# Itivuttaka — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

iti1:0.1	Itivuttaka 1
iti1:0.2	Ekakanipāta
iti1:0.3	Paṭhamavagga
iti1:0.4	Lobhasutta
iti1:1.1	Vuttañhetaṁ bhagavatā vuttamarahatāti me sutaṁ:
iti1:2.1	“Ekadhammaṁ, bhikkhave, pajahatha;
iti1:2.2	ahaṁ vo pāṭibhogo anāgāmitāya.
iti1:2.3	Katamaṁ ekadhammaṁ?
iti1:2.4	Lobhaṁ, bhikkhave, ekadhammaṁ pajahatha;
iti1:2.5	ahaṁ vo pāṭibhogo anāgāmitāyā”ti.
iti1:2.6	Etamatthaṁ bhagavā avoca.
iti1:2.7	Tatthetaṁ iti vuccati:
iti1:3.1	“Yena lobhena luddhāse,
iti1:3.2	sattā gacchanti duggatiṁ;
iti1:3.3	Taṁ lobhaṁ sammadaññāya,
iti1:3.4	pajahanti vipassino;
iti1:3.5	Pahāya na punāyanti,
iti1:3.6	imaṁ lokaṁ kudācanan”ti.
iti1:4.1	Ayampi attho vutto bhagavatā, iti me sutanti.
iti1:4.2	Paṭhamaṁ.
iti2:0.1	Itivuttaka 2
iti2:0.2	Ekakanipāta
iti2:0.3	Paṭhamavagga
iti2:0.4	Dosasutta
iti2:1.1	Vuttañhetaṁ bhagavatā vuttamarahatāti me sutaṁ:
iti2:2.1	“Ekadhammaṁ, bhikkhave, pajahatha;
iti2:2.2	ahaṁ vo pāṭibhogo anāgāmitāya.
iti2:2.3	Katamaṁ ekadhammaṁ?
iti2:2.4	Dosaṁ, bhikkhave, ekadhammaṁ pajahatha;
iti2:2.5	ahaṁ vo pāṭibhogo anāgāmitāyā”ti.
iti2:2.6	Etamatthaṁ bhagavā avoca.
iti2:2.7	Tatthetaṁ iti vuccati:
iti2:3.1	“Yena dosena duṭṭhāse,
iti2:3.2	sattā gacchanti duggatiṁ;
iti2:3.3	Taṁ dosaṁ sammadaññāya,
iti2:3.4	pajahanti vipassino;
iti2:3.5	Pahāya na punāyanti,
iti2:3.6	imaṁ lokaṁ kudācanan”ti.
iti2:4.1	Ayampi attho vutto bhagavatā, iti me sutanti.
iti2:4.2	Dutiyaṁ.
iti3:0.1	Itivuttaka 3
iti3:0.2	Ekakanipāta
iti3:0.3	Paṭhamavagga
iti3:0.4	Mohasutta
iti3:1.1	Vuttañhetaṁ bhagavatā vuttamarahatāti me sutaṁ:
iti3:2.1	“Ekadhammaṁ, bhikkhave, pajahatha;
iti3:2.2	ahaṁ vo pāṭibhogo anāgāmitāya.
iti3:2.3	Katamaṁ ekadhammaṁ?
iti3:2.4	Mohaṁ, bhikkhave, ekadhammaṁ pajahatha;
iti3:2.5	ahaṁ vo pāṭibhogo anāgāmitāyā”ti.
iti3:2.6	Etamatthaṁ bhagavā avoca.
iti3:2.7	Tatthetaṁ iti vuccati:
iti3:3.1	“Yena mohena mūḷhāse,
iti3:3.2	sattā gacchanti duggatiṁ;
iti3:3.3	Taṁ mohaṁ sammadaññāya,
iti3:3.4	pajahanti vipassino;
iti3:3.5	Pahāya na punāyanti,
iti3:3.6	imaṁ lokaṁ kudācanan”ti.
iti3:4.1	Ayampi attho vutto bhagavatā, iti me sutanti.
iti3:4.2	Tatiyaṁ.
iti4:0.1	Itivuttaka 4
iti4:0.2	Ekakanipāta
iti4:0.3	Paṭhamavagga
iti4:0.4	Kodhasutta
iti4:1.1	Vuttañhetaṁ bhagavatā vuttamarahatāti me sutaṁ:
iti4:2.1	“Ekadhammaṁ, bhikkhave, pajahatha;
iti4:2.2	ahaṁ vo pāṭibhogo anāgāmitāya.
iti4:2.3	Katamaṁ ekadhammaṁ?
iti4:2.4	Kodhaṁ, bhikkhave, ekadhammaṁ pajahatha;
iti4:2.5	ahaṁ vo pāṭibhogo anāgāmitāyā”ti.
iti4:2.6	Etamatthaṁ bhagavā avoca.
iti4:2.7	Tatthetaṁ iti vuccati:
iti4:3.1	“Yena kodhena kuddhāse,
iti4:3.2	sattā gacchanti duggatiṁ;
iti4:3.3	Taṁ kodhaṁ sammadaññāya,
iti4:3.4	pajahanti vipassino;
iti4:3.5	Pahāya na punāyanti,
iti4:3.6	imaṁ lokaṁ kudācanan”ti.
iti4:4.1	Ayampi attho vutto bhagavatā, iti me sutanti.
iti4:4.2	Catutthaṁ.
iti5:0.1	Itivuttaka 5
iti5:0.2	Ekakanipāta
iti5:0.3	Paṭhamavagga
iti5:0.4	Makkhasutta
iti5:1.1	Vuttañhetaṁ bhagavatā vuttamarahatāti me sutaṁ:
iti5:2.1	“Ekadhammaṁ, bhikkhave, pajahatha;
iti5:2.2	ahaṁ vo pāṭibhogo anāgāmitāya.
iti5:2.3	Katamaṁ ekadhammaṁ?
iti5:2.4	Makkhaṁ, bhikkhave, ekadhammaṁ pajahatha;
iti5:2.5	ahaṁ vo pāṭibhogo anāgāmitāyā”ti.
iti5:2.6	Etamatthaṁ bhagavā avoca.
iti5:2.7	Tatthetaṁ iti vuccati:
iti5:3.1	“Yena makkhena makkhāse,
iti5:3.2	sattā gacchanti duggatiṁ;
iti5:3.3	Taṁ makkhaṁ sammadaññāya,
iti5:3.4	pajahanti vipassino;
iti5:3.5	Pahāya na punāyanti,
iti5:3.6	imaṁ lokaṁ kudācanan”ti.
iti5:4.1	Ayampi attho vutto bhagavatā, iti me sutanti.
iti5:4.2	Pañcamaṁ.
iti6:0.1	Itivuttaka 6
iti6:0.2	Ekakanipāta
iti6:0.3	Paṭhamavagga
iti6:0.4	Mānasutta
iti6:1.1	Vuttañhetaṁ bhagavatā vuttamarahatāti me sutaṁ:
iti6:2.1	“Ekadhammaṁ, bhikkhave, pajahatha;
iti6:2.2	ahaṁ vo pāṭibhogo anāgāmitāya.
iti6:2.3	Katamaṁ ekadhammaṁ?
iti6:2.4	Mānaṁ, bhikkhave, ekadhammaṁ pajahatha;
iti6:2.5	ahaṁ vo pāṭibhogo anāgāmitāyā”ti.
iti6:2.6	Etamatthaṁ bhagavā avoca.
iti6:2.7	Tatthetaṁ iti vuccati:
iti6:3.1	“Yena mānena mattāse,
iti6:3.2	sattā gacchanti duggatiṁ;
iti6:3.3	Taṁ mānaṁ sammadaññāya,
iti6:3.4	pajahanti vipassino;
iti6:3.5	Pahāya na punāyanti,
iti6:3.6	imaṁ lokaṁ kudācanan”ti.
iti6:4.1	Ayampi attho vutto bhagavatā, iti me sutanti.
iti6:4.2	Chaṭṭhaṁ.
iti7:0.1	Itivuttaka 7
iti7:0.2	Ekakanipāta
iti7:0.3	Paṭhamavagga
iti7:0.4	Sabbapariññāsutta
iti7:1.1	Vuttañhetaṁ bhagavatā vuttamarahatāti me sutaṁ:
iti7:2.1	“Sabbaṁ, bhikkhave, anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya.
iti7:2.2	Sabbañca kho, bhikkhave, abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā”ti.
iti7:2.3	Etamatthaṁ bhagavā avoca.
iti7:2.4	Tatthetaṁ iti vuccati:
iti7:3.1	“Yo sabbaṁ sabbato ñatvā,
iti7:3.2	sabbatthesu na rajjati;
iti7:3.3	Sa ve sabbapariññā so,
iti7:3.4	sabbadukkhamupaccagā”ti.
iti7:4.1	Ayampi attho vutto bhagavatā, iti me sutanti.
iti7:4.2	Sattamaṁ.
iti8:0.1	Itivuttaka 8
iti8:0.2	Ekakanipāta
iti8:0.3	Paṭhamavagga
iti8:0.4	Mānapariññāsutta
iti8:1.1	Vuttañhetaṁ bhagavatā vuttamarahatāti me sutaṁ:
iti8:2.1	“Mānaṁ, bhikkhave, anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya.
iti8:2.2	Mānañca kho, bhikkhave, abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā”ti.
iti8:2.3	Etamatthaṁ bhagavā avoca.
iti8:2.4	Tatthetaṁ iti vuccati:
iti8:3.1	“Mānupetā ayaṁ pajā,
iti8:3.2	mānaganthā bhave ratā;
iti8:3.3	Mānaṁ aparijānantā,
iti8:3.4	āgantāro punabbhavaṁ.
iti8:4.1	Ye ca mānaṁ pahantvāna,
iti8:4.2	vimuttā mānasaṅkhaye;
iti8:4.3	Te mānaganthābhibhuno,
iti8:4.4	sabbadukkhamupaccagun”ti.
iti8:5.1	Ayampi attho vutto bhagavatā, iti me sutanti.
iti8:5.2	Aṭṭhamaṁ.
iti9:0.1	Itivuttaka 9
iti9:0.2	Ekakanipāta
iti9:0.3	Paṭhamavagga
iti9:0.4	Lobhapariññāsutta
iti9:1.1	Vuttañhetaṁ bhagavatā vuttamarahatāti me sutaṁ:
iti9:2.1	“Lobhaṁ, bhikkhave, anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya.
iti9:2.2	Lobhañca kho, bhikkhave, abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā”ti.
iti9:2.3	Etamatthaṁ bhagavā avoca.
iti9:2.4	Tatthetaṁ iti vuccati:
iti9:3.1	“Yena lobhena luddhāse,
iti9:3.2	sattā gacchanti duggatiṁ;
iti9:3.3	Taṁ lobhaṁ sammadaññāya,
iti9:3.4	pajahanti vipassino;
iti9:3.5	Pahāya na punāyanti,
iti9:3.6	imaṁ lokaṁ kudācanan”ti.
iti9:4.1	Ayampi attho vutto bhagavatā, iti me sutanti.
iti9:4.2	Navamaṁ.
iti10:0.1	Itivuttaka 10
iti10:0.2	Ekakanipāta
iti10:0.3	Paṭhamavagga
iti10:0.4	Dosapariññāsutta
iti10:1.1	Vuttañhetaṁ bhagavatā vuttamarahatāti me sutaṁ:
iti10:2.1	“Dosaṁ, bhikkhave, anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya.
iti10:2.2	Dosañca kho, bhikkhave, abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā”ti.
iti10:2.3	Etamatthaṁ bhagavā avoca.
iti10:2.4	Tatthetaṁ iti vuccati:
iti10:3.1	“Yena dosena duṭṭhāse,
iti10:3.2	sattā gacchanti duggatiṁ;
iti10:3.3	Taṁ dosaṁ sammadaññāya,
iti10:3.4	pajahanti vipassino;
iti10:3.5	Pahāya na punāyanti,
iti10:3.6	imaṁ lokaṁ kudācanan”ti.
iti10:4.1	Ayampi attho vutto bhagavatā, iti me sutanti.
iti10:4.2	Dasamaṁ.
iti10:4.3	Pāṭibhogavaggo paṭhamo.
iti10:5.0	Tassuddānaṁ
iti10:5.1	Rāgadosā atha moho,
iti10:5.2	Kodhamakkhā mānaṁ sabbaṁ;
iti10:5.3	Mānato rāgadosā puna dve,
iti10:5.4	Pakāsitā vaggamāhu paṭhamanti.
iti11:0.1	Itivuttaka 11
iti11:0.2	Ekakanipāta
iti11:0.3	Dutiyavagga
iti11:0.4	Mohapariññāsutta
iti11:1.1	Vuttañhetaṁ bhagavatā vuttamarahatāti me sutaṁ:
iti11:2.1	“Mohaṁ, bhikkhave, anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya.
iti11:2.2	Mohañca kho, bhikkhave, abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā”ti.
iti11:2.3	Etamatthaṁ bhagavā avoca.
iti11:2.4	Tatthetaṁ iti vuccati:
iti11:3.1	“Yena mohena mūḷhāse,
iti11:3.2	sattā gacchanti duggatiṁ;
iti11:3.3	Taṁ mohaṁ sammadaññāya,
iti11:3.4	pajahanti vipassino;
iti11:3.5	Pahāya na punāyanti,
iti11:3.6	imaṁ lokaṁ kudācanan”ti.
iti11:4.1	Ayampi attho vutto bhagavatā, iti me sutanti.
iti11:4.2	Paṭhamaṁ.
iti12:0.1	Itivuttaka 12
iti12:0.2	Ekakanipāta
iti12:0.3	Dutiyavagga
iti12:0.4	Kodhapariññāsutta
iti12:1.1	Vuttañhetaṁ bhagavatā vuttamarahatāti me sutaṁ:
iti12:2.1	“Kodhaṁ, bhikkhave, anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya.
iti12:2.2	Kodhañca kho, bhikkhave, abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā”ti.
iti12:2.3	Etamatthaṁ bhagavā avoca.
iti12:2.4	Tatthetaṁ iti vuccati:
iti12:3.1	“Yena kodhena kuddhāse,
iti12:3.2	sattā gacchanti duggatiṁ;
iti12:3.3	Taṁ kodhaṁ sammadaññāya,
iti12:3.4	pajahanti vipassino;
iti12:3.5	Pahāya na punāyanti,
iti12:3.6	imaṁ lokaṁ kudācanan”ti.
iti12:4.1	Ayampi attho vutto bhagavatā, iti me sutanti.
iti12:4.2	Dutiyaṁ.
iti13:0.1	Itivuttaka 13
iti13:0.2	Ekakanipāta
iti13:0.3	Dutiyavagga
iti13:0.4	Makkhapariññāsutta
iti13:1.1	Vuttañhetaṁ bhagavatā vuttamarahatāti me sutaṁ:
iti13:2.1	“Makkhaṁ, bhikkhave, anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya.
iti13:2.2	Makkhañca kho, bhikkhave, abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā”ti.
iti13:2.3	Etamatthaṁ bhagavā avoca.
iti13:2.4	Tatthetaṁ iti vuccati:
iti13:3.1	“Yena makkhena makkhāse,
iti13:3.2	sattā gacchanti duggatiṁ;
iti13:3.3	Taṁ makkhaṁ sammadaññāya,
iti13:3.4	pajahanti vipassino;
iti13:3.5	Pahāya na punāyanti,
iti13:3.6	imaṁ lokaṁ kudācanan”ti.
iti13:4.1	Ayampi attho vutto bhagavatā, iti me sutanti.
iti13:4.2	Tatiyaṁ.
iti14:0.1	Itivuttaka 14
iti14:0.2	Ekakanipāta
iti14:0.3	Dutiyavagga
iti14:0.4	Avijjānīvaraṇasutta
iti14:1.1	Vuttañhetaṁ bhagavatā vuttamarahatāti me sutaṁ:
iti14:2.1	“Nāhaṁ, bhikkhave, aññaṁ ekanīvaraṇampi samanupassāmi yena nīvaraṇena nivutā pajā dīgharattaṁ sandhāvanti saṁsaranti yathayidaṁ, bhikkhave, avijjānīvaraṇaṁ.
iti14:2.2	Avijjānīvaraṇena hi, bhikkhave, nivutā pajā dīgharattaṁ sandhāvanti saṁsarantī”ti.
iti14:2.3	Etamatthaṁ bhagavā avoca.
iti14:2.4	Tatthetaṁ iti vuccati:
iti14:3.1	“Natthañño ekadhammopi,
iti14:3.2	yenevaṁ nivutā pajā;
iti14:3.3	Saṁsaranti ahorattaṁ,
iti14:3.4	yathā mohena āvutā.
iti14:4.1	Ye ca mohaṁ pahantvāna,
iti14:4.2	tamokhandhaṁ padālayuṁ;
iti14:4.3	Na te puna saṁsaranti,
iti14:4.4	hetu tesaṁ na vijjatī”ti.
iti14:5.1	Ayampi attho vutto bhagavatā, iti me sutanti.
iti14:5.2	Catutthaṁ.
iti15:0.1	Itivuttaka 15
iti15:0.2	Ekakanipāta
iti15:0.3	Dutiyavagga
iti15:0.4	Taṇhāsaṁyojanasutta
iti15:1.1	Vuttañhetaṁ bhagavatā vuttamarahatāti me sutaṁ:
iti15:2.1	“Nāhaṁ, bhikkhave, aññaṁ ekasaṁyojanampi samanupassāmi yena saṁyojanena saṁyuttā sattā dīgharattaṁ sandhāvanti saṁsaranti yathayidaṁ, bhikkhave, taṇhāsaṁyojanaṁ.
iti15:2.2	Taṇhāsaṁyojanena hi, bhikkhave, saṁyuttā sattā dīgharattaṁ sandhāvanti saṁsarantī”ti.
iti15:2.3	Etamatthaṁ bhagavā avoca.
iti15:2.4	Tatthetaṁ iti vuccati:
iti15:3.1	“Taṇhādutiyo puriso,
iti15:3.2	dīghamaddhāna saṁsaraṁ;
iti15:3.3	Itthabhāvaññathābhāvaṁ,
iti15:3.4	saṁsāraṁ nātivattati.
iti15:4.1	Etamādīnavaṁ ñatvā,
iti15:4.2	Taṇhaṁ dukkhassa sambhavaṁ;
iti15:4.3	Vītataṇho anādāno,
iti15:4.4	Sato bhikkhu paribbaje”ti.
iti15:5.1	Ayampi attho vutto bhagavatā, iti me sutanti.
iti15:5.2	Pañcamaṁ.
iti16:0.1	Itivuttaka 16
iti16:0.2	Ekakanipāta
iti16:0.3	Dutiyavagga
iti16:0.4	Paṭhamasekhasutta
iti16:1.1	Vuttañhetaṁ bhagavatā vuttamarahatāti me sutaṁ:
iti16:2.1	“Sekhassa, bhikkhave, bhikkhuno appattamānasassa anuttaraṁ yogakkhemaṁ patthayamānassa viharato ajjhattikaṁ aṅganti karitvā nāññaṁ ekaṅgampi samanupassāmi yaṁ evaṁ bahūpakāraṁ yathayidaṁ, bhikkhave, yoniso manasikāro.
iti16:2.2	Yoniso, bhikkhave, bhikkhu manasi karonto akusalaṁ pajahati, kusalaṁ bhāvetī”ti.
iti16:2.3	Etamatthaṁ bhagavā avoca.
iti16:2.4	Tatthetaṁ iti vuccati:
iti16:3.1	“Yonisomanasikāro,
iti16:3.2	dhammo sekhassa bhikkhuno;
iti16:3.3	Natthañño evaṁ bahukāro,
iti16:3.4	uttamatthassa pattiyā;
iti16:3.5	Yoniso padahaṁ bhikkhu,
iti16:3.6	khayaṁ dukkhassa pāpuṇe”ti.
iti16:4.1	Ayampi attho vutto bhagavatā, iti me sutanti.
iti16:4.2	Chaṭṭhaṁ.
iti17:0.1	Itivuttaka 17
iti17:0.2	Ekakanipāta
iti17:0.3	Dutiyavagga
iti17:0.4	Dutiyasekhasutta
iti17:1.1	Vuttañhetaṁ bhagavatā vuttamarahatāti me sutaṁ:
iti17:2.1	“Sekhassa, bhikkhave, bhikkhuno appattamānasassa anuttaraṁ yogakkhemaṁ patthayamānassa viharato bāhiraṁ aṅganti karitvā nāññaṁ ekaṅgampi samanupassāmi yaṁ evaṁ bahūpakāraṁ yathayidaṁ, bhikkhave, kalyāṇamittatā.
iti17:2.2	Kalyāṇamitto, bhikkhave, bhikkhu akusalaṁ pajahati, kusalaṁ bhāvetī”ti.
iti17:2.3	Etamatthaṁ bhagavā avoca.
iti17:2.4	Tatthetaṁ iti vuccati:
iti17:3.1	“Kalyāṇamitto yo bhikkhu,
iti17:3.2	sappatisso sagāravo;
iti17:3.3	Karaṁ mittānaṁ vacanaṁ,
iti17:3.4	sampajāno patissato;
iti17:3.5	Pāpuṇe anupubbena,
iti17:3.6	sabbasaṁyojanakkhayan”ti.
iti17:4.1	Ayampi attho vutto bhagavatā, iti me sutanti.
iti17:4.2	Sattamaṁ.
iti18:0.1	Itivuttaka 18
iti18:0.2	Ekakanipāta
iti18:0.3	Dutiyavagga
iti18:0.4	Saṅghabhedasutta
iti18:1.1	Vuttañhetaṁ bhagavatā vuttamarahatāti me sutaṁ:
iti18:2.1	“Ekadhammo, bhikkhave, loke uppajjamāno uppajjati bahujanāhitāya bahujanāsukhāya bahuno janassa anatthāya ahitāya dukkhāya devamanussānaṁ.
iti18:2.2	Katamo ekadhammo?
iti18:2.3	Saṅghabhedo.
iti18:2.4	Saṅghe kho pana, bhikkhave, bhinne aññamaññaṁ bhaṇḍanāni ceva honti, aññamaññaṁ paribhāsā ca honti, aññamaññaṁ parikkhepā ca honti, aññamaññaṁ pariccajanā ca honti.
iti18:2.5	Tattha appasannā ceva nappasīdanti, pasannānañca ekaccānaṁ aññathattaṁ hotī”ti.
iti18:2.6	Etamatthaṁ bhagavā avoca.
iti18:2.7	Tatthetaṁ iti vuccati:
iti18:3.1	“Āpāyiko nerayiko,
iti18:3.2	Kappaṭṭho saṅghabhedako;
iti18:3.3	Vaggārāmo adhammaṭṭho,
iti18:3.4	Yogakkhemā padhaṁsati;
iti18:3.5	Saṅghaṁ samaggaṁ bhetvāna,
iti18:3.6	Kappaṁ nirayamhi paccatī”ti.
iti18:4.1	Ayampi attho vutto bhagavatā, iti me sutanti.
iti18:4.2	Aṭṭhamaṁ.
iti19:0.1	Itivuttaka 19
iti19:0.2	Ekakanipāta
iti19:0.3	Dutiyavagga
iti19:0.4	Saṅghasāmaggīsutta
iti19:1.1	Vuttañhetaṁ bhagavatā vuttamarahatāti me sutaṁ:
iti19:2.1	“Ekadhammo, bhikkhave, loke uppajjamāno uppajjati bahujanahitāya bahujanasukhāya bahuno janassa atthāya hitāya sukhāya devamanussānaṁ.
iti19:2.2	Katamo ekadhammo?
iti19:2.3	Saṅghasāmaggī.
iti19:2.4	Saṅghe kho pana, bhikkhave, samagge na ceva aññamaññaṁ bhaṇḍanāni honti, na ca aññamaññaṁ paribhāsā honti, na ca aññamaññaṁ parikkhepā honti, na ca aññamaññaṁ pariccajanā honti.
iti19:2.5	Tattha appasannā ceva pasīdanti, pasannānañca bhiyyobhāvo hotī”ti.
iti19:2.6	Etamatthaṁ bhagavā avoca.
iti19:2.7	Tatthetaṁ iti vuccati:
iti19:3.1	“Sukhā saṅghassa sāmaggī,
iti19:3.2	samaggānañcanuggaho;
iti19:3.3	Samaggarato dhammaṭṭho,
iti19:3.4	yogakkhemā na dhaṁsati;
iti19:3.5	Saṅghaṁ samaggaṁ katvāna,
iti19:3.6	kappaṁ saggamhi modatī”ti.
iti19:4.1	Ayampi attho vutto bhagavatā, iti me sutanti.
iti19:4.2	Navamaṁ.
iti20:0.1	Itivuttaka 20
iti20:0.2	Ekakanipāta
iti20:0.3	Dutiyavagga
iti20:0.4	Paduṭṭhacittasutta
iti20:1.1	Vuttañhetaṁ bhagavatā vuttamarahatāti me sutaṁ:
iti20:2.1	“Idhāhaṁ, bhikkhave, ekaccaṁ puggalaṁ paduṭṭhacittaṁ evaṁ cetasā ceto paricca pajānāmi:
iti20:2.2	‘imamhi cāyaṁ samaye puggalo kālaṁ kareyya yathābhataṁ nikkhitto evaṁ niraye’.
iti20:2.3	Taṁ kissa hetu?
iti20:2.4	Cittaṁ hissa, bhikkhave, paduṭṭhaṁ.
iti20:2.5	Cetopadosahetu kho pana, bhikkhave, evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjantī”ti.
iti20:2.6	Etamatthaṁ bhagavā avoca.
iti20:2.7	Tatthetaṁ iti vuccati:
iti20:3.1	“Paduṭṭhacittaṁ ñatvāna,
iti20:3.2	ekaccaṁ idha puggalaṁ;
iti20:3.3	Etamatthañca byākāsi,
iti20:3.4	buddho bhikkhūna santike.
iti20:4.1	Imamhi cāyaṁ samaye,
iti20:4.2	kālaṁ kayirātha puggalo;
iti20:4.3	Nirayaṁ upapajjeyya,
iti20:4.4	cittaṁ hissa padūsitaṁ.
iti20:5.1	Yathā haritvā nikkhipeyya,
iti20:5.2	evamevaṁ tathāvidho;
iti20:5.3	Cetopadosahetu hi,
iti20:5.4	sattā gacchanti duggatin”ti.
iti20:6.1	Ayampi attho vutto bhagavatā, iti me sutanti.
iti20:6.2	Dasamaṁ.
iti20:6.3	Dutiyo vaggo.
iti20:7.0	Tassuddānaṁ
iti20:7.1	Moho kodho atha makkho,
iti20:7.2	Vijjā taṇhā sekhaduve ca;
iti20:7.3	Bhedo sāmaggipuggalo,
iti20:7.4	Vaggamāhu dutiyanti vuccatīti.
iti21:0.1	Itivuttaka 21
iti21:0.2	Ekakanipāta
iti21:0.3	Tatiyavagga
iti21:0.4	Pasannacittasutta
iti21:1.1	Vuttañhetaṁ bhagavatā vuttamarahatāti me sutaṁ:
iti21:2.1	“Idhāhaṁ, bhikkhave, ekaccaṁ puggalaṁ pasannacittaṁ evaṁ cetasā ceto paricca pajānāmi:
iti21:2.2	‘imamhi cāyaṁ samaye puggalo kālaṁ kareyya yathābhataṁ nikkhitto evaṁ sagge’.
iti21:2.3	Taṁ kissa hetu?
iti21:2.4	Cittaṁ hissa, bhikkhave, pasannaṁ.
iti21:2.5	Cetopasādahetu kho pana, bhikkhave, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.
iti21:2.6	Etamatthaṁ bhagavā avoca.
iti21:2.7	Tatthetaṁ iti vuccati:
iti21:3.1	“Pasannacittaṁ ñatvāna,
iti21:3.2	ekaccaṁ idha puggalaṁ;
iti21:3.3	Etamatthañca byākāsi,
iti21:3.4	buddho bhikkhūna santike.
iti21:4.1	Imamhi cāyaṁ samaye,
iti21:4.2	kālaṁ kayirātha puggalo;
iti21:4.3	Sugatiṁ upapajjeyya,
iti21:4.4	cittaṁ hissa pasāditaṁ.
iti21:5.1	Yathā haritvā nikkhipeyya,
iti21:5.2	evamevaṁ tathāvidho;
iti21:5.3	Cetopasādahetu hi,
iti21:5.4	sattā gacchanti suggatin”ti.
