhiyamakkaṭajātakaṁ catutthaṁ.
ja175:0.1	Jātaka
ja175:0.2	Dukanipāta
ja175:0.3	Kalyāṇavagga
ja175:0.4	5. Ādiccupaṭṭhānajātaka
ja175:1.1	“Sabbesu kira bhūtesu,
ja175:1.2	santi sīlasamāhitā;
ja175:1.3	Passa sākhāmigaṁ jammaṁ,
ja175:1.4	ādiccamupatiṭṭhati”.
ja175:2.1	“Nāssa sīlaṁ vijānātha,
ja175:2.2	anaññāya pasaṁsatha;
ja175:2.3	Aggihuttañca uhannaṁ,
ja175:2.4	dve ca bhinnā kamaṇḍalū”ti.
ja175:3.1	Ādiccupaṭṭhānajātakaṁ pañcamaṁ.
ja176:0.1	Jātaka
ja176:0.2	Dukanipāta
ja176:0.3	Kalyāṇavagga
ja176:0.4	6. Kaḷāyamuṭṭhijātaka
ja176:1.1	“Bālo vatāyaṁ dumasākhagocaro,
ja176:1.2	Paññā janinda nayimassa vijjati;
ja176:1.3	Kaḷāyamuṭṭhiṁ avakiriya kevalaṁ,
ja176:1.4	Ekaṁ kaḷāyaṁ patitaṁ gavesati”.
ja176:2.1	“Evameva mayaṁ rāja,
ja176:2.2	ye caññe atilobhino;
ja176:2.3	Appena bahuṁ jiyyāma,
ja176:2.4	kaḷāyeneva vānaro”ti.
ja176:3.1	Kaḷāyamuṭṭhijātakaṁ chaṭṭhaṁ.
ja177:0.1	Jātaka
ja177:0.2	Dukanipāta
ja177:0.3	Kalyāṇavagga
ja177:0.4	7. Tindukajātaka
ja177:1.1	“Dhanuhatthakalāpehi,
ja177:1.2	nettiṁ savaradhāribhi;
ja177:1.3	Samantā parikiṇṇamha,
ja177:1.4	kathaṁ mokkho bhavissati”.
ja177:2.1	“Appeva bahukiccānaṁ,
ja177:2.2	attho jāyetha koci naṁ;
ja177:2.3	Atthi rukkhassa acchinnaṁ,
ja177:2.4	khajjathaññeva tindukan”ti.
ja177:3.1	Tindukajātakaṁ sattamaṁ.
ja178:0.1	Jātaka
ja178:0.2	Dukanipāta
ja178:0.3	Kalyāṇavagga
ja178:0.4	8. Kacchapajātaka
ja178:1.1	“Janittaṁ me bhavittaṁ me,
ja178:1.2	iti paṅke avassayiṁ;
ja178:1.3	Taṁ maṁ paṅko ajjhabhavi,
ja178:1.4	yathā dubbalakaṁ tathā;
ja178:1.5	Taṁ taṁ vadāmi bhaggava,
ja178:1.6	suṇohi vacanaṁ mama”.
ja178:2.1	“Gāme vā yadi vā raññe,
ja178:2.2	sukhaṁ yatrādhigacchati;
ja178:2.3	Taṁ janittaṁ bhavittañca,
ja178:2.4	purisassa pajānato;
ja178:2.5	Yamhi jīve tamhi gacche,
ja178:2.6	na niketahato siyā”ti.
ja178:3.1	Kacchapajātakaṁ aṭṭhamaṁ.
ja179:0.1	Jātaka
ja179:0.2	Dukanipāta
ja179:0.3	Kalyāṇavagga
ja179:0.4	9. Satadhammajātaka
ja179:1.1	“Tañca appañca ucchiṭṭhaṁ,
ja179:1.2	tañca kicchena no adā;
ja179:1.3	Sohaṁ brāhmaṇajātiko,
ja179:1.4	yaṁ bhuttaṁ tampi uggataṁ”.
ja179:2.1	“Evaṁ dhammaṁ niraṅkatvā,
ja179:2.2	Yo adhammena jīvati;
ja179:2.3	Satadhammova lābhena,
ja179:2.4	Laddhenapi na nandatī”ti.
ja179:3.1	Satadhammajātakaṁ navamaṁ.
ja180:0.1	Jātaka
ja180:0.2	Dukanipāta
ja180:0.3	Kalyāṇavagga
ja180:0.4	10. Duddadajātaka
ja180:1.1	“Duddadaṁ dadamānānaṁ,
ja180:1.2	dukkaraṁ kamma kubbataṁ;
ja180:1.3	Asanto nānukubbanti,
ja180:1.4	sataṁ dhammo durannayo”.
ja180:2.1	“Tasmā satañca asataṁ,
ja180:2.2	nānā hoti ito gati;
ja180:2.3	Asanto nirayaṁ yanti,
ja180:2.4	santo saggaparāyaṇāti.
ja180:3.1	Duddadajātakaṁ dasamaṁ.
ja180:3.2	Kalyāṇavaggo tatiyo.
ja180:4.1	Tassuddānaṁ
ja180:5.1	Susamaññamigādhibhū māṇavako,
ja180:5.2	Vāripahūtarūpādiccupaṭṭhānā;
ja180:5.3	Sakaḷāyasatindukapaṅka puna,
ja180:5.4	Satadhamma sududdadakena dasā”ti.
ja181:0.1	Jātaka
ja181:0.2	Dukanipāta
ja181:0.3	Asadisavagga
ja181:0.4	1. Asadisajātaka
ja181:1.1	Dhanuggaho asadiso,
ja181:1.2	rājaputto mahabbalo;
ja181:1.3	Dūrepātī akkhaṇavedhī,
ja181:1.4	mahākāyappadālano.
ja181:2.1	Sabbāmitte raṇaṁ katvā,
ja181:2.2	na ca kañci viheṭhayi;
ja181:2.3	Bhātaraṁ sotthiṁ katvāna,
ja181:2.4	saṁyamaṁ ajjhupāgamīti.
ja181:3.1	Asadisajātakaṁ paṭhamaṁ.
ja182:0.1	Jātaka
ja182:0.2	Dukanipāta
ja182:0.3	Asadisavagga
ja182:0.4	2. Saṅgāmāvacarajātaka
ja182:1.1	“Saṅgāmāvacaro sūro,
ja182:1.2	balavā iti vissuto;
ja182:1.3	Kiṁ nu toraṇamāsajja,
ja182:1.4	paṭikkamasi kuñjara.
ja182:2.1	Omadda khippaṁ palighaṁ,
ja182:2.2	esikāni ca abbaha;
ja182:2.3	Toraṇāni ca madditvā,
ja182:2.4	khippaṁ pavisa kuñjarā”ti.
ja182:3.1	Saṅgāmāvacarajātakaṁ dutiyaṁ.
ja183:0.1	Jātaka
ja183:0.2	Dukanipāta
ja183:0.3	Asadisavagga
ja183:0.4	3. Vālodakajātaka
ja183:1.1	“Vālodakaṁ apparasaṁ nihīnaṁ,
ja183:1.2	Pitvā mado jāyati gadrabhānaṁ;
ja183:1.3	Imañca pitvāna rasaṁ paṇītaṁ,
ja183:1.4	Mado na sañjāyati sindhavānaṁ”.
ja183:2.1	“Appaṁ pivitvāna nihīnajacco,
ja183:2.2	So majjatī tena janinda puṭṭho;
ja183:2.3	Dhorayhasīlī ca kulamhi jāto,
ja183:2.4	Na majjatī aggarasaṁ pivitvā”ti.
ja183:3.1	Vālodakajātakaṁ tatiyaṁ.
ja184:0.1	Jātaka
ja184:0.2	Dukanipāta
ja184:0.3	Asadisavagga
ja184:0.4	4. Giridattajātaka
ja184:1.1	“Dūsito giridattena,
ja184:1.2	hayo sāmassa paṇḍavo;
ja184:1.3	Porāṇaṁ pakatiṁ hitvā,
ja184:1.4	tassevānuvidhiyyati.
ja184:2.1	Sace ca tanujo poso,
ja184:2.2	sikharākārakappito;
ja184:2.3	Ānane naṁ gahetvāna,
ja184:2.4	maṇḍale parivattaye;
ja184:2.5	Khippameva pahantvāna,
ja184:2.6	tassevānuvidhiyyatī”ti.
ja184:3.1	Giridattajātakaṁ catutthaṁ.
ja185:0.1	Jātaka
ja185:0.2	Dukanipāta
ja185:0.3	Asadisavagga
ja185:0.4	5. Anabhiratijātaka
ja185:1.1	“Yathodake āvile appasanne,
ja185:1.2	Na passati sippikasambukañca;
ja185:1.3	Sakkharaṁ vālukaṁ macchagumbaṁ,
ja185:1.4	Evaṁ āvilamhi citte;
ja185:1.5	Na passati attadatthaṁ paratthaṁ.
ja185:2.1	Yathodake acche vippasanne,
ja185:2.2	So passati sippikasambukañca;
ja185:2.3	Sakkharaṁ vālukaṁ macchagumbaṁ,
ja185:2.4	Evaṁ anāvilamhi citte;
ja185:2.5	So passati attadatthaṁ paratthan”ti.
ja185:3.1	Anabhiratijātakaṁ pañcamaṁ.
ja186:0.1	Jātaka
ja186:0.2	Dukanipāta
ja186:0.3	Asadisavagga
ja186:0.4	6. Dadhivāhanajātaka
ja186:1.1	“Vaṇṇagandharasūpeto,
ja186:1.2	amboyaṁ ahuvā pure;
ja186:1.3	Tameva pūjaṁ labhamāno,
ja186:1.4	kenambo kaṭukapphalo”.
ja186:2.1	“Pucimandaparivāro,
ja186:2.2	ambo te dadhivāhana;
ja186:2.3	Mūlaṁ mūlena saṁsaṭṭhaṁ,
ja186:2.4	sākhā sākhā nisevare;
ja186:2.5	Asātasannivāsena,
ja186:2.6	tenambo kaṭukapphalo”ti.
ja186:3.1	Dadhivāhanajātakaṁ chaṭṭhaṁ.
ja187:0.1	Jātaka
ja187:0.2	Dukanipāta
ja187:0.3	Asadisavagga
ja187:0.4	7. Catumaṭṭhajātaka
ja187:1.1	“Ucce viṭabhimāruyha,
ja187:1.2	mantayavho rahogatā;
ja187:1.3	Nīce oruyha mantavho,
ja187:1.4	migarājāpi sossati.
ja187:2.1	Yaṁ suvaṇṇo suvaṇṇena,
ja187:2.2	devo devena mantaye;
ja187:2.3	Kiṁ tettha catumaṭṭhassa,
ja187:2.4	bilaṁ pavisa jambukā”ti.
ja187:3.1	Catumaṭṭhajātakaṁ sattamaṁ.
ja188:0.1	Jātaka
ja188:0.2	Dukanipāta
ja188:0.3	Asadisavagga
ja188:0.4	8. Sīhakotthujātaka
ja188:1.1	“Sīhaṅgulī sīhanakho,
ja188:1.2	sīhapādapatiṭṭhito;
ja188:1.3	So sīho sīhasaṅghamhi,
ja188:1.4	eko nadati aññathā”.
ja188:2.1	“Mā tvaṁ nadi rājaputta,
ja188:2.2	appasaddo vane vasa;
ja188:2.3	Sarena kho taṁ jāneyyuṁ,
ja188:2.4	na hi te pettiko saro”ti.
ja188:3.1	Sīhakotthujātakaṁ aṭṭhamaṁ.
ja189:0.1	Jātaka
ja189:0.2	Dukanipāta
ja189:0.3	Asadisavagga
ja189:0.4	9. Sīhacammajātaka
ja189:1.1	“Netaṁ sīhassa naditaṁ,
ja189:1.2	na byagghassa na dīpino;
ja189:1.3	Pāruto sīhacammena,
ja189:1.4	jammo nadati gadrabho”.
ja189:2.1	“Cirampi kho taṁ khādeyya,
ja189:2.2	gadrabho haritaṁ yavaṁ;
ja189:2.3	Pāruto sīhacammena,
ja189:2.4	ravamānova dūsayī”ti.
ja189:3.1	Sīhacammajātakaṁ navamaṁ.
ja190:0.1	Jātaka
ja190:0.2	Dukanipāta
ja190:0.3	Asadisavagga
ja190:0.4	10. Sīlānisaṁsajātaka
ja190:1.1	“Passa saddhāya sīlassa,
ja190:1.2	cāgassa ca ayaṁ phalaṁ;
ja190:1.3	Nāgo nāvāya vaṇṇena,
ja190:1.4	saddhaṁ vahatupāsakaṁ.
ja190:2.1	Sabbhireva samāsetha,
ja190:2.2	sabbhi kubbetha santhavaṁ;
ja190:2.3	Satañhi sannivāsena,
ja190:2.4	sotthiṁ gacchati nhāpito”ti.
ja190:3.1	Sīlānisaṁsajātakaṁ dasamaṁ.
ja190:3.2	Asadisavaggo catuttho.
ja190:4.1	Tassuddānaṁ
ja190:5.1	Dhanuggaha kuñjara apparaso,
ja190:5.2	Giridattamanāvilacittavaraṁ;
ja190:5.3	Dadhivāhana jambūka sīhanakho,
ja190:5.4	Haritayava nāgavarena dasāti.
ja191:0.1	Jātaka
ja191:0.2	Dukanipāta
ja191:0.3	Ruhakavagga
ja191:0.4	1. Ruhakajātaka
ja191:1.1	“Api ruhaka chinnāpi,
ja191:1.2	jiyā sandhīyate puna;
ja191:1.3	Sandhīyassu purāṇiyā,
ja191:1.4	mā kodhassa vasaṁ gami”.
ja191:2.1	“Vijjamānesu vākesu,
ja191:2.2	vijjamānesu kārisu;
ja191:2.3	Aññaṁ jiyaṁ karissāmi,
ja191:2.4	alaññeva purāṇiyā”ti.
ja191:3.1	Ruhakajātakaṁ paṭhamaṁ.
ja192:0.1	Jātaka
ja192:0.2	Dukanipāta
ja192:0.3	Ruhakavagga
ja192:0.4	2. Sirikāḷakaṇṇijātaka
ja192:1.1	“Itthī siyā rūpavatī,
ja192:1.2	sā ca sīlavatī siyā;
ja192:1.3	Puriso taṁ na iccheyya,
ja192:1.4	saddahāsi mahosadha”.
ja192:2.1	“Saddahāmi mahārāja,
ja192:2.2	puriso dubbhago siyā;
ja192:2.3	Sirī ca kāḷakaṇṇī ca,
ja192:2.4	na samenti kudācanan”ti.
ja192:3.1	Sirikāḷakaṇṇijātakaṁ dutiyaṁ.
ja193:0.1	Jātaka
ja193:0.2	Dukanipāta
ja193:0.3	Ruhakavagga
ja193:0.4	3. Cūḷapadumajātaka
ja193:1.1	“Ayameva sā ahamapi so anañño,
ja193:1.2	Ayameva so hatthacchinno anañño;
ja193:1.3	Yamāha ‘komārapatī maman’ti,
ja193:1.4	Vajjhitthiyo natthi itthīsu saccaṁ.
ja193:2.1	Imañca jammaṁ musalena hantvā,
ja193:2.2	Luddaṁ chavaṁ paradārūpaseviṁ;
ja193:2.3	Imissā ca naṁ pāpapatibbatāya,
ja193:2.4	Jīvantiyā chindatha kaṇṇanāsan”ti.
ja193:3.1	Cūḷapadumajātakaṁ tatiyaṁ.
ja194:0.1	Jātaka
ja194:0.2	Dukanipāta
ja194:0.3	Ruhakavagga
ja194:0.4	4. Maṇicorajātaka
ja194:1.1	“Na santi devā pavasanti nūna,
ja194:1.2	Na hi nūna santi idha lokapālā;
ja194:1.3	Sahasā karontānamasaññatānaṁ,
ja194:1.4	Na hi nūna santī paṭisedhitāro”.
ja194:2.1	“Akāle vassatī tassa,
ja194:2.2	kāle tassa na vassati;
ja194:2.3	Saggā ca cavati ṭhānā,
ja194:2.4	nanu so tāvatā hato”ti.
ja194:3.1	Maṇicorajātakaṁ catutthaṁ.
ja195:0.1	Jātaka
ja195:0.2	Dukanipāta
ja195:0.3	Ruhakavagga
ja195:0.4	5. Pabbatūpattharajātaka
ja195:1.1	“Pabbatūpatthare ramme,
ja195:1.2	jātā pokkharaṇī sivā;
ja195:1.3	Taṁ siṅgālo apāpāyi,
ja195:1.4	jānaṁ sīhena rakkhitaṁ”.
ja195:2.1	“Pivanti ce mahārāja,
ja195:2.2	sāpadāni mahānadiṁ;
ja195:2.3	Na tena anadī hoti,
ja195:2.4	khamassu yadi te piyā”ti.
ja195:3.1	Pabbatūpattharajātakaṁ pañcamaṁ.
ja196:0.1	Jātaka
ja196:0.2	Dukanipāta
ja196:0.3	Ruhakavagga
ja196:0.4	6. Valāhakassajātaka
ja196:1.1	“Ye na kāhanti ovādaṁ,
ja196:1.2	narā buddhena desitaṁ;
ja196:1.3	Byasanaṁ te gamissanti,
ja196:1.4	rakkhasīhiva vāṇijā.
ja196:2.1	Ye ca kāhanti ovādaṁ,
ja196:2.2	narā buddhena desitaṁ;
ja196:2.3	Sotthiṁ pāraṁ gamissanti,
ja196:2.4	valāheneva vāṇijā”ti.
ja196:3.1	Valāhakassajātakaṁ chaṭṭhaṁ.
ja197:0.1	Jātaka
ja197:0.2	Dukanipāta
ja197:0.3	Ruhakavagga
ja197:0.4	7. Mittāmittajātaka
ja197:1.1	“Na naṁ umhayate disvā,
ja197:1.2	na ca naṁ paṭinandati;
ja197:1.3	Cakkhūni cassa na dadāti,
ja197:1.4	paṭilomañca vattati.
ja197:2.1	Ete bhavanti ākārā,
ja197:2.2	amittasmiṁ patiṭṭhitā;
ja197:2.3	Yehi amittaṁ jāneyya,
ja197:2.4	disvā sutvā ca paṇḍito”ti.
ja197:3.1	Mittāmittajātakaṁ sattamaṁ.
ja198:0.1	Jātaka
ja198:0.2	Dukanipāta
ja198:0.3	Ruhakavagga
ja198:0.4	8. Rādhajātaka
ja198:1.1	“Pavāsā āgato tāta,
ja198:1.2	idāni nacirāgato;
ja198:1.3	Kaccinnu tāta te mātā,
ja198:1.4	na aññamupasevati”.
ja198:2.1	“Na kho panetaṁ subhaṇaṁ,
ja198:2.2	Giraṁ saccupasaṁhitaṁ;
ja198:2.3	Sayetha poṭṭhapādova,
ja198:2.4	Mummure upakūthito”ti.
ja198:3.1	Rādhajātakaṁ aṭṭhamaṁ.
ja199:0.1	Jātaka
ja199:0.2	Dukanipāta
ja199:0.3	Ruhakavagga
ja199:0.4	9. Gahapatijātaka
ja199:1.1	“Ubhayaṁ me na khamati,
ja199:1.2	ubhayaṁ me na ruccati;
ja199:1.3	Yācāyaṁ koṭṭhamotiṇṇā,
ja199:1.4	nāddasaṁ iti bhāsati.
ja199:2.1	Taṁ taṁ gāmapati brūmi,
ja199:2.2	kadare appasmi jīvite;
ja199:2.3	Dve māse saṅgaraṁ katvā,
ja199:2.4	maṁsaṁ jaraggavaṁ kisaṁ;
ja199:2.5	Appattakāle codesi,
ja199:2.6	tampi mayhaṁ na ruccatī”ti.
ja199:3.1	Gahapatijātakaṁ navamaṁ.
ja200:0.1	Jātaka
ja200:0.2	Dukanipāta
ja200:0.3	Ruhakavagga
ja200:0.4	10. Sādhusīlajātaka
ja200:1.1	“Sarīradabyaṁ vuḍḍhabyaṁ,
ja200:1.2	sojaccaṁ sādhusīliyaṁ;
ja200:1.3	Brāhmaṇaṁ teva pucchāma,
ja200:1.4	kaṁ nu tesaṁ vanimhase”.
ja200:2.1	“Attho atthi sarīrasmiṁ,
ja200:2.2	vuḍḍhabyassa namo kare;
ja200:2.3	Attho atthi sujātasmiṁ,
ja200:2.4	sīlaṁ asmāka ruccatī”ti.
ja200:3.1	Sādhusīlajātakaṁ dasamaṁ.
ja200:3.2	Ruhakavaggo pañcamo.
ja200:4.1	Tassuddānaṁ
ja200:5.1	Apiruhaka rūpavatī musalo,
ja200:5.2	Pavasanti sapañcamapokkharaṇī;
ja200:5.3	Atha muttimavāṇija umhayate,
ja200:5.4	Ciraāgata koṭṭha sarīra dasāti.
ja201:0.1	Jātaka
ja201:0.2	Dukanipāta
ja201:0.3	Nataṁdaḷhavagga
ja201:0.4	1. Bandhanāgārajātaka
ja201:1.1	“Na taṁ daḷhaṁ bandhanamāhu dhīrā,
ja201:1.2	Yadāyasaṁ dārujapabbajañca;
ja201:1.3	Sārattarattā maṇikuṇḍalesu,
ja201:1.4	Puttesu dāresu ca yā apekkhā.
ja201:2.1	Etaṁ daḷhaṁ bandhanamāhu dhīrā,
ja201:2.2	Ohārinaṁ sīthilaṁ duppamuñcaṁ;
ja201:2.3	Etampi chetvāna vajanti dhīrā,
ja201:2.4	Anapekkhino kāmasukhaṁ pahāyā”ti.
ja201:3.1	Bandhanāgārajātakaṁ paṭhamaṁ.
ja202:0.1	Jātaka
ja202:0.2	Dukanipāta
ja202:0.3	Nataṁdaḷhavagga
ja202:0.4	2. Keḷisīlajātaka
ja202:1.1	“Haṁsā koñcā mayūrā ca,
ja202:1.2	hatthayo pasadā migā;
ja202:1.3	Sabbe sīhassa bhāyanti,
ja202:1.4	natthi kāyasmi tulyatā.
ja202:2.1	Evameva manussesu,
ja202:2.2	daharo cepi paññavā;
ja202:2.3	So hi tattha mahā hoti,
ja202:2.4	neva bālo sarīravā”ti.
ja202:3.1	Keḷisīlajātakaṁ dutiyaṁ.
ja203:0.1	Jātaka
ja203:0.2	Dukanipāta
ja203:0.3	Nataṁdaḷhavagga
ja203:0.4	3. Khaṇḍajātaka
ja203:1.1	“Virūpakkhehi me mettaṁ,
ja203:1.2	Mettaṁ erāpathehi me;
ja203:1.3	Chabyāputtehi me mettaṁ,
ja203:1.4	Mettaṁ kaṇhāgotamakehi ca.
ja203:2.1	Apādakehi me mettaṁ,
ja203:2.2	mettaṁ dvipādakehi me;
ja203:2.3	Catuppadehi me mettaṁ,
ja203:2.4	mettaṁ bahuppadehi me.
ja203:3.1	Mā maṁ apādako hiṁsi,
ja203:3.2	mā maṁ hiṁsi dvipādako;
ja203:3.3	Mā maṁ catuppado hiṁsi,
ja203:3.4	mā maṁ hiṁsi bahuppado.
ja203:4.1	Sabbe sattā sabbe pāṇā,
ja203:4.2	sabbe bhūtā ca kevalā;
ja203:4.3	Sabbe bhadrāni passantu,
ja203:4.4	mā kañci pāpamāgamā.
ja203:5.1	Appamāṇo buddho,
ja203:5.2	Appamāṇo dhammo;
ja203:5.3	Appamāṇo saṅgho,
ja203:5.4	Pamāṇavantāni sarīsapāni;
ja203:5.5	Ahivicchikasatapadī,
ja203:5.6	Uṇṇanābhi sarabū mūsikā.
ja203:6.1	Katā me rakkhā katā me parittā,
ja203:6.2	Paṭikkamantu bhūtāni;
ja203:6.3	Sohaṁ namo bhagavato,
ja203:6.4	Namo sattannaṁ sammāsambuddhānan”ti.
ja203:7.1	Khaṇḍajātakaṁ tatiyaṁ.
ja204:0.1	Jātaka
ja204:0.2	Dukanipāta
ja204:0.3	Nataṁdaḷhavagga
ja204:0.4	4. Vīrakajātaka
ja204:1.1	“Api vīraka passesi,
ja204:1.2	sakuṇaṁ mañjubhāṇakaṁ;
ja204:1.3	Mayūragīvasaṅkāsaṁ,
ja204:1.4	patiṁ mayhaṁ saviṭṭhakaṁ”.
ja204:2.1	“Udakathalacarassa pakkhino,
ja204:2.2	Niccaṁ āmakamacchabhojino;
ja204:2.3	Tassānukaraṁ saviṭṭhako,
ja204:2.4	Sevāle paliguṇṭhito mato”ti.
ja204:3.1	Vīrakajātakaṁ catutthaṁ.
ja205:0.1	Jātaka
ja205:0.2	Dukanipāta
ja205:0.3	Nataṁdaḷhavagga
ja205:0.4	5. Gaṅgeyyajātaka
ja205:1.1	“Sobhati maccho gaṅgeyyo,
ja205:1.2	atho sobhati yāmuno;
ja205:1.3	Catuppadoyaṁ puriso,
ja205:1.4	nigrodhaparimaṇḍalo;
ja205:1.5	Īsakāyatagīvo ca,
ja205:1.6	sabbeva atirocati”.
ja205:2.1	“Yaṁ pucchito na taṁ akkhāsi,
ja205:2.2	Aññaṁ akkhāsi pucchito;
ja205:2.3	Attappasaṁsako poso,
ja205:2.4	Nāyaṁ asmāka ruccatī”ti.
ja205:3.1	Gaṅgeyyajātakaṁ pañcamaṁ.
ja206:0.1	Jātaka
ja206:0.2	Dukanipāta
ja206:0.3	Nataṁdaḷhavagga
ja206:0.4	6. Kuruṅgamigajātaka
ja206:1.1	“Iṅgha vaṭṭamayaṁ pāsaṁ,
ja206:1.2	chinda dantehi kacchapa;
ja206:1.3	Ahaṁ tathā karissāmi,
ja206:1.4	yathā nehiti luddako”.
ja206:2.1	“Kacchapo pāvisī vāriṁ,
ja206:2.2	kuruṅgo pāvisī vanaṁ;
ja206:2.3	Satapatto dumaggamhā,
ja206:2.4	dūre putte apānayī”ti.
ja206:3.1	Kuruṅgamigajātakaṁ chaṭṭhaṁ.
ja207:0.1	Jātaka
ja207:0.2	Dukanipāta
ja207:0.3	Nataṁdaḷhavagga
ja207:0.4	7. Assakajātaka
ja207:1.1	“Ayamassakarājena,
ja207:1.2	deso vicarito mayā;
ja207:1.3	Anukāmayakāmena,
ja207:1.4	piyena patinā saha.
ja207:2.1	Navena sukhadukkhena,
ja207:2.2	porāṇaṁ apidhīyati;
ja207:2.3	Tasmā assakaraññāva,
ja207:2.4	kīṭo piyataro mamā”ti.
ja207:3.1	Assakajātakaṁ sattamaṁ.
ja208:0.1	Jātaka
ja208:0.2	Dukanipāta
ja208:0.3	Nataṁdaḷhavagga
ja208:0.4	8. Susumārajātaka
ja208:1.1	“Alaṁ metehi ambehi,
ja208:1.2	jambūhi panasehi ca;
ja208:1.3	Yāni pāraṁ samuddassa,
ja208:1.4	varaṁ mayhaṁ udumbaro.
ja208:2.1	Mahatī vata te bondi,
ja208:2.2	na ca paññā tadūpikā;
ja208:2.3	Susumāra vañcito mesi,
ja208:2.4	gaccha dāni yathāsukhan”ti.
ja208:3.1	Susumārajātakaṁ aṭṭhamaṁ.
ja209:0.1	Jātaka
ja209:0.2	Dukanipāta
ja209:0.3	Nataṁdaḷhavagga
ja209:0.4	9. Kukkuṭajātaka
ja209:1.1	“Diṭṭhā mayā vane rukkhā,
ja209:1.2	assakaṇṇā vibhīṭakā;
ja209:1.3	Na tāni evaṁ sakkanti,
ja209:1.4	yathā tvaṁ rukkha sakkasi”.
ja209:2.1	“Purāṇakukkuṭo ayaṁ,
ja209:2.2	bhetvā pañjaramāgato;
ja209:2.3	Kusalo vāḷapāsānaṁ,
ja209:2.4	apakkamati bhāsatī”ti.
ja209:3.1	Kukkuṭajātakaṁ navamaṁ.
ja210:0.1	Jātaka
ja210:0.2	Dukanipāta
ja210:0.3	Nataṁdaḷhavagga
ja210:0.4	10. Kandagalakajātaka
ja210:1.1	“Ambho ko nāma yaṁ rukkho,
ja210:1.2	sinnapatto sakaṇṭako;
ja210:1.3	Yattha ekappahārena,
ja210:1.4	uttamaṅgaṁ vibhijjitaṁ”.
ja210:2.1	“Acāri vatāyaṁ vitudaṁ vanāni,
ja210:2.2	Kaṭṭhaṅgarukkhesu asārakesu;
ja210:2.3	Athāsadā khadiraṁ jātasāraṁ,
ja210:2.4	Yatthabbhidā garuḷo uttamaṅgan”ti.
ja210:3.1	Kandagalakajātakaṁ dasamaṁ.
ja210:3.2	Nataṁdaḷhavaggo chaṭṭho.
ja210:4.1	Tassuddānaṁ
ja210:5.1	Daḷhabandhana haṁsavaro ca puna,
ja210:5.2	Virūpakkha saviṭṭhaka macchavaro;
ja210:5.3	Sakuruṅga saassaka ambavaro,
ja210:5.4	Puna kukkuṭako garuḷena dasāti.
ja211:0.1	Jātaka
ja211:0.2	Dukanipāta
ja211:0.3	Bīraṇathambhavagga
ja211:0.4	1. Somadattajātaka
ja211:1.1	“Akāsi yoggaṁ dhuvamappamatto,
ja211:1.2	Saṁvaccharaṁ bīraṇathambhakasmiṁ;
ja211:1.3	Byākāsi saññaṁ parisaṁ vigayha,
ja211:1.4	Na niyyamo tāyati appapaññaṁ”.
ja211:2.1	“Dvayaṁ yācanako tāta,
ja211:2.2	somadatta nigacchati;
ja211:2.3	Alābhaṁ dhanalābhaṁ vā,
ja211:2.4	evaṁ dhammā hi yācanā”ti.
ja211:3.1	Somadattajātakaṁ paṭhamaṁ.
ja212:0.1	Jātaka
ja212:0.2	Dukanipāta
ja212:0.3	Bīraṇathambhavagga
ja212:0.4	2. Ucchiṭṭhabhattajātaka
ja212:1.1	“Añño uparimo vaṇṇo,
ja212:1.2	añño vaṇṇo ca heṭṭhimo;
ja212:1.3	Brāhmaṇī tveva pucchāmi,
ja212:1.4	kiṁ heṭṭhā kiñca uppari”.
ja212:2.1	“Ahaṁ naṭosmi bhaddante,
ja212:2.2	bhikkhakosmi idhāgato;
ja212:2.3	Ayañhi koṭṭhamotiṇṇo,
ja212:2.4	ayaṁ so yaṁ gavesasī”ti.
ja212:3.1	Ucchiṭṭhabhattajātakaṁ dutiyaṁ.
ja213:0.1	Jātaka
ja213:0.2	Dukanipāta
ja213:0.3	Bīraṇathambhavagga
ja213:0.4	3. Bharujātaka
ja213:1.1	“Isīnamantaraṁ katvā,
ja213:1.2	bharurājāti me sutaṁ;
ja213:1.3	Ucchinno saha raṭṭhehi,
ja213:1.4	sarājā vibhavaṅgato.
ja213:2.1	Tasmā hi chandāgamanaṁ,
ja213:2.2	nappasaṁsanti paṇḍitā;
ja213:2.3	Aduṭṭhacitto bhāseyya,
ja213:2.4	giraṁ saccupasaṁhitan”ti.
ja213:3.1	Bharujātakaṁ tatiyaṁ.
ja214:0.1	Jātaka
ja214:0.2	Dukanipāta
ja214:0.3	Bīraṇathambhavagga
ja214:0.4	4. Puṇṇanadījātaka
ja214:1.1	“Puṇṇaṁ nadiṁ yena ca peyyamāhu,
ja214:1.2	Jātaṁ yavaṁ yena ca guyhamāhu;
ja214:1.3	Dūraṁ gataṁ yena ca avhayanti,
ja214:1.4	So tyāgato handa ca bhuñja brāhmaṇa”.
ja214:2.1	“Yato maṁ saratī rājā,
ja214:2.2	vāyasampi pahetave;
ja214:2.3	Haṁsā koñcā mayūrā ca,
ja214:2.4	asatīyeva pāpiyā”ti.
ja214:3.1	Puṇṇanadījātakaṁ catutthaṁ.
ja215:0.1	Jātaka
ja215:0.2	Dukanipāta
ja215:0.3	Bīraṇathambhavagga
ja215:0.4	5. Kacchapajātaka
ja215:1.1	“Avadhī vata attānaṁ,
ja215:1.2	kacchapo byāharaṁ giraṁ;
ja215:1.3	Suggahītasmiṁ kaṭṭhasmiṁ,
ja215:1.4	vācāya sakiyāvadhi.
ja215:2.1	Etampi disvā naravīriyaseṭṭha,
ja215:2.2	Vācaṁ pamuñce kusalaṁ nātivelaṁ;
ja215:2.3	Passasi bahubhāṇena,
ja215:2.4	Kacchapaṁ byasanaṁ gatan”ti.
ja215:3.1	Kacchapajātakaṁ pañcamaṁ.
ja216:0.1	Jātaka
ja216:0.2	Dukanipāta
ja216:0.3	Bīraṇathambhavagga
ja216:0.4	6. Macchajātaka
ja216:1.1	“Na māyamaggi tapati,
ja216:1.2	na sūlo sādhutacchito;
ja216:1.3	Yañca maṁ maññate macchī,
ja216:1.4	aññaṁ so ratiyā gato.
ja216:2.1	So maṁ dahati rāgaggi,
ja216:2.2	cittaṁ cūpatapeti maṁ;
ja216:2.3	Jālino muñcathāyirā maṁ,
ja216:2.4	na kāme haññate kvacī”ti.
ja216:3.1	Macchajātakaṁ chaṭṭhaṁ.
ja217:0.1	Jātaka
ja217:0.2	Dukanipāta
ja217:0.3	Bīraṇathambhavagga
ja217:0.4	7. Seggujātaka
ja217:1.1	“Sabbo loko attamano ahosi,
ja217:1.2	Akovidā gāmadhammassa seggu;
ja217:1.3	Komāri ko nāma tavajja dhammo,
ja217:1.4	Yaṁ tvaṁ gahitā pavane parodasi”.
ja217:2.1	“Yo dukkhaphuṭṭhāya bhaveyya tāṇaṁ,
ja217:2.2	So me pitā dubbhi vane karoti;
ja217:2.3	Sā kassa kandāmi vanassa majjhe,
ja217:2.4	Yo tāyitā so sahasaṁ karotī”ti.
ja217:3.1	Seggujātakaṁ sattamaṁ.
ja218:0.1	Jātaka
ja218:0.2	Dukanipāta
ja218:0.3	Bīraṇathambhavagga
ja218:0.4	8. Kūṭavāṇijajātaka
ja218:1.1	“Saṭhassa sāṭheyyamidaṁ sucintitaṁ,
ja218:1.2	Paccoḍḍitaṁ paṭikūṭassa kūṭaṁ;
ja218:1.3	Phālañce khādeyyuṁ mūsikā,
ja218:1.4	Kasmā kumāraṁ kulalā na hareyyuṁ.
ja218:2.1	Kūṭassa hi santi kūṭakūṭā,
ja218:2.2	Bhavati cāpi nikatino nikatyā;
ja218:2.3	Dehi puttanaṭṭha phālanaṭṭhassa phālaṁ,
ja218:2.4	Mā te puttamahāsi phālanaṭṭho”ti.
ja218:3.1	Kūṭavāṇijajātakaṁ aṭṭhamaṁ.
ja219:0.1	Jātaka
ja219:0.2	Dukanipāta
ja219:0.3	Bīraṇathambhavagga
ja219:0.4	9. Garahitajātaka
ja219:1.1	“Hiraññaṁ me suvaṇṇaṁ me,
ja219:1.2	esā rattiṁ divā kathā;
ja219:1.3	Dummedhānaṁ manussānaṁ,
ja219:1.4	ariyadhammaṁ apassataṁ.
ja219:2.1	Dve dve gahapatayo gehe,
ja219:2.2	eko tattha amassuko;
ja219:2.3	Lambatthano veṇikato,
ja219:2.4	atho aṅkitakaṇṇako;
ja219:2.5	Kīto dhanena bahunā,
ja219:2.6	so taṁ vitudate janan”ti.
ja219:3.1	Garahitajātakaṁ navamaṁ.
ja220:0.1	Jātaka
ja220:0.2	Dukanipāta
ja220:0.3	Bīraṇathambhavagga
ja220:0.4	10. Dhammadhajajātaka
ja220:1.1	“Sukhaṁ jīvitarūposi,
ja220:1.2	raṭṭhā vivanamāgato;
ja220:1.3	So ekako rukkhamūle,
ja220:1.4	kapaṇo viya jhāyasi”.
ja220:2.1	“Sukhaṁ jīvitarūposmi,
ja220:2.2	raṭṭhā vivanamāgato;
ja220:2.3	So ekako rukkhamūle,
ja220:2.4	kapaṇo viya jhāyāmi;
ja220:2.5	Sataṁ dhammaṁ anussaran”ti.
ja220:3.1	Dhammadhajajātakaṁ dasamaṁ.
ja220:3.2	Bīraṇathambhavaggo sattamo.
ja220:4.1	Tassuddānaṁ
ja220:5.1	Atha bīraṇathambhavaro ca naṭo,
ja220:5.2	Bharurājavaruttamapuṇṇanadī;
ja220:5.3	Bahubhāṇi aggipavane mūsikā,
ja220:5.4	Sahalambatthano kapaṇena dasāti.
ja221:0.1	Jātaka
ja221:0.2	Dukanipāta
ja221:0.3	Kāsāvavagga
ja221:0.4	1. Kāsāvajātaka
ja221:1.1	“Anikkasāvo kāsāvaṁ,
ja221:1.2	yo vatthaṁ paridahissati;
ja221:1.3	Apeto damasaccena,
ja221:1.4	na so kāsāvamarahati.
ja221:2.1	Yo ca vantakasāvassa,
ja221:2.2	Sīlesu susamāhito;
ja221:2.3	Upeto damasaccena,
ja221:2.4	Sa ve kāsāvamarahatī”ti.
ja221:3.1	Kāsāvajātakaṁ paṭhamaṁ.
ja222:0.1	Jātaka
ja222:0.2	Dukanipāta
ja222:0.3	Kāsāvavagga
ja222:0.4	2. Cūḷanandiyajātaka
ja222:1.1	“Idaṁ tadācariyavaco,
ja222:1.2	pārāsariyo yadabravi;
ja222:1.3	Māsu tvaṁ akari pāpaṁ,
ja222:1.4	yaṁ tvaṁ pacchā kataṁ tape.
ja222:2.1	Yāni karoti puriso,
ja222:2.2	tāni attani passati;
ja222:2.3	Kalyāṇakārī kalyāṇaṁ,
ja222:2.4	pāpakārī ca pāpakaṁ;
ja222:2.5	Yādisaṁ vapate bījaṁ,
ja222:2.6	tādisaṁ harate phalan”ti.
ja222:3.1	Cūḷanandiyajātakaṁ dutiyaṁ.
ja223:0.1	Jātaka
ja223:0.2	Dukanipāta
ja223:0.3	Kāsāvavagga
ja223:0.4	3. Puṭabhattajātaka
ja223:1.1	“Name namantassa bhaje bhajantaṁ,
ja223:1.2	Kiccānukubbassa kareyya kiccaṁ;
ja223:1.3	Nānatthakāmassa kareyya atthaṁ,
ja223:1.4	Asambhajantampi na sambhajeyya.
ja223:2.1	Caje cajantaṁ vanathaṁ na kayirā,
ja223:2.2	Apetacittena na sambhajeyya;
ja223:2.3	Dijo dumaṁ khīṇaphalanti ñatvā,
ja223:2.4	Aññaṁ samekkheyya mahā hi loko”ti.
ja223:3.1	Puṭabhattajātakaṁ tatiyaṁ.
ja224:0.1	Jātaka
ja224:0.2	Dukanipāta
ja224:0.3	Kāsāvavagga
ja224:0.4	4. Kumbhilajātaka
ja224:1.1	“Yassete caturo dhammā,
ja224:1.2	vānarinda yathā tava;
ja224:1.3	Saccaṁ dhammo dhiti cāgo,
ja224:1.4	diṭṭhaṁ so ativattati.
ja224:2.1	Yassa cete na vijjanti,
ja224:2.2	guṇā paramabhaddakā;
ja224:2.3	Saccaṁ dhammo dhiti cāgo,
ja224:2.4	diṭṭhaṁ so nātivattatī”ti.
ja224:3.1	Kumbhilajātakaṁ catutthaṁ.
ja225:0.1	Jātaka
ja225:0.2	Dukanipāta
ja225:0.3	Kāsāvavagga
ja225:0.4	5. Khantivaṇṇajātaka
ja225:1.1	“Atthi me puriso deva,
ja225:1.2	sabbakiccesu byāvaṭo;
ja225:1.3	Tassa cekoparādhatthi,
ja225:1.4	tattha tvaṁ kinti maññasi”.
ja225:2.1	“Amhākampatthi puriso,
ja225:2.2	ediso idha vijjati;
ja225:2.3	Dullabho aṅgasampanno,
ja225:2.4	khantirasmāka ruccatī”ti.
ja225:3.1	Khantivaṇṇajātakaṁ pañcamaṁ.
ja226:0.1	Jātaka
ja226:0.2	Dukanipāta
ja226:0.3	Kāsāvavagga
ja226:0.4	6. Kosiyajātaka
ja226:1.1	“Kāle nikkhamanā sādhu,
ja226:1.2	nākāle sādhu nikkhamo;
ja226:1.3	Akālena hi nikkhamma,
ja226:1.4	ekakampi bahujjano;
ja226:1.5	Na kiñci atthaṁ joteti,
ja226:1.6	dhaṅkasenāva kosiyaṁ.
ja226:2.1	Dhīro ca vidhividhānaññū,
ja226:2.2	paresaṁ vivarānugū;
ja226:2.3	Sabbāmitte vasīkatvā,
ja226:2.4	kosiyova sukhī siyā”ti.
ja226:3.1	Kosiyajātakaṁ chaṭṭhaṁ.
ja227:0.1	Jātaka
ja227:0.2	Dukanipāta
ja227:0.3	Kāsāvavagga
ja227:0.4	7. Gūthapāṇajātaka
ja227:1.1	“Sūro sūrena saṅgamma,
ja227:1.2	vikkantena pahārinā;
ja227:1.3	Ehi nāga nivattassu,
ja227:1.4	kiṁ nu bhīto palāyasi;
ja227:1.5	Passantu aṅgamagadhā,
ja227:1.6	mama tuyhañca vikkamaṁ”.
ja227:2.1	“Na taṁ pādā vadhissāmi,
ja227:2.2	na dantehi na soṇḍiyā;
ja227:2.3	Mīḷhena taṁ vadhissāmi,
ja227:2.4	pūti haññatu pūtinā”ti.
ja227:3.1	Gūthapāṇajātakaṁ sattamaṁ.
ja228:0.1	Jātaka
ja228:0.2	Dukanipāta
ja228:0.3	Kāsāvavagga
ja228:0.4	8. Kāmanītajātaka
ja228:1.1	“Tayo giriṁ antaraṁ kāmayāmi,
ja228:1.2	Pañcālā kuruyo kekake ca;
ja228:1.3	Tatuttariṁ brāhmaṇa kāmayāmi,
ja228:1.4	Tikiccha maṁ brāhmaṇa kāmanītaṁ”.
ja228:2.1	“Kaṇhāhidaṭṭhassa karonti heke,
ja228:2.2	Amanussapaviṭṭhassa karonti paṇḍitā;
ja228:2.3	Na kāmanītassa karoti koci,
ja228:2.4	Okkantasukkassa hi kā tikicchā”ti.
ja228:3.1	Kāmanītajātakaṁ aṭṭhamaṁ.
ja229:0.1	Jātaka
ja229:0.2	Dukanipāta
ja229:0.3	Kāsāvavagga
ja229:0.4	9. Palāyitajātaka
ja229:1.1	“Gajaggameghehi hayaggamālibhi,
ja229:1.2	Rathūmijātehi sarābhivassebhi;
ja229:1.3	Tharuggahāvaṭṭadaḷhappahāribhi,
ja229:1.4	Parivāritā takkasilā samantato.
ja229:2.1	Abhidhāvatha cūpadhāvatha ca,
ja229:2.2	Vividhā vināditā vadantibhi;
ja229:2.3	Vattatajja tumulo ghoso yathā,
ja229:2.4	Vijjulatā jaladharassa gajjato”ti.
ja229:3.1	Palāyitajātakaṁ navamaṁ.
ja230:0.1	Jātaka
ja230:0.2	Dukanipāta
ja230:0.3	Kāsāvavagga
ja230:0.4	10. Dutiyapalāyitajātaka
ja230:1.1	“Dhajamaparimitaṁ anantapāraṁ,
ja230:1.2	Duppasahaṁ dhaṅkehi sāgaraṁva;
ja230:1.3	Girimiva anilena duppasayho,
ja230:1.4	Duppasaho ahamajjatādisena”.
ja230:2.1	“Mā bāliyaṁ vilapi na hissa tādisaṁ,
ja230:2.2	Viḍayhase na hi labhase nisedhakaṁ;
ja230:2.3	Āsajjasi gajamiva ekacārinaṁ,
ja230:2.4	Yo taṁ padā naḷamiva pothayissatī”ti.
ja230:3.1	Dutiyapalāyitajātakaṁ dasamaṁ.
ja230:3.2	Kāsāvavaggo aṭṭhamo.
ja230:4.1	Tassuddānaṁ
ja230:5.1	Varavatthavaco dumakhīṇaphalaṁ,
ja230:5.2	Caturodhammavaraṁ purisuttama;
ja230:5.3	Dhaṅkamagadhā ca tayogirināma,
ja230:5.4	Gajaggavaro dhajavarena dasāti.
ja231:0.1	Jātaka
ja231:0.2	Dukanipāta
ja231:0.3	Upāhanavagga
ja231:0.4	1. Upāhanajātaka
ja231:1.1	“Yathāpi kītā purisassupāhanā,
ja231:1.2	Sukhassa atthāya dukhaṁ udabbahe;
ja231:1.3	Ghammābhitattā thalasā papīḷitā,
ja231:1.4	Tasseva pāde purisassa khādare.
ja231:2.1	Evameva yo dukkulīno anariyo,
ja231:2.2	Tammāka vijjañca sutañca ādiya;
ja231:2.3	Tameva so tattha sutena khādati,
ja231:2.4	Anariyo vuccati dupāhanūpamo”ti.
ja231:3.1	Upāhanajātakaṁ paṭhamaṁ.
ja232:0.1	Jātaka
ja232:0.2	Dukanipāta
ja232:0.3	Upāhanavagga
ja232:0.4	2. Vīṇāguṇajātaka
ja232:1.1	“Ekacintito yamattho,
ja232:1.2	bālo apariṇāyako;
ja232:1.3	Na hi khujjena vāmena,
ja232:1.4	bhoti saṅgantumarahasi”.
ja232:2.1	“Purisūsabhaṁ maññamānā,
ja232:2.2	ahaṁ khujjamakāmayiṁ;
ja232:2.3	Soyaṁ saṅkuṭito seti,
ja232:2.4	chinnatanti yathā viṇā”ti.
ja232:3.1	Vīṇāguṇajātakaṁ dutiyaṁ.
ja233:0.1	Jātaka
ja233:0.2	Dukanipāta
ja233:0.3	Upāhanavagga
ja233:0.4	3. Vikaṇṇajātaka
ja233:1.1	“Kāmaṁ yahiṁ icchasi tena gaccha,
ja233:1.2	Viddhosi mammamhi vikaṇṇakena;
ja233:1.3	Hatosi bhattena suvāditena,
ja233:1.4	Lolo ca macche anubandhamāno”.
ja233:2.1	“Evampi lokāmisaṁ opatanto,
ja233:2.2	Vihaññatī cittavasānuvattī;
ja233:2.3	So haññatī ñātisakhāna majjhe,
ja233:2.4	Macchānugo soriva suṁsumāro”ti.
ja233:3.1	Vikaṇṇajātakaṁ tatiyaṁ.
ja234:0.1	Jātaka
ja234:0.2	Dukanipāta
ja234:0.3	Upāhanavagga
ja234:0.4	4. Asitābhūjātaka
ja234:1.1	“Tvameva dānimakara,
ja234:1.2	Yaṁ kāmo byagamā tayi;
ja234:1.3	Soyaṁ appaṭisandhiko,
ja234:1.4	Kharachinnaṁva renukaṁ”.
ja234:2.1	“Atricchaṁ atilobhena,
ja234:2.2	atilobhamadena ca;
ja234:2.3	Evaṁ hāyati atthamhā,
ja234:2.4	ahaṁva asitābhuyā”ti.
ja234:3.1	Asitābhūjātakaṁ catutthaṁ.
ja235:0.1	Jātaka
ja235:0.2	Dukanipāta
ja235:0.3	Upāhanavagga
ja235:0.4	5. Vacchanakhajātaka
ja235:1.1	“Sukhā gharā vacchanakha,
ja235:1.2	sahiraññā sabhojanā;
ja235:1.3	Yattha bhutvā pivitvā ca,
ja235:1.4	sayeyyātha anussuko”.
ja235:2.1	“Gharā nānīhamānassa,
ja235:2.2	Gharā nābhaṇato musā;
ja235:2.3	Gharā nādinnadaṇḍassa,
ja235:2.4	Paresaṁ anikubbato;
ja235:2.5	Evaṁ chiddaṁ durabhisambhavaṁ,
ja235:2.6	Ko gharaṁ paṭipajjatī”ti.
ja235:3.1	Vacchanakhajātakaṁ pañcamaṁ.
ja236:0.1	Jātaka
ja236:0.2	Dukanipāta
ja236:0.3	Upāhanavagga
ja236:0.4	6. Bakajātaka
ja236:1.1	“Bhaddako vatayaṁ pakkhī,
ja236:1.2	dijo kumudasannibho;
ja236:1.3	Vūpasantehi pakkhehi,
ja236:1.4	mandamandova jhāyati”.
ja236:2.1	“Nāssa sīlaṁ vijānātha,
ja236:2.2	anaññāya pasaṁsatha;
ja236:2.3	Amhe dijo na pāleti,
ja236:2.4	tena pakkhī na phandatī”ti.
ja236:3.1	Bakajātakaṁ chaṭṭhaṁ.
ja237:0.1	Jātaka
ja237:0.2	Dukanipāta
ja237:0.3	Upāhanavagga
ja237:0.4	7. Sāketajātaka
ja237:1.1	“Ko nu kho bhagavā hetu,
ja237:1.2	ekacce idha puggale;
ja237:1.3	Atīva hadayaṁ nibbāti,
ja237:1.4	cittañcāpi pasīdati”.
ja237:2.1	“Pubbeva sannivāsena,
ja237:2.2	paccuppannahitena vā;
ja237:2.3	Evaṁ taṁ jāyate pemaṁ,
ja237:2.4	uppalaṁva yathodake”ti.
ja237:3.1	Sāketajātakaṁ sattamaṁ.
ja238:0.1	Jātaka
ja238:0.2	Dukanipāta
ja238:0.3	Upāhanavagga
ja238:0.4	8. Ekapadajātaka
ja238:1.1	“Iṅgha ekapadaṁ tāta,
ja238:1.2	anekatthapadassitaṁ;
ja238:1.3	Kiñci saṅgāhikaṁ brūsi,
ja238:1.4	yenatthe sādhayemase”.
ja238:2.1	“Dakkheyyekapadaṁ tāta,
ja238:2.2	anekatthapadassitaṁ;
ja238:2.3	Tañca sīlena saññuttaṁ,
ja238:2.4	khantiyā upapāditaṁ;
ja238:2.5	Alaṁ mitte sukhāpetuṁ,
ja238:2.6	amittānaṁ dukhāya cā”ti.
ja238:3.1	Ekapadajātakaṁ aṭṭhamaṁ.
ja239:0.1	Jātaka
ja239:0.2	Dukanipāta
ja239:0.3	Upāhanavagga
ja239:0.4	9. Haritamaṇḍūkajātaka
ja239:1.1	“Āsīvisampi maṁ santaṁ,
ja239:1.2	Paviṭṭhaṁ kumināmukhaṁ;
ja239:1.3	Ruccate haritāmātā,
ja239:1.4	Yaṁ maṁ khādanti macchakā”.
ja239:2.1	“Vilumpateva puriso,
ja239:2.2	yāvassa upakappati;
ja239:2.3	Yadā caññe vilumpanti,
ja239:2.4	so vilutto vilumpatī”ti.
ja239:3.1	Haritamaṇḍūkajātakaṁ navamaṁ.
ja240:0.1	Jātaka
ja240:0.2	Dukanipāta
ja240:0.3	Upāhanavagga
ja240:0.4	10. Mahāpiṅgalajātaka
ja240:1.1	“Sabbo jano hiṁsito piṅgalena,
ja240:1.2	Tasmiṁ mate paccayā vedayanti;
ja240:1.3	Piyo nu te āsi akaṇhanetto,
ja240:1.4	Kasmā nu tvaṁ rodasi dvārapāla”.
ja240:2.1	“Na me piyo āsi akaṇhanetto,
ja240:2.2	Bhāyāmi paccāgamanāya tassa;
ja240:2.3	Ito gato hiṁseyya maccurājaṁ,
ja240:2.4	So hiṁsito āneyya puna idha”.
ja240:3.1	“Daḍḍho vāhasahassehi,
ja240:3.2	sitto ghaṭasatehi so;
ja240:3.3	Parikkhatā ca sā bhūmi,
ja240:3.4	mā bhāyi nāgamissatī”ti.
ja240:4.1	Mahāpiṅgalajātakaṁ dasamaṁ.
ja240:4.2	Upāhanavaggo navamo.
ja240:5.1	Tassuddānaṁ
ja240:6.1	Varupāhana khujja vikaṇṇakako,
ja240:6.2	Asitābhuya pañcamavacchanakho;
ja240:6.3	Dija pemavaruttamaekapadaṁ,
ja240:6.4	Kumināmukha piṅgalakena dasāti.
ja241:0.1	Jātaka
ja241:0.2	Dukanipāta
ja241:0.3	Siṅgālavagga
ja241:0.4	1. Sabbadāṭhijātaka
ja241:1.1	“Siṅgālo mānathaddho ca,
ja241:1.2	parivārena atthiko;
ja241:1.3	Pāpuṇi mahatiṁ bhūmiṁ,
ja241:1.4	rājāsi sabbadāṭhinaṁ.
ja241:2.1	Evameva manussesu,
ja241:2.2	yo hoti parivāravā;
ja241:2.3	So hi tattha mahā hoti,
ja241:2.4	siṅgālo viya dāṭhinan”ti.
ja241:3.1	Sabbadāṭhijātakaṁ paṭhamaṁ.
ja242:0.1	Jātaka
ja242:0.2	Dukanipāta
ja242:0.3	Siṅgālavagga
ja242:0.4	2. Sunakhajātaka
ja242:1.1	“Bālo vatāyaṁ sunakho,
ja242:1.2	yo varattaṁ na khādati;
ja242:1.3	Bandhanā ca pamuñceyya,
ja242:1.4	asito ca gharaṁ vaje”.
ja242:2.1	“Aṭṭhitaṁ me manasmiṁ me,
ja242:2.2	atho me hadaye kataṁ;
ja242:2.3	Kālañca paṭikaṅkhāmi,
ja242:2.4	yāva passupatū jano”ti.
ja242:3.1	Sunakhajātakaṁ dutiyaṁ.
ja243:0.1	Jātaka
ja243:0.2	Dukanipāta
ja243:0.3	Siṅgālavagga
ja243:0.4	3. Guttilajātaka
ja243:1.1	“Sattatantiṁ sumadhuraṁ,
ja243:1.2	rāmaṇeyyaṁ avācayiṁ;
ja243:1.3	So maṁ raṅgamhi avheti,
ja243:1.4	saraṇaṁ me hohi kosiya”.
ja243:2.1	“Ahaṁ taṁ saraṇaṁ samma,
ja243:2.2	Ahamācariyapūjako;
ja243:2.3	Na taṁ jayissati sisso,
ja243:2.4	Sissamācariya jessasī”ti.
ja243:3.1	Guttilajātakaṁ tatiyaṁ.
ja244:0.1	Jātaka
ja244:0.2	Dukanipāta
ja244:0.3	Siṅgālavagga
ja244:0.4	4. Vigaticchajātaka
ja244:1.1	“Yaṁ passati na taṁ icchati,
ja244:1.2	Yañca na passati taṁ kiricchati;
ja244:1.3	Maññāmi ciraṁ carissati,
ja244:1.4	Na hi taṁ lacchati yaṁ sa icchati.
ja244:2.1	Yaṁ labhati na tena tussati,
ja244:2.2	Yañca pattheti laddhaṁ hīḷeti;
ja244:2.3	Icchā hi anantagocarā,
ja244:2.4	Vigaticchāna namo karomase”ti.
ja244:3.1	Vigaticchajātakaṁ catutthaṁ.
ja245:0.1	Jātaka
ja245:0.2	Dukanipāta
ja245:0.3	Siṅgālavagga
ja245:0.4	5. Mūlapariyāyajātaka
ja245:1.1	“Kālo ghasati bhūtāni,
ja245:1.2	sabbāneva sahattanā;
ja245:1.3	Yo ca kālaghaso bhūto,
ja245:1.4	sa bhūtapacaniṁ paci”.
ja245:2.1	“Bahūni narasīsāni,
ja245:2.2	lomasāni brahāni ca;
ja245:2.3	Gīvāsu paṭimukkāni,
ja245:2.4	kocidevettha kaṇṇavā”ti.
ja245:3.1	Mūlapariyāyajātakaṁ pañcamaṁ.
ja246:0.1	Jātaka
ja246:0.2	Dukanipāta
ja246:0.3	Siṅgālavagga
ja246:0.4	6. Bālovādajātaka
ja246:1.1	“Hantvā chetvā vadhitvā ca,
ja246:1.2	deti dānaṁ asaññato;
ja246:1.3	Edisaṁ bhattaṁ bhuñjamāno,
ja246:1.4	sa pāpena upalippati”.
ja246:2.1	“Puttadārampi ce hantvā,
ja246:2.2	Deti dānaṁ asaññato;
ja246:2.3	Bhuñjamānopi sappañño,
ja246:2.4	Na pāpena upalippatī”ti.
ja246:3.1	Bālovādajātakaṁ chaṭṭhaṁ.
ja247:0.1	Jātaka
ja247:0.2	Dukanipāta
ja247:0.3	Siṅgālavagga
ja247:0.4	7. Pādañjalījātaka
ja247:1.1	“Addhā pādañjalī sabbe,
ja247:1.2	paññāya atirocati;
ja247:1.3	Tathā hi oṭṭhaṁ bhañjati,
ja247:1.4	uttariṁ nūna passati”.
ja247:2.1	“Nāyaṁ dhammaṁ adhammaṁ vā,
ja247:2.2	Atthānatthañca bujjhati;
ja247:2.3	Aññatra oṭṭhanibbhogā,
ja247:2.4	Nāyaṁ jānāti kiñcanan”ti.
ja247:3.1	Pādañjalījātakaṁ sattamaṁ.
ja248:0.1	Jātaka
ja248:0.2	Dukanipāta
ja248:0.3	Siṅgālavagga
ja248:0.4	8. Kiṁsukopamajātaka
ja248:1.1	“Sabbehi kiṁsuko diṭṭho,
ja248:1.2	kinnvettha vicikicchatha;
ja248:1.3	Na hi sabbesu ṭhānesu,
ja248:1.4	sārathī paripucchito”.
ja248:2.1	“Evaṁ sabbehi ñāṇehi,
ja248:2.2	yesaṁ dhammā ajānitā;
ja248:2.3	Te ve dhammesu kaṅkhanti,
ja248:2.4	kiṁsukasmiṁva bhātaro”ti.
ja248:3.1	Kiṁsukopamajātakaṁ aṭṭhamaṁ.
ja249:0.1	Jātaka
ja249:0.2	Dukanipāta
ja249:0.3	Siṅgālavagga
ja249:0.4	9. Sālakajātaka
ja249:1.1	“Ekaputtako bhavissasi,
ja249:1.2	Tvañca no hessasi issaro kule;
ja249:1.3	Oroha dumasmā sālaka,
ja249:1.4	Ehi dāni gharakaṁ vajemase”.
ja249:2.1	“Nanu maṁ suhadayoti maññasi,
ja249:2.2	Yañca maṁ hanasi veḷuyaṭṭhiyā;
ja249:2.3	Pakkambavane ramāmase,
ja249:2.4	Gaccha tvaṁ gharakaṁ yathāsukhan”ti.
ja249:3.1	Sālakajātakaṁ navamaṁ.
ja250:0.1	Jātaka
ja250:0.2	Dukanipāta
ja250:0.3	Siṅgālavagga
ja250:0.4	10. Kapijātaka
ja250:1.1	“Ayaṁ isī upasamasaṁyame rato,
ja250:1.2	Sa tiṭṭhati sisirabhayena aṭṭito;
ja250:1.3	Handa ayaṁ pavisatumaṁ agārakaṁ,
ja250:1.4	Vinetu sītaṁ darathañca kevalaṁ”.
ja250:2.1	“Nāyaṁ isī upasamasaṁyame rato,
ja250:2.2	Kapī ayaṁ dumavarasākhagocaro;
ja250:2.3	So dūsako rosako cāpi jammo,
ja250:2.4	Sacevajemampi dūseyyagāran”ti.
ja250:3.1	Kapijātakaṁ dasamaṁ.
ja250:3.2	Siṅgālavaggo dasamo.
ja250:4.1	Tassuddānaṁ
ja250:5.1	Atha rājā siṅgālavaro sunakho,
ja250:5.2	Tathā kosiya icchati kālaghaso;
ja250:5.3	Atha dānavaroṭṭhapi sārathinā,
ja250:5.4	Punambavanañca sisirakapi dasāti.
ja250:6.1	Atha vagguddānaṁ
ja250:7.1	Daḷhañca vaggaṁ aparena santhavaṁ,
ja250:7.2	Kalyāṇavaggāsadiso ca rūhakaṁ;
ja250:7.3	Nataṁdaḷha bīraṇathambhakaṁ puna,
ja250:7.4	Kāsāvupāhana siṅgālakena dasāti.
ja250:8.1	Dukanipātaṁ niṭṭhitaṁ.
ja251:0.1	Jātaka
ja251:0.2	Tikanipāta
ja251:0.3	Saṅkappavagga
ja251:0.4	1. Saṅkapparāgajātaka
ja251:1.1	“Saṅkapparāgadhotena,
ja251:1.2	vitakkanisitena ca;
ja251:1.3	Nālaṅkatena bhadrena,
ja251:1.4	usukārākatena ca.
ja251:2.1	Na kaṇṇāyatamuttena,
ja251:2.2	nāpi morūpasevinā;
ja251:2.3	Tenamhi hadaye viddho,
ja251:2.4	sabbaṅgaparidāhinā.
ja251:3.1	Āvedhañca na passāmi,
ja251:3.2	Yato ruhiramassave;
ja251:3.3	Yāva ayoniso cittaṁ,
ja251:3.4	Sayaṁ me dukkhamābhatan”ti.
ja251:4.1	Saṅkapparāgajātakaṁ paṭhamaṁ.
ja252:0.1	Jātaka
ja252:0.2	Tikanipāta
ja252:0.3	Saṅkappavagga
ja252:0.4	2. Tilamuṭṭhijātaka
ja252:1.1	“Ajjāpi me taṁ manasi,
ja252:1.2	yaṁ maṁ tvaṁ tilamuṭṭhiyā;
ja252:1.3	Bāhāya maṁ gahetvāna,
ja252:1.4	laṭṭhiyā anutāḷayi.
ja252:2.1	Nanu jīvite na ramasi,
ja252:2.2	yenāsi brāhmaṇāgato;
ja252:2.3	Yaṁ maṁ bāhā gahetvāna,
ja252:2.4	tikkhattuṁ anutāḷayi”.
ja252:3.1	“Ariyo anariyaṁ kubbantaṁ,
ja252:3.2	Yo daṇḍena nisedhati;
ja252:3.3	Sāsanaṁ taṁ na taṁ veraṁ,
ja252:3.4	Iti naṁ paṇḍitā vidū”ti.
ja252:4.1	Tilamuṭṭhijātakaṁ dutiyaṁ.
ja253:0.1	Jātaka
ja253:0.2	Tikanipāta
ja253:0.3	Saṅkappavagga
ja253:0.4	3. Maṇikaṇṭhajātaka
ja253:1.1	“Mamannapānaṁ vipulaṁ uḷāraṁ,
ja253:1.2	Uppajjatīmassa maṇissa hetu;
ja253:1.3	Taṁ te na dassaṁ atiyācakosi,
ja253:1.4	Na cāpi te assamamāgamissaṁ.
ja253:2.1	Susū yathā sakkharadhotapāṇī,
ja253:2.2	Tāsesi maṁ selaṁ yācamāno;
ja253:2.3	Taṁ te na dassaṁ atiyācakosi,
ja253:2.4	Na cāpi te assamamāgamissaṁ”.
ja253:3.1	“Na taṁ yāce yassa piyaṁ jigīse,
ja253:3.2	Desso hoti atiyācanāya;
ja253:3.3	Nāgo maṇiṁ yācito brāhmaṇena,
ja253:3.4	Adassanaṁyeva tadajjhagamā”ti.
ja253:4.1	Maṇikaṇṭhajātakaṁ tatiyaṁ.
ja254:0.1	Jātaka
ja254:0.2	Tikanipāta
ja254:0.3	Saṅkappavagga
ja254:0.4	4. Kuṇḍakakucchisindhavajātaka
ja254:1.1	“Bhutvā tiṇaparighāsaṁ,
ja254:1.2	bhutvā ācāmakuṇḍakaṁ;
ja254:1.3	Etaṁ te bhojanaṁ āsi,
ja254:1.4	kasmā dāni na bhuñjasi”.
ja254:2.1	“Yattha posaṁ na jānanti,
ja254:2.2	jātiyā vinayena vā;
ja254:2.3	Bahuṁ tattha mahābrahme,
ja254:2.4	api ācāmakuṇḍakaṁ.
ja254:3.1	Tvañca kho maṁ pajānāsi,
ja254:3.2	yādisāyaṁ hayuttamo;
ja254:3.3	Jānanto jānamāgamma,
ja254:3.4	na te bhakkhāmi kuṇḍakan”ti.
ja254:4.1	Kuṇḍakakucchisindhavajātakaṁ catutthaṁ.
ja255:0.1	Jātaka
ja255:0.2	Tikanipāta
ja255:0.3	Saṅkappavagga
ja255:0.4	5. Sukajātaka
ja255:1.1	“Yāva so mattamaññāsi,
ja255:1.2	bhojanasmiṁ vihaṅgamo;
ja255:1.3	Tāva addhānamāpādi,
ja255:1.4	mātarañca aposayi.
ja255:2.1	Yato ca kho bahutaraṁ,
ja255:2.2	bhojanaṁ ajjhavāhari;
ja255:2.3	Tato tattheva saṁsīdi,
ja255:2.4	amattaññū hi so ahu.
ja255:3.1	Tasmā mattaññutā sādhu,
ja255:3.2	bhojanasmiṁ agiddhatā;
ja255:3.3	Amattaññū hi sīdanti,
ja255:3.4	mattaññū ca na sīdare”ti.
ja255:4.1	Sukajātakaṁ pañcamaṁ.
ja256:0.1	Jātaka
ja256:0.2	Tikanipāta
ja256:0.3	Saṅkappavagga
ja256:0.4	6. Jarūdapānajātaka
ja256:1.1	“Jarūdapānaṁ khaṇamānā,
ja256:1.2	vāṇijā udakatthikā;
ja256:1.3	Ajjhagamuṁ ayasaṁ lohaṁ,
ja256:1.4	tipusīsañca vāṇijā;
ja256:1.5	Rajataṁ jātarūpañca,
ja256:1.6	muttā veḷuriyā bahū.
ja256:2.1	Te ca tena asantuṭṭhā,
ja256:2.2	bhiyyo bhiyyo akhāṇisuṁ;
ja256:2.3	Te tatthāsīviso ghoro,
ja256:2.4	tejassī tejasā hani.
ja256:3.1	Tasmā khaṇe nātikhaṇe,
ja256:3.2	Atikhātaṁ hi pāpakaṁ;
ja256:3.3	Khātena ca dhanaṁ laddhaṁ,
ja256:3.4	Atikhātena nāsitan”ti.
ja256:4.1	Jarūdapānajātakaṁ chaṭṭhaṁ.
ja257:0.1	Jātaka
ja257:0.2	Tikanipāta
ja257:0.3	Saṅkappavagga
ja257:0.4	7. Gāmaṇicandajātaka
ja257:1.1	“Nāyaṁ gharānaṁ kusalo,
ja257:1.2	lolo ayaṁ valīmukho;
ja257:1.3	Kataṁ kataṁ kho dūseyya,
ja257:1.4	evaṁdhammamidaṁ kulaṁ.
ja257:2.1	Nayidaṁ cittavato lomaṁ,
ja257:2.2	nāyaṁ assāsiko migo;
ja257:2.3	Siṭṭhaṁ me janasandhena,
ja257:2.4	nāyaṁ kiñci vijānati.
ja257:3.1	Na mātaraṁ pitaraṁ vā,
ja257:3.2	bhātaraṁ bhaginiṁ sakaṁ;
ja257:3.3	Bhareyya tādiso poso,
ja257:3.4	siṭṭhaṁ dasarathena me”ti.
ja257:4.1	Gāmaṇicanda jātakaṁ sattamaṁ.
ja258:0.1	Jātaka
ja258:0.2	Tikanipāta
ja258:0.3	Saṅkappavagga
ja258:0.4	8. Mandhātujātaka
ja258:1.1	“Yāvatā candimasūriyā,
ja258:1.2	Pariharanti disā bhanti virocanā;
ja258:1.3	Sabbeva dāsā mandhātu,
ja258:1.4	Ye pāṇā pathavissitā.
ja258:2.1	Na kahāpaṇavassena,
ja258:2.2	titti kāmesu vijjati;
ja258:2.3	Appassādā dukhā kāmā,
ja258:2.4	iti viññāya paṇḍito.
ja258:3.1	Api dibbesu kāmesu,
ja258:3.2	ratiṁ so nādhigacchati;
ja258:3.3	Taṇhakkhayarato hoti,
ja258:3.4	sammāsambuddhasāvako”ti.
ja258:4.1	Mandhātujātakaṁ aṭṭhamaṁ.
ja259:0.1	Jātaka
ja259:0.2	Tikanipāta
ja259:0.3	Saṅkappavagga
ja259:0.4	9. Tirīṭavacchajātaka
ja259:1.1	“Nayimassa vijjāmayamatthi kiñci,
ja259:1.2	Na bandhavo no pana te sahāyo;
ja259:1.3	Atha kena vaṇṇena tirīṭavaccho,
ja259:1.4	Tedaṇḍiko bhuñjati aggapiṇḍaṁ”.
ja259:2.1	“Āpāsu me yuddhaparājitassa,
ja259:2.2	Ekassa katvā vivanasmi ghore;
ja259:2.3	Pasārayī kicchagatassa pāṇiṁ,
ja259:2.4	Tenūdatāriṁ dukhasampareto.
ja259:3.1	Etassa kiccena idhānupatto,
ja259:3.2	Vesāyino visayā jīvaloke;
ja259:3.3	Lābhāraho tāta tirīṭavaccho,
ja259:3.4	Dethassa bhogaṁ yajathañca yaññan”ti.
ja259:4.1	Tirīṭavacchajātakaṁ navamaṁ.
ja260:0.1	Jātaka
ja260:0.2	Tikanipāta
ja260:0.3	Saṅkappavagga
ja260:0.4	10. Dūtajātaka
ja260:1.1	“Yassatthā dūramāyanti,
ja260:1.2	amittamapi yācituṁ;
ja260:1.3	Tassūdarassahaṁ dūto,
ja260:1.4	mā me kujjha rathesabha”.
ja260:2.1	“Yassa divā ca ratto ca,
ja260:2.2	vasamāyanti māṇavā;
ja260:2.3	Tassūdarassahaṁ dūto,
ja260:2.4	mā me kujjha rathesabha.
ja260:3.1	Dadāmi te brāhmaṇa rohiṇīnaṁ,
ja260:3.2	Gavaṁ sahassaṁ saha puṅgavena;
ja260:3.3	Dūto hi dūtassa kathaṁ na dajjaṁ,
ja260:3.4	Mayampi tasseva bhavāma dūtā”ti.
ja260:4.1	Dūtajātakaṁ dasamaṁ.
ja260:4.2	Saṅkappavaggo paṭhamo.
ja260:5.1	Tassuddānaṁ
ja260:6.1	Usukāravaro tilamuṭṭhi maṇi,
ja260:6.2	Hayarāja vihaṅgama āsiviso;
ja260:6.3	Janasandha kahāpaṇavassa puna,
ja260:6.4	Tiriṭaṁ puna dūtavarena dasāti.
ja261:0.1	Jātaka
ja261:0.2	Tikanipāta
ja261:0.3	Padumavagga
ja261:0.4	1. Padumajātaka
ja261:1.1	“Yathā kesā ca massū ca,
ja261:1.2	chinnaṁ chinnaṁ virūhati;
ja261:1.3	Evaṁ rūhatu te nāsā,
ja261:1.4	padumaṁ dehi yācito”.
ja261:2.1	“Yathā sāradikaṁ bījaṁ,
ja261:2.2	khette vuttaṁ virūhati;
ja261:2.3	Evaṁ rūhatu te nāsā,
ja261:2.4	padumaṁ dehi yācito”.
ja261:3.1	“Ubhopi palapantete,
ja261:3.2	api padmāni dassati;
ja261:3.3	Vajjuṁ vā te na vā vajjuṁ,
ja261:3.4	natthi nāsāya rūhanā;
ja261:3.5	Dehi samma padumāni,
ja261:3.6	ahaṁ yācāmi yācito”ti.
ja261:4.1	Padumajātakaṁ paṭhamaṁ.
ja262:0.1	Jātaka
ja262:0.2	Tikanipāta
ja262:0.3	Padumavagga
ja262:0.4	2. Mudupāṇijātaka
ja262:1.1	“Pāṇi ce muduko cassa,
ja262:1.2	nāgo cassa sukārito;
ja262:1.3	Andhakāro ca vasseyya,
ja262:1.4	atha nūna tadā siyā”.
ja262:2.1	“Analā mudusambhāsā,
ja262:2.2	duppūrā tā nadīsamā;
ja262:2.3	Sīdanti naṁ viditvāna,
ja262:2.4	ārakā parivajjaye.
ja262:3.1	Yaṁ etā upasevanti,
ja262:3.2	chandasā vā dhanena vā;
ja262:3.3	Jātavedova saṁ ṭhānaṁ,
ja262:3.4	khippaṁ anudahanti nan”ti.
ja262:4.1	Mudupāṇijātakaṁ dutiyaṁ.
ja263:0.1	Jātaka
ja263:0.2	Tikanipāta
ja263:0.3	Padumavagga
ja263:0.4	3. Cūḷapalobhanajātaka
ja263:1.1	“Abhijjamāne vārismiṁ,
ja263:1.2	sayaṁ āgamma iddhiyā;
ja263:1.3	Missībhāvitthiyā gantvā,
ja263:1.4	saṁsīdasi mahaṇṇave.
ja263:2.1	Āvaṭṭanī mahāmāyā,
ja263:2.2	brahmacariyavikopanā;
ja263:2.3	Sīdanti naṁ viditvāna,
ja263:2.4	ārakā parivajjaye.
ja263:3.1	Yaṁ etā upasevanti,
ja263:3.2	chandasā vā dhanena vā;
ja263:3.3	Jātavedova saṁ ṭhānaṁ,
ja263:3.4	khippaṁ anudahanti nan”ti.
ja263:4.1	Cūḷapalobhanajātakaṁ tatiyaṁ.
ja264:0.1	Jātaka
ja264:0.2	Tikanipāta
ja264:0.3	Padumavagga
ja264:0.4	4. Mahāpanādajātaka
ja264:1.1	“Panādo nāma so rājā,
ja264:1.2	yassa yūpo suvaṇṇayo;
ja264:1.3	Tiriyaṁ soḷasubbedho,
ja264:1.4	uddhamāhu sahassadhā.
ja264:2.1	Sahassakaṇḍo satageṇḍu,
ja264:2.2	dhajālu haritāmayo;
ja264:2.3	Anaccuṁ tattha gandhabbā,
ja264:2.4	cha sahassāni sattadhā.
ja264:3.1	Evametaṁ tadā āsi,
ja264:3.2	yathā bhāsasi bhaddaji;
ja264:3.3	Sakko ahaṁ tadā āsiṁ,
ja264:3.4	veyyāvaccakaro tavā”ti.
ja264:4.1	Mahāpanādajātakaṁ catutthaṁ.
ja265:0.1	Jātaka
ja265:0.2	Tikanipāta
ja265:0.3	Padumavagga
ja265:0.4	5. Khurappajātaka
ja265:1.1	“Disvā khurappe dhanuveganunne,
ja265:1.2	Khagge gahīte tikhiṇe teladhote;
ja265:1.3	Tasmiṁ bhayasmiṁ maraṇe viyūḷhe,
ja265:1.4	Kasmā nu te nāhu chambhitattaṁ”.
ja265:2.1	“Disvā khurappe dhanuveganunne,
ja265:2.2	Khagge gahīte tikhiṇe teladhote;
ja265:2.3	Tasmiṁ bhayasmiṁ maraṇe viyūḷhe,
ja265:2.4	Vedaṁ alatthaṁ vipulaṁ uḷāraṁ.
ja265:3.1	So vedajāto ajjhabhaviṁ amitte,
ja265:3.2	Pubbeva me jīvitamāsi cattaṁ;
ja265:3.3	Na hi jīvite ālayaṁ kubbamāno,
ja265:3.4	Sūro kayirā sūrakiccaṁ kadācī”ti.
ja265:4.1	Khurappajātakaṁ pañcamaṁ.
ja266:0.1	Jātaka
ja266:0.2	Tikanipāta
ja266:0.3	Padumavagga
ja266:0.4	6. Vātaggasindhavajātaka
ja266:1.1	“Yenāsi kisiyā paṇḍu,
ja266:1.2	yena bhattaṁ na ruccati;
ja266:1.3	Ayaṁ so āgato bhattā,
ja266:1.4	kasmā dāni palāyasi”.
ja266:2.1	“Sace panādikeneva,
ja266:2.2	santhavo nāma jāyati;
ja266:2.3	Yaso hāyati itthīnaṁ,
ja266:2.4	tasmā tāta palāyahaṁ”.
ja266:3.1	Yasassinaṁ kule jātaṁ,
ja266:3.2	āgataṁ yā na icchati;
ja266:3.3	Socati cirarattāya,
ja266:3.4	vātaggamiva bhaddalīti.
ja266:4.1	Vātaggasindhavajātakaṁ chaṭṭhaṁ.
ja267:0.1	Jātaka
ja267:0.2	Tikanipāta
ja267:0.3	Padumavagga
ja267:0.4	7. Kakkaṭakajātaka
ja267:1.1	“Siṅgīmigo āyatacakkhunetto,
ja267:1.2	Aṭṭhittaco vārisayo alomo;
ja267:1.3	Tenābhibhūto kapaṇaṁ rudāmi,
ja267:1.4	Mā heva maṁ pāṇasamaṁ jaheyya”.
ja267:2.1	“Ayya na taṁ jahissāmi,
ja267:2.2	kuñjaraṁ saṭṭhihāyanaṁ;
ja267:2.3	Pathabyā cāturantāya,
ja267:2.4	suppiyo hosi me tuvaṁ”.
ja267:3.1	“Ye kuḷīrā samuddasmiṁ,
ja267:3.2	gaṅgāya yamunāya ca;
ja267:3.3	Tesaṁ tvaṁ vārijo seṭṭho,
ja267:3.4	muñca rodantiyā patin”ti.
ja267:4.1	Kakkaṭakajātakaṁ sattamaṁ.
ja268:0.1	Jātaka
ja268:0.2	Tikanipāta
ja268:0.3	Padumavagga
ja268:0.4	8. Ārāmadūsakajātaka
ja268:1.1	“Yo ve sabbasametānaṁ,
ja268:1.2	ahuvā seṭṭhasammato;
ja268:1.3	Tassāyaṁ edisī paññā,
ja268:1.4	kimeva itarā pajā”.
ja268:2.1	“Evameva tuvaṁ brahme,
ja268:2.2	anaññāya vinindasi;
ja268:2.3	Kathaṁ mūlaṁ adisvāna,
ja268:2.4	rukkhaṁ jaññā patiṭṭhitaṁ”.
ja268:3.1	“Nāhaṁ tumhe vinindāmi,
ja268:3.2	ye caññe vānarā vane;
ja268:3.3	Vissasenova gārayho,
ja268:3.4	yassatthā rukkharopakā”ti.
ja268:4.1	Ārāmadūsakajātakaṁ aṭṭhamaṁ.
ja269:0.1	Jātaka
ja269:0.2	Tikanipāta
ja269:0.3	Padumavagga
ja269:0.4	9. Sujātajātaka
ja269:1.1	“Na hi vaṇṇena sampannā,
ja269:1.2	mañjukā piyadassanā;
ja269:1.3	Kharavācā piyā hoti,
ja269:1.4	asmiṁ loke paramhi ca.
ja269:2.1	Nanu passasimaṁ kāḷiṁ,
ja269:2.2	dubbaṇṇaṁ tilakāhataṁ;
ja269:2.3	Kokilaṁ saṇhavācena,
ja269:2.4	bahūnaṁ pāṇinaṁ piyaṁ.
ja269:3.1	Tasmā sakhilavācassa,
ja269:3.2	mantabhāṇī anuddhato;
ja269:3.3	Atthaṁ dhammañca dīpeti,
ja269:3.4	madhuraṁ tassa bhāsitan”ti.
ja269:4.1	Sujātajātakaṁ navamaṁ.
ja270:0.1	Jātaka
ja270:0.2	Tikanipāta
ja270:0.3	Padumavagga
ja270:0.4	10. Ulūkajātaka
ja270:1.1	“Sabbehi kira ñātīhi,
ja270:1.2	kosiyo issaro kato;
ja270:1.3	Sace ñātīhi anuññāto,
ja270:1.4	bhaṇeyyāhaṁ ekavācikaṁ”.
ja270:2.1	“Bhaṇa samma anuññāto,
ja270:2.2	atthaṁ dhammañca kevalaṁ;
ja270:2.3	Santi hi daharā pakkhī,
ja270:2.4	paññavanto jutindharā”.
ja270:3.1	“Na me ruccati bhaddaṁ vo,
ja270:3.2	ulūkassābhisecanaṁ;
ja270:3.3	Akkuddhassa mukhaṁ passa,
ja270:3.4	kathaṁ kuddho karissatī”ti.
ja270:4.1	Ulūkajātakaṁ dasamaṁ.
ja270:4.2	Padumavaggo dutiyo.
ja270:5.1	Tassuddānaṁ
ja270:6.1	Padumuttama nāgasirivhayano,
ja270:6.2	Sa-mahaṇṇava yūpa khurappavaro;
ja270:6.3	Atha bhaddalī kuñjara rukkha puna,
ja270:6.4	Kharavāca ulūkavarena dasāti.
ja271:0.1	Jātaka
ja271:0.2	Tikanipāta
ja271:0.3	Udapānavagga
ja271:0.4	1. Udapānadūsakajātaka
ja271:1.1	“Āraññikassa isino,
ja271:1.2	cirarattatapassino;
ja271:1.3	Kicchākataṁ udapānaṁ,
ja271:1.4	kathaṁ samma avāhayi”.
ja271:2.1	“Esa dhammo siṅgālānaṁ,
ja271:2.2	yaṁ pitvā ohadāmase;
ja271:2.3	Pitupitāmahaṁ dhammo,
ja271:2.4	na taṁ ujjhātumarahasi”.
ja271:3.1	“Yesaṁ vo ediso dhammo,
ja271:3.2	Adhammo pana kīdiso;
ja271:3.3	Mā vo dhammaṁ adhammaṁ vā,
ja271:3.4	Addasāma kudācanan”ti.
ja271:4.1	Udapānadūsakajātakaṁ paṭhamaṁ.
ja272:0.1	Jātaka
ja272:0.2	Tikanipāta
ja272:0.3	Udapānavagga
ja272:0.4	2. Byagghajātaka
ja272:1.1	“Yena mittena saṁsaggā,
ja272:1.2	yogakkhemo vihiyyati;
ja272:1.3	Pubbevajjhābhavaṁ tassa,
ja272:1.4	rukkhe akkhīva paṇḍito.
ja272:2.1	Yena mittena saṁsaggā,
ja272:2.2	yogakkhemo pavaḍḍhati;
ja272:2.3	Kareyyattasamaṁ vuttiṁ,
ja272:2.4	sabbakiccesu paṇḍito”.
ja272:3.1	“Etha byagghā nivattavho,
ja272:3.2	Paccupetha mahāvanaṁ;
ja272:3.3	Mā vanaṁ chindi nibyagghaṁ,
ja272:3.4	Byagghā māhesu nibbanā”ti.
ja272:4.1	Byagghajātakaṁ dutiyaṁ.
ja273:0.1	Jātaka
ja273:0.2	Tikanipāta
ja273:0.3	Udapānavagga
ja273:0.4	3. Kacchapajātaka
ja273:1.1	“Ko nu uddhitabhattova,
ja273:1.2	pūrahatthova brāhmaṇo;
ja273:1.3	Kahaṁ nu bhikkhaṁ acari,
ja273:1.4	kaṁ saddhaṁ upasaṅkami”.
ja273:2.1	“Ahaṁ kapismi dummedho,
ja273:2.2	anāmāsāni āmasiṁ;
ja273:2.3	Tvaṁ maṁ mocaya bhaddaṁ te,
ja273:2.4	mutto gaccheyya pabbataṁ”.
ja273:3.1	“Kacchapā kassapā honti,
ja273:3.2	Koṇḍaññā honti makkaṭā;
ja273:3.3	Muñca kassapa koṇḍaññaṁ,
ja273:3.4	Kataṁ methunakaṁ tayā”ti.
ja273:4.1	Kacchapajātakaṁ tatiyaṁ.
ja274:0.1	Jātaka
ja274:0.2	Tikanipāta
ja274:0.3	Udapānavagga
ja274:0.4	4. Lolajātaka
ja274:1.1	“Kāyaṁ balākā sikhinī,
ja274:1.2	corī laṅghipitāmahā;
ja274:1.3	Oraṁ balāke āgaccha,
ja274:1.4	caṇḍo me vāyaso sakhā”.
ja274:2.1	“Nāhaṁ balākā sikhinī,
ja274:2.2	ahaṁ lolosmi vāyaso;
ja274:2.3	Akatvā vacanaṁ tuyhaṁ,
ja274:2.4	passa lūnosmi āgato”.
ja274:3.1	“Punapāpajjasī samma,
ja274:3.2	sīlañhi tava tādisaṁ;
ja274:3.3	Na hi mānusakā bhogā,
ja274:3.4	subhuñjā honti pakkhinā”ti.
ja274:4.1	Lolajātakaṁ catutthaṁ.
ja275:0.1	Jātaka
ja275:0.2	Tikanipāta
ja275:0.3	Udapānavagga
ja275:0.4	5. Rucirajātaka
ja275:1.1	“Kāyaṁ balākā rucirā,
ja275:1.2	kākanīḷasmimacchati;
ja275:1.3	Caṇḍo kāko sakhā mayhaṁ,
ja275:1.4	yassa cetaṁ kulāvakaṁ”.
ja275:2.1	“Nanu maṁ samma jānāsi,
ja275:2.2	dija sāmākabhojana;
ja275:2.3	Akatvā vacanaṁ tuyhaṁ,
ja275:2.4	passa lūnosmi āgato”.
ja275:3.1	“Punapāpajjasī samma,
ja275:3.2	sīlañhi tava tādisaṁ;
ja275:3.3	Na hi mānusakā bhogā,
ja275:3.4	subhuñjā honti pakkhinā”ti.
ja275:4.1	Rucirajātakaṁ pañcamaṁ.
ja276:0.1	Jātaka
ja276:0.2	Tikanipāta
ja276:0.3	Udapānavagga
ja276:0.4	6. Garudhammajātaka
ja276:1.1	“Tava saddhañca sīlañca,
ja276:1.2	viditvāna janādhipa;
ja276:1.3	Vaṇṇaṁ añjanavaṇṇena,
ja276:1.4	kāliṅgasmiṁ nimimhase”.
ja276:2.1	“Annabhaccā cabhaccā ca,
ja276:2.2	yodha uddissa gacchati;
ja276:2.3	Sabbe te appaṭikkhippā,
ja276:2.4	pubbācariyavaco idaṁ.
ja276:3.1	Dadāmi vo brāhmaṇā nāgametaṁ,
ja276:3.2	Rājārahaṁ rājabhoggaṁ yasassinaṁ;
ja276:3.3	Alaṅkataṁ hemajālābhichannaṁ,
ja276:3.4	Sasārathiṁ gacchatha yena kāman”ti.
ja276:4.1	Garudhammajātakaṁ chaṭṭhaṁ.
ja277:0.1	Jātaka
ja277:0.2	Tikanipāta
ja277:0.3	Udapānavagga
ja277:0.4	7. Romakajātaka
ja277:1.1	“Vassāni paññāsa samādhikāni,
ja277:1.2	Vasimha selassa guhāya romaka;
ja277:1.3	Asaṅkamānā abhinibbutattā,
ja277:1.4	Hatthattamāyanti mamaṇḍajā pure.
ja277:2.1	Te dāni vakkaṅga kimatthamussukā,
ja277:2.2	Bhajanti aññaṁ girikandaraṁ dijā;
ja277:2.3	Na nūna maññanti mamaṁ yathā pure,
ja277:2.4	Cirappavutthā atha vā na te ime”.
ja277:3.1	“Jānāma taṁ na mayaṁ sampamūḷhā,
ja277:3.2	Soyeva tvaṁ te mayamasma nāññe;
ja277:3.3	Cittañca te asmiṁ jane paduṭṭhaṁ,
ja277:3.4	Ājīvikā tena tamuttasāmā”ti.
ja277:4.1	Romakajātakaṁ sattamaṁ.
ja278:0.1	Jātaka
ja278:0.2	Tikanipāta
ja278:0.3	Udapānavagga
ja278:0.4	8. Mahiṁsarājajātaka
ja278:1.1	“Kimatthamabhisandhāya,
ja278:1.2	lahucittassa dubbhino;
ja278:1.3	Sabbakāmadadasseva,
ja278:1.4	imaṁ dukkhaṁ titikkhasi.
ja278:2.1	Siṅgena nihanāhetaṁ,
ja278:2.2	padasā ca adhiṭṭhaha;
ja278:2.3	Bhiyyo bālā pakujjheyyuṁ,
ja278:2.4	no cassa paṭisedhako”.
ja278:3.1	“Mamevāyaṁ maññamāno,
ja278:3.2	aññepevaṁ karissati;
ja278:3.3	Te naṁ tattha vadhissanti,
ja278:3.4	sā me mutti bhavissatī”ti.
ja278:4.1	Mahiṁsarājajātakaṁ aṭṭhamaṁ.
ja279:0.1	Jātaka
ja279:0.2	Tikanipāta
ja279:0.3	Udapānavagga
ja279:0.4	9. Satapattajātaka
ja279:1.1	“Yathā māṇavako panthe,
ja279:1.2	siṅgāliṁ vanagocariṁ;
ja279:1.3	Atthakāmaṁ pavedentiṁ,
ja279:1.4	anatthakāmāti maññati;
ja279:1.5	Anatthakāmaṁ satapattaṁ,
ja279:1.6	atthakāmoti maññati.
ja279:2.1	Evameva idhekacco,
ja279:2.2	puggalo hoti tādiso;
ja279:2.3	Hitehi vacanaṁ vutto,
ja279:2.4	paṭigaṇhāti vāmato.
ja279:3.1	Ye ca kho naṁ pasaṁsanti,
ja279:3.2	bhayā ukkaṁsayanti vā;
ja279:3.3	Tañhi so maññate mittaṁ,
ja279:3.4	satapattaṁva māṇavo”ti.
ja279:4.1	Satapattajātakaṁ navamaṁ.
ja280:0.1	Jātaka
ja280:0.2	Tikanipāta
ja280:0.3	Udapānavagga
ja280:0.4	10. Puṭadūsakajātaka
ja280:1.1	“Addhā hi nūna migarājā,
ja280:1.2	puṭakammassa kovido;
ja280:1.3	Tathā hi puṭaṁ dūseti,
ja280:1.4	aññaṁ nūna karissati”.
ja280:2.1	“Na me mātā vā pitā vā,
ja280:2.2	puṭakammassa kovido;
ja280:2.3	Kataṁ kataṁ kho dūsema,
ja280:2.4	evaṁ dhammamidaṁ kulaṁ”.
ja280:3.1	“Yesaṁ vo ediso dhammo,
ja280:3.2	Adhammo pana kīdiso;
ja280:3.3	Mā vo dhammaṁ adhammaṁ vā,
ja280:3.4	Addasāma kudācanan”ti.
ja280:4.1	Puṭadūsakajātakaṁ dasamaṁ.
ja280:4.2	Udapānavaggo tatiyo.
ja280:5.1	Tassuddānaṁ
ja280:6.1	Udapānavaraṁ vanabyaggha kapi,
ja280:6.2	Sikhinī ca balāka ruciravaro;
ja280:6.3	Sujanādhiparomakadūsa puna,
ja280:6.4	Satapattavaro puṭakamma dasāti.
ja281:0.1	Jātaka
ja281:0.2	Tikanipāta
ja281:0.3	Abbhantaravagga
ja281:0.4	1. Abbhantarajātaka
ja281:1.1	“Abbhantaro nāma dumo,
ja281:1.2	yassa dibyamidaṁ phalaṁ;
ja281:1.3	Bhutvā dohaḷinī nārī,
ja281:1.4	cakkavattiṁ vijāyati.
ja281:2.1	Tvampi bhadde mahesīsi,
ja281:2.2	sā cāpi patino piyā;
ja281:2.3	Āharissati te rājā,
ja281:2.4	idaṁ abbhantaraṁ phalaṁ”.
ja281:3.1	“Bhatturatthe parakkanto,
ja281:3.2	yaṁ ṭhānamadhigacchati;
ja281:3.3	Sūro attapariccāgī,
ja281:3.4	labhamāno bhavāmahan”ti.
ja281:4.1	Abbhantarajātakaṁ paṭhamaṁ.
ja282:0.1	Jātaka
ja282:0.2	Tikanipāta
ja282:0.3	Abbhantaravagga
ja282:0.4	2. Seyyajātaka
ja282:1.1	“Seyyaṁso seyyaso hoti,
ja282:1.2	yo seyyamupasevati;
ja282:1.3	Ekena sandhiṁ katvāna,
ja282:1.4	sataṁ vajjhe amocayiṁ.
ja282:2.1	Tasmā sabbena lokena,
ja282:2.2	sandhiṁ katvāna ekato;
ja282:2.3	Pecca saggaṁ nigaccheyya,
ja282:2.4	idaṁ suṇātha kāsiyā”.
ja282:3.1	Idaṁ vatvā mahārājā,
ja282:3.2	Kaṁso bārāṇasiggaho;
ja282:3.3	Dhanuṁ kaṇḍañca nikkhippa,
ja282:3.4	Saṁyamaṁ ajjhupāgamīti.
ja282:4.1	Seyyajātakaṁ dutiyaṁ.
ja283:0.1	Jātaka
ja283:0.2	Tikanipāta
ja283:0.3	Abbhantaravagga
ja283:0.4	3. Vaḍḍhakīsūkarajātaka
ja283:1.1	“Varaṁ varaṁ tvaṁ nihanaṁ pure cari,
ja283:1.2	Asmiṁ padese abhibhuyya sūkare;
ja283:1.3	So dāni eko byapagamma jhāyasi,
ja283:1.4	Balaṁ nu te byaggha na cajja vijjati”.
ja283:2.1	“Ime sudaṁ yanti disodisaṁ pure,
ja283:2.2	Bhayaṭṭitā leṇagavesino puthū;
ja283:2.3	Te dāni saṅgamma vasanti ekato,
ja283:2.4	Yatthaṭṭhitā duppasahajjame mayā”.
ja283:3.1	“Namatthu saṅghāna samāgatānaṁ,
ja283:3.2	Disvā sayaṁ sakhya vadāmi abbhutaṁ;
ja283:3.3	Byagghaṁ migā yattha jiniṁsu dāṭhino,
ja283:3.4	Sāmaggiyā dāṭhabalesu muccare”ti.
ja283:4.1	Vaḍḍhakīsūkarajātakaṁ tatiyaṁ.
ja284:0.1	Jātaka
ja284:0.2	Tikanipāta
ja284:0.3	Abbhantaravagga
ja284:0.4	4. Sirijātaka
ja284:1.1	“Yaṁ ussukā saṅgharanti,
ja284:1.2	alakkhikā bahuṁ dhanaṁ;
ja284:1.3	Sippavanto asippā ca,
ja284:1.4	lakkhivā tāni bhuñjati.
ja284:2.1	Sabbattha katapuññassa,
ja284:2.2	aticcaññeva pāṇino;
ja284:2.3	Uppajjanti bahū bhogā,
ja284:2.4	appanāyatanesupi.
ja284:3.1	Kukkuṭo maṇayo daṇḍo,
ja284:3.2	thiyo ca puññalakkhaṇā;
ja284:3.3	Uppajjanti apāpassa,
ja284:3.4	katapuññassa jantuno”ti.
ja284:4.1	Sirijātakaṁ catutthaṁ.
ja285:0.1	Jātaka
ja285:0.2	Tikanipāta
ja285:0.3	Abbhantaravagga
ja285:0.4	5. Maṇisūkarajātaka
ja285:1.1	“Dariyā satta vassāni,
ja285:1.2	tiṁsamattā vasāmase;
ja285:1.3	Haññāma maṇino ābhaṁ,
ja285:1.4	iti no mantanaṁ ahu.
ja285:2.1	Yāvatā maṇiṁ ghaṁsāma,
ja285:2.2	bhiyyo vodāyate maṇi;
ja285:2.3	Idañca dāni pucchāma,
ja285:2.4	kiṁ kiccaṁ idha maññasi”.
ja285:3.1	“Ayaṁ maṇi veḷūriyo,
ja285:3.2	akāco vimalo subho;
ja285:3.3	Nāssa sakkā siriṁ hantuṁ,
ja285:3.4	apakkamatha sūkarā”ti.
ja285:4.1	Maṇisūkarajātakaṁ pañcamaṁ.
ja286:0.1	Jātaka
ja286:0.2	Tikanipāta
ja286:0.3	Abbhantaravagga
ja286:0.4	6. Sālūkajātaka
ja286:1.1	“Mā sālūkassa pihayi,
ja286:1.2	āturannāni bhuñjati;
ja286:1.3	Appossukko bhusaṁ khāda,
ja286:1.4	etaṁ dīghāyulakkhaṇaṁ.
ja286:2.1	Idāni so idhāgantvā,
ja286:2.2	atithī yuttasevako;
ja286:2.3	Atha dakkhasi sālūkaṁ,
ja286:2.4	sayantaṁ musaluttaraṁ”.
ja286:3.1	Vikantaṁ sūkaraṁ disvā,
ja286:3.2	sayantaṁ musaluttaraṁ;
ja286:3.3	Jaraggavā vicintesuṁ,
ja286:3.4	varamhākaṁ bhusāmivāti.
ja286:4.1	Sālūkajātakaṁ chaṭṭhaṁ.
ja287:0.1	Jātaka
ja287:0.2	Tikanipāta
ja287:0.3	Abbhantaravagga
ja287:0.4	7. Lābhagarahajātaka
ja287:1.1	“Nānummatto nāpisuṇo,
ja287:1.2	nānaṭo nākutūhalo;
ja287:1.3	Mūḷhesu labhate lābhaṁ,
ja287:1.4	esā te anusāsanī”.
ja287:2.1	“Dhiratthu taṁ yasalābhaṁ,
ja287:2.2	dhanalābhañca brāhmaṇa;
ja287:2.3	Yā vutti vinipātena,
ja287:2.4	adhammacaraṇena vā.
ja287:3.1	Api ce pattamādāya,
ja287:3.2	anagāro paribbaje;
ja287:3.3	Esāva jīvikā seyyo,
ja287:3.4	yā cādhammena esanā”ti.
ja287:4.1	Lābhagarahajātakaṁ sattamaṁ.
ja288:0.1	Jātaka
ja288:0.2	Tikanipāta
ja288:0.3	Abbhantaravagga
ja288:0.4	8. Macchuddānajātaka
ja288:1.1	“Agghanti macchā adhikaṁ sahassaṁ,
ja288:1.2	Na so atthi yo imaṁ saddaheyya;
ja288:1.3	Mayhañca assu idha satta māsā,
ja288:1.4	Ahampi taṁ macchuddānaṁ kiṇeyyaṁ”.
ja288:2.1	“Macchānaṁ bhojanaṁ datvā,
ja288:2.2	mama dakkhiṇamādisi;
ja288:2.3	Taṁ dakkhiṇaṁ sarantiyā,
ja288:2.4	kataṁ apacitiṁ tayā”.
ja288:3.1	“Paduṭṭhacittassa na phāti hoti,
ja288:3.2	Na cāpi taṁ devatā pūjayanti;
ja288:3.3	Yo bhātaraṁ pettikaṁ sāpateyyaṁ,
ja288:3.4	Avañcayī dukkaṭakammakārī”ti.
ja288:4.1	Macchuddānajātakaṁ aṭṭhamaṁ.
ja289:0.1	Jātaka
ja289:0.2	Tikanipāta
ja289:0.3	Abbhantaravagga
ja289:0.4	9. Nānāchandajātaka
ja289:1.1	“Nānāchandā mahārāja,
ja289:1.2	ekāgāre vasāmase;
ja289:1.3	Ahaṁ gāmavaraṁ icche,
ja289:1.4	brāhmaṇī ca gavaṁ sataṁ”.
ja289:2.1	Putto ca ājaññarathaṁ,
ja289:2.2	kaññā ca maṇikuṇḍalaṁ;
ja289:2.3	Yā cesā puṇṇikā jammī,
ja289:2.4	udukkhalaṁbhikaṅkhati.
ja289:3.1	“Brāhmaṇassa gāmavaraṁ,
ja289:3.2	brāhmaṇiyā gavaṁ sataṁ;
ja289:3.3	Puttassa ājaññarathaṁ,
ja289:3.4	kaññāya maṇikuṇḍalaṁ;
ja289:3.5	Yañcetaṁ puṇṇikaṁ jammiṁ,
ja289:3.6	paṭipādethudukkhalan”ti.
ja289:4.1	Nānāchandajātakaṁ navamaṁ.
ja290:0.1	Jātaka
ja290:0.2	Tikanipāta
ja290:0.3	Abbhantaravagga
ja290:0.4	10. Sīlavīmaṁsakajātaka
ja290:1.1	“Sīlaṁ kireva kalyāṇaṁ,
ja290:1.2	sīlaṁ loke anuttaraṁ;
ja290:1.3	Passa ghoraviso nāgo,
ja290:1.4	sīlavāti na haññati.
ja290:2.1	Sohaṁ sīlaṁ samādissaṁ,
ja290:2.2	loke anumataṁ sivaṁ;
ja290:2.3	Ariyavuttisamācāro,
ja290:2.4	yena vuccati sīlavā.
ja290:3.1	Ñātīnañca piyo hoti,
ja290:3.2	mittesu ca virocati;
ja290:3.3	Kāyassa bhedā sugatiṁ,
ja290:3.4	upapajjati sīlavā”ti.
ja290:4.1	Sīlavīmaṁsakajātakaṁ dasamaṁ.
ja290:4.2	Abbhantaravaggo catuttho.
ja290:5.1	Tassuddānaṁ
ja290:6.1	Duma kaṁsavaruttamabyagghamigā,
ja290:6.2	Maṇayo maṇi sālukamavhayano;
ja290:6.3	Anusāsaniyopi ca macchavaro,
ja290:6.4	Maṇikuṇḍalakena kirena dasāti.
ja291:0.1	Jātaka
ja291:0.2	Tikanipāta
ja291:0.3	Kumbhavagga
ja291:0.4	1. Surāghaṭajātaka
ja291:1.1	“Sabbakāmadadaṁ kumbhaṁ,
ja291:1.2	kuṭaṁ laddhāna dhuttako;
ja291:1.3	Yāva naṁ anupāleti,
ja291:1.4	tāva so sukhamedhati.
ja291:2.1	Yadā matto ca ditto ca,
ja291:2.2	pamādā kumbhamabbhidā;
ja291:2.3	Tadā naggo ca pottho ca,
ja291:2.4	pacchā bālo vihaññati.
ja291:3.1	Evameva yo dhanaṁ laddhā,
ja291:3.2	Pamatto paribhuñjati;
ja291:3.3	Pacchā tappati dummedho,
ja291:3.4	Kuṭaṁ bhitvāva dhuttako”ti.
ja291:4.1	Surāghaṭajātakaṁ paṭhamaṁ.
ja292:0.1	Jātaka
ja292:0.2	Tikanipāta
ja292:0.3	Kumbhavagga
ja292:0.4	2. Supattajātaka
ja292:1.1	“Bārāṇasyaṁ mahārāja,
ja292:1.2	kākarājā nivāsako;
ja292:1.3	Asītiyā sahassehi,
ja292:1.4	supatto parivārito.
ja292:2.1	Tassa dohaḷinī bhariyā,
ja292:2.2	Suphassā bhakkhitumicchati;
ja292:2.3	Rañño mahānase pakkaṁ,
ja292:2.4	Paccagghaṁ rājabhojanaṁ.
ja292:3.1	Tesāhaṁ pahito dūto,
ja292:3.2	rañño camhi idhāgato;
ja292:3.3	Bhattu apacitiṁ kummi,
ja292:3.4	nāsāyamakaraṁ vaṇan”ti.
ja292:4.1	Supattajātakaṁ dutiyaṁ.
ja293:0.1	Jātaka
ja293:0.2	Tikanipāta
ja293:0.3	Kumbhavagga
ja293:0.4	3. Kāyanibbindajātaka
ja293:1.1	“Phuṭṭhassa me aññatarena byādhinā,
ja293:1.2	Rogena bāḷhaṁ dukhitassa ruppato;
ja293:1.3	Parisussati khippamidaṁ kaḷevaraṁ,
ja293:1.4	Pupphaṁ yathā paṁsuni ātape kataṁ.
ja293:2.1	Ajaññaṁ jaññasaṅkhātaṁ,
ja293:2.2	asuciṁ sucisammataṁ;
ja293:2.3	Nānākuṇapaparipūraṁ,
ja293:2.4	jaññarūpaṁ apassato.
ja293:3.1	Dhiratthumaṁ āturaṁ pūtikāyaṁ,
ja293:3.2	Jegucchiyaṁ assuciṁ byādhidhammaṁ;
ja293:3.3	Yatthappamattā adhimucchitā pajā,
ja293:3.4	Hāpenti maggaṁ sugatūpapattiyā”ti.
ja293:4.1	Kāyanibbindajātakaṁ tatiyaṁ.
ja294:0.1	Jātaka
ja294:0.2	Tikanipāta
ja294:0.3	Kumbhavagga
ja294:0.4	4. Jambukhādakajātaka
ja294:1.1	“Koyaṁ bindussaro vaggu,
ja294:1.2	saravantānamuttamo;
ja294:1.3	Accuto jambusākhāya,
ja294:1.4	moracchāpova kūjati”.
ja294:2.1	“Kulaputtova jānāti,
ja294:2.2	kulaputtaṁ pasaṁsituṁ;
ja294:2.3	Byagghacchāpasarīvaṇṇa,
ja294:2.4	bhuñja samma dadāmi te”.
ja294:3.1	“Cirassaṁ vata passāmi,
ja294:3.2	musāvādī samāgate;
ja294:3.3	Vantādaṁ kuṇapādañca,
ja294:3.4	aññamaññaṁ pasaṁsake”ti.
ja294:4.1	Jambukhādakajātakaṁ catutthaṁ.
ja295:0.1	Jātaka
ja295:0.2	Tikanipāta
ja295:0.3	Kumbhavagga
ja295:0.4	5. Antajātaka
ja295:1.1	“Usabhasseva te khandho,
ja295:1.2	sīhasseva vijambhitaṁ;
ja295:1.3	Migarāja namo tyatthu,
ja295:1.4	api kiñci labhāmase”.
ja295:2.1	“Kulaputtova jānāti,
ja295:2.2	kulaputtaṁ pasaṁsituṁ;
ja295:2.3	Mayūragīvasaṅkāsa,
ja295:2.4	ito pariyāhi vāyasa”.
ja295:3.1	“Migānaṁ siṅgālo anto,
ja295:3.2	pakkhīnaṁ pana vāyaso;
ja295:3.3	Eraṇḍo anto rukkhānaṁ,
ja295:3.4	tayo antā samāgatā”ti.
ja295:4.1	Antajātakaṁ pañcamaṁ.
ja296:0.1	Jātaka
ja296:0.2	Tikanipāta
ja296:0.3	Kumbhavagga
ja296:0.4	6. Samuddajātaka
ja296:1.1	“Ko nāyaṁ loṇatoyasmiṁ,
ja296:1.2	samantā paridhāvati;
ja296:1.3	Macche makare ca vāreti,
ja296:1.4	ūmīsu ca vihaññati”.
ja296:2.1	“Anantapāyī sakuṇo,
ja296:2.2	atittoti disāsuto;
ja296:2.3	Samuddaṁ pātumicchāmi,
ja296:2.4	sāgaraṁ saritaṁ patiṁ”.
ja296:3.1	“So ayaṁ hāyati ceva,
ja296:3.2	pūrate ca mahodadhi;
ja296:3.3	Nāssa nāyati pītanto,
ja296:3.4	apeyyo kira sāgaro”ti.
ja296:4.1	Samuddajātakaṁ chaṭṭhaṁ.
ja297:0.1	Jātaka
ja297:0.2	Tikanipāta
ja297:0.3	Kumbhavagga
ja297:0.4	7. Kāmavilāpajātaka
ja297:1.1	“Ucce sakuṇa ḍemāna,
ja297:1.2	pattayāna vihaṅgama;
ja297:1.3	Vajjāsi kho tvaṁ vāmūruṁ,
ja297:1.4	ciraṁ kho sā karissati.
ja297:2.1	Idaṁ kho sā na jānāti,
ja297:2.2	asiṁ sattiñca oḍḍitaṁ;
ja297:2.3	Sā caṇḍī kāhati kodhaṁ,
ja297:2.4	taṁ me tapati no idaṁ.
ja297:3.1	Esa uppalasannāho,
ja297:3.2	nikkhañcussīsakohitaṁ;
ja297:3.3	Kāsikañca muduṁ vatthaṁ,
ja297:3.4	tappetu dhanikā piyā”ti.
ja297:4.1	Kāmavilāpajātakaṁ sattamaṁ.
ja298:0.1	Jātaka
ja298:0.2	Tikanipāta
ja298:0.3	Kumbhavagga
ja298:0.4	8. Udumbarajātaka
ja298:1.1	“Udumbarā cime pakkā,
ja298:1.2	nigrodhā ca kapitthanā;
ja298:1.3	Ehi nikkhama bhuñjassu,
ja298:1.4	kiṁ jighacchāya miyyasi”.
ja298:2.1	“Evaṁ so suhito hoti,
ja298:2.2	yo vuḍḍhamapacāyati;
ja298:2.3	Yathāhamajja suhito,
ja298:2.4	dumapakkāni māsito”.
ja298:3.1	“Yaṁ vanejo vanejassa,
ja298:3.2	vañceyya kapino kapi;
ja298:3.3	Daharo kapi saddheyya,
ja298:3.4	na hi jiṇṇo jarākapī”ti.
ja298:4.1	Udumbarajātakaṁ aṭṭhamaṁ.
ja299:0.1	Jātaka
ja299:0.2	Tikanipāta
ja299:0.3	Kumbhavagga
ja299:0.4	9. Komāraputtajātaka
ja299:1.1	“Pure tuvaṁ sīlavataṁ sakāse,
ja299:1.2	Okkantikaṁ kīḷasi assamamhi;
ja299:1.3	Karohare makkaṭiyāni makkaṭa,
ja299:1.4	Na taṁ mayaṁ sīlavataṁ ramāma”.
ja299:2.1	“Sutā hi mayhaṁ paramā visuddhi,
ja299:2.2	Komāraputtassa bahussutassa;
ja299:2.3	Mā dāni maṁ maññi tuvaṁ yathā pure,
ja299:2.4	Jhānānuyutto viharāmi āvuso”.
ja299:3.1	“Sacepi selasmi vapeyya bījaṁ,
ja299:3.2	Devo ca vasse na hi taṁ virūḷhe;
ja299:3.3	Sutā hi te sā paramā visuddhi,
ja299:3.4	Ārā tuvaṁ makkaṭa jhānabhūmiyā”ti.
ja299:4.1	Komāraputtajātakaṁ navamaṁ.
ja300:0.1	Jātaka
ja300:0.2	Tikanipāta
ja300:0.3	Kumbhavagga
ja300:0.4	10. Vakajātaka
ja300:1.1	“Parapāṇarodhā jīvanto,
ja300:1.2	maṁsalohitabhojano;
ja300:1.3	Vako vataṁ samādāya,
ja300:1.4	upapajji uposathaṁ.
ja300:2.1	Tassa sakko vataññāya,
ja300:2.2	ajarūpenupāgami;
ja300:2.3	Vītatapo ajjhappatto,
ja300:2.4	bhañji lohitapo tapaṁ.
ja300:3.1	Evameva idhekacce,
ja300:3.2	Samādānamhi dubbalā;
ja300:3.3	Lahuṁ karonti attānaṁ,
ja300:3.4	Vakova ajakāraṇā”ti.
ja300:4.1	Vakajātakaṁ dasamaṁ.
ja300:4.2	Kumbhavaggo pañcamo.
ja300:5.1	Tassuddānaṁ
ja300:6.1	Varakumbha supattasirivhayano,
ja300:6.2	Sucisammata bindusaro cusabho;
ja300:6.3	Saritaṁpati caṇḍi jarākapinā,
ja300:6.4	Atha makkaṭiyā vakakena dasāti.
ja300:7.1	Atha vagguddānaṁ
ja300:8.1	Saṅkappo padumo ceva,
ja300:8.2	Udapānena tatiyaṁ;
ja300:8.3	Abbhantaraṁ ghaṭabhedaṁ,
ja300:8.4	Tikanipātamhilaṅkatanti.
ja300:9.1	Tikanipātaṁ niṭṭhitaṁ.
ja301:0.1	Jātaka
ja301:0.2	Catukkanipāta
ja301:0.3	Kāliṅgavagga
ja301:0.4	1. Cūḷakāliṅgajātaka
ja301:1.1	“Vivarathimāsaṁ dvāraṁ,
ja301:1.2	Nagaraṁ pavisantu aruṇarājassa;
ja301:1.3	Sīhena susiṭṭhena,
ja301:1.4	Surakkhitaṁ nandisenena”.
ja301:2.1	“Jayo kaliṅgānamasayhasāhinaṁ,
ja301:2.2	Parājayo anayo assakānaṁ;
ja301:2.3	Icceva te bhāsitaṁ brahmacāri,
ja301:2.4	Na ujjubhūtā vitathaṁ bhaṇanti”.
ja301:3.1	“Devā musāvādamupātivattā,
ja301:3.2	Saccaṁ dhanaṁ paramaṁ tesu sakka;
ja301:3.3	Taṁ te musā bhāsitaṁ devarāja,
ja301:3.4	Kiṁ vā paṭicca maghavā mahinda”.
ja301:4.1	“Nanu te sutaṁ brāhmaṇa bhaññamāne,
ja301:4.2	Devā na issanti purisaparakkamassa;
ja301:4.3	Damo samādhi manaso abhejjo,
ja301:4.4	Abyaggatā nikkamanañca kāle;
ja301:4.5	Daḷhañca viriyaṁ purisaparakkamo ca,
ja301:4.6	Teneva āsi vijayo assakānan”ti.
ja301:5.1	Cūḷakāliṅgajātakaṁ paṭhamaṁ.
ja302:0.1	Jātaka
ja302:0.2	Catukkanipāta
ja302:0.3	Kāliṅgavagga
ja302:0.4	2. Mahāassārohajātaka
ja302:1.1	“Adeyyesu dadaṁ dānaṁ,
ja302:1.2	deyyesu nappavecchati;
ja302:1.3	Āpāsu byasanaṁ patto,
ja302:1.4	sahāyaṁ nādhigacchati.
ja302:2.1	Nādeyyesu dadaṁ dānaṁ,
ja302:2.2	deyyesu yo pavecchati;
ja302:2.3	Āpāsu byasanaṁ patto,
ja302:2.4	sahāyamadhigacchati.
ja302:3.1	Saññogasambhogavisesadassanaṁ,
ja302:3.2	Anariyadhammesu saṭhesu nassati;
ja302:3.3	Katañca ariyesu ca ajjavesu,
ja302:3.4	Mahapphalaṁ hoti aṇumpi tādisu.
ja302:4.1	Yo pubbe katakalyāṇo,
ja302:4.2	Akā loke sudukkaraṁ;
ja302:4.3	Pacchā kayirā na vā kayirā,
ja302:4.4	Accantaṁ pūjanāraho”ti.
ja302:5.1	Mahāassārohajātakaṁ dutiyaṁ.
ja303:0.1	Jātaka
ja303:0.2	Catukkanipāta
ja303:0.3	Kāliṅgavagga
ja303:0.4	3. Ekarājajātaka
ja303:1.1	“Anuttare kāmaguṇe samiddhe,
ja303:1.2	Bhutvāna pubbe vasī ekarāja;
ja303:1.3	So dāni dugge narakamhi khitto,
ja303:1.4	Nappajjahe vaṇṇabalaṁ purāṇaṁ”.
ja303:2.1	“Pubbeva khantī ca tapo ca mayhaṁ,
ja303:2.2	Sampatthitā dubbhisena ahosi;
ja303:2.3	Taṁ dāni laddhāna kathaṁ nu rāja,
ja303:2.4	Jahe ahaṁ vaṇṇabalaṁ purāṇaṁ.
ja303:3.1	Sabbā kirevaṁ pariniṭṭhitāni,
ja303:3.2	Yasassinaṁ paññavantaṁ visayha;
ja303:3.3	Yaso ca laddhā purimaṁ uḷāraṁ,
ja303:3.4	Nappajjahe vaṇṇabalaṁ purāṇaṁ.
ja303:4.1	Panujja dukkhena sukhaṁ janinda,
ja303:4.2	Sukhena vā dukkhamasayhasāhi;
ja303:4.3	Ubhayattha santo abhinibbutattā,
ja303:4.4	Sukhe ca dukkhe ca bhavanti tulyā”ti.
ja303:5.1	Ekarājajātakaṁ tatiyaṁ.
ja304:0.1	Jātaka
ja304:0.2	Catukkanipāta
ja304:0.3	Kāliṅgavagga
ja304:0.4	4. Daddarajātaka
ja304:1.1	“Imāni maṁ daddara tāpayanti,
ja304:1.2	Vācāduruttāni manussaloke;
ja304:1.3	Maṇḍūkabhakkhā udakantasevī,
ja304:1.4	Āsīvisaṁ maṁ avisā sapanti”.
ja304:2.1	“Sakā raṭṭhā pabbājito,
ja304:2.2	aññaṁ janapadaṁ gato;
ja304:2.3	Mahantaṁ koṭṭhaṁ kayirātha,
ja304:2.4	duruttānaṁ nidhetave.
ja304:3.1	Yattha posaṁ na jānanti,
ja304:3.2	jātiyā vinayena vā;
ja304:3.3	Na tattha mānaṁ kayirātha,
ja304:3.4	vasamaññātake jane.
ja304:4.1	Videsavāsaṁ vasato,
ja304:4.2	jātavedasamenapi;
ja304:4.3	Khamitabbaṁ sapaññena,
ja304:4.4	api dāsassa tajjitan”ti.
ja304:5.1	Daddarajātakaṁ catutthaṁ.
ja305:0.1	Jātaka
ja305:0.2	Catukkanipāta
ja305:0.3	Kāliṅgavagga
ja305:0.4	5. Sīlavīmaṁsanajātaka
ja305:1.1	“Natthi loke raho nāma,
ja305:1.2	pāpakammaṁ pakubbato;
ja305:1.3	Passanti vanabhūtāni,
ja305:1.4	taṁ bālo maññatī raho.
ja305:2.1	Ahaṁ raho na passāmi,
ja305:2.2	suññaṁ vāpi na vijjati;
ja305:2.3	Yattha aññaṁ na passāmi,
ja305:2.4	asuññaṁ hoti taṁ mayā”.
ja305:3.1	“Dujjacco ca sujacco ca,
ja305:3.2	nando ca sukhavaḍḍhito;
ja305:3.3	Vejjo ca addhuvasīlo ca,
ja305:3.4	te dhammaṁ jahu matthikā.
ja305:4.1	Brāhmaṇo ca kathaṁ jahe,
ja305:4.2	sabbadhammāna pāragū;
ja305:4.3	Yo dhammamanupāleti,
ja305:4.4	dhitimā saccanikkamo”ti.
ja305:5.1	Sīlavīmaṁsanajātakaṁ pañcamaṁ.
ja306:0.1	Jātaka
ja306:0.2	Catukkanipāta
ja306:0.3	Kāliṅgavagga
ja306:0.4	6. Sujātājātaka
ja306:1.1	“Kimaṇḍakā ime deva,
ja306:1.2	nikkhittā kaṁsamallake;
ja306:1.3	Upalohitakā vaggū,
ja306:1.4	taṁ me akkhāhi pucchito”.
ja306:2.1	“Yāni pure tuvaṁ devi,
ja306:2.2	bhaṇḍu nantakavāsinī;
ja306:2.3	Ucchaṅgahatthā pacināsi,
ja306:2.4	tassā te koliyaṁ phalaṁ.
ja306:3.1	Uḍḍayhate na ramati,
ja306:3.2	bhogā vippajahanti taṁ;
ja306:3.3	Tatthevimaṁ paṭinetha,
ja306:3.4	yattha kolaṁ pacissati”.
ja306:4.1	“Honti hete mahārāja,
ja306:4.2	iddhippattāya nāriyā;
ja306:4.3	Khama deva sujātāya,
ja306:4.4	māssā kujjha rathesabhā”ti.
ja306:5.1	Sujātājātakaṁ chaṭṭhaṁ.
ja307:0.1	Jātaka
ja307:0.2	Catukkanipāta
ja307:0.3	Kāliṅgavagga
ja307:0.4	7. Palāsajātaka
ja307:1.1	“Acetanaṁ brāhmaṇa assuṇantaṁ,
ja307:1.2	Jāno ajānantamimaṁ palāsaṁ;
ja307:1.3	Āraddhaviriyo dhuvaṁ appamatto,
ja307:1.4	Sukhaseyyaṁ pucchasi kissa hetu”.
ja307:2.1	“Dūre suto ceva brahā ca rukkho,
ja307:2.2	Dese ṭhito bhūtanivāsarūpo;
ja307:2.3	Tasmā namassāmi imaṁ palāsaṁ,
ja307:2.4	Ye cettha bhūtā te dhanassa hetu”.
ja307:3.1	“So te karissāmi yathānubhāvaṁ,
ja307:3.2	Kataññutaṁ brāhmaṇa pekkhamāno;
ja307:3.3	Kathañhi āgamma sataṁ sakāse,
ja307:3.4	Moghāni te assu pariphanditāni.
ja307:4.1	Yo tindukarukkhassa paro pilakkho,
ja307:4.2	Parivārito pubbayañño uḷāro;
ja307:4.3	Tassesa mūlasmiṁ nidhi nikhāto,
ja307:4.4	Adāyādo gaccha taṁ uddharāhī”ti.
ja307:5.1	Palāsajātakaṁ sattamaṁ.
ja308:0.1	Jātaka
ja308:0.2	Catukkanipāta
ja308:0.3	Kāliṅgavagga
ja308:0.4	8. Sakuṇajātaka
ja308:1.1	“Akaramhasa te kiccaṁ,
ja308:1.2	yaṁ balaṁ ahuvamhase;
ja308:1.3	Migarāja namo tyatthu,
ja308:1.4	api kiñci labhāmase”.
ja308:2.1	“Mama lohitabhakkhassa,
ja308:2.2	niccaṁ luddāni kubbato;
ja308:2.3	Dantantaragato santo,
ja308:2.4	taṁ bahuṁ yampi jīvasi”.
ja308:3.1	“Akataññumakattāraṁ,
ja308:3.2	katassa appaṭikārakaṁ;
ja308:3.3	Yasmiṁ kataññutā natthi,
ja308:3.4	niratthā tassa sevanā.
ja308:4.1	Yassa sammukhaciṇṇena,
ja308:4.2	Mittadhammo na labbhati;
ja308:4.3	Anusūyamanakkosaṁ,
ja308:4.4	Saṇikaṁ tamhā apakkame”ti.
ja308:5.1	Sakuṇajātakaṁ aṭṭhamaṁ.
ja309:0.1	Jātaka
ja309:0.2	Catukkanipāta
ja309:0.3	Kāliṅgavagga
ja309:0.4	9. Chavakajātaka
ja309:1.1	“Sabbamidaṁ carimaṁ kataṁ,
ja309:1.2	Ubho dhammaṁ na passare;
ja309:1.3	Ubho pakatiyā cutā,
ja309:1.4	Yo cāyaṁ mantejjhāpeti;
ja309:1.5	Yo ca mantaṁ adhīyati”.
ja309:2.1	“Sālīnaṁ odanaṁ bhuñje,
ja309:2.2	suciṁ maṁsūpasecanaṁ;
ja309:2.3	Tasmā etaṁ na sevāmi,
ja309:2.4	dhammaṁ isīhi sevitaṁ”.
ja309:3.1	“Paribbaja mahā loko,
ja309:3.2	pacantaññepi pāṇino;
ja309:3.3	Mā taṁ adhammo ācarito,
ja309:3.4	asmā kumbhamivābhidā.
ja309:4.1	Dhiratthu taṁ yasalābhaṁ,
ja309:4.2	dhanalābhañca brāhmaṇa;
ja309:4.3	Yā vutti vinipātena,
ja309:4.4	adhammacaraṇena vā”ti.
ja309:5.1	Chavakajātakaṁ navamaṁ.
ja310:0.1	Jātaka
ja310:0.2	Catukkanipāta
ja310:0.3	Kāliṅgavagga
ja310:0.4	10. Seyyajātaka
ja310:1.1	“Sasamuddapariyāyaṁ,
ja310:1.2	mahiṁ sāgarakuṇḍalaṁ;
ja310:1.3	Na icche saha nindāya,
ja310:1.4	evaṁ seyya vijānahi.
ja310:2.1	Dhiratthu taṁ yasalābhaṁ,
ja310:2.2	dhanalābhañca brāhmaṇa;
ja310:2.3	Yā vutti vinipātena,
ja310:2.4	adhammacaraṇena vā.
ja310:3.1	Api ce pattamādāya,
ja310:3.2	anagāro paribbaje;
ja310:3.3	Sāyeva jīvikā seyyo,
ja310:3.4	yā cādhammena esanā.
ja310:4.1	Api ce pattamādāya,
ja310:4.2	anagāro paribbaje;
ja310:4.3	Aññaṁ ahiṁsayaṁ loke,
ja310:4.4	api rajjena taṁ varan”ti.
ja310:5.1	Seyyajātakaṁ dasamaṁ.
ja310:5.2	Kāliṅgavaggo paṭhamo.
ja310:6.1	Tassuddānaṁ
ja310:7.1	Vivarañca adeyya samiddhavaraṁ,
ja310:7.2	Atha daddara pāpamahātiraho;
ja310:7.3	Atha koli palāsavarañca kara,
ja310:7.4	Carimaṁ sasamuddavarena dasāti.
ja311:0.1	Jātaka
ja311:0.2	Catukkanipāta
ja311:0.3	Pucimandavagga
ja311:0.4	1. Pucimandajātaka
ja311:1.1	“Uṭṭhehi cora kiṁ sesi,
ja311:1.2	ko attho supanena te;
ja311:1.3	Mā taṁ gahesuṁ rājāno,
ja311:1.4	gāme kibbisakārakaṁ”.
ja311:2.1	“Yannu coraṁ gahessanti,
ja311:2.2	gāme kibbisakārakaṁ;
ja311:2.3	Kiṁ tattha pucimandassa,
ja311:2.4	vane jātassa tiṭṭhato”.
ja311:3.1	“Na tvaṁ assattha jānāsi,
ja311:3.2	mama corassa cantaraṁ;
ja311:3.3	Coraṁ gahetvā rājāno,
ja311:3.4	gāme kibbisakārakaṁ;
ja311:3.5	Appenti nimbasūlasmiṁ,
ja311:3.6	tasmiṁ me saṅkate mano”.
ja311:4.1	“Saṅkeyya saṅkitabbāni,
ja311:4.2	rakkheyyānāgataṁ bhayaṁ;
ja311:4.3	Anāgatabhayā dhīro,
ja311:4.4	ubho loke avekkhatī”ti.
ja311:5.1	Pucimandajātakaṁ paṭhamaṁ.
ja312:0.1	Jātaka
ja312:0.2	Catukkanipāta
ja312:0.3	Pucimandavagga
ja312:0.4	2. Kassapamandiyajātaka
ja312:1.1	“Api kassapa mandiyā,
ja312:1.2	yuvā sapati hanti vā;
ja312:1.3	Sabbaṁ taṁ khamate dhīro,
ja312:1.4	paṇḍito taṁ titikkhati.
ja312:2.1	Sacepi santo vivadanti,
ja312:2.2	khippaṁ sandhīyare puna;
ja312:2.3	Bālā pattāva bhijjanti,
ja312:2.4	na te samathamajjhagū.
ja312:3.1	Ete bhiyyo samāyanti,
ja312:3.2	sandhi tesaṁ na jīrati;
ja312:3.3	Yo cādhipannaṁ jānāti,
ja312:3.4	yo ca jānāti desanaṁ.
ja312:4.1	Eso hi uttaritaro,
ja312:4.2	Bhāravaho dhuraddharo;
ja312:4.3	Yo paresādhipannānaṁ,
ja312:4.4	Sayaṁ sandhātumarahatī”ti.
ja312:5.1	Kassapamandiyajātakaṁ dutiyaṁ.
ja313:0.1	Jātaka
ja313:0.2	Catukkanipāta
ja313:0.3	Pucimandavagga
ja313:0.4	3. Khantīvādījātaka
ja313:1.1	“Yo te hatthe ca pāde ca,
ja313:1.2	kaṇṇanāsañca chedayi;
ja313:1.3	Tassa kujjha mahāvīra,
ja313:1.4	mā raṭṭhaṁ vinasā idaṁ”.
ja313:2.1	“Yo me hatthe ca pāde ca,
ja313:2.2	kaṇṇanāsañca chedayi;
ja313:2.3	Ciraṁ jīvatu so rājā,
ja313:2.4	na hi kujjhanti mādisā”.
ja313:3.1	Ahū atītamaddhānaṁ,
ja313:3.2	samaṇo khantidīpano;
ja313:3.3	Taṁ khantiyāyeva ṭhitaṁ,
ja313:3.4	kāsirājā achedayi.
ja313:4.1	Tassa kammapharusassa,
ja313:4.2	vipāko kaṭuko ahu;
ja313:4.3	Yaṁ kāsirājā vedesi,
ja313:4.4	nirayamhi samappitoti.
ja313:5.1	Khantīvādījātakaṁ tatiyaṁ.
ja314:0.1	Jātaka
ja314:0.2	Catukkanipāta
ja314:0.3	Pucimandavagga
ja314:0.4	4. Lohakumbhijātaka
ja314:1.1	“Dujjīvitamajīvimha,
ja314:1.2	ye sante na dadamhase;
ja314:1.3	Vijjamānesu bhogesu,
ja314:1.4	dīpaṁ nākamha attano”.
ja314:2.1	“Saṭṭhi vassasahassāni,
ja314:2.2	paripuṇṇāni sabbaso;
ja314:2.3	Niraye paccamānānaṁ,
ja314:2.4	kadā anto bhavissati”.
ja314:3.1	“Natthi anto kuto anto,
ja314:3.2	na anto paṭidissati;
ja314:3.3	Tadā hi pakataṁ pāpaṁ,
ja314:3.4	mama tuyhañca mārisā”.
ja314:4.1	“Sohaṁ nūna ito gantvā,
ja314:4.2	yoniṁ laddhāna mānusiṁ;
ja314:4.3	Vadaññū sīlasampanno,
ja314:4.4	kāhāmi kusalaṁ bahun”ti.
ja314:5.1	Lohakumbhijātakaṁ catutthaṁ.
ja315:0.1	Jātaka
ja315:0.2	Catukkanipāta
ja315:0.3	Pucimandavagga
ja315:0.4	5. Sabbamaṁsalābhajātaka
ja315:1.1	“Pharusā vata te vācā,
ja315:1.2	maṁsaṁ yācanako asi;
ja315:1.3	Kilomasadisī vācā,
ja315:1.4	kilomaṁ samma dammi te”.
ja315:2.1	“Aṅgametaṁ manussānaṁ,
ja315:2.2	bhātā loke pavuccati;
ja315:2.3	Aṅgassa sadisī vācā,
ja315:2.4	aṅgaṁ samma dadāmi te”.
ja315:3.1	“Tātāti putto vadamāno,
ja315:3.2	kampeti hadayaṁ pitu;
ja315:3.3	Hadayassa sadisī vācā,
ja315:3.4	hadayaṁ samma dammi te”.
ja315:4.1	“Yassa gāme sakhā natthi,
ja315:4.2	yathāraññaṁ tatheva taṁ;
ja315:4.3	Sabbassa sadisī vācā,
ja315:4.4	sabbaṁ samma dadāmi te”ti.
ja315:5.1	Sabbamaṁsalābhajātakaṁ pañcamaṁ.
ja316:0.1	Jātaka
ja316:0.2	Catukkanipāta
ja316:0.3	Pucimandavagga
ja316:0.4	6. Sasapaṇḍitajātaka
ja316:1.1	“Satta me rohitā macchā,
ja316:1.2	udakā thalamubbhatā;
ja316:1.3	Idaṁ brāhmaṇa me atthi,
ja316:1.4	etaṁ bhutvā vane vasa”.
ja316:2.1	“Dussa me khettapālassa,
ja316:2.2	rattibhattaṁ apābhataṁ;
ja316:2.3	Maṁsasūlā ca dve godhā,
ja316:2.4	ekañca dadhivārakaṁ;
ja316:2.5	Idaṁ brāhmaṇa me atthi,
ja316:2.6	etaṁ bhutvā vane vasa”.
ja316:3.1	“Ambapakkaṁ dakaṁ sītaṁ,
ja316:3.2	Sītacchāyā manoramā;
ja316:3.3	Idaṁ brāhmaṇa me atthi,
ja316:3.4	Etaṁ bhutvā vane vasa”.
ja316:4.1	“Na sasassa tilā atthi,
ja316:4.2	Na muggā napi taṇḍulā;
ja316:4.3	Iminā agginā pakkaṁ,
ja316:4.4	Mamaṁ bhutvā vane vasā”ti.
ja316:5.1	Sasapaṇḍitajātakaṁ chaṭṭhaṁ.
ja317:0.1	Jātaka
ja317:0.2	Catukkanipāta
ja317:0.3	Pucimandavagga
ja317:0.4	7. Matarodanajātaka
ja317:1.1	“Mataṁ mataṁ evaṁ rodatha,
ja317:1.2	Na hi taṁ rodatha yo marissati;
ja317:1.3	Sabbepi sarīradhārino,
ja317:1.4	Anupubbena jahanti jīvitaṁ.
ja317:2.1	Devamanussā catuppadā,
ja317:2.2	Pakkhigaṇā uragā ca bhogino;
ja317:2.3	Samhi sarīre anissarā,
ja317:2.4	Ramamānāva jahanti jīvitaṁ.
ja317:3.1	Evaṁ calitaṁ asaṇṭhitaṁ,
ja317:3.2	Sukhadukkhaṁ manujesvapekkhiya;
ja317:3.3	Kanditaruditaṁ niratthakaṁ,
ja317:3.4	Kiṁ vo sokagaṇābhikīrare.
ja317:4.1	Dhuttā ca soṇḍā akatā,
ja317:4.2	bālā sūrā ayogino;
ja317:4.3	Dhīraṁ maññanti bāloti,
ja317:4.4	ye dhammassa akovidā”ti.
ja317:5.1	Matarodanajātakaṁ sattamaṁ.
ja318:0.1	Jātaka
ja318:0.2	Catukkanipāta
ja318:0.3	Pucimandavagga
ja318:0.4	8. Kaṇaverajātaka
ja318:1.1	“Yaṁ taṁ vasantasamaye,
ja318:1.2	kaṇaveresu bhāṇusu;
ja318:1.3	Sāmaṁ bāhāya pīḷesi,
ja318:1.4	sā taṁ ārogyamabravi”.
ja318:2.1	“Ambho na kira saddheyyaṁ,
ja318:2.2	yaṁ vāto pabbataṁ vahe;
ja318:2.3	Pabbatañce vahe vāto,
ja318:2.4	sabbampi pathaviṁ vahe;
ja318:2.5	Yattha sāmā kālakatā,
ja318:2.6	sā maṁ ārogyamabravi”.
ja318:3.1	“Na ceva sā kālakatā,
ja318:3.2	na ca sā aññamicchati;
ja318:3.3	Ekabhattikinī sāmā,
ja318:3.4	tameva abhikaṅkhati”.
ja318:4.1	“Asanthutaṁ maṁ cirasanthutena,
ja318:4.2	Nimīni sāmā adhuvaṁ dhuvena;
ja318:4.3	Mayāpi sāmā nimineyya aññaṁ,
ja318:4.4	Ito ahaṁ dūrataraṁ gamissan”ti.
ja318:5.1	Kaṇaverajātakaṁ aṭṭhamaṁ.
ja319:0.1	Jātaka
ja319:0.2	Catukkanipāta
ja319:0.3	Pucimandavagga
ja319:0.4	9. Tittirajātaka
ja319:1.1	“Susukhaṁ vata jīvāmi,
ja319:1.2	labhāmi ceva bhuñjituṁ;
ja319:1.3	Paripanthe ca tiṭṭhāmi,
ja319:1.4	kā nu bhante gatī mama”.
ja319:2.1	“Mano ce te nappaṇamati,
ja319:2.2	pakkhi pāpassa kammuno;
ja319:2.3	Abyāvaṭassa bhadrassa,
ja319:2.4	na pāpamupalimpati”.
ja319:3.1	“Ñātako no nisinnoti,
ja319:3.2	bahu āgacchate jano;
ja319:3.3	Paṭicca kammaṁ phusati,
ja319:3.4	tasmiṁ me saṅkate mano”.
ja319:4.1	“Na paṭicca kammaṁ phusati,
ja319:4.2	mano ce nappadussati;
ja319:4.3	Appossukkassa bhadrassa,
ja319:4.4	na pāpamupalimpatī”ti.
ja319:5.1	Tittirajātakaṁ navamaṁ.
ja320:0.1	Jātaka
ja320:0.2	Catukkanipāta
ja320:0.3	Pucimandavagga
ja320:0.4	10. Succajajātaka
ja320:1.1	“Succajaṁ vata naccaji,
ja320:1.2	vācāya adadaṁ giriṁ;
ja320:1.3	Kiṁ hitassa cajantassa,
ja320:1.4	vācāya adada pabbataṁ”.
ja320:2.1	“Yañhi kayirā tañhi vade,
ja320:2.2	yaṁ na kayirā na taṁ vade;
ja320:2.3	Akarontaṁ bhāsamānaṁ,
ja320:2.4	parijānanti paṇḍitā”.
ja320:3.1	“Rājaputta namo tyatthu,
ja320:3.2	sacce dhamme ṭhito casi;
ja320:3.3	Yassa te byasanaṁ patto,
ja320:3.4	saccasmiṁ ramate mano”.
ja320:4.1	“Yā daliddī daliddassa,
ja320:4.2	aḍḍhā aḍḍhassa kittima;
ja320:4.3	Sā hissa paramā bhariyā,
ja320:4.4	sahiraññassa itthiyo”ti.
ja320:5.1	Succajajātakaṁ dasamaṁ.
ja320:5.2	Pucimandavaggo dutiyo.
ja320:6.1	Tassuddānaṁ
ja320:7.1	Atha cora sakassapa khantīvaro,
ja320:7.2	Dujjīvitatā ca varā pharusā;
ja320:7.3	Atha sasa matañca vasanta sukhaṁ,
ja320:7.4	Succajaṁvatanaccajinā ca dasāti.
ja321:0.1	Jātaka
ja321:0.2	Catukkanipāta
ja321:0.3	Kuṭidūsakavagga
ja321:0.4	1. Kuṭidūsakajātaka
ja321:1.1	“Manussasseva te sīsaṁ,
ja321:1.2	hatthapādā ca vānara;
ja321:1.3	Atha kena nu vaṇṇena,
ja321:1.4	agāraṁ te na vijjati”.
ja321:2.1	“Manussasseva me sīsaṁ,
ja321:2.2	hatthapādā ca siṅgila;
ja321:2.3	Yāhu seṭṭhā manussesu,
ja321:2.4	sā me paññā na vijjati”.
ja321:3.1	“Anavaṭṭhitacittassa,
ja321:3.2	lahucittassa dubbhino;
ja321:3.3	Niccaṁ addhuvasīlassa,
ja321:3.4	sukhabhāvo na vijjati.
ja321:4.1	So karassu ānubhāvaṁ,
ja321:4.2	vītivattassu sīliyaṁ;
ja321:4.3	Sītavātaparittāṇaṁ,
ja321:4.4	karassu kuṭavaṁ kapī”ti.
ja321:5.1	Kuṭidūsakajātakaṁ paṭhamaṁ.
ja322:0.1	Jātaka
ja322:0.2	Catukkanipāta
ja322:0.3	Kuṭidūsakavagga
ja322:0.4	2. Duddubhajātaka
ja322:1.1	“Duddubhāyati bhaddante,
ja322:1.2	yasmiṁ dese vasāmahaṁ;
ja322:1.3	Ahampetaṁ na jānāmi,
ja322:1.4	kimetaṁ duddubhāyati”.
ja322:2.1	“Beluvaṁ patitaṁ sutvā,
ja322:2.2	duddubhanti saso javi;
ja322:2.3	Sasassa vacanaṁ sutvā,
ja322:2.4	santattā migavāhinī.
ja322:3.1	Appatvā padaviññāṇaṁ,
ja322:3.2	paraghosānusārino;
ja322:3.3	Panādaparamā bālā,
ja322:3.4	te honti parapattiyā.
ja322:4.1	Ye ca sīlena sampannā,
ja322:4.2	paññāyūpasame ratā;
ja322:4.3	Ārakā viratā dhīrā,
ja322:4.4	na honti parapattiyā”ti.
ja322:5.1	Duddubhajātakaṁ dutiyaṁ.
ja323:0.1	Jātaka
ja323:0.2	Catukkanipāta
ja323:0.3	Kuṭidūsakavagga
ja323:0.4	3. Brahmadattajātaka
ja323:1.1	“Dvayaṁ yācanako rāja,
ja323:1.2	brahmadatta nigacchati;
ja323:1.3	Alābhaṁ dhanalābhaṁ vā,
ja323:1.4	evaṁ dhammā hi yācanā.
ja323:2.1	Yācanaṁ rodanaṁ āhu,
ja323:2.2	pañcālānaṁ rathesabha;
ja323:2.3	Yo yācanaṁ paccakkhāti,
ja323:2.4	tamāhu paṭirodanaṁ.
ja323:3.1	Mā maddasaṁsu rodantaṁ,
ja323:3.2	pañcālā susamāgatā;
ja323:3.3	Tuvaṁ vā paṭirodantaṁ,
ja323:3.4	tasmā icchāmahaṁ raho”.
ja323:4.1	“Dadāmi te brāhmaṇa rohiṇīnaṁ,
ja323:4.2	Gavaṁ sahassaṁ saha puṅgavena;
ja323:4.3	Ariyo hi ariyassa kathaṁ na dajjā,
ja323:4.4	Sutvāna gāthā tava dhammayuttā”ti.
ja323:5.1	Brahmadattajātakaṁ tatiyaṁ.
ja324:0.1	Jātaka
ja324:0.2	Catukkanipāta
ja324:0.3	Kuṭidūsakavagga
ja324:0.4	4. Cammasāṭakajātaka
ja324:1.1	“Kalyāṇarūpo vatayaṁ catuppado,
ja324:1.2	Subhaddako ceva supesalo ca;
ja324:1.3	Yo brāhmaṇaṁ jātimantūpapannaṁ,
ja324:1.4	Apacāyati meṇḍavaro yasassī”.
ja324:2.1	“Mā brāhmaṇa ittaradassanena,
ja324:2.2	Vissāsamāpajji catuppadassa;
ja324:2.3	Daḷhappahāraṁ abhikaṅkhamāno,
ja324:2.4	Avasakkatī dassati suppahāraṁ”.
ja324:3.1	Ūruṭṭhi bhaggaṁ pavaṭṭito khāribhāro,
ja324:3.2	Sabbañca bhaṇḍaṁ brāhmaṇassa bhinnaṁ;
ja324:3.3	Ubhopi bāhā paggayha kandati,
ja324:3.4	“Abhidhāvatha haññate brahmacārī.
ja324:4.1	Evaṁ so nihato seti,
ja324:4.2	yo apūjaṁ pasaṁsati;
ja324:4.3	Yathāhamajja pahato,
ja324:4.4	hato meṇḍena dummatī”ti.
ja324:5.1	Cammasāṭakajātakaṁ catutthaṁ.
ja325:0.1	Jātaka
ja325:0.2	Catukkanipāta
ja325:0.3	Kuṭidūsakavagga
ja325:0.4	5. Godharājajātaka
ja325:1.1	“Samaṇaṁ taṁ maññamāno,
ja325:1.2	upagacchimasaññataṁ;
ja325:1.3	So maṁ daṇḍena pāhāsi,
ja325:1.4	yathā assamaṇo tathā”.
ja325:2.1	“Kiṁ te jaṭāhi dummedha,
ja325:2.2	kiṁ te ajinasāṭiyā;
ja325:2.3	Abbhantaraṁ te gahanaṁ,
ja325:2.4	bāhiraṁ parimajjasi”.
ja325:3.1	“Ehi godha nivattassu,
ja325:3.2	bhuñja sālīnamodanaṁ;
ja325:3.3	Telaṁ loṇañca me atthi,
ja325:3.4	pahūtaṁ mayha pipphali.
ja325:4.1	Esa bhiyyo pavekkhāmi,
ja325:4.2	vammikaṁ sataporisaṁ;
ja325:4.3	Telaṁ loṇañca kittesi,
ja325:4.4	ahitaṁ mayha pipphalī”ti.
ja325:5.1	Godharājajātakaṁ pañcamaṁ.
ja326:0.1	Jātaka
ja326:0.2	Catukkanipāta
ja326:0.3	Kuṭidūsakavagga
ja326:0.4	6. Kakkārujātaka
ja326:1.1	“Kāyena yo nāvahare,
ja326:1.2	vācāya na musā bhaṇe;
ja326:1.3	Yaso laddhā na majjeyya,
ja326:1.4	sa ve kakkārumarahati”.
ja326:2.1	“Dhammena vittameseyya,
ja326:2.2	na nikatyā dhanaṁ hare;
ja326:2.3	Bhoge laddhā na majjeyya,
ja326:2.4	sa ve kakkārumarahati”.
ja326:3.1	“Yassa cittaṁ ahāliddaṁ,
ja326:3.2	saddhā ca avirāginī;
ja326:3.3	Eko sāduṁ na bhuñjeyya,
ja326:3.4	sa ve kakkārumarahati”.
ja326:4.1	“Sammukhā vā tirokkhā vā,
ja326:4.2	Yo sante na paribhāsati;
ja326:4.3	Yathāvādī tathākārī,
ja326:4.4	Sa ve kakkārumarahatī”ti.
ja326:5.1	Kakkārujātakaṁ chaṭṭhaṁ.
ja327:0.1	Jātaka
ja327:0.2	Catukkanipāta
ja327:0.3	Kuṭidūsakavagga
ja327:0.4	7. Kākavatījātaka
ja327:1.1	“Vāti cāyaṁ tato gandho,
ja327:1.2	yattha me vasatī piyā;
ja327:1.3	Dūre ito hi kākavatī,
ja327:1.4	yattha me nirato mano”.
ja327:2.1	“Kathaṁ samuddamatarī,
ja327:2.2	kathaṁ atari kepukaṁ;
ja327:2.3	Kathaṁ satta samuddāni,
ja327:2.4	kathaṁ simbalimāruhi”.
ja327:3.1	“Tayā samuddamatariṁ,
ja327:3.2	tayā atari kepukaṁ;
ja327:3.3	Tayā satta samuddāni,
ja327:3.4	tayā simbalimāruhiṁ”.
ja327:4.1	“Dhiratthumaṁ mahākāyaṁ,
ja327:4.2	dhiratthumaṁ acetanaṁ;
ja327:4.3	Yattha jāyāyahaṁ jāraṁ,
ja327:4.4	āvahāmi vahāmi cā”ti.
ja327:5.1	Kākavatījātakaṁ sattamaṁ.
ja328:0.1	Jātaka
ja328:0.2	Catukkanipāta
ja328:0.3	Kuṭidūsakavagga
ja328:0.4	8. Ananusociyajātaka
ja328:1.1	“Bahūnaṁ vijjatī bhotī,
ja328:1.2	tehi me kiṁ bhavissati;
ja328:1.3	Tasmā etaṁ na socāmi,
ja328:1.4	piyaṁ sammillahāsiniṁ.
ja328:2.1	Taṁ tañce anusoceyya,
ja328:2.2	yaṁ yaṁ tassa na vijjati;
ja328:2.3	Attānamanusoceyya,
ja328:2.4	sadā maccuvasaṁ pataṁ.
ja328:3.1	Na heva ṭhitaṁ nāsīnaṁ,
ja328:3.2	Na sayānaṁ na paddhaguṁ;
ja328:3.3	Yāva byāti nimisati,
ja328:3.4	Tatrāpi rasatī vayo.
ja328:4.1	Tatthattani vatappaddhe,
ja328:4.2	vinābhāve asaṁsaye;
ja328:4.3	Bhūtaṁ sesaṁ dayitabbaṁ,
ja328:4.4	vītaṁ ananusociyan”ti.
ja328:5.1	Ananusociyajātakaṁ aṭṭhamaṁ.
ja329:0.1	Jātaka
ja329:0.2	Catukkanipāta
ja329:0.3	Kuṭidūsakavagga
ja329:0.4	9. Kāḷabāhujātaka
ja329:1.1	“Yaṁ annapānassa pure labhāma,
ja329:1.2	Taṁ dāni sākhamigameva gacchati;
ja329:1.3	Gacchāma dāni vanameva rādha,
ja329:1.4	Asakkatā casma dhanañjayāya”.
ja329:2.1	“Lābho alābho yaso ayaso ca,
ja329:2.2	Nindā pasaṁsā ca sukhañca dukkhaṁ;
ja329:2.3	Ete aniccā manujesu dhammā,
ja329:2.4	Mā soci kiṁ socasi poṭṭhapāda”.
ja329:3.1	“Addhā tuvaṁ paṇḍitakosi rādha,
ja329:3.2	Jānāsi atthāni anāgatāni;
ja329:3.3	Kathaṁ nu sākhāmigaṁ dakkhisāma,
ja329:3.4	Niddhāvitaṁ rājakulatova jammaṁ”.
ja329:4.1	“Cāleti kaṇṇaṁ bhakuṭiṁ karoti,
ja329:4.2	Muhuṁ muhuṁ bhāyayate kumāre;
ja329:4.3	Sayameva taṁ kāhati kāḷabāhu,
ja329:4.4	Yenārakā ṭhassati annapānā”ti.
ja329:5.1	Kāḷabāhujātakaṁ navamaṁ.
ja330:0.1	Jātaka
ja330:0.2	Catukkanipāta
ja330:0.3	Kuṭidūsakavagga
ja330:0.4	10. Sīlavīmaṁsajātaka
ja330:1.1	“Sīlaṁ kireva kalyāṇaṁ,
ja330:1.2	sīlaṁ loke anuttaraṁ;
ja330:1.3	Passa ghoraviso nāgo,
ja330:1.4	sīlavāti na haññati”.
ja330:2.1	“Yāvadevassahū kiñci,
ja330:2.2	tāvadeva akhādisuṁ;
ja330:2.3	Saṅgamma kulalā loke,
ja330:2.4	na hiṁsanti akiñcanaṁ.
ja330:3.1	Sukhaṁ nirāsā supati,
ja330:3.2	āsā phalavatī sukhā;
ja330:3.3	Āsaṁ nirāsaṁ katvāna,
ja330:3.4	sukhaṁ supati piṅgalā.
ja330:4.1	Na samādhiparo atthi,
ja330:4.2	asmiṁ loke paramhi ca;
ja330:4.3	Na paraṁ nāpi attānaṁ,
ja330:4.4	vihiṁsati samāhito”ti.
ja330:5.1	Sīlavīmaṁsajātakaṁ dasamaṁ.
ja330:5.2	Kuṭidūsakavaggo tatiyo.
ja330:6.1	Tassuddānaṁ
ja330:7.1	Samanussa saduddubha yācanako,
ja330:7.2	Atha meṇḍavaruttama godhavaro;
ja330:7.3	Atha kāyasakepuka bhotīvaro,
ja330:7.4	Atha rādhasusīlavarena dasāti.
ja331:0.1	Jātaka
ja331:0.2	Catukkanipāta
ja331:0.3	Kokilavagga
ja331:0.4	1. Kokilajātaka
ja331:1.1	“Yo ve kāle asampatte,
ja331:1.2	ativelaṁ pabhāsati;
ja331:1.3	Evaṁ so nihato seti,
ja331:1.4	kokilāyiva atrajo.
ja331:2.1	Na hi satthaṁ sunisitaṁ,
ja331:2.2	visaṁ halāhalāmiva;
ja331:2.3	Evaṁ nikaṭṭhe pāteti,
ja331:2.4	vācā dubbhāsitā yathā.
ja331:3.1	Tasmā kāle akāle vā,
ja331:3.2	vācaṁ rakkheyya paṇḍito;
ja331:3.3	Nātivelaṁ pabhāseyya,
ja331:3.4	api attasamamhi vā.
ja331:4.1	Yo ca kāle mitaṁ bhāse,
ja331:4.2	matipubbo vicakkhaṇo;
ja331:4.3	Sabbe amitte ādeti,
ja331:4.4	supaṇṇo uragāmivā”ti.
ja331:5.1	Kokilajātakaṁ paṭhamaṁ.
ja332:0.1	Jātaka
ja332:0.2	Catukkanipāta
ja332:0.3	Kokilavagga
ja332:0.4	2. Rathalaṭṭhijātaka
ja332:1.1	“Api hantvā hato brūti,
ja332:1.2	jetvā jitoti bhāsati;
ja332:1.3	Pubbamakkhāyino rāja,
ja332:1.4	aññadatthu na saddahe.
ja332:2.1	Tasmā paṇḍitajātiyo,
ja332:2.2	suṇeyya itarassapi;
ja332:2.3	Ubhinnaṁ vacanaṁ sutvā,
ja332:2.4	yathā dhammo tathā kare.
ja332:3.1	Alaso gihī kāmabhogī na sādhu,
ja332:3.2	Asaññato pabbajito na sādhu;
ja332:3.3	Rājā na sādhu anisammakārī,
ja332:3.4	Yo paṇḍito kodhano taṁ na sādhu.
ja332:4.1	Nisamma khattiyo kayirā,
ja332:4.2	nānisamma disampati;
ja332:4.3	Nisammakārino rāja,
ja332:4.4	yaso kitti ca vaḍḍhatī”ti.
ja332:5.1	Rathalaṭṭhijātakaṁ dutiyaṁ.
ja333:0.1	Jātaka
ja333:0.2	Catukkanipāta
ja333:0.3	Kokilavagga
ja333:0.4	3. Pakkagodhajātaka
ja333:1.1	“Tadeva me tvaṁ vidito,
ja333:1.2	vanamajjhe rathesabha;
ja333:1.3	Yassa te khaggabaddhassa,
ja333:1.4	sannaddhassa tirīṭino;
ja333:1.5	Assatthadumasākhāya,
ja333:1.6	pakkā godhā palāyatha”.
ja333:2.1	“Name namantassa bhaje bhajantaṁ,
ja333:2.2	Kiccānukubbassa kareyya kiccaṁ;
ja333:2.3	Nānatthakāmassa kareyya atthaṁ,
ja333:2.4	Asambhajantampi na sambhajeyya.
ja333:3.1	Caje cajantaṁ vanathaṁ na kayirā,
ja333:3.2	Apetacittena na sambhajeyya;
ja333:3.3	Dijo dumaṁ khīṇaphalanti ñatvā,
ja333:3.4	Aññaṁ samekkheyya mahā hi loko”.
ja333:4.1	“So te karissāmi yathānubhāvaṁ,
ja333:4.2	Kataññutaṁ khattiye pekkhamāno;
ja333:4.3	Sabbañca te issariyaṁ dadāmi,
ja333:4.4	Yassicchasī tassa tuvaṁ dadāmī”ti.
ja333:5.1	Pakkagodhajātakaṁ tatiyaṁ.
ja334:0.1	Jātaka
ja334:0.2	Catukkanipāta
ja334:0.3	Kokilavagga
ja334:0.4	4. Rājovādajātaka
ja334:1.1	“Gavañce taramānānaṁ,
ja334:1.2	jimhaṁ gacchati puṅgavo;
ja334:1.3	Sabbā tā jimhaṁ gacchanti,
ja334:1.4	nette jimhaṁ gate sati.
ja334:2.1	Evameva manussesu,
ja334:2.2	yo hoti seṭṭhasammato;
ja334:2.3	So ce adhammaṁ carati,
ja334:2.4	pageva itarā pajā;
ja334:2.5	Sabbaṁ raṭṭhaṁ dukhaṁ seti,
ja334:2.6	rājā ce hoti adhammiko.
ja334:3.1	Gavañce taramānānaṁ,
ja334:3.2	ujuṁ gacchati puṅgavo;
ja334:3.3	Sabbā gāvī ujuṁ yanti,
ja334:3.4	nette ujuṁ gate sati.
ja334:4.1	Evameva manussesu,
ja334:4.2	yo hoti seṭṭhasammato;
ja334:4.3	So sace dhammaṁ carati,
ja334:4.4	pageva itarā pajā;
ja334:4.5	Sabbaṁ raṭṭhaṁ sukhaṁ seti,
ja334:4.6	rājā ce hoti dhammiko”ti.
ja334:5.1	Rājovādajātakaṁ catutthaṁ.
ja335:0.1	Jātaka
ja335:0.2	Catukkanipāta
ja335:0.3	Kokilavagga
ja335:0.4	5. Jambukajātaka
ja335:1.1	“Brahā pavaḍḍhakāyo so,
ja335:1.2	dīghadāṭho ca jambuka;
ja335:1.3	Na tvaṁ tattha kule jāto,
ja335:1.4	yattha gaṇhanti kuñjaraṁ”.
ja335:2.1	“Asīho sīhamānena,
ja335:2.2	yo attānaṁ vikubbati;
ja335:2.3	Kotthūva gajamāsajja,
ja335:2.4	seti bhūmyā anutthunaṁ.
ja335:3.1	Yasassino uttamapuggalassa,
ja335:3.2	Sañjātakhandhassa mahabbalassa;
ja335:3.3	Asamekkhiya thāmabalūpapattiṁ,
ja335:3.4	Sa seti nāgena hatoyaṁ jambuko.
ja335:4.1	Yo cīdha kammaṁ kurute pamāya,
ja335:4.2	Thāmabbalaṁ attani saṁviditvā;
ja335:4.3	Jappena mantena subhāsitena,
ja335:4.4	Parikkhavā so vipulaṁ jinātī”ti.
ja335:5.1	Jambukajātakaṁ pañcamaṁ.
ja336:0.1	Jātaka
ja336:0.2	Catukkanipāta
ja336:0.3	Kokilavagga
ja336:0.4	6. Brahāchattajātaka
ja336:1.1	“Tiṇaṁ tiṇanti lapasi,
ja336:1.2	ko nu te tiṇamāhari;
ja336:1.3	Kiṁ nu te tiṇakiccatthi,
ja336:1.4	tiṇameva pabhāsasi”.
ja336:2.1	“Idhāgamā brahmacārī,
ja336:2.2	brahā chatto bahussuto;
ja336:2.3	So me sabbaṁ samādāya,
ja336:2.4	tiṇaṁ nikkhippa gacchati”.
ja336:3.1	“Evetaṁ hoti kattabbaṁ,
ja336:3.2	appena bahumicchatā;
ja336:3.3	Sabbaṁ sakassa ādānaṁ,
ja336:3.4	anādānaṁ tiṇassa ca”.
ja336:3.5	(…)
ja336:4.1	“Sīlavanto na kubbanti,
ja336:4.2	bālo sīlāni kubbati;
ja336:4.3	Aniccasīlaṁ dussīlyaṁ,
ja336:4.4	kiṁ paṇḍiccaṁ karissatī”ti.
ja336:5.1	Brahāchattajātakaṁ chaṭṭhaṁ.
ja337:0.1	Jātaka
ja337:0.2	Catukkanipāta
ja337:0.3	Kokilavagga
ja337:0.4	7. Pīṭhajātaka
ja337:1.1	“Na te pīṭhamadāyimhā,
ja337:1.2	na pānaṁ napi bhojanaṁ;
ja337:1.3	Brahmacāri khamassu me,
ja337:1.4	etaṁ passāmi accayaṁ”.
ja337:2.1	“Nevābhisajjāmi na cāpi kuppe,
ja337:2.2	Na cāpi me appiyamāsi kiñci;
ja337:2.3	Athopi me āsi manovitakko,
ja337:2.4	Etādiso nūna kulassa dhammo”.
ja337:3.1	“Esasmākaṁ kule dhammo,
ja337:3.2	pitupitāmaho sadā;
ja337:3.3	Āsanaṁ udakaṁ pajjaṁ,
ja337:3.4	sabbetaṁ nipadāmase.
ja337:4.1	Esasmākaṁ kule dhammo,
ja337:4.2	pitupitāmaho sadā;
ja337:4.3	Sakkaccaṁ upatiṭṭhāma,
ja337:4.4	uttamaṁ viya ñātakan”ti.
ja337:5.1	Pīṭhajātakaṁ sattamaṁ.
ja338:0.1	Jātaka
ja338:0.2	Catukkanipāta
ja338:0.3	Kokilavagga
ja338:0.4	8. Thusajātaka
ja338:1.1	“Viditaṁ thusaṁ undurānaṁ,
ja338:1.2	Viditaṁ pana taṇḍulaṁ;
ja338:1.3	Thusaṁ thusaṁ vivajjetvā,
ja338:1.4	Taṇḍulaṁ pana khādare.
ja338:2.1	Yā mantanā araññasmiṁ,
ja338:2.2	yā ca gāme nikaṇṇikā;
ja338:2.3	Yañcetaṁ iti cīti ca,
ja338:2.4	etampi viditaṁ mayā.
ja338:3.1	Dhammena kira jātassa,
ja338:3.2	pitā puttassa makkaṭo;
ja338:3.3	Daharasseva santassa,
ja338:3.4	dantehi phalamacchidā.
ja338:4.1	Yametaṁ parisappasi,
ja338:4.2	ajakāṇova sāsape;
ja338:4.3	Yopāyaṁ heṭṭhato seti,
ja338:4.4	etampi viditaṁ mayā”ti.
ja338:5.1	Thusajātakaṁ aṭṭhamaṁ.
ja339:0.1	Jātaka
ja339:0.2	Catukkanipāta
ja339:0.3	Kokilavagga
ja339:0.4	9. Bāverujātaka
ja339:1.1	“Adassanena morassa,
ja339:1.2	sikhino mañjubhāṇino;
ja339:1.3	Kākaṁ tattha apūjesuṁ,
ja339:1.4	maṁsena ca phalena ca.
ja339:2.1	Yadā ca sarasampanno,
ja339:2.2	moro bāverumāgamā;
ja339:2.3	Atha lābho ca sakkāro,
ja339:2.4	vāyasassa ahāyatha.
ja339:3.1	Yāva nuppajjatī buddho,
ja339:3.2	dhammarājā pabhaṅkaro;
ja339:3.3	Tāva aññe apūjesuṁ,
ja339:3.4	puthū samaṇabrāhmaṇe.
ja339:4.1	Yadā ca sarasampanno,
ja339:4.2	buddho dhammaṁ adesayi;
ja339:4.3	Atha lābho ca sakkāro,
ja339:4.4	titthiyānaṁ ahāyathā”ti.
ja339:5.1	Bāverujātakaṁ navamaṁ.
ja340:0.1	Jātaka
ja340:0.2	Catukkanipāta
ja340:0.3	Kokilavagga
ja340:0.4	10. Visayhajātaka
ja340:1.1	“Adāsi dānāni pure visayha,
ja340:1.2	Dadato ca te khayadhammo ahosi;
ja340:1.3	Ito parañce na dadeyya dānaṁ,
ja340:1.4	Tiṭṭheyyuṁ te saṁyamantassa bhogā”.
ja340:2.1	“Anariyamariyena sahassanetta,
ja340:2.2	Suduggatenāpi akiccamāhu;
ja340:2.3	Mā vo dhanaṁ taṁ ahu devarāja,
ja340:2.4	Yaṁ bhogahetu vijahemu saddhaṁ.
ja340:3.1	Yena eko ratho yāti,
ja340:3.2	yāti tenāparo ratho;
ja340:3.3	Porāṇaṁ nihitaṁ vattaṁ,
ja340:3.4	vattataññeva vāsava.
ja340:4.1	Yadi hessati dassāma,
ja340:4.2	asante kiṁ dadāmase;
ja340:4.3	Evaṁbhūtāpi dassāma,
ja340:4.4	mā dānaṁ pamadamhase”ti.
ja340:5.1	Visayhajātakaṁ dasamaṁ.
ja340:5.2	Kokilavaggo catuttho.
ja340:6.1	Tassuddānaṁ
ja340:7.1	Ativelapabhāsati jītavaro,
ja340:7.2	Vanamajjha rathesabha jimhagamo;
ja340:7.3	Atha jambu tiṇāsanapīṭhavaraṁ,
ja340:7.4	Atha taṇḍula mora visayha dasāti.
ja341:0.1	Jātaka
ja341:0.2	Catukkanipāta
ja341:0.3	Cūḷakuṇālavagga
ja341:0.4	1. Kaṇḍarījātaka
ja341:1.1	Narānamārāmakarāsu nārisu,
ja341:1.2	Anekacittāsu aniggahāsu ca;
ja341:1.3	Sabbattha nāpītikarāpi ce siyā,
ja341:1.4	Na vissase titthasamā hi nāriyo.
ja341:2.1	“Yaṁ ve disvā kaṇḍarīkinnarānaṁ,
ja341:2.2	Sabbitthiyo na ramanti agāre;
ja341:2.3	Taṁ tādisaṁ maccaṁ cajitvā bhariyā,
ja341:2.4	Aññaṁ disvā purisaṁ pīṭhasappiṁ”.
ja341:3.1	“Bakassa ca bāvarikassa rañño,
ja341:3.2	Accantakāmānugatassa bhariyā;
ja341:3.3	Avācarī paṭṭhavasānugassa,
ja341:3.4	Kaṁ vāpi itthī nāticare tadaññaṁ”.
ja341:4.1	“Piṅgiyānī sabbalokissarassa,
ja341:4.2	Rañño piyā brahmadattassa bhariyā;
ja341:4.3	Avācarī paṭṭhavasānugassa,
ja341:4.4	Taṁ vāpi sā nājjhagā kāmakāminī”ti.
ja341:5.1	Kaṇḍarījātakaṁ paṭhamaṁ.
ja342:0.1	Jātaka
ja342:0.2	Catukkanipāta
ja342:0.3	Cūḷakuṇālavagga
ja342:0.4	2. Vānarajātaka
ja342:1.1	“Asakkhiṁ vata attānaṁ,
ja342:1.2	uddhātuṁ udakā thalaṁ;
ja342:1.3	Na dānāhaṁ puna tuyhaṁ,
ja342:1.4	vasaṁ gacchāmi vārija.
ja342:2.1	Alametehi ambehi,
ja342:2.2	jambūhi panasehi ca;
ja342:2.3	Yāni pāraṁ samuddassa,
ja342:2.4	varaṁ mayhaṁ udumbaro.
ja342:3.1	Yo ca uppatitaṁ atthaṁ,
ja342:3.2	na khippamanubujjhati;
ja342:3.3	Amittavasamanveti,
ja342:3.4	pacchā ca anutappati.
ja342:4.1	Yo ca uppatitaṁ atthaṁ,
ja342:4.2	khippameva nibodhati;
ja342:4.3	Muccate sattusambādhā,
ja342:4.4	na ca pacchānutappatī”ti.
ja342:5.1	Vānarajātakaṁ dutiyaṁ.
ja343:0.1	Jātaka
ja343:0.2	Catukkanipāta
ja343:0.3	Cūḷakuṇālavagga
ja343:0.4	3. Kuntinījātaka
ja343:1.1	“Avasimha tavāgāre,
ja343:1.2	niccaṁ sakkatapūjitā;
ja343:1.3	Tvameva dānimakari,
ja343:1.4	handa rāja vajāmahaṁ”.
ja343:2.1	“Yo ve kate paṭikate,
ja343:2.2	kibbise paṭikibbise;
ja343:2.3	Evaṁ taṁ sammatī veraṁ,
ja343:2.4	vasa kuntini māgamā”.
ja343:3.1	“Na katassa ca kattā ca,
ja343:3.2	metti sandhīyate puna;
ja343:3.3	Hadayaṁ nānujānāti,
ja343:3.4	gacchaññeva rathesabha”.
ja343:4.1	“Katassa ceva kattā ca,
ja343:4.2	metti sandhīyate puna;
ja343:4.3	Dhīrānaṁ no ca bālānaṁ,
ja343:4.4	vasa kuntini māgamā”ti.
ja343:5.1	Kuntinījātakaṁ tatiyaṁ.
ja344:0.1	Jātaka
ja344:0.2	Catukkanipāta
ja344:0.3	Cūḷakuṇālavagga
ja344:0.4	4. Ambajātaka
ja344:1.1	“Yo nīliyaṁ maṇḍayati,
ja344:1.2	saṇḍāsena vihaññati;
ja344:1.3	Tassa sā vasamanvetu,
ja344:1.4	yā te ambe avāhari”.
ja344:2.1	“Vīsaṁ vā pañcavīsaṁ vā,
ja344:2.2	ūnatiṁsaṁ va jātiyā;
ja344:2.3	Tādisā pati mā laddhā,
ja344:2.4	yā te ambe avāhari”.
ja344:3.1	“Dīghaṁ gacchatu addhānaṁ,
ja344:3.2	ekikā abhisārikā;
ja344:3.3	Saṅkete pati mā adda,
ja344:3.4	yā te ambe avāhari”.
ja344:4.1	“Alaṅkatā suvasanā,
ja344:4.2	mālinī candanussadā;
ja344:4.3	Ekikā sayane setu,
ja344:4.4	yā te ambe avāharī”ti.
ja344:5.1	Ambajātakaṁ catutthaṁ.
ja345:0.1	Jātaka
ja345:0.2	Catukkanipāta
ja345:0.3	Cūḷakuṇālavagga
ja345:0.4	5. Gajakumbhajātaka
ja345:1.1	“Vanaṁ yadaggi dahati,
ja345:1.2	pāvako kaṇhavattanī;
ja345:1.3	Kathaṁ karosi pacalaka,
ja345:1.4	evaṁ dandhaparakkamo”.
ja345:2.1	“Bahūni rukkhachiddāni,
ja345:2.2	pathabyā vivarāni ca;
ja345:2.3	Tāni ce nābhisambhoma,
ja345:2.4	hoti no kālapariyāyo”.
ja345:3.1	“Yo dandhakāle tarati,
ja345:3.2	taraṇīye ca dandhati;
ja345:3.3	Sukkhapaṇṇaṁva akkamma,
ja345:3.4	atthaṁ bhañjati attano.
ja345:4.1	Yo dandhakāle dandheti,
ja345:4.2	taraṇīye ca tārayi;
ja345:4.3	Sasīva rattiṁ vibhajaṁ,
ja345:4.4	tassattho paripūratī”ti.
ja345:5.1	Gajakumbhajātakaṁ pañcamaṁ.
ja346:0.1	Jātaka
ja346:0.2	Catukkanipāta
ja346:0.3	Cūḷakuṇālavagga
ja346:0.4	6. Kesavajātaka
ja346:1.1	“Manussindaṁ jahitvāna,
ja346:1.2	sabbakāmasamiddhinaṁ;
ja346:1.3	Kathaṁ nu bhagavā kesī,
ja346:1.4	kappassa ramati assame”.
ja346:2.1	“Sādūni ramaṇīyāni,
ja346:2.2	santi vakkhā manoramā;
ja346:2.3	Subhāsitāni kappassa,
ja346:2.4	nārada ramayanti maṁ”.
ja346:3.1	“Sālīnaṁ odanaṁ bhuñje,
ja346:3.2	suciṁ maṁsūpasecanaṁ;
ja346:3.3	Kathaṁ sāmākanīvāraṁ,
ja346:3.4	aloṇaṁ chādayanti taṁ”.
ja346:4.1	“Sāduṁ vā yadi vāsāduṁ,
ja346:4.2	appaṁ vā yadi vā bahuṁ;
ja346:4.3	Vissattho yattha bhuñjeyya,
ja346:4.4	vissāsaparamā rasā”ti.
ja346:5.1	Kesavajātakaṁ chaṭṭhaṁ.
ja347:0.1	Jātaka
ja347:0.2	Catukkanipāta
ja347:0.3	Cūḷakuṇālavagga
ja347:0.4	7. Ayakūṭajātaka
ja347:1.1	“Sabbāyasaṁ kūṭamatippamāṇaṁ,
ja347:1.2	Paggayha yo tiṭṭhasi antalikkhe;
ja347:1.3	Rakkhāya me tvaṁ vihito nusajja,
ja347:1.4	Udāhu me cetayase vadhāya”.
ja347:2.1	“Dūto ahaṁ rājidha rakkhasānaṁ,
ja347:2.2	Vadhāya tuyhaṁ pahitohamasmi;
ja347:2.3	Indo ca taṁ rakkhati devarājā,
ja347:2.4	Tenuttamaṅgaṁ na te phālayāmi”.
ja347:3.1	“Sace ca maṁ rakkhati devarājā,
ja347:3.2	Devānamindo maghavā sujampati;
ja347:3.3	Kāmaṁ pisācā vinadantu sabbe,
ja347:3.4	Na santase rakkhasiyā pajāya.
ja347:4.1	Kāmaṁ kandantu kumbhaṇḍā,
ja347:4.2	Sabbe paṁsupisācakā;
ja347:4.3	Nālaṁ pisācā yuddhāya,
ja347:4.4	Mahatī sā vibhiṁsikā”ti.
ja347:5.1	Ayakūṭajātakaṁ sattamaṁ.
ja348:0.1	Jātaka
ja348:0.2	Catukkanipāta
ja348:0.3	Cūḷakuṇālavagga
ja348:0.4	8. Araññajātaka
ja348:1.1	“Araññā gāmamāgamma,
ja348:1.2	kiṁsīlaṁ kiṁvataṁ ahaṁ;
ja348:1.3	Purisaṁ tāta seveyyaṁ,
ja348:1.4	taṁ me akkhāhi pucchito”.
ja348:2.1	“Yo taṁ vissāsaye tāta,
ja348:2.2	vissāsañca khameyya te;
ja348:2.3	Sussūsī ca titikkhī ca,
ja348:2.4	taṁ bhajehi ito gato.
ja348:3.1	Yassa kāyena vācāya,
ja348:3.2	manasā natthi dukkaṭaṁ;
ja348:3.3	Urasīva patiṭṭhāya,
ja348:3.4	taṁ bhajehi ito gato.
ja348:4.1	Haliddirāgaṁ kapicittaṁ,
ja348:4.2	purisaṁ rāgavirāginaṁ;
ja348:4.3	Tādisaṁ tāta mā sevi,
ja348:4.4	nimmanussampi ce siyā”ti.
ja348:5.1	Araññajātakaṁ aṭṭhamaṁ.
ja349:0.1	Jātaka
ja349:0.2	Catukkanipāta
ja349:0.3	Cūḷakuṇālavagga
ja349:0.4	9. Sandhibhedajātaka
ja349:1.1	“Neva itthīsu sāmaññaṁ,
ja349:1.2	nāpi bhakkhesu sārathi;
ja349:1.3	Athassa sandhibhedassa,
ja349:1.4	passa yāva sucintitaṁ.
ja349:2.1	Asi tikkhova maṁsamhi,
ja349:2.2	pesuññaṁ parivattati;
ja349:2.3	Yatthūsabhañca sīhañca,
ja349:2.4	bhakkhayanti migādhamā.
ja349:3.1	Imaṁ so sayanaṁ seti,
ja349:3.2	yamimaṁ passasi sārathi;
ja349:3.3	Yo vācaṁ sandhibhedassa,
ja349:3.4	pisuṇassa nibodhati.
ja349:4.1	Te janā sukhamedhanti,
ja349:4.2	narā saggagatāriva;
ja349:4.3	Ye vācaṁ sandhibhedassa,
ja349:4.4	nāvabodhanti sārathī”ti.
ja349:5.1	Sandhibhedajātakaṁ navamaṁ.
ja350:0.1	Jātaka
ja350:0.2	Catukkanipāta
ja350:0.3	Cūḷakuṇālavagga
ja350:0.4	10. Devatāpañhajātaka
ja350:1.1	“Hanti hatthehi pādehi,
ja350:1.2	mukhañca parisumbhati;
ja350:1.3	Sa ve rāja piyo hoti,
ja350:1.4	kaṁ tena tvābhipassasi”.
ja350:2.1	“Akkosati yathākāmaṁ,
ja350:2.2	āgamañcassa icchati;
ja350:2.3	Sa ve rāja piyo hoti,
ja350:2.4	kaṁ tena tvābhipassasi”.
ja350:3.1	“Abbhakkhāti abhūtena,
ja350:3.2	alikenābhisāraye;
ja350:3.3	Sa ve rāja piyo hoti,
ja350:3.4	kaṁ tena tvābhipassasi”.
ja350:4.1	“Haraṁ annañca pānañca,
ja350:4.2	Vatthasenāsanāni ca;
ja350:4.3	Aññadatthuharā santā,
ja350:4.4	Te ve rāja piyā honti;
ja350:4.5	Kaṁ tena tvābhipassasī”ti.
ja350:5.1	Devatāpañhajātakaṁ dasamaṁ.
ja350:5.2	Cūḷakuṇālavaggo pañcamo.
ja350:6.1	Tassuddānaṁ
ja350:7.1	Narānaṁ asakkhivasimhavaro,
ja350:7.2	Nīliyamaggivarañca puna;
ja350:7.3	Puna rasāyasakūṭavaro,
ja350:7.4	Tathārañña sārathi hanti dasāti.
ja350:8.1	Atha vagguddānaṁ
ja350:9.1	Kāliṅgaṁ pucimandañca,
ja350:9.2	kuṭidūsaka kokilā;
ja350:9.3	Cūḷakuṇālavaggo so,
ja350:9.4	pañcamo suppakāsitoti.
ja350:10.1	Catukkanipātaṁ niṭṭhitaṁ.
ja351:0.1	Jātaka
ja351:0.2	Pañcakanipāta
ja351:0.3	Maṇikuṇḍalavagga
ja351:0.4	1. Maṇikuṇḍalajātaka
ja351:1.1	“Jīno rathassaṁ maṇikuṇḍale ca,
ja351:1.2	Putte ca dāre ca tatheva jīno;
ja351:1.3	Sabbesu bhogesu asesakesu,
ja351:1.4	Kasmā na santappasi sokakāle”.
ja351:2.1	“Pubbeva maccaṁ vijahanti bhogā,
ja351:2.2	Macco vā te pubbataraṁ jahāti;
ja351:2.3	Asassatā bhogino kāmakāmi,
ja351:2.4	Tasmā na socāmahaṁ sokakāle.
ja351:3.1	Udeti āpūrati veti cando,
ja351:3.2	Atthaṁ tapetvāna paleti sūriyo;
ja351:3.3	Viditā mayā sattuka lokadhammā,
ja351:3.4	Tasmā na socāmahaṁ sokakāle”.
ja351:4.1	“Alaso gihī kāmabhogī na sādhu,
ja351:4.2	Asaññato pabbajito na sādhu;
ja351:4.3	Rājā na sādhu anisammakārī,
ja351:4.4	Yo paṇḍito kodhano taṁ na sādhu.
ja351:5.1	Nisamma khattiyo kayirā,
ja351:5.2	nānisamma disampati;
ja351:5.3	Nisammakārino rāja,
ja351:5.4	yaso kitti ca vaḍḍhatī”ti.
ja351:6.1	Maṇikuṇḍalajātakaṁ paṭhamaṁ.
ja352:0.1	Jātaka
ja352:0.2	Pañcakanipāta
ja352:0.3	Maṇikuṇḍalavagga
ja352:0.4	2. Sujātajātaka
ja352:1.1	“Kiṁ nu santaramānova,
ja352:1.2	lāyitvā haritaṁ tiṇaṁ;
ja352:1.3	Khāda khādāti lapasi,
ja352:1.4	gatasattaṁ jaraggavaṁ.
ja352:2.1	Na hi annena pānena,
ja352:2.2	mato goṇo samuṭṭhahe;
ja352:2.3	Tvañca tucchaṁ vilapasi,
ja352:2.4	yathā taṁ dummatī tathā”.
ja352:3.1	“Tatheva tiṭṭhati sīsaṁ,
ja352:3.2	hatthapādā ca vāladhi;
ja352:3.3	Sotā tatheva tiṭṭhanti,
ja352:3.4	maññe goṇo samuṭṭhahe.
ja352:4.1	Nevayyakassa sīsañca,
ja352:4.2	hatthapādā ca dissare;
ja352:4.3	Rudaṁ mattikathūpasmiṁ,
ja352:4.4	nanu tvaññeva dummati”.
ja352:5.1	“Ādittaṁ vata maṁ santaṁ,
ja352:5.2	ghatasittaṁva pāvakaṁ;
ja352:5.3	Vārinā viya osiñcaṁ,
ja352:5.4	sabbaṁ nibbāpaye daraṁ.
ja352:6.1	Abbahī vata me sallaṁ,
ja352:6.2	yamāsi hadayassitaṁ;
ja352:6.3	Yo me sokaparetassa,
ja352:6.4	pitusokaṁ apānudi.
ja352:7.1	Sohaṁ abbūḷhasallosmi,
ja352:7.2	vītasoko anāvilo;
ja352:7.3	Na socāmi na rodāmi,
ja352:7.4	tava sutvāna māṇava.
ja352:8.1	Evaṁ karonti sappaññā,
ja352:8.2	ye honti anukampakā;
ja352:8.3	Vinivattenti sokamhā,
ja352:8.4	sujāto pitaraṁ yathā”ti.
ja352:9.1	Sujātajātakaṁ dutiyaṁ.
ja353:0.1	Jātaka
ja353:0.2	Pañcakanipāta
ja353:0.3	Maṇikuṇḍalavagga
ja353:0.4	3. Venasākhajātaka
ja353:1.1	“Nayidaṁ niccaṁ bhavitabbaṁ brahmadatta,
ja353:1.2	Khemaṁ subhikkhaṁ sukhatā ca kāye;
ja353:1.3	Atthaccaye mā ahu sampamūḷho,
ja353:1.4	Bhinnaplavo sāgarasseva majjhe.
ja353:2.1	Yāni karoti puriso,
ja353:2.2	tāni attani passati;
ja353:2.3	Kalyāṇakārī kalyāṇaṁ,
ja353:2.4	pāpakārī ca pāpakaṁ;
ja353:2.5	Yādisaṁ vapate bījaṁ,
ja353:2.6	tādisaṁ harate phalaṁ”.
ja353:3.1	“Idaṁ tadācariyavaco,
ja353:3.2	pārāsariyo yadabravi;
ja353:3.3	Mā su tvaṁ akari pāpaṁ,
ja353:3.4	yaṁ tvaṁ pacchā kataṁ tape.
ja353:4.1	Ayameva so piṅgiya venasākho,
ja353:4.2	Yamhi ghātayiṁ khattiyānaṁ sahassaṁ;
ja353:4.3	Alaṅkate candanasārānulitte,
ja353:4.4	Tameva dukkhaṁ paccāgataṁ mamaṁ.
ja353:5.1	Sāmā ca kho candanalittagattā,
ja353:5.2	Laṭṭhīva sobhañjanakassa uggatā;
ja353:5.3	Adisvā kālaṁ karissāmi ubbariṁ,
ja353:5.4	Taṁ me ito dukkhataraṁ bhavissatī”ti.
ja353:6.1	Venasākhajātakaṁ tatiyaṁ.
ja354:0.1	Jātaka
ja354:0.2	Pañcakanipāta
ja354:0.3	Maṇikuṇḍalavagga
ja354:0.4	4. Uragajātaka
ja354:1.1	“Uragova tacaṁ jiṇṇaṁ,
ja354:1.2	hitvā gacchati saṁ tanuṁ;
ja354:1.3	Evaṁ sarīre nibbhoge,
ja354:1.4	pete kālaṅkate sati.
ja354:2.1	Ḍayhamāno na jānāti,
ja354:2.2	ñātīnaṁ paridevitaṁ;
ja354:2.3	Tasmā etaṁ na socāmi,
ja354:2.4	gato so tassa yā gati”.
ja354:3.1	“Anavhito tato āgā,
ja354:3.2	ananuññāto ito gato;
ja354:3.3	Yathāgato tathā gato,
ja354:3.4	tattha kā paridevanā.
ja354:4.1	Ḍayhamāno na jānāti,
ja354:4.2	ñātīnaṁ paridevitaṁ;
ja354:4.3	Tasmā etaṁ na socāmi,
ja354:4.4	gato so tassa yā gati”.
ja354:5.1	“Sace rode kisā assaṁ,
ja354:5.2	tassā me kiṁ phalaṁ siyā;
ja354:5.3	Ñātimittasuhajjānaṁ,
ja354:5.4	bhiyyo no aratī siyā.
ja354:6.1	Ḍayhamāno na jānāti,
ja354:6.2	ñātīnaṁ paridevitaṁ;
ja354:6.3	Tasmā etaṁ na socāmi,
ja354:6.4	gato so tassa yā gati”.
ja354:7.1	“Yathāpi dārako candaṁ,
ja354:7.2	gacchantamanurodati;
ja354:7.3	Evaṁsampadamevetaṁ,
ja354:7.4	yo petamanusocati.
ja354:8.1	Ḍayhamāno na jānāti,
ja354:8.2	ñātīnaṁ paridevitaṁ;
ja354:8.3	Tasmā etaṁ na socāmi,
ja354:8.4	gato so tassa yā gati”.
ja354:9.1	“Yathāpi udakakumbho,
ja354:9.2	bhinno appaṭisandhiyo;
ja354:9.3	Evaṁsampadamevetaṁ,
ja354:9.4	yo petamanusocati.
ja354:10.1	Ḍayhamāno na jānāti,
ja354:10.2	ñātīnaṁ paridevitaṁ;
ja354:10.3	Tasmā etaṁ na socāmi,
ja354:10.4	gato so tassa yā gatī”ti.
ja354:11.1	Uragajātakaṁ catutthaṁ.
ja355:0.1	Jātaka
ja355:0.2	Pañcakanipāta
ja355:0.3	Maṇikuṇḍalavagga
ja355:0.4	5. Ghaṭajātaka
ja355:1.1	“Aññe socanti rodanti,
ja355:1.2	aññe assumukhā janā;
ja355:1.3	Pasannamukhavaṇṇosi,
ja355:1.4	kasmā ghaṭa na socasi”.
ja355:2.1	“Nābbhatītaharo soko,
ja355:2.2	nānāgatasukhāvaho;
ja355:2.3	Tasmā dhaṅka na socāmi,
ja355:2.4	natthi soke dutīyatā.
ja355:3.1	Socaṁ paṇḍu kiso hoti,
ja355:3.2	bhattañcassa na ruccati;
ja355:3.3	Amittā sumanā honti,
ja355:3.4	sallaviddhassa ruppato.
ja355:4.1	Gāme vā yadi vāraññe,
ja355:4.2	ninne vā yadi vā thale;
ja355:4.3	Ṭhitaṁ maṁ nāgamissati,
ja355:4.4	evaṁ diṭṭhapado ahaṁ.
ja355:5.1	Yassattā nālamekova,
ja355:5.2	sabbakāmarasāharo;
ja355:5.3	Sabbāpi pathavī tassa,
ja355:5.4	na sukhaṁ āvahissatī”ti.
ja355:6.1	Ghaṭajātakaṁ pañcamaṁ.
ja356:0.1	Jātaka
ja356:0.2	Pañcakanipāta
ja356:0.3	Maṇikuṇḍalavagga
ja356:0.4	6. Koraṇḍiyajātaka
ja356:1.1	“Eko araññe girikandarāyaṁ,
ja356:1.2	Paggayha paggayha silaṁ pavecchasi;
ja356:1.3	Punappunaṁ santaramānarūpo,
ja356:1.4	Koraṇḍiya ko nu tava yidhattho”.
ja356:2.1	“Ahañhimaṁ sāgara sevitantaṁ,
ja356:2.2	Samaṁ karissāmi yathāpi pāṇi;
ja356:2.3	Vikiriya sānūni ca pabbatāni ca,
ja356:2.4	Tasmā silaṁ dariyā pakkhipāmi”.
ja356:3.1	“Nayimaṁ mahiṁ arahati pāṇikappaṁ,
ja356:3.2	Samaṁ manusso karaṇāya meko;
ja356:3.3	Maññāmimaññeva dariṁ jigīsaṁ,
ja356:3.4	Koraṇḍiya hāhasi jīvalokaṁ”.
ja356:4.1	“Sace ahaṁ bhūtadharaṁ na sakkā,
ja356:4.2	Samaṁ manusso karaṇāya meko;
ja356:4.3	Evameva tvaṁ brahme ime manusse,
ja356:4.4	Nānādiṭṭhike nānayissasi te”.
ja356:5.1	“Saṅkhittarūpena bhavaṁ mamatthaṁ,
ja356:5.2	Akkhāsi koraṇḍiya evametaṁ;
ja356:5.3	Yathā na sakkā pathavī samāyaṁ,
ja356:5.4	Kattuṁ manussena tathā manussā”ti.
ja356:6.1	Koraṇḍiyajātakaṁ chaṭṭhaṁ.
ja357:0.1	Jātaka
ja357:0.2	Pañcakanipāta
ja357:0.3	Maṇikuṇḍalavagga
ja357:0.4	7. Laṭukikajātaka
ja357:1.1	“Vandāmi taṁ kuñjara saṭṭhihāyanaṁ,
ja357:1.2	Āraññakaṁ yūthapatiṁ yasassiṁ;
ja357:1.3	Pakkhehi taṁ pañjalikaṁ karomi,
ja357:1.4	Mā me vadhī puttake dubbalāya”.
ja357:2.1	“Vandāmi taṁ kuñjara ekacāriṁ,
ja357:2.2	Āraññakaṁ pabbatasānugocaraṁ;
ja357:2.3	Pakkhehi taṁ pañjalikaṁ karomi,
ja357:2.4	Mā me vadhī puttake dubbalāya”.
ja357:3.1	“Vadhissāmi te laṭukike puttakāni,
ja357:3.2	Kiṁ me tuvaṁ kāhasi dubbalāsi;
ja357:3.3	Sataṁ sahassānipi tādisīnaṁ,
ja357:3.4	Vāmena pādena papothayeyyaṁ”.
ja357:4.1	“Na heva sabbattha balena kiccaṁ,
ja357:4.2	Balañhi bālassa vadhāya hoti;
ja357:4.3	Karissāmi te nāgarājā anatthaṁ,
ja357:4.4	Yo me vadhī puttake dubbalāya”.
ja357:5.1	“Kākañca passa laṭukikaṁ,
ja357:5.2	Maṇḍūkaṁ nīlamakkhikaṁ;
ja357:5.3	Ete nāgaṁ aghātesuṁ,
ja357:5.4	Passa verassa verinaṁ;
ja357:5.5	Tasmā hi veraṁ na kayirātha,
ja357:5.6	Appiyenapi kenacī”ti.
ja357:6.1	Laṭukikajātakaṁ sattamaṁ.
ja358:0.1	Jātaka
ja358:0.2	Pañcakanipāta
ja358:0.3	Maṇikuṇḍalavagga
ja358:0.4	8. Cūḷadhammapālajātaka
ja358:1.1	“Ahameva dūsiyā bhūnahatā,
ja358:1.2	Rañño mahāpatāpassa;
ja358:1.3	Etaṁ muñcatu dhammapālaṁ,
ja358:1.4	Hatthe me deva chedehi.
ja358:2.1	Ahameva dūsiyā bhūnahatā,
ja358:2.2	Rañño mahāpatāpassa;
ja358:2.3	Etaṁ muñcatu dhammapālaṁ,
ja358:2.4	Pāde me deva chedehi.
ja358:3.1	Ahameva dūsiyā bhūnahatā,
ja358:3.2	Rañño mahāpatāpassa;
ja358:3.3	Etaṁ muñcatu dhammapālaṁ,
ja358:3.4	Sīsaṁ me deva chedehi.
ja358:4.1	Na hi nūnimassa rañño,
ja358:4.2	Mittāmaccā ca vijjare suhadā;
ja358:4.3	Ye na vadanti rājānaṁ,
ja358:4.4	Mā ghātayi orasaṁ puttaṁ.
ja358:5.1	Na hi nūnimassa rañño,
ja358:5.2	Ñātī mittā ca vijjare suhadā;
ja358:5.3	Ye na vadanti rājānaṁ,
ja358:5.4	Mā ghātayi atrajaṁ puttaṁ.
ja358:6.1	Candanasārānulittā,
ja358:6.2	Bāhā chijjanti dhammapālassa;
ja358:6.3	Dāyādassa pathabyā,
ja358:6.4	Pāṇā me deva rujjhantī”ti.
ja358:7.1	Cūḷadhammapālajātakaṁ aṭṭhamaṁ.
ja359:0.1	Jātaka
ja359:0.2	Pañcakanipāta
ja359:0.3	Maṇikuṇḍalavagga
ja359:0.4	9. Suvaṇṇamigajātaka
ja359:1.1	“Vikkama re haripāda,
ja359:1.2	vikkama re mahāmiga;
ja359:1.3	Chinda vārattikaṁ pāsaṁ,
ja359:1.4	nāhaṁ ekā vane rame”.
ja359:2.1	“Vikkamāmi na pāremi,
ja359:2.2	bhūmiṁ sumbhāmi vegasā;
ja359:2.3	Daḷho vārattiko pāso,
ja359:2.4	pādaṁ me parikantati”.
ja359:3.1	“Attharassu palāsāni,
ja359:3.2	asiṁ nibbāha luddaka;
ja359:3.3	Paṭhamaṁ maṁ vadhitvāna,
ja359:3.4	hana pacchā mahāmigaṁ”.
ja359:4.1	“Na me sutaṁ vā diṭṭhaṁ vā,
ja359:4.2	Bhāsantiṁ mānusiṁ migiṁ;
ja359:4.3	Tvañca bhadde sukhī hohi,
ja359:4.4	Eso cāpi mahāmigo”.
ja359:5.1	“Evaṁ luddaka nandassu,
ja359:5.2	saha sabbehi ñātibhi;
ja359:5.3	Yathāhamajja nandāmi,
ja359:5.4	muttaṁ disvā mahāmigan”ti.
ja359:6.1	Suvaṇṇamigajātakaṁ navamaṁ.
ja360:0.1	Jātaka
ja360:0.2	Pañcakanipāta
ja360:0.3	Maṇikuṇḍalavagga
ja360:0.4	10. Suyonandījātaka
ja360:1.1	“Vāti gandho timirānaṁ,
ja360:1.2	kusamuddo ca ghosavā;
ja360:1.3	Dūre ito suyonandī,
ja360:1.4	tamba kāmā tudanti maṁ”.
ja360:2.1	“Kathaṁ samuddamatari,
ja360:2.2	Kathaṁ addakkhi sedumaṁ;
ja360:2.3	Kathaṁ tassā ca tuyhañca,
ja360:2.4	Ahu saggasamāgamo”.
ja360:3.1	“Kurukacchā payātānaṁ,
ja360:3.2	vāṇijānaṁ dhanesinaṁ;
ja360:3.3	Makarehi abhidā nāvā,
ja360:3.4	phalakenāhamaplaviṁ.
ja360:4.1	Sā maṁ saṇhena mudunā,
ja360:4.2	niccaṁ candanagandhinī;
ja360:4.3	Aṅgena uddharī bhaddā,
ja360:4.4	mātā puttaṁva orasaṁ.
ja360:5.1	Sā maṁ annena pānena,
ja360:5.2	vatthena sayanena ca;
ja360:5.3	Attanāpi ca mandakkhī,
ja360:5.4	evaṁ tamba vijānahī”ti.
ja360:6.1	Suyonandījātakaṁ dasamaṁ.
ja360:6.2	Maṇikuṇḍalavaggo paṭhamo.
ja360:7.1	Tassuddānaṁ
ja360:8.1	Atha jinavaro haritaṁ tiṇako,
ja360:8.2	Atha bhinnaplavo uragova ghaṭo;
ja360:8.3	Dariyā puna kuñjara bhūnahatā,
ja360:8.4	Migamuttamasaggavarena dasāti.
ja361:0.1	Jātaka
ja361:0.2	Pañcakanipāta
ja361:0.3	Vaṇṇārohavagga
ja361:0.4	1. Vaṇṇārohajātaka
ja361:1.1	“Vaṇṇārohena jātiyā,
ja361:1.2	balanikkamanena ca;
ja361:1.3	Subāhu na mayā seyyo,
ja361:1.4	sudāṭha iti bhāsasi”.
ja361:2.1	“Vaṇṇārohena jātiyā,
ja361:2.2	balanikkamanena ca;
ja361:2.3	Sudāṭho na mayā seyyo,
ja361:2.4	subāhu iti bhāsasi.
ja361:3.1	Evañce maṁ viharantaṁ,
ja361:3.2	subāhu samma dubbhasi;
ja361:3.3	Na dānāhaṁ tayā saddhiṁ,
ja361:3.4	saṁvāsamabhirocaye.
ja361:4.1	Yo paresaṁ vacanāni,
ja361:4.2	saddaheyya yathātathaṁ;
ja361:4.3	Khippaṁ bhijjetha mittasmiṁ,
ja361:4.4	verañca pasave bahuṁ.
ja361:5.1	Na so mitto yo sadā appamatto,
ja361:5.2	Bhedāsaṅkī randhamevānupassī;
ja361:5.3	Yasmiñca setī urasīva putto,
ja361:5.4	Sa ve mitto yo abhejjo parehī”ti.
ja361:6.1	Vaṇṇārohajātakaṁ paṭhamaṁ.
ja362:0.1	Jātaka
ja362:0.2	Pañcakanipāta
ja362:0.3	Vaṇṇārohavagga
ja362:0.4	2. Sīlavīmaṁsajātaka
ja362:1.1	“Sīlaṁ seyyo sutaṁ seyyo,
ja362:1.2	iti me saṁsayo ahu;
ja362:1.3	Sīlameva sutā seyyo,
ja362:1.4	iti me natthi saṁsayo.
ja362:2.1	Moghā jāti ca vaṇṇo ca,
ja362:2.2	sīlameva kiruttamaṁ;
ja362:2.3	Sīlena anupetassa,
ja362:2.4	sutenattho na vijjati.
ja362:3.1	Khattiyo ca adhammaṭṭho,
ja362:3.2	vesso cādhammanissito;
ja362:3.3	Te pariccajjubho loke,
ja362:3.4	upapajjanti duggatiṁ.
ja362:4.1	Khattiyā brāhmaṇā vessā,
ja362:4.2	suddā caṇḍālapukkusā;
ja362:4.3	Idha dhammaṁ caritvāna,
ja362:4.4	bhavanti tidive samā.
ja362:5.1	Na vedā samparāyāya,
ja362:5.2	Na jāti nāpi bandhavā;
ja362:5.3	Sakañca sīlaṁ saṁsuddhaṁ,
ja362:5.4	Samparāyāya sukhāya cā”ti.
ja362:6.1	Sīlavīmaṁsajātakaṁ dutiyaṁ.
ja363:0.1	Jātaka
ja363:0.2	Pañcakanipāta
ja363:0.3	Vaṇṇārohavagga
ja363:0.4	3. Hirijātaka
ja363:1.1	“Hiriṁ tarantaṁ vijigucchamānaṁ,
ja363:1.2	Tavāhamasmī iti bhāsamānaṁ;
ja363:1.3	Seyyāni kammāni anādiyantaṁ,
ja363:1.4	Neso mamanti iti naṁ vijaññā.
ja363:2.1	Yañhi kayirā tañhi vade,
ja363:2.2	yaṁ na kayirā na taṁ vade;
ja363:2.3	Akarontaṁ bhāsamānaṁ,
ja363:2.4	parijānanti paṇḍitā.
ja363:3.1	Na so mitto yo sadā appamatto,
ja363:3.2	Bhedāsaṅkī randhamevānupassī;
ja363:3.3	Yasmiñca setī urasīva putto,
ja363:3.4	Sa ve mitto yo abhejjo parehi.
ja363:4.1	Pāmojjakaraṇaṁ ṭhānaṁ,
ja363:4.2	pasaṁsāvahanaṁ sukhaṁ;
ja363:4.3	Phalānisaṁso bhāveti,
ja363:4.4	vahanto porisaṁ dhuraṁ.
ja363:5.1	Pavivekarasaṁ pitvā,
ja363:5.2	rasaṁ upasamassa ca;
ja363:5.3	Niddaro hoti nippāpo,
ja363:5.4	dhammappītirasaṁ pivan”ti.
ja363:6.1	Hirijātakaṁ tatiyaṁ.
ja364:0.1	Jātaka
ja364:0.2	Pañcakanipāta
ja364:0.3	Vaṇṇārohavagga
ja364:0.4	4. Khajjopanakajātaka
ja364:1.1	“Ko nu santamhi pajjote,
ja364:1.2	aggipariyesanaṁ caraṁ;
ja364:1.3	Addakkhi ratti khajjotaṁ,
ja364:1.4	jātavedaṁ amaññatha.
ja364:2.1	Svassa gomayacuṇṇāni,
ja364:2.2	abhimatthaṁ tiṇāni ca;
ja364:2.3	Viparītāya saññāya,
ja364:2.4	nāsakkhi pajjaletave.
ja364:3.1	Evampi anupāyena,
ja364:3.2	atthaṁ na labhate migo;
ja364:3.3	Visāṇato gavaṁ dohaṁ,
ja364:3.4	yattha khīraṁ na vindati.
ja364:4.1	Vividhehi upāyehi,
ja364:4.2	atthaṁ papponti māṇavā;
ja364:4.3	Niggahena amittānaṁ,
ja364:4.4	mittānaṁ paggahena ca.
ja364:5.1	Senāmokkhapalābhena,
ja364:5.2	vallabhānaṁ nayena ca;
ja364:5.3	Jagatiṁ jagatipālā,
ja364:5.4	āvasanti vasundharan”ti.
ja364:6.1	Khajjopanakajātakaṁ catutthaṁ.
ja365:0.1	Jātaka
ja365:0.2	Pañcakanipāta
ja365:0.3	Vaṇṇārohavagga
ja365:0.4	5. Ahituṇḍikajātaka
ja365:1.1	“Dhuttomhi samma sumukha,
ja365:1.2	jūte akkhaparājito;
ja365:1.3	Harehi ambapakkāni,
ja365:1.4	vīriyaṁ te bhakkhayāmase”.
ja365:2.1	“Alikaṁ vata maṁ samma,
ja365:2.2	abhūtena pasaṁsasi;
ja365:2.3	Ko te suto vā diṭṭho vā,
ja365:2.4	sumukho nāma makkaṭo.
ja365:3.1	Ajjāpi me taṁ manasi,
ja365:3.2	yaṁ maṁ tvaṁ ahituṇḍika;
ja365:3.3	Dhaññāpaṇaṁ pavisitvā,
ja365:3.4	matto chātaṁ hanāsi maṁ.
ja365:4.1	Tāhaṁ saraṁ dukkhaseyyaṁ,
ja365:4.2	api rajjampi kāraye;
ja365:4.3	Nevāhaṁ yācito dajjaṁ,
ja365:4.4	tathā hi bhayatajjito.
ja365:5.1	Yañca jaññā kule jātaṁ,
ja365:5.2	Gabbhe tittaṁ amacchariṁ;
ja365:5.3	Tena sakhiñca mittañca,
ja365:5.4	Dhīro sandhātumarahatī”ti.
ja365:6.1	Ahituṇḍikajātakaṁ pañcamaṁ.
ja366:0.1	Jātaka
ja366:0.2	Pañcakanipāta
ja366:0.3	Vaṇṇārohavagga
ja366:0.4	6. Gumbiyajātaka
ja366:1.1	“Madhuvaṇṇaṁ madhurasaṁ,
ja366:1.2	madhugandhaṁ visaṁ ahu;
ja366:1.3	Gumbiyo ghāsamesāno,
ja366:1.4	araññe odahī visaṁ.
ja366:2.1	Madhu iti maññamānā,
ja366:2.2	ye taṁ visamakhādisuṁ;
ja366:2.3	Tesaṁ taṁ kaṭukaṁ āsi,
ja366:2.4	maraṇaṁ tenupāgamuṁ.
ja366:3.1	Ye ca kho paṭisaṅkhāya,
ja366:3.2	visaṁ taṁ parivajjayuṁ;
ja366:3.3	Te āturesu sukhitā,
ja366:3.4	ḍayhamānesu nibbutā.
ja366:4.1	Evameva manussesu,
ja366:4.2	visaṁ kāmā samohitā;
ja366:4.3	Āmisaṁ bandhanañcetaṁ,
ja366:4.4	maccuveso guhāsayo.
ja366:5.1	Evameva ime kāme,
ja366:5.2	āturā paricārike;
ja366:5.3	Ye sadā parivajjenti,
ja366:5.4	saṅgaṁ loke upaccagun”ti.
ja366:6.1	Gumbiyajātakaṁ chaṭṭhaṁ.
ja367:0.1	Jātaka
ja367:0.2	Pañcakanipāta
ja367:0.3	Vaṇṇārohavagga
ja367:0.4	7. Sāḷiyajātaka
ja367:1.1	“Yvāyaṁ sāḷiyachāpoti,
ja367:1.2	kaṇhasappaṁ agāhayi;
ja367:1.3	Tena sappenayaṁ daṭṭho,
ja367:1.4	hato pāpānusāsako.
ja367:2.1	Ahantāra mahantāraṁ,
ja367:2.2	yo naro hantumicchati;
ja367:2.3	Evaṁ so nihato seti,
ja367:2.4	yathāyaṁ puriso hato.
ja367:3.1	Ahantāra maghātentaṁ,
ja367:3.2	yo naro hantumicchati;
ja367:3.3	Evaṁ so nihato seti,
ja367:3.4	yathāyaṁ puriso hato.
ja367:4.1	Yathā paṁsumuṭṭhiṁ puriso,
ja367:4.2	paṭivātaṁ paṭikkhipe;
ja367:4.3	Tameva so rajo hanti,
ja367:4.4	tathāyaṁ puriso hato.
ja367:5.1	Yo appaduṭṭhassa narassa dussati,
ja367:5.2	Suddhassa posassa anaṅgaṇassa;
ja367:5.3	Tameva bālaṁ pacceti pāpaṁ,
ja367:5.4	Sukhumo rajo paṭivātaṁva khitto”ti.
ja367:6.1	Sāḷiyajātakaṁ sattamaṁ.
ja368:0.1	Jātaka
ja368:0.2	Pañcakanipāta
ja368:0.3	Vaṇṇārohavagga
ja368:0.4	8. Tacasārajātaka
ja368:1.1	“Amittahatthatthagatā,
ja368:1.2	tacasārasamappitā;
ja368:1.3	Pasannamukhavaṇṇāttha,
ja368:1.4	kasmā tumhe na socatha”.
ja368:2.1	“Na socanāya paridevanāya,
ja368:2.2	Atthova labbho api appakopi;
ja368:2.3	Socantamenaṁ dukhitaṁ viditvā,
ja368:2.4	Paccatthikā attamanā bhavanti.
ja368:3.1	Yato ca kho paṇḍito āpadāsu,
ja368:3.2	Na vedhatī atthavinicchayaññū;
ja368:3.3	Paccatthikāssa dukhitā bhavanti,
ja368:3.4	Disvā mukhaṁ avikāraṁ purāṇaṁ.
ja368:4.1	Jappena mantena subhāsitena,
ja368:4.2	Anuppadānena paveṇiyā vā;
ja368:4.3	Yathā yathā yattha labhetha atthaṁ,
ja368:4.4	Tathā tathā tattha parakkameyya.
ja368:5.1	Yato ca jāneyya alabbhaneyyo,
ja368:5.2	Mayā va aññena vā esa attho;
ja368:5.3	Asocamāno adhivāsayeyya,
ja368:5.4	Kammaṁ daḷhaṁ kinti karomi dānī”ti.
ja368:6.1	Tacasārajātakaṁ aṭṭhamaṁ.
ja369:0.1	Jātaka
ja369:0.2	Pañcakanipāta
ja369:0.3	Vaṇṇārohavagga
ja369:0.4	9. Mittavindakajātaka
ja369:1.1	“Kyāhaṁ devānamakaraṁ,
ja369:1.2	kiṁ pāpaṁ pakataṁ mayā;
ja369:1.3	Yaṁ me sirasmiṁ ohacca,
ja369:1.4	cakkaṁ bhamati matthake”.
ja369:2.1	“Atikkamma ramaṇakaṁ,
ja369:2.2	sadāmattañca dūbhakaṁ;
ja369:2.3	Brahmattarañca pāsādaṁ,
ja369:2.4	kenatthena idhāgato”.
ja369:3.1	“Ito bahutarā bhogā,
ja369:3.2	atra maññe bhavissare;
ja369:3.3	Iti etāya saññāya,
ja369:3.4	passa maṁ byasanaṁ gataṁ”.
ja369:4.1	“Catubbhi aṭṭhajjhagamā,
ja369:4.2	aṭṭhāhipi ca soḷasa;
ja369:4.3	Soḷasāhi ca bāttiṁsa,
ja369:4.4	atricchaṁ cakkamāsado;
ja369:4.5	Icchāhatassa posassa,
ja369:4.6	cakkaṁ bhamati matthake.
ja369:5.1	Uparivisālā duppūrā,
ja369:5.2	icchā visaṭagāminī;
ja369:5.3	Ye ca taṁ anugijjhanti,
ja369:5.4	te honti cakkadhārino”ti.
ja369:6.1	Mittavindakajātakaṁ navamaṁ.
ja370:0.1	Jātaka
ja370:0.2	Pañcakanipāta
ja370:0.3	Vaṇṇārohavagga
ja370:0.4	10. Palāsajātaka
ja370:1.1	“Haṁso palāsamavaca,
ja370:1.2	nigrodho samma jāyati;
ja370:1.3	Aṅkasmiṁ te nisinnova,
ja370:1.4	so te mammāni checchati”.
ja370:2.1	“Vaḍḍhatāmeva nigrodho,
ja370:2.2	patiṭṭhassa bhavāmahaṁ;
ja370:2.3	Yathā pitā ca mātā ca,
ja370:2.4	evaṁ me so bhavissati”.
ja370:3.1	“Yaṁ tvaṁ aṅkasmiṁ vaḍḍhesi,
ja370:3.2	khīrarukkhaṁ bhayānakaṁ;
ja370:3.3	Āmanta kho taṁ gacchāma,
ja370:3.4	vuḍḍhi massa na ruccati”.
ja370:4.1	“Idāni kho maṁ bhāyeti,
ja370:4.2	mahānerunidassanaṁ;
ja370:4.3	Haṁsassa anabhiññāya,
ja370:4.4	mahā me bhayamāgataṁ”.
ja370:5.1	“Na tassa vuḍḍhi kusalappasatthā,
ja370:5.2	Yo vaḍḍhamāno ghasate patiṭṭhaṁ;
ja370:5.3	Tassūparodhaṁ parisaṅkamāno,
ja370:5.4	Patārayī mūlavadhāya dhīro”ti.
ja370:6.1	Palāsajātakaṁ dasamaṁ.
ja370:6.2	Vaṇṇārohavaggo dutiyo.
ja371:0.1	Jātaka
ja371:0.2	Pañcakanipāta
ja371:0.3	Aḍḍhavagga
ja371:0.4	1. Dīghītikosalajātaka
ja371:1.1	“Evaṁbhūtassa te rāja,
ja371:1.2	āgatassa vase mama;
ja371:1.3	Atthi nu koci pariyāyo,
ja371:1.4	yo taṁ dukkhā pamocaye”.
ja371:2.1	“Evaṁbhūtassa me tāta,
ja371:2.2	āgatassa vase tava;
ja371:2.3	Natthi no koci pariyāyo,
ja371:2.4	yo maṁ dukkhā pamocaye”.
ja371:3.1	“Nāññaṁ sucaritaṁ rāja,
ja371:3.2	nāññaṁ rāja subhāsitaṁ;
ja371:3.3	Tāyate maraṇakāle,
ja371:3.4	evamevitaraṁ dhanaṁ.
ja371:4.1	Akkocchi maṁ avadhi maṁ,
ja371:4.2	ajini maṁ ahāsi me;
ja371:4.3	Ye ca taṁ upanayhanti,
ja371:4.4	veraṁ tesaṁ na sammati.
ja371:5.1	Akkocchi maṁ avadhi maṁ,
ja371:5.2	ajini maṁ ahāsi me;
ja371:5.3	Ye ca taṁ nupanayhanti,
ja371:5.4	veraṁ tesūpasammati.
ja371:6.1	Na hi verena verāni,
ja371:6.2	sammantīdha kudācanaṁ;
ja371:6.3	Averena ca sammanti,
ja371:6.4	esa dhammo sanantano”ti.
ja371:7.1	Dīghītikosalajātakaṁ paṭhamaṁ.
ja372:0.1	Jātaka
ja372:0.2	Pañcakanipāta
ja372:0.3	Aḍḍhavagga
ja372:0.4	2. Migapotakajātaka
ja372:1.1	“Agārā paccupetassa,
ja372:1.2	anagārassa te sato;
ja372:1.3	Samaṇassa na taṁ sādhu,
ja372:1.4	yaṁ petamanusocasi”.
ja372:2.1	“Saṁvāsena have sakka,
ja372:2.2	manussassa migassa vā;
ja372:2.3	Hadaye jāyate pemaṁ,
ja372:2.4	na taṁ sakkā asocituṁ”.
ja372:3.1	“Mataṁ marissaṁ rodanti,
ja372:3.2	ye rudanti lapanti ca;
ja372:3.3	Tasmā tvaṁ isi mā rodi,
ja372:3.4	roditaṁ moghamāhu santo.
ja372:4.1	Roditena have brahme,
ja372:4.2	mato peto samuṭṭhahe;
ja372:4.3	Sabbe saṅgamma rodāma,
ja372:4.4	aññamaññassa ñātake”.
ja372:5.1	“Ādittaṁ vata maṁ santaṁ,
ja372:5.2	ghatasittaṁva pāvakaṁ;
ja372:5.3	Vārinā viya osiñcaṁ,
ja372:5.4	sabbaṁ nibbāpaye daraṁ.
ja372:6.1	Abbahi vata me sallaṁ,
ja372:6.2	yamāsi hadayassitaṁ;
ja372:6.3	Yo me sokaparetassa,
ja372:6.4	puttasokaṁ apānudi.
ja372:7.1	Sohaṁ abbūḷhasallosmi,
ja372:7.2	vītasoko anāvilo;
ja372:7.3	Na socāmi na rodāmi,
ja372:7.4	tava sutvāna vāsavā”ti.
ja372:8.1	Migapotakajātakaṁ dutiyaṁ.
ja373:0.1	Jātaka
ja373:0.2	Pañcakanipāta
ja373:0.3	Aḍḍhavagga
ja373:0.4	3. Mūsikajātaka
ja373:1.1	“Kuhiṁ gatā kattha gatā,
ja373:1.2	iti lālappatī jano;
ja373:1.3	Ahameveko jānāmi,
ja373:1.4	udapāne mūsikā hatā.
ja373:2.1	Yañcetaṁ iti cīti ca,
ja373:2.2	gadrabhova nivattasi;
ja373:2.3	Udapāne mūsikaṁ hantvā,
ja373:2.4	yavaṁ bhakkhetumicchasi.
ja373:3.1	Daharo cāsi dummedha,
ja373:3.2	paṭhamuppattiko susu;
ja373:3.3	Dīghañcetaṁ samāsajja,
ja373:3.4	na te dassāmi jīvitaṁ.
ja373:4.1	Nāntalikkhabhavanena,
ja373:4.2	nāṅgaputtapinena vā;
ja373:4.3	Puttena hi patthayito,
ja373:4.4	silokehi pamocito.
ja373:5.1	Sabbaṁ sutamadhīyetha,
ja373:5.2	hīnamukkaṭṭhamajjhimaṁ;
ja373:5.3	Sabbassa atthaṁ jāneyya,
ja373:5.4	na ca sabbaṁ payojaye;
ja373:5.5	Hoti tādisako kālo,
ja373:5.6	yattha atthāvahaṁ sutan”ti.
ja373:6.1	Mūsikajātakaṁ tatiyaṁ.
ja374:0.1	Jātaka
ja374:0.2	Pañcakanipāta
ja374:0.3	Aḍḍhavagga
ja374:0.4	4. Cūḷadhanuggahajātaka
ja374:1.1	“Sabbaṁ bhaṇḍaṁ samādāya,
ja374:1.2	pāraṁ tiṇṇosi brāhmaṇa;
ja374:1.3	Paccāgaccha lahuṁ khippaṁ,
ja374:1.4	mampi tārehi dānito”.
ja374:2.1	“Asanthutaṁ maṁ cirasanthutena,
ja374:2.2	Nimīni bhotī addhuvaṁ dhuvena;
ja374:2.3	Mayāpi bhotī nimineyya aññaṁ,
ja374:2.4	Ito ahaṁ dūrataraṁ gamissaṁ”.
ja374:3.1	“Kāyaṁ eḷagalāgumbe,
ja374:3.2	karoti ahuhāsiyaṁ;
ja374:3.3	Nayīdha naccagītaṁ vā,
ja374:3.4	tāḷaṁ vā susamāhitaṁ;
ja374:3.5	Anamhikāle susoṇi,
ja374:3.6	kiṁ nu jagghasi sobhane”.
ja374:4.1	“Siṅgāla bāla dummedha,
ja374:4.2	appapaññosi jambuka;
ja374:4.3	Jīno macchañca pesiñca,
ja374:4.4	kapaṇo viya jhāyasi”.
ja374:5.1	“Sudassaṁ vajjamaññesaṁ,
ja374:5.2	attano pana duddasaṁ;
ja374:5.3	Jīnā patiñca jārañca,
ja374:5.4	maññe tvaññeva jhāyasi”.
ja374:6.1	“Evametaṁ migarāja,
ja374:6.2	yathā bhāsasi jambuka;
ja374:6.3	Sā nūnāhaṁ ito gantvā,
ja374:6.4	bhattu hessaṁ vasānugā”.
ja374:7.1	“Yo hare mattikaṁ thālaṁ,
ja374:7.2	kaṁsathālampi so hare;
ja374:7.3	Katañceva tayā pāpaṁ,
ja374:7.4	punapevaṁ karissasī”ti.
ja374:8.1	Cūḷadhanuggahajātakaṁ catutthaṁ.
ja375:0.1	Jātaka
ja375:0.2	Pañcakanipāta
ja375:0.3	Aḍḍhavagga
ja375:0.4	5. Kapotajātaka
ja375:1.1	“Idāni khomhi sukhito arogo,
ja375:1.2	Nikkaṇṭako nippatito kapoto;
ja375:1.3	Kāhāmi dānī hadayassa tuṭṭhiṁ,
ja375:1.4	Tathāhimaṁ maṁsasākaṁ baleti”.
ja375:2.1	“Kāyaṁ balākā sikhinī,
ja375:2.2	corī laṅghipitāmahā;
ja375:2.3	Oraṁ balāke āgaccha,
ja375:2.4	caṇḍo me vāyaso sakhā”.
ja375:3.1	“Alañhi te jagghitāye,
ja375:3.2	Mamaṁ disvāna edisaṁ;
ja375:3.3	Vilūnaṁ sūdaputtena,
ja375:3.4	Piṭṭhamaṇḍena makkhitaṁ”.
ja375:4.1	“Sunhāto suvilittosi,
ja375:4.2	annapānena tappito;
ja375:4.3	Kaṇṭhe ca te veḷuriyo,
ja375:4.4	agamā nu kajaṅgalaṁ”.
ja375:5.1	“Mā te mitto amitto vā,
ja375:5.2	agamāsi kajaṅgalaṁ;
ja375:5.3	Piñchāni tattha lāyitvā,
ja375:5.4	kaṇṭhe bandhanti vaṭṭanaṁ”.
ja375:6.1	“Punapāpajjasī samma,
ja375:6.2	Sīlañhi tava tādisaṁ;
ja375:6.3	Na hi mānusakā bhogā,
ja375:6.4	Subhuñjā honti pakkhinā”ti.
ja375:7.1	Kapotajātakaṁ pañcamaṁ.
ja375:7.2	Aḍḍhavaggo tatiyo.
ja375:8.1	Tassuddānaṁ
ja375:9.1	Atha vaṇṇa sasīla hiri labhate,
ja375:9.2	Sumukhā visa sāḷiyamittavaro;
ja375:9.3	Atha cakka palāsa sarāja sato,
ja375:9.4	Yava bāla kapotaka pannarasāti.
ja375:10.1	Atha vagguddānaṁ
ja375:11.1	Jīnañca vaṇṇaṁ asamaṁvaguppari,
ja375:11.2	Sudesitā jātakanti santi vīsati;
ja375:11.3	Mahesino brahmacarittamuttam-
ja375:11.4	avoca gāthā atthavatī subyañjanāti.
ja375:12.1	Pañcakanipātaṁ niṭṭhitaṁ.
ja376:0.1	Jātaka
ja376:0.2	Chakkanipāta
ja376:0.3	Avāriyavagga
ja376:0.4	1. Avāriyajātaka
ja376:1.1	“Māsu kujjha bhūmipati,
ja376:1.2	māsu kujjha rathesabha;
ja376:1.3	Kuddhaṁ appaṭikujjhanto,
ja376:1.4	rājā raṭṭhassa pūjito.
ja376:2.1	Gāme vā yadi vāraññe,
ja376:2.2	ninne vā yadi vā thale;
ja376:2.3	Sabbattha anusāsāmi,
ja376:2.4	māsu kujjha rathesabha”.
ja376:3.1	“Avāriyapitā nāma,
ja376:3.2	ahu gaṅgāya nāviko;
ja376:3.3	Pubbe janaṁ tāretvāna,
ja376:3.4	pacchā yācati vetanaṁ;
ja376:3.5	Tenassa bhaṇḍanaṁ hoti,
ja376:3.6	na ca bhogehi vaḍḍhati”.
ja376:4.1	“Atiṇṇaṁyeva yācassu,
ja376:4.2	apāraṁ tāta nāvika;
ja376:4.3	Añño hi tiṇṇassa mano,
ja376:4.4	añño hoti pāresino.
ja376:5.1	Gāme vā yadi vāraññe,
ja376:5.2	ninne vā yadi vā thale;
ja376:5.3	Sabbattha anusāsāmi,
ja376:5.4	māsu kujjhittha nāvika”.
ja376:6.1	“Yāyevānusāsaniyā,
ja376:6.2	rājā gāmavaraṁ adā;
ja376:6.3	Tāyevānusāsaniyā,
ja376:6.4	nāviko paharī mukhaṁ.
ja376:7.1	Bhattaṁ bhinnaṁ hatā bhariyā,
ja376:7.2	Gabbho ca patito chamā;
ja376:7.3	Migova jātarūpena,
ja376:7.4	Na tenatthaṁ abandhi sū”ti.
ja376:8.1	Avāriyajātakaṁ paṭhamaṁ.
ja377:0.1	Jātaka
ja377:0.2	Chakkanipāta
ja377:0.3	Avāriyavagga
ja377:0.4	2. Setaketujātaka
ja377:1.1	“Mā tāta kujjhi na hi sādhu kodho,
ja377:1.2	Bahumpi te adiṭṭhamassutañca;
ja377:1.3	Mātā pitā disatā setaketu,
ja377:1.4	Ācariyamāhu disataṁ pasatthā.
ja377:2.1	Agārino annadapānavatthadā,
ja377:2.2	Avhāyikā tampi disaṁ vadanti;
ja377:2.3	Esā disā paramā setaketu,
ja377:2.4	Yaṁ patvā dukkhī sukhino bhavanti”.
ja377:3.1	“Kharājinā jaṭilā paṅkadantā,
ja377:3.2	Dummakkharūpā yeme jappanti mante;
ja377:3.3	Kacci nu te mānusake payoge,
ja377:3.4	Idaṁ vidū parimuttā apāyā”.
ja377:4.1	“Pāpāni kammāni katvāna rāja,
ja377:4.2	Bahussuto ce na careyya dhammaṁ;
ja377:4.3	Sahassavedopi na taṁ paṭicca,
ja377:4.4	Dukkhā pamucce caraṇaṁ apatvā”.
ja377:5.1	“Sahassavedopi na taṁ paṭicca,
ja377:5.2	Dukkhā pamucce caraṇaṁ apatvā;
ja377:5.3	Maññāmi vedā aphalā bhavanti,
ja377:5.4	Sasaṁyamaṁ caraṇameva saccaṁ”.
