# Cariyāpiṭaka — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

cp1:0.1	Cariyāpiṭaka
cp1:0.2	Akittivagga
cp1:0.3	Dānapāramī 1
cp1:0.4	Akitticariya
cp1:1.1	Namo tassa Bhagavato Arahato Sammāsambuddhassa.
cp1:2.1	“Kappe ca satasahasse,
cp1:2.2	caturo ca asaṅkhiye;
cp1:2.3	Etthantare yaṁ caritaṁ,
cp1:2.4	sabbaṁ taṁ bodhipācanaṁ.
cp1:3.1	Atītakappe caritaṁ,
cp1:3.2	ṭhapayitvā bhavābhave;
cp1:3.3	Imamhi kappe caritaṁ,
cp1:3.4	pavakkhissaṁ suṇohi me.
cp1:4.1	Yadā ahaṁ brahāraññe,
cp1:4.2	suññe vipinakānane;
cp1:4.3	Ajjhogāhetvā viharāmi,
cp1:4.4	akitti nāma tāpaso.
cp1:5.1	Tadā maṁ tapatejena,
cp1:5.2	santatto tidivābhibhū;
cp1:5.3	Dhārento brāhmaṇavaṇṇaṁ,
cp1:5.4	bhikkhāya maṁ upāgami.
cp1:6.1	Pavanā ābhataṁ paṇṇaṁ,
cp1:6.2	atelañca aloṇikaṁ;
cp1:6.3	Mama dvāre ṭhitaṁ disvā,
cp1:6.4	sakaṭāhena ākiriṁ.
cp1:7.1	Tassa datvānahaṁ paṇṇaṁ,
cp1:7.2	nikkujjitvāna bhājanaṁ;
cp1:7.3	Punesanaṁ jahitvāna,
cp1:7.4	pāvisiṁ paṇṇasālakaṁ.
cp1:8.1	Dutiyampi tatiyampi,
cp1:8.2	upagañchi mamantikaṁ;
cp1:8.3	Akampito anolaggo,
cp1:8.4	evamevamadāsahaṁ.
cp1:9.1	Na me tappaccayā atthi,
cp1:9.2	sarīrasmiṁ vivaṇṇiyaṁ;
cp1:9.3	Pītisukhena ratiyā,
cp1:9.4	vītināmemi taṁ divaṁ.
cp1:10.1	Yadi māsampi dvemāsaṁ,
cp1:10.2	dakkhiṇeyyaṁ varaṁ labhe;
cp1:10.3	Akampito anolīno,
cp1:10.4	dadeyyaṁ dānamuttamaṁ.
cp1:11.1	Na tassa dānaṁ dadamāno,
cp1:11.2	yasaṁ lābhañca patthayiṁ;
cp1:11.3	Sabbaññutaṁ patthayāno,
cp1:11.4	tāni kammāni ācarin”ti.
cp1:12.1	Akitticariyaṁ paṭhamaṁ.
cp2:0.1	Cariyāpiṭaka
cp2:0.2	Akittivagga
cp2:0.3	Dānapāramī 2
cp2:0.4	Saṅkhacariya
cp2:1.1	“Punāparaṁ yadā homi,
cp2:1.2	Brāhmaṇo saṅkhasavhayo;
cp2:1.3	Mahāsamuddaṁ taritukāmo,
cp2:1.4	Upagacchāmi paṭṭanaṁ.
cp2:2.1	Tatthaddasaṁ paṭipathe,
cp2:2.2	Sayambhuṁ aparājitaṁ;
cp2:2.3	Kantāraddhānaṁ paṭipannaṁ,
cp2:2.4	Tattāya kaṭhinabhūmiyā.
cp2:3.1	Tamahaṁ paṭipathe disvā,
cp2:3.2	imamatthaṁ vicintayiṁ;
cp2:3.3	‘Idaṁ khettaṁ anuppattaṁ,
cp2:3.4	puññakāmassa jantuno.
cp2:4.1	Yathā kassako puriso,
cp2:4.2	khettaṁ disvā mahāgamaṁ;
cp2:4.3	Tattha bījaṁ na ropeti,
cp2:4.4	na so dhaññena atthiko.
cp2:5.1	Evamevāhaṁ puññakāmo,
cp2:5.2	Disvā khettavaruttamaṁ;
cp2:5.3	Yadi tattha kāraṁ na karomi,
cp2:5.4	Nāhaṁ puññena atthiko.
cp2:6.1	Yathā amacco muddikāmo,
cp2:6.2	rañño antepure jane;
cp2:6.3	Na deti tesaṁ dhanadhaññaṁ,
cp2:6.4	muddito parihāyati.
cp2:7.1	Evamevāhaṁ puññakāmo,
cp2:7.2	Vipulaṁ disvāna dakkhiṇaṁ;
cp2:7.3	Yadi tassa dānaṁ na dadāmi,
cp2:7.4	Parihāyissāmi puññato’.
cp2:8.1	Evāhaṁ cintayitvāna,
cp2:8.2	orohitvā upāhanā;
cp2:8.3	Tassa pādāni vanditvā,
cp2:8.4	adāsiṁ chattupāhanaṁ.
cp2:9.1	Tenevāhaṁ sataguṇato,
cp2:9.2	Sukhumālo sukhedhito;
cp2:9.3	Api ca dānaṁ paripūrento,
cp2:9.4	Evaṁ tassa adāsahan”ti.
cp2:10.1	Saṅkhacariyaṁ dutiyaṁ.
cp3:0.1	Cariyāpiṭaka
cp3:0.2	Akittivagga
cp3:0.3	Dānapāramī 3
cp3:0.4	Kururājacariya
cp3:1.1	“Punāparaṁ yadā homi,
cp3:1.2	indapatthe puruttame;
cp3:1.3	Rājā dhanañcayo nāma,
cp3:1.4	kusale dasahupāgato.
cp3:2.1	Kaliṅgaraṭṭhavisayā,
cp3:2.2	brāhmaṇā upagañchu maṁ;
cp3:2.3	Āyācuṁ maṁ hatthināgaṁ,
cp3:2.4	dhaññaṁ maṅgalasammataṁ.
cp3:3.1	‘Avuṭṭhiko janapado,
cp3:3.2	dubbhikkho chātako mahā;
cp3:3.3	Dadāhi pavaraṁ nāgaṁ,
cp3:3.4	nīlaṁ añjanasavhayaṁ’.
cp3:4.1	‘Na me yācakamanuppatte,
cp3:4.2	paṭikkhepo anucchavo;
cp3:4.3	Mā me bhijji samādānaṁ,
cp3:4.4	dassāmi vipulaṁ gajaṁ’.
cp3:5.1	Nāgaṁ gahetvā soṇḍāya,
cp3:5.2	bhiṅgāre ratanāmaye;
cp3:5.3	Jalaṁ hatthe ākiritvā,
cp3:5.4	brāhmaṇānaṁ adaṁ gajaṁ.
cp3:6.1	Tassa nāge padinnamhi,
cp3:6.2	amaccā etadabravuṁ;
cp3:6.3	‘Kiṁ nu tuyhaṁ varaṁ nāgaṁ,
cp3:6.4	yācakānaṁ padassasi.
cp3:7.1	Dhaññaṁ maṅgalasampannaṁ,
cp3:7.2	saṅgāmavijayuttamaṁ;
cp3:7.3	Tasmiṁ nāge padinnamhi,
cp3:7.4	kiṁ te rajjaṁ karissati’.
cp3:8.1	‘Rajjampi me dade sabbaṁ,
cp3:8.2	sarīraṁ dajjamattano;
cp3:8.3	Sabbaññutaṁ piyaṁ mayhaṁ,
cp3:8.4	tasmā nāgaṁ adāsahan’”ti.
cp3:9.1	Kururājacariyaṁ tatiyaṁ.
cp4:0.1	Cariyāpiṭaka
cp4:0.2	Akittivagga
cp4:0.3	Dānapāramī 4
cp4:0.4	Mahāsudassanacariya
cp4:1.1	“Kusāvatimhi nagare,
cp4:1.2	yadā āsiṁ mahīpati;
cp4:1.3	Mahāsudassano nāma,
cp4:1.4	cakkavattī mahabbalo.
cp4:2.1	Tatthāhaṁ divase tikkhattuṁ,
cp4:2.2	ghosāpemi tahiṁ tahiṁ;
cp4:2.3	‘Ko kiṁ icchati pattheti,
cp4:2.4	kassa kiṁ dīyatū dhanaṁ.
cp4:3.1	Ko chātako ko tasito,
cp4:3.2	ko mālaṁ ko vilepanaṁ;
cp4:3.3	Nānārattāni vatthāni,
cp4:3.4	ko naggo paridahissati.
cp4:4.1	Ko pathe chattamādeti,
cp4:4.2	kopāhanā mudū subhā’;
cp4:4.3	Iti sāyañca pāto ca,
cp4:4.4	ghosāpemi tahiṁ tahiṁ.
cp4:5.1	Na taṁ dasasu ṭhānesu,
cp4:5.2	napi ṭhānasatesu vā;
cp4:5.3	Anekasataṭhānesu,
cp4:5.4	paṭiyattaṁ yācake dhanaṁ.
cp4:6.1	Divā vā yadi vā rattiṁ,
cp4:6.2	yadi eti vanibbako;
cp4:6.3	Laddhā yadicchakaṁ bhogaṁ,
cp4:6.4	pūrahatthova gacchati.
cp4:7.1	Evarūpaṁ mahādānaṁ,
cp4:7.2	Adāsiṁ yāvajīvikaṁ;
cp4:7.3	Napāhaṁ dessaṁ dhanaṁ dammi,
cp4:7.4	Napi natthi nicayo mayi.
cp4:8.1	Yathāpi āturo nāma,
cp4:8.2	rogato parimuttiyā;
cp4:8.3	Dhanena vejjaṁ tappetvā,
cp4:8.4	rogato parimuccati.
cp4:9.1	Tathevāhaṁ jānamāno,
cp4:9.2	paripūretumasesato;
cp4:9.3	Ūnamanaṁ pūrayituṁ,
cp4:9.4	demi dānaṁ vanibbake;
cp4:9.5	Nirālayo apaccāso,
cp4:9.6	sambodhimanupattiyā”ti.
cp4:10.1	Mahāsudassanacariyaṁ catutthaṁ.
cp5:0.1	Cariyāpiṭaka
cp5:0.2	Akittivagga
cp5:0.3	Dānapāramī 5
cp5:0.4	Mahāgovindacariya
cp5:1.1	“Punāparaṁ yadā homi,
cp5:1.2	sattarājapurohito;
cp5:1.3	Pūjito naradevehi,
cp5:1.4	mahāgovindabrāhmaṇo.
cp5:2.1	Tadāhaṁ sattarajjesu,
cp5:2.2	Yaṁ me āsi upāyanaṁ;
cp5:2.3	Tena demi mahādānaṁ,
cp5:2.4	Akkhobbhaṁ sāgarūpamaṁ.
cp5:3.1	Na me dessaṁ dhanaṁ dhaññaṁ,
cp5:3.2	Napi natthi nicayo mayi;
cp5:3.3	Sabbaññutaṁ piyaṁ mayhaṁ,
cp5:3.4	Tasmā demi varaṁ dhanan”ti.
cp5:4.1	Mahāgovindacariyaṁ pañcamaṁ.
cp6:0.1	Cariyāpiṭaka
cp6:0.2	Akittivagga
cp6:0.3	Dānapāramī 6
cp6:0.4	Nimirājacariya
cp6:1.1	“Punāparaṁ yadā homi,
cp6:1.2	mithilāyaṁ puruttame;
cp6:1.3	Nimi nāma mahārājā,
cp6:1.4	paṇḍito kusalatthiko.
cp6:2.1	Tadāhaṁ māpayitvāna,
cp6:2.2	catussālaṁ catummukhaṁ;
cp6:2.3	Tattha dānaṁ pavattesiṁ,
cp6:2.4	migapakkhinarādinaṁ.
cp6:3.1	Acchādanañca sayanaṁ,
cp6:3.2	annaṁ pānañca bhojanaṁ;
cp6:3.3	Abbocchinnaṁ karitvāna,
cp6:3.4	mahādānaṁ pavattayiṁ.
cp6:4.1	Yathāpi sevako sāmiṁ,
cp6:4.2	dhanahetumupāgato;
cp6:4.3	Kāyena vācā manasā,
cp6:4.4	ārādhanīyamesati.
cp6:5.1	Tathevāhaṁ sabbabhave,
cp6:5.2	pariyesissāmi bodhijaṁ;
cp6:5.3	Dānena satte tappetvā,
cp6:5.4	icchāmi bodhimuttaman”ti.
cp6:6.1	Nimirājacariyaṁ chaṭṭhaṁ.
cp7:0.1	Cariyāpiṭaka
cp7:0.2	Akittivagga
cp7:0.3	Dānapāramī 7
cp7:0.4	Candakumāracariya
cp7:1.1	“Punāparaṁ yadā homi,
cp7:1.2	ekarājassa atrajo;
cp7:1.3	Nagare pupphavatiyā,
cp7:1.4	kumāro candasavhayo.
