# Buddhavaṁsa — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

bv1:0.1	Buddhavaṁsa
bv1:0.2	1. Ratanacaṅkamanakaṇḍa
bv1:1.1	Namo tassa Bhagavato Arahato Sammāsambuddhassa.
bv1:2.1	Brahmā ca lokādhipatī sahampatī,
bv1:2.2	Katañjalī anadhivaraṁ ayācatha;
bv1:2.3	“Santīdha sattāpparajakkhajātikā,
bv1:2.4	Desehi dhammaṁ anukampimaṁ pajaṁ”.
bv1:3.1	Sampannavijjācaraṇassa tādino,
bv1:3.2	Jutindharassantimadehadhārino;
bv1:3.3	Tathāgatassappaṭipuggalassa,
bv1:3.4	Uppajji kāruññatā sabbasatte.
bv1:4.1	“Na hete jānanti sadevamānusā,
bv1:4.2	Buddho ayaṁ kīdisako naruttamo;
bv1:4.3	Iddhibalaṁ paññābalañca kīdisaṁ,
bv1:4.4	Buddhabalaṁ lokahitassa kīdisaṁ.
bv1:5.1	Na hete jānanti sadevamānusā,
bv1:5.2	Buddho ayaṁ edisako naruttamo;
bv1:5.3	Iddhibalaṁ paññābalañca edisaṁ,
bv1:5.4	Buddhabalaṁ lokahitassa edisaṁ.
bv1:6.1	Handāhaṁ dassayissāmi,
bv1:6.2	buddhabalamanuttaraṁ;
bv1:6.3	Caṅkamaṁ māpayissāmi,
bv1:6.4	nabhe ratanamaṇḍitaṁ”.
bv1:7.1	Bhummā mahārājikā tāvatiṁsā,
bv1:7.2	Yāmā ca devā tusitā ca nimmitā;
bv1:7.3	Paranimmitā yepi ca brahmakāyikā,
bv1:7.4	Ānanditā vipulamakaṁsu ghosaṁ.
bv1:8.1	Obhāsitā ca pathavī sadevakā,
bv1:8.2	Puthū ca lokantarikā asaṁvutā;
bv1:8.3	Tamo ca tibbo vihato tadā ahu,
bv1:8.4	Disvāna accherakaṁ pāṭihīraṁ.
bv1:9.1	Sadevagandhabbamanussarakkhase,
bv1:9.2	Ābhā uḷārā vipulā ajāyatha;
bv1:9.3	Imasmiṁ loke parasmiñcobhayasmiṁ,
bv1:9.4	Adho ca uddhaṁ tiriyañca vitthataṁ.
bv1:10.1	Sattuttamo anadhivaro vināyako,
bv1:10.2	Satthā ahū devamanussapūjito;
bv1:10.3	Mahānubhāvo satapuññalakkhaṇo,
bv1:10.4	Dassesi accherakaṁ pāṭihīraṁ.
bv1:11.1	So yācito devavarena cakkhumā,
bv1:11.2	Atthaṁ samekkhitvā tadā naruttamo;
bv1:11.3	Caṅkamaṁ māpayi lokanāyako,
bv1:11.4	Suniṭṭhitaṁ sabbaratananimmitaṁ.
bv1:12.1	Iddhī ca ādesanānusāsanī,
bv1:12.2	Tipāṭihīre bhagavā vasī ahu;
bv1:12.3	Caṅkamaṁ māpayi lokanāyako,
bv1:12.4	Suniṭṭhitaṁ sabbaratananimmitaṁ.
bv1:13.1	Dasasahassīlokadhātuyā,
bv1:13.2	Sinerupabbatuttame;
bv1:13.3	Thambheva dassesi paṭipāṭiyā,
bv1:13.4	Caṅkame ratanāmaye.
bv1:14.1	Dasasahassī atikkamma,
bv1:14.2	caṅkamaṁ māpayī jino;
bv1:14.3	Sabbasoṇṇamayā passe,
bv1:14.4	caṅkame ratanāmaye.
bv1:15.1	Tulāsaṅghāṭānuvaggā,
bv1:15.2	sovaṇṇaphalakatthatā;
bv1:15.3	Vedikā sabbasovaṇṇā,
bv1:15.4	dubhato passesu nimmitā.
bv1:16.1	Maṇimuttāvālikākiṇṇā,
bv1:16.2	nimmito ratanāmayo;
bv1:16.3	Obhāseti disā sabbā,
bv1:16.4	sataraṁsīva uggato.
bv1:17.1	Tasmiṁ caṅkamane dhīro,
bv1:17.2	dvattiṁsavaralakkhaṇo;
bv1:17.3	Virocamāno sambuddho,
bv1:17.4	caṅkame caṅkamī jino.
bv1:18.1	Dibbaṁ mandāravaṁ pupphaṁ,
bv1:18.2	padumaṁ pārichattakaṁ;
bv1:18.3	Caṅkamane okiranti,
bv1:18.4	sabbe devā samāgatā.
bv1:19.1	Passanti taṁ devasaṅghā,
bv1:19.2	dasasahassī pamoditā;
bv1:19.3	Namassamānā nipatanti,
bv1:19.4	tuṭṭhahaṭṭhā pamoditā.
bv1:20.1	Tāvatiṁsā ca yāmā ca,
bv1:20.2	tusitā cāpi devatā;
bv1:20.3	Nimmānaratino devā,
bv1:20.4	ye devā vasavattino;
bv1:20.5	Udaggacittā sumanā,
bv1:20.6	passanti lokanāyakaṁ.
bv1:21.1	Sadevagandhabbamanussarakkhasā,
bv1:21.2	Nāgā supaṇṇā atha vāpi kinnarā;
bv1:21.3	Passanti taṁ lokahitānukampakaṁ,
bv1:21.4	Nabheva accuggatacandamaṇḍalaṁ.
bv1:22.1	Ābhassarā subhakiṇhā,
bv1:22.2	Vehapphalā akaniṭṭhā ca devatā;
bv1:22.3	Susuddhasukkavatthavasanā,
bv1:22.4	Tiṭṭhanti pañjalīkatā.
bv1:23.1	Muñcanti pupphaṁ pana pañcavaṇṇikaṁ,
bv1:23.2	Mandāravaṁ candanacuṇṇamissitaṁ;
bv1:23.3	Bhamenti celāni ca ambare tadā,
bv1:23.4	“Aho jino lokahitānukampako.
bv1:24.1	Tuvaṁ satthā ca ketū ca,
bv1:24.2	dhajo yūpo ca pāṇinaṁ;
bv1:24.3	Parāyaṇo patiṭṭhā ca,
bv1:24.4	dīpo ca dvipaduttamo”.
bv1:25.1	Dasasahassīlokadhātuyā,
bv1:25.2	Devatāyo mahiddhikā;
bv1:25.3	Parivāretvā namassanti,
bv1:25.4	Tuṭṭhahaṭṭhā pamoditā.
bv1:26.1	Devatā devakaññā ca,
bv1:26.2	pasannā tuṭṭhamānasā;
bv1:26.3	Pañcavaṇṇikapupphehi,
bv1:26.4	pūjayanti narāsabhaṁ.
bv1:27.1	Passanti taṁ devasaṅghā,
bv1:27.2	pasannā tuṭṭhamānasā;
bv1:27.3	Pañcavaṇṇikapupphehi,
bv1:27.4	pūjayanti narāsabhaṁ.
bv1:28.1	“Aho acchariyaṁ loke,
bv1:28.2	abbhutaṁ lomahaṁsanaṁ;
bv1:28.3	Na medisaṁ bhūtapubbaṁ,
bv1:28.4	accheraṁ lomahaṁsanaṁ”.
bv1:29.1	Sakasakamhi bhavane,
bv1:29.2	nisīditvāna devatā;
bv1:29.3	Hasanti tā mahāhasitaṁ,
bv1:29.4	disvānaccherakaṁ nabhe.
bv1:30.1	Ākāsaṭṭhā ca bhūmaṭṭhā,
bv1:30.2	tiṇapanthanivāsino;
bv1:30.3	Katañjalī namassanti,
bv1:30.4	tuṭṭhahaṭṭhā pamoditā.
bv1:31.1	Yepi dīghāyukā nāgā,
bv1:31.2	puññavanto mahiddhikā;
bv1:31.3	Pamoditā namassanti,
bv1:31.4	pūjayanti naruttamaṁ.
bv1:32.1	Saṅgītiyo pavattenti,
bv1:32.2	ambare anilañjase;
bv1:32.3	Cammanaddhāni vādenti,
bv1:32.4	disvānaccherakaṁ nabhe.
bv1:33.1	Saṅkhā ca paṇavā ceva,
bv1:33.2	athopi ḍiṇḍimā bahū;
bv1:33.3	Antalikkhasmiṁ vajjanti,
bv1:33.4	disvānaccherakaṁ nabhe.
bv1:34.1	“Abbhuto vata no ajja,
bv1:34.2	uppajji lomahaṁsano;
bv1:34.3	Dhuvamatthasiddhiṁ labhāma,
bv1:34.4	khaṇo no paṭipādito”.
bv1:35.1	Buddhoti tesaṁ sutvāna,
bv1:35.2	pīti uppajji tāvade;
bv1:35.3	Buddho buddhoti kathayantā,
bv1:35.4	tiṭṭhanti pañjalīkatā.
bv1:36.1	Hiṅkārā sādhukārā ca,
bv1:36.2	ukkuṭṭhi sampahaṁsanaṁ;
bv1:36.3	Pajā ca vividhā gagane,
bv1:36.4	vattenti pañjalīkatā.
bv1:37.1	Gāyanti seḷenti ca vādayanti ca,
bv1:37.2	Bhujāni pothenti ca naccayanti ca;
bv1:37.3	Muñcanti pupphaṁ pana pañcavaṇṇikaṁ,
bv1:37.4	Mandāravaṁ candanacuṇṇamissitaṁ.
bv1:38.1	“Yathā tuyhaṁ mahāvīra,
bv1:38.2	pādesu cakkalakkhaṇaṁ;
bv1:38.3	Dhajavajirapaṭākā,
bv1:38.4	vaḍḍhamānaṅkusācitaṁ.
bv1:39.1	Rūpe sīle samādhimhi,
bv1:39.2	paññāya ca asādiso;
bv1:39.3	Vimuttiyā asamasamo,
bv1:39.4	dhammacakkappavattane.
bv1:40.1	Dasanāgabalaṁ kāye,
bv1:40.2	tuyhaṁ pākatikaṁ balaṁ;
bv1:40.3	Iddhibalena asamo,
bv1:40.4	dhammacakkappavattane.
bv1:41.1	Evaṁ sabbaguṇūpetaṁ,
bv1:41.2	sabbaṅgasamupāgataṁ;
bv1:41.3	Mahāmuniṁ kāruṇikaṁ,
bv1:41.4	lokanāthaṁ namassatha.
bv1:42.1	Abhivādanaṁ thomanañca,
bv1:42.2	vandanañca pasaṁsanaṁ;
bv1:42.3	Namassanañca pūjañca,
bv1:42.4	sabbaṁ arahasī tuvaṁ.
bv1:43.1	Ye keci loke vandaneyyā,
bv1:43.2	vandanaṁ arahanti ye;
bv1:43.3	Sabbaseṭṭho mahāvīra,
bv1:43.4	sadiso te na vijjati.
bv1:44.1	Sāriputto mahāpañño,
bv1:44.2	samādhijjhānakovido;
bv1:44.3	Gijjhakūṭe ṭhitoyeva,
bv1:44.4	passati lokanāyakaṁ.
bv1:45.1	Suphullaṁ sālarājaṁva,
bv1:45.2	candaṁva gagane yathā;
bv1:45.3	Majjhanhikeva sūriyaṁ,
bv1:45.4	olokesi narāsabhaṁ.
bv1:46.1	Jalantaṁ dīparukkhaṁva,
bv1:46.2	Taruṇasūriyaṁva uggataṁ;
bv1:46.3	Byāmappabhānurañjitaṁ,
bv1:46.4	Dhīraṁ passati lokanāyakaṁ.
bv1:47.1	Pañcannaṁ bhikkhusatānaṁ,
bv1:47.2	katakiccāna tādinaṁ;
bv1:47.3	Khīṇāsavānaṁ vimalānaṁ,
bv1:47.4	khaṇena sannipātayi.
bv1:48.1	Lokappasādanaṁ nāma,
bv1:48.2	pāṭihīraṁ nidassayi;
bv1:48.3	Amhepi tattha gantvāna,
bv1:48.4	vandissāma mayaṁ jinaṁ.
bv1:49.1	Etha sabbe gamissāma,
bv1:49.2	pucchissāma mayaṁ jinaṁ;
bv1:49.3	Kaṅkhaṁ vinodayissāma,
bv1:49.4	passitvā lokanāyakaṁ”.
bv1:50.1	Sādhūti te paṭissutvā,
bv1:50.2	nipakā saṁvutindriyā;
bv1:50.3	Pattacīvaramādāya,
bv1:50.4	taramānā upāgamuṁ.
bv1:51.1	Khīṇāsavehi vimalehi,
bv1:51.2	dantehi uttame dame;
bv1:51.3	Sāriputto mahāpañño,
bv1:51.4	iddhiyā upasaṅkami.
bv1:52.1	Tehi bhikkhūhi parivuto,
bv1:52.2	sāriputto mahāgaṇī;
bv1:52.3	Laḷanto devova gagane,
bv1:52.4	iddhiyā upasaṅkami.
bv1:53.1	Ukkāsitañca khipitaṁ,
bv1:53.2	ajjhupekkhiya subbatā;
bv1:53.3	Sagāravā sappatissā,
bv1:53.4	sambuddhaṁ upasaṅkamuṁ.
bv1:54.1	Upasaṅkamitvā passanti,
bv1:54.2	sayambhuṁ lokanāyakaṁ;
bv1:54.3	Nabhe accuggataṁ dhīraṁ,
bv1:54.4	candaṁva gagane yathā.
bv1:55.1	Jalantaṁ dīparukkhaṁva,
bv1:55.2	vijjuṁva gagane yathā;
bv1:55.3	Majjhanhikeva sūriyaṁ,
bv1:55.4	passanti lokanāyakaṁ.
bv1:56.1	Pañcabhikkhusatā sabbe,
bv1:56.2	passanti lokanāyakaṁ;
bv1:56.3	Rahadamiva vippasannaṁ,
bv1:56.4	suphullaṁ padumaṁ yathā.
bv1:57.1	Añjaliṁ paggahetvāna,
bv1:57.2	tuṭṭhahaṭṭhā pamoditā;
bv1:57.3	Namassamānā nipatanti,
bv1:57.4	satthuno cakkalakkhaṇe.
bv1:58.1	Sāriputto mahāpañño,
bv1:58.2	koraṇḍasamasādiso;
bv1:58.3	Samādhijjhānakusalo,
bv1:58.4	vandate lokanāyakaṁ.
bv1:59.1	Gajjitā kālameghova,
bv1:59.2	nīluppalasamasādiso;
bv1:59.3	Iddhibalena asamo,
bv1:59.4	moggallāno mahiddhiko.
bv1:60.1	Mahākassapopi ca thero,
bv1:60.2	uttattakanakasannibho;
bv1:60.3	Dhutaguṇe agganikkhitto,
bv1:60.4	thomito satthuvaṇṇito.
bv1:61.1	Dibbacakkhūnaṁ yo aggo,
bv1:61.2	anuruddho mahāgaṇī;
bv1:61.3	Ñātiseṭṭho bhagavato,
bv1:61.4	avidūreva tiṭṭhati.
bv1:62.1	Āpattianāpattiyā,
bv1:62.2	satekicchāya kovido;
bv1:62.3	Vinaye agganikkhitto,
bv1:62.4	upāli satthuvaṇṇito.
bv1:63.1	Sukhumanipuṇatthapaṭividdho,
bv1:63.2	Kathikānaṁ pavaro gaṇī;
bv1:63.3	Isi mantāniyā putto,
bv1:63.4	Puṇṇo nāmāti vissuto.
bv1:64.1	Etesaṁ cittamaññāya,
bv1:64.2	opammakusalo muni;
bv1:64.3	Kaṅkhacchedo mahāvīro,
bv1:64.4	kathesi attano guṇaṁ.
bv1:65.1	“Cattāro te asaṅkheyyā,
bv1:65.2	koṭi yesaṁ na nāyati;
bv1:65.3	Sattakāyo ca ākāso,
bv1:65.4	cakkavāḷā canantakā;
bv1:65.5	Buddhañāṇaṁ appameyyaṁ,
bv1:65.6	na sakkā ete vijānituṁ.
bv1:66.1	Kimetaṁ acchariyaṁ loke,
bv1:66.2	yaṁ me iddhivikubbanaṁ;
bv1:66.3	Aññe bahū acchariyā,
bv1:66.4	abbhutā lomahaṁsanā.
bv1:67.1	Yadāhaṁ tusite kāye,
bv1:67.2	santusito nāmahaṁ tadā;
bv1:67.3	Dasasahassī samāgamma,
bv1:67.4	yācanti pañjalī mamaṁ.
bv1:68.1	‘Kālo kho te mahāvīra,
bv1:68.2	uppajja mātukucchiyaṁ;
bv1:68.3	Sadevakaṁ tārayanto,
bv1:68.4	bujjhassu amataṁ padaṁ’.
bv1:69.1	Tusitā kāyā cavitvāna,
bv1:69.2	yadā okkami kucchiyaṁ;
bv1:69.3	Dasasahassīlokadhātu,
bv1:69.4	kampittha dharaṇī tadā.
bv1:70.1	Yadāhaṁ mātukucchito,
bv1:70.2	sampajānova nikkhamiṁ;
bv1:70.3	Sādhukāraṁ pavattenti,
bv1:70.4	dasasahassī pakampatha.
bv1:71.1	Okkantiṁ me samo natthi,
bv1:71.2	jātito abhinikkhame;
bv1:71.3	Sambodhiyaṁ ahaṁ seṭṭho,
bv1:71.4	dhammacakkappavattane.
bv1:72.1	Aho acchariyaṁ loke,
bv1:72.2	buddhānaṁ guṇamahantatā;
bv1:72.3	Dasasahassīlokadhātu,
bv1:72.4	chappakāraṁ pakampatha;
bv1:72.5	Obhāso ca mahā āsi,
bv1:72.6	accheraṁ lomahaṁsanaṁ”.
bv1:73.1	Bhagavā tamhi samaye,
bv1:73.2	lokajeṭṭho narāsabho;
bv1:73.3	Sadevakaṁ dassayanto,
bv1:73.4	iddhiyā caṅkamī jino.
bv1:74.1	Caṅkame caṅkamantova,
bv1:74.2	kathesi lokanāyako;
bv1:74.3	Antarā na nivatteti,
bv1:74.4	catuhatthe caṅkame yathā.
bv1:75.1	Sāriputto mahāpañño,
bv1:75.2	samādhijjhānakovido;
bv1:75.3	Paññāya pāramippatto,
bv1:75.4	pucchati lokanāyakaṁ.
bv1:76.1	“Kīdiso te mahāvīra,
bv1:76.2	abhinīhāro naruttama;
bv1:76.3	Kamhi kāle tayā dhīra,
bv1:76.4	patthitā bodhimuttamā.
bv1:77.1	Dānaṁ sīlañca nekkhammaṁ,
bv1:77.2	paññāvīriyañca kīdisaṁ;
bv1:77.3	Khantisaccamadhiṭṭhānaṁ,
bv1:77.4	mettupekkhā ca kīdisā.
bv1:78.1	Dasa pāramī tayā dhīra,
bv1:78.2	kīdisī lokanāyaka;
bv1:78.3	Kathaṁ upapāramī puṇṇā,
bv1:78.4	paramatthapāramī kathaṁ”.
bv1:79.1	Tassa puṭṭho viyākāsi,
bv1:79.2	karavīkamadhuragiro;
bv1:79.3	Nibbāpayanto hadayaṁ,
bv1:79.4	hāsayanto sadevakaṁ.
bv1:80.1	Atītabuddhānaṁ jinānaṁ desitaṁ,
bv1:80.2	Nikīlitaṁ buddhaparamparāgataṁ;
bv1:80.3	Pubbenivāsānugatāya buddhiyā,
bv1:80.4	Pakāsayī lokahitaṁ sadevake.
bv1:81.1	“Pītipāmojjajananaṁ,
bv1:81.2	sokasallavinodanaṁ;
bv1:81.3	Sabbasampattipaṭilābhaṁ,
bv1:81.4	cittīkatvā suṇātha me.
bv1:82.1	Madanimmadanaṁ sokanudaṁ,
bv1:82.2	Saṁsāraparimocanaṁ;
bv1:82.3	Sabbadukkhakkhayaṁ maggaṁ,
bv1:82.4	Sakkaccaṁ paṭipajjathā”ti.
bv1:83.1	Ratanacaṅkamanakaṇḍo niṭṭhito.
bv2:0.1	Buddhavaṁsa
bv2:0.2	2 Sumedhapatthanākathā
bv2:1.1	“Kappe ca satasahasse,
bv2:1.2	caturo ca asaṅkhiye;
bv2:1.3	Amaraṁ nāma nagaraṁ,
bv2:1.4	dassaneyyaṁ manoramaṁ.
bv2:2.1	Dasahi saddehi avivittaṁ,
bv2:2.2	Annapānasamāyutaṁ;
bv2:2.3	Hatthisaddaṁ assasaddaṁ,
bv2:2.4	Bherisaṅkharathāni ca;
bv2:2.5	Khādatha pivatha ceva,
bv2:2.6	Annapānena ghositaṁ.
bv2:3.1	Nagaraṁ sabbaṅgasampannaṁ,
bv2:3.2	sabbakammamupāgataṁ;
bv2:3.3	Sattaratanasampannaṁ,
bv2:3.4	nānājanasamākulaṁ;
bv2:3.5	Samiddhaṁ devanagaraṁva,
bv2:3.6	āvāsaṁ puññakamminaṁ.
bv2:4.1	Nagare amaravatiyā,
bv2:4.2	sumedho nāma brāhmaṇo;
bv2:4.3	Anekakoṭisannicayo,
bv2:4.4	pahūtadhanadhaññavā.
bv2:5.1	Ajjhāyako mantadharo,
bv2:5.2	tiṇṇaṁ vedāna pāragū;
bv2:5.3	Lakkhaṇe itihāse ca,
bv2:5.4	sadhamme pāramiṁ gato.
bv2:6.1	Rahogato nisīditvā,
bv2:6.2	evaṁ cintesahaṁ tadā;
bv2:6.3	‘Dukkho punabbhavo nāma,
bv2:6.4	sarīrassa ca bhedanaṁ.
bv2:7.1	Jātidhammo jarādhammo,
bv2:7.2	Byādhidhammo sahaṁ tadā;
bv2:7.3	Ajaraṁ amataṁ khemaṁ,
bv2:7.4	Pariyesissāmi nibbutiṁ.
bv2:8.1	Yaṁnūnimaṁ pūtikāyaṁ,
bv2:8.2	nānākuṇapapūritaṁ;
bv2:8.3	Chaḍḍayitvāna gaccheyyaṁ,
bv2:8.4	anapekkho anatthiko.
bv2:9.1	Atthi hehiti so maggo,
bv2:9.2	na so sakkā na hetuye;
bv2:9.3	Pariyesissāmi taṁ maggaṁ,
bv2:9.4	bhavato parimuttiyā.
bv2:10.1	Yathāpi dukkhe vijjante,
bv2:10.2	sukhaṁ nāmapi vijjati;
bv2:10.3	Evaṁ bhave vijjamāne,
bv2:10.4	vibhavopi icchitabbako.
bv2:11.1	Yathāpi uṇhe vijjante,
bv2:11.2	aparaṁ vijjati sītalaṁ;
bv2:11.3	Evaṁ tividhaggi vijjante,
bv2:11.4	nibbānaṁ icchitabbakaṁ.
bv2:12.1	Yathāpi pāpe vijjante,
bv2:12.2	kalyāṇamapi vijjati;
bv2:12.3	Evamevaṁ jāti vijjante,
bv2:12.4	ajātipicchitabbakaṁ.
bv2:13.1	Yathā gūthagato puriso,
bv2:13.2	taḷākaṁ disvāna pūritaṁ;
bv2:13.3	Na gavesati taṁ taḷākaṁ,
bv2:13.4	na doso taḷākassa so.
bv2:14.1	Evaṁ kilesamaladhovaṁ,
bv2:14.2	vijjante amatantaḷe;
bv2:14.3	Na gavesati taṁ taḷākaṁ,
bv2:14.4	na doso amatantaḷe.
bv2:15.1	Yathā arīhi pariruddho,
bv2:15.2	vijjante gamanampathe;
bv2:15.3	Na palāyati so puriso,
bv2:15.4	na doso añjasassa so.
bv2:16.1	Evaṁ kilesapariruddho,
bv2:16.2	vijjamāne sive pathe;
bv2:16.3	Na gavesati taṁ maggaṁ,
bv2:16.4	na doso sivamañjase.
bv2:17.1	Yathāpi byādhito puriso,
bv2:17.2	vijjamāne tikicchake;
bv2:17.3	Na tikicchāpeti taṁ byādhiṁ,
bv2:17.4	na doso so tikicchake.
bv2:18.1	Evaṁ kilesabyādhīhi,
bv2:18.2	Dukkhito paripīḷito;
bv2:18.3	Na gavesati taṁ ācariyaṁ,
bv2:18.4	Na doso so vināyake.
bv2:19.1	Yathāpi kuṇapaṁ puriso,
bv2:19.2	kaṇṭhe baddhaṁ jigucchiya;
bv2:19.3	Mocayitvāna gaccheyya,
bv2:19.4	sukhī serī sayaṁvasī.
bv2:20.1	Tathevimaṁ pūtikāyaṁ,
bv2:20.2	nānākuṇapasañcayaṁ;
bv2:20.3	Chaḍḍayitvāna gaccheyyaṁ,
bv2:20.4	anapekkho anatthiko.
bv2:21.1	Yathā uccāraṭṭhānamhi,
bv2:21.2	karīsaṁ naranāriyo;
bv2:21.3	Chaḍḍayitvāna gacchanti,
bv2:21.4	anapekkhā anatthikā.
bv2:22.1	Evamevāhaṁ imaṁ kāyaṁ,
bv2:22.2	nānākuṇapapūritaṁ;
bv2:22.3	Chaḍḍayitvāna gacchissaṁ,
bv2:22.4	vaccaṁ katvā yathā kuṭiṁ.
bv2:23.1	Yathāpi jajjaraṁ nāvaṁ,
bv2:23.2	paluggaṁ udagāhiniṁ;
bv2:23.3	Sāmī chaḍḍetvā gacchanti,
bv2:23.4	anapekkhā anatthikā.
bv2:24.1	Evamevāhaṁ imaṁ kāyaṁ,
bv2:24.2	navacchiddaṁ dhuvassavaṁ;
bv2:24.3	Chaḍḍayitvāna gacchissaṁ,
bv2:24.4	jiṇṇanāvaṁva sāmikā.
bv2:25.1	Yathāpi puriso corehi,
bv2:25.2	gacchanto bhaṇḍamādiya;
bv2:25.3	Bhaṇḍacchedabhayaṁ disvā,
bv2:25.4	chaḍḍayitvāna gacchati.
bv2:26.1	Evamevaṁ ayaṁ kāyo,
bv2:26.2	mahācorasamo viya;
bv2:26.3	Pahāyimaṁ gamissāmi,
bv2:26.4	kusalacchedanā bhayā’.
bv2:27.1	Evāhaṁ cintayitvāna,
bv2:27.2	nekakoṭisataṁ dhanaṁ;
bv2:27.3	Nāthānāthānaṁ datvāna,
bv2:27.4	himavantamupāgamiṁ.
bv2:28.1	Himavantassāvidūre,
bv2:28.2	dhammiko nāma pabbato;
bv2:28.3	Assamo sukato mayhaṁ,
bv2:28.4	paṇṇasālā sumāpitā.
bv2:29.1	Caṅkamaṁ tattha māpesiṁ,
bv2:29.2	pañcadosavivajjitaṁ;
bv2:29.3	Aṭṭhaguṇasamupetaṁ,
bv2:29.4	abhiññābalamāhariṁ.
bv2:30.1	Sāṭakaṁ pajahiṁ tattha,
bv2:30.2	navadosamupāgataṁ;
bv2:30.3	Vākacīraṁ nivāsesiṁ,
bv2:30.4	dvādasaguṇamupāgataṁ.
bv2:31.1	Aṭṭhadosasamākiṇṇaṁ,
bv2:31.2	pajahiṁ paṇṇasālakaṁ;
bv2:31.3	Upāgamiṁ rukkhamūlaṁ,
bv2:31.4	guṇe dasahupāgataṁ.
bv2:32.1	Vāpitaṁ ropitaṁ dhaññaṁ,
bv2:32.2	pajahiṁ niravasesato;
bv2:32.3	Anekaguṇasampannaṁ,
bv2:32.4	pavattaphalamādiyiṁ.
bv2:33.1	Tatthappadhānaṁ padahiṁ,
bv2:33.2	nisajjaṭṭhānacaṅkame;
bv2:33.3	Abbhantaramhi sattāhe,
bv2:33.4	abhiññābalapāpuṇiṁ.
bv2:34.1	Evaṁ me siddhippattassa,
bv2:34.2	vasībhūtassa sāsane;
bv2:34.3	Dīpaṅkaro nāma jino,
bv2:34.4	uppajji lokanāyako.
bv2:35.1	Uppajjante ca jāyante,
bv2:35.2	bujjhante dhammadesane;
bv2:35.3	Caturo nimitte nāddasaṁ,
bv2:35.4	jhānaratisamappito.
bv2:36.1	Paccantadesavisaye,
bv2:36.2	nimantetvā tathāgataṁ;
bv2:36.3	Tassa āgamanaṁ maggaṁ,
bv2:36.4	sodhenti tuṭṭhamānasā.
bv2:37.1	Ahaṁ tena samayena,
bv2:37.2	nikkhamitvā sakassamā;
bv2:37.3	Dhunanto vākacīrāni,
bv2:37.4	gacchāmi ambare tadā.
bv2:38.1	Vedajātaṁ janaṁ disvā,
bv2:38.2	tuṭṭhahaṭṭhaṁ pamoditaṁ;
bv2:38.3	Orohitvāna gaganā,
bv2:38.4	manusse pucchi tāvade.
bv2:39.1	‘Tuṭṭhahaṭṭho pamudito,
bv2:39.2	vedajāto mahājano;
bv2:39.3	Kassa sodhīyati maggo,
bv2:39.4	añjasaṁ vaṭumāyanaṁ’.
bv2:40.1	Te me puṭṭhā viyākaṁsu,
bv2:40.2	‘buddho loke anuttaro;
bv2:40.3	Dīpaṅkaro nāma jino,
bv2:40.4	uppajji lokanāyako;
bv2:40.5	Tassa sodhīyati maggo,
bv2:40.6	añjasaṁ vaṭumāyanaṁ’.
bv2:41.1	Buddhotivacanaṁ sutvāna,
bv2:41.2	pīti uppajji tāvade;
bv2:41.3	Buddho buddhoti kathayanto,
bv2:41.4	somanassaṁ pavedayiṁ.
bv2:42.1	Tattha ṭhatvā vicintesiṁ,
bv2:42.2	tuṭṭho saṁviggamānaso;
bv2:42.3	‘Idha bījāni ropissaṁ,
bv2:42.4	khaṇo ve mā upaccagā’.
bv2:43.1	‘Yadi buddhassa sodhetha,
bv2:43.2	ekokāsaṁ dadātha me;
bv2:43.3	Ahampi sodhayissāmi,
bv2:43.4	añjasaṁ vaṭumāyanaṁ’.
bv2:44.1	Adaṁsu te mamokāsaṁ,
bv2:44.2	sodhetuṁ añjasaṁ tadā;
bv2:44.3	Buddho buddhoti cintento,
bv2:44.4	maggaṁ sodhemahaṁ tadā.
bv2:45.1	Aniṭṭhite mamokāse,
bv2:45.2	dīpaṅkaro mahāmuni;
bv2:45.3	Catūhi satasahassehi,
bv2:45.4	chaḷabhiññehi tādihi;
bv2:45.5	Khīṇāsavehi vimalehi,
bv2:45.6	paṭipajji añjasaṁ jino.
bv2:46.1	Paccuggamanā vattanti,
bv2:46.2	vajjanti bheriyo bahū;
bv2:46.3	Āmoditā naramarū,
bv2:46.4	sādhukāraṁ pavattayuṁ.