ja377:6.1	“Na heva vedā aphalā bhavanti,
ja377:6.2	Sasaṁyamaṁ caraṇameva saccaṁ;
ja377:6.3	Kittiñhi pappoti adhicca vede,
ja377:6.4	Santiṁ puṇeti caraṇena danto”ti.
ja377:7.1	Setaketujātakaṁ dutiyaṁ.
ja378:0.1	Jātaka
ja378:0.2	Chakkanipāta
ja378:0.3	Avāriyavagga
ja378:0.4	3. Darīmukhajātaka
ja378:1.1	“Paṅko ca kāmā palipo ca kāmā,
ja378:1.2	Bhayañca metaṁ timūlaṁ pavuttaṁ;
ja378:1.3	Rajo ca dhūmo ca mayā pakāsitā,
ja378:1.4	Hitvā tuvaṁ pabbaja brahmadatta”.
ja378:2.1	“Gadhito ca ratto ca adhimucchito ca,
ja378:2.2	Kāmesvahaṁ brāhmaṇa bhiṁsarūpaṁ;
ja378:2.3	Taṁ nussahe jīvikattho pahātuṁ,
ja378:2.4	Kāhāmi puññāni anappakāni”.
ja378:3.1	“Yo atthakāmassa hitānukampino,
ja378:3.2	Ovajjamāno na karoti sāsanaṁ;
ja378:3.3	Idameva seyyo iti maññamāno,
ja378:3.4	Punappunaṁ gabbhamupeti mando.
ja378:4.1	So ghorarūpaṁ nirayaṁ upeti,
ja378:4.2	Subhāsubhaṁ muttakarīsapūraṁ;
ja378:4.3	Sattā sakāye na jahanti giddhā,
ja378:4.4	Ye honti kāmesu avītarāgā”.
ja378:5.1	“Mīḷhena littā ruhirena makkhitā,
ja378:5.2	Semhena littā upanikkhamanti;
ja378:5.3	Yaṁ yañhi kāyena phusanti tāvade,
ja378:5.4	Sabbaṁ asātaṁ dukhameva kevalaṁ.
ja378:6.1	Disvā vadāmi na hi aññato savaṁ,
ja378:6.2	Pubbenivāsaṁ bahukaṁ sarāmi;
ja378:6.3	Citrāhi gāthāhi subhāsitāhi,
ja378:6.4	Darīmukho nijjhāpayi sumedhan”ti.
ja378:7.1	Darīmukhajātakaṁ tatiyaṁ.
ja379:0.1	Jātaka
ja379:0.2	Chakkanipāta
ja379:0.3	Avāriyavagga
ja379:0.4	4. Nerujātaka
ja379:1.1	“Kākolā kākasaṅghā ca,
ja379:1.2	mayañca patataṁ varā;
ja379:1.3	Sabbeva sadisā homa,
ja379:1.4	imaṁ āgamma pabbataṁ.
ja379:2.1	Idha sīhā ca byagghā ca,
ja379:2.2	siṅgālā ca migādhamā;
ja379:2.3	Sabbeva sadisā honti,
ja379:2.4	ayaṁ ko nāma pabbato”.
ja379:3.1	“Imaṁ nerūti jānanti,
ja379:3.2	manussā pabbatuttamaṁ;
ja379:3.3	Idha vaṇṇena sampannā,
ja379:3.4	vasanti sabbapāṇino”.
ja379:4.1	“Amānanā yattha siyā,
ja379:4.2	santānaṁ vā vimānanā;
ja379:4.3	Hīnasammānanā vāpi,
ja379:4.4	na tattha vasatiṁ vase.
ja379:5.1	Yatthālaso ca dakkho ca,
ja379:5.2	sūro bhīru ca pūjiyā;
ja379:5.3	Na tattha santo vasanti,
ja379:5.4	avisesakare nare.
ja379:6.1	Nāyaṁ neru vibhajati,
ja379:6.2	hīnaukkaṭṭhamajjhime;
ja379:6.3	Avisesakaro neru,
ja379:6.4	handa neruṁ jahāmase”ti.
ja379:7.1	Nerujātakaṁ catutthaṁ.
ja380:0.1	Jātaka
ja380:0.2	Chakkanipāta
ja380:0.3	Avāriyavagga
ja380:0.4	5. Āsaṅkajātaka
ja380:1.1	“Āsāvatī nāma latā,
ja380:1.2	jātā cittalatāvane;
ja380:1.3	Tassā vassasahassena,
ja380:1.4	ekaṁ nibbattate phalaṁ.
ja380:2.1	Taṁ devā payirupāsanti,
ja380:2.2	tāva dūraphalaṁ satiṁ;
ja380:2.3	Āsīseva tuvaṁ rāja,
ja380:2.4	āsā phalavatī sukhā.
ja380:3.1	Āsīsateva so pakkhī,
ja380:3.2	āsīsateva so dijo;
ja380:3.3	Tassa cāsā samijjhati,
ja380:3.4	tāva dūragatā satī;
ja380:3.5	Āsīseva tuvaṁ rāja,
ja380:3.6	āsā phalavatī sukhā”.
ja380:4.1	“Sampesi kho maṁ vācāya,
ja380:4.2	na ca sampesi kammunā;
ja380:4.3	Mālā sereyyakasseva,
ja380:4.4	vaṇṇavantā agandhikā.
ja380:5.1	Aphalaṁ madhuraṁ vācaṁ,
ja380:5.2	yo mittesu pakubbati;
ja380:5.3	Adadaṁ avissajaṁ bhogaṁ,
ja380:5.4	sandhi tenassa jīrati.
ja380:6.1	Yañhi kayirā tañhi vade,
ja380:6.2	yaṁ na kayirā na taṁ vade;
ja380:6.3	Akarontaṁ bhāsamānaṁ,
ja380:6.4	parijānanti paṇḍitā.
ja380:7.1	Balañca vata me khīṇaṁ,
ja380:7.2	pātheyyañca na vijjati;
ja380:7.3	Saṅke pāṇūparodhāya,
ja380:7.4	handa dāni vajāmahaṁ”.
ja380:8.1	“Etadeva hi me nāmaṁ,
ja380:8.2	Yaṁ nāmasmi rathesabha;
ja380:8.3	Āgamehi mahārāja,
ja380:8.4	Pitaraṁ āmantayāmahan”ti.
ja380:9.1	Āsaṅkajātakaṁ pañcamaṁ.
ja381:0.1	Jātaka
ja381:0.2	Chakkanipāta
ja381:0.3	Avāriyavagga
ja381:0.4	6. Migālopajātaka
ja381:1.1	“Na me rucci migālopa,
ja381:1.2	yassa te tādisī gatī;
ja381:1.3	Atuccaṁ tāta patasi,
ja381:1.4	abhūmiṁ tāta sevasi.
ja381:2.1	Catukkaṇṇaṁva kedāraṁ,
ja381:2.2	yadā te pathavī siyā;
ja381:2.3	Tato tāta nivattassu,
ja381:2.4	māssu etto paraṁ gami”.
ja381:3.1	“Santi aññepi sakuṇā,
ja381:3.2	pattayānā vihaṅgamā;
ja381:3.3	Akkhittā vātavegena,
ja381:3.4	naṭṭhā te sassatīsamā.
ja381:4.1	Akatvā apanandassa,
ja381:4.2	pitu vuddhassa sāsanaṁ;
ja381:4.3	Kālavāte atikkamma,
ja381:4.4	verambhānaṁ vasaṁ agā.
ja381:5.1	Tassa puttā ca dārā ca,
ja381:5.2	ye caññe anujīvino;
ja381:5.3	Sabbe byasanamāpāduṁ,
ja381:5.4	anovādakare dije.
ja381:6.1	Evampi idha vuddhānaṁ,
ja381:6.2	yo vākyaṁ nāvabujjhati;
ja381:6.3	Atisīmacaro ditto,
ja381:6.4	gijjhovātītasāsano;
ja381:6.5	Sabbe byasanaṁ papponti,
ja381:6.6	akatvā vuddhasāsanan”ti.
ja381:7.1	Migālopajātakaṁ chaṭṭhaṁ.
ja382:0.1	Jātaka
ja382:0.2	Chakkanipāta
ja382:0.3	Avāriyavagga
ja382:0.4	7. Sirikāḷakaṇṇijātaka
ja382:1.1	“Kā nu kāḷena vaṇṇena,
ja382:1.2	na cāpi piyadassanā;
ja382:1.3	Kā vā tvaṁ kassa vā dhītā,
ja382:1.4	kathaṁ jānemu taṁ mayaṁ”.
ja382:2.1	“Mahārājassahaṁ dhītā,
ja382:2.2	virūpakkhassa caṇḍiyā;
ja382:2.3	Ahaṁ kāḷī alakkhikā,
ja382:2.4	kāḷakaṇṇīti maṁ vidū;
ja382:2.5	Okāsaṁ yācito dehi,
ja382:2.6	vasemu tava santike”.
ja382:3.1	“Kiṁsīle kiṁsamācāre,
ja382:3.2	Purise nivisase tuvaṁ;
ja382:3.3	Puṭṭhā me kāḷi akkhāhi,
ja382:3.4	Kathaṁ jānemu taṁ mayaṁ”.
ja382:4.1	“Makkhī paḷāsī sārambhī,
ja382:4.2	issukī maccharī saṭho;
ja382:4.3	So mayhaṁ puriso kanto,
ja382:4.4	laddhaṁ yassa vinassati.
ja382:5.1	Kodhano upanāhī ca,
ja382:5.2	pisuṇo ca vibhedako;
ja382:5.3	Kaṇḍakavāco pharuso,
ja382:5.4	so me kantataro tato.
ja382:6.1	Ajja suveti puriso,
ja382:6.2	sadatthaṁ nāvabujjhati;
ja382:6.3	Ovajjamāno kuppati,
ja382:6.4	seyyaṁ so atimaññati.
ja382:7.1	Davappaluddho puriso,
ja382:7.2	sabbamittehi dhaṁsati;
ja382:7.3	So mayhaṁ puriso kanto,
ja382:7.4	tasmiṁ homi anāmayā”.
ja382:8.1	“Apehi etto tvaṁ kāḷi,
ja382:8.2	netaṁ amhesu vijjati;
ja382:8.3	Aññaṁ janapadaṁ gaccha,
ja382:8.4	nigame rājadhāniyo”.
ja382:9.1	“Ahampi kho taṁ jānāmi,
ja382:9.2	netaṁ tumhesu vijjati;
ja382:9.3	Santi loke alakkhikā,
ja382:9.4	saṅgharanti bahuṁ dhanaṁ;
ja382:9.5	Ahaṁ devo ca me bhātā,
ja382:9.6	ubho naṁ vidhamāmase”.
ja382:10.1	“Kā nu dibbena vaṇṇena,
ja382:10.2	pathabyā supatiṭṭhitā;
ja382:10.3	Kā vā tvaṁ kassa vā dhītā,
ja382:10.4	kathaṁ jānemu taṁ mayaṁ”.
ja382:11.1	“Mahārājassahaṁ dhītā,
ja382:11.2	dhataraṭṭhassa sirīmato;
ja382:11.3	Ahaṁ sirī ca lakkhī ca,
ja382:11.4	bhūripaññāti maṁ vidū;
ja382:11.5	Okāsaṁ yācito dehi,
ja382:11.6	vasemu tava santike”.
ja382:12.1	“Kiṁsīle kiṁsamācāre,
ja382:12.2	Purise nivisase tuvaṁ;
ja382:12.3	Puṭṭhā me lakkhi akkhāhi,
ja382:12.4	Kathaṁ jānemu taṁ mayaṁ”.
ja382:13.1	“Yo cāpi sīte atha vāpi uṇhe,
ja382:13.2	Vātātape ḍaṁsasarīsape ca;
ja382:13.3	Khudhaṁ pipāsaṁ abhibhuyya sabbaṁ,
ja382:13.4	Rattindivaṁ yo satataṁ niyutto.
ja382:14.1	Kālāgatañca na hāpeti atthaṁ,
ja382:14.2	So me manāpo nivise ca tamhi;
ja382:14.3	Akkodhano mittavā cāgavā ca,
ja382:14.4	Sīlūpapanno asaṭhojubhūto.
ja382:15.1	Saṅgāhako sakhilo saṇhavāco,
ja382:15.2	Mahattapattopi nivātavutti;
ja382:15.3	Tasmiṁhaṁ pose vipulā bhavāmi,
ja382:15.4	Ūmi samuddassa yathāpi vaṇṇaṁ.
ja382:16.1	Yo cāpi mitte atha vā amitte,
ja382:16.2	Seṭṭhe sarikkhe atha vāpi hīne;
ja382:16.3	Atthaṁ carantaṁ atha vā anatthaṁ,
ja382:16.4	Āvī raho saṅgahameva vatte.
ja382:17.1	Vācaṁ na vajjā pharusaṁ kadāci,
ja382:17.2	Matassa jīvassa ca tassa homi;
ja382:17.3	Etesaṁ yo aññataraṁ labhitvā,
ja382:17.4	Kantā sirī majjati appapañño;
ja382:17.5	Taṁ dittarūpaṁ visamaṁ carantaṁ,
ja382:17.6	Karīsaṭhānaṁva vivajjayāmi.
ja382:18.1	Attanā kurute lakkhiṁ,
ja382:18.2	alakkhiṁ kurutattanā;
ja382:18.3	Na hi lakkhiṁ alakkhiṁ vā,
ja382:18.4	añño aññassa kārako”ti.
ja382:19.1	Sirikāḷakaṇṇijātakaṁ sattamaṁ.
ja383:0.1	Jātaka
ja383:0.2	Chakkanipāta
ja383:0.3	Avāriyavagga
ja383:0.4	8. Kukkuṭajātaka
ja383:1.1	“Sucittapattachadana,
ja383:1.2	tambacūḷa vihaṅgama;
ja383:1.3	Oroha dumasākhāya,
ja383:1.4	mudhā bhariyā bhavāmi te”.
ja383:2.1	“Catuppadī tvaṁ kalyāṇi,
ja383:2.2	dvipadāhaṁ manorame;
ja383:2.3	Migī pakkhī asaññuttā,
ja383:2.4	aññaṁ pariyesa sāmikaṁ”.
ja383:3.1	“Komārikā te hessāmi,
ja383:3.2	Mañjukā piyabhāṇinī;
ja383:3.3	Vinda maṁ ariyena vedena,
ja383:3.4	Sāvaya maṁ yadicchasi”.
ja383:4.1	“Kuṇapādini lohitape,
ja383:4.2	cori kukkuṭapothini;
ja383:4.3	Na tvaṁ ariyena vedena,
ja383:4.4	mamaṁ bhattāramicchasi”.
ja383:5.1	“Evampi caturā nārī,
ja383:5.2	disvāna sadhanaṁ naraṁ;
ja383:5.3	Nenti saṇhāhi vācāhi,
ja383:5.4	biḷārī viya kukkuṭaṁ.
ja383:6.1	Yo ca uppatitaṁ atthaṁ,
ja383:6.2	na khippamanubujjhati;
ja383:6.3	Amittavasamanveti,
ja383:6.4	pacchā ca anutappati.
ja383:7.1	Yo ca uppatitaṁ atthaṁ,
ja383:7.2	khippameva nibodhati;
ja383:7.3	Muccate sattusambādhā,
ja383:7.4	kukkuṭova biḷāriyā”ti.
ja383:8.1	Kukkuṭajātakaṁ aṭṭhamaṁ.
ja384:0.1	Jātaka
ja384:0.2	Chakkanipāta
ja384:0.3	Avāriyavagga
ja384:0.4	9. Dhammadhajajātaka
ja384:1.1	“Dhammaṁ caratha ñātayo,
ja384:1.2	Dhammaṁ caratha bhaddaṁ vo;
ja384:1.3	Dhammacārī sukhaṁ seti,
ja384:1.4	Asmiṁ loke paramhi ca”.
ja384:2.1	“Bhaddako vatayaṁ pakkhī,
ja384:2.2	dijo paramadhammiko;
ja384:2.3	Ekapādena tiṭṭhanto,
ja384:2.4	dhammamevānusāsati”.
ja384:3.1	“Nāssa sīlaṁ vijānātha,
ja384:3.2	anaññāya pasaṁsatha;
ja384:3.3	Bhutvā aṇḍañca potañca,
ja384:3.4	dhammo dhammoti bhāsati.
ja384:4.1	Aññaṁ bhaṇati vācāya,
ja384:4.2	aññaṁ kāyena kubbati;
ja384:4.3	Vācāya no ca kāyena,
ja384:4.4	na taṁ dhammaṁ adhiṭṭhito.
ja384:5.1	Vācāya sakhilo manoviduggo,
ja384:5.2	Channo kūpasayova kaṇhasappo;
ja384:5.3	Dhammadhajo gāmanigamāsu sādhu,
ja384:5.4	Dujjāno purisena bālisena.
ja384:6.1	Imaṁ tuṇḍehi pakkhehi,
ja384:6.2	pādā cimaṁ viheṭhatha;
ja384:6.3	Chavañhimaṁ vināsetha,
ja384:6.4	nāyaṁ saṁvāsanāraho”ti.
ja384:7.1	Dhammadhajajātakaṁ navamaṁ.
ja385:0.1	Jātaka
ja385:0.2	Chakkanipāta
ja385:0.3	Avāriyavagga
ja385:0.4	10. Nandiyamigarājajātaka
ja385:1.1	“Sace brāhmaṇa gacchesi,
ja385:1.2	sākete ajjunaṁ vanaṁ;
ja385:1.3	Vajjāsi nandiyaṁ nāma,
ja385:1.4	puttaṁ asmākamorasaṁ;
ja385:1.5	Mātā pitā ca te vuddhā,
ja385:1.6	te taṁ icchanti passituṁ”.
ja385:2.1	“Bhuttā mayā nivāpāni,
ja385:2.2	Rājino pānabhojanaṁ;
ja385:2.3	Taṁ rājapiṇḍaṁ avabhottuṁ,
ja385:2.4	Nāhaṁ brāhmaṇa mussahe”.
ja385:3.1	“Odahissāmahaṁ passaṁ,
ja385:3.2	khurappānissa rājino;
ja385:3.3	Tadāhaṁ sukhito mutto,
ja385:3.4	api passeyya mātaraṁ.
ja385:4.1	Migarājā pure āsiṁ,
ja385:4.2	kosalassa niketane;
ja385:4.3	Nandiyo nāma nāmena,
ja385:4.4	abhirūpo catuppado.
ja385:5.1	Taṁ maṁ vadhitumāgacchi,
ja385:5.2	dāyasmiṁ ajjune vane;
ja385:5.3	Dhanuṁ advejjhaṁ katvāna,
ja385:5.4	usuṁ sannayha kosalo.
ja385:6.1	Tassāhaṁ odahiṁ passaṁ,
ja385:6.2	khurappānissa rājino;
ja385:6.3	Tadāhaṁ sukhito mutto,
ja385:6.4	mātaraṁ daṭṭhumāgato”ti.
ja385:7.1	Nandiyamigarājajātakaṁ dasamaṁ.
ja385:7.2	Avāriyavaggo paṭhamo.
ja385:8.1	Tassuddānaṁ
ja385:9.1	Atha kujjharathesabha ketuvaro,
ja385:9.2	Sadarīmukha neru latā ca puna;
ja385:9.3	Apananda sirī ca sucittavaro,
ja385:9.4	Atha dhammika nandimigena dasāti.
ja386:0.1	Jātaka
ja386:0.2	Chakkanipāta
ja386:0.3	Kharaputtavagga
ja386:0.4	1. Kharaputtajātaka
ja386:1.1	“Saccaṁ kirevamāhaṁsu,
ja386:1.2	vastaṁ bāloti paṇḍitā;
ja386:1.3	Passa bālo rahokammaṁ,
ja386:1.4	āvikubbaṁ na bujjhati”.
ja386:2.1	“Tvaṁ khopi samma bālosi,
ja386:2.2	kharaputta vijānahi;
ja386:2.3	Rajjuyā hi parikkhitto,
ja386:2.4	vaṅkoṭṭho ohitomukho.
ja386:3.1	Aparampi samma te bālyaṁ,
ja386:3.2	yo mutto na palāyasi;
ja386:3.3	So ca bālataro samma,
ja386:3.4	yaṁ tvaṁ vahasi senakaṁ”.
ja386:4.1	“Yannu samma ahaṁ bālo,
ja386:4.2	ajarāja vijānahi;
ja386:4.3	Atha kena senako bālo,
ja386:4.4	taṁ me akkhāhi pucchito”.
ja386:5.1	“Uttamatthaṁ labhitvāna,
ja386:5.2	bhariyāya yo padassati;
ja386:5.3	Tena jahissatattānaṁ,
ja386:5.4	sā cevassa na hessati”.
ja386:6.1	“Na ve piyammeti janinda tādiso,
ja386:6.2	Attaṁ niraṅkatvā piyāni sevati;
ja386:6.3	Attāva seyyo paramā ca seyyo,
ja386:6.4	Labbhā piyā ocitatthena pacchā”ti.
ja386:7.1	Kharaputtajātakaṁ paṭhamaṁ.
ja387:0.1	Jātaka
ja387:0.2	Chakkanipāta
ja387:0.3	Kharaputtavagga
ja387:0.4	2. Sūcijātaka
ja387:1.1	“Akakkasaṁ apharusaṁ,
ja387:1.2	kharadhotaṁ supāsiyaṁ;
ja387:1.3	Sukhumaṁ tikhiṇaggañca,
ja387:1.4	ko sūciṁ ketumicchati.
ja387:2.1	Sumajjañca supāsañca,
ja387:2.2	anupubbaṁ suvaṭṭitaṁ;
ja387:2.3	Ghanaghātimaṁ paṭithaddhaṁ,
ja387:2.4	ko sūciṁ ketumicchati”.
ja387:3.1	“Ito dāni patāyanti,
ja387:3.2	sūciyo baḷisāni ca;
ja387:3.3	Koyaṁ kammāragāmasmiṁ,
ja387:3.4	sūciṁ vikketumicchati.
ja387:4.1	Ito satthāni gacchanti,
ja387:4.2	Kammantā vividhā puthū;
ja387:4.3	Koyaṁ kammāragāmasmiṁ,
ja387:4.4	Sūciṁ vikketumicchati”.
ja387:5.1	“Sūciṁ kammāragāmasmiṁ,
ja387:5.2	vikketabbā pajānatā;
ja387:5.3	Ācariyāva jānanti,
ja387:5.4	kammaṁ sukatadukkaṭaṁ.
ja387:6.1	Imañce te pitā bhadde,
ja387:6.2	Sūciṁ jaññā mayā kataṁ;
ja387:6.3	Tayā ca maṁ nimanteyya,
ja387:6.4	Yañcatthaññaṁ ghare dhanan”ti.
ja387:7.1	Sūcijātakaṁ dutiyaṁ.
ja388:0.1	Jātaka
ja388:0.2	Chakkanipāta
ja388:0.3	Kharaputtavagga
ja388:0.4	3. Tuṇḍilajātaka
ja388:1.1	“Navachannake dāni diyyati,
ja388:1.2	Puṇṇāyaṁ doṇi suvāminī ṭhitā;
ja388:1.3	Bahuke jane pāsapāṇike,
ja388:1.4	No ca kho me paṭibhāti bhuñjituṁ”.
ja388:2.1	“Tasasi bhamasi leṇamicchasi,
ja388:2.2	Attāṇosi kuhiṁ gamissasi;
ja388:2.3	Appossukko bhuñja tuṇḍila,
ja388:2.4	Maṁsatthāya hi positāmhase.
ja388:3.1	Ogaha rahadaṁ akaddamaṁ,
ja388:3.2	Sabbaṁ sedamalaṁ pavāhaya;
ja388:3.3	Gaṇhāhi navaṁ vilepanaṁ,
ja388:3.4	Yassa gandho na kadāci chijjati”.
ja388:4.1	“Katamo rahado akaddamo,
ja388:4.2	Kiṁsu sedamalanti vuccati;
ja388:4.3	Katamañca navaṁ vilepanaṁ,
ja388:4.4	Yassa gandho na kadāci chijjati”.
ja388:5.1	“Dhammo rahado akaddamo,
ja388:5.2	Pāpaṁ sedamalanti vuccati;
ja388:5.3	Sīlañca navaṁ vilepanaṁ,
ja388:5.4	Tassa gandho na kadāci chijjati.
ja388:6.1	Nandanti sarīraghātino,
ja388:6.2	Na ca nandanti sarīradhārino;
ja388:6.3	Puṇṇāya ca puṇṇamāsiyā,
ja388:6.4	Ramamānāva jahanti jīvitan”ti.
ja388:7.1	Tuṇḍilajātakaṁ tatiyaṁ.
ja389:0.1	Jātaka
ja389:0.2	Chakkanipāta
ja389:0.3	Kharaputtavagga
ja389:0.4	4. Suvaṇṇakakkaṭajātaka
ja389:1.1	“Siṅgīmigo āyatacakkhunetto,
ja389:1.2	Aṭṭhittaco vārisayo alomo;
ja389:1.3	Tenābhibhūto kapaṇaṁ rudāmi,
ja389:1.4	Hare sakhā kissa nu maṁ jahāsi”.
ja389:2.1	So passasanto mahatā phaṇena,
ja389:2.2	Bhujaṅgamo kakkaṭamajjhapatto;
ja389:2.3	Sakhā sakhāraṁ paritāyamāno,
ja389:2.4	Bhujaṅgamaṁ kakkaṭako gahesi.
ja389:3.1	“Na vāyasaṁ no pana kaṇhasappaṁ,
ja389:3.2	Ghāsatthiko kakkaṭako adeyya;
ja389:3.3	Pucchāmi taṁ āyatacakkhunetta,
ja389:3.4	Atha kissa hetumha ubho gahītā”.
ja389:4.1	“Ayaṁ puriso mama atthakāmo,
ja389:4.2	Yo maṁ gahetvāna dakāya neti;
ja389:4.3	Tasmiṁ mate dukkhamanappakaṁ me,
ja389:4.4	Ahañca eso ca ubho na homa.
ja389:5.1	Mamañca disvāna pavaddhakāyaṁ,
ja389:5.2	Sabbo jano hiṁsitumeva micche;
ja389:5.3	Sāduñca thūlañca muduñca maṁsaṁ,
ja389:5.4	Kākāpi maṁ disvāna viheṭhayeyyuṁ”.
ja389:6.1	“Sacetassa hetumha ubho gahītā,
ja389:6.2	Uṭṭhātu poso visamāvamāmi;
ja389:6.3	Mamañca kākañca pamuñca khippaṁ,
ja389:6.4	Pure visaṁ gāḷhamupeti maccaṁ”.
ja389:7.1	“Sappaṁ pamokkhāmi na tāva kākaṁ,
ja389:7.2	Paṭibandhako hohiti tāva kāko;
ja389:7.3	Purisañca disvāna sukhiṁ arogaṁ,
ja389:7.4	Kākaṁ pamokkhāmi yatheva sappaṁ”.
ja389:8.1	“Kāko tadā devadatto ahosi,
ja389:8.2	Māro pana kaṇhasappo ahosi;
ja389:8.3	Ānandabhaddo kakkaṭako ahosi,
ja389:8.4	Ahaṁ tadā brāhmaṇo homi satthā”ti.
ja389:9.1	Suvaṇṇakakkaṭajātakaṁ catutthaṁ.
ja390:0.1	Jātaka
ja390:0.2	Chakkanipāta
ja390:0.3	Kharaputtavagga
ja390:0.4	5. Mayhakajātaka
ja390:1.1	“Sakuṇo mayhako nāma,
ja390:1.2	girisānudarīcaro;
ja390:1.3	Pakkaṁ pipphalimāruyha,
ja390:1.4	mayhaṁ mayhanti kandati.
ja390:2.1	Tassevaṁ vilapantassa,
ja390:2.2	dijasaṅghā samāgatā;
ja390:2.3	Bhutvāna pipphaliṁ yanti,
ja390:2.4	vilapatveva so dijo.
ja390:3.1	Evameva idhekacco,
ja390:3.2	saṅgharitvā bahuṁ dhanaṁ;
ja390:3.3	Nevattano na ñātīnaṁ,
ja390:3.4	yathodhiṁ paṭipajjati.
ja390:4.1	Na so acchādanaṁ bhattaṁ,
ja390:4.2	na mālaṁ na vilepanaṁ;
ja390:4.3	Anubhoti sakiṁ kiñci,
ja390:4.4	na saṅgaṇhāti ñātake.
ja390:5.1	Tassevaṁ vilapantassa,
ja390:5.2	mayhaṁ mayhanti rakkhato;
ja390:5.3	Rājāno atha vā corā,
ja390:5.4	dāyādā ye va appiyā;
ja390:5.5	Dhanamādāya gacchanti,
ja390:5.6	vilapatveva so naro.
ja390:6.1	Dhīro bhoge adhigamma,
ja390:6.2	saṅgaṇhāti ca ñātake;
ja390:6.3	Tena so kittiṁ pappoti,
ja390:6.4	pecca sagge pamodatī”ti.
ja390:7.1	Mayhakajātakaṁ pañcamaṁ.
ja391:0.1	Jātaka
ja391:0.2	Chakkanipāta
ja391:0.3	Kharaputtavagga
ja391:0.4	6. Vijjādharajātaka
ja391:1.1	“Dubbaṇṇarūpaṁ tuvamariyavaṇṇī,
ja391:1.2	Purakkhatvā pañjaliko namassasi;
ja391:1.3	Seyyo nu te so udavā sarikkho,
ja391:1.4	Nāmaṁ parassattano cāpi brūhi”.
ja391:2.1	“Na nāmagottaṁ gaṇhanti rāja,
ja391:2.2	Sammaggatānujjugatāna devā;
ja391:2.3	Ahañca te nāmadheyyaṁ vadāmi,
ja391:2.4	Sakkohamasmī tidasānamindo”.
ja391:3.1	“Yo disvā bhikkhuṁ caraṇūpapannaṁ,
ja391:3.2	Purakkhatvā pañjaliko namassati;
ja391:3.3	Pucchāmi taṁ devarājetamatthaṁ,
ja391:3.4	Ito cuto kiṁ labhate sukhaṁ so”.
ja391:4.1	“Yo disvā bhikkhuṁ caraṇūpapannaṁ,
ja391:4.2	Purakkhatvā pañjaliko namassati;
ja391:4.3	Diṭṭheva dhamme labhate pasaṁsaṁ,
ja391:4.4	Saggañca so yāti sarīrabhedā”.
ja391:5.1	“Lakkhī vata me udapādi ajja,
ja391:5.2	Yaṁ vāsavaṁ bhūtapatiddasāma;
ja391:5.3	Bhikkhuñca disvāna tuvañca sakka,
ja391:5.4	Kāhāmi puññāni anappakāni”.
ja391:6.1	“Addhā have sevitabbā sapaññā,
ja391:6.2	Bahussutā ye bahuṭhānacintino;
ja391:6.3	Bhikkhuñca disvāna mamañca rāja,
ja391:6.4	Karohi puññāni anappakāni”.
ja391:7.1	“Akkodhano niccapasannacitto,
ja391:7.2	Sabbātithīyācayogo bhavitvā;
ja391:7.3	Nihacca mānaṁ abhivādayissaṁ,
ja391:7.4	Sutvāna devinda subhāsitānī”ti.
ja391:8.1	Vijjādharajātakaṁ chaṭṭhaṁ.
ja392:0.1	Jātaka
ja392:0.2	Chakkanipāta
ja392:0.3	Kharaputtavagga
ja392:0.4	7. Siṅghapupphajātaka
ja392:1.1	“Yametaṁ vārijaṁ pupphaṁ,
ja392:1.2	Adinnaṁ upasiṅghasi;
ja392:1.3	Ekaṅgametaṁ theyyānaṁ,
ja392:1.4	Gandhathenosi mārisa”.
ja392:2.1	“Na harāmi na bhañjāmi,
ja392:2.2	ārā siṅghāmi vārijaṁ;
ja392:2.3	Atha kena nu vaṇṇena,
ja392:2.4	gandhathenoti vuccati.
ja392:3.1	Yoyaṁ bhisāni khaṇati,
ja392:3.2	puṇḍarīkāni bhañjati;
ja392:3.3	Evaṁ ākiṇṇakammanto,
ja392:3.4	kasmā eso na vuccati”.
ja392:4.1	“Ākiṇṇaluddo puriso,
ja392:4.2	dhāticelaṁva makkhito;
ja392:4.3	Tasmiṁ me vacanaṁ natthi,
ja392:4.4	tañcārahāmi vattave.
ja392:5.1	Anaṅgaṇassa posassa,
ja392:5.2	niccaṁ sucigavesino;
ja392:5.3	Vālaggamattaṁ pāpassa,
ja392:5.4	abbhāmattaṁva khāyati”.
ja392:6.1	“Addhā maṁ yakkha jānāsi,
ja392:6.2	atho maṁ anukampasi;
ja392:6.3	Punapi yakkha vajjāsi,
ja392:6.4	yadā passasi edisaṁ”.
ja392:7.1	“Neva taṁ upajīvāmi,
ja392:7.2	napi te bhatakāmhase;
ja392:7.3	Tvameva bhikkhu jāneyya,
ja392:7.4	yena gaccheyya suggatin”ti.
ja392:8.1	Siṅghapupphajātakaṁ sattamaṁ.
ja393:0.1	Jātaka
ja393:0.2	Chakkanipāta
ja393:0.3	Kharaputtavagga
ja393:0.4	8. Vighāsādajātaka
ja393:1.1	“Susukhaṁ vata jīvanti,
ja393:1.2	ye janā vighāsādino;
ja393:1.3	Diṭṭheva dhamme pāsaṁsā,
ja393:1.4	samparāye ca suggatī”.
ja393:2.1	“Sukassa bhāsamānassa,
ja393:2.2	na nisāmetha paṇḍitā;
ja393:2.3	Idaṁ suṇātha sodariyā,
ja393:2.4	amhevāyaṁ pasaṁsati”.
ja393:3.1	“Nāhaṁ tumhe pasaṁsāmi,
ja393:3.2	kuṇapādā suṇātha me;
ja393:3.3	Ucchiṭṭhabhojino tumhe,
ja393:3.4	na tumhe vighāsādino”.
ja393:4.1	“Sattavassā pabbajitā,
ja393:4.2	mejjhāraññe sikhaṇḍino;
ja393:4.3	Vighāseneva yāpentā,
ja393:4.4	mayañce bhoto gārayhā;
ja393:4.5	Ke nu bhoto pasaṁsiyā”.
ja393:5.1	“Tumhe sīhānaṁ byagghānaṁ,
ja393:5.2	vāḷānañcāvasiṭṭhakaṁ;
ja393:5.3	Ucchiṭṭheneva yāpentā,
ja393:5.4	maññivho vighāsādino.
ja393:6.1	Ye brāhmaṇassa samaṇassa,
ja393:6.2	aññassa vā vanibbino;
ja393:6.3	Datvāva sesaṁ bhuñjanti,
ja393:6.4	te janā vighāsādino”ti.
ja393:7.1	Vighāsādajātakaṁ aṭṭhamaṁ.
ja394:0.1	Jātaka
ja394:0.2	Chakkanipāta
ja394:0.3	Kharaputtavagga
ja394:0.4	9. Vaṭṭakajātaka
ja394:1.1	“Paṇītaṁ bhuñjase bhattaṁ,
ja394:1.2	sappitelañca mātula;
ja394:1.3	Atha kena nu vaṇṇena,
ja394:1.4	kiso tvamasi vāyasa”.
ja394:2.1	“Amittamajjhe vasato,
ja394:2.2	tesu āmisamesato;
ja394:2.3	Niccaṁ ubbiggahadayassa,
ja394:2.4	kuto kākassa daḷhiyaṁ.
ja394:3.1	Niccaṁ ubbegino kākā,
ja394:3.2	dhaṅkā pāpena kammunā;
ja394:3.3	Laddho piṇḍo na pīṇeti,
ja394:3.4	kiso tenasmi vaṭṭaka.
ja394:4.1	Lūkhāni tiṇabījāni,
ja394:4.2	appasnehāni bhuñjasi;
ja394:4.3	Atha kena nu vaṇṇena,
ja394:4.4	thūlo tvamasi vaṭṭaka”.
ja394:5.1	“Appicchā appacintāya,
ja394:5.2	adūragamanena ca;
ja394:5.3	Laddhāladdhena yāpento,
ja394:5.4	thūlo tenasmi vāyasa.
ja394:6.1	Appicchassa hi posassa,
ja394:6.2	appacintasukhassa ca;
ja394:6.3	Susaṅgahitamānassa,
ja394:6.4	vuttī susamudānayā”ti.
ja394:7.1	Vaṭṭakajātakaṁ navamaṁ.
ja395:0.1	Jātaka
ja395:0.2	Chakkanipāta
ja395:0.3	Kharaputtavagga
ja395:0.4	10. Pārāvatajātaka
ja395:1.1	“Cirassaṁ vata passāmi,
ja395:1.2	sahāyaṁ maṇidhārinaṁ;
ja395:1.3	Sukatā massukuttiyā,
ja395:1.4	sobhate vata me sakhā”.
ja395:2.1	“Parūḷhakacchanakhalomo,
ja395:2.2	ahaṁ kammesu byāvaṭo;
ja395:2.3	Cirassaṁ nhāpitaṁ laddhā,
ja395:2.4	lomaṁ taṁ ajja hārayiṁ”.
ja395:3.1	“Yannu lomaṁ ahāresi,
ja395:3.2	dullabhaṁ laddha kappakaṁ;
ja395:3.3	Atha kiñcarahi te samma,
ja395:3.4	kaṇṭhe kiṇikiṇāyati”.
ja395:4.1	“Manussasukhumālānaṁ,
ja395:4.2	maṇi kaṇṭhesu lambati;
ja395:4.3	Tesāhaṁ anusikkhāmi,
ja395:4.4	mā tvaṁ maññi davā kataṁ.
ja395:5.1	Sacepimaṁ pihayasi,
ja395:5.2	massukuttiṁ sukāritaṁ;
ja395:5.3	Kārayissāmi te samma,
ja395:5.4	maṇiñcāpi dadāmi te”.
ja395:6.1	“Tvaññeva maṇinā channo,
ja395:6.2	Sukatāya ca massuyā;
ja395:6.3	Āmanta kho taṁ gacchāmi,
ja395:6.4	Piyaṁ me tavadassanan”ti.
ja395:7.1	Pārāvatajātakaṁ dasamaṁ.
ja395:7.2	Kharaputtavaggo dutiyo.
ja395:8.1	Tassuddānaṁ
ja395:9.1	Atha passa sasūci ca tuṇḍilako,
ja395:9.2	Miga mayhakapañcamapakkhivaro;
ja395:9.3	Atha pañjali vārija mejjha puna,
ja395:9.4	Atha vaṭṭa kapotavarena dasāti.
ja395:10.1	Atha vagguddānaṁ
ja395:11.1	Atha vaggaṁ pakittissaṁ,
ja395:11.2	chanipātaṁ varuttame;
ja395:11.3	Avāriyā ca kharo ca,
ja395:11.4	dve ca vuttā subyañjanāti.
ja395:12.1	Chakkanipātaṁ niṭṭhitaṁ.
ja396:0.1	Jātaka
ja396:0.2	Sattakanipāta
ja396:0.3	Kukkuvagga
ja396:0.4	1. Kukkujātaka
ja396:1.1	“Diyaḍḍhakukkū udayena kaṇṇikā,
ja396:1.2	Vidatthiyo aṭṭha parikkhipanti naṁ;
ja396:1.3	Sā siṁsapā sāramayā apheggukā,
ja396:1.4	Kuhiṁ ṭhitā upparito na dhaṁsati”.
ja396:2.1	“Yā tiṁsati sāramayā anujjukā,
ja396:2.2	Parikiriya gopānasiyo samaṁ ṭhitā;
ja396:2.3	Tāhi susaṅgahitā balasā pīḷitā,
ja396:2.4	Samaṁ ṭhitā upparito na dhaṁsati.
ja396:3.1	Evampi mittehi daḷhehi paṇḍito,
ja396:3.2	Abhejjarūpehi sucīhi mantibhi;
ja396:3.3	Susaṅgahīto siriyā na dhaṁsati,
ja396:3.4	Gopānasī bhāravahāva kaṇṇikā.
ja396:4.1	Kharattacaṁ bellaṁ yathāpi satthavā,
ja396:4.2	Anāmasantopi karoti tittakaṁ;
ja396:4.3	Samāharaṁ sāduṁ karoti patthiva,
ja396:4.4	Asāduṁ kayirā tanubandhamuddharaṁ.
ja396:5.1	Evampi gāmanigamesu paṇḍito,
ja396:5.2	Asāhasaṁ rājadhanāni saṅgharaṁ;
ja396:5.3	Dhammānuvattī paṭipajjamāno,
ja396:5.4	Sa phāti kayirā aviheṭhayaṁ paraṁ.
ja396:6.1	Odātamūlaṁ sucivārisambhavaṁ,
ja396:6.2	Jātaṁ yathā pokkharaṇīsu ambujaṁ;
ja396:6.3	Padumaṁ yathā agginikāsiphālimaṁ,
ja396:6.4	Na kaddamo na rajo na vāri limpati.
ja396:7.1	Evampi vohārasuciṁ asāhasaṁ,
ja396:7.2	Visuddhakammantamapetapāpakaṁ;
ja396:7.3	Na limpati kammakilesa tādiso,
ja396:7.4	Jātaṁ yathā pokkharaṇīsu ambujan”ti.
ja396:8.1	Kukkujātakaṁ paṭhamaṁ.
ja397:0.1	Jātaka
ja397:0.2	Sattakanipāta
ja397:0.3	Kukkuvagga
ja397:0.4	2. Manojajātaka
ja397:1.1	“Yathā cāpo ninnamati,
ja397:1.2	jiyā cāpi nikūjati;
ja397:1.3	Haññate nūna manojo,
ja397:1.4	migarājā sakhā mama.
ja397:2.1	Handa dāni vanantāni,
ja397:2.2	pakkamāmi yathāsukhaṁ;
ja397:2.3	Netādisā sakhā honti,
ja397:2.4	labbhā me jīvato sakhā”.
ja397:3.1	“Na pāpajanasaṁsevī,
ja397:3.2	accantaṁ sukhamedhati;
ja397:3.3	Manojaṁ passa semānaṁ,
ja397:3.4	giriyassānusāsanī”.
ja397:4.1	“Na pāpasampavaṅkena,
ja397:4.2	mātā puttena nandati;
ja397:4.3	Manojaṁ passa semānaṁ,
ja397:4.4	acchannaṁ samhi lohite”.
ja397:5.1	“Evamāpajjate poso,
ja397:5.2	pāpiyo ca nigacchati;
ja397:5.3	Yo ve hitānaṁ vacanaṁ,
ja397:5.4	na karoti atthadassinaṁ”.
ja397:6.1	“Evañca so hoti tato ca pāpiyo,
ja397:6.2	Yo uttamo adhamajanūpasevī;
ja397:6.3	Passuttamaṁ adhamajanūpasevitaṁ,
ja397:6.4	Migādhipaṁ saravaraveganiddhutaṁ”.
ja397:7.1	“Nihīyati puriso nihīnasevī,
ja397:7.2	Na ca hāyetha kadāci tulyasevī;
ja397:7.3	Seṭṭhamupagamaṁ udeti khippaṁ,
ja397:7.4	Tasmāttanā uttaritaraṁ bhajethā”ti.
ja397:8.1	Manojajātakaṁ dutiyaṁ.
ja398:0.1	Jātaka
ja398:0.2	Sattakanipāta
ja398:0.3	Kukkuvagga
ja398:0.4	3. Sutanujātaka
ja398:1.1	“Rājā te bhattaṁ pāhesi,
ja398:1.2	Suciṁ maṁsūpasecanaṁ;
ja398:1.3	Maghadevasmiṁ adhivatthe,
ja398:1.4	Ehi nikkhamma bhuñjasu”.
ja398:2.1	“Ehi māṇava orena,
ja398:2.2	bhikkhamādāya sūpitaṁ;
ja398:2.3	Tvañca māṇava bhikkhā ca,
ja398:2.4	ubho bhakkhā bhavissatha”.
ja398:3.1	“Appakena tuvaṁ yakkha,
ja398:3.2	thullamatthaṁ jahissasi;
ja398:3.3	Bhikkhaṁ te nāharissanti,
ja398:3.4	janā maraṇasaññino.
ja398:4.1	Laddhāya yakkhā tava niccabhikkhaṁ,
ja398:4.2	Suciṁ paṇītaṁ rasasā upetaṁ;
ja398:4.3	Bhikkhañca te āhariyo naro idha,
ja398:4.4	Sudullabho hehiti bhakkhite mayi”.
ja398:5.1	“Mameva sutano attho,
ja398:5.2	yathā bhāsasi māṇava;
ja398:5.3	Mayā tvaṁ samanuññāto,
ja398:5.4	sotthiṁ passāhi mātaraṁ.
ja398:6.1	Khaggaṁ chattañca pātiñca,
ja398:6.2	gacchamādāya māṇava;
ja398:6.3	Sotthiṁ passatu te mātā,
ja398:6.4	tvañca passāhi mātaraṁ”.
ja398:7.1	“Evaṁ yakkha sukhī hohi,
ja398:7.2	saha sabbehi ñātibhi;
ja398:7.3	Dhanañca me adhigataṁ,
ja398:7.4	rañño ca vacanaṁ katan”ti.
ja398:8.1	Sutanujātakaṁ tatiyaṁ.
ja399:0.1	Jātaka
ja399:0.2	Sattakanipāta
ja399:0.3	Kukkuvagga
ja399:0.4	4. Mātuposakagijjhajātaka
ja399:1.1	“Te kathaṁ nu karissanti,
ja399:1.2	vuddhā giridarīsayā;
ja399:1.3	Ahaṁ baddhosmi pāsena,
ja399:1.4	nilīyassa vasaṁ gato”.
ja399:2.1	“Kiṁ gijjha paridevasi,
ja399:2.2	kā nu te paridevanā;
ja399:2.3	Na me suto vā diṭṭho vā,
ja399:2.4	bhāsanto mānusiṁ dijo”.
ja399:3.1	“Bharāmi mātāpitaro,
ja399:3.2	vuddhe giridarīsaye;
ja399:3.3	Te kathaṁ nu karissanti,
ja399:3.4	ahaṁ vasaṁ gato tava”.
ja399:4.1	“Yannu gijjho yojanasataṁ,
ja399:4.2	kuṇapāni avekkhati;
ja399:4.3	Kasmā jālañca pāsañca,
ja399:4.4	āsajjāpi na bujjhasi”.
ja399:5.1	“Yadā parābhavo hoti,
ja399:5.2	poso jīvitasaṅkhaye;
ja399:5.3	Atha jālañca pāsañca,
ja399:5.4	āsajjāpi na bujjhati”.
ja399:6.1	“Bharassu mātāpitaro,
ja399:6.2	vuddhe giridarīsaye;
ja399:6.3	Mayā tvaṁ samanuññāto,
ja399:6.4	sotthiṁ passāhi ñātake”.
ja399:7.1	“Evaṁ luddaka nandassu,
ja399:7.2	saha sabbehi ñātibhi;
ja399:7.3	Bharissaṁ mātāpitaro,
ja399:7.4	vuddhe giridarīsaye”ti.
ja399:8.1	Mātuposakagijjhajātakaṁ catutthaṁ.
ja400:0.1	Jātaka
ja400:0.2	Sattakanipāta
ja400:0.3	Kukkuvagga
ja400:0.4	5. Dabbhapupphajātaka
ja400:1.1	“Anutīracārī bhaddante,
ja400:1.2	sahāyamanudhāva maṁ;
ja400:1.3	Mahā me gahito maccho,
ja400:1.4	so maṁ harati vegasā”.
ja400:2.1	“Gambhīracārī bhaddante,
ja400:2.2	daḷhaṁ gaṇhāhi thāmasā;
ja400:2.3	Ahaṁ taṁ uddharissāmi,
ja400:2.4	supaṇṇo uragāmiva”.
ja400:3.1	“Vivādo no samuppanno,
ja400:3.2	dabbhapuppha suṇohi me;
ja400:3.3	Samehi medhagaṁ samma,
ja400:3.4	vivādo vūpasammataṁ”.
ja400:4.1	“Dhammaṭṭhohaṁ pure āsiṁ,
ja400:4.2	bahū aḍḍā me tīritā;
ja400:4.3	Samemi medhagaṁ samma,
ja400:4.4	vivādo vūpasammataṁ.
ja400:5.1	Anutīracāri naṅguṭṭhaṁ,
ja400:5.2	sīsaṁ gambhīracārino;
ja400:5.3	Accāyaṁ majjhimo khaṇḍo,
ja400:5.4	dhammaṭṭhassa bhavissati”.
ja400:6.1	“Cirampi bhakkho abhavissa,
ja400:6.2	sace na vivademase;
ja400:6.3	Asīsakaṁ anaṅguṭṭhaṁ,
ja400:6.4	siṅgālo harati rohitaṁ”.
ja400:7.1	“Yathāpi rājā nandeyya,
ja400:7.2	rajjaṁ laddhāna khattiyo;
ja400:7.3	Evāhamajja nandāmi,
ja400:7.4	disvā puṇṇamukhaṁ patiṁ.
ja400:8.1	Kathaṁ nu thalajo santo,
ja400:8.2	udake macchaṁ parāmasi;
ja400:8.3	Puṭṭho me samma akkhāhi,
ja400:8.4	kathaṁ adhigataṁ tayā”.
ja400:9.1	“Vivādena kisā honti,
ja400:9.2	vivādena dhanakkhayā;
ja400:9.3	Jīnā uddā vivādena,
ja400:9.4	bhuñja māyāvi rohitaṁ.
ja400:10.1	Evameva manussesu,
ja400:10.2	vivādo yattha jāyati;
ja400:10.3	Dhammaṭṭhaṁ paṭidhāvanti,
ja400:10.4	so hi nesaṁ vināyako;
ja400:10.5	Dhanāpi tattha jīyanti,
ja400:10.6	rājakoso pavaḍḍhatī”ti.
ja400:11.1	Dabbhapupphajātakaṁ pañcamaṁ.
ja401:0.1	Jātaka
ja401:0.2	Sattakanipāta
ja401:0.3	Kukkuvagga
ja401:0.4	6. Paṇṇakajātaka
ja401:1.1	“Paṇṇakaṁ tikhiṇadhāraṁ,
ja401:1.2	Asiṁ sampannapāyinaṁ;
ja401:1.3	Parisāyaṁ puriso gilati,
ja401:1.4	Kiṁ dukkarataraṁ tato;
ja401:1.5	Yadaññaṁ dukkaraṁ ṭhānaṁ,
ja401:1.6	Taṁ me akkhāhi pucchito”.
ja401:2.1	“Gileyya puriso lobhā,
ja401:2.2	asiṁ sampannapāyinaṁ;
ja401:2.3	Yo ca vajjā dadāmīti,
ja401:2.4	taṁ dukkarataraṁ tato;
ja401:2.5	Sabbaññaṁ sukaraṁ ṭhānaṁ,
ja401:2.6	evaṁ jānāhi maddava”.
ja401:3.1	“Byākāsi āyuro pañhaṁ,
ja401:3.2	atthaṁ dhammassa kovido;
ja401:3.3	Pukkusaṁ dāni pucchāmi,
ja401:3.4	kiṁ dukkarataraṁ tato;
ja401:3.5	Yadaññaṁ dukkaraṁ ṭhānaṁ,
ja401:3.6	taṁ me akkhāhi pucchito”.
ja401:4.1	“Na vācamupajīvanti,
ja401:4.2	aphalaṁ giramudīritaṁ;
ja401:4.3	Yo ca datvā avākayirā,
ja401:4.4	taṁ dukkarataraṁ tato;
ja401:4.5	Sabbaññaṁ sukaraṁ ṭhānaṁ,
ja401:4.6	evaṁ jānāhi maddava”.
ja401:5.1	“Byākāsi pukkuso pañhaṁ,
ja401:5.2	atthaṁ dhammassa kovido;
ja401:5.3	Senakaṁ dāni pucchāmi,
ja401:5.4	kiṁ dukkarataraṁ tato;
ja401:5.5	Yadaññaṁ dukkaraṁ ṭhānaṁ,
ja401:5.6	taṁ me akkhāhi pucchito”.
ja401:6.1	“Dadeyya puriso dānaṁ,
ja401:6.2	appaṁ vā yadi vā bahuṁ;
ja401:6.3	Yo ca datvā nānutappe,
ja401:6.4	taṁ dukkarataraṁ tato;
ja401:6.5	Sabbaññaṁ sukaraṁ ṭhānaṁ,
ja401:6.6	evaṁ jānāhi maddava”.
ja401:7.1	“Byākāsi āyuro pañhaṁ,
ja401:7.2	atho pukkusaporiso;
ja401:7.3	Sabbe pañhe atibhoti,
ja401:7.4	yathā bhāsati senako”ti.
ja401:8.1	Paṇṇakajātakaṁ chaṭṭhaṁ.
ja402:0.1	Jātaka
ja402:0.2	Sattakanipāta
ja402:0.3	Kukkuvagga
ja402:0.4	7. Sattubhastajātaka
ja402:1.1	“Vibbhantacitto kupitindriyosi,
ja402:1.2	Nettehi te vārigaṇā savanti;
ja402:1.3	Kiṁ te naṭṭhaṁ kiṁ pana patthayāno,
ja402:1.4	Idhāgamā brahme tadiṅgha brūhi”.
ja402:2.1	“Miyyetha bhariyā vajato mamajja,
ja402:2.2	Agacchato maraṇamāha yakkho;
ja402:2.3	Etena dukkhena pavedhitosmi,
ja402:2.4	Akkhāhi me senaka etamatthaṁ”.
ja402:3.1	“Bahūni ṭhānāni vicintayitvā,
ja402:3.2	Yamettha vakkhāmi tadeva saccaṁ;
ja402:3.3	Maññāmi te brāhmaṇa sattubhastaṁ,
ja402:3.4	Ajānato kaṇhasappo paviṭṭho.
ja402:4.1	Ādāya daṇḍaṁ parisumbha bhastaṁ,
ja402:4.2	Passeḷamūgaṁ uragaṁ dujivhaṁ;
ja402:4.3	Chindajja kaṅkhaṁ vicikicchitāni,
ja402:4.4	Bhujaṅgamaṁ passa pamuñca bhastaṁ”.
ja402:5.1	Saṁviggarūpo parisāya majjhe,
ja402:5.2	So brāhmaṇo sattubhastaṁ pamuñci;
ja402:5.3	Atha nikkhami urago uggatejo,
ja402:5.4	Āsīviso sappo phaṇaṁ karitvā.
ja402:6.1	“Suladdhalābhā janakassa rañño,
ja402:6.2	Yo passatī senakaṁ sādhupaññaṁ;
ja402:6.3	Vivaṭṭachaddo nusi sabbadassī,
ja402:6.4	Ñāṇaṁ nu te brāhmaṇa bhiṁsarūpaṁ”.
ja402:7.1	“Imāni me sattasatāni atthi,
ja402:7.2	Gaṇhāhi sabbāni dadāmi tuyhaṁ;
ja402:7.3	Tayā hi me jīvitamajja laddhaṁ,
ja402:7.4	Athopi bhariyāya makāsi sotthiṁ”.
ja402:8.1	“Na paṇḍitā vetanamādiyanti,
ja402:8.2	Citrāhi gāthāhi subhāsitāhi;
ja402:8.3	Itopi te brahme dadantu vittaṁ,
ja402:8.4	Ādāya tvaṁ gaccha sakaṁ niketan”ti.
ja402:9.1	Sattubhastajātakaṁ sattamaṁ.
ja403:0.1	Jātaka
ja403:0.2	Sattakanipāta
ja403:0.3	Kukkuvagga
ja403:0.4	8. Aṭṭhisenakajātaka
ja403:1.1	“Yeme ahaṁ na jānāmi,
ja403:1.2	aṭṭhisena vanibbake;
ja403:1.3	Te maṁ saṅgamma yācanti,
ja403:1.4	kasmā maṁ tvaṁ na yācasi”.
ja403:2.1	“Yācako appiyo hoti,
ja403:2.2	yācaṁ adadamappiyo;
ja403:2.3	Tasmāhaṁ taṁ na yācāmi,
ja403:2.4	mā me videssanā ahu”.
ja403:3.1	“Yo ve yācanajīvāno,
ja403:3.2	kāle yācaṁ na yācati;
ja403:3.3	Parañca puññā dhaṁseti,
ja403:3.4	attanāpi na jīvati.
ja403:4.1	Yo ca yācanajīvāno,
ja403:4.2	kāle yācañhi yācati;
ja403:4.3	Parañca puññaṁ labbheti,
ja403:4.4	attanāpi ca jīvati.
ja403:5.1	Na ve dessanti sappaññā,
ja403:5.2	Disvā yācakamāgate;
ja403:5.3	Brahmacāri piyo mesi,
ja403:5.4	Vada tvaṁ bhaññamicchasi”.
ja403:6.1	“Na ve yācanti sappaññā,
ja403:6.2	Dhīro ca veditumarahati;
ja403:6.3	Uddissa ariyā tiṭṭhanti,
ja403:6.4	Esā ariyāna yācanā”.
ja403:7.1	“Dadāmi te brāhmaṇa rohiṇīnaṁ,
ja403:7.2	Gavaṁ sahassaṁ saha puṅgavena;
ja403:7.3	Ariyo hi ariyassa kathaṁ na dajjā,
ja403:7.4	Sutvāna gāthā tava dhammayuttā”ti.
ja403:8.1	Aṭṭhisenakajātakaṁ aṭṭhamaṁ.
ja404:0.1	Jātaka
ja404:0.2	Sattakanipāta
ja404:0.3	Kukkuvagga
ja404:0.4	9. Kapijātaka
ja404:1.1	“Yattha verī nivasati,
ja404:1.2	na vase tattha paṇḍito;
ja404:1.3	Ekarattaṁ dirattaṁ vā,
ja404:1.4	dukkhaṁ vasati verisu.
ja404:2.1	Diso ve lahucittassa,
ja404:2.2	posassānuvidhīyato;
ja404:2.3	Ekassa kapino hetu,
ja404:2.4	yūthassa anayo kato.
ja404:3.1	Bālova paṇḍitamānī,
ja404:3.2	yūthassa parihārako;
ja404:3.3	Sacittassa vasaṁ gantvā,
ja404:3.4	sayethāyaṁ yathā kapi.
ja404:4.1	Na sādhu balavā bālo,
ja404:4.2	yūthassa parihārako;
ja404:4.3	Ahito bhavati ñātīnaṁ,
ja404:4.4	sakuṇānaṁva cetako.
ja404:5.1	Dhīrova balavā sādhu,
ja404:5.2	yūthassa parihārako;
ja404:5.3	Hito bhavati ñātīnaṁ,
ja404:5.4	tidasānaṁva vāsavo.
ja404:6.1	Yo ca sīlañca paññañca,
ja404:6.2	sutañcattani passati;
ja404:6.3	Ubhinnamatthaṁ carati,
ja404:6.4	attano ca parassa ca.
ja404:7.1	Tasmā tuleyya mattānaṁ,
ja404:7.2	sīlapaññāsutāmiva;
ja404:7.3	Gaṇaṁ vā parihare dhīro,
ja404:7.4	eko vāpi paribbaje”ti.
ja404:8.1	Kapijātakaṁ navamaṁ.
ja405:0.1	Jātaka
ja405:0.2	Sattakanipāta
ja405:0.3	Kukkuvagga
ja405:0.4	10. Bakajātaka
ja405:1.1	“Dvāsattati gotama puññakammā,
ja405:1.2	Vasavattino jātijaraṁ atītā;
ja405:1.3	Ayamantimā vedagū brahmapatti,
ja405:1.4	Asmābhijappanti janā anekā”.
ja405:2.1	“Appañhi etaṁ na hi dīghamāyu,
ja405:2.2	Yaṁ tvaṁ baka maññasi dīghamāyuṁ;
ja405:2.3	Sataṁ sahassāni nirabbudānaṁ,
ja405:2.4	Āyuṁ pajānāmi tavāha brahme”.
ja405:3.1	“Anantadassī bhagavāhamasmi,
ja405:3.2	Jātijjaraṁ sokamupātivatto;
ja405:3.3	Kiṁ me purāṇaṁ vatasīlavattaṁ,
ja405:3.4	Ācikkha me taṁ yamahaṁ vijaññaṁ”.
ja405:4.1	“Yaṁ tvaṁ apāyesi bahū manusse,
ja405:4.2	Pipāsite ghammani samparete;
ja405:4.3	Taṁ te purāṇaṁ vatasīlavattaṁ,
ja405:4.4	Suttappabuddhova anussarāmi.
ja405:5.1	Yaṁ eṇikūlasmi janaṁ gahītaṁ,
ja405:5.2	Amocayī gayhaka niyyamānaṁ;
ja405:5.3	Taṁ te purāṇaṁ vatasīlavattaṁ,
ja405:5.4	Suttappabuddhova anussarāmi.
ja405:6.1	Gaṅgāya sotasmiṁ gahītanāvaṁ,
ja405:6.2	Luddena nāgena manussakappā;
ja405:6.3	Amocayi tvaṁ balasā pasayha,
ja405:6.4	Taṁ te purāṇaṁ vatasīlavattaṁ;
ja405:6.5	Suttappabuddhova anussarāmi.
ja405:7.1	Kappo ca te baddhacaro ahosiṁ,
ja405:7.2	Sambuddhimantaṁ vatinaṁ amaññaṁ;
ja405:7.3	Taṁ te purāṇaṁ vatasīlavattaṁ,
ja405:7.4	Suttappabuddhova anussarāmi”.
ja405:8.1	“Addhā pajānāsi mametamāyuṁ,
ja405:8.2	Aññampi jānāsi tathā hi buddho;
ja405:8.3	Tathā hi tāyaṁ jalitānubhāvo,
ja405:8.4	Obhāsayaṁ tiṭṭhati brahmalokan”ti.
ja405:9.1	Bakajātakaṁ dasamaṁ.
ja405:9.2	Kukkuvaggo paṭhamo.
ja405:10.1	Tassuddānaṁ
ja405:11.1	Varakaṇṇika cāpavaro sutano,
ja405:11.2	Atha gijjha sarohitamacchavaro;
ja405:11.3	Puna paṇṇaka senaka yācanako,
ja405:11.4	Atha veri sabrahmabakena dasāti.
ja406:0.1	Jātaka
ja406:0.2	Sattakanipāta
ja406:0.3	Gandhāravagga
ja406:0.4	1. Gandhārajātaka
ja406:1.1	“Hitvā gāmasahassāni,
ja406:1.2	paripuṇṇāni soḷasa;
ja406:1.3	Koṭṭhāgārāni phītāni,
ja406:1.4	sannidhiṁ dāni kubbasi”.
ja406:2.1	“Hitvā gandhāravisayaṁ,
ja406:2.2	pahūtadhanadhāriyaṁ;
ja406:2.3	Pasāsanato nikkhanto,
ja406:2.4	idha dāni pasāsasi”.
ja406:3.1	“Dhammaṁ bhaṇāmi vedeha,
ja406:3.2	adhammo me na ruccati;
ja406:3.3	Dhammaṁ me bhaṇamānassa,
ja406:3.4	na pāpamupalimpati”.
ja406:4.1	“Yena kenaci vaṇṇena,
ja406:4.2	paro labhati ruppanaṁ;
ja406:4.3	Mahatthiyampi ce vācaṁ,
ja406:4.4	na taṁ bhāseyya paṇḍito”.
ja406:5.1	“Kāmaṁ ruppatu vā mā vā,
ja406:5.2	bhusaṁva vikirīyatu;
ja406:5.3	Dhammaṁ me bhaṇamānassa,
ja406:5.4	na pāpamupalimpati”.
ja406:6.1	“No ce assa sakā buddhi,
ja406:6.2	vinayo vā susikkhito;
ja406:6.3	Vane andhamahiṁsova,
ja406:6.4	careyya bahuko jano.
ja406:7.1	Yasmā ca panidhekacce,
ja406:7.2	āceramhi susikkhitā;
ja406:7.3	Tasmā vinītavinayā,
ja406:7.4	caranti susamāhitā”ti.
ja406:8.1	Gandhārajātakaṁ paṭhamaṁ.
ja407:0.1	Jātaka
ja407:0.2	Sattakanipāta
ja407:0.3	Gandhāravagga
ja407:0.4	2. Mahākapijātaka
ja407:1.1	“Attānaṁ saṅkamaṁ katvā,
ja407:1.2	Yo sotthiṁ samatārayi;
ja407:1.3	Kiṁ tvaṁ tesaṁ kime tuyhaṁ,
ja407:1.4	Honti ete mahākapi”.
ja407:2.1	“Rājāhaṁ issaro tesaṁ,
ja407:2.2	yūthassa parihārako;
ja407:2.3	Tesaṁ sokaparetānaṁ,
ja407:2.4	bhītānaṁ te arindama.
ja407:3.1	Ullaṅghayitvā attānaṁ,
ja407:3.2	vissaṭṭhadhanuno sataṁ;
ja407:3.3	Tato aparapādesu,
ja407:3.4	daḷhaṁ bandhaṁ latāguṇaṁ.
ja407:4.1	Chinnabbhamiva vātena,
ja407:4.2	Nuṇṇo rukkhaṁ upāgamiṁ;
ja407:4.3	Sohaṁ appabhavaṁ tattha,
ja407:4.4	Sākhaṁ hatthehi aggahiṁ.
ja407:5.1	Taṁ maṁ viyāyataṁ santaṁ,
ja407:5.2	sākhāya ca latāya ca;
ja407:5.3	Samanukkamantā pādehi,
ja407:5.4	sotthiṁ sākhāmigā gatā.
ja407:6.1	Taṁ maṁ na tapate bandho,
ja407:6.2	mato me na tapessati;
ja407:6.3	Sukhamāharitaṁ tesaṁ,
ja407:6.4	yesaṁ rajjamakārayiṁ.
ja407:7.1	Esā te upamā rāja,
ja407:7.2	taṁ suṇohi arindama;
ja407:7.3	Raññā raṭṭhassa yoggassa,
ja407:7.4	balassa nigamassa ca;
ja407:7.5	Sabbesaṁ sukhameṭṭhabbaṁ,
ja407:7.6	khattiyena pajānatā”ti.
ja407:8.1	Mahākapijātakaṁ dutiyaṁ.
ja408:0.1	Jātaka
ja408:0.2	Sattakanipāta
ja408:0.3	Gandhāravagga
ja408:0.4	3. Kumbhakārajātaka
ja408:1.1	“Ambāhamaddaṁ vanamantarasmiṁ,
ja408:1.2	Nīlobhāsaṁ phalitaṁ saṁvirūḷhaṁ;
ja408:1.3	Tamaddasaṁ phalahetu vibhaggaṁ,
ja408:1.4	Taṁ disvā bhikkhācariyaṁ carāmi.
ja408:2.1	Selaṁ sumaṭṭhaṁ naravīraniṭṭhitaṁ,
ja408:2.2	Nārī yugaṁ dhārayi appasaddaṁ;
ja408:2.3	Dutiyañca āgamma ahosi saddo,
ja408:2.4	Taṁ disvā bhikkhācariyaṁ carāmi.
ja408:3.1	Dijā dijaṁ kuṇapamāharantaṁ,
ja408:3.2	Ekaṁ samānaṁ bahukā samecca;
ja408:3.3	Āhārahetū paripātayiṁsu,
ja408:3.4	Taṁ disvā bhikkhācariyaṁ carāmi.
ja408:4.1	Usabhāhamaddaṁ yūthassa majjhe,
ja408:4.2	Calakkakuṁ vaṇṇabalūpapannaṁ;
ja408:4.3	Tamaddasaṁ kāmahetu vitunnaṁ,
ja408:4.4	Taṁ disvā bhikkhācariyaṁ carāmi”.
ja408:5.1	“Karaṇḍako kaliṅgānaṁ,
ja408:5.2	gandhārānañca naggaji;
ja408:5.3	Nimirājā videhānaṁ,
ja408:5.4	pañcālānañca dummukho;
ja408:5.5	Ete raṭṭhāni hitvāna,
ja408:5.6	pabbajiṁsu akiñcanā.
ja408:6.1	Sabbepime devasamā samāgatā,
ja408:6.2	Aggī yathā pajjalito tathevime;
ja408:6.3	Ahampi eko carissāmi bhaggavi,
ja408:6.4	Hitvāna kāmāni yathodhikāni”.
ja408:7.1	“Ayameva kālo na hi añño atthi,
ja408:7.2	Anusāsitā me na bhaveyya pacchā;
ja408:7.3	Ahampi ekā carissāmi bhaggava,
ja408:7.4	Sakuṇīva muttā purisassa hatthā”.
ja408:8.1	“Āmaṁ pakkañca jānanti,
ja408:8.2	atho loṇaṁ aloṇakaṁ;
ja408:8.3	Tamahaṁ disvāna pabbajiṁ,
ja408:8.4	careva tvaṁ carāmahan”ti.
ja408:9.1	Kumbhakārajātakaṁ tatiyaṁ.
ja409:0.1	Jātaka
ja409:0.2	Sattakanipāta
ja409:0.3	Gandhāravagga
ja409:0.4	4. Daḷhadhammajātaka
ja409:1.1	“Ahañce daḷhadhammassa,
ja409:1.2	vahantī nābhirādhayiṁ;
ja409:1.3	Dharantī urasi sallaṁ,
ja409:1.4	yuddhe vikkantacārinī.
ja409:2.1	Nūna rājā na jānāti,
ja409:2.2	mama vikkamaporisaṁ;
ja409:2.3	Saṅgāme sukatantāni,
ja409:2.4	dūtavippahitāni ca.
ja409:3.1	Sā nūnāhaṁ marissāmi,
ja409:3.2	abandhu aparāyinī;
ja409:3.3	Tadā hi kumbhakārassa,
ja409:3.4	dinnā chakaṇahārikā”.
ja409:4.1	“Yāvatāsīsatī poso,
ja409:4.2	tāvadeva pavīṇati;
ja409:4.3	Atthāpāye jahanti naṁ,
ja409:4.4	oṭṭhibyādhiṁva khattiyo.
ja409:5.1	Yo pubbe katakalyāṇo,
ja409:5.2	katattho nāvabujjhati;
ja409:5.3	Atthā tassa palujjanti,
ja409:5.4	ye honti abhipatthitā.
ja409:6.1	Yo pubbe katakalyāṇo,
ja409:6.2	katattho manubujjhati;
ja409:6.3	Atthā tassa pavaḍḍhanti,
ja409:6.4	ye honti abhipatthitā.
ja409:7.1	Taṁ vo vadāmi bhaddante,
ja409:7.2	yāvantettha samāgatā;
ja409:7.3	Sabbe kataññuno hotha,
ja409:7.4	ciraṁ saggamhi ṭhassathā”ti.
ja409:8.1	Daḷhadhammajātakaṁ catutthaṁ.
ja410:0.1	Jātaka
ja410:0.2	Sattakanipāta
ja410:0.3	Gandhāravagga
ja410:0.4	5. Somadattajātaka
ja410:1.1	“Yo maṁ pure paccuḍḍeti,
ja410:1.2	araññe dūramāyato;
ja410:1.3	So na dissati mātaṅgo,
ja410:1.4	somadatto kuhiṁ gato.
ja410:2.1	Ayaṁ vā so mato seti,
ja410:2.2	allasiṅgaṁva vacchito;
ja410:2.3	Bhumyā nipatito seti,
ja410:2.4	amarā vata kuñjaro”.
ja410:3.1	“Anagāriyupetassa,
ja410:3.2	vippamuttassa te sato;
ja410:3.3	Samaṇassa na taṁ sādhu,
ja410:3.4	yaṁ petamanusocasi”.
ja410:4.1	“Saṁvāsena have sakka,
ja410:4.2	manussassa migassa vā;
ja410:4.3	Hadaye jāyate pemaṁ,
ja410:4.4	taṁ na sakkā asocituṁ”.
ja410:5.1	“Mataṁ marissaṁ rodanti,
ja410:5.2	ye rudanti lapanti ca;
ja410:5.3	Tasmā tvaṁ isi mā rodi,
ja410:5.4	roditaṁ moghamāhu santo.
ja410:6.1	Kanditena have brahme,
ja410:6.2	mato peto samuṭṭhahe;
ja410:6.3	Sabbe saṅgamma rodāma,
ja410:6.4	aññamaññassa ñātake”.
ja410:7.1	“Ādittaṁ vata maṁ santaṁ,
ja410:7.2	ghatasittaṁva pāvakaṁ;
ja410:7.3	Vārinā viya osiñcaṁ,
ja410:7.4	sabbaṁ nibbāpaye daraṁ.
ja410:8.1	Abbahī vata me sallaṁ,
ja410:8.2	yamāsi hadayassitaṁ;
ja410:8.3	Yo me sokaparetassa,
ja410:8.4	puttasokaṁ apānudi.
ja410:9.1	Sohaṁ abbūḷhasallosmi,
ja410:9.2	vītasoko anāvilo;
ja410:9.3	Na socāmi na rodāmi,
ja410:9.4	tava sutvāna vāsavā”ti.
ja410:10.1	Somadattajātakaṁ pañcamaṁ.
ja411:0.1	Jātaka
ja411:0.2	Sattakanipāta
ja411:0.3	Gandhāravagga
ja411:0.4	6. Susīmajātaka
ja411:1.1	“Kāḷāni kesāni pure ahesuṁ,
ja411:1.2	Jātāni sīsamhi yathāpadese;
ja411:1.3	Tānajja setāni susīma disvā,
ja411:1.4	Dhammaṁ cara brahmacariyassa kālo”.
ja411:2.1	“Mameva deva palitaṁ na tuyhaṁ,
ja411:2.2	Mameva sīsaṁ mama uttamaṅgaṁ;
ja411:2.3	‘Atthaṁ karissan’ti musā abhāṇiṁ,
ja411:2.4	Ekāparādhaṁ khama rājaseṭṭha.
ja411:3.1	Daharo tuvaṁ dassaniyosi rāja,
ja411:3.2	Paṭhamuggato hosi yathā kaḷīro;
ja411:3.3	Rajjañca kārehi mamañca passa,
ja411:3.4	Mā kālikaṁ anudhāvī janinda”.
ja411:4.1	“Passāmi vohaṁ dahariṁ kumāriṁ,
ja411:4.2	Sāmaṭṭhapassaṁ sutanuṁ sumajjhaṁ;
ja411:4.3	Kāḷappavāḷāva pavellamānā,
ja411:4.4	Palobhayantīva naresu gacchati.
ja411:5.1	Tamena passāmiparena nāriṁ,
ja411:5.2	Āsītikaṁ nāvutikaṁ va jaccā;
ja411:5.3	Daṇḍaṁ gahetvāna pavedhamānaṁ,
ja411:5.4	Gopānasībhoggasamaṁ carantiṁ.
ja411:6.1	Sohaṁ tamevānuvicintayanto,
ja411:6.2	Eko sayāmi sayanassa majjhe;
ja411:6.3	‘Ahampi evaṁ’ iti pekkhamāno,
ja411:6.4	Na gahe rame brahmacariyassa kālo.
ja411:7.1	Rajjuvālambanī cesā,
ja411:7.2	Yā gehe vasato rati;
ja411:7.3	Evampi chetvāna vajanti dhīrā,
ja411:7.4	Anapekkhino kāmasukhaṁ pahāyā”ti.
ja411:8.1	Susīmajātakaṁ chaṭṭhaṁ.
ja412:0.1	Jātaka
ja412:0.2	Sattakanipāta
ja412:0.3	Gandhāravagga
ja412:0.4	7. Koṭasimbalijātaka
ja412:1.1	“Ahaṁ dasasataṁbyāmaṁ,
ja412:1.2	uragamādāya āgato;
ja412:1.3	Tañca mañca mahākāyaṁ,
ja412:1.4	dhārayaṁ nappavedhasi.
ja412:2.1	Athimaṁ khuddakaṁ pakkhiṁ,
ja412:2.2	Appamaṁsataraṁ mayā;
ja412:2.3	Dhārayaṁ byathasi bhītā,
ja412:2.4	Kamatthaṁ koṭasimbali”.
ja412:3.1	“Maṁsabhakkho tuvaṁ rāja,
ja412:3.2	phalabhakkho ayaṁ dijo;
ja412:3.3	Ayaṁ nigrodhabījāni,
ja412:3.4	pilakkhudumbarāni ca;
ja412:3.5	Assatthāni ca bhakkhitvā,
ja412:3.6	khandhe me ohadissati.
ja412:4.1	Te rukkhā saṁvirūhanti,
ja412:4.2	mama passe nivātajā;
ja412:4.3	Te maṁ pariyonandhissanti,
ja412:4.4	arukkhaṁ maṁ karissare.
ja412:5.1	Santi aññepi rukkhā se,
ja412:5.2	mūlino khandhino dumā;
ja412:5.3	Iminā sakuṇajātena,
ja412:5.4	bījamāharitā hatā.
ja412:6.1	Ajjhārūhābhivaḍḍhanti,
ja412:6.2	brahantampi vanappatiṁ;
ja412:6.3	Tasmā rāja pavedhāmi,
ja412:6.4	sampassaṁnāgataṁ bhayaṁ”.
ja412:7.1	“Saṅkeyya saṅkitabbāni,
ja412:7.2	rakkheyyānāgataṁ bhayaṁ;
ja412:7.3	Anāgatabhayā dhīro,
ja412:7.4	ubho loke avekkhatī”ti.
ja412:8.1	Koṭasimbalijātakaṁ sattamaṁ.
ja413:0.1	Jātaka
ja413:0.2	Sattakanipāta
ja413:0.3	Gandhāravagga
ja413:0.4	8. Dhūmakārijātaka
ja413:1.1	“Rājā apucchi vidhuraṁ,
ja413:1.2	dhammakāmo yudhiṭṭhilo;
ja413:1.3	Api brāhmaṇa jānāsi,
ja413:1.4	ko eko bahu socati”.
ja413:2.1	“Brāhmaṇo ajayūthena,
ja413:2.2	pahūtedho vane vasaṁ;
ja413:2.3	Dhūmaṁ akāsi vāseṭṭho,
ja413:2.4	rattindivamatandito.
ja413:3.1	Tassa taṁ dhūmagandhena,
ja413:3.2	sarabhā makasaḍḍitā;
ja413:3.3	Vassāvāsaṁ upāgacchuṁ,
ja413:3.4	dhūmakārissa santike.
ja413:4.1	Sarabhesu manaṁ katvā,
ja413:4.2	ajā so nāvabujjhatha;
ja413:4.3	Āgacchantī vajantī vā,
ja413:4.4	tassa tā vinasuṁ ajā.
ja413:5.1	Sarabhā sarade kāle,
ja413:5.2	pahīnamakase vane;
ja413:5.3	Pāvisuṁ giriduggāni,
ja413:5.4	nadīnaṁ pabhavāni ca.
ja413:6.1	Sarabhe ca gate disvā,
ja413:6.2	ajā ca vibhavaṁ gatā;
ja413:6.3	Kiso ca vivaṇṇo cāsi,
ja413:6.4	paṇḍurogī ca brāhmaṇo.
ja413:7.1	Evaṁ yo saṁ niraṅkatvā,
ja413:7.2	āgantuṁ kurute piyaṁ;
ja413:7.3	So eko bahu socati,
ja413:7.4	dhūmakārīva brāhmaṇo”ti.
ja413:8.1	Dhūmakārijātakaṁ aṭṭhamaṁ.
ja414:0.1	Jātaka
ja414:0.2	Sattakanipāta
ja414:0.3	Gandhāravagga
ja414:0.4	9. Jāgarajātaka
ja414:1.1	“Kodha jāgarataṁ sutto,
ja414:1.2	kodha suttesu jāgaro;
ja414:1.3	Ko mametaṁ vijānāti,
ja414:1.4	ko taṁ paṭibhaṇāti me”.
ja414:2.1	“Ahaṁ jāgarataṁ sutto,
ja414:2.2	ahaṁ suttesu jāgaro;
ja414:2.3	Ahametaṁ vijānāmi,
ja414:2.4	ahaṁ paṭibhaṇāmi te”.
ja414:3.1	“Kathaṁ jāgarataṁ sutto,
ja414:3.2	kathaṁ suttesu jāgaro;
ja414:3.3	Kathaṁ etaṁ vijānāsi,
ja414:3.4	kathaṁ paṭibhaṇāsi me”.
ja414:4.1	“Ye dhammaṁ nappajānanti,
ja414:4.2	saṁyamoti damoti ca;
ja414:4.3	Tesu suppamānesu,
ja414:4.4	ahaṁ jaggāmi devate.
ja414:5.1	Yesaṁ rāgo ca doso ca,
ja414:5.2	avijjā ca virājitā;
ja414:5.3	Tesu jāgaramānesu,
ja414:5.4	ahaṁ suttosmi devate.
ja414:6.1	Evaṁ jāgarataṁ sutto,
ja414:6.2	evaṁ suttesu jāgaro;
ja414:6.3	Evametaṁ vijānāmi,
ja414:6.4	evaṁ paṭibhaṇāmi te”.
ja414:7.1	“Sādhu jāgarataṁ sutto,
ja414:7.2	sādhu suttesu jāgaro;
ja414:7.3	Sādhumetaṁ vijānāsi,
ja414:7.4	sādhu paṭibhaṇāsi me”ti.
ja414:8.1	Jāgarajātakaṁ navamaṁ.
ja415:0.1	Jātaka
ja415:0.2	Sattakanipāta
ja415:0.3	Gandhāravagga
ja415:0.4	10. Kummāsapiṇḍijātaka
ja415:1.1	“Na kiratthi anomadassisu,
ja415:1.2	Pāricariyā buddhesu appikā;
ja415:1.3	Sukkhāya aloṇikāya ca,
ja415:1.4	Passaphalaṁ kummāsapiṇḍiyā.
ja415:2.1	Hatthigavassā cime bahū,
ja415:2.2	Dhanadhaññaṁ pathavī ca kevalā;
ja415:2.3	Nāriyo cimā accharūpamā,
ja415:2.4	Passa phalaṁ kummāsapiṇḍiyā”.
ja415:3.1	“Abhikkhaṇaṁ rājakuñjara,
ja415:3.2	Gāthā bhāsasi kosalādhipa;
ja415:3.3	Pucchāmi taṁ raṭṭhavaḍḍhana,
ja415:3.4	Bāḷhaṁ pītimano pabhāsasi”.
ja415:4.1	“Imasmiññeva nagare,
ja415:4.2	kule aññatare ahuṁ;
ja415:4.3	Parakammakaro āsiṁ,
ja415:4.4	bhatako sīlasaṁvuto.
ja415:5.1	Kammāya nikkhamantohaṁ,
ja415:5.2	caturo samaṇeddasaṁ;
ja415:5.3	Ācārasīlasampanne,
ja415:5.4	sītibhūte anāsave.
ja415:6.1	Tesu cittaṁ pasādetvā,
ja415:6.2	nisīdetvā paṇṇasanthate;
ja415:6.3	Adaṁ buddhāna kummāsaṁ,
ja415:6.4	pasanno sehi pāṇibhi.
ja415:7.1	Tassa kammassa kusalassa,
ja415:7.2	idaṁ me edisaṁ phalaṁ;
ja415:7.3	Anubhomi idaṁ rajjaṁ,
ja415:7.4	phītaṁ dharaṇimuttamaṁ”.
ja415:8.1	“Dadaṁ bhuñja mā ca pamādo,
ja415:8.2	Cakkaṁ vattaya kosalādhipa;
ja415:8.3	Mā rāja adhammiko ahu,
ja415:8.4	Dhammaṁ pālaya kosalādhipa”.
ja415:9.1	“Sohaṁ tadeva punappunaṁ,
ja415:9.2	Vaṭumaṁ ācarissāmi sobhane;
ja415:9.3	Ariyācaritaṁ sukosale,
ja415:9.4	Arahanto me manāpāva passituṁ.
ja415:10.1	Devī viya accharūpamā,
ja415:10.2	Majjhe nārigaṇassa sobhasi;
ja415:10.3	Kiṁ kammamakāsi bhaddakaṁ,
ja415:10.4	Kenāsi vaṇṇavatī sukosale”.
ja415:11.1	“Ambaṭṭhakulassa khattiya,
ja415:11.2	Dāsyāhaṁ parapesiyā ahuṁ;
ja415:11.3	Saññatā ca dhammajīvinī,
ja415:11.4	Sīlavatī ca apāpadassanā.
ja415:12.1	Uddhaṭabhattaṁ ahaṁ tadā,
ja415:12.2	Caramānassa adāsi bhikkhuno;
ja415:12.3	Vittā sumanā sayaṁ ahaṁ,
ja415:12.4	Tassa kammassa phalaṁ mamedisan”ti.
ja415:13.1	Kummāsapiṇḍijātakaṁ dasamaṁ.
ja416:0.1	Jātaka
ja416:0.2	Sattakanipāta
ja416:0.3	Gandhāravagga
ja416:0.4	11. Parantapajātaka
ja416:1.1	“Āgamissati me pāpaṁ,
ja416:1.2	āgamissati me bhayaṁ;
ja416:1.3	Tadā hi calitā sākhā,
ja416:1.4	manussena migena vā”.
ja416:2.1	“Bhīruyā nūna me kāmo,
ja416:2.2	avidūre vasantiyā;
ja416:2.3	Karissati kisaṁ paṇḍuṁ,
ja416:2.4	sāva sākhā parantapaṁ.
ja416:3.1	Socayissati maṁ kantā,
ja416:3.2	gāme vasamaninditā;
ja416:3.3	Karissati kisaṁ paṇḍuṁ,
ja416:3.4	sāva sākhā parantapaṁ.
ja416:4.1	Tayā maṁ asitāpaṅgi,
ja416:4.2	sitāni bhaṇitāni ca;
ja416:4.3	Kisaṁ paṇḍuṁ karissanti,
ja416:4.4	sāva sākhā parantapaṁ”.
ja416:5.1	“Agamā nūna so saddo,
ja416:5.2	asaṁsi nūna so tava;
ja416:5.3	Akkhātaṁ nūna taṁ tena,
ja416:5.4	yo taṁ sākhamakampayi.
ja416:6.1	Idaṁ kho taṁ samāgamma,
ja416:6.2	mama bālassa cintitaṁ;
ja416:6.3	Tadā hi calitā sākhā,
ja416:6.4	manussena migena vā”.
ja416:7.1	“Tatheva tvaṁ avedesi,
ja416:7.2	Avañci pitaraṁ mama;
ja416:7.3	Hantvā sākhāhi chādento,
ja416:7.4	Āgamissati me bhayan”ti.
ja416:8.1	Parantapajātakaṁ ekādasamaṁ.
ja416:8.2	Gandhāravaggo dutiyo.
ja416:9.1	Tassuddānaṁ
ja416:10.1	Varagāma mahākapi bhaggava ca,
ja416:10.2	Daḷhadhamma sakuñjara kesavaro;
ja416:10.3	Urago vidhuro puna jāgarataṁ,
ja416:10.4	Atha kosalādhipa parantapa cāti.
ja416:11.1	Atha vagguddānaṁ
ja416:12.1	Atha sattanipātamhi,
ja416:12.2	vaggaṁ me bhaṇato suṇa;
ja416:12.3	Kukku ca puna gandhāro,
ja416:12.4	dveva vuttā mahesināti.
ja416:13.1	Sattakanipātaṁ niṭṭhitaṁ.
ja417:0.1	Jātaka
ja417:0.2	Aṭṭhakanipāta
ja417:0.3	Kaccānivagga
ja417:0.4	1. Kaccānijātaka
ja417:1.1	“Odātavatthā suci allakesā,
ja417:1.2	Kaccāni kiṁ kumbhimadhissayitvā;
ja417:1.3	Piṭṭhā tilā dhovasi taṇḍulāni,
ja417:1.4	Tilodano hehiti kissahetu”.
ja417:2.1	“Na kho ayaṁ brāhmaṇa bhojanatthā,
ja417:2.2	Tilodano hehiti sādhupakko;
ja417:2.3	Dhammo mato tassa pahuttamajja,
ja417:2.4	Ahaṁ karissāmi susānamajjhe”.
ja417:3.1	“Anuvicca kaccāni karohi kiccaṁ,
ja417:3.2	Dhammo mato ko nu taveva saṁsi;
ja417:3.3	Sahassanetto atulānubhāvo,
ja417:3.4	Na miyyatī dhammavaro kadāci”.
ja417:4.1	“Daḷhappamāṇaṁ mama ettha brahme,
ja417:4.2	Dhammo mato natthi mamettha kaṅkhā;
ja417:4.3	Yeyeva dāni pāpā bhavanti,
ja417:4.4	Te teva dāni sukhitā bhavanti.
ja417:5.1	Suṇisā hi mayhaṁ vañjhā ahosi,
ja417:5.2	Sā maṁ vadhitvāna vijāyi puttaṁ;
ja417:5.3	Sā dāni sabbassa kulassa issarā,
ja417:5.4	Ahaṁ panamhi apaviddhā ekikā”.
ja417:6.1	“Jīvāmi vohaṁ na matohamasmi,
ja417:6.2	Taveva atthāya idhāgatosmi;
ja417:6.3	Yā taṁ vadhitvāna vijāyi puttaṁ,
ja417:6.4	Sahāva puttena karomi bhasmaṁ”.
ja417:7.1	“Evañca te ruccati devarāja,
ja417:7.2	Mameva atthāya idhāgatosi;
ja417:7.3	Ahañca putto suṇisā ca nattā,
ja417:7.4	Sammodamānā gharamāvasema”.
ja417:8.1	“Evañca te ruccati kātiyāni,
ja417:8.2	Hatāpi santā na jahāsi dhammaṁ;
ja417:8.3	Tuvañca putto suṇisā ca nattā,
ja417:8.4	Sammodamānā gharamāvasetha.
ja417:9.1	Sā kātiyānī suṇisāya saddhiṁ,
ja417:9.2	Sammodamānā gharamāvasittha;
ja417:9.3	Putto ca nattā ca upaṭṭhahiṁsu,
ja417:9.4	Devānamindena adhiggahītā”ti.
ja417:10.1	Kaccānijātakaṁ paṭhamaṁ.
ja418:0.1	Jātaka
ja418:0.2	Aṭṭhakanipāta
ja418:0.3	Kaccānivagga
ja418:0.4	2. Aṭṭhasaddajātaka
ja418:1.1	“Idaṁ pure ninnamāhu,
ja418:1.2	bahumacchaṁ mahodakaṁ;
ja418:1.3	Āvāso bakarājassa,
ja418:1.4	pettikaṁ bhavanaṁ mama;
ja418:1.5	Tyajja bhekena yāpema,
ja418:1.6	okaṁ na vijahāmase”.
ja418:2.1	“Ko dutiyaṁ asīlissa,
ja418:2.2	bandharassakkhi bhecchati;
ja418:2.3	Ko me putte kulāvakaṁ,
ja418:2.4	mañca sotthiṁ karissati”.
ja418:3.1	“Sabbā parikkhayā pheggu,
ja418:3.2	yāva tassā gatī ahu;
ja418:3.3	Khīṇabhakkho mahārāja,
ja418:3.4	sāre na ramatī ghuṇo”.
ja418:4.1	“Sā nūnāhaṁ ito gantvā,
ja418:4.2	rañño muttā nivesanā;
ja418:4.3	Attānaṁ ramayissāmi,
ja418:4.4	dumasākhaniketinī”.
ja418:5.1	“So nūnāhaṁ ito gantvā,
ja418:5.2	rañño mutto nivesanā;
ja418:5.3	Aggodakāni pissāmi,
ja418:5.4	yūthassa purato vajaṁ”.
ja418:6.1	“Taṁ maṁ kāmehi sammattaṁ,
ja418:6.2	rattaṁ kāmesu mucchitaṁ;
ja418:6.3	Ānayī bharato luddo,
ja418:6.4	bāhiko bhaddamatthu te”.
ja418:7.1	“Andhakāratimisāyaṁ,
ja418:7.2	tuṅge uparipabbate;
ja418:7.3	Sā maṁ saṇhena mudunā,
ja418:7.4	mā pādaṁ khali yasmani”.
ja418:8.1	“Asaṁsayaṁ jātikhayantadassī,
ja418:8.2	Na gabbhaseyyaṁ punarāvajissaṁ;
ja418:8.3	Ayamantimā pacchimā gabbhaseyyā,
ja418:8.4	Khīṇo me saṁsāro punabbhavāyā”ti.
ja418:9.1	Aṭṭhasaddajātakaṁ dutiyaṁ.
ja419:0.1	Jātaka
ja419:0.2	Aṭṭhakanipāta
ja419:0.3	Kaccānivagga
ja419:0.4	3. Sulasājātaka
ja419:1.1	“Idaṁ suvaṇṇakāyūraṁ,
ja419:1.2	muttā veḷuriyā bahū;
ja419:1.3	Sabbaṁ harassu bhaddante,
ja419:1.4	mañca dāsīti sāvaya”.
ja419:2.1	“Oropayassu kalyāṇi,
ja419:2.2	mā bāḷhaṁ paridevasi;
ja419:2.3	Na cāhaṁ abhijānāmi,
ja419:2.4	ahantvā dhanamābhataṁ”.
ja419:3.1	“Yato sarāmi attānaṁ,
ja419:3.2	yato pattāsmi viññutaṁ;
ja419:3.3	Na cāhaṁ abhijānāmi,
ja419:3.4	aññaṁ piyataraṁ tayā.
ja419:4.1	Ehi taṁ upagūhissaṁ,
ja419:4.2	karissañca padakkhiṇaṁ;
ja419:4.3	Na hi dāni puna atthi,
ja419:4.4	mama tuyhañca saṅgamo”.
ja419:5.1	“Na hi sabbesu ṭhānesu,
ja419:5.2	puriso hoti paṇḍito;
ja419:5.3	Itthīpi paṇḍitā hoti,
ja419:5.4	tattha tattha vicakkhaṇā.
ja419:6.1	Na hi sabbesu ṭhānesu,
ja419:6.2	puriso hoti paṇḍito;
ja419:6.3	Itthīpi paṇḍitā hoti,
ja419:6.4	lahuṁ atthaṁ vicintikā.
ja419:7.1	Lahuñca vata khippañca,
ja419:7.2	nikaṭṭhe samacetayi;
ja419:7.3	Migaṁ puṇṇāyateneva,
ja419:7.4	sulasā sattukaṁ vadhi.
ja419:8.1	Yodha uppatitaṁ atthaṁ,
ja419:8.2	na khippamanubujjhati;
ja419:8.3	So haññati mandamati,
ja419:8.4	corova girigabbhare.
ja419:9.1	Yo ca uppatitaṁ atthaṁ,
ja419:9.2	khippameva nibodhati;
ja419:9.3	Muccate sattusambādhā,
ja419:9.4	sulasā sattukāmivā”ti.
ja419:10.1	Sulasājātakaṁ tatiyaṁ.
ja420:0.1	Jātaka
ja420:0.2	Aṭṭhakanipāta
ja420:0.3	Kaccānivagga
ja420:0.4	4. Sumaṅgalajātaka
ja420:1.1	“Bhusamhi kuddhoti avekkhiyāna,
ja420:1.2	Na tāva daṇḍaṁ paṇayeyya issaro;
ja420:1.3	Aṭṭhānaso appatirūpamattano,
ja420:1.4	Parassa dukkhāni bhusaṁ udīraye.
ja420:2.1	Yato ca jāneyya pasādamattano,
ja420:2.2	Atthaṁ niyuñjeyya parassa dukkaṭaṁ;
ja420:2.3	Tadāyamatthoti sayaṁ avekkhiya,
ja420:2.4	Athassa daṇḍaṁ sadisaṁ nivesaye.
ja420:3.1	Na cāpi jhāpeti paraṁ na attanaṁ,
ja420:3.2	Amucchito yo nayate nayānayaṁ;
ja420:3.3	Yo daṇḍadhāro bhavatīdha issaro,
ja420:3.4	Sa vaṇṇagutto siriyā na dhaṁsati.
ja420:4.1	Ye khattiyā se anisammakārino,
ja420:4.2	Paṇenti daṇḍaṁ sahasā pamucchitā;
ja420:4.3	Avaṇṇasaṁyutā jahanti jīvitaṁ,
ja420:4.4	Ito vimuttāpi ca yanti duggatiṁ.
ja420:5.1	Dhamme ca ye ariyappavedite ratā,
ja420:5.2	Anuttarā te vacasā manasā kammunā ca;
ja420:5.3	Te santisoraccasamādhisaṇṭhitā,
ja420:5.4	Vajanti lokaṁ dubhayaṁ tathāvidhā.
ja420:6.1	Rājāhamasmi narapamadānamissaro,
ja420:6.2	Sacepi kujjhāmi ṭhapemi attanaṁ;
ja420:6.3	Nisedhayanto janataṁ tathāvidhaṁ,
ja420:6.4	Paṇemi daṇḍaṁ anukampa yoniso”.
ja420:7.1	“Sirī ca lakkhī ca taveva khattiya,
ja420:7.2	Janādhipa mā vijahi kudācanaṁ;
ja420:7.3	Akkodhano niccapasannacitto,
ja420:7.4	Anīgho tuvaṁ vassasatāni pālaya.
ja420:8.1	Guṇehi etehi upeta khattiya,
ja420:8.2	Ṭhitamariyavattī suvaco akodhano;
ja420:8.3	Sukhī anuppīḷa pasāsamediniṁ,
ja420:8.4	Ito vimuttopi ca yāhi suggatiṁ.
ja420:9.1	Evaṁ sunītena subhāsitena,
ja420:9.2	Dhammena ñāyena upāyaso nayaṁ;
ja420:9.3	Nibbāpaye saṅkhubhitaṁ mahājanaṁ,
ja420:9.4	Mahāva megho salilena medinin”ti.
ja420:10.1	Sumaṅgalajātakaṁ catutthaṁ.
ja421:0.1	Jātaka
ja421:0.2	Aṭṭhakanipāta
ja421:0.3	Kaccānivagga
ja421:0.4	5. Gaṅgamālajātaka
ja421:1.1	“Aṅgārajātā pathavī,
ja421:1.2	kukkuḷānugatā mahī;
ja421:1.3	Atha gāyasi vattāni,
ja421:1.4	na taṁ tapati ātapo.
ja421:2.1	Uddhaṁ tapati ādicco,
ja421:2.2	adho tapati vālukā;
ja421:2.3	Atha gāyasi vattāni,
ja421:2.4	na taṁ tapati ātapo”.
ja421:3.1	“Na maṁ tapati ātapo,
ja421:3.2	ātapā tapayanti maṁ;
ja421:3.3	Atthā hi vividhā rāja,
ja421:3.4	te tapanti na ātapo”.
ja421:4.1	“Addasaṁ kāma te mūlaṁ,
ja421:4.2	saṅkappā kāma jāyasi;
ja421:4.3	Na taṁ saṅkappayissāmi,
ja421:4.4	evaṁ kāma na hehisi”.
ja421:5.1	“Appāpi kāmā na alaṁ,
ja421:5.2	bahūhipi na tappati;
ja421:5.3	Ahahā bālalapanā,
ja421:5.4	parivajjetha jaggato”.
ja421:6.1	“Appassa kammassa phalaṁ mamedaṁ,
ja421:6.2	Udayo ajjhāgamā mahattapattaṁ;
ja421:6.3	Suladdhalābho vata māṇavassa,
ja421:6.4	Yo pabbajī kāmarāgaṁ pahāya”.
ja421:7.1	“Tapasā pajahanti pāpakammaṁ,
ja421:7.2	Tapasā nhāpitakumbhakārabhāvaṁ;
ja421:7.3	Tapasā abhibhuyya gaṅgamāla,
ja421:7.4	Nāmenālapasajja brahmadattaṁ”.
ja421:8.1	“Sandiṭṭhikameva ‘amma’ passatha,
ja421:8.2	Khantīsoraccassa ayaṁ vipāko;
ja421:8.3	Yo sabbajanassa vanditohu,
ja421:8.4	Taṁ vandāma sarājikā samaccā”.
ja421:9.1	“Mā kiñci avacuttha gaṅgamālaṁ,
ja421:9.2	Muninaṁ monapathesu sikkhamānaṁ;
ja421:9.3	Eso hi atari aṇṇavaṁ,
ja421:9.4	Yaṁ taritvā caranti vītasokā”ti.
ja421:10.1	Gaṅgamālajātakaṁ pañcamaṁ.
ja422:0.1	Jātaka
ja422:0.2	Aṭṭhakanipāta
ja422:0.3	Kaccānivagga
ja422:0.4	6. Cetiyajātaka
ja422:1.1	“Dhammo have hato hanti,
ja422:1.2	Nāhato hanti kiñcanaṁ;
ja422:1.3	Tasmā hi dhammaṁ na hane,
ja422:1.4	Mā tvaṁ dhammo hato hani.
ja422:2.1	Alikaṁ bhāsamānassa,
ja422:2.2	apakkamanti devatā;
ja422:2.3	Pūtikañca mukhaṁ vāti,
ja422:2.4	sakaṭṭhānā ca dhaṁsati;
ja422:2.5	Yo jānaṁ pucchito pañhaṁ,
ja422:2.6	aññathā naṁ viyākare.
ja422:3.1	Sace hi saccaṁ bhaṇasi,
ja422:3.2	hohi rāja yathā pure;
ja422:3.3	Musā ce bhāsase rāja,
ja422:3.4	bhūmiyaṁ tiṭṭha cetiya.
ja422:4.1	Akāle vassatī tassa,
ja422:4.2	kāle tassa na vassati;
ja422:4.3	Yo jānaṁ pucchito pañhaṁ,
ja422:4.4	aññathā naṁ viyākare.
ja422:5.1	Sace hi saccaṁ bhaṇasi,
ja422:5.2	hohi rāja yathā pure;
ja422:5.3	Musā ce bhāsase rāja,
ja422:5.4	bhūmiṁ pavisa cetiya.
ja422:6.1	Jivhā tassa dvidhā hoti,
ja422:6.2	uragasseva disampati;
ja422:6.3	Yo jānaṁ pucchito pañhaṁ,
ja422:6.4	aññathā naṁ viyākare.
ja422:7.1	Sace hi saccaṁ bhaṇasi,
ja422:7.2	hohi rāja yathā pure;
ja422:7.3	Musā ce bhāsase rāja,
ja422:7.4	bhiyyo pavisa cetiya.
ja422:8.1	Jivhā tassa na bhavati,
ja422:8.2	macchasseva disampati;
ja422:8.3	Yo jānaṁ pucchito pañhaṁ,
ja422:8.4	aññathā naṁ viyākare.
ja422:9.1	Sace hi saccaṁ bhaṇasi,
ja422:9.2	hohi rāja yathā pure;
ja422:9.3	Musā ce bhāsase rāja,
ja422:9.4	bhiyyo pavisa cetiya.
ja422:10.1	Thiyova tassa jāyanti,
ja422:10.2	na pumā jāyare kule;
ja422:10.3	Yo jānaṁ pucchito pañhaṁ,
ja422:10.4	aññathā naṁ viyākare.
ja422:11.1	Sace hi saccaṁ bhaṇasi,
ja422:11.2	hohi rāja yathā pure;
ja422:11.3	Musā ce bhāsase rāja,
ja422:11.4	bhiyyo pavisa cetiya.
ja422:12.1	Puttā tassa na bhavanti,
ja422:12.2	pakkamanti disodisaṁ;
ja422:12.3	Yo jānaṁ pucchito pañhaṁ,
ja422:12.4	aññathā naṁ viyākare.
ja422:13.1	Sace hi saccaṁ bhaṇasi,
ja422:13.2	hohi rāja yathā pure;
ja422:13.3	Musā ce bhāsase rāja,
ja422:13.4	bhiyyo pavisa cetiya”.
ja422:14.1	“Sa rājā isinā satto,
ja422:14.2	antalikkhacaro pure;
ja422:14.3	Pāvekkhi pathaviṁ cecco,
ja422:14.4	hīnatto patva pariyāyaṁ.
ja422:15.1	Tasmā hi chandāgamanaṁ,
ja422:15.2	Nappasaṁsanti paṇḍitā;
ja422:15.3	Aduṭṭhacitto bhāseyya,
ja422:15.4	Giraṁ saccūpasaṁhitanti”.
ja422:16.1	Cetiyajātakaṁ chaṭṭhaṁ.
ja423:0.1	Jātaka
ja423:0.2	Aṭṭhakanipāta
ja423:0.3	Kaccānivagga
ja423:0.4	7. Indriyajātaka
ja423:1.1	“Yo indriyānaṁ kāmena,
ja423:1.2	vasaṁ nārada gacchati;
ja423:1.3	So pariccajjubho loke,
ja423:1.4	jīvantova visussati.
ja423:2.1	Sukhassānantaraṁ dukkhaṁ,
ja423:2.2	dukkhassānantaraṁ sukhaṁ;
ja423:2.3	Sosi patto sukhā dukkhaṁ,
ja423:2.4	pāṭikaṅkha varaṁ sukhaṁ.
ja423:3.1	Kicchakāle kicchasaho,
ja423:3.2	yo kicchaṁ nātivattati;
ja423:3.3	Sa kicchantaṁ sukhaṁ dhīro,
ja423:3.4	yogaṁ samadhigacchati.
ja423:4.1	Na heva kāmāna kāmā,
ja423:4.2	nānatthā nātthakāraṇā;
ja423:4.3	Na katañca niraṅkatvā,
ja423:4.4	dhammā cavitumarahasi”.
ja423:5.1	“Dakkhaṁ gahapatī sādhu,
ja423:5.2	saṁvibhajjañca bhojanaṁ;
ja423:5.3	Ahāso atthalābhesu,
ja423:5.4	atthabyāpatti abyatho”.
ja423:6.1	“Ettāvatetaṁ paṇḍiccaṁ,
ja423:6.2	api so devilo bravi;
ja423:6.3	Na yito kiñci pāpiyo,
ja423:6.4	yo indriyānaṁ vasaṁ vaje”.
ja423:7.1	“Amittānaṁva hatthatthaṁ,
ja423:7.2	sivi pappoti māmiva;
ja423:7.3	Kammaṁ vijjañca dakkheyyaṁ,
ja423:7.4	vivāhaṁ sīlamaddavaṁ;
ja423:7.5	Ete ca yase hāpetvā,
ja423:7.6	nibbatto sehi kammehi.
ja423:8.1	Sohaṁ sahassajīnova,
ja423:8.2	abandhu aparāyaṇo;
ja423:8.3	Ariyadhammā apakkanto,
ja423:8.4	yathā peto tathevahaṁ.
ja423:9.1	Sukhakāme dukkhāpetvā,
ja423:9.2	āpannosmi padaṁ imaṁ;
ja423:9.3	So sukhaṁ nādhigacchāmi,
ja423:9.4	ṭhito bhāṇumatāmivā”ti.
ja423:10.1	Indriyajātakaṁ sattamaṁ.
ja424:0.1	Jātaka
ja424:0.2	Aṭṭhakanipāta
ja424:0.3	Kaccānivagga
ja424:0.4	8. Ādittajātaka
ja424:1.1	“Ādittasmiṁ agārasmiṁ,
ja424:1.2	yaṁ nīharati bhājanaṁ;
ja424:1.3	Taṁ tassa hoti atthāya,
ja424:1.4	no ca yaṁ tattha ḍayhati.
ja424:2.1	Evamādīpito loko,
ja424:2.2	jarāya maraṇena ca;
ja424:2.3	Nīharetheva dānena,
ja424:2.4	dinnaṁ hoti sunīhataṁ”.
ja424:3.1	“Yo dhammaladdhassa dadāti dānaṁ,
ja424:3.2	Uṭṭhānaviriyādhigatassa jantu;
ja424:3.3	Atikkamma so vetaraṇiṁ yamassa,
ja424:3.4	Dibbāni ṭhānāni upeti macco.
ja424:4.1	Dānañca yuddhañca samānamāhu,
ja424:4.2	Appāpi santā bahuke jinanti;
ja424:4.3	Appampi ce saddahāno dadāti,
ja424:4.4	Teneva so hoti sukhī parattha.
ja424:5.1	Viceyya dānaṁ sugatappasatthaṁ,
ja424:5.2	Ye dakkhiṇeyyā idha jīvaloke;
ja424:5.3	Etesu dinnāni mahapphalāni,
ja424:5.4	Bījāni vuttāni yathā sukhette.
ja424:6.1	Yo pāṇabhūtāni aheṭhayaṁ caraṁ,
ja424:6.2	Parūpavādā na karoti pāpaṁ;
ja424:6.3	Bhīruṁ pasaṁsanti na tattha sūraṁ,
ja424:6.4	Bhayā hi santo na karonti pāpaṁ.
ja424:7.1	Hīnena brahmacariyena,
ja424:7.2	khattiye upapajjati;
ja424:7.3	Majjhimena ca devattaṁ,
ja424:7.4	uttamena visujjhati.
ja424:8.1	Addhā hi dānaṁ bahudhā pasatthaṁ,
ja424:8.2	Dānā ca kho dhammapadaṁva seyyo;
ja424:8.3	Pubbeva hi pubbatareva santo,
ja424:8.4	Nibbānamevajjhagamuṁ sapaññā”ti.
ja424:9.1	Ādittajātakaṁ aṭṭhamaṁ.
ja425:0.1	Jātaka
ja425:0.2	Aṭṭhakanipāta
ja425:0.3	Kaccānivagga
ja425:0.4	9. Aṭṭhānajātaka
ja425:1.1	“Gaṅgā kumudinī santā,
ja425:1.2	saṅkhavaṇṇā ca kokilā;
ja425:1.3	Jambu tālaphalaṁ dajjā,
ja425:1.4	atha nūna tadā siyā.
ja425:2.1	Yadā kacchapalomānaṁ,
ja425:2.2	pāvāro tividho siyā;
ja425:2.3	Hemantikaṁ pāvuraṇaṁ,
ja425:2.4	atha nūna tadā siyā.
ja425:3.1	Yadā makasapādānaṁ,
ja425:3.2	aṭṭālo sukato siyā;
ja425:3.3	Daḷho ca avikampī ca,
ja425:3.4	atha nūna tadā siyā.
ja425:4.1	Yadā sasavisāṇānaṁ,
ja425:4.2	nisseṇī sukatā siyā;
ja425:4.3	Saggassārohaṇatthāya,
ja425:4.4	atha nūna tadā siyā.
ja425:5.1	Yadā nisseṇimāruyha,
ja425:5.2	candaṁ khādeyyu mūsikā;
ja425:5.3	Rāhuñca paripāteyyuṁ,
ja425:5.4	atha nūna tadā siyā.
ja425:6.1	Yadā surāghaṭaṁ pitvā,
ja425:6.2	makkhikā gaṇacāriṇī;
ja425:6.3	Aṅgāre vāsaṁ kappeyyuṁ,
ja425:6.4	atha nūna tadā siyā.
ja425:7.1	Yadā bimboṭṭhasampanno,
ja425:7.2	gadrabho sumukho siyā;
ja425:7.3	Kusalo naccagītassa,
ja425:7.4	atha nūna tadā siyā.
ja425:8.1	Yadā kākā ulūkā ca,
ja425:8.2	mantayeyyuṁ rahogatā;
ja425:8.3	Aññamaññaṁ pihayeyyuṁ,
ja425:8.4	atha nūna tadā siyā.
ja425:9.1	Yadā muḷāla pattānaṁ,
ja425:9.2	chattaṁ thirataraṁ siyā;
ja425:9.3	Vassassa paṭighātāya,
ja425:9.4	atha nūna tadā siyā.
ja425:10.1	Yadā kulako sakuṇo,
ja425:10.2	pabbataṁ gandhamādanaṁ;
ja425:10.3	Tuṇḍenādāya gaccheyya,
ja425:10.4	atha nūna tadā siyā.
ja425:11.1	Yadā sāmuddikaṁ nāvaṁ,
ja425:11.2	sayantaṁ savaṭākaraṁ;
ja425:11.3	Ceṭo ādāya gaccheyya,
ja425:11.4	atha nūna tadā siyā”ti.
ja425:12.1	Aṭṭhānajātakaṁ navamaṁ.
ja426:0.1	Jātaka
ja426:0.2	Aṭṭhakanipāta
ja426:0.3	Kaccānivagga
ja426:0.4	10. Dīpijātaka
ja426:1.1	“Khamanīyaṁ yāpanīyaṁ,
ja426:1.2	kacci mātula te sukhaṁ;
ja426:1.3	Sukhaṁ te ammā avaca,
ja426:1.4	sukhakāmāva te mayaṁ”.
ja426:2.1	“Naṅguṭṭhaṁ me avakkamma,
ja426:2.2	Heṭhayitvāna eḷike;
ja426:2.3	Sājja mātulavādena,
ja426:2.4	Muñcitabbā nu maññasi”.
ja426:3.1	“Puratthāmukho nisinnosi,
ja426:3.2	Ahaṁ te mukhamāgatā;
ja426:3.3	Pacchato tuyhaṁ naṅguṭṭhaṁ,
ja426:3.4	Kathaṁ khvāhaṁ avakkamiṁ”.
ja426:4.1	“Yāvatā caturo dīpā,
ja426:4.2	sasamuddā sapabbatā;
ja426:4.3	Tāvatā mayhaṁ naṅguṭṭhaṁ,
ja426:4.4	kathaṁ kho tvaṁ vivajjayi”.
ja426:5.1	“Pubbeva metamakkhiṁsu,
ja426:5.2	mātā pitā ca bhātaro;
ja426:5.3	Dīghaṁ duṭṭhassa naṅguṭṭhaṁ,
ja426:5.4	sāmhi vehāyasāgatā”.
ja426:6.1	“Tañca disvāna āyantiṁ,
ja426:6.2	antalikkhasmi eḷike;
ja426:6.3	Migasaṅgho palāyittha,
ja426:6.4	bhakkho me nāsito tayā”.
ja426:7.1	“Iccevaṁ vilapantiyā,
ja426:7.2	eḷakiyā ruhagghaso;
ja426:7.3	Galakaṁ anvāvamaddi,
ja426:7.4	natthi duṭṭhe subhāsitaṁ.
ja426:8.1	Neva duṭṭhe nayo atthi,
ja426:8.2	Na dhammo na subhāsitaṁ;
ja426:8.3	Nikkamaṁ duṭṭhe yuñjetha,
ja426:8.4	So ca sabbhiṁ na rañjatī”ti.
ja426:9.1	Dīpijātakaṁ dasamaṁ.
ja426:10.1	Aṭṭhakanipātaṁ niṭṭhitaṁ.
ja426:11.1	Tassuddānaṁ
ja426:12.1	Parisuddhā manāvilā vatthadharā,
ja426:12.2	Bakarājassa kāyuraṁ daṇḍavaro;
ja426:12.3	Atha aṅgāra cetiya devilinā,
ja426:12.4	Atha āditta gaṅgā daseḷakināti.
ja427:0.1	Jātaka
ja427:0.2	Navakanipāta
ja427:0.3	Gijjhavagga
ja427:0.4	1. Gijjhajātaka
ja427:1.1	“Parisaṅkupatho nāma,
ja427:1.2	gijjhapantho sanantano;
ja427:1.3	Tatrāsi mātāpitaro,
ja427:1.4	gijjho posesi jiṇṇake;
ja427:1.5	Tesaṁ ajagaramedaṁ,
ja427:1.6	accahāsi bahuttaso.
ja427:2.1	Pitā ca puttaṁ avaca,
ja427:2.2	Jānaṁ uccaṁ papātinaṁ;
ja427:2.3	Supattaṁ thāmasampannaṁ,
ja427:2.4	Tejassiṁ dūragāminaṁ.
ja427:3.1	Pariplavantaṁ pathaviṁ,
ja427:3.2	yadā tāta vijānahi;
ja427:3.3	Sāgarena parikkhittaṁ,
ja427:3.4	cakkaṁva parimaṇḍalaṁ;
ja427:3.5	Tato tāta nivattassu,
ja427:3.6	māssu etto paraṁ gami.
ja427:4.1	Udapattosi vegena,
ja427:4.2	balī pakkhī dijuttamo;
ja427:4.3	Olokayanto vakkaṅgo,
ja427:4.4	pabbatāni vanāni ca.
ja427:5.1	Addassa pathaviṁ gijjho,
ja427:5.2	yathāsāsi pitussutaṁ;
ja427:5.3	Sāgarena parikkhittaṁ,
ja427:5.4	cakkaṁva parimaṇḍalaṁ.
ja427:6.1	Tañca so samatikkamma,
ja427:6.2	paramevaccavattatha;
ja427:6.3	Tañca vātasikhā tikkhā,
ja427:6.4	accahāsi baliṁ dijaṁ.
ja427:7.1	Nāsakkhātigato poso,
ja427:7.2	punadeva nivattituṁ;
ja427:7.3	Dijo byasanamāpādi,
ja427:7.4	verambhānaṁ vasaṁ gato.
ja427:8.1	Tassa puttā ca dārā ca,
ja427:8.2	ye caññe anujīvino;
ja427:8.3	Sabbe byasanamāpāduṁ,
ja427:8.4	anovādakare dije.
ja427:9.1	Evampi idha vuḍḍhānaṁ,
ja427:9.2	yo vākyaṁ nāvabujjhati;
ja427:9.3	Atisīmacaro ditto,
ja427:9.4	gijjhovātītasāsano;
ja427:9.5	Sa ve byasanaṁ pappoti,
ja427:9.6	akatvā vuḍḍhasāsanan”ti.
ja427:10.1	Gijjhajātakaṁ paṭhamaṁ.
ja428:0.1	Jātaka
ja428:0.2	Navakanipāta
ja428:0.3	Gijjhavagga
ja428:0.4	2. Kosambiyajātaka
ja428:1.1	“Puthusaddo samajano,
ja428:1.2	na bālo koci maññatha;
ja428:1.3	Saṅghasmiṁ bhijjamānasmiṁ,
ja428:1.4	nāññaṁ bhiyyo amaññaruṁ.
ja428:2.1	Parimuṭṭhā paṇḍitābhāsā,
ja428:2.2	vācāgocarabhāṇino;
ja428:2.3	Yāvicchanti mukhāyāmaṁ,
ja428:2.4	yena nītā na taṁ vidū.
ja428:3.1	Akkocchi maṁ avadhi maṁ,
ja428:3.2	ajini maṁ ahāsi me;
ja428:3.3	Ye ca taṁ upanayhanti,
ja428:3.4	veraṁ tesaṁ na sammati.
ja428:4.1	Akkocchi maṁ avadhi maṁ,
ja428:4.2	ajini maṁ ahāsi me;
ja428:4.3	Ye ca taṁ nupanayhanti,
ja428:4.4	veraṁ tesūpasammati.
ja428:5.1	Na hi verena verāni,
ja428:5.2	sammantīdha kudācanaṁ;
ja428:5.3	Averena ca sammanti,
ja428:5.4	esa dhammo sanantano.
ja428:6.1	Pare ca na vijānanti,
ja428:6.2	mayamettha yamāmase;
ja428:6.3	Ye ca tattha vijānanti,
ja428:6.4	tato sammanti medhagā.
ja428:7.1	Aṭṭhicchinnā pāṇaharā,
ja428:7.2	gavāssa dhanahārino;
ja428:7.3	Raṭṭhaṁ vilumpamānānaṁ,
ja428:7.4	tesampi hoti saṅgati;
ja428:7.5	Kasmā tumhāka no siyā.
ja428:8.1	Sace labhetha nipakaṁ sahāyaṁ,
ja428:8.2	Saddhiṁ caraṁ sādhuvihāridhīraṁ;
ja428:8.3	Abhibhuyya sabbāni parissayāni,
ja428:8.4	Careyya tenattamano satīmā.
ja428:9.1	No ce labhetha nipakaṁ sahāyaṁ,
ja428:9.2	Saddhiṁ caraṁ sādhuvihāridhīraṁ;
ja428:9.3	Rājāva raṭṭhaṁ vijitaṁ pahāya,
ja428:9.4	Eko care mātaṅgaraññeva nāgo.
ja428:10.1	Ekassa caritaṁ seyyo,
ja428:10.2	Natthi bāle sahāyatā;
ja428:10.3	Eko care na pāpāni kayirā,
ja428:10.4	Appossukko mātaṅgaraññeva nāgo”ti.
ja428:11.1	Kosambiyajātakaṁ dutiyaṁ.
ja429:0.1	Jātaka
ja429:0.2	Navakanipāta
ja429:0.3	Gijjhavagga
ja429:0.4	3. Mahāsuvajātaka
ja429:1.1	“Dumo yadā hoti phalūpapanno,
ja429:1.2	Bhuñjanti naṁ vihaṅgamā sampatantā;
ja429:1.3	Khīṇanti ñatvāna dumaṁ phalaccaye,
ja429:1.4	Disodisaṁ yanti tato vihaṅgamā.
ja429:2.1	Cara cārikaṁ lohitatuṇḍa māmari,
ja429:2.2	Kiṁ tvaṁ suva sukkhadumamhi jhāyasi;
ja429:2.3	Tadiṅgha maṁ brūhi vasantasannibha,
ja429:2.4	Kasmā suva sukkhadumaṁ na riñcasi”.
ja429:3.1	“Ye ve sakhīnaṁ sakhāro bhavanti,
ja429:3.2	Pāṇaccaye dukkhasukhesu haṁsa;
ja429:3.3	Khīṇaṁ akhīṇampi na taṁ jahanti,
ja429:3.4	Santo sataṁ dhammamanussarantā.
ja429:4.1	Sohaṁ sataṁ aññatarosmi haṁsa,
ja429:4.2	Ñātī ca me hoti sakhā ca rukkho;
ja429:4.3	Taṁ nussahe jīvikattho pahātuṁ,
ja429:4.4	Khīṇanti ñatvāna na hesa dhammo”.
ja429:5.1	“Sādhu sakkhi kataṁ hoti,
ja429:5.2	metti saṁsati santhavo;
ja429:5.3	Sacetaṁ dhammaṁ rocesi,
ja429:5.4	pāsaṁsosi vijānataṁ.
ja429:6.1	So te suva varaṁ dammi,
ja429:6.2	pattayāna vihaṅgama;
ja429:6.3	Varaṁ varassu vakkaṅga,
ja429:6.4	yaṁ kiñci manasicchasi”.
ja429:7.1	“Varañca me haṁsa bhavaṁ dadeyya,
ja429:7.2	Ayañca rukkho punarāyuṁ labhetha;
ja429:7.3	So sākhavā phalimā saṁvirūḷho,
ja429:7.4	Madhutthiko tiṭṭhatu sobhamāno”.
ja429:8.1	“Taṁ passa samma phalimaṁ uḷāraṁ,
ja429:8.2	Sahāva te hotu udumbarena;
ja429:8.3	So sākhavā phalimā saṁvirūḷho,
ja429:8.4	Madhutthiko tiṭṭhatu sobhamāno”.
ja429:9.1	“Evaṁ sakka sukhī hohi,
ja429:9.2	saha sabbehi ñātibhi;
ja429:9.3	Yathāhamajja sukhito,
ja429:9.4	disvāna saphalaṁ dumaṁ”.
ja429:10.1	“Suvassa ca varaṁ datvā,
ja429:10.2	katvāna saphalaṁ dumaṁ;
ja429:10.3	Pakkāmi saha bhariyāya,
ja429:10.4	devānaṁ nandanaṁ vanan”ti.
ja429:11.1	Mahāsuvajātakaṁ tatiyaṁ.
ja430:0.1	Jātaka
ja430:0.2	Navakanipāta
ja430:0.3	Gijjhavagga
ja430:0.4	4. Cūḷasuvajātaka
ja430:1.1	“Santi rukkhā haripattā,
ja430:1.2	dumā nekaphalā bahū;
ja430:1.3	Kasmā nu sukkhe koḷāpe,
ja430:1.4	suvassa nirato mano”.
ja430:2.1	“Phalassa upabhuñjimhā,
ja430:2.2	nekavassagaṇe bahū;
ja430:2.3	Aphalampi viditvāna,
ja430:2.4	sāva metti yathā pure”.
ja430:3.1	“Sukkhañca rukkhaṁ koḷāpaṁ,
ja430:3.2	opattamaphalaṁ dumaṁ;
ja430:3.3	Ohāya sakuṇā yanti,
ja430:3.4	kiṁ dosaṁ passase dija”.
ja430:4.1	“Ye phalatthā sambhajanti,
ja430:4.2	aphaloti jahanti naṁ;
ja430:4.3	Attatthapaññā dummedhā,
ja430:4.4	te honti pakkhapātino”.
ja430:5.1	“Sādhu sakkhi kataṁ hoti,
ja430:5.2	metti saṁsati santhavo;
ja430:5.3	Sacetaṁ dhammaṁ rocesi,
ja430:5.4	pāsaṁsosi vijānataṁ.
ja430:6.1	So te suva varaṁ dammi,
ja430:6.2	pattayāna vihaṅgama;
ja430:6.3	Varaṁ varassu vakkaṅga,
ja430:6.4	yaṁ kiñci manasicchasi”.
ja430:7.1	“Api nāma naṁ passeyyaṁ,
ja430:7.2	sapattaṁ saphalaṁ dumaṁ;
ja430:7.3	Daliddova nidhiṁ laddhā,
ja430:7.4	nandeyyāhaṁ punappunaṁ”.
ja430:8.1	“Tato amatamādāya,
ja430:8.2	abhisiñci mahīruhaṁ;
ja430:8.3	Tassa sākhā virūhiṁsu,
ja430:8.4	sītacchāyā manoramā”.
ja430:9.1	“Evaṁ sakka sukhī hohi,
ja430:9.2	saha sabbehi ñātibhi;
ja430:9.3	Yathāhamajja sukhito,
ja430:9.4	disvāna saphalaṁ dumaṁ.
ja430:10.1	Suvassa ca varaṁ datvā,
ja430:10.2	katvāna saphalaṁ dumaṁ;
ja430:10.3	Pakkāmi saha bhariyāya,
ja430:10.4	devānaṁ nandanaṁ vanan”ti.
ja430:11.1	Cūḷasuvajātakaṁ catutthaṁ.
ja431:0.1	Jātaka
ja431:0.2	Navakanipāta
ja431:0.3	Gijjhavagga
ja431:0.4	5. Haritacajātaka
ja431:1.1	“Sutaṁ metaṁ mahābrahme,
ja431:1.2	kāme bhuñjati hārito;
ja431:1.3	Kaccetaṁ vacanaṁ tucchaṁ,
ja431:1.4	kacci suddho iriyyasi”.
ja431:2.1	“Evametaṁ mahārāja,
ja431:2.2	yathā te vacanaṁ sutaṁ;
ja431:2.3	Kummaggaṁ paṭipannosmi,
ja431:2.4	mohaneyyesu mucchito”.
ja431:3.1	“Adu paññā kimatthiyā,
ja431:3.2	nipuṇā sādhucintinī;
ja431:3.3	Yāya uppatitaṁ rāgaṁ,
ja431:3.4	kiṁ mano na vinodaye”.
ja431:4.1	“Cattārome mahārāja,
ja431:4.2	loke atibalā bhusā;
ja431:4.3	Rāgo doso mado moho,
ja431:4.4	yattha paññā na gādhati”.
ja431:5.1	“Arahā sīlasampanno,
ja431:5.2	suddho carati hārito;
ja431:5.3	Medhāvī paṇḍito ceva,
ja431:5.4	iti no sammato bhavaṁ”.
ja431:6.1	“Medhāvīnampi hiṁsanti,
ja431:6.2	isiṁ dhammaguṇe rataṁ;
ja431:6.3	Vitakkā pāpakā rāja,
ja431:6.4	subhā rāgūpasaṁhitā”.
ja431:7.1	“Uppannāyaṁ sarīrajo,
ja431:7.2	Rāgo vaṇṇavidūsano tava;
ja431:7.3	Taṁ pajaha bhaddamatthu te,
ja431:7.4	Bahunnāsi medhāvisammato”.
ja431:8.1	“Te andhakārake kāme,
ja431:8.2	Bahudukkhe mahāvise;
ja431:8.3	Tesaṁ mūlaṁ gavesissaṁ,
ja431:8.4	Checchaṁ rāgaṁ sabandhanaṁ”.
ja431:9.1	“Idaṁ vatvāna hārito,
ja431:9.2	isi saccaparakkamo;
ja431:9.3	Kāmarāgaṁ virājetvā,
ja431:9.4	brahmalokūpago ahū”ti.
ja431:10.1	Haritacajātakaṁ pañcamaṁ.
ja432:0.1	Jātaka
ja432:0.2	Navakanipāta
ja432:0.3	Gijjhavagga
ja432:0.4	6. Padakusalamāṇavajātaka
ja432:1.1	“Bahussutaṁ cittakathiṁ,
ja432:1.2	gaṅgā vahati pāṭaliṁ;
ja432:1.3	Vuyhamānaka bhaddante,
ja432:1.4	ekaṁ me dehi gāthakaṁ”.
ja432:2.1	“Yena siñcanti dukkhitaṁ,
ja432:2.2	yena siñcanti āturaṁ;
ja432:2.3	Tassa majjhe marissāmi,
ja432:2.4	jātaṁ saraṇato bhayaṁ”.
ja432:3.1	“Yattha bījāni rūhanti,
ja432:3.2	sattā yattha patiṭṭhitā;
ja432:3.3	Sā me sīsaṁ nipīḷeti,
ja432:3.4	jātaṁ saraṇato bhayaṁ”.
ja432:4.1	“Yena bhattāni paccanti,
ja432:4.2	sītaṁ yena vihaññati;
ja432:4.3	So maṁ ḍahati gattāni,
ja432:4.4	jātaṁ saraṇato bhayaṁ”.
ja432:5.1	“Yena bhuttena yāpenti,
ja432:5.2	puthū brāhmaṇakhattiyā;
ja432:5.3	So maṁ bhutto byāpādeti,
ja432:5.4	jātaṁ saraṇato bhayaṁ”.
ja432:6.1	“Gimhānaṁ pacchime māse,
ja432:6.2	vātamicchanti paṇḍitā;
ja432:6.3	So maṁ bhañjati gattāni,
ja432:6.4	jātaṁ saraṇato bhayaṁ”.
ja432:7.1	“Yaṁ nissitā jagatiruhaṁ,
ja432:7.2	svāyaṁ aggiṁ pamuñcati;
ja432:7.3	Disā bhajatha vakkaṅgā,
ja432:7.4	jātaṁ saraṇato bhayaṁ”.
ja432:8.1	“Yamānayiṁ somanassaṁ,
ja432:8.2	māliniṁ candanussadaṁ;
ja432:8.3	Sā maṁ gharā nicchubhati,
ja432:8.4	jātaṁ saraṇato bhayaṁ”.
ja432:9.1	“Yena jātena nandissaṁ,
ja432:9.2	yassa ca bhavamicchisaṁ;
ja432:9.3	So maṁ gharā nicchubhati,
ja432:9.4	jātaṁ saraṇato bhayaṁ”.
ja432:10.1	“Suṇantu me jānapadā,
ja432:10.2	negamā ca samāgatā;
ja432:10.3	Yatodakaṁ tadādittaṁ,
ja432:10.4	yato khemaṁ tato bhayaṁ.
ja432:11.1	Rājā vilumpate raṭṭhaṁ,
ja432:11.2	brāhmaṇo ca purohito;
ja432:11.3	Attaguttā viharatha,
ja432:11.4	jātaṁ saraṇato bhayan”ti.
ja432:12.1	Padakusalamāṇavajātakaṁ chaṭṭhaṁ.
ja433:0.1	Jātaka
ja433:0.2	Navakanipāta
ja433:0.3	Gijjhavagga
ja433:0.4	7. Lomasakassapajātaka
ja433:1.1	“Assa indasamo rāja,
ja433:1.2	accantaṁ ajarāmaro;
ja433:1.3	Sace tvaṁ yaññaṁ yājeyya,
ja433:1.4	isiṁ lomasakassapaṁ”.
ja433:2.1	“Sasamuddapariyāyaṁ,
ja433:2.2	mahiṁ sāgarakuṇḍalaṁ;
ja433:2.3	Na icche saha nindāya,
ja433:2.4	evaṁ seyya vijānahi.
ja433:3.1	Dhiratthu taṁ yasalābhaṁ,
ja433:3.2	dhanalābhañca brāhmaṇa;
ja433:3.3	Yā vutti vinipātena,
ja433:3.4	adhammacaraṇena vā.
ja433:4.1	Api ce pattamādāya,
ja433:4.2	anagāro paribbaje;
ja433:4.3	Sāyeva jīvikā seyyo,
ja433:4.4	yā cādhammena esanā.
ja433:5.1	Api ce pattamādāya,
ja433:5.2	anagāro paribbaje;
ja433:5.3	Aññaṁ ahiṁsayaṁ loke,
ja433:5.4	api rajjena taṁ varaṁ”.
ja433:6.1	“Balaṁ cando balaṁ suriyo,
ja433:6.2	balaṁ samaṇabrāhmaṇā;
ja433:6.3	Balaṁ velā samuddassa,
ja433:6.4	balātibalamitthiyo.
ja433:7.1	Yathā uggatapaṁ santaṁ,
ja433:7.2	isiṁ lomasakassapaṁ;
ja433:7.3	Pitu atthā candavatī,
ja433:7.4	vājapeyyaṁ ayājayi”.
ja433:8.1	“Taṁ lobhapakataṁ kammaṁ,
ja433:8.2	Kaṭukaṁ kāmahetukaṁ;
ja433:8.3	Tassa mūlaṁ gavesissaṁ,
ja433:8.4	Checchaṁ rāgaṁ sabandhanaṁ.
ja433:9.1	Dhiratthu kāme subahūpi loke,
ja433:9.2	Tapova seyyo kāmaguṇehi rāja;
ja433:9.3	Tapo karissāmi pahāya kāme,
ja433:9.4	Taveva raṭṭhaṁ candavatī ca hotū”ti.
ja433:10.1	Lomasakassapajātakaṁ sattamaṁ.
ja434:0.1	Jātaka
ja434:0.2	Navakanipāta
ja434:0.3	Gijjhavagga
ja434:0.4	8. Cakkavākajātaka
ja434:1.1	“Kāsāyavatthe sakuṇe vadāmi,
ja434:1.2	Duve duve nandamane carante;
ja434:1.3	Kaṁ aṇḍajaṁ aṇḍajā mānusesu,
ja434:1.4	Jātiṁ pasaṁsanti tadiṅgha brūtha”.
ja434:2.1	“Amhe manussesu manussahiṁsa,
ja434:2.2	Anubbate cakkavāke vadanti;
ja434:2.3	Kalyāṇabhāvamhe dijesu sammatā,
ja434:2.4	Abhirūpā vicarāma aṇṇave”.
ja434:2.5	(…)
ja434:3.1	“Kiṁ aṇṇave kāni phalāni bhuñje,
ja434:3.2	Maṁsaṁ kuto khādatha cakkavākā;
ja434:3.3	Kiṁ bhojanaṁ bhuñjatha vo anomā,
ja434:3.4	Balañca vaṇṇo ca anapparūpā”.
ja434:4.1	“Na aṇṇave santi phalāni dhaṅka,
ja434:4.2	Maṁsaṁ kuto khādituṁ cakkavāke;
ja434:4.3	Sevālabhakkhamha apāṇabhojanā,
ja434:4.4	Na ghāsahetūpi karoma pāpaṁ”.
ja434:5.1	“Na me idaṁ ruccati cakkavāka,
ja434:5.2	Asmiṁ bhave bhojanasannikāso;
ja434:5.3	Ahosi pubbe tato me aññathā,
ja434:5.4	Icceva me vimati ettha jātā.
ja434:6.1	Ahampi maṁsāni phalāni bhuñje,
ja434:6.2	Annāni ca loṇiyateliyāni;
ja434:6.3	Rasaṁ manussesu labhāmi bhottuṁ,
ja434:6.4	Sūrova saṅgāmamukhaṁ vijetvā;
ja434:6.5	Na ca me tādiso vaṇṇo,
ja434:6.6	Cakkavāka yathā tava”.
ja434:7.1	“Asuddhabhakkhosi khaṇānupātī,
ja434:7.2	Kicchena te labbhati annapānaṁ;
ja434:7.3	Na tussasī rukkhaphalehi dhaṅka,
ja434:7.4	Maṁsāni vā yāni susānamajjhe.
ja434:8.1	Yo sāhasena adhigamma bhoge,
ja434:8.2	Paribhuñjati dhaṅka khaṇānupātī;
ja434:8.3	Tato upakkosati naṁ sabhāvo,
ja434:8.4	Upakkuṭṭho vaṇṇabalaṁ jahāti.
ja434:9.1	Appampi ce nibbutiṁ bhuñjatī yadi,
ja434:9.2	Asāhasena aparūpaghātī;
ja434:9.3	Balañca vaṇṇo ca tadassa hoti,
ja434:9.4	Na hi sabbo āhāramayena vaṇṇo”ti.
ja434:10.1	Cakkavākajātakaṁ aṭṭhamaṁ.
ja435:0.1	Jātaka
ja435:0.2	Navakanipāta
ja435:0.3	Gijjhavagga
ja435:0.4	9. Haliddirāgajātaka
ja435:1.1	“Sutitikkhaṁ araññamhi,
ja435:1.2	pantamhi sayanāsane;
ja435:1.3	Ye ca gāme titikkhanti,
ja435:1.4	te uḷāratarā tayā”.
ja435:2.1	“Araññā gāmamāgamma,
ja435:2.2	kiṁsīlaṁ kiṁvataṁ ahaṁ;
ja435:2.3	Purisaṁ tāta seveyyaṁ,
ja435:2.4	taṁ me akkhāhi pucchito”.
ja435:3.1	“Yo te vissāsaye tāta,
ja435:3.2	vissāsañca khameyya te;
ja435:3.3	Sussūsī ca titikkhī ca,
ja435:3.4	taṁ bhajehi ito gato.
ja435:4.1	Yassa kāyena vācāya,
ja435:4.2	manasā natthi dukkaṭaṁ;
ja435:4.3	Urasīva patiṭṭhāya,
ja435:4.4	taṁ bhajehi ito gato.
ja435:5.1	Yo ca dhammena carati,
ja435:5.2	carantopi na maññati;
ja435:5.3	Visuddhakāriṁ sappaññaṁ,
ja435:5.4	taṁ bhajehi ito gato.
ja435:6.1	Haliddirāgaṁ kapicittaṁ,
ja435:6.2	purisaṁ rāgavirāginaṁ;
ja435:6.3	Tādisaṁ tāta mā sevi,
ja435:6.4	nimmanussampi ce siyā.
ja435:7.1	Āsīvisaṁva kupitaṁ,
ja435:7.2	mīḷhalittaṁ mahāpathaṁ;
ja435:7.3	Ārakā parivajjehi,
ja435:7.4	yānīva visamaṁ pathaṁ.
ja435:8.1	Anatthā tāta vaḍḍhanti,
ja435:8.2	bālaṁ accupasevato;
ja435:8.3	Māssu bālena saṅgacchi,
ja435:8.4	amitteneva sabbadā.
ja435:9.1	Taṁ tāhaṁ tāta yācāmi,
ja435:9.2	karassu vacanaṁ mama;
ja435:9.3	Māssu bālena saṅgacchi,
ja435:9.4	dukkho bālehi saṅgamo”ti.
ja435:10.1	Haliddirāgajātakaṁ navamaṁ.
ja436:0.1	Jātaka
ja436:0.2	Navakanipāta
ja436:0.3	Gijjhavagga
ja436:0.4	10. Samuggajātaka
ja436:1.1	“Kuto nu āgacchatha bho tayo janā,
ja436:1.2	Svāgatā etha nisīdathāsane;
ja436:1.3	Kaccittha bhonto kusalaṁ anāmayaṁ,
ja436:1.4	Cirassamabbhāgamanaṁ hi vo idha”.
ja436:2.1	“Ahameva eko idha majja patto,
ja436:2.2	Na cāpi me dutiyo koci vijjati;
ja436:2.3	Kimeva sandhāya te bhāsitaṁ ise,
ja436:2.4	‘Kuto nu āgacchatha bho tayo janā’”.
ja436:3.1	“Tuvañca eko bhariyā ca te piyā,
ja436:3.2	Samuggapakkhittanikiṇṇamantare;
ja436:3.3	Sā rakkhitā kucchigatāva te sadā,
ja436:3.4	Vāyussa puttena sahā tahiṁ ratā”.
ja436:4.1	“Saṁviggarūpo isinā viyākato,
ja436:4.2	So dānavo tattha samuggamuggili;
ja436:4.3	Addakkhi bhariyaṁ suci māladhāriniṁ,
ja436:4.4	Vāyussa puttena sahā tahiṁ rataṁ”.
ja436:5.1	“Sudiṭṭharūpamuggatapānuvattinā,
ja436:5.2	Hīnā narā ye pamadāvasaṁ gatā;
ja436:5.3	Yathā have pāṇarivettha rakkhitā,
ja436:5.4	Duṭṭhā mayī aññamabhippamodayi.
ja436:6.1	Divā ca ratto ca mayā upaṭṭhitā,
ja436:6.2	Tapassinā jotirivā vane vasaṁ;
ja436:6.3	Sā dhammamukkamma adhammamācari,
ja436:6.4	Akiriyarūpo pamadāhi santhavo.
ja436:7.1	Sarīramajjhamhi ṭhitātimaññahaṁ,
ja436:7.2	Mayhaṁ ayanti asatiṁ asaññataṁ;
ja436:7.3	Sā dhammamukkamma adhammamācari,
ja436:7.4	Akiriyarūpo pamadāhi santhavo.
ja436:8.1	Surakkhitaṁ meti kathaṁ nu vissase,
ja436:8.2	Anekacittāsu na hatthi rakkhaṇā;
ja436:8.3	Etā hi pātālapapātasannibhā,
ja436:8.4	Etthappamatto byasanaṁ nigaccha”ti.
ja436:9.1	“Tasmā hi te sukhino vītasokā,
ja436:9.2	Ye mātugāmehi caranti nissaṭā;
ja436:9.3	Etaṁ sivaṁ uttamamābhipatthayaṁ,
ja436:9.4	Na mātugāmehi kareyya santhavanti”.
ja436:10.1	Samuggajātakaṁ dasamaṁ.
ja437:0.1	Jātaka
ja437:0.2	Navakanipāta
ja437:0.3	Gijjhavagga
ja437:0.4	11. Pūtimaṁsajātaka
ja437:1.1	“Na kho me ruccati āḷi,
ja437:1.2	pūtimaṁsassa pekkhanā;
ja437:1.3	Etādisā sakhārasmā,
ja437:1.4	ārakā parivajjaye”.
ja437:2.1	“Ummattikā ayaṁ veṇī,
ja437:2.2	vaṇṇeti patino sakhiṁ;
ja437:2.3	Pajjhāyi paṭigacchantiṁ,
ja437:2.4	āgataṁ meṇḍamātaraṁ”.
ja437:3.1	“Tvaṁ khosi samma ummatto,
ja437:3.2	dummedho avicakkhaṇo;
ja437:3.3	Yo tvaṁ matālayaṁ katvā,
ja437:3.4	akālena vipekkhasi”.
ja437:4.1	“Na akāle vipekkheyya,
ja437:4.2	kāle pekkheyya paṇḍito;
ja437:4.3	Pūtimaṁsova pajjhāyi,
ja437:4.4	yo akāle vipekkhati”.
ja437:5.1	“Piyaṁ kho āḷi me hotu,
ja437:5.2	puṇṇapattaṁ dadāhi me;
ja437:5.3	Pati sañjīvito mayhaṁ,
ja437:5.4	eyyāsi piyapucchikā”.
ja437:6.1	“Piyaṁ kho āḷi te hotu,
ja437:6.2	puṇṇapattaṁ dadāmi te;
ja437:6.3	Mahatā parivārena,
ja437:6.4	essaṁ kayirāhi bhojanaṁ”.
ja437:7.1	“Kīdiso tuyhaṁ parivāro,
ja437:7.2	yesaṁ kāhāmi bhojanaṁ;
ja437:7.3	Kiṁnāmakā ca te sabbe,
ja437:7.4	taṁ me akkhāhi pucchitā”.
ja437:8.1	“Māliyo caturakkho ca,
ja437:8.2	piṅgiyo atha jambuko;
ja437:8.3	Ediso mayhaṁ parivāro,
ja437:8.4	tesaṁ kayirāhi bhojanaṁ”.
ja437:9.1	“Nikkhantāya agārasmā,
ja437:9.2	bhaṇḍakampi vinassati;
ja437:9.3	Ārogyaṁ āḷino vajjaṁ,
ja437:9.4	idheva vasa māgamā”ti.
ja437:10.1	Pūtimaṁsajātakaṁ ekādasamaṁ.
ja438:0.1	Jātaka
ja438:0.2	Navakanipāta
ja438:0.3	Gijjhavagga
ja438:0.4	12. Daddarajātaka
ja438:1.1	“Yo te puttake akhādi,
ja438:1.2	dinnabhatto adūsake;
ja438:1.3	Tasmiṁ dāṭhaṁ nipātehi,
ja438:1.4	mā te muccittha jīvato”.
ja438:2.1	“Ākiṇṇaluddo puriso,
ja438:2.2	dhāticelaṁva makkhito;
ja438:2.3	Padesaṁ taṁ na passāmi,
ja438:2.4	yattha dāṭhaṁ nipātaye.
ja438:3.1	Akataññussa posassa,
ja438:3.2	niccaṁ vivaradassino;
ja438:3.3	Sabbañce pathaviṁ dajjā,
ja438:3.4	neva naṁ abhirādhaye”.
ja438:4.1	“Kiṁ nu subāhu taramānarūpo,
ja438:4.2	Paccāgatosi saha māṇavena;
ja438:4.3	Kiṁ kiccamatthaṁ idhamatthi tuyhaṁ,
ja438:4.4	Akkhāhi me pucchito etamatthaṁ”.
ja438:5.1	“Yo te sakhā daddaro sādhurūpo,
ja438:5.2	Tassa vadhaṁ parisaṅkāmi ajja;
ja438:5.3	Purisassa kammāyatanāni sutvā,
ja438:5.4	Nāhaṁ sukhiṁ daddaraṁ ajja maññe”.
ja438:6.1	“Kānissa kammāyatanāni assu,
ja438:6.2	Purisassa vuttisamodhānatāya;
ja438:6.3	Kaṁ vā paṭiññaṁ purisassa sutvā,
ja438:6.4	Parisaṅkasi daddaraṁ māṇavena”.
ja438:7.1	“Ciṇṇā kaliṅgā caritā vaṇijjā,
ja438:7.2	Vettācaro saṅkupathopi ciṇṇo;
ja438:7.3	Naṭehi ciṇṇaṁ saha vākurehi,
ja438:7.4	Daṇḍena yuddhampi samajjamajjhe.
ja438:8.1	Baddhā kulīkā mitamāḷhakena,
ja438:8.2	Akkhā jitā saṁyamo abbhatīto;
ja438:8.3	Abbāhitaṁ pubbakaṁ aḍḍharattaṁ,
ja438:8.4	Hatthā daḍḍhā piṇḍapaṭiggahena.
ja438:9.1	Tānissa kammāyatanāni assu,
ja438:9.2	Purisassa vuttisamodhānatāya;
ja438:9.3	Yathā ayaṁ dissati lomapiṇḍo,
ja438:9.4	Gāvo hatā kiṁ pana daddarassā”ti.
ja438:10.1	Daddarajātakaṁ dvādasamaṁ.
ja438:11.1	Navakanipātaṁ niṭṭhitaṁ.
ja438:12.1	Tassuddānaṁ
ja438:13.1	Varagijjha samajjana haṁsavaro,
ja438:13.2	Nidhisavhaya hārita pāṭaliko;
ja438:13.3	Ajarāmara dhaṅka titikkha kuto,
ja438:13.4	Atha dvādasa pekkhana daddaribhīti.
ja439:0.1	Jātaka
ja439:0.2	Dasakanipāta
ja439:0.3	Catudvāravagga
ja439:0.4	1. Catudvārajātaka
ja439:1.1	“Catudvāramidaṁ nagaraṁ,
ja439:1.2	āyasaṁ daḷhapākāraṁ;
ja439:1.3	Oruddhapaṭiruddhosmi,
ja439:1.4	kiṁ pāpaṁ pakataṁ mayā”.
ja439:2.1	“Sabbe apihitā dvārā,
ja439:2.2	oruddhosmi yathā dijo;
ja439:2.3	Kimādhikaraṇaṁ yakkha,
ja439:2.4	cakkābhinihato ahaṁ.
ja439:3.1	Laddhā satasahassāni,
ja439:3.2	atirekāni vīsati;
ja439:3.3	Anukampakānaṁ ñātīnaṁ,
ja439:3.4	vacanaṁ samma nākari.
ja439:4.1	Laṅghiṁ samuddaṁ pakkhandi,
ja439:4.2	sāgaraṁ appasiddhikaṁ;
ja439:4.3	Catubbhi aṭṭhajjhagamā,
ja439:4.4	aṭṭhāhipi ca soḷasa.
ja439:5.1	Soḷasāhi ca bāttiṁsa,
ja439:5.2	atricchaṁ cakkamāsado;
ja439:5.3	Icchāhatassa posassa,
ja439:5.4	cakkaṁ bhamati matthake.
ja439:6.1	Uparivisālā duppūrā,
ja439:6.2	icchā visaṭagāminī;
ja439:6.3	Ye ca taṁ anugijjhanti,
ja439:6.4	te honti cakkadhārino.
ja439:7.1	Bahubhaṇḍaṁ avahāya,
ja439:7.2	maggaṁ appaṭivekkhiya;
ja439:7.3	Yesañcetaṁ asaṅkhātaṁ,
ja439:7.4	te honti cakkadhārino.
ja439:8.1	Kammaṁ samekkhe vipulañca bhogaṁ,
ja439:8.2	Icchaṁ na seveyya anatthasaṁhitaṁ;
ja439:8.3	Kareyya vākyaṁ anukampakānaṁ,
ja439:8.4	Taṁ tādisaṁ nātivatteyya cakkaṁ”.
ja439:9.1	“Kīvaciraṁ nu me yakkha,
ja439:9.2	cakkaṁ sirasi ṭhassati;
ja439:9.3	Kati vassasahassāni,
ja439:9.4	taṁ me akkhāhi pucchito”.
ja439:10.1	“Atisaro paccasaro,
ja439:10.2	mittavinda suṇohi me;
ja439:10.3	Cakkaṁ te sirasi māviddhaṁ,
ja439:10.4	na taṁ jīvaṁ pamokkhasī”ti.
ja439:11.1	Catudvārajātakaṁ paṭhamaṁ.
ja440:0.1	Jātaka
ja440:0.2	Dasakanipāta
ja440:0.3	Catudvāravagga
ja440:0.4	2. Kaṇhajātaka
ja440:1.1	“Kaṇho vatāyaṁ puriso,
ja440:1.2	kaṇhaṁ bhuñjati bhojanaṁ;
ja440:1.3	Kaṇhe bhūmipadesasmiṁ,
ja440:1.4	na mayhaṁ manaso piyo”.
ja440:2.1	“Na kaṇho tacasā hoti,
ja440:2.2	antosāro hi brāhmaṇo;
ja440:2.3	Yasmiṁ pāpāni kammāni,
ja440:2.4	sa ve kaṇho sujampati”.
ja440:3.1	“Etasmiṁ te sulapite,
ja440:3.2	patirūpe subhāsite;
ja440:3.3	Varaṁ brāhmaṇa te dammi,
ja440:3.4	yaṁ kiñci manasicchasi”.
ja440:4.1	“Varañce me ado sakka,
ja440:4.2	sabbabhūtānamissara;
ja440:4.3	Sunikkodhaṁ suniddosaṁ,
ja440:4.4	nillobhaṁ vuttimattano;
ja440:4.5	Nisnehamabhikaṅkhāmi,
ja440:4.6	ete me caturo vare”.
ja440:5.1	“Kiṁ nu kodhe vā dose vā,
ja440:5.2	lobhe snehe ca brāhmaṇa;
ja440:5.3	Ādīnavaṁ tvaṁ passasi,
ja440:5.4	taṁ me akkhāhi pucchito”.
ja440:6.1	“Appo hutvā bahu hoti,
ja440:6.2	vaḍḍhate so akhantijo;
ja440:6.3	Āsaṅgī bahupāyāso,
ja440:6.4	tasmā kodhaṁ na rocaye.
ja440:7.1	Duṭṭhassa pharusā vācā,
ja440:7.2	parāmāso anantarā;
ja440:7.3	Tato pāṇi tato daṇḍo,
ja440:7.4	satthassa paramā gati;
ja440:7.5	Doso kodhasamuṭṭhāno,
ja440:7.6	tasmā dosaṁ na rocaye.
ja440:8.1	Ālopa sāhasākārā,
ja440:8.2	nikatī vañcanāni ca;
ja440:8.3	Dissanti lobhadhammesu,
ja440:8.4	tasmā lobhaṁ na rocaye.
ja440:9.1	Snehasaṅgathitā ganthā,
ja440:9.2	senti manomayā puthū;
ja440:9.3	Te bhusaṁ upatāpenti,
ja440:9.4	tasmā snehaṁ na rocaye”.
ja440:10.1	“Etasmiṁ te sulapite,
ja440:10.2	patirūpe subhāsite;
ja440:10.3	Varaṁ brāhmaṇa te dammi,
ja440:10.4	yaṁ kiñci manasicchasi”.
ja440:11.1	“Varañce me ado sakka,
ja440:11.2	sabbabhūtānamissara;
ja440:11.3	Araññe me viharato,
ja440:11.4	niccaṁ ekavihārino;
ja440:11.5	Ābādhā mā uppajjeyyuṁ,
ja440:11.6	antarāyakarā bhusā”.
ja440:12.1	“Etasmiṁ te sulapite,
ja440:12.2	patirūpe subhāsite;
ja440:12.3	Varaṁ brāhmaṇa te dammi,
ja440:12.4	yaṁ kiñci manasicchasi”.
ja440:13.1	“Varañce me ado sakka,
ja440:13.2	sabbabhūtānamissara;
ja440:13.3	Na mano vā sarīraṁ vā,
ja440:13.4	maṁ-kate sakka kassaci;
ja440:13.5	Kadāci upahaññetha,
ja440:13.6	etaṁ sakka varaṁ vare”ti.
ja440:14.1	Kaṇhajātakaṁ dutiyaṁ.
ja441:0.1	Jātaka
ja441:0.2	Dasakanipāta
ja441:0.3	Catudvāravagga
ja441:0.4	3. Catuposathiyajātaka
ja441:1.1	“Yo kopaneyye na karoti kopaṁ,
ja441:1.2	Na kujjhati sappuriso kadāci;
ja441:1.3	Kuddhopi so nāvikaroti kopaṁ,
ja441:1.4	Taṁ ve naraṁ samaṇamāhu loke”.
ja441:2.1	“Ūnūdaro yo sahate jighacchaṁ,
ja441:2.2	Danto tapassī mitapānabhojano;
ja441:2.3	Āhārahetu na karoti pāpaṁ,
ja441:2.4	Taṁ ve naraṁ samaṇamāhu loke”.
ja441:3.1	“Khiḍḍaṁ ratiṁ vippajahitvāna sabbaṁ,
ja441:3.2	Na cālikaṁ bhāsasi kiñci loke;
ja441:3.3	Vibhūsaṭṭhānā virato methunasmā,
ja441:3.4	Taṁ ve naraṁ samaṇamāhu loke”.
ja441:4.1	“Pariggahaṁ lobhadhammañca sabbaṁ,
ja441:4.2	Yo ve pariññāya pariccajeti;
ja441:4.3	Dantaṁ ṭhitattaṁ amamaṁ nirāsaṁ,
ja441:4.4	Taṁ ve naraṁ samaṇamāhu loke”.
ja441:5.1	“Pucchāma kattāramanomapaññaṁ,
ja441:5.2	Kathāsu no viggaho atthi jāto;
ja441:5.3	Chindajja kaṅkhaṁ vicikicchitāni,
ja441:5.4	Tadajja kaṅkhaṁ vitaremu sabbe”.
ja441:6.1	“Ye paṇḍitā atthadasā bhavanti,
ja441:6.2	Bhāsanti te yoniso tattha kāle;
ja441:6.3	Kathaṁ nu kathānaṁ abhāsitānaṁ,
ja441:6.4	Atthaṁ nayeyyuṁ kusalā janindā.
ja441:7.1	Kathaṁ have bhāsati nāgarājā,
ja441:7.2	Garuḷo pana venateyyo kimāha;
ja441:7.3	Gandhabbarājā pana kiṁ vadesi,
ja441:7.4	Kathaṁ pana kurūnaṁ rājaseṭṭho”.
ja441:8.1	“Khantiṁ have bhāsati nāgarājā,
ja441:8.2	Appāhāraṁ garuḷo venateyyo;
ja441:8.3	Gandhabbarājā rativippahānaṁ,
ja441:8.4	Akiñcanaṁ kurūnaṁ rājaseṭṭho”.
ja441:9.1	“Sabbāni etāni subhāsitāni,
ja441:9.2	Na hettha dubbhāsitamatthi kiñci;
ja441:9.3	Yasmiñca etāni patiṭṭhitāni,
ja441:9.4	Arāva nābhyā susamohitāni;
ja441:9.5	Catubbhi dhammehi samaṅgibhūtaṁ,
ja441:9.6	Taṁ ve naraṁ samaṇamāhu loke”.
ja441:10.1	“Tuvañhi seṭṭho tvamanuttarosi,
ja441:10.2	Tvaṁ dhammagū dhammavidū sumedho;
ja441:10.3	Paññāya pañhaṁ samadhiggahetvā,
ja441:10.4	Acchecchi dhīro vicikicchitāni;
ja441:10.5	Acchecchi kaṅkhaṁ vicikicchitāni,
ja441:10.6	Cundo yathā nāgadantaṁ kharena.
ja441:11.1	Nīluppalābhaṁ vimalaṁ anagghaṁ,
ja441:11.2	Vatthaṁ idaṁ dhūmasamānavaṇṇaṁ;
ja441:11.3	Pañhassa veyyākaraṇena tuṭṭho,
ja441:11.4	Dadāmi te dhammapūjāya dhīra.
ja441:12.1	Suvaṇṇamālaṁ satapattaphullitaṁ,
ja441:12.2	Sakesaraṁ ratnasahassamaṇḍitaṁ;
ja441:12.3	Pañhassa veyyākaraṇena tuṭṭho,
ja441:12.4	Dadāmi te dhammapūjāya dhīra.
ja441:13.1	Maṇiṁ anagghaṁ ruciraṁ pabhassaraṁ,
ja441:13.2	Kaṇṭhāvasattaṁ maṇibhūsitaṁ me;
ja441:13.3	Pañhassa veyyākaraṇena tuṭṭho,
ja441:13.4	Dadāmi te dhammapūjāya dhīra.
ja441:14.1	Gavaṁ sahassaṁ usabhañca nāgaṁ,
ja441:14.2	Ājaññayutte ca rathe dasa ime;
ja441:14.3	Pañhassa veyyākaraṇena tuṭṭho,
ja441:14.4	Dadāmi te gāmavarāni soḷasa”.
ja441:15.1	“Sāriputto tadā nāgo,
ja441:15.2	supaṇṇo pana kolito;
ja441:15.3	Gandhabbarājā anuruddho,
ja441:15.4	rājā ānandapaṇḍito;
ja441:15.5	Vidhuro bodhisatto ca,
ja441:15.6	evaṁ dhāretha jātakan”ti.
ja441:16.1	Catuposathiyajātakaṁ tatiyaṁ.
ja442:0.1	Jātaka
ja442:0.2	Dasakanipāta
ja442:0.3	Catudvāravagga
ja442:0.4	4. Saṅkhajātaka
ja442:1.1	“Bahussuto sutadhammosi saṅkha,
ja442:1.2	Diṭṭhā tayā samaṇabrāhmaṇā ca;
ja442:1.3	Athakkhaṇe dassayase vilāpaṁ,
ja442:1.4	Añño nu ko te paṭimantako mayā”.
ja442:2.1	“Subbhū subhā suppaṭimukkakambu,
ja442:2.2	Paggayha sovaṇṇamayāya pātiyā;
ja442:2.3	‘Bhuñjassu bhattaṁ’ iti maṁ vadeti,
ja442:2.4	Saddhāvittā
ja442:2.5	Tamahaṁ noti brūmi”.
ja442:3.1	“Etādisaṁ brāhmaṇa disvāna yakkhaṁ,
ja442:3.2	Puccheyya poso sukhamāsisāno;
ja442:3.3	Uṭṭhehi naṁ pañjalikābhipuccha,
ja442:3.4	Devī nusi tvaṁ uda mānusī nu”.
ja442:4.1	“Yaṁ tvaṁ sukhenābhisamekkhase maṁ,
ja442:4.2	Bhuñjassu bhattaṁ iti maṁ vadesi;
ja442:4.3	Pucchāmi taṁ nāri mahānubhāve,
ja442:4.4	Devī nusi tvaṁ uda mānusī nu”.
ja442:5.1	“Devī ahaṁ saṅkha mahānubhāvā,
ja442:5.2	Idhāgatā sāgaravārimajjhe;
ja442:5.3	Anukampikā no ca paduṭṭhacittā,
ja442:5.4	Taveva atthāya idhāgatāsmi.
ja442:6.1	Idhannapānaṁ sayanāsanañca,
ja442:6.2	Yānāni nānāvividhāni saṅkha;
ja442:6.3	Sabbassa tyāhaṁ paṭipādayāmi,
ja442:6.4	Yaṁ kiñci tuyhaṁ manasābhipatthitaṁ”.
ja442:7.1	“Yaṁ kiñci yiṭṭhañca hutañca mayhaṁ,
ja442:7.2	Sabbassa no issarā tvaṁ sugatte;
ja442:7.3	Susoṇi subbhamu suvilaggamajjhe,
ja442:7.4	Kissa me kammassa ayaṁ vipāko”.
ja442:8.1	“Ghamme pathe brāhmaṇa ekabhikkhuṁ,
ja442:8.2	Ugghaṭṭapādaṁ tasitaṁ kilantaṁ;
ja442:8.3	Paṭipādayī saṅkha upāhanāni,
ja442:8.4	Sā dakkhiṇā kāmaduhā tavajja”.
ja442:9.1	“Sā hotu nāvā phalakūpapannā,
ja442:9.2	Anavassutā erakavātayuttā;
ja442:9.3	Aññassa yānassa na hettha bhūmi,
ja442:9.4	Ajjeva maṁ moḷiniṁ pāpayassu”.
ja442:10.1	“Sā tattha vittā sumanā patītā,
ja442:10.2	Nāvaṁ sucittaṁ abhinimminitvā;
ja442:10.3	Ādāya saṅkhaṁ purisena saddhiṁ,
ja442:10.4	Upānayī nagaraṁ sādhuramman”ti.
ja442:11.1	Saṅkhajātakaṁ catutthaṁ.
ja443:0.1	Jātaka
ja443:0.2	Dasakanipāta
ja443:0.3	Catudvāravagga
ja443:0.4	5. Cūḷabodhijātaka
ja443:1.1	“Yo te imaṁ visālakkhiṁ,
ja443:1.2	piyaṁ sammhitabhāsiniṁ;
ja443:1.3	Ādāya balā gaccheyya,
ja443:1.4	kiṁ nu kayirāsi brāhmaṇa”.
ja443:2.1	“Uppajje me na mucceyya,
ja443:2.2	na me mucceyya jīvato;
ja443:2.3	Rajaṁva vipulā vuṭṭhi,
ja443:2.4	khippameva nivāraye”.
ja443:3.1	“Yannu pubbe vikatthittho,
ja443:3.2	balamhiva apassito;
ja443:3.3	Svajja tuṇhikato dāni,
ja443:3.4	saṅghāṭiṁ sibbamacchasi”.
ja443:4.1	“Uppajji me na muccittha,
ja443:4.2	na me muccittha jīvato;
ja443:4.3	Rajaṁva vipulā vuṭṭhi,
ja443:4.4	khippameva nivārayiṁ”.
ja443:5.1	“Kiṁ te uppajji no mucci,
ja443:5.2	kiṁ te na mucci jīvato;
ja443:5.3	Rajaṁva vipulā vuṭṭhi,
ja443:5.4	katamaṁ tvaṁ nivārayi”.
ja443:6.1	“Yamhi jāte na passati,
ja443:6.2	ajāte sādhu passati;
ja443:6.3	So me uppajji no mucci,
ja443:6.4	kodho dummedhagocaro.
ja443:7.1	Yena jātena nandanti,
ja443:7.2	amittā dukkhamesino;
ja443:7.3	So me uppajji no mucci,
ja443:7.4	kodho dummedhagocaro.
ja443:8.1	Yasmiñca jāyamānamhi,
ja443:8.2	sadatthaṁ nāvabujjhati;
ja443:8.3	So me uppajji no mucci,
ja443:8.4	kodho dummedhagocaro.
ja443:9.1	Yenābhibhūto kusalaṁ jahāti,
ja443:9.2	Parakkare vipulañcāpi atthaṁ;
ja443:9.3	Sa bhīmaseno balavā pamaddī,
ja443:9.4	Kodho mahārāja na me amuccatha.
ja443:10.1	Kaṭṭhasmiṁ matthamānasmiṁ,
ja443:10.2	Pāvako nāma jāyati;
ja443:10.3	Tameva kaṭṭhaṁ ḍahati,
ja443:10.4	Yasmā so jāyate gini.
ja443:11.1	Evaṁ mandassa posassa,
ja443:11.2	bālassa avijānato;
ja443:11.3	Sārambhā jāyate kodho,
ja443:11.4	sopi teneva ḍayhati.
ja443:12.1	Aggīva tiṇakaṭṭhasmiṁ,
ja443:12.2	kodho yassa pavaḍḍhati;
ja443:12.3	Nihīyati tassa yaso,
ja443:12.4	kāḷapakkheva candimā.
ja443:13.1	Anedho dhūmaketūva,
ja443:13.2	kodho yassūpasammati;
ja443:13.3	Āpūrati tassa yaso,
ja443:13.4	sukkapakkheva candimā”ti.
ja443:14.1	Cūḷabodhijātakaṁ pañcamaṁ.
ja444:0.1	Jātaka
ja444:0.2	Dasakanipāta
ja444:0.3	Catudvāravagga
ja444:0.4	6. Kaṇhadīpāyanajātaka
ja444:1.1	“Sattāhamevāhaṁ pasannacitto,
ja444:1.2	Puññatthiko ācariṁ brahmacariyaṁ;
ja444:1.3	Athāparaṁ yaṁ caritaṁ mamedaṁ,
ja444:1.4	Vassāni paññāsa samādhikāni;
ja444:1.5	Akāmakovāpi ahaṁ carāmi,
ja444:1.6	Etena saccena suvatthi hotu;
ja444:1.7	Hataṁ visaṁ jīvatu yaññadatto”.
ja444:2.1	“Yasmā dānaṁ nābhinandiṁ kadāci,
ja444:2.2	Disvānahaṁ atithiṁ vāsakāle;
ja444:2.3	Na cāpi me appiyataṁ aveduṁ,
ja444:2.4	Bahussutā samaṇabrāhmaṇā ca”.
ja444:2.5	Akāmakovāpi ahaṁ dadāmi,
ja444:2.6	Etena saccena suvatthi hotu;
ja444:2.7	Hataṁ visaṁ jīvatu yaññadatto.
ja444:3.1	“Āsīviso tāta pahūtatejo,
ja444:3.2	Yo taṁ adaṁsī sacarā udicca;
ja444:3.3	Tasmiñca me appiyatāya ajja,
ja444:3.4	Pitari ca te natthi koci viseso;
ja444:3.5	Etena saccena suvatthi hotu,
ja444:3.6	Hataṁ visaṁ jīvatu yaññadatto”.
ja444:4.1	“Santā dantāyeva paribbajanti,
ja444:4.2	Aññatra kaṇhā natthākāmarūpā;
ja444:4.3	Dīpāyana kissa jigucchamāno,
ja444:4.4	Akāmako carasi brahmacariyaṁ”.
ja444:5.1	“Saddhāya nikkhamma punaṁ nivatto,
ja444:5.2	So eḷamūgova bālo vatāyaṁ;
ja444:5.3	Etassa vādassa jigucchamāno,
ja444:5.4	Akāmako carāmi brahmacariyaṁ;
ja444:5.5	Viññuppasatthañca satañca ṭhānaṁ,
ja444:5.6	Evampahaṁ puññakaro bhavāmi”.
ja444:6.1	“Samaṇe tuvaṁ brāhmaṇe addhike ca,
ja444:6.2	Santappayāsi annapānena bhikkhaṁ;
ja444:6.3	Opānabhūtaṁva gharaṁ tava yidaṁ,
ja444:6.4	Annena pānena upetarūpaṁ;
ja444:6.5	Atha kissa vādassa jigucchamāno,
ja444:6.6	Akāmako dānamimaṁ dadāsi”.
ja444:7.1	“Pitaro ca me āsuṁ pitāmahā ca,
ja444:7.2	Saddhā ahuṁ dānapatī vadaññū;
ja444:7.3	Taṁ kullavattaṁ anuvattamāno,
ja444:7.4	Māhaṁ kule antimagandhano ahuṁ;
ja444:7.5	Etassa vādassa jigucchamāno,
ja444:7.6	Akāmako dānamimaṁ dadāmi”.
ja444:8.1	“Dahariṁ kumāriṁ asamatthapaññaṁ,
ja444:8.2	Yaṁ tānayiṁ ñātikulā sugatte;
ja444:8.3	Na cāpi me appiyataṁ avedi,
ja444:8.4	Aññatra kāmā paricārayantā;
ja444:8.5	Atha kena vaṇṇena mayā te bhoti,
ja444:8.6	Saṁvāsadhammo ahu evarūpo”.
ja444:9.1	“Ārā dūre nayidha kadāci atthi,
ja444:9.2	Paramparā nāma kule imasmiṁ;
ja444:9.3	Taṁ kullavattaṁ anuvattamānā,
ja444:9.4	Māhaṁ kule antimagandhinī ahuṁ;
ja444:9.5	Etassa vādassa jigucchamānā,
ja444:9.6	Akāmikā paddhacarāmhi tuyhaṁ”.
ja444:10.1	“Maṇḍabya bhāsiṁ yamabhāsaneyyaṁ,
ja444:10.2	Taṁ khamyataṁ puttakahetu majja;
ja444:10.3	Puttapemā na idha paratthi kiñci,
ja444:10.4	So no ayaṁ jīvati yaññadatto”ti.
ja444:11.1	Kaṇhadīpāyanajātakaṁ chaṭṭhaṁ.
ja445:0.1	Jātaka
ja445:0.2	Dasakanipāta
ja445:0.3	Catudvāravagga
ja445:0.4	7. Nigrodhajātaka
ja445:1.1	“Na vāhametaṁ jānāmi,
ja445:1.2	ko vāyaṁ kassa vāti vā;
ja445:1.3	Yathā sākho cari evaṁ,
ja445:1.4	nigrodha kinti maññasi.
ja445:2.1	Tato galavinītena,
ja445:2.2	purisā nīhariṁsu maṁ;
ja445:2.3	Datvā mukhapahārāni,
ja445:2.4	sākhassa vacanaṅkarā.
ja445:3.1	Etādisaṁ dummatinā,
ja445:3.2	akataññuna dubbhinā;
ja445:3.3	Kataṁ anariyaṁ sākhena,
ja445:3.4	sakhinā te janādhipa”.
ja445:4.1	“Na vāhametaṁ jānāmi,
ja445:4.2	napi me koci saṁsati;
ja445:4.3	Yaṁ me tvaṁ samma akkhāsi,
ja445:4.4	sākhena kāraṇaṁ kataṁ.
ja445:5.1	Sakhīnaṁ sājīvakaro,
ja445:5.2	mama sākhassa cūbhayaṁ;
ja445:5.3	Tvaṁ nosissariyaṁ dātā,
ja445:5.4	manussesu mahantataṁ;
ja445:5.5	Tayāmā labbhitā iddhī,
ja445:5.6	ettha me natthi saṁsayo.
ja445:6.1	Yathāpi bījamaggimhi,
ja445:6.2	ḍayhati na virūhati;
ja445:6.3	Evaṁ kataṁ asappurise,
ja445:6.4	nassati na virūhati.
ja445:7.1	Kataññumhi ca posamhi,
ja445:7.2	Sīlavante ariyavuttine;
ja445:7.3	Sukhette viya bījāni,
ja445:7.4	Kataṁ tamhi na nassati”.
ja445:8.1	“Imaṁ jammaṁ nekatikaṁ,
ja445:8.2	asappurisacintakaṁ;
ja445:8.3	Hanantu sākhaṁ sattīhi,
ja445:8.4	nāssa icchāmi jīvitaṁ”.
ja445:9.1	“Khamatassa mahārāja,
ja445:9.2	Pāṇā na paṭiānayā;
ja445:9.3	Khama deva asappurisassa,
ja445:9.4	Nāssa icchāmahaṁ vadhaṁ”.
ja445:10.1	“Nigrodhameva seveyya,
ja445:10.2	na sākhamupasaṁvase;
ja445:10.3	Nigrodhasmiṁ mataṁ seyyo,
ja445:10.4	yañce sākhasmi jīvitan”ti.
ja445:11.1	Nigrodhajātakaṁ sattamaṁ.
ja446:0.1	Jātaka
ja446:0.2	Dasakanipāta
ja446:0.3	Catudvāravagga
ja446:0.4	8. Takkalajātaka
ja446:1.1	“Na takkalā santi na āluvāni,
ja446:1.2	Na biḷāliyo na kaḷambāni tāta;
ja446:1.3	Eko araññamhi susānamajjhe,
ja446:1.4	Kimatthiko tāta khaṇāsi kāsuṁ”.
ja446:2.1	“Pitāmaho tāta sudubbalo te,
ja446:2.2	Anekabyādhīhi dukhena phuṭṭho;
ja446:2.3	Tamajjahaṁ nikhaṇissāmi sobbhe,
ja446:2.4	Na hissa taṁ jīvitaṁ rocayāmi”.
ja446:3.1	“Saṅkappametaṁ paṭiladdha pāpakaṁ,
ja446:3.2	Accāhitaṁ kamma karosi luddaṁ;
ja446:3.3	Mayāpi tāta paṭilacchase tuvaṁ,
ja446:3.4	Etādisaṁ kamma jarūpanīto;
ja446:3.5	Taṁ kullavattaṁ anuvattamāno,
ja446:3.6	Ahampi taṁ nikhaṇissāmi sobbhe”.
ja446:4.1	“Pharusāhi vācāhi pakubbamāno,
ja446:4.2	Āsajja maṁ tvaṁ vadase kumāra;
ja446:4.3	Putto mamaṁ orasako samāno,
ja446:4.4	Ahitānukampī mama tvaṁsi putta”.
ja446:5.1	“Na tāhaṁ tāta ahitānukampī,
ja446:5.2	Hitānukampī te ahampi tāta;
ja446:5.3	Pāpañca taṁ kamma pakubbamānaṁ,
ja446:5.4	Arahāmi no vārayituṁ tato”.
ja446:6.1	“Yo mātaraṁ vā pitaraṁ saviṭṭha,
ja446:6.2	Adūsake hiṁsati pāpadhammo;
ja446:6.3	Kāyassa bhedā abhisamparāyaṁ,
ja446:6.4	Asaṁsayaṁ so nirayaṁ upeti.
ja446:7.1	Yo mātaraṁ vā pitaraṁ saviṭṭha,
ja446:7.2	Annena pānena upaṭṭhahāti;
ja446:7.3	Kāyassa bhedā abhisamparāyaṁ,
ja446:7.4	Asaṁsayaṁ so sugatiṁ upeti.
ja446:8.1	Na me tvaṁ putta ahitānukampī,
ja446:8.2	Hitānukampī me tvaṁsi putta;
ja446:8.3	Ahañca taṁ mātarā vuccamāno,
ja446:8.4	Etādisaṁ kamma karomi luddaṁ”.
ja446:9.1	“Yā te sā bhariyā anariyarūpā,
ja446:9.2	Mātā mamesā sakiyā janetti;
ja446:9.3	Niddhāpaye tañca sakā agārā,
ja446:9.4	Aññampi te sā dukhamāvaheyya.
ja446:10.1	Yā te sā bhariyā anariyarūpā,
ja446:10.2	Mātā mamesā sakiyā janetti;
ja446:10.3	Dantā kareṇūva vasūpanītā,
ja446:10.4	Sā pāpadhammā punarāvajātū”ti.
ja446:11.1	Takkalajātakaṁ aṭṭhamaṁ.
ja447:0.1	Jātaka
ja447:0.2	Dasakanipāta
ja447:0.3	Catudvāravagga
ja447:0.4	9. Mahādhammapālajātaka
ja447:1.1	“Kiṁ te vataṁ kiṁ pana brahmacariyaṁ,
ja447:1.2	Kissa suciṇṇassa ayaṁ vipāko;
ja447:1.3	Akkhāhi me brāhmaṇa etamatthaṁ,
ja447:1.4	Kasmā nu tumhaṁ daharā na miyyare”.
ja447:2.1	“Dhammaṁ carāma na musā bhaṇāma,
ja447:2.2	Pāpāni kammāni parivajjayāma;
ja447:2.3	Anariyaṁ parivajjemu sabbaṁ,
ja447:2.4	Tasmā hi amhaṁ daharā na miyyare.
ja447:3.1	Suṇoma dhammaṁ asataṁ satañca,
ja447:3.2	Na cāpi dhammaṁ asataṁ rocayāma;
ja447:3.3	Hitvā asante na jahāma sante,
ja447:3.4	Tasmā hi amhaṁ daharā na miyyare.
ja447:4.1	Pubbeva dānā sumanā bhavāma,
ja447:4.2	Dadampi ve attamanā bhavāma;
ja447:4.3	Datvāpi ve nānutappāma pacchā,
ja447:4.4	Tasmā hi amhaṁ daharā na miyyare.
ja447:5.1	Samaṇe mayaṁ brāhmaṇe addhike ca,
ja447:5.2	Vanibbake yācanake dalidde;
ja447:5.3	Annena pānena abhitappayāma,
ja447:5.4	Tasmā hi amhaṁ daharā na miyyare.
ja447:6.1	Mayañca bhariyaṁ nātikkamāma,
ja447:6.2	Amhe ca bhariyā nātikkamanti;
ja447:6.3	Aññatra tāhi brahmacariyaṁ carāma,
ja447:6.4	Tasmā hi amhaṁ daharā na miyyare.
ja447:7.1	Pāṇātipātā viramāma sabbe,
ja447:7.2	Loke adinnaṁ parivajjayāma;
ja447:7.3	Amajjapā nopi musā bhaṇāma,
ja447:7.4	Tasmā hi amhaṁ daharā na miyyare.
ja447:8.1	Etāsu ve jāyare suttamāsu,
ja447:8.2	Medhāvino honti pahūtapaññā;
ja447:8.3	Bahussutā vedaguno ca honti,
ja447:8.4	Tasmā hi amhaṁ daharā na miyyare.
ja447:9.1	Mātā pitā ca bhaginī bhātaro ca,
ja447:9.2	Puttā ca dārā ca mayañca sabbe;
ja447:9.3	Dhammaṁ carāma paralokahetu,
ja447:9.4	Tasmā hi amhaṁ daharā na miyyare.
ja447:10.1	Dāsā ca dāsyo anujīvino ca,
ja447:10.2	Paricārakā kammakarā ca sabbe;
ja447:10.3	Dhammaṁ caranti paralokahetu,
ja447:10.4	Tasmā hi amhaṁ daharā na miyyare”.
ja447:11.1	“Dhammo have rakkhati dhammacāriṁ,
ja447:11.2	Dhammo suciṇṇo sukhamāvahāti;
ja447:11.3	Esānisaṁso dhamme suciṇṇe,
ja447:11.4	Na duggatiṁ gacchati dhammacārī.
ja447:12.1	Dhammo have rakkhati dhammacāriṁ,
ja447:12.2	Chattaṁ mahantaṁ viya vassakāle;
ja447:12.3	Dhammena gutto mama dhammapālo,
ja447:12.4	Aññassa aṭṭhīni sukhī kumāro”ti.
ja447:13.1	Mahādhammapālajātakaṁ navamaṁ.
ja448:0.1	Jātaka
ja448:0.2	Dasakanipāta
ja448:0.3	Catudvāravagga
ja448:0.4	10. Kukkuṭajātaka
ja448:1.1	“Nāsmase katapāpamhi,
ja448:1.2	nāsmase alikavādine;
ja448:1.3	Nāsmase attatthapaññamhi,
ja448:1.4	atisantepi nāsmase.
ja448:2.1	Bhavanti heke purisā,
ja448:2.2	gopipāsikajātikā;
ja448:2.3	Ghasanti maññe mittāni,
ja448:2.4	vācāya na ca kammunā.
ja448:3.1	Sukkhañjalipaggahitā,
ja448:3.2	vācāya paliguṇṭhitā;
ja448:3.3	Manussapheggū nāsīde,
ja448:3.4	yasmiṁ natthi kataññutā.
ja448:4.1	Na hi aññaññacittānaṁ,
ja448:4.2	itthīnaṁ purisāna vā;
ja448:4.3	Nānāvikatvā saṁsaggaṁ,
ja448:4.4	tādisampi ca nāsmase.
ja448:5.1	Anariyakammamokkantaṁ,
ja448:5.2	athetaṁ sabbaghātinaṁ;
ja448:5.3	Nisitaṁva paṭicchannaṁ,
ja448:5.4	tādisampi ca nāsmase.
ja448:6.1	Mittarūpenidhekacce,
ja448:6.2	sākhalyena acetasā;
ja448:6.3	Vividhehi upāyanti,
ja448:6.4	tādisampi ca nāsmase.
ja448:7.1	Āmisaṁ vā dhanaṁ vāpi,
ja448:7.2	yattha passati tādiso;
ja448:7.3	Dubbhiṁ karoti dummedho,
ja448:7.4	tañca hantvāna gacchati”.
ja448:8.1	“Mittarūpena bahavo,
ja448:8.2	channā sevanti sattavo;
ja448:8.3	Jahe kāpurise hete,
ja448:8.4	kukkuṭo viya senakaṁ.
ja448:9.1	Yo ca uppatitaṁ atthaṁ,
ja448:9.2	na khippamanubujjhati;
ja448:9.3	Amittavasamanveti,
ja448:9.4	pacchā ca anutappati.
ja448:10.1	Yo ca uppatitaṁ atthaṁ,
ja448:10.2	khippameva nibodhati;
ja448:10.3	Muccate sattusambādhā,
ja448:10.4	kukkuṭo viya senakā.
ja448:11.1	Taṁ tādisaṁ kūṭamivoḍḍitaṁ vane,
ja448:11.2	Adhammikaṁ niccavidhaṁsakārinaṁ;
ja448:11.3	Ārā vivajjeyya naro vicakkhaṇo,
ja448:11.4	Senaṁ yathā kukkuṭo vaṁsakānane”ti.
ja448:12.1	Kukkuṭajātakaṁ dasamaṁ.
ja449:0.1	Jātaka
ja449:0.2	Dasakanipāta
ja449:0.3	Catudvāravagga
ja449:0.4	11. Maṭṭhakuṇḍalījātaka
ja449:1.1	“Alaṅkato maṭṭhakuṇḍalī,
ja449:1.2	Māladhārī haricandanussado;
ja449:1.3	Bāhā paggayha kandasi,
ja449:1.4	Vanamajjhe kiṁ dukkhito tuvaṁ”.
ja449:2.1	“Sovaṇṇamayo pabhassaro,
ja449:2.2	Uppanno rathapañjaro mama;
ja449:2.3	Tassa cakkayugaṁ na vindāmi,
ja449:2.4	Tena dukkhena jahāmi jīvitaṁ”.
ja449:3.1	“Sovaṇṇamayaṁ maṇīmayaṁ,
ja449:3.2	Lohamayaṁ atha rūpiyāmayaṁ;
ja449:3.3	Pāvada rathaṁ karissāmi te,
ja449:3.4	Cakkayugaṁ paṭipādayāmi taṁ”.
ja449:4.1	“So māṇavo tassa pāvadi,
ja449:4.2	Candasūriyā ubhayettha bhātaro;
ja449:4.3	Sovaṇṇamayo ratho mama,
ja449:4.4	Tena cakkayugena sobhati”.
ja449:5.1	“Bālo kho tvaṁsi māṇava,
ja449:5.2	Yo tvaṁ patthayase apatthiyaṁ;
ja449:5.3	Maññāmi tuvaṁ marissasi,
ja449:5.4	Na hi tvaṁ lacchasi candasūriye”.
ja449:6.1	“Gamanāgamanampi dissati,
ja449:6.2	Vaṇṇadhātu ubhayettha vīthiyo;
ja449:6.3	Peto pana neva dissati,
ja449:6.4	Ko nu kho kandataṁ bālyataro”.
ja449:7.1	“Saccaṁ kho vadesi māṇava,
ja449:7.2	Ahameva kandataṁ bālyataro;
ja449:7.3	Candaṁ viya dārako rudaṁ,
ja449:7.4	Petaṁ kālakatābhipatthaye.
ja449:8.1	Ādittaṁ vata maṁ santaṁ,
ja449:8.2	ghatasittaṁva pāvakaṁ;
ja449:8.3	Vārinā viya osiñcaṁ,
ja449:8.4	sabbaṁ nibbāpaye daraṁ.
ja449:9.1	Abbahī vata me sallaṁ,
ja449:9.2	yamāsi hadayassitaṁ;
ja449:9.3	Yo me sokaparetassa,
ja449:9.4	puttasokaṁ apānudi.
ja449:10.1	Sohaṁ abbūḷhasallosmi,
ja449:10.2	vītasoko anāvilo;
ja449:10.3	Na socāmi na rodāmi,
ja449:10.4	tava sutvāna māṇavā”ti.
ja449:11.1	Maṭṭhakuṇḍalījātakaṁ ekādasamaṁ.
ja450:0.1	Jātaka
ja450:0.2	Dasakanipāta
ja450:0.3	Catudvāravagga
ja450:0.4	12. Bilārakosiyajātaka
ja450:1.1	“Apacantāpi dicchanti,
ja450:1.2	santo laddhāna bhojanaṁ;
ja450:1.3	Kimeva tvaṁ pacamāno,
ja450:1.4	yaṁ na dajjā na taṁ samaṁ.
ja450:2.1	Maccherā ca pamādā ca,
ja450:2.2	evaṁ dānaṁ na diyyati;
ja450:2.3	Puññaṁ ākaṅkhamānena,
ja450:2.4	deyyaṁ hoti vijānatā.
ja450:3.1	Yasseva bhīto na dadāti maccharī,
ja450:3.2	Tadevādadato bhayaṁ;
ja450:3.3	Jighacchā ca pipāsā ca,
ja450:3.4	Yassa bhāyati maccharī;
ja450:3.5	Tameva bālaṁ phusati,
ja450:3.6	Asmiṁ loke paramhi ca.
ja450:4.1	Tasmā vineyya maccheraṁ,
ja450:4.2	dajjā dānaṁ malābhibhū;
ja450:4.3	Puññāni paralokasmiṁ,
ja450:4.4	patiṭṭhā honti pāṇinaṁ”.
ja450:5.1	“Duddadaṁ dadamānānaṁ,
ja450:5.2	dukkaraṁ kamma kubbataṁ;
ja450:5.3	Asanto nānukubbanti,
ja450:5.4	sataṁ dhammo durannayo.
ja450:6.1	Tasmā satañca asataṁ,
ja450:6.2	nānā hoti ito gati;
ja450:6.3	Asanto nirayaṁ yanti,
ja450:6.4	santo saggaparāyaṇā”.
ja450:7.1	“Appasmeke pavecchanti,
ja450:7.2	bahuneke na dicchare;
ja450:7.3	Appasmā dakkhiṇā dinnā,
ja450:7.4	sahassena samaṁ mitā”.
ja450:8.1	“Dhammaṁ care yopi samuñchakaṁ care,
ja450:8.2	Dārañca posaṁ dadamappakasmiṁ;
ja450:8.3	Sataṁ sahassānaṁ sahassayāginaṁ,
ja450:8.4	Kalampi nāgghanti tathāvidhassa te”.
ja450:9.1	“Kenesa yañño vipulo mahagghato,
ja450:9.2	Samena dinnassa na agghameti;
ja450:9.3	Kathaṁ sataṁ sahassānaṁ sahassayāginaṁ,
ja450:9.4	Kalampi nāgghanti tathāvidhassa te”.
ja450:10.1	“Dadanti heke visame niviṭṭhā,
ja450:10.2	Chetvā vadhitvā atha socayitvā;
ja450:10.3	Sā dakkhiṇā assumukhā sadaṇḍā,
ja450:10.4	Samena dinnassa na agghameti;
ja450:10.5	Evaṁ sataṁ sahassānaṁ sahassayāginaṁ,
ja450:10.6	Kalampi nāgghanti tathāvidhassa te”ti.
ja450:11.1	Bilārakosiyajātakaṁ dvādasamaṁ.
ja451:0.1	Jātaka
ja451:0.2	Dasakanipāta
ja451:0.3	Catudvāravagga
ja451:0.4	13. Cakkavākajātaka
ja451:1.1	“Vaṇṇavā abhirūposi,
ja451:1.2	ghano sañjātarohito;
ja451:1.3	Cakkavāka surūposi,
ja451:1.4	vippasannamukhindriyo.
ja451:2.1	Pāṭhīnaṁ pāvusaṁ macchaṁ,
ja451:2.2	balajaṁ muñjarohitaṁ;
ja451:2.3	Gaṅgāya tīre nisinno,
ja451:2.4	evaṁ bhuñjasi bhojanaṁ”.
ja451:3.1	“Na vāhametaṁ bhuñjāmi,
ja451:3.2	Jaṅgalānodakāni vā;
ja451:3.3	Aññatra sevālapaṇakā,
ja451:3.4	Etaṁ me samma bhojanaṁ”.
ja451:4.1	“Na vāhametaṁ saddahāmi,
ja451:4.2	cakkavākassa bhojanaṁ;
ja451:4.3	Ahampi samma bhuñjāmi,
ja451:4.4	gāme loṇiyateliyaṁ.
ja451:5.1	Manussesu kataṁ bhattaṁ,
ja451:5.2	suciṁ maṁsūpasecanaṁ;
ja451:5.3	Na ca me tādiso vaṇṇo,
ja451:5.4	cakkavāka yathā tuvaṁ”.
ja451:6.1	“Sampassaṁ attani veraṁ,
ja451:6.2	hiṁsayaṁ mānusiṁ pajaṁ;
ja451:6.3	Utrasto ghasasī bhīto,
ja451:6.4	tena vaṇṇo tavediso.
ja451:7.1	Sabbalokaviruddhosi,
ja451:7.2	dhaṅka pāpena kammunā;
ja451:7.3	Laddho piṇḍo na pīṇeti,
ja451:7.4	tena vaṇṇo tavediso.
ja451:8.1	Ahampi samma bhuñjāmi,
ja451:8.2	ahiṁsaṁ sabbapāṇinaṁ;
ja451:8.3	Appossukko nirāsaṅkī,
ja451:8.4	asoko akutobhayo.
ja451:9.1	So karassu ānubhāvaṁ,
ja451:9.2	vītivattassu sīliyaṁ;
ja451:9.3	Ahiṁsāya cara loke,
ja451:9.4	piyo hohisi maṁmiva.
ja451:10.1	Yo na hanti na ghāteti,
ja451:10.2	na jināti na jāpaye;
ja451:10.3	Mettaṁso sabbabhūtesu,
ja451:10.4	veraṁ tassa na kenacī”ti.
ja451:11.1	Cakkavākajātakaṁ terasamaṁ.
ja452:0.1	Jātaka
ja452:0.2	Dasakanipāta
ja452:0.3	Catudvāravagga
ja452:0.4	14. Bhūripaññajātaka
ja452:1.1	“Saccaṁ kira tvaṁ api bhūripañña,
ja452:1.2	Yā tādisī sīri dhitī matī ca;
ja452:1.3	Na tāyatebhāvavasūpanitaṁ,
ja452:1.4	Yo yavakaṁ bhuñjasi appasūpaṁ”.
ja452:2.1	“Sukhaṁ dukkhena paripācayanto,
ja452:2.2	Kālā kālaṁ vicinaṁ chandachanno;
ja452:2.3	Atthassa dvārāni avāpuranto,
ja452:2.4	Tenāhaṁ tussāmi yavodanena.
ja452:3.1	Kālañca ñatvā abhijīhanāya,
ja452:3.2	Mantehi atthaṁ paripācayitvā;
ja452:3.3	Vijambhissaṁ sīhavijambhitāni,
ja452:3.4	Tāyiddhiyā dakkhasi maṁ punāpi”.
ja452:4.1	“Sukhīpi heke na karonti pāpaṁ,
ja452:4.2	Avaṇṇasaṁsaggabhayā puneke;
ja452:4.3	Pahū samāno vipulatthacintī,
ja452:4.4	Kiṅkāraṇā me na karosi dukkhaṁ”.
ja452:5.1	“Na paṇḍitā attasukhassa hetu,
ja452:5.2	Pāpāni kammāni samācaranti;
ja452:5.3	Dukkhena phuṭṭhā khalitāpi santā,
ja452:5.4	Chandā ca dosā na jahanti dhammaṁ”.
ja452:6.1	“Yena kenaci vaṇṇena,
ja452:6.2	mudunā dāruṇena vā;
ja452:6.3	Uddhare dīnamattānaṁ,
ja452:6.4	pacchā dhammaṁ samācare”.
ja452:7.1	“Yassa rukkhassa chāyāya,
ja452:7.2	nisīdeyya sayeyya vā;
ja452:7.3	Na tassa sākhaṁ bhañjeyya,
ja452:7.4	mittadubbho hi pāpako.
ja452:8.1	Yassāpi dhammaṁ puriso vijaññā,
ja452:8.2	Ye cassa kaṅkhaṁ vinayanti santo;
ja452:8.3	Taṁ hissa dīpañca parāyanañca,
ja452:8.4	Na tena mettiṁ jarayetha pañño”.
ja452:9.1	“Alaso gihī kāmabhogī na sādhu,
ja452:9.2	Asaññato pabbajito na sādhu;
ja452:9.3	Rājā na sādhu anisammakārī,
ja452:9.4	Yo paṇḍito kodhano taṁ na sādhu.
ja452:10.1	Nisamma khattiyo kayirā,
ja452:10.2	nānisamma disampati;
ja452:10.3	Nisammakārino rāja,
ja452:10.4	yaso kitti ca vaḍḍhatī”ti.
ja452:11.1	Bhūripaññajātakaṁ cuddasamaṁ.
ja453:0.1	Jātaka
ja453:0.2	Dasakanipāta
ja453:0.3	Catudvāravagga
ja453:0.4	15. Mahāmaṅgalajātaka
ja453:1.1	“Kiṁsu naro jappamadhiccakāle,
ja453:1.2	Kaṁ vā vijjaṁ katamaṁ vā sutānaṁ;
ja453:1.3	So macco asmiñca paramhi loke,
ja453:1.4	Kathaṁ karo sotthānena gutto”.
ja453:2.1	“Yassa devā pitaro ca sabbe,
ja453:2.2	Sarīsapā sabbabhūtāni cāpi;
ja453:2.3	Mettāya niccaṁ apacitāni honti,
ja453:2.4	Bhūtesu ve sotthānaṁ tadāhu”.
ja453:3.1	“Yo sabbalokassa nivātavutti,
ja453:3.2	Itthīpumānaṁ sahadārakānaṁ;
ja453:3.3	Khantā duruttānamappaṭikūlavādī,
ja453:3.4	Adhivāsanaṁ sotthānaṁ tadāhu.
ja453:4.1	Yo nāvajānāti sahāyamitte,
ja453:4.2	Sippena kulyāhi dhanena jaccā;
ja453:4.3	Rucipañño atthakāle matīmā,
ja453:4.4	Sahāyesu ve sotthānaṁ tadāhu.
ja453:5.1	Mittāni ve yassa bhavanti santo,
ja453:5.2	Saṁvissatthā avisaṁvādakassa;
ja453:5.3	Na mittadubbhī saṁvibhāgī dhanena,
ja453:5.4	Mittesu ve sotthānaṁ tadāhu.
ja453:6.1	Yassa bhariyā tulyavayā samaggā,
ja453:6.2	Anubbatā dhammakāmā pajātā;
ja453:6.3	Koliniyā sīlavatī patibbatā,
ja453:6.4	Dāresu ve sotthānaṁ tadāhu.
ja453:7.1	Yassa rājā bhūtapati yasassī,
ja453:7.2	Jānāti soceyyaṁ parakkamañca;
ja453:7.3	Advejjhatā suhadayaṁ mamanti,
ja453:7.4	Rājūsu ve sotthānaṁ tadāhu.
ja453:8.1	Annañca pānañca dadāti saddho,
ja453:8.2	Mālañca gandhañca vilepanañca;
ja453:8.3	Pasannacitto anumodamāno,
ja453:8.4	Saggesu ve sotthānaṁ tadāhu.
ja453:9.1	Yamariyadhammena punanti vuddhā,
ja453:9.2	Ārādhitā samacariyāya santo;
ja453:9.3	Bahussutā isayo sīlavanto,
ja453:9.4	Arahantamajjhe sotthānaṁ tadāhu.
ja453:10.1	Etāni kho sotthānāni loke,
ja453:10.2	Viññuppasatthāni sukhudrayāni;
ja453:10.3	Tānīdha sevetha naro sapañño,
ja453:10.4	Na hi maṅgale kiñcanamatthi saccan”ti.
ja453:11.1	Mahāmaṅgalajātakaṁ pannarasamaṁ.
ja454:0.1	Jātaka
ja454:0.2	Dasakanipāta
ja454:0.3	Catudvāravagga
ja454:0.4	16. Ghaṭapaṇḍitajātaka
ja454:1.1	“Uṭṭhehi kaṇha kiṁ sesi,
ja454:1.2	Ko attho supanena te;
ja454:1.3	Yopi tuyhaṁ sako bhātā,
ja454:1.4	Hadayaṁ cakkhu ca dakkhiṇaṁ;
ja454:1.5	Tassa vātā balīyanti,
ja454:1.6	Ghaṭo jappati kesava”.
ja454:2.1	“Tassa taṁ vacanaṁ sutvā,
ja454:2.2	rohiṇeyyassa kesavo;
ja454:2.3	Taramānarūpo vuṭṭhāsi,
ja454:2.4	bhātusokena aṭṭito”.
ja454:3.1	“Kiṁ nu ummattarūpova,
ja454:3.2	kevalaṁ dvārakaṁ imaṁ;
ja454:3.3	Saso sasoti lapasi,
ja454:3.4	ko nu te sasamāhari”.
ja454:4.1	“Sovaṇṇamayaṁ maṇīmayaṁ,
ja454:4.2	Lohamayaṁ atha rūpiyāmayaṁ;
ja454:4.3	Saṅkhasilāpavāḷamayaṁ,
ja454:4.4	Kārayissāmi te sasaṁ”.
ja454:5.1	“Santi aññepi sasakā,
ja454:5.2	araññe vanagocarā;
ja454:5.3	Tepi te ānayissāmi,
ja454:5.4	kīdisaṁ sasamicchasi”.
ja454:6.1	“Na cāhamete icchāmi,
ja454:6.2	ye sasā pathavissitā;
ja454:6.3	Candato sasamicchāmi,
ja454:6.4	taṁ me ohara kesava”.
ja454:7.1	“So nūna madhuraṁ ñāti,
ja454:7.2	jīvitaṁ vijahissasi;
ja454:7.3	Apatthiyaṁ yo patthayasi,
ja454:7.4	candato sasamicchasi”.
ja454:8.1	“Evañce kaṇha jānāsi,
ja454:8.2	yadaññamanusāsasi;
ja454:8.3	Kasmā pure mataṁ puttaṁ,
ja454:8.4	ajjāpi manusocasi”.
ja454:9.1	“Yaṁ na labbhā manussena,
ja454:9.2	amanussena vā puna;
ja454:9.3	Jāto me mā marī putto,
ja454:9.4	kuto labbhā alabbhiyaṁ.
ja454:10.1	Na mantā mūlabhesajjā,
ja454:10.2	osadhehi dhanena vā;
ja454:10.3	Sakkā ānayituṁ kaṇha,
ja454:10.4	yaṁ petamanusocasi”.
ja454:11.1	“Yassa etādisā assu,
ja454:11.2	amaccā purisapaṇḍitā;
ja454:11.3	Yathā nijjhāpaye ajja,
ja454:11.4	ghaṭo purisapaṇḍito.
ja454:12.1	Ādittaṁ vata maṁ santaṁ,
ja454:12.2	ghatasittaṁva pāvakaṁ;
ja454:12.3	Vārinā viya osiñcaṁ,
ja454:12.4	sabbaṁ nibbāpaye daraṁ.
ja454:13.1	Abbahī vata me sallaṁ,
ja454:13.2	yamāsi hadayassitaṁ;
ja454:13.3	Yo me sokaparetassa,
ja454:13.4	puttasokaṁ apānudi.
ja454:14.1	Sohaṁ abbūḷhasallosmi,
ja454:14.2	vītasoko anāvilo;
ja454:14.3	Na socāmi na rodāmi,
ja454:14.4	tava sutvāna māṇava”.
ja454:15.1	“Evaṁ karonti sappaññā,
ja454:15.2	Ye honti anukampakā;
ja454:15.3	Nivattayanti sokamhā,
ja454:15.4	Ghaṭo jeṭṭhaṁva bhātaran”ti.
ja454:16.1	Ghaṭapaṇḍitajātakaṁ soḷasamaṁ.
ja454:17.1	Dasakanipātaṁ niṭṭhitaṁ.
ja454:18.1	Tassuddānaṁ
ja454:19.1	Daḷha kaṇha dhanañjaya saṅkhavaro,
ja454:19.2	Raja sattaha kassa ca takkalinā;
ja454:19.3	Dhammaṁ kukkuṭa kuṇḍali bhojanadā,
ja454:19.4	Cakkavāka subhūrisa sotthi ghaṭoti.
ja455:0.1	Jātaka
ja455:0.2	Ekādasakanipāta
ja455:0.3	Mātuposakavagga
ja455:0.4	1. Mātuposakajātaka
ja455:1.1	“Tassa nāgassa vippavāsena,
ja455:1.2	Virūḷhā sallakī ca kuṭajā ca;
ja455:1.3	Kuruvindakaravīrā bhisasāmā ca,
ja455:1.4	Nivāte pupphitā ca kaṇikārā.
ja455:2.1	Kocideva suvaṇṇakāyurā,
ja455:2.2	Nāgarājaṁ bharanti piṇḍena;
ja455:2.3	Yattha rājā rājakumāro vā,
ja455:2.4	Kavacamabhihessati achambhito”.
ja455:3.1	“Gaṇhāhi nāga kabaḷaṁ,
ja455:3.2	mā nāga kisako bhava;
ja455:3.3	Bahūni rājakiccāni,
ja455:3.4	tāni nāga karissasi”.
ja455:4.1	“Sā nūnasā kapaṇikā,
ja455:4.2	andhā apariṇāyikā;
ja455:4.3	Khāṇuṁ pādena ghaṭṭeti,
ja455:4.4	giriṁ caṇḍoraṇaṁ pati”.
ja455:5.1	“Kā nu te sā mahānāga,
ja455:5.2	andhā apariṇāyikā;
ja455:5.3	Khāṇuṁ pādena ghaṭṭeti,
ja455:5.4	giriṁ caṇḍoraṇaṁ pati”.
ja455:6.1	“Mātā me sā mahārāja,
ja455:6.2	andhā apariṇāyikā;
ja455:6.3	Khāṇuṁ pādena ghaṭṭeti,
ja455:6.4	giriṁ caṇḍoraṇaṁ pati”.
ja455:7.1	“Muñcathetaṁ mahānāgaṁ,
ja455:7.2	yoyaṁ bharati mātaraṁ;
ja455:7.3	Sametu mātarā nāgo,
ja455:7.4	saha sabbehi ñātibhi”.
ja455:8.1	“Mutto ca bandhanā nāgo,
ja455:8.2	muttamādāya kuñjaro;
ja455:8.3	Muhuttaṁ assāsayitvā,
ja455:8.4	agamā yena pabbato.
ja455:9.1	Tato so naḷiniṁ gantvā,
ja455:9.2	sītaṁ kuñjarasevitaṁ;
ja455:9.3	Soṇḍāyūdakamāhatvā,
ja455:9.4	mātaraṁ abhisiñcatha”.
ja455:10.1	“Koyaṁ anariyo devo,
ja455:10.2	akālenapi vassati;
ja455:10.3	Gato me atrajo putto,
ja455:10.4	yo mayhaṁ paricārako”.
ja455:11.1	“Uṭṭhehi amma kiṁ sesi,
ja455:11.2	āgato tyāhamatrajo;
ja455:11.3	Muttomhi kāsirājena,
ja455:11.4	vedehena yasassinā”.
ja455:12.1	“Ciraṁ jīvatu so rājā,
ja455:12.2	kāsīnaṁ raṭṭhavaḍḍhano;
ja455:12.3	Yo me puttaṁ pamocesi,
ja455:12.4	sadā vuddhāpacāyikan”ti.
ja455:13.1	Mātuposakajātakaṁ paṭhamaṁ.
ja456:0.1	Jātaka
ja456:0.2	Ekādasakanipāta
ja456:0.3	Mātuposakavagga
ja456:0.4	2. Juṇhajātaka
ja456:1.1	“Suṇohi mayhaṁ vacanaṁ janinda,
ja456:1.2	Atthena juṇhamhi idhānupatto;
ja456:1.3	Na brāhmaṇe addhike tiṭṭhamāne,
ja456:1.4	Gantabbamāhu dvipadindaseṭṭha”.
ja456:2.1	“Suṇomi tiṭṭhāmi vadehi brahme,
ja456:2.2	Yenāsi atthena idhānupatto;
ja456:2.3	Kaṁ vā tvamatthaṁ mayi patthayāno,
ja456:2.4	Idhāgamā brahme tadiṅgha brūhi”.
ja456:3.1	“Dadāhi me gāmavarāni pañca,
ja456:3.2	Dāsīsataṁ satta gavaṁsatāni;
ja456:3.3	Parosahassañca suvaṇṇanikkhe,
ja456:3.4	Bhariyā ca me sādisī dve dadāhi.
ja456:4.1	Tapo nu te brāhmaṇa bhiṁsarūpo,
ja456:4.2	Mantā nu te brāhmaṇa cittarūpā;
ja456:4.3	Yakkhā nu te assavā santi keci,
ja456:4.4	Atthaṁ vā me abhijānāsi kattaṁ.
ja456:5.1	Na me tapo atthi na cāpi mantā,
ja456:5.2	Yakkhāpi me assavā natthi keci;
ja456:5.3	Atthampi te nābhijānāmi kattaṁ,
ja456:5.4	Pubbe ca kho saṅgatimattamāsi.
ja456:6.1	Paṭhamaṁ idaṁ dassanaṁ jānato me,
ja456:6.2	Na tābhijānāmi ito puratthā;
ja456:6.3	Akkhāhi me pucchito etamatthaṁ,
ja456:6.4	Kadā kuhiṁ vā ahu saṅgamo no.
ja456:7.1	Gandhārarājassa puramhi ramme,
ja456:7.2	Avasimhase takkasīlāyaṁ deva;
ja456:7.3	Tatthandhakāramhi timīsikāyaṁ,
ja456:7.4	Aṁsena aṁsaṁ samaghaṭṭayimha.
ja456:8.1	Te tattha ṭhatvāna ubho janinda,
ja456:8.2	Sārāṇiyaṁ vītisārayimha tattha;
ja456:8.3	Sāyeva no saṅgatimattamāsi,
ja456:8.4	Tato na pacchā na pure ahosi.
ja456:9.1	Yadā kadāci manujesu brahme,
ja456:9.2	Samāgamo sappurisena hoti;
ja456:9.3	Na paṇḍitā saṅgatisanthavāni,
ja456:9.4	Pubbe kataṁ vāpi vināsayanti.
ja456:10.1	Bālāva kho saṅgatisanthavāni,
ja456:10.2	Pubbe kataṁ vāpi vināsayanti;
ja456:10.3	Bahumpi bālesu kataṁ vinassati,
ja456:10.4	Tathā hi bālā akataññurūpā.
ja456:11.1	Dhīrā ca kho saṅgatisanthavāni,
ja456:11.2	Pubbe kataṁ vāpi na nāsayanti;
ja456:11.3	Appampi dhīresu kataṁ na nassati,
ja456:11.4	Tathā hi dhīrā sukataññurūpā.
ja456:12.1	Dadāmi te gāmavarāni pañca,
ja456:12.2	Dāsīsataṁ satta gavaṁsatāni;
ja456:12.3	Parosahassañca suvaṇṇanikkhe,
ja456:12.4	Bhariyā ca te sādisī dve dadāmi.
ja456:13.1	Evaṁ sataṁ hoti samecca rāja,
ja456:13.2	Nakkhattarājāriva tārakānaṁ;
ja456:13.3	Āpūratī kāsipatī tathāhaṁ,
ja456:13.4	Tayāpi me saṅgamo ajja laddho”ti.
ja456:14.1	Juṇhajātakaṁ dutiyaṁ.
ja457:0.1	Jātaka
ja457:0.2	Ekādasakanipāta
ja457:0.3	Mātuposakavagga
ja457:0.4	3. Dhammadevaputtajātaka
ja457:1.1	“Yasokaro puññakarohamasmi,
ja457:1.2	Sadātthuto samaṇabrāhmaṇānaṁ;
ja457:1.3	Maggāraho devamanussapūjito,
ja457:1.4	Dhammo ahaṁ dehi adhamma maggaṁ”.
ja457:2.1	“Adhammayānaṁ daḷhamāruhitvā,
ja457:2.2	Asantasanto balavāhamasmi;
ja457:2.3	Sa kissa hetumhi tavajja dajjaṁ,
ja457:2.4	Maggaṁ ahaṁ dhamma adinnapubbaṁ”.
ja457:3.1	“Dhammo have pāturahosi pubbe,
ja457:3.2	Pacchā adhammo udapādi loke;
ja457:3.3	Jeṭṭho ca seṭṭho ca sanantano ca,
ja457:3.4	Uyyāhi jeṭṭhassa kaniṭṭha maggā”.
ja457:4.1	“Na yācanāya napi pātirūpā,
ja457:4.2	Na arahatā tehaṁ dadeyyaṁ maggaṁ;
ja457:4.3	Yuddhañca no hotu ubhinnamajja,
ja457:4.4	Yuddhamhi yo jessati tassa maggo”.
ja457:5.1	“Sabbā disā anuvisaṭohamasmi,
ja457:5.2	Mahabbalo amitayaso atulyo;
ja457:5.3	Guṇehi sabbehi upetarūpo,
ja457:5.4	Dhammo adhamma tvaṁ kathaṁ vijessasi.
ja457:6.1	Lohena ve haññati jātarūpaṁ,
ja457:6.2	Na jātarūpena hananti lohaṁ;
ja457:6.3	Sace adhammo hañchati dhammamajja,
ja457:6.4	Ayo suvaṇṇaṁ viya dassaneyyaṁ.
ja457:7.1	Sace tuvaṁ yuddhabalo adhamma,
ja457:7.2	Na tuyha vuḍḍhā ca garū ca atthi;
ja457:7.3	Maggañca te dammi piyāppiyena,
ja457:7.4	Vācāduruttānipi te khamāmi”.
ja457:8.1	“Idañca sutvā vacanaṁ adhammo,
ja457:8.2	Avaṁsiro patito uddhapādo;
ja457:8.3	‘Yuddhatthiko ce na labhāmi yuddhaṁ’,
ja457:8.4	Ettāvatā hoti hato adhammo.
ja457:9.1	Khantībalo yuddhabalaṁ vijetvā,
ja457:9.2	Hantvā adhammaṁ nihanitva bhūmyā;
ja457:9.3	Pāyāsi vitto abhiruyha sandanaṁ,
ja457:9.4	Maggeneva atibalo saccanikkamo.
ja457:10.1	Mātā pitā samaṇabrāhmaṇā ca,
ja457:10.2	Asammānitā yassa sake agāre;
ja457:10.3	Idheva nikkhippa sarīradehaṁ,
ja457:10.4	Kāyassa bhedā nirayaṁ vajanti te;
ja457:10.5	Yathā adhammo patito avaṁsiro.
ja457:11.1	Mātā pitā samaṇabrāhmaṇā ca,
ja457:11.2	Susammānitā yassa sake agāre;
ja457:11.3	Idheva nikkhippa sarīradehaṁ,
ja457:11.4	Kāyassa bhedā sugatiṁ vajanti te;
ja457:11.5	Yathāpi dhammo abhiruyha sandanan”ti.
ja457:12.1	Dhammadevaputtajātakaṁ tatiyaṁ.
ja458:0.1	Jātaka
ja458:0.2	Ekādasakanipāta
ja458:0.3	Mātuposakavagga
ja458:0.4	4. Udayajātaka
ja458:1.1	“Ekā nisinnā suci saññatūrū,
ja458:1.2	Pāsādamāruyha aninditaṅgī;
ja458:1.3	Yācāmi taṁ kinnaranettacakkhu,
ja458:1.4	Imekarattiṁ ubhayo vasema”.
ja458:2.1	“Okiṇṇantaraparikhaṁ,
ja458:2.2	daḷhamaṭṭālakoṭṭhakaṁ;
ja458:2.3	Rakkhitaṁ khaggahatthehi,
ja458:2.4	duppavesamidaṁ puraṁ.
ja458:3.1	Daharassa yuvino cāpi,
ja458:3.2	āgamo ca na vijjati;
ja458:3.3	Atha kena nu vaṇṇena,
ja458:3.4	saṅgamaṁ icchase mayā”.
ja458:4.1	“Yakkhohamasmi kalyāṇi,
ja458:4.2	Āgatosmi tavantike;
ja458:4.3	Tvaṁ maṁ nandaya bhaddante,
ja458:4.4	Puṇṇakaṁsaṁ dadāmi te”.
ja458:5.1	“Devaṁ va yakkhaṁ atha vā manussaṁ,
ja458:5.2	Na patthaye udayamaticca aññaṁ;
ja458:5.3	Gaccheva tvaṁ yakkha mahānubhāva,
ja458:5.4	Mā cassu gantvā punarāvajittha”.
ja458:6.1	“Yā sā rati uttamā kāmabhoginaṁ,
ja458:6.2	Yaṁ hetu sattā visamaṁ caranti;
ja458:6.3	Mā taṁ ratiṁ jīyi tuvaṁ sucimhite,
ja458:6.4	Dadāmi te rūpiyaṁ kaṁsapūraṁ”.
ja458:7.1	“Nāriṁ naro nijjhapayaṁ dhanena,
ja458:7.2	Ukkaṁsatī yattha karoti chandaṁ;
ja458:7.3	Vipaccanīko tava devadhammo,
ja458:7.4	Paccakkhato thokatarena esi”.
ja458:8.1	“Āyu ca vaṇṇo ca manussaloke,
ja458:8.2	Nihīyati manujānaṁ sugatte;
ja458:8.3	Teneva vaṇṇena dhanampi tuyhaṁ,
ja458:8.4	Nihīyati jiṇṇatarāsi ajja.
ja458:9.1	Evaṁ me pekkhamānassa,
ja458:9.2	rājaputti yasassini;
ja458:9.3	Hāyateva tava vaṇṇo,
ja458:9.4	ahorattānamaccaye”.
ja458:10.1	“Imināva tvaṁ vayasā,
ja458:10.2	rājaputti sumedhase;
ja458:10.3	Brahmacariyaṁ careyyāsi,
ja458:10.4	bhiyyo vaṇṇavatī siyā”.
ja458:11.1	“Devā na jīranti yathā manussā,
ja458:11.2	Gattesu tesaṁ valiyo na honti;
ja458:11.3	Pucchāmi taṁ yakkha mahānubhāva,
ja458:11.4	Kathaṁ nu devāna sarīradeho”.
ja458:12.1	“Devā na jīranti yathā manussā,
ja458:12.2	Gattesu tesaṁ valiyo na honti;
ja458:12.3	Suve suve bhiyyatarova tesaṁ,
ja458:12.4	Dibbo ca vaṇṇo vipulā ca bhogā”.
ja458:13.1	“Kiṁsūdha bhītā janatā anekā,
ja458:13.2	Maggo ca nekāyatanaṁ pavutto;
ja458:13.3	Pucchāmi taṁ yakkha mahānubhāva,
ja458:13.4	Katthaṭṭhito paralokaṁ na bhāye”.
ja458:14.1	“Vācaṁ manañca paṇidhāya sammā,
ja458:14.2	Kāyena pāpāni akubbamāno;
ja458:14.3	Bahunnapānaṁ gharamāvasanto,
ja458:14.4	Saddho mudū saṁvibhāgī vadaññū;
ja458:14.5	Saṅgāhako sakhilo saṇhavāco,
ja458:14.6	Etthaṭṭhito paralokaṁ na bhāye”.
ja458:15.1	“Anusāsasi maṁ yakkha,
ja458:15.2	yathā mātā yathā pitā;
ja458:15.3	Uḷāravaṇṇaṁ pucchāmi,
ja458:15.4	ko nu tvamasi subrahā”.
ja458:16.1	“Udayohamasmi kalyāṇi,
ja458:16.2	saṅgarattā idhāgato;
ja458:16.3	Āmanta kho taṁ gacchāmi,
ja458:16.4	muttosmi tava saṅgarā”.
ja458:17.1	“Sace kho tvaṁ udayosi,
ja458:17.2	saṅgarattā idhāgato;
ja458:17.3	Anusāsa maṁ rājaputta,
ja458:17.4	yathāssa puna saṅgamo”.
ja458:18.1	“Atipatati vayo khaṇo tatheva,
ja458:18.2	Ṭhānaṁ natthi dhuvaṁ cavanti sattā;
ja458:18.3	Parijiyyati addhuvaṁ sarīraṁ,
ja458:18.4	Udaye mā pamāda carassu dhammaṁ.
ja458:19.1	Kasiṇā pathavī dhanassa pūrā,
ja458:19.2	Ekasseva siyā anaññadheyyā;
ja458:19.3	Tañcāpi jahati avītarāgo,
ja458:19.4	Udaye mā pamāda carassu dhammaṁ.
ja458:20.1	Mātā ca pitā ca bhātaro ca,
ja458:20.2	Bhariyā yāpi dhanena hoti kītā;
ja458:20.3	Te cāpi jahanti aññamaññaṁ,
ja458:20.4	Udaye mā pamāda carassu dhammaṁ.
ja458:21.1	Kāyo parabhojananti ñatvā,
ja458:21.2	Saṁsāre sugatiñca duggatiñca;
ja458:21.3	Ittaravāsoti jāniyāna,
ja458:21.4	Udaye mā pamāda carassu dhammaṁ”.
ja458:22.1	“Sādhu bhāsatiyaṁ yakkho,
ja458:22.2	appaṁ maccāna jīvitaṁ;
ja458:22.3	Kasirañca parittañca,
ja458:22.4	tañca dukkhena saṁyutaṁ;
ja458:22.5	Sāhaṁ ekā pabbajissāmi,
ja458:22.6	hitvā kāsiṁ surundhanan”ti.
ja458:23.1	Udayajātakaṁ catutthaṁ.
ja459:0.1	Jātaka
ja459:0.2	Ekādasakanipāta
ja459:0.3	Mātuposakavagga
ja459:0.4	5. Pānīyajātaka
ja459:1.1	“Mitto mittassa pānīyaṁ,
ja459:1.2	adinnaṁ paribhuñjisaṁ;
ja459:1.3	Tena pacchā vijigucchiṁ,
ja459:1.4	taṁ pāpaṁ pakataṁ mayā;
ja459:1.5	Mā puna akaraṁ pāpaṁ,
ja459:1.6	tasmā pabbajito ahaṁ.
ja459:2.1	Paradārañca disvāna,
ja459:2.2	chando me udapajjatha;
ja459:2.3	Tena pacchā vijigucchiṁ,
ja459:2.4	taṁ pāpaṁ pakataṁ mayā;
ja459:2.5	Mā puna akaraṁ pāpaṁ,
ja459:2.6	tasmā pabbajito ahaṁ.
ja459:3.1	Pitaraṁ me mahārāja,
ja459:3.2	corā agaṇhu kānane;
ja459:3.3	Tesāhaṁ pucchito jānaṁ,
ja459:3.4	aññathā naṁ viyākariṁ.
ja459:4.1	Tena pacchā vijigucchiṁ,
ja459:4.2	taṁ pāpaṁ pakataṁ mayā;
ja459:4.3	Mā puna akaraṁ pāpaṁ,
ja459:4.4	tasmā pabbajito ahaṁ.
ja459:5.1	Pāṇātipātamakaruṁ,
ja459:5.2	somayāge upaṭṭhite;
ja459:5.3	Tesāhaṁ samanuññāsiṁ.
ja459:6.1	Tena pacchā vijigucchiṁ,
ja459:6.2	taṁ pāpaṁ pakataṁ mayā;
ja459:6.3	Mā puna akaraṁ pāpaṁ,
ja459:6.4	tasmā pabbajito ahaṁ.
ja459:7.1	Surāmerayamādhukā,
ja459:7.2	ye janā paṭhamāsu no;
ja459:7.3	Bahūnaṁ te anatthāya,
ja459:7.4	majjapānamakappayuṁ;
ja459:7.5	Tesāhaṁ samanuññāsiṁ.
ja459:8.1	Tena pacchā vijigucchiṁ,
ja459:8.2	taṁ pāpaṁ pakataṁ mayā;
ja459:8.3	Mā puna akaraṁ pāpaṁ,
ja459:8.4	tasmā pabbajito ahaṁ”.
ja459:9.1	“Dhiratthu subahū kāme,
ja459:9.2	duggandhe bahukaṇṭake;
ja459:9.3	Ye ahaṁ paṭisevanto,
ja459:9.4	nālabhiṁ tādisaṁ sukhaṁ”.
ja459:10.1	“Mahassādā sukhā kāmā,
ja459:10.2	Natthi kāmā paraṁ sukhaṁ;
ja459:10.3	Ye kāme paṭisevanti,
ja459:10.4	Saggaṁ te upapajjare”.
ja459:11.1	“Appassādā dukhā kāmā,
ja459:11.2	natthi kāmā paraṁ dukhaṁ;
ja459:11.3	Ye kāme paṭisevanti,
ja459:11.4	nirayaṁ te upapajjare.
ja459:12.1	Asī yathā sunisito,
ja459:12.2	nettiṁsova supāyiko;
ja459:12.3	Sattīva urasi khittā,
ja459:12.4	kāmā dukkhatarā tato.
ja459:13.1	Aṅgārānaṁva jalitaṁ,
ja459:13.2	kāsuṁ sādhikaporisaṁ;
ja459:13.3	Phālaṁva divasantattaṁ,
ja459:13.4	kāmā dukkhatarā tato.
ja459:14.1	Visaṁ yathā halāhalaṁ,
ja459:14.2	telaṁ pakkuthitaṁ yathā;
ja459:14.3	Tambaloha vilīnaṁva,
ja459:14.4	kāmā dukkhatarā tato”ti.
ja459:15.1	Pānīyajātakaṁ pañcamaṁ.
ja460:0.1	Jātaka
ja460:0.2	Ekādasakanipāta
ja460:0.3	Mātuposakavagga
ja460:0.4	6. Yudhañcayajātaka
ja460:1.1	“Mittāmaccaparibyūḷhaṁ,
ja460:1.2	ahaṁ vande rathesabhaṁ;
ja460:1.3	Pabbajissāmahaṁ rāja,
ja460:1.4	taṁ devo anumaññatu”.
ja460:2.1	“Sace te ūnaṁ kāmehi,
ja460:2.2	ahaṁ paripūrayāmi te;
ja460:2.3	Yo taṁ hiṁsati vāremi,
ja460:2.4	mā pabbaja yudhañcaya”.
ja460:3.1	“Na matthi ūnaṁ kāmehi,
ja460:3.2	hiṁsitā me na vijjati;
ja460:3.3	Dīpañca kātumicchāmi,
ja460:3.4	yaṁ jarā nābhikīrati”.
ja460:4.1	“Putto vā pitaraṁ yāce,
ja460:4.2	pitā vā puttamorasaṁ;
ja460:4.3	Negamo taṁ yāce tāta,
ja460:4.4	mā pabbaja yudhañcaya”.
ja460:5.1	“Mā maṁ deva nivārehi,
ja460:5.2	pabbajantaṁ rathesabha;
ja460:5.3	Māhaṁ kāmehi sammatto,
ja460:5.4	jarāya vasamanvagū”.
ja460:6.1	“Ahaṁ taṁ tāta yācāmi,
ja460:6.2	ahaṁ putta nivāraye;
ja460:6.3	Ciraṁ taṁ daṭṭhumicchāmi,
ja460:6.4	mā pabbaja yudhañcaya”.
ja460:7.1	“Ussāvova tiṇaggamhi,
ja460:7.2	sūriyuggamanaṁ pati;
ja460:7.3	Evamāyu manussānaṁ,
ja460:7.4	mā maṁ amma nivāraya”.
ja460:8.1	“Taramāno imaṁ yānaṁ,
ja460:8.2	āropetu rathesabha;
ja460:8.3	Mā me mātā tarantassa,
ja460:8.4	antarāyakarā ahu”.
ja460:9.1	“Abhidhāvatha bhaddante,
ja460:9.2	suññaṁ hessati rammakaṁ;
ja460:9.3	Yudhañcayo anuññāto,
ja460:9.4	sabbadattena rājinā.
ja460:10.1	Yohu seṭṭho sahassassa,
ja460:10.2	yuvā kañcanasannibho;
ja460:10.3	Soyaṁ kumāro pabbajito,
ja460:10.4	kāsāyavasano balī”.
ja460:11.1	“Ubho kumārā pabbajitā,
ja460:11.2	yudhañcayo yudhiṭṭhilo;
ja460:11.3	Pahāya mātāpitaro,
ja460:11.4	saṅgaṁ chetvāna maccuno”ti.
ja460:12.1	Yudhañcayajātakaṁ chaṭṭhaṁ.
ja461:0.1	Jātaka
ja461:0.2	Ekādasakanipāta
ja461:0.3	Mātuposakavagga
ja461:0.4	7. Dasarathajātaka
ja461:1.1	“Etha lakkhaṇa sītā ca,
ja461:1.2	ubho otarathodakaṁ;
ja461:1.3	Evāyaṁ bharato āha,
ja461:1.4	‘rājā dasaratho mato’”.
ja461:2.1	“Kena rāmappabhāvena,
ja461:2.2	socitabbaṁ na socasi;
ja461:2.3	Pitaraṁ kālakataṁ sutvā,
ja461:2.4	na taṁ pasahate dukhaṁ”.
ja461:3.1	“Yaṁ na sakkā nipāletuṁ,
ja461:3.2	posena lapataṁ bahuṁ;
ja461:3.3	Sa kissa viññū medhāvī,
ja461:3.4	attānamupatāpaye.
ja461:4.1	Daharā ca hi vuddhā ca,
ja461:4.2	ye bālā ye ca paṇḍitā;
ja461:4.3	Aḍḍhā ceva daliddā ca,
ja461:4.4	sabbe maccuparāyaṇā.
ja461:5.1	Phalānamiva pakkānaṁ,
ja461:5.2	niccaṁ patanato bhayaṁ;
ja461:5.3	Evaṁ jātāna maccānaṁ,
ja461:5.4	nicca maraṇato bhayaṁ.
ja461:6.1	Sāyameke na dissanti,
ja461:6.2	pāto diṭṭhā bahujjanā;
ja461:6.3	Pāto eke na dissanti,
ja461:6.4	sāyaṁ diṭṭhā bahujjanā.