iti21:6.1	Ayampi attho vutto bhagavatā, iti me sutanti.
iti21:6.2	Paṭhamaṁ.
iti22:0.1	Itivuttaka 22
iti22:0.2	Ekakanipāta
iti22:0.3	Tatiyavagga
iti22:0.4	Mettasutta
iti22:1.1	Vuttañhetaṁ bhagavatā vuttamarahatāti me sutaṁ:
iti22:2.1	“Mā, bhikkhave, puññānaṁ bhāyittha.
iti22:2.2	Sukhassetaṁ, bhikkhave, adhivacanaṁ iṭṭhassa kantassa piyassa manāpassa yadidaṁ puññāni.
iti22:2.3	Abhijānāmi kho panāhaṁ, bhikkhave, dīgharattaṁ katānaṁ puññānaṁ iṭṭhaṁ kantaṁ piyaṁ manāpaṁ vipākaṁ paccanubhūtaṁ.
iti22:2.4	Satta vassāni mettacittaṁ bhāvetvā satta saṁvaṭṭavivaṭṭakappe nayimaṁ lokaṁ punarāgamāsiṁ.
iti22:2.5	Saṁvaṭṭamāne sudaṁ, bhikkhave, kappe ābhassarūpago homi;
iti22:2.6	vivaṭṭamāne kappe suññaṁ brahmavimānaṁ upapajjāmi.
iti22:3.1	Tatra sudaṁ, bhikkhave, brahmā homi mahābrahmā abhibhū anabhibhūto aññadatthudaso vasavattī.
iti22:3.2	Chattiṁsakkhattuṁ kho panāhaṁ, bhikkhave, sakko ahosiṁ devānamindo;
iti22:3.3	anekasatakkhattuṁ rājā ahosiṁ cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato.
iti22:3.4	Ko pana vādo padesarajjassa.
iti22:4.1	Tassa mayhaṁ, bhikkhave, etadahosi:
iti22:4.2	‘kissa nu kho me idaṁ kammassa phalaṁ, kissa kammassa vipāko, yenāhaṁ etarahi evaṁmahiddhiko evaṁmahānubhāvo’ti?
iti22:4.3	Tassa mayhaṁ, bhikkhave, etadahosi:
iti22:4.4	‘tiṇṇaṁ kho me idaṁ kammānaṁ phalaṁ, tiṇṇaṁ kammānaṁ vipāko, yenāhaṁ etarahi evaṁmahiddhiko evaṁmahānubhāvoti, seyyathidaṁ—
iti22:4.5	dānassa, damassa, saññamassā’”ti.
iti22:4.6	Etamatthaṁ bhagavā avoca.
iti22:4.7	Tatthetaṁ iti vuccati:
iti22:5.1	“Puññameva so sikkheyya,
iti22:5.2	āyataggaṁ sukhudrayaṁ;
iti22:5.3	Dānañca samacariyañca,
iti22:5.4	mettacittañca bhāvaye.
iti22:6.1	Ete dhamme bhāvayitvā,
iti22:6.2	tayo sukhasamuddaye;
iti22:6.3	Abyāpajjaṁ sukhaṁ lokaṁ,
iti22:6.4	paṇḍito upapajjatī”ti.
iti22:7.1	Ayampi attho vutto bhagavatā, iti me sutanti.
iti22:7.2	Dutiyaṁ.
iti23:0.1	Itivuttaka 23
iti23:0.2	Ekakanipāta
iti23:0.3	Tatiyavagga
iti23:0.4	Ubhayatthasutta
iti23:1.1	Vuttañhetaṁ bhagavatā vuttamarahatāti me sutaṁ:
iti23:2.1	“Ekadhammo, bhikkhave, bhāvito bahulīkato ubho atthe samadhigayha tiṭṭhati—
iti23:2.2	diṭṭhadhammikañceva atthaṁ samparāyikañca.
iti23:2.3	Katamo ekadhammo?
iti23:2.4	Appamādo kusalesu dhammesu.
iti23:2.5	Ayaṁ kho, bhikkhave, ekadhammo bhāvito bahulīkato ubho atthe samadhigayha tiṭṭhati—
iti23:2.6	diṭṭhadhammikañceva atthaṁ samparāyikañcā”ti.
iti23:2.7	Etamatthaṁ bhagavā avoca.
iti23:2.8	Tatthetaṁ iti vuccati:
iti23:3.1	“Appamādaṁ pasaṁsanti,
iti23:3.2	puññakiriyāsu paṇḍitā;
iti23:3.3	Appamatto ubho atthe,
iti23:3.4	adhigaṇhāti paṇḍito.
iti23:4.1	Diṭṭhe dhamme ca yo attho,
iti23:4.2	yo cattho samparāyiko;
iti23:4.3	Atthābhisamayā dhīro,
iti23:4.4	paṇḍitoti pavuccatī”ti.
iti23:5.1	Ayampi attho vutto bhagavatā, iti me sutanti.
iti23:5.2	Tatiyaṁ.
iti24:0.1	Itivuttaka 24
iti24:0.2	Ekakanipāta
iti24:0.3	Tatiyavagga
iti24:0.4	Aṭṭhipuñjasutta
iti24:1.1	Vuttañhetaṁ bhagavatā vuttamarahatāti me sutaṁ:
iti24:2.1	“Ekapuggalassa, bhikkhave, kappaṁ sandhāvato saṁsarato siyā evaṁ mahā aṭṭhikaṅkalo aṭṭhipuñjo aṭṭhirāsi yathāyaṁ vepullo pabbato, sace saṁhārako assa, sambhatañca na vinasseyyā”ti.
iti24:2.2	Etamatthaṁ bhagavā avoca.
iti24:2.3	Tatthetaṁ iti vuccati:
iti24:3.1	“Ekassekena kappena,
iti24:3.2	puggalassaṭṭhisañcayo;
iti24:3.3	Siyā pabbatasamo rāsi,
iti24:3.4	iti vuttaṁ mahesinā.
iti24:4.1	So kho panāyaṁ akkhāto,
iti24:4.2	vepullo pabbato mahā;
iti24:4.3	Uttaro gijjhakūṭassa,
iti24:4.4	magadhānaṁ giribbaje.
iti24:5.1	Yato ca ariyasaccāni,
iti24:5.2	sammappaññāya passati;
iti24:5.3	Dukkhaṁ dukkhasamuppādaṁ,
iti24:5.4	dukkhassa ca atikkamaṁ;
iti24:5.5	Ariyañcaṭṭhaṅgikaṁ maggaṁ,
iti24:5.6	dukkhūpasamagāminaṁ.
iti24:6.1	Sa sattakkhattuṁ paramaṁ,
iti24:6.2	sandhāvitvāna puggalo;
iti24:6.3	Dukkhassantakaro hoti,
iti24:6.4	sabbasaṁyojanakkhayā”ti.
iti24:7.1	Ayampi attho vutto bhagavatā, iti me sutanti.
iti24:7.2	Catutthaṁ.
iti25:0.1	Itivuttaka 25
iti25:0.2	Ekakanipāta
iti25:0.3	Tatiyavagga
iti25:0.4	Musāvādasutta
iti25:1.1	Vuttañhetaṁ bhagavatā vuttamarahatāti me sutaṁ:
iti25:2.1	“Ekadhammaṁ atītassa, bhikkhave, purisapuggalassa nāhaṁ tassa kiñci pāpakammaṁ akaraṇīyanti vadāmi.
iti25:2.2	Katamaṁ ekadhammaṁ?
iti25:2.3	Yadidaṁ, bhikkhave, sampajānamusāvādo”ti.
iti25:2.4	Etamatthaṁ bhagavā avoca.
iti25:2.5	Tatthetaṁ iti vuccati:
iti25:3.1	“Ekadhammaṁ atītassa,
iti25:3.2	musāvādissa jantuno;
iti25:3.3	Vitiṇṇaparalokassa,
iti25:3.4	natthi pāpaṁ akāriyan”ti.
iti25:4.1	Ayampi attho vutto bhagavatā, iti me sutanti.
iti25:4.2	Pañcamaṁ.
iti26:0.1	Itivuttaka 26
iti26:0.2	Ekakanipāta
iti26:0.3	Tatiyavagga
iti26:0.4	Dānasutta
iti26:1.1	Vuttañhetaṁ bhagavatā vuttamarahatāti me sutaṁ:
iti26:2.1	“Evañce, bhikkhave, sattā jāneyyuṁ dānasaṁvibhāgassa vipākaṁ yathāhaṁ jānāmi, na adatvā bhuñjeyyuṁ, na ca nesaṁ maccheramalaṁ cittaṁ pariyādāya tiṭṭheyya.
iti26:2.2	Yopi nesaṁ assa carimo ālopo carimaṁ kabaḷaṁ, tatopi na asaṁvibhajitvā bhuñjeyyuṁ, sace nesaṁ paṭiggāhakā assu.
iti26:2.3	Yasmā ca kho, bhikkhave, sattā na evaṁ jānanti dānasaṁvibhāgassa vipākaṁ yathāhaṁ jānāmi, tasmā adatvā bhuñjanti, maccheramalañca nesaṁ cittaṁ pariyādāya tiṭṭhatī”ti.
iti26:2.4	Etamatthaṁ bhagavā avoca.
iti26:2.5	Tatthetaṁ iti vuccati:
iti26:3.1	“Evañce sattā jāneyyuṁ,
iti26:3.2	yathāvuttaṁ mahesinā;
iti26:3.3	Vipākaṁ saṁvibhāgassa,
iti26:3.4	yathā hoti mahapphalaṁ.
iti26:4.1	Vineyya maccheramalaṁ,
iti26:4.2	vippasannena cetasā;
iti26:4.3	Dajjuṁ kālena ariyesu,
iti26:4.4	yattha dinnaṁ mahapphalaṁ.
iti26:5.1	Annañca datvā bahuno,
iti26:5.2	dakkhiṇeyyesu dakkhiṇaṁ;
iti26:5.3	Ito cutā manussattā,
iti26:5.4	saggaṁ gacchanti dāyakā.
iti26:6.1	Te ca saggagatā tattha,
iti26:6.2	modanti kāmakāmino;
iti26:6.3	Vipākaṁ saṁvibhāgassa,
iti26:6.4	anubhonti amaccharā”ti.
iti26:7.1	Ayampi attho vutto bhagavatā, iti me sutanti.
iti26:7.2	Chaṭṭhaṁ.
iti27:0.1	Itivuttaka 27
iti27:0.2	Ekakanipāta
iti27:0.3	Tatiyavagga
iti27:0.4	Mettābhāvanāsutta
iti27:1.1	Vuttañhetaṁ bhagavatā vuttamarahatāti me sutaṁ:
iti27:2.1	“Yāni kānici, bhikkhave, opadhikāni puññakiriyavatthūni sabbāni tāni mettāya cetovimuttiyā kalaṁ nāgghanti soḷasiṁ.
iti27:2.2	Mettāyeva tāni cetovimutti adhiggahetvā bhāsate ca tapate ca virocati ca.
iti27:3.1	Seyyathāpi, bhikkhave, yā kāci tārakarūpānaṁ pabhā sabbā tā candiyā pabhāya kalaṁ nāgghanti soḷasiṁ, candapabhāyeva tā adhiggahetvā bhāsate ca tapate ca virocati ca;
iti27:3.2	evamevaṁ kho, bhikkhave, yāni kānici opadhikāni puññakiriyavatthūni sabbāni tāni mettāya cetovimuttiyā kalaṁ nāgghanti soḷasiṁ, mettāyeva tāni cetovimutti adhiggahetvā bhāsate ca tapate ca virocati ca.
iti27:4.1	Seyyathāpi, bhikkhave, vassānaṁ pacchime māse saradasamaye viddhe vigatavalāhake deve ādicco nabhaṁ abbhussakkamāno sabbaṁ ākāsagataṁ tamagataṁ abhivihacca bhāsate ca tapate ca virocati ca;
iti27:4.2	evamevaṁ kho, bhikkhave, yāni kānici opadhikāni puññakiriyavatthūni sabbāni tāni mettāya cetovimuttiyā kalaṁ nāgghanti soḷasiṁ, mettāyeva tāni cetovimutti adhiggahetvā bhāsate ca tapate ca virocati ca.
iti27:5.1	Seyyathāpi, bhikkhave, rattiyā paccūsasamayaṁ osadhitārakā bhāsate ca tapate ca virocati ca;
iti27:5.2	evamevaṁ kho, bhikkhave, yāni kānici opadhikāni puññakiriyavatthūni sabbāni tāni mettāya cetovimuttiyā kalaṁ nāgghanti soḷasiṁ, mettāyeva tāni cetovimutti adhiggahetvā bhāsate ca tapate ca virocati cā”ti.
iti27:5.3	Etamatthaṁ bhagavā avoca.
iti27:5.4	Tatthetaṁ iti vuccati:
iti27:6.1	“Yo ca mettaṁ bhāvayati,
iti27:6.2	appamāṇaṁ paṭissato;
iti27:6.3	Tanū saṁyojanā honti,
iti27:6.4	passato upadhikkhayaṁ.
iti27:7.1	Ekampi ce pāṇamaduṭṭhacitto,
iti27:7.2	Mettāyati kusalo tena hoti;
iti27:7.3	Sabbe ca pāṇe manasānukampaṁ,
iti27:7.4	Pahūtamariyo pakaroti puññaṁ.
iti27:8.1	Ye sattasaṇḍaṁ pathaviṁ vijitvā,
iti27:8.2	Rājisayo yajamānānupariyagā;
iti27:8.3	Assamedhaṁ purisamedhaṁ,
iti27:8.4	Sammāpāsaṁ vājapeyyaṁ niraggaḷaṁ.
iti27:9.1	Mettassa cittassa subhāvitassa,
iti27:9.2	Kalampi te nānubhavanti soḷasiṁ;
iti27:9.3	Candappabhā tāragaṇāva sabbe.
iti27:10.1	Yo na hanti na ghāteti,
iti27:10.2	na jināti na jāpaye;
iti27:10.3	Mettaṁso sabbabhūtesu,
iti27:10.4	veraṁ tassa na kenacī”ti.
iti27:11.1	Ayampi attho vutto bhagavatā, iti me sutanti.
iti27:11.2	Sattamaṁ.
iti27:11.3	Tatiyo vaggo.
iti27:12.0	Tassuddānaṁ
iti27:12.1	Cittaṁ mettaṁ ubho atthe,
iti27:12.2	puñjaṁ vepullapabbataṁ;
iti27:12.3	Sampajānamusāvādo,
iti27:12.4	dānañca mettabhāvanā.
iti27:13.1	Sattimāni ca suttāni,
iti27:13.2	purimāni ca vīsati;
iti27:13.3	Ekadhammesu suttantā,
iti27:13.4	sattavīsatisaṅgahāti.
iti27:13.5	Ekakanipāto niṭṭhito.
iti28:0.1	Itivuttaka 28
iti28:0.2	Dukanipāta
iti28:0.3	Paṭhamavagga
iti28:0.4	Dukkhavihārasutta
iti28:1.1	(…) Vuttañhetaṁ bhagavatā vuttamarahatāti me sutaṁ:
iti28:2.1	“Dvīhi, bhikkhave, dhammehi samannāgato bhikkhu diṭṭheva dhamme dukkhaṁ viharati savighātaṁ saupāyāsaṁ sapariḷāhaṁ;
iti28:2.2	kāyassa bhedā paraṁ maraṇā duggati pāṭikaṅkhā.
iti28:2.3	Katamehi dvīhi?
iti28:2.4	Indriyesu aguttadvāratāya ca, bhojane amattaññutāya ca.
iti28:2.5	Imehi kho, bhikkhave, dvīhi dhammehi samannāgato bhikkhu diṭṭheva dhamme dukkhaṁ viharati savighātaṁ saupāyāsaṁ sapariḷāhaṁ;
iti28:2.6	kāyassa bhedā paraṁ maraṇā duggati pāṭikaṅkhā”ti.
iti28:2.7	Etamatthaṁ bhagavā avoca.
iti28:2.8	Tatthetaṁ iti vuccati:
iti28:3.1	“Cakkhu sotañca ghānañca,
iti28:3.2	jivhā kāyo tathā mano;
iti28:3.3	Etāni yassa dvārāni,
iti28:3.4	aguttāni ca bhikkhuno.
iti28:4.1	Bhojanamhi amattaññū,
iti28:4.2	indriyesu asaṁvuto;
iti28:4.3	Kāyadukkhaṁ cetodukkhaṁ,
iti28:4.4	dukkhaṁ so adhigacchati.
iti28:5.1	Ḍayhamānena kāyena,
iti28:5.2	Ḍayhamānena cetasā;
iti28:5.3	Divā vā yadi vā rattiṁ,
iti28:5.4	Dukkhaṁ viharati tādiso”ti.
iti28:6.1	Ayampi attho vutto bhagavatā, iti me sutanti.
iti28:6.2	Paṭhamaṁ.
iti29:0.1	Itivuttaka 29
iti29:0.2	Dukanipāta
iti29:0.3	Paṭhamavagga
iti29:0.4	Sukhavihārasutta
iti29:1.1	Vuttañhetaṁ bhagavatā vuttamarahatāti me sutaṁ:
iti29:2.1	“Dvīhi, bhikkhave, dhammehi samannāgato bhikkhu diṭṭheva dhamme sukhaṁ viharati avighātaṁ anupāyāsaṁ apariḷāhaṁ;
iti29:2.2	kāyassa bhedā paraṁ maraṇā sugati pāṭikaṅkhā.
iti29:2.3	Katamehi dvīhi?
iti29:2.4	Indriyesu guttadvāratāya ca, bhojane mattaññutāya ca.
iti29:2.5	Imehi kho, bhikkhave, dvīhi dhammehi samannāgato bhikkhu diṭṭheva dhamme sukhaṁ viharati avighātaṁ anupāyāsaṁ apariḷāhaṁ;
iti29:2.6	kāyassa bhedā paraṁ maraṇā sugati pāṭikaṅkhā”ti.
iti29:2.7	Etamatthaṁ bhagavā avoca.
iti29:2.8	Tatthetaṁ iti vuccati:
iti29:3.1	“Cakkhu sotañca ghānañca,
iti29:3.2	jivhā kāyo tathā mano;
iti29:3.3	Etāni yassa dvārāni,
iti29:3.4	suguttāni ca bhikkhuno.
iti29:4.1	Bhojanamhi ca mattaññū,
iti29:4.2	indriyesu ca saṁvuto;
iti29:4.3	Kāyasukhaṁ cetosukhaṁ,
iti29:4.4	sukhaṁ so adhigacchati.
iti29:5.1	Aḍayhamānena kāyena,
iti29:5.2	Aḍayhamānena cetasā;
iti29:5.3	Divā vā yadi vā rattiṁ,
iti29:5.4	Sukhaṁ viharati tādiso”ti.
iti29:6.1	Ayampi attho vutto bhagavatā, iti me sutanti.
iti29:6.2	Dutiyaṁ.
iti30:0.1	Itivuttaka 30
iti30:0.2	Dukanipāta
iti30:0.3	Paṭhamavagga
iti30:0.4	Tapanīyasutta
iti30:1.1	Vuttañhetaṁ bhagavatā vuttamarahatāti me sutaṁ:
iti30:2.1	“Dveme, bhikkhave, dhammā tapanīyā.
iti30:2.2	Katame dve?
iti30:2.3	Idha, bhikkhave, ekacco akatakalyāṇo hoti, akatakusalo, akatabhīruttāṇo, katapāpo, kataluddo, katakibbiso.
iti30:2.4	So ‘akataṁ me kalyāṇan’tipi tappati, ‘kataṁ me pāpan’tipi tappati.
iti30:2.5	Ime kho, bhikkhave, dve dhammā tapanīyā”ti.
iti30:2.6	Etamatthaṁ bhagavā avoca.
iti30:2.7	Tatthetaṁ iti vuccati:
iti30:3.1	“Kāyaduccaritaṁ katvā,
iti30:3.2	vacīduccaritāni ca;
iti30:3.3	Manoduccaritaṁ katvā,
iti30:3.4	yañcaññaṁ dosasañhitaṁ.
iti30:4.1	Akatvā kusalaṁ kammaṁ,
iti30:4.2	katvānākusalaṁ bahuṁ;
iti30:4.3	Kāyassa bhedā duppañño,
iti30:4.4	nirayaṁ sopapajjatī”ti.
iti30:5.1	Ayampi attho vutto bhagavatā, iti me sutanti.
iti30:5.2	Tatiyaṁ.
iti31:0.1	Itivuttaka 31
iti31:0.2	Dukanipāta
iti31:0.3	Paṭhamavagga
iti31:0.4	Atapanīyasutta
iti31:1.1	Vuttañhetaṁ bhagavatā vuttamarahatāti me sutaṁ:
iti31:2.1	“Dveme, bhikkhave, dhammā atapanīyā.
iti31:2.2	Katame dve?
iti31:2.3	Idha, bhikkhave, ekacco katakalyāṇo hoti, katakusalo, katabhīruttāṇo, akatapāpo, akataluddo, akatakibbiso.
iti31:2.4	So ‘kataṁ me kalyāṇan’tipi na tappati, ‘akataṁ me pāpan’tipi na tappati.
iti31:2.5	Ime kho, bhikkhave, dve dhammā atapanīyā”ti.
iti31:2.6	Etamatthaṁ bhagavā avoca.
iti31:2.7	Tatthetaṁ iti vuccati:
iti31:3.1	“Kāyaduccaritaṁ hitvā,
iti31:3.2	vacīduccaritāni ca;
iti31:3.3	Manoduccaritaṁ hitvā,
iti31:3.4	yañcaññaṁ dosasañhitaṁ.
iti31:4.1	Akatvākusalaṁ kammaṁ,
iti31:4.2	katvāna kusalaṁ bahuṁ;
iti31:4.3	Kāyassa bhedā sappañño,
iti31:4.4	saggaṁ so upapajjatī”ti.
iti31:5.1	Ayampi attho vutto bhagavatā, iti me sutanti.
iti31:5.2	Catutthaṁ.
iti32:0.1	Itivuttaka 32
iti32:0.2	Dukanipāta
iti32:0.3	Paṭhamavagga
iti32:0.4	Paṭhamasīlasutta
iti32:1.1	Vuttañhetaṁ bhagavatā vuttamarahatāti me sutaṁ:
iti32:2.1	“Dvīhi, bhikkhave, dhammehi samannāgato puggalo yathābhataṁ nikkhitto evaṁ niraye.
iti32:2.2	Katamehi dvīhi?
iti32:2.3	Pāpakena ca sīlena, pāpikāya ca diṭṭhiyā.
iti32:2.4	Imehi kho, bhikkhave, dvīhi dhammehi samannāgato puggalo yathābhataṁ nikkhitto evaṁ niraye”ti.
iti32:2.5	Etamatthaṁ bhagavā avoca.
iti32:2.6	Tatthetaṁ iti vuccati:
iti32:3.1	“Pāpakena ca sīlena,
iti32:3.2	pāpikāya ca diṭṭhiyā;
iti32:3.3	Etehi dvīhi dhammehi,
iti32:3.4	yo samannāgato naro;
iti32:3.5	Kāyassa bhedā duppañño,
iti32:3.6	nirayaṁ sopapajjatī”ti.
iti32:4.1	Ayampi attho vutto bhagavatā, iti me sutanti.
iti32:4.2	Pañcamaṁ.
iti33:0.1	Itivuttaka 33
iti33:0.2	Dukanipāta
iti33:0.3	Paṭhamavagga
iti33:0.4	Dutiyasīlasutta
iti33:1.1	Vuttañhetaṁ bhagavatā vuttamarahatāti me sutaṁ:
iti33:2.1	“Dvīhi, bhikkhave, dhammehi samannāgato puggalo yathābhataṁ nikkhitto evaṁ sagge.
iti33:2.2	Katamehi dvīhi?
iti33:2.3	Bhaddakena ca sīlena, bhaddikāya ca diṭṭhiyā.
iti33:2.4	Imehi kho, bhikkhave, dvīhi dhammehi samannāgato puggalo yathābhataṁ nikkhitto evaṁ sagge”ti.
iti33:2.5	Etamatthaṁ bhagavā avoca.
iti33:2.6	Tatthetaṁ iti vuccati:
iti33:3.1	“Bhaddakena ca sīlena,
iti33:3.2	bhaddikāya ca diṭṭhiyā;
iti33:3.3	Etehi dvīhi dhammehi,
iti33:3.4	yo samannāgato naro;
iti33:3.5	Kāyassa bhedā sappañño,
iti33:3.6	saggaṁ so upapajjatī”ti.
iti33:4.1	Ayampi attho vutto bhagavatā, iti me sutanti.
iti33:4.2	Chaṭṭhaṁ.
iti34:0.1	Itivuttaka 34
iti34:0.2	Dukanipāta
iti34:0.3	Paṭhamavagga
iti34:0.4	Ātāpīsutta
iti34:1.1	Vuttañhetaṁ bhagavatā vuttamarahatāti me sutaṁ:
iti34:2.1	“Anātāpī, bhikkhave, bhikkhu anottāpī abhabbo sambodhāya, abhabbo nibbānāya, abhabbo anuttarassa yogakkhemassa adhigamāya.
iti34:2.2	Ātāpī ca kho, bhikkhave, bhikkhu ottāpī bhabbo sambodhāya, bhabbo nibbānāya, bhabbo anuttarassa yogakkhemassa adhigamāyā”ti.
iti34:2.3	Etamatthaṁ bhagavā avoca.
iti34:2.4	Tatthetaṁ iti vuccati:
iti34:3.1	“Anātāpī anottāpī,
iti34:3.2	kusīto hīnavīriyo;
iti34:3.3	Yo thinamiddhabahulo,
iti34:3.4	ahirīko anādaro;
iti34:3.5	Abhabbo tādiso bhikkhu,
iti34:3.6	phuṭṭhuṁ sambodhimuttamaṁ.
iti34:4.1	Yo ca satimā nipako jhāyī,
iti34:4.2	Ātāpī ottāpī ca appamatto;
iti34:4.3	Saṁyojanaṁ jātijarāya chetvā,
iti34:4.4	Idheva sambodhimanuttaraṁ phuse”ti.
iti34:5.1	Ayampi attho vutto bhagavatā, iti me sutanti.
iti34:5.2	Sattamaṁ.
iti35:0.1	Itivuttaka 35
iti35:0.2	Dukanipāta
iti35:0.3	Paṭhamavagga
iti35:0.4	Paṭhamajananakuhanasutta
iti35:1.1	Vuttañhetaṁ bhagavatā vuttamarahatāti me sutaṁ:
iti35:2.1	“Nayidaṁ, bhikkhave, brahmacariyaṁ vussati janakuhanatthaṁ, na janalapanatthaṁ, na lābhasakkārasilokānisaṁsatthaṁ, na ‘iti maṁ jano jānātū’ti.
iti35:2.2	Atha kho idaṁ, bhikkhave, brahmacariyaṁ vussati saṁvaratthañceva pahānatthañcā”ti.
iti35:2.3	Etamatthaṁ bhagavā avoca.
iti35:2.4	Tatthetaṁ iti vuccati:
iti35:3.1	“Saṁvaratthaṁ pahānatthaṁ,
iti35:3.2	brahmacariyaṁ anītihaṁ;
iti35:3.3	Adesayi so bhagavā,
iti35:3.4	nibbānogadhagāminaṁ.
iti35:4.1	Esa maggo mahattehi,
iti35:4.2	anuyāto mahesibhi;
iti35:4.3	Ye ye taṁ paṭipajjanti,
iti35:4.4	yathā buddhena desitaṁ;
iti35:4.5	Dukkhassantaṁ karissanti,
iti35:4.6	satthusāsanakārino”ti.
iti35:5.1	Ayampi attho vutto bhagavatā, iti me sutanti.
iti35:5.2	Aṭṭhamaṁ.
iti36:0.1	Itivuttaka 36
iti36:0.2	Dukanipāta
iti36:0.3	Paṭhamavagga
iti36:0.4	Dutiyajananakuhanasutta
iti36:1.1	Vuttañhetaṁ bhagavatā vuttamarahatāti me sutaṁ:
iti36:2.1	“Nayidaṁ, bhikkhave, brahmacariyaṁ vussati janakuhanatthaṁ, na janalapanatthaṁ, na lābhasakkārasilokānisaṁsatthaṁ, na ‘iti maṁ jano jānātū’ti.
iti36:2.2	Atha kho idaṁ, bhikkhave, brahmacariyaṁ vussati abhiññatthañceva pariññatthañcā”ti.
iti36:2.3	Etamatthaṁ bhagavā avoca.
