# Aṅguttara Nikāya — root Pali (Mahāsaṅgīti) · suttacentral/bilara-data@da23a8afdd1b · seat EA-CORPORA-29/08

an1.1:0.1	Aṅguttara Nikāya 1
an1.1:0.2	1. Rūpādivagga
an1.1:1.0	1
an1.1:1.1	Evaṁ me sutaṁ—
an1.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an1.1:1.3	Tatra kho bhagavā bhikkhū āmantesi:
an1.1:1.4	“bhikkhavo”ti.
an1.1:1.5	“Bhadante”ti te bhikkhū bhagavato paccassosuṁ.
an1.1:1.6	Bhagavā etadavoca:
an1.1:2.1	“Nāhaṁ, bhikkhave, aññaṁ ekarūpampi samanupassāmi yaṁ evaṁ purisassa cittaṁ pariyādāya tiṭṭhati yathayidaṁ, bhikkhave, itthirūpaṁ.
an1.1:2.2	Itthirūpaṁ, bhikkhave, purisassa cittaṁ pariyādāya tiṭṭhatī”ti.
an1.1:2.3	Paṭhamaṁ.
an1.2:1.0	2
an1.2:1.1	“Nāhaṁ, bhikkhave, aññaṁ ekasaddampi samanupassāmi yaṁ evaṁ purisassa cittaṁ pariyādāya tiṭṭhati yathayidaṁ, bhikkhave, itthisaddo.
an1.2:1.2	Itthisaddo, bhikkhave, purisassa cittaṁ pariyādāya tiṭṭhatī”ti.
an1.2:1.3	Dutiyaṁ.
an1.3:1.0	3
an1.3:1.1	“Nāhaṁ, bhikkhave, aññaṁ ekagandhampi samanupassāmi yaṁ evaṁ purisassa cittaṁ pariyādāya tiṭṭhati yathayidaṁ, bhikkhave, itthigandho.
an1.3:1.2	Itthigandho, bhikkhave, purisassa cittaṁ pariyādāya tiṭṭhatī”ti.
an1.3:1.3	Tatiyaṁ.
an1.4:1.0	4
an1.4:1.1	“Nāhaṁ, bhikkhave, aññaṁ ekarasampi samanupassāmi yaṁ evaṁ purisassa cittaṁ pariyādāya tiṭṭhati yathayidaṁ, bhikkhave, itthiraso.
an1.4:1.2	Itthiraso, bhikkhave, purisassa cittaṁ pariyādāya tiṭṭhatī”ti.
an1.4:1.3	Catutthaṁ.
an1.5:1.0	5
an1.5:1.1	“Nāhaṁ, bhikkhave, aññaṁ ekaphoṭṭhabbampi samanupassāmi yaṁ evaṁ purisassa cittaṁ pariyādāya tiṭṭhati yathayidaṁ, bhikkhave, itthiphoṭṭhabbo.
an1.5:1.2	Itthiphoṭṭhabbo, bhikkhave, purisassa cittaṁ pariyādāya tiṭṭhatī”ti.
an1.5:1.3	Pañcamaṁ.
an1.6:1.0	6
an1.6:1.1	“Nāhaṁ, bhikkhave, aññaṁ ekarūpampi samanupassāmi yaṁ evaṁ itthiyā cittaṁ pariyādāya tiṭṭhati yathayidaṁ, bhikkhave, purisarūpaṁ.
an1.6:1.2	Purisarūpaṁ, bhikkhave, itthiyā cittaṁ pariyādāya tiṭṭhatī”ti.
an1.6:1.3	Chaṭṭhaṁ.
an1.7:1.0	7
an1.7:1.1	“Nāhaṁ, bhikkhave, aññaṁ ekasaddampi samanupassāmi yaṁ evaṁ itthiyā cittaṁ pariyādāya tiṭṭhati yathayidaṁ, bhikkhave, purisasaddo.
an1.7:1.2	Purisasaddo, bhikkhave, itthiyā cittaṁ pariyādāya tiṭṭhatī”ti.
an1.7:1.3	Sattamaṁ.
an1.8:1.0	8
an1.8:1.1	“Nāhaṁ, bhikkhave, aññaṁ ekagandhampi samanupassāmi yaṁ evaṁ itthiyā cittaṁ pariyādāya tiṭṭhati yathayidaṁ, bhikkhave, purisagandho.
an1.8:1.2	Purisagandho, bhikkhave, itthiyā cittaṁ pariyādāya tiṭṭhatī”ti.
an1.8:1.3	Aṭṭhamaṁ.
an1.9:1.0	9
an1.9:1.1	“Nāhaṁ, bhikkhave, aññaṁ ekarasampi samanupassāmi yaṁ evaṁ itthiyā cittaṁ pariyādāya tiṭṭhati yathayidaṁ, bhikkhave, purisaraso.
an1.9:1.2	Purisaraso, bhikkhave, itthiyā cittaṁ pariyādāya tiṭṭhatī”ti.
an1.9:1.3	Navamaṁ.
an1.10:1.0	10
an1.10:1.1	“Nāhaṁ, bhikkhave, aññaṁ ekaphoṭṭhabbampi samanupassāmi yaṁ evaṁ itthiyā cittaṁ pariyādāya tiṭṭhati yathayidaṁ, bhikkhave, purisaphoṭṭhabbo.
an1.10:1.2	Purisaphoṭṭhabbo, bhikkhave, itthiyā cittaṁ pariyādāya tiṭṭhatī”ti.
an1.10:1.3	Dasamaṁ.
an1.10:1.4	Rūpādivaggo paṭhamo.
an1.11:0.1	Aṅguttara Nikāya 1
an1.11:0.2	2. Nīvaraṇappahānavagga
an1.11:1.0	11
an1.11:1.1	“Nāhaṁ, bhikkhave, aññaṁ ekadhammampi samanupassāmi yena anuppanno vā kāmacchando uppajjati uppanno vā kāmacchando bhiyyobhāvāya vepullāya saṁvattati yathayidaṁ, bhikkhave, subhanimittaṁ.
an1.11:1.2	Subhanimittaṁ, bhikkhave, ayoniso manasi karoto anuppanno ceva kāmacchando uppajjati uppanno ca kāmacchando bhiyyobhāvāya vepullāya saṁvattatī”ti.
an1.11:1.3	Paṭhamaṁ.
an1.12:1.0	12
an1.12:1.1	“Nāhaṁ, bhikkhave, aññaṁ ekadhammampi samanupassāmi yena anuppanno vā byāpādo uppajjati uppanno vā byāpādo bhiyyobhāvāya vepullāya saṁvattati yathayidaṁ, bhikkhave, paṭighanimittaṁ.
an1.12:1.2	Paṭighanimittaṁ, bhikkhave, ayoniso manasi karoto anuppanno ceva byāpādo uppajjati uppanno ca byāpādo bhiyyobhāvāya vepullāya saṁvattatī”ti.
an1.12:1.3	Dutiyaṁ.
an1.13:1.0	13
an1.13:1.1	“Nāhaṁ, bhikkhave, aññaṁ ekadhammampi samanupassāmi yena anuppannaṁ vā thinamiddhaṁ uppajjati uppannaṁ vā thinamiddhaṁ bhiyyobhāvāya vepullāya saṁvattati yathayidaṁ, bhikkhave, arati tandī vijambhitā bhattasammado cetaso ca līnattaṁ.
an1.13:1.2	Līnacittassa, bhikkhave, anuppannañceva thinamiddhaṁ uppajjati uppannañca thinamiddhaṁ bhiyyobhāvāya vepullāya saṁvattatī”ti.
an1.13:1.3	Tatiyaṁ.
an1.14:1.0	14
an1.14:1.1	“Nāhaṁ, bhikkhave, aññaṁ ekadhammampi samanupassāmi yena anuppannaṁ vā uddhaccakukkuccaṁ uppajjati uppannaṁ vā uddhaccakukkuccaṁ bhiyyobhāvāya vepullāya saṁvattati yathayidaṁ, bhikkhave, cetaso avūpasamo.
an1.14:1.2	Avūpasantacittassa, bhikkhave, anuppannañceva uddhaccakukkuccaṁ uppajjati uppannañca uddhaccakukkuccaṁ bhiyyobhāvāya vepullāya saṁvattatī”ti.
an1.14:1.3	Catutthaṁ.
an1.15:1.0	15
an1.15:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā vicikicchā uppajjati uppannā vā vicikicchā bhiyyobhāvāya vepullāya saṁvattati yathayidaṁ, bhikkhave, ayonisomanasikāro.
an1.15:1.2	Ayoniso, bhikkhave, manasi karoto anuppannā ceva vicikicchā uppajjati uppannā ca vicikicchā bhiyyobhāvāya vepullāya saṁvattatī”ti.
an1.15:1.3	Pañcamaṁ.
an1.16:1.0	16
an1.16:1.1	“Nāhaṁ, bhikkhave, aññaṁ ekadhammampi samanupassāmi yena anuppanno vā kāmacchando nuppajjati uppanno vā kāmacchando pahīyati yathayidaṁ, bhikkhave, asubhanimittaṁ.
an1.16:1.2	Asubhanimittaṁ, bhikkhave, yoniso manasi karoto anuppanno ceva kāmacchando nuppajjati uppanno ca kāmacchando pahīyatī”ti.
an1.16:1.3	Chaṭṭhaṁ.
an1.17:1.0	17
an1.17:1.1	“Nāhaṁ, bhikkhave, aññaṁ ekadhammampi samanupassāmi yena anuppanno vā byāpādo nuppajjati uppanno vā byāpādo pahīyati yathayidaṁ, bhikkhave, mettā cetovimutti.
an1.17:1.2	Mettaṁ, bhikkhave, cetovimuttiṁ yoniso manasi karoto anuppanno ceva byāpādo nuppajjati uppanno ca byāpādo pahīyatī”ti.
an1.17:1.3	Sattamaṁ.
an1.18:1.0	18
an1.18:1.1	“Nāhaṁ, bhikkhave, aññaṁ ekadhammampi samanupassāmi yena anuppannaṁ vā thinamiddhaṁ nuppajjati uppannaṁ vā thinamiddhaṁ pahīyati yathayidaṁ, bhikkhave, ārambhadhātu nikkamadhātu parakkamadhātu.
an1.18:1.2	Āraddhavīriyassa, bhikkhave, anuppannañceva thinamiddhaṁ nuppajjati uppannañca thinamiddhaṁ pahīyatī”ti.
an1.18:1.3	Aṭṭhamaṁ.
an1.19:1.0	19
an1.19:1.1	“Nāhaṁ, bhikkhave, aññaṁ ekadhammampi samanupassāmi yena anuppannaṁ vā uddhaccakukkuccaṁ nuppajjati uppannaṁ vā uddhaccakukkuccaṁ pahīyati yathayidaṁ, bhikkhave, cetaso vūpasamo.
an1.19:1.2	Vūpasantacittassa, bhikkhave, anuppannañceva uddhaccakukkuccaṁ nuppajjati uppannañca uddhaccakukkuccaṁ pahīyatī”ti.
an1.19:1.3	Navamaṁ.
an1.20:1.0	20
an1.20:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā vicikicchā nuppajjati uppannā vā vicikicchā pahīyati yathayidaṁ, bhikkhave, yonisomanasikāro.
an1.20:1.2	Yoniso, bhikkhave, manasi karoto anuppannā ceva vicikicchā nuppajjati uppannā ca vicikicchā pahīyatī”ti.
an1.20:1.3	Dasamaṁ.
an1.20:1.4	Nīvaraṇappahānavaggo dutiyo.
an1.21:0.1	Aṅguttara Nikāya 1
an1.21:0.2	3. Akammaniyavagga
an1.21:1.0	21
an1.21:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ abhāvitaṁ akammaniyaṁ hoti yathayidaṁ, bhikkhave, cittaṁ.
an1.21:1.2	Cittaṁ, bhikkhave, abhāvitaṁ akammaniyaṁ hotī”ti.
an1.21:1.3	Paṭhamaṁ.
an1.22:1.0	22
an1.22:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ bhāvitaṁ kammaniyaṁ hoti yathayidaṁ, bhikkhave, cittaṁ.
an1.22:1.2	Cittaṁ, bhikkhave, bhāvitaṁ kammaniyaṁ hotī”ti.
an1.22:1.3	Dutiyaṁ.
an1.23:1.0	23
an1.23:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ abhāvitaṁ mahato anatthāya saṁvattati yathayidaṁ, bhikkhave, cittaṁ.
an1.23:1.2	Cittaṁ, bhikkhave, abhāvitaṁ mahato anatthāya saṁvattatī”ti.
an1.23:1.3	Tatiyaṁ.
an1.24:1.0	24
an1.24:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ bhāvitaṁ mahato atthāya saṁvattati yathayidaṁ, bhikkhave, cittaṁ.
an1.24:1.2	Cittaṁ, bhikkhave, bhāvitaṁ mahato atthāya saṁvattatī”ti.
an1.24:1.3	Catutthaṁ.
an1.25:1.0	25
an1.25:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ abhāvitaṁ apātubhūtaṁ mahato anatthāya saṁvattati yathayidaṁ, bhikkhave, cittaṁ.
an1.25:1.2	Cittaṁ, bhikkhave, abhāvitaṁ apātubhūtaṁ mahato anatthāya saṁvattatī”ti.
an1.25:1.3	Pañcamaṁ.
an1.26:1.0	26
an1.26:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ bhāvitaṁ pātubhūtaṁ mahato atthāya saṁvattati yathayidaṁ, bhikkhave, cittaṁ.
an1.26:1.2	Cittaṁ, bhikkhave, bhāvitaṁ pātubhūtaṁ mahato atthāya saṁvattatī”ti.
an1.26:1.3	Chaṭṭhaṁ.
an1.27:1.0	27
an1.27:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ abhāvitaṁ abahulīkataṁ mahato anatthāya saṁvattati yathayidaṁ, bhikkhave, cittaṁ.
an1.27:1.2	Cittaṁ, bhikkhave, abhāvitaṁ abahulīkataṁ mahato anatthāya saṁvattatī”ti.
an1.27:1.3	Sattamaṁ.
an1.28:1.0	28
an1.28:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ bhāvitaṁ bahulīkataṁ mahato atthāya saṁvattati yathayidaṁ, bhikkhave, cittaṁ.
an1.28:1.2	Cittaṁ, bhikkhave, bhāvitaṁ bahulīkataṁ mahato atthāya saṁvattatī”ti.
an1.28:1.3	Aṭṭhamaṁ.
an1.29:1.0	29
an1.29:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ abhāvitaṁ abahulīkataṁ dukkhādhivahaṁ hoti yathayidaṁ, bhikkhave, cittaṁ.
an1.29:1.2	Cittaṁ, bhikkhave, abhāvitaṁ abahulīkataṁ dukkhādhivahaṁ hotī”ti.
an1.29:1.3	Navamaṁ.
an1.30:1.0	30
an1.30:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ bhāvitaṁ bahulīkataṁ sukhādhivahaṁ hoti yathayidaṁ, bhikkhave, cittaṁ.
an1.30:1.2	Cittaṁ, bhikkhave, bhāvitaṁ bahulīkataṁ sukhādhivahaṁ hotī”ti.
an1.30:1.3	Dasamaṁ.
an1.30:1.4	Akammaniyavaggo tatiyo.
an1.31:0.1	Aṅguttara Nikāya 1
an1.31:0.2	4. Adantavagga
an1.31:1.0	31
an1.31:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ adantaṁ mahato anatthāya saṁvattati yathayidaṁ, bhikkhave, cittaṁ.
an1.31:1.2	Cittaṁ, bhikkhave, adantaṁ mahato anatthāya saṁvattatī”ti.
an1.31:1.3	Paṭhamaṁ.
an1.32:1.0	32
an1.32:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ dantaṁ mahato atthāya saṁvattati yathayidaṁ, bhikkhave, cittaṁ.
an1.32:1.2	Cittaṁ, bhikkhave, dantaṁ mahato atthāya saṁvattatī”ti.
an1.32:1.3	Dutiyaṁ.
an1.33:1.0	33
an1.33:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ aguttaṁ mahato anatthāya saṁvattati yathayidaṁ, bhikkhave, cittaṁ.
an1.33:1.2	Cittaṁ, bhikkhave, aguttaṁ mahato anatthāya saṁvattatī”ti.
an1.33:1.3	Tatiyaṁ.
an1.34:1.0	34
an1.34:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ guttaṁ mahato atthāya saṁvattati yathayidaṁ, bhikkhave, cittaṁ.
an1.34:1.2	Cittaṁ, bhikkhave, guttaṁ mahato atthāya saṁvattatī”ti.
an1.34:1.3	Catutthaṁ.
an1.35:1.0	35
an1.35:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ arakkhitaṁ mahato anatthāya saṁvattati yathayidaṁ, bhikkhave, cittaṁ.
an1.35:1.2	Cittaṁ, bhikkhave, arakkhitaṁ mahato anatthāya saṁvattatī”ti.
an1.35:1.3	Pañcamaṁ.
an1.36:1.0	36
an1.36:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ rakkhitaṁ mahato atthāya saṁvattati yathayidaṁ, bhikkhave, cittaṁ.
an1.36:1.2	Cittaṁ, bhikkhave, rakkhitaṁ mahato atthāya saṁvattatī”ti.
an1.36:1.3	Chaṭṭhaṁ.
an1.37:1.0	37
an1.37:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ asaṁvutaṁ mahato anatthāya saṁvattati yathayidaṁ, bhikkhave, cittaṁ.
an1.37:1.2	Cittaṁ, bhikkhave, asaṁvutaṁ mahato anatthāya saṁvattatī”ti.
an1.37:1.3	Sattamaṁ.
an1.38:1.0	38
an1.38:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ saṁvutaṁ mahato atthāya saṁvattati yathayidaṁ, bhikkhave, cittaṁ.
an1.38:1.2	Cittaṁ, bhikkhave, saṁvutaṁ mahato atthāya saṁvattatī”ti.
an1.38:1.3	Aṭṭhamaṁ.
an1.39:1.0	39
an1.39:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ adantaṁ aguttaṁ arakkhitaṁ asaṁvutaṁ mahato anatthāya saṁvattati yathayidaṁ, bhikkhave, cittaṁ.
an1.39:1.2	Cittaṁ, bhikkhave, adantaṁ aguttaṁ arakkhitaṁ asaṁvutaṁ mahato anatthāya saṁvattatī”ti.
an1.39:1.3	Navamaṁ.
an1.40:1.0	40
an1.40:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ dantaṁ guttaṁ rakkhitaṁ saṁvutaṁ mahato atthāya saṁvattati yathayidaṁ, bhikkhave, cittaṁ.
an1.40:1.2	Cittaṁ, bhikkhave, dantaṁ guttaṁ rakkhitaṁ saṁvutaṁ mahato atthāya saṁvattatī”ti.
an1.40:1.3	Dasamaṁ.
an1.40:1.4	Adantavaggo catuttho.
an1.41:0.1	Aṅguttara Nikāya 1
an1.41:0.2	5. Paṇihitaacchavagga
an1.41:1.0	41
an1.41:1.1	“Seyyathāpi, bhikkhave, sālisūkaṁ vā yavasūkaṁ vā micchāpaṇihitaṁ hatthena vā pādena vā akkantaṁ hatthaṁ vā pādaṁ vā bhecchati lohitaṁ vā uppādessatīti netaṁ ṭhānaṁ vijjati.
an1.41:1.2	Taṁ kissa hetu?
an1.41:1.3	Micchāpaṇihitattā, bhikkhave, sūkassa.
an1.41:1.4	Evamevaṁ kho, bhikkhave, so vata bhikkhu micchāpaṇihitena cittena avijjaṁ bhecchati, vijjaṁ uppādessati, nibbānaṁ sacchikarissatīti netaṁ ṭhānaṁ vijjati.
an1.41:1.5	Taṁ kissa hetu?
an1.41:1.6	Micchāpaṇihitattā, bhikkhave, cittassā”ti.
an1.41:1.7	Paṭhamaṁ.
an1.42:1.0	42
an1.42:1.1	“Seyyathāpi, bhikkhave, sālisūkaṁ vā yavasūkaṁ vā sammāpaṇihitaṁ hatthena vā pādena vā akkantaṁ hatthaṁ vā pādaṁ vā bhecchati lohitaṁ vā uppādessatīti ṭhānametaṁ vijjati.
an1.42:1.2	Taṁ kissa hetu?
an1.42:1.3	Sammāpaṇihitattā, bhikkhave, sūkassa.
an1.42:1.4	Evamevaṁ kho, bhikkhave, so vata bhikkhu sammāpaṇihitena cittena avijjaṁ bhecchati, vijjaṁ uppādessati, nibbānaṁ sacchikarissatīti ṭhānametaṁ vijjati.
an1.42:1.5	Taṁ kissa hetu?
an1.42:1.6	Sammāpaṇihitattā, bhikkhave, cittassā”ti.
an1.42:1.7	Dutiyaṁ.
an1.43:1.0	43
an1.43:1.1	“Idhāhaṁ, bhikkhave, ekaccaṁ puggalaṁ paduṭṭhacittaṁ evaṁ cetasā ceto paricca pajānāmi:
an1.43:1.2	‘imamhi ce ayaṁ samaye puggalo kālaṁ kareyya, yathābhataṁ nikkhitto evaṁ niraye’.
an1.43:1.3	Taṁ kissa hetu?
an1.43:1.4	Cittaṁ hissa, bhikkhave, paduṭṭhaṁ.
an1.43:1.5	Cetopadosahetu pana, bhikkhave, evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjantī”ti.
an1.43:1.6	Tatiyaṁ.
an1.44:1.0	44
an1.44:1.1	“Idhāhaṁ, bhikkhave, ekaccaṁ puggalaṁ pasannacittaṁ evaṁ cetasā ceto paricca pajānāmi:
an1.44:1.2	‘imamhi ce ayaṁ samaye puggalo kālaṁ kareyya, yathābhataṁ nikkhitto evaṁ sagge’.
an1.44:1.3	Taṁ kissa hetu?
an1.44:1.4	Cittaṁ hissa, bhikkhave, pasannaṁ.
an1.44:1.5	Cetopasādahetu pana, bhikkhave, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.
an1.44:1.6	Catutthaṁ.
an1.45:1.0	45
an1.45:1.1	“Seyyathāpi, bhikkhave, udakarahado āvilo luḷito kalalībhūto tattha cakkhumā puriso tīre ṭhito na passeyya sippisambukampi sakkharakaṭhalampi macchagumbampi carantampi tiṭṭhantampi.
an1.45:1.2	Taṁ kissa hetu?
an1.45:1.3	Āvilattā, bhikkhave, udakassa.
an1.45:1.4	Evamevaṁ kho, bhikkhave, so vata bhikkhu āvilena cittena attatthaṁ vā ñassati paratthaṁ vā ñassati ubhayatthaṁ vā ñassati uttariṁ vā manussadhammā alamariyañāṇadassanavisesaṁ sacchikarissatīti netaṁ ṭhānaṁ vijjati.
an1.45:1.5	Taṁ kissa hetu?
an1.45:1.6	Āvilattā, bhikkhave, cittassā”ti.
an1.45:1.7	Pañcamaṁ.
an1.46:1.0	46
an1.46:1.1	“Seyyathāpi, bhikkhave, udakarahado accho vippasanno anāvilo tattha cakkhumā puriso tīre ṭhito passeyya sippisambukampi sakkharakaṭhalampi macchagumbampi carantampi tiṭṭhantampi.
an1.46:1.2	Taṁ kissa hetu?
an1.46:1.3	Anāvilattā, bhikkhave, udakassa.
an1.46:1.4	Evamevaṁ kho, bhikkhave, so vata bhikkhu anāvilena cittena attatthaṁ vā ñassati paratthaṁ vā ñassati ubhayatthaṁ vā ñassati uttariṁ vā manussadhammā alamariyañāṇadassanavisesaṁ sacchikarissatīti ṭhānametaṁ vijjati.
an1.46:1.5	Taṁ kissa hetu?
an1.46:1.6	Anāvilattā, bhikkhave, cittassā”ti.
an1.46:1.7	Chaṭṭhaṁ.
an1.47:1.0	47
an1.47:1.1	“Seyyathāpi, bhikkhave, yāni kānici rukkhajātānaṁ phandano tesaṁ aggamakkhāyati yadidaṁ mudutāya ceva kammaññatāya ca.
an1.47:1.2	Evamevaṁ kho ahaṁ, bhikkhave, nāññaṁ ekadhammampi samanupassāmi yaṁ evaṁ bhāvitaṁ bahulīkataṁ mudu ca hoti kammaññañca yathayidaṁ cittaṁ.
an1.47:1.3	Cittaṁ, bhikkhave, bhāvitaṁ bahulīkataṁ mudu ca hoti kammaññañca hotī”ti.
an1.47:1.4	Sattamaṁ.
an1.48:1.0	48
an1.48:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ lahuparivattaṁ yathayidaṁ cittaṁ.
an1.48:1.2	Yāvañcidaṁ, bhikkhave, upamāpi na sukarā yāva lahuparivattaṁ cittan”ti.
an1.48:1.3	Aṭṭhamaṁ.
an1.49:1.0	49
an1.49:1.1	“Pabhassaramidaṁ, bhikkhave, cittaṁ.
an1.49:1.2	Tañca kho āgantukehi upakkilesehi upakkiliṭṭhan”ti.
an1.49:1.3	Navamaṁ.
an1.50:1.0	50
an1.50:1.1	“Pabhassaramidaṁ, bhikkhave, cittaṁ.
an1.50:1.2	Tañca kho āgantukehi upakkilesehi vippamuttan”ti.
an1.50:1.3	Dasamaṁ.
an1.50:1.4	Paṇihitaacchavaggo pañcamo.
an1.51:0.1	Aṅguttara Nikāya 1
an1.51:0.2	6. Accharāsaṅghātavagga
an1.51:1.0	51
an1.51:1.1	“Pabhassaramidaṁ, bhikkhave, cittaṁ.
an1.51:1.2	Tañca kho āgantukehi upakkilesehi upakkiliṭṭhaṁ.
an1.51:1.3	Taṁ assutavā puthujjano yathābhūtaṁ nappajānāti.
an1.51:1.4	Tasmā ‘assutavato puthujjanassa cittabhāvanā natthī’ti vadāmī”ti.
an1.51:1.5	Paṭhamaṁ.
an1.52:1.0	52
an1.52:1.1	“Pabhassaramidaṁ, bhikkhave, cittaṁ.
an1.52:1.2	Tañca kho āgantukehi upakkilesehi vippamuttaṁ.
an1.52:1.3	Taṁ sutavā ariyasāvako yathābhūtaṁ pajānāti.
an1.52:1.4	Tasmā ‘sutavato ariyasāvakassa cittabhāvanā atthī’ti vadāmī”ti.
an1.52:1.5	Dutiyaṁ.
an1.53:1.0	53
an1.53:1.1	“Accharāsaṅghātamattampi ce, bhikkhave, bhikkhu mettācittaṁ āsevati;
an1.53:1.2	ayaṁ vuccati, bhikkhave:
an1.53:1.3	‘bhikkhu arittajjhāno viharati satthusāsanakaro ovādapatikaro, amoghaṁ raṭṭhapiṇḍaṁ bhuñjati’.
an1.53:1.4	Ko pana vādo ye naṁ bahulīkarontī”ti.
an1.53:1.5	Tatiyaṁ.
an1.54:1.0	54
an1.54:1.1	“Accharāsaṅghātamattampi ce, bhikkhave, bhikkhu mettācittaṁ bhāveti;
an1.54:1.2	ayaṁ vuccati, bhikkhave:
an1.54:1.3	‘bhikkhu arittajjhāno viharati satthusāsanakaro ovādapatikaro, amoghaṁ raṭṭhapiṇḍaṁ bhuñjati’.
an1.54:1.4	Ko pana vādo ye naṁ bahulīkarontī”ti.
an1.54:1.5	Catutthaṁ.
an1.55:1.0	55
an1.55:1.1	“Accharāsaṅghātamattampi ce, bhikkhave, bhikkhu mettācittaṁ manasi karoti;
an1.55:1.2	ayaṁ vuccati, bhikkhave:
an1.55:1.3	‘bhikkhu arittajjhāno viharati satthusāsanakaro ovādapatikaro amoghaṁ raṭṭhapiṇḍaṁ bhuñjati’.
an1.55:1.4	Ko pana vādo ye naṁ bahulīkarontī”ti.
an1.55:1.5	Pañcamaṁ.
an1.56:1.0	56
an1.56:1.1	“Ye keci, bhikkhave, dhammā akusalā akusalabhāgiyā akusalapakkhikā, sabbe te manopubbaṅgamā.
an1.56:1.2	Mano tesaṁ dhammānaṁ paṭhamaṁ uppajjati, anvadeva akusalā dhammā”ti.
an1.56:1.3	Chaṭṭhaṁ.
an1.57:1.0	57
an1.57:1.1	“Ye keci, bhikkhave, dhammā kusalā kusalabhāgiyā kusalapakkhikā, sabbe te manopubbaṅgamā.
an1.57:1.2	Mano tesaṁ dhammānaṁ paṭhamaṁ uppajjati, anvadeva kusalā dhammā”ti.
an1.57:1.3	Sattamaṁ.
an1.58:1.0	58
an1.58:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṁ, bhikkhave, pamādo.
an1.58:1.2	Pamattassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī”ti.
an1.58:1.3	Aṭṭhamaṁ.
an1.59:1.0	59
an1.59:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṁ, bhikkhave, appamādo.
an1.59:1.2	Appamattassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī”ti.
an1.59:1.3	Navamaṁ.
an1.60:1.0	60
an1.60:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṁ, bhikkhave, kosajjaṁ.
an1.60:1.2	Kusītassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī”ti.
an1.60:1.3	Dasamaṁ.
an1.60:1.4	Accharāsaṅghātavaggo chaṭṭho.
an1.61:0.1	Aṅguttara Nikāya 1
an1.61:0.2	7. Vīriyārambhādivagga
an1.61:1.0	61
an1.61:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṁ, bhikkhave, vīriyārambho.
an1.61:1.2	Āraddhavīriyassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī”ti.
an1.61:1.3	Paṭhamaṁ.
an1.62:1.0	62
an1.62:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṁ, bhikkhave, mahicchatā.
an1.62:1.2	Mahicchassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī”ti.
an1.62:1.3	Dutiyaṁ.
an1.63:1.0	63
an1.63:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṁ, bhikkhave, appicchatā.
an1.63:1.2	Appicchassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī”ti.
an1.63:1.3	Tatiyaṁ.
an1.64:1.0	64
an1.64:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṁ, bhikkhave, asantuṭṭhitā.
an1.64:1.2	Asantuṭṭhassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī”ti.
an1.64:1.3	Catutthaṁ.
an1.65:1.0	65
an1.65:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṁ, bhikkhave, santuṭṭhitā.
an1.65:1.2	Santuṭṭhassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī”ti.
an1.65:1.3	Pañcamaṁ.
an1.66:1.0	66
an1.66:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṁ, bhikkhave, ayonisomanasikāro.
an1.66:1.2	Ayoniso, bhikkhave, manasi karoto anuppannā ceva akusalā dhammā uppajjanti uppannā ca kusalā dhammā parihāyantī”ti.
an1.66:1.3	Chaṭṭhaṁ.
an1.67:1.0	67
an1.67:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṁ, bhikkhave, yonisomanasikāro.
an1.67:1.2	Yoniso, bhikkhave, manasi karoto anuppannā ceva kusalā dhammā uppajjanti uppannā ca akusalā dhammā parihāyantī”ti.
an1.67:1.3	Sattamaṁ.
an1.68:1.0	68
an1.68:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṁ, bhikkhave, asampajaññaṁ.
an1.68:1.2	Asampajānassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī”ti.
an1.68:1.3	Aṭṭhamaṁ.
an1.69:1.0	69
an1.69:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṁ, bhikkhave, sampajaññaṁ.
an1.69:1.2	Sampajānassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī”ti.
an1.69:1.3	Navamaṁ.
an1.70:1.0	70
an1.70:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṁ, bhikkhave, pāpamittatā.
an1.70:1.2	Pāpamittassa, bhikkhave, anuppannā ceva akusalā dhammā uppajjanti uppannā ca kusalā dhammā parihāyantī”ti.
an1.70:1.3	Dasamaṁ.
an1.70:1.4	Vīriyārambhādivaggo sattamo.
an1.71:0.1	Aṅguttara Nikāya 1
an1.71:0.2	8. Kalyāṇamittādivagga
an1.71:1.0	71
an1.71:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṁ, bhikkhave, kalyāṇamittatā.
an1.71:1.2	Kalyāṇamittassa, bhikkhave, anuppannā ceva kusalā dhammā uppajjanti uppannā ca akusalā dhammā parihāyantī”ti.
an1.71:1.3	Paṭhamaṁ.
an1.72:1.0	72
an1.72:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṁ, bhikkhave, anuyogo akusalānaṁ dhammānaṁ, ananuyogo kusalānaṁ dhammānaṁ.
an1.72:1.2	Anuyogā, bhikkhave, akusalānaṁ dhammānaṁ, ananuyogā kusalānaṁ dhammānaṁ anuppannā ceva akusalā dhammā uppajjanti uppannā ca kusalā dhammā parihāyantī”ti.
an1.72:1.3	Dutiyaṁ.
an1.73:1.0	73
an1.73:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṁ, bhikkhave, anuyogo kusalānaṁ dhammānaṁ, ananuyogo akusalānaṁ dhammānaṁ.
an1.73:1.2	Anuyogā, bhikkhave, kusalānaṁ dhammānaṁ, ananuyogā akusalānaṁ dhammānaṁ anuppannā ceva kusalā dhammā uppajjanti uppannā ca akusalā dhammā parihāyantī”ti.
an1.73:1.3	Tatiyaṁ.
an1.74:1.0	74
an1.74:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā bojjhaṅgā nuppajjanti uppannā vā bojjhaṅgā na bhāvanāpāripūriṁ gacchanti yathayidaṁ, bhikkhave, ayonisomanasikāro.
an1.74:1.2	Ayoniso, bhikkhave, manasi karoto anuppannā ceva bojjhaṅgā nuppajjanti uppannā ca bojjhaṅgā na bhāvanāpāripūriṁ gacchantī”ti.
an1.74:1.3	Catutthaṁ.
an1.75:1.0	75
an1.75:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā bojjhaṅgā uppajjanti uppannā vā bojjhaṅgā bhāvanāpāripūriṁ gacchanti yathayidaṁ, bhikkhave, yonisomanasikāro.
an1.75:1.2	Yoniso, bhikkhave, manasi karoto anuppannā ceva bojjhaṅgā uppajjanti uppannā ca bojjhaṅgā bhāvanāpāripūriṁ gacchantī”ti.
an1.75:1.3	Pañcamaṁ.
an1.76:1.0	76
an1.76:1.1	“Appamattikā esā, bhikkhave, parihāni yadidaṁ ñātiparihāni.
an1.76:1.2	Etaṁ patikiṭṭhaṁ, bhikkhave, parihānīnaṁ yadidaṁ paññāparihānī”ti.
an1.76:1.3	Chaṭṭhaṁ.
an1.77:1.0	77
an1.77:1.1	“Appamattikā esā, bhikkhave, vuddhi yadidaṁ ñātivuddhi.
an1.77:1.2	Etadaggaṁ, bhikkhave, vuddhīnaṁ yadidaṁ paññāvuddhi.
an1.77:1.3	Tasmātiha, bhikkhave, evaṁ sikkhitabbaṁ:
an1.77:1.4	‘paññāvuddhiyā vaddhissāmā’ti.
an1.77:1.5	Evañhi vo, bhikkhave, sikkhitabban”ti.
an1.77:1.6	Sattamaṁ.
an1.78:1.0	78
an1.78:1.1	“Appamattikā esā, bhikkhave, parihāni yadidaṁ bhogaparihāni.
an1.78:1.2	Etaṁ patikiṭṭhaṁ, bhikkhave, parihānīnaṁ yadidaṁ paññāparihānī”ti.
an1.78:1.3	Aṭṭhamaṁ.
an1.79:1.0	79
an1.79:1.1	“Appamattikā esā, bhikkhave, vuddhi yadidaṁ bhogavuddhi.
an1.79:1.2	Etadaggaṁ, bhikkhave, vuddhīnaṁ yadidaṁ paññāvuddhi.
an1.79:1.3	Tasmātiha, bhikkhave, evaṁ sikkhitabbaṁ:
an1.79:1.4	‘paññāvuddhiyā vaddhissāmā’ti.
an1.79:1.5	Evañhi vo, bhikkhave, sikkhitabban”ti.
an1.79:1.6	Navamaṁ.
an1.80:1.0	80
an1.80:1.1	“Appamattikā esā, bhikkhave, parihāni yadidaṁ yasoparihāni.
an1.80:1.2	Etaṁ patikiṭṭhaṁ, bhikkhave, parihānīnaṁ yadidaṁ paññāparihānī”ti.
an1.80:1.3	Dasamaṁ.
an1.81:1.0	81
an1.81:1.1	“Appamattikā esā, bhikkhave, vuddhi yadidaṁ yasovuddhi.
an1.81:1.2	Etadaggaṁ, bhikkhave, vuddhīnaṁ yadidaṁ paññāvuddhi.
an1.81:1.3	Tasmātiha, bhikkhave, evaṁ sikkhitabbaṁ:
an1.81:1.4	‘paññāvuddhiyā vaddhissāmā’ti.
an1.81:1.5	Evañhi vo, bhikkhave, sikkhitabban”ti.
an1.81:1.6	Ekādasamaṁ.
an1.81:1.7	Kalyāṇamittādivaggo aṭṭhamo.
an1.82:0.1	Aṅguttara Nikāya 1
an1.82:0.2	9. Pamādādivagga
an1.82:1.0	82
an1.82:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato anatthāya saṁvattati yathayidaṁ, bhikkhave, pamādo.
an1.82:1.2	Pamādo, bhikkhave, mahato anatthāya saṁvattatī”ti.
an1.82:1.3	Paṭhamaṁ.
an1.83:1.0	83
an1.83:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato atthāya saṁvattati yathayidaṁ, bhikkhave, appamādo.
an1.83:1.2	Appamādo, bhikkhave, mahato atthāya saṁvattatī”ti.
an1.83:1.3	Dutiyaṁ.
an1.84:1.0	84
an1.84:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato anatthāya saṁvattati yathayidaṁ, bhikkhave, kosajjaṁ.
an1.84:1.2	Kosajjaṁ, bhikkhave, mahato anatthāya saṁvattatī”ti.
an1.84:1.3	Tatiyaṁ.
an1.85:1.0	85
an1.85:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato atthāya saṁvattati yathayidaṁ, bhikkhave, vīriyārambho.
an1.85:1.2	Vīriyārambho, bhikkhave, mahato atthāya saṁvattatī”ti.
an1.85:1.3	Catutthaṁ.
an1.86:1.0	86
an1.86:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato anatthāya saṁvattati yathayidaṁ, bhikkhave, mahicchatā.
an1.86:1.2	Mahicchatā, bhikkhave, mahato anatthāya saṁvattatī”ti.
an1.86:1.3	Pañcamaṁ.
an1.87:1.0	87
an1.87:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato atthāya saṁvattati yathayidaṁ, bhikkhave, appicchatā.
an1.87:1.2	Appicchatā, bhikkhave, mahato atthāya saṁvattatī”ti.
an1.87:1.3	Chaṭṭhaṁ.
an1.88:1.0	88
an1.88:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato anatthāya saṁvattati yathayidaṁ, bhikkhave, asantuṭṭhitā.
an1.88:1.2	Asantuṭṭhitā, bhikkhave, mahato anatthāya saṁvattatī”ti.
an1.88:1.3	Sattamaṁ.
an1.89:1.0	89
an1.89:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato atthāya saṁvattati yathayidaṁ, bhikkhave, santuṭṭhitā.
an1.89:1.2	Santuṭṭhitā, bhikkhave, mahato atthāya saṁvattatī”ti.
an1.89:1.3	Aṭṭhamaṁ.
an1.90:1.0	90
an1.90:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato anatthāya saṁvattati yathayidaṁ, bhikkhave, ayonisomanasikāro.
an1.90:1.2	Ayonisomanasikāro, bhikkhave, mahato anatthāya saṁvattatī”ti.
an1.90:1.3	Navamaṁ.
an1.91:1.0	91
an1.91:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato atthāya saṁvattati yathayidaṁ, bhikkhave, yoniso manasikāro.
an1.91:1.2	Yonisomanasikāro, bhikkhave, mahato atthāya saṁvattatī”ti.
an1.91:1.3	Dasamaṁ.
an1.92:1.0	92
an1.92:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato anatthāya saṁvattati yathayidaṁ, bhikkhave, asampajaññaṁ.
an1.92:1.2	Asampajaññaṁ, bhikkhave, mahato anatthāya saṁvattatī”ti.
an1.92:1.3	Ekādasamaṁ.
an1.93:1.0	93
an1.93:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato atthāya saṁvattati yathayidaṁ, bhikkhave, sampajaññaṁ.
an1.93:1.2	Sampajaññaṁ, bhikkhave, mahato atthāya saṁvattatī”ti.
an1.93:1.3	Dvādasamaṁ.
an1.94:1.0	94
an1.94:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato anatthāya saṁvattati yathayidaṁ, bhikkhave, pāpamittatā.
an1.94:1.2	Pāpamittatā, bhikkhave, mahato anatthāya saṁvattatī”ti.
an1.94:1.3	Terasamaṁ.
an1.95:1.0	95
an1.95:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato atthāya saṁvattati yathayidaṁ, bhikkhave, kalyāṇamittatā.
an1.95:1.2	Kalyāṇamittatā, bhikkhave, mahato atthāya saṁvattatī”ti.
an1.95:1.3	Cuddasamaṁ.
an1.96:1.0	96
an1.96:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato anatthāya saṁvattati yathayidaṁ, bhikkhave, anuyogo akusalānaṁ dhammānaṁ, ananuyogo kusalānaṁ dhammānaṁ.
an1.96:1.2	Anuyogo, bhikkhave, akusalānaṁ dhammānaṁ, ananuyogo kusalānaṁ dhammānaṁ mahato anatthāya saṁvattatī”ti.
an1.96:1.3	Pannarasamaṁ.
an1.97:1.0	97
an1.97:1.1	“Nāhaṁ, bhikkhave, aññaṁ ekadhammampi samanupassāmi yo evaṁ mahato atthāya saṁvattati yathayidaṁ, bhikkhave, anuyogo kusalānaṁ dhammānaṁ, ananuyogo akusalānaṁ dhammānaṁ.
an1.97:1.2	Anuyogo, bhikkhave, kusalānaṁ dhammānaṁ, ananuyogo akusalānaṁ dhammānaṁ mahato atthāya saṁvattatī”ti.
an1.97:1.3	Soḷasamaṁ.
an1.97:1.4	Pamādādivaggo navamo.
an1.98:0.1	Aṅguttara Nikāya 1
an1.98:0.2	10. Dutiyapamādādivagga
an1.98:1.0	98
an1.98:1.1	“Ajjhattikaṁ, bhikkhave, aṅganti karitvā nāññaṁ ekaṅgampi samanupassāmi yaṁ evaṁ mahato anatthāya saṁvattati yathayidaṁ, bhikkhave, pamādo.
an1.98:1.2	Pamādo, bhikkhave, mahato anatthāya saṁvattatī”ti.
an1.98:1.3	Paṭhamaṁ.
an1.99:1.0	99
an1.99:1.1	“Ajjhattikaṁ, bhikkhave, aṅganti karitvā nāññaṁ ekaṅgampi samanupassāmi yaṁ evaṁ mahato atthāya saṁvattati yathayidaṁ, bhikkhave, appamādo.
an1.99:1.2	Appamādo, bhikkhave, mahato atthāya saṁvattatī”ti.
an1.99:1.3	Dutiyaṁ.
an1.100:1.0	100
an1.100:1.1	“Ajjhattikaṁ, bhikkhave, aṅganti karitvā nāññaṁ ekaṅgampi samanupassāmi yaṁ evaṁ mahato anatthāya saṁvattati yathayidaṁ, bhikkhave, kosajjaṁ.
an1.100:1.2	Kosajjaṁ, bhikkhave, mahato anatthāya saṁvattatī”ti.
an1.100:1.3	Tatiyaṁ.
an1.101:1.0	101
an1.101:1.1	“Ajjhattikaṁ, bhikkhave, aṅganti karitvā nāññaṁ ekaṅgampi samanupassāmi yaṁ evaṁ mahato atthāya saṁvattati yathayidaṁ, bhikkhave, vīriyārambho.
an1.101:1.2	Vīriyārambho, bhikkhave, mahato atthāya saṁvattatī”ti.
an1.101:1.3	Catutthaṁ.
an1.102-109:1.0	102–109
an1.102-109:1.1	“Ajjhattikaṁ, bhikkhave, aṅganti karitvā nāññaṁ ekaṅgampi samanupassāmi yaṁ evaṁ mahato anatthāya saṁvattati yathayidaṁ, bhikkhave, mahicchatā …pe… appicchatā … asantuṭṭhitā … santuṭṭhitā … ayonisomanasikāro … yonisomanasikāro … asampajaññaṁ … sampajaññaṁ … dvādasamaṁ.
an1.110:1.0	110
an1.110:1.1	“Bāhiraṁ, bhikkhave, aṅganti karitvā nāññaṁ ekaṅgampi samanupassāmi yaṁ evaṁ mahato anatthāya saṁvattati yathayidaṁ, bhikkhave, pāpamittatā.
an1.110:1.2	Pāpamittatā, bhikkhave, mahato anatthāya saṁvattatī”ti.
an1.110:1.3	Terasamaṁ.