ja461:7.1	Paridevayamāno ce,
ja461:7.2	kiñcidatthaṁ udabbahe;
ja461:7.3	Sammūḷho hiṁsamattānaṁ,
ja461:7.4	kayirā taṁ vicakkhaṇo.
ja461:8.1	Kiso vivaṇṇo bhavati,
ja461:8.2	hiṁsamattānamattano;
ja461:8.3	Na tena petā pālenti,
ja461:8.4	niratthā paridevanā.
ja461:9.1	Yathā saraṇamādittaṁ,
ja461:9.2	vārinā parinibbaye;
ja461:9.3	Evampi dhīro sutavā,
ja461:9.4	medhāvī paṇḍito naro;
ja461:9.5	Khippamuppatitaṁ sokaṁ,
ja461:9.6	vāto tūlaṁva dhaṁsaye.
ja461:10.1	Macco ekova acceti,
ja461:10.2	ekova jāyate kule;
ja461:10.3	Saṁyogaparamā tveva,
ja461:10.4	sambhogā sabbapāṇinaṁ.
ja461:11.1	Tasmā hi dhīrassa bahussutassa,
ja461:11.2	Sampassato lokamimaṁ parañca;
ja461:11.3	Aññāya dhammaṁ hadayaṁ manañca,
ja461:11.4	Sokā mahantāpi na tāpayanti.
ja461:12.1	Sohaṁ dassañca bhokkhañca,
ja461:12.2	bharissāmi ca ñātake;
ja461:12.3	Sesañca pālayissāmi,
ja461:12.4	kiccametaṁ vijānato.
ja461:13.1	Dasa vassasahassāni,
ja461:13.2	saṭṭhi vassasatāni ca;
ja461:13.3	Kambugīvo mahābāhu,
ja461:13.4	rāmo rajjamakārayī”ti.
ja461:14.1	Dasarathajātakaṁ sattamaṁ.
ja462:0.1	Jātaka
ja462:0.2	Ekādasakanipāta
ja462:0.3	Mātuposakavagga
ja462:0.4	8. Saṁvarajātaka
ja462:1.1	“Jānanto no mahārāja,
ja462:1.2	tava sīlaṁ janādhipo;
ja462:1.3	Ime kumāre pūjento,
ja462:1.4	na taṁ kenaci maññatha.
ja462:2.1	Tiṭṭhante no mahārāje,
ja462:2.2	adu deve divaṅgate;
ja462:2.3	Ñātī taṁ samanuññiṁsu,
ja462:2.4	sampassaṁ atthamattano.
ja462:3.1	Kena saṁvara vattena,
ja462:3.2	sañjāte abhitiṭṭhasi;
ja462:3.3	Kena taṁ nātivattanti,
ja462:3.4	ñātisaṅghā samāgatā”.
ja462:4.1	“Na rājaputta usūyāmi,
ja462:4.2	samaṇānaṁ mahesinaṁ;
ja462:4.3	Sakkaccaṁ te namassāmi,
ja462:4.4	pāde vandāmi tādinaṁ.
ja462:5.1	Te maṁ dhammaguṇe yuttaṁ,
ja462:5.2	sussūsamanusūyakaṁ;
ja462:5.3	Samaṇā manusāsanti,
ja462:5.4	isī dhammaguṇe ratā.
ja462:6.1	Tesāhaṁ vacanaṁ sutvā,
ja462:6.2	samaṇānaṁ mahesinaṁ;
ja462:6.3	Na kiñci atimaññāmi,
ja462:6.4	dhamme me nirato mano.
ja462:7.1	Hatthārohā anīkaṭṭhā,
ja462:7.2	rathikā pattikārakā;
ja462:7.3	Tesaṁ nappaṭibandhāmi,
ja462:7.4	niviṭṭhaṁ bhattavetanaṁ.
ja462:8.1	Mahāmattā ca me atthi,
ja462:8.2	mantino paricārakā;
ja462:8.3	Bārāṇasiṁ voharanti,
ja462:8.4	bahumaṁsasurodakaṁ.
ja462:9.1	Athopi vāṇijā phītā,
ja462:9.2	nānāraṭṭhehi āgatā;
ja462:9.3	Tesu me vihitā rakkhā,
ja462:9.4	evaṁ jānāhuposatha”.
ja462:10.1	“Dhammena kira ñātīnaṁ,
ja462:10.2	rajjaṁ kārehi saṁvara;
ja462:10.3	Medhāvī paṇḍito cāsi,
ja462:10.4	athopi ñātinaṁ hito.
ja462:11.1	Taṁ taṁ ñātiparibyūḷhaṁ,
ja462:11.2	nānāratanamocitaṁ;
ja462:11.3	Amittā nappasahanti,
ja462:11.4	indaṁva asurādhipo”ti.
ja462:12.1	Saṁvarajātakaṁ aṭṭhamaṁ.
ja463:0.1	Jātaka
ja463:0.2	Ekādasakanipāta
ja463:0.3	Mātuposakavagga
ja463:0.4	9. Suppārakajātaka
ja463:1.1	“Ummujjanti nimujjanti,
ja463:1.2	manussā khuranāsikā;
ja463:1.3	Suppārakaṁ taṁ pucchāma,
ja463:1.4	samuddo katamo ayaṁ”.
ja463:2.1	“Kurukacchā payātānaṁ,
ja463:2.2	vāṇijānaṁ dhanesinaṁ;
ja463:2.3	Nāvāya vippanaṭṭhāya,
ja463:2.4	khuramālīti vuccati”.
ja463:3.1	“Yathā aggīva suriyova,
ja463:3.2	samuddo paṭidissati;
ja463:3.3	Suppārakaṁ taṁ pucchāma,
ja463:3.4	samuddo katamo ayaṁ”.
ja463:4.1	“Kurukacchā payātānaṁ,
ja463:4.2	vāṇijānaṁ dhanesinaṁ;
ja463:4.3	Nāvāya vippanaṭṭhāya,
ja463:4.4	aggimālīti vuccati”.
ja463:5.1	“Yathā dadhīva khīraṁva,
ja463:5.2	samuddo paṭidissati;
ja463:5.3	Suppārakaṁ taṁ pucchāma,
ja463:5.4	samuddo katamo ayaṁ”.
ja463:6.1	“Kurukacchā payātānaṁ,
ja463:6.2	vāṇijānaṁ dhanesinaṁ;
ja463:6.3	Nāvāya vippanaṭṭhāya,
ja463:6.4	dadhimālīti vuccati”.
ja463:7.1	“Yathā kusova sassova,
ja463:7.2	samuddo paṭidissati;
ja463:7.3	Suppārakaṁ taṁ pucchāma,
ja463:7.4	samuddo katamo ayaṁ”.
ja463:8.1	“Kurukacchā payātānaṁ,
ja463:8.2	vāṇijānaṁ dhanesinaṁ;
ja463:8.3	Nāvāya vippanaṭṭhāya,
ja463:8.4	kusamālīti vuccati”.
ja463:9.1	“Yathā naḷova veḷūva,
ja463:9.2	samuddo paṭidissati;
ja463:9.3	Suppārakaṁ taṁ pucchāma,
ja463:9.4	samuddo katamo ayaṁ”.
ja463:10.1	“Kurukacchā payātānaṁ,
ja463:10.2	vāṇijānaṁ dhanesinaṁ;
ja463:10.3	Nāvāya vippanaṭṭhāya,
ja463:10.4	naḷamālīti vuccati”.
ja463:11.1	“Mahabbhayo bhiṁsanako,
ja463:11.2	saddo suyyatimānuso;
ja463:11.3	Yathā sobbho papātova,
ja463:11.4	samuddo paṭidissati;
ja463:11.5	Suppārakaṁ taṁ pucchāma,
ja463:11.6	samuddo katamo ayaṁ”.
ja463:12.1	“Kurukacchā payātānaṁ,
ja463:12.2	vāṇijānaṁ dhanesinaṁ;
ja463:12.3	Nāvāya vippanaṭṭhāya,
ja463:12.4	baḷavāmukhīti vuccati.
ja463:13.1	Yato sarāmi attānaṁ,
ja463:13.2	Yato pattosmi viññutaṁ;
ja463:13.3	Nābhijānāmi sañcicca,
ja463:13.4	Ekapāṇampi hiṁsitaṁ;
ja463:13.5	Etena saccavajjena,
ja463:13.6	Sotthiṁ nāvā nivattatū”ti.
ja463:14.1	Suppārakajātakaṁ navamaṁ.
ja463:15.1	Ekādasakanipātaṁ niṭṭhitaṁ.
ja463:16.1	Tassuddānaṁ
ja463:17.1	Sirimātusuposakanāgavaro,
ja463:17.2	Puna juṇhaka dhammamudayavaro;
ja463:17.3	Atha pāni yudhañcayako ca dasa-
ja463:17.4	Ratha saṁvara pāragatena navāti.
ja464:0.1	Jātaka
ja464:0.2	Dvādasakanipāta
ja464:0.3	Cūḷakuṇālavagga
ja464:0.4	1. Cūḷakuṇālajātaka
ja464:1.1	“Luddhānaṁ lahucittānaṁ,
ja464:1.2	akataññūna dubbhinaṁ;
ja464:1.3	Nādevasatto puriso,
ja464:1.4	thīnaṁ saddhātumarahati.
ja464:2.1	Na tā pajānanti kataṁ na kiccaṁ,
ja464:2.2	Na mātaraṁ pitaraṁ bhātaraṁ vā;
ja464:2.3	Anariyā samatikkantadhammā,
ja464:2.4	Sasseva cittassa vasaṁ vajanti.
ja464:3.1	Cirānuvutthampi piyaṁ manāpaṁ,
ja464:3.2	Anukampakaṁ pāṇasamampi bhattuṁ;
ja464:3.3	Āvāsu kiccesu ca naṁ jahanti,
ja464:3.4	Tasmāhamitthīnaṁ na vissasāmi.
ja464:4.1	Thīnañhi cittaṁ yathā vānarassa,
ja464:4.2	Kannappakannaṁ yathā rukkhachāyā;
ja464:4.3	Calācalaṁ hadayamitthiyānaṁ,
ja464:4.4	Cakkassa nemi viya parivattati.
ja464:5.1	Yadā tā passanti samekkhamānā,
ja464:5.2	Ādeyyarūpaṁ purisassa vittaṁ;
ja464:5.3	Saṇhāhi vācāhi nayanti menaṁ,
ja464:5.4	Kambojakā jalajeneva assaṁ.
ja464:6.1	Yadā na passanti samekkhamānā,
ja464:6.2	Ādeyyarūpaṁ purisassa vittaṁ;
ja464:6.3	Samantato naṁ parivajjayanti,
ja464:6.4	Tiṇṇo nadīpāragatova kullaṁ.
ja464:7.1	Silesūpamā sikhiriva sabbabhakkhā,
ja464:7.2	Tikkhamāyā nadīriva sīghasotā;
ja464:7.3	Sevanti hetā piyamappiyañca,
ja464:7.4	Nāvā yathā orakūlaṁ parañca.
ja464:8.1	Na tā ekassa na dvinnaṁ,
ja464:8.2	āpaṇova pasārito;
ja464:8.3	Yo tā mayhanti maññeyya,
ja464:8.4	vātaṁ jālena bādhaye.
ja464:9.1	Yathā nadī ca pantho ca,
ja464:9.2	pānāgāraṁ sabhā papā;
ja464:9.3	Evaṁ lokitthiyo nāma,
ja464:9.4	velā tāsaṁ na vijjati.
ja464:10.1	Ghatāsanasamā etā,
ja464:10.2	kaṇhasappasirūpamā;
ja464:10.3	Gāvo bahitiṇasseva,
ja464:10.4	omasanti varaṁ varaṁ.
ja464:11.1	Ghatāsanaṁ kuñjaraṁ kaṇhasappaṁ,
ja464:11.2	Muddhābhisittaṁ pamadā ca sabbā;
ja464:11.3	Ete naro niccayato bhajetha,
ja464:11.4	Tesaṁ have dubbidu sabbabhāvo.
ja464:12.1	Naccantavaṇṇā na bahūnaṁ kantā,
ja464:12.2	Na dakkhiṇā pamadā sevitabbā;
ja464:12.3	Na parassa bhariyā na dhanassa hetu,
ja464:12.4	Etitthiyo pañca na sevitabbā”ti.
ja464:13.1	Cūḷakuṇālajātakaṁ paṭhamaṁ.
ja465:0.1	Jātaka
ja465:0.2	Dvādasakanipāta
ja465:0.3	Cūḷakuṇālavagga
ja465:0.4	2. Bhaddasālajātaka
ja465:1.1	“Kā tvaṁ suddhehi vatthehi,
ja465:1.2	aghe vehāyasaṁ ṭhitā;
ja465:1.3	Kena tyāssūni vattanti,
ja465:1.4	kuto taṁ bhayamāgataṁ”.
ja465:2.1	“Taveva deva vijite,
ja465:2.2	bhaddasāloti maṁ vidū;
ja465:2.3	Saṭṭhi vassasahassāni,
ja465:2.4	tiṭṭhato pūjitassa me.
ja465:3.1	Kārayantā nagarāni,
ja465:3.2	agāre ca disampati;
ja465:3.3	Vividhe cāpi pāsāde,
ja465:3.4	na maṁ te accamaññisuṁ;
ja465:3.5	Yatheva maṁ te pūjesuṁ,
ja465:3.6	tatheva tvampi pūjaya”.
ja465:4.1	“Taṁ ivāhaṁ na passāmi,
ja465:4.2	thūlaṁ kāyena te dumaṁ;
ja465:4.3	Ārohapariṇāhena,
ja465:4.4	abhirūposi jātiyā.
ja465:5.1	Pāsādaṁ kārayissāmi,
ja465:5.2	ekatthambhaṁ manoramaṁ;
ja465:5.3	Tattha taṁ upanessāmi,
ja465:5.4	ciraṁ te yakkha jīvitaṁ”.
ja465:6.1	“Evaṁ cittaṁ udapādi,
ja465:6.2	sarīrena vinābhāvo;
ja465:6.3	Puthuso maṁ vikantitvā,
ja465:6.4	khaṇḍaso avakantatha.
ja465:7.1	Agge ca chetvā majjhe ca,
ja465:7.2	pacchā mūlamhi chindatha;
ja465:7.3	Evaṁ me chijjamānassa,
ja465:7.4	na dukkhaṁ maraṇaṁ siyā”.
ja465:8.1	“Hatthapādaṁ yathā chinde,
ja465:8.2	Kaṇṇanāsañca jīvato;
ja465:8.3	Tato pacchā siro chinde,
ja465:8.4	Taṁ dukkhaṁ maraṇaṁ siyā.
ja465:9.1	Sukhaṁ nu khaṇḍaso chinnaṁ,
ja465:9.2	bhaddasāla vanappati;
ja465:9.3	Kiṁhetu kiṁ upādāya,
ja465:9.4	khaṇḍaso chinnamicchasi”.
ja465:10.1	“Yañca hetumupādāya,
ja465:10.2	hetuṁ dhammūpasaṁhitaṁ;
ja465:10.3	Khaṇḍaso chinnamicchāmi,
ja465:10.4	mahārāja suṇohi me.
ja465:11.1	Ñātī me sukhasaṁvaddhā,
ja465:11.2	mama passe nivātajā;
ja465:11.3	Tepihaṁ upahiṁseyyaṁ,
ja465:11.4	paresaṁ asukhocitaṁ”.
ja465:12.1	“Ceteyyarūpaṁ cetesi,
ja465:12.2	bhaddasāla vanappati;
ja465:12.3	Hitakāmosi ñātīnaṁ,
ja465:12.4	abhayaṁ samma dammi te”ti.
ja465:13.1	Bhaddasālajātakaṁ dutiyaṁ.
ja466:0.1	Jātaka
ja466:0.2	Dvādasakanipāta
ja466:0.3	Cūḷakuṇālavagga
ja466:0.4	3. Samuddavāṇijajātaka
ja466:1.1	“Kasanti vapanti te janā,
ja466:1.2	Manujā kammaphalūpajīvino;
ja466:1.3	Nayimassa dīpakassa bhāgino,
ja466:1.4	Jambudīpā idameva no varaṁ”.
ja466:2.1	“Tipañcarattūpagatamhi cande,
ja466:2.2	Vego mahā hehiti sāgarassa;
ja466:2.3	Uplavissaṁ dīpamimaṁ uḷāraṁ,
ja466:2.4	Mā vo vadhī gacchatha leṇamaññaṁ”.
ja466:3.1	“Na jātuyaṁ sāgaravārivego,
ja466:3.2	Uplavissaṁ dīpamimaṁ uḷāraṁ;
ja466:3.3	Taṁ me nimittehi bahūhi diṭṭhaṁ,
ja466:3.4	Mā bhetha kiṁ socatha modathavho.
ja466:4.1	Pahūtabhakkhaṁ bahuannapānaṁ,
ja466:4.2	Pattattha āvāsamimaṁ uḷāraṁ;
ja466:4.3	Na vo bhayaṁ paṭipassāmi kiñci,
ja466:4.4	Āputtaputtehi pamodathavho”.
ja466:5.1	“Yo devoyaṁ dakkhiṇāyaṁ disāyaṁ,
ja466:5.2	Khemanti pakkosati tassa saccaṁ;
ja466:5.3	Na uttaro vedi bhayābhayassa,
ja466:5.4	Mā bhetha kiṁ socatha modathavho”.
ja466:6.1	“Yathā ime vippavadanti yakkhā,
ja466:6.2	Eko bhayaṁ saṁsati khemameko;
ja466:6.3	Tadiṅgha mayhaṁ vacanaṁ suṇātha,
ja466:6.4	Khippaṁ lahuṁ mā vinassimha sabbe.
ja466:7.1	Sabbe samāgamma karoma nāvaṁ,
ja466:7.2	Doṇiṁ daḷhaṁ sabbayantūpapannaṁ;
ja466:7.3	Sace ayaṁ dakkhiṇo saccamāha,
ja466:7.4	Moghaṁ paṭikkosati uttaroyaṁ;
ja466:7.5	Sā ceva no hehiti āpadatthā,
ja466:7.6	Imañca dīpaṁ na pariccajema.
ja466:8.1	Sace ca kho uttaro saccamāha,
ja466:8.2	Moghaṁ paṭikkosati dakkhiṇoyaṁ;
ja466:8.3	Tameva nāvaṁ abhiruyha sabbe,
ja466:8.4	Evaṁ mayaṁ sotthi taremu pāraṁ.
ja466:9.1	Na ve sugaṇhaṁ paṭhamena seṭṭhaṁ,
ja466:9.2	Kaniṭṭhamāpāthagataṁ gahetvā;
ja466:9.3	Yo cīdha tacchaṁ paviceyya gaṇhati,
ja466:9.4	Sa ve naro seṭṭhamupeti ṭhānaṁ.
ja466:10.1	Yathāpi te sāgaravārimajjhe,
ja466:10.2	Sakammunā sotthi vahiṁsu vāṇijā;
ja466:10.3	Anāgatatthaṁ paṭivijjhiyāna,
ja466:10.4	Appampi nācceti sa bhūripañño.
ja466:11.1	Bālā ca mohena rasānugiddhā,
ja466:11.2	Anāgataṁ appaṭivijjhiyatthaṁ;
ja466:11.3	Paccuppanne sīdanti atthajāte,
ja466:11.4	Samuddamajjhe yathā te manussā.
ja466:12.1	Anāgataṁ paṭikayirātha kiccaṁ,
ja466:12.2	‘Mā maṁ kiccaṁ kiccakāle byadhesi’;
ja466:12.3	Taṁ tādisaṁ paṭikatakiccakāriṁ,
ja466:12.4	Na taṁ kiccaṁ kiccakāle byadhetī”ti.
ja466:13.1	Samuddavāṇijajātakaṁ tatiyaṁ.
ja467:0.1	Jātaka
ja467:0.2	Dvādasakanipāta
ja467:0.3	Cūḷakuṇālavagga
ja467:0.4	4. Kāmajātaka
ja467:1.1	“Kāmaṁ kāmayamānassa,
ja467:1.2	tassa ce taṁ samijjhati;
ja467:1.3	Addhā pītimano hoti,
ja467:1.4	laddhā macco yadicchati.
ja467:2.1	Kāmaṁ kāmayamānassa,
ja467:2.2	tassa ce taṁ samijjhati;
ja467:2.3	Tato naṁ aparaṁ kāme,
ja467:2.4	ghamme taṇhaṁva vindati.
ja467:3.1	Gavaṁva siṅgino siṅgaṁ,
ja467:3.2	vaḍḍhamānassa vaḍḍhati;
ja467:3.3	Evaṁ mandassa posassa,
ja467:3.4	bālassa avijānato;
ja467:3.5	Bhiyyo taṇhā pipāsā ca,
ja467:3.6	vaḍḍhamānassa vaḍḍhati.
ja467:4.1	Pathabyā sāliyavakaṁ,
ja467:4.2	gavāssaṁ dāsaporisaṁ;
ja467:4.3	Datvā ca nālamekassa,
ja467:4.4	iti vidvā samaṁ care.
ja467:5.1	Rājā pasayha pathaviṁ vijitvā,
ja467:5.2	Sasāgarantaṁ mahimāvasanto;
ja467:5.3	Oraṁ samuddassa atittarūpo,
ja467:5.4	Pāraṁ samuddassapi patthayetha.
ja467:6.1	Yāva anussaraṁ kāme,
ja467:6.2	Manasā titti nājjhagā;
ja467:6.3	Tato nivattā paṭikkamma disvā,
ja467:6.4	Te ve sutittā ye paññāya tittā.
ja467:7.1	Paññāya tittinaṁ seṭṭhaṁ,
ja467:7.2	na so kāmehi tappati;
ja467:7.3	Paññāya tittaṁ purisaṁ,
ja467:7.4	taṇhā na kurute vasaṁ.
ja467:8.1	Apacinetheva kāmānaṁ,
ja467:8.2	appicchassa alolupo;
ja467:8.3	Samuddamatto puriso,
ja467:8.4	na so kāmehi tappati.
ja467:9.1	Rathakārova cammassa,
ja467:9.2	parikantaṁ upāhanaṁ;
ja467:9.3	Yaṁ yaṁ cajati kāmānaṁ,
ja467:9.4	taṁ taṁ sampajjate sukhaṁ;
ja467:9.5	Sabbañce sukhamiccheyya,
ja467:9.6	sabbe kāme pariccaje”.
ja467:10.1	“Aṭṭha te bhāsitā gāthā,
ja467:10.2	sabbā honti sahassiyo;
ja467:10.3	Paṭigaṇha mahābrahme,
ja467:10.4	sādhetaṁ tava bhāsitaṁ”.
ja467:11.1	“Na me attho sahassehi,
ja467:11.2	satehi nahutehi vā;
ja467:11.3	Pacchimaṁ bhāsato gāthaṁ,
ja467:11.4	kāme me na rato mano”.
ja467:12.1	“Bhadrako vatāyaṁ māṇavako,
ja467:12.2	Sabbalokavidū muni;
ja467:12.3	Yo imaṁ taṇhaṁ dukkhajananiṁ,
ja467:12.4	Parijānāti paṇḍito”ti.
ja467:13.1	Kāmajātakaṁ catutthaṁ.
ja468:0.1	Jātaka
ja468:0.2	Dvādasakanipāta
ja468:0.3	Cūḷakuṇālavagga
ja468:0.4	5. Janasandhajātaka
ja468:1.1	“Dasa khalu imāni ṭhānāni,
ja468:1.2	Yāni pubbe akaritvā;
ja468:1.3	Sa pacchā manutappati,
ja468:1.4	Iccevāha janasandho.
ja468:2.1	Aladdhā vittaṁ tappati,
ja468:2.2	pubbe asamudānitaṁ;
ja468:2.3	Na pubbe dhanamesissaṁ,
ja468:2.4	iti pacchānutappati.
ja468:3.1	Sakyarūpaṁ pure santaṁ,
ja468:3.2	mayā sippaṁ na sikkhitaṁ;
ja468:3.3	Kicchā vutti asippassa,
ja468:3.4	iti pacchānutappati.
ja468:4.1	Kūṭavedī pure āsiṁ,
ja468:4.2	pisuṇo piṭṭhimaṁsiko;
ja468:4.3	Caṇḍo ca pharuso cāpi,
ja468:4.4	iti pacchānutappati.
ja468:5.1	Pāṇātipātī pure āsiṁ,
ja468:5.2	luddo cāpi anāriyo;
ja468:5.3	Bhūtānaṁ nāpacāyissaṁ,
ja468:5.4	iti pacchānutappati.
ja468:6.1	Bahūsu vata santīsu,
ja468:6.2	anāpādāsu itthisu;
ja468:6.3	Paradāraṁ asevissaṁ,
ja468:6.4	iti pacchānutappati.
ja468:7.1	Bahumhi vata santamhi,
ja468:7.2	annapāne upaṭṭhite;
ja468:7.3	Na pubbe adadaṁ dānaṁ,
ja468:7.4	iti pacchānutappati.
ja468:8.1	Mātaraṁ pitarañcāpi,
ja468:8.2	jiṇṇakaṁ gatayobbanaṁ;
ja468:8.3	Pahu santo na posissaṁ,
ja468:8.4	iti pacchānutappati.
ja468:9.1	Ācariyamanusatthāraṁ,
ja468:9.2	sabbakāmarasāharaṁ;
ja468:9.3	Pitaraṁ atimaññissaṁ,
ja468:9.4	iti pacchānutappati.
ja468:10.1	Samaṇe brāhmaṇe cāpi,
ja468:10.2	sīlavante bahussute;
ja468:10.3	Na pubbe payirupāsissaṁ,
ja468:10.4	iti pacchānutappati.
ja468:11.1	Sādhu hoti tapo ciṇṇo,
ja468:11.2	santo ca payirupāsito;
ja468:11.3	Na ca pubbe tapo ciṇṇo,
ja468:11.4	iti pacchānutappati.
ja468:12.1	Yo ca etāni ṭhānāni,
ja468:12.2	yoniso paṭipajjati;
ja468:12.3	Karaṁ purisakiccāni,
ja468:12.4	sa pacchā nānutappatī”ti.
ja468:13.1	Janasandhajātakaṁ pañcamaṁ.
ja469:0.1	Jātaka
ja469:0.2	Dvādasakanipāta
ja469:0.3	Cūḷakuṇālavagga
ja469:0.4	6. Mahākaṇhajātaka
ja469:1.1	“Kaṇho kaṇho ca ghoro ca,
ja469:1.2	sukkadāṭho pabhāsavā;
ja469:1.3	Baddho pañcahi rajjūhi,
ja469:1.4	kiṁ ravi sunakho tava”.
ja469:2.1	“Nāyaṁ migānamatthāya,
ja469:2.2	usīnaka bhavissati;
ja469:2.3	Manussānaṁ anayo hutvā,
ja469:2.4	tadā kaṇho pamokkhati”.
ja469:3.1	“Pattahatthā samaṇakā,
ja469:3.2	muṇḍā saṅghāṭipārutā;
ja469:3.3	Naṅgalehi kasissanti,
ja469:3.4	tadā kaṇho pamokkhati.
ja469:4.1	Tapassiniyo pabbajitā,
ja469:4.2	muṇḍā saṅghāṭipārutā;
ja469:4.3	Yadā loke gamissanti,
ja469:4.4	tadā kaṇho pamokkhati.
ja469:5.1	Dīghottaroṭṭhā jaṭilā,
ja469:5.2	paṅkadantā rajassirā;
ja469:5.3	Iṇaṁ codāya gacchanti,
ja469:5.4	tadā kaṇho pamokkhati.
ja469:6.1	Adhicca vede sāvittiṁ,
ja469:6.2	yaññatantañca brāhmaṇā;
ja469:6.3	Bhatikāya yajissanti,
ja469:6.4	tadā kaṇho pamokkhati.
ja469:7.1	Mātaraṁ pitarañcāpi,
ja469:7.2	jiṇṇakaṁ gatayobbanaṁ;
ja469:7.3	Pahū santo na bharanti,
ja469:7.4	tadā kaṇho pamokkhati.
ja469:8.1	Mātaraṁ pitarañcāpi,
ja469:8.2	jiṇṇakaṁ gatayobbanaṁ;
ja469:8.3	Bālā tumheti vakkhanti,
ja469:8.4	tadā kaṇho pamokkhati.
ja469:9.1	Ācariyabhariyaṁ sakhiṁ,
ja469:9.2	mātulāniṁ pitucchakiṁ;
ja469:9.3	Yadā loke gamissanti,
ja469:9.4	tadā kaṇho pamokkhati.
ja469:10.1	Asicammaṁ gahetvāna,
ja469:10.2	khaggaṁ paggayha brāhmaṇā;
ja469:10.3	Panthaghātaṁ karissanti,
ja469:10.4	tadā kaṇho pamokkhati.
ja469:11.1	Sukkacchavī vedhaverā,
ja469:11.2	thūlabāhū apātubhā;
ja469:11.3	Mittabhedaṁ karissanti,
ja469:11.4	tadā kaṇho pamokkhati.
ja469:12.1	Māyāvino nekatikā,
ja469:12.2	asappurisacintakā;
ja469:12.3	Yadā loke bhavissanti,
ja469:12.4	tadā kaṇho pamokkhatī”ti.
ja469:13.1	Mahākaṇhajātakaṁ chaṭṭhaṁ.
ja470:0.1	Jātaka
ja470:0.2	Dvādasakanipāta
ja470:0.3	Cūḷakuṇālavagga
ja470:0.4	7. Kosiyajātaka
ja470:1.1	“Neva kiṇāmi napi vikkiṇāmi,
ja470:1.2	Na cāpi me sannicayo ca atthi;
ja470:1.3	Sukiccharūpaṁ vatidaṁ parittaṁ,
ja470:1.4	Patthodano nālamayaṁ duvinnaṁ”.
ja470:2.1	“Appamhā appakaṁ dajjā,
ja470:2.2	anumajjhato majjhakaṁ;
ja470:2.3	Bahumhā bahukaṁ dajjā,
ja470:2.4	adānaṁ nupapajjati.
ja470:3.1	Taṁ taṁ vadāmi kosiya,
ja470:3.2	dehi dānāni bhuñja ca”.
ja470:3.3	Ariyamaggaṁ samārūha,
ja470:3.4	nekāsī labhate sukhaṁ.
ja470:4.1	“Moghañcassa hutaṁ hoti,
ja470:4.2	moghañcāpi samīhitaṁ;
ja470:4.3	Atithismiṁ yo nisinnasmiṁ,
ja470:4.4	eko bhuñjati bhojanaṁ.
ja470:5.1	Taṁ taṁ vadāmi kosiya,
ja470:5.2	dehi dānāni bhuñja ca;
ja470:5.3	Ariyamaggaṁ samārūha,
ja470:5.4	nekāsī labhate sukhaṁ”.
ja470:6.1	“Saccañcassa hutaṁ hoti,
ja470:6.2	saccañcāpi samīhitaṁ;
ja470:6.3	Atithismiṁ yo nisinnasmiṁ,
ja470:6.4	neko bhuñjati bhojanaṁ.
ja470:7.1	Taṁ taṁ vadāmi kosiya,
ja470:7.2	dehi dānāni bhuñja ca;
ja470:7.3	Ariyamaggaṁ samārūha,
ja470:7.4	nekāsī labhate sukhaṁ”.
ja470:8.1	“Sarañca juhati poso,
ja470:8.2	bahukāya gayāya ca;
ja470:8.3	Doṇe timbarutitthasmiṁ,
ja470:8.4	sīghasote mahāvahe.
ja470:9.1	Atra cassa hutaṁ hoti,
ja470:9.2	atra cassa samīhitaṁ;
ja470:9.3	Atithismiṁ yo nisinnasmiṁ,
ja470:9.4	neko bhuñjati bhojanaṁ.
ja470:10.1	Taṁ taṁ vadāmi kosiya,
ja470:10.2	dehi dānāni bhuñja ca;
ja470:10.3	Ariyamaggaṁ samārūha,
ja470:10.4	nekāsī labhate sukhaṁ”.
ja470:11.1	“Baḷisañhi so nigilati,
ja470:11.2	dīghasuttaṁ sabandhanaṁ;
ja470:11.3	Atithismiṁ yo nisinnasmiṁ,
ja470:11.4	eko bhuñjati bhojanaṁ.
ja470:12.1	Taṁ taṁ vadāmi kosiya,
ja470:12.2	dehi dānāni bhuñja ca;
ja470:12.3	Ariyamaggaṁ samārūha,
ja470:12.4	nekāsī labhate sukhaṁ”.
ja470:13.1	“Uḷāravaṇṇā vata brāhmaṇā ime,
ja470:13.2	Ayañca vo sunakho kissa hetu;
ja470:13.3	Uccāvacaṁ vaṇṇanibhaṁ vikubbati,
ja470:13.4	Akkhātha no brāhmaṇā ke nu tumhe”.
ja470:14.1	“Cando ca suriyo ca ubho idhāgatā,
ja470:14.2	Ayaṁ pana mātali devasārathi;
ja470:14.3	Sakkohamasmi tidasānamindo,
ja470:14.4	Eso ca kho pañcasikhoti vuccati”.
ja470:15.1	“Pāṇissarā mudiṅgā ca,
ja470:15.2	murajālambarāni ca;
ja470:15.3	Suttamenaṁ pabodhenti,
ja470:15.4	paṭibuddho ca nandati”.
ja470:16.1	“Ye kecime maccharino kadariyā,
ja470:16.2	Paribhāsakā samaṇabrāhmaṇānaṁ;
ja470:16.3	Idheva nikkhippa sarīradehaṁ,
ja470:16.4	Kāyassa bhedā nirayaṁ vajanti”.
ja470:17.1	“Ye kecime suggatimāsamānā,
ja470:17.2	Dhamme ṭhitā saṁyame saṁvibhāge;
ja470:17.3	Idheva nikkhippa sarīradehaṁ,
ja470:17.4	Kāyassa bhedā sugatiṁ vajanti.
ja470:18.1	Tvaṁ nosi ñāti purimāsu jātisu,
ja470:18.2	So maccharī rosako pāpadhammo;
ja470:18.3	Taveva atthāya idhāgatamhā,
ja470:18.4	Mā pāpadhammo nirayaṁ gamittha”.
ja470:19.1	“Addhā hi maṁ vo hitakāmā,
ja470:19.2	yaṁ maṁ samanusāsatha;
ja470:19.3	Sohaṁ tathā karissāmi,
ja470:19.4	sabbaṁ vuttaṁ hitesibhi.
ja470:20.1	Esāhamajjeva upāramāmi,
ja470:20.2	Na cāpihaṁ kiñci kareyya pāpaṁ;
ja470:20.3	Na cāpi me kiñci adeyyamatthi,
ja470:20.4	Na cāpidatvā udakaṁ pivāmi.
ja470:21.1	Evañca me dadato sabbakālaṁ,
ja470:21.2	Bhogā ime vāsava khīyissanti;
ja470:21.3	Tato ahaṁ pabbajissāmi sakka,
ja470:21.4	Hitvāna kāmāni yathodhikānī”ti.
ja470:22.1	Kosiyajātakaṁ sattamaṁ.
ja471:0.1	Jātaka
ja471:0.2	Dvādasakanipāta
ja471:0.3	Cūḷakuṇālavagga
ja471:0.4	8. Meṇḍakapañhajātaka
ja471:1.1	“Yesaṁ na kadāci bhūtapubbaṁ,
ja471:1.2	Sakhyaṁ sattapadampimasmi loke;
ja471:1.3	Jātā amittā duve sahāyā,
ja471:1.4	Paṭisandhāya caranti kissa hetu”.
ja471:2.1	“Yadi me ajja pātarāsakāle,
ja471:2.2	Pañhaṁ na sakkuṇeyyātha vattumetaṁ;
ja471:2.3	Raṭṭhā pabbājayissāmi vo sabbe,
ja471:2.4	Na hi mattho duppaññajātikehi”.
ja471:3.1	“Mahājanasamāgamamhi ghore,
ja471:3.2	Janakolāhalasaṅgamamhi jāte;
ja471:3.3	Vikkhittamanā anekacittā,
ja471:3.4	Pañhaṁ na sakkuṇoma vattumetaṁ.
ja471:4.1	Ekaggacittāva ekamekā,
ja471:4.2	Rahasi gatā atthaṁ nicintayitvā;
ja471:4.3	Paviveke sammasitvāna dhīrā,
ja471:4.4	Atha vakkhanti janinda etamatthaṁ”.
ja471:5.1	“Uggaputtarājaputtiyānaṁ,
ja471:5.2	Urabbhassa maṁsaṁ piyaṁ manāpaṁ;
ja471:5.3	Na sunakhassa te adenti maṁsaṁ,
ja471:5.4	Atha meṇḍassa suṇena sakhyamassa”.
ja471:6.1	“Cammaṁ vihananti eḷakassa,
ja471:6.2	Assapiṭṭhattharassukhassa hetu;
ja471:6.3	Na ca te sunakhassa attharanti,
ja471:6.4	Atha meṇḍassa suṇena sakhyamassa”.
ja471:7.1	“Āvellitasiṅgiko hi meṇḍo,
ja471:7.2	Na ca sunakhassa visāṇakāni atthi;
ja471:7.3	Tiṇabhakkho maṁsabhojano ca,
ja471:7.4	Atha meṇḍassa suṇena sakhyamassa”.
ja471:8.1	“Tiṇamāsi palāsamāsi meṇḍo,
ja471:8.2	Na ca sunakho tiṇamāsi no palāsaṁ;
ja471:8.3	Gaṇheyya suṇo sasaṁ biḷāraṁ,
ja471:8.4	Atha meṇḍassa suṇena sakhyamassa”.
ja471:9.1	“Aṭṭhaḍḍhapado catuppadassa,
ja471:9.2	Meṇḍo aṭṭhanakho adissamāno;
ja471:9.3	Chādiyamāharatī ayaṁ imassa,
ja471:9.4	Maṁsaṁ āharatī ayaṁ amussa.
ja471:10.1	Pāsādavaragato videhaseṭṭho,
ja471:10.2	Vitihāraṁ aññamaññabhojanānaṁ;
ja471:10.3	Addakkhi kira sakkhikaṁ janindo,
ja471:10.4	Bubhukkassa puṇṇaṁmukhassa cetaṁ”.
ja471:11.1	“Lābhā vata me anapparūpā,
ja471:11.2	Yassa medisā paṇḍitā kulamhi;
ja471:11.3	Pañhassa gambhīragataṁ nipuṇamatthaṁ,
ja471:11.4	Paṭivijjhanti subhāsitena dhīrā.
ja471:12.1	Assatarirathañca ekamekaṁ,
ja471:12.2	Phītaṁ gāmavarañca ekamekaṁ;
ja471:12.3	Sabbesaṁ vo dammi paṇḍitānaṁ,
ja471:12.4	Paramappatītamano subhāsitenā”ti.
ja471:13.1	Meṇḍakapañhajātakaṁ aṭṭhamaṁ.
ja472:0.1	Jātaka
ja472:0.2	Dvādasakanipāta
ja472:0.3	Cūḷakuṇālavagga
ja472:0.4	9. Mahāpadumajātaka
ja472:1.1	“Nādaṭṭhā parato dosaṁ,
ja472:1.2	aṇuṁthūlāni sabbaso;
ja472:1.3	Issaro paṇaye daṇḍaṁ,
ja472:1.4	sāmaṁ appaṭivekkhiya.
ja472:2.1	Yo ca appaṭivekkhitvā,
ja472:2.2	daṇḍaṁ kubbati khattiyo;
ja472:2.3	Sakaṇṭakaṁ so gilati,
ja472:2.4	jaccandhova samakkhikaṁ.
ja472:3.1	Adaṇḍiyaṁ daṇḍayati,
ja472:3.2	daṇḍiyañca adaṇḍiyaṁ;
ja472:3.3	Andhova visamaṁ maggaṁ,
ja472:3.4	na jānāti samāsamaṁ.
ja472:4.1	Yo ca etāni ṭhānāni,
ja472:4.2	Aṇuṁthūlāni sabbaso;
ja472:4.3	Sudiṭṭhamanusāseyya,
ja472:4.4	Sa ve voharitumarahati.
ja472:5.1	Nekantamudunā sakkā,
ja472:5.2	Ekantatikhiṇena vā;
ja472:5.3	Attaṁ mahante ṭhapetuṁ,
ja472:5.4	Tasmā ubhayamācare.
ja472:6.1	Paribhūto mudu hoti,
ja472:6.2	atitikkho ca veravā;
ja472:6.3	Etañca ubhayaṁ ñatvā,
ja472:6.4	anumajjhaṁ samācare.
ja472:7.1	Bahumpi ratto bhāseyya,
ja472:7.2	duṭṭhopi bahu bhāsati;
ja472:7.3	Na itthikāraṇā rāja,
ja472:7.4	puttaṁ ghātetumarahasi”.
ja472:8.1	“Sabbova loko ekato,
ja472:8.2	Itthī ca ayamekikā;
ja472:8.3	Tenāhaṁ paṭipajjissaṁ,
ja472:8.4	Gacchatha pakkhipatheva taṁ”.
ja472:9.1	“Anekatāle narake,
ja472:9.2	gambhīre ca suduttare;
ja472:9.3	Pātito giriduggasmiṁ,
ja472:9.4	kena tvaṁ tattha nāmari”.
ja472:10.1	“Nāgo jātaphaṇo tattha,
ja472:10.2	thāmavā girisānujo;
ja472:10.3	Paccaggahi maṁ bhogehi,
ja472:10.4	tenāhaṁ tattha nāmariṁ”.
ja472:11.1	“Ehi taṁ paṭinessāmi,
ja472:11.2	rājaputta sakaṁ gharaṁ;
ja472:11.3	Rajjaṁ kārehi bhaddante,
ja472:11.4	kiṁ araññe karissasi”.
ja472:12.1	“Yathā gilitvā baḷisaṁ,
ja472:12.2	Uddhareyya salohitaṁ;
ja472:12.3	Uddharitvā sukhī assa,
ja472:12.4	Evaṁ passāmi attanaṁ”.
ja472:13.1	“Kiṁ nu tvaṁ baḷisaṁ brūsi,
ja472:13.2	kiṁ tvaṁ brūsi salohitaṁ;
ja472:13.3	Kiṁ nu tvaṁ ubbhataṁ brūsi,
ja472:13.4	taṁ me akkhāhi pucchito”.
ja472:14.1	“Kāmāhaṁ baḷisaṁ brūmi,
ja472:14.2	hatthiassaṁ salohitaṁ;
ja472:14.3	Cattāhaṁ ubbhataṁ brūmi,
ja472:14.4	evaṁ jānāhi khattiya”.
ja472:15.1	“Ciñcamāṇavikā mātā,
ja472:15.2	devadatto ca me pitā;
ja472:15.3	Ānando paṇḍito nāgo,
ja472:15.4	sāriputto ca devatā;
ja472:15.5	Rājaputto ahaṁ āsiṁ,
ja472:15.6	evaṁ dhāretha jātakan”ti.
ja472:16.1	Mahāpadumajātakaṁ navamaṁ.
ja473:0.1	Jātaka
ja473:0.2	Dvādasakanipāta
ja473:0.3	Cūḷakuṇālavagga
ja473:0.4	10. Mittāmittajātaka
ja473:1.1	“Kāni kammāni kubbānaṁ,
ja473:1.2	kathaṁ viññū parakkame;
ja473:1.3	Amittaṁ jāneyya medhāvī,
ja473:1.4	disvā sutvā ca paṇḍito”.
ja473:2.1	“Na naṁ umhayate disvā,
ja473:2.2	na ca naṁ paṭinandati;
ja473:2.3	Cakkhūni cassa na dadāti,
ja473:2.4	paṭilomañca vattati.
ja473:3.1	Amitte tassa bhajati,
ja473:3.2	mitte tassa na sevati;
ja473:3.3	Vaṇṇakāme nivāreti,
ja473:3.4	akkosante pasaṁsati.
ja473:4.1	Guyhañca tassa nakkhāti,
ja473:4.2	tassa guyhaṁ na gūhati;
ja473:4.3	Kammaṁ tassa na vaṇṇeti,
ja473:4.4	paññassa nappasaṁsati.
ja473:5.1	Abhave nandati tassa,
ja473:5.2	bhave tassa na nandati;
ja473:5.3	Accheraṁ bhojanaṁ laddhā,
ja473:5.4	tassa nuppajjate sati;
ja473:5.5	Tato naṁ nānukampati,
ja473:5.6	aho sopi labheyyito.
ja473:6.1	Iccete soḷasākārā,
ja473:6.2	amittasmiṁ patiṭṭhitā;
ja473:6.3	Yehi amittaṁ jāneyya,
ja473:6.4	disvā sutvā ca paṇḍito”.
ja473:7.1	“Kāni kammāni kubbānaṁ,
ja473:7.2	kathaṁ viññū parakkame;
ja473:7.3	Mittaṁ jāneyya medhāvī,
ja473:7.4	disvā sutvā ca paṇḍito.
ja473:8.1	Pavutthaṁ tassa sarati,
ja473:8.2	āgataṁ abhinandati;
ja473:8.3	Tato kelāyito hoti,
ja473:8.4	vācāya paṭinandati.
ja473:9.1	Mitte tasseva bhajati,
ja473:9.2	amitte tassa na sevati;
ja473:9.3	Akkosante nivāreti,
ja473:9.4	vaṇṇakāme pasaṁsati.
ja473:10.1	Guyhañca tassa akkhāti,
ja473:10.2	tassa guyhañca gūhati;
ja473:10.3	Kammañca tassa vaṇṇeti,
ja473:10.4	paññaṁ tassa pasaṁsati.
ja473:11.1	Bhave ca nandati tassa,
ja473:11.2	abhave tassa na nandati;
ja473:11.3	Accheraṁ bhojanaṁ laddhā,
ja473:11.4	tassa uppajjate sati;
ja473:11.5	Tato naṁ anukampati,
ja473:11.6	aho sopi labheyyito.
ja473:12.1	Iccete soḷasākārā,
ja473:12.2	Mittasmiṁ suppatiṭṭhitā;
ja473:12.3	Yehi mittañca jāneyya,
ja473:12.4	Disvā sutvā ca paṇḍito”ti.
ja473:13.1	Mittāmittajātakaṁ dasamaṁ.
ja473:14.1	Dvādasakanipātaṁ niṭṭhitaṁ.
ja473:15.1	Tassuddānaṁ
ja473:16.1	Lahucitta sasāla kasanti puna,
ja473:16.2	Atha kāma dasakhaluṭṭhānavaro;
ja473:16.3	Atha kaṇha sukosiya meṇḍavaro,
ja473:16.4	Padumo puna mittavarena dasāti.
ja474:0.1	Jātaka
ja474:0.2	Terasakanipāta
ja474:0.3	Ambavagga
ja474:0.4	1. Ambajātaka
ja474:1.1	“Ahāsi me ambaphalāni pubbe,
ja474:1.2	Aṇūni thūlāni ca brahmacāri;
ja474:1.3	Teheva mantehi na dāni tuyhaṁ,
ja474:1.4	Dumapphalā pātubhavanti brahme”.
ja474:2.1	“Nakkhattayogaṁ paṭimānayāmi,
ja474:2.2	Khaṇaṁ muhuttañca mante na passaṁ;
ja474:2.3	Nakkhattayogañca khaṇañca laddhā,
ja474:2.4	Addhāharissambaphalaṁ pahūtaṁ”.
ja474:3.1	“Nakkhattayogaṁ na pure abhāṇi,
ja474:3.2	Khaṇaṁ muhuttaṁ na pure asaṁsi;
ja474:3.3	Sayaṁ harī ambaphalaṁ pahūtaṁ,
ja474:3.4	Vaṇṇena gandhena rasenupetaṁ.
ja474:4.1	Mantābhijappena pure hi tuyhaṁ,
ja474:4.2	Dumapphalā pātubhavanti brahme;
ja474:4.3	Svājja na pāresi jappampi mantaṁ,
ja474:4.4	Ayaṁ so ko nāma tavajja dhammo”.
ja474:5.1	“Caṇḍālaputto mama sampadāsi,
ja474:5.2	Dhammena mante pakatiñca saṁsi;
ja474:5.3	Mā cassu me pucchito nāmagottaṁ,
ja474:5.4	Guyhittho atthaṁ vijaheyya manto.
ja474:6.1	Sohaṁ janindena janamhi puṭṭho,
ja474:6.2	Makkhābhibhūto alikaṁ abhāṇiṁ;
ja474:6.3	‘Mantā ime brāhmaṇassā’ti micchā,
ja474:6.4	Pahīnamanto kapaṇo rudāmi”.
ja474:7.1	“Eraṇḍā pucimandā vā,
ja474:7.2	atha vā pālibhaddakā;
ja474:7.3	Madhuṁ madhutthiko vinde,
ja474:7.4	so hi tassa dumuttamo.
ja474:8.1	Khattiyā brāhmaṇā vessā,
ja474:8.2	suddā caṇḍālapukkusā;
ja474:8.3	Yamhā dhammaṁ vijāneyya,
ja474:8.4	so hi tassa naruttamo.
ja474:9.1	Imassa daṇḍañca vadhañca datvā,
ja474:9.2	Gale gahetvā khalayātha jammaṁ;
ja474:9.3	Yo uttamatthaṁ kasirena laddhaṁ,
ja474:9.4	Mānātimānena vināsayittha”.
ja474:10.1	“Yathā samaṁ maññamāno pateyya,
ja474:10.2	Sobbhaṁ guhaṁ narakaṁ pūtipādaṁ;
ja474:10.3	Rajjūti vā akkame kaṇhasappaṁ,
ja474:10.4	Andho yathā jotimadhiṭṭhaheyya;
ja474:10.5	Evampi maṁ tvaṁ khalitaṁ sapañña,
ja474:10.6	Pahīnamantassa punappadāhi”.
ja474:11.1	“Dhammena mantaṁ tava sampadāsiṁ,
ja474:11.2	Tuvampi dhammena pariggahesi;
ja474:11.3	Pakatimpi te attamano asaṁsiṁ,
ja474:11.4	Dhamme ṭhitaṁ taṁ na jaheyya manto.
ja474:12.1	Yo bāla mantaṁ kasirena laddhaṁ,
ja474:12.2	Yaṁ dullabhaṁ ajja manussaloke;
ja474:12.3	Kiñcāpi laddhā jīvituṁ appapañño,
ja474:12.4	Vināsayī alikaṁ bhāsamāno.
ja474:13.1	Bālassa mūḷhassa akataññuno ca,
ja474:13.2	Musā bhaṇantassa asaññatassa;
ja474:13.3	Mante mayaṁ tādisake na dema,
ja474:13.4	Kuto mantā gaccha na mayha ruccasī”ti.
ja474:14.1	Ambajātakaṁ paṭhamaṁ.
ja475:0.1	Jātaka
ja475:0.2	Terasakanipāta
ja475:0.3	Ambavagga
ja475:0.4	2. Phandanajātaka
ja475:1.1	“Kuṭhārihattho puriso,
ja475:1.2	vanamogayha tiṭṭhasi;
ja475:1.3	Puṭṭho me samma akkhāhi,
ja475:1.4	kiṁ dāruṁ chetumicchasi”.
ja475:2.1	“Isso vanāni carasi,
ja475:2.2	samāni visamāni ca;
ja475:2.3	Puṭṭho me samma akkhāhi,
ja475:2.4	kiṁ dāruṁ nemiyā daḷhaṁ”.
ja475:3.1	“Neva sālo na khadiro,
ja475:3.2	nāssakaṇṇo kuto dhavo;
ja475:3.3	Rukkho ca phandano nāma,
ja475:3.4	taṁ dāruṁ nemiyā daḷhaṁ”.
ja475:4.1	“Kīdisānissa pattāni,
ja475:4.2	khandho vā pana kīdiso;
ja475:4.3	Puṭṭho me samma akkhāhi,
ja475:4.4	yathā jānemu phandanaṁ”.
ja475:5.1	“Yassa sākhā palambanti,
ja475:5.2	namanti na ca bhañjare;
ja475:5.3	So rukkho phandano nāma,
ja475:5.4	yassa mūle ahaṁ ṭhito.
ja475:6.1	Arānaṁ cakkanābhīnaṁ,
ja475:6.2	īsānemirathassa ca;
ja475:6.3	Sabbassa te kammaniyo,
ja475:6.4	ayaṁ hessati phandano”.
ja475:7.1	“Iti phandanarukkhopi,
ja475:7.2	tāvade ajjhabhāsatha;
ja475:7.3	Mayhampi vacanaṁ atthi,
ja475:7.4	bhāradvāja suṇohi me.
ja475:8.1	Issassa upakkhandhamhā,
ja475:8.2	Ukkacca caturaṅgulaṁ;
ja475:8.3	Tena nemiṁ pasāresi,
ja475:8.4	Evaṁ daḷhataraṁ siyā.
ja475:9.1	Iti phandanarukkhopi,
ja475:9.2	veraṁ appesi tāvade;
ja475:9.3	Jātānañca ajātānaṁ,
ja475:9.4	issānaṁ dukkhamāvahi.
ja475:10.1	Iccevaṁ phandano issaṁ,
ja475:10.2	isso ca pana phandanaṁ;
ja475:10.3	Aññamaññaṁ vivādena,
ja475:10.4	aññamaññamaghātayuṁ.
ja475:11.1	Evameva manussānaṁ,
ja475:11.2	vivādo yattha jāyati;
ja475:11.3	Mayūranaccaṁ naccanti,
ja475:11.4	yathā te issaphandanā.
ja475:12.1	Taṁ vo vadāmi bhaddaṁ vo,
ja475:12.2	yāvantettha samāgatā;
ja475:12.3	Sammodatha mā vivadatha,
ja475:12.4	mā hotha issaphandanā.
ja475:13.1	Sāmaggimeva sikkhetha,
ja475:13.2	buddhehetaṁ pasaṁsitaṁ;
ja475:13.3	Sāmaggirato dhammaṭṭho,
ja475:13.4	yogakkhemā na dhaṁsatī”ti.
ja475:14.1	Phandanajātakaṁ dutiyaṁ.
ja476:0.1	Jātaka
ja476:0.2	Terasakanipāta
ja476:0.3	Ambavagga
ja476:0.4	3. Javanahaṁsajātaka
ja476:1.1	“Idheva haṁsa nipata,
ja476:1.2	piyaṁ me tava dassanaṁ;
ja476:1.3	Issarosi anuppatto,
ja476:1.4	yamidhatthi pavedaya”.
ja476:2.1	“Savanena ekassa piyā bhavanti,
ja476:2.2	Disvā panekassa viyeti chando;
ja476:2.3	Disvā ca sutvā ca piyā bhavanti,
ja476:2.4	Kaccinnu me pīyasi dassanena.
ja476:3.1	Savanena piyo mesi,
ja476:3.2	bhiyyo cāgamma dassanaṁ;
ja476:3.3	Evaṁ piyadassano me,
ja476:3.4	vasa haṁsa mamantike”.
ja476:4.1	“Vaseyyāma tavāgāre,
ja476:4.2	niccaṁ sakkatapūjitā;
ja476:4.3	Matto ca ekadā vajje,
ja476:4.4	‘haṁsarājaṁ pacantu me’”.
ja476:5.1	“Dhiratthu taṁ majjapānaṁ,
ja476:5.2	yaṁ me piyataraṁ tayā;
ja476:5.3	Na cāpi majjaṁ pissāmi,
ja476:5.4	yāva me vacchasī ghare”.
ja476:6.1	“Suvijānaṁ siṅgālānaṁ,
ja476:6.2	sakuṇānañca vassitaṁ;
ja476:6.3	Manussavassitaṁ rāja,
ja476:6.4	dubbijānataraṁ tato.
ja476:7.1	Api ce maññatī poso,
ja476:7.2	ñāti mitto sakhāti vā;
ja476:7.3	Yo pubbe sumano hutvā,
ja476:7.4	pacchā sampajjate diso.
ja476:8.1	Yasmiṁ mano nivisati,
ja476:8.2	avidūre sahāpi so;
ja476:8.3	Santikepi hi so dūre,
ja476:8.4	yasmiṁ nāvisate mano.
ja476:9.1	Antopi so hoti pasannacitto,
ja476:9.2	Pāraṁ samuddassa pasannacitto;
ja476:9.3	Antopi so hoti paduṭṭhacitto,
ja476:9.4	Pāraṁ samuddassa paduṭṭhacitto.
ja476:10.1	Saṁvasantā vivasanti,
ja476:10.2	ye disā te rathesabha;
ja476:10.3	Ārā santo saṁvasanti,
ja476:10.4	manasā raṭṭhavaḍḍhana.
ja476:11.1	Aticiraṁ nivāsena,
ja476:11.2	piyo bhavati appiyo;
ja476:11.3	Āmanta kho taṁ gacchāma,
ja476:11.4	purā te homa appiyā”.
ja476:12.1	“Evañce yācamānānaṁ,
ja476:12.2	Añjaliṁ nāvabujjhasi;
ja476:12.3	Paricārakānaṁ sataṁ,
ja476:12.4	Vacanaṁ na karosi no;
ja476:12.5	Evaṁ taṁ abhiyācāma,
ja476:12.6	Puna kayirāsi pariyāyaṁ”.
ja476:13.1	“Evañce no viharataṁ,
ja476:13.2	antarāyo na hessati;
ja476:13.3	Tuyhañcāpi mahārāja,
ja476:13.4	mayhañca raṭṭhavaḍḍhana;
ja476:13.5	Appeva nāma passemu,
ja476:13.6	ahorattānamaccaye”ti.
ja476:14.1	Javanahaṁsajātakaṁ tatiyaṁ.
ja477:0.1	Jātaka
ja477:0.2	Terasakanipāta
ja477:0.3	Ambavagga
ja477:0.4	4. Cūḷanāradajātaka
ja477:1.1	“Na te kaṭṭhāni bhinnāni,
ja477:1.2	na te udakamābhataṁ;
ja477:1.3	Aggīpi te na hāpito,
ja477:1.4	kiṁ nu mandova jhāyasi”.
ja477:2.1	“Na ussahe vane vatthuṁ,
ja477:2.2	kassapāmantayāmi taṁ;
ja477:2.3	Dukkho vāso araññasmiṁ,
ja477:2.4	raṭṭhaṁ icchāmi gantave.
ja477:3.1	Yathā ahaṁ ito gantvā,
ja477:3.2	Yasmiṁ janapade vasaṁ;
ja477:3.3	Ācāraṁ brahme sikkheyyaṁ,
ja477:3.4	Taṁ dhammaṁ anusāsa maṁ”.
ja477:4.1	“Sace araññaṁ hitvāna,
ja477:4.2	vanamūlaphalāni ca;
ja477:4.3	Raṭṭhe rocayase vāsaṁ,
ja477:4.4	taṁ dhammaṁ nisāmehi me.
ja477:5.1	Visaṁ mā paṭisevittho,
ja477:5.2	papātaṁ parivajjaya;
ja477:5.3	Paṅke ca mā visīdittho,
ja477:5.4	yatto cāsīvise care”.
ja477:6.1	“Kiṁ nu visaṁ papāto vā,
ja477:6.2	paṅko vā brahmacārinaṁ;
ja477:6.3	Kaṁ tvaṁ āsīvisaṁ brūsi,
ja477:6.4	taṁ me akkhāhi pucchito”.
ja477:7.1	“Āsavo tāta lokasmiṁ,
ja477:7.2	surā nāma pavuccati;
ja477:7.3	Manuñño surabhī vaggu,
ja477:7.4	sādu khuddarasūpamo;
ja477:7.5	Visaṁ tadāhu ariyā se,
ja477:7.6	brahmacariyassa nārada.
ja477:8.1	Itthiyo tāta lokasmiṁ,
ja477:8.2	pamattaṁ pamathenti tā;
ja477:8.3	Haranti yuvino cittaṁ,
ja477:8.4	tūlaṁ bhaṭṭhaṁva māluto;
ja477:8.5	Papāto eso akkhāto,
ja477:8.6	brahmacariyassa nārada.
ja477:9.1	Lābho siloko sakkāro,
ja477:9.2	pūjā parakulesu ca;
ja477:9.3	Paṅko eso ca akkhāto,
ja477:9.4	brahmacariyassa nārada.
ja477:10.1	Sasatthā tāta rājāno,
ja477:10.2	āvasanti mahiṁ imaṁ;
ja477:10.3	Te tādise manussinde,
ja477:10.4	mahante tāta nārada.
ja477:11.1	Issarānaṁ adhipatīnaṁ,
ja477:11.2	na tesaṁ pādato care;
ja477:11.3	Āsīvisoti akkhāto,
ja477:11.4	brahmacariyassa nārada.
ja477:12.1	Bhattattho bhattakāle ca,
ja477:12.2	yaṁ gehamupasaṅkame;
ja477:12.3	Yadettha kusalaṁ jaññā,
ja477:12.4	tattha ghāsesanaṁ care.
ja477:13.1	Pavisitvā parakulaṁ,
ja477:13.2	pānatthaṁ bhojanāya vā;
ja477:13.3	Mitaṁ khāde mitaṁ bhuñje,
ja477:13.4	na ca rūpe manaṁ kare.
ja477:14.1	Goṭṭhaṁ majjaṁ kirāṭañca,
ja477:14.2	sabhā nikiraṇāni ca;
ja477:14.3	Ārakā parivajjehi,
ja477:14.4	yānīva visamaṁ pathan”ti.
ja477:15.1	Cūḷanāradajātakaṁ catutthaṁ.
ja478:0.1	Jātaka
ja478:0.2	Terasakanipāta
ja478:0.3	Ambavagga
ja478:0.4	5. Dūtajātaka
ja478:1.1	“Dūte te brahme pāhesiṁ,
ja478:1.2	Gaṅgātīrasmi jhāyato;
ja478:1.3	Tesaṁ puṭṭho na byākāsi,
ja478:1.4	Dukkhaṁ guyhamataṁ nu te”.
ja478:2.1	“Sace te dukkhamuppajje,
ja478:2.2	kāsīnaṁ raṭṭhavaḍḍhana;
ja478:2.3	Mā kho naṁ tassa akkhāhi,
ja478:2.4	yo taṁ dukkhā na mocaye.
ja478:3.1	Yo tassa dukkhajātassa,
ja478:3.2	ekaṅgamapi bhāgaso;
ja478:3.3	Vippamoceyya dhammena,
ja478:3.4	kāmaṁ tassa pavedaya.
ja478:4.1	Suvijānaṁ siṅgālānaṁ,
ja478:4.2	sakuṇānañca vassitaṁ;
ja478:4.3	Manussavassitaṁ rāja,
ja478:4.4	dubbijānataraṁ tato.
ja478:5.1	Api ce maññatī poso,
ja478:5.2	ñāti mitto sakhāti vā;
ja478:5.3	Yo pubbe sumano hutvā,
ja478:5.4	pacchā sampajjate diso.
ja478:6.1	Yo attano dukkhamanānupuṭṭho,
ja478:6.2	Pavedaye jantu akālarūpe;
ja478:6.3	Ānandino tassa bhavantimittā,
ja478:6.4	Hitesino tassa dukhī bhavanti.
ja478:7.1	Kālañca ñatvāna tathāvidhassa,
ja478:7.2	Medhāvīnaṁ ekamanaṁ viditvā;
ja478:7.3	Akkheyya tibbāni parassa dhīro,
ja478:7.4	Saṇhaṁ giraṁ atthavatiṁ pamuñce.
ja478:8.1	Sace ca jaññā avisayhamattano,
ja478:8.2	Na te hi mayhaṁ sukhāgamāya;
ja478:8.3	Ekova tibbāni saheyya dhīro,
ja478:8.4	Saccaṁ hirottappamapekkhamāno.
ja478:9.1	Ahaṁ raṭṭhe vicaranto,
ja478:9.2	nigame rājadhāniyo;
ja478:9.3	Bhikkhamāno mahārāja,
ja478:9.4	ācariyassa dhanatthiko.
ja478:10.1	Gahapatī rājapurise,
ja478:10.2	mahāsāle ca brāhmaṇe;
ja478:10.3	Alatthaṁ satta nikkhāni,
ja478:10.4	suvaṇṇassa janādhipa;
ja478:10.5	Te me naṭṭhā mahārāja,
ja478:10.6	tasmā socāmahaṁ bhusaṁ.
ja478:11.1	Purisā te mahārāja,
ja478:11.2	manasānuvicintitā;
ja478:11.3	Nālaṁ dukkhā pamocetuṁ,
ja478:11.4	tasmā tesaṁ na byāhariṁ.
ja478:12.1	Tvañca kho me mahārāja,
ja478:12.2	manasānuvicintito;
ja478:12.3	Alaṁ dukkhā pamocetuṁ,
ja478:12.4	tasmā tuyhaṁ pavedayiṁ”.
ja478:13.1	“Tassādāsi pasannatto,
ja478:13.2	kāsīnaṁ raṭṭhavaḍḍhano;
ja478:13.3	Jātarūpamaye nikkhe,
ja478:13.4	suvaṇṇassa catuddasā”ti.
ja478:14.1	Dūtajātakaṁ pañcamaṁ.
ja479:0.1	Jātaka
ja479:0.2	Terasakanipāta
ja479:0.3	Ambavagga
ja479:0.4	6. Kāliṅgabodhijātaka
ja479:1.1	Rājā kāliṅgo cakkavatti,
ja479:1.2	Dhammena pathavimanusāsaṁ;
ja479:1.3	Agamā bodhisamīpaṁ,
ja479:1.4	Nāgena mahānubhāvena.
ja479:2.1	Kāliṅgo bhāradvājo ca,
ja479:2.2	Rājānaṁ kāliṅgaṁ samaṇakolaññaṁ;
ja479:2.3	Cakkaṁ vattayato pariggahetvā,
ja479:2.4	Pañjalī idamavoca.
ja479:3.1	“Paccoroha mahārāja,
ja479:3.2	Bhūmibhāgo yathā samaṇuggato;
ja479:3.3	Idha anadhivarā buddhā,
ja479:3.4	Abhisambuddhā virocanti.
ja479:4.1	Padakkhiṇato āvaṭṭā,
ja479:4.2	Tiṇalatā asmiṁ bhūmibhāgasmiṁ;
ja479:4.3	Pathaviyā nābhiyaṁ maṇḍo,
ja479:4.4	Iti no sutaṁ mante mahārāja.
ja479:5.1	Sāgarapariyantāya,
ja479:5.2	Mediniyā sabbabhūtadharaṇiyā;
ja479:5.3	Pathaviyā ayaṁ maṇḍo,
ja479:5.4	Orohitvā namo karohi.
ja479:6.1	Ye te bhavanti nāgā ca,
ja479:6.2	abhijātā ca kuñjarā;
ja479:6.3	Ettāvatā padesaṁ te,
ja479:6.4	nāgā neva mupayanti.
ja479:7.1	Abhijāto nāgo kāmaṁ,
ja479:7.2	Pesehi kuñjaraṁ dantiṁ;
ja479:7.3	Ettāvatā padeso,
ja479:7.4	Sakkā nāgena mupagantuṁ.
ja479:8.1	Taṁ sutvā rājā kāliṅgo,
ja479:8.2	Veyyañjanikavaco nisāmetvā;
ja479:8.3	Sampesesi nāgaṁ ñassāma,
ja479:8.4	Mayaṁ yathimassidaṁ vacanaṁ”.
ja479:9.1	Sampesito ca raññā,
ja479:9.2	Nāgo koñcova abhinaditvāna;
ja479:9.3	Paṭisakkitvā nisīdi,
ja479:9.4	Garuṁva bhāraṁ asahamāno.
ja479:10.1	Kāliṅgabhāradvājo,
ja479:10.2	Nāgaṁ khīṇāyukaṁ viditvāna;
ja479:10.3	Rājānaṁ kāliṅgaṁ,
ja479:10.4	Taramāno ajjhabhāsittha;
ja479:10.5	“Aññaṁ saṅkama nāgaṁ,
ja479:10.6	Nāgo khīṇāyuko mahārāja”.
ja479:11.1	Taṁ sutvā kāliṅgo,
ja479:11.2	taramāno saṅkamī nāgaṁ;
ja479:11.3	Saṅkanteva raññe,
ja479:11.4	nāgo tattheva pati bhumyā;
ja479:11.5	Veyyañjanikavaco,
ja479:11.6	yathā tathā ahu nāgo.
ja479:12.1	Kāliṅgo rājā kāliṅgaṁ,
ja479:12.2	brāhmaṇaṁ etadavoca;
ja479:12.3	“Tvameva asi sambuddho,
ja479:12.4	sabbaññū sabbadassāvī”.
ja479:13.1	Taṁ anadhivāsento kāliṅgaṁ,
ja479:13.2	Brāhmaṇo idamavoca;
ja479:13.3	“Veyyañjanikā hi mayaṁ,
ja479:13.4	Buddhā sabbaññuno mahārāja.
ja479:14.1	Sabbaññū sabbavidū ca,
ja479:14.2	Buddhā na lakkhaṇena jānanti;
ja479:14.3	Āgamabalasā hi mayaṁ,
ja479:14.4	Buddhā sabbaṁ pajānanti”.
ja479:15.1	Mahayitvā sambodhiṁ,
ja479:15.2	Nānāturiyehi vajjamānehi;
ja479:15.3	Mālāvilepanaṁ abhiharitvā,
ja479:15.4	Atha rājā manupāyāsi.
ja479:16.1	Saṭṭhi vāhasahassāni,
ja479:16.2	pupphānaṁ sannipātayi;
ja479:16.3	Pūjesi rājā kāliṅgo,
ja479:16.4	bodhimaṇḍamanuttaranti.
ja479:17.1	Kāliṅgabodhijātakaṁ chaṭṭhaṁ.
ja480:0.1	Jātaka
ja480:0.2	Terasakanipāta
ja480:0.3	Ambavagga
ja480:0.4	7. Akittijātaka
ja480:1.1	“Akittiṁ disvā sammantaṁ,
ja480:1.2	sakko bhūtapatī bravi;
ja480:1.3	Kiṁ patthayaṁ mahābrahme,
ja480:1.4	eko sammasi ghammani”.
ja480:2.1	“Dukkho punabbhavo sakka,
ja480:2.2	sarīrassa ca bhedanaṁ;
ja480:2.3	Sammohamaraṇaṁ dukkhaṁ,
ja480:2.4	tasmā sammāmi vāsava”.
ja480:3.1	“Etasmiṁ te sulapite,
ja480:3.2	patirūpe subhāsite;
ja480:3.3	Varaṁ kassapa te dammi,
ja480:3.4	yaṁ kiñci manasicchasi”.
ja480:4.1	“Varañce me ado sakka,
ja480:4.2	sabbabhūtānamissara;
ja480:4.3	Yena putte ca dāre ca,
ja480:4.4	dhanadhaññaṁ piyāni ca;
ja480:4.5	Laddhā narā na tappanti,
ja480:4.6	so lobho na mayī vase”.
ja480:5.1	“Etasmiṁ te sulapite,
ja480:5.2	patirūpe subhāsite;
ja480:5.3	Varaṁ kassapa te dammi,
ja480:5.4	yaṁ kiñci manasicchasi”.
ja480:6.1	“Varañce me ado sakka,
ja480:6.2	sabbabhūtānamissara;
ja480:6.3	Khettaṁ vatthuṁ hiraññañca,
ja480:6.4	gavāssaṁ dāsaporisaṁ;
ja480:6.5	Yena jātena jīyanti,
ja480:6.6	so doso na mayī vase”.
ja480:7.1	“Etasmiṁ te sulapite,
ja480:7.2	patirūpe subhāsite;
ja480:7.3	Varaṁ kassapa te dammi,
ja480:7.4	yaṁ kiñci manasicchasi”.
ja480:8.1	“Varañce me ado sakka,
ja480:8.2	sabbabhūtānamissara;
ja480:8.3	Bālaṁ na passe na suṇe,
ja480:8.4	na ca bālena saṁvase;
ja480:8.5	Bālenallāpasallāpaṁ,
ja480:8.6	na kare na ca rocaye”.
ja480:9.1	“Kiṁ nu te akaraṁ bālo,
ja480:9.2	vada kassapa kāraṇaṁ;
ja480:9.3	Kena kassapa bālassa,
ja480:9.4	dassanaṁ nābhikaṅkhasi”.
ja480:10.1	“Anayaṁ nayati dummedho,
ja480:10.2	adhurāyaṁ niyuñjati;
ja480:10.3	Dunnayo seyyaso hoti,
ja480:10.4	sammā vutto pakuppati;
ja480:10.5	Vinayaṁ so na jānāti,
ja480:10.6	sādhu tassa adassanaṁ”.
ja480:11.1	“Etasmiṁ te sulapite,
ja480:11.2	patirūpe subhāsite;
ja480:11.3	Varaṁ kassapa te dammi,
ja480:11.4	yaṁ kiñci manasicchasi”.
ja480:12.1	“Varañce me ado sakka,
ja480:12.2	sabbabhūtānamissara;
ja480:12.3	Dhīraṁ passe suṇe dhīraṁ,
ja480:12.4	dhīrena saha saṁvase;
ja480:12.5	Dhīrenallāpasallāpaṁ,
ja480:12.6	taṁ kare tañca rocaye”.
ja480:13.1	“Kiṁ nu te akaraṁ dhīro,
ja480:13.2	vada kassapa kāraṇaṁ;
ja480:13.3	Kena kassapa dhīrassa,
ja480:13.4	dassanaṁ abhikaṅkhasi”.
ja480:14.1	“Nayaṁ nayati medhāvī,
ja480:14.2	adhurāyaṁ na yuñjati;
ja480:14.3	Sunayo seyyaso hoti,
ja480:14.4	sammā vutto na kuppati;
ja480:14.5	Vinayaṁ so pajānāti,
ja480:14.6	sādhu tena samāgamo”.
ja480:15.1	“Etasmiṁ te sulapite,
ja480:15.2	patirūpe subhāsite;
ja480:15.3	Varaṁ kassapa te dammi,
ja480:15.4	yaṁ kiñci manasicchasi”.
ja480:16.1	“Varañce me ado sakka,
ja480:16.2	sabbabhūtānamissara;
ja480:16.3	Tato ratyā vivasāne,
ja480:16.4	sūriyuggamanaṁ pati;
ja480:16.5	Dibbā bhakkhā pātubhaveyyuṁ,
ja480:16.6	sīlavanto ca yācakā.
ja480:17.1	Dadato me na khīyetha,
ja480:17.2	datvā nānutapeyyahaṁ;
ja480:17.3	Dadaṁ cittaṁ pasādeyyaṁ,
ja480:17.4	etaṁ sakka varaṁ vare”.
ja480:18.1	“Etasmiṁ te sulapite,
ja480:18.2	patirūpe subhāsite;
ja480:18.3	Varaṁ kassapa te dammi,
ja480:18.4	yaṁ kiñci manasicchasi”.
ja480:19.1	“Varañce me ado sakka,
ja480:19.2	sabbabhūtānamissara;
ja480:19.3	Na maṁ puna upeyyāsi,
ja480:19.4	etaṁ sakka varaṁ vare”.
ja480:20.1	“Bahūhi vatacariyāhi,
ja480:20.2	narā ca atha nāriyo;
ja480:20.3	Dassanaṁ abhikaṅkhanti,
ja480:20.4	kiṁ nu me dassane bhayaṁ”.
ja480:21.1	“Taṁ tādisaṁ devavaṇṇaṁ,
ja480:21.2	sabbakāmasamiddhinaṁ;
ja480:21.3	Disvā tapo pamajjeyyaṁ,
ja480:21.4	etaṁ te dassane bhayan”ti.
ja480:22.1	Akittijātakaṁ sattamaṁ.
ja481:0.1	Jātaka
ja481:0.2	Terasakanipāta
ja481:0.3	Ambavagga
ja481:0.4	8. Takkāriyajātaka
ja481:1.1	“Ahameva dubbhāsitaṁ bhāsi bālo,
ja481:1.2	Bhekovaraññe ahimavhāyamāno;
ja481:1.3	Takkāriye sobbhamimaṁ patāmi,
ja481:1.4	Na kireva sādhu ativelabhāṇī”.
ja481:2.1	“Pappoti macco ativelabhāṇī,
ja481:2.2	Bandhaṁ vadhaṁ sokapariddavañca;
ja481:2.3	Attānameva garahāsi ettha,
ja481:2.4	Ācera yaṁ taṁ nikhaṇanti sobbhe”.
ja481:3.1	“Kimevahaṁ tuṇḍilamanupucchiṁ,
ja481:3.2	Kareyya saṁ bhātaraṁ kāḷikāyaṁ;
ja481:3.3	Naggovahaṁ vatthayugañca jīno,
ja481:3.4	Ayampi attho bahutādisova”.
ja481:4.1	“Yo yujjhamānānamayujjhamāno,
ja481:4.2	Meṇḍantaraṁ accupatī kuliṅgo;
ja481:4.3	So piṁsito meṇḍasirehi tattha,
ja481:4.4	Ayampi attho bahutādisova.
ja481:5.1	Caturo janā potthakamaggahesuṁ,
ja481:5.2	Ekañca posaṁ anurakkhamānā;
ja481:5.3	Sabbeva te bhinnasirā sayiṁsu,
ja481:5.4	Ayampi attho bahutādisova.
ja481:6.1	Ajā yathā veḷugumbasmiṁ baddhā,
ja481:6.2	Avakkhipantī asimajjhagacchi;
ja481:6.3	Teneva tassā galakāvakantaṁ,
ja481:6.4	Ayampi attho bahutādisova”.
ja481:7.1	“Ime na devā na gandhabbaputtā,
ja481:7.2	Migā ime atthavasaṁ gatā me;
ja481:7.3	Ekañca naṁ sāyamāse pacantu,
ja481:7.4	Ekaṁ punappātarāse pacantu”.
ja481:8.1	“Sataṁ sahassāni dubhāsitāni,
ja481:8.2	Kalampi nāgghanti subhāsitassa;
ja481:8.3	Dubbhāsitaṁ saṅkamāno kileso,
ja481:8.4	Tasmā tuṇhī kimpurisā na bālyā”.
ja481:9.1	“Yā mesā byāhāsi pamuñcathetaṁ,
ja481:9.2	Giriñca naṁ himavantaṁ nayantu;
ja481:9.3	Imañca kho dentu mahānasāya,
ja481:9.4	Pātova naṁ pātarāse pacantu”.
ja481:10.1	“Pajjunnanāthā pasavo,
ja481:10.2	pasunāthā ayaṁ pajā;
ja481:10.3	Tvaṁ nāthosi mahārāja,
ja481:10.4	nāthohaṁ bhariyāya me;
ja481:10.5	Dvinnamaññataraṁ ñatvā,
ja481:10.6	mutto gaccheyya pabbataṁ.
ja481:11.1	Na ve nindā suparivajjayetha,
ja481:11.2	Nānā janā sevitabbā janinda;
ja481:11.3	Yeneva eko labhate pasaṁsaṁ,
ja481:11.4	Teneva añño labhate ninditāraṁ.
ja481:12.1	Sabbo loko paricitto aticitto,
ja481:12.2	Sabbo loko cittavā samhi citte;
ja481:12.3	Paccekacittā puthu sabbasattā,
ja481:12.4	Kassīdha cittassa vasena vatte”.
ja481:13.1	“Tuṇhī ahū kimpuriso sabhariyo,
ja481:13.2	Yo dāni byāhāsi bhayassa bhīto;
ja481:13.3	So dāni mutto sukhito arogo,
ja481:13.4	Vācākirevatthavatī narānan”ti.
ja481:14.1	Takkāriyajātakaṁ aṭṭhamaṁ.
ja482:0.1	Jātaka
ja482:0.2	Terasakanipāta
ja482:0.3	Ambavagga
ja482:0.4	9. Rurumigarājajātaka
ja482:1.1	“Tassa gāmavaraṁ dammi,
ja482:1.2	Nāriyo ca alaṅkatā;
ja482:1.3	Yo metaṁ migamakkhāti,
ja482:1.4	Migānaṁ migamuttamaṁ”.
ja482:2.1	“Mayhaṁ gāmavaraṁ dehi,
ja482:2.2	nāriyo ca alaṅkatā;
ja482:2.3	Ahaṁ te migamakkhissaṁ,
ja482:2.4	migānaṁ migamuttamaṁ.
ja482:3.1	Etasmiṁ vanasaṇḍasmiṁ,
ja482:3.2	ambā sālā ca pupphitā;
ja482:3.3	Indagopakasañchannā,
ja482:3.4	ettheso tiṭṭhate migo”.
ja482:4.1	“Dhanuṁ advejjhaṁ katvāna,
ja482:4.2	usuṁ sannayhupāgami;
ja482:4.3	Migo ca disvā rājānaṁ,
ja482:4.4	dūrato ajjhabhāsatha.
ja482:5.1	Āgamehi mahārāja,
ja482:5.2	mā maṁ vijjhi rathesabha;
ja482:5.3	Ko nu te idamakkhāsi,
ja482:5.4	ettheso tiṭṭhate migo”.
ja482:6.1	“Esa pāpacaro poso,
ja482:6.2	samma tiṭṭhati ārakā;
ja482:6.3	Soyaṁ me idamakkhāsi,
ja482:6.4	ettheso tiṭṭhate migo”.
ja482:7.1	“Saccaṁ kireva māhaṁsu,
ja482:7.2	narā ekacciyā idha;
ja482:7.3	Kaṭṭhaṁ niplavitaṁ seyyo,
ja482:7.4	na tvevekacciyo naro”.
ja482:8.1	“Kiṁ nu ruru garahasi migānaṁ,
ja482:8.2	Kiṁ pakkhīnaṁ kiṁ pana mānusānaṁ;
ja482:8.3	Bhayañhi maṁ vindatinapparūpaṁ,
ja482:8.4	Sutvāna taṁ mānusiṁ bhāsamānaṁ”.
ja482:9.1	“Yamuddhariṁ vāhane vuyhamānaṁ,
ja482:9.2	Mahodake salile sīghasote;
ja482:9.3	Tatonidānaṁ bhayamāgataṁ mama,
ja482:9.4	Dukkho have rāja asabbhi saṅgamo”.
ja482:10.1	“Sohaṁ catuppattamimaṁ vihaṅgamaṁ,
ja482:10.2	Tanucchidaṁ hadaye ossajāmi;
ja482:10.3	Hanāmi taṁ mittadubbhiṁ akiccakāriṁ,
ja482:10.4	Yo tādisaṁ kammakataṁ na jāne”.
ja482:11.1	“Dhīrassa bālassa have janinda,
ja482:11.2	Santo vadhaṁ nappasaṁsanti jātu;
ja482:11.3	Kāmaṁ gharaṁ gacchatu pāpadhammo,
ja482:11.4	Yañcassa bhaṭṭhaṁ tadetassa dehi;
ja482:11.5	Ahañca te kāmakaro bhavāmi”.
ja482:12.1	“Addhā rurū aññataro sataṁ so,
ja482:12.2	Yo dubbhato mānusassa na dubbhi;
ja482:12.3	Kāmaṁ gharaṁ gacchatu pāpadhammo,
ja482:12.4	Yañcassa bhaṭṭhaṁ tadetassa dammi;
ja482:12.5	Ahañca te kāmacāraṁ dadāmi”.
ja482:13.1	“Suvijānaṁ siṅgālānaṁ,
ja482:13.2	sakuṇānañca vassitaṁ;
ja482:13.3	Manussavassitaṁ rāja,
ja482:13.4	dubbijānataraṁ tato.
ja482:14.1	Api ce maññatī poso,
ja482:14.2	ñāti mitto sakhāti vā;
ja482:14.3	Yo pubbe sumano hutvā,
ja482:14.4	pacchā sampajjate diso”.
ja482:15.1	“Samāgatā jānapadā,
ja482:15.2	negamā ca samāgatā;
ja482:15.3	Migā sassāni khādanti,
ja482:15.4	taṁ devo paṭisedhatu”.
ja482:16.1	“Kāmaṁ janapado māsi,
ja482:16.2	raṭṭhañcāpi vinassatu;
ja482:16.3	Na tvevāhaṁ ruruṁ dubbhe,
ja482:16.4	datvā abhayadakkhiṇaṁ.
ja482:17.1	Mā me janapado āsi,
ja482:17.2	raṭṭhañcāpi vinassatu;
ja482:17.3	Na tvevāhaṁ migarājassa,
ja482:17.4	varaṁ datvā musā bhaṇe”ti.
ja482:18.1	Rurumigarājajātakaṁ navamaṁ.
ja483:0.1	Jātaka
ja483:0.2	Terasakanipāta
ja483:0.3	Ambavagga
ja483:0.4	10. Sarabhamigajātaka
ja483:1.1	“Āsīsetheva puriso,
ja483:1.2	na nibbindeyya paṇḍito;
ja483:1.3	Passāmi vohaṁ attānaṁ,
ja483:1.4	yathā icchiṁ tathā ahu.
ja483:2.1	Āsīsetheva puriso,
ja483:2.2	na nibbindeyya paṇḍito;
ja483:2.3	Passāmi vohaṁ attānaṁ,
ja483:2.4	udakā thalamubbhataṁ.
ja483:3.1	Vāyametheva puriso,
ja483:3.2	na nibbindeyya paṇḍito;
ja483:3.3	Passāmi vohaṁ attānaṁ,
ja483:3.4	yathā icchiṁ tathā ahu.
ja483:4.1	Vāyametheva puriso,
ja483:4.2	na nibbindeyya paṇḍito;
ja483:4.3	Passāmi vohaṁ attānaṁ,
ja483:4.4	udakā thalamubbhataṁ.
ja483:5.1	Dukkhūpanītopi naro sapañño,
ja483:5.2	Āsaṁ na chindeyya sukhāgamāya;
ja483:5.3	Bahū hi phassā ahitā hitā ca,
ja483:5.4	Avitakkitā maccamupabbajanti.
ja483:6.1	Acintitampi bhavati,
ja483:6.2	cintitampi vinassati;
ja483:6.3	Na hi cintāmayā bhogā,
ja483:6.4	itthiyā purisassa vā”.
ja483:7.1	“Sarabhaṁ giriduggasmiṁ,
ja483:7.2	yaṁ tvaṁ anusarī pure;
ja483:7.3	Alīnacittassa tuvaṁ,
ja483:7.4	vikkantamanujīvasi.
ja483:8.1	Yo taṁ viduggā narakā samuddhari,
ja483:8.2	Silāya yoggaṁ sarabho karitvā;
ja483:8.3	Dukkhūpanītaṁ maccumukhā pamocayi,
ja483:8.4	Alīnacittaṁ ta migaṁ vadesi”.
ja483:9.1	“Kiṁ tvaṁ nu tattheva tadā ahosi,
ja483:9.2	Udāhu te koci naṁ etadakkhā;
ja483:9.3	Vivaṭṭacchaddo nusi sabbadassī,
ja483:9.4	Ñāṇaṁ nu te brāhmaṇa bhiṁsarūpaṁ”.
ja483:10.1	“Na cevahaṁ tattha tadā ahosiṁ,
ja483:10.2	Na cāpi me koci naṁ etadakkhā;
ja483:10.3	Gāthāpadānañca subhāsitānaṁ,
ja483:10.4	Atthaṁ tadānenti janinda dhīrā”.
ja483:11.1	“Ādāya pattiṁ paraviriyaghātiṁ,
ja483:11.2	Cāpe saraṁ kiṁ vicikicchase tuvaṁ;
ja483:11.3	Nunno saro sarabhaṁ hantu khippaṁ,
ja483:11.4	Annañhi etaṁ varapañña rañño”.
ja483:12.1	“Addhā pajānāmi ahampi etaṁ,
ja483:12.2	Annaṁ migo brāhmaṇa khattiyassa;
ja483:12.3	Pubbe katañca apacāyamāno,
ja483:12.4	Tasmā migaṁ sarabhaṁ no hanāmi”.
ja483:13.1	“Neso migo mahārāja,
ja483:13.2	asureso disampati;
ja483:13.3	Etaṁ hantvā manussinda,
ja483:13.4	bhavassu amarādhipo.
ja483:14.1	Sace ca rājā vicikicchase tuvaṁ,
ja483:14.2	Hantuṁ migaṁ sarabhaṁ sahāyakaṁ;
ja483:14.3	Saputtadāro naravīraseṭṭha,
ja483:14.4	Gantā tuvaṁ vetaraṇiṁ yamassa”.
ja483:15.1	“Kāmaṁ ahaṁ jānapadā ca sabbe,
ja483:15.2	Puttā ca dārā ca sahāyasaṅghā;
ja483:15.3	Gacchemu taṁ vetaraṇiṁ yamassa,
ja483:15.4	Na tveva hañño mama pāṇado yo.
ja483:16.1	Ayaṁ migo kicchagatassa mayhaṁ,
ja483:16.2	Ekassa kattā vivanasmi ghore;
ja483:16.3	Taṁ tādisaṁ pubbakiccaṁ saranto,
ja483:16.4	Jānaṁ mahābrahme kathaṁ haneyyaṁ”.
ja483:17.1	“Mittābhirādhī cirameva jīva,
ja483:17.2	Rajjaṁ imaṁ dhammaguṇe pasāsa;
ja483:17.3	Nārīgaṇehi paricāriyanto,
ja483:17.4	Modassu raṭṭhe tidiveva vāsavo.
ja483:18.1	Akkodhano niccapasannacitto,
ja483:18.2	Sabbātithī yācayogo bhavitvā;
ja483:18.3	Datvā ca bhutvā ca yathānubhāvaṁ,
ja483:18.4	Anindito saggamupehi ṭhānan”ti.
ja483:19.1	Sarabhamigajātakaṁ dasamaṁ.
ja483:20.1	Terasakanipātaṁ niṭṭhitaṁ.
ja483:21.1	Tassuddānaṁ
ja483:22.1	Varaamba kuṭhāri sahaṁsavaro,
ja483:22.2	Atharaññasmiṁ dūtakapañcamako;
ja483:22.3	Atha bodhi akitti sutakkarinā,
ja483:22.4	Atha rurumigenaparo sarabhoti.
ja484:0.1	Jātaka
ja484:0.2	Pakiṇṇakanipāta
ja484:0.3	Sālikedāravagga
ja484:0.4	1. Sālikedārajātaka
ja484:1.1	“Sampannaṁ sālikedāraṁ,
ja484:1.2	suvā bhuñjanti kosiya;
ja484:1.3	Paṭivedemi te brahme,
ja484:1.4	na ne vāretumussahe.
ja484:2.1	Eko ca tattha sakuṇo,
ja484:2.2	yo nesaṁ sabbasundaro;
ja484:2.3	Bhutvā sāliṁ yathākāmaṁ,
ja484:2.4	tuṇḍenādāya gacchati”.
ja484:3.1	“Oḍḍentu vāḷapāsāni,
ja484:3.2	yathā bajjhetha so dijo;
ja484:3.3	Jīvañca naṁ gahetvāna,
ja484:3.4	ānayehi mamantike”.
ja484:4.1	“Ete bhutvā pivitvā ca,
ja484:4.2	pakkamanti vihaṅgamā;
ja484:4.3	Eko baddhosmi pāsena,
ja484:4.4	kiṁ pāpaṁ pakataṁ mayā”.
ja484:5.1	“Udaraṁ nūna aññesaṁ,
ja484:5.2	suva accodaraṁ tava;
ja484:5.3	Bhutvā sāliṁ yathākāmaṁ,
ja484:5.4	tuṇḍenādāya gacchasi.
ja484:6.1	Koṭṭhaṁ nu tattha pūresi,
ja484:6.2	suva veraṁ nu te mayā;
ja484:6.3	Puṭṭho me samma akkhāhi,
ja484:6.4	kuhiṁ sāliṁ nidāhasi”.
ja484:7.1	“Na me veraṁ tayā saddhiṁ,
ja484:7.2	koṭṭho mayhaṁ na vijjati;
ja484:7.3	Iṇaṁ muñcāmiṇaṁ dammi,
ja484:7.4	sampatto koṭasimbaliṁ;
ja484:7.5	Nidhimpi tattha nidahāmi,
ja484:7.6	evaṁ jānāhi kosiya”.
ja484:8.1	“Kīdisaṁ te iṇadānaṁ,
ja484:8.2	iṇamokkho ca kīdiso;
ja484:8.3	Nidhinidhānamakkhāhi,
ja484:8.4	atha pāsā pamokkhasi”.
ja484:9.1	“Ajātapakkhā taruṇā,
ja484:9.2	puttakā mayha kosiya;
ja484:9.3	Te maṁ bhatā bharissanti,
ja484:9.4	tasmā tesaṁ iṇaṁ dade.
ja484:10.1	Mātā pitā ca me vuddhā,
ja484:10.2	jiṇṇakā gatayobbanā;
ja484:10.3	Tesaṁ tuṇḍena hātūna,
ja484:10.4	muñce pubbakataṁ iṇaṁ.
ja484:11.1	Aññepi tattha sakuṇā,
ja484:11.2	khīṇapakkhā sudubbalā;
ja484:11.3	Tesaṁ puññatthiko dammi,
ja484:11.4	taṁ nidhiṁ āhu paṇḍitā.
ja484:12.1	Īdisaṁ me iṇadānaṁ,
ja484:12.2	iṇamokkho ca īdiso;
ja484:12.3	Nidhinidhānamakkhāmi,
ja484:12.4	evaṁ jānāhi kosiya”.
ja484:13.1	“Bhaddako vatayaṁ pakkhī,
ja484:13.2	dijo paramadhammiko;
ja484:13.3	Ekaccesu manussesu,
ja484:13.4	ayaṁ dhammo na vijjati.
ja484:14.1	Bhuñja sāliṁ yathākāmaṁ,
ja484:14.2	saha sabbehi ñātibhi;
ja484:14.3	Punāpi suva passemu,
ja484:14.4	piyaṁ me tava dassanaṁ”.
ja484:15.1	“Bhuttañca pītañca tavassamamhi,
ja484:15.2	Ratī ca no kosiya te sakāse;
ja484:15.3	Nikkhittadaṇḍesu dadāhi dānaṁ,
ja484:15.4	Jiṇṇe ca mātāpitaro bharassu”.
ja484:16.1	“Lakkhī vata me udapādi ajja,
ja484:16.2	Yo addasāsiṁ pavaraṁ dijānaṁ;
ja484:16.3	Suvassa sutvāna subhāsitāni,
ja484:16.4	Kāhāmi puññāni anappakāni”.
ja484:17.1	So kosiyo attamano udaggo,
ja484:17.2	Annañca pānañcabhisaṅkharitvā;
ja484:17.3	Annena pānena pasannacitto,
ja484:17.4	Santappayi samaṇabrāhmaṇe cāti.
ja484:18.1	Sālikedārajātakaṁ paṭhamaṁ.
ja485:0.1	Jātaka
ja485:0.2	Pakiṇṇakanipāta
ja485:0.3	Sālikedāravagga
ja485:0.4	2. Candakinnarījātaka
ja485:1.1	“Upanīyatidaṁ maññe,
ja485:1.2	cande lohitamaddane;
ja485:1.3	Ajja jahāmi jīvitaṁ,
ja485:1.4	pāṇā me cande nirujjhanti.
ja485:2.1	Osīdi me dukkhaṁ hadayaṁ,
ja485:2.2	Me ḍayhate nitammāmi;
ja485:2.3	Tava candiyā socantiyā,
ja485:2.4	Na naṁ aññehi sokehi.
ja485:3.1	Tiṇamiva vanamiva milāyāmi,
ja485:3.2	Nadī aparipuṇṇāva sussāmi;
ja485:3.3	Tava candiyā socantiyā,
ja485:3.4	Na naṁ aññehi sokehi.
ja485:4.1	Vassamiva sare pāde,
ja485:4.2	Imāni assūni vattare mayhaṁ;
ja485:4.3	Tava candiyā socantiyā,
ja485:4.4	Na naṁ aññehi sokehi”.
ja485:5.1	“Pāpo khosi rājaputta,
ja485:5.2	Yo me icchitaṁ patiṁ varākiyā;
ja485:5.3	Vijjhasi vanamūlasmiṁ,
ja485:5.4	Soyaṁ viddho chamā seti.
ja485:6.1	Imaṁ mayhaṁ hadayasokaṁ,
ja485:6.2	Paṭimuñcatu rājaputta tava mātā;
ja485:6.3	Yo mayhaṁ hadayasoko,
ja485:6.4	Kimpurisaṁ avekkhamānāya.
ja485:7.1	Imaṁ mayhaṁ hadayasokaṁ,
ja485:7.2	Paṭimuñcatu rājaputta tava jāyā;
ja485:7.3	Yo mayhaṁ hadayasoko,
ja485:7.4	Kimpurisaṁ avekkhamānāya.
ja485:8.1	Mā ca puttaṁ mā ca patiṁ,
ja485:8.2	Addakkhi rājaputta tava mātā;
ja485:8.3	Yo kimpurisaṁ avadhi,
ja485:8.4	Adūsakaṁ mayha kāmā hi.
ja485:9.1	Mā ca puttaṁ mā ca patiṁ,
ja485:9.2	Addakkhi rājaputta tava jāyā;
ja485:9.3	Yo kimpurisaṁ avadhi,
ja485:9.4	Adūsakaṁ mayha kāmā hi”.
ja485:10.1	“Mā tvaṁ cande rodi,
ja485:10.2	Mā soci vanatimiramattakkhi;
ja485:10.3	Mama tvaṁ hehisi bhariyā,
ja485:10.4	Rājakule pūjitā nārībhi”.
ja485:11.1	“Api nūnahaṁ marissaṁ,
ja485:11.2	Nāhaṁ rājaputta tava hessaṁ;
ja485:11.3	Yo kimpurisaṁ avadhi,
ja485:11.4	Adūsakaṁ mayha kāmā hi”.
ja485:12.1	“Api bhīruke api jīvitukāmike,
ja485:12.2	Kimpurisi gaccha himavantaṁ;
ja485:12.3	Tālīsatagarabhojanā,
ja485:12.4	Aññe taṁ migā ramissanti”.
ja485:13.1	“Te pabbatā tā ca kandarā,
ja485:13.2	Tā ca giriguhāyo tatheva tiṭṭhanti;
ja485:13.3	Tattheva taṁ apassantī,
ja485:13.4	Kimpurisa kathaṁ ahaṁ kassaṁ.
ja485:14.1	Te paṇṇasanthatā ramaṇīyā,
ja485:14.2	Vāḷamigehi anuciṇṇā;
ja485:14.3	Tattheva taṁ apassantī,
ja485:14.4	Kimpurisa kathaṁ ahaṁ kassaṁ.
ja485:15.1	Te pupphasanthatā ramaṇīyā,
ja485:15.2	Vāḷamigehi anuciṇṇā;
ja485:15.3	Tattheva taṁ apassantī,
ja485:15.4	Kimpurisa kathaṁ ahaṁ kassaṁ.
ja485:16.1	Acchā savanti girivananadiyo,
ja485:16.2	Kusumābhikiṇṇasotāyo;
ja485:16.3	Tattheva taṁ apassantī,
ja485:16.4	Kimpurisa kathaṁ ahaṁ kassaṁ.
ja485:17.1	Nīlāni himavato pabbatassa,
ja485:17.2	Kūṭāni dassanīyāni;
ja485:17.3	Tattheva taṁ apassantī,
ja485:17.4	Kimpurisa kathaṁ ahaṁ kassaṁ.
ja485:18.1	Pītāni himavato pabbatassa,
ja485:18.2	Kūṭāni dassanīyāni;
ja485:18.3	Tattheva taṁ apassantī,
ja485:18.4	Kimpurisa kathaṁ ahaṁ kassaṁ.
ja485:19.1	Tambāni himavato pabbatassa,
ja485:19.2	Kūṭāni dassanīyāni;
ja485:19.3	Tattheva taṁ apassantī,
ja485:19.4	Kimpurisa kathaṁ ahaṁ kassaṁ.
ja485:20.1	Tuṅgāni himavato pabbatassa,
ja485:20.2	Kūṭāni dassanīyāni;
ja485:20.3	Tattheva taṁ apassantī,
ja485:20.4	Kimpurisa kathaṁ ahaṁ kassaṁ.
ja485:21.1	Setāni himavato pabbatassa,
ja485:21.2	Kūṭāni dassanīyāni;
ja485:21.3	Tattheva taṁ apassantī,
ja485:21.4	Kimpurisa kathaṁ ahaṁ kassaṁ.
ja485:22.1	Citrāni himavato pabbatassa,
ja485:22.2	Kūṭāni dassanīyāni;
ja485:22.3	Tattheva taṁ apassantī,
ja485:22.4	Kimpurisa kathaṁ ahaṁ kassaṁ.
ja485:23.1	Yakkhagaṇasevite gandhamādane,
ja485:23.2	Osadhebhi sañchanne;
ja485:23.3	Tattheva taṁ apassantī,
ja485:23.4	Kimpurisa kathaṁ ahaṁ kassaṁ.
ja485:24.1	Kimpurisasevite gandhamādane,
ja485:24.2	Osadhebhi sañchanne;
ja485:24.3	Tattheva taṁ apassantī,
ja485:24.4	Kimpurisa kathaṁ ahaṁ kassaṁ”.
ja485:25.1	“Vande te ayirabrahme,
ja485:25.2	Yo me icchitaṁ patiṁ varākiyā;
ja485:25.3	Amatena abhisiñci,
ja485:25.4	Samāgatāsmi piyatamena.
ja485:26.1	Vicarāma dāni girivana nadiyo,
ja485:26.2	Kusumābhikiṇṇasotāyo;
ja485:26.3	Nānādumavasanāyo,
ja485:26.4	Piyaṁvadā aññamaññassā”ti.
ja485:27.1	Candakinnarījātakaṁ dutiyaṁ.
ja486:0.1	Jātaka
ja486:0.2	Pakiṇṇakanipāta
ja486:0.3	Sālikedāravagga
ja486:0.4	3. Mahāukkusajātaka
ja486:1.1	“Ukkā cilācā bandhanti dīpe,
ja486:1.2	Pajā mamaṁ khādituṁ patthayanti;
ja486:1.3	Mittaṁ sahāyañca vadehi senaka,
ja486:1.4	Ācikkha ñātibyasanaṁ dijānaṁ”.
ja486:2.1	“Dijo dijānaṁ pavarosi pakkhima,
ja486:2.2	Ukkusarāja saraṇaṁ taṁ upema;
ja486:2.3	Pajā mamaṁ khādituṁ patthayanti,
ja486:2.4	Luddā cilācā bhava me sukhāya”.
ja486:3.1	“Mittaṁ sahāyañca karonti paṇḍitā,
ja486:3.2	Kāle akāle sukhamesamānā;
ja486:3.3	Karomi te senaka etamatthaṁ,
ja486:3.4	Ariyo hi ariyassa karoti kiccaṁ”.
ja486:4.1	“Yaṁ hoti kiccaṁ anukampakena,
ja486:4.2	Ariyassa ariyena kataṁ tayīdaṁ;
ja486:4.3	Attānurakkhī bhava mā adayhi,
ja486:4.4	Lacchāma putte tayi jīvamāne”.
ja486:5.1	“Taveva rakkhāvaraṇaṁ karonto,
ja486:5.2	Sarīrabhedāpi na santasāmi;
ja486:5.3	Karonti heke sakhīnaṁ sakhāro,
ja486:5.4	Pāṇaṁ cajantā satamesa dhammo”.
ja486:6.1	“Sudukkaraṁ kammamakāsi,
ja486:6.2	aṇḍajāyaṁ vihaṅgamo;
ja486:6.3	Atthāya kuraro putte,
ja486:6.4	aḍḍharatte anāgate”.
ja486:7.1	“Cutāpi heke khalitā sakammunā,
ja486:7.2	Mittānukampāya patiṭṭhahanti;
ja486:7.3	Puttā mamaṭṭā gatimāgatosmi,
ja486:7.4	Atthaṁ caretho mama vāricara”.
ja486:8.1	“Dhanena dhaññena ca attanā ca,
ja486:8.2	Mittaṁ sahāyañca karonti paṇḍitā;
ja486:8.3	Karomi te senaka etamatthaṁ,
ja486:8.4	Ariyo hi ariyassa karoti kiccaṁ”.
ja486:9.1	“Appossukko tāta tuvaṁ nisīda,
ja486:9.2	Putto pitu carati atthacariyaṁ;
ja486:9.3	Ahaṁ carissāmi tavetamatthaṁ,
ja486:9.4	Senassa putte paritāyamāno”.
ja486:10.1	“Addhā hi tāta satamesa dhammo,
ja486:10.2	Putto pitu yaṁ care atthacariyaṁ;
ja486:10.3	Appeva maṁ disvāna pavaḍḍhakāyaṁ,
ja486:10.4	Senassa puttā na viheṭhayeyyuṁ”.
ja486:11.1	“Pasū manussā migavīraseṭṭha,
ja486:11.2	Bhayaṭṭitā seṭṭhamupabbajanti;
ja486:11.3	Puttā mamaṭṭā gatimāgatosmi,
ja486:11.4	Tvaṁ nosi rājā bhava me sukhāya”.
ja486:12.1	“Karomi te senaka etamatthaṁ,
ja486:12.2	Āyāmi te taṁ disataṁ vadhāya;
ja486:12.3	Kathañhi viññū pahu sampajāno,
ja486:12.4	Na vāyame attajanassa guttiyā”.
ja486:13.1	“Mittañca kayirātha suhadayañca,
ja486:13.2	Ayirañca kayirātha sukhāgamāya;
ja486:13.3	Nivatthakocova sarebhihantvā,
ja486:13.4	Modāma puttehi samaṅgibhūtā.
ja486:14.1	Sakamittassa kammena,
ja486:14.2	sahāyassāpalāyino;
ja486:14.3	Kūjantamupakūjanti,
ja486:14.4	lomasā hadayaṅgamaṁ.
ja486:15.1	Mittaṁ sahāyaṁ adhigamma paṇḍito,
ja486:15.2	So bhuñjatī putta pasuṁ dhanaṁ vā;
ja486:15.3	Ahañca puttā ca patī ca mayhaṁ,
ja486:15.4	Mittānukampāya samaṅgibhūtā.
ja486:16.1	Rājavatā sūravatā ca attho,
ja486:16.2	Sampannasakhissa bhavanti hete;
ja486:16.3	So mittavā yasavā uggatatto,
ja486:16.4	Asmiṁdhaloke modati kāmakāmī.
ja486:17.1	Karaṇīyāni mittāni,
ja486:17.2	daliddenāpi senaka;
ja486:17.3	Passa mittānukampāya,
ja486:17.4	samaggamhā sañātake.
ja486:18.1	Sūrena balavantena,
ja486:18.2	yo mitte kurute dijo;
ja486:18.3	Evaṁ so sukhito hoti,
ja486:18.4	yathāhaṁ tvañca senakāti”.
ja486:19.1	Mahāukkusajātakaṁ tatiyaṁ.
ja487:0.1	Jātaka
ja487:0.2	Pakiṇṇakanipāta
ja487:0.3	Sālikedāravagga
ja487:0.4	4. Uddālakajātaka
ja487:1.1	“Kharājinā jaṭilā paṅkadantā,
ja487:1.2	Dummakkharūpā ye mantaṁ jappanti;
ja487:1.3	Kaccinnu te mānusake payoge,
ja487:1.4	Idaṁ vidū parimuttā apāyā”.
ja487:2.1	“Pāpāni kammāni karetha rāja,
ja487:2.2	Bahussuto ce na careyya dhammaṁ;
ja487:2.3	Sahassavedopi na taṁ paṭicca,
ja487:2.4	Dukkhā pamucce caraṇaṁ apatvā”.
ja487:3.1	“Sahassavedopi na taṁ paṭicca,
ja487:3.2	Dukkhā pamucce caraṇaṁ apatvā;
ja487:3.3	Maññāmi vedā aphalā bhavanti,
ja487:3.4	Sasaṁyamaṁ caraṇaññeva saccaṁ”.
ja487:4.1	“Na heva vedā aphalā bhavanti,
ja487:4.2	Sasaṁyamaṁ caraṇaññeva saccaṁ;
ja487:4.3	Kittiñhi pappoti adhicca vede,
ja487:4.4	Santiṁ puṇāti caraṇena danto”.
ja487:5.1	“Bhaccā mātā pitā bandhū,
ja487:5.2	yena jāto sayeva so;
ja487:5.3	Uddālako ahaṁ bhoto,
ja487:5.4	sottiyākulavaṁsako”.
ja487:6.1	“Kathaṁ bho brāhmaṇo hoti,
ja487:6.2	kathaṁ bhavati kevalī;
ja487:6.3	Kathañca parinibbānaṁ,
ja487:6.4	dhammaṭṭho kinti vuccati”.
ja487:7.1	“Niraṅkatvā aggimādāya brāhmaṇo,
ja487:7.2	Āpo siñcaṁ yajaṁ usseti yūpaṁ;
ja487:7.3	Evaṅkaro brāhmaṇo hoti khemī,
ja487:7.4	Dhamme ṭhitaṁ tena amāpayiṁsu”.
ja487:8.1	“Na suddhi secanenatthi,
ja487:8.2	nāpi kevalī brāhmaṇo;
ja487:8.3	Na khantī nāpi soraccaṁ,
ja487:8.4	nāpi so parinibbuto”.
ja487:9.1	“Kathaṁ so brāhmaṇo hoti,
ja487:9.2	kathaṁ bhavati kevalī;
ja487:9.3	Kathañca parinibbānaṁ,
ja487:9.4	dhammaṭṭho kinti vuccati”.
ja487:10.1	“Akhettabandhū amamo nirāso,
ja487:10.2	Nillobhapāpo bhavalobhakhīṇo;
ja487:10.3	Evaṅkaro brāhmaṇo hoti khemī,
ja487:10.4	Dhamme ṭhitaṁ tena amāpayiṁsu”.
ja487:11.1	“Khattiyā brāhmaṇā vessā,
ja487:11.2	suddā caṇḍālapukkusā;
ja487:11.3	Sabbeva soratā dantā,
ja487:11.4	sabbeva parinibbutā;
ja487:11.5	Sabbesaṁ sītibhūtānaṁ,
ja487:11.6	atthi seyyotha pāpiyo”.
ja487:12.1	“Khattiyā brāhmaṇā vessā,
ja487:12.2	suddā caṇḍālapukkusā;
ja487:12.3	Sabbeva soratā dantā,
ja487:12.4	sabbeva parinibbutā;
ja487:12.5	Sabbesaṁ sītibhūtānaṁ,
ja487:12.6	natthi seyyotha pāpiyo”.
ja487:13.1	“Khattiyā brāhmaṇā vessā,
ja487:13.2	suddā caṇḍālapukkusā;
ja487:13.3	Sabbeva soratā dantā,
ja487:13.4	sabbeva parinibbutā.
ja487:14.1	Sabbesaṁ sītibhūtānaṁ,
ja487:14.2	Natthi seyyotha pāpiyo;
ja487:14.3	Panatthaṁ carasi brahmaññaṁ,
ja487:14.4	Sottiyākulavaṁsataṁ”.
ja487:15.1	“Nānārattehi vatthehi,
ja487:15.2	vimānaṁ bhavati chāditaṁ;
ja487:15.3	Na tesaṁ chāyā vatthānaṁ,
ja487:15.4	so rāgo anupajjatha.
ja487:16.1	Evameva manussesu,
ja487:16.2	yadā sujjhanti māṇavā;
ja487:16.3	Te sajātiṁ pamuñcanti,
ja487:16.4	dhammamaññāya subbatā”ti.
ja487:17.1	Uddālakajātakaṁ catutthaṁ.
ja488:0.1	Jātaka
ja488:0.2	Pakiṇṇakanipāta
ja488:0.3	Sālikedāravagga
ja488:0.4	5. Bhisajātaka
ja488:1.1	“Assaṁ gavaṁ rajataṁ jātarūpaṁ,
ja488:1.2	Bhariyañca so idha labhataṁ manāpaṁ;
ja488:1.3	Puttehi dārehi samaṅgi hotu,
ja488:1.4	Bhisāni te brāhmaṇa yo ahāsi”.
ja488:2.1	“Mālañca so kāsikacandanañca,
ja488:2.2	Dhāretu puttassa bahū bhavantu;
ja488:2.3	Kāmesu tibbaṁ kurutaṁ apekkhaṁ,
ja488:2.4	Bhisāni te brāhmaṇa yo ahāsi”.
ja488:3.1	“Pahūtadhañño kasimā yasassī,
ja488:3.2	Putte gihī dhanimā sabbakāme;
ja488:3.3	Vayaṁ apassaṁ gharamāvasātu,
ja488:3.4	Bhisāni te brāhmaṇa yo ahāsi.
ja488:4.1	So khattiyo hotu pasayhakārī,
ja488:4.2	Rājābhirājā balavā yasassī;
ja488:4.3	Sa cāturantaṁ mahimāvasātu,
ja488:4.4	Bhisāni te brāhmaṇa yo ahāsi.
ja488:5.1	So brāhmaṇo hotu avītarāgo,
ja488:5.2	Muhuttanakkhattapathesu yutto;
ja488:5.3	Pūjetu naṁ raṭṭhapatī yasassī,
ja488:5.4	Bhisāni te brāhmaṇa yo ahāsi.
ja488:6.1	Ajjhāyakaṁ sabbasamantavedaṁ,
ja488:6.2	Tapassīnaṁ maññatu sabbaloko;
ja488:6.3	Pūjentu naṁ jānapadā samecca,
ja488:6.4	Bhisāni te brāhmaṇa yo ahāsi.
ja488:7.1	Catussadaṁ gāmavaraṁ samiddhaṁ,
ja488:7.2	Dinnañhi so bhuñjatu vāsavena;
ja488:7.3	Avītarāgo maraṇaṁ upetu,
ja488:7.4	Bhisāni te brāhmaṇa yo ahāsi.
ja488:8.1	So gāmaṇī hotu sahāyamajjhe,
ja488:8.2	Naccehi gītehi pamodamāno;
ja488:8.3	So rājato byasana mālattha kiñci,
ja488:8.4	Bhisāni te brāhmaṇa yo ahāsi.
ja488:9.1	Yaṁ ekarājā pathaviṁ vijetvā,
ja488:9.2	Itthīsahassāna ṭhapetu aggaṁ;
ja488:9.3	Sīmantinīnaṁ pavarā bhavātu,
ja488:9.4	Bhisāni te brāhmaṇa yā ahāsi.
ja488:10.1	Isīnañhi sā sabbasamāgatānaṁ,
ja488:10.2	Bhuñjeyya sāduṁ avikampamānā;
ja488:10.3	Carātu lābhena vikatthamānā,
ja488:10.4	Bhisāni te brāhmaṇa yā ahāsi.
ja488:11.1	Āvāsiko hotu mahāvihāre,
ja488:11.2	Navakammiko hotu gajaṅgalāyaṁ;
ja488:11.3	Ālokasandhiṁ divasaṁ karotu,
ja488:11.4	Bhisāni te brāhmaṇa yo ahāsi.
ja488:12.1	So bajjhatū pāsasatehi chabbhi,
ja488:12.2	Rammā vanā niyyatu rājadhāniṁ;
ja488:12.3	Tuttehi so haññatu pācanehi,
ja488:12.4	Bhisāni te brāhmaṇa yo ahāsi.
ja488:13.1	Alakkamālī tipukaṇṇaviddho,
ja488:13.2	Laṭṭhīhato sappamukhaṁ upetu;
ja488:13.3	Sakacchabandho visikhaṁ carātu,
ja488:13.4	Bhisāni te brāhmaṇa yo ahāsi”.
ja488:14.1	“Yo ve anaṭṭhaṁva naṭṭhanti cāha,
ja488:14.2	Kāmeva so labhataṁ bhuñjatañca;
ja488:14.3	Agāramajjhe maraṇaṁ upetu,
ja488:14.4	Yo vā bhonto saṅkati kañcideva”.
ja488:15.1	“Yadesamānā vicaranti loke,
ja488:15.2	Iṭṭhañca kantañca bahūnametaṁ;
ja488:15.3	Piyaṁ manuññaṁ cidha jīvaloke,
ja488:15.4	Kasmā isayo nappasaṁsanti kāme”.
ja488:16.1	“Kāmesu ve haññare bajjhare ca,
ja488:16.2	Kāmesu dukkhañca bhayañca jātaṁ;
ja488:16.3	Kāmesu bhūtādhipatī pamattā,
ja488:16.4	Pāpāni kammāni karonti mohā.
ja488:17.1	Te pāpadhammā pasavetva pāpaṁ,
ja488:17.2	Kāyassa bhedā nirayaṁ vajanti;
ja488:17.3	Ādīnavaṁ kāmaguṇesu disvā,
ja488:17.4	Tasmā isayo nappasaṁsanti kāme”.
ja488:18.1	“Vīmaṁsamāno isino bhisāni,
ja488:18.2	Tīre gahetvāna thale nidhesiṁ;
ja488:18.3	Suddhā apāpā isayo vasanti,
ja488:18.4	Etāni te brahmacārī bhisāni”.
ja488:19.1	“Na te naṭā no pana kīḷaneyyā,
ja488:19.2	Na bandhavā no pana te sahāyā;
ja488:19.3	Kismiṁ vupatthambha sahassanetta,
ja488:19.4	Isīhi tvaṁ kīḷasi devarāja”.
ja488:20.1	“Ācariyo mesi pitā ca mayhaṁ,
ja488:20.2	Esā patiṭṭhā khalitassa brahme;
ja488:20.3	Ekāparādhaṁ khama bhūripañña,
ja488:20.4	Na paṇḍitā kodhabalā bhavanti”.
ja488:21.1	“Suvāsitaṁ isinaṁ ekarattaṁ,
ja488:21.2	Yaṁ vāsavaṁ bhūtapatiddasāma;
ja488:21.3	Sabbeva bhonto sumanā bhavantu,
ja488:21.4	Yaṁ brāhmaṇo paccupādī bhisāni”.
ja488:22.1	“Ahañca sāriputto ca,
ja488:22.2	moggallāno ca kassapo;
ja488:22.3	Anuruddho puṇṇo ānando,
ja488:22.4	tadāsuṁ satta bhātaro.
ja488:23.1	Bhaginī uppalavaṇṇā ca,
ja488:23.2	dāsī khujjuttarā tadā;
ja488:23.3	Citto gahapati dāso,
ja488:23.4	yakkho sātāgiro tadā.
ja488:24.1	Pālileyyo tadā nāgo,
ja488:24.2	madhudo seṭṭhavānaro;
ja488:24.3	Kāḷudāyī tadā sakko,
ja488:24.4	evaṁ dhāretha jātakanti”.
ja488:25.1	Bhisajātakaṁ pañcamaṁ.
ja489:0.1	Jātaka
ja489:0.2	Pakiṇṇakanipāta
ja489:0.3	Sālikedāravagga
ja489:0.4	6. Surucijātaka
ja489:1.1	“Mahesī surucino bhariyā,
ja489:1.2	Ānītā paṭhamaṁ ahaṁ;
ja489:1.3	Dasa vassasahassāni,
ja489:1.4	Yaṁ maṁ surucimānayi.
ja489:2.1	Sāhaṁ brāhmaṇa rājānaṁ,
ja489:2.2	vedehaṁ mithilaggahaṁ;
ja489:2.3	Nābhijānāmi kāyena,
ja489:2.4	vācāya uda cetasā;
ja489:2.5	Suruciṁ atimaññittha,
ja489:2.6	āvi vā yadi vā raho.
ja489:3.1	Etena saccavajjena,
ja489:3.2	putto uppajjataṁ ise;
ja489:3.3	Musā me bhaṇamānāya,
ja489:3.4	muddhā phalatu sattadhā.
ja489:4.1	Bhattu mama sassu mātā,
ja489:4.2	pitā cāpi ca sassuro;
ja489:4.3	Te maṁ brahme vinetāro,
ja489:4.4	yāva aṭṭhaṁsu jīvitaṁ.
ja489:5.1	Sāhaṁ ahiṁsāratinī,
ja489:5.2	kāmasā dhammacārinī;
ja489:5.3	Sakkaccaṁ te upaṭṭhāsiṁ,
ja489:5.4	rattindivamatanditā.
ja489:6.1	Etena saccavajjena,
ja489:6.2	putto uppajjataṁ ise;
ja489:6.3	Musā me bhaṇamānāya,
ja489:6.4	muddhā phalatu sattadhā.
ja489:7.1	Soḷasitthisahassāni,
ja489:7.2	sahabhariyāni brāhmaṇa;
ja489:7.3	Tāsu issā vā kodho vā,
ja489:7.4	nāhu mayhaṁ kudācanaṁ.
ja489:8.1	Hitena tāsaṁ nandāmi,
ja489:8.2	na ca me kāci appiyā;
ja489:8.3	Attānaṁvānukampāmi,
ja489:8.4	sadā sabbā sapattiyo.
ja489:9.1	Etena saccavajjena,
ja489:9.2	putto uppajjataṁ ise;
ja489:9.3	Musā me bhaṇamānāya,
ja489:9.4	muddhā phalatu sattadhā.
ja489:10.1	Dāse kammakare pesse,
ja489:10.2	ye caññe anujīvino;
ja489:10.3	Pesemi sahadhammena,
ja489:10.4	sadā pamuditindriyā.
ja489:11.1	Etena saccavajjena,
ja489:11.2	putto uppajjataṁ ise;
ja489:11.3	Musā me bhaṇamānāya,
ja489:11.4	muddhā phalatu sattadhā.
ja489:12.1	Samaṇe brāhmaṇe cāpi,
ja489:12.2	aññe cāpi vanibbake;
ja489:12.3	Tappemi annapānena,
ja489:12.4	sadā payatapāṇinī.
ja489:13.1	Etena saccavajjena,
ja489:13.2	putto uppajjataṁ ise;
ja489:13.3	Musā me bhaṇamānāya,
ja489:13.4	muddhā phalatu sattadhā.
ja489:14.1	Cātuddasiṁ pañcaddasiṁ,
ja489:14.2	Yā ca pakkhassa aṭṭhamī;
ja489:14.3	Pāṭihāriyapakkhañca,
ja489:14.4	Aṭṭhaṅgasusamāgataṁ;
ja489:14.5	Uposathaṁ upavasāmi,
ja489:14.6	Sadā sīlesu saṁvutā.
ja489:15.1	Etena saccavajjena,
ja489:15.2	putto uppajjataṁ ise;
ja489:15.3	Musā me bhaṇamānāya,
ja489:15.4	muddhā phalatu sattadhā”.
ja489:16.1	“Sabbeva te dhammaguṇā,
ja489:16.2	rājaputti yasassini;
ja489:16.3	Saṁvijjanti tayi bhadde,
ja489:16.4	ye tvaṁ kittesi attani.
ja489:17.1	Khattiyo jātisampanno,
ja489:17.2	abhijāto yasassimā;
ja489:17.3	Dhammarājā videhānaṁ,
ja489:17.4	putto uppajjate tava”.
ja489:18.1	“Dummī rajojalladharo,
ja489:18.2	aghe vehāyasaṁ ṭhito;
ja489:18.3	Manuññaṁ bhāsase vācaṁ,
ja489:18.4	yaṁ mayhaṁ hadayaṅgamaṁ.
ja489:19.1	Devatānusi saggamhā,
ja489:19.2	isi vāsi mahiddhiko;
ja489:19.3	Ko vāsi tvaṁ anuppatto,
ja489:19.4	attānaṁ me pavedaya”.
ja489:20.1	“Yaṁ devasaṅghā vandanti,
ja489:20.2	sudhammāyaṁ samāgatā;
ja489:20.3	Sohaṁ sakko sahassakkho,
ja489:20.4	āgatosmi tavantike.
ja489:21.1	Itthiyo jīvalokasmiṁ,
ja489:21.2	yā hoti samacārinī;
ja489:21.3	Medhāvinī sīlavatī,
ja489:21.4	sassudevā patibbatā.
ja489:22.1	Tādisāya sumedhāya,
ja489:22.2	sucikammāya nāriyā;
ja489:22.3	Devā dassanamāyanti,
ja489:22.4	mānusiyā amānusā.
ja489:23.1	Tvañca bhadde suciṇṇena,
ja489:23.2	pubbe sucaritena ca;
ja489:23.3	Idha rājakule jātā,
ja489:23.4	sabbakāmasamiddhinī.
ja489:24.1	Ayañca te rājaputti,
ja489:24.2	ubhayattha kaṭaggaho;
ja489:24.3	Devalokūpapattī ca,
ja489:24.4	kittī ca idha jīvite.
ja489:25.1	Ciraṁ sumedhe sukhinī,
ja489:25.2	dhammamattani pālaya;
ja489:25.3	Esāhaṁ tidivaṁ yāmi,
ja489:25.4	piyaṁ me tava dassanan”ti.
ja489:26.1	Surucijātakaṁ chaṭṭhaṁ.
ja490:0.1	Jātaka
ja490:0.2	Pakiṇṇakanipāta
ja490:0.3	Sālikedāravagga
ja490:0.4	7. Pañcuposathikajātaka
ja490:1.1	“Appossukko dāni tuvaṁ kapota,
ja490:1.2	Vihaṅgama na tava bhojanattho;
ja490:1.3	Khudaṁ pipāsaṁ adhivāsayanto,
ja490:1.4	Kasmā bhavaṁposathiko kapota”.
ja490:2.1	“Ahaṁ pure giddhigato kapotiyā,
ja490:2.2	Asmiṁ padesasmimubho ramāma;
ja490:2.3	Athaggahī sākuṇiko kapotiṁ,
ja490:2.4	Akāmako tāya vinā ahosiṁ.
ja490:3.1	Nānābhavā vippayogena tassā,
ja490:3.2	Manomayaṁ vedana vedayāmi;
ja490:3.3	Tasmā ahaṁposathaṁ pālayāmi,
ja490:3.4	Rāgo mamaṁ mā punarāgamāsi”.
ja490:4.1	“Anujjugāmī uragā dujivha,
ja490:4.2	Dāṭhāvudho ghoravisosi sappa;
ja490:4.3	Khudaṁ pipāsaṁ adhivāsayanto,
ja490:4.4	Kasmā bhavaṁposathiko nu dīgha.
ja490:5.1	Usabho ahū balavā gāmikassa,
ja490:5.2	Calakkakū vaṇṇabalūpapanno;
ja490:5.3	So maṁ akkami taṁ kupito aḍaṁsiṁ,
ja490:5.4	Dukkhābhitunno maraṇaṁ upāgā.
ja490:6.1	Tato janā nikkhamitvāna gāmā,
ja490:6.2	Kanditvā roditvā apakkamiṁsu;
ja490:6.3	Tasmā ahaṁposathaṁ pālayāmi,
ja490:6.4	Kodho mamaṁ mā punarāgamāsi.
ja490:7.1	Matāna maṁsāni bahū susāne,
ja490:7.2	Manuññarūpaṁ tava bhojane taṁ;
ja490:7.3	Khudaṁ pipāsaṁ adhivāsayanto,
ja490:7.4	Kasmā bhavaṁposathiko siṅgāla.
ja490:8.1	Pavisi kucchiṁ mahato gajassa,
ja490:8.2	Kuṇape rato hatthimaṁsesu giddho;
ja490:8.3	Uṇho ca vāto tikhiṇā ca rasmiyo,
ja490:8.4	Te sosayuṁ tassa karīsamaggaṁ.
ja490:9.1	Kiso ca paṇḍū ca ahaṁ bhadante,
ja490:9.2	Na me ahū nikkhamanāya maggo;
ja490:9.3	Mahā ca megho sahasā pavassi,
ja490:9.4	So temayī tassa karīsamaggaṁ.
ja490:10.1	Tato ahaṁ nikkhamisaṁ bhadante,
ja490:10.2	Cando yathā rāhumukhā pamutto;
ja490:10.3	Tasmā ahaṁposathaṁ pālayāmi,
ja490:10.4	Lobho mamaṁ mā punarāgamāsi.
ja490:11.1	Vammīkathūpasmiṁ kipillikāni,
ja490:11.2	Nippothayanto tuvaṁ pure carāsi;
ja490:11.3	Khudaṁ pipāsaṁ adhivāsayanto,
ja490:11.4	Kasmā bhavaṁposathiko nu accha.
ja490:12.1	Sakaṁ niketaṁ atihīḷayāno,
ja490:12.2	Atricchatā mallagāmaṁ agacchiṁ;
ja490:12.3	Tato janā nikkhamitvāna gāmā,
ja490:12.4	Kodaṇḍakena paripothayiṁsu maṁ.
ja490:13.1	So bhinnasīso ruhiramakkhitaṅgo,
ja490:13.2	Paccāgamāsiṁ sakaṁ niketaṁ;
ja490:13.3	Tasmā ahaṁposathaṁ pālayāmi,
ja490:13.4	Atricchatā mā punarāgamāsi”.
ja490:14.1	“Yaṁ no apucchittha tuvaṁ bhadante,
ja490:14.2	Sabbeva byākarimha yathāpajānaṁ;
ja490:14.3	Mayampi pucchāma tuvaṁ bhadante,
ja490:14.4	Kasmā bhavaṁposathiko nu brahme”.
ja490:15.1	“Anūpalitto mama assamamhi,
ja490:15.2	Paccekabuddho muhuttaṁ nisīdi;
ja490:15.3	So maṁ avedī gatimāgatiñca,
ja490:15.4	Nāmañca gottaṁ caraṇañca sabbaṁ.
ja490:16.1	Evampahaṁ vandi na tassa pāde,
ja490:16.2	Na cāpi naṁ mānagatena pucchiṁ;
ja490:16.3	Tasmā ahaṁposathaṁ pālayāmi,
ja490:16.4	Māno mamaṁ mā punarāgamāsī”ti.
ja490:17.1	Pañcuposathikajātakaṁ sattamaṁ.
ja491:0.1	Jātaka
ja491:0.2	Pakiṇṇakanipāta
ja491:0.3	Sālikedāravagga
ja491:0.4	8. Mahāmorajātaka
ja491:1.1	“Sace hi tyāhaṁ dhanahetu gāhito,
ja491:1.2	Mā maṁ vadhī jīvagāhaṁ gahetvā;
ja491:1.3	Rañño ca maṁ samma upantikaṁ nehi,
ja491:1.4	Maññe dhanaṁ lacchasinapparūpaṁ”.
ja491:2.1	“Na me ayaṁ tuyha vadhāya ajja,
ja491:2.2	Samāhito cāpadhure khurappo;
ja491:2.3	Pāsañca tyāhaṁ adhipātayissaṁ,
ja491:2.4	Yathāsukhaṁ gacchatu morarājā”.
ja491:3.1	“Yaṁ satta vassāni mamānubandhi,
ja491:3.2	Rattindivaṁ khuppipāsaṁ sahanto;
ja491:3.3	Atha kissa maṁ pāsavasūpanītaṁ,
ja491:3.4	Pamuttave icchasi bandhanasmā.
ja491:4.1	Pāṇātipātā virato nusajja,
ja491:4.2	Abhayaṁ nu te sabbabhūtesu dinnaṁ;
ja491:4.3	Yaṁ maṁ tuvaṁ pāsavasūpanītaṁ,
ja491:4.4	Pamuttave icchasi bandhanasmā”.
ja491:5.1	“Pāṇātipātā viratassa brūhi,
ja491:5.2	Abhayañca yo sabbabhūtesu deti;
ja491:5.3	Pucchāmi taṁ morarājetamatthaṁ,
ja491:5.4	Ito cuto kiṁ labhate sukhaṁ so”.
ja491:6.1	“Pāṇātipātā viratassa brūmi,
ja491:6.2	Abhayañca yo sabbabhūtesu deti;
ja491:6.3	Diṭṭheva dhamme labhate pasaṁsaṁ,
ja491:6.4	Saggañca so yāti sarīrabhedā”.
ja491:7.1	“Na santi devā iti āhu eke,
ja491:7.2	Idheva jīvo vibhavaṁ upeti;
ja491:7.3	Tathā phalaṁ sukatadukkaṭānaṁ,
ja491:7.4	Dattupaññattañca vadanti dānaṁ;
ja491:7.5	Tesaṁ vaco arahataṁ saddahāno,
ja491:7.6	Tasmā ahaṁ sakuṇe bādhayāmi”.
ja491:8.1	“Cando ca suriyo ca ubho sudassanā,
ja491:8.2	Gacchanti obhāsayamantalikkhe;
ja491:8.3	Imassa lokassa parassa vā te,
ja491:8.4	Kathaṁ nu te āhu manussaloke”.
ja491:9.1	“Cando ca suriyo ca ubho sudassanā,
ja491:9.2	Gacchanti obhāsayamantalikkhe;
ja491:9.3	Parassa lokassa na te imassa,
ja491:9.4	Devāti te āhu manussaloke”.
ja491:10.1	“Ettheva te nīhatā hīnavādā,
ja491:10.2	Ahetukā ye na vadanti kammaṁ;
ja491:10.3	Tathā phalaṁ sukatadukkaṭānaṁ,
ja491:10.4	Dattupaññattaṁ ye ca vadanti dānaṁ”.
ja491:11.1	“Addhā hi saccaṁ vacanaṁ tavedaṁ,
ja491:11.2	Kathañhi dānaṁ aphalaṁ bhaveyya;
ja491:11.3	Tathā phalaṁ sukatadukkaṭānaṁ,
ja491:11.4	Dattupaññattañca kathaṁ bhaveyya.
ja491:12.1	Kathaṅkaro kintikaro kimācaraṁ,
ja491:12.2	Kiṁ sevamāno kena tapoguṇena;
ja491:12.3	Akkhāhi me morarājetamatthaṁ,
ja491:12.4	Yathā ahaṁ no nirayaṁ pateyyaṁ”.
ja491:13.1	“Ye keci atthi samaṇā pathabyā,
ja491:13.2	Kāsāyavatthā anagāriyā te;
ja491:13.3	Pātova piṇḍāya caranti kāle,
ja491:13.4	Vikālacariyā viratā hi santo.
ja491:14.1	Te tattha kālenupasaṅkamitvā,
ja491:14.2	Pucchāhi yaṁ te manaso piyaṁ siyā;
ja491:14.3	Te te pavakkhanti yathāpajānaṁ,
ja491:14.4	Imassa lokassa parassa catthaṁ”.
ja491:15.1	“Tacaṁva jiṇṇaṁ urago purāṇaṁ,
ja491:15.2	Paṇḍūpalāsaṁ harito dumova;
ja491:15.3	Esappahīno mama luddabhāvo,
ja491:15.4	Jahāmahaṁ luddakabhāvamajja.
ja491:16.1	Ye cāpi me sakuṇā atthi baddhā,
ja491:16.2	Satāninekāni nivesanasmiṁ;
ja491:16.3	Tesampahaṁ jīvitamajja dammi,
ja491:16.4	Mokkhañca te pattā sakaṁ niketaṁ”.
ja491:17.1	“Luddo carī pāsahattho araññe,
ja491:17.2	Bādhetu morādhipatiṁ yasassiṁ;
ja491:17.3	Bandhitvā morādhipatiṁ yasassiṁ,
ja491:17.4	Dukkhā sa pamucci yathāhaṁ pamutto”ti.
ja491:18.1	Mahāmorajātakaṁ aṭṭhamaṁ.
ja492:0.1	Jātaka
ja492:0.2	Pakiṇṇakanipāta
ja492:0.3	Sālikedāravagga
ja492:0.4	9. Tacchasūkarajātaka
ja492:1.1	“Yadesamānā vicarimha,
ja492:1.2	pabbatāni vanāni ca;
ja492:1.3	Anvesaṁ vicariṁ ñātī,
ja492:1.4	teme adhigatā mayā.
ja492:2.1	Bahuñcidaṁ mūlaphalaṁ,
ja492:2.2	bhakkho cāyaṁ anappako;
ja492:2.3	Rammā cimā girīnajjo,
ja492:2.4	phāsuvāso bhavissati.
ja492:3.1	Idhevāhaṁ vasissāmi,
ja492:3.2	saha sabbehi ñātibhi;
ja492:3.3	Appossukko nirāsaṅkī,
ja492:3.4	asoko akutobhayo”.
ja492:4.1	“Aññampi leṇaṁ pariyesa,
ja492:4.2	sattu no idha vijjati;
ja492:4.3	So taccha sūkare hanti,
ja492:4.4	idhāgantvā varaṁ varaṁ”.
ja492:5.1	“Ko numhākaṁ idha sattu,
ja492:5.2	ko ñātī susamāgate;
ja492:5.3	Duppadhaṁse padhaṁseti,
ja492:5.4	taṁ me akkhātha pucchitā”.
ja492:6.1	“Uddhaggarājī migarājā,
ja492:6.2	balī dāṭhāvudho migo;
ja492:6.3	So taccha sūkare hanti,
ja492:6.4	idhāgantvā varaṁ varaṁ”.
ja492:7.1	“Na no dāṭhā na vijjanti,
ja492:7.2	balaṁ kāye samohitaṁ;
ja492:7.3	Sabbe samaggā hutvāna,
ja492:7.4	vasaṁ kāhāma ekakaṁ”.
ja492:8.1	“Hadayaṅgamaṁ kaṇṇasukhaṁ,
ja492:8.2	Vācaṁ bhāsasi tacchaka;
ja492:8.3	Yopi yuddhe palāyeyya,
ja492:8.4	Tampi pacchā hanāmase”.
ja492:9.1	“Pāṇātipātā virato nu ajja,
ja492:9.2	Abhayaṁ nu te sabbabhūtesu dinnaṁ;
ja492:9.3	Dāṭhā nu te migavadhāya na santi,
ja492:9.4	Yo saṅghapatto kapaṇova jhāyasi”.
ja492:10.1	“Na me dāṭhā na vijjanti,
ja492:10.2	Balaṁ kāye samohitaṁ;
ja492:10.3	Ñātī ca disvāna sāmaggī ekato,
ja492:10.4	Tasmā ca jhāyāmi vanamhi ekako.
ja492:11.1	Imassudaṁ yanti disodisaṁ pure,
ja492:11.2	Bhayaṭṭitā leṇagavesino puthu;
ja492:11.3	Te dāni saṅgamma vasanti ekato,
ja492:11.4	Yatthaṭṭhitā duppasahajja te mayā.
ja492:12.1	Pariṇāyakasampannā,
ja492:12.2	sahitā ekavādino;
ja492:12.3	Te maṁ samaggā hiṁseyyuṁ,
ja492:12.4	tasmā nesaṁ na patthaye”.
ja492:13.1	“Ekova indo asure jināti,
ja492:13.2	Ekova seno hanti dije pasayha;
ja492:13.3	Ekova byaggho migasaṅghapatto,
ja492:13.4	Varaṁ varaṁ hanti balañhi tādisaṁ”.
ja492:14.1	“Na heva indo na seno,
ja492:14.2	napi byaggho migādhipo;
ja492:14.3	Samagge sahite ñātī,
ja492:14.4	na byagghe kurute vase”.
ja492:15.1	“Kumbhīlakā sakuṇakā,
ja492:15.2	saṅghino gaṇacārino;
ja492:15.3	Sammodamānā ekajjhaṁ,
ja492:15.4	uppatanti ḍayanti ca.
ja492:16.1	Tesañca ḍayamānānaṁ,
ja492:16.2	ekettha apasakkati;
ja492:16.3	Tañca seno nitāḷeti,
ja492:16.4	veyyagghiyeva sā gati”.
ja492:17.1	“Ussāhito jaṭilena,
ja492:17.2	luddenāmisacakkhunā;
ja492:17.3	Dāṭhī dāṭhīsu pakkhandi,
ja492:17.4	maññamāno yathā pure”.
ja492:18.1	“Sādhu sambahulā ñātī,
ja492:18.2	api rukkhā araññajā;
ja492:18.3	Sūkarehi samaggehi,
ja492:18.4	byaggho ekāyane hato”.
ja492:19.1	Brāhmaṇañceva byagghañca,
ja492:19.2	ubho hantvāna sūkarā.
ja492:19.3	Ānandino pamuditā,
ja492:19.4	mahānādaṁ panādisuṁ.
ja492:20.1	Te su udumbaramūlasmiṁ,
ja492:20.2	sūkarā susamāgatā;
ja492:20.3	Tacchakaṁ abhisiñciṁsu,
ja492:20.4	“tvaṁ no rājāsi issaro”ti.
ja492:21.1	Tacchasūkarajātakaṁ navamaṁ.
ja493:0.1	Jātaka
ja493:0.2	Pakiṇṇakanipāta
ja493:0.3	Sālikedāravagga
ja493:0.4	10. Mahāvāṇijajātaka
ja493:1.1	Vāṇijā samitiṁ katvā,
ja493:1.2	nānāraṭṭhato āgatā;
ja493:1.3	Dhanāharā pakkamiṁsu,
ja493:1.4	ekaṁ katvāna gāmaṇiṁ.
ja493:2.1	Te taṁ kantāramāgamma,
ja493:2.2	appabhakkhaṁ anodakaṁ;
ja493:2.3	Mahānigrodhamaddakkhuṁ,
ja493:2.4	sītacchāyaṁ manoramaṁ.
ja493:3.1	Te ca tattha nisīditvā,
ja493:3.2	tassa rukkhassa chāyayā;
ja493:3.3	Vāṇijā samacintesuṁ,
ja493:3.4	bālā mohena pārutā.
ja493:4.1	Allāyate ayaṁ rukkho,
ja493:4.2	api vārīva sandati;
ja493:4.3	Iṅghassa purimaṁ sākhaṁ,
ja493:4.4	mayaṁ chindāma vāṇijā.
ja493:5.1	Sā ca chinnāva pagghari,
ja493:5.2	acchaṁ vāriṁ anāvilaṁ;
ja493:5.3	Te tattha nhatvā pivitvā,
ja493:5.4	yāvaticchiṁsu vāṇijā.
ja493:6.1	Dutiyaṁ samacintesuṁ,
ja493:6.2	bālā mohena pārutā;
ja493:6.3	Iṅghassa dakkhiṇaṁ sākhaṁ,
ja493:6.4	mayaṁ chindāma vāṇijā.
ja493:7.1	Sā ca chinnāva pagghari,
ja493:7.2	sālimaṁsodanaṁ bahuṁ;
ja493:7.3	Appodavaṇṇe kummāse,
ja493:7.4	siṅgiṁ vidalasūpiyo.
ja493:8.1	Te tattha bhutvā khāditvā,
ja493:8.2	yāvaticchiṁsu vāṇijā;
ja493:8.3	Tatiyaṁ samacintesuṁ,
ja493:8.4	bālā mohena pārutā;
ja493:8.5	Iṅghassa pacchimaṁ sākhaṁ,
ja493:8.6	mayaṁ chindāma vāṇijā.
ja493:9.1	Sā ca chinnāva pagghari,
ja493:9.2	nāriyo samalaṅkatā;
ja493:9.3	Vicitravatthābharaṇā,
ja493:9.4	āmuttamaṇikuṇḍalā.
ja493:10.1	Api su vāṇijā ekā,
ja493:10.2	nāriyo paṇṇavīsati;
ja493:10.3	Samantā parivāriṁsu,
ja493:10.4	tassa rukkhassa chāyayā.
ja493:11.1	Te tāhi paricāretvā,
ja493:11.2	yāvaticchiṁsu vāṇijā;
ja493:11.3	Catutthaṁ samacintesuṁ,
ja493:11.4	bālā mohena pārutā;
ja493:11.5	Iṅghassa uttaraṁ sākhaṁ,
ja493:11.6	mayaṁ chindāma vāṇijā.
ja493:12.1	Sā ca chinnāva pagghari,
ja493:12.2	muttā veḷuriyā bahū;
ja493:12.3	Rajataṁ jātarūpañca,
ja493:12.4	kuttiyo paṭiyāni ca.
ja493:13.1	Kāsikāni ca vatthāni,
ja493:13.2	uddiyāni ca kambalā;
ja493:13.3	Te tattha bhāre bandhitvā,
ja493:13.4	yāvaticchiṁsu vāṇijā.
ja493:14.1	Pañcamaṁ samacintesuṁ,
ja493:14.2	bālā mohena pārutā;
ja493:14.3	Iṅghassa mūlaṁ chindāma,
ja493:14.4	api bhiyyo labhāmase.
ja493:15.1	Athuṭṭhahi satthavāho,
ja493:15.2	yācamāno katañjalī;
ja493:15.3	Nigrodho kiṁ parajjhati,
ja493:15.4	vāṇijā bhaddamatthu te.
ja493:16.1	Vāridā purimā sākhā,
ja493:16.2	annapānañca dakkhiṇā;
ja493:16.3	Nāridā pacchimā sākhā,
ja493:16.4	sabbakāme ca uttarā;
ja493:16.5	Nigrodho kiṁ parajjhati,
ja493:16.6	vāṇijā bhaddamatthu te.
ja493:17.1	Yassa rukkhassa chāyāya,
ja493:17.2	nisīdeyya sayeyya vā;
ja493:17.3	Na tassa sākhaṁ bhañjeyya,
ja493:17.4	mittadubbho hi pāpako.
ja493:18.1	Te ca tassānādiyitvā,
ja493:18.2	ekassa vacanaṁ bahū;
ja493:18.3	Nisitāhi kuṭhārīhi,
ja493:18.4	mūlato naṁ upakkamuṁ.
ja493:19.1	Tato nāgā nikkhamiṁsu,
ja493:19.2	sannaddhā paṇṇavīsati;
ja493:19.3	Dhanuggahānaṁ tisatā,
ja493:19.4	chasahassā ca vammino.
ja493:20.1	“Ete hanatha bandhatha,
ja493:20.2	Mā vo muñcittha jīvitaṁ;
ja493:20.3	Ṭhapetvā satthavāhaṁva,
ja493:20.4	Sabbe bhasmaṁ karotha ne”.
ja493:21.1	“Tasmā hi paṇḍito poso,
ja493:21.2	sampassaṁ atthamattano;
ja493:21.3	Lobhassa na vasaṁ gacche,
ja493:21.4	haneyyārisakaṁ manaṁ.
ja493:22.1	Evamādīnavaṁ ñatvā,
ja493:22.2	taṇhā dukkhassa sambhavaṁ;
ja493:22.3	Vītataṇho anādāno,
ja493:22.4	sato bhikkhu paribbaje”ti.
ja493:23.1	Mahāvāṇijajātakaṁ dasamaṁ.
ja494:0.1	Jātaka
ja494:0.2	Pakiṇṇakanipāta
ja494:0.3	Sālikedāravagga
ja494:0.4	11. Sādhinajātaka
ja494:1.1	“Abbhuto vata lokasmiṁ,
ja494:1.2	uppajji lomahaṁsano;
ja494:1.3	Dibbo ratho pāturahu,
ja494:1.4	vedehassa yasassino”.
ja494:2.1	Devaputto mahiddhiko,
ja494:2.2	mātali devasārathi;
ja494:2.3	Nimantayittha rājānaṁ,
ja494:2.4	vedehaṁ mithilaggahaṁ.
ja494:3.1	“Ehimaṁ rathamāruyha,
ja494:3.2	rājaseṭṭha disampati;
ja494:3.3	Devā dassanakāmā te,
ja494:3.4	tāvatiṁsā saindakā;
ja494:3.5	Saramānā hi te devā,
ja494:3.6	sudhammāyaṁ samacchare”.
ja494:4.1	Tato ca rājā sādhino,
ja494:4.2	vedeho mithilaggaho;
ja494:4.3	Sahassayuttamāruyha,
ja494:4.4	agā devāna santike;
ja494:4.5	Taṁ devā paṭinandiṁsu,
ja494:4.6	disvā rājānamāgataṁ.
ja494:5.1	“Svāgataṁ te mahārāja,
ja494:5.2	atho te adurāgataṁ;
ja494:5.3	Nisīda dāni rājīsi,
ja494:5.4	devarājassa santike”.
ja494:6.1	Sakkopi paṭinandittha,
ja494:6.2	vedehaṁ mithilaggahaṁ;
ja494:6.3	Nimantayittha kāmehi,
ja494:6.4	āsanena ca vāsavo.
ja494:7.1	“Sādhu khosi anuppatto,
ja494:7.2	āvāsaṁ vasavattinaṁ;
ja494:7.3	Vasa devesu rājīsi,
ja494:7.4	sabbakāmasamiddhisu;
ja494:7.5	Tāvatiṁsesu devesu,
ja494:7.6	bhuñja kāme amānuse”.
ja494:8.1	“Ahaṁ pure saggagato ramāmi,
ja494:8.2	Naccehi gītehi ca vāditehi;
ja494:8.3	So dāni ajja na ramāmi sagge,
ja494:8.4	Āyuṁ nu khīṇo maraṇaṁ nu santike;
ja494:8.5	Udāhu mūḷhosmi janindaseṭṭha”.
ja494:9.1	“Na tāyu khīṇaṁ maraṇañca dūre,
ja494:9.2	Na cāpi mūḷho naravīraseṭṭha;
ja494:9.3	Tuyhañca puññāni parittakāni,
ja494:9.4	Yesaṁ vipākaṁ idha vedayittho.
ja494:10.1	Vasa devānubhāvena,
ja494:10.2	rājaseṭṭha disampati;
ja494:10.3	Tāvatiṁsesu devesu,
ja494:10.4	bhuñja kāme amānuse”.
ja494:11.1	“Yathā yācitakaṁ yānaṁ,
ja494:11.2	yathā yācitakaṁ dhanaṁ;
ja494:11.3	Evaṁsampadamevetaṁ,
ja494:11.4	yaṁ parato dānapaccayā.
ja494:12.1	Na cāhametamicchāmi,
ja494:12.2	yaṁ parato dānapaccayā;
ja494:12.3	Sayaṅkatāni puññāni,
ja494:12.4	taṁ me āveṇikaṁ dhanaṁ.
ja494:13.1	Sohaṁ gantvā manussesu,
ja494:13.2	kāhāmi kusalaṁ bahuṁ;
ja494:13.3	Dānena samacariyāya,
ja494:13.4	saṁyamena damena ca;
ja494:13.5	Yaṁ katvā sukhito hoti,
ja494:13.6	na ca pacchānutappati.
ja494:14.1	Imāni tāni khettāni,
ja494:14.2	imaṁ nikkhaṁ sukuṇḍalaṁ;
ja494:14.3	Imā tā haritānūpā,
ja494:14.4	imā najjo savantiyo.
ja494:15.1	Imā tā pokkharaṇī rammā,
ja494:15.2	cakkavākapakūjitā;
ja494:15.3	Mandālakehi sañchannā,
ja494:15.4	padumuppalakehi ca;
ja494:15.5	Yassimāni mamāyiṁsu,
ja494:15.6	kiṁ nu te disataṁ gatā.
ja494:16.1	Tānīdha khettāni so bhūmibhāgo,
ja494:16.2	Teyeva ārāmavanūpacārā;
ja494:16.3	Tameva mayhaṁ janataṁ apassato,
ja494:16.4	Suññaṁva me nārada khāyate disā”.
ja494:17.1	“Diṭṭhā mayā vimānāni,
ja494:17.2	obhāsentā catuddisā;
ja494:17.3	Sammukhā devarājassa,
ja494:17.4	tidasānañca sammukhā.
ja494:18.1	Vutthaṁ me bhavanaṁ dibyaṁ,
ja494:18.2	Bhuttā kāmā amānusā;
ja494:18.3	Tāvatiṁsesu devesu,
ja494:18.4	Sabbakāmasamiddhisu.
ja494:19.1	Sohaṁ etādisaṁ hitvā,
ja494:19.2	puññāyamhi idhāgato;
ja494:19.3	Dhammameva carissāmi,
ja494:19.4	nāhaṁ rajjena atthiko.
ja494:20.1	Adaṇḍāvacaraṁ maggaṁ,
ja494:20.2	sammāsambuddhadesitaṁ;
ja494:20.3	Taṁ maggaṁ paṭipajjissaṁ,
ja494:20.4	yena gacchanti subbatā”ti.
ja494:21.1	Sādhinajātakaṁ ekādasamaṁ.
ja495:0.1	Jātaka
ja495:0.2	Pakiṇṇakanipāta
ja495:0.3	Sālikedāravagga
ja495:0.4	12. Dasabrāhmaṇajātaka
ja495:1.1	Rājā avoca vidhuraṁ,
ja495:1.2	Dhammakāmo yudhiṭṭhilo;
ja495:1.3	“Brāhmaṇe vidhura pariyesa,
ja495:1.4	Sīlavante bahussute.
ja495:2.1	Virate methunā dhammā,
ja495:2.2	Ye me bhuñjeyyu bhojanaṁ;
ja495:2.3	Dakkhiṇaṁ samma dassāma,
ja495:2.4	Yattha dinnaṁ mahapphalaṁ”.
ja495:3.1	“Dullabhā brāhmaṇā deva,
ja495:3.2	sīlavanto bahussutā;
ja495:3.3	Viratā methunā dhammā,
ja495:3.4	ye te bhuñjeyyu bhojanaṁ.
ja495:4.1	Dasa khalu mahārāja,
ja495:4.2	yā tā brāhmaṇajātiyo;
ja495:4.3	Tesaṁ vibhaṅgaṁ vicayaṁ,
ja495:4.4	vitthārena suṇohi me.
ja495:5.1	Pasibbake gahetvāna,
ja495:5.2	puṇṇe mūlassa saṁvute;
ja495:5.3	Osadhikāyo ganthenti,
ja495:5.4	nhāpayanti japanti ca.
ja495:6.1	Tikicchakasamā rāja,
ja495:6.2	tepi vuccanti brāhmaṇā;
ja495:6.3	Akkhātā te mahārāja,
ja495:6.4	tādise nipatāmase”.
ja495:7.1	“Apetā te ca brahmaññā,
ja495:7.2	(iti rājā korabyo)
ja495:7.3	Na te vuccanti brāhmaṇā;
ja495:7.4	Aññe vidhura pariyesa,
ja495:7.5	Sīlavante bahussute.
ja495:8.1	Virate methunā dhammā,
ja495:8.2	Ye me bhuñjeyyu bhojanaṁ;
ja495:8.3	Dakkhiṇaṁ samma dassāma,
ja495:8.4	Yattha dinnaṁ mahapphalaṁ”.
ja495:9.1	“Kiṅkiṇikāyo gahetvā,
ja495:9.2	ghosenti puratopi te;
ja495:9.3	Pesanānipi gacchanti,
ja495:9.4	rathacariyāsu sikkhare.
ja495:10.1	Paricārakasamā rāja,
ja495:10.2	tepi vuccanti brāhmaṇā;
ja495:10.3	Akkhātā te mahārāja,
ja495:10.4	tādise nipatāmase”.
ja495:11.1	“Apetā te ca brahmaññā,
ja495:11.2	(iti rājā korabyo)
ja495:11.3	Na te vuccanti brāhmaṇā;
ja495:11.4	Aññe vidhura pariyesa,
ja495:11.5	Sīlavante bahussute.
ja495:12.1	Virate methunā dhammā,
ja495:12.2	ye me bhuñjeyyu bhojanaṁ;
ja495:12.3	Dakkhiṇaṁ samma dassāma,
ja495:12.4	yattha dinnaṁ mahapphalaṁ”.
ja495:13.1	“Kamaṇḍaluṁ gahetvāna,
ja495:13.2	vaṅkadaṇḍañca brāhmaṇā;
ja495:13.3	Paccupessanti rājāno,
ja495:13.4	gāmesu nigamesu ca;
ja495:13.5	Nādinne vuṭṭhahissāma,
ja495:13.6	gāmamhi vā vanamhi vā.
ja495:14.1	Niggāhakasamā rāja,
ja495:14.2	tepi vuccanti brāhmaṇā;
ja495:14.3	Akkhātā te mahārāja,
ja495:14.4	tādise nipatāmase”.
ja495:15.1	“Apetā te ca brahmaññā,
ja495:15.2	(iti rājā korabyo)
ja495:15.3	Na te vuccanti brāhmaṇā;
ja495:15.4	Aññe vidhura pariyesa,
ja495:15.5	Sīlavante bahussute.
ja495:16.1	Virate methunā dhammā,
ja495:16.2	ye me bhuñjeyyu bhojanaṁ;
ja495:16.3	Dakkhiṇaṁ samma dassāma,
ja495:16.4	yattha dinnaṁ mahapphalaṁ”.
ja495:17.1	“Parūḷhakacchanakhalomā,
ja495:17.2	paṅkadantā rajassirā;
ja495:17.3	Okiṇṇā rajareṇūhi,
ja495:17.4	yācakā vicaranti te.
ja495:18.1	Khāṇughātasamā rāja,
ja495:18.2	tepi vuccanti brāhmaṇā;
ja495:18.3	Akkhātā te mahārāja,
ja495:18.4	tādise nipatāmase”.
ja495:19.1	“Apetā te ca brahmaññā,
ja495:19.2	(iti rājā korabyo)
ja495:19.3	Na te vuccanti brāhmaṇā;
ja495:19.4	Aññe vidhura pariyesa,
ja495:19.5	Sīlavante bahussute.
ja495:20.1	Virate methunā dhammā,
ja495:20.2	ye me bhuñjeyyu bhojanaṁ;
ja495:20.3	Dakkhiṇaṁ samma dassāma,
ja495:20.4	yattha dinnaṁ mahapphalaṁ”.
ja495:21.1	“Harītakaṁ āmalakaṁ,
ja495:21.2	Ambaṁ jambuṁ vibhītakaṁ;
ja495:21.3	Labujaṁ dantapoṇāni,
ja495:21.4	Beluvā badarāni ca.
ja495:22.1	Rājāyatanaṁ ucchupuṭaṁ,
ja495:22.2	dhūmanettaṁ madhuañjanaṁ;
ja495:22.3	Uccāvacāni paṇiyāni,
ja495:22.4	vipaṇenti janādhipa.
ja495:23.1	Vāṇijakasamā rāja,
ja495:23.2	tepi vuccanti brāhmaṇā;
ja495:23.3	Akkhātā te mahārāja,
ja495:23.4	tādise nipatāmase”.
ja495:24.1	“Apetā te ca brahmaññā,
ja495:24.2	(iti rājā korabyo)
ja495:24.3	Na te vuccanti brāhmaṇā;
ja495:24.4	Aññe vidhura pariyesa,
ja495:24.5	Sīlavante bahussute.
ja495:25.1	Virate methunā dhammā,
ja495:25.2	ye me bhuñjeyyu bhojanaṁ;
ja495:25.3	Dakkhiṇaṁ samma dassāma,
ja495:25.4	yattha dinnaṁ mahapphalaṁ”.
ja495:26.1	“Kasivāṇijjaṁ kārenti,
ja495:26.2	posayanti ajeḷake;
ja495:26.3	Kumāriyo pavecchanti,
ja495:26.4	vivāhantāvahanti ca.
ja495:27.1	Samā ambaṭṭhavessehi,
ja495:27.2	tepi vuccanti brāhmaṇā;
ja495:27.3	Akkhātā te mahārāja,
ja495:27.4	tādise nipatāmase”.
ja495:28.1	“Apetā te ca brahmaññā,
ja495:28.2	(iti rājā korabyo)
ja495:28.3	Na te vuccanti brāhmaṇā;
ja495:28.4	Aññe vidhura pariyesa,
ja495:28.5	Sīlavante bahussute.
ja495:29.1	Virate methunā dhammā,
ja495:29.2	ye me bhuñjeyyu bhojanaṁ;
ja495:29.3	Dakkhiṇaṁ samma dassāma,
ja495:29.4	yattha dinnaṁ mahapphalaṁ”.
ja495:30.1	“Nikkhittabhikkhaṁ bhuñjanti,
ja495:30.2	gāmesveke purohitā;
ja495:30.3	Bahū te paripucchanti,
ja495:30.4	aṇḍacchedā nilañchakā.
ja495:31.1	Pasūpi tattha haññanti,
ja495:31.2	mahiṁsā sūkarā ajā;
ja495:31.3	Goghātakasamā rāja,
ja495:31.4	tepi vuccanti brāhmaṇā;
ja495:31.5	Akkhātā te mahārāja,
ja495:31.6	tādise nipatāmase”.
ja495:32.1	“Apetā te ca brahmaññā,
ja495:32.2	(iti rājā korabyo)
ja495:32.3	Na te vuccanti brāhmaṇā;
ja495:32.4	Aññe vidhura pariyesa,
ja495:32.5	Sīlavante bahussute.
ja495:33.1	Virate methunā dhammā,
ja495:33.2	ye me bhuñjeyyu bhojanaṁ;
ja495:33.3	Dakkhiṇaṁ samma dassāma,
ja495:33.4	yattha dinnaṁ mahapphalaṁ”.
ja495:34.1	“Asicammaṁ gahetvāna,
ja495:34.2	khaggaṁ paggayha brāhmaṇā;
ja495:34.3	Vessapathesu tiṭṭhanti,
ja495:34.4	satthaṁ abbāhayantipi.
ja495:35.1	Samā gopanisādehi,
ja495:35.2	tepi vuccanti brāhmaṇā;
ja495:35.3	Akkhātā te mahārāja,
ja495:35.4	tādise nipatāmase”.
ja495:36.1	“Apetā te ca brahmaññā,
ja495:36.2	(iti rājā korabyo)
ja495:36.3	Na te vuccanti brāhmaṇā;
ja495:36.4	Aññe vidhura pariyesa,
ja495:36.5	Sīlavante bahussute.
ja495:37.1	Virate methunā dhammā,
ja495:37.2	ye me bhuñjeyyu bhojanaṁ;
ja495:37.3	Dakkhiṇaṁ samma dassāma,
ja495:37.4	yattha dinnaṁ mahapphalaṁ”.
ja495:38.1	“Araññe kuṭikaṁ katvā,
ja495:38.2	kūṭāni kārayanti te;
ja495:38.3	Sasabiḷāre bādhenti,
ja495:38.4	āgodhā macchakacchapaṁ.
ja495:39.1	Te luddakasamā rāja,
ja495:39.2	tepi vuccanti brāhmaṇā;
ja495:39.3	Akkhātā te mahārāja,
ja495:39.4	tādise nipatāmase”.
ja495:40.1	“Apetā te ca brahmaññā,
ja495:40.2	(iti rājā korabyo)
ja495:40.3	Na te vuccanti brāhmaṇā;
ja495:40.4	Aññe vidhura pariyesa,
ja495:40.5	Sīlavante bahussute.
ja495:41.1	Virate methunā dhammā,
ja495:41.2	ye me bhuñjeyyu bhojanaṁ;
ja495:41.3	Dakkhiṇaṁ samma dassāma,
ja495:41.4	yattha dinnaṁ mahapphalaṁ”.
ja495:42.1	“Aññe dhanassa kāmā hi,
ja495:42.2	heṭṭhāmañce pasakkitā;
ja495:42.3	Rājāno upari nhāyanti,
ja495:42.4	somayāge upaṭṭhite.
ja495:43.1	Malamajjakasamā rāja,
ja495:43.2	Tepi vuccanti brāhmaṇā;
ja495:43.3	Akkhātā te mahārāja,
ja495:43.4	Tādise nipatāmase”.
ja495:44.1	“Apetā te ca brahmaññā,
ja495:44.2	(iti rājā korabyo)
ja495:44.3	Na te vuccanti brāhmaṇā;
ja495:44.4	Aññe vidhura pariyesa,
ja495:44.5	Sīlavante bahussute.
ja495:45.1	Virate methunā dhammā,
ja495:45.2	ye me bhuñjeyyu bhojanaṁ;
ja495:45.3	Dakkhiṇaṁ samma dassāma,
ja495:45.4	yattha dinnaṁ mahapphalaṁ”.
ja495:46.1	“Atthi kho brāhmaṇā deva,
ja495:46.2	sīlavanto bahussutā;
ja495:46.3	Viratā methunā dhammā,
ja495:46.4	ye te bhuñjeyyu bhojanaṁ.
ja495:47.1	Ekañca bhattaṁ bhuñjanti,
ja495:47.2	na ca majjaṁ pivanti te;
ja495:47.3	Akkhātā te mahārāja,
ja495:47.4	tādise nipatāmase”.
ja495:48.1	“Ete kho brāhmaṇā vidhura,
ja495:48.2	Sīlavanto bahussutā;
ja495:48.3	Ete vidhura pariyesa,
ja495:48.4	Khippañca ne nimantayā”ti.
ja495:49.1	Dasabrāhmaṇajātakaṁ dvādasamaṁ.
ja496:0.1	Jātaka
ja496:0.2	Pakiṇṇakanipāta
ja496:0.3	Sālikedāravagga
ja496:0.4	13. Bhikkhāparamparajātaka
ja496:1.1	“Sukhumālarūpaṁ disvā,
ja496:1.2	raṭṭhā vivanamāgataṁ;
ja496:1.3	Kūṭāgāravarūpetaṁ,
ja496:1.4	mahāsayanamupāsitaṁ.
ja496:2.1	Tassa te pemakenāhaṁ,
ja496:2.2	adāsiṁ vaḍḍhamodanaṁ;
ja496:2.3	Sālīnaṁ vicitaṁ bhattaṁ,
ja496:2.4	suciṁ maṁsūpasecanaṁ.
ja496:3.1	Taṁ tvaṁ bhattaṁ paṭiggayha,
ja496:3.2	brāhmaṇassa adāsayi;
ja496:3.3	Attānaṁ anasitvāna,
ja496:3.4	koyaṁ dhammo namatthu te”.
ja496:4.1	“Ācariyo brāhmaṇo mayhaṁ,
ja496:4.2	kiccākiccesu byāvaṭo;
ja496:4.3	Garu ca āmantanīyo ca,
ja496:4.4	dātumarahāmi bhojanaṁ”.
ja496:5.1	“Brāhmaṇaṁ dāni pucchāmi,
ja496:5.2	gotamaṁ rājapūjitaṁ;
ja496:5.3	Rājā te bhattaṁ pādāsi,
ja496:5.4	suciṁ maṁsūpasecanaṁ.
ja496:6.1	Taṁ tvaṁ bhattaṁ paṭiggayha,
ja496:6.2	isissa bhojanaṁ adā;
ja496:6.3	Akhettaññūsi dānassa,
ja496:6.4	koyaṁ dhammo namatthu te”.
ja496:7.1	“Bharāmi puttadāre ca,
ja496:7.2	gharesu gadhito ahaṁ;
ja496:7.3	Bhuñje mānusake kāme,
ja496:7.4	anusāsāmi rājino.
ja496:8.1	Āraññikassa isino,
ja496:8.2	cirarattaṁ tapassino;
ja496:8.3	Vuḍḍhassa bhāvitattassa,
ja496:8.4	dātumarahāmi bhojanaṁ”.
ja496:9.1	“Isiñca dāni pucchāmi,
ja496:9.2	kisaṁ dhamanisanthataṁ;
ja496:9.3	Parūḷhakacchanakhalomaṁ,
ja496:9.4	paṅkadantaṁ rajassiraṁ.
ja496:10.1	Eko araññe viharasi,
ja496:10.2	nāvakaṅkhasi jīvitaṁ;
ja496:10.3	Bhikkhu kena tayā seyyo,
ja496:10.4	yassa tvaṁ bhojanaṁ adā”.
ja496:11.1	“Khaṇantālukalambāni,
ja496:11.2	bilālitakkalāni ca;
ja496:11.3	Dhunaṁ sāmākanīvāraṁ,
ja496:11.4	saṅghāriyaṁ pasāriyaṁ.
ja496:12.1	Sākaṁ bhisaṁ madhuṁ maṁsaṁ,
ja496:12.2	Badarāmalakāni ca;
ja496:12.3	Tāni āharitvā bhuñjāmi,
ja496:12.4	Atthi me so pariggaho.
ja496:13.1	Pacanto apacantassa,
ja496:13.2	amamassa sakiñcano;
ja496:13.3	Anādānassa sādāno,
ja496:13.4	dātumarahāmi bhojanaṁ”.
ja496:14.1	“Bhikkhuñca dāni pucchāmi,
ja496:14.2	tuṇhīmāsīna subbataṁ;
ja496:14.3	Isi te bhattaṁ pādāsi,
ja496:14.4	suciṁ maṁsūpasecanaṁ.
ja496:15.1	Taṁ tvaṁ bhattaṁ paṭiggayha,
ja496:15.2	tuṇhī bhuñjasi ekako;
ja496:15.3	Nāññaṁ kañci nimantesi,
ja496:15.4	koyaṁ dhammo namatthu te”.
ja496:16.1	“Na pacāmi na pācemi,
ja496:16.2	na chindāmi na chedaye;
ja496:16.3	Taṁ maṁ akiñcanaṁ ñatvā,
ja496:16.4	sabbapāpehi ārataṁ.
ja496:17.1	Vāmena bhikkhamādāya,
ja496:17.2	dakkhiṇena kamaṇḍaluṁ;
ja496:17.3	Isi me bhattaṁ pādāsi,
ja496:17.4	suciṁ maṁsūpasecanaṁ.
ja496:18.1	Ete hi dātumarahanti,
ja496:18.2	samamā sapariggahā;
ja496:18.3	Paccanīkamahaṁ maññe,
ja496:18.4	yo dātāraṁ nimantaye”.
ja496:19.1	“Atthāya vata me ajja,
ja496:19.2	idhāgacchi rathesabho;
ja496:19.3	Sohaṁ ajja pajānāmi,
ja496:19.4	yattha dinnaṁ mahapphalaṁ.
ja496:20.1	Raṭṭhesu giddhā rājāno,
ja496:20.2	Kiccākiccesu brāhmaṇā;
ja496:20.3	Isī mūlaphale giddhā,
ja496:20.4	Vippamuttā ca bhikkhavo”ti.
ja496:21.1	Bhikkhāparamparajātakaṁ terasamaṁ.
ja496:22.1	Pakiṇṇakanipātaṁ niṭṭhitaṁ.
ja496:23.1	Tassuddānaṁ
ja496:24.1	Suva kinnara mukka kharājinaso,
ja496:24.2	Bhisajāta mahesi kapotavaro;
ja496:24.3	Atha mora satacchaka vāṇijako,
ja496:24.4	Atha rāja sabrāhmaṇa bhikkhaparanti.
ja497:0.1	Jātaka
ja497:0.2	Vīsatinipāta
ja497:0.3	Mātaṅgavagga
ja497:0.4	1. Mātaṅgajātaka
ja497:1.1	“Kuto nu āgacchasi dummavāsī,
ja497:1.2	Otallako paṁsupisācakova;
ja497:1.3	Saṅkāracoḷaṁ paṭimuñca kaṇṭhe,
ja497:1.4	Ko re tuvaṁ hosi adakkhiṇeyyo”.
ja497:2.1	“Annaṁ tavedaṁ pakataṁ yasassi,
ja497:2.2	Taṁ khajjare bhuñjare piyyare ca;
ja497:2.3	Jānāsi maṁ tvaṁ paradattūpajīviṁ,
ja497:2.4	Uttiṭṭhapiṇḍaṁ labhataṁ sapāko”.
ja497:3.1	“Annaṁ mamedaṁ pakataṁ brāhmaṇānaṁ,
ja497:3.2	Attatthāya saddahato mamedaṁ;
ja497:3.3	Apehi etto kimidhaṭṭhitosi,
ja497:3.4	Na mādisā tuyhaṁ dadanti jamma”.
ja497:4.1	“Thale ca ninne ca vapanti bījaṁ,
ja497:4.2	Anūpakhette phalamāsamānā;
ja497:4.3	Etāya saddhāya dadāhi dānaṁ,
ja497:4.4	Appeva ārādhaye dakkhiṇeyye”.
ja497:5.1	“Khettāni mayhaṁ viditāni loke,
ja497:5.2	Yesāhaṁ bījāni patiṭṭhapemi;
ja497:5.3	Ye brāhmaṇā jātimantūpapannā,
ja497:5.4	Tānīdha khettāni supesalāni”.
ja497:6.1	“Jātimado ca atimānitā ca,
ja497:6.2	Lobho ca doso ca mado ca moho;
ja497:6.3	Ete aguṇā yesu ca santi sabbe,
ja497:6.4	Tānīdha khettāni apesalāni.
ja497:7.1	Jātimado ca atimānitā ca,
ja497:7.2	Lobho ca doso ca mado ca moho;
ja497:7.3	Ete aguṇā yesu na santi sabbe,
ja497:7.4	Tānīdha khettāni supesalāni”.
ja497:8.1	“Kvettha gatā upajotiyo ca,
ja497:8.2	Upajjhāyo ca atha vā gaṇḍakucchi;
ja497:8.3	Imassa daṇḍañca vadhañca datvā,
ja497:8.4	Gale gahetvā khalayātha jammaṁ”.
ja497:9.1	“Giriṁ nakhena khaṇasi,
ja497:9.2	ayo dantehi khādasi;
ja497:9.3	Jātavedaṁ padahasi,
ja497:9.4	yo isiṁ paribhāsasi”.
ja497:10.1	“Idaṁ vatvāna mātaṅgo,
ja497:10.2	isi saccaparakkamo;
ja497:10.3	Antalikkhasmiṁ pakkāmi,
ja497:10.4	brāhmaṇānaṁ udikkhataṁ”.
ja497:11.1	“Āvellitaṁ piṭṭhito uttamaṅgaṁ,
ja497:11.2	Bāhuṁ pasāreti akammaneyyaṁ;
ja497:11.3	Setāni akkhīni yathā matassa,
ja497:11.4	Ko me imaṁ puttamakāsi evaṁ”.
ja497:12.1	“Idhāgamā samaṇo dummavāsī,
ja497:12.2	Otallako paṁsupisācakova;
ja497:12.3	Saṅkāracoḷaṁ paṭimuñca kaṇṭhe,
ja497:12.4	So te imaṁ puttamakāsi evaṁ”.
ja497:13.1	“Katamaṁ disaṁ agamā bhūripañño,
ja497:13.2	Akkhātha me māṇavā etamatthaṁ;
ja497:13.3	Gantvāna taṁ paṭikaremu accayaṁ,
ja497:13.4	Appeva naṁ putta labhemu jīvitaṁ”.
ja497:14.1	“Vehāyasaṁ agamā bhūripañño,
ja497:14.2	Pathaddhuno pannaraseva cando;
ja497:14.3	Api cāpi so purimadisaṁ agacchi,
ja497:14.4	Saccappaṭiñño isi sādhurūpo”.
ja497:15.1	“Āvellitaṁ piṭṭhito uttamaṅgaṁ,
ja497:15.2	Bāhuṁ pasāreti akammaneyyaṁ;
ja497:15.3	Setāni akkhīni yathā matassa,
ja497:15.4	Ko me imaṁ puttamakāsi evaṁ”.
ja497:16.1	“Yakkhā have santi mahānubhāvā,
ja497:16.2	Anvāgatā isayo sādhurūpā;
ja497:16.3	Te duṭṭhacittaṁ kupitaṁ viditvā,
ja497:16.4	Yakkhā hi te puttamakaṁsu evaṁ”.
ja497:17.1	“Yakkhā ca me puttamakaṁsu evaṁ,
ja497:17.2	Tvaññeva me mā kuddho brahmacāri;
ja497:17.3	Tumheva pāde saraṇaṁ gatāsmi,
ja497:17.4	Anvāgatā puttasokena bhikkhu”.
ja497:18.1	“Tadeva hi etarahi ca mayhaṁ,
ja497:18.2	Manopadoso na mamatthi koci;
ja497:18.3	Putto ca te vedamadena matto,
ja497:18.4	Atthaṁ na jānāti adhicca vede”.
ja497:19.1	“Addhā have bhikkhu muhuttakena,
ja497:19.2	Sammuyhateva purisassa saññā;
ja497:19.3	Ekāparādhaṁ khama bhūripañña,
ja497:19.4	Na paṇḍitā kodhabalā bhavanti”.
ja497:20.1	“Idañca mayhaṁ uttiṭṭhapiṇḍaṁ,
ja497:20.2	Tava maṇḍabyo bhuñjatu appapañño;
ja497:20.3	Yakkhā ca te naṁ na viheṭhayeyyuṁ,
ja497:20.4	Putto ca te hessati so arogo”.
ja497:21.1	“Maṇḍabya bālosi parittapañño,
ja497:21.2	Yo puññakhettānamakovidosi;
ja497:21.3	Mahakkasāvesu dadāsi dānaṁ,
ja497:21.4	Kiliṭṭhakammesu asaññatesu.
ja497:22.1	Jaṭā ca kesā ajinā nivatthā,
ja497:22.2	Jarūdapānaṁva mukhaṁ parūḷhaṁ;
ja497:22.3	Pajaṁ imaṁ passatha dummarūpaṁ,
ja497:22.4	Na jaṭājinaṁ tāyati appapaññaṁ.
ja497:23.1	Yesaṁ rāgo ca doso ca,
ja497:23.2	avijjā ca virājitā;
ja497:23.3	Khīṇāsavā arahanto,
ja497:23.4	tesu dinnaṁ mahapphalan”ti.
ja497:24.1	Mātaṅgajātakaṁ paṭhamaṁ.
ja498:0.1	Jātaka
ja498:0.2	Vīsatinipāta
ja498:0.3	Mātaṅgavagga
ja498:0.4	2. Cittasambhūtajātaka
ja498:1.1	“Sabbaṁ narānaṁ saphalaṁ suciṇṇaṁ,
ja498:1.2	Na kammunā kiñcana moghamatthi;
ja498:1.3	Passāmi sambhūtaṁ mahānubhāvaṁ,
ja498:1.4	Sakammunā puññaphalūpapannaṁ.
ja498:2.1	Sabbaṁ narānaṁ saphalaṁ suciṇṇaṁ,
ja498:2.2	Na kammunā kiñcana moghamatthi;
ja498:2.3	Kaccinnu cittassapi evamevaṁ,
ja498:2.4	Iddho mano tassa yathāpi mayhaṁ”.
ja498:3.1	“Sabbaṁ narānaṁ saphalaṁ suciṇṇaṁ,
ja498:3.2	Na kammunā kiñcana moghamatthi;
ja498:3.3	Cittampi jānāhi tatheva deva,
ja498:3.4	Iddho mano tassa yathāpi tuyhaṁ”.
ja498:4.1	“Bhavaṁ nu citto sutamaññato te,
ja498:4.2	Udāhu te koci naṁ etadakkhā;
ja498:4.3	Gāthā sugītā na mamatthi kaṅkhā,
ja498:4.4	Dadāmi te gāmavaraṁ satañca”.
ja498:5.1	“Na cāhaṁ citto sutamaññato me,
ja498:5.2	Isī ca me etamatthaṁ asaṁsi;
ja498:5.3	‘Gantvāna rañño paṭigāhi gāthaṁ,
ja498:5.4	Api te varaṁ attamano dadeyya’”.
ja498:6.1	“Yojentu ve rājarathe,
ja498:6.2	sukate cittasibbane;
ja498:6.3	Kacchaṁ nāgānaṁ bandhatha,
ja498:6.4	gīveyyaṁ paṭimuñcatha.
ja498:7.1	Āhaññantu bherimudiṅgasaṅkhe,
ja498:7.2	Sīghāni yānāni ca yojayantu;
ja498:7.3	Ajjevahaṁ assamaṁ taṁ gamissaṁ,
ja498:7.4	Yattheva dakkhissamisiṁ nisinnaṁ”.
ja498:8.1	“Suladdhalābho vata me ahosi,
ja498:8.2	Gāthā sugītā parisāya majjhe;
ja498:8.3	Svāhaṁ isiṁ sīlavatūpapannaṁ,
ja498:8.4	Disvā patīto sumanohamasmi”.
ja498:9.1	“Āsanaṁ udakaṁ pajjaṁ,
ja498:9.2	paṭiggaṇhātu no bhavaṁ;
ja498:9.3	Agghe bhavantaṁ pucchāma,
ja498:9.4	agghaṁ kurutu no bhavaṁ”.
ja498:10.1	“Rammañca te āvasathaṁ karontu,
ja498:10.2	Nārīgaṇehi paricārayassu;
ja498:10.3	Karohi okāsamanuggahāya,
ja498:10.4	Ubhopimaṁ issariyaṁ karoma”.
ja498:11.1	“Disvā phalaṁ duccaritassa rāja,
ja498:11.2	Atho suciṇṇassa mahāvipākaṁ;
ja498:11.3	Attānameva paṭisaṁyamissaṁ,
ja498:11.4	Na patthaye putta pasuṁ dhanaṁ vā.
ja498:12.1	Dasevimā vassadasā,
ja498:12.2	maccānaṁ idha jīvitaṁ;
ja498:12.3	Apattaññeva taṁ odhiṁ,
ja498:12.4	naḷo chinnova sussati.
ja498:13.1	Tattha kā nandi kā khiḍḍā,
ja498:13.2	kā ratī kā dhanesanā;
ja498:13.3	Kiṁ me puttehi dārehi,
ja498:13.4	rāja muttosmi bandhanā.
ja498:14.1	Sohaṁ evaṁ pajānāmi,
ja498:14.2	maccu me nappamajjati;
ja498:14.3	Antakenādhipannassa,
ja498:14.4	kā ratī kā dhanesanā.
ja498:15.1	Jāti narānaṁ adhamā janinda,
ja498:15.2	Caṇḍālayoni dvipadākaniṭṭhā;
ja498:15.3	Sakehi kammehi supāpakehi,
ja498:15.4	Caṇḍālagabbhe avasimha pubbe.
ja498:16.1	Caṇḍālāhumha avantīsu,
ja498:16.2	migā nerañjaraṁ pati;
ja498:16.3	Ukkusā nammadātīre,
ja498:16.4	tyajja brāhmaṇakhattiyā.
ja498:17.1	Upanīyati jīvitamappamāyu,
ja498:17.2	Jarūpanītassa na santi tāṇā;
ja498:17.3	Karohi pañcāla mameta vākyaṁ,
ja498:17.4	Mākāsi kammāni dukkhudrayāni.
ja498:18.1	Upanīyati jīvitamappamāyu,
ja498:18.2	Jarūpanītassa na santi tāṇā;
ja498:18.3	Karohi pañcāla mameta vākyaṁ,
ja498:18.4	Mākāsi kammāni dukkhapphalāni.
ja498:19.1	Upanīyati jīvitamappamāyu,
ja498:19.2	Jarūpanītassa na santi tāṇā;
ja498:19.3	Karohi pañcāla mameta vākyaṁ,
ja498:19.4	Mākāsi kammāni rajassirāni.
ja498:20.1	Upanīyati jīvitamappamāyu,
ja498:20.2	Vaṇṇaṁ jarā hanti narassa jiyyato;
ja498:20.3	Karohi pañcāla mameta vākyaṁ,
ja498:20.4	Mākāsi kammaṁ nirayūpapattiyā”.
ja498:21.1	“Addhā hi saccaṁ vacanaṁ tavetaṁ,
ja498:21.2	Yathā isī bhāsasi evametaṁ;
ja498:21.3	Kāmā ca me santi anapparūpā,
ja498:21.4	Te duccajā mādisakena bhikkhu.
ja498:22.1	Nāgo yathā paṅkamajjhe byasanno,
ja498:22.2	Passaṁ thalaṁ nābhisambhoti gantuṁ;
ja498:22.3	Evampahaṁ kāmapaṅke byasanno,
ja498:22.4	Na bhikkhuno maggamanubbajāmi.
ja498:23.1	Yathāpi mātā ca pitā ca puttaṁ,
ja498:23.2	Anusāsare kinti sukhī bhaveyya;
ja498:23.3	Evampi maṁ tvaṁ anusāsa bhante,
ja498:23.4	Yathā ciraṁ pecca sukhī bhaveyyaṁ”.
ja498:24.1	“No ce tuvaṁ ussahase janinda,
ja498:24.2	Kāme ime mānusake pahātuṁ;
ja498:24.3	Dhammiṁ baliṁ paṭṭhapayassu rāja,
ja498:24.4	Adhammakāro tava māhu raṭṭhe.
ja498:25.1	Dūtā vidhāvantu disā catasso,
ja498:25.2	Nimantakā samaṇabrāhmaṇānaṁ;
ja498:25.3	Te annapānena upaṭṭhahassu,
ja498:25.4	Vatthena senāsanapaccayena ca.
ja498:26.1	Annena pānena pasannacitto,
ja498:26.2	Santappaya samaṇabrāhmaṇe ca;
ja498:26.3	Datvā ca bhutvā ca yathānubhāvaṁ,
ja498:26.4	Anindito saggamupehi ṭhānaṁ.
ja498:27.1	Sace ca taṁ rāja mado saheyya,
ja498:27.2	Nārīgaṇehi paricārayantaṁ;
ja498:27.3	Imameva gāthaṁ manasī karohi,
ja498:27.4	Bhāsesi cenaṁ parisāya majjhe.
ja498:28.1	Abbhokāsasayo jantu,
ja498:28.2	vajantyā khīrapāyito;
ja498:28.3	Parikiṇṇo suvānehi,
ja498:28.4	svājja rājāti vuccatī”ti.
ja498:29.1	Cittasambhūtajātakaṁ dutiyaṁ.
ja499:0.1	Jātaka
ja499:0.2	Vīsatinipāta
ja499:0.3	Mātaṅgavagga
ja499:0.4	3. Sivijātaka
ja499:1.1	“Dūre apassaṁ therova,
ja499:1.2	cakkhuṁ yācitumāgato;
ja499:1.3	Ekanettā bhavissāma,
ja499:1.4	cakkhuṁ me dehi yācito”.
ja499:2.1	“Kenānusiṭṭho idha māgatosi,
ja499:2.2	Vanibbaka cakkhupathāni yācituṁ;
ja499:2.3	Suduccajaṁ yācasi uttamaṅgaṁ,
ja499:2.4	Yamāhu nettaṁ purisena duccajaṁ”.
ja499:3.1	“Yamāhu devesu sujampatīti,
ja499:3.2	Maghavāti naṁ āhu manussaloke;
ja499:3.3	Tenānusiṭṭho idha māgatosmi,
ja499:3.4	Vanibbako cakkhupathāni yācituṁ.
ja499:4.1	Vanibbato mayha vaniṁ anuttaraṁ,
ja499:4.2	Dadāhi te cakkhupathāni yācito;
ja499:4.3	Dadāhi me cakkhupathaṁ anuttaraṁ,
ja499:4.4	Yamāhu nettaṁ purisena duccajaṁ”.
ja499:5.1	“Yena atthena āgacchi,
ja499:5.2	yamatthamabhipatthayaṁ;
ja499:5.3	Te te ijjhantu saṅkappā,
ja499:5.4	labha cakkhūni brāhmaṇa.
ja499:6.1	Ekaṁ te yācamānassa,
ja499:6.2	Ubhayāni dadāmahaṁ;
ja499:6.3	Sa cakkhumā gaccha janassa pekkhato,
ja499:6.4	Yadicchase tvaṁ tadate samijjhatu”.
ja499:7.1	“Mā no deva adā cakkhuṁ,
ja499:7.2	mā no sabbe parākari;
ja499:7.3	Dhanaṁ dehi mahārāja,
ja499:7.4	muttā veḷuriyā bahū.
ja499:8.1	Yutte deva rathe dehi,
ja499:8.2	ājānīye calaṅkate;
ja499:8.3	Nāge dehi mahārāja,
ja499:8.4	hemakappanavāsase.
ja499:9.1	Yathā taṁ sivayo sabbe,
ja499:9.2	sayoggā sarathā sadā;
ja499:9.3	Samantā parikireyyuṁ,
ja499:9.4	evaṁ dehi rathesabha”.
ja499:10.1	“Yo ve dassanti vatvāna,
ja499:10.2	adāne kurute mano;
ja499:10.3	Bhūmyaṁ so patitaṁ pāsaṁ,
ja499:10.4	gīvāyaṁ paṭimuñcati.
ja499:11.1	Yo ve dassanti vatvāna,
ja499:11.2	adāne kurute mano;
ja499:11.3	Pāpā pāpataro hoti,
ja499:11.4	sampatto yamasādhanaṁ.
ja499:12.1	Yañhi yāce tañhi dade,
ja499:12.2	yaṁ na yāce na taṁ dade;
ja499:12.3	Svāhaṁ tameva dassāmi,
ja499:12.4	yaṁ maṁ yācati brāhmaṇo”.
ja499:13.1	“Āyuṁ nu vaṇṇaṁ nu sukhaṁ balaṁ nu,
ja499:13.2	Kiṁ patthayāno nu janinda desi;
ja499:13.3	Kathañhi rājā sivinaṁ anuttaro,
ja499:13.4	Cakkhūni dajjā paralokahetu”.
ja499:14.1	“Na vāhametaṁ yasasā dadāmi,
ja499:14.2	Na puttamicche na dhanaṁ na raṭṭhaṁ;
ja499:14.3	Satañca dhammo carito purāṇo,
ja499:14.4	Icceva dāne ramate mano mama”.
ja499:14.5	(…)
ja499:15.1	“Sakhā ca mitto ca mamāsi sīvika,
ja499:15.2	Susikkhito sādhu karohi me vaco;
ja499:15.3	Uddharitvā cakkhūni mamaṁ jigīsato,
ja499:15.4	Hatthesu ṭhapehi vanibbakassa”.
ja499:16.1	Codito sivirājena,
ja499:16.2	sīviko vacanaṅkaro;
ja499:16.3	Rañño cakkhūnuddharitvā,
ja499:16.4	brāhmaṇassūpanāmayi;
ja499:16.5	Sacakkhu brāhmaṇo āsi,
ja499:16.6	andho rājā upāvisi.
ja499:17.1	Tato so katipāhassa,
ja499:17.2	uparūḷhesu cakkhusu;
ja499:17.3	Sūtaṁ āmantayī rājā,
ja499:17.4	sivīnaṁ raṭṭhavaḍḍhano.
ja499:18.1	“Yojehi sārathi yānaṁ,
ja499:18.2	yuttañca paṭivedaya;
ja499:18.3	Uyyānabhūmiṁ gacchāma,
ja499:18.4	pokkharañño vanāni ca”.
ja499:19.1	So ca pokkharaṇītīre,
ja499:19.2	pallaṅkena upāvisi;
ja499:19.3	Tassa sakko pāturahu,
ja499:19.4	devarājā sujampati.
ja499:20.1	“Sakkohamasmi devindo,
ja499:20.2	āgatosmi tavantike;
ja499:20.3	Varaṁ varassu rājīsi,
ja499:20.4	yaṁ kiñci manasicchasi”.
ja499:21.1	“Pahūtaṁ me dhanaṁ sakka,
ja499:21.2	balaṁ koso canappako;
ja499:21.3	Andhassa me sato dāni,
ja499:21.4	maraṇaññeva ruccati”.
ja499:22.1	“Yāni saccāni dvipadinda,
ja499:22.2	tāni bhāsassu khattiya;
ja499:22.3	Saccaṁ te bhaṇamānassa,
ja499:22.4	puna cakkhu bhavissati”.
ja499:23.1	“Ye maṁ yācitumāyanti,
ja499:23.2	nānāgottā vanibbakā;
ja499:23.3	Yopi maṁ yācate tattha,
ja499:23.4	sopi me manaso piyo;
ja499:23.5	Etena saccavajjena,
ja499:23.6	cakkhu me upapajjatha.
ja499:24.1	Yaṁ maṁ so yācituṁ āgā,
ja499:24.2	dehi cakkhunti brāhmaṇo;
ja499:24.3	Tassa cakkhūni pādāsiṁ,
ja499:24.4	brāhmaṇassa vanibbato.
ja499:25.1	Bhiyyo maṁ āvisī pīti,
ja499:25.2	somanassañcanappakaṁ;
ja499:25.3	Etena saccavajjena,
ja499:25.4	dutiyaṁ me upapajjatha”.
ja499:26.1	“Dhammena bhāsitā gāthā,
ja499:26.2	sivīnaṁ raṭṭhavaḍḍhana;
ja499:26.3	Etāni tava nettāni,
ja499:26.4	dibbāni paṭidissare.
ja499:27.1	Tirokuṭṭaṁ tiroselaṁ,
ja499:27.2	samatiggayha pabbataṁ;
ja499:27.3	Samantā yojanasataṁ,
ja499:27.4	dassanaṁ anubhontu te”.
ja499:28.1	“Ko nīdha vittaṁ na dadeyya yācito,
ja499:28.2	Api visiṭṭhaṁ supiyampi attano;
ja499:28.3	Tadiṅgha sabbe sivayo samāgatā,
ja499:28.4	Dibbāni nettāni mamajja passatha.
ja499:29.1	Tirokuṭṭaṁ tiroselaṁ,
ja499:29.2	samatiggayha pabbataṁ;
ja499:29.3	Samantā yojanasataṁ,
ja499:29.4	dassanaṁ anubhonti me.
ja499:30.1	Na cāgamattā paramatthi kiñci,
ja499:30.2	Maccānaṁ idha jīvite;
ja499:30.3	Datvāna mānusaṁ cakkhuṁ,
ja499:30.4	Laddhaṁ me cakkhuṁ amānusaṁ.
ja499:31.1	Etampi disvā sivayo,
ja499:31.2	Detha dānāni bhuñjatha;
ja499:31.3	Datvā ca bhutvā ca yathānubhāvaṁ,
ja499:31.4	Aninditā saggamupetha ṭhānan”ti.
ja499:32.1	Sivijātakaṁ tatiyaṁ.
ja500:0.1	Jātaka
ja500:0.2	Vīsatinipāta
ja500:0.3	Mātaṅgavagga
ja500:0.4	4. Sirīmantajātaka
ja500:1.1	“Paññāyupetaṁ siriyā vihīnaṁ,
ja500:1.2	Yasassinaṁ vāpi apetapaññaṁ;
ja500:1.3	Pucchāmi taṁ senaka etamatthaṁ,
ja500:1.4	Kamettha seyyo kusalā vadanti”.
ja500:2.1	“Dhīrā ca bālā ca have janinda,
ja500:2.2	Sippūpapannā ca asippino ca;
ja500:2.3	Sujātimantopi ajātimassa,
ja500:2.4	Yasassino pesakarā bhavanti;
ja500:2.5	Etampi disvāna ahaṁ vadāmi,
ja500:2.6	Pañño nihīno sirīmāva seyyo”.
ja500:3.1	“Tuvampi pucchāmi anomapañña,
ja500:3.2	Mahosadha kevaladhammadassi;
ja500:3.3	Bālaṁ yasassiṁ paṇḍitaṁ appabhogaṁ,
ja500:3.4	Kamettha seyyo kusalā vadanti”.
ja500:4.1	“Pāpāni kammāni karoti bālo,
ja500:4.2	Idhameva seyyo iti maññamāno;
ja500:4.3	Idhalokadassī paralokamadassī,
ja500:4.4	Ubhayattha bālo kalimaggahesi;
ja500:4.5	Etampi disvāna ahaṁ vadāmi,
ja500:4.6	Paññova seyyo na yasassi bālo”.
ja500:5.1	“Na sippametaṁ vidadhāti bhogaṁ,
ja500:5.2	Na bandhuvā na sarīravaṇṇo yo;
ja500:5.3	Passeḷamūgaṁ sukhamedhamānaṁ,
ja500:5.4	Sirī hi naṁ bhajate goravindaṁ;
ja500:5.5	Etampi disvāna ahaṁ vadāmi,
ja500:5.6	Pañño nihīno sirīmāva seyyo”.
ja500:6.1	“Laddhā sukhaṁ majjati appapañño,
ja500:6.2	Dukkhena phuṭṭhopi pamohameti;
ja500:6.3	Āgantunā dukkhasukhena phuṭṭho,
ja500:6.4	Pavedhati vāricarova ghamme;
ja500:6.5	Etampi disvāna ahaṁ vadāmi,
ja500:6.6	Paññova seyyo na yasassi bālo”.
ja500:7.1	“Dumaṁ yathā sāduphalaṁ araññe,
ja500:7.2	Samantato samabhisaranti pakkhī;
ja500:7.3	Evampi aḍḍhaṁ sadhanaṁ sabhogaṁ,
ja500:7.4	Bahujjano bhajati atthahetu;
ja500:7.5	Etampi disvāna ahaṁ vadāmi,
ja500:7.6	Pañño nihīno sirīmāva seyyo”.
ja500:8.1	“Na sādhu balavā bālo,
ja500:8.2	Sāhasā vindate dhanaṁ;
ja500:8.3	Kandantametaṁ dummedhaṁ,
ja500:8.4	Kaḍḍhanti nirayaṁ bhusaṁ;
ja500:8.5	Etampi disvāna ahaṁ vadāmi,
ja500:8.6	Paññova seyyo na yasassi bālo”.
ja500:9.1	“Yā kāci najjo gaṅgamabhissavanti,
ja500:9.2	Sabbāva tā nāmagottaṁ jahanti;
ja500:9.3	Gaṅgā samuddaṁ paṭipajjamānā,
ja500:9.4	Na khāyate iddhiṁ paññopi loke;
ja500:9.5	Etampi disvāna ahaṁ vadāmi,
ja500:9.6	Pañño nihīno sirīmāva seyyo”.
ja500:10.1	“Yametamakkhā udadhiṁ mahantaṁ,
ja500:10.2	Savanti najjo sabbakālamasaṅkhyaṁ;
ja500:10.3	So sāgaro niccamuḷāravego,
ja500:10.4	Velaṁ na acceti mahāsamuddo.
ja500:11.1	Evampi bālassa pajappitāni,
ja500:11.2	Paññaṁ na acceti sirī kadāci;
ja500:11.3	Etampi disvāna ahaṁ vadāmi,
ja500:11.4	Paññova seyyo na yasassi bālo”.
ja500:12.1	“Asaññato cepi paresamatthaṁ,
ja500:12.2	Bhaṇāti sandhānagato yasassī;
ja500:12.3	Tasseva taṁ rūhati ñātimajjhe,
ja500:12.4	Sirī hi naṁ kārayate na paññā;
ja500:12.5	Etampi disvāna ahaṁ vadāmi,
ja500:12.6	Pañño nihīno sirīmāva seyyo”.
ja500:13.1	“Parassa vā attano vāpi hetu,
ja500:13.2	Bālo musā bhāsati appapañño;
ja500:13.3	So nindito hoti sabhāya majjhe,
ja500:13.4	Pacchāpi so duggatigāmī hoti;
ja500:13.5	Etampi disvāna ahaṁ vadāmi,
ja500:13.6	Paññova seyyo na yasassi bālo”.
ja500:14.1	“Atthampi ce bhāsati bhūripañño,
ja500:14.2	Anāḷhiyo appadhano daliddo;
ja500:14.3	Na tassa taṁ rūhati ñātimajjhe,
ja500:14.4	Sirī ca paññāṇavato na hoti;
ja500:14.5	Etampi disvāna ahaṁ vadāmi,
ja500:14.6	Pañño nihīno sirīmāva seyyo”.
ja500:15.1	“Parassa vā attano vāpi hetu,
ja500:15.2	Na bhāsati alikaṁ bhūripañño;
ja500:15.3	So pūjito hoti sabhāya majjhe,
ja500:15.4	Pacchāpi so suggatigāmī hoti;
ja500:15.5	Etampi disvāna ahaṁ vadāmi,
ja500:15.6	Paññova seyyo na yasassi bālo”.
ja500:16.1	“Hatthī gavassā maṇikuṇḍalā ca,
ja500:16.2	Thiyo ca iddhesu kulesu jātā;
ja500:16.3	Sabbāva tā upabhogā bhavanti,
ja500:16.4	Iddhassa posassa aniddhimanto;
ja500:16.5	Etampi disvāna ahaṁ vadāmi,
ja500:16.6	Pañño nihīno sirīmāva seyyo”.
ja500:17.1	“Asaṁvihitakammantaṁ,
ja500:17.2	Bālaṁ dummedhamantinaṁ;
ja500:17.3	Sirī jahati dummedhaṁ,
ja500:17.4	Jiṇṇaṁva urago tacaṁ;
ja500:17.5	Etampi disvāna ahaṁ vadāmi,
ja500:17.6	Paññova seyyo na yasassi bālo”.
ja500:18.1	“Pañca paṇḍitā mayaṁ bhaddante,
ja500:18.2	Sabbe pañjalikā upaṭṭhitā;
ja500:18.3	Tvaṁ no abhibhuyya issarosi,
ja500:18.4	Sakkova bhūtapati devarājā;
ja500:18.5	Etampi disvāna ahaṁ vadāmi,
ja500:18.6	Pañño nihīno sirīmāva seyyo”.
ja500:19.1	“Dāsova paññassa yasassi bālo,
ja500:19.2	Atthesu jātesu tathāvidhesu;
ja500:19.3	Yaṁ paṇḍito nipuṇaṁ saṁvidheti,
ja500:19.4	Sammohamāpajjati tattha bālo;
ja500:19.5	Etampi disvāna ahaṁ vadāmi,
ja500:19.6	Paññova seyyo na yasassi bālo.
ja500:20.1	Addhā hi paññāva sataṁ pasatthā,
ja500:20.2	Kantā sirī bhogaratā manussā;
ja500:20.3	Ñāṇañca buddhānamatulyarūpaṁ,
ja500:20.4	Paññaṁ na acceti sirī kadāci”.
ja500:21.1	“Yaṁ taṁ apucchimha akittayī no,
ja500:21.2	Mahosadha kevaladhammadassī;
ja500:21.3	Gavaṁ sahassaṁ usabhañca nāgaṁ,
ja500:21.4	Ājaññayutte ca rathe dasa ime;
ja500:21.5	Pañhassa veyyākaraṇena tuṭṭho,
ja500:21.6	Dadāmi te gāmavarāni soḷasā”ti.
ja500:22.1	Sirīmantajātakaṁ catutthaṁ.
ja501:0.1	Jātaka
ja501:0.2	Vīsatinipāta
ja501:0.3	Mātaṅgavagga
ja501:0.4	5. Rohaṇamigajātaka
ja501:1.1	“Ete yūthā patiyanti,
ja501:1.2	bhītā maraṇassa cittaka;
ja501:1.3	Gaccha tuvampi mākaṅkhi,
ja501:1.4	jīvissanti tayā saha”.
ja501:2.1	“Nāhaṁ rohaṇa gacchāmi,
ja501:2.2	hadayaṁ me avakassati;
ja501:2.3	Na taṁ ahaṁ jahissāmi,
ja501:2.4	idha hissāmi jīvitaṁ”.
ja501:3.1	“Te hi nūna marissanti,
ja501:3.2	andhā apariṇāyakā;
ja501:3.3	Gaccha tuvampi mākaṅkhi,
ja501:3.4	jīvissanti tayā saha”.
ja501:4.1	“Nāhaṁ rohaṇa gacchāmi,
ja501:4.2	hadayaṁ me avakassati;
ja501:4.3	Na taṁ baddhaṁ jahissāmi,
ja501:4.4	idha hissāmi jīvitaṁ”.
ja501:5.1	“Gaccha bhīru palāyassu,
ja501:5.2	kūṭe baddhosmi āyase;
ja501:5.3	Gaccha tuvampi mākaṅkhi,
ja501:5.4	jīvissanti tayā saha”.
ja501:6.1	“Nāhaṁ rohaṇa gacchāmi,
ja501:6.2	hadayaṁ me avakassati;
ja501:6.3	Na taṁ ahaṁ jahissāmi,
ja501:6.4	idha hissāmi jīvitaṁ”.
ja501:7.1	“Te hi nūna marissanti,
ja501:7.2	andhā apariṇāyakā;
ja501:7.3	Gaccha tuvampi mākaṅkhi,
ja501:7.4	jīvissanti tayā saha”.
ja501:8.1	“Nāhaṁ rohaṇa gacchāmi,
ja501:8.2	hadayaṁ me avakassati;
ja501:8.3	Na taṁ baddhaṁ jahissāmi,
ja501:8.4	idha hissāmi jīvitaṁ”.
ja501:9.1	“Ayaṁ so luddako eti,
ja501:9.2	luddarūpo sahāvudho;
ja501:9.3	Yo no vadhissati ajja,
ja501:9.4	usunā sattiyā api”.
ja501:10.1	“Sā muhuttaṁ palāyitvā,
ja501:10.2	bhayaṭṭā bhayatajjitā;
ja501:10.3	Sudukkaraṁ akarā bhīru,
ja501:10.4	maraṇāyūpanivattatha”.
ja501:11.1	“Kiṁ nu teme migā honti,
ja501:11.2	muttā baddhaṁ upāsare;
ja501:11.3	Na taṁ cajitumicchanti,
ja501:11.4	jīvitassapi kāraṇā”.
ja501:12.1	“Bhātaro honti me ludda,
ja501:12.2	sodariyā ekamātukā;
ja501:12.3	Na maṁ cajitumicchanti,
ja501:12.4	jīvitassapi kāraṇā”.
ja501:13.1	“Te hi nūna marissanti,
ja501:13.2	andhā apariṇāyakā;
ja501:13.3	Pañcannaṁ jīvitaṁ dehi,
ja501:13.4	bhātaraṁ muñca luddaka”.
ja501:14.1	“So vo ahaṁ pamokkhāmi,
ja501:14.2	mātāpettibharaṁ migaṁ;
ja501:14.3	Nandantu mātāpitaro,
ja501:14.4	muttaṁ disvā mahāmigaṁ”.
ja501:15.1	“Evaṁ luddaka nandassu,
ja501:15.2	saha sabbehi ñātibhi;
ja501:15.3	Yathāhamajja nandāmi,
ja501:15.4	muttaṁ disvā mahāmigaṁ”.
ja501:16.1	“Kathaṁ tvaṁ pamokkho āsi,
ja501:16.2	Upanītasmi jīvite;
ja501:16.3	Kathaṁ putta amocesi,
ja501:16.4	Kūṭapāsamha luddako”.
ja501:17.1	“Bhaṇaṁ kaṇṇasukhaṁ vācaṁ,
ja501:17.2	hadayaṅgaṁ hadayassitaṁ;
ja501:17.3	Subhāsitāhi vācāhi,
ja501:17.4	cittako maṁ amocayi.
ja501:18.1	Bhaṇaṁ kaṇṇasukhaṁ vācaṁ,
ja501:18.2	hadayaṅgaṁ hadayassitaṁ;
ja501:18.3	Subhāsitāhi vācāhi,
ja501:18.4	sutanā maṁ amocayi.
ja501:19.1	Sutvā kaṇṇasukhaṁ vācaṁ,
ja501:19.2	hadayaṅgaṁ hadayassitaṁ;
ja501:19.3	Subhāsitāni sutvāna,
ja501:19.4	luddako maṁ amocayi”.
ja501:20.1	“Evaṁ ānandito hotu,
ja501:20.2	saha dārehi luddako;
ja501:20.3	Yathā mayajja nandāma,
ja501:20.4	disvā rohaṇamāgataṁ”.
ja501:21.1	“Nanu tvaṁ avaca ludda,
ja501:21.2	‘migacammāni āhariṁ’;
ja501:21.3	Atha kena nu vaṇṇena,
ja501:21.4	migacammāni nāhari”.
ja501:22.1	“Āgamā ceva hatthatthaṁ,
ja501:22.2	kūṭapāsañca so migo;
ja501:22.3	Abajjhi taṁ migarājaṁ,
ja501:22.4	tañca muttā upāsare.
ja501:23.1	Tassa me ahu saṁvego,
ja501:23.2	abbhuto lomahaṁsano;
ja501:23.3	Imañcāhaṁ migaṁ haññe,
ja501:23.4	ajja hissāmi jīvitaṁ”.
ja501:24.1	“Kīdisā te migā ludda,
ja501:24.2	kīdisā dhammikā migā;
ja501:24.3	Kathaṁvaṇṇā kathaṁsīlā,
ja501:24.4	bāḷhaṁ kho ne pasaṁsasi”.
ja501:25.1	“Odātasiṅgā sucivālā,
ja501:25.2	jātarūpatacūpamā;
ja501:25.3	Pādā lohitakā tesaṁ,
ja501:25.4	añjitakkhā manoramā”.
ja501:26.1	“Edisā te migā deva,
ja501:26.2	edisā dhammikā migā;
ja501:26.3	Mātāpettibharā deva,
ja501:26.4	na te so abhihārituṁ”.
ja501:27.1	“Dammi nikkhasataṁ ludda,
ja501:27.2	thūlañca maṇikuṇḍalaṁ;
ja501:27.3	Catussadañca pallaṅkaṁ,
ja501:27.4	umāpupphasarinnibhaṁ.
ja501:28.1	Dve ca sādisiyo bhariyā,
ja501:28.2	usabhañca gavaṁ sataṁ;
ja501:28.3	Dhammena rajjaṁ kāressaṁ,
ja501:28.4	bahukāro mesi luddaka.
ja501:29.1	Kasivāṇijjā iṇadānaṁ,
ja501:29.2	uñchācariyā ca luddaka;
ja501:29.3	Etena dāraṁ posehi,
ja501:29.4	mā pāpaṁ akarī punāti”.
ja501:30.1	Rohaṇamigajātakaṁ pañcamaṁ.
ja502:0.1	Jātaka
ja502:0.2	Vīsatinipāta
ja502:0.3	Mātaṅgavagga
ja502:0.4	6. Cūḷahaṁsajātaka
ja502:1.1	“Ete haṁsā pakkamanti,
ja502:1.2	vakkaṅgā bhayameritā;
ja502:1.3	Harittaca hemavaṇṇa,
ja502:1.4	kāmaṁ sumukha pakkama.
ja502:2.1	Ohāya maṁ ñātigaṇā,
ja502:2.2	ekaṁ pāsavasaṁ gataṁ;
ja502:2.3	Anapekkhamānā gacchanti,
ja502:2.4	kiṁ eko avahiyyasi.
ja502:3.1	Pateva patataṁ seṭṭha,
ja502:3.2	natthi baddhe sahāyatā;
ja502:3.3	Mā anīghāya hāpesi,
ja502:3.4	kāmaṁ sumukha pakkama”.
ja502:4.1	“Nāhaṁ ‘dukkhapareto’ti,
ja502:4.2	dhataraṭṭha tuvaṁ jahe;
ja502:4.3	Jīvitaṁ maraṇaṁ vā me,
ja502:4.4	tayā saddhiṁ bhavissati”.
ja502:5.1	“Etadariyassa kalyāṇaṁ,
ja502:5.2	yaṁ tvaṁ sumukha bhāsasi;
ja502:5.3	Tañca vīmaṁsamānohaṁ,
ja502:5.4	‘patatetaṁ’ avassajiṁ”.
ja502:6.1	“Apadena padaṁ yāti,
ja502:6.2	antalikkhacaro dijo;
ja502:6.3	Ārā pāsaṁ na bujjhi tvaṁ,
ja502:6.4	haṁsānaṁ pavaruttama”.
ja502:7.1	“Yadā parābhavo hoti,
ja502:7.2	poso jīvitasaṅkhaye;
ja502:7.3	Atha jālañca pāsañca,
ja502:7.4	āsajjāpi na bujjhati”.
ja502:8.1	“Ete haṁsā pakkamanti,
ja502:8.2	vakkaṅgā bhayameritā;
ja502:8.3	Harittaca hemavaṇṇa,
ja502:8.4	tvaññeva avahiyyasi.
ja502:9.1	Ete bhutvā ca pitvā ca,
ja502:9.2	pakkamanti vihaṅgamā;
ja502:9.3	Anapekkhamānā vakkaṅgā,
ja502:9.4	tvaññeveko upāsasi.
ja502:10.1	Kiṁ nu tyāyaṁ dijo hoti,
ja502:10.2	mutto baddhaṁ upāsasi;
ja502:10.3	Ohāya sakuṇā yanti,
ja502:10.4	kiṁ eko avahiyyasi”.
ja502:11.1	“Rājā me so dijo mitto,
ja502:11.2	sakhā pāṇasamo ca me;
ja502:11.3	Neva naṁ vijahissāmi,
ja502:11.4	yāva kālassa pariyāyaṁ”.
ja502:12.1	“Yo ca tvaṁ sakhino hetu,
ja502:12.2	pāṇaṁ cajitumicchasi;
ja502:12.3	So te sahāyaṁ muñcāmi,
ja502:12.4	hotu rājā tavānugo”.
ja502:13.1	“Evaṁ luddaka nandassu,
ja502:13.2	saha sabbehi ñātibhi;
ja502:13.3	Yathāhamajja nandāmi,
ja502:13.4	muttaṁ disvā dijādhipaṁ”.
ja502:14.1	“Kaccinnu bhoto kusalaṁ,
ja502:14.2	kacci bhoto anāmayaṁ;
ja502:14.3	Kacci raṭṭhamidaṁ phītaṁ,
ja502:14.4	dhammena manusāsasi”.
ja502:15.1	“Kusalañceva me haṁsa,
ja502:15.2	atho haṁsa anāmayaṁ;
ja502:15.3	Atho raṭṭhamidaṁ phītaṁ,
ja502:15.4	dhammena manusāsahaṁ”.
ja502:16.1	“Kacci bhoto amaccesu,
ja502:16.2	doso koci na vijjati;
ja502:16.3	Kacci ārā amittā te,
ja502:16.4	chāyā dakkhiṇatoriva”.
ja502:17.1	“Athopi me amaccesu,
ja502:17.2	doso koci na vijjati;
ja502:17.3	Atho ārā amittā me,
ja502:17.4	chāyā dakkhiṇatoriva”.
ja502:18.1	“Kacci te sādisī bhariyā,
ja502:18.2	assavā piyabhāṇinī;
ja502:18.3	Puttarūpayasūpetā,
ja502:18.4	tava chandavasānugā”.
ja502:19.1	“Atho me sādisī bhariyā,
ja502:19.2	assavā piyabhāṇinī;
ja502:19.3	Puttarūpayasūpetā,
ja502:19.4	mama chandavasānugā”.
ja502:20.1	“Kacci te bahavo puttā,
ja502:20.2	sujātā raṭṭhavaḍḍhana;
ja502:20.3	Paññājavena sampannā,
ja502:20.4	sammodanti tato tato”.
ja502:21.1	“Satameko ca me puttā,
ja502:21.2	dhataraṭṭha mayā sutā;
ja502:21.3	Tesaṁ tvaṁ kiccamakkhāhi,
ja502:21.4	nāvarujjhanti te vaco”.
ja502:22.1	“Upapannopi ce hoti,
ja502:22.2	jātiyā vinayena vā;
ja502:22.3	Atha pacchā kurute yogaṁ,
ja502:22.4	kicche āpāsu sīdati.
ja502:23.1	Tassa saṁhīrapaññassa,
ja502:23.2	vivaro jāyate mahā;
ja502:23.3	Rattimandhova rūpāni,
ja502:23.4	thūlāni manupassati.
ja502:24.1	Asāre sārayogaññū,
ja502:24.2	matiṁ na tveva vindati;
ja502:24.3	Sarabhova giriduggasmiṁ,
ja502:24.4	antarāyeva sīdati.
ja502:25.1	Hīnajaccopi ce hoti,
ja502:25.2	uṭṭhātā dhitimā naro;
ja502:25.3	Ācārasīlasampanno,
ja502:25.4	nise aggīva bhāsati.
ja502:26.1	Etaṁ me upamaṁ katvā,
ja502:26.2	putte vijjāsu vācaya;
ja502:26.3	Saṁvirūḷhetha medhāvī,
ja502:26.4	khette bījaṁva vuṭṭhiyā”ti.
ja502:27.1	Cūḷahaṁsajātakaṁ chaṭṭhaṁ.
ja503:0.1	Jātaka
ja503:0.2	Vīsatinipāta
ja503:0.3	Mātaṅgavagga
ja503:0.4	7. Sattigumbajātaka
ja503:1.1	Migaluddo mahārājā,
ja503:1.2	pañcālānaṁ rathesabho;
ja503:1.3	Nikkhanto saha senāya,
ja503:1.4	ogaṇo vanamāgamā.
ja503:2.1	Tatthaddasā araññasmiṁ,
ja503:2.2	takkarānaṁ kuṭiṁ kataṁ;
ja503:2.3	Tassā kuṭiyā nikkhamma,
ja503:2.4	suvo luddāni bhāsati.
ja503:3.1	“Sampannavāhano poso,
ja503:3.2	yuvā sammaṭṭhakuṇḍalo;
ja503:3.3	Sobhati lohituṇhīso,
ja503:3.4	divā sūriyova bhāsati.
ja503:4.1	Majjhanhike sampatike,
ja503:4.2	sutto rājā sasārathi;
ja503:4.3	Handassābharaṇaṁ sabbaṁ,
ja503:4.4	gaṇhāma sāhasā mayaṁ.
ja503:5.1	Nisīthepi raho dāni,
ja503:5.2	Sutto rājā sasārathi;
ja503:5.3	Ādāya vatthaṁ maṇikuṇḍalañca,
ja503:5.4	Hantvāna sākhāhi avattharāma”.
ja503:6.1	“Kiṁ nu ummattarūpova,
ja503:6.2	sattigumba pabhāsasi;
ja503:6.3	Durāsadā hi rājāno,
ja503:6.4	aggi pajjalito yathā”.
ja503:7.1	“Atha tvaṁ patikolamba,
ja503:7.2	matto thullāni gajjasi;
ja503:7.3	Mātari mayhaṁ naggāya,
ja503:7.4	kiṁ nu tvaṁ vijigucchase”.
ja503:8.1	“Uṭṭhehi samma taramāno,
ja503:8.2	rathaṁ yojehi sārathi;
ja503:8.3	Sakuṇo me na ruccati,
ja503:8.4	aññaṁ gacchāma assamaṁ”.
ja503:9.1	“Yutto ratho mahārāja,
ja503:9.2	yutto ca balavāhano;
ja503:9.3	Adhitiṭṭha mahārāja,
ja503:9.4	aññaṁ gacchāma assamaṁ”.
ja503:10.1	“Ko numeva gatā sabbe,
ja503:10.2	ye asmiṁ paricārakā;
ja503:10.3	Esa gacchati pañcālo,
ja503:10.4	mutto tesaṁ adassanā.
ja503:11.1	Kodaṇḍakāni gaṇhatha,
ja503:11.2	sattiyo tomarāni ca;
ja503:11.3	Esa gacchati pañcālo,
ja503:11.4	mā vo muñcittha jīvataṁ”.
ja503:12.1	Athāparo paṭinandittha,
ja503:12.2	suvo lohitatuṇḍako;
ja503:12.3	“Svāgataṁ te mahārāja,
ja503:12.4	atho te adurāgataṁ;
ja503:12.5	Issarosi anuppatto,
ja503:12.6	yaṁ idhatthi pavedaya.
ja503:13.1	Tindukāni piyālāni,
ja503:13.2	madhuke kāsumāriyo;
ja503:13.3	Phalāni khuddakappāni,
ja503:13.4	bhuñja rāja varaṁ varaṁ.
ja503:14.1	Idampi pānīyaṁ sītaṁ,
ja503:14.2	ābhataṁ girigabbharā;
ja503:14.3	Tato piva mahārāja,
ja503:14.4	sace tvaṁ abhikaṅkhasi.
ja503:15.1	Araññaṁ uñchāya gatā,
ja503:15.2	ye asmiṁ paricārakā;
ja503:15.3	Sayaṁ uṭṭhāya gaṇhavho,
ja503:15.4	hatthā me natthi dātave”.
ja503:16.1	“Bhaddako vatayaṁ pakkhī,
ja503:16.2	dijo paramadhammiko;
ja503:16.3	Atheso itaro pakkhī,
ja503:16.4	suvo luddāni bhāsati.
ja503:17.1	‘Etaṁ hanatha bandhatha,
ja503:17.2	Mā vo muñcittha jīvataṁ’;
ja503:17.3	Iccevaṁ vilapantassa,
ja503:17.4	Sotthiṁ pattosmi assamaṁ”.
ja503:18.1	“Bhātarosma mahārāja,
ja503:18.2	sodariyā ekamātukā;
ja503:18.3	Ekarukkhasmiṁ saṁvaḍḍhā,
ja503:18.4	nānākhettagatā ubho.
ja503:19.1	Sattigumbo ca corānaṁ,
ja503:19.2	ahañca isīnaṁ idha;
ja503:19.3	Asataṁ so, sataṁ ahaṁ,
ja503:19.4	tena dhammena no vinā”.
ja503:20.1	“Tattha vadho ca bandho ca,
ja503:20.2	nikatī vañcanāni ca;
ja503:20.3	Ālopā sāhasākārā,
ja503:20.4	tāni so tattha sikkhati.
ja503:21.1	Idha saccañca dhammo ca,
ja503:21.2	Ahiṁsā saṁyamo damo;
ja503:21.3	Āsanūdakadāyīnaṁ,
ja503:21.4	Aṅke vaddhosmi bhāradha”.
ja503:22.1	“Yaṁ yañhi rāja bhajati,
ja503:22.2	santaṁ vā yadi vā asaṁ;
ja503:22.3	Sīlavantaṁ visīlaṁ vā,
ja503:22.4	vasaṁ tasseva gacchati.
ja503:23.1	Yādisaṁ kurute mittaṁ,
ja503:23.2	yādisaṁ cūpasevati;
ja503:23.3	Sopi tādisako hoti,
ja503:23.4	sahavāso hi tādiso.
ja503:24.1	Sevamāno sevamānaṁ,
ja503:24.2	samphuṭṭho samphusaṁ paraṁ;
ja503:24.3	Saro diddho kalāpaṁva,
ja503:24.4	alittamupalimpati;
ja503:24.5	Upalepabhayā dhīro,
ja503:24.6	neva pāpasakhā siyā.
ja503:25.1	Pūtimacchaṁ kusaggena,
ja503:25.2	yo naro upanayhati;
ja503:25.3	Kusāpi pūti vāyanti,
ja503:25.4	evaṁ bālūpasevanā.
ja503:26.1	Tagarañca palāsena,
ja503:26.2	yo naro upanayhati;
ja503:26.3	Pattāpi surabhi vāyanti,
ja503:26.4	evaṁ dhīrūpasevanā.
ja503:27.1	Tasmā pattapuṭasseva,
ja503:27.2	ñatvā sampākamattano;
ja503:27.3	Asante nopaseveyya,
ja503:27.4	sante seveyya paṇḍito;
ja503:27.5	Asanto nirayaṁ nenti,
ja503:27.6	santo pāpenti suggatin”ti.
ja503:28.1	Sattigumbajātakaṁ sattamaṁ.
ja504:0.1	Jātaka
ja504:0.2	Vīsatinipāta
ja504:0.3	Mātaṅgavagga
ja504:0.4	8. Bhallātiyajātaka
ja504:1.1	Bhallātiyo nāma ahosi rājā,
ja504:1.2	Raṭṭhaṁ pahāya migavaṁ acāri so;
ja504:1.3	Agamā girivaraṁ gandhamādanaṁ,
ja504:1.4	Supupphitaṁ kimpurisānuciṇṇaṁ.
ja504:2.1	Sāḷūrasaṅghañca nisedhayitvā,
ja504:2.2	Dhanuṁ kalāpañca so nikkhipitvā;
ja504:2.3	Upāgami vacanaṁ vattukāmo,
ja504:2.4	Yatthaṭṭhitā kimpurisā ahesuṁ.
ja504:3.1	“Himaccaye hemavatāya tīre,
ja504:3.2	Kimidhaṭṭhitā mantayavho abhiṇhaṁ;
ja504:3.3	Pucchāmi vo mānusadehavaṇṇe,
ja504:3.4	Kathaṁ vo jānanti manussaloke”.
ja504:4.1	“Mallaṁ giriṁ paṇḍarakaṁ tikūṭaṁ,
ja504:4.2	Sītodakā anuvicarāma najjo;
ja504:4.3	Migā manussāva nibhāsavaṇṇā,
ja504:4.4	Jānanti no kimpurisāti ludda”.
ja504:5.1	“Sukiccharūpaṁ paridevayavho,
ja504:5.2	Āliṅgito cāsi piyo piyāya;
ja504:5.3	Pucchāmi vo mānusadehavaṇṇe,
ja504:5.4	Kimidha vane rodatha appatītā.
ja504:6.1	Sukiccharūpaṁ paridevayavho,
ja504:6.2	Āliṅgito cāsi piyo piyāya;
ja504:6.3	Pucchāmi vo mānusadehavaṇṇe,
ja504:6.4	Kimidha vane vilapatha appatītā.
ja504:7.1	Sukiccharūpaṁ paridevayavho,
ja504:7.2	Āliṅgito cāsi piyo piyāya;
ja504:7.3	Pucchāmi vo mānusadehavaṇṇe,
ja504:7.4	Kimidha vane socatha appatītā”.
ja504:8.1	“Mayekarattaṁ vippavasimha ludda,
ja504:8.2	Akāmakā aññamaññaṁ sarantā;
ja504:8.3	Tamekarattaṁ anutappamānā,
ja504:8.4	Socāma ‘sā ratti punaṁ na hessati’”.
ja504:9.1	“Yamekarattaṁ anutappathetaṁ,
ja504:9.2	Dhanaṁ va naṭṭhaṁ pitaraṁ va petaṁ;
ja504:9.3	Pucchāmi vo mānusadehavaṇṇe,
ja504:9.4	Kathaṁ vinā vāsamakappayittha”.
ja504:10.1	“Yamimaṁ nadiṁ passasi sīghasotaṁ,
ja504:10.2	Nānādumacchādanaṁ selakūlaṁ;
ja504:10.3	Taṁ me piyo uttari vassakāle,
ja504:10.4	Mamañca maññaṁ anubandhatīti.
ja504:11.1	Ahañca aṅkolakamocināmi,
ja504:11.2	Atimuttakaṁ sattaliyothikañca;
ja504:11.3	‘Piyo ca me hehiti mālabhārī,
ja504:11.4	Ahañca naṁ mālinī ajjhupessaṁ’.
ja504:12.1	Ahañcidaṁ kuravakamocināmi,
ja504:12.2	Uddālakā pāṭalisindhuvārakā;
ja504:12.3	‘Piyo ca me hehiti mālabhārī,
ja504:12.4	Ahañca naṁ mālinī ajjhupessaṁ’.
ja504:13.1	Ahañca sālassa supupphitassa,
ja504:13.2	Oceyya pupphāni karomi mālaṁ;
ja504:13.3	‘Piyo ca me hehiti mālabhārī,
ja504:13.4	Ahañca naṁ mālinī ajjhupessaṁ’.
ja504:14.1	Ahañca sālassa supupphitassa,
ja504:14.2	Oceyya pupphāni karomi bhāraṁ;
ja504:14.3	Idañca no hehiti santharatthaṁ,
ja504:14.4	Yatthajjimaṁ viharissāma rattiṁ.
ja504:15.1	Ahañca kho agaḷuṁ candanañca,
ja504:15.2	Silāya piṁsāmi pamattarūpā;
ja504:15.3	‘Piyo ca me hehiti rositaṅgo,
ja504:15.4	Ahañca naṁ rositā ajjhupessaṁ’.
ja504:16.1	Athāgamā salilaṁ sīghasotaṁ,
ja504:16.2	Nudaṁ sāle salaḷe kaṇṇikāre;
ja504:16.3	Āpūratha tena muhuttakena,
ja504:16.4	Sāyaṁ nadī āsi mayā suduttarā.
ja504:17.1	Ubhosu tīresu mayaṁ tadā ṭhitā,
ja504:17.2	Sampassantā ubhayo aññamaññaṁ;
ja504:17.3	Sakimpi rodāma sakiṁ hasāma,
ja504:17.4	Kicchena no āgamā saṁvarī sā.
ja504:18.1	Pātova kho uggate sūriyamhi,
ja504:18.2	Catukkaṁ nadiṁ uttariyāna ludda;
ja504:18.3	Āliṅgiyā aññamaññaṁ mayaṁ ubho,
ja504:18.4	Sakimpi rodāma sakiṁ hasāma.
ja504:19.1	Tīhūnakaṁ sattasatāni ludda,
ja504:19.2	Yamidha mayaṁ vippavasimha pubbe;
ja504:19.3	Vassekimaṁ jīvitaṁ bhūmipāla,
ja504:19.4	Ko nīdha kantāya vinā vaseyya”.
ja504:20.1	“Āyuñca vo kīvatako nu samma,
ja504:20.2	Sacepi jānātha vadetha āyuṁ;
ja504:20.3	Anussavā vuḍḍhato āgamā vā,
ja504:20.4	Akkhātha me taṁ avikampamānā”.