iti36:2.4	Tatthetaṁ iti vuccati:
iti36:3.1	“Abhiññatthaṁ pariññatthaṁ,
iti36:3.2	brahmacariyaṁ anītihaṁ;
iti36:3.3	Adesayi so bhagavā,
iti36:3.4	nibbānogadhagāminaṁ.
iti36:4.1	Esa maggo mahattehi,
iti36:4.2	anuyāto mahesibhi;
iti36:4.3	Ye ye taṁ paṭipajjanti,
iti36:4.4	yathā buddhena desitaṁ;
iti36:4.5	Dukkhassantaṁ karissanti,
iti36:4.6	satthusāsanakārino”ti.
iti36:5.1	Ayampi attho vutto bhagavatā, iti me sutanti.
iti36:5.2	Navamaṁ.
iti37:0.1	Itivuttaka 37
iti37:0.2	Dukanipāta
iti37:0.3	Paṭhamavagga
iti37:0.4	Somanassasutta
iti37:1.1	Vuttañhetaṁ bhagavatā vuttamarahatāti me sutaṁ:
iti37:2.1	“Dvīhi, bhikkhave, dhammehi samannāgato bhikkhu diṭṭheva dhamme sukhasomanassabahulo viharati, yoni cassa āraddhā hoti āsavānaṁ khayāya.
iti37:2.2	Katamehi dvīhi?
iti37:2.3	Saṁvejanīyesu ṭhānesu saṁvejanena, saṁviggassa ca yoniso padhānena.
iti37:2.4	Imehi kho, bhikkhave, dvīhi dhammehi samannāgato bhikkhu diṭṭheva dhamme sukhasomanassabahulo viharati, yoni cassa āraddhā hoti āsavānaṁ khayāyā”ti.
iti37:2.5	Etamatthaṁ bhagavā avoca.
iti37:2.6	Tatthetaṁ iti vuccati:
iti37:3.1	“Saṁvejanīyaṭṭhānesu,
iti37:3.2	saṁvijjetheva paṇḍito;
iti37:3.3	Ātāpī nipako bhikkhu,
iti37:3.4	paññāya samavekkhiya.
iti37:4.1	Evaṁ vihārī ātāpī,
iti37:4.2	santavutti anuddhato;
iti37:4.3	Cetosamathamanuyutto,
iti37:4.4	khayaṁ dukkhassa pāpuṇe”ti.
iti37:5.1	Ayampi attho vutto bhagavatā, iti me sutanti.
iti37:5.2	Dasamaṁ.
iti37:5.3	Paṭhamo vaggo.
iti37:6.0	Tassuddānaṁ
iti37:6.1	Dve ca bhikkhū tapanīyā,
iti37:6.2	tapanīyā paratthehi;
iti37:6.3	Ātāpī nakuhanā dve,
iti37:6.4	somanassena te dasāti.
iti38:0.1	Itivuttaka 38
iti38:0.2	Dukanipāta
iti38:0.3	Dutiyavagga
iti38:0.4	Vitakkasutta
iti38:1.1	Vuttañhetaṁ bhagavatā vuttamarahatāti me sutaṁ:
iti38:2.1	“Tathāgataṁ, bhikkhave, arahantaṁ sammāsambuddhaṁ dve vitakkā bahulaṁ samudācaranti—
iti38:2.2	khemo ca vitakko, paviveko ca.
iti38:2.3	Abyāpajjhārāmo, bhikkhave, tathāgato abyāpajjharato.
iti38:2.4	Tamenaṁ, bhikkhave, tathāgataṁ abyāpajjhārāmaṁ abyāpajjharataṁ eseva vitakko bahulaṁ samudācarati:
iti38:2.5	‘imāyāhaṁ iriyāya na kañci byābādhemi tasaṁ vā thāvaraṁ vā’ti.
iti38:3.1	Pavivekārāmo, bhikkhave, tathāgato pavivekarato.
iti38:3.2	Tamenaṁ, bhikkhave, tathāgataṁ pavivekārāmaṁ pavivekarataṁ eseva vitakko bahulaṁ samudācarati:
iti38:3.3	‘yaṁ akusalaṁ taṁ pahīnan’ti.
iti38:4.1	Tasmātiha, bhikkhave, tumhepi abyāpajjhārāmā viharatha abyāpajjharatā.
iti38:4.2	Tesaṁ vo, bhikkhave, tumhākaṁ abyāpajjhārāmānaṁ viharataṁ abyāpajjharatānaṁ eseva vitakko bahulaṁ samudācarissati:
iti38:4.3	‘imāya mayaṁ iriyāya na kañci byābādhema tasaṁ vā thāvaraṁ vā’ti.
iti38:5.1	Pavivekārāmā, bhikkhave, viharatha pavivekaratā.
iti38:5.2	Tesaṁ vo, bhikkhave, tumhākaṁ pavivekārāmānaṁ viharataṁ pavivekaratānaṁ eseva vitakko bahulaṁ samudācarissati:
iti38:5.3	‘kiṁ akusalaṁ, kiṁ appahīnaṁ, kiṁ pajahāmā’”ti.
iti38:5.4	Etamatthaṁ bhagavā avoca.
iti38:5.5	Tatthetaṁ iti vuccati:
iti38:6.1	“Tathāgataṁ buddhamasayhasāhinaṁ,
iti38:6.2	Duve vitakkā samudācaranti naṁ;
iti38:6.3	Khemo vitakko paṭhamo udīrito,
iti38:6.4	Tato viveko dutiyo pakāsito.
iti38:7.1	Tamonudaṁ pāragataṁ mahesiṁ,
iti38:7.2	Taṁ pattipattaṁ vasimaṁ anāsavaṁ;
iti38:7.3	Visantaraṁ taṇhakkhaye vimuttaṁ,
iti38:7.4	Taṁ ve muniṁ antimadehadhāriṁ;
iti38:7.5	Mārañjahaṁ brūmi jarāya pāraguṁ.
iti38:8.1	Sele yathā pabbatamuddhaniṭṭhito,
iti38:8.2	Yathāpi passe janataṁ samantato;
iti38:8.3	Tathūpamaṁ dhammamayaṁ sumedho,
iti38:8.4	Pāsādamāruyha samantacakkhu;
iti38:8.5	Sokāvatiṇṇaṁ janatamapetasoko,
iti38:8.6	Avekkhati jātijarābhibhūtan”ti.
iti38:9.1	Ayampi attho vutto bhagavatā, iti me sutanti.
iti38:9.2	Paṭhamaṁ.
iti39:0.1	Itivuttaka 39
iti39:0.2	Dukanipāta
iti39:0.3	Dutiyavagga
iti39:0.4	Desanāsutta
iti39:1.1	Vuttañhetaṁ bhagavatā vuttamarahatāti me sutaṁ:
iti39:2.1	“Tathāgatassa, bhikkhave, arahato sammāsambuddhassa dve dhammadesanā pariyāyena bhavanti.
iti39:2.2	Katamā dve?
iti39:2.3	‘Pāpaṁ pāpakato passathā’ti—
iti39:2.4	ayaṁ paṭhamā dhammadesanā;
iti39:2.5	‘pāpaṁ pāpakato disvā tattha nibbindatha virajjatha vimuccathā’ti—
iti39:2.6	ayaṁ dutiyā dhammadesanā.
iti39:2.7	Tathāgatassa, bhikkhave, arahato sammāsambuddhassa imā dve dhammadesanā pariyāyena bhavantī”ti.
iti39:2.8	Etamatthaṁ bhagavā avoca.
iti39:2.9	Tatthetaṁ iti vuccati:
iti39:3.1	“Tathāgatassa buddhassa,
iti39:3.2	sabbabhūtānukampino;
iti39:3.3	Pariyāyavacanaṁ passa,
iti39:3.4	dve ca dhammā pakāsitā.
iti39:4.1	Pāpakaṁ passatha cetaṁ,
iti39:4.2	tattha cāpi virajjatha;
iti39:4.3	Tato virattacittāse,
iti39:4.4	dukkhassantaṁ karissathā”ti.
iti39:5.1	Ayampi attho vutto bhagavatā, iti me sutanti.
iti39:5.2	Dutiyaṁ.
iti40:0.1	Itivuttaka 40
iti40:0.2	Dukanipāta
iti40:0.3	Dutiyavagga
iti40:0.4	Vijjāsutta
iti40:1.1	Vuttañhetaṁ bhagavatā vuttamarahatāti me sutaṁ:
iti40:2.1	“Avijjā, bhikkhave, pubbaṅgamā akusalānaṁ dhammānaṁ samāpattiyā anvadeva ahirikaṁ anottappaṁ;
iti40:2.2	vijjā ca kho, bhikkhave, pubbaṅgamā kusalānaṁ dhammānaṁ samāpattiyā anvadeva hirottappan”ti.
iti40:2.3	Etamatthaṁ bhagavā avoca.
iti40:2.4	Tatthetaṁ iti vuccati:
iti40:3.1	“Yā kācimā duggatiyo,
iti40:3.2	asmiṁ loke paramhi ca;
iti40:3.3	Avijjāmūlikā sabbā,
iti40:3.4	icchālobhasamussayā.
iti40:4.1	Yato ca hoti pāpiccho,
iti40:4.2	ahirīko anādaro;
iti40:4.3	Tato pāpaṁ pasavati,
iti40:4.4	apāyaṁ tena gacchati.
iti40:5.1	Tasmā chandañca lobhañca,
iti40:5.2	avijjañca virājayaṁ;
iti40:5.3	Vijjaṁ uppādayaṁ bhikkhu,
iti40:5.4	sabbā duggatiyo jahe”ti.
iti40:6.1	Ayampi attho vutto bhagavatā, iti me sutanti.
iti40:6.2	Tatiyaṁ.
iti40:6.3	Paṭhamabhāṇavāro.
iti41:0.1	Itivuttaka 41
iti41:0.2	Dukanipāta
iti41:0.3	Dutiyavagga
iti41:0.4	Paññāparihīnasutta
iti41:1.1	Vuttañhetaṁ bhagavatā vuttamarahatāti me sutaṁ:
iti41:2.1	“Te, bhikkhave, sattā suparihīnā ye ariyāya paññāya parihīnā.
iti41:2.2	Te diṭṭheva dhamme dukkhaṁ viharanti savighātaṁ saupāyāsaṁ sapariḷāhaṁ;
iti41:2.3	kāyassa bhedā paraṁ maraṇā duggati pāṭikaṅkhā.
iti41:2.4	Te, bhikkhave, sattā aparihīnā ye ariyāya paññāya aparihīnā.
iti41:2.5	Te diṭṭheva dhamme sukhaṁ viharanti avighātaṁ anupāyāsaṁ apariḷāhaṁ;
iti41:2.6	kāyassa bhedā paraṁ maraṇā sugati pāṭikaṅkhā”ti.
iti41:2.7	Etamatthaṁ bhagavā avoca.
iti41:2.8	Tatthetaṁ iti vuccati:
iti41:3.1	“Paññāya parihānena,
iti41:3.2	passa lokaṁ sadevakaṁ;
iti41:3.3	Niviṭṭhaṁ nāmarūpasmiṁ,
iti41:3.4	idaṁ saccanti maññati.
iti41:4.1	Paññā hi seṭṭhā lokasmiṁ,
iti41:4.2	yāyaṁ nibbedhagāminī;
iti41:4.3	Yāya sammā pajānāti,
iti41:4.4	jātibhavaparikkhayaṁ.
iti41:5.1	Tesaṁ devā manussā ca,
iti41:5.2	sambuddhānaṁ satīmataṁ;
iti41:5.3	Pihayanti hāsapaññānaṁ,
iti41:5.4	sarīrantimadhārinan”ti.
iti41:6.1	Ayampi attho vutto bhagavatā, iti me sutanti.
iti41:6.2	Catutthaṁ.
iti42:0.1	Itivuttaka 42
iti42:0.2	Dukanipāta
iti42:0.3	Dutiyavagga
iti42:0.4	Sukkadhammasutta
iti42:1.1	Vuttañhetaṁ bhagavatā vuttamarahatāti me sutaṁ:
iti42:2.1	“Dveme, bhikkhave, sukkā dhammā lokaṁ pālenti.
iti42:2.2	Katame dve?
iti42:2.3	Hirī ca, ottappañca.
iti42:2.4	Ime ce, bhikkhave, dve sukkā dhammā lokaṁ na pāleyyuṁ, nayidha paññāyetha mātāti vā mātucchāti vā mātulānīti vā ācariyabhariyāti vā garūnaṁ dārāti vā.
iti42:2.5	Sambhedaṁ loko agamissa yathā ajeḷakā kukkuṭasūkarā soṇasiṅgālā.
iti42:2.6	Yasmā ca kho, bhikkhave, ime dve sukkā dhammā lokaṁ pālenti tasmā paññāyati mātāti vā mātucchāti vā mātulānīti vā ācariyabhariyāti vā garūnaṁ dārāti vā”ti.
iti42:2.7	Etamatthaṁ bhagavā avoca.
iti42:2.8	Tatthetaṁ iti vuccati:
iti42:3.1	“Yesañce hiriottappaṁ,
iti42:3.2	sabbadā ca na vijjati;
iti42:3.3	Vokkantā sukkamūlā te,
iti42:3.4	jātimaraṇagāmino.
iti42:4.1	Yesañca hiriottappaṁ,
iti42:4.2	sadā sammā upaṭṭhitā;
iti42:4.3	Virūḷhabrahmacariyā te,
iti42:4.4	santo khīṇapunabbhavā”ti.
iti42:5.1	Ayampi attho vutto bhagavatā, iti me sutanti.
iti42:5.2	Pañcamaṁ.
iti43:0.1	Itivuttaka 43
iti43:0.2	Dukanipāta
iti43:0.3	Dutiyavagga
iti43:0.4	Ajātasutta
iti43:1.1	Vuttañhetaṁ bhagavatā vuttamarahatāti me sutaṁ:
iti43:2.1	“Atthi, bhikkhave, ajātaṁ abhūtaṁ akataṁ asaṅkhataṁ.
iti43:2.2	No cetaṁ, bhikkhave, abhavissa ajātaṁ abhūtaṁ akataṁ asaṅkhataṁ, nayidha jātassa bhūtassa katassa saṅkhatassa nissaraṇaṁ paññāyetha.
iti43:2.3	Yasmā ca kho, bhikkhave, atthi ajātaṁ abhūtaṁ akataṁ asaṅkhataṁ, tasmā jātassa bhūtassa katassa saṅkhatassa nissaraṇaṁ paññāyatī”ti.
iti43:2.4	Etamatthaṁ bhagavā avoca.
iti43:2.5	Tatthetaṁ iti vuccati:
iti43:3.1	“Jātaṁ bhūtaṁ samuppannaṁ,
iti43:3.2	kataṁ saṅkhatamaddhuvaṁ;
iti43:3.3	Jarāmaraṇasaṅghāṭaṁ,
iti43:3.4	roganīḷaṁ pabhaṅguraṁ.
iti43:4.1	Āhāranettippabhavaṁ,
iti43:4.2	nālaṁ tadabhinandituṁ;
iti43:4.3	Tassa nissaraṇaṁ santaṁ,
iti43:4.4	atakkāvacaraṁ dhuvaṁ.
iti43:5.1	Ajātaṁ asamuppannaṁ,
iti43:5.2	asokaṁ virajaṁ padaṁ;
iti43:5.3	Nirodho dukkhadhammānaṁ,
iti43:5.4	saṅkhārūpasamo sukho”ti.
iti43:6.1	Ayampi attho vutto bhagavatā, iti me sutanti.
iti43:6.2	Chaṭṭhaṁ.
iti44:0.1	Itivuttaka 44
iti44:0.2	Dukanipāta
iti44:0.3	Dutiyavagga
iti44:0.4	Nibbānadhātusutta
iti44:1.1	Vuttañhetaṁ bhagavatā vuttamarahatāti me sutaṁ:
iti44:2.1	“Dvemā, bhikkhave, nibbānadhātuyo.
iti44:2.2	Katamā dve?
iti44:2.3	Saupādisesā ca nibbānadhātu, anupādisesā ca nibbānadhātu.
iti44:3.1	Katamā ca, bhikkhave, saupādisesā nibbānadhātu?
iti44:3.2	Idha, bhikkhave, bhikkhu arahaṁ hoti khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto.
iti44:3.3	Tassa tiṭṭhanteva pañcindriyāni yesaṁ avighātattā manāpāmanāpaṁ paccanubhoti, sukhadukkhaṁ paṭisaṁvedeti.
iti44:3.4	Tassa yo rāgakkhayo, dosakkhayo, mohakkhayo—
iti44:3.5	ayaṁ vuccati, bhikkhave, saupādisesā nibbānadhātu.
iti44:4.1	Katamā ca, bhikkhave, anupādisesā nibbānadhātu?
iti44:4.2	Idha, bhikkhave, bhikkhu arahaṁ hoti khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto.
iti44:4.3	Tassa idheva, bhikkhave, sabbavedayitāni anabhinanditāni sīti bhavissanti.
iti44:4.4	Ayaṁ vuccati, bhikkhave, anupādisesā nibbānadhātu.
iti44:4.5	Imā kho, bhikkhave, dve nibbānadhātuyo”ti.
iti44:4.6	Etamatthaṁ bhagavā avoca.
iti44:4.7	Tatthetaṁ iti vuccati:
iti44:5.1	“Duve imā cakkhumatā pakāsitā,
iti44:5.2	Nibbānadhātū anissitena tādinā;
iti44:5.3	Ekā hi dhātu idha diṭṭhadhammikā,
iti44:5.4	Saupādisesā bhavanettisaṅkhayā;
iti44:5.5	Anupādisesā pana samparāyikā,
iti44:5.6	Yamhi nirujjhanti bhavāni sabbaso.
iti44:6.1	Ye etadaññāya padaṁ asaṅkhataṁ,
iti44:6.2	Vimuttacittā bhavanettisaṅkhayā;
iti44:6.3	Te dhammasārādhigamā khaye ratā,
iti44:6.4	Pahaṁsu te sabbabhavāni tādino”ti.
iti44:7.1	Ayampi attho vutto bhagavatā, iti me sutanti.
iti44:7.2	Sattamaṁ.
iti45:0.1	Itivuttaka 45
iti45:0.2	Dukanipāta
iti45:0.3	Dutiyavagga
iti45:0.4	Paṭisallānasutta
iti45:1.1	Vuttañhetaṁ bhagavatā vuttamarahatāti me sutaṁ:
iti45:2.1	“Paṭisallānārāmā, bhikkhave, viharatha paṭisallānaratā, ajjhattaṁ cetosamathamanuyuttā, anirākatajjhānā, vipassanāya samannāgatā, brūhetāro suññāgārānaṁ.
iti45:2.2	Paṭisallānārāmānaṁ, bhikkhave, viharataṁ paṭisallānaratānaṁ ajjhattaṁ cetosamathamanuyuttānaṁ anirākatajjhānānaṁ vipassanāya samannāgatānaṁ brūhetānaṁ suññāgārānaṁ dvinnaṁ phalānaṁ aññataraṁ phalaṁ pāṭikaṅkhaṁ—
iti45:2.3	diṭṭheva dhamme aññā, sati vā upādisese anāgāmitā”ti.
iti45:2.4	Etamatthaṁ bhagavā avoca.
iti45:2.5	Tatthetaṁ iti vuccati:
iti45:3.1	“Ye santacittā nipakā,
iti45:3.2	satimanto ca jhāyino;
iti45:3.3	Sammā dhammaṁ vipassanti,
iti45:3.4	kāmesu anapekkhino.
iti45:4.1	Appamādaratā santā,
iti45:4.2	pamāde bhayadassino;
iti45:4.3	Abhabbā parihānāya,
iti45:4.4	nibbānasseva santike”ti.
iti45:5.1	Ayampi attho vutto bhagavatā, iti me sutanti.
iti45:5.2	Aṭṭhamaṁ.
iti46:0.1	Itivuttaka 46
iti46:0.2	Dukanipāta
iti46:0.3	Dutiyavagga
iti46:0.4	Sikkhānisaṁsasutta
iti46:1.1	Vuttañhetaṁ bhagavatā vuttamarahatāti me sutaṁ:
iti46:2.1	“Sikkhānisaṁsā, bhikkhave, viharatha paññuttarā vimuttisārā satādhipateyyā.
iti46:2.2	Sikkhānisaṁsānaṁ, bhikkhave, viharataṁ paññuttarānaṁ vimuttisārānaṁ satādhipateyyānaṁ dvinnaṁ phalānaṁ aññataraṁ phalaṁ pāṭikaṅkhaṁ—
iti46:2.3	diṭṭheva dhamme aññā, sati vā upādisese anāgāmitā”ti.
iti46:2.4	Etamatthaṁ bhagavā avoca.
iti46:2.5	Tatthetaṁ iti vuccati:
iti46:3.1	“Paripuṇṇasikkhaṁ apahānadhammaṁ,
iti46:3.2	Paññuttaraṁ jātikhayantadassiṁ;
iti46:3.3	Taṁ ve muniṁ antimadehadhāriṁ,
iti46:3.4	Mārañjahaṁ brūmi jarāya pāraguṁ.
iti46:4.1	Tasmā sadā jhānaratā samāhitā,
iti46:4.2	Ātāpino jātikhayantadassino;
iti46:4.3	Māraṁ sasenaṁ abhibhuyya bhikkhavo,
iti46:4.4	Bhavatha jātimaraṇassa pāragā”ti.
iti46:5.1	Ayampi attho vutto bhagavatā, iti me sutanti.
iti46:5.2	Navamaṁ.
iti47:0.1	Itivuttaka 47
iti47:0.2	Dukanipāta
iti47:0.3	Dutiyavagga
iti47:0.4	Jāgariyasutta
iti47:1.1	Vuttañhetaṁ bhagavatā vuttamarahatāti me sutaṁ:
iti47:2.1	“Jāgaro cassa, bhikkhave, bhikkhu vihareyya sato sampajāno samāhito pamudito vippasanno ca tattha kālavipassī ca kusalesu dhammesu.
iti47:2.2	Jāgarassa, bhikkhave, bhikkhuno viharato satassa sampajānassa samāhitassa pamuditassa vippasannassa tattha kālavipassino kusalesu dhammesu dvinnaṁ phalānaṁ aññataraṁ phalaṁ pāṭikaṅkhaṁ—
iti47:2.3	diṭṭheva dhamme aññā, sati vā upādisese anāgāmitā”ti.
iti47:2.4	Etamatthaṁ bhagavā avoca.
iti47:2.5	Tatthetaṁ iti vuccati:
iti47:3.1	“Jāgarantā suṇāthetaṁ,
iti47:3.2	ye suttā te pabujjhatha;
iti47:3.3	Suttā jāgaritaṁ seyyo,
iti47:3.4	natthi jāgarato bhayaṁ.
iti47:4.1	Yo jāgaro ca satimā sampajāno,
iti47:4.2	Samāhito mudito vippasanno ca;
iti47:4.3	Kālena so sammā dhammaṁ parivīmaṁsamāno,
iti47:4.4	Ekodibhūto vihane tamaṁ so.
iti47:5.1	Tasmā have jāgariyaṁ bhajetha,
iti47:5.2	Ātāpī bhikkhu nipako jhānalābhī;
iti47:5.3	Saṁyojanaṁ jātijarāya chetvā,
iti47:5.4	Idheva sambodhimanuttaraṁ phuse”ti.
iti47:6.1	Ayampi attho vutto bhagavatā, iti me sutanti.
iti47:6.2	Dasamaṁ.
iti48:0.1	Itivuttaka 48
iti48:0.2	Dukanipāta
iti48:0.3	Dutiyavagga
iti48:0.4	Āpāyikasutta
iti48:1.1	Vuttañhetaṁ bhagavatā vuttamarahatāti me sutaṁ:
iti48:2.1	“Dveme, bhikkhave, āpāyikā nerayikā idamappahāya.
iti48:2.2	Katame dve?
iti48:2.3	Yo ca abrahmacārī brahmacāripaṭiñño, yo ca paripuṇṇaṁ parisuddhaṁ brahmacariyaṁ carantaṁ amūlakena abrahmacariyena anuddhaṁseti.
iti48:2.4	Ime kho, bhikkhave, dve āpāyikā nerayikā idamappahāyā”ti.
iti48:2.5	Etamatthaṁ bhagavā avoca.
iti48:2.6	Tatthetaṁ iti vuccati:
iti48:3.1	“Abhūtavādī nirayaṁ upeti,
iti48:3.2	Yo vāpi katvā na karomi cāha;
iti48:3.3	Ubhopi te pecca samā bhavanti,
iti48:3.4	Nihīnakammā manujā parattha.
iti48:4.1	Kāsāvakaṇṭhā bahavo,
iti48:4.2	pāpadhammā asaññatā;
iti48:4.3	Pāpā pāpehi kammehi,
iti48:4.4	nirayaṁ te upapajjare.
iti48:5.1	Seyyo ayoguḷo bhutto,
iti48:5.2	tatto aggisikhūpamo;
iti48:5.3	Yañce bhuñjeyya dussīlo,
iti48:5.4	raṭṭhapiṇḍamasaññato”ti.
iti48:6.1	Ayampi attho vutto bhagavatā, iti me sutanti.
iti48:6.2	Ekādasamaṁ.
iti49:0.1	Itivuttaka 49
iti49:0.2	Dukanipāta
iti49:0.3	Dutiyavagga
iti49:0.4	Diṭṭhigatasutta
iti49:1.1	Vuttañhetaṁ bhagavatā vuttamarahatāti me sutaṁ:
iti49:2.1	“Dvīhi, bhikkhave, diṭṭhigatehi pariyuṭṭhitā devamanussā olīyanti eke, atidhāvanti eke; cakkhumanto ca passanti.
iti49:3.1	Kathañca, bhikkhave, olīyanti eke?
iti49:3.2	Bhavārāmā, bhikkhave, devamanussā bhavaratā bhavasammuditā tesaṁ bhavanirodhāya dhamme desiyamāne cittaṁ na pakkhandati na pasīdati na santiṭṭhati nādhimuccati.
iti49:3.3	Evaṁ kho, bhikkhave, olīyanti eke.
iti49:4.1	Kathañca, bhikkhave, atidhāvanti eke?
iti49:4.2	Bhaveneva kho paneke aṭṭīyamānā harāyamānā jigucchamānā vibhavaṁ abhinandanti—
iti49:4.3	yato kira, bho, ayaṁ attā kāyassa bhedā paraṁ maraṇā ucchijjati vinassati na hoti paraṁ maraṇā;
iti49:4.4	etaṁ santaṁ etaṁ paṇītaṁ etaṁ yāthāvanti.
iti49:4.5	Evaṁ kho, bhikkhave, atidhāvanti eke.
iti49:5.1	Kathañca, bhikkhave, cakkhumanto passanti?
iti49:5.2	Idha bhikkhu bhūtaṁ bhūtato passati;
iti49:5.3	bhūtaṁ bhūtato disvā bhūtassa nibbidāya virāgāya nirodhāya paṭipanno hoti.
iti49:5.4	Evaṁ kho, bhikkhave, cakkhumanto passantī”ti.
iti49:5.5	Etamatthaṁ bhagavā avoca.
iti49:5.6	Tatthetaṁ iti vuccati:
iti49:6.1	“Ye bhūtaṁ bhūtato disvā,
iti49:6.2	bhūtassa ca atikkamaṁ;
iti49:6.3	Yathābhūte vimuccanti,
iti49:6.4	bhavataṇhā parikkhayā.
iti49:7.1	Sa ve bhūtapariñño so,
iti49:7.2	vītataṇho bhavābhave;
iti49:7.3	Bhūtassa vibhavā bhikkhu,
iti49:7.4	nāgacchati punabbhavan”ti.
iti49:8.1	Ayampi attho vutto bhagavatā, iti me sutanti.
iti49:8.2	Dvādasamaṁ.
iti49:8.3	Dutiyo vaggo.
iti49:9.0	Tassuddānaṁ
iti49:9.1	Dve indriyā dve tapanīyā,
iti49:9.2	sīlena apare duve;
iti49:9.3	Anottāpī kuhanā dve ca,
iti49:9.4	saṁvejanīyena te dasa.
iti49:10.1	Vitakkā desanā vijjā,
iti49:10.2	paññā dhammena pañcamaṁ;
iti49:10.3	Ajātaṁ dhātusallānaṁ,
iti49:10.4	sikkhā jāgariyena ca;
iti49:10.5	Apāyadiṭṭhiyā ceva,
iti49:10.6	bāvīsati pakāsitāti.
iti49:10.7	Dukanipāto niṭṭhito.