an1.111:1.0	111
an1.111:1.1	“Bāhiraṁ, bhikkhave, aṅganti karitvā nāññaṁ ekaṅgampi samanupassāmi yaṁ evaṁ mahato atthāya saṁvattati yathayidaṁ, bhikkhave, kalyāṇamittatā.
an1.111:1.2	Kalyāṇamittatā, bhikkhave, mahato atthāya saṁvattatī”ti.
an1.111:1.3	Cuddasamaṁ.
an1.112:1.0	112
an1.112:1.1	“Ajjhattikaṁ, bhikkhave, aṅganti karitvā nāññaṁ ekaṅgampi samanupassāmi yaṁ evaṁ mahato anatthāya saṁvattati yathayidaṁ, bhikkhave, anuyogo akusalānaṁ dhammānaṁ, ananuyogo kusalānaṁ dhammānaṁ.
an1.112:1.2	Anuyogo, bhikkhave, akusalānaṁ dhammānaṁ, ananuyogo kusalānaṁ dhammānaṁ mahato anatthāya saṁvattatī”ti.
an1.112:1.3	Pannarasamaṁ.
an1.113:1.0	113
an1.113:1.1	“Ajjhattikaṁ, bhikkhave, aṅganti karitvā nāññaṁ ekaṅgampi samanupassāmi yaṁ evaṁ mahato atthāya saṁvattati yathayidaṁ, bhikkhave, anuyogo kusalānaṁ dhammānaṁ, ananuyogo akusalānaṁ dhammānaṁ.
an1.113:1.2	Anuyogo, bhikkhave, kusalānaṁ dhammānaṁ, ananuyogo akusalānaṁ dhammānaṁ mahato atthāya saṁvattatī”ti.
an1.113:1.3	Soḷasamaṁ.
an1.114:1.0	114
an1.114:1.1	“Nāhaṁ, bhikkhave, aññaṁ ekadhammampi samanupassāmi yo evaṁ saddhammassa sammosāya antaradhānāya saṁvattati yathayidaṁ, bhikkhave, pamādo.
an1.114:1.2	Pamādo, bhikkhave, saddhammassa sammosāya antaradhānāya saṁvattatī”ti.
an1.114:1.3	Sattarasamaṁ.
an1.115:1.0	115
an1.115:1.1	“Nāhaṁ, bhikkhave, aññaṁ ekadhammampi samanupassāmi yo evaṁ saddhammassa ṭhitiyā asammosāya anantaradhānāya saṁvattati yathayidaṁ, bhikkhave, appamādo.
an1.115:1.2	Appamādo, bhikkhave, saddhammassa ṭhitiyā asammosāya anantaradhānāya saṁvattatī”ti.
an1.115:1.3	Aṭṭhārasamaṁ.
an1.116:1.0	116
an1.116:1.1	“Nāhaṁ, bhikkhave, aññaṁ ekadhammampi samanupassāmi yo evaṁ saddhammassa sammosāya antaradhānāya saṁvattati yathayidaṁ, bhikkhave, kosajjaṁ.
an1.116:1.2	Kosajjaṁ, bhikkhave, saddhammassa sammosāya antaradhānāya saṁvattatī”ti.
an1.116:1.3	Ekūnavīsatimaṁ.
an1.117:1.0	117
an1.117:1.1	“Nāhaṁ, bhikkhave, aññaṁ ekadhammampi samanupassāmi yo evaṁ saddhammassa ṭhitiyā asammosāya anantaradhānāya saṁvattati yathayidaṁ, bhikkhave, vīriyārambho.
an1.117:1.2	Vīriyārambho, bhikkhave, saddhammassa ṭhitiyā asammosāya anantaradhānāya saṁvattatī”ti.
an1.117:1.3	Vīsatimaṁ.
an1.118-128:1.0	118–128
an1.118-128:1.1	“Nāhaṁ, bhikkhave, aññaṁ ekadhammampi samanupassāmi yo evaṁ saddhammassa sammosāya antaradhānāya saṁvattati yathayidaṁ, bhikkhave, mahicchatā …pe… appicchatā … asantuṭṭhitā … santuṭṭhitā … ayonisomanasikāro … yonisomanasikāro … asampajaññaṁ … sampajaññaṁ … pāpamittatā … kalyāṇamittatā … anuyogo akusalānaṁ dhammānaṁ, ananuyogo kusalānaṁ dhammānaṁ.
an1.118-128:1.2	Anuyogo, bhikkhave, akusalānaṁ dhammānaṁ, ananuyogo kusalānaṁ dhammānaṁ saddhammassa sammosāya antaradhānāya saṁvattatī”ti.
an1.118-128:1.3	Ekattiṁsatimaṁ.
an1.129:1.0	129
an1.129:1.1	“Nāhaṁ, bhikkhave, aññaṁ ekadhammampi samanupassāmi yo evaṁ saddhammassa ṭhitiyā asammosāya anantaradhānāya saṁvattati yathayidaṁ, bhikkhave, anuyogo kusalānaṁ dhammānaṁ, ananuyogo akusalānaṁ dhammānaṁ.
an1.129:1.2	Anuyogo, bhikkhave, kusalānaṁ dhammānaṁ, ananuyogo akusalānaṁ dhammānaṁ saddhammassa ṭhitiyā asammosāya anantaradhānāya saṁvattatī”ti.
an1.129:1.3	Bāttiṁsatimaṁ.
an1.129:1.4	Catukkoṭikaṁ niṭṭhitaṁ.
an1.130:1.0	130
an1.130:1.1	“Ye te, bhikkhave, bhikkhū adhammaṁ dhammoti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṁ.
an1.130:1.2	Bahuñca te, bhikkhave, bhikkhū apuññaṁ pasavanti, te cimaṁ saddhammaṁ antaradhāpentī”ti.
an1.130:1.3	Tettiṁsatimaṁ.
an1.131:1.0	131
an1.131:1.1	“Ye te, bhikkhave, bhikkhū dhammaṁ adhammoti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṁ.
an1.131:1.2	Bahuñca te, bhikkhave, bhikkhū apuññaṁ pasavanti, te cimaṁ saddhammaṁ antaradhāpentī”ti.
an1.131:1.3	Catuttiṁsatimaṁ.
an1.132-139:1.0	132–139
an1.132-139:1.1	“Ye te, bhikkhave, bhikkhū avinayaṁ vinayoti dīpenti …pe… vinayaṁ avinayoti dīpenti …pe… abhāsitaṁ alapitaṁ tathāgatena bhāsitaṁ lapitaṁ tathāgatenāti dīpenti …pe… bhāsitaṁ lapitaṁ tathāgatena abhāsitaṁ alapitaṁ tathāgatenāti dīpenti …pe… anāciṇṇaṁ tathāgatena āciṇṇaṁ tathāgatenāti dīpenti …pe… āciṇṇaṁ tathāgatena anāciṇṇaṁ tathāgatenāti dīpenti …pe… apaññattaṁ tathāgatena paññattaṁ tathāgatenāti dīpenti …pe… paññattaṁ tathāgatena apaññattaṁ tathāgatenāti dīpenti;
an1.132-139:1.2	te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṁ.
an1.132-139:1.3	Bahuñca te, bhikkhave, bhikkhū apuññaṁ pasavanti, te cimaṁ saddhammaṁ antaradhāpentī”ti.
an1.132-139:1.4	Dvācattālīsatimaṁ.
an1.132-139:1.5	Dutiyapamādādivaggo dasamo.
an1.140:0.1	Aṅguttara Nikāya 1
an1.140:0.2	11. Adhammavagga
an1.140:1.0	140
an1.140:1.1	“Ye te, bhikkhave, bhikkhū adhammaṁ adhammoti dīpenti te, bhikkhave, bhikkhū bahujanahitāya paṭipannā bahujanasukhāya, bahuno janassa atthāya hitāya sukhāya devamanussānaṁ.
an1.140:1.2	Bahuñca te, bhikkhave, bhikkhū puññaṁ pasavanti, te cimaṁ saddhammaṁ ṭhapentī”ti.
an1.140:1.3	Paṭhamaṁ.
an1.141:1.0	141
an1.141:1.1	“Ye te, bhikkhave, bhikkhū dhammaṁ dhammoti dīpenti te, bhikkhave, bhikkhū bahujanahitāya paṭipannā bahujanasukhāya, bahuno janassa atthāya hitāya sukhāya devamanussānaṁ.
an1.141:1.2	Bahuñca te, bhikkhave, bhikkhū puññaṁ pasavanti, te cimaṁ saddhammaṁ ṭhapentī”ti.
an1.141:1.3	Dutiyaṁ.
an1.142-149:1.0	142–149
an1.142-149:1.1	“Ye te, bhikkhave, bhikkhū avinayaṁ avinayoti dīpenti …pe… vinayaṁ vinayoti dīpenti …pe… abhāsitaṁ alapitaṁ tathāgatena abhāsitaṁ alapitaṁ tathāgatenāti dīpenti …pe… bhāsitaṁ lapitaṁ tathāgatena bhāsitaṁ lapitaṁ tathāgatenāti dīpenti …pe… anāciṇṇaṁ tathāgatena anāciṇṇaṁ tathāgatenāti dīpenti …pe… āciṇṇaṁ tathāgatena āciṇṇaṁ tathāgatenāti dīpenti …pe… apaññattaṁ tathāgatena apaññattaṁ tathāgatenāti dīpenti …pe… paññattaṁ tathāgatena paññattaṁ tathāgatenāti dīpenti;
an1.142-149:1.2	te, bhikkhave, bhikkhū bahujanahitāya paṭipannā bahujanasukhāya, bahuno janassa atthāya hitāya sukhāya devamanussānaṁ.
an1.142-149:1.3	Bahuñca te, bhikkhave, bhikkhū puññaṁ pasavanti, te cimaṁ saddhammaṁ ṭhapentī”ti.
an1.142-149:1.4	Dasamaṁ.
an1.142-149:1.5	Adhammavaggo ekādasamo.
an1.150:0.1	Aṅguttara Nikāya 1
an1.150:0.2	12. Anāpattivagga
an1.150:1.0	150
an1.150:1.1	“Ye te, bhikkhave, bhikkhū anāpattiṁ āpattīti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṁ.
an1.150:1.2	Bahuñca te, bhikkhave, bhikkhū apuññaṁ pasavanti, te cimaṁ saddhammaṁ antaradhāpentī”ti.
an1.150:1.3	Paṭhamaṁ.
an1.151:1.0	151
an1.151:1.1	“Ye te, bhikkhave, bhikkhū āpattiṁ anāpattīti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṁ.
an1.151:1.2	Bahuñca te, bhikkhave, bhikkhū apuññaṁ pasavanti, te cimaṁ saddhammaṁ antaradhāpentī”ti.
an1.151:1.3	Dutiyaṁ.
an1.152-159:1.0	152–159
an1.152-159:1.1	“Ye te, bhikkhave, bhikkhū lahukaṁ āpattiṁ garukā āpattīti dīpenti …pe… garukaṁ āpattiṁ lahukā āpattīti dīpenti …pe… duṭṭhullaṁ āpattiṁ aduṭṭhullā āpattīti dīpenti …pe… aduṭṭhullaṁ āpattiṁ duṭṭhullā āpattīti dīpenti …pe… sāvasesaṁ āpattiṁ anavasesā āpattīti dīpenti …pe… anavasesaṁ āpattiṁ sāvasesā āpattīti dīpenti …pe… sappaṭikammaṁ āpattiṁ appaṭikammā āpattīti dīpenti …pe… appaṭikammaṁ āpattiṁ sappaṭikammā āpattīti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṁ.
an1.152-159:1.2	Bahuñca te, bhikkhave, bhikkhū apuññaṁ pasavanti, te cimaṁ saddhammaṁ antaradhāpentī”ti.
an1.152-159:1.3	Dasamaṁ.
an1.160:1.0	160
an1.160:1.1	“Ye te, bhikkhave, bhikkhū anāpattiṁ anāpattīti dīpenti te, bhikkhave, bhikkhū bahujanahitāya paṭipannā bahujanasukhāya, bahuno janassa atthāya hitāya sukhāya devamanussānaṁ.
an1.160:1.2	Bahuñca te, bhikkhave, bhikkhū puññaṁ pasavanti, te cimaṁ saddhammaṁ ṭhapentī”ti.
an1.160:1.3	Ekādasamaṁ.
an1.161:1.0	161
an1.161:1.1	“Ye te, bhikkhave, bhikkhū āpattiṁ āpattīti dīpenti te, bhikkhave, bhikkhū bahujanahitāya paṭipannā bahujanasukhāya, bahuno janassa atthāya hitāya sukhāya devamanussānaṁ.
an1.161:1.2	Bahuñca te, bhikkhave, bhikkhū puññaṁ pasavanti, te cimaṁ saddhammaṁ ṭhapentī”ti.
an1.161:1.3	Dvādasamaṁ.
an1.162-169:1.0	162–169
an1.162-169:1.1	“Ye te, bhikkhave, bhikkhū lahukaṁ āpattiṁ lahukā āpattīti dīpenti … garukaṁ āpattiṁ garukā āpattīti dīpenti … duṭṭhullaṁ āpattiṁ duṭṭhullā āpattīti dīpenti … aduṭṭhullaṁ āpattiṁ aduṭṭhullā āpattīti dīpenti … sāvasesaṁ āpattiṁ sāvasesā āpattīti dīpenti … anavasesaṁ āpattiṁ anavasesā āpattīti dīpenti … sappaṭikammaṁ āpattiṁ sappaṭikammā āpattīti dīpenti … appaṭikammaṁ āpattiṁ appaṭikammā āpattīti dīpenti;
an1.162-169:1.2	te, bhikkhave, bhikkhū bahujanahitāya paṭipannā bahujanasukhāya, bahuno janassa atthāya hitāya sukhāya devamanussānaṁ.
an1.162-169:1.3	Bahuñca te, bhikkhave, bhikkhū puññaṁ pasavanti, te cimaṁ saddhammaṁ ṭhapentī”ti.
an1.162-169:1.4	Vīsatimaṁ.
an1.162-169:1.5	Anāpattivaggo dvādasamo.
an1.170:0.1	Aṅguttara Nikāya 1
an1.170:0.2	13. Ekapuggalavagga
an1.170:1.0	170
an1.170:1.1	“Ekapuggalo, bhikkhave, loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṁ.
an1.170:1.2	Katamo ekapuggalo?
an1.170:1.3	Tathāgato arahaṁ sammāsambuddho.
an1.170:1.4	Ayaṁ kho, bhikkhave, ekapuggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānan”ti.
an1.171:1.0	171
an1.171:1.1	“Ekapuggalassa, bhikkhave, pātubhāvo dullabho lokasmiṁ.
an1.171:1.2	Katamassa ekapuggalassa?
an1.171:1.3	Tathāgatassa arahato sammāsambuddhassa.
an1.171:1.4	Imassa kho, bhikkhave, ekapuggalassa pātubhāvo dullabho lokasmin”ti.
an1.172:1.0	172
an1.172:1.1	“Ekapuggalo, bhikkhave, loke uppajjamāno uppajjati acchariyamanusso.
an1.172:1.2	Katamo ekapuggalo?
an1.172:1.3	Tathāgato arahaṁ sammāsambuddho.
an1.172:1.4	Ayaṁ kho, bhikkhave, ekapuggalo loke uppajjamāno uppajjati acchariyamanusso”ti.
an1.173:1.0	173
an1.173:1.1	“Ekapuggalassa, bhikkhave, kālakiriyā bahuno janassa anutappā hoti.
an1.173:1.2	Katamassa ekapuggalassa?
an1.173:1.3	Tathāgatassa arahato sammāsambuddhassa.
an1.173:1.4	Imassa kho, bhikkhave, ekapuggalassa kālakiriyā bahuno janassa anutappā hotī”ti.
an1.174:1.0	174
an1.174:1.1	“Ekapuggalo, bhikkhave, loke uppajjamāno uppajjati adutiyo asahāyo appaṭimo appaṭisamo appaṭibhāgo appaṭipuggalo asamo asamasamo dvipadānaṁ aggo.
an1.174:1.2	Katamo ekapuggalo?
an1.174:1.3	Tathāgato arahaṁ sammāsambuddho.
an1.174:1.4	Ayaṁ kho, bhikkhave, ekapuggalo loke uppajjamāno uppajjati adutiyo asahāyo appaṭimo appaṭisamo appaṭibhāgo appaṭipuggalo asamo asamasamo dvipadānaṁ aggo”ti.
an1.175-186:1.0	175–186
an1.175-186:1.1	“Ekapuggalassa, bhikkhave, pātubhāvā mahato cakkhussa pātubhāvo hoti, mahato ālokassa pātubhāvo hoti, mahato obhāsassa pātubhāvo hoti, channaṁ anuttariyānaṁ pātubhāvo hoti, catunnaṁ paṭisambhidānaṁ sacchikiriyā hoti, anekadhātupaṭivedho hoti, nānādhātupaṭivedho hoti, vijjāvimuttiphalasacchikiriyā hoti, sotāpattiphalasacchikiriyā hoti, sakadāgāmiphalasacchikiriyā hoti, anāgāmiphalasacchikiriyā hoti, arahattaphalasacchikiriyā hoti.
an1.175-186:1.2	Katamassa ekapuggalassa?
an1.175-186:1.3	Tathāgatassa arahato sammāsambuddhassa.
an1.175-186:1.4	Imassa kho, bhikkhave, ekapuggalassa pātubhāvā mahato cakkhussa pātubhāvo hoti, mahato ālokassa pātubhāvo hoti, mahato obhāsassa pātubhāvo hoti, channaṁ anuttariyānaṁ pātubhāvo hoti, catunnaṁ paṭisambhidānaṁ sacchikiriyā hoti, anekadhātupaṭivedho hoti, nānādhātupaṭivedho hoti, vijjāvimuttiphalasacchikiriyā hoti, sotāpattiphalasacchikiriyā hoti, sakadāgāmiphalasacchikiriyā hoti, anāgāmiphalasacchikiriyā hoti, arahattaphalasacchikiriyā hotī”ti.
an1.187:1.0	187
an1.187:1.1	“Nāhaṁ, bhikkhave, aññaṁ ekapuggalampi samanupassāmi yo evaṁ tathāgatena anuttaraṁ dhammacakkaṁ pavattitaṁ sammadeva anuppavatteti yathayidaṁ, bhikkhave, sāriputto.
an1.187:1.2	Sāriputto, bhikkhave, tathāgatena anuttaraṁ dhammacakkaṁ pavattitaṁ sammadeva anuppavattetī”ti.
an1.187:1.3	Ekapuggalavaggo terasamo.
an1.188:0.1	Aṅguttara Nikāya 1
an1.188:0.2	14. Paṭhamavagga
an1.188:1.1	“Etadaggaṁ, bhikkhave, mama sāvakānaṁ bhikkhūnaṁ rattaññūnaṁ yadidaṁ aññāsikoṇḍañño.
an1.189:1.1	… Mahāpaññānaṁ yadidaṁ sāriputto.
an1.190:1.1	… Iddhimantānaṁ yadidaṁ mahāmoggallāno.
an1.191:1.1	… Dhutavādānaṁ yadidaṁ mahākassapo.
an1.192:1.1	… Dibbacakkhukānaṁ yadidaṁ anuruddho.
an1.193:1.1	… Uccākulikānaṁ yadidaṁ bhaddiyo kāḷigodhāya putto.
an1.194:1.1	… Mañjussarānaṁ yadidaṁ lakuṇḍaka bhaddiyo.
an1.195:1.1	… Sīhanādikānaṁ yadidaṁ piṇḍolabhāradvājo.
an1.196:1.1	… Dhammakathikānaṁ yadidaṁ puṇṇo mantāṇiputto.
an1.197:1.1	… saṅkhittena bhāsitassa vitthārena atthaṁ vibhajantānaṁ yadidaṁ mahākaccāno”ti.
an1.197:1.2	Vaggo paṭhamo.
an1.198:0.1	Aṅguttara Nikāya 1
an1.198:0.2	15. Dutiyavagga
an1.198:1.1	“Etadaggaṁ, bhikkhave, mama sāvakānaṁ bhikkhūnaṁ manomayaṁ kāyaṁ abhinimminantānaṁ yadidaṁ cūḷapanthako.
an1.199:1.1	… Cetovivaṭṭakusalānaṁ yadidaṁ cūḷapanthako.
an1.200:1.1	… Saññāvivaṭṭakusalānaṁ yadidaṁ mahāpanthako.
an1.201:1.1	… Araṇavihārīnaṁ yadidaṁ subhūti.
an1.202:1.1	… Dakkhiṇeyyānaṁ yadidaṁ subhūti.
an1.203:1.1	… Āraññakānaṁ yadidaṁ revato khadiravaniyo.
an1.204:1.1	… Jhāyīnaṁ yadidaṁ kaṅkhārevato.
an1.205:1.1	… Āraddhavīriyānaṁ yadidaṁ soṇo koḷiviso.
an1.206:1.1	… Kalyāṇavākkaraṇānaṁ yadidaṁ soṇo kuṭikaṇṇo.
an1.207:1.1	… Lābhīnaṁ yadidaṁ sīvali.
an1.208:1.1	… Saddhādhimuttānaṁ yadidaṁ vakkalī”ti.
an1.208:1.2	Vaggo dutiyo.
an1.209:0.1	Aṅguttara Nikāya 1
an1.209:0.2	16. Tatiyavagga
an1.209:1.1	“Etadaggaṁ, bhikkhave, mama sāvakānaṁ bhikkhūnaṁ sikkhākāmānaṁ yadidaṁ rāhulo.
an1.210:1.1	… Saddhāpabbajitānaṁ yadidaṁ raṭṭhapālo.
an1.211:1.1	… Paṭhamaṁ salākaṁ gaṇhantānaṁ yadidaṁ kuṇḍadhāno.
an1.212:1.1	… Paṭibhānavantānaṁ yadidaṁ vaṅgīso.
an1.213:1.1	… Samantapāsādikānaṁ yadidaṁ upaseno vaṅgantaputto.
an1.214:1.1	… Senāsanapaññāpakānaṁ yadidaṁ dabbo mallaputto.
an1.215:1.1	… devatānaṁ piyamanāpānaṁ yadidaṁ pilindavaccho.
an1.216:1.1	… Khippābhiññānaṁ yadidaṁ bāhiyo dārucīriyo.
an1.217:1.1	… Cittakathikānaṁ yadidaṁ kumārakassapo.
an1.218:1.1	… Paṭisambhidāpattānaṁ yadidaṁ mahākoṭṭhito”ti.
an1.218:1.2	Vaggo tatiyo.
an1.219:0.1	Aṅguttara Nikāya 1
an1.219:0.2	17. Catutthavagga
an1.219:1.1	“Etadaggaṁ, bhikkhave, mama sāvakānaṁ bhikkhūnaṁ bahussutānaṁ yadidaṁ ānando.
an1.220:1.1	… Satimantānaṁ yadidaṁ ānando.
an1.221:1.1	… Gatimantānaṁ yadidaṁ ānando.
an1.222:1.1	… Dhitimantānaṁ yadidaṁ ānando.
an1.223:1.1	… Upaṭṭhākānaṁ yadidaṁ ānando.
an1.224:1.1	… Mahāparisānaṁ yadidaṁ uruvelakassapo.
an1.225:1.1	… Kulappasādakānaṁ yadidaṁ kāḷudāyī.
an1.226:1.1	… Appābādhānaṁ yadidaṁ bākulo.
an1.227:1.1	… Pubbenivāsaṁ anussarantānaṁ yadidaṁ sobhito.
an1.228:1.1	… Vinayadharānaṁ yadidaṁ upāli.
an1.229:1.1	… Bhikkhunovādakānaṁ yadidaṁ nandako.
an1.230:1.1	… Indriyesu guttadvārānaṁ yadidaṁ nando.
an1.231:1.1	… Bhikkhuovādakānaṁ yadidaṁ mahākappino.
an1.232:1.1	… Tejodhātukusalānaṁ yadidaṁ sāgato.
an1.233:1.1	… Paṭibhāneyyakānaṁ yadidaṁ rādho.
an1.234:1.1	… Lūkhacīvaradharānaṁ yadidaṁ mogharājā”ti.
an1.234:1.2	Vaggo catuttho.
an1.235:0.1	Aṅguttara Nikāya 1
an1.235:0.2	18. Pañcamavagga
an1.235:1.1	“Etadaggaṁ, bhikkhave, mama sāvikānaṁ bhikkhunīnaṁ rattaññūnaṁ yadidaṁ mahāpajāpatigotamī.
an1.236:1.1	… Mahāpaññānaṁ yadidaṁ khemā.
an1.237:1.1	… Iddhimantīnaṁ yadidaṁ uppalavaṇṇā.
an1.238:1.1	… Vinayadharānaṁ yadidaṁ paṭācārā.
an1.239:1.1	… Dhammakathikānaṁ yadidaṁ dhammadinnā.
an1.240:1.1	… Jhāyīnaṁ yadidaṁ nandā.
an1.241:1.1	… Āraddhavīriyānaṁ yadidaṁ soṇā.
an1.242:1.1	… Dibbacakkhukānaṁ yadidaṁ bakulā.
an1.243:1.1	… Khippābhiññānaṁ yadidaṁ bhaddā kuṇḍalakesā.
an1.244:1.1	… Pubbenivāsaṁ anussarantīnaṁ yadidaṁ bhaddā kāpilānī.
an1.245:1.1	… Mahābhiññāpattānaṁ yadidaṁ bhaddakaccānā.
an1.246:1.1	… Lūkhacīvaradharānaṁ yadidaṁ kisāgotamī.
an1.247:1.1	… Saddhādhimuttānaṁ yadidaṁ siṅgālakamātā”ti.
an1.247:1.2	Vaggo pañcamo.
an1.248:0.1	Aṅguttara Nikāya 1
an1.248:0.2	19. Chaṭṭhavagga
an1.248:1.1	“Etadaggaṁ, bhikkhave, mama sāvakānaṁ upāsakānaṁ paṭhamaṁ saraṇaṁ gacchantānaṁ yadidaṁ tapussabhallikā vāṇijā.
an1.249:1.1	… Dāyakānaṁ yadidaṁ sudatto gahapati anāthapiṇḍiko.
an1.250:1.1	… Dhammakathikānaṁ yadidaṁ citto gahapati macchikāsaṇḍiko.
an1.251:1.1	… Catūhi saṅgahavatthūhi parisaṁ saṅgaṇhantānaṁ yadidaṁ hatthako āḷavako.
an1.252:1.1	… Paṇītadāyakānaṁ yadidaṁ mahānāmo sakko.
an1.253:1.1	… Manāpadāyakānaṁ yadidaṁ uggo gahapati vesāliko.
an1.254:1.1	… Saṅghupaṭṭhākānaṁ yadidaṁ hatthigāmako uggato gahapati.
an1.255:1.1	… Aveccappasannānaṁ yadidaṁ sūrambaṭṭho.
an1.256:1.1	… Puggalappasannānaṁ yadidaṁ jīvako komārabhacco.
an1.257:1.1	… Vissāsakānaṁ yadidaṁ nakulapitā gahapatī”ti.
an1.257:1.2	Vaggo chaṭṭho.
an1.258:0.1	Aṅguttara Nikāya 1
an1.258:0.2	20. Sattamavagga
an1.258:1.1	“Etadaggaṁ, bhikkhave, mama sāvikānaṁ upāsikānaṁ paṭhamaṁ saraṇaṁ gacchantīnaṁ yadidaṁ sujātā seniyadhītā.
an1.259:1.1	… Dāyikānaṁ yadidaṁ visākhā migāramātā.
an1.260:1.1	… Bahussutānaṁ yadidaṁ khujjuttarā.
an1.261:1.1	… Mettāvihārīnaṁ yadidaṁ sāmāvatī.
an1.262:1.1	… Jhāyīnaṁ yadidaṁ uttarānandamātā.
an1.263:1.1	… Paṇītadāyikānaṁ yadidaṁ suppavāsā koliyadhītā.
an1.264:1.1	… Gilānupaṭṭhākīnaṁ yadidaṁ suppiyā upāsikā.
an1.265:1.1	… Aveccappasannānaṁ yadidaṁ kātiyānī.
an1.266:1.1	… Vissāsikānaṁ yadidaṁ nakulamātā gahapatānī.
an1.267:1.1	… Anussavappasannānaṁ yadidaṁ kāḷī upāsikā kuraragharikā”ti.
an1.267:1.2	vaggo sattamo.
an1.267:1.3	(Etadaggavaggo niṭṭhito.)
an1.268:0.1	Aṅguttara Nikāya 1
an1.268:0.2	21. Paṭhamavagga
an1.268:1.0	268
an1.268:1.1	“Aṭṭhānametaṁ, bhikkhave, anavakāso yaṁ diṭṭhisampanno puggalo kañci saṅkhāraṁ niccato upagaccheyya. Netaṁ ṭhānaṁ vijjati.
an1.268:1.2	Ṭhānañca kho etaṁ, bhikkhave, vijjati yaṁ puthujjano kañci saṅkhāraṁ niccato upagaccheyya. Ṭhānametaṁ vijjatī”ti.
an1.269:1.0	269
an1.269:1.1	“Aṭṭhānametaṁ, bhikkhave, anavakāso yaṁ diṭṭhisampanno puggalo kañci saṅkhāraṁ sukhato upagaccheyya. Netaṁ ṭhānaṁ vijjati.
an1.269:1.2	Ṭhānañca kho etaṁ, bhikkhave, vijjati yaṁ puthujjano kañci saṅkhāraṁ sukhato upagaccheyya. Ṭhānametaṁ vijjatī”ti.
an1.270:1.0	270
an1.270:1.1	“Aṭṭhānametaṁ, bhikkhave, anavakāso yaṁ diṭṭhisampanno puggalo kañci dhammaṁ attato upagaccheyya. Netaṁ ṭhānaṁ vijjati.
an1.270:1.2	Ṭhānañca kho etaṁ, bhikkhave, vijjati yaṁ puthujjano kañci dhammaṁ attato upagaccheyya. Ṭhānametaṁ vijjatī”ti.
an1.271:1.0	271
an1.271:1.1	“Aṭṭhānametaṁ, bhikkhave, anavakāso yaṁ diṭṭhisampanno puggalo mātaraṁ jīvitā voropeyya. Netaṁ ṭhānaṁ vijjati.
an1.271:1.2	Ṭhānañca kho, bhikkhave, vijjati yaṁ puthujjano mātaraṁ jīvitā voropeyya. Ṭhānametaṁ vijjatī”ti.
an1.272:1.0	272
an1.272:1.1	“Aṭṭhānametaṁ, bhikkhave, anavakāso yaṁ diṭṭhisampanno puggalo pitaraṁ jīvitā voropeyya. Netaṁ ṭhānaṁ vijjati.
an1.272:1.2	Ṭhānañca kho etaṁ, bhikkhave, vijjati yaṁ puthujjano pitaraṁ jīvitā voropeyya. Ṭhānametaṁ vijjatī”ti.
an1.273:1.0	273
an1.273:1.1	“Aṭṭhānametaṁ, bhikkhave, anavakāso yaṁ diṭṭhisampanno puggalo arahantaṁ jīvitā voropeyya. Netaṁ ṭhānaṁ vijjati.
an1.273:1.2	Ṭhānañca kho etaṁ, bhikkhave, vijjati yaṁ puthujjano arahantaṁ jīvitā voropeyya. Ṭhānametaṁ vijjatī”ti.
an1.274:1.0	274
an1.274:1.1	“Aṭṭhānametaṁ, bhikkhave, anavakāso yaṁ diṭṭhisampanno puggalo tathāgatassa paduṭṭhacitto lohitaṁ uppādeyya. Netaṁ ṭhānaṁ vijjati.
an1.274:1.2	Ṭhānañca kho etaṁ, bhikkhave, vijjati yaṁ puthujjano tathāgatassa paduṭṭhacitto lohitaṁ uppādeyya. Ṭhānametaṁ vijjatī”ti.
an1.275:1.0	275
an1.275:1.1	“Aṭṭhānametaṁ, bhikkhave, anavakāso yaṁ diṭṭhisampanno puggalo saṅghaṁ bhindeyya. Netaṁ ṭhānaṁ vijjati.
an1.275:1.2	Ṭhānañca kho etaṁ, bhikkhave, vijjati yaṁ puthujjano saṅghaṁ bhindeyya. Ṭhānametaṁ vijjatī”ti.
an1.276:1.0	276
an1.276:1.1	“Aṭṭhānametaṁ, bhikkhave, anavakāso yaṁ diṭṭhisampanno puggalo aññaṁ satthāraṁ uddiseyya. Netaṁ ṭhānaṁ vijjati.
an1.276:1.2	Ṭhānañca kho etaṁ, bhikkhave, vijjati yaṁ puthujjano aññaṁ satthāraṁ uddiseyya. Ṭhānametaṁ vijjatī”ti.
an1.277:1.0	277
an1.277:1.1	“Aṭṭhānametaṁ, bhikkhave, anavakāso yaṁ ekissā lokadhātuyā dve arahanto sammāsambuddhā apubbaṁ acarimaṁ uppajjeyyuṁ. Netaṁ ṭhānaṁ vijjati.
an1.277:1.2	Ṭhānañca kho etaṁ, bhikkhave, vijjati yaṁ ekissā lokadhātuyā ekova arahaṁ sammāsambuddho uppajjeyya. Ṭhānametaṁ vijjatī”ti.
an1.277:1.3	Vaggo paṭhamo.
an1.278:0.1	Aṅguttara Nikāya 1
an1.278:0.2	22. Dutiyavagga
an1.278:1.0	278
an1.278:1.1	“Aṭṭhānametaṁ, bhikkhave, anavakāso yaṁ ekissā lokadhātuyā dve rājāno cakkavattī apubbaṁ acarimaṁ uppajjeyyuṁ. Netaṁ ṭhānaṁ vijjati.
an1.278:1.2	Ṭhānañca kho etaṁ, bhikkhave, vijjati yaṁ ekissā lokadhātuyā eko rājā cakkavattī uppajjeyya. Ṭhānametaṁ vijjatī”ti.
an1.279:1.0	279
an1.279:1.1	“Aṭṭhānametaṁ, bhikkhave, anavakāso yaṁ itthī arahaṁ assa sammāsambuddho. Netaṁ ṭhānaṁ vijjati.
an1.279:1.2	Ṭhānañca kho, etaṁ, bhikkhave, vijjati yaṁ puriso arahaṁ assa sammāsambuddho. Ṭhānametaṁ vijjatī”ti.
an1.280:1.0	280
an1.280:1.1	“Aṭṭhānametaṁ, bhikkhave, anavakāso yaṁ itthī rājā assa cakkavattī. Netaṁ ṭhānaṁ vijjati.
an1.280:1.2	Ṭhānañca kho etaṁ, bhikkhave, vijjati yaṁ puriso rājā assa cakkavattī. Ṭhānametaṁ vijjatī”ti.
an1.281-283:1.0	281–283
an1.281-283:1.1	“Aṭṭhānametaṁ, bhikkhave, anavakāso yaṁ itthī sakkattaṁ kāreyya …pe… mārattaṁ kāreyya …pe… brahmattaṁ kāreyya. Netaṁ ṭhānaṁ vijjati.
an1.281-283:1.2	Ṭhānañca kho etaṁ, bhikkhave, vijjati yaṁ puriso sakkattaṁ kāreyya …pe… mārattaṁ kāreyya …pe… brahmattaṁ kāreyya. Ṭhānametaṁ vijjatī”ti.
an1.284:1.0	284
an1.284:1.1	“Aṭṭhānametaṁ, bhikkhave, anavakāso yaṁ kāyaduccaritassa iṭṭho kanto manāpo vipāko nibbatteyya. Netaṁ ṭhānaṁ vijjati.
an1.284:1.2	Ṭhānañca kho etaṁ, bhikkhave, vijjati yaṁ kāyaduccaritassa aniṭṭho akanto amanāpo vipāko nibbatteyya. Ṭhānametaṁ vijjatī”ti.
an1.285-286:1.0	285–286
an1.285-286:1.1	“Aṭṭhānametaṁ, bhikkhave, anavakāso yaṁ vacīduccaritassa …pe… yaṁ manoduccaritassa iṭṭho kanto manāpo vipāko nibbatteyya. Netaṁ ṭhānaṁ vijjati.
an1.285-286:1.2	Ṭhānañca kho etaṁ, bhikkhave, vijjati yaṁ manoduccaritassa aniṭṭho akanto amanāpo vipāko nibbatteyya. Ṭhānametaṁ vijjatī”ti.
an1.285-286:1.3	Vaggo dutiyo.
an1.287:0.1	Aṅguttara Nikāya 1
an1.287:0.2	23. Tatiyavagga
an1.287:1.0	287
an1.287:1.1	“Aṭṭhānametaṁ, bhikkhave, anavakāso yaṁ kāyasucaritassa aniṭṭho akanto amanāpo vipāko nibbatteyya. Netaṁ ṭhānaṁ vijjati.
an1.287:1.2	Ṭhānañca kho etaṁ, bhikkhave, vijjati yaṁ kāyasucaritassa iṭṭho kanto manāpo vipāko nibbatteyya. Ṭhānametaṁ vijjatī”ti.
an1.288-289:1.0	288–289
an1.288-289:1.1	“Aṭṭhānametaṁ, bhikkhave, anavakāso yaṁ vacīsucaritassa …pe… manosucaritassa aniṭṭho akanto amanāpo vipāko nibbatteyya. Netaṁ ṭhānaṁ vijjati.
an1.288-289:1.2	Ṭhānañca kho etaṁ, bhikkhave, vijjati yaṁ manosucaritassa iṭṭho kanto manāpo vipāko nibbatteyya. Ṭhānametaṁ vijjatī”ti.
an1.290:1.0	290
an1.290:1.1	“Aṭṭhānametaṁ, bhikkhave, anavakāso yaṁ kāyaduccaritasamaṅgī tannidānā tappaccayā kāyassa bhedā paraṁ maraṇā sugatiṁ saggaṁ lokaṁ upapajjeyya. Netaṁ ṭhānaṁ vijjati.
an1.290:1.2	Ṭhānañca kho etaṁ, bhikkhave, vijjati yaṁ kāyaduccaritasamaṅgī tannidānā tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya. Ṭhānametaṁ vijjatī”ti.
an1.291-292:1.0	291–292
an1.291-292:1.1	“Aṭṭhānametaṁ, bhikkhave, anavakāso yaṁ vacīduccaritasamaṅgī …pe… yaṁ manoduccaritasamaṅgī tannidānā tappaccayā kāyassa bhedā paraṁ maraṇā sugatiṁ saggaṁ lokaṁ upapajjeyya. Netaṁ ṭhānaṁ vijjati.
an1.291-292:1.2	Ṭhānañca kho etaṁ, bhikkhave, vijjati yaṁ manoduccaritasamaṅgī tannidānā tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya. Ṭhānametaṁ vijjatī”ti.
an1.293:1.0	293
an1.293:1.1	“Aṭṭhānametaṁ, bhikkhave, anavakāso yaṁ kāyasucaritasamaṅgī tannidānā tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya. Netaṁ ṭhānaṁ vijjati.
an1.293:1.2	Ṭhānañca kho etaṁ, bhikkhave, vijjati yaṁ kāyasucaritasamaṅgī tannidānā tappaccayā kāyassa bhedā paraṁ maraṇā sugatiṁ saggaṁ lokaṁ upapajjeyya. Ṭhānametaṁ vijjatī”ti.
an1.294-295:1.0	294–295
an1.294-295:1.1	“Aṭṭhānametaṁ, bhikkhave, anavakāso yaṁ vacīsucaritasamaṅgī …pe… yaṁ manosucaritasamaṅgī tannidānā tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya. Netaṁ ṭhānaṁ vijjati.
an1.294-295:1.2	Ṭhānañca kho etaṁ, bhikkhave, vijjati yaṁ manosucaritasamaṅgī tannidānā tappaccayā kāyassa bhedā paraṁ maraṇā sugatiṁ saggaṁ lokaṁ upapajjeyya. Ṭhānametaṁ vijjatī”ti.
an1.294-295:1.3	vaggo tatiyo.
an1.294-295:1.4	Aṭṭhānapāḷi niṭṭhitā.
an1.296:0.1	Aṅguttara Nikāya 1
an1.296:0.2	24. Paṭhamavagga
an1.296:1.0	296
an1.296:1.1	“Ekadhammo, bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṁvattati.
an1.296:1.2	Katamo ekadhammo?
an1.296:1.3	Buddhānussati.
an1.296:1.4	Ayaṁ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṁvattatī”ti.
an1.297-305:1.0	297–305
an1.297-305:1.1	“Ekadhammo, bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṁvattati.
an1.297-305:1.2	Katamo ekadhammo?
an1.297-305:1.3	Dhammānussati …pe… saṅghānussati … sīlānussati … cāgānussati … devatānussati … ānāpānassati … maraṇassati … kāyagatāsati … upasamānussati.
an1.297-305:1.4	Ayaṁ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṁvattatī”ti.
an1.297-305:1.5	Vaggo paṭhamo.
an1.306:0.1	Aṅguttara Nikāya 1
an1.306:0.2	25. Dutiyavagga
an1.306:1.0	306
an1.306:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā akusalā dhammā bhiyyobhāvāya vepullāya saṁvattanti yathayidaṁ, bhikkhave, micchādiṭṭhi.
an1.306:1.2	Micchādiṭṭhikassa, bhikkhave, anuppannā ceva akusalā dhammā uppajjanti uppannā ca akusalā dhammā bhiyyobhāvāya vepullāya saṁvattantī”ti.
an1.307:1.0	307
an1.307:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā kusalā dhammā bhiyyobhāvāya vepullāya saṁvattanti yathayidaṁ, bhikkhave, sammādiṭṭhi.
an1.307:1.2	Sammādiṭṭhikassa, bhikkhave, anuppannā ceva kusalā dhammā uppajjanti uppannā ca kusalā dhammā bhiyyobhāvāya vepullāya saṁvattantī”ti.
an1.308:1.0	308
an1.308:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā nuppajjanti uppannā vā kusalā dhammā parihāyanti yathayidaṁ, bhikkhave, micchādiṭṭhi.
an1.308:1.2	Micchādiṭṭhikassa, bhikkhave, anuppannā ceva kusalā dhammā nuppajjanti uppannā ca kusalā dhammā parihāyantī”ti.
an1.309:1.0	309
an1.309:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā nuppajjanti uppannā vā akusalā dhammā parihāyanti yathayidaṁ, bhikkhave, sammādiṭṭhi.
an1.309:1.2	Sammādiṭṭhikassa, bhikkhave, anuppannā ceva akusalā dhammā nuppajjanti uppannā ca akusalā dhammā parihāyantī”ti.
an1.310:1.0	310
an1.310:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā micchādiṭṭhi uppajjati uppannā vā micchādiṭṭhi pavaḍḍhati yathayidaṁ, bhikkhave, ayonisomanasikāro.
an1.310:1.2	Ayoniso, bhikkhave, manasi karoto anuppannā ceva micchādiṭṭhi uppajjati uppannā ca micchādiṭṭhi pavaḍḍhatī”ti.
an1.311:1.0	311
an1.311:1.1	“Nāhaṁ, bhikkhave, aññaṁ ekadhammampi samanupassāmi yena anuppannā vā sammādiṭṭhi uppajjati uppannā vā sammādiṭṭhi pavaḍḍhati yathayidaṁ, bhikkhave, yonisomanasikāro.
an1.311:1.2	Yoniso, bhikkhave, manasi karoto anuppannā ceva sammādiṭṭhi uppajjati uppannā ca sammādiṭṭhi pavaḍḍhatī”ti.
an1.312:1.0	312
an1.312:1.1	“Nāhaṁ, bhikkhave, aññaṁ ekadhammampi samanupassāmi yena sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ uppajjanti yathayidaṁ, bhikkhave, micchādiṭṭhi.
an1.312:1.2	Micchādiṭṭhiyā, bhikkhave, samannāgatā sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ uppajjantī”ti.
an1.313:1.0	313
an1.313:1.1	“Nāhaṁ, bhikkhave, aññaṁ ekadhammampi samanupassāmi yena sattā kāyassa bhedā paraṁ maraṇā sugatiṁ saggaṁ lokaṁ uppajjanti yathayidaṁ, bhikkhave, sammādiṭṭhi.
an1.313:1.2	Sammādiṭṭhiyā, bhikkhave, samannāgatā sattā kāyassa bhedā paraṁ maraṇā sugatiṁ saggaṁ lokaṁ uppajjantī”ti.
an1.314:1.0	314
an1.314:1.1	“Micchādiṭṭhikassa, bhikkhave, purisapuggalassa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …pe… yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṁvattanti.
an1.314:1.2	Taṁ kissa hetu?
an1.314:1.3	Diṭṭhi hissa, bhikkhave, pāpikā.
an1.314:1.4	Seyyathāpi, bhikkhave, nimbabījaṁ vā kosātakibījaṁ vā tittakālābubījaṁ vā allāya pathaviyā nikkhittaṁ yañceva pathavirasaṁ upādiyati yañca āporasaṁ upādiyati sabbaṁ taṁ tittakattāya kaṭukattāya asātattāya saṁvattati.
an1.314:1.5	Taṁ kissa hetu?
an1.314:1.6	Bījañhissa, bhikkhave, pāpakaṁ.
an1.314:1.7	Evamevaṁ kho, bhikkhave, micchādiṭṭhikassa purisapuggalassa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …pe… yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṁvattanti.
an1.314:1.8	Taṁ kissa hetu?
an1.314:1.9	Diṭṭhi hissa, bhikkhave, pāpikā”ti.
an1.315:1.0	315
an1.315:1.1	“Sammādiṭṭhikassa, bhikkhave, purisapuggalassa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …pe… yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṁvattanti.