bv2:47.1	Devā manusse passanti,
bv2:47.2	manussāpi ca devatā;
bv2:47.3	Ubhopi te pañjalikā,
bv2:47.4	anuyanti tathāgataṁ.
bv2:48.1	Devā dibbehi turiyehi,
bv2:48.2	manussā mānusehi ca;
bv2:48.3	Ubhopi te vajjayantā,
bv2:48.4	anuyanti tathāgataṁ.
bv2:49.1	Dibbaṁ mandāravaṁ pupphaṁ,
bv2:49.2	padumaṁ pārichattakaṁ;
bv2:49.3	Disodisaṁ okiranti,
bv2:49.4	ākāsanabhagatā marū.
bv2:50.1	Dibbaṁ candanacuṇṇañca,
bv2:50.2	varagandhañca kevalaṁ;
bv2:50.3	Disodisaṁ okiranti,
bv2:50.4	ākāsanabhagatā marū.
bv2:51.1	Campakaṁ saralaṁ nīpaṁ,
bv2:51.2	nāgapunnāgaketakaṁ;
bv2:51.3	Disodisaṁ ukkhipanti,
bv2:51.4	bhūmitalagatā narā.
bv2:52.1	Kese muñcitvāhaṁ tattha,
bv2:52.2	vākacīrañca cammakaṁ;
bv2:52.3	Kalale pattharitvāna,
bv2:52.4	avakujjo nipajjahaṁ.
bv2:53.1	‘Akkamitvāna maṁ buddho,
bv2:53.2	saha sissehi gacchatu;
bv2:53.3	Mā naṁ kalale akkamittha,
bv2:53.4	hitāya me bhavissati’.
bv2:54.1	Pathaviyaṁ nipannassa,
bv2:54.2	evaṁ me āsi cetaso;
bv2:54.3	‘Icchamāno ahaṁ ajja,
bv2:54.4	kilese jhāpaye mama.
bv2:55.1	Kiṁ me aññātavesena,
bv2:55.2	dhammaṁ sacchikatenidha;
bv2:55.3	Sabbaññutaṁ pāpuṇitvā,
bv2:55.4	buddho hessaṁ sadevake.
bv2:56.1	Kiṁ me ekena tiṇṇena,
bv2:56.2	purisena thāmadassinā;
bv2:56.3	Sabbaññutaṁ pāpuṇitvā,
bv2:56.4	santāressaṁ sadevakaṁ.
bv2:57.1	Iminā me adhikārena,
bv2:57.2	katena purisuttame;
bv2:57.3	Sabbaññutaṁ pāpuṇitvā,
bv2:57.4	tāremi janataṁ bahuṁ.
bv2:58.1	Saṁsārasotaṁ chinditvā,
bv2:58.2	viddhaṁsetvā tayo bhave;
bv2:58.3	Dhammanāvaṁ samāruyha,
bv2:58.4	santāressaṁ sadevakaṁ.
bv2:59.1	Manussattaṁ liṅgasampatti,
bv2:59.2	hetu satthāradassanaṁ;
bv2:59.3	Pabbajjā guṇasampatti,
bv2:59.4	adhikāro ca chandatā;
bv2:59.5	Aṭṭhadhammasamodhānā,
bv2:59.6	abhinīhāro samijjhati’.
bv2:60.1	Dīpaṅkaro lokavidū,
bv2:60.2	āhutīnaṁ paṭiggaho;
bv2:60.3	Ussīsake maṁ ṭhatvāna,
bv2:60.4	idaṁ vacanamabravi.
bv2:61.1	‘Passatha imaṁ tāpasaṁ,
bv2:61.2	jaṭilaṁ uggatāpanaṁ;
bv2:61.3	Aparimeyyito kappe,
bv2:61.4	buddho loke bhavissati.
bv2:62.1	Ahu kapilavhayā rammā,
bv2:62.2	nikkhamitvā tathāgato;
bv2:62.3	Padhānaṁ padahitvāna,
bv2:62.4	katvā dukkarakārikaṁ.
bv2:63.1	Ajapālarukkhamūlasmiṁ,
bv2:63.2	nisīditvā tathāgato;
bv2:63.3	Tattha pāyāsaṁ paggayha,
bv2:63.4	nerañjaramupehiti.
bv2:64.1	Nerañjarāya tīramhi,
bv2:64.2	pāyāsaṁ ada so jino;
bv2:64.3	Paṭiyattavaramaggena,
bv2:64.4	bodhimūlamupehiti.
bv2:65.1	Tato padakkhiṇaṁ katvā,
bv2:65.2	bodhimaṇḍaṁ anuttaro;
bv2:65.3	Assattharukkhamūlamhi,
bv2:65.4	bujjhissati mahāyaso.
bv2:66.1	Imassa janikā mātā,
bv2:66.2	māyā nāma bhavissati;
bv2:66.3	Pitā suddhodano nāma,
bv2:66.4	ayaṁ hessati gotamo.
bv2:67.1	Anāsavā vītarāgā,
bv2:67.2	santacittā samāhitā;
bv2:67.3	Kolito upatisso ca,
bv2:67.4	aggā hessanti sāvakā;
bv2:67.5	Ānando nāmupaṭṭhāko,
bv2:67.6	upaṭṭhissatimaṁ jinaṁ.
bv2:68.1	Khemā uppalavaṇṇā ca,
bv2:68.2	aggā hessanti sāvikā;
bv2:68.3	Anāsavā vītarāgā,
bv2:68.4	santacittā samāhitā;
bv2:68.5	Bodhi tassa bhagavato,
bv2:68.6	assatthoti pavuccati.
bv2:69.1	Citto ca hatthāḷavako,
bv2:69.2	aggā hessantupaṭṭhakā;
bv2:69.3	Uttarā nandamātā ca,
bv2:69.4	aggā hessantupaṭṭhikā’.
bv2:70.1	Idaṁ sutvāna vacanaṁ,
bv2:70.2	asamassa mahesino;
bv2:70.3	Āmoditā naramarū,
bv2:70.4	buddhabījaṁ kira ayaṁ.
bv2:71.1	Ukkuṭṭhisaddā vattanti,
bv2:71.2	apphoṭenti hasanti ca;
bv2:71.3	Katañjalī namassanti,
bv2:71.4	dasasahassī sadevakā.
bv2:72.1	‘Yadimassa lokanāthassa,
bv2:72.2	virajjhissāma sāsanaṁ;
bv2:72.3	Anāgatamhi addhāne,
bv2:72.4	hessāma sammukhā imaṁ.
bv2:73.1	Yathā manussā nadiṁ tarantā,
bv2:73.2	Paṭititthaṁ virajjhiya;
bv2:73.3	Heṭṭhātitthe gahetvāna,
bv2:73.4	Uttaranti mahānadiṁ.
bv2:74.1	Evamevaṁ mayaṁ sabbe,
bv2:74.2	yadi muñcāmimaṁ jinaṁ;
bv2:74.3	Anāgatamhi addhāne,
bv2:74.4	hessāma sammukhā imaṁ’.
bv2:75.1	Dīpaṅkaro lokavidū,
bv2:75.2	āhutīnaṁ paṭiggaho;
bv2:75.3	Mama kammaṁ pakittetvā,
bv2:75.4	dakkhiṇaṁ pādamuddhari.
bv2:76.1	Ye tatthāsuṁ jinaputtā,
bv2:76.2	Padakkhiṇamakaṁsu maṁ;
bv2:76.3	Devā manussā asurā ca,
bv2:76.4	Abhivādetvāna pakkamuṁ.
bv2:77.1	Dassanaṁ me atikkante,
bv2:77.2	sasaṅghe lokanāyake;
bv2:77.3	Sayanā vuṭṭhahitvāna,
bv2:77.4	pallaṅkaṁ ābhujiṁ tadā.
bv2:78.1	Sukhena sukhito homi,
bv2:78.2	pāmojjena pamodito;
bv2:78.3	Pītiyā ca abhissanno,
bv2:78.4	pallaṅkaṁ ābhujiṁ tadā.
bv2:79.1	Pallaṅkena nisīditvā,
bv2:79.2	evaṁ cintesahaṁ tadā;
bv2:79.3	‘Vasībhūto ahaṁ jhāne,
bv2:79.4	abhiññāsu pāramiṅgato.
bv2:80.1	Sahassiyamhi lokamhi,
bv2:80.2	isayo natthi me samā;
bv2:80.3	Asamo iddhidhammesu,
bv2:80.4	alabhiṁ īdisaṁ sukhaṁ’.
bv2:81.1	Pallaṅkābhujane mayhaṁ,
bv2:81.2	dasasahassādhivāsino;
bv2:81.3	Mahānādaṁ pavattesuṁ,
bv2:81.4	‘dhuvaṁ buddho bhavissasi.
bv2:82.1	Yā pubbe bodhisattānaṁ,
bv2:82.2	pallaṅkavaramābhuje;
bv2:82.3	Nimittāni padissanti,
bv2:82.4	tāni ajja padissare.
bv2:83.1	Sītaṁ byapagataṁ hoti,
bv2:83.2	uṇhañca upasammati;
bv2:83.3	Tāni ajja padissanti,
bv2:83.4	dhuvaṁ buddho bhavissasi.
bv2:84.1	Dasasahassī lokadhātū,
bv2:84.2	nissaddā honti nirākulā;
bv2:84.3	Tāni ajja padissanti,
bv2:84.4	dhuvaṁ buddho bhavissasi.
bv2:85.1	Mahāvātā na vāyanti,
bv2:85.2	na sandanti savantiyo;
bv2:85.3	Tāni ajja padissanti,
bv2:85.4	dhuvaṁ buddho bhavissasi.
bv2:86.1	Thalajā dakajā pupphā,
bv2:86.2	sabbe pupphanti tāvade;
bv2:86.3	Tepajja pupphitā sabbe,
bv2:86.4	dhuvaṁ buddho bhavissasi.
bv2:87.1	Latā vā yadi vā rukkhā,
bv2:87.2	phalabhārā honti tāvade;
bv2:87.3	Tepajja phalitā sabbe,
bv2:87.4	dhuvaṁ buddho bhavissasi.
bv2:88.1	Ākāsaṭṭhā ca bhūmaṭṭhā,
bv2:88.2	ratanā jotanti tāvade;
bv2:88.3	Tepajja ratanā jotanti,
bv2:88.4	dhuvaṁ buddho bhavissasi.
bv2:89.1	Mānussakā ca dibbā ca,
bv2:89.2	turiyā vajjanti tāvade;
bv2:89.3	Tepajjubho abhiravanti,
bv2:89.4	dhuvaṁ buddho bhavissasi.
bv2:90.1	Vicitrapupphā gaganā,
bv2:90.2	abhivassanti tāvade;
bv2:90.3	Tepi ajja pavassanti,
bv2:90.4	dhuvaṁ buddho bhavissasi.
bv2:91.1	Mahāsamuddo ābhujati,
bv2:91.2	dasasahassī pakampati;
bv2:91.3	Tepajjubho abhiravanti,
bv2:91.4	dhuvaṁ buddho bhavissasi.
bv2:92.1	Nirayepi dasasahasse,
bv2:92.2	aggī nibbanti tāvade;
bv2:92.3	Tepajja nibbutā aggī,
bv2:92.4	dhuvaṁ buddho bhavissasi.
bv2:93.1	Vimalo hoti sūriyo,
bv2:93.2	sabbā dissanti tārakā;
bv2:93.3	Tepi ajja padissanti,
bv2:93.4	dhuvaṁ buddho bhavissasi.
bv2:94.1	Anovaṭṭhena udakaṁ,
bv2:94.2	mahiyā ubbhijji tāvade;
bv2:94.3	Tampajjubbhijjate mahiyā,
bv2:94.4	dhuvaṁ buddho bhavissasi.
bv2:95.1	Tārāgaṇā virocanti,
bv2:95.2	nakkhattā gaganamaṇḍale;
bv2:95.3	Visākhā candimāyuttā,
bv2:95.4	dhuvaṁ buddho bhavissasi.
bv2:96.1	Bilāsayā darīsayā,
bv2:96.2	nikkhamanti sakāsayā;
bv2:96.3	Tepajja āsayā chuddhā,
bv2:96.4	dhuvaṁ buddho bhavissasi.
bv2:97.1	Na honti aratī sattānaṁ,
bv2:97.2	santuṭṭhā honti tāvade;
bv2:97.3	Tepajja sabbe santuṭṭhā,
bv2:97.4	dhuvaṁ buddho bhavissasi.
bv2:98.1	Rogā tadupasammanti,
bv2:98.2	jighacchā ca vinassati;
bv2:98.3	Tāni ajja padissanti,
bv2:98.4	dhuvaṁ buddho bhavissasi.
bv2:99.1	Rāgo tadā tanu hoti,
bv2:99.2	doso moho vinassati;
bv2:99.3	Tepajja vigatā sabbe,
bv2:99.4	dhuvaṁ buddho bhavissasi.
bv2:100.1	Bhayaṁ tadā na bhavati,
bv2:100.2	ajjapetaṁ padissati;
bv2:100.3	Tena liṅgena jānāma,
bv2:100.4	dhuvaṁ buddho bhavissasi.
bv2:101.1	Rajonuddhaṁsati uddhaṁ,
bv2:101.2	ajjapetaṁ padissati;
bv2:101.3	Tena liṅgena jānāma,
bv2:101.4	dhuvaṁ buddho bhavissasi.
bv2:102.1	Aniṭṭhagandho pakkamati,
bv2:102.2	dibbagandho pavāyati;
bv2:102.3	Sopajja vāyati gandho,
bv2:102.4	dhuvaṁ buddho bhavissasi.
bv2:103.1	Sabbe devā padissanti,
bv2:103.2	ṭhapayitvā arūpino;
bv2:103.3	Tepajja sabbe dissanti,
bv2:103.4	dhuvaṁ buddho bhavissasi.
bv2:104.1	Yāvatā nirayā nāma,
bv2:104.2	sabbe dissanti tāvade;
bv2:104.3	Tepajja sabbe dissanti,
bv2:104.4	dhuvaṁ buddho bhavissasi.
bv2:105.1	Kuṭṭā kavāṭā selā ca,
bv2:105.2	na hontāvaraṇā tadā;
bv2:105.3	Ākāsabhūtā tepajja,
bv2:105.4	dhuvaṁ buddho bhavissasi.
bv2:106.1	Cutī ca upapatti ca,
bv2:106.2	khaṇe tasmiṁ na vijjati;
bv2:106.3	Tānipajja padissanti,
bv2:106.4	dhuvaṁ buddho bhavissasi.
bv2:107.1	Daḷhaṁ paggaṇha vīriyaṁ,
bv2:107.2	mā nivatta abhikkama;
bv2:107.3	Mayampetaṁ vijānāma,
bv2:107.4	dhuvaṁ buddho bhavissasi’.
bv2:108.1	Buddhassa vacanaṁ sutvā,
bv2:108.2	dasasahassīna cūbhayaṁ;
bv2:108.3	Tuṭṭhahaṭṭho pamodito,
bv2:108.4	evaṁ cintesahaṁ tadā.
bv2:109.1	‘Advejjhavacanā buddhā,
bv2:109.2	Amoghavacanā jinā;
bv2:109.3	Vitathaṁ natthi buddhānaṁ,
bv2:109.4	Dhuvaṁ buddho bhavāmahaṁ.
bv2:110.1	Yathā khittaṁ nabhe leḍḍu,
bv2:110.2	Dhuvaṁ patati bhūmiyaṁ;
bv2:110.3	Tatheva buddhaseṭṭhānaṁ,
bv2:110.4	Vacanaṁ dhuvasassataṁ;
bv2:110.5	Vitathaṁ natthi buddhānaṁ,
bv2:110.6	Dhuvaṁ buddho bhavāmahaṁ.
bv2:111.1	Yathāpi sabbasattānaṁ,
bv2:111.2	Maraṇaṁ dhuvasassataṁ;
bv2:111.3	Tatheva buddhaseṭṭhānaṁ,
bv2:111.4	Vacanaṁ dhuvasassataṁ;
bv2:111.5	Vitathaṁ natthi buddhānaṁ,
bv2:111.6	Dhuvaṁ buddho bhavāmahaṁ.
bv2:112.1	Yathā rattikkhaye patte,
bv2:112.2	Sūriyuggamanaṁ dhuvaṁ;
bv2:112.3	Tatheva buddhaseṭṭhānaṁ,
bv2:112.4	Vacanaṁ dhuvasassataṁ;
bv2:112.5	Vitathaṁ natthi buddhānaṁ,
bv2:112.6	Dhuvaṁ buddho bhavāmahaṁ.
bv2:113.1	Yathā nikkhantasayanassa,
bv2:113.2	Sīhassa nadanaṁ dhuvaṁ;
bv2:113.3	Tatheva buddhaseṭṭhānaṁ,
bv2:113.4	Vacanaṁ dhuvasassataṁ;
bv2:113.5	Vitathaṁ natthi buddhānaṁ,
bv2:113.6	Dhuvaṁ buddho bhavāmahaṁ.
bv2:114.1	Yathā āpannasattānaṁ,
bv2:114.2	Bhāramoropanaṁ dhuvaṁ;
bv2:114.3	Tatheva buddhaseṭṭhānaṁ,
bv2:114.4	Vacanaṁ dhuvasassataṁ;
bv2:114.5	Vitathaṁ natthi buddhānaṁ,
bv2:114.6	Dhuvaṁ buddho bhavāmahaṁ.
bv2:115.1	Handa buddhakare dhamme,
bv2:115.2	vicināmi ito cito;
bv2:115.3	Uddhaṁ adho dasa disā,
bv2:115.4	yāvatā dhammadhātuyā’.
bv2:116.1	Vicinanto tadā dakkhiṁ,
bv2:116.2	paṭhamaṁ <b>dānapāramiṁ</b>;
bv2:116.3	Pubbakehi mahesīhi,
bv2:116.4	anuciṇṇaṁ mahāpathaṁ.
bv2:117.1	‘Imaṁ tvaṁ paṭhamaṁ tāva,
bv2:117.2	daḷhaṁ katvā samādiya;
bv2:117.3	Dānapāramitaṁ gaccha,
bv2:117.4	yadi bodhiṁ pattumicchasi.
bv2:118.1	Yathāpi kumbho sampuṇṇo,
bv2:118.2	yassa kassaci adhokato;
bv2:118.3	Vamatevudakaṁ nissesaṁ,
bv2:118.4	na tattha parirakkhati.
bv2:119.1	Tatheva yācake disvā,
bv2:119.2	hīnamukkaṭṭhamajjhime;
bv2:119.3	Dadāhi dānaṁ nissesaṁ,
bv2:119.4	kumbho viya adhokato.
bv2:120.1	Na hete ettakāyeva,
bv2:120.2	buddhadhammā bhavissare;
bv2:120.3	Aññepi vicinissāmi,
bv2:120.4	ye dhammā bodhipācanā’.
bv2:121.1	Vicinanto tadā dakkhiṁ,
bv2:121.2	dutiyaṁ <b>sīlapāramiṁ</b>;
bv2:121.3	Pubbakehi mahesīhi,
bv2:121.4	āsevitanisevitaṁ.
bv2:122.1	‘Imaṁ tvaṁ dutiyaṁ tāva,
bv2:122.2	daḷhaṁ katvā samādiya;
bv2:122.3	Sīlapāramitaṁ gaccha,
bv2:122.4	yadi bodhiṁ pattumicchasi.
bv2:123.1	Yathāpi camarī vālaṁ,
bv2:123.2	kismiñci paṭilaggitaṁ;
bv2:123.3	Upeti maraṇaṁ tattha,
bv2:123.4	na vikopeti vāladhiṁ.
bv2:124.1	Tatheva tvaṁ catūsu bhūmīsu,
bv2:124.2	Sīlāni paripūraya;
bv2:124.3	Parirakkha sabbadā sīlaṁ,
bv2:124.4	Camarī viya vāladhiṁ.
bv2:125.1	Na hete ettakāyeva,
bv2:125.2	buddhadhammā bhavissare;
bv2:125.3	Aññepi vicinissāmi,
bv2:125.4	ye dhammā bodhipācanā’.
bv2:126.1	Vicinanto tadā dakkhiṁ,
bv2:126.2	tatiyaṁ <b>nekkhammapāramiṁ</b>;
bv2:126.3	Pubbakehi mahesīhi,
bv2:126.4	āsevitanisevitaṁ.
bv2:127.1	‘Imaṁ tvaṁ tatiyaṁ tāva,
bv2:127.2	daḷhaṁ katvā samādiya;
bv2:127.3	Nekkhammapāramitaṁ gaccha,
bv2:127.4	yadi bodhiṁ pattumicchasi.
bv2:128.1	Yathā andughare puriso,
bv2:128.2	ciravuttho dukhaṭṭito;
bv2:128.3	Na tattha rāgaṁ janesi,
bv2:128.4	muttiṁyeva gavesati.
bv2:129.1	Tatheva tvaṁ sabbabhave,
bv2:129.2	passa andughare viya;
bv2:129.3	Nekkhammābhimukho hohi,
bv2:129.4	bhavato parimuttiyā.
bv2:130.1	Na hete ettakāyeva,
bv2:130.2	buddhadhammā bhavissare;
bv2:130.3	Aññepi vicinissāmi,
bv2:130.4	ye dhammā bodhipācanā’.
bv2:131.1	Vicinanto tadā dakkhiṁ,
bv2:131.2	catutthaṁ <b>paññāpāramiṁ</b>;
bv2:131.3	Pubbakehi mahesīhi,
bv2:131.4	āsevitanisevitaṁ.
bv2:132.1	‘Imaṁ tvaṁ catutthaṁ tāva,
bv2:132.2	daḷhaṁ katvā samādiya;
bv2:132.3	Paññāpāramitaṁ gaccha,
bv2:132.4	yadi bodhiṁ pattumicchasi.
bv2:133.1	Yathāpi bhikkhu bhikkhanto,
bv2:133.2	hīnamukkaṭṭhamajjhime;
bv2:133.3	Kulāni na vivajjento,
bv2:133.4	evaṁ labhati yāpanaṁ.
bv2:134.1	Tatheva tvaṁ sabbakālaṁ,
bv2:134.2	paripucchaṁ budhaṁ janaṁ;
bv2:134.3	Paññāpāramitaṁ gantvā,
bv2:134.4	sambodhiṁ pāpuṇissasi.
bv2:135.1	Na hete ettakāyeva,
bv2:135.2	buddhadhammā bhavissare;
bv2:135.3	Aññepi vicinissāmi,
bv2:135.4	ye dhammā bodhipācanā’.
bv2:136.1	Vicinanto tadā dakkhiṁ,
bv2:136.2	pañcamaṁ <b>vīriyapāramiṁ</b>;
bv2:136.3	Pubbakehi mahesīhi,
bv2:136.4	āsevitanisevitaṁ.
bv2:137.1	‘Imaṁ tvaṁ pañcamaṁ tāva,
bv2:137.2	daḷhaṁ katvā samādiya;
bv2:137.3	Vīriyapāramitaṁ gaccha,
bv2:137.4	yadi bodhiṁ pattumicchasi.
bv2:138.1	Yathāpi sīho migarājā,
bv2:138.2	nisajjaṭṭhānacaṅkame;
bv2:138.3	Alīnavīriyo hoti,
bv2:138.4	paggahitamano sadā.
bv2:139.1	Tatheva tvaṁ sabbabhave,
bv2:139.2	paggaṇha vīriyaṁ daḷhaṁ;
bv2:139.3	Vīriyapāramitaṁ gantvā,
bv2:139.4	sambodhiṁ pāpuṇissasi.
bv2:140.1	Na hete ettakāyeva,
bv2:140.2	buddhadhammā bhavissare;
bv2:140.3	Aññepi vicinissāmi,
bv2:140.4	ye dhammā bodhipācanā’.
bv2:141.1	Vicinanto tadā dakkhiṁ,
bv2:141.2	chaṭṭhamaṁ <b>khantipāramiṁ</b>;
bv2:141.3	Pubbakehi mahesīhi,
bv2:141.4	āsevitanisevitaṁ.
bv2:142.1	‘Imaṁ tvaṁ chaṭṭhamaṁ tāva,
bv2:142.2	daḷhaṁ katvā samādiya;
bv2:142.3	Tattha advejjhamānaso,
bv2:142.4	sambodhiṁ pāpuṇissasi.
bv2:143.1	Yathāpi pathavī nāma,
bv2:143.2	sucimpi asucimpi ca;
bv2:143.3	Sabbaṁ sahati nikkhepaṁ,
bv2:143.4	na karoti paṭighaṁ tayā.
bv2:144.1	Tatheva tvampi sabbesaṁ,
bv2:144.2	sammānāvamānakkhamo;
bv2:144.3	Khantipāramitaṁ gantvā,
bv2:144.4	sambodhiṁ pāpuṇissasi.
bv2:145.1	Na hete ettakāyeva,
bv2:145.2	buddhadhammā bhavissare;
bv2:145.3	Aññepi vicinissāmi,
bv2:145.4	ye dhammā bodhipācanā’.
bv2:146.1	Vicinanto tadā dakkhiṁ,
bv2:146.2	sattamaṁ <b>saccapāramiṁ</b>;
bv2:146.3	Pubbakehi mahesīhi,
bv2:146.4	āsevitanisevitaṁ.
bv2:147.1	‘Imaṁ tvaṁ sattamaṁ tāva,
bv2:147.2	daḷhaṁ katvā samādiya;
bv2:147.3	Tattha advejjhavacano,
bv2:147.4	sambodhiṁ pāpuṇissasi.
bv2:148.1	Yathāpi osadhī nāma,
bv2:148.2	tulābhūtā sadevake;
bv2:148.3	Samaye utuvasse vā,
bv2:148.4	na vokkamati vīthito.
bv2:149.1	Tatheva tvampi saccesu,
bv2:149.2	mā vokkama hi vīthito;
bv2:149.3	Saccapāramitaṁ gantvā,
bv2:149.4	sambodhiṁ pāpuṇissasi.
bv2:150.1	Na hete ettakāyeva,
bv2:150.2	buddhadhammā bhavissare;
bv2:150.3	Aññepi vicinissāmi,
bv2:150.4	ye dhammā bodhipācanā’.
bv2:151.1	Vicinanto tadā dakkhiṁ,
bv2:151.2	Aṭṭhamaṁ <b>adhiṭṭhānapāramiṁ</b>;
bv2:151.3	Pubbakehi mahesīhi,
bv2:151.4	Āsevitanisevitaṁ.
bv2:152.1	‘Imaṁ tvaṁ aṭṭhamaṁ tāva,
bv2:152.2	daḷhaṁ katvā samādiya;
bv2:152.3	Tattha tvaṁ acalo hutvā,
bv2:152.4	sambodhiṁ pāpuṇissasi.
bv2:153.1	Yathāpi pabbato selo,
bv2:153.2	acalo suppatiṭṭhito;
bv2:153.3	Na kampati bhusavātehi,
bv2:153.4	sakaṭṭhāneva tiṭṭhati.
bv2:154.1	Tatheva tvampi adhiṭṭhāne,
bv2:154.2	Sabbadā acalo bhava;
bv2:154.3	Adhiṭṭhānapāramitaṁ gantvā,
bv2:154.4	Sambodhiṁ pāpuṇissasi.
bv2:155.1	Na hete ettakāyeva,
bv2:155.2	buddhadhammā bhavissare;
bv2:155.3	Aññepi vicinissāmi,
bv2:155.4	ye dhammā bodhipācanā’.
bv2:156.1	Vicinanto tadā dakkhiṁ,
bv2:156.2	navamaṁ <b>mettāpāramiṁ</b>;
bv2:156.3	Pubbakehi mahesīhi,
bv2:156.4	āsevitanisevitaṁ.
bv2:157.1	‘Imaṁ tvaṁ navamaṁ tāva,
bv2:157.2	daḷhaṁ katvā samādiya;
bv2:157.3	Mettāya asamo hohi,
bv2:157.4	yadi bodhiṁ pattumicchasi.
bv2:158.1	Yathāpi udakaṁ nāma,
bv2:158.2	kalyāṇe pāpake jane;
bv2:158.3	Samaṁ pharati sītena,
bv2:158.4	pavāheti rajomalaṁ.
bv2:159.1	Tatheva tvaṁ hitāhite,
bv2:159.2	samaṁ mettāya bhāvaya;
bv2:159.3	Mettāpāramitaṁ gantvā,
bv2:159.4	sambodhiṁ pāpuṇissasi.
bv2:160.1	Na hete ettakāyeva,
bv2:160.2	buddhadhammā bhavissare;
bv2:160.3	Aññepi vicinissāmi,
bv2:160.4	ye dhammā bodhipācanā’.
bv2:161.1	Vicinanto tadā dakkhiṁ,
bv2:161.2	dasamaṁ <b>upekkhāpāramiṁ</b>;
bv2:161.3	Pubbakehi mahesīhi,
bv2:161.4	āsevitanisevitaṁ.
bv2:162.1	‘Imaṁ tvaṁ dasamaṁ tāva,
bv2:162.2	daḷhaṁ katvā samādiya;
bv2:162.3	Tulābhūto daḷho hutvā,
bv2:162.4	sambodhiṁ pāpuṇissasi.
bv2:163.1	Yathāpi pathavī nāma,
bv2:163.2	nikkhittaṁ asuciṁ suciṁ;
bv2:163.3	Upekkhati ubhopete,
bv2:163.4	kopānunayavajjitā.
bv2:164.1	Tatheva tvaṁ sukhadukkhe,
bv2:164.2	tulābhūto sadā bhava;
bv2:164.3	Upekkhāpāramitaṁ gantvā,
bv2:164.4	sambodhiṁ pāpuṇissasi.
bv2:165.1	Ettakāyeva te loke,
bv2:165.2	ye dhammā bodhipācanā;
bv2:165.3	Tatuddhaṁ natthi aññatra,
bv2:165.4	daḷhaṁ tattha patiṭṭhaha’.
bv2:166.1	Ime dhamme sammasato,
bv2:166.2	sabhāvasarasalakkhaṇe;
bv2:166.3	Dhammatejena vasudhā,
bv2:166.4	dasasahassī pakampatha.
bv2:167.1	Calatī ravatī pathavī,
bv2:167.2	ucchuyantaṁva pīḷitaṁ;
bv2:167.3	Telayante yathā cakkaṁ,
bv2:167.4	evaṁ kampati medanī.
bv2:168.1	Yāvatā parisā āsi,
bv2:168.2	buddhassa parivesane;
bv2:168.3	Pavedhamānā sā tattha,
bv2:168.4	mucchitā seti bhūmiyaṁ.
bv2:169.1	Ghaṭānekasahassāni,
bv2:169.2	kumbhīnañca satā bahū;
bv2:169.3	Sañcuṇṇamathitā tattha,
bv2:169.4	aññamaññaṁ paghaṭṭitā.
bv2:170.1	Ubbiggā tasitā bhītā,
bv2:170.2	bhantā byathitamānasā;
bv2:170.3	Mahājanā samāgamma,
bv2:170.4	dīpaṅkaramupāgamuṁ.
bv2:171.1	‘Kiṁ bhavissati lokassa,
bv2:171.2	kalyāṇamatha pāpakaṁ;
bv2:171.3	Sabbo upadduto loko,
bv2:171.4	taṁ vinodehi cakkhuma’.
bv2:172.1	Tesaṁ tadā saññapesi,
bv2:172.2	dīpaṅkaro mahāmuni;
bv2:172.3	‘Visaṭṭhā hotha mā bhetha,
bv2:172.4	imasmiṁ pathavikampane.
bv2:173.1	Yamahaṁ ajja byākāsiṁ,
bv2:173.2	buddho loke bhavissati;
bv2:173.3	Eso sammasati dhammaṁ,
bv2:173.4	pubbakaṁ jinasevitaṁ.
bv2:174.1	Tassa sammasato dhammaṁ,
bv2:174.2	buddhabhūmiṁ asesato;
bv2:174.3	Tenāyaṁ kampitā pathavī,
bv2:174.4	dasasahassī sadevake’.
bv2:175.1	Buddhassa vacanaṁ sutvā,
bv2:175.2	mano nibbāyi tāvade;
bv2:175.3	Sabbe maṁ upasaṅkamma,
bv2:175.4	punāpi abhivandisuṁ.