cp7:2.1	Tadāhaṁ yajanā mutto,
cp7:2.2	nikkhanto yaññavāṭato;
cp7:2.3	Saṁvegaṁ janayitvāna,
cp7:2.4	mahādānaṁ pavattayiṁ.
cp7:3.1	Nāhaṁ pivāmi khādāmi,
cp7:3.2	napi bhuñjāmi bhojanaṁ;
cp7:3.3	Dakkhiṇeyye adatvāna,
cp7:3.4	api chappañcarattiyo.
cp7:4.1	Yathāpi vāṇijo nāma,
cp7:4.2	Katvāna bhaṇḍasañcayaṁ;
cp7:4.3	Yattha lābho mahā hoti,
cp7:4.4	Tattha taṁ harati bhaṇḍakaṁ.
cp7:5.1	Tatheva sakabhuttāpi,
cp7:5.2	pare dinnaṁ mahapphalaṁ;
cp7:5.3	Tasmā parassa dātabbaṁ,
cp7:5.4	satabhāgo bhavissati.
cp7:6.1	Etamatthavasaṁ ñatvā,
cp7:6.2	demi dānaṁ bhavābhave;
cp7:6.3	Na paṭikkamāmi dānato,
cp7:6.4	sambodhimanupattiyā”ti.
cp7:7.1	Candakumāracariyaṁ sattamaṁ.
cp8:0.1	Cariyāpiṭaka
cp8:0.2	Akittivagga
cp8:0.3	Dānapāramī 8
cp8:0.4	Sivirājacariya
cp8:1.1	“Ariṭṭhasavhaye nagare,
cp8:1.2	sivināmāsi khattiyo;
cp8:1.3	Nisajja pāsādavare,
cp8:1.4	evaṁ cintesahaṁ tadā.
cp8:2.1	‘Yaṁ kiñci mānusaṁ dānaṁ,
cp8:2.2	adinnaṁ me na vijjati;
cp8:2.3	Yopi yāceyya maṁ cakkhuṁ,
cp8:2.4	dadeyyaṁ avikampito’.
cp8:3.1	Mama saṅkappamaññāya,
cp8:3.2	sakko devānamissaro;
cp8:3.3	Nisinno devaparisāya,
cp8:3.4	idaṁ vacanamabravi.
cp8:4.1	‘Nisajja pāsādavare,
cp8:4.2	sivirājā mahiddhiko;
cp8:4.3	Cintento vividhaṁ dānaṁ,
cp8:4.4	adeyyaṁ so na passati.
cp8:5.1	Tathaṁ nu vitathaṁ netaṁ,
cp8:5.2	handa vīmaṁsayāmi taṁ;
cp8:5.3	Muhuttaṁ āgameyyātha,
cp8:5.4	yāva jānāmi taṁ manaṁ’.
cp8:6.1	Pavedhamāno palitasiro,
cp8:6.2	Valigatto jarāturo;
cp8:6.3	Andhavaṇṇova hutvāna,
cp8:6.4	Rājānaṁ upasaṅkami.
cp8:7.1	So tadā paggahetvāna,
cp8:7.2	vāmaṁ dakkhiṇabāhu ca;
cp8:7.3	Sirasmiṁ añjaliṁ katvā,
cp8:7.4	idaṁ vacanamabravi.
cp8:8.1	‘Yācāmi taṁ mahārāja,
cp8:8.2	dhammika raṭṭhavaḍḍhana;
cp8:8.3	Tava dānaratā kitti,
cp8:8.4	uggatā devamānuse.
cp8:9.1	Ubhopi nettā nayanā,
cp8:9.2	andhā upahatā mama;
cp8:9.3	Ekaṁ me nayanaṁ dehi,
cp8:9.4	tvampi ekena yāpaya’.
cp8:10.1	Tassāhaṁ vacanaṁ sutvā,
cp8:10.2	haṭṭho saṁviggamānaso;
cp8:10.3	Katañjalī vedajāto,
cp8:10.4	idaṁ vacanamabraviṁ.
cp8:11.1	‘Idānāhaṁ cintayitvāna,
cp8:11.2	pāsādato idhāgato;
cp8:11.3	Tvaṁ mama cittamaññāya,
cp8:11.4	nettaṁ yācitumāgato.
cp8:12.1	Aho me mānasaṁ siddhaṁ,
cp8:12.2	saṅkappo paripūrito;
cp8:12.3	Adinnapubbaṁ dānavaraṁ,
cp8:12.4	ajja dassāmi yācake.
cp8:13.1	Ehi sivaka uṭṭhehi,
cp8:13.2	mā dandhayi mā pavedhayi;
cp8:13.3	Ubhopi nayanaṁ dehi,
cp8:13.4	uppāṭetvā vaṇibbake’.
cp8:14.1	Tato so codito mayhaṁ,
cp8:14.2	sivako vacanaṁ karo;
cp8:14.3	Uddharitvāna pādāsi,
cp8:14.4	tālamiñjaṁva yācake.
cp8:15.1	Dadamānassa dentassa,
cp8:15.2	dinnadānassa me sato;
cp8:15.3	Cittassa aññathā natthi,
cp8:15.4	bodhiyāyeva kāraṇā.
cp8:16.1	Na me dessā ubho cakkhū,
cp8:16.2	attā na me na dessiyo;
cp8:16.3	Sabbaññutaṁ piyaṁ mayhaṁ,
cp8:16.4	tasmā cakkhuṁ adāsahan”ti.
cp8:17.1	Sivirājacariyaṁ aṭṭhamaṁ.
cp9:0.1	Cariyāpiṭaka
cp9:0.2	Akittivagga
cp9:0.3	Dānapāramī 9
cp9:0.4	Vessantaracariya
cp9:1.1	“Yā me ahosi janikā,
cp9:1.2	phussatī nāma khattiyā;
cp9:1.3	Sā atītāsu jātīsu,
cp9:1.4	sakkassa mahesī piyā.
cp9:2.1	Tassā āyukkhayaṁ ñatvā,
cp9:2.2	devindo etadabravi;
cp9:2.3	‘Dadāmi te dasa vare,
cp9:2.4	varabhadde yadicchasi’.
cp9:3.1	Evaṁ vuttā ca sā devī,
cp9:3.2	sakkaṁ punidamabravi;
cp9:3.3	‘Kiṁ nu me aparādhatthi,
cp9:3.4	kiṁ nu dessā ahaṁ tava;
cp9:3.5	Rammā cāvesi maṁ ṭhānā,
cp9:3.6	vātova dharaṇīruhaṁ’.
cp9:4.1	Evaṁ vutto ca so sakko,
cp9:4.2	puna tassidamabravi;
cp9:4.3	‘Na ceva te kataṁ pāpaṁ,
cp9:4.4	na ca me tvaṁsi appiyā.
cp9:5.1	Ettakaṁyeva te āyu,
cp9:5.2	cavanakālo bhavissati;
cp9:5.3	Paṭiggaṇha mayā dinne,
cp9:5.4	vare dasa varuttame’.
cp9:6.1	Sakkena sā dinnavarā,
cp9:6.2	tuṭṭhahaṭṭhā pamoditā;
cp9:6.3	Mamaṁ abbhantaraṁ katvā,
cp9:6.4	phussatī dasa vare varī.
cp9:7.1	Tato cutā sā phussatī,
cp9:7.2	khattiye upapajjatha;
cp9:7.3	Jetuttaramhi nagare,
cp9:7.4	sañjayena samāgami.
cp9:8.1	Yadāhaṁ phussatiyā kucchiṁ,
cp9:8.2	okkanto piyamātuyā;
cp9:8.3	Mama tejena me mātā,
cp9:8.4	sadā dānaratā ahu.
cp9:9.1	Adhane āture jiṇṇe,
cp9:9.2	yācake addhike jane;
cp9:9.3	Samaṇe brāhmaṇe khīṇe,
cp9:9.4	deti dānaṁ akiñcane.
cp9:10.1	Dasa māse dhārayitvāna,
cp9:10.2	karonte puraṁ padakkhiṇaṁ;
cp9:10.3	Vessānaṁ vīthiyā majjhe,
cp9:10.4	janesi phussatī mamaṁ.
cp9:11.1	Na mayhaṁ mattikaṁ nāmaṁ,
cp9:11.2	napi pettikasambhavaṁ;
cp9:11.3	Jātettha vessavīthiyā,
cp9:11.4	tasmā vessantaro ahu.
cp9:12.1	Yadāhaṁ dārako homi,
cp9:12.2	jātiyā aṭṭhavassiko;
cp9:12.3	Tadā nisajja pāsāde,
cp9:12.4	dānaṁ dātuṁ vicintayiṁ.
cp9:13.1	‘Hadayaṁ dadeyyaṁ cakkhuṁ,
cp9:13.2	maṁsampi rudhirampi ca;
cp9:13.3	Dadeyyaṁ kāyaṁ sāvetvā,
cp9:13.4	yadi koci yācaye mamaṁ’.
cp9:14.1	Sabhāvaṁ cintayantassa,
cp9:14.2	akampitamasaṇṭhitaṁ;
cp9:14.3	Akampi tattha pathavī,
cp9:14.4	sineruvanavaṭaṁsakā.
cp9:15.1	Anvaddhamāse pannarase,
cp9:15.2	puṇṇamāse uposathe;
cp9:15.3	Paccayaṁ nāgamāruyha,
cp9:15.4	dānaṁ dātuṁ upāgamiṁ.
cp9:16.1	Kaliṅgaraṭṭhavisayā,
cp9:16.2	brāhmaṇā upagañchu maṁ;
cp9:16.3	Ayācuṁ maṁ hatthināgaṁ,
cp9:16.4	dhaññaṁ maṅgalasammataṁ.
cp9:17.1	‘Avuṭṭhiko janapado,
cp9:17.2	dubbhikkho chātako mahā;
cp9:17.3	Dadāhi pavaraṁ nāgaṁ,
cp9:17.4	sabbasetaṁ gajuttamaṁ’.
cp9:18.1	Dadāmi na vikampāmi,
cp9:18.2	yaṁ maṁ yācanti brāhmaṇā;
cp9:18.3	Santaṁ nappatigūhāmi,
cp9:18.4	dāne me ramate mano.
cp9:19.1	Na me yācakamanuppatte,
cp9:19.2	paṭikkhepo anucchavo;
cp9:19.3	Mā me bhijji samādānaṁ,
cp9:19.4	dassāmi vipulaṁ gajaṁ.
cp9:20.1	Nāgaṁ gahetvā soṇḍāya,
cp9:20.2	bhiṅgāre ratanāmaye;
cp9:20.3	Jalaṁ hatthe ākiritvā,
cp9:20.4	brāhmaṇānaṁ adaṁ gajaṁ.
cp9:21.1	Punāparaṁ dadantassa,
cp9:21.2	sabbasetaṁ gajuttamaṁ;
cp9:21.3	Tadāpi pathavī kampi,
cp9:21.4	sineruvanavaṭaṁsakā.
cp9:22.1	Tassa nāgassa dānena,
cp9:22.2	sivayo kuddhā samāgatā;
cp9:22.3	Pabbājesuṁ sakā raṭṭhā,
cp9:22.4	‘vaṅkaṁ gacchatu pabbataṁ’.
cp9:23.1	Tesaṁ nicchubhamānānaṁ,
cp9:23.2	akampitamasaṇṭhitaṁ;
cp9:23.3	Mahādānaṁ pavattetuṁ,
cp9:23.4	ekaṁ varamayācisaṁ.
cp9:24.1	Yācitā sivayo sabbe,
cp9:24.2	ekaṁ varamadaṁsu me;
cp9:24.3	Sāvayitvā kaṇṇabheriṁ,
cp9:24.4	mahādānaṁ dadāmahaṁ.
cp9:25.1	Athettha vattatī saddo,
cp9:25.2	tumulo bheravo mahā;
cp9:25.3	Dānenimaṁ nīharanti,
cp9:25.4	puna dānaṁ dadātayaṁ.
cp9:26.1	Hatthiṁ asse rathe datvā,
cp9:26.2	dāsiṁ dāsaṁ gavaṁ dhanaṁ;
cp9:26.3	Mahādānaṁ daditvāna,
cp9:26.4	nagarā nikkhamiṁ tadā.
cp9:27.1	Nikkhamitvāna nagarā,
cp9:27.2	nivattitvā vilokite;
cp9:27.3	Tadāpi pathavī kampi,
cp9:27.4	sineruvanavaṭaṁsakā.
cp9:28.1	Catuvāhiṁ rathaṁ datvā,
cp9:28.2	ṭhatvā cātummahāpathe;
cp9:28.3	Ekākiyo adutiyo,
cp9:28.4	maddideviṁ idamabraviṁ.