an1.315:1.2	Taṁ kissa hetu?
an1.315:1.3	Diṭṭhi hissa, bhikkhave, bhaddikā.
an1.315:1.4	Seyyathāpi, bhikkhave, ucchubījaṁ vā sālibījaṁ vā muddikābījaṁ vā allāya pathaviyā nikkhittaṁ yañceva pathavirasaṁ upādiyati yañca āporasaṁ upādiyati sabbaṁ taṁ madhurattāya sātattāya asecanakattāya saṁvattati.
an1.315:1.5	Taṁ kissa hetu?
an1.315:1.6	Bījaṁ hissa, bhikkhave, bhaddakaṁ.
an1.315:1.7	Evamevaṁ kho, bhikkhave, sammādiṭṭhikassa purisapuggalassa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …pe… yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṁvattanti.
an1.315:1.8	Taṁ kissa hetu?
an1.315:1.9	Diṭṭhi hissa, bhikkhave, bhaddikā”ti.
an1.315:1.10	Vaggo dutiyo.
an1.316:0.1	Aṅguttara Nikāya 1
an1.316:0.2	26. Tatiyavagga
an1.316:1.0	316
an1.316:1.1	“Ekapuggalo, bhikkhave, loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussānaṁ.
an1.316:1.2	Katamo ekapuggalo?
an1.316:1.3	Micchādiṭṭhiko hoti viparītadassano.
an1.316:1.4	So bahujanaṁ saddhammā vuṭṭhāpetvā asaddhamme patiṭṭhāpeti.
an1.316:1.5	Ayaṁ kho, bhikkhave, ekapuggalo loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussānan”ti.
an1.317:1.0	317
an1.317:1.1	“Ekapuggalo, bhikkhave, loke uppajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussānaṁ.
an1.317:1.2	Katamo ekapuggalo?
an1.317:1.3	Sammādiṭṭhiko hoti aviparītadassano.
an1.317:1.4	So bahujanaṁ asaddhammā vuṭṭhāpetvā saddhamme patiṭṭhāpeti.
an1.317:1.5	Ayaṁ kho, bhikkhave, ekapuggalo loke uppajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussānan”ti.
an1.318:1.0	318
an1.318:1.1	“Nāhaṁ, bhikkhave, aññaṁ ekadhammampi samanupassāmi yaṁ evaṁ mahāsāvajjaṁ yathayidaṁ, bhikkhave, micchādiṭṭhi.
an1.318:1.2	Micchādiṭṭhiparamāni, bhikkhave, mahāsāvajjānī”ti.
an1.319:1.0	319
an1.319:1.1	“Nāhaṁ, bhikkhave, aññaṁ ekapuggalampi samanupassāmi yo evaṁ bahujanaahitāya paṭipanno bahujanaasukhāya, bahuno janassa anatthāya ahitāya dukkhāya devamanussānaṁ yathayidaṁ, bhikkhave, makkhali moghapuriso.
an1.319:1.2	Seyyathāpi, bhikkhave, nadīmukhe khippaṁ uḍḍeyya bahūnaṁ macchānaṁ ahitāya dukkhāya anayāya byasanāya;
an1.319:1.3	evamevaṁ kho, bhikkhave, makkhali moghapuriso manussakhippaṁ maññe loke uppanno bahūnaṁ sattānaṁ ahitāya dukkhāya anayāya byasanāyā”ti.
an1.320:1.0	320
an1.320:1.1	“Durakkhāte, bhikkhave, dhammavinaye yo ca samādapeti yañca samādapeti yo ca samādapito tathattāya paṭipajjati sabbe te bahuṁ apuññaṁ pasavanti.
an1.320:1.2	Taṁ kissa hetu?
an1.320:1.3	Durakkhātattā, bhikkhave, dhammassā”ti.
an1.321:1.0	321
an1.321:1.1	“Svākkhāte, bhikkhave, dhammavinaye yo ca samādapeti yañca samādapeti yo ca samādapito tathattāya paṭipajjati sabbe te bahuṁ puññaṁ pasavanti.
an1.321:1.2	Taṁ kissa hetu?
an1.321:1.3	Svākkhātattā, bhikkhave, dhammassā”ti.
an1.322:1.0	322
an1.322:1.1	“Durakkhāte, bhikkhave, dhammavinaye dāyakena mattā jānitabbā, no paṭiggāhakena.
an1.322:1.2	Taṁ kissa hetu?
an1.322:1.3	Durakkhātattā, bhikkhave, dhammassā”ti.
an1.323:1.0	323
an1.323:1.1	“Svākkhāte, bhikkhave, dhammavinaye paṭiggāhakena mattā jānitabbā, no dāyakena.
an1.323:1.2	Taṁ kissa hetu?
an1.323:1.3	Svākkhātattā, bhikkhave, dhammassā”ti.
an1.324:1.0	324
an1.324:1.1	“Durakkhāte, bhikkhave, dhammavinaye yo āraddhavīriyo so dukkhaṁ viharati.
an1.324:1.2	Taṁ kissa hetu?
an1.324:1.3	Durakkhātattā, bhikkhave, dhammassā”ti.
an1.325:1.0	325
an1.325:1.1	“Svākkhāte, bhikkhave, dhammavinaye yo kusīto so dukkhaṁ viharati.
an1.325:1.2	Taṁ kissa hetu?
an1.325:1.3	Svākkhātattā, bhikkhave, dhammassā”ti.
an1.326:1.0	326
an1.326:1.1	“Durakkhāte, bhikkhave, dhammavinaye yo kusīto so sukhaṁ viharati.
an1.326:1.2	Taṁ kissa hetu?
an1.326:1.3	Durakkhātattā, bhikkhave, dhammassā”ti.
an1.327:1.0	327
an1.327:1.1	“Svākkhāte, bhikkhave, dhammavinaye yo āraddhavīriyo so sukhaṁ viharati.
an1.327:1.2	Taṁ kissa hetu?
an1.327:1.3	Svākkhātattā, bhikkhave, dhammassā”ti.
an1.328:1.0	328
an1.328:1.1	“Seyyathāpi, bhikkhave, appamattakopi gūtho duggandho hoti;
an1.328:1.2	evamevaṁ kho ahaṁ, bhikkhave, appamattakampi bhavaṁ na vaṇṇemi, antamaso accharāsaṅghātamattampi”.
an1.329:1.0	329
an1.329:1.1	“Seyyathāpi, bhikkhave, appamattakampi muttaṁ duggandhaṁ hoti … appamattakopi kheḷo duggandho hoti … appamattakopi pubbo duggandho hoti … appamattakampi lohitaṁ duggandhaṁ hoti;
an1.329:1.2	evamevaṁ kho ahaṁ, bhikkhave, appamattakampi bhavaṁ na vaṇṇemi, antamaso accharāsaṅghātamattampi”.
an1.329:1.3	Vaggo tatiyo.
an1.333:0.1	Aṅguttara Nikāya 1
an1.333:0.2	27. Catutthavagga
an1.333:1.0	333
an1.333:1.1	“Seyyathāpi, bhikkhave, appamattakaṁ imasmiṁ jambudīpe ārāmarāmaṇeyyakaṁ vanarāmaṇeyyakaṁ bhūmirāmaṇeyyakaṁ pokkharaṇirāmaṇeyyakaṁ;
an1.333:1.2	atha kho etadeva bahutaraṁ yadidaṁ ukkūlavikūlaṁ nadīviduggaṁ khāṇukaṇṭakaṭṭhānaṁ pabbatavisamaṁ;
an1.333:1.3	evamevaṁ kho, bhikkhave, appakā te sattā ye thalajā, atha kho eteva sattā bahutarā ye odakā.
an1.334:1.0	334
an1.334:1.1	… Evamevaṁ kho, bhikkhave, appakā te sattā ye manussesu paccājāyanti;
an1.334:1.2	atha kho eteva sattā bahutarā ye aññatra manussehi paccājāyanti.
an1.335:1.0	335
an1.335:1.1	… Evamevaṁ kho, bhikkhave, appakā te sattā ye majjhimesu janapadesu paccājāyanti;
an1.335:1.2	atha kho eteva sattā bahutarā ye paccantimesu janapadesu paccājāyanti aviññātāresu milakkhesu.
an1.336:1.0	336
an1.336:1.1	… Evamevaṁ kho, bhikkhave, appakā te sattā ye paññavanto ajaḷā aneḷamūgā paṭibalā subhāsitadubbhāsitassa atthamaññātuṁ;
an1.336:1.2	atha kho eteva sattā bahutarā ye duppaññā jaḷā eḷamūgā na paṭibalā subhāsitadubbhāsitassa atthamaññātuṁ.
an1.337:1.0	337
an1.337:1.1	… Evamevaṁ kho, bhikkhave, appakā te sattā ye ariyena paññācakkhunā samannāgatā;
an1.337:1.2	atha kho eteva sattā bahutarā ye avijjāgatā sammūḷhā.
an1.338:1.0	338
an1.338:1.1	… Evamevaṁ kho, bhikkhave, appakā te sattā ye labhanti tathāgataṁ dassanāya;
an1.338:1.2	atha kho eteva sattā bahutarā ye na labhanti tathāgataṁ dassanāya.
an1.339:1.0	339
an1.339:1.1	… Evamevaṁ kho, bhikkhave, appakā te sattā ye labhanti tathāgatappaveditaṁ dhammavinayaṁ savanāya;
an1.339:1.2	atha kho eteva sattā bahutarā ye na labhanti tathāgatappaveditaṁ dhammavinayaṁ savanāya.
an1.340:1.0	340
an1.340:1.1	… Evamevaṁ kho, bhikkhave, appakā te sattā ye sutvā dhammaṁ dhārenti;
an1.340:1.2	atha kho eteva sattā bahutarā ye sutvā dhammaṁ na dhārenti.
an1.341:1.0	341
an1.341:1.1	… Evamevaṁ kho, bhikkhave, appakā te sattā ye dhātānaṁ dhammānaṁ atthaṁ upaparikkhanti;
an1.341:1.2	atha kho eteva sattā bahutarā ye dhātānaṁ dhammānaṁ atthaṁ na upaparikkhanti.
an1.342:1.0	342
an1.342:1.1	… Evamevaṁ kho, bhikkhave, appakā te sattā ye atthamaññāya dhammamaññāya dhammānudhammaṁ paṭipajjanti;
an1.342:1.2	atha kho eteva sattā bahutarā ye atthamaññāya dhammamaññāya dhammānudhammaṁ na paṭipajjanti.
an1.343:1.0	343
an1.343:1.1	… Evamevaṁ kho, bhikkhave, appakā te sattā ye saṁvejaniyesu ṭhānesu saṁvijjanti;
an1.343:1.2	atha kho eteva sattā bahutarā ye saṁvejaniyesu ṭhānesu na saṁvijjanti.
an1.344:1.0	344
an1.344:1.1	… Evamevaṁ kho, bhikkhave, appakā te sattā ye saṁviggā yoniso padahanti;
an1.344:1.2	atha kho eteva sattā bahutarā ye saṁviggā yoniso na padahanti.
an1.345:1.0	345
an1.345:1.1	… Evamevaṁ kho, bhikkhave, appakā te sattā ye vavassaggārammaṇaṁ karitvā labhanti samādhiṁ labhanti cittassekaggataṁ;
an1.345:1.2	atha kho eteva sattā bahutarā ye vavassaggārammaṇaṁ karitvā na labhanti samādhiṁ na labhanti cittassekaggataṁ.
an1.346:1.0	346
an1.346:1.1	… Evamevaṁ kho, bhikkhave, appakā te sattā ye annaggarasaggānaṁ lābhino;
an1.346:1.2	atha kho eteva sattā bahutarā ye annaggarasaggānaṁ na lābhino, uñchena kapālābhatena yāpenti.
an1.347:1.0	347
an1.347:1.1	… Evamevaṁ kho, bhikkhave, appakā te sattā ye attharasassa dhammarasassa vimuttirasassa lābhino;
an1.347:1.2	atha kho eteva sattā bahutarā ye attharasassa dhammarasassa vimuttirasassa na lābhino.
an1.347:1.3	Tasmātiha, bhikkhave, evaṁ sikkhitabbaṁ:
an1.347:1.4	‘attharasassa dhammarasassa vimuttirasassa lābhino bhavissāmā’ti.
an1.347:1.5	Evañhi vo, bhikkhave, sikkhitabban”ti.
an1.348-350:1.0	348–350
an1.348-350:1.1	“Seyyathāpi, bhikkhave, appamattakaṁ imasmiṁ jambudīpe ārāmarāmaṇeyyakaṁ vanarāmaṇeyyakaṁ bhūmirāmaṇeyyakaṁ pokkharaṇirāmaṇeyyakaṁ;
an1.348-350:1.2	atha kho etadeva bahutaraṁ yadidaṁ ukkūlavikūlaṁ nadīviduggaṁ khāṇukaṇṭakaṭṭhānaṁ pabbatavisamaṁ.
an1.348-350:1.3	Evamevaṁ kho, bhikkhave, appakā te sattā ye manussā cutā manussesu paccājāyanti, atha kho eteva sattā bahutarā ye manussā cutā niraye paccājāyanti …pe… tiracchānayoniyā paccājāyanti …pe… pettivisaye paccājāyanti”.
an1.351-353:1.0	351–353
an1.351-353:1.1	… Evamevaṁ kho, bhikkhave, appakā te sattā ye manussā cutā devesu paccājāyanti;
an1.351-353:1.2	atha kho eteva sattā bahutarā ye manussā cutā niraye paccājāyanti … tiracchānayoniyā paccājāyanti … pettivisaye paccājāyanti.
an1.354-356:1.0	354–356
an1.354-356:1.1	… Evamevaṁ kho, bhikkhave, appakā te sattā ye devā cutā devesu paccājāyanti;
an1.354-356:1.2	atha kho eteva sattā bahutarā ye devā cutā niraye paccājāyanti … tiracchānayoniyā paccājāyanti … pettivisaye paccājāyanti.
an1.357-359:1.0	357–359
an1.357-359:1.1	… Evamevaṁ kho, bhikkhave, appakā te sattā ye devā cutā manussesu paccājāyanti;
an1.357-359:1.2	atha kho eteva sattā bahutarā ye devā cutā niraye paccājāyanti … tiracchānayoniyā paccājāyanti … pettivisaye paccājāyanti.
an1.360-362:1.0	360–362
an1.360-362:1.1	… Evamevaṁ kho, bhikkhave, appakā te sattā ye nirayā cutā manussesu paccājāyanti;
an1.360-362:1.2	atha kho eteva sattā bahutarā ye nirayā cutā niraye paccājāyanti … tiracchānayoniyā paccājāyanti … pettivisaye paccājāyanti.
an1.363-365:1.0	363–365
an1.363-365:1.1	… Evamevaṁ kho, bhikkhave, appakā te sattā ye nirayā cutā devesu paccājāyanti;
an1.363-365:1.2	atha kho eteva sattā bahutarā ye nirayā cutā niraye paccājāyanti … tiracchānayoniyā paccājāyanti … pettivisaye paccājāyanti.
an1.366-368:1.0	366–368
an1.366-368:1.1	… Evamevaṁ kho, bhikkhave, appakā te sattā ye tiracchānayoniyā cutā manussesu paccājāyanti;
an1.366-368:1.2	atha kho eteva sattā bahutarā ye tiracchānayoniyā cutā niraye paccājāyanti … tiracchānayoniyā paccājāyanti … pettivisaye paccājāyanti.
an1.369-371:1.0	369–371
an1.369-371:1.1	… Evamevaṁ kho, bhikkhave, appakā te sattā ye tiracchānayoniyā cutā devesu paccājāyanti;
an1.369-371:1.2	atha kho eteva sattā bahutarā ye tiracchānayoniyā cutā niraye paccājāyanti … tiracchānayoniyā paccājāyanti … pettivisaye paccājāyanti.
an1.372-374:1.0	372–374
an1.372-374:1.1	… Evamevaṁ kho, bhikkhave, appakā te sattā ye pettivisayā cutā manussesu paccājāyanti;
an1.372-374:1.2	atha kho eteva sattā bahutarā ye pettivisayā cutā niraye paccājāyanti … tiracchānayoniyā paccājāyanti … pettivisaye paccājāyanti.
an1.375-377:1.0	375–377
an1.375-377:1.1	… Evamevaṁ kho, bhikkhave, appakā te sattā ye pettivisayā cutā devesu paccājāyanti;
an1.375-377:1.2	atha kho eteva sattā bahutarā ye pettivisayā cutā niraye paccājāyanti … tiracchānayoniyā paccājāyanti … pettivisaye paccājāyan”ti.
an1.375-377:1.3	vaggo catuttho.
an1.375-377:1.4	(Jambudīpapeyyālo niṭṭhito.)
an1.378:0.1	Aṅguttara Nikāya 1
an1.378:0.2	28. Pasādakaradhammavagga
an1.378:1.1	“Addhamidaṁ, bhikkhave, lābhānaṁ yadidaṁ āraññikattaṁ …pe…
an1.379:1.1	piṇḍapātikattaṁ …
an1.380:1.1	paṁsukūlikattaṁ …
an1.381:1.1	tecīvarikattaṁ …
an1.382:1.1	dhammakathikattaṁ …
an1.383:1.1	vinayadharattaṁ …
an1.384:1.1	bāhusaccaṁ …
an1.385:1.1	thāvareyyaṁ …
an1.386:1.1	ākappasampadā …
an1.387:1.1	parivārasampadā …
an1.388:1.1	mahāparivāratā …
an1.389:1.1	kolaputti …
an1.390:1.1	vaṇṇapokkharatā …
an1.391:1.1	kalyāṇavākkaraṇatā …
an1.392:1.1	appicchatā …
an1.393:1.1	appābādhatā”ti.
an1.393:1.2	(Soḷasa pasādakaradhammā niṭṭhitā.)
an1.394:0.1	Aṅguttara Nikāya 1
an1.394:0.2	29. Aparaaccharāsaṅghātavagga
an1.394:1.0	394
an1.394:1.1	“Accharāsaṅghātamattampi ce, bhikkhave, bhikkhu paṭhamaṁ jhānaṁ bhāveti, ayaṁ vuccati, bhikkhave:
an1.394:1.2	‘bhikkhu arittajjhāno viharati, satthusāsanakaro ovādapatikaro, amoghaṁ raṭṭhapiṇḍaṁ bhuñjati’.
an1.394:1.3	Ko pana vādo ye naṁ bahulīkarontī”ti.
an1.395:1.0	395–401
an1.395:1.1	“Accharāsaṅghātamattampi ce, bhikkhave, bhikkhu dutiyaṁ jhānaṁ bhāveti …pe…
an1.396:1.1	tatiyaṁ jhānaṁ bhāveti …pe…
an1.397:1.1	catutthaṁ jhānaṁ bhāveti …pe…
an1.398:1.1	mettaṁ cetovimuttiṁ bhāveti …pe…
an1.399:1.1	karuṇaṁ cetovimuttiṁ bhāveti …pe…
an1.400:1.1	muditaṁ cetovimuttiṁ bhāveti …pe…
an1.401:1.1	upekkhaṁ cetovimuttiṁ bhāveti …pe….
an1.402:1.0	402–405
an1.402:1.1	Kāye kāyānupassī viharati ātāpī sampajāno satimā vineyya loke abhijjhādomanassaṁ …pe…
an1.403:1.1	vedanāsu vedanānupassī viharati …
an1.404:1.1	citte cittānupassī viharati …
an1.405:1.1	dhammesu dhammānupassī viharati ātāpī sampajāno satimā vineyya loke abhijjhādomanassaṁ.
an1.406:1.0	406–409
an1.406:1.1	Anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an1.407:1.1	uppannānaṁ pāpakānaṁ akusalānaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati.
an1.408:1.1	Anuppannānaṁ kusalānaṁ dhammānaṁ uppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an1.409:1.1	uppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati.
an1.410:1.0	410–413
an1.410:1.1	Chandasamādhipadhānasaṅkhārasamannāgataṁ iddhipādaṁ bhāveti …
an1.411:1.1	vīriyasamādhipadhānasaṅkhārasamannāgataṁ iddhipādaṁ bhāveti …
an1.412:1.1	cittasamādhipadhānasaṅkhārasamannāgataṁ iddhipādaṁ bhāveti …
an1.413:1.1	vīmaṁsāsamādhipadhānasaṅkhārasamannāgataṁ iddhipādaṁ bhāveti ….
an1.414:1.0	414–418
an1.414:1.1	Saddhindriyaṁ bhāveti …
an1.415:1.1	vīriyindriyaṁ bhāveti …
an1.416:1.1	satindriyaṁ bhāveti …
an1.417:1.1	samādhindriyaṁ bhāveti …
an1.418:1.1	paññindriyaṁ bhāveti ….
an1.419:1.0	419–423
an1.419:1.1	Saddhābalaṁ bhāveti …
an1.420:1.1	vīriyabalaṁ bhāveti …
an1.421:1.1	satibalaṁ bhāveti …
an1.422:1.1	samādhibalaṁ bhāveti …
an1.423:1.1	paññābalaṁ bhāveti ….
an1.424:1.0	424–430
an1.424:1.1	Satisambojjhaṅgaṁ bhāveti …
an1.425:1.1	dhammavicayasambojjhaṅgaṁ bhāveti …
an1.426:1.1	vīriyasambojjhaṅgaṁ bhāveti …
an1.427:1.1	pītisambojjhaṅgaṁ bhāveti …
an1.428:1.1	passaddhisambojjhaṅgaṁ bhāveti …
an1.429:1.1	samādhisambojjhaṅgaṁ bhāveti …
an1.430:1.1	upekkhāsambojjhaṅgaṁ bhāveti ….
an1.431:1.0	431–438
an1.431:1.1	Sammādiṭṭhiṁ bhāveti …
an1.432:1.1	sammāsaṅkappaṁ bhāveti …
an1.433:1.1	sammāvācaṁ bhāveti …
an1.434:1.1	sammākammantaṁ bhāveti …
an1.435:1.1	sammāājīvaṁ bhāveti …
an1.436:1.1	sammāvāyāmaṁ bhāveti …
an1.437:1.1	sammāsatiṁ bhāveti …
an1.438:1.1	sammāsamādhiṁ bhāveti ….
an1.439:1.0	439–446
an1.439:1.1	Ajjhattaṁ rūpasaññī bahiddhā rūpāni passati parittāni suvaṇṇadubbaṇṇāni.
an1.439:1.2	Tāni abhibhuyya:
an1.439:1.3	‘jānāmi passāmī’ti—
an1.439:1.4	evaṁsaññī hoti.
an1.440:1.1	… ajjhattaṁ rūpasaññī bahiddhā rūpāni passati appamāṇāni suvaṇṇadubbaṇṇāni.
an1.440:1.2	Tāni abhibhuyya:
an1.440:1.3	‘jānāmi passāmī’ti—
an1.440:1.4	evaṁsaññī hoti.
an1.441:1.1	… ajjhattaṁ arūpasaññī bahiddhā rūpāni passati parittāni suvaṇṇadubbaṇṇāni.
an1.441:1.2	Tāni abhibhuyya:
an1.441:1.3	‘jānāmi passāmī’ti—
an1.441:1.4	evaṁsaññī hoti.
an1.442:1.1	… ajjhattaṁ arūpasaññī bahiddhā rūpāni passati appamāṇāni suvaṇṇadubbaṇṇāni.
an1.442:1.2	Tāni abhibhuyya:
an1.442:1.3	‘jānāmi passāmī’ti—
an1.442:1.4	evaṁsaññī hoti.
an1.443:1.1	… ajjhattaṁ arūpasaññī bahiddhā rūpāni passati nīlāni nīlavaṇṇāni nīlanidassanāni nīlanibhāsāni.
an1.443:1.2	Tāni abhibhuyya:
an1.443:1.3	‘jānāmi passāmī’ti—
an1.443:1.4	evaṁsaññī hoti.
an1.444:1.1	… ajjhattaṁ arūpasaññī bahiddhā rūpāni passati pītāni pītavaṇṇāni pītanidassanāni pītanibhāsāni.
an1.444:1.2	Tāni abhibhuyya:
an1.444:1.3	‘jānāmi passāmī’ti—
an1.444:1.4	evaṁsaññī hoti.
an1.445:1.1	… ajjhattaṁ arūpasaññī bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni.
an1.445:1.2	Tāni abhibhuyya:
an1.445:1.3	‘jānāmi passāmī’ti—
an1.445:1.4	evaṁsaññī hoti.
an1.446:1.1	… ajjhattaṁ arūpasaññī bahiddhā rūpāni passati odātāni odātavaṇṇāni odātanidassanāni odātanibhāsāni.
an1.446:1.2	Tāni abhibhuyya:
an1.446:1.3	‘jānāmi passāmī’ti—
an1.446:1.4	evaṁsaññī hoti.
an1.447:1.0	447–454
an1.447:1.1	Rūpī rūpāni passati …
an1.448:1.1	ajjhattaṁ arūpasaññī bahiddhā rūpāni passati …
an1.449:1.1	subhanteva adhimutto hoti …
an1.450:1.1	sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ananto ākāsoti ākāsānañcāyatanaṁ upasampajja viharati …
an1.451:1.1	sabbaso ākāsānañcāyatanaṁ samatikkamma anantaṁ viññāṇanti viññāṇañcāyatanaṁ upasampajja viharati …
an1.452:1.1	sabbaso viññāṇañcāyatanaṁ samatikkamma natthi kiñcīti ākiñcaññāyatanaṁ upasampajja viharati …
an1.453:1.1	sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati …
an1.454:1.1	sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati ….
an1.455:1.0	455–464
an1.455:1.1	Pathavikasiṇaṁ bhāveti …
an1.456:1.1	āpokasiṇaṁ bhāveti …
an1.457:1.1	tejokasiṇaṁ bhāveti …
an1.458:1.1	vāyokasiṇaṁ bhāveti …
an1.459:1.1	nīlakasiṇaṁ bhāveti …
an1.460:1.1	pītakasiṇaṁ bhāveti …
an1.461:1.1	lohitakasiṇaṁ bhāveti …
an1.462:1.1	odātakasiṇaṁ bhāveti …
an1.463:1.1	ākāsakasiṇaṁ bhāveti …
an1.464:1.1	viññāṇakasiṇaṁ bhāveti …. (…)
an1.465:1.0	465–474
an1.465:1.1	Asubhasaññaṁ bhāveti …
an1.466:1.1	maraṇasaññaṁ bhāveti …
an1.467:1.1	āhāre paṭikūlasaññaṁ bhāveti …
an1.468:1.1	sabbaloke anabhiratisaññaṁ bhāveti …
an1.469:1.1	aniccasaññaṁ bhāveti …
an1.470:1.1	anicce dukkhasaññaṁ bhāveti …
an1.471:1.1	dukkhe anattasaññaṁ bhāveti …
an1.472:1.1	pahānasaññaṁ bhāveti …
an1.473:1.1	virāgasaññaṁ bhāveti …
an1.474:1.1	nirodhasaññaṁ bhāveti ….
an1.475:1.0	475–484
an1.475:1.1	Aniccasaññaṁ bhāveti …
an1.476:1.1	anattasaññaṁ bhāveti …
an1.477:1.1	maraṇasaññaṁ bhāveti …
an1.478:1.1	āhāre paṭikūlasaññaṁ bhāveti …
an1.479:1.1	sabbaloke anabhiratisaññaṁ bhāveti …
an1.480:1.1	aṭṭhikasaññaṁ bhāveti …
an1.481:1.1	puḷavakasaññaṁ bhāveti …
an1.482:1.1	vinīlakasaññaṁ bhāveti …
an1.483:1.1	vicchiddakasaññaṁ bhāveti …
an1.484:1.1	uddhumātakasaññaṁ bhāveti ….
an1.485:1.0	485–494
an1.485:1.1	Buddhānussatiṁ bhāveti …
an1.486:1.1	dhammānussatiṁ bhāveti …
an1.487:1.1	saṅghānussatiṁ bhāveti …
an1.488:1.1	sīlānussatiṁ bhāveti …
an1.489:1.1	cāgānussatiṁ bhāveti …
an1.490:1.1	devatānussatiṁ bhāveti …
an1.491:1.1	ānāpānassatiṁ bhāveti …
an1.492:1.1	maraṇassatiṁ bhāveti …
an1.493:1.1	kāyagatāsatiṁ bhāveti …
an1.494:1.1	upasamānussatiṁ bhāveti ….
an1.495:1.0	495–574
an1.495:1.1	Paṭhamajjhānasahagataṁ saddhindriyaṁ bhāveti …
an1.496:1.1	vīriyindriyaṁ bhāveti …
an1.497:1.1	satindriyaṁ bhāveti …
an1.498:1.1	samādhindriyaṁ bhāveti …
an1.499:1.1	paññindriyaṁ bhāveti …
an1.500:1.1	saddhābalaṁ bhāveti …
an1.501:1.1	vīriyabalaṁ bhāveti …
an1.502:1.1	satibalaṁ bhāveti …
an1.503:1.1	samādhibalaṁ bhāveti …
an1.504:1.1	paññābalaṁ bhāveti ….
an1.505-514:1.1	Dutiyajjhānasahagataṁ …pe…
an1.515-524:1.1	tatiyajjhānasahagataṁ …pe…
an1.525-534:1.1	catutthajjhānasahagataṁ …pe…
an1.535-544:1.1	mettāsahagataṁ …pe…
an1.545-554:1.1	karuṇāsahagataṁ …pe…
an1.555-564:1.1	muditāsahagataṁ …pe…
an1.565:1.1	upekkhāsahagataṁ saddhindriyaṁ bhāveti …
an1.566:1.1	vīriyindriyaṁ bhāveti …
an1.567:1.1	satindriyaṁ bhāveti …
an1.568:1.1	samādhindriyaṁ bhāveti …
an1.569:1.1	paññindriyaṁ bhāveti …
an1.570:1.1	saddhābalaṁ bhāveti …
an1.571:1.1	vīriyabalaṁ bhāveti …
an1.572:1.1	satibalaṁ bhāveti …
an1.573:1.1	samādhibalaṁ bhāveti …
an1.574:1.1	paññābalaṁ bhāveti.
an1.574:2.1	Ayaṁ vuccati, bhikkhave:
an1.574:2.2	‘bhikkhu arittajjhāno viharati satthusāsanakaro ovādapatikaro, amoghaṁ raṭṭhapiṇḍaṁ bhuñjati’.
an1.574:2.3	Ko pana vādo ye naṁ bahulīkarontī”ti.
an1.574:2.4	(Aparaaccharāsaṅghātavaggo.)
an1.575:0.1	Aṅguttara Nikāya 1
an1.575:0.2	30. Kāyagatāsativagga
an1.575:1.0	575
an1.575:1.1	“Yassa kassaci, bhikkhave, mahāsamuddo cetasā phuṭo antogadhā tassa kunnadiyo yā kāci samuddaṅgamā;
an1.575:1.2	evamevaṁ, bhikkhave, yassa kassaci kāyagatā sati bhāvitā bahulīkatā antogadhā tassa kusalā dhammā ye keci vijjābhāgiyā”ti.
an1.576-582:1.0	576–582
an1.576-582:1.1	“Ekadhammo, bhikkhave, bhāvito bahulīkato mahato saṁvegāya saṁvattati … mahato atthāya saṁvattati … mahato yogakkhemāya saṁvattati … satisampajaññāya saṁvattati … ñāṇadassanappaṭilābhāya saṁvattati … diṭṭhadhammasukhavihārāya saṁvattati … vijjāvimuttiphalasacchikiriyāya saṁvattati.
an1.576-582:1.2	Katamo ekadhammo?
an1.576-582:1.3	Kāyagatā sati.
an1.576-582:1.4	Ayaṁ kho, bhikkhave, ekadhammo bhāvito bahulīkato mahato saṁvegāya saṁvattati … mahato atthāya saṁvattati … mahato yogakkhemāya saṁvattati … satisampajaññāya saṁvattati … ñāṇadassanappaṭilābhāya saṁvattati … diṭṭhadhammasukhavihārāya saṁvattati … vijjāvimuttiphalasacchikiriyāya saṁvattatī”ti.
an1.583:1.0	583
an1.583:1.1	“Ekadhamme, bhikkhave, bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṁ gacchanti.
an1.583:1.2	Katamasmiṁ ekadhamme?
an1.583:1.3	Kāyagatāya satiyā.
an1.583:1.4	Imasmiṁ kho, bhikkhave, ekadhamme bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṁ gacchantī”ti.
an1.584:1.0	584
an1.584:1.1	“Ekadhamme, bhikkhave, bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyanti.
an1.584:1.2	Katamasmiṁ ekadhamme?
an1.584:1.3	Kāyagatāya satiyā.
an1.584:1.4	Imasmiṁ kho, bhikkhave, ekadhamme bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyantī”ti.
an1.585:1.0	585
an1.585:1.1	“Ekadhamme, bhikkhave, bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṁvattanti.
an1.585:1.2	Katamasmiṁ ekadhamme?
an1.585:1.3	Kāyagatāya satiyā.
an1.585:1.4	Imasmiṁ kho, bhikkhave, ekadhamme bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṁvattantī”ti.
an1.586-590:1.0	586–590
an1.586-590:1.1	“Ekadhamme, bhikkhave, bhāvite bahulīkate avijjā pahīyati … vijjā uppajjati … asmimāno pahīyati … anusayā samugghātaṁ gacchanti … saṁyojanā pahīyanti.
an1.586-590:1.2	Katamasmiṁ ekadhamme?
an1.586-590:1.3	Kāyagatāya satiyā.
an1.586-590:1.4	Imasmiṁ kho, bhikkhave, ekadhamme bhāvite bahulīkate avijjā pahīyati … vijjā uppajjati … asmimāno pahīyati … anusayā samugghātaṁ gacchanti … saṁyojanā pahīyantī”ti.
an1.591-592:1.0	591–592
an1.591-592:1.1	“Ekadhammo, bhikkhave, bhāvito bahulīkato paññāpabhedāya saṁvattati … anupādāparinibbānāya saṁvattati.
an1.591-592:1.2	Katamo ekadhammo?
an1.591-592:1.3	Kāyagatā sati.
an1.591-592:1.4	Ayaṁ kho, bhikkhave, ekadhammo bhāvito bahulīkato paññāpabhedāya saṁvattati … anupādāparinibbānāya saṁvattatī”ti.
an1.593-595:1.0	593–595
an1.593-595:1.1	“Ekadhamme, bhikkhave, bhāvite bahulīkate anekadhātupaṭivedho hoti … nānādhātupaṭivedho hoti … anekadhātupaṭisambhidā hoti.
an1.593-595:1.2	Katamasmiṁ ekadhamme?
an1.593-595:1.3	Kāyagatāya satiyā.
an1.593-595:1.4	Imasmiṁ kho, bhikkhave, ekadhamme bhāvite bahulīkate anekadhātupaṭivedho hoti … nānādhātupaṭivedho hoti … anekadhātupaṭisambhidā hotī”ti.
an1.596-599:1.0	596–599
an1.596-599:1.1	“Ekadhammo, bhikkhave, bhāvito bahulīkato sotāpattiphalasacchikiriyāya saṁvattati … sakadāgāmiphalasacchikiriyāya saṁvattati … anāgāmiphalasacchikiriyāya saṁvattati … arahattaphalasacchikiriyāya saṁvattati.
an1.596-599:1.2	Katamo ekadhammo?
an1.596-599:1.3	Kāyagatā sati.
an1.596-599:1.4	Ayaṁ kho, bhikkhave, ekadhammo bhāvito bahulīkato sotāpattiphalasacchikiriyāya saṁvattati … sakadāgāmiphalasacchikiriyāya saṁvattati … anāgāmiphalasacchikiriyāya saṁvattati … arahattaphalasacchikiriyāya saṁvattatī”ti.
an1.600-615:1.0	600–615
an1.600-615:1.1	“Ekadhammo, bhikkhave, bhāvito bahulīkato paññāpaṭilābhāya saṁvattati … paññāvuddhiyā saṁvattati … paññāvepullāya saṁvattati … mahāpaññatāya saṁvattati … puthupaññatāya saṁvattati … vipulapaññatāya saṁvattati … gambhīrapaññatāya saṁvattati … asāmantapaññatāya saṁvattati … bhūripaññatāya saṁvattati … paññābāhullāya saṁvattati … sīghapaññatāya saṁvattati … lahupaññatāya saṁvattati … hāsapaññatāya saṁvattati … javanapaññatāya saṁvattati … tikkhapaññatāya saṁvattati … nibbedhikapaññatāya saṁvattati.
an1.600-615:1.2	Katamo ekadhammo?
an1.600-615:1.3	Kāyagatā sati.
an1.600-615:1.4	Ayaṁ kho, bhikkhave, ekadhammo bhāvito bahulīkato paññāpaṭilābhāya saṁvattati … paññāvuddhiyā saṁvattati … paññāvepullāya saṁvattati … mahāpaññatāya saṁvattati … puthupaññatāya saṁvattati … vipulapaññatāya saṁvattati … gambhīrapaññatāya saṁvattati … asāmantapaññatāya saṁvattati … bhūripaññatāya saṁvattati … paññābāhullāya saṁvattati … sīghapaññatāya saṁvattati … lahupaññatāya saṁvattati … hāsapaññatāya saṁvattati … javanapaññatāya saṁvattati … tikkhapaññatāya saṁvattati … nibbedhikapaññatāya saṁvattatī”ti.
an1.600-615:1.5	(Kāyagatāsativaggo.)
an1.616:0.1	Aṅguttara Nikāya 1
an1.616:0.2	31. Amatavagga
an1.616:1.0	616
an1.616:1.1	“Amataṁ te, bhikkhave, na paribhuñjanti ye kāyagatāsatiṁ na paribhuñjanti.
an1.616:1.2	Amataṁ te, bhikkhave, paribhuñjanti ye kāyagatāsatiṁ paribhuñjantī”ti.
an1.617:1.0	617
an1.617:1.1	“Amataṁ tesaṁ, bhikkhave, aparibhuttaṁ yesaṁ kāyagatāsati aparibhuttā.
an1.617:1.2	Amataṁ tesaṁ, bhikkhave, paribhuttaṁ yesaṁ kāyagatāsati paribhuttā”ti.
an1.618:1.0	618
an1.618:1.1	“Amataṁ tesaṁ, bhikkhave, parihīnaṁ yesaṁ kāyagatāsati parihīnā.
an1.618:1.2	Amataṁ tesaṁ, bhikkhave, aparihīnaṁ yesaṁ kāyagatāsati aparihīnā”ti.
an1.619:1.0	619
an1.619:1.1	“Amataṁ tesaṁ, bhikkhave, viraddhaṁ yesaṁ kāyagatāsati viraddhā.
an1.619:1.2	Amataṁ tesaṁ, bhikkhave, āraddhaṁ yesaṁ kāyagatāsati āraddhā”ti.
an1.620:1.0	620
an1.620:1.1	“Amataṁ te, bhikkhave, pamādiṁsu ye kāyagatāsatiṁ pamādiṁsu.
an1.620:1.2	Amataṁ te, bhikkhave, na pamādiṁsu ye kāyagatāsatiṁ na pamādiṁsu”.
an1.621:1.0	621
an1.621:1.1	“Amataṁ tesaṁ, bhikkhave, pamuṭṭhaṁ yesaṁ kāyagatāsati pamuṭṭhā.
an1.621:1.2	Amataṁ tesaṁ, bhikkhave, appamuṭṭhaṁ yesaṁ kāyagatāsati appamuṭṭhā”ti.
an1.622:1.0	622
an1.622:1.1	“Amataṁ tesaṁ, bhikkhave, anāsevitaṁ yesaṁ kāyagatāsati anāsevitā.
an1.622:1.2	Amataṁ tesaṁ, bhikkhave, āsevitaṁ yesaṁ kāyagatāsati āsevitā”ti.
an1.623:1.0	623
an1.623:1.1	“Amataṁ tesaṁ, bhikkhave, abhāvitaṁ yesaṁ kāyagatāsati abhāvitā.
an1.623:1.2	Amataṁ tesaṁ, bhikkhave, bhāvitaṁ yesaṁ kāyagatāsati bhāvitā”ti.
an1.624:1.0	624
an1.624:1.1	“Amataṁ tesaṁ, bhikkhave, abahulīkataṁ yesaṁ kāyagatāsati abahulīkatā.
an1.624:1.2	Amataṁ tesaṁ, bhikkhave, bahulīkataṁ yesaṁ kāyagatāsati bahulīkatā”ti.
an1.625:1.0	625
an1.625:1.1	“Amataṁ tesaṁ, bhikkhave, anabhiññātaṁ yesaṁ kāyagatāsati anabhiññātā.
an1.625:1.2	Amataṁ tesaṁ, bhikkhave, abhiññātaṁ yesaṁ kāyagatāsati abhiññātā”ti.
an1.626:1.0	626
an1.626:1.1	“Amataṁ tesaṁ, bhikkhave, apariññātaṁ yesaṁ kāyagatāsati apariññātā.
an1.626:1.2	Amataṁ tesaṁ, bhikkhave, pariññātaṁ yesaṁ kāyagatāsati pariññātā”ti.
an1.627:1.0	627
an1.627:1.1	“Amataṁ tesaṁ, bhikkhave, asacchikataṁ yesaṁ kāyagatāsati asacchikatā.
an1.627:1.2	Amataṁ tesaṁ, bhikkhave, sacchikataṁ yesaṁ kāyagatāsati sacchikatā”ti.
an1.627:1.3	(…)
an1.627:2.1	Idamavoca bhagavā.
an1.627:2.2	Attamanā te bhikkhū bhagavato bhāsitaṁ abhinandunti.
an1.627:2.3	(Amatavaggo.)
an1.627:2.4	Ekakanipātapāḷi niṭṭhitā.
an2.1:0.1	Aṅguttara Nikāya 2
an2.1:0.2	1. Kammakaraṇavagga
an2.1:1.0	1. Vajjasutta
an2.1:1.1	Evaṁ me sutaṁ—
an2.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an2.1:1.3	Tatra kho bhagavā bhikkhū āmantesi:
an2.1:1.4	“bhikkhavo”ti.
an2.1:1.5	“Bhadante”ti te bhikkhū bhagavato paccassosuṁ.
an2.1:1.6	Bhagavā etadavoca:
an2.1:2.1	“Dvemāni, bhikkhave, vajjāni.
an2.1:2.2	Katamāni dve?
an2.1:2.3	Diṭṭhadhammikañca vajjaṁ samparāyikañca vajjaṁ.
an2.1:2.4	Katamañca, bhikkhave, diṭṭhadhammikaṁ vajjaṁ?
an2.1:2.5	Idha, bhikkhave, ekacco passati coraṁ āgucāriṁ rājāno gahetvā vividhā kammakāraṇā kārente;
an2.1:2.6	kasāhipi tāḷente, vettehipi tāḷente, addhadaṇḍakehipi tāḷente, hatthampi chindante, pādampi chindante, hatthapādampi chindante, kaṇṇampi chindante, nāsampi chindante, kaṇṇanāsampi chindante, bilaṅgathālikampi karonte, saṅkhamuṇḍikampi karonte, rāhumukhampi karonte, jotimālikampi karonte, hatthapajjotikampi karonte, erakavattikampi karonte, cīrakavāsikampi karonte, eṇeyyakampi karonte, baḷisamaṁsikampi karonte, kahāpaṇikampi karonte, khārāpatacchikampi karonte, palighaparivattikampi karonte, palālapīṭhakampi karonte, tattenapi telena osiñcante, sunakhehipi khādāpente, jīvantampi sūle uttāsente, asināpi sīsaṁ chindante.
an2.1:3.1	Tassa evaṁ hoti:
an2.1:3.2	‘yathārūpānaṁ kho pāpakānaṁ kammānaṁ hetu coraṁ āgucāriṁ rājāno gahetvā vividhā kammakāraṇā kārenti;
an2.1:3.3	kasāhipi tāḷenti, vettehipi tāḷenti, addhadaṇḍakehipi tāḷenti, hatthampi chindanti, pādampi chindanti, hatthapādampi chindanti, kaṇṇampi chindanti, nāsampi chindanti, kaṇṇanāsampi chindanti, bilaṅgathālikampi karonti, saṅkhamuṇḍikampi karonti, rāhumukhampi karonti, jotimālikampi karonti, hatthapajjotikampi karonti, erakavattikampi karonti, cīrakavāsikampi karonti, eṇeyyakampi karonti, baḷisamaṁsikampi karonti, kahāpaṇikampi karonti, khārāpatacchikampi karonti, palighaparivattikampi karonti, palālapīṭhakampi karonti, tattenapi telena osiñcanti, sunakhehipi khādāpenti, jīvantampi sūle uttāsenti, asināpi sīsaṁ chindanti.
an2.1:3.4	Ahañceva kho pana evarūpaṁ pāpakammaṁ kareyyaṁ, mampi rājāno gahetvā evarūpā vividhā kammakāraṇā kāreyyuṁ;
an2.1:3.5	kasāhipi tāḷeyyuṁ …pe… asināpi sīsaṁ chindeyyun’ti.
an2.1:3.6	So diṭṭhadhammikassa vajjassa bhīto na paresaṁ pābhataṁ vilumpanto carati.
an2.1:3.7	Idaṁ vuccati, bhikkhave, diṭṭhadhammikaṁ vajjaṁ.
an2.1:4.1	Katamañca, bhikkhave, samparāyikaṁ vajjaṁ?
an2.1:4.2	Idha, bhikkhave, ekacco iti paṭisañcikkhati:
an2.1:4.3	‘kāyaduccaritassa kho pana pāpako dukkho vipāko abhisamparāyaṁ, vacīduccaritassa pāpako dukkho vipāko abhisamparāyaṁ, manoduccaritassa pāpako dukkho vipāko abhisamparāyaṁ.