bv2:176.1	Samādiyitvā buddhaguṇaṁ,
bv2:176.2	daḷhaṁ katvāna mānasaṁ;
bv2:176.3	Dīpaṅkaraṁ namassitvā,
bv2:176.4	āsanā vuṭṭhahiṁ tadā.
bv2:177.1	Dibbaṁ mānusakaṁ pupphaṁ,
bv2:177.2	devā mānusakā ubho;
bv2:177.3	Samokiranti pupphehi,
bv2:177.4	vuṭṭhahantassa āsanā.
bv2:178.1	Vedayanti ca te sotthiṁ,
bv2:178.2	devā mānusakā ubho;
bv2:178.3	‘Mahantaṁ patthitaṁ tuyhaṁ,
bv2:178.4	taṁ labhassu yathicchitaṁ.
bv2:179.1	Sabbītiyo vivajjantu,
bv2:179.2	Soko rogo vinassatu;
bv2:179.3	Mā te bhavantvantarāyā,
bv2:179.4	Phusa khippaṁ bodhimuttamaṁ.
bv2:180.1	Yathāpi samaye patte,
bv2:180.2	pupphanti pupphino dumā;
bv2:180.3	Tatheva tvaṁ mahāvīra,
bv2:180.4	buddhañāṇena pupphasi.
bv2:181.1	Yathā ye keci sambuddhā,
bv2:181.2	pūrayuṁ dasa pāramī;
bv2:181.3	Tatheva tvaṁ mahāvīra,
bv2:181.4	pūraya dasa pāramī.
bv2:182.1	Yathā ye keci sambuddhā,
bv2:182.2	bodhimaṇḍamhi bujjhare;
bv2:182.3	Tatheva tvaṁ mahāvīra,
bv2:182.4	bujjhassu jinabodhiyaṁ.
bv2:183.1	Yathā ye keci sambuddhā,
bv2:183.2	dhammacakkaṁ pavattayuṁ;
bv2:183.3	Tatheva tvaṁ mahāvīra,
bv2:183.4	dhammacakkaṁ pavattaya.
bv2:184.1	Puṇṇamāye yathā cando,
bv2:184.2	parisuddho virocati;
bv2:184.3	Tatheva tvaṁ puṇṇamano,
bv2:184.4	viroca dasasahassiyaṁ.
bv2:185.1	Rāhumutto yathā sūriyo,
bv2:185.2	tāpena atirocati;
bv2:185.3	Tatheva lokā muñcitvā,
bv2:185.4	viroca siriyā tuvaṁ.
bv2:186.1	Yathā yā kāci nadiyo,
bv2:186.2	osaranti mahodadhiṁ;
bv2:186.3	Evaṁ sadevakā lokā,
bv2:186.4	osarantu tavantike’.
bv2:187.1	Tehi thutappasattho so,
bv2:187.2	Dasa dhamme samādiya;
bv2:187.3	Te dhamme paripūrento,
bv2:187.4	Pavanaṁ pāvisī tadā”ti.
bv2:188.1	Sumedhapatthanākathā niṭṭhitā.
bv3:0.1	Buddhavaṁsa
bv3:0.2	3. Dīpaṅkarabuddhavaṁsa
bv3:1.1	“Tadā te bhojayitvāna,
bv3:1.2	sasaṅghaṁ lokanāyakaṁ;
bv3:1.3	Upagacchuṁ saraṇaṁ tassa,
bv3:1.4	dīpaṅkarassa satthuno.
bv3:2.1	Saraṇāgamane kañci,
bv3:2.2	nivesesi tathāgato;
bv3:2.3	Kañci pañcasu sīlesu,
bv3:2.4	sīle dasavidhe paraṁ.
bv3:3.1	Kassaci deti sāmaññaṁ,
bv3:3.2	caturo phalamuttame;
bv3:3.3	Kassaci asame dhamme,
bv3:3.4	deti so paṭisambhidā.
bv3:4.1	Kassaci varasamāpattiyo,
bv3:4.2	Aṭṭha deti narāsabho;
bv3:4.3	Tisso kassaci vijjāyo,
bv3:4.4	Chaḷabhiññā pavecchati.
bv3:5.1	Tena yogena janakāyaṁ,
bv3:5.2	ovadati mahāmuni;
bv3:5.3	Tena vitthārikaṁ āsi,
bv3:5.4	lokanāthassa sāsanaṁ.
bv3:6.1	Mahāhanusabhakkhandho,
bv3:6.2	dīpaṅkarassa nāmako;
bv3:6.3	Bahū jane tārayati,
bv3:6.4	parimoceti duggatiṁ.
bv3:7.1	Bodhaneyyaṁ janaṁ disvā,
bv3:7.2	satasahassepi yojane;
bv3:7.3	Khaṇena upagantvāna,
bv3:7.4	bodheti taṁ mahāmuni.
bv3:8.1	Paṭhamābhisamaye buddho,
bv3:8.2	koṭisatamabodhayi;
bv3:8.3	Dutiyābhisamaye nātho,
bv3:8.4	navutikoṭimabodhayi.
bv3:9.1	Yadā ca devabhavanamhi,
bv3:9.2	buddho dhammamadesayi;
bv3:9.3	Navutikoṭisahassānaṁ,
bv3:9.4	tatiyābhisamayo ahu.
bv3:10.1	Sannipātā tayo āsuṁ,
bv3:10.2	dīpaṅkarassa satthuno;
bv3:10.3	Koṭisatasahassānaṁ,
bv3:10.4	paṭhamo āsi samāgamo.
bv3:11.1	Puna nāradakūṭamhi,
bv3:11.2	pavivekagate jine;
bv3:11.3	Khīṇāsavā vītamalā,
bv3:11.4	samiṁsu satakoṭiyo.
bv3:12.1	Yamhi kāle mahāvīro,
bv3:12.2	sudassanasiluccaye;
bv3:12.3	Navakoṭisahassehi,
bv3:12.4	pavāresi mahāmuni.
bv3:13.1	Dasavīsasahassānaṁ,
bv3:13.2	dhammābhisamayo ahu;
bv3:13.3	Ekadvinnaṁ abhisamayā,
bv3:13.4	gaṇanāto asaṅkhiyā.
bv3:14.1	Vitthārikaṁ bāhujaññaṁ,
bv3:14.2	iddhaṁ phītaṁ ahū tadā;
bv3:14.3	Dīpaṅkarassa bhagavato,
bv3:14.4	sāsanaṁ suvisodhitaṁ.
bv3:15.1	Cattāri satasahassāni,
bv3:15.2	chaḷabhiññā mahiddhikā;
bv3:15.3	Dīpaṅkaraṁ lokaviduṁ,
bv3:15.4	parivārenti sabbadā.
bv3:16.1	Ye keci tena samayena,
bv3:16.2	jahanti mānusaṁ bhavaṁ;
bv3:16.3	Apattamānasā sekhā,
bv3:16.4	garahitā bhavanti te.
bv3:17.1	Supupphitaṁ pāvacanaṁ,
bv3:17.2	arahantehi tādihi;
bv3:17.3	Khīṇāsavehi vimalehi,
bv3:17.4	upasobhati sabbadā.
bv3:18.1	Nagaraṁ rammavatī nāma,
bv3:18.2	sudevo nāma khattiyo;
bv3:18.3	Sumedhā nāma janikā,
bv3:18.4	dīpaṅkarassa satthuno.
bv3:19.1	Dasavassasahassāni,
bv3:19.2	agāraṁ ajjha so vasi;
bv3:19.3	Haṁsā koñcā mayūrā ca,
bv3:19.4	tayo pāsādamuttamā.
bv3:20.1	Tīṇi satasahassāni,
bv3:20.2	nāriyo samalaṅkatā;
bv3:20.3	Padumā nāma sā nārī,
bv3:20.4	usabhakkhandho atrajo.
bv3:21.1	Nimitte caturo disvā,
bv3:21.2	hatthiyānena nikkhami;
bv3:21.3	Anūnadasamāsāni,
bv3:21.4	padhāne padahī jino.
bv3:22.1	Padhānacāraṁ caritvāna,
bv3:22.2	abujjhi mānasaṁ muni;
bv3:22.3	Brahmunā yācito santo,
bv3:22.4	dīpaṅkaro mahāmuni.
bv3:23.1	Vatti cakkaṁ mahāvīro,
bv3:23.2	nandārāme sirīghare;
bv3:23.3	Nisinno sirīsamūlamhi,
bv3:23.4	akā titthiyamaddanaṁ.
bv3:24.1	Sumaṅgalo ca tisso ca,
bv3:24.2	ahesuṁ aggasāvakā;
bv3:24.3	Sāgato nāmupaṭṭhāko,
bv3:24.4	dīpaṅkarassa satthuno.
bv3:25.1	Nandā ceva sunandā ca,
bv3:25.2	ahesuṁ aggasāvikā;
bv3:25.3	Bodhi tassa bhagavato,
bv3:25.4	pipphalīti pavuccati.
bv3:26.1	Tapussabhallikā nāma,
bv3:26.2	ahesuṁ aggupaṭṭhakā;
bv3:26.3	Sirimā koṇā upaṭṭhikā,
bv3:26.4	dīpaṅkarassa satthuno.
bv3:27.1	Asītihatthamubbedho,
bv3:27.2	dīpaṅkaro mahāmuni;
bv3:27.3	Sobhati dīparukkhova,
bv3:27.4	sālarājāva phullito.
bv3:28.1	Satasahassavassāni,
bv3:28.2	āyu tassa mahesino;
bv3:28.3	Tāvatā tiṭṭhamāno so,
bv3:28.4	tāresi janataṁ bahuṁ.
bv3:29.1	Jotayitvāna saddhammaṁ,
bv3:29.2	santāretvā mahājanaṁ;
bv3:29.3	Jalitvā aggikkhandhova,
bv3:29.4	nibbuto so sasāvako.
bv3:30.1	Sā ca iddhi so ca yaso,
bv3:30.2	Tāni ca pādesu cakkaratanāni;
bv3:30.3	Sabbaṁ tamantarahitaṁ,
bv3:30.4	Nanu rittā sabbasaṅkhārā.
bv3:31.1	Dīpaṅkaro jino satthā,
bv3:31.2	Nandārāmamhi nibbuto;
bv3:31.3	Tatthevassa jinathūpo,
bv3:31.4	Chattiṁsubbedhayojano”ti.
bv3:32.1	Dīpaṅkarassa bhagavato vaṁso paṭhamo.
bv4:0.1	Buddhavaṁsa
bv4:0.2	4. Koṇḍaññabuddhavaṁsa
bv4:1.1	“Dīpaṅkarassa aparena,
bv4:1.2	Koṇḍañño nāma nāyako;
bv4:1.3	Anantatejo amitayaso,
bv4:1.4	Appameyyo durāsado.
bv4:2.1	Dharaṇūpamo khamanena,
bv4:2.2	sīlena sāgarūpamo;
bv4:2.3	Samādhinā merūpamo,
bv4:2.4	ñāṇena gaganūpamo.
bv4:3.1	Indriyabalabojjhaṅga-
bv4:3.2	maggasaccappakāsanaṁ;
bv4:3.3	Pakāsesi sadā buddho,
bv4:3.4	hitāya sabbapāṇinaṁ.
bv4:4.1	Dhammacakkaṁ pavattente,
bv4:4.2	koṇḍaññe lokanāyake;
bv4:4.3	Koṭisatasahassānaṁ,
bv4:4.4	paṭhamābhisamayo ahu.
bv4:5.1	Tato parampi desente,
bv4:5.2	naramarūnaṁ samāgame;
bv4:5.3	Navutikoṭisahassānaṁ,
bv4:5.4	dutiyābhisamayo ahu.
bv4:6.1	Titthiye abhimaddanto,
bv4:6.2	yadā dhammamadesayi;
bv4:6.3	Asītikoṭisahassānaṁ,
bv4:6.4	tatiyābhisamayo ahu.
bv4:7.1	Sannipātā tayo āsuṁ,
bv4:7.2	koṇḍaññassa mahesino;
bv4:7.3	Khīṇāsavānaṁ vimalānaṁ,
bv4:7.4	santacittāna tādinaṁ.
bv4:8.1	Koṭisatasahassānaṁ,
bv4:8.2	paṭhamo āsi samāgamo;
bv4:8.3	Dutiyo koṭisahassānaṁ,
bv4:8.4	tatiyo navutikoṭinaṁ.
bv4:9.1	Ahaṁ tena samayena,
bv4:9.2	vijitāvī nāma khattiyo;
bv4:9.3	Samuddaṁ antamantena,
bv4:9.4	issariyaṁ vattayāmahaṁ.
bv4:10.1	Koṭisatasahassānaṁ,
bv4:10.2	vimalānaṁ mahesinaṁ;
bv4:10.3	Saha lokagganāthena,
bv4:10.4	paramannena tappayiṁ.
bv4:11.1	Sopi maṁ buddho byākāsi,
bv4:11.2	koṇḍañño lokanāyako;
bv4:11.3	‘Aparimeyyito kappe,
bv4:11.4	buddho loke bhavissati.
bv4:12.1	Padhānaṁ padahitvāna,
bv4:12.2	katvā dukkarakārikaṁ;
bv4:12.3	Assatthamūle sambuddho,
bv4:12.4	bujjhissati mahāyaso.
bv4:13.1	Imassa janikā mātā,
bv4:13.2	māyā nāma bhavissati;
bv4:13.3	Pitā suddhodano nāma,
bv4:13.4	ayaṁ hessati gotamo.
bv4:14.1	Kolito upatisso ca,
bv4:14.2	aggā hessanti sāvakā;
bv4:14.3	Ānando nāmupaṭṭhāko,
bv4:14.4	upaṭṭhissatimaṁ jinaṁ.
bv4:15.1	Khemā uppalavaṇṇā ca,
bv4:15.2	aggā hessanti sāvikā;
bv4:15.3	Bodhi tassa bhagavato,
bv4:15.4	assatthoti pavuccati.
bv4:16.1	Citto ca hatthāḷavako,
bv4:16.2	aggā hessantupaṭṭhakā;
bv4:16.3	Nandamātā ca uttarā,
bv4:16.4	aggā hessantupaṭṭhikā;
bv4:16.5	Āyu vassasataṁ tassa,
bv4:16.6	gotamassa yasassino’.
bv4:17.1	Idaṁ sutvāna vacanaṁ,
bv4:17.2	asamassa mahesino;
bv4:17.3	Āmoditā naramarū,
bv4:17.4	‘buddhabījaṁ kira ayaṁ’.
bv4:18.1	Ukkuṭṭhisaddā vattanti,
bv4:18.2	apphoṭenti hasanti ca;
bv4:18.3	Katañjalī namassanti,
bv4:18.4	dasasahassidevatā.
bv4:19.1	‘Yadimassa lokanāthassa,
bv4:19.2	virajjhissāma sāsanaṁ;
bv4:19.3	Anāgatamhi addhāne,
bv4:19.4	hessāma sammukhā imaṁ.
bv4:20.1	Yathā manussā nadiṁ tarantā,
bv4:20.2	Paṭititthaṁ virajjhiya;
bv4:20.3	Heṭṭhātitthe gahetvāna,
bv4:20.4	Uttaranti mahānadiṁ.
bv4:21.1	Evamevaṁ mayaṁ sabbe,
bv4:21.2	yadi muñcāmimaṁ jinaṁ;
bv4:21.3	Anāgatamhi addhāne,
bv4:21.4	hessāma sammukhā imaṁ’.
bv4:22.1	Tassāhaṁ vacanaṁ sutvā,
bv4:22.2	bhiyyo cittaṁ pasādayiṁ;
bv4:22.3	Tameva atthaṁ sādhento,
bv4:22.4	mahārajjaṁ jine adaṁ;
bv4:22.5	Mahārajjaṁ daditvāna,
bv4:22.6	pabbajiṁ tassa santike.
bv4:23.1	Suttantaṁ vinayañcāpi,
bv4:23.2	navaṅgaṁ satthusāsanaṁ;
bv4:23.3	Sabbaṁ pariyāpuṇitvāna,
bv4:23.4	sobhayiṁ jinasāsanaṁ.
bv4:24.1	Tatthappamatto viharanto,
bv4:24.2	nisajjaṭṭhānacaṅkame;
bv4:24.3	Abhiññāpāramiṁ gantvā,
bv4:24.4	brahmalokamagañchahaṁ.
bv4:25.1	Nagaraṁ rammavatī nāma,
bv4:25.2	sunando nāma khattiyo;
bv4:25.3	Sujātā nāma janikā,
bv4:25.4	koṇḍaññassa mahesino.
bv4:26.1	Dasavassasahassāni,
bv4:26.2	agāraṁ ajjha so vasi;
bv4:26.3	Suci suruci subho ca,
bv4:26.4	tayo pāsādamuttamā.
bv4:27.1	Tīṇi satasahassāni,
bv4:27.2	nāriyo samalaṅkatā;
bv4:27.3	Rucidevī nāma nārī,
bv4:27.4	vijitaseno atrajo.
bv4:28.1	Nimitte caturo disvā,
bv4:28.2	rathayānena nikkhami;
bv4:28.3	Anūnadasamāsāni,
bv4:28.4	padhānaṁ padahī jino.
bv4:29.1	Brahmunā yācito santo,
bv4:29.2	koṇḍañño dvipaduttamo;
bv4:29.3	Vatti cakkaṁ mahāvīro,
bv4:29.4	devānaṁ nagaruttame.
bv4:30.1	Bhaddo ceva subhaddo ca,
bv4:30.2	ahesuṁ aggasāvakā;
bv4:30.3	Anuruddho nāmupaṭṭhāko,
bv4:30.4	koṇḍaññassa mahesino.
bv4:31.1	Tissā ca upatissā ca,
bv4:31.2	ahesuṁ aggasāvikā;
bv4:31.3	Sālakalyāṇiko bodhi,
bv4:31.4	koṇḍaññassa mahesino.
bv4:32.1	Soṇo ca upasoṇo ca,
bv4:32.2	ahesuṁ aggupaṭṭhakā;
bv4:32.3	Nandā ceva sirīmā ca,
bv4:32.4	ahesuṁ aggupaṭṭhikā.
bv4:33.1	So aṭṭhāsīti hatthāni,
bv4:33.2	accuggato mahāmuni;
bv4:33.3	Sobhate uḷurājāva,
bv4:33.4	sūriyo majjhanhike yathā.
bv4:34.1	Vassasatasahassāni,
bv4:34.2	āyu vijjati tāvade;
bv4:34.3	Tāvatā tiṭṭhamāno so,
bv4:34.4	tāresi janataṁ bahuṁ.
bv4:35.1	Khīṇāsavehi vimalehi,
bv4:35.2	vicittā āsi medanī;
bv4:35.3	Yathā gaganamuḷūhi,
bv4:35.4	evaṁ so upasobhatha.
bv4:36.1	Tepi nāgā appameyyā,
bv4:36.2	asaṅkhobbhā durāsadā;
bv4:36.3	Vijjupātaṁva dassetvā,
bv4:36.4	nibbutā te mahāyasā.
bv4:37.1	Sā ca atuliyā jinassa iddhi,
bv4:37.2	Ñāṇaparibhāvito ca samādhi;
bv4:37.3	Sabbaṁ tamantarahitaṁ,
bv4:37.4	Nanu rittā sabbasaṅkhārā.
bv4:38.1	Koṇḍañño pavaro buddho,
bv4:38.2	Candārāmamhi nibbuto;
bv4:38.3	Tattheva cetiyo citto,
bv4:38.4	Satta yojanamussito”ti.
bv4:39.1	Koṇḍaññassa bhagavato vaṁso dutiyo.
bv5:0.1	Buddhavaṁsa
bv5:0.2	5. Maṅgalabuddhavaṁsa
bv5:1.1	“Koṇḍaññassa aparena,
bv5:1.2	maṅgalo nāma nāyako;
bv5:1.3	Tamaṁ loke nihantvāna,
bv5:1.4	dhammokkamabhidhārayi.
bv5:2.1	Atulāsi pabhā tassa,
bv5:2.2	jinehaññehi uttariṁ;
bv5:2.3	Candasūriyapabhaṁ hantvā,
bv5:2.4	dasasahassī virocati.
bv5:3.1	Sopi buddho pakāsesi,
bv5:3.2	caturo saccavaruttame;
bv5:3.3	Te te saccarasaṁ pītvā,
bv5:3.4	vinodenti mahātamaṁ.
bv5:4.1	Patvāna bodhimatulaṁ,
bv5:4.2	paṭhame dhammadesane;
bv5:4.3	Koṭisatasahassānaṁ,
bv5:4.4	dhammābhisamayo ahu.
bv5:5.1	Surindadevabhavane,
bv5:5.2	buddho dhammamadesayi;
bv5:5.3	Tadā koṭisahassānaṁ,
bv5:5.4	dutiyo samayo ahu.
bv5:6.1	Yadā sunando cakkavattī,
bv5:6.2	sambuddhaṁ upasaṅkami;
bv5:6.3	Tadā āhani sambuddho,
bv5:6.4	dhammabheriṁ varuttamaṁ.
bv5:7.1	Sunandassānucarā janatā,
bv5:7.2	Tadāsuṁ navutikoṭiyo;
bv5:7.3	Sabbepi te niravasesā,
bv5:7.4	Ahesuṁ ehi bhikkhukā.
bv5:8.1	Sannipātā tayo āsuṁ,
bv5:8.2	maṅgalassa mahesino;
bv5:8.3	Koṭisatasahassānaṁ,
bv5:8.4	paṭhamo āsi samāgamo.
bv5:9.1	Dutiyo koṭisatasahassānaṁ,
bv5:9.2	Tatiyo navutikoṭinaṁ;
bv5:9.3	Khīṇāsavānaṁ vimalānaṁ,
bv5:9.4	Tadā āsi samāgamo.
bv5:10.1	Ahaṁ tena samayena,
bv5:10.2	surucī nāma brāhmaṇo;
bv5:10.3	Ajjhāyako mantadharo,
bv5:10.4	tiṇṇaṁ vedāna pāragū.
bv5:11.1	Tamahaṁ upasaṅkamma,
bv5:11.2	Saraṇaṁ gantvāna satthuno;
bv5:11.3	Sambuddhappamukhaṁ saṅghaṁ,
bv5:11.4	Gandhamālena pūjayiṁ;
bv5:11.5	Pūjetvā gandhamālena,
bv5:11.6	Gavapānena tappayiṁ.
bv5:12.1	Sopi maṁ buddho byākāsi,
bv5:12.2	maṅgalo dvipaduttamo;
bv5:12.3	‘Aparimeyyito kappe,
bv5:12.4	ayaṁ buddho bhavissati.
bv5:13.1	Padhānaṁ padahitvāna,
bv5:13.2	…pe…
bv5:13.3	hessāma sammukhā imaṁ’.
bv5:14.1	Tassāpi vacanaṁ sutvā,
bv5:14.2	bhiyyo cittaṁ pasādayiṁ;
bv5:14.3	Uttariṁ vatamadhiṭṭhāsiṁ,
bv5:14.4	dasapāramipūriyā.
bv5:15.1	Tadā pītimanubrūhanto,
bv5:15.2	sambodhivarapattiyā;
bv5:15.3	Buddhe datvāna maṁ gehaṁ,
bv5:15.4	pabbajiṁ tassa santike.
bv5:16.1	Suttantaṁ vinayañcāpi,
bv5:16.2	navaṅgaṁ satthusāsanaṁ;
bv5:16.3	Sabbaṁ pariyāpuṇitvā,
bv5:16.4	sobhayiṁ jinasāsanaṁ.
bv5:17.1	Tatthappamatto viharanto,
bv5:17.2	brahmaṁ bhāvetva bhāvanaṁ;
bv5:17.3	Abhiññāpāramiṁ gantvā,
bv5:17.4	brahmalokamagacchahaṁ.
bv5:18.1	Uttaraṁ nāma nagaraṁ,
bv5:18.2	uttaro nāma khattiyo;
bv5:18.3	Uttarā nāma janikā,
bv5:18.4	maṅgalassa mahesino.
bv5:19.1	Navavassasahassāni,
bv5:19.2	agāraṁ ajjha so vasi;
bv5:19.3	Yasavā sucimā sirīmā,
bv5:19.4	tayo pāsādamuttamā.
bv5:20.1	Samatiṁsasahassāni,
bv5:20.2	nāriyo samalaṅkatā;
bv5:20.3	Yasavatī nāma nārī,
bv5:20.4	sīvalo nāma atrajo.
bv5:21.1	Nimitte caturo disvā,
bv5:21.2	assayānena nikkhami;
bv5:21.3	Anūnaaṭṭhamāsāni,
bv5:21.4	padhānaṁ padahī jino.
bv5:22.1	Brahmunā yācito santo,
bv5:22.2	maṅgalo nāma nāyako;
bv5:22.3	Vatti cakkaṁ mahāvīro,
bv5:22.4	vane sirīvaruttame.
bv5:23.1	Sudevo dhammaseno ca,
bv5:23.2	ahesuṁ aggasāvakā;
bv5:23.3	Pālito nāmupaṭṭhāko,
bv5:23.4	maṅgalassa mahesino.
bv5:24.1	Sīvalā ca asokā ca,
bv5:24.2	ahesuṁ aggasāvikā;
bv5:24.3	Bodhi tassa bhagavato,
bv5:24.4	nāgarukkhoti vuccati.
bv5:25.1	Nando ceva visākho ca,
bv5:25.2	ahesuṁ aggupaṭṭhakā;
bv5:25.3	Anulā ceva sutanā ca,
bv5:25.4	ahesuṁ aggupaṭṭhikā.
bv5:26.1	Aṭṭhāsīti ratanāni,
bv5:26.2	accuggato mahāmuni;
bv5:26.3	Tato niddhāvatī raṁsī,
bv5:26.4	anekasatasahassiyo.
bv5:27.1	Navutivassasahassāni,
bv5:27.2	āyu vijjati tāvade;
bv5:27.3	Tāvatā tiṭṭhamāno so,
bv5:27.4	tāresi janataṁ bahuṁ.
bv5:28.1	Yathāpi sāgare ūmī,
bv5:28.2	na sakkā tā gaṇetuye;
bv5:28.3	Tatheva sāvakā tassa,
bv5:28.4	na sakkā te gaṇetuye.
bv5:29.1	Yāva aṭṭhāsi sambuddho,
bv5:29.2	maṅgalo lokanāyako;
bv5:29.3	Na tassa sāsane atthi,
bv5:29.4	sakilesamaraṇaṁ tadā.
bv5:30.1	Dhammokkaṁ dhārayitvāna,
bv5:30.2	santāretvā mahājanaṁ;
bv5:30.3	Jalitvā dhūmaketūva,
bv5:30.4	nibbuto so mahāyaso.
bv5:31.1	Saṅkhārānaṁ sabhāvatthaṁ,
bv5:31.2	dassayitvā sadevake;
bv5:31.3	Jalitvā aggikkhandhova,
bv5:31.4	sūriyo atthaṅgato yathā.
bv5:32.1	Uyyāne vassare nāma,
bv5:32.2	Buddho nibbāyi maṅgalo;
bv5:32.3	Tatthevassa jinathūpo,
bv5:32.4	Tiṁsayojanamuggato”ti.
bv5:33.1	Maṅgalassa bhagavato vaṁso tatiyo.
bv6:0.1	Buddhavaṁsa
bv6:0.2	6. Sumanabuddhavaṁsa
bv6:1.1	“Maṅgalassa aparena,
bv6:1.2	sumano nāma nāyako;
bv6:1.3	Sabbadhammehi asamo,
bv6:1.4	sabbasattānamuttamo.
bv6:2.1	Tadā amatabheriṁ so,
bv6:2.2	āhanī mekhale pure;
bv6:2.3	Dhammasaṅkhasamāyuttaṁ,
bv6:2.4	navaṅgaṁ jinasāsanaṁ.
bv6:3.1	Nijjinitvā kilese so,
bv6:3.2	patvā sambodhimuttamaṁ;
bv6:3.3	Māpesi nagaraṁ satthā,
bv6:3.4	saddhammapuravaruttamaṁ.
bv6:4.1	Nirantaraṁ akuṭilaṁ,
bv6:4.2	ujuṁ vipulavitthataṁ;
bv6:4.3	Māpesi so mahāvīthiṁ,
bv6:4.4	satipaṭṭhānavaruttamaṁ.
bv6:5.1	Phale cattāri sāmaññe,
bv6:5.2	catasso paṭisambhidā;
bv6:5.3	Chaḷabhiññāṭṭhasamāpattī,
bv6:5.4	pasāresi tattha vīthiyaṁ.
bv6:6.1	Ye appamattā akhilā,
bv6:6.2	hirivīriyehupāgatā;
bv6:6.3	Te te ime guṇavare,
bv6:6.4	ādiyanti yathā sukhaṁ.
bv6:7.1	Evametena yogena,
bv6:7.2	uddharanto mahājanaṁ;
bv6:7.3	Bodhesi paṭhamaṁ satthā,
bv6:7.4	koṭisatasahassiyo.
bv6:8.1	Yamhi kāle mahāvīro,
bv6:8.2	ovadī titthiye gaṇe;
bv6:8.3	Koṭisahassābhisamiṁsu,
bv6:8.4	dutiye dhammadesane.
bv6:9.1	Yadā devā manussā ca,
bv6:9.2	samaggā ekamānasā;
bv6:9.3	Nirodhapañhaṁ pucchiṁsu,
bv6:9.4	saṁsayañcāpi mānasaṁ.
bv6:10.1	Tadāpi dhammadesane,
bv6:10.2	nirodhaparidīpane;
bv6:10.3	Navutikoṭisahassānaṁ,
bv6:10.4	tatiyābhisamayo ahu.
bv6:11.1	Sannipātā tayo āsuṁ,
bv6:11.2	sumanassa mahesino;
bv6:11.3	Khīṇāsavānaṁ vimalānaṁ,
bv6:11.4	santacittāna tādinaṁ.
bv6:12.1	Vassaṁvutthassa bhagavato,
bv6:12.2	abhighuṭṭhe pavāraṇe;
bv6:12.3	Koṭisatasahassehi,
bv6:12.4	pavāresi tathāgato.
bv6:13.1	Tatoparaṁ sannipāte,
bv6:13.2	vimale kañcanapabbate;
bv6:13.3	Navutikoṭisahassānaṁ,
bv6:13.4	dutiyo āsi samāgamo.
bv6:14.1	Yadā sakko devarājā,
bv6:14.2	buddhadassanupāgami;
bv6:14.3	Asītikoṭisahassānaṁ,
bv6:14.4	tatiyo āsi samāgamo.
bv6:15.1	Ahaṁ tena samayena,
bv6:15.2	nāgarājā mahiddhiko;
bv6:15.3	Atulo nāma nāmena,
bv6:15.4	ussannakusalasañcayo.
bv6:16.1	Tadāhaṁ nāgabhavanā,
bv6:16.2	nikkhamitvā sañātibhi;
bv6:16.3	Nāgānaṁ dibbaturiyehi,
bv6:16.4	sasaṅghaṁ jinamupaṭṭhahiṁ.
bv6:17.1	Koṭisatasahassānaṁ,
bv6:17.2	annapānena tappayiṁ;
bv6:17.3	Paccekadussayugaṁ datvā,
bv6:17.4	saraṇaṁ tamupāgamiṁ.
bv6:18.1	Sopi maṁ buddho byākāsi,
bv6:18.2	sumano lokanāyako;
bv6:18.3	‘Aparimeyyito kappe,
bv6:18.4	ayaṁ buddho bhavissati.
bv6:19.1	Padhānaṁ padahitvāna,
bv6:19.2	…pe…
bv6:19.3	hessāma sammukhā imaṁ’.
bv6:20.1	Tassāpi vacanaṁ sutvā,
bv6:20.2	bhiyyo cittaṁ pasādayiṁ;
bv6:20.3	Uttariṁ vatamadhiṭṭhāsiṁ,
bv6:20.4	dasapāramipūriyā.
bv6:21.1	Nagaraṁ mekhalaṁ nāma,
bv6:21.2	sudatto nāma khattiyo;
bv6:21.3	Sirimā nāma janikā,
bv6:21.4	sumanassa mahesino.
bv6:22.1	Navavassasahassāni,
bv6:22.2	agāraṁ ajjha so vasi;
bv6:22.3	Cando sucando vaṭaṁso ca,
bv6:22.4	tayo pāsādamuttamā.
bv6:23.1	Tesaṭṭhisatasahassāni,
bv6:23.2	nāriyo samalaṅkatā;
bv6:23.3	Vaṭaṁsikā nāma nārī,
bv6:23.4	anūpamo nāma atrajo.