ja504:21.1	“Āyuñca no vassasahassaṁ ludda,
ja504:21.2	Na cantarā pāpako atthi rogo;
ja504:21.3	Appañca dukkhaṁ sukhameva bhiyyo,
ja504:21.4	Avītarāgā vijahāma jīvitaṁ”.
ja504:22.1	“Idañca sutvāna amānusānaṁ,
ja504:22.2	Bhallātiyo ittara jīvitanti;
ja504:22.3	Nivattatha na migavaṁ acari,
ja504:22.4	Adāsi dānāni abhuñji bhoge.
ja504:23.1	Idañca sutvāna amānusānaṁ,
ja504:23.2	Sammodatha mā kalahaṁ akattha;
ja504:23.3	Mā vo tapī attakammāparādho,
ja504:23.4	Yathāpi te kimpurisekarattaṁ.
ja504:24.1	Idañca sutvāna amānusānaṁ,
ja504:24.2	Sammodatha mā vivādaṁ akattha;
ja504:24.3	Mā vo tapī attakammāparādho,
ja504:24.4	Yathāpi te kimpurisekarattaṁ”.
ja504:25.1	“Vividhaṁ adhimanā suṇomahaṁ,
ja504:25.2	Vacanapathaṁ tava atthasaṁhitaṁ;
ja504:25.3	Muñcaṁ giraṁ nudaseva me daraṁ,
ja504:25.4	Samaṇa sukhāvaha jīva me ciran”ti.
ja504:26.1	Bhallātiyajātakaṁ aṭṭhamaṁ.
ja505:0.1	Jātaka
ja505:0.2	Vīsatinipāta
ja505:0.3	Mātaṅgavagga
ja505:0.4	9. Somanassajātaka
ja505:1.1	“Ko taṁ hiṁsati heṭheti,
ja505:1.2	Kiṁ dummano socasi appatīto;
ja505:1.3	Kassajja mātāpitaro rudantu,
ja505:1.4	Kvajja setu nihato pathabyā”.
ja505:2.1	“Tuṭṭhosmi deva tava dassanena,
ja505:2.2	Cirassaṁ passāmi taṁ bhūmipāla;
ja505:2.3	Ahiṁsako reṇumanuppavissa,
ja505:2.4	Puttena te heṭhayitosmi deva”.
ja505:3.1	“Āyantu dovārikā khaggabandhā,
ja505:3.2	Kāsāviyā yantu antepurantaṁ;
ja505:3.3	Hantvāna taṁ somanassaṁ kumāraṁ,
ja505:3.4	Chetvāna sīsaṁ varamāharantu”.
ja505:4.1	“Pesitā rājino dūtā,
ja505:4.2	kumāraṁ etadabravuṁ;
ja505:4.3	Issarena vitiṇṇosi,
ja505:4.4	vadhaṁ pattosi khattiya”.
ja505:5.1	“Sa rājaputto paridevayanto,
ja505:5.2	Dasaṅguliṁ añjaliṁ paggahetvā;
ja505:5.3	Ahampi icchāmi janinda daṭṭhuṁ,
ja505:5.4	Jīvaṁ maṁ netvā paṭidassayetha”.
ja505:6.1	Tassa taṁ vacanaṁ sutvā,
ja505:6.2	rañño puttaṁ adassayuṁ;
ja505:6.3	Putto ca pitaraṁ disvā,
ja505:6.4	dūratovajjhabhāsatha.
ja505:7.1	“Āgacchuṁ dovārikā khaggabandhā,
ja505:7.2	Kāsāviyā hantu mamaṁ janinda;
ja505:7.3	Akkhāhi me pucchito etamatthaṁ,
ja505:7.4	Aparādho ko nidha mamajja atthi”.
ja505:8.1	“Sāyañca pāto udakaṁ sajāti,
ja505:8.2	Aggiṁ sadā pāricaratappamatto;
ja505:8.3	Taṁ tādisaṁ saṁyataṁ brahmacāriṁ,
ja505:8.4	Kasmā tuvaṁ brūsi gahappatīti”.
ja505:9.1	“Tālā ca mūlā ca phalā ca deva,
ja505:9.2	Pariggahā vividhā santimassa;
ja505:9.3	Te rakkhati gopayatappamatto,
ja505:9.4	Tasmā ahaṁ brūmi gahappatīti”.
ja505:10.1	“Saccaṁ kho etaṁ vadasi kumāra,
ja505:10.2	Pariggahā vividhā santimassa;
ja505:10.3	Te rakkhati gopayatappamatto,
ja505:10.4	Sa brāhmaṇo gahapati tena hoti”.
ja505:11.1	“Suṇantu mayhaṁ parisā samāgatā,
ja505:11.2	Sanegamā jānapadā ca sabbe;
ja505:11.3	Bālāyaṁ bālassa vaco nisamma,
ja505:11.4	Ahetunā ghātayate maṁ janindo.
ja505:12.1	Daḷhasmi mūle visaṭe virūḷhe,
ja505:12.2	Dunnikkayo veḷu pasākhajāto;
ja505:12.3	Vandāmi pādāni tava janinda,
ja505:12.4	Anujāna maṁ pabbajissāmi deva”.
ja505:13.1	“Bhuñjassu bhoge vipule kumāra,
ja505:13.2	Sabbañca te issariyaṁ dadāmi;
ja505:13.3	Ajjeva tvaṁ kurūnaṁ hohi rājā,
ja505:13.4	Mā pabbajī pabbajjā hi dukkhā”.
ja505:14.1	“Kinnūdha deva tavamatthi bhogā,
ja505:14.2	Pubbevahaṁ devaloke ramissaṁ;
ja505:14.3	Rūpehi saddehi atho rasehi,
ja505:14.4	Gandhehi phassehi manoramehi.
ja505:15.1	Bhuttā ca me bhogā tidivasmiṁ deva,
ja505:15.2	Parivārito accharānaṁ gaṇena;
ja505:15.3	Tuvañca bālaṁ paraneyyaṁ viditvā,
ja505:15.4	Na tādise rājakule vaseyyaṁ”.
ja505:16.1	“Sacāhaṁ bālo paraneyyo asmi,
ja505:16.2	Ekāparādhaṁ khama putta mayhaṁ;
ja505:16.3	Punapi ce edisakaṁ bhaveyya,
ja505:16.4	Yathāmatiṁ somanassa karohi”.
ja505:17.1	“Anisamma kataṁ kammaṁ,
ja505:17.2	anavatthāya cintitaṁ;
ja505:17.3	Bhesajjasseva vebhaṅgo,
ja505:17.4	vipāko hoti pāpako.
ja505:18.1	Nisamma ca kataṁ kammaṁ,
ja505:18.2	sammāvatthāya cintitaṁ;
ja505:18.3	Bhesajjasseva sampatti,
ja505:18.4	vipāko hoti bhadrako.
ja505:19.1	Alaso gihī kāmabhogī na sādhu,
ja505:19.2	Asaññato pabbajito na sādhu;
ja505:19.3	Rājā na sādhu anisammakārī,
ja505:19.4	Yo paṇḍito kodhano taṁ na sādhu.
ja505:20.1	Nisamma khattiyo kayirā,
ja505:20.2	nānisamma disampati;
ja505:20.3	Nisammakārino rāja,
ja505:20.4	yaso kitti ca vaḍḍhati.
ja505:21.1	Nisamma daṇḍaṁ paṇayeyya issaro,
ja505:21.2	Vegā kataṁ tappati bhūmipāla;
ja505:21.3	Sammāpaṇīdhī ca narassa atthā,
ja505:21.4	Anānutappā te bhavanti pacchā.
ja505:22.1	Anānutappāni hi ye karonti,
ja505:22.2	Vibhajja kammāyatanāni loke;
ja505:22.3	Viññuppasatthāni sukhudrayāni,
ja505:22.4	Bhavanti buddhānumatāni tāni.
ja505:23.1	Āgacchuṁ dovārikā khaggabandhā,
ja505:23.2	Kāsāviyā hantu mamaṁ janinda;
ja505:23.3	Mātuñca aṅkasmimahaṁ nisinno,
ja505:23.4	Ākaḍḍhito sahasā tehi deva.
ja505:24.1	Kaṭukañhi sambādhaṁ sukicchaṁ patto,
ja505:24.2	Madhurampi yaṁ jīvitaṁ laddha rāja;
ja505:24.3	Kicchenahaṁ ajja vadhā pamutto,
ja505:24.4	Pabbajjamevābhimanohamasmi”.
ja505:25.1	“Putto tavāyaṁ taruṇo sudhamme,
ja505:25.2	Anukampako somanasso kumāro;
ja505:25.3	Taṁ yācamāno na labhāmi svajja,
ja505:25.4	Arahasi naṁ yācitave tuvampi”.
ja505:26.1	“Ramassu bhikkhācariyāya putta,
ja505:26.2	Nisamma dhammesu paribbajassu;
ja505:26.3	Sabbesu bhūtesu nidhāya daṇḍaṁ,
ja505:26.4	Anindito brahmamupehi ṭhānaṁ”.
ja505:27.1	“Acchera rūpaṁ vata yādisañca,
ja505:27.2	Dukkhitaṁ maṁ dukkhāpayase sudhamme;
ja505:27.3	Yācassu puttaṁ iti vuccamānā,
ja505:27.4	Bhiyyova ussāhayase kumāraṁ”.
ja505:28.1	“Ye vippamuttā anavajjabhogino,
ja505:28.2	Parinibbutā lokamimaṁ caranti;
ja505:28.3	Tamariyamaggaṁ paṭipajjamānaṁ,
ja505:28.4	Na ussahe vārayituṁ kumāraṁ”.
ja505:29.1	“Addhā have sevitabbā sapaññā,
ja505:29.2	Bahussutā ye bahuṭhānacintino;
ja505:29.3	Yesāyaṁ sutvāna subhāsitāni,
ja505:29.4	Appossukkā vītasokā sudhammā”ti.
ja505:30.1	Somanassajātakaṁ navamaṁ.
ja506:0.1	Jātaka
ja506:0.2	Vīsatinipāta
ja506:0.3	Mātaṅgavagga
ja506:0.4	10. Campeyyajātaka
ja506:1.1	“Kā nu vijjurivābhāsi,
ja506:1.2	Osadhī viya tārakā;
ja506:1.3	Devatā nusi gandhabbī,
ja506:1.4	Na taṁ maññāmi mānusiṁ”.
ja506:2.1	“Namhi devī na gandhabbī,
ja506:2.2	na mahārāja mānusī;
ja506:2.3	Nāgakaññāsmi bhaddante,
ja506:2.4	atthenamhi idhāgatā”.
ja506:3.1	“Vibbhantacittā kupitindriyāsi,
ja506:3.2	Nettehi te vārigaṇā savanti;
ja506:3.3	Kiṁ te naṭṭhaṁ kiṁ pana patthayānā,
ja506:3.4	Idhāgatā nāri tadiṅgha brūhi”.
ja506:4.1	“Yamuggatejo uragoti cāhu,
ja506:4.2	Nāgoti naṁ āhu janā janinda;
ja506:4.3	Tamaggahī puriso jīvikattho,
ja506:4.4	Taṁ bandhanā muñca patī mameso”.
ja506:5.1	“Kathaṁ nvayaṁ balaviriyūpapanno,
ja506:5.2	Hatthattamāgacchi vanibbakassa;
ja506:5.3	Akkhāhi me nāgakaññe tamatthaṁ,
ja506:5.4	Kathaṁ vijānemu gahītanāgaṁ”.
ja506:6.1	“Nagarampi nāgo bhasmaṁ kareyya,
ja506:6.2	Tathā hi so balaviriyūpapanno;
ja506:6.3	Dhammañca nāgo apacāyamāno,
ja506:6.4	Tasmā parakkamma tapo karoti.
ja506:7.1	Cātuddasiṁ pañcadasiñca rāja,
ja506:7.2	Catuppathe sammati nāgarājā;
ja506:7.3	Tamaggahī puriso jīvikattho,
ja506:7.4	Taṁ bandhanā muñca patī mameso”.
ja506:8.1	“Soḷasitthisahassāni,
ja506:8.2	āmuttamaṇikuṇḍalā;
ja506:8.3	Vārigehasayā nārī,
ja506:8.4	tāpi taṁ saraṇaṁ gatā.
ja506:9.1	Dhammena mocehi asāhasena,
ja506:9.2	Gāmena nikkhena gavaṁ satena;
ja506:9.3	Ossaṭṭhakāyo urago carātu,
ja506:9.4	Puññatthiko muñcatu bandhanasmā”.
ja506:10.1	“Dhammena mocemi asāhasena,
ja506:10.2	Gāmena nikkhena gavaṁ satena;
ja506:10.3	Ossaṭṭhakāyo urago carātu,
ja506:10.4	Puññatthiko muñcatu bandhanasmā.
ja506:11.1	Dammi nikkhasataṁ ludda,
ja506:11.2	thūlañca maṇikuṇḍalaṁ;
ja506:11.3	Catussadañca pallaṅkaṁ,
ja506:11.4	umāpupphasarinnibhaṁ.
ja506:12.1	Dve ca sādisiyo bhariyā,
ja506:12.2	Usabhañca gavaṁ sataṁ;
ja506:12.3	Ossaṭṭhakāyo urago carātu,
ja506:12.4	Puññatthiko muñcatu bandhanasmā”.
ja506:13.1	“Vināpi dānā tava vacanaṁ janinda,
ja506:13.2	Muñcemu naṁ uragaṁ bandhanasmā;
ja506:13.3	Ossaṭṭhakāyo urago carātu,
ja506:13.4	Puññatthiko muñcatu bandhanasmā”.
ja506:14.1	Mutto campeyyako nāgo,
ja506:14.2	rājānaṁ etadabravi;
ja506:14.3	“Namo te kāsirājatthu,
ja506:14.4	namo te kāsivaḍḍhana;
ja506:14.5	Añjaliṁ te paggaṇhāmi,
ja506:14.6	passeyyaṁ me nivesanaṁ”.
ja506:15.1	“Addhā hi dubbissasametamāhu,
ja506:15.2	Yaṁ mānuso vissase amānusamhi;
ja506:15.3	Sace ca maṁ yācasi etamatthaṁ,
ja506:15.4	Dakkhemu te nāga nivesanāni”.
ja506:16.1	“Sacepi vāto girimāvaheyya,
ja506:16.2	Cando ca suriyo ca chamā pateyyuṁ;
ja506:16.3	Sabbā ca najjo paṭisotaṁ vajeyyuṁ,
ja506:16.4	Na tvevahaṁ rāja musā bhaṇeyyaṁ.
ja506:17.1	Nabhaṁ phaleyya udadhīpi susse,
ja506:17.2	Saṁvaṭṭaye bhūtadharā vasundharā;
ja506:17.3	Siluccayo meru samūlamuppate,
ja506:17.4	Na tvevahaṁ rāja musā bhaṇeyyaṁ”.
ja506:18.1	“Addhā hi dubbissasametamāhu,
ja506:18.2	Yaṁ mānuso vissase amānusamhi;
ja506:18.3	Sace ca maṁ yācasi etamatthaṁ,
ja506:18.4	Dakkhemu te nāga nivesanāni.
ja506:19.1	Tumhe khottha ghoravisā uḷārā,
ja506:19.2	Mahātejā khippakopī ca hotha;
ja506:19.3	Maṅkāraṇā bandhanasmā pamutto,
ja506:19.4	Arahasi no jānituye katāni”.
ja506:20.1	“So paccataṁ niraye ghorarūpe,
ja506:20.2	Mā kāyikaṁ sātamalattha kiñci;
ja506:20.3	Peḷāya baddho maraṇaṁ upetu,
ja506:20.4	Yo tādisaṁ kammakataṁ na jāne”.
ja506:21.1	“Saccappaṭiññā tava mesa hotu,
ja506:21.2	Akkodhano hohi anupanāhī;
ja506:21.3	Sabbañca te nāgakulaṁ supaṇṇā,
ja506:21.4	Aggiṁva gimhesu vivajjayantu”.
ja506:22.1	“Anukampasī nāgakulaṁ janinda,
ja506:22.2	Mātā yathā suppiyaṁ ekaputtaṁ;
ja506:22.3	Ahañca te nāgakulena saddhiṁ,
ja506:22.4	Kāhāmi veyyāvaṭikaṁ uḷāraṁ”.
ja506:23.1	“Yojentu ve rājarathe sucitte,
ja506:23.2	Kambojake assatare sudante;
ja506:23.3	Nāge ca yojentu suvaṇṇakappane,
ja506:23.4	Dakkhemu nāgassa nivesanāni”.
ja506:24.1	Bherī mudiṅgā paṇavā ca saṅkhā,
ja506:24.2	Avajjayiṁsu uggasenassa rañño;
ja506:24.3	Pāyāsi rājā bahusobhamāno,
ja506:24.4	Purakkhato nārigaṇassa majjhe.
ja506:25.1	Suvaṇṇacitakaṁ bhūmiṁ,
ja506:25.2	addakkhi kāsivaḍḍhano;
ja506:25.3	Sovaṇṇamayapāsāde,
ja506:25.4	veḷuriyaphalakatthate.
ja506:26.1	Sa rājā pāvisi byamhaṁ,
ja506:26.2	campeyyassa nivesanaṁ;
ja506:26.3	Ādiccavaṇṇasannibhaṁ,
ja506:26.4	kaṁsavijju pabhassaraṁ.
ja506:27.1	Nānārukkhehi sañchannaṁ,
ja506:27.2	nānāgandhasamīritaṁ;
ja506:27.3	So pāvekkhi kāsirājā,
ja506:27.4	campeyyassa nivesanaṁ.
ja506:28.1	Paviṭṭhasmiṁ kāsiraññe,
ja506:28.2	campeyyassa nivesanaṁ;
ja506:28.3	Dibbā tūriyā pavajjiṁsu,
ja506:28.4	nāgakaññā ca naccisuṁ.
ja506:29.1	Taṁ nāgakaññā caritaṁ gaṇena,
ja506:29.2	Anvāruhī kāsirājā pasanno;
ja506:29.3	Nisīdi sovaṇṇamayamhi pīṭhe,
ja506:29.4	Sāpassaye candanasāralitte.
ja506:30.1	So tattha bhutvā ca atho ramitvā,
ja506:30.2	Campeyyakaṁ kāsirājā avoca;
ja506:30.3	“Vimānaseṭṭhāni imāni tuyhaṁ,
ja506:30.4	Ādiccavaṇṇāni pabhassarāni;
ja506:30.5	Netādisaṁ atthi manussaloke,
ja506:30.6	Kiṁ patthayaṁ nāga tapo karosi.
ja506:31.1	Tā kambukāyūradharā suvatthā,
ja506:31.2	Vaṭṭaṅgulī tambatalūpapannā;
ja506:31.3	Paggayha pāyenti anomavaṇṇā,
ja506:31.4	Netādisaṁ atthi manussaloke;
ja506:31.5	Kiṁ patthayaṁ nāga tapo karosi.
ja506:32.1	Najjo ca temā puthulomamacchā,
ja506:32.2	Āṭā sakuntābhirudā sutitthā;
ja506:32.3	Netādisaṁ atthi manussaloke,
ja506:32.4	Kiṁ patthayaṁ nāga tapo karosi.
ja506:33.1	Koñcā mayūrā diviyā ca haṁsā,
ja506:33.2	Vaggussarā kokilā sampatanti;
ja506:33.3	Netādisaṁ atthi manussaloke,
ja506:33.4	Kiṁ patthayaṁ nāga tapo karosi.
ja506:34.1	Ambā ca sālā tilakā ca jambuyo,
ja506:34.2	Uddālakā pāṭaliyo ca phullā;
ja506:34.3	Netādisaṁ atthi manussaloke,
ja506:34.4	Kiṁ patthayaṁ nāga tapo karosi.
ja506:35.1	Imā ca te pokkharañño samantato,
ja506:35.2	Dibbā ca gandhā satataṁ pavāyanti;
ja506:35.3	Netādisaṁ atthi manussaloke,
ja506:35.4	Kiṁ patthayaṁ nāga tapo karosi”.
ja506:36.1	“Na puttahetu na dhanassa hetu,
ja506:36.2	Na āyuno cāpi janinda hetu;
ja506:36.3	Manussayoniṁ abhipatthayāno,
ja506:36.4	Tasmā parakkamma tapo karomi”.
ja506:37.1	“Tvaṁ lohitakkho vihatantaraṁso,
ja506:37.2	Alaṅkato kappitakesamassu;
ja506:37.3	Surosito lohitacandanena,
ja506:37.4	Gandhabbarājāva disā pabhāsasi.
ja506:38.1	Deviddhipattosi mahānubhāvo,
ja506:38.2	Sabbehi kāmehi samaṅgibhūto;
ja506:38.3	Pucchāmi taṁ nāgarājetamatthaṁ,
ja506:38.4	Seyyo ito kena manussaloko”.
ja506:39.1	“Janinda nāññatra manussalokā,
ja506:39.2	Suddhī va saṁvijjati saṁyamo vā;
ja506:39.3	Ahañca laddhāna manussayoniṁ,
ja506:39.4	Kāhāmi jātimaraṇassa antaṁ”.
ja506:40.1	“Addhā have sevitabbā sapaññā,
ja506:40.2	Bahussutā ye bahuṭhānacintino;
ja506:40.3	Nāriyo ca disvāna tuvañca nāga,
ja506:40.4	Kāhāmi puññāni anappakāni”.
ja506:41.1	“Addhā have sevitabbā sapaññā,
ja506:41.2	Bahussutā ye bahuṭhānacintino;
ja506:41.3	Nāriyo ca disvāna mamañca rāja,
ja506:41.4	Karohi puññāni anappakāni”.
ja506:42.1	“Idañca me jātarūpaṁ pahūtaṁ,
ja506:42.2	Rāsī suvaṇṇassa ca tālamattā;
ja506:42.3	Ito haritvāna suvaṇṇagharāni,
ja506:42.4	Karassu rūpiyapākāraṁ karontu.
ja506:43.1	Muttā ca vāhasahassāni pañca,
ja506:43.2	Veḷuriyamissāni ito haritvā;
ja506:43.3	Antepure bhūmiyaṁ santharantu,
ja506:43.4	Nikkaddamā hehiti nīrajā ca.
ja506:44.1	Etādisaṁ āvasa rājaseṭṭha,
ja506:44.2	Vimānaseṭṭhaṁ bahu sobhamānaṁ;
ja506:44.3	Bārāṇasiṁ nagaraṁ iddhaṁ phītaṁ,
ja506:44.4	Rajjañca kārehi anomapaññā”ti.
ja506:45.1	Campeyyajātakaṁ dasamaṁ.
ja507:0.1	Jātaka
ja507:0.2	Vīsatinipāta
ja507:0.3	Mātaṅgavagga
ja507:0.4	11. Mahāpalobhanajātaka
ja507:1.1	Brahmalokā cavitvāna,
ja507:1.2	devaputto mahiddhiko;
ja507:1.3	Rañño putto udapādi,
ja507:1.4	sabbakāmasamiddhisu.
ja507:2.1	Kāmā vā kāmasaññā vā,
ja507:2.2	brahmaloke na vijjati;
ja507:2.3	Svāssu tāyeva saññāya,
ja507:2.4	kāmehi vijigucchatha.
ja507:3.1	Tassa cantepure āsi,
ja507:3.2	jhānāgāraṁ sumāpitaṁ;
ja507:3.3	So tattha paṭisallīno,
ja507:3.4	eko rahasi jhāyatha.
ja507:4.1	Sa rājā paridevesi,
ja507:4.2	puttasokena aṭṭito;
ja507:4.3	“Ekaputto cayaṁ mayhaṁ,
ja507:4.4	na ca kāmāni bhuñjati.
ja507:5.1	Ko nu khvettha upāyo so,
ja507:5.2	ko vā jānāti kiñcanaṁ;
ja507:5.3	Yo me puttaṁ palobheyya,
ja507:5.4	yathā kāmāni patthaye”.
ja507:6.1	Ahu kumārī tattheva,
ja507:6.2	vaṇṇarūpasamāhitā;
ja507:6.3	Kusalā naccagītassa,
ja507:6.4	vādite ca padakkhiṇā.
ja507:7.1	Sā tattha upasaṅkamma,
ja507:7.2	rājānaṁ etadabravi;
ja507:7.3	“Ahaṁ kho naṁ palobheyyaṁ,
ja507:7.4	sace bhattā bhavissati”.
ja507:8.1	Taṁ tathāvādiniṁ rājā,
ja507:8.2	kumāriṁ etadabravi;
ja507:8.3	“Tvaññeva naṁ palobhehi,
ja507:8.4	tava bhattā bhavissati”.
ja507:9.1	Sā ca antepuraṁ gantvā,
ja507:9.2	bahuṁ kāmupasaṁhitaṁ;
ja507:9.3	Hadayaṅgamā pemanīyā,
ja507:9.4	citrā gāthā abhāsatha.
ja507:10.1	Tassā ca gāyamānāya,
ja507:10.2	saddaṁ sutvāna nāriyā;
ja507:10.3	Kāmacchandassa uppajji,
ja507:10.4	janaṁ so paripucchatha.
ja507:11.1	“Kasseso saddo ko vā so,
ja507:11.2	bhaṇati uccāvacaṁ bahuṁ;
ja507:11.3	Hadayaṅgamaṁ pemanīyaṁ,
ja507:11.4	aho kaṇṇasukhaṁ mama”.
ja507:12.1	“Esā kho pamadā deva,
ja507:12.2	khiḍḍā esā anappikā;
ja507:12.3	Sace tvaṁ kāme bhuñjeyya,
ja507:12.4	bhiyyo bhiyyo chādeyyu taṁ”.
ja507:13.1	“Iṅgha āgacchatorena,
ja507:13.2	avidūramhi gāyatu;
ja507:13.3	Assamassa samīpamhi,
ja507:13.4	santike mayhaṁ gāyatu”.
ja507:14.1	Tirokuṭṭamhi gāyitvā,
ja507:14.2	jhānāgāramhi pāvisi;
ja507:14.3	Bandhi naṁ anupubbena,
ja507:14.4	āraññamiva kuñjaraṁ.
ja507:15.1	Tassa kāmarasaṁ ñatvā,
ja507:15.2	issādhammo ajāyatha;
ja507:15.3	“Ahameva kāme bhuñjeyyaṁ,
ja507:15.4	mā añño puriso ahu”.
ja507:16.1	Tato asiṁ gahetvāna,
ja507:16.2	purise hantuṁ upakkami;
ja507:16.3	“Ahameveko bhuñjissaṁ,
ja507:16.4	mā añño puriso siyā”.
ja507:17.1	Tato jānapadā sabbe,
ja507:17.2	vikkandiṁsu samāgatā;
ja507:17.3	“Putto tyāyaṁ mahārāja,
ja507:17.4	janaṁ heṭhetyadūsakaṁ”.
ja507:18.1	Tañca rājā vivāhesi,
ja507:18.2	samhā raṭṭhā ca khattiyo;
ja507:18.3	“Yāvatā vijitaṁ mayhaṁ,
ja507:18.4	na te vatthabba tāvade”.
ja507:19.1	Tato so bhariyamādāya,
ja507:19.2	samuddaṁ upasaṅkami;
ja507:19.3	Paṇṇasālaṁ karitvāna,
ja507:19.4	vanamuñchāya pāvisi.
ja507:20.1	Athettha isi māgacchi,
ja507:20.2	samuddaṁ uparūpari;
ja507:20.3	So tassa gehaṁ pāvekkhi,
ja507:20.4	bhattakāle upaṭṭhite.
ja507:21.1	Tañca bhariyā palobhesi,
ja507:21.2	passa yāva sudāruṇaṁ;
ja507:21.3	Cuto so brahmacariyamhā,
ja507:21.4	iddhiyā parihāyatha.
ja507:22.1	Rājaputto ca uñchāto,
ja507:22.2	vanamūlaphalaṁ bahuṁ;
ja507:22.3	Sāyaṁ kājena ādāya,
ja507:22.4	assamaṁ upasaṅkami.
ja507:23.1	Isī ca khattiyaṁ disvā,
ja507:23.2	samuddaṁ upasaṅkami;
ja507:23.3	“Vehāyasaṁ gamissan”ti,
ja507:23.4	sīdate so mahaṇṇave.
ja507:24.1	Khattiyo ca isiṁ disvā,
ja507:24.2	sīdamānaṁ mahaṇṇave;
ja507:24.3	Tasseva anukampāya,
ja507:24.4	imā gāthā abhāsatha.
ja507:25.1	“Abhijjamāne vārismiṁ,
ja507:25.2	sayaṁ āgamma iddhiyā;
ja507:25.3	Missībhāvitthiyā gantvā,
ja507:25.4	saṁsīdasi mahaṇṇave.
ja507:26.1	Āvaṭṭanī mahāmāyā,
ja507:26.2	brahmacariyavikopanā;
ja507:26.3	Sīdanti naṁ viditvāna,
ja507:26.4	ārakā parivajjaye.
ja507:27.1	Analā mudusambhāsā,
ja507:27.2	duppūrā tā nadīsamā;
ja507:27.3	Sīdanti naṁ viditvāna,
ja507:27.4	ārakā parivajjaye.
ja507:28.1	Yaṁ etā upasevanti,
ja507:28.2	chandasā vā dhanena vā;
ja507:28.3	Jātavedova saṁ ṭhānaṁ,
ja507:28.4	khippaṁ anudahanti naṁ”.
ja507:29.1	Khattiyassa vaco sutvā,
ja507:29.2	isissa nibbidā ahu;
ja507:29.3	Laddhā porāṇakaṁ maggaṁ,
ja507:29.4	gacchate so vihāyasaṁ.
ja507:30.1	Khattiyo ca isiṁ disvā,
ja507:30.2	gacchamānaṁ vihāyasaṁ;
ja507:30.3	Saṁvegaṁ alabhī dhīro,
ja507:30.4	pabbajjaṁ samarocayi.
ja507:31.1	Tato so pabbajitvāna,
ja507:31.2	kāmarāgaṁ virājayi;
ja507:31.3	Kāmarāgaṁ virājetvā,
ja507:31.4	brahmalokūpago ahūti.
ja507:32.1	Mahāpalobhanajātakaṁ ekādasamaṁ.
ja508:0.1	Jātaka
ja508:0.2	Vīsatinipāta
ja508:0.3	Mātaṅgavagga
ja508:0.4	12. Pañcapaṇḍitajātaka
ja508:1.1	“Pañca paṇḍitā samāgatāttha,
ja508:1.2	Pañhā me paṭibhāti taṁ suṇātha;
ja508:1.3	Nindiyamatthaṁ pasaṁsiyaṁ vā,
ja508:1.4	Kassevāvikareyya guyhamatthaṁ”.
ja508:2.1	“Tvaṁ āvikarohi bhūmipāla,
ja508:2.2	Bhattā bhārasaho tuvaṁ vade taṁ;
ja508:2.3	Tava chandarucīni sammasitvā,
ja508:2.4	Atha vakkhanti janinda pañca dhīrā”.
ja508:3.1	“Yā sīlavatī anaññatheyyā,
ja508:3.2	Bhattucchandavasānugā manāpā;
ja508:3.3	Nindiyamatthaṁ pasaṁsiyaṁ vā,
ja508:3.4	Bhariyāyāvikareyya guyhamatthaṁ”.
ja508:4.1	“Yo kicchagatassa āturassa,
ja508:4.2	Saraṇaṁ hoti gatī parāyanañca;
ja508:4.3	Nindiyamatthaṁ pasaṁsiyaṁ vā,
ja508:4.4	Sakhino vāvikareyya guyhamatthaṁ”.
ja508:5.1	“Jeṭṭho atha majjhimo kaniṭṭho,
ja508:5.2	Yo ce sīlasamāhito ṭhitatto;
ja508:5.3	Nindiyamatthaṁ pasaṁsiyaṁ vā,
ja508:5.4	Bhātu vāvīkareyya guyhamatthaṁ”.
ja508:6.1	“Yo ve pituhadayassa paddhagū,
ja508:6.2	Anujāto pitaraṁ anomapañño;
ja508:6.3	Nindiyamatthaṁ pasaṁsiyaṁ vā,
ja508:6.4	Puttassāvikareyya guyhamatthaṁ”.
ja508:7.1	“Mātā dvipadājanindaseṭṭha,
ja508:7.2	Yā naṁ poseti chandasā piyena;
ja508:7.3	Nindiyamatthaṁ pasaṁsiyaṁ vā,
ja508:7.4	Mātuyāvīkareyya guyhamatthaṁ”.
ja508:8.1	“Guyhassa hi guyhameva sādhu,
ja508:8.2	Na hi guyhassa pasatthamāvikammaṁ;
ja508:8.3	Anipphannatā saheyya dhīro,
ja508:8.4	Nipphannova yathāsukhaṁ bhaṇeyya”.
ja508:9.1	“Kiṁ tvaṁ vimanosi rājaseṭṭha,
ja508:9.2	Dvipadajaninda vacanaṁ suṇoma metaṁ;
ja508:9.3	Kiṁ cintayamāno dummanosi,
ja508:9.4	Nūna deva aparādho atthi mayhaṁ”.
ja508:10.1	“‘Paṇhe vajjho mahosadho’ti,
ja508:10.2	Āṇatto me vadhāya bhūripañño;
ja508:10.3	Taṁ cintayamāno dummanosmi,
ja508:10.4	Na hi devī aparādho atthi tuyhaṁ”.
ja508:11.1	“Abhidosagato dāni ehisi,
ja508:11.2	Kiṁ sutvā kiṁ saṅkate mano te;
ja508:11.3	Ko te kimavoca bhūripañña,
ja508:11.4	Iṅgha vacanaṁ suṇoma brūhi metaṁ”.
ja508:12.1	“‘Paṇhe vajjho mahosadho’ti,
ja508:12.2	Yadi te mantayitaṁ janinda dosaṁ;
ja508:12.3	Bhariyāya rahogato asaṁsi,
ja508:12.4	Guyhaṁ pātukataṁ sutaṁ mametaṁ”.
ja508:13.1	“Yaṁ sālavanasmiṁ senako,
ja508:13.2	Pāpakammaṁ akāsi asabbhirūpaṁ;
ja508:13.3	Sakhinova rahogato asaṁsi,
ja508:13.4	Guyhaṁ pātukataṁ sutaṁ mametaṁ.
ja508:14.1	Pukkusa purisassa te janinda,
ja508:14.2	Uppanno rogo arājayutto;
ja508:14.3	Bhātuñca rahogato asaṁsi,
ja508:14.4	Guyhaṁ pātukataṁ sutaṁ mametaṁ.
ja508:15.1	Ābādhoyaṁ asabbhirūpo,
ja508:15.2	Kāmindo naradevena phuṭṭho;
ja508:15.3	Puttassa rahogato asaṁsi,
ja508:15.4	Guyhaṁ pātukataṁ sutaṁ mametaṁ.
ja508:16.1	Aṭṭhavaṅkaṁ maṇiratanaṁ uḷāraṁ,
ja508:16.2	Sakko te adadā pitāmahassa;
ja508:16.3	Devindassa gataṁ tadajja hatthaṁ,
ja508:16.4	Mātuñca rahogato asaṁsi;
ja508:16.5	Guyhaṁ pātukataṁ sutaṁ mametaṁ.
ja508:17.1	Guyhassa hi guyhameva sādhu,
ja508:17.2	Na hi guyhassa pasatthamāvikammaṁ;
ja508:17.3	Anipphannatā saheyya dhīro,
ja508:17.4	Nipphannova yathāsukhaṁ bhaṇeyya.
ja508:18.1	Na guyhamatthaṁ vivareyya,
ja508:18.2	rakkheyya naṁ yathā nidhiṁ;
ja508:18.3	Na hi pātukato sādhu,
ja508:18.4	guyho attho pajānatā.
ja508:19.1	Thiyā guyhaṁ na saṁseyya,
ja508:19.2	amittassa ca paṇḍito;
ja508:19.3	Yo cāmisena saṁhīro,
ja508:19.4	hadayattheno ca yo naro.
ja508:20.1	Guyhamatthaṁ asambuddhaṁ,
ja508:20.2	sambodhayati yo naro;
ja508:20.3	Mantabhedabhayā tassa,
ja508:20.4	dāsabhūto titikkhati.
ja508:21.1	Yāvanto purisassatthaṁ,
ja508:21.2	guyhaṁ jānanti mantinaṁ;
ja508:21.3	Tāvanto tassa ubbegā,
ja508:21.4	tasmā guyhaṁ na vissaje.
ja508:22.1	Vivicca bhāseyya divā rahassaṁ,
ja508:22.2	Rattiṁ giraṁ nātivelaṁ pamuñce;
ja508:22.3	Upassutikā hi suṇanti mantaṁ,
ja508:22.4	Tasmā manto khippamupeti bhedan”ti.
ja508:23.1	Pañcapaṇḍitajātakaṁ dvādasamaṁ.
ja509:0.1	Jātaka
ja509:0.2	Vīsatinipāta
ja509:0.3	Mātaṅgavagga
ja509:0.4	13. Hatthipālajātaka
ja509:1.1	“Cirassaṁ vata passāma,
ja509:1.2	brāhmaṇaṁ devavaṇṇinaṁ;
ja509:1.3	Mahājaṭaṁ khāridharaṁ,
ja509:1.4	paṅkadantaṁ rajassiraṁ.
ja509:2.1	Cirassaṁ vata passāma,
ja509:2.2	isiṁ dhammaguṇe rataṁ;
ja509:2.3	Kāsāyavatthavasanaṁ,
ja509:2.4	vākacīraṁ paṭicchadaṁ.
ja509:3.1	Āsanaṁ udakaṁ pajjaṁ,
ja509:3.2	paṭigaṇhātu no bhavaṁ;
ja509:3.3	Agghe bhavantaṁ pucchāma,
ja509:3.4	agghaṁ kurutu no bhavaṁ”.
ja509:4.1	“Adhicca vede pariyesa vittaṁ,
ja509:4.2	Putte gahe tāta patiṭṭhapetvā;
ja509:4.3	Gandhe rase paccanubhuyya sabbaṁ,
ja509:4.4	Araññaṁ sādhu muni so pasattho”.
ja509:5.1	“Vedā na saccā na ca vittalābho,
ja509:5.2	Na puttalābhena jaraṁ vihanti;
ja509:5.3	Gandhe rase muccanamāhu santo,
ja509:5.4	Sakammunā hoti phalūpapatti”.
ja509:6.1	“Addhā hi saccaṁ vacanaṁ tavetaṁ,
ja509:6.2	Sakammunā hoti phalūpapatti;
ja509:6.3	Jiṇṇā ca mātāpitaro tavīme,
ja509:6.4	Passeyyuṁ taṁ vassasataṁ arogaṁ”.
ja509:7.1	“Yassassa sakkhī maraṇena rāja,
ja509:7.2	Jarāya mettī naravīraseṭṭha;
ja509:7.3	Yo cāpi jaññā na marissaṁ kadāci,
ja509:7.4	Passeyyuṁ taṁ vassasataṁ arogaṁ.
ja509:8.1	Yathāpi nāvaṁ puriso dakamhi,
ja509:8.2	Ereti ce naṁ upaneti tīraṁ;
ja509:8.3	Evampi byādhī satataṁ jarā ca,
ja509:8.4	Upaneti maccaṁ vasamantakassa”.
ja509:9.1	“Paṅko ca kāmā palipo ca kāmā,
ja509:9.2	Manoharā duttarā maccudheyyā;
ja509:9.3	Etasmiṁ paṅke palipe byasannā,
ja509:9.4	Hīnattarūpā na taranti pāraṁ.
ja509:10.1	Ayaṁ pure luddamakāsi kammaṁ,
ja509:10.2	Svāyaṁ gahīto na hi mokkhito me;
ja509:10.3	Orundhiyā naṁ parirakkhissāmi,
ja509:10.4	Māyaṁ puna luddamakāsi kammaṁ”.
ja509:11.1	“Gavaṁva naṭṭhaṁ puriso yathā vane,
ja509:11.2	Anvesatī rāja apassamāno;
ja509:11.3	Evaṁ naṭṭho esukārī mamattho,
ja509:11.4	Sohaṁ kathaṁ na gaveseyyaṁ rāja.
ja509:12.1	Hiyyoti hiyyati poso,
ja509:12.2	Pareti parihāyati;
ja509:12.3	Anāgataṁ netamatthīti ñatvā,
ja509:12.4	Uppannachandaṁ ko panudeyya dhīro”.
ja509:13.1	“Passāmi vohaṁ daharaṁ kumāriṁ,
ja509:13.2	Mattūpamaṁ ketakapupphanettaṁ;
ja509:13.3	Abhuttabhoge paṭhame vayasmiṁ,
ja509:13.4	Ādāya maccu vajate kumāriṁ.
ja509:14.1	Yuvā sujāto sumukho sudassano,
ja509:14.2	Sāmo kusumbhaparikiṇṇamassu;
ja509:14.3	Hitvāna kāme paṭikacca gehaṁ,
ja509:14.4	Anujāna maṁ pabbajissāmi deva”.
ja509:15.1	“Sākhāhi rukkho labhate samaññaṁ,
ja509:15.2	Pahīnasākhaṁ pana khāṇumāhu;
ja509:15.3	Pahīnaputtassa mamajja bhoti,
ja509:15.4	Vāseṭṭhi bhikkhācariyāya kālo”.
ja509:16.1	“Aghasmi koñcāva yathā himaccaye,
ja509:16.2	Katāni jālāni padāliya haṁsā;
ja509:16.3	Gacchanti puttā ca patī ca mayhaṁ,
ja509:16.4	Sāhaṁ kathaṁ nānuvaje pajānaṁ”.
ja509:17.1	“Ete bhutvā vamitvā ca,
ja509:17.2	pakkamanti vihaṅgamā;
ja509:17.3	Ye ca bhutvāna vamiṁsu,
ja509:17.4	te me hatthattamāgatā.
ja509:18.1	Avamī brāhmaṇo kāme,
ja509:18.2	so tvaṁ paccāvamissasi;
ja509:18.3	Vantādo puriso rāja,
ja509:18.4	na so hoti pasaṁsiyo”.
ja509:19.1	“Paṅke ca posaṁ palipe byasannaṁ,
ja509:19.2	Balī yathā dubbalamuddhareyya;
ja509:19.3	Evampi maṁ tvaṁ udatāri bhoti,
ja509:19.4	Pañcāli gāthāhi subhāsitāhi”.
ja509:20.1	Idaṁ vatvā mahārājā,
ja509:20.2	esukārī disampati;
ja509:20.3	Raṭṭhaṁ hitvāna pabbaji,
ja509:20.4	nāgo chetvāva bandhanaṁ.
ja509:21.1	“Rājā ca pabbajjamarocayittha,
ja509:21.2	Raṭṭhaṁ pahāya naravīraseṭṭho;
ja509:21.3	Tuvampi no hohi yatheva rājā,
ja509:21.4	Amhehi guttā anusāsa rajjaṁ”.
ja509:22.1	“Rājā ca pabbajjamarocayittha,
ja509:22.2	Raṭṭhaṁ pahāya naravīraseṭṭho;
ja509:22.3	Ahampi ekā carissāmi loke,
ja509:22.4	Hitvāna kāmāni manoramāni.
ja509:23.1	Rājā ca pabbajjamarocayittha,
ja509:23.2	Raṭṭhaṁ pahāya naravīraseṭṭho;
ja509:23.3	Ahampi ekā carissāmi loke,
ja509:23.4	Hitvāna kāmāni yathodhikāni.
ja509:24.1	Accenti kālā tarayanti rattiyo,
ja509:24.2	Vayoguṇā anupubbaṁ jahanti;
ja509:24.3	Ahampi ekā carissāmi loke,
ja509:24.4	Hitvāna kāmāni manoramāni.
ja509:25.1	Accenti kālā tarayanti rattiyo,
ja509:25.2	Vayoguṇā anupubbaṁ jahanti;
ja509:25.3	Ahampi ekā carissāmi loke,
ja509:25.4	Hitvāna kāmāni yathodhikāni.
ja509:26.1	Accenti kālā tarayanti rattiyo,
ja509:26.2	Vayoguṇā anupubbaṁ jahanti;
ja509:26.3	Ahampi ekā carissāmi loke,
ja509:26.4	Sītibhūtā sabbamaticca saṅgan”ti.
ja509:27.1	Hatthipālajātakaṁ terasamaṁ.
ja510:0.1	Jātaka
ja510:0.2	Vīsatinipāta
ja510:0.3	Mātaṅgavagga
ja510:0.4	14. Ayogharajātaka
ja510:1.1	“Yamekarattiṁ paṭhamaṁ,
ja510:1.2	gabbhe vasati māṇavo;
ja510:1.3	Abbhuṭṭhitova so yāti,
ja510:1.4	sagacchaṁ na nivattati.
ja510:2.1	Na yujjhamānā na balenavassitā,
ja510:2.2	Narā na jīranti na cāpi miyyare;
ja510:2.3	Sabbaṁ hidaṁ jātijarāyupaddutaṁ,
ja510:2.4	Taṁ me matī hoti carāmi dhammaṁ.
ja510:3.1	Caturaṅginiṁ senaṁ subhiṁsarūpaṁ,
ja510:3.2	Jayanti raṭṭhādhipatī pasayha;
ja510:3.3	Na maccuno jayitumussahanti,
ja510:3.4	Taṁ me matī hoti carāmi dhammaṁ.
ja510:4.1	Hatthīhi assehi rathehi pattibhi,
ja510:4.2	Parivāritā muccare ekacceyyā;
ja510:4.3	Na maccuno muccitumussahanti,
ja510:4.4	Taṁ me matī hoti carāmi dhammaṁ.
ja510:5.1	Hatthīhi assehi rathehi pattibhi,
ja510:5.2	Sūrā pabhañjanti padhaṁsayanti;
ja510:5.3	Na maccuno bhañjitumussahanti,
ja510:5.4	Taṁ me matī hoti carāmi dhammaṁ.
ja510:6.1	Mattā gajā bhinnagaḷā pabhinnā,
ja510:6.2	Nagarāni maddanti janaṁ hananti;
ja510:6.3	Na maccuno madditumussahanti,
ja510:6.4	Taṁ me matī hoti carāmi dhammaṁ.
ja510:7.1	Issāsino katahatthāpi vīrā,
ja510:7.2	Dūrepātī akkhaṇavedhinopi;
ja510:7.3	Na maccuno vijjhitumussahanti,
ja510:7.4	Taṁ me matī hoti carāmi dhammaṁ.
ja510:8.1	Sarāni khīyanti saselakānanā,
ja510:8.2	Sabbaṁ hidaṁ khīyati dīghamantaraṁ;
ja510:8.3	Sabbaṁ hidaṁ bhañjare kālapariyāyaṁ,
ja510:8.4	Taṁ me matī hoti carāmi dhammaṁ.
ja510:9.1	Sabbesa mevaṁ hi narāna nārinaṁ,
ja510:9.2	Calācalaṁ pāṇabhunodha jīvitaṁ;
ja510:9.3	Paṭova dhuttassa dumova kūlajo,
ja510:9.4	Taṁ me matī hoti carāmi dhammaṁ.
ja510:10.1	Dumapphalāneva patanti māṇavā,
ja510:10.2	Daharā ca vuddhā ca sarīrabhedā;
ja510:10.3	Nāriyo narā majjhimaporisā ca,
ja510:10.4	Taṁ me matī hoti carāmi dhammaṁ.
ja510:11.1	Nāyaṁ vayo tārakarājasannibho,
ja510:11.2	Yadabbhatītaṁ gatameva dāni taṁ;
ja510:11.3	Jiṇṇassa hī natthi ratī kuto sukhaṁ,
ja510:11.4	Taṁ me matī hoti carāmi dhammaṁ.
ja510:12.1	Yakkhā pisācā athavāpi petā,
ja510:12.2	Kupitā te assasanti manusse;
ja510:12.3	Na maccuno assasitussahanti,
ja510:12.4	Taṁ me matī hoti carāmi dhammaṁ.
ja510:13.1	Yakkhe pisāce athavāpi pete,
ja510:13.2	Kupitepi te nijjhapanaṁ karonti;
ja510:13.3	Na maccuno nijjhapanaṁ karonti,
ja510:13.4	Taṁ me matī hoti carāmi dhammaṁ.
ja510:14.1	Aparādhake dūsake heṭhake ca,
ja510:14.2	Rājāno daṇḍenti viditvāna dosaṁ;
ja510:14.3	Na maccuno daṇḍayitussahanti,
ja510:14.4	Taṁ me matī hoti carāmi dhammaṁ.
ja510:15.1	Aparādhakā dūsakā heṭhakā ca,
ja510:15.2	Labhanti te rājino nijjhapetuṁ;
ja510:15.3	Na maccuno nijjhapanaṁ karonti,
ja510:15.4	Taṁ me matī hoti carāmi dhammaṁ.
ja510:16.1	Na khattiyoti na ca brāhmaṇoti,
ja510:16.2	Na aḍḍhakā balavā tejavāpi;
ja510:16.3	Na maccurājassa apekkhamatthi,
ja510:16.4	Taṁ me matī hoti carāmi dhammaṁ.
ja510:17.1	Sīhā ca byagghā ca athopi dīpiyo,
ja510:17.2	Pasayha khādanti vipphandamānaṁ;
ja510:17.3	Na maccuno khāditumussahanti,
ja510:17.4	Taṁ me matī hoti carāmi dhammaṁ.
ja510:18.1	Māyākārā raṅgamajjhe karontā,
ja510:18.2	Mohenti cakkhūni janassa tāvade;
ja510:18.3	Na maccuno mohayitussahanti,
ja510:18.4	Taṁ me matī hoti carāmi dhammaṁ.
ja510:19.1	Āsīvisā kupitā uggatejā,
ja510:19.2	Ḍaṁsanti mārentipi te manusse;
ja510:19.3	Na maccuno ḍaṁsitumussahanti,
ja510:19.4	Taṁ me matī hoti carāmi dhammaṁ.
ja510:20.1	Āsīvisā kupitā yaṁ ḍaṁsanti,
ja510:20.2	Tikicchakā tesa visaṁ hananti;
ja510:20.3	Na maccuno daṭṭhavisaṁ hananti,
ja510:20.4	Taṁ me matī hoti carāmi dhammaṁ.
ja510:21.1	Dhammantarī vettaraṇī ca bhojo,
ja510:21.2	Visāni hantvāna bhujaṅgamānaṁ;
ja510:21.3	Suyyanti te kālakatā tatheva,
ja510:21.4	Taṁ me matī hoti carāmi dhammaṁ.
ja510:22.1	Vijjādharā ghoramadhīyamānā,
ja510:22.2	Adassanaṁ osadhehi vajanti;
ja510:22.3	Na maccurājassa vajantadassanaṁ,
ja510:22.4	Taṁ me matī hoti carāmi dhammaṁ.
ja510:23.1	Dhammo have rakkhati dhammacāriṁ,
ja510:23.2	Dhammo suciṇṇo sukhamāvahāti;
ja510:23.3	Esānisaṁso dhamme suciṇṇe,
ja510:23.4	Na duggatiṁ gacchati dhammacārī.
ja510:24.1	Na hi dhammo adhammo ca,
ja510:24.2	Ubho samavipākino;
ja510:24.3	Adhammo nirayaṁ neti,
ja510:24.4	Dhammo pāpeti suggatin”ti.
ja510:25.1	Ayogharajātakaṁ cuddasamaṁ.
ja510:26.1	Vīsatinipātaṁ niṭṭhitaṁ.
ja510:27.1	Tassuddānaṁ
ja510:28.1	Mātaṅga sambhūta sivi sirimanto,
ja510:28.2	Rohaṇa haṁsa sattigumbo bhallātiya;
ja510:28.3	Somanassa campeyya brahma pañca-
ja510:28.4	Paṇḍita cirassaṁvata ayogharāti.
ja511:0.1	Jātaka
ja511:0.2	Tiṁsanipāta
ja511:0.3	Kiṁchandavagga
ja511:0.4	1. Kiṁchandajātaka
ja511:1.1	“Kiṁchando kimadhippāyo,
ja511:1.2	eko sammasi ghammani;
ja511:1.3	Kiṁ patthayāno kiṁ esaṁ,
ja511:1.4	kena atthena brāhmaṇa”.
ja511:2.1	“Yathā mahā vāridharo,
ja511:2.2	kumbho supariṇāhavā;
ja511:2.3	Tathūpamaṁ ambapakkaṁ,
ja511:2.4	vaṇṇagandharasuttamaṁ.
ja511:3.1	Taṁ vuyhamānaṁ sotena,
ja511:3.2	disvānāmalamajjhime;
ja511:3.3	Pāṇīhi naṁ gahetvāna,
ja511:3.4	agyāyatanamāhariṁ.
ja511:4.1	Tato kadalipattesu,
ja511:4.2	nikkhipitvā sayaṁ ahaṁ;
ja511:4.3	Satthena naṁ vikappetvā,
ja511:4.4	khuppipāsaṁ ahāsi me.
ja511:5.1	Sohaṁ apetadaratho,
ja511:5.2	Byantībhūto dukhakkhamo;
ja511:5.3	Assādaṁ nādhigacchāmi,
ja511:5.4	Phalesvaññesu kesuci.
ja511:6.1	Sosetvā nūna maraṇaṁ,
ja511:6.2	taṁ mamaṁ āvahissati;
ja511:6.3	Ambaṁ yassa phalaṁ sādu,
ja511:6.4	madhuraggaṁ manoramaṁ;
ja511:6.5	Yamuddhariṁ vuyhamānaṁ,
ja511:6.6	udadhismā mahaṇṇave.
ja511:7.1	Akkhātaṁ te mayā sabbaṁ,
ja511:7.2	yasmā upavasāmahaṁ;
ja511:7.3	Rammaṁ pati nisinnosmi,
ja511:7.4	puthulomāyutā puthu.
ja511:8.1	Tvañca kho meva akkhāhi,
ja511:8.2	attānamapalāyini;
ja511:8.3	Kā vā tvamasi kalyāṇi,
ja511:8.4	kissa vā tvaṁ sumajjhime.
ja511:9.1	Ruppapaṭṭapalimaṭṭhīva,
ja511:9.2	byagghīva girisānujā;
ja511:9.3	Yā santi nāriyo devesu,
ja511:9.4	devānaṁ paricārikā.
ja511:10.1	Yā ca manussalokasmiṁ,
ja511:10.2	Rūpenānvāgatitthiyo;
ja511:10.3	Rūpena te sadisī natthi,
ja511:10.4	Devesu gandhabbamanussaloke;
ja511:10.5	Puṭṭhāsi me cārupubbaṅgi,
ja511:10.6	Brūhi nāmañca bandhave”.
ja511:11.1	“Yaṁ tvaṁ pati nisinnosi,
ja511:11.2	rammaṁ brāhmaṇa kosikiṁ;
ja511:11.3	Sāhaṁ bhusālayāvutthā,
ja511:11.4	varavārivahoghasā.
ja511:12.1	Nānādumagaṇākiṇṇā,
ja511:12.2	bahukā girikandarā;
ja511:12.3	Mameva pamukhā honti,
ja511:12.4	abhisandanti pāvuse.
ja511:13.1	Atho bahū vanatodā,
ja511:13.2	nīlavārivahindharā;
ja511:13.3	Bahukā nāgavittodā,
ja511:13.4	abhisandanti vārinā.
ja511:14.1	Tā ambajambulabujā,
ja511:14.2	nīpā tālā cudumbarā;
ja511:14.3	Bahūni phalajātāni,
ja511:14.4	āvahanti abhiṇhaso.
ja511:15.1	Yaṁ kiñci ubhato tīre,
ja511:15.2	phalaṁ patati ambuni;
ja511:15.3	Asaṁsayaṁ taṁ sotassa,
ja511:15.4	phalaṁ hoti vasānugaṁ.
ja511:16.1	Etadaññāya medhāvi,
ja511:16.2	puthupañña suṇohi me;
ja511:16.3	Mā rocaya mabhisaṅgaṁ,
ja511:16.4	paṭisedha janādhipa.
ja511:17.1	Na vāhaṁ vaḍḍhavaṁ maññe,
ja511:17.2	Yaṁ tvaṁ raṭṭhābhivaḍḍhana;
ja511:17.3	Āceyyamāno rājisi,
ja511:17.4	Maraṇaṁ abhikaṅkhasi.
ja511:18.1	Tassa jānanti pitaro,
ja511:18.2	gandhabbā ca sadevakā;
ja511:18.3	Ye cāpi isayo loke,
ja511:18.4	saññatattā tapassino;
ja511:18.5	Asaṁsayaṁ tepi jānanti,
ja511:18.6	paṭṭhabhūtā yasassino”.
ja511:19.1	“Evaṁ viditvā vidū sabbadhammaṁ,
ja511:19.2	Viddhaṁsanaṁ cavanaṁ jīvitassa;
ja511:19.3	Na cīyatī tassa narassa pāpaṁ,
ja511:19.4	Sace na ceteti vadhāya tassa.
ja511:20.1	Isipūgasamaññāte,
ja511:20.2	evaṁ lokyā viditā sati;
ja511:20.3	Anariyaparisambhāse,
ja511:20.4	pāpakammaṁ jigīsasi.
ja511:21.1	Sace ahaṁ marissāmi,
ja511:21.2	tīre te puthusussoṇi;
ja511:21.3	Asaṁsayaṁ taṁ asiloko,
ja511:21.4	mayi pete āgamissati.
ja511:22.1	Tasmā hi pāpakaṁ kammaṁ,
ja511:22.2	rakkhasseva sumajjhime;
ja511:22.3	Mā taṁ sabbo jano pacchā,
ja511:22.4	pakuṭṭhāyi mayi mate”.
ja511:23.1	“Aññātametaṁ avisayhasāhi,
ja511:23.2	Attānamambañca dadāmi te taṁ;
ja511:23.3	So duccaje kāmaguṇe pahāya,
ja511:23.4	Santiñca dhammañca adhiṭṭhitosi.
ja511:24.1	Yo hitvā pubbasaññogaṁ,
ja511:24.2	pacchā saṁyojane ṭhito;
ja511:24.3	Adhammañceva carati,
ja511:24.4	pāpañcassa pavaḍḍhati.
ja511:25.1	Ehi taṁ pāpayissāmi,
ja511:25.2	kāmaṁ appossuko bhava;
ja511:25.3	Upānayāmi sītasmiṁ,
ja511:25.4	viharāhi anussuko.
ja511:26.1	Taṁ puppharasamattebhi,
ja511:26.2	vakkaṅgehi arindama;
ja511:26.3	Koñcā mayūrā diviyā,
ja511:26.4	kolaṭṭhimadhusāḷikā;
ja511:26.5	Kūjitā haṁsapūgehi,
ja511:26.6	kokilettha pabodhare.
ja511:27.1	Ambettha vippasākhaggā,
ja511:27.2	palālakhalasannibhā;
ja511:27.3	Kosambasaḷalā nīpā,
ja511:27.4	pakkatālavilambino”.
ja511:28.1	“Mālī tiriṭī kāyūrī,
ja511:28.2	aṅgadī candanussado;
ja511:28.3	Rattiṁ tvaṁ paricāresi,
ja511:28.4	divā vedesi vedanaṁ.
ja511:29.1	Soḷasitthisahassāni,
ja511:29.2	yā temā paricārikā;
ja511:29.3	Evaṁ mahānubhāvosi,
ja511:29.4	abbhuto lomahaṁsano.
ja511:30.1	Kiṁ kammamakarī pubbe,
ja511:30.2	pāpaṁ attadukhāvahaṁ;
ja511:30.3	Yaṁ karitvā manussesu,
ja511:30.4	piṭṭhimaṁsāni khādasi”.
ja511:31.1	“Ajjhenāni paṭiggayha,
ja511:31.2	kāmesu gadhito ahaṁ;
ja511:31.3	Acariṁ dīghamaddhānaṁ,
ja511:31.4	paresaṁ ahitāyahaṁ.
ja511:32.1	Yo piṭṭhimaṁsiko hoti,
ja511:32.2	evaṁ ukkacca khādati;
ja511:32.3	Yathāhaṁ ajja khādāmi,
ja511:32.4	piṭṭhimaṁsāni attano”ti.
ja511:33.1	Kiṁchandajātakaṁ paṭhamaṁ.
ja512:0.1	Jātaka
ja512:0.2	Tiṁsanipāta
ja512:0.3	Kiṁchandavagga
ja512:0.4	2. Kumbhajātaka
ja512:1.1	“Ko pāturāsī tidivā nabhamhi,
ja512:1.2	Obhāsayaṁ saṁvariṁ candimāva;
ja512:1.3	Gattehi te rasmiyo niccharanti,
ja512:1.4	Sateratā vijjurivantalikkhe.
ja512:2.1	So chinnavātaṁ kamasī aghamhi,
ja512:2.2	Vehāyasaṁ gacchasi tiṭṭhasī ca;
ja512:2.3	Iddhī nu te vatthukatā subhāvitā,
ja512:2.4	Anaddhagūnaṁ api devatānaṁ.
ja512:3.1	Vehāyasaṁ gammamāgamma tiṭṭhasi,
ja512:3.2	Kumbhaṁ kiṇāthāti yametamatthaṁ;
ja512:3.3	Ko vā tuvaṁ kissa vā tāya kumbho,
ja512:3.4	Akkhāhi me brāhmaṇa etamatthaṁ”.
ja512:4.1	“Na sappikumbho napi telakumbho,
ja512:4.2	Na phāṇitassa na madhussa kumbho;
ja512:4.3	Kumbhassa vajjāni anappakāni,
ja512:4.4	Dose bahū kumbhagate suṇātha.
ja512:5.1	Gaḷeyya yaṁ pitvā pate papātaṁ,
ja512:5.2	Sobbhaṁ guhaṁ candaniyoḷigallaṁ;
ja512:5.3	Bahumpi bhuñjeyya abhojaneyyaṁ,
ja512:5.4	Tassā puṇṇaṁ kumbhamimaṁ kiṇātha.
ja512:6.1	Yaṁ pitva cittasmimanesamāno,
ja512:6.2	Āhiṇḍatī goriva bhakkhasādī;
ja512:6.3	Anāthamāno upagāyati naccati ca,
ja512:6.4	Tassā puṇṇaṁ kumbhamimaṁ kiṇātha.
ja512:7.1	Yaṁ ve pivitvā acelova naggo,
ja512:7.2	Careyya gāme visikhantarāni;
ja512:7.3	Sammūḷhacitto ativelasāyī,
ja512:7.4	Tassā puṇṇaṁ kumbhamimaṁ kiṇātha.
ja512:8.1	Yaṁ pitva uṭṭhāya pavedhamāno,
ja512:8.2	Sīsañca bāhuñca pacālayanto;
ja512:8.3	So naccatī dārukaṭallakova,
ja512:8.4	Tassā puṇṇaṁ kumbhamimaṁ kiṇātha.
ja512:9.1	Yaṁ ve pivitvā aggidaḍḍhā sayanti,
ja512:9.2	Atho sigālehipi khāditāse;
ja512:9.3	Bandhaṁ vadhaṁ bhogajāniñcupenti,
ja512:9.4	Tassā puṇṇaṁ kumbhamimaṁ kiṇātha.
ja512:10.1	Yaṁ pitva bhāseyya abhāsaneyyaṁ,
ja512:10.2	Sabhāyamāsīno apetavattho;
ja512:10.3	Sammakkhito vantagato byasanno,
ja512:10.4	Tassā puṇṇaṁ kumbhamimaṁ kiṇātha.
ja512:11.1	Yaṁ ve pivitvā ukkaṭṭho āvilakkho,
ja512:11.2	Mameva sabbā pathavīti maññe;
ja512:11.3	Na me samo cāturantopi rājā,
ja512:11.4	Tassā puṇṇaṁ kumbhamimaṁ kiṇātha.
ja512:12.1	Mānātimānā kalahāni pesuṇī,
ja512:12.2	Dubbaṇṇinī naggayinī palāyinī;
ja512:12.3	Corāna dhuttāna gatī niketo,
ja512:12.4	Tassā puṇṇaṁ kumbhamimaṁ kiṇātha.
ja512:13.1	Iddhāni phītāni kulāni assu,
ja512:13.2	Anekasāhassadhanāni loke;
ja512:13.3	Ucchinnadāyajjakatānimāya,
ja512:13.4	Tassā puṇṇaṁ kumbhamimaṁ kiṇātha.
ja512:14.1	Dhaññaṁ dhanaṁ rajataṁ jātarūpaṁ,
ja512:14.2	Khettaṁ gavaṁ yattha vināsayanti;
ja512:14.3	Ucchedanī vittavataṁ kulānaṁ,
ja512:14.4	Tassā puṇṇaṁ kumbhamimaṁ kiṇātha.
ja512:15.1	Yaṁ ve pitvā dittarūpova poso,
ja512:15.2	Akkosati mātaraṁ pitarañca;
ja512:15.3	Sassumpi gaṇheyya athopi suṇhaṁ,
ja512:15.4	Tassā puṇṇaṁ kumbhamimaṁ kiṇātha.
ja512:16.1	Yaṁ ve pitvā dittarūpāva nārī,
ja512:16.2	Akkosatī sasuraṁ sāmikañca;
ja512:16.3	Dāsampi gaṇhe paricārakampi,
ja512:16.4	Tassā puṇṇaṁ kumbhamimaṁ kiṇātha.
ja512:17.1	Yaṁ ve pivitvāna haneyya poso,
ja512:17.2	Dhamme ṭhitaṁ samaṇaṁ brāhmaṇaṁ vā;
ja512:17.3	Gacche apāyampi tatonidānaṁ,
ja512:17.4	Tassā puṇṇaṁ kumbhamimaṁ kiṇātha.
ja512:18.1	Yaṁ ve pivitvā duccaritaṁ caranti,
ja512:18.2	Kāyena vācāya ca cetasā ca;
ja512:18.3	Nirayaṁ vajanti duccaritaṁ caritvā,
ja512:18.4	Tassā puṇṇaṁ kumbhamimaṁ kiṇātha.
ja512:19.1	Yaṁ yācamānā na labhanti pubbe,
ja512:19.2	Bahuṁ hiraññampi pariccajantā;
ja512:19.3	So taṁ pivitvā alikaṁ bhaṇāti,
ja512:19.4	Tassā puṇṇaṁ kumbhamimaṁ kiṇātha.
ja512:20.1	Yaṁ ve pitvā pesane pesiyanto,
ja512:20.2	Accāyike karaṇīyamhi jāte;
ja512:20.3	Atthampi so nappajānāti vutto,
ja512:20.4	Tassā puṇṇaṁ kumbhamimaṁ kiṇātha.
ja512:21.1	Hirīmanāpi ahirīkabhāvaṁ,
ja512:21.2	Pātuṁ karonti madanāya mattā;
ja512:21.3	Dhīrāpi santā bahukaṁ bhaṇanti,
ja512:21.4	Tassā puṇṇaṁ kumbhamimaṁ kiṇātha.
ja512:22.1	Yaṁ ve pitvā ekathūpā sayanti,
ja512:22.2	Anāsakā thaṇḍiladukkhaseyyaṁ;
ja512:22.3	Dubbaṇṇiyaṁ āyasakyañcupenti,
ja512:22.4	Tassā puṇṇaṁ kumbhamimaṁ kiṇātha.
ja512:23.1	Yaṁ ve pitvā pattakhandhā sayanti,
ja512:23.2	Gāvo kuṭahatāva na hi vāruṇiyā;
ja512:23.3	Vego narena susahoriva,
ja512:23.4	Tassā puṇṇaṁ kumbhamimaṁ kiṇātha.
ja512:24.1	Yaṁ manussā vivajjenti,
ja512:24.2	sappaṁ ghoravisamiva;
ja512:24.3	Taṁ loke visasamānaṁ,
ja512:24.4	ko naro pātumarahati.
ja512:25.1	Yaṁ ve pitvā andhakaveṇḍaputtā,
ja512:25.2	Samuddatīre paricārayantā;
ja512:25.3	Upakkamuṁ musalehaññamaññaṁ,
ja512:25.4	Tassā puṇṇaṁ kumbhamimaṁ kiṇātha.
ja512:26.1	Yaṁ ve pitvā pubbadevā pamattā,
ja512:26.2	Tidivā cutā sassatiyā samāya;
ja512:26.3	Taṁ tādisaṁ majjamimaṁ niratthakaṁ,
ja512:26.4	Jānaṁ mahārāja kathaṁ piveyya.
ja512:27.1	Nayimasmiṁ kumbhasmiṁ dadhi vā madhu vā,
ja512:27.2	Evaṁ abhiññāya kiṇāhi rāja;
ja512:27.3	Evañhimaṁ kumbhagatā mayā te,
ja512:27.4	Akkhātarūpaṁ tava sabbamitta”.
ja512:28.1	“Na me pitā vā athavāpi mātā,
ja512:28.2	Etādisā yādisako tuvaṁsi;
ja512:28.3	Hitānukampī paramatthakāmo,
ja512:28.4	Sohaṁ karissaṁ vacanaṁ tavajja.
ja512:29.1	Dadāmi te gāmavarāni pañca,
ja512:29.2	Dāsīsataṁ satta gavaṁsatāni;
ja512:29.3	Ājaññayutte ca rathe dasa ime,
ja512:29.4	Ācariyo hosi mamatthakāmo”.
ja512:30.1	“Taveva dāsīsatamatthu rāja,
ja512:30.2	Gāmā ca gāvo ca taveva hontu;
ja512:30.3	Ājaññayuttā ca rathā taveva,
ja512:30.4	Sakkohamasmī tidasānamindo.
ja512:31.1	Maṁsodanaṁ sappipāyāsaṁ bhuñja,
ja512:31.2	Khādassu ca tvaṁ madhumāsapūve;
ja512:31.3	Evaṁ tuvaṁ dhammarato janinda,
ja512:31.4	Anindito saggamupehi ṭhānan”ti.
ja512:32.1	Kumbhajātakaṁ dutiyaṁ.
ja513:0.1	Jātaka
ja513:0.2	Tiṁsanipāta
ja513:0.3	Kiṁchandavagga
ja513:0.4	3. Jayaddisajātaka
ja513:1.1	“Cirassaṁ vata me udapādi ajja,
ja513:1.2	Bhakkho mahā sattamibhattakāle;
ja513:1.3	Kutosi ko vāsi tadiṅgha brūhi,
ja513:1.4	Ācikkha jātiṁ vidito yathāsi”.
ja513:2.1	“Pañcālarājā migavaṁ paviṭṭho,
ja513:2.2	Jayaddiso nāma yadissuto te;
ja513:2.3	Carāmi kacchāni vanāni cāhaṁ,
ja513:2.4	Pasadaṁ imaṁ khāda mamajja muñca”.
ja513:3.1	“Seneva tvaṁ paṇasi sassamāno,
ja513:3.2	Mamesa bhakkho pasado yaṁ vadesi;
ja513:3.3	Taṁ khādiyāna pasadaṁ jighaññaṁ,
ja513:3.4	Khādissaṁ pacchā na vilāpakālo”.
ja513:4.1	“Na catthi mokkho mama nikkayena,
ja513:4.2	Gantvāna paccāgamanāya paṇhe;
ja513:4.3	Taṁ saṅgaraṁ brāhmaṇassappadāya,
ja513:4.4	Saccānurakkhī punarāvajissaṁ”.
ja513:5.1	“Kiṁ kammajātaṁ anutappate tvaṁ,
ja513:5.2	Pattaṁ samīpaṁ maraṇassa rāja;
ja513:5.3	Ācikkha me taṁ api sakkuṇemu,
ja513:5.4	Anujānituṁ āgamanāya paṇhe”.
ja513:6.1	“Katā mayā brāhmaṇassa dhanāsā,
ja513:6.2	Taṁ saṅgaraṁ paṭimukkaṁ na muttaṁ;
ja513:6.3	Taṁ saṅgaraṁ brāhmaṇassappadāya,
ja513:6.4	Saccānurakkhī punarāvajissaṁ”.
ja513:7.1	“Yā te katā brāhmaṇassa dhanāsā,
ja513:7.2	Taṁ saṅgaraṁ paṭimukkaṁ na muttaṁ;
ja513:7.3	Taṁ saṅgaraṁ brāhmaṇassappadāya,
ja513:7.4	Saccānurakkhī punarāvajassu”.
ja513:8.1	Mutto ca so porisādassa hatthā,
ja513:8.2	Gantvā sakaṁ mandiraṁ kāmakāmī;
ja513:8.3	Taṁ saṅgaraṁ brāhmaṇassappadāya,
ja513:8.4	Āmantayī puttamalīnasattaṁ.
ja513:9.1	“Ajjeva rajjaṁ abhisiñcayassu,
ja513:9.2	Dhammaṁ cara sesu paresu cāpi;
ja513:9.3	Adhammakāro ca te māhu raṭṭhe,
ja513:9.4	Gacchāmahaṁ porisādassa ñatte”.
ja513:10.1	“Kiṁ kamma kubbaṁ tava deva pāva,
ja513:10.2	Nārādhayī taṁ tadicchāmi sotuṁ;
ja513:10.3	Yamajja rajjamhi udassaye tuvaṁ,
ja513:10.4	Rajjampi niccheyyaṁ tayā vināhaṁ”.
ja513:11.1	“Na kammunā vā vacasā va tāta,
ja513:11.2	Aparādhitohaṁ tuviyaṁ sarāmi;
ja513:11.3	Sandhiñca katvā purisādakena,
ja513:11.4	Saccānurakkhī punāhaṁ gamissaṁ”.
ja513:12.1	“Ahaṁ gamissāmi idheva hohi,
ja513:12.2	Natthi tato jīvato vippamokkho;
ja513:12.3	Sace tuvaṁ gacchasiyeva rāja,
ja513:12.4	Ahampi gacchāmi ubho na homa”.
ja513:13.1	“Addhā hi tāta satānesa dhammo,
ja513:13.2	Maraṇā ca me dukkhataraṁ tadassa;
ja513:13.3	Kammāsapādo taṁ yadā pacitvā,
ja513:13.4	Pasayha khāde bhidā rukkhasūle”.
ja513:14.1	“Pāṇena te pāṇamahaṁ nimissaṁ,
ja513:14.2	Mā tvaṁ agā porisādassa ñatte;
ja513:14.3	Etañca te pāṇamahaṁ nimissaṁ,
ja513:14.4	Tasmā mataṁ jīvitassa vaṇṇemi”.
ja513:15.1	Tato have dhitimā rājaputto,
ja513:15.2	Vanditvā mātu ca pitu ca pāde;
ja513:15.3	Dukhinissa mātā nipatā pathabyā,
ja513:15.4	Pitāssa paggayha bhujāni kandati.
ja513:16.1	Taṁ gacchantaṁ tāva pitā viditvā,
ja513:16.2	Parammukho vandati pañjalīko;
ja513:16.3	“Somo ca rājā varuṇo ca rājā,
ja513:16.4	Pajāpatī candimā sūriyo ca;
ja513:16.5	Etehi gutto purisādakamhā,
ja513:16.6	Anuññāto sotthi paccehi tāta”.
ja513:17.1	“Yaṁ daṇḍakirañño gatassa mātā,
ja513:17.2	Rāmassakāsi sotthānaṁ suguttā;
ja513:17.3	Taṁ te ahaṁ sotthānaṁ karomi,
ja513:17.4	Etena saccena sarantu devā;
ja513:17.5	Anuññāto sotthi paccehi putta”.
ja513:18.1	“Āvī raho vāpi manopadosaṁ,
ja513:18.2	Nāhaṁ sare jātu malīnasatte;
ja513:18.3	Etena saccena sarantu devā,
ja513:18.4	Anuññāto sotthi paccehi bhātika”.
ja513:19.1	“Yasmā ca me anadhimanosi sāmi,
ja513:19.2	Na cāpi me manasā appiyosi;
ja513:19.3	Etena saccena sarantu devā,
ja513:19.4	Anuññāto sotthi paccehi sāmi”.
ja513:20.1	“Brahā ujū cārumukho kutosi,
ja513:20.2	Na maṁ pajānāsi vane vasantaṁ;
ja513:20.3	Luddaṁ maṁ ñatvā ‘purisādako’ti,
ja513:20.4	Ko sotthimājānamidhāvajeyya”.
ja513:21.1	“Jānāmi ludda purisādako tvaṁ,
ja513:21.2	Na taṁ na jānāmi vane vasantaṁ;
ja513:21.3	Ahañca puttosmi jayaddisassa,
ja513:21.4	Mamajja khāda pituno pamokkhā”.
ja513:22.1	“Jānāmi puttoti jayaddisassa,
ja513:22.2	Tathā hi vo mukhavaṇṇo ubhinnaṁ;
ja513:22.3	Sudukkaraññeva kataṁ tavedaṁ,
ja513:22.4	Yo mattumicche pituno pamokkhā”.
ja513:23.1	“Na dukkaraṁ kiñci mahettha maññe,
ja513:23.2	Yo mattumicche pituno pamokkhā;
ja513:23.3	Mātu ca hetu paraloka gantvā,
ja513:23.4	Sukhena saggena ca sampayutto”.
ja513:24.1	“Ahañca kho attano pāpakiriyaṁ,
ja513:24.2	Āvī raho vāpi sare na jātu;
ja513:24.3	Saṅkhātajātīmaraṇohamasmi,
ja513:24.4	Yatheva me idha tathā parattha.
ja513:25.1	Khādajja maṁ dāni mahānubhāva,
ja513:25.2	Karassu kiccāni imaṁ sarīraṁ;
ja513:25.3	Rukkhassa vā te papatāmi aggā,
ja513:25.4	Chādayamāno mayhaṁ tvamadesi maṁsaṁ”.
ja513:26.1	“Idañca te ruccati rājaputta,
ja513:26.2	Cajesi pāṇaṁ pituno pamokkhā;
ja513:26.3	Tasmā hi so tvaṁ taramānarūpo,
ja513:26.4	Sambhañja kaṭṭhāni jalehi aggiṁ”.
ja513:27.1	Tato have dhitimā rājaputto,
ja513:27.2	Dāruṁ samāhatvā mahantamaggiṁ;
ja513:27.3	Sandīpayitvā paṭivedayittha,
ja513:27.4	“Ādīpito dāni mahāyamaggi”.
ja513:28.1	“Khādajja maṁ dāni pasayhakāri,
ja513:28.2	Kiṁ maṁ muhuṁ pekkhasi haṭṭhalomo;
ja513:28.3	Tathā tathā tuyhamahaṁ karomi,
ja513:28.4	Yathā yathā maṁ chādayamāno adesi”.
ja513:29.1	“Ko tādisaṁ arahati khāditāye,
ja513:29.2	Dhamme ṭhitaṁ saccavādiṁ vadaññuṁ;
ja513:29.3	Muddhāpi tassa viphaleyya sattadhā,
ja513:29.4	Yo tādisaṁ saccavādiṁ adeyya”.
ja513:30.1	“Idañhi so brāhmaṇaṁ maññamāno,
ja513:30.2	Saso avāsesi sake sarīre;
ja513:30.3	Teneva so candimā devaputto,
ja513:30.4	Sasatthuto kāmaduhajja yakkha”.
ja513:31.1	“Cando yathā rāhumukhā pamutto,
ja513:31.2	Virocate pannaraseva bhāṇumā;
ja513:31.3	Evaṁ tuvaṁ porisādā pamutto,
ja513:31.4	Viroca kapile mahānubhāva;
ja513:31.5	Āmodayaṁ pitaraṁ mātarañca,
ja513:31.6	Sabbo ca te nandatu ñātipakkho”.
ja513:32.1	Tato have dhitimā rājaputto,
ja513:32.2	Katañjalī pariyāya porisādaṁ;
ja513:32.3	Anuññāto sotthi sukhī arogo,
ja513:32.4	Paccāgamā kapilamalīnasatto.
ja513:33.1	Taṁ negamā jānapadā ca sabbe,
ja513:33.2	Hatthārohā rathikā pattikā ca;
ja513:33.3	Namassamānā pañjalikā upāgamuṁ,
ja513:33.4	“Namatthu te dukkarakārakosī”ti.
ja513:34.1	Jayaddisajātakaṁ tatiyaṁ.
ja514:0.1	Jātaka
ja514:0.2	Tiṁsanipāta
ja514:0.3	Kiṁchandavagga
ja514:0.4	4. Chaddantajātaka
ja514:1.1	“Kiṁ nu socasinuccaṅgi,
ja514:1.2	paṇḍūsi varavaṇṇini;
ja514:1.3	Milāyasi visālakkhi,
ja514:1.4	mālāva parimadditā”.
ja514:2.1	“Dohaḷo me mahārāja,
ja514:2.2	supinantenupajjhagā;
ja514:2.3	Na so sulabharūpova,
ja514:2.4	yādiso mama dohaḷo”.
ja514:3.1	“Ye keci mānusā kāmā,
ja514:3.2	idha lokasmi nandane;
ja514:3.3	Sabbe te pacurā mayhaṁ,
ja514:3.4	ahaṁ te dammi dohaḷaṁ”.
ja514:4.1	“Luddā deva samāyantu,
ja514:4.2	ye keci vijite tava;
ja514:4.3	Etesaṁ ahamakkhissaṁ,
ja514:4.4	yādiso mama dohaḷo”.
ja514:5.1	“Ime te luddakā devi,
ja514:5.2	katahatthā visāradā;
ja514:5.3	Vanaññū ca migaññū ca,
ja514:5.4	mamatthe cattajīvitā”.
ja514:6.1	“Luddaputtā nisāmetha,
ja514:6.2	yāvantettha samāgatā;
ja514:6.3	Chabbisāṇaṁ gajaṁ setaṁ,
ja514:6.4	addasaṁ supine ahaṁ;
ja514:6.5	Tassa dantehi me attho,
ja514:6.6	alābhe natthi jīvitaṁ”.
ja514:7.1	“Na no pitūnaṁ na pitāmahānaṁ,
ja514:7.2	Diṭṭho suto kuñjaro chabbisāṇo;
ja514:7.3	Yamaddasā supine rājaputtī,
ja514:7.4	Akkhāhi no yādiso hatthināgo”.
ja514:8.1	“Disā catasso vidisā catasso,
ja514:8.2	Uddhaṁ adho dasa disā imāyo;
ja514:8.3	Katamaṁ disaṁ tiṭṭhati nāgarājā,
ja514:8.4	Yamaddasā supine chabbisāṇaṁ”.
ja514:9.1	“Ito ujuṁ uttariyaṁ disāyaṁ,
ja514:9.2	Atikkamma so sattagirī brahante;
ja514:9.3	Suvaṇṇapasso nāma girī uḷāro,
ja514:9.4	Supupphito kimpurisānuciṇṇo.
ja514:10.1	Āruyha selaṁ bhavanaṁ kinnarānaṁ,
ja514:10.2	Olokaya pabbatapādamūlaṁ;
ja514:10.3	Atha dakkhasī meghasamānavaṇṇaṁ,
ja514:10.4	Nigrodharājaṁ aṭṭhasahassapādaṁ.
ja514:11.1	Tatthacchatī kuñjaro chabbisāṇo,
ja514:11.2	Sabbaseto duppasaho parebhi;
ja514:11.3	Rakkhanti naṁ aṭṭhasahassanāgā,
ja514:11.4	Īsādantā vātajavappahārino.
ja514:12.1	Tiṭṭhanti te tumūlaṁ passasantā,
ja514:12.2	Kuppanti vātassapi eritassa;
ja514:12.3	Manussabhūtaṁ pana tattha disvā,
ja514:12.4	Bhasmaṁ kareyyuṁ nāssa rajopi tassa”.
ja514:13.1	“Bahū hime rājakulamhi santi,
ja514:13.2	Piḷandhanā jātarūpassa devī;
ja514:13.3	Muttā maṇī veḷuriyāmayā ca,
ja514:13.4	Kiṁ kāhasi dantapiḷandhanena;
ja514:13.5	Māretukāmā kuñjaraṁ chabbisāṇaṁ,
ja514:13.6	Udāhu ghātessasi luddaputte”.
ja514:14.1	“Sā issitā dukkhitā casmi ludda,
ja514:14.2	Uddhañca sussāmi anussarantī;
ja514:14.3	Karohi me luddaka etamatthaṁ,
ja514:14.4	Dassāmi te gāmavarāni pañca”.
ja514:15.1	“Katthacchatī kattha mupeti ṭhānaṁ,
ja514:15.2	Vīthissa kā nhāna gatassa hoti;
ja514:15.3	Kathañhi so nhāyati nāgarājā,
ja514:15.4	Kathaṁ vijānemu gatiṁ gajassa”.
ja514:16.1	“Tattheva sā pokkharaṇī adūre,
ja514:16.2	Rammā sutitthā ca mahodikā ca;
ja514:16.3	Sampupphitā bhamaragaṇānuciṇṇā,
ja514:16.4	Ettha hi so nhāyati nāgarājā.
ja514:17.1	Sīsaṁ nahātuppalamālabhārī,
ja514:17.2	Sabbaseto puṇḍarīkattacaṅgī;
ja514:17.3	Āmodamāno gacchati sanniketaṁ,
ja514:17.4	Purakkhatvā mahesiṁ sabbabhaddaṁ”.
ja514:18.1	Tattheva so uggahetvāna vākyaṁ,
ja514:18.2	Ādāya tūṇiñca dhanuñca luddo;
ja514:18.3	Vituriyati sattagirī brahante,
ja514:18.4	Suvaṇṇapassaṁ nāma giriṁ uḷāraṁ.
ja514:19.1	Āruyha selaṁ bhavanaṁ kinnarānaṁ,
ja514:19.2	Olokayī pabbatapādamūlaṁ;
ja514:19.3	Tatthaddasā meghasamānavaṇṇaṁ,
ja514:19.4	Nigrodharājaṁ aṭṭhasahassapādaṁ.
ja514:20.1	Tatthaddasā kuñjaraṁ chabbisāṇaṁ,
ja514:20.2	Sabbasetaṁ duppasahaṁ parebhi;
ja514:20.3	Rakkhanti naṁ aṭṭhasahassanāgā,
ja514:20.4	Īsādantā vātajavappahārino.
ja514:21.1	Tatthaddasā pokkharaṇiṁ adūre,
ja514:21.2	Rammaṁ sutitthañca mahodikañca;
ja514:21.3	Sampupphitaṁ bhamaragaṇānuciṇṇaṁ,
ja514:21.4	Yattha hi so nhāyati nāgarājā.
ja514:22.1	Disvāna nāgassa gatiṁ ṭhitiñca,
ja514:22.2	Vīthissa yā nhānagatassa hoti;
ja514:22.3	Opātamāgacchi anariyarūpo,
ja514:22.4	Payojito cittavasānugāya.
ja514:23.1	Khaṇitvāna kāsuṁ phalakehi chādayi,
ja514:23.2	Attānamodhāya dhanuñca luddo;
ja514:23.3	Passāgataṁ puthusallena nāgaṁ,
ja514:23.4	Samappayī dukkaṭakammakārī.
ja514:24.1	Viddho ca nāgo koñcamanādi ghoraṁ,
ja514:24.2	Sabbe ca nāgā ninnaduṁ ghorarūpaṁ;
ja514:24.3	Tiṇañca kaṭṭhañca raṇaṁ karontā,
ja514:24.4	Dhāviṁsu te aṭṭha disā samantato.
ja514:25.1	Vadhissametanti parāmasanto,
ja514:25.2	Kāsāvamaddakkhi dhajaṁ isīnaṁ;
ja514:25.3	Dukkhena phuṭṭhassudapādi saññā,
ja514:25.4	Arahaddhajo sabbhi avajjharūpo.
ja514:26.1	“Anikkasāvo kāsāvaṁ,
ja514:26.2	yo vatthaṁ paridahissati;
ja514:26.3	Apeto damasaccena,
ja514:26.4	na so kāsāvamarahati.
ja514:27.1	Yo ca vantakasāvassa,
ja514:27.2	sīlesu susamāhito;
ja514:27.3	Upeto damasaccena,
ja514:27.4	sa ve kāsāvamarahati”.
ja514:28.1	Samappito puthusallena nāgo,
ja514:28.2	Aduṭṭhacitto luddakamajjhabhāsi;
ja514:28.3	“Kimatthayaṁ kissa vā samma hetu,
ja514:28.4	Mamaṁ vadhī kassa vāyaṁ payogo”.
ja514:29.1	“Kāsissa rañño mahesī bhadante,
ja514:29.2	Sā pūjitā rājakule subhaddā;
ja514:29.3	Taṁ addasā sā ca mamaṁ asaṁsi,
ja514:29.4	Dantehi atthoti ca maṁ avoca”.
ja514:30.1	“Bahū hi me dantayugā uḷārā,
ja514:30.2	Ye me pitūnañca pitāmahānaṁ;
ja514:30.3	Jānāti sā kodhanā rājaputtī,
ja514:30.4	Vadhatthikā veramakāsi bālā.
ja514:31.1	Uṭṭhehi tvaṁ ludda kharaṁ gahetvā,
ja514:31.2	Dante ime chinda purā marāmi;
ja514:31.3	Vajjāsi taṁ kodhanaṁ rājaputtiṁ,
ja514:31.4	‘Nāgo hato handa imassa dantā’”.
ja514:32.1	Uṭṭhāya so luddo kharaṁ gahetvā,
ja514:32.2	Chetvāna dantāni gajuttamassa;
ja514:32.3	Vaggū subhe appaṭime pathabyā,
ja514:32.4	Ādāya pakkāmi tato hi khippaṁ.
ja514:33.1	Bhayaṭṭitā nāgavadhena aṭṭā,
ja514:33.2	Ye te nāgā aṭṭha disā vidhāvuṁ;
ja514:33.3	Adisvāna posaṁ gajapaccamittaṁ,
ja514:33.4	Paccāgamuṁ yena so nāgarājā.
ja514:34.1	Te tattha kanditvā roditvāna nāgā,
ja514:34.2	Sīse sake paṁsukaṁ okiritvā;
ja514:34.3	Agamaṁsu te sabbe sakaṁ niketaṁ,
ja514:34.4	Purakkhatvā mahesiṁ sabbabhaddaṁ.
ja514:35.1	Ādāya dantāni gajuttamassa,
ja514:35.2	Vaggū subhe appaṭime pathabyā;
ja514:35.3	Suvaṇṇarājīhi samantamodare,
ja514:35.4	So luddako kāsipuraṁ upāgami;
ja514:35.5	Upanesi so rājakaññāya dante,
ja514:35.6	Nāgo hato handa imassa dantā.
ja514:36.1	Disvāna dantāni gajuttamassa,
ja514:36.2	Bhattuppiyassa purimāya jātiyā;
ja514:36.3	Tattheva tassā hadayaṁ aphāli,
ja514:36.4	Teneva sā kālamakāsi bālā.
ja514:37.1	Sambodhipatto sa mahānubhāvo,
ja514:37.2	Sitaṁ akāsi parisāya majjhe;
ja514:37.3	Pucchiṁsu bhikkhū suvimuttacittā,
ja514:37.4	“Nākāraṇe pātukaronti buddhā.
ja514:38.1	Yamaddasātha dahariṁ kumāriṁ,
ja514:38.2	Kāsāyavatthaṁ anagāriyaṁ carantiṁ;
ja514:38.3	Sā kho tadā rājakaññā ahosi,
ja514:38.4	Ahaṁ tadā nāgarājā ahosiṁ.
ja514:39.1	Ādāya dantāni gajuttamassa,
ja514:39.2	Vaggū subhe appaṭime pathabyā;
ja514:39.3	Yo luddako kāsipuraṁ upāgami,
ja514:39.4	So kho tadā devadatto ahosi”.
ja514:40.1	Anāvasūraṁ cirarattasaṁsitaṁ,
ja514:40.2	Uccāvacaṁ caritamidaṁ purāṇaṁ;
ja514:40.3	Vītaddaro vītasoko visallo,
ja514:40.4	Sayaṁ abhiññāya abhāsi buddho.
ja514:41.1	“Ahaṁ vo tena kālena,
ja514:41.2	ahosiṁ tattha bhikkhavo;
ja514:41.3	Nāgarājā tadā homi,
ja514:41.4	evaṁ dhāretha jātakan”ti.
ja514:42.1	Chaddantajātakaṁ catutthaṁ.
ja515:0.1	Jātaka
ja515:0.2	Tiṁsanipāta
ja515:0.3	Kiṁchandavagga
ja515:0.4	5. Sambhavajātaka
ja515:1.1	“Rajjañca paṭipannāsma,
ja515:1.2	ādhipaccaṁ sucīrata;
ja515:1.3	Mahattaṁ pattumicchāmi,
ja515:1.4	vijetuṁ pathaviṁ imaṁ.
ja515:2.1	Dhammena no adhammena,
ja515:2.2	adhammo me na ruccati;
ja515:2.3	Kiccova dhammo carito,
ja515:2.4	rañño hoti sucīrata.
ja515:3.1	Idha cevāninditā yena,
ja515:3.2	pecca yena aninditā;
ja515:3.3	Yasaṁ devamanussesu,
ja515:3.4	yena pappomu brāhmaṇa.
ja515:4.1	Yohaṁ atthañca dhammañca,
ja515:4.2	kattumicchāmi brāhmaṇa;
ja515:4.3	Taṁ tvaṁ atthañca dhammañca,
ja515:4.4	brāhmaṇakkhāhi pucchito”.
ja515:5.1	“Nāññatra vidhurā rāja,
ja515:5.2	etadakkhātumarahati;
ja515:5.3	Yaṁ tvaṁ atthañca dhammañca,
ja515:5.4	kattumicchasi khattiya”.
ja515:6.1	“Ehi kho pahito gaccha,
ja515:6.2	vidhurassa upantikaṁ;
ja515:6.3	Nikkhañcimaṁ suvaṇṇassa,
ja515:6.4	haraṁ gaccha sucīrata;
ja515:6.5	Abhihāraṁ imaṁ dajjā,
ja515:6.6	atthadhammānusiṭṭhiyā”.
ja515:7.1	Svādhippāgā bhāradvājo,
ja515:7.2	vidhurassa upantikaṁ;
ja515:7.3	Tamaddasa mahābrahmā,
ja515:7.4	asamānaṁ sake ghare.
ja515:8.1	“Raññohaṁ pahito dūto,
ja515:8.2	korabyassa yasassino;
ja515:8.3	‘Atthaṁ dhammañca pucchesi’,
ja515:8.4	iccabravi yudhiṭṭhilo;
ja515:8.5	Taṁ tvaṁ atthañca dhammañca,
ja515:8.6	vidhurakkhāhi pucchito”.
ja515:9.1	“Gaṅgaṁ me pidahissanti,
ja515:9.2	na taṁ sakkomi brāhmaṇa;
ja515:9.3	Apidhetuṁ mahāsindhuṁ,
ja515:9.4	taṁ kathaṁ so bhavissati;
ja515:9.5	Na te sakkomi akkhātuṁ,
ja515:9.6	atthaṁ dhammañca pucchito.
ja515:10.1	Bhadrakāro ca me putto,
ja515:10.2	oraso mama atrajo;
ja515:10.3	Taṁ tvaṁ atthañca dhammañca,
ja515:10.4	gantvā pucchassu brāhmaṇa”.
ja515:11.1	Svādhippāgā bhāradvājo,
ja515:11.2	bhadrakārassupantikaṁ;
ja515:11.3	Tamaddasa mahābrahmā,
ja515:11.4	nisinnaṁ samhi vesmani.
ja515:12.1	“Raññohaṁ pahito dūto,
ja515:12.2	korabyassa yasassino;
ja515:12.3	‘Atthaṁ dhammañca pucchesi’,
ja515:12.4	iccabravi yudhiṭṭhilo;
ja515:12.5	Taṁ tvaṁ atthañca dhammañca,
ja515:12.6	bhadrakāra pabrūhi me”.
ja515:13.1	“Maṁsakājaṁ avahāya,
ja515:13.2	godhaṁ anupatāmahaṁ;
ja515:13.3	Na te sakkomi akkhātuṁ,
ja515:13.4	atthaṁ dhammañca pucchito.
ja515:14.1	Sañcayo nāma me bhātā,
ja515:14.2	kaniṭṭho me sucīrata;
ja515:14.3	Taṁ tvaṁ atthañca dhammañca,
ja515:14.4	gantvā pucchassu brāhmaṇa”.
ja515:15.1	Svādhippāgā bhāradvājo,
ja515:15.2	sañcayassa upantikaṁ;
ja515:15.3	Tamaddasa mahābrahmā,
ja515:15.4	nisinnaṁ samhi vesmani.
ja515:16.1	“Raññohaṁ pahito dūto,
ja515:16.2	korabyassa yasassino;
ja515:16.3	‘Atthaṁ dhammañca pucchesi’,
ja515:16.4	iccabravi yudhiṭṭhilo;
ja515:16.5	Taṁ tvaṁ atthañca dhammañca,
ja515:16.6	sañcayakkhāhi pucchito”.
ja515:17.1	“Sadā maṁ gilate maccu,
ja515:17.2	sāyaṁ pāto sucīrata;
ja515:17.3	Na te sakkomi akkhātuṁ,
ja515:17.4	atthaṁ dhammañca pucchito.
ja515:18.1	Sambhavo nāma me bhātā,
ja515:18.2	kaniṭṭho me sucīrata;
ja515:18.3	Taṁ tvaṁ atthañca dhammañca,
ja515:18.4	gantvā pucchassu brāhmaṇa”.
ja515:19.1	“Abbhuto vata bho dhammo,
ja515:19.2	nāyaṁ asmāka ruccati;
ja515:19.3	Tayo janā pitāputtā,
ja515:19.4	te su paññāya no vidū.
ja515:20.1	Na taṁ sakkotha akkhātuṁ,
ja515:20.2	atthaṁ dhammañca pucchitā;
ja515:20.3	Kathaṁ nu daharo jaññā,
ja515:20.4	atthaṁ dhammañca pucchito”.
ja515:21.1	“Mā naṁ daharoti uññāsi,
ja515:21.2	apucchitvāna sambhavaṁ;
ja515:21.3	Pucchitvā sambhavaṁ jaññā,
ja515:21.4	atthaṁ dhammañca brāhmaṇa.
ja515:22.1	Yathāpi cando vimalo,
ja515:22.2	gacchaṁ ākāsadhātuyā;
ja515:22.3	Sabbe tārāgaṇe loke,
ja515:22.4	ābhāya atirocati.
ja515:23.1	Evampi daharūpeto,
ja515:23.2	paññāyogena sambhavo;
ja515:23.3	Mā naṁ daharoti uññāsi,
ja515:23.4	apucchitvāna sambhavaṁ;
ja515:23.5	Pucchitvā sambhavaṁ jaññā,
ja515:23.6	atthaṁ dhammañca brāhmaṇa.
ja515:24.1	Yathāpi rammako māso,
ja515:24.2	gimhānaṁ hoti brāhmaṇa;
ja515:24.3	Atevaññehi māsehi,
ja515:24.4	dumapupphehi sobhati.
ja515:25.1	Evampi daharūpeto,
ja515:25.2	paññāyogena sambhavo;
ja515:25.3	Mā naṁ daharoti uññāsi,
ja515:25.4	apucchitvāna sambhavaṁ;
ja515:25.5	Pucchitvā sambhavaṁ jaññā,
ja515:25.6	atthaṁ dhammañca brāhmaṇa.
ja515:26.1	Yathāpi himavā brahme,
ja515:26.2	pabbato gandhamādano;
ja515:26.3	Nānārukkhehi sañchanno,
ja515:26.4	mahābhūtagaṇālayo;
ja515:26.5	Osadhehi ca dibbehi,
ja515:26.6	disā bhāti pavāti ca.
ja515:27.1	Evampi daharūpeto,
ja515:27.2	paññāyogena sambhavo;
ja515:27.3	Mā naṁ daharoti uññāsi,
ja515:27.4	apucchitvāna sambhavaṁ;
ja515:27.5	Pucchitvā sambhavaṁ jaññā,
ja515:27.6	atthaṁ dhammañca brāhmaṇa.
ja515:28.1	Yathāpi pāvako brahme,
ja515:28.2	accimālī yasassimā;
ja515:28.3	Jalamāno vane gacche,
ja515:28.4	analo kaṇhavattanī.
ja515:29.1	Ghatāsano dhūmaketu,
ja515:29.2	uttamāhevanandaho;
ja515:29.3	Nisīthe pabbataggasmiṁ,
ja515:29.4	pahūtedho virocati.
ja515:30.1	Evampi daharūpeto,
ja515:30.2	paññāyogena sambhavo;
ja515:30.3	Mā naṁ daharoti uññāsi,
ja515:30.4	apucchitvāna sambhavaṁ;
ja515:30.5	Pucchitvā sambhavaṁ jaññā,
ja515:30.6	atthaṁ dhammañca brāhmaṇa.
ja515:31.1	Javena bhadraṁ jānanti,
ja515:31.2	balībaddañca vāhiye;
ja515:31.3	Dohena dhenuṁ jānanti,
ja515:31.4	bhāsamānañca paṇḍitaṁ.
ja515:32.1	Evampi daharūpeto,
ja515:32.2	paññāyogena sambhavo;
ja515:32.3	Mā naṁ daharoti uññāsi,
ja515:32.4	apucchitvāna sambhavaṁ;
ja515:32.5	Pucchitvā sambhavaṁ jaññā,
ja515:32.6	atthaṁ dhammañca brāhmaṇa”.
ja515:33.1	Svādhippāgā bhāradvājo,
ja515:33.2	sambhavassa upantikaṁ;
ja515:33.3	Tamaddasa mahābrahmā,
ja515:33.4	kīḷamānaṁ bahīpure.
ja515:34.1	“Raññohaṁ pahito dūto,
ja515:34.2	korabyassa yasassino;
ja515:34.3	‘Atthaṁ dhammañca pucchesi’,
ja515:34.4	iccabravi yudhiṭṭhilo;
ja515:34.5	Taṁ tvaṁ atthañca dhammañca,
ja515:34.6	sambhavakkhāhi pucchito”.
ja515:35.1	“Taggha te ahamakkhissaṁ,
ja515:35.2	yathāpi kusalo tathā;
ja515:35.3	Rājā ca kho taṁ jānāti,
ja515:35.4	yadi kāhati vā na vā.
ja515:36.1	‘Ajja suve’ti saṁseyya,
ja515:36.2	raññā puṭṭho sucīrata;
ja515:36.3	Mā katvā avasī rājā,
ja515:36.4	atthe jāte yudhiṭṭhilo.
ja515:37.1	Ajjhattaññeva saṁseyya,
ja515:37.2	raññā puṭṭho sucīrata;
ja515:37.3	Kummaggaṁ na niveseyya,
ja515:37.4	yathā mūḷho acetaso.
ja515:38.1	Attānaṁ nātivatteyya,
ja515:38.2	adhammaṁ na samācare;
ja515:38.3	Atitthe nappatāreyya,
ja515:38.4	anatthe na yuto siyā.
ja515:39.1	Yo ca etāni ṭhānāni,
ja515:39.2	kattuṁ jānāti khattiyo;
ja515:39.3	Sadā so vaḍḍhate rājā,
ja515:39.4	sukkapakkheva candimā.
ja515:40.1	Ñātīnañca piyo hoti,
ja515:40.2	mittesu ca virocati;
ja515:40.3	Kāyassa bhedā sappañño,
ja515:40.4	saggaṁ so upapajjatī”ti.
ja515:41.1	Sambhavajātakaṁ pañcamaṁ.
ja516:0.1	Jātaka
ja516:0.2	Tiṁsanipāta
ja516:0.3	Kiṁchandavagga
ja516:0.4	6. Mahākapijātaka
ja516:1.1	Bārāṇasyaṁ ahū rājā,
ja516:1.2	kāsīnaṁ raṭṭhavaḍḍhano;
ja516:1.3	Mittāmaccaparibyūḷho,
ja516:1.4	agamāsi migājinaṁ.
ja516:2.1	Tattha brāhmaṇamaddakkhi,
ja516:2.2	setaṁ citraṁ kilāsinaṁ;
ja516:2.3	Viddhastaṁ koviḷāraṁva,
ja516:2.4	kisaṁ dhamanisanthataṁ.
ja516:3.1	Paramakāruññataṁ pattaṁ,
ja516:3.2	disvā kicchagataṁ naraṁ;
ja516:3.3	Avaca byamhito rājā,
ja516:3.4	“yakkhānaṁ katamo nusi.
ja516:4.1	Hatthapādā ca te setā,
ja516:4.2	tato setataraṁ siro;
ja516:4.3	Gattaṁ kammāsavaṇṇaṁ te,
ja516:4.4	kilāsabahulo casi.
ja516:5.1	Vaṭṭanāvaḷi saṅkāsā,
ja516:5.2	piṭṭhi te ninnatunnatā;
ja516:5.3	Kāḷapabbāva te aṅgā,
ja516:5.4	nāññaṁ passāmi edisaṁ.
ja516:6.1	Ugghaṭṭapādo tasito,
ja516:6.2	kiso dhamanisanthato;
ja516:6.3	Chāto ātattarūposi,
ja516:6.4	kutosi kattha gacchasi.
ja516:7.1	Duddasī appakārosi,
ja516:7.2	dubbaṇṇo bhīmadassano;
ja516:7.3	Janetti yāpi te mātā,
ja516:7.4	na taṁ iccheyya passituṁ.
ja516:8.1	Kiṁ kammamakaraṁ pubbe,
ja516:8.2	Kaṁ avajjhaṁ aghātayi;
ja516:8.3	Kibbisaṁ yaṁ karitvāna,
ja516:8.4	Idaṁ dukkhaṁ upāgami”.
ja516:9.1	“Taggha te ahamakkhissaṁ,
ja516:9.2	yathāpi kusalo tathā;
ja516:9.3	Saccavādiñhi lokasmiṁ,
ja516:9.4	pasaṁsantīdha paṇḍitā.
ja516:10.1	Eko caraṁ gogaveso,
ja516:10.2	mūḷho accasariṁ vane;
ja516:10.3	Araññe irīṇe vivane,
ja516:10.4	nānākuñjarasevite.
ja516:11.1	Vāḷamigānucarite,
ja516:11.2	vippanaṭṭhosmi kānane;
ja516:11.3	Acariṁ tattha sattāhaṁ,
ja516:11.4	khuppipāsasamappito.
ja516:12.1	Tattha tindukamaddakkhiṁ,
ja516:12.2	visamaṭṭhaṁ bubhukkhito;
ja516:12.3	Papātamabhilambantaṁ,
ja516:12.4	sampannaphaladhārinaṁ.
ja516:13.1	Vātassitāni bhakkhesiṁ,
ja516:13.2	tāni rucciṁsu me bhusaṁ;
ja516:13.3	Atitto rukkhamārūhiṁ,
ja516:13.4	tattha hessāmi āsito.
ja516:14.1	Ekaṁ me bhakkhitaṁ āsi,
ja516:14.2	dutiyaṁ abhipatthitaṁ;
ja516:14.3	Tato sā bhañjatha sākhā,
ja516:14.4	chinnā pharasunā viya.
ja516:15.1	Sohaṁ sahāva sākhāhi,
ja516:15.2	uddhampādo avaṁsiro;
ja516:15.3	Appatiṭṭhe anālambe,
ja516:15.4	giriduggasmi pāpataṁ.
ja516:16.1	Yasmā ca vāri gambhīraṁ,
ja516:16.2	tasmā na samapajjisaṁ;
ja516:16.3	Tattha sesiṁ nirānando,
ja516:16.4	anūnā dasa rattiyo.
ja516:17.1	Athettha kapi māgañchi,
ja516:17.2	gonaṅgulo darīcaro;
ja516:17.3	Sākhāhi sākhaṁ vicaranto,
ja516:17.4	khādamāno dumapphalaṁ.
ja516:18.1	So maṁ disvā kisaṁ paṇḍuṁ,
ja516:18.2	kāruññamakaraṁ mayi;
ja516:18.3	Ambho ko nāma so ettha,
ja516:18.4	evaṁ dukkhena aṭṭito.
ja516:19.1	Manusso amanusso vā,
ja516:19.2	attānaṁ me pavedaya;
ja516:19.3	Tassañjaliṁ paṇāmetvā,
ja516:19.4	idaṁ vacanamabraviṁ.
ja516:20.1	Manussohaṁ byasampatto,
ja516:20.2	sā me natthi ito gati;
ja516:20.3	Taṁ vo vadāmi bhaddaṁ vo,
ja516:20.4	tvañca me saraṇaṁ bhava.
ja516:21.1	Garuṁ silaṁ gahetvāna,
ja516:21.2	vicarī pabbate kapi;
ja516:21.3	Silāya yoggaṁ katvāna,
ja516:21.4	nisabho etadabravi.
ja516:22.1	Ehi me piṭṭhimāruyha,
ja516:22.2	gīvaṁ gaṇhāhi bāhubhi;
ja516:22.3	Ahaṁ taṁ uddharissāmi,
ja516:22.4	giriduggata vegasā.
ja516:23.1	Tassa taṁ vacanaṁ sutvā,
ja516:23.2	vānarindassa sirīmato;
ja516:23.3	Piṭṭhimāruyha dhīrassa,
ja516:23.4	gīvaṁ bāhāhi aggahiṁ.
ja516:24.1	So maṁ tato samuṭṭhāsi,
ja516:24.2	tejassī balavā kapi;
ja516:24.3	Vihaññamāno kicchena,
ja516:24.4	giriduggata vegasā.
ja516:25.1	Uddharitvāna maṁ santo,
ja516:25.2	nisabho etadabravi;
ja516:25.3	Iṅgha maṁ samma rakkhassu,
ja516:25.4	pasupissaṁ muhuttakaṁ.
ja516:26.1	Sīhā byagghā ca dīpī ca,
ja516:26.2	acchakokataracchayo;
ja516:26.3	Te maṁ pamattaṁ hiṁseyyuṁ,
ja516:26.4	te tvaṁ disvā nivāraya.
ja516:27.1	Evaṁ me parittātūna,
ja516:27.2	pasupī so muhuttakaṁ;
ja516:27.3	Tadāhaṁ pāpikaṁ diṭṭhiṁ,
ja516:27.4	paṭilacchiṁ ayoniso.
ja516:28.1	Bhakkho ayaṁ manussānaṁ,
ja516:28.2	yathā caññe vane migā;
ja516:28.3	Yaṁ nūnimaṁ vadhitvāna,
ja516:28.4	chāto khādeyya vānaraṁ.
ja516:29.1	Asito ca gamissāmi,
ja516:29.2	maṁsamādāya sambalaṁ;
ja516:29.3	Kantāraṁ nittharissāmi,
ja516:29.4	pātheyyaṁ me bhavissati.
ja516:30.1	Tato silaṁ gahetvāna,
ja516:30.2	matthakaṁ sannitāḷayiṁ;
ja516:30.3	Mama gattakilantassa,
ja516:30.4	pahāro dubbalo ahu.
ja516:31.1	So ca vegenudappatto,
ja516:31.2	kapi ruhira makkhito;
ja516:31.3	Assupuṇṇehi nettehi,
ja516:31.4	rodanto maṁ udikkhati.
ja516:32.1	‘Māyyomaṁ kari bhaddante,
ja516:32.2	tvañca nāmedisaṁ kari;
ja516:32.3	Tvañca kho nāma dīghāvu,
ja516:32.4	aññe vāretumarahasi.
ja516:33.1	Aho vata re purisa,
ja516:33.2	tāvadukkarakāraka;
ja516:33.3	Edisā visamā duggā,
ja516:33.4	papātā uddhato mayā.
ja516:34.1	Ānīto paralokāva,
ja516:34.2	dubbheyyaṁ maṁ amaññatha;
ja516:34.3	Taṁ tena pāpadhammena,
ja516:34.4	pāpaṁ pāpena cintitaṁ.
ja516:35.1	Mā heva tvaṁ adhammaṭṭha,
ja516:35.2	vedanaṁ kaṭukaṁ phusi;
ja516:35.3	Mā heva pāpakammaṁ taṁ,
ja516:35.4	phalaṁ veḷuṁva taṁ vadhi.
ja516:36.1	Tayime natthi vissāso,
ja516:36.2	pāpadhamma asaññata;
ja516:36.3	Ehi me piṭṭhito gaccha,
ja516:36.4	dissamānova santike.
ja516:37.1	Muttosi hatthā vāḷānaṁ,
ja516:37.2	pattosi mānusiṁ padaṁ;
ja516:37.3	Esa maggo adhammaṭṭha,
ja516:37.4	tena gaccha yathāsukhaṁ’.
ja516:38.1	Idaṁ vatvā giricaro,
ja516:38.2	rahade pakkhalya matthakaṁ;
ja516:38.3	Assūni sampamajjitvā,
ja516:38.4	tato pabbatamāruhi.
ja516:39.1	Sohaṁ tenābhisattosmi,
ja516:39.2	pariḷāhena aṭṭito;
ja516:39.3	Ḍayhamānena gattena,
ja516:39.4	vāriṁ pātuṁ upāgamiṁ.
ja516:40.1	Agginā viya santatto,
ja516:40.2	rahado ruhiramakkhito;
ja516:40.3	Pubbalohitasaṅkāso,
ja516:40.4	sabbo me samapajjatha.
ja516:41.1	Yāvanto udabindūni,
ja516:41.2	kāyasmiṁ nipatiṁsu me;
ja516:41.3	Tāvanto gaṇḍa jāyetha,
ja516:41.4	addhabeluvasādisā.
ja516:42.1	Pabhinnā pagghariṁsu me,
ja516:42.2	kuṇapā pubbalohitā;
ja516:42.3	Yena yeneva gacchāmi,
ja516:42.4	gāmesu nigamesu ca.
ja516:43.1	Daṇḍahatthā nivārenti,
ja516:43.2	itthiyo purisā ca maṁ;
ja516:43.3	Okkitā pūtigandhena,
ja516:43.4	māssu orena āgamā.
ja516:44.1	Etādisaṁ idaṁ dukkhaṁ,
ja516:44.2	satta vassāni dāni me;
ja516:44.3	Anubhomi sakaṁ kammaṁ,
ja516:44.4	pubbe dukkaṭamattano.
ja516:45.1	Taṁ vo vadāmi bhaddante,
ja516:45.2	yāvantettha samāgatā;
ja516:45.3	Māssu mittāna dubbhittho,
ja516:45.4	mittadubbho hi pāpako.
ja516:46.1	Kuṭṭhī kilāsī bhavati,
ja516:46.2	yo mittānidha dubbhati;
ja516:46.3	Kāyassa bhedā mittaddu,
ja516:46.4	nirayaṁ sopapajjatī”ti.
ja516:47.1	Mahākapijātakaṁ chaṭṭhaṁ.
ja517:0.1	Jātaka
ja517:0.2	Tiṁsanipāta
ja517:0.3	Kiṁchandavagga
ja517:0.4	7. Dakarakkhasajātaka
ja517:1.1	“Sace vo vuyhamānānaṁ,
ja517:1.2	sattannaṁ udakaṇṇave;
ja517:1.3	Manussabalimesāno,
ja517:1.4	nāvaṁ gaṇheyya rakkhaso;
ja517:1.5	Anupubbaṁ kathaṁ datvā,
ja517:1.6	muñcesi dakarakkhasā”.
ja517:2.1	“Mātaraṁ paṭhamaṁ dajjaṁ,
ja517:2.2	Bhariyaṁ datvāna bhātaraṁ;
ja517:2.3	Tato sahāyaṁ datvāna,
ja517:2.4	Pañcamaṁ dajjaṁ brāhmaṇaṁ;
ja517:2.5	Chaṭṭhāhaṁ dajjamattānaṁ,
ja517:2.6	Neva dajjaṁ mahosadhaṁ”.
ja517:3.1	“Posetā te janettī ca,
ja517:3.2	dīgharattānukampikā;
ja517:3.3	Chabbhī tayi padussati,
ja517:3.4	paṇḍitā atthadassinī;
ja517:3.5	Aññaṁ upanisaṁ katvā,
ja517:3.6	vadhā taṁ parimocayi.
ja517:4.1	Taṁ tādisiṁ pāṇadadiṁ,
ja517:4.2	orasaṁ gabbhadhāriniṁ;
ja517:4.3	Mātaraṁ kena dosena,
ja517:4.4	dajjāsi dakarakkhino”.
ja517:5.1	“Daharā viyalaṅkāraṁ,
ja517:5.2	dhāreti apiḷandhanaṁ;
ja517:5.3	Dovārike anīkaṭṭhe,
ja517:5.4	ativelaṁ pajagghati.
ja517:6.1	Athopi paṭirājūnaṁ,
ja517:6.2	sayaṁ dūtāni sāsati;
ja517:6.3	Mātaraṁ tena dosena,
ja517:6.4	dajjāhaṁ dakarakkhino”.
ja517:7.1	“Itthigumbassa pavarā,
ja517:7.2	accantaṁ piyabhāṇinī;
ja517:7.3	Anuggatā sīlavatī,
ja517:7.4	chāyāva anapāyinī.
ja517:8.1	Akkodhanā puññavatī,
ja517:8.2	paṇḍitā atthadassinī;
ja517:8.3	Ubbariṁ kena dosena,
ja517:8.4	dajjāsi dakarakkhino”.
ja517:9.1	“Khiḍḍāratisamāpannaṁ,
ja517:9.2	anatthavasamāgataṁ;
ja517:9.3	Sā maṁ sakāna puttānaṁ,
ja517:9.4	ayācaṁ yācate dhanaṁ.
ja517:10.1	Sohaṁ dadāmi sāratto,
ja517:10.2	bahuṁ uccāvacaṁ dhanaṁ;
ja517:10.3	Suduccajaṁ cajitvāna,
ja517:10.4	pacchā socāmi dummano;
ja517:10.5	Ubbariṁ tena dosena,
ja517:10.6	dajjāhaṁ dakarakkhino”.
ja517:11.1	“Yenocitā janapadā,
ja517:11.2	ānītā ca paṭiggahaṁ;
ja517:11.3	Ābhataṁ pararajjebhi,
ja517:11.4	abhiṭṭhāya bahuṁ dhanaṁ.
ja517:12.1	Dhanuggahānaṁ pavaraṁ,
ja517:12.2	sūraṁ tikhiṇamantinaṁ;
ja517:12.3	Bhātaraṁ kena dosena,
ja517:12.4	dajjāsi dakarakkhino”.
ja517:13.1	“Yenocitā janapadā,
ja517:13.2	ānītā ca paṭiggahaṁ;
ja517:13.3	Ābhataṁ pararajjebhi,
ja517:13.4	abhiṭṭhāya bahuṁ dhanaṁ.
ja517:14.1	Dhanuggahānaṁ pavaro,
ja517:14.2	sūro tikhiṇamanti ca;
ja517:14.3	Mayāyaṁ sukhito rājā,
ja517:14.4	atimaññati dārako.
ja517:15.1	Upaṭṭhānampi me ayye,
ja517:15.2	na so eti yathā pure;
ja517:15.3	Bhātaraṁ tena dosena,
ja517:15.4	dajjāhaṁ dakarakkhino”.
ja517:16.1	“Ekarattena ubhayo,
ja517:16.2	tvañceva dhanusekha ca;
ja517:16.3	Ubho jātettha pañcālā,
ja517:16.4	sahāyā susamāvayā.
ja517:17.1	Cariyā taṁ anubandhittho,
ja517:17.2	ekadukkhasukho tava;
ja517:17.3	Ussukko te divārattiṁ,
ja517:17.4	sabbakiccesu byāvaṭo;
ja517:17.5	Sahāyaṁ kena dosena,
ja517:17.6	dajjāsi dakarakkhino”.
ja517:18.1	“Cariyā maṁ ayaṁ ayye,
ja517:18.2	pajagghittho mayā saha;
ja517:18.3	Ajjāpi tena vaṇṇena,
ja517:18.4	ativelaṁ pajagghati.
ja517:19.1	Ubbariyāpihaṁ ayye,
ja517:19.2	mantayāmi rahogato;
ja517:19.3	Anāmanto pavisati,
ja517:19.4	pubbe appaṭivedito.
ja517:20.1	Laddhadvāro katokāso,
ja517:20.2	ahirikaṁ anādaraṁ;
ja517:20.3	Sahāyaṁ tena dosena,
ja517:20.4	dajjāhaṁ dakarakkhino”.
ja517:21.1	“Kusalo sabbanimittānaṁ,
ja517:21.2	rutaññū āgatāgamo;
ja517:21.3	Uppāte supine yutto,
ja517:21.4	niyyāne ca pavesane.
ja517:22.1	Paṭṭho bhūmantalikkhasmiṁ,
ja517:22.2	Nakkhattapadakovido;
ja517:22.3	Brāhmaṇaṁ kena dosena,
ja517:22.4	Dajjāsi dakarakkhino”.
ja517:23.1	“Parisāyampi me ayye,
ja517:23.2	ummīlitvā udikkhati;
ja517:23.3	Tasmā accabhamuṁ luddaṁ,
ja517:23.4	dajjāhaṁ dakarakkhino”.
ja517:24.1	“Sasamuddapariyāyaṁ,
ja517:24.2	mahiṁ sāgarakuṇḍalaṁ;
ja517:24.3	Vasundharaṁ āvasasi,
ja517:24.4	amaccaparivārito.
ja517:25.1	Cāturanto mahāraṭṭho,
ja517:25.2	vijitāvī mahabbalo;
ja517:25.3	Pathabyā ekarājāsi,
ja517:25.4	yaso te vipulaṁ gato.
ja517:26.1	Soḷasitthisahassāni,
ja517:26.2	āmuttamaṇikuṇḍalā;
ja517:26.3	Nānājanapadā nārī,
ja517:26.4	devakaññūpamā subhā.
ja517:27.1	Evaṁ sabbaṅgasampannaṁ,
ja517:27.2	sabbakāmasamiddhinaṁ;
ja517:27.3	Sukhitānaṁ piyaṁ dīghaṁ,
ja517:27.4	jīvitaṁ āhu khattiya.
ja517:28.1	Atha tvaṁ kena vaṇṇena,
ja517:28.2	kena vā pana hetunā;
ja517:28.3	Paṇḍitaṁ anurakkhanto,
ja517:28.4	pāṇaṁ cajasi duccajaṁ”.
ja517:29.1	“Yatopi āgato ayye,
ja517:29.2	mama hatthaṁ mahosadho;
ja517:29.3	Nābhijānāmi dhīrassa,
ja517:29.4	anumattampi dukkaṭaṁ.
ja517:30.1	Sace ca kismici kāle,
ja517:30.2	maraṇaṁ me pure siyā;
ja517:30.3	So me putte paputte ca,
ja517:30.4	sukhāpeyya mahosadho.
ja517:31.1	Anāgataṁ paccuppannaṁ,
ja517:31.2	sabbamatthampi passati;
ja517:31.3	Anāparādhakammantaṁ,
ja517:31.4	na dajjaṁ dakarakkhino”.
ja517:32.1	“Idaṁ suṇātha pañcālā,
ja517:32.2	cūḷaneyyassa bhāsitaṁ;
ja517:32.3	Paṇḍitaṁ anurakkhanto,
ja517:32.4	pāṇaṁ cajati duccajaṁ.
ja517:33.1	Mātu bhariyāya bhātucca,
ja517:33.2	sakhino brāhmaṇassa ca;
ja517:33.3	Attano cāpi pañcālo,
ja517:33.4	channaṁ cajati jīvitaṁ.
ja517:34.1	Evaṁ mahatthikā paññā,
ja517:34.2	nipuṇā sādhucintinī;
ja517:34.3	Diṭṭhadhammahitatthāya,
ja517:34.4	samparāyasukhāya cā”ti.
ja517:35.1	Dakarakkhasajātakaṁ sattamaṁ.
ja518:0.1	Jātaka
ja518:0.2	Tiṁsanipāta
ja518:0.3	Kiṁchandavagga
ja518:0.4	8. Paṇḍaranāgarājajātaka
ja518:1.1	“Vikiṇṇavācaṁ aniguyha mantaṁ,
ja518:1.2	Asaññataṁ aparicakkhitāraṁ;
ja518:1.3	Bhayaṁ tamanveti sayaṁ abodhaṁ,
ja518:1.4	Nāgaṁ yathā paṇḍarakaṁ supaṇṇo.
ja518:2.1	Yo guyhamantaṁ parirakkhaṇeyyaṁ,
ja518:2.2	Mohā naro saṁsati hāsamāno;
ja518:2.3	Taṁ bhinnamantaṁ bhayamanveti khippaṁ,
ja518:2.4	Nāgaṁ yathā paṇḍarakaṁ supaṇṇo.
ja518:3.1	Nānumitto garuṁ atthaṁ,
ja518:3.2	guyhaṁ veditumarahati;
ja518:3.3	Sumitto ca asambuddhaṁ,
ja518:3.4	sambuddhaṁ vā anatthavā.
ja518:4.1	Vissāsamāpajjimahaṁ acelaṁ,
ja518:4.2	Samaṇo ayaṁ sammato bhāvitatto;
ja518:4.3	Tassāhamakkhiṁ vivariṁ guyhamatthaṁ,
ja518:4.4	Atītamattho kapaṇaṁ rudāmi.
ja518:5.1	Tassāhaṁ paramaṁ brahme guyhaṁ,
ja518:5.2	Vācañhi maṁ nāsakkhiṁ saṁyametuṁ;
ja518:5.3	Tappakkhato hi bhayamāgataṁ mamaṁ,
ja518:5.4	Atītamattho kapaṇaṁ rudāmi.
ja518:6.1	Yo ve naro suhadaṁ maññamāno,
ja518:6.2	Guyhamatthaṁ saṁsati dukkulīne;
ja518:6.3	Dosā bhayā athavā rāgarattā,
ja518:6.4	Pallatthito bālo asaṁsayaṁ so.
ja518:7.1	Tirokkhavāco asataṁ paviṭṭho,
ja518:7.2	Yo saṅgatīsu mudīreti vākyaṁ;
ja518:7.3	Āsīviso dummukhotyāhu taṁ naraṁ,
ja518:7.4	Ārā ārā saṁyame tādisamhā.
ja518:8.1	Annaṁ pānaṁ kāsikacandanañca,
ja518:8.2	Manāpitthiyo mālamucchādanañca;
ja518:8.3	Ohāya gacchāmase sabbakāme,
ja518:8.4	Supaṇṇa pāṇūpagatāva tyamhā”.
ja518:9.1	“Ko nīdha tiṇṇaṁ garahaṁ upeti,
ja518:9.2	Asmiṁdhaloke pāṇabhū nāgarāja;
ja518:9.3	Samaṇo supaṇṇo athavā tvameva,
ja518:9.4	Kiṁ kāraṇā paṇḍarakaggahīto”.
ja518:10.1	“Samaṇoti me sammatatto ahosi,
ja518:10.2	Piyo ca me manasā bhāvitatto;
ja518:10.3	Tassāhamakkhiṁ vivariṁ guyhamatthaṁ,
ja518:10.4	Atītamattho kapaṇaṁ rudāmi”.
ja518:11.1	“Na catthi satto amaro pathabyā,
ja518:11.2	Paññāvidhā natthi na ninditabbā;
ja518:11.3	Saccena dhammena dhitiyā damena,
ja518:11.4	Alabbhamabyāharatī naro idha.
ja518:12.1	Mātāpitā paramā bandhavānaṁ,
ja518:12.2	Nāssa tatiyo anukampakatthi;
ja518:12.3	Tesampi guyhaṁ paramaṁ na saṁse,
ja518:12.4	Mantassa bhedaṁ parisaṅkamāno.
ja518:13.1	Mātāpitā bhaginī bhātaro ca,
ja518:13.2	Sahāyā vā yassa honti sapakkhā;
ja518:13.3	Tesampi guyhaṁ paramaṁ na saṁse,
ja518:13.4	Mantassa bhedaṁ parisaṅkamāno.
ja518:14.1	Bhariyā ce purisaṁ vajjā,
ja518:14.2	Komārī piyabhāṇinī;
ja518:14.3	Puttarūpayasūpetā,
ja518:14.4	Ñātisaṅghapurakkhatā;
ja518:14.5	Tassāpi guyhaṁ paramaṁ na saṁse,
ja518:14.6	Mantassa bhedaṁ parisaṅkamāno.
ja518:15.1	Na guyhamatthaṁ vivareyya,
ja518:15.2	Rakkheyya naṁ yathā nidhiṁ;
ja518:15.3	Na hi pātukato sādhu,
ja518:15.4	Guyho attho pajānatā.
ja518:16.1	Thiyā guyhaṁ na saṁseyya,
ja518:16.2	amittassa ca paṇḍito;
ja518:16.3	Yo cāmisena saṁhīro,
ja518:16.4	hadayattheno ca yo naro.
ja518:17.1	Guyhamatthaṁ asambuddhaṁ,
ja518:17.2	sambodhayati yo naro;
ja518:17.3	Mantabhedabhayā tassa,
ja518:17.4	dāsabhūto titikkhati.
ja518:18.1	Yāvanto purisassatthaṁ,
ja518:18.2	guyhaṁ jānanti mantinaṁ;
ja518:18.3	Tāvanto tassa ubbegā,
ja518:18.4	tasmā guyhaṁ na vissaje.
ja518:19.1	Vivicca bhāseyya divā rahassaṁ,
ja518:19.2	Rattiṁ giraṁ nātivelaṁ pamuñce;
ja518:19.3	Upassutikā hi suṇanti mantaṁ,
ja518:19.4	Tasmā manto khippamupeti bhedaṁ.
ja518:20.1	Yathāpi assa nagaraṁ mahantaṁ,
ja518:20.2	Advārakaṁ āyasaṁ bhaddasālaṁ;
ja518:20.3	Samantakhātāparikhāupetaṁ,
ja518:20.4	Evampi me te idha guyhamantā.
ja518:21.1	Ye guyhamantā avikiṇṇavācā,
ja518:21.2	Daḷhā sadatthesu narā dujivha;
ja518:21.3	Ārā amittā byavajanti tehi,
ja518:21.4	Āsīvisā vā riva sattusaṅghā”.
ja518:22.1	“Hitvā gharaṁ pabbajito acelo,
ja518:22.2	Naggo muṇḍo carati ghāsahetu;
ja518:22.3	Tamhi nu kho vivariṁ guyhamatthaṁ,
ja518:22.4	Atthā ca dhammā ca apaggatamhā.
ja518:23.1	Kathaṅkaro hoti supaṇṇarāja,
ja518:23.2	Kiṁsīlo kena vatena vattaṁ;
ja518:23.3	Samaṇo caraṁ hitvā mamāyitāni,
ja518:23.4	Kathaṅkaro saggamupeti ṭhānaṁ”.
ja518:24.1	“Hiriyā titikkhāya damenupeto,
ja518:24.2	Akkodhano pesuṇiyaṁ pahāya;
ja518:24.3	Samaṇo caraṁ hitvā mamāyitāni,
ja518:24.4	Evaṅkaro saggamupeti ṭhānaṁ”.
ja518:25.1	“Mātāva puttaṁ taruṇaṁ tanujjaṁ,
ja518:25.2	Samphassatā sabbagattaṁ phareti;
ja518:25.3	Evampi me tvaṁ pāturahu dijinda,
ja518:25.4	Mātāva puttaṁ anukampamāno”.
ja518:26.1	“Handajja tvaṁ muñca vadhā dujivha,
ja518:26.2	Tayo hi puttā na hi añño atthi;
ja518:26.3	Antevāsī dinnako atrajo ca,
ja518:26.4	Rajjassu puttaññataro me ahosi”.
ja518:27.1	Icceva vākyaṁ visajjī supaṇṇo,
ja518:27.2	Bhumyaṁ patiṭṭhāya dijo dujivhaṁ;
ja518:27.3	“Muttajja tvaṁ sabbabhayātivatto,
ja518:27.4	Thalūdake hohi mayābhigutto.
ja518:28.1	Ātaṅkinaṁ yathā kusalo bhisakko,
ja518:28.2	Pipāsitānaṁ rahadova sīto;
ja518:28.3	Vesmaṁ yathā himasītaṭṭitānaṁ,
ja518:28.4	Evampi te saraṇamahaṁ bhavāmi”.
ja518:29.1	“Sandhiṁ katvā amittena,
ja518:29.2	aṇḍajena jalābuja;
ja518:29.3	Vivariya dāṭhaṁ sesi,
ja518:29.4	kuto taṁ bhayamāgataṁ”.
ja518:30.1	“Saṅketheva amittasmiṁ,
ja518:30.2	mittasmimpi na vissase;
ja518:30.3	Abhayā bhayamuppannaṁ,
ja518:30.4	api mūlāni kantati.
ja518:31.1	Kathaṁ nu vissase tyamhi,
ja518:31.2	yenāsi kalaho kato;
ja518:31.3	Niccayattena ṭhātabbaṁ,
ja518:31.4	so disabbhi na rajjati.
ja518:32.1	Vissāsaye na ca taṁ vissayeyya,
ja518:32.2	Asaṅkito saṅkito ca bhaveyya;
ja518:32.3	Tathā tathā viññū parakkameyya,
ja518:32.4	Yathā yathā bhāvaṁ paro na jaññā”.
ja518:33.1	Te devavaṇṇā sukhumālarūpā,
ja518:33.2	Ubho samā sujayā puññakhandhā;
ja518:33.3	Upāgamuṁ karampiyaṁ acelaṁ,
ja518:33.4	Missībhūtā assavāhāva nāgā.
ja518:34.1	Tato have paṇḍarako acelaṁ,
ja518:34.2	Sayamevupāgamma idaṁ avoca;
ja518:34.3	“Muttajjahaṁ sabbabhayātivatto,
ja518:34.4	Na hi nūna tuyhaṁ manaso piyamhā”.
ja518:35.1	“Piyo hi me āsi supaṇṇarājā,
ja518:35.2	Asaṁsayaṁ paṇḍarakena saccaṁ;
ja518:35.3	So rāgarattova akāsimetaṁ,
ja518:35.4	Pāpakammaṁ sampajāno na mohā”.
ja518:36.1	“Na me piyaṁ appiyaṁ vāpi hoti,
ja518:36.2	Sampassato lokamimaṁ parañca;
ja518:36.3	Susaññatānañhi viyañjanena,
ja518:36.4	Asaññato lokamimaṁ carāsi.
ja518:37.1	Ariyāvakāsosi anariyovāsi,
ja518:37.2	Asaññato saññatasannikāso;
ja518:37.3	Kaṇhābhijātikosi anariyarūpo,
ja518:37.4	Pāpaṁ bahuṁ duccaritaṁ acāri.
ja518:38.1	Aduṭṭhassa tuvaṁ dubbhi,
ja518:38.2	dubbhī ca pisuṇo casi;
ja518:38.3	Etena saccavajjena,
ja518:38.4	muddhā te phalatu sattadhā”.
ja518:39.1	“Tasmā hi mittānaṁ na dubbhitabbaṁ,
ja518:39.2	Mittadubbhā pāpiyo natthi añño;
ja518:39.3	Āsittasatto nihato pathabyā,
ja518:39.4	Indassa vākyena hi saṁvaro hato”ti.
ja518:40.1	Paṇḍaranāgarājajātakaṁ aṭṭhamaṁ.
ja519:0.1	Jātaka
ja519:0.2	Tiṁsanipāta
ja519:0.3	Kiṁchandavagga
ja519:0.4	9. Sambulājātaka
ja519:1.1	“Kā vedhamānā girikandarāyaṁ,
ja519:1.2	Ekā tuvaṁ tiṭṭhasi saṁhitūru;
ja519:1.3	Puṭṭhāsi me pāṇipameyyamajjhe,
ja519:1.4	Akkhāhi me nāmañca bandhave ca.
ja519:2.1	Obhāsayaṁ vanaṁ rammaṁ,
ja519:2.2	sīhabyagghanisevitaṁ;
ja519:2.3	Kā vā tvamasi kalyāṇi,
ja519:2.4	kassa vā tvaṁ sumajjhime;
ja519:2.5	Abhivādemi taṁ bhadde,
ja519:2.6	dānavāhaṁ namatthu te”.
ja519:3.1	“Yo putto kāsirājassa,
ja519:3.2	sotthisenoti taṁ vidū;
ja519:3.3	Tassāhaṁ sambulā bhariyā,
ja519:3.4	evaṁ jānāhi dānava;
ja519:3.5	Abhivādemi taṁ bhante,
ja519:3.6	sambulāhaṁ namatthu te.
ja519:4.1	Vedehaputto bhaddante,
ja519:4.2	vane vasati āturo;
ja519:4.3	Tamahaṁ rogasammattaṁ,
ja519:4.4	ekā ekaṁ upaṭṭhahaṁ.
ja519:5.1	Ahañca vanamuñchāya,
ja519:5.2	Madhumaṁsaṁ migābilaṁ;
ja519:5.3	Yadāharāmi taṁ bhakkho,
ja519:5.4	Tassa nūnajja nādhati”.
ja519:6.1	“Kiṁ vane rājaputtena,
ja519:6.2	āturena karissasi;
ja519:6.3	Sambule pariciṇṇena,
ja519:6.4	ahaṁ bhattā bhavāmi te”.
ja519:7.1	“Sokaṭṭāya durattāya,
ja519:7.2	kiṁ rūpaṁ vijjate mama;
ja519:7.3	Aññaṁ pariyesa bhaddante,
ja519:7.4	abhirūpataraṁ mayā”.
ja519:8.1	“Ehimaṁ girimāruyha,
ja519:8.2	bhariyā me catussatā;
ja519:8.3	Tāsaṁ tvaṁ pavarā hohi,
ja519:8.4	sabbakāmasamiddhinī.
ja519:9.1	Nūna tārakavaṇṇābhe,
ja519:9.2	yaṁ kiñci manasicchasi;
ja519:9.3	Sabbaṁ taṁ pacuraṁ mayhaṁ,
ja519:9.4	ramassvajja mayā saha.
ja519:10.1	No ce tuvaṁ maheseyyaṁ,
ja519:10.2	Sambule kārayissasi;
ja519:10.3	Alaṁ tvaṁ pātarāsāya,
ja519:10.4	Paṇhe bhakkhā bhavissasi”.
ja519:11.1	Tañca sattajaṭo luddo,
ja519:11.2	kaḷāro purisādako;
ja519:11.3	Vane nāthaṁ apassantiṁ,
ja519:11.4	sambulaṁ aggahī bhuje.
ja519:12.1	Adhipannā pisācena,
ja519:12.2	luddenāmisacakkhunā;
ja519:12.3	Sā ca sattuvasaṁ pattā,
ja519:12.4	patimevānusocati.
ja519:13.1	“Na me idaṁ tathā dukkhaṁ,
ja519:13.2	yaṁ maṁ khādeyya rakkhaso;
ja519:13.3	Yañca me ayyaputtassa,
ja519:13.4	mano hessati aññathā.
ja519:14.1	Na santi devā pavasanti nūna,
ja519:14.2	Na hi nūna santi idha lokapālā;
ja519:14.3	Sahasā karontānamasaññatānaṁ,
ja519:14.4	Na hi nūna santi paṭisedhitāro”.
ja519:15.1	“Itthīnamesā pavarā yasassinī,
ja519:15.2	Santā samā aggirivuggatejā;
ja519:15.3	Tañce tuvaṁ rakkhasādesi kaññaṁ,
ja519:15.4	Muddhā ca hi sattadhā te phaleyya;
ja519:15.5	Mā tvaṁ dahī muñca patibbatāya”.
ja519:16.1	Sā ca assamamāgacchi,
ja519:16.2	pamuttā purisādakā;
ja519:16.3	Nīḷaṁ paḷinaṁ sakuṇīva,
ja519:16.4	gatasiṅgaṁva ālayaṁ.
ja519:17.1	Sā tattha paridevesi,
ja519:17.2	rājaputtī yasassinī;
ja519:17.3	Sambulā utumattakkhā,
ja519:17.4	vane nāthaṁ apassantī.
ja519:18.1	Samaṇe brāhmaṇe vande,
ja519:18.2	sampannacaraṇe ise;
ja519:18.3	Rājaputtaṁ apassantī,
ja519:18.4	“tumhaṁmhi saraṇaṁ gatā”.
ja519:19.1	Vande sīhe ca byagghe ca,
ja519:19.2	ye ca aññe vane migā;
ja519:19.3	Rājaputtaṁ apassantī,
ja519:19.4	“tumhaṁmhi saraṇaṁ gatā”.
ja519:20.1	Tiṇā latāni osadhyo,
ja519:20.2	pabbatāni vanāni ca;
ja519:20.3	Rājaputtaṁ apassantī,
ja519:20.4	“tumhaṁmhi saraṇaṁ gatā”.
ja519:21.1	Vande indīvarīsāmaṁ,
ja519:21.2	rattiṁ nakkhattamāliniṁ;
ja519:21.3	Rājaputtaṁ apassantī,
ja519:21.4	“tumhaṁmhi saraṇaṁ gatā”.
ja519:22.1	Vande bhāgīrathiṁ gaṅgaṁ,
ja519:22.2	savantīnaṁ paṭiggahaṁ;
ja519:22.3	Rājaputtaṁ apassantī,
ja519:22.4	“tumhaṁmhi saraṇaṁ gatā”.
ja519:23.1	Vande ahaṁ pabbatarājaseṭṭhaṁ,
ja519:23.2	Himavantaṁ siluccayaṁ;
ja519:23.3	Rājaputtaṁ apassantī,
ja519:23.4	“Tumhaṁmhi saraṇaṁ gatā”.
ja519:24.1	“Atisāyaṁ vatāgacchi,
ja519:24.2	rājaputti yasassini;
ja519:24.3	Kena nujja samāgacchi,
ja519:24.4	ko te piyataro mayā”.
ja519:25.1	“Idaṁ khohaṁ tadāvocaṁ,
ja519:25.2	gahitā tena sattunā;
ja519:25.3	Na me idaṁ tathā dukkhaṁ,
ja519:25.4	yaṁ maṁ khādeyya rakkhaso;
ja519:25.5	Yañca me ayyaputtassa,
ja519:25.6	mano hessati aññathā”.
ja519:26.1	“Corīnaṁ bahubuddhīnaṁ,
ja519:26.2	yāsu saccaṁ sudullabhaṁ;
ja519:26.3	Thīnaṁ bhāvo durājāno,
ja519:26.4	macchassevodake gataṁ”.
ja519:27.1	“Tathā maṁ saccaṁ pāletu,
ja519:27.2	pālayissati ce mamaṁ;
ja519:27.3	Yathāhaṁ nābhijānāmi,
ja519:27.4	aññaṁ piyataraṁ tayā;
ja519:27.5	Etena saccavajjena,
ja519:27.6	byādhi te vūpasammatu”.
ja519:28.1	“Ye kuñjarā sattasatā uḷārā,
ja519:28.2	Rakkhanti rattindivamuyyutāvudhā;
ja519:28.3	Dhanuggahānañca satāni soḷasa,
ja519:28.4	Kathaṁvidhe passasi bhadde sattavo”.
ja519:29.1	“Alaṅkatāyo padumuttarattacā,
ja519:29.2	Virāgitā passati haṁsagaggarā;
ja519:29.3	Tāsaṁ suṇitvā mitagītavāditaṁ,
ja519:29.4	Na dāni me tāta tathā yathā pure.
ja519:30.1	Suvaṇṇasaṅkaccadharā suviggahā,
ja519:30.2	Alaṅkatā mānusiyaccharūpamā;
ja519:30.3	Senopiyā tāta aninditaṅgiyo,
ja519:30.4	Khattiyakaññā paṭilobhayanti naṁ.
ja519:31.1	Sace ahaṁ tāta tathā yathā pure,
ja519:31.2	Patiṁ tamuñchāya punā vane bhare;
ja519:31.3	Sammānaye maṁ na ca maṁ vimānaye,
ja519:31.4	Itopi me tāta tato varaṁ siyā.
ja519:32.1	Yamannapāne vipulasmi ohite,
ja519:32.2	Nārī vimaṭṭhābharaṇā alaṅkatā;
ja519:32.3	Sabbaṅgupetā patino ca appiyā,
ja519:32.4	Abajjha tassā maraṇaṁ tato varaṁ.
ja519:33.1	Api ce daliddā kapaṇā anāḷhiyā,
ja519:33.2	Kaṭādutīyā patino ca sā piyā;
ja519:33.3	Sabbaṅgupetāyapi appiyāya,
ja519:33.4	Ayameva seyyā kapaṇāpi yā piyā”.
ja519:34.1	“Sudullabhitthī purisassa yā hitā,
ja519:34.2	Bhattitthiyā dullabho yo hito ca;
ja519:34.3	Hitā ca te sīlavatī ca bhariyā,
ja519:34.4	Janinda dhammaṁ cara sambulāya”.
ja519:35.1	“Sace tuvaṁ vipule laddhabhoge,
ja519:35.2	Issāvatiṇṇā maraṇaṁ upesi;
ja519:35.3	Ahañca te bhadde imā rājakaññā,
ja519:35.4	Sabbe te vacanakarā bhavāmā”ti.
ja519:36.1	Sambulājātakaṁ navamaṁ.
ja520:0.1	Jātaka
ja520:0.2	Tiṁsanipāta
ja520:0.3	Kiṁchandavagga
ja520:0.4	10. Gandhatindukajātaka
ja520:1.1	“Appamādo amataṁ padaṁ,
ja520:1.2	Pamādo maccuno padaṁ;
ja520:1.3	Appamattā na mīyanti,
ja520:1.4	Ye pamattā yathā matā.
ja520:2.1	Madā pamādo jāyetha,
ja520:2.2	pamādā jāyate khayo;
ja520:2.3	Khayā padosā jāyanti,
ja520:2.4	mā pamādo bharatūsabha.
ja520:3.1	Bahū hi khattiyā jīnā,
ja520:3.2	atthaṁ raṭṭhaṁ pamādino;
ja520:3.3	Athopi gāmino gāmā,
ja520:3.4	anagārā agārino.
ja520:4.1	Khattiyassa pamattassa,
ja520:4.2	raṭṭhasmiṁ raṭṭhavaḍḍhana;
ja520:4.3	Sabbe bhogā vinassanti,
ja520:4.4	rañño taṁ vuccate aghaṁ.
ja520:5.1	Nesa dhammo mahārāja,
ja520:5.2	ativelaṁ pamajjasi;
ja520:5.3	Iddhaṁ phītaṁ janapadaṁ,
ja520:5.4	corā viddhaṁsayanti naṁ.
ja520:6.1	Na te puttā bhavissanti,
ja520:6.2	na hiraññaṁ na dhāniyaṁ;
ja520:6.3	Raṭṭhe viluppamānamhi,
ja520:6.4	sabbabhogehi jiyyasi.
ja520:7.1	Sabbabhogā parijiṇṇaṁ,
ja520:7.2	rājānaṁ vāpi khattiyaṁ;
ja520:7.3	Ñātimittā suhajjā ca,
ja520:7.4	na taṁ maññanti māniyaṁ.
ja520:8.1	Hatthārohā anikaṭṭhā,
ja520:8.2	rathikā pattikārakā;
ja520:8.3	Tamevamupajīvantā,
ja520:8.4	na taṁ maññanti māniyaṁ.
ja520:9.1	Asaṁvihitakammantaṁ,
ja520:9.2	bālaṁ dummantimantinaṁ;
ja520:9.3	Sirī jahati dummedhaṁ,
ja520:9.4	jiṇṇaṁva urago tacaṁ.
ja520:10.1	Susaṁvihitakammantaṁ,
ja520:10.2	kāluṭṭhāyiṁ atanditaṁ;
ja520:10.3	Sabbe bhogābhivaḍḍhanti,
ja520:10.4	gāvo sausabhāmiva.
ja520:11.1	Upassutiṁ mahārāja,
ja520:11.2	raṭṭhe janapade cara;
ja520:11.3	Tattha disvā ca sutvā ca,
ja520:11.4	tato taṁ paṭipajjasi”.
ja520:12.1	“Evaṁ vedetu pañcālo,
ja520:12.2	saṅgāme saramappito;
ja520:12.3	Yathāhamajja vedemi,
ja520:12.4	kaṇṭakena samappito”.
ja520:13.1	“Jiṇṇo dubbalacakkhūsi,
ja520:13.2	na rūpaṁ sādhu passasi;
ja520:13.3	Kiṁ tattha brahmadattassa,
ja520:13.4	yaṁ taṁ maggeyya kaṇṭako”.
ja520:14.1	“Bahvettha brahmadattassa,
ja520:14.2	Sohaṁ maggasmi brāhmaṇa;
ja520:14.3	Arakkhitā jānapadā,
ja520:14.4	Adhammabalinā hatā.
ja520:15.1	Rattiñhi corā khādanti,
ja520:15.2	divā khādanti tuṇḍiyā;
ja520:15.3	Raṭṭhasmiṁ kūṭarājassa,
ja520:15.4	bahu adhammiko jano.
ja520:16.1	Etādise bhaye jāte,
ja520:16.2	bhayaṭṭā tāta māṇavā;
ja520:16.3	Nillenakāni kubbanti,
ja520:16.4	vane āhatva kaṇṭakaṁ”.
ja520:17.1	“Kadāssu nāmayaṁ rājā,
ja520:17.2	brahmadatto marissati;
ja520:17.3	Yassa raṭṭhamhi jiyyanti,
ja520:17.4	appatikā kumārikā”.
ja520:18.1	“Dubbhāsitañhi te jammi,
ja520:18.2	anatthapadakovide;
ja520:18.3	Kuhiṁ rājā kumārīnaṁ,
ja520:18.4	bhattāraṁ pariyesati”.
ja520:19.1	“Na me dubbhāsitaṁ brahme,
ja520:19.2	kovidatthapadā ahaṁ;
ja520:19.3	Arakkhitā jānapadā,
ja520:19.4	adhammabalinā hatā.
ja520:20.1	Rattiñhi corā khādanti,
ja520:20.2	divā khādanti tuṇḍiyā;
ja520:20.3	Raṭṭhasmiṁ kūṭarājassa,
ja520:20.4	bahu adhammiko jano;
ja520:20.5	Dujjīve dubbhare dāre,
ja520:20.6	kuto bhattā kumāriyo”.
ja520:21.1	“Evaṁ sayatu pañcālo,
ja520:21.2	saṅgāme sattiyā hato;
ja520:21.3	Yathāyaṁ kapaṇo seti,
ja520:21.4	hato phālena sāliyo”.
ja520:22.1	“Adhammena tuvaṁ jamma,
ja520:22.2	brahmadattassa kujjhasi;
ja520:22.3	Yo tvaṁ sapasi rājānaṁ,
ja520:22.4	aparajjhitvāna attano”.
ja520:23.1	“Dhammena brahmadattassa,
ja520:23.2	ahaṁ kujjhāmi brāhmaṇa;
ja520:23.3	Arakkhitā jānapadā,
ja520:23.4	adhammabalinā hatā.
ja520:24.1	Rattiñhi corā khādanti,
ja520:24.2	divā khādanti tuṇḍiyā;
ja520:24.3	Raṭṭhasmiṁ kūṭarājassa,
ja520:24.4	bahu adhammiko jano.
ja520:25.1	Sā nūna puna re pakkā,
ja520:25.2	vikāle bhattamāhari;
ja520:25.3	Bhattahāriṁ apekkhanto,
ja520:25.4	hato phālena sāliyo”.
ja520:26.1	“Evaṁ haññatu pañcālo,
ja520:26.2	saṅgāme asinā hato;
ja520:26.3	Yathāhamajja pahato,
ja520:26.4	khīrañca me pavaṭṭitaṁ”.
ja520:27.1	“Yaṁ pasu khīraṁ chaḍḍeti,
ja520:27.2	pasupālaṁ vihiṁsati;
ja520:27.3	Kiṁ tattha brahmadattassa,
ja520:27.4	yaṁ no garahate bhavaṁ”.
ja520:28.1	“Gārayho brahme pañcālo,
ja520:28.2	brahmadattassa rājino;
ja520:28.3	Arakkhitā jānapadā,
ja520:28.4	adhammabalinā hatā.
ja520:29.1	Rattiñhi corā khādanti,
ja520:29.2	divā khādanti tuṇḍiyā;
ja520:29.3	Raṭṭhasmiṁ kūṭarājassa,
ja520:29.4	bahu adhammiko jano.
ja520:30.1	Caṇḍā aṭanakā gāvī,
ja520:30.2	yaṁ pure na duhāmase;
ja520:30.3	Taṁ dāni ajja dohāma,
ja520:30.4	khīrakāmehupaddutā”.
ja520:31.1	“Evaṁ kandatu pañcālo,
ja520:31.2	viputto vippasukkhatu;
ja520:31.3	Yathāyaṁ kapaṇā gāvī,
ja520:31.4	viputtā paridhāvati”.
ja520:32.1	“Yaṁ pasu pasupālassa,
ja520:32.2	sambhameyya raveyya vā;
ja520:32.3	Ko nīdha aparādhatthi,
ja520:32.4	brahmadattassa rājino”.
ja520:33.1	“Aparādho mahābrahme,
ja520:33.2	brahmadattassa rājino;
ja520:33.3	Arakkhitā jānapadā,
ja520:33.4	adhammabalinā hatā.
ja520:34.1	Rattiñhi corā khādanti,
ja520:34.2	divā khādanti tuṇḍiyā;
ja520:34.3	Raṭṭhasmiṁ kūṭarājassa,
ja520:34.4	bahu adhammiko jano;
ja520:34.5	Kathaṁ no asikosatthā,
ja520:34.6	khīrapā haññate pajā”.
ja520:35.1	“Evaṁ khajjatu pañcālo,
ja520:35.2	hato yuddhe saputtako;
ja520:35.3	Yathāhamajja khajjāmi,
ja520:35.4	gāmikehi araññajo”.
ja520:36.1	“Na sabbabhūtesu vidhenti rakkhaṁ,
ja520:36.2	Rājāno maṇḍūka manussaloke;
ja520:36.3	Nettāvatā rājā adhammacārī,
ja520:36.4	Yaṁ tādisaṁ jīvamadeyyu dhaṅkā”.
ja520:37.1	“Adhammarūpo vata brahmacārī,
ja520:37.2	Anuppiyaṁ bhāsasi khattiyassa;
ja520:37.3	Viluppamānāya puthuppajāya,
ja520:37.4	Pūjesi rājaṁ paramappamādaṁ.
ja520:38.1	Sace idaṁ brahme surajjakaṁ siyā,
ja520:38.2	Phītaṁ raṭṭhaṁ muditaṁ vippasannaṁ;
ja520:38.3	Bhutvā baliṁ aggapiṇḍañca kākā,
ja520:38.4	Na mādisaṁ jīvamadeyyu dhaṅkā”ti.
ja520:39.1	Gandhatindukajātakaṁ dasamaṁ.
ja520:40.1	Tiṁsanipātaṁ niṭṭhitaṁ.
ja520:41.1	Tassuddānaṁ
ja520:42.1	Kiṁchanda kumbha jayaddisa chaddanta,
ja520:42.2	Atha paṇḍitasambhava sirakapi;
ja520:42.3	Dakarakkhasa paṇḍaranāgavaro,
ja520:42.4	Atha sambula tindukadevasutoti.
ja520:43.1	Jātakapāḷiyā paṭhamo bhāgo niṭṭhito.
ja521:0.1	Jātaka
ja521:0.2	Cattālīsanipāta
ja521:0.3	Tesakuṇavagga
ja521:0.4	1. Tesakuṇajātaka
ja521:1.1	Namo tassa Bhagavato Arahato Sammāsambuddhassa.
ja521:2.1	“Vessantaraṁ taṁ pucchāmi,
ja521:2.2	sakuṇa bhaddamatthu te;
ja521:2.3	Rajjaṁ kāretukāmena,
ja521:2.4	kiṁ su kiccaṁ kataṁ varaṁ”.
ja521:3.1	“Cirassaṁ vata maṁ tāto,
ja521:3.2	kaṁso bārāṇasiggaho;
ja521:3.3	Pamatto appamattaṁ maṁ,
ja521:3.4	pitā puttaṁ acodayi.
ja521:4.1	Paṭhameneva vitathaṁ,
ja521:4.2	kodhaṁ hāsaṁ nivāraye;
ja521:4.3	Tato kiccāni kāreyya,
ja521:4.4	taṁ vataṁ āhu khattiya.
ja521:5.1	Yaṁ tvaṁ tāta tapokammaṁ,
ja521:5.2	Pubbe katamasaṁsayaṁ;
ja521:5.3	Ratto duṭṭho ca yaṁ kayirā,
ja521:5.4	Na taṁ kayirā tato puna.
ja521:6.1	Khattiyassa pamattassa,
ja521:6.2	raṭṭhasmiṁ raṭṭhavaḍḍhana;
ja521:6.3	Sabbe bhogā vinassanti,
ja521:6.4	rañño taṁ vuccate aghaṁ.
ja521:7.1	Sirī tāta alakkhī ca,
ja521:7.2	pucchitā etadabravuṁ;
ja521:7.3	Uṭṭhānavīriye pose,
ja521:7.4	ramāhaṁ anusūyake.
ja521:8.1	Usūyake duhadaye,
ja521:8.2	purise kammadussake;
ja521:8.3	Kāḷakaṇṇī mahārāja,
ja521:8.4	ramati cakkabhañjanī.
ja521:9.1	So tvaṁ sabbesu suhadayo,
ja521:9.2	sabbesaṁ rakkhito bhava;
ja521:9.3	Alakkhiṁ nuda mahārāja,
ja521:9.4	lakkhyā bhava nivesanaṁ.
ja521:10.1	Sa lakkhīdhitisampanno,
ja521:10.2	puriso hi mahaggato;
ja521:10.3	Amittānaṁ kāsipati,
ja521:10.4	mūlaṁ aggañca chindati.
ja521:11.1	Sakkopi hi bhūtapati,
ja521:11.2	uṭṭhāne nappamajjati;
ja521:11.3	Sa kalyāṇe dhitiṁ katvā,
ja521:11.4	uṭṭhāne kurute mano.
ja521:12.1	Gandhabbā pitaro devā,
ja521:12.2	sājīvā honti tādino;
ja521:12.3	Uṭṭhāhato appamajjato,
ja521:12.4	anutiṭṭhanti devatā.
ja521:13.1	So appamatto akkuddho,
ja521:13.2	tāta kiccāni kāraya;
ja521:13.3	Vāyamassu ca kiccesu,
ja521:13.4	nālaso vindate sukhaṁ.
ja521:14.1	Tattheva te vattapadā,
ja521:14.2	esāva anusāsanī;
ja521:14.3	Alaṁ mitte sukhāpetuṁ,
ja521:14.4	amittānaṁ dukhāya ca”.
ja521:15.1	“Sakkhisi tvaṁ kuṇḍalini,
ja521:15.2	maññasi khattabandhuni;
ja521:15.3	Rajjaṁ kāretukāmena,
ja521:15.4	kiṁ su kiccaṁ kataṁ varaṁ”.
ja521:16.1	“Dveva tāta padakāni,
ja521:16.2	yattha sabbaṁ patiṭṭhitaṁ;
ja521:16.3	Aladdhassa ca yo lābho,
ja521:16.4	laddhassa cānurakkhaṇā.
ja521:17.1	Amacce tāta jānāhi,
ja521:17.2	dhīre atthassa kovide;
ja521:17.3	Anakkhākitave tāta,
ja521:17.4	asoṇḍe avināsake.
ja521:18.1	Yo ca taṁ tāta rakkheyya,
ja521:18.2	dhanaṁ yañceva te siyā;
ja521:18.3	Sūtova rathaṁ saṅgaṇhe,
ja521:18.4	so te kiccāni kāraye.
ja521:19.1	Susaṅgahitantajano,
ja521:19.2	sayaṁ vittaṁ avekkhiya;
ja521:19.3	Nidhiñca iṇadānañca,
ja521:19.4	na kare parapattiyā.
ja521:20.1	Sayaṁ āyaṁ vayaṁ jaññā,
ja521:20.2	sayaṁ jaññā katākataṁ;
ja521:20.3	Niggaṇhe niggahārahaṁ,
ja521:20.4	paggaṇhe paggahārahaṁ.
ja521:21.1	Sayaṁ jānapadaṁ atthaṁ,
ja521:21.2	anusāsa rathesabha;
ja521:21.3	Mā te adhammikā yuttā,
ja521:21.4	dhanaṁ raṭṭhañca nāsayuṁ.
ja521:22.1	Mā ca vegena kiccāni,
ja521:22.2	karosi kārayesi vā;
ja521:22.3	Vegasā hi kataṁ kammaṁ,
ja521:22.4	mando pacchānutappati.
ja521:23.1	Mā te adhisare muñca,
ja521:23.2	subāḷhamadhikopitaṁ;
ja521:23.3	Kodhasā hi bahū phītā,
ja521:23.4	kulā akulataṁ gatā.
ja521:24.1	Mā tāta issaromhīti,
ja521:24.2	anatthāya patārayi;
ja521:24.3	Itthīnaṁ purisānañca,
ja521:24.4	mā te āsi dukhudrayo.
ja521:25.1	Apetalomahaṁsassa,
ja521:25.2	rañño kāmānusārino;
ja521:25.3	Sabbe bhogā vinassanti,
ja521:25.4	rañño taṁ vuccate aghaṁ.
ja521:26.1	Tattheva te vattapadā,
ja521:26.2	esāva anusāsanī;
ja521:26.3	Dakkhassudāni puññakaro,
ja521:26.4	asoṇḍo avināsako;
ja521:26.5	Sīlavāssu mahārāja,
ja521:26.6	dussīlo vinipātiko”.
ja521:27.1	“Apucchimha kosiyagottaṁ,
ja521:27.2	kuṇḍaliniṁ tatheva ca;
ja521:27.3	Tvaṁ dāni vadehi jambuka,
ja521:27.4	balānaṁ balamuttamaṁ”.
ja521:28.1	“Balaṁ pañcavidhaṁ loke,
ja521:28.2	purisasmiṁ mahaggate;
ja521:28.3	Tattha bāhubalaṁ nāma,
ja521:28.4	carimaṁ vuccate balaṁ.
ja521:29.1	Bhogabalañca dīghāvu,
ja521:29.2	dutiyaṁ vuccate balaṁ;
ja521:29.3	Amaccabalañca dīghāvu,
ja521:29.4	tatiyaṁ vuccate balaṁ.
ja521:30.1	Abhijaccabalaṁ ceva,
ja521:30.2	taṁ catutthaṁ asaṁsayaṁ;
ja521:30.3	Yāni cetāni sabbāni,
ja521:30.4	adhigaṇhāti paṇḍito.
ja521:31.1	Taṁ balānaṁ balaṁ seṭṭhaṁ,
ja521:31.2	aggaṁ paññābalaṁ balaṁ;
ja521:31.3	Paññābalenupatthaddho,
ja521:31.4	atthaṁ vindati paṇḍito.
ja521:32.1	Api ce labhati mando,
ja521:32.2	phītaṁ dharaṇimuttamaṁ;
ja521:32.3	Akāmassa pasayhaṁ vā,
ja521:32.4	añño taṁ paṭipajjati.
ja521:33.1	Abhijātopi ce hoti,
ja521:33.2	rajjaṁ laddhāna khattiyo;
ja521:33.3	Duppañño hi kāsipati,
ja521:33.4	sabbenapi na jīvati.
ja521:34.1	Paññāva sutaṁ vinicchinī,
ja521:34.2	Paññā kitti silokavaḍḍhanī;
ja521:34.3	Paññāsahito naro idha,
ja521:34.4	Api dukkhe sukhāni vindati.
ja521:35.1	Paññañca kho asussūsaṁ,
ja521:35.2	na koci adhigacchati;
ja521:35.3	Bahussutaṁ anāgamma,
ja521:35.4	dhammaṭṭhaṁ avinibbhujaṁ.
ja521:36.1	Yo ca dhammavibhaṅgaññū,
ja521:36.2	kāluṭṭhāyī matandito;
ja521:36.3	Anuṭṭhahati kālena,
ja521:36.4	kammaphalaṁ tassijjhati.
ja521:37.1	Anāyatanasīlassa,
ja521:37.2	anāyatanasevino;
ja521:37.3	Na nibbindiyakārissa,
ja521:37.4	sammadattho vipaccati.
ja521:38.1	Ajjhattañca payuttassa,
ja521:38.2	tathāyatanasevino;
ja521:38.3	Anibbindiyakārissa,
ja521:38.4	sammadattho vipaccati.
ja521:39.1	Yogappayogasaṅkhātaṁ,
ja521:39.2	sambhatassānurakkhaṇaṁ;
ja521:39.3	Tāni tvaṁ tāta sevassu,
ja521:39.4	mā akammāya randhayi;
ja521:39.5	Akammunā hi dummedho,
ja521:39.6	naḷāgāraṁva sīdati”.
ja521:40.1	“Dhammaṁ cara mahārāja,
ja521:40.2	mātāpitūsu khattiya;
ja521:40.3	Idha dhammaṁ caritvāna,
ja521:40.4	rāja saggaṁ gamissasi.
ja521:41.1	Dhammaṁ cara mahārāja,
ja521:41.2	puttadāresu khattiya;
ja521:41.3	Idha dhammaṁ caritvāna,
ja521:41.4	rāja saggaṁ gamissasi.
ja521:42.1	Dhammaṁ cara mahārāja,
ja521:42.2	mittāmaccesu khattiya;
ja521:42.3	Idha dhammaṁ caritvāna,
ja521:42.4	rāja saggaṁ gamissasi.
ja521:43.1	Dhammaṁ cara mahārāja,
ja521:43.2	vāhanesu balesu ca;
ja521:43.3	Idha dhammaṁ caritvāna,
ja521:43.4	rāja saggaṁ gamissasi.
ja521:44.1	Dhammaṁ cara mahārāja,
ja521:44.2	gāmesu nigamesu ca;
ja521:44.3	…pe…
ja521:45.1	Dhammaṁ cara mahārāja,
ja521:45.2	raṭṭhesu janapadesu ca;
ja521:45.3	…pe…
ja521:46.1	Dhammaṁ cara mahārāja,
ja521:46.2	samaṇabrāhmaṇesu ca;
ja521:46.3	…pe…
ja521:47.1	Dhammaṁ cara mahārāja,
ja521:47.2	migapakkhīsu khattiya;
ja521:47.3	Idha dhammaṁ caritvāna,
ja521:47.4	rāja saggaṁ gamissasi.
ja521:48.1	Dhammaṁ cara mahārāja,
ja521:48.2	dhammo ciṇṇo sukhāvaho;
ja521:48.3	Idha dhammaṁ caritvāna,
ja521:48.4	rāja saggaṁ gamissasi.
ja521:49.1	Dhammaṁ cara mahārāja,
ja521:49.2	Saindā devā sabrahmakā;
ja521:49.3	Suciṇṇena divaṁ pattā,
ja521:49.4	Mā dhammaṁ rāja pāmado.
ja521:50.1	Tattheva te vattapadā,
ja521:50.2	Esāva anusāsanī;
ja521:50.3	Sappaññasevī kalyāṇī,
ja521:50.4	Samattaṁ sāma taṁ vidū”ti.
ja521:51.1	Tesakuṇajātakaṁ paṭhamaṁ.
ja522:0.1	Jātaka
ja522:0.2	Cattālīsanipāta
ja522:0.3	Tesakuṇavagga
ja522:0.4	2. Sarabhaṅgajātaka
ja522:1.1	“Alaṅkatā kuṇḍalino suvatthā,
ja522:1.2	Veḷuriyamuttātharukhaggabandhā;
ja522:1.3	Rathesabhā tiṭṭhatha ke nu tumhe,
ja522:1.4	Kathaṁ vo jānanti manussaloke”.
ja522:2.1	“Ahamaṭṭhako bhīmaratho panāyaṁ,
ja522:2.2	Kāliṅgarājā pana uggatoyaṁ;
ja522:2.3	Susaññatānaṁ isīnaṁ dassanāya,
ja522:2.4	Idhāgatā pucchitāyemha pañhe”.
ja522:3.1	“Vehāyasaṁ tiṭṭhasi antalikkhe,
ja522:3.2	Pathaddhuno pannaraseva cando;
ja522:3.3	Pucchāmi taṁ yakkha mahānubhāva,
ja522:3.4	Kathaṁ taṁ jānanti manussaloke”.
ja522:4.1	“Yamāhu devesu sujampatīti,
ja522:4.2	Maghavāti taṁ āhu manussaloke;
ja522:4.3	Sa devarājā idamajja patto,
ja522:4.4	Susaññatānaṁ isīnaṁ dassanāya”.
ja522:5.1	“Dūre sutā no isayo samāgatā,
ja522:5.2	Mahiddhikā iddhiguṇūpapannā;
ja522:5.3	Vandāmi te ayire pasannacitto,
ja522:5.4	Ye jīvalokettha manussaseṭṭhā”.
ja522:6.1	“Gandho isīnaṁ ciradikkhitānaṁ,
ja522:6.2	Kāyā cuto gacchati mālutena;
ja522:6.3	Ito paṭikkamma sahassanetta,
ja522:6.4	Gandho isīnaṁ asuci devarāja”.
ja522:7.1	“Gandho isīnaṁ ciradikkhitānaṁ,
ja522:7.2	Kāyā cuto gacchatu mālutena;
ja522:7.3	Vicitrapupphaṁ surabhiṁva mālaṁ,
ja522:7.4	Gandhañca etaṁ pāṭikaṅkhāma bhante;
ja522:7.5	Na hettha devā paṭikkūlasaññino”.
ja522:8.1	“Purindado bhūtapatī yasassī,
ja522:8.2	Devānamindo sakko maghavā sujampati;
ja522:8.3	Sa devarājā asuragaṇappamaddano,
ja522:8.4	Okāsamākaṅkhati pañha pucchituṁ.
ja522:9.1	Ko nevimesaṁ idha paṇḍitānaṁ,
ja522:9.2	Pañhe puṭṭho nipuṇe byākarissati;
ja522:9.3	Tiṇṇañca raññaṁ manujādhipānaṁ,
ja522:9.4	Devānamindassa ca vāsavassa”.
ja522:10.1	“Ayaṁ isi sarabhaṅgo tapassī,
ja522:10.2	Yato jāto virato methunasmā;
ja522:10.3	Āceraputto suvinītarūpo,
ja522:10.4	So nesaṁ pañhāni viyākarissati”.
ja522:11.1	“Koṇḍañña pañhāni viyākarohi,
ja522:11.2	Yācanti taṁ isayo sādhurūpā;
ja522:11.3	Koṇḍañña eso manujesu dhammo,
ja522:11.4	Yaṁ vuddhamāgacchati esa bhāro”.
ja522:12.1	“Katāvakāsā pucchantu bhonto,
ja522:12.2	Yaṁ kiñci pañhaṁ manasābhipatthitaṁ;
ja522:12.3	Ahañhi taṁ taṁ vo viyākarissaṁ,
ja522:12.4	Ñatvā sayaṁ lokamimaṁ parañca”.
ja522:13.1	Tato ca maghavā sakko,
ja522:13.2	atthadassī purindado;
ja522:13.3	Apucchi paṭhamaṁ pañhaṁ,
ja522:13.4	yañcāsi abhipatthitaṁ.
ja522:14.1	“Kiṁ sū vadhitvā na kadāci socati,
ja522:14.2	Kissappahānaṁ isayo vaṇṇayanti;
ja522:14.3	Kassīdha vuttaṁ pharusaṁ khametha,
ja522:14.4	Akkhāhi me koṇḍañña etamatthaṁ”.
ja522:15.1	“Kodhaṁ vadhitvā na kadāci socati,
ja522:15.2	Makkhappahānaṁ isayo vaṇṇayanti;
ja522:15.3	Sabbesaṁ vuttaṁ pharusaṁ khametha,
ja522:15.4	Etaṁ khantiṁ uttamamāhu santo”.
ja522:16.1	“Sakkā ubhinnaṁ vacanaṁ titikkhituṁ,
ja522:16.2	Sadisassa vā seṭṭhatarassa vāpi;
ja522:16.3	Kathaṁ nu hīnassa vaco khametha,
ja522:16.4	Akkhāhi me koṇḍañña etamatthaṁ”.
ja522:17.1	“Bhayā hi seṭṭhassa vaco khametha,
ja522:17.2	Sārambhahetū pana sādisassa;
ja522:17.3	Yo cīdha hīnassa vaco khametha,
ja522:17.4	Etaṁ khantiṁ uttamamāhu santo”.
ja522:18.1	“Kathaṁ vijaññā catupattharūpaṁ,
ja522:18.2	Seṭṭhaṁ sarikkhaṁ athavāpi hīnaṁ;
ja522:18.3	Virūparūpena caranti santo,
ja522:18.4	Tasmā hi sabbesaṁ vaco khametha”.
ja522:19.1	“Na hetamatthaṁ mahatīpi senā,
ja522:19.2	Sarājikā yujjhamānā labhetha;
ja522:19.3	Yaṁ khantimā sappuriso labhetha,
ja522:19.4	Khantī balassūpasamanti verā”.
ja522:20.1	“Subhāsitaṁ te anumodiyāna,
ja522:20.2	Aññaṁ taṁ pucchāmi tadiṅgha brūhi;
ja522:20.3	Yathā ahuṁ daṇḍakī nāḷikero,
ja522:20.4	Athajjuno kalābu cāpi rājā;
ja522:20.5	Tesaṁ gatiṁ brūhi supāpakamminaṁ,
ja522:20.6	Katthūpapannā isinaṁ viheṭhakā”.
ja522:21.1	“Kisañhi vacchaṁ avakiriya daṇḍakī,
ja522:21.2	Ucchinnamūlo sajano saraṭṭho;
ja522:21.3	Kukkuḷanāme nirayamhi paccati,
ja522:21.4	Tassa phuliṅgāni patanti kāye.
ja522:22.1	Yo saññate pabbajite aheṭhayi,
ja522:22.2	Dhammaṁ bhaṇante samaṇe adūsake;
ja522:22.3	Taṁ nāḷikeraṁ sunakhā parattha,
ja522:22.4	Saṅgamma khādanti viphandamānaṁ.
ja522:23.1	Athajjuno niraye sattisūle,
ja522:23.2	Avaṁsiro patito uddhampādo;
ja522:23.3	Aṅgīrasaṁ gotamaṁ heṭhayitvā,
ja522:23.4	Khantiṁ tapassiṁ cirabrahmacāriṁ.
ja522:24.1	Yo khaṇḍaso pabbajitaṁ achedayi,
ja522:24.2	Khantiṁ vadantaṁ samaṇaṁ adūsakaṁ;
ja522:24.3	Kalābuvīciṁ upapajja paccati,
ja522:24.4	Mahāpatāpaṁ kaṭukaṁ bhayānakaṁ.
ja522:25.1	Etāni sutvā nirayāni paṇḍito,
ja522:25.2	Aññāni pāpiṭṭhatarāni cettha;
ja522:25.3	Dhammaṁ care samaṇabrāhmaṇesu,
ja522:25.4	Evaṅkaro saggamupeti ṭhānaṁ”.
ja522:26.1	“Subhāsitaṁ te anumodiyāna,
ja522:26.2	Aññaṁ taṁ pucchāmi tadiṅgha brūhi;
ja522:26.3	Kathaṁvidhaṁ sīlavantaṁ vadanti,
ja522:26.4	Kathaṁvidhaṁ paññavantaṁ vadanti;
ja522:26.5	Kathaṁvidhaṁ sappurisaṁ vadanti,
ja522:26.6	Kathaṁvidhaṁ no siri no jahāti”.
ja522:27.1	“Kāyena vācāya ca yodha saññato,
ja522:27.2	Manasā ca kiñci na karoti pāpaṁ;
ja522:27.3	Na attahetū alikaṁ bhaṇeti,
ja522:27.4	Tathāvidhaṁ sīlavantaṁ vadanti.
ja522:28.1	Gambhīrapañhaṁ manasābhicintayaṁ,
ja522:28.2	Nāccāhitaṁ kamma karoti luddaṁ;
ja522:28.3	Kālāgataṁ atthapadaṁ na riñcati,
ja522:28.4	Tathāvidhaṁ paññavantaṁ vadanti.
ja522:29.1	Yo ve kataññū katavedi dhīro,
ja522:29.2	Kalyāṇamitto daḷhabhatti ca hoti;
ja522:29.3	Dukhitassa sakkacca karoti kiccaṁ,
ja522:29.4	Tathāvidhaṁ sappurisaṁ vadanti.
ja522:30.1	Etehi sabbehi guṇehupeto,
ja522:30.2	Saddho mudū saṁvibhāgī vadaññū;
ja522:30.3	Saṅgāhakaṁ sakhilaṁ saṇhavācaṁ,
ja522:30.4	Tathāvidhaṁ no siri no jahāti”.
ja522:31.1	“Subhāsitaṁ te anumodiyāna,
ja522:31.2	Aññaṁ taṁ pucchāmi tadiṅgha brūhi;
ja522:31.3	Sīlaṁ siriñcāpi satañca dhammaṁ,
ja522:31.4	Paññañca kaṁ seṭṭhataraṁ vadanti”.
ja522:32.1	“Paññā hi seṭṭhā kusalā vadanti,
ja522:32.2	Nakkhattarājāriva tārakānaṁ;
ja522:32.3	Sīlaṁ sīrī cāpi satañca dhammo,
ja522:32.4	Anvāyikā paññavato bhavanti”.
ja522:33.1	“Subhāsitaṁ te anumodiyāna,
ja522:33.2	Aññaṁ taṁ pucchāmi tadiṅgha brūhi;
ja522:33.3	Kathaṅkaro kintikaro kimācaraṁ,
ja522:33.4	Kiṁ sevamāno labhatīdha paññaṁ;
ja522:33.5	Paññāya dāni paṭipadaṁ vadehi,
ja522:33.6	Kathaṅkaro paññavā hoti macco”.
ja522:34.1	“Sevetha vuddhe nipuṇe bahussute,
ja522:34.2	Uggāhako ca paripucchako siyā;
ja522:34.3	Suṇeyya sakkacca subhāsitāni,
ja522:34.4	Evaṅkaro paññavā hoti macco.
ja522:35.1	Sa paññavā kāmaguṇe avekkhati,
ja522:35.2	Aniccato dukkhato rogato ca;
ja522:35.3	Evaṁ vipassī pajahāti chandaṁ,
ja522:35.4	Dukkhesu kāmesu mahabbhayesu.
ja522:36.1	Sa vītarāgo pavineyya dosaṁ,
ja522:36.2	Mettaṁ cittaṁ bhāvaye appamāṇaṁ;
ja522:36.3	Sabbesu bhūtesu nidhāya daṇḍaṁ,
ja522:36.4	Anindito brahmamupeti ṭhānaṁ”.
ja522:37.1	“Mahatthiyaṁ āgamanaṁ ahosi,
ja522:37.2	Tavamaṭṭhakā bhīmarathassa cāpi;
ja522:37.3	Kāliṅgarājassa ca uggatassa,
ja522:37.4	Sabbesa vo kāmarāgo pahīno”.
ja522:38.1	“Evametaṁ paracittavedi,
ja522:38.2	Sabbesa no kāmarāgo pahīno;
ja522:38.3	Karohi okāsamanuggahāya,
ja522:38.4	Yathā gatiṁ te abhisambhavema”.
ja522:39.1	“Karomi okāsamanuggahāya,
ja522:39.2	Tathā hi vo kāmarāgo pahīno;
ja522:39.3	Pharātha kāyaṁ vipulāya pītiyā,
ja522:39.4	Yathā gatiṁ me abhisambhavetha”.
ja522:40.1	“Sabbaṁ karissāma tavānusāsaniṁ,
ja522:40.2	Yaṁ yaṁ tuvaṁ vakkhasi bhūripañña;
ja522:40.3	Pharāma kāyaṁ vipulāya pītiyā,
ja522:40.4	Yathā gatiṁ te abhisambhavema”.
ja522:41.1	“Katāya vacchassa kisassa pūjā,
ja522:41.2	Gacchantu bhonto isayo sādhurūpā;
ja522:41.3	Jhāne ratā hotha sadā samāhitā,
ja522:41.4	Esā ratī pabbajitassa seṭṭhā”.
ja522:42.1	Sutvāna gāthā paramatthasaṁhitā,
ja522:42.2	Subhāsitā isinā paṇḍitena;
ja522:42.3	Te vedajātā anumodamānā,
ja522:42.4	Pakkāmu devā devapuraṁ yasassino.
ja522:43.1	Gāthā imā atthavatī subyañjanā,
ja522:43.2	Subhāsitā isinā paṇḍitena;
ja522:43.3	Yo kocimā aṭṭhikatvā suṇeyya,
ja522:43.4	Labhetha pubbāpariyaṁ visesaṁ;
ja522:43.5	Laddhāna pubbāpariyaṁ visesaṁ,
ja522:43.6	Adassanaṁ maccurājassa gacche.
ja522:44.1	“Sālissaro sāriputto,
ja522:44.2	meṇḍissaro ca kassapo;
ja522:44.3	Pabbato anuruddho ca,
ja522:44.4	kaccāyano ca devalo.
ja522:45.1	Anusisso ca ānando,
ja522:45.2	kisavaccho ca kolito;
ja522:45.3	Nārado udāyitthero,
ja522:45.4	parisā buddhaparisā;
ja522:45.5	Sarabhaṅgo lokanātho,
ja522:45.6	evaṁ dhāretha jātakan”ti.
ja522:46.1	Sarabhaṅgajātakaṁ dutiyaṁ.
ja523:0.1	Jātaka
ja523:0.2	Cattālīsanipāta
ja523:0.3	Tesakuṇavagga
ja523:0.4	3. Alambusājātaka
ja523:1.1	Atha bravi brahā indo,
ja523:1.2	vatrabhū jayataṁ pitā;
ja523:1.3	Devakaññaṁ parābhetvā,
ja523:1.4	sudhammāyaṁ alambusaṁ.
ja523:2.1	“Misse devā taṁ yācanti,
ja523:2.2	tāvatiṁsā saindakā;
ja523:2.3	Isippalobhane gaccha,
ja523:2.4	isisiṅgaṁ alambuse.
ja523:3.1	Purāyaṁ amhe acceti,
ja523:3.2	vattavā brahmacariyavā;
ja523:3.3	Nibbānābhirato vuddho,
ja523:3.4	tassa maggāni āvara”.
ja523:4.1	“Devarāja kimeva tvaṁ,
ja523:4.2	mameva tuvaṁ sikkhasi;
ja523:4.3	Isippalobhane gaccha,
ja523:4.4	santi aññāpi accharā.
ja523:5.1	Mādisiyo pavarā ceva,
ja523:5.2	asoke nandane vane;
ja523:5.3	Tāsampi hotu pariyāyo,
ja523:5.4	tāpi yantu palobhanā”.
ja523:6.1	“Addhā hi saccaṁ bhaṇasi,
ja523:6.2	santi aññāpi accharā;
ja523:6.3	Tādisiyo pavarā ceva,
ja523:6.4	asoke nandane vane.
ja523:7.1	Na tā evaṁ pajānanti,
ja523:7.2	pāricariyaṁ pumaṁ gatā;
ja523:7.3	Yādisaṁ tvaṁ pajānāsi,
ja523:7.4	nāri sabbaṅgasobhane.
ja523:8.1	Tvameva gaccha kalyāṇi,
ja523:8.2	itthīnaṁ pavarā casi;
ja523:8.3	Taveva vaṇṇarūpena,
ja523:8.4	savasamānayissasi”.
ja523:9.1	“Na vāhaṁ na gamissāmi,
ja523:9.2	devarājena pesitā;
ja523:9.3	Vibhemi cetaṁ āsāduṁ,
ja523:9.4	uggatejo hi brāhmaṇo.
ja523:10.1	Aneke nirayaṁ pattā,
ja523:10.2	isimāsādiyā janā;
ja523:10.3	Āpannā mohasaṁsāraṁ,
ja523:10.4	tasmā lomāni haṁsaye”.
ja523:11.1	Idaṁ vatvāna pakkāmi,
ja523:11.2	accharā kāmavaṇṇinī;
ja523:11.3	Missā missitumicchantī,
ja523:11.4	isisiṅgaṁ alambusā.
ja523:12.1	Sā ca taṁ vanamogayha,
ja523:12.2	isisiṅgena rakkhitaṁ;
ja523:12.3	Bimbajālakasañchannaṁ,
ja523:12.4	samantā addhayojanaṁ.
ja523:13.1	Pātova pātarāsamhi,
ja523:13.2	udaṇhasamayaṁ pati;
ja523:13.3	Aggiṭṭhaṁ parimajjantaṁ,
ja523:13.4	isisiṅgaṁ upāgami.
ja523:14.1	“Kā nu vijjurivābhāsi,
ja523:14.2	osadhī viya tārakā;
ja523:14.3	Vicittahatthābharaṇā,
ja523:14.4	āmuttamaṇikuṇḍalā.
ja523:15.1	Ādiccavaṇṇasaṅkāsā,
ja523:15.2	hemacandanagandhinī;
ja523:15.3	Saññatūrū mahāmāyā,
ja523:15.4	kumārī cārudassanā.
ja523:16.1	Vilaggā mudukā suddhā,
ja523:16.2	pādā te suppatiṭṭhitā;
ja523:16.3	Gamanā kāmanīyā te,
ja523:16.4	harantiyeva me mano.
ja523:17.1	Anupubbāva te ūrū,
ja523:17.2	nāganāsasamūpamā;
ja523:17.3	Vimaṭṭhā tuyhaṁ sussoṇī,
ja523:17.4	akkhassa phalakaṁ yathā.
ja523:18.1	Uppalasseva kiñjakkhā,
ja523:18.2	nābhi te sādhu saṇṭhitā;
ja523:18.3	Pūrā kaṇhañjanasseva,
ja523:18.4	dūrato paṭidissati.
ja523:19.1	Duvidhā jātā urajā,
ja523:19.2	avaṇṭā sādhupaccudā;
ja523:19.3	Payodharā apatitā,
ja523:19.4	aḍḍhalābusamā thanā.
ja523:20.1	Dīghā kambutalābhāsā,
ja523:20.2	gīvā eṇeyyakā yathā;
ja523:20.3	Paṇḍarāvaraṇā vaggu,
ja523:20.4	catutthamanasannibhā.
ja523:21.1	Uddhaggā ca adhaggā ca,
ja523:21.2	dumaggaparimajjitā;
ja523:21.3	Duvijā nelasambhūtā,
ja523:21.4	dantā tava sudassanā.
ja523:22.1	Apaṇḍarā lohitantā,
ja523:22.2	jiñjūkaphalasannibhā;
ja523:22.3	Āyatā ca visālā ca,
ja523:22.4	nettā tava sudassanā.
ja523:23.1	Nātidīghā susammaṭṭhā,
ja523:23.2	kanakabyā samocitā;
ja523:23.3	Uttamaṅgaruhā tuyhaṁ,
ja523:23.4	kesā candanagandhikā.
ja523:24.1	Yāvatā kasigorakkhā,
ja523:24.2	vāṇijānaṁ ca yā gati;
ja523:24.3	Isīnañca parakkantaṁ,
ja523:24.4	saññatānaṁ tapassinaṁ.
ja523:25.1	Na te samasamaṁ passe,
ja523:25.2	asmiṁ pathavimaṇḍale;
ja523:25.3	Ko vā tvaṁ kassa vā putto,
ja523:25.4	kathaṁ jānemu taṁ mayaṁ”.
ja523:26.1	“Na pañhakālo bhaddante,
ja523:26.2	kassapevaṁ gate sati;
ja523:26.3	Ehi samma ramissāma,
ja523:26.4	ubho asmākamassame;
ja523:26.5	Ehi taṁ upagūhissaṁ,
ja523:26.6	ratīnaṁ kusalo bhava”.
ja523:27.1	Idaṁ vatvāna pakkāmi,
ja523:27.2	accharā kāmavaṇṇinī;
ja523:27.3	Missā missitumicchantī,
ja523:27.4	isisiṅgaṁ alambusā.
ja523:28.1	So ca vegena nikkhamma,
ja523:28.2	Chetvā dandhaparakkamaṁ;
ja523:28.3	Tamuttamāsu veṇīsu,
ja523:28.4	Ajjhappatto parāmasi.
ja523:29.1	Tamudāvatta kalyāṇī,
ja523:29.2	palissaji susobhanā;
ja523:29.3	Cavitamhi brahmacariyā,
ja523:29.4	yathā taṁ atha tositā.
ja523:30.1	Manasā agamā indaṁ,
ja523:30.2	vasantaṁ nandane vane;
ja523:30.3	Tassā saṅkappamaññāya,
ja523:30.4	maghavā devakuñjaro.
ja523:31.1	Pallaṅkaṁ pahiṇī khippaṁ,
ja523:31.2	sovaṇṇaṁ sopavāhanaṁ;
ja523:31.3	Sauttaracchadapaññāsaṁ,
ja523:31.4	sahassapaṭiyatthataṁ.
ja523:32.1	Tamenaṁ tattha dhāresi,
ja523:32.2	ure katvāna sobhanā;
ja523:32.3	Yathā ekamuhuttaṁva,
ja523:32.4	tīṇi vassāni dhārayi.
ja523:33.1	Vimado tīhi vassehi,
ja523:33.2	pabujjhitvāna brāhmaṇo;
ja523:33.3	Addasāsi haritarukkhe,
ja523:33.4	samantā aggiyāyanaṁ.
ja523:34.1	Navapattavanaṁ phullaṁ,
ja523:34.2	kokilaggaṇaghositaṁ;
ja523:34.3	Samantā paviloketvā,
ja523:34.4	rudaṁ assūni vattayi.
ja523:35.1	“Na juhe na jape mante,
ja523:35.2	aggihuttaṁ pahāpitaṁ;
ja523:35.3	Ko nu me pāricariyāya,
ja523:35.4	pubbe cittaṁ palobhayi.
ja523:36.1	Araññe me viharato,
ja523:36.2	yo me tejā ha sambhutaṁ;
ja523:36.3	Nānāratnaparipūraṁ,
ja523:36.4	nāvaṁva gaṇhi aṇṇave”.
ja523:37.1	“Ahaṁ te pāricariyāya,
ja523:37.2	devarājena pesitā;
ja523:37.3	Avadhiṁ cittaṁ cittena,
ja523:37.4	pamādo tvaṁ na bujjhasi”.
ja523:38.1	“Imāni kira maṁ tāto,
ja523:38.2	kassapo anusāsati;
ja523:38.3	Kamalāsadisitthiyo,
ja523:38.4	tāyo bujjhesi māṇava.
ja523:39.1	Uregaṇḍāyo bujjhesi,
ja523:39.2	tāyo bujjhesi māṇava;
ja523:39.3	Iccānusāsi maṁ tāto,
ja523:39.4	yathā maṁ anukampako.
ja523:40.1	Tassāhaṁ vacanaṁ nākaṁ,
ja523:40.2	pitu vuddhassa sāsanaṁ;
ja523:40.3	Araññe nimmanussamhi,
ja523:40.4	svajja jhāyāmi ekako.
ja523:41.1	Sohaṁ tathā karissāmi,
ja523:41.2	dhiratthu jīvitena me;
ja523:41.3	Puna vā tādiso hessaṁ,
ja523:41.4	maraṇaṁ me bhavissati”.
ja523:42.1	Tassa tejaṁ vīriyañca,
ja523:42.2	Dhitiṁ ñatvā avaṭṭhitaṁ;
ja523:42.3	Sirasā aggahī pāde,
ja523:42.4	Isisiṅgaṁ alambusā.
ja523:43.1	“Mā me kujjha mahāvīra,
ja523:43.2	mā me kujjha mahāise;
ja523:43.3	Mahā attho mayā ciṇṇo,
ja523:43.4	tidasānaṁ yasassinaṁ;
ja523:43.5	Tayā saṅkampitaṁ āsi,
ja523:43.6	sabbaṁ devapuraṁ tadā”.
ja523:44.1	“Tāvatiṁsā ca ye devā,
ja523:44.2	tidasānañca vāsavo;
ja523:44.3	Tvañca bhadde sukhī hohi,
ja523:44.4	gaccha kaññe yathāsukhaṁ”.
ja523:45.1	Tassa pāde gahetvāna,
ja523:45.2	katvā ca naṁ padakkhiṇaṁ;
ja523:45.3	Añjaliṁ paggahetvāna,
ja523:45.4	tamhā ṭhānā apakkami.
ja523:46.1	Yo ca tassāsi pallaṅko,
ja523:46.2	sovaṇṇo sopavāhano;
ja523:46.3	Sauttaracchadapaññāso,
ja523:46.4	sahassapaṭiyatthato;
ja523:46.5	Tameva pallaṅkamāruyha,
ja523:46.6	agā devāna santike.
ja523:47.1	Tamokkamiva āyantiṁ,
ja523:47.2	jalantiṁ vijjutaṁ yathā;
ja523:47.3	Patīto sumano vitto,
ja523:47.4	devindo adadā varaṁ.
ja523:48.1	“Varañce me ado sakka,
ja523:48.2	sabbabhūtānamissara;
ja523:48.3	Nisippalobhikā gacche,
ja523:48.4	etaṁ sakka varaṁ vare”ti.
ja523:49.1	Alambusājātakaṁ tatiyaṁ.
ja524:0.1	Jātaka
ja524:0.2	Cattālīsanipāta
ja524:0.3	Tesakuṇavagga
ja524:0.4	4. Saṅkhapālajātaka
ja524:1.1	“Ariyāvakāsosi pasannanetto,
ja524:1.2	Maññe bhavaṁ pabbajito kulamhā;
ja524:1.3	Kathaṁ nu vittāni pahāya bhoge,
ja524:1.4	Pabbaji nikkhamma gharā sapañña”.
ja524:2.1	“Sayaṁ vimānaṁ naradeva disvā,
ja524:2.2	Mahānubhāvassa mahoragassa;
ja524:2.3	Disvāna puññāna mahāvipākaṁ,
ja524:2.4	Saddhāyahaṁ pabbajitomhi rāja”.
ja524:3.1	“Na kāmakāmā na bhayā na dosā,
ja524:3.2	Vācaṁ musā pabbajitā bhaṇanti;
ja524:3.3	Akkhāhi me pucchito etamatthaṁ,
ja524:3.4	Sutvāna me jāyihitippasādo”.
ja524:4.1	“Vāṇijja raṭṭhādhipa gacchamāno,
ja524:4.2	Pathe addasāsimhi bhojaputte;
ja524:4.3	Pavaddhakāyaṁ uragaṁ mahantaṁ,
ja524:4.4	Ādāya gacchante pamodamāne.
ja524:5.1	Sohaṁ samāgamma janinda tehi,
ja524:5.2	Pahaṭṭhalomo avacamhi bhīto;
ja524:5.3	‘Kuhiṁ ayaṁ nīyati bhīmakāyo,
ja524:5.4	Nāgena kiṁ kāhatha bhojaputtā’.
ja524:6.1	‘Nāgo ayaṁ nīyati bhojanatthā,
ja524:6.2	Pavaddhakāyo urago mahanto;
ja524:6.3	Sāduñca thūlañca muduñca maṁsaṁ,
ja524:6.4	Na tvaṁ rasaññāsi videhaputta.
ja524:7.1	Ito mayaṁ gantvā sakaṁ niketaṁ,
ja524:7.2	Ādāya satthāni vikopayitvā;
ja524:7.3	Maṁsāni bhokkhāma pamodamānā,
ja524:7.4	Mayañhi ve sattavo pannagānaṁ’.
ja524:8.1	‘Sace ayaṁ nīyati bhojanatthā,
ja524:8.2	Pavaddhakāyo urago mahanto;
ja524:8.3	Dadāmi vo balibaddāni soḷasa,
ja524:8.4	Nāgaṁ imaṁ muñcatha bandhanasmā’.
ja524:9.1	‘Addhā hi no bhakkho ayaṁ manāpo,
ja524:9.2	Bahū ca no uragā bhuttapubbā;
ja524:9.3	Karoma te taṁ vacanaṁ aḷāra,
ja524:9.4	Mittañca no hohi videhaputta’.
ja524:10.1	Tadāssu te bandhanā mocayiṁsu,
ja524:10.2	Yaṁ natthuto paṭimokkassa pāse;
ja524:10.3	Mutto ca so bandhanā nāgarājā,
ja524:10.4	Pakkāmi pācīnamukho muhuttaṁ.
ja524:11.1	Gantvāna pācīnamukho muhuttaṁ,
ja524:11.2	Puṇṇehi nettehi palokayī maṁ;
ja524:11.3	Tadāssahaṁ piṭṭhito anvagacchiṁ,
ja524:11.4	Dasaṅguliṁ añjaliṁ paggahetvā.
ja524:12.1	‘Gaccheva kho tvaṁ taramānarūpo,
ja524:12.2	Mā taṁ amittā punaraggahesuṁ;
ja524:12.3	Dukkho hi luddehi punā samāgamo,
ja524:12.4	Adassanaṁ bhojaputtāna gaccha’.
ja524:13.1	Agamāsi so rahadaṁ vippasannaṁ,
ja524:13.2	Nīlobhāsaṁ ramaṇīyaṁ sutitthaṁ;
ja524:13.3	Samotataṁ jambuhi vetasāhi,
ja524:13.4	Pāvekkhi nittiṇṇabhayo patīto.
ja524:14.1	So taṁ pavissa na cirassa nāgo,
ja524:14.2	Dibbena me pāturahuṁ janinda;
ja524:14.3	Upaṭṭhahī maṁ pitaraṁva putto,
ja524:14.4	Hadayaṅgamaṁ kaṇṇasukhaṁ bhaṇanto.
ja524:15.1	‘Tvaṁ mesi mātā ca pitā aḷāra,
ja524:15.2	Abbhantaro pāṇadado sahāyo;
ja524:15.3	Sakañca iddhiṁ paṭilābhakosmi,
ja524:15.4	Aḷāra passa me nivesanāni;
ja524:15.5	Pahūtabhakkhaṁ bahuannapānaṁ,
ja524:15.6	Masakkasāraṁ viya vāsavassa.
ja524:16.1	Taṁ bhūmibhāgehi upetarūpaṁ,
ja524:16.2	Asakkharā ceva mudū subhā ca;
ja524:16.3	Nīcattiṇā apparajā ca bhūmi,
ja524:16.4	Pāsādikā yattha jahanti sokaṁ.
ja524:17.1	Anāvakulā veḷuriyūpanīlā,
ja524:17.2	Catuddisaṁ ambavanaṁ surammaṁ;
ja524:17.3	Pakkā ca pesī ca phalā suphullā,
ja524:17.4	Niccotukā dhārayantī phalāni’.
ja524:18.1	Tesaṁ vanānaṁ naradeva majjhe,
ja524:18.2	Nivesanaṁ bhassarasannikāsaṁ;
ja524:18.3	Rajataggaḷaṁ sovaṇṇamayaṁ uḷāraṁ,
ja524:18.4	Obhāsatī vijjurivantalikkhe.
ja524:19.1	Maṇīmayā soṇṇamayā uḷārā,
ja524:19.2	Anekacittā satataṁ sunimmitā;
ja524:19.3	Paripūrā kaññāhi alaṅkatābhi,
ja524:19.4	Suvaṇṇakāyūradharāhi rāja.
ja524:20.1	So saṅkhapālo taramānarūpo,
ja524:20.2	Pāsādamāruyha anomavaṇṇo;
ja524:20.3	Sahassathambhaṁ atulānubhāvaṁ,
ja524:20.4	Yatthassa bhariyā mahesī ahosi.
ja524:21.1	Ekā ca nārī taramānarūpā,
ja524:21.2	Ādāya veḷuriyamayaṁ mahagghaṁ;
ja524:21.3	Subhaṁ maṇiṁ jātimantūpapannaṁ,
ja524:21.4	Acoditā āsanamabbhihāsi.
ja524:22.1	Tato maṁ urago hatthe gahetvā,
ja524:22.2	Nisīdayī pāmukhaāsanasmiṁ;
ja524:22.3	‘Idamāsanaṁ atra bhavaṁ nisīdatu,
ja524:22.4	Bhavañhi me aññataro garūnaṁ’.
ja524:23.1	Aññā ca nārī taramānarūpā,
ja524:23.2	Ādāya vāriṁ upasaṅkamitvā;
ja524:23.3	Pādāni pakkhālayī me janinda,
ja524:23.4	Bhariyāva bhattū patino piyassa.
ja524:24.1	Aparā ca nārī taramānarūpā,
ja524:24.2	Paggayha sovaṇṇamayāya pātiyā;
ja524:24.3	Anekasūpaṁ vividhaṁ viyañjanaṁ,
ja524:24.4	Upanāmayī bhatta manuññarūpaṁ.
ja524:25.1	Turiyehi maṁ bhārata bhuttavantaṁ,
ja524:25.2	Upaṭṭhahuṁ bhattu mano viditvā;
ja524:25.3	Tatuttariṁ maṁ nipatī mahantaṁ,
ja524:25.4	Dibbehi kāmehi anappakehi.
ja524:26.1	‘Bhariyā mametā tisatā aḷāra,
ja524:26.2	Sabbattamajjhā padumuttarābhā;
ja524:26.3	Aḷāra etāssu te kāmakārā,
ja524:26.4	Dadāmi te tā paricārayassu’.
ja524:27.1	Saṁvaccharaṁ dibbarasānubhutvā,
ja524:27.2	Tadāssuhaṁ uttarimajjhabhāsiṁ;
ja524:27.3	‘Nāgassidaṁ kinti kathañca laddhaṁ,
ja524:27.4	Kathajjhagamāsi vimānaseṭṭhaṁ.
ja524:28.1	Adhiccaladdhaṁ pariṇāmajaṁ te,
ja524:28.2	Sayaṅkataṁ udāhu devehi dinnaṁ;
ja524:28.3	Pucchāmi taṁ nāgarājetamatthaṁ,
ja524:28.4	Kathajjhagamāsi vimānaseṭṭhaṁ’.
ja524:29.1	‘Nādhiccaladdhaṁ na pariṇāmajaṁ me,
ja524:29.2	Na sayaṅkataṁ nāpi devehi dinnaṁ;
ja524:29.3	Sakehi kammehi apāpakehi,
ja524:29.4	Puññehi me laddhamidaṁ vimānaṁ’.
ja524:30.1	‘Kiṁ te vataṁ kiṁ pana brahmacariyaṁ,
ja524:30.2	Kissa suciṇṇassa ayaṁ vipāko;
ja524:30.3	Akkhāhi me nāgarājetamatthaṁ,
ja524:30.4	Kathaṁ nu te laddhamidaṁ vimānaṁ’.
ja524:31.1	‘Rājā ahosiṁ magadhānamissaro,
ja524:31.2	Duyyodhano nāma mahānubhāvo;
ja524:31.3	So ittaraṁ jīvitaṁ saṁviditvā,
ja524:31.4	Asassataṁ vipariṇāmadhammaṁ.
ja524:32.1	Annañca pānañca pasannacitto,
ja524:32.2	Sakkacca dānaṁ vipulaṁ adāsiṁ;
ja524:32.3	Opānabhūtaṁ me gharaṁ tadāsi,
ja524:32.4	Santappitā samaṇabrāhmaṇā ca.
ja524:33.1	Mālañca gandhañca vilepanañca,
ja524:33.2	Padīpiyaṁ yānamupassayañca;
ja524:33.3	Acchādanaṁ seyyamathannapānaṁ,
ja524:33.4	Sakkacca dānāni adamha tattha.
ja524:34.1	Taṁ me vataṁ taṁ pana brahmacariyaṁ,
ja524:34.2	Tassa suciṇṇassa ayaṁ vipāko;
ja524:34.3	Teneva me laddhamidaṁ vimānaṁ,
ja524:34.4	Pahūtabhakkhaṁ bahuannapānaṁ;
ja524:34.5	Naccehi gītehi cupetarūpaṁ,
ja524:34.6	Ciraṭṭhitikaṁ na ca sassatāyaṁ’.
ja524:35.1	‘Appānubhāvā taṁ mahānubhāvaṁ,
ja524:35.2	Tejassinaṁ hanti atejavanto;
ja524:35.3	Kimeva dāṭhāvudha kiṁ paṭicca,
ja524:35.4	Hatthattamāgacchi vanibbakānaṁ.
ja524:36.1	Bhayaṁ nu te anvagataṁ mahantaṁ,
ja524:36.2	Tejo nu te nānvagaṁ dantamūlaṁ;
ja524:36.3	Kimeva dāṭhāvudha kiṁ paṭicca,
ja524:36.4	Kilesamāpajji vanibbakānaṁ’.
ja524:37.1	‘Na me bhayaṁ anvagataṁ mahantaṁ,
ja524:37.2	Tejo na sakkā mama tehi hantuṁ;
ja524:37.3	Satañca dhammāni sukittitāni,
ja524:37.4	Samuddavelāva duraccayāni.
ja524:38.1	Cātuddasiṁ pañcadasiṁ aḷāra,
ja524:38.2	Uposathaṁ niccamupāvasāmi;
ja524:38.3	Athāgamuṁ soḷasa bhojaputtā,
ja524:38.4	Rajjuṁ gahetvāna daḷhañca pāsaṁ.
ja524:39.1	Bhetvāna nāsaṁ atikassa rajjuṁ,
ja524:39.2	Nayiṁsu maṁ samparigayha luddā;
ja524:39.3	Etādisaṁ dukkhamahaṁ titikkhaṁ,
ja524:39.4	Uposathaṁ appaṭikopayanto’.
ja524:40.1	‘Ekāyane taṁ pathe addasaṁsu,
ja524:40.2	Balena vaṇṇena cupetarūpaṁ;
ja524:40.3	Siriyā paññāya ca bhāvitosi,
ja524:40.4	Kiṁ patthayaṁ nāga tapo karosi’.
ja524:41.1	‘Na puttahetū na dhanassa hetu,
ja524:41.2	Na āyuno cāpi aḷāra hetu;
ja524:41.3	Manussayoniṁ abhipatthayāno,
ja524:41.4	Tasmā parakkamma tapo karomi’.
ja524:42.1	‘Tvaṁ lohitakkho vihatantaraṁso,
ja524:42.2	Alaṅkato kappitakesamassu;
ja524:42.3	Surosito lohitacandanena,
ja524:42.4	Gandhabbarājāva disā pabhāsasi.
ja524:43.1	Deviddhipattosi mahānubhāvo,
ja524:43.2	Sabbehi kāmehi samaṅgibhūto;
ja524:43.3	Pucchāmi taṁ nāgarājetamatthaṁ,
ja524:43.4	Seyyo ito kena manussaloko’.
ja524:44.1	‘Aḷāra nāññatra manussalokā,
ja524:44.2	Suddhī va saṁvijjati saṁyamo vā;
ja524:44.3	Ahañca laddhāna manussayoniṁ,
ja524:44.4	Kāhāmi jātimaraṇassa antaṁ’.
ja524:45.1	‘Saṁvaccharo me vasato tavantike,
ja524:45.2	Annena pānena upaṭṭhitosmi;
ja524:45.3	Āmantayitvāna palemi nāga,
ja524:45.4	Cirappavutthosmi ahaṁ janinda’.
ja524:46.1	‘Puttā ca dārā anujīvino ca,
ja524:46.2	Niccānusiṭṭhā upatiṭṭhathetaṁ;
ja524:46.3	Kaccinnu taṁ nābhisapittha koci,
ja524:46.4	Piyañhi me dassanaṁ tuyhaṁ aḷāra’.
ja524:47.1	‘Yathāpi mātū ca pitū agāre,
ja524:47.2	Putto piyo paṭivihito vaseyya;
ja524:47.3	Tatopi mayhaṁ idhameva seyyo,
ja524:47.4	Cittañhi te nāga mayī pasannaṁ’.
ja524:48.1	‘Maṇī mamaṁ vijjati lohitaṅko,
ja524:48.2	Dhanāharo maṇiratanaṁ uḷāraṁ;
ja524:48.3	Ādāya tvaṁ gaccha sakaṁ niketaṁ,
ja524:48.4	Laddhā dhanaṁ taṁ maṇimossajassu’.
ja524:49.1	Diṭṭhā mayā mānusakāpi kāmā,
ja524:49.2	Asassatā vipariṇāmadhammā;
ja524:49.3	Ādīnavaṁ kāmaguṇesu disvā,
ja524:49.4	Saddhāyahaṁ pabbajitomhi rāja.
ja524:50.1	Dumapphalānīva patanti māṇavā,
ja524:50.2	Daharā ca vuddhā ca sarīrabhedā;
ja524:50.3	Etampi disvā pabbajitomhi rāja,
ja524:50.4	Apaṇṇakaṁ sāmaññameva seyyo”.
ja524:51.1	“Addhā have sevitabbā sapaññā,
ja524:51.2	Bahussutā ye bahuṭhānacintino;
ja524:51.3	Nāgañca sutvāna tavañcaḷāra,
ja524:51.4	Kāhāmi puññāni anappakāni”.
ja524:52.1	“Addhā have sevitabbā sapaññā,
ja524:52.2	Bahussutā ye bahuṭhānacintino;
ja524:52.3	Nāgañca sutvāna mamañca rāja,
ja524:52.4	Karohi puññāni anappakānī”ti.
ja524:53.1	Saṅkhapālajātakaṁ catutthaṁ.
ja525:0.1	Jātaka
ja525:0.2	Cattālīsanipāta
ja525:0.3	Tesakuṇavagga
ja525:0.4	5 Cūḷasutasomajātaka
ja525:1.1	“Āmantayāmi nigamaṁ,
ja525:1.2	mittāmacce parissaje;
ja525:1.3	Sirasmiṁ palitaṁ jātaṁ,
ja525:1.4	pabbajjaṁ dāni rocahaṁ”.
ja525:2.1	“Abhumme kathaṁ nu bhaṇasi,
ja525:2.2	Sallaṁ me deva urasi kappesi;
ja525:2.3	Sattasatā te bhariyā,
ja525:2.4	Kathaṁ nu te tā bhavissanti”.
ja525:3.1	“Paññāyihinti etā,
ja525:3.2	Daharā aññampi tā gamissanti;
ja525:3.3	Saggañcassa patthayāno,
ja525:3.4	Tena ahaṁ pabbajissāmi”.
ja525:4.1	“Dulladdhaṁ me āsi sutasoma,
ja525:4.2	Yassa te homahaṁ mātā;
ja525:4.3	Yaṁ me vilapantiyā,
ja525:4.4	Anapekkho pabbajasi deva.
ja525:5.1	Dulladdhaṁ me āsi sutasoma,
ja525:5.2	Yaṁ taṁ ahaṁ vijāyissaṁ;
ja525:5.3	Yaṁ me vilapantiyā,
ja525:5.4	Anapekkho pabbajasi deva”.
ja525:6.1	“Ko nāmeso dhammo,
ja525:6.2	Sutasoma kā ca nāma pabbajjā;
ja525:6.3	Yaṁ no amhe jiṇṇe,
ja525:6.4	Anapekkho pabbajasi deva.
ja525:7.1	Puttāpi tuyhaṁ bahavo,
ja525:7.2	daharā appattayobbanā;
ja525:7.3	Mañjū tepi taṁ apassantā,
ja525:7.4	maññe dukkhaṁ nigacchanti”.
ja525:8.1	“Puttehi ca me etehi,
ja525:8.2	Daharehi appattayobbanehi;
ja525:8.3	Mañjūhi sabbehipi tumhehi,
ja525:8.4	Cirampi ṭhatvā vināsabhāvo”.
ja525:9.1	“Chinnaṁ nu tuyhaṁ hadayaṁ,
ja525:9.2	Adu te karuṇā ca natthi amhesu;
ja525:9.3	Yaṁ no vikandantiyo,
ja525:9.4	Anapekkho pabbajasi deva”.
ja525:10.1	“Na ca mayhaṁ chinnaṁ hadayaṁ,
ja525:10.2	Atthi karuṇāpi mayhaṁ tumhesu;
ja525:10.3	Saggañca patthayāno,
ja525:10.4	Tena ahaṁ pabbajissāmi”.
ja525:11.1	“Dulladdhaṁ me āsi,
ja525:11.2	Sutasoma yassa te ahaṁ bhariyā;
ja525:11.3	Yaṁ me vilapantiyā,
ja525:11.4	Anapekkho pabbajasi deva.
ja525:12.1	Dulladdhaṁ me āsi,
ja525:12.2	Sutasoma yassa te ahaṁ bhariyā;
ja525:12.3	Yaṁ me kucchipaṭisandhiṁ,
ja525:12.4	Anapekkho pabbajasi deva.
ja525:13.1	Paripakko me gabbho,
ja525:13.2	Kucchigato yāva naṁ vijāyāmi;
ja525:13.3	Māhaṁ ekā vidhavā,
ja525:13.4	Pacchā dukkhāni addakkhiṁ”.
ja525:14.1	“Paripakko te gabbho,
ja525:14.2	Kucchigato iṅgha tvaṁ vijāyassu;
ja525:14.3	Puttaṁ anomavaṇṇaṁ,
ja525:14.4	Taṁ hitvā pabbajissāmi”.
ja525:15.1	“Mā tvaṁ cande rudi,
ja525:15.2	Mā soci vanatimiramattakkhi;
ja525:15.3	Āroha varapāsādaṁ,
ja525:15.4	Anapekkho ahaṁ gamissāmi”.
ja525:16.1	“Ko taṁ amma kopesi,
ja525:16.2	Kiṁ rodasi pekkhasi ca maṁ bāḷhaṁ;
ja525:16.3	Kaṁ avajjhaṁ ghātemi,
ja525:16.4	Ñātīnaṁ udikkhamānānaṁ”.
ja525:17.1	“Na hi so sakkā hantuṁ,
ja525:17.2	Vijitāvī yo maṁ tāta kopesi;
ja525:17.3	Pitā te maṁ tāta avaca,
ja525:17.4	Anapekkho ahaṁ gamissāmi”.
ja525:18.1	“Yohaṁ pubbe niyyāmi,
ja525:18.2	Uyyānaṁ mattakuñjare ca yodhemi;
ja525:18.3	Sutasome pabbajite,
ja525:18.4	Kathaṁ nu dāni karissāmi”.
ja525:19.1	“Mātucca me rudantyā,
ja525:19.2	Jeṭṭhassa ca bhātuno akāmassa;
ja525:19.3	Hatthepi te gahessaṁ,
ja525:19.4	Na hi gacchasi no akāmānaṁ”.
ja525:20.1	“Uṭṭhehi tvaṁ dhāti,
ja525:20.2	Imaṁ kumāraṁ ramehi aññattha;
ja525:20.3	Mā me paripanthamakāsi,
ja525:20.4	Saggaṁ mama patthayānassa”.
ja525:21.1	“Yaṁnūnimaṁ dadeyyaṁ pabhaṅkaraṁ,
ja525:21.2	Ko nu me imināttho;
ja525:21.3	Sutasome pabbajite,
ja525:21.4	Kiṁ nu menaṁ karissāmi”.
ja525:22.1	“Koso ca tuyhaṁ vipulo,
ja525:22.2	Koṭṭhāgārañca tuyhaṁ paripūraṁ;
ja525:22.3	Pathavī ca tuyhaṁ vijitā,
ja525:22.4	Ramassu mā pabbaji deva”.
ja525:23.1	“Koso ca mayhaṁ vipulo,
ja525:23.2	Koṭṭhāgārañca mayhaṁ paripūraṁ;
ja525:23.3	Pathavī ca mayhaṁ vijitā,
ja525:23.4	Taṁ hitvā pabbajissāmi”.
ja525:24.1	“Mayhampi dhanaṁ pahūtaṁ,
ja525:24.2	Saṅkhātuṁ nopi deva sakkomi;
ja525:24.3	Taṁ te dadāmi sabbampi,
ja525:24.4	Ramassu mā pabbaji deva”.
ja525:25.1	“Jānāmi dhanaṁ pahūtaṁ,
ja525:25.2	Kulavaddhana pūjito tayā casmi;
ja525:25.3	Saggañca patthayāno,
ja525:25.4	Tena ahaṁ pabbajissāmi.
ja525:26.1	Ukkaṇṭhitosmi bāḷhaṁ,
ja525:26.2	Arati maṁ somadatta āvisati;
ja525:26.3	Bahukāpi me antarāyā,
ja525:26.4	Ajjevāhaṁ pabbajissāmi”.
ja525:27.1	“Idañca tuyhaṁ rucitaṁ,
ja525:27.2	Sutasoma ajjeva dāni tvaṁ pabbaja;
ja525:27.3	Ahampi pabbajissāmi,
ja525:27.4	Na ussahe tayā vinā ahaṁ ṭhātuṁ”.
ja525:28.1	“Na hi sakkā pabbajituṁ,
ja525:28.2	Nagare na hi paccati janapade ca;
ja525:28.3	Sutasome pabbajite,
ja525:28.4	Kathaṁ nu dāni karissāma.
ja525:29.1	Upanīyatidaṁ maññe,
ja525:29.2	Parittaṁ udakaṁva caṅkavāramhi;
ja525:29.3	Evaṁ suparittake jīvite,
ja525:29.4	Na ca pamajjituṁ kālo.
ja525:30.1	Upanīyatidaṁ maññe,
ja525:30.2	Parittaṁ udakaṁva caṅkavāramhi;
ja525:30.3	Evaṁ suparittake jīvite,
ja525:30.4	Andhabālā pamajjanti.
ja525:31.1	Te vaḍḍhayanti nirayaṁ,
ja525:31.2	Tiracchānayoniñca pettivisayañca;
ja525:31.3	Taṇhāya bandhanabaddhā,
ja525:31.4	Vaḍḍhenti asurakāyaṁ”.
ja525:32.1	“Ūhaññate rajaggaṁ,
ja525:32.2	Avidūre pubbakamhi ca pāsāde;
ja525:32.3	Maññe no kesā chinnā,
ja525:32.4	Yasassino dhammarājassa”.
ja525:33.1	“Ayamassa pāsādo,
ja525:33.2	Sovaṇṇapupphamālyavītikiṇṇo;
ja525:33.3	Yahimanuvicari rājā,
ja525:33.4	Parikiṇṇo itthāgārehi.
ja525:34.1	Ayamassa pāsādo,
ja525:34.2	Sovaṇṇapupphamālyavītikiṇṇo;
ja525:34.3	Yahimanuvicari rājā,
ja525:34.4	Parikiṇṇo ñātisaṅghena.
ja525:35.1	Idamassa kūṭāgāraṁ,
ja525:35.2	Sovaṇṇapupphamālyavītikiṇṇaṁ;
ja525:35.3	Yahimanuvicari rājā,
ja525:35.4	Parikiṇṇo itthāgārehi.
ja525:36.1	Idamassa kūṭāgāraṁ,
ja525:36.2	Sovaṇṇapupphamālyavītikiṇṇaṁ;
ja525:36.3	Yahimanuvicari rājā,
ja525:36.4	Parikiṇṇo ñātisaṅghena.
ja525:37.1	Ayamassa asokavanikā,
ja525:37.2	Supupphitā sabbakālikā rammā;
ja525:37.3	Yahimanuvicari rājā,
ja525:37.4	Parikiṇṇo itthāgārehi.
ja525:38.1	Ayamassa asokavanikā,
ja525:38.2	Supupphitā sabbakālikā rammā;
ja525:38.3	Yahimanuvicari rājā,
ja525:38.4	Parikiṇṇo ñātisaṅghena.
ja525:39.1	Idamassa uyyānaṁ,
ja525:39.2	Supupphitaṁ sabbakālikaṁ rammaṁ;
ja525:39.3	Yahimanuvicari rājā,
ja525:39.4	Parikiṇṇo itthāgārehi.
ja525:40.1	Idamassa uyyānaṁ,
ja525:40.2	Supupphitaṁ sabbakālikaṁ rammaṁ;
ja525:40.3	Yahimanuvicari rājā,
ja525:40.4	Parikiṇṇo ñātisaṅghena.
ja525:41.1	Idamassa kaṇikāravanaṁ,
ja525:41.2	Supupphitaṁ sabbakālikaṁ rammaṁ;
ja525:41.3	Yahimanuvicari rājā,
ja525:41.4	Parikiṇṇo itthāgārehi.
ja525:42.1	Idamassa kaṇikāravanaṁ,
ja525:42.2	Supupphitaṁ sabbakālikaṁ rammaṁ;
ja525:42.3	Yahimanuvicari rājā,
ja525:42.4	Parikiṇṇo ñātisaṅghena.
ja525:43.1	Idamassa pāṭalivanaṁ,
ja525:43.2	Supupphitaṁ sabbakālikaṁ rammaṁ;
ja525:43.3	Yahimanuvicari rājā,
ja525:43.4	Parikiṇṇo itthāgārehi.
ja525:44.1	Idamassa pāṭalivanaṁ,
ja525:44.2	Supupphitaṁ sabbakālikaṁ rammaṁ;
ja525:44.3	Yahimanuvicari rājā,
ja525:44.4	Parikiṇṇo ñātisaṅghena.
ja525:45.1	Idamassa ambavanaṁ,
ja525:45.2	Supupphitaṁ sabbakālikaṁ rammaṁ;
ja525:45.3	Yahimanuvicari rājā,
ja525:45.4	Parikiṇṇo itthāgārehi.
ja525:46.1	Idamassa ambavanaṁ,
ja525:46.2	Supupphitaṁ sabbakālikaṁ rammaṁ;
ja525:46.3	Yahimanuvicari rājā,
ja525:46.4	Parikiṇṇo ñātisaṅghena.
ja525:47.1	Ayamassa pokkharaṇī,
ja525:47.2	Sañchannā aṇḍajehi vītikiṇṇā;
ja525:47.3	Yahimanuvicari rājā,
ja525:47.4	Parikiṇṇo itthāgārehi.
ja525:48.1	Ayamassa pokkharaṇī,
ja525:48.2	Sañchannā aṇḍajehi vītikiṇṇā;
ja525:48.3	Yahimanuvicari rājā,
ja525:48.4	Parikiṇṇo ñātisaṅghena.
ja525:49.1	Rājā vo kho pabbajito,
ja525:49.2	Sutasomo rajjaṁ imaṁ pahatvāna;
ja525:49.3	Kāsāyavatthavasano,
ja525:49.4	Nāgova ekako carati”.
ja525:50.1	“Māssu pubbe ratikīḷitāni,
ja525:50.2	Hasitāni ca anussarittha;
ja525:50.3	Mā vo kāmā haniṁsu,
ja525:50.4	Rammaṁ hi sudassanaṁ nagaraṁ.
ja525:51.1	Mettacittañca bhāvetha,
ja525:51.2	Appamāṇaṁ divā ca ratto ca;
ja525:51.3	Agacchittha devapuraṁ,
ja525:51.4	Āvāsaṁ puññakamminan”ti.
ja525:52.1	Cūḷasutasomajātakaṁ pañcamaṁ.
ja525:53.1	Cattālīsanipātaṁ niṭṭhitaṁ.
ja525:54.1	Tassuddānaṁ
ja525:55.1	Suvapaṇḍitajambukakuṇḍalino,
ja525:55.2	Varakaññamalambusajātakañca;
ja525:55.3	Pavaruttamasaṅkhasirīvhayako,
ja525:55.4	Sutasomaarindhamarājavaro.
ja526:0.1	Jātaka
ja526:0.2	Paṇṇāsanipāta
ja526:0.3	Niḷinikāvagga
ja526:0.4	1 Niḷinikājātaka
ja526:1.1	“Uddayhate janapado,
ja526:1.2	raṭṭhañcāpi vinassati;
ja526:1.3	Ehi niḷinike gaccha,
ja526:1.4	taṁ me brāhmaṇamānaya”.
ja526:2.1	“Nāhaṁ dukkhakkhamā rāja,
ja526:2.2	nāhaṁ addhānakovidā;
ja526:2.3	Kathaṁ ahaṁ gamissāmi,
ja526:2.4	vanaṁ kuñjarasevitaṁ”.
ja526:3.1	“Phītaṁ janapadaṁ gantvā,
ja526:3.2	hatthinā ca rathena ca;
ja526:3.3	Dārusaṅghāṭayānena,
ja526:3.4	evaṁ gaccha niḷinike.
ja526:4.1	Hatthiassarathe pattī,
ja526:4.2	gacchevādāya khattiye;
ja526:4.3	Taveva vaṇṇarūpena,
ja526:4.4	vasaṁ tamānayissasi”.
ja526:5.1	“Kadalīdhajapaññāṇo,
ja526:5.2	ābhujīparivārito;
ja526:5.3	Eso padissati rammo,
ja526:5.4	isisiṅgassa assamo.
ja526:6.1	Eso aggissa saṅkhāto,
ja526:6.2	eso dhūmo padissati;
ja526:6.3	Maññe no aggiṁ hāpeti,
ja526:6.4	isisiṅgo mahiddhiko”.
ja526:7.1	“Tañca disvāna āyantiṁ,
ja526:7.2	āmuttamaṇikuṇḍalaṁ;
ja526:7.3	Isisiṅgo pāvisi bhīto,
ja526:7.4	assamaṁ paṇṇachādanaṁ.
ja526:8.1	Assamassa ca sā dvāre,
ja526:8.2	geṇḍukenassa kīḷati;
ja526:8.3	Vidaṁsayantī aṅgāni,
ja526:8.4	guyhaṁ pakāsitāni ca.
ja526:9.1	Tañca disvāna kīḷantiṁ,
ja526:9.2	paṇṇasālagato jaṭī;
ja526:9.3	Assamā nikkhamitvāna,
ja526:9.4	idaṁ vacanamabravi.
ja526:10.1	Ambho ko nāma so rukkho,
ja526:10.2	yassa tevaṅgataṁ phalaṁ;
ja526:10.3	Dūrepi khittaṁ pacceti,
ja526:10.4	na taṁ ohāya gacchati”.
ja526:11.1	“Assamassa mama brahme,
ja526:11.2	samīpe gandhamādane;
ja526:11.3	Bahavo tādisā rukkhā,
ja526:11.4	yassa tevaṅgataṁ phalaṁ;
ja526:11.5	Dūrepi khittaṁ pacceti,
ja526:11.6	na maṁ ohāya gacchati”.
ja526:12.1	“Etū bhavaṁ assamimaṁ adetu,
ja526:12.2	Pajjañca bhakkhañca paṭiccha dammi;
ja526:12.3	Idamāsanaṁ atra bhavaṁ nisīdatu,
ja526:12.4	Ito bhavaṁ mūlaphalāni bhuñjatu.
ja526:13.1	Kiṁ te idaṁ ūrūnamantarasmiṁ,
ja526:13.2	Supicchitaṁ kaṇharivappakāsati;
ja526:13.3	Akkhāhi me pucchito etamatthaṁ,
ja526:13.4	Kose nu te uttamaṅgaṁ paviṭṭhaṁ”.
ja526:14.1	“Ahaṁ vane mūlaphalesanaṁ caraṁ,
ja526:14.2	Āsādayiṁ acchaṁ sughorarūpaṁ;
ja526:14.3	So maṁ patitvā sahasājjhapatto,
ja526:14.4	Panujja maṁ abbahi uttamaṅgaṁ.
ja526:15.1	Svāyaṁ vaṇo khajjati kaṇḍuvāyati,
ja526:15.2	Sabbañca kālaṁ na labhāmi sātaṁ;
ja526:15.3	Paho bhavaṁ kaṇḍumimaṁ vinetuṁ,
ja526:15.4	Kurutaṁ bhavaṁ yācito brāhmaṇatthaṁ”.
ja526:16.1	“Gambhīrarūpo te vaṇo salohito,
ja526:16.2	Apūtiko vaṇagandho mahā ca;
ja526:16.3	Karomi te kiñci kasāyayogaṁ,
ja526:16.4	Yathā bhavaṁ paramasukhī bhaveyya”.
ja526:17.1	“Na mantayogā na kasāyayogā,
ja526:17.2	Na osadhā brahmacāri kamanti;
ja526:17.3	Yaṁ te mudu tena vinehi kaṇḍuṁ,
ja526:17.4	Yathā ahaṁ paramasukhī bhaveyyaṁ”.
ja526:18.1	“Ito nu bhoto katamena assamo,
ja526:18.2	Kacci bhavaṁ abhiramasi araññe;
ja526:18.3	Kacci nu te mūlaphalaṁ pahūtaṁ,
ja526:18.4	Kacci bhavantaṁ na vihiṁsanti vāḷā”.