an2.1:4.4	Ahañceva kho pana kāyena duccaritaṁ careyyaṁ, vācāya duccaritaṁ careyyaṁ, manasā duccaritaṁ careyyaṁ.
an2.1:4.5	Kiñca taṁ yāhaṁ na kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyyan’ti.
an2.1:4.6	So samparāyikassa vajjassa bhīto kāyaduccaritaṁ pahāya kāyasucaritaṁ bhāveti, vacīduccaritaṁ pahāya vacīsucaritaṁ bhāveti, manoduccaritaṁ pahāya manosucaritaṁ bhāveti, suddhaṁ attānaṁ pariharati.
an2.1:4.7	Idaṁ vuccati, bhikkhave, samparāyikaṁ vajjaṁ.
an2.1:4.8	Imāni kho, bhikkhave, dve vajjāni.
an2.1:4.9	Tasmātiha, bhikkhave, evaṁ sikkhitabbaṁ:
an2.1:4.10	‘diṭṭhadhammikassa vajjassa bhāyissāma, samparāyikassa vajjassa bhāyissāma, vajjabhīruno bhavissāma vajjabhayadassāvino’ti.
an2.1:4.11	Evañhi vo, bhikkhave, sikkhitabbaṁ.
an2.1:4.12	Vajjabhīruno, bhikkhave, vajjabhayadassāvino etaṁ pāṭikaṅkhaṁ yaṁ parimuccissati sabbavajjehī”ti.
an2.1:4.13	Paṭhamaṁ.
an2.2:1.0	2. Padhānasutta
an2.2:1.1	“Dvemāni, bhikkhave, padhānāni durabhisambhavāni lokasmiṁ.
an2.2:1.2	Katamāni dve?
an2.2:1.3	Yañca gihīnaṁ agāraṁ ajjhāvasataṁ cīvarapiṇḍapātasenāsanagilānapaccayabhesajjaparikkhārānuppadānatthaṁ padhānaṁ, yañca agārasmā anagāriyaṁ pabbajitānaṁ sabbūpadhipaṭinissaggatthaṁ padhānaṁ.
an2.2:1.4	Imāni kho, bhikkhave, dve padhānāni durabhisambhavāni lokasmiṁ.
an2.2:2.1	Etadaggaṁ, bhikkhave, imesaṁ dvinnaṁ padhānānaṁ yadidaṁ sabbūpadhipaṭinissaggatthaṁ padhānaṁ.
an2.2:2.2	Tasmātiha, bhikkhave, evaṁ sikkhitabbaṁ:
an2.2:2.3	‘sabbūpadhipaṭinissaggatthaṁ padhānaṁ padahissāmā’ti.
an2.2:2.4	Evañhi vo, bhikkhave, sikkhitabban”ti.
an2.2:2.5	Dutiyaṁ.
an2.3:1.0	3. Tapanīyasutta
an2.3:1.1	“Dveme, bhikkhave, dhammā tapanīyā.
an2.3:1.2	Katame dve?
an2.3:1.3	Idha, bhikkhave, ekaccassa kāyaduccaritaṁ kataṁ hoti, akataṁ hoti kāyasucaritaṁ;
an2.3:1.4	vacīduccaritaṁ kataṁ hoti, akataṁ hoti vacīsucaritaṁ;
an2.3:1.5	manoduccaritaṁ kataṁ hoti, akataṁ hoti manosucaritaṁ.
an2.3:1.6	So ‘kāyaduccaritaṁ me katan’ti tappati, ‘akataṁ me kāyasucaritan’ti tappati;
an2.3:1.7	‘vacīduccaritaṁ me katan’ti tappati, ‘akataṁ me vacīsucaritan’ti tappati;
an2.3:1.8	‘manoduccaritaṁ me katan’ti tappati, ‘akataṁ me manosucaritan’ti tappati.
an2.3:1.9	Ime kho, bhikkhave, dve dhammā tapanīyā”ti.
an2.3:1.10	Tatiyaṁ.
an2.4:1.0	4. Atapanīyasutta
an2.4:1.1	“Dveme, bhikkhave, dhammā atapanīyā.
an2.4:1.2	Katame dve?
an2.4:1.3	Idha, bhikkhave, ekaccassa kāyasucaritaṁ kataṁ hoti, akataṁ hoti kāyaduccaritaṁ;
an2.4:1.4	vacīsucaritaṁ kataṁ hoti, akataṁ hoti vacīduccaritaṁ;
an2.4:1.5	manosucaritaṁ kataṁ hoti, akataṁ hoti manoduccaritaṁ.
an2.4:1.6	So ‘kāyasucaritaṁ me katan’ti na tappati, ‘akataṁ me kāyaduccaritan’ti na tappati;
an2.4:1.7	‘vacīsucaritaṁ me katan’ti na tappati, ‘akataṁ me vacīduccaritan’ti na tappati;
an2.4:1.8	‘manosucaritaṁ me katan’ti na tappati, ‘akataṁ me manoduccaritan’ti na tappati.
an2.4:1.9	Ime kho, bhikkhave, dve dhammā atapanīyā”ti.
an2.4:1.10	Catutthaṁ.
an2.5:1.0	5. Upaññātasutta
an2.5:1.1	“Dvinnāhaṁ, bhikkhave, dhammānaṁ upaññāsiṁ—
an2.5:1.2	yā ca asantuṭṭhitā kusalesu dhammesu, yā ca appaṭivānitā padhānasmiṁ.
an2.5:1.3	Appaṭivānī sudāhaṁ, bhikkhave, padahāmi:
an2.5:1.4	‘kāmaṁ taco ca nhāru ca aṭṭhi ca avasissatu, sarīre upassussatu maṁsalohitaṁ, yaṁ taṁ purisathāmena purisavīriyena purisaparakkamena pattabbaṁ na taṁ apāpuṇitvā vīriyassa saṇṭhānaṁ bhavissatī’ti.
an2.5:1.5	Tassa mayhaṁ, bhikkhave, appamādādhigatā sambodhi, appamādādhigato anuttaro yogakkhemo.
an2.5:1.6	Tumhe cepi, bhikkhave, appaṭivānaṁ padaheyyātha:
an2.5:1.7	‘kāmaṁ taco ca nhāru ca aṭṭhi ca avasissatu, sarīre upassussatu maṁsalohitaṁ, yaṁ taṁ purisathāmena purisavīriyena purisaparakkamena pattabbaṁ na taṁ apāpuṇitvā vīriyassa saṇṭhānaṁ bhavissatī’ti, tumhepi, bhikkhave, nacirasseva—
an2.5:1.8	yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja viharissatha.
an2.5:1.9	Tasmātiha, bhikkhave, evaṁ sikkhitabbaṁ:
an2.5:1.10	‘appaṭivānaṁ padahissāma.
an2.5:1.11	Kāmaṁ taco ca nhāru ca aṭṭhi ca avasissatu, sarīre upassussatu maṁsalohitaṁ, yaṁ taṁ purisathāmena purisavīriyena purisaparakkamena pattabbaṁ na taṁ apāpuṇitvā vīriyassa saṇṭhānaṁ bhavissatī’ti.
an2.5:1.12	Evañhi vo, bhikkhave, sikkhitabban”ti.
an2.5:1.13	Pañcamaṁ.
an2.6:1.0	6. Saṁyojanasutta
an2.6:1.1	“Dveme, bhikkhave, dhammā.
an2.6:1.2	Katame dve?
an2.6:1.3	Yā ca saṁyojaniyesu dhammesu assādānupassitā, yā ca saṁyojaniyesu dhammesu nibbidānupassitā.
an2.6:1.4	Saṁyojaniyesu, bhikkhave, dhammesu assādānupassī viharanto rāgaṁ na pajahati, dosaṁ na pajahati, mohaṁ na pajahati.
an2.6:1.5	Rāgaṁ appahāya, dosaṁ appahāya, mohaṁ appahāya na parimuccati jātiyā jarāya maraṇena sokehi paridevehi dukkhehi domanassehi upāyāsehi.
an2.6:1.6	‘Na parimuccati dukkhasmā’ti vadāmi.
an2.6:2.1	Saṁyojaniyesu, bhikkhave, dhammesu nibbidānupassī viharanto rāgaṁ pajahati, dosaṁ pajahati, mohaṁ pajahati.
an2.6:2.2	Rāgaṁ pahāya, dosaṁ pahāya, mohaṁ pahāya, parimuccati jātiyā jarāya maraṇena sokehi paridevehi dukkhehi domanassehi upāyāsehi.
an2.6:2.3	‘Parimuccati dukkhasmā’ti vadāmi.
an2.6:2.4	Ime kho, bhikkhave, dve dhammā”ti.
an2.6:2.5	Chaṭṭhaṁ.
an2.7:1.0	7. Kaṇhasutta
an2.7:1.1	“Dveme, bhikkhave, dhammā kaṇhā.
an2.7:1.2	Katame dve?
an2.7:1.3	Ahirikañca anottappañca.
an2.7:1.4	Ime kho, bhikkhave, dve dhammā kaṇhā”ti.
an2.7:1.5	Sattamaṁ.
an2.8:1.0	8. Sukkasutta
an2.8:1.1	“Dveme, bhikkhave, dhammā sukkā.
an2.8:1.2	Katame dve?
an2.8:1.3	Hirī ca ottappañca.
an2.8:1.4	Ime kho, bhikkhave, dve dhammā sukkā”ti.
an2.8:1.5	Aṭṭhamaṁ.
an2.9:1.0	9. Cariyasutta
an2.9:1.1	“Dveme, bhikkhave, dhammā sukkā lokaṁ pālenti.
an2.9:1.2	Katame dve?
an2.9:1.3	Hirī ca ottappañca.
an2.9:1.4	Ime kho, bhikkhave, dve sukkā dhammā lokaṁ na pāleyyuṁ, nayidha paññāyetha mātāti vā mātucchāti vā mātulānīti vā ācariyabhariyāti vā garūnaṁ dārāti vā.
an2.9:1.5	Sambhedaṁ loko agamissa, yathā ajeḷakā kukkuṭasūkarā soṇasiṅgālā.
an2.9:1.6	Yasmā ca kho, bhikkhave, ime dve sukkā dhammā lokaṁ pālenti tasmā paññāyati mātāti vā mātucchāti vā mātulānīti vā ācariyabhariyāti vā garūnaṁ dārāti vā”ti.
an2.9:1.7	Navamaṁ.
an2.10:1.0	10. Vassūpanāyikasutta
an2.10:1.1	“Dvemā, bhikkhave, vassūpanāyikā.
an2.10:1.2	Katamā dve?
an2.10:1.3	Purimikā ca pacchimikā ca.
an2.10:1.4	Imā kho, bhikkhave, dve vassūpanāyikā”ti.
an2.10:1.5	Dasamaṁ.
an2.10:1.6	Kammakaraṇavaggo paṭhamo.
an2.10:2.0	Tassuddānaṁ
an2.10:2.1	Vajjā padhānā dve tapanīyā,
an2.10:2.2	Upaññātena pañcamaṁ;
an2.10:2.3	Saṁyojanañca kaṇhañca,
an2.10:2.4	Sukkaṁ cariyā vassūpanāyikena vaggo.
an2.11:0.1	Aṅguttara Nikāya 2
an2.11:0.2	2. Adhikaraṇavagga
an2.11:1.0	11
an2.11:1.1	“Dvemāni, bhikkhave, balāni.
an2.11:1.2	Katamāni dve?
an2.11:1.3	Paṭisaṅkhānabalañca bhāvanābalañca.
an2.11:1.4	Katamañca, bhikkhave, paṭisaṅkhānabalaṁ?
an2.11:1.5	Idha, bhikkhave, ekacco iti paṭisañcikkhati:
an2.11:1.6	‘kāyaduccaritassa kho pāpako vipāko diṭṭhe ceva dhamme abhisamparāyañca, vacīduccaritassa pāpako vipāko diṭṭhe ceva dhamme abhisamparāyañca, manoduccaritassa pāpako vipāko diṭṭhe ceva dhamme abhisamparāyañcā’ti.
an2.11:1.7	So iti paṭisaṅkhāya kāyaduccaritaṁ pahāya kāyasucaritaṁ bhāveti, vacīduccaritaṁ pahāya vacīsucaritaṁ bhāveti, manoduccaritaṁ pahāya manosucaritaṁ bhāveti, suddhaṁ attānaṁ pariharati.
an2.11:1.8	Idaṁ vuccati, bhikkhave, paṭisaṅkhānabalaṁ.
an2.11:2.1	Katamañca, bhikkhave, bhāvanābalaṁ.
an2.11:2.2	Tatra, bhikkhave, yamidaṁ bhāvanābalaṁ sekhānametaṁ balaṁ.
an2.11:2.3	Sekhañhi so, bhikkhave, balaṁ āgamma rāgaṁ pajahati, dosaṁ pajahati, mohaṁ pajahati.
an2.11:2.4	Rāgaṁ pahāya, dosaṁ pahāya, mohaṁ pahāya yaṁ akusalaṁ na taṁ karoti, yaṁ pāpaṁ na taṁ sevati.
an2.11:2.5	Idaṁ vuccati, bhikkhave, bhāvanābalaṁ.
an2.11:2.6	Imāni kho, bhikkhave, dve balānī”ti.
an2.12:1.0	12
an2.12:1.1	“Dvemāni, bhikkhave, balāni.
an2.12:1.2	Katamāni dve?
an2.12:1.3	Paṭisaṅkhānabalañca bhāvanābalañca.
an2.12:1.4	Katamañca, bhikkhave, paṭisaṅkhānabalaṁ?
an2.12:1.5	Idha, bhikkhave, ekacco iti paṭisañcikkhati:
an2.12:1.6	‘kāyaduccaritassa kho pāpako vipāko diṭṭhe ceva dhamme abhisamparāyañca, vacīduccaritassa pāpako vipāko diṭṭhe ceva dhamme abhisamparāyañca, manoduccaritassa pāpako vipāko diṭṭhe ceva dhamme abhisamparāyañcā’ti.
an2.12:1.7	So iti paṭisaṅkhāya kāyaduccaritaṁ pahāya kāyasucaritaṁ bhāveti, vacīduccaritaṁ pahāya vacīsucaritaṁ bhāveti, manoduccaritaṁ pahāya manosucaritaṁ bhāveti, suddhaṁ attānaṁ pariharati.
an2.12:1.8	Idaṁ vuccati, bhikkhave, paṭisaṅkhānabalaṁ.
an2.12:2.1	Katamañca, bhikkhave, bhāvanābalaṁ?
an2.12:2.2	Idha, bhikkhave, bhikkhu satisambojjhaṅgaṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ,
an2.12:2.3	dhammavicayasambojjhaṅgaṁ bhāveti …
an2.12:2.4	vīriyasambojjhaṅgaṁ bhāveti …
an2.12:2.5	pītisambojjhaṅgaṁ bhāveti …
an2.12:2.6	passaddhisambojjhaṅgaṁ bhāveti …
an2.12:2.7	samādhisambojjhaṅgaṁ bhāveti …
an2.12:2.8	upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ.
an2.12:2.9	Idaṁ vuccati, bhikkhave, bhāvanābalaṁ.
an2.12:2.10	Imāni kho, bhikkhave, dve balānī”ti.
an2.13:1.0	13
an2.13:1.1	“Dvemāni, bhikkhave, balāni.
an2.13:1.2	Katamāni dve?
an2.13:1.3	Paṭisaṅkhānabalañca bhāvanābalañca.
an2.13:1.4	Katamañca, bhikkhave, paṭisaṅkhānabalaṁ?
an2.13:1.5	Idha, bhikkhave, ekacco iti paṭisañcikkhati:
an2.13:1.6	‘kāyaduccaritassa kho pāpako vipāko diṭṭhe ceva dhamme abhisamparāyañca, vacīduccaritassa kho pāpako vipāko diṭṭhe ceva dhamme abhisamparāyañca, manoduccaritassa kho pāpako vipāko diṭṭhe ceva dhamme abhisamparāyañcā’ti.
an2.13:1.7	So iti paṭisaṅkhāya kāyaduccaritaṁ pahāya kāyasucaritaṁ bhāveti, vacīduccaritaṁ pahāya vacīsucaritaṁ bhāveti, manoduccaritaṁ pahāya manosucaritaṁ bhāveti, suddhaṁ attānaṁ pariharati.
an2.13:1.8	Idaṁ vuccati, bhikkhave, paṭisaṅkhānabalaṁ.
an2.13:2.1	Katamañca, bhikkhave, bhāvanābalaṁ?
an2.13:2.2	Idha, bhikkhave, bhikkhu vivicceva kāmehi, vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an2.13:2.3	Vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati.
an2.13:2.4	Pītiyā ca virāgā upekkhako ca viharati sato ca sampajāno, sukhañca kāyena paṭisaṁvedeti, yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharati.
an2.13:2.5	Sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
an2.13:2.6	Idaṁ vuccati, bhikkhave, bhāvanābalaṁ.
an2.13:2.7	Imāni kho, bhikkhave, dve balānī”ti.
an2.14:1.0	14
an2.14:1.1	“Dvemā, bhikkhave, tathāgatassa dhammadesanā.
an2.14:1.2	Katamā dve?
an2.14:1.3	saṅkhittena ca vitthārena ca.
an2.14:1.4	Imā kho, bhikkhave, dve tathāgatassa dhammadesanā”ti.
an2.15:1.0	15
an2.15:1.1	“Yasmiṁ, bhikkhave, adhikaraṇe āpanno ca bhikkhu codako ca bhikkhu na sādhukaṁ attanāva attānaṁ paccavekkhati tasmetaṁ, bhikkhave, adhikaraṇe pāṭikaṅkhaṁ:
an2.15:1.2	‘dīghattāya kharattāya vāḷattāya saṁvattissati, bhikkhū ca na phāsuṁ viharissantī’ti.
an2.15:1.3	Yasmiñca kho, bhikkhave, adhikaraṇe āpanno ca bhikkhu codako ca bhikkhu sādhukaṁ attanāva attānaṁ paccavekkhati tasmetaṁ, bhikkhave, adhikaraṇe pāṭikaṅkhaṁ:
an2.15:1.4	‘na dīghattāya kharattāya vāḷattāya saṁvattissati, bhikkhū ca phāsuṁ viharissantī’ti.
an2.15:2.1	Kathañca, bhikkhave, āpanno bhikkhu sādhukaṁ attanāva attānaṁ paccavekkhati?
an2.15:2.2	Idha, bhikkhave, āpanno bhikkhu iti paṭisañcikkhati:
an2.15:2.3	‘ahaṁ kho akusalaṁ āpanno kañcideva desaṁ kāyena.
an2.15:2.4	Maṁ so bhikkhu addasa akusalaṁ āpajjamānaṁ kañcideva desaṁ kāyena.
an2.15:2.5	No ce ahaṁ akusalaṁ āpajjeyyaṁ kañcideva desaṁ kāyena, na maṁ so bhikkhu passeyya akusalaṁ āpajjamānaṁ kañcideva desaṁ kāyena.
an2.15:2.6	Yasmā ca kho, ahaṁ akusalaṁ āpanno kañcideva desaṁ kāyena, tasmā maṁ so bhikkhu addasa akusalaṁ āpajjamānaṁ kañcideva desaṁ kāyena.
an2.15:2.7	Disvā ca pana maṁ so bhikkhu akusalaṁ āpajjamānaṁ kañcideva desaṁ kāyena anattamano ahosi.
an2.15:2.8	Anattamano samāno anattamanavacanaṁ maṁ so bhikkhu avaca.
an2.15:2.9	Anattamanavacanāhaṁ tena bhikkhunā vutto samāno anattamano ahosiṁ.
an2.15:2.10	Anattamano samāno paresaṁ ārocesiṁ.
an2.15:2.11	Iti mameva tattha accayo accagamā suṅkadāyakaṁva bhaṇḍasmin’ti.
an2.15:2.12	Evaṁ kho, bhikkhave, āpanno bhikkhu sādhukaṁ attanāva attānaṁ paccavekkhati.
an2.15:3.1	Kathañca, bhikkhave, codako bhikkhu sādhukaṁ attanāva attānaṁ paccavekkhati?
an2.15:3.2	Idha, bhikkhave, codako bhikkhu iti paṭisañcikkhati:
an2.15:3.3	‘ayaṁ kho bhikkhu akusalaṁ āpanno kañcideva desaṁ kāyena.
an2.15:3.4	Ahaṁ imaṁ bhikkhuṁ addasaṁ akusalaṁ āpajjamānaṁ kañcideva desaṁ kāyena.
an2.15:3.5	No ce ayaṁ bhikkhu akusalaṁ āpajjeyya kañcideva desaṁ kāyena, nāhaṁ imaṁ bhikkhuṁ passeyyaṁ akusalaṁ āpajjamānaṁ kañcideva desaṁ kāyena.
an2.15:3.6	Yasmā ca kho, ayaṁ bhikkhu akusalaṁ āpanno kañcideva desaṁ kāyena, tasmā ahaṁ imaṁ bhikkhuṁ addasaṁ akusalaṁ āpajjamānaṁ kañcideva desaṁ kāyena.
an2.15:3.7	Disvā ca panāhaṁ imaṁ bhikkhuṁ akusalaṁ āpajjamānaṁ kañcideva desaṁ kāyena anattamano ahosiṁ.
an2.15:3.8	Anattamano samāno anattamanavacanāhaṁ imaṁ bhikkhuṁ avacaṁ.
an2.15:3.9	Anattamanavacanāyaṁ bhikkhu mayā vutto samāno anattamano ahosi.
an2.15:3.10	Anattamano samāno paresaṁ ārocesi.
an2.15:3.11	Iti mameva tattha accayo accagamā suṅkadāyakaṁva bhaṇḍasmin’ti.
an2.15:3.12	Evaṁ kho, bhikkhave, codako bhikkhu sādhukaṁ attanāva attānaṁ paccavekkhati.
an2.15:4.1	Yasmiṁ, bhikkhave, adhikaraṇe āpanno ca bhikkhu codako ca bhikkhu na sādhukaṁ attanāva attānaṁ paccavekkhati tasmetaṁ, bhikkhave, adhikaraṇe pāṭikaṅkhaṁ dīghattāya kharattāya vāḷattāya saṁvattissati, bhikkhū ca na phāsuṁ viharissantīti.
an2.15:4.2	Yasmiñca kho, bhikkhave, adhikaraṇe āpanno ca bhikkhu codako ca bhikkhu sādhukaṁ attanāva attānaṁ paccavekkhati tasmetaṁ, bhikkhave, adhikaraṇe pāṭikaṅkhaṁ na dīghattāya kharattāya vāḷattāya saṁvattissati, bhikkhū ca phāsuṁ viharissantī”ti.
an2.16:1.0	16
an2.16:1.1	Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an2.16:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho so brāhmaṇo bhagavantaṁ etadavoca:
an2.16:1.3	“ko nu kho, bho gotama, hetu ko paccayo yena m’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjantī”ti?
an2.16:1.4	“Adhammacariyāvisamacariyāhetu kho, brāhmaṇa, evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjantī”ti.
an2.16:2.1	“Ko nu kho, bho gotama, hetu ko paccayo yena m’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti?
an2.16:2.2	“Dhammacariyāsamacariyāhetu kho, brāhmaṇa, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.
an2.16:3.1	“Abhikkantaṁ, bho gotama, abhikkantaṁ, bho gotama.
an2.16:3.2	Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.
an2.16:3.3	Esāhaṁ bhavantaṁ gotamaṁ saraṇaṁ gacchāmi dhammañca bhikkhusaṅghañca.
an2.16:3.4	Upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an2.17:1.0	17
an2.17:1.1	Atha kho jāṇussoṇi brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an2.17:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho jāṇussoṇi brāhmaṇo bhagavantaṁ etadavoca:
an2.17:1.3	“ko nu kho, bho gotama, hetu ko paccayo yena m’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjantī”ti?
an2.17:1.4	“Katattā ca, brāhmaṇa, akatattā ca.
an2.17:1.5	Evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjantī”ti.
an2.17:1.6	“Ko pana, bho gotama, hetu ko paccayo yena m’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti?
an2.17:1.7	“Katattā ca, brāhmaṇa, akatattā ca.
an2.17:1.8	Evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.
an2.17:1.9	“Na kho ahaṁ imassa bhoto gotamassa saṅkhittena bhāsitassa vitthārena atthaṁ avibhattassa vitthārena atthaṁ ājānāmi.
an2.17:1.10	Sādhu me bhavaṁ gotamo tathā dhammaṁ desetu yathā ahaṁ imassa bhoto gotamassa saṅkhittena bhāsitassa vitthārena atthaṁ avibhattassa vitthārena atthaṁ ājāneyyan”ti.
an2.17:1.11	“Tena hi, brāhmaṇa, suṇāhi, sādhukaṁ manasi karohi; bhāsissāmī”ti.
an2.17:1.12	“Evaṁ, bho”ti kho jāṇussoṇi brāhmaṇo bhagavato paccassosi.
an2.17:1.13	Bhagavā etadavoca:
an2.17:2.1	“Idha, brāhmaṇa, ekaccassa kāyaduccaritaṁ kataṁ hoti, akataṁ hoti kāyasucaritaṁ;
an2.17:2.2	vacīduccaritaṁ kataṁ hoti, akataṁ hoti vacīsucaritaṁ;
an2.17:2.3	manoduccaritaṁ kataṁ hoti, akataṁ hoti manosucaritaṁ.
an2.17:2.4	Evaṁ kho, brāhmaṇa, katattā ca akatattā ca evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.
an2.17:2.5	Idha pana, brāhmaṇa, ekaccassa kāyasucaritaṁ kataṁ hoti, akataṁ hoti kāyaduccaritaṁ;
an2.17:2.6	vacīsucaritaṁ kataṁ hoti, akataṁ hoti vacīduccaritaṁ;
an2.17:2.7	manosucaritaṁ kataṁ hoti, akataṁ hoti manoduccaritaṁ.
an2.17:2.8	Evaṁ kho, brāhmaṇa, katattā ca akatattā ca evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.
an2.17:3.1	“Abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an2.18:1.0	18
an2.18:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ ānandaṁ bhagavā etadavoca:
an2.18:1.2	“ekaṁsenāhaṁ, ānanda, akaraṇīyaṁ vadāmi kāyaduccaritaṁ vacīduccaritaṁ manoduccaritan”ti.
an2.18:1.3	“Yamidaṁ, bhante, bhagavatā ekaṁsena akaraṇīyaṁ akkhātaṁ kāyaduccaritaṁ vacīduccaritaṁ manoduccaritaṁ tasmiṁ akaraṇīye kayiramāne ko ādīnavo pāṭikaṅkho”ti?
an2.18:1.4	“Yamidaṁ, ānanda, mayā ekaṁsena akaraṇīyaṁ akkhātaṁ kāyaduccaritaṁ vacīduccaritaṁ manoduccaritaṁ tasmiṁ akaraṇīye kayiramāne ayaṁ ādīnavo pāṭikaṅkho—
an2.18:1.5	attāpi attānaṁ upavadati,
an2.18:1.6	anuvicca viññū garahanti,
an2.18:1.7	pāpako kittisaddo abbhuggacchati,
an2.18:1.8	sammūḷho kālaṁ karoti,
an2.18:1.9	kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an2.18:1.10	Yamidaṁ, ānanda, mayā ekaṁsena akaraṇīyaṁ akkhātaṁ kāyaduccaritaṁ vacīduccaritaṁ manoduccaritaṁ tasmiṁ akaraṇīye kayiramāne ayaṁ ādīnavo pāṭikaṅkho”ti.
an2.18:2.1	“Ekaṁsenāhaṁ, ānanda, karaṇīyaṁ vadāmi kāyasucaritaṁ vacīsucaritaṁ manosucaritan”ti.
an2.18:2.2	“Yamidaṁ, bhante, bhagavatā ekaṁsena karaṇīyaṁ akkhātaṁ kāyasucaritaṁ vacīsucaritaṁ manosucaritaṁ tasmiṁ karaṇīye kayiramāne ko ānisaṁso pāṭikaṅkho”ti?
an2.18:2.3	“Yamidaṁ, ānanda, mayā ekaṁsena karaṇīyaṁ akkhātaṁ kāyasucaritaṁ vacīsucaritaṁ manosucaritaṁ tasmiṁ karaṇīye kayiramāne ayaṁ ānisaṁso pāṭikaṅkho—
an2.18:2.4	attāpi attānaṁ na upavadati,
an2.18:2.5	anuvicca viññū pasaṁsanti,
an2.18:2.6	kalyāṇo kittisaddo abbhuggacchati,
an2.18:2.7	asammūḷho kālaṁ karoti,
an2.18:2.8	kāyassa bhedā paraṁ maraṇā sugatiṁ saggaṁ lokaṁ upapajjati.
an2.18:2.9	Yamidaṁ, ānanda, mayā ekaṁsena karaṇīyaṁ akkhātaṁ kāyasucaritaṁ vacīsucaritaṁ manosucaritaṁ tasmiṁ karaṇīye kayiramāne ayaṁ ānisaṁso pāṭikaṅkho”ti.
an2.19:1.0	19
an2.19:1.1	“Akusalaṁ, bhikkhave, pajahatha.
an2.19:1.2	Sakkā, bhikkhave, akusalaṁ pajahituṁ.
an2.19:1.3	No cedaṁ, bhikkhave, sakkā abhavissa akusalaṁ pajahituṁ, nāhaṁ evaṁ vadeyyaṁ:
an2.19:1.4	‘akusalaṁ, bhikkhave, pajahathā’ti.
an2.19:1.5	Yasmā ca kho, bhikkhave, sakkā akusalaṁ pajahituṁ tasmāhaṁ evaṁ vadāmi:
an2.19:1.6	‘akusalaṁ, bhikkhave, pajahathā’ti.
an2.19:1.7	Akusalañca hidaṁ, bhikkhave, pahīnaṁ ahitāya dukkhāya saṁvatteyya nāhaṁ evaṁ vadeyyaṁ:
an2.19:1.8	‘akusalaṁ, bhikkhave, pajahathā’ti.
an2.19:1.9	Yasmā ca kho, bhikkhave, akusalaṁ pahīnaṁ hitāya sukhāya saṁvattati tasmāhaṁ evaṁ vadāmi:
an2.19:1.10	‘akusalaṁ, bhikkhave, pajahathā’”ti.
an2.19:2.1	“Kusalaṁ, bhikkhave, bhāvetha.
an2.19:2.2	Sakkā, bhikkhave, kusalaṁ bhāvetuṁ.
an2.19:2.3	No cedaṁ, bhikkhave, sakkā abhavissa kusalaṁ bhāvetuṁ, nāhaṁ evaṁ vadeyyaṁ:
an2.19:2.4	‘kusalaṁ, bhikkhave, bhāvethā’ti.
an2.19:2.5	Yasmā ca kho, bhikkhave, sakkā kusalaṁ bhāvetuṁ tasmāhaṁ evaṁ vadāmi:
an2.19:2.6	‘kusalaṁ, bhikkhave, bhāvethā’ti.
an2.19:2.7	Kusalañca hidaṁ, bhikkhave, bhāvitaṁ ahitāya dukkhāya saṁvatteyya, nāhaṁ evaṁ vadeyyaṁ:
an2.19:2.8	‘kusalaṁ, bhikkhave, bhāvethā’ti.
an2.19:2.9	Yasmā ca kho, bhikkhave, kusalaṁ bhāvitaṁ hitāya sukhāya saṁvattati tasmāhaṁ evaṁ vadāmi:
an2.19:2.10	‘kusalaṁ, bhikkhave, bhāvethā’”ti.
an2.20:1.0	20
an2.20:1.1	“Dveme, bhikkhave, dhammā saddhammassa sammosāya antaradhānāya saṁvattanti.
an2.20:1.2	Katame dve?
an2.20:1.3	Dunnikkhittañca padabyañjanaṁ attho ca dunnīto.
an2.20:1.4	Dunnikkhittassa, bhikkhave, padabyañjanassa atthopi dunnayo hoti.
an2.20:1.5	Ime kho, bhikkhave, dve dhammā saddhammassa sammosāya antaradhānāya saṁvattantī”ti.
an2.20:2.1	“Dveme, bhikkhave, dhammā saddhammassa ṭhitiyā asammosāya anantaradhānāya saṁvattanti.
an2.20:2.2	Katame dve?
an2.20:2.3	Sunikkhittañca padabyañjanaṁ attho ca sunīto.
an2.20:2.4	Sunikkhittassa, bhikkhave, padabyañjanassa atthopi sunayo hoti.
an2.20:2.5	Ime kho, bhikkhave, dve dhammā saddhammassa ṭhitiyā asammosāya anantaradhānāya saṁvattantī”ti.
an2.20:2.6	Adhikaraṇavaggo dutiyo.
an2.21:0.1	Aṅguttara Nikāya 2
an2.21:0.2	3. Bālavagga
an2.21:1.0	21
an2.21:1.1	“Dveme, bhikkhave, bālā.
an2.21:1.2	Katame dve?
an2.21:1.3	Yo ca accayaṁ accayato na passati, yo ca accayaṁ desentassa yathādhammaṁ nappaṭiggaṇhāti.
an2.21:1.4	Ime kho, bhikkhave, dve bālāti.
an2.21:2.1	Dveme, bhikkhave, paṇḍitā.
an2.21:2.2	Katame dve?
an2.21:2.3	Yo ca accayaṁ accayato passati, yo ca accayaṁ desentassa yathādhammaṁ paṭiggaṇhāti.
an2.21:2.4	Ime kho, bhikkhave, dve paṇḍitā”ti.
an2.22:1.0	22
an2.22:1.1	“Dveme, bhikkhave, tathāgataṁ abbhācikkhanti.
an2.22:1.2	Katame dve?
an2.22:1.3	Duṭṭho vā dosantaro, saddho vā duggahitena.
an2.22:1.4	Ime kho, bhikkhave, dve tathāgataṁ abbhācikkhantī”ti.
an2.23:1.0	23
an2.23:1.1	“Dveme, bhikkhave, tathāgataṁ abbhācikkhanti.
an2.23:1.2	Katame dve?
an2.23:1.3	Yo ca abhāsitaṁ alapitaṁ tathāgatena bhāsitaṁ lapitaṁ tathāgatenāti dīpeti, yo ca bhāsitaṁ lapitaṁ tathāgatena abhāsitaṁ alapitaṁ tathāgatenāti dīpeti.
an2.23:1.4	Ime kho, bhikkhave, dve tathāgataṁ abbhācikkhantīti.
an2.23:2.1	Dveme, bhikkhave, tathāgataṁ nābbhācikkhanti.
an2.23:2.2	Katame dve?
an2.23:2.3	Yo ca abhāsitaṁ alapitaṁ tathāgatena abhāsitaṁ alapitaṁ tathāgatenāti dīpeti, yo ca bhāsitaṁ lapitaṁ tathāgatena bhāsitaṁ lapitaṁ tathāgatenāti dīpeti.
an2.23:2.4	Ime kho, bhikkhave, dve tathāgataṁ nābbhācikkhantī”ti.
an2.24:1.0	24
an2.24:1.1	“Dveme, bhikkhave, tathāgataṁ abbhācikkhanti.
an2.24:1.2	Katame dve?
an2.24:1.3	Yo ca neyyatthaṁ suttantaṁ nītattho suttantoti dīpeti, yo ca nītatthaṁ suttantaṁ neyyattho suttantoti dīpeti.
an2.24:1.4	Ime kho, bhikkhave, dve tathāgataṁ abbhācikkhantī”ti.
an2.25:1.0	25
an2.25:1.1	“Dveme, bhikkhave, tathāgataṁ nābbhācikkhanti.
an2.25:1.2	Katame dve?
an2.25:1.3	Yo ca neyyatthaṁ suttantaṁ neyyattho suttantoti dīpeti, yo ca nītatthaṁ suttantaṁ nītattho suttantoti dīpeti.
an2.25:1.4	Ime kho, bhikkhave, dve tathāgataṁ nābbhācikkhantī”ti.
an2.26:1.0	26
an2.26:1.1	“Paṭicchannakammantassa, bhikkhave, dvinnaṁ gatīnaṁ aññatarā gati pāṭikaṅkhā—
an2.26:1.2	nirayo vā tiracchānayoni vāti.
an2.26:2.1	Appaṭicchannakammantassa, bhikkhave, dvinnaṁ gatīnaṁ aññatarā gati pāṭikaṅkhā—
an2.26:2.2	devā vā manussā vā”ti.
an2.27:1.0	27
an2.27:1.1	“Micchādiṭṭhikassa, bhikkhave, dvinnaṁ gatīnaṁ aññatarā gati pāṭikaṅkhā—
an2.27:1.2	nirayo vā tiracchānayoni vā”ti.
an2.28:1.0	28
an2.28:1.1	“Sammādiṭṭhikassa, bhikkhave, dvinnaṁ gatīnaṁ aññatarā gati pāṭikaṅkhā—
an2.28:1.2	devā vā manussā vā”ti.
an2.29:1.0	29
an2.29:1.1	“Dussīlassa, bhikkhave, dve paṭiggāhā—
an2.29:1.2	nirayo vā tiracchānayoni vā.
an2.29:2.1	Sīlavato, bhikkhave, dve paṭiggāhā—
an2.29:2.2	devā vā manussā vā”ti.
an2.30:1.0	30
an2.30:1.1	“Dvāhaṁ, bhikkhave, atthavase sampassamāno araññavanapatthāni pantāni senāsanāni paṭisevāmi.
an2.30:1.2	Katame dve?
an2.30:1.3	Attano ca diṭṭhadhammasukhavihāraṁ sampassamāno, pacchimañca janataṁ anukampamāno.
an2.30:1.4	Ime kho ahaṁ, bhikkhave, dve atthavase sampassamāno araññavanapatthāni pantāni senāsanāni paṭisevāmī”ti.
an2.31:1.0	31
an2.31:1.1	“Dve me, bhikkhave, dhammā vijjābhāgiyā.
an2.31:1.2	Katame dve?
an2.31:1.3	Samatho ca vipassanā ca.
an2.31:1.4	Samatho, bhikkhave, bhāvito kamatthamanubhoti?
an2.31:1.5	Cittaṁ bhāvīyati.
an2.31:1.6	Cittaṁ bhāvitaṁ kamatthamanubhoti?
an2.31:1.7	Yo rāgo so pahīyati.
an2.31:1.8	Vipassanā, bhikkhave, bhāvitā kamatthamanubhoti?
an2.31:1.9	Paññā bhāvīyati.
an2.31:1.10	Paññā bhāvitā kamatthamanubhoti?
an2.31:1.11	Yā avijjā sā pahīyati.
an2.31:1.12	Rāgupakkiliṭṭhaṁ vā, bhikkhave, cittaṁ na vimuccati, avijjupakkiliṭṭhā vā paññā na bhāvīyati.
an2.31:1.13	Iti kho, bhikkhave, rāgavirāgā cetovimutti, avijjāvirāgā paññāvimuttī”ti.
an2.31:1.14	Bālavaggo tatiyo.
an2.32:0.1	Aṅguttara Nikāya 2
an2.32:0.2	4. Samacittavagga
an2.32:1.0	32
an2.32:1.1	“Asappurisabhūmiñca vo, bhikkhave, desessāmi sappurisabhūmiñca.
an2.32:1.2	Taṁ suṇātha, sādhukaṁ manasi karotha. bhāsissāmī”ti.
an2.32:1.3	“Evaṁ, bhante”ti kho te bhikkhū bhagavato paccassosuṁ.
an2.32:1.4	Bhagavā etadavoca:
an2.32:2.1	“Katamā ca, bhikkhave, asappurisabhūmi?
an2.32:2.2	Asappuriso, bhikkhave, akataññū hoti akatavedī.
an2.32:2.3	Asabbhi hetaṁ, bhikkhave, upaññātaṁ yadidaṁ akataññutā akataveditā.
an2.32:2.4	Kevalā esā, bhikkhave, asappurisabhūmi yadidaṁ akataññutā akataveditā. (…)
an2.32:2.5	Sappuriso ca kho, bhikkhave, kataññū hoti katavedī.
an2.32:2.6	Sabbhi hetaṁ, bhikkhave, upaññātaṁ yadidaṁ kataññutā kataveditā.
an2.32:2.7	Kevalā esā, bhikkhave, sappurisabhūmi yadidaṁ kataññutā kataveditā”ti.
an2.33:1.0	33
an2.33:1.1	“Dvinnāhaṁ, bhikkhave, na suppatikāraṁ vadāmi.
an2.33:1.2	Katamesaṁ dvinnaṁ?
an2.33:1.3	Mātu ca pitu ca.
an2.33:1.4	Ekena, bhikkhave, aṁsena mātaraṁ parihareyya, ekena aṁsena pitaraṁ parihareyya vassasatāyuko vassasatajīvī so ca nesaṁ ucchādanaparimaddananhāpanasambāhanena.
an2.33:1.5	Te ca tattheva muttakarīsaṁ cajeyyuṁ, na tveva, bhikkhave, mātāpitūnaṁ kataṁ vā hoti paṭikataṁ vā.
an2.33:1.6	Imissā ca, bhikkhave, mahāpathaviyā pahūtarattaratanāya mātāpitaro issarādhipacce rajje patiṭṭhāpeyya, na tveva, bhikkhave, mātāpitūnaṁ kataṁ vā hoti paṭikataṁ vā.
an2.33:1.7	Taṁ kissa hetu?
an2.33:1.8	Bahukārā, bhikkhave, mātāpitaro puttānaṁ āpādakā posakā imassa lokassa dassetāro.
an2.33:1.9	Yo ca kho, bhikkhave, mātāpitaro assaddhe saddhāsampadāya samādapeti niveseti patiṭṭhāpeti, dussīle sīlasampadāya samādapeti niveseti patiṭṭhāpeti, maccharī cāgasampadāya samādapeti niveseti patiṭṭhāpeti, duppaññe paññāsampadāya samādapeti niveseti patiṭṭhāpeti, ettāvatā kho, bhikkhave, mātāpitūnaṁ katañca hoti paṭikatañcā”ti.
an2.34:1.0	34
an2.34:1.1	Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi. Sammodanīyaṁ kathaṁ …pe… ekamantaṁ nisinno kho so brāhmaṇo bhagavantaṁ etadavoca:
an2.34:1.2	“kiṁvādī bhavaṁ gotamo kimakkhāyī”ti?
an2.34:1.3	“Kiriyavādī cāhaṁ, brāhmaṇa, akiriyavādī cā”ti.
an2.34:1.4	“Yathākathaṁ pana bhavaṁ gotamo kiriyavādī ca akiriyavādī cā”ti?
an2.34:2.1	“Akiriyaṁ kho ahaṁ, brāhmaṇa, vadāmi kāyaduccaritassa vacīduccaritassa manoduccaritassa, anekavihitānaṁ pāpakānaṁ akusalānaṁ dhammānaṁ akiriyaṁ vadāmi.
an2.34:2.2	Kiriyañca kho ahaṁ, brāhmaṇa, vadāmi kāyasucaritassa vacīsucaritassa manosucaritassa, anekavihitānaṁ kusalānaṁ dhammānaṁ kiriyaṁ vadāmi.
an2.34:2.3	Evaṁ kho ahaṁ, brāhmaṇa, kiriyavādī ca akiriyavādī cā”ti.
an2.34:3.1	“Abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an2.35:1.0	35
an2.35:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho anāthapiṇḍiko gahapati bhagavantaṁ etadavoca:
an2.35:1.2	“kati nu kho, bhante, loke dakkhiṇeyyā, kattha ca dānaṁ dātabban”ti?
an2.35:1.3	“Dve kho, gahapati, loke dakkhiṇeyyā—
an2.35:1.4	sekho ca asekho ca.
an2.35:1.5	Ime kho, gahapati, dve loke dakkhiṇeyyā, ettha ca dānaṁ dātabban”ti.
an2.35:2.1	Idamavoca bhagavā.
an2.35:2.2	Idaṁ vatvāna sugato athāparaṁ etadavoca satthā:
an2.35:3.1	“Sekho asekho ca imasmiṁ loke,
an2.35:3.2	Āhuneyyā yajamānānaṁ honti;
an2.35:3.3	Te ujjubhūtā kāyena,
an2.35:3.4	Vācāya uda cetasā;
an2.35:3.5	Khettaṁ taṁ yajamānānaṁ,
an2.35:3.6	Ettha dinnaṁ mahapphalan”ti.
an2.36:1.0	36
an2.36:1.1	Evaṁ me sutaṁ—
an2.36:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an2.36:1.3	Tena kho pana samayena āyasmā sāriputto sāvatthiyaṁ viharati pubbārāme migāramātupāsāde.
an2.36:1.4	Tatra kho āyasmā sāriputto bhikkhū āmantesi:
an2.36:1.5	“āvuso bhikkhave”ti.
an2.36:1.6	“Āvuso”ti kho te bhikkhū āyasmato sāriputtassa paccassosuṁ.
an2.36:1.7	Āyasmā sāriputto etadavoca:
an2.36:1.8	“ajjhattasaṁyojanañca, āvuso, puggalaṁ desessāmi bahiddhāsaṁyojanañca.
an2.36:1.9	Taṁ suṇātha, sādhukaṁ manasi karotha, bhāsissāmī”ti.
an2.36:1.10	“Evamāvuso”ti kho te bhikkhū āyasmato sāriputtassa paccassosuṁ.
an2.36:1.11	Āyasmā sāriputto etadavoca:
an2.36:2.1	“Katamo cāvuso, ajjhattasaṁyojano puggalo?
an2.36:2.2	Idhāvuso, bhikkhu sīlavā hoti, pātimokkhasaṁvarasaṁvuto viharati ācāragocarasampanno, aṇumattesu vajjesu bhayadassāvī, samādāya sikkhati sikkhāpadesu.