bv6:24.1	Nimitte caturo disvā,
bv6:24.2	hatthiyānena nikkhami;
bv6:24.3	Anūnadasamāsāni,
bv6:24.4	padhānaṁ padahī jino.
bv6:25.1	Brahmunā yācito santo,
bv6:25.2	sumano lokanāyako;
bv6:25.3	Vatti cakkaṁ mahāvīro,
bv6:25.4	mekhale puramuttame.
bv6:26.1	Saraṇo bhāvitatto ca,
bv6:26.2	ahesuṁ aggasāvakā;
bv6:26.3	Udeno nāmupaṭṭhāko,
bv6:26.4	sumanassa mahesino.
bv6:27.1	Soṇā ca upasoṇā ca,
bv6:27.2	ahesuṁ aggasāvikā;
bv6:27.3	Sopi buddho amitayaso,
bv6:27.4	nāgamūle abujjhatha.
bv6:28.1	Varuṇo ceva saraṇo ca,
bv6:28.2	ahesuṁ aggupaṭṭhakā;
bv6:28.3	Cālā ca upacālā ca,
bv6:28.4	ahesuṁ aggupaṭṭhikā.
bv6:29.1	Uccattanena so buddho,
bv6:29.2	navutihatthamuggato;
bv6:29.3	Kañcanagghiyasaṅkāso,
bv6:29.4	dasasahassī virocati.
bv6:30.1	Navutivassasahassāni,
bv6:30.2	āyu vijjati tāvade;
bv6:30.3	Tāvatā tiṭṭhamāno so,
bv6:30.4	tāresi janataṁ bahuṁ.
bv6:31.1	Tāraṇīye tārayitvā,
bv6:31.2	bodhanīye ca bodhayi;
bv6:31.3	Parinibbāyi sambuddho,
bv6:31.4	uḷurājāva atthami.
bv6:32.1	Te ca khīṇāsavā bhikkhū,
bv6:32.2	so ca buddho asādiso;
bv6:32.3	Atulappabhaṁ dassayitvā,
bv6:32.4	nibbutā ye mahāyasā.
bv6:33.1	Tañca ñāṇaṁ atuliyaṁ,
bv6:33.2	Tāni ca atulāni ratanāni;
bv6:33.3	Sabbaṁ tamantarahitaṁ,
bv6:33.4	Nanu rittā sabbasaṅkhārā.
bv6:34.1	Sumano yasadharo buddho,
bv6:34.2	Aṅgārāmamhi nibbuto;
bv6:34.3	Tattheva tassa jinathūpo,
bv6:34.4	Catuyojanamuggato”ti.
bv6:35.1	Sumanassa bhagavato vaṁso catuttho.
bv7:0.1	Buddhavaṁsa
bv7:0.2	7. Revatabuddhavaṁsa
bv7:1.1	Sumanassa aparena,
bv7:1.2	revato nāma nāyako;
bv7:1.3	Anūpamo asadiso,
bv7:1.4	atulo uttamo jino.
bv7:2.1	Sopi dhammaṁ pakāsesi,
bv7:2.2	brahmunā abhiyācito;
bv7:2.3	Khandhadhātuvavatthānaṁ,
bv7:2.4	appavattaṁ bhavābhave.
bv7:3.1	Tassābhisamayā tīṇi,
bv7:3.2	ahesuṁ dhammadesane;
bv7:3.3	Gaṇanāya na vattabbo,
bv7:3.4	paṭhamābhisamayo ahu.
bv7:4.1	Yadā arindamaṁ rājaṁ,
bv7:4.2	vinesi revato muni;
bv7:4.3	Tadā koṭisahassānaṁ,
bv7:4.4	dutiyābhisamayo ahu.
bv7:5.1	Sattāhaṁ paṭisallānā,
bv7:5.2	vuṭṭhahitvā narāsabho;
bv7:5.3	Koṭisataṁ naramarūnaṁ,
bv7:5.4	vinesi uttame phale.
bv7:6.1	Sannipātā tayo āsuṁ,
bv7:6.2	revatassa mahesino;
bv7:6.3	Khīṇāsavānaṁ vimalānaṁ,
bv7:6.4	suvimuttāna tādinaṁ.
bv7:7.1	Atikkantā gaṇanapathaṁ,
bv7:7.2	paṭhamaṁ ye samāgatā;
bv7:7.3	Koṭisatasahassānaṁ,
bv7:7.4	dutiyo āsi samāgamo.
bv7:8.1	Yopi paññāya asamo,
bv7:8.2	tassa cakkānuvattako;
bv7:8.3	So tadā byādhito āsi,
bv7:8.4	patto jīvitasaṁsayaṁ.
bv7:9.1	Tassa gilānapucchāya,
bv7:9.2	ye tadā upagatā munī;
bv7:9.3	Koṭisahassā arahanto,
bv7:9.4	tatiyo āsi samāgamo.
bv7:10.1	Ahaṁ tena samayena,
bv7:10.2	atidevo nāma brāhmaṇo;
bv7:10.3	Upagantvā revataṁ buddhaṁ,
bv7:10.4	saraṇaṁ tassa gañchahaṁ.
bv7:11.1	Tassa sīlaṁ samādhiñca,
bv7:11.2	paññāguṇamanuttamaṁ;
bv7:11.3	Thomayitvā yathāthāmaṁ,
bv7:11.4	uttarīyamadāsahaṁ.
bv7:12.1	Sopi maṁ buddho byākāsi,
bv7:12.2	revato lokanāyako;
bv7:12.3	“Aparimeyyito kappe,
bv7:12.4	ayaṁ buddho bhavissati.
bv7:13.1	‘Padhānaṁ padahitvāna,
bv7:13.2	…pe…
bv7:13.3	hessāma sammukhā imaṁ’.
bv7:14.1	Tassāpi vacanaṁ sutvā,
bv7:14.2	bhiyyo cittaṁ pasādayiṁ;
bv7:14.3	Uttariṁ vatamadhiṭṭhāsiṁ,
bv7:14.4	dasapāramipūriyā.
bv7:15.1	Tadāpi taṁ buddhadhammaṁ,
bv7:15.2	saritvā anubrūhayiṁ;
bv7:15.3	Āharissāmi taṁ dhammaṁ,
bv7:15.4	yaṁ mayhaṁ abhipatthitaṁ.
bv7:16.1	Nagaraṁ sudhaññavatī nāma,
bv7:16.2	Vipulo nāma khattiyo;
bv7:16.3	Vipulā nāma janikā,
bv7:16.4	Revatassa mahesino.
bv7:17.1	Cha ca vassasahassāni,
bv7:17.2	agāraṁ ajjha so vasi;
bv7:17.3	Sudassano ratanagghi,
bv7:17.4	āveḷo ca vibhūsito;
bv7:17.5	Puññakammābhinibbattā,
bv7:17.6	tayo pāsādamuttamā.
bv7:18.1	Tettiṁsa ca sahassāni,
bv7:18.2	nāriyo samalaṅkatā;
bv7:18.3	Sudassanā nāma nārī,
bv7:18.4	varuṇo nāma atrajo.
bv7:19.1	Nimitte caturo disvā,
bv7:19.2	rathayānena nikkhami;
bv7:19.3	Anūnasattamāsāni,
bv7:19.4	padhānaṁ padahī jino.
bv7:20.1	Brahmunā yācito santo,
bv7:20.2	revato lokanāyako;
bv7:20.3	Vatti cakkaṁ mahāvīro,
bv7:20.4	varuṇārāme sirīghare.
bv7:21.1	Varuṇo brahmadevo ca,
bv7:21.2	ahesuṁ aggasāvakā;
bv7:21.3	Sambhavo nāmupaṭṭhāko,
bv7:21.4	revatassa mahesino.
bv7:22.1	Bhaddā ceva subhaddā ca,
bv7:22.2	ahesuṁ aggasāvikā;
bv7:22.3	Sopi buddho asamasamo,
bv7:22.4	nāgamūle abujjhatha.
bv7:23.1	Padumo kuñjaro ceva,
bv7:23.2	ahesuṁ aggupaṭṭhakā;
bv7:23.3	Sirīmā ceva yasavatī,
bv7:23.4	ahesuṁ aggupaṭṭhikā.
bv7:24.1	Uccattanena so buddho,
bv7:24.2	asītihatthamuggato;
bv7:24.3	Obhāseti disā sabbā,
bv7:24.4	indaketuva uggato.
bv7:25.1	Tassa sarīre nibbattā,
bv7:25.2	pabhāmālā anuttarā;
bv7:25.3	Divā vā yadi vā rattiṁ,
bv7:25.4	samantā pharati yojanaṁ.
bv7:26.1	Saṭṭhivassasahassāni,
bv7:26.2	āyu vijjati tāvade;
bv7:26.3	Tāvatā tiṭṭhamāno so,
bv7:26.4	tāresi janataṁ bahuṁ.
bv7:27.1	Dassayitvā buddhabalaṁ,
bv7:27.2	amataṁ loke pakāsayaṁ;
bv7:27.3	Nibbāyi anupādāno,
bv7:27.4	yathaggupādānasaṅkhayā.
bv7:28.1	So ca kāyo ratananibho,
bv7:28.2	so ca dhammo asādiso;
bv7:28.3	Sabbaṁ tamantarahitaṁ,
bv7:28.4	nanu rittā sabbasaṅkhārā.
bv7:29.1	Revato yasadharo buddho,
bv7:29.2	Nibbuto so mahāpure;
bv7:29.3	Dhātuvitthārikaṁ āsi,
bv7:29.4	Tesu tesu padesato”ti.
bv7:30.1	Revatassa bhagavato vaṁso pañcamo.
bv8:0.1	Buddhavaṁsa
bv8:0.2	8. Sobhitabuddhavaṁsa
bv8:1.1	“Revatassa aparena,
bv8:1.2	sobhito nāma nāyako;
bv8:1.3	Samāhito santacitto,
bv8:1.4	asamo appaṭipuggalo.
bv8:2.1	So jino sakagehamhi,
bv8:2.2	mānasaṁ vinivattayi;
bv8:2.3	Patvāna kevalaṁ bodhiṁ,
bv8:2.4	dhammacakkaṁ pavattayi.
bv8:3.1	Yāva heṭṭhā avīcito,
bv8:3.2	bhavaggā cāpi uddhato;
bv8:3.3	Etthantare ekaparisā,
bv8:3.4	ahosi dhammadesane.
bv8:4.1	Tāya parisāya sambuddho,
bv8:4.2	dhammacakkaṁ pavattayi;
bv8:4.3	Gaṇanāya na vattabbo,
bv8:4.4	paṭhamābhisamayo ahu.
bv8:5.1	Tato parampi desente,
bv8:5.2	marūnañca samāgame;
bv8:5.3	Navutikoṭisahassānaṁ,
bv8:5.4	dutiyābhisamayo ahu.
bv8:6.1	Punāparaṁ rājaputto,
bv8:6.2	jayaseno nāma khattiyo;
bv8:6.3	Ārāmaṁ ropayitvāna,
bv8:6.4	buddhe niyyādayī tadā.
bv8:7.1	Tassa yāgaṁ pakittento,
bv8:7.2	dhammaṁ desesi cakkhumā;
bv8:7.3	Tadā koṭisahassānaṁ,
bv8:7.4	tatiyābhisamayo ahu.
bv8:8.1	Sannipātā tayo āsuṁ,
bv8:8.2	sobhitassa mahesino;
bv8:8.3	Khīṇāsavānaṁ vimalānaṁ,
bv8:8.4	santacittāna tādinaṁ.
bv8:9.1	Uggato nāma so rājā,
bv8:9.2	dānaṁ deti naruttame;
bv8:9.3	Tamhi dāne samāgañchuṁ,
bv8:9.4	arahantā satakoṭiyo.
bv8:10.1	Punāparaṁ puragaṇo,
bv8:10.2	deti dānaṁ naruttame;
bv8:10.3	Tadā navutikoṭīnaṁ,
bv8:10.4	dutiyo āsi samāgamo.
bv8:11.1	Devaloke vasitvāna,
bv8:11.2	yadā orohatī jino;
bv8:11.3	Tadā asītikoṭīnaṁ,
bv8:11.4	tatiyo āsi samāgamo.
bv8:12.1	Ahaṁ tena samayena,
bv8:12.2	sujāto nāma brāhmaṇo;
bv8:12.3	Tadā sasāvakaṁ buddhaṁ,
bv8:12.4	annapānena tappayiṁ.
bv8:13.1	Sopi maṁ buddho byākāsi,
bv8:13.2	sobhito lokanāyako;
bv8:13.3	‘Aparimeyyito kappe,
bv8:13.4	ayaṁ buddho bhavissati.
bv8:14.1	Padhānaṁ padahitvāna,
bv8:14.2	…pe…
bv8:14.3	hessāma sammukhā imaṁ’.
bv8:15.1	Tassāpi vacanaṁ sutvā,
bv8:15.2	haṭṭho saṁviggamānaso;
bv8:15.3	Tamevatthamanuppattiyā,
bv8:15.4	uggaṁ dhitimakāsahaṁ.
bv8:16.1	Sudhammaṁ nāma nagaraṁ,
bv8:16.2	sudhammo nāma khattiyo;
bv8:16.3	Sudhammā nāma janikā,
bv8:16.4	sobhitassa mahesino.
bv8:17.1	Navavassasahassāni,
bv8:17.2	agāraṁ ajjha so vasi;
bv8:17.3	Kumudo nāḷino padumo,
bv8:17.4	tayo pāsādamuttamā.
bv8:18.1	Sattatiṁsasahassāni,
bv8:18.2	nāriyo samalaṅkatā;
bv8:18.3	Maṇilā nāma sā nārī,
bv8:18.4	sīho nāmāsi atrajo.
bv8:19.1	Nimitte caturo disvā,
bv8:19.2	pāsādenābhinikkhami;
bv8:19.3	Sattāhaṁ padhānacāraṁ,
bv8:19.4	caritvā purisuttamo.
bv8:20.1	Brahmunā yācito santo,
bv8:20.2	sobhito lokanāyako;
bv8:20.3	Vatti cakkaṁ mahāvīro,
bv8:20.4	sudhammuyyānamuttame.
bv8:21.1	Asamo ca sunetto ca,
bv8:21.2	ahesuṁ aggasāvakā;
bv8:21.3	Anomo nāmupaṭṭhāko,
bv8:21.4	sobhitassa mahesino.
bv8:22.1	Nakulā ca sujātā ca,
bv8:22.2	ahesuṁ aggasāvikā;
bv8:22.3	Bujjhamāno ca so buddho,
bv8:22.4	nāgamūle abujjhatha.
bv8:23.1	Rammo ceva sudatto ca,
bv8:23.2	ahesuṁ aggupaṭṭhakā;
bv8:23.3	Nakulā ceva cittā ca,
bv8:23.4	ahesuṁ aggupaṭṭhikā.
bv8:24.1	Aṭṭhapaṇṇāsaratanaṁ,
bv8:24.2	accuggato mahāmuni;
bv8:24.3	Obhāseti disā sabbā,
bv8:24.4	sataraṁsīva uggato.
bv8:25.1	Yathā suphullaṁ pavanaṁ,
bv8:25.2	nānāgandhehi dhūpitaṁ;
bv8:25.3	Tatheva tassa pāvacanaṁ,
bv8:25.4	sīlagandhehi dhūpitaṁ.
bv8:26.1	Yathāpi sāgaro nāma,
bv8:26.2	dassanena atappiyo;
bv8:26.3	Tatheva tassa pāvacanaṁ,
bv8:26.4	savanena atappiyaṁ.
bv8:27.1	Navutivassasahassāni,
bv8:27.2	āyu vijjati tāvade;
bv8:27.3	Tāvatā tiṭṭhamāno so,
bv8:27.4	tāresi janataṁ bahuṁ.
bv8:28.1	Ovādaṁ anusiṭṭhiñca,
bv8:28.2	datvāna sesake jane;
bv8:28.3	Hutāsanova tāpetvā,
bv8:28.4	nibbuto so sasāvako.
bv8:29.1	So ca buddho asamasamo,
bv8:29.2	tepi sāvakā balappattā;
bv8:29.3	Sabbaṁ tamantarahitaṁ,
bv8:29.4	nanu rittā sabbasaṅkhārā.
bv8:30.1	Sobhito varasambuddho,
bv8:30.2	Sīhārāmamhi nibbuto;
bv8:30.3	Dhātuvitthārikaṁ āsi,
bv8:30.4	Tesu tesu padesato”ti.
bv8:31.1	Sobhitassa bhagavato vaṁso chaṭṭho.
bv9:0.1	Buddhavaṁsa
bv9:0.2	9 Anomadassībuddhavaṁsa
bv9:1.1	“Sobhitassa aparena,
bv9:1.2	Sambuddho dvipaduttamo;
bv9:1.3	Anomadassī amitayaso,
bv9:1.4	Tejassī duratikkamo.
bv9:2.1	So chetvā bandhanaṁ sabbaṁ,
bv9:2.2	viddhaṁsetvā tayo bhave;
bv9:2.3	Anivattigamanaṁ maggaṁ,
bv9:2.4	desesi devamānuse.
bv9:3.1	Sāgarova asaṅkhobbho,
bv9:3.2	pabbatova durāsado;
bv9:3.3	Ākāsova ananto so,
bv9:3.4	sālarājāva phullito.
bv9:4.1	Dassanenapi taṁ buddhaṁ,
bv9:4.2	tositā honti pāṇino;
bv9:4.3	Byāharantaṁ giraṁ sutvā,
bv9:4.4	amataṁ pāpuṇanti te.
bv9:5.1	Dhammābhisamayo tassa,
bv9:5.2	Iddho phīto tadā ahu;
bv9:5.3	Koṭisatāni abhisamiṁsu,
bv9:5.4	Paṭhame dhammadesane.
bv9:6.1	Tato paraṁ abhisamaye,
bv9:6.2	Vassante dhammavuṭṭhiyo;
bv9:6.3	Asītikoṭiyobhisamiṁsu,
bv9:6.4	Dutiye dhammadesane.
bv9:7.1	Tatoparañhi vassante,
bv9:7.2	tappayante ca pāṇinaṁ;
bv9:7.3	Aṭṭhasattatikoṭīnaṁ,
bv9:7.4	tatiyābhisamayo ahu.
bv9:8.1	Sannipātā tayo āsuṁ,
bv9:8.2	tassāpi ca mahesino;
bv9:8.3	Abhiññābalappattānaṁ,
bv9:8.4	pupphitānaṁ vimuttiyā.
bv9:9.1	Aṭṭhasatasahassānaṁ,
bv9:9.2	sannipāto tadā ahu;
bv9:9.3	Pahīnamadamohānaṁ,
bv9:9.4	santacittāna tādinaṁ.
bv9:10.1	Sattasatasahassānaṁ,
bv9:10.2	dutiyo āsi samāgamo;
bv9:10.3	Anaṅgaṇānaṁ virajānaṁ,
bv9:10.4	upasantāna tādinaṁ.
bv9:11.1	Channaṁ satasahassānaṁ,
bv9:11.2	tatiyo āsi samāgamo;
bv9:11.3	Abhiññābalappattānaṁ,
bv9:11.4	nibbutānaṁ tapassinaṁ.
bv9:12.1	Ahaṁ tena samayena,
bv9:12.2	yakkho āsiṁ mahiddhiko;
bv9:12.3	Nekānaṁ yakkhakoṭīnaṁ,
bv9:12.4	vasavattimhi issaro.
bv9:13.1	Tadāpi taṁ buddhavaraṁ,
bv9:13.2	upagantvā mahesinaṁ;
bv9:13.3	Annapānena tappesiṁ,
bv9:13.4	sasaṅghaṁ lokanāyakaṁ.
bv9:14.1	Sopi maṁ tadā byākāsi,
bv9:14.2	visuddhanayano muni;
bv9:14.3	‘Aparimeyyito kappe,
bv9:14.4	ayaṁ buddho bhavissati.
bv9:15.1	Padhānaṁ padahitvāna,
bv9:15.2	…pe…
bv9:15.3	hessāma sammukhā imaṁ’.
bv9:16.1	Tassāpi vacanaṁ sutvā,
bv9:16.2	haṭṭho saṁviggamānaso;
bv9:16.3	Uttariṁ vatamadhiṭṭhāsiṁ,
bv9:16.4	dasapāramipūriyā.
bv9:17.1	Nagaraṁ candavatī nāma,
bv9:17.2	yasavā nāma khattiyo;
bv9:17.3	Mātā yasodharā nāma,
bv9:17.4	anomadassissa satthuno.
bv9:18.1	Dasavassasahassāni,
bv9:18.2	agāraṁ ajjha so vasi;
bv9:18.3	Sirī upasirī vaḍḍho,
bv9:18.4	tayo pāsādamuttamā.
bv9:19.1	Tevīsatisahassāni,
bv9:19.2	nāriyo samalaṅkatā;
bv9:19.3	Sirimā nāma sā nārī,
bv9:19.4	upavāṇo nāma atrajo.
bv9:20.1	Nimitte caturo disvā,
bv9:20.2	sivikāyābhinikkhami;
bv9:20.3	Anūnadasamāsāni,
bv9:20.4	padhānaṁ padahī jino.
bv9:21.1	Brahmunā yācito santo,
bv9:21.2	anomadassī mahāmuni;
bv9:21.3	Vatti cakkaṁ mahāvīro,
bv9:21.4	uyyāne so sudassane.
bv9:22.1	Nisabho ca anomo ca,
bv9:22.2	ahesuṁ aggasāvakā;
bv9:22.3	Varuṇo nāmupaṭṭhāko,
bv9:22.4	anomadassissa satthuno.
bv9:23.1	Sundarī ca sumanā ca,
bv9:23.2	ahesuṁ aggasāvikā;
bv9:23.3	Bodhi tassa bhagavato,
bv9:23.4	ajjunoti pavuccati.
bv9:24.1	Nandivaḍḍho sirivaḍḍho,
bv9:24.2	ahesuṁ aggupaṭṭhakā;
bv9:24.3	Uppalā ceva padumā ca,
bv9:24.4	ahesuṁ aggupaṭṭhikā.
bv9:25.1	Aṭṭhapaṇṇāsaratanaṁ,
bv9:25.2	accuggato mahāmuni;
bv9:25.3	Pabhā niddhāvatī tassa,
bv9:25.4	sataraṁsīva uggato.
bv9:26.1	Vassasatasahassāni,
bv9:26.2	āyu vijjati tāvade;
bv9:26.3	Tāvatā tiṭṭhamāno so,
bv9:26.4	tāresi janataṁ bahuṁ.
bv9:27.1	Supupphitaṁ pāvacanaṁ,
bv9:27.2	arahantehi tādihi;
bv9:27.3	Vītarāgehi vimalehi,
bv9:27.4	sobhittha jinasāsanaṁ.
bv9:28.1	So ca satthā amitayaso,
bv9:28.2	Yugāni tāni atuliyāni;
bv9:28.3	Sabbaṁ tamantarahitaṁ,
bv9:28.4	Nanu rittā sabbasaṅkhārā.
bv9:29.1	Anomadassī jino satthā,
bv9:29.2	Dhammārāmamhi nibbuto;
bv9:29.3	Tatthevassa jinathūpo,
bv9:29.4	Ubbedho pañcavīsatī”ti.
bv9:30.1	Anomadassissa bhagavato vaṁso sattamo.
bv10:0.1	Buddhavaṁsa
bv10:0.2	10. Padumabuddhavaṁsa
bv10:1.1	“Anomadassissa aparena,
bv10:1.2	Sambuddho dvipaduttamo;
bv10:1.3	Padumo nāma nāmena,
bv10:1.4	Asamo appaṭipuggalo.
bv10:2.1	Tassāpi asamaṁ sīlaṁ,
bv10:2.2	samādhipi anantako;
bv10:2.3	Asaṅkheyyaṁ ñāṇavaraṁ,
bv10:2.4	vimuttipi anūpamā.
bv10:3.1	Tassāpi atulatejassa,
bv10:3.2	dhammacakkappavattane;
bv10:3.3	Abhisamayā tayo āsuṁ,
bv10:3.4	mahātamapavāhanā.
bv10:4.1	Paṭhamābhisamaye buddho,
bv10:4.2	koṭisatamabodhayi;
bv10:4.3	Dutiyābhisamaye dhīro,
bv10:4.4	navutikoṭimabodhayi.
bv10:5.1	Yadā ca padumo buddho,
bv10:5.2	ovadī sakamatrajaṁ;
bv10:5.3	Tadā asītikoṭīnaṁ,
bv10:5.4	tatiyābhisamayo ahu.
bv10:6.1	Sannipātā tayo āsuṁ,
bv10:6.2	padumassa mahesino;
bv10:6.3	Koṭisatasahassānaṁ,
bv10:6.4	paṭhamo āsi samāgamo.
bv10:7.1	Kathinatthārasamaye,
bv10:7.2	uppanne kathinacīvare;
bv10:7.3	Dhammasenāpatitthāya,
bv10:7.4	bhikkhū sibbiṁsu cīvaraṁ.
bv10:8.1	Tadā te vimalā bhikkhū,
bv10:8.2	chaḷabhiññā mahiddhikā;
bv10:8.3	Tīṇi satasahassāni,
bv10:8.4	samiṁsu aparājitā.
bv10:9.1	Punāparaṁ so narāsabho,
bv10:9.2	pavane vāsaṁ upāgami;
bv10:9.3	Tadā samāgamo āsi,
bv10:9.4	dvinnaṁ satasahassinaṁ.
bv10:10.1	Ahaṁ tena samayena,
bv10:10.2	sīho āsiṁ migādhibhū;
bv10:10.3	Vivekamanubrūhantaṁ,
bv10:10.4	pavane addasaṁ jinaṁ.
bv10:11.1	Vanditvā sirasā pāde,
bv10:11.2	katvāna taṁ padakkhiṇaṁ;
bv10:11.3	Tikkhattuṁ abhināditvā,
bv10:11.4	sattāhaṁ jinamupaṭṭhahaṁ.
bv10:12.1	Sattāhaṁ varasamāpattiyā,
bv10:12.2	Vuṭṭhahitvā tathāgato;
bv10:12.3	Manasā cintayitvāna,
bv10:12.4	Koṭibhikkhū samānayi.
bv10:13.1	Tadāpi so mahāvīro,
bv10:13.2	tesaṁ majjhe viyākari;
bv10:13.3	‘Aparimeyyito kappe,
bv10:13.4	ayaṁ buddho bhavissati.
bv10:14.1	Padhānaṁ padahitvāna,
bv10:14.2	…pe…
bv10:14.3	hessāma sammukhā imaṁ’.
bv10:15.1	Tassāpi vacanaṁ sutvā,
bv10:15.2	bhiyyo cittaṁ pasādayiṁ;
bv10:15.3	Uttariṁ vatamadhiṭṭhāsiṁ,
bv10:15.4	dasapāramipūriyā.
bv10:16.1	Campakaṁ nāma nagaraṁ,
bv10:16.2	asamo nāma khattiyo;
bv10:16.3	Asamā nāma janikā,
bv10:16.4	padumassa mahesino.
bv10:17.1	Dasavassasahassāni,
bv10:17.2	agāraṁ ajjha so vasi;
bv10:17.3	Nandā-vasu-yasuttarā,
bv10:17.4	tayo pāsādamuttamā.
bv10:18.1	Tettiṁsa ca sahassāni,
bv10:18.2	nāriyo samalaṅkatā;
bv10:18.3	Uttarā nāma sā nārī,
bv10:18.4	rammo nāmāsi atrajo.
bv10:19.1	Nimitte caturo disvā,
bv10:19.2	rathayānena nikkhami;
bv10:19.3	Anūnaaṭṭhamāsāni,
bv10:19.4	padhānaṁ padahī jino.
bv10:20.1	Brahmunā yācito santo,
bv10:20.2	padumo lokanāyako;
bv10:20.3	Vatti cakkaṁ mahāvīro,
bv10:20.4	dhanañcuyyānamuttame.
bv10:21.1	Sālo ca upasālo ca,
bv10:21.2	ahesuṁ aggasāvakā;
bv10:21.3	Varuṇo nāmupaṭṭhāko,
bv10:21.4	padumassa mahesino.
bv10:22.1	Rādhā ceva surādhā ca,
bv10:22.2	ahesuṁ aggasāvikā;
bv10:22.3	Bodhi tassa bhagavato,
bv10:22.4	mahāsoṇoti vuccati.
bv10:23.1	Bhiyyo ceva asamo ca,
bv10:23.2	ahesuṁ aggupaṭṭhakā;
bv10:23.3	Rucī ca nandarāmā ca,
bv10:23.4	ahesuṁ aggupaṭṭhikā.
bv10:24.1	Aṭṭhapaṇṇāsaratanaṁ,
bv10:24.2	accuggato mahāmuni;
bv10:24.3	Pabhā niddhāvatī tassa,
bv10:24.4	asamā sabbaso disā.
bv10:25.1	Candappabhā sūriyappabhā,
bv10:25.2	ratanaggimaṇippabhā;
bv10:25.3	Sabbāpi tā hatā honti,
bv10:25.4	patvā jinapabhuttamaṁ.
bv10:26.1	Vassasatasahassāni,
bv10:26.2	āyu vijjati tāvade;
bv10:26.3	Tāvatā tiṭṭhamāno so,
bv10:26.4	tāresi janataṁ bahuṁ.
bv10:27.1	Paripakkamānase satte,
bv10:27.2	bodhayitvā asesato;
bv10:27.3	Sesake anusāsitvā,
bv10:27.4	nibbuto so sasāvako.
bv10:28.1	Uragova tacaṁ jiṇṇaṁ,
bv10:28.2	vaddhapattaṁva pādapo;
bv10:28.3	Jahitvā sabbasaṅkhāre,
bv10:28.4	nibbuto so yathā sikhī.
bv10:29.1	Padumo jinavaro satthā,
bv10:29.2	Dhammārāmamhi nibbuto;
bv10:29.3	Dhātuvitthārikaṁ āsi,
bv10:29.4	Tesu tesu padesato”ti.
bv10:30.1	Padumassa bhagavato vaṁso aṭṭhamo.
bv11:0.1	Buddhavaṁsa
bv11:0.2	11. Nāradabuddhavaṁsa
bv11:1.1	“Padumassa aparena,
bv11:1.2	sambuddho dvipaduttamo;
bv11:1.3	Nārado nāma nāmena,
bv11:1.4	asamo appaṭipuggalo.
bv11:2.1	So buddho cakkavattissa,
bv11:2.2	jeṭṭho dayitaoraso;
bv11:2.3	Āmukkamālābharaṇo,
bv11:2.4	uyyānaṁ upasaṅkami.
bv11:3.1	Tatthāsi rukkho yasavipulo,
bv11:3.2	Abhirūpo brahā suci;
bv11:3.3	Tamajjhapatvā upanisīdi,
bv11:3.4	Mahāsoṇassa heṭṭhato.
bv11:4.1	Tattha ñāṇavaruppajji,
bv11:4.2	anantaṁ vajirūpamaṁ;
bv11:4.3	Tena vicini saṅkhāre,
bv11:4.4	ukkujjamavakujjakaṁ.
bv11:5.1	Tattha sabbakilesāni,
bv11:5.2	asesamabhivāhayi;
bv11:5.3	Pāpuṇī kevalaṁ bodhiṁ,
bv11:5.4	buddhañāṇe ca cuddasa.
bv11:6.1	Pāpuṇitvāna sambodhiṁ,
bv11:6.2	dhammacakkaṁ pavattayi;
bv11:6.3	Koṭisatasahassānaṁ,
bv11:6.4	paṭhamābhisamayo ahu.
bv11:7.1	Mahādoṇaṁ nāgarājaṁ,
bv11:7.2	vinayanto mahāmuni;
bv11:7.3	Pāṭiheraṁ tadākāsi,
bv11:7.4	dassayanto sadevake.
bv11:8.1	Tadā devamanussānaṁ,
bv11:8.2	tamhi dhammappakāsane;
bv11:8.3	Navutikoṭisahassāni,
bv11:8.4	tariṁsu sabbasaṁsayaṁ.
bv11:9.1	Yamhi kāle mahāvīro,
bv11:9.2	ovadī sakamatrajaṁ;
bv11:9.3	Asītikoṭisahassānaṁ,
bv11:9.4	tatiyābhisamayo ahu.