cp9:29.1	‘Tvaṁ maddi kaṇhaṁ gaṇhāhi,
cp9:29.2	lahukā esā kaniṭṭhikā;
cp9:29.3	Ahaṁ jāliṁ gahessāmi,
cp9:29.4	garuko bhātiko hi so’.
cp9:30.1	Padumaṁ puṇḍarīkaṁva,
cp9:30.2	maddī kaṇhājinaggahī;
cp9:30.3	Ahaṁ suvaṇṇabimbaṁva,
cp9:30.4	jāliṁ khattiyamaggahiṁ.
cp9:31.1	Abhijātā sukhumālā,
cp9:31.2	khattiyā caturo janā;
cp9:31.3	Visamaṁ samaṁ akkamantā,
cp9:31.4	vaṅkaṁ gacchāma pabbataṁ.
cp9:32.1	Ye keci manujā enti,
cp9:32.2	anumagge paṭippathe;
cp9:32.3	Maggante paṭipucchāma,
cp9:32.4	‘kuhiṁ vaṅkantapabbato’.
cp9:33.1	Te tattha amhe passitvā,
cp9:33.2	karuṇaṁ giramudīrayuṁ;
cp9:33.3	Dukkhante paṭivedenti,
cp9:33.4	dūre vaṅkantapabbato.
cp9:34.1	Yadi passanti pavane,
cp9:34.2	dārakā phaline dume;
cp9:34.3	Tesaṁ phalānaṁ hetumhi,
cp9:34.4	uparodanti dārakā.
cp9:35.1	Rodante dārake disvā,
cp9:35.2	ubbiddhā vipulā dumā;
cp9:35.3	Sayamevoṇamitvāna,
cp9:35.4	upagacchanti dārake.
cp9:36.1	Idaṁ acchariyaṁ disvā,
cp9:36.2	abbhutaṁ lomahaṁsanaṁ;
cp9:36.3	Sāhukāraṁ pavattesi,
cp9:36.4	maddī sabbaṅgasobhanā.
cp9:37.1	Accheraṁ vata lokasmiṁ,
cp9:37.2	abbhutaṁ lomahaṁsanaṁ;
cp9:37.3	Vessantarassa tejena,
cp9:37.4	sayamevoṇatā dumā.
cp9:38.1	Saṅkhipiṁsu pathaṁ yakkhā,
cp9:38.2	anukampāya dārake;
cp9:38.3	Nikkhantadivaseneva,
cp9:38.4	cetaraṭṭhamupāgamuṁ.
cp9:39.1	Saṭṭhirājasahassāni,
cp9:39.2	tadā vasanti mātule;
cp9:39.3	Sabbe pañjalikā hutvā,
cp9:39.4	rodamānā upāgamuṁ.
cp9:40.1	Tattha vattetvā sallāpaṁ,
cp9:40.2	cetehi cetaputtehi;
cp9:40.3	Te tato nikkhamitvāna,
cp9:40.4	vaṅkaṁ agamu pabbataṁ.
cp9:41.1	Āmantayitvā devindo,
cp9:41.2	vissakammaṁ mahiddhikaṁ;
cp9:41.3	Assamaṁ sukataṁ rammaṁ,
cp9:41.4	paṇṇasālaṁ sumāpaya.
cp9:42.1	Sakkassa vacanaṁ sutvā,
cp9:42.2	vissakammo mahiddhiko;
cp9:42.3	Assamaṁ sukataṁ rammaṁ,
cp9:42.4	paṇṇasālaṁ sumāpayi.
cp9:43.1	Ajjhogāhetvā pavanaṁ,
cp9:43.2	appasaddaṁ nirākulaṁ;
cp9:43.3	Caturo janā mayaṁ tattha,
cp9:43.4	vasāma pabbatantare.
cp9:44.1	Ahañca maddidevī ca,
cp9:44.2	jālī kaṇhājinā cubho;
cp9:44.3	Aññamaññaṁ sokanudā,
cp9:44.4	vasāma assame tadā.
cp9:45.1	Dārake anurakkhanto,
cp9:45.2	asuñño homi assame;
cp9:45.3	Maddī phalaṁ āharitvā,
cp9:45.4	poseti sā tayo jane.
cp9:46.1	Pavane vasamānassa,
cp9:46.2	addhiko maṁ upāgami;
cp9:46.3	Āyāci puttake mayhaṁ,
cp9:46.4	jāliṁ kaṇhājinaṁ cubho.
cp9:47.1	Yācakaṁ upagataṁ disvā,
cp9:47.2	hāso me upapajjatha;
cp9:47.3	Ubho putte gahetvāna,
cp9:47.4	adāsiṁ brāhmaṇe tadā.
cp9:48.1	Sake putte cajantassa,
cp9:48.2	jūjake brāhmaṇe yadā;
cp9:48.3	Tadāpi pathavī kampi,
cp9:48.4	sineruvanavaṭaṁsakā.
cp9:49.1	Punadeva sakko oruyha,
cp9:49.2	hutvā brāhmaṇasannibho;
cp9:49.3	Āyāci maṁ maddideviṁ,
cp9:49.4	sīlavantiṁ patibbataṁ.
cp9:50.1	Maddiṁ hatthe gahetvāna,
cp9:50.2	udakañjali pūriya;
cp9:50.3	Pasannamanasaṅkappo,
cp9:50.4	tassa maddiṁ adāsahaṁ.
cp9:51.1	Maddiyā dīyamānāya,
cp9:51.2	gagane devā pamoditā;
cp9:51.3	Tadāpi pathavī kampi,
cp9:51.4	sineruvanavaṭaṁsakā.
cp9:52.1	Jāliṁ kaṇhājinaṁ dhītaṁ,
cp9:52.2	maddideviṁ patibbataṁ;
cp9:52.3	Cajamāno na cintesiṁ,
cp9:52.4	bodhiyāyeva kāraṇā.
cp9:53.1	Na me dessā ubho puttā,
cp9:53.2	maddidevī na dessiyā;
cp9:53.3	Sabbaññutaṁ piyaṁ mayhaṁ,
cp9:53.4	tasmā piye adāsahaṁ.
cp9:54.1	Punāparaṁ brahāraññe,
cp9:54.2	mātāpitusamāgame;
cp9:54.3	Karuṇaṁ paridevante,
cp9:54.4	sallapante sukhaṁ dukhaṁ.
cp9:55.1	Hirottappena garunā,
cp9:55.2	ubhinnaṁ upasaṅkami;
cp9:55.3	Tadāpi pathavī kampi,
cp9:55.4	sineruvanavaṭaṁsakā.
cp9:56.1	Punāparaṁ brahāraññā,
cp9:56.2	nikkhamitvā sañātibhi;
cp9:56.3	Pavisāmi puraṁ rammaṁ,
cp9:56.4	jetuttaraṁ puruttamaṁ.
cp9:57.1	Ratanāni satta vassiṁsu,
cp9:57.2	mahāmegho pavassatha;
cp9:57.3	Tadāpi pathavī kampi,
cp9:57.4	sineruvanavaṭaṁsakā.
cp9:58.1	Acetanāyaṁ pathavī,
cp9:58.2	aviññāya sukhaṁ dukhaṁ;
cp9:58.3	Sāpi dānabalā mayhaṁ,
cp9:58.4	sattakkhattuṁ pakampathā”ti.
cp9:59.1	Vessantaracariyaṁ navamaṁ.
cp10:0.1	Cariyāpiṭaka
cp10:0.2	Akittivagga
cp10:0.3	Dānapāramī 10
cp10:0.4	Sasapaṇḍitacariya
cp10:1.1	“Punāparaṁ yadā homi,
cp10:1.2	Sasako pavanacārako;
cp10:1.3	Tiṇapaṇṇasākaphalabhakkho,
cp10:1.4	Paraheṭhanavivajjito.
cp10:2.1	Makkaṭo ca siṅgālo ca,
cp10:2.2	suttapoto cahaṁ tadā;
cp10:2.3	Vasāma ekasāmantā,
cp10:2.4	sāyaṁ pāto ca dissare.
cp10:3.1	Ahaṁ te anusāsāmi,
cp10:3.2	kiriye kalyāṇapāpake;
cp10:3.3	‘Pāpāni parivajjetha,
cp10:3.4	kalyāṇe abhinivissatha’.
cp10:4.1	Uposathamhi divase,
cp10:4.2	candaṁ disvāna pūritaṁ;
cp10:4.3	Etesaṁ tattha ācikkhiṁ,
cp10:4.4	‘divaso ajjuposatho.
cp10:5.1	Dānāni paṭiyādetha,
cp10:5.2	dakkhiṇeyyassa dātave;
cp10:5.3	Datvā dānaṁ dakkhiṇeyye,
cp10:5.4	upavassathuposathaṁ’.
cp10:6.1	Te me sādhūti vatvāna,
cp10:6.2	yathāsatti yathābalaṁ;
cp10:6.3	Dānāni paṭiyādetvā,
cp10:6.4	dakkhiṇeyyaṁ gavesisuṁ.
cp10:7.1	Ahaṁ nisajja cintesiṁ,
cp10:7.2	dānaṁ dakkhiṇanucchavaṁ;
cp10:7.3	‘Yadihaṁ labhe dakkhiṇeyyaṁ,
cp10:7.4	kiṁ me dānaṁ bhavissati.
cp10:8.1	Na me atthi tilā muggā,
cp10:8.2	māsā vā taṇḍulā ghataṁ;
cp10:8.3	Ahaṁ tiṇena yāpemi,
cp10:8.4	na sakkā tiṇa dātave.
cp10:9.1	Yadi koci eti dakkhiṇeyyo,
cp10:9.2	Bhikkhāya mama santike;
cp10:9.3	Dajjāhaṁ sakamattānaṁ,
cp10:9.4	Na so tuccho gamissati’.
cp10:10.1	Mama saṅkappamaññāya,
cp10:10.2	sakko brāhmaṇavaṇṇinā;
cp10:10.3	Āsayaṁ me upāgacchi,
cp10:10.4	dānavīmaṁsanāya me.
cp10:11.1	Tamahaṁ disvāna santuṭṭho,
cp10:11.2	idaṁ vacanamabraviṁ;
cp10:11.3	‘Sādhu khosi anuppatto,
cp10:11.4	ghāsahetu mamantike.
cp10:12.1	Adinnapubbaṁ dānavaraṁ,
cp10:12.2	ajja dassāmi te ahaṁ;
cp10:12.3	Tuvaṁ sīlaguṇūpeto,
cp10:12.4	ayuttaṁ te paraheṭhanaṁ.
cp10:13.1	Ehi aggiṁ padīpehi,
cp10:13.2	nānākaṭṭhe samānaya;
cp10:13.3	Ahaṁ pacissamattānaṁ,
cp10:13.4	pakkaṁ tvaṁ bhakkhayissasi’.
cp10:14.1	‘Sādhū’ti so haṭṭhamano,
cp10:14.2	nānākaṭṭhe samānayi;
cp10:14.3	Mahantaṁ akāsi citakaṁ,
cp10:14.4	katvā aṅgāragabbhakaṁ.
cp10:15.1	Aggiṁ tattha padīpesi,
cp10:15.2	yathā so khippaṁ mahā bhave;
cp10:15.3	Phoṭetvā rajagate gatte,
cp10:15.4	ekamantaṁ upāvisiṁ.
cp10:16.1	Yadā mahākaṭṭhapuñjo,
cp10:16.2	āditto dhamadhamāyati;
cp10:16.3	Taduppatitvā papatiṁ,
cp10:16.4	majjhe jālasikhantare.
cp10:17.1	Yathā sītodakaṁ nāma,
cp10:17.2	Paviṭṭhaṁ yassa kassaci;
cp10:17.3	Sameti darathapariḷāhaṁ,
cp10:17.4	Assādaṁ deti pīti ca.
cp10:18.1	Tatheva jalitaṁ aggiṁ,
cp10:18.2	paviṭṭhassa mamaṁ tadā;
cp10:18.3	Sabbaṁ sameti darathaṁ,
cp10:18.4	yathā sītodakaṁ viya.
cp10:19.1	Chaviṁ cammaṁ maṁsaṁ nhāruṁ,
cp10:19.2	Aṭṭhiṁ hadayabandhanaṁ;
cp10:19.3	Kevalaṁ sakalaṁ kāyaṁ,
cp10:19.4	Brāhmaṇassa adāsahan”ti.
cp10:20.1	Sasapaṇḍitacariyaṁ dasamaṁ.
cp10:21.1	Akittivaggo paṭhamo.
cp10:22.1	Tassuddānaṁ
cp10:23.1	Akittibrāhmaṇo saṅkho,
cp10:23.2	kururājā dhanañcayo;
cp10:23.3	Mahāsudassano rājā,
cp10:23.4	mahāgovindabrāhmaṇo.
cp10:24.1	Nimi candakumāro ca,
cp10:24.2	sivi vessantaro saso;
cp10:24.3	Ahameva tadā āsiṁ,
cp10:24.4	yo te dānavare adā.