an2.36:2.3	So kāyassa bhedā paraṁ maraṇā aññataraṁ devanikāyaṁ upapajjati.
an2.36:2.4	So tato cuto āgāmī hoti, āgantā itthattaṁ.
an2.36:2.5	Ayaṁ vuccati, āvuso, ajjhattasaṁyojano puggalo āgāmī hoti, āgantā itthattaṁ.
an2.36:3.1	Katamo cāvuso, bahiddhāsaṁyojano puggalo?
an2.36:3.2	Idhāvuso, bhikkhu sīlavā hoti, pātimokkhasaṁvarasaṁvuto viharati ācāragocarasampanno, aṇumattesu vajjesu bhayadassāvī, samādāya sikkhati sikkhāpadesu.
an2.36:3.3	So aññataraṁ santaṁ cetovimuttiṁ upasampajja viharati.
an2.36:3.4	So kāyassa bhedā paraṁ maraṇā aññataraṁ devanikāyaṁ upapajjati.
an2.36:3.5	So tato cuto anāgāmī hoti, anāgantā itthattaṁ.
an2.36:3.6	Ayaṁ vuccatāvuso, bahiddhāsaṁyojano puggalo anāgāmī hoti, anāgantā itthattaṁ.
an2.36:4.1	Puna caparaṁ, āvuso, bhikkhu sīlavā hoti …pe… samādāya sikkhati sikkhāpadesu.
an2.36:4.2	So kāmānaṁyeva nibbidāya virāgāya nirodhāya paṭipanno hoti.
an2.36:4.3	So bhavānaṁyeva nibbidāya virāgāya nirodhāya paṭipanno hoti.
an2.36:4.4	So taṇhākkhayāya paṭipanno hoti.
an2.36:4.5	So lobhakkhayāya paṭipanno hoti.
an2.36:4.6	So kāyassa bhedā paraṁ maraṇā aññataraṁ devanikāyaṁ upapajjati.
an2.36:4.7	So tato cuto anāgāmī hoti, anāgantā itthattaṁ.
an2.36:4.8	Ayaṁ vuccatāvuso, bahiddhāsaṁyojano puggalo anāgāmī hoti, anāgantā itthattan”ti.
an2.36:5.1	Atha kho sambahulā samacittā devatā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ aṭṭhaṁsu. Ekamantaṁ ṭhitā kho tā devatā bhagavantaṁ etadavocuṁ:
an2.36:5.2	“eso, bhante, āyasmā sāriputto pubbārāme migāramātupāsāde bhikkhūnaṁ ajjhattasaṁyojanañca puggalaṁ deseti bahiddhāsaṁyojanañca.
an2.36:5.3	Haṭṭhā, bhante, parisā.
an2.36:5.4	Sādhu, bhante, bhagavā yenāyasmā sāriputto tenupasaṅkamatu anukampaṁ upādāyā”ti.
an2.36:5.5	Adhivāsesi bhagavā tuṇhībhāvena.
an2.36:5.6	Atha kho bhagavā—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—jetavane antarahito pubbārāme migāramātupāsāde āyasmato sāriputtassa sammukhe pāturahosi.
an2.36:5.7	Nisīdi bhagavā paññatte āsane.
an2.36:5.8	Āyasmāpi kho sāriputto bhagavantaṁ abhivādetvā ekamantaṁ nisīdi.
an2.36:5.9	Ekamantaṁ nisinnaṁ kho āyasmantaṁ sāriputtaṁ bhagavā etadavoca:
an2.36:6.1	“Idha, sāriputta, sambahulā samacittā devatā yenāhaṁ tenupasaṅkamiṁsu; upasaṅkamitvā maṁ abhivādetvā ekamantaṁ aṭṭhaṁsu. Ekamantaṁ ṭhitā kho, sāriputta, tā devatā maṁ etadavocuṁ:
an2.36:6.2	‘eso, bhante, āyasmā sāriputto pubbārāme migāramātupāsāde bhikkhūnaṁ ajjhattasaṁyojanañca puggalaṁ deseti bahiddhāsaṁyojanañca.
an2.36:6.3	Haṭṭhā, bhante, parisā.
an2.36:6.4	Sādhu, bhante, bhagavā yena āyasmā sāriputto tenupasaṅkamatu anukampaṁ upādāyā’ti.
an2.36:6.5	Tā kho pana, sāriputta, devatā dasapi hutvā vīsampi hutvā tiṁsampi hutvā cattālīsampi hutvā paññāsampi hutvā saṭṭhipi hutvā āraggakoṭinitudanamattepi tiṭṭhanti, na ca aññamaññaṁ byābādhenti.
an2.36:6.6	Siyā kho pana, sāriputta, evamassa:
an2.36:6.7	‘tattha nūna tāsaṁ devatānaṁ tathā cittaṁ bhāvitaṁ yena tā devatā dasapi hutvā vīsampi hutvā tiṁsampi hutvā cattālīsampi hutvā paññāsampi hutvā saṭṭhipi hutvā āraggakoṭinitudanamattepi tiṭṭhanti na ca aññamaññaṁ byābādhentī’ti.
an2.36:6.8	Na kho panetaṁ, sāriputta, evaṁ daṭṭhabbaṁ.
an2.36:6.9	Idheva kho, sāriputta, tāsaṁ devatānaṁ tathā cittaṁ bhāvitaṁ, yena tā devatā dasapi hutvā …pe… na ca aññamaññaṁ byābādhenti.
an2.36:6.10	Tasmātiha, sāriputta, evaṁ sikkhitabbaṁ:
an2.36:6.11	‘santindriyā bhavissāma santamānasā’ti.
an2.36:6.12	Evañhi vo, sāriputta, sikkhitabbaṁ.
an2.36:6.13	‘Santindriyānañhi vo, sāriputta, santamānasānaṁ santaṁyeva kāyakammaṁ bhavissati santaṁ vacīkammaṁ santaṁ manokammaṁ.
an2.36:6.14	Santaṁyeva upahāraṁ upaharissāma sabrahmacārīsū’ti.
an2.36:6.15	‘Evañhi vo, sāriputta, sikkhitabbaṁ.
an2.36:6.16	Anassuṁ kho, sāriputta, aññatitthiyā paribbājakā ye imaṁ dhammapariyāyaṁ nāssosun’”ti.
an2.37:1.0	37
an2.37:1.1	Evaṁ me sutaṁ—
an2.37:1.2	ekaṁ samayaṁ āyasmā mahākaccāno varaṇāyaṁ viharati bhaddasāritīre.
an2.37:1.3	Atha kho ārāmadaṇḍo brāhmaṇo yenāyasmā mahākaccāno tenupasaṅkami; upasaṅkamitvā āyasmatā mahākaccānena saddhiṁ sammodi.
an2.37:1.4	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho ārāmadaṇḍo brāhmaṇo āyasmantaṁ mahākaccānaṁ etadavoca:
an2.37:1.5	“ko nu kho, bho kaccāna, hetu ko paccayo yena khattiyāpi khattiyehi vivadanti, brāhmaṇāpi brāhmaṇehi vivadanti, gahapatikāpi gahapatikehi vivadantī”ti?
an2.37:1.6	“Kāmarāgābhinivesavinibandhapaligedhapariyuṭṭhānajjhosānahetu kho, brāhmaṇa, khattiyāpi khattiyehi vivadanti, brāhmaṇāpi brāhmaṇehi vivadanti, gahapatikāpi gahapatikehi vivadantī”ti.
an2.37:2.1	“Ko pana, bho kaccāna, hetu ko paccayo yena samaṇāpi samaṇehi vivadantī”ti?
an2.37:2.2	“Diṭṭhirāgābhinivesavinibandhapaligedhapariyuṭṭhānajjhosānahetu kho, brāhmaṇa, samaṇāpi samaṇehi vivadantī”ti.
an2.37:3.1	“Atthi pana, bho kaccāna, koci lokasmiṁ yo imañceva kāmarāgābhinivesavinibandhapaligedhapariyuṭṭhānajjhosānaṁ samatikkanto, imañca diṭṭhirāgābhinivesavinibandhapaligedhapariyuṭṭhānajjhosānaṁ samatikkanto”ti?
an2.37:3.2	“Atthi, brāhmaṇa, lokasmiṁ yo imañceva kāmarāgābhinivesavinibandhapaligedhapariyuṭṭhānajjhosānaṁ samatikkanto, imañca diṭṭhirāgābhinivesavinibandhapaligedhapariyuṭṭhānajjhosānaṁ samatikkanto”ti.
an2.37:4.1	“Ko pana so, bho kaccāna, lokasmiṁ yo imañceva kāmarāgābhinivesavinibandhapaligedhapariyuṭṭhānajjhosānaṁ samatikkanto, imañca diṭṭhirāgābhinivesavinibandhapaligedhapariyuṭṭhānajjhosānaṁ samatikkanto”ti?
an2.37:4.2	“Atthi, brāhmaṇa, puratthimesu janapadesu sāvatthī nāma nagaraṁ.
an2.37:4.3	Tattha so bhagavā etarahi viharati arahaṁ sammāsambuddho.
an2.37:4.4	So hi, brāhmaṇa, bhagavā imañceva kāmarāgābhinivesavinibandhapaligedhapariyuṭṭhānajjhosānaṁ samatikkanto, imañca diṭṭhirāgābhinivesavinibandhapaligedhapariyuṭṭhānajjhosānaṁ samatikkanto”ti.
an2.37:5.1	Evaṁ vutte, ārāmadaṇḍo brāhmaṇo uṭṭhāyāsanā ekaṁsaṁ uttarāsaṅgaṁ karitvā dakkhiṇaṁ jāṇumaṇḍalaṁ pathaviyaṁ nihantvā yena bhagavā tenañjaliṁ paṇāmetvā tikkhattuṁ udānaṁ udānesi:
an2.37:6.1	“Namo tassa bhagavato arahato sammāsambuddhassa.
an2.37:7.1	Namo tassa bhagavato arahato sammāsambuddhassa.
an2.37:8.1	Namo tassa bhagavato arahato sammāsambuddhassa.
an2.37:9.1	Yo hi so bhagavā imañceva kāmarāgābhinivesavinibandhapaligedhapariyuṭṭhānajjhosānaṁ samatikkanto, imañca diṭṭhirāgābhinivesavinibandhapaligedhapariyuṭṭhānajjhosānaṁ samatikkanto”ti.
an2.37:10.1	“Abhikkantaṁ, bho kaccāna, abhikkantaṁ, bho kaccāna.
an2.37:10.2	Seyyathāpi, bho kaccāna, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya; andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā kaccānena anekapariyāyena dhammo pakāsito.
an2.37:10.3	Esāhaṁ, bho kaccāna, taṁ bhavantaṁ gotamaṁ saraṇaṁ gacchāmi dhammañca bhikkhusaṅghañca.
an2.37:10.4	Upāsakaṁ maṁ bhavaṁ kaccāno dhāretu ajjatagge pāṇupetaṁ saraṇaṁ gatan”ti.
an2.38:1.0	38
an2.38:1.1	Ekaṁ samayaṁ āyasmā mahākaccāno madhurāyaṁ viharati gundāvane.
an2.38:1.2	Atha kho kandarāyano brāhmaṇo yenāyasmā mahākaccāno tenupasaṅkami; upasaṅkamitvā āyasmatā mahākaccānena saddhiṁ …pe… ekamantaṁ nisinno kho kandarāyano brāhmaṇo āyasmantaṁ mahākaccānaṁ etadavoca:
an2.38:1.3	“sutaṁ metaṁ, bho kaccāna, ‘na samaṇo kaccāno brāhmaṇe jiṇṇe vuddhe mahallake addhagate vayoanuppatte abhivādeti vā paccuṭṭheti vā āsanena vā nimantetī’ti.
an2.38:1.4	Tayidaṁ, bho kaccāna, tatheva?
an2.38:1.5	Na hi bhavaṁ kaccāno brāhmaṇe jiṇṇe vuddhe mahallake addhagate vayoanuppatte abhivādeti vā paccuṭṭheti vā āsanena vā nimanteti.
an2.38:1.6	Tayidaṁ, bho kaccāna, na sampannamevā”ti.
an2.38:2.1	“Atthi, brāhmaṇa, tena bhagavatā jānatā passatā arahatā sammāsambuddhena vuddhabhūmi ca akkhātā daharabhūmi ca.
an2.38:2.2	Vuddho cepi, brāhmaṇa, hoti āsītiko vā nāvutiko vā vassasatiko vā jātiyā, so ca kāme paribhuñjati kāmamajjhāvasati kāmapariḷāhena pariḍayhati kāmavitakkehi khajjati kāmapariyesanāya ussuko.
an2.38:2.3	Atha kho so bālo na therotveva saṅkhyaṁ gacchati.
an2.38:2.4	Daharo cepi, brāhmaṇa, hoti yuvā susukāḷakeso bhadrena yobbanena samannāgato paṭhamena vayasā.
an2.38:2.5	So ca na kāme paribhuñjati na kāmamajjhāvasati, na kāmapariḷāhena pariḍayhati, na kāmavitakkehi khajjati, na kāmapariyesanāya ussuko.
an2.38:2.6	Atha kho so paṇḍito therotveva saṅkhyaṁ gacchatī”ti.
an2.38:3.1	Evaṁ vutte, kandarāyano brāhmaṇo uṭṭhāyāsanā ekaṁsaṁ uttarāsaṅgaṁ karitvā daharānaṁ sataṁ bhikkhūnaṁ pāde sirasā vandati:
an2.38:3.2	“vuddhā bhavanto, vuddhabhūmiyaṁ ṭhitā.
an2.38:3.3	Daharā mayaṁ, daharabhūmiyaṁ ṭhitā”ti.
an2.38:4.1	“Abhikkantaṁ, bho kaccāna …pe… upāsakaṁ maṁ bhavaṁ kaccāno dhāretu ajjatagge pāṇupetaṁ saraṇaṁ gatan”ti.
an2.39:1.0	39
an2.39:1.1	“Yasmiṁ, bhikkhave, samaye corā balavanto honti, rājāno tasmiṁ samaye dubbalā honti.
an2.39:1.2	Tasmiṁ, bhikkhave, samaye rañño na phāsu hoti atiyātuṁ vā niyyātuṁ vā paccantime vā janapade anusaññātuṁ.
an2.39:1.3	Brāhmaṇagahapatikānampi tasmiṁ samaye na phāsu hoti atiyātuṁ vā niyyātuṁ vā bāhirāni vā kammantāni paṭivekkhituṁ.
an2.39:1.4	Evamevaṁ kho, bhikkhave, yasmiṁ samaye pāpabhikkhū balavanto honti, pesalā bhikkhū tasmiṁ samaye dubbalā honti.
an2.39:1.5	Tasmiṁ, bhikkhave, samaye pesalā bhikkhū tuṇhībhūtā tuṇhībhūtāva saṅghamajjhe saṅkasāyanti paccantime vā janapade acchanti.
an2.39:1.6	Tayidaṁ, bhikkhave, hoti bahujanāhitāya bahujanāsukhāya, bahuno janassa anatthāya ahitāya dukkhāya devamanussānaṁ.
an2.39:2.1	Yasmiṁ, bhikkhave, samaye rājāno balavanto honti, corā tasmiṁ samaye dubbalā honti.
an2.39:2.2	Tasmiṁ, bhikkhave, samaye rañño phāsu hoti atiyātuṁ vā niyyātuṁ vā paccantime vā janapade anusaññātuṁ.
an2.39:2.3	Brāhmaṇagahapatikānampi tasmiṁ samaye phāsu hoti atiyātuṁ vā niyyātuṁ vā bāhirāni vā kammantāni paṭivekkhituṁ.
an2.39:2.4	Evamevaṁ kho, bhikkhave, yasmiṁ samaye pesalā bhikkhū balavanto honti, pāpabhikkhū tasmiṁ samaye dubbalā honti.
an2.39:2.5	Tasmiṁ, bhikkhave, samaye pāpabhikkhū tuṇhībhūtā tuṇhībhūtāva saṅghamajjhe saṅkasāyanti, yena vā pana tena pakkamanti.
an2.39:2.6	Tayidaṁ, bhikkhave, hoti bahujanahitāya bahujanasukhāya, bahuno janassa atthāya hitāya sukhāya devamanussānan”ti.
an2.40:1.0	40
an2.40:1.1	“Dvinnāhaṁ, bhikkhave, micchāpaṭipattiṁ na vaṇṇemi, gihissa vā pabbajitassa vā.
an2.40:1.2	Gihī vā, bhikkhave, pabbajito vā micchāpaṭipanno micchāpaṭipattādhikaraṇahetu na ārādhako hoti ñāyaṁ dhammaṁ kusalaṁ.
an2.40:2.1	Dvinnāhaṁ, bhikkhave, sammāpaṭipattiṁ vaṇṇemi, gihissa vā pabbajitassa vā.
an2.40:2.2	Gihī vā, bhikkhave, pabbajito vā sammāpaṭipanno sammāpaṭipattādhikaraṇahetu ārādhako hoti ñāyaṁ dhammaṁ kusalan”ti.
an2.41:1.0	41
an2.41:1.1	“Ye te, bhikkhave, bhikkhū duggahitehi suttantehi byañjanappatirūpakehi atthañca dhammañca paṭibāhanti te, bhikkhave, bhikkhū bahujanāhitāya paṭipannā bahujanāsukhāya, bahuno janassa anatthāya ahitāya dukkhāya devamanussānaṁ.
an2.41:1.2	Bahuñca te, bhikkhave, bhikkhū apuññaṁ pasavanti, te cimaṁ saddhammaṁ antaradhāpenti.
an2.41:2.1	Ye te, bhikkhave, bhikkhū suggahitehi suttantehi byañjanappatirūpakehi atthañca dhammañca anulomenti te, bhikkhave, bhikkhū bahujanahitāya paṭipannā bahujanasukhāya, bahuno janassa atthāya hitāya sukhāya devamanussānaṁ.
an2.41:2.2	Bahuñca te, bhikkhave, bhikkhū puññaṁ pasavanti, te cimaṁ saddhammaṁ ṭhapentī”ti.
an2.41:2.3	Samacittavaggo catuttho.
an2.42:0.1	Aṅguttara Nikāya 2
an2.42:0.2	5. Parisavagga
an2.42:1.0	42
an2.42:1.1	“Dvemā, bhikkhave, parisā.
an2.42:1.2	Katamā dve?
an2.42:1.3	Uttānā ca parisā gambhīrā ca parisā.
an2.42:1.4	Katamā ca, bhikkhave, uttānā parisā?
an2.42:1.5	Idha, bhikkhave, yassaṁ parisāyaṁ bhikkhū uddhatā honti unnaḷā capalā mukharā vikiṇṇavācā muṭṭhassatī asampajānā asamāhitā vibbhantacittā pākatindriyā.
an2.42:1.6	Ayaṁ vuccati, bhikkhave, uttānā parisā.
an2.42:2.1	Katamā ca, bhikkhave, gambhīrā parisā?
an2.42:2.2	Idha, bhikkhave, yassaṁ parisāyaṁ bhikkhū anuddhatā honti anunnaḷā acapalā amukharā avikiṇṇavācā upaṭṭhitassatī sampajānā samāhitā ekaggacittā saṁvutindriyā.
an2.42:2.3	Ayaṁ vuccati, bhikkhave, gambhīrā parisā.
an2.42:2.4	Imā kho, bhikkhave, dve parisā.
an2.42:2.5	Etadaggaṁ, bhikkhave, imāsaṁ dvinnaṁ parisānaṁ yadidaṁ gambhīrā parisā”ti.
an2.43:1.0	43
an2.43:1.1	“Dvemā, bhikkhave, parisā.
an2.43:1.2	Katamā dve?
an2.43:1.3	Vaggā ca parisā samaggā ca parisā.
an2.43:1.4	Katamā ca, bhikkhave, vaggā parisā?
an2.43:1.5	Idha, bhikkhave, yassaṁ parisāyaṁ bhikkhū bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti.
an2.43:1.6	Ayaṁ vuccati, bhikkhave, vaggā parisā.
an2.43:2.1	Katamā ca, bhikkhave, samaggā parisā?
an2.43:2.2	Idha, bhikkhave, yassaṁ parisāyaṁ bhikkhū samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharanti.
an2.43:2.3	Ayaṁ vuccati, bhikkhave, samaggā parisā.
an2.43:2.4	Imā kho, bhikkhave, dve parisā.
an2.43:2.5	Etadaggaṁ, bhikkhave, imāsaṁ dvinnaṁ parisānaṁ yadidaṁ samaggā parisā”ti.
an2.44:1.0	44
an2.44:1.1	“Dvemā, bhikkhave, parisā.
an2.44:1.2	Katamā dve?
an2.44:1.3	Anaggavatī ca parisā aggavatī ca parisā.
an2.44:1.4	Katamā ca, bhikkhave, anaggavatī parisā?
an2.44:1.5	Idha, bhikkhave, yassaṁ parisāyaṁ therā bhikkhū bāhulikā honti sāthalikā, okkamane pubbaṅgamā, paviveke nikkhittadhurā, na vīriyaṁ ārabhanti appattassa pattiyā anadhigatassa adhigamāya asacchikatassa sacchikiriyāya.
an2.44:1.6	Tesaṁ pacchimā janatā diṭṭhānugatiṁ āpajjati.
an2.44:1.7	Sāpi hoti bāhulikā sāthalikā, okkamane pubbaṅgamā, paviveke nikkhittadhurā, na vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an2.44:1.8	Ayaṁ vuccati, bhikkhave, anaggavatī parisā.
an2.44:2.1	Katamā ca, bhikkhave, aggavatī parisā?
an2.44:2.2	Idha, bhikkhave, yassaṁ parisāyaṁ therā bhikkhū na bāhulikā honti na sāthalikā, okkamane nikkhittadhurā, paviveke pubbaṅgamā, vīriyaṁ ārabhanti appattassa pattiyā anadhigatassa adhigamāya asacchikatassa sacchikiriyāya.
an2.44:2.3	Tesaṁ pacchimā janatā diṭṭhānugatiṁ āpajjati.
an2.44:2.4	Sāpi hoti na bāhulikā na sāthalikā, okkamane nikkhittadhurā, paviveke pubbaṅgamā, vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an2.44:2.5	Ayaṁ vuccati, bhikkhave, aggavatī parisā.
an2.44:2.6	Imā kho, bhikkhave, dve parisā.
an2.44:2.7	Etadaggaṁ, bhikkhave, imāsaṁ dvinnaṁ parisānaṁ yadidaṁ aggavatī parisā”ti.
an2.45:1.0	45
an2.45:1.1	“Dvemā, bhikkhave, parisā.
an2.45:1.2	Katamā dve?
an2.45:1.3	Anariyā ca parisā ariyā ca parisā.
an2.45:1.4	Katamā ca, bhikkhave, anariyā parisā?
an2.45:1.5	Idha, bhikkhave, yassaṁ parisāyaṁ bhikkhū ‘idaṁ dukkhan’ti yathābhūtaṁ nappajānanti, ‘ayaṁ dukkhasamudayo’ti yathābhūtaṁ nappajānanti, ‘ayaṁ dukkhanirodho’ti yathābhūtaṁ nappajānanti, ‘ayaṁ dukkhanirodhagāminī paṭipadā’ti yathābhūtaṁ nappajānanti.
an2.45:1.6	Ayaṁ vuccati, bhikkhave, anariyā parisā.
an2.45:2.1	Katamā ca, bhikkhave, ariyā parisā?
an2.45:2.2	Idha, bhikkhave, yassaṁ parisāyaṁ bhikkhū ‘idaṁ dukkhan’ti yathābhūtaṁ pajānanti, ‘ayaṁ dukkhasamudayo’ti yathābhūtaṁ pajānanti, ‘ayaṁ dukkhanirodho’ti yathābhūtaṁ pajānanti, ‘ayaṁ dukkhanirodhagāminī paṭipadā’ti yathābhūtaṁ pajānanti.
an2.45:2.3	Ayaṁ vuccati, bhikkhave, ariyā parisā.
an2.45:2.4	Imā kho, bhikkhave, dve parisā.
an2.45:2.5	Etadaggaṁ, bhikkhave, imāsaṁ dvinnaṁ parisānaṁ yadidaṁ ariyā parisā”ti.
an2.46:1.0	46
an2.46:1.1	“Dvemā, bhikkhave, parisā.
an2.46:1.2	Katamā dve?
an2.46:1.3	Parisākasaṭo ca parisāmaṇḍo ca.
an2.46:1.4	Katamo ca, bhikkhave, parisākasaṭo?
an2.46:1.5	Idha, bhikkhave, yassaṁ parisāyaṁ bhikkhū chandāgatiṁ gacchanti, dosāgatiṁ gacchanti, mohāgatiṁ gacchanti, bhayāgatiṁ gacchanti.
an2.46:1.6	Ayaṁ vuccati, bhikkhave, parisākasaṭo.
an2.46:2.1	Katamo ca, bhikkhave, parisāmaṇḍo?
an2.46:2.2	Idha, bhikkhave, yassaṁ parisāyaṁ bhikkhū na chandāgatiṁ gacchanti, na dosāgatiṁ gacchanti, na mohāgatiṁ gacchanti, na bhayāgatiṁ gacchanti.
an2.46:2.3	Ayaṁ vuccati, bhikkhave, parisāmaṇḍo.
an2.46:2.4	Imā kho, bhikkhave, dve parisā.
an2.46:2.5	Etadaggaṁ, bhikkhave, imāsaṁ dvinnaṁ parisānaṁ yadidaṁ parisāmaṇḍo”ti.
an2.47:1.0	47
an2.47:1.1	“Dvemā, bhikkhave, parisā.
an2.47:1.2	Katamā dve?
an2.47:1.3	Okkācitavinītā parisā nopaṭipucchāvinītā, paṭipucchāvinītā parisā nookkācitavinītā.
an2.47:1.4	Katamā ca, bhikkhave, okkācitavinītā parisā nopaṭipucchāvinītā?
an2.47:1.5	Idha, bhikkhave, yassaṁ parisāyaṁ bhikkhū ye te suttantā tathāgatabhāsitā gambhīrā gambhīratthā lokuttarā suññatāpaṭisaṁyuttā tesu bhaññamānesu na sussūsanti na sotaṁ odahanti na aññā cittaṁ upaṭṭhapenti na ca te dhamme uggahetabbaṁ pariyāpuṇitabbaṁ maññanti.
an2.47:1.6	Ye pana te suttantā kavitā kāveyyā cittakkharā cittabyañjanā bāhirakā sāvakabhāsitā tesu bhaññamānesu sussūsanti sotaṁ odahanti aññā cittaṁ upaṭṭhapenti, te dhamme uggahetabbaṁ pariyāpuṇitabbaṁ maññanti, te ca taṁ dhammaṁ pariyāpuṇitvā na ceva aññamaññaṁ paṭipucchanti na ca paṭivicaranti:
an2.47:1.7	‘idaṁ kathaṁ, imassa ko attho’ti?
an2.47:1.8	Te avivaṭañceva na vivaranti, anuttānīkatañca na uttānīkaronti, anekavihitesu ca kaṅkhāṭhāniyesu dhammesu kaṅkhaṁ na paṭivinodenti.
an2.47:1.9	Ayaṁ vuccati, bhikkhave, okkācitavinītā parisā no paṭipucchāvinītā.
an2.47:2.1	Katamā ca, bhikkhave, paṭipucchāvinītā parisā nookkācitavinītā?
an2.47:2.2	Idha, bhikkhave, yassaṁ parisāyaṁ bhikkhū ye te suttantā kavitā kāveyyā cittakkharā cittabyañjanā bāhirakā sāvakabhāsitā tesu bhaññamānesu na sussūsanti na sotaṁ odahanti na aññā cittaṁ upaṭṭhapenti, na ca te dhamme uggahetabbaṁ pariyāpuṇitabbaṁ maññanti.
an2.47:2.3	Ye pana te suttantā tathāgatabhāsitā gambhīrā gambhīratthā lokuttarā suññatāpaṭisaṁyuttā tesu bhaññamānesu sussūsanti sotaṁ odahanti aññā cittaṁ upaṭṭhapenti, te ca dhamme uggahetabbaṁ pariyāpuṇitabbaṁ maññanti.
an2.47:2.4	Te taṁ dhammaṁ pariyāpuṇitvā aññamaññaṁ paṭipucchanti paṭivicaranti:
an2.47:2.5	‘idaṁ kathaṁ, imassa ko attho’ti?
an2.47:2.6	Te avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṁ paṭivinodenti.
an2.47:2.7	Ayaṁ vuccati, bhikkhave, paṭipucchāvinītā parisā nookkācitavinītā.
an2.47:2.8	Imā kho, bhikkhave, dve parisā.
an2.47:2.9	Etadaggaṁ, bhikkhave, imāsaṁ dvinnaṁ parisānaṁ yadidaṁ paṭipucchāvinītā parisā nookkācitavinītā”ti.
an2.48:1.0	48
an2.48:1.1	“Dvemā, bhikkhave, parisā.
an2.48:1.2	Katamā dve?
an2.48:1.3	Āmisagaru parisā no saddhammagaru, saddhammagaru parisā no āmisagaru.
an2.48:1.4	Katamā ca, bhikkhave, āmisagaru parisā no saddhammagaru?
an2.48:1.5	Idha, bhikkhave, yassaṁ parisāyaṁ bhikkhū gihīnaṁ odātavasanānaṁ sammukhā aññamaññassa vaṇṇaṁ bhāsanti:
an2.48:1.6	‘asuko bhikkhu ubhatobhāgavimutto, asuko paññāvimutto, asuko kāyasakkhī, asuko diṭṭhippatto, asuko saddhāvimutto, asuko dhammānusārī, asuko saddhānusārī, asuko sīlavā kalyāṇadhammo, asuko dussīlo pāpadhammo’ti.
an2.48:1.7	Te tena lābhaṁ labhanti.
an2.48:1.8	Te taṁ lābhaṁ labhitvā gathitā mucchitā ajjhopannā anādīnavadassāvino anissaraṇapaññā paribhuñjanti.
an2.48:1.9	Ayaṁ vuccati, bhikkhave, āmisagaru parisā no saddhammagaru.
an2.48:2.1	Katamā ca, bhikkhave, saddhammagaru parisā noāmisagaru?
an2.48:2.2	Idha, bhikkhave, yassaṁ parisāyaṁ bhikkhū gihīnaṁ odātavasanānaṁ sammukhā aññamaññassa vaṇṇaṁ na bhāsanti:
an2.48:2.3	‘asuko bhikkhu ubhatobhāgavimutto, asuko paññāvimutto, asuko kāyasakkhī, asuko diṭṭhippatto, asuko saddhāvimutto, asuko dhammānusārī, asuko saddhānusārī, asuko sīlavā kalyāṇadhammo, asuko dussīlo pāpadhammo’ti.
an2.48:2.4	Te tena lābhaṁ labhanti.
an2.48:2.5	Te taṁ lābhaṁ labhitvā agathitā amucchitā anajjhosannā ādīnavadassāvino nissaraṇapaññā paribhuñjanti.
an2.48:2.6	Ayaṁ vuccati, bhikkhave, saddhammagaru parisā noāmisagaru.
an2.48:2.7	Imā kho, bhikkhave, dve parisā.
an2.48:2.8	Etadaggaṁ, bhikkhave, imāsaṁ dvinnaṁ parisānaṁ yadidaṁ saddhammagaru parisā noāmisagarū”ti.
an2.49:1.0	49
an2.49:1.1	“Dvemā, bhikkhave, parisā.
an2.49:1.2	Katamā dve?
an2.49:1.3	Visamā ca parisā samā ca parisā.
an2.49:1.4	Katamā ca, bhikkhave, visamā parisā?
an2.49:1.5	Idha, bhikkhave, yassaṁ parisāyaṁ adhammakammāni pavattanti dhammakammāni nappavattanti, avinayakammāni pavattanti vinayakammāni nappavattanti, adhammakammāni dippanti dhammakammāni na dippanti, avinayakammāni dippanti vinayakammāni na dippanti.
an2.49:1.6	Ayaṁ vuccati, bhikkhave, visamā parisā. (…)
an2.49:2.1	Katamā ca, bhikkhave, samā parisā?
an2.49:2.2	Idha, bhikkhave, yassaṁ parisāyaṁ dhammakammāni pavattanti adhammakammāni nappavattanti, vinayakammāni pavattanti avinayakammāni nappavattanti, dhammakammāni dippanti adhammakammāni na dippanti, vinayakammāni dippanti avinayakammāni na dippanti.
an2.49:2.3	Ayaṁ vuccati, bhikkhave, samā parisā. (…)
an2.49:2.4	Imā kho, bhikkhave, dve parisā.
an2.49:2.5	Etadaggaṁ, bhikkhave, imāsaṁ dvinnaṁ parisānaṁ yadidaṁ samā parisā”ti.
an2.50:1.0	50
an2.50:1.1	“Dvemā, bhikkhave, parisā.
an2.50:1.2	Katamā dve?
an2.50:1.3	Adhammikā ca parisā dhammikā ca parisā …pe… imā kho, bhikkhave, dve parisā.
an2.50:1.4	Etadaggaṁ, bhikkhave, imāsaṁ dvinnaṁ parisānaṁ yadidaṁ dhammikā parisā”ti.
an2.51:1.0	51
an2.51:1.1	“Dvemā, bhikkhave, parisā.
an2.51:1.2	Katamā dve?
an2.51:1.3	Adhammavādinī ca parisā dhammavādinī ca parisā.
an2.51:1.4	Katamā ca, bhikkhave, adhammavādinī parisā?
an2.51:1.5	Idha, bhikkhave, yassaṁ parisāyaṁ bhikkhū adhikaraṇaṁ ādiyanti dhammikaṁ vā adhammikaṁ vā.
an2.51:1.6	Te taṁ adhikaraṇaṁ ādiyitvā na ceva aññamaññaṁ saññāpenti na ca saññattiṁ upagacchanti, na ca nijjhāpenti na ca nijjhattiṁ upagacchanti.
an2.51:1.7	Te asaññattibalā anijjhattibalā appaṭinissaggamantino tameva adhikaraṇaṁ thāmasā parāmāsā abhinivissa voharanti:
an2.51:1.8	‘idameva saccaṁ moghamaññan’ti.
an2.51:1.9	Ayaṁ vuccati, bhikkhave, adhammavādinī parisā.
an2.51:2.1	Katamā ca, bhikkhave, dhammavādinī parisā?
an2.51:2.2	Idha, bhikkhave, yassaṁ parisāyaṁ bhikkhū adhikaraṇaṁ ādiyanti dhammikaṁ vā adhammikaṁ vā.
an2.51:2.3	Te taṁ adhikaraṇaṁ ādiyitvā aññamaññaṁ saññāpenti ceva saññattiñca upagacchanti, nijjhāpenti ceva nijjhattiñca upagacchanti.
an2.51:2.4	Te saññattibalā nijjhattibalā paṭinissaggamantino, na tameva adhikaraṇaṁ thāmasā parāmāsā abhinivissa voharanti:
an2.51:2.5	‘idameva saccaṁ moghamaññan’ti.
an2.51:2.6	Ayaṁ vuccati, bhikkhave, dhammavādinī parisā.
an2.51:2.7	Imā kho, bhikkhave, dve parisā.
an2.51:2.8	Etadaggaṁ, bhikkhave, imāsaṁ dvinnaṁ parisānaṁ yadidaṁ dhammavādinī parisā”ti.
an2.51:2.9	Parisavaggo pañcamo.
an2.51:3.0	Tassuddānaṁ
an2.51:3.1	Uttānā vaggā aggavatī,
an2.51:3.2	Ariyā kasaṭo ca pañcamo;
an2.51:3.3	Okkācitaāmisañceva,
an2.51:3.4	Visamā adhammādhammiyena cāti.
an2.51:3.5	Paṭhamo paṇṇāsako samatto.
an2.52:0.1	Aṅguttara Nikāya 2
an2.52:0.2	6. Puggalavagga
an2.52:1.0	52
an2.52:1.1	“Dveme, bhikkhave, puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussānaṁ.
an2.52:1.2	Katame dve?
an2.52:1.3	Tathāgato ca arahaṁ sammāsambuddho, rājā ca cakkavattī.
an2.52:1.4	Ime kho, bhikkhave, dve puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussānan”ti.
an2.53:1.0	53
an2.53:1.1	“Dveme, bhikkhave, puggalā loke uppajjamānā uppajjanti acchariyamanussā.
an2.53:1.2	Katame dve?
an2.53:1.3	Tathāgato ca arahaṁ sammāsambuddho, rājā ca cakkavattī.
an2.53:1.4	Ime kho, bhikkhave, dve puggalā loke uppajjamānā uppajjanti acchariyamanussā”ti.
an2.54:1.0	54
an2.54:1.1	“Dvinnaṁ, bhikkhave, puggalānaṁ kālakiriyā bahuno janassa anutappā hoti.
an2.54:1.2	Katamesaṁ dvinnaṁ?
an2.54:1.3	Tathāgatassa ca arahato sammāsambuddhassa, rañño ca cakkavattissa.
an2.54:1.4	Imesaṁ kho, bhikkhave, dvinnaṁ puggalānaṁ kālakiriyā bahuno janassa anutappā hotī”ti.
an2.55:1.0	55
an2.55:1.1	“Dveme, bhikkhave, thūpārahā.
an2.55:1.2	Katame dve?
an2.55:1.3	Tathāgato ca arahaṁ sammāsambuddho, rājā ca cakkavattī.
an2.55:1.4	Ime kho, bhikkhave, dve thūpārahā”ti.
an2.56:1.0	56
an2.56:1.1	“Dveme, bhikkhave, buddhā.
an2.56:1.2	Katame dve?
an2.56:1.3	Tathāgato ca arahaṁ sammāsambuddho, paccekabuddho ca.
an2.56:1.4	Ime kho, bhikkhave, dve buddhā”ti.
an2.57:1.0	57
an2.57:1.1	“Dveme, bhikkhave, asaniyā phalantiyā na santasanti.
an2.57:1.2	Katame dve?
an2.57:1.3	Bhikkhu ca khīṇāsavo, hatthājānīyo ca.
an2.57:1.4	Ime kho, bhikkhave, dve asaniyā phalantiyā na santasantī”ti.
an2.58:1.0	58
an2.58:1.1	“Dveme, bhikkhave, asaniyā phalantiyā na santasanti.
an2.58:1.2	Katame dve?
an2.58:1.3	Bhikkhu ca khīṇāsavo, assājānīyo ca.
an2.58:1.4	Ime kho, bhikkhave, dve asaniyā phalantiyā na santasantī”ti.
an2.59:1.0	59
an2.59:1.1	“Dveme, bhikkhave, asaniyā phalantiyā na santasanti.
an2.59:1.2	Katame dve?
an2.59:1.3	Bhikkhu ca khīṇāsavo, sīho ca migarājā.
an2.59:1.4	Ime kho, bhikkhave, dve asaniyā phalantiyā na santasantī”ti.
an2.60:1.0	60
an2.60:1.1	“Dveme, bhikkhave, atthavase sampassamānā kiṁpurisā mānusiṁ vācaṁ na bhāsanti.
an2.60:1.2	Katame dve?
an2.60:1.3	Mā ca musā bhaṇimhā, mā ca paraṁ abhūtena abbhācikkhimhāti.
an2.60:1.4	Ime kho, bhikkhave, dve atthavase sampassamānā kiṁpurisā mānusiṁ vācaṁ na bhāsantī”ti.
an2.61:1.0	61
an2.61:1.1	“Dvinnaṁ dhammānaṁ, bhikkhave, atitto appaṭivāno mātugāmo kālaṁ karoti.
an2.61:1.2	Katamesaṁ dvinnaṁ?
an2.61:1.3	Methunasamāpattiyā ca vijāyanassa ca.
an2.61:1.4	Imesaṁ kho, bhikkhave, dvinnaṁ dhammānaṁ atitto appaṭivāno mātugāmo kālaṁ karotī”ti.
an2.62:1.0	62
an2.62:1.1	“Asantasannivāsañca vo, bhikkhave, desessāmi santasannivāsañca.
an2.62:1.2	Taṁ suṇātha, sādhukaṁ manasi karotha, bhāsissāmī”ti.
an2.62:1.3	“Evaṁ, bhante”ti kho te bhikkhū bhagavato paccassosuṁ.
an2.62:1.4	Bhagavā etadavoca:
an2.62:2.1	“Kathañca, bhikkhave, asantasannivāso hoti, kathañca asanto sannivasanti?
an2.62:2.2	Idha, bhikkhave, therassa bhikkhuno evaṁ hoti:
an2.62:2.3	‘theropi maṁ na vadeyya, majjhimopi maṁ na vadeyya, navopi maṁ na vadeyya;
an2.62:2.4	therampāhaṁ na vadeyyaṁ, majjhimampāhaṁ na vadeyyaṁ, navampāhaṁ na vadeyyaṁ.
an2.62:2.5	Thero cepi maṁ vadeyya ahitānukampī maṁ vadeyya no hitānukampī, noti naṁ vadeyyaṁ viheṭheyyaṁ passampissa nappaṭikareyyaṁ.
an2.62:2.6	Majjhimo cepi maṁ vadeyya …pe… navo cepi maṁ vadeyya, ahitānukampī maṁ vadeyya no hitānukampī, noti naṁ vadeyyaṁ viheṭheyyaṁ passampissa nappaṭikareyyaṁ’.
an2.62:2.7	Majjhimassapi bhikkhuno evaṁ hoti …pe… navassapi bhikkhuno evaṁ hoti:
an2.62:2.8	‘theropi maṁ na vadeyya, majjhimopi maṁ na vadeyya, navopi maṁ na vadeyya;
an2.62:2.9	therampāhaṁ na vadeyyaṁ, majjhimampāhaṁ na vadeyyaṁ, navampāhaṁ na vadeyyaṁ.
an2.62:2.10	Thero cepi maṁ vadeyya ahitānukampī maṁ vadeyya no hitānukampī noti naṁ vadeyyaṁ viheṭheyyaṁ passampissa nappaṭikareyyaṁ.
an2.62:2.11	Majjhimo cepi maṁ vadeyya … navo cepi maṁ vadeyya ahitānukampī maṁ vadeyya no hitānukampī, noti naṁ vadeyyaṁ viheṭheyyaṁ passampissa nappaṭikareyyaṁ’.
an2.62:2.12	Evaṁ kho, bhikkhave, asantasannivāso hoti, evañca asanto sannivasanti.
an2.62:3.1	Kathañca, bhikkhave, santasannivāso hoti, kathañca santo sannivasanti?
an2.62:3.2	Idha, bhikkhave, therassa bhikkhuno evaṁ hoti:
an2.62:3.3	‘theropi maṁ vadeyya, majjhimopi maṁ vadeyya, navopi maṁ vadeyya;
an2.62:3.4	therampāhaṁ vadeyyaṁ, majjhimampāhaṁ vadeyyaṁ, navampāhaṁ vadeyyaṁ.
an2.62:3.5	Thero cepi maṁ vadeyya hitānukampī maṁ vadeyya no ahitānukampī, sādhūti naṁ vadeyyaṁ na naṁ viheṭheyyaṁ passampissa paṭikareyyaṁ.
an2.62:3.6	Majjhimo cepi maṁ vadeyya …pe… navo cepi maṁ vadeyya hitānukampī maṁ vadeyya no ahitānukampī, sādhūti naṁ vadeyyaṁ na naṁ viheṭheyyaṁ passampissa paṭikareyyaṁ’.
an2.62:3.7	Majjhimassapi bhikkhuno evaṁ hoti …pe… navassapi bhikkhuno evaṁ hoti:
an2.62:3.8	‘theropi maṁ vadeyya, majjhimopi maṁ vadeyya, navopi maṁ vadeyya;
an2.62:3.9	therampāhaṁ vadeyyaṁ, majjhimampāhaṁ vadeyyaṁ, navampāhaṁ vadeyyaṁ.
an2.62:3.10	Thero cepi maṁ vadeyya hitānukampī maṁ vadeyya no ahitānukampī, sādhūti naṁ vadeyyaṁ na naṁ viheṭheyyaṁ passampissa paṭikareyyaṁ.
an2.62:3.11	Majjhimo cepi maṁ vadeyya …pe… navo cepi maṁ vadeyya hitānukampī maṁ vadeyya no ahitānukampī, sādhūti naṁ vadeyyaṁ na naṁ viheṭheyyaṁ passampissa paṭikareyyaṁ’.
an2.62:3.12	Evaṁ kho, bhikkhave, santasannivāso hoti, evañca santo sannivasantī”ti.
an2.63:1.0	63
an2.63:1.1	“Yasmiṁ, bhikkhave, adhikaraṇe ubhato vacīsaṁsāro diṭṭhipaḷāso cetaso āghāto appaccayo anabhiraddhi ajjhattaṁ avūpasantaṁ hoti, tasmetaṁ, bhikkhave, adhikaraṇe pāṭikaṅkhaṁ:
an2.63:1.2	‘dīghattāya kharattāya vāḷattāya saṁvattissati, bhikkhū ca na phāsuṁ viharissanti’.
an2.63:2.1	Yasmiñca kho, bhikkhave, adhikaraṇe ubhato vacīsaṁsāro diṭṭhipaḷāso cetaso āghāto appaccayo anabhiraddhi ajjhattaṁ suvūpasantaṁ hoti, tasmetaṁ, bhikkhave, adhikaraṇe pāṭikaṅkhaṁ:
an2.63:2.2	‘na dīghattāya kharattāya vāḷattāya saṁvattissati, bhikkhū ca phāsuṁ viharissantī’”ti.
an2.63:2.3	Puggalavaggo paṭhamo.
an2.64:0.1	Aṅguttara Nikāya 2
an2.64:0.2	7. Sukhavagga
an2.64:1.0	64
an2.64:1.1	“Dvemāni, bhikkhave, sukhāni.