bv11:10.1	Sannipātā tayo āsuṁ,
bv11:10.2	nāradassa mahesino;
bv11:10.3	Koṭisatasahassānaṁ,
bv11:10.4	paṭhamo āsi samāgamo.
bv11:11.1	Yadā buddho buddhaguṇaṁ,
bv11:11.2	sanidānaṁ pakāsayi;
bv11:11.3	Navutikoṭisahassāni,
bv11:11.4	samiṁsu vimalā tadā.
bv11:12.1	Yadā verocano nāgo,
bv11:12.2	dānaṁ dadāti satthuno;
bv11:12.3	Tadā samiṁsu jinaputtā,
bv11:12.4	asītisatasahassiyo.
bv11:13.1	Ahaṁ tena samayena,
bv11:13.2	jaṭilo uggatāpano;
bv11:13.3	Antalikkhacaro āsiṁ,
bv11:13.4	pañcābhiññāsu pāragū.
bv11:14.1	Tadāpāhaṁ asamasamaṁ,
bv11:14.2	sasaṅghaṁ saparijjanaṁ;
bv11:14.3	Annapānena tappetvā,
bv11:14.4	candanenābhipūjayiṁ.
bv11:15.1	Sopi maṁ tadā byākāsi,
bv11:15.2	nārado lokanāyako;
bv11:15.3	‘Aparimeyyito kappe,
bv11:15.4	ayaṁ buddho bhavissati.
bv11:16.1	Padhānaṁ padahitvāna,
bv11:16.2	…pe…
bv11:16.3	hessāma sammukhā imaṁ’.
bv11:17.1	Tassāpi vacanaṁ sutvā,
bv11:17.2	bhiyyo hāsetva mānasaṁ;
bv11:17.3	Adhiṭṭhahiṁ vataṁ uggaṁ,
bv11:17.4	dasapāramipūriyā.
bv11:18.1	Nagaraṁ dhaññavatī nāma,
bv11:18.2	sudevo nāma khattiyo;
bv11:18.3	Anomā nāma janikā,
bv11:18.4	nāradassa mahesino.
bv11:19.1	Navavassasahassāni,
bv11:19.2	agāraṁ ajjha so vasi;
bv11:19.3	Jito vijitābhirāmo,
bv11:19.4	tayo pāsādamuttamā.
bv11:20.1	Ticattārīsasahassāni,
bv11:20.2	nāriyo samalaṅkatā;
bv11:20.3	Vijitasenā nāma nārī,
bv11:20.4	nanduttaro nāma atrajo.
bv11:21.1	Nimitte caturo disvā,
bv11:21.2	Padasā gamanena nikkhami;
bv11:21.3	Sattāhaṁ padhānacāraṁ,
bv11:21.4	Acarī purisuttamo.
bv11:22.1	Brahmunā yācito santo,
bv11:22.2	nārado lokanāyako;
bv11:22.3	Vatti cakkaṁ mahāvīro,
bv11:22.4	dhanañcuyyānamuttame.
bv11:23.1	Bhaddasālo jitamitto,
bv11:23.2	ahesuṁ aggasāvakā;
bv11:23.3	Vāseṭṭho nāmupaṭṭhāko,
bv11:23.4	nāradassa mahesino.
bv11:24.1	Uttarā phaggunī ceva,
bv11:24.2	ahesuṁ aggasāvikā;
bv11:24.3	Bodhi tassa bhagavato,
bv11:24.4	mahāsoṇoti vuccati.
bv11:25.1	Uggarindo vasabho ca,
bv11:25.2	ahesuṁ aggupaṭṭhakā;
bv11:25.3	Indāvarī ca vaṇḍī ca,
bv11:25.4	ahesuṁ aggupaṭṭhikā.
bv11:26.1	Aṭṭhāsītiratanāni,
bv11:26.2	accuggato mahāmuni;
bv11:26.3	Kañcanagghiyasaṅkāso,
bv11:26.4	dasasahassī virocati.
bv11:27.1	Tassa byāmappabhā kāyā,
bv11:27.2	niddhāvati disodisaṁ;
bv11:27.3	Nirantaraṁ divārattiṁ,
bv11:27.4	yojanaṁ pharate sadā.
bv11:28.1	Na keci tena samayena,
bv11:28.2	samantā yojane janā;
bv11:28.3	Ukkāpadīpe ujjālenti,
bv11:28.4	buddharaṁsīhi otthaṭā.
bv11:29.1	Navutivassasahassāni,
bv11:29.2	āyu vijjati tāvade;
bv11:29.3	Tāvatā tiṭṭhamāno so,
bv11:29.4	tāresi janataṁ bahuṁ.
bv11:30.1	Yathā uḷūhi gaganaṁ,
bv11:30.2	vicittaṁ upasobhati;
bv11:30.3	Tatheva sāsanaṁ tassa,
bv11:30.4	arahantehi sobhati.
bv11:31.1	Saṁsārasotaṁ taraṇāya,
bv11:31.2	sesake paṭipannake;
bv11:31.3	Dhammasetuṁ daḷhaṁ katvā,
bv11:31.4	nibbuto so narāsabho.
bv11:32.1	Sopi buddho asamasamo,
bv11:32.2	Tepi khīṇāsavā atulatejā;
bv11:32.3	Sabbaṁ tamantarahitaṁ,
bv11:32.4	Nanu rittā sabbasaṅkhārā.
bv11:33.1	Nārado jinavasabho,
bv11:33.2	Nibbuto sudassane pure;
bv11:33.3	Tatthevassa thūpavaro,
bv11:33.4	Catuyojanamuggato”ti.
bv11:34.1	Nāradassa bhagavato vaṁso navamo.
bv12:0.1	Buddhavaṁsa
bv12:0.2	12. Padumuttarabuddhavaṁsa
bv12:1.1	“Nāradassa aparena,
bv12:1.2	sambuddho dvipaduttamo;
bv12:1.3	Padumuttaro nāma jino,
bv12:1.4	akkhobbho sāgarūpamo.
bv12:2.1	Maṇḍakappova so āsi,
bv12:2.2	yamhi buddho ajāyatha;
bv12:2.3	Ussannakusalā janatā,
bv12:2.4	tamhi kappe ajāyatha.
bv12:3.1	Padumuttarassa bhagavato,
bv12:3.2	Paṭhame dhammadesane;
bv12:3.3	Koṭisatasahassānaṁ,
bv12:3.4	Dhammābhisamayo ahu.
bv12:4.1	Tato parampi vassante,
bv12:4.2	Tappayante ca pāṇine;
bv12:4.3	Sattatiṁsasatasahassānaṁ,
bv12:4.4	Dutiyābhisamayo ahu.
bv12:5.1	Yamhi kāle mahāvīro,
bv12:5.2	ānandaṁ upasaṅkami;
bv12:5.3	Pitusantikaṁ upagantvā,
bv12:5.4	āhanī amatadundubhiṁ.
bv12:6.1	Āhate amatabherimhi,
bv12:6.2	vassante dhammavuṭṭhiyā;
bv12:6.3	Paññāsasatasahassānaṁ,
bv12:6.4	tatiyābhisamayo ahu.
bv12:7.1	Ovādako viññāpako,
bv12:7.2	tārako sabbapāṇinaṁ;
bv12:7.3	Desanākusalo buddho,
bv12:7.4	tāresi janataṁ bahuṁ.
bv12:8.1	Sannipātā tayo āsuṁ,
bv12:8.2	padumuttarassa satthuno;
bv12:8.3	Koṭisatasahassānaṁ,
bv12:8.4	paṭhamo āsi samāgamo.
bv12:9.1	Yadā buddho asamasamo,
bv12:9.2	vasi vebhārapabbate;
bv12:9.3	Navutikoṭisahassānaṁ,
bv12:9.4	dutiyo āsi samāgamo.
bv12:10.1	Puna cārikaṁ pakkante,
bv12:10.2	gāmanigamaraṭṭhato;
bv12:10.3	Asītikoṭisahassānaṁ,
bv12:10.4	tatiyo āsi samāgamo.
bv12:11.1	Ahaṁ tena samayena,
bv12:11.2	Jaṭilo nāma raṭṭhiko;
bv12:11.3	Sambuddhappamukhaṁ saṅghaṁ,
bv12:11.4	Sabhattaṁ dussamadāsahaṁ.
bv12:12.1	Sopi maṁ buddho byākāsi,
bv12:12.2	saṅghamajjhe nisīdiya;
bv12:12.3	‘Satasahassito kappe,
bv12:12.4	ayaṁ buddho bhavissati.
bv12:13.1	Padhānaṁ padahitvāna,
bv12:13.2	…pe…
bv12:13.3	hessāma sammukhā imaṁ’.
bv12:14.1	Tassāpi vacanaṁ sutvā,
bv12:14.2	uttariṁ vatamadhiṭṭhahiṁ;
bv12:14.3	Akāsiṁ uggadaḷhaṁ dhitiṁ,
bv12:14.4	dasapāramipūriyā.
bv12:15.1	Byāhatā titthiyā sabbe,
bv12:15.2	Vimanā dummanā tadā;
bv12:15.3	Na tesaṁ keci paricaranti,
bv12:15.4	Raṭṭhato nicchubhanti te.
bv12:16.1	Sabbe tattha samāgantvā,
bv12:16.2	upagacchuṁ buddhasantike;
bv12:16.3	Tuvaṁ nātho mahāvīra,
bv12:16.4	saraṇaṁ hohi cakkhuma.
bv12:17.1	Anukampako kāruṇiko,
bv12:17.2	hitesī sabbapāṇinaṁ;
bv12:17.3	Sampatte titthiye sabbe,
bv12:17.4	pañcasīle patiṭṭhapi.
bv12:18.1	Evaṁ nirākulaṁ āsi,
bv12:18.2	suññataṁ titthiyehi taṁ;
bv12:18.3	Vicittaṁ arahantehi,
bv12:18.4	vasībhūtehi tādihi.
bv12:19.1	Nagaraṁ haṁsavatī nāma,
bv12:19.2	ānando nāma khattiyo;
bv12:19.3	Sujātā nāma janikā,
bv12:19.4	padumuttarassa satthuno.
bv12:20.1	Dasavassasahassāni,
bv12:20.2	Agāraṁ ajjha so vasi;
bv12:20.3	Naravāhano yaso vasavattī,
bv12:20.4	Tayo pāsādamuttamā.
bv12:21.1	Ticattārīsasahassāni,
bv12:21.2	nāriyo samalaṅkatā;
bv12:21.3	Vasudattā nāma nārī,
bv12:21.4	uttamo nāma atrajo.
bv12:22.1	Nimitte caturo disvā,
bv12:22.2	pāsādenābhinikkhami;
bv12:22.3	Sattāhaṁ padhānacāraṁ,
bv12:22.4	acarī purisuttamo.
bv12:23.1	Brahmunā yācito santo,
bv12:23.2	padumuttaro vināyako;
bv12:23.3	Vatti cakkaṁ mahāvīro,
bv12:23.4	mithiluyyānamuttame.
bv12:24.1	Devalo ca sujāto ca,
bv12:24.2	Ahesuṁ aggasāvakā;
bv12:24.3	Sumano nāmupaṭṭhāko,
bv12:24.4	Padumuttarassa mahesino.
bv12:25.1	Amitā ca asamā ca,
bv12:25.2	ahesuṁ aggasāvikā;
bv12:25.3	Bodhi tassa bhagavato,
bv12:25.4	salaloti pavuccati.
bv12:26.1	Vitiṇṇo ceva tisso ca,
bv12:26.2	ahesuṁ aggupaṭṭhakā;
bv12:26.3	Haṭṭhā ceva vicittā ca,
bv12:26.4	ahesuṁ aggupaṭṭhikā.
bv12:27.1	Aṭṭhapaṇṇāsaratanaṁ,
bv12:27.2	accuggato mahāmuni;
bv12:27.3	Kañcanagghiyasaṅkāso,
bv12:27.4	dvattiṁsavaralakkhaṇo.
bv12:28.1	Kuṭṭā kavāṭā bhittī ca,
bv12:28.2	rukkhā nagasiluccayā;
bv12:28.3	Na tassāvaraṇaṁ atthi,
bv12:28.4	samantā dvādasayojane.
bv12:29.1	Vassasatasahassāni,
bv12:29.2	āyu vijjati tāvade;
bv12:29.3	Tāvatā tiṭṭhamāno so,
bv12:29.4	tāresi janataṁ bahuṁ.
bv12:30.1	Santāretvā bahujanaṁ,
bv12:30.2	chinditvā sabbasaṁsayaṁ;
bv12:30.3	Jalitvā aggikkhandhova,
bv12:30.4	nibbuto so sasāvako.
bv12:31.1	Padumuttaro jino buddho,
bv12:31.2	Nandārāmamhi nibbuto;
bv12:31.3	Tatthevassa thūpavaro,
bv12:31.4	Dvādasubbedhayojano”ti.
bv12:32.1	Padumuttarassa bhagavato vaṁso dasamo.
bv13:0.1	Buddhavaṁsa
bv13:0.2	13. Sumedhabuddhavaṁsa
bv13:1.1	“Padumuttarassa aparena,
bv13:1.2	Sumedho nāma nāyako;
bv13:1.3	Durāsado uggatejo,
bv13:1.4	Sabbalokuttamo muni.
bv13:2.1	Pasannanetto sumukho,
bv13:2.2	brahā uju patāpavā;
bv13:2.3	Hitesī sabbasattānaṁ,
bv13:2.4	bahū mocesi bandhanā.
bv13:3.1	Yadā buddho pāpuṇitvā,
bv13:3.2	kevalaṁ bodhimuttamaṁ;
bv13:3.3	Sudassanamhi nagare,
bv13:3.4	dhammacakkaṁ pavattayi.
bv13:4.1	Tassāpi abhisamayā tīṇi,
bv13:4.2	Ahesuṁ dhammadesane;
bv13:4.3	Koṭisatasahassānaṁ,
bv13:4.4	Paṭhamābhisamayo ahu.
bv13:5.1	Punāparaṁ kumbhakaṇṇaṁ,
bv13:5.2	yakkhaṁ so damayī jino;
bv13:5.3	Navutikoṭisahassānaṁ,
bv13:5.4	dutiyābhisamayo ahu.
bv13:6.1	Punāparaṁ amitayaso,
bv13:6.2	catusaccaṁ pakāsayi;
bv13:6.3	Asītikoṭisahassānaṁ,
bv13:6.4	tatiyābhisamayo ahu.
bv13:7.1	Sannipātā tayo āsuṁ,
bv13:7.2	sumedhassa mahesino;
bv13:7.3	Khīṇāsavānaṁ vimalānaṁ,
bv13:7.4	santacittāna tādinaṁ.
bv13:8.1	Sudassanaṁ nāma nagaraṁ,
bv13:8.2	upagañchi jino yadā;
bv13:8.3	Tadā khīṇāsavā bhikkhū,
bv13:8.4	samiṁsu satakoṭiyo.
bv13:9.1	Punāparaṁ devakūṭe,
bv13:9.2	bhikkhūnaṁ kathinatthate;
bv13:9.3	Tadā navutikoṭīnaṁ,
bv13:9.4	dutiyo āsi samāgamo.
bv13:10.1	Punāparaṁ dasabalo,
bv13:10.2	yadā carati cārikaṁ;
bv13:10.3	Tadā asītikoṭīnaṁ,
bv13:10.4	tatiyo āsi samāgamo.
bv13:11.1	Ahaṁ tena samayena,
bv13:11.2	uttaro nāma māṇavo;
bv13:11.3	Asītikoṭiyo mayhaṁ,
bv13:11.4	ghare sannicitaṁ dhanaṁ.
bv13:12.1	Kevalaṁ sabbaṁ datvāna,
bv13:12.2	sasaṅghe lokanāyake;
bv13:12.3	Saraṇaṁ tassupagañchiṁ,
bv13:12.4	pabbajjañcābhirocayiṁ.
bv13:13.1	Sopi maṁ buddho byākāsi,
bv13:13.2	karonto anumodanaṁ;
bv13:13.3	‘Tiṁsakappasahassamhi,
bv13:13.4	ayaṁ buddho bhavissati.
bv13:14.1	Padhānaṁ padahitvāna,
bv13:14.2	…pe…
bv13:14.3	hessāma sammukhā imaṁ’.
bv13:15.1	Tassāpi vacanaṁ sutvā,
bv13:15.2	bhiyyo cittaṁ pasādayiṁ;
bv13:15.3	Uttariṁ vatamadhiṭṭhāsiṁ,
bv13:15.4	dasapāramipūriyā.
bv13:16.1	Suttantaṁ vinayañcāpi,
bv13:16.2	navaṅgaṁ satthusāsanaṁ;
bv13:16.3	Sabbaṁ pariyāpuṇitvāna,
bv13:16.4	sobhayiṁ jinasāsanaṁ.
bv13:17.1	Tatthappamatto viharanto,
bv13:17.2	Nisajjaṭṭhānacaṅkame;
bv13:17.3	Abhiññāsu pāramiṁ gantvā,
bv13:17.4	Brahmalokamagañchahaṁ.
bv13:18.1	Sudassanaṁ nāma nagaraṁ,
bv13:18.2	sudatto nāma khattiyo;
bv13:18.3	Sudattā nāma janikā,
bv13:18.4	sumedhassa mahesino.
bv13:19.1	Navavassasahassāni,
bv13:19.2	Agāraṁ ajjha so vasi;
bv13:19.3	Sucandakañcanasirivaḍḍhā,
bv13:19.4	Tayo pāsādamuttamā.
bv13:20.1	Tisoḷasasahassāni,
bv13:20.2	nāriyo samalaṅkatā;
bv13:20.3	Sumanā nāma sā nārī,
bv13:20.4	punabbasu nāma atrajo.
bv13:21.1	Nimitte caturo disvā,
bv13:21.2	hatthiyānena nikkhami;
bv13:21.3	Anūnakaṁ aḍḍhamāsaṁ,
bv13:21.4	padhānaṁ padahī jino.
bv13:22.1	Brahmunā yācito santo,
bv13:22.2	sumedho lokanāyako;
bv13:22.3	Vatti cakkaṁ mahāvīro,
bv13:22.4	sudassanuyyānamuttame.
bv13:23.1	Saraṇo sabbakāmo ca,
bv13:23.2	ahesuṁ aggasāvakā;
bv13:23.3	Sāgaro nāmupaṭṭhāko,
bv13:23.4	sumedhassa mahesino.
bv13:24.1	Rāmā ceva surāmā ca,
bv13:24.2	ahesuṁ aggasāvikā;
bv13:24.3	Bodhi tassa bhagavato,
bv13:24.4	mahānīpoti vuccati.
bv13:25.1	Uruvelā yasavā ca,
bv13:25.2	ahesuṁ aggupaṭṭhakā;
bv13:25.3	Yasodharā sirimā ca,
bv13:25.4	ahesuṁ aggupaṭṭhikā.
bv13:26.1	Aṭṭhāsītiratanāni,
bv13:26.2	accuggato mahāmuni;
bv13:26.3	Obhāseti disā sabbā,
bv13:26.4	cando tāragaṇe yathā.
bv13:27.1	Cakkavattimaṇī nāma,
bv13:27.2	yathā tapati yojanaṁ;
bv13:27.3	Tatheva tassa ratanaṁ,
bv13:27.4	samantā pharati yojanaṁ.
bv13:28.1	Navutivassasahassāni,
bv13:28.2	āyu vijjati tāvade;
bv13:28.3	Tāvatā tiṭṭhamāno so,
bv13:28.4	tāresi janataṁ bahuṁ.
bv13:29.1	Tevijjachaḷabhiññehi,
bv13:29.2	balappattehi tādihi;
bv13:29.3	Samākulamidaṁ āsi,
bv13:29.4	arahantehi sādhuhi.
bv13:30.1	Tepi sabbe amitayasā,
bv13:30.2	vippamuttā nirūpadhī;
bv13:30.3	Ñāṇālokaṁ dassayitvā,
bv13:30.4	nibbutā te mahāyasā.
bv13:31.1	Sumedho jinavaro buddho,
bv13:31.2	Medhārāmamhi nibbuto;
bv13:31.3	Dhātuvitthārikaṁ āsi,
bv13:31.4	Tesu tesu padesato”ti.
bv13:32.1	Sumedhassa bhagavato vaṁso ekādasamo.
bv14:0.1	Buddhavaṁsa
bv14:0.2	14. Sujātabuddhavaṁsa
bv14:1.1	“Tattheva maṇḍakappamhi,
bv14:1.2	sujāto nāma nāyako;
bv14:1.3	Sīhahanusabhakkhandho,
bv14:1.4	appameyyo durāsado.
bv14:2.1	Candova vimalo suddho,
bv14:2.2	sataraṁsīva patāpavā;
bv14:2.3	Evaṁ sobhati sambuddho,
bv14:2.4	jalanto siriyā sadā.
bv14:3.1	Pāpuṇitvāna sambuddho,
bv14:3.2	kevalaṁ bodhimuttamaṁ;
bv14:3.3	Sumaṅgalamhi nagare,
bv14:3.4	dhammacakkaṁ pavattayi.
bv14:4.1	Desente pavaraṁ dhammaṁ,
bv14:4.2	Sujāte lokanāyake;
bv14:4.3	Asītikoṭī abhisamiṁsu,
bv14:4.4	Paṭhame dhammadesane.
bv14:5.1	Yadā sujāto amitayaso,
bv14:5.2	Deve vassaṁ upāgami;
bv14:5.3	Sattatiṁsasatasahassānaṁ,
bv14:5.4	Dutiyābhisamayo ahu.
bv14:6.1	Yadā sujāto asamasamo,
bv14:6.2	Upagacchi pitusantikaṁ;
bv14:6.3	Saṭṭhisatasahassānaṁ,
bv14:6.4	Tatiyābhisamayo ahu.
bv14:7.1	Sannipātā tayo āsuṁ,
bv14:7.2	sujātassa mahesino;
bv14:7.3	Khīṇāsavānaṁ vimalānaṁ,
bv14:7.4	santacittāna tādinaṁ.
bv14:8.1	Abhiññābalappattānaṁ,
bv14:8.2	appattānaṁ bhavābhave;
bv14:8.3	Saṭṭhisatasahassāni,
bv14:8.4	paṭhamaṁ sannipatiṁsu te.
bv14:9.1	Punāparaṁ sannipāte,
bv14:9.2	tidivorohaṇe jine;
bv14:9.3	Paññāsasatasahassānaṁ,
bv14:9.4	dutiyo āsi samāgamo.
bv14:10.1	Upasaṅkamanto narāsabhaṁ,
bv14:10.2	Tassa yo aggasāvako;
bv14:10.3	Catūhi satasahassehi,
bv14:10.4	Sambuddhaṁ upasaṅkami.
bv14:11.1	Ahaṁ tena samayena,
bv14:11.2	catudīpamhi issaro;
bv14:11.3	Antalikkhacaro āsiṁ,
bv14:11.4	cakkavattī mahabbalo.
bv14:12.1	Loke acchariyaṁ disvā,
bv14:12.2	abbhutaṁ lomahaṁsanaṁ;
bv14:12.3	Upagantvāna vandiṁ so,
bv14:12.4	sujātaṁ lokanāyakaṁ.
bv14:13.1	Catudīpe mahārajjaṁ,
bv14:13.2	ratane satta uttame;
bv14:13.3	Buddhe niyyādayitvāna,
bv14:13.4	pabbajiṁ tassa santike.
bv14:14.1	Ārāmikā janapade,
bv14:14.2	uṭṭhānaṁ paṭipiṇḍiya;
bv14:14.3	Upanenti bhikkhusaṅghassa,
bv14:14.4	paccayaṁ sayanāsanaṁ.
bv14:15.1	Sopi maṁ buddho byākāsi,
bv14:15.2	dasasahassimhi issaro;
bv14:15.3	‘Tiṁsakappasahassamhi,
bv14:15.4	ayaṁ buddho bhavissati.
bv14:16.1	Padhānaṁ padahitvāna,
bv14:16.2	…pe…
bv14:16.3	hessāma sammukhā imaṁ’.
bv14:17.1	Tassāpi vacanaṁ sutvā,
bv14:17.2	bhiyyo hāsaṁ janesahaṁ;
bv14:17.3	Adhiṭṭhahiṁ vataṁ uggaṁ,
bv14:17.4	dasapāramipūriyā.
bv14:18.1	Suttantaṁ vinayañcāpi,
bv14:18.2	navaṅgaṁ satthusāsanaṁ;
bv14:18.3	Sabbaṁ pariyāpuṇitvāna,
bv14:18.4	sobhayiṁ jinasāsanaṁ.
bv14:19.1	Tatthappamatto viharanto,
bv14:19.2	brahmaṁ bhāvetva bhāvanaṁ;
bv14:19.3	Abhiññāpāramiṁ gantvā,
bv14:19.4	brahmalokamagañchahaṁ.
bv14:20.1	Sumaṅgalaṁ nāma nagaraṁ,
bv14:20.2	uggato nāma khattiyo;
bv14:20.3	Mātā pabhāvatī nāma,
bv14:20.4	sujātassa mahesino.
bv14:21.1	Navavassasahassāni,
bv14:21.2	agāraṁ ajjha so vasi;
bv14:21.3	Sirī upasirī nando,
bv14:21.4	tayo pāsādamuttamā.
bv14:22.1	Tevīsatisahassāni,
bv14:22.2	nāriyo samalaṅkatā;
bv14:22.3	Sirinandā nāma nārī,
bv14:22.4	upaseno nāma atrajo.
bv14:23.1	Nimitte caturo disvā,
bv14:23.2	assayānena nikkhami;
bv14:23.3	Anūnanavamāsāni,
bv14:23.4	padhānaṁ padahī jino.
bv14:24.1	Brahmunā yācito santo,
bv14:24.2	sujāto lokanāyako;
bv14:24.3	Vatti cakkaṁ mahāvīro,
bv14:24.4	sumaṅgaluyyānamuttame.
bv14:25.1	Sudassano sudevo ca,
bv14:25.2	ahesuṁ aggasāvakā;
bv14:25.3	Nārado nāmupaṭṭhāko,
bv14:25.4	sujātassa mahesino.
bv14:26.1	Nāgā ca nāgasamālā ca,
bv14:26.2	ahesuṁ aggasāvikā;
bv14:26.3	Bodhi tassa bhagavato,
bv14:26.4	mahāveḷūti vuccati.
bv14:27.1	So ca rukkho ghanakkhandho,
bv14:27.2	Acchiddo hoti pattiko;
bv14:27.3	Uju vaṁso brahā hoti,
bv14:27.4	Dassanīyo manoramo.
bv14:28.1	Ekakkhandho pavaḍḍhitvā,
bv14:28.2	tato sākhā pabhijjati;
bv14:28.3	Yathā subaddho morahattho,
bv14:28.4	evaṁ sobhati so dumo.
bv14:29.1	Na tassa kaṇṭakā honti,
bv14:29.2	nāpi chiddaṁ mahā ahu;
bv14:29.3	Vitthiṇṇasākho aviralo,
bv14:29.4	sandacchāyo manoramo.
bv14:30.1	Sudatto ceva citto ca,
bv14:30.2	ahesuṁ aggupaṭṭhakā;
bv14:30.3	Subhaddā ca padumā ca,
bv14:30.4	ahesuṁ aggupaṭṭhikā.
bv14:31.1	Paññāsaratano āsi,
bv14:31.2	uccattanena so jino;
bv14:31.3	Sabbākāravarūpeto,
bv14:31.4	sabbaguṇamupāgato.
bv14:32.1	Tassa pabhā asamasamā,
bv14:32.2	niddhāvati samantato;
bv14:32.3	Appamāṇo atuliyo,
bv14:32.4	opammehi anūpamo.
bv14:33.1	Navutivassasahassāni,
bv14:33.2	āyu vijjati tāvade;
bv14:33.3	Tāvatā tiṭṭhamāno so,
bv14:33.4	tāresi janataṁ bahuṁ.
bv14:34.1	Yathāpi sāgare ūmī,
bv14:34.2	gagane tārakā yathā;
bv14:34.3	Evaṁ tadā pāvacanaṁ,
bv14:34.4	arahantehi cittitaṁ.
bv14:35.1	So ca buddho asamasamo,
bv14:35.2	Guṇāni ca tāni atuliyāni;
bv14:35.3	Sabbaṁ tamantarahitaṁ,
bv14:35.4	Nanu rittā sabbasaṅkhārā.
bv14:36.1	Sujāto jinavaro buddho,
bv14:36.2	Silārāmamhi nibbuto;
bv14:36.3	Tattheva tassa cetiyo,
bv14:36.4	Tīṇigāvutamuggato”ti.
bv14:37.1	Sujātassa bhagavato vaṁso dvādasamo.
bv15:0.1	Buddhavaṁsa
bv15:0.2	15 Piyadassībuddhavaṁsa
bv15:1.1	“Sujātassa aparena,
bv15:1.2	sayambhū lokanāyako;
bv15:1.3	Durāsado asamasamo,
bv15:1.4	piyadassī mahāyaso.
bv15:2.1	Sopi buddho amitayaso,
bv15:2.2	ādiccova virocati;
bv15:2.3	Sabbaṁ tamaṁ nihantvāna,
bv15:2.4	dhammacakkaṁ pavattayi.
bv15:3.1	Tassāpi atulatejassa,
bv15:3.2	Ahesuṁ abhisamayā tayo;
bv15:3.3	Koṭisatasahassānaṁ,
bv15:3.4	Paṭhamābhisamayo ahu.
bv15:4.1	Sudassano devarājā,
bv15:4.2	micchādiṭṭhimarocayi;
bv15:4.3	Tassa diṭṭhiṁ vinodento,
bv15:4.4	satthā dhammamadesayi.
bv15:5.1	Janasannipāto atulo,
bv15:5.2	mahāsannipatī tadā;
bv15:5.3	Navutikoṭisahassānaṁ,
bv15:5.4	dutiyābhisamayo ahu.
bv15:6.1	Yadā doṇamukhaṁ hatthiṁ,
bv15:6.2	vinesi narasārathi;
bv15:6.3	Asītikoṭisahassānaṁ,
bv15:6.4	tatiyābhisamayo ahu.
bv15:7.1	Sannipātā tayo āsuṁ,
bv15:7.2	tassāpi piyadassino;
bv15:7.3	Koṭisatasahassānaṁ,
bv15:7.4	paṭhamo āsi samāgamo.
bv15:8.1	Tato paraṁ navutikoṭī,
bv15:8.2	samiṁsu ekato munī;
bv15:8.3	Tatiye sannipātamhi,
bv15:8.4	asītikoṭiyo ahū.
bv15:9.1	Ahaṁ tena samayena,
bv15:9.2	kassapo nāma brāhmaṇo;
bv15:9.3	Ajjhāyako mantadharo,
bv15:9.4	tiṇṇaṁ vedāna pāragū.
bv15:10.1	Tassa dhammaṁ suṇitvāna,
bv15:10.2	pasādaṁ janayiṁ ahaṁ;
bv15:10.3	Koṭisatasahassehi,
bv15:10.4	saṅghārāmaṁ amāpayiṁ.
bv15:11.1	Tassa datvāna ārāmaṁ,
bv15:11.2	haṭṭho saṁviggamānaso;
bv15:11.3	Saraṇe pañca sīle ca,
bv15:11.4	daḷhaṁ katvā samādiyiṁ.
bv15:12.1	Sopi maṁ buddho byākāsi,
bv15:12.2	saṅghamajjhe nisīdiya;
bv15:12.3	‘Aṭṭhārase kappasate,
bv15:12.4	ayaṁ buddho bhavissati.
bv15:13.1	Padhānaṁ padahitvāna,
bv15:13.2	…pe…
bv15:13.3	hessāma sammukhā imaṁ’.
bv15:14.1	Tassāpi vacanaṁ sutvā,
bv15:14.2	bhiyyo cittaṁ pasādayiṁ;
bv15:14.3	Uttariṁ vatamadhiṭṭhāsiṁ,
bv15:14.4	dasapāramipūriyā.
bv15:15.1	Sudhaññaṁ nāma nagaraṁ,
bv15:15.2	sudatto nāma khattiyo;
bv15:15.3	Candā nāmāsi janikā,
bv15:15.4	piyadassissa satthuno.
bv15:16.1	Navavassasahassāni,
bv15:16.2	Agāraṁ ajjha so vasi;
bv15:16.3	Sunimmalavimalagiriguhā,
bv15:16.4	Tayo pāsādamuttamā.