cp10:25.1	Ete dānaparikkhārā,
cp10:25.2	ete dānassa pāramī;
cp10:25.3	Jīvitaṁ yācake datvā,
cp10:25.4	imaṁ pārami pūrayiṁ.
cp10:26.1	Bhikkhāya upagataṁ disvā,
cp10:26.2	sakattānaṁ pariccajiṁ;
cp10:26.3	Dānena me samo natthi,
cp10:26.4	esā me dānapāramīti.
cp10:27.1	Dānapāraminiddeso niṭṭhito.
cp11:0.1	Cariyāpiṭaka
cp11:0.2	Hatthināgavagga
cp11:0.3	Sīlapāramī 1
cp11:0.4	Mātuposakacariya
cp11:1.1	“Yadā ahosiṁ pavane,
cp11:1.2	kuñjaro mātuposako;
cp11:1.3	Na tadā atthi mahiyā,
cp11:1.4	guṇena mama sādiso.
cp11:2.1	Pavane disvā vanacaro,
cp11:2.2	rañño maṁ paṭivedayi;
cp11:2.3	‘Tavānucchavo mahārāja,
cp11:2.4	gajo vasati kānane.
cp11:3.1	Na tassa parikkhāyattho,
cp11:3.2	napi āḷakakāsuyā;
cp11:3.3	Saha gahite soṇḍāya,
cp11:3.4	sayameva idhehi’ti.
cp11:4.1	Tassa taṁ vacanaṁ sutvā,
cp11:4.2	rājāpi tuṭṭhamānaso;
cp11:4.3	Pesesi hatthidamakaṁ,
cp11:4.4	chekācariyaṁ susikkhitaṁ.
cp11:5.1	Gantvā so hatthidamako,
cp11:5.2	addasa padumassare;
cp11:5.3	Bhisamuḷālaṁ uddharantaṁ,
cp11:5.4	yāpanatthāya mātuyā.
cp11:6.1	Viññāya me sīlaguṇaṁ,
cp11:6.2	lakkhaṇaṁ upadhārayi;
cp11:6.3	‘Ehi puttā’ti vatvāna,
cp11:6.4	mama soṇḍāya aggahi.
cp11:7.1	Yaṁ me tadā pākatikaṁ,
cp11:7.2	sarīrānugataṁ balaṁ;
cp11:7.3	Ajja nāgasahassānaṁ,
cp11:7.4	balena samasādisaṁ.
cp11:8.1	Yadihaṁ tesaṁ pakuppeyyaṁ,
cp11:8.2	upetānaṁ gahaṇāya maṁ;
cp11:8.3	Paṭibalo bhave tesaṁ,
cp11:8.4	yāva rajjampi mānusaṁ.
cp11:9.1	Api cāhaṁ sīlarakkhāya,
cp11:9.2	Sīlapāramipūriyā;
cp11:9.3	Na karomi citte aññathattaṁ,
cp11:9.4	Pakkhipantaṁ mamāḷake.
cp11:10.1	Yadi te maṁ tattha koṭṭeyyuṁ,
cp11:10.2	pharasūhi tomarehi ca;
cp11:10.3	Neva tesaṁ pakuppeyyaṁ,
cp11:10.4	sīlakhaṇḍabhayā mamā”ti.
cp11:11.1	Mātuposakacariyaṁ paṭhamaṁ.
cp12:0.1	Cariyāpiṭaka
cp12:0.2	Hatthināgavagga
cp12:0.3	Sīlapāramī 2
cp12:0.4	Bhūridattacariya
cp12:1.1	“Punāparaṁ yadā homi,
cp12:1.2	bhūridatto mahiddhiko;
cp12:1.3	Virūpakkhena mahāraññā,
cp12:1.4	devalokamagañchahaṁ.
cp12:2.1	Tattha passitvāhaṁ deve,
cp12:2.2	ekantaṁ sukhasamappite;
cp12:2.3	Taṁ saggagamanatthāya,
cp12:2.4	sīlabbataṁ samādiyiṁ.
cp12:3.1	Sarīrakiccaṁ katvāna,
cp12:3.2	bhutvā yāpanamattakaṁ;
cp12:3.3	Caturo aṅge adhiṭṭhāya,
cp12:3.4	semi vammikamuddhani.
cp12:4.1	‘Chaviyā cammena maṁsena,
cp12:4.2	Nahāruaṭṭhikehi vā;
cp12:4.3	Yassa etena karaṇīyaṁ,
cp12:4.4	Dinnaṁyeva harātu so’.
cp12:5.1	Saṁsito akataññunā,
cp12:5.2	ālampāyano mamaggahi;
cp12:5.3	Peḷāya pakkhipitvāna,
cp12:5.4	kīḷeti maṁ tahiṁ tahiṁ.
cp12:6.1	Peḷāya pakkhipantepi,
cp12:6.2	sammaddantepi pāṇinā;
cp12:6.3	Ālampāyane na kuppāmi,
cp12:6.4	sīlakhaṇḍabhayā mama.
cp12:7.1	Sakajīvitapariccāgo,
cp12:7.2	tiṇato lahuko mama;
cp12:7.3	Sīlavītikkamo mayhaṁ,
cp12:7.4	pathavīuppatanaṁ viya.
cp12:8.1	Nirantaraṁ jātisataṁ,
cp12:8.2	cajeyyaṁ mama jīvitaṁ;
cp12:8.3	Neva sīlaṁ pabhindeyyaṁ,
cp12:8.4	catuddīpāna hetupi.
cp12:9.1	Api cāhaṁ sīlarakkhāya,
cp12:9.2	Sīlapāramipūriyā;
cp12:9.3	Na karomi citte aññathattaṁ,
cp12:9.4	Pakkhipantampi peḷake”ti.
cp12:10.1	Bhūridattacariyaṁ dutiyaṁ.
cp13:0.1	Cariyāpiṭaka
cp13:0.2	Hatthināgavagga
cp13:0.3	Sīlapāramī 3
cp13:0.4	Campeyyanāgacariya
cp13:1.1	“Punāparaṁ yadā homi,
cp13:1.2	campeyyako mahiddhiko;
cp13:1.3	Tadāpi dhammiko āsiṁ,
cp13:1.4	sīlabbatasamappito.
cp13:2.1	Tadāpi maṁ dhammacāriṁ,
cp13:2.2	upavutthaṁ uposathaṁ;
cp13:2.3	Ahituṇḍiko gahetvāna,
cp13:2.4	rājadvāramhi kīḷati.
cp13:3.1	Yaṁ yaṁ so vaṇṇaṁ cintayi,
cp13:3.2	nīlaṁva pītalohitaṁ;
cp13:3.3	Tassa cittānuvattanto,
cp13:3.4	homi cintitasannibho.
cp13:4.1	Thalaṁ kareyyamudakaṁ,
cp13:4.2	udakampi thalaṁ kare;
cp13:4.3	Yadihaṁ tassa pakuppeyyaṁ,
cp13:4.4	khaṇena chārikaṁ kare.
cp13:5.1	Yadi cittavasī hessaṁ,
cp13:5.2	parihāyissāmi sīlato;
cp13:5.3	Sīlena parihīnassa,
cp13:5.4	uttamattho na sijjhati.
cp13:6.1	Kāmaṁ bhijjatuyaṁ kāyo,
cp13:6.2	idheva vikirīyatu;
cp13:6.3	Neva sīlaṁ pabhindeyyaṁ,
cp13:6.4	vikirante bhusaṁ viyā”ti.
cp13:7.1	Campeyyanāgacariyaṁ tatiyaṁ.
cp14:0.1	Cariyāpiṭaka
cp14:0.2	Hatthināgavagga
cp14:0.3	Sīlapāramī 4
cp14:0.4	Cūḷabodhicariya
cp14:1.1	“Punāparaṁ yadā homi,
cp14:1.2	cūḷabodhi susīlavā;
cp14:1.3	Bhavaṁ disvāna bhayato,
cp14:1.4	nekkhammaṁ abhinikkhamiṁ.
cp14:2.1	Yā me dutiyikā āsi,
cp14:2.2	brāhmaṇī kanakasannibhā;
cp14:2.3	Sāpi vaṭṭe anapekkhā,
cp14:2.4	nekkhammaṁ abhinikkhami.
cp14:3.1	Nirālayā chinnabandhū,
cp14:3.2	anapekkhā kule gaṇe;
cp14:3.3	Carantā gāmanigamaṁ,
cp14:3.4	bārāṇasimupāgamuṁ.
cp14:4.1	Tattha vasāma nipakā,
cp14:4.2	asaṁsaṭṭhā kule gaṇe;
cp14:4.3	Nirākule appasadde,
cp14:4.4	rājuyyāne vasāmubho.
cp14:5.1	Uyyānadassanaṁ gantvā,
cp14:5.2	rājā addasa brāhmaṇiṁ;
cp14:5.3	Upagamma mamaṁ pucchi,
cp14:5.4	‘tuyhesā kā kassa bhariyā’.
cp14:6.1	Evaṁ vutte, ahaṁ tassa,
cp14:6.2	idaṁ vacanamabraviṁ;
cp14:6.3	‘Na mayhaṁ bhariyā esā,
cp14:6.4	sahadhammā ekasāsanī’.
cp14:7.1	Tissā sārattagadhito,
cp14:7.2	gāhāpetvāna ceṭake;
cp14:7.3	Nippīḷayanto balasā,
cp14:7.4	antepuraṁ pavesayi.
cp14:8.1	Odapattakiyā mayhaṁ,
cp14:8.2	sahajā ekasāsanī;
cp14:8.3	Ākaḍḍhitvā nayantiyā,
cp14:8.4	kopo me upapajjatha.
cp14:9.1	Saha kope samuppanne,
cp14:9.2	sīlabbatamanussariṁ;
cp14:9.3	Tattheva kopaṁ niggaṇhiṁ,
cp14:9.4	nādāsiṁ vaḍḍhitūpari.
cp14:10.1	Yadi naṁ brāhmaṇiṁ koci,
cp14:10.2	koṭṭeyya tiṇhasattiyā;
cp14:10.3	Neva sīlaṁ pabhindeyyaṁ,
cp14:10.4	bodhiyāyeva kāraṇā.
cp14:11.1	Na mesā brāhmaṇī dessā,
cp14:11.2	napi me balaṁ na vijjati;
cp14:11.3	Sabbaññutaṁ piyaṁ mayhaṁ,
cp14:11.4	tasmā sīlānurakkhisan”ti.
cp14:12.1	Cūḷabodhicariyaṁ catutthaṁ.
cp15:0.1	Cariyāpiṭaka
cp15:0.2	Hatthināgavagga
cp15:0.3	Sīlapāramī 5
cp15:0.4	Mahiṁsarājacariya
cp15:1.1	“Punāparaṁ yadā homi,
cp15:1.2	mahiṁso pavanacārako;
cp15:1.3	Pavaḍḍhakāyo balavā,
cp15:1.4	mahanto bhīmadassano.
cp15:2.1	Pabbhāre giridugge ca,
cp15:2.2	rukkhamūle dakāsaye;
cp15:2.3	Hotettha ṭhānaṁ mahiṁsānaṁ,
cp15:2.4	koci koci tahiṁ tahiṁ.
cp15:3.1	Vicaranto brahāraññe,
cp15:3.2	ṭhānaṁ addasa bhaddakaṁ;
cp15:3.3	Taṁ ṭhānaṁ upagantvāna,
cp15:3.4	tiṭṭhāmi ca sayāmi ca.
cp15:4.1	Athettha kapimāgantvā,
cp15:4.2	pāpo anariyo lahu;
cp15:4.3	Khandhe nalāṭe bhamuke,
cp15:4.4	mutteti ohadeti taṁ.
cp15:5.1	Sakimpi divasaṁ dutiyaṁ,
cp15:5.2	tatiyaṁ catutthampi ca;
cp15:5.3	Dūseti maṁ sabbakālaṁ,
cp15:5.4	tena homi upadduto.
cp15:6.1	Mamaṁ upaddutaṁ disvā,
cp15:6.2	yakkho maṁ idamabravi;
cp15:6.3	‘Nāsehetaṁ chavaṁ pāpaṁ,
cp15:6.4	siṅgehi ca khurehi ca’.
cp15:7.1	Evaṁ vutte, tadā yakkhe,
cp15:7.2	ahaṁ taṁ idamabraviṁ;
cp15:7.3	‘Kiṁ tvaṁ makkhesi kuṇapena,
cp15:7.4	pāpena anariyena maṁ.
cp15:8.1	Yadihaṁ tassa pakuppeyyaṁ,
cp15:8.2	tato hīnataro bhave;
cp15:8.3	Sīlañca me pabhijjeyya,
cp15:8.4	viññū ca garaheyyu maṁ.
cp15:9.1	Hīḷitā jīvitā vāpi,
cp15:9.2	parisuddhena mataṁ varaṁ;
cp15:9.3	Kyāhaṁ jīvitahetūpi,
cp15:9.4	kāhāmi paraheṭhanaṁ’.