an2.64:1.2	Katamāni dve?
an2.64:1.3	Gihisukhañca pabbajitasukhañca.
an2.64:1.4	Imāni kho, bhikkhave, dve sukhāni.
an2.64:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ pabbajitasukhan”ti.
an2.65:1.0	65
an2.65:1.1	“Dvemāni, bhikkhave, sukhāni.
an2.65:1.2	Katamāni dve?
an2.65:1.3	Kāmasukhañca nekkhammasukhañca.
an2.65:1.4	Imāni kho, bhikkhave, dve sukhāni.
an2.65:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ nekkhammasukhan”ti.
an2.66:1.0	66
an2.66:1.1	“Dvemāni, bhikkhave, sukhāni.
an2.66:1.2	Katamāni dve?
an2.66:1.3	Upadhisukhañca nirupadhisukhañca.
an2.66:1.4	Imāni kho, bhikkhave, dve sukhāni.
an2.66:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ nirupadhisukhan”ti.
an2.67:1.0	67
an2.67:1.1	“Dvemāni, bhikkhave, sukhāni.
an2.67:1.2	Katamāni dve?
an2.67:1.3	Sāsavasukhañca anāsavasukhañca.
an2.67:1.4	Imāni kho, bhikkhave, dve sukhāni.
an2.67:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ anāsavasukhan”ti.
an2.68:1.0	68
an2.68:1.1	“Dvemāni, bhikkhave, sukhāni.
an2.68:1.2	Katamāni dve?
an2.68:1.3	Sāmisañca sukhaṁ nirāmisañca sukhaṁ.
an2.68:1.4	Imāni kho, bhikkhave, dve sukhāni.
an2.68:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ nirāmisaṁ sukhan”ti.
an2.69:1.0	69
an2.69:1.1	“Dvemāni, bhikkhave, sukhāni.
an2.69:1.2	Katamāni dve?
an2.69:1.3	Ariyasukhañca anariyasukhañca.
an2.69:1.4	Imāni kho, bhikkhave, dve sukhāni.
an2.69:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ ariyasukhan”ti.
an2.70:1.0	70
an2.70:1.1	“Dvemāni, bhikkhave, sukhāni.
an2.70:1.2	Katamāni dve?
an2.70:1.3	Kāyikañca sukhaṁ cetasikañca sukhaṁ.
an2.70:1.4	Imāni kho, bhikkhave, dve sukhāni.
an2.70:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ cetasikaṁ sukhan”ti.
an2.71:1.0	71
an2.71:1.1	“Dvemāni, bhikkhave, sukhāni.
an2.71:1.2	Katamāni dve?
an2.71:1.3	Sappītikañca sukhaṁ nippītikañca sukhaṁ.
an2.71:1.4	Imāni kho, bhikkhave, dve sukhāni.
an2.71:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ nippītikaṁ sukhan”ti.
an2.72:1.0	72
an2.72:1.1	“Dvemāni, bhikkhave, sukhāni.
an2.72:1.2	Katamāni dve?
an2.72:1.3	Sātasukhañca upekkhāsukhañca.
an2.72:1.4	Imāni kho, bhikkhave, dve sukhāni.
an2.72:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ upekkhāsukhan”ti.
an2.73:1.0	73
an2.73:1.1	“Dvemāni, bhikkhave, sukhāni.
an2.73:1.2	Katamāni dve?
an2.73:1.3	Samādhisukhañca asamādhisukhañca.
an2.73:1.4	Imāni kho, bhikkhave, dve sukhāni.
an2.73:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ samādhisukhan”ti.
an2.74:1.0	74
an2.74:1.1	“Dvemāni, bhikkhave, sukhāni.
an2.74:1.2	Katamāni dve?
an2.74:1.3	Sappītikārammaṇañca sukhaṁ nippītikārammaṇañca sukhaṁ.
an2.74:1.4	Imāni kho, bhikkhave, dve sukhāni.
an2.74:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ nippītikārammaṇaṁ sukhan”ti.
an2.75:1.0	75
an2.75:1.1	“Dvemāni, bhikkhave, sukhāni.
an2.75:1.2	Katamāni dve?
an2.75:1.3	Sātārammaṇañca sukhaṁ upekkhārammaṇañca sukhaṁ.
an2.75:1.4	Imāni kho, bhikkhave, dve sukhāni.
an2.75:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ upekkhārammaṇaṁ sukhan”ti.
an2.76:1.0	76
an2.76:1.1	“Dvemāni, bhikkhave, sukhāni.
an2.76:1.2	Katamāni dve?
an2.76:1.3	Rūpārammaṇañca sukhaṁ arūpārammaṇañca sukhaṁ.
an2.76:1.4	Imāni kho, bhikkhave, dve sukhāni.
an2.76:1.5	Etadaggaṁ, bhikkhave, imesaṁ dvinnaṁ sukhānaṁ yadidaṁ arūpārammaṇaṁ sukhan”ti.
an2.76:1.6	Sukhavaggo dutiyo.
an2.77:0.1	Aṅguttara Nikāya 2
an2.77:0.2	8. Sanimittavagga
an2.77:1.0	77
an2.77:1.1	“Sanimittā, bhikkhave, uppajjanti pāpakā akusalā dhammā, no animittā.
an2.77:1.2	Tasseva nimittassa pahānā evaṁ te pāpakā akusalā dhammā na hontī”ti.
an2.78:1.0	78
an2.78:1.1	“Sanidānā, bhikkhave, uppajjanti pāpakā akusalā dhammā, no anidānā.
an2.78:1.2	Tasseva nidānassa pahānā evaṁ te pāpakā akusalā dhammā na hontī”ti.
an2.79:1.0	79
an2.79:1.1	“Sahetukā, bhikkhave, uppajjanti pāpakā akusalā dhammā, no ahetukā.
an2.79:1.2	Tasseva hetussa pahānā evaṁ te pāpakā akusalā dhammā na hontī”ti.
an2.80:1.0	80
an2.80:1.1	“Sasaṅkhārā, bhikkhave, uppajjanti pāpakā akusalā dhammā, no asaṅkhārā.
an2.80:1.2	Tesaṁyeva saṅkhārānaṁ pahānā evaṁ te pāpakā akusalā dhammā na hontī”ti.
an2.81:1.0	81
an2.81:1.1	“Sappaccayā, bhikkhave, uppajjanti pāpakā akusalā dhammā, no appaccayā.
an2.81:1.2	Tasseva paccayassa pahānā evaṁ te pāpakā akusalā dhammā na hontī”ti.
an2.82:1.0	82
an2.82:1.1	“Sarūpā, bhikkhave, uppajjanti pāpakā akusalā dhammā, no arūpā.
an2.82:1.2	Tasseva rūpassa pahānā evaṁ te pāpakā akusalā dhammā na hontī”ti.
an2.83:1.0	83
an2.83:1.1	“Savedanā, bhikkhave, uppajjanti pāpakā akusalā dhammā, no avedanā.
an2.83:1.2	Tassāyeva vedanāya pahānā evaṁ te pāpakā akusalā dhammā na hontī”ti.
an2.84:1.0	84
an2.84:1.1	“Sasaññā, bhikkhave, uppajjanti pāpakā akusalā dhammā, no asaññā.
an2.84:1.2	Tassāyeva saññāya pahānā evaṁ te pāpakā akusalā dhammā na hontī”ti.
an2.85:1.0	85
an2.85:1.1	“Saviññāṇā, bhikkhave, uppajjanti pāpakā akusalā dhammā, no aviññāṇā.
an2.85:1.2	Tasseva viññāṇassa pahānā evaṁ te pāpakā akusalā dhammā na hontī”ti.
an2.86:1.0	86
an2.86:1.1	“Saṅkhatārammaṇā, bhikkhave, uppajjanti pāpakā akusalā dhammā, no asaṅkhatārammaṇā.
an2.86:1.2	Tasseva saṅkhatassa pahānā evaṁ te pāpakā akusalā dhammā na hontī”ti.
an2.86:1.3	Sanimittavaggo tatiyo.
an2.87:0.1	Aṅguttara Nikāya 2
an2.87:0.2	9. Dhammavagga
an2.87:1.0	87
an2.87:1.1	“Dveme, bhikkhave, dhammā.
an2.87:1.2	Katame dve?
an2.87:1.3	Cetovimutti ca paññāvimutti ca.
an2.87:1.4	Ime kho, bhikkhave, dve dhammā”ti.
an2.88:1.0	88
an2.88:1.1	“Dveme, bhikkhave, dhammā.
an2.88:1.2	Katame dve?
an2.88:1.3	Paggāho ca avikkhepo ca.
an2.88:1.4	Ime kho, bhikkhave, dve dhammā”ti.
an2.89:1.0	89
an2.89:1.1	“Dveme, bhikkhave, dhammā.
an2.89:1.2	Katame dve?
an2.89:1.3	Nāmañca rūpañca.
an2.89:1.4	Ime kho, bhikkhave, dve dhammā”ti.
an2.90:1.0	90
an2.90:1.1	“Dveme, bhikkhave, dhammā.
an2.90:1.2	Katame dve?
an2.90:1.3	Vijjā ca vimutti ca.
an2.90:1.4	Ime kho, bhikkhave, dve dhammā”ti.
an2.91:1.0	91
an2.91:1.1	“Dveme, bhikkhave, dhammā.
an2.91:1.2	Katame dve?
an2.91:1.3	Bhavadiṭṭhi ca vibhavadiṭṭhi ca.
an2.91:1.4	Ime kho, bhikkhave, dve dhammā”ti.
an2.92:1.0	92
an2.92:1.1	“Dveme, bhikkhave, dhammā.
an2.92:1.2	Katame dve?
an2.92:1.3	Ahirikañca anottappañca.
an2.92:1.4	Ime kho, bhikkhave, dve dhammā”ti.
an2.93:1.0	93
an2.93:1.1	“Dveme, bhikkhave, dhammā.
an2.93:1.2	Katame dve?
an2.93:1.3	Hirī ca ottappañca.
an2.93:1.4	Ime kho, bhikkhave, dve dhammā”ti.
an2.94:1.0	94
an2.94:1.1	“Dveme, bhikkhave, dhammā.
an2.94:1.2	Katame dve?
an2.94:1.3	Dovacassatā ca pāpamittatā ca.
an2.94:1.4	Ime kho, bhikkhave, dve dhammā”ti.
an2.95:1.0	95
an2.95:1.1	“Dveme, bhikkhave, dhammā.
an2.95:1.2	Katame dve?
an2.95:1.3	Sovacassatā ca kalyāṇamittatā ca.
an2.95:1.4	Ime kho, bhikkhave, dve dhammā”ti.
an2.96:1.0	96
an2.96:1.1	“Dveme, bhikkhave, dhammā.
an2.96:1.2	Katame dve?
an2.96:1.3	Dhātukusalatā ca manasikārakusalatā ca.
an2.96:1.4	Ime kho, bhikkhave, dve dhammā”ti.
an2.97:1.0	97
an2.97:1.1	“Dveme, bhikkhave, dhammā.
an2.97:1.2	Katame dve?
an2.97:1.3	Āpattikusalatā ca āpattivuṭṭhānakusalatā ca.
an2.97:1.4	Ime kho, bhikkhave, dve dhammā”ti.
an2.97:1.5	Dhammavaggo catuttho.
an2.98:0.1	Aṅguttara Nikāya 2
an2.98:0.2	10. Bālavagga
an2.98:1.0	98
an2.98:1.1	“Dveme, bhikkhave, bālā.
an2.98:1.2	Katame dve?
an2.98:1.3	Yo ca anāgataṁ bhāraṁ vahati, yo ca āgataṁ bhāraṁ na vahati.
an2.98:1.4	Ime kho, bhikkhave, dve bālā”ti.
an2.99:1.0	99
an2.99:1.1	“Dveme, bhikkhave, paṇḍitā.
an2.99:1.2	Katame dve?
an2.99:1.3	Yo ca anāgataṁ bhāraṁ na vahati, yo ca āgataṁ bhāraṁ vahati.
an2.99:1.4	Ime kho, bhikkhave, dve paṇḍitā”ti.
an2.100:1.0	100
an2.100:1.1	“Dveme, bhikkhave, bālā.
an2.100:1.2	Katame dve?
an2.100:1.3	Yo ca akappiye kappiyasaññī, yo ca kappiye akappiyasaññī.
an2.100:1.4	Ime kho, bhikkhave, dve bālā”ti.
an2.101:1.0	101
an2.101:1.1	“Dveme, bhikkhave, paṇḍitā.
an2.101:1.2	Katame dve?
an2.101:1.3	Yo ca akappiye akappiyasaññī, yo ca kappiye kappiyasaññī.
an2.101:1.4	Ime kho, bhikkhave, dve paṇḍitā”ti.
an2.102:1.0	102
an2.102:1.1	“Dveme, bhikkhave, bālā.
an2.102:1.2	Katame dve?
an2.102:1.3	Yo ca anāpattiyā āpattisaññī, yo ca āpattiyā anāpattisaññī.
an2.102:1.4	Ime kho, bhikkhave, dve bālā”ti.
an2.103:1.0	103
an2.103:1.1	“Dveme, bhikkhave, paṇḍitā.
an2.103:1.2	Katame dve?
an2.103:1.3	Yo ca anāpattiyā anāpattisaññī, yo ca āpattiyā āpattisaññī.
an2.103:1.4	Ime kho, bhikkhave, dve paṇḍitā”ti.
an2.104:1.0	104
an2.104:1.1	“Dveme, bhikkhave, bālā.
an2.104:1.2	Katame dve?
an2.104:1.3	Yo ca adhamme dhammasaññī, yo ca dhamme adhammasaññī.
an2.104:1.4	Ime kho, bhikkhave, dve bālā”ti.
an2.105:1.0	105
an2.105:1.1	“Dveme, bhikkhave, paṇḍitā.
an2.105:1.2	Katame dve?
an2.105:1.3	Yo ca dhamme dhammasaññī, yo ca adhamme adhammasaññī.
an2.105:1.4	Ime kho, bhikkhave, dve paṇḍitā”ti.
an2.106:1.0	106
an2.106:1.1	“Dveme, bhikkhave, bālā.
an2.106:1.2	Katame dve?
an2.106:1.3	Yo ca avinaye vinayasaññī, yo ca vinaye avinayasaññī.
an2.106:1.4	Ime kho, bhikkhave, dve bālā”ti.
an2.107:1.0	107
an2.107:1.1	“Dveme, bhikkhave, paṇḍitā.
an2.107:1.2	Katame dve?
an2.107:1.3	Yo ca avinaye avinayasaññī, yo ca vinaye vinayasaññī.
an2.107:1.4	Ime kho, bhikkhave, dve paṇḍitā”ti.
an2.108:1.0	108
an2.108:1.1	“Dvinnaṁ, bhikkhave, āsavā vaḍḍhanti.
an2.108:1.2	Katamesaṁ dvinnaṁ?
an2.108:1.3	Yo ca na kukkuccāyitabbaṁ kukkuccāyati, yo ca kukkuccāyitabbaṁ na kukkuccāyati.
an2.108:1.4	Imesaṁ kho, bhikkhave, dvinnaṁ āsavā vaḍḍhantī”ti.
an2.109:1.0	109
an2.109:1.1	“Dvinnaṁ, bhikkhave, āsavā na vaḍḍhanti.
an2.109:1.2	Katamesaṁ dvinnaṁ?
an2.109:1.3	Yo ca na kukkuccāyitabbaṁ na kukkuccāyati, yo ca kukkuccāyitabbaṁ kukkuccāyati.
an2.109:1.4	Imesaṁ kho, bhikkhave, dvinnaṁ āsavā na vaḍḍhantī”ti.
an2.110:1.0	110
an2.110:1.1	“Dvinnaṁ, bhikkhave, āsavā vaḍḍhanti.
an2.110:1.2	Katamesaṁ dvinnaṁ?
an2.110:1.3	Yo ca akappiye kappiyasaññī, yo ca kappiye akappiyasaññī.
an2.110:1.4	Imesaṁ kho, bhikkhave, dvinnaṁ āsavā vaḍḍhantī”ti.
an2.111:1.0	111
an2.111:1.1	“Dvinnaṁ, bhikkhave, āsavā na vaḍḍhanti.
an2.111:1.2	Katamesaṁ dvinnaṁ?
an2.111:1.3	Yo ca akappiye akappiyasaññī, yo ca kappiye kappiyasaññī.
an2.111:1.4	Imesaṁ kho, bhikkhave, dvinnaṁ āsavā na vaḍḍhantī”ti.
an2.112:1.0	112
an2.112:1.1	“Dvinnaṁ, bhikkhave, āsavā vaḍḍhanti.
an2.112:1.2	Katamesaṁ dvinnaṁ?
an2.112:1.3	Yo ca āpattiyā anāpattisaññī, yo ca anāpattiyā āpattisaññī.
an2.112:1.4	Imesaṁ kho, bhikkhave, dvinnaṁ āsavā vaḍḍhantī”ti.
an2.113:1.0	113
an2.113:1.1	“Dvinnaṁ, bhikkhave, āsavā na vaḍḍhanti.
an2.113:1.2	Katamesaṁ dvinnaṁ?
an2.113:1.3	Yo ca āpattiyā āpattisaññī, yo ca anāpattiyā anāpattisaññī.
an2.113:1.4	Imesaṁ kho, bhikkhave, dvinnaṁ āsavā na vaḍḍhantī”ti.
an2.114:1.0	114
an2.114:1.1	“Dvinnaṁ, bhikkhave, āsavā vaḍḍhanti.
an2.114:1.2	Katamesaṁ dvinnaṁ?
an2.114:1.3	Yo ca adhamme dhammasaññī, yo ca dhamme adhammasaññī.
an2.114:1.4	Imesaṁ kho, bhikkhave, dvinnaṁ āsavā vaḍḍhantī”ti.
an2.115:1.0	115
an2.115:1.1	“Dvinnaṁ, bhikkhave, āsavā na vaḍḍhanti.
an2.115:1.2	Katamesaṁ dvinnaṁ?
an2.115:1.3	Yo ca dhamme dhammasaññī, yo ca adhamme adhammasaññī.
an2.115:1.4	Imesaṁ kho, bhikkhave, dvinnaṁ āsavā na vaḍḍhantī”ti.
an2.116:1.0	116
an2.116:1.1	“Dvinnaṁ, bhikkhave, āsavā vaḍḍhanti.
an2.116:1.2	Katamesaṁ dvinnaṁ?
an2.116:1.3	Yo ca avinaye vinayasaññī, yo ca vinaye avinayasaññī.
an2.116:1.4	Imesaṁ kho, bhikkhave, dvinnaṁ āsavā vaḍḍhantī”ti.
an2.117:1.0	117
an2.117:1.1	“Dvinnaṁ, bhikkhave, āsavā na vaḍḍhanti.
an2.117:1.2	Katamesaṁ dvinnaṁ?
an2.117:1.3	Yo ca avinaye avinayasaññī, yo ca vinaye vinayasaññī.
an2.117:1.4	Imesaṁ kho, bhikkhave, dvinnaṁ āsavā na vaḍḍhantī”ti.
an2.117:1.5	Bālavaggo pañcamo.
an2.117:1.6	Dutiyo paṇṇāsako samatto.
an2.118:0.1	Aṅguttara Nikāya 2
an2.118:0.2	11. Āsāduppajahavagga
an2.118:1.0	118
an2.118:1.1	“Dvemā, bhikkhave, āsā duppajahā.
an2.118:1.2	Katamā dve?
an2.118:1.3	Lābhāsā ca jīvitāsā ca.
an2.118:1.4	Imā kho, bhikkhave, dve āsā duppajahā”ti.
an2.119:1.0	119
an2.119:1.1	“Dveme, bhikkhave, puggalā dullabhā lokasmiṁ.
an2.119:1.2	Katame dve?
an2.119:1.3	Yo ca pubbakārī, yo ca kataññū katavedī.
an2.119:1.4	Ime kho, bhikkhave, dve puggalā dullabhā lokasmin”ti.
an2.120:1.0	120
an2.120:1.1	“Dveme, bhikkhave, puggalā dullabhā lokasmiṁ.
an2.120:1.2	Katame dve?
an2.120:1.3	Titto ca tappetā ca.
an2.120:1.4	Ime kho, bhikkhave, dve puggalā dullabhā lokasmin”ti.
an2.121:1.0	121
an2.121:1.1	“Dveme, bhikkhave, puggalā duttappayā.
an2.121:1.2	Katame dve?
an2.121:1.3	Yo ca laddhaṁ laddhaṁ nikkhipati, yo ca laddhaṁ laddhaṁ vissajjeti.
an2.121:1.4	Ime kho, bhikkhave, dve puggalā duttappayā”ti.
an2.122:1.0	122
an2.122:1.1	“Dveme, bhikkhave, puggalā sutappayā.
an2.122:1.2	Katame dve?
an2.122:1.3	Yo ca laddhaṁ laddhaṁ na nikkhipati, yo ca laddhaṁ laddhaṁ na vissajjeti.
an2.122:1.4	Ime kho, bhikkhave, dve puggalā sutappayā”ti.
an2.123:1.0	123
an2.123:1.1	“Dveme, bhikkhave, paccayā rāgassa uppādāya.
an2.123:1.2	Katame dve?
an2.123:1.3	Subhanimittañca ayoniso ca manasikāro.
an2.123:1.4	Ime kho, bhikkhave, dve paccayā rāgassa uppādāyā”ti.
an2.124:1.0	124
an2.124:1.1	“Dveme, bhikkhave, paccayā dosassa uppādāya.
an2.124:1.2	Katame dve?
an2.124:1.3	Paṭighanimittañca ayoniso ca manasikāro.
an2.124:1.4	Ime kho, bhikkhave, dve paccayā dosassa uppādāyā”ti.
an2.125:1.0	125
an2.125:1.1	“Dveme, bhikkhave, paccayā micchādiṭṭhiyā uppādāya.
an2.125:1.2	Katame dve?
an2.125:1.3	Parato ca ghoso ayoniso ca manasikāro.
an2.125:1.4	Ime kho, bhikkhave, dve paccayā micchādiṭṭhiyā uppādāyā”ti.
an2.126:1.0	126
an2.126:1.1	“Dveme, bhikkhave, paccayā sammādiṭṭhiyā uppādāya.
an2.126:1.2	Katame dve?
an2.126:1.3	Parato ca ghoso, yoniso ca manasikāro.
an2.126:1.4	Ime kho, bhikkhave, dve paccayā sammādiṭṭhiyā uppādāyā”ti.
an2.127:1.0	127
an2.127:1.1	“Dvemā, bhikkhave, āpattiyo.
an2.127:1.2	Katamā dve?
an2.127:1.3	Lahukā ca āpatti, garukā ca āpatti.
an2.127:1.4	Imā kho, bhikkhave, dve āpattiyo”ti.
an2.128:1.0	128
an2.128:1.1	“Dvemā, bhikkhave, āpattiyo.
an2.128:1.2	Katamā dve?
an2.128:1.3	Duṭṭhullā ca āpatti, aduṭṭhullā ca āpatti.
an2.128:1.4	Imā kho, bhikkhave, dve āpattiyo”ti.
an2.129:1.0	129
an2.129:1.1	“Dvemā, bhikkhave, āpattiyo.
an2.129:1.2	Katamā dve?
an2.129:1.3	Sāvasesā ca āpatti, anavasesā ca āpatti.
an2.129:1.4	Imā kho, bhikkhave, dve āpattiyo”ti.
an2.129:1.5	Āsāduppajahavaggo paṭhamo.
an2.130:0.1	Aṅguttara Nikāya 2
an2.130:0.2	12. Āyācanavagga
an2.130:1.0	130
an2.130:1.1	“Saddho, bhikkhave, bhikkhu evaṁ sammā āyācamāno āyāceyya:
an2.130:1.2	‘tādiso homi yādisā sāriputtamoggallānā’ti.
an2.130:1.3	Esā, bhikkhave, tulā etaṁ pamāṇaṁ mama sāvakānaṁ bhikkhūnaṁ yadidaṁ sāriputtamoggallānā”ti.
an2.131:1.0	131
an2.131:1.1	“Saddhā, bhikkhave, bhikkhunī evaṁ sammā āyācamānā āyāceyya:
an2.131:1.2	‘tādisī homi yādisī khemā ca bhikkhunī uppalavaṇṇā cā’ti.
an2.131:1.3	Esā, bhikkhave, tulā etaṁ pamāṇaṁ mama sāvikānaṁ bhikkhunīnaṁ yadidaṁ khemā ca bhikkhunī uppalavaṇṇā cā”ti.
an2.132:1.0	132
an2.132:1.1	“Saddho, bhikkhave, upāsako evaṁ sammā āyācamāno āyāceyya:
an2.132:1.2	‘tādiso homi yādiso citto ca gahapati hatthako ca āḷavako’ti.
an2.132:1.3	Esā, bhikkhave, tulā etaṁ pamāṇaṁ mama sāvakānaṁ upāsakānaṁ yadidaṁ citto ca gahapati hatthako ca āḷavako”ti.
an2.133:1.0	133
an2.133:1.1	“Saddhā, bhikkhave, upāsikā evaṁ sammā āyācamānā āyāceyya:
an2.133:1.2	‘tādisī homi yādisī khujjuttarā ca upāsikā veḷukaṇḍakiyā ca nandamātā’ti.
an2.133:1.3	Esā, bhikkhave, tulā etaṁ pamāṇaṁ mama sāvikānaṁ upāsikānaṁ yadidaṁ khujjuttarā ca upāsikā veḷukaṇḍakiyā ca nandamātā”ti.
an2.134:1.0	134
an2.134:1.1	“Dvīhi, bhikkhave, dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an2.134:1.2	Katamehi dvīhi?
an2.134:1.3	Ananuvicca apariyogāhetvā avaṇṇārahassa vaṇṇaṁ bhāsati,
an2.134:1.4	ananuvicca apariyogāhetvā vaṇṇārahassa avaṇṇaṁ bhāsati.
an2.134:1.5	Imehi kho, bhikkhave, dvīhi dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavatīti.
an2.134:2.1	Dvīhi, bhikkhave, dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an2.134:2.2	Katamehi dvīhi?
an2.134:2.3	Anuvicca pariyogāhetvā avaṇṇārahassa avaṇṇaṁ bhāsati,
an2.134:2.4	anuvicca pariyogāhetvā vaṇṇārahassa vaṇṇaṁ bhāsati.
an2.134:2.5	Imehi kho, bhikkhave, dvīhi dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavatī”ti.
an2.135:1.0	135
an2.135:1.1	“Dvīhi, bhikkhave, dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an2.135:1.2	Katamehi dvīhi?
an2.135:1.3	Ananuvicca apariyogāhetvā appasādanīye ṭhāne pasādaṁ upadaṁseti,
an2.135:1.4	ananuvicca apariyogāhetvā pasādanīye ṭhāne appasādaṁ upadaṁseti.
an2.135:1.5	Imehi kho, bhikkhave, dvīhi dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavatīti.
an2.135:2.1	Dvīhi, bhikkhave, dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an2.135:2.2	Katamehi dvīhi?
an2.135:2.3	Anuvicca pariyogāhetvā appasādanīye ṭhāne appasādaṁ upadaṁseti,
an2.135:2.4	anuvicca pariyogāhetvā pasādanīye ṭhāne pasādaṁ upadaṁseti.
an2.135:2.5	Imehi kho, bhikkhave, dvīhi dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavatī”ti.
an2.136:1.0	136
an2.136:1.1	“Dvīsu, bhikkhave, micchāpaṭipajjamāno bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an2.136:1.2	Katamesu dvīsu?
an2.136:1.3	Mātari ca pitari ca.
an2.136:1.4	Imesu kho, bhikkhave, dvīsu micchāpaṭipajjamāno bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavatīti.
an2.136:2.1	Dvīsu, bhikkhave, sammāpaṭipajjamāno paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an2.136:2.2	Katamesu dvīsu?
an2.136:2.3	Mātari ca pitari ca.
an2.136:2.4	Imesu kho, bhikkhave, dvīsu sammāpaṭipajjamāno paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavatī”ti.
an2.137:1.0	137
an2.137:1.1	“Dvīsu, bhikkhave, micchāpaṭipajjamāno bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an2.137:1.2	Katamesu dvīsu?
an2.137:1.3	Tathāgate ca tathāgatasāvake ca.
an2.137:1.4	Imesu kho, bhikkhave, micchāpaṭipajjamāno bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavatīti.
an2.137:2.1	Dvīsu, bhikkhave, sammāpaṭipajjamāno paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an2.137:2.2	Katamesu dvīsu?
an2.137:2.3	Tathāgate ca tathāgatasāvake ca.
an2.137:2.4	Imesu kho, bhikkhave, dvīsu sammāpaṭipajjamāno paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavatī”ti.
an2.138:1.0	138
an2.138:1.1	“Dveme, bhikkhave, dhammā.
an2.138:1.2	Katame dve?
an2.138:1.3	Sacittavodānañca na ca kiñci loke upādiyati.
an2.138:1.4	Ime kho, bhikkhave, dve dhammā”ti.
an2.139:1.0	139
an2.139:1.1	“Dveme, bhikkhave, dhammā.
an2.139:1.2	Katame dve?
an2.139:1.3	Kodho ca upanāho ca.
an2.139:1.4	Ime kho, bhikkhave, dve dhammā”ti.
an2.140:1.0	140
an2.140:1.1	“Dveme, bhikkhave, dhammā.
an2.140:1.2	Katame dve?
an2.140:1.3	Kodhavinayo ca upanāhavinayo ca.
an2.140:1.4	Ime kho, bhikkhave, dve dhammā”ti.
an2.140:1.5	Āyācanavaggo dutiyo.
an2.141:0.1	Aṅguttara Nikāya 2
an2.141:0.2	13. Dānavagga
an2.141:1.0	141
an2.141:1.1	“Dvemāni, bhikkhave, dānāni.
an2.141:1.2	Katamāni dve?
an2.141:1.3	Āmisadānañca dhammadānañca.
an2.141:1.4	Imāni kho, bhikkhave, dve dānāni.
an2.141:1.5	Etadaggaṁ, bhikkhave, imesaṁ dvinnaṁ dānānaṁ yadidaṁ dhammadānan”ti.
an2.142:1.0	142
an2.142:1.1	“Dveme, bhikkhave, yāgā.
an2.142:1.2	Katame dve?
an2.142:1.3	Āmisayāgo ca dhammayāgo ca.
an2.142:1.4	Ime kho, bhikkhave, dve yāgā.
an2.142:1.5	Etadaggaṁ, bhikkhave, imesaṁ dvinnaṁ yāgānaṁ yadidaṁ dhammayāgo”ti.
an2.143:1.0	143
an2.143:1.1	“Dveme, bhikkhave, cāgā.
an2.143:1.2	Katame dve?
an2.143:1.3	Āmisacāgo ca dhammacāgo ca.
an2.143:1.4	Ime kho, bhikkhave, dve cāgā.
an2.143:1.5	Etadaggaṁ, bhikkhave, imesaṁ dvinnaṁ cāgānaṁ yadidaṁ dhammacāgo”ti.
an2.144:1.0	144
an2.144:1.1	“Dveme, bhikkhave, pariccāgā.
an2.144:1.2	Katame dve?
an2.144:1.3	Āmisapariccāgo ca dhammapariccāgo ca.
an2.144:1.4	Ime kho, bhikkhave, dve pariccāgā.
an2.144:1.5	Etadaggaṁ, bhikkhave, imesaṁ dvinnaṁ pariccāgānaṁ yadidaṁ dhammapariccāgo”ti.
an2.145:1.0	145
an2.145:1.1	“Dveme, bhikkhave, bhogā.
an2.145:1.2	Katame dve?
an2.145:1.3	Āmisabhogo ca dhammabhogo ca.
an2.145:1.4	Ime kho, bhikkhave, dve bhogā.
an2.145:1.5	Etadaggaṁ, bhikkhave, imesaṁ dvinnaṁ bhogānaṁ yadidaṁ dhammabhogo”ti.
an2.146:1.0	146
an2.146:1.1	“Dveme, bhikkhave, sambhogā.
an2.146:1.2	Katame dve?
an2.146:1.3	Āmisasambhogo ca dhammasambhogo ca.
an2.146:1.4	Ime kho, bhikkhave, dve sambhogā.
an2.146:1.5	Etadaggaṁ, bhikkhave, imesaṁ dvinnaṁ sambhogānaṁ yadidaṁ dhammasambhogo”ti.
an2.147:1.0	147
an2.147:1.1	“Dveme, bhikkhave, saṁvibhāgā.
an2.147:1.2	Katame dve?
an2.147:1.3	Āmisasaṁvibhāgo ca dhammasaṁvibhāgo ca.
an2.147:1.4	Ime kho, bhikkhave, dve saṁvibhāgā.
an2.147:1.5	Etadaggaṁ, bhikkhave, imesaṁ dvinnaṁ saṁvibhāgānaṁ yadidaṁ dhammasaṁvibhāgo”ti.
an2.148:1.0	148
an2.148:1.1	“Dveme, bhikkhave, saṅgahā.
an2.148:1.2	Katame dve?
an2.148:1.3	Āmisasaṅgaho ca dhammasaṅgaho ca.
an2.148:1.4	Ime kho, bhikkhave, dve saṅgahā.
an2.148:1.5	Etadaggaṁ, bhikkhave, imesaṁ dvinnaṁ saṅgahānaṁ yadidaṁ dhammasaṅgaho”ti.
an2.149:1.0	149
an2.149:1.1	“Dveme, bhikkhave, anuggahā.
an2.149:1.2	Katame dve?
an2.149:1.3	Āmisānuggaho ca dhammānuggaho ca.
an2.149:1.4	Ime kho, bhikkhave, dve anuggahā.
an2.149:1.5	Etadaggaṁ, bhikkhave, imesaṁ dvinnaṁ anuggahānaṁ yadidaṁ dhammānuggaho”ti.
an2.150:1.0	150
an2.150:1.1	“Dvemā, bhikkhave, anukampā.
an2.150:1.2	Katamā dve?
an2.150:1.3	Āmisānukampā ca dhammānukampā ca.
an2.150:1.4	Imā kho, bhikkhave, dve anukampā.
an2.150:1.5	Etadaggaṁ, bhikkhave, imāsaṁ dvinnaṁ anukampānaṁ yadidaṁ dhammānukampā”ti.
an2.150:1.6	Dānavaggo tatiyo.
an2.151:0.1	Aṅguttara Nikāya 2
an2.151:0.2	14. Santhāravagga
an2.151:1.0	151
an2.151:1.1	“Dveme, bhikkhave, santhārā.
an2.151:1.2	Katame dve?
an2.151:1.3	Āmisasanthāro ca dhammasanthāro ca.
an2.151:1.4	Ime kho, bhikkhave, dve santhārā.
an2.151:1.5	Etadaggaṁ, bhikkhave, imesaṁ dvinnaṁ santhārānaṁ yadidaṁ dhammasanthāro”ti.
an2.152:1.0	152
an2.152:1.1	“Dveme, bhikkhave, paṭisanthārā.
an2.152:1.2	Katame dve?
an2.152:1.3	Āmisapaṭisanthāro ca dhammapaṭisanthāro ca.
an2.152:1.4	Ime kho, bhikkhave, dve paṭisanthārā.
an2.152:1.5	Etadaggaṁ, bhikkhave, imesaṁ dvinnaṁ paṭisanthārānaṁ yadidaṁ dhammapaṭisanthāro”ti.
an2.153:1.0	153
an2.153:1.1	“Dvemā, bhikkhave, esanā.
an2.153:1.2	Katamā dve?
an2.153:1.3	Āmisesanā ca dhammesanā ca.
an2.153:1.4	Imā kho, bhikkhave, dve esanā.
an2.153:1.5	Etadaggaṁ, bhikkhave, imāsaṁ dvinnaṁ esanānaṁ yadidaṁ dhammesanā”ti.
an2.154:1.0	154
an2.154:1.1	“Dvemā, bhikkhave, pariyesanā.
an2.154:1.2	Katamā dve?
an2.154:1.3	Āmisapariyesanā ca dhammapariyesanā ca.
an2.154:1.4	Imā kho, bhikkhave, dve pariyesanā.
an2.154:1.5	Etadaggaṁ, bhikkhave, imāsaṁ dvinnaṁ pariyesanānaṁ yadidaṁ dhammapariyesanā”ti.
an2.155:1.0	155
an2.155:1.1	“Dvemā, bhikkhave, pariyeṭṭhiyo.
an2.155:1.2	Katamā dve?
an2.155:1.3	Āmisapariyeṭṭhi ca dhammapariyeṭṭhi ca.
an2.155:1.4	Imā kho, bhikkhave, dve pariyeṭṭhiyo.
an2.155:1.5	Etadaggaṁ, bhikkhave, imāsaṁ dvinnaṁ pariyeṭṭhīnaṁ yadidaṁ dhammapariyeṭṭhī”ti.
an2.156:1.0	156
an2.156:1.1	“Dvemā, bhikkhave, pūjā.
an2.156:1.2	Katamā dve?
an2.156:1.3	Āmisapūjā ca dhammapūjā ca.
an2.156:1.4	Imā kho, bhikkhave, dve pūjā.
an2.156:1.5	Etadaggaṁ, bhikkhave, imāsaṁ dvinnaṁ pūjānaṁ yadidaṁ dhammapūjā”ti.
an2.157:1.0	157
an2.157:1.1	“Dvemāni, bhikkhave, ātitheyyāni.
an2.157:1.2	Katamāni dve?
an2.157:1.3	Āmisātitheyyañca dhammātitheyyañca.
an2.157:1.4	Imāni kho, bhikkhave, dve ātitheyyāni.
an2.157:1.5	Etadaggaṁ, bhikkhave, imesaṁ dvinnaṁ ātitheyyānaṁ yadidaṁ dhammātitheyyan”ti.
an2.158:1.0	158
an2.158:1.1	“Dvemā, bhikkhave, iddhiyo.
an2.158:1.2	Katamā dve?
an2.158:1.3	Āmisiddhi ca dhammiddhi ca.
an2.158:1.4	Imā kho, bhikkhave, dve iddhiyo.
an2.158:1.5	Etadaggaṁ, bhikkhave, imāsaṁ dvinnaṁ iddhīnaṁ yadidaṁ dhammiddhī”ti.
an2.159:1.0	159
an2.159:1.1	“Dvemā, bhikkhave, vuddhiyo.
an2.159:1.2	Katamā dve?
an2.159:1.3	Āmisavuddhi ca dhammavuddhi ca.
an2.159:1.4	Imā kho, bhikkhave, dve vuddhiyo.
an2.159:1.5	Etadaggaṁ, bhikkhave, imāsaṁ dvinnaṁ vuddhīnaṁ yadidaṁ dhammavuddhī”ti.
an2.160:1.0	160
an2.160:1.1	“Dvemāni, bhikkhave, ratanāni.
an2.160:1.2	Katamāni dve?
an2.160:1.3	Āmisaratanañca dhammaratanañca.
an2.160:1.4	Imāni kho, bhikkhave, dve ratanāni.
an2.160:1.5	Etadaggaṁ, bhikkhave, imesaṁ dvinnaṁ ratanānaṁ yadidaṁ dhammaratanan”ti.
an2.161:1.0	161
an2.161:1.1	“Dveme, bhikkhave, sannicayā.
an2.161:1.2	Katame dve?
an2.161:1.3	Āmisasannicayo ca dhammasannicayo ca.
an2.161:1.4	Ime kho, bhikkhave, dve sannicayā.
an2.161:1.5	Etadaggaṁ, bhikkhave, imesaṁ dvinnaṁ sannicayānaṁ yadidaṁ dhammasannicayo”ti.
an2.162:1.0	162
an2.162:1.1	“Dvemāni, bhikkhave, vepullāni.
an2.162:1.2	Katamāni dve?
an2.162:1.3	Āmisavepullañca dhammavepullañca.
an2.162:1.4	Imāni kho, bhikkhave, dve vepullāni.
an2.162:1.5	Etadaggaṁ, bhikkhave, imesaṁ dvinnaṁ vepullānaṁ yadidaṁ dhammavepullan”ti.
an2.162:1.6	Santhāravaggo catuttho.
an2.163:0.1	Aṅguttara Nikāya 2
an2.163:0.2	15. Samāpattivagga
an2.163:1.0	163
an2.163:1.1	“Dveme, bhikkhave, dhammā.
an2.163:1.2	Katame dve?
an2.163:1.3	Samāpattikusalatā ca samāpattivuṭṭhānakusalatā ca.
an2.163:1.4	Ime kho, bhikkhave, dve dhammā”ti.
an2.164:1.0	164
an2.164:1.1	“Dveme, bhikkhave, dhammā.
an2.164:1.2	Katame dve?
an2.164:1.3	Ajjavañca maddavañca.
an2.164:1.4	Ime kho, bhikkhave, dve dhammā”.
an2.165:1.0	165
an2.165:1.1	“Dveme, bhikkhave, dhammā.
an2.165:1.2	Katame dve?
an2.165:1.3	Khanti ca soraccañca.
an2.165:1.4	Ime kho, bhikkhave, dve dhammā”.
an2.166:1.0	166
an2.166:1.1	“Dveme, bhikkhave, dhammā.
an2.166:1.2	Katame dve?
an2.166:1.3	Sākhalyañca paṭisanthāro ca.
an2.166:1.4	Ime kho, bhikkhave, dve dhammā”.
an2.167:1.0	167
an2.167:1.1	“Dveme, bhikkhave, dhammā.
an2.167:1.2	Katame dve?
an2.167:1.3	Avihiṁsā ca soceyyañca.
an2.167:1.4	Ime kho, bhikkhave, dve dhammā”.
an2.168:1.0	168
an2.168:1.1	“Dveme, bhikkhave, dhammā.
an2.168:1.2	Katame dve?
an2.168:1.3	Indriyesu aguttadvāratā ca bhojane amattaññutā ca.
an2.168:1.4	Ime kho, bhikkhave, dve dhammā”.
an2.169:1.0	169
an2.169:1.1	“Dveme, bhikkhave, dhammā.
an2.169:1.2	Katame dve?
an2.169:1.3	Indriyesu guttadvāratā ca bhojane mattaññutā ca.
an2.169:1.4	Ime kho, bhikkhave, dve dhammā”.
an2.170:1.0	170
an2.170:1.1	“Dveme, bhikkhave, dhammā.
an2.170:1.2	Katame dve?
an2.170:1.3	Paṭisaṅkhānabalañca bhāvanābalañca.
an2.170:1.4	Ime kho, bhikkhave, dve dhammā”.
an2.171:1.0	171
an2.171:1.1	“Dveme, bhikkhave, dhammā.
an2.171:1.2	Katame dve?
an2.171:1.3	Satibalañca samādhibalañca.
an2.171:1.4	Ime kho, bhikkhave, dve dhammā”.
an2.172:1.0	172
an2.172:1.1	“Dveme, bhikkhave, dhammā.
an2.172:1.2	Katame dve?
an2.172:1.3	Samatho ca vipassanā ca.
an2.172:1.4	Ime kho, bhikkhave, dve dhammā”.
an2.173:1.0	173
an2.173:1.1	“Dveme, bhikkhave, dhammā.
an2.173:1.2	Katame dve?
an2.173:1.3	Sīlavipatti ca diṭṭhivipatti ca.
an2.173:1.4	Ime kho, bhikkhave, dve dhammā”.
an2.174:1.0	174
an2.174:1.1	“Dveme, bhikkhave, dhammā.
an2.174:1.2	Katame dve?
an2.174:1.3	Sīlasampadā ca diṭṭhisampadā ca.
an2.174:1.4	Ime kho, bhikkhave, dve dhammā”.
an2.175:1.0	175
an2.175:1.1	“Dveme, bhikkhave, dhammā.
an2.175:1.2	Katame dve?
an2.175:1.3	Sīlavisuddhi ca diṭṭhivisuddhi ca.
an2.175:1.4	Ime kho, bhikkhave, dve dhammā”.
an2.176:1.0	176
an2.176:1.1	“Dveme, bhikkhave, dhammā.
an2.176:1.2	Katame dve?
an2.176:1.3	Diṭṭhivisuddhi ca yathādiṭṭhissa ca padhānaṁ.
an2.176:1.4	Ime kho, bhikkhave, dve dhammā”.
an2.177:1.0	177
an2.177:1.1	“Dveme, bhikkhave, dhammā.
an2.177:1.2	Katame dve?
an2.177:1.3	Asantuṭṭhitā ca kusalesu dhammesu, appaṭivānitā ca padhānasmiṁ.
an2.177:1.4	Ime kho, bhikkhave, dve dhammā”.
an2.178:1.0	178
an2.178:1.1	“Dveme, bhikkhave, dhammā.
an2.178:1.2	Katame dve?
an2.178:1.3	Muṭṭhassaccañca asampajaññañca.
an2.178:1.4	Ime kho, bhikkhave, dve dhammā”.
an2.179:1.0	179
an2.179:1.1	“Dveme, bhikkhave, dhammā.
an2.179:1.2	Katame dve?
an2.179:1.3	Sati ca sampajaññañca.
an2.179:1.4	Ime kho, bhikkhave, dve dhammā”ti.
an2.179:1.5	Samāpattivaggo pañcamo.
an2.179:1.6	Tatiyo paṇṇāsako samatto.
an2.180-184:0.1	Aṅguttara Nikāya 2
an2.180-184:0.2	16. Kodhapeyyāla
an2.180-184:1.0	180–184
an2.180-184:1.1	“Dveme, bhikkhave, dhammā.
an2.180-184:1.2	Katame dve?
an2.180-184:1.3	Kodho ca upanāho ca … makkho ca paḷāso ca … issā ca macchariyañca … māyā ca sāṭheyyañca … ahirikañca anottappañca.