bv15:17.1	Tettiṁsasahassāni ca,
bv15:17.2	Nāriyo samalaṅkatā;
bv15:17.3	Vimalā nāma nārī ca,
bv15:17.4	Kañcanāveḷo nāma atrajo.
bv15:18.1	Nimitte caturo disvā,
bv15:18.2	rathayānena nikkhami;
bv15:18.3	Chamāsaṁ padhānacāraṁ,
bv15:18.4	acarī purisuttamo.
bv15:19.1	Brahmunā yācito santo,
bv15:19.2	piyadassī mahāmuni;
bv15:19.3	Vatti cakkaṁ mahāvīro,
bv15:19.4	usabhuyyāne manorame.
bv15:20.1	Pālito sabbadassī ca,
bv15:20.2	ahesuṁ aggasāvakā;
bv15:20.3	Sobhito nāmupaṭṭhāko,
bv15:20.4	piyadassissa satthuno.
bv15:21.1	Sujātā dhammadinnā ca,
bv15:21.2	ahesuṁ aggasāvikā;
bv15:21.3	Bodhi tassa bhagavato,
bv15:21.4	kakudhoti pavuccati.
bv15:22.1	Sandhako dhammako ceva,
bv15:22.2	ahesuṁ aggupaṭṭhakā;
bv15:22.3	Visākhā dhammadinnā ca,
bv15:22.4	ahesuṁ aggupaṭṭhikā.
bv15:23.1	Sopi buddho amitayaso,
bv15:23.2	dvattiṁsavaralakkhaṇo;
bv15:23.3	Asītihatthamubbedho,
bv15:23.4	sālarājāva dissati.
bv15:24.1	Aggicandasūriyānaṁ,
bv15:24.2	natthi tādisikā pabhā;
bv15:24.3	Yathā ahu pabhā tassa,
bv15:24.4	asamassa mahesino.
bv15:25.1	Tassāpi devadevassa,
bv15:25.2	āyu tāvatakaṁ ahu;
bv15:25.3	Navutivassasahassāni,
bv15:25.4	loke aṭṭhāsi cakkhumā.
bv15:26.1	Sopi buddho asamasamo,
bv15:26.2	Yugānipi tāni atuliyāni;
bv15:26.3	Sabbaṁ tamantarahitaṁ,
bv15:26.4	Nanu rittā sabbasaṅkhārā.
bv15:27.1	Piyadassī munivaro,
bv15:27.2	Assatthārāmamhi nibbuto;
bv15:27.3	Tatthevassa jinathūpo,
bv15:27.4	Tīṇiyojanamuggato”ti.
bv15:28.1	Piyadassissa bhagavato vaṁso terasamo.
bv16:0.1	Buddhavaṁsa
bv16:0.2	16 Atthadassībuddhavaṁsa
bv16:1.1	“Tattheva maṇḍakappamhi,
bv16:1.2	atthadassī mahāyaso;
bv16:1.3	Mahātamaṁ nihantvāna,
bv16:1.4	patto sambodhimuttamaṁ.
bv16:2.1	Brahmunā yācito santo,
bv16:2.2	dhammacakkaṁ pavattayi;
bv16:2.3	Amatena tappayī lokaṁ,
bv16:2.4	dasasahassisadevakaṁ.
bv16:3.1	Tassāpi lokanāthassa,
bv16:3.2	Ahesuṁ abhisamayā tayo;
bv16:3.3	Koṭisatasahassānaṁ,
bv16:3.4	Paṭhamābhisamayo ahu.
bv16:4.1	Yadā buddho atthadassī,
bv16:4.2	carate devacārikaṁ;
bv16:4.3	Koṭisatasahassānaṁ,
bv16:4.4	dutiyābhisamayo ahu.
bv16:5.1	Punāparaṁ yadā buddho,
bv16:5.2	desesi pitusantike;
bv16:5.3	Koṭisatasahassānaṁ,
bv16:5.4	tatiyābhisamayo ahu.
bv16:6.1	Sannipātā tayo āsuṁ,
bv16:6.2	tassāpi ca mahesino;
bv16:6.3	Khīṇāsavānaṁ vimalānaṁ,
bv16:6.4	santacittāna tādinaṁ.
bv16:7.1	Aṭṭhanavutisahassānaṁ,
bv16:7.2	paṭhamo āsi samāgamo;
bv16:7.3	Aṭṭhāsītisahassānaṁ,
bv16:7.4	dutiyo āsi samāgamo.
bv16:8.1	Aṭṭhasattatisatasahassānaṁ,
bv16:8.2	Tatiyo āsi samāgamo;
bv16:8.3	Anupādā vimuttānaṁ,
bv16:8.4	Vimalānaṁ mahesinaṁ.
bv16:9.1	Ahaṁ tena samayena,
bv16:9.2	jaṭilo uggatāpano;
bv16:9.3	Susīmo nāma nāmena,
bv16:9.4	mahiyā seṭṭhasammato.
bv16:10.1	Dibbaṁ mandāravaṁ pupphaṁ,
bv16:10.2	padumaṁ pārichattakaṁ;
bv16:10.3	Devalokāharitvāna,
bv16:10.4	sambuddhamabhipūjayiṁ.
bv16:11.1	Sopi maṁ buddho byākāsi,
bv16:11.2	atthadassī mahāmuni;
bv16:11.3	‘Aṭṭhārase kappasate,
bv16:11.4	ayaṁ buddho bhavissati.
bv16:12.1	Padhānaṁ padahitvāna,
bv16:12.2	…pe…
bv16:12.3	hessāma sammukhā imaṁ’.
bv16:13.1	Tassāpi vacanaṁ sutvā,
bv16:13.2	haṭṭho saṁviggamānaso;
bv16:13.3	Uttariṁ vatamadhiṭṭhāsiṁ,
bv16:13.4	dasapāramipūriyā.
bv16:14.1	Sobhanaṁ nāma nagaraṁ,
bv16:14.2	sāgaro nāma khattiyo;
bv16:14.3	Sudassanā nāma janikā,
bv16:14.4	atthadassissa satthuno.
bv16:15.1	Dasavassasahassāni,
bv16:15.2	Agāraṁ ajjha so vasi;
bv16:15.3	Amaragiri sugiri vāhanā,
bv16:15.4	Tayo pāsādamuttamā.
bv16:16.1	Tettiṁsañca sahassāni,
bv16:16.2	nāriyo samalaṅkatā;
bv16:16.3	Visākhā nāma nārī ca,
bv16:16.4	selo nāmāsi atrajo.
bv16:17.1	Nimitte caturo disvā,
bv16:17.2	assayānena nikkhami;
bv16:17.3	Anūnaaṭṭhamāsāni,
bv16:17.4	padhānaṁ padahī jino.
bv16:18.1	Brahmunā yācito santo,
bv16:18.2	atthadassī mahāyaso;
bv16:18.3	Vatti cakkaṁ mahāvīro,
bv16:18.4	anomuyyāne narāsabho.
bv16:19.1	Santo ca upasanto ca,
bv16:19.2	ahesuṁ aggasāvakā;
bv16:19.3	Abhayo nāmupaṭṭhāko,
bv16:19.4	atthadassissa satthuno.
bv16:20.1	Dhammā ceva sudhammā ca,
bv16:20.2	ahesuṁ aggasāvikā;
bv16:20.3	Bodhi tassa bhagavato,
bv16:20.4	campakoti pavuccati.
bv16:21.1	Nakulo ca nisabho ca,
bv16:21.2	ahesuṁ aggupaṭṭhakā;
bv16:21.3	Makilā ca sunandā ca,
bv16:21.4	ahesuṁ aggupaṭṭhikā.
bv16:22.1	Sopi buddho asamasamo,
bv16:22.2	asītihatthamuggato;
bv16:22.3	Sobhate sālarājāva,
bv16:22.4	uḷurājāva pūrito.
bv16:23.1	Tassa pākatikā raṁsī,
bv16:23.2	anekasatakoṭiyo;
bv16:23.3	Uddhaṁ adho dasa disā,
bv16:23.4	pharanti yojanaṁ sadā.
bv16:24.1	Sopi buddho narāsabho,
bv16:24.2	sabbasattuttamo muni;
bv16:24.3	Vassasatasahassāni,
bv16:24.4	loke aṭṭhāsi cakkhumā.
bv16:25.1	Atulaṁ dassetvā obhāsaṁ,
bv16:25.2	virocetvā sadevake;
bv16:25.3	Sopi aniccataṁ patto,
bv16:25.4	yathaggupādānasaṅkhayā.
bv16:26.1	Atthadassī jinavaro,
bv16:26.2	Anomārāmamhi nibbuto;
bv16:26.3	Dhātuvitthārikaṁ āsi,
bv16:26.4	Tesu tesu padesato”ti.
bv16:27.1	Atthadassissa bhagavato vaṁso cuddasamo.
bv17:0.1	Buddhavaṁsa
bv17:0.2	17 Dhammadassībuddhavaṁsa
bv17:1.1	“Tattheva maṇḍakappamhi,
bv17:1.2	dhammadassī mahāyaso;
bv17:1.3	Tamandhakāraṁ vidhamitvā,
bv17:1.4	atirocati sadevake.
bv17:2.1	Tassāpi atulatejassa,
bv17:2.2	dhammacakkappavattane;
bv17:2.3	Koṭisatasahassānaṁ,
bv17:2.4	paṭhamābhisamayo ahu.
bv17:3.1	Yadā buddho dhammadassī,
bv17:3.2	vinesi sañjayaṁ isiṁ;
bv17:3.3	Tadā navutikoṭīnaṁ,
bv17:3.4	dutiyābhisamayo ahu.
bv17:4.1	Yadā sakko upāgañchi,
bv17:4.2	sapariso vināyakaṁ;
bv17:4.3	Tadā asītikoṭīnaṁ,
bv17:4.4	tatiyābhisamayo ahu.
bv17:5.1	Tassāpi devadevassa,
bv17:5.2	sannipātā tayo ahuṁ;
bv17:5.3	Khīṇāsavānaṁ vimalānaṁ,
bv17:5.4	santacittāna tādinaṁ.
bv17:6.1	Yadā buddho dhammadassī,
bv17:6.2	Saraṇe vassaṁ upāgami;
bv17:6.3	Tadā koṭisatasahassānaṁ,
bv17:6.4	Paṭhamo āsi samāgamo.
bv17:7.1	Punāparaṁ yadā buddho,
bv17:7.2	devato eti mānusaṁ;
bv17:7.3	Tadāpi satakoṭīnaṁ,
bv17:7.4	dutiyo āsi samāgamo.
bv17:8.1	Punāparaṁ yadā buddho,
bv17:8.2	pakāsesi dhute guṇe;
bv17:8.3	Tadā asītikoṭīnaṁ,
bv17:8.4	tatiyo āsi samāgamo.
bv17:9.1	Ahaṁ tena samayena,
bv17:9.2	sakko āsiṁ purindado;
bv17:9.3	Dibbena gandhamālena,
bv17:9.4	tūriyenābhipūjayiṁ.
bv17:10.1	Sopi maṁ buddho byākāsi,
bv17:10.2	devamajjhe nisīdiya;
bv17:10.3	‘Aṭṭhārase kappasate,
bv17:10.4	ayaṁ buddho bhavissati.
bv17:11.1	Padhānaṁ padahitvāna,
bv17:11.2	…pe…
bv17:11.3	hessāma sammukhā imaṁ’.
bv17:12.1	Tassāpi vacanaṁ sutvā,
bv17:12.2	bhiyyo cittaṁ pasādayiṁ;
bv17:12.3	Uttariṁ vatamadhiṭṭhāsiṁ,
bv17:12.4	dasapāramipūriyā.
bv17:13.1	Saraṇaṁ nāma nagaraṁ,
bv17:13.2	saraṇo nāma khattiyo;
bv17:13.3	Sunandā nāma janikā,
bv17:13.4	dhammadassissa satthuno.
bv17:14.1	Aṭṭhavassasahassāni,
bv17:14.2	Agāraṁ ajjha so vasi;
bv17:14.3	Arajo virajo sudassano,
bv17:14.4	Tayo pāsādamuttamā.
bv17:15.1	Ticattārīsasahassāni,
bv17:15.2	nāriyo samalaṅkatā;
bv17:15.3	Vicikoḷi nāma nārī,
bv17:15.4	atrajo puññavaḍḍhano.
bv17:16.1	Nimitte caturo disvā,
bv17:16.2	pāsādenābhinikkhami;
bv17:16.3	Sattāhaṁ padhānacāraṁ,
bv17:16.4	acarī purisuttamo.
bv17:17.1	Brahmunā yācito santo,
bv17:17.2	dhammadassī narāsabho;
bv17:17.3	Vatti cakkaṁ mahāvīro,
bv17:17.4	migadāye naruttamo.
bv17:18.1	Padumo phussadevo ca,
bv17:18.2	ahesuṁ aggasāvakā;
bv17:18.3	Sunetto nāmupaṭṭhāko,
bv17:18.4	dhammadassissa satthuno.
bv17:19.1	Khemā ca saccanāmā ca,
bv17:19.2	ahesuṁ aggasāvikā;
bv17:19.3	Bodhi tassa bhagavato,
bv17:19.4	bimbijāloti vuccati.
bv17:20.1	Subhaddo kaṭissaho ceva,
bv17:20.2	ahesuṁ aggupaṭṭhakā;
bv17:20.3	Sāḷiyā ca kaḷiyā ca,
bv17:20.4	ahesuṁ aggupaṭṭhikā.
bv17:21.1	Sopi buddho asamasamo,
bv17:21.2	asītihatthamuggato;
bv17:21.3	Atirocati tejena,
bv17:21.4	dasasahassimhi dhātuyā.
bv17:22.1	Suphullo sālarājāva,
bv17:22.2	vijjūva gagane yathā;
bv17:22.3	Majjhanhikeva sūriyo,
bv17:22.4	evaṁ so upasobhatha.
bv17:23.1	Tassāpi atulatejassa,
bv17:23.2	samakaṁ āsi jīvitaṁ;
bv17:23.3	Vassasatasahassāni,
bv17:23.4	loke aṭṭhāsi cakkhumā.
bv17:24.1	Obhāsaṁ dassayitvāna,
bv17:24.2	vimalaṁ katvāna sāsanaṁ;
bv17:24.3	Cavi candova gagane,
bv17:24.4	nibbuto so sasāvako.
bv17:25.1	Dhammadassī mahāvīro,
bv17:25.2	Sālārāmamhi nibbuto;
bv17:25.3	Tatthevassa thūpavaro,
bv17:25.4	Tīṇiyojanamuggato”ti.
bv17:26.1	Dhammadassissa bhagavato vaṁso pannarasamo.
bv18:0.1	Buddhavaṁsa
bv18:0.2	18. Siddhatthabuddhavaṁsa
bv18:1.1	“Dhammadassissa aparena,
bv18:1.2	siddhattho nāma nāyako;
bv18:1.3	Nihanitvā tamaṁ sabbaṁ,
bv18:1.4	sūriyo abbhuggato yathā.
bv18:2.1	Sopi patvāna sambodhiṁ,
bv18:2.2	santārento sadevakaṁ;
bv18:2.3	Abhivassi dhammameghena,
bv18:2.4	nibbāpento sadevakaṁ.
bv18:3.1	Tassāpi atulatejassa,
bv18:3.2	Ahesuṁ abhisamayā tayo;
bv18:3.3	Koṭisatasahassānaṁ,
bv18:3.4	Paṭhamābhisamayo ahu.
bv18:4.1	Punāparaṁ bhīmarathe,
bv18:4.2	yadā āhani dundubhiṁ;
bv18:4.3	Tadā navutikoṭīnaṁ,
bv18:4.4	dutiyābhisamayo ahu.
bv18:5.1	Yadā buddho dhammaṁ desesi,
bv18:5.2	vebhāre so puruttame;
bv18:5.3	Tadā navutikoṭīnaṁ,
bv18:5.4	tatiyābhisamayo ahu.
bv18:6.1	Sannipātā tayo āsuṁ,
bv18:6.2	tasmimpi dvipaduttame;
bv18:6.3	Khīṇāsavānaṁ vimalānaṁ,
bv18:6.4	santacittāna tādinaṁ.
bv18:7.1	Koṭisatānaṁ navutīnaṁ,
bv18:7.2	asītiyāpi ca koṭinaṁ;
bv18:7.3	Ete āsuṁ tayo ṭhānā,
bv18:7.4	vimalānaṁ samāgame.
bv18:8.1	Ahaṁ tena samayena,
bv18:8.2	maṅgalo nāma tāpaso;
bv18:8.3	Uggatejo duppasaho,
bv18:8.4	abhiññābalasamāhito.
bv18:9.1	Jambuto phalamānetvā,
bv18:9.2	siddhatthassa adāsahaṁ;
bv18:9.3	Paṭiggahetvā sambuddho,
bv18:9.4	idaṁ vacanamabravi.
bv18:10.1	‘Passatha imaṁ tāpasaṁ,
bv18:10.2	jaṭilaṁ uggatāpanaṁ;
bv18:10.3	Catunnavutito kappe,
bv18:10.4	ayaṁ buddho bhavissati.
bv18:11.1	Padhānaṁ padahitvāna,
bv18:11.2	…pe…
bv18:11.3	hessāma sammukhā imaṁ’.
bv18:12.1	Tassāpi vacanaṁ sutvā,
bv18:12.2	bhiyyo cittaṁ pasādayiṁ;
bv18:12.3	Uttariṁ vatamadhiṭṭhāsiṁ,
bv18:12.4	dasapāramipūriyā.
bv18:13.1	Vebhāraṁ nāma nagaraṁ,
bv18:13.2	udeno nāma khattiyo;
bv18:13.3	Suphassā nāma janikā,
bv18:13.4	siddhatthassa mahesino.
bv18:14.1	Dasavassasahassāni,
bv18:14.2	agāraṁ ajjha so vasi;
bv18:14.3	Kokāsuppalakokanadā,
bv18:14.4	tayo pāsādamuttamā.
bv18:15.1	Tisoḷasasahassāni,
bv18:15.2	nāriyo samalaṅkatā;
bv18:15.3	Somanassā nāma sā nārī,
bv18:15.4	anūpamo nāma atrajo.
bv18:16.1	Nimitte caturo disvā,
bv18:16.2	sivikāyābhinikkhami;
bv18:16.3	Anūnadasamāsāni,
bv18:16.4	padhānaṁ padahī jino.
bv18:17.1	Brahmunā yācito santo,
bv18:17.2	siddhattho lokanāyako;
bv18:17.3	Vatti cakkaṁ mahāvīro,
bv18:17.4	migadāye naruttamo.
bv18:18.1	Sambalo ca sumitto ca,
bv18:18.2	ahesuṁ aggasāvakā;
bv18:18.3	Revato nāmupaṭṭhāko,
bv18:18.4	siddhatthassa mahesino.
bv18:19.1	Sīvalā ca surāmā ca,
bv18:19.2	ahesuṁ aggasāvikā;
bv18:19.3	Bodhi tassa bhagavato,
bv18:19.4	kaṇikāroti vuccati.
bv18:20.1	Suppiyo ca samuddo ca,
bv18:20.2	ahesuṁ aggupaṭṭhakā;
bv18:20.3	Rammā ceva surammā ca,
bv18:20.4	ahesuṁ aggupaṭṭhikā.
bv18:21.1	So buddho saṭṭhiratanaṁ,
bv18:21.2	ahosi nabhamuggato;
bv18:21.3	Kañcanagghiyasaṅkāso,
bv18:21.4	dasasahassī virocati.
bv18:22.1	Sopi buddho asamasamo,
bv18:22.2	atulo appaṭipuggalo;
bv18:22.3	Vassasatasahassāni,
bv18:22.4	loke aṭṭhāsi cakkhumā.
bv18:23.1	Vipulaṁ pabhaṁ dassayitvā,
bv18:23.2	pupphāpetvāna sāvake;
bv18:23.3	Vilāsetvā samāpatyā,
bv18:23.4	nibbuto so sasāvako.
bv18:24.1	Siddhattho munivaro buddho,
bv18:24.2	Anomārāmamhi nibbuto;
bv18:24.3	Tatthevassa thūpavaro,
bv18:24.4	Catuyojanamuggato”ti.
bv18:25.1	Siddhatthassa bhagavato vaṁso soḷasamo.
bv19:0.1	Buddhavaṁsa
bv19:0.2	19. Tissabuddhavaṁsa
bv19:1.1	“Siddhatthassa aparena,
bv19:1.2	Asamo appaṭipuggalo;
bv19:1.3	Anantatejo amitayaso,
bv19:1.4	Tisso lokagganāyako.
bv19:2.1	Tamandhakāraṁ vidhamitvā,
bv19:2.2	obhāsetvā sadevakaṁ;
bv19:2.3	Anukampako mahāvīro,
bv19:2.4	loke uppajji cakkhumā.
bv19:3.1	Tassāpi atulā iddhi,
bv19:3.2	atulaṁ sīlaṁ samādhi ca;
bv19:3.3	Sabbattha pāramiṁ gantvā,
bv19:3.4	dhammacakkaṁ pavattayi.
bv19:4.1	So buddho dasasahassimhi,
bv19:4.2	Viññāpesi giraṁ suciṁ;
bv19:4.3	Koṭisatāni abhisamiṁsu,
bv19:4.4	Paṭhame dhammadesane.
bv19:5.1	Dutiyo navutikoṭīnaṁ,
bv19:5.2	tatiyo saṭṭhikoṭiyo;
bv19:5.3	Bandhanāto pamocesi,
bv19:5.4	satte naramarū tadā.
bv19:6.1	Sannipātā tayo āsuṁ,
bv19:6.2	tisse lokagganāyake;
bv19:6.3	Khīṇāsavānaṁ vimalānaṁ,
bv19:6.4	santacittāna tādinaṁ.
bv19:7.1	Khīṇāsavasatasahassānaṁ,
bv19:7.2	Paṭhamo āsi samāgamo;
bv19:7.3	Navutisatasahassānaṁ,
bv19:7.4	Dutiyo āsi samāgamo.
bv19:8.1	Asītisatasahassānaṁ,
bv19:8.2	tatiyo āsi samāgamo;
bv19:8.3	Khīṇāsavānaṁ vimalānaṁ,
bv19:8.4	pupphitānaṁ vimuttiyā.
bv19:9.1	Ahaṁ tena samayena,
bv19:9.2	sujāto nāma khattiyo;
bv19:9.3	Mahābhogaṁ chaḍḍayitvā,
bv19:9.4	pabbajiṁ isipabbajaṁ.
bv19:10.1	Mayi pabbajite sante,
bv19:10.2	uppajji lokanāyako;
bv19:10.3	Buddhoti saddaṁ sutvāna,
bv19:10.4	pīti me upapajjatha.
bv19:11.1	Dibbaṁ mandāravaṁ pupphaṁ,
bv19:11.2	padumaṁ pārichattakaṁ;
bv19:11.3	Ubho hatthehi paggayha,
bv19:11.4	dhunamāno upāgamiṁ.
bv19:12.1	Catuvaṇṇaparivutaṁ,
bv19:12.2	tissaṁ lokagganāyakaṁ;
bv19:12.3	Tamahaṁ pupphaṁ gahetvā,
bv19:12.4	matthake dhārayiṁ jinaṁ.
bv19:13.1	Sopi maṁ buddho byākāsi,
bv19:13.2	janamajjhe nisīdiya;
bv19:13.3	‘Dvenavute ito kappe,
bv19:13.4	ayaṁ buddho bhavissati.
bv19:14.1	Padhānaṁ padahitvāna,
bv19:14.2	…pe…
bv19:14.3	hessāma sammukhā imaṁ’.
bv19:15.1	Tassāpi vacanaṁ sutvā,
bv19:15.2	bhiyyo cittaṁ pasādayiṁ;
bv19:15.3	Uttariṁ vatamadhiṭṭhāsiṁ,
bv19:15.4	dasapāramipūriyā.
bv19:16.1	Khemakaṁ nāma nagaraṁ,
bv19:16.2	janasandho nāma khattiyo;
bv19:16.3	Padumā nāma janikā,
bv19:16.4	tissassa ca mahesino.
bv19:17.1	Sattavassasahassāni,
bv19:17.2	Agāraṁ ajjha so vasi;
bv19:17.3	Guhāsela nārisaya nisabhā,
bv19:17.4	Tayo pāsādamuttamā.
bv19:18.1	Samatiṁsasahassāni,
bv19:18.2	nāriyo samalaṅkatā;
bv19:18.3	Subhaddānāmikā nārī,
bv19:18.4	ānando nāma atrajo.
bv19:19.1	Nimitte caturo disvā,
bv19:19.2	assayānena nikkhami;
bv19:19.3	Anūnaaṭṭhamāsāni,
bv19:19.4	padhānaṁ padahī jino.
bv19:20.1	Brahmunā yācito santo,
bv19:20.2	tisso lokagganāyako;
bv19:20.3	Vatti cakkaṁ mahāvīro,
bv19:20.4	yasavatiyamuttame.
bv19:21.1	Brahmadevo udayo ca,
bv19:21.2	ahesuṁ aggasāvakā;
bv19:21.3	Samaṅgo nāmupaṭṭhāko,
bv19:21.4	tissassa ca mahesino.
bv19:22.1	Phussā ceva sudattā ca,
bv19:22.2	ahesuṁ aggasāvikā;
bv19:22.3	Bodhi tassa bhagavato,
bv19:22.4	asanoti pavuccati.
bv19:23.1	Sambalo ca sirimā ceva,
bv19:23.2	ahesuṁ aggupaṭṭhakā;
bv19:23.3	Kisāgotamī upasenā,
bv19:23.4	ahesuṁ aggupaṭṭhikā.
bv19:24.1	So buddho saṭṭhiratano,
bv19:24.2	ahu uccattane jino;
bv19:24.3	Anūpamo asadiso,
bv19:24.4	himavā viya dissati.
bv19:25.1	Tassāpi atulatejassa,
bv19:25.2	āyu āsi anuttaro;
bv19:25.3	Vassasatasahassāni,
bv19:25.4	loke aṭṭhāsi cakkhumā.
bv19:26.1	Uttamaṁ pavaraṁ seṭṭhaṁ,
bv19:26.2	anubhotvā mahāyasaṁ;
bv19:26.3	Jalitvā aggikkhandhova,
bv19:26.4	nibbuto so sasāvako.
bv19:27.1	Valāhakova anilena,
bv19:27.2	sūriyena viya ussavo;
bv19:27.3	Andhakārova padīpena,
bv19:27.4	nibbuto so sasāvako.
bv19:28.1	Tisso jinavaro buddho,
bv19:28.2	Nandārāmamhi nibbuto;
bv19:28.3	Tatthevassa jinathūpo,
bv19:28.4	Tīṇiyojanamuggato”ti.
bv19:29.1	Tissassa bhagavato vaṁso sattarasamo.
bv20:0.1	Buddhavaṁsa
bv20:0.2	20. Phussabuddhavaṁsa
bv20:1.1	“Tattheva maṇḍakappamhi,
bv20:1.2	ahu satthā anuttaro;
bv20:1.3	Anūpamo asamasamo,
bv20:1.4	phusso lokagganāyako.
bv20:2.1	Sopi sabbaṁ tamaṁ hantvā,
bv20:2.2	vijaṭetvā mahājaṭaṁ;
bv20:2.3	Sadevakaṁ tappayanto,
bv20:2.4	abhivassi amatambunā.
bv20:3.1	Dhammacakkaṁ pavattente,
bv20:3.2	phusse nakkhattamaṅgale;
bv20:3.3	Koṭisatasahassānaṁ,
bv20:3.4	paṭhamābhisamayo ahu.
bv20:4.1	Navutisatasahassānaṁ,
bv20:4.2	dutiyābhisamayo ahu;
bv20:4.3	Asītisatasahassānaṁ,
bv20:4.4	tatiyābhisamayo ahu.
bv20:5.1	Sannipātā tayo āsuṁ,
bv20:5.2	phussassāpi mahesino;
bv20:5.3	Khīṇāsavānaṁ vimalānaṁ,
bv20:5.4	santacittāna tādinaṁ.
bv20:6.1	Saṭṭhisatasahassānaṁ,
bv20:6.2	paṭhamo āsi samāgamo;
bv20:6.3	Paññāsasatasahassānaṁ,
bv20:6.4	dutiyo āsi samāgamo.
bv20:7.1	Cattārīsasatasahassānaṁ,
bv20:7.2	Tatiyo āsi samāgamo;
bv20:7.3	Anupādā vimuttānaṁ,
bv20:7.4	Vocchinnapaṭisandhinaṁ.
bv20:8.1	Ahaṁ tena samayena,
bv20:8.2	vijitāvī nāma khattiyo;
bv20:8.3	Chaḍḍayitvā mahārajjaṁ,
bv20:8.4	pabbajiṁ tassa santike.
bv20:9.1	Sopi maṁ buddho byākāsi,
bv20:9.2	phusso lokagganāyako;
bv20:9.3	‘Dvenavute ito kappe,
bv20:9.4	ayaṁ buddho bhavissati.
bv20:10.1	Padhānaṁ padahitvāna,
bv20:10.2	…pe…
bv20:10.3	hessāma sammukhā imaṁ’.
bv20:11.1	Tassāpi vacanaṁ sutvā,
bv20:11.2	bhiyyo cittaṁ pasādayiṁ;
bv20:11.3	Uttariṁ vatamadhiṭṭhāsiṁ,
bv20:11.4	dasapāramipūriyā.
bv20:12.1	Suttantaṁ vinayañcāpi,
bv20:12.2	navaṅgaṁ satthusāsanaṁ;
bv20:12.3	Sabbaṁ pariyāpuṇitvā,
bv20:12.4	sobhayiṁ jinasāsanaṁ.
bv20:13.1	Tatthappamatto viharanto,
bv20:13.2	brahmaṁ bhāvetva bhāvanaṁ;
bv20:13.3	Abhiññāsu pāramiṁ gantvā,
bv20:13.4	brahmalokamagañchahaṁ.
bv20:14.1	Kāsikaṁ nāma nagaraṁ,
bv20:14.2	jayaseno nāma khattiyo;
bv20:14.3	Sirimā nāma janikā,
bv20:14.4	phussassāpi mahesino.
bv20:15.1	Navavassasahassāni,
bv20:15.2	Agāraṁ ajjha so vasi;
bv20:15.3	Garuḷapakkha haṁsa suvaṇṇabhārā,
bv20:15.4	Tayo pāsādamuttamā.
bv20:16.1	Tiṁsaitthisahassāni,
bv20:16.2	nāriyo samalaṅkatā;
bv20:16.3	Kisāgotamī nāma nārī,
bv20:16.4	anūpamo nāma atrajo.
bv20:17.1	Nimitte caturo disvā,
bv20:17.2	hatthiyānena nikkhami;
bv20:17.3	Chamāsaṁ padhānacāraṁ,
bv20:17.4	acarī purisuttamo.
bv20:18.1	Brahmunā yācito santo,
bv20:18.2	phusso lokagganāyako;
bv20:18.3	Vatti cakkaṁ mahāvīro,
bv20:18.4	migadāye naruttamo.
bv20:19.1	Surakkhito dhammaseno,
bv20:19.2	ahesuṁ aggasāvakā;
bv20:19.3	Sabhiyo nāmupaṭṭhāko,
bv20:19.4	phussassāpi mahesino.
bv20:20.1	Cālā ca upacālā ca,
bv20:20.2	ahesuṁ aggasāvikā;
bv20:20.3	Bodhi tassa bhagavato,
bv20:20.4	āmaṇḍoti pavuccati.
bv20:21.1	Dhanañcayo visākho ca,
bv20:21.2	ahesuṁ aggupaṭṭhakā;
bv20:21.3	Padumā ceva nāgā ca,
bv20:21.4	ahesuṁ aggupaṭṭhikā.
bv20:22.1	Aṭṭhapaṇṇāsaratanaṁ,
bv20:22.2	sopi accuggato muni;
bv20:22.3	Sobhate sataraṁsīva,
bv20:22.4	uḷurājāva pūrito.
bv20:23.1	Navutivassasahassāni,
bv20:23.2	āyu vijjati tāvade;
bv20:23.3	Tāvatā tiṭṭhamāno so,
bv20:23.4	tāresi janataṁ bahuṁ.
bv20:24.1	Ovaditvā bahū satte,
bv20:24.2	santāretvā bahū jane;
bv20:24.3	Sopi satthā atulayaso,
bv20:24.4	nibbuto so sasāvako.