iti50:0.1	Itivuttaka 50
iti50:0.2	Tikanipāta
iti50:0.3	Paṭhamavagga
iti50:0.4	Mūlasutta
iti50:1.1	Vuttañhetaṁ bhagavatā vuttamarahatāti me sutaṁ:
iti50:2.1	“Tīṇimāni, bhikkhave, akusalamūlāni.
iti50:2.2	Katamāni tīṇi?
iti50:2.3	Lobho akusalamūlaṁ, doso akusalamūlaṁ, moho akusalamūlaṁ—
iti50:2.4	imāni kho, bhikkhave, tīṇi akusalamūlānī”ti.
iti50:2.5	Etamatthaṁ bhagavā avoca.
iti50:2.6	Tatthetaṁ iti vuccati:
iti50:3.1	“Lobho doso ca moho ca,
iti50:3.2	purisaṁ pāpacetasaṁ;
iti50:3.3	Hiṁsanti attasambhūtā,
iti50:3.4	tacasāraṁva samphalan”ti.
iti50:4.1	Ayampi attho vutto bhagavatā, iti me sutanti.
iti50:4.2	Paṭhamaṁ.
iti51:0.1	Itivuttaka 51
iti51:0.2	Tikanipāta
iti51:0.3	Paṭhamavagga
iti51:0.4	Dhātusutta
iti51:1.1	Vuttañhetaṁ bhagavatā vuttamarahatāti me sutaṁ:
iti51:2.1	“Tisso imā, bhikkhave, dhātuyo.
iti51:2.2	Katamā tisso?
iti51:2.3	Rūpadhātu, arūpadhātu, nirodhadhātu—
iti51:2.4	imā kho, bhikkhave, tisso dhātuyo”ti.
iti51:2.5	Etamatthaṁ bhagavā avoca.
iti51:2.6	Tatthetaṁ iti vuccati:
iti51:3.1	“Rūpadhātuṁ pariññāya,
iti51:3.2	āruppesu asaṇṭhitā;
iti51:3.3	Nirodhe ye vimuccanti,
iti51:3.4	te janā maccuhāyino.
iti51:4.1	Kāyena amataṁ dhātuṁ,
iti51:4.2	phusayitvā nirūpadhiṁ;
iti51:4.3	Upadhippaṭinissaggaṁ,
iti51:4.4	sacchikatvā anāsavo;
iti51:4.5	Deseti sammāsambuddho,
iti51:4.6	asokaṁ virajaṁ padan”ti.
iti51:5.1	Ayampi attho vutto bhagavatā, iti me sutanti.
iti51:5.2	Dutiyaṁ.
iti52:0.1	Itivuttaka 52
iti52:0.2	Tikanipāta
iti52:0.3	Paṭhamavagga
iti52:0.4	Paṭhamavedanāsutta
iti52:1.1	Vuttañhetaṁ bhagavatā vuttamarahatāti me sutaṁ:
iti52:2.1	“Tisso imā, bhikkhave, vedanā.
iti52:2.2	Katamā tisso?
iti52:2.3	Sukhā vedanā, dukkhā vedanā, adukkhamasukhā vedanā—
iti52:2.4	imā kho, bhikkhave, tisso vedanā”ti.
iti52:2.5	Etamatthaṁ bhagavā avoca.
iti52:2.6	Tatthetaṁ iti vuccati:
iti52:3.1	“Samāhito sampajāno,
iti52:3.2	sato buddhassa sāvako;
iti52:3.3	Vedanā ca pajānāti,
iti52:3.4	vedanānañca sambhavaṁ.
iti52:4.1	Yattha cetā nirujjhanti,
iti52:4.2	maggañca khayagāminaṁ;
iti52:4.3	Vedanānaṁ khayā bhikkhu,
iti52:4.4	nicchāto parinibbuto”ti.
iti52:5.1	Ayampi attho vutto bhagavatā, iti me sutanti.
iti52:5.2	Tatiyaṁ.
iti53:0.1	Itivuttaka 53
iti53:0.2	Tikanipāta
iti53:0.3	Paṭhamavagga
iti53:0.4	Dutiyavedanāsutta
iti53:1.1	Vuttañhetaṁ bhagavatā vuttamarahatāti me sutaṁ:
iti53:2.1	“Tisso imā, bhikkhave, vedanā.
iti53:2.2	Katamā tisso?
iti53:2.3	Sukhā vedanā, dukkhā vedanā, adukkhamasukhā vedanā.
iti53:2.4	Sukhā, bhikkhave, vedanā dukkhato daṭṭhabbā;
iti53:2.5	dukkhā vedanā sallato daṭṭhabbā;
iti53:2.6	adukkhamasukhā vedanā aniccato daṭṭhabbā.
iti53:2.7	Yato kho, bhikkhave, bhikkhuno sukhā vedanā dukkhato diṭṭhā hoti, dukkhā vedanā sallato diṭṭhā hoti, adukkhamasukhā vedanā aniccato diṭṭhā hoti;
iti53:2.8	ayaṁ vuccati, bhikkhave, ‘bhikkhu ariyo, sammaddaso, acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā’”ti.
iti53:2.9	Etamatthaṁ bhagavā avoca.
iti53:2.10	Tatthetaṁ iti vuccati:
iti53:3.1	“Yo sukhaṁ dukkhato adda,
iti53:3.2	Dukkhamaddakkhi sallato;
iti53:3.3	Adukkhamasukhaṁ santaṁ,
iti53:3.4	Adakkhi naṁ aniccato.
iti53:4.1	Sa ve sammaddaso bhikkhu,
iti53:4.2	yato tattha vimuccati;
iti53:4.3	Abhiññāvosito santo,
iti53:4.4	sa ve yogātigo munī”ti.
iti53:5.1	Ayampi attho vutto bhagavatā, iti me sutanti.
iti53:5.2	Catutthaṁ.
iti54:0.1	Itivuttaka 54
iti54:0.2	Tikanipāta
iti54:0.3	Paṭhamavagga
iti54:0.4	Paṭhamaesanāsutta
iti54:1.1	Vuttañhetaṁ bhagavatā vuttamarahatāti me sutaṁ:
iti54:2.1	“Tisso imā, bhikkhave, esanā.
iti54:2.2	Katamā tisso?
iti54:2.3	Kāmesanā, bhavesanā, brahmacariyesanā—
iti54:2.4	imā kho, bhikkhave, tisso esanā”ti.
iti54:2.5	Etamatthaṁ bhagavā avoca.
iti54:2.6	Tatthetaṁ iti vuccati:
iti54:3.1	“Samāhito sampajāno,
iti54:3.2	sato buddhassa sāvako;
iti54:3.3	Esanā ca pajānāti,
iti54:3.4	esanānañca sambhavaṁ.
iti54:4.1	Yattha cetā nirujjhanti,
iti54:4.2	maggañca khayagāminaṁ;
iti54:4.3	Esanānaṁ khayā bhikkhu,
iti54:4.4	nicchāto parinibbuto”ti.
iti54:5.1	Ayampi attho vutto bhagavatā, iti me sutanti.
iti54:5.2	Pañcamaṁ.
iti55:0.1	Itivuttaka 55
iti55:0.2	Tikanipāta
iti55:0.3	Paṭhamavagga
iti55:0.4	Dutiyaesanāsutta
iti55:1.1	Vuttañhetaṁ bhagavatā vuttamarahatāti me sutaṁ:
iti55:2.1	“Tisso imā, bhikkhave, esanā.
iti55:2.2	Katamā tisso?
iti55:2.3	Kāmesanā, bhavesanā, brahmacariyesanā—
iti55:2.4	imā kho, bhikkhave, tisso esanā”ti.
iti55:2.5	Etamatthaṁ bhagavā avoca.
iti55:2.6	Tatthetaṁ iti vuccati:
iti55:3.1	“Kāmesanā bhavesanā,
iti55:3.2	brahmacariyesanā saha;
iti55:3.3	Iti saccaparāmāso,
iti55:3.4	diṭṭhiṭṭhānā samussayā.
iti55:4.1	Sabbarāgavirattassa,
iti55:4.2	taṇhakkhayavimuttino;
iti55:4.3	Esanā paṭinissaṭṭhā,
iti55:4.4	diṭṭhiṭṭhānā samūhatā;
iti55:4.5	Esanānaṁ khayā bhikkhu,
iti55:4.6	nirāso akathaṅkathī”ti.
iti55:5.1	Ayampi attho vutto bhagavatā, iti me sutanti.
iti55:5.2	Chaṭṭhaṁ.
iti56:0.1	Itivuttaka 56
iti56:0.2	Tikanipāta
iti56:0.3	Paṭhamavagga
iti56:0.4	Paṭhamaāsavasutta
iti56:1.1	Vuttañhetaṁ bhagavatā vuttamarahatāti me sutaṁ:
iti56:2.1	“Tayome, bhikkhave, āsavā.
iti56:2.2	Katame tayo?
iti56:2.3	Kāmāsavo, bhavāsavo, avijjāsavo—
iti56:2.4	ime kho, bhikkhave, tayo āsavā”ti.
iti56:2.5	Etamatthaṁ bhagavā avoca.
iti56:2.6	Tatthetaṁ iti vuccati:
iti56:3.1	“Samāhito sampajāno,
iti56:3.2	sato buddhassa sāvako;
iti56:3.3	Āsave ca pajānāti,
iti56:3.4	āsavānañca sambhavaṁ.
iti56:4.1	Yattha cetā nirujjhanti,
iti56:4.2	maggañca khayagāminaṁ;
iti56:4.3	Āsavānaṁ khayā bhikkhu,
iti56:4.4	nicchāto parinibbuto”ti.
iti56:5.1	Ayampi attho vutto bhagavatā, iti me sutanti.
iti56:5.2	Sattamaṁ.
iti57:0.1	Itivuttaka 57
iti57:0.2	Tikanipāta
iti57:0.3	Paṭhamavagga
iti57:0.4	Dutiyaāsavasutta
iti57:1.1	Vuttañhetaṁ bhagavatā vuttamarahatāti me sutaṁ:
iti57:2.1	“Tayome, bhikkhave, āsavā.
iti57:2.2	Katame tayo?
iti57:2.3	Kāmāsavo, bhavāsavo, avijjāsavo—
iti57:2.4	ime kho, bhikkhave, tayo āsavā”ti.
iti57:2.5	Etamatthaṁ bhagavā avoca.
iti57:2.6	Tatthetaṁ iti vuccati:
iti57:3.1	“Yassa kāmāsavo khīṇo,
iti57:3.2	avijjā ca virājitā;
iti57:3.3	Bhavāsavo parikkhīṇo,
iti57:3.4	vippamutto nirūpadhi;
iti57:3.5	Dhāreti antimaṁ dehaṁ,
iti57:3.6	jetvā māraṁ savāhinin”ti.
iti57:4.1	Ayampi attho vutto bhagavatā, iti me sutanti.
iti57:4.2	Aṭṭhamaṁ.
iti58:0.1	Itivuttaka 58
iti58:0.2	Tikanipāta
iti58:0.3	Paṭhamavagga
iti58:0.4	Taṇhāsutta
iti58:1.1	Vuttañhetaṁ bhagavatā vuttamarahatāti me sutaṁ:
iti58:2.1	“Tisso imā, bhikkhave, taṇhā.
iti58:2.2	Katamā tisso?
iti58:2.3	Kāmataṇhā, bhavataṇhā, vibhavataṇhā—
iti58:2.4	imā kho, bhikkhave, tisso taṇhā”ti.
iti58:2.5	Etamatthaṁ bhagavā avoca.
iti58:2.6	Tatthetaṁ iti vuccati:
iti58:3.1	“Taṇhāyogena saṁyuttā,
iti58:3.2	rattacittā bhavābhave;
iti58:3.3	Te yogayuttā mārassa,
iti58:3.4	ayogakkhemino janā;
iti58:3.5	Sattā gacchanti saṁsāraṁ,
iti58:3.6	jātīmaraṇagāmino.
iti58:4.1	Ye ca taṇhaṁ pahantvāna,
iti58:4.2	vītataṇhā bhavābhave;
iti58:4.3	Te ve pāraṅgatā loke,
iti58:4.4	ye pattā āsavakkhayan”ti.
iti58:5.1	Ayampi attho vutto bhagavatā, iti me sutanti.
iti58:5.2	Navamaṁ.
iti59:0.1	Itivuttaka 59
iti59:0.2	Tikanipāta
iti59:0.3	Paṭhamavagga
iti59:0.4	Māradheyyasutta
iti59:1.1	Vuttañhetaṁ bhagavatā vuttamarahatāti me sutaṁ:
iti59:2.1	“Tīhi, bhikkhave, dhammehi samannāgato bhikkhu atikkamma māradheyyaṁ ādiccova virocati.
iti59:2.2	Katamehi tīhi?
iti59:2.3	Idha, bhikkhave, bhikkhu asekhena sīlakkhandhena samannāgato hoti, asekhena samādhikkhandhena samannāgato hoti, asekhena paññākkhandhena samannāgato hoti—
iti59:2.4	imehi kho, bhikkhave, tīhi dhammehi samannāgato bhikkhu atikkamma māradheyyaṁ ādiccova virocatī”ti.
iti59:2.5	Etamatthaṁ bhagavā avoca.
iti59:2.6	Tatthetaṁ iti vuccati:
iti59:3.1	“Sīlaṁ samādhi paññā ca,
iti59:3.2	yassa ete subhāvitā;
iti59:3.3	Atikkamma māradheyyaṁ,
iti59:3.4	ādiccova virocatī”ti.
iti59:4.1	Ayampi attho vutto bhagavatā, iti me sutanti.
iti59:4.2	Dasamaṁ.
iti59:4.3	Paṭhamo vaggo.
iti59:5.0	Tassuddānaṁ
iti59:5.1	Mūladhātu atha vedanā duve,
iti59:5.2	Esanā ca duve āsavā duve;
iti59:5.3	Taṇhāto ca atha māradheyyato,
iti59:5.4	Vaggamāhu paṭhamanti muttamanti.
iti60:0.1	Itivuttaka 60
iti60:0.2	Tikanipāta
iti60:0.3	Dutiyavagga
iti60:0.4	Puññakiriyavatthusutta
iti60:1.1	Vuttañhetaṁ bhagavatā vuttamarahatāti me sutaṁ:
iti60:2.1	“Tīṇimāni, bhikkhave, puññakiriyavatthūni.
iti60:2.2	Katamāni tīṇi?
iti60:2.3	Dānamayaṁ puññakiriyavatthu, sīlamayaṁ puññakiriyavatthu, bhāvanāmayaṁ puññakiriyavatthu—
iti60:2.4	imāni kho, bhikkhave, tīṇi puññakiriyavatthūnī”ti.
iti60:2.5	Etamatthaṁ bhagavā avoca.
iti60:2.6	Tatthetaṁ iti vuccati:
iti60:3.1	“Puññameva so sikkheyya,
iti60:3.2	āyataggaṁ sukhudrayaṁ;
iti60:3.3	Dānañca samacariyañca,
iti60:3.4	mettacittañca bhāvaye.
iti60:4.1	Ete dhamme bhāvayitvā,
iti60:4.2	tayo sukhasamuddaye;
iti60:4.3	Abyābajjhaṁ sukhaṁ lokaṁ,
iti60:4.4	paṇḍito upapajjatī”ti.
iti60:5.1	Ayampi attho vutto bhagavatā, iti me sutanti.
iti60:5.2	Paṭhamaṁ.
iti61:0.1	Itivuttaka 61
iti61:0.2	Tikanipāta
iti61:0.3	Dutiyavagga
iti61:0.4	Cakkhusutta
iti61:1.1	Vuttañhetaṁ bhagavatā vuttamarahatāti me sutaṁ:
iti61:2.1	“Tīṇimāni, bhikkhave, cakkhūni.
iti61:2.2	Katamāni tīṇi?
iti61:2.3	Maṁsacakkhu, dibbacakkhu, paññācakkhu—
iti61:2.4	imāni kho, bhikkhave, tīṇi cakkhūnī”ti.
iti61:2.5	Etamatthaṁ bhagavā avoca.
iti61:2.6	Tatthetaṁ iti vuccati:
iti61:3.1	“Maṁsacakkhu dibbacakkhu,
iti61:3.2	paññācakkhu anuttaraṁ;
iti61:3.3	Etāni tīṇi cakkhūni,
iti61:3.4	akkhāsi purisuttamo.
iti61:4.1	Maṁsacakkhussa uppādo,
iti61:4.2	maggo dibbassa cakkhuno;
iti61:4.3	Yato ñāṇaṁ udapādi,
iti61:4.4	paññācakkhu anuttaraṁ;
iti61:4.5	Yassa cakkhussa paṭilābhā,
iti61:4.6	sabbadukkhā pamuccatī”ti.
iti61:5.1	Ayampi attho vutto bhagavatā, iti me sutanti.
iti61:5.2	Dutiyaṁ.
iti62:0.1	Itivuttaka 62
iti62:0.2	Tikanipāta
iti62:0.3	Dutiyavagga
iti62:0.4	Indriyasutta
iti62:1.1	Vuttañhetaṁ bhagavatā vuttamarahatāti me sutaṁ:
iti62:2.1	“Tīṇimāni, bhikkhave, indriyāni.
iti62:2.2	Katamāni tīṇi?
iti62:2.3	Anaññātaññassāmītindriyaṁ, aññindriyaṁ, aññātāvindriyaṁ—
iti62:2.4	imāni kho, bhikkhave, tīṇi indriyānī”ti.
iti62:2.5	Etamatthaṁ bhagavā avoca.
iti62:2.6	Tatthetaṁ iti vuccati:
iti62:3.1	“Sekhassa sikkhamānassa,
iti62:3.2	ujumaggānusārino;
iti62:3.3	Khayasmiṁ paṭhamaṁ ñāṇaṁ,
iti62:3.4	tato aññā anantarā.
iti62:4.1	Tato aññāvimuttassa,
iti62:4.2	ñāṇaṁ ve hoti tādino;
iti62:4.3	Akuppā me vimuttīti,
iti62:4.4	bhavasaṁyojanakkhayā.
iti62:5.1	Sa ve indriyasampanno,
iti62:5.2	santo santipade rato;
iti62:5.3	Dhāreti antimaṁ dehaṁ,
iti62:5.4	jetvā māraṁ savāhinin”ti.
iti62:6.1	Ayampi attho vutto bhagavatā, iti me sutanti.
iti62:6.2	Tatiyaṁ.
iti63:0.1	Itivuttaka 63
iti63:0.2	Tikanipāta
iti63:0.3	Dutiyavagga
iti63:0.4	Addhāsutta
iti63:1.1	Vuttañhetaṁ bhagavatā vuttamarahatāti me sutaṁ:
iti63:2.1	“Tayome, bhikkhave, addhā.
iti63:2.2	Katame tayo?
iti63:2.3	Atīto addhā, anāgato addhā, paccuppanno addhā—
iti63:2.4	ime kho, bhikkhave, tayo addhā”ti.
iti63:2.5	Etamatthaṁ bhagavā avoca.
iti63:2.6	Tatthetaṁ iti vuccati:
iti63:3.1	“Akkheyyasaññino sattā,
iti63:3.2	akkheyyasmiṁ patiṭṭhitā;
iti63:3.3	Akkheyyaṁ apariññāya,
iti63:3.4	yogamāyanti maccuno.
iti63:4.1	Akkheyyañca pariññāya,
iti63:4.2	akkhātāraṁ na maññati;
iti63:4.3	Phuṭṭho vimokkho manasā,
iti63:4.4	santipadamanuttaraṁ.
iti63:5.1	Sa ve akkheyyasampanno,
iti63:5.2	santo santipade rato;
iti63:5.3	Saṅkhāya sevī dhammaṭṭho,
iti63:5.4	saṅkhyaṁ nopeti vedagū”ti.
iti63:6.1	Ayampi attho vutto bhagavatā, iti me sutanti.
iti63:6.2	Catutthaṁ.
iti64:0.1	Itivuttaka 64
iti64:0.2	Tikanipāta
iti64:0.3	Dutiyavagga
iti64:0.4	Duccaritasutta
iti64:1.1	Vuttañhetaṁ bhagavatā vuttamarahatāti me sutaṁ:
iti64:2.1	“Tīṇimāni, bhikkhave, duccaritāni.
iti64:2.2	Katamāni tīṇi?
iti64:2.3	Kāyaduccaritaṁ, vacīduccaritaṁ, manoduccaritaṁ—
iti64:2.4	imāni kho, bhikkhave, tīṇi duccaritānī”ti.
iti64:2.5	Etamatthaṁ bhagavā avoca.
iti64:2.6	Tatthetaṁ iti vuccati:
iti64:3.1	“Kāyaduccaritaṁ katvā,
iti64:3.2	vacīduccaritāni ca;
iti64:3.3	Manoduccaritaṁ katvā,
iti64:3.4	yañcaññaṁ dosasaṁhitaṁ.
iti64:4.1	Akatvā kusalaṁ kammaṁ,
iti64:4.2	katvānākusalaṁ bahuṁ;
iti64:4.3	Kāyassa bhedā duppañño,
iti64:4.4	nirayaṁ sopapajjatī”ti.
iti64:5.1	Ayampi attho vutto bhagavatā, iti me sutanti.
iti64:5.2	Pañcamaṁ.
iti65:0.1	Itivuttaka 65
iti65:0.2	Tikanipāta
iti65:0.3	Dutiyavagga
iti65:0.4	Sucaritasutta
iti65:1.1	Vuttañhetaṁ bhagavatā vuttamarahatāti me sutaṁ:
iti65:2.1	“Tīṇimāni, bhikkhave, sucaritāni.
iti65:2.2	Katamāni tīṇi?
iti65:2.3	Kāyasucaritaṁ, vacīsucaritaṁ, manosucaritaṁ—
iti65:2.4	imāni kho, bhikkhave, tīṇi sucaritānī”ti.
iti65:2.5	Etamatthaṁ bhagavā avoca.
iti65:2.6	Tatthetaṁ iti vuccati:
iti65:3.1	“Kāyaduccaritaṁ hitvā,
iti65:3.2	vacīduccaritāni ca;
iti65:3.3	Manoduccaritaṁ hitvā,
iti65:3.4	yañcaññaṁ dosasaṁhitaṁ.
iti65:4.1	Akatvākusalaṁ kammaṁ,
iti65:4.2	katvāna kusalaṁ bahuṁ;
iti65:4.3	Kāyassa bhedā sappañño,
iti65:4.4	saggaṁ so upapajjatī”ti.
iti65:5.1	Ayampi attho vutto bhagavatā, iti me sutanti.
iti65:5.2	Chaṭṭhaṁ.
iti66:0.1	Itivuttaka 66
iti66:0.2	Tikanipāta
iti66:0.3	Dutiyavagga
iti66:0.4	Soceyyasutta
iti66:1.1	Vuttañhetaṁ bhagavatā vuttamarahatāti me sutaṁ:
iti66:2.1	“Tīṇimāni, bhikkhave, soceyyāni.
iti66:2.2	Katamāni tīṇi?
iti66:2.3	Kāyasoceyyaṁ, vacīsoceyyaṁ, manosoceyyaṁ—
iti66:2.4	imāni kho, bhikkhave, tīṇi soceyyānī”ti.
iti66:2.5	Etamatthaṁ bhagavā avoca.
iti66:2.6	Tatthetaṁ iti vuccati:
iti66:3.1	“Kāyasuciṁ vacīsuciṁ,
iti66:3.2	cetosucimanāsavaṁ;
iti66:3.3	Suciṁ soceyyasampannaṁ,
iti66:3.4	āhu sabbappahāyinan”ti.
iti66:4.1	Ayampi attho vutto bhagavatā, iti me sutanti.
iti66:4.2	Sattamaṁ.
iti67:0.1	Itivuttaka 67
iti67:0.2	Tikanipāta
iti67:0.3	Dutiyavagga
iti67:0.4	Moneyyasutta
iti67:1.1	Vuttañhetaṁ bhagavatā vuttamarahatāti me sutaṁ:
iti67:2.1	“Tīṇimāni, bhikkhave, moneyyāni.
iti67:2.2	Katamāni tīṇi?
iti67:2.3	Kāyamoneyyaṁ, vacīmoneyyaṁ, manomoneyyaṁ—
iti67:2.4	imāni kho, bhikkhave, tīṇi moneyyānī”ti.
iti67:2.5	Etamatthaṁ bhagavā avoca.
iti67:2.6	Tatthetaṁ iti vuccati:
iti67:3.1	“Kāyamuniṁ vacīmuniṁ,
iti67:3.2	manomunimanāsavaṁ;
iti67:3.3	Muniṁ moneyyasampannaṁ,
iti67:3.4	āhu ninhātapāpakan”ti.
iti67:4.1	Ayampi attho vutto bhagavatā, iti me sutanti.
iti67:4.2	Aṭṭhamaṁ.
iti68:0.1	Itivuttaka 68
iti68:0.2	Tikanipāta
iti68:0.3	Dutiyavagga
iti68:0.4	Paṭhamarāgasutta
iti68:1.1	Vuttañhetaṁ bhagavatā vuttamarahatāti me sutaṁ:
iti68:2.1	“Yassa kassaci, bhikkhave, rāgo appahīno, doso appahīno, moho appahīno—
iti68:2.2	ayaṁ vuccati, bhikkhave, ‘baddho mārassa paṭimukkassa mārapāso yathākāmakaraṇīyo pāpimato’.
iti68:2.3	Yassa kassaci, bhikkhave, rāgo pahīno, doso pahīno, moho pahīno—
iti68:2.4	ayaṁ vuccati, bhikkhave, ‘abaddho mārassa omukkassa mārapāso na yathākāmakaraṇīyo pāpimato’”ti.
iti68:2.5	Etamatthaṁ bhagavā avoca.
iti68:2.6	Tatthetaṁ iti vuccati:
iti68:3.1	“Yassa rāgo ca doso ca,
iti68:3.2	avijjā ca virājitā;
iti68:3.3	Taṁ bhāvitattaññataraṁ,
iti68:3.4	brahmabhūtaṁ tathāgataṁ;
iti68:3.5	Buddhaṁ verabhayātītaṁ,
iti68:3.6	āhu sabbappahāyinan”ti.
iti68:4.1	Ayampi attho vutto bhagavatā, iti me sutanti.
iti68:4.2	Navamaṁ.
iti69:0.1	Itivuttaka 69
iti69:0.2	Tikanipāta
iti69:0.3	Dutiyavagga
iti69:0.4	Dutiyarāgasutta
iti69:1.1	Vuttañhetaṁ bhagavatā vuttamarahatāti me sutaṁ:
iti69:2.1	“Yassa kassaci, bhikkhave, bhikkhussa vā bhikkhuniyā vā rāgo appahīno, doso appahīno, moho appahīno—
iti69:2.2	ayaṁ vuccati, bhikkhave, ‘atiṇṇo samuddaṁ saūmiṁ savīciṁ sāvaṭṭaṁ sagahaṁ sarakkhasaṁ’.
iti69:2.3	Yassa kassaci, bhikkhave, bhikkhussa vā bhikkhuniyā vā rāgo pahīno, doso pahīno, moho pahīno—
iti69:2.4	ayaṁ vuccati, bhikkhave, ‘atari samuddaṁ saūmiṁ savīciṁ sāvaṭṭaṁ sagahaṁ sarakkhasaṁ, tiṇṇo pāraṅgato thale tiṭṭhati brāhmaṇo’”ti.
iti69:2.5	Etamatthaṁ bhagavā avoca.
iti69:2.6	Tatthetaṁ iti vuccati:
iti69:3.1	“Yassa rāgo ca doso ca,
iti69:3.2	Avijjā ca virājitā;
iti69:3.3	Somaṁ samuddaṁ sagahaṁ sarakkhasaṁ,
iti69:3.4	Saūmibhayaṁ duttaraṁ accatāri.
iti69:4.1	Saṅgātigo maccujaho nirūpadhi,
iti69:4.2	Pahāsi dukkhaṁ apunabbhavāya;
iti69:4.3	Atthaṅgato so na pamāṇameti,
iti69:4.4	Amohayi maccurājanti brūmī”ti.
iti69:5.1	Ayampi attho vutto bhagavatā, iti me sutanti.
iti69:5.2	Dasamaṁ.
iti69:5.3	Dutiyo vaggo.
iti69:6.0	Tassuddānaṁ
iti69:6.1	Puññaṁ cakkhu atha indriyāni,
iti69:6.2	Addhā ca caritaṁ duve soci;
iti69:6.3	Muno atha rāgaduve,
iti69:6.4	Puna vaggamāhu dutiyamuttamanti.