ja526:19.1	“Ito ujuṁ uttarāyaṁ disāyaṁ,
ja526:19.2	Khemānadī himavatā pabhāvī;
ja526:19.3	Tassā tīre assamo mayha rammo,
ja526:19.4	Aho bhavaṁ assamaṁ mayhaṁ passe.
ja526:20.1	Ambā ca sālā tilakā ca jambuyo,
ja526:20.2	Uddālakā pāṭaliyo ca phullā;
ja526:20.3	Samantato kimpurisābhigītaṁ,
ja526:20.4	Aho bhavaṁ assamaṁ mayhaṁ passe.
ja526:21.1	Tālā ca mūlā ca phalā ca mettha,
ja526:21.2	Vaṇṇena gandhena upetarūpaṁ;
ja526:21.3	Taṁ bhūmibhāgehi upetarūpaṁ,
ja526:21.4	Aho bhavaṁ assamaṁ mayhaṁ passe.
ja526:22.1	Phalā ca mūlā ca pahūtamettha,
ja526:22.2	Vaṇṇena gandhena rasenupetā;
ja526:22.3	Āyanti ca luddakā taṁ padesaṁ,
ja526:22.4	Mā me tato mūlaphalaṁ ahāsuṁ”.
ja526:23.1	“Pitā mamaṁ mūlaphalesanaṁ gato,
ja526:23.2	Idāni āgacchati sāyakāle;
ja526:23.3	Ubhova gacchāmase assamaṁ taṁ,
ja526:23.4	Yāva pitā mūlaphalato etu”.
ja526:24.1	“Aññe bahū isayo sādhurūpā,
ja526:24.2	Rājīsayo anumagge vasanti;
ja526:24.3	Teyeva pucchesi mamassamaṁ taṁ,
ja526:24.4	Te taṁ nayissanti mamaṁ sakāse”.
ja526:25.1	“Na te kaṭṭhāni bhinnāni,
ja526:25.2	na te udakamābhataṁ;
ja526:25.3	Aggīpi te na hāpito,
ja526:25.4	kiṁ nu mandova jhāyasi.
ja526:26.1	Bhinnāni kaṭṭhāni huto ca aggi,
ja526:26.2	Tapanīpi te samitā brahmacārī;
ja526:26.3	Pīṭhañca mayhaṁ udakañca hoti,
ja526:26.4	Ramasi tuvaṁ brahmabhūto puratthā.
ja526:27.1	Abhinnakaṭṭhosi anābhatodako,
ja526:27.2	Ahāpitaggīsi asiddhabhojano;
ja526:27.3	Na me tuvaṁ ālapasī mamajja,
ja526:27.4	Naṭṭhaṁ nu kiṁ cetasikañca dukkhaṁ”.
ja526:28.1	“Idhāgamā jaṭilo brahmacārī,
ja526:28.2	Sudassaneyyo sutanū vineti;
ja526:28.3	Nevātidīgho na panātirasso,
ja526:28.4	Sukaṇhakaṇhacchadanehi bhoto.
ja526:29.1	Amassujāto apurāṇavaṇṇī,
ja526:29.2	Ādhārarūpañca panassa kaṇṭhe;
ja526:29.3	Dve yamā gaṇḍā ure sujātā,
ja526:29.4	Suvaṇṇatindukanibhā pabhassarā.
ja526:30.1	Mukhañca tassa bhusadassaneyyaṁ,
ja526:30.2	Kaṇṇesu lambanti ca kuñcitaggā;
ja526:30.3	Te jotare carato māṇavassa,
ja526:30.4	Suttañca yaṁ saṁyamanaṁ jaṭānaṁ.
ja526:31.1	Aññā ca tassa saṁyamāni catasso,
ja526:31.2	Nīlā pītā lohitikā ca setā;
ja526:31.3	Tā piṁsare carato māṇavassa,
ja526:31.4	Tiriṭisaṅghāriva pāvusamhi.
ja526:32.1	Na mikhalaṁ muñjamayaṁ dhāreti,
ja526:32.2	Na santhare no pana pabbajassa;
ja526:32.3	Tā jotare jaghanantare vilaggā,
ja526:32.4	Sateratā vijjurivantalikkhe.
ja526:33.1	Akhīlakāni ca avaṇṭakāni,
ja526:33.2	Heṭṭhā nabhyā kaṭisamohitāni;
ja526:33.3	Aghaṭṭitā niccakīḷaṁ karonti,
ja526:33.4	Haṁ tāta kiṁrukkhaphalāni tāni.
ja526:34.1	Jaṭā ca tassa bhusadassaneyyā,
ja526:34.2	Parosataṁ vellitaggā sugandhā;
ja526:34.3	Dvedhā siro sādhu vibhattarūpo,
ja526:34.4	Aho nu kho mayha tathā jaṭāssu.
ja526:35.1	Yadā ca so pakirati tā jaṭāyo,
ja526:35.2	Vaṇṇena gandhena upetarūpā;
ja526:35.3	Nīluppalaṁ vātasameritaṁva,
ja526:35.4	Tatheva saṁvāti panassamo ayaṁ.
ja526:36.1	Paṅko ca tassa bhusadassaneyyo,
ja526:36.2	Netādiso yādiso mayhaṁ kāye;
ja526:36.3	So vāyatī erito mālutena,
ja526:36.4	Vanaṁ yathā aggagimhe suphullaṁ.
ja526:37.1	Nihanti so rukkhaphalaṁ pathabyā,
ja526:37.2	Sucittarūpaṁ ruciraṁ dassaneyyaṁ;
ja526:37.3	Khittañca tassa punareti hatthaṁ,
ja526:37.4	Haṁ tāta kiṁrukkhaphalaṁ nu kho taṁ.
ja526:38.1	Dantā ca tassa bhusadassaneyyā,
ja526:38.2	Suddhā samā saṅkhavarūpapannā;
ja526:38.3	Mano pasādenti vivariyamānā,
ja526:38.4	Na hi nūna so sākamakhādi tehi.
ja526:39.1	Akakkasaṁ aggaḷitaṁ muhuṁ muduṁ,
ja526:39.2	Ujuṁ anuddhataṁ acapalamassa bhāsitaṁ;
ja526:39.3	Rudaṁ manuññaṁ karavīkasussaraṁ,
ja526:39.4	Hadayaṅgamaṁ rañjayateva me mano.
ja526:40.1	Bindussaro nātivisaṭṭhavākyo,
ja526:40.2	Na nūna sajjhāyamatippayutto;
ja526:40.3	Icchāmi bho taṁ punadeva daṭṭhuṁ,
ja526:40.4	Mitto hi me māṇavohu puratthā.
ja526:41.1	Susandhi sabbattha vimaṭṭhimaṁ vaṇaṁ,
ja526:41.2	Puthū sujātaṁ kharapattasannitaṁ;
ja526:41.3	Teneva maṁ uttariyāna māṇavo,
ja526:41.4	Vivaritaṁ ūruṁ jaghanena piḷayi.
ja526:42.1	Tapanti ābhanti virocare ca,
ja526:42.2	Sateratā vijjurivantalikkhe;
ja526:42.3	Bāhā mudū añjanalomasādisā,
ja526:42.4	Vicitravaṭṭaṅgulikāssa sobhare.
ja526:43.1	Akakkasaṅgo na ca dīghalomo,
ja526:43.2	Nakhāssa dīghā api lohitaggā;
ja526:43.3	Mudūhi bāhāhi palissajanto,
ja526:43.4	Kalyāṇarūpo ramayaṁ upaṭṭhahi.
ja526:44.1	Dumassa tūlūpanibhā pabhassarā,
ja526:44.2	Suvaṇṇakambutalavaṭṭasucchavi;
ja526:44.3	Hatthā mudū tehi maṁ samphusitvā,
ja526:44.4	Ito gato tena maṁ dahanti tāta.
ja526:45.1	Na nūna so khārividhaṁ ahāsi,
ja526:45.2	Na nūna so kaṭṭhāni sayaṁ abhañji;
ja526:45.3	Na nūna so hanti dume kuṭhāriyā,
ja526:45.4	Na hissa hatthesu khilāni atthi.
ja526:46.1	Accho ca kho tassa vaṇaṁ akāsi,
ja526:46.2	So maṁbravi sukhitaṁ maṁ karohi;
ja526:46.3	Tāhaṁ kariṁ tena mamāsi sokhyaṁ,
ja526:46.4	So cabravi ‘sukhitosmī’ti brahme.
ja526:47.1	Ayañca te māluvapaṇṇasanthatā,
ja526:47.2	Vikiṇṇarūpāva mayā ca tena ca;
ja526:47.3	Kilantarūpā udake ramitvā,
ja526:47.4	Punappunaṁ paṇṇakuṭiṁ vajāma.
ja526:48.1	Na majja mantā paṭibhanti tāta,
ja526:48.2	Na aggihuttaṁ napi yaññatantaṁ;
ja526:48.3	Na cāpi te mūlaphalāni bhuñje,
ja526:48.4	Yāva na passāmi taṁ brahmacāriṁ.
ja526:49.1	Addhā pajānāsi tuvampi tāta,
ja526:49.2	Yassaṁ disaṁ vasate brahmacārī;
ja526:49.3	Taṁ maṁ disaṁ pāpaya tāta khippaṁ,
ja526:49.4	Mā te ahaṁ amarimassamamhi.
ja526:50.1	Vicitraphullaṁ hi vanaṁ sutaṁ mayā,
ja526:50.2	Dijābhighuṭṭhaṁ dijasaṅghasevitaṁ;
ja526:50.3	Taṁ maṁ vanaṁ pāpaya tāta khippaṁ,
ja526:50.4	Purā te pāṇaṁ vijahāmi assame”.
ja526:51.1	“Imasmāhaṁ jotirase vanamhi,
ja526:51.2	Gandhabbadevaccharasaṅghasevite;
ja526:51.3	Isīnamāvāse sanantanamhi,
ja526:51.4	Netādisaṁ aratiṁ pāpuṇetha.
ja526:52.1	Bhavanti mittāni atho na honti,
ja526:52.2	Ñātīsu mittesu karonti pemaṁ;
ja526:52.3	Ayañca jammo kissa vā niviṭṭho,
ja526:52.4	Yo neva jānāti kutomhi āgato.
ja526:53.1	Saṁvāsena hi mittāni,
ja526:53.2	sandhīyanti punappunaṁ;
ja526:53.3	Sveva mitto asaṅgantu,
ja526:53.4	asaṁvāsena jīrati.
ja526:54.1	Sace tuvaṁ dakkhasi brahmacāriṁ,
ja526:54.2	Sace tuvaṁ sallape brahmacārinā;
ja526:54.3	Sampannasassaṁva mahodakena,
ja526:54.4	Tapoguṇaṁ khippamimaṁ pahissasi.
ja526:55.1	Punapi ce dakkhasi brahmacāriṁ,
ja526:55.2	Punapi ce sallape brahmacārinā;
ja526:55.3	Sampannasassaṁva mahodakena,
ja526:55.4	Usmāgataṁ khippamimaṁ pahissasi.
ja526:56.1	Bhūtāni hetāni caranti tāta,
ja526:56.2	Virūparūpena manussaloke;
ja526:56.3	Na tāni sevetha naro sapañño,
ja526:56.4	Āsajja naṁ nassati brahmacārī”ti.
ja526:57.1	Niḷinikājātakaṁ paṭhamaṁ.
ja527:0.1	Jātaka
ja527:0.2	Paṇṇāsanipāta
ja527:0.3	Niḷinikāvagga
ja527:0.4	2 Ummādantījātaka
ja527:1.1	“Nivesanaṁ kassa nudaṁ sunanda,
ja527:1.2	Pākārena paṇḍumayena guttaṁ;
ja527:1.3	Kā dissati aggisikhāva dūre,
ja527:1.4	Vehāyasaṁ pabbataggeva acci.
ja527:2.1	Dhītā nvayaṁ kassa sunanda hoti,
ja527:2.2	Suṇisā nvayaṁ kassa athopi bhariyā;
ja527:2.3	Akkhāhi me khippamidheva puṭṭho,
ja527:2.4	Avāvaṭā yadi vā atthi bhattā”.
ja527:3.1	“Ahañhi jānāmi janinda etaṁ,
ja527:3.2	Matyā ca petyā ca athopi assā;
ja527:3.3	Taveva so puriso bhūmipāla,
ja527:3.4	Rattindivaṁ appamatto tavatthe.
ja527:4.1	Iddho ca phīto ca suvaḍḍhito ca,
ja527:4.2	Amacco ca te aññataro janinda;
ja527:4.3	Tassesā bhariyābhipārakassa,
ja527:4.4	Ummādantī nāmadheyyena rāja”.
ja527:5.1	“Ambho ambho nāmamidaṁ imissā,
ja527:5.2	Matyā ca petyā ca kataṁ susādhu;
ja527:5.3	Tadā hi mayhaṁ avalokayantī,
ja527:5.4	Ummattakaṁ ummadantī akāsi.
ja527:6.1	Yā puṇṇamāse migamandalocanā,
ja527:6.2	Upāvisi puṇḍarīkattacaṅgī;
ja527:6.3	Dve puṇṇamāyo tadahū amaññahaṁ,
ja527:6.4	Disvāna pārāvatarattavāsiniṁ.
ja527:7.1	Aḷārapamhehi subhehi vaggubhi,
ja527:7.2	Palobhayantī maṁ yadā udikkhati;
ja527:7.3	Vijambhamānā harateva me mano,
ja527:7.4	Jātā vane kimpurisīva pabbate.
ja527:8.1	Tadā hi brahatī sāmā,
ja527:8.2	āmuttamaṇikuṇḍalā;
ja527:8.3	Ekaccavasanā nārī,
ja527:8.4	migī bhantāvudikkhati.
ja527:9.1	Kadāssu maṁ tambanakhā sulomā,
ja527:9.2	Bāhāmudū candanasāralittā;
ja527:9.3	Vaṭṭaṅgulī sannatadhīrakuttiyā,
ja527:9.4	Nārī upaññissati sīsato subhā.
ja527:10.1	Kadāssu maṁ kañcanajāluracchadā,
ja527:10.2	Dhītā tirīṭissa vilaggamajjhā;
ja527:10.3	Mudūhi bāhāhi palissajissati,
ja527:10.4	Brahāvane jātadumaṁva māluvā.
ja527:11.1	Kadāssu lākhārasarattasucchavī,
ja527:11.2	Bindutthanī puṇḍarīkattacaṅgī;
ja527:11.3	Mukhaṁ mukhena upanāmayissati,
ja527:11.4	Soṇḍova soṇḍassa surāya thālaṁ.
ja527:12.1	Yadāddasaṁ taṁ tiṭṭhantiṁ,
ja527:12.2	Sabbabhaddaṁ manoramaṁ;
ja527:12.3	Tato sakassa cittassa,
ja527:12.4	Nāvabodhāmi kañcinaṁ.
ja527:13.1	Ummādantimahaṁ daṭṭhā,
ja527:13.2	āmuttamaṇikuṇḍalaṁ;
ja527:13.3	Na supāmi divārattiṁ,
ja527:13.4	sahassaṁva parājito.
ja527:14.1	Sakko ce me varaṁ dajjā,
ja527:14.2	so ca labbhetha me varo;
ja527:14.3	Ekarattaṁ dvirattaṁ vā,
ja527:14.4	bhaveyyaṁ abhipārako;
ja527:14.5	Ummādantyā ramitvāna,
ja527:14.6	sivirājā tato siyaṁ”.
ja527:15.1	“Bhūtāni me bhūtapatī namassato,
ja527:15.2	Āgamma yakkho idametadabravi;
ja527:15.3	Rañño mano ummadantyā niviṭṭho,
ja527:15.4	Dadāmi te taṁ paricārayassu”.
ja527:16.1	“Puññā ca dhaṁse amaro na camhi,
ja527:16.2	Jano ca me pāpamidañca jaññā;
ja527:16.3	Bhuso ca tyassa manaso vighāto,
ja527:16.4	Datvā piyaṁ ummadantiṁ adaṭṭhā”.
ja527:17.1	“Janinda nāññatra tayā mayā vā,
ja527:17.2	Sabbāpi kammassa katassa jaññā;
ja527:17.3	Yaṁ te mayā ummadantī padinnā,
ja527:17.4	Bhusehi rājā vanathaṁ sajāhi”.
ja527:18.1	“Yo pāpakaṁ kamma karaṁ manusso,
ja527:18.2	So maññati māyida maññiṁsu aññe;
ja527:18.3	Passanti bhūtāni karontametaṁ,
ja527:18.4	Yuttā ca ye honti narā pathabyā.
ja527:19.1	Añño nu te koci naro pathabyā,
ja527:19.2	Saddheyya lokasmi na me piyāti;
ja527:19.3	Bhuso ca tyassa manaso vighāto,
ja527:19.4	Datvā piyaṁ ummadantiṁ adaṭṭhā”.
ja527:20.1	“Addhā piyā mayha janinda esā,
ja527:20.2	Na sā mamaṁ appiyā bhūmipāla;
ja527:20.3	Gaccheva tvaṁ ummadantiṁ bhadante,
ja527:20.4	Sīhova selassa guhaṁ upeti”.
ja527:21.1	“Na pīḷitā attadukhena dhīrā,
ja527:21.2	Sukhapphalaṁ kamma pariccajanti;
ja527:21.3	Sammohitā vāpi sukhena mattā,
ja527:21.4	Na pāpakammañca samācaranti”.
ja527:22.1	“Tuvañhi mātā ca pitā ca mayhaṁ,
ja527:22.2	Bhattā patī posako devatā ca;
ja527:22.3	Dāso ahaṁ tuyha saputtadāro,
ja527:22.4	Yathāsukhaṁ sāmi karohi kāmaṁ”.
ja527:23.1	“Yo issaromhīti karoti pāpaṁ,
ja527:23.2	Katvā ca so nuttasate paresaṁ;
ja527:23.3	Na tena so jīvati dīghamāyu,
ja527:23.4	Devāpi pāpena samekkhare naṁ.
ja527:24.1	Aññātakaṁ sāmikehī padinnaṁ,
ja527:24.2	Dhamme ṭhitā ye paṭicchanti dānaṁ;
ja527:24.3	Paṭicchakā dāyakā cāpi tattha,
ja527:24.4	Sukhapphalaññeva karonti kammaṁ.
ja527:25.1	Añño nu te koci naro pathabyā,
ja527:25.2	Saddheyya lokasmi na me piyāti;
ja527:25.3	Bhuso ca tyassa manaso vighāto,
ja527:25.4	Datvā piyaṁ ummadantiṁ adaṭṭhā”.
ja527:26.1	“Addhā piyā mayha janinda esā,
ja527:26.2	Na sā mamaṁ appiyā bhūmipāla;
ja527:26.3	Yaṁ te mayā ummadantī padinnā,
ja527:26.4	Bhusehi rājā vanathaṁ sajāhi”.
ja527:27.1	“Yo attadukkhena parassa dukkhaṁ,
ja527:27.2	Sukhena vā attasukhaṁ dahāti;
ja527:27.3	Yathevidaṁ mayha tathā paresaṁ,
ja527:27.4	Yo evaṁ jānāti sa vedi dhammaṁ.
ja527:28.1	Añño nu te koci naro pathabyā,
ja527:28.2	Saddheyya lokasmi na me piyāti;
ja527:28.3	Bhuso ca tyassa manaso vighāto,
ja527:28.4	Datvā piyaṁ ummadantiṁ adaṭṭhā”.
ja527:29.1	“Janinda jānāsi piyā mamesā,
ja527:29.2	Na sā mamaṁ appiyā bhūmipāla;
ja527:29.3	Piyena te dammi piyaṁ janinda,
ja527:29.4	Piyadāyino deva piyaṁ labhanti”.
ja527:30.1	“So nūnāhaṁ vadhissāmi,
ja527:30.2	attānaṁ kāmahetukaṁ;
ja527:30.3	Na hi dhammaṁ adhammena,
ja527:30.4	ahaṁ vadhitumussahe”.
ja527:31.1	“Sace tuvaṁ mayha satiṁ janinda,
ja527:31.2	Na kāmayāsi naravīra seṭṭha;
ja527:31.3	Cajāmi naṁ sabbajanassa sibyā,
ja527:31.4	Mayā pamuttaṁ tato avhayesi naṁ”.
ja527:32.1	“Adūsiyañce abhipāraka tvaṁ,
ja527:32.2	Cajāsi katte ahitāya tyassa;
ja527:32.3	Mahā ca te upavādopi assa,
ja527:32.4	Na cāpi tyassa nagaramhi pakkho”.
ja527:33.1	“Ahaṁ sahissaṁ upavādametaṁ,
ja527:33.2	Nindaṁ pasaṁsaṁ garahañca sabbaṁ;
ja527:33.3	Mametamāgacchatu bhūmipāla,
ja527:33.4	Yathāsukhaṁ sivi karohi kāmaṁ”.
ja527:34.1	“Yo neva nindaṁ na panappasaṁsaṁ,
ja527:34.2	Ādiyati garahaṁ nopi pūjaṁ;
ja527:34.3	Sirī ca lakkhī ca apeti tamhā,
ja527:34.4	Āpo suvuṭṭhīva yathā thalamhā”.
ja527:35.1	“Yaṁ kiñci dukkhañca sukhañca etto,
ja527:35.2	Dhammātisārañca manovighātaṁ;
ja527:35.3	Urasā ahaṁ paccuttarissāmi sabbaṁ,
ja527:35.4	Pathavī yathā thāvarānaṁ tasānaṁ”.
ja527:36.1	“Dhammātisārañca manovighātaṁ,
ja527:36.2	Dukkhañca nicchāmi ahaṁ paresaṁ;
ja527:36.3	Ekovimaṁ hārayissāmi bhāraṁ,
ja527:36.4	Dhamme ṭhito kiñci ahāpayanto”.
ja527:37.1	“Saggūpagaṁ puññakammaṁ janinda,
ja527:37.2	Mā me tuvaṁ antarāyaṁ akāsi;
ja527:37.3	Dadāmi te ummadantiṁ pasanno,
ja527:37.4	Rājāva yaññe dhanaṁ brāhmaṇānaṁ”.
ja527:38.1	“Addhā tuvaṁ katte hitesi mayhaṁ,
ja527:38.2	Sakhā mamaṁ ummadantī tuvañca;
ja527:38.3	Nindeyyu devā pitaro ca sabbe,
ja527:38.4	Pāpañca passaṁ abhisamparāyaṁ”.
ja527:39.1	“Na hetadhammaṁ sivirāja vajjuṁ,
ja527:39.2	Sanegamā jānapadā ca sabbe;
ja527:39.3	Yaṁ te mayā ummadantī padinnā,
ja527:39.4	Bhusehi rājā vanathaṁ sajāhi”.
ja527:40.1	“Addhā tuvaṁ katte hitesi mayhaṁ,
ja527:40.2	Sakhā mamaṁ ummadantī tuvañca;
ja527:40.3	Satañca dhammāni sukittitāni,
ja527:40.4	Samuddavelāva duraccayāni”.
ja527:41.1	“Āhuneyyo mesi hitānukampī,
ja527:41.2	Dhātā vidhātā casi kāmapālo;
ja527:41.3	Tayī hutā rāja mahapphalā hi,
ja527:41.4	Kāmena me ummadantiṁ paṭiccha”.
ja527:42.1	“Addhā hi sabbaṁ abhipāraka tvaṁ,
ja527:42.2	Dhammaṁ acārī mama kattuputta;
ja527:42.3	Añño nu te ko idha sotthikattā,
ja527:42.4	Dvipado naro aruṇe jīvaloke”.
ja527:43.1	“Tuvaṁ nu seṭṭho tvamanuttarosi,
ja527:43.2	Tvaṁ dhammagutto dhammavidū sumedho;
ja527:43.3	So dhammagutto cirameva jīva,
ja527:43.4	Dhammañca me desaya dhammapāla”.
ja527:44.1	“Tadiṅgha abhipāraka,
ja527:44.2	suṇohi vacanaṁ mama;
ja527:44.3	Dhammaṁ te desayissāmi,
ja527:44.4	sataṁ āsevitaṁ ahaṁ.
ja527:45.1	Sādhu dhammaruci rājā,
ja527:45.2	sādhu paññāṇavā naro;
ja527:45.3	Sādhu mittānamaddubbho,
ja527:45.4	pāpassākaraṇaṁ sukhaṁ.
ja527:46.1	Akkodhanassa vijite,
ja527:46.2	ṭhitadhammassa rājino;
ja527:46.3	Sukhaṁ manussā āsetha,
ja527:46.4	sītacchāyāya saṅghare.
ja527:47.1	Na cāhametaṁ abhirocayāmi,
ja527:47.2	Kammaṁ asamekkhakataṁ asādhu;
ja527:47.3	Ye vāpi ñatvāna sayaṁ karonti,
ja527:47.4	Upamā imā mayhaṁ tuvaṁ suṇohi.
ja527:48.1	Gavañce taramānānaṁ,
ja527:48.2	jimhaṁ gacchati puṅgavo;
ja527:48.3	Sabbā tā jimhaṁ gacchanti,
ja527:48.4	nette jimhaṁ gate sati.
ja527:49.1	Evameva manussesu,
ja527:49.2	yo hoti seṭṭhasammato;
ja527:49.3	So ce adhammaṁ carati,
ja527:49.4	pageva itarā pajā;
ja527:49.5	Sabbaṁ raṭṭhaṁ dukhaṁ seti,
ja527:49.6	rājā ce hoti adhammiko.
ja527:50.1	Gavañce taramānānaṁ,
ja527:50.2	ujuṁ gacchati puṅgavo;
ja527:50.3	Sabbā gāvī ujuṁ yanti,
ja527:50.4	nette ujuṁ gate sati.
ja527:51.1	Evameva manussesu,
ja527:51.2	yo hoti seṭṭhasammato;
ja527:51.3	So sace dhammaṁ carati,
ja527:51.4	pageva itarā pajā;
ja527:51.5	Sabbaṁ raṭṭhaṁ sukhaṁ seti,
ja527:51.6	rājā ce hoti dhammiko.
ja527:52.1	Na cāpāhaṁ adhammena,
ja527:52.2	amarattamabhipatthaye;
ja527:52.3	Imaṁ vā pathaviṁ sabbaṁ,
ja527:52.4	vijetuṁ abhipāraka.
ja527:53.1	Yañhi kiñci manussesu,
ja527:53.2	ratanaṁ idha vijjati;
ja527:53.3	Gāvo dāso hiraññañca,
ja527:53.4	vatthiyaṁ haricandanaṁ.
ja527:54.1	Assitthiyo ratanaṁ maṇikañca,
ja527:54.2	Yañcāpi me candasūriyā abhipālayanti;
ja527:54.3	Na tassa hetu visamaṁ careyyaṁ,
ja527:54.4	Majjhe sivīnaṁ usabhomhi jāto.
ja527:55.1	Netā hitā uggato raṭṭhapālo,
ja527:55.2	Dhammaṁ sivīnaṁ apacāyamāno;
ja527:55.3	So dhammamevānuvicintayanto,
ja527:55.4	Tasmā sake cittavase na vatto”.
ja527:56.1	“Addhā tuvaṁ mahārāja,
ja527:56.2	niccaṁ abyasanaṁ sivaṁ;
ja527:56.3	Karissasi ciraṁ rajjaṁ,
ja527:56.4	paññā hi tava tādisī.
ja527:57.1	Etaṁ te anumodāma,
ja527:57.2	yaṁ dhammaṁ nappamajjasi;
ja527:57.3	Dhammaṁ pamajja khattiyo,
ja527:57.4	raṭṭhā cavati issaro.
ja527:58.1	Dhammaṁ cara mahārāja,
ja527:58.2	mātāpitūsu khattiya;
ja527:58.3	Idha dhammaṁ caritvāna,
ja527:58.4	rāja saggaṁ gamissasi.
ja527:59.1	Dhammaṁ cara mahārāja,
ja527:59.2	puttadāresu khattiya;
ja527:59.3	…pe…
ja527:60.1	Dhammaṁ cara mahārāja,
ja527:60.2	mittāmaccesu khattiya;
ja527:60.3	…pe…
ja527:61.1	Dhammaṁ cara mahārāja,
ja527:61.2	vāhanesu balesu ca;
ja527:61.3	…pe…
ja527:62.1	Dhammaṁ cara mahārāja,
ja527:62.2	gāmesu nigamesu ca;
ja527:62.3	…pe…
ja527:63.1	Dhammaṁ cara mahārāja,
ja527:63.2	raṭṭhesu janapadesu ca;
ja527:63.3	…pe…
ja527:64.1	Dhammaṁ cara mahārāja,
ja527:64.2	samaṇabrāhmaṇesu ca;
ja527:64.3	…pe…
ja527:65.1	Dhammaṁ cara mahārāja,
ja527:65.2	migapakkhīsu khattiya;
ja527:65.3	…pe…
ja527:66.1	Dhammaṁ cara mahārāja,
ja527:66.2	dhammo ciṇṇo sukhāvaho;
ja527:66.3	Idha dhammaṁ caritvāna,
ja527:66.4	rāja saggaṁ gamissasi.
ja527:67.1	Dhammaṁ cara mahārāja,
ja527:67.2	saindā devā sabrahmakā;
ja527:67.3	Suciṇṇena divaṁ pattā,
ja527:67.4	mā dhammaṁ rāja pāmado”ti.
ja527:68.1	Ummādantījātakaṁ dutiyaṁ.
ja528:0.1	Jātaka
ja528:0.2	Paṇṇāsanipāta
ja528:0.3	Niḷinikāvagga
ja528:0.4	3. Mahābodhijātaka
ja528:1.1	“Kiṁ nu daṇḍaṁ kimajinaṁ,
ja528:1.2	kiṁ chattaṁ kimupāhanaṁ;
ja528:1.3	Kimaṅkusañca pattañca,
ja528:1.4	saṅghāṭiñcāpi brāhmaṇa;
ja528:1.5	Taramānarūpohāsi,
ja528:1.6	kiṁ nu patthayase disaṁ”.
ja528:2.1	“Dvādasetāni vassāni,
ja528:2.2	vusitāni tavantike;
ja528:2.3	Nābhijānāmi soṇena,
ja528:2.4	piṅgalenābhikūjitaṁ.
ja528:3.1	Svāyaṁ dittova nadati,
ja528:3.2	sukkadāṭhaṁ vidaṁsayaṁ;
ja528:3.3	Tava sutvā sabhariyassa,
ja528:3.4	vītasaddhassa maṁ pati”.
ja528:4.1	“Ahu esa kato doso,
ja528:4.2	yathā bhāsasi brāhmaṇa;
ja528:4.3	Esa bhiyyo pasīdāmi,
ja528:4.4	vasa brāhmaṇa māgamā”.
ja528:5.1	“Sabbaseto pure āsi,
ja528:5.2	tatopi sabalo ahu;
ja528:5.3	Sabbalohitako dāni,
ja528:5.4	kālo pakkamituṁ mama.
ja528:6.1	Abbhantaraṁ pure āsi,
ja528:6.2	tato majjhe tato bahi;
ja528:6.3	Purā niddhamanā hoti,
ja528:6.4	sayameva vajāmahaṁ.
ja528:7.1	Vītasaddhaṁ na seveyya,
ja528:7.2	udapānaṁvanodakaṁ;
ja528:7.3	Sacepi naṁ anukhaṇe,
ja528:7.4	vāri kaddamagandhikaṁ.
ja528:8.1	Pasannameva seveyya,
ja528:8.2	appasannaṁ vivajjaye;
ja528:8.3	Pasannaṁ payirupāseyya,
ja528:8.4	rahadaṁ vudakatthiko.
ja528:9.1	Bhaje bhajantaṁ purisaṁ,
ja528:9.2	abhajantaṁ na bhajjaye;
ja528:9.3	Asappurisadhammo so,
ja528:9.4	yo bhajantaṁ na bhajjati.
ja528:10.1	Yo bhajantaṁ na bhajati,
ja528:10.2	sevamānaṁ na sevati;
ja528:10.3	Sa ve manussapāpiṭṭho,
ja528:10.4	migo sākhassito yathā.
ja528:11.1	Accābhikkhaṇasaṁsaggā,
ja528:11.2	asamosaraṇena ca;
ja528:11.3	Etena mittā jīranti,
ja528:11.4	akāle yācanāya ca.
ja528:12.1	Tasmā nābhikkhaṇaṁ gacche,
ja528:12.2	na ca gacche cirāciraṁ;
ja528:12.3	Kālena yācaṁ yāceyya,
ja528:12.4	evaṁ mittā na jīyare.
ja528:13.1	Aticiraṁ nivāsena,
ja528:13.2	piyo bhavati appiyo;
ja528:13.3	Āmanta kho taṁ gacchāma,
ja528:13.4	purā te homa appiyā”.
ja528:14.1	“Evañce yācamānānaṁ,
ja528:14.2	Añjaliṁ nāvabujjhasi;
ja528:14.3	Paricārakānaṁ sataṁ,
ja528:14.4	Vacanaṁ na karosi no;
ja528:14.5	Evaṁ taṁ abhiyācāma,
ja528:14.6	Puna kayirāsi pariyāyaṁ”.
ja528:15.1	“Evañce no viharataṁ,
ja528:15.2	Antarāyo na hessati;
ja528:15.3	Tuyhaṁ vāpi mahārāja,
ja528:15.4	Mayhaṁ vā raṭṭhavaddhana;
ja528:15.5	Appeva nāma passema,
ja528:15.6	Ahorattānamaccaye.
ja528:16.1	Udīraṇā ce saṅgatyā,
ja528:16.2	bhāvāya manuvattati;
ja528:16.3	Akāmā akaraṇīyaṁ vā,
ja528:16.4	karaṇīyaṁ vāpi kubbati;
ja528:16.5	Akāmākaraṇīyamhi,
ja528:16.6	kvidha pāpena lippati.
ja528:17.1	So ce attho ca dhammo ca,
ja528:17.2	kalyāṇo na ca pāpako;
ja528:17.3	Bhoto ce vacanaṁ saccaṁ,
ja528:17.4	suhato vānaro mayā.
ja528:18.1	Attano ce hi vādassa,
ja528:18.2	aparādhaṁ vijāniyā;
ja528:18.3	Na maṁ tvaṁ garaheyyāsi,
ja528:18.4	bhoto vādo hi tādiso.
ja528:19.1	Issaro sabbalokassa,
ja528:19.2	sace kappeti jīvitaṁ;
ja528:19.3	Iddhiṁ byasanabhāvañca,
ja528:19.4	kammaṁ kalyāṇapāpakaṁ;
ja528:19.5	Niddesakārī puriso,
ja528:19.6	issaro tena lippati.
ja528:20.1	So ce attho ca dhammo ca,
ja528:20.2	kalyāṇo na ca pāpako;
ja528:20.3	Bhoto ce vacanaṁ saccaṁ,
ja528:20.4	suhato vānaro mayā.
ja528:21.1	Attano ce hi vādassa,
ja528:21.2	aparādhaṁ vijāniyā;
ja528:21.3	Na maṁ tvaṁ garaheyyāsi,
ja528:21.4	bhoto vādo hi tādiso.
ja528:22.1	Sace pubbekatahetu,
ja528:22.2	sukhadukkhaṁ nigacchati;
ja528:22.3	Porāṇakaṁ kataṁ pāpaṁ,
ja528:22.4	tameso muccate iṇaṁ;
ja528:22.5	Porāṇakaiṇamokkho,
ja528:22.6	kvidha pāpena lippati.
ja528:23.1	So ce attho ca dhammo ca,
ja528:23.2	kalyāṇo na ca pāpako;
ja528:23.3	Bhoto ce vacanaṁ saccaṁ,
ja528:23.4	suhato vānaro mayā.
ja528:24.1	Attano ce hi vādassa,
ja528:24.2	aparādhaṁ vijāniyā;
ja528:24.3	Na maṁ tvaṁ garaheyyāsi,
ja528:24.4	bhoto vādo hi tādiso.
ja528:25.1	Catunnaṁyevupādāya,
ja528:25.2	rūpaṁ sambhoti pāṇinaṁ;
ja528:25.3	Yato ca rūpaṁ sambhoti,
ja528:25.4	tatthevānupagacchati;
ja528:25.5	Idheva jīvati jīvo,
ja528:25.6	pecca pecca vinassati.
ja528:26.1	Ucchijjati ayaṁ loko,
ja528:26.2	ye bālā ye ca paṇḍitā;
ja528:26.3	Ucchijjamāne lokasmiṁ,
ja528:26.4	kvidha pāpena lippati.
ja528:27.1	So ce attho ca dhammo ca,
ja528:27.2	kalyāṇo na ca pāpako;
ja528:27.3	Bhoto ce vacanaṁ saccaṁ,
ja528:27.4	suhato vānaro mayā.
ja528:28.1	Attano ce hi vādassa,
ja528:28.2	aparādhaṁ vijāniyā;
ja528:28.3	Na maṁ tvaṁ garaheyyāsi,
ja528:28.4	bhoto vādo hi tādiso.
ja528:29.1	Āhu khattavidā loke,
ja528:29.2	bālā paṇḍitamānino;
ja528:29.3	‘Mātaraṁ pitaraṁ haññe,
ja528:29.4	atho jeṭṭhampi bhātaraṁ;
ja528:29.5	Haneyya puttadāre ca,
ja528:29.6	attho ce tādiso siyā’.
ja528:30.1	Yassa rukkhassa chāyāya,
ja528:30.2	nisīdeyya sayeyya vā;
ja528:30.3	Na tassa sākhaṁ bhañjeyya,
ja528:30.4	mittadubbho hi pāpako.
ja528:31.1	Atha atthe samuppanne,
ja528:31.2	samūlamapi abbahe;
ja528:31.3	Attho me sambalenāpi,
ja528:31.4	suhato vānaro mayā.
ja528:32.1	So ce attho ca dhammo ca,
ja528:32.2	kalyāṇo na ca pāpako;
ja528:32.3	Bhoto ce vacanaṁ saccaṁ,
ja528:32.4	suhato vānaro mayā.
ja528:33.1	Attano ce hi vādassa,
ja528:33.2	aparādhaṁ vijāniyā;
ja528:33.3	Na maṁ tvaṁ garaheyyāsi,
ja528:33.4	bhoto vādo hi tādiso.
ja528:34.1	Ahetuvādo puriso,
ja528:34.2	yo ca issarakuttiko;
ja528:34.3	Pubbekatī ca ucchedī,
ja528:34.4	yo ca khattavido naro.
ja528:35.1	Ete asappurisā loke,
ja528:35.2	bālā paṇḍitamānino;
ja528:35.3	Kareyya tādiso pāpaṁ,
ja528:35.4	atho aññampi kāraye;
ja528:35.5	Asappurisasaṁsaggo,
ja528:35.6	dukkhanto kaṭukudrayo.
ja528:36.1	Urabbharūpena vakassu pubbe,
ja528:36.2	Asaṅkito ajayūthaṁ upeti;
ja528:36.3	Hantvā uraṇiṁ ajikaṁ ajañca,
ja528:36.4	Utrāsayitvā yena kāmaṁ paleti.
ja528:37.1	Tathāvidheke samaṇabrāhmaṇāse,
ja528:37.2	Chadanaṁ katvā vañcayanti manusse;
ja528:37.3	Anāsakā thaṇḍilaseyyakā ca,
ja528:37.4	Rajojallaṁ ukkuṭikappadhānaṁ;
ja528:37.5	Pariyāyabhattañca apānakattā,
ja528:37.6	Pāpācārā arahanto vadānā.
ja528:38.1	Ete asappurisā loke,
ja528:38.2	bālā paṇḍitamānino;
ja528:38.3	Kareyya tādiso pāpaṁ,
ja528:38.4	atho aññampi kāraye;
ja528:38.5	Asappurisasaṁsaggo,
ja528:38.6	dukkhanto kaṭukudrayo.
ja528:39.1	Yamāhu natthi vīriyanti,
ja528:39.2	ahetuñca pavadanti ye;
ja528:39.3	Parakāraṁ attakārañca,
ja528:39.4	ye tucchaṁ samavaṇṇayuṁ.
ja528:40.1	Ete asappurisā loke,
ja528:40.2	bālā paṇḍitamānino;
ja528:40.3	Kareyya tādiso pāpaṁ,
ja528:40.4	atho aññampi kāraye;
ja528:40.5	Asappurisasaṁsaggo,
ja528:40.6	dukkhanto kaṭukudrayo.
ja528:41.1	Sace hi vīriyaṁ nāssa,
ja528:41.2	kammaṁ kalyāṇapāpakaṁ;
ja528:41.3	Na bhare vaḍḍhakiṁ rājā,
ja528:41.4	napi yantāni kāraye.
ja528:42.1	Yasmā ca vīriyaṁ atthi,
ja528:42.2	kammaṁ kalyāṇapāpakaṁ;
ja528:42.3	Tasmā yantāni kāreti,
ja528:42.4	rājā bharati vaḍḍhakiṁ.
ja528:43.1	Yadi vassasataṁ devo,
ja528:43.2	na vasse na himaṁ pate;
ja528:43.3	Ucchijjeyya ayaṁ loko,
ja528:43.4	vinasseyya ayaṁ pajā.
ja528:44.1	Yasmā ca vassatī devo,
ja528:44.2	himañcānuphusāyati;
ja528:44.3	Tasmā sassāni paccanti,
ja528:44.4	raṭṭhañca pālite ciraṁ.
ja528:45.1	Gavañce taramānānaṁ,
ja528:45.2	jimhaṁ gacchati puṅgavo;
ja528:45.3	Sabbā tā jimhaṁ gacchanti,
ja528:45.4	nette jimhaṁ gate sati.
ja528:46.1	Evameva manussesu,
ja528:46.2	yo hoti seṭṭhasammato;
ja528:46.3	So ce adhammaṁ carati,
ja528:46.4	pageva itarā pajā;
ja528:46.5	Sabbaṁ raṭṭhaṁ dukhaṁ seti,
ja528:46.6	rājā ce hoti adhammiko.
ja528:47.1	Gavañce taramānānaṁ,
ja528:47.2	ujuṁ gacchati puṅgavo;
ja528:47.3	Sabbā gāvī ujuṁ yanti,
ja528:47.4	nette ujuṁ gate sati.
ja528:48.1	Evameva manussesu,
ja528:48.2	yo hoti seṭṭhasammato;
ja528:48.3	So sace dhammaṁ carati,
ja528:48.4	pageva itarā pajā;
ja528:48.5	Sabbaṁ raṭṭhaṁ sukhaṁ seti,
ja528:48.6	rājā ce hoti dhammiko.
ja528:49.1	Mahārukkhassa phalino,
ja528:49.2	āmaṁ chindati yo phalaṁ;
ja528:49.3	Rasañcassa na jānāti,
ja528:49.4	bījañcassa vinassati.
ja528:50.1	Mahārukkhūpamaṁ raṭṭhaṁ,
ja528:50.2	adhammena pasāsati;
ja528:50.3	Rasañcassa na jānāti,
ja528:50.4	raṭṭhañcassa vinassati.
ja528:51.1	Mahārukkhassa phalino,
ja528:51.2	pakkaṁ chindati yo phalaṁ;
ja528:51.3	Rasañcassa vijānāti,
ja528:51.4	bījañcassa na nassati.
ja528:52.1	Mahārukkhūpamaṁ raṭṭhaṁ,
ja528:52.2	dhammena yo pasāsati;
ja528:52.3	Rasañcassa vijānāti,
ja528:52.4	raṭṭhañcassa na nassati.
ja528:53.1	Yo ca rājā janapadaṁ,
ja528:53.2	adhammena pasāsati;
ja528:53.3	Sabbosadhīhi so rājā,
ja528:53.4	viruddho hoti khattiyo.
ja528:54.1	Tatheva negame hiṁsaṁ,
ja528:54.2	ye yuttā kayavikkaye;
ja528:54.3	Ojadānabalīkāre,
ja528:54.4	sa kosena virujjhati.
ja528:55.1	Pahāravarakhettaññū,
ja528:55.2	saṅgāme katanissame;
ja528:55.3	Ussite hiṁsayaṁ rājā,
ja528:55.4	sa balena virujjhati.
ja528:56.1	Tatheva isayo hiṁsaṁ,
ja528:56.2	saññate brahmacārino;
ja528:56.3	Adhammacārī khattiyo,
ja528:56.4	so saggena virujjhati.
ja528:57.1	Yo ca rājā adhammaṭṭho,
ja528:57.2	bhariyaṁ hanti adūsikaṁ;
ja528:57.3	Luddaṁ pasavate ṭhānaṁ,
ja528:57.4	puttehi ca virujjhati.
ja528:58.1	Dhammaṁ care jānapade,
ja528:58.2	negamesu balesu ca;
ja528:58.3	Isayo ca na hiṁseyya,
ja528:58.4	puttadāre samaṁ care.
ja528:59.1	Sa tādiso bhūmipati,
ja528:59.2	Raṭṭhapālo akodhano;
ja528:59.3	Sapatte sampakampeti,
ja528:59.4	Indova asurādhipo”ti.
ja528:60.1	Mahābodhijātakaṁ tatiyaṁ.
ja528:61.1	Paṇṇāsanipātaṁ niṭṭhitaṁ.
ja528:62.1	Tassuddānaṁ
ja528:63.1	Saniḷīnikamavhayano paṭhamo,
ja528:63.2	Dutiyo pana saummadantivaro;
ja528:63.3	Tatiyo pana bodhisirīvhayano,
ja528:63.4	Kathitā pana tīṇi jinena subhāti.
ja529:0.1	Jātaka
ja529:0.2	Saṭṭhinipāta
ja529:0.3	Soṇakavagga
ja529:0.4	1 Soṇakajātaka
ja529:1.1	“Tassa sutvā sataṁ dammi,
ja529:1.2	sahassaṁ diṭṭha soṇakaṁ;
ja529:1.3	Ko me soṇakamakkhāti,
ja529:1.4	sahāyaṁ paṁsukīḷitaṁ”.
ja529:2.1	“Athabravī māṇavako,
ja529:2.2	daharo pañcacūḷako;
ja529:2.3	Mayhaṁ sutvā sataṁ dehi,
ja529:2.4	sahassaṁ diṭṭha soṇakaṁ;
ja529:2.5	Ahaṁ te soṇakakkhissaṁ,
ja529:2.6	sahāyaṁ paṁsukīḷitaṁ”.
ja529:3.1	“Katamasmiṁ so janapade,
ja529:3.2	raṭṭhesu nigamesu ca;
ja529:3.3	Kattha soṇakamaddakkhi,
ja529:3.4	taṁ me akkhāhi pucchito”.
ja529:4.1	“Taveva deva vijite,
ja529:4.2	tavevuyyānabhūmiyā;
ja529:4.3	Ujuvaṁsā mahāsālā,
ja529:4.4	nīlobhāsā manoramā.
ja529:5.1	Tiṭṭhanti meghasamānā,
ja529:5.2	rammā aññoññanissitā;
ja529:5.3	Tesaṁ mūlamhi soṇako,
ja529:5.4	jhāyatī anupādano;
ja529:5.5	Upādānesu lokesu,
ja529:5.6	ḍayhamānesu nibbuto”.
ja529:6.1	Tato ca rājā pāyāsi,
ja529:6.2	senāya caturaṅgiyā;
ja529:6.3	Kārāpetvā samaṁ maggaṁ,
ja529:6.4	agamā yena soṇako.
ja529:7.1	Uyyānabhūmiṁ gantvāna,
ja529:7.2	vicaranto brahāvane;
ja529:7.3	Āsīnaṁ soṇakaṁ dakkhi,
ja529:7.4	ḍayhamānesu nibbutaṁ.
ja529:8.1	“Kapaṇo vatayaṁ bhikkhu,
ja529:8.2	muṇḍo saṅghāṭipāruto;
ja529:8.3	Amātiko apitiko,
ja529:8.4	rukkhamūlasmi jhāyati”.
ja529:9.1	Imaṁ vākyaṁ nisāmetvā,
ja529:9.2	Soṇako etadabravi;
ja529:9.3	“Na rāja kapaṇo hoti,
ja529:9.4	Dhammaṁ kāyena phassayaṁ.
ja529:10.1	Yo ca dhammaṁ niraṅkatvā,
ja529:10.2	Adhammamanuvattati;
ja529:10.3	Sa rāja kapaṇo hoti,
ja529:10.4	Pāpo pāpaparāyaṇo”.
ja529:11.1	“Arindamoti me nāmaṁ,
ja529:11.2	kāsirājāti maṁ vidū;
ja529:11.3	Kacci bhoto sukhasseyyā,
ja529:11.4	idha pattassa soṇaka”.
ja529:12.1	“Sadāpi bhadramadhanassa,
ja529:12.2	Anāgārassa bhikkhuno;
ja529:12.3	Na tesaṁ koṭṭhe openti,
ja529:12.4	Na kumbhiṁ na khaḷopiyaṁ;
ja529:12.5	Paraniṭṭhitamesānā,
ja529:12.6	Tena yāpenti subbatā.
ja529:13.1	Dutiyampi bhadramadhanassa,
ja529:13.2	Anāgārassa bhikkhuno;
ja529:13.3	Anavajjapiṇḍo bhottabbo,
ja529:13.4	Na ca kocūparodhati.
ja529:14.1	Tatiyampi bhadramadhanassa,
ja529:14.2	Anāgārassa bhikkhuno;
ja529:14.3	Nibbuto piṇḍo bhottabbo,
ja529:14.4	Na ca kocūparodhati.
ja529:15.1	Catutthampi bhadramadhanassa,
ja529:15.2	Anāgārassa bhikkhuno;
ja529:15.3	Muttassa raṭṭhe carato,
ja529:15.4	Saṅgo yassa na vijjati.
ja529:16.1	Pañcamampi bhadramadhanassa,
ja529:16.2	Anāgārassa bhikkhuno;
ja529:16.3	Nagaramhi ḍayhamānamhi,
ja529:16.4	Nāssa kiñci aḍayhatha.
ja529:17.1	Chaṭṭhampi bhadramadhanassa,
ja529:17.2	Anāgārassa bhikkhuno;
ja529:17.3	Raṭṭhe vilumpamānamhi,
ja529:17.4	Nāssa kiñci ahīratha.
ja529:18.1	Sattamampi bhadramadhanassa,
ja529:18.2	Anāgārassa bhikkhuno;
ja529:18.3	Corehi rakkhitaṁ maggaṁ,
ja529:18.4	Ye caññe paripanthikā;
ja529:18.5	Pattacīvaramādāya,
ja529:18.6	Sotthiṁ gacchati subbato.
ja529:19.1	Aṭṭhamampi bhadramadhanassa,
ja529:19.2	Anāgārassa bhikkhuno;
ja529:19.3	Yaṁ yaṁ disaṁ pakkamati,
ja529:19.4	Anapekkhova gacchati”.
ja529:20.1	“Bahūni samaṇabhadrāni,
ja529:20.2	ye tvaṁ bhikkhu pasaṁsasi;
ja529:20.3	Ahañca giddho kāmesu,
ja529:20.4	kathaṁ kāhāmi soṇaka.
ja529:21.1	Piyā me mānusā kāmā,
ja529:21.2	atho dibyāpi me piyā;
ja529:21.3	Atha kena nu vaṇṇena,
ja529:21.4	ubho loke labhāmase”.
ja529:22.1	“Kāme giddhā kāmaratā,
ja529:22.2	kāmesu adhimucchitā;
ja529:22.3	Narā pāpāni katvāna,
ja529:22.4	upapajjanti duggatiṁ.
ja529:23.1	Ye ca kāme pahantvāna,
ja529:23.2	nikkhantā akutobhayā;
ja529:23.3	Ekodibhāvādhigatā,
ja529:23.4	na te gacchanti duggatiṁ.
ja529:24.1	Upamaṁ te karissāmi,
ja529:24.2	taṁ suṇohi arindama;
ja529:24.3	Upamāya midhekacce,
ja529:24.4	atthaṁ jānanti paṇḍitā.
ja529:25.1	Gaṅgāya kuṇapaṁ disvā,
ja529:25.2	vuyhamānaṁ mahaṇṇave;
ja529:25.3	Vāyaso samacintesi,
ja529:25.4	appapañño acetaso.
ja529:26.1	‘Yānañca vatidaṁ laddhaṁ,
ja529:26.2	bhakkho cāyaṁ anappako’;
ja529:26.3	Tattha rattiṁ tattha divā,
ja529:26.4	tattheva nirato mano.
ja529:27.1	Khādaṁ nāgassa maṁsāni,
ja529:27.2	pivaṁ bhāgīrathodakaṁ;
ja529:27.3	Sampassaṁ vanacetyāni,
ja529:27.4	na palettha vihaṅgamo.
ja529:28.1	Tañca otaraṇī gaṅgā,
ja529:28.2	pamattaṁ kuṇape rataṁ;
ja529:28.3	Samuddaṁ ajjhagāhāsi,
ja529:28.4	agatī yattha pakkhinaṁ.
ja529:29.1	So ca bhakkhaparikkhīṇo,
ja529:29.2	udapatvā vihaṅgamo;
ja529:29.3	Na pacchato na purato,
ja529:29.4	nuttaraṁ nopi dakkhiṇaṁ.
ja529:30.1	Dīpaṁ so najjhagāgañchi,
ja529:30.2	agatī yattha pakkhinaṁ;
ja529:30.3	So ca tattheva pāpattha,
ja529:30.4	yathā dubbalako tathā.
ja529:31.1	Tañca sāmuddikā macchā,
ja529:31.2	kumbhīlā makarā susū;
ja529:31.3	Pasayhakārā khādiṁsu,
ja529:31.4	phandamānaṁ vipakkhakaṁ.
ja529:32.1	Evameva tuvaṁ rāja,
ja529:32.2	ye caññe kāmabhogino;
ja529:32.3	Giddhā ce na vamissanti,
ja529:32.4	kākapaññāva te vidū.
ja529:33.1	Esā te upamā rāja,
ja529:33.2	atthasandassanī katā;
ja529:33.3	Tvañca paññāyase tena,
ja529:33.4	yadi kāhasi vā na vā.
ja529:34.1	Ekavācampi dvivācaṁ,
ja529:34.2	bhaṇeyya anukampako;
ja529:34.3	Tatuttariṁ na bhāseyya,
ja529:34.4	dāsovayyassa santike”.
ja529:35.1	Idaṁ vatvāna pakkāmi,
ja529:35.2	soṇako amitabuddhimā;
ja529:35.3	Vehāse antalikkhasmiṁ,
ja529:35.4	anusāsitvāna khattiyaṁ.
ja529:36.1	“Ko nume rājakattāro,
ja529:36.2	suddā veyyattamāgatā;
ja529:36.3	Rajjaṁ niyyādayissāmi,
ja529:36.4	nāhaṁ rajjena matthiko.
ja529:37.1	Ajjeva pabbajissāmi,
ja529:37.2	Ko jaññā maraṇaṁ suve;
ja529:37.3	Māhaṁ kākova dummedho,
ja529:37.4	Kāmānaṁ vasamanvagaṁ”.
ja529:38.1	“Atthi te daharo putto,
ja529:38.2	dīghāvu raṭṭhavaḍḍhano;
ja529:38.3	Taṁ rajje abhisiñcassu,
ja529:38.4	so no rājā bhavissati”.
ja529:39.1	“Khippaṁ kumāramānetha,
ja529:39.2	dīghāvuṁ raṭṭhavaḍḍhanaṁ;
ja529:39.3	Taṁ rajje abhisiñcissaṁ,
ja529:39.4	so vo rājā bhavissati”.
ja529:40.1	Tato kumāramānesuṁ,
ja529:40.2	dīghāvuṁ raṭṭhavaḍḍhanaṁ;
ja529:40.3	Taṁ disvā ālapī rājā,
ja529:40.4	ekaputtaṁ manoramaṁ.
ja529:41.1	“Saṭṭhi gāmasahassāni,
ja529:41.2	paripuṇṇāni sabbaso;
ja529:41.3	Te putta paṭipajjassu,
ja529:41.4	rajjaṁ niyyādayāmi te.
ja529:42.1	Ajjeva pabbajissāmi,
ja529:42.2	ko jaññā maraṇaṁ suve;
ja529:42.3	Māhaṁ kākova dummedho,
ja529:42.4	kāmānaṁ vasamanvagaṁ.
ja529:43.1	Saṭṭhi nāgasahassāni,
ja529:43.2	sabbālaṅkārabhūsitā;
ja529:43.3	Suvaṇṇakacchā mātaṅgā,
ja529:43.4	hemakappanavāsasā.
ja529:44.1	Ārūḷhā gāmaṇīyehi,
ja529:44.2	tomaraṅkusapāṇibhi;
ja529:44.3	Te putta paṭipajjassu,
ja529:44.4	rajjaṁ niyyādayāmi te.
ja529:45.1	Ajjeva pabbajissāmi,
ja529:45.2	ko jaññā maraṇaṁ suve;
ja529:45.3	Māhaṁ kākova dummedho,
ja529:45.4	kāmānaṁ vasamanvagaṁ.
ja529:46.1	Saṭṭhi assasahassāni,
ja529:46.2	sabbālaṅkārabhūsitā;
ja529:46.3	Ājānīyāva jātiyā,
ja529:46.4	sindhavā sīghavāhino.
ja529:47.1	Ārūḷhā gāmaṇīyehi,
ja529:47.2	illiyācāpadhāribhi;
ja529:47.3	Te putta paṭipajjassu,
ja529:47.4	rajjaṁ niyyādayāmi te.
ja529:48.1	Ajjeva pabbajissāmi,
ja529:48.2	ko jaññā maraṇaṁ suve;
ja529:48.3	Māhaṁ kākova dummedho,
ja529:48.4	kāmānaṁ vasamanvagaṁ.
ja529:49.1	Saṭṭhi rathasahassāni,
ja529:49.2	sannaddhā ussitaddhajā;
ja529:49.3	Dīpā athopi veyyagghā,
ja529:49.4	sabbālaṅkārabhūsitā.
ja529:50.1	Ārūḷhā gāmaṇīyehi,
ja529:50.2	cāpahatthehi vammibhi;
ja529:50.3	Te putta paṭipajjassu,
ja529:50.4	rajjaṁ niyyādayāmi te.
ja529:51.1	Ajjeva pabbajissāmi,
ja529:51.2	ko jaññā maraṇaṁ suve;
ja529:51.3	Māhaṁ kākova dummedho,
ja529:51.4	kāmānaṁ vasamanvagaṁ.
ja529:52.1	Saṭṭhi dhenusahassāni,
ja529:52.2	rohaññā puṅgavūsabhā;
ja529:52.3	Tā putta paṭipajjassu,
ja529:52.4	rajjaṁ niyyādayāmi te.
ja529:53.1	Ajjeva pabbajissāmi,
ja529:53.2	ko jaññā maraṇaṁ suve;
ja529:53.3	Māhaṁ kākova dummedho,
ja529:53.4	kāmānaṁ vasamanvagaṁ.
ja529:54.1	Soḷasitthisahassāni,
ja529:54.2	sabbālaṅkārabhūsitā;
ja529:54.3	Vicitravatthābharaṇā,
ja529:54.4	āmuttamaṇikuṇḍalā;
ja529:54.5	Tā putta paṭipajjassu,
ja529:54.6	rajjaṁ niyyādayāmi te.
ja529:55.1	Ajjeva pabbajissāmi,
ja529:55.2	ko jaññā maraṇaṁ suve;
ja529:55.3	Māhaṁ kākova dummedho,
ja529:55.4	kāmānaṁ vasamanvagaṁ”.
ja529:56.1	“Daharasseva me tāta,
ja529:56.2	mātā matāti me sutaṁ;
ja529:56.3	Tayā vinā ahaṁ tāta,
ja529:56.4	jīvitumpi na ussahe.
ja529:57.1	Yathā āraññakaṁ nāgaṁ,
ja529:57.2	poto anveti pacchato;
ja529:57.3	Jessantaṁ giriduggesu,
ja529:57.4	samesu visamesu ca.
ja529:58.1	Evaṁ taṁ anugacchāmi,
ja529:58.2	pattamādāya pacchato;
ja529:58.3	Subharo te bhavissāmi,
ja529:58.4	na te hessāmi dubbharo”.
ja529:59.1	“Yathā sāmuddikaṁ nāvaṁ,
ja529:59.2	vāṇijānaṁ dhanesinaṁ;
ja529:59.3	Vohāro tattha gaṇheyya,
ja529:59.4	vāṇijā byasanī siyā.
ja529:60.1	Evamevāyaṁ puttakali,
ja529:60.2	antarāyakaro mama;
ja529:60.3	Imaṁ kumāraṁ pāpetha,
ja529:60.4	pāsādaṁ rativaḍḍhanaṁ.
ja529:61.1	Tattha kambusahatthāyo,
ja529:61.2	yathā sakkaṁva accharā;
ja529:61.3	Tā naṁ tattha ramessanti,
ja529:61.4	tāhi ceso ramissati.
ja529:62.1	Tato kumāraṁ pāpesuṁ,
ja529:62.2	pāsādaṁ rativaḍḍhanaṁ;
ja529:62.3	Taṁ disvā avacuṁ kaññā,
ja529:62.4	dīghāvuṁ raṭṭhavaḍḍhanaṁ.
ja529:63.1	Devatā nusi gandhabbo,
ja529:63.2	adu sakko purindado;
ja529:63.3	Ko vā tvaṁ kassa vā putto,
ja529:63.4	kathaṁ jānemu taṁ mayaṁ”.
ja529:64.1	“Namhi devo na gandhabbo,
ja529:64.2	Nāpi sakko purindado;
ja529:64.3	Kāsirañño ahaṁ putto,
ja529:64.4	Dīghāvu raṭṭhavaḍḍhano;
ja529:64.5	Mamaṁ bharatha bhaddaṁ vo,
ja529:64.6	Ahaṁ bhattā bhavāmi vo”.
ja529:65.1	Taṁ tattha avacuṁ kaññā,
ja529:65.2	dīghāvuṁ raṭṭhavaḍḍhanaṁ;
ja529:65.3	“Kuhiṁ rājā anuppatto,
ja529:65.4	ito rājā kuhiṁ gato”.
ja529:66.1	“Paṅkaṁ rājā atikkanto,
ja529:66.2	thale rājā patiṭṭhito;
ja529:66.3	Akaṇṭakaṁ agahanaṁ,
ja529:66.4	paṭipanno mahāpathaṁ.
ja529:67.1	Ahañca paṭipannosmi,
ja529:67.2	maggaṁ duggatigāminaṁ;
ja529:67.3	Sakaṇṭakaṁ sagahanaṁ,
ja529:67.4	yena gacchanti duggatiṁ”.
ja529:68.1	“Tassa te svāgataṁ rāja,
ja529:68.2	sīhasseva giribbajaṁ;
ja529:68.3	Anusāsa mahārāja,
ja529:68.4	tvaṁ no sabbāsamissaro”ti.
ja529:69.1	Soṇakajātakaṁ paṭhamaṁ.
ja530:0.1	Jātaka
ja530:0.2	Saṭṭhinipāta
ja530:0.3	Soṇakavagga
ja530:0.4	2. Saṅkiccajātaka
ja530:1.1	Disvā nisinnaṁ rājānaṁ,
ja530:1.2	brahmadattaṁ rathesabhaṁ;
ja530:1.3	Athassa paṭivedesi,
ja530:1.4	“yassāsi anukampako.
ja530:2.1	Saṅkiccāyaṁ anuppatto,
ja530:2.2	isīnaṁ sādhusammato;
ja530:2.3	Taramānarūpo niyyāhi,
ja530:2.4	khippaṁ passa mahesinaṁ”.
ja530:3.1	Tato ca rājā taramāno,
ja530:3.2	yuttamāruyha sandanaṁ;
ja530:3.3	Mittāmaccaparibyūḷho,
ja530:3.4	agamāsi rathesabho.
ja530:4.1	Nikkhippa pañca kakudhāni,
ja530:4.2	kāsīnaṁ raṭṭhavaḍḍhano;
ja530:4.3	Vālabījanimuṇhīsaṁ,
ja530:4.4	khaggaṁ chattañcupāhanaṁ.
ja530:5.1	Oruyha rājā yānamhā,
ja530:5.2	ṭhapayitvā paṭicchadaṁ;
ja530:5.3	Āsīnaṁ dāyapassasmiṁ,
ja530:5.4	saṅkiccamupasaṅkami.
ja530:6.1	Upasaṅkamitvā so rājā,
ja530:6.2	sammodi isinā saha;
ja530:6.3	Taṁ kathaṁ vītisāretvā,
ja530:6.4	ekamantaṁ upāvisi.
ja530:7.1	Ekamantaṁ nisinnova,
ja530:7.2	atha kālaṁ amaññatha;
ja530:7.3	Tato pāpāni kammāni,
ja530:7.4	pucchituṁ paṭipajjatha.
ja530:8.1	“Isiṁ pucchāma saṅkiccaṁ,
ja530:8.2	isīnaṁ sādhusammataṁ;
ja530:8.3	Āsīnaṁ dāyapassasmiṁ,
ja530:8.4	isisaṅghapurakkhataṁ.
ja530:9.1	Kaṁ gatiṁ pecca gacchanti,
ja530:9.2	narā dhammāticārino;
ja530:9.3	Aticiṇṇo mayā dhammo,
ja530:9.4	taṁ me akkhāhi pucchito”.
ja530:10.1	Isī avaca saṅkicco,
ja530:10.2	kāsīnaṁ raṭṭhavaḍḍhanaṁ;
ja530:10.3	Āsīnaṁ dāyapassasmiṁ,
ja530:10.4	“mahārāja suṇohi me.
ja530:11.1	Uppathena vajantassa,
ja530:11.2	yo maggamanusāsati;
ja530:11.3	Tassa ce vacanaṁ kayirā,
ja530:11.4	nāssa maggeyya kaṇṭako.
ja530:12.1	Adhammaṁ paṭipannassa,
ja530:12.2	yo dhammamanusāsati;
ja530:12.3	Tassa ce vacanaṁ kayirā,
ja530:12.4	na so gaccheyya duggatiṁ”.
ja530:13.1	“Dhammo patho mahārāja,
ja530:13.2	adhammo pana uppatho;
ja530:13.3	Adhammo nirayaṁ neti,
ja530:13.4	dhammo pāpeti suggatiṁ.
ja530:14.1	Adhammacārino rāja,
ja530:14.2	narā visamajīvino;
ja530:14.3	Yaṁ gatiṁ pecca gacchanti,
ja530:14.4	niraye te suṇohi me.
ja530:15.1	Sañjīvo kāḷasutto ca,
ja530:15.2	saṅghāto dve ca roruvā;
ja530:15.3	Athāparo mahāvīci,
ja530:15.4	tāpano ca patāpano.
ja530:16.1	Iccete aṭṭha nirayā,
ja530:16.2	akkhātā duratikkamā;
ja530:16.3	Ākiṇṇā luddakammehi,
ja530:16.4	paccekā soḷasussadā.
ja530:17.1	Kadariyatāpanā ghorā,
ja530:17.2	accimanto mahabbhayā;
ja530:17.3	Lomahaṁsanarūpā ca,
ja530:17.4	bhesmā paṭibhayā dukhā.
ja530:18.1	Catukkaṇṇā catudvārā,
ja530:18.2	vibhattā bhāgaso mitā;
ja530:18.3	Ayopākārapariyantā,
ja530:18.4	ayasā paṭikujjitā.
ja530:19.1	Tesaṁ ayomayā bhūmi,
ja530:19.2	jalitā tejasā yutā;
ja530:19.3	Samantā yojanasataṁ,
ja530:19.4	phuṭā tiṭṭhanti sabbadā.
ja530:20.1	Ete patanti niraye,
ja530:20.2	uddhampādā avaṁsirā;
ja530:20.3	Isīnaṁ ativattāro,
ja530:20.4	saññatānaṁ tapassinaṁ.
ja530:21.1	Te bhūnahuno paccanti,
ja530:21.2	macchā bilakatā yathā;
ja530:21.3	Saṁvacchare asaṅkheyye,
ja530:21.4	narā kibbisakārino.
ja530:22.1	Ḍayhamānena gattena,
ja530:22.2	niccaṁ santarabāhiraṁ;
ja530:22.3	Nirayā nādhigacchanti,
ja530:22.4	dvāraṁ nikkhamanesino.
ja530:23.1	Puratthimena dhāvanti,
ja530:23.2	tato dhāvanti pacchato;
ja530:23.3	Uttarenapi dhāvanti,
ja530:23.4	tato dhāvanti dakkhiṇaṁ;
ja530:23.5	Yaṁ yañhi dvāraṁ gacchanti,
ja530:23.6	taṁ tadeva pidhīyare.
ja530:24.1	Bahūni vassasahassāni,
ja530:24.2	janā nirayagāmino;
ja530:24.3	Bāhā paggayha kandanti,
ja530:24.4	patvā dukkhaṁ anappakaṁ.
ja530:25.1	Āsīvisaṁva kupitaṁ,
ja530:25.2	tejassiṁ duratikkamaṁ;
ja530:25.3	Na sādhurūpe āsīde,
ja530:25.4	saññatānaṁ tapassinaṁ.
ja530:26.1	Atikāyo mahissāso,
ja530:26.2	ajjuno kekakādhipo;
ja530:26.3	Sahassabāhu ucchinno,
ja530:26.4	isimāsajja gotamaṁ.
ja530:27.1	Arajaṁ rajasā vacchaṁ,
ja530:27.2	Kisaṁ avakiriya daṇḍakī;
ja530:27.3	Tālova mūlato chinno,
ja530:27.4	Sa rājā vibhavaṅgato.
ja530:28.1	Upahacca manaṁ majjho,
ja530:28.2	mātaṅgasmiṁ yasassine;
ja530:28.3	Sapārisajjo ucchinno,
ja530:28.4	majjhāraññaṁ tadā ahu.
ja530:29.1	Kaṇhadīpāyanāsajja,
ja530:29.2	Isiṁ andhakaveṇḍayo;
ja530:29.3	Aññoññaṁ musalā hantvā,
ja530:29.4	Sampattā yamasādhanaṁ.
ja530:30.1	Athāyaṁ isinā satto,
ja530:30.2	antalikkhacaro pure;
ja530:30.3	Pāvekkhi pathaviṁ cecco,
ja530:30.4	hīnatto pattapariyāyaṁ.
ja530:31.1	Tasmā hi chandāgamanaṁ,
ja530:31.2	nappasaṁsanti paṇḍitā;
ja530:31.3	Aduṭṭhacitto bhāseyya,
ja530:31.4	giraṁ saccūpasaṁhitaṁ.
ja530:32.1	Manasā ce paduṭṭhena,
ja530:32.2	yo naro pekkhate muniṁ;
ja530:32.3	Vijjācaraṇasampannaṁ,
ja530:32.4	gantā so nirayaṁ adho.
ja530:33.1	Ye vuḍḍhe paribhāsanti,
ja530:33.2	pharusūpakkamā janā;
ja530:33.3	Anapaccā adāyādā,
ja530:33.4	tālavatthu bhavanti te.
ja530:34.1	Yo ca pabbajitaṁ hanti,
ja530:34.2	katakiccaṁ mahesinaṁ;
ja530:34.3	Sa kāḷasutte niraye,
ja530:34.4	cirarattāya paccati.
ja530:35.1	Yo ca rājā adhammaṭṭho,
ja530:35.2	raṭṭhaviddhaṁsano mago;
ja530:35.3	Tāpayitvā janapadaṁ,
ja530:35.4	tāpane pecca paccati.
ja530:36.1	So ca vassasahassāni,
ja530:36.2	sataṁ dibbāni paccati;
ja530:36.3	Accisaṅghapareto so,
ja530:36.4	dukkhaṁ vedeti vedanaṁ.
ja530:37.1	Tassa aggisikhā kāyā,
ja530:37.2	niccharanti pabhassarā;
ja530:37.3	Tejobhakkhassa gattāni,
ja530:37.4	lomehi ca nakhehi ca.
ja530:38.1	Ḍayhamānena gattena,
ja530:38.2	niccaṁ santarabāhiraṁ;
ja530:38.3	Dukkhābhitunno nadati,
ja530:38.4	nāgo tuttaṭṭito yathā.
ja530:39.1	Yo lobhā pitaraṁ hanti,
ja530:39.2	dosā vā purisādhamo;
ja530:39.3	Sa kāḷasutte niraye,
ja530:39.4	cirarattāya paccati.
ja530:40.1	Sa tādiso paccati lohakumbhiyaṁ,
ja530:40.2	Pakkañca sattīhi hananti nittacaṁ;
ja530:40.3	Andhaṁ karitvā muttakarīsabhakkhaṁ,
ja530:40.4	Khāre nimujjanti tathāvidhaṁ naraṁ.
ja530:41.1	Tattaṁ pakkuthitamayoguḷañca,
ja530:41.2	Dīghe ca phāle cirarattatāpite;
ja530:41.3	Vikkhambhamādāya vibandharajjubhi,
ja530:41.4	Vivaṭe mukhe sampavisanti rakkhasā.
ja530:42.1	Sāmā ca soṇā sabalā ca gijjhā,
ja530:42.2	Kākoḷasaṅghā ca dijā ayomukhā;
ja530:42.3	Saṅgamma khādanti vipphandamānaṁ,
ja530:42.4	Jivhaṁ vibhajja vighāsaṁ salohitaṁ.
ja530:43.1	Taṁ daḍḍhatālaṁ paribhinnagattaṁ,
ja530:43.2	Nippothayantā anuvicaranti rakkhasā;
ja530:43.3	Ratī hi nesaṁ dukhino panītare,
ja530:43.4	Etādisasmiṁ niraye vasanti;
ja530:43.5	Ye keci loke idha pettighātino.
ja530:44.1	Putto ca mātaraṁ hantvā,
ja530:44.2	ito gantvā yamakkhayaṁ;
ja530:44.3	Bhusamāpajjate dukkhaṁ,
ja530:44.4	attakammaphalūpago.
ja530:45.1	Amanussā atibalā,
ja530:45.2	hantāraṁ janayantiyā;
ja530:45.3	Ayomayehi vālehi,
ja530:45.4	pīḷayanti punappunaṁ.
ja530:46.1	Tamassavaṁ sakā gattā,
ja530:46.2	rudhiraṁ attasambhavaṁ;
ja530:46.3	Tambalohavilīnaṁva,
ja530:46.4	tattaṁ pāyenti mattighaṁ.
ja530:47.1	Jigucchaṁ kuṇapaṁ pūtiṁ,
ja530:47.2	Duggandhaṁ gūthakaddamaṁ;
ja530:47.3	Pubbalohitasaṅkāsaṁ,
ja530:47.4	Rahadamogayha tiṭṭhati.
ja530:48.1	Tamenaṁ kimayo tattha,
ja530:48.2	atikāyā ayomukhā;
ja530:48.3	Chaviṁ bhetvāna khādanti,
ja530:48.4	saṅgiddhā maṁsalohite.
ja530:49.1	So ca taṁ nirayaṁ patto,
ja530:49.2	nimuggo sataporisaṁ;
ja530:49.3	Pūtikaṁ kuṇapaṁ vāti,
ja530:49.4	samantā satayojanaṁ.
ja530:50.1	Cakkhumāpi hi cakkhūhi,
ja530:50.2	tena gandhena jīyati;
ja530:50.3	Etādisaṁ brahmadatta,
ja530:50.4	mātugho labhate dukhaṁ.
ja530:51.1	Khuradhāramanukkamma,
ja530:51.2	tikkhaṁ durabhisambhavaṁ;
ja530:51.3	Patanti gabbhapātiyo,
ja530:51.4	duggaṁ vetaraṇiṁ nadiṁ.
ja530:52.1	Ayomayā simbaliyo,
ja530:52.2	soḷasaṅgulakaṇṭakā;
ja530:52.3	Ubhato abhilambanti,
ja530:52.4	duggaṁ vetaraṇiṁ nadiṁ.
ja530:53.1	Te accimanto tiṭṭhanti,
ja530:53.2	aggikkhandhāva ārakā;
ja530:53.3	Ādittā jātavedena,
ja530:53.4	uddhaṁ yojanamuggatā.
ja530:54.1	Ete vajanti niraye,
ja530:54.2	tatte tikhiṇakaṇṭake;
ja530:54.3	Nāriyo ca aticārā,
ja530:54.4	narā ca paradāragū.
ja530:55.1	Te patanti adhokkhandhā,
ja530:55.2	vivattā vihatā puthū;
ja530:55.3	Sayanti vinividdhaṅgā,
ja530:55.4	dīghaṁ jagganti sabbadā.
ja530:56.1	Tato ratyā vivasāne,
ja530:56.2	mahatiṁ pabbatūpamaṁ;
ja530:56.3	Lohakumbhiṁ pavajjanti,
ja530:56.4	tattaṁ aggisamūdakaṁ.
ja530:57.1	Evaṁ divā ca ratto ca,
ja530:57.2	dussīlā mohapārutā;
ja530:57.3	Anubhonti sakaṁ kammaṁ,
ja530:57.4	pubbe dukkaṭamattano.
ja530:58.1	Yā ca bhariyā dhanakkītā,
ja530:58.2	sāmikaṁ atimaññati;
ja530:58.3	Sassuṁ vā sasuraṁ vāpi,
ja530:58.4	jeṭṭhaṁ vāpi nanandaraṁ.
ja530:59.1	Tassā vaṅkena jivhaggaṁ,
ja530:59.2	nibbahanti sabandhanaṁ;
ja530:59.3	Sa byāmamattaṁ kiminaṁ,
ja530:59.4	jivhaṁ passati attani;
ja530:59.5	Viññāpetuṁ na sakkoti,
ja530:59.6	tāpane pecca paccati.
ja530:60.1	Orabbhikā sūkarikā,
ja530:60.2	macchikā migabandhakā;
ja530:60.3	Corā goghātakā luddā,
ja530:60.4	avaṇṇe vaṇṇakārakā.
ja530:61.1	Sattīhi lohakūṭehi,
ja530:61.2	nettiṁsehi usūhi ca;
ja530:61.3	Haññamānā khāranadiṁ,
ja530:61.4	papatanti avaṁsirā.
ja530:62.1	Sāyaṁ pāto kūṭakārī,
ja530:62.2	ayokūṭehi haññati;
ja530:62.3	Tato vantaṁ durattānaṁ,
ja530:62.4	paresaṁ bhuñjare sadā.
ja530:63.1	Dhaṅkā bheraṇḍakā gijjhā,
ja530:63.2	kākoḷā ca ayomukhā;
ja530:63.3	Vipphandamānaṁ khādanti,
ja530:63.4	naraṁ kibbisakārakaṁ.
ja530:64.1	Ye migena migaṁ hanti,
ja530:64.2	pakkhiṁ vā pana pakkhinā;
ja530:64.3	Asanto rajasā channā,
ja530:64.4	gantā te nirayussadaṁ.
ja530:65.1	Santo ca uddhaṁ gacchanti,
ja530:65.2	suciṇṇenidha kammunā;
ja530:65.3	Suciṇṇassa phalaṁ passa,
ja530:65.4	saindā devā sabrahmakā.
ja530:66.1	Taṁ taṁ brūmi mahārāja,
ja530:66.2	Dhammaṁ raṭṭhapatī cara;
ja530:66.3	Tathā rāja carāhi dhammaṁ,
ja530:66.4	Yathā taṁ suciṇṇaṁ nānutappeyya pacchā”ti.
ja530:67.1	Saṅkiccajātakaṁ dutiyaṁ.
ja530:68.1	Saṭṭhinipātaṁ niṭṭhitaṁ.
ja530:69.1	Tassuddānaṁ
ja530:70.1	Atha saṭṭhinipātamhi,
ja530:70.2	Suṇātha mama bhāsitaṁ;
ja530:70.3	Jātakasavhayano pavaro,
ja530:70.4	Soṇakaarindamasavhayano;
ja530:70.5	Tathā vuttarathesabhakiccavaroti.
ja531:0.1	Jātaka
ja531:0.2	Sattatinipāta
ja531:0.3	Kusavagga
ja531:0.4	1. Kusajātaka
ja531:1.1	“Idaṁ te raṭṭhaṁ sadhanaṁ sayoggaṁ,
ja531:1.2	Sakāyuraṁ sabbakāmūpapannaṁ;
ja531:1.3	Idaṁ te rajjaṁ anusāsa amma,
ja531:1.4	Gacchāmahaṁ yattha piyā pabhāvatī”.
ja531:2.1	“Anujjubhūtena haraṁ mahantaṁ,
ja531:2.2	Divā ca ratto ca nisīthakāle;
ja531:2.3	Paṭigaccha tvaṁ khippaṁ kusāvatiṁ kusa,
ja531:2.4	Nicchāmi dubbaṇṇamahaṁ vasantaṁ”.
ja531:3.1	“Nāhaṁ gamissāmi ito kusāvatiṁ,
ja531:3.2	Pabhāvatī vaṇṇapalobhito tava;
ja531:3.3	Ramāmi maddassa niketaramme,
ja531:3.4	Hitvāna raṭṭhaṁ tava dassane rato.
ja531:4.1	Pabhāvatī vaṇṇapalobhito tava,
ja531:4.2	Sammūḷharūpo vicarāmi mediniṁ;
ja531:4.3	Disaṁ na jānāmi kutomhi āgato,
ja531:4.4	Tayamhi matto migamandalocane.
ja531:5.1	Suvaṇṇacīravasane,
ja531:5.2	jātarūpasumekhale;
ja531:5.3	Sussoṇi tava kāmā hi,
ja531:5.4	nāhaṁ rajjena matthiko”.
ja531:6.1	“Abbhūti tassa bho hoti,
ja531:6.2	yo anicchantamicchati;
ja531:6.3	Akāmaṁ rāja kāmesi,
ja531:6.4	akantaṁ kantumicchasi”.
ja531:7.1	“Akāmaṁ vā sakāmaṁ vā,
ja531:7.2	yo naro labhate piyaṁ;
ja531:7.3	Lābhamettha pasaṁsāma,
ja531:7.4	alābho tattha pāpako”.
ja531:8.1	“Pāsāṇasāraṁ khaṇasi,
ja531:8.2	kaṇikārassa dārunā;
ja531:8.3	Vātaṁ jālena bādhesi,
ja531:8.4	yo anicchantamicchasi”.
ja531:9.1	“Pāsāṇo nūna te hadaye,
ja531:9.2	ohito mudulakkhaṇe;
ja531:9.3	Yo te sātaṁ na vindāmi,
ja531:9.4	tirojanapadāgato.
ja531:10.1	Yadā maṁ bhakuṭiṁ katvā,
ja531:10.2	rājaputtī udikkhati;
ja531:10.3	Āḷāriko tadā homi,
ja531:10.4	rañño maddassantepure.
ja531:11.1	Yadā umhayamānā maṁ,
ja531:11.2	rājaputtī udikkhati;
ja531:11.3	Nāḷāriko tadā homi,
ja531:11.4	rājā homi tadā kuso”.
ja531:12.1	“Sace hi vacanaṁ saccaṁ,
ja531:12.2	nemittānaṁ bhavissati;
ja531:12.3	Neva me tvaṁ patī assa,
ja531:12.4	kāmaṁ chindantu sattadhā”.
ja531:13.1	“Sace hi vacanaṁ saccaṁ,
ja531:13.2	aññesaṁ yadi vā mamaṁ;
ja531:13.3	Neva tuyhaṁ patī atthi,
ja531:13.4	añño sīhassarā kusā”.
ja531:14.1	“Nekkhaṁ gīvaṁ te kāressaṁ,
ja531:14.2	patvā khujje kusāvatiṁ;
ja531:14.3	Sace maṁ nāganāsūrū,
ja531:14.4	olokeyya pabhāvatī.
ja531:15.1	Nekkhaṁ gīvaṁ te kāressaṁ,
ja531:15.2	patvā khujje kusāvatiṁ;
ja531:15.3	Sace maṁ nāganāsūrū,
ja531:15.4	ālapeyya pabhāvatī.
ja531:16.1	Nekkhaṁ gīvaṁ te kāressaṁ,
ja531:16.2	patvā khujje kusāvatiṁ;
ja531:16.3	Sace maṁ nāganāsūrū,
ja531:16.4	umhāyeyya pabhāvatī.
ja531:17.1	Nekkhaṁ gīvaṁ te kāressaṁ,
ja531:17.2	patvā khujje kusāvatiṁ;
ja531:17.3	Sace maṁ nāganāsūrū,
ja531:17.4	pamhāyeyya pabhāvatī.
ja531:18.1	Nekkhaṁ gīvaṁ te kāressaṁ,
ja531:18.2	patvā khujje kusāvatiṁ;
ja531:18.3	Sace maṁ nāganāsūrū,
ja531:18.4	pāṇīhi upasamphuse”.
ja531:19.1	“Na hi nūnāyaṁ rājaputtī,
ja531:19.2	kuse sātampi vindati;
ja531:19.3	Āḷārike bhate pose,
ja531:19.4	vetanena anatthike”.
ja531:20.1	“Na hi nūnāyaṁ sā khujjā,
ja531:20.2	labhati jivhāya chedanaṁ;
ja531:20.3	Sunisitena satthena,
ja531:20.4	evaṁ dubbhāsitaṁ bhaṇaṁ”.
ja531:21.1	“Mā naṁ rūpena pāmesi,
ja531:21.2	ārohena pabhāvati;
ja531:21.3	Mahāyasoti katvāna,
ja531:21.4	karassu rucire piyaṁ.
ja531:22.1	Mā naṁ rūpena pāmesi,
ja531:22.2	ārohena pabhāvati;
ja531:22.3	Mahaddhanoti katvāna,
ja531:22.4	karassu rucire piyaṁ.
ja531:23.1	Mā naṁ rūpena pāmesi,
ja531:23.2	ārohena pabhāvati;
ja531:23.3	Mahabbaloti katvāna,
ja531:23.4	karassu rucire piyaṁ.
ja531:24.1	Mā naṁ rūpena pāmesi,
ja531:24.2	ārohena pabhāvati;
ja531:24.3	Mahāraṭṭhoti katvāna,
ja531:24.4	karassu rucire piyaṁ.
ja531:25.1	Mā naṁ rūpena pāmesi,
ja531:25.2	ārohena pabhāvati;
ja531:25.3	Mahārājāti katvāna,
ja531:25.4	karassu rucire piyaṁ.
ja531:26.1	Mā naṁ rūpena pāmesi,
ja531:26.2	ārohena pabhāvati;
ja531:26.3	Sīhassaroti katvāna,
ja531:26.4	karassu rucire piyaṁ.
ja531:27.1	Mā naṁ rūpena pāmesi,
ja531:27.2	ārohena pabhāvati;
ja531:27.3	Vaggussaroti katvāna,
ja531:27.4	karassu rucire piyaṁ.
ja531:28.1	Mā naṁ rūpena pāmesi,
ja531:28.2	ārohena pabhāvati;
ja531:28.3	Bindussaroti katvāna,
ja531:28.4	karassu rucire piyaṁ.
ja531:29.1	Mā naṁ rūpena pāmesi,
ja531:29.2	ārohena pabhāvati;
ja531:29.3	Mañjussaroti katvāna,
ja531:29.4	karassu rucire piyaṁ.
ja531:30.1	Mā naṁ rūpena pāmesi,
ja531:30.2	ārohena pabhāvati;
ja531:30.3	Madhussaroti katvāna,
ja531:30.4	karassu rucire piyaṁ.
ja531:31.1	Mā naṁ rūpena pāmesi,
ja531:31.2	ārohena pabhāvati;
ja531:31.3	Satasippoti katvāna,
ja531:31.4	karassu rucire piyaṁ.
ja531:32.1	Mā naṁ rūpena pāmesi,
ja531:32.2	ārohena pabhāvati;
ja531:32.3	Khattiyotipi katvāna,
ja531:32.4	karassu rucire piyaṁ.
ja531:33.1	Mā naṁ rūpena pāmesi,
ja531:33.2	ārohena pabhāvati;
ja531:33.3	Kusarājāti katvāna,
ja531:33.4	karassu rucire piyaṁ”.
ja531:34.1	“Ete nāgā upatthaddhā,
ja531:34.2	sabbe tiṭṭhanti vammitā;
ja531:34.3	Purā maddanti pākāraṁ,
ja531:34.4	ānentetaṁ pabhāvatiṁ”.
ja531:35.1	“Satta bile karitvāna,
ja531:35.2	ahametaṁ pabhāvatiṁ;
ja531:35.3	Khattiyānaṁ padassāmi,
ja531:35.4	ye maṁ hantuṁ idhāgatā”.
ja531:36.1	“Avuṭṭhahi rājaputtī,
ja531:36.2	sāmā koseyyavāsinī;
ja531:36.3	Assupuṇṇehi nettehi,
ja531:36.4	dāsīgaṇapurakkhatā”.
ja531:37.1	“Taṁ nūna kakkūpanisevitaṁ mukhaṁ,
ja531:37.2	Ādāsadantātharupaccavekkhitaṁ;
ja531:37.3	Subhaṁ sunettaṁ virajaṁ anaṅgaṇaṁ,
ja531:37.4	Chuddhaṁ vane ṭhassati khattiyehi.
ja531:38.1	Te nūna me asite vellitagge,
ja531:38.2	Kese mudū candanasāralitte;
ja531:38.3	Samākule sīvathikāya majjhe,
ja531:38.4	Pādehi gijjhā parikaḍḍhissanti.
ja531:39.1	Tā nūna me tambanakhā sulomā,
ja531:39.2	Bāhā mudū candanasāralittā;
ja531:39.3	Chinnā vane ujjhitā khattiyehi,
ja531:39.4	Gayha dhaṅko gacchati yenakāmaṁ.
ja531:40.1	Te nūna tālūpanibhe alambe,
ja531:40.2	Nisevite kāsikacandanena;
ja531:40.3	Thanesu me lambissati siṅgālo,
ja531:40.4	Mātūva putto taruṇo tanūjo.
ja531:41.1	Taṁ nūna soṇiṁ puthulaṁ sukoṭṭitaṁ,
ja531:41.2	Nisevitaṁ kañcanamekhalāhi;
ja531:41.3	Chinnaṁ vane khattiyehī avatthaṁ,
ja531:41.4	Siṅgālasaṅghā parikaḍḍhissanti.
ja531:42.1	Soṇā dhaṅkā siṅgālā ca,
ja531:42.2	ye caññe santi dāṭhino;
ja531:42.3	Ajarā nūna hessanti,
ja531:42.4	bhakkhayitvā pabhāvatiṁ.
ja531:43.1	Sace maṁsāni hariṁsu,
ja531:43.2	khattiyā dūragāmino;
ja531:43.3	Aṭṭhīni amma yācitvā,
ja531:43.4	anupathe dahātha naṁ.
ja531:44.1	Khettāni amma kāretvā,
ja531:44.2	kaṇikārettha ropaya;
ja531:44.3	Yadā te pupphitā assu,
ja531:44.4	hemantānaṁ himaccaye;
ja531:44.5	Sareyyātha mamaṁ amma,
ja531:44.6	evaṁvaṇṇā pabhāvatī”.
ja531:45.1	“Tassā mātā udaṭṭhāsi,
ja531:45.2	khattiyā devavaṇṇinī;
ja531:45.3	Disvā asiñca sūnañca,
ja531:45.4	rañño maddassantepure”.
ja531:46.1	“Iminā nūna asinā,
ja531:46.2	susaññaṁ tanumajjhimaṁ;
ja531:46.3	Dhītaraṁ madda hantvāna,
ja531:46.4	khattiyānaṁ padassasi.
ja531:47.1	Na me akāsi vacanaṁ,
ja531:47.2	atthakāmāya puttike;
ja531:47.3	Sājja lohitasañchannā,
ja531:47.4	gacchasi yamasādhanaṁ.
ja531:48.1	Evamāpajjatī poso,
ja531:48.2	pāpiyañca nigacchati;
ja531:48.3	Yo ve hitānaṁ vacanaṁ,
ja531:48.4	na karoti atthadassinaṁ.
ja531:49.1	Sace ca ajja dhāresi,
ja531:49.2	kumāraṁ cārudassanaṁ;
ja531:49.3	Kusena jātaṁ khattiyaṁ,
ja531:49.4	suvaṇṇamaṇimekhalaṁ;
ja531:49.5	Pūjitaṁ ñātisaṅghehi,
ja531:49.6	na gacchasi yamakkhayaṁ.
ja531:50.1	Yatthassu bherī nadati,
ja531:50.2	kuñjaro ca nikūjati;
ja531:50.3	Khattiyānaṁ kule bhadde,
ja531:50.4	kiṁ nu sukhataraṁ tato.
ja531:51.1	Asso ca sisati dvāre,
ja531:51.2	kumāro uparodati;
ja531:51.3	Khattiyānaṁ kule bhadde,
ja531:51.4	kiṁ nu sukhataraṁ tato.
ja531:52.1	Mayūrakoñcābhirude,
ja531:52.2	kokilābhinikūjite;
ja531:52.3	Khattiyānaṁ kule bhadde,
ja531:52.4	kiṁ nu sukhataraṁ tato”.
ja531:53.1	“Kahaṁ nu so sattumaddano,
ja531:53.2	pararaṭṭhappamaddano;
ja531:53.3	Kuso soḷārapaññāṇo,
ja531:53.4	yo no dukkhā pamocaye”.
ja531:54.1	“Idheva so sattumaddano,
ja531:54.2	pararaṭṭhappamaddano;
ja531:54.3	Kuso soḷārapaññāṇo,
ja531:54.4	yo te sabbe vadhissati”.
ja531:55.1	“Ummattikā nu bhaṇasi,
ja531:55.2	Andhabālā pabhāsasi;
ja531:55.3	Kuso ce āgato assa,
ja531:55.4	Kiṁ na jānemu taṁ mayaṁ”.
ja531:56.1	“Eso āḷāriko poso,
ja531:56.2	kumārīpuramantare;
ja531:56.3	Daḷhaṁ katvāna saṁvelliṁ,
ja531:56.4	kumbhiṁ dhovati oṇato”.
ja531:57.1	“Veṇī tvamasi caṇḍālī,
ja531:57.2	adūsi kulagandhinī;
ja531:57.3	Kathaṁ maddakule jātā,
ja531:57.4	dāsaṁ kayirāsi kāmukaṁ”.
ja531:58.1	“Namhi veṇī na caṇḍālī,
ja531:58.2	na camhi kulagandhinī;
ja531:58.3	Okkākaputto bhaddante,
ja531:58.4	tvaṁ nu dāsoti maññasi”.
ja531:59.1	“Yo brāhmaṇasahassāni,
ja531:59.2	sadā bhojeti vīsatiṁ;
ja531:59.3	Okkākaputto bhaddante,
ja531:59.4	tvaṁ nu dāsoti maññasi.
ja531:60.1	Yassa nāgasahassāni,
ja531:60.2	sadā yojenti vīsatiṁ;
ja531:60.3	Okkākaputto bhaddante,
ja531:60.4	tvaṁ nu dāsoti maññasi.
ja531:61.1	Yassa assasahassāni,
ja531:61.2	sadā yojenti vīsatiṁ;
ja531:61.3	Okkākaputto bhaddante,
ja531:61.4	tvaṁ nu dāsoti maññasi.
ja531:62.1	Yassa rathasahassāni,
ja531:62.2	sadā yojenti vīsatiṁ;
ja531:62.3	Okkākaputto bhaddante,
ja531:62.4	tvaṁ nu dāsoti maññasi.
ja531:63.1	Yassa usabhasahassāni,
ja531:63.2	sadā yojenti vīsatiṁ;
ja531:63.3	Okkākaputto bhaddante,
ja531:63.4	tvaṁ nu dāsoti maññasi.
ja531:64.1	Yassa dhenusahassāni,
ja531:64.2	sadā duhanti vīsatiṁ;
ja531:64.3	Okkākaputto bhaddante,
ja531:64.4	tvaṁ nu dāsoti maññasi”.
ja531:65.1	“Taggha te dukkaṭaṁ bāle,
ja531:65.2	yaṁ khattiyaṁ mahabbalaṁ;
ja531:65.3	Nāgaṁ maṇḍūkavaṇṇena,
ja531:65.4	na naṁ akkhāsidhāgataṁ”.
ja531:66.1	“Aparādhaṁ mahārāja,
ja531:66.2	tvaṁ no khama rathesabha;
ja531:66.3	Yaṁ taṁ aññātavesena,
ja531:66.4	nāññāsimhā idhāgataṁ”.
ja531:67.1	“Mādisassa na taṁ channaṁ,
ja531:67.2	yohaṁ āḷāriko bhave;
ja531:67.3	Tvaññeva me pasīdassu,
ja531:67.4	natthi te deva dukkaṭaṁ”.
ja531:68.1	“Gaccha bāle khamāpehi,
ja531:68.2	kusarājaṁ mahabbalaṁ;
ja531:68.3	Khamāpito kuso rājā,
ja531:68.4	so te dassati jīvitaṁ”.
ja531:69.1	“Pitussa vacanaṁ sutvā,
ja531:69.2	devavaṇṇī pabhāvatī;
ja531:69.3	Sirasā aggahī pāde,
ja531:69.4	kusarājaṁ mahabbalaṁ”.
ja531:70.1	“Yāmā ratyo atikkantā,
ja531:70.2	tāmā deva tayā vinā;
ja531:70.3	Vande te sirasā pāde,
ja531:70.4	mā me kujjha rathesabha.
ja531:71.1	Sabbaṁ te paṭijānāmi,
ja531:71.2	mahārāja suṇohi me;
ja531:71.3	Na cāpi appiyaṁ tuyhaṁ,
ja531:71.4	kareyyāmi ahaṁ puna.
ja531:72.1	Evañce yācamānāya,
ja531:72.2	vacanaṁ me na kāhasi;
ja531:72.3	Idāni maṁ tāto hantvā,
ja531:72.4	khattiyānaṁ padassati”.
ja531:73.1	“Evaṁ te yācamānāya,
ja531:73.2	kiṁ na kāhāmi te vaco;
ja531:73.3	Vikuddho tyasmi kalyāṇi,
ja531:73.4	mā tvaṁ bhāyi pabhāvati.
ja531:74.1	Sabbaṁ te paṭijānāmi,
ja531:74.2	rājaputti suṇohi me;
ja531:74.3	Na cāpi appiyaṁ tuyhaṁ,
ja531:74.4	kareyyāmi ahaṁ puna.
ja531:75.1	Tava kāmā hi sussoṇi,
ja531:75.2	pahu dukkhaṁ titikkhisaṁ;
ja531:75.3	Bahuṁ maddakulaṁ hantvā,
ja531:75.4	nayituṁ taṁ pabhāvati”.
ja531:76.1	“Yojayantu rathe asse,
ja531:76.2	nānācitte samāhite;
ja531:76.3	Atha dakkhatha me vegaṁ,
ja531:76.4	vidhamantassa sattavo”.
ja531:77.1	“Tañca tattha udikkhiṁsu,
ja531:77.2	rañño maddassantepure;
ja531:77.3	Vijambhamānaṁ sīhaṁva,
ja531:77.4	phoṭentaṁ diguṇaṁ bhujaṁ.
ja531:78.1	Hatthikkhandhañca āruyha,
ja531:78.2	āropetvā pabhāvatiṁ;
ja531:78.3	Saṅgāmaṁ otaritvāna,
ja531:78.4	sīhanādaṁ nadī kuso.
ja531:79.1	Tassa taṁ nadato sutvā,
ja531:79.2	sīhassevitare migā;
ja531:79.3	Khattiyā vipalāyiṁsu,
ja531:79.4	kusasaddabhayaṭṭitā.
ja531:80.1	Hatthārohā anīkaṭṭhā,
ja531:80.2	rathikā pattikārakā;
ja531:80.3	Aññamaññassa chindanti,
ja531:80.4	kusasaddabhayaṭṭitā.
ja531:81.1	Tasmiṁ saṅgāmasīsasmiṁ,
ja531:81.2	passitvā haṭṭhamānaso;
ja531:81.3	Kusassa rañño devindo,
ja531:81.4	adā verocanaṁ maṇiṁ.
ja531:82.1	So taṁ vijitvā saṅgāmaṁ,
ja531:82.2	laddhā verocanaṁ maṇiṁ;
ja531:82.3	Hatthikkhandhagato rājā,
ja531:82.4	pāvekkhi nagaraṁ puraṁ.
ja531:83.1	Jīvaggāhaṁ gahetvāna,
ja531:83.2	bandhitvā satta khattiye;
ja531:83.3	Sasurassupanāmesi,
ja531:83.4	ime te deva sattavo.
ja531:84.1	Sabbeva te vasaṁ gatā,
ja531:84.2	amittā vihatā tava;
ja531:84.3	Kāmaṁ karohi te tayā,
ja531:84.4	muñca vā te hanassu vā”.
ja531:85.1	“Tuyheva sattavo ete,
ja531:85.2	na hi te mayha sattavo;
ja531:85.3	Tvaññeva no mahārāja,
ja531:85.4	muñca vā te hanassu vā”.
ja531:86.1	“Imā te dhītaro satta,
ja531:86.2	devakaññūpamā subhā;
ja531:86.3	Dadāhi nesaṁ ekekaṁ,
ja531:86.4	hontu jāmātaro tava”.
ja531:87.1	“Amhākañceva tāsañca,
ja531:87.2	tvaṁ no sabbesamissaro;
ja531:87.3	Tvaññeva no mahārāja,
ja531:87.4	dehi nesaṁ yadicchasi”.
ja531:88.1	Ekamekassa ekekaṁ,
ja531:88.2	adā sīhassaro kuso;
ja531:88.3	Khattiyānaṁ tadā tesaṁ,
ja531:88.4	rañño maddassa dhītaro.
ja531:89.1	Pīṇitā tena lābhena,
ja531:89.2	tuṭṭhā sīhassare kuse;
ja531:89.3	Sakaraṭṭhāni pāyiṁsu,
ja531:89.4	khattiyā satta tāvade.
ja531:90.1	Pabhāvatiñca ādāya,
ja531:90.2	maṇiṁ verocanaṁ subhaṁ;
ja531:90.3	Kusāvatiṁ kuso rājā,
ja531:90.4	agamāsi mahabbalo.
ja531:91.1	Tyassu ekarathe yantā,
ja531:91.2	pavisantā kusāvatiṁ;
ja531:91.3	Samānā vaṇṇarūpena,
ja531:91.4	nāññamaññātirocisuṁ.
ja531:92.1	Mātā puttena saṅgacchi,
ja531:92.2	ubhayo ca jayampatī;
ja531:92.3	Samaggā te tadā āsuṁ,
ja531:92.4	phītaṁ dharaṇimāvasunti.
ja531:93.1	Kusajātakaṁ paṭhamaṁ.
ja532:0.1	Jātaka
ja532:0.2	Sattatinipāta
ja532:0.3	Kusavagga
ja532:0.4	2. Soṇanandajātaka
ja532:1.1	“Devatā nusi gandhabbo,
ja532:1.2	adu sakko purindado;
ja532:1.3	Manussabhūto iddhimā,
ja532:1.4	kathaṁ jānemu taṁ mayaṁ”.
ja532:2.1	“Nāpi devo na gandhabbo,
ja532:2.2	nāpi sakko purindado;
ja532:2.3	Manussabhūto iddhimā,
ja532:2.4	evaṁ jānāhi bhāradha”.
ja532:3.1	“Katarūpamidaṁ bhoto,
ja532:3.2	veyyāvaccaṁ anappakaṁ;
ja532:3.3	Devamhi vassamānamhi,
ja532:3.4	anovassaṁ bhavaṁ akā.
ja532:4.1	Tato vātātape ghore,
ja532:4.2	sītacchāyaṁ bhavaṁ akā;
ja532:4.3	Tato amittamajjhesu,
ja532:4.4	saratāṇaṁ bhavaṁ akā.
ja532:5.1	Tato phītāni raṭṭhāni,
ja532:5.2	vasino te bhavaṁ akā;
ja532:5.3	Tato ekasataṁ khatye,
ja532:5.4	anuyante bhavaṁ akā.
ja532:6.1	Patītāssu mayaṁ bhoto,
ja532:6.2	Vada taṁ bhañjamicchasi;
ja532:6.3	Hatthiyānaṁ assarathaṁ,
ja532:6.4	Nāriyo ca alaṅkatā;
ja532:6.5	Nivesanāni rammāni,
ja532:6.6	Mayaṁ bhoto dadāmase.
ja532:7.1	Atha vaṅge vā magadhe,
ja532:7.2	mayaṁ bhoto dadāmase;
ja532:7.3	Atha vā assakāvantī,
ja532:7.4	sumanā damma te mayaṁ.
ja532:8.1	Upaḍḍhaṁ vāpi rajjassa,
ja532:8.2	mayaṁ bhoto dadāmase;
ja532:8.3	Sace te attho rajjena,
ja532:8.4	anusāsa yadicchasi”.
ja532:9.1	“Na me atthopi rajjena,
ja532:9.2	nagarena dhanena vā;
ja532:9.3	Athopi janapadena,
ja532:9.4	attho mayhaṁ na vijjati.
ja532:10.1	Bhotova raṭṭhe vijite,
ja532:10.2	araññe atthi assamo;
ja532:10.3	Pitā mayhaṁ janettī ca,
ja532:10.4	ubho sammanti assame.
ja532:11.1	Tesāhaṁ pubbācariyesu,
ja532:11.2	Puññaṁ na labhāmi kātave;
ja532:11.3	Bhavantaṁ ajjhāvaraṁ katvā,
ja532:11.4	Soṇaṁ yācemu saṁvaraṁ”.
ja532:12.1	“Karomi te taṁ vacanaṁ,
ja532:12.2	yaṁ maṁ bhaṇasi brāhmaṇa;
ja532:12.3	Etañca kho no akkhāhi,
ja532:12.4	kīvanto hontu yācakā”.
ja532:13.1	“Parosataṁ jānapadā,
ja532:13.2	mahāsālā ca brāhmaṇā;
ja532:13.3	Ime ca khattiyā sabbe,
ja532:13.4	abhijātā yasassino;
ja532:13.5	Bhavañca rājā manojo,
ja532:13.6	alaṁ hessanti yācakā”.
ja532:14.1	“Hatthī asse ca yojentu,
ja532:14.2	rathaṁ sannayha sārathi;
ja532:14.3	Ābandhanāni gaṇhātha,
ja532:14.4	pādāsussārayaddhaje;
ja532:14.5	Assamaṁ taṁ gamissāmi,
ja532:14.6	yattha sammati kosiyo”.
ja532:15.1	Tato ca rājā pāyāsi,
ja532:15.2	senāya caturaṅginī;
ja532:15.3	Agamā assamaṁ rammaṁ,
ja532:15.4	yattha sammati kosiyo.
ja532:16.1	“Kassa kādambayo kājo,
ja532:16.2	vehāsaṁ caturaṅgulaṁ;
ja532:16.3	Aṁsaṁ asamphusaṁ eti,
ja532:16.4	udahārāya gacchato”.
ja532:17.1	“Ahaṁ soṇo mahārāja,
ja532:17.2	tāpaso sahitabbato;
ja532:17.3	Bharāmi mātāpitaro,
ja532:17.4	rattindivamatandito.
ja532:18.1	Vane phalañca mūlañca,
ja532:18.2	āharitvā disampati;
ja532:18.3	Posemi mātāpitaro,
ja532:18.4	pubbe katamanussaraṁ”.
ja532:19.1	“Icchāma assamaṁ gantuṁ,
ja532:19.2	yattha sammati kosiyo;
ja532:19.3	Maggaṁ no soṇa akkhāhi,
ja532:19.4	yena gacchemu assamaṁ”.
ja532:20.1	“Ayaṁ ekapadī rāja,
ja532:20.2	yenetaṁ meghasannibhaṁ;
ja532:20.3	Koviḷārehi sañchannaṁ,
ja532:20.4	ettha sammati kosiyo”.
ja532:21.1	Idaṁ vatvāna pakkāmi,
ja532:21.2	taramāno mahāisi;
ja532:21.3	Vehāse antalikkhasmiṁ,
ja532:21.4	anusāsitvāna khattiye.
ja532:22.1	Assamaṁ parimajjitvā,
ja532:22.2	paññāpetvāna āsanaṁ;
ja532:22.3	Paṇṇasālaṁ pavisitvā,
ja532:22.4	pitaraṁ paṭibodhayi.
ja532:23.1	“Ime āyanti rājāno,
ja532:23.2	abhijātā yasassino;
ja532:23.3	Assamā nikkhamitvāna,
ja532:23.4	nisīda tvaṁ mahāise”.
ja532:24.1	Tassa taṁ vacanaṁ sutvā,
ja532:24.2	taramāno mahāisi;
ja532:24.3	Assamā nikkhamitvāna,
ja532:24.4	sadvāramhi upāvisi.
ja532:25.1	Tañca disvāna āyantaṁ,
ja532:25.2	jalantaṁriva tejasā;
ja532:25.3	Khatyasaṅghaparibyūḷhaṁ,
ja532:25.4	kosiyo etadabravi.
ja532:26.1	Kassa bherī mudiṅgā ca,
ja532:26.2	saṅkhā paṇavadindimā;
ja532:26.3	Purato paṭipannāni,
ja532:26.4	hāsayantā rathesabhaṁ.
ja532:27.1	Kassa kañcanapaṭṭena,
ja532:27.2	puthunā vijjuvaṇṇinā;
ja532:27.3	Yuvā kalāpasannaddho,
ja532:27.4	ko eti siriyā jalaṁ.
ja532:28.1	Ukkāmukhapahaṭṭhaṁva,
ja532:28.2	khadiraṅgārasannibhaṁ;
ja532:28.3	Mukhañca rucirā bhāti,
ja532:28.4	ko eti siriyā jalaṁ.
ja532:29.1	Kassa paggahitaṁ chattaṁ,
ja532:29.2	sasalākaṁ manoramaṁ;
ja532:29.3	Ādiccaraṁsāvaraṇaṁ,
ja532:29.4	ko eti siriyā jalaṁ.
ja532:30.1	Kassa aṅgaṁ pariggayha,
ja532:30.2	vāḷabījanimuttamaṁ;
ja532:30.3	Caranti varapuññassa,
ja532:30.4	hatthikkhandhena āyato.
ja532:31.1	Kassa setāni chattāni,
ja532:31.2	ājānīyā ca vammitā;
ja532:31.3	Samantā parikīrenti,
ja532:31.4	ko eti siriyā jalaṁ.
ja532:32.1	Kassa ekasataṁ khatyā,
ja532:32.2	anuyantā yasassino;
ja532:32.3	Samantānupariyanti,
ja532:32.4	ko eti siriyā jalaṁ.
ja532:33.1	Hatthi assaratha patti,
ja532:33.2	senā ca caturaṅginī;
ja532:33.3	Samantānupariyanti,
ja532:33.4	ko eti siriyā jalaṁ.
ja532:34.1	Kassesā mahatī senā,
ja532:34.2	piṭṭhito anuvattati;
ja532:34.3	Akkhobhaṇī apariyantā,
ja532:34.4	sāgarasseva ūmiyo.
ja532:35.1	Rājābhirājā manojo,
ja532:35.2	indova jayataṁ pati;
ja532:35.3	Nandassajjhāvaraṁ eti,
ja532:35.4	assamaṁ brahmacārinaṁ.
ja532:36.1	Tassesā mahatī senā,
ja532:36.2	piṭṭhito anuvattati;
ja532:36.3	Akkhobhaṇī apariyantā,
ja532:36.4	sāgarasseva ūmiyo.
ja532:37.1	Anulittā candanena,
ja532:37.2	kāsikuttamadhārino;
ja532:37.3	Sabbe pañjalikā hutvā,
ja532:37.4	isīnaṁ ajjhupāgamuṁ.
ja532:38.1	“Kacci nu bhoto kusalaṁ,
ja532:38.2	kacci bhoto anāmayaṁ;
ja532:38.3	Kacci uñchena yāpetha,
ja532:38.4	kacci mūlaphalā bahū.
ja532:39.1	Kacci ḍaṁsā makasā ca,
ja532:39.2	appameva sarīsapā;
ja532:39.3	Vane vāḷamigākiṇṇe,
ja532:39.4	kacci hiṁsā na vijjati”.
ja532:40.1	“Kusalañceva no rāja,
ja532:40.2	atho rāja anāmayaṁ;
ja532:40.3	Atho uñchena yāpema,
ja532:40.4	atho mūlaphalā bahū.
ja532:41.1	Atho ḍaṁsā makasā ca,
ja532:41.2	appameva sarīsapā;
ja532:41.3	Vane vāḷamigākiṇṇe,
ja532:41.4	hiṁsā mayhaṁ na vijjati.
ja532:42.1	Bahūni vassapūgāni,
ja532:42.2	assame sammataṁ idha;
ja532:42.3	Nābhijānāmi uppannaṁ,
ja532:42.4	ābādhaṁ amanoramaṁ.
ja532:43.1	Svāgataṁ te mahārāja,
ja532:43.2	atho te adurāgataṁ;
ja532:43.3	Issarosi anuppatto,
ja532:43.4	yaṁ idhatthi pavedaya.
ja532:44.1	Tindukāni piyālāni,
ja532:44.2	madhuke kāsumāriyo;
ja532:44.3	Phalāni khuddakappāni,
ja532:44.4	bhuñja rāja varaṁ varaṁ.
ja532:45.1	Idampi pānīyaṁ sītaṁ,
ja532:45.2	ābhataṁ girigabbharā;
ja532:45.3	Tato piva mahārāja,
ja532:45.4	sace tvaṁ abhikaṅkhasi”.
ja532:46.1	“Paṭiggahitaṁ yaṁ dinnaṁ,
ja532:46.2	sabbassa agghiyaṁ kataṁ;
ja532:46.3	Nandassāpi nisāmetha,
ja532:46.4	vacanaṁ so pavakkhati.
ja532:47.1	Ajjhāvaramhā nandassa,
ja532:47.2	bhoto santikamāgatā;
ja532:47.3	Suṇātu bhavaṁ vacanaṁ,
ja532:47.4	nandassa parisāya ca”.
ja532:48.1	“Parosataṁ jānapadā,
ja532:48.2	mahāsālā ca brāhmaṇā;
ja532:48.3	Ime ca khattiyā sabbe,
ja532:48.4	abhijātā yasassino;
ja532:48.5	Bhavañca rājā manojo,
ja532:48.6	anumaññantu me vaco.
ja532:49.1	Ye ca santi samītāro,
ja532:49.2	yakkhāni idha massame;
ja532:49.3	Araññe bhūtabhabyāni,
ja532:49.4	suṇantu vacanaṁ mama.
ja532:50.1	Namo katvāna bhūtānaṁ,
ja532:50.2	isiṁ vakkhāmi subbataṁ;
ja532:50.3	So tyāhaṁ dakkhiṇā bāhu,
ja532:50.4	tava kosiya sammato.
ja532:51.1	Pitaraṁ me janettiñca,
ja532:51.2	bhattukāmassa me sato;
ja532:51.3	Vīra puññamidaṁ ṭhānaṁ,
ja532:51.4	mā maṁ kosiya vāraya.
ja532:52.1	Sabbhi hetaṁ upaññātaṁ,
ja532:52.2	mametaṁ upanissaja;
ja532:52.3	Uṭṭhānapāricariyāya,
ja532:52.4	dīgharattaṁ tayā kataṁ;
ja532:52.5	Mātāpitūsu puññāni,
ja532:52.6	mama lokadado bhava.
ja532:53.1	Tatheva santi manujā,
ja532:53.2	dhamme dhammapadaṁ vidū;
ja532:53.3	Maggo saggassa lokassa,
ja532:53.4	yathā jānāsi tvaṁ ise.
ja532:54.1	Uṭṭhānapāricariyāya,
ja532:54.2	mātāpitusukhāvahaṁ;
ja532:54.3	Taṁ maṁ puññā nivāreti,
ja532:54.4	ariyamaggāvaro naro”.
ja532:55.1	“Suṇantu bhonto vacanaṁ,
ja532:55.2	bhāturajjhāvarā mama;
ja532:55.3	Kulavaṁsaṁ mahārāja,
ja532:55.4	porāṇaṁ parihāpayaṁ;
ja532:55.5	Adhammacārī jeṭṭhesu,
ja532:55.6	nirayaṁ sopapajjati.
ja532:56.1	Ye ca dhammassa kusalā,
ja532:56.2	porāṇassa disampati;
ja532:56.3	Cārittena ca sampannā,
ja532:56.4	na te gacchanti duggatiṁ.
ja532:57.1	Mātā pitā ca bhātā ca,
ja532:57.2	bhaginī ñātibandhavā;
ja532:57.3	Sabbe jeṭṭhassa te bhārā,
ja532:57.4	evaṁ jānāhi bhāradha.
ja532:58.1	Ādiyitvā garuṁ bhāraṁ,
ja532:58.2	nāviko viya ussahe;
ja532:58.3	Dhammañca nappamajjāmi,
ja532:58.4	jeṭṭho casmi rathesabha”.
ja532:59.1	“Adhigamā tame ñāṇaṁ,
ja532:59.2	Jālaṁva jātavedato;
ja532:59.3	Evameva no bhavaṁ dhammaṁ,
ja532:59.4	Kosiyo pavidaṁsayi.
ja532:60.1	Yathā udayamādicco,
ja532:60.2	Vāsudevo pabhaṅkaro;
ja532:60.3	Pāṇīnaṁ pavidaṁseti,
ja532:60.4	Rūpaṁ kalyāṇapāpakaṁ;
ja532:60.5	Evameva no bhavaṁ dhammaṁ,
ja532:60.6	Kosiyo pavidaṁsayi”.
ja532:61.1	“Evaṁ me yācamānassa,
ja532:61.2	añjaliṁ nāvabujjhatha;
ja532:61.3	Tava paddhacaro hessaṁ,
ja532:61.4	vuṭṭhito paricārako”.
ja532:62.1	“Addhā nanda vijānāsi,
ja532:62.2	Saddhammaṁ sabbhi desitaṁ;
ja532:62.3	Ariyo ariyasamācāro,
ja532:62.4	Bāḷhaṁ tvaṁ mama ruccasi.
ja532:63.1	Bhavantaṁ vadāmi bhotiñca,
ja532:63.2	suṇātha vacanaṁ mama;
ja532:63.3	Nāyaṁ bhāro bhāramato,
ja532:63.4	ahu mayhaṁ kudācanaṁ.
ja532:64.1	Taṁ maṁ upaṭṭhitaṁ santaṁ,
ja532:64.2	mātāpitusukhāvahaṁ;
ja532:64.3	Nando ajjhāvaraṁ katvā,
ja532:64.4	upaṭṭhānāya yācati.
ja532:65.1	Yo ve icchati kāmena,
ja532:65.2	santānaṁ brahmacārinaṁ;
ja532:65.3	Nandaṁ vo varatha eko,
ja532:65.4	kaṁ nando upatiṭṭhatu”.
ja532:66.1	“Tayā tāta anuññātā,
ja532:66.2	soṇa taṁ nissitā mayaṁ;
ja532:66.3	Upaghātuṁ labhe nandaṁ,
ja532:66.4	muddhani brahmacārinaṁ.
ja532:67.1	Assatthasseva taruṇaṁ,
ja532:67.2	pavāḷaṁ māluteritaṁ;
ja532:67.3	Cirassaṁ nandaṁ disvāna,
ja532:67.4	hadayaṁ me pavedhati.
ja532:68.1	Yadā suttāpi supine,
ja532:68.2	nandaṁ passāmi āgataṁ;
ja532:68.3	Udaggā sumanā homi,
ja532:68.4	nando no āgato ayaṁ.
ja532:69.1	Yadā ca paṭibujjhitvā,
ja532:69.2	nandaṁ passāmi nāgataṁ;
ja532:69.3	Bhiyyo āvisatī soko,
ja532:69.4	domanassañcanappakaṁ.
ja532:70.1	Sāhaṁ ajja cirassampi,
ja532:70.2	nandaṁ passāmi āgataṁ;
ja532:70.3	Bhattucca mayhañca piyo,
ja532:70.4	nando no pāvisī gharaṁ.
ja532:71.1	Pitupi nando suppiyo,
ja532:71.2	Yaṁ nando nappavase gharā;
ja532:71.3	Labhatū tāta nando taṁ,
ja532:71.4	Maṁ nando upatiṭṭhatu”.
ja532:72.1	“Anukampikā patiṭṭhā ca,
ja532:72.2	pubbe rasadadī ca no;
ja532:72.3	Maggo saggassa lokassa,
ja532:72.4	mātā taṁ varate ise.
ja532:73.1	Pubbe rasadadī gottī,
ja532:73.2	mātā puññūpasaṁhitā;
ja532:73.3	Maggo saggassa lokassa,
ja532:73.4	mātā taṁ varate ise”.
ja532:74.1	“Ākaṅkhamānā puttaphalaṁ,
ja532:74.2	devatāya namassati;
ja532:74.3	Nakkhattāni ca pucchati,
ja532:74.4	utusaṁvaccharāni ca.
ja532:75.1	Tassā utumhi nhātāya,
ja532:75.2	hoti gabbhassa vokkamo;
ja532:75.3	Tena dohaḷinī hoti,
ja532:75.4	suhadā tena vuccati.
ja532:76.1	Saṁvaccharaṁ vā ūnaṁ vā,
ja532:76.2	pariharitvā vijāyati;
ja532:76.3	Tena sā janayantīti,
ja532:76.4	janetti tena vuccati.
ja532:77.1	Thanakhīrena gītena,
ja532:77.2	aṅgapāvuraṇena ca;
ja532:77.3	Rodantaṁ puttaṁ toseti,
ja532:77.4	tosentī tena vuccati.
ja532:78.1	Tato vātātape ghore,
ja532:78.2	mamaṁ katvā udikkhati;
ja532:78.3	Dārakaṁ appajānantaṁ,
ja532:78.4	posentī tena vuccati.
ja532:79.1	Yañca mātudhanaṁ hoti,
ja532:79.2	yañca hoti pituddhanaṁ;
ja532:79.3	Ubhayampetassa gopeti,
ja532:79.4	api puttassa no siyā.
ja532:80.1	Evaṁ putta aduṁ putta,
ja532:80.2	iti mātā vihaññati;
ja532:80.3	Pamattaṁ paradāresu,
ja532:80.4	nisīthe pattayobbane;
ja532:80.5	Sāyaṁ puttaṁ anāyantaṁ,
ja532:80.6	iti mātā vihaññati.
ja532:81.1	Evaṁ kicchā bhato poso,
ja532:81.2	mātu aparicārako;
ja532:81.3	Mātari micchā caritvāna,
ja532:81.4	nirayaṁ sopapajjati.
ja532:82.1	Evaṁ kicchā bhato poso,
ja532:82.2	pitu aparicārako;
ja532:82.3	Pitari micchā caritvāna,
ja532:82.4	nirayaṁ sopapajjati.
ja532:83.1	Dhanāpi dhanakāmānaṁ,
ja532:83.2	Nassati iti me sutaṁ;
ja532:83.3	Mātaraṁ aparicaritvāna,
ja532:83.4	Kicchaṁ vā so nigacchati.
ja532:84.1	Dhanāpi dhanakāmānaṁ,
ja532:84.2	Nassati iti me sutaṁ;
ja532:84.3	Pitaraṁ aparicaritvāna,
ja532:84.4	Kicchaṁ vā so nigacchati.
ja532:85.1	Ānando ca pamodo ca,
ja532:85.2	sadā hasitakīḷitaṁ;
ja532:85.3	Mātaraṁ paricaritvāna,
ja532:85.4	labbhametaṁ vijānato.
ja532:86.1	Ānando ca pamodo ca,
ja532:86.2	sadā hasitakīḷitaṁ;
ja532:86.3	Pitaraṁ paricaritvāna,
ja532:86.4	labbhametaṁ vijānato.
ja532:87.1	Dānañca piyavācā ca,
ja532:87.2	atthacariyā ca yā idha;
ja532:87.3	Samānattatā ca dhammesu,
ja532:87.4	tattha tattha yathārahaṁ;
ja532:87.5	Ete kho saṅgahā loke,
ja532:87.6	rathassāṇīva yāyato.
ja532:88.1	Ete ca saṅgahā nāssu,
ja532:88.2	na mātā puttakāraṇā;
ja532:88.3	Labhetha mānaṁ pūjaṁ vā,
ja532:88.4	pitā vā puttakāraṇā.
ja532:89.1	Yasmā ca saṅgahā ete,
ja532:89.2	sammapekkhanti paṇḍitā;
ja532:89.3	Tasmā mahattaṁ papponti,
ja532:89.4	pāsaṁsā ca bhavanti te.
ja532:90.1	Brahmāti mātāpitaro,
ja532:90.2	pubbācariyāti vuccare;
ja532:90.3	Āhuneyyā ca puttānaṁ,
ja532:90.4	pajāya anukampakā.
ja532:91.1	Tasmā hi ne namasseyya,
ja532:91.2	sakkareyya ca paṇḍito;
ja532:91.3	Annena atho pānena,
ja532:91.4	vatthena sayanena ca;
ja532:91.5	Ucchādanena nhāpanena,
ja532:91.6	pādānaṁ dhovanena ca.
ja532:92.1	Tāya naṁ pāricariyāya,
ja532:92.2	Mātāpitūsu paṇḍitā;
ja532:92.3	Idheva naṁ pasaṁsanti,
ja532:92.4	Pecca sagge pamodatī”ti.
ja532:93.1	Soṇanandajātakaṁ dutiyaṁ.
ja532:94.1	Sattatinipātaṁ niṭṭhitaṁ.
ja532:95.1	Tassuddānaṁ
ja532:96.1	Atha sattatimamhi nipātavare,
ja532:96.2	Sabhāvantu kusāvatirājavaro;
ja532:96.3	Atha soṇasunandavaro ca puna,
ja532:96.4	Abhivāsitasattatimamhi suteti.
ja533:0.1	Jātaka
ja533:0.2	Asītinipāta
ja533:0.3	Cūḷahaṁsavagga
ja533:0.4	1 Cūḷahaṁsajātaka
ja533:1.1	“Sumukha anupacinantā,
ja533:1.2	pakkamanti vihaṅgamā;
ja533:1.3	Gaccha tuvampi mā kaṅkhi,
ja533:1.4	natthi baddhe sahāyatā”.
ja533:2.1	“Gacche vāhaṁ na vā gacche,
ja533:2.2	na tena amaro siyaṁ;
ja533:2.3	Sukhitaṁ taṁ upāsitvā,
ja533:2.4	dukkhitaṁ taṁ kathaṁ jahe.
ja533:3.1	Maraṇaṁ vā tayā saddhiṁ,
ja533:3.2	jīvitaṁ vā tayā vinā;
ja533:3.3	Tadeva maraṇaṁ seyyo,
ja533:3.4	yañce jīve tayā vinā.
ja533:4.1	Nesa dhammo mahārāja,
ja533:4.2	yaṁ taṁ evaṁ gataṁ jahe;
ja533:4.3	Yā gati tuyhaṁ sā mayhaṁ,
ja533:4.4	ruccate vihagādhipa”.
ja533:5.1	“Kā nu pāsena baddhassa,
ja533:5.2	gati aññā mahānasā;
ja533:5.3	Sā kathaṁ cetayānassa,
ja533:5.4	muttassa tava ruccati.
ja533:6.1	Kaṁ vā tvaṁ passase atthaṁ,
ja533:6.2	mama tuyhañca pakkhima;
ja533:6.3	Ñātīnaṁ vāvasiṭṭhānaṁ,
ja533:6.4	ubhinnaṁ jīvitakkhaye.
ja533:7.1	Yaṁ na kañcanadepiñcha,
ja533:7.2	Andhena tamasā gataṁ;
ja533:7.3	Tādise sañcajaṁ pāṇaṁ,
ja533:7.4	Kamatthamabhijotaye”.
ja533:8.1	“Kathaṁ nu patataṁ seṭṭha,
ja533:8.2	Dhamme atthaṁ na bujjhasi;
ja533:8.3	Dhammo apacito santo,
ja533:8.4	Atthaṁ dasseti pāṇinaṁ.
ja533:9.1	Sohaṁ dhammaṁ apekkhāno,
ja533:9.2	dhammā catthaṁ samuṭṭhitaṁ;
ja533:9.3	Bhattiñca tayi sampassaṁ,
ja533:9.4	nāvakaṅkhāmi jīvitaṁ.
ja533:10.1	Addhā eso sataṁ dhammo,
ja533:10.2	yo mitto mittamāpade;
ja533:10.3	Na caje jīvitassāpi,
ja533:10.4	hetudhammamanussaraṁ”.
ja533:11.1	“Svāyaṁ dhammo ca te ciṇṇo,
ja533:11.2	bhatti ca viditā mayi;
ja533:11.3	Kāmaṁ karassu mayhetaṁ,
ja533:11.4	gacchevānumato mayā.
ja533:12.1	Api tvevaṁ gate kāle,
ja533:12.2	yaṁ khaṇḍaṁ ñātinaṁ mayā;
ja533:12.3	Tayā taṁ buddhisampannaṁ,
ja533:12.4	assa paramasaṁvutaṁ”.
ja533:13.1	Iccevaṁ mantayantānaṁ,
ja533:13.2	Ariyānaṁ ariyavuttinaṁ;
ja533:13.3	Paccadissatha nesādo,
ja533:13.4	Āturānamivantako.
ja533:14.1	Te sattumabhisañcikkha,
ja533:14.2	dīgharattaṁ hitā dijā;
ja533:14.3	Tuṇhīmāsittha ubhayo,
ja533:14.4	na sañcalesumāsanā.
ja533:15.1	Dhataraṭṭhe ca disvāna,
ja533:15.2	samuḍḍente tato tato;
ja533:15.3	Abhikkamatha vegena,
ja533:15.4	dijasattu dijādhipe.
ja533:16.1	So ca vegenabhikkamma,
ja533:16.2	āsajja parame dije;
ja533:16.3	Paccakamittha nesādo,
ja533:16.4	baddhā iti vicintayaṁ.
ja533:17.1	Ekaṁva baddhamāsīnaṁ,
ja533:17.2	abaddhañca punāparaṁ;
ja533:17.3	Āsajja baddhamāsīnaṁ,
ja533:17.4	pekkhamānamadīnavaṁ.
ja533:18.1	Tato so vimatoyeva,
ja533:18.2	paṇḍare ajjhabhāsatha;
ja533:18.3	Pavaḍḍhakāye āsīne,
ja533:18.4	dijasaṅghagaṇādhipe.
ja533:19.1	“Yannu pāsena mahatā,
ja533:19.2	baddho na kurute disaṁ;
ja533:19.3	Atha kasmā abaddho tvaṁ,
ja533:19.4	balī pakkhi na gacchasi.
ja533:20.1	Kiṁ nu tyāyaṁ dijo hoti,
ja533:20.2	mutto baddhaṁ upāsasi;
ja533:20.3	Ohāya sakuṇā yanti,
ja533:20.4	kiṁ eko avahīyasi”.
ja533:21.1	“Rājā me so dijāmitta,
ja533:21.2	sakhā pāṇasamo ca me;
ja533:21.3	Neva naṁ vijahissāmi,
ja533:21.4	yāva kālassa pariyāyaṁ”.
ja533:22.1	“Kathaṁ panāyaṁ vihaṅgo,
ja533:22.2	nāddasa pāsamoḍḍitaṁ;
ja533:22.3	Padañhetaṁ mahantānaṁ,
ja533:22.4	boddhumarahanti āpadaṁ”.
ja533:23.1	“Yadā parābhavo hoti,
ja533:23.2	poso jīvitasaṅkhaye;
ja533:23.3	Atha jālañca pāsañca,
ja533:23.4	āsajjāpi na bujjhati.
ja533:24.1	Api tveva mahāpañña,
ja533:24.2	pāsā bahuvidhā tatā;
ja533:24.3	Guyhamāsajja bajjhanti,
ja533:24.4	athevaṁ jīvitakkhaye”.
ja533:25.1	“Api nāyaṁ tayā saddhiṁ,
ja533:25.2	saṁvāsassa sukhudrayo;
ja533:25.3	Api no anumaññāsi,
ja533:25.4	api no jīvitaṁ dade”.
ja533:26.1	“Na ceva me tvaṁ baddhosi,
ja533:26.2	napi icchāmi te vadhaṁ;
ja533:26.3	Kāmaṁ khippamito gantvā,
ja533:26.4	jīva tvaṁ anigho ciraṁ”.
ja533:27.1	“Nevāhametamicchāmi,
ja533:27.2	aññatretassa jīvitā;
ja533:27.3	Sace ekena tuṭṭhosi,
ja533:27.4	muñcetaṁ mañca bhakkhaya.
ja533:28.1	Ārohapariṇāhena,
ja533:28.2	tulyāsmā vayasā ubho;
ja533:28.3	Na te lābhena jīvatthi,
ja533:28.4	etena niminā tuvaṁ.
ja533:29.1	Tadiṅgha samapekkhassu,
ja533:29.2	hotu giddhi tavamhasu;
ja533:29.3	Maṁ pubbe bandha pāsena,
ja533:29.4	pacchā muñca dijādhipaṁ.
ja533:30.1	Tāvadeva ca te lābho,
ja533:30.2	katāssa yācanāya ca;
ja533:30.3	Mitti ca dhataraṭṭhehi,
ja533:30.4	yāvajīvāya te siyā”.
ja533:31.1	“Passantu no mahāsaṅghā,
ja533:31.2	tayā muttaṁ ito gataṁ;
ja533:31.3	Mittāmaccā ca bhaccā ca,
ja533:31.4	puttadārā ca bandhavā.
ja533:32.1	Na ca te tādisā mittā,
ja533:32.2	bahūnaṁ idha vijjati;
ja533:32.3	Yathā tvaṁ dhataraṭṭhassa,
ja533:32.4	pāṇasādhāraṇo sakhā.
ja533:33.1	So te sahāyaṁ muñcāmi,
ja533:33.2	hotu rājā tavānugo;
ja533:33.3	Kāmaṁ khippamito gantvā,
ja533:33.4	ñātimajjhe virocatha”.
ja533:34.1	“So patīto pamuttena,
ja533:34.2	bhattunā bhattugāravo;
ja533:34.3	Ajjhabhāsatha vakkaṅgo,
ja533:34.4	vācaṁ kaṇṇasukhaṁ bhaṇaṁ.
ja533:35.1	Evaṁ luddaka nandassu,
ja533:35.2	saha sabbehi ñātibhi;
ja533:35.3	Yathāhamajja nandāmi,
ja533:35.4	muttaṁ disvā dijādhipaṁ”.
ja533:36.1	“Ehi taṁ anusikkhāmi,
ja533:36.2	Yathā tvamapi lacchase;
ja533:36.3	Lābhaṁ tavāyaṁ dhataraṭṭho,
ja533:36.4	Pāpaṁ kiñci na dakkhati.
ja533:37.1	Khippamantepuraṁ netvā,
ja533:37.2	rañño dassehi no ubho;
ja533:37.3	Abaddhe pakatibhūte,
ja533:37.4	kāje ubhayato ṭhite.
ja533:38.1	Dhataraṭṭhā mahārāja,
ja533:38.2	haṁsādhipatino ime;
ja533:38.3	Ayañhi rājā haṁsānaṁ,
ja533:38.4	ayaṁ senāpatītaro.
ja533:39.1	Asaṁsayaṁ imaṁ disvā,
ja533:39.2	haṁsarājaṁ narādhipo;
ja533:39.3	Patīto sumano vitto,
ja533:39.4	bahuṁ dassati te dhanaṁ”.
ja533:40.1	Tassa taṁ vacanaṁ sutvā,
ja533:40.2	kammunā upapādayi;
ja533:40.3	Khippamantepuraṁ gantvā,
ja533:40.4	rañño haṁse adassayi;
ja533:40.5	Abaddhe pakatibhūte,
ja533:40.6	kāje ubhayato ṭhite.
ja533:41.1	“Dhataraṭṭhā mahārāja,
ja533:41.2	haṁsādhipatino ime;
ja533:41.3	Ayañhi rājā haṁsānaṁ,
ja533:41.4	ayaṁ senāpatītaro”.
ja533:42.1	“Kathaṁ panime vihaṅgā,
ja533:42.2	tava hatthattamāgatā;
ja533:42.3	Kathaṁ luddo mahantānaṁ,
ja533:42.4	issare idha ajjhagā”.
ja533:43.1	“Vihitā santime pāsā,
ja533:43.2	pallalesu janādhipa;
ja533:43.3	Yaṁ yadāyatanaṁ maññe,
ja533:43.4	dijānaṁ pāṇarodhanaṁ.
ja533:44.1	Tādisaṁ pāsamāsajja,
ja533:44.2	haṁsarājā abajjhatha;
ja533:44.3	Taṁ abaddho upāsīno,
ja533:44.4	mamāyaṁ ajjhabhāsatha.
ja533:45.1	Sudukkaraṁ anariyehi,
ja533:45.2	dahate bhāvamuttamaṁ;
ja533:45.3	Bhatturatthe parakkanto,
ja533:45.4	dhammayutto vihaṅgamo.
ja533:46.1	Attanāyaṁ cajitvāna,
ja533:46.2	jīvitaṁ jīvitāraho;
ja533:46.3	Anutthunanto āsīno,
ja533:46.4	bhattu yācittha jīvitaṁ.
ja533:47.1	Tassa taṁ vacanaṁ sutvā,
ja533:47.2	pasādamahamajjhagā;
ja533:47.3	Tato naṁ pāmuciṁ pāsā,
ja533:47.4	anuññāsiṁ sukhena ca.
ja533:48.1	So patīto pamuttena,
ja533:48.2	bhattunā bhattugāravo;
ja533:48.3	Ajjhabhāsatha vakkaṅgo,
ja533:48.4	vācaṁ kaṇṇasukhaṁ bhaṇaṁ.
ja533:49.1	‘Evaṁ luddaka nandassu,
ja533:49.2	saha sabbehi ñātibhi;
ja533:49.3	Yathāhamajja nandāmi,
ja533:49.4	muttaṁ disvā dijādhipaṁ.
ja533:50.1	Ehi taṁ anusikkhāmi,
ja533:50.2	yathā tvamapi lacchase;
ja533:50.3	Lābhaṁ tavāyaṁ dhataraṭṭho,
ja533:50.4	pāpaṁ kiñci na dakkhati.
ja533:51.1	Khippamantepuraṁ netvā,
ja533:51.2	rañño dassehi no ubho;
ja533:51.3	Abaddhe pakatibhūte,
ja533:51.4	kāje ubhayato ṭhite.
ja533:52.1	“Dhataraṭṭhā mahārāja,
ja533:52.2	haṁsādhipatino ime;
ja533:52.3	Ayañhi rājā haṁsānaṁ,
ja533:52.4	ayaṁ senāpatītaro”.
ja533:53.1	Asaṁsayaṁ imaṁ disvā,
ja533:53.2	haṁsarājaṁ narādhipo;
ja533:53.3	Patīto sumano vitto,
ja533:53.4	bahuṁ dassati te dhanaṁ’.
ja533:54.1	Evametassa vacanā,
ja533:54.2	ānītāme ubho mayā;
ja533:54.3	Ettheva hi ime āsuṁ,
ja533:54.4	ubho anumatā mayā.
ja533:55.1	Soyaṁ evaṁ gato pakkhī,
ja533:55.2	dijo paramadhammiko;
ja533:55.3	Mādisassa hi luddassa,
ja533:55.4	janayeyyātha maddavaṁ.
ja533:56.1	Upāyanañca te deva,
ja533:56.2	nāññaṁ passāmi edisaṁ;
ja533:56.3	Sabbasākuṇikāgāme,
ja533:56.4	taṁ passa manujādhipa”.
ja533:57.1	Disvā nisinnaṁ rājānaṁ,
ja533:57.2	pīṭhe sovaṇṇaye subhe;
ja533:57.3	Ajjhabhāsatha vakkaṅgo,
ja533:57.4	vācaṁ kaṇṇasukhaṁ bhaṇaṁ.
ja533:58.1	“Kaccinnu bhoto kusalaṁ,
ja533:58.2	kacci bhoto anāmayaṁ;
ja533:58.3	Kacci raṭṭhamidaṁ phītaṁ,
ja533:58.4	dhammena manusāsasi”.
ja533:59.1	“Kusalañceva me haṁsa,
ja533:59.2	Atho haṁsa anāmayaṁ;
ja533:59.3	Atho raṭṭhamidaṁ phītaṁ,
ja533:59.4	Dhammena manusāsahaṁ”.
ja533:60.1	“Kacci bhoto amaccesu,
ja533:60.2	doso koci na vijjati;
ja533:60.3	Kacci ca te tavatthesu,
ja533:60.4	nāvakaṅkhanti jīvitaṁ”.
ja533:61.1	“Athopi me amaccesu,
ja533:61.2	doso koci na vijjati;
ja533:61.3	Athopi te mamatthesu,
ja533:61.4	nāvakaṅkhanti jīvitaṁ”.
ja533:62.1	“Kacci te sādisī bhariyā,
ja533:62.2	assavā piyabhāṇinī;
ja533:62.3	Puttarūpayasūpetā,
ja533:62.4	tava chandavasānugā”.
ja533:63.1	“Atho me sādisī bhariyā,
ja533:63.2	assavā piyabhāṇinī;
ja533:63.3	Puttarūpayasūpetā,
ja533:63.4	mama chandavasānugā.
ja533:64.1	Bhavantaṁ kacci nu mahā-
ja533:64.2	sattuhatthattataṁ gato;
ja533:64.3	Dukkhamāpajji vipulaṁ,
ja533:64.4	tasmiṁ paṭhamamāpade.
ja533:65.1	Kacci yantāpatitvāna,
ja533:65.2	daṇḍena samapothayi;
ja533:65.3	Evametesaṁ jammānaṁ,
ja533:65.4	pātikaṁ bhavati tāvade”.
ja533:66.1	“Khemamāsi mahārāja,
ja533:66.2	evamāpadiyā sati;
ja533:66.3	Na cāyaṁ kiñci rasmāsu,
ja533:66.4	sattūva samapajjatha.
ja533:67.1	Paccagamittha nesādo,
ja533:67.2	pubbeva ajjhabhāsatha;
ja533:67.3	Tadāyaṁ sumukhoyeva,
ja533:67.4	paṇḍito paccabhāsatha.
ja533:68.1	Tassa taṁ vacanaṁ sutvā,
ja533:68.2	pasādamayamajjhagā;
ja533:68.3	Tato maṁ pāmucī pāsā,
ja533:68.4	anuññāsi sukhena ca.
ja533:69.1	Idañca sumukheneva,
ja533:69.2	etadatthāya cintitaṁ;
ja533:69.3	Bhoto sakāsegamanaṁ,
ja533:69.4	etassa dhanamicchatā”.
ja533:70.1	“Svāgatañcevidaṁ bhavataṁ,
ja533:70.2	patīto casmi dassanā;
ja533:70.3	Eso cāpi bahuṁ vittaṁ,
ja533:70.4	labhataṁ yāvadicchati”.
ja533:71.1	Santappayitvā nesādaṁ,
ja533:71.2	bhogehi manujādhipo;
ja533:71.3	Ajjhabhāsatha vakkaṅgaṁ,
ja533:71.4	vācaṁ kaṇṇasukhaṁ bhaṇaṁ.
ja533:72.1	“Yaṁ khalu dhammamādhīnaṁ,
ja533:72.2	vaso vattati kiñcanaṁ;
ja533:72.3	Sabbatthissariyaṁ tava,
ja533:72.4	taṁ pasāsa yadicchatha.
ja533:73.1	Dānatthaṁ upabhottuṁ vā,
ja533:73.2	yaṁ caññaṁ upakappati;
ja533:73.3	Etaṁ dadāmi vo vittaṁ,
ja533:73.4	issariyaṁ vissajāmi vo”.
ja533:74.1	“Yathā ca myāyaṁ sumukho,
ja533:74.2	ajjhabhāseyya paṇḍito;
ja533:74.3	Kāmasā buddhisampanno,
ja533:74.4	taṁ myāssa paramappiyaṁ”.
ja533:75.1	“Ahaṁ khalu mahārāja,
ja533:75.2	nāgarājārivantaraṁ;
ja533:75.3	Paṭivattuṁ na sakkomi,
ja533:75.4	na me so vinayo siyā.
ja533:76.1	Amhākañceva so seṭṭho,
ja533:76.2	tvañca uttamasattavo;
ja533:76.3	Bhūmipālo manussindo,
ja533:76.4	pūjā bahūhi hetuhi.
ja533:77.1	Tesaṁ ubhinnaṁ bhaṇataṁ,
ja533:77.2	vattamāne vinicchaye;
ja533:77.3	Nantaraṁ paṭivattabbaṁ,
ja533:77.4	pessena manujādhipa”.
ja533:78.1	“Dhammena kira nesādo,
ja533:78.2	paṇḍito aṇḍajo iti;
ja533:78.3	Na heva akatattassa,
ja533:78.4	nayo etādiso siyā.
ja533:79.1	Evaṁ aggapakatimā,
ja533:79.2	evaṁ uttamasattavo;
ja533:79.3	Yāvatatthi mayā diṭṭhā,
ja533:79.4	nāññaṁ passāmi edisaṁ.
ja533:80.1	Tuṭṭhosmi vo pakatiyā,
ja533:80.2	vākyena madhurena ca;
ja533:80.3	Eso cāpi mamacchando,
ja533:80.4	ciraṁ passeyya vo ubho”.
ja533:81.1	“Yaṁ kiccaṁ parame mitte,
ja533:81.2	katamasmāsu taṁ tayā;
ja533:81.3	Pattā nissaṁsayaṁ tyāmhā,
ja533:81.4	bhattirasmāsu yā tava.
ja533:82.1	Aduñca nūna sumahā,
ja533:82.2	ñātisaṅghassa mantaraṁ;
ja533:82.3	Adassanena asmākaṁ,
ja533:82.4	dukkhaṁ bahūsu pakkhisu.
ja533:83.1	Tesaṁ sokavighātāya,
ja533:83.2	Tayā anumatā mayaṁ;
ja533:83.3	Taṁ padakkhiṇato katvā,
ja533:83.4	Ñātiṁ passemurindama.
ja533:84.1	Addhāhaṁ vipulaṁ pītiṁ,
ja533:84.2	bhavataṁ vindāmi dassanā;
ja533:84.3	Eso cāpi mahā attho,
ja533:84.4	ñātivissāsanā siyā”.
ja533:85.1	Idaṁ vatvā dhataraṭṭho,
ja533:85.2	haṁsarājā narādhipaṁ;
ja533:85.3	Uttamaṁ javamanvāya,
ja533:85.4	ñātisaṅghaṁ upāgamuṁ.
ja533:86.1	Te aroge anuppatte,
ja533:86.2	disvāna parame dije;
ja533:86.3	Kekāti makaruṁ haṁsā,
ja533:86.4	puthusaddo ajāyatha.
ja533:87.1	Te patītā pamuttena,
ja533:87.2	bhattunā bhattugāravā;
ja533:87.3	Samantā parikiriṁsu,
ja533:87.4	aṇḍajā laddhapaccayā.
ja533:88.1	Evaṁ mittavataṁ atthā,
ja533:88.2	sabbe honti padakkhiṇā;
ja533:88.3	Haṁsā yathā dhataraṭṭhā,
ja533:88.4	ñātisaṅghaṁ upāgamunti.
ja533:89.1	Cūḷahaṁsajātakaṁ paṭhamaṁ.
ja534:0.1	Jātaka
ja534:0.2	Asītinipāta
ja534:0.3	Cūḷahaṁsavagga
ja534:0.4	2. Mahāhaṁsajātaka
ja534:1.1	“Ete haṁsā pakkamanti,
ja534:1.2	vakkaṅgā bhayameritā;
ja534:1.3	Harittaca hemavaṇṇa,
ja534:1.4	kāmaṁ sumukha pakkama.
ja534:2.1	Ohāya maṁ ñātigaṇā,
ja534:2.2	ekaṁ pāsavasaṁ gataṁ;
ja534:2.3	Anapekkhamānā gacchanti,
ja534:2.4	kiṁ eko avahīyasi.
ja534:3.1	Pateva patataṁ seṭṭha,
ja534:3.2	natthi baddhe sahāyatā;
ja534:3.3	Mā anīghāya hāpesi,
ja534:3.4	kāmaṁ sumukha pakkama”.
ja534:4.1	“Nāhaṁ dukkhaparetopi,
ja534:4.2	dhataraṭṭha tuvaṁ jahe;
ja534:4.3	Jīvitaṁ maraṇaṁ vā me,
ja534:4.4	tayā saddhiṁ bhavissati.
ja534:5.1	Nāhaṁ dukkhaparetopi,
ja534:5.2	dhataraṭṭha tuvaṁ jahe;
ja534:5.3	Na maṁ anariyasaṁyutte,
ja534:5.4	kamme yojetumarahasi.
ja534:6.1	Sakumāro sakhā tyasmi,
ja534:6.2	sacitte casmi te ṭhito;
ja534:6.3	Ñāto senāpati tyāhaṁ,
ja534:6.4	haṁsānaṁ pavaruttama.
ja534:7.1	Kathaṁ ahaṁ vikatthissaṁ,
ja534:7.2	ñātimajjhe ito gato;
ja534:7.3	Taṁ hitvā patataṁ seṭṭha,
ja534:7.4	kiṁ te vakkhāmito gato;
ja534:7.5	Idha pāṇaṁ cajissāmi,
ja534:7.6	nānariyaṁ kattumussahe”.
ja534:8.1	“Eso hi dhammo sumukha,
ja534:8.2	yaṁ tvaṁ ariyapathe ṭhito;
ja534:8.3	Yo bhattāraṁ sakhāraṁ maṁ,
ja534:8.4	na pariccattumussahe.
ja534:9.1	Tañhi me pekkhamānassa,
ja534:9.2	bhayaṁ na tveva jāyati;
ja534:9.3	Adhigacchasi tvaṁ mayhaṁ,
ja534:9.4	evaṁ bhūtassa jīvitaṁ”.
ja534:10.1	Iccevaṁ mantayantānaṁ,
ja534:10.2	Ariyānaṁ ariyavuttinaṁ;
ja534:10.3	Daṇḍamādāya nesādo,
ja534:10.4	Āpatī turito bhusaṁ.
ja534:11.1	Tamāpatantaṁ disvāna,
ja534:11.2	Sumukho atibrūhayi;
ja534:11.3	Aṭṭhāsi purato rañño,
ja534:11.4	Haṁso vissāsayaṁ byathaṁ.
ja534:12.1	“Mā bhāyi patataṁ seṭṭha,
ja534:12.2	na hi bhāyanti tādisā;
ja534:12.3	Ahaṁ yogaṁ payuñjissaṁ,
ja534:12.4	yuttaṁ dhammūpasaṁhitaṁ;
ja534:12.5	Tena pariyāpadānena,
ja534:12.6	khippaṁ pāsā pamokkhasi”.
ja534:13.1	Tassa taṁ vacanaṁ sutvā,
ja534:13.2	sumukhassa subhāsitaṁ;
ja534:13.3	Pahaṭṭhalomo nesādo,
ja534:13.4	añjalissa paṇāmayi.
ja534:14.1	“Na me sutaṁ vā diṭṭhaṁ vā,
ja534:14.2	bhāsanto mānusiṁ dijo;
ja534:14.3	Ariyaṁ bruvāno vakkaṅgo,
ja534:14.4	cajanto mānusiṁ giraṁ.
ja534:15.1	Kiṁ nu tāyaṁ dijo hoti,
ja534:15.2	mutto baddhaṁ upāsasi;
ja534:15.3	Ohāya sakuṇā yanti,
ja534:15.4	kiṁ eko avahīyasi”.
ja534:16.1	“Rājā me so dijāmitta,
ja534:16.2	senāpaccassa kārayiṁ;
ja534:16.3	Tamāpade pariccattuṁ,
ja534:16.4	nussahe vihagādhipaṁ.
ja534:17.1	Mahāgaṇāya bhattā me,
ja534:17.2	mā eko byasanaṁ agā;
ja534:17.3	Tathā taṁ samma nesāda,
ja534:17.4	bhattāyaṁ abhito rame”.
ja534:18.1	“Ariyavattasi vakkaṅga,
ja534:18.2	yo piṇḍamapacāyasi;
ja534:18.3	Cajāmi te taṁ bhattāraṁ,
ja534:18.4	gacchathūbho yathāsukhaṁ”.
ja534:19.1	“Sace attappayogena,
ja534:19.2	ohito haṁsapakkhinaṁ;
ja534:19.3	Paṭigaṇhāma te samma,
ja534:19.4	etaṁ abhayadakkhiṇaṁ.
ja534:20.1	No ce attappayogena,
ja534:20.2	ohito haṁsapakkhinaṁ;
ja534:20.3	Anissaro muñcamamhe,
ja534:20.4	theyyaṁ kayirāsi luddaka”.
ja534:21.1	“Yassa tvaṁ bhatako rañño,
ja534:21.2	kāmaṁ tasseva pāpaya;
ja534:21.3	Tattha saṁyamano rājā,
ja534:21.4	yathābhiññaṁ karissati”.
ja534:22.1	Iccevaṁ vutto nesādo,
ja534:22.2	hemavaṇṇe harittace;
ja534:22.3	Ubho hatthehi saṅgayha,
ja534:22.4	pañjare ajjhavodahi.
ja534:23.1	Te pañjaragate pakkhī,
ja534:23.2	ubho bhassaravaṇṇine;
ja534:23.3	Sumukhaṁ dhataraṭṭhañca,
ja534:23.4	luddo ādāya pakkami.
ja534:24.1	Harīyamāno dhataraṭṭho,
ja534:24.2	sumukhaṁ etadabravi;
ja534:24.3	“Bāḷhaṁ bhāyāmi sumukha,
ja534:24.4	sāmāya lakkhaṇūruyā;
ja534:24.5	Asmākaṁ vadhamaññāya,
ja534:24.6	athattānaṁ vadhissati.
ja534:25.1	Pākahaṁsā ca sumukha,
ja534:25.2	suhemā hemasuttacā;
ja534:25.3	Koñcī samuddatīreva,
ja534:25.4	kapaṇā nūna rucchati”.
ja534:26.1	“Evaṁ mahanto lokassa,
ja534:26.2	appameyyo mahāgaṇī;
ja534:26.3	Ekitthimanusoceyya,
ja534:26.4	nayidaṁ paññavatāmiva.
ja534:27.1	Vātova gandhamādeti,
ja534:27.2	ubhayaṁ chekapāpakaṁ;
ja534:27.3	Bālo āmakapakkaṁva,
ja534:27.4	lolo andhova āmisaṁ.
ja534:28.1	Avinicchayaññu atthesu,
ja534:28.2	mandova paṭibhāsi maṁ;
ja534:28.3	Kiccākiccaṁ na jānāsi,
ja534:28.4	sampatto kālapariyāyaṁ.
ja534:29.1	Aḍḍhummatto udīresi,
ja534:29.2	yo seyyā maññasitthiyo;
ja534:29.3	Bahusādhāraṇā hetā,
ja534:29.4	soṇḍānaṁva surāgharaṁ.
ja534:30.1	Māyā cesā marīcī ca,
ja534:30.2	soko rogo cupaddavo;
ja534:30.3	Kharā ca bandhanā cetā,
ja534:30.4	maccupāsā guhāsayā;
ja534:30.5	Tāsu yo vissase poso,
ja534:30.6	so naresu narādhamo”.
ja534:31.1	“Yaṁ vuddhehi upaññātaṁ,
ja534:31.2	ko taṁ ninditumarahati;
ja534:31.3	Mahābhūtitthiyo nāma,
ja534:31.4	lokasmiṁ udapajjisuṁ.
ja534:32.1	Khiḍḍā paṇihitā tyāsu,
ja534:32.2	rati tyāsu patiṭṭhitā;
ja534:32.3	Bījāni tyāsu rūhanti,
ja534:32.4	yadidaṁ sattā pajāyare;
ja534:32.5	Tāsu ko nibbide poso,
ja534:32.6	pāṇamāsajja pāṇibhi.
ja534:33.1	Tvameva nañño sumukha,
ja534:33.2	thīnaṁ atthesu yuñjasi;
ja534:33.3	Tassa tyajja bhaye jāte,
ja534:33.4	bhītena jāyate mati.
ja534:34.1	Sabbo hi saṁsayaṁ patto,
ja534:34.2	bhayaṁ bhīru titikkhati;
ja534:34.3	Paṇḍitā ca mahantāno,
ja534:34.4	atthe yuñjanti duyyuje.
ja534:35.1	Etadatthāya rājāno,
ja534:35.2	sūramicchanti mantinaṁ;
ja534:35.3	Paṭibāhati yaṁ sūro,
ja534:35.4	āpadaṁ attapariyāyaṁ.
ja534:36.1	Mā no ajja vikantiṁsu,
ja534:36.2	rañño sūdā mahānase;
ja534:36.3	Tathā hi vaṇṇo pattānaṁ,
ja534:36.4	phalaṁ veḷuṁva taṁ vadhi.
ja534:37.1	Muttopi na icchi uḍḍetuṁ,
ja534:37.2	Sayaṁ bandhaṁ upāgami;
ja534:37.3	Sopajja saṁsayaṁ patto,
ja534:37.4	Atthaṁ gaṇhāhi mā mukhaṁ.
ja534:38.1	So taṁ yogaṁ payuñjassu,
ja534:38.2	yuttaṁ dhammūpasaṁhitaṁ;
ja534:38.3	Tava pariyāpadānena,
ja534:38.4	mama pāṇesanaṁ cara”.
ja534:39.1	“Mā bhāyi patataṁ seṭṭha,
ja534:39.2	na hi bhāyanti tādisā;
ja534:39.3	Ahaṁ yogaṁ payuñjissaṁ,
ja534:39.4	yuttaṁ dhammūpasaṁhitaṁ;
ja534:39.5	Mama pariyāpadānena,
ja534:39.6	khippaṁ pāsā pamokkhasi”.
ja534:40.1	So luddo haṁsakājena,
ja534:40.2	rājadvāraṁ upāgami;
ja534:40.3	“Paṭivedetha maṁ rañño,
ja534:40.4	dhataraṭṭhāyamāgato”.
ja534:41.1	Te disvā puññasaṅkāse,
ja534:41.2	ubho lakkhaṇasammate;
ja534:41.3	Khalu saṁyamano rājā,
ja534:41.4	amacce ajjhabhāsatha.
ja534:42.1	“Detha luddassa vatthāni,
ja534:42.2	annaṁ pānañca bhojanaṁ;
ja534:42.3	Kāmaṅkaro hiraññassa,
ja534:42.4	yāvanto esa icchati”.
ja534:43.1	Disvā luddaṁ pasannattaṁ,
ja534:43.2	Kāsirājā tadabravi;
ja534:43.3	“Yadyāyaṁ samma khemaka,
ja534:43.4	Puṇṇā haṁsehi tiṭṭhati.
ja534:44.1	Kathaṁ rucimajjhagataṁ,
ja534:44.2	pāsahattho upāgami;
ja534:44.3	Okiṇṇaṁ ñātisaṅghehi,
ja534:44.4	nimmajjhimaṁ kathaṁ gahi”.
ja534:45.1	“Ajja me sattamā ratti,
ja534:45.2	adanāni upāsato;
ja534:45.3	Padametassa anvesaṁ,
ja534:45.4	appamatto ghaṭassito.
ja534:46.1	Athassa padamaddakkhiṁ,
ja534:46.2	carato adanesanaṁ;
ja534:46.3	Tatthāhaṁ odahiṁ pāsaṁ,
ja534:46.4	evaṁ taṁ dijamaggahiṁ”.
ja534:47.1	“Ludda dve ime sakuṇā,
ja534:47.2	atha ekoti bhāsasi;
ja534:47.3	Cittaṁ nu te vipariyattaṁ,
ja534:47.4	adu kiṁ nu jigīsasi”.
ja534:48.1	“Yassa lohitakā tālā,
ja534:48.2	tapanīyanibhā subhā;
ja534:48.3	Uraṁ saṁhacca tiṭṭhanti,
ja534:48.4	so me bandhaṁ upāgami.
ja534:49.1	Athāyaṁ bhassaro pakkhī,
ja534:49.2	abaddho baddhamāturaṁ;
ja534:49.3	Ariyaṁ bruvāno aṭṭhāsi,
ja534:49.4	cajanto mānusiṁ giraṁ”.
ja534:50.1	“Atha kiṁ dāni sumukha,
ja534:50.2	Hanuṁ saṁhacca tiṭṭhasi;
ja534:50.3	Adu me parisaṁ patto,
ja534:50.4	Bhayā bhīto na bhāsasi”.
ja534:51.1	“Nāhaṁ kāsipati bhīto,
ja534:51.2	ogayha parisaṁ tava;
ja534:51.3	Nāhaṁ bhayā na bhāsissaṁ,
ja534:51.4	vākyaṁ atthamhi tādise”.
ja534:52.1	“Na te abhisaraṁ passe,
ja534:52.2	na rathe napi pattike;
ja534:52.3	Nāssa cammaṁ va kīṭaṁ vā,
ja534:52.4	vammite ca dhanuggahe.
ja534:53.1	Na hiraññaṁ suvaṇṇaṁ vā,
ja534:53.2	nagaraṁ vā sumāpitaṁ;
ja534:53.3	Okiṇṇaparikhaṁ duggaṁ,
ja534:53.4	daḷhamaṭṭālakoṭṭhakaṁ;
ja534:53.5	Yattha paviṭṭho sumukha,
ja534:53.6	bhāyitabbaṁ na bhāyasi”.
ja534:54.1	“Na me abhisarenattho,
ja534:54.2	nagarena dhanena vā;
ja534:54.3	Apathena pathaṁ yāma,
ja534:54.4	antalikkhecarā mayaṁ.
ja534:55.1	Sutā ca paṇḍitā tyamhā,
ja534:55.2	nipuṇā atthacintakā;
ja534:55.3	Bhāsematthavatiṁ vācaṁ,
ja534:55.4	sacce cassa patiṭṭhito.
ja534:56.1	Kiñca tuyhaṁ asaccassa,
ja534:56.2	anariyassa karissati;
ja534:56.3	Musāvādissa luddassa,
ja534:56.4	bhaṇitampi subhāsitaṁ.
ja534:57.1	Taṁ brāhmaṇānaṁ vacanā,
ja534:57.2	imaṁ khemamakārayi;
ja534:57.3	Abhayañca tayā ghuṭṭhaṁ,
ja534:57.4	imāyo dasadhā disā.
ja534:58.1	Ogayha te pokkharaṇiṁ,
ja534:58.2	vippasannodakaṁ suciṁ;
ja534:58.3	Pahūtaṁ cādanaṁ tattha,
ja534:58.4	ahiṁsā cettha pakkhinaṁ.
ja534:59.1	Idaṁ sutvāna nigghosaṁ,
ja534:59.2	āgatamha tavantike;
ja534:59.3	Te te bandhasma pāsena,
ja534:59.4	etaṁ te bhāsitaṁ musā.
ja534:60.1	Musāvādaṁ purakkhatvā,
ja534:60.2	icchālobhañca pāpakaṁ;
ja534:60.3	Ubho sandhimatikkamma,
ja534:60.4	asātaṁ upapajjati”.
ja534:61.1	“Nāparajjhāma sumukha,
ja534:61.2	napi lobhāva maggahiṁ;
ja534:61.3	Sutā ca paṇḍitātyattha-
ja534:61.4	nipuṇā atthacintakā.
ja534:62.1	Appevatthavatiṁ vācaṁ,
ja534:62.2	byāhareyyuṁ idhāgatā;
ja534:62.3	Tathā taṁ samma nesādo,
ja534:62.4	vutto sumukha maggahi”.
ja534:63.1	“Neva bhītā kāsipati,
ja534:63.2	upanītasmi jīvite;
ja534:63.3	Bhāsematthavatiṁ vācaṁ,
ja534:63.4	sampattā kālapariyāyaṁ.
ja534:64.1	Yo migena migaṁ hanti,
ja534:64.2	pakkhiṁ vā pana pakkhinā;
ja534:64.3	Sutena vā sutaṁ kiṇyā,
ja534:64.4	kiṁ anariyataraṁ tato.
ja534:65.1	Yo cāriyarudaṁ bhāse,
ja534:65.2	anariyadhammavassito;
ja534:65.3	Ubho so dhaṁsate lokā,
ja534:65.4	idha ceva parattha ca.
ja534:66.1	Na majjetha yasaṁ patto,
ja534:66.2	na byādhe pattasaṁsayaṁ;
ja534:66.3	Vāyametheva kiccesu,
ja534:66.4	saṁvare vivarāni ca.
ja534:67.1	Ye vuddhā abbhatikkantā,
ja534:67.2	sampattā kālapariyāyaṁ;
ja534:67.3	Idha dhammaṁ caritvāna,
ja534:67.4	evaṁte tidivaṁ gatā.
ja534:68.1	Idaṁ sutvā kāsipati,
ja534:68.2	dhammamattani pālaya;
ja534:68.3	Dhataraṭṭhañca muñcāhi,
ja534:68.4	haṁsānaṁ pavaruttamaṁ”.
ja534:69.1	“Āharantudakaṁ pajjaṁ,
ja534:69.2	āsanañca mahārahaṁ;
ja534:69.3	Pañjarato pamokkhāmi,
ja534:69.4	dhataraṭṭhaṁ yasassinaṁ.
ja534:70.1	Tañca senāpatiṁ dhīraṁ,
ja534:70.2	nipuṇaṁ atthacintakaṁ;
ja534:70.3	Yo sukhe sukhito rañño,
ja534:70.4	dukkhite hoti dukkhito.
ja534:71.1	Ediso kho arahati,
ja534:71.2	piṇḍamasnātu bhattuno;
ja534:71.3	Yathāyaṁ sumukho rañño,
ja534:71.4	pāṇasādhāraṇo sakhā”.
ja534:72.1	Pīṭhañca sabbasovaṇṇaṁ,
ja534:72.2	Aṭṭhapādaṁ manoramaṁ;
ja534:72.3	Maṭṭhaṁ kāsikamatthannaṁ,
ja534:72.4	Dhataraṭṭho upāvisi.
ja534:73.1	Kocchañca sabbasovaṇṇaṁ,
ja534:73.2	veyyagghaparisibbitaṁ;
ja534:73.3	Sumukho ajjhupāvekkhi,
ja534:73.4	dhataraṭṭhassanantarā.
ja534:74.1	Tesaṁ kañcanapattehi,
ja534:74.2	puthū ādāya kāsiyo;
ja534:74.3	Haṁsānaṁ abhihāresuṁ,
ja534:74.4	aggarañño pavāsitaṁ.
ja534:75.1	Disvā abhihaṭaṁ aggaṁ,
ja534:75.2	kāsirājena pesitaṁ;
ja534:75.3	Kusalo khattadhammānaṁ,
ja534:75.4	tato pucchi anantarā.
ja534:76.1	“Kaccinnu bhoto kusalaṁ,
ja534:76.2	kacci bhoto anāmayaṁ;
ja534:76.3	Kacci raṭṭhamidaṁ phītaṁ,
ja534:76.4	dhammena manusāsasi”.
ja534:77.1	“Kusalañceva me haṁsa,
ja534:77.2	atho haṁsa anāmayaṁ;
ja534:77.3	Atho raṭṭhamidaṁ phītaṁ,
ja534:77.4	dhammenaṁ manusāsahaṁ”.
ja534:78.1	“Kacci bhoto amaccesu,
ja534:78.2	doso koci na vijjati;
ja534:78.3	Kacci ca te tavatthesu,
ja534:78.4	nāvakaṅkhanti jīvitaṁ”.
ja534:79.1	“Athopi me amaccesu,
ja534:79.2	doso koci na vijjati;
ja534:79.3	Athopi te mamatthesu,
ja534:79.4	nāvakaṅkhanti jīvitaṁ”.
ja534:80.1	“Kacci te sādisī bhariyā,
ja534:80.2	assavā piyabhāṇinī;
ja534:80.3	Puttarūpayasūpetā,
ja534:80.4	tava chandavasānugā”.
ja534:81.1	“Atho me sādisī bhariyā,
ja534:81.2	assavā piyabhāṇinī;
ja534:81.3	Puttarūpayasūpetā,
ja534:81.4	mama chandavasānugā”.
ja534:82.1	“Kacci raṭṭhaṁ anuppīḷaṁ,
ja534:82.2	akutociupaddavaṁ;
ja534:82.3	Asāhasena dhammena,
ja534:82.4	samena manusāsasi”.
ja534:83.1	“Atho raṭṭhaṁ anuppīḷaṁ,
ja534:83.2	akutociupaddavaṁ;
ja534:83.3	Asāhasena dhammena,
ja534:83.4	samena manusāsahaṁ”.
ja534:84.1	“Kacci santo apacitā,
ja534:84.2	Asanto parivajjitā;
ja534:84.3	No ce dhammaṁ niraṅkatvā,
ja534:84.4	Adhammamanuvattasi”.
ja534:85.1	“Santo ca me apacitā,
ja534:85.2	asanto parivajjitā;
ja534:85.3	Dhammamevānuvattāmi,
ja534:85.4	adhammo me niraṅkato”.
ja534:86.1	“Kacci nānāgataṁ dīghaṁ,
ja534:86.2	samavekkhasi khattiya;
ja534:86.3	Kacci matto madanīye,
ja534:86.4	paralokaṁ na santasi”.
ja534:87.1	“Nāhaṁ anāgataṁ dīghaṁ,
ja534:87.2	samavekkhāmi pakkhima;
ja534:87.3	Ṭhito dasasu dhammesu,
ja534:87.4	paralokaṁ na santase.
ja534:88.1	Dānaṁ sīlaṁ pariccāgaṁ,
ja534:88.2	ajjavaṁ maddavaṁ tapaṁ;
ja534:88.3	Akkodhaṁ avihiṁsañca,
ja534:88.4	khantiñca avirodhanaṁ.
ja534:89.1	Iccete kusale dhamme,
ja534:89.2	ṭhite passāmi attani;
ja534:89.3	Tato me jāyate pīti,
ja534:89.4	somanassañcanappakaṁ.
ja534:90.1	Sumukho ca acintetvā,
ja534:90.2	visajji pharusaṁ giraṁ;
ja534:90.3	Bhāvadosamanaññāya,
ja534:90.4	asmākāyaṁ vihaṅgamo.
ja534:91.1	So kuddho pharusaṁ vācaṁ,
ja534:91.2	nicchāresi ayoniso;
ja534:91.3	Yānasmesu na vijjanti,
ja534:91.4	nayidaṁ paññavatāmiva”.
ja534:92.1	“Atthi me taṁ atisāraṁ,
ja534:92.2	vegena manujādhipa;
ja534:92.3	Dhataraṭṭhe ca baddhasmiṁ,
ja534:92.4	dukkhaṁ me vipulaṁ ahu.
ja534:93.1	Tvaṁ no pitāva puttānaṁ,
ja534:93.2	bhūtānaṁ dharaṇīriva;
ja534:93.3	Asmākaṁ adhipannānaṁ,
ja534:93.4	khamassu rājakuñjara”.
ja534:94.1	“Etaṁ te anumodāma,
ja534:94.2	yaṁ bhāvaṁ na nigūhasi;
ja534:94.3	Khilaṁ pabhindasi pakkhi,
ja534:94.4	ujukosi vihaṅgama.
ja534:95.1	Yaṁ kiñci ratanaṁ atthi,
ja534:95.2	kāsirājanivesane;
ja534:95.3	Rajataṁ jātarūpañca,
ja534:95.4	muttā veḷuriyā bahū.
ja534:96.1	Maṇayo saṅkhamuttā ca,
ja534:96.2	vatthakaṁ haricandanaṁ;
ja534:96.3	Ajinaṁ dantabhaṇḍañca,
ja534:96.4	lohaṁ kāḷāyasaṁ bahuṁ;
ja534:96.5	Etaṁ dadāmi vo vittaṁ,
ja534:96.6	issaraṁ vissajāmi vo”.
ja534:97.1	“Addhā apacitā tyamhā,
ja534:97.2	sakkatā ca rathesabha;
ja534:97.3	Dhammesu vattamānānaṁ,
ja534:97.4	tvaṁ no ācariyo bhava.
ja534:98.1	Ācariya samanuññātā,
ja534:98.2	Tayā anumatā mayaṁ;
ja534:98.3	Taṁ padakkhiṇato katvā,
ja534:98.4	Ñātiṁ passemurindama”.
ja534:99.1	Sabbarattiṁ cintayitvā,
ja534:99.2	mantayitvā yathātathaṁ;
ja534:99.3	Kāsirājā anuññāsi,
ja534:99.4	haṁsānaṁ pavaruttamaṁ.
ja534:100.1	Tato ratyā vivasāne,
ja534:100.2	sūriyuggamanaṁ pati;
ja534:100.3	Pekkhato kāsirājassa,
ja534:100.4	bhavanā te vigāhisuṁ.
ja534:101.1	Te aroge anuppatte,
ja534:101.2	disvāna parame dije;
ja534:101.3	Kekāti makaruṁ haṁsā,
ja534:101.4	puthusaddo ajāyatha.
ja534:102.1	Te patītā pamuttena,
ja534:102.2	bhattunā bhattugāravā;
ja534:102.3	Samantā parikiriṁsu,
ja534:102.4	aṇḍajā laddhapaccayā.
ja534:103.1	Evaṁ mittavataṁ atthā,
ja534:103.2	sabbe honti padakkhiṇā;
ja534:103.3	Haṁsā yathā dhataraṭṭhā,
ja534:103.4	ñātisaṅghaṁ upāgamunti.
ja534:104.1	Mahāhaṁsajātakaṁ dutiyaṁ.
ja535:0.1	Jātaka
ja535:0.2	Asītinipāta
ja535:0.3	Cūḷahaṁsavagga
ja535:0.4	3. Sudhābhojanajātaka
ja535:1.1	“Neva kiṇāmi napi vikkiṇāmi,
ja535:1.2	Na cāpi me sannicayo ca atthi;
ja535:1.3	Sukiccharūpaṁ vatidaṁ parittaṁ,
ja535:1.4	Patthodano nālamayaṁ duvinnaṁ”.
ja535:2.1	“Appamhā appakaṁ dajjā,
ja535:2.2	anumajjhato majjhakaṁ;
ja535:2.3	Bahumhā bahukaṁ dajjā,
ja535:2.4	adānaṁ nupapajjati.
ja535:3.1	Taṁ taṁ vadāmi kosiya,
ja535:3.2	dehi dānāni bhuñja ca;
ja535:3.3	Ariyamaggaṁ samārūha,
ja535:3.4	nekāsī labhate sukhaṁ”.
ja535:4.1	“Moghañcassa hutaṁ hoti,
ja535:4.2	moghañcāpi samīhitaṁ;
ja535:4.3	Atithismiṁ yo nisinnasmiṁ,
ja535:4.4	eko bhuñjati bhojanaṁ.
ja535:5.1	Taṁ taṁ vadāmi kosiya,
ja535:5.2	dehi dānāni bhuñja ca;
ja535:5.3	Ariyamaggaṁ samārūha,
ja535:5.4	nekāsī labhate sukhaṁ”.
ja535:6.1	“Saccañcassa hutaṁ hoti,
ja535:6.2	saccañcāpi samīhitaṁ;
ja535:6.3	Atithismiṁ yo nisinnasmiṁ,
ja535:6.4	neko bhuñjati bhojanaṁ.
ja535:7.1	Taṁ taṁ vadāmi kosiya,
ja535:7.2	dehi dānāni bhuñja ca;
ja535:7.3	Ariyamaggaṁ samārūha,
ja535:7.4	nekāsī labhate sukhaṁ”.
ja535:8.1	“Sarañca juhati poso,
ja535:8.2	bahukāya gayāya ca;
ja535:8.3	Doṇe timbarutitthasmiṁ,
ja535:8.4	sīghasote mahāvahe.
ja535:9.1	Atra cassa hutaṁ hoti,
ja535:9.2	atra cassa samīhitaṁ;
ja535:9.3	Atithismiṁ yo nisinnasmiṁ,
ja535:9.4	neko bhuñjati bhojanaṁ.
ja535:10.1	Taṁ taṁ vadāmi kosiya,
ja535:10.2	dehi dānāni bhuñja ca;
ja535:10.3	Ariyamaggaṁ samārūha,
ja535:10.4	nekāsī labhate sukhaṁ”.
ja535:11.1	“Baḷisañhi so nigilati,
ja535:11.2	dīghasuttaṁ sabandhanaṁ;
ja535:11.3	Atithismiṁ yo nisinnasmiṁ,
ja535:11.4	eko bhuñjati bhojanaṁ.
ja535:12.1	Taṁ taṁ vadāmi kosiya,
ja535:12.2	dehi dānāni bhuñja ca;
ja535:12.3	Ariyamaggaṁ samārūha,
ja535:12.4	nekāsī labhate sukhaṁ”.
ja535:13.1	“Uḷāravaṇṇā vata brāhmaṇā ime,
ja535:13.2	Ayañca vo sunakho kissa hetu;
ja535:13.3	Uccāvacaṁ vaṇṇanibhaṁ vikubbati,
ja535:13.4	Akkhātha no brāhmaṇā ke nu tumhe”.
ja535:14.1	“Cando ca suriyo ca ubho idhāgatā,
ja535:14.2	Ayaṁ pana mātali devasārathi;
ja535:14.3	Sakkohamasmi tidasānamindo,
ja535:14.4	Eso ca kho pañcasikhoti vuccati.
ja535:15.1	Pāṇissarā mudiṅgā ca,
ja535:15.2	murajālambarāni ca;
ja535:15.3	Suttamenaṁ pabodhenti,
ja535:15.4	paṭibuddho ca nandati.
ja535:16.1	Ye kecime maccharino kadariyā,
ja535:16.2	Paribhāsakā samaṇabrāhmaṇānaṁ;
ja535:16.3	Idheva nikkhippa sarīradehaṁ,
ja535:16.4	Kāyassa bhedā nirayaṁ vajanti.
ja535:17.1	Ye kecime suggatimāsamānā,
ja535:17.2	Dhamme ṭhitā saṁyame saṁvibhāge;
ja535:17.3	Idheva nikkhippa sarīradehaṁ,
ja535:17.4	Kāyassa bhedā sugatiṁ vajanti.
ja535:18.1	Tvaṁ nosi ñāti purimāsu jātisu,
ja535:18.2	So maccharī rosako pāpadhammo;
ja535:18.3	Taveva atthāya idhāgatamhā,
ja535:18.4	Mā pāpadhammo nirayaṁ gamittha”.
ja535:19.1	“Addhā maṁ vo hitakāmā,
ja535:19.2	yaṁ maṁ samanusāsatha;
ja535:19.3	Sohaṁ tathā karissāmi,
ja535:19.4	sabbaṁ vuttaṁ hitesibhi.
ja535:20.1	Esāhamajjeva upāramāmi,
ja535:20.2	Na cāpihaṁ kiñci kareyya pāpaṁ;
ja535:20.3	Na cāpi me kiñci adeyyamatthi,
ja535:20.4	Na cāpidatvā udakaṁ pivāmi.
ja535:21.1	Evañca me dadato sabbakālaṁ,
ja535:21.2	Bhogā ime vāsava khīyissanti;
ja535:21.3	Tato ahaṁ pabbajissāmi sakka,
ja535:21.4	Hitvāna kāmāni yathodhikāni”.
ja535:22.1	Naguttame girivare gandhamādane,
ja535:22.2	Modanti tā devavarābhipālitā;
ja535:22.3	Athāgamā isivaro sabbalokagū,
ja535:22.4	Supupphitaṁ dumavarasākhamādiya.
ja535:23.1	Suciṁ sugandhaṁ tidasehi sakkataṁ,
ja535:23.2	Pupphuttamaṁ amaravarehi sevitaṁ;
ja535:23.3	Aladdha maccehi va dānavehi vā,
ja535:23.4	Aññatra devehi tadārahaṁ hidaṁ.
ja535:24.1	Tato catasso kanakattacūpamā,
ja535:24.2	Uṭṭhāya nāriyo pamadādhipā muniṁ;
ja535:24.3	Āsā ca saddhā ca sirī tato hirī,
ja535:24.4	Iccabravuṁ nāradadeva brāhmaṇaṁ.
ja535:25.1	“Sace anuddiṭṭhaṁ tayā mahāmuni,
ja535:25.2	Pupphaṁ imaṁ pārichattassa brahme;
ja535:25.3	Dadāhi no sabbā gati te ijjhatu,
ja535:25.4	Tuvampi no hohi yatheva vāsavo”.
ja535:26.1	Taṁ yācamānābhisamekkha nārado,
ja535:26.2	Iccabravī saṅkalahaṁ udīrayi;
ja535:26.3	“Na mayhamatthatthi imehi koci naṁ,
ja535:26.4	Yāyeva vo seyyasi sā piḷandhatha”.
ja535:27.1	“Tvaṁ nottamevābhisamekkha nārada,
ja535:27.2	Yassicchasi tassā anuppavecchasu;
ja535:27.3	Yassā hi no nārada tvaṁ padassasi,
ja535:27.4	Sāyeva no hehiti seṭṭhasammatā”.
ja535:28.1	“Akallametaṁ vacanaṁ sugatte,
ja535:28.2	Ko brāhmaṇo saṅkalahaṁ udīraye;
ja535:28.3	Gantvāna bhūtādhipameva pucchatha,
ja535:28.4	Sace na jānātha idhuttamādhamaṁ”.
ja535:29.1	Tā nāradena paramappakopitā,
ja535:29.2	Udīritā vaṇṇamadena mattā;
ja535:29.3	Sakāse gantvāna sahassacakkhuno,
ja535:29.4	“Pucchiṁsu bhūtādhipaṁ kā nu seyyasi”.
ja535:30.1	Tā disvā āyattamanā purindado,
ja535:30.2	Iccabravī devavaro katañjalī;
ja535:30.3	“Sabbāva vo hotha sugatte sādisī,
ja535:30.4	Ko neva bhadde kalahaṁ udīrayi”.
ja535:31.1	“Yo sabbalokaccarito mahāmuni,
ja535:31.2	Dhamme ṭhito nārado saccanikkamo;
ja535:31.3	So nobravi girivare gandhamādane,
ja535:31.4	Gantvāna bhūtādhipameva pucchatha;
ja535:31.5	Sace na jānātha idhuttamādhamaṁ”.
ja535:32.1	“Asu brahāraññacaro mahāmuni,
ja535:32.2	Nādatvā bhattaṁ varagatte bhuñjati;
ja535:32.3	Viceyya dānāni dadāti kosiyo,
ja535:32.4	Yassā hi so dassati sāva seyyasi”.
ja535:33.1	“Asū hi yo sammati dakkhiṇaṁ disaṁ,
ja535:33.2	Gaṅgāya tīre himavantapassani;
ja535:33.3	Sa kosiyo dullabhapānabhojano,
ja535:33.4	Tassa sudhaṁ pāpaya devasārathi”.
ja535:34.1	Sa mātalī devavarena pesito,
ja535:34.2	Sahassayuttaṁ abhiruyha sandanaṁ;
ja535:34.3	Sukhippameva upagamma assamaṁ,
ja535:34.4	Adissamāno munino sudhaṁ adā.
ja535:35.1	“Udaggihuttaṁ upatiṭṭhato hi me,
ja535:35.2	Pabhaṅkaraṁ lokatamonuduttamaṁ;
ja535:35.3	Sabbāni bhūtāni adhicca vāsavo,
ja535:35.4	Ko neva me pāṇisu kiṁ sudhodahi.
ja535:36.1	Saṅkhūpamaṁ setamatulyadassanaṁ,
ja535:36.2	Suciṁ sugandhaṁ piyarūpamabbhutaṁ;
ja535:36.3	Adiṭṭhapubbaṁ mama jātu cakkhubhi,
ja535:36.4	Kā devatā pāṇisu kiṁ sudhodahi”.
ja535:37.1	“Ahaṁ mahindena mahesi pesito,
ja535:37.2	Sudhābhihāsiṁ turito mahāmuni;
ja535:37.3	Jānāsi maṁ mātali devasārathi,
ja535:37.4	Bhuñjassu bhattuttama mābhivārayi.
ja535:38.1	Bhuttā ca sā dvādasa hanti pāpake,
ja535:38.2	Khudaṁ pipāsaṁ aratiṁ daraklamaṁ;
ja535:38.3	Kodhūpanāhañca vivādapesuṇaṁ,
ja535:38.4	Sītuṇha tandiñca rasuttamaṁ idaṁ”.
ja535:39.1	“Na kappatī mātali mayha bhuñjituṁ,
ja535:39.2	Pubbe adatvā iti me vatuttamaṁ;
ja535:39.3	Na cāpi ekāsnamarīyapūjitaṁ,
ja535:39.4	Asaṁvibhāgī ca sukhaṁ na vindati”.
ja535:40.1	“Thīghātakā ye cime pāradārikā,
ja535:40.2	Mittadduno ye ca sapanti subbate;
ja535:40.3	Sabbe ca te maccharipañcamādhamā,
ja535:40.4	Tasmā adatvā udakampi nāsniye.
ja535:41.1	Sohitthiyā vā purisassa vā pana,
ja535:41.2	Dassāmi dānaṁ vidusampavaṇṇitaṁ;
ja535:41.3	Saddhā vadaññū idha vītamaccharā,
ja535:41.4	Bhavanti hete sucisaccasammatā”.
ja535:42.1	Ato matā devavarena pesitā,
ja535:42.2	Kaññā catasso kanakattacūpamā;
ja535:42.3	Āsā ca saddhā ca sirī tato hirī,
ja535:42.4	Taṁ assamaṁ āgamu yattha kosiyo.
ja535:43.1	Tā disvā sabbo paramappamodito,
ja535:43.2	Subhena vaṇṇena sikhārivaggino;
ja535:43.3	Kaññā catasso caturo catuddisā,
ja535:43.4	Iccabravī mātalino ca sammukhā.
ja535:44.1	“Purimaṁ disaṁ kā tvaṁ pabhāsi devate,
ja535:44.2	Alaṅkatā tāravarāva osadhī;
ja535:44.3	Pucchāmi taṁ kañcanavelliviggahe,
ja535:44.4	Ācikkha me tvaṁ katamāsi devatā”.
ja535:45.1	“Sirāha devī manujebhi pūjitā,
ja535:45.2	Apāpasattūpanisevinī sadā;
ja535:45.3	Sudhāvivādena tavantimāgatā,
ja535:45.4	Taṁ maṁ sudhāya varapañña bhājaya.
ja535:46.1	Yassāhamicchāmi sudhaṁ mahāmuni,
ja535:46.2	So sabbakāmehi naro pamodati;
ja535:46.3	Sirīti maṁ jānahi jūhatuttama,
ja535:46.4	Taṁ maṁ sudhāya varapañña bhājaya”.
ja535:47.1	“Sippena vijjācaraṇena buddhiyā,
ja535:47.2	Narā upetā paguṇā sakammunā;
ja535:47.3	Tayā vihīnā na labhanti kiñcanaṁ,
ja535:47.4	Tayidaṁ na sādhu yadidaṁ tayā kataṁ.
ja535:48.1	Passāmi posaṁ alasaṁ mahagghasaṁ,
ja535:48.2	Sudukkulīnampi arūpimaṁ naraṁ;
ja535:48.3	Tayānugutto siri jātimāmapi,
ja535:48.4	Peseti dāsaṁ viya bhogavā sukhī.
ja535:49.1	Taṁ taṁ asaccaṁ avibhajjaseviniṁ,
ja535:49.2	Jānāmi mūḷhaṁ vidurānupātiniṁ;
ja535:49.3	Na tādisī arahati āsanūdakaṁ,
ja535:49.4	Kuto sudhā gaccha na mayha ruccasi”.
ja535:50.1	“Kā sukkadāṭhā paṭimukkakuṇḍalā,
ja535:50.2	Cittaṅgadā kambuvimaṭṭhadhārinī;
ja535:50.3	Osittavaṇṇaṁ paridayha sobhasi,
ja535:50.4	Kusaggirattaṁ apiḷayha mañjariṁ.
ja535:51.1	Migīva bhantā saracāpadhārinā,
ja535:51.2	Virādhitā mandamiva udikkhasi;
ja535:51.3	Ko te dutīyo idha mandalocane,
ja535:51.4	Na bhāyasi ekikā kānane vane”.
ja535:52.1	“Na me dutīyo idha matthi kosiya,
ja535:52.2	Masakkasārappabhavamhi devatā;
ja535:52.3	Āsā sudhāsāya tavantimāgatā,
ja535:52.4	Taṁ maṁ sudhāya varapañña bhājaya”.
ja535:53.1	“Āsāya yanti vāṇijā dhanesino,
ja535:53.2	Nāvaṁ samāruyha parenti aṇṇave;
ja535:53.3	Te tattha sīdanti athopi ekadā,
ja535:53.4	Jīnādhanā enti vinaṭṭhapābhatā.
ja535:54.1	Āsāya khettāni kasanti kassakā,
ja535:54.2	Vapanti bījāni karontupāyaso;
ja535:54.3	Ītīnipātena avuṭṭhitāya vā,
ja535:54.4	Na kiñci vindanti tato phalāgamaṁ.
ja535:55.1	Athattakārāni karonti bhattusu,
ja535:55.2	Āsaṁ purakkhatvā narā sukhesino;
ja535:55.3	Te bhatturatthā atigāḷhitā puna,
ja535:55.4	Disā panassanti aladdha kiñcanaṁ.
ja535:56.1	Hitvāna dhaññañca dhanañca ñātake,
ja535:56.2	Āsāya saggādhimanā sukhesino;
ja535:56.3	Tapanti lūkhampi tapaṁ cirantaraṁ,
ja535:56.4	Kumaggamāruyha parenti duggatiṁ.
ja535:57.1	Āsā visaṁvādikasammatā ime,
ja535:57.2	Āse sudhāsaṁ vinayassu attani;
ja535:57.3	Na tādisī arahati āsanūdakaṁ,
ja535:57.4	Kuto sudhā gaccha na mayha ruccasi”.
ja535:58.1	“Daddallamānā yasasā yasassinī,
ja535:58.2	Jighaññanāmavhayanaṁ disaṁ pati;
ja535:58.3	Pucchāmi taṁ kañcanavelliviggahe,
ja535:58.4	Ācikkha me tvaṁ katamāsi devatā”.
ja535:59.1	“Saddhāha devī manujehi pūjitā,
ja535:59.2	Apāpasattūpanisevinī sadā;
ja535:59.3	Sudhāvivādena tavantimāgatā,
ja535:59.4	Taṁ maṁ sudhāya varapañña bhājaya”.
ja535:60.1	“Dānaṁ damaṁ cāgamathopi saṁyamaṁ,
ja535:60.2	Ādāya saddhāya karonti hekadā;
ja535:60.3	Theyyaṁ musā kūṭamathopi pesuṇaṁ,
ja535:60.4	Karonti heke puna viccutā tayā.
ja535:61.1	Bhariyāsu poso sadisīsu pekkhavā,
ja535:61.2	Sīlūpapannāsu patibbatāsupi;
ja535:61.3	Vinetvāna chandaṁ kulitthiyāsupi,
ja535:61.4	Karoti saddhaṁ puna kumbhadāsiyā.
ja535:62.1	Tvameva saddhe paradārasevinī,
ja535:62.2	Pāpaṁ karosi kusalampi riñcasi;
ja535:62.3	Na tādisī arahati āsanūdakaṁ,
ja535:62.4	Kuto sudhā gaccha na mayha ruccasi”.
ja535:63.1	“Jighaññarattiṁ aruṇasmimūhate,
ja535:63.2	Yā dissati uttamarūpavaṇṇinī;
ja535:63.3	Tathūpamā maṁ paṭibhāsi devate,
ja535:63.4	Ācikkha me tvaṁ katamāsi accharā.
ja535:64.1	Kālā nidāgheriva aggijāriva,
ja535:64.2	Anileritā lohitapattamālinī;
ja535:64.3	Kā tiṭṭhasi mandamigāvalokayaṁ,
ja535:64.4	Bhāsesamānāva giraṁ na muñcasi”.
ja535:65.1	“Hirāha devī manujehi pūjitā,
ja535:65.2	Apāpasattūpanisevinī sadā;
ja535:65.3	Sudhāvivādena tavantimāgatā,
ja535:65.4	Sāhaṁ na sakkomi sudhampi yācituṁ;
ja535:65.5	Kopīnarūpā viya yācanitthiyā”.
ja535:66.1	“Dhammena ñāyena sugatte lacchasi,
ja535:66.2	Eso hi dhammo na hi yācanā sudhā;
ja535:66.3	Taṁ taṁ ayācantimahaṁ nimantaye,
ja535:66.4	Sudhāya yañcicchasi tampi dammi te.
ja535:67.1	Sā tvaṁ mayā ajja sakamhi assame,
ja535:67.2	Nimantitā kañcanavelliviggahe;
ja535:67.3	Tuvañhi me sabbarasehi pūjiyā,
ja535:67.4	Taṁ pūjayitvāna sudhampi asniye”.
ja535:68.1	Sā kosiyenānumatā jutīmatā,
ja535:68.2	Addhā hiri rammaṁ pāvisi yassamaṁ;
ja535:68.3	Udakavantaṁ phalamariyapūjitaṁ,
ja535:68.4	Apāpasattūpanisevitaṁ sadā.
ja535:69.1	Rukkhaggahānā bahukettha pupphitā,
ja535:69.2	Ambā piyālā panasā ca kiṁsukā;
ja535:69.3	Sobhañjanā loddamathopi padmakā,
ja535:69.4	Kekā ca bhaṅgā tilakā supupphitā.
ja535:70.1	Sālā karerī bahukettha jambuyo,
ja535:70.2	Assatthanigrodhamadhukavetasā;
ja535:70.3	Uddālakā pāṭali sinduvārakā,
ja535:70.4	Manuññagandhā mucalindaketakā.
ja535:71.1	Hareṇukā veḷukā keṇu tindukā,
ja535:71.2	Sāmākanīvāramathopi cīnakā;
ja535:71.3	Mocā kadalī bahukettha sāliyo,
ja535:71.4	Pavīhayo ābhūjino ca taṇḍulā.
ja535:72.1	Tassevuttarapassena,
ja535:72.2	jātā pokkharaṇī sivā;
ja535:72.3	Akakkasā apabbhārā,
ja535:72.4	sādhu appaṭigandhikā.
ja535:73.1	Tattha macchā sanniratā,
ja535:73.2	khemino bahubhojanā;
ja535:73.3	Siṅgū savaṅkā saṅkulā,
ja535:73.4	satavaṅkā ca rohitā;
ja535:73.5	Āḷigaggarakākiṇṇā,
ja535:73.6	pāṭhīnā kākamacchakā.
ja535:74.1	Tattha pakkhī sanniratā,
ja535:74.2	khemino bahubhojanā;
ja535:74.3	Haṁsā koñcā mayūrā ca,
ja535:74.4	cakkavākā ca kukkuhā;
ja535:74.5	Kuṇālakā bahū citrā,
ja535:74.6	sikhaṇḍī jīvajīvakā.
ja535:75.1	Tattha pānāya māyanti,
ja535:75.2	nānā migagaṇā bahū;
ja535:75.3	Sīhā byagghā varāhā ca,
ja535:75.4	acchakokataracchayo.
ja535:76.1	Palāsādā gavajā ca,
ja535:76.2	mahiṁsā rohitā rurū;
ja535:76.3	Eṇeyyā ca varāhā ca,
ja535:76.4	gaṇino nīkasūkarā;
ja535:76.5	Kadalimigā bahukettha,
ja535:76.6	biḷārā sasakaṇṇikā.
ja535:77.1	Chamāgirī pupphavicitrasanthatā,
ja535:77.2	Dijābhighuṭṭhā dijasaṅghasevitā.
ja535:78.1	Sā suttacā nīladumābhilambitā,
ja535:78.2	Vijju mahāmegharivānupajjatha;
ja535:78.3	Tassā susambandhasiraṁ kusāmayaṁ,
ja535:78.4	Suciṁ sugandhaṁ ajinūpasevitaṁ;
ja535:78.5	Atricca kocchaṁ hirimetadabravi,
ja535:78.6	“Nisīda kalyāṇi sukhayidamāsanaṁ”.
ja535:79.1	Tassā tadā kocchagatāya kosiyo,
ja535:79.2	Yadicchamānāya jaṭājinandharo;
ja535:79.3	Navehi pattehi sayaṁ sahūdakaṁ,
ja535:79.4	Sudhābhihāsī turito mahāmuni.
ja535:80.1	Sā taṁ paṭiggayha ubhohi pāṇibhi,
ja535:80.2	Iccabravi attamanā jaṭādharaṁ;
ja535:80.3	“Handāhaṁ etarahi pūjitā tayā,
ja535:80.4	Gaccheyyaṁ brahme tidivaṁ jitāvinī”.
ja535:81.1	Sā kosiyenānumatā jutīmatā,
ja535:81.2	Udīritā vaṇṇamadena mattā;
ja535:81.3	Sakāse gantvāna sahassacakkhuno,
ja535:81.4	“Ayaṁ sudhā vāsava dehi me jayaṁ”.
ja535:82.1	Tamena sakkopi tadā apūjayi,
ja535:82.2	Sahindadevā surakaññamuttamaṁ;
ja535:82.3	Sā pañjalī devamanussapūjitā,
ja535:82.4	Navamhi kocchamhi yadā upāvisi.
ja535:83.1	Tameva saṁsī punadeva mātaliṁ,
ja535:83.2	Sahassanetto tidasānamindo;
ja535:83.3	“Gantvāna vākyaṁ mama brūhi kosiyaṁ,
ja535:83.4	‘Āsāya saddhā siriyā ca kosiya;
ja535:83.5	Hirī sudhaṁ kena malattha hetunā’”.
ja535:84.1	Taṁ suplavatthaṁ udatārayī rathaṁ,
ja535:84.2	Daddallamānaṁ upakāriyasādisaṁ;
ja535:84.3	Jambonadīsaṁ tapaneyyasannibhaṁ,
ja535:84.4	Alaṅkataṁ kañcanacittasannibhaṁ.
ja535:85.1	Suvaṇṇacandettha bahū nipātitā,
ja535:85.2	Hatthī gavāssā kikibyagghadīpiyo;
ja535:85.3	Eṇeyyakā laṅghamayettha pakkhino,
ja535:85.4	Migettha veḷuriyamayā yudhā yutā.
ja535:86.1	Tatthassarājaharayo ayojayuṁ,
ja535:86.2	Dasasatāni susunāgasādise;
ja535:86.3	Alaṅkate kañcanajāluracchade,
ja535:86.4	Āveḷine saddagame asaṅgite.
ja535:87.1	Taṁ yānaseṭṭhaṁ abhiruyha mātali,
ja535:87.2	Disā imāyo abhinādayittha;
ja535:87.3	Nabhañca selañca vanappatiniñca,
ja535:87.4	Sasāgaraṁ pabyathayittha mediniṁ.
ja535:88.1	Sa khippameva upagamma assamaṁ,
ja535:88.2	Pāvāramekaṁsakato katañjalī;
ja535:88.3	Bahussutaṁ vuddhaṁ vinītavantaṁ,
ja535:88.4	Iccabravī mātali devabrāhmaṇaṁ.
ja535:89.1	“Indassa vākyaṁ nisāmehi kosiya,
ja535:89.2	Dūto ahaṁ pucchati taṁ purindado;
ja535:89.3	‘Āsāya saddhā siriyā ca kosiya,
ja535:89.4	Hirī sudhaṁ kena malattha hetunā’”.
ja535:90.1	“Andhā sirī maṁ paṭibhāti mātali,
ja535:90.2	Saddhā aniccā pana devasārathi;
ja535:90.3	Āsā visaṁvādikasammatā hi me,
ja535:90.4	Hirī ca ariyamhi guṇe patiṭṭhitā”.
ja535:91.1	“Kumāriyo yācimā gottarakkhitā,
ja535:91.2	Jiṇṇā ca yā yā ca sabhattuitthiyo;
ja535:91.3	Tā chandarāgaṁ purisesu uggataṁ,
ja535:91.4	Hiriyā nivārenti sacittamattano.
ja535:92.1	Saṅgāmasīse sarasattisaṁyute,
ja535:92.2	Parājitānaṁ patataṁ palāyinaṁ;
ja535:92.3	Hiriyā nivattanti jahitva jīvitaṁ,
ja535:92.4	Te sampaṭicchanti punā hirīmanā.
ja535:93.1	Velā yathā sāgaravegavārinī,
ja535:93.2	Hirāya hi pāpajanaṁ nivārinī;
ja535:93.3	Taṁ sabbaloke hirimariyapūjitaṁ,
ja535:93.4	Indassa taṁ vedaya devasārathi”.
ja535:94.1	“Ko te imaṁ kosiya diṭṭhimodahi,
ja535:94.2	Brahmā mahindo atha vā pajāpati;
ja535:94.3	Hirāya devesu hi seṭṭhasammatā,
ja535:94.4	Dhītā mahindassa mahesi jāyatha”.
ja535:95.1	“Handehi dāni tidivaṁ apakkama,
ja535:95.2	Rathaṁ samāruyha mamāyitaṁ imaṁ;
ja535:95.3	Indo ca taṁ indasagotta kaṅkhati,
ja535:95.4	Ajjeva tvaṁ indasahabyataṁ vaja”.
ja535:96.1	“Evaṁ visujjhanti apāpakammino,
ja535:96.2	Atho suciṇṇassa phalaṁ na nassati;
ja535:96.3	Ye keci maddakkhu sudhāya bhojanaṁ,
ja535:96.4	Sabbeva te indasahabyataṁ gatā.
ja535:97.1	Hirī uppalavaṇṇāsi,
ja535:97.2	kosiyo dānapati bhikkhu;
ja535:97.3	Anuruddho pañcasikho,
ja535:97.4	ānando āsi mātali.
ja535:98.1	Sūriyo kassapo bhikkhu,
ja535:98.2	moggallānosi candimā;
ja535:98.3	Nārado sāriputtosi,
ja535:98.4	sambuddho āsi vāsavo”ti.
ja535:99.1	Sudhābhojanajātakaṁ tatiyaṁ.
ja536:0.1	Jātaka
ja536:0.2	Asītinipāta
ja536:0.3	Cūḷahaṁsavagga
ja536:0.4	4. Kuṇālajātaka
ja536:1.1	Evamakkhāyati, evamanusūyati.
ja536:1.2	Sabbosadhadharaṇidhare nekapupphamālyavitate gajagavajamahiṁsarurucamarapasadakhaggagokaṇṇasīhabyagghadīpiacchakokataracchauddārakadalimigabiḷārasasakaṇṇikānucarite ākiṇṇanelamaṇḍalamahāvarāhanāgakulakareṇusaṅghādhivuṭṭhe issamigasākhamigasarabhamigaeṇīmigavātamigapasadamigapurisālukimpurisayakkharakkhasanisevite amajjavamañjarīdharapahaṭṭhapupphaphusitaggānekapādapagaṇavitate kuraracakoravāraṇamayūraparabhatajīvañjīvakacelāvakābhiṅkārakaravīkamattavihaṅgagaṇasatatasampaghuṭṭhe añjanamanosilāharitālahiṅgulakahemarajatakanakānekadhātusatavinaddhapaṭimaṇḍitappadese evarūpe khalu, bho, ramme vanasaṇḍe kuṇālo nāma sakuṇo paṭivasati ativiya citto ativiya cittapattacchadano.
ja536:2.1	Tasseva khalu, bho, kuṇālassa sakuṇassa aḍḍhuḍḍhāni itthisahassāni paricārikā dijakaññāyo, atha khalu, bho, dve dijakaññāyo kaṭṭhaṁ mukhena ḍaṁsitvā taṁ kuṇālaṁ sakuṇaṁ majjhe nisīdāpetvā uḍḍenti—
ja536:2.2	“mā naṁ kuṇālaṁ sakuṇaṁ addhānapariyāyapathe kilamatho ubbāhetthā”ti.
ja536:3.1	Pañcasatā dijakaññāyo heṭṭhato heṭṭhato uḍḍenti—
ja536:3.2	“sacāyaṁ kuṇālo sakuṇo āsanā paripatissati, mayaṁ taṁ pakkhehi paṭiggahessāmā”ti.
ja536:4.1	Pañcasatā dijakaññāyo uparūpari uḍḍenti—
ja536:4.2	“mā naṁ kuṇālaṁ sakuṇaṁ ātapo paritāpesī”ti.
ja536:5.1	Pañcasatā pañcasatā dijakaññāyo ubhatopassena uḍḍenti—
ja536:5.2	“mā naṁ kuṇālaṁ sakuṇaṁ sītaṁ vā uṇhaṁ vā tiṇaṁ vā rajo vā vāto vā ussāvo vā upapphusī”ti.
ja536:6.1	Pañcasatā dijakaññāyo purato purato uḍḍenti—
ja536:6.2	“mā naṁ kuṇālaṁ sakuṇaṁ gopālakā vā pasupālakā vā tiṇahārakā vā kaṭṭhahārakā vā vanakammikā vā kaṭṭhena vā kaṭhalena vā pāṇinā vā (…) leḍḍunā vā daṇḍena vā satthena vā sakkharāhi vā pahāraṁ adaṁsu.
ja536:6.3	Māyaṁ kuṇālo sakuṇo gacchehi vā latāhi vā rukkhehi vā sākhāhi vā thambhehi vā pāsāṇehi vā balavantehi vā pakkhīhi saṅgamesī”ti.
ja536:7.1	Pañcasatā dijakaññāyo pacchato pacchato uḍḍenti saṇhāhi sakhilāhi mañjūhi madhurāhi vācāhi samudācarantiyo—
ja536:7.2	“māyaṁ kuṇālo sakuṇo āsane pariyukkaṇṭhī”ti.
ja536:8.1	Pañcasatā dijakaññāyo disodisaṁ uḍḍenti anekarukkhavividhavikatiphalamāharantiyo—
ja536:8.2	“māyaṁ kuṇālo sakuṇo khudāya parikilamitthā”ti.
ja536:9.1	Atha khalu, bho, tā dijakaññāyo taṁ kuṇālaṁ sakuṇaṁ ārāmeneva ārāmaṁ uyyāneneva uyyānaṁ nadītittheneva nadītitthaṁ pabbatasikhareneva pabbatasikharaṁ ambavaneneva ambavanaṁ jambuvaneneva jambuvanaṁ labujavaneneva labujavanaṁ nāḷikerasañcāriyeneva nāḷikerasañcāriyaṁ khippameva abhisambhonti ratitthāya.
ja536:10.1	Atha khalu, bho, kuṇālo sakuṇo tāhi dijakaññāhi divasaṁ paribyūḷho evaṁ apasādeti—
ja536:10.2	“nassatha tumhe vasaliyo, vinassatha tumhe vasaliyo, coriyo dhuttiyo asatiyo lahucittāyo katassa appaṭikārikāyo anilo viya yenakāmaṅgamāyo”ti.
ja536:11.1	Tasseva khalu, bho, himavato pabbatarājassa puratthimadisābhāge susukhumasunipuṇagirippabhava—
ja536:11.2	haritupayantiyo.
ja536:12.1	Uppala paduma kumuda nalina satapatta sogandhika mandālaka sampativirūḷhasucigandhamanuññamāvakappadese.
ja536:13.1	Kuravakamucalindaketakavedisavañjulapunnāgabakulatilakapiyakahasanasālasaḷalacampakaasokanāgarukkhatirīṭibhujapattaloddacandanoghavane kāḷāgarupadmakapiyaṅgudevadārukacocagahane kakudhakuṭajaaṅkolakaccikārakaṇikārakaṇṇikārakanaverakoraṇḍakakoviḷārakiṁsukayodhikavanamallikamanaṅgaṇamanavajjabhaṇḍisurucirabhaginimālāmalyadhare jātisumanamadhugandhikadhanutakkāritālīsatagaramusīrakoṭṭhakacchavitate atimuttakasaṅkusumitalatāvitatapaṭimaṇḍitappadese haṁsapilavakādambakāraṇḍavābhinadite vijjādharasiddhasamaṇatāpasagaṇādhivuṭṭhe varadevayakkharakkhasadānavagandhabbakinnaramahoragānuciṇṇappadese evarūpe khalu, bho, ramme vanasaṇḍe puṇṇamukho nāma phussakokilo paṭivasati ativiya madhuragiro vilāsitanayano mattakkho.
ja536:14.1	Tasseva khalu, bho, puṇṇamukhassa phussakokilassa aḍḍhuḍḍhāni itthisatāni paricārikā dijakaññāyo.
ja536:14.2	Atha khalu, bho, dve dijakaññāyo kaṭṭhaṁ mukhena ḍaṁsitvā taṁ puṇṇamukhaṁ phussakokilaṁ majjhe nisīdāpetvā uḍḍenti—
ja536:14.3	“mā naṁ puṇṇamukhaṁ phussakokilaṁ addhānapariyāyapathe kilamatho ubbāhetthā”ti.
ja536:15.1	Paññāsa dijakaññāyo heṭṭhato heṭṭhato uḍḍenti—
ja536:15.2	“sacāyaṁ puṇṇamukho phussakokilo āsanā paripatissati, mayaṁ taṁ pakkhehi paṭiggahessāmā”ti.
ja536:16.1	Paññāsa dijakaññāyo uparūpari uḍḍenti—
ja536:16.2	“mā naṁ puṇṇamukhaṁ phussakokilaṁ ātapo paritāpesī”ti.
ja536:17.1	Paññāsa paññāsa dijakaññāyo ubhatopassena uḍḍenti—
ja536:17.2	“mā naṁ puṇṇamukhaṁ phussakokilaṁ sītaṁ vā uṇhaṁ vā tiṇaṁ vā rajo vā vāto vā ussāvo vā upapphusī”ti.
ja536:18.1	Paññāsa dijakaññāyo purato purato uḍḍenti—
ja536:18.2	“mā naṁ puṇṇamukhaṁ phussakokilaṁ gopālakā vā pasupālakā vā tiṇahārakā vā kaṭṭhahārakā vā vanakammikā vā kaṭṭhena vā kaṭhalena vā pāṇinā vā leḍḍunā vā daṇḍena vā satthena vā sakkharāhi vā pahāraṁ adaṁsu.
ja536:18.3	Māyaṁ puṇṇamukho phussakokilo gacchehi vā latāhi vā rukkhehi vā sākhāhi vā thambhehi vā pāsāṇehi vā balavantehi vā pakkhīhi saṅgamesī”ti.
ja536:19.1	Paññāsa dijakaññāyo pacchato pacchato uḍḍenti saṇhāhi sakhilāhi mañjūhi madhurāhi vācāhi samudācarantiyo—
ja536:19.2	“māyaṁ puṇṇamukho phussakokilo āsane pariyukkaṇṭhī”ti.
ja536:20.1	Paññāsa dijakaññāyo disodisaṁ uḍḍenti anekarukkhavividhavikatiphalamāharantiyo—
ja536:20.2	“māyaṁ puṇṇamukho phussakokilo khudāya parikilamitthā”ti.
ja536:21.1	Atha khalu, bho, tā dijakaññāyo taṁ puṇṇamukhaṁ phussakokilaṁ ārāmeneva ārāmaṁ uyyāneneva uyyānaṁ nadītittheneva nadītitthaṁ pabbatasikhareneva pabbatasikharaṁ ambavaneneva ambavanaṁ jambuvaneneva jambuvanaṁ labujavaneneva labujavanaṁ nāḷikerasañcāriyeneva nāḷikerasañcāriyaṁ khippameva abhisambhonti ratitthāya.
ja536:22.1	Atha khalu, bho, puṇṇamukho phussakokilo tāhi dijakaññāhi divasaṁ paribyūḷho evaṁ pasaṁsati—
ja536:22.2	“sādhu sādhu, bhaginiyo, etaṁ kho, bhaginiyo, tumhākaṁ patirūpaṁ kuladhītānaṁ, yaṁ tumhe bhattāraṁ paricareyyāthā”ti.
ja536:23.1	Atha khalu, bho, puṇṇamukho phussakokilo yena kuṇālo sakuṇo tenupasaṅkami.
ja536:23.2	Addasaṁsu kho kuṇālassa sakuṇassa paricārikā dijakaññāyo taṁ puṇṇamukhaṁ phussakokilaṁ dūratova āgacchantaṁ;
ja536:23.3	disvāna yena puṇṇamukho phussakokilo tenupasaṅkamiṁsu; upasaṅkamitvā taṁ puṇṇamukhaṁ phussakokilaṁ etadavocuṁ—
ja536:23.4	“ayaṁ, samma puṇṇamukha, kuṇālo sakuṇo ativiya pharuso ativiya pharusavāco, appevanāma tavampi āgamma piyavācaṁ labheyyāmā”ti.
ja536:23.5	“Appevanāma, bhaginiyo”ti vatvā yena kuṇālo sakuṇo tenupasaṅkami; upasaṅkamitvā kuṇālena sakuṇena saddhiṁ paṭisammoditvā ekamantaṁ nisīdi.
ja536:23.6	Ekamantaṁ nisinno kho puṇṇamukho phussakokilo taṁ kuṇālaṁ sakuṇaṁ etadavoca—
ja536:23.7	“kissa tvaṁ, samma kuṇāla, itthīnaṁ sujātānaṁ kuladhītānaṁ sammāpaṭipannānaṁ micchāpaṭipannosi?
ja536:23.8	Amanāpabhāṇīnampi kira, samma kuṇāla, itthīnaṁ manāpabhāṇinā bhavitabbaṁ, kimaṅga pana manāpabhāṇīnan”ti.
ja536:24.1	Evaṁ vutte, kuṇālo sakuṇo taṁ puṇṇamukhaṁ phussakokilaṁ evaṁ apasādesi—
ja536:24.2	“nassa tvaṁ, samma jamma vasala, vinassa tvaṁ, samma jamma vasala, ko nu tayā viyatto jāyājinenā”ti.
ja536:24.3	Evaṁ apasādito ca pana puṇṇamukho phussakokilo tatoyeva paṭinivatti.
ja536:25.1	Atha khalu, bho, puṇṇamukhassa phussakokilassa aparena samayena nacirasseva kharo ābādho uppajji lohitapakkhandikā bāḷhā vedanā vattanti māraṇantikā.
ja536:25.2	Atha khalu, bho, puṇṇamukhassa phussakokilassa paricārikānaṁ dijakaññānaṁ etadahosi—
ja536:25.3	“ābādhiko kho ayaṁ puṇṇamukho phussakokilo, appevanāma imamhā ābādhā vuṭṭhaheyyā”ti ekaṁ adutiyaṁ ohāya yena kuṇālo sakuṇo tenupasaṅkamiṁsu.
ja536:25.4	Addasā kho kuṇālo sakuṇo tā dijakaññāyo dūratova āgacchantiyo, disvāna tā dijakaññāyo etadavoca—
ja536:25.5	“kahaṁ pana tumhaṁ vasaliyo bhattā”ti?
ja536:25.6	“Ābādhiko kho, samma kuṇāla, puṇṇamukho phussakokilo appevanāma tamhā ābādhā vuṭṭhaheyyā”ti.
ja536:25.7	Evaṁ vutte, kuṇālo sakuṇo tā dijakaññāyo evaṁ apasādesi—
ja536:25.8	“nassatha tumhe vasaliyo, vinassatha tumhe vasaliyo, coriyo dhuttiyo asatiyo lahucittāyo katassa appaṭikārikāyo anilo viya yenakāmaṅgamāyo”ti;
ja536:25.9	vatvā yena puṇṇamukho phussakokilo tenupasaṅkami; upasaṅkamitvā taṁ puṇṇamukhaṁ phussakokilaṁ etadavoca—
ja536:25.10	“haṁ, samma, puṇṇamukhā”ti.
ja536:25.11	“Haṁ, samma, kuṇālā”ti.
ja536:26.1	Atha khalu, bho kuṇālo sakuṇo taṁ puṇṇamukhaṁ phussakokilaṁ pakkhehi ca mukhatuṇḍakena ca pariggahetvā vuṭṭhāpetvā nānābhesajjāni pāyāpesi.
ja536:26.2	Atha khalu, bho, puṇṇamukhassa phussakokilassa so ābādho paṭippassambhīti.
ja536:26.3	Atha khalu, bho, kuṇālo sakuṇo taṁ puṇṇamukhaṁ phussakokilaṁ gilānavuṭṭhitaṁ aciravuṭṭhitaṁ gelaññā etadavoca—
ja536:27.1	“Diṭṭhā mayā, samma puṇṇamukha, kaṇhā dvepitikā pañcapatikāya chaṭṭhe purise cittaṁ paṭibandhantiyā, yadidaṁ kabandhe pīṭhasappimhī”ti.
ja536:27.2	Bhavati ca panuttarettha vākyaṁ—
ja536:28.1	“Athajjuno nakulo bhīmaseno,
ja536:28.2	Yudhiṭṭhilo sahadevo ca rājā;
ja536:28.3	Ete patī pañca maticca nārī,
ja536:28.4	Akāsi khujjavāmanakena pāpanti.
ja536:29.1	Diṭṭhā mayā, samma puṇṇamukha, saccatapāpī nāma samaṇī susānamajjhe vasantī catutthabhattaṁ pariṇāmayamānā surādhuttakena pāpamakāsi.
ja536:30.1	Diṭṭhā mayā, samma puṇṇamukha, kākavatī nāma devī samuddamajjhe vasantī bhariyā venateyyassa naṭakuverena pāpamakāsi.
ja536:31.1	Diṭṭhā mayā, samma puṇṇamukha, kuruṅgadevī nāma lomasuddarī eḷikakumāraṁ kāmayamānā chaḷaṅgakumāradhanantevāsinā pāpamakāsi.
ja536:32.1	Evañhetaṁ mayā ñātaṁ,
ja536:32.2	Brahmadattassa mātaraṁ;
ja536:32.3	Ohāya kosalarājaṁ,
ja536:32.4	Pañcālacaṇḍena pāpamakāsi.
ja536:33.1	Etā ca aññā ca akaṁsu pāpaṁ,
ja536:33.2	Tasmāhamitthīnaṁ na vissase nappasaṁse;
ja536:33.3	Mahī yathā jagati samānarattā,
ja536:33.4	Vasundharā itarītarā patiṭṭhā;
ja536:33.5	Sabbasahā aphandanā akuppā,
ja536:33.6	Tathitthiyo tāyo na vissase naro.
ja536:34.1	Sīho yathā lohitamaṁsabhojano,
ja536:34.2	Vāḷamigo pañcāvudho suruddho;
ja536:34.3	Pasayhakhādī parahiṁsane rato,
ja536:34.4	Tathitthiyo tāyo na vissase naro.
ja536:35.1	Na khalu, samma puṇṇamukha, vesiyo nāriyo gamaniyo, na hetā bandhakiyo nāma, vadhikāyo nāma etāyo, yadidaṁ vesiyo nāriyo gamaniyoti.
ja536:36.1	Coro viya veṇikatā, madirāva diddhā vāṇijo viya vācāsanthutiyo, issasiṅghamiva viparivattāyo, uragāmiva dujivhāyo, sobbhamiva paṭicchannā, pātālamiva duppūrā rakkhasī viya duttosā, yamovekantahāriyo, sikhīriva sabbabhakkhā, nadīriva sabbavāhī, anilo viya yenakāmaṁcarā, neru viya avisesakarā, visarukkho viya niccaphalitāyoti.
ja536:36.2	Bhavati ca panuttarettha vākyaṁ—
ja536:37.1	Yathā coro yathā diddho,
ja536:37.2	Vāṇijova vikatthanī;
ja536:37.3	Issasiṅghamiva parivattā,
ja536:37.4	Dujivhā urago viya.
ja536:38.1	Sobbhamiva paṭicchannā,
ja536:38.2	pātālamiva duppurā;
ja536:38.3	Rakkhasī viya duttosā,
ja536:38.4	yamovekantahāriyo.
ja536:39.1	Yathā sikhī nadī vāto,
ja536:39.2	Nerunāva samāgatā;
ja536:39.3	Visarukkho viya niccaphalā,
ja536:39.4	Nāsayanti ghare bhogaṁ;
ja536:39.5	Ratanantakaritthiyoti.
ja536:40.1	Cattārimāni, samma puṇṇamukha, yāni vatthūni kicce jāte anatthacarāni bhavanti;
ja536:40.2	tāni parakule na vāsetabbāni—
ja536:40.3	goṇaṁ dhenuṁ yānaṁ bhariyā.
ja536:40.4	Cattāri etāni paṇḍito dhanāni gharā na vippavāsaye.
ja536:41.1	Goṇaṁ dhenuñca yānañca,
ja536:41.2	Bhariyaṁ ñātikule na vāsaye;
ja536:41.3	Bhañjanti rathaṁ ayānakā,
ja536:41.4	Ativāhena hananti puṅgavaṁ;
ja536:41.5	Dohena hananti vacchakaṁ,
ja536:41.6	Bhariyā ñātikule padussatīti.
ja536:42.1	Cha imāni, samma puṇṇamukha, yāni vatthūni kicce jāte anatthacarāni bhavanti—
ja536:43.1	Aguṇaṁ dhanu ñātikule ca bhariyā,
ja536:43.2	Pāraṁ nāvā akkhabhaggañca yānaṁ;
ja536:43.3	Dūre mitto pāpasahāyako ca,
ja536:43.4	Kicce jāte anatthacarāni bhavanti.
ja536:44.1	Aṭṭhahi khalu, samma puṇṇamukha, ṭhānehi itthī sāmikaṁ avajānāti.
ja536:44.2	Daliddatā, āturatā, jiṇṇatā, surāsoṇḍatā, muddhatā, pamattatā, sabbakiccesu anuvattanatā, sabbadhanaanuppadānena—
ja536:44.3	imehi khalu, samma puṇṇamukha, aṭṭhahi ṭhānehi itthī sāmikaṁ avajānāti.
ja536:44.4	Bhavati ca panuttarettha vākyaṁ—
ja536:45.1	Daliddaṁ āturañcāpi,
ja536:45.2	jiṇṇakaṁ surasoṇḍakaṁ;
ja536:45.3	Pamattaṁ muddhapattañca,
ja536:45.4	sabbakiccesu hāpanaṁ;
ja536:45.5	Sabbakāmappadānena,
ja536:45.6	avajānāti sāmikanti.
ja536:46.1	Navahi khalu, samma puṇṇamukha, ṭhānehi itthī padosamāharati.
ja536:46.2	Ārāmagamanasīlā ca hoti, uyyānagamanasīlā ca hoti, nadītitthagamanasīlā ca hoti, ñātikulagamanasīlā ca hoti, parakulagamanasīlā ca hoti, ādāsadussamaṇḍanānuyogamanuyuttasīlā ca hoti, majjapāyinī ca hoti, nillokanasīlā ca hoti, sadvāraṭhāyinī ca hoti—
ja536:46.3	imehi khalu, samma puṇṇamukha, navahi ṭhānehi itthī padosamāharatīti.
ja536:46.4	Bhavati ca panuttarettha vākyaṁ—
ja536:47.1	Ārāmasīlā ca uyyānaṁ,
ja536:47.2	Nadī ñāti parakulaṁ;
ja536:47.3	Ādāsadussamaṇḍanamanuyuttā,
ja536:47.4	Yā citthī majjapāyinī.
ja536:48.1	Yā ca nillokanasīlā,
ja536:48.2	Yā ca sadvāraṭhāyinī;
ja536:48.3	Navahetehi ṭhānehi,
ja536:48.4	Padosamāharanti itthiyoti.
ja536:49.1	Cattālīsāya khalu, samma puṇṇamukha, ṭhānehi itthī purisaṁ accācarati.
ja536:49.2	Vijambhati, vinamati, vilasati, vilajjati, nakhena nakhaṁ ghaṭṭeti, pādena pādaṁ akkamati, kaṭṭhena pathaviṁ vilikhati, dārakaṁ ullaṅghati ullaṅghāpeti, kīḷati kīḷāpeti, cumbati cumbāpeti, bhuñjati bhuñjāpeti, dadāti, yācati, katamanukaroti, uccaṁ bhāsati, nīcaṁ bhāsati, aviccaṁ bhāsati, viviccaṁ bhāsati, naccena gītena vāditena rodanena vilasitena vibhūsitena jagghati, pekkhati, kaṭiṁ cāleti, guyhabhaṇḍakaṁ sañcāleti, ūruṁ vivarati, ūruṁ pidahati, thanaṁ dasseti, kacchaṁ dasseti, nābhiṁ dasseti, akkhiṁ nikhanati, bhamukaṁ ukkhipati, oṭṭhaṁ upalikhati, jivhaṁ nillāleti, dussaṁ muñcati, dussaṁ paṭibandhati, sirasaṁ muñcati, sirasaṁ bandhati—
ja536:49.3	imehi khalu, samma puṇṇamukha, cattālīsāya ṭhānehi itthī purisaṁ accācarati.
ja536:50.1	Pañcavīsāya khalu, samma puṇṇamukha, ṭhānehi itthī paduṭṭhā veditabbā bhavati.
ja536:50.2	Sāmikassa pavāsaṁ vaṇṇeti, pavuṭṭhaṁ na sarati, āgataṁ nābhinandati, avaṇṇaṁ tassa bhaṇati, vaṇṇaṁ tassa na bhaṇati, anatthaṁ tassa carati, atthaṁ tassa na carati, akiccaṁ tassa karoti, kiccaṁ tassa na karoti, paridahitvā sayati, parammukhī nipajjati, parivattakajātā kho pana hoti kuṅkumiyajātā, dīghaṁ assasati, dukkhaṁ vedayati, uccārapassāvaṁ abhiṇhaṁ gacchati, vilomamācarati, parapurisasaddaṁ sutvā kaṇṇasotaṁ vivaramodahati, nihatabhogā kho pana hoti, paṭivissakehi santhavaṁ karoti, nikkhantapādā kho pana hoti, visikhānucārinī aticārinī kho pana hoti, niccaṁ sāmike agāravā paduṭṭhamanasaṅkappā, abhiṇhaṁ dvāre tiṭṭhati, kacchāni aṅgāni thanāni dasseti, disodisaṁ gantvā pekkhati—
ja536:50.3	imehi khalu, samma puṇṇamukha, pañcavīsāya ṭhānehi itthī paduṭṭhā veditabbā bhavati.
ja536:50.4	Bhavati ca panuttarettha vākyaṁ—
ja536:51.1	Pavāsaṁ tassa vaṇṇeti,
ja536:51.2	Gataṁ tassa na socati;
ja536:51.3	Disvāna patimāgataṁ nābhinandati,
ja536:51.4	Bhattāravaṇṇaṁ na kadāci bhāsati;
ja536:51.5	Ete paduṭṭhāya bhavanti lakkhaṇā.
ja536:52.1	Anatthaṁ tassa carati asaññatā,
ja536:52.2	Atthañca hāpeti akiccakārinī;
ja536:52.3	Paridahitvā sayati parammukhī,
ja536:52.4	Ete paduṭṭhāya bhavanti lakkhaṇā.
ja536:53.1	Parivattajātā ca bhavati kuṅkumī,
ja536:53.2	Dīghañca assasati dukkhavedinī;
ja536:53.3	Uccārapassāvamabhiṇhaṁ gacchati,
ja536:53.4	Ete paduṭṭhāya bhavanti lakkhaṇā.
ja536:54.1	Vilomamācarati akiccakārinī,
ja536:54.2	Saddaṁ nisāmeti parassa bhāsato;
ja536:54.3	Nihatabhogā ca karoti santhavaṁ,
ja536:54.4	Ete paduṭṭhāya bhavanti lakkhaṇā.
ja536:55.1	Kicchena laddhaṁ kasirābhataṁ dhanaṁ,
ja536:55.2	Vittaṁ vināseti dukkhena sambhataṁ;
ja536:55.3	Paṭivissakehi ca karoti santhavaṁ,
ja536:55.4	Ete paduṭṭhāya bhavanti lakkhaṇā.
ja536:56.1	Nikkhantapādā visikhānucārinī,
ja536:56.2	Niccañca sāmimhi paduṭṭhamānasā;
ja536:56.3	Aticārinī hoti apetagāravā,
ja536:56.4	Ete paduṭṭhāya bhavanti lakkhaṇā.