cp15:10.1	Mamevāyaṁ maññamāno,
cp15:10.2	aññepevaṁ karissati;
cp15:10.3	Teva tassa vadhissanti,
cp15:10.4	sā me mutti bhavissati.
cp15:11.1	Hīnamajjhimaukkaṭṭhe,
cp15:11.2	sahanto avamānitaṁ;
cp15:11.3	Evaṁ labhati sappañño,
cp15:11.4	manasā yathāpatthitan”ti.
cp15:12.1	Mahiṁsarājacariyaṁ pañcamaṁ.
cp16:0.1	Cariyāpiṭaka
cp16:0.2	Hatthināgavagga
cp16:0.3	Sīlapāramī 6
cp16:0.4	Rurumigarājacariya
cp16:1.1	“Punāparaṁ yadā homi,
cp16:1.2	sutattakanakasannibho;
cp16:1.3	Migarājā ruru nāma,
cp16:1.4	paramasīlasamāhito.
cp16:2.1	Ramme padese ramaṇīye,
cp16:2.2	vivitte amanussake;
cp16:2.3	Tattha vāsaṁ upagañchiṁ,
cp16:2.4	gaṅgākūle manorame.
cp16:3.1	Atha upari gaṅgāya,
cp16:3.2	dhanikehi paripīḷito;
cp16:3.3	Puriso gaṅgāya papati,
cp16:3.4	‘jīvāmi vā marāmi vā’.
cp16:4.1	Rattindivaṁ so gaṅgāya,
cp16:4.2	vuyhamāno mahodake;
cp16:4.3	Ravanto karuṇaṁ ravaṁ,
cp16:4.4	majjhe gaṅgāya gacchati.
cp16:5.1	Tassāhaṁ saddaṁ sutvāna,
cp16:5.2	karuṇaṁ paridevato;
cp16:5.3	Gaṅgāya tīre ṭhatvāna,
cp16:5.4	apucchiṁ ‘kosi tvaṁ naro’.
cp16:6.1	So me puṭṭho ca byākāsi,
cp16:6.2	attano karaṇaṁ tadā;
cp16:6.3	‘Dhanikehi bhīto tasito,
cp16:6.4	pakkhandohaṁ mahānadiṁ’.
cp16:7.1	Tassa katvāna kāruññaṁ,
cp16:7.2	cajitvā mama jīvitaṁ;
cp16:7.3	Pavisitvā nīhariṁ tassa,
cp16:7.4	andhakāramhi rattiyā.
cp16:8.1	Assatthakālamaññāya,
cp16:8.2	tassāhaṁ idamabraviṁ;
cp16:8.3	‘Ekaṁ taṁ varaṁ yācāmi,
cp16:8.4	mā maṁ kassaci pāvada’.
cp16:9.1	Nagaraṁ gantvāna ācikkhi,
cp16:9.2	pucchito dhanahetuko;
cp16:9.3	Rājānaṁ so gahetvāna,
cp16:9.4	upagañchi mamantikaṁ.
cp16:10.1	Yāvatā karaṇaṁ sabbaṁ,
cp16:10.2	rañño ārocitaṁ mayā;
cp16:10.3	Rājā sutvāna vacanaṁ,
cp16:10.4	usuṁ tassa pakappayi;
cp16:10.5	‘Idheva ghātayissāmi,
cp16:10.6	mittadubbhiṁ anāriyaṁ’.
cp16:11.1	Tamahaṁ anurakkhanto,
cp16:11.2	nimminiṁ mama attanā;
cp16:11.3	‘Tiṭṭhateso mahārāja,
cp16:11.4	kāmakāro bhavāmi te’.
cp16:12.1	Anurakkhiṁ mama sīlaṁ,
cp16:12.2	nārakkhiṁ mama jīvitaṁ;
cp16:12.3	Sīlavā hi tadā āsiṁ,
cp16:12.4	bodhiyāyeva kāraṇā”ti.
cp16:13.1	Rurumigarājacariyaṁ chaṭṭhaṁ.
cp17:0.1	Cariyāpiṭaka
cp17:0.2	Hatthināgavagga
cp17:0.3	Sīlapāramī 7
cp17:0.4	Mātaṅgacariya
cp17:1.1	“Punāparaṁ yadā homi,
cp17:1.2	jaṭilo uggatāpano;
cp17:1.3	Mātaṅgo nāma nāmena,
cp17:1.4	sīlavā susamāhito.
cp17:2.1	Ahañca brāhmaṇo eko,
cp17:2.2	gaṅgākūle vasāmubho;
cp17:2.3	Ahaṁ vasāmi upari,
cp17:2.4	heṭṭhā vasati brāhmaṇo.
cp17:3.1	Vicaranto anukūlamhi,
cp17:3.2	uddhaṁ me assamaddasa;
cp17:3.3	Tattha maṁ paribhāsetvā,
cp17:3.4	abhisapi muddhaphālanaṁ.
cp17:4.1	Yadihaṁ tassa pakuppeyyaṁ,
cp17:4.2	yadi sīlaṁ na gopaye;
cp17:4.3	Oloketvānahaṁ tassa,
cp17:4.4	kareyyaṁ chārikaṁ viya.
cp17:5.1	Yaṁ so tadā maṁ abhisapi,
cp17:5.2	kupito duṭṭhamānaso;
cp17:5.3	Tasseva matthake nipati,
cp17:5.4	yogena taṁ pamocayiṁ.
cp17:6.1	Anurakkhiṁ mama sīlaṁ,
cp17:6.2	nārakkhiṁ mama jīvitaṁ;
cp17:6.3	Sīlavā hi tadā āsiṁ,
cp17:6.4	bodhiyāyeva kāraṇā”ti.
cp17:7.1	Mātaṅgacariyaṁ sattamaṁ.
cp18:0.1	Cariyāpiṭaka
cp18:0.2	Hatthināgavagga
cp18:0.3	Sīlapāramī 8
cp18:0.4	Dhammadevaputtacariya
cp18:1.1	“Punāparaṁ yadā homi,
cp18:1.2	mahāpakkho mahiddhiko;
cp18:1.3	Dhammo nāma mahāyakkho,
cp18:1.4	sabbalokānukampako.
cp18:2.1	Dasakusalakammapathe,
cp18:2.2	samādapento mahājanaṁ;
cp18:2.3	Carāmi gāmanigamaṁ,
cp18:2.4	samitto saparijjano.
cp18:3.1	Pāpo kadariyo yakkho,
cp18:3.2	dīpento dasa pāpake;
cp18:3.3	Sopettha mahiyā carati,
cp18:3.4	samitto saparijjano.
cp18:4.1	Dhammavādī adhammo ca,
cp18:4.2	ubho paccanikā mayaṁ;
cp18:4.3	Dhure dhuraṁ ghaṭṭayantā,
cp18:4.4	samimhā paṭipathe ubho.
cp18:5.1	Kalaho vattatī bhesmā,
cp18:5.2	kalyāṇapāpakassa ca;
cp18:5.3	Maggā okkamanatthāya,
cp18:5.4	mahāyuddho upaṭṭhito.
cp18:6.1	Yadihaṁ tassa kuppeyyaṁ,
cp18:6.2	yadi bhinde tapoguṇaṁ;
cp18:6.3	Sahaparijanaṁ tassa,
cp18:6.4	rajabhūtaṁ kareyyahaṁ.
cp18:7.1	Api cāhaṁ sīlarakkhāya,
cp18:7.2	nibbāpetvāna mānasaṁ;
cp18:7.3	Saha janenokkamitvā,
cp18:7.4	pathaṁ pāpassa dāsahaṁ.
cp18:8.1	Saha pathato okkante,
cp18:8.2	katvā cittassa nibbutiṁ;
cp18:8.3	Vivaraṁ adāsi pathavī,
cp18:8.4	pāpayakkhassa tāvade”ti.
cp18:9.1	Dhammadevaputtacariyaṁ aṭṭhamaṁ.
cp19:0.1	Cariyāpiṭaka
cp19:0.2	Hatthināgavagga
cp19:0.3	Sīlapāramī 9
cp19:0.4	Alīnasattucariya
cp19:1.1	“Pañcālaraṭṭhe nagaravare,
cp19:1.2	Kapilāyaṁ puruttame;
cp19:1.3	Rājā jayaddiso nāma,
cp19:1.4	Sīlaguṇamupāgato.
cp19:2.1	Tassa rañño ahaṁ putto,
cp19:2.2	Sutadhammo susīlavā;
cp19:2.3	Alīnasatto guṇavā,
cp19:2.4	Anurakkhaparijano sadā.
cp19:3.1	Pitā me migavaṁ gantvā,
cp19:3.2	porisādaṁ upāgami;
cp19:3.3	So me pitumaggahesi,
cp19:3.4	‘bhakkhosi mama mā cali’.
cp19:4.1	Tassa taṁ vacanaṁ sutvā,
cp19:4.2	bhīto tasitavedhito;
cp19:4.3	Ūrukkhambho ahu tassa,
cp19:4.4	disvāna porisādakaṁ.
cp19:5.1	Migavaṁ gahetvā muñcassu,
cp19:5.2	katvā āgamanaṁ puna;
cp19:5.3	Brāhmaṇassa dhanaṁ datvā,
cp19:5.4	pitā āmantayī mamaṁ.
cp19:6.1	‘Rajjaṁ putta paṭipajja,
cp19:6.2	mā pamajji puraṁ idaṁ;
cp19:6.3	Kataṁ me porisādena,
cp19:6.4	mama āgamanaṁ puna’.
cp19:7.1	Mātāpitū ca vanditvā,
cp19:7.2	nimminitvāna attanā;
cp19:7.3	Nikkhipitvā dhanuṁ khaggaṁ,
cp19:7.4	porisādaṁ upāgamiṁ.
cp19:8.1	Sasatthahatthūpagataṁ,
cp19:8.2	kadāci so tasissati;
cp19:8.3	Tena bhijjissati sīlaṁ,
cp19:8.4	parittāsaṁ kate mayi.
cp19:9.1	Sīlakhaṇḍabhayā mayhaṁ,
cp19:9.2	tassa dessaṁ na byāhariṁ;
cp19:9.3	Mettacitto hitavādī,
cp19:9.4	idaṁ vacanamabraviṁ.
cp19:10.1	‘Ujjālehi mahāaggiṁ,
cp19:10.2	papatissāmi rukkhato;
cp19:10.3	Tvaṁ pakkakālamaññāya,
cp19:10.4	bhakkhaya maṁ pitāmaha’.
cp19:11.1	Iti sīlavataṁ hetu,
cp19:11.2	nārakkhiṁ mama jīvitaṁ;
cp19:11.3	Pabbājesiṁ cahaṁ tassa,
cp19:11.4	sadā pāṇātipātikan”ti.
cp19:12.1	Alīnasattucariyaṁ navamaṁ.
cp20:0.1	Cariyāpiṭaka
cp20:0.2	Hatthināgavagga
cp20:0.3	Sīlapāramī 10
cp20:0.4	Saṅkhapālacariya
cp20:1.1	“Punāparaṁ yadā homi,
cp20:1.2	saṅkhapālo mahiddhiko;
cp20:1.3	Dāṭhāvudho ghoraviso,
cp20:1.4	dvijivho uragādhibhū.
cp20:2.1	Catuppathe mahāmagge,
cp20:2.2	nānājanasamākule;
cp20:2.3	Caturo aṅge adhiṭṭhāya,
cp20:2.4	tattha vāsamakappayiṁ.
cp20:3.1	Chaviyā cammena maṁsena,
cp20:3.2	Nahāruaṭṭhikehi vā;
cp20:3.3	Yassa etena karaṇīyaṁ,
cp20:3.4	Dinnaṁyeva harātu so.
cp20:4.1	Addasaṁsu bhojaputtā,
cp20:4.2	kharā luddā akāruṇā;
cp20:4.3	Upagañchuṁ mamaṁ tattha,
cp20:4.4	daṇḍamuggarapāṇino.
cp20:5.1	Nāsāya vinivijjhitvā,
cp20:5.2	naṅguṭṭhe piṭṭhikaṇṭake;
cp20:5.3	Kāje āropayitvāna,
cp20:5.4	bhojaputtā hariṁsu maṁ.
cp20:6.1	Sasāgarantaṁ pathaviṁ,
cp20:6.2	sakānanaṁ sapabbataṁ;
cp20:6.3	Icchamāno cahaṁ tattha,
cp20:6.4	nāsāvātena jhāpaye.
cp20:7.1	Sūlehi vinivijjhante,
cp20:7.2	Koṭṭayantepi sattibhi;
cp20:7.3	Bhojaputte na kuppāmi,
cp20:7.4	Esā me sīlapāramī”ti.
cp20:8.1	Saṅkhapālacariyaṁ dasamaṁ.
cp20:9.1	Hatthināgavaggo dutiyo.