iti70:0.1	Itivuttaka 70
iti70:0.2	Tikanipāta
iti70:0.3	Tatiyavagga
iti70:0.4	Micchādiṭṭhikasutta
iti70:1.1	Vuttañhetaṁ bhagavatā vuttamarahatāti me sutaṁ:
iti70:2.1	“Diṭṭhā mayā, bhikkhave, sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā.
iti70:2.2	Te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā.
iti70:3.1	Taṁ kho panāhaṁ, bhikkhave, nāññassa samaṇassa vā brāhmaṇassa vā sutvā vadāmi.
iti70:3.2	Diṭṭhā mayā, bhikkhave, sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā.
iti70:3.3	Te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā.
iti70:3.4	Api ca, bhikkhave, yadeva sāmaṁ ñātaṁ sāmaṁ diṭṭhaṁ sāmaṁ viditaṁ tadevāhaṁ vadāmi.
iti70:4.1	Diṭṭhā mayā, bhikkhave, sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā.
iti70:4.2	Te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā”ti.
iti70:4.3	Etamatthaṁ bhagavā avoca.
iti70:4.4	Tatthetaṁ iti vuccati:
iti70:5.1	“Micchā manaṁ paṇidhāya,
iti70:5.2	micchā vācañca bhāsiya;
iti70:5.3	Micchā kammāni katvāna,
iti70:5.4	kāyena idha puggalo.
iti70:6.1	Appassutāpuññakaro,
iti70:6.2	appasmiṁ idha jīvite;
iti70:6.3	Kāyassa bhedā duppañño,
iti70:6.4	nirayaṁ sopapajjatī”ti.
iti70:7.1	Ayampi attho vutto bhagavatā, iti me sutanti.
iti70:7.2	Paṭhamaṁ.
iti71:0.1	Itivuttaka 71
iti71:0.2	Tikanipāta
iti71:0.3	Tatiyavagga
iti71:0.4	Sammādiṭṭhikasutta
iti71:1.1	Vuttañhetaṁ bhagavatā vuttamarahatāti me sutaṁ:
iti71:2.1	“Diṭṭhā mayā, bhikkhave, sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā.
iti71:2.2	Te kāyassa bhedā paraṁ maraṇā sugatiṁ saggaṁ lokaṁ upapannā.
iti71:3.1	Taṁ kho panāhaṁ, bhikkhave, nāññassa samaṇassa vā brāhmaṇassa vā sutvā vadāmi.
iti71:3.2	Diṭṭhā mayā, bhikkhave, sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā.
iti71:3.3	Te kāyassa bhedā paraṁ maraṇā sugatiṁ saggaṁ lokaṁ upapannā.
iti71:3.4	Api ca, bhikkhave, yadeva sāmaṁ ñātaṁ sāmaṁ diṭṭhaṁ sāmaṁ viditaṁ tadevāhaṁ vadāmi.
iti71:4.1	Diṭṭhā mayā, bhikkhave, sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā.
iti71:4.2	Te kāyassa bhedā paraṁ maraṇā sugatiṁ saggaṁ lokaṁ upapannā”ti.
iti71:4.3	Etamatthaṁ bhagavā avoca.
iti71:4.4	Tatthetaṁ iti vuccati:
iti71:5.1	“Sammā manaṁ paṇidhāya,
iti71:5.2	sammā vācañca bhāsiya;
iti71:5.3	Sammā kammāni katvāna,
iti71:5.4	kāyena idha puggalo.
iti71:6.1	Bahussuto puññakaro,
iti71:6.2	appasmiṁ idha jīvite;
iti71:6.3	Kāyassa bhedā sappañño,
iti71:6.4	saggaṁ so upapajjatī”ti.
iti71:7.1	Ayampi attho vutto bhagavatā, iti me sutanti.
iti71:7.2	Dutiyaṁ.
iti72:0.1	Itivuttaka 72
iti72:0.2	Tikanipāta
iti72:0.3	Tatiyavagga
iti72:0.4	Nissaraṇiyasutta
iti72:1.1	Vuttañhetaṁ bhagavatā vuttamarahatāti me sutaṁ:
iti72:2.1	“Tisso imā, bhikkhave, nissaraṇiyā dhātuyo.
iti72:2.2	Katamā tisso?
iti72:2.3	Kāmānametaṁ nissaraṇaṁ yadidaṁ nekkhammaṁ, rūpānametaṁ nissaraṇaṁ yadidaṁ āruppaṁ, yaṁ kho pana kiñci bhūtaṁ saṅkhataṁ paṭiccasamuppannaṁ nirodho tassa nissaraṇaṁ—
iti72:2.4	imā kho, bhikkhave, tisso nissaraṇiyā dhātuyo”ti.
iti72:2.5	Etamatthaṁ bhagavā avoca.
iti72:2.6	Tatthetaṁ iti vuccati:
iti72:3.1	“Kāmanissaraṇaṁ ñatvā,
iti72:3.2	rūpānañca atikkamaṁ;
iti72:3.3	Sabbasaṅkhārasamathaṁ,
iti72:3.4	phusaṁ ātāpi sabbadā.
iti72:4.1	Sa ve sammaddaso bhikkhu,
iti72:4.2	yato tattha vimuccati;
iti72:4.3	Abhiññāvosito santo,
iti72:4.4	sa ve yogātigo munī”ti.
iti72:5.1	Ayampi attho vutto bhagavatā, iti me sutanti.
iti72:5.2	Tatiyaṁ.
iti73:0.1	Itivuttaka 73
iti73:0.2	Tikanipāta
iti73:0.3	Tatiyavagga
iti73:0.4	Santatarasutta
iti73:1.1	Vuttañhetaṁ bhagavatā vuttamarahatāti me sutaṁ:
iti73:2.1	“Rūpehi, bhikkhave, arūpā santatarā, arūpehi nirodho santataro”ti.
iti73:2.2	Etamatthaṁ bhagavā avoca.
iti73:2.3	Tatthetaṁ iti vuccati:
iti73:3.1	“Ye ca rūpūpagā sattā,
iti73:3.2	ye ca arūpaṭṭhāyino;
iti73:3.3	Nirodhaṁ appajānantā,
iti73:3.4	āgantāro punabbhavaṁ.
iti73:4.1	Ye ca rūpe pariññāya,
iti73:4.2	arūpesu asaṇṭhitā;
iti73:4.3	Nirodhe ye vimuccanti,
iti73:4.4	te janā maccuhāyino.
iti73:5.1	Kāyena amatadhātuṁ,
iti73:5.2	phusayitvā nirūpadhiṁ;
iti73:5.3	Upadhippaṭinissaggaṁ,
iti73:5.4	sacchikatvā anāsavo;
iti73:5.5	Deseti sammāsambuddho,
iti73:5.6	asokaṁ virajaṁ padan”ti.
iti73:6.1	Ayampi attho vutto bhagavatā, iti me sutanti.
iti73:6.2	Catutthaṁ.
iti74:0.1	Itivuttaka 74
iti74:0.2	Tikanipāta
iti74:0.3	Tatiyavagga
iti74:0.4	Puttasutta
iti74:1.1	Vuttañhetaṁ bhagavatā vuttamarahatāti me sutaṁ:
iti74:2.1	“Tayome, bhikkhave, puttā santo saṁvijjamānā lokasmiṁ.
iti74:2.2	Katame tayo?
iti74:2.3	Atijāto, anujāto, avajātoti.
iti74:3.1	Kathañca, bhikkhave, putto atijāto hoti?
iti74:3.2	Idha, bhikkhave, puttassa mātāpitaro honti—
iti74:3.3	na buddhaṁ saraṇaṁ gatā, na dhammaṁ saraṇaṁ gatā, na saṅghaṁ saraṇaṁ gatā;
iti74:3.4	pāṇātipātā appaṭiviratā, adinnādānā appaṭiviratā, kāmesumicchācārā appaṭiviratā, musāvādā appaṭiviratā, surāmerayamajjapamādaṭṭhānā appaṭiviratā, dussīlā pāpadhammā.
iti74:3.5	Putto ca nesaṁ hoti—
iti74:3.6	buddhaṁ saraṇaṁ gato, dhammaṁ saraṇaṁ gato, saṅghaṁ saraṇaṁ gato;
iti74:3.7	pāṇātipātā paṭivirato, adinnādānā paṭivirato, kāmesumicchācārā paṭivirato, musāvādā paṭivirato, surāmerayamajjapamādaṭṭhānā paṭivirato, sīlavā kalyāṇadhammo.
iti74:3.8	Evaṁ kho, bhikkhave, putto atijāto hoti.
iti74:4.1	Kathañca, bhikkhave, putto anujāto hoti?
iti74:4.2	Idha, bhikkhave, puttassa mātāpitaro honti—
iti74:4.3	buddhaṁ saraṇaṁ gatā, dhammaṁ saraṇaṁ gatā, saṅghaṁ saraṇaṁ gatā;
iti74:4.4	pāṇātipātā paṭiviratā, adinnādānā paṭiviratā, kāmesumicchācārā paṭiviratā, musāvādā paṭiviratā, surāmerayamajjapamādaṭṭhānā paṭiviratā, sīlavanto kalyāṇadhammā.
iti74:4.5	Puttopi nesaṁ hoti—
iti74:4.6	buddhaṁ saraṇaṁ gato, dhammaṁ saraṇaṁ gato, saṅghaṁ saraṇaṁ gato;
iti74:4.7	pāṇātipātā paṭivirato, adinnādānā paṭivirato, kāmesumicchācārā paṭivirato, musāvādā paṭivirato, surāmerayamajjapamādaṭṭhānā paṭivirato, sīlavā kalyāṇadhammo.
iti74:4.8	Evaṁ kho, bhikkhave, putto anujāto hoti.
iti74:5.1	Kathañca, bhikkhave, putto avajāto hoti?
iti74:5.2	Idha, bhikkhave, puttassa mātāpitaro honti—
iti74:5.3	buddhaṁ saraṇaṁ gatā, dhammaṁ saraṇaṁ gatā, saṅghaṁ saraṇaṁ gatā;
iti74:5.4	pāṇātipātā paṭiviratā, adinnādānā paṭiviratā, kāmesumicchācārā paṭiviratā, musāvādā paṭiviratā, surāmerayamajjapamādaṭṭhānā paṭiviratā, sīlavanto kalyāṇadhammā.
iti74:5.5	Putto ca nesaṁ hoti—
iti74:5.6	na buddhaṁ saraṇaṁ gato, na dhammaṁ saraṇaṁ gato, na saṅghaṁ saraṇaṁ gato;
iti74:5.7	pāṇātipātā appaṭivirato, adinnādānā appaṭivirato, kāmesumicchācārā appaṭivirato, musāvādā appaṭivirato, surāmerayamajjapamādaṭṭhānā appaṭivirato, dussīlo pāpadhammo.
iti74:5.8	Evaṁ kho, bhikkhave, putto avajāto hoti.
iti74:5.9	Ime kho, bhikkhave, tayo puttā santo saṁvijjamānā lokasmin”ti.
iti74:5.10	Etamatthaṁ bhagavā avoca.
iti74:5.11	Tatthetaṁ iti vuccati:
iti74:6.1	“Atijātaṁ anujātaṁ,
iti74:6.2	puttamicchanti paṇḍitā;
iti74:6.3	Avajātaṁ na icchanti,
iti74:6.4	yo hoti kulagandhano.
iti74:7.1	Ete kho puttā lokasmiṁ,
iti74:7.2	ye bhavanti upāsakā;
iti74:7.3	Saddhā sīlena sampannā,
iti74:7.4	vadaññū vītamaccharā;
iti74:7.5	Cando abbhaghanā mutto,
iti74:7.6	parisāsu virocare”ti.
iti74:8.1	Ayampi attho vutto bhagavatā, iti me sutanti.
iti74:8.2	Pañcamaṁ.
iti75:0.1	Itivuttaka 75
iti75:0.2	Tikanipāta
iti75:0.3	Tatiyavagga
iti75:0.4	Avuṭṭhikasutta
iti75:1.1	Vuttañhetaṁ bhagavatā vuttamarahatāti me sutaṁ:
iti75:2.1	“Tayome, bhikkhave, puggalā santo saṁvijjamānā lokasmiṁ.
iti75:2.2	Katame tayo?
iti75:2.3	Avuṭṭhikasamo, padesavassī, sabbatthābhivassī.
iti75:3.1	Kathañca, bhikkhave, puggalo avuṭṭhikasamo hoti?
iti75:3.2	Idha, bhikkhave, ekacco puggalo sabbesaññeva na dātā hoti, samaṇabrāhmaṇakapaṇaddhikavanibbakayācakānaṁ annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
iti75:3.3	Evaṁ kho, bhikkhave, puggalo avuṭṭhikasamo hoti.
iti75:4.1	Kathañca, bhikkhave, puggalo padesavassī hoti?
iti75:4.2	Idha, bhikkhave, ekacco puggalo ekaccānaṁ dātā hoti, ekaccānaṁ na dātā hoti samaṇabrāhmaṇakapaṇaddhikavanibbakayācakānaṁ annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
iti75:4.3	Evaṁ kho, bhikkhave, puggalo padesavassī hoti.
iti75:5.1	Kathañca, bhikkhave, puggalo sabbatthābhivassī hoti?
iti75:5.2	Idha, bhikkhave, ekacco puggalo sabbesaṁva deti, samaṇabrāhmaṇakapaṇaddhikavanibbakayācakānaṁ annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
iti75:5.3	Evaṁ kho, bhikkhave, puggalo sabbatthābhivassī hoti.
iti75:5.4	Ime kho, bhikkhave, tayo puggalā santo saṁvijjamānā lokasmin”ti.
iti75:5.5	Etamatthaṁ bhagavā avoca.
iti75:5.6	Tatthetaṁ iti vuccati:
iti75:6.1	“Na samaṇe na brāhmaṇe,
iti75:6.2	Na kapaṇaddhikavanibbake;
iti75:6.3	Laddhāna saṁvibhājeti,
iti75:6.4	Annaṁ pānañca bhojanaṁ;
iti75:6.5	Taṁ ve avuṭṭhikasamoti,
iti75:6.6	Āhu naṁ purisādhamaṁ.
iti75:7.1	Ekaccānaṁ na dadāti,
iti75:7.2	ekaccānaṁ pavecchati;
iti75:7.3	Taṁ ve padesavassīti,
iti75:7.4	āhu medhāvino janā.
iti75:8.1	Subhikkhavāco puriso,
iti75:8.2	sabbabhūtānukampako;
iti75:8.3	Āmodamāno pakireti,
iti75:8.4	detha dethāti bhāsati.
iti75:9.1	Yathāpi megho thanayitvā,
iti75:9.2	gajjayitvā pavassati;
iti75:9.3	Thalaṁ ninnañca pūreti,
iti75:9.4	abhisandantova vārinā.
iti75:10.1	Evamevaṁ idhekacco,
iti75:10.2	puggalo hoti tādiso;
iti75:10.3	Dhammena saṁharitvāna,
iti75:10.4	uṭṭhānādhigataṁ dhanaṁ;
iti75:10.5	Tappeti annapānena,
iti75:10.6	sammā patte vanibbake”ti.
iti75:11.1	Ayampi attho vutto bhagavatā, iti me sutanti.
iti75:11.2	Chaṭṭhaṁ.
iti76:0.1	Itivuttaka 76
iti76:0.2	Tikanipāta
iti76:0.3	Tatiyavagga
iti76:0.4	Sukhapatthanāsutta
iti76:1.1	Vuttañhetaṁ bhagavatā vuttamarahatāti me sutaṁ:
iti76:2.1	“Tīṇimāni, bhikkhave, sukhāni patthayamāno sīlaṁ rakkheyya paṇḍito.
iti76:2.2	Katamāni tīṇi?
iti76:2.3	Pasaṁsā me āgacchatūti sīlaṁ rakkheyya paṇḍito, bhogā me uppajjantūti sīlaṁ rakkheyya paṇḍito, kāyassa bhedā paraṁ maraṇā sugatiṁ saggaṁ lokaṁ upapajjissāmīti sīlaṁ rakkheyya paṇḍito.
iti76:2.4	Imāni kho, bhikkhave, tīṇi sukhāni patthayamāno sīlaṁ rakkheyya paṇḍito”ti.
iti76:2.5	Etamatthaṁ bhagavā avoca.
iti76:2.6	Tatthetaṁ iti vuccati:
iti76:3.1	“Sīlaṁ rakkheyya medhāvī,
iti76:3.2	patthayāno tayo sukhe;
iti76:3.3	Pasaṁsaṁ vittalābhañca,
iti76:3.4	pecca sagge pamodanaṁ.
iti76:4.1	Akarontopi ce pāpaṁ,
iti76:4.2	karontamupasevati;
iti76:4.3	Saṅkiyo hoti pāpasmiṁ,
iti76:4.4	avaṇṇo cassa rūhati.
iti76:5.1	Yādisaṁ kurute mittaṁ,
iti76:5.2	yādisaṁ cūpasevati;
iti76:5.3	Sa ve tādisako hoti,
iti76:5.4	sahavāso hi tādiso.
iti76:6.1	Sevamāno sevamānaṁ,
iti76:6.2	samphuṭṭho samphusaṁ paraṁ;
iti76:6.3	Saro diddho kalāpaṁva,
iti76:6.4	alittamupalimpati;
iti76:6.5	Upalepabhayā dhīro,
iti76:6.6	neva pāpasakhā siyā.
iti76:7.1	Pūtimacchaṁ kusaggena,
iti76:7.2	yo naro upanayhati;
iti76:7.3	Kusāpi pūti vāyanti,
iti76:7.4	evaṁ bālūpasevanā.
iti76:8.1	Tagarañca palāsena,
iti76:8.2	yo naro upanayhati;
iti76:8.3	Pattāpi surabhi vāyanti,
iti76:8.4	evaṁ dhīrūpasevanā.
iti76:9.1	Tasmā pattapuṭasseva,
iti76:9.2	ñatvā sampākamattano;
iti76:9.3	Asante nupaseveyya,
iti76:9.4	sante seveyya paṇḍito;
iti76:9.5	Asanto nirayaṁ nenti,
iti76:9.6	santo pāpenti suggatin”ti.
iti76:10.1	Ayampi attho vutto bhagavatā, iti me sutanti.
iti76:10.2	Sattamaṁ.
iti77:0.1	Itivuttaka 77
iti77:0.2	Tikanipāta
iti77:0.3	Tatiyavagga
iti77:0.4	Bhidurasutta
iti77:1.1	Vuttañhetaṁ bhagavatā vuttamarahatāti me sutaṁ:
iti77:2.1	“Bhidurāyaṁ, bhikkhave, kāyo, viññāṇaṁ virāgadhammaṁ, sabbe upadhī aniccā dukkhā vipariṇāmadhammā”ti.
iti77:2.2	Etamatthaṁ bhagavā avoca.
iti77:2.3	Tatthetaṁ iti vuccati:
iti77:3.1	“Kāyañca bhiduraṁ ñatvā,
iti77:3.2	Viññāṇañca virāgunaṁ;
iti77:3.3	Upadhīsu bhayaṁ disvā,
iti77:3.4	Jātimaraṇamaccagā;
iti77:3.5	Sampatvā paramaṁ santiṁ,
iti77:3.6	Kālaṁ kaṅkhati bhāvitatto”ti.
iti77:4.1	Ayampi attho vutto bhagavatā, iti me sutanti.
iti77:4.2	Aṭṭhamaṁ.
iti78:0.1	Itivuttaka 78
iti78:0.2	Tikanipāta
iti78:0.3	Tatiyavagga
iti78:0.4	Dhātusosaṁsandanasutta
iti78:1.1	Vuttañhetaṁ bhagavatā vuttamarahatāti me sutaṁ:
iti78:2.1	“Dhātuso, bhikkhave, sattā sattehi saddhiṁ saṁsandanti samenti.
iti78:2.2	Hīnādhimuttikā sattā hīnādhimuttikehi sattehi saddhiṁ saṁsandanti samenti,
iti78:2.3	kalyāṇādhimuttikā sattā kalyāṇādhimuttikehi sattehi saddhiṁ saṁsandanti samenti.
iti78:3.1	Atītampi, bhikkhave, addhānaṁ dhātusova sattā sattehi saddhiṁ saṁsandiṁsu samiṁsu.
iti78:3.2	Hīnādhimuttikā sattā hīnādhimuttikehi sattehi saddhiṁ saṁsandiṁsu samiṁsu,
iti78:3.3	kalyāṇādhimuttikā sattā kalyāṇādhimuttikehi sattehi saddhiṁ saṁsandiṁsu samiṁsu.
iti78:4.1	Anāgatampi, bhikkhave, addhānaṁ dhātusova sattā sattehi saddhiṁ saṁsandissanti samessanti.
iti78:4.2	Hīnādhimuttikā sattā hīnādhimuttikehi sattehi saddhiṁ saṁsandissanti samessanti,
iti78:4.3	kalyāṇādhimuttikā sattā kalyāṇādhimuttikehi sattehi saddhiṁ saṁsandissanti samessanti.
iti78:5.1	Etarahipi, bhikkhave, paccuppannaṁ addhānaṁ dhātusova sattā sattehi saddhiṁ saṁsandanti samenti.
iti78:5.2	Hīnādhimuttikā sattā hīnādhimuttikehi sattehi saddhiṁ saṁsandanti samenti,
iti78:5.3	kalyāṇādhimuttikā sattā kalyāṇādhimuttikehi sattehi saddhiṁ saṁsandanti samentī”ti.
iti78:5.4	Etamatthaṁ bhagavā avoca.
iti78:5.5	Tatthetaṁ iti vuccati:
iti78:6.1	“Saṁsaggā vanatho jāto,
iti78:6.2	asaṁsaggena chijjati;
iti78:6.3	Parittaṁ dārumāruyha,
iti78:6.4	yathā sīde mahaṇṇave.
iti78:7.1	Evaṁ kusītamāgamma,
iti78:7.2	sādhujīvīpi sīdati;
iti78:7.3	Tasmā taṁ parivajjeyya,
iti78:7.4	kusītaṁ hīnavīriyaṁ.
iti78:8.1	Pavivittehi ariyehi,
iti78:8.2	pahitattehi jhāyibhi;
iti78:8.3	Niccaṁ āraddhaviriyehi,
iti78:8.4	paṇḍitehi sahāvase”ti.
iti78:9.1	Ayampi attho vutto bhagavatā, iti me sutanti.
iti78:9.2	Navamaṁ.
iti79:0.1	Itivuttaka 79
iti79:0.2	Tikanipāta
iti79:0.3	Tatiyavagga
iti79:0.4	Parihānasutta
iti79:1.1	Vuttañhetaṁ bhagavatā vuttamarahatāti me sutaṁ:
iti79:2.1	“Tayome, bhikkhave, dhammā sekhassa bhikkhuno parihānāya saṁvattanti.
iti79:2.2	Katame tayo?
iti79:2.3	Idha, bhikkhave, sekho bhikkhu kammārāmo hoti, kammarato, kammārāmatamanuyutto;
iti79:2.4	bhassārāmo hoti, bhassarato, bhassārāmatamanuyutto;
iti79:2.5	niddārāmo hoti, niddārato, niddārāmatamanuyutto.
iti79:2.6	Ime kho, bhikkhave, tayo dhammā sekhassa bhikkhuno parihānāya saṁvattanti.
iti79:3.1	Tayome, bhikkhave, dhammā sekhassa bhikkhuno aparihānāya saṁvattanti.
iti79:3.2	Katame tayo?
iti79:3.3	Idha, bhikkhave, sekho bhikkhu na kammārāmo hoti, na kammarato, na kammārāmatamanuyutto;
iti79:3.4	na bhassārāmo hoti, na bhassarato, na bhassārāmatamanuyutto;
iti79:3.5	na niddārāmo hoti, na niddārato, na niddārāmatamanuyutto.
iti79:3.6	Ime kho, bhikkhave, tayo dhammā sekhassa bhikkhuno aparihānāya saṁvattantī”ti.
iti79:3.7	Etamatthaṁ bhagavā avoca.
iti79:3.8	Tatthetaṁ iti vuccati:
iti79:4.1	“Kammārāmo bhassārāmo,
iti79:4.2	Niddārāmo ca uddhato;
iti79:4.3	Abhabbo tādiso bhikkhu,
iti79:4.4	Phuṭṭhuṁ sambodhimuttamaṁ.
iti79:5.1	Tasmā hi appakiccassa,
iti79:5.2	Appamiddho anuddhato;
iti79:5.3	Bhabbo so tādiso bhikkhu,
iti79:5.4	Phuṭṭhuṁ sambodhimuttaman”ti.
iti79:6.1	Ayampi attho vutto bhagavatā, iti me sutanti.
iti79:6.2	Dasamaṁ.
iti79:6.3	Tatiyo vaggo.
iti79:7.0	Tassuddānaṁ
iti79:7.1	Dve diṭṭhī nissaraṇaṁ rūpaṁ,
iti79:7.2	putto avuṭṭhikena ca;
iti79:7.3	Sukhā ca bhiduro dhātu,
iti79:7.4	parihānena te dasāti.
iti80:0.1	Itivuttaka 80
iti80:0.2	Tikanipāta
iti80:0.3	Catutthavagga
iti80:0.4	Vitakkasutta
iti80:1.1	Vuttañhetaṁ bhagavatā vuttamarahatāti me sutaṁ:
iti80:2.1	“Tayome, bhikkhave, akusalavitakkā.
iti80:2.2	Katame tayo?
iti80:2.3	Anavaññattipaṭisaṁyutto vitakko, lābhasakkārasilokapaṭisaṁyutto vitakko, parānuddayatāpaṭisaṁyutto vitakko.
iti80:2.4	Ime kho, bhikkhave, tayo akusalavitakkā”ti.
iti80:2.5	Etamatthaṁ bhagavā avoca.
iti80:2.6	Tatthetaṁ iti vuccati:
iti80:3.1	“Anavaññattisaṁyutto,
iti80:3.2	lābhasakkāragāravo;
iti80:3.3	Sahanandī amaccehi,
iti80:3.4	ārā saṁyojanakkhayā.
iti80:4.1	Yo ca puttapasuṁ hitvā,
iti80:4.2	Vivāhe saṁharāni ca;
iti80:4.3	Bhabbo so tādiso bhikkhu,
iti80:4.4	Phuṭṭhuṁ sambodhimuttaman”ti.
iti80:5.1	Ayampi attho vutto bhagavatā, iti me sutanti.
iti80:5.2	Paṭhamaṁ.
iti81:0.1	Itivuttaka 81
iti81:0.2	Tikanipāta
iti81:0.3	Catutthavagga
iti81:0.4	Sakkārasutta
iti81:1.1	Vuttañhetaṁ bhagavatā vuttamarahatāti me sutaṁ:
iti81:2.1	“Diṭṭhā mayā, bhikkhave, sattā sakkārena abhibhūtā, pariyādinnacittā, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā.
iti81:3.1	Diṭṭhā mayā, bhikkhave, sattā asakkārena abhibhūtā, pariyādinnacittā, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā.
iti81:4.1	Diṭṭhā mayā, bhikkhave, sattā sakkārena ca asakkārena ca tadubhayena abhibhūtā, pariyādinnacittā, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā.
iti81:5.1	Taṁ kho panāhaṁ, bhikkhave, nāññassa samaṇassa vā brāhmaṇassa vā sutvā vadāmi;
iti81:5.2	(…) api ca, bhikkhave, yadeva me sāmaṁ ñātaṁ sāmaṁ diṭṭhaṁ sāmaṁ viditaṁ tamevāhaṁ vadāmi.
iti81:6.1	Diṭṭhā mayā, bhikkhave, sattā sakkārena abhibhūtā, pariyādinnacittā, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā.
iti81:7.1	Diṭṭhā mayā, bhikkhave, sattā asakkārena abhibhūtā, pariyādinnacittā, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā.
iti81:8.1	Diṭṭhā mayā, bhikkhave, sattā sakkārena ca asakkārena ca tadubhayena abhibhūtā, pariyādinnacittā, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā”ti.
iti81:8.2	Etamatthaṁ bhagavā avoca.
iti81:8.3	Tatthetaṁ iti vuccati:
iti81:9.1	“Yassa sakkariyamānassa,
iti81:9.2	asakkārena cūbhayaṁ;
iti81:9.3	Samādhi na vikampati,
iti81:9.4	appamādavihārino.
iti81:10.1	Taṁ jhāyinaṁ sātatikaṁ,
iti81:10.2	sukhumadiṭṭhivipassakaṁ;
iti81:10.3	Upādānakkhayārāmaṁ,
iti81:10.4	āhu sappuriso itī”ti.