ja536:57.1	Abhikkhaṇaṁ tiṭṭhati dvāramūle,
ja536:57.2	Thanāni kacchāni ca dassayantī;
ja536:57.3	Disodisaṁ pekkhati bhantacittā,
ja536:57.4	Ete paduṭṭhāya bhavanti lakkhaṇā.
ja536:58.1	Sabbā nadī vaṅkagatī,
ja536:58.2	sabbe kaṭṭhamayā vanā;
ja536:58.3	Sabbitthiyo kare pāpaṁ,
ja536:58.4	labhamāne nivātake.
ja536:59.1	Sace labhetha khaṇaṁ vā raho vā,
ja536:59.2	Nivātakaṁ vāpi labhetha tādisaṁ;
ja536:59.3	Sabbāva itthī kayiruṁ nu pāpaṁ,
ja536:59.4	Aññaṁ alattha pīṭhasappināpi saddhiṁ.
ja536:60.1	Narānamārāmakarāsu nārisu,
ja536:60.2	Anekacittāsu aniggahāsu ca;
ja536:60.3	Sabbattha nāpītikarāpi ce siyā,
ja536:60.4	Na vissase titthasamā hi nāriyoti.
ja536:61.1	Yaṁ ve disvā kaṇḍarīkinnarānaṁ,
ja536:61.2	Sabbitthiyo na ramanti agāre;
ja536:61.3	Taṁ tādisaṁ maccaṁ cajitvā bhariyā,
ja536:61.4	Aññaṁ disvā purisaṁ pīṭhasappiṁ.
ja536:62.1	Bakassa ca bāvarikassa rañño,
ja536:62.2	Accantakāmānugatassa bhariyā;
ja536:62.3	Avācarī paṭṭhavasānugassa,
ja536:62.4	Kaṁ vāpi itthī nāticare tadaññaṁ.
ja536:63.1	Piṅgiyānī sabbalokissarassa,
ja536:63.2	Rañño piyā brahmadattassa bhariyā;
ja536:63.3	Avācarī paṭṭhavasānugassa,
ja536:63.4	Taṁ vāpi sā nājjhagā kāmakāminī.
ja536:64.1	Luddhānaṁ lahucittānaṁ,
ja536:64.2	Akataññūna dubbhinaṁ;
ja536:64.3	Nādevasatto puriso,
ja536:64.4	Thīnaṁ saddhātumarahati.
ja536:65.1	Na tā pajānanti kataṁ na kiccaṁ,
ja536:65.2	Na mātaraṁ pitaraṁ bhātaraṁ vā;
ja536:65.3	Anariyā samatikkantadhammā,
ja536:65.4	Sasseva cittassa vasaṁ vajanti.
ja536:66.1	Cirānuvuṭṭhampi piyaṁ manāpaṁ,
ja536:66.2	Anukampakaṁ pāṇasamampi bhattuṁ;
ja536:66.3	Āvāsu kiccesu ca naṁ jahanti,
ja536:66.4	Tasmāhamitthīnaṁ na vissasāmi.
ja536:67.1	Thīnañhi cittaṁ yathā vānarassa,
ja536:67.2	Kannappakannaṁ yathā rukkhachāyā;
ja536:67.3	Calācalaṁ hadayamitthiyānaṁ,
ja536:67.4	Cakkassa nemi viya parivattati.
ja536:68.1	Yadā tā passanti samekkhamānā,
ja536:68.2	Ādeyyarūpaṁ purisassa vittaṁ;
ja536:68.3	Saṇhāhi vācāhi nayanti menaṁ,
ja536:68.4	Kambojakā jalajeneva assaṁ.
ja536:69.1	Yadā na passanti samekkhamānā,
ja536:69.2	Ādeyyarūpaṁ purisassa vittaṁ;
ja536:69.3	Samantato naṁ parivajjayanti,
ja536:69.4	Tiṇṇo nadīpāragatova kullaṁ.
ja536:70.1	Silesūpamā sikhiriva sabbabhakkhā,
ja536:70.2	Tikkhamāyā nadīriva sīghasotā;
ja536:70.3	Sevanti hetā piyamappiyañca,
ja536:70.4	Nāvā yathā orakūlaṁ parañca.
ja536:71.1	Na tā ekassa na dvinnaṁ,
ja536:71.2	āpaṇova pasārito;
ja536:71.3	Yo tā mayhanti maññeyya,
ja536:71.4	vātaṁ jālena bādhaye.
ja536:72.1	Yathā nadī ca pantho ca,
ja536:72.2	pānāgāraṁ sabhā papā;
ja536:72.3	Evaṁ lokitthiyo nāma,
ja536:72.4	velā tāsaṁ na vijjati.
ja536:73.1	Ghatāsanasamā etā,
ja536:73.2	kaṇhasappasirūpamā;
ja536:73.3	Gāvo bahitiṇasseva,
ja536:73.4	omasanti varaṁ varaṁ.
ja536:74.1	Ghatāsanaṁ kuñjaraṁ kaṇhasappaṁ,
ja536:74.2	Muddhābhisittaṁ pamadā ca sabbā;
ja536:74.3	Ete naro niccayato bhajetha,
ja536:74.4	Tesaṁ have dubbidu sabbabhāvo.
ja536:75.1	Naccantavaṇṇā na bahūna kantā,
ja536:75.2	Na dakkhiṇā pamadā sevitabbā;
ja536:75.3	Na parassa bhariyā na dhanassa hetu,
ja536:75.4	Etitthiyo pañca na sevitabbā”.
ja536:76.1	Atha khalu, bho, ānando gijjharājā kuṇālassa sakuṇassa ādimajjhakathāpariyosānaṁ viditvā tāyaṁ velāyaṁ imā gāthāyo abhāsi—
ja536:77.1	“Puṇṇampi cemaṁ pathaviṁ dhanena,
ja536:77.2	Dajjitthiyā puriso sammatāya;
ja536:77.3	Laddhā khaṇaṁ atimaññeyya tampi,
ja536:77.4	Tāsaṁ vasaṁ asatīnaṁ na gacche.
ja536:78.1	Uṭṭhāhakañcepi alīnavuttiṁ,
ja536:78.2	Komārabhattāraṁ piyaṁ manāpaṁ;
ja536:78.3	Āvāsu kiccesu ca naṁ jahanti,
ja536:78.4	Tasmāhamitthīnaṁ na vissasāmi.
ja536:79.1	Na vissase icchati manti poso,
ja536:79.2	Na vissase rodati me sakāse;
ja536:79.3	Sevanti hetā piyamappiyañca,
ja536:79.4	Nāvā yathā orakūlaṁ parañca.
ja536:80.1	Na vissase sākhapurāṇasanthataṁ,
ja536:80.2	Na vissase mittapurāṇacoraṁ;
ja536:80.3	Na vissase rājānaṁ sakhā mamanti,
ja536:80.4	Na vissase itthi dasanna mātaraṁ.
ja536:81.1	Na vissase rāmakarāsu nārisu,
ja536:81.2	Accantasīlāsu asaññatāsu;
ja536:81.3	Accantapemānugatassa bhariyā,
ja536:81.4	Na vissase titthasamā hi nāriyo.
ja536:82.1	Haneyyuṁ chindeyyuṁ chedāpeyyumpi,
ja536:82.2	Kaṇṭhepi chetvā rudhiraṁ piveyyuṁ;
ja536:82.3	Mā dīnakāmāsu asaññatāsu,
ja536:82.4	Bhāvaṁ kare gaṅgatitthūpamāsu.
ja536:83.1	Musā tāsaṁ yathā saccaṁ,
ja536:83.2	saccaṁ tāsaṁ yathā musā;
ja536:83.3	Gāvo bahitiṇasseva,
ja536:83.4	omasanti varaṁ varaṁ.
ja536:84.1	Gatenetā palobhenti,
ja536:84.2	pekkhitena mhitena ca;
ja536:84.3	Athopi dunnivatthena,
ja536:84.4	mañjunā bhaṇitena ca.
ja536:85.1	Coriyo kathinā hetā,
ja536:85.2	vāḷā ca lapasakkharā;
ja536:85.3	Na tā kiñci na jānanti,
ja536:85.4	yaṁ manussesu vañcanaṁ.
ja536:86.1	Asā lokitthiyo nāma,
ja536:86.2	velā tāsaṁ na vijjati;
ja536:86.3	Sārattā ca pagabbhā ca,
ja536:86.4	sikhī sabbaghaso yathā.
ja536:87.1	Natthitthīnaṁ piyo nāma,
ja536:87.2	Appiyopi na vijjati;
ja536:87.3	Sevanti hetā piyamappiyañca,
ja536:87.4	Nāvā yathā orakūlaṁ parañca.
ja536:88.1	Natthitthīnaṁ piyo nāma,
ja536:88.2	appiyopi na vijjati;
ja536:88.3	Dhanattā paṭivallanti,
ja536:88.4	latāva dumanissitā.
ja536:89.1	Hatthibandhaṁ assabandhaṁ,
ja536:89.2	Gopurisañca maṇḍalaṁ;
ja536:89.3	Chavaḍāhakaṁ pupphachaḍḍakaṁ,
ja536:89.4	Sadhanamanupatanti nāriyo.
ja536:90.1	Kulaputtampi jahanti akiñcanaṁ,
ja536:90.2	Chavakasamasadisampi;
ja536:90.3	Anugacchanti anupatanti,
ja536:90.4	Dhanahetu hi nāriyo”ti.
ja536:91.1	Atha khalu, bho, nārado devabrāhmaṇo ānandassa gijjharājassa ādimajjhakathāpariyosānaṁ viditvā tāyaṁ velāyaṁ imā gāthāyo abhāsi—
ja536:92.1	“Cattārome na pūrenti,
ja536:92.2	te me suṇātha bhāsato;
ja536:92.3	Samuddo brāhmaṇo rājā,
ja536:92.4	itthī cāpi dijampati.
ja536:93.1	Saritā sāgaraṁ yanti,
ja536:93.2	yā kāci pathavissitā;
ja536:93.3	Tā samuddaṁ na pūrenti,
ja536:93.4	ūnattā hi na pūrati.
ja536:94.1	Brāhmaṇo ca adhīyāna,
ja536:94.2	vedamakkhānapañcamaṁ;
ja536:94.3	Bhiyyopi sutamiccheyya,
ja536:94.4	ūnattā hi na pūrati.
ja536:95.1	Rājā ca pathaviṁ sabbaṁ,
ja536:95.2	sasamuddaṁ sapabbataṁ;
ja536:95.3	Ajjhāvasaṁ vijinitvā,
ja536:95.4	anantaratanocitaṁ;
ja536:95.5	Pāraṁ samuddaṁ pattheti,
ja536:95.6	ūnattā hi na pūrati.
ja536:96.1	Ekamekāya itthiyā,
ja536:96.2	aṭṭhaṭṭha patino siyā;
ja536:96.3	Sūrā ca balavanto ca,
ja536:96.4	sabbakāmarasāharā;
ja536:96.5	Kareyya navame chandaṁ,
ja536:96.6	ūnattā hi na pūrati.
ja536:97.1	Sabbitthiyo sikhiriva sabbabhakkhā,
ja536:97.2	Sabbitthiyo nadīriva sabbavāhī;
ja536:97.3	Sabbitthiyo kaṇṭakānaṁva sākhā,
ja536:97.4	Sabbitthiyo dhanahetu vajanti.
ja536:98.1	Vātañca jālena naro parāmase,
ja536:98.2	Osiñcaye sāgaramekapāṇinā;
ja536:98.3	Sakena hatthena kareyya ghosaṁ,
ja536:98.4	Yo sabbabhāvaṁ pamadāsu osaje.
ja536:99.1	Corīnaṁ bahubuddhīnaṁ,
ja536:99.2	yāsu saccaṁ sudullabhaṁ;
ja536:99.3	Thīnaṁ bhāvo durājāno,
ja536:99.4	macchassevodake gataṁ.
ja536:100.1	Analā mudusambhāsā,
ja536:100.2	duppūrā tā nadīsamā;
ja536:100.3	Sīdanti naṁ viditvāna,
ja536:100.4	ārakā parivajjaye.
ja536:101.1	Āvaṭṭanī mahāmāyā,
ja536:101.2	brahmacariyavikopanā;
ja536:101.3	Sīdanti naṁ viditvāna,
ja536:101.4	ārakā parivajjaye.
ja536:102.1	Yaṁ etā upasevanti,
ja536:102.2	chandasā vā dhanena vā;
ja536:102.3	Jātavedova saṇṭhānaṁ,
ja536:102.4	khippaṁ anudahanti nan”ti.
ja536:103.1	Atha khalu, bho, kuṇālo sakuṇo nāradassa devabrāhmaṇassa ādimajjhakathāpariyosānaṁ viditvā tāyaṁ velāyaṁ imā gāthāyo abhāsi—
ja536:104.1	“Sallape nisitakhaggapāṇinā,
ja536:104.2	Paṇḍito api pisācadosinā;
ja536:104.3	Uggatejamuragampi āside,
ja536:104.4	Eko ekāya pamadāya nālape.
ja536:105.1	Lokacittamathanā hi nāriyo,
ja536:105.2	Naccagītabhaṇitamhitāvudhā;
ja536:105.3	Bādhayanti anupaṭṭhitassatiṁ,
ja536:105.4	Dīpe rakkhasigaṇova vāṇije.
ja536:106.1	Natthi tāsaṁ vinayo na saṁvaro,
ja536:106.2	Majjamaṁsaniratā asaññatā;
ja536:106.3	Tā gilanti purisassa pābhataṁ,
ja536:106.4	Sāgareva makaraṁ timiṅgalo.
ja536:107.1	Pañcakāmaguṇasātagocarā,
ja536:107.2	Uddhatā aniyatā asaññatā;
ja536:107.3	Osaranti pamadā pamādinaṁ,
ja536:107.4	Loṇatoyavatiyaṁva āpakā.
ja536:108.1	Yaṁ naraṁ upalapenti nāriyo,
ja536:108.2	Chandasā va ratiyā dhanena vā;
ja536:108.3	Jātavedasadisampi tādisaṁ,
ja536:108.4	Rāgadosavadhiyo dahanti naṁ.
ja536:109.1	Aḍḍhaṁ ñatvā purisaṁ mahaddhanaṁ,
ja536:109.2	Osaranti sadhanā sahattanā;
ja536:109.3	Rattacittamativeṭhayanti naṁ,
ja536:109.4	Sāla māluvalatāva kānane.
ja536:110.1	Tā upenti vividhena chandasā,
ja536:110.2	Citrabimbamukhiyo alaṅkatā;
ja536:110.3	Uhasanti pahasanti nāriyo,
ja536:110.4	Sambarova satamāyakovidā.
ja536:111.1	Jātarūpamaṇimuttabhūsitā,
ja536:111.2	Sakkatā patikulesu nāriyo;
ja536:111.3	Rakkhitā aticaranti sāmikaṁ,
ja536:111.4	Dānavaṁva hadayantarassitā.
ja536:112.1	Tejavāpi hi naro vicakkhaṇo,
ja536:112.2	Sakkato bahujanassa pūjito;
ja536:112.3	Nārinaṁ vasagato na bhāsati,
ja536:112.4	Rāhunā upahatova candimā.
ja536:113.1	Yaṁ kareyya kupito diso disaṁ,
ja536:113.2	Duṭṭhacitto vasamāgataṁ ariṁ;
ja536:113.3	Tena bhiyyo byasanaṁ nigacchati,
ja536:113.4	Nārinaṁ vasagato apekkhavā.
ja536:114.1	Kesalūnanakhachinnatajjitā,
ja536:114.2	Pādapāṇikasadaṇḍatāḷitā;
ja536:114.3	Hīnamevupagatā hi nāriyo,
ja536:114.4	Tā ramanti kuṇapeva makkhikā.
ja536:115.1	Tā kulesu visikhantaresu vā,
ja536:115.2	Rājadhāninigamesu vā puna;
ja536:115.3	Oḍḍitaṁ namucipāsavākaraṁ,
ja536:115.4	Cakkhumā parivajje sukhatthiko.
ja536:116.1	Ossajitva kusalaṁ tapoguṇaṁ,
ja536:116.2	Yo anariyacaritāni mācari;
ja536:116.3	Devatāhi nirayaṁ nimissati,
ja536:116.4	Chedagāmimaṇiyaṁva vāṇijo.
ja536:117.1	So idha garahito parattha ca,
ja536:117.2	Dummatī upahato sakammunā;
ja536:117.3	Gacchatī aniyato gaḷāgaḷaṁ,
ja536:117.4	Duṭṭhagadrabharathova uppathe.
ja536:118.1	So upeti nirayaṁ patāpanaṁ,
ja536:118.2	Sattisimbalivanañca āyasaṁ;
ja536:118.3	Āvasitvā tiracchānayoniyaṁ,
ja536:118.4	Petarājavisayaṁ na muñcati.
ja536:119.1	Dibyakhiḍḍaratiyo ca nandane,
ja536:119.2	Cakkavatticaritañca mānuse;
ja536:119.3	Nāsayanti pamadā pamādinaṁ,
ja536:119.4	Duggatiñca paṭipādayanti naṁ.
ja536:120.1	Dibyakhiḍḍaratiyo na dullabhā,
ja536:120.2	Cakkavatticaritañca mānuse;
ja536:120.3	Soṇṇabyamhanilayā ca accharā,
ja536:120.4	Ye caranti pamadāhanatthikā.
ja536:121.1	Kāmadhātusamatikkamā gati,
ja536:121.2	Rūpadhātuyā bhāvo na dullabho;
ja536:121.3	Vītarāgavisayūpapatti yā,
ja536:121.4	Ye caranti pamadāhanatthikā.
ja536:122.1	Sabbadukkhasamatikkamaṁ sivaṁ,
ja536:122.2	Accantamacalitaṁ asaṅkhataṁ;
ja536:122.3	Nibbutehi sucihī na dullabhaṁ,
ja536:122.4	Ye caranti pamadāhanatthikā”ti.
ja536:123.1	“Kuṇālohaṁ tadā āsiṁ,
ja536:123.2	udāyī phussakokilo;
ja536:123.3	Ānando gijjharājāsi,
ja536:123.4	sāriputto ca nārado;
ja536:123.5	Parisā buddhaparisā,
ja536:123.6	evaṁ dhāretha jātakan”ti.
ja536:124.1	Kuṇālajātakaṁ catutthaṁ.
ja537:0.1	Jātaka
ja537:0.2	Asītinipāta
ja537:0.3	Cūḷahaṁsavagga
ja537:0.4	5. Mahāsutasomajātaka
ja537:1.1	“Kasmā tuvaṁ rasaka edisāni,
ja537:1.2	Karosi kammāni sudāruṇāni;
ja537:1.3	Hanāsi itthī purise ca mūḷho,
ja537:1.4	Maṁsassa hetu adu dhanassa kāraṇā”.
ja537:2.1	“Na attahetū na dhanassa kāraṇā,
ja537:2.2	Na puttadārassa sahāyañātinaṁ;
ja537:2.3	Bhattā ca me bhagavā bhūmipālo,
ja537:2.4	So khādati maṁsaṁ bhadantedisaṁ”.
ja537:3.1	“Sace tuvaṁ bhatturatthe payutto,
ja537:3.2	Karosi kammāni sudāruṇāni;
ja537:3.3	Pātova antepuraṁ pāpuṇitvā,
ja537:3.4	Lapeyyāsi me rājino sammukhe taṁ”.
ja537:4.1	“Tathā karissāmi ahaṁ bhadante,
ja537:4.2	Yathā tuvaṁ bhāsasi kāḷahatthi;
ja537:4.3	Pātova antepuraṁ pāpuṇitvā,
ja537:4.4	Vakkhāmi te rājino sammukhe taṁ”.
ja537:5.1	Tato ratyā vivasāne,
ja537:5.2	sūriyuggamanaṁ pati;
ja537:5.3	Kāḷo rasakamādāya,
ja537:5.4	rājānaṁ upasaṅkami;
ja537:5.5	Upasaṅkamma rājānaṁ,
ja537:5.6	idaṁ vacanamabravi.
ja537:6.1	“Saccaṁ kira mahārāja,
ja537:6.2	rasako pesito tayā;
ja537:6.3	Hanati itthipurise,
ja537:6.4	tuvaṁ maṁsāni khādasi”.
ja537:7.1	“Evameva tathā kāḷa,
ja537:7.2	rasako pesito mayā;
ja537:7.3	Mama atthaṁ karontassa,
ja537:7.4	kimetaṁ paribhāsasi”.
ja537:8.1	“Ānando sabbamacchānaṁ,
ja537:8.2	khāditvā rasagiddhimā;
ja537:8.3	Parikkhīṇāya parisāya,
ja537:8.4	attānaṁ khādiyā mato.
ja537:9.1	Evaṁ pamatto rasagārave ratto,
ja537:9.2	Bālo yadī āyati nāvabujjhati;
ja537:9.3	Vidhamma putte caji ñātake ca,
ja537:9.4	Parivattiya attānaññeva khādati.
ja537:10.1	Idaṁ te sutvāna vigetu chando,
ja537:10.2	Mā bhakkhayī rāja manussamaṁsaṁ;
ja537:10.3	Mā tvaṁ imaṁ kevalaṁ vārijova,
ja537:10.4	Dvipadādhipa suññamakāsi raṭṭhaṁ”.
ja537:11.1	“Sujāto nāma nāmena,
ja537:11.2	oraso tassa atrajo;
ja537:11.3	Jambupesimaladdhāna,
ja537:11.4	mato so tassa saṅkhaye.
ja537:12.1	Evameva ahaṁ kāḷa,
ja537:12.2	bhutvā bhakkhaṁ rasuttamaṁ;
ja537:12.3	Aladdhā mānusaṁ maṁsaṁ,
ja537:12.4	maññe hissāmi jīvitaṁ”.
ja537:13.1	“Māṇava abhirūposi,
ja537:13.2	kule jātosi sotthiye;
ja537:13.3	Na tvaṁ arahasi tāta,
ja537:13.4	abhakkhaṁ bhakkhayetave”.
ja537:14.1	“Rasānaṁ aññataraṁ etaṁ,
ja537:14.2	kasmā maṁ tvaṁ nivāraye;
ja537:14.3	Sohaṁ tattha gamissāmi,
ja537:14.4	yattha lacchāmi edisaṁ.
ja537:15.1	Sovāhaṁ nippatissāmi,
ja537:15.2	na te vacchāmi santike;
ja537:15.3	Yassa me dassanena tvaṁ,
ja537:15.4	nābhinandasi brāhmaṇa”.
ja537:16.1	“Addhā aññepi dāyāde,
ja537:16.2	putte lacchāma māṇava;
ja537:16.3	Tvañca jamma vinassassu,
ja537:16.4	yattha pattaṁ na taṁ suṇe”.
ja537:17.1	“Evameva tuvaṁ rāja,
ja537:17.2	dvipadinda suṇohi me;
ja537:17.3	Pabbājessanti taṁ raṭṭhā,
ja537:17.4	soṇḍaṁ māṇavakaṁ yathā”.
ja537:18.1	“Sujāto nāma nāmena,
ja537:18.2	bhāvitattāna sāvako;
ja537:18.3	Accharaṁ kāmayantova,
ja537:18.4	na so bhuñji na so pivi.
ja537:19.1	Kusaggenudakamādāya,
ja537:19.2	samudde udakaṁ mine;
ja537:19.3	Evaṁ mānusakā kāmā,
ja537:19.4	dibbakāmāna santike.
ja537:20.1	Evameva ahaṁ kāḷa,
ja537:20.2	bhutvā bhakkhaṁ rasuttamaṁ;
ja537:20.3	Aladdhā mānusaṁ maṁsaṁ,
ja537:20.4	maññe hissāmi jīvitaṁ”.
ja537:21.1	“Yathāpi te dhataraṭṭhā,
ja537:21.2	haṁsā vehāyasaṅgamā;
ja537:21.3	Abhuttaparibhogena,
ja537:21.4	sabbe abbhatthataṁ gatā.
ja537:22.1	Evameva tuvaṁ rāja,
ja537:22.2	dvipadinda suṇohi me;
ja537:22.3	Abhakkhaṁ rāja bhakkhesi,
ja537:22.4	tasmā pabbājayanti taṁ”.
ja537:23.1	“Tiṭṭhāhīti mayā vutto,
ja537:23.2	So tvaṁ gacchasi pammukho;
ja537:23.3	Aṭṭhito tvaṁ ṭhitomhīti,
ja537:23.4	Lapasi brahmacārini;
ja537:23.5	Idaṁ te samaṇāyuttaṁ,
ja537:23.6	Asiñca me maññasi kaṅkapattaṁ”.
ja537:24.1	“Ṭhitohamasmī sadhammesu rāja,
ja537:24.2	Na nāmagottaṁ parivattayāmi;
ja537:24.3	Corañca loke aṭhitaṁ vadanti,
ja537:24.4	Āpāyikaṁ nerayikaṁ ito cutaṁ.
ja537:25.1	Sace tvaṁ saddahasi rāja,
ja537:25.2	sutaṁ gaṇhāhi khattiya;
ja537:25.3	Tena yaññaṁ yajitvāna,
ja537:25.4	evaṁ saggaṁ gamissasi”.
ja537:26.1	“Kismiṁ nu raṭṭhe tava jātibhūmi,
ja537:26.2	Atha kena atthena idhānupatto;
ja537:26.3	Akkhāhi me brāhmaṇa etamatthaṁ,
ja537:26.4	Kimicchasī demi tayajja patthitaṁ”.
ja537:27.1	“Gāthā catasso dharaṇīmahissara,
ja537:27.2	Sugambhiratthā varasāgarūpamā;
ja537:27.3	Taveva atthāya idhāgatosmi,
ja537:27.4	Suṇohi gāthā paramatthasaṁhitā”.
ja537:28.1	“Na ve rudanti matimanto sapaññā,
ja537:28.2	Bahussutā ye bahuṭhānacintino;
ja537:28.3	Dīpañhi etaṁ paramaṁ narānaṁ,
ja537:28.4	Yaṁ paṇḍitā sokanudā bhavanti.
ja537:29.1	Attānaṁ ñātī udāhu puttadāraṁ,
ja537:29.2	Dhaññaṁ dhanaṁ rajataṁ jātarūpaṁ;
ja537:29.3	Kimeva tvaṁ sutasomānutappe,
ja537:29.4	Korabyaseṭṭha vacanaṁ suṇoma tetaṁ”.
ja537:30.1	“Nevāhamattānamanutthunāmi,
ja537:30.2	Na puttadāraṁ na dhanaṁ na raṭṭhaṁ;
ja537:30.3	Satañca dhammo carito purāṇo,
ja537:30.4	Taṁ saṅkaraṁ brāhmaṇassānutappe.
ja537:31.1	Kato mayā saṅkaro brāhmaṇena,
ja537:31.2	Raṭṭhe sake issariye ṭhitena;
ja537:31.3	Taṁ saṅkaraṁ brāhmaṇasappadāya,
ja537:31.4	Saccānurakkhī punarāvajissaṁ”.
ja537:32.1	“Nevāhametaṁ abhisaddahāmi,
ja537:32.2	Sukhī naro maccumukhā pamutto;
ja537:32.3	Amittahatthaṁ punarāvajeyya,
ja537:32.4	Korabyaseṭṭha na hi maṁ upesi.
ja537:33.1	Mutto tuvaṁ porisādassa hatthā,
ja537:33.2	Gantvā sakaṁ mandiraṁ kāmakāmī;
ja537:33.3	Madhuraṁ piyaṁ jīvitaṁ laddha rāja,
ja537:33.4	Kuto tuvaṁ ehisi me sakāsaṁ”.
ja537:34.1	“Mataṁ vareyya parisuddhasīlo,
ja537:34.2	Na jīvitaṁ garahito pāpadhammo;
ja537:34.3	Na hi taṁ naraṁ tāyati duggatīhi,
ja537:34.4	Yassāpi hetu alikaṁ bhaṇeyya.
ja537:35.1	Sacepi vāto girimāvaheyya,
ja537:35.2	Cando ca suriyo ca chamā pateyyuṁ;
ja537:35.3	Sabbā ca najjo paṭisotaṁ vajeyyuṁ,
ja537:35.4	Na tvevahaṁ rāja musā bhaṇeyyaṁ.
ja537:36.1	Nabhaṁ phaleyya udadhīpi susse,
ja537:36.2	Saṁvaṭṭaye bhūtadharā vasundharā;
ja537:36.3	Siluccayo meru samūlamuppate,
ja537:36.4	Na tvevahaṁ rāja musā bhaṇeyyaṁ.
ja537:37.1	Asiñca sattiñca parāmasāmi,
ja537:37.2	Sapathampi te samma ahaṁ karomi;
ja537:37.3	Tayā pamutto anaṇo bhavitvā,
ja537:37.4	Saccānurakkhī punarāvajissaṁ”.
ja537:38.1	“Yo te kato saṅgaro brāhmaṇena,
ja537:38.2	Raṭṭhe sake issariye ṭhitena;
ja537:38.3	Taṁ saṅgaraṁ brāhmaṇasappadāya,
ja537:38.4	Saccānurakkhī punarāvajassu”.
ja537:39.1	“Yo me kato saṅgaro brāhmaṇena,
ja537:39.2	Raṭṭhe sake issariye ṭhitena;
ja537:39.3	Taṁ saṅgaraṁ brāhmaṇasappadāya,
ja537:39.4	Saccānurakkhī punarāvajissaṁ”.
ja537:40.1	Mutto ca so porisādassa hatthā,
ja537:40.2	Gantvāna taṁ brāhmaṇaṁ etadavoca;
ja537:40.3	“Suṇoma gāthāyo satārahāyo,
ja537:40.4	Yā me sutā assu hitāya brahme”.
ja537:41.1	“Sakideva sutasoma,
ja537:41.2	sabbhi hoti samāgamo;
ja537:41.3	Sā naṁ saṅgati pāleti,
ja537:41.4	nāsabbhi bahu saṅgamo.
ja537:42.1	Sabbhireva samāsetha,
ja537:42.2	sabbhi kubbetha santhavaṁ;
ja537:42.3	Sataṁ saddhammamaññāya,
ja537:42.4	seyyo hoti na pāpiyo.
ja537:43.1	Jīranti ve rājarathā sucittā,
ja537:43.2	Atho sarīrampi jaraṁ upeti;
ja537:43.3	Satañca dhammo na jaraṁ upeti,
ja537:43.4	Santo have sabbhi pavedayanti.
ja537:44.1	Nabhañca dūre pathavī ca dūre,
ja537:44.2	Pāraṁ samuddassa tadāhu dūre;
ja537:44.3	Tato have dūrataraṁ vadanti,
ja537:44.4	Satañca dhammo asatañca rāja”.
ja537:45.1	“Sahassiyā imā gāthā,
ja537:45.2	nahimā gāthā satārahā;
ja537:45.3	Cattāri tvaṁ sahassāni,
ja537:45.4	khippaṁ gaṇhāhi brāhmaṇa”.
ja537:46.1	“Āsītiyā nāvutiyā ca gāthā,
ja537:46.2	Satārahā cāpi bhaveyya gāthā;
ja537:46.3	Paccattameva sutasoma jānahi,
ja537:46.4	Sahassiyā nāma kā atthi gāthā”.
ja537:47.1	“Icchāmi vohaṁ sutavuddhimattano,
ja537:47.2	Santoti maṁ sappurisā bhajeyyuṁ;
ja537:47.3	Ahaṁ savantīhi mahodadhīva,
ja537:47.4	Na hi tāta tappāmi subhāsitena.
ja537:48.1	Aggi yathā tiṇakaṭṭhaṁ dahanto,
ja537:48.2	Na tappatī sāgarova nadīhi;
ja537:48.3	Evampi te paṇḍitā rājaseṭṭha,
ja537:48.4	Sutvā na tappanti subhāsitena.
ja537:49.1	Sakassa dāsassa yadā suṇomi,
ja537:49.2	Gāthaṁ ahaṁ atthavatiṁ janinda;
ja537:49.3	Tameva sakkacca nisāmayāmi,
ja537:49.4	Na hi tāta dhammesu mamatthi titti.
ja537:50.1	Idaṁ te raṭṭhaṁ sadhanaṁ sayoggaṁ,
ja537:50.2	Sakāyuraṁ sabbakāmūpapannaṁ;
ja537:50.3	Kiṁ kāmahetu paribhāsasi maṁ,
ja537:50.4	Gacchāmahaṁ porisādassa ñatte”.
ja537:51.1	“Attānurakkhāya bhavanti hete,
ja537:51.2	Hatthārohā rathikā pattikā ca;
ja537:51.3	Assāruhā ye ca dhanuggahāse,
ja537:51.4	Senaṁ payuñjāma hanāma sattuṁ”.
ja537:52.1	“Sudukkaraṁ porisādo akāsi,
ja537:52.2	Jīvaṁ gahetvāna avassajī maṁ;
ja537:52.3	Taṁ tādisaṁ pubbakiccaṁ saranto,
ja537:52.4	Dubbhe ahaṁ tassa kathaṁ janinda”.
ja537:53.1	Vanditvā so pitaraṁ mātarañca,
ja537:53.2	Anusāsetvā negamañca balañca;
ja537:53.3	Saccavādī saccānurakkhamāno,
ja537:53.4	Agamāsi so yattha porisādo.
ja537:54.1	“Kato mayā saṅgaro brāhmaṇena,
ja537:54.2	Raṭṭhe sake issariye ṭhitena;
ja537:54.3	Taṁ saṅgaraṁ brāhmaṇasappadāya,
ja537:54.4	Saccānurakkhī punarāgatosmi;
ja537:54.5	Yajassu yaññaṁ khāda maṁ porisāda”.
ja537:55.1	“Na hāyate khāditaṁ mayhaṁ pacchā,
ja537:55.2	Citakā ayaṁ tāva sadhūmikāva;
ja537:55.3	Niddhūmake pacitaṁ sādhupakkaṁ,
ja537:55.4	Suṇoma gāthāyo satārahāyo”.
ja537:56.1	“Adhammiko tvaṁ porisādakāsi,
ja537:56.2	Raṭṭhā ca bhaṭṭho udarassa hetu;
ja537:56.3	Dhammañcimā abhivadanti gāthā,
ja537:56.4	Dhammo ca adhammo ca kuhiṁ sameti.
ja537:57.1	Adhammikassa luddassa,
ja537:57.2	niccaṁ lohitapāṇino;
ja537:57.3	Natthi saccaṁ kuto dhammo,
ja537:57.4	kiṁ sutena karissasi”.
ja537:58.1	“Yo maṁsahetu migavaṁ careyya,
ja537:58.2	Yo vā hane purisamattahetu;
ja537:58.3	Ubhopi te pecca samā bhavanti,
ja537:58.4	Kasmā no adhammikaṁ brūsi maṁ tvaṁ”.
ja537:59.1	“Pañca pañca na khā bhakkhā,
ja537:59.2	khattiyena pajānatā;
ja537:59.3	Abhakkhaṁ rāja bhakkhesi,
ja537:59.4	tasmā adhammiko tuvaṁ”.
ja537:60.1	“Mutto tuvaṁ porisādassa hatthā,
ja537:60.2	Gantvā sakaṁ mandiraṁ kāmakāmī;
ja537:60.3	Amittahatthaṁ punarāgatosi,
ja537:60.4	Na khattadhamme kusalosi rāja”.
ja537:61.1	“Ye khattadhamme kusalā bhavanti,
ja537:61.2	Pāyena te nerayikā bhavanti;
ja537:61.3	Tasmā ahaṁ khattadhammaṁ pahāya,
ja537:61.4	Saccānurakkhī punarāgatosmi;
ja537:61.5	Yajassu yaññaṁ khāda maṁ porisāda”.
ja537:62.1	“Pāsādavāsā pathavīgavāssā,
ja537:62.2	Kāmitthiyo kāsikacandanañca;
ja537:62.3	Sabbaṁ tahiṁ labhasi sāmitāya,
ja537:62.4	Saccena kiṁ passasi ānisaṁsaṁ”.
ja537:63.1	“Ye kecime atthi rasā pathabyā,
ja537:63.2	Saccaṁ tesaṁ sādhutaraṁ rasānaṁ;
ja537:63.3	Sacce ṭhitā samaṇabrāhmaṇā ca,
ja537:63.4	Taranti jātimaraṇassa pāraṁ”.
ja537:64.1	“Mutto tuvaṁ porisādassa hatthā,
ja537:64.2	Gantvā sakaṁ mandiraṁ kāmakāmī;
ja537:64.3	Amittahatthaṁ punarāgatosi,
ja537:64.4	Na hi nūna te maraṇabhayaṁ janinda;
ja537:64.5	Alīnacitto asi saccavādī”.
ja537:65.1	“Katā me kalyāṇā anekarūpā,
ja537:65.2	Yaññā yiṭṭhā ye vipulā pasatthā;
ja537:65.3	Visodhito paralokassa maggo,
ja537:65.4	Dhamme ṭhito ko maraṇassa bhāye.
ja537:66.1	Katā me kalyāṇā anekarūpā,
ja537:66.2	Yaññā yiṭṭhā ye vipulā pasatthā;
ja537:66.3	Anānutappaṁ paralokaṁ gamissaṁ,
ja537:66.4	Yajassu yaññaṁ ada maṁ porisāda.
ja537:67.1	Pitā ca mātā ca upaṭṭhitā me,
ja537:67.2	Dhammena me issariyaṁ pasatthaṁ;
ja537:67.3	Visodhito paralokassa maggo,
ja537:67.4	Dhamme ṭhito ko maraṇassa bhāye.
ja537:68.1	Pitā ca mātā ca upaṭṭhitā me,
ja537:68.2	Dhammena me issariyaṁ pasatthaṁ;
ja537:68.3	Anānutappaṁ paralokaṁ gamissaṁ,
ja537:68.4	Yajassu yaññaṁ ada maṁ porisāda.
ja537:69.1	Ñātīsu mittesu katā me kārā,
ja537:69.2	Dhammena me issariyaṁ pasatthaṁ;
ja537:69.3	Visodhito paralokassa maggo,
ja537:69.4	Dhamme ṭhito ko maraṇassa bhāye.
ja537:70.1	Ñātīsu mittesu katā me kārā,
ja537:70.2	Dhammena me issariyaṁ pasatthaṁ;
ja537:70.3	Anānutappaṁ paralokaṁ gamissaṁ,
ja537:70.4	Yajassu yaññaṁ ada maṁ porisāda.
ja537:71.1	Dinnaṁ me dānaṁ bahudhā bahūnaṁ,
ja537:71.2	Santappitā samaṇabrāhmaṇā ca;
ja537:71.3	Visodhito paralokassa maggo,
ja537:71.4	Dhamme ṭhito ko maraṇassa bhāye.
ja537:72.1	Dinnaṁ me dānaṁ bahudhā bahūnaṁ,
ja537:72.2	Santappitā samaṇabrāhmaṇā ca;
ja537:72.3	Anānutappaṁ paralokaṁ gamissaṁ,
ja537:72.4	Yajassu yaññaṁ ada maṁ porisāda”.
ja537:73.1	“Visaṁ pajānaṁ puriso adeyya,
ja537:73.2	Āsīvisaṁ jalitamuggatejaṁ;
ja537:73.3	Muddhāpi tassa viphaleyya sattadhā,
ja537:73.4	Yo tādisaṁ saccavādiṁ adeyya.
ja537:74.1	Sutvā dhammaṁ vijānanti,
ja537:74.2	Narā kalyāṇapāpakaṁ;
ja537:74.3	Api gāthā suṇitvāna,
ja537:74.4	Dhamme me ramate mano”.
ja537:75.1	“Sakideva mahārāja,
ja537:75.2	sabbhi hoti samāgamo;
ja537:75.3	Sā naṁ saṅgati pāleti,
ja537:75.4	nāsabbhi bahu saṅgamo.
ja537:76.1	Sabbhireva samāsetha,
ja537:76.2	sabbhi kubbetha santhavaṁ;
ja537:76.3	Sataṁ saddhammamaññāya,
ja537:76.4	seyyo hoti na pāpiyo.
ja537:77.1	Jīranti ve rājarathā sucittā,
ja537:77.2	Atho sarīrampi jaraṁ upeti;
ja537:77.3	Satañca dhammo na jaraṁ upeti,
ja537:77.4	Santo have sabbhi pavedayanti.
ja537:78.1	Nabhañca dūre pathavī ca dūre,
ja537:78.2	Pāraṁ samuddassa tadāhu dūre;
ja537:78.3	Tato have dūrataraṁ vadanti,
ja537:78.4	Satañca dhammo asatañca rāja”.
ja537:79.1	“Gāthā imā atthavatī subyañjanā,
ja537:79.2	Subhāsitā tuyha janinda sutvā;
ja537:79.3	Ānandi vitto sumano patīto,
ja537:79.4	Cattāri te samma vare dadāmi”.
ja537:80.1	“Yo nattano maraṇaṁ bujjhasi tuvaṁ,
ja537:80.2	Hitāhitaṁ vinipātañca saggaṁ;
ja537:80.3	Giddho rase duccarite niviṭṭho,
ja537:80.4	Kiṁ tvaṁ varaṁ dassasi pāpadhamma.
ja537:81.1	Ahañca taṁ dehi varanti vajjaṁ,
ja537:81.2	Tvañcāpi datvāna avākareyya;
ja537:81.3	Sandiṭṭhikaṁ kalahamimaṁ vivādaṁ,
ja537:81.4	Ko paṇḍito jānamupabbajeyya”.
ja537:82.1	“Na taṁ varaṁ arahati jantu dātuṁ,
ja537:82.2	Yaṁ vāpi datvāna avākareyya;
ja537:82.3	Varassu samma avikampamāno,
ja537:82.4	Pāṇaṁ cajitvānapi dassameva”.
ja537:83.1	“Ariyassa ariyena sameti sakhyaṁ,
ja537:83.2	Paññassa paññāṇavatā sameti;
ja537:83.3	Passeyya taṁ vassasataṁ arogaṁ,
ja537:83.4	Etaṁ varānaṁ paṭhamaṁ varāmi”.
ja537:84.1	“Ariyassa ariyena sameti sakhyaṁ,
ja537:84.2	Paññassa paññāṇavatā sameti;
ja537:84.3	Passāsi maṁ vassasataṁ arogaṁ,
ja537:84.4	Etaṁ varānaṁ paṭhamaṁ dadāmi”.
ja537:85.1	“Ye khattiyāse idha bhūmipālā,
ja537:85.2	Muddhābhisittā katanāmadheyyā;
ja537:85.3	Na tādise bhūmipatī adesi,
ja537:85.4	Etaṁ varānaṁ dutiyaṁ varāmi”.
ja537:86.1	“Ye khattiyāse idha bhūmipālā,
ja537:86.2	Muddhābhisittā katanāmadheyyā;
ja537:86.3	Na tādise bhūmipatī ademi,
ja537:86.4	Etaṁ varānaṁ dutiyaṁ dadāmi”.
ja537:87.1	“Parosataṁ khattiyā te gahitā,
ja537:87.2	Talāvutā assumukhā rudantā;
ja537:87.3	Sake te raṭṭhe paṭipādayāhi,
ja537:87.4	Etaṁ varānaṁ tatiyaṁ varāmi”.
ja537:88.1	“Parosataṁ khattiyā me gahitā,
ja537:88.2	Talāvutā assumukhā rudantā;
ja537:88.3	Sake te raṭṭhe paṭipādayāmi,
ja537:88.4	Etaṁ varānaṁ tatiyaṁ dadāmi”.
ja537:89.1	“Chiddaṁ te raṭṭhaṁ byathitā bhayā hi,
ja537:89.2	Puthū narā leṇamanuppaviṭṭhā;
ja537:89.3	Manussamaṁsaṁ viramehi rāja,
ja537:89.4	Etaṁ varānaṁ catutthaṁ varāmi”.
ja537:90.1	“Addhā hi so bhakkho mama manāpo,
ja537:90.2	Etassa hetumhi vanaṁ paviṭṭho;
ja537:90.3	Sohaṁ kathaṁ etto upārameyyaṁ,
ja537:90.4	Aññaṁ varānaṁ catutthaṁ varassu”.
ja537:91.1	“Na ve piyaṁ meti janinda tādiso,
ja537:91.2	Attaṁ niraṅkacca piyāni sevati;
ja537:91.3	Attāva seyyo paramā ca seyyo,
ja537:91.4	Labbhā piyā ocitatthena pacchā”.
ja537:92.1	“Piyaṁ me mānusaṁ maṁsaṁ,
ja537:92.2	Sutasoma vijānahi;
ja537:92.3	Namhi sakkā nivāretuṁ,
ja537:92.4	Aññaṁ varaṁ samma varassu”.
ja537:93.1	“Yo ve piyaṁ meti piyānurakkhī,
ja537:93.2	Attaṁ niraṅkacca piyāni sevati;
ja537:93.3	Soṇḍova pitvā visamissapānaṁ,
ja537:93.4	Teneva so hoti dukkhī parattha.
ja537:94.1	Yo cīdha saṅkhāya piyāni hitvā,
ja537:94.2	Kicchenapi sevati ariyadhamme;
ja537:94.3	Dukkhitova pitvāna yathosadhāni,
ja537:94.4	Teneva so hoti sukhī parattha”.
ja537:95.1	“Ohāyahaṁ pitaraṁ mātarañca,
ja537:95.2	Manāpiye kāmaguṇe ca pañca;
ja537:95.3	Etassa hetumhi vanaṁ paviṭṭho,
ja537:95.4	Taṁ te varaṁ kinti mahaṁ dadāmi”.
ja537:96.1	“Na paṇḍitā diguṇamāhu vākyaṁ,
ja537:96.2	Saccappaṭiññāva bhavanti santo;
ja537:96.3	Varassu samma iti maṁ avoca,
ja537:96.4	Iccabravī tvaṁ na hi te sameti”.
ja537:97.1	“Apuññalābhaṁ ayasaṁ akittiṁ,
ja537:97.2	Pāpaṁ bahuṁ duccaritaṁ kilesaṁ;
ja537:97.3	Manussamaṁsassa kate upāgā,
ja537:97.4	Taṁ te varaṁ kinti mahaṁ dadeyyaṁ”.
ja537:98.1	“Na taṁ varaṁ arahati jantu dātuṁ,
ja537:98.2	Yaṁ vāpi datvāna avākareyya;
ja537:98.3	Varassu samma avikampamāno,
ja537:98.4	Pāṇaṁ cajitvānapi dassameva.
ja537:99.1	Pāṇaṁ cajanti santo nāpi dhammaṁ,
ja537:99.2	Saccappaṭiññāva bhavanti santo;
ja537:99.3	Datvā varaṁ khippamavākarohi,
ja537:99.4	Etena sampajja surājaseṭṭha.
ja537:100.1	Caje dhanaṁ aṅgavarassa hetu,
ja537:100.2	Aṅgaṁ caje jīvitaṁ rakkhamāno;
ja537:100.3	Aṅgaṁ dhanaṁ jīvitañcāpi sabbaṁ,
ja537:100.4	Caje naro dhammamanussaranto.
ja537:101.1	Yasmā hi dhammaṁ puriso vijaññā,
ja537:101.2	Ye cassa kaṅkhaṁ vinayanti santo;
ja537:101.3	Taṁ hissa dīpañca parāyaṇañca,
ja537:101.4	Na tena mittiṁ jirayetha pañño”.
ja537:102.1	“Addhā hi so bhakkho mama manāpo,
ja537:102.2	Etassa hetumhi vanaṁ paviṭṭho;
ja537:102.3	Sace ca maṁ yācasi etamatthaṁ,
ja537:102.4	Etampi te samma varaṁ dadāmi.
ja537:103.1	Satthā ca me hosi sakhā ca mesi,
ja537:103.2	Vacanampi te samma ahaṁ akāsiṁ;
ja537:103.3	Tuvampi me samma karohi vākyaṁ,
ja537:103.4	Ubhopi gantvāna pamocayāma”.
ja537:104.1	“Satthā ca te homi sakhā ca tyamhi,
ja537:104.2	Vacanampi me samma tuvaṁ akāsi;
ja537:104.3	Ahampi te samma karomi vākyaṁ,
ja537:104.4	Ubhopi gantvāna pamocayāma”.
ja537:105.1	“Kammāsapādena viheṭhitattha,
ja537:105.2	Talāvutā assumukhā rudantā;
ja537:105.3	Na jātu dubbhetha imassa rañño,
ja537:105.4	Saccappaṭiññaṁ me paṭissuṇātha”.
ja537:106.1	“Kammāsapādena viheṭhitamhā,
ja537:106.2	Talāvutā assumukhā rudantā;
ja537:106.3	Na jātu dubbhema imassa rañño,
ja537:106.4	Saccappaṭiññaṁ te paṭissuṇāma”.
ja537:107.1	“Yathā pitā vā atha vāpi mātā,
ja537:107.2	Anukampakā atthakāmā pajānaṁ;
ja537:107.3	Evameva vo hotu ayañca rājā,
ja537:107.4	Tumhe ca vo hotha yatheva puttā”.
ja537:108.1	“Yathā pitā vā atha vāpi mātā,
ja537:108.2	Anukampakā atthakāmā pajānaṁ;
ja537:108.3	Evameva no hotu ayañca rājā,
ja537:108.4	Mayampi hessāma yatheva puttā”.
ja537:109.1	“Catuppadaṁ sakuṇañcāpi maṁsaṁ,
ja537:109.2	Sūdehi randhaṁ sukataṁ suniṭṭhitaṁ;
ja537:109.3	Sudhaṁva indo paribhuñjiyāna,
ja537:109.4	Hitvā katheko ramasī araññe.
ja537:110.1	Tā khattiyā vallivilākamajjhā,
ja537:110.2	Alaṅkatā samparivārayitvā;
ja537:110.3	Indaṁva devesu pamodayiṁsu,
ja537:110.4	Hitvā katheko ramasī araññe.
ja537:111.1	Tambūpadhāne bahugoṇakamhi,
ja537:111.2	Subhamhi sabbassayanamhi saṅge;
ja537:111.3	Seyyassa majjhamhi sukhaṁ sayitvā,
ja537:111.4	Hitvā katheko ramasī araññe.
ja537:112.1	Pāṇissaraṁ kumbhathūṇaṁ nisīthe,
ja537:112.2	Athopi ve nippurisampi tūriyaṁ;
ja537:112.3	Bahuṁ sugītañca suvāditañca,
ja537:112.4	Hitvā katheko ramasī araññe.
ja537:113.1	Uyyānasampannaṁ pahūtamālyaṁ,
ja537:113.2	Migājinūpetapuraṁ surammaṁ;
ja537:113.3	Hayehi nāgehi rathehupetaṁ,
ja537:113.4	Hitvā katheko ramasī araññe”.
ja537:114.1	“Kāḷapakkhe yathā cando,
ja537:114.2	hāyateva suve suve;
ja537:114.3	Kāḷapakkhūpamo rāja,
ja537:114.4	asataṁ hoti samāgamo.
ja537:115.1	Yathāhaṁ rasakamāgamma,
ja537:115.2	sūdaṁ kāpurisādhamaṁ;
ja537:115.3	Akāsiṁ pāpakaṁ kammaṁ,
ja537:115.4	yena gacchāmi duggatiṁ.
ja537:116.1	Sukkapakkhe yathā cando,
ja537:116.2	vaḍḍhateva suve suve;
ja537:116.3	Sukkapakkhūpamo rāja,
ja537:116.4	sataṁ hoti samāgamo.
ja537:117.1	Yathāhaṁ tuvamāgamma,
ja537:117.2	sutasoma vijānahi;
ja537:117.3	Kāhāmi kusalaṁ kammaṁ,
ja537:117.4	yena gacchāmi suggatiṁ.
ja537:118.1	Thale yathā vāri janinda vuṭṭhaṁ,
ja537:118.2	Anaddhaneyyaṁ na ciraṭṭhitīkaṁ;
ja537:118.3	Evampi hoti asataṁ samāgamo,
ja537:118.4	Anaddhaneyyo udakaṁ thaleva.
ja537:119.1	Sare yathā vāri janinda vuṭṭhaṁ,
ja537:119.2	Ciraṭṭhitīkaṁ naravīraseṭṭha;
ja537:119.3	Evampi ve hoti sataṁ samāgamo,
ja537:119.4	Ciraṭṭhitīko udakaṁ sareva.
ja537:120.1	Abyāyiko hoti sataṁ samāgamo,
ja537:120.2	Yāvampi tiṭṭheyya tatheva hoti;
ja537:120.3	Khippañhi veti asataṁ samāgamo,
ja537:120.4	Tasmā sataṁ dhammo asabbhi ārakā”.
ja537:121.1	“Na so rājā yo ajeyyaṁ jināti,
ja537:121.2	Na so sakhā yo sakhāraṁ jināti;
ja537:121.3	Na sā bhariyā yā patino na vibheti,
ja537:121.4	Na te puttā ye na bharanti jiṇṇaṁ.
ja537:122.1	Na sā sabhā yattha na santi santo,
ja537:122.2	Na te santo ye na bhaṇanti dhammaṁ;
ja537:122.3	Rāgañca dosañca pahāya mohaṁ,
ja537:122.4	Dhammaṁ bhaṇantāva bhavanti santo.
ja537:123.1	Nābhāsamānaṁ jānanti,
ja537:123.2	missaṁ bālehi paṇḍitaṁ;
ja537:123.3	Bhāsamānañca jānanti,
ja537:123.4	desentaṁ amataṁ padaṁ.
ja537:124.1	Bhāsaye jotaye dhammaṁ,
ja537:124.2	Paggaṇhe isinaṁ dhajaṁ;
ja537:124.3	Subhāsitaddhajā isayo,
ja537:124.4	Dhammo hi isinaṁ dhajo”ti.
ja537:125.1	Mahāsutasomajātakaṁ pañcamaṁ.
ja537:126.1	Asītinipātaṁ niṭṭhitaṁ.
ja537:127.1	Tassuddānaṁ
ja537:128.1	Sumukho pana haṁsavaro ca mahā,
ja537:128.2	Sudhabhojaniko ca paro pavaro;
ja537:128.3	Sakuṇāladijādhipativhayano,
ja537:128.4	Sutasomavaruttamasavhayanoti.
ja538:0.1	Jātaka
ja538:0.2	Mahānipāta
ja538:0.3	Mūgapakkhavagga
ja538:0.4	1 Mūgapakkhajātaka
ja538:1.1	“Mā paṇḍiccayaṁ vibhāvaya,
ja538:1.2	Bālamato bhava sabbapāṇinaṁ;
ja538:1.3	Sabbo taṁ jano ocināyatu,
ja538:1.4	Evaṁ tava attho bhavissati”.
ja538:2.1	“Karomi te taṁ vacanaṁ,
ja538:2.2	yaṁ maṁ bhaṇasi devate;
ja538:2.3	Atthakāmāsi me amma,
ja538:2.4	hitakāmāsi devate”.
ja538:3.1	“Kiṁ nu santaramānova,
ja538:3.2	kāsuṁ khaṇasi sārathi;
ja538:3.3	Puṭṭho me samma akkhāhi,
ja538:3.4	kiṁ kāsuyā karissasi”.
ja538:4.1	“Rañño mūgo ca pakkho ca,
ja538:4.2	putto jāto acetaso;
ja538:4.3	Somhi raññā samajjhiṭṭho,
ja538:4.4	puttaṁ me nikhaṇaṁ vane”.
ja538:5.1	“Na badhiro na mūgosmi,
ja538:5.2	na pakkho na ca vīkalo;
ja538:5.3	Adhammaṁ sārathi kayirā,
ja538:5.4	mañce tvaṁ nikhaṇaṁ vane.
ja538:6.1	Ūrū bāhuñca me passa,
ja538:6.2	bhāsitañca suṇohi me;
ja538:6.3	Adhammaṁ sārathi kayirā,
ja538:6.4	mañce tvaṁ nikhaṇaṁ vane”.
ja538:7.1	“Devatā nusi gandhabbo,
ja538:7.2	adu sakko purindado;
ja538:7.3	Ko vā tvaṁ kassa vā putto,
ja538:7.4	kathaṁ jānemu taṁ mayaṁ”.
ja538:8.1	“Namhi devo na gandhabbo,
ja538:8.2	nāpi sakko purindado;
ja538:8.3	Kāsirañño ahaṁ putto,
ja538:8.4	yaṁ kāsuyā nikhaññasi.
ja538:9.1	Tassa rañño ahaṁ putto,
ja538:9.2	yaṁ tvaṁ sammūpajīvasi;
ja538:9.3	Adhammaṁ sārathi kayirā,
ja538:9.4	mañce tvaṁ nikhaṇaṁ vane.
ja538:10.1	Yassa rukkhassa chāyāya,
ja538:10.2	nisīdeyya sayeyya vā;
ja538:10.3	Na tassa sākhaṁ bhañjeyya,
ja538:10.4	mittadubbho hi pāpako.
ja538:11.1	Yathā rukkho tathā rājā,
ja538:11.2	yathā sākhā tathā ahaṁ;
ja538:11.3	Yathā chāyūpago poso,
ja538:11.4	evaṁ tvamasi sārathi;
ja538:11.5	Adhammaṁ sārathi kayirā,
ja538:11.6	mañce tvaṁ nikhaṇaṁ vane.
ja538:12.1	Pahūtabhakkho bhavati,
ja538:12.2	vippavuttho sakaṁ gharā;
ja538:12.3	Bahū naṁ upajīvanti,
ja538:12.4	yo mittānaṁ na dubbhati.
ja538:13.1	Yaṁ yaṁ janapadaṁ yāti,
ja538:13.2	nigame rājadhāniyo;
ja538:13.3	Sabbattha pūjito hoti,
ja538:13.4	yo mittānaṁ na dubbhati.
ja538:14.1	Nāssa corā pasāhanti,
ja538:14.2	nātimaññanti khattiyā;
ja538:14.3	Sabbe amitte tarati,
ja538:14.4	yo mittānaṁ na dubbhati.
ja538:15.1	Akkuddho sagharaṁ eti,
ja538:15.2	sabhāyaṁ paṭinandito;
ja538:15.3	Ñātīnaṁ uttamo hoti,
ja538:15.4	yo mittānaṁ na dubbhati.
ja538:16.1	Sakkatvā sakkato hoti,
ja538:16.2	garu hoti sagāravo;
ja538:16.3	Vaṇṇakittibhato hoti,
ja538:16.4	yo mittānaṁ na dubbhati.
ja538:17.1	Pūjako labhate pūjaṁ,
ja538:17.2	vandako paṭivandanaṁ;
ja538:17.3	Yaso kittiñca pappoti,
ja538:17.4	yo mittānaṁ na dubbhati.
ja538:18.1	Aggi yathā pajjalati,
ja538:18.2	devatāva virocati;
ja538:18.3	Siriyā ajahito hoti,
ja538:18.4	yo mittānaṁ na dubbhati.
ja538:19.1	Gāvo tassa pajāyanti,
ja538:19.2	khette vuttaṁ virūhati;
ja538:19.3	Vuttānaṁ phalamasnāti,
ja538:19.4	yo mittānaṁ na dubbhati.
ja538:20.1	Darito pabbatāto vā,
ja538:20.2	rukkhato patito naro;
ja538:20.3	Cuto patiṭṭhaṁ labhati,
ja538:20.4	yo mittānaṁ na dubbhati.
ja538:21.1	Virūḷhamūlasantānaṁ,
ja538:21.2	nigrodhamiva māluto;
ja538:21.3	Amittā nappasāhanti,
ja538:21.4	yo mittānaṁ na dubbhati”.
ja538:22.1	“Ehi taṁ paṭinessāmi,
ja538:22.2	rājaputta sakaṁ gharaṁ;
ja538:22.3	Rajjaṁ kārehi bhaddante,
ja538:22.4	kiṁ araññe karissasi”.
ja538:23.1	“Alaṁ me tena rajjena,
ja538:23.2	ñātakehi dhanena vā;
ja538:23.3	Yaṁ me adhammacariyāya,
ja538:23.4	rajjaṁ labbhetha sārathi”.
ja538:24.1	“Puṇṇapattaṁ maṁ lābhehi,
ja538:24.2	rājaputta ito gato;
ja538:24.3	Pitā mātā ca me dajjuṁ,
ja538:24.4	rājaputta tayī gate.
ja538:25.1	Orodhā ca kumārā ca,
ja538:25.2	vesiyānā ca brāhmaṇā;
ja538:25.3	Tepi attamanā dajjuṁ,
ja538:25.4	rājaputta tayī gate.
ja538:26.1	Hatthārohā anīkaṭṭhā,
ja538:26.2	rathikā pattikārakā;
ja538:26.3	Tepi attamanā dajjuṁ,
ja538:26.4	rājaputta tayī gate.
ja538:27.1	Bahudhaññā jānapadā,
ja538:27.2	negamā ca samāgatā;
ja538:27.3	Upāyanāni me dajjuṁ,
ja538:27.4	rājaputta tayī gate”.
ja538:28.1	“Pitu mātu cahaṁ catto,
ja538:28.2	raṭṭhassa nigamassa ca;
ja538:28.3	Atho sabbakumārānaṁ,
ja538:28.4	natthi mayhaṁ sakaṁ gharaṁ.
ja538:29.1	Anuññāto ahaṁ matyā,
ja538:29.2	sañcatto pitarā mahaṁ;
ja538:29.3	Ekoraññe pabbajito,
ja538:29.4	na kāme abhipatthaye.
ja538:30.1	Api ataramānānaṁ,
ja538:30.2	phalāsāva samijjhati;
ja538:30.3	Vipakkabrahmacariyosmi,
ja538:30.4	evaṁ jānāhi sārathi.
ja538:31.1	Api ataramānānaṁ,
ja538:31.2	sammadattho vipaccati;
ja538:31.3	Vipakkabrahmacariyosmi,
ja538:31.4	nikkhanto akutobhayo”.
ja538:32.1	“Evaṁ vaggukatho santo,
ja538:32.2	visaṭṭhavacano casi;
ja538:32.3	Kasmā pitu ca mātucca,
ja538:32.4	santike na bhaṇī tadā”.
ja538:33.1	“Nāhaṁ asandhitā pakkho,
ja538:33.2	na badhiro asotatā;
ja538:33.3	Nāhaṁ ajivhatā mūgo,
ja538:33.4	mā maṁ mūgamadhārayi.
ja538:34.1	Purimaṁ sarāmahaṁ jātiṁ,
ja538:34.2	yattha rajjamakārayiṁ;
ja538:34.3	Kārayitvā tahiṁ rajjaṁ,
ja538:34.4	pāpatthaṁ nirayaṁ bhusaṁ.
ja538:35.1	Vīsatiñceva vassāni,
ja538:35.2	tahiṁ rajjamakārayiṁ;
ja538:35.3	Asītivassasahassāni,
ja538:35.4	nirayamhi apaccisaṁ.
ja538:36.1	Tassa rajjassahaṁ bhīto,
ja538:36.2	mā maṁ rajjābhisecayuṁ;
ja538:36.3	Tasmā pitu ca mātucca,
ja538:36.4	santike na bhaṇiṁ tadā.
ja538:37.1	Ucchaṅge maṁ nisādetvā,
ja538:37.2	pitā atthānusāsati;
ja538:37.3	Ekaṁ hanatha bandhatha,
ja538:37.4	ekaṁ khārāpatacchikaṁ;
ja538:37.5	Ekaṁ sūlasmiṁ uppetha,
ja538:37.6	iccassa manusāsati.
ja538:38.1	Tāyāhaṁ pharusaṁ sutvā,
ja538:38.2	vācāyo samudīritā;
ja538:38.3	Amūgo mūgavaṇṇena,
ja538:38.4	apakkho pakkhasammato;
ja538:38.5	Sake muttakarīsasmiṁ,
ja538:38.6	acchāhaṁ samparipluto.
ja538:39.1	Kasirañca parittañca,
ja538:39.2	tañca dukkhena saṁyutaṁ;
ja538:39.3	Komaṁ jīvitamāgamma,
ja538:39.4	veraṁ kayirātha kenaci.
ja538:40.1	Paññāya ca alābhena,
ja538:40.2	dhammassa ca adassanā;
ja538:40.3	Komaṁ jīvitamāgamma,
ja538:40.4	veraṁ kayirātha kenaci.
ja538:41.1	Api ataramānānaṁ,
ja538:41.2	phalāsāva samijjhati;
ja538:41.3	Vipakkabrahmacariyosmi,
ja538:41.4	evaṁ jānāhi sārathi.
ja538:42.1	Api ataramānānaṁ,
ja538:42.2	sammadattho vipaccati;
ja538:42.3	Vipakkabrahmacariyosmi,
ja538:42.4	nikkhanto akutobhayo”.
ja538:43.1	“Ahampi pabbajissāmi,
ja538:43.2	rājaputta tavantike;
ja538:43.3	Avhāyassu maṁ bhaddante,
ja538:43.4	pabbajjā mama ruccati”.
ja538:44.1	“Rathaṁ niyyādayitvāna,
ja538:44.2	anaṇo ehi sārathi;
ja538:44.3	Anaṇassa hi pabbajjā,
ja538:44.4	etaṁ isīhi vaṇṇitaṁ”.
ja538:45.1	“Yadeva tyāhaṁ vacanaṁ,
ja538:45.2	akaraṁ bhaddamatthu te;
ja538:45.3	Tadeva me tvaṁ vacanaṁ,
ja538:45.4	yācito kattumarahasi.
ja538:46.1	Idheva tāva acchassu,
ja538:46.2	yāva rājānamānaye;
ja538:46.3	Appeva te pitā disvā,
ja538:46.4	patīto sumano siyā”.
ja538:47.1	“Karomi tetaṁ vacanaṁ,
ja538:47.2	yaṁ maṁ bhaṇasi sārathi;
ja538:47.3	Ahampi daṭṭhukāmosmi,
ja538:47.4	pitaraṁ me idhāgataṁ.
ja538:48.1	Ehi samma nivattassu,
ja538:48.2	kusalaṁ vajjāsi ñātinaṁ;
ja538:48.3	Mātaraṁ pitaraṁ mayhaṁ,
ja538:48.4	vutto vajjāsi vandanaṁ”.
ja538:49.1	Tassa pāde gahetvāna,
ja538:49.2	katvā ca naṁ padakkhiṇaṁ;
ja538:49.3	Sārathi rathamāruyha,
ja538:49.4	rājadvāraṁ upāgami.
ja538:50.1	Suññaṁ mātā rathaṁ disvā,
ja538:50.2	ekaṁ sārathimāgataṁ;
ja538:50.3	Assupuṇṇehi nettehi,
ja538:50.4	rodantī naṁ udikkhati.
ja538:51.1	“Ayaṁ so sārathi eti,
ja538:51.2	nihantvā mama atrajaṁ;
ja538:51.3	Nihato nūna me putto,
ja538:51.4	pathabyā bhūmivaḍḍhano.
ja538:52.1	Amittā nūna nandanti,
ja538:52.2	patītā nūna verino;
ja538:52.3	Āgataṁ sārathiṁ disvā,
ja538:52.4	nihantvā mama atrajaṁ”.
ja538:53.1	Suññaṁ mātā rathaṁ disvā,
ja538:53.2	ekaṁ sārathimāgataṁ;
ja538:53.3	Assupuṇṇehi nettehi,
ja538:53.4	rodantī paripucchi naṁ.
ja538:54.1	“Kiṁ nu mūgo kiṁ nu pakkho,
ja538:54.2	kiṁ nu so vilapī tadā;
ja538:54.3	Nihaññamāno bhūmiyā,
ja538:54.4	taṁ me akkhāhi sārathi.
ja538:55.1	Kathaṁ hatthehi pādehi,
ja538:55.2	mūgapakkho vivajjayi;
ja538:55.3	Nihaññamāno bhūmiyā,
ja538:55.4	taṁ me akkhāhi pucchito”.
ja538:56.1	“Akkheyyaṁ te ahaṁ ayye,
ja538:56.2	dajjāsi abhayaṁ mama;
ja538:56.3	Yaṁ me sutaṁ vā diṭṭhaṁ vā,
ja538:56.4	rājaputtassa santike”.
ja538:57.1	“Abhayaṁ samma te dammi,
ja538:57.2	abhīto bhaṇa sārathi;
ja538:57.3	Yaṁ te sutaṁ vā diṭṭhaṁ vā,
ja538:57.4	rājaputtassa santike”.
ja538:58.1	“Na so mūgo na so pakkho,
ja538:58.2	visaṭṭhavacano ca so;
ja538:58.3	Rajjassa kira so bhīto,
ja538:58.4	akarā ālaye bahū.
ja538:59.1	Purimaṁ sarati so jātiṁ,
ja538:59.2	yattha rajjamakārayi;
ja538:59.3	Kārayitvā tahiṁ rajjaṁ,
ja538:59.4	pāpattha nirayaṁ bhusaṁ.
ja538:60.1	Vīsatiñceva vassāni,
ja538:60.2	tahiṁ rajjamakārayi;
ja538:60.3	Asītivassasahassāni,
ja538:60.4	nirayamhi apacci so.
ja538:61.1	Tassa rajjassa so bhīto,
ja538:61.2	mā maṁ rajjābhisecayuṁ;
ja538:61.3	Tasmā pitu ca mātucca,
ja538:61.4	santike na bhaṇī tadā.
ja538:62.1	Aṅgapaccaṅgasampanno,
ja538:62.2	ārohapariṇāhavā;
ja538:62.3	Visaṭṭhavacano pañño,
ja538:62.4	magge saggassa tiṭṭhati.
ja538:63.1	Sace tvaṁ daṭṭhukāmāsi,
ja538:63.2	rājaputtaṁ tavatrajaṁ;
ja538:63.3	Ehi taṁ pāpayissāmi,
ja538:63.4	yattha sammati temiyo”.
ja538:64.1	“Yojayantu rathe asse,
ja538:64.2	Kacchaṁ nāgāna bandhatha;
ja538:64.3	Udīrayantu saṅkhapaṇavā,
ja538:64.4	Vādantu ekapokkharā.
ja538:65.1	Vādantu bherī sannaddhā,
ja538:65.2	vaggū vādantu dundubhī;
ja538:65.3	Negamā ca maṁ anventu,
ja538:65.4	gacchaṁ puttanivedako.
ja538:66.1	Orodhā ca kumārā ca,
ja538:66.2	vesiyānā ca brāhmaṇā;
ja538:66.3	Khippaṁ yānāni yojentu,
ja538:66.4	gacchaṁ puttanivedako.
ja538:67.1	Hatthārohā anīkaṭṭhā,
ja538:67.2	rathikā pattikārakā;
ja538:67.3	Khippaṁ yānāni yojentu,
ja538:67.4	gacchaṁ puttanivedako.
ja538:68.1	Samāgatā jānapadā,
ja538:68.2	negamā ca samāgatā;
ja538:68.3	Khippaṁ yānāni yojentu,
ja538:68.4	gacchaṁ puttanivedako”.
ja538:69.1	Asse ca sārathī yutte,
ja538:69.2	sindhave sīghavāhane;
ja538:69.3	Rājadvāraṁ upāgacchuṁ,
ja538:69.4	“yuttā deva ime hayā”.
ja538:70.1	“Thūlā javena hāyanti,
ja538:70.2	kisā hāyanti thāmunā;
ja538:70.3	Kise thūle vivajjetvā,
ja538:70.4	saṁsaṭṭhā yojitā hayā”.
ja538:71.1	Tato rājā taramāno,
ja538:71.2	yuttamāruyha sandanaṁ;
ja538:71.3	Itthāgāraṁ ajjhabhāsi,
ja538:71.4	“sabbāva anuyātha maṁ.
ja538:72.1	Vālabījanimuṇhīsaṁ,
ja538:72.2	khaggaṁ chattañca paṇḍaraṁ;
ja538:72.3	Upādhī rathamāruyha,
ja538:72.4	suvaṇṇehi alaṅkatā”.
ja538:73.1	Tato sa rājā pāyāsi,
ja538:73.2	purakkhatvāna sārathiṁ;
ja538:73.3	Khippameva upāgacchi,
ja538:73.4	yattha sammati temiyo.
ja538:74.1	Tañca disvāna āyantaṁ,
ja538:74.2	jalantamiva tejasā;
ja538:74.3	Khattasaṅghaparibyūḷhaṁ,
ja538:74.4	temiyo etadabravi.
ja538:75.1	“Kacci nu tāta kusalaṁ,
ja538:75.2	kacci tāta anāmayaṁ;
ja538:75.3	Sabbā ca rājakaññāyo,
ja538:75.4	arogā mayha mātaro”.
ja538:76.1	“Kusalañceva me putta,
ja538:76.2	atho putta anāmayaṁ;
ja538:76.3	Sabbā ca rājakaññāyo,
ja538:76.4	arogā tuyha mātaro”.
ja538:77.1	“Kacci amajjapo tāta,
ja538:77.2	kacci te suramappiyaṁ;
ja538:77.3	Kacci sacce ca dhamme ca,
ja538:77.4	dāne te ramate mano”.
ja538:78.1	“Amajjapo ahaṁ putta,
ja538:78.2	atho me suramappiyaṁ;
ja538:78.3	Atho sacce ca dhamme ca,
ja538:78.4	dāne me ramate mano”.
ja538:79.1	“Kacci arogaṁ yoggaṁ te,
ja538:79.2	kacci vahati vāhanaṁ;
ja538:79.3	Kacci te byādhayo natthi,
ja538:79.4	sarīrassupatāpanā”.
ja538:80.1	“Atho arogaṁ yoggaṁ me,
ja538:80.2	atho vahati vāhanaṁ;
ja538:80.3	Atho me byādhayo natthi,
ja538:80.4	sarīrassupatāpanā”.
ja538:81.1	“Kacci antā ca te phītā,
ja538:81.2	majjhe ca bahalā tava;
ja538:81.3	Koṭṭhāgārañca kosañca,
ja538:81.4	kacci te paṭisanthataṁ”.
ja538:82.1	“Atho antā ca me phītā,
ja538:82.2	majjhe ca bahalā mama;
ja538:82.3	Koṭṭhāgārañca kosañca,
ja538:82.4	sabbaṁ me paṭisanthataṁ”.
ja538:83.1	“Svāgataṁ te mahārāja,
ja538:83.2	atho te adurāgataṁ;
ja538:83.3	Patiṭṭhapentu pallaṅkaṁ,
ja538:83.4	yattha rājā nisakkati.
ja538:84.1	Idheva te nisīdassu,
ja538:84.2	niyate paṇṇasanthare;
ja538:84.3	Etto udakamādāya,
ja538:84.4	pāde pakkhālayassu te.
ja538:85.1	Idampi paṇṇakaṁ mayhaṁ,
ja538:85.2	randhaṁ rāja aloṇakaṁ;
ja538:85.3	Paribhuñja mahārāja,
ja538:85.4	pāhuno mesidhāgato”.
ja538:86.1	“Na cāhaṁ paṇṇaṁ bhuñjāmi,
ja538:86.2	Na hetaṁ mayha bhojanaṁ;
ja538:86.3	Sālīnaṁ odanaṁ bhuñje,
ja538:86.4	Suciṁ maṁsūpasecanaṁ”.
ja538:87.1	“Accherakaṁ maṁ paṭibhāti,
ja538:87.2	ekakampi rahogataṁ;
ja538:87.3	Edisaṁ bhuñjamānānaṁ,
ja538:87.4	kena vaṇṇo pasīdati”.
ja538:88.1	“Eko rāja nipajjāmi,
ja538:88.2	niyate paṇṇasanthare;
ja538:88.3	Tāya me ekaseyyāya,
ja538:88.4	rāja vaṇṇo pasīdati.
ja538:89.1	Na ca nettiṁsabandhā me,
ja538:89.2	rājarakkhā upaṭṭhitā;
ja538:89.3	Tāya me sukhaseyyāya,
ja538:89.4	rāja vaṇṇo pasīdati.
ja538:90.1	Atītaṁ nānusocāmi,
ja538:90.2	nappajappāmināgataṁ;
ja538:90.3	Paccuppannena yāpemi,
ja538:90.4	tena vaṇṇo pasīdati.
ja538:91.1	Anāgatappajappāya,
ja538:91.2	atītassānusocanā;
ja538:91.3	Etena bālā sussanti,
ja538:91.4	naḷova harito luto”.
ja538:92.1	“Hatthānīkaṁ rathānīkaṁ,
ja538:92.2	asse pattī ca vammino;
ja538:92.3	Nivesanāni rammāni,
ja538:92.4	ahaṁ putta dadāmi te.
ja538:93.1	Itthāgārampi te dammi,
ja538:93.2	sabbālaṅkārabhūsitaṁ;
ja538:93.3	Tā putta paṭipajjassu,
ja538:93.4	tvaṁ no rājā bhavissasi.
ja538:94.1	Kusalā naccagītassa,
ja538:94.2	sikkhitā cāturitthiyo;
ja538:94.3	Kāme taṁ ramayissanti,
ja538:94.4	kiṁ araññe karissasi.
ja538:95.1	Paṭirājūhi te kaññā,
ja538:95.2	ānayissaṁ alaṅkatā;
ja538:95.3	Tāsu putte janetvāna,
ja538:95.4	atha pacchā pabbajissasi.
ja538:96.1	Yuvā ca daharo cāsi,
ja538:96.2	paṭhamuppattiko susu;
ja538:96.3	Rajjaṁ kārehi bhaddante,
ja538:96.4	kiṁ araññe karissasi”.
ja538:97.1	“Yuvā care brahmacariyaṁ,
ja538:97.2	brahmacārī yuvā siyā;
ja538:97.3	Daharassa hi pabbajjā,
ja538:97.4	etaṁ isīhi vaṇṇitaṁ.
ja538:98.1	Yuvā care brahmacariyaṁ,
ja538:98.2	brahmacārī yuvā siyā;
ja538:98.3	Brahmacariyaṁ carissāmi,
ja538:98.4	nāhaṁ rajjena matthiko.
ja538:99.1	Passāmi vohaṁ daharaṁ,
ja538:99.2	amma tāta vadantaraṁ;
ja538:99.3	Kicchāladdhaṁ piyaṁ puttaṁ,
ja538:99.4	appatvāva jaraṁ mataṁ.
ja538:100.1	Passāmi vohaṁ dahariṁ,
ja538:100.2	kumāriṁ cārudassaniṁ;
ja538:100.3	Navavaṁsakaḷīraṁva,
ja538:100.4	paluggaṁ jīvitakkhayaṁ.
ja538:101.1	Daharāpi hi miyyanti,
ja538:101.2	narā ca atha nāriyo;
ja538:101.3	Tattha ko vissase poso,
ja538:101.4	daharomhīti jīvite.
ja538:102.1	Yassa ratyā vivasāne,
ja538:102.2	āyu appataraṁ siyā;
ja538:102.3	Appodakeva macchānaṁ,
ja538:102.4	kiṁ nu komārakaṁ tahiṁ.
ja538:103.1	Niccamabbhāhato loko,
ja538:103.2	niccañca parivārito;
ja538:103.3	Amoghāsu vajantīsu,
ja538:103.4	kiṁ maṁ rajjebhisiñcasi”.
ja538:104.1	“Kena mabbhāhato loko,
ja538:104.2	kena ca parivārito;
ja538:104.3	Kāyo amoghā gacchanti,
ja538:104.4	taṁ me akkhāhi pucchito”.
ja538:105.1	“Maccunābbhāhato loko,
ja538:105.2	jarāya parivārito;
ja538:105.3	Ratyo amoghā gacchanti,
ja538:105.4	evaṁ jānāhi khattiya.
ja538:106.1	Yathāpi tante vitate,
ja538:106.2	yaṁ yadevūpaviyyati;
ja538:106.3	Appakaṁ hoti vetabbaṁ,
ja538:106.4	evaṁ maccāna jīvitaṁ.
ja538:107.1	Yathā vārivaho pūro,
ja538:107.2	gacchannupanivattati;
ja538:107.3	Evamāyu manussānaṁ,
ja538:107.4	gacchannupanivattati.
ja538:108.1	Yathā vārivaho pūro,
ja538:108.2	vahe rukkhepakūlaje;
ja538:108.3	Evaṁ jarāmaraṇena,
ja538:108.4	vuyhante sabbapāṇino”.
ja538:109.1	“Hatthānīkaṁ rathānīkaṁ,
ja538:109.2	asse pattī ca vammino;
ja538:109.3	Nivesanāni rammāni,
ja538:109.4	ahaṁ putta dadāmi te.
ja538:110.1	Itthāgārampi te dammi,
ja538:110.2	sabbālaṅkārabhūsitaṁ;
ja538:110.3	Tā putta paṭipajjassu,
ja538:110.4	tvaṁ no rājā bhavissasi.
ja538:111.1	Kusalā naccagītassa,
ja538:111.2	sikkhitā cāturitthiyo;
ja538:111.3	Kāme taṁ ramayissanti,
ja538:111.4	kiṁ araññe karissasi.
ja538:112.1	Paṭirājūhi te kaññā,
ja538:112.2	ānayissaṁ alaṅkatā;
ja538:112.3	Tāsu putte janetvāna,
ja538:112.4	atha pacchā pabbajissasi.
ja538:113.1	Yuvā ca daharo cāsi,
ja538:113.2	paṭhamuppattiko susu;
ja538:113.3	Rajjaṁ kārehi bhaddante,
ja538:113.4	kiṁ araññe karissasi.
ja538:114.1	Koṭṭhāgārañca kosañca,
ja538:114.2	vāhanāni balāni ca;
ja538:114.3	Nivesanāni rammāni,
ja538:114.4	ahaṁ putta dadāmi te.
ja538:115.1	Gomaṇḍalaparibyūḷho,
ja538:115.2	dāsisaṅghapurakkhato;
ja538:115.3	Rajjaṁ kārehi bhaddante,
ja538:115.4	kiṁ araññe karissasi”.
ja538:116.1	“Kiṁ dhanena yaṁ khīyetha,
ja538:116.2	Kiṁ bhariyāya marissati;
ja538:116.3	Kiṁ yobbanena jiṇṇena,
ja538:116.4	Yaṁ jarāyābhibhuyyati.
ja538:117.1	Tattha kā nandi kā khiḍḍā,
ja538:117.2	kā rati kā dhanesanā;
ja538:117.3	Kiṁ me puttehi dārehi,
ja538:117.4	rāja muttosmi bandhanā.
ja538:118.1	Yohaṁ evaṁ pajānāmi,
ja538:118.2	maccu me nappamajjati;
ja538:118.3	Antakenādhipannassa,
ja538:118.4	kā ratī kā dhanesanā.
ja538:119.1	Phalānamiva pakkānaṁ,
ja538:119.2	niccaṁ patanato bhayaṁ;
ja538:119.3	Evaṁ jātāna maccānaṁ,
ja538:119.4	niccaṁ maraṇato bhayaṁ.
ja538:120.1	Sāyameke na dissanti,
ja538:120.2	pāto diṭṭhā bahū janā;
ja538:120.3	Pāto eke na dissanti,
ja538:120.4	sāyaṁ diṭṭhā bahū janā.
ja538:121.1	Ajjeva kiccaṁ ātapaṁ,
ja538:121.2	ko jaññā maraṇaṁ suve;
ja538:121.3	Na hi no saṅgaraṁ tena,
ja538:121.4	mahāsenena maccunā.
ja538:122.1	Corā dhanassa patthenti,
ja538:122.2	rāja muttosmi bandhanā;
ja538:122.3	Ehi rāja nivattassu,
ja538:122.4	nāhaṁ rajjena matthiko”ti.
ja538:123.1	Mūgapakkhajātakaṁ paṭhamaṁ.
ja539:0.1	Jātaka
ja539:0.2	Mahānipāta
ja539:0.3	Mūgapakkhavagga
ja539:0.4	2. Mahājanakajātaka
ja539:1.1	“Koyaṁ majjhe samuddasmiṁ,
ja539:1.2	apassaṁ tīramāyuhe;
ja539:1.3	Kaṁ tvaṁ atthavasaṁ ñatvā,
ja539:1.4	evaṁ vāyamase bhusaṁ”.
ja539:2.1	“Nisamma vattaṁ lokassa,
ja539:2.2	vāyāmassa ca devate;
ja539:2.3	Tasmā majjhe samuddasmiṁ,
ja539:2.4	apassaṁ tīramāyuhe”.
ja539:3.1	“Gambhīre appameyyasmiṁ,
ja539:3.2	tīraṁ yassa na dissati;
ja539:3.3	Mogho te purisavāyāmo,
ja539:3.4	appatvāva marissasi”.
ja539:4.1	“Anaṇo ñātinaṁ hoti,
ja539:4.2	devānaṁ pitunañca so;
ja539:4.3	Karaṁ purisakiccāni,
ja539:4.4	na ca pacchānutappati”.
ja539:5.1	“Apāraneyyaṁ yaṁ kammaṁ,
ja539:5.2	Aphalaṁ kilamathuddayaṁ;
ja539:5.3	Tattha ko vāyamenattho,
ja539:5.4	Maccu yassābhinippataṁ”.
ja539:6.1	“Apāraneyyamaccantaṁ,
ja539:6.2	yo viditvāna devate;
ja539:6.3	Na rakkhe attano pāṇaṁ,
ja539:6.4	jaññā so yadi hāpaye.
ja539:7.1	Adhippāyaphalaṁ eke,
ja539:7.2	asmiṁ lokasmi devate;
ja539:7.3	Payojayanti kammāni,
ja539:7.4	tāni ijjhanti vā na vā.
ja539:8.1	Sandiṭṭhikaṁ kammaphalaṁ,
ja539:8.2	nanu passasi devate;
ja539:8.3	Sannā aññe tarāmahaṁ,
ja539:8.4	tañca passāmi santike.
ja539:9.1	So ahaṁ vāyamissāmi,
ja539:9.2	yathāsatti yathābalaṁ;
ja539:9.3	Gacchaṁ pāraṁ samuddassa,
ja539:9.4	kassaṁ purisakāriyaṁ”.
ja539:10.1	“Yo tvaṁ evaṁ gate oghe,
ja539:10.2	appameyye mahaṇṇave;
ja539:10.3	Dhammavāyāmasampanno,
ja539:10.4	kammunā nāvasīdasi;
ja539:10.5	So tvaṁ tattheva gacchāhi,
ja539:10.6	yattha te nirato mano.
ja539:11.1	Suriyuggamane nidhi,
ja539:11.2	atho oggamane nidhi;
ja539:11.3	Anto nidhi bahi nidhi,
ja539:11.4	na anto na bahi nidhi.
ja539:12.1	Ārohane mahānidhi,
ja539:12.2	atho orohane nidhi;
ja539:12.3	Catūsu mahāsālesu,
ja539:12.4	samantā yojane nidhi.
ja539:13.1	Dantaggesu mahānidhi,
ja539:13.2	bālaggesu ca kepuke;
ja539:13.3	Rukkhaggesu mahānidhi,
ja539:13.4	soḷasete mahānidhī;
ja539:13.5	Sahassathāmo pallaṅko,
ja539:13.6	sīvalārādhanena ca.
ja539:14.1	Āsīsetheva puriso,
ja539:14.2	na nibbindeyya paṇḍito;
ja539:14.3	Passāmi vohaṁ attānaṁ,
ja539:14.4	yathā icchiṁ tathā ahu.
ja539:15.1	Āsīsetheva puriso,
ja539:15.2	na nibbindeyya paṇḍito;
ja539:15.3	Passāmi vohaṁ attānaṁ,
ja539:15.4	udakā thalamubbhataṁ.
ja539:16.1	Vāyametheva puriso,
ja539:16.2	na nibbindeyya paṇḍito;
ja539:16.3	Passāmi vohaṁ attānaṁ,
ja539:16.4	yathā icchiṁ tathā ahu.
ja539:17.1	Vāyametheva puriso,
ja539:17.2	na nibbindeyya paṇḍito;
ja539:17.3	Passāmi vohaṁ attānaṁ,
ja539:17.4	udakā thalamubbhataṁ.
ja539:18.1	Dukkhūpanītopi naro sapañño,
ja539:18.2	Āsaṁ na chindeyya sukhāgamāya;
ja539:18.3	Bahū hi phassā ahitā hitā ca,
ja539:18.4	Avitakkitā maccumupabbajanti.
ja539:19.1	Acintitampi bhavati,
ja539:19.2	cintitampi vinassati;
ja539:19.3	Na hi cintāmayā bhogā,
ja539:19.4	itthiyā purisassa vā”.
ja539:20.1	“Aporāṇaṁ vata bho rājā,
ja539:20.2	sabbabhummo disampati;
ja539:20.3	Nājja nacce nisāmeti,
ja539:20.4	na gīte kurute mano.
ja539:21.1	Na mige napi uyyāne,
ja539:21.2	napi haṁse udikkhati;
ja539:21.3	Mūgova tuṇhimāsīno,
ja539:21.4	na atthamanusāsati”.
ja539:22.1	“Sukhakāmā rahosīlā,
ja539:22.2	vadhabandhā upāratā;
ja539:22.3	Kassa nu ajja ārāme,
ja539:22.4	daharā vuddhā ca acchare.
ja539:23.1	Atikkantavanathā dhīrā,
ja539:23.2	namo tesaṁ mahesinaṁ;
ja539:23.3	Ye ussukamhi lokamhi,
ja539:23.4	viharanti manussukā.
ja539:24.1	Te chetvā maccuno jālaṁ,
ja539:24.2	tataṁ māyāvino daḷaṁ;
ja539:24.3	Chinnālayattā gacchanti,
ja539:24.4	ko tesaṁ gatimāpaye.
ja539:25.1	Kadāhaṁ mithilaṁ phītaṁ,
ja539:25.2	vibhattaṁ bhāgaso mitaṁ;
ja539:25.3	Pahāya pabbajissāmi,
ja539:25.4	taṁ kudāssu bhavissati.
ja539:26.1	Kadāhaṁ mithilaṁ phītaṁ,
ja539:26.2	visālaṁ sabbatopabhaṁ;
ja539:26.3	Pahāya pabbajissāmi,
ja539:26.4	taṁ kudāssu bhavissati.
ja539:27.1	Kadāhaṁ mithilaṁ phītaṁ,
ja539:27.2	bahupākāratoraṇaṁ;
ja539:27.3	Pahāya pabbajissāmi,
ja539:27.4	taṁ kudāssu bhavissati.
ja539:28.1	Kadāhaṁ mithilaṁ phītaṁ,
ja539:28.2	daḷhamaṭṭālakoṭṭhakaṁ;
ja539:28.3	Pahāya pabbajissāmi,
ja539:28.4	taṁ kudāssu bhavissati.
ja539:29.1	Kadāhaṁ mithilaṁ phītaṁ,
ja539:29.2	suvibhattaṁ mahāpathaṁ;
ja539:29.3	Pahāya pabbajissāmi,
ja539:29.4	taṁ kudāssu bhavissati.
ja539:30.1	Kadāhaṁ mithilaṁ phītaṁ,
ja539:30.2	suvibhattantarāpaṇaṁ;
ja539:30.3	Pahāya pabbajissāmi,
ja539:30.4	taṁ kudāssu bhavissati.
ja539:31.1	Kadāhaṁ mithilaṁ phītaṁ,
ja539:31.2	gavassarathapīḷitaṁ;
ja539:31.3	Pahāya pabbajissāmi,
ja539:31.4	taṁ kudāssu bhavissati.
ja539:32.1	Kadāhaṁ mithilaṁ phītaṁ,
ja539:32.2	ārāmavanamāliniṁ;
ja539:32.3	Pahāya pabbajissāmi,
ja539:32.4	taṁ kudāssu bhavissati.
ja539:33.1	Kadāhaṁ mithilaṁ phītaṁ,
ja539:33.2	uyyānavanamāliniṁ;
ja539:33.3	Pahāya pabbajissāmi,
ja539:33.4	taṁ kudāssu bhavissati.
ja539:34.1	Kadāhaṁ mithilaṁ phītaṁ,
ja539:34.2	pāsādavanamāliniṁ;
ja539:34.3	Pahāya pabbajissāmi,
ja539:34.4	taṁ kudāssu bhavissati.
ja539:35.1	Kadāhaṁ mithilaṁ phītaṁ,
ja539:35.2	tipuraṁ rājabandhuniṁ;
ja539:35.3	Māpitaṁ somanassena,
ja539:35.4	vedehena yasassinā;
ja539:35.5	Pahāya pabbajissāmi,
ja539:35.6	taṁ kudāssu bhavissati.
ja539:36.1	Kadāhaṁ vedehe phīte,
ja539:36.2	nicite dhammarakkhite;
ja539:36.3	Pahāya pabbajissāmi,
ja539:36.4	taṁ kudāssu bhavissati.
ja539:37.1	Kadāhaṁ vedehe phīte,
ja539:37.2	ajeyye dhammarakkhite;
ja539:37.3	Pahāya pabbajissāmi,
ja539:37.4	taṁ kudāssu bhavissati.
ja539:38.1	Kadāhaṁ antepuraṁ rammaṁ,
ja539:38.2	Vibhattaṁ bhāgaso mitaṁ;
ja539:38.3	Pahāya pabbajissāmi,
ja539:38.4	Taṁ kudāssu bhavissati.
ja539:39.1	Kadāhaṁ antepuraṁ rammaṁ,
ja539:39.2	sudhāmattikalepanaṁ;
ja539:39.3	Pahāya pabbajissāmi,
ja539:39.4	taṁ kudāssu bhavissati.
ja539:40.1	Kadāhaṁ antepuraṁ rammaṁ,
ja539:40.2	sucigandhaṁ manoramaṁ;
ja539:40.3	Pahāya pabbajissāmi,
ja539:40.4	taṁ kudāssu bhavissati.
ja539:41.1	Kadāhaṁ kūṭāgāre ca,
ja539:41.2	vibhatte bhāgaso mite;
ja539:41.3	Pahāya pabbajissāmi,
ja539:41.4	taṁ kudāssu bhavissati.
ja539:42.1	Kadāhaṁ kūṭāgāre ca,
ja539:42.2	sudhāmattikalepane;
ja539:42.3	Pahāya pabbajissāmi,
ja539:42.4	taṁ kudāssu bhavissati.
ja539:43.1	Kadāhaṁ kūṭāgāre ca,
ja539:43.2	sucigandhe manorame;
ja539:43.3	Pahāya pabbajissāmi,
ja539:43.4	taṁ kudāssu bhavissati.
ja539:44.1	Kadāhaṁ kūṭāgāre ca,
ja539:44.2	litte candanaphosite;
ja539:44.3	Pahāya pabbajissāmi,
ja539:44.4	taṁ kudāssu bhavissati.
ja539:45.1	Kadāhaṁ soṇṇapallaṅke,
ja539:45.2	gonake cittasanthate;
ja539:45.3	Pahāya pabbajissāmi,
ja539:45.4	taṁ kudāssu bhavissati.
ja539:46.1	Kadāhaṁ maṇipallaṅke,
ja539:46.2	gonake cittasanthate;
ja539:46.3	Pahāya pabbajissāmi,
ja539:46.4	taṁ kudāssu bhavissati.
ja539:47.1	Kadāhaṁ kappāsakoseyyaṁ,
ja539:47.2	khomakoṭumbarāni ca;
ja539:47.3	Pahāya pabbajissāmi,
ja539:47.4	taṁ kudāssu bhavissati.
ja539:48.1	Kadāhaṁ pokkharaṇī rammā,
ja539:48.2	cakkavākapakūjitā;
ja539:48.3	Mandālakehi sañchannā,
ja539:48.4	padumuppalakehi ca;
ja539:48.5	Pahāya pabbajissāmi,
ja539:48.6	taṁ kudāssu bhavissati.
ja539:49.1	Kadāhaṁ hatthigumbe ca,
ja539:49.2	sabbālaṅkārabhūsite;
ja539:49.3	Suvaṇṇakacche mātaṅge,
ja539:49.4	hemakappanavāsase.
ja539:50.1	Ārūḷhe gāmaṇīyehi,
ja539:50.2	tomaraṅkusapāṇibhi;
ja539:50.3	Pahāya pabbajissāmi,
ja539:50.4	taṁ kudāssu bhavissati.
ja539:51.1	Kadāhaṁ assagumbe ca,
ja539:51.2	sabbālaṅkārabhūsite;
ja539:51.3	Ājānīyeva jātiyā,
ja539:51.4	sindhave sīghavāhane.
ja539:52.1	Ārūḷhe gāmaṇīyehi,
ja539:52.2	illiyācāpadhāribhi;
ja539:52.3	Pahāya pabbajissāmi,
ja539:52.4	taṁ kudāssu bhavissati.
ja539:53.1	Kadāhaṁ rathaseniyo,
ja539:53.2	sannaddhe ussitaddhaje;
ja539:53.3	Dīpe athopi veyyagghe,
ja539:53.4	sabbālaṅkārabhūsite.
ja539:54.1	Ārūḷhe gāmaṇīyehi,
ja539:54.2	cāpahatthehi vammibhi;
ja539:54.3	Pahāya pabbajissāmi,
ja539:54.4	taṁ kudāssu bhavissati.
ja539:55.1	Kadāhaṁ sovaṇṇarathe,
ja539:55.2	sannaddhe ussitaddhaje;
ja539:55.3	Dīpe athopi veyyagghe,
ja539:55.4	sabbālaṅkārabhūsite.
ja539:56.1	Ārūḷhe gāmaṇīyehi,
ja539:56.2	cāpahatthehi vammibhi;
ja539:56.3	Pahāya pabbajissāmi,
ja539:56.4	taṁ kudāssu bhavissati.
ja539:57.1	Kadāhaṁ sajjhurathe ca,
ja539:57.2	sannaddhe ussitaddhaje;
ja539:57.3	Dīpe athopi veyyagghe,
ja539:57.4	sabbālaṅkārabhūsite.
ja539:58.1	Ārūḷhe gāmaṇīyehi,
ja539:58.2	cāpahatthehi vammibhi;
ja539:58.3	Pahāya pabbajissāmi,
ja539:58.4	taṁ kudāssu bhavissati.
ja539:59.1	Kadāhaṁ assarathe ca,
ja539:59.2	sannaddhe ussitaddhaje;
ja539:59.3	Dīpe athopi veyyagghe,
ja539:59.4	sabbālaṅkārabhūsite.
ja539:60.1	Ārūḷhe gāmaṇīyehi,
ja539:60.2	cāpahatthehi vammibhi;
ja539:60.3	Pahāya pabbajissāmi,
ja539:60.4	taṁ kudāssu bhavissati.
ja539:61.1	Kadāhaṁ oṭṭharathe ca,
ja539:61.2	sannaddhe ussitaddhaje;
ja539:61.3	Dīpe athopi veyyagghe,
ja539:61.4	sabbālaṅkārabhūsite.
ja539:62.1	Ārūḷhe gāmaṇīyehi,
ja539:62.2	cāpahatthehi vammibhi;
ja539:62.3	Pahāya pabbajissāmi,
ja539:62.4	taṁ kudāssu bhavissati.
ja539:63.1	Kadāhaṁ goṇarathe ca,
ja539:63.2	sannaddhe ussitaddhaje;
ja539:63.3	Dīpe athopi veyyagghe,
ja539:63.4	sabbālaṅkārabhūsite.
ja539:64.1	Ārūḷhe gāmaṇīyehi,
ja539:64.2	cāpahatthehi vammibhi;
ja539:64.3	Pahāya pabbajissāmi,
ja539:64.4	taṁ kudāssu bhavissati.
ja539:65.1	Kadāhaṁ ajarathe ca,
ja539:65.2	sannaddhe ussitaddhaje;
ja539:65.3	Dīpe athopi veyyagghe,
ja539:65.4	sabbālaṅkārabhūsite.
ja539:66.1	Ārūḷhe gāmaṇīyehi,
ja539:66.2	cāpahatthehi vammibhi;
ja539:66.3	Pahāya pabbajissāmi,
ja539:66.4	taṁ kudāssu bhavissati.
ja539:67.1	Kadāhaṁ meṇḍarathe ca,
ja539:67.2	sannaddhe ussitaddhaje;
ja539:67.3	Dīpe athopi veyyagghe,
ja539:67.4	sabbālaṅkārabhūsite.
ja539:68.1	Ārūḷhe gāmaṇīyehi,
ja539:68.2	cāpahatthehi vammibhi;
ja539:68.3	Pahāya pabbajissāmi,
ja539:68.4	taṁ kudāssu bhavissati.
ja539:69.1	Kadāhaṁ migarathe ca,
ja539:69.2	sannaddhe ussitaddhaje;
ja539:69.3	Dīpe athopi veyyagghe,
ja539:69.4	sabbālaṅkārabhūsite.
ja539:70.1	Ārūḷhe gāmaṇīyehi,
ja539:70.2	cāpahatthehi vammibhi;
ja539:70.3	Pahāya pabbajissāmi,
ja539:70.4	taṁ kudāssu bhavissati.
ja539:71.1	Kadāhaṁ hatthārohe ca,
ja539:71.2	sabbālaṅkārabhūsite;
ja539:71.3	Nīlavammadhare sūre,
ja539:71.4	tomaraṅkusapāṇine;
ja539:71.5	Pahāya pabbajissāmi,
ja539:71.6	taṁ kudāssu bhavissati.
ja539:72.1	Kadāhaṁ assārohe ca,
ja539:72.2	sabbālaṅkārabhūsite;
ja539:72.3	Nīlavammadhare sūre,
ja539:72.4	illiyācāpadhārine;
ja539:72.5	Pahāya pabbajissāmi,
ja539:72.6	taṁ kudāssu bhavissati.
ja539:73.1	Kadāhaṁ rathārohe ca,
ja539:73.2	sabbālaṅkārabhūsite;
ja539:73.3	Nīlavammadhare sūre,
ja539:73.4	cāpahatthe kalāpine;
ja539:73.5	Pahāya pabbajissāmi,
ja539:73.6	taṁ kudāssu bhavissati.
ja539:74.1	Kadāhaṁ dhanuggahe ca,
ja539:74.2	sabbālaṅkārabhūsite;
ja539:74.3	Nīlavammadhare sūre,
ja539:74.4	cāpahatthe kalāpine;
ja539:74.5	Pahāya pabbajissāmi,
ja539:74.6	taṁ kudāssu bhavissati.
ja539:75.1	Kadāhaṁ rājaputte ca,
ja539:75.2	sabbālaṅkārabhūsite;
ja539:75.3	Citravammadhare sūre,
ja539:75.4	kañcanāveḷadhārine;
ja539:75.5	Pahāya pabbajissāmi,
ja539:75.6	taṁ kudāssu bhavissati.
ja539:76.1	Kadāhaṁ ariyagaṇe ca,
ja539:76.2	vatavante alaṅkate;
ja539:76.3	Haricandanalittaṅge,
ja539:76.4	kāsikuttamadhārine;
ja539:76.5	Pahāya pabbajissāmi,
ja539:76.6	taṁ kudāssu bhavissati.
ja539:77.1	Kadāhaṁ amaccagaṇe ca,
ja539:77.2	sabbālaṅkārabhūsite;
ja539:77.3	Pītavammadhare sūre,
ja539:77.4	purato gacchamāline;
ja539:77.5	Pahāya pabbajissāmi,
ja539:77.6	taṁ kudāssu bhavissati.
ja539:78.1	Kadāhaṁ sattasatā bhariyā,
ja539:78.2	Sabbālaṅkārabhūsitā;
ja539:78.3	Pahāya pabbajissāmi,
ja539:78.4	Taṁ kudāssu bhavissati.
ja539:79.1	Kadāhaṁ sattasatā bhariyā,
ja539:79.2	Susaññā tanumajjhimā;
ja539:79.3	Pahāya pabbajissāmi,
ja539:79.4	Taṁ kudāssu bhavissati.
ja539:80.1	Kadāhaṁ sattasatā bhariyā,
ja539:80.2	Assavā piyabhāṇinī;
ja539:80.3	Pahāya pabbajissāmi,
ja539:80.4	Taṁ kudāssu bhavissati.
ja539:81.1	Kadāhaṁ satapalaṁ kaṁsaṁ,
ja539:81.2	sovaṇṇaṁ satarājikaṁ;
ja539:81.3	Pahāya pabbajissāmi,
ja539:81.4	taṁ kudāssu bhavissati.
ja539:82.1	Kadāssu maṁ hatthigumbā,
ja539:82.2	sabbālaṅkārabhūsitā;
ja539:82.3	Suvaṇṇakacchā mātaṅgā,
ja539:82.4	hemakappanavāsasā.
ja539:83.1	Ārūḷhā gāmaṇīyehi,
ja539:83.2	tomaraṅkusapāṇibhi;
ja539:83.3	Yantaṁ maṁ nānuyissanti,
ja539:83.4	taṁ kudāssu bhavissati.
ja539:84.1	Kadāssu maṁ assagumbā,
ja539:84.2	sabbālaṅkārabhūsitā;
ja539:84.3	Ājānīyāva jātiyā,
ja539:84.4	sindhavā sīghavāhanā.
ja539:85.1	Ārūḷhā gāmaṇīyehi,
ja539:85.2	illiyācāpadhāribhi;
ja539:85.3	Yantaṁ maṁ nānuyissanti,
ja539:85.4	taṁ kudāssu bhavissati.
ja539:86.1	Kadāssu maṁ rathasenī,
ja539:86.2	sannaddhā ussitaddhajā;
ja539:86.3	Dīpā athopi veyyagghā,
ja539:86.4	sabbālaṅkārabhūsitā.
ja539:87.1	Ārūḷhā gāmaṇīyehi,
ja539:87.2	cāpahatthehi vammibhi;
ja539:87.3	Yantaṁ maṁ nānuyissanti,
ja539:87.4	taṁ kudāssu bhavissati.
ja539:88.1	Kadāssu maṁ soṇṇarathā,
ja539:88.2	sannaddhā ussitaddhajā;
ja539:88.3	Dīpā athopi veyyagghā,
ja539:88.4	sabbālaṅkārabhūsitā.
ja539:89.1	Ārūḷhā gāmaṇīyehi,
ja539:89.2	cāpahatthehi vammibhi;
ja539:89.3	Yantaṁ maṁ nānuyissanti,
ja539:89.4	taṁ kudāssu bhavissati.
ja539:90.1	Kadāssu maṁ sajjhurathā,
ja539:90.2	sannaddhā ussitaddhajā;
ja539:90.3	Dīpā athopi veyyagghā,
ja539:90.4	sabbālaṅkārabhūsitā.
ja539:91.1	Ārūḷhā gāmaṇīyehi,
ja539:91.2	cāpahatthehi vammibhi;
ja539:91.3	Yantaṁ maṁ nānuyissanti,
ja539:91.4	taṁ kudāssu bhavissati.
ja539:92.1	Kadāssu maṁ assarathā,
ja539:92.2	sannaddhā ussitaddhajā;
ja539:92.3	Dīpā athopi veyyagghā,
ja539:92.4	sabbālaṅkārabhūsitā.
ja539:93.1	Ārūḷhā gāmaṇīyehi,
ja539:93.2	cāpahatthehi vammibhi;
ja539:93.3	Yantaṁ maṁ nānuyissanti,
ja539:93.4	taṁ kudāssu bhavissati.
ja539:94.1	Kadāssu maṁ oṭṭharathā,
ja539:94.2	sannaddhā ussitaddhajā;
ja539:94.3	Dīpā athopi veyyagghā,
ja539:94.4	sabbālaṅkārabhūsitā.
ja539:95.1	Ārūḷhā gāmaṇīyehi,
ja539:95.2	cāpahatthehi vammibhi;
ja539:95.3	Yantaṁ maṁ nānuyissanti,
ja539:95.4	taṁ kudāssu bhavissati.
ja539:96.1	Kadāssu maṁ goṇarathā,
ja539:96.2	sannaddhā ussitaddhajā;
ja539:96.3	Dīpā athopi veyyagghā,
ja539:96.4	sabbālaṅkārabhūsitā.
ja539:97.1	Ārūḷhā gāmaṇīyehi,
ja539:97.2	cāpahatthehi vammibhi;
ja539:97.3	Yantaṁ maṁ nānuyissanti,
ja539:97.4	taṁ kudāssu bhavissati.
ja539:98.1	Kadāssu maṁ ajarathā,
ja539:98.2	sannaddhā ussitaddhajā;
ja539:98.3	Dīpā athopi veyyagghā,
ja539:98.4	sabbālaṅkārabhūsitā.
ja539:99.1	Ārūḷhā gāmaṇīyehi,
ja539:99.2	cāpahatthehi vammibhi;
ja539:99.3	Yantaṁ maṁ nānuyissanti,
ja539:99.4	taṁ kudāssu bhavissati.
ja539:100.1	Kadāssu maṁ meṇḍarathā,
ja539:100.2	sannaddhā ussitaddhajā;
ja539:100.3	Dīpā athopi veyyagghā,
ja539:100.4	sabbālaṅkārabhūsitā.
ja539:101.1	Ārūḷhā gāmaṇīyehi,
ja539:101.2	cāpahatthehi vammibhi;
ja539:101.3	Yantaṁ maṁ nānuyissanti,
ja539:101.4	taṁ kudāssu bhavissati.
ja539:102.1	Kadāssu maṁ migarathā,
ja539:102.2	sannaddhā ussitaddhajā;
ja539:102.3	Dīpā athopi veyyagghā,
ja539:102.4	sabbālaṅkārabhūsitā.
ja539:103.1	Ārūḷhā gāmaṇīyehi,
ja539:103.2	cāpahatthehi vammibhi;
ja539:103.3	Yantaṁ maṁ nānuyissanti,
ja539:103.4	taṁ kudāssu bhavissati.
ja539:104.1	Kadāssu maṁ hatthārohā,
ja539:104.2	sabbālaṅkārabhūsitā;
ja539:104.3	Nīlavammadharā sūrā,
ja539:104.4	tomaraṅkusapāṇino;
ja539:104.5	Yantaṁ maṁ nānuyissanti,
ja539:104.6	taṁ kudāssu bhavissati.
ja539:105.1	Kadāssu maṁ assārohā,
ja539:105.2	sabbālaṅkārabhūsitā;
ja539:105.3	Nīlavammadharā sūrā,
ja539:105.4	illiyācāpadhārino;
ja539:105.5	Yantaṁ maṁ nānuyissanti,
ja539:105.6	taṁ kudāssu bhavissati.
ja539:106.1	Kadāssu maṁ rathārohā,
ja539:106.2	sabbālaṅkārabhūsitā;
ja539:106.3	Nīlavammadharā sūrā,
ja539:106.4	cāpahatthā kalāpino;
ja539:106.5	Yantaṁ maṁ nānuyissanti,
ja539:106.6	taṁ kudāssu bhavissati.
ja539:107.1	Kadāssu maṁ dhanuggahā,
ja539:107.2	sabbālaṅkārabhūsitā;
ja539:107.3	Nīlavammadharā sūrā,
ja539:107.4	cāpahatthā kalāpino;
ja539:107.5	Yantaṁ maṁ nānuyissanti,
ja539:107.6	taṁ kudāssu bhavissati.
ja539:108.1	Kadāssu maṁ rājaputtā,
ja539:108.2	sabbālaṅkārabhūsitā;
ja539:108.3	Citravammadharā sūrā,
ja539:108.4	kañcanāveḷadhārino;
ja539:108.5	Yantaṁ maṁ nānuyissanti,
ja539:108.6	taṁ kudāssu bhavissati.
ja539:109.1	Kadāssu maṁ ariyagaṇā,
ja539:109.2	vatavantā alaṅkatā;
ja539:109.3	Haricandanalittaṅgā,
ja539:109.4	kāsikuttamadhārino;
ja539:109.5	Yantaṁ maṁ nānuyissanti,
ja539:109.6	taṁ kudāssu bhavissati.
ja539:110.1	Kadāssu maṁ amaccagaṇā,
ja539:110.2	sabbālaṅkārabhūsitā;
ja539:110.3	Pītavammadharā sūrā,
ja539:110.4	purato gacchamālino;
ja539:110.5	Yantaṁ maṁ nānuyissanti,
ja539:110.6	taṁ kudāssu bhavissati.
ja539:111.1	Kadāssu maṁ sattasatā bhariyā,
ja539:111.2	Sabbālaṅkārabhūsitā;
ja539:111.3	Yantaṁ maṁ nānuyissanti,
ja539:111.4	Taṁ kudāssu bhavissati.
ja539:112.1	Kadāssu maṁ sattasatā bhariyā,
ja539:112.2	Susaññā tanumajjhimā;
ja539:112.3	Yantaṁ maṁ nānuyissanti,
ja539:112.4	Taṁ kudāssu bhavissati.
ja539:113.1	Kadāssu maṁ sattasatā bhariyā,
ja539:113.2	Assavā piyabhāṇinī;
ja539:113.3	Yantaṁ maṁ nānuyissanti,
ja539:113.4	Taṁ kudāssu bhavissati.
ja539:114.1	Kadāhaṁ pattaṁ gahetvāna,
ja539:114.2	muṇḍo saṅghāṭipāruto;
ja539:114.3	Piṇḍikāya carissāmi,
ja539:114.4	taṁ kudāssu bhavissati.
ja539:115.1	Kadāhaṁ paṁsukūlānaṁ,
ja539:115.2	ujjhitānaṁ mahāpathe;
ja539:115.3	Saṅghāṭiṁ dhārayissāmi,
ja539:115.4	taṁ kudāssu bhavissati.
ja539:116.1	Kadāhaṁ sattāhasammeghe,
ja539:116.2	ovaṭṭho allacīvaro;
ja539:116.3	Piṇḍikāya carissāmi,
ja539:116.4	taṁ kudāssu bhavissati.
ja539:117.1	Kadāhaṁ sabbattha gantvā,
ja539:117.2	rukkhā rukkhaṁ vanā vanaṁ;
ja539:117.3	Anapekkho gamissāmi,
ja539:117.4	taṁ kudāssu bhavissati.
ja539:118.1	Kadāhaṁ giriduggesu,
ja539:118.2	pahīnabhayabheravo;
ja539:118.3	Adutiyo gamissāmi,
ja539:118.4	taṁ kudāssu bhavissati.
ja539:119.1	Kadāhaṁ vīṇaṁva rujjako,
ja539:119.2	sattatantiṁ manoramaṁ;
ja539:119.3	Cittaṁ ujuṁ karissāmi,
ja539:119.4	taṁ kudāssu bhavissati.
ja539:120.1	Kadāhaṁ rathakārova,
ja539:120.2	parikantaṁ upāhanaṁ;
ja539:120.3	Kāmasaṁyojane checchaṁ,
ja539:120.4	ye dibbe ye ca mānuse”.
ja539:121.1	Tā ca sattasatā bhariyā,
ja539:121.2	sabbālaṅkārabhūsitā;
ja539:121.3	Bāhā paggayha pakkanduṁ,
ja539:121.4	“kasmā no vijahissasi”.
ja539:122.1	Tā ca sattasatā bhariyā,
ja539:122.2	susaññā tanumajjhimā;
ja539:122.3	Bāhā paggayha pakkanduṁ,
ja539:122.4	“kasmā no vijahissasi”.
ja539:123.1	Tā ca sattasatā bhariyā,
ja539:123.2	assavā piyabhāṇinī;
ja539:123.3	Bāhā paggayha pakkanduṁ,
ja539:123.4	“kasmā no vijahissasi”.
ja539:124.1	Tā ca sattasatā bhariyā,
ja539:124.2	sabbālaṅkārabhūsitā;
ja539:124.3	Hitvā sampaddavī rājā,
ja539:124.4	pabbajjāya purakkhato.
ja539:125.1	Tā ca sattasatā bhariyā,
ja539:125.2	susaññā tanumajjhimā;
ja539:125.3	Hitvā sampaddavī rājā,
ja539:125.4	pabbajjāya purakkhato.
ja539:126.1	Tā ca sattasatā bhariyā,
ja539:126.2	assavā piyabhāṇinī;
ja539:126.3	Hitvā sampaddavī rājā,
ja539:126.4	pabbajjāya purakkhato.
ja539:127.1	Hitvā satapalaṁ kaṁsaṁ,
ja539:127.2	sovaṇṇaṁ satarājikaṁ;
ja539:127.3	Aggahī mattikaṁ pattaṁ,
ja539:127.4	taṁ dutiyābhisecanaṁ.
ja539:128.1	“Bhesmā aggisamā jālā,
ja539:128.2	kosā ḍayhanti bhāgaso;
ja539:128.3	Rajataṁ jātarūpañca,
ja539:128.4	muttā veḷuriyā bahū.
ja539:129.1	Maṇayo saṅkhamuttā ca,
ja539:129.2	vatthikaṁ haricandanaṁ;
ja539:129.3	Ajinaṁ dantabhaṇḍañca,
ja539:129.4	lohaṁ kāḷāyasaṁ bahū;
ja539:129.5	Ehi rāja nivattassu,
ja539:129.6	mā tetaṁ vinasā dhanaṁ”.
ja539:130.1	“Susukhaṁ vata jīvāma,
ja539:130.2	yesaṁ no natthi kiñcanaṁ;
ja539:130.3	Mithilā dayhamānāya,
ja539:130.4	na me kiñci adayhatha”.
ja539:131.1	“Aṭaviyo samuppannā,
ja539:131.2	raṭṭhaṁ viddhaṁsayanti taṁ;
ja539:131.3	Ehi rāja nivattassu,
ja539:131.4	mā raṭṭhaṁ vinasā idaṁ”.
ja539:132.1	“Susukhaṁ vata jīvāma,
ja539:132.2	yesaṁ no natthi kiñcanaṁ;
ja539:132.3	Raṭṭhe vilumpamānamhi,
ja539:132.4	na me kiñci ahīratha.
ja539:133.1	Susukhaṁ vata jīvāma,
ja539:133.2	yesaṁ no natthi kiñcanaṁ;
ja539:133.3	Pītibhakkhā bhavissāma,
ja539:133.4	devā ābhassarā yathā”.
ja539:134.1	“Kimheso mahato ghoso,
ja539:134.2	kā nu gāmeva kīḷiyā;
ja539:134.3	Samaṇa teva pucchāma,
ja539:134.4	kattheso abhisaṭo jano”.
ja539:135.1	“Mamaṁ ohāya gacchantaṁ,
ja539:135.2	ettheso abhisaṭo jano;
ja539:135.3	Sīmātikkamanaṁ yantaṁ,
ja539:135.4	munimonassa pattiyā;
ja539:135.5	Missaṁ nandīhi gacchantaṁ,
ja539:135.6	kiṁ jānamanupucchasi”.
ja539:136.1	“Māssu tiṇṇo amaññittha,
ja539:136.2	sarīraṁ dhārayaṁ imaṁ;
ja539:136.3	Atīraṇeyya yamidaṁ,
ja539:136.4	bahū hi paripanthayo”.
ja539:137.1	“Ko nu me paripanthassa,
ja539:137.2	mamaṁ evaṁvihārino;
ja539:137.3	Yo neva diṭṭhe nādiṭṭhe,
ja539:137.4	kāmānamabhipatthaye”.
ja539:138.1	“Niddā tandī vijambhitā,
ja539:138.2	aratī bhattasammado;
ja539:138.3	Āvasanti sarīraṭṭhā,
ja539:138.4	bahū hi paripanthayo”.
ja539:139.1	“Kalyāṇaṁ vata maṁ bhavaṁ,
ja539:139.2	brāhmaṇa manusāsati;
ja539:139.3	Brāhmaṇa teva pucchāmi,
ja539:139.4	ko nu tvamasi mārisa”.
ja539:140.1	“Nārado iti me nāmaṁ,
ja539:140.2	kassapo iti maṁ vidū;
ja539:140.3	Bhoto sakāsamāgacchiṁ,
ja539:140.4	sādhu sabbhi samāgamo.
ja539:141.1	Tassa te sabbo ānando,
ja539:141.2	vihāro upavattatu;
ja539:141.3	Yaṁ ūnaṁ taṁ paripūrehi,
ja539:141.4	khantiyā upasamena ca.
ja539:142.1	Pasāraya sannatañca,
ja539:142.2	unnatañca pasāraya;
ja539:142.3	Kammaṁ vijjañca dhammañca,
ja539:142.4	sakkatvāna paribbaja.
ja539:143.1	Bahū hatthī ca asse ca,
ja539:143.2	nagare janapadāni ca;
ja539:143.3	Hitvā janaka pabbajito,
ja539:143.4	kapāle ratimajjhagā.
ja539:144.1	Kacci nu te jānapadā,
ja539:144.2	mittāmaccā ca ñātakā;
ja539:144.3	Dubbhimakaṁsu janaka,
ja539:144.4	kasmā tetaṁ aruccatha”.
ja539:145.1	“Na migājina jātucche,
ja539:145.2	ahaṁ kañci kudācanaṁ;
ja539:145.3	Adhammena jine ñātiṁ,
ja539:145.4	na cāpi ñātayo mamaṁ.
ja539:146.1	Disvāna lokavattantaṁ,
ja539:146.2	khajjantaṁ kaddamīkataṁ;
ja539:146.3	Haññare bajjhare cettha,
ja539:146.4	yattha sanno puthujjano;
ja539:146.5	Etāhaṁ upamaṁ katvā,
ja539:146.6	bhikkhakosmi migājina”.
ja539:147.1	“Ko nu te bhagavā satthā,
ja539:147.2	kassetaṁ vacanaṁ suci;
ja539:147.3	Na hi kappaṁ vā vijjaṁ vā,
ja539:147.4	paccakkhāya rathesabha;
ja539:147.5	Samaṇaṁ āhu vattantaṁ,
ja539:147.6	yathā dukkhassatikkamo.
ja539:148.1	Na migājina jātucche,
ja539:148.2	ahaṁ kañci kudācanaṁ;
ja539:148.3	Samaṇaṁ brāhmaṇaṁ vāpi,
ja539:148.4	sakkatvā anupāvisiṁ”.
ja539:149.1	“Mahatā cānubhāvena,
ja539:149.2	gacchanto siriyā jalaṁ;
ja539:149.3	Gīyamānesu gītesu,
ja539:149.4	vajjamānesu vaggusu.
ja539:150.1	Tūriyatāḷasaṅghuṭṭhe,
ja539:150.2	Sammatālasamāhite;
ja539:150.3	Sa migājina maddakkhiṁ,
ja539:150.4	Phaliṁ ambaṁ tirocchadaṁ;
ja539:150.5	Haññamānaṁ manussehi,
ja539:150.6	Phalakāmehi jantubhi.
ja539:151.1	So khohaṁ taṁ siriṁ hitvā,
ja539:151.2	orohitvā migājina;
ja539:151.3	Mūlaṁ ambassupāgacchiṁ,
ja539:151.4	phalino nipphalassa ca.
ja539:152.1	Phaliṁ ambaṁ hataṁ disvā,
ja539:152.2	viddhaṁstaṁ vinaḷīkataṁ;
ja539:152.3	Athekaṁ itaraṁ ambaṁ,
ja539:152.4	nīlobhāsaṁ manoramaṁ.
ja539:153.1	Evameva nūnamhepi,
ja539:153.2	issare bahukaṇṭake;
ja539:153.3	Amittā no vadhissanti,
ja539:153.4	yathā ambo phalī hato.
ja539:154.1	Ajinamhi haññate dīpi,
ja539:154.2	nāgo dantehi haññate;
ja539:154.3	Dhanamhi dhanino hanti,
ja539:154.4	aniketamasanthavaṁ;
ja539:154.5	Phalī ambo aphalo ca,
ja539:154.6	te satthāro ubho mama”.
ja539:155.1	“Sabbo jano pabyathito,
ja539:155.2	rājā pabbajito iti;
ja539:155.3	Hatthārohā anīkaṭṭhā,
ja539:155.4	rathikā pattikārakā.
ja539:156.1	Assāsayitvā janataṁ,
ja539:156.2	ṭhapayitvā paṭicchadaṁ;
ja539:156.3	Puttaṁ rajje ṭhapetvāna,
ja539:156.4	atha pacchā pabbajissasi”.
ja539:157.1	“Cattā mayā jānapadā,
ja539:157.2	mittāmaccā ca ñātakā;
ja539:157.3	Santi puttā videhānaṁ,
ja539:157.4	dīghāvu raṭṭhavaḍḍhano;
ja539:157.5	Te rajjaṁ kārayissanti,
ja539:157.6	mithilāyaṁ pajāpati.
ja539:158.1	Ehi taṁ anusikkhāmi,
ja539:158.2	yaṁ vākyaṁ mama ruccati;
ja539:158.3	Rajjaṁ tuvaṁ kārayasi,
ja539:158.4	pāpaṁ duccaritaṁ bahuṁ;
ja539:158.5	Kāyena vācā manasā,
ja539:158.6	yena gacchasi duggatiṁ.
ja539:159.1	Paradinnakena paraniṭṭhitena,
ja539:159.2	Piṇḍena yāpehi sa dhīradhammo”.
ja539:160.1	“Yopi catutthe bhattakāle na bhuñje,
ja539:160.2	Ajuṭṭhamārīva khudāya miyye;
ja539:160.3	Na tveva piṇḍaṁ luḷitaṁ anariyaṁ,
ja539:160.4	Kulaputtarūpo sappuriso na seve;
ja539:160.5	Tayidaṁ na sādhu tayidaṁ na suṭṭhu,
ja539:160.6	Sunakhucchiṭṭhakaṁ janaka bhuñjase tuvaṁ”.
ja539:161.1	“Na cāpi me sīvali so abhakkho,
ja539:161.2	Yaṁ hoti cattaṁ gihino sunassa vā;
ja539:161.3	Ye keci bhogā idha dhammaladdhā,
ja539:161.4	Sabbo so bhakkho anavayoti vutto”.
ja539:162.1	“Kumārike upaseniye,
ja539:162.2	Niccaṁ niggaḷamaṇḍite;
ja539:162.3	Kasmā te eko bhujo janati,
ja539:162.4	Eko te na janatī bhujo”.
ja539:163.1	“Imasmiṁ me samaṇa hatthe,
ja539:163.2	paṭimukkā dunīvarā;
ja539:163.3	Saṅghātā jāyate saddo,
ja539:163.4	dutiyasseva sā gati.
ja539:164.1	Imasmiṁ me samaṇa hatthe,
ja539:164.2	paṭimukko ekanīvaro;
ja539:164.3	So adutiyo na janati,
ja539:164.4	munibhūtova tiṭṭhati.
ja539:165.1	Vivādappatto dutiyo,
ja539:165.2	keneko vivadissati;
ja539:165.3	Tassa te saggakāmassa,
ja539:165.4	ekattamuparocataṁ”.
ja539:166.1	“Suṇāsi sīvali kathā,
ja539:166.2	kumāriyā paveditā;
ja539:166.3	Pesiyā maṁ garahittho,
ja539:166.4	dutiyasseva sā gati.
ja539:167.1	Ayaṁ dvedhāpatho bhadde,
ja539:167.2	anuciṇṇo pathāvihi;
ja539:167.3	Tesaṁ tvaṁ ekaṁ gaṇhāhi,
ja539:167.4	ahamekaṁ punāparaṁ.
ja539:168.1	Māvaca maṁ tvaṁ pati meti,
ja539:168.2	nāhaṁ bhariyāti vā puna”;
ja539:168.3	Imameva kathayantā,
ja539:168.4	thūṇaṁ nagarupāgamuṁ.
ja539:169.1	Koṭṭhake usukārassa,
ja539:169.2	bhattakāle upaṭṭhite;
ja539:169.3	Tatrā ca so usukāro,
ja539:169.4	ekaṁ daṇḍaṁ ujuṁ kataṁ;
ja539:169.5	Ekañca cakkhuṁ niggayha,
ja539:169.6	jimhamekena pekkhati.
ja539:170.1	“Evaṁ no sādhu passasi,
ja539:170.2	usukāra suṇohi me;
ja539:170.3	Yadekaṁ cakkhuṁ niggayha,
ja539:170.4	jimhamekena pekkhasi”.
ja539:171.1	“Dvīhi samaṇa cakkhūhi,
ja539:171.2	Visālaṁ viya khāyati;
ja539:171.3	Asampatvā paramaṁ liṅgaṁ,
ja539:171.4	Nujubhāvāya kappati.
ja539:172.1	Ekañca cakkhuṁ niggayha,
ja539:172.2	jimhamekena pekkhato;
ja539:172.3	Sampatvā paramaṁ liṅgaṁ,
ja539:172.4	ujubhāvāya kappati.
ja539:173.1	Vivādappatto dutiyo,
ja539:173.2	keneko vivadissati;
ja539:173.3	Tassa te saggakāmassa,
ja539:173.4	ekattamuparocataṁ”.
ja539:174.1	“Suṇāsi sīvali kathā,
ja539:174.2	usukārena veditā;
ja539:174.3	Pesiyā maṁ garahittho,
ja539:174.4	dutiyasseva sā gati.
ja539:175.1	Ayaṁ dvedhāpatho bhadde,
ja539:175.2	anuciṇṇo pathāvihi;
ja539:175.3	Tesaṁ tvaṁ ekaṁ gaṇhāhi,
ja539:175.4	ahamekaṁ punāparaṁ.
ja539:176.1	Māvaca maṁ tvaṁ pati meti,
ja539:176.2	nāhaṁ bhariyāti vā puna;
ja539:176.3	Muñjāvesikā pavāḷhā,
ja539:176.4	ekā vihara sīvalī”ti.
ja539:177.1	Mahājanakajātakaṁ dutiyaṁ.
ja540:0.1	Jātaka
ja540:0.2	Mahānipāta
ja540:0.3	Mūgapakkhavagga
ja540:0.4	3 Suvaṇṇasāmajātaka
ja540:1.1	“Ko nu maṁ usunā vijjhi,
ja540:1.2	pamattaṁ udahārakaṁ;
ja540:1.3	Khattiyo brāhmaṇo vesso,
ja540:1.4	ko maṁ viddhā nilīyasi.
ja540:2.1	Na me maṁsāni khajjāni,
ja540:2.2	Cammenattho na vijjati;
ja540:2.3	Atha kena nu vaṇṇena,
ja540:2.4	Viddheyyaṁ maṁ amaññatha.
ja540:3.1	Ko vā tvaṁ kassa vā putto,
ja540:3.2	kathaṁ jānemu taṁ mayaṁ;
ja540:3.3	Puṭṭho me samma akkhāhi,
ja540:3.4	kiṁ maṁ viddhā nilīyasi”.
ja540:4.1	“Rājāhamasmi kāsīnaṁ,
ja540:4.2	pīḷiyakkhoti maṁ vidū;
ja540:4.3	Lobhā raṭṭhaṁ pahitvāna,
ja540:4.4	migamesaṁ carāmahaṁ.
ja540:5.1	Issatthe casmi kusalo,
ja540:5.2	daḷhadhammoti vissuto;
ja540:5.3	Nāgopi me na mucceyya,
ja540:5.4	āgato usupātanaṁ.
ja540:6.1	Ko vā tvaṁ kassa vā putto,
ja540:6.2	kathaṁ jānemu taṁ mayaṁ;
ja540:6.3	Pituno attano cāpi,
ja540:6.4	nāmagottaṁ pavedaya”.
ja540:7.1	“Nesādaputto bhaddante,
ja540:7.2	sāmo iti maṁ ñātayo;
ja540:7.3	Āmantayiṁsu jīvantaṁ,
ja540:7.4	svajjevāhaṁ gato saye.
ja540:8.1	Viddhosmi puthusallena,
ja540:8.2	savisena yathā migo;
ja540:8.3	Sakamhi lohite rāja,
ja540:8.4	passa semi paripluto.
ja540:9.1	Paṭivāmagataṁ sallaṁ,
ja540:9.2	passa dhimhāmi lohitaṁ;
ja540:9.3	Āturo tyānupucchāmi,
ja540:9.4	kiṁ maṁ viddhā nilīyasi.
ja540:10.1	Ajinamhi haññate dīpi,
ja540:10.2	nāgo dantehi haññate;
ja540:10.3	Atha kena nu vaṇṇena,
ja540:10.4	viddheyyaṁ maṁ amaññatha”.
ja540:11.1	“Migo upaṭṭhito āsi,
ja540:11.2	āgato usupātanaṁ;
ja540:11.3	Taṁ disvā ubbijī sāma,
ja540:11.4	tena kodho mamāvisi”.
ja540:12.1	“Yato sarāmi attānaṁ,
ja540:12.2	yato pattosmi viññutaṁ;
ja540:12.3	Na maṁ migā uttasanti,
ja540:12.4	araññe sāpadānipi.
ja540:13.1	Yato nidhiṁ parihariṁ,
ja540:13.2	yato pattosmi yobbanaṁ;
ja540:13.3	Na maṁ migā uttasanti,
ja540:13.4	araññe sāpadānipi.
ja540:14.1	Bhīrū kimpurisā rāja,
ja540:14.2	pabbate gandhamādane;
ja540:14.3	Sammodamānā gacchāma,
ja540:14.4	pabbatāni vanāni ca.
ja540:15.1	Na maṁ migā uttasanti,
ja540:15.2	araññe sāpadānipi;
ja540:15.3	Atha kena nu vaṇṇena,
ja540:15.4	utrāsanti migā mamaṁ”.
ja540:16.1	“Na taṁ tasa migo sāma,
ja540:16.2	kiṁ tāhaṁ alikaṁ bhaṇe;
ja540:16.3	Kodhalobhābhibhūtāhaṁ,
ja540:16.4	usuṁ te taṁ avassajiṁ.
ja540:17.1	Kuto nu sāma āgamma,
ja540:17.2	kassa vā pahito tuvaṁ;
ja540:17.3	Udahāro nadiṁ gaccha,
ja540:17.4	āgato migasammataṁ”.
ja540:18.1	“Andhā mātāpitā mayhaṁ,
ja540:18.2	te bharāmi brahāvane;
ja540:18.3	Tesāhaṁ udakāhāro,
ja540:18.4	āgato migasammataṁ.
ja540:19.1	Atthi nesaṁ usāmattaṁ,
ja540:19.2	atha sāhassa jīvitaṁ;
ja540:19.3	Udakassa alābhena,
ja540:19.4	maññe andhā marissare.
ja540:20.1	Na me idaṁ tathā dukkhaṁ,
ja540:20.2	labbhā hi pumunā idaṁ;
ja540:20.3	Yañca ammaṁ na passāmi,
ja540:20.4	taṁ me dukkhataraṁ ito.
ja540:21.1	Na me idaṁ tathā dukkhaṁ,
ja540:21.2	labbhā hi pumunā idaṁ;
ja540:21.3	Yañca tātaṁ na passāmi,
ja540:21.4	taṁ me dukkhataraṁ ito.
ja540:22.1	Sā nūna kapaṇā ammā,
ja540:22.2	cirarattāya rucchati;
ja540:22.3	Aḍḍharatte va ratte vā,
ja540:22.4	nadīva avasucchati.
ja540:23.1	So nūna kapaṇo tāto,
ja540:23.2	cirarattāya rucchati;
ja540:23.3	Aḍḍharatte va ratte vā,
ja540:23.4	nadīva avasucchati.
ja540:24.1	Uṭṭhānapādacariyāya,
ja540:24.2	pādasambāhanassa ca;
ja540:24.3	Sāma tāta vilapantā,
ja540:24.4	hiṇḍissanti brahāvane.
ja540:25.1	Idampi dutiyaṁ sallaṁ,
ja540:25.2	kampeti hadayaṁ mamaṁ;
ja540:25.3	Yañca andhe na passāmi,
ja540:25.4	maññe hissāmi jīvitaṁ”.
ja540:26.1	“Mā bāḷhaṁ paridevesi,
ja540:26.2	sāma kalyāṇadassana;
ja540:26.3	Ahaṁ kammakaro hutvā,
ja540:26.4	bharissaṁ te brahāvane.
ja540:27.1	Issatthe casmi kusalo,
ja540:27.2	daḷhadhammoti vissuto;
ja540:27.3	Ahaṁ kammakaro hutvā,
ja540:27.4	bharissaṁ te brahāvane.
ja540:28.1	Migānaṁ vighāsamanvesaṁ,
ja540:28.2	Vanamūlaphalāni ca;
ja540:28.3	Ahaṁ kammakaro hutvā,
ja540:28.4	Bharissaṁ te brahāvane.
ja540:29.1	Katamaṁ taṁ vanaṁ sāma,
ja540:29.2	yattha mātāpitā tava;
ja540:29.3	Ahaṁ te tathā bharissaṁ,
ja540:29.4	yathā te abharī tuvaṁ”.
ja540:30.1	“Ayaṁ ekapadī rāja,
ja540:30.2	yoyaṁ ussīsake mama;
ja540:30.3	Ito gantvā aḍḍhakosaṁ,
ja540:30.4	tattha nesaṁ agārakaṁ;
ja540:30.5	Yattha mātāpitā mayhaṁ,
ja540:30.6	te bharassu ito gato.
ja540:31.1	Namo te kāsirājatthu,
ja540:31.2	namo te kāsivaḍḍhana;
ja540:31.3	Andhā mātāpitā mayhaṁ,
ja540:31.4	te bharassu brahāvane.
ja540:32.1	Añjaliṁ te paggaṇhāmi,
ja540:32.2	kāsirāja namatthu te;
ja540:32.3	Mātaraṁ pitaraṁ mayhaṁ,
ja540:32.4	vutto vajjāsi vandanaṁ”.
ja540:33.1	Idaṁ vatvāna so sāmo,
ja540:33.2	yuvā kalyāṇadassano;
ja540:33.3	Mucchito visavegena,
ja540:33.4	visaññī samapajjatha.
ja540:34.1	Sa rājā paridevesi,
ja540:34.2	bahuṁ kāruññasañhitaṁ;
ja540:34.3	“Ajarāmarohaṁ āsiṁ,
ja540:34.4	ajjetaṁ ñāmi no pure;
ja540:34.5	Sāmaṁ kālaṅkataṁ disvā,
ja540:34.6	natthi maccussa nāgamo.
ja540:35.1	Yassu maṁ paṭimanteti,
ja540:35.2	savisena samappito;
ja540:35.3	Svajja evaṁ gate kāle,
ja540:35.4	na kiñci mabhibhāsati.
ja540:36.1	Nirayaṁ nūna gacchāmi,
ja540:36.2	ettha me natthi saṁsayo;
ja540:36.3	Tadā hi pakataṁ pāpaṁ,
ja540:36.4	cirarattāya kibbisaṁ.
ja540:37.1	Bhavanti tassa vattāro,
ja540:37.2	gāme kibbisakārako;
ja540:37.3	Araññe nimmanussamhi,
ja540:37.4	ko maṁ vattumarahati.
ja540:38.1	Sārayanti hi kammāni,
ja540:38.2	gāme saṅgaccha māṇavā;
ja540:38.3	Araññe nimmanussamhi,
ja540:38.4	ko nu maṁ sārayissati”.
ja540:39.1	Sā devatā antarahitā,
ja540:39.2	pabbate gandhamādane;
ja540:39.3	Raññova anukampāya,
ja540:39.4	imā gāthā abhāsatha.
ja540:40.1	“Āguṁ kira mahārāja,
ja540:40.2	akari kamma dukkaṭaṁ;
ja540:40.3	Adūsakā pitāputtā,
ja540:40.4	tayo ekūsunā hatā.
ja540:41.1	Ehi taṁ anusikkhāmi,
ja540:41.2	yathā te sugatī siyā;
ja540:41.3	Dhammenandhe vane posa,
ja540:41.4	maññehaṁ sugatī tayā”.
ja540:42.1	Sa rājā paridevitvā,
ja540:42.2	bahuṁ kāruññasañhitaṁ;
ja540:42.3	Udakakumbhamādāya,
ja540:42.4	pakkāmi dakkhiṇāmukho.
ja540:43.1	“Kassa nu eso padasaddo,
ja540:43.2	manussasseva āgato;
ja540:43.3	Neso sāmassa nigghoso,
ja540:43.4	ko nu tvamasi mārisa.
ja540:44.1	Santañhi sāmo vajati,
ja540:44.2	santaṁ pādāni neyati;
ja540:44.3	Neso sāmassa nigghoso,
ja540:44.4	ko nu tvamasi mārisa”.
ja540:45.1	“Rājāhamasmi kāsīnaṁ,
ja540:45.2	pīḷiyakkhoti maṁ vidū;
ja540:45.3	Lobhā raṭṭhaṁ pahitvāna,
ja540:45.4	migamesaṁ carāmahaṁ.
ja540:46.1	Issatthe casmi kusalo,
ja540:46.2	daḷhadhammoti vissuto;
ja540:46.3	Nāgopi me na mucceyya,
ja540:46.4	āgato usupātanaṁ”.
ja540:47.1	“Svāgataṁ te mahārāja,
ja540:47.2	atho te adurāgataṁ;
ja540:47.3	Issarosi anuppatto,
ja540:47.4	yaṁ idhatthi pavedaya.
ja540:48.1	Tindukāni piyālāni,
ja540:48.2	madhuke kāsumāriyo;
ja540:48.3	Phalāni khuddakappāni,
ja540:48.4	bhuñja rāja varaṁ varaṁ.
ja540:49.1	Idampi pānīyaṁ sītaṁ,
ja540:49.2	ābhataṁ girigabbharā;
ja540:49.3	Tato piva mahārāja,
ja540:49.4	sace tvaṁ abhikaṅkhasi”.
ja540:50.1	“Nālaṁ andhā vane daṭṭhuṁ,
ja540:50.2	ko nu vo phalamāhari;
ja540:50.3	Anandhassevayaṁ sammā,
ja540:50.4	nivāpo mayha khāyati”.
ja540:51.1	“Daharo yuvā nātibrahā,
ja540:51.2	sāmo kalyāṇadassano;
ja540:51.3	Dīghassa kesā asitā,
ja540:51.4	atho sūnaggavellitā.
ja540:52.1	So have phalamāharitvā,
ja540:52.2	ito ādāya kamaṇḍaluṁ;
ja540:52.3	Nadiṁ gato udahāro,
ja540:52.4	maññe na dūramāgato”.
ja540:53.1	“Ahaṁ taṁ avadhiṁ sāmaṁ,
ja540:53.2	yo tuyhaṁ paricārako;
ja540:53.3	Yaṁ kumāraṁ pavedetha,
ja540:53.4	sāmaṁ kalyāṇadassanaṁ.
ja540:54.1	Dīghassa kesā asitā,
ja540:54.2	atho sūnaggavellitā;
ja540:54.3	Tesu lohitalittesu,
ja540:54.4	seti sāmo mayā hato”.
ja540:55.1	“Kena dukūla mantesi,
ja540:55.2	hato sāmoti vādinā;
ja540:55.3	Hato sāmoti sutvāna,
ja540:55.4	hadayaṁ me pavedhati.
ja540:56.1	Assatthasseva taruṇaṁ,
ja540:56.2	pavāḷaṁ māluteritaṁ;
ja540:56.3	Hato sāmoti sutvāna,
ja540:56.4	hadayaṁ me pavedhati”.
ja540:57.1	“Pārike kāsirājāyaṁ,
ja540:57.2	so sāmaṁ migasammate;
ja540:57.3	Kodhasā usunā vijjhi,
ja540:57.4	tassa mā pāpamicchimhā”.
ja540:58.1	“Kicchā laddho piyo putto,
ja540:58.2	yo andhe abharī vane;
ja540:58.3	Taṁ ekaputtaṁ ghātimhi,
ja540:58.4	kathaṁ cittaṁ na kopaye”.
ja540:59.1	“Kicchā laddho piyo putto,
ja540:59.2	yo andhe abharī vane;
ja540:59.3	Taṁ ekaputtaṁ ghātimhi,
ja540:59.4	akkodhaṁ āhu paṇḍitā”.
ja540:60.1	“Mā bāḷhaṁ paridevetha,
ja540:60.2	hato sāmoti vādinā;
ja540:60.3	Ahaṁ kammakaro hutvā,
ja540:60.4	bharissāmi brahāvane.
ja540:61.1	Issatthe casmi kusalo,
ja540:61.2	daḷhadhammoti vissuto;
ja540:61.3	Ahaṁ kammakaro hutvā,
ja540:61.4	bharissāmi brahāvane.
ja540:62.1	Migānaṁ vighāsamanvesaṁ,
ja540:62.2	vanamūlaphalāni ca;
ja540:62.3	Ahaṁ kammakaro hutvā,
ja540:62.4	bharissāmi brahāvane”.
ja540:63.1	“Nesa dhammo mahārāja,
ja540:63.2	netaṁ amhesu kappati;
ja540:63.3	Rājā tvamasi amhākaṁ,
ja540:63.4	pāde vandāma te mayaṁ”.
ja540:64.1	“Dhammaṁ nesādā bhaṇatha,
ja540:64.2	katā apacitī tayā;
ja540:64.3	Pitā tvamasi amhākaṁ,
ja540:64.4	mātā tvamasi pārike”.
ja540:65.1	“Namo te kāsirājatthu,
ja540:65.2	namo te kāsivaḍḍhana;
ja540:65.3	Añjaliṁ te paggaṇhāma,
ja540:65.4	yāva sāmānupāpaya.
ja540:66.1	Tassa pāde samajjantā,
ja540:66.2	mukhañca bhujadassanaṁ;
ja540:66.3	Saṁsumbhamānā attānaṁ,
ja540:66.4	kālamāgamayāmase”.
ja540:67.1	“Brahā vāḷamigākiṇṇaṁ,
ja540:67.2	ākāsantaṁva dissati;
ja540:67.3	Yattha sāmo hato seti,
ja540:67.4	candova patito chamā.
ja540:68.1	Brahā vāḷamigākiṇṇaṁ,
ja540:68.2	ākāsantaṁva dissati;
ja540:68.3	Yattha sāmo hato seti,
ja540:68.4	sūriyova patito chamā.
ja540:69.1	Brahā vāḷamigākiṇṇaṁ,
ja540:69.2	ākāsantaṁva dissati;
ja540:69.3	Yattha sāmo hato seti,
ja540:69.4	paṁsunā patikunthito.
ja540:70.1	Brahā vāḷamigākiṇṇaṁ,
ja540:70.2	ākāsantaṁva dissati;
ja540:70.3	Yattha sāmo hato seti,
ja540:70.4	idheva vasathassame”.
ja540:71.1	“Yadi tattha sahassāni,
ja540:71.2	satāni niyutāni ca;
ja540:71.3	Nevamhākaṁ bhayaṁ koci,
ja540:71.4	vane vāḷesu vijjati”.
ja540:72.1	Tato andhānamādāya,
ja540:72.2	kāsirājā brahāvane;
ja540:72.3	Hatthe gahetvā pakkāmi,
ja540:72.4	yattha sāmo hato ahu.
ja540:73.1	Disvāna patitaṁ sāmaṁ,
ja540:73.2	puttakaṁ paṁsukunthitaṁ;
ja540:73.3	Apaviddhaṁ brahāraññe,
ja540:73.4	candaṁva patitaṁ chamā.
ja540:74.1	Disvāna patitaṁ sāmaṁ,
ja540:74.2	puttakaṁ paṁsukunthitaṁ;
ja540:74.3	Apaviddhaṁ brahāraññe,
ja540:74.4	sūriyaṁva patitaṁ chamā.
ja540:75.1	Disvāna patitaṁ sāmaṁ,
ja540:75.2	puttakaṁ paṁsukunthitaṁ;
ja540:75.3	Apaviddhaṁ brahāraññe,
ja540:75.4	kalūnaṁ paridevayuṁ.
ja540:76.1	Disvāna patitaṁ sāmaṁ,
ja540:76.2	puttakaṁ paṁsukunthitaṁ;
ja540:76.3	Bāhā paggayha pakkanduṁ,
ja540:76.4	“adhammo kira bho iti.
ja540:77.1	Bāḷhaṁ kho tvaṁ pamattosi,
ja540:77.2	sāma kalyāṇadassana;
ja540:77.3	Yo ajjevaṁ gate kāle,
ja540:77.4	na kiñci mabhibhāsasi.
ja540:78.1	Bāḷhaṁ kho tvaṁ padittosi,
ja540:78.2	sāma kalyāṇadassana;
ja540:78.3	Yo ajjevaṁ gate kāle,
ja540:78.4	na kiñci mabhibhāsasi.
ja540:79.1	Bāḷhaṁ kho tvaṁ pakuddhosi,
ja540:79.2	sāma kalyāṇadassana;
ja540:79.3	Yo ajjevaṁ gate kāle,
ja540:79.4	na kiñci mabhibhāsasi.
ja540:80.1	Bāḷhaṁ kho tvaṁ pasuttosi,
ja540:80.2	sāma kalyāṇadassana;
ja540:80.3	Yo ajjevaṁ gate kāle,
ja540:80.4	na kiñci mabhibhāsasi.
ja540:81.1	Bāḷhaṁ kho tvaṁ vimanosi,
ja540:81.2	sāma kalyāṇadassana;
ja540:81.3	Yo ajjevaṁ gate kāle,
ja540:81.4	na kiñci mabhibhāsasi.
ja540:82.1	Jaṭaṁ valinaṁ paṁsugataṁ,
ja540:82.2	ko dāni saṇṭhapessati;
ja540:82.3	Sāmo ayaṁ kālaṅkato,
ja540:82.4	andhānaṁ paricārako.
ja540:83.1	Ko me sammajjamādāya,
ja540:83.2	sammajjissati assamaṁ;
ja540:83.3	Sāmo ayaṁ kālaṅkato,
ja540:83.4	andhānaṁ paricārako.
ja540:84.1	Ko dāni nhāpayissati,
ja540:84.2	sītenuṇhodakena ca;
ja540:84.3	Sāmo ayaṁ kālaṅkato,
ja540:84.4	andhānaṁ paricārako.
ja540:85.1	Ko dāni bhojayissati,
ja540:85.2	vanamūlaphalāni ca;
ja540:85.3	Sāmo ayaṁ kālaṅkato,
ja540:85.4	andhānaṁ paricārako”.
ja540:86.1	Disvāna patitaṁ sāmaṁ,
ja540:86.2	puttakaṁ paṁsukunthitaṁ;
ja540:86.3	Aṭṭitā puttasokena,
ja540:86.4	mātā saccaṁ abhāsatha.
ja540:87.1	“Yena saccenayaṁ sāmo,
ja540:87.2	dhammacārī pure ahu;
ja540:87.3	Etena saccavajjena,
ja540:87.4	visaṁ sāmassa haññatu.
ja540:88.1	Yena saccenayaṁ sāmo,
ja540:88.2	brahmacārī pure ahu;
ja540:88.3	Etena saccavajjena,
ja540:88.4	visaṁ sāmassa haññatu.
ja540:89.1	Yena saccenayaṁ sāmo,
ja540:89.2	saccavādī pure ahu;
ja540:89.3	Etena saccavajjena,
ja540:89.4	visaṁ sāmassa haññatu.
ja540:90.1	Yena saccenayaṁ sāmo,
ja540:90.2	mātāpettibharo ahu;
ja540:90.3	Etena saccavajjena,
ja540:90.4	visaṁ sāmassa haññatu.
ja540:91.1	Yena saccenayaṁ sāmo,
ja540:91.2	kule jeṭṭhāpacāyiko;
ja540:91.3	Etena saccavajjena,
ja540:91.4	visaṁ sāmassa haññatu.
ja540:92.1	Yena saccenayaṁ sāmo,
ja540:92.2	pāṇā piyataro mama;
ja540:92.3	Etena saccavajjena,
ja540:92.4	visaṁ sāmassa haññatu.
ja540:93.1	Yaṁ kiñcitthi kataṁ puññaṁ,
ja540:93.2	Mayhañceva pitucca te;
ja540:93.3	Sabbena tena kusalena,
ja540:93.4	Visaṁ sāmassa haññatu”.
ja540:94.1	Disvāna patitaṁ sāmaṁ,
ja540:94.2	puttakaṁ paṁsukunthitaṁ;
ja540:94.3	Aṭṭito puttasokena,
ja540:94.4	pitā saccaṁ abhāsatha.
ja540:95.1	“Yena saccenayaṁ sāmo,
ja540:95.2	dhammacārī pure ahu;
ja540:95.3	Etena saccavajjena,
ja540:95.4	visaṁ sāmassa haññatu.
ja540:96.1	Yena saccenayaṁ sāmo,
ja540:96.2	brahmacārī pure ahu;
ja540:96.3	Etena saccavajjena,
ja540:96.4	visaṁ sāmassa haññatu.
ja540:97.1	Yena saccenayaṁ sāmo,
ja540:97.2	saccavādī pure ahu;
ja540:97.3	Etena saccavajjena,
ja540:97.4	visaṁ sāmassa haññatu.
ja540:98.1	Yena saccenayaṁ sāmo,
ja540:98.2	mātāpettibharo ahu;
ja540:98.3	Etena saccavajjena,
ja540:98.4	visaṁ sāmassa haññatu.
ja540:99.1	Yena saccenayaṁ sāmo,
ja540:99.2	kule jeṭṭhāpacāyiko;
ja540:99.3	Etena saccavajjena,
ja540:99.4	visaṁ sāmassa haññatu.
ja540:100.1	Yena saccenayaṁ sāmo,
ja540:100.2	pāṇā piyataro mama;
ja540:100.3	Etena saccavajjena,
ja540:100.4	visaṁ sāmassa haññatu.
ja540:101.1	Yaṁ kiñcitthi kataṁ puññaṁ,
ja540:101.2	Mayhañceva mātucca te;
ja540:101.3	Sabbena tena kusalena,
ja540:101.4	Visaṁ sāmassa haññatu.
ja540:102.1	Sā devatā antarahitā,
ja540:102.2	pabbate gandhamādane;
ja540:102.3	Sāmassa anukampāya,
ja540:102.4	imaṁ saccaṁ abhāsatha.
ja540:103.1	Pabbatyāhaṁ gandhamādane,
ja540:103.2	cirarattanivāsinī;
ja540:103.3	Na me piyataro koci,
ja540:103.4	añño sāmena vijjati;
ja540:103.5	Etena saccavajjena,
ja540:103.6	visaṁ sāmassa haññatu.
ja540:104.1	Sabbe vanā gandhamayā,
ja540:104.2	pabbate gandhamādane;
ja540:104.3	Etena saccavajjena,
ja540:104.4	visaṁ sāmassa haññatu”.
ja540:105.1	Tesaṁ lālappamānānaṁ,
ja540:105.2	bahuṁ kāruññasañhitaṁ;
ja540:105.3	Khippaṁ sāmo samuṭṭhāsi,
ja540:105.4	yuvā kalyāṇadassano.
ja540:106.1	“Sāmohamasmi bhaddaṁ vo,
ja540:106.2	Sotthināmhi samuṭṭhito;
ja540:106.3	Mā bāḷhaṁ paridevetha,
ja540:106.4	Mañjunābhivadetha maṁ”.
ja540:107.1	“Svāgataṁ te mahārāja,
ja540:107.2	atho te adurāgataṁ;
ja540:107.3	Issarosi anuppatto,
ja540:107.4	yaṁ idhatthi pavedaya.
ja540:108.1	Tindukāni piyālāni,
ja540:108.2	madhuke kāsumāriyo;
ja540:108.3	Phalāni khuddakappāni,
ja540:108.4	bhuñja rāja varaṁ varaṁ.
ja540:109.1	Atthi me pānīyaṁ sītaṁ,
ja540:109.2	ābhataṁ girigabbharā;
ja540:109.3	Tato piva mahārāja,
ja540:109.4	sace tvaṁ abhikaṅkhasi”.
ja540:110.1	“Sammuyhāmi pamuyhāmi,
ja540:110.2	sabbā muyhanti me disā;
ja540:110.3	Petaṁ taṁ sāma maddakkhiṁ,
ja540:110.4	ko nu tvaṁ sāma jīvasi”.
ja540:111.1	“Api jīvaṁ mahārāja,
ja540:111.2	purisaṁ gāḷhavedanaṁ;
ja540:111.3	Upanītamanasaṅkappaṁ,
ja540:111.4	jīvantaṁ maññate mataṁ.
ja540:112.1	Api jīvaṁ mahārāja,
ja540:112.2	purisaṁ gāḷhavedanaṁ;
ja540:112.3	Taṁ nirodhagataṁ santaṁ,
ja540:112.4	jīvantaṁ maññate mataṁ.
ja540:113.1	Yo mātaraṁ pitaraṁ vā,
ja540:113.2	macco dhammena posati;
ja540:113.3	Devāpi naṁ tikicchanti,
ja540:113.4	mātāpettibharaṁ naraṁ.
ja540:114.1	Yo mātaraṁ pitaraṁ vā,
ja540:114.2	macco dhammena posati;
ja540:114.3	Idheva naṁ pasaṁsanti,
ja540:114.4	pecca sagge pamodati”.
ja540:115.1	“Esa bhiyyo pamuyhāmi,
ja540:115.2	Sabbā muyhanti me disā;
ja540:115.3	Saraṇaṁ taṁ sāma gacchāmi,
ja540:115.4	Tvañca me saraṇaṁ bhava”.
ja540:116.1	“Dhammaṁ cara mahārāja,
ja540:116.2	mātāpitūsu khattiya;
ja540:116.3	Idha dhammaṁ caritvāna,
ja540:116.4	rāja saggaṁ gamissasi.
ja540:117.1	Dhammaṁ cara mahārāja,
ja540:117.2	puttadāresu khattiya;
ja540:117.3	Idha dhammaṁ caritvāna,
ja540:117.4	rāja saggaṁ gamissasi.
ja540:118.1	Dhammaṁ cara mahārāja,
ja540:118.2	mittāmaccesu khattiya;
ja540:118.3	Idha dhammaṁ caritvāna,
ja540:118.4	rāja saggaṁ gamissasi.
ja540:119.1	Dhammaṁ cara mahārāja,
ja540:119.2	vāhanesu balesu ca;
ja540:119.3	Idha dhammaṁ caritvāna,
ja540:119.4	rāja saggaṁ gamissasi.
ja540:120.1	Dhammaṁ cara mahārāja,
ja540:120.2	gāmesu nigamesu ca;
ja540:120.3	Idha dhammaṁ caritvāna,
ja540:120.4	rāja saggaṁ gamissasi.
ja540:121.1	Dhammaṁ cara mahārāja,
ja540:121.2	raṭṭhesu janapadesu ca;
ja540:121.3	Idha dhammaṁ caritvāna,
ja540:121.4	rāja saggaṁ gamissasi.
ja540:122.1	Dhammaṁ cara mahārāja,
ja540:122.2	samaṇabrāhmaṇesu ca;
ja540:122.3	Idha dhammaṁ caritvāna,
ja540:122.4	rāja saggaṁ gamissasi.
ja540:123.1	Dhammaṁ cara mahārāja,
ja540:123.2	migapakkhīsu khattiya;
ja540:123.3	Idha dhammaṁ caritvāna,
ja540:123.4	rāja saggaṁ gamissasi.
ja540:124.1	Dhammaṁ cara mahārāja,
ja540:124.2	dhammo ciṇṇo sukhāvaho;
ja540:124.3	Idha dhammaṁ caritvāna,
ja540:124.4	rāja saggaṁ gamissasi.
ja540:125.1	Dhammaṁ cara mahārāja,
ja540:125.2	saindā devā sabrahmakā;
ja540:125.3	Suciṇṇena divaṁ pattā,
ja540:125.4	mā dhammaṁ rāja pāmado”ti.
ja540:126.1	Suvaṇṇasāmajātakaṁ tatiyaṁ.
ja541:0.1	Jātaka
ja541:0.2	Mahānipāta
ja541:0.3	Mūgapakkhavagga
ja541:0.4	4 Nimijātaka
ja541:1.1	Accheraṁ vata lokasmiṁ,
ja541:1.2	uppajjanti vicakkhaṇā;
ja541:1.3	Yadā ahu nimirājā,
ja541:1.4	paṇḍito kusalatthiko.
ja541:2.1	Rājā sabbavidehānaṁ,
ja541:2.2	adā dānaṁ arindamo;
ja541:2.3	Tassa taṁ dadato dānaṁ,
ja541:2.4	saṅkappo udapajjatha;
ja541:2.5	Dānaṁ vā brahmacariyaṁ vā,
ja541:2.6	katamaṁ su mahapphalaṁ.
ja541:3.1	Tassa saṅkappamaññāya,
ja541:3.2	maghavā devakuñjaro;
ja541:3.3	Sahassanetto pāturahu,
ja541:3.4	vaṇṇena vihanaṁ tamaṁ.
ja541:4.1	Salomahaṭṭho manujindo,
ja541:4.2	vāsavaṁ avacā nimi;
ja541:4.3	“Devatā nusi gandhabbo,
ja541:4.4	adu sakko purindado.
ja541:5.1	Na ca me tādiso vaṇṇo,
ja541:5.2	diṭṭho vā yadi vā suto;
ja541:5.3	Ācikkha me tvaṁ bhaddante,
ja541:5.4	kathaṁ jānemu taṁ mayaṁ”.
ja541:6.1	Salomahaṭṭhaṁ ñatvāna,
ja541:6.2	vāsavo avacā nimiṁ;
ja541:6.3	“Sakkohamasmi devindo,
ja541:6.4	āgatosmi tavantike;
ja541:6.5	Alomahaṭṭho manujinda,
ja541:6.6	puccha pañhaṁ yamicchasi”.
ja541:7.1	So ca tena katokāso,
ja541:7.2	vāsavaṁ avacā nimi;
ja541:7.3	“Pucchāmi taṁ mahārāja,
ja541:7.4	sabbabhūtānamissara;
ja541:7.5	Dānaṁ vā brahmacariyaṁ vā,
ja541:7.6	katamaṁ su mahapphalaṁ”.
ja541:8.1	So puṭṭho naradevena,
ja541:8.2	vāsavo avacā nimiṁ;
ja541:8.3	Vipākaṁ brahmacariyassa,
ja541:8.4	jānaṁ akkhāsijānato.
ja541:9.1	“Hīnena brahmacariyena,
ja541:9.2	khattiye upapajjati;
ja541:9.3	Majjhimena ca devattaṁ,
ja541:9.4	uttamena visujjhati.
ja541:10.1	Na hete sulabhā kāyā,
ja541:10.2	yācayogena kenaci;
ja541:10.3	Ye kāye upapajjanti,
ja541:10.4	anāgārā tapassino.
ja541:11.1	Dudīpo sāgaro selo,
ja541:11.2	mujakindo bhagīraso;
ja541:11.3	Usindaro kassapo ca,
ja541:11.4	asako ca puthujjano.
ja541:12.1	Ete caññe ca rājāno,
ja541:12.2	khattiyā brāhmaṇā bahū;
ja541:12.3	Puthuyaññaṁ yajitvāna,
ja541:12.4	petattaṁ nātivattisuṁ.
ja541:13.1	(…)
ja541:14.1	Atha yīme avattiṁsu,
ja541:14.2	anāgārā tapassino;
ja541:14.3	Sattisayo yāmahanu,
ja541:14.4	somayāmo manojavo.
ja541:15.1	Samuddo māgho bharato ca,
ja541:15.2	isi kālapurakkhato;
ja541:15.3	Aṅgīraso kassapo ca,
ja541:15.4	kisavaccho akatti ca.
ja541:16.1	Uttarena nadī sīdā,
ja541:16.2	gambhīrā duratikkamā;
ja541:16.3	Naḷaggivaṇṇā jotanti,
ja541:16.4	sadā kañcanapabbatā.
ja541:17.1	Parūḷhakacchā tagarā,
ja541:17.2	rūḷhakacchā vanā nagā;
ja541:17.3	Tatrāsuṁ dasasahassā,
ja541:17.4	porāṇā isayo pure.
ja541:18.1	Ahaṁ seṭṭhosmi dānena,
ja541:18.2	saṁyamena damena ca;
ja541:18.3	Anuttaraṁ vataṁ katvā,
ja541:18.4	pakiracārī samāhite.
ja541:19.1	Jātimantaṁ ajaccañca,
ja541:19.2	ahaṁ ujugataṁ naraṁ;
ja541:19.3	Ativelaṁ namassissaṁ,
ja541:19.4	kammabandhū hi māṇavā.
ja541:20.1	Sabbe vaṇṇā adhammaṭṭhā,
ja541:20.2	patanti nirayaṁ adho;
ja541:20.3	Sabbe vaṇṇā visujjhanti,
ja541:20.4	caritvā dhammamuttamaṁ”.
ja541:21.1	Idaṁ vatvāna maghavā,
ja541:21.2	devarājā sujampati;
ja541:21.3	Vedehamanusāsitvā,
ja541:21.4	saggakāyaṁ apakkami.
ja541:22.1	“Imaṁ bhonto nisāmetha,
ja541:22.2	yāvantettha samāgatā;
ja541:22.3	Dhammikānaṁ manussānaṁ,
ja541:22.4	vaṇṇaṁ uccāvacaṁ bahuṁ.
ja541:23.1	Yathā ayaṁ nimirājā,
ja541:23.2	paṇḍito kusalatthiko;
ja541:23.3	Rājā sabbavidehānaṁ,
ja541:23.4	adā dānaṁ arindamo.
ja541:24.1	Tassa taṁ dadato dānaṁ,
ja541:24.2	saṅkappo udapajjatha;
ja541:24.3	Dānaṁ vā brahmacariyaṁ vā,
ja541:24.4	katamaṁ su mahapphalaṁ”.
ja541:25.1	“Abbhuto vata lokasmiṁ,
ja541:25.2	uppajji lomahaṁsano;
ja541:25.3	Dibbo ratho pāturahu,
ja541:25.4	vedehassa yasassino”.
ja541:26.1	Devaputto mahiddhiko,
ja541:26.2	mātali devasārathi;
ja541:26.3	Nimantayittha rājānaṁ,
ja541:26.4	vedehaṁ mithilaggahaṁ.
ja541:27.1	“Ehimaṁ rathamāruyha,
ja541:27.2	rājaseṭṭha disampati;
ja541:27.3	Devā dassanakāmā te,
ja541:27.4	tāvatiṁsā saindakā;
ja541:27.5	Saramānā hi te devā,
ja541:27.6	sudhammāyaṁ samacchare”.
ja541:28.1	Tato rājā taramāno,
ja541:28.2	vedeho mithilaggaho;
ja541:28.3	Āsanā vuṭṭhahitvāna,
ja541:28.4	pamukho rathamāruhi.
ja541:29.1	Abhirūḷhaṁ rathaṁ dibbaṁ,
ja541:29.2	mātali etadabravi;
ja541:29.3	“Kena taṁ nemi maggena,
ja541:29.4	rājaseṭṭha disampati;
ja541:29.5	Yena vā pāpakammantā,
ja541:29.6	puññakammā ca ye narā”.
ja541:30.1	“Ubhayeneva maṁ nehi,
ja541:30.2	mātali devasārathi;
ja541:30.3	Yena vā pāpakammantā,
ja541:30.4	puññakammā ca ye narā”.
ja541:31.1	“Kena taṁ paṭhamaṁ nemi,
ja541:31.2	rājaseṭṭha disampati;
ja541:31.3	Yena vā pāpakammantā,
ja541:31.4	puññakammā ca ye narā”.
ja541:32.1	“Niraye tāva passāmi,
ja541:32.2	āvāse pāpakamminaṁ;
ja541:32.3	Ṭhānāni luddakammānaṁ,
ja541:32.4	dussīlānañca yā gati”.
ja541:33.1	Dassesi mātali rañño,
ja541:33.2	duggaṁ vetaraṇiṁ nadiṁ;
ja541:33.3	Kuthitaṁ khārasaṁyuttaṁ,
ja541:33.4	tattaṁ aggisikhūpamaṁ.
ja541:34.1	Nimī have mātalimajjhabhāsatha,
ja541:34.2	Disvā janaṁ patamānaṁ vidugge;
ja541:34.3	“Bhayañhi maṁ vindati sūta disvā,
ja541:34.4	Pucchāmi taṁ mātali devasārathi;
ja541:34.5	Ime nu maccā kimakaṁsu pāpaṁ,
ja541:34.6	Yeme janā vetaraṇiṁ patanti”.
ja541:35.1	Tassa puṭṭho viyākāsi,
ja541:35.2	mātali devasārathi;
ja541:35.3	Vipākaṁ pāpakammānaṁ,
ja541:35.4	jānaṁ akkhāsijānato.
ja541:36.1	“Ye dubbale balavantā jīvaloke,
ja541:36.2	Hiṁsanti rosanti supāpadhammā;
ja541:36.3	Te luddakammā pasavetva pāpaṁ,
ja541:36.4	Teme janā vetaraṇiṁ patanti”.
ja541:37.1	“Sāmā ca soṇā sabalā ca gijjhā,
ja541:37.2	Kākolasaṅghā adanti bheravā;
ja541:37.3	Bhayañhi maṁ vindati sūta disvā,
ja541:37.4	Pucchāmi taṁ mātali devasārathi;
ja541:37.5	Ime nu maccā kimakaṁsu pāpaṁ,
ja541:37.6	Yeme jane kākolasaṅghā adanti”.
ja541:38.1	Tassa puṭṭho viyākāsi,
ja541:38.2	mātali devasārathi;
ja541:38.3	Vipākaṁ pāpakammānaṁ,
ja541:38.4	jānaṁ akkhāsijānato.
ja541:39.1	“Ye kecime maccharino kadariyā,
ja541:39.2	Paribhāsakā samaṇabrāhmaṇānaṁ;
ja541:39.3	Hiṁsanti rosanti supāpadhammā,
ja541:39.4	Te luddakammā pasavetva pāpaṁ;
ja541:39.5	Teme jane kākolasaṅghā adanti”.
ja541:40.1	“Sajotibhūtā pathaviṁ kamanti,
ja541:40.2	Tattehi khandhehi ca pothayanti;
ja541:40.3	Bhayañhi maṁ vindati sūta disvā,
ja541:40.4	Pucchāmi taṁ mātali devasārathi;
ja541:40.5	Ime nu maccā kimakaṁsu pāpaṁ,
ja541:40.6	Yeme janā khandhahatā sayanti”.
ja541:41.1	Tassa puṭṭho viyākāsi,
ja541:41.2	mātali devasārathi;
ja541:41.3	Vipākaṁ pāpakammānaṁ,
ja541:41.4	jānaṁ akkhāsijānato.
ja541:42.1	“Ye jīvalokasmi supāpadhammino,
ja541:42.2	Narañca nāriñca apāpadhammaṁ;
ja541:42.3	Hiṁsanti rosanti supāpadhammā,
ja541:42.4	Te luddakammā pasavetva pāpaṁ;
ja541:42.5	Teme janā khandhahatā sayanti”.
ja541:43.1	“Aṅgārakāsuṁ apare phuṇanti,
ja541:43.2	Narā rudantā paridaḍḍhagattā;
ja541:43.3	Bhayañhi maṁ vindati sūta disvā,
ja541:43.4	Pucchāmi taṁ mātali devasārathi;
ja541:43.5	Ime nu maccā kimakaṁsu pāpaṁ,
ja541:43.6	Yeme janā aṅgārakāsuṁ phuṇanti”.
ja541:44.1	Tassa puṭṭho viyākāsi,
ja541:44.2	mātali devasārathi;
ja541:44.3	Vipākaṁ pāpakammānaṁ,
ja541:44.4	jānaṁ akkhāsijānato.
ja541:45.1	“Ye keci pūgāya dhanassa hetu,
ja541:45.2	Sakkhiṁ karitvā iṇaṁ jāpayanti;
ja541:45.3	Te jāpayitvā janataṁ janinda,
ja541:45.4	Te luddakammā pasavetva pāpaṁ;
ja541:45.5	Teme janā aṅgārakāsuṁ phuṇanti”.
ja541:46.1	“Sajotibhūtā jalitā padittā,
ja541:46.2	Padissati mahatī lohakumbhī;
ja541:46.3	Bhayañhi maṁ vindati sūta disvā,
ja541:46.4	Pucchāmi taṁ mātali devasārathi;
ja541:46.5	Ime nu maccā kimakaṁsu pāpaṁ,
ja541:46.6	Yeme janā avaṁsirā lohakumbhiṁ patanti”.
ja541:47.1	Tassa puṭṭho viyākāsi,
ja541:47.2	mātali devasārathi;
ja541:47.3	Vipākaṁ pāpakammānaṁ,
ja541:47.4	jānaṁ akkhāsijānato.
ja541:48.1	“Ye sīlavantaṁ samaṇaṁ brāhmaṇaṁ vā,
ja541:48.2	Hiṁsanti rosanti supāpadhammā;
ja541:48.3	Te luddakammā pasavetva pāpaṁ,
ja541:48.4	Teme janā avaṁsirā lohakumbhiṁ patanti”.
ja541:49.1	“Luñcanti gīvaṁ atha veṭhayitvā,
ja541:49.2	Uṇhodakasmiṁ pakiledayitvā;
ja541:49.3	Bhayañhi maṁ vindati sūta disvā,
ja541:49.4	Pucchāmi taṁ mātali devasārathi;
ja541:49.5	Ime nu maccā kimakaṁsu pāpaṁ,
ja541:49.6	Yeme janā luttasirā sayanti”.
ja541:50.1	Tassa puṭṭho viyākāsi,
ja541:50.2	mātali devasārathi;
ja541:50.3	Vipākaṁ pāpakammānaṁ,
ja541:50.4	jānaṁ akkhāsijānato.
ja541:51.1	“Ye jīvalokasmi supāpadhammino,
ja541:51.2	Pakkhī gahetvāna viheṭhayanti te;
ja541:51.3	Viheṭhayitvā sakuṇaṁ janinda,
ja541:51.4	Te luddakammā pasavetva pāpaṁ;
ja541:51.5	Teme janā luttasirā sayanti”.
ja541:52.1	“Pahūtatoyā anigādhakūlā,
ja541:52.2	Nadī ayaṁ sandati suppatitthā;
ja541:52.3	Ghammābhitattā manujā pivanti,
ja541:52.4	Pītañca tesaṁ bhusa hoti pāni.
ja541:53.1	Bhayañhi maṁ vindati sūta disvā,
ja541:53.2	Pucchāmi taṁ mātali devasārathi;
ja541:53.3	Ime nu maccā kimakaṁsu pāpaṁ,
ja541:53.4	Pītañca tesaṁ bhusa hoti pāni”.
ja541:54.1	Tassa puṭṭho viyākāsi,
ja541:54.2	mātali devasārathi;
ja541:54.3	Vipākaṁ pāpakammānaṁ,
ja541:54.4	jānaṁ akkhāsijānato.
ja541:55.1	“Ye suddhadhaññaṁ palāsena missaṁ,
ja541:55.2	Asuddhakammā kayino dadanti;
ja541:55.3	Ghammābhitattāna pipāsitānaṁ,
ja541:55.4	Pītañca tesaṁ bhusa hoti pāni”.
ja541:56.1	“Usūhi sattīhi ca tomarehi,
ja541:56.2	Dubhayāni passāni tudanti kandataṁ;
ja541:56.3	Bhayañhi maṁ vindati sūta disvā,
ja541:56.4	Pucchāmi taṁ mātali devasārathi;
ja541:56.5	Ime nu maccā kimakaṁsu pāpaṁ,
ja541:56.6	Yeme janā sattihatā sayanti”.
ja541:57.1	Tassa puṭṭho viyākāsi,
ja541:57.2	mātali devasārathi;
ja541:57.3	Vipākaṁ pāpakammānaṁ,
ja541:57.4	jānaṁ akkhāsijānato.
ja541:58.1	“Ye jīvalokasmi asādhukammino,
ja541:58.2	Adinnamādāya karonti jīvikaṁ;
ja541:58.3	Dhaññaṁ dhanaṁ rajataṁ jātarūpaṁ,
ja541:58.4	Ajeḷakañcāpi pasuṁ mahiṁsaṁ;
ja541:58.5	Te luddakammā pasavetva pāpaṁ,
ja541:58.6	Teme janā sattihatā sayanti”.
ja541:59.1	“Gīvāya baddhā kissa ime puneke,
ja541:59.2	Aññe vikantā bilakatā sayanti;
ja541:59.3	Bhayañhi maṁ vindati sūta disvā,
ja541:59.4	Pucchāmi taṁ mātali devasārathi;
ja541:59.5	Ime nu maccā kimakaṁsu pāpaṁ,
ja541:59.6	Yeme janā bilakatā sayanti”.
ja541:60.1	Tassa puṭṭho viyākāsi,
ja541:60.2	mātali devasārathi;
ja541:60.3	Vipākaṁ pāpakammānaṁ,
ja541:60.4	jānaṁ akkhāsijānato.
ja541:61.1	“Orabbhikā sūkarikā ca macchikā,
ja541:61.2	Pasuṁ mahiṁsañca ajeḷakañca;
ja541:61.3	Hantvāna sūnesu pasārayiṁsu,
ja541:61.4	Te luddakammā pasavetva pāpaṁ;
ja541:61.5	Teme janā bilakatā sayanti”.
ja541:62.1	“Rahado ayaṁ muttakarīsapūro,
ja541:62.2	Duggandharūpo asuci pūti vāti;
ja541:62.3	Khudāparetā manujā adanti,
ja541:62.4	Bhayañhi maṁ vindati sūta disvā;
ja541:62.5	Pucchāmi taṁ mātali devasārathi,
ja541:62.6	Ime nu maccā kimakaṁsu pāpaṁ;
ja541:62.7	Yeme janā muttakarīsabhakkhā”.
ja541:63.1	Tassa puṭṭho viyākāsi,
ja541:63.2	mātali devasārathi;
ja541:63.3	Vipākaṁ pāpakammānaṁ,
ja541:63.4	jānaṁ akkhāsijānato.
ja541:64.1	“Ye kecime kāraṇikā virosakā,
ja541:64.2	Paresaṁ hiṁsāya sadā niviṭṭhā;
ja541:64.3	Te luddakammā pasavetva pāpaṁ,
ja541:64.4	Mittadduno mīḷhamadanti bālā”.
ja541:65.1	“Rahado ayaṁ lohitapubbapūro,
ja541:65.2	Duggandharūpo asuci pūti vāti;
ja541:65.3	Ghammābhitattā manujā pivanti,
ja541:65.4	Bhayañhi maṁ vindati sūta disvā;
ja541:65.5	Pucchāmi taṁ mātali devasārathi,
ja541:65.6	Ime nu maccā kimakaṁsu pāpaṁ;
ja541:65.7	Yeme janā lohitapubbabhakkhā”.
ja541:66.1	Tassa puṭṭho viyākāsi,
ja541:66.2	mātali devasārathi;
ja541:66.3	Vipākaṁ pāpakammānaṁ,
ja541:66.4	jānaṁ akkhāsijānato.
ja541:67.1	“Ye mātaraṁ vā pitaraṁ vā jīvaloke,
ja541:67.2	Pārājikā arahante hananti;
ja541:67.3	Te luddakammā pasavetva pāpaṁ,
ja541:67.4	Teme janā lohitapubbabhakkhā”.
ja541:68.1	“Jivhañca passa baḷisena viddhaṁ,
ja541:68.2	Vihataṁ yathā saṅkusatena cammaṁ;
ja541:68.3	Phandanti macchāva thalamhi khittā,
ja541:68.4	Muñcanti kheḷaṁ rudamānā kimete.
ja541:69.1	Bhayañhi maṁ vindati sūta disvā,
ja541:69.2	Pucchāmi taṁ mātali devasārathi;
ja541:69.3	Ime nu maccā kimakaṁsu pāpaṁ,
ja541:69.4	Yeme janā vaṅkaghastā sayanti”.
ja541:70.1	Tassa puṭṭho viyākāsi,
ja541:70.2	mātali devasārathi;
ja541:70.3	Vipākaṁ pāpakammānaṁ,
ja541:70.4	jānaṁ akkhāsijānato.
ja541:71.1	“Ye keci sandhānagatā manussā,
ja541:71.2	Agghena agghaṁ kayaṁ hāpayanti;
ja541:71.3	Kuṭena kuṭaṁ dhanalobhahetu,
ja541:71.4	Channaṁ yathā vāricaraṁ vadhāya.
ja541:72.1	Na hi kuṭakārissa bhavanti tāṇā,
ja541:72.2	Sakehi kammehi purakkhatassa;
ja541:72.3	Te luddakammā pasavetva pāpaṁ,
ja541:72.4	Teme janā vaṅkaghastā sayanti”.
ja541:73.1	“Nārī imā samparibhinnagattā,
ja541:73.2	Paggayha kandanti bhuje dujaccā;
ja541:73.3	Sammakkhitā lohitapubbalittā,
ja541:73.4	Gāvo yathā āghātane vikantā;
ja541:73.5	Tā bhūmibhāgasmiṁ sadā nikhātā,
ja541:73.6	Khandhātivattanti sajotibhūtā.
ja541:74.1	Bhayañhi maṁ vindati sūta disvā,
ja541:74.2	Pucchāmi taṁ mātali devasārathi;
ja541:74.3	Imā nu nāriyo kimakaṁsu pāpaṁ,
ja541:74.4	Yā bhūmibhāgasmiṁ sadā nikhātā;
ja541:74.5	Khandhātivattanti sajotibhūtā”.
ja541:75.1	Tassa puṭṭho viyākāsi,
ja541:75.2	mātali devasārathi;
ja541:75.3	Vipākaṁ pāpakammānaṁ,
ja541:75.4	jānaṁ akkhāsijānato.
ja541:76.1	“Kolitthiyāyo idha jīvaloke,
ja541:76.2	Asuddhakammā asataṁ acāruṁ;
ja541:76.3	Tā dittarūpā pati vippahāya,
ja541:76.4	Aññaṁ acāruṁ ratikhiḍḍahetu;
ja541:76.5	Tā jīvalokasmiṁ ramāpayitvā,
ja541:76.6	Khandhātivattanti sajotibhūtā”.
ja541:77.1	“Pāde gahetvā kissa ime puneke,
ja541:77.2	Avaṁsirā narake pātayanti;
ja541:77.3	Bhayañhi maṁ vindati sūta disvā,
ja541:77.4	Pucchāmi taṁ mātali devasārathi;
ja541:77.5	Ime nu maccā kimakaṁsu pāpaṁ,
ja541:77.6	Yeme janā avaṁsirā narake pātayanti”.
ja541:78.1	Tassa puṭṭho viyākāsi,
ja541:78.2	mātali devasārathi;
ja541:78.3	Vipākaṁ pāpakammānaṁ,
ja541:78.4	jānaṁ akkhāsijānato.
ja541:79.1	“Ye jīvalokasmi asādhukammino,
ja541:79.2	Parassa dārāni atikkamanti;
ja541:79.3	Te tādisā uttamabhaṇḍathenā,
ja541:79.4	Teme janā avaṁsirā narake pātayanti.
ja541:80.1	Te vassapūgāni bahūni tattha,
ja541:80.2	Nirayesu dukkhaṁ vedanaṁ vedayanti;
ja541:80.3	Na hi pāpakārissa bhavanti tāṇā,
ja541:80.4	Sakehi kammehi purakkhatassa;
ja541:80.5	Te luddakammā pasavetva pāpaṁ,
ja541:80.6	Teme janā avaṁsirā narake pātayanti”.
ja541:81.1	“Uccāvacāme vividhā upakkamā,
ja541:81.2	Nirayesu dissanti sughorarūpā;
ja541:81.3	Bhayañhi maṁ vindati sūta disvā,
ja541:81.4	Pucchāmi taṁ mātali devasārathi;
ja541:81.5	Ime nu maccā kimakaṁsu pāpaṁ,
ja541:81.6	Yeme janā adhimattā dukkhā tibbā;
ja541:81.7	Kharā kaṭukā vedanā vedayanti”.
ja541:82.1	Tassa puṭṭho viyākāsi,
ja541:82.2	mātali devasārathi;
ja541:82.3	Vipākaṁ pāpakammānaṁ,
ja541:82.4	jānaṁ akkhāsijānato.
ja541:83.1	“Ye jīvalokasmi supāpadiṭṭhino,
ja541:83.2	Vissāsakammāni karonti mohā;
ja541:83.3	Parañca diṭṭhīsu samādapenti,
ja541:83.4	Te pāpadiṭṭhiṁ pasavetva pāpaṁ;
ja541:83.5	Teme janā adhimattā dukkhā tibbā,
ja541:83.6	Kharā kaṭukā vedanā vedayanti”.
ja541:84.1	“Viditāni te mahārāja,
ja541:84.2	āvāsaṁ pāpakamminaṁ;
ja541:84.3	Ṭhānāni luddakammānaṁ,
ja541:84.4	dussīlānañca yā gati;
ja541:84.5	Uyyāhi dāni rājīsi,
ja541:84.6	devarājassa santike.
ja541:85.1	(…)
ja541:86.1	Pañcathūpaṁ dissatidaṁ vimānaṁ,
ja541:86.2	Mālāpiḷandhā sayanassa majjhe;
ja541:86.3	Tatthacchati nārī mahānubhāvā,
ja541:86.4	Uccāvacaṁ iddhi vikubbamānā”.
ja541:87.1	“Vittī hi maṁ vindati sūta disvā,
ja541:87.2	Pucchāmi taṁ mātali devasārathi;
ja541:87.3	Ayaṁ nu nārī kimakāsi sādhuṁ,
ja541:87.4	Yā modati saggapattā vimāne”.
ja541:88.1	Tassa puṭṭho viyākāsi,
ja541:88.2	mātali devasārathi;
ja541:88.3	Vipākaṁ puññakammānaṁ,
ja541:88.4	jānaṁ akkhāsijānato.
ja541:89.1	“Yadi te sutā bīraṇī jīvaloke,
ja541:89.2	Āmāyadāsī ahu brāhmaṇassa;
ja541:89.3	Sā pattakāle atithiṁ viditvā,
ja541:89.4	Mātāva puttaṁ sakimābhinandī;
ja541:89.5	Saṁyamā saṁvibhāgā ca,
ja541:89.6	Sā vimānasmi modati.
ja541:90.1	Daddallamānā ābhenti,
ja541:90.2	vimānā satta nimmitā;
ja541:90.3	Tattha yakkho mahiddhiko,
ja541:90.4	sabbābharaṇabhūsito;
ja541:90.5	Samantā anupariyāti,
ja541:90.6	nārīgaṇapurakkhato”.
ja541:91.1	“Vittī hi maṁ vindati sūta disvā,
ja541:91.2	Pucchāmi taṁ mātali devasārathi;
ja541:91.3	Ayaṁ nu macco kimakāsi sādhuṁ,
ja541:91.4	Yo modati saggapatto vimāne”.
ja541:92.1	Tassa puṭṭho viyākāsi,
ja541:92.2	mātali devasārathi;
ja541:92.3	Vipākaṁ puññakammānaṁ,
ja541:92.4	jānaṁ akkhāsijānato.
ja541:93.1	“Soṇadinno gahapati,
ja541:93.2	esa dānapatī ahu;
ja541:93.3	Esa pabbajituddissa,
ja541:93.4	vihāre satta kārayi.
ja541:94.1	Sakkaccaṁ te upaṭṭhāsi,
ja541:94.2	bhikkhavo tattha vāsike;
ja541:94.3	Acchādanañca bhattañca,
ja541:94.4	senāsanaṁ padīpiyaṁ;
ja541:94.5	Adāsi ujubhūtesu,
ja541:94.6	vippasannena cetasā.
ja541:95.1	Cātuddasiṁ pañcadasiṁ,
ja541:95.2	Yā ca pakkhassa aṭṭhamī;
ja541:95.3	Pāṭihāriyapakkhañca,
ja541:95.4	Aṭṭhaṅgasusamāhitaṁ.
ja541:96.1	Uposathaṁ upavasī,
ja541:96.2	sadā sīlesu saṁvuto;
ja541:96.3	Saṁyamā saṁvibhāgā ca,
ja541:96.4	so vimānasmi modati.
ja541:97.1	Pabhāsati midaṁ byamhaṁ,
ja541:97.2	phalikāsu sunimmitaṁ;
ja541:97.3	Nārīvaragaṇākiṇṇaṁ,
ja541:97.4	kūṭāgāravarocitaṁ;
ja541:97.5	Upetaṁ annapānehi,
ja541:97.6	naccagītehi cūbhayaṁ”.
ja541:98.1	“Vittī hi maṁ vindati sūta disvā,
ja541:98.2	Pucchāmi taṁ mātali devasārathi;
ja541:98.3	Ime nu maccā kimakaṁsu sādhuṁ,
ja541:98.4	Ye modare saggapattā vimāne”.
ja541:99.1	Tassa puṭṭho viyākāsi,
ja541:99.2	mātali devasārathi;
ja541:99.3	Vipākaṁ puññakammānaṁ,
ja541:99.4	jānaṁ akkhāsijānato.
ja541:100.1	“Yā kāci nāriyo idha jīvaloke,
ja541:100.2	Sīlavantiyo upāsikā;
ja541:100.3	Dāne ratā niccaṁ pasannacittā,
ja541:100.4	Sacce ṭhitā uposathe appamattā;
ja541:100.5	Saṁyamā saṁvibhāgā ca,
ja541:100.6	Tā vimānasmi modare”.
ja541:101.1	“Pabhāsati midaṁ byamhaṁ,
ja541:101.2	veḷuriyāsu nimmitaṁ;
ja541:101.3	Upetaṁ bhūmibhāgehi,
ja541:101.4	vibhattaṁ bhāgaso mitaṁ.
ja541:102.1	Āḷambarā mudiṅgā ca,
ja541:102.2	naccagītā suvāditā;
ja541:102.3	Dibbā saddā niccharanti,
ja541:102.4	savanīyā manoramā.
ja541:103.1	Nāhaṁ evaṅgataṁ jātu,
ja541:103.2	evaṁsuruciraṁ pure;
ja541:103.3	Saddaṁ samabhijānāmi,
ja541:103.4	diṭṭhaṁ vā yadi vā sutaṁ.
ja541:104.1	Vittī hi maṁ vindati sūta disvā,
ja541:104.2	Pucchāmi taṁ mātali devasārathi;
ja541:104.3	Ime nu maccā kimakaṁsu sādhuṁ,
ja541:104.4	Ye modare saggapattā vimāne”.
ja541:105.1	Tassa puṭṭho viyākāsi,
ja541:105.2	mātali devasārathi;
ja541:105.3	Vipākaṁ puññakammānaṁ,
ja541:105.4	jānaṁ akkhāsijānato.
ja541:106.1	“Ye keci maccā idha jīvaloke,
ja541:106.2	Sīlavantā upāsakā;
ja541:106.3	Ārāme udapāne ca,
ja541:106.4	Papā saṅkamanāni ca;
ja541:106.5	Arahante sītibhūte,
ja541:106.6	Sakkaccaṁ paṭipādayuṁ.
ja541:107.1	Cīvaraṁ piṇḍapātañca,
ja541:107.2	paccayaṁ sayanāsanaṁ;
ja541:107.3	Adaṁsu ujubhūtesu,
ja541:107.4	vippasannena cetasā.
ja541:108.1	Cātuddasiṁ pañcadasiṁ,
ja541:108.2	yā ca pakkhassa aṭṭhamī;
ja541:108.3	Pāṭihāriyapakkhañca,
ja541:108.4	aṭṭhaṅgasusamāhitaṁ.
ja541:109.1	Uposathaṁ upavasuṁ,
ja541:109.2	sadā sīlesu saṁvutā;
ja541:109.3	Saṁyamā saṁvibhāgā ca,
ja541:109.4	te vimānasmi modare”.
ja541:110.1	“Pabhāsati midaṁ byamhaṁ,
ja541:110.2	phalikāsu sunimmitaṁ;
ja541:110.3	Nārīvaragaṇākiṇṇaṁ,
ja541:110.4	kūṭāgāravarocitaṁ.
ja541:111.1	Upetaṁ annapānehi,
ja541:111.2	naccagītehi cūbhayaṁ;
ja541:111.3	Najjo cānupariyāti,
ja541:111.4	nānāpupphadumāyutā.
ja541:112.1	Vittī hi maṁ vindati sūta disvā,
ja541:112.2	Pucchāmi taṁ mātali devasārathi;
ja541:112.3	Ayaṁ nu macco kimakāsi sādhuṁ,
ja541:112.4	Yo modatī saggapatto vimāne”.
ja541:113.1	Tassa puṭṭho viyākāsi,
ja541:113.2	mātali devasārathi;
ja541:113.3	Vipākaṁ puññakammānaṁ,
ja541:113.4	jānaṁ akkhāsijānato.
ja541:114.1	“Mithilāyaṁ gahapati,
ja541:114.2	esa dānapatī ahu;
ja541:114.3	Ārāme udapāne ca,
ja541:114.4	papā saṅkamanāni ca;
ja541:114.5	Arahante sītibhūte,
ja541:114.6	sakkaccaṁ paṭipādayi.
ja541:115.1	Cīvaraṁ piṇḍapātañca,
ja541:115.2	paccayaṁ sayanāsanaṁ;
ja541:115.3	Adāsi ujubhūtesu,
ja541:115.4	vippasannena cetasā.
ja541:116.1	Cātuddasiṁ pañcadasiṁ,
ja541:116.2	yā ca pakkhassa aṭṭhamī;
ja541:116.3	Pāṭihāriyapakkhañca,
ja541:116.4	aṭṭhaṅgasusamāhitaṁ.
ja541:117.1	Uposathaṁ upavasī,
ja541:117.2	sadā sīlesu saṁvuto;
ja541:117.3	Saṁyamā saṁvibhāgā ca,
ja541:117.4	so vimānasmi modati”.
ja541:118.1	“Pabhāsati midaṁ byamhaṁ,
ja541:118.2	phalikāsu sunimmitaṁ;
ja541:118.3	Nārīvaragaṇākiṇṇaṁ,
ja541:118.4	kūṭāgāravarocitaṁ.
ja541:119.1	Upetaṁ annapānehi,
ja541:119.2	naccagītehi cūbhayaṁ;
ja541:119.3	Najjo cānupariyāti,
ja541:119.4	nānāpupphadumāyutā.
ja541:120.1	Rājāyatanā kapitthā ca,
ja541:120.2	ambā sālā ca jambuyo;
ja541:120.3	Tindukā ca piyālā ca,
ja541:120.4	dumā niccaphalā bahū.
ja541:121.1	Vittī hi maṁ vindati sūta disvā,
ja541:121.2	Pucchāmi taṁ mātali devasārathi;
ja541:121.3	Ayaṁ nu macco kimakāsi sādhuṁ,
ja541:121.4	Yo modatī saggapatto vimāne”.
ja541:122.1	Tassa puṭṭho viyākāsi,
ja541:122.2	mātali devasārathi;
ja541:122.3	Vipākaṁ puññakammānaṁ,
ja541:122.4	jānaṁ akkhāsijānato.
ja541:123.1	“Mithilāyaṁ gahapati,
ja541:123.2	esa dānapatī ahu;
ja541:123.3	Ārāme udapāne ca,
ja541:123.4	papā saṅkamanāni ca;
ja541:123.5	Arahante sītibhūte,
ja541:123.6	sakkaccaṁ paṭipādayi.
ja541:124.1	Cīvaraṁ piṇḍapātañca,
ja541:124.2	paccayaṁ sayanāsanaṁ;
ja541:124.3	Adāsi ujubhūtesu,
ja541:124.4	vippasannena cetasā.
ja541:125.1	Cātuddasiṁ pañcadasiṁ,
ja541:125.2	yā ca pakkhassa aṭṭhamī;
ja541:125.3	Pāṭihāriyapakkhañca,
ja541:125.4	aṭṭhaṅgasusamāhitaṁ.
ja541:126.1	Uposathaṁ upavasī,
ja541:126.2	sadā sīlesu saṁvuto;
ja541:126.3	Saṁyamā saṁvibhāgā ca,
ja541:126.4	so vimānasmi modati”.
ja541:127.1	“Pabhāsati midaṁ byamhaṁ,
ja541:127.2	veḷuriyāsu nimmitaṁ;
ja541:127.3	Upetaṁ bhūmibhāgehi,
ja541:127.4	vibhattaṁ bhāgaso mitaṁ.
ja541:128.1	Āḷambarā mudiṅgā ca,
ja541:128.2	naccagītā suvāditā;
ja541:128.3	Dibyā saddā niccharanti,
ja541:128.4	savanīyā manoramā.
ja541:129.1	Nāhaṁ evaṅgataṁ jātu,
ja541:129.2	evaṁsuruciraṁ pure;
ja541:129.3	Saddaṁ samabhijānāmi,
ja541:129.4	diṭṭhaṁ vā yadi vā sutaṁ.
ja541:130.1	Vittī hi maṁ vindati sūta disvā,
ja541:130.2	Pucchāmi taṁ mātali devasārathi;
ja541:130.3	Ayaṁ nu macco kimakāsi sādhuṁ,
ja541:130.4	Yo modatī saggapatto vimāne”.
ja541:131.1	Tassa puṭṭho viyākāsi,
ja541:131.2	mātali devasārathi;
ja541:131.3	Vipākaṁ puññakammānaṁ,
ja541:131.4	jānaṁ akkhāsijānato.
ja541:132.1	“Bārāṇasiyaṁ gahapati,
ja541:132.2	esa dānapatī ahu;
ja541:132.3	Ārāme udapāne ca,
ja541:132.4	papā saṅkamanāni ca;
ja541:132.5	Arahante sītibhūte,
ja541:132.6	sakkaccaṁ paṭipādayi.
ja541:133.1	Cīvaraṁ piṇḍapātañca,
ja541:133.2	paccayaṁ sayanāsanaṁ;
ja541:133.3	Adāsi ujubhūtesu,
ja541:133.4	vippasannena cetasā.
ja541:134.1	Cātuddasiṁ pañcadasiṁ,
ja541:134.2	yā ca pakkhassa aṭṭhamī;
ja541:134.3	Pāṭihāriyapakkhañca,
ja541:134.4	aṭṭhaṅgasusamāhitaṁ.
ja541:135.1	Uposathaṁ upavasī,
ja541:135.2	sadā sīlesu saṁvuto;
ja541:135.3	Saṁyamā saṁvibhāgā ca,
ja541:135.4	so vimānasmi modati”.
ja541:136.1	“Yathā udayamādicco,
ja541:136.2	hoti lohitako mahā;
ja541:136.3	Tathūpamaṁ idaṁ byamhaṁ,
ja541:136.4	jātarūpassa nimmitaṁ.
ja541:137.1	Vittī hi maṁ vindati sūta disvā,
ja541:137.2	Pucchāmi taṁ mātali devasārathi;
ja541:137.3	Ayaṁ nu macco kimakāsi sādhuṁ,
ja541:137.4	Yo modatī saggapatto vimāne”.
ja541:138.1	Tassa puṭṭho viyākāsi,
ja541:138.2	mātali devasārathi;
ja541:138.3	Vipākaṁ puññakammānaṁ,
ja541:138.4	jānaṁ akkhāsijānato.
ja541:139.1	“Sāvatthiyaṁ gahapati,
ja541:139.2	esa dānapatī ahu;
ja541:139.3	Ārāme udapāne ca,
ja541:139.4	papā saṅkamanāni ca;
ja541:139.5	Arahante sītibhūte,
ja541:139.6	sakkaccaṁ paṭipādayi.
ja541:140.1	Cīvaraṁ piṇḍapātañca,
ja541:140.2	paccayaṁ sayanāsanaṁ;
ja541:140.3	Adāsi ujubhūtesu,
ja541:140.4	vippasannena cetasā.
ja541:141.1	Cātuddasiṁ pañcadasiṁ,
ja541:141.2	yā ca pakkhassa aṭṭhamī;
ja541:141.3	Pāṭihāriyapakkhañca,
ja541:141.4	aṭṭhaṅgasusamāhitaṁ.
ja541:142.1	Uposathaṁ upavasī,
ja541:142.2	sadā sīlesu saṁvuto;
ja541:142.3	Saṁyamā saṁvibhāgā ca,
ja541:142.4	so vimānasmi modati”.
ja541:143.1	“Vehāyasāme bahukā,
ja541:143.2	jātarūpassa nimmitā;
ja541:143.3	Daddallamānā ābhenti,
ja541:143.4	vijjuvabbhaghanantare.
ja541:144.1	(…)
ja541:145.1	Vittī hi maṁ vindati sūta disvā,
ja541:145.2	Pucchāmi taṁ mātali devasārathi;
ja541:145.3	Ime nu maccā kimakaṁsu sādhuṁ,
ja541:145.4	Ye modare saggapattā vimāne”.
ja541:146.1	Tassa puṭṭho viyākāsi,
ja541:146.2	mātali devasārathi;
ja541:146.3	Vipākaṁ puññakammānaṁ,
ja541:146.4	jānaṁ akkhāsijānato.
ja541:147.1	“Saddhāya suniviṭṭhāya,
ja541:147.2	saddhamme suppavedite;
ja541:147.3	Akaṁsu satthu vacanaṁ,
ja541:147.4	sammāsambuddhasāsane;
ja541:147.5	Tesaṁ etāni ṭhānāni,
ja541:147.6	yāni tvaṁ rāja passasi.
ja541:148.1	Viditāni te mahārāja,
ja541:148.2	āvāsaṁ pāpakamminaṁ;
ja541:148.3	Atho kalyāṇakammānaṁ,
ja541:148.4	ṭhānāni viditāni te;
ja541:148.5	Uyyāhi dāni rājīsi,
ja541:148.6	devarājassa santike”.
ja541:149.1	Sahassayuttaṁ hayavāhiṁ,
ja541:149.2	dibbayānamadhiṭṭhito;
ja541:149.3	Yāyamāno mahārājā,
ja541:149.4	addā sīdantare nage;
ja541:149.5	Disvānāmantayī sūtaṁ,
ja541:149.6	“ime ke nāma pabbatā”.
ja541:150.1	Tassa puṭṭho viyākāsi,
ja541:150.2	mātali devasārathi;
ja541:150.3	Vipākaṁ puññakammānaṁ,
ja541:150.4	jānaṁ akkhāsijānato
ja541:151.1	“Sudassano karavīko,
ja541:151.2	īsadharo yugandharo;
ja541:151.3	Nemindharo vinatako,
ja541:151.4	assakaṇṇo girī brahā.
ja541:152.1	Ete sīdantare nagā,
ja541:152.2	anupubbasamuggatā;
ja541:152.3	Mahārājānamāvāsā,
ja541:152.4	yāni tvaṁ rāja passasi”.
ja541:153.1	“Anekarūpaṁ ruciraṁ,
ja541:153.2	nānācitraṁ pakāsati;
ja541:153.3	Ākiṇṇaṁ indasadisehi,
ja541:153.4	byaggheheva surakkhitaṁ.
ja541:154.1	Vittī hi maṁ vindati sūta disvā,
ja541:154.2	Pucchāmi taṁ mātali devasārathi;
ja541:154.3	Imaṁ nu dvāraṁ kimabhaññamāhu,
ja541:154.4	Manorama dissati dūratova”.
ja541:155.1	Tassa puṭṭho viyākāsi,
ja541:155.2	mātali devasārathi;
ja541:155.3	Vipākaṁ puññakammānaṁ,
ja541:155.4	jānaṁ akkhāsijānato.
ja541:156.1	“Citrakūṭoti yaṁ āhu,
ja541:156.2	devarājapavesanaṁ;
ja541:156.3	Sudassanassa girino,
ja541:156.4	dvārañhetaṁ pakāsati.
ja541:157.1	Anekarūpaṁ ruciraṁ,
ja541:157.2	nānācitraṁ pakāsati;
ja541:157.3	Ākiṇṇaṁ indasadisehi,
ja541:157.4	byaggheheva surakkhitaṁ;
ja541:157.5	Pavisetena rājīsi,
ja541:157.6	arajaṁ bhūmimakkama”.
ja541:158.1	Sahassayuttaṁ hayavāhiṁ,
ja541:158.2	dibbayānamadhiṭṭhito;
ja541:158.3	Yāyamāno mahārājā,
ja541:158.4	addā devasabhaṁ idaṁ.
ja541:159.1	“Yathā sarade ākāse,
ja541:159.2	nīlobhāso padissati;
ja541:159.3	Tathūpamaṁ idaṁ byamhaṁ,
ja541:159.4	veḷuriyāsu nimmitaṁ.
ja541:160.1	Vittī hi maṁ vindati sūta disvā,
ja541:160.2	Pucchāmi taṁ mātali devasārathi;
ja541:160.3	Imaṁ nu byamhaṁ kimabhaññamāhu,
ja541:160.4	Manorama dissati dūratova”.
ja541:161.1	Tassa puṭṭho viyākāsi,
ja541:161.2	mātali devasārathi;
ja541:161.3	Vipākaṁ puññakammānaṁ,
ja541:161.4	jānaṁ akkhāsijānato.
ja541:162.1	“Sudhammā iti yaṁ āhu,
ja541:162.2	passesā dissate sabhā;
ja541:162.3	Veḷuriyārucirā citrā,
ja541:162.4	dhārayanti sunimmitā.
ja541:163.1	Aṭṭhaṁsā sukatā thambhā,
ja541:163.2	sabbe veḷuriyāmayā;
ja541:163.3	Yattha devā tāvatiṁsā,
ja541:163.4	sabbe indapurohitā.
ja541:164.1	Atthaṁ devamanussānaṁ,
ja541:164.2	cintayantā samacchare;
ja541:164.3	Pavisetena rājīsi,
ja541:164.4	devānaṁ anumodanaṁ”.
ja541:165.1	Taṁ devā paṭinandiṁsu,
ja541:165.2	disvā rājānamāgataṁ;
ja541:165.3	“Svāgataṁ te mahārāja,
ja541:165.4	atho te adurāgataṁ;
ja541:165.5	Nisīda dāni rājīsi,
ja541:165.6	devarājassa santike”.
ja541:166.1	Sakkopi paṭinandittha,
ja541:166.2	vedehaṁ mithilaggahaṁ;
ja541:166.3	Nimantayittha kāmehi,
ja541:166.4	āsanena ca vāsavo.
ja541:167.1	“Sādhu khosi anuppatto,
ja541:167.2	āvāsaṁ vasavattinaṁ;
ja541:167.3	Vasa devesu rājīsi,
ja541:167.4	sabbakāmasamiddhisu;
ja541:167.5	Tāvatiṁsesu devesu,
ja541:167.6	bhuñja kāme amānuse”.
ja541:168.1	“Yathā yācitakaṁ yānaṁ,
ja541:168.2	yathā yācitakaṁ dhanaṁ;
ja541:168.3	Evaṁsampadamevetaṁ,
ja541:168.4	yaṁ parato dānapaccayā.
ja541:169.1	Na cāhametamicchāmi,
ja541:169.2	yaṁ parato dānapaccayā;
ja541:169.3	Sayaṅkatāni puññāni,
ja541:169.4	taṁ me āveṇikaṁ dhanaṁ.
ja541:170.1	Sohaṁ gantvā manussesu,
ja541:170.2	kāhāmi kusalaṁ bahuṁ;
ja541:170.3	Dānena samacariyāya,
ja541:170.4	saṁyamena damena ca;
ja541:170.5	Yaṁ katvā sukhito hoti,
ja541:170.6	na ca pacchānutappati”.
ja541:171.1	“Bahūpakāro no bhavaṁ,
ja541:171.2	mātali devasārathi;
ja541:171.3	Yo me kalyāṇakammānaṁ,
ja541:171.4	pāpānaṁ paṭidassayi”.
ja541:172.1	Idaṁ vatvā nimirājā,
ja541:172.2	vedeho mithilaggaho;
ja541:172.3	Puthuyaññaṁ yajitvāna,
ja541:172.4	saṁyamaṁ ajjhupāgamīti.
ja541:173.1	Nimijātakaṁ catutthaṁ.
ja542:0.1	Jātaka
ja542:0.2	Mahānipāta
ja542:0.3	Mūgapakkhavagga
ja542:0.4	5 Umaṅgajātaka
ja542:1.1	“Pañcālo sabbasenāya,
ja542:1.2	brahmadattoyamāgato;
ja542:1.3	Sāyaṁ pañcāliyā senā,
ja542:1.4	appameyyā mahosadha.
ja542:2.1	Vīthimatī pattimatī,
ja542:2.2	sabbasaṅgāmakovidā;
ja542:2.3	Ohārinī saddavatī,
ja542:2.4	bherisaṅkhappabodhanā.
ja542:3.1	Lohavijjālaṅkārābhā,
ja542:3.2	dhajinī vāmarohinī;
ja542:3.3	Sippiyehi susampannā,
ja542:3.4	sūrehi suppatiṭṭhitā.
ja542:4.1	Dasettha paṇḍitā āhu,
ja542:4.2	bhūripaññā rahogamā;
ja542:4.3	Mātā ekādasī rañño,
ja542:4.4	pañcāliyaṁ pasāsati.
ja542:5.1	Athetthekasataṁ khatyā,
ja542:5.2	anuyantā yasassino;
ja542:5.3	Acchinnaraṭṭhā byathitā,
ja542:5.4	pañcāliyaṁ vasaṁ gatā.
ja542:6.1	Yaṁvadā takkarā rañño,
ja542:6.2	akāmā piyabhāṇino;
ja542:6.3	Pañcālamanuyāyanti,
ja542:6.4	akāmā vasino gatā.
ja542:7.1	Tāya senāya mithilā,
ja542:7.2	tisandhiparivāritā;
ja542:7.3	Rājadhānī videhānaṁ,
ja542:7.4	samantā parikhaññati.
ja542:8.1	Uddhaṁ tārakajātāva,
ja542:8.2	samantā parivāritā;
ja542:8.3	Mahosadha vijānāhi,
ja542:8.4	kathaṁ mokkho bhavissati”.
ja542:9.1	“Pāde deva pasārehi,
ja542:9.2	bhuñja kāme ramassu ca;
ja542:9.3	Hitvā pañcāliyaṁ senaṁ,
ja542:9.4	brahmadatto palāyiti”.
ja542:10.1	“Rājā santhavakāmo te,
ja542:10.2	ratanāni pavecchati;
ja542:10.3	Āgacchantu ito dūtā,
ja542:10.4	mañjukā piyabhāṇino.
ja542:11.1	Bhāsantu mudukā vācā,
ja542:11.2	yā vācā paṭinanditā;
ja542:11.3	Pañcālo ca videho ca,
ja542:11.4	ubho ekā bhavantu te”.
ja542:12.1	“Kathaṁ nu kevaṭṭa mahosadhena,
ja542:12.2	Samāgamo āsi tadiṅgha brūhi;
ja542:12.3	Kacci te paṭinijjhatto,
ja542:12.4	Kacci tuṭṭho mahosadho”.
ja542:13.1	“Anariyarūpo puriso janinda,
ja542:13.2	Asammodako thaddho asabbhirūpo;
ja542:13.3	Yathā mūgo ca badhiro ca,
ja542:13.4	Na kiñcitthaṁ abhāsatha”.
ja542:14.1	“Addhā idaṁ mantapadaṁ sududdasaṁ,
ja542:14.2	Attho suddho naraviriyena diṭṭho;
ja542:14.3	Tathā hi kāyo mama sampavedhati,
ja542:14.4	Hitvā sayaṁ ko parahatthamessati”.
ja542:15.1	“Channañhi ekāva matī sameti,
ja542:15.2	Ye paṇḍitā uttamabhūripattā;
ja542:15.3	Yānaṁ ayānaṁ atha vāpi ṭhānaṁ,
ja542:15.4	Mahosadha tvampi matiṁ karohi”.
ja542:16.1	“Jānāsi kho rāja mahānubhāvo,
ja542:16.2	Mahabbalo cūḷanibrahmadatto;
ja542:16.3	Rājā ca taṁ icchati māraṇatthaṁ,
ja542:16.4	Migaṁ yathā okacarena luddo.
ja542:17.1	Yathāpi maccho baḷisaṁ,
ja542:17.2	vaṅkaṁ maṁsena chāditaṁ;
ja542:17.3	Āmagiddho na jānāti,
ja542:17.4	maccho maraṇamattano.
ja542:18.1	Evameva tuvaṁ rāja,
ja542:18.2	cūḷaneyyassa dhītaraṁ;
ja542:18.3	Kāmagiddho na jānāsi,
ja542:18.4	macchova maraṇamattano.
ja542:19.1	Sace gacchasi pañcālaṁ,
ja542:19.2	Khippamattaṁ jahissasi;
ja542:19.3	Migaṁ panthānubandhaṁva,
ja542:19.4	Mahantaṁ bhayamessati”.
ja542:20.1	“Mayameva bālamhase eḷamūgā,
ja542:20.2	Ye uttamatthāni tayī lapimhā;
ja542:20.3	Kimeva tvaṁ naṅgalakoṭivaḍḍho,
ja542:20.4	Atthāni jānāsi yathāpi aññe”.
ja542:21.1	“Imaṁ gale gahetvāna,
ja542:21.2	nāsetha vijitā mama;
ja542:21.3	Yo me ratanalābhassa,
ja542:21.4	antarāyāya bhāsati”.
ja542:22.1	Tato ca so apakkamma,
ja542:22.2	vedehassa upantikā;
ja542:22.3	Atha āmantayī dūtaṁ,
ja542:22.4	mādharaṁ suvapaṇḍitaṁ.
ja542:23.1	“Ehi samma haritapakkha,
ja542:23.2	veyyāvaccaṁ karohi me;
ja542:23.3	Atthi pañcālarājassa,
ja542:23.4	sāḷikā sayanapālikā.
ja542:24.1	Taṁ bandhanena pucchassu,
ja542:24.2	sā hi sabbassa kovidā;
ja542:24.3	Sā tesaṁ sabbaṁ jānāti,
ja542:24.4	rañño ca kosiyassa ca”.
ja542:25.1	“Āmo”ti so paṭissutvā,
ja542:25.2	mādharo suvapaṇḍito;
ja542:25.3	Agamāsi haritapakkho,
ja542:25.4	sāḷikāya upantikaṁ.
ja542:26.1	Tato ca kho so gantvāna,
ja542:26.2	mādharo suvapaṇḍito;
ja542:26.3	Athāmantayi sugharaṁ,
ja542:26.4	sāḷikaṁ mañjubhāṇikaṁ.
ja542:27.1	“Kacci te sughare khamanīyaṁ,
ja542:27.2	Kacci vesse anāmayaṁ;
ja542:27.3	Kacci te madhunā lājā,
ja542:27.4	Labbhate sughare tuvaṁ”.
ja542:28.1	“Kusalañceva me samma,
ja542:28.2	atho samma anāmayaṁ;
ja542:28.3	Atho me madhunā lājā,
ja542:28.4	labbhate suvapaṇḍita.
ja542:29.1	Kuto nu samma āgamma,
ja542:29.2	kassa vā pahito tuvaṁ;
ja542:29.3	Na ca mesi ito pubbe,
ja542:29.4	diṭṭho vā yadi vā suto”.
ja542:30.1	“Ahosiṁ sivirājassa,
ja542:30.2	pāsāde sayanapālako;
ja542:30.3	Tato so dhammiko rājā,
ja542:30.4	baddhe mocesi bandhanā.
ja542:31.1	Tassa mekā dutiyāsi,
ja542:31.2	sāḷikā mañjubhāṇikā;
ja542:31.3	Taṁ tattha avadhī seno,
ja542:31.4	pekkhato sughare mama.
ja542:32.1	Tassā kāmā hi sammatto,
ja542:32.2	āgatosmi tavantike;
ja542:32.3	Sace kareyya okāsaṁ,
ja542:32.4	ubhayova vasāmase”.
ja542:33.1	“Suvova suviṁ kāmeyya,
ja542:33.2	sāḷiko pana sāḷikaṁ;
ja542:33.3	Suvassa sāḷikāyeva,
ja542:33.4	saṁvāso hoti kīdiso”.
ja542:34.1	“Yoyaṁ kāme kāmayati,
ja542:34.2	api caṇḍālikāmapi;
ja542:34.3	Sabbo hi sadiso hoti,
ja542:34.4	natthi kāme asādiso”.
ja542:35.1	“Atthi jampāvatī nāma,
ja542:35.2	mātā sivissa rājino;
ja542:35.3	Sā bhariyā vāsudevassa,
ja542:35.4	kaṇhassa mahesī piyā.
ja542:36.1	Raṭṭhavatī kimpurisī,
ja542:36.2	sāpi vacchaṁ akāmayi;
ja542:36.3	Manusso migiyā saddhiṁ,
ja542:36.4	natthi kāme asādiso.
ja542:37.1	Handa khvāhaṁ gamissāmi,
ja542:37.2	sāḷike mañjubhāṇike;
ja542:37.3	Paccakkhānupadañhetaṁ,
ja542:37.4	atimaññasi nūna maṁ”.
ja542:38.1	“Na sirī taramānassa,
ja542:38.2	mādhara suvapaṇḍita;
ja542:38.3	Idheva tāva acchassu,
ja542:38.4	yāva rājāna dakkhasi;
ja542:38.5	Sossi saddaṁ mudiṅgānaṁ,
ja542:38.6	ānubhāvañca rājino”.
ja542:39.1	“Yo nu khvāyaṁ tibbo saddo,
ja542:39.2	tirojanapade suto;
ja542:39.3	Dhītā pañcālarājassa,
ja542:39.4	osadhī viya vaṇṇinī;
ja542:39.5	Taṁ dassati videhānaṁ,
ja542:39.6	so vivāho bhavissati”.
ja542:40.1	“Ediso mā amittānaṁ,
ja542:40.2	vivāho hotu mādhara;
ja542:40.3	Yathā pañcālarājassa,
ja542:40.4	vedehena bhavissati.
ja542:41.1	Ānayitvāna vedehaṁ,
ja542:41.2	pañcālānaṁ rathesabho;
ja542:41.3	Tato naṁ ghātayissati,
ja542:41.4	nassa sakhī bhavissati”.
ja542:42.1	“Handa kho maṁ anujānāhi,
ja542:42.2	rattiyo sattamattiyo;
ja542:42.3	Yāvāhaṁ sivirājassa,
ja542:42.4	ārocemi mahesino;
ja542:42.5	Laddho ca me āvasatho,
ja542:42.6	sāḷikāya upantikaṁ”.
ja542:43.1	“Handa kho taṁ anujānāmi,
ja542:43.2	rattiyo sattamattiyo;
ja542:43.3	Sace tvaṁ sattarattena,
ja542:43.4	nāgacchasi mamantike;
ja542:43.5	Maññe okkantasattaṁ maṁ,
ja542:43.6	matāya āgamissasi”.
ja542:44.1	Tato ca kho so gantvāna,
ja542:44.2	mādharo suvapaṇḍito;
ja542:44.3	Mahosadhassa akkhāsi,
ja542:44.4	sāḷikāvacanaṁ idaṁ.
ja542:45.1	“Yasseva ghare bhuñjeyya bhogaṁ,
ja542:45.2	Tasseva atthaṁ puriso careyya;
ja542:45.3	Handāhaṁ gacchāmi pure janinda,
ja542:45.4	Pañcālarājassa puraṁ surammaṁ;
ja542:45.5	Nivesanāni māpetuṁ,
ja542:45.6	Vedehassa yasassino.
ja542:46.1	Nivesanāni māpetvā,
ja542:46.2	vedehassa yasassino;
ja542:46.3	Yadā te pahiṇeyyāmi,
ja542:46.4	tadā eyyāsi khattiya”.
ja542:47.1	Tato ca pāyāsi pure mahosadho,
ja542:47.2	Pañcālarājassa puraṁ surammaṁ;
ja542:47.3	Nivesanāni māpetuṁ,
ja542:47.4	Vedehassa yasassino.
ja542:48.1	Nivesanāni māpetvā,
ja542:48.2	vedehassa yasassino;
ja542:48.3	Athassa pāhiṇī dūtaṁ,
ja542:48.4	vedehaṁ mithilaggahaṁ;
ja542:48.5	“Ehi dāni mahārāja,
ja542:48.6	māpitaṁ te nivesanaṁ”.
ja542:49.1	Tato ca rājā pāyāsi,
ja542:49.2	senāya caturaṅgiyā;
ja542:49.3	Anantavāhanaṁ daṭṭhuṁ,
ja542:49.4	phītaṁ kapiliyaṁ puraṁ.
ja542:50.1	Tato ca kho so gantvāna,
ja542:50.2	brahmadattassa pāhiṇi;
ja542:50.3	“Āgatosmi mahārāja,
ja542:50.4	tava pādāni vandituṁ.
ja542:51.1	Dadāhi dāni me bhariyaṁ,
ja542:51.2	nāriṁ sabbaṅgasobhiniṁ;
ja542:51.3	Suvaṇṇena paṭicchannaṁ,
ja542:51.4	dāsīgaṇapurakkhataṁ”.
ja542:52.1	“Svāgataṁ teva vedeha,
ja542:52.2	atho te adurāgataṁ;
ja542:52.3	Nakkhattaṁyeva paripuccha,
ja542:52.4	ahaṁ kaññaṁ dadāmi te;
ja542:52.5	Suvaṇṇena paṭicchannaṁ,
ja542:52.6	dāsīgaṇapurakkhataṁ”.
ja542:53.1	Tato ca rājā vedeho,
ja542:53.2	nakkhattaṁ paripucchatha;
ja542:53.3	Nakkhattaṁ paripucchitvā,
ja542:53.4	brahmadattassa pāhiṇi.
ja542:54.1	“Dadāhi dāni me bhariyaṁ,
ja542:54.2	nāriṁ sabbaṅgasobhiniṁ;
ja542:54.3	Suvaṇṇena paṭicchannaṁ,
ja542:54.4	dāsīgaṇapurakkhataṁ”.
ja542:55.1	“Dadāmi dāni te bhariyaṁ,
ja542:55.2	nāriṁ sabbaṅgasobhiniṁ;
ja542:55.3	Suvaṇṇena paṭicchannaṁ,
ja542:55.4	dāsīgaṇapurakkhataṁ”.
ja542:56.1	“Hatthī assā rathā pattī,
ja542:56.2	senā tiṭṭhanti vammitā;
ja542:56.3	Ukkā padittā jhāyanti,
ja542:56.4	kiṁ nu maññanti paṇḍitā.
ja542:57.1	Hatthī assā rathā pattī,
ja542:57.2	senā tiṭṭhanti vammitā;
ja542:57.3	Ukkā padittā jhāyanti,
ja542:57.4	kiṁ nu kāhanti paṇḍita”.
ja542:58.1	“Rakkhati taṁ mahārāja,
ja542:58.2	cūḷaneyyo mahabbalo;
ja542:58.3	Paduṭṭho brahmadattena,
ja542:58.4	pāto taṁ ghātayissati”.
ja542:59.1	“Ubbedhati me hadayaṁ,
ja542:59.2	mukhañca parisussati;
ja542:59.3	Nibbutiṁ nādhigacchāmi,
ja542:59.4	aggidaḍḍhova ātape.
ja542:60.1	Kammārānaṁ yathā ukkā,
ja542:60.2	anto jhāyati no bahi;
ja542:60.3	Evampi hadayaṁ mayhaṁ,
ja542:60.4	anto jhāyati no bahi”.
ja542:61.1	“Pamatto mantanātīto,
ja542:61.2	bhinnamantosi khattiya;
ja542:61.3	Idāni kho taṁ tāyantu,
ja542:61.4	paṇḍitā mantino janā.
ja542:62.1	Akatvāmaccassa vacanaṁ,
ja542:62.2	atthakāmahitesino;
ja542:62.3	Attapītirato rājā,
ja542:62.4	migo kūṭeva ohito.
ja542:63.1	Yathāpi maccho baḷisaṁ,
ja542:63.2	vaṅkaṁ maṁsena chāditaṁ;
ja542:63.3	Āmagiddho na jānāti,
ja542:63.4	maccho maraṇamattano.
ja542:64.1	Evameva tuvaṁ rāja,
ja542:64.2	cūḷaneyyassa dhītaraṁ;
ja542:64.3	Kāmagiddho na jānāsi,
ja542:64.4	macchova maraṇamattano.
ja542:65.1	Sace gacchasi pañcālaṁ,
ja542:65.2	khippamattaṁ jahissasi;
ja542:65.3	Migaṁ panthānubandhaṁva,
ja542:65.4	mahantaṁ bhayamessati.
ja542:66.1	Anariyarūpo puriso janinda,
ja542:66.2	Ahīva ucchaṅgagato ḍaseyya;
ja542:66.3	Na tena mittiṁ kayirātha dhīro,
ja542:66.4	Dukkho have kāpurisena saṅgamo.
ja542:67.1	Yadeva jaññā purisaṁ janinda,
ja542:67.2	Sīlavāyaṁ bahussuto;
ja542:67.3	Teneva mittiṁ kayirātha dhīro,
ja542:67.4	Sukho have sappurisena saṅgamo.
ja542:68.1	Bālo tuvaṁ eḷamūgosi rāja,
ja542:68.2	Yo uttamatthāni mayī lapittho;
ja542:68.3	Kimevahaṁ naṅgalakoṭivaḍḍho,
ja542:68.4	Atthāni jānāmi yathāpi aññe.
ja542:69.1	Imaṁ gale gahetvāna,
ja542:69.2	nāsetha vijitā mama;
ja542:69.3	Yo me ratanalābhassa,
ja542:69.4	antarāyāya bhāsati”.
ja542:70.1	“Mahosadha atītena,
ja542:70.2	Nānuvijjhanti paṇḍitā;
ja542:70.3	Kiṁ maṁ assaṁva sambaddhaṁ,
ja542:70.4	Patodeneva vijjhasi.
ja542:71.1	Sace passasi mokkhaṁ vā,
ja542:71.2	khemaṁ vā pana passasi;
ja542:71.3	Teneva maṁ anusāsa,
ja542:71.4	kiṁ atītena vijjhasi”.
ja542:72.1	“Atītaṁ mānusaṁ kammaṁ,
ja542:72.2	Dukkaraṁ durabhisambhavaṁ;
ja542:72.3	Na taṁ sakkomi mocetuṁ,
ja542:72.4	Tvaṁ pajānassu khattiya.
ja542:73.1	Santi vehāyasā nāgā,
ja542:73.2	iddhimanto yasassino;
ja542:73.3	Tepi ādāya gaccheyyuṁ,
ja542:73.4	yassa honti tathāvidhā.
ja542:74.1	Santi vehāyasā assā,
ja542:74.2	iddhimanto yasassino;
ja542:74.3	Tepi ādāya gaccheyyuṁ,
ja542:74.4	yassa honti tathāvidhā.
ja542:75.1	Santi vehāyasā pakkhī,
ja542:75.2	iddhimanto yasassino;
ja542:75.3	Tepi ādāya gaccheyyuṁ,
ja542:75.4	yassa honti tathāvidhā.
ja542:76.1	Santi vehāyasā yakkhā,
ja542:76.2	iddhimanto yasassino;
ja542:76.3	Tepi ādāya gaccheyyuṁ,
ja542:76.4	yassa honti tathāvidhā.
ja542:77.1	Atītaṁ mānusaṁ kammaṁ,
ja542:77.2	Dukkaraṁ durabhisambhavaṁ;
ja542:77.3	Na taṁ sakkomi mocetuṁ,
ja542:77.4	Antalikkhena khattiya”.
ja542:78.1	“Atīradassī puriso,
ja542:78.2	mahante udakaṇṇave;
ja542:78.3	Yattha so labhate gādhaṁ,
ja542:78.4	tattha so vindate sukhaṁ.
ja542:79.1	Evaṁ amhañca rañño ca,
ja542:79.2	tvaṁ patiṭṭhā mahosadha;
ja542:79.3	Tvaṁ nosi mantinaṁ seṭṭho,
ja542:79.4	amhe dukkhā pamocaya”.
ja542:80.1	“Atītaṁ mānusaṁ kammaṁ,
ja542:80.2	Dukkaraṁ durabhisambhavaṁ;
ja542:80.3	Na taṁ sakkomi mocetuṁ,
ja542:80.4	Tvaṁ pajānassu senaka”.
ja542:81.1	“Suṇohi metaṁ vacanaṁ,
ja542:81.2	Passa senaṁ mahabbhayaṁ;
ja542:81.3	Senakaṁ dāni pucchāmi,
ja542:81.4	Kiṁ kiccaṁ idha maññasi”.
ja542:82.1	“Aggiṁ vā dvārato dema,
ja542:82.2	gaṇhāmase vikantanaṁ;
ja542:82.3	Aññamaññaṁ vadhitvāna,
ja542:82.4	khippaṁ hissāma jīvitaṁ;
ja542:82.5	Mā no rājā brahmadatto,
ja542:82.6	ciraṁ dukkhena mārayi”.