an2.180-184:1.4	Ime kho, bhikkhave, dve dhammā”.
an2.185-189:1.0	185–189
an2.185-189:1.1	“Dveme, bhikkhave, dhammā.
an2.185-189:1.2	Katame dve?
an2.185-189:1.3	Akkodho ca anupanāho ca … amakkho ca apaḷāso ca … anissā ca amacchariyañca … amāyā ca asāṭheyyañca … hirī ca ottappañca.
an2.185-189:1.4	Ime kho, bhikkhave, dve dhammā”.
an2.190-194:1.0	190–194
an2.190-194:1.1	“Dvīhi, bhikkhave, dhammehi samannāgato dukkhaṁ viharati.
an2.190-194:1.2	Katamehi dvīhi?
an2.190-194:1.3	Kodhena ca upanāhena ca … makkhena ca paḷāsena ca … issāya ca macchariyena ca … māyāya ca sāṭheyyena ca … ahirikena ca anottappena ca.
an2.190-194:1.4	Imehi kho, bhikkhave, dvīhi dhammehi samannāgato dukkhaṁ viharati”.
an2.195-199:1.0	195–199
an2.195-199:1.1	“Dvīhi, bhikkhave, dhammehi samannāgato sukhaṁ viharati.
an2.195-199:1.2	Katamehi dvīhi?
an2.195-199:1.3	Akkodhena ca anupanāhena ca … amakkhena ca apaḷāsena ca … anissāya ca amacchariyena ca … amāyāya ca asāṭheyyena ca … hiriyā ca ottappena ca.
an2.195-199:1.4	Imehi kho, bhikkhave, dvīhi dhammehi samannāgato sukhaṁ viharati”.
an2.200-204:1.0	200–204
an2.200-204:1.1	“Dveme, bhikkhave, dhammā sekhassa bhikkhuno parihānāya saṁvattanti.
an2.200-204:1.2	Katame dve?
an2.200-204:1.3	Kodho ca upanāho ca … makkho ca paḷāso ca … issā ca macchariyañca … māyā ca sāṭheyyañca … ahirikañca anottappañca.
an2.200-204:1.4	Ime kho, bhikkhave, dve dhammā sekhassa bhikkhuno parihānāya saṁvattanti”.
an2.205-209:1.0	205–209
an2.205-209:1.1	“Dveme, bhikkhave, dhammā sekhassa bhikkhuno aparihānāya saṁvattanti.
an2.205-209:1.2	Katame dve?
an2.205-209:1.3	Akkodho ca anupanāho ca … amakkho ca apaḷāso ca … anissā ca amacchariyañca … amāyā ca asāṭheyyañca … hirī ca ottappañca.
an2.205-209:1.4	Ime kho, bhikkhave, dve dhammā sekhassa bhikkhuno aparihānāya saṁvattanti”.
an2.210-214:1.0	210–214
an2.210-214:1.1	“Dvīhi, bhikkhave, dhammehi samannāgato yathābhataṁ nikkhitto evaṁ niraye.
an2.210-214:1.2	Katamehi dvīhi?
an2.210-214:1.3	Kodhena ca upanāhena ca … makkhena ca paḷāsena ca … issāya ca macchariyena ca … māyāya ca sāṭheyyena ca … ahirikena ca anottappena ca.
an2.210-214:1.4	Imehi kho, bhikkhave, dvīhi dhammehi samannāgato yathābhataṁ nikkhitto evaṁ niraye”.
an2.215-219:1.0	215–219
an2.215-219:1.1	“Dvīhi, bhikkhave, dhammehi samannāgato yathābhataṁ nikkhitto evaṁ sagge.
an2.215-219:1.2	Katamehi dvīhi?
an2.215-219:1.3	Akkodhena ca anupanāhena ca … amakkhena ca apaḷāsena ca … anissāya ca amacchariyena ca … amāyāya ca asāṭheyyena ca … hiriyā ca ottappena ca.
an2.215-219:1.4	Imehi kho, bhikkhave, dvīhi dhammehi samannāgato yathābhataṁ nikkhitto evaṁ sagge”.
an2.220-224:1.0	220–224
an2.220-224:1.1	“Dvīhi, bhikkhave, dhammehi samannāgato idhekacco kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an2.220-224:1.2	Katamehi dvīhi?
an2.220-224:1.3	Kodhena ca upanāhena ca … makkhena ca paḷāsena ca … issāya ca macchariyena ca … māyāya ca sāṭheyyena ca … ahirikena ca anottappena ca.
an2.220-224:1.4	Imehi kho, bhikkhave, dvīhi dhammehi samannāgato idhekacco kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati”.
an2.225-229:1.0	225–229
an2.225-229:1.1	“Dvīhi, bhikkhave, dhammehi samannāgato idhekacco kāyassa bhedā paraṁ maraṇā sugatiṁ saggaṁ lokaṁ upapajjati.
an2.225-229:1.2	Katamehi dvīhi?
an2.225-229:1.3	Akkodhena ca anupanāhena ca … amakkhena ca apaḷāsena ca … anissāya ca amacchariyena ca … amāyāya ca asāṭheyyena ca … hiriyā ca ottappena ca.
an2.225-229:1.4	Imehi kho, bhikkhave, dvīhi dhammehi samannāgato idhekacco kāyassa bhedā paraṁ maraṇā sugatiṁ saggaṁ lokaṁ upapajjati”.
an2.225-229:1.5	Kodhapeyyālaṁ niṭṭhitaṁ.
an2.230-279:0.1	Aṅguttara Nikāya 2
an2.230-279:0.2	17. Akusalapeyyāla
an2.230-279:1.1	“Dveme, bhikkhave, dhammā akusalā … dveme, bhikkhave, dhammā kusalā … dveme, bhikkhave, dhammā sāvajjā … dveme, bhikkhave, dhammā anavajjā … dveme, bhikkhave, dhammā dukkhudrayā … dveme, bhikkhave, dhammā sukhudrayā … dveme, bhikkhave, dhammā dukkhavipākā … dveme, bhikkhave, dhammā sukhavipākā … dveme, bhikkhave, dhammā sabyābajjhā … dveme, bhikkhave, dhammā abyābajjhā.
an2.230-279:1.2	Katame dve?
an2.230-279:1.3	Akkodho ca anupanāho ca … amakkho ca apaḷāso ca … anissā ca amacchariyañca … amāyā ca asāṭheyyañca … hirī ca ottappañca.
an2.230-279:1.4	Ime kho, bhikkhave, dve dhammā abyābajjhā”ti.
an2.230-279:1.5	Akusalapeyyālaṁ niṭṭhitaṁ.
an2.280:0.1	Aṅguttara Nikāya 2
an2.280:0.2	18. Vinayapeyyāla
an2.280:1.0	280
an2.280:1.1	“Dveme, bhikkhave, atthavase paṭicca tathāgatena sāvakānaṁ sikkhāpadaṁ paññattaṁ.
an2.280:1.2	Katame dve?
an2.280:1.3	Saṅghasuṭṭhutāya saṅghaphāsutāya … dummaṅkūnaṁ puggalānaṁ niggahāya, pesalānaṁ bhikkhūnaṁ phāsuvihārāya … diṭṭhadhammikānaṁ āsavānaṁ saṁvarāya, samparāyikānaṁ āsavānaṁ paṭighātāya … diṭṭhadhammikānaṁ verānaṁ saṁvarāya, samparāyikānaṁ verānaṁ paṭighātāya … diṭṭhadhammikānaṁ vajjānaṁ saṁvarāya, samparāyikānaṁ vajjānaṁ paṭighātāya … diṭṭhadhammikānaṁ bhayānaṁ saṁvarāya, samparāyikānaṁ bhayānaṁ paṭighātāya … diṭṭhadhammikānaṁ akusalānaṁ dhammānaṁ saṁvarāya, samparāyikānaṁ akusalānaṁ dhammānaṁ paṭighātāya … gihīnaṁ anukampāya, pāpicchānaṁ bhikkhūnaṁ pakkhupacchedāya … appasannānaṁ pasādāya, pasannānaṁ bhiyyobhāvāya … saddhammaṭṭhitiyā vinayānuggahāya.
an2.280:1.4	Ime kho, bhikkhave, dve atthavase paṭicca tathāgatena sāvakānaṁ sikkhāpadaṁ paññattan”ti.
an2.281-309:1.0	281–309
an2.281-309:1.1	“Dveme, bhikkhave, atthavase paṭicca tathāgatena sāvakānaṁ pātimokkhaṁ paññattaṁ …pe… pātimokkhuddeso paññatto … pātimokkhaṭṭhapanaṁ paññattaṁ … pavāraṇā paññattā … pavāraṇaṭṭhapanaṁ paññattaṁ … tajjanīyakammaṁ paññattaṁ … niyassakammaṁ paññattaṁ … pabbājanīyakammaṁ paññattaṁ … paṭisāraṇīyakammaṁ paññattaṁ … ukkhepanīyakammaṁ paññattaṁ … parivāsadānaṁ paññattaṁ … mūlāyapaṭikassanaṁ paññattaṁ … mānattadānaṁ paññattaṁ … abbhānaṁ paññattaṁ … osāraṇīyaṁ paññattaṁ … nissāraṇīyaṁ paññattaṁ … upasampadā paññattā … ñattikammaṁ paññattaṁ … ñattidutiyakammaṁ paññattaṁ … ñatticatutthakammaṁ paññattaṁ … apaññatte paññattaṁ … paññatte anupaññattaṁ … sammukhāvinayo paññatto … sativinayo paññatto … amūḷhavinayo paññatto … paṭiññātakaraṇaṁ paññattaṁ … yebhuyyasikā paññattā … tassapāpiyasikā paññattā … tiṇavatthārako paññatto.
an2.281-309:1.2	Katame dve?
an2.281-309:1.3	Saṅghasuṭṭhutāya, saṅghaphāsutāya … dummaṅkūnaṁ puggalānaṁ niggahāya, pesalānaṁ bhikkhūnaṁ phāsuvihārāya … diṭṭhadhammikānaṁ āsavānaṁ saṁvarāya, samparāyikānaṁ āsavānaṁ paṭighātāya … diṭṭhadhammikānaṁ verānaṁ saṁvarāya, samparāyikānaṁ verānaṁ paṭighātāya … diṭṭhadhammikānaṁ vajjānaṁ saṁvarāya, samparāyikānaṁ vajjānaṁ paṭighātāya … diṭṭhadhammikānaṁ bhayānaṁ saṁvarāya, samparāyikānaṁ bhayānaṁ paṭighātāya … diṭṭhadhammikānaṁ akusalānaṁ dhammānaṁ saṁvarāya, samparāyikānaṁ akusalānaṁ dhammānaṁ paṭighātāya … gihīnaṁ anukampāya, pāpicchānaṁ bhikkhūnaṁ pakkhupacchedāya … appasannānaṁ pasādāya, pasannānaṁ bhiyyobhāvāya … saddhammaṭṭhitiyā, vinayānuggahāya.
an2.281-309:1.4	Ime kho, bhikkhave, dve atthavase paṭicca tathāgatena sāvakānaṁ tiṇavatthārako paññatto”ti.
an2.281-309:1.5	Vinayapeyyālaṁ niṭṭhitaṁ.
an2.310-319:0.1	Aṅguttara Nikāya 2
an2.310-319:0.2	19. Rāgapeyyāla
an2.310-319:1.0	310–319
an2.310-319:1.1	“Rāgassa, bhikkhave, abhiññāya dve dhammā bhāvetabbā.
an2.310-319:1.2	Katame dve?
an2.310-319:1.3	Samatho ca vipassanā ca.
an2.310-319:1.4	Rāgassa, bhikkhave, abhiññāya ime dve dhammā bhāvetabbā”ti.
an2.310-319:2.1	“Rāgassa, bhikkhave, pariññāya … parikkhayāya … pahānāya … khayāya … vayāya … virāgāya … nirodhāya … cāgāya … paṭinissaggāya dve dhammā bhāvetabbā …pe…
an2.320-479:1.0	320–479
an2.320-479:1.1	“Dosassa …pe… mohassa … kodhassa … upanāhassa … makkhassa … paḷāsassa … issāya … macchariyassa … māyāya … sāṭheyyassa … thambhassa … sārambhassa … mānassa … atimānassa … madassa … pamādassa … abhiññāya … pariññāya … parikkhayāya … pahānāya … khayāya … vayāya … virāgāya … nirodhāya … cāgāya … paṭinissaggāya dve dhammā bhāvetabbā.
an2.320-479:1.2	Katame dve?
an2.320-479:1.3	Samatho ca vipassanā ca.
an2.320-479:1.4	Pamādassa, bhikkhave, paṭinissaggāya ime dve dhammā bhāvetabbā”ti.
an2.320-479:2.1	Idamavoca bhagavā.
an2.320-479:2.2	Attamanā te bhikkhū bhagavato bhāsitaṁ abhinandunti.
an2.320-479:2.3	Rāgapeyyālaṁ niṭṭhitaṁ.
an2.320-479:2.4	Dukanipātapāḷi niṭṭhitā.
an3.1:0.1	Aṅguttara Nikāya 3.1
an3.1:0.2	1. Bālavagga
an3.1:0.3	Bhayasutta
an3.1:1.1	Evaṁ me sutaṁ—
an3.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an3.1:1.3	Tatra kho bhagavā bhikkhū āmantesi:
an3.1:1.4	“bhikkhavo”ti.
an3.1:1.5	“Bhadante”ti te bhikkhū bhagavato paccassosuṁ.
an3.1:1.6	Bhagavā etadavoca:
an3.1:2.1	“Yāni kānici, bhikkhave, bhayāni uppajjanti sabbāni tāni bālato uppajjanti, no paṇḍitato.
an3.1:2.2	Ye keci upaddavā uppajjanti sabbe te bālato uppajjanti, no paṇḍitato.
an3.1:2.3	Ye keci upasaggā uppajjanti sabbe te bālato uppajjanti, no paṇḍitato.
an3.1:2.4	Seyyathāpi, bhikkhave, naḷāgārā vā tiṇāgārā vā aggi mutto kūṭāgārānipi ḍahati ullittāvalittāni nivātāni phusitaggaḷāni pihitavātapānāni;
an3.1:2.5	evamevaṁ kho, bhikkhave, yāni kānici bhayāni uppajjanti sabbāni tāni bālato uppajjanti, no paṇḍitato.
an3.1:2.6	Ye keci upaddavā uppajjanti sabbe te bālato uppajjanti, no paṇḍitato.
an3.1:2.7	Ye keci upasaggā uppajjanti sabbe te bālato uppajjanti, no paṇḍitato.
an3.1:3.1	Iti kho, bhikkhave, sappaṭibhayo bālo, appaṭibhayo paṇḍito.
an3.1:3.2	Saupaddavo bālo, anupaddavo paṇḍito.
an3.1:3.3	Saupasaggo bālo, anupasaggo paṇḍito.
an3.1:3.4	Natthi, bhikkhave, paṇḍitato bhayaṁ, natthi paṇḍitato upaddavo, natthi paṇḍitato upasaggo.
an3.1:4.1	Tasmātiha, bhikkhave, evaṁ sikkhitabbaṁ:
an3.1:4.2	‘yehi tīhi dhammehi samannāgato bālo veditabbo te tayo dhamme abhinivajjetvā, yehi tīhi dhammehi samannāgato paṇḍito veditabbo te tayo dhamme samādāya vattissāmā’ti.
an3.1:4.3	Evañhi vo, bhikkhave, sikkhitabban”ti.
an3.1:4.4	Paṭhamaṁ.
an3.2:0.1	Aṅguttara Nikāya 3.2
an3.2:0.2	1. Bālavagga
an3.2:0.3	Lakkhaṇasutta
an3.2:1.1	“Kammalakkhaṇo, bhikkhave, bālo, kammalakkhaṇo paṇḍito, apadānasobhanī paññāti.
an3.2:1.2	Tīhi, bhikkhave, dhammehi samannāgato bālo veditabbo.
an3.2:1.3	Katamehi tīhi?
an3.2:1.4	Kāyaduccaritena, vacīduccaritena, manoduccaritena.
an3.2:1.5	Imehi kho, bhikkhave, tīhi dhammehi samannāgato bālo veditabbo.
an3.2:2.1	Tīhi, bhikkhave, dhammehi samannāgato paṇḍito veditabbo.
an3.2:2.2	Katamehi tīhi?
an3.2:2.3	Kāyasucaritena, vacīsucaritena, manosucaritena.
an3.2:2.4	Imehi kho, bhikkhave, tīhi dhammehi samannāgato paṇḍito veditabbo.
an3.2:3.1	Tasmātiha, bhikkhave, evaṁ sikkhitabbaṁ:
an3.2:3.2	‘yehi tīhi dhammehi samannāgato bālo veditabbo te tayo dhamme abhinivajjetvā, yehi tīhi dhammehi samannāgato paṇḍito veditabbo te tayo dhamme samādāya vattissāmā’ti.
an3.2:3.3	Evañhi vo, bhikkhave, sikkhitabban”ti.
an3.2:3.4	Dutiyaṁ.
an3.3:0.1	Aṅguttara Nikāya 3.3
an3.3:0.2	1. Bālavagga
an3.3:0.3	Cintīsutta
an3.3:1.1	“Tīṇimāni, bhikkhave, bālassa bālalakkhaṇāni bālanimittāni bālāpadānāni.
an3.3:1.2	Katamāni tīṇi?
an3.3:1.3	Idha, bhikkhave, bālo duccintitacintī ca hoti dubbhāsitabhāsī ca dukkaṭakammakārī ca.
an3.3:1.4	No cedaṁ, bhikkhave, bālo duccintitacintī ca abhavissa dubbhāsitabhāsī ca dukkaṭakammakārī ca, kena naṁ paṇḍitā jāneyyuṁ:
an3.3:1.5	‘bālo ayaṁ bhavaṁ asappuriso’ti?
an3.3:1.6	Yasmā ca kho, bhikkhave, bālo duccintitacintī ca hoti dubbhāsitabhāsī ca dukkaṭakammakārī ca tasmā naṁ paṇḍitā jānanti:
an3.3:1.7	‘bālo ayaṁ bhavaṁ asappuriso’ti.
an3.3:1.8	Imāni kho, bhikkhave, tīṇi bālassa bālalakkhaṇāni bālanimittāni bālāpadānāni.
an3.3:2.1	Tīṇimāni, bhikkhave, paṇḍitassa paṇḍitalakkhaṇāni paṇḍitanimittāni paṇḍitāpadānāni.
an3.3:2.2	Katamāni tīṇi?
an3.3:2.3	Idha, bhikkhave, paṇḍito sucintitacintī ca hoti subhāsitabhāsī ca sukatakammakārī ca.
an3.3:2.4	No cedaṁ, bhikkhave, paṇḍito sucintitacintī ca abhavissa subhāsitabhāsī ca sukatakammakārī ca, kena naṁ paṇḍitā jāneyyuṁ:
an3.3:2.5	‘paṇḍito ayaṁ bhavaṁ sappuriso’ti?
an3.3:2.6	Yasmā ca kho, bhikkhave, paṇḍito sucintitacintī ca hoti subhāsitabhāsī ca sukatakammakārī ca tasmā naṁ paṇḍitā jānanti:
an3.3:2.7	‘paṇḍito ayaṁ bhavaṁ sappuriso’ti.
an3.3:2.8	Imāni kho, bhikkhave, tīṇi paṇḍitassa paṇḍitalakkhaṇāni paṇḍitanimittāni paṇḍitāpadānāni.
an3.3:2.9	Tasmātiha …pe….
an3.3:2.10	Tatiyaṁ.
an3.4:0.1	Aṅguttara Nikāya 3.4
an3.4:0.2	1. Bālavagga
an3.4:0.3	Accayasutta
an3.4:1.1	“Tīhi, bhikkhave, dhammehi samannāgato bālo veditabbo.
an3.4:1.2	Katamehi tīhi?
an3.4:1.3	Accayaṁ accayato na passati, accayaṁ accayato disvā yathādhammaṁ nappaṭikaroti, parassa kho pana accayaṁ desentassa yathādhammaṁ nappaṭiggaṇhāti.
an3.4:1.4	Imehi kho, bhikkhave, tīhi dhammehi samannāgato bālo veditabbo.
an3.4:2.1	Tīhi, bhikkhave, dhammehi samannāgato paṇḍito veditabbo.
an3.4:2.2	Katamehi tīhi?
an3.4:2.3	Accayaṁ accayato passati, accayaṁ accayato disvā yathādhammaṁ paṭikaroti, parassa kho pana accayaṁ desentassa yathādhammaṁ paṭiggaṇhāti.
an3.4:2.4	Imehi kho, bhikkhave, tīhi dhammehi samannāgato paṇḍito veditabbo.
an3.4:2.5	Tasmātiha …pe….
an3.4:2.6	Catutthaṁ.
an3.5:0.1	Aṅguttara Nikāya 3.5
an3.5:0.2	1. Bālavagga
an3.5:0.3	Ayonisosutta
an3.5:1.1	“Tīhi, bhikkhave, dhammehi samannāgato bālo veditabbo.
an3.5:1.2	Katamehi tīhi?
an3.5:1.3	Ayoniso pañhaṁ kattā hoti, ayoniso pañhaṁ vissajjetā hoti, parassa kho pana yoniso pañhaṁ vissajjitaṁ parimaṇḍalehi padabyañjanehi siliṭṭhehi upagatehi nābbhanumoditā hoti.
an3.5:1.4	Imehi kho, bhikkhave, tīhi dhammehi samannāgato bālo veditabbo.
an3.5:2.1	Tīhi, bhikkhave, dhammehi samannāgato paṇḍito veditabbo.
an3.5:2.2	Katamehi tīhi?
an3.5:2.3	Yoniso pañhaṁ kattā hoti, yoniso pañhaṁ vissajjetā hoti, parassa kho pana yoniso pañhaṁ vissajjitaṁ parimaṇḍalehi padabyañjanehi siliṭṭhehi upagatehi abbhanumoditā hoti.
an3.5:2.4	Imehi kho, bhikkhave, tīhi dhammehi samannāgato paṇḍito veditabbo.
an3.5:2.5	Tasmātiha …pe….
an3.5:2.6	Pañcamaṁ.
an3.6:0.1	Aṅguttara Nikāya 3.6
an3.6:0.2	1. Bālavagga
an3.6:0.3	Akusalasutta
an3.6:1.1	“Tīhi, bhikkhave, dhammehi samannāgato bālo veditabbo.
an3.6:1.2	Katamehi tīhi?
an3.6:1.3	Akusalena kāyakammena, akusalena vacīkammena, akusalena manokammena.
an3.6:1.4	Imehi kho, bhikkhave, tīhi dhammehi samannāgato bālo veditabbo.
an3.6:2.1	Tīhi, bhikkhave, dhammehi samannāgato paṇḍito veditabbo.
an3.6:2.2	Katamehi tīhi?
an3.6:2.3	Kusalena kāyakammena, kusalena vacīkammena, kusalena manokammena.
an3.6:2.4	Imehi kho, bhikkhave, tīhi dhammehi samannāgato paṇḍito veditabbo.
an3.6:2.5	Tasmātiha …pe….
an3.6:2.6	Chaṭṭhaṁ.
an3.7:0.1	Aṅguttara Nikāya 3.7
an3.7:0.2	1. Bālavagga
an3.7:0.3	Sāvajjasutta
an3.7:1.1	“Tīhi, bhikkhave, dhammehi samannāgato bālo veditabbo.
an3.7:1.2	Katamehi tīhi?
an3.7:1.3	Sāvajjena kāyakammena, sāvajjena vacīkammena, sāvajjena manokammena …pe… anavajjena kāyakammena, anavajjena vacīkammena, anavajjena manokammena …pe….
an3.7:1.4	Sattamaṁ.
an3.8:0.1	Aṅguttara Nikāya 3.8
an3.8:0.2	1. Bālavagga
an3.8:0.3	Sabyābajjhasutta
an3.8:1.1	“Tīhi, bhikkhave, dhammehi samannāgato bālo veditabbo.
an3.8:1.2	Katamehi tīhi?
an3.8:1.3	Sabyābajjhena kāyakammena, sabyābajjhena vacīkammena, sabyābajjhena manokammena …pe… abyābajjhena kāyakammena, abyābajjhena vacīkammena, abyābajjhena manokammena.
an3.8:1.4	Imehi, kho, bhikkhave, tīhi dhammehi samannāgato paṇḍito veditabbo.
an3.8:2.1	Tasmātiha, bhikkhave, evaṁ sikkhitabbaṁ:
an3.8:2.2	‘yehi tīhi dhammehi samannāgato bālo veditabbo te tayo dhamme abhinivajjetvā, yehi tīhi dhammehi samannāgato paṇḍito veditabbo te tayo dhamme samādāya vattissāmā’ti.
an3.8:2.3	Evañhi vo, bhikkhave, sikkhitabban”ti.
an3.8:2.4	Aṭṭhamaṁ.
an3.9:0.1	Aṅguttara Nikāya 3.9
an3.9:0.2	1. Bālavagga
an3.9:0.3	Khatasutta
an3.9:1.1	“Tīhi, bhikkhave, dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an3.9:1.2	Katamehi tīhi?
an3.9:1.3	Kāyaduccaritena, vacīduccaritena, manoduccaritena.
an3.9:1.4	Imehi kho, bhikkhave, tīhi dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an3.9:2.1	Tīhi, bhikkhave, dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an3.9:2.2	Katamehi tīhi?
an3.9:2.3	Kāyasucaritena, vacīsucaritena, manosucaritena.
an3.9:2.4	Imehi kho, bhikkhave, tīhi dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavatī”ti.
an3.9:2.5	Navamaṁ.
an3.10:0.1	Aṅguttara Nikāya 3.10
an3.10:0.2	1. Bālavagga
an3.10:0.3	Malasutta
an3.10:1.1	“Tīhi, bhikkhave, dhammehi samannāgato tayo male appahāya yathābhataṁ nikkhitto evaṁ niraye.
an3.10:1.2	Katamehi tīhi?
an3.10:1.3	Dussīlo ca hoti, dussīlyamalañcassa appahīnaṁ hoti;
an3.10:1.4	issukī ca hoti, issāmalañcassa appahīnaṁ hoti;
an3.10:1.5	maccharī ca hoti, maccheramalañcassa appahīnaṁ hoti.
an3.10:1.6	Imehi kho, bhikkhave, tīhi dhammehi samannāgato ime tayo male appahāya yathābhataṁ nikkhitto evaṁ niraye.
an3.10:2.1	Tīhi, bhikkhave, dhammehi samannāgato tayo male pahāya yathābhataṁ nikkhitto evaṁ sagge.
an3.10:2.2	Katamehi tīhi?
an3.10:2.3	Sīlavā ca hoti, dussīlyamalañcassa pahīnaṁ hoti;
an3.10:2.4	anissukī ca hoti, issāmalañcassa pahīnaṁ hoti;
an3.10:2.5	amaccharī ca hoti, maccheramalañcassa pahīnaṁ hoti.
an3.10:2.6	Imehi kho, bhikkhave, tīhi dhammehi samannāgato ime tayo male pahāya yathābhataṁ nikkhitto evaṁ sagge”ti.
an3.10:2.7	Dasamaṁ.
an3.10:2.8	Bālavaggo paṭhamo.
an3.10:3.0	Tassuddānaṁ
an3.10:3.1	Bhayaṁ lakkhaṇacintī ca,
an3.10:3.2	accayañca ayoniso;
an3.10:3.3	Akusalañca sāvajjaṁ,
an3.10:3.4	sabyābajjhakhataṁ malanti.
an3.11:0.1	Aṅguttara Nikāya 3.11
an3.11:0.2	2. Rathakāravagga
an3.11:0.3	Ñātasutta
an3.11:1.1	“Tīhi, bhikkhave, dhammehi samannāgato ñāto bhikkhu bahujanaahitāya paṭipanno hoti bahujanadukkhāya, bahuno janassa anatthāya ahitāya dukkhāya devamanussānaṁ.
an3.11:1.2	Katamehi tīhi?
an3.11:1.3	Ananulomike kāyakamme samādapeti, ananulomike vacīkamme samādapeti, ananulomikesu dhammesu samādapeti.
an3.11:1.4	Imehi kho, bhikkhave, tīhi dhammehi samannāgato ñāto bhikkhu bahujanaahitāya paṭipanno hoti bahujanadukkhāya, bahuno janassa anatthāya ahitāya dukkhāya devamanussānaṁ.
an3.11:2.1	Tīhi, bhikkhave, dhammehi samannāgato ñāto bhikkhu bahujanahitāya paṭipanno hoti bahujanasukhāya, bahuno janassa atthāya hitāya sukhāya devamanussānaṁ.
an3.11:2.2	Katamehi tīhi?
an3.11:2.3	Anulomike kāyakamme samādapeti, anulomike vacīkamme samādapeti, anulomikesu dhammesu samādapeti.
an3.11:2.4	Imehi kho, bhikkhave, tīhi dhammehi samannāgato ñāto bhikkhu bahujanahitāya paṭipanno hoti bahujanasukhāya, bahuno janassa atthāya hitāya sukhāya devamanussānan”ti.
an3.11:2.5	Paṭhamaṁ.
an3.12:0.1	Aṅguttara Nikāya 3.12
an3.12:0.2	2. Rathakāravagga
an3.12:0.3	Sāraṇīyasutta
an3.12:1.1	“Tīṇimāni, bhikkhave, rañño khattiyassa muddhāvasittassa yāvajīvaṁ sāraṇīyāni bhavanti.
an3.12:1.2	Katamāni tīṇi?
an3.12:1.3	Yasmiṁ, bhikkhave, padese rājā khattiyo muddhāvasitto jāto hoti.
an3.12:1.4	Idaṁ, bhikkhave, paṭhamaṁ rañño khattiyassa muddhāvasittassa yāvajīvaṁ sāraṇīyaṁ hoti.
an3.12:2.1	Puna caparaṁ, bhikkhave, yasmiṁ padese rājā khattiyo muddhāvasitto hoti.
an3.12:2.2	Idaṁ, bhikkhave, dutiyaṁ rañño khattiyassa muddhāvasittassa yāvajīvaṁ sāraṇīyaṁ hoti.
an3.12:3.1	Puna caparaṁ, bhikkhave, yasmiṁ padese rājā khattiyo muddhāvasitto saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati.
an3.12:3.2	Idaṁ, bhikkhave, tatiyaṁ rañño khattiyassa muddhāvasittassa yāvajīvaṁ sāraṇīyaṁ hoti.
an3.12:3.3	Imāni kho, bhikkhave, tīṇi rañño khattiyassa muddhāvasittassa yāvajīvaṁ sāraṇīyāni bhavanti.
an3.12:4.1	Evamevaṁ kho, bhikkhave, tīṇimāni bhikkhussa yāvajīvaṁ sāraṇīyāni bhavanti.
an3.12:4.2	Katamāni tīṇi?
an3.12:4.3	Yasmiṁ, bhikkhave, padese bhikkhu kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajito hoti.
an3.12:4.4	Idaṁ, bhikkhave, paṭhamaṁ bhikkhussa yāvajīvaṁ sāraṇīyaṁ hoti.
an3.12:5.1	Puna caparaṁ, bhikkhave, yasmiṁ padese bhikkhu ‘idaṁ dukkhan’ti yathābhūtaṁ pajānāti, ‘ayaṁ dukkhasamudayo’ti yathābhūtaṁ pajānāti, ‘ayaṁ dukkhanirodho’ti yathābhūtaṁ pajānāti, ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.12:5.2	Idaṁ, bhikkhave, dutiyaṁ bhikkhussa yāvajīvaṁ sāraṇīyaṁ hoti.
an3.12:6.1	Puna caparaṁ, bhikkhave, yasmiṁ padese bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.12:6.2	Idaṁ, bhikkhave, tatiyaṁ bhikkhussa yāvajīvaṁ sāraṇīyaṁ hoti.
an3.12:6.3	Imāni kho, bhikkhave, tīṇi bhikkhussa yāvajīvaṁ sāraṇīyāni bhavantī”ti.
an3.12:6.4	Dutiyaṁ.
an3.13:0.1	Aṅguttara Nikāya 3.13
an3.13:0.2	2. Rathakāravagga
an3.13:0.3	Āsaṁsasutta
an3.13:1.1	“Tayome, bhikkhave, puggalā santo saṁvijjamānā lokasmiṁ.
an3.13:1.2	Katame tayo?
an3.13:1.3	Nirāso, āsaṁso, vigatāso.
an3.13:1.4	Katamo ca, bhikkhave puggalo nirāso?
an3.13:1.5	Idha, bhikkhave, ekacco puggalo nīce kule paccājāto hoti, caṇḍālakule vā venakule vā nesādakule vā rathakārakule vā pukkusakule vā dalidde appannapānabhojane kasiravuttike, yattha kasirena ghāsacchādo labbhati.
an3.13:1.6	So ca hoti dubbaṇṇo duddasiko okoṭimako bavhābādho kāṇo vā kuṇī vā khañjo vā pakkhahato vā, na lābhī annassa pānassa vatthassa yānassa mālāgandhavilepanassa seyyāvasathapadīpeyyassa.
an3.13:1.7	So suṇāti:
an3.13:1.8	‘itthannāmo kira khattiyo khattiyehi khattiyābhisekena abhisitto’ti.
an3.13:1.9	Tassa na evaṁ hoti:
an3.13:1.10	‘kudāssu nāma mampi khattiyā khattiyābhisekena abhisiñcissantī’ti.
an3.13:1.11	Ayaṁ vuccati, bhikkhave, puggalo nirāso.
an3.13:2.1	Katamo ca, bhikkhave, puggalo āsaṁso?
an3.13:2.2	Idha, bhikkhave, rañño khattiyassa muddhāvasittassa jeṭṭho putto hoti ābhiseko anabhisitto acalappatto.
an3.13:2.3	So suṇāti:
an3.13:2.4	‘itthannāmo kira khattiyo khattiyehi khattiyābhisekena abhisitto’ti.
an3.13:2.5	Tassa evaṁ hoti:
an3.13:2.6	‘kudāssu nāma mampi khattiyā khattiyābhisekena abhisiñcissantī’ti.
an3.13:2.7	Ayaṁ vuccati, bhikkhave, puggalo āsaṁso.
an3.13:3.1	Katamo ca, bhikkhave, puggalo vigatāso?
an3.13:3.2	Idha, bhikkhave, rājā hoti khattiyo muddhāvasitto.
an3.13:3.3	So suṇāti:
an3.13:3.4	‘itthannāmo kira khattiyo khattiyehi khattiyābhisekena abhisitto’ti.
an3.13:3.5	Tassa na evaṁ hoti:
an3.13:3.6	‘kudāssu nāma mampi khattiyā khattiyābhisekena abhisiñcissantī’ti.
an3.13:3.7	Taṁ kissa hetu?
an3.13:3.8	Yā hissa, bhikkhave, pubbe anabhisittassa abhisekāsā sā paṭippassaddhā.
an3.13:3.9	Ayaṁ vuccati, bhikkhave, puggalo vigatāso.
an3.13:3.10	Ime kho, bhikkhave, tayo puggalā santo saṁvijjamānā lokasmiṁ.
an3.13:4.1	Evamevaṁ kho, bhikkhave, tayo puggalā santo saṁvijjamānā bhikkhūsu.
an3.13:4.2	Katame tayo?
an3.13:4.3	Nirāso, āsaṁso, vigatāso.
an3.13:4.4	Katamo ca, bhikkhave, puggalo nirāso?
an3.13:4.5	Idha, bhikkhave, ekacco puggalo dussīlo hoti pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto.
an3.13:4.6	So suṇāti:
an3.13:4.7	‘itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.
an3.13:4.8	Tassa na evaṁ hoti:
an3.13:4.9	‘kudāssu nāma ahampi āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissāmī’ti.
an3.13:4.10	Ayaṁ vuccati, bhikkhave, puggalo nirāso.
an3.13:5.1	Katamo ca, bhikkhave, puggalo āsaṁso?
an3.13:5.2	Idha, bhikkhave, bhikkhu sīlavā hoti kalyāṇadhammo.
an3.13:5.3	So suṇāti:
an3.13:5.4	‘itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.
an3.13:5.5	Tassa evaṁ hoti:
an3.13:5.6	‘kudāssu nāma ahampi āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissāmī’ti.
an3.13:5.7	Ayaṁ vuccati, bhikkhave, puggalo āsaṁso.
an3.13:6.1	Katamo ca, bhikkhave, puggalo vigatāso?
an3.13:6.2	Idha, bhikkhave, bhikkhu arahaṁ hoti khīṇāsavo.
an3.13:6.3	So suṇāti:
an3.13:6.4	‘itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.
an3.13:6.5	Tassa na evaṁ hoti:
an3.13:6.6	‘kudāssu nāma ahampi āsavānaṁ khayā …pe… sacchikatvā upasampajja viharissāmī’ti.
an3.13:6.7	Taṁ kissa hetu?
an3.13:6.8	Yā hissa, bhikkhave, pubbe avimuttassa vimuttāsā sā paṭippassaddhā.
an3.13:6.9	Ayaṁ vuccati, bhikkhave, puggalo vigatāso.
an3.13:6.10	Ime kho, bhikkhave, tayo puggalā santo saṁvijjamānā bhikkhūsū”ti.
an3.13:6.11	Tatiyaṁ.
an3.14:0.1	Aṅguttara Nikāya 3.14
an3.14:0.2	2. Rathakāravagga
an3.14:0.3	Cakkavattisutta
an3.14:1.1	“Yopi so, bhikkhave, rājā cakkavattī dhammiko dhammarājā sopi na arājakaṁ cakkaṁ vattetī”ti.
an3.14:1.2	Evaṁ vutte, aññataro bhikkhu bhagavantaṁ etadavoca:
an3.14:1.3	“ko pana, bhante, rañño cakkavattissa dhammikassa dhammarañño rājā”ti?
an3.14:1.4	“Dhammo, bhikkhū”ti bhagavā avoca:
an3.14:1.5	“idha, bhikkhu, rājā cakkavattī dhammiko dhammarājā dhammaṁyeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahati antojanasmiṁ.
an3.14:2.1	Puna caparaṁ, bhikkhu, rājā cakkavattī dhammiko dhammarājā dhammaṁyeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahati khattiyesu, anuyantesu, balakāyasmiṁ, brāhmaṇagahapatikesu, negamajānapadesu, samaṇabrāhmaṇesu, migapakkhīsu.
an3.14:2.2	Sa kho so bhikkhu rājā cakkavattī dhammiko dhammarājā dhammaṁyeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahitvā antojanasmiṁ, dhammikaṁ rakkhāvaraṇaguttiṁ saṁvidahitvā khattiyesu …pe… anuyantesu, balakāyasmiṁ, brāhmaṇagahapatikesu, negamajānapadesu, samaṇabrāhmaṇesu, migapakkhīsu, dhammeneva cakkaṁ vatteti.
an3.14:2.3	Taṁ hoti cakkaṁ appaṭivattiyaṁ kenaci manussabhūtena paccatthikena pāṇinā.
an3.14:3.1	Evamevaṁ kho, bhikkhu, tathāgato arahaṁ sammāsambuddho dhammiko dhammarājā dhammaṁyeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahati kāyakammasmiṁ:
an3.14:3.2	‘evarūpaṁ kāyakammaṁ sevitabbaṁ, evarūpaṁ kāyakammaṁ na sevitabban’ti.
an3.14:4.1	Puna caparaṁ, bhikkhu, tathāgato arahaṁ sammāsambuddho dhammiko dhammarājā dhammaṁyeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahati vacīkammasmiṁ:
an3.14:4.2	‘evarūpaṁ vacīkammaṁ sevitabbaṁ, evarūpaṁ vacīkammaṁ na sevitabban’ti …pe… manokammasmiṁ:
an3.14:4.3	‘evarūpaṁ manokammaṁ sevitabbaṁ, evarūpaṁ manokammaṁ na sevitabban’ti.
an3.14:5.1	Sa kho so, bhikkhu, tathāgato arahaṁ sammāsambuddho dhammiko dhammarājā dhammaṁyeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahitvā kāyakammasmiṁ, dhammikaṁ rakkhāvaraṇaguttiṁ saṁvidahitvā vacīkammasmiṁ, dhammikaṁ rakkhāvaraṇaguttiṁ saṁvidahitvā manokammasmiṁ, dhammeneva anuttaraṁ dhammacakkaṁ pavatteti.
an3.14:5.2	Taṁ hoti cakkaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.
an3.14:5.3	Catutthaṁ.
an3.15:0.1	Aṅguttara Nikāya 3.15
an3.15:0.2	2. Rathakāravagga
an3.15:0.3	Sacetanasutta
an3.15:1.1	Ekaṁ samayaṁ bhagavā bārāṇasiyaṁ viharati isipatane migadāye.
an3.15:1.2	Tatra kho bhagavā bhikkhū āmantesi:
an3.15:1.3	“bhikkhavo”ti.
an3.15:1.4	“Bhadante”ti te bhikkhū bhagavato paccassosuṁ.
an3.15:1.5	Bhagavā etadavoca:
an3.15:2.1	“Bhūtapubbaṁ, bhikkhave, rājā ahosi sacetano nāma.
an3.15:2.2	Atha kho, bhikkhave, rājā sacetano rathakāraṁ āmantesi:
an3.15:2.3	‘ito me, samma rathakāra, channaṁ māsānaṁ accayena saṅgāmo bhavissati.
an3.15:2.4	Sakkhissasi me, samma rathakāra, navaṁ cakkayugaṁ kātun’ti?
an3.15:2.5	‘Sakkomi, devā’ti kho, bhikkhave, rathakāro rañño sacetanassa paccassosi.
an3.15:2.6	Atha kho, bhikkhave, rathakāro chahi māsehi chārattūnehi ekaṁ cakkaṁ niṭṭhāpesi.
an3.15:2.7	Atha kho, bhikkhave, rājā sacetano rathakāraṁ āmantesi:
an3.15:2.8	‘ito me, samma rathakāra, channaṁ divasānaṁ accayena saṅgāmo bhavissati, niṭṭhitaṁ navaṁ cakkayugan’ti?
an3.15:2.9	‘Imehi kho, deva, chahi māsehi chārattūnehi ekaṁ cakkaṁ niṭṭhitan’ti.
an3.15:2.10	‘Sakkhissasi pana me, samma rathakāra, imehi chahi divasehi dutiyaṁ cakkaṁ niṭṭhāpetun’ti?
an3.15:2.11	‘Sakkomi, devā’ti kho, bhikkhave, rathakāro chahi divasehi dutiyaṁ cakkaṁ niṭṭhāpetvā navaṁ cakkayugaṁ ādāya yena rājā sacetano tenupasaṅkami; upasaṅkamitvā rājānaṁ sacetanaṁ etadavoca:
an3.15:2.12	‘idaṁ te, deva, navaṁ cakkayugaṁ niṭṭhitan’ti.
an3.15:2.13	‘Yañca te idaṁ, samma rathakāra, cakkaṁ chahi māsehi niṭṭhitaṁ chārattūnehi yañca te idaṁ cakkaṁ chahi divasehi niṭṭhitaṁ, imesaṁ kiṁ nānākaraṇaṁ?
an3.15:2.14	Nesāhaṁ kiñci nānākaraṇaṁ passāmī’ti.
an3.15:2.15	‘Atthesaṁ, deva, nānākaraṇaṁ.
an3.15:2.16	Passatu devo nānākaraṇan’ti.
an3.15:3.1	Atha kho, bhikkhave, rathakāro yaṁ taṁ cakkaṁ chahi divasehi niṭṭhitaṁ taṁ pavattesi.
an3.15:3.2	Taṁ pavattitaṁ samānaṁ yāvatikā abhisaṅkhārassa gati tāvatikaṁ gantvā ciṅgulāyitvā bhūmiyaṁ papati.
an3.15:3.3	Yaṁ pana taṁ cakkaṁ chahi māsehi niṭṭhitaṁ chārattūnehi taṁ pavattesi.
an3.15:3.4	Taṁ pavattitaṁ samānaṁ yāvatikā abhisaṅkhārassa gati tāvatikaṁ gantvā akkhāhataṁ maññe aṭṭhāsi.
an3.15:4.1	‘Ko nu kho, samma rathakāra, hetu ko paccayo yamidaṁ cakkaṁ chahi divasehi niṭṭhitaṁ taṁ pavattitaṁ samānaṁ yāvatikā abhisaṅkhārassa gati tāvatikaṁ gantvā ciṅgulāyitvā bhūmiyaṁ papati?
an3.15:4.2	Ko pana, samma rathakāra, hetu ko paccayo yamidaṁ cakkaṁ chahi māsehi niṭṭhitaṁ chārattūnehi taṁ pavattitaṁ samānaṁ yāvatikā abhisaṅkhārassa gati tāvatikaṁ gantvā akkhāhataṁ maññe aṭṭhāsī’ti?
an3.15:4.3	‘Yamidaṁ, deva, cakkaṁ chahi divasehi niṭṭhitaṁ tassa nemipi savaṅkā sadosā sakasāvā, arāpi savaṅkā sadosā sakasāvā, nābhipi savaṅkā sadosā sakasāvā.
an3.15:4.4	Taṁ nemiyāpi savaṅkattā sadosattā sakasāvattā, arānampi savaṅkattā sadosattā sakasāvattā, nābhiyāpi savaṅkattā sadosattā sakasāvattā pavattitaṁ samānaṁ yāvatikā abhisaṅkhārassa gati tāvatikaṁ gantvā ciṅgulāyitvā bhūmiyaṁ papati.
an3.15:4.5	Yaṁ pana taṁ, deva, cakkaṁ chahi māsehi niṭṭhitaṁ chārattūnehi tassa nemipi avaṅkā adosā akasāvā, arāpi avaṅkā adosā akasāvā, nābhipi avaṅkā adosā akasāvā.