iti81:11.1	Ayampi attho vutto bhagavatā, iti me sutanti.
iti81:11.2	Dutiyaṁ.
iti82:0.1	Itivuttaka 82
iti82:0.2	Tikanipāta
iti82:0.3	Catutthavagga
iti82:0.4	Devasaddasutta
iti82:1.1	Vuttañhetaṁ bhagavatā vuttamarahatāti me sutaṁ:
iti82:2.1	“Tayome, bhikkhave, devesu devasaddā niccharanti samayā samayaṁ upādāya.
iti82:2.2	Katame tayo?
iti82:2.3	Yasmiṁ, bhikkhave, samaye ariyasāvako kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajjāya ceteti, tasmiṁ samaye devesu devasaddo niccharati:
iti82:2.4	‘eso ariyasāvako mārena saddhiṁ saṅgāmāya cetetī’ti.
iti82:2.5	Ayaṁ, bhikkhave, paṭhamo devesu devasaddo niccharati samayā samayaṁ upādāya.
iti82:3.1	Puna caparaṁ, bhikkhave, yasmiṁ samaye ariyasāvako sattannaṁ bodhipakkhiyānaṁ dhammānaṁ bhāvanānuyogamanuyutto viharati, tasmiṁ samaye devesu devasaddo niccharati:
iti82:3.2	‘eso ariyasāvako mārena saddhiṁ saṅgāmetī’ti.
iti82:3.3	Ayaṁ, bhikkhave, dutiyo devesu devasaddo niccharati samayā samayaṁ upādāya.
iti82:4.1	Puna caparaṁ, bhikkhave, yasmiṁ samaye ariyasāvako āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati, tasmiṁ samaye devesu devasaddo niccharati:
iti82:4.2	‘eso ariyasāvako vijitasaṅgāmo tameva saṅgāmasīsaṁ abhivijiya ajjhāvasatī’ti.
iti82:4.3	Ayaṁ, bhikkhave, tatiyo devesu devasaddo niccharati samayā samayaṁ upādāya.
iti82:4.4	Ime kho, bhikkhave, tayo devesu devasaddā niccharanti samayā samayaṁ upādāyā”ti.
iti82:4.5	Etamatthaṁ bhagavā avoca.
iti82:4.6	Tatthetaṁ iti vuccati:
iti82:5.1	“Disvā vijitasaṅgāmaṁ,
iti82:5.2	sammāsambuddhasāvakaṁ;
iti82:5.3	Devatāpi namassanti,
iti82:5.4	mahantaṁ vītasāradaṁ.
iti82:6.1	Namo te purisājañña,
iti82:6.2	yo tvaṁ dujjayamajjhabhū;
iti82:6.3	Jetvāna maccuno senaṁ,
iti82:6.4	vimokkhena anāvaraṁ.
iti82:7.1	Iti hetaṁ namassanti,
iti82:7.2	devatā pattamānasaṁ;
iti82:7.3	Tañhi tassa na passanti,
iti82:7.4	yena maccuvasaṁ vaje”ti.
iti82:8.1	Ayampi attho vutto bhagavatā, iti me sutanti.
iti82:8.2	Tatiyaṁ.
iti83:0.1	Itivuttaka 83
iti83:0.2	Tikanipāta
iti83:0.3	Catutthavagga
iti83:0.4	Pañcapubbanimittasutta
iti83:1.1	Vuttañhetaṁ bhagavatā vuttamarahatāti me sutaṁ:
iti83:2.1	“Yadā, bhikkhave, devo devakāyā cavanadhammo hoti, pañcassa pubbanimittāni pātubhavanti—
iti83:2.2	mālā milāyanti, vatthāni kilissanti, kacchehi sedā muccanti, kāye dubbaṇṇiyaṁ okkamati, sake devo devāsane nābhiramatīti.
iti83:2.3	Tamenaṁ, bhikkhave, devā ‘cavanadhammo ayaṁ devaputto’ti iti viditvā tīhi vācāhi anumodenti:
iti83:2.4	‘ito, bho, sugatiṁ gaccha.
iti83:3.1	Sugatiṁ gantvā suladdhalābhaṁ labha.
iti83:4.1	Suladdhalābhaṁ labhitvā suppatiṭṭhito bhavāhī’”ti.
iti83:5.1	Evaṁ vutte, aññataro bhikkhu bhagavantaṁ etadavoca:
iti83:5.2	“kiṁ nu kho, bhante, devānaṁ sugatigamanasaṅkhātaṁ.
iti83:6.1	Kiñca, bhante, devānaṁ suladdhalābhasaṅkhātaṁ.
iti83:7.1	Kiṁ pana, bhante, devānaṁ suppatiṭṭhitasaṅkhātan”ti?
iti83:8.1	“Manussattaṁ kho, bhikkhu, devānaṁ sugatigamanasaṅkhātaṁ.
iti83:9.1	Yaṁ manussabhūto samāno tathāgatappavedite dhammavinaye saddhaṁ paṭilabhati;
iti83:9.2	idaṁ kho, bhikkhu, devānaṁ suladdhalābhasaṅkhātaṁ.
iti83:10.1	Sā kho panassa saddhā niviṭṭhā hoti mūlajātā patiṭṭhitā daḷhā asaṁhāriyā samaṇena vā brāhmaṇena vā devena vā mārena vā brahmunā vā kenaci vā lokasmiṁ;
iti83:10.2	idaṁ kho, bhikkhu, devānaṁ suppatiṭṭhitasaṅkhātan”ti.
iti83:11.1	Etamatthaṁ bhagavā avoca.
iti83:11.2	Tatthetaṁ iti vuccati:
iti83:12.1	“Yadā devo devakāyā,
iti83:12.2	cavati āyusaṅkhayā;
iti83:12.3	Tayo saddā niccharanti,
iti83:12.4	devānaṁ anumodataṁ.
iti83:13.1	‘Ito bho sugatiṁ gaccha,
iti83:13.2	manussānaṁ sahabyataṁ;
iti83:13.3	Manussabhūto saddhamme,
iti83:13.4	labha saddhaṁ anuttaraṁ.
iti83:14.1	Sā te saddhā niviṭṭhassa,
iti83:14.2	mūlajātā patiṭṭhitā;
iti83:14.3	Yāvajīvaṁ asaṁhīrā,
iti83:14.4	saddhamme suppavedite.
iti83:15.1	Kāyaduccaritaṁ hitvā,
iti83:15.2	vacīduccaritāni ca;
iti83:15.3	Manoduccaritaṁ hitvā,
iti83:15.4	yañcaññaṁ dosasañhitaṁ.
iti83:16.1	Kāyena kusalaṁ katvā,
iti83:16.2	vācāya kusalaṁ bahuṁ;
iti83:16.3	Manasā kusalaṁ katvā,
iti83:16.4	appamāṇaṁ nirūpadhiṁ.
iti83:17.1	Tato opadhikaṁ puññaṁ,
iti83:17.2	katvā dānena taṁ bahuṁ;
iti83:17.3	Aññepi macce saddhamme,
iti83:17.4	brahmacariye nivesaya’.
iti83:18.1	Imāya anukampāya,
iti83:18.2	devā devaṁ yadā vidū;
iti83:18.3	Cavantaṁ anumodenti,
iti83:18.4	ehi deva punappunan”ti.
iti83:19.1	Ayampi attho vutto bhagavatā, iti me sutanti.
iti83:19.2	Catutthaṁ.
iti84:0.1	Itivuttaka 84
iti84:0.2	Tikanipāta
iti84:0.3	Catutthavagga
iti84:0.4	Bahujanahitasutta
iti84:1.1	Vuttañhetaṁ bhagavatā vuttamarahatāti me sutaṁ:
iti84:2.1	“Tayome puggalā loke uppajjamānā uppajjanti bahujanahitāya bahujanasukhāya lokānukampāya atthāya hitāya sukhāya devamanussānaṁ.
iti84:2.2	Katame tayo?
iti84:2.3	Idha, bhikkhave, tathāgato loke uppajjati arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā.
iti84:2.4	So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
iti84:2.5	Ayaṁ, bhikkhave, paṭhamo puggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṁ.
iti84:3.1	Puna caparaṁ, bhikkhave, tasseva satthu sāvako arahaṁ hoti khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto.
iti84:3.2	So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
iti84:3.3	Ayaṁ, bhikkhave, dutiyo puggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṁ.
iti84:4.1	Puna caparaṁ, bhikkhave, tasseva satthu sāvako sekho hoti pāṭipado bahussuto sīlavatūpapanno.
iti84:4.2	Sopi dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
iti84:4.3	Ayaṁ, bhikkhave, tatiyo puggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṁ.
iti84:4.4	Ime kho, bhikkhave, tayo puggalā loke uppajjamānā uppajjanti bahujanahitāya bahujanasukhāya lokānukampāya atthāya hitāya sukhāya devamanussānan”ti.
iti84:4.5	Etamatthaṁ bhagavā avoca.
iti84:4.6	Tatthetaṁ iti vuccati:
iti84:5.1	“Satthā hi loke paṭhamo mahesi,
iti84:5.2	Tassanvayo sāvako bhāvitatto;
iti84:5.3	Athāparo pāṭipadopi sekho,
iti84:5.4	Bahussuto sīlavatūpapanno.
iti84:6.1	Ete tayo devamanussaseṭṭhā,
iti84:6.2	Pabhaṅkarā dhammamudīrayantā;
iti84:6.3	Apāpuranti amatassa dvāraṁ,
iti84:6.4	Yogā pamocenti bahujjanaṁ te.
iti84:7.1	Ye satthavāhena anuttarena,
iti84:7.2	Sudesitaṁ maggamanukkamanti;
iti84:7.3	Idheva dukkhassa karonti antaṁ,
iti84:7.4	Ye appamattā sugatassa sāsane”ti.
iti84:8.1	Ayampi attho vutto bhagavatā, iti me sutanti.
iti84:8.2	Pañcamaṁ.
iti85:0.1	Itivuttaka 85
iti85:0.2	Tikanipāta
iti85:0.3	Catutthavagga
iti85:0.4	Asubhānupassīsutta
iti85:1.1	Vuttañhetaṁ bhagavatā vuttamarahatāti me sutaṁ:
iti85:2.1	“Asubhānupassī, bhikkhave, kāyasmiṁ viharatha;
iti85:2.2	ānāpānassati ca vo ajjhattaṁ parimukhaṁ sūpaṭṭhitā hotu;
iti85:2.3	sabbasaṅkhāresu aniccānupassino viharatha.
iti85:2.4	Asubhānupassīnaṁ, bhikkhave, kāyasmiṁ viharataṁ yo subhāya dhātuyā rāgānusayo so pahīyati.
iti85:2.5	Ānāpānassatiyā ajjhattaṁ parimukhaṁ sūpaṭṭhititāya ye bāhirā vitakkāsayā vighātapakkhikā, te na honti.
iti85:2.6	Sabbasaṅkhāresu aniccānupassīnaṁ viharataṁ yā avijjā sā pahīyati, yā vijjā sā uppajjatī”ti.
iti85:2.7	Etamatthaṁ bhagavā avoca.
iti85:2.8	Tatthetaṁ iti vuccati:
iti85:3.1	“Asubhānupassī kāyasmiṁ,
iti85:3.2	ānāpāne paṭissato;
iti85:3.3	Sabbasaṅkhārasamathaṁ,
iti85:3.4	passaṁ ātāpi sabbadā.
iti85:4.1	Sa ve sammaddaso bhikkhu,
iti85:4.2	yato tattha vimuccati;
iti85:4.3	Abhiññāvosito santo,
iti85:4.4	sa ve yogātigo munī”ti.
iti85:5.1	Ayampi attho vutto bhagavatā, iti me sutanti.
iti85:5.2	Chaṭṭhaṁ.
iti86:0.1	Itivuttaka 86
iti86:0.2	Tikanipāta
iti86:0.3	Catutthavagga
iti86:0.4	Dhammānudhammapaṭipannasutta
iti86:1.1	Vuttañhetaṁ bhagavatā vuttamarahatāti me sutaṁ:
iti86:2.1	“Dhammānudhammapaṭipannassa bhikkhuno ayamanudhammo hoti veyyākaraṇāya—
iti86:2.2	dhammānudhammapaṭipannoyanti bhāsamāno dhammaññeva bhāsati no adhammaṁ, vitakkayamāno vā dhammavitakkaññeva vitakketi no adhammavitakkaṁ, tadubhayaṁ vā pana abhinivejjetvā upekkhako viharati sato sampajāno”ti.
iti86:2.3	Etamatthaṁ bhagavā avoca.
iti86:2.4	Tatthetaṁ iti vuccati:
iti86:3.1	“Dhammārāmo dhammarato,
iti86:3.2	dhammaṁ anuvicintayaṁ;
iti86:3.3	Dhammaṁ anussaraṁ bhikkhu,
iti86:3.4	saddhammā na parihāyati.
iti86:4.1	Caraṁ vā yadi vā tiṭṭhaṁ,
iti86:4.2	nisinno uda vā sayaṁ;
iti86:4.3	Ajjhattaṁ samayaṁ cittaṁ,
iti86:4.4	santimevādhigacchatī”ti.
iti86:5.1	Ayampi attho vutto bhagavatā, iti me sutanti.
iti86:5.2	Sattamaṁ.
iti87:0.1	Itivuttaka 87
iti87:0.2	Tikanipāta
iti87:0.3	Catutthavagga
iti87:0.4	Andhakaraṇasutta
iti87:1.1	Vuttañhetaṁ bhagavatā vuttamarahatāti me sutaṁ:
iti87:2.1	“Tayome, bhikkhave, akusalavitakkā andhakaraṇā acakkhukaraṇā aññāṇakaraṇā paññānirodhikā vighātapakkhikā anibbānasaṁvattanikā.
iti87:2.2	Katame tayo?
iti87:2.3	Kāmavitakko, bhikkhave, andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṁvattaniko.
iti87:2.4	Byāpādavitakko, bhikkhave, andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṁvattaniko.
iti87:2.5	Vihiṁsāvitakko, bhikkhave, andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṁvattaniko.
iti87:2.6	Ime kho, bhikkhave, tayo akusalavitakkā andhakaraṇā acakkhukaraṇā aññāṇakaraṇā paññānirodhikā vighātapakkhikā anibbānasaṁvattanikā.
iti87:3.1	Tayome, bhikkhave, kusalavitakkā anandhakaraṇā cakkhukaraṇā ñāṇakaraṇā paññāvuddhikā avighātapakkhikā nibbānasaṁvattanikā.
iti87:3.2	Katame tayo?
iti87:3.3	Nekkhammavitakko, bhikkhave, anandhakaraṇo cakkhukaraṇo ñāṇakaraṇo paññāvuddhiko avighātapakkhiko nibbānasaṁvattaniko.
iti87:3.4	Abyāpādavitakko, bhikkhave, anandhakaraṇo cakkhukaraṇo ñāṇakaraṇo paññāvuddhiko avighātapakkhiko nibbānasaṁvattaniko.
iti87:3.5	Avihiṁsāvitakko, bhikkhave, anandhakaraṇo cakkhukaraṇo ñāṇakaraṇo paññāvuddhiko avighātapakkhiko nibbānasaṁvattaniko.
iti87:3.6	Ime kho, bhikkhave, tayo kusalavitakkā anandhakaraṇā cakkhukaraṇā ñāṇakaraṇā paññāvuddhikā avighātapakkhikā nibbānasaṁvattanikā”ti.
iti87:3.7	Etamatthaṁ bhagavā avoca.
iti87:3.8	Tatthetaṁ iti vuccati:
iti87:4.1	“Tayo vitakke kusale vitakkaye,
iti87:4.2	Tayo pana akusale nirākare;
iti87:4.3	Sa ve vitakkāni vicāritāni,
iti87:4.4	Sameti vuṭṭhīva rajaṁ samūhataṁ;
iti87:4.5	Sa ve vitakkūpasamena cetasā,
iti87:4.6	Idheva so santipadaṁ samajjhagā”ti.
iti87:5.1	Ayampi attho vutto bhagavatā, iti me sutanti.
iti87:5.2	Aṭṭhamaṁ.
iti88:0.1	Itivuttaka 88
iti88:0.2	Tikanipāta
iti88:0.3	Catutthavagga
iti88:0.4	Antarāmalasutta
iti88:1.1	Vuttañhetaṁ bhagavatā vuttamarahatāti me sutaṁ:
iti88:2.1	“Tayome, bhikkhave, antarāmalā antarāamittā antarāsapattā antarāvadhakā antarāpaccatthikā.
iti88:2.2	Katame tayo?
iti88:2.3	Lobho, bhikkhave, antarāmalo antarāamitto antarāsapatto antarāvadhako antarāpaccatthiko.
iti88:2.4	Doso, bhikkhave, antarāmalo antarāamitto antarāsapatto antarāvadhako antarāpaccatthiko.
iti88:2.5	Moho, bhikkhave, antarāmalo antarāamitto antarāsapatto antarāvadhako antarāpaccatthiko.
iti88:2.6	Ime kho, bhikkhave, tayo antarāmalā antarāamittā antarāsapattā antarāvadhakā antarāpaccatthikā”ti.
iti88:2.7	Etamatthaṁ bhagavā avoca.
iti88:2.8	Tatthetaṁ iti vuccati:
iti88:3.1	“Anatthajanano lobho,
iti88:3.2	lobho cittappakopano;
iti88:3.3	Bhayamantarato jātaṁ,
iti88:3.4	taṁ jano nāvabujjhati.
iti88:4.1	Luddho atthaṁ na jānāti,
iti88:4.2	luddho dhammaṁ na passati;
iti88:4.3	Andhatamaṁ tadā hoti,
iti88:4.4	yaṁ lobho sahate naraṁ.
iti88:5.1	Yo ca lobhaṁ pahantvāna,
iti88:5.2	lobhaneyye na lubbhati;
iti88:5.3	Lobho pahīyate tamhā,
iti88:5.4	udabindūva pokkharā.
iti88:6.1	Anatthajanano doso,
iti88:6.2	doso cittappakopano;
iti88:6.3	Bhayamantarato jātaṁ,
iti88:6.4	taṁ jano nāvabujjhati.
iti88:7.1	Duṭṭho atthaṁ na jānāti,
iti88:7.2	duṭṭho dhammaṁ na passati;
iti88:7.3	Andhatamaṁ tadā hoti,
iti88:7.4	yaṁ doso sahate naraṁ.
iti88:8.1	Yo ca dosaṁ pahantvāna,
iti88:8.2	dosaneyye na dussati;
iti88:8.3	Doso pahīyate tamhā,
iti88:8.4	tālapakkaṁva bandhanā.
iti88:9.1	Anatthajanano moho,
iti88:9.2	moho cittappakopano;
iti88:9.3	Bhayamantarato jātaṁ,
iti88:9.4	taṁ jano nāvabujjhati.
iti88:10.1	Mūḷho atthaṁ na jānāti,
iti88:10.2	mūḷho dhammaṁ na passati;
iti88:10.3	Andhatamaṁ tadā hoti,
iti88:10.4	yaṁ moho sahate naraṁ.
iti88:11.1	Yo ca mohaṁ pahantvāna,
iti88:11.2	mohaneyye na muyhati;
iti88:11.3	Mohaṁ vihanti so sabbaṁ,
iti88:11.4	ādiccovudayaṁ taman”ti.
iti88:12.1	Ayampi attho vutto bhagavatā, iti me sutanti.
iti88:12.2	Navamaṁ.
iti89:0.1	Itivuttaka 89
iti89:0.2	Tikanipāta
iti89:0.3	Catutthavagga
iti89:0.4	Devadattasutta
iti89:1.1	Vuttañhetaṁ bhagavatā vuttamarahatāti me sutaṁ:
iti89:2.1	“Tīhi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
iti89:2.2	Katamehi tīhi?
iti89:2.3	Pāpicchatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho.
iti89:2.4	Pāpamittatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho.
iti89:2.5	Sati kho pana uttarikaraṇīye oramattakena visesādhigamena antarā vosānaṁ āpādi.
iti89:2.6	Imehi kho, bhikkhave, tīhi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho”ti.
iti89:2.7	Etamatthaṁ bhagavā avoca.
iti89:2.8	Tatthetaṁ iti vuccati:
iti89:3.1	“Mā jātu koci lokasmiṁ,
iti89:3.2	pāpiccho udapajjatha;
iti89:3.3	Tadamināpi jānātha,
iti89:3.4	pāpicchānaṁ yathā gati.
iti89:4.1	Paṇḍitoti samaññāto,
iti89:4.2	bhāvitattoti sammato;
iti89:4.3	Jalaṁva yasasā aṭṭhā,
iti89:4.4	devadattoti vissuto.
iti89:5.1	So samānamanuciṇṇo,
iti89:5.2	āsajja naṁ tathāgataṁ;
iti89:5.3	Avīcinirayaṁ patto,
iti89:5.4	catudvāraṁ bhayānakaṁ.
iti89:6.1	Aduṭṭhassa hi yo dubbhe,
iti89:6.2	pāpakammaṁ akubbato;
iti89:6.3	Tameva pāpaṁ phusati,
iti89:6.4	duṭṭhacittaṁ anādaraṁ.
iti89:7.1	Samuddaṁ visakumbhena,
iti89:7.2	yo maññeyya padūsituṁ;
iti89:7.3	Na so tena padūseyya,
iti89:7.4	bhesmā hi udadhi mahā.
iti89:8.1	Evamevaṁ tathāgataṁ,
iti89:8.2	yo vādena vihiṁsati;
iti89:8.3	Sammaggataṁ santacittaṁ,
iti89:8.4	vādo tamhi na rūhati.
iti89:9.1	Tādisaṁ mittaṁ kubbetha,
iti89:9.2	tañca seveyya paṇḍito;
iti89:9.3	Yassa maggānugo bhikkhu,
iti89:9.4	khayaṁ dukkhassa pāpuṇe”ti.
iti89:10.1	Ayampi attho vutto bhagavatā, iti me sutanti.
iti89:10.2	Dasamaṁ.
iti89:10.3	Catuttho vaggo.
iti89:11.0	Tassuddānaṁ
iti89:11.1	Vitakkāsakkārasadda,
iti89:11.2	cavanaloke asubhaṁ;
iti89:11.3	Dhammaandhakāramalaṁ,
iti89:11.4	devadattena te dasāti.
iti90:0.1	Itivuttaka 90
iti90:0.2	Tikanipāta
iti90:0.3	Pañcamavagga
iti90:0.4	Aggappasādasutta
iti90:1.1	Vuttañhetaṁ bhagavatā vuttamarahatāti me sutaṁ:
iti90:2.1	“Tayome, bhikkhave, aggappasādā.
iti90:2.2	Katame tayo?
iti90:2.3	Yāvatā, bhikkhave, sattā apadā vā dvipadā vā catuppadā vā bahuppadā vā rūpino vā arūpino vā saññino vā asaññino vā nevasaññināsaññino vā, tathāgato tesaṁ aggamakkhāyati arahaṁ sammāsambuddho.
iti90:2.4	Ye, bhikkhave, buddhe pasannā, agge te pasannā.
iti90:2.5	Agge kho pana pasannānaṁ aggo vipāko hoti.
iti90:3.1	Yāvatā, bhikkhave, dhammā saṅkhatā vā asaṅkhatā vā, virāgo tesaṁ aggamakkhāyati, yadidaṁ madanimmadano pipāsavinayo ālayasamugghāto vaṭṭupacchedo taṇhakkhayo virāgo nirodho nibbānaṁ.
iti90:3.2	Ye, bhikkhave, virāge dhamme pasannā, agge te pasannā.
iti90:3.3	Agge kho pana pasannānaṁ aggo vipāko hoti.
iti90:4.1	Yāvatā, bhikkhave, saṅghā vā gaṇā vā, tathāgatasāvakasaṅgho tesaṁ aggamakkhāyati, yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
iti90:4.2	Ye, bhikkhave, saṅghe pasannā, agge te pasannā.
iti90:4.3	Agge kho pana pasannānaṁ aggo vipāko hoti.
iti90:4.4	Ime kho, bhikkhave, tayo aggappasādā”ti.
iti90:4.5	Etamatthaṁ bhagavā avoca.
iti90:4.6	Tatthetaṁ iti vuccati:
iti90:5.1	“Aggato ve pasannānaṁ,
iti90:5.2	aggaṁ dhammaṁ vijānataṁ;
iti90:5.3	Agge buddhe pasannānaṁ,
iti90:5.4	dakkhiṇeyye anuttare.
iti90:6.1	Agge dhamme pasannānaṁ,
iti90:6.2	virāgūpasame sukhe;
iti90:6.3	Agge saṅghe pasannānaṁ,
iti90:6.4	puññakkhette anuttare.
iti90:7.1	Aggasmiṁ dānaṁ dadataṁ,
iti90:7.2	aggaṁ puññaṁ pavaḍḍhati;
iti90:7.3	Aggaṁ āyu ca vaṇṇo ca,
iti90:7.4	yaso kitti sukhaṁ balaṁ.
iti90:8.1	Aggassa dātā medhāvī,
iti90:8.2	aggadhammasamāhito;
iti90:8.3	Devabhūto manusso vā,
iti90:8.4	aggappatto pamodatī”ti.
iti90:9.1	Ayampi attho vutto bhagavatā, iti me sutanti.
iti90:9.2	Paṭhamaṁ.
iti91:0.1	Itivuttaka 91
iti91:0.2	Tikanipāta
iti91:0.3	Pañcamavagga
iti91:0.4	Jīvikasutta
iti91:1.1	Vuttañhetaṁ bhagavatā vuttamarahatāti me sutaṁ:
iti91:2.1	“Antamidaṁ, bhikkhave, jīvikānaṁ yadidaṁ piṇḍolyaṁ.
iti91:2.2	Abhisāpoyaṁ, bhikkhave, lokasmiṁ: ‘piṇḍolo vicarasi pattapāṇī’ti.
iti91:2.3	Tañca kho etaṁ, bhikkhave, kulaputtā upenti atthavasikā, atthavasaṁ paṭicca;
iti91:2.4	neva rājābhinītā, na corābhinītā, na iṇaṭṭā, na bhayaṭṭā, na ājīvikāpakatā.
iti91:2.5	Api ca kho ‘otiṇṇamhā jātiyā jarāya maraṇena sokehi paridevehi dukkhehi domanassehi upāyāsehi dukkhotiṇṇā dukkhaparetā,
iti91:2.6	appeva nāma imassa kevalassa dukkhakkhandhassa antakiriyā paññāyethā’ti.
iti91:2.7	Evaṁ pabbajito cāyaṁ, bhikkhave, kulaputto.
iti91:2.8	So ca hoti abhijjhālu kāmesu tibbasārāgo, byāpannacitto paduṭṭhamanasaṅkappo, muṭṭhassati asampajāno asamāhito vibbhantacitto pākatindriyo.
iti91:2.9	Seyyathāpi, bhikkhave, chavālātaṁ ubhatopadittaṁ majjhe gūthagataṁ neva gāme kaṭṭhatthaṁ pharati na araññe;
iti91:2.10	tathūpamāhaṁ, bhikkhave, imaṁ puggalaṁ vadāmi gihibhogā parihīno sāmaññatthañca na paripūretī”ti.
iti91:2.11	Etamatthaṁ bhagavā avoca.
iti91:2.12	Tatthetaṁ iti vuccati:
iti91:3.1	“Gihibhogā parihīno,
iti91:3.2	Sāmaññatthañca dubbhago;
iti91:3.3	Paridhaṁsamāno pakireti,
iti91:3.4	Chavālātaṁva nassati.
iti91:4.1	Kāsāvakaṇṭhā bahavo,
iti91:4.2	pāpadhammā asaññatā;
iti91:4.3	Pāpā pāpehi kammehi,
iti91:4.4	nirayaṁ te upapajjare.
iti91:5.1	Seyyo ayoguḷo bhutto,
iti91:5.2	tatto aggisikhūpamo;
iti91:5.3	Yañce bhuñjeyya dussīlo,
iti91:5.4	raṭṭhapiṇḍamasaññato”ti.
iti91:6.1	Ayampi attho vutto bhagavatā, iti me sutanti.
iti91:6.2	Dutiyaṁ.