cp20:10.1	Tassuddānaṁ
cp20:11.1	Hatthināgo bhūridatto,
cp20:11.2	campeyyo bodhi mahiṁso;
cp20:11.3	Ruru mātaṅgo dhammo ca,
cp20:11.4	atrajo ca jayaddiso.
cp20:12.1	Ete nava sīlabalā,
cp20:12.2	parikkhārā padesikā;
cp20:12.3	Jīvitaṁ parirakkhitvā,
cp20:12.4	sīlāni anurakkhisaṁ.
cp20:13.1	Saṅkhapālassa me sato,
cp20:13.2	sabbakālampi jīvitaṁ;
cp20:13.3	Yassa kassaci niyyattaṁ,
cp20:13.4	tasmā sā sīlapāramīti.
cp20:14.1	Sīlapāraminiddeso niṭṭhito.
cp21:0.1	Cariyāpiṭaka
cp21:0.2	Yudhañjayavagga
cp21:0.3	Nekkhammapāramī 1
cp21:0.4	Yudhañjayacariya
cp21:1.1	“Yadāhaṁ amitayaso,
cp21:1.2	Rājaputto yudhañjayo;
cp21:1.3	Ussāvabinduṁ sūriyātape,
cp21:1.4	Patitaṁ disvāna saṁvijiṁ.
cp21:2.1	Taññevādhipatiṁ katvā,
cp21:2.2	saṁvegamanubrūhayiṁ;
cp21:2.3	Mātāpitū ca vanditvā,
cp21:2.4	pabbajjamanuyācahaṁ.
cp21:3.1	Yācanti maṁ pañjalikā,
cp21:3.2	sanegamā saraṭṭhakā;
cp21:3.3	‘Ajjeva putta paṭipajja,
cp21:3.4	iddhaṁ phītaṁ mahāmahiṁ’.
cp21:4.1	Sarājake sahorodhe,
cp21:4.2	sanegame saraṭṭhake;
cp21:4.3	Karuṇaṁ paridevante,
cp21:4.4	anapekkhova pariccajiṁ.
cp21:5.1	Kevalaṁ pathaviṁ rajjaṁ,
cp21:5.2	ñātiparijanaṁ yasaṁ;
cp21:5.3	Cajamāno na cintesiṁ,
cp21:5.4	bodhiyāyeva kāraṇā.
cp21:6.1	Mātāpitā na me dessā,
cp21:6.2	napi me dessaṁ mahāyasaṁ;
cp21:6.3	Sabbaññutaṁ piyaṁ mayhaṁ,
cp21:6.4	tasmā rajjaṁ pariccajin”ti.
cp21:7.1	Yudhañjayacariyaṁ paṭhamaṁ.
cp22:0.1	Cariyāpiṭaka
cp22:0.2	Yudhañjayavagga
cp22:0.3	Nekkhammapāramī 2
cp22:0.4	Somanassacariya
cp22:1.1	“Punāparaṁ yadā homi,
cp22:1.2	indapatthe puruttame;
cp22:1.3	Kāmito dayito putto,
cp22:1.4	somanassoti vissuto.
cp22:2.1	Sīlavā guṇasampanno,
cp22:2.2	kalyāṇapaṭibhānavā;
cp22:2.3	Vuḍḍhāpacāyī hirīmā,
cp22:2.4	saṅgahesu ca kovido.
cp22:3.1	Tassa rañño patikaro,
cp22:3.2	ahosi kuhakatāpaso;
cp22:3.3	Ārāmaṁ mālāvacchañca,
cp22:3.4	ropayitvāna jīvati.
cp22:4.1	Tamahaṁ disvāna kuhakaṁ,
cp22:4.2	thusarāsiṁva ataṇḍulaṁ;
cp22:4.3	Dumaṁva anto susiraṁ,
cp22:4.4	kadaliṁva asārakaṁ.
cp22:5.1	Natthimassa sataṁ dhammo,
cp22:5.2	sāmaññāpagato ayaṁ;
cp22:5.3	Hirīsukkadhammajahito,
cp22:5.4	jīvitavuttikāraṇā.
cp22:6.1	Kupito ahu paccanto,
cp22:6.2	aṭavīhi parantihi;
cp22:6.3	Taṁ nisedhetuṁ gacchanto,
cp22:6.4	anusāsi pitā mamaṁ.
cp22:7.1	‘Mā pamajji tuvaṁ tāta,
cp22:7.2	jaṭilaṁ uggatāpanaṁ;
cp22:7.3	Yadicchakaṁ pavattehi,
cp22:7.4	sabbakāmadado hi so’.
cp22:8.1	Tamahaṁ gantvānupaṭṭhānaṁ,
cp22:8.2	Idaṁ vacanamabraviṁ;
cp22:8.3	‘Kacci te gahapati kusalaṁ,
cp22:8.4	Kiṁ vā te āharīyatu’.
cp22:9.1	Tena so kupito āsi,
cp22:9.2	kuhako mānanissito;
cp22:9.3	‘Ghātāpemi tuvaṁ ajja,
cp22:9.4	raṭṭhā pabbājayāmi vā’.
cp22:10.1	Nisedhayitvā paccantaṁ,
cp22:10.2	rājā kuhakamabravi;
cp22:10.3	‘Kacci te bhante khamanīyaṁ,
cp22:10.4	sammāno te pavattito’.
cp22:11.1	Tassa ācikkhatī pāpo,
cp22:11.2	kumāro yathā nāsiyo;
cp22:11.3	Tassa taṁ vacanaṁ sutvā,
cp22:11.4	āṇāpesi mahīpati.
cp22:12.1	‘Sīsaṁ tattheva chinditvā,
cp22:12.2	katvāna catukhaṇḍikaṁ;
cp22:12.3	Rathiyā rathiyaṁ dassetha,
cp22:12.4	sā gati jaṭilahīḷitā’.
cp22:13.1	Tattha kāraṇikā gantvā,
cp22:13.2	caṇḍā luddā akāruṇā;
cp22:13.3	Mātu aṅke nisinnassa,
cp22:13.4	ākaḍḍhitvā nayanti maṁ.
cp22:14.1	Tesāhaṁ evamavacaṁ,
cp22:14.2	bandhataṁ gāḷhabandhanaṁ;
cp22:14.3	‘Rañño dassetha maṁ khippaṁ,
cp22:14.4	rājakiriyāni atthi me’.
cp22:15.1	Te maṁ rañño dassayiṁsu,
cp22:15.2	pāpassa pāpasevino;
cp22:15.3	Disvāna taṁ saññāpesiṁ,
cp22:15.4	mamañca vasamānayiṁ.
cp22:16.1	So maṁ tattha khamāpesi,
cp22:16.2	mahārajjamadāsi me;
cp22:16.3	Sohaṁ tamaṁ dālayitvā,
cp22:16.4	pabbajiṁ anagāriyaṁ.
cp22:17.1	Na me dessaṁ mahārajjaṁ,
cp22:17.2	kāmabhogo na dessiyo;
cp22:17.3	Sabbaññutaṁ piyaṁ mayhaṁ,
cp22:17.4	tasmā rajjaṁ pariccajin”ti.
cp22:18.1	Somanassacariyaṁ dutiyaṁ.
cp23:0.1	Cariyāpiṭaka
cp23:0.2	Yudhañjayavagga
cp23:0.3	Nekkhammapāramī 3
cp23:0.4	Ayogharacariya
cp23:1.1	“Punāparaṁ yadā homi,
cp23:1.2	kāsirājassa atrajo;
cp23:1.3	Ayogharamhi saṁvaḍḍho,
cp23:1.4	nāmenāsi ayogharo.
cp23:2.1	‘Dukkhena jīvito laddho,
cp23:2.2	saṁpīḷe patiposito;
cp23:2.3	Ajjeva putta paṭipajja,
cp23:2.4	kevalaṁ vasudhaṁ imaṁ’.
cp23:3.1	Saraṭṭhakaṁ sanigamaṁ,
cp23:3.2	sajanaṁ vanditva khattiyaṁ;
cp23:3.3	Añjaliṁ paggahetvāna,
cp23:3.4	idaṁ vacanamabraviṁ.
cp23:4.1	‘Ye keci mahiyā sattā,
cp23:4.2	hīnamukkaṭṭhamajjhimā;
cp23:4.3	Nirārakkhā sake gehe,
cp23:4.4	vaḍḍhanti sakañātibhi.
cp23:5.1	Idaṁ loke uttariyaṁ,
cp23:5.2	saṁpīḷe mama posanaṁ;
cp23:5.3	Ayogharamhi saṁvaḍḍho,
cp23:5.4	appabhe candasūriye.
cp23:6.1	Pūtikuṇapasampuṇṇā,
cp23:6.2	muccitvā mātukucchito;
cp23:6.3	Tato ghoratare dukkhe,
cp23:6.4	puna pakkhittayoghare.
cp23:7.1	Yadihaṁ tādisaṁ patvā,
cp23:7.2	dukkhaṁ paramadāruṇaṁ;
cp23:7.3	Rajjesu yadi rajjāmi,
cp23:7.4	pāpānaṁ uttamo siyaṁ.
cp23:8.1	Ukkaṇṭhitomhi kāyena,
cp23:8.2	rajjenamhi anatthiko;
cp23:8.3	Nibbutiṁ pariyesissaṁ,
cp23:8.4	yattha maṁ maccu na maddiye’.
cp23:9.1	Evāhaṁ cintayitvāna,
cp23:9.2	viravante mahājane;
cp23:9.3	Nāgova bandhanaṁ chetvā,
cp23:9.4	pāvisiṁ kānanaṁ vanaṁ.
cp23:10.1	Mātāpitā na me dessā,
cp23:10.2	napi me dessaṁ mahāyasaṁ;
cp23:10.3	Sabbaññutaṁ piyaṁ mayhaṁ,
cp23:10.4	tasmā rajjaṁ pariccajin”ti.
cp23:11.1	Ayogharacariyaṁ tatiyaṁ.
cp24:0.1	Cariyāpiṭaka
cp24:0.2	Yudhañjayavagga
cp24:0.3	Nekkhammapāramī 4
cp24:0.4	Bhisacariya
cp24:1.1	“Punāparaṁ yadā homi,
cp24:1.2	kāsīnaṁ puravaruttame;
cp24:1.3	Bhaginī ca bhātaro satta,
cp24:1.4	nibbattā sotthiye kule.
cp24:2.1	Etesaṁ pubbajo āsiṁ,
cp24:2.2	hirīsukkamupāgato;
cp24:2.3	Bhavaṁ disvāna bhayato,
cp24:2.4	nekkhammābhirato ahaṁ.
cp24:3.1	Mātāpitūhi pahitā,
cp24:3.2	sahāyā ekamānasā;
cp24:3.3	Kāmehi maṁ nimantenti,
cp24:3.4	‘kulavaṁsaṁ dharehi’ti.
cp24:4.1	Yaṁ tesaṁ vacanaṁ vuttaṁ,
cp24:4.2	gihīdhamme sukhāvahaṁ;
cp24:4.3	Taṁ me ahosi kaṭhinaṁ,
cp24:4.4	tattaphālasamaṁ viya.
cp24:5.1	Te maṁ tadā ukkhipantaṁ,
cp24:5.2	pucchiṁsu patthitaṁ mama;
cp24:5.3	‘Kiṁ tvaṁ patthayase samma,
cp24:5.4	yadi kāme na bhuñjasi’.
cp24:6.1	Tesāhaṁ evamavacaṁ,
cp24:6.2	atthakāmo hitesinaṁ;
cp24:6.3	‘Nāhaṁ patthemi gihībhāvaṁ,
cp24:6.4	nekkhammābhirato ahaṁ’.
cp24:7.1	Te mayhaṁ vacanaṁ sutvā,
cp24:7.2	pitu mātu ca sāvayuṁ;
cp24:7.3	Mātāpitā evamāhu,
cp24:7.4	‘sabbeva pabbajāma bho’.
cp24:8.1	Ubho mātāpitā mayhaṁ,
cp24:8.2	bhaginī ca satta bhātaro;
cp24:8.3	Amitadhanaṁ chaḍḍayitvā,
cp24:8.4	pāvisimhā mahāvanan”ti.
cp24:9.1	Bhisacariyaṁ catutthaṁ.
cp25:0.1	Cariyāpiṭaka
cp25:0.2	Yudhañjayavagga
cp25:0.3	Nekkhammapāramī 5
cp25:0.4	Soṇapaṇḍitacariya
cp25:1.1	“Punāparaṁ yadā homi,
cp25:1.2	nagare brahmavaḍḍhane;
cp25:1.3	Tattha kulavare seṭṭhe,
cp25:1.4	mahāsāle ajāyahaṁ.
cp25:2.1	Tadāpi lokaṁ disvāna,
cp25:2.2	Andhībhūtaṁ tamotthaṭaṁ;
cp25:2.3	Cittaṁ bhavato patikuṭati,
cp25:2.4	Tuttavegahataṁ viya.