bv20:25.1	Phusso jinavaro satthā,
bv20:25.2	Senārāmamhi nibbuto;
bv20:25.3	Dhātuvitthārikaṁ āsi,
bv20:25.4	Tesu tesu padesato”ti.
bv20:26.1	Phussassa bhagavato vaṁso aṭṭhārasamo.
bv21:0.1	Buddhavaṁsa
bv21:0.2	21 Vipassībuddhavaṁsa
bv21:1.1	“Phussassa ca aparena,
bv21:1.2	sambuddho dvipaduttamo;
bv21:1.3	Vipassī nāma nāmena,
bv21:1.4	loke uppajji cakkhumā.
bv21:2.1	Avijjaṁ sabbaṁ padāletvā,
bv21:2.2	patto sambodhimuttamaṁ;
bv21:2.3	Dhammacakkaṁ pavattetuṁ,
bv21:2.4	pakkāmi bandhumatīpuraṁ.
bv21:3.1	Dhammacakkaṁ pavattetvā,
bv21:3.2	ubho bodhesi nāyako;
bv21:3.3	Gaṇanāya na vattabbo,
bv21:3.4	paṭhamābhisamayo ahu.
bv21:4.1	Punāparaṁ amitayaso,
bv21:4.2	tattha saccaṁ pakāsayi;
bv21:4.3	Caturāsītisahassānaṁ,
bv21:4.4	dutiyābhisamayo ahu.
bv21:5.1	Caturāsītisahassāni,
bv21:5.2	sambuddhaṁ anupabbajuṁ;
bv21:5.3	Tesamārāmapattānaṁ,
bv21:5.4	dhammaṁ desesi cakkhumā.
bv21:6.1	Sabbākārena bhāsato,
bv21:6.2	sutvā upanisādino;
bv21:6.3	Tepi dhammavaraṁ gantvā,
bv21:6.4	tatiyābhisamayo ahu.
bv21:7.1	Sannipātā tayo āsuṁ,
bv21:7.2	vipassissa mahesino;
bv21:7.3	Khīṇāsavānaṁ vimalānaṁ,
bv21:7.4	santacittāna tādinaṁ.
bv21:8.1	Aṭṭhasaṭṭhisatasahassānaṁ,
bv21:8.2	Paṭhamo āsi samāgamo;
bv21:8.3	Bhikkhusatasahassānaṁ,
bv21:8.4	Dutiyo āsi samāgamo.
bv21:9.1	Asītibhikkhusahassānaṁ,
bv21:9.2	tatiyo āsi samāgamo;
bv21:9.3	Tattha bhikkhugaṇamajjhe,
bv21:9.4	sambuddho atirocati.
bv21:10.1	Ahaṁ tena samayena,
bv21:10.2	nāgarājā mahiddhiko;
bv21:10.3	Atulo nāma nāmena,
bv21:10.4	puññavanto jutindharo.
bv21:11.1	Nekānaṁ nāgakoṭīnaṁ,
bv21:11.2	parivāretvānahaṁ tadā;
bv21:11.3	Vajjanto dibbaturiyehi,
bv21:11.4	lokajeṭṭhaṁ upāgamiṁ.
bv21:12.1	Upasaṅkamitvā sambuddhaṁ,
bv21:12.2	Vipassiṁ lokanāyakaṁ;
bv21:12.3	Maṇimuttaratanakhacitaṁ,
bv21:12.4	Sabbābharaṇavibhūsitaṁ;
bv21:12.5	Nimantetvā dhammarājassa,
bv21:12.6	Suvaṇṇapīṭhamadāsahaṁ.
bv21:13.1	Sopi maṁ buddho byākāsi,
bv21:13.2	saṅghamajjhe nisīdiya;
bv21:13.3	‘Ekanavutito kappe,
bv21:13.4	ayaṁ buddho bhavissati.
bv21:14.1	Ahu kapilavhayā rammā,
bv21:14.2	nikkhamitvā tathāgato;
bv21:14.3	Padhānaṁ padahitvāna,
bv21:14.4	katvā dukkarakārikaṁ.
bv21:15.1	Ajapālarukkhamūlasmiṁ,
bv21:15.2	nisīditvā tathāgato;
bv21:15.3	Tattha pāyāsaṁ paggayha,
bv21:15.4	nerañjaramupehiti.
bv21:16.1	Nerañjarāya tīramhi,
bv21:16.2	pāyāsaṁ ada so jino;
bv21:16.3	Paṭiyattavaramaggena,
bv21:16.4	bodhimūlamupehiti.
bv21:17.1	Tato padakkhiṇaṁ katvā,
bv21:17.2	bodhimaṇḍaṁ anuttaro;
bv21:17.3	Assatthamūle sambodhiṁ,
bv21:17.4	bujjhissati mahāyaso.
bv21:18.1	Imassa janikā mātā,
bv21:18.2	māyā nāma bhavissati;
bv21:18.3	Pitā suddhodano nāma,
bv21:18.4	ayaṁ hessati gotamo.
bv21:19.1	Anāsavā vītarāgā,
bv21:19.2	santacittā samāhitā;
bv21:19.3	Kolito upatisso ca,
bv21:19.4	aggā hessanti sāvakā;
bv21:19.5	Ānando nāmupaṭṭhāko,
bv21:19.6	upaṭṭhissatimaṁ jinaṁ.
bv21:20.1	Khemā uppalavaṇṇā ca,
bv21:20.2	aggā hessanti sāvikā;
bv21:20.3	Anāsavā vītarāgā,
bv21:20.4	santacittā samāhitā;
bv21:20.5	Bodhi tassa bhagavato,
bv21:20.6	assatthoti pavuccati.
bv21:21.1	Citto ca hatthāḷavako,
bv21:21.2	aggā hessantupaṭṭhakā;
bv21:21.3	Nandamātā ca uttarā,
bv21:21.4	aggā hessantupaṭṭhikā;
bv21:21.5	Āyu vassasataṁ tassa,
bv21:21.6	gotamassa yasassino.
bv21:22.1	Idaṁ sutvāna vacanaṁ,
bv21:22.2	…pe…
bv21:22.3	hessāma sammukhā imaṁ’.
bv21:23.1	Tassāhaṁ vacanaṁ sutvā,
bv21:23.2	bhiyyo cittaṁ pasādayiṁ;
bv21:23.3	Uttariṁ vatamadhiṭṭhāsiṁ,
bv21:23.4	dasapāramipūriyā.
bv21:24.1	Nagaraṁ bandhumatī nāma,
bv21:24.2	bandhumā nāma khattiyo;
bv21:24.3	Mātā bandhumatī nāma,
bv21:24.4	vipassissa mahesino.
bv21:25.1	Aṭṭhavassasahassāni,
bv21:25.2	agāraṁ ajjha so vasi;
bv21:25.3	Nando sunando sirimā,
bv21:25.4	tayo pāsādamuttamā.
bv21:26.1	Ticattārīsasahassāni,
bv21:26.2	Nāriyo samalaṅkatā;
bv21:26.3	Sudassanā nāma sā nārī,
bv21:26.4	Samavattakkhandho nāma atrajo.
bv21:27.1	Nimitte caturo disvā,
bv21:27.2	rathayānena nikkhami;
bv21:27.3	Anūnaaṭṭhamāsāni,
bv21:27.4	padhānaṁ padahī jino.
bv21:28.1	Brahmunā yācito santo,
bv21:28.2	vipassī lokanāyako;
bv21:28.3	Vatti cakkaṁ mahāvīro,
bv21:28.4	migadāye naruttamo.
bv21:29.1	Khaṇḍo ca tissanāmo ca,
bv21:29.2	ahesuṁ aggasāvakā;
bv21:29.3	Asoko nāmupaṭṭhāko,
bv21:29.4	vipassissa mahesino.
bv21:30.1	Candā ca candamittā ca,
bv21:30.2	ahesuṁ aggasāvikā;
bv21:30.3	Bodhi tassa bhagavato,
bv21:30.4	pāṭalīti pavuccati.
bv21:31.1	Punabbasumitto nāgo ca,
bv21:31.2	ahesuṁ aggupaṭṭhakā;
bv21:31.3	Sirimā uttarā ceva,
bv21:31.4	ahesuṁ aggupaṭṭhikā.
bv21:32.1	Asītihatthamubbedho,
bv21:32.2	vipassī lokanāyako;
bv21:32.3	Pabhā niddhāvati tassa,
bv21:32.4	samantā sattayojane.
bv21:33.1	Asītivassasahassāni,
bv21:33.2	āyu buddhassa tāvade;
bv21:33.3	Tāvatā tiṭṭhamāno so,
bv21:33.4	tāresi janataṁ bahuṁ.
bv21:34.1	Bahudevamanussānaṁ,
bv21:34.2	bandhanā parimocayi;
bv21:34.3	Maggāmaggañca ācikkhi,
bv21:34.4	avasesaputhujjane.
bv21:35.1	Ālokaṁ dassayitvāna,
bv21:35.2	desetvā amataṁ padaṁ;
bv21:35.3	Jalitvā aggikkhandhova,
bv21:35.4	nibbuto so sasāvako.
bv21:36.1	Iddhivaraṁ puññavaraṁ,
bv21:36.2	lakkhaṇañca kusumitaṁ;
bv21:36.3	Sabbaṁ tamantarahitaṁ,
bv21:36.4	nanu rittā sabbasaṅkhārā.
bv21:37.1	Vipassī jinavaro buddho,
bv21:37.2	Sumittārāmamhi nibbuto;
bv21:37.3	Tatthevassa thūpavaro,
bv21:37.4	Sattayojanamussito”ti.
bv21:38.1	Vipassissa bhagavato vaṁso ekūnavīsatimo.
bv22:0.1	Buddhavaṁsa
bv22:0.2	22. Sikhībuddhavaṁsa
bv22:1.1	“Vipassissa aparena,
bv22:1.2	sambuddho dvipaduttamo;
bv22:1.3	Sikhivhayo āsi jino,
bv22:1.4	asamo appaṭipuggalo.
bv22:2.1	Mārasenaṁ pamadditvā,
bv22:2.2	patto sambodhimuttamaṁ;
bv22:2.3	Dhammacakkaṁ pavattesi,
bv22:2.4	anukampāya pāṇinaṁ.
bv22:3.1	Dhammacakkaṁ pavattente,
bv22:3.2	sikhimhi jinapuṅgave;
bv22:3.3	Koṭisatasahassānaṁ,
bv22:3.4	paṭhamābhisamayo ahu.
bv22:4.1	Aparampi dhammaṁ desente,
bv22:4.2	gaṇaseṭṭhe naruttame;
bv22:4.3	Navutikoṭisahassānaṁ,
bv22:4.4	dutiyābhisamayo ahu.
bv22:5.1	Yamakapāṭihāriyañca,
bv22:5.2	dassayante sadevake;
bv22:5.3	Asītikoṭisahassānaṁ,
bv22:5.4	tatiyābhisamayo ahu.
bv22:6.1	Sannipātā tayo āsuṁ,
bv22:6.2	sikhissāpi mahesino;
bv22:6.3	Khīṇāsavānaṁ vimalānaṁ,
bv22:6.4	santacittāna tādinaṁ.
bv22:7.1	Bhikkhusatasahassānaṁ,
bv22:7.2	paṭhamo āsi samāgamo;
bv22:7.3	Asītibhikkhusahassānaṁ,
bv22:7.4	dutiyo āsi samāgamo.
bv22:8.1	Sattatibhikkhusahassānaṁ,
bv22:8.2	tatiyo āsi samāgamo;
bv22:8.3	Anupalitto padumaṁva,
bv22:8.4	toyamhi sampavaḍḍhitaṁ.
bv22:9.1	Ahaṁ tena samayena,
bv22:9.2	Arindamo nāma khattiyo;
bv22:9.3	Sambuddhappamukhaṁ saṅghaṁ,
bv22:9.4	Annapānena tappayiṁ.
bv22:10.1	Bahuṁ dussavaraṁ datvā,
bv22:10.2	dussakoṭiṁ anappakaṁ;
bv22:10.3	Alaṅkataṁ hatthiyānaṁ,
bv22:10.4	sambuddhassa adāsahaṁ.
bv22:11.1	Hatthiyānaṁ nimminitvā,
bv22:11.2	kappiyaṁ upanāmayiṁ;
bv22:11.3	Pūrayiṁ mānasaṁ mayhaṁ,
bv22:11.4	niccaṁ daḷhamupaṭṭhitaṁ.
bv22:12.1	Sopi maṁ buddho byākāsi,
bv22:12.2	sikhī lokagganāyako;
bv22:12.3	‘Ekatiṁse ito kappe,
bv22:12.4	ayaṁ buddho bhavissati.
bv22:13.1	Ahu kapilavhayā rammā,
bv22:13.2	…pe…
bv22:13.3	hessāma sammukhā imaṁ’.
bv22:14.1	Tassāhaṁ vacanaṁ sutvā,
bv22:14.2	bhiyyo cittaṁ pasādayiṁ;
bv22:14.3	Uttariṁ vatamadhiṭṭhāsiṁ,
bv22:14.4	dasapāramipūriyā.
bv22:15.1	Nagaraṁ aruṇavatī nāma,
bv22:15.2	Aruṇo nāma khattiyo;
bv22:15.3	Pabhāvatī nāma janikā,
bv22:15.4	Sikhissāpi mahesino.
bv22:16.1	Sattavassasahassāni,
bv22:16.2	agāraṁ ajjha so vasi;
bv22:16.3	Sucandako giri vasabho,
bv22:16.4	tayo pāsādamuttamā.
bv22:17.1	Catuvīsasahassāni,
bv22:17.2	nāriyo samalaṅkatā;
bv22:17.3	Sabbakāmā nāma nārī,
bv22:17.4	atulo nāma atrajo.
bv22:18.1	Nimitte caturo disvā,
bv22:18.2	hatthiyānena nikkhami;
bv22:18.3	Aṭṭhamāsaṁ padhānacāraṁ,
bv22:18.4	acarī purisuttamo.
bv22:19.1	Brahmunā yācito santo,
bv22:19.2	sikhī lokagganāyako;
bv22:19.3	Vatti cakkaṁ mahāvīro,
bv22:19.4	migadāye naruttamo.
bv22:20.1	Abhibhū sambhavo ceva,
bv22:20.2	ahesuṁ aggasāvakā;
bv22:20.3	Khemaṅkaro nāmupaṭṭhāko,
bv22:20.4	sikhissāpi mahesino.
bv22:21.1	Sakhilā ca padumā ca,
bv22:21.2	ahesuṁ aggasāvikā;
bv22:21.3	Bodhi tassa bhagavato,
bv22:21.4	puṇḍarīkoti vuccati.
bv22:22.1	Sirivaḍḍho ca nando ca,
bv22:22.2	ahesuṁ aggupaṭṭhakā;
bv22:22.3	Cittā ceva suguttā ca,
bv22:22.4	ahesuṁ aggupaṭṭhikā.
bv22:23.1	Uccattanena so buddho,
bv22:23.2	sattatihatthamuggato;
bv22:23.3	Kañcanagghiyasaṅkāso,
bv22:23.4	dvattiṁsavaralakkhaṇo.
bv22:24.1	Tassāpi byāmappabhā kāyā,
bv22:24.2	divārattiṁ nirantaraṁ;
bv22:24.3	Disodisaṁ niccharanti,
bv22:24.4	tīṇiyojanaso pabhā.
bv22:25.1	Sattativassasahassāni,
bv22:25.2	āyu tassa mahesino;
bv22:25.3	Tāvatā tiṭṭhamāno so,
bv22:25.4	tāresi janataṁ bahuṁ.
bv22:26.1	Dhammameghaṁ pavassetvā,
bv22:26.2	temayitvā sadevake;
bv22:26.3	Khemantaṁ pāpayitvāna,
bv22:26.4	nibbuto so sasāvako.
bv22:27.1	Anubyañjanasampannaṁ,
bv22:27.2	dvattiṁsavaralakkhaṇaṁ;
bv22:27.3	Sabbaṁ tamantarahitaṁ,
bv22:27.4	nanu rittā sabbasaṅkhārā.
bv22:28.1	Sikhī munivaro buddho,
bv22:28.2	Assārāmamhi nibbuto;
bv22:28.3	Tatthevassa thūpavaro,
bv22:28.4	Tīṇiyojanamuggato”ti.
bv22:29.1	Sikhissa bhagavato vaṁso vīsatimo.
bv23:0.1	Buddhavaṁsa
bv23:0.2	23. Vessabhūbuddhavaṁsa
bv23:1.1	“Tattheva maṇḍakappamhi,
bv23:1.2	asamo appaṭipuggalo;
bv23:1.3	Vessabhū nāma nāmena,
bv23:1.4	loke uppajji nāyako.
bv23:2.1	Ādittaṁ vata rāgaggi,
bv23:2.2	taṇhānaṁ vijitaṁ tadā;
bv23:2.3	Nāgova bandhanaṁ chetvā,
bv23:2.4	patto sambodhimuttamaṁ.
bv23:3.1	Dhammacakkaṁ pavattente,
bv23:3.2	vessabhūlokanāyake;
bv23:3.3	Asītikoṭisahassānaṁ,
bv23:3.4	paṭhamābhisamayo ahu.
bv23:4.1	Pakkante cārikaṁ raṭṭhe,
bv23:4.2	lokajeṭṭhe narāsabhe;
bv23:4.3	Sattatikoṭisahassānaṁ,
bv23:4.4	dutiyābhisamayo ahu.
bv23:5.1	Mahādiṭṭhiṁ vinodento,
bv23:5.2	pāṭiheraṁ karoti so;
bv23:5.3	Samāgatā naramarū,
bv23:5.4	dasasahassī sadevake.
bv23:6.1	Mahāacchariyaṁ disvā,
bv23:6.2	abbhutaṁ lomahaṁsanaṁ;
bv23:6.3	Devā ceva manussā ca,
bv23:6.4	bujjhare saṭṭhikoṭiyo.
bv23:7.1	Sannipātā tayo āsuṁ,
bv23:7.2	vessabhussa mahesino;
bv23:7.3	Khīṇāsavānaṁ vimalānaṁ,
bv23:7.4	santacittāna tādinaṁ.
bv23:8.1	Asītibhikkhusahassānaṁ,
bv23:8.2	paṭhamo āsi samāgamo;
bv23:8.3	Sattatibhikkhusahassānaṁ,
bv23:8.4	dutiyo āsi samāgamo.
bv23:9.1	Saṭṭhibhikkhusahassānaṁ,
bv23:9.2	tatiyo āsi samāgamo;
bv23:9.3	Jarādibhayabhītānaṁ,
bv23:9.4	orasānaṁ mahesino.
bv23:10.1	Ahaṁ tena samayena,
bv23:10.2	sudassano nāma khattiyo;
bv23:10.3	Nimantetvā mahāvīraṁ,
bv23:10.4	dānaṁ datvā mahārahaṁ;
bv23:10.5	Annapānena vatthena,
bv23:10.6	sasaṅghaṁ jinapūjayiṁ.
bv23:11.1	Tassa buddhassa asamassa,
bv23:11.2	cakkaṁ vattitamuttamaṁ;
bv23:11.3	Sutvāna paṇitaṁ dhammaṁ,
bv23:11.4	pabbajjamabhirocayiṁ.
bv23:12.1	Mahādānaṁ pavattetvā,
bv23:12.2	rattindivamatandito;
bv23:12.3	Pabbajjaṁ guṇasampannaṁ,
bv23:12.4	pabbajiṁ jinasantike.
bv23:13.1	Ācāraguṇasampanno,
bv23:13.2	vattasīlasamāhito;
bv23:13.3	Sabbaññutaṁ gavesanto,
bv23:13.4	ramāmi jinasāsane.
bv23:14.1	Saddhāpītiṁ upagantvā,
bv23:14.2	buddhaṁ vandāmi sattharaṁ;
bv23:14.3	Pīti uppajjati mayhaṁ,
bv23:14.4	bodhiyāyeva kāraṇā.
bv23:15.1	Anivattamānasaṁ ñatvā,
bv23:15.2	sambuddho etadabravi;
bv23:15.3	‘Ekatiṁse ito kappe,
bv23:15.4	ayaṁ buddho bhavissati.
bv23:16.1	Ahu kapilavhayā rammā,
bv23:16.2	…pe…
bv23:16.3	hessāma sammukhā imaṁ’.
bv23:17.1	Tassāhaṁ vacanaṁ sutvā,
bv23:17.2	bhiyyo cittaṁ pasādayiṁ;
bv23:17.3	Uttariṁ vatamadhiṭṭhāsiṁ,
bv23:17.4	dasapāramipūriyā.
bv23:18.1	Anomaṁ nāma nagaraṁ,
bv23:18.2	suppatīto nāma khattiyo;
bv23:18.3	Mātā yasavatī nāma,
bv23:18.4	vessabhussa mahesino.
bv23:19.1	Cha ca vassasahassāni,
bv23:19.2	Agāraṁ ajjha so vasi;
bv23:19.3	Ruci suruci rativaḍḍhano,
bv23:19.4	Tayo pāsādamuttamā.
bv23:20.1	Anūnatiṁsasahassāni,
bv23:20.2	nāriyo samalaṅkatā;
bv23:20.3	Sucittā nāma sā nārī,
bv23:20.4	suppabuddho nāma atrajo.
bv23:21.1	Nimitte caturo disvā,
bv23:21.2	sivikāyābhinikkhami;
bv23:21.3	Chamāsaṁ padhānacāraṁ,
bv23:21.4	acarī purisuttamo.
bv23:22.1	Brahmunā yācito santo,
bv23:22.2	vessabhūlokanāyako;
bv23:22.3	Vatti cakkaṁ mahāvīro,
bv23:22.4	aruṇārāme naruttamo.
bv23:23.1	Soṇo ca uttaro ceva,
bv23:23.2	ahesuṁ aggasāvakā;
bv23:23.3	Upasanto nāmupaṭṭhāko,
bv23:23.4	vessabhussa mahesino.
bv23:24.1	Rāmā ceva samālā ca,
bv23:24.2	ahesuṁ aggasāvikā;
bv23:24.3	Bodhi tassa bhagavato,
bv23:24.4	mahāsāloti vuccati.
bv23:25.1	Sotthiko ceva rambho ca,
bv23:25.2	ahesuṁ aggupaṭṭhakā;
bv23:25.3	Gotamī sirimā ceva,
bv23:25.4	ahesuṁ aggupaṭṭhikā.
bv23:26.1	Saṭṭhiratanamubbedho,
bv23:26.2	hemayūpasamūpamo;
bv23:26.3	Kāyā niccharati rasmi,
bv23:26.4	rattiṁva pabbate sikhī.
bv23:27.1	Saṭṭhivassasahassāni,
bv23:27.2	āyu tassa mahesino;
bv23:27.3	Tāvatā tiṭṭhamāno so,
bv23:27.4	tāresi janataṁ bahuṁ.
bv23:28.1	Dhammaṁ vitthārikaṁ katvā,
bv23:28.2	vibhajitvā mahājanaṁ;
bv23:28.3	Dhammanāvaṁ ṭhapetvāna,
bv23:28.4	nibbuto so sasāvako.
bv23:29.1	Dassaneyyaṁ sabbajanaṁ,
bv23:29.2	vihāraṁ iriyāpathaṁ;
bv23:29.3	Sabbaṁ tamantarahitaṁ,
bv23:29.4	nanu rittā sabbasaṅkhārā.
bv23:30.1	Vessabhū jinavaro satthā,
bv23:30.2	Khemārāmamhi nibbuto;
bv23:30.3	Dhātuvitthārikaṁ āsi,
bv23:30.4	Tesu tesu padesato”ti.
bv23:31.1	Vessabhussa bhagavato vaṁso ekavīsatimo.
bv24:0.1	Buddhavaṁsa
bv24:0.2	24. Kakusandhabuddhavaṁsa
bv24:1.1	“Vessabhussa aparena,
bv24:1.2	sambuddho dvipaduttamo;
bv24:1.3	Kakusandho nāma nāmena,
bv24:1.4	appameyyo durāsado.
bv24:2.1	Ugghāṭetvā sabbabhavaṁ,
bv24:2.2	cariyāya pāramiṁ gato;
bv24:2.3	Sīhova pañjaraṁ bhetvā,
bv24:2.4	patto sambodhimuttamaṁ.
bv24:3.1	Dhammacakkaṁ pavattente,
bv24:3.2	Kakusandhe lokanāyake;
bv24:3.3	Cattārīsakoṭisahassānaṁ,
bv24:3.4	Dhammābhisamayo ahu.
bv24:4.1	Antalikkhamhi ākāse,
bv24:4.2	yamakaṁ katvā vikubbanaṁ;
bv24:4.3	Tiṁsakoṭisahassānaṁ,
bv24:4.4	bodhesi devamānuse.
bv24:5.1	Naradevassa yakkhassa,
bv24:5.2	catusaccappakāsane;
bv24:5.3	Dhammābhisamayo tassa,
bv24:5.4	gaṇanāto asaṅkhiyo.
bv24:6.1	Kakusandhassa bhagavato,
bv24:6.2	eko āsi samāgamo;
bv24:6.3	Khīṇāsavānaṁ vimalānaṁ,
bv24:6.4	santacittāna tādinaṁ.
bv24:7.1	Cattālīsasahassānaṁ,
bv24:7.2	tadā āsi samāgamo;
bv24:7.3	Dantabhūmimanuppattānaṁ,
bv24:7.4	āsavārigaṇakkhayā.
bv24:8.1	Ahaṁ tena samayena,
bv24:8.2	khemo nāmāsi khattiyo;
bv24:8.3	Tathāgate jinaputte,
bv24:8.4	dānaṁ datvā anappakaṁ.
bv24:9.1	Pattañca cīvaraṁ datvā,
bv24:9.2	añjanaṁ madhulaṭṭhikaṁ;
bv24:9.3	Imetaṁ patthitaṁ sabbaṁ,
bv24:9.4	paṭiyādemi varaṁ varaṁ.
bv24:10.1	Sopi maṁ buddho byākāsi,
bv24:10.2	kakusandho vināyako;
bv24:10.3	‘Imamhi bhaddake kappe,
bv24:10.4	ayaṁ buddho bhavissati.
bv24:11.1	Ahu kapilavhayā rammā,
bv24:11.2	…pe…
bv24:11.3	hessāma sammukhā imaṁ’.
bv24:12.1	Tassāpi vacanaṁ sutvā,
bv24:12.2	bhiyyo cittaṁ pasādayiṁ;
bv24:12.3	Uttariṁ vatamadhiṭṭhāsiṁ,
bv24:12.4	dasapāramipūriyā.
bv24:13.1	Nagaraṁ khemāvatī nāma,
bv24:13.2	khemo nāmāsahaṁ tadā;
bv24:13.3	Sabbaññutaṁ gavesanto,
bv24:13.4	pabbajiṁ tassa santike.
bv24:14.1	Brāhmaṇo aggidatto ca,
bv24:14.2	āsi buddhassa so pitā;
bv24:14.3	Visākhā nāma janikā,
bv24:14.4	kakusandhassa satthuno.
bv24:15.1	Vasate tattha kheme pure,
bv24:15.2	sambuddhassa mahākulaṁ;
bv24:15.3	Narānaṁ pavaraṁ seṭṭhaṁ,
bv24:15.4	jātimantaṁ mahāyasaṁ.
bv24:16.1	Catuvassasahassāni,
bv24:16.2	Agāraṁ ajjha so vasi;
bv24:16.3	Kāmakāmavaṇṇakāmasuddhināmā,
bv24:16.4	Tayo pāsādamuttamā.
bv24:17.1	Samattiṁsasahassāni,
bv24:17.2	nāriyo samalaṅkatā;
bv24:17.3	Rocinī nāma sā nārī,
bv24:17.4	uttaro nāma atrajo.
bv24:18.1	Nimitte caturo disvā,
bv24:18.2	rathayānena nikkhami;
bv24:18.3	Anūnaaṭṭhamāsāni,
bv24:18.4	padhānaṁ padahī jino.
bv24:19.1	Brahmunā yācito santo,
bv24:19.2	kakusandho vināyako;
bv24:19.3	Vatti cakkaṁ mahāvīro,
bv24:19.4	migadāye naruttamo.
bv24:20.1	Vidhuro ca sañjīvo ca,
bv24:20.2	ahesuṁ aggasāvakā;
bv24:20.3	Buddhijo nāmupaṭṭhāko,
bv24:20.4	kakusandhassa satthuno.
bv24:21.1	Sāmā ca campānāmā ca,
bv24:21.2	ahesuṁ aggasāvikā;
bv24:21.3	Bodhi tassa bhagavato,
bv24:21.4	sirīsoti pavuccati.
bv24:22.1	Accuto ca sumano ca,
bv24:22.2	ahesuṁ aggupaṭṭhakā;
bv24:22.3	Nandā ceva sunandā ca,
bv24:22.4	ahesuṁ aggupaṭṭhikā.
bv24:23.1	Cattālīsaratanāni,
bv24:23.2	accuggato mahāmuni;
bv24:23.3	Kanakappabhā niccharati,
bv24:23.4	samantā dasayojanaṁ.
bv24:24.1	Cattālīsavassasahassāni,
bv24:24.2	Āyu tassa mahesino;
bv24:24.3	Tāvatā tiṭṭhamāno so,
bv24:24.4	Tāresi janataṁ bahuṁ.
bv24:25.1	Dhammāpaṇaṁ pasāretvā,
bv24:25.2	naranārīnaṁ sadevake;
bv24:25.3	Naditvā sīhanādaṁva,
bv24:25.4	nibbuto so sasāvako.
bv24:26.1	Aṭṭhaṅgavacanasampanno,
bv24:26.2	acchiddāni nirantaraṁ;
bv24:26.3	Sabbaṁ tamantarahitaṁ,
bv24:26.4	nanu rittā sabbasaṅkhārā.
bv24:27.1	Kakusandho jinavaro,
bv24:27.2	Khemārāmamhi nibbuto;
bv24:27.3	Tatthevassa thūpavaro,
bv24:27.4	Gāvutaṁ nabhamuggato”ti.
bv24:28.1	Kakusandhassa bhagavato vaṁso dvāvīsatimo.
bv25:0.1	Buddhavaṁsa
bv25:0.2	25. Koṇāgamanabuddhavaṁsa
bv25:1.1	“Kakusandhassa aparena,
bv25:1.2	sambuddho dvipaduttamo;
bv25:1.3	Koṇāgamano nāma jino,
bv25:1.4	lokajeṭṭho narāsabho.
bv25:2.1	Dasa dhamme pūrayitvāna,
bv25:2.2	kantāraṁ samatikkami;
bv25:2.3	Pavāhiya malaṁ sabbaṁ,
bv25:2.4	patto sambodhimuttamaṁ.
bv25:3.1	Dhammacakkaṁ pavattente,
bv25:3.2	koṇāgamananāyake;
bv25:3.3	Tiṁsakoṭisahassānaṁ,
bv25:3.4	paṭhamābhisamayo ahu.
bv25:4.1	Pāṭihīraṁ karonte ca,
bv25:4.2	paravādappamaddane;
bv25:4.3	Vīsatikoṭisahassānaṁ,
bv25:4.4	dutiyābhisamayo ahu.
bv25:5.1	Tato vikubbanaṁ katvā,
bv25:5.2	jino devapuraṁ gato;
bv25:5.3	Vasate tattha sambuddho,
bv25:5.4	silāya paṇḍukambale.
bv25:6.1	Pakaraṇe satta desento,
bv25:6.2	vassaṁ vasati so muni;
bv25:6.3	Dasakoṭisahassānaṁ,
bv25:6.4	tatiyābhisamayo ahu.
bv25:7.1	Tassāpi devadevassa,
bv25:7.2	eko āsi samāgamo;
bv25:7.3	Khīṇāsavānaṁ vimalānaṁ,
bv25:7.4	santacittāna tādinaṁ.
bv25:8.1	Tiṁsabhikkhusahassānaṁ,
bv25:8.2	tadā āsi samāgamo;
bv25:8.3	Oghānamatikkantānaṁ,
bv25:8.4	bhijjitānañca maccuyā.
bv25:9.1	Ahaṁ tena samayena,
bv25:9.2	pabbato nāma khattiyo;
bv25:9.3	Mittāmaccehi sampanno,
bv25:9.4	anantabalavāhano.
bv25:10.1	Sambuddhadassanaṁ gantvā,
bv25:10.2	sutvā dhammamanuttaraṁ;
bv25:10.3	Nimantetvā sajinasaṅghaṁ,
bv25:10.4	dānaṁ datvā yadicchakaṁ.