iti92:0.1	Itivuttaka 92
iti92:0.2	Tikanipāta
iti92:0.3	Pañcamavagga
iti92:0.4	Saṅghāṭikaṇṇasutta
iti92:1.1	Vuttañhetaṁ bhagavatā vuttamarahatāti me sutaṁ:
iti92:2.1	“Saṅghāṭikaṇṇe cepi, bhikkhave, bhikkhu gahetvā piṭṭhito piṭṭhito anubandho assa pāde pādaṁ nikkhipanto,
iti92:2.2	so ca hoti abhijjhālu kāmesu tibbasārāgo byāpannacitto paduṭṭhamanasaṅkappo muṭṭhassati asampajāno asamāhito vibbhantacitto pākatindriyo;
iti92:2.3	atha kho so ārakāva mayhaṁ, ahañca tassa.
iti92:2.4	Taṁ kissa hetu?
iti92:2.5	Dhammañhi so, bhikkhave, bhikkhu na passati.
iti92:2.6	Dhammaṁ apassanto na maṁ passati.
iti92:3.1	Yojanasate cepi so, bhikkhave, bhikkhu vihareyya.
iti92:3.2	So ca hoti anabhijjhālu kāmesu na tibbasārāgo abyāpannacitto apaduṭṭhamanasaṅkappo upaṭṭhitassati sampajāno samāhito ekaggacitto saṁvutindriyo;
iti92:3.3	atha kho so santikeva mayhaṁ, ahañca tassa.
iti92:3.4	Taṁ kissa hetu?
iti92:3.5	Dhammañhi so, bhikkhave, bhikkhu passati;
iti92:3.6	dhammaṁ passanto maṁ passatī”ti.
iti92:3.7	Etamatthaṁ bhagavā avoca.
iti92:3.8	Tatthetaṁ iti vuccati:
iti92:4.1	“Anubandhopi ce assa,
iti92:4.2	mahiccho ca vighātavā;
iti92:4.3	Ejānugo anejassa,
iti92:4.4	nibbutassa anibbuto;
iti92:4.5	Giddho so vītagedhassa,
iti92:4.6	passa yāvañca ārakā.
iti92:5.1	Yo ca dhammamabhiññāya,
iti92:5.2	dhammamaññāya paṇḍito;
iti92:5.3	Rahadova nivāte ca,
iti92:5.4	anejo vūpasammati.
iti92:6.1	Anejo so anejassa,
iti92:6.2	nibbutassa ca nibbuto;
iti92:6.3	Agiddho vītagedhassa,
iti92:6.4	passa yāvañca santike”ti.
iti92:7.1	Ayampi attho vutto bhagavatā, iti me sutanti.
iti92:7.2	Tatiyaṁ.
iti93:0.1	Itivuttaka 93
iti93:0.2	Tikanipāta
iti93:0.3	Pañcamavagga
iti93:0.4	Aggisutta
iti93:1.1	Vuttañhetaṁ bhagavatā vuttamarahatāti me sutaṁ:
iti93:2.1	“Tayome, bhikkhave, aggī.
iti93:2.2	Katame tayo?
iti93:2.3	Rāgaggi, dosaggi, mohaggi—
iti93:2.4	ime kho, bhikkhave, tayo aggī”ti.
iti93:2.5	Etamatthaṁ bhagavā avoca.
iti93:2.6	Tatthetaṁ iti vuccati:
iti93:3.1	“Rāgaggi dahati macce,
iti93:3.2	ratte kāmesu mucchite;
iti93:3.3	Dosaggi pana byāpanne,
iti93:3.4	nare pāṇātipātino.
iti93:4.1	Mohaggi pana sammūḷhe,
iti93:4.2	ariyadhamme akovide;
iti93:4.3	Ete aggī ajānantā,
iti93:4.4	sakkāyābhiratā pajā.
iti93:5.1	Te vaḍḍhayanti nirayaṁ,
iti93:5.2	tiracchānañca yoniyo;
iti93:5.3	Asuraṁ pettivisayaṁ,
iti93:5.4	amuttā mārabandhanā.
iti93:6.1	Ye ca rattindivā yuttā,
iti93:6.2	sammāsambuddhasāsane;
iti93:6.3	Te nibbāpenti rāgaggiṁ,
iti93:6.4	niccaṁ asubhasaññino.
iti93:7.1	Dosaggiṁ pana mettāya,
iti93:7.2	nibbāpenti naruttamā;
iti93:7.3	Mohaggiṁ pana paññāya,
iti93:7.4	yāyaṁ nibbedhagāminī.
iti93:8.1	Te nibbāpetvā nipakā,
iti93:8.2	rattindivamatanditā;
iti93:8.3	Asesaṁ parinibbanti,
iti93:8.4	asesaṁ dukkhamaccaguṁ.
iti93:9.1	Ariyaddasā vedaguno,
iti93:9.2	sammadaññāya paṇḍitā;
iti93:9.3	Jātikkhayamabhiññāya,
iti93:9.4	nāgacchanti punabbhavan”ti.
iti93:10.1	Ayampi attho vutto bhagavatā, iti me sutanti.
iti93:10.2	Catutthaṁ.
iti94:0.1	Itivuttaka 94
iti94:0.2	Tikanipāta
iti94:0.3	Pañcamavagga
iti94:0.4	Upaparikkhasutta
iti94:1.1	Vuttañhetaṁ bhagavatā vuttamarahatāti me sutaṁ:
iti94:2.1	“Tathā tathā, bhikkhave, bhikkhu upaparikkheyya yathā yathāssa upaparikkhato bahiddhā cassa viññāṇaṁ avikkhittaṁ avisaṭaṁ ajjhattaṁ asaṇṭhitaṁ anupādāya na paritasseyya.
iti94:2.2	Bahiddhā, bhikkhave, viññāṇe avikkhitte avisaṭe sati ajjhattaṁ asaṇṭhite anupādāya aparitassato āyatiṁ jātijarāmaraṇadukkhasamudayasambhavo na hotī”ti.
iti94:2.3	Etamatthaṁ bhagavā avoca.
iti94:2.4	Tatthetaṁ iti vuccati:
iti94:3.1	“Sattasaṅgappahīnassa,
iti94:3.2	netticchinnassa bhikkhuno;
iti94:3.3	Vikkhīṇo jātisaṁsāro,
iti94:3.4	natthi tassa punabbhavo”ti.
iti94:4.1	Ayampi attho vutto bhagavatā, iti me sutanti.
iti94:4.2	Pañcamaṁ.
iti95:0.1	Itivuttaka 95
iti95:0.2	Tikanipāta
iti95:0.3	Pañcamavagga
iti95:0.4	Kāmūpapattisutta
iti95:1.1	Vuttañhetaṁ bhagavatā vuttamarahatāti me sutaṁ:
iti95:2.1	“Tisso imā, bhikkhave, kāmūpapattiyo.
iti95:2.2	Katamā tisso?
iti95:2.3	Paccupaṭṭhitakāmā, nimmānaratino, paranimmitavasavattino—
iti95:2.4	imā kho, bhikkhave, tisso kāmūpapattiyo”ti.
iti95:2.5	Etamatthaṁ bhagavā avoca.
iti95:2.6	Tatthetaṁ iti vuccati:
iti95:3.1	“Paccupaṭṭhitakāmā ca,
iti95:3.2	ye devā vasavattino;
iti95:3.3	Nimmānaratino devā,
iti95:3.4	ye caññe kāmabhogino;
iti95:3.5	Itthabhāvaññathābhāvaṁ,
iti95:3.6	saṁsāraṁ nātivattare.
iti95:4.1	Etamādīnavaṁ ñatvā,
iti95:4.2	kāmabhogesu paṇḍito;
iti95:4.3	Sabbe pariccaje kāme,
iti95:4.4	ye dibbā ye ca mānusā.
iti95:5.1	Piyarūpasātagadhitaṁ,
iti95:5.2	chetvā sotaṁ duraccayaṁ;
iti95:5.3	Asesaṁ parinibbanti,
iti95:5.4	asesaṁ dukkhamaccaguṁ.
iti95:6.1	Ariyaddasā vedaguno,
iti95:6.2	sammadaññāya paṇḍitā;
iti95:6.3	Jātikkhayamabhiññāya,
iti95:6.4	nāgacchanti punabbhavan”ti.
iti95:7.1	Ayampi attho vutto bhagavatā, iti me sutanti.
iti95:7.2	Chaṭṭhaṁ.
iti96:0.1	Itivuttaka 96
iti96:0.2	Tikanipāta
iti96:0.3	Pañcamavagga
iti96:0.4	Kāmayogasutta
iti96:1.1	Vuttañhetaṁ bhagavatā vuttamarahatāti me sutaṁ:
iti96:2.1	“Kāmayogayutto, bhikkhave, bhavayogayutto āgāmī hoti āgantā itthattaṁ.
iti96:2.2	Kāmayogavisaṁyutto, bhikkhave, bhavayogayutto anāgāmī hoti anāgantā itthattaṁ.
iti96:2.3	Kāmayogavisaṁyutto, bhikkhave, bhavayogavisaṁyutto arahā hoti, khīṇāsavo”ti.
iti96:2.4	Etamatthaṁ bhagavā avoca.
iti96:2.5	Tatthetaṁ iti vuccati:
iti96:3.1	“Kāmayogena saṁyuttā,
iti96:3.2	bhavayogena cūbhayaṁ;
iti96:3.3	Sattā gacchanti saṁsāraṁ,
iti96:3.4	jātimaraṇagāmino.
iti96:4.1	Ye ca kāme pahantvāna,
iti96:4.2	appattā āsavakkhayaṁ;
iti96:4.3	Bhavayogena saṁyuttā,
iti96:4.4	anāgāmīti vuccare.
iti96:5.1	Ye ca kho chinnasaṁsayā,
iti96:5.2	khīṇamānapunabbhavā;
iti96:5.3	Te ve pāraṅgatā loke,
iti96:5.4	ye pattā āsavakkhayan”ti.
iti96:6.1	Ayampi attho vutto bhagavatā, iti me sutanti.
iti96:6.2	Sattamaṁ.
iti96:6.3	Tatiyabhāṇavāraṁ.
iti97:0.1	Itivuttaka 97
iti97:0.2	Tikanipāta
iti97:0.3	Pañcamavagga
iti97:0.4	Kalyāṇasīlasutta
iti97:1.1	Vuttañhetaṁ bhagavatā vuttamarahatāti me sutaṁ:
iti97:2.1	“Kalyāṇasīlo, bhikkhave, bhikkhu kalyāṇadhammo kalyāṇapañño imasmiṁ dhammavinaye ‘kevalī vusitavā uttamapuriso’ti vuccati—
iti97:3.1	Kathañca, bhikkhave, bhikkhu kalyāṇasīlo hoti?
iti97:3.2	Idha, bhikkhave, bhikkhu sīlavā hoti, pātimokkhasaṁvarasaṁvuto viharati, ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
iti97:3.3	Evaṁ kho, bhikkhave, bhikkhu kalyāṇasīlo hoti.
iti97:3.4	Iti kalyāṇasīlo.
iti97:4.1	Kalyāṇadhammo ca kathaṁ hoti?
iti97:4.2	Idha, bhikkhave, bhikkhu sattannaṁ bodhipakkhiyānaṁ dhammānaṁ bhāvanānuyogamanuyutto viharati.
iti97:4.3	Evaṁ kho, bhikkhave, bhikkhu kalyāṇadhammo hoti.
iti97:4.4	Iti kalyāṇasīlo, kalyāṇadhammo.
iti97:5.1	Kalyāṇapañño ca kathaṁ hoti?
iti97:5.2	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
iti97:5.3	Evaṁ kho, bhikkhave, bhikkhu kalyāṇapañño hoti.
iti97:6.1	Iti kalyāṇasīlo kalyāṇadhammo kalyāṇapañño imasmiṁ dhammavinaye ‘kevalī vusitavā uttamapuriso’ti vuccatī”ti.
iti97:6.2	Etamatthaṁ bhagavā avoca.
iti97:6.3	Tatthetaṁ iti vuccati:
iti97:7.1	“Yassa kāyena vācāya,
iti97:7.2	manasā natthi dukkaṭaṁ;
iti97:7.3	Taṁ ve kalyāṇasīloti,
iti97:7.4	āhu bhikkhuṁ hirīmanaṁ.
iti97:8.1	Yassa dhammā subhāvitā,
iti97:8.2	satta sambodhigāmino;
iti97:8.3	Taṁ ve kalyāṇadhammoti,
iti97:8.4	āhu bhikkhuṁ anussadaṁ.
iti97:9.1	Yo dukkhassa pajānāti,
iti97:9.2	idheva khayamattano;
iti97:9.3	Taṁ ve kalyāṇapaññoti,
iti97:9.4	āhu bhikkhuṁ anāsavaṁ.
iti97:10.1	Tehi dhammehi sampannaṁ,
iti97:10.2	anīghaṁ chinnasaṁsayaṁ;
iti97:10.3	Asitaṁ sabbalokassa,
iti97:10.4	āhu sabbapahāyinan”ti.
iti97:11.1	Ayampi attho vutto bhagavatā, iti me sutanti.
iti97:11.2	Aṭṭhamaṁ.
iti98:0.1	Itivuttaka 98
iti98:0.2	Tikanipāta
iti98:0.3	Pañcamavagga
iti98:0.4	Dānasutta
iti98:1.1	Vuttañhetaṁ bhagavatā vuttamarahatāti me sutaṁ:
iti98:2.1	“Dvemāni, bhikkhave, dānāni—
iti98:2.2	āmisadānañca dhammadānañca.
iti98:2.3	Etadaggaṁ, bhikkhave, imesaṁ dvinnaṁ dānānaṁ yadidaṁ dhammadānaṁ.
iti98:3.1	Dveme, bhikkhave, saṁvibhāgā—
iti98:3.2	āmisasaṁvibhāgo ca dhammasaṁvibhāgo ca.
iti98:3.3	Etadaggaṁ, bhikkhave, imesaṁ dvinnaṁ saṁvibhāgānaṁ yadidaṁ dhammasaṁvibhāgo.
iti98:4.1	Dveme, bhikkhave, anuggahā—
iti98:4.2	āmisānuggaho ca dhammānuggaho ca.
iti98:4.3	Etadaggaṁ, bhikkhave, imesaṁ dvinnaṁ anuggahānaṁ yadidaṁ dhammānuggaho”ti.
iti98:4.4	Etamatthaṁ bhagavā avoca.
iti98:4.5	Tatthetaṁ iti vuccati:
iti98:5.1	“Yamāhu dānaṁ paramaṁ anuttaraṁ,
iti98:5.2	Yaṁ saṁvibhāgaṁ bhagavā avaṇṇayi;
iti98:5.3	Aggamhi khettamhi pasannacitto,
iti98:5.4	Viññū pajānaṁ ko na yajetha kāle.
iti98:6.1	Ye ceva bhāsanti suṇanti cūbhayaṁ,
iti98:6.2	Pasannacittā sugatassa sāsane;
iti98:6.3	Tesaṁ so attho paramo visujjhati,
iti98:6.4	Ye appamattā sugatassa sāsane”ti.
iti98:7.1	Ayampi attho vutto bhagavatā, iti me sutanti.
iti98:7.2	Navamaṁ.
iti99:0.1	Itivuttaka 99
iti99:0.2	Tikanipāta
iti99:0.3	Pañcamavagga
iti99:0.4	Tevijjasutta
iti99:1.1	Vuttañhetaṁ bhagavatā vuttamarahatāti me sutaṁ:
iti99:2.1	“Dhammenāhaṁ, bhikkhave, tevijjaṁ brāhmaṇaṁ paññāpemi, nāññaṁ lapitalāpanamattena.
iti99:3.1	Kathañcāhaṁ, bhikkhave, dhammena tevijjaṁ brāhmaṇaṁ paññāpemi, nāññaṁ lapitalāpanamattena?
iti99:3.2	Idha, bhikkhave, bhikkhu anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe: ‘amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto. So tato cuto amutra udapādiṁ. Tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto. So tato cuto idhūpapanno’ti. Iti sākāraṁ sauddesaṁ anekavihitaṁ pubbenivāsaṁ anussarati.
iti99:3.3	Ayamassa paṭhamā vijjā adhigatā hoti, avijjā vihatā, vijjā uppannā, tamo vihato, āloko uppanno, yathā taṁ appamattassa ātāpino pahitattassa viharato.
iti99:4.1	Puna caparaṁ, bhikkhave, bhikkhu dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti: ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā. Te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā. Te kāyassa bhedā paraṁ maraṇā sugatiṁ saggaṁ lokaṁ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti.
iti99:4.2	Ayamassa dutiyā vijjā adhigatā hoti, avijjā vihatā, vijjā uppannā, tamo vihato, āloko uppanno, yathā taṁ appamattassa ātāpino pahitattassa viharato.
iti99:5.1	Puna caparaṁ, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
iti99:5.2	Ayamassa tatiyā vijjā adhigatā hoti, avijjā vihatā, vijjā uppannā, tamo vihato, āloko uppanno, yathā taṁ appamattassa ātāpino pahitattassa viharato.
iti99:5.3	Evaṁ kho ahaṁ, bhikkhave, dhammena tevijjaṁ brāhmaṇaṁ paññāpemi, nāññaṁ lapitalāpanamattenā”ti.
iti99:5.4	Etamatthaṁ bhagavā avoca.
iti99:5.5	Tatthetaṁ iti vuccati:
iti99:6.1	“Pubbenivāsaṁ yoveti,
iti99:6.2	saggāpāyañca passati;
iti99:6.3	Atho jātikkhayaṁ patto,
iti99:6.4	abhiññāvosito muni.
iti99:7.1	Etāhi tīhi vijjāhi,
iti99:7.2	tevijjo hoti brāhmaṇo;
iti99:7.3	Tamahaṁ vadāmi tevijjaṁ,
iti99:7.4	nāññaṁ lapitalāpanan”ti.
iti99:8.1	Ayampi attho vutto bhagavatā, iti me sutanti.
iti99:8.2	Dasamaṁ.
iti99:8.3	Pañcamo vaggo.
iti99:9.0	Tassuddānaṁ
iti99:9.1	Pasāda jīvita saṅghāṭi,
iti99:9.2	aggi upaparikkhayā;
iti99:9.3	Upapatti kāma kalyāṇaṁ,
iti99:9.4	dānaṁ dhammena te dasāti.
iti99:9.5	Tikanipāto niṭṭhito.
iti100:0.1	Itivuttaka 100
iti100:0.2	Catukkanipāta
iti100:0.3	Brāhmaṇadhammayāgavagga
iti100:0.4	Brāhmaṇadhammayāgasutta
iti100:1.1	Vuttañhetaṁ bhagavatā vuttamarahatāti me sutaṁ:
iti100:2.1	“Ahamasmi, bhikkhave, brāhmaṇo yācayogo sadā payatapāṇi antimadehadharo anuttaro bhisakko sallakatto.
iti100:2.2	Tassa me tumhe puttā orasā mukhato jātā dhammajā dhammanimmitā dhammadāyādā, no āmisadāyādā.
iti100:3.1	Dvemāni, bhikkhave, dānāni—
iti100:3.2	āmisadānañca dhammadānañca.
iti100:3.3	Etadaggaṁ, bhikkhave, imesaṁ dvinnaṁ dānānaṁ yadidaṁ dhammadānaṁ.
iti100:4.1	Dveme, bhikkhave, saṁvibhāgā—
iti100:4.2	āmisasaṁvibhāgo ca dhammasaṁvibhāgo ca.
iti100:4.3	Etadaggaṁ, bhikkhave, imesaṁ dvinnaṁ saṁvibhāgānaṁ yadidaṁ dhammasaṁvibhāgo.
iti100:5.1	Dveme, bhikkhave, anuggahā—
iti100:5.2	āmisānuggaho ca dhammānuggaho ca.
iti100:5.3	Etadaggaṁ, bhikkhave, imesaṁ dvinnaṁ anuggahānaṁ yadidaṁ dhammānuggaho.
iti100:6.1	Dveme, bhikkhave, yāgā—
iti100:6.2	āmisayāgo ca dhammayāgo ca.
iti100:6.3	Etadaggaṁ, bhikkhave, imesaṁ dvinnaṁ yāgānaṁ yadidaṁ dhammayāgo”ti.
iti100:6.4	Etamatthaṁ bhagavā avoca.
iti100:6.5	Tatthetaṁ iti vuccati:
iti100:7.1	“Yo dhammayāgaṁ ayajī amaccharī,
iti100:7.2	Tathāgato sabbabhūtānukampī;
iti100:7.3	Taṁ tādisaṁ devamanussaseṭṭhaṁ,
iti100:7.4	Sattā namassanti bhavassa pāragun”ti.
iti100:8.1	Ayampi attho vutto bhagavatā, iti me sutanti.
iti100:8.2	Paṭhamaṁ.
iti101:0.1	Itivuttaka 101
iti101:0.2	Catukkanipāta
iti101:0.3	Brāhmaṇadhammayāgavagga
iti101:0.4	Sulabhasutta
iti101:1.1	Vuttañhetaṁ bhagavatā vuttamarahatāti me sutaṁ:
iti101:2.1	“Cattārimāni, bhikkhave, appāni ceva sulabhāni ca, tāni ca anavajjāni.
iti101:2.2	Katamāni cattāri?
iti101:2.3	Paṁsukūlaṁ, bhikkhave, cīvarānaṁ appañca sulabhañca, tañca anavajjaṁ.
iti101:2.4	Piṇḍiyālopo, bhikkhave, bhojanānaṁ appañca sulabhañca, tañca anavajjaṁ.
iti101:2.5	Rukkhamūlaṁ, bhikkhave, senāsanānaṁ appañca sulabhañca, tañca anavajjaṁ.
iti101:2.6	Pūtimuttaṁ, bhikkhave, bhesajjānaṁ appañca sulabhañca tañca anavajjaṁ.
iti101:2.7	Imāni kho, bhikkhave, cattāri appāni ceva sulabhāni ca, tāni ca anavajjāni.
iti101:2.8	Yato kho, bhikkhave, bhikkhu appena ca tuṭṭho hoti sulabhena ca anavajjena ca, idamassāhaṁ aññataraṁ sāmaññaṅganti vadāmī”ti.
iti101:2.9	Etamatthaṁ bhagavā avoca.
iti101:2.10	Tatthetaṁ iti vuccati:
iti101:3.1	“Anavajjena tuṭṭhassa,
iti101:3.2	appena sulabhena ca;
iti101:3.3	Na senāsanamārabbha,
iti101:3.4	cīvaraṁ pānabhojanaṁ;
iti101:3.5	Vighāto hoti cittassa,
iti101:3.6	disā nappaṭihaññati.
iti101:4.1	Ye cassa dhammā akkhātā,
iti101:4.2	sāmaññassānulomikā;
iti101:4.3	Adhiggahitā tuṭṭhassa,
iti101:4.4	appamattassa bhikkhuno”ti.
iti101:5.1	Ayampi attho vutto bhagavatā, iti me sutanti.
iti101:5.2	Dutiyaṁ.
iti102:0.1	Itivuttaka 102
iti102:0.2	Catukkanipāta
iti102:0.3	Brāhmaṇadhammayāgavagga
iti102:0.4	Āsavakkhayasutta
iti102:1.1	Vuttañhetaṁ bhagavatā vuttamarahatāti me sutaṁ:
iti102:2.1	“Jānatohaṁ, bhikkhave, passato āsavānaṁ khayaṁ vadāmi, no ajānato no apassato.
iti102:2.2	Kiñca, bhikkhave, jānato, kiṁ passato āsavānaṁ khayo hoti?
iti102:2.3	Idaṁ dukkhanti, bhikkhave, jānato passato āsavānaṁ khayo hoti. Ayaṁ dukkhasamudayoti, bhikkhave, jānato passato āsavānaṁ khayo hoti. Ayaṁ dukkhanirodhoti, bhikkhave, jānato passato āsavānaṁ khayo hoti. Ayaṁ dukkhanirodhagāminī paṭipadāti, bhikkhave, jānato passato āsavānaṁ khayo hoti.
iti102:2.4	Evaṁ kho, bhikkhave, jānato evaṁ passato āsavānaṁ khayo hotī”ti.
iti102:2.5	Etamatthaṁ bhagavā avoca.
iti102:2.6	Tatthetaṁ iti vuccati:
iti102:3.1	“Sekhassa sikkhamānassa,
iti102:3.2	ujumaggānusārino;
iti102:3.3	Khayasmiṁ paṭhamaṁ ñāṇaṁ,
iti102:3.4	tato aññā anantarā.
iti102:4.1	Tato aññāvimuttassa,
iti102:4.2	vimuttiñāṇamuttamaṁ;
iti102:4.3	Uppajjati khaye ñāṇaṁ,
iti102:4.4	khīṇā saṁyojanā iti.
iti102:5.1	Na tvevidaṁ kusītena,
iti102:5.2	bālenamavijānatā;
iti102:5.3	Nibbānaṁ adhigantabbaṁ,
iti102:5.4	sabbaganthappamocanan”ti.
iti102:6.1	Ayampi attho vutto bhagavatā, iti me sutanti.
iti102:6.2	Tatiyaṁ.
iti103:0.1	Itivuttaka 103
iti103:0.2	Catukkanipāta
iti103:0.3	Brāhmaṇadhammayāgavagga
iti103:0.4	Samaṇabrāhmaṇasutta
iti103:1.1	Vuttañhetaṁ bhagavatā vuttamarahatāti me sutaṁ:
iti103:2.1	“Ye hi keci, bhikkhave, samaṇā vā brāhmaṇā vā ‘idaṁ dukkhan’ti yathābhūtaṁ nappajānanti; ‘ayaṁ dukkhasamudayo’ti yathābhūtaṁ nappajānanti; ‘ayaṁ dukkhanirodho’ti yathābhūtaṁ nappajānanti; ‘ayaṁ dukkhanirodhagāminī paṭipadā’ti yathābhūtaṁ nappajānanti—
iti103:2.2	na me te, bhikkhave, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā, na ca panete āyasmanto sāmaññatthaṁ vā brahmaññatthaṁ vā diṭṭheva dhamme sayaṁ abhiññā sacchikatvā upasampajja viharanti.
iti103:3.1	Ye ca kho keci, bhikkhave, samaṇā vā brāhmaṇā vā ‘idaṁ dukkhan’ti yathābhūtaṁ pajānanti; ‘ayaṁ dukkhasamudayo’ti yathābhūtaṁ pajānanti; ‘ayaṁ dukkhanirodho’ti yathābhūtaṁ pajānanti; ‘ayaṁ dukkhanirodhagāminī paṭipadā’ti yathābhūtaṁ pajānanti—
iti103:3.2	te kho me, bhikkhave, samaṇā vā brāhmaṇā vā samaṇesu ceva samaṇasammatā brāhmaṇesu ca brāhmaṇasammatā, te ca panāyasmanto sāmaññatthañca brahmaññatthañca diṭṭheva dhamme sayaṁ abhiññā sacchikatvā upasampajja viharantī”ti.
iti103:3.3	Etamatthaṁ bhagavā avoca.
iti103:3.4	Tatthetaṁ iti vuccati:
iti103:4.1	“Ye dukkhaṁ nappajānanti,
iti103:4.2	atho dukkhassa sambhavaṁ;
iti103:4.3	Yattha ca sabbaso dukkhaṁ,
iti103:4.4	asesaṁ uparujjhati;
iti103:4.5	Tañca maggaṁ na jānanti,
iti103:4.6	dukkhūpasamagāminaṁ.
iti103:5.1	Cetovimuttihīnā te,
iti103:5.2	Atho paññāvimuttiyā;
iti103:5.3	Abhabbā te antakiriyāya,
iti103:5.4	Te ve jātijarūpagā.
iti103:6.1	Ye ca dukkhaṁ pajānanti,
iti103:6.2	atho dukkhassa sambhavaṁ;
iti103:6.3	Yattha ca sabbaso dukkhaṁ,
iti103:6.4	asesaṁ uparujjhati;
iti103:6.5	Tañca maggaṁ pajānanti,
iti103:6.6	dukkhūpasamagāminaṁ.
iti103:7.1	Cetovimuttisampannā,
iti103:7.2	atho paññāvimuttiyā;
iti103:7.3	Bhabbā te antakiriyāya,
iti103:7.4	na te jātijarūpagā”ti.
iti103:8.1	Ayampi attho vutto bhagavatā, iti me sutanti.
iti103:8.2	Catutthaṁ.