cp25:3.1	Disvāna vividhaṁ pāpaṁ,
cp25:3.2	evaṁ cintesahaṁ tadā;
cp25:3.3	‘Kadāhaṁ gehā nikkhamma,
cp25:3.4	pavisissāmi kānanaṁ’.
cp25:4.1	Tadāpi maṁ nimantesuṁ,
cp25:4.2	kāmabhogehi ñātayo;
cp25:4.3	Tesampi chandamācikkhiṁ,
cp25:4.4	‘mā nimantetha tehi maṁ’.
cp25:5.1	Yo me kaniṭṭhako bhātā,
cp25:5.2	nando nāmāsi paṇḍito;
cp25:5.3	Sopi maṁ anusikkhanto,
cp25:5.4	pabbajjaṁ samarocayi.
cp25:6.1	Ahaṁ soṇo ca nando ca,
cp25:6.2	ubho mātāpitā mama;
cp25:6.3	Tadāpi bhoge chaḍḍetvā,
cp25:6.4	pāvisimhā mahāvanan”ti.
cp25:7.1	Soṇapaṇḍitacariyaṁ pañcamaṁ.
cp26:0.1	Cariyāpiṭaka
cp26:0.2	Yudhañjayavagga
cp26:0.3	Adiṭṭhānapāramī 1
cp26:0.4	Temiyacariya
cp26:1.1	“Punāparaṁ yadā homi,
cp26:1.2	kāsirājassa atrajo;
cp26:1.3	Mūgapakkhoti nāmena,
cp26:1.4	temiyoti vadanti maṁ.
cp26:2.1	Soḷasitthisahassānaṁ,
cp26:2.2	na vijjati pumo tadā;
cp26:2.3	Ahorattānaṁ accayena,
cp26:2.4	nibbatto ahamekako.
cp26:3.1	Kicchā laddhaṁ piyaṁ puttaṁ,
cp26:3.2	abhijātaṁ jutindharaṁ;
cp26:3.3	Setacchattaṁ dhārayitvāna,
cp26:3.4	sayane poseti maṁ pitā.
cp26:4.1	Niddāyamāno sayanavare,
cp26:4.2	Pabujjhitvānahaṁ tadā;
cp26:4.3	Addasaṁ paṇḍaraṁ chattaṁ,
cp26:4.4	Yenāhaṁ nirayaṁ gato.
cp26:5.1	Saha diṭṭhassa me chattaṁ,
cp26:5.2	tāso uppajji bheravo;
cp26:5.3	Vinicchayaṁ samāpanno,
cp26:5.4	‘kathāhaṁ imaṁ muñcissaṁ’.
cp26:6.1	Pubbasālohitā mayhaṁ,
cp26:6.2	devatā atthakāminī;
cp26:6.3	Sā maṁ disvāna dukkhitaṁ,
cp26:6.4	tīsu ṭhānesu yojayi.
cp26:7.1	‘Mā paṇḍiccayaṁ vibhāvaya,
cp26:7.2	Bālamato bhava sabbapāṇinaṁ;
cp26:7.3	Sabbo taṁ jano ocināyatu,
cp26:7.4	Evaṁ tava attho bhavissati’.
cp26:8.1	Evaṁ vuttāyahaṁ tassā,
cp26:8.2	idaṁ vacanamabraviṁ;
cp26:8.3	‘Karomi te taṁ vacanaṁ,
cp26:8.4	yaṁ tvaṁ bhaṇasi devate;
cp26:8.5	Atthakāmāsi me amma,
cp26:8.6	hitakāmāsi devate’.
cp26:9.1	Tassāhaṁ vacanaṁ sutvā,
cp26:9.2	sāgareva thalaṁ labhiṁ;
cp26:9.3	Haṭṭho saṁviggamānaso,
cp26:9.4	tayo aṅge adhiṭṭhahiṁ.
cp26:10.1	Mūgo ahosiṁ badhiro,
cp26:10.2	pakkho gativivajjito;
cp26:10.3	Ete aṅge adhiṭṭhāya,
cp26:10.4	vassāni soḷasaṁ vasiṁ.
cp26:11.1	Tato me hatthapāde ca,
cp26:11.2	jivhaṁ sotañca maddiya;
cp26:11.3	Anūnataṁ me passitvā,
cp26:11.4	‘kāḷakaṇṇī’ti nindisuṁ.
cp26:12.1	Tato jānapadā sabbe,
cp26:12.2	senāpatipurohitā;
cp26:12.3	Sabbe ekamanā hutvā,
cp26:12.4	chaḍḍanaṁ anumodisuṁ.
cp26:13.1	Sohaṁ tesaṁ matiṁ sutvā,
cp26:13.2	haṭṭho saṁviggamānaso;
cp26:13.3	‘Yassatthāya tapociṇṇo,
cp26:13.4	so me attho samijjhatha’.
cp26:14.1	Nhāpetvā anulimpitvā,
cp26:14.2	veṭhetvā rājaveṭhanaṁ;
cp26:14.3	Chattena abhisiñcitvā,
cp26:14.4	kāresuṁ puraṁ padakkhiṇaṁ.
cp26:15.1	Sattāhaṁ dhārayitvāna,
cp26:15.2	uggate ravimaṇḍale;
cp26:15.3	Rathena maṁ nīharitvā,
cp26:15.4	sārathī vanamupāgami.
cp26:16.1	Ekokāse rathaṁ katvā,
cp26:16.2	sajjassaṁ hatthamuccito;
cp26:16.3	Sārathī khaṇatī kāsuṁ,
cp26:16.4	nikhātuṁ pathaviyā mamaṁ.
cp26:17.1	Adhiṭṭhitamadhiṭṭhānaṁ,
cp26:17.2	tajjento vividhakāraṇā;
cp26:17.3	Na bhindiṁ tamadhiṭṭhānaṁ,
cp26:17.4	bodhiyāyeva kāraṇā.
cp26:18.1	Mātāpitā na me dessā,
cp26:18.2	attā me na ca dessiyo;
cp26:18.3	Sabbaññutaṁ piyaṁ mayhaṁ,
cp26:18.4	tasmā vatamadhiṭṭhahiṁ.
cp26:19.1	Ete aṅge adhiṭṭhāya,
cp26:19.2	Vassāni soḷasaṁ vasiṁ;
cp26:19.3	Adhiṭṭhānena me samo natthi,
cp26:19.4	Esā me adhiṭṭhānapāramī”ti.
cp26:20.1	Temiyacariyaṁ chaṭṭhaṁ.
cp27:0.1	Cariyāpiṭaka
cp27:0.2	Yudhañjayavagga
cp27:0.3	Saccapāramī 1
cp27:0.4	Kapirājacariya
cp27:1.1	“Yadā ahaṁ kapi āsiṁ,
cp27:1.2	nadīkūle darīsaye;
cp27:1.3	Pīḷito susumārena,
cp27:1.4	gamanaṁ na labhāmahaṁ.
cp27:2.1	Yamhokāse ahaṁ ṭhatvā,
cp27:2.2	orā pāraṁ patāmahaṁ;
cp27:2.3	Tatthacchi sattu vadhako,
cp27:2.4	kumbhīlo luddadassano.
cp27:3.1	So maṁ asaṁsi ‘ehī’ti,
cp27:3.2	‘ahampemī’ti taṁ vatiṁ;
cp27:3.3	Tassa matthakamakkamma,
cp27:3.4	parakūle patiṭṭhahiṁ.
cp27:4.1	Na tassa alikaṁ bhaṇitaṁ,
cp27:4.2	yathā vācaṁ akāsahaṁ;
cp27:4.3	Saccena me samo natthi,
cp27:4.4	esā me saccapāramī”ti.
cp27:4.5	Kapirājacariyaṁ sattamaṁ.
cp28:0.1	Cariyāpiṭaka
cp28:0.2	Yudhañjayavagga
cp28:0.3	Saccapāramī 2
cp28:0.4	Saccatāpasacariya
cp28:1.1	“Punāparaṁ yadā homi,
cp28:1.2	Tāpaso saccasavhayo;
cp28:1.3	Saccena lokaṁ pālesiṁ,
cp28:1.4	Samaggaṁ janamakāsahan”ti.
cp28:2.1	Saccatāpasacariyaṁ aṭṭhamaṁ.
cp29:0.1	Cariyāpiṭaka
cp29:0.2	Yudhañjayavagga
cp29:0.3	Saccapāramī 3
cp29:0.4	Vaṭṭapotakacariya
cp29:1.1	“Punāparaṁ yadā homi,
cp29:1.2	magadhe vaṭṭapotako;
cp29:1.3	Ajātapakkho taruṇo,
cp29:1.4	maṁsapesi kulāvake.
cp29:2.1	Mukhatuṇḍakenāharitvā,
cp29:2.2	mātā posayatī mamaṁ;
cp29:2.3	Tassā phassena jīvāmi,
cp29:2.4	natthi me kāyikaṁ balaṁ.
cp29:3.1	Saṁvacchare gimhasamaye,
cp29:3.2	davaḍāho padippati;
cp29:3.3	Upagacchati amhākaṁ,
cp29:3.4	pāvako kaṇhavattanī.
cp29:4.1	Dhamadhamāiti evaṁ,
cp29:4.2	saddāyanto mahāsikhī;
cp29:4.3	Anupubbena jhāpento,
cp29:4.4	aggi mamamupāgami.
cp29:5.1	Aggivegabhayātītā,
cp29:5.2	tasitā mātāpitā mama;
cp29:5.3	Kulāvake maṁ chaḍḍetvā,
cp29:5.4	attānaṁ parimocayuṁ.
cp29:6.1	Pāde pakkhe pajahāmi,
cp29:6.2	natthi me kāyikaṁ balaṁ;
cp29:6.3	Sohaṁ agatiko tattha,
cp29:6.4	evaṁ cintesahaṁ tadā.
cp29:7.1	‘Yesāhaṁ upadhāveyyaṁ,
cp29:7.2	bhīto tasitavedhito;
cp29:7.3	Te maṁ ohāya pakkantā,
cp29:7.4	kathaṁ me ajja kātave.
cp29:8.1	Atthi loke sīlaguṇo,
cp29:8.2	saccaṁ soceyyanuddayā;
cp29:8.3	Tena saccena kāhāmi,
cp29:8.4	saccakiriyamuttamaṁ.
cp29:9.1	Āvejjetvā dhammabalaṁ,
cp29:9.2	saritvā pubbake jine;
cp29:9.3	Saccabalamavassāya,
cp29:9.4	saccakiriyamakāsahaṁ.
cp29:10.1	Santi pakkhā apatanā,
cp29:10.2	santi pādā avañcanā;
cp29:10.3	Mātāpitā ca nikkhantā,
cp29:10.4	jātaveda paṭikkama’.
cp29:11.1	Sahasacce kate mayhaṁ,
cp29:11.2	Mahāpajjalito sikhī;
cp29:11.3	Vajjesi soḷasakarīsāni,
cp29:11.4	Udakaṁ patvā yathā sikhī;
cp29:11.5	Saccena me samo natthi,
cp29:11.6	Esā me saccapāramī”ti.
cp29:12.1	Vaṭṭapotakacariyaṁ navamaṁ.
cp30:0.1	Cariyāpiṭaka
cp30:0.2	Yudhañjayavagga
cp30:0.3	Saccapāramī 4
cp30:0.4	Maccharājacariya
cp30:1.1	“Punāparaṁ yadā homi,
cp30:1.2	maccharājā mahāsare;
cp30:1.3	Uṇhe sūriyasantāpe,
cp30:1.4	sare udaka khīyatha.
cp30:2.1	Tato kākā ca gijjhā ca,
cp30:2.2	kaṅkā kulalasenakā;
cp30:2.3	Bhakkhayanti divārattiṁ,
cp30:2.4	macche upanisīdiya.
cp30:3.1	Evaṁ cintesahaṁ tattha,
cp30:3.2	saha ñātīhi pīḷito;
cp30:3.3	‘Kena nu kho upāyena,
cp30:3.4	ñātī dukkhā pamocaye’.
cp30:4.1	Vicintayitvā dhammatthaṁ,
cp30:4.2	saccaṁ addasa passayaṁ;
cp30:4.3	Sacce ṭhatvā pamocesiṁ,
cp30:4.4	ñātīnaṁ taṁ atikkhayaṁ.
cp30:5.1	Anussaritvā sataṁ dhammaṁ,
cp30:5.2	paramatthaṁ vicintayaṁ;
cp30:5.3	Akāsiṁ saccakiriyaṁ,
cp30:5.4	yaṁ loke dhuvasassataṁ.
cp30:6.1	‘Yato sarāmi attānaṁ,
cp30:6.2	yato pattosmi viññutaṁ;
cp30:6.3	Nābhijānāmi sañcicca,
cp30:6.4	ekapāṇampi hiṁsitaṁ.
cp30:7.1	Etena saccavajjena,
cp30:7.2	pajjunno abhivassatu;
cp30:7.3	Abhitthanaya pajjunna,
cp30:7.4	nidhiṁ kākassa nāsaya;
cp30:7.5	Kākaṁ sokāya randhehi,
cp30:7.6	macche sokā pamocaya’.