ja542:83.1	“Suṇohi metaṁ vacanaṁ,
ja542:83.2	passa senaṁ mahabbhayaṁ;
ja542:83.3	Pukkusaṁ dāni pucchāmi,
ja542:83.4	kiṁ kiccaṁ idha maññasi”.
ja542:84.1	“Visaṁ khāditvā miyyāma,
ja542:84.2	khippaṁ hissāma jīvitaṁ;
ja542:84.3	Mā no rājā brahmadatto,
ja542:84.4	ciraṁ dukkhena mārayi”.
ja542:85.1	“Suṇohi metaṁ vacanaṁ,
ja542:85.2	passa senaṁ mahabbhayaṁ;
ja542:85.3	Kāmindaṁ dāni pucchāmi,
ja542:85.4	kiṁ kiccaṁ idha maññasi”.
ja542:86.1	“Rajjuyā bajjha miyyāma,
ja542:86.2	papātā papatāmase;
ja542:86.3	Mā no rājā brahmadatto,
ja542:86.4	ciraṁ dukkhena mārayi”.
ja542:87.1	“Suṇohi metaṁ vacanaṁ,
ja542:87.2	passa senaṁ mahabbhayaṁ;
ja542:87.3	Devindaṁ dāni pucchāmi,
ja542:87.4	kiṁ kiccaṁ idha maññasi”.
ja542:88.1	“Aggiṁ vā dvārato dema,
ja542:88.2	gaṇhāmase vikantanaṁ;
ja542:88.3	Aññamaññaṁ vadhitvāna,
ja542:88.4	khippaṁ hissāma jīvitaṁ;
ja542:88.5	Na no sakkoti mocetuṁ,
ja542:88.6	sukheneva mahosadho”.
ja542:89.1	“Yathā kadalino sāraṁ,
ja542:89.2	anvesaṁ nādhigacchati;
ja542:89.3	Evaṁ anvesamānā naṁ,
ja542:89.4	pañhaṁ najjhagamāmase.
ja542:90.1	Yathā simbalino sāraṁ,
ja542:90.2	anvesaṁ nādhigacchati;
ja542:90.3	Evaṁ anvesamānā naṁ,
ja542:90.4	pañhaṁ najjhagamāmase.
ja542:91.1	Adese vata no vuṭṭhaṁ,
ja542:91.2	kuñjarānaṁvanodake;
ja542:91.3	Sakāse dummanussānaṁ,
ja542:91.4	bālānaṁ avijānataṁ.
ja542:92.1	Ubbedhati me hadayaṁ,
ja542:92.2	mukhañca parisussati;
ja542:92.3	Nibbutiṁ nādhigacchāmi,
ja542:92.4	aggidaḍḍhova ātape.
ja542:93.1	Kammārānaṁ yathā ukkā,
ja542:93.2	anto jhāyati no bahi;
ja542:93.3	Evampi hadayaṁ mayhaṁ,
ja542:93.4	anto jhāyati no bahi”.
ja542:94.1	Tato so paṇḍito dhīro,
ja542:94.2	atthadassī mahosadho;
ja542:94.3	Vedehaṁ dukkhitaṁ disvā,
ja542:94.4	idaṁ vacanamabravi.
ja542:95.1	“Mā tvaṁ bhāyi mahārāja,
ja542:95.2	mā tvaṁ bhāyi rathesabha;
ja542:95.3	Ahaṁ taṁ mocayissāmi,
ja542:95.4	rāhuggahaṁva candimaṁ.
ja542:96.1	Mā tvaṁ bhāyi mahārāja,
ja542:96.2	mā tvaṁ bhāyi rathesabha;
ja542:96.3	Ahaṁ taṁ mocayissāmi,
ja542:96.4	rāhuggahaṁva sūriyaṁ.
ja542:97.1	Mā tvaṁ bhāyi mahārāja,
ja542:97.2	mā tvaṁ bhāyi rathesabha;
ja542:97.3	Ahaṁ taṁ mocayissāmi,
ja542:97.4	paṅke sannaṁva kuñjaraṁ.
ja542:98.1	Mā tvaṁ bhāyi mahārāja,
ja542:98.2	mā tvaṁ bhāyi rathesabha;
ja542:98.3	Ahaṁ taṁ mocayissāmi,
ja542:98.4	peḷābaddhaṁva pannagaṁ.
ja542:99.1	Mā tvaṁ bhāyi mahārāja,
ja542:99.2	mā tvaṁ bhāyi rathesabha;
ja542:99.3	Ahaṁ taṁ mocayissāmi,
ja542:99.4	pakkhiṁ baddhaṁva pañjare.
ja542:100.1	Mā tvaṁ bhāyi mahārāja,
ja542:100.2	mā tvaṁ bhāyi rathesabha;
ja542:100.3	Ahaṁ taṁ mocayissāmi,
ja542:100.4	macche jālagateriva.
ja542:101.1	Mā tvaṁ bhāyi mahārāja,
ja542:101.2	mā tvaṁ bhāyi rathesabha;
ja542:101.3	Ahaṁ taṁ mocayissāmi,
ja542:101.4	sayoggabalavāhanaṁ.
ja542:102.1	Mā tvaṁ bhāyi mahārāja,
ja542:102.2	mā tvaṁ bhāyi rathesabha;
ja542:102.3	Pañcālaṁ vāhayissāmi,
ja542:102.4	kākasenaṁva leḍḍunā.
ja542:103.1	Adu paññā kimatthiyā,
ja542:103.2	Amacco vāpi tādiso;
ja542:103.3	Yo taṁ sambādhapakkhandaṁ,
ja542:103.4	Dukkhā na parimocaye”.
ja542:104.1	“Etha māṇavā uṭṭhetha,
ja542:104.2	mukhaṁ sodhetha sandhino;
ja542:104.3	Vedeho sahamaccehi,
ja542:104.4	umaṅgena gamissati”.
ja542:105.1	Tassa taṁ vacanaṁ sutvā,
ja542:105.2	paṇḍitassānucārino;
ja542:105.3	Umaṅgadvāraṁ vivariṁsu,
ja542:105.4	yantayutte ca aggaḷe.
ja542:106.1	Purato senako yāti,
ja542:106.2	pacchato ca mahosadho;
ja542:106.3	Majjhe ca rājā vedeho,
ja542:106.4	amaccaparivārito.
ja542:107.1	Umaṅgā nikkhamitvāna,
ja542:107.2	vedeho nāvamāruhi;
ja542:107.3	Abhirūḷhañca taṁ ñatvā,
ja542:107.4	anusāsi mahosadho.
ja542:108.1	“Ayaṁ te sasuro deva,
ja542:108.2	ayaṁ sassu janādhipa;
ja542:108.3	Yathā mātu paṭipatti,
ja542:108.4	evaṁ te hotu sassuyā.
ja542:109.1	Yathāpi niyako bhātā,
ja542:109.2	Saudariyo ekamātuko;
ja542:109.3	Evaṁ pañcālacando te,
ja542:109.4	Dayitabbo rathesabha.
ja542:110.1	Ayaṁ pañcālacandī te,
ja542:110.2	rājaputtī abhicchitā;
ja542:110.3	Kāmaṁ karohi te tāya,
ja542:110.4	bhariyā te rathesabha”.
ja542:111.1	“Āruyha nāvaṁ taramāno,
ja542:111.2	kiṁ nu tīramhi tiṭṭhasi;
ja542:111.3	Kicchā muttāmha dukkhato,
ja542:111.4	yāma dāni mahosadha”.
ja542:112.1	“Nesa dhammo mahārāja,
ja542:112.2	yohaṁ senāya nāyako;
ja542:112.3	Senaṅgaṁ parihāpetvā,
ja542:112.4	attānaṁ parimocaye.
ja542:113.1	Nivesanamhi te deva,
ja542:113.2	senaṅgaṁ parihāpitaṁ;
ja542:113.3	Taṁ dinnaṁ brahmadattena,
ja542:113.4	ānayissaṁ rathesabha”.
ja542:114.1	“Appaseno mahāsenaṁ,
ja542:114.2	kathaṁ viggayha ṭhassasi;
ja542:114.3	Dubbalo balavantena,
ja542:114.4	vihaññissasi paṇḍita”.
ja542:115.1	“Appasenopi ce mantī,
ja542:115.2	mahāsenaṁ amantinaṁ;
ja542:115.3	Jināti rājā rājāno,
ja542:115.4	ādiccovudayaṁ tamaṁ”.
ja542:116.1	“Susukhaṁ vata saṁvāso,
ja542:116.2	paṇḍitehīti senaka;
ja542:116.3	Pakkhīva pañjare baddhe,
ja542:116.4	macche jālagateriva;
ja542:116.5	Amittahatthattagate,
ja542:116.6	mocayī no mahosadho”.
ja542:117.1	“Evametaṁ mahārāja,
ja542:117.2	paṇḍitā hi sukhāvahā;
ja542:117.3	Pakkhīva pañjare baddhe,
ja542:117.4	macche jālagateriva;
ja542:117.5	Amittahatthattagate,
ja542:117.6	mocayī no mahosadho”.
ja542:118.1	Rakkhitvā kasiṇaṁ rattiṁ,
ja542:118.2	cūḷaneyyo mahabbalo;
ja542:118.3	Udentaṁ aruṇuggasmiṁ,
ja542:118.4	upakāriṁ upāgami.
ja542:119.1	Āruyha pavaraṁ nāgaṁ,
ja542:119.2	balavantaṁ saṭṭhihāyanaṁ;
ja542:119.3	Rājā avoca pañcālo,
ja542:119.4	cūḷaneyyo mahabbalo.
ja542:120.1	Sannaddho maṇivammena,
ja542:120.2	saramādāya pāṇinā;
ja542:120.3	Pesiye ajjhabhāsittha,
ja542:120.4	puthugumbe samāgate.
ja542:121.1	Hatthārohe anīkaṭṭhe,
ja542:121.2	rathike pattikārake;
ja542:121.3	Upāsanamhi katahatthe,
ja542:121.4	vālavedhe samāgate.
ja542:122.1	“Pesetha kuñjare dantī,
ja542:122.2	balavante saṭṭhihāyane;
ja542:122.3	Maddantu kuñjarā nagaraṁ,
ja542:122.4	vedehena sumāpitaṁ.
ja542:123.1	Vacchadantamukhā setā,
ja542:123.2	tikkhaggā aṭṭhivedhino;
ja542:123.3	Paṇunnā dhanuvegena,
ja542:123.4	sampatantutarītarā.
ja542:124.1	Māṇavā vammino sūrā,
ja542:124.2	citradaṇḍayutāvudhā;
ja542:124.3	Pakkhandino mahānāgā,
ja542:124.4	hatthīnaṁ hontu sammukhā.
ja542:125.1	Sattiyo teladhotāyo,
ja542:125.2	accimantā pabhassarā;
ja542:125.3	Vijjotamānā tiṭṭhantu,
ja542:125.4	sataraṁsīva tārakā.
ja542:126.1	Āvudhabalavantānaṁ,
ja542:126.2	guṇikāyūradhārinaṁ;
ja542:126.3	Etādisānaṁ yodhānaṁ,
ja542:126.4	saṅgāme apalāyinaṁ;
ja542:126.5	Vedeho kuto muccissati,
ja542:126.6	sace pakkhīva kāhiti.
ja542:127.1	Tiṁsa me purisanāvutyo,
ja542:127.2	sabbevekekaniccitā;
ja542:127.3	Yesaṁ samaṁ na passāmi,
ja542:127.4	kevalaṁ mahimaṁ caraṁ.
ja542:128.1	Nāgā ca kappitā dantī,
ja542:128.2	balavanto saṭṭhihāyanā;
ja542:128.3	Yesaṁ khandhesu sobhanti,
ja542:128.4	kumārā cārudassanā.
ja542:129.1	Pītālaṅkārā pītavasanā,
ja542:129.2	Pītuttaranivāsanā;
ja542:129.3	Nāgakhandhesu sobhanti,
ja542:129.4	Devaputtāva nandane.
ja542:130.1	Pāṭhīnavaṇṇā nettiṁsā,
ja542:130.2	teladhotā pabhassarā;
ja542:130.3	Niṭṭhitā naradhīrehi,
ja542:130.4	samadhārā sunissitā.
ja542:131.1	Vellālino vītamalā,
ja542:131.2	sikkāyasamayā daḷā;
ja542:131.3	Gahitā balavantehi,
ja542:131.4	suppahārappahāribhi.
ja542:132.1	Suvaṇṇatharusampannā,
ja542:132.2	lohitakacchupadhāritā;
ja542:132.3	Vivattamānā sobhanti,
ja542:132.4	vijjuvabbhaghanantare.
ja542:133.1	Paṭākā vammino sūrā,
ja542:133.2	asicammassa kovidā;
ja542:133.3	Dhanuggahā sikkhitarā,
ja542:133.4	nāgakhandhe nipātino.
ja542:134.1	Etādisehi parikkhitto,
ja542:134.2	natthi mokkho ito tava;
ja542:134.3	Pabhāvaṁ te na passāmi,
ja542:134.4	yena tvaṁ mithilaṁ vaje”.
ja542:135.1	“Kiṁ nu santaramānova,
ja542:135.2	nāgaṁ pesesi kuñjaraṁ;
ja542:135.3	Pahaṭṭharūpo āpatasi,
ja542:135.4	siddhatthosmīti maññasi.
ja542:136.1	Oharetaṁ dhanuṁ cāpaṁ,
ja542:136.2	khurappaṁ paṭisaṁhara;
ja542:136.3	Oharetaṁ subhaṁ vammaṁ,
ja542:136.4	veḷuriyamaṇisanthataṁ”.
ja542:137.1	“Pasannamukhavaṇṇosi,
ja542:137.2	mitapubbañca bhāsasi;
ja542:137.3	Hoti kho maraṇakāle,
ja542:137.4	edisī vaṇṇasampadā”.
ja542:138.1	“Moghaṁ te gajjitaṁ rāja,
ja542:138.2	bhinnamantosi khattiya;
ja542:138.3	Duggaṇhosi tayā rājā,
ja542:138.4	khaḷuṅkeneva sindhavo.
ja542:139.1	Tiṇṇo hiyyo rājā gaṅgaṁ,
ja542:139.2	sāmacco saparijjano;
ja542:139.3	Haṁsarājaṁ yathā dhaṅko,
ja542:139.4	anujjavaṁ patissasi.
ja542:140.1	Siṅgālā rattibhāgena,
ja542:140.2	phullaṁ disvāna kiṁsukaṁ;
ja542:140.3	Maṁsapesīti maññantā,
ja542:140.4	paribyūḷhā migādhamā.
ja542:141.1	Vītivattāsu rattīsu,
ja542:141.2	uggatasmiṁ divākare;
ja542:141.3	Kiṁsukaṁ phullitaṁ disvā,
ja542:141.4	āsacchinnā migādhamā.
ja542:142.1	Evameva tuvaṁ rāja,
ja542:142.2	vedehaṁ parivāriya;
ja542:142.3	Āsacchinno gamissasi,
ja542:142.4	siṅgālā kiṁsukaṁ yathā”.
ja542:143.1	“Imassa hatthe pāde ca,
ja542:143.2	kaṇṇanāsañca chindatha;
ja542:143.3	Yo me amittaṁ hatthagataṁ,
ja542:143.4	vedehaṁ parimocayi.
ja542:144.1	Imaṁ maṁsaṁva pātabyaṁ,
ja542:144.2	sūle katvā pacantu naṁ;
ja542:144.3	Yo me amittaṁ hatthagataṁ,
ja542:144.4	vedehaṁ parimocayi.
ja542:145.1	Yathāpi āsabhaṁ cammaṁ,
ja542:145.2	pathabyā vitaniyyati;
ja542:145.3	Sīhassa atho byagghassa,
ja542:145.4	hoti saṅkusamāhataṁ.
ja542:146.1	Evaṁ taṁ vitanitvāna,
ja542:146.2	vedhayissāmi sattiyā;
ja542:146.3	Yo me amittaṁ hatthagataṁ,
ja542:146.4	vedehaṁ parimocayi”.
ja542:147.1	“Sace me hatthe pāde ca,
ja542:147.2	kaṇṇanāsañca checchasi;
ja542:147.3	Evaṁ pañcālacandassa,
ja542:147.4	vedeho chedayissati.
ja542:148.1	Sace me hatthe pāde ca,
ja542:148.2	kaṇṇanāsañca checchasi;
ja542:148.3	Evaṁ pañcālacandiyā,
ja542:148.4	vedeho chedayissati.
ja542:149.1	Sace me hatthe pāde ca,
ja542:149.2	kaṇṇanāsañca checchasi;
ja542:149.3	Evaṁ nandāya deviyā,
ja542:149.4	vedeho chedayissati.
ja542:150.1	Sace me hatthe pāde ca,
ja542:150.2	kaṇṇanāsañca checchasi;
ja542:150.3	Evaṁ te puttadārassa,
ja542:150.4	vedeho chedayissati.
ja542:151.1	Sace maṁsaṁva pātabyaṁ,
ja542:151.2	sūle katvā pacissasi;
ja542:151.3	Evaṁ pañcālacandassa,
ja542:151.4	vedeho pācayissati.
ja542:152.1	Sace maṁsaṁva pātabyaṁ,
ja542:152.2	sūle katvā pacissasi;
ja542:152.3	Evaṁ pañcālacandiyā,
ja542:152.4	vedeho pācayissati.
ja542:153.1	Sace maṁsaṁva pātabyaṁ,
ja542:153.2	sūle katvā pacissasi;
ja542:153.3	Evaṁ nandāya deviyā,
ja542:153.4	vedeho pācayissati.
ja542:154.1	Sace maṁsaṁva pātabyaṁ,
ja542:154.2	sūle katvā pacissasi;
ja542:154.3	Evaṁ te puttadārassa,
ja542:154.4	vedeho pācayissati.
ja542:155.1	Sace maṁ vitanitvāna,
ja542:155.2	vedhayissasi sattiyā;
ja542:155.3	Evaṁ pañcālacandassa,
ja542:155.4	vedeho vedhayissati.
ja542:156.1	Sace maṁ vitanitvāna,
ja542:156.2	vedhayissasi sattiyā;
ja542:156.3	Evaṁ pañcālacandiyā,
ja542:156.4	vedeho vedhayissati.
ja542:157.1	Sace maṁ vitanitvāna,
ja542:157.2	vedhayissasi sattiyā;
ja542:157.3	Evaṁ nandāya deviyā,
ja542:157.4	vedeho vedhayissati.
ja542:158.1	Sace maṁ vitanitvāna,
ja542:158.2	vedhayissasi sattiyā;
ja542:158.3	Evaṁ te puttadārassa,
ja542:158.4	vedeho vedhayissati;
ja542:158.5	Evaṁ no mantitaṁ raho,
ja542:158.6	vedehena mayā saha.
ja542:159.1	Yathāpi palasataṁ cammaṁ,
ja542:159.2	kontimantāsuniṭṭhitaṁ;
ja542:159.3	Upeti tanutāṇāya,
ja542:159.4	sarānaṁ paṭihantave.
ja542:160.1	Sukhāvaho dukkhanudo,
ja542:160.2	vedehassa yasassino;
ja542:160.3	Matiṁ te paṭihaññāmi,
ja542:160.4	usuṁ palasatena vā.
ja542:161.1	Iṅgha passa mahārāja,
ja542:161.2	suññaṁ antepuraṁ tava;
ja542:161.3	Orodhā ca kumārā ca,
ja542:161.4	tava mātā ca khattiya;
ja542:161.5	Umaṅgā nīharitvāna,
ja542:161.6	vedehassupanāmitā”.
ja542:162.1	“Iṅgha antepuraṁ mayhaṁ,
ja542:162.2	gantvāna vicinātha naṁ;
ja542:162.3	Yathā imassa vacanaṁ,
ja542:162.4	saccaṁ vā yadi vā musā”.
ja542:163.1	“Evametaṁ mahārāja,
ja542:163.2	yathā āha mahosadho;
ja542:163.3	Suññaṁ antepuraṁ sabbaṁ,
ja542:163.4	kākapaṭṭanakaṁ yathā”.
ja542:164.1	“Ito gatā mahārāja,
ja542:164.2	nārī sabbaṅgasobhanā;
ja542:164.3	Kosambaphalakasussoṇī,
ja542:164.4	haṁsagaggarabhāṇinī.
ja542:165.1	Ito nītā mahārāja,
ja542:165.2	nārī sabbaṅgasobhanā;
ja542:165.3	Koseyyavasanā sāmā,
ja542:165.4	jātarūpasumekhalā.
ja542:166.1	Surattapādā kalyāṇī,
ja542:166.2	suvaṇṇamaṇimekhalā;
ja542:166.3	Pārevatakkhī sutanū,
ja542:166.4	bimboṭṭhā tanumajjhimā.
ja542:167.1	Sujātā bhujalaṭṭhīva,
ja542:167.2	vedīva tanumajjhimā;
ja542:167.3	Dīghassā kesā asitā,
ja542:167.4	īsakaggapavellitā.
ja542:168.1	Sujātā migachāpāva,
ja542:168.2	hemantaggisikhāriva;
ja542:168.3	Nadīva giriduggesu,
ja542:168.4	sañchannā khuddaveḷubhi.
ja542:169.1	Nāganāsūru kalyāṇī,
ja542:169.2	paramā timbarutthanī;
ja542:169.3	Nātidīghā nātirassā,
ja542:169.4	nālomā nātilomasā”.
ja542:170.1	“Nandāya nūna maraṇena,
ja542:170.2	nandasi sirivāhana;
ja542:170.3	Ahañca nūna nandā ca,
ja542:170.4	gacchāma yamasādhanaṁ”.
ja542:171.1	“Dibbaṁ adhīyase māyaṁ,
ja542:171.2	akāsi cakkhumohanaṁ;
ja542:171.3	Yo me amittaṁ hatthagataṁ,
ja542:171.4	vedehaṁ parimocayi”.
ja542:172.1	“Adhīyanti mahārāja,
ja542:172.2	dibbamāyidha paṇḍitā;
ja542:172.3	Te mocayanti attānaṁ,
ja542:172.4	paṇḍitā mantino janā.
ja542:173.1	Santi māṇavaputtā me,
ja542:173.2	kusalā sandhichedakā;
ja542:173.3	Yesaṁ katena maggena,
ja542:173.4	vedeho mithilaṁ gato”.
ja542:174.1	“Iṅgha passa mahārāja,
ja542:174.2	Umaṅgaṁ sādhu māpitaṁ;
ja542:174.3	Hatthīnaṁ atha assānaṁ,
ja542:174.4	Rathānaṁ atha pattinaṁ;
ja542:174.5	Ālokabhūtaṁ tiṭṭhantaṁ,
ja542:174.6	Umaṅgaṁ sādhu māpitaṁ”.
ja542:175.1	“Lābhā vata videhānaṁ,
ja542:175.2	yassimedisā paṇḍitā;
ja542:175.3	Ghare vasanti vijite,
ja542:175.4	yathā tvaṁsi mahosadha”.
ja542:176.1	“Vuttiñca parihārañca,
ja542:176.2	diguṇaṁ bhattavetanaṁ;
ja542:176.3	Dadāmi vipule bhoge,
ja542:176.4	bhuñja kāme ramassu ca;
ja542:176.5	Mā videhaṁ paccagamā,
ja542:176.6	kiṁ videho karissati”.
ja542:177.1	“Yo cajetha mahārāja,
ja542:177.2	bhattāraṁ dhanakāraṇā;
ja542:177.3	Ubhinnaṁ hoti gārayho,
ja542:177.4	attano ca parassa ca;
ja542:177.5	Yāva jīveyya vedeho,
ja542:177.6	nāññassa puriso siyā.
ja542:178.1	Yo cajetha mahārāja,
ja542:178.2	bhattāraṁ dhanakāraṇā;
ja542:178.3	Ubhinnaṁ hoti gārayho,
ja542:178.4	attano ca parassa ca;
ja542:178.5	Yāva tiṭṭheyya vedeho,
ja542:178.6	nāññassa vijite vase”.
ja542:179.1	“Dammi nikkhasahassaṁ te,
ja542:179.2	gāmāsītiñca kāsisu;
ja542:179.3	Dāsisatāni cattāri,
ja542:179.4	dammi bhariyāsatañca te;
ja542:179.5	Sabbaṁ senaṅgamādāya,
ja542:179.6	sotthiṁ gaccha mahosadha.
ja542:180.1	Yāva dadantu hatthīnaṁ,
ja542:180.2	assānaṁ diguṇaṁ vidhaṁ;
ja542:180.3	Tappentu annapānena,
ja542:180.4	rathike pattikārake.
ja542:181.1	Hatthī asse rathe pattī,
ja542:181.2	gacchevādāya paṇḍita;
ja542:181.3	Passatu taṁ mahārājā,
ja542:181.4	vedeho mithilaṁ gataṁ”.
ja542:182.1	“Hatthī assā rathā pattī,
ja542:182.2	senā padissate mahā;
ja542:182.3	Caturaṅginī bhīsarūpā,
ja542:182.4	kiṁ nu maññasi paṇḍita”.
ja542:183.1	“Ānando te mahārāja,
ja542:183.2	uttamo paṭidissati;
ja542:183.3	Sabbaṁ senaṅgamādāya,
ja542:183.4	sotthiṁ patto mahosadho”.
ja542:184.1	“Yathā petaṁ susānasmiṁ,
ja542:184.2	chaḍḍetvā caturo janā;
ja542:184.3	Evaṁ kapilaye tyamha,
ja542:184.4	chaḍḍayitvā idhāgatā.
ja542:185.1	Atha tvaṁ kena vaṇṇena,
ja542:185.2	kena vā pana hetunā;
ja542:185.3	Kena vā atthajātena,
ja542:185.4	attānaṁ parimocayi”.
ja542:186.1	“Atthaṁ atthena vedeha,
ja542:186.2	mantaṁ mantena khattiya;
ja542:186.3	Parivārayiṁ rājānaṁ,
ja542:186.4	jambudīpaṁva sāgaro”.
ja542:187.1	“Dinnaṁ nikkhasahassaṁ me,
ja542:187.2	gāmāsīti ca kāsisu;
ja542:187.3	Dāsīsatāni cattāri,
ja542:187.4	dinnaṁ bhariyāsatañca me;
ja542:187.5	Sabbaṁ senaṅgamādāya,
ja542:187.6	sotthināmhi idhāgato”.
ja542:188.1	“Susukhaṁ vata saṁvāso,
ja542:188.2	paṇḍitehīti senaka;
ja542:188.3	Pakkhīva pañjare baddhe,
ja542:188.4	macche jālagateriva;
ja542:188.5	Amittahatthattagate,
ja542:188.6	mocayī no mahosadho”.
ja542:189.1	“Evametaṁ mahārāja,
ja542:189.2	paṇḍitā hi sukhāvahā;
ja542:189.3	Pakkhīva pañjare baddhe,
ja542:189.4	macche jālagateriva;
ja542:189.5	Amittahatthattagate,
ja542:189.6	mocayī no mahosadho”.
ja542:190.1	“Āhaññantu sabbavīṇā,
ja542:190.2	bheriyo dindimāni ca;
ja542:190.3	Dhamentu māgadhā saṅkhā,
ja542:190.4	vaggū nadantu dundubhī”.
ja542:191.1	Orodhā ca kumārā ca,
ja542:191.2	vesiyānā ca brāhmaṇā;
ja542:191.3	Bahuṁ annañca pānañca,
ja542:191.4	paṇḍitassābhihārayuṁ.
ja542:192.1	Hatthārohā anīkaṭṭhā,
ja542:192.2	rathikā pattikārakā;
ja542:192.3	Bahuṁ annañca pānañca,
ja542:192.4	paṇḍitassābhihārayuṁ.
ja542:193.1	Samāgatā jānapadā,
ja542:193.2	negamā ca samāgatā;
ja542:193.3	Bahuṁ annañca pānañca,
ja542:193.4	paṇḍitassābhihārayuṁ.
ja542:194.1	Bahujano pasannosi,
ja542:194.2	disvā paṇḍitamāgataṁ;
ja542:194.3	Paṇḍitamhi anuppatte,
ja542:194.4	celukkhepo avattathāti.
ja542:195.1	Umaṅgajātakaṁ pañcamaṁ.
ja543:0.1	Jātaka
ja543:0.2	Mahānipāta
ja543:0.3	Mūgapakkhavagga
ja543:0.4	6. Bhūridattajātaka
ja543:1.1	“Yaṁ kiñci ratanaṁ atthi,
ja543:1.2	dhataraṭṭhanivesane;
ja543:1.3	Sabbāni te upayantu,
ja543:1.4	dhītaraṁ dehi rājino”.
ja543:2.1	“Na no vivāho nāgehi,
ja543:2.2	katapubbo kudācanaṁ;
ja543:2.3	Taṁ vivāhaṁ asaṁyuttaṁ,
ja543:2.4	kathaṁ amhe karomase”.
ja543:3.1	“Jīvitaṁ nūna te cattaṁ,
ja543:3.2	raṭṭhaṁ vā manujādhipa;
ja543:3.3	Na hi nāge kupitamhi,
ja543:3.4	ciraṁ jīvanti tādisā.
ja543:4.1	Yo tvaṁ deva manussosi,
ja543:4.2	iddhimantaṁ aniddhimā;
ja543:4.3	Varuṇassa niyaṁputtaṁ,
ja543:4.4	yāmunaṁ atimaññasi”.
ja543:5.1	“Nātimaññāmi rājānaṁ,
ja543:5.2	dhataraṭṭhaṁ yasassinaṁ;
ja543:5.3	Dhataraṭṭho hi nāgānaṁ,
ja543:5.4	bahūnamapi issaro.
ja543:6.1	Ahi mahānubhāvopi,
ja543:6.2	na me dhītaramāraho;
ja543:6.3	Khattiyo ca videhānaṁ,
ja543:6.4	abhijātā samuddajā”.
ja543:7.1	“Kambalassatarā uṭṭhentu,
ja543:7.2	sabbe nāge nivedaya;
ja543:7.3	Bārāṇasiṁ pavajjantu,
ja543:7.4	mā ca kañci viheṭhayuṁ”.
ja543:8.1	“Nivesanesu sobbhesu,
ja543:8.2	rathiyā caccaresu ca;
ja543:8.3	Rukkhaggesu ca lambantu,
ja543:8.4	vitatā toraṇesu ca.
ja543:9.1	Ahampi sabbasetena,
ja543:9.2	mahatā sumahaṁ puraṁ;
ja543:9.3	Parikkhipissaṁ bhogehi,
ja543:9.4	kāsīnaṁ janayaṁ bhayaṁ”.
ja543:10.1	Tassa taṁ vacanaṁ sutvā,
ja543:10.2	uragānekavaṇṇino;
ja543:10.3	Bārāṇasiṁ pavajjiṁsu,
ja543:10.4	na ca kañci viheṭhayuṁ.
ja543:11.1	Nivesanesu sobbhesu,
ja543:11.2	rathiyā caccaresu ca;
ja543:11.3	Rukkhaggesu ca lambiṁsu,
ja543:11.4	vitatā toraṇesu ca.
ja543:12.1	Tesu disvāna lambante,
ja543:12.2	puthū kandiṁsu nāriyo;
ja543:12.3	Nāge soṇḍikate disvā,
ja543:12.4	passasante muhuṁ muhuṁ.
ja543:13.1	Bārāṇasī pabyathitā,
ja543:13.2	āturā samapajjatha;
ja543:13.3	Bāhā paggayha pakkanduṁ,
ja543:13.4	“dhītaraṁ dehi rājino”.
ja543:14.1	(…)
ja543:15.1	“Pupphābhihārassa vanassa majjhe,
ja543:15.2	Ko lohitakkho vitatantaraṁso;
ja543:15.3	Kā kambukāyūradharā suvatthā,
ja543:15.4	Tiṭṭhanti nāriyo dasa vandamānā.
ja543:16.1	Ko tvaṁ brahābāhu vanassa majjhe,
ja543:16.2	Virocasi ghatasittova aggi;
ja543:16.3	Mahesakkho aññatarosi yakkho,
ja543:16.4	Udāhu nāgosi mahānubhāvo”.
ja543:17.1	“Nāgohamasmi iddhimā,
ja543:17.2	tejassī duratikkamo;
ja543:17.3	Ḍaṁseyyaṁ tejasā kuddho,
ja543:17.4	phītaṁ janapadaṁ api.
ja543:18.1	Samuddajā hi me mātā,
ja543:18.2	dhataraṭṭho ca me pitā;
ja543:18.3	Sudassanakaniṭṭhosmi,
ja543:18.4	bhūridattoti maṁ vidū.
ja543:19.1	Yaṁ gambhīraṁ sadāvaṭṭaṁ,
ja543:19.2	rahadaṁ bhismaṁ pekkhasi;
ja543:19.3	Esa dibyo mamāvāso,
ja543:19.4	anekasataporiso.
ja543:20.1	Mayūrakoñcābhirudaṁ,
ja543:20.2	nīlodaṁ vanamajjhato;
ja543:20.3	Yamunaṁ pavisa mā bhīto,
ja543:20.4	khemaṁ vattavataṁ sivaṁ.
ja543:21.1	Tattha patto sānucaro,
ja543:21.2	saha puttena brāhmaṇa;
ja543:21.3	Pūjito mayhaṁ kāmehi,
ja543:21.4	sukhaṁ brāhmaṇa vacchasi”.
ja543:22.1	“Samā samantaparito,
ja543:22.2	pahūtatagarā mahī;
ja543:22.3	Indagopakasañchannā,
ja543:22.4	sobhati harituttamā.
ja543:23.1	Rammāni vanacetyāni,
ja543:23.2	rammā haṁsūpakūjitā;
ja543:23.3	Opupphāpadmā tiṭṭhanti,
ja543:23.4	pokkharañño sunimmitā.
ja543:24.1	Aṭṭhaṁsā sukatā thambhā,
ja543:24.2	sabbe veḷuriyāmayā;
ja543:24.3	Sahassathambhā pāsādā,
ja543:24.4	pūrā kaññāhi jotare.
ja543:25.1	Vimānaṁ upapannosi,
ja543:25.2	dibyaṁ puññehi attano;
ja543:25.3	Asambādhaṁ sivaṁ rammaṁ,
ja543:25.4	accantasukhasaṁhitaṁ.
ja543:26.1	Maññe sahassanettassa,
ja543:26.2	vimānaṁ nābhikaṅkhasi;
ja543:26.3	Iddhī hi tyāyaṁ vipulā,
ja543:26.4	sakkasseva jutīmato”.
ja543:27.1	“Manasāpi na pattabbo,
ja543:27.2	ānubhāvo jutīmato;
ja543:27.3	Paricārayamānānaṁ,
ja543:27.4	saindānaṁ vasavattinaṁ.
ja543:28.1	Taṁ vimānaṁ abhijjhāya,
ja543:28.2	amarānaṁ sukhesinaṁ;
ja543:28.3	Uposathaṁ upavasanto,
ja543:28.4	semi vammikamuddhani”.
ja543:29.1	“Ahañca migamesāno,
ja543:29.2	saputto pāvisiṁ vanaṁ;
ja543:29.3	Taṁ maṁ mataṁ vā jīvaṁ vā,
ja543:29.4	nābhivedenti ñātakā.
ja543:30.1	Āmantaye bhūridattaṁ,
ja543:30.2	kāsiputtaṁ yasassinaṁ;
ja543:30.3	Tayā no samanuññātā,
ja543:30.4	api passemu ñātake”.
ja543:31.1	“Eso hi vata me chando,
ja543:31.2	yaṁ vasesi mamantike;
ja543:31.3	Na hi etādisā kāmā,
ja543:31.4	sulabhā honti mānuse.
ja543:32.1	Sace tvaṁ nicchase vatthuṁ,
ja543:32.2	mama kāmehi pūjito;
ja543:32.3	Mayā tvaṁ samanuññāto,
ja543:32.4	sotthiṁ passāhi ñātake”.
ja543:33.1	“Dhārayimaṁ maṇiṁ dibyaṁ,
ja543:33.2	pasuṁ putte ca vindati;
ja543:33.3	Arogo sukhito hoti,
ja543:33.4	gacchevādāya brāhmaṇa”.
ja543:34.1	“Kusalaṁ paṭinandāmi,
ja543:34.2	bhūridatta vaco tava;
ja543:34.3	Pabbajissāmi jiṇṇosmi,
ja543:34.4	na kāme abhipatthaye”.
ja543:35.1	“Brahmacariyassa ce bhaṅgo,
ja543:35.2	hoti bhogehi kāriyaṁ;
ja543:35.3	Avikampamāno eyyāsi,
ja543:35.4	bahuṁ dassāmi te dhanaṁ”.
ja543:36.1	“Kusalaṁ paṭinandāmi,
ja543:36.2	bhūridatta vaco tava;
ja543:36.3	Punapi āgamissāmi,
ja543:36.4	sace attho bhavissati”.
ja543:37.1	Idaṁ vatvā bhūridatto,
ja543:37.2	Pesesi caturo jane;
ja543:37.3	“Etha gacchatha uṭṭhetha,
ja543:37.4	Khippaṁ pāpetha brāhmaṇaṁ”.
ja543:38.1	Tassa taṁ vacanaṁ sutvā,
ja543:38.2	uṭṭhāya caturo janā;
ja543:38.3	Pesitā bhūridattena,
ja543:38.4	khippaṁ pāpesu brāhmaṇaṁ.
ja543:39.1	(…)
ja543:40.1	“Maṇiṁ paggayha maṅgalyaṁ,
ja543:40.2	sādhuvittaṁ manoramaṁ;
ja543:40.3	Selaṁ byañjanasampannaṁ,
ja543:40.4	ko imaṁ maṇimajjhagā”.
ja543:41.1	“Lohitakkhasahassāhi,
ja543:41.2	samantā parivāritaṁ;
ja543:41.3	Ajja kālaṁ pathaṁ gacchaṁ,
ja543:41.4	ajjhagāhaṁ maṇiṁ imaṁ”.
ja543:42.1	“Sūpaciṇṇo ayaṁ selo,
ja543:42.2	accito mānito sadā;
ja543:42.3	Sudhārito sunikkhitto,
ja543:42.4	sabbatthamabhisādhaye.
ja543:43.1	Upacāravipannassa,
ja543:43.2	nikkhepe dhāraṇāya vā;
ja543:43.3	Ayaṁ selo vināsāya,
ja543:43.4	pariciṇṇo ayoniso.
ja543:44.1	Na imaṁ akusalo dibyaṁ,
ja543:44.2	maṇiṁ dhāretumāraho;
ja543:44.3	Paṭipajja sataṁ nikkhaṁ,
ja543:44.4	dehimaṁ ratanaṁ mama”.
ja543:45.1	“Na ca myāyaṁ maṇī keyyo,
ja543:45.2	gohi vā ratanehi vā;
ja543:45.3	Selo byañjanasampanno,
ja543:45.4	neva keyyo maṇī mama”.
ja543:46.1	“No ce tayā maṇī keyyo,
ja543:46.2	gohi vā ratanehi vā;
ja543:46.3	Atha kena maṇī keyyo,
ja543:46.4	taṁ me akkhāhi pucchito”.
ja543:47.1	“Yo me saṁse mahānāgaṁ,
ja543:47.2	tejassiṁ duratikkamaṁ;
ja543:47.3	Tassa dajjaṁ imaṁ selaṁ,
ja543:47.4	jalantamiva tejasā”.
ja543:48.1	“Ko nu brāhmaṇavaṇṇena,
ja543:48.2	supaṇṇo patataṁ varo;
ja543:48.3	Nāgaṁ jigīsamanvesi,
ja543:48.4	anvesaṁ bhakkhamattano”.
ja543:49.1	“Nāhaṁ dijādhipo homi,
ja543:49.2	na diṭṭho garuḷo mayā;
ja543:49.3	Āsīvisena vittoti,
ja543:49.4	vajjo brāhmaṇa maṁ vidū”.
ja543:50.1	“Kiṁ nu tuyhaṁ balaṁ atthi,
ja543:50.2	kiṁ sippaṁ vijjate tava;
ja543:50.3	Kismiṁ vā tvaṁ paratthaddho,
ja543:50.4	uragaṁ nāpacāyasi”.
ja543:51.1	“Āraññikassa isino,
ja543:51.2	cirarattaṁ tapassino;
ja543:51.3	Supaṇṇo kosiyassakkhā,
ja543:51.4	visavijjaṁ anuttaraṁ.
ja543:52.1	Taṁ bhāvitattaññataraṁ,
ja543:52.2	sammantaṁ pabbatantare;
ja543:52.3	Sakkaccaṁ taṁ upaṭṭhāsiṁ,
ja543:52.4	rattindivamatandito.
ja543:53.1	So tadā pariciṇṇo me,
ja543:53.2	vattavā brahmacariyavā;
ja543:53.3	Dibbaṁ pātukarī mantaṁ,
ja543:53.4	kāmasā bhagavā mama.
ja543:54.1	Tyāhaṁ mante paratthaddho,
ja543:54.2	nāhaṁ bhāyāmi bhoginaṁ;
ja543:54.3	Ācariyo visaghātānaṁ,
ja543:54.4	alampānoti maṁ vidū”.
ja543:55.1	“Gaṇhāmase maṇiṁ tāta,
ja543:55.2	somadatta vijānahi;
ja543:55.3	Mā daṇḍena siriṁ pattaṁ,
ja543:55.4	kāmasā pajahimhase”.
ja543:56.1	“Sakaṁ nivesanaṁ pattaṁ,
ja543:56.2	yo taṁ brāhmaṇa pūjayi;
ja543:56.3	Evaṁ kalyāṇakārissa,
ja543:56.4	kiṁ mohā dubbhimicchasi.
ja543:57.1	Sace tvaṁ dhanakāmosi,
ja543:57.2	bhūridatto padassati;
ja543:57.3	Tameva gantvā yācassu,
ja543:57.4	bahuṁ dassati te dhanaṁ”.
ja543:58.1	“Hatthagataṁ pattagataṁ,
ja543:58.2	nikiṇṇaṁ khādituṁ varaṁ;
ja543:58.3	Mā no sandiṭṭhiko attho,
ja543:58.4	somadatta upaccagā”.
ja543:59.1	“Paccati niraye ghore,
ja543:59.2	mahissamapi vivarati;
ja543:59.3	Mittadubbhī hitaccāgī,
ja543:59.4	jīvarevāpi sussati.
ja543:60.1	Sace tvaṁ dhanakāmosi,
ja543:60.2	bhūridatto padassati;
ja543:60.3	Maññe attakataṁ veraṁ,
ja543:60.4	naciraṁ vedayissasi”.
ja543:61.1	“Mahāyaññaṁ yajitvāna,
ja543:61.2	evaṁ sujjhanti brāhmaṇā;
ja543:61.3	Mahāyaññaṁ yajissāma,
ja543:61.4	evaṁ mokkhāma pāpakā”.
ja543:62.1	“Handa dāni apāyāmi,
ja543:62.2	nāhaṁ ajja tayā saha;
ja543:62.3	Padampekaṁ na gaccheyyaṁ,
ja543:62.4	evaṁ kibbisakārinā”.
ja543:63.1	Idaṁ vatvāna pitaraṁ,
ja543:63.2	somadatto bahussuto;
ja543:63.3	Ujjhāpetvāna bhūtāni,
ja543:63.4	tamhā ṭhānā apakkami.
ja543:64.1	“Gaṇhāhetaṁ mahānāgaṁ,
ja543:64.2	āharetaṁ maṇiṁ mama;
ja543:64.3	Indagopakavaṇṇābho,
ja543:64.4	yassa lohitako siro.
ja543:65.1	Kappāsapicurāsīva,
ja543:65.2	eso kāyo padissati;
ja543:65.3	Vammikaggagato seti,
ja543:65.4	taṁ tvaṁ gaṇhāhi brāhmaṇa”.
ja543:66.1	Athosadhehi dibbehi,
ja543:66.2	jappaṁ mantapadāni ca;
ja543:66.3	Evaṁ taṁ asakkhi satthuṁ,
ja543:66.4	katvā parittamattano.
ja543:67.1	(…)
ja543:68.1	“Mamaṁ disvāna āyantaṁ,
ja543:68.2	sabbakāmasamiddhinaṁ;
ja543:68.3	Indriyāni ahaṭṭhāni,
ja543:68.4	sāvaṁ jātaṁ mukhaṁ tava.
ja543:69.1	Padmaṁ yathā hatthagataṁ,
ja543:69.2	Pāṇinā parimadditaṁ;
ja543:69.3	Sāvaṁ jātaṁ mukhaṁ tuyhaṁ,
ja543:69.4	Mamaṁ disvāna edisaṁ.
ja543:70.1	Kacci nu te nābhisasi,
ja543:70.2	kacci te atthi vedanā;
ja543:70.3	Yena sāvaṁ mukhaṁ tuyhaṁ,
ja543:70.4	mamaṁ disvāna āgataṁ”.
ja543:71.1	“Supinaṁ tāta addakkhiṁ,
ja543:71.2	ito māsaṁ adhogataṁ;
ja543:71.3	Dakkhiṇaṁ viya me bāhuṁ,
ja543:71.4	chetvā ruhiramakkhitaṁ;
ja543:71.5	Puriso ādāya pakkāmi,
ja543:71.6	mama rodantiyā sati.
ja543:72.1	Yatohaṁ supinamaddakkhiṁ,
ja543:72.2	sudassana vijānahi;
ja543:72.3	Tato divā vā rattiṁ vā,
ja543:72.4	sukhaṁ me nopalabbhati”.
ja543:73.1	“Yaṁ pubbe parivāriṁsu,
ja543:73.2	kaññā ruciraviggahā;
ja543:73.3	Hemajālapaṭicchannā,
ja543:73.4	bhūridatto na dissati.
ja543:74.1	Yaṁ pubbe parivāriṁsu,
ja543:74.2	nettiṁsavaradhārino;
ja543:74.3	Kaṇikārāva samphullā,
ja543:74.4	bhūridatto na dissati.
ja543:75.1	Handa dāni gamissāma,
ja543:75.2	bhūridattanivesanaṁ;
ja543:75.3	Dhammaṭṭhaṁ sīlasampannaṁ,
ja543:75.4	passāma tava bhātaraṁ”.
ja543:76.1	Tañca disvāna āyantiṁ,
ja543:76.2	bhūridattassa mātaraṁ;
ja543:76.3	Bāhā paggayha pakkanduṁ,
ja543:76.4	bhūridattassa nāriyo.
ja543:77.1	“Puttaṁ teyye na jānāma,
ja543:77.2	ito māsaṁ adhogataṁ;
ja543:77.3	Mataṁ vā yadi vā jīvaṁ,
ja543:77.4	bhūridattaṁ yasassinaṁ.
ja543:78.1	Sakuṇī hataputtāva,
ja543:78.2	suññaṁ disvā kulāvakaṁ;
ja543:78.3	Ciraṁ dukkhena jhāyissaṁ,
ja543:78.4	bhūridattaṁ apassatī.
ja543:79.1	Kurarī hatachāpāva,
ja543:79.2	suññaṁ disvā kulāvakaṁ;
ja543:79.3	Ciraṁ dukkhena jhāyissaṁ,
ja543:79.4	bhūridattaṁ apassatī.
ja543:80.1	Sā nūna cakkavākīva,
ja543:80.2	pallalasmiṁ anodake;
ja543:80.3	Ciraṁ dukkhena jhāyissaṁ,
ja543:80.4	bhūridattaṁ apassatī.
ja543:81.1	Kammārānaṁ yathā ukkā,
ja543:81.2	anto jhāyati no bahi;
ja543:81.3	Evaṁ jhāyāmi sokena,
ja543:81.4	bhūridattaṁ apassatī”.
ja543:82.1	Sālāva sampamathitā,
ja543:82.2	mālutena pamadditā;
ja543:82.3	Senti puttā ca dārā ca,
ja543:82.4	bhūridattanivesane.
ja543:83.1	Idaṁ sutvāna nigghosaṁ,
ja543:83.2	bhūridattanivesane;
ja543:83.3	Ariṭṭho ca subhogo ca,
ja543:83.4	padhāviṁsu anantarā.
ja543:84.1	“Amma assāsa mā soci,
ja543:84.2	evaṁdhammā hi pāṇino;
ja543:84.3	Cavanti upapajjanti,
ja543:84.4	esassa pariṇāmitā”.
ja543:85.1	“Ahampi tāta jānāmi,
ja543:85.2	evaṁdhammā hi pāṇino;
ja543:85.3	Sokena ca paretasmi,
ja543:85.4	bhūridattaṁ apassatī.
ja543:86.1	Ajja ce me imaṁ rattiṁ,
ja543:86.2	sudassana vijānahi;
ja543:86.3	Bhūridattaṁ apassantī,
ja543:86.4	maññe hissāmi jīvitaṁ”.
ja543:87.1	“Amma assāsa mā soci,
ja543:87.2	ānayissāma bhātaraṁ;
ja543:87.3	Disodisaṁ gamissāma,
ja543:87.4	bhātupariyesanaṁ caraṁ.
ja543:88.1	Pabbate giriduggesu,
ja543:88.2	gāmesu nigamesu ca;
ja543:88.3	Orena sattarattassa,
ja543:88.4	bhātaraṁ passa āgataṁ”.
ja543:89.1	“Hatthā pamutto urago,
ja543:89.2	pāde te nipatī bhusaṁ;
ja543:89.3	Kacci nu taṁ ḍaṁsī tāta,
ja543:89.4	mā bhāyi sukhito bhava”.
ja543:90.1	“Neva mayhaṁ ayaṁ nāgo,
ja543:90.2	alaṁ dukkhāya kāyaci;
ja543:90.3	Yāvatatthi ahiggāho,
ja543:90.4	mayā bhiyyo na vijjati”.
ja543:91.1	“Ko nu brāhmaṇavaṇṇena,
ja543:91.2	ditto parisamāgato;
ja543:91.3	Avhāyantu suyuddhena,
ja543:91.4	suṇantu parisā mama”.
ja543:92.1	“Tvaṁ maṁ nāgena ālampa,
ja543:92.2	ahaṁ maṇḍūkachāpiyā;
ja543:92.3	Hotu no abbhutaṁ tattha,
ja543:92.4	ā sahassehi pañcahi”.
ja543:93.1	“Ahañhi vasumā aḍḍho,
ja543:93.2	tvaṁ daliddosi māṇava;
ja543:93.3	Ko nu te pāṭibhogatthi,
ja543:93.4	upajūtañca kiṁ siyā.
ja543:94.1	Upajūtañca me assa,
ja543:94.2	pāṭibhogo ca tādiso;
ja543:94.3	Hotu no abbhutaṁ tattha,
ja543:94.4	ā sahassehi pañcahi”.
ja543:95.1	“Suṇohi me mahārāja,
ja543:95.2	vacanaṁ bhaddamatthu te;
ja543:95.3	Pañcannaṁ me sahassānaṁ,
ja543:95.4	pāṭibhogo hi kittima”.
ja543:96.1	“Pettikaṁ vā iṇaṁ hoti,
ja543:96.2	Yaṁ vā hoti sayaṅkataṁ;
ja543:96.3	Kiṁ tvaṁ evaṁ bahuṁ mayhaṁ,
ja543:96.4	Dhanaṁ yācasi brāhmaṇa”.
ja543:97.1	“Alampāno hi nāgena,
ja543:97.2	mamaṁ abhijigīsati;
ja543:97.3	Ahaṁ maṇḍūkachāpiyā,
ja543:97.4	ḍaṁsayissāmi brāhmaṇaṁ.
ja543:98.1	Taṁ tvaṁ daṭṭhuṁ mahārāja,
ja543:98.2	ajja raṭṭhābhivaḍḍhana;
ja543:98.3	Khattasaṅghaparibyūḷho,
ja543:98.4	niyyāhi ahidassanaṁ”.
ja543:99.1	“Neva taṁ atimaññāmi,
ja543:99.2	sippavādena māṇava;
ja543:99.3	Atimattosi sippena,
ja543:99.4	uragaṁ nāpacāyasi”.
ja543:100.1	“Ahampi nātimaññāmi,
ja543:100.2	sippavādena brāhmaṇa;
ja543:100.3	Avisena ca nāgena,
ja543:100.4	bhusaṁ vañcayase janaṁ.
ja543:101.1	Evañcetaṁ jano jaññā,
ja543:101.2	Yathā jānāmi taṁ ahaṁ;
ja543:101.3	Na tvaṁ labhasi ālampa,
ja543:101.4	Bhusamuṭṭhiṁ kuto dhanaṁ”.
ja543:102.1	“Kharājino jaṭī dummī,
ja543:102.2	ditto parisamāgato;
ja543:102.3	Yo tvaṁ evaṁ gataṁ nāgaṁ,
ja543:102.4	aviso atimaññasi.
ja543:103.1	Āsajja kho naṁ jaññāsi,
ja543:103.2	puṇṇaṁ uggassa tejaso;
ja543:103.3	Maññe taṁ bhasmarāsiṁva,
ja543:103.4	khippameso karissati”.
ja543:104.1	“Siyā visaṁ siluttassa,
ja543:104.2	deḍḍubhassa silābhuno;
ja543:104.3	Neva lohitasīsassa,
ja543:104.4	visaṁ nāgassa vijjati”.
ja543:105.1	“Sutametaṁ arahataṁ,
ja543:105.2	saññatānaṁ tapassinaṁ;
ja543:105.3	Idha dānāni datvāna,
ja543:105.4	saggaṁ gacchanti dāyakā;
ja543:105.5	Jīvanto dehi dānāni,
ja543:105.6	yadi te atthi dātave.
ja543:106.1	Ayaṁ nāgo mahiddhiko,
ja543:106.2	tejassī duratikkamo;
ja543:106.3	Tena taṁ ḍaṁsayissāmi,
ja543:106.4	so taṁ bhasmaṁ karissati”.
ja543:107.1	“Mayāpetaṁ sutaṁ samma,
ja543:107.2	saññatānaṁ tapassinaṁ;
ja543:107.3	Idha dānāni datvāna,
ja543:107.4	saggaṁ gacchanti dāyakā;
ja543:107.5	Tvameva dehi jīvanto,
ja543:107.6	yadi te atthi dātave.
ja543:108.1	Ayaṁ ajamukhī nāma,
ja543:108.2	puṇṇā uggassa tejaso;
ja543:108.3	Tāya taṁ ḍaṁsayissāmi,
ja543:108.4	sā taṁ bhasmaṁ karissati.
ja543:109.1	Yā dhītā dhataraṭṭhassa,
ja543:109.2	vemātā bhaginī mama;
ja543:109.3	Sā taṁ ḍaṁsatvajamukhī,
ja543:109.4	puṇṇā uggassa tejaso.
ja543:110.1	Chamāyañce nisiñcissaṁ,
ja543:110.2	brahmadatta vijānahi;
ja543:110.3	Tiṇalatāni osadhyo,
ja543:110.4	ussusseyyuṁ asaṁsayaṁ.
ja543:111.1	Uddhañce pātayissāmi,
ja543:111.2	brahmadatta vijānahi;
ja543:111.3	Satta vassāniyaṁ devo,
ja543:111.4	na vasse na himaṁ pate.
ja543:112.1	Udake ce nisiñcissaṁ,
ja543:112.2	brahmadatta vijānahi;
ja543:112.3	Yāvantodakajā pāṇā,
ja543:112.4	mareyyuṁ macchakacchapā”.
ja543:113.1	(…)
ja543:114.1	“Lokyaṁ sajantaṁ udakaṁ,
ja543:114.2	payāgasmiṁ patiṭṭhitaṁ;
ja543:114.3	Komaṁ ajjhoharī bhūto,
ja543:114.4	ogāḷhaṁ yamunaṁ nadiṁ”.
ja543:115.1	“Yadesa lokādhipatī yasassī,
ja543:115.2	Bārāṇasiṁ pakriya samantato;
ja543:115.3	Tassāha putto uragūsabhassa,
ja543:115.4	Subhogoti maṁ brāhmaṇa vedayanti”.
ja543:116.1	“Sace hi putto uragūsabhassa,
ja543:116.2	Kāsissa rañño amarādhipassa;
ja543:116.3	Mahesakkho aññataro pitā te,
ja543:116.4	Maccesu mātā pana te atulyā;
ja543:116.5	Na tādiso arahati brāhmaṇassa,
ja543:116.6	Dāsampi ohārituṁ mahānubhāvo”.
ja543:117.1	“Rukkhaṁ nissāya vijjhittho,
ja543:117.2	eṇeyyaṁ pātumāgataṁ;
ja543:117.3	So viddho dūramacari,
ja543:117.4	saravegena sīghavā.
ja543:118.1	Taṁ tvaṁ patitamaddakkhi,
ja543:118.2	araññasmiṁ brahāvane;
ja543:118.3	Sa maṁsakājamādāya,
ja543:118.4	sāyaṁ nigrodhupāgami.
ja543:119.1	Sukasāḷikasaṅghuṭṭhaṁ,
ja543:119.2	piṅgalaṁ santhatāyutaṁ;
ja543:119.3	Kokilābhirudaṁ rammaṁ,
ja543:119.4	dhuvaṁ haritasaddalaṁ.
ja543:120.1	Tattha te so pāturahu,
ja543:120.2	iddhiyā yasasā jalaṁ;
ja543:120.3	Mahānubhāvo bhātā me,
ja543:120.4	kaññāhi parivārito.
ja543:121.1	So tena pariciṇṇo tvaṁ,
ja543:121.2	sabbakāmehi tappito;
ja543:121.3	Aduṭṭhassa tuvaṁ dubbhi,
ja543:121.4	taṁ te veraṁ idhāgataṁ.
ja543:122.1	Khippaṁ gīvaṁ pasārehi,
ja543:122.2	na te dassāmi jīvitaṁ;
ja543:122.3	Bhātu parisaraṁ veraṁ,
ja543:122.4	chedayissāmi te siraṁ”.
ja543:123.1	“Ajjhāyako yācayogī,
ja543:123.2	āhutaggi ca brāhmaṇo;
ja543:123.3	Etehi tīhi ṭhānehi,
ja543:123.4	avajjho hoti brāhmaṇo”.
ja543:124.1	“Yaṁ pūraṁ dhataraṭṭhassa,
ja543:124.2	ogāḷhaṁ yamunaṁ nadiṁ;
ja543:124.3	Jotate sabbasovaṇṇaṁ,
ja543:124.4	girimāhacca yāmunaṁ.
ja543:125.1	Tattha te purisabyagghā,
ja543:125.2	sodariyā mama bhātaro;
ja543:125.3	Yathā te tattha vakkhanti,
ja543:125.4	tathā hessasi brāhmaṇa”.
ja543:126.1	(…)
ja543:127.1	“Anittarā ittarasampayuttā,
ja543:127.2	Yaññā ca vedā ca subhoga loke;
ja543:127.3	Tadaggarayhañhi vinindamāno,
ja543:127.4	Jahāti vittañca satañca dhammaṁ.
ja543:128.1	Ajjhenamariyā pathaviṁ janindā,
ja543:128.2	Vessā kasiṁ pāricariyañca suddā;
ja543:128.3	Upāgu paccekaṁ yathāpadesaṁ,
ja543:128.4	Katāhu ete vasināti āhu.
ja543:129.1	Dhātā vidhātā varuṇo kuvero,
ja543:129.2	Somo yamo candimā vāyu sūriyo;
ja543:129.3	Etepi yaññaṁ puthuso yajitvā,
ja543:129.4	Ajjhāyakānaṁ atho sabbakāme.
ja543:130.1	Vikāsitā cāpasatāni pañca,
ja543:130.2	Yo ajjuno balavā bhīmaseno;
ja543:130.3	Sahassabāhu asamo pathabyā,
ja543:130.4	Sopi tadā mādahi jātavedaṁ.
ja543:131.1	Yo brāhmaṇe bhojayi dīgharattaṁ,
ja543:131.2	Annena pānena yathānubhāvaṁ;
ja543:131.3	Pasannacitto anumodamāno,
ja543:131.4	Subhoga devaññataro ahosi.
ja543:132.1	Mahāsanaṁ devamanomavaṇṇaṁ,
ja543:132.2	Yo sappinā asakkhi bhojetumaggiṁ;
ja543:132.3	Sa yaññatantaṁ varato yajitvā,
ja543:132.4	Dibbaṁ gatiṁ mucalindajjhagacchi.
ja543:133.1	Mahānubhāvo vassasahassajīvī,
ja543:133.2	Yo pabbajī dassaneyyo uḷāro;
ja543:133.3	Hitvā apariyanta raṭṭhaṁ sasenaṁ,
ja543:133.4	Rājā dudīpopi jagāma saggaṁ.
ja543:134.1	Yo sāgarantaṁ sāgaro vijitvā,
ja543:134.2	Yūpaṁ subhaṁ soṇṇamayaṁ uḷāraṁ;
ja543:134.3	Ussesi vessānaramādahāno,
ja543:134.4	Subhoga devaññataro ahosi.
ja543:135.1	Yassānubhāvena subhoga gaṅgā,
ja543:135.2	Pavattatha dadhisannisinnaṁ samuddaṁ;
ja543:135.3	Salomapādo paricariya maggiṁ,
ja543:135.4	Aṅgo sahassakkhapurajjhagacchi.
ja543:136.1	Mahiddhiko devavaro yasassī,
ja543:136.2	Senāpati tidive vāsavassa;
ja543:136.3	So somayāgena malaṁ vihantvā,
ja543:136.4	Subhoga devaññataro ahosi.
ja543:137.1	Akārayi lokamimaṁ parañca,
ja543:137.2	Bhāgīrathiṁ himavantañca gijjhaṁ;
ja543:137.3	Yo iddhimā devavaro yasassī,
ja543:137.4	Sopi tadā ādahi jātavedaṁ.
ja543:138.1	Mālāgirī himavā yo ca gijjho,
ja543:138.2	Sudassano nisabho kuveru;
ja543:138.3	Ete ca aññe ca nagā mahantā,
ja543:138.4	Cityā katā yaññakarehi māhu.
ja543:139.1	Ajjhāyakaṁ mantaguṇūpapannaṁ,
ja543:139.2	Tapassinaṁ yācayogotidhāhu;
ja543:139.3	Tīre samuddassudakaṁ sajantaṁ,
ja543:139.4	Taṁ sāgarojjhohari tenapeyyo.
ja543:140.1	Āyāgavatthūni puthū pathabyā,
ja543:140.2	Saṁvijjanti brāhmaṇā vāsavassa;
ja543:140.3	Purimaṁ disaṁ pacchimaṁ dakkhiṇuttaraṁ,
ja543:140.4	Saṁvijjamānā janayanti vedaṁ”.
ja543:141.1	“Kalī hi dhīrāna kaṭaṁ magānaṁ,
ja543:141.2	Bhavanti vedajjhagatānariṭṭha;
ja543:141.3	Marīcidhammaṁ asamekkhitattā,
ja543:141.4	Māyāguṇā nātivahanti paññaṁ.
ja543:142.1	Vedā na tāṇāya bhavanti dassa,
ja543:142.2	Mittadduno bhūnahuno narassa;
ja543:142.3	Na tāyate pariciṇṇo ca aggi,
ja543:142.4	Dosantaraṁ maccamanariyakammaṁ.
ja543:143.1	Sabbañca maccā sadhanaṁ sabhogaṁ,
ja543:143.2	Ādīpitaṁ dāru tiṇena missaṁ;
ja543:143.3	Dahaṁ na tappe asamatthatejo,
ja543:143.4	Ko taṁ subhikkhaṁ dvirasaññu kayirā.
ja543:144.1	Yathāpi khīraṁ vipariṇāmadhammaṁ,
ja543:144.2	Dadhi bhavitvā navanītampi hoti;
ja543:144.3	Evampi aggi vipariṇāmadhammo,
ja543:144.4	Tejo samorohatī yogayutto.
ja543:145.1	Na dissatī aggimanuppaviṭṭho,
ja543:145.2	Sukkhesu kaṭṭhesu navesu cāpi;
ja543:145.3	Nāmatthamāno araṇīnarena,
ja543:145.4	Nākammunā jāyati jātavedo.
ja543:146.1	Sace hi aggi antarato vaseyya,
ja543:146.2	Sukkhesu kaṭṭhesu navesu cāpi;
ja543:146.3	Sabbāni susseyyu vanāni loke,
ja543:146.4	Sukkhāni kaṭṭhāni ca pajjaleyyuṁ.
ja543:147.1	Karoti ce dārutiṇena puññaṁ,
ja543:147.2	Bhojaṁ naro dhūmasikhiṁ patāpavaṁ;
ja543:147.3	Aṅgārikā loṇakarā ca sūdā,
ja543:147.4	Sarīradāhāpi kareyyu puññaṁ.
ja543:148.1	Atha ce hi ete na karonti puññaṁ,
ja543:148.2	Ajjhenamaggiṁ idha tappayitvā;
ja543:148.3	Na koci lokasmiṁ karoti puññaṁ,
ja543:148.4	Bhojaṁ naro dhūmasikhiṁ patāpavaṁ.
ja543:149.1	Kathañhi lokāpacito samāno,
ja543:149.2	Amanuññagandhaṁ bahūnaṁ akantaṁ;
ja543:149.3	Yadeva maccā parivajjayanti,
ja543:149.4	Tadappasatthaṁ dvirasaññu bhuñje.
ja543:150.1	Sikhimpi devesu vadanti heke,
ja543:150.2	Āpaṁ milakkhū pana devamāhu;
ja543:150.3	Sabbeva ete vitathaṁ bhaṇanti,
ja543:150.4	Aggī na devaññataro na cāpo.
ja543:151.1	Anindriyabaddhamasaññakāyaṁ,
ja543:151.2	Vessānaraṁ kammakaraṁ pajānaṁ;
ja543:151.3	Paricariya maggiṁ sugatiṁ kathaṁ vaje,
ja543:151.4	Pāpāni kammāni pakubbamāno.
ja543:152.1	Sabbābhibhū tāhudha jīvikatthā,
ja543:152.2	Aggissa brahmā paricārakoti;
ja543:152.3	Sabbānubhāvī ca vasī kimatthaṁ,
ja543:152.4	Animmito nimmitaṁ vanditassa.
ja543:153.1	Hassaṁ anijjhānakhamaṁ atacchaṁ,
ja543:153.2	Sakkārahetu pakiriṁsu pubbe;
ja543:153.3	Te lābhasakkāre apātubhonte,
ja543:153.4	Sandhāpitā jantubhi santidhammaṁ.
ja543:154.1	Ajjhenamariyā pathaviṁ janindā,
ja543:154.2	Vessā kasiṁ pāricariyañca suddā;
ja543:154.3	Upāgu paccekaṁ yathāpadesaṁ,
ja543:154.4	Katāhu ete vasināti āhu.
ja543:155.1	Etañca saccaṁ vacanaṁ bhaveyya,
ja543:155.2	Yathā idaṁ bhāsitaṁ brāhmaṇehi;
ja543:155.3	Nākhattiyo jātu labhetha rajjaṁ,
ja543:155.4	Nābrāhmaṇo mantapadāni sikkhe;
ja543:155.5	Nāññatra vessehi kasiṁ kareyya,
ja543:155.6	Suddo na mucce parapesanāya.
ja543:156.1	Yasmā ca etaṁ vacanaṁ abhūtaṁ,
ja543:156.2	Musāvime odariyā bhaṇanti;
ja543:156.3	Tadappapaññā abhisaddahanti,
ja543:156.4	Passanti taṁ paṇḍitā attanāva.
ja543:157.1	Khatyā hi vessānaṁ baliṁ haranti,
ja543:157.2	Ādāya satthāni caranti brāhmaṇā;
ja543:157.3	Taṁ tādisaṁ saṅkhubhitaṁ pabhinnaṁ,
ja543:157.4	Kasmā brahmā nujju karoti lokaṁ.
ja543:158.1	Sace hi so issaro sabbaloke,
ja543:158.2	Brahmā bahūbhūtapatī pajānaṁ;
ja543:158.3	Kiṁ sabbalokaṁ vidahī alakkhiṁ,
ja543:158.4	Kiṁ sabbalokaṁ na sukhiṁ akāsi.
ja543:159.1	Sace hi so issaro sabbaloke,
ja543:159.2	Brahmā bahūbhūtapatī pajānaṁ;
ja543:159.3	Māyā musāvajjamadena cāpi,
ja543:159.4	Lokaṁ adhammena kimatthamakāri.
ja543:160.1	Sace hi so issaro sabbaloke,
ja543:160.2	Brahmā bahūbhūtapatī pajānaṁ;
ja543:160.3	Adhammiko bhūtapatī ariṭṭha,
ja543:160.4	Dhamme sati yo vidahī adhammaṁ.
ja543:161.1	Kīṭā paṭaṅgā uragā ca bhekā,
ja543:161.2	Hantvā kimī sujjhati makkhikā ca;
ja543:161.3	Etepi dhammā anariyarūpā,
ja543:161.4	Kambojakānaṁ vitathā bahūnaṁ.
ja543:162.1	Sace hi so sujjhati yo hanāti,
ja543:162.2	Hatopi so saggamupeti ṭhānaṁ;
ja543:162.3	Bhovādi bhovādina mārayeyyuṁ,
ja543:162.4	Ye cāpi tesaṁ abhisaddaheyyuṁ.
ja543:163.1	Neva migā na pasū nopi gāvo,
ja543:163.2	Āyācanti attavadhāya keci;
ja543:163.3	Vipphandamāne idha jīvikatthā,
ja543:163.4	Yaññesu pāṇe pasumārabhanti.
ja543:164.1	Yūpussane pasubandhe ca bālā,
ja543:164.2	Cittehi vaṇṇehi mukhaṁ nayanti;
ja543:164.3	Ayaṁ te yūpo kāmaduho parattha,
ja543:164.4	Bhavissati sassato samparāye.
ja543:165.1	Sace ca yūpe maṇisaṅkhamuttaṁ,
ja543:165.2	Dhaññaṁ dhanaṁ rajataṁ jātarūpaṁ;
ja543:165.3	Sukkhesu kaṭṭhesu navesu cāpi,
ja543:165.4	Sace duhe tidive sabbakāme;
ja543:165.5	Tevijjasaṅghāva puthū yajeyyuṁ,
ja543:165.6	Abrāhmaṇaṁ kañci na yājayeyyuṁ.
ja543:166.1	Kuto ca yūpe maṇisaṅkhamuttaṁ,
ja543:166.2	Dhaññaṁ dhanaṁ rajataṁ jātarūpaṁ;
ja543:166.3	Sukkhesu kaṭṭhesu navesu cāpi,
ja543:166.4	Kuto duhe tidive sabbakāme.
ja543:167.1	Saṭhā ca luddā ca paluddhabālā,
ja543:167.2	Cittehi vaṇṇehi mukhaṁ nayanti;
ja543:167.3	Ādāya aggiṁ mama dehi vittaṁ,
ja543:167.4	Tato sukhī hohisi sabbakāme.
ja543:168.1	Tamaggihuttaṁ saraṇaṁ pavissa,
ja543:168.2	Cittehi vaṇṇehi mukhaṁ nayanti;
ja543:168.3	Oropayitvā kesamassuṁ nakhañca,
ja543:168.4	Vedehi vittaṁ atigāḷhayanti.
ja543:169.1	Kākā ulūkaṁva raho labhitvā,
ja543:169.2	Ekaṁ samānaṁ bahukā samecca;
ja543:169.3	Annāni bhutvā kuhakā kuhitvā,
ja543:169.4	Muṇḍaṁ karitvā yaññapathossajanti.
ja543:170.1	Evañhi so vañcito brāhmaṇehi,
ja543:170.2	Eko samāno bahukā samecca;
ja543:170.3	Te yogayogena vilumpamānā,
ja543:170.4	Diṭṭhaṁ adiṭṭhena dhanaṁ haranti.
ja543:171.1	Akāsiyā rājūhivānusiṭṭhā,
ja543:171.2	Tadassa ādāya dhanaṁ haranti;
ja543:171.3	Te tādisā corasamā asantā,
ja543:171.4	Vajjhā na haññanti ariṭṭha loke.
ja543:172.1	Indassa bāhārasi dakkhiṇāti,
ja543:172.2	Yaññesu chindanti palāsayaṭṭhiṁ;
ja543:172.3	Tañcepi saccaṁ maghavā chinnabāhu,
ja543:172.4	Kenassa indo asure jināti.
ja543:173.1	Tañceva tucchaṁ maghavā samaṅgī,
ja543:173.2	Hantā avajjho paramo sa devo;
ja543:173.3	Mantā ime brāhmaṇā tuccharūpā,
ja543:173.4	Sandiṭṭhikā vañcanā esa loke.
ja543:174.1	Mālāgiri himavā yo ca gijjho,
ja543:174.2	Sudassano nisabho kuveru;
ja543:174.3	Ete ca aññe ca nagā mahantā,
ja543:174.4	Cityā katā yaññakarehi māhu.
ja543:175.1	Yathāpakārāni hi iṭṭhakāni,
ja543:175.2	Cityā katā yaññakarehi māhu;
ja543:175.3	Na pabbatā honti tathāpakārā,
ja543:175.4	Aññā disā acalā tiṭṭhaselā.
ja543:176.1	Na iṭṭhakā honti silā cirena,
ja543:176.2	Na tattha sañjāyati ayo na lohaṁ;
ja543:176.3	Yaññañca etaṁ parivaṇṇayantā,
ja543:176.4	Cityā katā yaññakarehi māhu.
ja543:177.1	Ajjhāyakaṁ mantaguṇūpapannaṁ,
ja543:177.2	Tapassinaṁ yācayogotidhāhu;
ja543:177.3	Tīre samuddassudakaṁ sajantaṁ,
ja543:177.4	Taṁ sāgarojjhohari tenapeyyo.
ja543:178.1	Parosahassampi samantavede,
ja543:178.2	Mantūpapanne nadiyo vahanti;
ja543:178.3	Na tena byāpannarasūdakā na,
ja543:178.4	Kasmā samuddo atulo apeyyo.
ja543:179.1	Ye keci kūpā idha jīvaloke,
ja543:179.2	Loṇūdakā kūpakhaṇehi khātā;
ja543:179.3	Na brāhmaṇajjhoharaṇena tesu,
ja543:179.4	Āpo apeyyo dvirasaññu māhu.
ja543:180.1	Pure puratthā kā kassa bhariyā,
ja543:180.2	Mano manussaṁ ajanesi pubbe;
ja543:180.3	Tenāpi dhammena na koci hīno,
ja543:180.4	Evampi vosaggavibhaṅgamāhu.
ja543:181.1	Caṇḍālaputtopi adhicca vede,
ja543:181.2	Bhāseyya mante kusalo matīmā;
ja543:181.3	Na tassa muddhāpi phaleyya sattadhā,
ja543:181.4	Mantā ime attavadhāya katā.
ja543:182.1	Vācākatā giddhikatā gahītā,
ja543:182.2	Dummocayā kabyapathānupannā;
ja543:182.3	Bālāna cittaṁ visame niviṭṭhaṁ,
ja543:182.4	Tadappapaññā abhisaddahanti.
ja543:183.1	Sīhassa byagghassa ca dīpino ca,
ja543:183.2	Na vijjatī porisiyaṁ balena;
ja543:183.3	Manussabhāvo ca gavaṁva pekkho,
ja543:183.4	Jātī hi tesaṁ asamā samānā.
ja543:184.1	Sace ca rājā pathaviṁ vijitvā,
ja543:184.2	Sajīvavā assavapārisajjo;
ja543:184.3	Sayameva so sattusaṅghaṁ vijeyya,
ja543:184.4	Tassappajā niccasukhī bhaveyya.
ja543:185.1	Khattiyamantā ca tayo ca vedā,
ja543:185.2	Atthena ete samakā bhavanti;
ja543:185.3	Tesañca atthaṁ avinicchinitvā,
ja543:185.4	Na bujjhatī oghapathaṁva channaṁ.
ja543:186.1	Khattiyamantā ca tayo ca vedā,
ja543:186.2	Atthena ete samakā bhavanti;
ja543:186.3	Lābho alābho ayaso yaso ca,
ja543:186.4	Sabbeva tesaṁ catunnañca dhammā.
ja543:187.1	Yathāpi ibbhā dhanadhaññahetu,
ja543:187.2	Kammāni karonti puthū pathabyā;
ja543:187.3	Tevijjasaṅghā ca tatheva ajja,
ja543:187.4	Kammāni karonti puthū pathabyā.
ja543:188.1	Ibbhehi ye te samakā bhavanti,
ja543:188.2	Niccussukā kāmaguṇesu yuttā;
ja543:188.3	Kammāni karonti puthū pathabyā,
ja543:188.4	Tadappapaññā dvirasaññurā te”.
ja543:189.1	(…)
ja543:190.1	“Kassa bherī mudiṅgā ca,
ja543:190.2	saṅkhāpaṇavadindimā;
ja543:190.3	Purato paṭipannāni,
ja543:190.4	hāsayantā rathesabhaṁ.
ja543:191.1	Kassa kañcanapaṭṭena,
ja543:191.2	puthunā vijjuvaṇṇinā;
ja543:191.3	Yuvā kalāpasannaddho,
ja543:191.4	ko eti siriyā jalaṁ.
ja543:192.1	Ukkāmukhapahaṭṭhaṁva,
ja543:192.2	khadiraṅgārasannibhaṁ;
ja543:192.3	Mukhañca rucirā bhāti,
ja543:192.4	ko eti siriyā jalaṁ.
ja543:193.1	Kassa jambonadaṁ chattaṁ,
ja543:193.2	sasalākaṁ manoramaṁ;
ja543:193.3	Ādiccaraṁsāvaraṇaṁ,
ja543:193.4	ko eti siriyā jalaṁ.
ja543:194.1	Kassa aṅgaṁ pariggayha,
ja543:194.2	vālabījanimuttamaṁ;
ja543:194.3	Ubhato varapuññassa,
ja543:194.4	muddhani uparūpari.
ja543:195.1	Kassa pekhuṇahatthāni,
ja543:195.2	citrāni ca mudūni ca;
ja543:195.3	Kañcanamaṇidaṇḍāni,
ja543:195.4	caranti dubhato mukhaṁ.
ja543:196.1	Khadiraṅgāravaṇṇābhā,
ja543:196.2	ukkāmukhapahaṁsitā;
ja543:196.3	Kassete kuṇḍalā vaggū,
ja543:196.4	sobhanti dubhato mukhaṁ.
ja543:197.1	Kassa vātena chupitā,
ja543:197.2	niddhantā mudukāḷakā;
ja543:197.3	Sobhayanti nalāṭantaṁ,
ja543:197.4	nabhā vijjurivuggatā.
ja543:198.1	Kassa etāni akkhīni,
ja543:198.2	āyatāni puthūni ca;
ja543:198.3	Ko sobhati visālakkho,
ja543:198.4	kassetaṁ uṇṇajaṁ mukhaṁ.
ja543:199.1	Kassete lapanajātā,
ja543:199.2	suddhā saṅkhavarūpamā;
ja543:199.3	Bhāsamānassa sobhanti,
ja543:199.4	dantā kuppilasādisā.
ja543:200.1	Kassa lākhārasasamā,
ja543:200.2	hatthapādā sukhedhitā;
ja543:200.3	Ko so bimboṭṭhasampanno,
ja543:200.4	divā sūriyova bhāsati.
ja543:201.1	Himaccaye himavati,
ja543:201.2	mahāsālova pupphito;
ja543:201.3	Ko so odātapāvāro,
ja543:201.4	jayaṁ indova sobhati.
ja543:202.1	Suvaṇṇapīḷakākiṇṇaṁ,
ja543:202.2	maṇidaṇḍavicittakaṁ;
ja543:202.3	Ko so parisamogayha,
ja543:202.4	īsaṁ khaggaṁ pamuñcati.
ja543:203.1	Suvaṇṇavikatā cittā,
ja543:203.2	sukatā cittasibbanā;
ja543:203.3	Ko so omuñcate pādā,
ja543:203.4	namo katvā mahesino”.
ja543:204.1	“Dhataraṭṭhā hi te nāgā,
ja543:204.2	iddhimanto yasassino;
ja543:204.3	Samuddajāya uppannā,
ja543:204.4	nāgā ete mahiddhikā”ti.
ja543:205.1	Bhūridattajātakaṁ chaṭṭhaṁ.
ja544:0.1	Jātaka
ja544:0.2	Mahānipāta
ja544:0.3	Mūgapakkhavagga
ja544:0.4	7 Candakumārajātaka
ja544:1.1	Rājāsi luddakammo,
ja544:1.2	Ekarājā pupphavatīyā;
ja544:1.3	So pucchi brahmabandhuṁ,
ja544:1.4	Khaṇḍahālaṁ purohitaṁ mūḷhaṁ.
ja544:2.1	“Saggāna maggamācikkha,
ja544:2.2	Tvaṁsi brāhmaṇa dhammavinayakusalo;
ja544:2.3	Yathā ito vajanti sugatiṁ,
ja544:2.4	Narā puññāni katvāna”.
ja544:3.1	“Atidānaṁ daditvāna,
ja544:3.2	avajjhe deva ghātetvā;
ja544:3.3	Evaṁ vajanti sugatiṁ,
ja544:3.4	narā puññāni katvāna”.
ja544:4.1	“Kiṁ pana taṁ atidānaṁ,
ja544:4.2	Ke ca avajjhā imasmi lokasmiṁ;
ja544:4.3	Etañca kho no akkhāhi,
ja544:4.4	Yajissāmi dadāmi dānāni”.
ja544:5.1	“Puttehi deva yajitabbaṁ,
ja544:5.2	Mahesīhi negamehi ca;
ja544:5.3	Usabhehi ājāniyehi catūhi,
ja544:5.4	Sabbacatukkena deva yajitabbaṁ”.
ja544:6.1	Taṁ sutvā antepure,
ja544:6.2	Kumārā mahesiyo ca haññantu;
ja544:6.3	Eko ahosi nigghoso,
ja544:6.4	Bhismā accuggato saddo.
ja544:7.1	“Gacchatha vadetha kumāre,
ja544:7.2	Candaṁ sūriyañca bhaddasenañca;
ja544:7.3	Sūrañca vāmagottañca,
ja544:7.4	Pacurā kira hotha yaññatthāya.
ja544:8.1	Kumāriyopi vadetha,
ja544:8.2	Upasenaṁ kokilañca muditañca;
ja544:8.3	Nandañcāpi kumāriṁ,
ja544:8.4	Pacurā kira hotha yaññatthāya.
ja544:9.1	Vijayampi mayhaṁ mahesiṁ,
ja544:9.2	Erāvatiṁ kesiniṁ sunandañca;
ja544:9.3	Lakkhaṇavarūpapannā,
ja544:9.4	Pacurā kira hotha yaññatthāya.
ja544:10.1	Gahapatayo ca vadetha,
ja544:10.2	Puṇṇamukhaṁ bhaddiyaṁ siṅgālañca;
ja544:10.3	Vaḍḍhañcāpi gahapatiṁ,
ja544:10.4	Pacurā kira hotha yaññatthāya”.
ja544:11.1	Te tattha gahapatayo,
ja544:11.2	Avocisuṁ samāgatā puttadāraparikiṇṇā;
ja544:11.3	“Sabbeva sikhino deva karohi,
ja544:11.4	Atha vā no dāse sāvehi”.
ja544:12.1	“Abhayaṅkarampi me hatthiṁ,
ja544:12.2	Nāḷāgiriṁ accuggataṁ varuṇadantaṁ;
ja544:12.3	Ānetha kho ne khippaṁ,
ja544:12.4	Yaññatthāya bhavissanti.
ja544:13.1	Assaratanampi kesiṁ,
ja544:13.2	Surāmukhaṁ puṇṇakaṁ vinatakañca;
ja544:13.3	Ānetha kho ne khippaṁ,
ja544:13.4	Yaññatthāya bhavissanti.
ja544:14.1	Usabhampi yūthapatiṁ anojaṁ,
ja544:14.2	Nisabhaṁ gavampatiṁ tepi mayhaṁ ānetha;
ja544:14.3	Samūha karontu sabbaṁ,
ja544:14.4	Yajissāmi dadāmi dānāni.
ja544:15.1	Sabbaṁ paṭiyādetha,
ja544:15.2	Yaññaṁ pana uggatamhi sūriyamhi;
ja544:15.3	Āṇāpetha ca kumāre,
ja544:15.4	Abhiramantu imaṁ rattiṁ.
ja544:16.1	Sabbaṁ upaṭṭhapetha,
ja544:16.2	Yaññaṁ pana uggatamhi sūriyamhi;
ja544:16.3	Vadetha dāni kumāre,
ja544:16.4	Ajja kho pacchimā ratti”.
ja544:17.1	Taṁtaṁ mātā avaca,
ja544:17.2	Rodantī āgantvā vimānato;
ja544:17.3	“Yañño kira te putta,
ja544:17.4	Bhavissati catūhi puttehi”.
ja544:18.1	“Sabbepi mayhaṁ puttā cattā,
ja544:18.2	candasmiṁ haññamānasmiṁ;
ja544:18.3	Puttehi yaññaṁ yajitvāna,
ja544:18.4	sugatiṁ saggaṁ gamissāmi”.
ja544:19.1	“Mā taṁ putta saddahesi,
ja544:19.2	Sugati kira hoti puttayaññena;
ja544:19.3	Nirayāneso maggo,
ja544:19.4	Neso maggo hi saggānaṁ.
ja544:20.1	Dānāni dehi koṇḍañña,
ja544:20.2	Ahiṁsā sabbabhūtabhabyānaṁ;
ja544:20.3	Esa maggo sugatiyā,
ja544:20.4	Na ca maggo puttayaññena”.
ja544:21.1	“Ācariyānaṁ vacanā,
ja544:21.2	Ghātessaṁ candañca sūriyañca;
ja544:21.3	Puttehi yaññaṁ yajitvāna duccajehi,
ja544:21.4	Sugatiṁ saggaṁ gamissāmi”.
ja544:22.1	Taṁtaṁ pitāpi avaca,
ja544:22.2	Vasavattī orasaṁ sakaṁ puttaṁ;
ja544:22.3	“Yañño kira te putta,
ja544:22.4	Bhavissati catūhi puttehi”.
ja544:23.1	“Sabbepi mayhaṁ puttā cattā,
ja544:23.2	candasmiṁ haññamānasmiṁ;
ja544:23.3	Puttehi yaññaṁ yajitvāna,
ja544:23.4	sugatiṁ saggaṁ gamissāmi”.
ja544:24.1	“Mā taṁ putta saddahesi,
ja544:24.2	Sugati kira hoti puttayaññena;
ja544:24.3	Nirayāneso maggo,
ja544:24.4	Neso maggo hi saggānaṁ.
ja544:25.1	Dānāni dehi koṇḍañña,
ja544:25.2	Ahiṁsā sabbabhūtabhabyānaṁ;
ja544:25.3	Esa maggo sugatiyā,
ja544:25.4	Na ca maggo puttayaññena”.
ja544:26.1	“Ācariyānaṁ vacanā,
ja544:26.2	Ghātessaṁ candañca sūriyañca;
ja544:26.3	Puttehi yaññaṁ yajitvāna duccajehi,
ja544:26.4	Sugatiṁ saggaṁ gamissāmi”.
ja544:27.1	“Dānāni dehi koṇḍañña,
ja544:27.2	Ahiṁsā sabbabhūtabhabyānaṁ;
ja544:27.3	Puttaparivuto tuvaṁ,
ja544:27.4	Raṭṭhaṁ janapadañca pālehi”.
ja544:28.1	“Mā no deva avadhi,
ja544:28.2	Dāse no dehi khaṇḍahālassa;
ja544:28.3	Api nigaḷabandhakāpi,
ja544:28.4	Hatthī asse ca pālema.
ja544:29.1	Mā no deva avadhi,
ja544:29.2	Dāse no dehi khaṇḍahālassa;
ja544:29.3	Api nigaḷabandhakāpi,
ja544:29.4	Hatthichakaṇāni ujjhema.
ja544:30.1	Mā no deva avadhi,
ja544:30.2	Dāse no dehi khaṇḍahālassa;
ja544:30.3	Api nigaḷabandhakāpi,
ja544:30.4	Assachakaṇāni ujjhema.
ja544:31.1	Mā no deva avadhi,
ja544:31.2	Dāse no dehi khaṇḍahālassa;
ja544:31.3	Yassa honti tava kāmā,
ja544:31.4	Api raṭṭhā pabbājitā;
ja544:31.5	Bhikkhācariyaṁ carissāma”.
ja544:32.1	“Dukkhaṁ kho me janayatha,
ja544:32.2	Vilapantā jīvitassa kāmā hi;
ja544:32.3	Muñcetha dāni kumāre,
ja544:32.4	Alampi me hotu puttayaññena”.
ja544:33.1	“Pubbeva khosi me vutto,
ja544:33.2	Dukkaraṁ durabhisambhavañcetaṁ;
ja544:33.3	Atha no upakkhaṭassa yaññassa,
ja544:33.4	Kasmā karosi vikkhepaṁ.
ja544:34.1	Sabbe vajanti sugatiṁ,
ja544:34.2	Ye yajanti yepi yājenti;
ja544:34.3	Ye cāpi anumodanti,
ja544:34.4	Yajantānaṁ edisaṁ mahāyaññaṁ”.
ja544:35.1	“Atha kissa jano pubbe,
ja544:35.2	Sotthānaṁ brāhmaṇe avācesi;
ja544:35.3	Atha no akāraṇasmā,
ja544:35.4	Yaññatthāya deva ghātesi.
ja544:36.1	Pubbeva no daharakāle,
ja544:36.2	na hanesi na ghātesi;
ja544:36.3	Daharamhā yobbanaṁ pattā,
ja544:36.4	adūsakā tāta haññāma.
ja544:37.1	Hatthigate assagate,
ja544:37.2	Sannaddhe passa no mahārāja;
ja544:37.3	Yuddhe vā yujjhamāne vā,
ja544:37.4	Na hi mādisā sūrā honti yaññatthāya.
ja544:38.1	Paccante vāpi kupite,
ja544:38.2	Aṭavīsu vā mādise niyojenti;
ja544:38.3	Atha no akāraṇasmā,
ja544:38.4	Abhūmiyaṁ tāta haññāma.
ja544:39.1	Yāpi hi tā sakuṇiyo,
ja544:39.2	Vasanti tiṇagharāni katvāna;
ja544:39.3	Tāsampi piyā puttā,
ja544:39.4	Atha no tvaṁ deva ghātesi.
ja544:40.1	Mā tassa saddahesi,
ja544:40.2	Na maṁ khaṇḍahālo ghāteyya;
ja544:40.3	Mamañhi so ghātetvāna,
ja544:40.4	Anantarā tampi deva ghāteyya.
ja544:41.1	Gāmavaraṁ nigamavaraṁ dadanti,
ja544:41.2	Bhogampissa mahārāja;
ja544:41.3	Athaggapiṇḍikāpi,
ja544:41.4	Kule kule hete bhuñjanti.
ja544:42.1	Tesampi tādisānaṁ,
ja544:42.2	Icchanti dubbhituṁ mahārāja;
ja544:42.3	Yebhuyyena ete,
ja544:42.4	Akataññuno brāhmaṇā deva.
ja544:43.1	Mā no deva avadhi,
ja544:43.2	Dāse no dehi khaṇḍahālassa;
ja544:43.3	Api nigaḷabandhakāpi,
ja544:43.4	Hatthī asse ca pālema.
ja544:44.1	Mā no deva avadhi,
ja544:44.2	Dāse no dehi khaṇḍahālassa;
ja544:44.3	Api nigaḷabandhakāpi,
ja544:44.4	Hatthichakaṇāni ujjhema.
ja544:45.1	Mā no deva avadhi,
ja544:45.2	Dāse no dehi khaṇḍahālassa;
ja544:45.3	Api nigaḷabandhakāpi,
ja544:45.4	Assachakaṇāni ujjhema.
ja544:46.1	Mā no deva avadhi,
ja544:46.2	Dāse no dehi khaṇḍahālassa;
ja544:46.3	Yassa honti tava kāmā,
ja544:46.4	Api raṭṭhā pabbājitā;
ja544:46.5	Bhikkhācariyaṁ carissāma”.
ja544:47.1	“Dukkhaṁ kho me janayatha,
ja544:47.2	Vilapantā jīvitassa kāmā hi;
ja544:47.3	Muñcetha dāni kumāre,
ja544:47.4	Alampi me hotu puttayaññena”.
ja544:48.1	“Pubbeva khosi me vutto,
ja544:48.2	Dukkaraṁ durabhisambhavañcetaṁ;
ja544:48.3	Atha no upakkhaṭassa yaññassa,
ja544:48.4	Kasmā karosi vikkhepaṁ.
ja544:49.1	Sabbe vajanti sugatiṁ,
ja544:49.2	Ye yajanti yepi yājenti;
ja544:49.3	Ye cāpi anumodanti,
ja544:49.4	Yajantānaṁ edisaṁ mahāyaññaṁ”.
ja544:50.1	“Yadi kira yajitvā puttehi,
ja544:50.2	Devalokaṁ ito cutā yanti;
ja544:50.3	Brāhmaṇo tāva yajatu,
ja544:50.4	Pacchāpi yajasi tuvaṁ rājā.
ja544:51.1	Yadi kira yajitvā puttehi,
ja544:51.2	Devalokaṁ ito cutā yanti;
ja544:51.3	Esveva khaṇḍahālo,
ja544:51.4	Yajataṁ sakehi puttehi.
ja544:52.1	Evaṁ jānanto khaṇḍahālo,
ja544:52.2	kiṁ puttake na ghātesi;
ja544:52.3	Sabbañca ñātijanaṁ,
ja544:52.4	attānañca na ghātesi.
ja544:53.1	Sabbe vajanti nirayaṁ,
ja544:53.2	Ye yajanti yepi yājenti;
ja544:53.3	Ye cāpi anumodanti,
ja544:53.4	Yajantānaṁ edisaṁ mahāyaññaṁ.
ja544:54.1	Sace hi so sujjhati yo hanāti,
ja544:54.2	Hatopi so saggamupeti ṭhānaṁ;
ja544:54.3	Bhovādi bhovādina mārayeyyuṁ,
ja544:54.4	Ye cāpi tesaṁ abhisaddaheyyuṁ.
ja544:55.1	Kathañca kira puttakāmāyo,
ja544:55.2	Gahapatayo gharaṇiyo ca;
ja544:55.3	Nagaramhi na uparavanti rājānaṁ,
ja544:55.4	‘Mā ghātayi orasaṁ puttaṁ’.
ja544:56.1	Kathañca kira puttakāmāyo,
ja544:56.2	Gahapatayo gharaṇiyo ca;
ja544:56.3	Nagaramhi na uparavanti rājānaṁ,
ja544:56.4	‘Mā ghātayi atrajaṁ puttaṁ’.
ja544:57.1	Rañño camhi atthakāmo,
ja544:57.2	Hito ca sabbajanapadassa;
ja544:57.3	Na koci assa paṭighaṁ,
ja544:57.4	Mayā jānapado na pavedeti.
ja544:58.1	Gacchatha vo gharaṇiyo,
ja544:58.2	Tātañca vadetha khaṇḍahālañca;
ja544:58.3	‘Mā ghātetha kumāre,
ja544:58.4	Adūsake sīhasaṅkāse’.
ja544:59.1	Gacchatha vo gharaṇiyo,
ja544:59.2	Tātañca vadetha khaṇḍahālañca;
ja544:59.3	‘Mā ghātetha kumāre,
ja544:59.4	Apekkhite sabbalokassa’.
ja544:60.1	Yannūnāhaṁ jāyeyyaṁ,
ja544:60.2	Rathakārakulesu vā;
ja544:60.3	Pukkusakulesu vā vessesu vā jāyeyyaṁ,
ja544:60.4	Na hajja maṁ rāja yaññe ghāteyya”.
ja544:61.1	“Sabbā sīmantiniyo gacchatha,
ja544:61.2	Ayyassa khaṇḍahālassa;
ja544:61.3	Pādesu nipatatha,
ja544:61.4	Aparādhāhaṁ na passāmi.
ja544:62.1	Sabbā sīmantiniyo gacchatha,
ja544:62.2	Ayyassa khaṇḍahālassa;
ja544:62.3	Pādesu nipatatha,
ja544:62.4	Kinte bhante mayaṁ adūsema”.
ja544:63.1	Kapaṇā vilapati selā,
ja544:63.2	Disvāna bhātare upanītatte;
ja544:63.3	“Yañño kira me ukkhipito,
ja544:63.4	Tātena saggakāmena”.
ja544:64.1	Āvatti parivatti ca,
ja544:64.2	vasulo sammukhā rañño;
ja544:64.3	“Mā no pitaraṁ avadhi,
ja544:64.4	daharamhāyobbanaṁ pattā”.
ja544:65.1	“Eso te vasula pitā,
ja544:65.2	Samehi pitarā saha;
ja544:65.3	Dukkhaṁ kho me janayasi,
ja544:65.4	Vilapanto antepurasmiṁ;
ja544:65.5	Muñcetha dāni kumāre,
ja544:65.6	Alampi me hotu puttayaññena”.
ja544:66.1	“Pubbeva khosi me vutto,
ja544:66.2	Dukkaraṁ durabhisambhavañcetaṁ;
ja544:66.3	Atha no upakkhaṭassa yaññassa,
ja544:66.4	Kasmā karosi vikkhepaṁ.
ja544:67.1	Sabbe vajanti sugatiṁ,
ja544:67.2	Ye yajanti yepi yājenti;
ja544:67.3	Ye cāpi anumodanti,
ja544:67.4	Yajantānaṁ edisaṁ mahāyaññaṁ.
ja544:68.1	Sabbaratanassa yañño upakkhaṭo,
ja544:68.2	Ekarāja tava paṭiyatto;
ja544:68.3	Abhinikkhamassu deva,
ja544:68.4	Saggaṁ gato tvaṁ pamodissasi”.
ja544:69.1	Daharā sattasatā etā,
ja544:69.2	Candakumārassa bhariyāyo;
ja544:69.3	Kese pakiritvāna,
ja544:69.4	Rodantiyo maggamanuyāyisuṁ.
ja544:70.1	Aparā pana sokena,
ja544:70.2	Nikkhantā nandane viya devā;
ja544:70.3	Kese pakiritvāna,
ja544:70.4	Rodantiyo maggamanuyāyiṁsu.
ja544:71.1	“Kāsikasucivatthadharā,
ja544:71.2	Kuṇḍalino agalucandanavilittā;
ja544:71.3	Niyyanti candasūriyā,
ja544:71.4	Yaññatthāya ekarājassa.
ja544:72.1	Kāsikasucivatthadharā,
ja544:72.2	Kuṇḍalino agalucandanavilittā;
ja544:72.3	Niyyanti candasūriyā,
ja544:72.4	Mātu katvā hadayasokaṁ.
ja544:73.1	Kāsikasucivatthadharā,
ja544:73.2	Kuṇḍalino agalucandanavilittā;
ja544:73.3	Niyyanti candasūriyā,
ja544:73.4	Janassa katvā hadayasokaṁ.
ja544:74.1	Maṁsarasabhojanā nhāpakasunhāpitā,
ja544:74.2	Kuṇḍalino agalucandanavilittā;
ja544:74.3	Niyyanti candasūriyā,
ja544:74.4	Yaññatthāya ekarājassa.
ja544:75.1	Maṁsarasabhojanā nhāpakasunhāpitā,
ja544:75.2	Kuṇḍalino agalucandanavilittā;
ja544:75.3	Niyyanti candasūriyā,
ja544:75.4	Mātu katvā hadayasokaṁ.
ja544:76.1	Maṁsarasabhojanā nhāpakasunhāpitā,
ja544:76.2	Kuṇḍalino agalucandanavilittā;
ja544:76.3	Niyyanti candasūriyā,
ja544:76.4	Janassa katvā hadayasokaṁ.
ja544:77.1	Yassu pubbe hatthivaradhuragate,
ja544:77.2	Hatthīhi anuvajanti;
ja544:77.3	Tyajja candasūriyā,
ja544:77.4	Ubhova pattikā yanti.
ja544:78.1	Yassu pubbe assavaradhuragate,
ja544:78.2	Assehi anuvajanti;
ja544:78.3	Tyajja candasūriyā,
ja544:78.4	Ubhova pattikā yanti.
ja544:79.1	Yassu pubbe rathavaradhuragate,
ja544:79.2	Rathehi anuvajanti;
ja544:79.3	Tyajja candasūriyā,
ja544:79.4	Ubhova pattikā yanti.
ja544:80.1	Yehissu pubbe niyyaṁsu,
ja544:80.2	Tapanīyakappanehi turaṅgehi;
ja544:80.3	Tyajja candasūriyā,
ja544:80.4	Ubhova pattikā yanti”.
ja544:81.1	“Yadi sakuṇi maṁsamicchasi,
ja544:81.2	Ḍayassu pubbena pupphavatiyā;
ja544:81.3	Yajatettha ekarājā,
ja544:81.4	Sammūḷho catūhi puttehi.
ja544:82.1	Yadi sakuṇi maṁsamicchasi,
ja544:82.2	Ḍayassu pubbena pupphavatiyā;
ja544:82.3	Yajatettha ekarājā,
ja544:82.4	Sammūḷho catūhi kaññāhi.
ja544:83.1	Yadi sakuṇi maṁsamicchasi,
ja544:83.2	Ḍayassu pubbena pupphavatiyā;
ja544:83.3	Yajatettha ekarājā,
ja544:83.4	Sammūḷho catūhi mahesīhi.
ja544:84.1	Yadi sakuṇi maṁsamicchasi,
ja544:84.2	Ḍayassu pubbena pupphavatiyā;
ja544:84.3	Yajatettha ekarājā,
ja544:84.4	Sammūḷho catūhi gahapatīhi.
ja544:85.1	Yadi sakuṇi maṁsamicchasi,
ja544:85.2	Ḍayassu pubbena pupphavatiyā;
ja544:85.3	Yajatettha ekarājā,
ja544:85.4	Sammūḷho catūhi hatthīhi.
ja544:86.1	Yadi sakuṇi maṁsamicchasi,
ja544:86.2	Ḍayassu pubbena pupphavatiyā;
ja544:86.3	Yajatettha ekarājā,
ja544:86.4	Sammūḷho catūhi assehi.
ja544:87.1	Yadi sakuṇi maṁsamicchasi,
ja544:87.2	Ḍayassu pubbena pupphavatiyā;
ja544:87.3	Yajatettha ekarājā,
ja544:87.4	Sammūḷho catūhi usabhehi.
ja544:88.1	Yadi sakuṇi maṁsamicchasi,
ja544:88.2	Ḍayassu pubbena pupphavatiyā;
ja544:88.3	Yajatettha ekarājā,
ja544:88.4	Sammūḷho sabbacatukkena.
ja544:89.1	Ayamassa pāsādo,
ja544:89.2	Idaṁ antepuraṁ suramaṇīyaṁ;
ja544:89.3	Tedāni ayyaputtā,
ja544:89.4	Cattāro vadhāya ninnītā.
ja544:90.1	Idamassa kūṭāgāraṁ,
ja544:90.2	Sovaṇṇaṁ pupphamalyavikiṇṇaṁ;
ja544:90.3	Tedāni ayyaputtā,
ja544:90.4	Cattāro vadhāya ninnītā.
ja544:91.1	Idamassa uyyānaṁ,
ja544:91.2	Supupphitaṁ sabbakālikaṁ rammaṁ;
ja544:91.3	Tedāni ayyaputtā,
ja544:91.4	Cattāro vadhāya ninnītā.
ja544:92.1	Idamassa asokavanaṁ,
ja544:92.2	Supupphitaṁ sabbakālikaṁ rammaṁ;
ja544:92.3	Tedāni ayyaputtā,
ja544:92.4	Cattāro vadhāya ninnītā.
ja544:93.1	Idamassa kaṇikāravanaṁ,
ja544:93.2	Supupphitaṁ sabbakālikaṁ rammaṁ;
ja544:93.3	Tedāni ayyaputtā,
ja544:93.4	Cattāro vadhāya ninnītā.
ja544:94.1	Idamassa pāṭalivanaṁ,
ja544:94.2	Supupphitaṁ sabbakālikaṁ rammaṁ;
ja544:94.3	Tedāni ayyaputtā,
ja544:94.4	Cattāro vadhāya ninnītā.
ja544:95.1	Idamassa ambavanaṁ,
ja544:95.2	Supupphitaṁ sabbakālikaṁ rammaṁ;
ja544:95.3	Tedāni ayyaputtā,
ja544:95.4	Cattāro vadhāya ninnītā.
ja544:96.1	Ayamassa pokkharaṇī,
ja544:96.2	Sañchannā padumapuṇḍarīkehi;
ja544:96.3	Nāvā ca sovaṇṇavikatā,
ja544:96.4	Pupphavalliyā cittā suramaṇīyā;
ja544:96.5	Tedāni ayyaputtā,
ja544:96.6	Cattāro vadhāya ninnītā.
ja544:97.1	Idamassa hatthiratanaṁ,
ja544:97.2	Erāvaṇo gajo balī dantī;
ja544:97.3	Tedāni ayyaputtā,
ja544:97.4	Cattāro vadhāya ninnītā.
ja544:98.1	Idamassa assaratanaṁ,
ja544:98.2	ekakhuro asso;
ja544:98.3	Tedāni ayyaputtā,
ja544:98.4	cattāro vadhāya ninnītā.
ja544:99.1	Ayamassa assaratho,
ja544:99.2	Sāḷiya nigghoso subho ratanavicitto;
ja544:99.3	Yatthassu ayyaputtā,
ja544:99.4	Sobhiṁsu nandane viya devā;
ja544:99.5	Tedāni ayyaputtā,
ja544:99.6	Cattāro vadhāya ninnītā.
ja544:100.1	Kathaṁ nāma sāmasamasundarehi,
ja544:100.2	Candanamudukagattehi;
ja544:100.3	Rājā yajissate yaññaṁ,
ja544:100.4	Sammūḷho catūhi puttehi.
ja544:101.1	Kathaṁ nāma sāmasamasundarāhi,
ja544:101.2	Candanamudukagattāhi;
ja544:101.3	Rājā yajissate yaññaṁ,
ja544:101.4	Sammūḷho catūhi kaññāhi.
ja544:102.1	Kathaṁ nāma sāmasamasundarāhi,
ja544:102.2	Candanamudukagattāhi;
ja544:102.3	Rājā yajissate yaññaṁ,
ja544:102.4	Sammūḷho catūhi mahesīhi.
ja544:103.1	Kathaṁ nāma sāmasamasundarehi,
ja544:103.2	Candanamudukagattehi;
ja544:103.3	Rājā yajissate yaññaṁ,
ja544:103.4	Sammūḷho catūhi gahapatīhi.
ja544:104.1	Yathā honti gāmanigamā,
ja544:104.2	Suññā amanussakā brahāraññā;
ja544:104.3	Tathā hessati pupphavatiyā,
ja544:104.4	Yiṭṭhesu candasūriyesu”.
ja544:105.1	“Ummattikā bhavissāmi,
ja544:105.2	Bhūnahatā paṁsunā ca parikiṇṇā;
ja544:105.3	Sace candavaraṁ hanti,
ja544:105.4	Pāṇā me deva rujjhanti.
ja544:106.1	Ummattikā bhavissāmi,
ja544:106.2	Bhūnahatā paṁsunā ca parikiṇṇā;
ja544:106.3	Sace sūriyavaraṁ hanti,
ja544:106.4	Pāṇā me deva rujjhanti”.
ja544:107.1	“Kinnumā na ramāpeyyuṁ,
ja544:107.2	Aññamaññaṁ piyaṁvadā;
ja544:107.3	Ghaṭṭikā uparikkhī ca,
ja544:107.4	Pokkharaṇī ca bhārikā;
ja544:107.5	Candasūriyesu naccantiyo,
ja544:107.6	Samā tāsaṁ na vijjati”.
ja544:108.1	“Imaṁ mayhaṁ hadayasokaṁ,
ja544:108.2	Paṭimuñcatu khaṇḍahāla tava mātā;
ja544:108.3	Yo mayhaṁ hadayasoko,
ja544:108.4	Candamhi vadhāya ninnīte.
ja544:109.1	Imaṁ mayhaṁ hadayasokaṁ,
ja544:109.2	Paṭimuñcatu khaṇḍahāla tava mātā;
ja544:109.3	Yo mayhaṁ hadayasoko,
ja544:109.4	Sūriyamhi vadhāya ninnīte.
ja544:110.1	Imaṁ mayhaṁ hadayasokaṁ,
ja544:110.2	Paṭimuñcatu khaṇḍahāla tava jāyā;
ja544:110.3	Yo mayhaṁ hadayasoko,
ja544:110.4	Candamhi vadhāya ninnīte.
ja544:111.1	Imaṁ mayhaṁ hadayasokaṁ,
ja544:111.2	Paṭimuñcatu khaṇḍahāla tava jāyā;
ja544:111.3	Yo mayhaṁ hadayasoko,
ja544:111.4	Sūriyamhi vadhāya ninnīte.
ja544:112.1	Mā ca putte mā ca patiṁ,
ja544:112.2	Addakkhi khaṇḍahāla tava mātā;
ja544:112.3	Yo ghātesi kumāre,
ja544:112.4	Adūsake sīhasaṅkāse.
ja544:113.1	Mā ca putte mā ca patiṁ,
ja544:113.2	Addakkhi khaṇḍahāla tava mātā;
ja544:113.3	Yo ghātesi kumāre,
ja544:113.4	Apekkhite sabbalokassa.
ja544:114.1	Mā ca putte mā ca patiṁ,
ja544:114.2	Addakkhi khaṇḍahāla tava jāyā;
ja544:114.3	Yo ghātesi kumāre,
ja544:114.4	Adūsake sīhasaṅkāse.
ja544:115.1	Mā ca putte mā ca patiṁ,
ja544:115.2	Addakkhi khaṇḍahāla tava jāyā;
ja544:115.3	Yo ghātesi kumāre,
ja544:115.4	Apekkhite sabbalokassa”.
ja544:116.1	“Mā no deva avadhi,
ja544:116.2	Dāse no dehi khaṇḍahālassa;
ja544:116.3	Api nigaḷabandhakāpi,
ja544:116.4	Hatthī asse ca pālema.
ja544:117.1	Mā no deva avadhi,
ja544:117.2	Dāse no dehi khaṇḍahālassa;
ja544:117.3	Api nigaḷabandhakāpi,
ja544:117.4	Hatthichakaṇāni ujjhema.
ja544:118.1	Mā no deva avadhi,
ja544:118.2	Dāse no dehi khaṇḍahālassa;
ja544:118.3	Api nigaḷabandhakāpi,
ja544:118.4	Assachakaṇāni ujjhema.
ja544:119.1	Mā no deva avadhi,
ja544:119.2	Dāse no dehi khaṇḍahālassa;
ja544:119.3	Yassa honti tava kāmā,
ja544:119.4	Api raṭṭhā pabbājitā;
ja544:119.5	Bhikkhācariyaṁ carissāma.
ja544:120.1	Dibbaṁ deva upayācanti,
ja544:120.2	puttatthikāpi daliddā;
ja544:120.3	Paṭibhānānipi hitvā,
ja544:120.4	putte na labhanti ekaccā.
ja544:121.1	Āsīsikāni karonti,
ja544:121.2	Puttā no jāyantu tato paputtā;
ja544:121.3	Atha no akāraṇasmā,
ja544:121.4	Yaññatthāya deva ghātesi.
ja544:122.1	Upayācitakena puttaṁ labhanti,
ja544:122.2	Mā tāta no aghātesi;
ja544:122.3	Mā kicchāladdhakehi puttehi,
ja544:122.4	Yajittho imaṁ yaññaṁ.
ja544:123.1	Upayācitakena puttaṁ labhanti,
ja544:123.2	Mā tāta no aghātesi;
ja544:123.3	Mā kapaṇaladdhakehi puttehi,
ja544:123.4	Ammāya no vippavāsesi.
ja544:124.1	Bahudukkhā posiya candaṁ,
ja544:124.2	amma tuvaṁ jīyase puttaṁ;
ja544:124.3	Vandāmi kho te pāde,
ja544:124.4	labhataṁ tāto paralokaṁ.
ja544:125.1	Handa ca maṁ upaguyha,
ja544:125.2	Pāde te amma vandituṁ dehi;
ja544:125.3	Gacchāmi dāni pavāsaṁ,
ja544:125.4	Yaññatthāya ekarājassa.
ja544:126.1	Handa ca maṁ upagūha,
ja544:126.2	Pāde te amma vandituṁ dehi;
ja544:126.3	Gacchāmi dāni pavāsaṁ,
ja544:126.4	Mātu katvā hadayasokaṁ.
ja544:127.1	Handa ca maṁ upagūha,
ja544:127.2	Pāde te amma vandituṁ dehi;
ja544:127.3	Gacchāmi dāni pavāsaṁ,
ja544:127.4	Janassa katvā hadayasokaṁ”.
ja544:128.1	“Handa ca padumapattānaṁ,
ja544:128.2	Moḷiṁ bandhassu gotamiputta;
ja544:128.3	Campakadalamissāyo,
ja544:128.4	Esā te porāṇikā pakati.
ja544:129.1	Handa ca vilepanaṁ te,
ja544:129.2	Pacchimakaṁ candanaṁ vilimpassu;
ja544:129.3	Yehi ca suvilitto,
ja544:129.4	Sobhasi rājaparisāyaṁ.
ja544:130.1	Handa ca mudukāni vatthāni,
ja544:130.2	Pacchimakaṁ kāsikaṁ nivāsehi;
ja544:130.3	Yehi ca sunivattho,
ja544:130.4	Sobhasi rājaparisāyaṁ.
ja544:131.1	Muttāmaṇikanakavibhūsitāni,
ja544:131.2	Gaṇhassu hatthābharaṇāni;
ja544:131.3	Yehi ca hatthābharaṇehi,
ja544:131.4	Sobhasi rājaparisāyaṁ”.
ja544:132.1	“Na hi nūnāyaṁ raṭṭhapālo,
ja544:132.2	Bhūmipati janapadassa dāyādo;
ja544:132.3	Lokissaro mahanto,
ja544:132.4	Putte snehaṁ janayati”.
ja544:133.1	“Mayhampi piyā puttā,
ja544:133.2	Attā ca piyo tumhe ca bhariyāyo;
ja544:133.3	Saggañca patthayāno,
ja544:133.4	Tenāhaṁ ghātayissāmi”.
ja544:134.1	“Maṁ paṭhamaṁ ghātehi,
ja544:134.2	Mā me hadayaṁ dukkhaṁ phālesi;
ja544:134.3	Alaṅkato sundarako,
ja544:134.4	Putto deva tava sukhumālo.
ja544:135.1	Handayya maṁ hanassu,
ja544:135.2	Paraloke candakena hessāmi;
ja544:135.3	Puññaṁ karassu vipulaṁ,
ja544:135.4	Vicarāma ubhopi paraloke”.
ja544:136.1	“Mā tvaṁ cande rucci maraṇaṁ,
ja544:136.2	Bahukā tava devarā visālakkhi;
ja544:136.3	Te taṁ ramayissanti,
ja544:136.4	Yiṭṭhasmiṁ gotamiputte”.
ja544:137.1	Evaṁ vutte, candā attānaṁ,
ja544:137.2	hanti hatthatalakehi;
ja544:137.3	“Alamettha jīvitena,
ja544:137.4	pissāmi visaṁ marissāmi.
ja544:138.1	Na hi nūnimassa rañño,
ja544:138.2	Mittāmaccā ca vijjare suhadā;
ja544:138.3	Ye na vadanti rājānaṁ,
ja544:138.4	Mā ghātayi orase putte.
ja544:139.1	Na hi nūnimassa rañño,
ja544:139.2	Ñātī mittā ca vijjare suhadā;
ja544:139.3	Ye na vadanti rājānaṁ,
ja544:139.4	Mā ghātayi atraje putte.
ja544:140.1	Ime tepi mayhaṁ puttā,
ja544:140.2	Guṇino kāyūradhārino rāja;
ja544:140.3	Tehipi yajassu yaññaṁ,
ja544:140.4	Atha muñcatu gotamiputte.
ja544:141.1	Bilasataṁ maṁ katvāna,
ja544:141.2	Yajassu sattadhā mahārāja;
ja544:141.3	Mā jeṭṭhaputtamavadhi,
ja544:141.4	Adūsakaṁ sīhasaṅkāsaṁ.
ja544:142.1	Bilasataṁ maṁ katvāna,
ja544:142.2	Yajassu sattadhā mahārāja;
ja544:142.3	Mā jeṭṭhaputtamavadhi,
ja544:142.4	Apekkhitaṁ sabbalokassa”.
ja544:143.1	“Bahukā tava dinnābharaṇā,
ja544:143.2	Uccāvacā subhaṇitamhi;
ja544:143.3	Muttāmaṇiveḷuriyā,
ja544:143.4	Etaṁ te pacchimakaṁ dānaṁ”.
ja544:144.1	“Yesaṁ pubbe khandhesu,
ja544:144.2	Phullā mālāguṇā vivattiṁsu;
ja544:144.3	Tesajjapi sunisito,
ja544:144.4	Nettiṁso vivattissati khandhesu.
ja544:145.1	Yesaṁ pubbe khandhesu,
ja544:145.2	Cittā mālāguṇā vivattiṁsu;
ja544:145.3	Tesajjapi sunisito,
ja544:145.4	Nettiṁso vivattissati khandhesu.
ja544:146.1	Aciraṁ vata nettiṁso,
ja544:146.2	Vivattissati rājaputtānaṁ khandhesu;
ja544:146.3	Atha mama hadayaṁ na phalati,
ja544:146.4	Tāva daḷhabandhañca me āsi.
ja544:147.1	Kāsikasucivatthadharā,
ja544:147.2	Kuṇḍalino agalucandanavilittā;
ja544:147.3	Niyyātha candasūriyā,
ja544:147.4	Yaññatthāya ekarājassa.
ja544:148.1	Kāsikasucivatthadharā,
ja544:148.2	Kuṇḍalino agalucandanavilittā;
ja544:148.3	Niyyātha candasūriyā,
ja544:148.4	Mātu katvā hadayasokaṁ.
ja544:149.1	Kāsikasucivatthadharā,
ja544:149.2	Kuṇḍalino agalucandanavilittā;
ja544:149.3	Niyyātha candasūriyā,
ja544:149.4	Janassa katvā hadayasokaṁ.
ja544:150.1	Maṁsarasabhojanā nhāpakasunhāpitā,
ja544:150.2	Kuṇḍalino agalucandanavilittā;
ja544:150.3	Niyyātha candasūriyā,
ja544:150.4	Yaññatthāya ekarājassa.
ja544:151.1	Maṁsarasabhojanā nhāpakasunhāpitā,
ja544:151.2	Kuṇḍalino agalucandanavilittā;
ja544:151.3	Niyyātha candasūriyā,
ja544:151.4	Mātu katvā hadayasokaṁ.
ja544:152.1	Maṁsarasabhojanā nhāpakasunhāpitā,
ja544:152.2	Kuṇḍalino agalucandanavilittā;
ja544:152.3	Niyyātha candasūriyā,
ja544:152.4	Janassa katvā hadayasokaṁ”.
ja544:153.1	Sabbasmiṁ upakkhaṭasmiṁ,
ja544:153.2	Nisīdite candasmiṁ yaññatthāya;
ja544:153.3	Pañcālarājadhītā pañjalikā,
ja544:153.4	Sabbaparisāya samanupariyāyi.
ja544:154.1	“Yena saccena khaṇḍahālo,
ja544:154.2	Pāpakammaṁ karoti dummedho;
ja544:154.3	Etena saccavajjena,
ja544:154.4	Samaṅginī sāmikena homi.
ja544:155.1	Ye idhatthi amanussā,
ja544:155.2	Yāni ca yakkhabhūtabhabyāni;
ja544:155.3	Karontu me veyyāvaṭikaṁ,
ja544:155.4	Samaṅginī sāmikena homi.
ja544:156.1	Yā devatā idhāgatā,
ja544:156.2	Yāni ca yakkhabhūtabhabyāni;
ja544:156.3	Saraṇesiniṁ anāthaṁ tāyatha maṁ,
ja544:156.4	Yācāmahaṁ pati māhaṁ ajeyyaṁ”.
ja544:157.1	Taṁ sutvā amanusso,
ja544:157.2	Ayokūṭaṁ paribbhametvāna;
ja544:157.3	Bhayamassa janayanto,
ja544:157.4	Rājānaṁ idamavoca.
ja544:158.1	“Bujjhassu kho rājakali,
ja544:158.2	Mā tāhaṁ matthakaṁ nitāḷesiṁ;
ja544:158.3	Mā jeṭṭhaputtamavadhi,
ja544:158.4	Adūsakaṁ sīhasaṅkāsaṁ.
ja544:159.1	Ko te diṭṭho rājakali,
ja544:159.2	Puttabhariyāyo haññamānāyo;
ja544:159.3	Seṭṭhi ca gahapatayo,
ja544:159.4	Adūsakā saggakāmā hi”.
ja544:160.1	Taṁ sutvā khaṇḍahālo,
ja544:160.2	Rājā ca abbhutamidaṁ disvāna;
ja544:160.3	Sabbesaṁ bandhanāni mocesuṁ,
ja544:160.4	Yathā taṁ anupaghātaṁ.
ja544:161.1	Sabbesu vippamuttesu,
ja544:161.2	Ye tattha samāgatā tadā āsuṁ;
ja544:161.3	Sabbe ekekaleḍḍukamadaṁsu,
ja544:161.4	Esa vadho khaṇḍahālassa.
ja544:162.1	Sabbe paviṭṭhā nirayaṁ,
ja544:162.2	Yathā taṁ pāpakaṁ karitvāna;
ja544:162.3	Na hi pāpakammaṁ katvā,
ja544:162.4	Labbhā sugatiṁ ito gantuṁ.
ja544:163.1	Sabbesu vippamuttesu,
ja544:163.2	Ye tattha samāgatā tadā āsuṁ;
ja544:163.3	Candaṁ abhisiñciṁsu,
ja544:163.4	Samāgatā rājaparisā ca.
ja544:164.1	Sabbesu vippamuttesu,
ja544:164.2	Ye tattha samāgatā tadā āsuṁ;
ja544:164.3	Candaṁ abhisiñciṁsu,
ja544:164.4	Samāgatā rājakaññāyo ca.
ja544:165.1	Sabbesu vippamuttesu,
ja544:165.2	Ye tattha samāgatā tadā āsuṁ;
ja544:165.3	Candaṁ abhisiñciṁsu,
ja544:165.4	Samāgatā devaparisā ca.
ja544:166.1	Sabbesu vippamuttesu,
ja544:166.2	Ye tattha samāgatā tadā āsuṁ;
ja544:166.3	Candaṁ abhisiñciṁsu,
ja544:166.4	Samāgatā devakaññāyo ca.
ja544:167.1	Sabbesu vippamuttesu,
ja544:167.2	Ye tattha samāgatā tadā āsuṁ;
ja544:167.3	Celukkhepamakaruṁ,
ja544:167.4	Samāgatā rājaparisā ca.
ja544:168.1	Sabbesu vippamuttesu,
ja544:168.2	Ye tattha samāgatā tadā āsuṁ;
ja544:168.3	Celukkhepamakaruṁ,
ja544:168.4	Samāgatā rājakaññāyo ca.
ja544:169.1	Sabbesu vippamuttesu,
ja544:169.2	Ye tattha samāgatā tadā āsuṁ;
ja544:169.3	Celukkhepamakaruṁ,
ja544:169.4	Samāgatā devaparisā ca.
ja544:170.1	Sabbesu vippamuttesu,
ja544:170.2	Ye tattha samāgatā tadā āsuṁ;
ja544:170.3	Celukkhepamakaruṁ,
ja544:170.4	Samāgatā devakaññāyo ca.
ja544:171.1	Sabbesu vippamuttesu,
ja544:171.2	Bahū ānanditā ahuṁ;
ja544:171.3	Nandiṁ pavesi nagaraṁ,
ja544:171.4	Bandhanā mokkho aghositthāti.
ja544:172.1	Candakumārajātakaṁ sattamaṁ.
ja545:0.1	Jātaka
ja545:0.2	Mahānipāta
ja545:0.3	Mūgapakkhavagga
ja545:0.4	8. Mahānāradakassapajātaka
ja545:1.1	Ahu rājā videhānaṁ,
ja545:1.2	aṅgati nāma khattiyo;
ja545:1.3	Pahūtayoggo dhanimā,
ja545:1.4	anantabalaporiso.
ja545:2.1	So ca pannarasiṁ rattiṁ,
ja545:2.2	purimayāme anāgate;
ja545:2.3	Cātumāsā komudiyā,
ja545:2.4	amacce sannipātayi.
ja545:3.1	Paṇḍite sutasampanne,
ja545:3.2	mhitapubbe vicakkhaṇe;
ja545:3.3	Vijayañca sunāmañca,
ja545:3.4	senāpatiṁ alātakaṁ.
ja545:4.1	Tamanupucchi vedeho,
ja545:4.2	“paccekaṁ brūtha saṁ ruciṁ;
ja545:4.3	Cātumāsā komudajja,
ja545:4.4	juṇhaṁ byapahataṁ tamaṁ;
ja545:4.5	Kāyajja ratiyā rattiṁ,
ja545:4.6	viharemu imaṁ utuṁ”.
ja545:5.1	Tato senāpati rañño,
ja545:5.2	Alāto etadabravi;
ja545:5.3	“Haṭṭhaṁ yoggaṁ balaṁ sabbaṁ,
ja545:5.4	Senaṁ sannāhayāmase.
ja545:6.1	Niyyāma deva yuddhāya,
ja545:6.2	anantabalaporisā;
ja545:6.3	Ye te vasaṁ na āyanti,
ja545:6.4	vasaṁ upanayāmase;
ja545:6.5	Esā mayhaṁ sakā diṭṭhi,
ja545:6.6	ajitaṁ ojināmase”.
ja545:7.1	Alātassa vaco sutvā,
ja545:7.2	sunāmo etadabravi;
ja545:7.3	“Sabbe tuyhaṁ mahārāja,
ja545:7.4	amittā vasamāgatā.
ja545:8.1	Nikkhittasatthā paccatthā,
ja545:8.2	nivātamanuvattare;
ja545:8.3	Uttamo ussavo ajja,
ja545:8.4	na yuddhaṁ mama ruccati.
ja545:9.1	Annapānañca khajjañca,
ja545:9.2	khippaṁ abhiharantu te;
ja545:9.3	Ramassu deva kāmehi,
ja545:9.4	naccagīte suvādite”.
ja545:10.1	Sunāmassa vaco sutvā,
ja545:10.2	vijayo etadabravi;
ja545:10.3	“Sabbe kāmā mahārāja,
ja545:10.4	niccaṁ tava mupaṭṭhitā.
ja545:11.1	Na hete dullabhā deva,
ja545:11.2	tava kāmehi modituṁ;
ja545:11.3	Sadāpi kāmā sulabhā,
ja545:11.4	netaṁ cittamataṁ mama.
ja545:12.1	Samaṇaṁ brāhmaṇaṁ vāpi,
ja545:12.2	upāsemu bahussutaṁ;
ja545:12.3	Yo najja vinaye kaṅkhaṁ,
ja545:12.4	atthadhammavidū ise”.
ja545:13.1	Vijayassa vaco sutvā,
ja545:13.2	rājā aṅgati mabravi;
ja545:13.3	“Yathā vijayo bhaṇati,
ja545:13.4	mayhampetaṁva ruccati.
ja545:14.1	Samaṇaṁ brāhmaṇaṁ vāpi,
ja545:14.2	upāsemu bahussutaṁ;
ja545:14.3	Yo najja vinaye kaṅkhaṁ,
ja545:14.4	atthadhammavidū ise.
ja545:15.1	Sabbeva santā karotha matiṁ,
ja545:15.2	Kaṁ upāsemu paṇḍitaṁ;
ja545:15.3	Yo najja vinaye kaṅkhaṁ,
ja545:15.4	Atthadhammavidū ise”.
ja545:16.1	Vedehassa vaco sutvā,
ja545:16.2	alāto etadabravi;
ja545:16.3	“Atthāyaṁ migadāyasmiṁ,
ja545:16.4	acelo dhīrasammato.
ja545:17.1	Guṇo kassapagottāyaṁ,
ja545:17.2	suto citrakathī gaṇī;
ja545:17.3	Taṁ deva payirupāsemu,
ja545:17.4	so no kaṅkhaṁ vinessati”.
ja545:18.1	Alātassa vaco sutvā,
ja545:18.2	rājā codesi sārathiṁ;
ja545:18.3	“Migadāyaṁ gamissāma,
ja545:18.4	yuttaṁ yānaṁ idhānaya”.
ja545:19.1	Tassa yānaṁ ayojesuṁ,
ja545:19.2	dantaṁ rūpiyapakkharaṁ;
ja545:19.3	Sukkamaṭṭhaparivāraṁ,
ja545:19.4	paṇḍaraṁ dosināmukhaṁ.
ja545:20.1	Tatrāsuṁ kumudāyuttā,
ja545:20.2	cattāro sindhavā hayā;
ja545:20.3	Anilūpamasamuppātā,
ja545:20.4	sudantā soṇṇamālino.
ja545:21.1	Setacchattaṁ setaratho,
ja545:21.2	setassā setabījanī;
ja545:21.3	Vedeho sahamaccehi,
ja545:21.4	niyyaṁ candova sobhati.
ja545:22.1	Tamanuyāyiṁsu bahavo,
ja545:22.2	indikhaggadharā balī;
ja545:22.3	Assapiṭṭhigatā vīrā,
ja545:22.4	narā naravarādhipaṁ.
ja545:23.1	So muhuttaṁva yāyitvā,
ja545:23.2	yānā oruyha khattiyo;
ja545:23.3	Vedeho sahamaccehi,
ja545:23.4	pattī guṇamupāgami.
ja545:24.1	Yepi tattha tadā āsuṁ,
ja545:24.2	brāhmaṇibbhā samāgatā;
ja545:24.3	Na te apanayī rājā,
ja545:24.4	akataṁ bhūmimāgate.
ja545:25.1	Tato so mudukā bhisiyā,
ja545:25.2	muducittakasanthate;
ja545:25.3	Mudupaccatthate rājā,
ja545:25.4	ekamantaṁ upāvisi.
ja545:26.1	Nisajja rājā sammodi,
ja545:26.2	kathaṁ sāraṇiyaṁ tato;
ja545:26.3	“Kacci yāpaniyaṁ bhante,
ja545:26.4	vātānamaviyaggatā.
ja545:27.1	Kacci akasirā vutti,
ja545:27.2	labhasi piṇḍayāpanaṁ;
ja545:27.3	Apābādho casi kacci,
ja545:27.4	cakkhuṁ na parihāyati”.
ja545:28.1	Taṁ guṇo paṭisammodi,
ja545:28.2	vedehaṁ vinaye rataṁ;
ja545:28.3	“Yāpanīyaṁ mahārāja,
ja545:28.4	sabbametaṁ tadūbhayaṁ.
ja545:29.1	Kacci tuyhampi vedeha,
ja545:29.2	paccantā na balīyare;
ja545:29.3	Kacci arogaṁ yoggaṁ te,
ja545:29.4	kacci vahati vāhanaṁ;
ja545:29.5	Kacci te byādhayo natthi,
ja545:29.6	sarīrassupatāpiyā”.
ja545:30.1	Paṭisammodito rājā,
ja545:30.2	tato pucchi anantarā;
ja545:30.3	Atthaṁ dhammañca ñāyañca,
ja545:30.4	dhammakāmo rathesabho.
ja545:31.1	“Kathaṁ dhammaṁ care macco,
ja545:31.2	mātāpitūsu kassapa;
ja545:31.3	Kathaṁ care ācariye,
ja545:31.4	puttadāre kathaṁ care.
ja545:32.1	Kathaṁ careyya vuḍḍhesu,
ja545:32.2	kathaṁ samaṇabrāhmaṇe;
ja545:32.3	Kathañca balakāyasmiṁ,
ja545:32.4	kathaṁ janapade care.
ja545:33.1	Kathaṁ dhammaṁ caritvāna,
ja545:33.2	maccā gacchanti suggatiṁ;
ja545:33.3	Kathañceke adhammaṭṭhā,
ja545:33.4	patanti nirayaṁ atho”.
ja545:34.1	Vedehassa vaco sutvā,
ja545:34.2	kassapo etadabravi;
ja545:34.3	“Suṇohi me mahārāja,
ja545:34.4	saccaṁ avitathaṁ padaṁ.
ja545:35.1	Natthi dhammacaritassa,
ja545:35.2	phalaṁ kalyāṇapāpakaṁ;
ja545:35.3	Natthi deva paro loko,
ja545:35.4	ko tato hi idhāgato.
ja545:36.1	Natthi deva pitaro vā,
ja545:36.2	kuto mātā kuto pitā;
ja545:36.3	Natthi ācariyo nāma,
ja545:36.4	adantaṁ ko damessati.
ja545:37.1	Samatulyāni bhūtāni,
ja545:37.2	natthi jeṭṭhāpacāyikā;
ja545:37.3	Natthi balaṁ vīriyaṁ vā,
ja545:37.4	kuto uṭṭhānaporisaṁ;
ja545:37.5	Niyatāni hi bhūtāni,
ja545:37.6	yathā goṭaviso tathā.
ja545:38.1	Laddheyyaṁ labhate macco,
ja545:38.2	tattha dānaphalaṁ kuto;
ja545:38.3	Natthi dānaphalaṁ deva,
ja545:38.4	avaso devavīriyo.
ja545:39.1	Bālehi dānaṁ paññattaṁ,
ja545:39.2	paṇḍitehi paṭicchitaṁ;
ja545:39.3	Avasā denti dhīrānaṁ,
ja545:39.4	bālā paṇḍitamānino.
ja545:40.1	Sattime sassatā kāyā,
ja545:40.2	acchejjā avikopino;
ja545:40.3	Tejo pathavī āpo ca,
ja545:40.4	vāyo sukhaṁ dukhañcime;
ja545:40.5	Jīve ca sattime kāyā,
ja545:40.6	yesaṁ chettā na vijjati.
ja545:41.1	Natthi hantā va chettā vā,
ja545:41.2	haññe yevāpi koci naṁ;
ja545:41.3	Antareneva kāyānaṁ,
ja545:41.4	satthāni vītivattare.
ja545:42.1	Yo cāpi siramādāya,
ja545:42.2	paresaṁ nisitāsinā;
ja545:42.3	Na so chindati te kāye,
ja545:42.4	tattha pāpaphalaṁ kuto.
ja545:43.1	Cullāsītimahākappe,
ja545:43.2	sabbe sujjhanti saṁsaraṁ;
ja545:43.3	Anāgate tamhi kāle,
ja545:43.4	saññatopi na sujjhati.
ja545:44.1	Caritvāpi bahuṁ bhadraṁ,
ja545:44.2	neva sujjhantināgate;
ja545:44.3	Pāpañcepi bahuṁ katvā,
ja545:44.4	taṁ khaṇaṁ nātivattare.
ja545:45.1	Anupubbena no suddhi,
ja545:45.2	kappānaṁ cullasītiyā;
ja545:45.3	Niyatiṁ nātivattāma,
ja545:45.4	velantamiva sāgaro”.
ja545:46.1	Kassapassa vaco sutvā,
ja545:46.2	alāto etadabravi;
ja545:46.3	“Yathā bhadanto bhaṇati,
ja545:46.4	mayhampetaṁva ruccati.
ja545:47.1	Ahampi purimaṁ jātiṁ,
ja545:47.2	sare saṁsaritattano;
ja545:47.3	Piṅgalo nāmahaṁ āsiṁ,
ja545:47.4	luddo goghātako pure.
ja545:48.1	Bārāṇasiyaṁ phītāyaṁ,
ja545:48.2	bahuṁ pāpaṁ kataṁ mayā;
ja545:48.3	Bahū mayā hatā pāṇā,
ja545:48.4	mahiṁsā sūkarā ajā.
ja545:49.1	Tato cuto idha jāto,
ja545:49.2	iddhe senāpatīkule;
ja545:49.3	Natthi nūna phalaṁ pāpaṁ,
ja545:49.4	yohaṁ na nirayaṁ gato”.
ja545:50.1	Athettha bījako nāma,
ja545:50.2	dāso āsi paṭaccarī;
ja545:50.3	Uposathaṁ upavasanto,
ja545:50.4	guṇasantikupāgami.
ja545:51.1	Kassapassa vaco sutvā,
ja545:51.2	alātassa ca bhāsitaṁ;
ja545:51.3	Passasanto muhuṁ uṇhaṁ,
ja545:51.4	rudaṁ assūni vattayi.
ja545:52.1	Tamanupucchi vedeho,
ja545:52.2	“kimatthaṁ samma rodasi;
ja545:52.3	Kiṁ te sutaṁ vā diṭṭhaṁ vā,
ja545:52.4	kiṁ maṁ vedesi vedanaṁ”.
ja545:53.1	Vedehassa vaco sutvā,
ja545:53.2	bījako etadabravi;
ja545:53.3	“Natthi me vedanā dukkhā,
ja545:53.4	mahārāja suṇohi me.
ja545:54.1	Ahampi purimaṁ jātiṁ,
ja545:54.2	sarāmi sukhamattano;
ja545:54.3	Sāketāhaṁ pure āsiṁ,
ja545:54.4	bhāvaseṭṭhi guṇe rato.
ja545:55.1	Sammato brāhmaṇibbhānaṁ,
ja545:55.2	saṁvibhāgarato suci;
ja545:55.3	Na cāpi pāpakaṁ kammaṁ,
ja545:55.4	sarāmi katamattano.
ja545:56.1	Tato cutāhaṁ vedeha,
ja545:56.2	idha jāto duritthiyā;
ja545:56.3	Gabbhamhi kumbhadāsiyā,
ja545:56.4	yato jāto suduggato.
ja545:57.1	Evampi duggato santo,
ja545:57.2	samacariyaṁ adhiṭṭhito;
ja545:57.3	Upaḍḍhabhāgaṁ bhattassa,
ja545:57.4	dadāmi yo me icchati.
ja545:58.1	Cātuddasiṁ pañcadasiṁ,
ja545:58.2	sadā upavasāmahaṁ;
ja545:58.3	Na cāpi bhūte hiṁsāmi,
ja545:58.4	theyyañcāpi vivajjayiṁ.
ja545:59.1	Sabbameva hi nūnetaṁ,
ja545:59.2	suciṇṇaṁ bhavati nipphalaṁ;
ja545:59.3	Niratthaṁ maññidaṁ sīlaṁ,
ja545:59.4	alāto bhāsatī yathā.
ja545:60.1	Kalimeva nūna gaṇhāmi,
ja545:60.2	asippo dhuttako yathā;
ja545:60.3	Kaṭaṁ alāto gaṇhāti,
ja545:60.4	kitavosikkhito yathā.
ja545:61.1	Dvāraṁ nappaṭipassāmi,
ja545:61.2	yena gacchāmi suggatiṁ;
ja545:61.3	Tasmā rāja parodāmi,
ja545:61.4	sutvā kassapabhāsitaṁ”.
ja545:62.1	Bījakassa vaco sutvā,
ja545:62.2	rājā aṅgati mabravi;
ja545:62.3	“Natthi dvāraṁ sugatiyā,
ja545:62.4	niyatiṁ kaṅkha bījaka.
ja545:63.1	Sukhaṁ vā yadi vā dukkhaṁ,
ja545:63.2	niyatiyā kira labbhati;
ja545:63.3	Saṁsārasuddhi sabbesaṁ,
ja545:63.4	mā turittho anāgate.
ja545:64.1	Ahampi pubbe kalyāṇo,
ja545:64.2	brāhmaṇibbhesu byāvaṭo;
ja545:64.3	Vohāramanusāsanto,
ja545:64.4	ratihīno tadantarā.
ja545:65.1	Punapi bhante dakkhemu,
ja545:65.2	saṅgati ce bhavissati”;
ja545:65.3	Idaṁ vatvāna vedeho,
ja545:65.4	paccagā sanivesanaṁ.
ja545:66.1	Tato ratyā vivasāne,
ja545:66.2	upaṭṭhānamhi aṅgati;
ja545:66.3	Amacce sannipātetvā,
ja545:66.4	idaṁ vacanamabravi.
ja545:67.1	“Candake me vimānasmiṁ,
ja545:67.2	sadā kāme vidhentu me;
ja545:67.3	Mā upagacchuṁ atthesu,
ja545:67.4	guyhappakāsiyesu ca.
ja545:68.1	Vijayo ca sunāmo ca,
ja545:68.2	senāpati alātako;
ja545:68.3	Ete atthe nisīdantu,
ja545:68.4	vohārakusalā tayo”.
ja545:69.1	Idaṁ vatvāna vedeho,
ja545:69.2	“kāmeva bahumaññatha;
ja545:69.3	Na cāpi brāhmaṇibbhesu,
ja545:69.4	atthe kismiñci byāvaṭo”.
ja545:70.1	Tato dvesattarattassa,
ja545:70.2	vedehassatrajā piyā;
ja545:70.3	Rājakaññā rucā nāma,
ja545:70.4	dhātimātaramabravi.
ja545:71.1	“Alaṅkarotha maṁ khippaṁ,
ja545:71.2	sakhiyo cālaṅkarontu me;
ja545:71.3	Suve pannaraso dibyo,
ja545:71.4	gacchaṁ issarasantike”.
ja545:72.1	Tassā mālyaṁ abhihariṁsu,
ja545:72.2	candanañca mahārahaṁ;
ja545:72.3	Maṇisaṅkhamuttāratanaṁ,
ja545:72.4	nānāratte ca ambare.
ja545:73.1	Tañca soṇṇamaye pīṭhe,
ja545:73.2	nisinnaṁ bahukitthiyo;
ja545:73.3	Parikiriya pasobhiṁsu,
ja545:73.4	rucaṁ ruciravaṇṇiniṁ.
ja545:74.1	Sā ca sakhimajjhagatā,
ja545:74.2	sabbābharaṇabhūsitā;
ja545:74.3	Sateratā abbhamiva,
ja545:74.4	candakaṁ pāvisī rucā.
ja545:75.1	Upasaṅkamitvā vedehaṁ,
ja545:75.2	vanditvā vinaye rataṁ;
ja545:75.3	Suvaṇṇakhacite pīṭhe,
ja545:75.4	ekamantaṁ upāvisi.
ja545:76.1	Tañca disvāna vedeho,
ja545:76.2	accharānaṁva saṅgamaṁ;
ja545:76.3	Rucaṁ sakhimajjhagataṁ,
ja545:76.4	idaṁ vacanamabravi.
ja545:77.1	“Kacci ramasi pāsāde,
ja545:77.2	antopokkharaṇiṁ pati;
ja545:77.3	Kacci bahuvidhaṁ khajjaṁ,
ja545:77.4	sadā abhiharanti te.
ja545:78.1	Kacci bahuvidhaṁ mālyaṁ,
ja545:78.2	ocinitvā kumāriyo;
ja545:78.3	Gharake karotha paccekaṁ,
ja545:78.4	khiḍḍāratiratā muhuṁ.
ja545:79.1	Kena vā vikalaṁ tuyhaṁ,
ja545:79.2	kiṁ khippaṁ āharantu te;
ja545:79.3	Manokarassu kuḍḍamukhī,
ja545:79.4	api candasamamhipi”.
ja545:80.1	Vedehassa vaco sutvā,
ja545:80.2	rucā pitaramabravi;
ja545:80.3	“Sabbametaṁ mahārāja,
ja545:80.4	labbhatissarasantike.
ja545:81.1	Suve pannaraso dibyo,
ja545:81.2	sahassaṁ āharantu me;
ja545:81.3	Yathādinnañca dassāmi,
ja545:81.4	dānaṁ sabbavanīsvahaṁ”.
ja545:82.1	Rucāya vacanaṁ sutvā,
ja545:82.2	rājā aṅgati mabravi;
ja545:82.3	“Bahuṁ vināsitaṁ vittaṁ,
ja545:82.4	niratthaṁ aphalaṁ tayā.
ja545:83.1	Uposathe vasaṁ niccaṁ,
ja545:83.2	annapānaṁ na bhuñjasi;
ja545:83.3	Niyatetaṁ abhuttabbaṁ,
ja545:83.4	natthi puññaṁ abhuñjato.
ja545:84.1	Bījakopi hi sutvāna,
ja545:84.2	tadā kassapabhāsitaṁ;
ja545:84.3	Passasanto muhuṁ uṇhaṁ,
ja545:84.4	rudaṁ assūni vattayi.
ja545:85.1	Yāva ruce jīvamānā,
ja545:85.2	mā bhattamapanāmayi;
ja545:85.3	Natthi bhadde paro loko,
ja545:85.4	kiṁ niratthaṁ vihaññasi”.
ja545:86.1	Vedehassa vaco sutvā,
ja545:86.2	rucā ruciravaṇṇinī;
ja545:86.3	Jānaṁ pubbāparaṁ dhammaṁ,
ja545:86.4	pitaraṁ etadabravi.
ja545:87.1	“Sutameva pure āsi,
ja545:87.2	sakkhi diṭṭhamidaṁ mayā;
ja545:87.3	Bālūpasevī yo hoti,
ja545:87.4	bālova samapajjatha.
ja545:88.1	Mūḷho hi mūḷhamāgamma,
ja545:88.2	bhiyyo mohaṁ nigacchati;
ja545:88.3	Patirūpaṁ alātena,
ja545:88.4	bījakena ca muyhituṁ.
ja545:89.1	Tvañca devāsi sappañño,
ja545:89.2	dhiro atthassa kovido;
ja545:89.3	Kathaṁ bālehi sadisaṁ,
ja545:89.4	hīnadiṭṭhiṁ upāgami.
ja545:90.1	Sacepi saṁsārapathena sujjhati,
ja545:90.2	Niratthiyā pabbajjā guṇassa;
ja545:90.3	Kīṭova aggiṁ jalitaṁ apāpataṁ,
ja545:90.4	Upapajjati mohamūḷho naggabhāvaṁ.
ja545:91.1	Saṁsārasuddhīti pure niviṭṭhā,
ja545:91.2	Kammaṁ vidūsenti bahū ajānaṁ;
ja545:91.3	Pubbe kalī duggahitovanatthā,
ja545:91.4	Dummo ca yā balisā ambujova.
ja545:92.1	Upamaṁ te karissāmi,
ja545:92.2	mahārāja tavatthiyā;
ja545:92.3	Upamāya midhekacce,
ja545:92.4	atthaṁ jānanti paṇḍitā.
ja545:93.1	Vāṇijānaṁ yathā nāvā,
ja545:93.2	appamāṇabharā garu;
ja545:93.3	Atibhāraṁ samādāya,
ja545:93.4	aṇṇave avasīdati.
ja545:94.1	Evameva naro pāpaṁ,
ja545:94.2	thokaṁ thokampi ācinaṁ;
ja545:94.3	Atibhāraṁ samādāya,
ja545:94.4	niraye avasīdati.
ja545:95.1	Na tāva bhāro paripūro,
ja545:95.2	alātassa mahīpati;
ja545:95.3	Ācināti ca taṁ pāpaṁ,
ja545:95.4	yena gacchati duggatiṁ.
ja545:96.1	Pubbevassa kataṁ puññaṁ,
ja545:96.2	alātassa mahīpati;
ja545:96.3	Tasseva deva nissando,
ja545:96.4	yañceso labhate sukhaṁ.
ja545:97.1	Khīyate cassa taṁ puññaṁ,
ja545:97.2	tathā hi aguṇe rato;
ja545:97.3	Ujumaggaṁ avahāya,
ja545:97.4	kummaggamanudhāvati.
ja545:98.1	Tulā yathā paggahitā,
ja545:98.2	ohite tulamaṇḍale;
ja545:98.3	Unnameti tulāsīsaṁ,
ja545:98.4	bhāre oropite sati.
ja545:99.1	Evameva naro puññaṁ,
ja545:99.2	thokaṁ thokampi ācinaṁ;
ja545:99.3	Saggātimāno dāsova,
ja545:99.4	bījako sātave rato.
ja545:100.1	Yamajja bījako dāso,
ja545:100.2	dukkhaṁ passati attani;
ja545:100.3	Pubbevassa kataṁ pāpaṁ,
ja545:100.4	tameso paṭisevati.
ja545:101.1	Khīyate cassa taṁ pāpaṁ,
ja545:101.2	tathā hi vinaye rato;
ja545:101.3	Kassapañca samāpajja,
ja545:101.4	mā hevuppathamāgamā.
ja545:102.1	Yaṁ yañhi rāja bhajati,
ja545:102.2	santaṁ vā yadi vā asaṁ;
ja545:102.3	Sīlavantaṁ visīlaṁ vā,
ja545:102.4	vasaṁ tasseva gacchati.
ja545:103.1	Yādisaṁ kurute mittaṁ,
ja545:103.2	yādisaṁ cūpasevati;
ja545:103.3	Sopi tādisako hoti,
ja545:103.4	sahavāso hi tādiso.
ja545:104.1	Sevamāno sevamānaṁ,
ja545:104.2	samphuṭṭho samphusaṁ paraṁ;
ja545:104.3	Saro diddho kalāpaṁva,
ja545:104.4	alittamupalimpati;
ja545:104.5	Upalepabhayā dhīro,
ja545:104.6	neva pāpasakhā siyā.
ja545:105.1	Pūtimacchaṁ kusaggena,
ja545:105.2	yo naro upanayhati;
ja545:105.3	Kusāpi pūti vāyanti,
ja545:105.4	evaṁ bālūpasevanā.
ja545:106.1	Tagarañca palāsena,
ja545:106.2	yo naro upanayhati;
ja545:106.3	Pattāpi surabhi vāyanti,
ja545:106.4	evaṁ dhīrūpasevanā.
ja545:107.1	Tasmā pattapuṭasseva,
ja545:107.2	ñatvā sampākamattano;
ja545:107.3	Asante nopaseveyya,
ja545:107.4	sante seveyya paṇḍito;
ja545:107.5	Asanto nirayaṁ nenti,
ja545:107.6	santo pāpenti suggatiṁ.
ja545:108.1	Ahampi jātiyo satta,
ja545:108.2	sare saṁsaritattano;
ja545:108.3	Anāgatāpi satteva,
ja545:108.4	yā gamissaṁ ito cutā.
ja545:109.1	Yā me sā sattamī jāti,
ja545:109.2	ahu pubbe janādhipa;
ja545:109.3	Kammāraputto magadhesu,
ja545:109.4	ahuṁ rājagahe pure.
ja545:110.1	Pāpaṁ sahāyamāgamma,
ja545:110.2	bahuṁ pāpaṁ kataṁ mayā;
ja545:110.3	Paradārassa heṭhento,
ja545:110.4	carimhā amarā viya.
ja545:111.1	Taṁ kammaṁ nihitaṁ aṭṭhā,
ja545:111.2	bhasmacchannova pāvako;
ja545:111.3	Atha aññehi kammehi,
ja545:111.4	ajāyiṁ vaṁsabhūmiyaṁ.
ja545:112.1	Kosambiyaṁ seṭṭhikule,
ja545:112.2	iddhe phīte mahaddhane;
ja545:112.3	Ekaputto mahārāja,
ja545:112.4	niccaṁ sakkatapūjito.
ja545:113.1	Tattha mittaṁ asevissaṁ,
ja545:113.2	sahāyaṁ sātave rataṁ;
ja545:113.3	Paṇḍitaṁ sutasampannaṁ,
ja545:113.4	so maṁ atthe nivesayi.
ja545:114.1	Cātuddasiṁ pañcadasiṁ,
ja545:114.2	bahuṁ rattiṁ upāvasiṁ;
ja545:114.3	Taṁ kammaṁ nihitaṁ aṭṭhā,
ja545:114.4	nidhīva udakantike.
ja545:115.1	Atha pāpāna kammānaṁ,
ja545:115.2	Yametaṁ magadhe kataṁ;
ja545:115.3	Phalaṁ pariyāga maṁ pacchā,
ja545:115.4	Bhutvā duṭṭhavisaṁ yathā.
ja545:116.1	Tato cutāhaṁ vedeha,
ja545:116.2	roruve niraye ciraṁ;
ja545:116.3	Sakammunā apaccissaṁ,
ja545:116.4	taṁ saraṁ na sukhaṁ labhe.
ja545:117.1	Bahuvassagaṇe tattha,
ja545:117.2	khepayitvā bahuṁ dukhaṁ;
ja545:117.3	Bhinnāgate ahuṁ rāja,
ja545:117.4	chagalo uddhatapphalo.
ja545:118.1	Sātaputtā mayā vūḷhā,
ja545:118.2	piṭṭhiyā ca rathena ca;
ja545:118.3	Tassa kammassa nissando,
ja545:118.4	paradāragamanassa me.
ja545:119.1	Tato cutāhaṁ vedeha,
ja545:119.2	kapi āsiṁ brahāvane;
ja545:119.3	Niluñcitaphaloyeva,
ja545:119.4	yūthapena pagabbhinā;
ja545:119.5	Tassa kammassa nissando,
ja545:119.6	paradāragamanassa me.
ja545:120.1	Tato cutāhaṁ vedeha,
ja545:120.2	dassanesu pasū ahuṁ;
ja545:120.3	Niluñcito javo bhadro,
ja545:120.4	yoggaṁ vūḷhaṁ ciraṁ mayā;
ja545:120.5	Tassa kammassa nissando,
ja545:120.6	paradāragamanassa me.
ja545:121.1	Tato cutāhaṁ vedeha,
ja545:121.2	vajjīsu kulamāgamā;
ja545:121.3	Nevitthī na pumā āsiṁ,
ja545:121.4	manussatte sudullabhe;
ja545:121.5	Tassa kammassa nissando,
ja545:121.6	paradāragamanassa me.
ja545:122.1	Tato cutāhaṁ vedeha,
ja545:122.2	ajāyiṁ nandane vane;
ja545:122.3	Bhavane tāvatiṁsāhaṁ,
ja545:122.4	accharā kāmavaṇṇinī.
ja545:123.1	Vicittavatthābharaṇā,
ja545:123.2	āmuttamaṇikuṇḍalā;
ja545:123.3	Kusalā naccagītassa,
ja545:123.4	sakkassa paricārikā.
ja545:124.1	Tattha ṭhitāhaṁ vedeha,
ja545:124.2	sarāmi jātiyo imā;
ja545:124.3	Anāgatāpi satteva,
ja545:124.4	yā gamissaṁ ito cutā.
ja545:125.1	Pariyāgataṁ taṁ kusalaṁ,
ja545:125.2	yaṁ me kosambiyaṁ kataṁ;
ja545:125.3	Deve ceva manusse ca,
ja545:125.4	sandhāvissaṁ ito cutā.
ja545:126.1	Satta jacco mahārāja,
ja545:126.2	niccaṁ sakkatapūjitā;
ja545:126.3	Thībhāvāpi na muccissaṁ,
ja545:126.4	chaṭṭhā nigatiyo imā.
ja545:127.1	Sattamī ca gati deva,
ja545:127.2	devaputto mahiddhiko;
ja545:127.3	Pumā devo bhavissāmi,
ja545:127.4	devakāyasmimuttamo.
ja545:128.1	Ajjāpi santānamayaṁ,
ja545:128.2	mālaṁ ganthenti nandane;
ja545:128.3	Devaputto javo nāma,
ja545:128.4	yo me mālaṁ paṭicchati.
ja545:129.1	Muhutto viya so dibyo,
ja545:129.2	idha vassāni soḷasa;
ja545:129.3	Rattindivo ca so dibyo,
ja545:129.4	mānusiṁ saradosataṁ.
ja545:130.1	Iti kammāni anventi,
ja545:130.2	asaṅkheyyāpi jātiyo;
ja545:130.3	Kalyāṇaṁ yadi vā pāpaṁ,
ja545:130.4	na hi kammaṁ vinassati.
ja545:131.1	Yo icche puriso hotuṁ,
ja545:131.2	jātiṁ jātiṁ punappunaṁ;
ja545:131.3	Paradāraṁ vivajjeyya,
ja545:131.4	dhotapādova kaddamaṁ.
ja545:132.1	Yā icche puriso hotuṁ,
ja545:132.2	jātiṁ jātiṁ punappunaṁ;
ja545:132.3	Sāmikaṁ apacāyeyya,
ja545:132.4	indaṁva paricārikā.
ja545:133.1	Yo icche dibyabhogañca,
ja545:133.2	dibbamāyuṁ yasaṁ sukhaṁ;
ja545:133.3	Pāpāni parivajjetvā,
ja545:133.4	tividhaṁ dhammamācare.
ja545:134.1	Kāyena vācā manasā,
ja545:134.2	appamatto vicakkhaṇo;
ja545:134.3	Attano hoti atthāya,
ja545:134.4	itthī vā yadi vā pumā.
ja545:135.1	Ye kecime mānujā jīvaloke,
ja545:135.2	Yasassino sabbasamantabhogā;
ja545:135.3	Asaṁsayaṁ tehi pure suciṇṇaṁ,
ja545:135.4	Kammassakāse puthu sabbasattā.
ja545:136.1	Iṅghānucintesi sayampi deva,
ja545:136.2	Kutonidānā te imā janinda;
ja545:136.3	Yā te imā accharāsannikāsā,
ja545:136.4	Alaṅkatā kañcanajālachannā”.
ja545:137.1	Iccevaṁ pitaraṁ kaññā,
ja545:137.2	rucā tosesi aṅgatiṁ;
ja545:137.3	Mūḷhassa maggamācikkhi,
ja545:137.4	dhammamakkhāsi subbatā.
ja545:138.1	Athāgamā brahmalokā,
ja545:138.2	nārado mānusiṁ pajaṁ;
ja545:138.3	Jambudīpaṁ avekkhanto,
ja545:138.4	addā rājānamaṅgatiṁ.
ja545:139.1	Tato patiṭṭhā pāsāde,
ja545:139.2	vedehassa puratthato;
ja545:139.3	Tañca disvānānuppattaṁ,
ja545:139.4	rucā isimavandatha.
ja545:140.1	Athāsanamhā oruyha,
ja545:140.2	rājā byathitamānaso;
ja545:140.3	Nāradaṁ paripucchanto,
ja545:140.4	idaṁ vacanamabravi.
ja545:141.1	“Kuto nu āgacchasi devavaṇṇi,
ja545:141.2	Obhāsayaṁ sabbadisā candimāva;
ja545:141.3	Akkhāhi me pucchito nāmagottaṁ,
ja545:141.4	Kathaṁ taṁ jānanti manussaloke”.
ja545:142.1	“Ahañhi devato idāni emi,
ja545:142.2	Obhāsayaṁ sabbadisā candimāva;
ja545:142.3	Akkhāmi te pucchito nāmagottaṁ,
ja545:142.4	Jānanti maṁ nārado kassapo ca”.
ja545:143.1	“Accherarūpaṁ tava yādisañca,
ja545:143.2	Vehāyasaṁ gacchasi tiṭṭhasī ca;
ja545:143.3	Pucchāmi taṁ nārada etamatthaṁ,
ja545:143.4	Atha kena vaṇṇena tavāyamiddhi”.
ja545:144.1	“Saccañca dhammo ca damo ca cāgo,
ja545:144.2	Guṇā mamete pakatā purāṇā;
ja545:144.3	Teheva dhammehi susevitehi,
ja545:144.4	Manojavo yena kāmaṁ gatosmi”.
ja545:145.1	“Accheramācikkhasi puññasiddhiṁ,
ja545:145.2	Sace hi etehi yathā vadesi;
ja545:145.3	Pucchāmi taṁ nārada etamatthaṁ,
ja545:145.4	Puṭṭho ca me sādhu viyākarohi”.
ja545:146.1	“Pucchassu maṁ rāja tavesa attho,
ja545:146.2	Yaṁ saṁsayaṁ kuruse bhūmipāla;
ja545:146.3	Ahaṁ taṁ nissaṁsayataṁ gamemi,
ja545:146.4	Nayehi ñāyehi ca hetubhī ca”.
ja545:147.1	“Pucchāmi taṁ nārada etamatthaṁ,
ja545:147.2	Puṭṭho ca me nārada mā musā bhaṇi;
ja545:147.3	Atthi nu devā pitaro nu atthi,
ja545:147.4	Loko paro atthi jano yamāhu”.
ja545:148.1	“Attheva devā pitaro ca atthi,
ja545:148.2	Loko paro atthi jano yamāhu;
ja545:148.3	Kāmesu giddhā ca narā pamūḷhā,
ja545:148.4	Lokaṁ paraṁ na vidū mohayuttā”.
ja545:149.1	“Atthīti ce nārada saddahāsi,
ja545:149.2	Nivesanaṁ paraloke matānaṁ;
ja545:149.3	Idheva me pañca satāni dehi,
ja545:149.4	Dassāmi te paraloke sahassaṁ”.
ja545:150.1	“Dajjemu kho pañca satāni bhoto,
ja545:150.2	Jaññāmu ce sīlavantaṁ vadaññuṁ;
ja545:150.3	Luddaṁ taṁ bhontaṁ niraye vasantaṁ,
ja545:150.4	Ko codaye paraloke sahassaṁ.
ja545:151.1	Idheva yo hoti adhammasīlo,
ja545:151.2	Pāpācāro alaso luddakammo;
ja545:151.3	Na paṇḍitā tasmiṁ iṇaṁ dadanti,
ja545:151.4	Na hi āgamo hoti tathāvidhamhā.
ja545:152.1	Dakkhañca posaṁ manujā viditvā,
ja545:152.2	Uṭṭhānakaṁ sīlavantaṁ vadaññuṁ;
ja545:152.3	Sayameva bhogehi nimantayanti,
ja545:152.4	Kammaṁ karitvā puna māharesi.
ja545:153.1	Ito cuto dakkhasi tattha rāja,
ja545:153.2	Kākolasaṅghehi vikassamānaṁ;
ja545:153.3	Taṁ khajjamānaṁ niraye vasantaṁ,
ja545:153.4	Kākehi gijjhehi ca senakehi;
ja545:153.5	Sañchinnagattaṁ ruhiraṁ savantaṁ,
ja545:153.6	Ko codaye paraloke sahassaṁ.
ja545:154.1	Andhaṁtamaṁ tattha na candasūriyā,
ja545:154.2	Nirayo sadā tumulo ghorarūpo;
ja545:154.3	Sā neva rattī na divā paññāyati,
ja545:154.4	Tathāvidhe ko vicare dhanatthiko.
ja545:155.1	Sabalo ca sāmo ca duve suvānā,
ja545:155.2	Pavaddhakāyā balino mahantā;
ja545:155.3	Khādanti dantehi ayomayehi,
ja545:155.4	Ito paṇunnaṁ paralokapattaṁ.
ja545:156.1	Taṁ khajjamānaṁ niraye vasantaṁ,
ja545:156.2	Luddehi vāḷehi aghammigehi ca;
ja545:156.3	Sañchinnagattaṁ ruhiraṁ savantaṁ,
ja545:156.4	Ko codaye paraloke sahassaṁ.
ja545:157.1	Usūhi sattīhi ca sunisitāhi,
ja545:157.2	Hananti vijjhanti ca paccamittā;
ja545:157.3	Kāḷūpakāḷā nirayamhi ghore,
ja545:157.4	Pubbe naraṁ dukkaṭakammakāriṁ.
ja545:158.1	Taṁ haññamānaṁ niraye vajantaṁ,
ja545:158.2	Kucchismiṁ passasmiṁ vipphālitūdaraṁ;
ja545:158.3	Sañchinnagattaṁ ruhiraṁ savantaṁ,
ja545:158.4	Ko codaye paraloke sahassaṁ.
ja545:159.1	Sattī usū tomarabhiṇḍivālā,
ja545:159.2	Vividhāvudhā vassanti tattha devā;
ja545:159.3	Patanti aṅgāramivaccimanto,
ja545:159.4	Silāsanī vassati luddakamme.
ja545:160.1	Uṇho ca vāto nirayamhi dussaho,
ja545:160.2	Na tamhi sukhaṁ labbhati ittarampi;
ja545:160.3	Taṁ taṁ vidhāvantamalenamāturaṁ,
ja545:160.4	Ko codaye paraloke sahassaṁ.
ja545:161.1	Sandhāvamānampi rathesu yuttaṁ,
ja545:161.2	Sajotibhūtaṁ pathaviṁ kamantaṁ;
ja545:161.3	Patodalaṭṭhīhi sucodayantaṁ,
ja545:161.4	Ko codaye paraloke sahassaṁ.
ja545:162.1	Tamāruhantaṁ khurasañcitaṁ giriṁ,
ja545:162.2	Vibhiṁsanaṁ pajjalitaṁ bhayānakaṁ;
ja545:162.3	Sañchinnagattaṁ ruhiraṁ savantaṁ,
ja545:162.4	Ko codaye paraloke sahassaṁ.
ja545:163.1	Tamāruhantaṁ pabbatasannikāsaṁ,
ja545:163.2	Aṅgārarāsiṁ jalitaṁ bhayānakaṁ;
ja545:163.3	Sudaḍḍhagattaṁ kapaṇaṁ rudantaṁ,
ja545:163.4	Ko codaye paraloke sahassaṁ.
ja545:164.1	Abbhakūṭasamā uccā,
ja545:164.2	kaṇṭakanicitā dumā;
ja545:164.3	Ayomayehi tikkhehi,
ja545:164.4	naralohitapāyibhi.
ja545:165.1	Tamāruhanti nāriyo,
ja545:165.2	narā ca paradāragū;
ja545:165.3	Coditā sattihatthehi,
ja545:165.4	yamaniddesakāribhi.
ja545:166.1	Tamāruhantaṁ nirayaṁ,
ja545:166.2	simbaliṁ ruhiramakkhitaṁ;
ja545:166.3	Vidaḍḍhakāyaṁ vitacaṁ,
ja545:166.4	āturaṁ gāḷhavedanaṁ.
ja545:167.1	Passasantaṁ muhuṁ uṇhaṁ,
ja545:167.2	pubbakammāparādhikaṁ;
ja545:167.3	Dumagge vitacaṁ gattaṁ,
ja545:167.4	ko taṁ yāceyya taṁ dhanaṁ.
ja545:168.1	Abbhakūṭasamā uccā,
ja545:168.2	asipattācitā dumā;
ja545:168.3	Ayomayehi tikkhehi,
ja545:168.4	naralohitapāyibhi.
ja545:169.1	Tamāruhantaṁ asipattapādapaṁ,
ja545:169.2	Asīhi tikkhehi ca chijjamānaṁ;
ja545:169.3	Sañchinnagattaṁ ruhiraṁ savantaṁ,
ja545:169.4	Ko codaye paraloke sahassaṁ.
ja545:170.1	Tato nikkhantamattaṁ taṁ,
ja545:170.2	asipattācitā dumā;
ja545:170.3	Sampatitaṁ vetaraṇiṁ,
ja545:170.4	ko taṁ yāceyya taṁ dhanaṁ.
ja545:171.1	Kharā kharodakā tattā,
ja545:171.2	duggā vetaraṇī nadī;
ja545:171.3	Ayopokkharasañchannā,
ja545:171.4	tikkhā pattehi sandati.
ja545:172.1	Tattha sañchinnagattaṁ taṁ,
ja545:172.2	vuyhantaṁ ruhiramakkhitaṁ;
ja545:172.3	Vetaraññe anālambe,
ja545:172.4	ko taṁ yāceyya taṁ dhanaṁ”.
ja545:173.1	“Vedhāmi rukkho viya chijjamāno,
ja545:173.2	Disaṁ na jānāmi pamūḷhasañño;
ja545:173.3	Bhayānutappāmi mahā ca me bhayā,
ja545:173.4	Sutvāna kathā tava bhāsitā ise.
ja545:174.1	Āditte vārimajjhaṁva,
ja545:174.2	dīpaṁvoghe mahaṇṇave;
ja545:174.3	Andhakāreva pajjoto,
ja545:174.4	tvaṁ nosi saraṇaṁ ise.
ja545:175.1	Atthañca dhammaṁ anusāsa maṁ ise,
ja545:175.2	Atītamaddhā aparādhitaṁ mayā;
ja545:175.3	Ācikkha me nārada suddhimaggaṁ,
ja545:175.4	Yathā ahaṁ no nirayaṁ pateyyaṁ”.
ja545:176.1	“Yathā ahū dhataraṭṭho,
ja545:176.2	Vessāmitto aṭṭhako yāmataggi;
ja545:176.3	Usindaro cāpi sivī ca rājā,
ja545:176.4	Paricārakā samaṇabrāhmaṇānaṁ.
ja545:177.1	Ete caññe ca rājāno,
ja545:177.2	ye saggavisayaṁ gatā;
ja545:177.3	Adhammaṁ parivajjetvā,
ja545:177.4	dhammaṁ cara mahīpati.
ja545:178.1	Annahatthā ca te byamhe,
ja545:178.2	ghosayantu pure tava;
ja545:178.3	Ko chāto ko ca tasito,
ja545:178.4	ko mālaṁ ko vilepanaṁ;
ja545:178.5	Nānārattānaṁ vatthānaṁ,
ja545:178.6	ko naggo paridahissati.
ja545:179.1	Ko panthe chattamāneti,
ja545:179.2	pādukā ca mudū subhā;
ja545:179.3	Iti sāyañca pāto ca,
ja545:179.4	ghosayantu pure tava.
ja545:180.1	Jiṇṇaṁ posaṁ gavāssañca,
ja545:180.2	māssu yuñja yathā pure;
ja545:180.3	Parihārañca dajjāsi,
ja545:180.4	adhikārakato balī.
ja545:181.1	Kāyo te rathasaññāto,
ja545:181.2	manosārathiko lahu;
ja545:181.3	Avihiṁsāsāritakkho,
ja545:181.4	saṁvibhāgapaṭicchado.
ja545:182.1	Pādasaññamanemiyo,
ja545:182.2	hatthasaññamapakkharo;
ja545:182.3	Kucchisaññamanabbhanto,
ja545:182.4	vācāsaññamakūjano.
ja545:183.1	Saccavākyasamattaṅgo,
ja545:183.2	apesuññasusaññato;
ja545:183.3	Girāsakhilanelaṅgo,
ja545:183.4	mitabhāṇisilesito.
ja545:184.1	Saddhālobhasusaṅkhāro,
ja545:184.2	nivātañjalikubbaro;
ja545:184.3	Athaddhatānatīsāko,
ja545:184.4	sīlasaṁvaranandhano.
ja545:185.1	Akkodhanamanugghātī,
ja545:185.2	dhammapaṇḍarachattako;
ja545:185.3	Bāhusaccamapālambo,
ja545:185.4	ṭhitacittamupādhiyo.
ja545:186.1	Kālaññutācittasāro,
ja545:186.2	vesārajjatidaṇḍako;
ja545:186.3	Nivātavuttiyottako,
ja545:186.4	anatimānayugo lahu.
ja545:187.1	Alīnacittasanthāro,
ja545:187.2	vuddhisevī rajohato;
ja545:187.3	Sati patodo dhīrassa,
ja545:187.4	dhiti yogo ca rasmiyo.
ja545:188.1	Mano dantaṁ pathaṁ neti,
ja545:188.2	samadantehi vāhibhi;
ja545:188.3	Icchā lobho ca kummaggo,
ja545:188.4	ujumaggo ca saṁyamo.
ja545:189.1	Rūpe sadde rase gandhe,
ja545:189.2	vāhanassa padhāvato;
ja545:189.3	Paññā ākoṭanī rāja,
ja545:189.4	tattha attāva sārathi.
ja545:190.1	Sace etena yānena,
ja545:190.2	samacariyā daḷhā dhiti;
ja545:190.3	Sabbakāmaduho rāja,
ja545:190.4	na jātu nirayaṁ vaje”.
ja545:191.1	“Alāto devadattosi,
ja545:191.2	sunāmo āsi bhaddaji;
ja545:191.3	Vijayo sāriputtosi,
ja545:191.4	moggallānosi bījako.
ja545:192.1	Sunakkhatto licchaviputto,
ja545:192.2	guṇo āsi acelako;
ja545:192.3	Ānando sā rucā āsi,
ja545:192.4	yā rājānaṁ pasādayi.
ja545:193.1	Uruvelakassapo rājā,
ja545:193.2	pāpadiṭṭhi tadā ahu;
ja545:193.3	Mahābrahmā bodhisatto,
ja545:193.4	evaṁ dhāretha jātakan”ti.
ja545:194.1	Mahānāradakassapajātakaṁ aṭṭhamaṁ.
ja546:0.1	Jātaka
ja546:0.2	Mahānipāta
ja546:0.3	Mūgapakkhavagga
ja546:0.4	Vidhurajātaka
ja546:1.0.1	1 Dohaḷakaṇḍa
ja546:1.1	“Paṇḍu kisiyāsi dubbalā,
ja546:1.2	Vaṇṇarūpaṁ natavedisaṁ pure;
ja546:1.3	Vimale akkhāhi pucchitā,
ja546:1.4	Kīdisī tuyhaṁ sarīravedanā”.
ja546:2.1	“Dhammo manujesu mātīnaṁ,
ja546:2.2	Dohaḷo nāma janinda vuccati;
ja546:2.3	Dhammāhataṁ nāgakuñjara,
ja546:2.4	Vidhurassa hadayābhipatthaye”.
ja546:3.1	“Candaṁ kho tvaṁ dohaḷāyasi,
ja546:3.2	Sūriyaṁ vā atha vāpi mālutaṁ;
ja546:3.3	Dullabhañhi vidhurassa dassanaṁ,
ja546:3.4	Ko vidhuramidha mānayissati”.
ja546:4.1	“Kiṁ nu tāta tuvaṁ pajjhāyasi,
ja546:4.2	Padumaṁ hatthagataṁva te mukhaṁ;
ja546:4.3	Kiṁ nu dummanarūposi issara,
ja546:4.4	Mā tvaṁ soci amittatāpana”.
ja546:5.1	“Mātā hi tava irandhati,
ja546:5.2	Vidhurassa hadayaṁ dhaniyati;
ja546:5.3	Dullabhañhi vidhurassa dassanaṁ,
ja546:5.4	Ko vidhuramidha mānayissati.
ja546:6.1	Tassa bhattupariyesanaṁ cara,
ja546:6.2	Yo vidhuramidha mānayissati”;
ja546:6.3	Pituno ca sā sutvāna vākyaṁ,
ja546:6.4	Rattiṁ nikkhamma avassutiṁ cari.
ja546:7.1	“Ke gandhabbe rakkhase ca nāge,
ja546:7.2	Ke kimpurise cāpi mānuse;
ja546:7.3	Ke paṇḍite sabbakāmadade,
ja546:7.4	Dīgharattaṁ bhattā me bhavissati”.
ja546:8.1	“Assāsa hessāmi te pati,
ja546:8.2	Bhattā te hessāmi anindalocane;
ja546:8.3	Paññā hi mamaṁ tathāvidhā,
ja546:8.4	Assāsa hessasi bhariyā mama”.
ja546:9.1	Avacāsi puṇṇakaṁ irandhatī,
ja546:9.2	Pubbapathānugatena cetasā;
ja546:9.3	“Ehi gacchāma pitu mamantike,
ja546:9.4	Esova te etamatthaṁ pavakkhati”.
ja546:10.1	Alaṅkatā suvasanā,
ja546:10.2	mālinī candanussadā;
ja546:10.3	Yakkhaṁ hatthe gahetvāna,
ja546:10.4	pitusantikupāgami.
ja546:11.1	“Nāgavara vaco suṇohi me,
ja546:11.2	Patirūpaṁ paṭipajja suṅkiyaṁ;
ja546:11.3	Patthemi ahaṁ irandhatiṁ,
ja546:11.4	Tāya samaṅgiṁ karohi maṁ tuvaṁ.
ja546:12.1	Sataṁ hatthī sataṁ assā,
ja546:12.2	sataṁ assatarīrathā;
ja546:12.3	Sataṁ valabhiyo puṇṇā,
ja546:12.4	nānāratnassa kevalā;
ja546:12.5	Te nāga paṭipajjassu,
ja546:12.6	dhītaraṁ dehirandhatiṁ”.
ja546:13.1	“Yāva āmantaye ñātī,
ja546:13.2	mitte ca suhadajjane;
ja546:13.3	Anāmanta kataṁ kammaṁ,
ja546:13.4	taṁ pacchā anutappati”.
ja546:14.1	Tato so varuṇo nāgo,
ja546:14.2	pavisitvā nivesanaṁ;
ja546:14.3	Bhariyaṁ āmantayitvāna,
ja546:14.4	idaṁ vacanamabravi.
ja546:15.1	“Ayaṁ so puṇṇako yakkho,
ja546:15.2	yācatī maṁ irandhatiṁ;
ja546:15.3	Bahunā vittalābhena,
ja546:15.4	tassa dema piyaṁ mamaṁ”.
ja546:16.1	“Na dhanena na vittena,
ja546:16.2	Labbhā amhaṁ irandhatī;
ja546:16.3	Sace ca kho hadayaṁ paṇḍitassa,
ja546:16.4	Dhammena laddhā idha māhareyya;
ja546:16.5	Etena vittena kumāri labbhā,
ja546:16.6	Nāññaṁ dhanaṁ uttari patthayāma”.
ja546:17.1	Tato so varuṇo nāgo,
ja546:17.2	nikkhamitvā nivesanā;
ja546:17.3	Puṇṇakāmantayitvāna,
ja546:17.4	idaṁ vacanamabravi.
ja546:18.1	“Na dhanena na vittena,
ja546:18.2	Labbhā amhaṁ irandhatī;
ja546:18.3	Sace tuvaṁ hadayaṁ paṇḍitassa,
ja546:18.4	Dhammena laddhā idha māharesi;
ja546:18.5	Etena vittena kumāri labbhā,
ja546:18.6	Nāññaṁ dhanaṁ uttari patthayāma”.
ja546:19.1	“Yaṁ paṇḍitotyeke vadanti loke,
ja546:19.2	Tameva bāloti punāhu aññe;
ja546:19.3	Akkhāhi me vippavadanti ettha,
ja546:19.4	Kaṁ paṇḍitaṁ nāga tuvaṁ vadesi”.
ja546:20.1	“Korabyarājassa dhanañcayassa,
ja546:20.2	Yadi te suto vidhuro nāma kattā;
ja546:20.3	Ānehi taṁ paṇḍitaṁ dhammaladdhā,
ja546:20.4	Irandhatī padacarā te hotu”.
ja546:21.1	Idañca sutvā varuṇassa vākyaṁ,
ja546:21.2	Uṭṭhāya yakkho paramappatīto;
ja546:21.3	Tattheva santo purisaṁ asaṁsi,
ja546:21.4	“Ānehi ājaññamidheva yuttaṁ.
ja546:22.1	Jātarūpamayā kaṇṇā,
ja546:22.2	kācamhicamayā khurā;
ja546:22.3	Jambonadassa pākassa,
ja546:22.4	suvaṇṇassa uracchado”.
ja546:23.1	Devavāhavahaṁ yānaṁ,
ja546:23.2	Assamāruyha puṇṇako;
ja546:23.3	Alaṅkato kappitakesamassu,
ja546:23.4	Pakkāmi vehāyasamantalikkhe.
ja546:24.1	So puṇṇako kāmarāgena giddho,
ja546:24.2	Irandhatiṁ nāgakaññaṁ jigīsaṁ;
ja546:24.3	Gantvāna taṁ bhūtapatiṁ yasassiṁ,
ja546:24.4	Iccabravī vessavaṇaṁ kuveraṁ.
ja546:25.1	“Bhogavatī nāma mandire,
ja546:25.2	Vāsā hiraññavatīti vuccati;
ja546:25.3	Nagare nimmite kañcanamaye,
ja546:25.4	Maṇḍalassa uragassa niṭṭhitaṁ.
ja546:26.1	Aṭṭālakā oṭṭhagīviyo,
ja546:26.2	Lohitaṅkassa masāragallino;
ja546:26.3	Pāsādettha silāmayā,
ja546:26.4	Sovaṇṇaratanehi chāditā.
ja546:27.1	Ambā tilakā ca jambuyo,
ja546:27.2	Sattapaṇṇā mucalindaketakā;
ja546:27.3	Piyaṅgu uddālakā sahā,
ja546:27.4	Uparibhaddakā sinduvārakā.
ja546:28.1	Campeyyakā nāgamallikā,
ja546:28.2	Bhaginīmālā atha mettha koliyā;
ja546:28.3	Ete dumā pariṇāmitā,
ja546:28.4	Sobhayanti uragassa mandiraṁ.
ja546:29.1	Khajjurettha silāmayā,
ja546:29.2	Sovaṇṇadhuvapupphitā bahū;
ja546:29.3	Yattha vasato papātiko,
ja546:29.4	Nāgarājā varuṇo mahiddhiko.
ja546:30.1	Tassa komārikā bhariyā,
ja546:30.2	Vimalā kañcanavelliviggahā;
ja546:30.3	Kālā taruṇāva uggatā,
ja546:30.4	Pucimandatthanī cārudassanā.
ja546:31.1	Lākhārasarattasucchavī,
ja546:31.2	Kaṇikārāva nivātapupphitā;
ja546:31.3	Tidivokacarāva accharā,
ja546:31.4	Vijjuvabbhaghanā vinissaṭā.
ja546:32.1	Sā dohaḷinī suvimhitā,
ja546:32.2	Vidhurassa hadayaṁ dhaniyati;
ja546:32.3	Taṁ tesaṁ demi issara,
ja546:32.4	Tena te denti irandhatiṁ mamaṁ”.
ja546:33.1	So puṇṇako bhūtapatiṁ yasassiṁ,
ja546:33.2	Āmantaya vessavaṇaṁ kuveraṁ;
ja546:33.3	“Tattheva santo purisaṁ asaṁsi,
ja546:33.4	Ānehi ājaññamidheva yuttaṁ”.
ja546:34.1	Jātarūpamayā kaṇṇā,
ja546:34.2	kācamhicamayā khurā;
ja546:34.3	Jambonadassa pākassa,
ja546:34.4	suvaṇṇassa uracchado.
ja546:35.1	Devavāhavahaṁ yānaṁ,
ja546:35.2	Assamāruyha puṇṇako;
ja546:35.3	Alaṅkato kappitakesamassu,
ja546:35.4	Pakkāmi vehāyasamantalikkhe.
ja546:36.1	So aggamā rājagahaṁ surammaṁ,
ja546:36.2	Aṅgassa rañño nagaraṁ durāyutaṁ;
ja546:36.3	Pahūtabhakkhaṁ bahuannapānaṁ,
ja546:36.4	Masakkasāraṁ viya vāsavassa.
ja546:37.1	Mayūrakoñcāgaṇasampaghuṭṭhaṁ,
ja546:37.2	Dijābhighuṭṭhaṁ dijasaṅghasevitaṁ;
ja546:37.3	Nānāsakuntābhirudaṁ suvaṅgaṇaṁ,
ja546:37.4	Pupphābhikiṇṇaṁ himavaṁva pabbataṁ.
ja546:38.1	So puṇṇako vepulamābhirūhi,
ja546:38.2	Siluccayaṁ kimpurisānuciṇṇaṁ;
ja546:38.3	Anvesamāno maṇiratanaṁ uḷāraṁ,
ja546:38.4	Tamaddasā pabbatakūṭamajjhe.
ja546:39.1	Disvā maṇiṁ pabhassaraṁ jātimantaṁ,
ja546:39.2	Manoharaṁ maṇiratanaṁ uḷāraṁ;
ja546:39.3	Daddallamānaṁ yasasā yasassinaṁ,
ja546:39.4	Obhāsatī vijjurivantalikkhe.
ja546:40.1	Tamaggahī veḷuriyaṁ mahagghaṁ,
ja546:40.2	Manoharaṁ nāma mahānubhāvaṁ;
ja546:40.3	Ājaññamāruyha manomavaṇṇo,
ja546:40.4	Pakkāmi vehāyasamantalikkhe.
ja546:41.1	So aggamā nagaramindapatthaṁ,
ja546:41.2	Oruyhupāgacchi sabhaṁ kurūnaṁ;
ja546:41.3	Samāgate ekasataṁ samagge,
ja546:41.4	Avhettha yakkho avikampamāno.
ja546:42.1	“Ko nīdha raññaṁ varamābhijeti,
ja546:42.2	Kamābhijeyyāma varaddhanena;
ja546:42.3	Kamanuttaraṁ ratanavaraṁ jināma,
ja546:42.4	Ko vāpi no jeti varaddhanena”.
ja546:43.1	“Kuhiṁ nu raṭṭhe tava jātibhūmi,
ja546:43.2	Na korabyasseva vaco tavedaṁ;
ja546:43.3	Abhītosi no vaṇṇanibhāya sabbe,
ja546:43.4	Akkhāhi me nāmañca bandhave ca”.
ja546:44.1	“Kaccāyano māṇavakosmi rāja,
ja546:44.2	Anūnanāmo iti mavhayanti;
ja546:44.3	Aṅgesu me ñātayo bandhavā ca,
ja546:44.4	Akkhena devasmi idhānupatto”.
ja546:45.1	“Kiṁ māṇavassa ratanāni atthi,
ja546:45.2	Ye taṁ jinanto hare akkhadhutto;
ja546:45.3	Bahūni rañño ratanāni atthi,
ja546:45.4	Te tvaṁ daliddo kathamavhayesi”.
ja546:46.1	“Manoharo nāma maṇī mamāyaṁ,
ja546:46.2	Manoharaṁ maṇiratanaṁ uḷāraṁ;
ja546:46.3	Imañca ājaññamamittatāpanaṁ,
ja546:46.4	Etaṁ me jinitvā hare akkhadhutto”.
ja546:47.1	“Eko maṇī māṇava kiṁ karissati,
ja546:47.2	Ājāniyeko pana kiṁ karissati;
ja546:47.3	Bahūni rañño maṇiratanāni atthi,
ja546:47.4	Ājāniyā vātajavā anappakā”.
ja546:48.1	Dohaḷakaṇḍaṁ nāma.
ja546:49.0	2. Maṇikaṇḍa
ja546:49.1	“Idañca me maṇiratanaṁ,
ja546:49.2	passa tvaṁ dvipaduttama;
ja546:49.3	Itthīnaṁ viggahā cettha,
ja546:49.4	purisānañca viggahā.
ja546:50.1	Migānaṁ viggahā cettha,
ja546:50.2	sakuṇānañca viggahā;
ja546:50.3	Nāgarājā supaṇṇā ca,
ja546:50.4	maṇimhi passa nimmitaṁ.
ja546:51.1	Hatthānīkaṁ rathānīkaṁ,
ja546:51.2	asse pattī ca vammine;
ja546:51.3	Caturaṅginimaṁ senaṁ,
ja546:51.4	maṇimhi passa nimmitaṁ.
ja546:52.1	Hatthārohe anīkaṭṭhe,
ja546:52.2	rathike pattikārake;
ja546:52.3	Balaggāni viyūḷhāni,
ja546:52.4	maṇimhi passa nimmitaṁ.
ja546:53.1	Puraṁ uddhāpasampannaṁ,
ja546:53.2	bahupākāratoraṇaṁ;
ja546:53.3	Siṅghāṭakesu bhūmiyo,
ja546:53.4	maṇimhi passa nimmitaṁ.
ja546:54.1	Esikā parikhāyo ca,
ja546:54.2	palikhaṁ aggaḷāni ca;
ja546:54.3	Aṭṭālake ca dvāre ca,
ja546:54.4	maṇimhi passa nimmitaṁ.
ja546:55.1	Passa toraṇamaggesu,
ja546:55.2	nānādijagaṇā bahū;
ja546:55.3	Haṁsā koñcā mayūrā ca,
ja546:55.4	cakkavākā ca kukkuhā.
ja546:56.1	Kuṇālakā bahū citrā,
ja546:56.2	sikhaṇḍī jīvajīvakā;
ja546:56.3	Nānādijagaṇākiṇṇaṁ,
ja546:56.4	maṇimhi passa nimmitaṁ.
ja546:57.1	Passa nagaraṁ supākāraṁ,
ja546:57.2	abbhutaṁ lomahaṁsanaṁ;
ja546:57.3	Samussitadhajaṁ rammaṁ,
ja546:57.4	soṇṇavālukasanthataṁ.
ja546:58.1	Passettha paṇṇasālāyo,
ja546:58.2	vibhattā bhāgaso mitā;
ja546:58.3	Nivesane nivese ca,
ja546:58.4	sandhibyūhe pathaddhiyo.
ja546:59.1	Pānāgāre ca soṇḍe ca,
ja546:59.2	sūnā odaniyā gharā;
ja546:59.3	Vesī ca gaṇikāyo ca,
ja546:59.4	maṇimhi passa nimmitaṁ.
ja546:60.1	Mālākāre ca rajake,
ja546:60.2	gandhike atha dussike;
ja546:60.3	Suvaṇṇakāre maṇikāre,
ja546:60.4	maṇimhi passa nimmitaṁ.
ja546:61.1	Āḷārike ca sūde ca,
ja546:61.2	naṭanāṭakagāyino;
ja546:61.3	Pāṇissare kumbhathūnike,
ja546:61.4	maṇimhi passa nimmitaṁ.
ja546:62.1	Passa bherī mudiṅgā ca,
ja546:62.2	saṅkhā paṇavadindimā;
ja546:62.3	Sabbañca tāḷāvacaraṁ,
ja546:62.4	maṇimhi passa nimmitaṁ.
ja546:63.1	Sammatālañca vīṇañca,
ja546:63.2	naccagītaṁ suvāditaṁ;
ja546:63.3	Tūriyatāḷitasaṅghuṭṭhaṁ,
ja546:63.4	maṇimhi passa nimmitaṁ.
ja546:64.1	Laṅghikā muṭṭhikā cettha,
ja546:64.2	māyākārā ca sobhiyā;
ja546:64.3	Vetālike ca jalle ca,
ja546:64.4	maṇimhi passa nimmitaṁ.
ja546:65.1	Samajjā cettha vattanti,
ja546:65.2	ākiṇṇā naranāribhi;
ja546:65.3	Mañcātimañce bhūmiyo,
ja546:65.4	maṇimhi passa nimmitaṁ.
ja546:66.1	Passa malle samajjasmiṁ,
ja546:66.2	phoṭente diguṇaṁ bhujaṁ;
ja546:66.3	Nihate nihatamāne ca,
ja546:66.4	maṇimhi passa nimmitaṁ.
ja546:67.1	Passa pabbatapādesu,
ja546:67.2	nānāmigagaṇā bahū;
ja546:67.3	Sīhā byagghā varāhā ca,
ja546:67.4	acchakokataracchayo.
ja546:68.1	Palāsādā gavajā ca,
ja546:68.2	mahiṁsā rohitā rurū;
ja546:68.3	Eṇeyyā ca varāhā ca,
ja546:68.4	gaṇino nīkasūkarā.
ja546:69.1	Kadalimigā bahū citrā,
ja546:69.2	biḷārā sasakaṇṭakā;
ja546:69.3	Nānāmigagaṇākiṇṇaṁ,
ja546:69.4	maṇimhi passa nimmitaṁ.
ja546:70.1	Najjāyo supatitthāyo,
ja546:70.2	soṇṇavālukasanthatā;
ja546:70.3	Acchā savanti ambūni,
ja546:70.4	macchagumbanisevitā.
ja546:71.1	Kumbhīlā makarā cettha,
ja546:71.2	susumārā ca kacchapā;
ja546:71.3	Pāṭhīnā pāvusā macchā,
ja546:71.4	balajā muñjarohitā.
ja546:72.1	Nānādijagaṇākiṇṇā,
ja546:72.2	nānādumagaṇāyutā;
ja546:72.3	Veḷuriyakarodāyo,
ja546:72.4	maṇimhi passa nimmitaṁ.
ja546:73.1	Passettha pokkharaṇiyo,
ja546:73.2	suvibhattā catuddisā;
ja546:73.3	Nānādijagaṇākiṇṇā,
ja546:73.4	puthulomanisevitā.
ja546:74.1	Samantodakasampannaṁ,
ja546:74.2	mahiṁ sāgarakuṇḍalaṁ;
ja546:74.3	Upetaṁ vanarājehi,
ja546:74.4	maṇimhi passa nimmitaṁ.
ja546:75.1	Purato videhe passa,
ja546:75.2	goyāniye ca pacchato;
ja546:75.3	Kuruyo jambudīpañca,
ja546:75.4	maṇimhi passa nimmitaṁ.
ja546:76.1	Passa candaṁ sūriyañca,
ja546:76.2	obhāsante catuddisā;
ja546:76.3	Sineruṁ anupariyante,
ja546:76.4	maṇimhi passa nimmitaṁ.
ja546:77.1	Sineruṁ himavantañca,
ja546:77.2	sāgarañca mahītalaṁ;
ja546:77.3	Cattāro ca mahārāje,
ja546:77.4	maṇimhi passa nimmitaṁ.
ja546:78.1	Ārāme vanagumbe ca,
ja546:78.2	pāṭiye ca siluccaye;
ja546:78.3	Ramme kimpurisākiṇṇe,
ja546:78.4	maṇimhi passa nimmitaṁ.
ja546:79.1	Phārusakaṁ cittalataṁ,
ja546:79.2	missakaṁ nandanaṁ vanaṁ;
ja546:79.3	Vejayantañca pāsādaṁ,
ja546:79.4	maṇimhi passa nimmitaṁ.
ja546:80.1	Sudhammaṁ tāvatiṁsañca,
ja546:80.2	pārichattañca pupphitaṁ;
ja546:80.3	Erāvaṇaṁ nāgarājaṁ,
ja546:80.4	maṇimhi passa nimmitaṁ.
ja546:81.1	Passettha devakaññāyo,
ja546:81.2	nabhā vijjurivuggatā;
ja546:81.3	Nandane vicarantiyo,
ja546:81.4	maṇimhi passa nimmitaṁ.
ja546:82.1	Passettha devakaññāyo,
ja546:82.2	devaputtapalobhinī;
ja546:82.3	Devaputte ramamāne,
ja546:82.4	maṇimhi passa nimmitaṁ.
ja546:83.1	Parosahassapāsāde,
ja546:83.2	veḷuriyaphalasanthate;
ja546:83.3	Pajjalante ca vaṇṇena,
ja546:83.4	maṇimhi passa nimmitaṁ.
ja546:84.1	Tāvatiṁse ca yāme ca,
ja546:84.2	Tusite cāpi nimmite;
ja546:84.3	Paranimmitavasavattino,
ja546:84.4	Maṇimhi passa nimmitaṁ.
ja546:85.1	Passettha pokkharaṇiyo,
ja546:85.2	vippasannodikā sucī;
ja546:85.3	Mandālakehi sañchannā,
ja546:85.4	padumuppalakehi ca.
ja546:86.1	Dasettha rājiyo setā,
ja546:86.2	dasanīlā manoramā;
ja546:86.3	Cha piṅgalā pannarasa,
ja546:86.4	haliddā ca catuddasa.
ja546:87.1	Vīsati tattha sovaṇṇā,
ja546:87.2	vīsati rajatāmayā;
ja546:87.3	Indagopakavaṇṇābhā,
ja546:87.4	tāva dissanti tiṁsati.
ja546:88.1	Dasettha kāḷiyo chacca,
ja546:88.2	mañjeṭṭhā pannavīsati;
ja546:88.3	Missā bandhukapupphehi,
ja546:88.4	nīluppalavicittikā.
ja546:89.1	Evaṁ sabbaṅgasampannaṁ,
ja546:89.2	accimantaṁ pabhassaraṁ;
ja546:89.3	Odhisuṅkaṁ mahārāja,
ja546:89.4	passa tvaṁ dvipaduttama”.
ja546:90.1	Maṇikaṇḍaṁ nāma.
ja546:91.0	3. Akkhakaṇḍa
ja546:91.1	“Upāgataṁ rāja mupehi lakkhaṁ,
ja546:91.2	Netādisaṁ maṇiratanaṁ tavatthi;
ja546:91.3	Dhammena jissāma asāhasena,
ja546:91.4	Jito ca no khippamavākarohi.
ja546:92.1	Pañcāla-paccuggata-sūrasena,
ja546:92.2	Macchā ca maddā saha kekakebhi;
ja546:92.3	Passantu note asaṭhena yuddhaṁ,
ja546:92.4	Na no sabhāyaṁ na karonti kiñci”.
ja546:93.1	Te pāvisuṁ akkhamadena mattā,
ja546:93.2	Rājā kurūnaṁ puṇṇako cāpi yakkho;
ja546:93.3	Rājā kaliṁ viccinamaggahesi,
ja546:93.4	Kaṭaṁ aggahī puṇṇako nāma yakkho.
ja546:94.1	Te tattha jūte ubhaye samāgate,
ja546:94.2	Raññaṁ sakāse sakhīnañca majjhe;
ja546:94.3	Ajesi yakkho naravīraseṭṭhaṁ,
ja546:94.4	Tatthappanādo tumulo babhūva.
ja546:95.1	“Jayo mahārāja parājayo ca,
ja546:95.2	Āyūhataṁ aññatarassa hoti;
ja546:95.3	Janinda jīnosi varaddhanena,
ja546:95.4	Jito ca me khippamavākarohi”.
ja546:96.1	“Hatthī gavāssā maṇikuṇḍalā ca,
ja546:96.2	Yañcāpi mayhaṁ ratanaṁ pathabyā;
ja546:96.3	Gaṇhāhi kaccāna varaṁ dhanānaṁ,
ja546:96.4	Ādāya yenicchasi tena gaccha”.
ja546:97.1	“Hatthī gavāssā maṇikuṇḍalā ca,
ja546:97.2	Yañcāpi tuyhaṁ ratanaṁ pathabyā;
ja546:97.3	Tesaṁ varo vidhuro nāma kattā,
ja546:97.4	So me jito taṁ me avākarohi”.
ja546:98.1	“Attā ca me so saraṇaṁ gatī ca,
ja546:98.2	Dīpo ca leṇo ca parāyaṇo ca;
ja546:98.3	Asantuleyyo mama so dhanena,
ja546:98.4	Pāṇena me sādiso esa kattā”.
ja546:99.1	“Ciraṁ vivādo mama tuyhañcassa,
ja546:99.2	Kāmañca pucchāma tameva gantvā;
ja546:99.3	Esova no vivaratu etamatthaṁ,
ja546:99.4	Yaṁ vakkhatī hotu kathā ubhinnaṁ”.
ja546:100.1	“Addhā hi saccaṁ bhaṇasi,
ja546:100.2	na ca māṇava sāhasaṁ;
ja546:100.3	Tameva gantvā pucchāma,
ja546:100.4	tena tussāmubho janā”.
ja546:101.1	“Saccaṁ nu devā vidahū kurūnaṁ,
ja546:101.2	Dhamme ṭhitaṁ vidhuraṁ nāmamaccaṁ;
ja546:101.3	Dāsosi rañño uda vāsi ñāti,
ja546:101.4	Vidhuroti saṅkhā katamāsi loke”.
ja546:102.1	“Āmāyadāsāpi bhavanti heke,
ja546:102.2	Dhanena kītāpi bhavanti dāsā;
ja546:102.3	Sayampi heke upayanti dāsā,
ja546:102.4	Bhayā paṇunnāpi bhavanti dāsā.
ja546:103.1	Ete narānaṁ caturova dāsā,
ja546:103.2	Addhā hi yonito ahampi jāto;
ja546:103.3	Bhavo ca rañño abhavo ca rañño,
ja546:103.4	Dāsāhaṁ devassa parampi gantvā;
ja546:103.5	Dhammena maṁ māṇava tuyha dajjā”.
ja546:104.1	“Ayaṁ dutīyo vijayo mamajja,
ja546:104.2	Puṭṭho hi kattā vivarettha pañhaṁ;
ja546:104.3	Adhammarūpo vata rājaseṭṭho,
ja546:104.4	Subhāsitaṁ nānujānāsi mayhaṁ”.
ja546:105.1	“Evañce no so vivarettha pañhaṁ,
ja546:105.2	Dāsohamasmi na ca khosmi ñāti;
ja546:105.3	Gaṇhāhi kaccāna varaṁ dhanānaṁ,
ja546:105.4	Ādāya yenicchasi tena gaccha”.
ja546:106.1	Akkhakaṇḍaṁ nāma.
ja546:107.0	4. Gharāvāsapañhā
ja546:107.1	“Vidhura vasamānassa,
ja546:107.2	gahaṭṭhassa sakaṁ gharaṁ;
ja546:107.3	Khemā vutti kathaṁ assa,
ja546:107.4	kathaṁ nu assa saṅgaho.
ja546:108.1	Abyābajjhaṁ kathaṁ assa,
ja546:108.2	saccavādī ca māṇavo;
ja546:108.3	Asmā lokā paraṁ lokaṁ,
ja546:108.4	kathaṁ pecca na socati”.
ja546:109.1	Taṁ tattha gatimā dhitimā,
ja546:109.2	matimā atthadassimā;
ja546:109.3	Saṅkhātā sabbadhammānaṁ,
ja546:109.4	vidhuro etadabravi.
ja546:110.1	“Na sādhāraṇadārassa,
ja546:110.2	na bhuñje sādumekako;
ja546:110.3	Na seve lokāyatikaṁ,
ja546:110.4	netaṁ paññāya vaḍḍhanaṁ.
ja546:111.1	Sīlavā vattasampanno,
ja546:111.2	appamatto vicakkhaṇo;
ja546:111.3	Nivātavutti atthaddho,
ja546:111.4	surato sakhilo mudu.
ja546:112.1	Saṅgahetā ca mittānaṁ,
ja546:112.2	saṁvibhāgī vidhānavā;
ja546:112.3	Tappeyya annapānena,
ja546:112.4	sadā samaṇabrāhmaṇe.
ja546:113.1	Dhammakāmo sutādhāro,
ja546:113.2	bhaveyya paripucchako;
ja546:113.3	Sakkaccaṁ payirupāseyya,
ja546:113.4	sīlavante bahussute.
ja546:114.1	Gharamāvasamānassa,
ja546:114.2	gahaṭṭhassa sakaṁ gharaṁ;
ja546:114.3	Khemā vutti siyā evaṁ,
ja546:114.4	evaṁ nu assa saṅgaho.
ja546:115.1	Abyābajjhaṁ siyā evaṁ,
ja546:115.2	saccavādī ca māṇavo;
ja546:115.3	Asmā lokā paraṁ lokaṁ,
ja546:115.4	evaṁ pecca na socati”.
ja546:116.1	Gharāvāsapañhā nāma.
ja546:117.0	5. Lakkhaṇakaṇḍa
ja546:117.1	“Ehi dāni gamissāma,
ja546:117.2	dinno no issarena me;
ja546:117.3	Mamevatthaṁ paṭipajja,
ja546:117.4	esa dhammo sanantano”.
ja546:118.1	“Jānāmi māṇava tayāhamasmi,
ja546:118.2	Dinnohamasmi tava issarena;
ja546:118.3	Tīhañca taṁ vāsayemu agāre,
ja546:118.4	Yenaddhunā anusāsemu putte”.
ja546:119.1	“Taṁ me tathā hotu vasemu tīhaṁ,
ja546:119.2	Kurutaṁ bhavajja gharesu kiccaṁ;
ja546:119.3	Anusāsataṁ puttadāre bhavajja,
ja546:119.4	Yathā tayī pecca sukhī bhaveyya”.
ja546:120.1	“Sādhū”ti vatvāna pahūtakāmo,
ja546:120.2	Pakkāmi yakkho vidhurena saddhiṁ;
ja546:120.3	Taṁ kuñjarājaññahayānuciṇṇaṁ,
ja546:120.4	Pāvekkhi antepuramariyaseṭṭho.
ja546:121.1	Koñcaṁ mayūrañca piyañca ketaṁ,
ja546:121.2	Upāgami tattha surammarūpaṁ;
ja546:121.3	Pahūtabhakkhaṁ bahuannapānaṁ,
ja546:121.4	Masakkasāraṁ viya vāsavassa.
ja546:122.1	Tattha naccanti gāyanti,
ja546:122.2	avhāyanti varāvaraṁ;
ja546:122.3	Accharā viya devesu,
ja546:122.4	nāriyo samalaṅkatā.
ja546:123.1	Samaṅgikatvā pamadāhi yakkhaṁ,
ja546:123.2	Annena pānena ca dhammapālo;
ja546:123.3	Atthattha mevānuvicintayanto,
ja546:123.4	Pāvekkhi bhariyāya tadā sakāse.
ja546:124.1	Taṁ candanagandharasānulittaṁ,
ja546:124.2	Suvaṇṇajambonadanikkhasādisaṁ;
ja546:124.3	Bhariyaṁvacā “ehi suṇohi bhoti,
ja546:124.4	Puttāni āmantaya tambanette”.
ja546:125.1	Sutvāna vākyaṁ patino anujjā,
ja546:125.2	Suṇisaṁvaca tambanakhiṁ sunettaṁ;
ja546:125.3	“Āmantaya vammadharāni cete,
ja546:125.4	Puttāni indīvarapupphasāme”.
ja546:126.1	Te āgate muddhani dhammapālo,
ja546:126.2	Cumbitvā putte avikampamāno;
ja546:126.3	Āmantayitvāna avoca vākyaṁ,
ja546:126.4	“Dinnāhaṁ raññā idha māṇavassa.
ja546:127.1	Tassajjahaṁ attasukhī vidheyyo,
ja546:127.2	Ādāya yenicchati tena gacchati;
ja546:127.3	Ahañca vo sāsitumāgatosmi,
ja546:127.4	Kathaṁ ahaṁ aparittāya gacche.
ja546:128.1	Sace vo rājā kururaṭṭhavāsī,
ja546:128.2	Janasandho puccheyya pahūtakāmo;
ja546:128.3	Kimābhijānātha pure purāṇaṁ,
ja546:128.4	Kiṁ vo pitā anusāse puratthā.
ja546:129.1	Samāsanā hotha mayāva sabbe,
ja546:129.2	Konīdha rañño abbhatiko manusso;
ja546:129.3	Tamañjaliṁ kariya vadetha evaṁ,
ja546:129.4	Mā hevaṁ deva na hi esa dhammo;
ja546:129.5	Viyaggharājassa nihīnajacco,
ja546:129.6	Samāsano deva kathaṁ bhaveyya”.
ja546:130.1	Lakkhaṇakaṇḍaṁ nāma.
ja546:131.0	6. Rājavasati
ja546:131.1	So ca putte amacce ca,
ja546:131.2	ñātayo suhadajjane;
ja546:131.3	Alīnamanasaṅkappo,
ja546:131.4	vidhuro etadabravi.
ja546:132.1	“Ethayyo rājavasatiṁ,
ja546:132.2	nisīditvā suṇātha me;
ja546:132.3	Yathā rājakulaṁ patto,
ja546:132.4	yasaṁ poso nigacchati.
ja546:133.1	Na hi rājakulaṁ patto,
ja546:133.2	aññāto labhate yasaṁ;
ja546:133.3	Nāsūro nāpi dummedho,
ja546:133.4	nappamatto kudācanaṁ.
ja546:134.1	Yadāssa sīlaṁ paññañca,
ja546:134.2	soceyyaṁ cādhigacchati;
ja546:134.3	Atha vissasate tyamhi,
ja546:134.4	guyhañcassa na rakkhati.
ja546:135.1	Tulā yathā paggahitā,
ja546:135.2	samadaṇḍā sudhāritā;
ja546:135.3	Ajjhiṭṭho na vikampeyya,
ja546:135.4	sa rājavasatiṁ vase.
ja546:136.1	Tulā yathā paggahitā,
ja546:136.2	samadaṇḍā sudhāritā;
ja546:136.3	Sabbāni abhisambhonto,
ja546:136.4	sa rājavasatiṁ vase.
ja546:137.1	Divā vā yadi vā rattiṁ,
ja546:137.2	rājakiccesu paṇḍito;
ja546:137.3	Ajjhiṭṭho na vikampeyya,
ja546:137.4	sa rājavasatiṁ vase.
ja546:138.1	Divā vā yadi vā rattiṁ,
ja546:138.2	rājakiccesu paṇḍito;
ja546:138.3	Sabbāni abhisambhonto,
ja546:138.4	sa rājavasatiṁ vase.
ja546:139.1	Yo cassa sukato maggo,
ja546:139.2	rañño suppaṭiyādito;
ja546:139.3	Na tena vutto gaccheyya,
ja546:139.4	sa rājavasatiṁ vase.
ja546:140.1	Na rañño sadisaṁ bhuñje,
ja546:140.2	kāmabhoge kudācanaṁ;
ja546:140.3	Sabbattha pacchato gacche,
ja546:140.4	sa rājavasatiṁ vase.
ja546:141.1	Na rañño sadisaṁ vatthaṁ,
ja546:141.2	na mālaṁ na vilepanaṁ;
ja546:141.3	Ākappaṁ sarakuttiṁ vā,
ja546:141.4	na rañño sadisamācare;
ja546:141.5	Aññaṁ kareyya ākappaṁ,
ja546:141.6	sa rājavasatiṁ vase.
ja546:142.1	Kīḷe rājā amaccehi,
ja546:142.2	bhariyāhi parivārito;
ja546:142.3	Nāmacco rājabhariyāsu,
ja546:142.4	bhāvaṁ kubbetha paṇḍito.
ja546:143.1	Anuddhato acapalo,
ja546:143.2	nipako saṁvutindriyo;
ja546:143.3	Manopaṇidhisampanno,
ja546:143.4	sa rājavasatiṁ vase.
ja546:144.1	Nāssa bhariyāhi kīḷeyya,
ja546:144.2	na manteyya rahogato;
ja546:144.3	Nāssa kosā dhanaṁ gaṇhe,
ja546:144.4	sa rājavasatiṁ vase.
ja546:145.1	Na niddaṁ bahu maññeyya,
ja546:145.2	na madāya suraṁ pive;
ja546:145.3	Nāssa dāye mige haññe,
ja546:145.4	sa rājavasatiṁ vase.
ja546:146.1	Nāssa pīṭhaṁ na pallaṅkaṁ,
ja546:146.2	Na kocchaṁ na nāvaṁ rathaṁ;
ja546:146.3	Sammatomhīti ārūhe,
ja546:146.4	Sa rājavasatiṁ vase.
ja546:147.1	Nātidūre bhaje rañño,
ja546:147.2	nāccāsanne vicakkhaṇo;
ja546:147.3	Sammukhañcassa tiṭṭheyya,
ja546:147.4	sandissanto sabhattuno.
ja546:148.1	Na ve rājā sakhā hoti,
ja546:148.2	na rājā hoti methuno;
ja546:148.3	Khippaṁ kujjhanti rājāno,
ja546:148.4	sūkenakkhīva ghaṭṭitaṁ.
ja546:149.1	Na pūjito maññamāno,
ja546:149.2	medhāvī paṇḍito naro;
ja546:149.3	Pharusaṁ patimanteyya,
ja546:149.4	rājānaṁ parisaṅgataṁ.
ja546:150.1	Laddhadvāro labhe dvāraṁ,
ja546:150.2	neva rājūsu vissase;
ja546:150.3	Aggīva saṁyato tiṭṭhe,
ja546:150.4	sa rājavasatiṁ vase.
ja546:151.1	Puttaṁ vā bhātaraṁ vā saṁ,
ja546:151.2	sampaggaṇhāti khattiyo;
ja546:151.3	Gāmehi nigamehi vā,
ja546:151.4	raṭṭhehi janapadehi vā;
ja546:151.5	Tuṇhībhūto upekkheyya,
ja546:151.6	na bhaṇe chekapāpakaṁ.
ja546:152.1	Hatthārohe anīkaṭṭhe,
ja546:152.2	rathike pattikārake;
ja546:152.3	Tesaṁ kammāvadānena,
ja546:152.4	rājā vaḍḍheti vetanaṁ;
ja546:152.5	Na tesaṁ antarā gacche,
ja546:152.6	sa rājavasatiṁ vase.
ja546:153.1	Cāpovūnudaro dhīro,
ja546:153.2	vaṁsovāpi pakampaye;
ja546:153.3	Paṭilomaṁ na vatteyya,
ja546:153.4	sa rājavasatiṁ vase.
ja546:154.1	Cāpovūnudaro assa,
ja546:154.2	macchovassa ajivhavā;
ja546:154.3	Appāsī nipako sūro,
ja546:154.4	sa rājavasatiṁ vase.
ja546:155.1	Na bāḷhaṁ itthiṁ gaccheyya,
ja546:155.2	sampassaṁ tejasaṅkhayaṁ;
ja546:155.3	Kāsaṁ sāsaṁ daraṁ balyaṁ,
ja546:155.4	khīṇamedho nigacchati.
ja546:156.1	Nātivelaṁ pabhāseyya,
ja546:156.2	na tuṇhī sabbadā siyā;
ja546:156.3	Avikiṇṇaṁ mitaṁ vācaṁ,
ja546:156.4	patte kāle udīraye.
ja546:157.1	Akkodhano asaṅghaṭṭo,
ja546:157.2	sacco saṇho apesuṇo;
ja546:157.3	Samphaṁ giraṁ na bhāseyya,
ja546:157.4	sa rājavasatiṁ vase.
ja546:158.1	Mātāpettibharo assa,
ja546:158.2	kule jeṭṭhāpacāyiko;
ja546:158.3	Saṇho sakhilasambhāso,
ja546:158.4	sa rājavasatiṁ vase.
ja546:159.1	Vinīto sippavā danto,
ja546:159.2	katatto niyato mudu;
ja546:159.3	Appamatto suci dakkho,
ja546:159.4	sa rājavasatiṁ vase.
ja546:160.1	Nivātavutti vuddhesu,
ja546:160.2	sappatisso sagāravo;
ja546:160.3	Surato sukhasaṁvāso,
ja546:160.4	sa rājavasatiṁ vase.
ja546:161.1	Ārakā parivajjeyya,
ja546:161.2	sahituṁ pahitaṁ janaṁ;
ja546:161.3	Bhattāraññevudikkheyya,
ja546:161.4	na ca aññassa rājino.
ja546:162.1	Samaṇe brāhmaṇe cāpi,
ja546:162.2	sīlavante bahussute;
ja546:162.3	Sakkaccaṁ payirupāseyya,
ja546:162.4	sa rājavasatiṁ vase.
ja546:163.1	Samaṇe brāhmaṇe cāpi,
ja546:163.2	sīlavante bahussute;
ja546:163.3	Sakkaccaṁ anuvāseyya,
ja546:163.4	sa rājavasatiṁ vase.
ja546:164.1	Samaṇe brāhmaṇe cāpi,
ja546:164.2	sīlavante bahussute;
ja546:164.3	Tappeyya annapānena,
ja546:164.4	sa rājavasatiṁ vase.
ja546:165.1	Samaṇe brāhmaṇe cāpi,
ja546:165.2	sīlavante bahussute;
ja546:165.3	Āsajja paññe sevetha,
ja546:165.4	ākaṅkhaṁ vuddhimattano.
ja546:166.1	Dinnapubbaṁ na hāpeyya,
ja546:166.2	dānaṁ samaṇabrāhmaṇe;
ja546:166.3	Na ca kiñci nivāreyya,
ja546:166.4	dānakāle vanibbake.
ja546:167.1	Paññavā buddhisampanno,
ja546:167.2	vidhānavidhikovido;
ja546:167.3	Kālaññū samayaññū ca,
ja546:167.4	sa rājavasatiṁ vase.
ja546:168.1	Uṭṭhātā kammadheyyesu,
ja546:168.2	appamatto vicakkhaṇo;
ja546:168.3	Susaṁvihitakammanto,
ja546:168.4	sa rājavasatiṁ vase.
ja546:169.1	Khalaṁ sālaṁ pasuṁ khettaṁ,
ja546:169.2	gantā cassa abhikkhaṇaṁ;
ja546:169.3	Mitaṁ dhaññaṁ nidhāpeyya,
ja546:169.4	mitaṁva pācaye ghare.
ja546:170.1	Puttaṁ vā bhātaraṁ vā saṁ,
ja546:170.2	sīlesu asamāhitaṁ;
ja546:170.3	Anaṅgavā hi te bālā,
ja546:170.4	yathā petā tatheva te;
ja546:170.5	Coḷañca nesaṁ piṇḍañca,
ja546:170.6	āsīnānaṁ padāpaye.
ja546:171.1	Dāse kammakare pesse,
ja546:171.2	sīlesu susamāhite;
ja546:171.3	Dakkhe uṭṭhānasampanne,
ja546:171.4	ādhipaccamhi ṭhāpaye.
ja546:172.1	Sīlavā ca alolo ca,
ja546:172.2	anurakkho ca rājino;
ja546:172.3	Āvī raho hito tassa,
ja546:172.4	sa rājavasatiṁ vase.
ja546:173.1	Chandaññū rājino cassa,
ja546:173.2	cittaṭṭho assa rājino;
ja546:173.3	Asaṅkusakavutti’ssa,
ja546:173.4	sa rājavasatiṁ vase.
ja546:174.1	Ucchādaye ca nhāpaye,
ja546:174.2	dhove pāde adhosiraṁ;
ja546:174.3	Āhatopi na kuppeyya,
ja546:174.4	sa rājavasatiṁ vase.
ja546:175.1	Kumbhampañjaliṁ kariyā,
ja546:175.2	cāṭañcāpi padakkhiṇaṁ;
ja546:175.3	Kimeva sabbakāmānaṁ,
ja546:175.4	dātāraṁ dhīramuttamaṁ.
ja546:176.1	Yo deti sayanaṁ vatthaṁ,
ja546:176.2	yānaṁ āvasathaṁ gharaṁ;
ja546:176.3	Pajjunnoriva bhūtāni,
ja546:176.4	bhogehi abhivassati.
ja546:177.1	Esayyo rājavasati,
ja546:177.2	vattamāno yathā naro;
ja546:177.3	Ārādhayati rājānaṁ,
ja546:177.4	pūjaṁ labhati bhattusu”.
ja546:178.1	Rājavasati nāma.
ja546:179.0	7. Antarapeyyāla
ja546:179.1	Evaṁ samanusāsitvā,
ja546:179.2	ñātisaṅghaṁ vicakkhaṇo;
ja546:179.3	Parikiṇṇo suhadehi,
ja546:179.4	rājānamupasaṅkami.
ja546:180.1	Vanditvā sirasā pāde,
ja546:180.2	katvā ca naṁ padakkhiṇaṁ;
ja546:180.3	Vidhuro avaca rājānaṁ,
ja546:180.4	paggahetvāna añjaliṁ.
ja546:181.1	“Ayaṁ maṁ māṇavo neti,
ja546:181.2	kattukāmo yathāmati;
ja546:181.3	Ñātīnatthaṁ pavakkhāmi,
ja546:181.4	taṁ suṇohi arindama.
ja546:182.1	Putte ca me udikkhesi,
ja546:182.2	yañca maññaṁ ghare dhanaṁ;
ja546:182.3	Yathā pecca na hāyetha,
ja546:182.4	ñātisaṅgho mayī gate.
ja546:183.1	Yatheva khalatī bhūmyā,
ja546:183.2	bhūmyāyeva patiṭṭhati;
ja546:183.3	Evetaṁ khalitaṁ mayhaṁ,
ja546:183.4	etaṁ passāmi accayaṁ”.
ja546:184.1	“Sakkā na gantuṁ iti mayha hoti,
ja546:184.2	Chetvā vadhitvā idha kātiyānaṁ;
ja546:184.3	Idheva hohī iti mayha ruccati,
ja546:184.4	Mā tvaṁ agā uttamabhūripañña”.
ja546:185.1	“Mā hevadhammesu manaṁ paṇīdahi,
ja546:185.2	Atthe ca dhamme ca yutto bhavassu;
ja546:185.3	Dhiratthu kammaṁ akusalaṁ anariyaṁ,
ja546:185.4	Yaṁ katvā pacchā nirayaṁ vajeyya.
ja546:186.1	Nevesa dhammo na puneta kiccaṁ,
ja546:186.2	Ayiro hi dāsassa janinda issaro;
ja546:186.3	Ghātetuṁ jhāpetuṁ athopi hantuṁ,
ja546:186.4	Na ca mayha kodhatthi vajāmi cāhaṁ”.
ja546:187.1	Jeṭṭhaputtaṁ upaguyha,
ja546:187.2	vineyya hadaye daraṁ;
ja546:187.3	Assupuṇṇehi nettehi,
ja546:187.4	pāvisī so mahāgharaṁ.
ja546:188.1	Sālāva sammapatitā,
ja546:188.2	mālutena pamadditā;
ja546:188.3	Senti puttā ca dārā ca,
ja546:188.4	vidhurassa nivesane.
ja546:189.1	Itthisahassaṁ bhariyānaṁ,
ja546:189.2	dāsisattasatāni ca;
ja546:189.3	Bāhā paggayha pakkanduṁ,
ja546:189.4	vidhurassa nivesane.
ja546:190.1	Orodhā ca kumārā ca,
ja546:190.2	vesiyānā ca brāhmaṇā;
ja546:190.3	Bāhā paggayha pakkanduṁ,
ja546:190.4	vidhurassa nivesane.
ja546:191.1	Hatthārohā anīkaṭṭhā,
ja546:191.2	rathikā pattikārakā;
ja546:191.3	Bāhā paggayha pakkanduṁ,
ja546:191.4	vidhurassa nivesane.
ja546:192.1	Samāgatā jānapadā,
ja546:192.2	negamā ca samāgatā;
ja546:192.3	Bāhā paggayha pakkanduṁ,
ja546:192.4	vidhurassa nivesane.
ja546:193.1	Itthisahassaṁ bhariyānaṁ,
ja546:193.2	dāsisattasatāni ca;
ja546:193.3	Bāhā paggayha pakkanduṁ,
ja546:193.4	“kasmā no vijahissasi”.
ja546:194.1	Orodhā ca kumārā ca,
ja546:194.2	vesiyānā ca brāhmaṇā;
ja546:194.3	Bāhā paggayha pakkanduṁ,
ja546:194.4	“kasmā no vijahissasi”.
ja546:195.1	Hatthārohā anīkaṭṭhā,
ja546:195.2	rathikā pattikārakā;
ja546:195.3	Bāhā paggayha pakkanduṁ,
ja546:195.4	“kasmā no vijahissasi”.
ja546:196.1	Samāgatā jānapadā,
ja546:196.2	negamā ca samāgatā;
ja546:196.3	Bāhā paggayha pakkanduṁ,
ja546:196.4	“kasmā no vijahissasi”.
ja546:197.1	Katvā gharesu kiccāni,
ja546:197.2	anusāsitvā sakaṁ janaṁ;
ja546:197.3	Mittāmacce ca bhacce ca,
ja546:197.4	puttadāre ca bandhave.
ja546:198.1	Kammantaṁ saṁvidhetvāna,
ja546:198.2	ācikkhitvā ghare dhanaṁ;
ja546:198.3	Nidhiñca iṇadānañca,
ja546:198.4	puṇṇakaṁ etadabravi.
ja546:199.1	“Avasī tuvaṁ mayha tīhaṁ agāre,
ja546:199.2	Katāni kiccāni gharesu mayhaṁ;
ja546:199.3	Anusāsitā puttadārā mayā ca,
ja546:199.4	Karoma kaccāna yathāmatiṁ te”.
ja546:200.1	“Sace hi katte anusāsitā te,
ja546:200.2	Puttā ca dārā anujīvino ca;
ja546:200.3	Handehi dānī taramānarūpo,
ja546:200.4	Dīgho hi addhāpi ayaṁ puratthā.
ja546:201.1	Achambhitova gaṇhāhi,
ja546:201.2	ājāneyyassa vāladhiṁ;
ja546:201.3	Idaṁ pacchimakaṁ tuyhaṁ,
ja546:201.4	jīvalokassa dassanaṁ”.
ja546:202.1	“Sohaṁ kissa nu bhāyissaṁ,
ja546:202.2	yassa me natthi dukkaṭaṁ;
ja546:202.3	Kāyena vācā manasā,
ja546:202.4	yena gaccheyya duggatiṁ”.
ja546:203.1	So assarājā vidhuraṁ vahanto,
ja546:203.2	Pakkāmi vehāyasamantalikkhe;
ja546:203.3	Sākhāsu selesu asajjamāno,
ja546:203.4	Kālāgiriṁ khippamupāgamāsi.
ja546:204.1	Itthisahassaṁ bhariyānaṁ,
ja546:204.2	dāsisattasatāni ca;
ja546:204.3	Bāhā paggayha pakkanduṁ,
ja546:204.4	yakkho brāhmaṇavaṇṇena;
ja546:204.5	Vidhuraṁ ādāya gacchati.
ja546:205.1	…pe…
ja546:206.1	Samāgatā jānapadā,
ja546:206.2	negamā ca samāgatā;
ja546:206.3	Bāhā paggayha pakkanduṁ,
ja546:206.4	yakkho brāhmaṇavaṇṇena;
ja546:206.5	Vidhuraṁ ādāya gacchati.
ja546:207.1	Itthisahassaṁ bhariyānaṁ,
ja546:207.2	dāsisattasatāni ca;
ja546:207.3	Bāhā paggayha pakkanduṁ,
ja546:207.4	“paṇḍito so kuhiṁ gato”.
ja546:208.1	…pe…
ja546:209.1	Samāgatā jānapadā,
ja546:209.2	negamā ca samāgatā;
ja546:209.3	Bāhā paggayha pakkanduṁ,
ja546:209.4	“paṇḍito so kuhiṁ gato.
ja546:210.1	Sace so sattarattena,
ja546:210.2	nāgacchissati paṇḍito;
ja546:210.3	Sabbe aggiṁ pavekkhāma,
ja546:210.4	natthattho jīvitena no”.
ja546:211.1	“Paṇḍito ca viyatto ca,
ja546:211.2	vibhāvī ca vicakkhaṇo;
ja546:211.3	Khippaṁ mociya attānaṁ,
ja546:211.4	mā bhāyitthāgamissati”.
ja546:212.1	Antarapeyyālaṁ nāma.
ja546:213.0	8. Sādhunaradhammakaṇḍa
ja546:213.1	So tattha gantvāna vicintayanto,
ja546:213.2	“Uccāvacā cetanakā bhavanti;
ja546:213.3	Nayimassa jīvena mamatthi kiñci,
ja546:213.4	Hantvānimaṁ hadayamānayissaṁ”.
ja546:214.1	So tattha gantvā pabbatantarasmiṁ,
ja546:214.2	Anto pavisitvāna paduṭṭhacitto;
ja546:214.3	Asaṁvutasmiṁ jagatippadese,
ja546:214.4	Adhosiraṁ dhārayi kātiyāno.
ja546:215.1	So lambamāno narake papāte,
ja546:215.2	Mahabbhaye lomahaṁse vidugge;
ja546:215.3	Asantasanto kurūnaṁ kattuseṭṭho,
ja546:215.4	Iccabravi puṇṇakaṁ nāma yakkhaṁ.
ja546:216.1	“Ariyāvakāsosi anariyarūpo,
ja546:216.2	Asaññato saññatasannikāso;
ja546:216.3	Accāhitaṁ kammaṁ karosi ludraṁ,
ja546:216.4	Bhāve ca te kusalaṁ natthi kiñci.
ja546:217.1	Yaṁ maṁ papātasmiṁ papātumicchasi,
ja546:217.2	Ko nu tavattho maraṇena mayhaṁ;
ja546:217.3	Amānusasseva tavajja vaṇṇo,
ja546:217.4	Ācikkha me tvaṁ katamāsi devatā”.
ja546:218.1	“Yadi te suto puṇṇako nāma yakkho,
ja546:218.2	Rañño kuverassa hi so sajibbo;
ja546:218.3	Bhūmindharo varuṇo nāma nāgo,
ja546:218.4	Brahā sucī vaṇṇabalūpapanno.
ja546:219.1	Tassānujaṁ dhītaraṁ kāmayāmi,
ja546:219.2	Irandhatī nāma sā nāgakaññā;
ja546:219.3	Tassā sumajjhāya piyāya hetu,
ja546:219.4	Patārayiṁ tuyha vadhāya dhīra”.