iti104:0.1	Itivuttaka 104
iti104:0.2	Catukkanipāta
iti104:0.3	Brāhmaṇadhammayāgavagga
iti104:0.4	Sīlasampannasutta
iti104:1.1	Vuttañhetaṁ bhagavatā vuttamarahatāti me sutaṁ:
iti104:2.1	“Ye te, bhikkhave, bhikkhū sīlasampannā samādhisampannā paññāsampannā vimuttisampannā vimuttiñāṇadassanasampannā ovādakā viññāpakā sandassakā samādapakā samuttejakā sampahaṁsakā alaṁsamakkhātāro saddhammassa dassanampahaṁ, bhikkhave, tesaṁ bhikkhūnaṁ bahūpakāraṁ vadāmi;
iti104:2.2	savanampahaṁ, bhikkhave, tesaṁ bhikkhūnaṁ bahūpakāraṁ vadāmi;
iti104:2.3	upasaṅkamanampahaṁ, bhikkhave, tesaṁ bhikkhūnaṁ bahūpakāraṁ vadāmi;
iti104:2.4	payirupāsanampahaṁ, bhikkhave, tesaṁ bhikkhūnaṁ bahūpakāraṁ vadāmi;
iti104:2.5	anussaraṇampahaṁ, bhikkhave, tesaṁ bhikkhūnaṁ bahūpakāraṁ vadāmi;
iti104:2.6	anupabbajjampahaṁ, bhikkhave, tesaṁ bhikkhūnaṁ bahūpakāraṁ vadāmi.
iti104:2.7	Taṁ kissa hetu?
iti104:2.8	Tathārūpe, bhikkhave, bhikkhū sevato bhajato payirupāsato aparipūropi sīlakkhandho bhāvanāpāripūriṁ gacchati, aparipūropi samādhikkhandho bhāvanāpāripūriṁ gacchati, aparipūropi paññākkhandho bhāvanāpāripūriṁ gacchati, aparipūropi vimuttikkhandho bhāvanāpāripūriṁ gacchati, aparipūropi vimuttiñāṇadassanakkhandho bhāvanāpāripūriṁ gacchati.
iti104:2.9	Evarūpā ca te, bhikkhave, bhikkhū satthārotipi vuccanti, satthavāhātipi vuccanti, raṇañjahātipi vuccanti, tamonudātipi vuccanti, ālokakarātipi vuccanti, obhāsakarātipi vuccanti, pajjotakarātipi vuccanti, ukkādhārātipi vuccanti, pabhaṅkarātipi vuccanti, ariyātipi vuccanti, cakkhumantotipi vuccantī”ti.
iti104:2.10	Etamatthaṁ bhagavā avoca.
iti104:2.11	Tatthetaṁ iti vuccati:
iti104:3.1	“Pāmojjakaraṇaṁ ṭhānaṁ,
iti104:3.2	etaṁ hoti vijānataṁ;
iti104:3.3	Yadidaṁ bhāvitattānaṁ,
iti104:3.4	ariyānaṁ dhammajīvinaṁ.
iti104:4.1	Te jotayanti saddhammaṁ,
iti104:4.2	bhāsayanti pabhaṅkarā;
iti104:4.3	Ālokakaraṇā dhīrā,
iti104:4.4	cakkhumanto raṇañjahā.
iti104:5.1	Yesaṁ ve sāsanaṁ sutvā,
iti104:5.2	sammadaññāya paṇḍitā;
iti104:5.3	Jātikkhayamabhiññāya,
iti104:5.4	nāgacchanti punabbhavan”ti.
iti104:6.1	Ayampi attho vutto bhagavatā, iti me sutanti.
iti104:6.2	Pañcamaṁ.
iti105:0.1	Itivuttaka 105
iti105:0.2	Catukkanipāta
iti105:0.3	Brāhmaṇadhammayāgavagga
iti105:0.4	Taṇhuppādasutta
iti105:1.1	Vuttañhetaṁ bhagavatā vuttamarahatāti me sutaṁ:
iti105:2.1	“Cattārome, bhikkhave, taṇhuppādā, yattha bhikkhuno taṇhā uppajjamānā uppajjati.
iti105:2.2	Katame cattāro?
iti105:2.3	Cīvarahetu vā, bhikkhave, bhikkhuno taṇhā uppajjamānā uppajjati;
iti105:2.4	piṇḍapātahetu vā, bhikkhave, bhikkhuno taṇhā uppajjamānā uppajjati;
iti105:2.5	senāsanahetu vā, bhikkhave, bhikkhuno taṇhā uppajjamānā uppajjati;
iti105:2.6	itibhavābhavahetu vā, bhikkhave, bhikkhuno taṇhā uppajjamānā uppajjati.
iti105:2.7	Ime kho, bhikkhave, cattāro taṇhuppādā yattha bhikkhuno taṇhā uppajjamānā uppajjatī”ti.
iti105:2.8	Etamatthaṁ bhagavā avoca.
iti105:2.9	Tatthetaṁ iti vuccati:
iti105:3.1	“Taṇhādutiyo puriso,
iti105:3.2	dīghamaddhāna saṁsaraṁ;
iti105:3.3	Itthabhāvaññathābhāvaṁ,
iti105:3.4	saṁsaraṁ nātivattati.
iti105:4.1	Etamādīnavaṁ ñatvā,
iti105:4.2	taṇhaṁ dukkhassa sambhavaṁ;
iti105:4.3	Vītataṇho anādāno,
iti105:4.4	sato bhikkhu paribbaje”ti.
iti105:5.1	Ayampi attho vutto bhagavatā, iti me sutanti.
iti105:5.2	Chaṭṭhaṁ.
iti106:0.1	Itivuttaka 106
iti106:0.2	Catukkanipāta
iti106:0.3	Brāhmaṇadhammayāgavagga
iti106:0.4	Sabrahmakasutta
iti106:1.1	Vuttañhetaṁ bhagavatā vuttamarahatāti me sutaṁ:
iti106:2.1	“Sabrahmakāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
iti106:2.2	Sapubbadevatāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
iti106:2.3	Sapubbācariyakāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
iti106:2.4	Sāhuneyyakāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
iti106:3.1	‘Brahmā’ti, bhikkhave, mātāpitūnaṁ etaṁ adhivacanaṁ.
iti106:3.2	‘Pubbadevatā’ti, bhikkhave, mātāpitūnaṁ etaṁ adhivacanaṁ.
iti106:3.3	‘Pubbācariyā’ti, bhikkhave, mātāpitūnaṁ etaṁ adhivacanaṁ.
iti106:3.4	‘Āhuneyyā’ti, bhikkhave, mātāpitūnaṁ etaṁ adhivacanaṁ.
iti106:3.5	Taṁ kissa hetu?
iti106:3.6	Bahukārā, bhikkhave, mātāpitaro puttānaṁ āpādakā posakā imassa lokassa dassetāro”ti.
iti106:3.7	Etamatthaṁ bhagavā avoca.
iti106:3.8	Tatthetaṁ iti vuccati:
iti106:4.1	“Brahmāti mātāpitaro,
iti106:4.2	pubbācariyāti vuccare;
iti106:4.3	Āhuneyyā ca puttānaṁ,
iti106:4.4	pajāya anukampakā.
iti106:5.1	Tasmā hi ne namasseyya,
iti106:5.2	sakkareyya ca paṇḍito;
iti106:5.3	Annena atha pānena,
iti106:5.4	vatthena sayanena ca;
iti106:5.5	Ucchādanena nhāpanena,
iti106:5.6	pādānaṁ dhovanena ca.
iti106:6.1	Tāya naṁ pāricariyāya,
iti106:6.2	mātāpitūsu paṇḍitā;
iti106:6.3	Idheva naṁ pasaṁsanti,
iti106:6.4	pecca sagge pamodatī”ti.
iti106:7.1	Ayampi attho vutto bhagavatā, iti me sutanti.
iti106:7.2	Sattamaṁ.
iti107:0.1	Itivuttaka 107
iti107:0.2	Catukkanipāta
iti107:0.3	Brāhmaṇadhammayāgavagga
iti107:0.4	Bahukārasutta
iti107:1.1	Vuttañhetaṁ bhagavatā vuttamarahatāti me sutaṁ:
iti107:2.1	“Bahukārā, bhikkhave, brāhmaṇagahapatikā tumhākaṁ ye vo paccupaṭṭhitā cīvarapiṇḍapātasenāsanagilānapaccayabhesajjaparikkhārehi.
iti107:2.2	Tumhepi, bhikkhave, bahukārā brāhmaṇagahapatikānaṁ yaṁ nesaṁ dhammaṁ desetha ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāsetha.
iti107:2.3	Evamidaṁ, bhikkhave, aññamaññaṁ nissāya brahmacariyaṁ vussati oghassa nittharaṇatthāya sammā dukkhassa antakiriyāyā”ti.
iti107:2.4	Etamatthaṁ bhagavā avoca.
iti107:2.5	Tatthetaṁ iti vuccati:
iti107:3.1	“Sāgārā anagārā ca,
iti107:3.2	ubho aññoññanissitā;
iti107:3.3	Ārādhayanti saddhammaṁ,
iti107:3.4	yogakkhemaṁ anuttaraṁ.
iti107:4.1	Sāgāresu ca cīvaraṁ,
iti107:4.2	paccayaṁ sayanāsanaṁ;
iti107:4.3	Anagārā paṭicchanti,
iti107:4.4	parissayavinodanaṁ.
iti107:5.1	Sugataṁ pana nissāya,
iti107:5.2	gahaṭṭhā gharamesino;
iti107:5.3	Saddahānā arahataṁ,
iti107:5.4	ariyapaññāya jhāyino.
iti107:6.1	Idha dhammaṁ caritvāna,
iti107:6.2	maggaṁ sugatigāminaṁ;
iti107:6.3	Nandino devalokasmiṁ,
iti107:6.4	modanti kāmakāmino”ti.
iti107:7.1	Ayampi attho vutto bhagavatā, iti me sutanti.
iti107:7.2	Aṭṭhamaṁ.
iti108:0.1	Itivuttaka 108
iti108:0.2	Catukkanipāta
iti108:0.3	Brāhmaṇadhammayāgavagga
iti108:0.4	Kuhasutta
iti108:1.1	Vuttañhetaṁ bhagavatā vuttamarahatāti me sutaṁ:
iti108:2.1	“Ye keci, bhikkhave, bhikkhū kuhā thaddhā lapā siṅgī unnaḷā asamāhitā, na me te, bhikkhave, bhikkhū māmakā.
iti108:2.2	Apagatā ca te, bhikkhave, bhikkhū imasmā dhammavinayā; na ca te imasmiṁ dhammavinaye vuddhiṁ virūḷhiṁ vepullaṁ āpajjanti.
iti108:2.3	Ye ca kho, bhikkhave, bhikkhū nikkuhā nillapā dhīrā atthaddhā susamāhitā, te kho me, bhikkhave, bhikkhū māmakā.
iti108:2.4	Anapagatā ca te, bhikkhave, bhikkhū imasmā dhammavinayā; te ca imasmiṁ dhammavinaye vuddhiṁ virūḷhiṁ vepullaṁ āpajjantī”ti.
iti108:2.5	Etamatthaṁ bhagavā avoca.
iti108:2.6	Tatthetaṁ iti vuccati:
iti108:3.1	“Kuhā thaddhā lapā siṅgī,
iti108:3.2	unnaḷā asamāhitā;
iti108:3.3	Na te dhamme virūhanti,
iti108:3.4	sammāsambuddhadesite.
iti108:4.1	Nikkuhā nillapā dhīrā,
iti108:4.2	atthaddhā susamāhitā;
iti108:4.3	Te ve dhamme virūhanti,
iti108:4.4	sammāsambuddhadesite”ti.
iti108:5.1	Ayampi attho vutto bhagavatā, iti me sutanti.
iti108:5.2	Navamaṁ.
iti109:0.1	Itivuttaka 109
iti109:0.2	Catukkanipāta
iti109:0.3	Brāhmaṇadhammayāgavagga
iti109:0.4	Nadīsotasutta
iti109:1.1	Vuttañhetaṁ bhagavatā vuttamarahatāti me sutaṁ:
iti109:2.1	“Seyyathāpi, bhikkhave, puriso nadiyā sotena ovuyheyya piyarūpasātarūpena.
iti109:2.2	Tamenaṁ cakkhumā puriso tīre ṭhito disvā evaṁ vadeyya:
iti109:2.3	‘kiñcāpi kho tvaṁ, ambho purisa, nadiyā sotena ovuyhasi piyarūpasātarūpena, atthi cettha heṭṭhā rahado saūmi sāvaṭṭo sagaho sarakkhaso yaṁ tvaṁ, ambho purisa, rahadaṁ pāpuṇitvā maraṇaṁ vā nigacchasi maraṇamattaṁ vā dukkhan’ti.
iti109:2.4	Atha kho so, bhikkhave, puriso tassa purisassa saddaṁ sutvā hatthehi ca pādehi ca paṭisotaṁ vāyameyya.
iti109:3.1	Upamā kho me ayaṁ, bhikkhave, katā atthassa viññāpanāya.
iti109:3.2	Ayañcettha attho:
iti109:3.3	‘nadiyā soto’ti kho, bhikkhave, taṇhāyetaṁ adhivacanaṁ.
iti109:4.1	‘Piyarūpaṁ sātarūpan’ti kho, bhikkhave, channetaṁ ajjhattikānaṁ āyatanānaṁ adhivacanaṁ.
iti109:5.1	‘Heṭṭhā rahado’ti kho, bhikkhave, pañcannaṁ orambhāgiyānaṁ saṁyojanānaṁ adhivacanaṁ.
iti109:6.1	‘Ūmibhayan’ti kho, bhikkhave, kodhupāyāsassetaṁ adhivacanaṁ.
iti109:7.1	‘Āvaṭṭan’ti kho, bhikkhave, pañcannetaṁ kāmaguṇānaṁ adhivacanaṁ.
iti109:8.1	‘Gaharakkhaso’ti kho, bhikkhave, mātugāmassetaṁ adhivacanaṁ.
iti109:9.1	‘Paṭisoto’ti kho, bhikkhave, nekkhammassetaṁ adhivacanaṁ.
iti109:10.1	‘Hatthehi ca pādehi ca vāyāmo’ti kho, bhikkhave, vīriyārambhassetaṁ adhivacanaṁ.
iti109:11.1	‘Cakkhumā puriso tīre ṭhito’ti kho, bhikkhave, tathāgatassetaṁ adhivacanaṁ arahato sammāsambuddhassā”ti.
iti109:11.2	Etamatthaṁ bhagavā avoca.
iti109:11.3	Tatthetaṁ iti vuccati:
iti109:12.1	“Sahāpi dukkhena jaheyya kāme,
iti109:12.2	Yogakkhemaṁ āyatiṁ patthayāno;
iti109:12.3	Sammappajāno suvimuttacitto,
iti109:12.4	Vimuttiyā phassaye tattha tattha;
iti109:12.5	Sa vedagū vūsitabrahmacariyo,
iti109:12.6	Lokantagū pāragatoti vuccatī”ti.
iti109:13.1	Ayampi attho vutto bhagavatā, iti me sutanti.
iti109:13.2	Dasamaṁ.
iti110:0.1	Itivuttaka 110
iti110:0.2	Catukkanipāta
iti110:0.3	Brāhmaṇadhammayāgavagga
iti110:0.4	Carasutta
iti110:1.1	Vuttañhetaṁ bhagavatā vuttamarahatāti me sutaṁ:
iti110:2.1	“Carato cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
iti110:2.2	Tañce, bhikkhave, bhikkhu adhivāseti nappajahati na vinodeti na byantīkaroti na anabhāvaṁ gameti.
iti110:2.3	Carampi, bhikkhave, bhikkhu evaṁbhūto anātāpī anottāpī satataṁ samitaṁ kusīto hīnavīriyoti vuccati.
iti110:3.1	Ṭhitassa cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
iti110:3.2	Tañce, bhikkhave, bhikkhu adhivāseti nappajahati na vinodeti na byantīkaroti na anabhāvaṁ gameti.
iti110:3.3	Ṭhitopi, bhikkhave, bhikkhu evaṁbhūto anātāpī anottāpī satataṁ samitaṁ kusīto hīnavīriyoti vuccati.
iti110:4.1	Nisinnassa cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
iti110:4.2	Tañce, bhikkhave, bhikkhu adhivāseti nappajahati na vinodeti na byantīkaroti na anabhāvaṁ gameti.
iti110:4.3	Nisinnopi, bhikkhave, bhikkhu evaṁbhūto anātāpī anottāpī satataṁ samitaṁ kusīto hīnavīriyoti vuccati.
iti110:5.1	Sayānassa cepi, bhikkhave, bhikkhuno jāgarassa uppajjati kāmavitakko vā byāpādavitakko vā vihiṁsāvitakko vā.
iti110:5.2	Tañce, bhikkhave, bhikkhu adhivāseti nappajahati na vinodeti na byantīkaroti na anabhāvaṁ gameti.
iti110:5.3	Sayānopi, bhikkhave, bhikkhu jāgaro evaṁbhūto anātāpī anottāpī satataṁ samitaṁ kusīto hīnavīriyoti vuccati.
iti110:6.1	Carato cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
iti110:6.2	Tañce, bhikkhave, bhikkhu nādhivāseti pajahati vinodeti byantīkaroti anabhāvaṁ gameti.
iti110:6.3	Carampi, bhikkhave, bhikkhu evaṁbhūto ātāpī ottāpī satataṁ samitaṁ āraddhavīriyo pahitattoti vuccati.
iti110:7.1	Ṭhitassa cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
iti110:7.2	Tañce, bhikkhave, bhikkhu nādhivāseti pajahati vinodeti byantīkaroti anabhāvaṁ gameti.
iti110:7.3	Ṭhitopi, bhikkhave, bhikkhu evaṁbhūto ātāpī ottāpī satataṁ samitaṁ āraddhavīriyo pahitattoti vuccati.
iti110:8.1	Nisinnassa cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
iti110:8.2	Tañce, bhikkhave, bhikkhu nādhivāseti pajahati vinodeti byantīkaroti anabhāvaṁ gameti.
iti110:8.3	Nisinnopi, bhikkhave, bhikkhu evaṁbhūto ātāpī ottāpī satataṁ samitaṁ āraddhavīriyo pahitattoti vuccati.
iti110:9.1	Sayānassa cepi, bhikkhave, bhikkhuno jāgarassa uppajjati kāmavitakko vā byāpādavitakko vā vihiṁsāvitakko vā.
iti110:9.2	Tañce, bhikkhave, bhikkhu nādhivāseti pajahati vinodeti byantīkaroti anabhāvaṁ gameti.
iti110:9.3	Sayānopi, bhikkhave, bhikkhu jāgaro evaṁbhūto ātāpī ottāpī satataṁ samitaṁ āraddhavīriyo pahitattoti vuccatī”ti.
iti110:9.4	Etamatthaṁ bhagavā avoca.
iti110:9.5	Tatthetaṁ iti vuccati:
iti110:10.1	“Caraṁ vā yadi vā tiṭṭhaṁ,
iti110:10.2	nisinno uda vā sayaṁ;
iti110:10.3	Yo vitakkaṁ vitakketi,
iti110:10.4	pāpakaṁ gehanissitaṁ.
iti110:11.1	Kummaggaṁ paṭipanno so,
iti110:11.2	mohaneyyesu mucchito;
iti110:11.3	Abhabbo tādiso bhikkhu,
iti110:11.4	phuṭṭhuṁ sambodhimuttamaṁ.
iti110:12.1	Yo ca caraṁ vā tiṭṭhaṁ vā,
iti110:12.2	Nisinno uda vā sayaṁ;
iti110:12.3	Vitakkaṁ samayitvāna,
iti110:12.4	Vitakkūpasame rato;
iti110:12.5	Bhabbo so tādiso bhikkhu,
iti110:12.6	Phuṭṭhuṁ sambodhimuttaman”ti.
iti110:13.1	Ayampi attho vutto bhagavatā, iti me sutanti.
iti110:13.2	Ekādasamaṁ.
iti111:0.1	Itivuttaka 111
iti111:0.2	Catukkanipāta
iti111:0.3	Brāhmaṇadhammayāgavagga
iti111:0.4	Sampannasīlasutta
iti111:1.1	Vuttañhetaṁ bhagavatā vuttamarahatāti me sutaṁ:
iti111:2.1	“Sampannasīlā, bhikkhave, viharatha sampannapātimokkhā; pātimokkhasaṁvarasaṁvutā viharatha ācāragocarasampannā aṇumattesu vajjesu bhayadassāvino; samādāya sikkhatha sikkhāpadesu.
iti111:3.1	Sampannasīlānaṁ vo, bhikkhave, viharataṁ sampannapātimokkhānaṁ pātimokkhasaṁvarasaṁvutānaṁ viharataṁ ācāragocarasampannānaṁ aṇumattesu vajjesu bhayadassāvīnaṁ samādāya sikkhataṁ sikkhāpadesu, kimassa uttari karaṇīyaṁ?
iti111:4.1	Carato cepi, bhikkhave, bhikkhuno abhijjhā, byāpādo vigato hoti, thinamiddhaṁ vigataṁ hoti, uddhaccakukkuccaṁ vigataṁ hoti, vicikicchā pahīnā hoti, āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ.
iti111:4.2	Carampi, bhikkhave, bhikkhu evaṁbhūto ātāpī ottāpī satataṁ samitaṁ āraddhavīriyo pahitattoti vuccati.
iti111:5.1	Ṭhitassa cepi, bhikkhave, bhikkhuno abhijjhā byāpādo vigato hoti …pe… thinamiddhaṁ … uddhaccakukkuccaṁ … vicikicchā pahīnā hoti, āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ.
iti111:5.2	Ṭhitopi, bhikkhave, bhikkhu evaṁbhūto ātāpī ottāpī satataṁ samitaṁ āraddhavīriyo pahitattoti vuccati.
iti111:6.1	Nisinnassa cepi, bhikkhave, bhikkhuno abhijjhā byāpādo vigato hoti …pe… thinamiddhaṁ … uddhaccakukkuccaṁ … vicikicchā pahīnā hoti, āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ.
iti111:6.2	Nisinnopi, bhikkhave, bhikkhu evaṁbhūto ātāpī ottāpī satataṁ samitaṁ āraddhavīriyo pahitattoti vuccati.
iti111:7.1	Sayānassa cepi, bhikkhave, bhikkhuno jāgarassa abhijjhā byāpādo vigato hoti …pe… thinamiddhaṁ … uddhaccakukkuccaṁ … vicikicchā pahīnā hoti, āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ.
iti111:7.2	Sayānopi, bhikkhave, bhikkhu jāgaro evaṁbhūto ātāpī ottāpī satataṁ samitaṁ āraddhavīriyo pahitattoti vuccatī”ti.
iti111:7.3	Etamatthaṁ bhagavā avoca.
iti111:7.4	Tatthetaṁ iti vuccati:
iti111:8.1	“Yataṁ care yataṁ tiṭṭhe,
iti111:8.2	yataṁ acche yataṁ saye;
iti111:8.3	Yataṁ samiñjaye bhikkhu,
iti111:8.4	yatamenaṁ pasāraye.
iti111:9.1	Uddhaṁ tiriyaṁ apācīnaṁ,
iti111:9.2	yāvatājagatogati;
iti111:9.3	Samavekkhitā ca dhammānaṁ,
iti111:9.4	khandhānaṁ udayabbayaṁ.
iti111:10.1	Evaṁ vihārimātāpiṁ,
iti111:10.2	santavuttimanuddhataṁ;
iti111:10.3	Cetosamathasāmīciṁ,
iti111:10.4	sikkhamānaṁ sadā sataṁ;
iti111:10.5	Satataṁ pahitattoti,
iti111:10.6	āhu bhikkhuṁ tathāvidhan”ti.
iti111:11.1	Ayampi attho vutto bhagavatā, iti me sutanti.
iti111:11.2	Dvādasamaṁ.
iti112:0.1	Itivuttaka 112
iti112:0.2	Catukkanipāta
iti112:0.3	Brāhmaṇadhammayāgavagga
iti112:0.4	Lokasutta
iti112:1.1	Vuttañhetaṁ bhagavatā vuttamarahatāti me sutaṁ:
iti112:2.1	“Loko, bhikkhave, tathāgatena abhisambuddho,
iti112:2.2	lokasmā tathāgato visaṁyutto.
iti112:2.3	Lokasamudayo, bhikkhave, tathāgatena abhisambuddho,
iti112:2.4	lokasamudayo tathāgatassa pahīno.
iti112:2.5	Lokanirodho, bhikkhave, tathāgatena abhisambuddho,
iti112:2.6	lokanirodho tathāgatassa sacchikato.
iti112:2.7	Lokanirodhagāminī paṭipadā, bhikkhave, tathāgatena abhisambuddhā,
iti112:2.8	lokanirodhagāminī paṭipadā tathāgatassa bhāvitā.
iti112:3.1	Yaṁ, bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā yasmā taṁ tathāgatena abhisambuddhaṁ,
iti112:3.2	tasmā ‘tathāgato’ti vuccati.
iti112:4.1	Yañca, bhikkhave, rattiṁ tathāgato anuttaraṁ sammāsambodhiṁ abhisambujjhati, yañca rattiṁ anupādisesāya nibbānadhātuyā parinibbāyati, yaṁ etasmiṁ antare bhāsati lapati niddisati, sabbaṁ taṁ tatheva hoti no aññathā,
iti112:4.2	tasmā ‘tathāgato’ti vuccati.
iti112:5.1	Yathāvādī, bhikkhave, tathāgato tathākārī, yathākārī tathāvādī,
iti112:5.2	iti yathāvādī tathākārī yathākārī tathāvādī,
iti112:5.3	tasmā ‘tathāgato’ti vuccati.
iti112:6.1	Sadevake, bhikkhave, loke samārake sabrahmake sassamaṇabrāhmaṇiyā pajāya sadevamanussāya tathāgato abhibhū anabhibhūto aññadatthudaso vasavattī,
iti112:6.2	tasmā tathāgatoti vuccatī”ti.
iti112:6.3	Etamatthaṁ bhagavā avoca.
iti112:6.4	Tatthetaṁ iti vuccati:
iti112:7.1	“Sabbalokaṁ abhiññāya,
iti112:7.2	sabbaloke yathātathaṁ;
iti112:7.3	Sabbalokavisaṁyutto,
iti112:7.4	sabbaloke anūpayo.
iti112:8.1	Sa ve sabbābhibhū dhīro,
iti112:8.2	sabbaganthappamocano;
iti112:8.3	Phuṭṭhāssa paramā santi,
iti112:8.4	nibbānaṁ akutobhayaṁ.
iti112:9.1	Esa khīṇāsavo buddho,
iti112:9.2	anīgho chinnasaṁsayo;
iti112:9.3	Sabbakammakkhayaṁ patto,
iti112:9.4	vimutto upadhisaṅkhaye.
iti112:10.1	Esa so bhagavā buddho,
iti112:10.2	esa sīho anuttaro;
iti112:10.3	Sadevakassa lokassa,
iti112:10.4	brahmacakkaṁ pavattayi.
iti112:11.1	Iti devā manussā ca,
iti112:11.2	ye buddhaṁ saraṇaṁ gatā;
iti112:11.3	Saṅgamma taṁ namassanti,
iti112:11.4	mahantaṁ vītasāradaṁ.
iti112:12.1	Danto damayataṁ seṭṭho,
iti112:12.2	santo samayataṁ isi;
iti112:12.3	Mutto mocayataṁ aggo,
iti112:12.4	tiṇṇo tārayataṁ varo.
iti112:13.1	Iti hetaṁ namassanti,
iti112:13.2	mahantaṁ vītasāradaṁ;
iti112:13.3	Sadevakasmiṁ lokasmiṁ,
iti112:13.4	natthi te paṭipuggalo”ti.
iti112:14.1	Ayampi attho vutto bhagavatā, iti me sutanti.
iti112:14.2	Terasamaṁ.
iti112:14.3	Catukkanipāto niṭṭhito.
iti112:15.0	Tassuddānaṁ
iti112:15.1	Brāhmaṇasulabhā jānaṁ,
iti112:15.2	Samaṇasīlā taṇhā brahmā;
iti112:15.3	Bahukārā kuhapurisā,
iti112:15.4	Cara sampannalokena terasāti.
iti112:16.0	Suttasaṅgaho
iti112:16.1	Sattavisekanipātaṁ,
iti112:16.2	Dukkaṁ bāvīsasuttasaṅgahitaṁ;
iti112:16.3	Samapaññāsamathatikaṁ,
iti112:16.4	Terasa catukkañca iti yamidaṁ.
iti112:17.1	Dvidasuttarasuttasate,
iti112:17.2	Saṅgāyitvā samādahiṁsu purā;
iti112:17.3	Arahanto ciraṭṭhitiyā,
iti112:17.4	Tamāhu nāmena itivuttanti.
iti112:17.5	Itivuttakapāḷi niṭṭhitā.