bv25:11.1	Pattuṇṇaṁ cīnapaṭṭañca,
bv25:11.2	koseyyaṁ kambalampi ca;
bv25:11.3	Sovaṇṇapādukañceva,
bv25:11.4	adāsiṁ satthusāvake.
bv25:12.1	Sopi maṁ buddho byākāsi,
bv25:12.2	saṅghamajjhe nisīdiya;
bv25:12.3	‘Imamhi bhaddake kappe,
bv25:12.4	ayaṁ buddho bhavissati.
bv25:13.1	Ahu kapilavhayā rammā,
bv25:13.2	…pe…
bv25:13.3	hessāma sammukhā imaṁ’.
bv25:14.1	Tassāpi vacanaṁ sutvā,
bv25:14.2	bhiyyo cittaṁ pasādayiṁ;
bv25:14.3	Uttariṁ vatamadhiṭṭhāsiṁ,
bv25:14.4	dasapāramipūriyā.
bv25:15.1	Sabbaññutaṁ gavesanto,
bv25:15.2	dānaṁ datvā naruttame;
bv25:15.3	Ohāyāhaṁ mahārajjaṁ,
bv25:15.4	pabbajiṁ jinasantike.
bv25:16.1	Nagaraṁ sobhavatī nāma,
bv25:16.2	sobho nāmāsi khattiyo;
bv25:16.3	Vasate tattha nagare,
bv25:16.4	sambuddhassa mahākulaṁ.
bv25:17.1	Brāhmaṇo yaññadatto ca,
bv25:17.2	āsi buddhassa so pitā;
bv25:17.3	Uttarā nāma janikā,
bv25:17.4	koṇāgamanassa satthuno.
bv25:18.1	Tīṇi vassasahassāni,
bv25:18.2	Agāraṁ ajjha so vasi;
bv25:18.3	Tusitasantusitasantuṭṭhā,
bv25:18.4	Tayo pāsādamuttamā.
bv25:19.1	Anūnasoḷasasahassāni,
bv25:19.2	Nāriyo samalaṅkatā;
bv25:19.3	Rucigattā nāma nārī,
bv25:19.4	Satthavāho nāma atrajo.
bv25:20.1	Nimitte caturo disvā,
bv25:20.2	hatthiyānena nikkhami;
bv25:20.3	Chamāsaṁ padhānacāraṁ,
bv25:20.4	acarī purisuttamo.
bv25:21.1	Brahmunā yācito santo,
bv25:21.2	koṇāgamananāyako;
bv25:21.3	Vatti cakkaṁ mahāvīro,
bv25:21.4	migadāye naruttamo.
bv25:22.1	Bhiyyaso uttaro nāma,
bv25:22.2	ahesuṁ aggasāvakā;
bv25:22.3	Sotthijo nāmupaṭṭhāko,
bv25:22.4	koṇāgamanassa satthuno.
bv25:23.1	Samuddā uttarā ceva,
bv25:23.2	ahesuṁ aggasāvikā;
bv25:23.3	Bodhi tassa bhagavato,
bv25:23.4	udumbaroti pavuccati.
bv25:24.1	Uggo ca somadevo ca,
bv25:24.2	ahesuṁ aggupaṭṭhakā;
bv25:24.3	Sīvalā ceva sāmā ca,
bv25:24.4	ahesuṁ aggupaṭṭhikā.
bv25:25.1	Uccattanena so buddho,
bv25:25.2	tiṁsahatthasamuggato;
bv25:25.3	Ukkāmukhe yathā kambu,
bv25:25.4	evaṁ raṁsīhi maṇḍito.
bv25:26.1	Tiṁsavassasahassāni,
bv25:26.2	āyu buddhassa tāvade;
bv25:26.3	Tāvatā tiṭṭhamāno so,
bv25:26.4	tāresi janataṁ bahuṁ.
bv25:27.1	Dhammacetiṁ samussetvā,
bv25:27.2	dhammadussavibhūsitaṁ;
bv25:27.3	Dhammapupphaguḷaṁ katvā,
bv25:27.4	nibbuto so sasāvako.
bv25:28.1	Mahāvilāso tassa jano,
bv25:28.2	siridhammappakāsano;
bv25:28.3	Sabbaṁ tamantarahitaṁ,
bv25:28.4	nanu rittā sabbasaṅkhārā.
bv25:29.1	Koṇāgamano sambuddho,
bv25:29.2	Pabbatārāmamhi nibbuto;
bv25:29.3	Dhātuvitthārikaṁ āsi,
bv25:29.4	Tesu tesu padesato”ti.
bv25:30.1	Koṇāgamanassa bhagavato vaṁso tevīsatimo.
bv26:0.1	Buddhavaṁsa
bv26:0.2	26. Kassapabuddhavaṁsa
bv26:1.1	“Koṇāgamanassa aparena,
bv26:1.2	Sambuddho dvipaduttamo;
bv26:1.3	Kassapo nāma gottena,
bv26:1.4	Dhammarājā pabhaṅkaro.
bv26:2.1	Sañchaḍḍitaṁ kulamūlaṁ,
bv26:2.2	bahvannapānabhojanaṁ;
bv26:2.3	Datvāna yācake dānaṁ,
bv26:2.4	pūrayitvāna mānasaṁ;
bv26:2.5	Usabhova āḷakaṁ bhetvā,
bv26:2.6	patto sambodhimuttamaṁ.
bv26:3.1	Dhammacakkaṁ pavattente,
bv26:3.2	kassape lokanāyake;
bv26:3.3	Vīsakoṭisahassānaṁ,
bv26:3.4	paṭhamābhisamayo ahu.
bv26:4.1	Catumāsaṁ yadā buddho,
bv26:4.2	loke carati cārikaṁ;
bv26:4.3	Dasakoṭisahassānaṁ,
bv26:4.4	dutiyābhisamayo ahu.
bv26:5.1	Yamakaṁ vikubbanaṁ katvā,
bv26:5.2	ñāṇadhātuṁ pakittayi;
bv26:5.3	Pañcakoṭisahassānaṁ,
bv26:5.4	tatiyābhisamayo ahu.
bv26:6.1	Sudhammā devapure ramme,
bv26:6.2	tattha dhammaṁ pakittayi;
bv26:6.3	Tīṇikoṭisahassānaṁ,
bv26:6.4	devānaṁ bodhayī jino.
bv26:7.1	Naradevassa yakkhassa,
bv26:7.2	apare dhammadesane;
bv26:7.3	Etesānaṁ abhisamayā,
bv26:7.4	gaṇanāto asaṅkhiyā.
bv26:8.1	Tassāpi devadevassa,
bv26:8.2	eko āsi samāgamo;
bv26:8.3	Khīṇāsavānaṁ vimalānaṁ,
bv26:8.4	santacittāna tādinaṁ.
bv26:9.1	Vīsabhikkhusahassānaṁ,
bv26:9.2	tadā āsi samāgamo;
bv26:9.3	Atikkantabhavantānaṁ,
bv26:9.4	hirisīlena tādinaṁ.
bv26:10.1	Ahaṁ tadā māṇavako,
bv26:10.2	jotipāloti vissuto;
bv26:10.3	Ajjhāyako mantadharo,
bv26:10.4	tiṇṇaṁ vedāna pāragū.
bv26:11.1	Lakkhaṇe itihāse ca,
bv26:11.2	sadhamme pāramiṁ gato;
bv26:11.3	Bhūmantalikkhakusalo,
bv26:11.4	katavijjo anāvayo.
bv26:12.1	Kassapassa bhagavato,
bv26:12.2	ghaṭīkāro nāmupaṭṭhāko;
bv26:12.3	Sagāravo sappatisso,
bv26:12.4	nibbuto tatiye phale.
bv26:13.1	Ādāya maṁ ghaṭīkāro,
bv26:13.2	upagañchi kassapaṁ jinaṁ;
bv26:13.3	Tassa dhammaṁ suṇitvāna,
bv26:13.4	pabbajiṁ tassa santike.
bv26:14.1	Āraddhavīriyo hutvā,
bv26:14.2	vattāvattesu kovido;
bv26:14.3	Na kvaci parihāyāmi,
bv26:14.4	pūresiṁ jinasāsanaṁ.
bv26:15.1	Yāvatā buddhabhaṇitaṁ,
bv26:15.2	navaṅgaṁ jinasāsanaṁ;
bv26:15.3	Sabbaṁ pariyāpuṇitvāna,
bv26:15.4	sobhayiṁ jinasāsanaṁ.
bv26:16.1	Mama acchariyaṁ disvā,
bv26:16.2	sopi buddho viyākari;
bv26:16.3	‘Imamhi bhaddake kappe,
bv26:16.4	ayaṁ buddho bhavissati.
bv26:17.1	Ahu kapilavhayā rammā,
bv26:17.2	nikkhamitvā tathāgato;
bv26:17.3	Padhānaṁ padahitvāna,
bv26:17.4	katvā dukkarakārikaṁ.
bv26:18.1	Ajapālarukkhamūle,
bv26:18.2	nisīditvā tathāgato;
bv26:18.3	Tattha pāyāsaṁ paggayha,
bv26:18.4	nerañjaramupehiti.
bv26:19.1	Nerañjarāya tīramhi,
bv26:19.2	pāyāsaṁ paribhuñjiya;
bv26:19.3	Paṭiyattavaramaggena,
bv26:19.4	bodhimūlamupehiti.
bv26:20.1	Tato padakkhiṇaṁ katvā,
bv26:20.2	bodhimaṇḍaṁ anuttaro;
bv26:20.3	Aparājitaṭṭhānamhi,
bv26:20.4	bodhipallaṅkamuttame;
bv26:20.5	Pallaṅkena nisīditvā,
bv26:20.6	bujjhissati mahāyaso.
bv26:21.1	Imassa janikā mātā,
bv26:21.2	māyā nāma bhavissati;
bv26:21.3	Pitā suddhodano nāma,
bv26:21.4	ayaṁ hessati gotamo.
bv26:22.1	Anāsavā vītarāgā,
bv26:22.2	santacittā samāhitā;
bv26:22.3	Kolito upatisso ca,
bv26:22.4	aggā hessanti sāvakā;
bv26:22.5	Ānando nāmupaṭṭhāko,
bv26:22.6	upaṭṭhissatimaṁ jinaṁ.
bv26:23.1	Khemā uppalavaṇṇā ca,
bv26:23.2	aggā hessanti sāvikā;
bv26:23.3	Anāsavā santacittā,
bv26:23.4	vītarāgā samāhitā;
bv26:23.5	Bodhi tassa bhagavato,
bv26:23.6	assatthoti pavuccati.
bv26:24.1	Citto hatthāḷavako ca,
bv26:24.2	aggā hessantupaṭṭhakā;
bv26:24.3	Nandamātā ca uttarā,
bv26:24.4	aggā hessantupaṭṭhikā’.
bv26:25.1	Idaṁ sutvāna vacanaṁ,
bv26:25.2	assamassa mahesino;
bv26:25.3	Āmoditā naramarū,
bv26:25.4	buddhabījaṁ kira ayaṁ.
bv26:26.1	Ukkuṭṭhisaddā pavattanti,
bv26:26.2	apphoṭenti hasanti ca;
bv26:26.3	Katañjalī namassanti,
bv26:26.4	dasasahassī sadevakā.
bv26:27.1	‘Yadimassa lokanāthassa,
bv26:27.2	virajjhissāma sāsanaṁ;
bv26:27.3	Anāgatamhi addhāne,
bv26:27.4	hessāma sammukhā imaṁ.
bv26:28.1	Yathā manussā nadiṁ tarantā,
bv26:28.2	Paṭititthaṁ virajjhiya;
bv26:28.3	Heṭṭhā titthe gahetvāna,
bv26:28.4	Uttaranti mahānadiṁ.
bv26:29.1	Evamevaṁ mayaṁ sabbe,
bv26:29.2	yadi muñcāmimaṁ jinaṁ;
bv26:29.3	Anāgatamhi addhāne,
bv26:29.4	hessāma sammukhā imaṁ’.
bv26:30.1	Tassāpi vacanaṁ sutvā,
bv26:30.2	bhiyyo cittaṁ pasādayiṁ;
bv26:30.3	Uttariṁ vatamadhiṭṭhāsiṁ,
bv26:30.4	dasapāramipūriyā.
bv26:31.1	Evamahaṁ saṁsaritvā,
bv26:31.2	parivajjento anācaraṁ;
bv26:31.3	Dukkarañca kataṁ mayhaṁ,
bv26:31.4	bodhiyāyeva kāraṇā.
bv26:32.1	Nagaraṁ bārāṇasī nāma,
bv26:32.2	kikī nāmāsi khattiyo;
bv26:32.3	Vasate tattha nagare,
bv26:32.4	sambuddhassa mahākulaṁ.
bv26:33.1	Brāhmaṇo brahmadattova,
bv26:33.2	āsi buddhassa so pitā;
bv26:33.3	Dhanavatī nāma janikā,
bv26:33.4	kassapassa mahesino.
bv26:34.1	Duve vassasahassāni,
bv26:34.2	agāraṁ ajjha so vasi;
bv26:34.3	Haṁso yaso sirinando,
bv26:34.4	tayo pāsādamuttamā.
bv26:35.1	Tisoḷasasahassāni,
bv26:35.2	Nāriyo samalaṅkatā;
bv26:35.3	Sunandā nāma sā nārī,
bv26:35.4	Vijitaseno nāma atrajo.
bv26:36.1	Nimitte caturo disvā,
bv26:36.2	pāsādenābhinikkhami;
bv26:36.3	Sattāhaṁ padhānacāraṁ,
bv26:36.4	acarī purisuttamo.
bv26:37.1	Brahmunā yācito santo,
bv26:37.2	kassapo lokanāyako;
bv26:37.3	Vatti cakkaṁ mahāvīro,
bv26:37.4	migadāye naruttamo.
bv26:38.1	Tisso ca bhāradvājo ca,
bv26:38.2	ahesuṁ aggasāvakā;
bv26:38.3	Sabbamitto nāmupaṭṭhāko,
bv26:38.4	kassapassa mahesino.
bv26:39.1	Anuḷā uruvelā ca,
bv26:39.2	ahesuṁ aggasāvikā;
bv26:39.3	Bodhi tassa bhagavato,
bv26:39.4	nigrodhoti pavuccati.
bv26:40.1	Sumaṅgalo ghaṭikāro ca,
bv26:40.2	ahesuṁ aggupaṭṭhakā;
bv26:40.3	Vicitasenā bhaddā ca,
bv26:40.4	ahesuṁ aggupaṭṭhikā.
bv26:41.1	Uccattanena so buddho,
bv26:41.2	vīsatiratanuggato;
bv26:41.3	Vijjulaṭṭhīva ākāse,
bv26:41.4	candova gahapūrito.
bv26:42.1	Vīsativassasahassāni,
bv26:42.2	āyu tassa mahesino;
bv26:42.3	Tāvatā tiṭṭhamāno so,
bv26:42.4	tāresi janataṁ bahuṁ.
bv26:43.1	Dhammataḷākaṁ māpayitvā,
bv26:43.2	sīlaṁ datvā vilepanaṁ;
bv26:43.3	Dhammadussaṁ nivāsetvā,
bv26:43.4	dhammamālaṁ vibhajjiya.
bv26:44.1	Dhammavimalamādāsaṁ,
bv26:44.2	ṭhapayitvā mahājane;
bv26:44.3	Keci nibbānaṁ patthentā,
bv26:44.4	passantu me alaṅkaraṁ.
bv26:45.1	Sīlakañcukaṁ datvāna,
bv26:45.2	jhānakavacavammitaṁ;
bv26:45.3	Dhammacammaṁ pārupitvā,
bv26:45.4	datvā sannāhamuttamaṁ.
bv26:46.1	Satiphalakaṁ datvāna,
bv26:46.2	tikhiṇañāṇakuntimaṁ;
bv26:46.3	Dhammakhaggavaraṁ datvā,
bv26:46.4	sīlasaṁsaggamaddanaṁ.
bv26:47.1	Tevijjābhūsanaṁ datvāna,
bv26:47.2	āveḷaṁ caturo phale;
bv26:47.3	Chaḷabhiññābharaṇaṁ datvā,
bv26:47.4	dhammapupphapiḷandhanaṁ.
bv26:48.1	Saddhammapaṇḍaracchattaṁ,
bv26:48.2	datvā pāpanivāraṇaṁ;
bv26:48.3	Māpayitvābhayaṁ pupphaṁ,
bv26:48.4	nibbuto so sasāvako.
bv26:49.1	Eso hi sammāsambuddho,
bv26:49.2	appameyyo durāsado;
bv26:49.3	Eso hi dhammaratano,
bv26:49.4	svākkhāto ehipassiko.
bv26:50.1	Eso hi saṅgharatano,
bv26:50.2	suppaṭipanno anuttaro;
bv26:50.3	Sabbaṁ tamantarahitaṁ,
bv26:50.4	nanu rittā sabbasaṅkhārā.
bv26:51.1	Mahākassapo jino satthā,
bv26:51.2	Setabyārāmamhi nibbuto;
bv26:51.3	Tatthevassa jinathūpo,
bv26:51.4	Yojanubbedhamuggato”ti.
bv26:52.1	Kassapassa bhagavato vaṁso catuvīsatimo.
bv27:0.1	Buddhavaṁsa
bv27:0.2	27. Gotamabuddhavaṁsa
bv27:1.1	“Ahametarahi sambuddho,
bv27:1.2	gotamo sakyavaḍḍhano;
bv27:1.3	Padhānaṁ padahitvāna,
bv27:1.4	patto sambodhimuttamaṁ.
bv27:2.1	Brahmunā yācito santo,
bv27:2.2	dhammacakkaṁ pavattayiṁ;
bv27:2.3	Aṭṭhārasannaṁ koṭīnaṁ,
bv27:2.4	paṭhamābhisamayo ahu.
bv27:3.1	Tato parañca desente,
bv27:3.2	naradevasamāgame;
bv27:3.3	Gaṇanāya na vattabbo,
bv27:3.4	dutiyābhisamayo ahu.
bv27:4.1	Idhevāhaṁ etarahi,
bv27:4.2	ovadiṁ mama atrajaṁ;
bv27:4.3	Gaṇanāya na vattabbo,
bv27:4.4	tatiyābhisamayo ahu.
bv27:5.1	Ekosi sannipāto me,
bv27:5.2	sāvakānaṁ mahesinaṁ;
bv27:5.3	Aḍḍhateḷasasatānaṁ,
bv27:5.4	bhikkhūnāsi samāgamo.
bv27:6.1	Virocamāno vimalo,
bv27:6.2	bhikkhusaṅghassa majjhago;
bv27:6.3	Dadāmi patthitaṁ sabbaṁ,
bv27:6.4	maṇīva sabbakāmado.
bv27:7.1	Phalamākaṅkhamānānaṁ,
bv27:7.2	bhavacchandajahesinaṁ;
bv27:7.3	Catusaccaṁ pakāsemi,
bv27:7.4	anukampāya pāṇinaṁ.
bv27:8.1	Dasavīsasahassānaṁ,
bv27:8.2	dhammābhisamayo ahu;
bv27:8.3	Ekadvinnaṁ abhisamayo,
bv27:8.4	gaṇanāto asaṅkhiyo.
bv27:9.1	Vitthārikaṁ bāhujaññaṁ,
bv27:9.2	iddhaṁ phītaṁ suphullitaṁ;
bv27:9.3	Idha mayhaṁ sakyamunino,
bv27:9.4	sāsanaṁ suvisodhitaṁ.
bv27:10.1	Anāsavā vītarāgā,
bv27:10.2	santacittā samāhitā;
bv27:10.3	Bhikkhūnekasatā sabbe,
bv27:10.4	parivārenti maṁ sadā.
bv27:11.1	Idāni ye etarahi,
bv27:11.2	jahanti mānusaṁ bhavaṁ;
bv27:11.3	Appattamānasā sekhā,
bv27:11.4	te bhikkhū viññugarahitā.
bv27:12.1	Ariyañca santhomayantā,
bv27:12.2	sadā dhammaratā janā;
bv27:12.3	Bujjhissanti satimanto,
bv27:12.4	saṁsārasaritaṁ gatā.
bv27:13.1	Nagaraṁ kapilavatthu me,
bv27:13.2	rājā suddhodano pitā;
bv27:13.3	Mayhaṁ janettikā mātā,
bv27:13.4	māyādevīti vuccati.
bv27:14.1	Ekūnatiṁsavassāni,
bv27:14.2	agāraṁ ajjhahaṁ vasiṁ;
bv27:14.3	Rammo surammo subhako,
bv27:14.4	tayo pāsādamuttamā.
bv27:15.1	Cattārīsasahassāni,
bv27:15.2	nāriyo samalaṅkatā;
bv27:15.3	Bhaddakañcanā nāma nārī,
bv27:15.4	rāhulo nāma atrajo.
bv27:16.1	Nimitte caturo disvā,
bv27:16.2	assayānena nikkhamiṁ;
bv27:16.3	Chabbassaṁ padhānacāraṁ,
bv27:16.4	acariṁ dukkaraṁ ahaṁ.
bv27:17.1	Bārāṇasiyaṁ isipatane,
bv27:17.2	Cakkaṁ pavattitaṁ mayā;
bv27:17.3	Ahaṁ gotamasambuddho,
bv27:17.4	Saraṇaṁ sabbapāṇinaṁ.
bv27:18.1	Kolito upatisso ca,
bv27:18.2	dve bhikkhū aggasāvakā;
bv27:18.3	Ānando nāmupaṭṭhāko,
bv27:18.4	santikāvacaro mama;
bv27:18.5	Khemā uppalavaṇṇā ca,
bv27:18.6	bhikkhunī aggasāvikā.
bv27:19.1	Citto hatthāḷavako ca,
bv27:19.2	aggupaṭṭhākupāsakā;
bv27:19.3	Nandamātā ca uttarā,
bv27:19.4	aggupaṭṭhākupāsikā.
bv27:20.1	Ahaṁ assatthamūlamhi,
bv27:20.2	patto sambodhimuttamaṁ;
bv27:20.3	Byāmappabhā sadā mayhaṁ,
bv27:20.4	soḷasahatthamuggatā.
bv27:21.1	Appaṁ vassasataṁ āyu,
bv27:21.2	idānetarahi vijjati;
bv27:21.3	Tāvatā tiṭṭhamānohaṁ,
bv27:21.4	tāremi janataṁ bahuṁ.
bv27:22.1	Ṭhapayitvāna dhammukkaṁ,
bv27:22.2	pacchimaṁ janabodhanaṁ;
bv27:22.3	Ahampi nacirasseva,
bv27:22.4	saddhiṁ sāvakasaṅghato;
bv27:22.5	Idheva parinibbissaṁ,
bv27:22.6	aggīvāhārasaṅkhayā.
bv27:23.1	Tāni ca atulatejāni,
bv27:23.2	Imāni ca dasabalāni;
bv27:23.3	Ayañca guṇadhāraṇo deho,
bv27:23.4	Dvattiṁsavaralakkhaṇavicitto.
bv27:24.1	Dasa disā pabhāsetvā,
bv27:24.2	Sataraṁsīva chappabhā;
bv27:24.3	Sabbaṁ tamantarahissanti,
bv27:24.4	Nanu rittā sabbasaṅkhārā”ti.
bv27:25.1	Gotamassa bhagavato vaṁso pañcavīsatimo.
bv28:0.1	Buddhavaṁsa
bv28:0.2	28. Buddhapakiṇṇakakaṇḍa
bv28:1.1	Aparimeyyito kappe,
bv28:1.2	caturo āsuṁ vināyakā;
bv28:1.3	Taṇhaṅkaro medhaṅkaro,
bv28:1.4	athopi saraṇaṅkaro;
bv28:1.5	Dīpaṅkaro ca sambuddho,
bv28:1.6	ekakappamhi te jinā.
bv28:2.1	Dīpaṅkarassa aparena,
bv28:2.2	koṇḍañño nāma nāyako;
bv28:2.3	Ekova ekakappamhi,
bv28:2.4	tāresi janataṁ bahuṁ.
bv28:3.1	Dīpaṅkarassa bhagavato,
bv28:3.2	koṇḍaññassa ca satthuno;
bv28:3.3	Etesaṁ antarā kappā,
bv28:3.4	gaṇanāto asaṅkhiyā.
bv28:4.1	Koṇḍaññassa aparena,
bv28:4.2	maṅgalo nāma nāyako;
bv28:4.3	Tesampi antarā kappā,
bv28:4.4	gaṇanāto asaṅkhiyā.
bv28:5.1	Maṅgalo ca sumano ca,
bv28:5.2	revato sobhito muni;
bv28:5.3	Tepi buddhā ekakappe,
bv28:5.4	cakkhumanto pabhaṅkarā.
bv28:6.1	Sobhitassa aparena,
bv28:6.2	anomadassī mahāyaso;
bv28:6.3	Tesampi antarā kappā,
bv28:6.4	gaṇanāto asaṅkhiyā.
bv28:7.1	Anomadassī padumo,
bv28:7.2	nārado cāpi nāyako;
bv28:7.3	Tepi buddhā ekakappe,
bv28:7.4	tamantakārakā munī.
bv28:8.1	Nāradassa aparena,
bv28:8.2	Padumuttaro nāma nāyako;
bv28:8.3	Ekakappamhi uppanno,
bv28:8.4	Tāresi janataṁ bahuṁ.
bv28:9.1	Nāradassa bhagavato,
bv28:9.2	padumuttarassa satthuno;
bv28:9.3	Tesampi antarā kappā,
bv28:9.4	gaṇanāto asaṅkhiyā.
bv28:10.1	Kappasatasahassamhi,
bv28:10.2	eko āsi mahāmuni;
bv28:10.3	Padumuttaro lokavidū,
bv28:10.4	āhutīnaṁ paṭiggaho.
bv28:11.1	Tiṁsakappasahassamhi,
bv28:11.2	duve āsuṁ vināyakā;
bv28:11.3	Sumedho ca sujāto ca,
bv28:11.4	orato padumuttarā.
bv28:12.1	Aṭṭhārase kappasate,
bv28:12.2	tayo āsuṁ vināyakā;
bv28:12.3	Piyadassī atthadassī,
bv28:12.4	dhammadassī ca nāyakā.
bv28:13.1	Orato ca sujātassa,
bv28:13.2	sambuddhā dvipaduttamā;
bv28:13.3	Ekakappamhi te buddhā,
bv28:13.4	loke appaṭipuggalā.
bv28:14.1	Catunnavutito kappe,
bv28:14.2	eko āsi mahāmuni;
bv28:14.3	Siddhattho so lokavidū,
bv28:14.4	sallakatto anuttaro.
bv28:15.1	Dvenavute ito kappe,
bv28:15.2	duve āsuṁ vināyakā;
bv28:15.3	Tisso phusso ca sambuddhā,
bv28:15.4	asamā appaṭipuggalā.
bv28:16.1	Ekanavutito kappe,
bv28:16.2	vipassī nāma nāyako;
bv28:16.3	Sopi buddho kāruṇiko,
bv28:16.4	satte mocesi bandhanā.
bv28:17.1	Ekatiṁse ito kappe,
bv28:17.2	duve āsuṁ vināyakā;
bv28:17.3	Sikhī ca vessabhū ceva,
bv28:17.4	asamā appaṭipuggalā.
bv28:18.1	Imamhi bhaddake kappe,
bv28:18.2	tayo āsuṁ vināyakā;
bv28:18.3	Kakusandho koṇāgamano,
bv28:18.4	kassapo cāpi nāyako.
bv28:19.1	Ahametarahi sambuddho,
bv28:19.2	metteyyo cāpi hessati;
bv28:19.3	Etepime pañca buddhā,
bv28:19.4	dhīrā lokānukampakā.
bv28:20.1	Etesaṁ dhammarājūnaṁ,
bv28:20.2	Aññesaṁnekakoṭinaṁ;
bv28:20.3	Ācikkhitvāna taṁ maggaṁ,
bv28:20.4	Nibbutā te sasāvakāti.
bv28:21.1	Buddhapakiṇṇakakaṇḍaṁ niṭṭhitaṁ.
bv29:0.1	Buddhavaṁsa
bv29:0.2	29. Dhātubhājanīyakathā
bv29:1.1	Mahāgotamo jinavaro,
bv29:1.2	kusināramhi nibbuto;
bv29:1.3	Dhātuvitthārikaṁ āsi,
bv29:1.4	tesu tesu padesato.
bv29:2.1	Eko ajātasattussa,
bv29:2.2	eko vesāliyā pure;
bv29:2.3	Eko kapilavatthusmiṁ,
bv29:2.4	eko ca allakappake.
bv29:3.1	Eko ca rāmagāmamhi,
bv29:3.2	eko ca veṭhadīpake;
bv29:3.3	Eko pāveyyake malle,
bv29:3.4	eko ca kosinārake.
bv29:4.1	Kumbhassa thūpaṁ kāresi,
bv29:4.2	brāhmaṇo doṇasavhayo;
bv29:4.3	Aṅgārathūpaṁ kāresuṁ,
bv29:4.4	moriyā tuṭṭhamānasā.
bv29:5.1	Aṭṭha sārīrikā thūpā,
bv29:5.2	navamo kumbhacetiyo;
bv29:5.3	Aṅgārathūpo dasamo,
bv29:5.4	tadāyeva patiṭṭhito.
bv29:6.1	Uṇhīsaṁ catasso dāṭhā,
bv29:6.2	akkhakā dve ca dhātuyo;
bv29:6.3	Asambhinnā imā satta,
bv29:6.4	sesā bhinnāva dhātuyo.
bv29:7.1	Mahantā muggamattā ca,
bv29:7.2	majjhimā bhinnataṇḍulā;
bv29:7.3	Khuddakā sāsapamattā ca,
bv29:7.4	nānāvaṇṇā ca dhātuyo.
bv29:8.1	Mahantā suvaṇṇavaṇṇā ca,
bv29:8.2	muttavaṇṇā ca majjhimā;
bv29:8.3	Khuddakā makulavaṇṇā ca,
bv29:8.4	soḷasadoṇamattikā.
bv29:9.1	Mahantā pañca nāḷiyo,
bv29:9.2	nāḷiyo pañca majjhimā;
bv29:9.3	Khuddakā cha nāḷī ceva,
bv29:9.4	etā sabbāpi dhātuyo.
bv29:10.1	Uṇhīsaṁ sīhaḷe dīpe,
bv29:10.2	brahmaloke ca vāmakaṁ;
bv29:10.3	Sīhaḷe dakkhiṇakkhañca,
bv29:10.4	sabbāpetā patiṭṭhitā.
bv29:11.1	Ekā dāṭhā tidasapure,
bv29:11.2	ekā nāgapure ahu;
bv29:11.3	Ekā gandhāravisaye,
bv29:11.4	ekā kaliṅgarājino.
bv29:12.1	Cattālīsasamā dantā,
bv29:12.2	kesā lomā ca sabbaso;
bv29:12.3	Devā hariṁsu ekekaṁ,
bv29:12.4	cakkavāḷaparamparā.
bv29:13.1	Vajirāyaṁ bhagavato,
bv29:13.2	Patto daṇḍañca cīvaraṁ;
bv29:13.3	Nivāsanaṁ kulaghare,
bv29:13.4	Paccattharaṇaṁ kapilavhaye.
bv29:14.1	Pāṭaliputtapuramhi,
bv29:14.2	karaṇaṁ kāyabandhanaṁ;
bv29:14.3	Campāyudakasāṭiyaṁ,
bv29:14.4	uṇṇalomañca kosale.
bv29:15.1	Kāsāvaṁ brahmaloke ca,
bv29:15.2	veṭhanaṁ tidase pure;
bv29:15.3	Nisīdanaṁ avantīsu,
bv29:15.4	raṭṭhe attharaṇaṁ tadā.
bv29:16.1	Araṇī ca mithilāyaṁ,
bv29:16.2	videhe parisāvanaṁ;
bv29:16.3	Vāsi sūcigharañcāpi,
bv29:16.4	indapatthapure tadā.
bv29:17.1	Parikkhārā avasesā,
bv29:17.2	janapade aparantake;
bv29:17.3	Paribhuttāni muninā,
bv29:17.4	akaṁsu manujā tadā.
bv29:18.1	Dhātuvitthārikaṁ āsi,
bv29:18.2	Gotamassa mahesino;
bv29:18.3	Pāṇīnaṁ anukampāya,
bv29:18.4	Ahu porāṇikaṁ tadāti.