cp30:8.1	Saha kate saccavare,
cp30:8.2	pajjunno abhigajjiya;
cp30:8.3	Thalaṁ ninnañca pūrento,
cp30:8.4	khaṇena abhivassatha.
cp30:9.1	Evarūpaṁ saccavaraṁ,
cp30:9.2	katvā vīriyamuttamaṁ;
cp30:9.3	Vassāpesiṁ mahāmeghaṁ,
cp30:9.4	saccatejabalassito;
cp30:9.5	Saccena me samo natthi,
cp30:9.6	esā me saccapāramī”ti.
cp30:10.1	Maccharājacariyaṁ dasamaṁ.
cp31:0.1	Cariyāpiṭaka
cp31:0.2	Yudhañjayavagga
cp31:0.3	Saccapāramī 5
cp31:0.4	Kaṇhadīpāyanacariya
cp31:1.1	“Punāparaṁ yadā homi,
cp31:1.2	kaṇhadīpāyano isi;
cp31:1.3	Paropaññāsavassāni,
cp31:1.4	anabhiratocariṁ ahaṁ.
cp31:2.1	Na koci etaṁ jānāti,
cp31:2.2	Anabhiratimanaṁ mama;
cp31:2.3	Ahañhi kassaci nācikkhiṁ,
cp31:2.4	Arati me carati mānase.
cp31:3.1	Sabrahmacārī maṇḍabyo,
cp31:3.2	sahāyo me mahāisi;
cp31:3.3	Pubbakammasamāyutto,
cp31:3.4	sūlamāropanaṁ labhi.
cp31:4.1	Tamahaṁ upaṭṭhahitvāna,
cp31:4.2	ārogyamanupāpayiṁ;
cp31:4.3	Āpucchitvāna āgañchiṁ,
cp31:4.4	yaṁ mayhaṁ sakamassamaṁ.
cp31:5.1	Sahāyo brāhmaṇo mayhaṁ,
cp31:5.2	bhariyaṁ ādāya puttakaṁ;
cp31:5.3	Tayo janā samāgantvā,
cp31:5.4	āgañchuṁ pāhunāgataṁ.
cp31:6.1	Sammodamāno tehi saha,
cp31:6.2	nisinno sakamassame;
cp31:6.3	Dārako vaṭṭamanukkhipaṁ,
cp31:6.4	āsīvisamakopayi.
cp31:7.1	Tato so vaṭṭagataṁ maggaṁ,
cp31:7.2	anvesanto kumārako;
cp31:7.3	Āsīvisassa hatthena,
cp31:7.4	uttamaṅgaṁ parāmasi.
cp31:8.1	Tassa āmasane kuddho,
cp31:8.2	sappo visabalassito;
cp31:8.3	Kupito paramakopena,
cp31:8.4	aḍaṁsi dārakaṁ khaṇe.
cp31:9.1	Sahadaṭṭho āsīvisena,
cp31:9.2	dārako papati bhūmiyaṁ;
cp31:9.3	Tenāhaṁ dukkhito āsiṁ,
cp31:9.4	mama vāhasi taṁ dukkhaṁ.
cp31:10.1	Tyāhaṁ assāsayitvāna,
cp31:10.2	dukkhite sokasallite;
cp31:10.3	Paṭhamaṁ akāsiṁ kiriyaṁ,
cp31:10.4	aggaṁ saccaṁ varuttamaṁ.
cp31:11.1	‘Sattāhamevāhaṁ pasannacitto,
cp31:11.2	Puññatthiko acariṁ brahmacariyaṁ;
cp31:11.3	Athāparaṁ yaṁ caritaṁ mamedaṁ,
cp31:11.4	Vassāni paññāsasamādhikāni.
cp31:12.1	Akāmako vāhi ahaṁ carāmi,
cp31:12.2	Etena saccena suvatthi hotu;
cp31:12.3	Hataṁ visaṁ jīvatu yaññadatto’.
cp31:13.1	Saha sacce kate mayhaṁ,
cp31:13.2	visavegena vedhito;
cp31:13.3	Abujjhitvāna vuṭṭhāsi,
cp31:13.4	arogo cāsi māṇavo;
cp31:13.5	Saccena me samo natthi,
cp31:13.6	esā me saccapāramī”ti.
cp31:14.1	Kaṇhadīpāyanacariyaṁ ekādasamaṁ.
cp32:0.1	Cariyāpiṭaka
cp32:0.2	Yudhañjayavagga
cp32:0.3	Saccapāramī 6
cp32:0.4	Sutasomacariya
cp32:1.1	“Punāparaṁ yadā homi,
cp32:1.2	sutasomo mahīpati;
cp32:1.3	Gahito porisādena,
cp32:1.4	brāhmaṇe saṅgaraṁ sariṁ.
cp32:2.1	Khattiyānaṁ ekasataṁ,
cp32:2.2	āvuṇitvā karattale;
cp32:2.3	Etesaṁ pamilāpetvā,
cp32:2.4	yaññatthe upanayī mamaṁ.
cp32:3.1	Apucchi maṁ porisādo,
cp32:3.2	‘kiṁ tvaṁ icchasi nissajaṁ;
cp32:3.3	Yathāmati te kāhāmi,
cp32:3.4	yadi me tvaṁ punehisi’.
cp32:4.1	Tassa paṭissuṇitvāna,
cp32:4.2	paṇhe āgamanaṁ mama;
cp32:4.3	Upagantvā puraṁ rammaṁ,
cp32:4.4	rajjaṁ niyyādayiṁ tadā.
cp32:5.1	Anussaritvā sataṁ dhammaṁ,
cp32:5.2	pubbakaṁ jinasevitaṁ;
cp32:5.3	Brāhmaṇassa dhanaṁ datvā,
cp32:5.4	porisādaṁ upāgamiṁ.
cp32:6.1	Natthi me saṁsayo tattha,
cp32:6.2	Ghātayissati vā na vā;
cp32:6.3	Saccavācānurakkhanto,
cp32:6.4	Jīvitaṁ cajitumupāgamiṁ;
cp32:6.5	Saccena me samo natthi,
cp32:6.6	Esā me saccapāramī”ti.
cp32:7.1	Sutasomacariyaṁ dvādasamaṁ.
cp33:0.1	Cariyāpiṭaka
cp33:0.2	Yudhañjayavagga
cp33:0.3	Mettāpāramī 1
cp33:0.4	Suvaṇṇasāmacariya
cp33:1.1	“Sāmo yadā vane āsiṁ,
cp33:1.2	sakkena abhinimmito;
cp33:1.3	Pavane sīhabyagghe ca,
cp33:1.4	mettāya mupanāmayiṁ.
cp33:2.1	Sīhabyagghehi dīpīhi,
cp33:2.2	acchehi mahisehi ca;
cp33:2.3	Pasadamigavarāhehi,
cp33:2.4	parivāretvā vane vasiṁ.
cp33:3.1	Na maṁ koci uttasati,
cp33:3.2	napi bhāyāmi kassaci;
cp33:3.3	Mettābalenupatthaddho,
cp33:3.4	ramāmi pavane tadā”ti.
cp33:4.1	Suvaṇṇasāmacariyaṁ terasamaṁ.
cp34:0.1	Cariyāpiṭaka
cp34:0.2	Yudhañjayavagga
cp34:0.3	Mettāpāramī 2
cp34:0.4	Ekarājacariya
cp34:1.1	“Punāparaṁ yadā homi,
cp34:1.2	ekarājāti vissuto;
cp34:1.3	Paramaṁ sīlaṁ adhiṭṭhāya,
cp34:1.4	pasāsāmi mahāmahiṁ.
cp34:2.1	Dasa kusalakammapathe,
cp34:2.2	vattāmi anavasesato;
cp34:2.3	Catūhi saṅgahavatthūhi,
cp34:2.4	saṅgaṇhāmi mahājanaṁ.
cp34:3.1	Evaṁ me appamattassa,
cp34:3.2	idha loke parattha ca;
cp34:3.3	Dabbaseno upagantvā,
cp34:3.4	acchindanto puraṁ mama.
cp34:4.1	Rājūpajīve nigame,
cp34:4.2	sabalaṭṭhe saraṭṭhake;
cp34:4.3	Sabbaṁ hatthagataṁ katvā,
cp34:4.4	kāsuyā nikhaṇī mamaṁ.
cp34:5.1	Amaccamaṇḍalaṁ rajjaṁ,
cp34:5.2	phītaṁ antepuraṁ mama;
cp34:5.3	Acchinditvāna gahitaṁ,
cp34:5.4	piyaṁ puttaṁva passahaṁ;
cp34:5.5	Mettāya me samo natthi,
cp34:5.6	esā me mettāpāramī”ti.
cp34:6.1	Ekarājacariyaṁ cuddasamaṁ.
cp35:0.1	Cariyāpiṭaka
cp35:0.2	Yudhañjayavagga
cp35:0.3	Upekkhāpāramī 1
cp35:0.4	Mahālomahaṁsacariya
cp35:1.1	“Susāne seyyaṁ kappemi,
cp35:1.2	Chavaṭṭhikaṁ upanidhāyahaṁ;
cp35:1.3	Gāmaṇḍalā upāgantvā,
cp35:1.4	Rūpaṁ dassentinappakaṁ.
cp35:2.1	Apare gandhamālañca,
cp35:2.2	bhojanaṁ vividhaṁ bahuṁ;
cp35:2.3	Upāyanānūpanenti,
cp35:2.4	haṭṭhā saṁviggamānasā.
cp35:3.1	Ye me dukkhaṁ upaharanti,
cp35:3.2	ye ca denti sukhaṁ mama;
cp35:3.3	Sabbesaṁ samako homi,
cp35:3.4	dayā kopo na vijjati.
cp35:4.1	Sukhadukkhe tulābhūto,
cp35:4.2	Yasesu ayasesu ca;
cp35:4.3	Sabbattha samako homi,
cp35:4.4	Esā me upekkhāpāramī”ti.
cp35:5.1	Mahālomahaṁsacariyaṁ pannarasamaṁ.
cp35:6.1	Yudhañjayavaggo tatiyo.
cp35:7.1	Tassuddānaṁ
cp35:8.1	Yudhañjayo somanasso,
cp35:8.2	ayogharabhisena ca;
cp35:8.3	Soṇanando mūgapakkho,
cp35:8.4	kapirājā saccasavhayo.
cp35:9.1	Vaṭṭako maccharājā ca,
cp35:9.2	kaṇhadīpāyano isi;
cp35:9.3	Sutasomo puna āsiṁ,
cp35:9.4	sāmo ca ekarājahu;
cp35:9.5	Upekkhāpāramī āsi,
cp35:9.6	iti vutthaṁ mahesinā.
cp35:10.1	Evaṁ bahubbidhaṁ dukkhaṁ,
cp35:10.2	sampattī ca bahubbidhā;
cp35:10.3	Bhavābhave anubhavitvā,
cp35:10.4	patto sambodhimuttamaṁ.
cp35:11.1	Datvā dātabbakaṁ dānaṁ,
cp35:11.2	sīlaṁ pūretvā asesato;
cp35:11.3	Nekkhamme pāramiṁ gantvā,
cp35:11.4	patto sambodhimuttamaṁ.
cp35:12.1	Paṇḍite paripucchitvā,
cp35:12.2	vīriyaṁ katvāna muttamaṁ;
cp35:12.3	Khantiyā pāramiṁ gantvā,
cp35:12.4	patto sambodhimuttamaṁ.
cp35:13.1	Katvā daḷhamadhiṭṭhānaṁ,
cp35:13.2	saccavācānurakkhiya;
cp35:13.3	Mettāya pāramiṁ gantvā,
cp35:13.4	patto sambodhimuttamaṁ.
cp35:14.1	Lābhālābhe yasāyase,
cp35:14.2	sammānanāvamānane;
cp35:14.3	Sabbattha samako hutvā,
cp35:14.4	patto sambodhimuttamaṁ.
cp35:15.1	Kosajjaṁ bhayato disvā,
cp35:15.2	vīriyārambhañca khemato;
cp35:15.3	Āraddhavīriyā hotha,
cp35:15.4	esā buddhānusāsanī.
cp35:16.1	Vivādaṁ bhayato disvā,
cp35:16.2	avivādañca khemato;
cp35:16.3	Samaggā sakhilā hotha,
cp35:16.4	esā buddhānusāsanī.
cp35:17.1	Pamādaṁ bhayato disvā,
cp35:17.2	appamādañca khemato;
cp35:17.3	Bhāvethaṭṭhaṅgikaṁ maggaṁ,
cp35:17.4	esā buddhānusāsanī.
cp35:18.1	Itthaṁ sudaṁ bhagavā attano pubbacariyaṁ sambhāvayamāno buddhāpadāniyaṁ nāma dhammapariyāyaṁ abhāsitthāti.
cp35:19.1	Cariyāpiṭakaṁ niṭṭhitaṁ.