ja546:220.1	“Mā heva tvaṁ yakkha ahosi mūḷho,
ja546:220.2	Naṭṭhā bahū duggahītena loke;
ja546:220.3	Kiṁ te sumajjhāya piyāya kiccaṁ,
ja546:220.4	Maraṇena me iṅgha suṇomi sabbaṁ”.
ja546:221.1	“Mahānubhāvassa mahoragassa,
ja546:221.2	Dhītukāmo ñātibhatohamasmi;
ja546:221.3	Taṁ yācamānaṁ sasuro avoca,
ja546:221.4	Yathā mamaññiṁsu sukāmanītaṁ.
ja546:222.1	Dajjemu kho te sutanuṁ sunettaṁ,
ja546:222.2	Sucimhitaṁ candanalittagattaṁ;
ja546:222.3	Sace tuvaṁ hadayaṁ paṇḍitassa,
ja546:222.4	Dhammena laddhā idha māharesi;
ja546:222.5	Etena vittena kumāri labbhā,
ja546:222.6	Naññaṁ dhanaṁ uttari patthayāma.
ja546:223.1	Evaṁ na mūḷhosmi suṇohi katte,
ja546:223.2	Na cāpi me duggahitatthi kiñci;
ja546:223.3	Hadayena te dhammaladdhena nāgā,
ja546:223.4	Irandhatiṁ nāgakaññaṁ dadanti.
ja546:224.1	Tasmā ahaṁ tuyhaṁ vadhāya yutto,
ja546:224.2	Evaṁ mamattho maraṇena tuyhaṁ;
ja546:224.3	Idheva taṁ narake pātayitvā,
ja546:224.4	Hantvāna taṁ hadayamānayissaṁ”.
ja546:225.1	“Khippaṁ mamaṁ uddhara kātiyāna,
ja546:225.2	Hadayena me yadi te atthi kiccaṁ;
ja546:225.3	Ye kecime sādhunarassa dhammā,
ja546:225.4	Sabbeva te pātukaromi ajja”.
ja546:226.1	So puṇṇako kurūnaṁ kattuseṭṭhaṁ,
ja546:226.2	Nagamuddhani khippaṁ patiṭṭhapetvā;
ja546:226.3	Assatthamāsīnaṁ samekkhiyāna,
ja546:226.4	Paripucchi kattāramanomapaññaṁ.
ja546:227.1	“Samuddhato mesi tuvaṁ papātā,
ja546:227.2	Hadayena te ajja mamatthi kiccaṁ;
ja546:227.3	Ye kecime sādhunarassa dhammā,
ja546:227.4	Sabbeva me pātukarohi ajja”.
ja546:228.1	“Samuddhato tyasmi ahaṁ papātā,
ja546:228.2	Hadayena me yadi te atthi kiccaṁ;
ja546:228.3	Ye kecime sādhunarassa dhammā,
ja546:228.4	Sabbeva te pātukaromi ajja.
ja546:229.1	Yātānuyāyī ca bhavāhi māṇava,
ja546:229.2	Allañca pāṇiṁ parivajjayassu;
ja546:229.3	Mā cassu mittesu kadāci dubbhī,
ja546:229.4	Mā ca vasaṁ asatīnaṁ nigacche”.
ja546:230.1	“Kathaṁ nu yātaṁ anuyāyī hoti,
ja546:230.2	Allañca pāṇiṁ dahate kathaṁ so;
ja546:230.3	Asatī ca kā ko pana mittadubbho,
ja546:230.4	Akkhāhi me pucchito etamatthaṁ”.
ja546:231.1	“Asanthutaṁ nopi ca diṭṭhapubbaṁ,
ja546:231.2	Yo āsanenāpi nimantayeyya;
ja546:231.3	Tasseva atthaṁ puriso kareyya,
ja546:231.4	Yātānuyāyīti tamāhu paṇḍitā.
ja546:232.1	Yassekarattampi ghare vaseyya,
ja546:232.2	Yatthannapānaṁ puriso labheyya;
ja546:232.3	Na tassa pāpaṁ manasāpi cintaye,
ja546:232.4	Adubbhapāṇiṁ dahate mittadubbho.
ja546:233.1	Yassa rukkhassa chāyāya,
ja546:233.2	nisīdeyya sayeyya vā;
ja546:233.3	Na tassa sākhaṁ bhañjeyya,
ja546:233.4	mittadubbho hi pāpako.
ja546:234.1	Puṇṇampi cemaṁ pathaviṁ dhanena,
ja546:234.2	Dajjitthiyā puriso sammatāya;
ja546:234.3	Laddhā khaṇaṁ atimaññeyya tampi,
ja546:234.4	Tāsaṁ vasaṁ asatīnaṁ na gacche.
ja546:235.1	Evaṁ kho yātaṁ anuyāyī hoti,
ja546:235.2	Allañca pāṇiṁ dahate punevaṁ;
ja546:235.3	Asatī ca sā so pana mittadubbho,
ja546:235.4	So dhammiko hohi jahassu adhammaṁ”.
ja546:236.1	Sādhunaradhammakaṇḍaṁ nāma.
ja546:237.0	9. Kāḷāgirikaṇḍa
ja546:237.1	“Avasiṁ ahaṁ tuyha tīhaṁ agāre,
ja546:237.2	Annena pānena upaṭṭhitosmi;
ja546:237.3	Mitto mamāsī visajjāmahaṁ taṁ,
ja546:237.4	Kāmaṁ gharaṁ uttamapañña gaccha.
ja546:238.1	Api hāyatu nāgakulā attho,
ja546:238.2	Alampi me nāgakaññāya hotu;
ja546:238.3	So tvaṁ sakeneva subhāsitena,
ja546:238.4	Muttosi me ajja vadhāya pañña”.
ja546:239.1	“Handa tuvaṁ yakkha mamampi nehi,
ja546:239.2	Sasuraṁ te atthaṁ mayi carassu;
ja546:239.3	Mayañca nāgādhipatiṁ vimānaṁ,
ja546:239.4	Dakkhemu nāgassa adiṭṭhapubbaṁ”.
ja546:240.1	“Yaṁ ve narassa ahitāya assa,
ja546:240.2	Na taṁ pañño arahati dassanāya;
ja546:240.3	Atha kena vaṇṇena amittagāmaṁ,
ja546:240.4	Tuvamicchasi uttamapañña gantuṁ”.
ja546:241.1	“Addhā pajānāmi ahampi etaṁ,
ja546:241.2	Na taṁ pañño arahati dassanāya;
ja546:241.3	Pāpañca me natthi kataṁ kuhiñci,
ja546:241.4	Tasmā na saṅke maraṇāgamāya”.
ja546:242.1	“Handa ca ṭhānaṁ atulānubhāvaṁ,
ja546:242.2	Mayā saha dakkhasi ehi katte;
ja546:242.3	Yatthacchati naccagītehi nāgo,
ja546:242.4	Rājā yathā vessavaṇo naḷiññaṁ.
ja546:243.1	Taṁ nāgakaññā caritaṁ gaṇena,
ja546:243.2	Nikīḷitaṁ niccamaho ca rattiṁ;
ja546:243.3	Pahūtamālyaṁ bahupupphachannaṁ,
ja546:243.4	Obhāsatī vijjurivantalikkhe.
ja546:244.1	Annena pānena upetarūpaṁ,
ja546:244.2	Naccehi gītehi ca vāditehi;
ja546:244.3	Paripūraṁ kaññāhi alaṅkatāhi,
ja546:244.4	Upasobhati vatthapilandhanena.
ja546:245.1	So puṇṇako kurūnaṁ kattuseṭṭhaṁ,
ja546:245.2	Nisīdayī pacchato āsanasmiṁ;
ja546:245.3	Ādāya kattāramanomapaññaṁ,
ja546:245.4	Upānayī bhavanaṁ nāgarañño.
ja546:246.1	Patvāna ṭhānaṁ atulānubhāvaṁ,
ja546:246.2	Aṭṭhāsi kattā pacchato puṇṇakassa;
ja546:246.3	Sāmaggipekkhamāno nāgarājā,
ja546:246.4	Pubbeva jāmātaramajjhabhāsatha.
ja546:247.1	Yannu tuvaṁ agamā maccalokaṁ,
ja546:247.2	Anvesamāno hadayaṁ paṇḍitassa;
ja546:247.3	Kacci samiddhena idhānupatto,
ja546:247.4	Ādāya kattāramanomapaññaṁ”.
ja546:248.1	“Ayañhi so āgato yaṁ tvamicchasi,
ja546:248.2	Dhammena laddho mama dhammapālo;
ja546:248.3	Taṁ passatha sammukhā bhāsamānaṁ,
ja546:248.4	Sukho have sappurisehi saṅgamo”.
ja546:249.1	Kāḷāgirikaṇḍaṁ nāma.
ja546:250.1	“Adiṭṭhapubbaṁ disvāna,
ja546:250.2	macco maccubhayaṭṭito;
ja546:250.3	Byamhito nābhivādesi,
ja546:250.4	nayidaṁ paññavatāmiva”.
ja546:251.1	“Na camhi byamhito nāga,
ja546:251.2	na ca maccubhayaṭṭito;
ja546:251.3	Na vajjho abhivādeyya,
ja546:251.4	vajjhaṁ vā nābhivādaye.
ja546:252.1	Kathaṁ no abhivādeyya,
ja546:252.2	abhivādāpayetha ve;
ja546:252.3	Yaṁ naro hantumiccheyya,
ja546:252.4	taṁ kammaṁ nupapajjati”.
ja546:253.1	“Evametaṁ yathā brūsi,
ja546:253.2	saccaṁ bhāsasi paṇḍita;
ja546:253.3	Na vajjho abhivādeyya,
ja546:253.4	vajjhaṁ vā nābhivādaye.
ja546:254.1	Kathaṁ no abhivādeyya,
ja546:254.2	abhivādāpayetha ve;
ja546:254.3	Yaṁ naro hantumiccheyya,
ja546:254.4	taṁ kammaṁ nupapajjati”.
ja546:255.1	“Asassataṁ sassataṁ nu tavayidaṁ,
ja546:255.2	Iddhī jutī balavīriyūpapatti;
ja546:255.3	Pucchāmi taṁ nāgarājetamatthaṁ,
ja546:255.4	Kathaṁ nu te laddhamidaṁ vimānaṁ.
ja546:256.1	Adhiccaladdhaṁ pariṇāmajaṁ te,
ja546:256.2	Sayaṅkataṁ udāhu devehi dinnaṁ;
ja546:256.3	Akkhāhi me nāgarājetamatthaṁ,
ja546:256.4	Yatheva te laddhamidaṁ vimānaṁ”.
ja546:257.1	“Nādhiccaladdhaṁ na pariṇāmajaṁ me,
ja546:257.2	Na sayaṅkataṁ nāpi devehi dinnaṁ;
ja546:257.3	Sakehi kammehi apāpakehi,
ja546:257.4	Puññehi me laddhamidaṁ vimānaṁ”.
ja546:258.1	“Kiṁ te vataṁ kiṁ pana brahmacariyaṁ,
ja546:258.2	Kissa suciṇṇassa ayaṁ vipāko;
ja546:258.3	Iddhī jutī balavīriyūpapatti,
ja546:258.4	Idañca te nāga mahāvimānaṁ”.
ja546:259.1	“Ahañca bhariyā ca manussaloke,
ja546:259.2	Saddhā ubho dānapatī ahumhā;
ja546:259.3	Opānabhūtaṁ me gharaṁ tadāsi,
ja546:259.4	Santappitā samaṇabrāhmaṇā ca.
ja546:260.1	Mālañca gandhañca vilepanañca,
ja546:260.2	Padīpiyaṁ seyyamupassayañca;
ja546:260.3	Acchādanaṁ sāyanamannapānaṁ,
ja546:260.4	Sakkacca dānāni adamha tattha.
ja546:261.1	Taṁ me vataṁ taṁ pana brahmacariyaṁ,
ja546:261.2	Tassa suciṇṇassa ayaṁ vipāko;
ja546:261.3	Iddhī jutī balavīriyūpapatti,
ja546:261.4	Idañca me dhīra mahāvimānaṁ”.
ja546:262.1	“Evañce te laddhamidaṁ vimānaṁ,
ja546:262.2	Jānāsi puññānaṁ phalūpapattiṁ;
ja546:262.3	Tasmā hi dhammaṁ cara appamatto,
ja546:262.4	Yathā vimānaṁ puna māvasesi”.
ja546:263.1	“Nayidha santi samaṇabrāhmaṇā ca,
ja546:263.2	Yesannapānāni dademu katte;
ja546:263.3	Akkhāhi me pucchito etamatthaṁ,
ja546:263.4	Yathā vimānaṁ puna māvasema”.
ja546:264.1	“Bhogī hi te santi idhūpapannā,
ja546:264.2	Puttā ca dārā anujīvino ca;
ja546:264.3	Tesu tuvaṁ vacasā kammunā ca,
ja546:264.4	Asampaduṭṭho ca bhavāhi niccaṁ.
ja546:265.1	Evaṁ tuvaṁ nāga asampadosaṁ,
ja546:265.2	Anupālaya vacasā kammunā ca;
ja546:265.3	Ṭhatvā idha yāvatāyukaṁ vimāne,
ja546:265.4	Uddhaṁ ito gacchasi devalokaṁ”.
ja546:266.1	“Addhā hi so socati rājaseṭṭho,
ja546:266.2	Tayā vinā yassa tuvaṁ sajibbo;
ja546:266.3	Dukkhūpanītopi tayā samecca,
ja546:266.4	Vindeyya poso sukhamāturopi”.
ja546:267.1	“Addhā sataṁ bhāsasi nāga dhammaṁ,
ja546:267.2	Anuttaraṁ atthapadaṁ suciṇṇaṁ;
ja546:267.3	Etādisiyāsu hi āpadāsu,
ja546:267.4	Paññāyate mādisānaṁ viseso”.
ja546:268.1	“Akkhāhi no tāyaṁ mudhā nu laddho,
ja546:268.2	Akkhehi no tāyaṁ ajesi jūte;
ja546:268.3	Dhammena laddho iti tāyamāha,
ja546:268.4	Kathaṁ nu tvaṁ hatthamimassa māgato”.
ja546:269.1	“Yo missaro tattha ahosi rājā,
ja546:269.2	Tamāyamakkhehi ajesi jūte;
ja546:269.3	So maṁ jito rājā imassadāsi,
ja546:269.4	Dhammena laddhosmi asāhasena”.
ja546:270.1	Mahorago attamano udaggo,
ja546:270.2	Sutvāna dhīrassa subhāsitāni;
ja546:270.3	Hatthe gahetvāna anomapaññaṁ,
ja546:270.4	Pāvekkhi bhariyāya tadā sakāse.
ja546:271.1	“Yena tvaṁ vimale paṇḍu,
ja546:271.2	yena bhattaṁ na ruccati;
ja546:271.3	Na ca me tādiso vaṇṇo,
ja546:271.4	ayameso tamonudo.
ja546:272.1	Yassa te hadayenattho,
ja546:272.2	āgatāyaṁ pabhaṅkaro;
ja546:272.3	Tassa vākyaṁ nisāmehi,
ja546:272.4	dullabhaṁ dassanaṁ puna”.
ja546:273.1	Disvāna taṁ vimalā bhūripaññaṁ,
ja546:273.2	Dasaṅgulī añjaliṁ paggahetvā;
ja546:273.3	Haṭṭhena bhāvena patītarūpā,
ja546:273.4	Iccabravi kurūnaṁ kattuseṭṭhaṁ.
ja546:274.1	“Adiṭṭhapubbaṁ disvāna,
ja546:274.2	macco maccubhayaṭṭito;
ja546:274.3	Byamhito nābhivādesi,
ja546:274.4	nayidaṁ paññavatāmiva”.
ja546:275.1	“Na camhi byamhito nāgi,
ja546:275.2	na ca maccubhayaṭṭito;
ja546:275.3	Na vajjho abhivādeyya,
ja546:275.4	vajjhaṁ vā nābhivādaye.
ja546:276.1	Kathaṁ no abhivādeyya,
ja546:276.2	abhivādāpayetha ve;
ja546:276.3	Yaṁ naro hantumiccheyya,
ja546:276.4	taṁ kammaṁ nupapajjati”.
ja546:277.1	“Evametaṁ yathā brūsi,
ja546:277.2	saccaṁ bhāsasi paṇḍita;
ja546:277.3	Na vajjho abhivādeyya,
ja546:277.4	vajjhaṁ vā nābhivādaye.
ja546:278.1	Kathaṁ no abhivādeyya,
ja546:278.2	abhivādāpayetha ve;
ja546:278.3	Yaṁ naro hantumiccheyya,
ja546:278.4	taṁ kammaṁ nupapajjati”.
ja546:279.1	“Asassataṁ sassataṁ nu tavayidaṁ,
ja546:279.2	Iddhī jutī balavīriyūpapatti;
ja546:279.3	Pucchāmi taṁ nāgakaññetamatthaṁ,
ja546:279.4	Kathaṁ nu te laddhamidaṁ vimānaṁ.
ja546:280.1	Adhiccaladdhaṁ pariṇāmajaṁ te,
ja546:280.2	Sayaṅkataṁ udāhu devehi dinnaṁ;
ja546:280.3	Akkhāhi me nāgakaññetamatthaṁ,
ja546:280.4	Yatheva te laddhamidaṁ vimānaṁ”.
ja546:281.1	“Nādhiccaladdhaṁ na pariṇāmajaṁ me,
ja546:281.2	Na sayaṁ kataṁ nāpi devehi dinnaṁ;
ja546:281.3	Sakehi kammehi apāpakehi,
ja546:281.4	Puññehi me laddhamidaṁ vimānaṁ”.
ja546:282.1	“Kiṁ te vataṁ kiṁ pana brahmacariyaṁ,
ja546:282.2	Kissa suciṇṇassa ayaṁ vipāko;
ja546:282.3	Iddhī jutī balavīriyūpapatti,
ja546:282.4	Idañca te nāgi mahāvimānaṁ”.
ja546:283.1	“Ahañca kho sāmiko cāpi mayhaṁ,
ja546:283.2	Saddhā ubho dānapatī ahumhā;
ja546:283.3	Opānabhūtaṁ me gharaṁ tadāsi,
ja546:283.4	Santappitā samaṇabrāhmaṇā ca.
ja546:284.1	Mālañca gandhañca vilepanañca,
ja546:284.2	Padīpiyaṁ seyyamupassayañca;
ja546:284.3	Acchādanaṁ sāyanamannapānaṁ,
ja546:284.4	Sakkacca dānāni adamha tattha.
ja546:285.1	Taṁ me vataṁ taṁ pana brahmacariyaṁ,
ja546:285.2	Tassa suciṇṇassa ayaṁ vipāko;
ja546:285.3	Iddhī jutī balavīriyūpapatti,
ja546:285.4	Idañca me dhīra mahāvimānaṁ”.
ja546:286.1	“Evañce te laddhamidaṁ vimānaṁ,
ja546:286.2	Jānāsi puññānaṁ phalūpapattiṁ;
ja546:286.3	Tasmā hi dhammaṁ cara appamattā,
ja546:286.4	Yathā vimānaṁ puna māvasesi”.
ja546:287.1	“Nayidha santi samaṇabrāhmaṇā ca,
ja546:287.2	Yesannapānāni dademu katte;
ja546:287.3	Akkhāhi me pucchito etamatthaṁ,
ja546:287.4	Yathā vimānaṁ puna māvasema”.
ja546:288.1	“Bhogī hi te santi idhūpapannā,
ja546:288.2	Puttā ca dārā anujīvino ca;
ja546:288.3	Tesu tuvaṁ vacasā kammunā ca,
ja546:288.4	Asampaduṭṭhā ca bhavāhi niccaṁ.
ja546:289.1	Evaṁ tuvaṁ nāgi asampadosaṁ,
ja546:289.2	Anupālaya vacasā kammunā ca;
ja546:289.3	Ṭhatvā idha yāvatāyukaṁ vimāne,
ja546:289.4	Uddhaṁ ito gacchasi devalokaṁ”.
ja546:290.1	“Addhā hi so socati rājaseṭṭho,
ja546:290.2	Tayā vinā yassa tuvaṁ sajibbo;
ja546:290.3	Dukkhūpanītopi tayā samecca,
ja546:290.4	Vindeyya poso sukhamāturopi”.
ja546:291.1	“Addhā sataṁ bhāsasi nāgi dhammaṁ,
ja546:291.2	Anuttaraṁ atthapadaṁ suciṇṇaṁ;
ja546:291.3	Etādisiyāsu hi āpadāsu,
ja546:291.4	Paññāyate mādisānaṁ viseso”.
ja546:292.1	“Akkhāhi no tāyaṁ mudhā nu laddho,
ja546:292.2	Akkhehi no tāyaṁ ajesi jūte;
ja546:292.3	Dhammena laddho iti tāyamāha,
ja546:292.4	Kathaṁ nu tvaṁ hatthamimassa māgato”.
ja546:293.1	“Yo missaro tattha ahosi rājā,
ja546:293.2	Tamāyamakkhehi ajesi jūte;
ja546:293.3	So maṁ jito rājā imassadāsi,
ja546:293.4	Dhammena laddhosmi asāhasena”.
ja546:294.1	Yatheva varuṇo nāgo,
ja546:294.2	pañhaṁ pucchittha paṇḍitaṁ;
ja546:294.3	Tatheva nāgakaññāpi,
ja546:294.4	pañhaṁ pucchittha paṇḍitaṁ.
ja546:295.1	Yatheva varuṇaṁ nāgaṁ,
ja546:295.2	dhīro tosesi pucchito;
ja546:295.3	Tatheva nāgakaññampi,
ja546:295.4	dhīro tosesi pucchito.
ja546:296.1	Ubhopi te attamane viditvā,
ja546:296.2	Mahoragaṁ nāgakaññañca dhīro;
ja546:296.3	Achambhī abhīto alomahaṭṭho,
ja546:296.4	Iccabravi varuṇaṁ nāgarājānaṁ.
ja546:297.1	“Mā rodhayi nāga āyāhamasmi,
ja546:297.2	Yena tavattho idaṁ sarīraṁ;
ja546:297.3	Hadayena maṁsena karohi kiccaṁ,
ja546:297.4	Sayaṁ karissāmi yathāmati te”.
ja546:298.1	“Paññā have hadayaṁ paṇḍitānaṁ,
ja546:298.2	Te tyamha paññāya mayaṁ sutuṭṭhā;
ja546:298.3	Anūnanāmo labhatajja dāraṁ,
ja546:298.4	Ajjeva taṁ kuruyo pāpayātu”.
ja546:299.1	Sa puṇṇako attamano udaggo,
ja546:299.2	Irandhatiṁ nāgakaññaṁ labhitvā;
ja546:299.3	Haṭṭhena bhāvena patītarūpo,
ja546:299.4	Iccabravi kurūnaṁ kattuseṭṭhaṁ.
ja546:300.1	“Bhariyāya maṁ tvaṁ akari samaṅgiṁ,
ja546:300.2	Ahañca te vidhura karomi kiccaṁ;
ja546:300.3	Idañca te maṇiratanaṁ dadāmi,
ja546:300.4	Ajjeva taṁ kuruyo pāpayāmi”.
ja546:301.1	“Ajeyyamesā tava hotu metti,
ja546:301.2	Bhariyāya kaccāna piyāya saddhiṁ;
ja546:301.3	Ānandi vitto sumano patīto,
ja546:301.4	Datvā maṇiṁ mañca nayindapatthaṁ”.
ja546:302.1	Sa puṇṇako kurūnaṁ kattuseṭṭhaṁ,
ja546:302.2	Nisīdayī purato āsanasmiṁ;
ja546:302.3	Ādāya kattāramanomapaññaṁ,
ja546:302.4	Upānayī nagaraṁ indapatthaṁ.
ja546:303.1	Mano manussassa yathāpi gacche,
ja546:303.2	Tatopissa khippataraṁ ahosi;
ja546:303.3	Sa puṇṇako kurūnaṁ kattuseṭṭhaṁ,
ja546:303.4	Upānayī nagaraṁ indapatthaṁ.
ja546:304.1	“Etindapatthaṁ nagaraṁ padissati,
ja546:304.2	Rammāni ca ambavanāni bhāgaso;
ja546:304.3	Ahañca bhariyāya samaṅgibhūto,
ja546:304.4	Tuvañca pattosi sakaṁ niketaṁ”.
ja546:305.1	Sa puṇṇako kurūnaṁ kattuseṭṭhaṁ,
ja546:305.2	Oropiya dhammasabhāya majjhe;
ja546:305.3	Ājaññamāruyha anomavaṇṇo,
ja546:305.4	Pakkāmi vehāyasamantalikkhe.
ja546:306.1	Taṁ disvā rājā paramappatīto,
ja546:306.2	Uṭṭhāya bāhāhi palissajitvā;
ja546:306.3	Avikampayaṁ dhammasabhāya majjhe,
ja546:306.4	Nisīdayī pamukhamāsanasmiṁ.
ja546:307.1	“Tvaṁ no vinetāsi rathaṁva naddhaṁ,
ja546:307.2	Nandanti taṁ kuruyo dassanena;
ja546:307.3	Akkhāhi me pucchito etamatthaṁ,
ja546:307.4	Kathaṁ pamokkho ahu māṇavassa”.
ja546:308.1	“Yaṁ māṇavotyābhivadī janinda,
ja546:308.2	Na so manusso naravīraseṭṭha;
ja546:308.3	Yadi te suto puṇṇako nāma yakkho,
ja546:308.4	Rañño kuverassa hi so sajibbo.
ja546:309.1	Bhūmindharo varuṇo nāma nāgo,
ja546:309.2	Brahā sucī vaṇṇabalūpapanno;
ja546:309.3	Tassānujaṁ dhītaraṁ kāmayāno,
ja546:309.4	Irandhatī nāma sā nāgakaññā.
ja546:310.1	Tassā sumajjhāya piyāya hetu,
ja546:310.2	Patārayittha maraṇāya mayhaṁ;
ja546:310.3	So ceva bhariyāya samaṅgibhūto,
ja546:310.4	Ahañca anuññāto maṇi ca laddho”.
ja546:311.1	“Rukkho hi mayhaṁ padvāre sujāto,
ja546:311.2	Paññākkhandho sīlamayassa sākhā;
ja546:311.3	Atthe ca dhamme ca ṭhito nipāko,
ja546:311.4	Gavapphalo hatthigavāssachanno.
ja546:312.1	Naccagītatūriyābhinādite,
ja546:312.2	Ucchijja senaṁ puriso ahāsi;
ja546:312.3	So no ayaṁ āgato sanniketaṁ,
ja546:312.4	Rukkhassimassāpacitiṁ karotha.
ja546:313.1	Ye keci vittā mama paccayena,
ja546:313.2	Sabbeva te pātukarontu ajja;
ja546:313.3	Tibbāni katvāna upāyanāni,
ja546:313.4	Rukkhassimassāpacitiṁ karotha.
ja546:314.1	Ye keci baddhā mama atthi raṭṭhe,
ja546:314.2	Sabbeva te bandhanā mocayantu;
ja546:314.3	Yatheva yaṁ bandhanasmā pamutto,
ja546:314.4	Evamete muñcare bandhanasmā.
ja546:315.1	Unnaṅgalā māsamimaṁ karontu,
ja546:315.2	Maṁsodanaṁ brāhmaṇā bhakkhayantu;
ja546:315.3	Amajjapā majjarahā pivantu,
ja546:315.4	Puṇṇāhi thālāhi palissutāhi.
ja546:316.1	Mahāpathaṁ nicca samavhayantu,
ja546:316.2	Tibbañca rakkhaṁ vidahantu raṭṭhe;
ja546:316.3	Yathāññamaññaṁ na viheṭhayeyyuṁ,
ja546:316.4	Rukkhassimassāpacitiṁ karotha”.
ja546:317.1	Orodhā ca kumārā ca,
ja546:317.2	vesiyānā ca brāhmaṇā;
ja546:317.3	Bahuṁ annañca pānañca,
ja546:317.4	paṇḍitassābhihārayuṁ.
ja546:318.1	Hatthārohā anīkaṭṭhā,
ja546:318.2	rathikā pattikārakā;
ja546:318.3	Bahuṁ annañca pānañca,
ja546:318.4	paṇḍitassābhihārayuṁ.
ja546:319.1	Samāgatā jānapadā,
ja546:319.2	negamā ca samāgatā;
ja546:319.3	Bahuṁ annañca pānañca,
ja546:319.4	paṇḍitassābhihārayuṁ.
ja546:320.1	Bahujano pasannosi,
ja546:320.2	disvā paṇḍitamāgate;
ja546:320.3	Paṇḍitamhi anuppatte,
ja546:320.4	celukkhepo pavattathāti.
ja546:321.1	Vidhurajātakaṁ navamaṁ.
ja547:0.1	Jātaka
ja547:0.2	Mahānipāta
ja547:0.3	Mūgapakkhavagga
ja547:0.4	Vessantarajātaka
ja547:1.0.1	1. Dasavarakathā
ja547:1.1	“Phussatī varavaṇṇābhe,
ja547:1.2	varassu dasadhā vare;
ja547:1.3	Pathabyā cārupubbaṅgi,
ja547:1.4	yaṁ tuyhaṁ manaso piyaṁ”.
ja547:2.1	“Devarāja namo tyatthu,
ja547:2.2	kiṁ pāpaṁ pakataṁ mayā;
ja547:2.3	Rammā cāvesi maṁ ṭhānā,
ja547:2.4	vātova dharaṇīruhaṁ”.
ja547:3.1	“Na ceva te kataṁ pāpaṁ,
ja547:3.2	na ca me tvamasi appiyā;
ja547:3.3	Puññañca te parikkhīṇaṁ,
ja547:3.4	yena tevaṁ vadāmahaṁ.
ja547:4.1	Santike maraṇaṁ tuyhaṁ,
ja547:4.2	vinābhāvo bhavissati;
ja547:4.3	Paṭigaṇhāhi me ete,
ja547:4.4	vare dasa pavecchato”.
ja547:5.1	“Varañce me ado sakka,
ja547:5.2	sabbabhūtānamissara;
ja547:5.3	Sivirājassa bhaddante,
ja547:5.4	tattha assaṁ nivesane.
ja547:6.1	Nīlanettā nīlabhamu,
ja547:6.2	nilakkhī ca yathā migī;
ja547:6.3	Phussatī nāma nāmena,
ja547:6.4	tatthapassaṁ purindada.
ja547:7.1	Puttaṁ labhetha varadaṁ,
ja547:7.2	yācayogaṁ amacchariṁ;
ja547:7.3	Pūjitaṁ paṭirājūhi,
ja547:7.4	kittimantaṁ yasassinaṁ.
ja547:8.1	Gabbhaṁ me dhārayantiyā,
ja547:8.2	majjhimaṅgaṁ anunnataṁ;
ja547:8.3	Kucchi anunnato assa,
ja547:8.4	cāpaṁva likhitaṁ samaṁ.
ja547:9.1	Thanā me nappapateyyuṁ,
ja547:9.2	palitā na santu vāsava;
ja547:9.3	Kāye rajo na limpetha,
ja547:9.4	vajjhañcāpi pamocaye.
ja547:10.1	Mayūrakoñcābhirude,
ja547:10.2	nārivaragaṇāyute;
ja547:10.3	Khujjacelāpakākiṇṇe,
ja547:10.4	sūtamāgadhavaṇṇite.
ja547:11.1	Citraggaḷerughusite,
ja547:11.2	surāmaṁsapabodhane;
ja547:11.3	Sivirājassa bhaddante,
ja547:11.4	tatthassaṁ mahesī piyā”.
ja547:12.1	“Ye te dasa varā dinnā,
ja547:12.2	mayā sabbaṅgasobhane;
ja547:12.3	Sivirājassa vijite,
ja547:12.4	sabbe te lacchasī vare”.
ja547:13.1	Idaṁ vatvāna maghavā,
ja547:13.2	devarājā sujampati;
ja547:13.3	Phussatiyā varaṁ datvā,
ja547:13.4	anumodittha vāsavo.
ja547:14.1	Dasavarakathā nāma.
ja547:15.1	“Parūḷhakacchanakhalomā,
ja547:15.2	paṅkadantā rajassirā;
ja547:15.3	Paggayha dakkhiṇaṁ bāhuṁ,
ja547:15.4	kiṁ maṁ yācanti brāhmaṇā”.
ja547:16.1	“Ratanaṁ deva yācāma,
ja547:16.2	sivīnaṁ raṭṭhavaḍḍhanaṁ;
ja547:16.3	Dadāhi pavaraṁ nāgaṁ,
ja547:16.4	īsādantaṁ urūḷhavaṁ”.
ja547:17.1	“Dadāmi na vikampāmi,
ja547:17.2	yaṁ maṁ yācanti brāhmaṇā;
ja547:17.3	Pabhinnaṁ kuñjaraṁ dantiṁ,
ja547:17.4	opavayhaṁ gajuttamaṁ”.
ja547:18.1	Hatthikkhandhato oruyha,
ja547:18.2	rājā cāgādhimānaso;
ja547:18.3	Brāhmaṇānaṁ adā dānaṁ,
ja547:18.4	sivīnaṁ raṭṭhavaḍḍhano.
ja547:19.1	Tadāsi yaṁ bhiṁsanakaṁ,
ja547:19.2	tadāsi lomahaṁsanaṁ;
ja547:19.3	Hatthināge padinnamhi,
ja547:19.4	medanī sampakampatha.
ja547:20.1	Tadāsi yaṁ bhiṁsanakaṁ,
ja547:20.2	tadāsi lomahaṁsanaṁ;
ja547:20.3	Hatthināge padinnamhi,
ja547:20.4	khubhittha nagaraṁ tadā.
ja547:21.1	Samākulaṁ puraṁ āsi,
ja547:21.2	ghoso ca vipulo mahā;
ja547:21.3	Hatthināge padinnamhi,
ja547:21.4	sivīnaṁ raṭṭhavaḍḍhane.
ja547:22.1	Uggā ca rājaputtā ca,
ja547:22.2	vesiyānā ca brāhmaṇā;
ja547:22.3	Hatthārohā anīkaṭṭhā,
ja547:22.4	rathikā pattikārakā.
ja547:23.1	Kevalo cāpi nigamo,
ja547:23.2	sivayo ca samāgatā;
ja547:23.3	Disvā nāgaṁ nīyamānaṁ,
ja547:23.4	te rañño paṭivedayuṁ.
ja547:24.1	“Vidhamaṁ deva te raṭṭhaṁ,
ja547:24.2	putto vessantaro tava;
ja547:24.3	Kathaṁ no hatthinaṁ dajjā,
ja547:24.4	nāgaṁ raṭṭhassa pūjitaṁ.
ja547:25.1	Kathaṁ no kuñjaraṁ dajjā,
ja547:25.2	īsādantaṁ urūḷhavaṁ;
ja547:25.3	Khettaññuṁ sabbayuddhānaṁ,
ja547:25.4	sabbasetaṁ gajuttamaṁ.
ja547:26.1	Paṇḍukambalasañchannaṁ,
ja547:26.2	pabhinnaṁ sattumaddanaṁ;
ja547:26.3	Dantiṁ savāḷabījaniṁ,
ja547:26.4	setaṁ kelāsasādisaṁ.
ja547:27.1	Sasetacchattaṁ saupādheyyaṁ,
ja547:27.2	Sāthabbanaṁ sahatthipaṁ;
ja547:27.3	Aggayānaṁ rājavāhiṁ,
ja547:27.4	Brāhmaṇānaṁ adā gajaṁ.
ja547:28.1	Annaṁ pānañca yo dajjā,
ja547:28.2	vatthasenāsanāni ca;
ja547:28.3	Etaṁ kho dānaṁ patirūpaṁ,
ja547:28.4	etaṁ kho brāhmaṇārahaṁ.
ja547:29.1	Ayaṁ te vaṁsarājā no,
ja547:29.2	sivīnaṁ raṭṭhavaḍḍhano;
ja547:29.3	Kathaṁ vessantaro putto,
ja547:29.4	gajaṁ bhājeti sañjaya.
ja547:30.1	Sace tvaṁ na karissasi,
ja547:30.2	sivīnaṁ vacanaṁ idaṁ;
ja547:30.3	Maññe taṁ saha puttena,
ja547:30.4	sivī hatthe karissare”.
ja547:31.1	“Kāmaṁ janapado māsi,
ja547:31.2	raṭṭhañcāpi vinassatu;
ja547:31.3	Nāhaṁ sivīnaṁ vacanā,
ja547:31.4	rājaputtaṁ adūsakaṁ;
ja547:31.5	Pabbājeyyaṁ sakā raṭṭhā,
ja547:31.6	putto hi mama oraso.
ja547:32.1	Kāmaṁ janapado māsi,
ja547:32.2	raṭṭhañcāpi vinassatu;
ja547:32.3	Nāhaṁ sivīnaṁ vacanā,
ja547:32.4	rājaputtaṁ adūsakaṁ;
ja547:32.5	Pabbājeyyaṁ sakā raṭṭhā,
ja547:32.6	putto hi mama atrajo.
ja547:33.1	Na cāhaṁ tasmiṁ dubbheyyaṁ,
ja547:33.2	ariyasīlavato hi so;
ja547:33.3	Asilokopi me assa,
ja547:33.4	pāpañca pasave bahuṁ;
ja547:33.5	Kathaṁ vessantaraṁ puttaṁ,
ja547:33.6	satthena ghātayāmase”.
ja547:34.1	“Mā naṁ daṇḍena satthena,
ja547:34.2	na hi so bandhanāraho;
ja547:34.3	Pabbājehi ca naṁ raṭṭhā,
ja547:34.4	vaṅke vasatu pabbate”.
ja547:35.1	“Eso ce sivīnaṁ chando,
ja547:35.2	chandaṁ na panudāmase;
ja547:35.3	Imaṁ so vasatu rattiṁ,
ja547:35.4	kāme ca paribhuñjatu.
ja547:36.1	Tato ratyā vivasāne,
ja547:36.2	sūriyassuggamanaṁ pati;
ja547:36.3	Samaggā sivayo hutvā,
ja547:36.4	raṭṭhā pabbājayantu naṁ.
ja547:37.1	Uṭṭhehi katte taramāno,
ja547:37.2	gantvā vessantaraṁ vada;
ja547:37.3	‘Sivayo deva te kuddhā,
ja547:37.4	negamā ca samāgatā.
ja547:38.1	Uggā ca rājaputtā ca,
ja547:38.2	vesiyānā ca brāhmaṇā;
ja547:38.3	Hatthārohā anīkaṭṭhā,
ja547:38.4	rathikā pattikārakā;
ja547:38.5	Kevalo cāpi nigamo,
ja547:38.6	sivayo ca samāgatā.
ja547:39.1	Asmā ratyā vivasāne,
ja547:39.2	sūriyassuggamanaṁ pati;
ja547:39.3	Samaggā sivayo hutvā,
ja547:39.4	raṭṭhā pabbājayanti taṁ’”.
ja547:40.1	Sa kattā taramānova,
ja547:40.2	sivirājena pesito;
ja547:40.3	Āmuttahatthābharaṇo,
ja547:40.4	suvattho candanabhūsito.
ja547:41.1	Sīsaṁ nhāto udake so,
ja547:41.2	āmuttamaṇikuṇḍalo;
ja547:41.3	Upāgami puraṁ rammaṁ,
ja547:41.4	vessantaranivesanaṁ.
ja547:42.1	Tatthaddasa kumāraṁ so,
ja547:42.2	ramamānaṁ sake pure;
ja547:42.3	Parikiṇṇaṁ amaccehi,
ja547:42.4	tidasānaṁva vāsavaṁ.
ja547:43.1	So tattha gantvā taramāno,
ja547:43.2	kattā vessantaraṁbravi;
ja547:43.3	“Dukkhaṁ te vedayissāmi,
ja547:43.4	mā me kujjhi rathesabha”.
ja547:44.1	Vanditvā rodamāno so,
ja547:44.2	kattā rājānamabravi;
ja547:44.3	“Bhattā mesi mahārāja,
ja547:44.4	sabbakāmarasāharo.
ja547:45.1	Dukkhaṁ te vedayissāmi,
ja547:45.2	tattha assāsayantu maṁ;
ja547:45.3	Sivayo deva te kuddhā,
ja547:45.4	negamā ca samāgatā.
ja547:46.1	Uggā ca rājaputtā ca,
ja547:46.2	vesiyānā ca brāhmaṇā;
ja547:46.3	Hatthārohā anīkaṭṭhā,
ja547:46.4	rathikā pattikārakā;
ja547:46.5	Kevalo cāpi nigamo,
ja547:46.6	sivayo ca samāgatā.
ja547:47.1	Asmā ratyā vivasāne,
ja547:47.2	sūriyassuggamanaṁ pati;
ja547:47.3	Samaggā sivayo hutvā,
ja547:47.4	raṭṭhā pabbājayanti taṁ”.
ja547:48.1	“Kismiṁ me sivayo kuddhā,
ja547:48.2	nāhaṁ passāmi dukkaṭaṁ;
ja547:48.3	Taṁ me katte viyācikkha,
ja547:48.4	kasmā pabbājayanti maṁ”.
ja547:49.1	“Uggā ca rājaputtā ca,
ja547:49.2	vesiyānā ca brāhmaṇā;
ja547:49.3	Hatthārohā anīkaṭṭhā,
ja547:49.4	rathikā pattikārakā;
ja547:49.5	Nāgadānena khiyyanti,
ja547:49.6	tasmā pabbājayanti taṁ”.
ja547:50.1	“Hadayaṁ cakkhumpahaṁ dajjaṁ,
ja547:50.2	Kiṁ me bāhirakaṁ dhanaṁ;
ja547:50.3	Hiraññaṁ vā suvaṇṇaṁ vā,
ja547:50.4	Muttā veḷuriyā maṇi.
ja547:51.1	Dakkhiṇaṁ vāpahaṁ bāhuṁ,
ja547:51.2	disvā yācakamāgate;
ja547:51.3	Dadeyyaṁ na vikampeyyaṁ,
ja547:51.4	dāne me ramate mano.
ja547:52.1	Kāmaṁ maṁ sivayo sabbe,
ja547:52.2	pabbājentu hanantu vā;
ja547:52.3	Neva dānā viramissaṁ,
ja547:52.4	kāmaṁ chindantu sattadhā”.
ja547:53.1	Evaṁ taṁ sivayo āhu,
ja547:53.2	negamā ca samāgatā;
ja547:53.3	“Kontimārāya tīrena,
ja547:53.4	girimārañjaraṁ pati;
ja547:53.5	Yena pabbājitā yanti,
ja547:53.6	tena gacchatu subbato”.
ja547:54.1	“Sohaṁ tena gamissāmi,
ja547:54.2	yena gacchanti dūsakā;
ja547:54.3	Rattindivaṁ me khamatha,
ja547:54.4	yāva dānaṁ dadāmahaṁ”.
ja547:55.1	Āmantayittha rājā naṁ,
ja547:55.2	maddiṁ sabbaṅgasobhanaṁ;
ja547:55.3	“Yaṁ te kiñci mayā dinnaṁ,
ja547:55.4	dhanaṁ dhaññañca vijjati.
ja547:56.1	Hiraññaṁ vā suvaṇṇaṁ vā,
ja547:56.2	muttā veḷuriyā bahū;
ja547:56.3	Sabbaṁ taṁ nidaheyyāsi,
ja547:56.4	yañca te pettikaṁ dhanaṁ”.
ja547:57.1	Tamabravi rājaputtī,
ja547:57.2	maddī sabbaṅgasobhanā;
ja547:57.3	“Kuhiṁ deva nidahāmi,
ja547:57.4	taṁ me akkhāhi pucchito”.
ja547:58.1	“Sīlavantesu dajjāsi,
ja547:58.2	dānaṁ maddi yathārahaṁ;
ja547:58.3	Na hi dānā paraṁ atthi,
ja547:58.4	patiṭṭhā sabbapāṇinaṁ.
ja547:59.1	Puttesu maddi dayesi,
ja547:59.2	sassuyā sasuramhi ca;
ja547:59.3	Yo ca taṁ bhattā maññeyya,
ja547:59.4	sakkaccaṁ taṁ upaṭṭhahe.
ja547:60.1	No ce taṁ bhattā maññeyya,
ja547:60.2	mayā vippavasena te;
ja547:60.3	Aññaṁ bhattāraṁ pariyesa,
ja547:60.4	mā kisittho mayā vinā.
ja547:61.1	Ahañhi vanaṁ gacchāmi,
ja547:61.2	ghoraṁ vāḷamigāyutaṁ;
ja547:61.3	Saṁsayo jīvitaṁ mayhaṁ,
ja547:61.4	ekakassa brahāvane”.
ja547:62.1	Tamabravi rājaputtī,
ja547:62.2	maddī sabbaṅgasobhanā;
ja547:62.3	“Abhumme kathaṁ nu bhaṇasi,
ja547:62.4	pāpakaṁ vata bhāsasi.
ja547:63.1	Nesa dhammo mahārāja,
ja547:63.2	yaṁ tvaṁ gaccheyya ekako;
ja547:63.3	Ahampi tena gacchāmi,
ja547:63.4	yena gacchasi khattiya.
ja547:64.1	Maraṇaṁ vā tayā saddhiṁ,
ja547:64.2	jīvitaṁ vā tayā vinā;
ja547:64.3	Tadeva maraṇaṁ seyyo,
ja547:64.4	yañce jīve tayā vinā.
ja547:65.1	Aggiṁ ujjālayitvāna,
ja547:65.2	ekajālasamāhitaṁ;
ja547:65.3	Tattha me maraṇaṁ seyyo,
ja547:65.4	yañce jīve tayā vinā.
ja547:66.1	Yathā āraññakaṁ nāgaṁ,
ja547:66.2	dantiṁ anveti hatthinī;
ja547:66.3	Jessantaṁ giriduggesu,
ja547:66.4	samesu visamesu ca.
ja547:67.1	Evaṁ taṁ anugacchāmi,
ja547:67.2	putte ādāya pacchato;
ja547:67.3	Subharā te bhavissāmi,
ja547:67.4	na te hessāmi dubbharā.
ja547:68.1	Ime kumāre passanto,
ja547:68.2	mañjuke piyabhāṇine;
ja547:68.3	Āsīne vanagumbasmiṁ,
ja547:68.4	na rajjassa sarissasi.
ja547:69.1	Ime kumāre passanto,
ja547:69.2	mañjuke piyabhāṇine;
ja547:69.3	Kīḷante vanagumbasmiṁ,
ja547:69.4	na rajjassa sarissasi.
ja547:70.1	Ime kumāre passanto,
ja547:70.2	mañjuke piyabhāṇine;
ja547:70.3	Assame ramaṇīyamhi,
ja547:70.4	na rajjassa sarissasi.
ja547:71.1	Ime kumāre passanto,
ja547:71.2	mañjuke piyabhāṇine;
ja547:71.3	Kīḷante assame ramme,
ja547:71.4	na rajjassa sarissasi.
ja547:72.1	Ime kumāre passanto,
ja547:72.2	māladhārī alaṅkate;
ja547:72.3	Assame ramaṇīyamhi,
ja547:72.4	na rajjassa sarissasi.
ja547:73.1	Ime kumāre passanto,
ja547:73.2	māladhārī alaṅkate;
ja547:73.3	Kīḷante assame ramme,
ja547:73.4	na rajjassa sarissasi.
ja547:74.1	Yadā dakkhisi naccante,
ja547:74.2	kumāre māladhārine;
ja547:74.3	Assame ramaṇīyamhi,
ja547:74.4	na rajjassa sarissasi.
ja547:75.1	Yadā dakkhisi naccante,
ja547:75.2	kumāre māladhārine;
ja547:75.3	Kīḷante assame ramme,
ja547:75.4	na rajjassa sarissasi.
ja547:76.1	Yadā dakkhisi mātaṅgaṁ,
ja547:76.2	kuñjaraṁ saṭṭhihāyanaṁ;
ja547:76.3	Ekaṁ araññe carantaṁ,
ja547:76.4	na rajjassa sarissasi.
ja547:77.1	Yadā dakkhisi mātaṅgaṁ,
ja547:77.2	kuñjaraṁ saṭṭhihāyanaṁ;
ja547:77.3	Sāyaṁ pāto vicarantaṁ,
ja547:77.4	na rajjassa sarissasi.
ja547:78.1	Yadā kareṇusaṅghassa,
ja547:78.2	yūthassa purato vajaṁ;
ja547:78.3	Koñcaṁ kāhati mātaṅgo,
ja547:78.4	kuñjaro saṭṭhihāyano;
ja547:78.5	Tassa taṁ nadato sutvā,
ja547:78.6	na rajjassa sarissasi.
ja547:79.1	Dubhato vanavikāse,
ja547:79.2	yadā dakkhisi kāmado;
ja547:79.3	Vane vāḷamigākiṇṇe,
ja547:79.4	na rajjassa sarissasi.
ja547:80.1	Migaṁ disvāna sāyanhaṁ,
ja547:80.2	pañcamālinamāgataṁ;
ja547:80.3	Kimpurise ca naccante,
ja547:80.4	na rajjassa sarissasi.
ja547:81.1	Yadā sossasi nigghosaṁ,
ja547:81.2	sandamānāya sindhuyā;
ja547:81.3	Gītaṁ kimpurisānañca,
ja547:81.4	na rajjassa sarissasi.
ja547:82.1	Yadā sossasi nigghosaṁ,
ja547:82.2	girigabbharacārino;
ja547:82.3	Vassamānassulūkassa,
ja547:82.4	na rajjassa sarissasi.
ja547:83.1	Yadā sīhassa byagghassa,
ja547:83.2	khaggassa gavayassa ca;
ja547:83.3	Vane sossasi vāḷānaṁ,
ja547:83.4	na rajjassa sarissasi.
ja547:84.1	Yadā morīhi parikiṇṇaṁ,
ja547:84.2	barihīnaṁ matthakāsinaṁ;
ja547:84.3	Moraṁ dakkhisi naccantaṁ,
ja547:84.4	na rajjassa sarissasi.
ja547:85.1	Yadā morīhi parikiṇṇaṁ,
ja547:85.2	aṇḍajaṁ citrapakkhinaṁ;
ja547:85.3	Moraṁ dakkhisi naccantaṁ,
ja547:85.4	na rajjassa sarissasi.
ja547:86.1	Yadā morīhi parikiṇṇaṁ,
ja547:86.2	nīlagīvaṁ sikhaṇḍinaṁ;
ja547:86.3	Moraṁ dakkhisi naccantaṁ,
ja547:86.4	na rajjassa sarissasi.
ja547:87.1	Yadā dakkhisi hemante,
ja547:87.2	pupphite dharaṇīruhe;
ja547:87.3	Surabhiṁ sampavāyante,
ja547:87.4	na rajjassa sarissasi.
ja547:88.1	Yadā hemantike māse,
ja547:88.2	haritaṁ dakkhisi medaniṁ;
ja547:88.3	Indagopakasañchannaṁ,
ja547:88.4	na rajjassa sarissasi.
ja547:89.1	Yadā dakkhisi hemante,
ja547:89.2	pupphite dharaṇīruhe;
ja547:89.3	Kuṭajaṁ bimbajālañca,
ja547:89.4	pupphitaṁ loddapadmakaṁ;
ja547:89.5	Surabhiṁ sampavāyante,
ja547:89.6	na rajjassa sarissasi.
ja547:90.1	Yadā hemantike māse,
ja547:90.2	vanaṁ dakkhisi pupphitaṁ;
ja547:90.3	Opupphāni ca padmāni,
ja547:90.4	na rajjassa sarissasi”.
ja547:91.1	Hemavantaṁ nāma.
ja547:92.0	3. Dānakaṇḍa
ja547:92.1	Tesaṁ lālappitaṁ sutvā,
ja547:92.2	puttassa suṇisāya ca;
ja547:92.3	Kalunaṁ paridevesi,
ja547:92.4	rājaputtī yasassinī.
ja547:93.1	“Seyyo visaṁ me khāyitaṁ,
ja547:93.2	papātā papateyyahaṁ;
ja547:93.3	Rajjuyā bajjha miyyāhaṁ,
ja547:93.4	kasmā vessantaraṁ puttaṁ;
ja547:93.5	Pabbājenti adūsakaṁ.
ja547:94.1	Ajjhāyakaṁ dānapatiṁ,
ja547:94.2	yācayogaṁ amacchariṁ;
ja547:94.3	Pūjitaṁ paṭirājūhi,
ja547:94.4	kittimantaṁ yasassinaṁ;
ja547:94.5	Kasmā vessantaraṁ puttaṁ,
ja547:94.6	pabbājenti adūsakaṁ.
ja547:95.1	Mātāpettibharaṁ jantuṁ,
ja547:95.2	kule jeṭṭhāpacāyikaṁ;
ja547:95.3	Kasmā vessantaraṁ puttaṁ,
ja547:95.4	pabbājenti adūsakaṁ.
ja547:96.1	Rañño hitaṁ devihitaṁ,
ja547:96.2	ñātīnaṁ sakhinaṁ hitaṁ;
ja547:96.3	Hitaṁ sabbassa raṭṭhassa,
ja547:96.4	kasmā vessantaraṁ puttaṁ;
ja547:96.5	Pabbājenti adūsakaṁ.
ja547:97.1	Madhūniva palātāni,
ja547:97.2	ambāva patitā chamā;
ja547:97.3	Evaṁ hessati te raṭṭhaṁ,
ja547:97.4	pabbājenti adūsakaṁ.
ja547:98.1	Haṁso nikhīṇapattova,
ja547:98.2	pallalasmiṁ anūdake;
ja547:98.3	Apaviddho amaccehi,
ja547:98.4	eko rājā vihiyyasi.
ja547:99.1	Taṁ taṁ brūmi mahārāja,
ja547:99.2	attho te mā upaccagā;
ja547:99.3	Mā naṁ sivīnaṁ vacanā,
ja547:99.4	pabbājesi adūsakaṁ”.
ja547:100.1	“Dhammassāpacitiṁ kummi,
ja547:100.2	sivīnaṁ vinayaṁ dhajaṁ;
ja547:100.3	Pabbājemi sakaṁ puttaṁ,
ja547:100.4	pāṇā piyataro hi me”.
ja547:101.1	“Yassa pubbe dhajaggāni,
ja547:101.2	kaṇikārāva pupphitā;
ja547:101.3	Yāyantamanuyāyanti,
ja547:101.4	svajjekova gamissati.
ja547:102.1	Yassa pubbe dhajaggāni,
ja547:102.2	kaṇikāravanāniva;
ja547:102.3	Yāyantamanuyāyanti,
ja547:102.4	svajjekova gamissati.
ja547:103.1	Yassa pubbe anīkāni,
ja547:103.2	kaṇikārāva pupphitā;
ja547:103.3	Yāyantamanuyāyanti,
ja547:103.4	svajjekova gamissati.
ja547:104.1	Yassa pubbe anīkāni,
ja547:104.2	kaṇikāravanāniva;
ja547:104.3	Yāyantamanuyāyanti,
ja547:104.4	svajjekova gamissati.
ja547:105.1	Indagopakavaṇṇābhā,
ja547:105.2	gandhārā paṇḍukambalā;
ja547:105.3	Yāyantamanuyāyanti,
ja547:105.4	svajjekova gamissati.
ja547:106.1	Yo pubbe hatthinā yāti,
ja547:106.2	sivikāya rathena ca;
ja547:106.3	Svajja vessantaro rājā,
ja547:106.4	kathaṁ gacchati pattiko.
ja547:107.1	Kathaṁ candanalittaṅgo,
ja547:107.2	naccagītappabodhano;
ja547:107.3	Khurājinaṁ pharasuñca,
ja547:107.4	khārikājañca hāhiti.
ja547:108.1	Kasmā nābhiharissanti,
ja547:108.2	kāsāvā ajināni ca;
ja547:108.3	Pavisantaṁ brahāraññaṁ,
ja547:108.4	kasmā cīraṁ na bajjhare.
ja547:109.1	Kathaṁ nu cīraṁ dhārenti,
ja547:109.2	rājapabbajitā janā;
ja547:109.3	Kathaṁ kusamayaṁ cīraṁ,
ja547:109.4	maddī paridahissati.
ja547:110.1	Kāsiyāni ca dhāretvā,
ja547:110.2	khomakoṭumbarāni ca;
ja547:110.3	Kusacīrāni dhārentī,
ja547:110.4	kathaṁ maddī karissati.
ja547:111.1	Vayhāhi pariyāyitvā,
ja547:111.2	sivikāya rathena ca;
ja547:111.3	Sā kathajja anujjhaṅgī,
ja547:111.4	pathaṁ gacchati pattikā.
ja547:112.1	Yassā mudutalā hatthā,
ja547:112.2	caraṇā ca sukhedhitā;
ja547:112.3	Sā kathajja anujjhaṅgī,
ja547:112.4	pathaṁ gacchati pattikā.
ja547:113.1	Yassā mudutalā pādā,
ja547:113.2	caraṇā ca sukhedhitā;
ja547:113.3	Pādukāhi suvaṇṇāhi,
ja547:113.4	pīḷamānāva gacchati;
ja547:113.5	Sā kathajja anujjhaṅgī,
ja547:113.6	pathaṁ gacchati pattikā.
ja547:114.1	Yāssu itthisahassānaṁ,
ja547:114.2	purato gacchati mālinī;
ja547:114.3	Sā kathajja anujjhaṅgī,
ja547:114.4	vanaṁ gacchati ekikā.
ja547:115.1	Yāssu sivāya sutvāna,
ja547:115.2	muhuṁ uttasate pure;
ja547:115.3	Sā kathajja anujjhaṅgī,
ja547:115.4	vanaṁ gacchati bhīrukā.
ja547:116.1	Yāssu indasagottassa,
ja547:116.2	ulūkassa pavassato;
ja547:116.3	Sutvāna nadato bhītā,
ja547:116.4	vāruṇīva pavedhati;
ja547:116.5	Sā kathajja anujjhaṅgī,
ja547:116.6	vanaṁ gacchati bhīrukā.
ja547:117.1	Sakuṇī hataputtāva,
ja547:117.2	suññaṁ disvā kulāvakaṁ;
ja547:117.3	Ciraṁ dukkhena jhāyissaṁ,
ja547:117.4	suññaṁ āgammimaṁ puraṁ.
ja547:118.1	Sakuṇī hataputtāva,
ja547:118.2	suññaṁ disvā kulāvakaṁ;
ja547:118.3	Kisā paṇḍu bhavissāmi,
ja547:118.4	piye putte apassatī.
ja547:119.1	Sakuṇī hataputtāva,
ja547:119.2	suññaṁ disvā kulāvakaṁ;
ja547:119.3	Tena tena padhāvissaṁ,
ja547:119.4	piye putte apassatī.
ja547:120.1	Kurarī hatachāpāva,
ja547:120.2	suññaṁ disvā kulāvakaṁ;
ja547:120.3	Ciraṁ dukkhena jhāyissaṁ,
ja547:120.4	suññaṁ āgammimaṁ puraṁ.
ja547:121.1	Kurarī hatachāpāva,
ja547:121.2	suññaṁ disvā kulāvakaṁ;
ja547:121.3	Kisā paṇḍu bhavissāmi,
ja547:121.4	piye putte apassatī.
ja547:122.1	Kurarī hatachāpāva,
ja547:122.2	suññaṁ disvā kulāvakaṁ;
ja547:122.3	Tena tena padhāvissaṁ,
ja547:122.4	piye putte apassatī.
ja547:123.1	Sā nūna cakkavākīva,
ja547:123.2	pallalasmiṁ anūdake;
ja547:123.3	Ciraṁ dukkhena jhāyissaṁ,
ja547:123.4	suññaṁ āgammimaṁ puraṁ.
ja547:124.1	Sā nūna cakkavākīva,
ja547:124.2	pallalasmiṁ anūdake;
ja547:124.3	Kisā paṇḍu bhavissāmi,
ja547:124.4	piye putte apassatī.
ja547:125.1	Sā nūna cakkavākīva,
ja547:125.2	pallalasmiṁ anūdake;
ja547:125.3	Tena tena padhāvissaṁ,
ja547:125.4	piye putte apassatī.
ja547:126.1	Evaṁ me vilapantiyā,
ja547:126.2	rājā puttaṁ adūsakaṁ;
ja547:126.3	Pabbājesi vanaṁ raṭṭhā,
ja547:126.4	maññe hissāmi jīvitaṁ”.
ja547:127.1	Tassā lālappitaṁ sutvā,
ja547:127.2	sabbā antepure bahū;
ja547:127.3	Bāhā paggayha pakkanduṁ,
ja547:127.4	sivikaññā samāgatā.
ja547:128.1	Sālāva sampamathitā,
ja547:128.2	mālutena pamadditā;
ja547:128.3	Senti puttā ca dārā ca,
ja547:128.4	vessantaranivesane.
ja547:129.1	Orodhā ca kumārā ca,
ja547:129.2	vesiyānā ca brāhmaṇā;
ja547:129.3	Bāhā paggayha pakkanduṁ,
ja547:129.4	vessantaranivesane.
ja547:130.1	Hatthārohā anīkaṭṭhā,
ja547:130.2	rathikā pattikārakā;
ja547:130.3	Bāhā paggayha pakkanduṁ,
ja547:130.4	vessantaranivesane.
ja547:131.1	Tato ratyā vivasāne,
ja547:131.2	sūriyassuggamanaṁ pati;
ja547:131.3	Atha vessantaro rājā,
ja547:131.4	dānaṁ dātuṁ upāgami.
ja547:132.1	“Vatthāni vatthakāmānaṁ,
ja547:132.2	soṇḍānaṁ detha vāruṇiṁ;
ja547:132.3	Bhojanaṁ bhojanatthīnaṁ,
ja547:132.4	sammadeva pavecchatha.
ja547:133.1	Mā ca kañci vanibbake,
ja547:133.2	heṭhayittha idhāgate;
ja547:133.3	Tappetha annapānena,
ja547:133.4	gacchantu paṭipūjitā”.
ja547:134.1	Athettha vattatī saddo,
ja547:134.2	tumulo bheravo mahā;
ja547:134.3	“Dānena taṁ nīharanti,
ja547:134.4	puna dānaṁ adā tuvaṁ”.
ja547:135.1	Te su mattā kilantāva,
ja547:135.2	sampatanti vanibbakā;
ja547:135.3	Nikkhamante mahārāje,
ja547:135.4	sivīnaṁ raṭṭhavaḍḍhane.
ja547:136.1	“Acchecchuṁ vata bho rukkhaṁ,
ja547:136.2	Nānāphaladharaṁ dumaṁ;
ja547:136.3	Yathā vessantaraṁ raṭṭhā,
ja547:136.4	Pabbājenti adūsakaṁ.
ja547:137.1	Acchecchuṁ vata bho rukkhaṁ,
ja547:137.2	sabbakāmadadaṁ dumaṁ;
ja547:137.3	Yathā vessantaraṁ raṭṭhā,
ja547:137.4	pabbājenti adūsakaṁ.
ja547:138.1	Acchecchuṁ vata bho rukkhaṁ,
ja547:138.2	sabbakāmarasāharaṁ;
ja547:138.3	Yathā vessantaraṁ raṭṭhā,
ja547:138.4	pabbājenti adūsakaṁ”.
ja547:139.1	Ye vuḍḍhā ye ca daharā,
ja547:139.2	ye ca majjhimaporisā;
ja547:139.3	Bāhā paggayha pakkanduṁ,
ja547:139.4	nikkhamante mahārāje;
ja547:139.5	Sivīnaṁ raṭṭhavaḍḍhane.
ja547:140.1	Atiyakkhā vassavarā,
ja547:140.2	itthāgārā ca rājino;
ja547:140.3	Bāhā paggayha pakkanduṁ,
ja547:140.4	nikkhamante mahārāje;
ja547:140.5	Sivīnaṁ raṭṭhavaḍḍhane.
ja547:141.1	Thiyopi tattha pakkanduṁ,
ja547:141.2	yā tamhi nagare ahu;
ja547:141.3	Nikkhamante mahārāje,
ja547:141.4	sivīnaṁ raṭṭhavaḍḍhane.
ja547:142.1	Ye brāhmaṇā ye ca samaṇā,
ja547:142.2	aññe vāpi vanibbakā;
ja547:142.3	Bāhā paggayha pakkanduṁ,
ja547:142.4	“adhammo kira bho iti.
ja547:143.1	Yathā vessantaro rājā,
ja547:143.2	yajamāno sake pure;
ja547:143.3	Sivīnaṁ vacanatthena,
ja547:143.4	samhā raṭṭhā nirajjati”.
ja547:144.1	Satta hatthisate datvā,
ja547:144.2	sabbālaṅkārabhūsite;
ja547:144.3	Suvaṇṇakacche mātaṅge,
ja547:144.4	hemakappanavāsase.
ja547:145.1	Ārūḷhe gāmaṇīyehi,
ja547:145.2	tomaraṅkusapāṇibhi;
ja547:145.3	Esa vessantaro rājā,
ja547:145.4	samhā raṭṭhā nirajjati.
ja547:146.1	Satta assasate datvā,
ja547:146.2	sabbālaṅkārabhūsite;
ja547:146.3	Ājānīyeva jātiyā,
ja547:146.4	sindhave sīghavāhane.
ja547:147.1	Ārūḷhe gāmaṇīyehi,
ja547:147.2	illiyācāpadhāribhi;
ja547:147.3	Esa vessantaro rājā,
ja547:147.4	samhā raṭṭhā nirajjati.
ja547:148.1	Satta rathasate datvā,
ja547:148.2	sannaddhe ussitaddhaje;
ja547:148.3	Dīpe athopi veyagghe,
ja547:148.4	sabbālaṅkārabhūsite.
ja547:149.1	Ārūḷhe gāmaṇīyehi,
ja547:149.2	cāpahatthehi vammibhi;
ja547:149.3	Esa vessantaro rājā,
ja547:149.4	samhā raṭṭhā nirajjati.
ja547:150.1	Satta itthisate datvā,
ja547:150.2	ekamekā rathe ṭhitā;
ja547:150.3	Sannaddhā nikkharajjūhi,
ja547:150.4	suvaṇṇehi alaṅkatā.
ja547:151.1	Pītālaṅkārā pītavasanā,
ja547:151.2	Pītābharaṇabhūsitā;
ja547:151.3	Aḷārapamhā hasulā,
ja547:151.4	Susaññā tanumajjhimā;
ja547:151.5	Esa vessantaro rājā,
ja547:151.6	Samhā raṭṭhā nirajjati.
ja547:152.1	Satta dhenusate datvā,
ja547:152.2	sabbā kaṁsupadhāraṇā;
ja547:152.3	Esa vessantaro rājā,
ja547:152.4	samhā raṭṭhā nirajjati.
ja547:153.1	Satta dāsisate datvā,
ja547:153.2	satta dāsasatāni ca;
ja547:153.3	Esa vessantaro rājā,
ja547:153.4	samhā raṭṭhā nirajjati.
ja547:154.1	Hatthī assarathe datvā,
ja547:154.2	nāriyo ca alaṅkatā;
ja547:154.3	Esa vessantaro rājā,
ja547:154.4	samhā raṭṭhā nirajjati.
ja547:155.1	Tadāsi yaṁ bhiṁsanakaṁ,
ja547:155.2	tadāsi lomahaṁsanaṁ;
ja547:155.3	Mahādāne padinnamhi,
ja547:155.4	medanī sampakampatha.
ja547:156.1	Tadāsi yaṁ bhiṁsanakaṁ,
ja547:156.2	tadāsi lomahaṁsanaṁ;
ja547:156.3	Yaṁ pañjalikato rājā,
ja547:156.4	samhā raṭṭhā nirajjati.
ja547:157.1	Athettha vattatī saddo,
ja547:157.2	tumulo bheravo mahā;
ja547:157.3	Dānena taṁ nīharanti,
ja547:157.4	puna dānaṁ adā tuvaṁ.
ja547:158.1	Te su mattā kilantāva,
ja547:158.2	sampatanti vanibbakā;
ja547:158.3	Nikkhamante mahārāje,
ja547:158.4	sivīnaṁ raṭṭhavaḍḍhane.
ja547:159.1	Āmantayittha rājānaṁ,
ja547:159.2	sañjayaṁ dhamminaṁ varaṁ;
ja547:159.3	“Avaruddhasi maṁ deva,
ja547:159.4	vaṅkaṁ gacchāmi pabbataṁ.
ja547:160.1	Ye hi keci mahārāja,
ja547:160.2	bhūtā ye ca bhavissare;
ja547:160.3	Atittāyeva kāmehi,
ja547:160.4	gacchanti yamasādhanaṁ.
ja547:161.1	Svāhaṁ sake abhissasiṁ,
ja547:161.2	yajamāno sake pure;
ja547:161.3	Sivīnaṁ vacanatthena,
ja547:161.4	samhā raṭṭhā nirajjahaṁ.
ja547:162.1	Aghaṁ taṁ paṭisevissaṁ,
ja547:162.2	vane vāḷamigākiṇṇe;
ja547:162.3	Khaggadīpinisevite,
ja547:162.4	ahaṁ puññāni karomi;
ja547:162.5	Tumhe paṅkamhi sīdatha.
ja547:163.1	Anujānāhi maṁ amma,
ja547:163.2	pabbajjā mama ruccati;
ja547:163.3	Svāhaṁ sake abhissasiṁ,
ja547:163.4	yajamāno sake pure;
ja547:163.5	Sivīnaṁ vacanatthena,
ja547:163.6	samhā raṭṭhā nirajjahaṁ.
ja547:164.1	Aghaṁ taṁ paṭisevissaṁ,
ja547:164.2	vane vāḷamigākiṇṇe;
ja547:164.3	Khaggadīpinisevite,
ja547:164.4	ahaṁ puññāni karomi;
ja547:164.5	Tumhe paṅkamhi sīdatha”.
ja547:165.1	“Anujānāmi taṁ putta,
ja547:165.2	pabbajjā te samijjhatu;
ja547:165.3	Ayañca maddī kalyāṇī,
ja547:165.4	susaññā tanumajjhimā;
ja547:165.5	Acchataṁ saha puttehi,
ja547:165.6	kiṁ araññe karissati”.
ja547:166.1	“Nāhaṁ akāmā dāsimpi,
ja547:166.2	araññaṁ netumussahe;
ja547:166.3	Sace icchati anvetu,
ja547:166.4	sace nicchati acchatu”.
ja547:167.1	Tato suṇhaṁ mahārājā,
ja547:167.2	yācituṁ paṭipajjatha;
ja547:167.3	“Mā candanasamācāre,
ja547:167.4	rajojallaṁ adhārayi.
ja547:168.1	Mā kāsiyāni dhāretvā,
ja547:168.2	kusacīraṁ adhārayi;
ja547:168.3	Dukkho vāso araññasmiṁ,
ja547:168.4	mā hi tvaṁ lakkhaṇe gami”.
ja547:169.1	Tamabravi rājaputtī,
ja547:169.2	maddī sabbaṅgasobhanā;
ja547:169.3	“Nāhaṁ taṁ sukhamiccheyyaṁ,
ja547:169.4	yaṁ me vessantaraṁ vinā”.
ja547:170.1	Tamabravi mahārājā,
ja547:170.2	sivīnaṁ raṭṭhavaḍḍhano;
ja547:170.3	“Iṅgha maddi nisāmehi,
ja547:170.4	vane ye honti dussahā.
ja547:171.1	Bahū kīṭā paṭaṅgā ca,
ja547:171.2	makasā madhumakkhikā;
ja547:171.3	Tepi taṁ tattha hiṁseyyuṁ,
ja547:171.4	taṁ te dukkhataraṁ siyā.
ja547:172.1	Apare passa santāpe,
ja547:172.2	nadīnupanisevite;
ja547:172.3	Sappā ajagarā nāma,
ja547:172.4	avisā te mahabbalā.
ja547:173.1	Te manussaṁ migaṁ vāpi,
ja547:173.2	api māsannamāgataṁ;
ja547:173.3	Parikkhipitvā bhogehi,
ja547:173.4	vasamānenti attano.
ja547:174.1	Aññepi kaṇhajaṭino,
ja547:174.2	acchā nāma aghammigā;
ja547:174.3	Na tehi puriso diṭṭho,
ja547:174.4	rukkhamāruyha muccati.
ja547:175.1	Saṅghaṭṭayantā siṅgāni,
ja547:175.2	tikkhaggātippahārino;
ja547:175.3	Mahiṁsā vicarantettha,
ja547:175.4	nadiṁ sotumbaraṁ pati.
ja547:176.1	Disvā migānaṁ yūthānaṁ,
ja547:176.2	gavaṁ sañcarataṁ vane;
ja547:176.3	Dhenuva vacchagiddhāva,
ja547:176.4	kathaṁ maddi karissasi.
ja547:177.1	Disvā sampatite ghore,
ja547:177.2	dumaggesu plavaṅgame;
ja547:177.3	Akhettaññāya te maddi,
ja547:177.4	bhavissate mahabbhayaṁ.
ja547:178.1	Yā tvaṁ sivāya sutvāna,
ja547:178.2	muhuṁ uttasayī pure;
ja547:178.3	Sā tvaṁ vaṅkamanuppattā,
ja547:178.4	kathaṁ maddi karissasi.
ja547:179.1	Ṭhite majjhanhike kāle,
ja547:179.2	sannisinnesu pakkhisu;
ja547:179.3	Saṇateva brahāraññaṁ,
ja547:179.4	tattha kiṁ gantumicchasi”.
ja547:180.1	Tamabravi rājaputtī,
ja547:180.2	maddī sabbaṅgasobhanā;
ja547:180.3	“Yāni etāni akkhāsi,
ja547:180.4	vane paṭibhayāni me;
ja547:180.5	Sabbāni abhisambhossaṁ,
ja547:180.6	gacchaññeva rathesabha.
ja547:181.1	Kāsaṁ kusaṁ poṭakilaṁ,
ja547:181.2	usiraṁ muñjapabbajaṁ;
ja547:181.3	Urasā panudahissāmi,
ja547:181.4	nassa hessāmi dunnayā.
ja547:182.1	Bahūhi vata cariyāhi,
ja547:182.2	kumārī vindate patiṁ;
ja547:182.3	Udarassuparodhena,
ja547:182.4	gohanuveṭhanena ca.
ja547:183.1	Aggissa pāricariyāya,
ja547:183.2	udakummujjanena ca;
ja547:183.3	Vedhabyaṁ kaṭukaṁ loke,
ja547:183.4	gacchaññeva rathesabha.
ja547:184.1	Apissā hoti appatto,
ja547:184.2	ucchiṭṭhamapi bhuñjituṁ;
ja547:184.3	Yo naṁ hatthe gahetvāna,
ja547:184.4	akāmaṁ parikaḍḍhati;
ja547:184.5	Vedhabyaṁ kaṭukaṁ loke,
ja547:184.6	gacchaññeva rathesabha.
ja547:185.1	Kesaggahaṇamukkhepā,
ja547:185.2	bhūmyā ca parisumbhanā;
ja547:185.3	Datvā ca nopakkamati,
ja547:185.4	bahuṁ dukkhaṁ anappakaṁ;
ja547:185.5	Vedhabyaṁ kaṭukaṁ loke,
ja547:185.6	gacchaññeva rathesabha.
ja547:186.1	Sukkacchavī vedhaverā,
ja547:186.2	datvā subhagamānino;
ja547:186.3	Akāmaṁ parikaḍḍhanti,
ja547:186.4	ulūkaññeva vāyasā;
ja547:186.5	Vedhabyaṁ kaṭukaṁ loke,
ja547:186.6	gacchaññeva rathesabha.
ja547:187.1	Api ñātikule phīte,
ja547:187.2	kaṁsapajjotane vasaṁ;
ja547:187.3	Nevābhivākyaṁ na labhe,
ja547:187.4	bhātūhi sakhinīhipi;
ja547:187.5	Vedhabyaṁ kaṭukaṁ loke,
ja547:187.6	gacchaññeva rathesabha.
ja547:188.1	Naggā nadī anudakā,
ja547:188.2	naggaṁ raṭṭhaṁ arājakaṁ;
ja547:188.3	Itthīpi vidhavā naggā,
ja547:188.4	yassāpi dasa bhātaro;
ja547:188.5	Vedhabyaṁ kaṭukaṁ loke,
ja547:188.6	gacchaññeva rathesabha.
ja547:189.1	Dhajo rathassa paññāṇaṁ,
ja547:189.2	dhūmo paññāṇamaggino;
ja547:189.3	Rājā rathassa paññāṇaṁ,
ja547:189.4	bhattā paññāṇamitthiyā;
ja547:189.5	Vedhabyaṁ kaṭukaṁ loke,
ja547:189.6	gacchaññeva rathesabha.
ja547:190.1	Yā daliddī daliddassa,
ja547:190.2	aḍḍhā aḍḍhassa kittimā;
ja547:190.3	Taṁ ve devā pasaṁsanti,
ja547:190.4	dukkarañhi karoti sā.
ja547:191.1	Sāmikaṁ anubandhissaṁ,
ja547:191.2	sadā kāsāyavāsinī;
ja547:191.3	Pathabyāpi abhijjantyā,
ja547:191.4	vedhabyaṁ kaṭukitthiyā.
ja547:192.1	Api sāgarapariyantaṁ,
ja547:192.2	bahuvittadharaṁ mahiṁ;
ja547:192.3	Nānāratanaparipūraṁ,
ja547:192.4	nicche vessantaraṁ vinā.
ja547:193.1	Kathaṁ nu tāsaṁ hadayaṁ,
ja547:193.2	sukharā vata itthiyo;
ja547:193.3	Yā sāmike dukkhitamhi,
ja547:193.4	sukhamicchanti attano.
ja547:194.1	Nikkhamante mahārāje,
ja547:194.2	sivīnaṁ raṭṭhavaḍḍhane;
ja547:194.3	Tamahaṁ anubandhissaṁ,
ja547:194.4	sabbakāmadado hi me”.
ja547:195.1	Tamabravi mahārājā,
ja547:195.2	maddiṁ sabbaṅgasobhanaṁ;
ja547:195.3	“Ime te daharā puttā,
ja547:195.4	jālī kaṇhājinā cubho;
ja547:195.5	Nikkhippa lakkhaṇe gaccha,
ja547:195.6	mayaṁ te posayāmase”.
ja547:196.1	Tamabravi rājaputtī,
ja547:196.2	maddī sabbaṅgasobhanā;
ja547:196.3	“Piyā me puttakā deva,
ja547:196.4	jālī kaṇhājinā cubho;
ja547:196.5	Tyamhaṁ tattha ramessanti,
ja547:196.6	araññe jīvasokinaṁ”.
ja547:197.1	Tamabravi mahārājā,
ja547:197.2	sivīnaṁ raṭṭhavaḍḍhano;
ja547:197.3	“Sālīnaṁ odanaṁ bhutvā,
ja547:197.4	suciṁ maṁsūpasecanaṁ;
ja547:197.5	Rukkhaphalāni bhuñjantā,
ja547:197.6	kathaṁ kāhanti dārakā.
ja547:198.1	Bhutvā satapale kaṁse,
ja547:198.2	sovaṇṇe satarājike;
ja547:198.3	Rukkhapattesu bhuñjantā,
ja547:198.4	kathaṁ kāhanti dārakā.
ja547:199.1	Kāsiyāni ca dhāretvā,
ja547:199.2	khomakoṭumbarāni ca;
ja547:199.3	Kusacīrāni dhārentā,
ja547:199.4	kathaṁ kāhanti dārakā.
ja547:200.1	Vayhāhi pariyāyitvā,
ja547:200.2	sivikāya rathena ca;
ja547:200.3	Pattikā paridhāvantā,
ja547:200.4	kathaṁ kāhanti dārakā.
ja547:201.1	Kūṭāgāre sayitvāna,
ja547:201.2	nivāte phusitaggaḷe;
ja547:201.3	Sayantā rukkhamūlasmiṁ,
ja547:201.4	kathaṁ kāhanti dārakā.
ja547:202.1	Pallaṅkesu sayitvāna,
ja547:202.2	gonake cittasanthate;
ja547:202.3	Sayantā tiṇasanthāre,
ja547:202.4	kathaṁ kāhanti dārakā.
ja547:203.1	Gandhakena vilimpitvā,
ja547:203.2	agarucandanena ca;
ja547:203.3	Rajojallāni dhārentā,
ja547:203.4	kathaṁ kāhanti dārakā.
ja547:204.1	Cāmaramorahatthehi,
ja547:204.2	bījitaṅgā sukhedhitā;
ja547:204.3	Phuṭṭhā ḍaṁsehi makasehi,
ja547:204.4	kathaṁ kāhanti dārakā”.
ja547:205.1	Tamabravi rājaputtī,
ja547:205.2	maddī sabbaṅgasobhanā;
ja547:205.3	“Mā deva paridevesi,
ja547:205.4	mā ca tvaṁ vimano ahu;
ja547:205.5	Yathā mayaṁ bhavissāma,
ja547:205.6	tathā hessanti dārakā”.
ja547:206.1	Idaṁ vatvāna pakkāmi,
ja547:206.2	maddī sabbaṅgasobhanā;
ja547:206.3	Sivimaggena anvesi,
ja547:206.4	putte ādāya lakkhaṇā.
ja547:207.1	Tato vessantaro rājā,
ja547:207.2	dānaṁ datvāna khattiyo;
ja547:207.3	Pitu mātu ca vanditvā,
ja547:207.4	katvā ca naṁ padakkhiṇaṁ.
ja547:208.1	Catuvāhiṁ rathaṁ yuttaṁ,
ja547:208.2	sīghamāruyha sandanaṁ;
ja547:208.3	Ādāya puttadārañca,
ja547:208.4	vaṅkaṁ pāyāsi pabbataṁ.
ja547:209.1	Tato vessantaro rājā,
ja547:209.2	yenāsi bahuko jano;
ja547:209.3	“Āmanta kho taṁ gacchāma,
ja547:209.4	arogā hontu ñātayo.
ja547:210.1	Iṅgha maddi nisāmehi,
ja547:210.2	rammarūpaṁva dissati;
ja547:210.3	Āvāsaṁ siviseṭṭhassa,
ja547:210.4	pettikaṁ bhavanaṁ mama”.
ja547:211.1	Taṁ brāhmaṇā anvagamuṁ,
ja547:211.2	te naṁ asse ayācisuṁ;
ja547:211.3	Yācito paṭipādesi,
ja547:211.4	catunnaṁ caturo haye.
ja547:212.1	“Iṅgha maddi nisāmehi,
ja547:212.2	cittarūpaṁva dissati;
ja547:212.3	Migarohiccavaṇṇena,
ja547:212.4	dakkhiṇassā vahanti maṁ”.
ja547:213.1	Athettha pañcamo āgā,
ja547:213.2	so taṁ rathamayācatha;
ja547:213.3	Tassa taṁ yācitodāsi,
ja547:213.4	na cassupahato mano.
ja547:214.1	Tato vessantaro rājā,
ja547:214.2	oropetvā sakaṁ janaṁ;
ja547:214.3	Assāsayi assarathaṁ,
ja547:214.4	brāhmaṇassa dhanesino.
ja547:215.1	“Tvaṁ maddi kaṇhaṁ gaṇhāhi,
ja547:215.2	lahu esā kaniṭṭhikā;
ja547:215.3	Ahaṁ jāliṁ gahessāmi,
ja547:215.4	garuko bhātiko hi so”.
ja547:216.1	Rājā kumāramādāya,
ja547:216.2	rājaputtī ca dārikaṁ;
ja547:216.3	Sammodamānā pakkāmuṁ,
ja547:216.4	aññamaññaṁ piyaṁvadā.
ja547:217.1	Dānakaṇḍaṁ nāma.
ja547:218.0	4. Vanapavesana
ja547:218.1	Yadi keci manujā enti,
ja547:218.2	anumagge paṭipathe;
ja547:218.3	Maggaṁ te paṭipucchāma,
ja547:218.4	kuhiṁ vaṅkatapabbato.
ja547:219.1	Te tattha amhe passitvā,
ja547:219.2	kalunaṁ paridevayuṁ;
ja547:219.3	Dukkhaṁ te paṭivedenti,
ja547:219.4	dūre vaṅkatapabbato.
ja547:220.1	Yadi passanti pavane,
ja547:220.2	dārakā phaline dume;
ja547:220.3	Tesaṁ phalānaṁ hetumhi,
ja547:220.4	uparodanti dārakā.
ja547:221.1	Rodante dārake disvā,
ja547:221.2	ubbiddhā vipulā dumā;
ja547:221.3	Sayamevonamitvāna,
ja547:221.4	upagacchanti dārake.
ja547:222.1	Idaṁ accherakaṁ disvā,
ja547:222.2	abbhutaṁ lomahaṁsanaṁ;
ja547:222.3	Sādhukāraṁ pavattesi,
ja547:222.4	maddī sabbaṅgasobhanā.
ja547:223.1	“Accheraṁ vata lokasmiṁ,
ja547:223.2	abbhutaṁ lomahaṁsanaṁ;
ja547:223.3	Vessantarassa tejena,
ja547:223.4	sayamevonatā dumā”.
ja547:224.1	Saṅkhipiṁsu pathaṁ yakkhā,
ja547:224.2	anukampāya dārake;
ja547:224.3	Nikkhantadivaseneva,
ja547:224.4	cetaraṭṭhaṁ upāgamuṁ.
ja547:225.1	Te gantvā dīghamaddhānaṁ,
ja547:225.2	cetaraṭṭhaṁ upāgamuṁ;
ja547:225.3	Iddhaṁ phītaṁ janapadaṁ,
ja547:225.4	bahumaṁsasurodanaṁ.
ja547:226.1	Cetiyo parivāriṁsu,
ja547:226.2	disvā lakkhaṇamāgataṁ;
ja547:226.3	“Sukhumālī vata ayyā,
ja547:226.4	pattikā paridhāvati.
ja547:227.1	Vayhāhi pariyāyitvā,
ja547:227.2	sivikāya rathena ca;
ja547:227.3	Sājja maddī araññasmiṁ,
ja547:227.4	pattikā paridhāvati”.
ja547:228.1	Taṁ disvā cetapāmokkhā,
ja547:228.2	rodamānā upāgamuṁ;
ja547:228.3	“Kacci nu deva kusalaṁ,
ja547:228.4	kacci deva anāmayaṁ;
ja547:228.5	Kacci pitā arogo te,
ja547:228.6	sivīnañca anāmayaṁ.
ja547:229.1	Ko te balaṁ mahārāja,
ja547:229.2	ko nu te rathamaṇḍalaṁ;
ja547:229.3	Anassako arathako,
ja547:229.4	dīghamaddhānamāgato;
ja547:229.5	Kaccāmittehi pakato,
ja547:229.6	anuppattosimaṁ disaṁ”.
ja547:230.1	“Kusalañceva me sammā,
ja547:230.2	atho sammā anāmayaṁ;
ja547:230.3	Atho pitā arogo me,
ja547:230.4	sivīnañca anāmayaṁ.
ja547:231.1	Ahañhi kuñjaraṁ dajjaṁ,
ja547:231.2	īsādantaṁ urūḷhavaṁ;
ja547:231.3	Khettaññuṁ sabbayuddhānaṁ,
ja547:231.4	sabbasetaṁ gajuttamaṁ.
ja547:232.1	Paṇḍukambalasañchannaṁ,
ja547:232.2	pabhinnaṁ sattumaddanaṁ;
ja547:232.3	Dantiṁ savāḷabījaniṁ,
ja547:232.4	setaṁ kelāsasādisaṁ.
ja547:233.1	Sasetacchattaṁ saupādheyyaṁ,
ja547:233.2	Sāthabbanaṁ sahatthipaṁ;
ja547:233.3	Aggayānaṁ rājavāhiṁ,
ja547:233.4	Brāhmaṇānaṁ adāsahaṁ.
ja547:234.1	Tasmiṁ me sivayo kuddhā,
ja547:234.2	pitā cupahatomano;
ja547:234.3	Avaruddhasi maṁ rājā,
ja547:234.4	vaṅkaṁ gacchāmi pabbataṁ;
ja547:234.5	Okāsaṁ sammā jānātha,
ja547:234.6	vane yattha vasāmase”.
ja547:235.1	“Svāgataṁ te mahārāja,
ja547:235.2	atho te adurāgataṁ;
ja547:235.3	Issarosi anuppatto,
ja547:235.4	yaṁ idhatthi pavedaya.
ja547:236.1	Sākaṁ bhisaṁ madhuṁ maṁsaṁ,
ja547:236.2	Suddhaṁ sālīnamodanaṁ;
ja547:236.3	Paribhuñja mahārāja,
ja547:236.4	Pāhuno nosi āgato”.
ja547:237.1	“Paṭiggahitaṁ yaṁ dinnaṁ,
ja547:237.2	sabbassa agghiyaṁ kataṁ;
ja547:237.3	Avaruddhasi maṁ rājā,
ja547:237.4	vaṅkaṁ gacchāmi pabbataṁ;
ja547:237.5	Okāsaṁ sammā jānātha,
ja547:237.6	vane yattha vasāmase”.
ja547:238.1	“Idheva tāva acchassu,
ja547:238.2	cetaraṭṭhe rathesabha;
ja547:238.3	Yāva cetā gamissanti,
ja547:238.4	rañño santika yācituṁ.
ja547:239.1	Nijjhāpetuṁ mahārājaṁ,
ja547:239.2	sivīnaṁ raṭṭhavaḍḍhanaṁ;
ja547:239.3	Taṁ taṁ cetā purakkhatvā,
ja547:239.4	patītā laddhapaccayā;
ja547:239.5	Parivāretvāna gacchanti,
ja547:239.6	evaṁ jānāhi khattiya”.
ja547:240.1	“Mā vo ruccittha gamanaṁ,
ja547:240.2	rañño santika yācituṁ;
ja547:240.3	Nijjhāpetuṁ mahārājaṁ,
ja547:240.4	rājāpi tattha nissaro.
ja547:241.1	Accuggatā hi sivayo,
ja547:241.2	balaggā negamā ca ye;
ja547:241.3	Te vidhaṁsetumicchanti,
ja547:241.4	rājānaṁ mama kāraṇā”.
ja547:242.1	“Sace esā pavattettha,
ja547:242.2	raṭṭhasmiṁ raṭṭhavaḍḍhana;
ja547:242.3	Idheva rajjaṁ kārehi,
ja547:242.4	cetehi parivārito.
ja547:243.1	Iddhaṁ phītañcidaṁ raṭṭhaṁ,
ja547:243.2	iddho janapado mahā;
ja547:243.3	Matiṁ karohi tvaṁ deva,
ja547:243.4	rajjassa manusāsituṁ”.
ja547:244.1	“Na me chando mati atthi,
ja547:244.2	rajjassa anusāsituṁ;
ja547:244.3	Pabbājitassa raṭṭhasmā,
ja547:244.4	cetaputtā suṇātha me.
ja547:245.1	Atuṭṭhā sivayo āsuṁ,
ja547:245.2	balaggā negamā ca ye;
ja547:245.3	Pabbājitassa raṭṭhasmā,
ja547:245.4	cetā rajjebhisecayuṁ.
ja547:246.1	Asammodiyampi vo assa,
ja547:246.2	accantaṁ mama kāraṇā;
ja547:246.3	Sivīhi bhaṇḍanañcāpi,
ja547:246.4	viggaho me na ruccati.
ja547:247.1	Athassa bhaṇḍanaṁ ghoraṁ,
ja547:247.2	sampahāro anappako;
ja547:247.3	Ekassa kāraṇā mayhaṁ,
ja547:247.4	hiṁseyya bahuko jano.
ja547:248.1	Paṭiggahitaṁ yaṁ dinnaṁ,
ja547:248.2	sabbassa agghiyaṁ kataṁ;
ja547:248.3	Avaruddhasi maṁ rājā,
ja547:248.4	vaṅkaṁ gacchāmi pabbataṁ;
ja547:248.5	Okāsaṁ sammā jānātha,
ja547:248.6	vane yattha vasāmase”.
ja547:249.1	“Taggha te mayamakkhāma,
ja547:249.2	yathāpi kusalā tathā;
ja547:249.3	Rājisī yattha sammanti,
ja547:249.4	āhutaggī samāhitā.
ja547:250.1	Esa selo mahārāja,
ja547:250.2	pabbato gandhamādano;
ja547:250.3	Yattha tvaṁ saha puttehi,
ja547:250.4	saha bhariyāya cacchasi”.
ja547:251.1	Taṁ cetā anusāsiṁsu,
ja547:251.2	assunettā rudammukhā;
ja547:251.3	“Ito gaccha mahārāja,
ja547:251.4	ujuṁ yenuttarā mukho.
ja547:252.1	Atha dakkhisi bhaddante,
ja547:252.2	vepullaṁ nāma pabbataṁ;
ja547:252.3	Nānādumagaṇākiṇṇaṁ,
ja547:252.4	sītacchāyaṁ manoramaṁ.
ja547:253.1	Tamatikkamma bhaddante,
ja547:253.2	atha dakkhisi āpagaṁ;
ja547:253.3	Nadiṁ ketumatiṁ nāma,
ja547:253.4	gambhīraṁ girigabbharaṁ.
ja547:254.1	Puthulomamacchākiṇṇaṁ,
ja547:254.2	supatitthaṁ mahodakaṁ;
ja547:254.3	Tattha nhatvā pivitvā ca,
ja547:254.4	assāsetvā saputtake.
ja547:255.1	Atha dakkhisi bhaddante,
ja547:255.2	nigrodhaṁ madhupipphalaṁ;
ja547:255.3	Rammake sikhare jātaṁ,
ja547:255.4	sītacchāyaṁ manoramaṁ.
ja547:256.1	Atha dakkhisi bhaddante,
ja547:256.2	nāḷikaṁ nāma pabbataṁ;
ja547:256.3	Nānādijagaṇākiṇṇaṁ,
ja547:256.4	selaṁ kimpurisāyutaṁ.
ja547:257.1	Tassa uttarapubbena,
ja547:257.2	mucalindo nāma so saro;
ja547:257.3	Puṇḍarīkehi sañchanno,
ja547:257.4	setasogandhikehi ca.
ja547:258.1	So vanaṁ meghasaṅkāsaṁ,
ja547:258.2	dhuvaṁ haritasaddalaṁ;
ja547:258.3	Sīhovāmisapekkhīva,
ja547:258.4	vanasaṇḍaṁ vigāhaya;
ja547:258.5	Puppharukkhehi sañchannaṁ,
ja547:258.6	phalarukkhehi cūbhayaṁ.
ja547:259.1	Tattha bindussarā vaggū,
ja547:259.2	nānāvaṇṇā bahū dijā;
ja547:259.3	Kūjantamupakūjanti,
ja547:259.4	utusaṁpupphite dume.
ja547:260.1	Gantvā girividuggānaṁ,
ja547:260.2	nadīnaṁ pabhavāni ca;
ja547:260.3	So dakkhisi pokkharaṇiṁ,
ja547:260.4	karañjakakudhāyutaṁ.
ja547:261.1	Puthulomamacchākiṇṇaṁ,
ja547:261.2	supatitthaṁ mahodakaṁ;
ja547:261.3	Samañca caturaṁsañca,
ja547:261.4	sāduṁ appaṭigandhiyaṁ.
ja547:262.1	Tassā uttarapubbena,
ja547:262.2	paṇṇasālaṁ amāpaya;
ja547:262.3	Paṇṇasālaṁ amāpetvā,
ja547:262.4	uñchācariyāya īhatha”.
ja547:263.1	Vanapavesanaṁ nāma.
ja547:264.0	5. Jūjakapabba
ja547:264.1	Ahu vāsī kaliṅgesu,
ja547:264.2	jūjako nāma brāhmaṇo;
ja547:264.3	Tassāsi daharā bhariyā,
ja547:264.4	nāmenāmittatāpanā.
ja547:265.1	Tā naṁ tattha gatāvocuṁ,
ja547:265.2	nadiṁ udakahāriyā;
ja547:265.3	Thiyo naṁ paribhāsiṁsu,
ja547:265.4	samāgantvā kutūhalā.
ja547:266.1	“Amittā nūna te mātā,
ja547:266.2	amitto nūna te pitā;
ja547:266.3	Ye taṁ jiṇṇassa pādaṁsu,
ja547:266.4	evaṁ dahariyaṁ satiṁ.
ja547:267.1	Ahitaṁ vata te ñātī,
ja547:267.2	mantayiṁsu rahogatā;
ja547:267.3	Ye taṁ jiṇṇassa pādaṁsu,
ja547:267.4	evaṁ dahariyaṁ satiṁ.
ja547:268.1	Amittā vata te ñātī,
ja547:268.2	mantayiṁsu rahogatā;
ja547:268.3	Ye taṁ jiṇṇassa pādaṁsu,
ja547:268.4	evaṁ dahariyaṁ satiṁ.
ja547:269.1	Dukkaṭaṁ vata te ñātī,
ja547:269.2	mantayiṁsu rahogatā;
ja547:269.3	Ye taṁ jiṇṇassa pādaṁsu,
ja547:269.4	evaṁ dahariyaṁ satiṁ.
ja547:270.1	Pāpakaṁ vata te ñātī,
ja547:270.2	mantayiṁsu rahogatā;
ja547:270.3	Ye taṁ jiṇṇassa pādaṁsu,
ja547:270.4	evaṁ dahariyaṁ satiṁ.
ja547:271.1	Amanāpaṁ vata te ñātī,
ja547:271.2	mantayiṁsu rahogatā;
ja547:271.3	Ye taṁ jiṇṇassa pādaṁsu,
ja547:271.4	evaṁ dahariyaṁ satiṁ.
ja547:272.1	Amanāpavāsaṁ vasi,
ja547:272.2	jiṇṇena patinā saha;
ja547:272.3	Yā tvaṁ vasasi jiṇṇassa,
ja547:272.4	mataṁ te jīvitā varaṁ.
ja547:273.1	Na hi nūna tuyhaṁ kalyāṇi,
ja547:273.2	pitā mātā ca sobhane;
ja547:273.3	Aññaṁ bhattāraṁ vindiṁsu,
ja547:273.4	ye taṁ jiṇṇassa pādaṁsu;
ja547:273.5	Evaṁ dahariyaṁ satiṁ.
ja547:274.1	Duyiṭṭhaṁ te navamiyaṁ,
ja547:274.2	akataṁ aggihuttakaṁ;
ja547:274.3	Ye taṁ jiṇṇassa pādaṁsu,
ja547:274.4	evaṁ dahariyaṁ satiṁ.
ja547:275.1	Samaṇe brāhmaṇe nūna,
ja547:275.2	brahmacariyaparāyaṇe;
ja547:275.3	Sā tvaṁ loke abhisapi,
ja547:275.4	sīlavante bahussute;
ja547:275.5	Yā tvaṁ vasasi jiṇṇassa,
ja547:275.6	evaṁ dahariyā satī.
ja547:276.1	Na dukkhaṁ ahinā daṭṭhaṁ,
ja547:276.2	na dukkhaṁ sattiyā hataṁ;
ja547:276.3	Tañca dukkhañca tibbañca,
ja547:276.4	yaṁ passe jiṇṇakaṁ patiṁ.
ja547:277.1	Natthi khiḍḍā natthi rati,
ja547:277.2	jiṇṇena patinā saha;
ja547:277.3	Natthi allāpasallāpo,
ja547:277.4	jagghitampi na sobhati.
ja547:278.1	Yadā ca daharo daharā,
ja547:278.2	mantayanti rahogatā;
ja547:278.3	Sabbesaṁ sokā nassanti,
ja547:278.4	ye keci hadayassitā.
ja547:279.1	Daharā tvaṁ rūpavatī,
ja547:279.2	purisānaṁbhipatthitā;
ja547:279.3	Gaccha ñātikule accha,
ja547:279.4	kiṁ jiṇṇo ramayissati”.
ja547:280.1	“Na te brāhmaṇa gacchāmi,
ja547:280.2	nadiṁ udakahāriyā;
ja547:280.3	Thiyo maṁ paribhāsanti,
ja547:280.4	tayā jiṇṇena brāhmaṇa”.
ja547:281.1	“Mā me tvaṁ akarā kammaṁ,
ja547:281.2	mā me udakamāhari;
ja547:281.3	Ahaṁ udakamāhissaṁ,
ja547:281.4	mā bhoti kupitā ahu”.
ja547:282.1	“Nāhaṁ tamhi kule jātā,
ja547:282.2	yaṁ tvaṁ udakamāhare;
ja547:282.3	Evaṁ brāhmaṇa jānāhi,
ja547:282.4	na te vacchāmahaṁ ghare.
ja547:283.1	Sace me dāsaṁ dāsiṁ vā,
ja547:283.2	nānayissasi brāhmaṇa;
ja547:283.3	Evaṁ brāhmaṇa jānāhi,
ja547:283.4	na te vacchāmi santike”.
ja547:284.1	“Natthi me sippaṭhānaṁ vā,
ja547:284.2	dhanaṁ dhaññañca brāhmaṇi;
ja547:284.3	Kutohaṁ dāsaṁ dāsiṁ vā,
ja547:284.4	ānayissāmi bhotiyā;
ja547:284.5	Ahaṁ bhotiṁ upaṭṭhissaṁ,
ja547:284.6	mā bhoti kupitā ahu”.
ja547:285.1	“Ehi te ahamakkhissaṁ,
ja547:285.2	yathā me vacanaṁ sutaṁ;
ja547:285.3	Esa vessantaro rājā,
ja547:285.4	vaṅke vasati pabbate.
ja547:286.1	Taṁ tvaṁ gantvāna yācassu,
ja547:286.2	dāsaṁ dāsiñca brāhmaṇa;
ja547:286.3	So te dassati yācito,
ja547:286.4	dāsaṁ dāsiñca khattiyo”.
ja547:287.1	“Jiṇṇohamasmi dubbalo,
ja547:287.2	dīgho caddhā suduggamo;
ja547:287.3	Mā bhoti paṭidevesi,
ja547:287.4	mā ca tvaṁ vimanā ahu;
ja547:287.5	Ahaṁ bhotiṁ upaṭṭhissaṁ,
ja547:287.6	mā bhoti kupitā ahu”.
ja547:288.1	“Yathā agantvā saṅgāmaṁ,
ja547:288.2	ayuddhova parājito;
ja547:288.3	Evameva tuvaṁ brahme,
ja547:288.4	agantvāva parājito.
ja547:289.1	Sace me dāsaṁ dāsiṁ vā,
ja547:289.2	nānayissasi brāhmaṇa;
ja547:289.3	Evaṁ brāhmaṇa jānāhi,
ja547:289.4	na te vacchāmahaṁ ghare;
ja547:289.5	Amanāpaṁ te karissāmi,
ja547:289.6	taṁ te dukkhaṁ bhavissati.
ja547:290.1	Nakkhatte utupubbesu,
ja547:290.2	yadā maṁ dakkhisilaṅkataṁ;
ja547:290.3	Aññehi saddhiṁ ramamānaṁ,
ja547:290.4	taṁ te dukkhaṁ bhavissati.
ja547:291.1	Adassanena mayhaṁ te,
ja547:291.2	jiṇṇassa paridevato;
ja547:291.3	Bhiyyo vaṅkā ca palitā,
ja547:291.4	bahū hessanti brāhmaṇa”.
ja547:292.1	Tato so brāhmaṇo bhīto,
ja547:292.2	brāhmaṇiyā vasānugo;
ja547:292.3	Aṭṭito kāmarāgena,
ja547:292.4	brāhmaṇiṁ etadabravi.
ja547:293.1	“Pātheyyaṁ me karohi tvaṁ,
ja547:293.2	Saṅkulyā saguḷāni ca;
ja547:293.3	Madhupiṇḍikā ca sukatāyo,
ja547:293.4	Sattubhattañca brāhmaṇi.
ja547:294.1	Ānayissaṁ methunake,
ja547:294.2	ubho dāsakumārake;
ja547:294.3	Te taṁ paricarissanti,
ja547:294.4	rattindivamatanditā”.
ja547:295.1	Idaṁ vatvā brahmabandhu,
ja547:295.2	paṭimuñci upāhanā;
ja547:295.3	Tato so mantayitvāna,
ja547:295.4	bhariyaṁ katvā padakkhiṇaṁ.
ja547:296.1	Pakkāmi so ruṇṇamukho,
ja547:296.2	brāhmaṇo sahitabbato;
ja547:296.3	Sivīnaṁ nagaraṁ phītaṁ,
ja547:296.4	dāsapariyesanaṁ caraṁ.
ja547:297.1	So tattha gantvā avaca,
ja547:297.2	ye tatthāsuṁ samāgatā;
ja547:297.3	“Kuhiṁ vessantaro rājā,
ja547:297.4	kattha passemu khattiyaṁ”.
ja547:298.1	Te janā taṁ avaciṁsu,
ja547:298.2	ye tatthāsuṁ samāgatā;
ja547:298.3	“Tumhehi brahme pakato,
ja547:298.4	atidānena khattiyo;
ja547:298.5	Pabbājito sakā raṭṭhā,
ja547:298.6	vaṅke vasati pabbate.
ja547:299.1	Tumhehi brahme pakato,
ja547:299.2	atidānena khattiyo;
ja547:299.3	Ādāya puttadārañca,
ja547:299.4	vaṅke vasati pabbate”.
ja547:300.1	So codito brāhmaṇiyā,
ja547:300.2	brāhmaṇo kāmagiddhimā;
ja547:300.3	Aghaṁ taṁ paṭisevittha,
ja547:300.4	vane vāḷamigākiṇṇe;
ja547:300.5	Khaggadīpinisevite.
ja547:301.1	Ādāya beḷuvaṁ daṇḍaṁ,
ja547:301.2	aggihuttaṁ kamaṇḍaluṁ;
ja547:301.3	So pāvisi brahāraññaṁ,
ja547:301.4	yattha assosi kāmadaṁ.
ja547:302.1	Taṁ paviṭṭhaṁ brahāraññaṁ,
ja547:302.2	kokā naṁ parivārayuṁ;
ja547:302.3	Vikkandi so vippanaṭṭho,
ja547:302.4	dūre panthā apakkami.
ja547:303.1	Tato so brāhmaṇo gantvā,
ja547:303.2	bhogaluddho asaññato;
ja547:303.3	Vaṅkassorohaṇe naṭṭhe,
ja547:303.4	imā gāthā abhāsatha.
ja547:304.1	“Ko rājaputtaṁ nisabhaṁ,
ja547:304.2	jayantamaparājitaṁ;
ja547:304.3	Bhaye khemassa dātāraṁ,
ja547:304.4	ko me vessantaraṁ vidū.
ja547:305.1	Yo yācataṁ patiṭṭhāsi,
ja547:305.2	bhūtānaṁ dharaṇīriva;
ja547:305.3	Dharaṇūpamaṁ mahārājaṁ,
ja547:305.4	ko me vessantaraṁ vidū.
ja547:306.1	Yo yācataṁ gatī āsi,
ja547:306.2	savantīnaṁva sāgaro;
ja547:306.3	Sāgarūpamaṁ mahārājaṁ,
ja547:306.4	ko me vessantaraṁ vidū.
ja547:307.1	Kalyāṇatitthaṁ sucimaṁ,
ja547:307.2	sītūdakaṁ manoramaṁ;
ja547:307.3	Puṇḍarīkehi sañchannaṁ,
ja547:307.4	yuttaṁ kiñjakkhareṇunā;
ja547:307.5	Rahadūpamaṁ mahārājaṁ,
ja547:307.6	ko me vessantaraṁ vidū.
ja547:308.1	Assatthaṁva pathe jātaṁ,
ja547:308.2	sītacchāyaṁ manoramaṁ;
ja547:308.3	Santānaṁ visametāraṁ,
ja547:308.4	kilantānaṁ paṭiggahaṁ;
ja547:308.5	Tathūpamaṁ mahārājaṁ,
ja547:308.6	ko me vessantaraṁ vidū.
ja547:309.1	Nigrodhaṁva pathe jātaṁ,
ja547:309.2	sītacchāyaṁ manoramaṁ;
ja547:309.3	Santānaṁ visametāraṁ,
ja547:309.4	kilantānaṁ paṭiggahaṁ;
ja547:309.5	Tathūpamaṁ mahārājaṁ,
ja547:309.6	ko me vessantaraṁ vidū.
ja547:310.1	Ambaṁ iva pathe jātaṁ,
ja547:310.2	sītacchāyaṁ manoramaṁ;
ja547:310.3	Santānaṁ visametāraṁ,
ja547:310.4	kilantānaṁ paṭiggahaṁ;
ja547:310.5	Tathūpamaṁ mahārājaṁ,
ja547:310.6	ko me vessantaraṁ vidū.
ja547:311.1	Sālaṁ iva pathe jātaṁ,
ja547:311.2	sītacchāyaṁ manoramaṁ;
ja547:311.3	Santānaṁ visametāraṁ,
ja547:311.4	kilantānaṁ paṭiggahaṁ;
ja547:311.5	Tathūpamaṁ mahārājaṁ,
ja547:311.6	ko me vessantaraṁ vidū.
ja547:312.1	Dumaṁ iva pathe jātaṁ,
ja547:312.2	sītacchāyaṁ manoramaṁ;
ja547:312.3	Santānaṁ visametāraṁ,
ja547:312.4	kilantānaṁ paṭiggahaṁ;
ja547:312.5	Tathūpamaṁ mahārājaṁ,
ja547:312.6	ko me vessantaraṁ vidū.
ja547:313.1	Evañca me vilapato,
ja547:313.2	paviṭṭhassa brahāvane;
ja547:313.3	Ahaṁ jānanti yo vajjā,
ja547:313.4	nandiṁ so janaye mama.
ja547:314.1	Evañca me vilapato,
ja547:314.2	paviṭṭhassa brahāvane;
ja547:314.3	Ahaṁ jānanti yo vajjā,
ja547:314.4	tāya so ekavācāya;
ja547:314.5	Pasave puññaṁ anappakaṁ”.
ja547:315.1	Tassa ceto paṭissosi,
ja547:315.2	araññe luddako caraṁ;
ja547:315.3	“Tumhehi brahme pakato,
ja547:315.4	atidānena khattiyo;
ja547:315.5	Pabbājito sakā raṭṭhā,
ja547:315.6	vaṅke vasati pabbate.
ja547:316.1	Tumhehi brahme pakato,
ja547:316.2	atidānena khattiyo;
ja547:316.3	Ādāya puttadārañca,
ja547:316.4	vaṅke vasati pabbate.
ja547:317.1	Akiccakārī dummedho,
ja547:317.2	raṭṭhā pavanamāgato;
ja547:317.3	Rājaputtaṁ gavesanto,
ja547:317.4	bako macchamivodake.
ja547:318.1	Tassa tyāhaṁ na dassāmi,
ja547:318.2	jīvitaṁ idha brāhmaṇa;
ja547:318.3	Ayañhi te mayā nunno,
ja547:318.4	saro pissati lohitaṁ.
ja547:319.1	Siro te vajjhayitvāna,
ja547:319.2	hadayaṁ chetvā sabandhanaṁ;
ja547:319.3	Panthasakuṇaṁ yajissāmi,
ja547:319.4	tuyhaṁ maṁsena brāhmaṇa.
ja547:320.1	Tuyhaṁ maṁsena medena,
ja547:320.2	matthakena ca brāhmaṇa;
ja547:320.3	Āhutiṁ paggahessāmi,
ja547:320.4	chetvāna hadayaṁ tava.
ja547:321.1	Taṁ me suyiṭṭhaṁ suhutaṁ,
ja547:321.2	tuyhaṁ maṁsena brāhmaṇa;
ja547:321.3	Na ca tvaṁ rājaputtassa,
ja547:321.4	bhariyaṁ putte ca nessasi”.
ja547:322.1	“Avajjho brāhmaṇo dūto,
ja547:322.2	cetaputta suṇohi me;
ja547:322.3	Tasmā hi dūtaṁ na hanti,
ja547:322.4	esa dhammo sanantano.
ja547:323.1	Nijjhattā sivayo sabbe,
ja547:323.2	pitā naṁ daṭṭhumicchati;
ja547:323.3	Mātā ca dubbalā tassa,
ja547:323.4	acirā cakkhūni jīyare.
ja547:324.1	Tesāhaṁ pahito dūto,
ja547:324.2	cetaputta suṇohi me;
ja547:324.3	Rājaputtaṁ nayissāmi,
ja547:324.4	yadi jānāsi saṁsa me”.
ja547:325.1	“Piyassa me piyo dūto,
ja547:325.2	puṇṇapattaṁ dadāmi te;
ja547:325.3	Imañca madhuno tumbaṁ,
ja547:325.4	migasatthiñca brāhmaṇa;
ja547:325.5	Tañca te desamakkhissaṁ,
ja547:325.6	yattha sammati kāmado”.
ja547:326.1	Jūjakapabbaṁ nāma.
ja547:327.0	6. Cūḷavanavaṇṇanā
ja547:327.1	“Esa selo mahābrahme,
ja547:327.2	pabbato gandhamādano;
ja547:327.3	Yattha vessantaro rājā,
ja547:327.4	saha puttehi sammati.
ja547:328.1	Dhārento brāhmaṇavaṇṇaṁ,
ja547:328.2	āsadañca masaṁ jaṭaṁ;
ja547:328.3	Cammavāsī chamā seti,
ja547:328.4	jātavedaṁ namassati.
ja547:329.1	Ete nīlā padissanti,
ja547:329.2	nānāphaladharā dumā;
ja547:329.3	Uggatā abbhakūṭāva,
ja547:329.4	nīlā añjanapabbatā.
ja547:330.1	Dhavassakaṇṇā khadirā,
ja547:330.2	sālā phandanamāluvā;
ja547:330.3	Sampavedhanti vātena,
ja547:330.4	sakiṁ pītāva māṇavā.
ja547:331.1	Upari dumapariyāyesu,
ja547:331.2	Saṅgītiyova suyyare;
ja547:331.3	Najjuhā kokilasaṅghā,
ja547:331.4	Sampatanti dumā dumaṁ.
ja547:332.1	Avhayanteva gacchantaṁ,
ja547:332.2	sākhāpattasamīritā;
ja547:332.3	Ramayanteva āgantaṁ,
ja547:332.4	modayanti nivāsinaṁ;
ja547:332.5	Yattha vessantaro rājā,
ja547:332.6	saha puttehi sammati.
ja547:333.1	Dhārento brāhmaṇavaṇṇaṁ,
ja547:333.2	āsadañca masaṁ jaṭaṁ;
ja547:333.3	Cammavāsī chamā seti,
ja547:333.4	jātavedaṁ namassati.
ja547:334.1	Ambā kapitthā panasā,
ja547:334.2	sālā jambū vibhītakā;
ja547:334.3	Harītakī āmalakā,
ja547:334.4	assatthā badarāni ca.
ja547:335.1	Cārutimbarukkhā cettha,
ja547:335.2	nigrodhā ca kapitthanā;
ja547:335.3	Madhumadhukā thevanti,
ja547:335.4	nīce pakkā cudumbarā.
ja547:336.1	Pārevatā bhaveyyā ca,
ja547:336.2	muddikā ca madhutthikā;
ja547:336.3	Madhuṁ anelakaṁ tattha,
ja547:336.4	sakamādāya bhuñjare.
ja547:337.1	Aññettha pupphitā ambā,
ja547:337.2	aññe tiṭṭhanti dovilā;
ja547:337.3	Aññe āmā ca pakkā ca,
ja547:337.4	bhekavaṇṇā tadūbhayaṁ.
ja547:338.1	Athettha heṭṭhā puriso,
ja547:338.2	ambapakkāni gaṇhati;
ja547:338.3	Āmāni ceva pakkāni,
ja547:338.4	vaṇṇagandharasuttame.
ja547:339.1	Ateva me acchariyaṁ,
ja547:339.2	hiṅkāro paṭibhāti maṁ;
ja547:339.3	Devānamiva āvāso,
ja547:339.4	sobhati nandanūpamo.
ja547:340.1	Vibhedikā nāḷikerā,
ja547:340.2	khajjurīnaṁ brahāvane;
ja547:340.3	Mālāva ganthitā ṭhanti,
ja547:340.4	dhajaggāneva dissare;
ja547:340.5	Nānāvaṇṇehi pupphehi,
ja547:340.6	nabhaṁ tārācitāmiva.
ja547:341.1	Kuṭajī kuṭṭhatagarā,
ja547:341.2	pāṭaliyo ca pupphitā;
ja547:341.3	Punnāgā giripunnāgā,
ja547:341.4	koviḷārā ca pupphitā.
ja547:342.1	Uddālakā somarukkhā,
ja547:342.2	agaruphalliyā bahū;
ja547:342.3	Puttajīvā ca kakudhā,
ja547:342.4	asanā cettha pupphitā.
ja547:343.1	Kuṭajā salaḷā nīpā,
ja547:343.2	kosambā labujā dhavā;
ja547:343.3	Sālā ca pupphitā tattha,
ja547:343.4	palālakhalasannibhā.
ja547:344.1	Tassāvidūre pokkharaṇī,
ja547:344.2	bhūmibhāge manorame;
ja547:344.3	Padumuppalasañchannā,
ja547:344.4	devānamiva nandane.
ja547:345.1	Athettha puppharasamattā,
ja547:345.2	kokilā mañjubhāṇikā;
ja547:345.3	Abhinādenti pavanaṁ,
ja547:345.4	utusampupphite dume.
ja547:346.1	Bhassanti makarandehi,
ja547:346.2	pokkhare pokkhare madhū;
ja547:346.3	Athettha vātā vāyanti,
ja547:346.4	dakkhiṇā atha pacchimā;
ja547:346.5	Padumakiñjakkhareṇūhi,
ja547:346.6	okiṇṇo hoti assamo.
ja547:347.1	Thūlā siṅghāṭakā cettha,
ja547:347.2	saṁsādiyā pasādiyā;
ja547:347.3	Macchakacchapabyāviddhā,
ja547:347.4	bahū cettha mupayānakā;
ja547:347.5	Madhuṁ bhisehi savati,
ja547:347.6	khirasappimuḷālibhi.
ja547:348.1	Surabhī taṁ vanaṁ vāti,
ja547:348.2	nānāgandhasamoditaṁ;
ja547:348.3	Sammaddateva gandhena,
ja547:348.4	pupphasākhāhi taṁ vanaṁ;
ja547:348.5	Bhamarā pupphagandhena,
ja547:348.6	samantā mabhināditā.
ja547:349.1	Athettha sakuṇā santi,
ja547:349.2	nānāvaṇṇā bahū dijā;
ja547:349.3	Modanti saha bhariyāhi,
ja547:349.4	aññamaññaṁ pakūjino.
ja547:350.1	Nandikā jīvaputtā ca,
ja547:350.2	jīvaputtā piyā ca no;
ja547:350.3	Piyā puttā piyā nandā,
ja547:350.4	dijā pokkharaṇīgharā.
ja547:351.1	Mālāva ganthitā ṭhanti,
ja547:351.2	dhajaggāneva dissare;
ja547:351.3	Nānāvaṇṇehi pupphehi,
ja547:351.4	kusaleheva suganthitā;
ja547:351.5	Yattha vessantaro rājā,
ja547:351.6	saha puttehi sammati.
ja547:352.1	Dhārento brāhmaṇavaṇṇaṁ,
ja547:352.2	āsadañca masaṁ jaṭaṁ;
ja547:352.3	Cammavāsī chamā seti,
ja547:352.4	jātavedaṁ namassati”.
ja547:353.1	“Idañca me sattubhattaṁ,
ja547:353.2	Madhunā paṭisaṁyutaṁ;
ja547:353.3	Madhupiṇḍikā ca sukatāyo,
ja547:353.4	Sattubhattaṁ dadāmi te”.
ja547:354.1	“Tuyheva sambalaṁ hotu,
ja547:354.2	nāhaṁ icchāmi sambalaṁ;
ja547:354.3	Itopi brahme gaṇhāhi,
ja547:354.4	gaccha brahme yathāsukhaṁ.
ja547:355.1	Ayaṁ ekapadī eti,
ja547:355.2	ujuṁ gacchati assamaṁ;
ja547:355.3	Isīpi accuto tattha,
ja547:355.4	paṅkadanto rajassiro;
ja547:355.5	Dhārento brāhmaṇavaṇṇaṁ,
ja547:355.6	āsadañca masaṁ jaṭaṁ.
ja547:356.1	Cammavāsī chamā seti,
ja547:356.2	jātavedaṁ namassati;
ja547:356.3	Taṁ tvaṁ gantvāna pucchassu,
ja547:356.4	so te maggaṁ pavakkhati”.
ja547:357.1	Idaṁ sutvā brahmabandhu,
ja547:357.2	cetaṁ katvā padakkhiṇaṁ;
ja547:357.3	Udaggacitto pakkāmi,
ja547:357.4	yenāsi accuto isi.
ja547:358.1	Cūḷavanavaṇṇanā.
ja547:359.0	7. Mahāvanavaṇṇanā
ja547:359.1	Gacchanto so bhāradvājo,
ja547:359.2	addassa accutaṁ isiṁ;
ja547:359.3	Disvāna taṁ bhāradvājo,
ja547:359.4	sammodi isinā saha.
ja547:360.1	“Kacci nu bhoto kusalaṁ,
ja547:360.2	kacci bhoto anāmayaṁ;
ja547:360.3	Kacci uñchena yāpesi,
ja547:360.4	kacci mūlaphalā bahū.
ja547:361.1	Kacci ḍaṁsā makasā ca,
ja547:361.2	appameva sarīsapā;
ja547:361.3	Vane vāḷamigākiṇṇe,
ja547:361.4	kacci hiṁsā na vijjati”.
ja547:362.1	“Kusalañceva me brahme,
ja547:362.2	atho brahme anāmayaṁ;
ja547:362.3	Atho uñchena yāpemi,
ja547:362.4	atho mūlaphalā bahū.
ja547:363.1	Atho ḍaṁsā makasā ca,
ja547:363.2	appameva sarīsapā;
ja547:363.3	Vane vāḷamigākiṇṇe,
ja547:363.4	hiṁsā mayhaṁ na vijjati.
ja547:364.1	Bahūni vassapūgāni,
ja547:364.2	assame vasato mama;
ja547:364.3	Nābhijānāmi uppannaṁ,
ja547:364.4	ābādhaṁ amanoramaṁ.
ja547:365.1	Svāgataṁ te mahābrahme,
ja547:365.2	atho te adurāgataṁ;
ja547:365.3	Anto pavisa bhaddante,
ja547:365.4	pāde pakkhālayassu te.
ja547:366.1	Tindukāni piyālāni,
ja547:366.2	madhuke kāsumāriyo;
ja547:366.3	Phalāni khuddakappāni,
ja547:366.4	bhuñja brahme varaṁ varaṁ.
ja547:367.1	Idampi pānīyaṁ sītaṁ,
ja547:367.2	ābhataṁ girigabbharā;
ja547:367.3	Tato piva mahābrahme,
ja547:367.4	sace tvaṁ abhikaṅkhasi”.
ja547:368.1	“Paṭiggahitaṁ yaṁ dinnaṁ,
ja547:368.2	sabbassa agghiyaṁ kataṁ;
ja547:368.3	Sañjayassa sakaṁ puttaṁ,
ja547:368.4	sivīhi vippavāsitaṁ;
ja547:368.5	Tamahaṁ dassanamāgato,
ja547:368.6	yadi jānāsi saṁsa me”.
ja547:369.1	“Na bhavaṁ eti puññatthaṁ,
ja547:369.2	sivirājassa dassanaṁ;
ja547:369.3	Maññe bhavaṁ patthayati,
ja547:369.4	rañño bhariyaṁ patibbataṁ;
ja547:369.5	Maññe kaṇhājinaṁ dāsiṁ,
ja547:369.6	jāliṁ dāsañca icchasi.
ja547:370.1	Atha vā tayo mātāputte,
ja547:370.2	araññā netumāgato;
ja547:370.3	Na tassa bhogā vijjanti,
ja547:370.4	dhanaṁ dhaññañca brāhmaṇa”.
ja547:371.1	“Akuddharūpohaṁ bhoto,
ja547:371.2	nāhaṁ yācitumāgato;
ja547:371.3	Sādhu dassanamariyānaṁ,
ja547:371.4	sannivāso sadā sukho.
ja547:372.1	Adiṭṭhapubbo sivirājā,
ja547:372.2	sivīhi vippavāsito;
ja547:372.3	Tamahaṁ dassanamāgato,
ja547:372.4	yadi jānāsi saṁsa me”.
ja547:373.1	“Esa selo mahābrahme,
ja547:373.2	pabbato gandhamādano;
ja547:373.3	Yattha vessantaro rājā,
ja547:373.4	saha puttehi sammati.
ja547:374.1	Dhārento brāhmaṇavaṇṇaṁ,
ja547:374.2	āsadañca masaṁ jaṭaṁ;
ja547:374.3	Cammavāsī chamā seti,
ja547:374.4	jātavedaṁ namassati.
ja547:375.1	Ete nīlā padissanti,
ja547:375.2	nānāphaladharā dumā;
ja547:375.3	Uggatā abbhakūṭāva,
ja547:375.4	nīlā añjanapabbatā.
ja547:376.1	Dhavassakaṇṇā khadirā,
ja547:376.2	sālā phandanamāluvā;
ja547:376.3	Sampavedhanti vātena,
ja547:376.4	sakiṁ pītāva māṇavā.
ja547:377.1	Upari dumapariyāyesu,
ja547:377.2	Saṅgītiyova suyyare;
ja547:377.3	Najjuhā kokilasaṅghā,
ja547:377.4	Sampatanti dumā dumaṁ.
ja547:378.1	Avhayanteva gacchantaṁ,
ja547:378.2	sākhāpattasamīritā;
ja547:378.3	Ramayanteva āgantaṁ,
ja547:378.4	modayanti nivāsinaṁ;
ja547:378.5	Yattha vessantaro rājā,
ja547:378.6	saha puttehi sammati.
ja547:379.1	Dhārento brāhmaṇavaṇṇaṁ,
ja547:379.2	āsadañca masaṁ jaṭaṁ;
ja547:379.3	Cammavāsī chamā seti,
ja547:379.4	jātavedaṁ namassati.
ja547:380.1	Karerimālā vitatā,
ja547:380.2	bhūmibhāge manorame;
ja547:380.3	Saddalāharitā bhūmi,
ja547:380.4	na tatthuddhaṁsate rajo.
ja547:381.1	Mayūragīvasaṅkāsā,
ja547:381.2	tūlaphassasamūpamā;
ja547:381.3	Tiṇāni nātivattanti,
ja547:381.4	samantā caturaṅgulā.
ja547:382.1	Ambā jambū kapitthā ca,
ja547:382.2	nīce pakkā cudumbarā;
ja547:382.3	Paribhogehi rukkhehi,
ja547:382.4	vanaṁ taṁ rativaḍḍhanaṁ.
ja547:383.1	Veḷuriyavaṇṇasannibhaṁ,
ja547:383.2	macchagumbanisevitaṁ;
ja547:383.3	Suciṁ sugandhaṁ salilaṁ,
ja547:383.4	āpo tatthapi sandati.
ja547:384.1	Tassāvidūre pokkharaṇī,
ja547:384.2	bhūmibhāge manorame;
ja547:384.3	Padumuppalasañchannā,
ja547:384.4	devānamiva nandane.
ja547:385.1	Tīṇi uppalajātāni,
ja547:385.2	tasmiṁ sarasi brāhmaṇa;
ja547:385.3	Vicittaṁ nīlānekāni,
ja547:385.4	setā lohitakāni ca.
ja547:386.1	Khomāva tattha padumā,
ja547:386.2	setasogandhikehi ca;
ja547:386.3	Kalambakehi sañchanno,
ja547:386.4	mucalindo nāma so saro.
ja547:387.1	Athettha padumā phullā,
ja547:387.2	apariyantāva dissare;
ja547:387.3	Gimhā hemantikā phullā,
ja547:387.4	jaṇṇutagghā upattharā.
ja547:388.1	Surabhī sampavāyanti,
ja547:388.2	vicittapupphasanthatā;
ja547:388.3	Bhamarā pupphagandhena,
ja547:388.4	samantā mabhināditā.
ja547:389.1	Athettha udakantasmiṁ,
ja547:389.2	rukkhā tiṭṭhanti brāhmaṇa;
ja547:389.3	Kadambā pāṭalī phullā,
ja547:389.4	koviḷārā ca pupphitā.
ja547:390.1	Aṅkolā kacchikārā ca,
ja547:390.2	pārijaññā ca pupphitā;
ja547:390.3	Vāraṇā vayanā rukkhā,
ja547:390.4	mucalindamubhato saraṁ.
ja547:391.1	Sirīsā setapārisā,
ja547:391.2	sādhu vāyanti padmakā;
ja547:391.3	Nigguṇḍī sirīnigguṇḍī,
ja547:391.4	asanā cettha pupphitā.
ja547:392.1	Paṅgurā bahulā selā,
ja547:392.2	sobhañjanā ca pupphitā;
ja547:392.3	Ketakā kaṇikārā ca,
ja547:392.4	kanaverā ca pupphitā.
ja547:393.1	Ajjunā ajjukaṇṇā ca,
ja547:393.2	mahānāmā ca pupphitā;
ja547:393.3	Supupphitaggā tiṭṭhanti,
ja547:393.4	pajjalanteva kiṁsukā.
ja547:394.1	Setapaṇṇī sattapaṇṇā,
ja547:394.2	kadaliyo kusumbharā;
ja547:394.3	Dhanutakkārī pupphehi,
ja547:394.4	sīsapāvaraṇāni ca.
ja547:395.1	Acchivā sallavā rukkhā,
ja547:395.2	sallakiyo ca pupphitā;
ja547:395.3	Setageru ca tagarā,
ja547:395.4	maṁsikuṭṭhā kulāvarā.
ja547:396.1	Daharā rukkhā ca vuddhā ca,
ja547:396.2	akuṭilā cettha pupphitā;
ja547:396.3	Assamaṁ ubhato ṭhanti,
ja547:396.4	agyāgāraṁ samantato.
ja547:397.1	Athettha udakantasmiṁ,
ja547:397.2	bahujāto phaṇijjako;
ja547:397.3	Muggatiyo karatiyo,
ja547:397.4	sevālasīsakā bahū.
ja547:398.1	Uddāpavattaṁ ulluḷitaṁ,
ja547:398.2	makkhikā hiṅgujālikā;
ja547:398.3	Dāsimakañjako cettha,
ja547:398.4	bahū nīcekaḷambakā.
ja547:399.1	Elamphurakasañchannā,
ja547:399.2	rukkhā tiṭṭhanti brāhmaṇa;
ja547:399.3	Sattāhaṁ dhāriyamānānaṁ,
ja547:399.4	gandho tesaṁ na chijjati.
ja547:400.1	Ubhato saraṁ mucalindaṁ,
ja547:400.2	pupphā tiṭṭhanti sobhanā;
ja547:400.3	Indīvarehi sañchannaṁ,
ja547:400.4	vanaṁ taṁ upasobhati.
ja547:401.1	Aḍḍhamāsaṁ dhāriyamānānaṁ,
ja547:401.2	Gandho tesaṁ na chijjati;
ja547:401.3	Nīlapupphī setavārī,
ja547:401.4	Pupphitā girikaṇṇikā;
ja547:401.5	Kalerukkhehi sañchannaṁ,
ja547:401.6	Vanaṁ taṁ tulasīhi ca.
ja547:402.1	Sammaddateva gandhena,
ja547:402.2	pupphasākhāhi taṁ vanaṁ;
ja547:402.3	Bhamarā pupphagandhena,
ja547:402.4	samantā mabhināditā.
ja547:403.1	Tīṇi kakkārujātāni,
ja547:403.2	tasmiṁ sarasi brāhmaṇa;
ja547:403.3	Kumbhamattāni cekāni,
ja547:403.4	murajamattāni tā ubho.
ja547:404.1	Athettha sāsapo bahuko,
ja547:404.2	nādiyo haritāyuto;
ja547:404.3	Asī tālāva tiṭṭhanti,
ja547:404.4	chejjā indīvarā bahū.
ja547:405.1	Apphoṭā suriyavallī ca,
ja547:405.2	kāḷīyā madhugandhiyā;
ja547:405.3	Asokā mudayantī ca,
ja547:405.4	vallibho khuddapupphiyo.
ja547:406.1	Koraṇḍakā anojā ca,
ja547:406.2	pupphitā nāgamallikā;
ja547:406.3	Rukkhamāruyha tiṭṭhanti,
ja547:406.4	phullā kiṁsukavalliyo.
ja547:407.1	Kaṭeruhā ca vāsantī,
ja547:407.2	yūthikā madhugandhiyā;
ja547:407.3	Niliyā sumanā bhaṇḍī,
ja547:407.4	sobhati padumuttaro.
ja547:408.1	Pāṭalī samuddakappāsī,
ja547:408.2	kaṇikārā ca pupphitā;
ja547:408.3	Hemajālāva dissanti,
ja547:408.4	ruciraggi sikhūpamā.
ja547:409.1	Yāni tāni ca pupphāni,
ja547:409.2	thalajānudakāni ca;
ja547:409.3	Sabbāni tattha dissanti,
ja547:409.4	evaṁ rammo mahodadhi.
ja547:410.1	Athassā pokkharaṇiyā,
ja547:410.2	bahukā vārigocarā;
ja547:410.3	Rohitā naḷapī siṅgū,
ja547:410.4	kumbhilā makarā susū.
ja547:411.1	Madhu ca madhulaṭṭhi ca,
ja547:411.2	tālisā ca piyaṅgukā;
ja547:411.3	Kuṭandajā bhaddamuttā,
ja547:411.4	setapupphā ca lolupā.
ja547:412.1	Surabhī ca rukkhā tagarā,
ja547:412.2	bahukā tuṅgavaṇṭakā;
ja547:412.3	Padmakā naradā kuṭṭhā,
ja547:412.4	jhāmakā ca hareṇukā.
ja547:413.1	Haliddakā gandhasilā,
ja547:413.2	hiriverā ca guggulā;
ja547:413.3	Vibhedikā corakā kuṭṭhā,
ja547:413.4	kappūrā ca kaliṅgukā.
ja547:414.1	Athettha sīhabyagghā ca,
ja547:414.2	purisālū ca hatthiyo;
ja547:414.3	Eṇeyyā pasadā ceva,
ja547:414.4	rohiccā sarabhā migā.
ja547:415.1	Koṭṭhasuṇā suṇopi ca,
ja547:415.2	tuliyā naḷasannibhā;
ja547:415.3	Cāmarī calanī laṅghī,
ja547:415.4	jhāpitā makkaṭā picu.
ja547:416.1	Kakkaṭā kaṭamāyā ca,
ja547:416.2	ikkā goṇasirā bahū;
ja547:416.3	Khaggā varāhā nakulā,
ja547:416.4	kāḷakettha bahūtaso.
ja547:417.1	Mahiṁsā soṇasiṅgālā,
ja547:417.2	pampakā ca samantato;
ja547:417.3	Ākucchā pacalākā ca,
ja547:417.4	citrakā cāpi dīpiyo.
ja547:418.1	Pelakā ca vighāsādā,
ja547:418.2	sīhā gogaṇisādakā;
ja547:418.3	Aṭṭhapādā ca morā ca,
ja547:418.4	bhassarā ca kukutthakā.
ja547:419.1	Caṅkorā kukkuṭā nāgā,
ja547:419.2	aññamaññaṁ pakūjino;
ja547:419.3	Bakā balākā najjuhā,
ja547:419.4	dindibhā kuñjavājitā.
ja547:420.1	Byagghinasā lohapiṭṭhā,
ja547:420.2	pammakā jīvajīvakā;
ja547:420.3	Kapiñjarā tittirāyo,
ja547:420.4	kulā ca paṭikutthakā.
ja547:421.1	Mandālakā celakeṭu,
ja547:421.2	bhaṇḍutittiranāmakā;
ja547:421.3	Celāvakā piṅgalāyo,
ja547:421.4	goṭakā aṅgahetukā.
ja547:422.1	Karaviyā ca saggā ca,
ja547:422.2	uhuṅkārā ca kukkuhā;
ja547:422.3	Nānādijagaṇākiṇṇaṁ,
ja547:422.4	nānāsaranikūjitaṁ.
ja547:423.1	Athettha sakuṇā santi,
ja547:423.2	nīlakā mañjubhāṇakā;
ja547:423.3	Modanti saha bhariyāhi,
ja547:423.4	aññamaññaṁ pakūjino.
ja547:424.1	Athettha sakuṇā santi,
ja547:424.2	dijā mañjussarā sitā;
ja547:424.3	Setacchikūṭā bhadrakkhā,
ja547:424.4	aṇḍajā citrapekhuṇā.
ja547:425.1	Athettha sakuṇā santi,
ja547:425.2	dijā mañjussarā sitā;
ja547:425.3	Sikhaṇḍī nīlagīvāhi,
ja547:425.4	aññamaññaṁ pakūjino.
ja547:426.1	Kukutthakā kuḷīrakā,
ja547:426.2	koṭṭhā pokkharasātakā;
ja547:426.3	Kālāmeyyā baliyakkhā,
ja547:426.4	kadambā suvasāḷikā.
ja547:427.1	Haliddā lohitā setā,
ja547:427.2	athettha nalakā bahū;
ja547:427.3	Vāraṇā bhiṅgarājā ca,
ja547:427.4	kadambā suvakokilā.
ja547:428.1	Ukkusā kurarā haṁsā,
ja547:428.2	āṭā parivadentikā;
ja547:428.3	Pākahaṁsā atibalā,
ja547:428.4	najjuhā jīvajīvakā.
ja547:429.1	Pārevatā ravihaṁsā,
ja547:429.2	cakkavākā nadīcarā;
ja547:429.3	Vāraṇābhirudā rammā,
ja547:429.4	ubho kālūpakūjino.
ja547:430.1	Athettha sakuṇā santi,
ja547:430.2	nānāvaṇṇā bahū dijā;
ja547:430.3	Modanti saha bhariyāhi,
ja547:430.4	aññamaññaṁ pakūjino.
ja547:431.1	Athettha sakuṇā santi,
ja547:431.2	nānāvaṇṇā bahū dijā;
ja547:431.3	Sabbe mañjū nikūjanti,
ja547:431.4	mucalindamubhato saraṁ.
ja547:432.1	Athettha sakuṇā santi,
ja547:432.2	karaviyā nāma te dijā;
ja547:432.3	Modanti saha bhariyāhi,
ja547:432.4	aññamaññaṁ pakūjino.
ja547:433.1	Athettha sakuṇā santi,
ja547:433.2	karaviyā nāma te dijā;
ja547:433.3	Sabbe mañjū nikūjanti,
ja547:433.4	mucalindamubhato saraṁ.
ja547:434.1	Eṇeyyapasadākiṇṇaṁ,
ja547:434.2	nāgasaṁsevitaṁ vanaṁ;
ja547:434.3	Nānālatāhi sañchannaṁ,
ja547:434.4	kadalīmigasevitaṁ.
ja547:435.1	Athettha sāsapo bahuko,
ja547:435.2	nīvāro varako bahu;
ja547:435.3	Sāli akaṭṭhapāko ca,
ja547:435.4	ucchu tattha anappako.
ja547:436.1	Ayaṁ ekapadī eti,
ja547:436.2	ujuṁ gacchati assamaṁ;
ja547:436.3	Khudaṁ pipāsaṁ aratiṁ,
ja547:436.4	tattha patto na vindati;
ja547:436.5	Yattha vessantaro rājā,
ja547:436.6	saha puttehi sammati.
ja547:437.1	Dhārento brāhmaṇavaṇṇaṁ,
ja547:437.2	āsadañca masaṁ jaṭaṁ;
ja547:437.3	Cammavāsī chamā seti,
ja547:437.4	jātavedaṁ namassati”.
ja547:438.1	Idaṁ sutvā brahmabandhu,
ja547:438.2	isiṁ katvā padakkhiṇaṁ;
ja547:438.3	Udaggacitto pakkāmi,
ja547:438.4	yattha vessantaro ahu.
ja547:439.1	Mahāvanavaṇṇanā.
ja547:440.0	8. Dārakapabba
ja547:440.1	“Uṭṭhehi jāli patiṭṭha,
ja547:440.2	porāṇaṁ viya dissati;
ja547:440.3	Brāhmaṇaṁ viya passāmi,
ja547:440.4	nandiyo mābhikīrare”.
ja547:441.1	“Ahampi tāta passāmi,
ja547:441.2	yo so brahmāva dissati;
ja547:441.3	Addhiko viya āyāti,
ja547:441.4	atithī no bhavissati”.
ja547:442.1	“Kacci nu bhoto kusalaṁ,
ja547:442.2	kacci bhoto anāmayaṁ;
ja547:442.3	Kacci uñchena yāpetha,
ja547:442.4	kacci mūlaphalā bahū.
ja547:443.1	Kacci ḍaṁsā makasā ca,
ja547:443.2	appameva sarīsapā;
ja547:443.3	Vane vāḷamigākiṇṇe,
ja547:443.4	kacci hiṁsā na vijjati”.
ja547:444.1	“Kusalañceva no brahme,
ja547:444.2	atho brahme anāmayaṁ;
ja547:444.3	Atho uñchena yāpema,
ja547:444.4	atho mūlaphalā bahū.
ja547:445.1	Atho ḍaṁsā makasā ca,
ja547:445.2	appameva sarīsapā;
ja547:445.3	Vane vāḷamigākiṇṇe,
ja547:445.4	hiṁsā amhaṁ na vijjati”.
ja547:446.1	Satta no māse vasataṁ,
ja547:446.2	araññe jīvasokinaṁ;
ja547:446.3	Imampi paṭhamaṁ passāma,
ja547:446.4	brāhmaṇaṁ devavaṇṇinaṁ;
ja547:446.5	Ādāya veḷuvaṁ daṇḍaṁ,
ja547:446.6	aggihuttaṁ kamaṇḍaluṁ.
ja547:447.1	Svāgataṁ te mahābrahme,
ja547:447.2	atho te adurāgataṁ;
ja547:447.3	Anto pavisa bhaddante,
ja547:447.4	pāde pakkhālayassu te.
ja547:448.1	Tindukāni piyālāni,
ja547:448.2	madhuke kāsumāriyo;
ja547:448.3	Phalāni khuddakappāni,
ja547:448.4	bhuñja brahme varaṁ varaṁ.
ja547:449.1	Idampi pānīyaṁ sītaṁ,
ja547:449.2	ābhataṁ girigabbharā;
ja547:449.3	Tato piva mahābrahme,
ja547:449.4	sace tvaṁ abhikaṅkhasi.
ja547:450.1	Atha tvaṁ kena vaṇṇena,
ja547:450.2	kena vā pana hetunā;
ja547:450.3	Anuppatto brahāraññaṁ,
ja547:450.4	taṁ me akkhāhi pucchito.
ja547:451.1	“Yathā vārivaho pūro,
ja547:451.2	sabbakālaṁ na khīyati;
ja547:451.3	Evaṁ taṁ yācitāgacchiṁ,
ja547:451.4	putte me dehi yācito”.
ja547:452.1	“Dadāmi na vikampāmi,
ja547:452.2	issaro naya brāhmaṇa;
ja547:452.3	Pāto gatā rājaputtī,
ja547:452.4	sāyaṁ uñchāto ehiti.
ja547:453.1	Ekarattiṁ vasitvāna,
ja547:453.2	pāto gacchasi brāhmaṇa;
ja547:453.3	Tassā nhāte upaghāte,
ja547:453.4	atha ne māladhārine.
ja547:454.1	Ekarattiṁ vasitvāna,
ja547:454.2	pāto gacchasi brāhmaṇa;
ja547:454.3	Nānāpupphehi sañchanne,
ja547:454.4	nānāgandhehi bhūsite;
ja547:454.5	Nānāmūlaphalākiṇṇe,
ja547:454.6	gaccha svādāya brāhmaṇa”.
ja547:455.1	“Na vāsamabhirocāmi,
ja547:455.2	gamanaṁ mayha ruccati;
ja547:455.3	Antarāyopi me assa,
ja547:455.4	gacchaññeva rathesabha.
ja547:456.1	Na hetā yācayogī naṁ,
ja547:456.2	antarāyassa kāriyā;
ja547:456.3	Itthiyo mantaṁ jānanti,
ja547:456.4	sabbaṁ gaṇhanti vāmato.
ja547:457.1	Saddhāya dānaṁ dadato,
ja547:457.2	māsaṁ adakkhi mātaraṁ;
ja547:457.3	Antarāyampi sā kayirā,
ja547:457.4	gacchaññeva rathesabha.
ja547:458.1	Āmantayassu te putte,
ja547:458.2	mā te mātaramaddasuṁ;
ja547:458.3	Saddhāya dānaṁ dadato,
ja547:458.4	evaṁ puññaṁ pavaḍḍhati.
ja547:459.1	Āmantayassu te putte,
ja547:459.2	mā te mātaramaddasuṁ;
ja547:459.3	Mādisassa dhanaṁ datvā,
ja547:459.4	rāja saggaṁ gamissasi”.
ja547:460.1	“Sace tvaṁ nicchase daṭṭhuṁ,
ja547:460.2	mama bhariyaṁ patibbataṁ;
ja547:460.3	Ayyakassapi dassehi,
ja547:460.4	jāliṁ kaṇhājinaṁ cubho.
ja547:461.1	Ime kumāre disvāna,
ja547:461.2	mañjuke piyabhāṇine;
ja547:461.3	Patīto sumano vitto,
ja547:461.4	bahuṁ dassati te dhanaṁ”.
ja547:462.1	“Acchedanassa bhāyāmi,
ja547:462.2	rājaputta suṇohi me;
ja547:462.3	Rājadaṇḍāya maṁ dajjā,
ja547:462.4	vikkiṇeyya haneyya vā;
ja547:462.5	Jino dhanañca dāse ca,
ja547:462.6	gārayhassa brahmabandhuyā”.
ja547:463.1	“Ime kumāre disvāna,
ja547:463.2	mañjuke piyabhāṇine;
ja547:463.3	Dhamme ṭhito mahārājā,
ja547:463.4	sivīnaṁ raṭṭhavaḍḍhano;
ja547:463.5	Laddhā pītisomanassaṁ,
ja547:463.6	bahuṁ dassati te dhanaṁ”.
ja547:464.1	“Nāhaṁ tampi karissāmi,
ja547:464.2	yaṁ maṁ tvaṁ anusāsasi;
ja547:464.3	Dārakeva ahaṁ nessaṁ,
ja547:464.4	brāhmaṇyā paricārake”.
ja547:465.1	Tato kumārā byathitā,
ja547:465.2	sutvā luddassa bhāsitaṁ;
ja547:465.3	Tena tena padhāviṁsu,
ja547:465.4	jālī kaṇhājinā cubho.
ja547:466.1	“Ehi tāta piyaputta,
ja547:466.2	pūretha mama pāramiṁ;
ja547:466.3	Hadayaṁ mebhisiñcetha,
ja547:466.4	karotha vacanaṁ mama.
ja547:467.1	Yānā nāvā ca me hotha,
ja547:467.2	acalā bhavasāgare;
ja547:467.3	Jātipāraṁ tarissāmi,
ja547:467.4	santāressaṁ sadevakaṁ.
ja547:468.1	Ehi amma piyadhīti,
ja547:468.2	pūretha mama pāramiṁ;
ja547:468.3	Hadayaṁ mebhisiñcetha,
ja547:468.4	karotha vacanaṁ mama.
ja547:469.1	Yānā nāvā ca me hotha,
ja547:469.2	acalā bhavasāgare;
ja547:469.3	Jātipāraṁ tarissāmi,
ja547:469.4	uddharissaṁ sadevakaṁ”.
ja547:470.1	Tato kumāre ādāya,
ja547:470.2	jāliṁ kaṇhājinaṁ cubho;
ja547:470.3	Brāhmaṇassa adā dānaṁ,
ja547:470.4	sivīnaṁ raṭṭhavaḍḍhano.
ja547:471.1	Tato kumāre ādāya,
ja547:471.2	jāliṁ kaṇhājinaṁ cubho;
ja547:471.3	Brāhmaṇassa adā vitto,
ja547:471.4	puttake dānamuttamaṁ.
ja547:472.1	Tadāsi yaṁ bhiṁsanakaṁ,
ja547:472.2	tadāsi lomahaṁsanaṁ;
ja547:472.3	Yaṁ kumāre padinnamhi,
ja547:472.4	medanī sampakampatha.
ja547:473.1	Tadāsi yaṁ bhiṁsanakaṁ,
ja547:473.2	tadāsi lomahaṁsanaṁ;
ja547:473.3	Yaṁ pañjalikato rājā,
ja547:473.4	kumāre sukhavacchite;
ja547:473.5	Brāhmaṇassa adā dānaṁ,
ja547:473.6	sivīnaṁ raṭṭhavaḍḍhano.
ja547:474.1	Tato so brāhmaṇo luddo,
ja547:474.2	lataṁ dantehi chindiya;
ja547:474.3	Latāya hatthe bandhitvā,
ja547:474.4	latāya anumajjatha.
ja547:475.1	Tato so rajjumādāya,
ja547:475.2	daṇḍañcādāya brāhmaṇo;
ja547:475.3	Ākoṭayanto te neti,
ja547:475.4	sivirājassa pekkhato.
ja547:476.1	Tato kumārā pakkāmuṁ,
ja547:476.2	brāhmaṇassa pamuñciya;
ja547:476.3	Assupuṇṇehi nettehi,
ja547:476.4	pitaraṁ so udikkhati.
ja547:477.1	Vedhamassatthapattaṁva,
ja547:477.2	pitu pādāni vandati;
ja547:477.3	Pitu pādāni vanditvā,
ja547:477.4	idaṁ vacanamabravi.
ja547:478.1	“Ammā ca tāta nikkhantā,
ja547:478.2	tvañca no tāta dassasi;
ja547:478.3	Yāva ammampi passemu,
ja547:478.4	atha no tāta dassasi.
ja547:479.1	Ammā ca tāta nikkhantā,
ja547:479.2	tvañca no tāta dassasi;
ja547:479.3	Mā no tvaṁ tāta adadā,
ja547:479.4	yāva ammāpi etu no;
ja547:479.5	Tadāyaṁ brāhmaṇo kāmaṁ,
ja547:479.6	vikkiṇātu hanātu vā.
ja547:480.1	Balaṅkapādo andhanakho,
ja547:480.2	atho ovaddhapiṇḍiko;
ja547:480.3	Dīghuttaroṭṭho capalo,
ja547:480.4	kaḷāro bhagganāsako.
ja547:481.1	Kumbhodaro bhaggapiṭṭhi,
ja547:481.2	atho visamacakkhuko;
ja547:481.3	Lohamassu haritakeso,
ja547:481.4	valīnaṁ tilakāhato.
ja547:482.1	Piṅgalo ca vinato ca,
ja547:482.2	vikaṭo ca brahā kharo;
ja547:482.3	Ajināni ca sannaddho,
ja547:482.4	amanusso bhayānako.
ja547:483.1	Manusso udāhu yakkho,
ja547:483.2	maṁsalohitabhojano;
ja547:483.3	Gāmā araññamāgamma,
ja547:483.4	dhanaṁ taṁ tāta yācati.
ja547:484.1	Nīyamāne pisācena,
ja547:484.2	kiṁ nu tāta udikkhasi;
ja547:484.3	Asmā nūna te hadayaṁ,
ja547:484.4	āyasaṁ daḷhabandhanaṁ.
ja547:485.1	Yo no baddhe na jānāsi,
ja547:485.2	brāhmaṇena dhanesinā;
ja547:485.3	Accāyikena luddena,
ja547:485.4	yo no gāvova sumbhati.
ja547:486.1	Idheva acchataṁ kaṇhā,
ja547:486.2	na sā jānāti kismiñci;
ja547:486.3	Migīva khīrasammattā,
ja547:486.4	yūthā hīnā pakandati.
ja547:487.1	Na me idaṁ tathā dukkhaṁ,
ja547:487.2	labbhā hi pumunā idaṁ;
ja547:487.3	Yañca ammaṁ na passāmi,
ja547:487.4	taṁ me dukkhataraṁ ito.
ja547:488.1	Na me idaṁ tathā dukkhaṁ,
ja547:488.2	labbhā hi pumunā idaṁ;
ja547:488.3	Yañca tātaṁ na passāmi,
ja547:488.4	taṁ me dukkhataraṁ ito.
ja547:489.1	Sā nūna kapaṇā ammā,
ja547:489.2	cirarattāya rucchati;
ja547:489.3	Kaṇhājinaṁ apassantī,
ja547:489.4	kumāriṁ cārudassaniṁ.
ja547:490.1	So nūna kapaṇo tāto,
ja547:490.2	cirarattāya rucchati;
ja547:490.3	Kaṇhājinaṁ apassanto,
ja547:490.4	kumāriṁ cārudassaniṁ.
ja547:491.1	Sā nūna kapaṇā ammā,
ja547:491.2	ciraṁ rucchati assame;
ja547:491.3	Kaṇhājinaṁ apassantī,
ja547:491.4	kumāriṁ cārudassaniṁ.
ja547:492.1	So nūna kapaṇo tāto,
ja547:492.2	ciraṁ rucchati assame;
ja547:492.3	Kaṇhājinaṁ apassanto,
ja547:492.4	kumāriṁ cārudassaniṁ.
ja547:493.1	Sā nūna kapaṇā ammā,
ja547:493.2	cirarattāya rucchati;
ja547:493.3	Aḍḍharatte va ratte vā,
ja547:493.4	nadīva avasucchati.
ja547:494.1	So nūna kapaṇo tāto,
ja547:494.2	cirarattāya rucchati;
ja547:494.3	Aḍḍharatte va ratte vā,
ja547:494.4	nadīva avasucchati.
ja547:495.1	Ime te jambukā rukkhā,
ja547:495.2	vedisā sinduvārakā;
ja547:495.3	Vividhāni rukkhajātāni,
ja547:495.4	tāni ajja jahāmase.
ja547:496.1	Assatthā panasā ceme,
ja547:496.2	nigrodhā ca kapitthanā;
ja547:496.3	Vividhāni phalajātāni,
ja547:496.4	tāni ajja jahāmase.
ja547:497.1	Ime tiṭṭhanti ārāmā,
ja547:497.2	ayaṁ sītūdakā nadī;
ja547:497.3	Yatthassu pubbe kīḷāma,
ja547:497.4	tāni ajja jahāmase.
ja547:498.1	Vividhāni pupphajātāni,
ja547:498.2	asmiṁ uparipabbate;
ja547:498.3	Yānassu pubbe dhārema,
ja547:498.4	tāni ajja jahāmase.
ja547:499.1	Vividhāni phalajātāni,
ja547:499.2	asmiṁ uparipabbate;
ja547:499.3	Yānassu pubbe bhuñjāma,
ja547:499.4	tāni ajja jahāmase.
ja547:500.1	Ime no hatthikā assā,
ja547:500.2	balībaddā ca no ime;
ja547:500.3	Yehissu pubbe kīḷāma,
ja547:500.4	tāni ajja jahāmase”.
ja547:501.1	Nīyamānā kumārā te,
ja547:501.2	pitaraṁ etadabravuṁ;
ja547:501.3	“Ammaṁ ārogyaṁ vajjāsi,
ja547:501.4	tvañca tāta sukhī bhava.
ja547:502.1	Ime no hatthikā assā,
ja547:502.2	balībaddā ca no ime;
ja547:502.3	Tāni ammāya dajjesi,
ja547:502.4	sokaṁ tehi vinessati.
ja547:503.1	Ime no hatthikā assā,
ja547:503.2	balībaddā ca no ime;
ja547:503.3	Tāni ammā udikkhantī,
ja547:503.4	sokaṁ paṭivinessati”.
ja547:504.1	Tato vessantaro rājā,
ja547:504.2	dānaṁ datvāna khattiyo;
ja547:504.3	Paṇṇasālaṁ pavisitvā,
ja547:504.4	kalunaṁ paridevayi.
ja547:505.1	“Kaṁ nvajja chātā tasitā,
ja547:505.2	uparucchanti dārakā;
ja547:505.3	Sāyaṁ saṁvesanākāle,
ja547:505.4	ko ne dassati bhojanaṁ.
ja547:506.1	Kaṁ nvajja chātā tasitā,
ja547:506.2	uparucchanti dārakā;
ja547:506.3	Sāyaṁ saṁvesanākāle,
ja547:506.4	ammā chātamha detha no.
ja547:507.1	Kathaṁ nu pathaṁ gacchanti,
ja547:507.2	pattikā anupāhanā;
ja547:507.3	Santā sūnehi pādehi,
ja547:507.4	ko ne hatthe gahessati.
ja547:508.1	Kathaṁ nu so na lajjeyya,
ja547:508.2	sammukhā paharaṁ mama;
ja547:508.3	Adūsakānaṁ puttānaṁ,
ja547:508.4	alajjī vata brāhmaṇo.
ja547:509.1	Yopi me dāsidāsassa,
ja547:509.2	añño vā pana pesiyo;
ja547:509.3	Tassāpi suvihīnassa,
ja547:509.4	ko lajjī paharissati.
ja547:510.1	Vārijasseva me sato,
ja547:510.2	baddhassa kumināmukhe;
ja547:510.3	Akkosati paharati,
ja547:510.4	piye putte apassato.
ja547:511.1	Adu cāpaṁ gahetvāna,
ja547:511.2	khaggaṁ bandhiya vāmato;
ja547:511.3	Ānessāmi sake putte,
ja547:511.4	puttānañhi vadho dukho.
ja547:512.1	Aṭṭhānametaṁ dukkharūpaṁ,
ja547:512.2	Yaṁ kumārā vihaññare;
ja547:512.3	Satañca dhammamaññāya,
ja547:512.4	Ko datvā anutappati”.
ja547:513.1	“Saccaṁ kirevamāhaṁsu,
ja547:513.2	narā ekacciyā idha;
ja547:513.3	Yassa natthi sakā mātā,
ja547:513.4	yathā natthi tatheva so.
ja547:514.1	Ehi kaṇhe marissāma,
ja547:514.2	natthattho jīvitena no;
ja547:514.3	Dinnamhāti janindena,
ja547:514.4	brāhmaṇassa dhanesino;
ja547:514.5	Accāyikassa luddassa,
ja547:514.6	yo no gāvova sumbhati.
ja547:515.1	Ime te jambukā rukkhā,
ja547:515.2	vedisā sinduvārakā;
ja547:515.3	Vividhāni rukkhajātāni,
ja547:515.4	tāni kaṇhe jahāmase.
ja547:516.1	Assatthā panasā ceme,
ja547:516.2	nigrodhā ca kapitthanā;
ja547:516.3	Vividhāni phalajātāni,
ja547:516.4	tāni kaṇhe jahāmase.
ja547:517.1	Ime tiṭṭhanti ārāmā,
ja547:517.2	ayaṁ sītūdakā nadī;
ja547:517.3	Yatthassu pubbe kīḷāma,
ja547:517.4	tāni kaṇhe jahāmase.
ja547:518.1	Vividhāni pupphajātāni,
ja547:518.2	asmiṁ uparipabbate;
ja547:518.3	Yānassu pubbe dhārema,
ja547:518.4	tāni kaṇhe jahāmase.
ja547:519.1	Vividhāni phalajātāni,
ja547:519.2	asmiṁ uparipabbate;
ja547:519.3	Yānassu pubbe bhuñjāma,
ja547:519.4	tāni kaṇhe jahāmase.
ja547:520.1	Ime no hatthikā assā,
ja547:520.2	balībaddā ca no ime;
ja547:520.3	Yehissu pubbe kīḷāma,
ja547:520.4	tāni kaṇhe jahāmase”.
ja547:521.1	Nīyamānā kumārā te,
ja547:521.2	brāhmaṇassa pamuñciya;
ja547:521.3	Tena tena padhāviṁsu,
ja547:521.4	jālī kaṇhājinā cubho.
ja547:522.1	Tato so rajjumādāya,
ja547:522.2	daṇḍañcādāya brāhmaṇo;
ja547:522.3	Ākoṭayanto te neti,
ja547:522.4	sivirājassa pekkhato.
ja547:523.1	Taṁ taṁ kaṇhājināvoca,
ja547:523.2	“ayaṁ maṁ tāta brāhmaṇo;
ja547:523.3	Laṭṭhiyā paṭikoṭeti,
ja547:523.4	ghare jātaṁva dāsiyaṁ.
ja547:524.1	Na cāyaṁ brāhmaṇo tāta,
ja547:524.2	dhammikā honti brāhmaṇā;
ja547:524.3	Yakkho brāhmaṇavaṇṇena,
ja547:524.4	khādituṁ tāta neti no;
ja547:524.5	Nīyamāne pisācena,
ja547:524.6	kiṁ nu tāta udikkhasi”.
ja547:525.1	“Ime no pādakā dukkhā,
ja547:525.2	dīgho caddhā suduggamo;
ja547:525.3	Nīce colambate sūriyo,
ja547:525.4	brāhmaṇo ca dhāreti no.
ja547:526.1	Okandāmase bhūtāni,
ja547:526.2	pabbatāni vanāni ca;
ja547:526.3	Sarassa sirasā vandāma,
ja547:526.4	supatitthe ca āpake.
ja547:527.1	Tiṇalatāni osadhyo,
ja547:527.2	pabbatāni vanāni ca;
ja547:527.3	Ammaṁ ārogyaṁ vajjātha,
ja547:527.4	ayaṁ no neti brāhmaṇo.
ja547:528.1	Vajjantu bhonto ammañca,
ja547:528.2	Maddiṁ asmāka mātaraṁ;
ja547:528.3	Sace anupatitukāmāsi,
ja547:528.4	Khippaṁ anupatiyāsi no.
ja547:529.1	Ayaṁ ekapadī eti,
ja547:529.2	ujuṁ gacchati assamaṁ;
ja547:529.3	Tamevānupateyyāsi,
ja547:529.4	api passesi ne lahuṁ.
ja547:530.1	Aho vata re jaṭinī,
ja547:530.2	vanamūlaphalahārike;
ja547:530.3	Suññaṁ disvāna assamaṁ,
ja547:530.4	taṁ te dukkhaṁ bhavissati.
ja547:531.1	Ativelaṁ nu ammāya,
ja547:531.2	uñchā laddho anappako;
ja547:531.3	Yā no baddhe na jānāsi,
ja547:531.4	brāhmaṇena dhanesinā.
ja547:532.1	Accāyikena luddena,
ja547:532.2	yo no gāvova sumbhati;
ja547:532.3	Apajja ammaṁ passemu,
ja547:532.4	sāyaṁ uñchāto āgataṁ.
ja547:533.1	Dajjā ammā brāhmaṇassa,
ja547:533.2	phalaṁ khuddena missitaṁ;
ja547:533.3	Tadāyaṁ asito dhāto,
ja547:533.4	na bāḷhaṁ dhārayeyya no.
ja547:534.1	Sūnā ca vata no pādā,
ja547:534.2	bāḷhaṁ dhāreti brāhmaṇo;
ja547:534.3	Iti tattha vilapiṁsu,
ja547:534.4	kumārā mātugiddhino”.
ja547:535.1	Dārakapabbaṁ nāma.
ja547:536.0	9. Maddīpabba
ja547:536.1	Tesaṁ lālappitaṁ sutvā,
ja547:536.2	tayo vāḷā vane migā;
ja547:536.3	Sīho byaggho ca dīpi ca,
ja547:536.4	idaṁ vacanamabravuṁ.
ja547:537.1	“Mā heva no rājaputtī,
ja547:537.2	sāyaṁ uñchāto āgamā;
ja547:537.3	Mā hevamhāka nibbhoge,
ja547:537.4	heṭhayittha vane migā.
ja547:538.1	Sīho ce naṁ viheṭheyya,
ja547:538.2	byaggho dīpi ca lakkhaṇaṁ;
ja547:538.3	Neva jālīkumārassa,
ja547:538.4	kuto kaṇhājinā siyā;
ja547:538.5	Ubhayeneva jīyetha,
ja547:538.6	patiṁ putte ca lakkhaṇā”.
ja547:539.1	“Khaṇittikaṁ me patitaṁ,
ja547:539.2	dakkhiṇakkhi ca phandati;
ja547:539.3	Aphalā phalino rukkhā,
ja547:539.4	sabbā muyhanti me disā”.
ja547:540.1	Tassā sāyanhakālasmiṁ,
ja547:540.2	assamāgamanaṁ pati;
ja547:540.3	Atthaṅgatamhi sūriye,
ja547:540.4	vāḷā panthe upaṭṭhahuṁ.
ja547:541.1	“Nīce colambate sūriyo,
ja547:541.2	dūre ca vata assamo;
ja547:541.3	Yañca nesaṁ ito hassaṁ,
ja547:541.4	taṁ te bhuñjeyyu bhojanaṁ.
ja547:542.1	So nūna khattiyo eko,
ja547:542.2	paṇṇasālāya acchati;
ja547:542.3	Tosento dārake chāte,
ja547:542.4	mamaṁ disvā anāyatiṁ.
ja547:543.1	Te nūna puttakā mayhaṁ,
ja547:543.2	kapaṇāya varākiyā;
ja547:543.3	Sāyaṁ saṁvesanākāle,
ja547:543.4	khīrapītāva acchare.
ja547:544.1	Te nūna puttakā mayhaṁ,
ja547:544.2	kapaṇāya varākiyā;
ja547:544.3	Sāyaṁ saṁvesanākāle,
ja547:544.4	vāripītāva acchare.
ja547:545.1	Te nūna puttakā mayhaṁ,
ja547:545.2	kapaṇāya varākiyā;
ja547:545.3	Paccuggatā maṁ tiṭṭhanti,
ja547:545.4	vacchā bālāva mātaraṁ.
ja547:546.1	Te nūna puttakā mayhaṁ,
ja547:546.2	kapaṇāya varākiyā;
ja547:546.3	Paccuggatā maṁ tiṭṭhanti,
ja547:546.4	haṁsāvuparipallale.
ja547:547.1	Te nūna puttakā mayhaṁ,
ja547:547.2	kapaṇāya varākiyā;
ja547:547.3	Paccuggatā maṁ tiṭṭhanti,
ja547:547.4	assamassāvidūrato.
ja547:548.1	Ekāyano ekapatho,
ja547:548.2	sarā sobbhā ca passato;
ja547:548.3	Aññaṁ maggaṁ na passāmi,
ja547:548.4	yena gaccheyya assamaṁ.
ja547:549.1	Migā namatthu rājāno,
ja547:549.2	kānanasmiṁ mahabbalā;
ja547:549.3	Dhammena bhātaro hotha,
ja547:549.4	maggaṁ me detha yācitā.
ja547:550.1	Avaruddhassāhaṁ bhariyā,
ja547:550.2	rājaputtassa sirīmato;
ja547:550.3	Tañcāhaṁ nātimaññāmi,
ja547:550.4	rāmaṁ sītāvanubbatā.
ja547:551.1	Tumhe ca putte passatha,
ja547:551.2	sāyaṁ saṁvesanaṁ pati;
ja547:551.3	Ahañca putte passeyyaṁ,
ja547:551.4	jāliṁ kaṇhājinaṁ cubho.
ja547:552.1	Bahuñcidaṁ mūlaphalaṁ,
ja547:552.2	bhakkho cāyaṁ anappako;
ja547:552.3	Tato upaḍḍhaṁ dassāmi,
ja547:552.4	maggaṁ me detha yācitā.
ja547:553.1	Rājaputtī ca no mātā,
ja547:553.2	rājaputto ca no pitā;
ja547:553.3	Dhammena bhātaro hotha,
ja547:553.4	maggaṁ me detha yācitā”.
ja547:554.1	Tassā lālappamānāya,
ja547:554.2	bahuṁ kāruññasañhitaṁ;
ja547:554.3	Sutvā nelapatiṁ vācaṁ,
ja547:554.4	vāḷā panthā apakkamuṁ.
ja547:555.1	“Imamhi naṁ padesamhi,
ja547:555.2	puttakā paṁsukuṇṭhitā;
ja547:555.3	Paccuggatā maṁ tiṭṭhanti,
ja547:555.4	vacchā bālāva mātaraṁ.
ja547:556.1	Imamhi naṁ padesamhi,
ja547:556.2	puttakā paṁsukuṇṭhitā;
ja547:556.3	Paccuggatā maṁ tiṭṭhanti,
ja547:556.4	haṁsāvuparipallale.
ja547:557.1	Imamhi naṁ padesamhi,
ja547:557.2	puttakā paṁsukuṇṭhitā;
ja547:557.3	Paccuggatā maṁ tiṭṭhanti,
ja547:557.4	assamassāvidūrato.
ja547:558.1	Dve migā viya ukkaṇṇā,
ja547:558.2	samantā mabhidhāvino;
ja547:558.3	Ānandino pamuditā,
ja547:558.4	vaggamānāva kampare;
ja547:558.5	Tyajja putte na passāmi,
ja547:558.6	jāliṁ kaṇhājinaṁ cubho.
ja547:559.1	Chakalīva migī chāpaṁ,
ja547:559.2	pakkhī muttāva pañjarā;
ja547:559.3	Ohāya putte nikkhamiṁ,
ja547:559.4	sīhīvāmisagiddhinī;
ja547:559.5	Tyajja putte na passāmi,
ja547:559.6	jāliṁ kaṇhājinaṁ cubho.
ja547:560.1	Idaṁ nesaṁ padakkantaṁ,
ja547:560.2	nāgānamiva pabbate;
ja547:560.3	Citakā parikiṇṇāyo,
ja547:560.4	assamassāvidūrato;
ja547:560.5	Tyajja putte na passāmi,
ja547:560.6	jāliṁ kaṇhājinaṁ cubho.
ja547:561.1	Vālikāyapi okiṇṇā,
ja547:561.2	puttakā paṁsukuṇṭhitā;
ja547:561.3	Samantā mabhidhāvanti,
ja547:561.4	te na passāmi dārake.
ja547:562.1	Ye maṁ pure paccuṭṭhenti,
ja547:562.2	araññā dūramāyatiṁ;
ja547:562.3	Tyajja putte na passāmi,
ja547:562.4	jāliṁ kaṇhājinaṁ cubho.
ja547:563.1	Chakaliṁva migiṁ chāpā,
ja547:563.2	paccuggantuna mātaraṁ;
ja547:563.3	Dūre maṁ pavilokenti,
ja547:563.4	te na passāmi dārake.
ja547:564.1	Idaṁ nesaṁ kīḷanakaṁ,
ja547:564.2	patitaṁ paṇḍubeḷuvaṁ;
ja547:564.3	Tyajja putte na passāmi,
ja547:564.4	jāliṁ kaṇhājinaṁ cubho.
ja547:565.1	Thanā ca mayhime pūrā,
ja547:565.2	uro ca sampadālati;
ja547:565.3	Tyajja putte na passāmi,
ja547:565.4	jāliṁ kaṇhājinaṁ cubho.
ja547:566.1	Ucchaṅgeko vicināti,
ja547:566.2	thanamekāvalambati;
ja547:566.3	Tyajja putte na passāmi,
ja547:566.4	jāliṁ kaṇhājinaṁ cubho.
ja547:567.1	Yassu sāyanhasamayaṁ,
ja547:567.2	puttakā paṁsukuṇṭhitā;
ja547:567.3	Ucchaṅge me vivattanti,
ja547:567.4	te na passāmi dārake.
ja547:568.1	Ayaṁ so assamo pubbe,
ja547:568.2	samajjo paṭibhāti maṁ;
ja547:568.3	Tyajja putte apassantyā,
ja547:568.4	bhamate viya assamo.
ja547:569.1	Kimidaṁ appasaddova,
ja547:569.2	assamo paṭibhāti maṁ;
ja547:569.3	Kākolāpi na vassanti,
ja547:569.4	matā me nūna dārakā.
ja547:570.1	Kimidaṁ appasaddova,
ja547:570.2	assamo paṭibhāti maṁ;
ja547:570.3	Sakuṇāpi na vassanti,
ja547:570.4	matā me nūna dārakā.
ja547:571.1	Kimidaṁ tuṇhibhūtosi,
ja547:571.2	api ratteva me mano;
ja547:571.3	Kākolāpi na vassanti,
ja547:571.4	matā me nūna dārakā.
ja547:572.1	Kimidaṁ tuṇhibhūtosi,
ja547:572.2	api ratteva me mano;
ja547:572.3	Sakuṇāpi na vassanti,
ja547:572.4	matā me nūna dārakā.
ja547:573.1	Kacci nu me ayyaputta,
ja547:573.2	migā khādiṁsu dārake;
ja547:573.3	Araññe iriṇe vivane,
ja547:573.4	kena nītā me dārakā.
ja547:574.1	Adu te pahitā dūtā,
ja547:574.2	adu suttā piyaṁvadā;
ja547:574.3	Adu bahi no nikkhantā,
ja547:574.4	khiḍḍāsu pasutā nu te.
ja547:575.1	Nevāsaṁ kesā dissanti,
ja547:575.2	hatthapādā ca jālino;
ja547:575.3	Sakuṇānañca opāto,
ja547:575.4	kena nītā me dārakā.
ja547:576.1	Idaṁ tato dukkhataraṁ,
ja547:576.2	sallaviddho yathā vaṇo;
ja547:576.3	Tyajja putte na passāmi,
ja547:576.4	jāliṁ kaṇhājinaṁ cubho.
ja547:577.1	Idampi dutiyaṁ sallaṁ,
ja547:577.2	kampeti hadayaṁ mama;
ja547:577.3	Yañca putte na passāmi,
ja547:577.4	tvañca maṁ nābhibhāsasi.
ja547:578.1	Ajjeva me imaṁ rattiṁ,
ja547:578.2	rājaputta na saṁsasi;
ja547:578.3	Maññe okkantasantaṁ maṁ,
ja547:578.4	pāto dakkhisi no mataṁ”.
ja547:579.1	“Nūna maddī varārohā,
ja547:579.2	rājaputtī yasassinī;
ja547:579.3	Pāto gatāsi uñchāya,
ja547:579.4	kimidaṁ sāyamāgatā”.
ja547:580.1	“Nanu tvaṁ saddamassosi,
ja547:580.2	ye saraṁ pātumāgatā;
ja547:580.3	Sīhassapi nadantassa,
ja547:580.4	byagghassa ca nikujjitaṁ.
ja547:581.1	Ahu pubbanimittaṁ me,
ja547:581.2	vicarantyā brahāvane;
ja547:581.3	Khaṇitto me hatthā patito,
ja547:581.4	uggīvañcāpi aṁsato.
ja547:582.1	Tadāhaṁ byathitā bhītā,
ja547:582.2	puthu katvāna pañjaliṁ;
ja547:582.3	Sabbadisā namassissaṁ,
ja547:582.4	api sotthi ito siyā.
ja547:583.1	Mā heva no rājaputto,
ja547:583.2	hato sīhena dīpinā;
ja547:583.3	Dārakā vā parāmaṭṭhā,
ja547:583.4	acchakokataracchihi.
ja547:584.1	Sīho byaggho ca dīpi ca,
ja547:584.2	tayo vāḷā vane migā;
ja547:584.3	Te maṁ pariyāvaruṁ maggaṁ,
ja547:584.4	tena sāyamhi āgatā.
ja547:585.1	Ahaṁ patiñca putte ca,
ja547:585.2	āceramiva māṇavo;
ja547:585.3	Anuṭṭhitā divārattiṁ,
ja547:585.4	jaṭinī brahmacārinī.
ja547:586.1	Ajināni paridahitvā,
ja547:586.2	vanamūlaphalahāriyā;
ja547:586.3	Vicarāmi divārattiṁ,
ja547:586.4	tumhaṁ kāmā hi puttakā.
ja547:587.1	Ahaṁ suvaṇṇahaliddiṁ,
ja547:587.2	ābhataṁ paṇḍubeḷuvaṁ;
ja547:587.3	Rukkhapakkāni cāhāsiṁ,
ja547:587.4	ime vo putta kīḷanā.
ja547:588.1	Imaṁ mūlāḷivattakaṁ,
ja547:588.2	sālukaṁ ciñcabhedakaṁ;
ja547:588.3	Bhuñja khuddehi saṁyuttaṁ,
ja547:588.4	saha puttehi khattiya.
ja547:589.1	Padumaṁ jālino dehi,
ja547:589.2	kumudañca kumāriyā;
ja547:589.3	Māline passa naccante,
ja547:589.4	sivi puttāni avhaya.
ja547:590.1	Tato kaṇhājināyapi,
ja547:590.2	nisāmehi rathesabha;
ja547:590.3	Mañjussarāya vagguyā,
ja547:590.4	assamaṁ upayantiyā.
ja547:591.1	Samānasukhadukkhamhā,
ja547:591.2	raṭṭhā pabbājitā ubho;
ja547:591.3	Api sivi putte passesi,
ja547:591.4	jāliṁ kaṇhājinaṁ cubho.
ja547:592.1	Samaṇe brāhmaṇe nūna,
ja547:592.2	brahmacariyaparāyaṇe;
ja547:592.3	Ahaṁ loke abhissapiṁ,
ja547:592.4	sīlavante bahussute;
ja547:592.5	Tyajja putte na passāmi,
ja547:592.6	jāliṁ kaṇhājinaṁ cubho.
ja547:593.1	Ime te jambukā rukkhā,
ja547:593.2	vedisā sinduvārakā;
ja547:593.3	Vividhāni rukkhajātāni,
ja547:593.4	te kumārā na dissare.
ja547:594.1	Assatthā panasā ceme,
ja547:594.2	nigrodhā ca kapitthanā;
ja547:594.3	Vividhāni phalajātāni,
ja547:594.4	te kumārā na dissare.
ja547:595.1	Ime tiṭṭhanti ārāmā,
ja547:595.2	ayaṁ sītūdakā nadī;
ja547:595.3	Yatthassu pubbe kīḷiṁsu,
ja547:595.4	te kumārā na dissare.
ja547:596.1	Vividhāni pupphajātāni,
ja547:596.2	asmiṁ uparipabbate;
ja547:596.3	Yānassu pubbe dhāriṁsu,
ja547:596.4	te kumārā na dissare.
ja547:597.1	Vividhāni phalajātāni,
ja547:597.2	asmiṁ uparipabbate;
ja547:597.3	Yānassu pubbe bhuñjiṁsu,
ja547:597.4	te kumārā na dissare.
ja547:598.1	Ime te hatthikā assā,
ja547:598.2	balībaddā ca te ime;
ja547:598.3	Yehissu pubbe kīḷiṁsu,
ja547:598.4	te kumārā na dissare.
ja547:599.1	Ime sāmā sasolūkā,
ja547:599.2	bahukā kadalīmigā;
ja547:599.3	Yehissu pubbe kīḷiṁsu,
ja547:599.4	te kumārā na dissare.
ja547:600.1	Ime haṁsā ca koñcā ca,
ja547:600.2	mayūrā citrapekhuṇā;
ja547:600.3	Yehissu pubbe kīḷiṁsu,
ja547:600.4	te kumārā na dissare.
ja547:601.1	Imā tā vanagumbāyo,
ja547:601.2	pupphitā sabbakālikā;
ja547:601.3	Yatthassu pubbe kīḷiṁsu,
ja547:601.4	te kumārā na dissare.
ja547:602.1	Imā tā pokkharaṇī rammā,
ja547:602.2	cakkavākūpakūjitā;
ja547:602.3	Mandālakehi sañchannā,
ja547:602.4	padumuppalakehi ca;
ja547:602.5	Yatthassu pubbe kīḷiṁsu,
ja547:602.6	te kumārā na dissare.
ja547:603.1	Na te kaṭṭhāni bhinnāni,
ja547:603.2	na te udakamāhaṭaṁ;
ja547:603.3	Aggipi te na hāpito,
ja547:603.4	kiṁ nu mandova jhāyasi.
ja547:604.1	Piyo piyena saṅgamma,
ja547:604.2	samo me byapahaññati;
ja547:604.3	Tyajja putte na passāmi,
ja547:604.4	jāliṁ kaṇhājinaṁ cubho.
ja547:605.1	Na kho no deva passāmi,
ja547:605.2	yena te nīhatā matā;
ja547:605.3	Kākolāpi na vassanti,
ja547:605.4	matā me nūna dārakā.
ja547:606.1	Na kho no deva passāmi,
ja547:606.2	yena te nīhatā matā;
ja547:606.3	Sakuṇāpi na vassanti,
ja547:606.4	matā me nūna dārakā”.
ja547:607.1	Sā tattha paridevitvā,
ja547:607.2	pabbatāni vanāni ca;
ja547:607.3	Punadevassamaṁ gantvā,
ja547:607.4	rodi sāmikasantike.
ja547:608.1	“Na kho no deva passāmi,
ja547:608.2	yena te nīhatā matā;
ja547:608.3	Kākolāpi na vassanti,
ja547:608.4	matā me nūna dārakā.
ja547:609.1	Na kho no deva passāmi,
ja547:609.2	yena te nīhatā matā;
ja547:609.3	Sakuṇāpi na vassanti,
ja547:609.4	matā me nūna dārakā.
ja547:610.1	Na kho no deva passāmi,
ja547:610.2	yena te nīhatā matā;
ja547:610.3	Vicarantī rukkhamūlesu,
ja547:610.4	pabbatesu guhāsu ca”.
ja547:611.1	Iti maddī varārohā,
ja547:611.2	rājaputtī yasassinī;
ja547:611.3	Bāhā paggayha kanditvā,
ja547:611.4	tattheva patitā chamā.
ja547:612.1	Tamajjhapattaṁ rājaputtiṁ,
ja547:612.2	udakenābhisiñcatha;
ja547:612.3	Assatthaṁ naṁ viditvāna,
ja547:612.4	atha naṁ etadabravi.
ja547:613.1	“Ādiyeneva te maddi,
ja547:613.2	dukkhaṁ nakkhātumicchisaṁ;
ja547:613.3	Daliddo yācako vuḍḍho,
ja547:613.4	brāhmaṇo gharamāgato.
ja547:614.1	Tassa dinnā mayā puttā,
ja547:614.2	maddi mā bhāyi assasa;
ja547:614.3	Maṁ passa maddi mā putte,
ja547:614.4	mā bāḷhaṁ paridevasi;
ja547:614.5	Lacchāma putte jīvantā,
ja547:614.6	arogā ca bhavāmase.
ja547:615.1	Putte pasuñca dhaññañca,
ja547:615.2	yañca aññaṁ ghare dhanaṁ;
ja547:615.3	Dajjā sappuriso dānaṁ,
ja547:615.4	disvā yācakamāgataṁ;
ja547:615.5	Anumodāhi me maddi,
ja547:615.6	puttake dānamuttamaṁ”.
ja547:616.1	“Anumodāmi te deva,
ja547:616.2	puttake dānamuttamaṁ;
ja547:616.3	Datvā cittaṁ pasādehi,
ja547:616.4	bhiyyo dānaṁ dado bhava.
ja547:617.1	Yo tvaṁ maccherabhūtesu,
ja547:617.2	manussesu janādhipa;
ja547:617.3	Brāhmaṇassa adā dānaṁ,
ja547:617.4	sivīnaṁ raṭṭhavaḍḍhano”.
ja547:618.1	Ninnāditā te pathavī,
ja547:618.2	saddo te tidivaṅgato;
ja547:618.3	Samantā vijjutā āguṁ,
ja547:618.4	girīnaṁva patissutā.
ja547:619.1	Tassa te anumodanti,
ja547:619.2	ubho nāradapabbatā;
ja547:619.3	Indo ca brahmā pajāpati,
ja547:619.4	somo yamo vessavaṇo;
ja547:619.5	Sabbe devānumodanti,
ja547:619.6	tāvatiṁsā saindakā.
ja547:620.1	Iti maddī varārohā,
ja547:620.2	rājaputtī yasassinī;
ja547:620.3	Vessantarassa anumodi,
ja547:620.4	puttake dānamuttamaṁ.
ja547:621.1	Maddīpabbaṁ nāma.
ja547:622.0	10. Sakkapabba
ja547:622.1	Tato ratyā vivasāne,
ja547:622.2	sūriyassuggamanaṁ pati;
ja547:622.3	Sakko brāhmaṇavaṇṇena,
ja547:622.4	pāto tesaṁ adissatha.
ja547:623.1	“Kacci nu bhoto kusalaṁ,
ja547:623.2	kacci bhoto anāmayaṁ;
ja547:623.3	Kacci uñchena yāpetha,
ja547:623.4	kacci mūlaphalā bahū.
ja547:624.1	Kacci ḍaṁsā makasā ca,
ja547:624.2	appameva sarīsapā;
ja547:624.3	Vane vāḷamigākiṇṇe,
ja547:624.4	kacci hiṁsā na vijjati”.
ja547:625.1	“Kusalañceva no brahme,
ja547:625.2	atho brahme anāmayaṁ;
ja547:625.3	Atho uñchena yāpema,
ja547:625.4	atho mūlaphalā bahū.
ja547:626.1	Atho ḍaṁsā makasā ca,
ja547:626.2	appameva sarīsapā;
ja547:626.3	Vane vāḷamigākiṇṇe,
ja547:626.4	hiṁsā mayhaṁ na vijjati.
ja547:627.1	Satta no māse vasataṁ,
ja547:627.2	araññe jīvasokinaṁ;
ja547:627.3	Idaṁ dutiyaṁ passāma,
ja547:627.4	brāhmaṇaṁ devavaṇṇinaṁ;
ja547:627.5	Ādāya veḷuvaṁ daṇḍaṁ,
ja547:627.6	dhārentaṁ ajinakkhipaṁ.
ja547:628.1	Svāgataṁ te mahābrahme,
ja547:628.2	atho me adurāgataṁ;
ja547:628.3	Anto pavisa bhaddante,
ja547:628.4	pāde pakkhālayassu te.
ja547:629.1	Tindukāni piyālāni,
ja547:629.2	madhuke kāsumāriyo;
ja547:629.3	Phalāni khuddakappāni,
ja547:629.4	bhuñja brahme varaṁ varaṁ.
ja547:630.1	Idampi pānīyaṁ sītaṁ,
ja547:630.2	ābhataṁ girigabbharā;
ja547:630.3	Tato piva mahābrahme,
ja547:630.4	sace tvaṁ abhikaṅkhasi.
ja547:631.1	Atha tvaṁ kena vaṇṇena,
ja547:631.2	kena vā pana hetunā;
ja547:631.3	Anuppatto brahāraññaṁ,
ja547:631.4	taṁ me akkhāhi pucchito”.
ja547:632.1	“Yathā vārivaho pūro,
ja547:632.2	sabbakālaṁ na khīyati;
ja547:632.3	Evaṁ taṁ yācitāgacchiṁ,
ja547:632.4	bhariyaṁ me dehi yācito”.
ja547:633.1	“Dadāmi na vikampāmi,
ja547:633.2	yaṁ maṁ yācasi brāhmaṇa;
ja547:633.3	Santaṁ nappaṭiguyhāmi,
ja547:633.4	dāne me ramatī mano”.
ja547:634.1	Maddiṁ hatthe gahetvāna,
ja547:634.2	udakassa kamaṇḍaluṁ;
ja547:634.3	Brāhmaṇassa adā dānaṁ,
ja547:634.4	sivīnaṁ raṭṭhavaḍḍhano.
ja547:635.1	Tadāsi yaṁ bhiṁsanakaṁ,
ja547:635.2	tadāsi lomahaṁsanaṁ;
ja547:635.3	Maddiṁ paricajantassa,
ja547:635.4	medanī sampakampatha.
ja547:636.1	Nevassa maddī bhākuṭi,
ja547:636.2	na sandhīyati na rodati;
ja547:636.3	Pekkhatevassa tuṇhī sā,
ja547:636.4	“eso jānāti yaṁ varaṁ”.
ja547:637.1	(Jāliṁ kaṇhājinaṁ dhītaṁ,
ja547:637.2	maddideviṁ patibbataṁ;
ja547:637.3	Cajamāno ca cintesiṁ,
ja547:637.4	bodhiyāyeva kāraṇā.
ja547:638.1	Na me dessā ubho puttā,
ja547:638.2	maddī devī na dessiyā;
ja547:638.3	Sabbaññutaṁ piyaṁ mayhaṁ,
ja547:638.4	tasmā piye adāsahaṁ.)
ja547:639.1	“Komārī yassāhaṁ bhariyā,
ja547:639.2	sāmiko mama issaro;
ja547:639.3	Yassicche tassa maṁ dajjā,
ja547:639.4	vikkiṇeyya haneyya vā”.
ja547:640.1	Tesaṁ saṅkappamaññāya,
ja547:640.2	devindo etadabravi;
ja547:640.3	“Sabbe jitā te paccūhā,
ja547:640.4	ye dibbā ye ca mānusā.
ja547:641.1	Ninnāditā te pathavī,
ja547:641.2	saddo te tidivaṅgato;
ja547:641.3	Samantā vijjutā āguṁ,
ja547:641.4	girīnaṁva patissutā.
ja547:642.1	Tassa te anumodanti,
ja547:642.2	ubho nāradapabbatā;
ja547:642.3	Indo ca brahmā pajāpati,
ja547:642.4	somo yamo vessavaṇo;
ja547:642.5	Sabbe devānumodanti,
ja547:642.6	dukkarañhi karoti so.
ja547:643.1	Duddadaṁ dadamānānaṁ,
ja547:643.2	dukkaraṁ kamma kubbataṁ;
ja547:643.3	Asanto nānukubbanti,
ja547:643.4	sataṁ dhammo durannayo.
ja547:644.1	Tasmā satañca asataṁ,
ja547:644.2	nānā hoti ito gati;
ja547:644.3	Asanto nirayaṁ yanti,
ja547:644.4	santo saggaparāyaṇā.
ja547:645.1	Yametaṁ kumāre adā,
ja547:645.2	bhariyaṁ adā vane vasaṁ;
ja547:645.3	Brahmayānamanokkamma,
ja547:645.4	sagge te taṁ vipaccatu”.
ja547:646.1	“Dadāmi bhoto bhariyaṁ,
ja547:646.2	maddiṁ sabbaṅgasobhanaṁ;
ja547:646.3	Tvañceva maddiyā channo,
ja547:646.4	maddī ca patinā saha.
ja547:647.1	Yathā payo ca saṅkho ca,
ja547:647.2	ubho samānavaṇṇino;
ja547:647.3	Evaṁ tuvañca maddī ca,
ja547:647.4	samānamanacetasā.
ja547:648.1	Avaruddhettha araññasmiṁ,
ja547:648.2	ubho sammatha assame;
ja547:648.3	Khattiyā gottasampannā,
ja547:648.4	sujātā mātupettito;
ja547:648.5	Yathā puññāni kayirātha,
ja547:648.6	dadantā aparāparaṁ.
ja547:649.1	Sakkohamasmi devindo,
ja547:649.2	āgatosmi tavantike;
ja547:649.3	Varaṁ varassu rājisi,
ja547:649.4	vare aṭṭha dadāmi te”.
ja547:650.1	“Varañce me ado sakka,
ja547:650.2	sabbabhūtānamissara;
ja547:650.3	Pitā maṁ anumodeyya,
ja547:650.4	ito pattaṁ sakaṁ gharaṁ;
ja547:650.5	Āsanena nimanteyya,
ja547:650.6	paṭhametaṁ varaṁ vare.
ja547:651.1	Purisassa vadhaṁ na roceyyaṁ,
ja547:651.2	Api kibbisakārakaṁ;
ja547:651.3	Vajjhaṁ vadhamhā moceyyaṁ,
ja547:651.4	Dutiyetaṁ varaṁ vare.
ja547:652.1	Ye vuḍḍhā ye ca daharā,
ja547:652.2	ye ca majjhimaporisā;
ja547:652.3	Mameva upajīveyyuṁ,
ja547:652.4	tatiyetaṁ varaṁ vare.
ja547:653.1	Paradāraṁ na gaccheyyaṁ,
ja547:653.2	sadārapasuto siyaṁ;
ja547:653.3	Thīnaṁ vasaṁ na gaccheyyaṁ,
ja547:653.4	catutthetaṁ varaṁ vare.
ja547:654.1	Putto me sakka jāyetha,
ja547:654.2	so ca dīghāyuko siyā;
ja547:654.3	Dhammena jine pathaviṁ,
ja547:654.4	pañcametaṁ varaṁ vare.
ja547:655.1	Tato ratyā vivasāne,
ja547:655.2	sūriyassuggamanaṁ pati;
ja547:655.3	Dibbā bhakkhā pātubhaveyyuṁ,
ja547:655.4	chaṭṭhametaṁ varaṁ vare.
ja547:656.1	Dadato me na khīyetha,
ja547:656.2	datvā nānutapeyyahaṁ;
ja547:656.3	Dadaṁ cittaṁ pasādeyyaṁ,
ja547:656.4	sattametaṁ varaṁ vare.
ja547:657.1	Ito vimuccamānāhaṁ,
ja547:657.2	saggagāmī visesagū;
ja547:657.3	Anivatti tato assaṁ,
ja547:657.4	aṭṭhametaṁ varaṁ vare”.
ja547:658.1	Tassa taṁ vacanaṁ sutvā,
ja547:658.2	devindo etadabravi;
ja547:658.3	“Aciraṁ vata te tato,
ja547:658.4	pitā taṁ daṭṭhumessati”.
ja547:659.1	Idaṁ vatvāna maghavā,
ja547:659.2	devarājā sujampati;
ja547:659.3	Vessantare varaṁ datvā,
ja547:659.4	saggakāyaṁ apakkami.
ja547:660.1	Sakkapabbaṁ nāma.
ja547:661.0	11. Mahārājapabba
ja547:661.1	“Kassetaṁ mukhamābhāti,
ja547:661.2	hemaṁvuttattamagginā;
ja547:661.3	Nikkhaṁva jātarūpassa,
ja547:661.4	ukkāmukhapahaṁsitaṁ.
ja547:662.1	Ubho sadisapaccaṅgā,
ja547:662.2	ubho sadisalakkhaṇā;
ja547:662.3	Jālissa sadiso eko,
ja547:662.4	ekā kaṇhājinā yathā.
ja547:663.1	Sīhā bilāva nikkhantā,
ja547:663.2	ubho sampatirūpakā;
ja547:663.3	Jātarūpamayāyeva,
ja547:663.4	ime dissanti dārakā.
ja547:664.1	Kuto nu bhavaṁ bhāradvāja,
ja547:664.2	Ime ānesi dārake;
ja547:664.3	Ajja raṭṭhaṁ anuppatto,
ja547:664.4	Kuhiṁ gacchasi brāhmaṇa”.
ja547:665.1	“Mayhaṁ te dārakā deva,
ja547:665.2	dinnā vittena sañjaya;
ja547:665.3	Ajja pannarasā ratti,
ja547:665.4	yato laddhā me dārakā”.
ja547:666.1	“Kena vā vācapeyyena,
ja547:666.2	sammāñāyena saddahe;
ja547:666.3	Ko tetaṁ dānamadadā,
ja547:666.4	puttake dānamuttamaṁ”.
ja547:667.1	“Yo yācataṁ patiṭṭhāsi,
ja547:667.2	bhūtānaṁ dharaṇīriva;
ja547:667.3	So me vessantaro rājā,
ja547:667.4	puttedāsi vane vasaṁ.
ja547:668.1	Yo yācataṁ gatī āsi,
ja547:668.2	savantīnaṁva sāgaro;
ja547:668.3	So me vessantaro rājā,
ja547:668.4	puttedāsi vane vasaṁ”.
ja547:669.1	“Dukkaṭaṁ vata bho raññā,
ja547:669.2	saddhena gharamesinā;
ja547:669.3	Kathaṁ nu puttake dajjā,
ja547:669.4	araññe avaruddhako.
ja547:670.1	Imaṁ bhonto nisāmetha,
ja547:670.2	yāvantettha samāgatā;
ja547:670.3	Kathaṁ vessantaro rājā,
ja547:670.4	puttedāsi vane vasaṁ.
ja547:671.1	Dāsiṁ dāsaṁ ca so dajjā,
ja547:671.2	assaṁ cassatarīrathaṁ;
ja547:671.3	Hatthiñca kuñjaraṁ dajja,
ja547:671.4	kathaṁ so dajja dārake”.
ja547:672.1	“Yassa nassa ghare dāso,
ja547:672.2	asso cassatarīratho;
ja547:672.3	Hatthī ca kuñjaro nāgo,
ja547:672.4	kiṁ so dajjā pitāmaha”.
ja547:673.1	“Dānamassa pasaṁsāma,
ja547:673.2	na ca nindāma puttakā;
ja547:673.3	Kathaṁ nu hadayaṁ āsi,
ja547:673.4	tumhe datvā vanibbake”.
ja547:674.1	“Dukkhassa hadayaṁ āsi,
ja547:674.2	atho uṇhampi passasi;
ja547:674.3	Rohinīheva tambakkhī,
ja547:674.4	pitā assūni vattayi”.
ja547:675.1	Yaṁ taṁ kaṇhājināvoca,
ja547:675.2	“ayaṁ maṁ tāta brāhmaṇo;
ja547:675.3	Laṭṭhiyā paṭikoṭeti,
ja547:675.4	ghare jātaṁva dāsiyaṁ.
ja547:676.1	Na cāyaṁ brāhmaṇo tāta,
ja547:676.2	dhammikā honti brāhmaṇā;
ja547:676.3	Yakkho brāhmaṇavaṇṇena,
ja547:676.4	khādituṁ tāta neti no;
ja547:676.5	Nīyamāne pisācena,
ja547:676.6	kiṁ nu tāta udikkhasi”.
ja547:677.1	“Rājaputtī ca vo mātā,
ja547:677.2	rājaputto ca vo pitā;
ja547:677.3	Pubbe me aṅkamāruyha,
ja547:677.4	kiṁ nu tiṭṭhatha ārakā”.
ja547:678.1	“Rājaputtī ca no mātā,
ja547:678.2	rājaputto ca no pitā;
ja547:678.3	Dāsā mayaṁ brāhmaṇassa,
ja547:678.4	tasmā tiṭṭhāma ārakā”.
ja547:679.1	“Mā sammevaṁ avacuttha,
ja547:679.2	ḍayhate hadayaṁ mama;
ja547:679.3	Citakāyaṁva me kāyo,
ja547:679.4	āsane na sukhaṁ labhe.
ja547:680.1	Mā sammevaṁ avacuttha,
ja547:680.2	bhiyyo sokaṁ janetha maṁ;
ja547:680.3	Nikkiṇissāmi dabbena,
ja547:680.4	na vo dāsā bhavissatha.
ja547:681.1	Kimagghiyañhi vo tāta,
ja547:681.2	brāhmaṇassa pitā adā;
ja547:681.3	Yathābhūtaṁ me akkhātha,
ja547:681.4	paṭipādentu brāhmaṇaṁ”.
ja547:682.1	“Sahassagghañhi maṁ tāta,
ja547:682.2	brāhmaṇassa pitā adā;
ja547:682.3	Atha kaṇhājinaṁ kaññaṁ,
ja547:682.4	hatthinā ca satena ca”.
ja547:683.1	“Uṭṭhehi katte taramāno,
ja547:683.2	brāhmaṇassa avākara;
ja547:683.3	Dāsisataṁ dāsasataṁ,
ja547:683.4	gavaṁ hatthusabhaṁ sataṁ;
ja547:683.5	Jātarūpasahassañca,
ja547:683.6	puttānaṁ dehi nikkayaṁ”.
ja547:684.1	Tato kattā taramāno,
ja547:684.2	brāhmaṇassa avākari;
ja547:684.3	Dāsisataṁ dāsasataṁ,
ja547:684.4	gavaṁ hatthusabhaṁ sataṁ;
ja547:684.5	Jātarūpasahassañca,
ja547:684.6	puttānaṁdāsi nikkayaṁ.
ja547:685.1	Nikkiṇitvā nahāpetvā,
ja547:685.2	bhojayitvāna dārake;
ja547:685.3	Samalaṅkaritvā bhaṇḍena,
ja547:685.4	ucchaṅge upavesayuṁ.
ja547:686.1	Sīsaṁ nhāte sucivatthe,
ja547:686.2	sabbābharaṇabhūsite;
ja547:686.3	Rājā aṅke karitvāna,
ja547:686.4	ayyako paripucchatha.
ja547:687.1	Kuṇḍale ghusite māle,
ja547:687.2	sabbābharaṇabhūsite;
ja547:687.3	Rājā aṅke karitvāna,
ja547:687.4	idaṁ vacanamabravi.
ja547:688.1	“Kacci ubho arogā te,
ja547:688.2	jāli mātāpitā tava;
ja547:688.3	Kacci uñchena yāpenti,
ja547:688.4	kacci mūlaphalā bahū.
ja547:689.1	Kacci ḍaṁsā makasā ca,
ja547:689.2	appameva sarīsapā;
ja547:689.3	Vane vāḷamigākiṇṇe,
ja547:689.4	kacci hiṁsā na vijjati”.
ja547:690.1	“Atho ubho arogā me,
ja547:690.2	deva mātāpitā mama;
ja547:690.3	Atho uñchena yāpenti,
ja547:690.4	atho mūlaphalā bahū.
ja547:691.1	Atho ḍaṁsā makasā ca,
ja547:691.2	appameva sarīsapā;
ja547:691.3	Vane vāḷamigākiṇṇe,
ja547:691.4	hiṁsā nesaṁ na vijjati.
ja547:692.1	Khaṇantālukalambāni,
ja547:692.2	bilāni takkalāni ca;
ja547:692.3	Kolaṁ bhallātakaṁ bellaṁ,
ja547:692.4	sā no āhatva posati.
ja547:693.1	Yañceva sā āharati,
ja547:693.2	vanamūlaphalahāriyā;
ja547:693.3	Taṁ no sabbe samāgantvā,
ja547:693.4	rattiṁ bhuñjāma no divā.
ja547:694.1	Ammāva no kisā paṇḍu,
ja547:694.2	āharantī dumapphalaṁ;
ja547:694.3	Vātātapena sukhumālī,
ja547:694.4	padumaṁ hatthagatāmiva.
ja547:695.1	Ammāya patanū kesā,
ja547:695.2	vicarantyā brahāvane;
ja547:695.3	Vane vāḷamigākiṇṇe,
ja547:695.4	khaggadīpinisevite.
ja547:696.1	Kesesu jaṭaṁ bandhitvā,
ja547:696.2	kacche jallamadhārayi;
ja547:696.3	Cammavāsī chamā seti,
ja547:696.4	jātavedaṁ namassati.
ja547:697.1	Puttā piyā manussānaṁ,
ja547:697.2	lokasmiṁ udapajjisuṁ;
ja547:697.3	Na hi nūnamhākaṁ ayyassa,
ja547:697.4	putte sneho ajāyatha”.
ja547:698.1	“Dukkaṭañca hi no putta,
ja547:698.2	bhūnahaccaṁ kataṁ mayā;
ja547:698.3	Yohaṁ sivīnaṁ vacanā,
ja547:698.4	pabbājesimadūsakaṁ.
ja547:699.1	Yaṁ me kiñci idha atthi,
ja547:699.2	dhanaṁ dhaññañca vijjati;
ja547:699.3	Etu vessantaro rājā,
ja547:699.4	siviraṭṭhe pasāsatu”.
ja547:700.1	“Na deva mayhaṁ vacanā,
ja547:700.2	ehiti sivisuttamo;
ja547:700.3	Sayameva devo gantvā,
ja547:700.4	siñca bhogehi atrajaṁ”.
ja547:701.1	Tato senāpatiṁ rājā,
ja547:701.2	sañjayo ajjhabhāsatha;
ja547:701.3	“Hatthī assā rathā pattī,
ja547:701.4	senā sannāhayantu naṁ;
ja547:701.5	Negamā ca maṁ anventu,
ja547:701.6	brāhmaṇā ca purohitā.
ja547:702.1	Tato saṭṭhisahassāni,
ja547:702.2	yodhino cārudassanā;
ja547:702.3	Khippamāyantu sannaddhā,
ja547:702.4	nānāvaṇṇehilaṅkatā.
ja547:703.1	Nīlavatthadharā neke,
ja547:703.2	pītāneke nivāsitā;
ja547:703.3	Aññe lohitauṇhīsā,
ja547:703.4	suddhāneke nivāsitā;
ja547:703.5	Khippamāyantu sannaddhā,
ja547:703.6	nānāvaṇṇehilaṅkatā.
ja547:704.1	Himavā yathā gandhadharo,
ja547:704.2	pabbato gandhamādano;
ja547:704.3	Nānārukkhehi sañchanno,
ja547:704.4	mahābhūtagaṇālayo.
ja547:705.1	Osadhehi ca dibbehi,
ja547:705.2	disā bhāti pavāti ca;
ja547:705.3	Khippamāyantu sannaddhā,
ja547:705.4	disā bhantu pavantu ca.
ja547:706.1	Tato nāgasahassāni,
ja547:706.2	yojayantu catuddasa;
ja547:706.3	Suvaṇṇakacchā mātaṅgā,
ja547:706.4	hemakappanavāsasā.
ja547:707.1	Ārūḷhā gāmaṇīyehi,
ja547:707.2	tomaraṅkusapāṇibhi;
ja547:707.3	Khippamāyantu sannaddhā,
ja547:707.4	hatthikkhandhehi dassitā.
ja547:708.1	Tato assasahassāni,
ja547:708.2	yojayantu catuddasa;
ja547:708.3	Ājānīyāva jātiyā,
ja547:708.4	sindhavā sīghavāhanā.
ja547:709.1	Ārūḷhā gāmaṇīyehi,
ja547:709.2	illiyācāpadhāribhi;
ja547:709.3	Khippamāyantu sannaddhā,
ja547:709.4	assapiṭṭhehilaṅkatā.
ja547:710.1	Tato rathasahassāni,
ja547:710.2	yojayantu catuddasa;
ja547:710.3	Ayosukatanemiyo,
ja547:710.4	suvaṇṇacitapakkhare.
ja547:711.1	Āropentu dhaje tattha,
ja547:711.2	cammāni kavacāni ca;
ja547:711.3	Vippālentu ca cāpāni,
ja547:711.4	daḷhadhammā pahārino;
ja547:711.5	Khippamāyantu sannaddhā,
ja547:711.6	rathesu rathajīvino.
ja547:712.1	Lājā olopiyā pupphā,
ja547:712.2	mālāgandhavilepanā;
ja547:712.3	Agghiyāni ca tiṭṭhantu,
ja547:712.4	yena maggena ehiti.
ja547:713.1	Gāme gāme sataṁ kumbhā,
ja547:713.2	merayassa surāya ca;
ja547:713.3	Maggamhi patitiṭṭhantu,
ja547:713.4	yena maggena ehiti.
ja547:714.1	Maṁsā pūvā saṅkuliyo,
ja547:714.2	kummāsā macchasaṁyutā;
ja547:714.3	Maggamhi patitiṭṭhantu,
ja547:714.4	yena maggena ehiti.
ja547:715.1	Sappi telaṁ dadhi khīraṁ,
ja547:715.2	kaṅgubījā bahū surā;
ja547:715.3	Maggamhi patitiṭṭhantu,
ja547:715.4	yena maggena ehiti.
ja547:716.1	Āḷārikā ca sūdā ca,
ja547:716.2	naṭanaṭṭakagāyino;
ja547:716.3	Pāṇissarā kumbhathūṇiyo,
ja547:716.4	mandakā sokajjhāyikā.
ja547:717.1	Āhaññantu sabbavīṇā,
ja547:717.2	bheriyo dindimāni ca;
ja547:717.3	Kharamukhāni dhamentu,
ja547:717.4	nadantu ekapokkharā.
ja547:718.1	Mudiṅgā paṇavā saṅkhā,
ja547:718.2	godhā parivadentikā;
ja547:718.3	Dindimāni ca haññantu,
ja547:718.4	kutumpa dindimāni ca”.
ja547:719.1	Sā senā mahatī āsi,
ja547:719.2	uyyuttā sivivāhinī;
ja547:719.3	Jālinā magganāyena,
ja547:719.4	vaṅkaṁ pāyāsi pabbataṁ.
ja547:720.1	Koñcaṁ nadati mātaṅgo,
ja547:720.2	kuñjaro saṭṭhihāyano;
ja547:720.3	Kacchāya baddhamānāya,
ja547:720.4	koñcaṁ nadati vāraṇo.
ja547:721.1	Ājānīyā hasiyanti,
ja547:721.2	nemighoso ajāyatha;
ja547:721.3	Abbhaṁ rajo acchādesi,
ja547:721.4	uyyuttā sivivāhinī.
ja547:722.1	Sā senā mahatī āsi,
ja547:722.2	uyyuttā hārahārinī;
ja547:722.3	Jālinā magganāyena,
ja547:722.4	vaṅkaṁ pāyāsi pabbataṁ.
ja547:723.1	Te pāviṁsu brahāraññaṁ,
ja547:723.2	bahusākhaṁ mahodakaṁ;
ja547:723.3	Puppharukkhehi sañchannaṁ,
ja547:723.4	phalarukkhehi cūbhayaṁ.
ja547:724.1	Tattha bindussarā vaggū,
ja547:724.2	nānāvaṇṇā bahū dijā;
ja547:724.3	Kūjantamupakūjanti,
ja547:724.4	utusampupphite dume.
ja547:725.1	Te gantvā dīghamaddhānaṁ,
ja547:725.2	ahorattānamaccaye;
ja547:725.3	Padesaṁ taṁ upāgacchuṁ,
ja547:725.4	yattha vessantaro ahu.
ja547:726.1	Mahārājapabbaṁ nāma.
ja547:727.0	12. Chakhattiyakamma
ja547:727.1	Tesaṁ sutvāna nigghosaṁ,
ja547:727.2	bhīto vessantaro ahu;
ja547:727.3	Pabbataṁ abhiruhitvā,
ja547:727.4	bhīto senaṁ udikkhati.
ja547:728.1	“Iṅgha maddi nisāmehi,
ja547:728.2	nigghoso yādiso vane;
ja547:728.3	Ājānīyā hasiyanti,
ja547:728.4	dhajaggāni ca dissare.
ja547:729.1	Ime nūna araññasmiṁ,
ja547:729.2	migasaṅghāni luddakā;
ja547:729.3	Vāgurāhi parikkhippa,
ja547:729.4	sobbhaṁ pātetvā tāvade;
ja547:729.5	Vikkosamānā tibbāhi,
ja547:729.6	hanti nesaṁ varaṁ varaṁ.
ja547:730.1	Yathā mayaṁ adūsakā,
ja547:730.2	araññe avaruddhakā;
ja547:730.3	Amittahatthattaṁ gatā,
ja547:730.4	passa dubbalaghātakaṁ”.
ja547:731.1	“Amittā nappasāheyyuṁ,
ja547:731.2	aggīva udakaṇṇave;
ja547:731.3	Tadeva tvaṁ vicintehi,
ja547:731.4	api sotthi ito siyā”.
ja547:732.1	Tato vessantaro rājā,
ja547:732.2	orohitvāna pabbatā;
ja547:732.3	Nisīdi paṇṇasālāyaṁ,
ja547:732.4	daḷhaṁ katvāna mānasaṁ.
ja547:733.1	Nivattayitvāna rathaṁ,
ja547:733.2	vuṭṭhapetvāna seniyo;
ja547:733.3	Ekaṁ araññe viharantaṁ,
ja547:733.4	pitā puttaṁ upāgami.
ja547:734.1	Hatthikkhandhato oruyha,
ja547:734.2	ekaṁso pañjalīkato;
ja547:734.3	Parikiṇṇo amaccehi,
ja547:734.4	puttaṁ siñcitumāgami.
ja547:735.1	Tatthaddasa kumāraṁ so,
ja547:735.2	rammarūpaṁ samāhitaṁ;
ja547:735.3	Nisinnaṁ paṇṇasālāyaṁ,
ja547:735.4	jhāyantaṁ akutobhayaṁ.
ja547:736.1	Tañca disvāna āyantaṁ,
ja547:736.2	pitaraṁ puttagiddhinaṁ;
ja547:736.3	Vessantaro ca maddī ca,
ja547:736.4	paccuggantvā avandisuṁ.
ja547:737.1	Maddī ca sirasā pāde,
ja547:737.2	sasurassābhivādayi;
ja547:737.3	“Maddī ahañhi te deva,
ja547:737.4	pāde vandāmi te suṇhā”;
ja547:737.5	Te su tattha palisajja,
ja547:737.6	pāṇinā parimajjatha.
ja547:738.1	“Kacci vo kusalaṁ putta,
ja547:738.2	kacci putta anāmayaṁ;
ja547:738.3	Kacci uñchena yāpetha,
ja547:738.4	kacci mūlaphalā bahū.
ja547:739.1	Kacci ḍaṁsā makasā ca,
ja547:739.2	appameva sarīsapā;
ja547:739.3	Vane vāḷamigākiṇṇe,
ja547:739.4	kacci hiṁsā na vijjati”.
ja547:740.1	“Atthi no jīvikā deva,
ja547:740.2	sā ca yādisakīdisā;
ja547:740.3	Kasirā jīvikā homa,
ja547:740.4	uñchācariyāya jīvitaṁ.
ja547:741.1	Aniddhinaṁ mahārāja,
ja547:741.2	dametassaṁva sārathi;
ja547:741.3	Tyamhā aniddhikā dantā,
ja547:741.4	asamiddhi dameti no.
ja547:742.1	Api no kisāni maṁsāni,
ja547:742.2	pitu mātu adassanā;
ja547:742.3	Avaruddhānaṁ mahārāja,
ja547:742.4	araññe jīvasokinaṁ.
ja547:743.1	Yepi te siviseṭṭhassa,
ja547:743.2	dāyādāpattamānasā;
ja547:743.3	Jālī kaṇhājinā cubho,
ja547:743.4	brāhmaṇassa vasānugā;
ja547:743.5	Accāyikassa luddassa,
ja547:743.6	yo ne gāvova sumbhati.
ja547:744.1	Te rājaputtiyā putte,
ja547:744.2	yadi jānātha saṁsatha;
ja547:744.3	Pariyāpuṇātha no khippaṁ,
ja547:744.4	sappadaṭṭhaṁva māṇavaṁ”.
ja547:745.1	“Ubho kumārā nikkītā,
ja547:745.2	jālī kaṇhājinā cubho;
ja547:745.3	Brāhmaṇassa dhanaṁ datvā,
ja547:745.4	putta mā bhāyi assasa”.
ja547:746.1	“Kacci nu tāta kusalaṁ,
ja547:746.2	kacci tāta anāmayaṁ;
ja547:746.3	Kacci nu tāta me mātu,
ja547:746.4	cakkhu na parihāyati”.
ja547:747.1	“Kusalañceva me putta,
ja547:747.2	atho putta anāmayaṁ;
ja547:747.3	Atho ca putta te mātu,
ja547:747.4	cakkhu na parihāyati”.
ja547:748.1	“Kacci arogaṁ yoggaṁ te,
ja547:748.2	kacci vahati vāhanaṁ;
ja547:748.3	Kacci phīto janapado,
ja547:748.4	kacci vuṭṭhi na chijjati”.
ja547:749.1	“Atho arogaṁ yoggaṁ me,
ja547:749.2	atho vahati vāhanaṁ;
ja547:749.3	Atho phīto janapado,
ja547:749.4	atho vuṭṭhi na chijjati”.
ja547:750.1	Iccevaṁ mantayantānaṁ,
ja547:750.2	mātā nesaṁ adissatha;
ja547:750.3	Rājaputtī giridvāre,
ja547:750.4	pattikā anupāhanā.
ja547:751.1	Tañca disvāna āyantiṁ,
ja547:751.2	mātaraṁ puttagiddhiniṁ;
ja547:751.3	Vessantaro ca maddī ca,
ja547:751.4	paccuggantvā avandisuṁ.
ja547:752.1	Maddī ca sirasā pāde,
ja547:752.2	sassuyā abhivādayi;
ja547:752.3	“Maddī ahañhi te ayye,
ja547:752.4	pāde vandāmi te suṇhā”.
ja547:753.1	Maddiñca puttakā disvā,
ja547:753.2	dūrato sotthimāgatā;
ja547:753.3	Kandantā mabhidhāviṁsu,
ja547:753.4	vacchabālāva mātaraṁ.
ja547:754.1	Maddī ca puttake disvā,
ja547:754.2	dūrato sotthimāgate;
ja547:754.3	Vāruṇīva pavedhentī,
ja547:754.4	thanadhārābhisiñcatha.
ja547:755.1	Samāgatānaṁ ñātīnaṁ,
ja547:755.2	mahāghoso ajāyatha;
ja547:755.3	Pabbatā samanādiṁsu,
ja547:755.4	mahī pakampitā ahu.
ja547:756.1	Vuṭṭhidhāraṁ pavattento,
ja547:756.2	devo pāvassi tāvade;
ja547:756.3	Atha vessantaro rājā,
ja547:756.4	ñātīhi samagacchatha.
ja547:757.1	Nattāro suṇisā putto,
ja547:757.2	rājā devī ca ekato;
ja547:757.3	Yadā samāgatā āsuṁ,
ja547:757.4	tadāsi lomahaṁsanaṁ.
ja547:758.1	Pañjalikā tassa yācanti,
ja547:758.2	rodantā bherave vane;
ja547:758.3	Vessantarañca maddiñca,
ja547:758.4	sabbe raṭṭhā samāgatā;
ja547:758.5	Tvaṁ nosi issaro rājā,
ja547:758.6	rajjaṁ kāretha no ubho.
ja547:759.1	Chakhattiyakammaṁ nāma.
ja547:760.1	“Dhammena rajjaṁ kārentaṁ,
ja547:760.2	raṭṭhā pabbājayittha maṁ;
ja547:760.3	Tvañca jānapadā ceva,
ja547:760.4	negamā ca samāgatā”.
ja547:761.1	“Dukkaṭañca hi no putta,
ja547:761.2	bhūnahaccaṁ kataṁ mayā;
ja547:761.3	Yohaṁ sivīnaṁ vacanā,
ja547:761.4	pabbājesimadūsakaṁ.
ja547:762.1	Yena kenaci vaṇṇena,
ja547:762.2	pitu dukkhaṁ udabbahe;
ja547:762.3	Mātu bhaginiyā cāpi,
ja547:762.4	api pāṇehi attano”.
ja547:763.1	Tato vessantaro rājā,
ja547:763.2	rajojallaṁ pavāhayi;
ja547:763.3	Rajojallaṁ pavāhetvā,
ja547:763.4	saṅkhavaṇṇaṁ adhārayi.
ja547:764.1	Sīsaṁ nhāto sucivattho,
ja547:764.2	sabbābharaṇabhūsito;
ja547:764.3	Paccayaṁ nāgamāruyha,
ja547:764.4	khaggaṁ bandhi parantapaṁ.
ja547:765.1	Tato saṭṭhisahassāni,
ja547:765.2	yodhino cārudassanā;
ja547:765.3	Sahajātā pakiriṁsu,
ja547:765.4	nandayantā rathesabhaṁ.
ja547:766.1	Tato maddimpi nhāpesuṁ,
ja547:766.2	sivikaññā samāgatā;
ja547:766.3	“Vessantaro taṁ pāletu,
ja547:766.4	jālī kaṇhājinā cubho;
ja547:766.5	Athopi taṁ mahārājā,
ja547:766.6	sañjayo abhirakkhatu”.
ja547:767.1	Idañca paccayaṁ laddhā,
ja547:767.2	pubbe saṅklesamattano;
ja547:767.3	Ānandiyaṁ ācariṁsu,
ja547:767.4	ramaṇīye giribbaje.
ja547:768.1	Idañca paccayaṁ laddhā,
ja547:768.2	pubbe saṅklesamattano;
ja547:768.3	Ānandi vittā sumanā,
ja547:768.4	putte saṅgamma lakkhaṇā.
ja547:769.1	Idañca paccayaṁ laddhā,
ja547:769.2	pubbe saṅklesamattano;
ja547:769.3	Ānandi vittā patītā,
ja547:769.4	saha puttehi lakkhaṇā.
ja547:770.1	“Ekabhattā pure āsiṁ,
ja547:770.2	niccaṁ thaṇḍilasāyinī;
ja547:770.3	Iti metaṁ vataṁ āsi,
ja547:770.4	tumhaṁ kāmā hi puttakā.
ja547:771.1	Taṁ me vataṁ samiddhajja,
ja547:771.2	tumhe saṅgamma puttakā;
ja547:771.3	Mātujampi taṁ pāletu,
ja547:771.4	pitujampi ca puttaka;
ja547:771.5	Athopi taṁ mahārājā,
ja547:771.6	sañjayo abhirakkhatu.
ja547:772.1	Yaṁ kiñcitthi kataṁ puññaṁ,
ja547:772.2	mayhañceva pitucca te;
ja547:772.3	Sabbena tena kusalena,
ja547:772.4	ajaro amaro bhava”.
ja547:773.1	Kappāsikañca koseyyaṁ,
ja547:773.2	khomakoṭumbarāni ca;
ja547:773.3	Sassu suṇhāya pāhesi,
ja547:773.4	yehi maddī asobhatha.
ja547:774.1	Tato hemañca kāyūraṁ,
ja547:774.2	gīveyyaṁ ratanāmayaṁ;
ja547:774.3	Sassu suṇhāya pāhesi,
ja547:774.4	yehi maddī asobhatha.
ja547:775.1	Tato hemañca kāyūraṁ,
ja547:775.2	aṅgadaṁ maṇimekhalaṁ;
ja547:775.3	Sassu suṇhāya pāhesi,
ja547:775.4	yehi maddī asobhatha.
ja547:776.1	Uṇṇataṁ mukhaphullañca,
ja547:776.2	nānāratte ca māṇike;
ja547:776.3	Sassu suṇhāya pāhesi,
ja547:776.4	yehi maddī asobhatha.
ja547:777.1	Uggatthanaṁ giṅgamakaṁ,
ja547:777.2	mekhalaṁ pāṭipādakaṁ;
ja547:777.3	Sassu suṇhāya pāhesi,
ja547:777.4	yehi maddī asobhatha.
ja547:778.1	Suttañca suttavajjañca,
ja547:778.2	upanijjhāya seyyasi;
ja547:778.3	Asobhatha rājaputtī,
ja547:778.4	devakaññāva nandane.
ja547:779.1	Sīsaṁ nhātā sucivatthā,
ja547:779.2	sabbālaṅkārabhūsitā;
ja547:779.3	Asobhatha rājaputtī,
ja547:779.4	tāvatiṁseva accharā.
ja547:780.1	Kadalīva vātacchupitā,
ja547:780.2	jātā cittalatāvane;
ja547:780.3	Dantāvaraṇasampannā,
ja547:780.4	rājaputtī asobhatha.
ja547:781.1	Sakuṇī mānusinīva,
ja547:781.2	jātā cittapattā patī;
ja547:781.3	Nigrodhapakkabimboṭṭhī,
ja547:781.4	rājaputtī asobhatha.
ja547:782.1	Tassā ca nāgamānesuṁ,
ja547:782.2	nātibaddhaṁva kuñjaraṁ;
ja547:782.3	Sattikkhamaṁ sarakkhamaṁ,
ja547:782.4	īsādantaṁ urūḷhavaṁ.
ja547:783.1	Sā maddī nāgamāruhi,
ja547:783.2	nātivaddhaṁva kuñjaraṁ;
ja547:783.3	Sattikkhamaṁ sarakkhamaṁ,
ja547:783.4	īsādantaṁ urūḷhavaṁ.
ja547:784.1	Sabbamhi taṁaraññamhi,
ja547:784.2	yāvantettha migā ahuṁ;
ja547:784.3	Vessantarassa tejena,
ja547:784.4	naññamaññaṁ viheṭhayuṁ.
ja547:785.1	Sabbamhi taṁaraññamhi,
ja547:785.2	yāvantettha dijā ahuṁ;
ja547:785.3	Vessantarassa tejena,
ja547:785.4	naññamaññaṁ viheṭhayuṁ.
ja547:786.1	Sabbamhi taṁaraññamhi,
ja547:786.2	yāvantettha migā ahuṁ;
ja547:786.3	Ekajjhaṁ sannipātiṁsu,
ja547:786.4	vessantare payātamhi;
ja547:786.5	Sivīnaṁ raṭṭhavaḍḍhane.
ja547:787.1	Sabbamhi taṁaraññamhi,
ja547:787.2	yāvantettha dijā ahuṁ;
ja547:787.3	Ekajjhaṁ sannipātiṁsu,
ja547:787.4	vessantare payātamhi;
ja547:787.5	Sivīnaṁ raṭṭhavaḍḍhane.
ja547:788.1	Sabbamhi taṁaraññamhi,
ja547:788.2	yāvantettha migā ahuṁ;
ja547:788.3	Nāssu mañjū nikūjiṁsu,
ja547:788.4	vessantare payātamhi;
ja547:788.5	Sivīnaṁ raṭṭhavaḍḍhane.
ja547:789.1	Sabbamhi taṁaraññamhi,
ja547:789.2	yāvantettha dijā ahuṁ;
ja547:789.3	Nāssu mañjū nikūjiṁsu,
ja547:789.4	vessantare payātamhi;
ja547:789.5	Sivīnaṁ raṭṭhavaḍḍhane.
ja547:790.1	Paṭiyatto rājamaggo,
ja547:790.2	vicitto pupphasanthato;
ja547:790.3	Vasi vessantaro yattha,
ja547:790.4	yāvatāva jetuttarā.
ja547:791.1	Tato saṭṭhisahassāni,
ja547:791.2	yodhino cārudassanā;
ja547:791.3	Samantā parikiriṁsu,
ja547:791.4	vessantare payātamhi;
ja547:791.5	Sivīnaṁ raṭṭhavaḍḍhane.
ja547:792.1	Orodhā ca kumārā ca,
ja547:792.2	vesiyānā ca brāhmaṇā;
ja547:792.3	Samantā parikiriṁsu,
ja547:792.4	vessantare payātamhi;
ja547:792.5	Sivīnaṁ raṭṭhavaḍḍhane.
ja547:793.1	Hatthārohā anīkaṭṭhā,
ja547:793.2	rathikā pattikārakā;
ja547:793.3	Samantā parikiriṁsu,
ja547:793.4	vessantare payātamhi;
ja547:793.5	Sivīnaṁ raṭṭhavaḍḍhane.
ja547:794.1	Samāgatā jānapadā,
ja547:794.2	negamā ca samāgatā;
ja547:794.3	Samantā parikiriṁsu,
ja547:794.4	vessantare payātamhi;
ja547:794.5	Sivīnaṁ raṭṭhavaḍḍhane.
ja547:795.1	Karoṭiyā cammadharā,
ja547:795.2	illīhatthā suvammino;
ja547:795.3	Purato paṭipajjiṁsu,
ja547:795.4	vessantare payātamhi;
ja547:795.5	Sivīnaṁ raṭṭhavaḍḍhane.
ja547:796.1	Te pāvisuṁ puraṁ rammaṁ,
ja547:796.2	mahāpākāratoraṇaṁ;
ja547:796.3	Upetaṁ annapānehi,
ja547:796.4	naccagītehi cūbhayaṁ.
ja547:797.1	Vittā jānapadā āsuṁ,
ja547:797.2	negamā ca samāgatā;
ja547:797.3	Anuppatte kumāramhi,
ja547:797.4	sivīnaṁ raṭṭhavaḍḍhane.
ja547:798.1	Celukkhepo avattittha,
ja547:798.2	āgate dhanadāyake;
ja547:798.3	Nandiṁ pavesi nagare,
ja547:798.4	bandhanā mokkho aghosatha.
ja547:799.1	Jātarūpamayaṁ vassaṁ,
ja547:799.2	devo pāvassi tāvade;
ja547:799.3	Vessantare paviṭṭhamhi,
ja547:799.4	sivīnaṁ raṭṭhavaḍḍhane.
ja547:800.1	Tato vessantaro rājā,
ja547:800.2	Dānaṁ datvāna khattiyo;
ja547:800.3	Kāyassa bhedā sappañño,
ja547:800.4	Saggaṁ so upapajjathāti.
ja547:801.1	Vessantarajātakaṁ dasamaṁ.
ja547:802.1	Mahānipātaṁ niṭṭhitaṁ.
ja547:803.1	Jātakapāḷi niṭṭhitā.