an3.15:4.6	Taṁ nemiyāpi avaṅkattā adosattā akasāvattā, arānampi avaṅkattā adosattā akasāvattā, nābhiyāpi avaṅkattā adosattā akasāvattā pavattitaṁ samānaṁ yāvatikā abhisaṅkhārassa gati tāvatikaṁ gantvā akkhāhataṁ maññe aṭṭhāsī’ti.
an3.15:5.1	Siyā kho pana, bhikkhave, tumhākaṁ evamassa:
an3.15:5.2	‘añño nūna tena samayena so rathakāro ahosī’ti.
an3.15:5.3	Na kho panetaṁ, bhikkhave, evaṁ daṭṭhabbaṁ.
an3.15:5.4	Ahaṁ tena samayena so rathakāro ahosiṁ.
an3.15:5.5	Tadāhaṁ, bhikkhave, kusalo dāruvaṅkānaṁ dārudosānaṁ dārukasāvānaṁ.
an3.15:5.6	Etarahi kho panāhaṁ, bhikkhave, arahaṁ sammāsambuddho kusalo kāyavaṅkānaṁ kāyadosānaṁ kāyakasāvānaṁ, kusalo vacīvaṅkānaṁ vacīdosānaṁ vacīkasāvānaṁ, kusalo manovaṅkānaṁ manodosānaṁ manokasāvānaṁ.
an3.15:5.7	Yassa kassaci, bhikkhave, bhikkhussa vā bhikkhuniyā vā kāyavaṅko appahīno kāyadoso kāyakasāvo, vacīvaṅko appahīno vacīdoso vacīkasāvo, manovaṅko appahīno manodoso manokasāvo, evaṁ papatitā te, bhikkhave, imasmā dhammavinayā, seyyathāpi taṁ cakkaṁ chahi divasehi niṭṭhitaṁ.
an3.15:6.1	Yassa kassaci, bhikkhave, bhikkhussa vā bhikkhuniyā vā kāyavaṅko pahīno kāyadoso kāyakasāvo, vacīvaṅko pahīno vacīdoso vacīkasāvo, manovaṅko pahīno manodoso manokasāvo, evaṁ patiṭṭhitā te, bhikkhave, imasmiṁ dhammavinaye, seyyathāpi taṁ cakkaṁ chahi māsehi niṭṭhitaṁ chārattūnehi.
an3.15:7.1	Tasmātiha, bhikkhave, evaṁ sikkhitabbaṁ:
an3.15:7.2	‘kāyavaṅkaṁ pajahissāma kāyadosaṁ kāyakasāvaṁ, vacīvaṅkaṁ pajahissāma vacīdosaṁ vacīkasāvaṁ, manovaṅkaṁ pajahissāma manodosaṁ manokasāvan’ti.
an3.15:7.3	Evañhi vo, bhikkhave, sikkhitabban”ti.
an3.15:7.4	Pañcamaṁ.
an3.16:0.1	Aṅguttara Nikāya 3.16
an3.16:0.2	2. Rathakāravagga
an3.16:0.3	Apaṇṇakasutta
an3.16:1.1	“Tīhi, bhikkhave, dhammehi samannāgato bhikkhu apaṇṇakapaṭipadaṁ paṭipanno hoti, yoni cassa āraddhā hoti āsavānaṁ khayāya.
an3.16:1.2	Katamehi tīhi?
an3.16:1.3	Idha, bhikkhave, bhikkhu indriyesu guttadvāro hoti, bhojane mattaññū hoti, jāgariyaṁ anuyutto hoti.
an3.16:2.1	Kathañca, bhikkhave, bhikkhu indriyesu guttadvāro hoti?
an3.16:2.2	Idha, bhikkhave, bhikkhu cakkhunā rūpaṁ disvā na nimittaggāhī hoti nānubyañjanaggāhī.
an3.16:2.3	Yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ tassa saṁvarāya paṭipajjati, rakkhati cakkhundriyaṁ, cakkhundriye saṁvaraṁ āpajjati.
an3.16:2.4	Sotena saddaṁ sutvā …
an3.16:2.5	ghānena gandhaṁ ghāyitvā …
an3.16:2.6	jivhāya rasaṁ sāyitvā …
an3.16:2.7	kāyena phoṭṭhabbaṁ phusitvā …
an3.16:2.8	manasā dhammaṁ viññāya na nimittaggāhī hoti nānubyañjanaggāhī.
an3.16:2.9	Yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ tassa saṁvarāya paṭipajjati, rakkhati manindriyaṁ, manindriye saṁvaraṁ āpajjati.
an3.16:2.10	Evaṁ kho, bhikkhave, bhikkhu indriyesu guttadvāro hoti.
an3.16:3.1	Kathañca, bhikkhave, bhikkhu bhojane mattaññū hoti?
an3.16:3.2	Idha, bhikkhave, bhikkhu paṭisaṅkhā yoniso āhāraṁ āhāreti:
an3.16:3.3	‘neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṁsūparatiyā brahmacariyānuggahāya, iti purāṇañca vedanaṁ paṭihaṅkhāmi, navañca vedanaṁ na uppādessāmi, yātrā ca me bhavissati anavajjatā ca phāsuvihāro cā’ti.
an3.16:3.4	Evaṁ kho, bhikkhave, bhikkhu bhojane mattaññū hoti.
an3.16:4.1	Kathañca, bhikkhave, bhikkhu jāgariyaṁ anuyutto hoti?
an3.16:4.2	Idha, bhikkhave, bhikkhu divasaṁ caṅkamena nisajjāya āvaraṇīyehi dhammehi cittaṁ parisodheti, rattiyā paṭhamaṁ yāmaṁ caṅkamena nisajjāya āvaraṇīyehi dhammehi cittaṁ parisodheti, rattiyā majjhimaṁ yāmaṁ dakkhiṇena passena sīhaseyyaṁ kappeti pāde pādaṁ accādhāya sato sampajāno uṭṭhānasaññaṁ manasi karitvā, rattiyā pacchimaṁ yāmaṁ paccuṭṭhāya caṅkamena nisajjāya āvaraṇīyehi dhammehi cittaṁ parisodheti.
an3.16:4.3	Evaṁ kho, bhikkhave, bhikkhu jāgariyaṁ anuyutto hoti.
an3.16:4.4	Imehi kho, bhikkhave, tīhi dhammehi samannāgato bhikkhu apaṇṇakapaṭipadaṁ paṭipanno hoti, yoni cassa āraddhā hoti āsavānaṁ khayāyā”ti.
an3.16:4.5	Chaṭṭhaṁ.
an3.17:0.1	Aṅguttara Nikāya 3.17
an3.17:0.2	2. Rathakāravagga
an3.17:0.3	Attabyābādhasutta
an3.17:1.1	“Tayome, bhikkhave, dhammā attabyābādhāyapi saṁvattanti, parabyābādhāyapi saṁvattanti, ubhayabyābādhāyapi saṁvattanti.
an3.17:1.2	Katame tayo?
an3.17:1.3	Kāyaduccaritaṁ, vacīduccaritaṁ, manoduccaritaṁ.
an3.17:1.4	Ime kho, bhikkhave, tayo dhammā attabyābādhāyapi saṁvattanti, parabyābādhāyapi saṁvattanti, ubhayabyābādhāyapi saṁvattanti.
an3.17:2.1	Tayome, bhikkhave, dhammā nevattabyābādhāyapi saṁvattanti, na parabyābādhāyapi saṁvattanti, na ubhayabyābādhāyapi saṁvattanti.
an3.17:2.2	Katame tayo?
an3.17:2.3	Kāyasucaritaṁ, vacīsucaritaṁ, manosucaritaṁ.
an3.17:2.4	Ime kho, bhikkhave, tayo dhammā nevattabyābādhāyapi saṁvattanti, na parabyābādhāyapi saṁvattanti, na ubhayabyābādhāyapi saṁvattantī”ti.
an3.17:2.5	Sattamaṁ.
an3.18:0.1	Aṅguttara Nikāya 3.18
an3.18:0.2	2. Rathakāravagga
an3.18:0.3	Devalokasutta
an3.18:1.1	“Sace vo, bhikkhave, aññatitthiyā paribbājakā evaṁ puccheyyuṁ:
an3.18:1.2	‘devalokūpapattiyā, āvuso, samaṇe gotame brahmacariyaṁ vussathā’ti?
an3.18:1.3	Nanu tumhe, bhikkhave, evaṁ puṭṭhā aṭṭīyeyyātha harāyeyyātha jiguccheyyāthā”ti?
an3.18:1.4	“Evaṁ, bhante”.
an3.18:1.5	“Iti kira tumhe, bhikkhave, dibbena āyunā aṭṭīyatha harāyatha jigucchatha, dibbena vaṇṇena dibbena sukhena dibbena yasena dibbenādhipateyyena aṭṭīyatha harāyatha jigucchatha;
an3.18:1.6	pageva kho pana, bhikkhave, tumhehi kāyaduccaritena aṭṭīyitabbaṁ harāyitabbaṁ jigucchitabbaṁ, vacīduccaritena … manoduccaritena aṭṭīyitabbaṁ harāyitabbaṁ jigucchitabban”ti.
an3.18:1.7	Aṭṭhamaṁ.
an3.19:0.1	Aṅguttara Nikāya 3.19
an3.19:0.2	2. Rathakāravagga
an3.19:0.3	Paṭhamapāpaṇikasutta
an3.19:1.1	“Tīhi, bhikkhave, aṅgehi samannāgato pāpaṇiko abhabbo anadhigataṁ vā bhogaṁ adhigantuṁ, adhigataṁ vā bhogaṁ phātiṁ kātuṁ.
an3.19:1.2	Katamehi tīhi?
an3.19:1.3	Idha, bhikkhave, pāpaṇiko pubbaṇhasamayaṁ na sakkaccaṁ kammantaṁ adhiṭṭhāti, majjhanhikasamayaṁ na sakkaccaṁ kammantaṁ adhiṭṭhāti, sāyanhasamayaṁ na sakkaccaṁ kammantaṁ adhiṭṭhāti.
an3.19:1.4	Imehi kho, bhikkhave, tīhi aṅgehi samannāgato pāpaṇiko abhabbo anadhigataṁ vā bhogaṁ adhigantuṁ, adhigataṁ vā bhogaṁ phātiṁ kātuṁ.
an3.19:2.1	Evamevaṁ kho, bhikkhave, tīhi dhammehi samannāgato bhikkhu abhabbo anadhigataṁ vā kusalaṁ dhammaṁ adhigantuṁ, adhigataṁ vā kusalaṁ dhammaṁ phātiṁ kātuṁ.
an3.19:2.2	Katamehi tīhi?
an3.19:2.3	Idha, bhikkhave, bhikkhu pubbaṇhasamayaṁ na sakkaccaṁ samādhinimittaṁ adhiṭṭhāti, majjhanhikasamayaṁ na sakkaccaṁ samādhinimittaṁ adhiṭṭhāti, sāyanhasamayaṁ na sakkaccaṁ samādhinimittaṁ adhiṭṭhāti.
an3.19:2.4	Imehi kho, bhikkhave, tīhi dhammehi samannāgato bhikkhu abhabbo anadhigataṁ vā kusalaṁ dhammaṁ adhigantuṁ, adhigataṁ vā kusalaṁ dhammaṁ phātiṁ kātuṁ.
an3.19:3.1	Tīhi, bhikkhave, aṅgehi samannāgato pāpaṇiko bhabbo anadhigataṁ vā bhogaṁ adhigantuṁ, adhigataṁ vā bhogaṁ phātiṁ kātuṁ.
an3.19:3.2	Katamehi tīhi?
an3.19:3.3	Idha, bhikkhave, pāpaṇiko pubbaṇhasamayaṁ sakkaccaṁ kammantaṁ adhiṭṭhāti, majjhanhikasamayaṁ …pe… sāyanhasamayaṁ sakkaccaṁ kammantaṁ adhiṭṭhāti.
an3.19:3.4	Imehi kho, bhikkhave, tīhi aṅgehi samannāgato pāpaṇiko bhabbo anadhigataṁ vā bhogaṁ adhigantuṁ, adhigataṁ vā bhogaṁ phātiṁ kātuṁ.
an3.19:4.1	Evamevaṁ kho, bhikkhave, tīhi dhammehi samannāgato bhikkhu bhabbo anadhigataṁ vā kusalaṁ dhammaṁ adhigantuṁ, adhigataṁ vā kusalaṁ dhammaṁ phātiṁ kātuṁ.
an3.19:4.2	Katamehi tīhi?
an3.19:4.3	Idha, bhikkhave, bhikkhu pubbaṇhasamayaṁ sakkaccaṁ samādhinimittaṁ adhiṭṭhāti, majjhanhikasamayaṁ …pe… sāyanhasamayaṁ sakkaccaṁ samādhinimittaṁ adhiṭṭhāti.
an3.19:4.4	Imehi kho, bhikkhave, tīhi dhammehi samannāgato bhikkhu bhabbo anadhigataṁ vā kusalaṁ dhammaṁ adhigantuṁ, adhigataṁ vā kusalaṁ dhammaṁ phātiṁ kātun”ti.
an3.19:4.5	Navamaṁ.
an3.20:0.1	Aṅguttara Nikāya 3.20
an3.20:0.2	2. Rathakāravagga
an3.20:0.3	Dutiyapāpaṇikasutta
an3.20:1.1	“Tīhi, bhikkhave, aṅgehi samannāgato pāpaṇiko nacirasseva mahattaṁ vepullattaṁ pāpuṇāti bhogesu.
an3.20:1.2	Katamehi tīhi?
an3.20:1.3	Idha, bhikkhave, pāpaṇiko cakkhumā ca hoti vidhuro ca nissayasampanno ca.
an3.20:1.4	Kathañca, bhikkhave, pāpaṇiko cakkhumā hoti?
an3.20:1.5	Idha, bhikkhave, pāpaṇiko paṇiyaṁ jānāti:
an3.20:1.6	‘idaṁ paṇiyaṁ evaṁ kītaṁ, evaṁ vikkayamānaṁ, ettakaṁ mūlaṁ bhavissati, ettako udayo’ti.
an3.20:1.7	Evaṁ kho, bhikkhave, pāpaṇiko cakkhumā hoti.
an3.20:2.1	Kathañca, bhikkhave, pāpaṇiko vidhuro hoti?
an3.20:2.2	Idha, bhikkhave, pāpaṇiko kusalo hoti paṇiyaṁ ketuñca vikketuñca.
an3.20:2.3	Evaṁ kho, bhikkhave, pāpaṇiko vidhuro hoti.
an3.20:3.1	Kathañca, bhikkhave, pāpaṇiko nissayasampanno hoti?
an3.20:3.2	Idha, bhikkhave, pāpaṇikaṁ ye te gahapatī vā gahapatiputtā vā aḍḍhā mahaddhanā mahābhogā te evaṁ jānanti:
an3.20:3.3	‘ayaṁ kho bhavaṁ pāpaṇiko cakkhumā vidhuro ca paṭibalo puttadārañca posetuṁ, amhākañca kālena kālaṁ anuppadātun’ti.
an3.20:3.4	Te naṁ bhogehi nipatanti:
an3.20:3.5	‘ito, samma pāpaṇika, bhoge karitvā puttadārañca posehi, amhākañca kālena kālaṁ anuppadehī’ti.
an3.20:3.6	Evaṁ kho, bhikkhave, pāpaṇiko nissayasampanno hoti.
an3.20:3.7	Imehi kho, bhikkhave, tīhi aṅgehi samannāgato pāpaṇiko nacirasseva mahattaṁ vepullattaṁ pāpuṇāti bhogesu.
an3.20:4.1	Evamevaṁ kho, bhikkhave, tīhi dhammehi samannāgato bhikkhu nacirasseva mahattaṁ vepullattaṁ pāpuṇāti kusalesu dhammesu.
an3.20:4.2	Katamehi tīhi?
an3.20:4.3	Idha, bhikkhave, bhikkhu cakkhumā ca hoti vidhuro ca nissayasampanno ca.
an3.20:4.4	Kathañca, bhikkhave, bhikkhu cakkhumā hoti?
an3.20:4.5	Idha, bhikkhave, bhikkhu ‘idaṁ dukkhan’ti yathābhūtaṁ pajānāti, ‘ayaṁ dukkhasamudayo’ti yathābhūtaṁ pajānāti, ‘ayaṁ dukkhanirodho’ti yathābhūtaṁ pajānāti, ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.20:4.6	Evaṁ kho, bhikkhave, bhikkhu cakkhumā hoti.
an3.20:5.1	Kathañca, bhikkhave, bhikkhu vidhuro hoti?
an3.20:5.2	Idha, bhikkhave, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an3.20:5.3	Evaṁ kho, bhikkhave, bhikkhu vidhuro hoti.
an3.20:6.1	Kathañca, bhikkhave, bhikkhu nissayasampanno hoti?
an3.20:6.2	Idha, bhikkhave, bhikkhu ye te bhikkhū bahussutā āgatāgamā dhammadharā vinayadharā mātikādharā te kālena kālaṁ upasaṅkamitvā paripucchati paripañhati:
an3.20:6.3	‘idaṁ, bhante, kathaṁ, imassa ko attho’ti?
an3.20:6.4	Tassa te āyasmanto avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṁ paṭivinodenti.
an3.20:6.5	Evaṁ kho, bhikkhave, bhikkhu nissayasampanno hoti.
an3.20:6.6	Imehi kho, bhikkhave, tīhi dhammehi samannāgato bhikkhu nacirasseva mahattaṁ vepullattaṁ pāpuṇāti kusalesu dhammesū”ti.
an3.20:6.7	Dasamaṁ.
an3.20:6.8	Paṭhamabhāṇavāro niṭṭhito.
an3.20:6.9	Rathakāravaggo dutiyo.
an3.20:7.0	Tassuddānaṁ
an3.20:7.1	Ñāto sāraṇīyo bhikkhu,
an3.20:7.2	cakkavattī sacetano;
an3.20:7.3	Apaṇṇakattā devo ca,
an3.20:7.4	duve pāpaṇikena cāti.
an3.21:0.1	Aṅguttara Nikāya 3.21
an3.21:0.2	3. Puggalavagga
an3.21:0.3	Samiddhasutta
an3.21:1.1	Evaṁ me sutaṁ—
an3.21:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an3.21:1.3	Atha kho āyasmā ca samiddho āyasmā ca mahākoṭṭhiko yenāyasmā sāriputto tenupasaṅkamiṁsu; upasaṅkamitvā āyasmatā sāriputtena saddhiṁ sammodiṁsu.
an3.21:1.4	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnaṁ kho āyasmantaṁ samiddhaṁ āyasmā sāriputto etadavoca:
an3.21:2.1	“Tayome, āvuso samiddha, puggalā santo saṁvijjamānā lokasmiṁ.
an3.21:2.2	Katame tayo?
an3.21:2.3	Kāyasakkhī, diṭṭhippatto, saddhāvimutto.
an3.21:2.4	Ime kho, āvuso, tayo puggalā santo saṁvijjamānā lokasmiṁ.
an3.21:2.5	Imesaṁ, āvuso, tiṇṇaṁ puggalānaṁ katamo te puggalo khamati abhikkantataro ca paṇītataro cā”ti?
an3.21:3.1	“Tayome, āvuso sāriputta, puggalā santo saṁvijjamānā lokasmiṁ.
an3.21:3.2	Katame tayo?
an3.21:3.3	Kāyasakkhī, diṭṭhippatto, saddhāvimutto.
an3.21:3.4	Ime kho, āvuso, tayo puggalā santo saṁvijjamānā lokasmiṁ.
an3.21:3.5	Imesaṁ, āvuso, tiṇṇaṁ puggalānaṁ yvāyaṁ puggalo saddhāvimutto, ayaṁ me puggalo khamati imesaṁ tiṇṇaṁ puggalānaṁ abhikkantataro ca paṇītataro ca.
an3.21:3.6	Taṁ kissa hetu?
an3.21:3.7	Imassa, āvuso, puggalassa saddhindriyaṁ adhimattan”ti.
an3.21:4.1	Atha kho āyasmā sāriputto āyasmantaṁ mahākoṭṭhikaṁ etadavoca:
an3.21:4.2	“tayome, āvuso koṭṭhika, puggalā santo saṁvijjamānā lokasmiṁ.
an3.21:4.3	Katame tayo?
an3.21:4.4	Kāyasakkhī, diṭṭhippatto, saddhāvimutto.
an3.21:4.5	Ime kho, āvuso, tayo puggalā santo saṁvijjamānā lokasmiṁ.
an3.21:4.6	Imesaṁ, āvuso, tiṇṇaṁ puggalānaṁ katamo te puggalo khamati abhikkantataro ca paṇītataro cā”ti?
an3.21:5.1	“Tayome, āvuso sāriputta, puggalā santo saṁvijjamānā lokasmiṁ.
an3.21:5.2	Katame tayo?
an3.21:5.3	Kāyasakkhī, diṭṭhippatto, saddhāvimutto.
an3.21:5.4	Ime kho, āvuso, tayo puggalā santo saṁvijjamānā lokasmiṁ.
an3.21:5.5	Imesaṁ, āvuso, tiṇṇaṁ puggalānaṁ yvāyaṁ puggalo kāyasakkhī, ayaṁ me puggalo khamati imesaṁ tiṇṇaṁ puggalānaṁ abhikkantataro ca paṇītataro ca.
an3.21:5.6	Taṁ kissa hetu?
an3.21:5.7	Imassa, āvuso, puggalassa samādhindriyaṁ adhimattan”ti.
an3.21:6.1	Atha kho āyasmā mahākoṭṭhiko āyasmantaṁ sāriputtaṁ etadavoca:
an3.21:6.2	“tayome, āvuso sāriputta, puggalā santo saṁvijjamānā lokasmiṁ.
an3.21:6.3	Katame tayo?
an3.21:6.4	Kāyasakkhī, diṭṭhippatto, saddhāvimutto.
an3.21:6.5	Ime kho, āvuso, tayo puggalā santo saṁvijjamānā lokasmiṁ.
an3.21:6.6	Imesaṁ, āvuso, tiṇṇaṁ puggalānaṁ katamo te puggalo khamati abhikkantataro ca paṇītataro cā”ti?
an3.21:7.1	“Tayome, āvuso koṭṭhika, puggalā santo saṁvijjamānā lokasmiṁ.
an3.21:7.2	Katame tayo?
an3.21:7.3	Kāyasakkhī, diṭṭhippatto, saddhāvimutto.
an3.21:7.4	Ime kho, āvuso, tayo puggalā santo saṁvijjamānā lokasmiṁ.
an3.21:7.5	Imesaṁ, āvuso, tiṇṇaṁ puggalānaṁ yvāyaṁ puggalo diṭṭhippatto, ayaṁ me puggalo khamati imesaṁ tiṇṇaṁ puggalānaṁ abhikkantataro ca paṇītataro ca.
an3.21:7.6	Taṁ kissa hetu?
an3.21:7.7	Imassa, āvuso, puggalassa paññindriyaṁ adhimattan”ti.
an3.21:8.1	Atha kho āyasmā sāriputto āyasmantañca samiddhaṁ āyasmantañca mahākoṭṭhikaṁ etadavoca:
an3.21:8.2	“byākataṁ kho, āvuso, amhehi sabbeheva yathāsakaṁ paṭibhānaṁ.
an3.21:8.3	Āyāmāvuso, yena bhagavā tenupasaṅkamissāma; upasaṅkamitvā bhagavato etamatthaṁ ārocessāma.
an3.21:8.4	Yathā no bhagavā byākarissati tathā naṁ dhāressāmā”ti.
an3.21:8.5	“Evamāvuso”ti kho āyasmā ca samiddho āyasmā ca mahākoṭṭhiko āyasmato sāriputtassa paccassosuṁ.
an3.21:8.6	Atha kho āyasmā ca sāriputto āyasmā ca samiddho āyasmā ca mahākoṭṭhiko yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.
an3.21:8.7	Ekamantaṁ nisinno kho āyasmā sāriputto yāvatako ahosi āyasmatā ca samiddhena āyasmatā ca mahākoṭṭhikena saddhiṁ kathāsallāpo taṁ sabbaṁ bhagavato ārocesi.
an3.21:9.1	“Na khvettha, sāriputta, sukaraṁ ekaṁsena byākātuṁ:
an3.21:9.2	‘ayaṁ imesaṁ tiṇṇaṁ puggalānaṁ abhikkantataro ca paṇītataro cā’ti.
an3.21:9.3	Ṭhānañhetaṁ, sāriputta, vijjati yvāyaṁ puggalo saddhāvimutto svāssa arahattāya paṭipanno, yvāyaṁ puggalo kāyasakkhī svāssa sakadāgāmī vā anāgāmī vā, yo cāyaṁ puggalo diṭṭhippatto sopassa sakadāgāmī vā anāgāmī vā.
an3.21:10.1	Na khvettha, sāriputta, sukaraṁ ekaṁsena byākātuṁ:
an3.21:10.2	‘ayaṁ imesaṁ tiṇṇaṁ puggalānaṁ abhikkantataro ca paṇītataro cā’ti.
an3.21:10.3	Ṭhānañhetaṁ, sāriputta, vijjati yvāyaṁ puggalo kāyasakkhī svāssa arahattāya paṭipanno, yvāyaṁ puggalo saddhāvimutto svāssa sakadāgāmī vā anāgāmī vā, yo cāyaṁ puggalo diṭṭhippatto sopassa sakadāgāmī vā anāgāmī vā.
an3.21:11.1	Na khvettha, sāriputta, sukaraṁ ekaṁsena byākātuṁ:
an3.21:11.2	‘ayaṁ imesaṁ tiṇṇaṁ puggalānaṁ abhikkantataro ca paṇītataro cā’ti.
an3.21:11.3	Ṭhānañhetaṁ, sāriputta, vijjati yvāyaṁ puggalo diṭṭhippatto svāssa arahattāya paṭipanno, yvāyaṁ puggalo saddhāvimutto svāssa sakadāgāmī vā anāgāmī vā, yo cāyaṁ puggalo kāyasakkhī sopassa sakadāgāmī vā anāgāmī vā.
an3.21:12.1	Na khvettha, sāriputta, sukaraṁ ekaṁsena byākātuṁ:
an3.21:12.2	‘ayaṁ imesaṁ tiṇṇaṁ puggalānaṁ abhikkantataro ca paṇītataro cā’”ti.
an3.21:12.3	Paṭhamaṁ.
an3.22:0.1	Aṅguttara Nikāya 3.22
an3.22:0.2	3. Puggalavagga
an3.22:0.3	Gilānasutta
an3.22:1.1	“Tayome, bhikkhave, gilānā santo saṁvijjamānā lokasmiṁ.
an3.22:1.2	Katame tayo?
an3.22:1.3	Idha, bhikkhave, ekacco gilāno labhanto vā sappāyāni bhojanāni alabhanto vā sappāyāni bhojanāni, labhanto vā sappāyāni bhesajjāni alabhanto vā sappāyāni bhesajjāni, labhanto vā patirūpaṁ upaṭṭhākaṁ alabhanto vā patirūpaṁ upaṭṭhākaṁ neva vuṭṭhāti tamhā ābādhā.
an3.22:2.1	Idha pana, bhikkhave, ekacco gilāno labhanto vā sappāyāni bhojanāni alabhanto vā sappāyāni bhojanāni, labhanto vā sappāyāni bhesajjāni alabhanto vā sappāyāni bhesajjāni, labhanto vā patirūpaṁ upaṭṭhākaṁ alabhanto vā patirūpaṁ upaṭṭhākaṁ vuṭṭhāti tamhā ābādhā.
an3.22:3.1	Idha pana, bhikkhave, ekacco gilāno labhantova sappāyāni bhojanāni no alabhanto, labhantova sappāyāni bhesajjāni no alabhanto, labhantova patirūpaṁ upaṭṭhākaṁ no alabhanto vuṭṭhāti tamhā ābādhā.
an3.22:4.1	Tatra, bhikkhave, yvāyaṁ gilāno labhantova sappāyāni bhojanāni no alabhanto, labhantova sappāyāni bhesajjāni no alabhanto, labhantova patirūpaṁ upaṭṭhākaṁ no alabhanto vuṭṭhāti tamhā ābādhā, imaṁ kho, bhikkhave, gilānaṁ paṭicca gilānabhattaṁ anuññātaṁ gilānabhesajjaṁ anuññātaṁ gilānupaṭṭhāko anuññāto.
an3.22:4.2	Imañca pana, bhikkhave, gilānaṁ paṭicca aññepi gilānā upaṭṭhātabbā.
an3.22:4.3	Ime kho, bhikkhave, tayo gilānā santo saṁvijjamānā lokasmiṁ.
an3.22:5.1	Evamevaṁ kho, bhikkhave, tayome gilānūpamā puggalā santo saṁvijjamānā lokasmiṁ.
an3.22:5.2	Katame tayo?
an3.22:5.3	Idha, bhikkhave, ekacco puggalo labhanto vā tathāgataṁ dassanāya alabhanto vā tathāgataṁ dassanāya, labhanto vā tathāgatappaveditaṁ dhammavinayaṁ savanāya alabhanto vā tathāgatappaveditaṁ dhammavinayaṁ savanāya neva okkamati niyāmaṁ kusalesu dhammesu sammattaṁ.
an3.22:6.1	Idha, pana, bhikkhave, ekacco puggalo labhanto vā tathāgataṁ dassanāya alabhanto vā tathāgataṁ dassanāya, labhanto vā tathāgatappaveditaṁ dhammavinayaṁ savanāya alabhanto vā tathāgatappaveditaṁ dhammavinayaṁ savanāya okkamati niyāmaṁ kusalesu dhammesu sammattaṁ.
an3.22:7.1	Idha pana, bhikkhave, ekacco puggalo labhantova tathāgataṁ dassanāya no alabhanto, labhantova tathāgatappaveditaṁ dhammavinayaṁ savanāya no alabhanto okkamati niyāmaṁ kusalesu dhammesu sammattaṁ.
an3.22:8.1	Tatra, bhikkhave, yvāyaṁ puggalo labhantova tathāgataṁ dassanāya no alabhanto, labhantova tathāgatappaveditaṁ dhammavinayaṁ savanāya no alabhanto okkamati niyāmaṁ kusalesu dhammesu sammattaṁ, imaṁ kho, bhikkhave, puggalaṁ paṭicca dhammadesanā anuññātā.
an3.22:8.2	Imañca pana, bhikkhave, puggalaṁ paṭicca aññesampi dhammo desetabbo.
an3.22:8.3	Ime kho, bhikkhave, tayo gilānūpamā puggalā santo saṁvijjamānā lokasmin”ti.
an3.22:8.4	Dutiyaṁ.
an3.23:0.1	Aṅguttara Nikāya 3.23
an3.23:0.2	3. Puggalavagga
an3.23:0.3	Saṅkhārasutta
an3.23:1.1	“Tayome, bhikkhave, puggalā santo saṁvijjamānā lokasmiṁ.
an3.23:1.2	Katame tayo?
an3.23:1.3	Idha, bhikkhave, ekacco puggalo sabyābajjhaṁ kāyasaṅkhāraṁ abhisaṅkharoti, sabyābajjhaṁ vacīsaṅkhāraṁ abhisaṅkharoti, sabyābajjhaṁ manosaṅkhāraṁ abhisaṅkharoti.
an3.23:1.4	So sabyābajjhaṁ kāyasaṅkhāraṁ abhisaṅkharitvā, sabyābajjhaṁ vacīsaṅkhāraṁ abhisaṅkharitvā, sabyābajjhaṁ manosaṅkhāraṁ abhisaṅkharitvā sabyābajjhaṁ lokaṁ upapajjati.
an3.23:1.5	Tamenaṁ sabyābajjhaṁ lokaṁ upapannaṁ samānaṁ sabyābajjhā phassā phusanti.
an3.23:1.6	So sabyābajjhehi phassehi phuṭṭho samāno sabyābajjhaṁ vedanaṁ vedayati ekantadukkhaṁ, seyyathāpi sattā nerayikā.
an3.23:2.1	Idha pana, bhikkhave, ekacco puggalo abyābajjhaṁ kāyasaṅkhāraṁ abhisaṅkharoti, abyābajjhaṁ vacīsaṅkhāraṁ abhisaṅkharoti, abyābajjhaṁ manosaṅkhāraṁ abhisaṅkharoti.
an3.23:2.2	So abyābajjhaṁ kāyasaṅkhāraṁ abhisaṅkharitvā, abyābajjhaṁ vacīsaṅkhāraṁ abhisaṅkharitvā, abyābajjhaṁ manosaṅkhāraṁ abhisaṅkharitvā abyābajjhaṁ lokaṁ upapajjati.
an3.23:2.3	Tamenaṁ abyābajjhaṁ lokaṁ upapannaṁ samānaṁ abyābajjhā phassā phusanti.
an3.23:2.4	So abyābajjhehi phassehi phuṭṭho samāno abyābajjhaṁ vedanaṁ vedayati ekantasukhaṁ, seyyathāpi devā subhakiṇhā.
an3.23:3.1	Idha pana, bhikkhave, ekacco puggalo sabyābajjhampi abyābajjhampi kāyasaṅkhāraṁ abhisaṅkharoti, sabyābajjhampi abyābajjhampi vacīsaṅkhāraṁ abhisaṅkharoti, sabyābajjhampi abyābajjhampi manosaṅkhāraṁ abhisaṅkharoti.
an3.23:3.2	So sabyābajjhampi abyābajjhampi kāyasaṅkhāraṁ abhisaṅkharitvā, sabyābajjhampi abyābajjhampi vacīsaṅkhāraṁ abhisaṅkharitvā, sabyābajjhampi abyābajjhampi manosaṅkhāraṁ abhisaṅkharitvā sabyābajjhampi abyābajjhampi lokaṁ upapajjati.
an3.23:3.3	Tamenaṁ sabyābajjhampi abyābajjhampi lokaṁ upapannaṁ samānaṁ sabyābajjhāpi abyābajjhāpi phassā phusanti.
an3.23:3.4	So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṁ vedayati vokiṇṇasukhadukkhaṁ, seyyathāpi manussā ekacce ca devā ekacce ca vinipātikā.
an3.23:3.5	Ime kho, bhikkhave, tayo puggalā santo saṁvijjamānā lokasmin”ti.
an3.23:3.6	Tatiyaṁ.
an3.24:0.1	Aṅguttara Nikāya 3.24
an3.24:0.2	3. Puggalavagga
an3.24:0.3	Bahukārasutta
an3.24:1.1	“Tayome, bhikkhave, puggalā puggalassa bahukārā.
an3.24:1.2	Katame tayo?
an3.24:1.3	Yaṁ, bhikkhave, puggalaṁ āgamma puggalo buddhaṁ saraṇaṁ gato hoti, dhammaṁ saraṇaṁ gato hoti, saṅghaṁ saraṇaṁ gato hoti;
an3.24:1.4	ayaṁ, bhikkhave, puggalo imassa puggalassa bahukāro.
an3.24:2.1	Puna caparaṁ, bhikkhave, yaṁ puggalaṁ āgamma puggalo ‘idaṁ dukkhan’ti yathābhūtaṁ pajānāti, ‘ayaṁ dukkhasamudayo’ti yathābhūtaṁ pajānāti, ‘ayaṁ dukkhanirodho’ti yathābhūtaṁ pajānāti, ‘ayaṁ dukkhanirodhagāminī paṭipadā’ti yathābhūtaṁ pajānāti;
an3.24:2.2	ayaṁ, bhikkhave, puggalo imassa puggalassa bahukāro.
an3.24:3.1	Puna caparaṁ, bhikkhave, yaṁ puggalaṁ āgamma puggalo āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati;
an3.24:3.2	ayaṁ, bhikkhave, puggalo imassa puggalassa bahukāro.
an3.24:3.3	Ime kho, bhikkhave, tayo puggalā puggalassa bahukārā.
an3.24:4.1	Imehi ca pana, bhikkhave, tīhi puggalehi imassa puggalassa natthañño puggalo bahukāroti vadāmi.
an3.24:4.2	Imesaṁ pana, bhikkhave, tiṇṇaṁ puggalānaṁ iminā puggalena na suppatikāraṁ vadāmi, yadidaṁ abhivādanapaccuṭṭhānaañjalikammasāmīcikammacīvarapiṇḍapātasenāsanagilānapaccayabhesajjaparikkhārānuppadānenā”ti.
an3.24:4.3	Catutthaṁ.
an3.25:0.1	Aṅguttara Nikāya 3.25
an3.25:0.2	3. Puggalavagga
an3.25:0.3	Vajirūpamasutta
an3.25:1.1	“Tayome, bhikkhave, puggalā santo saṁvijjamānā lokasmiṁ.
an3.25:1.2	Katame tayo?
an3.25:1.3	Arukūpamacitto puggalo, vijjūpamacitto puggalo, vajirūpamacitto puggalo.
an3.25:1.4	Katamo ca, bhikkhave, arukūpamacitto puggalo?
an3.25:1.5	Idha, bhikkhave, ekacco puggalo kodhano hoti upāyāsabahulo
an3.25:1.6	appampi vutto samāno abhisajjati kuppati byāpajjati patitthīyati kopañca dosañca appaccayañca pātukaroti.
an3.25:1.7	Seyyathāpi, bhikkhave, duṭṭhāruko kaṭṭhena vā kaṭhalāya vā ghaṭṭito bhiyyoso mattāya āsavaṁ deti;
an3.25:1.8	evamevaṁ kho, bhikkhave, idhekacco puggalo kodhano hoti upāyāsabahulo
an3.25:1.9	appampi vutto samāno abhisajjati kuppati byāpajjati patitthīyati kopañca dosañca appaccayañca pātukaroti.
an3.25:1.10	Ayaṁ vuccati, bhikkhave, arukūpamacitto puggalo.
an3.25:2.1	Katamo ca, bhikkhave, vijjūpamacitto puggalo?
an3.25:2.2	Idha, bhikkhave, ekacco puggalo ‘idaṁ dukkhan’ti yathābhūtaṁ pajānāti, ‘ayaṁ dukkhasamudayo’ti yathābhūtaṁ pajānāti, ‘ayaṁ dukkhanirodho’ti yathābhūtaṁ pajānāti, ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.25:2.3	Seyyathāpi, bhikkhave, cakkhumā puriso rattandhakāratimisāyaṁ vijjantarikāya rūpāni passeyya;
an3.25:2.4	evamevaṁ kho, bhikkhave, idhekacco puggalo ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.25:2.5	Ayaṁ vuccati, bhikkhave, vijjūpamacitto puggalo.
an3.25:3.1	Katamo ca, bhikkhave, vajirūpamacitto puggalo?
an3.25:3.2	Idha, bhikkhave, ekacco puggalo āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.25:3.3	Seyyathāpi, bhikkhave, vajirassa natthi kiñci abhejjaṁ maṇi vā pāsāṇo vā;
an3.25:3.4	evamevaṁ kho, bhikkhave, idhekacco puggalo āsavānaṁ khayā …pe… upasampajja viharati.
an3.25:3.5	Ayaṁ vuccati, bhikkhave, vajirūpamacitto puggalo.
an3.25:3.6	Ime kho, bhikkhave, tayo puggalā santo saṁvijjamānā lokasmin”ti.
an3.25:3.7	Pañcamaṁ.
an3.26:0.1	Aṅguttara Nikāya 3.26
an3.26:0.2	3. Puggalavagga
an3.26:0.3	Sevitabbasutta
an3.26:1.1	“Tayome, bhikkhave, puggalā santo saṁvijjamānā lokasmiṁ.
an3.26:1.2	Katame tayo?
an3.26:1.3	Atthi, bhikkhave, puggalo na sevitabbo na bhajitabbo na payirupāsitabbo.
an3.26:1.4	Atthi, bhikkhave, puggalo sevitabbo bhajitabbo payirupāsitabbo.
an3.26:1.5	Atthi, bhikkhave, puggalo sakkatvā garuṁ katvā sevitabbo bhajitabbo payirupāsitabbo.
an3.26:1.6	Katamo ca, bhikkhave, puggalo na sevitabbo na bhajitabbo na payirupāsitabbo?
an3.26:1.7	Idha, bhikkhave, ekacco puggalo hīno hoti sīlena samādhinā paññāya.
an3.26:1.8	Evarūpo, bhikkhave, puggalo na sevitabbo na bhajitabbo na payirupāsitabbo aññatra anuddayā aññatra anukampā.
an3.26:2.1	Katamo ca, bhikkhave, puggalo sevitabbo bhajitabbo payirupāsitabbo?
an3.26:2.2	Idha, bhikkhave, ekacco puggalo sadiso hoti sīlena samādhinā paññāya.
an3.26:2.3	Evarūpo, bhikkhave, puggalo sevitabbo bhajitabbo payirupāsitabbo.
an3.26:2.4	Taṁ kissa hetu?
an3.26:2.5	Sīlasāmaññagatānaṁ sataṁ sīlakathā ca no bhavissati, sā ca no pavattinī bhavissati, sā ca no phāsu bhavissati.
an3.26:2.6	Samādhisāmaññagatānaṁ sataṁ samādhikathā ca no bhavissati, sā ca no pavattinī bhavissati, sā ca no phāsu bhavissati.
an3.26:2.7	Paññāsāmaññagatānaṁ sataṁ paññākathā ca no bhavissati, sā ca no pavattinī bhavissati, sā ca no phāsu bhavissatīti.
an3.26:2.8	Tasmā evarūpo puggalo sevitabbo bhajitabbo payirupāsitabbo.
an3.26:3.1	Katamo ca, bhikkhave, puggalo sakkatvā garuṁ katvā sevitabbo bhajitabbo payirupāsitabbo?
an3.26:3.2	Idha, bhikkhave, ekacco puggalo adhiko hoti sīlena samādhinā paññāya.
an3.26:3.3	Evarūpo, bhikkhave, puggalo sakkatvā garuṁ katvā sevitabbo bhajitabbo payirupāsitabbo.
an3.26:3.4	Taṁ kissa hetu?
an3.26:3.5	Iti aparipūraṁ vā sīlakkhandhaṁ paripūressāmi, paripūraṁ vā sīlakkhandhaṁ tattha tattha paññāya anuggahessāmi;
an3.26:3.6	aparipūraṁ vā samādhikkhandhaṁ paripūressāmi, paripūraṁ vā samādhikkhandhaṁ tattha tattha paññāya anuggahessāmi;
an3.26:3.7	aparipūraṁ vā paññākkhandhaṁ paripūressāmi, paripūraṁ vā paññākkhandhaṁ tattha tattha paññāya anuggahessāmīti.
an3.26:3.8	Tasmā evarūpo puggalo sakkatvā garuṁ katvā sevitabbo bhajitabbo payirupāsitabbo.
an3.26:3.9	Ime kho, bhikkhave, tayo puggalā santo saṁvijjamānā lokasminti.
an3.26:4.1	Nihīyati puriso nihīnasevī,
an3.26:4.2	Na ca hāyetha kadāci tulyasevī;
an3.26:4.3	Seṭṭhamupanamaṁ udeti khippaṁ,
an3.26:4.4	Tasmā attano uttariṁ bhajethā”ti.
an3.26:4.5	Chaṭṭhaṁ.
an3.27:0.1	Aṅguttara Nikāya 3.27
an3.27:0.2	3. Puggalavagga
an3.27:0.3	Jigucchitabbasutta
an3.27:1.1	“Tayome, bhikkhave, puggalā santo saṁvijjamānā lokasmiṁ.
an3.27:1.2	Katame tayo?
an3.27:1.3	Atthi, bhikkhave, puggalo jigucchitabbo na sevitabbo na bhajitabbo na payirupāsitabbo.
an3.27:1.4	Atthi, bhikkhave, puggalo ajjhupekkhitabbo na sevitabbo na bhajitabbo na payirupāsitabbo.
an3.27:1.5	Atthi, bhikkhave, puggalo sevitabbo bhajitabbo payirupāsitabbo.
an3.27:1.6	Katamo ca, bhikkhave, puggalo jigucchitabbo na sevitabbo na bhajitabbo na payirupāsitabbo?
an3.27:1.7	Idha, bhikkhave, ekacco puggalo dussīlo hoti pāpadhammo asuci saṅkassarasamācāro paṭicchannakammanto, assamaṇo samaṇapaṭiñño, abrahmacārī brahmacāripaṭiñño, antopūti avassuto kasambujāto.
an3.27:1.8	Evarūpo, bhikkhave, puggalo jigucchitabbo na sevitabbo na bhajitabbo na payirupāsitabbo.
an3.27:1.9	Taṁ kissa hetu?
an3.27:1.10	Kiñcāpi, bhikkhave, evarūpassa puggalassa na diṭṭhānugatiṁ āpajjati, atha kho naṁ pāpako kittisaddo abbhuggacchati:
an3.27:1.11	‘pāpamitto purisapuggalo pāpasahāyo pāpasampavaṅko’ti.
an3.27:1.12	Seyyathāpi, bhikkhave, ahi gūthagato kiñcāpi na daṁsati, atha kho naṁ makkheti;
an3.27:1.13	evamevaṁ kho, bhikkhave, kiñcāpi evarūpassa puggalassa na diṭṭhānugatiṁ āpajjati, atha kho naṁ pāpako kittisaddo abbhuggacchati:
an3.27:1.14	‘pāpamitto purisapuggalo pāpasahāyo pāpasampavaṅko’ti.
an3.27:1.15	Tasmā evarūpo puggalo jigucchitabbo na sevitabbo na bhajitabbo na payirupāsitabbo.
an3.27:2.1	Katamo ca, bhikkhave, puggalo ajjhupekkhitabbo na sevitabbo na bhajitabbo na payirupāsitabbo?
an3.27:2.2	Idha, bhikkhave, ekacco puggalo kodhano hoti upāyāsabahulo,
an3.27:2.3	appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti.
an3.27:2.4	Seyyathāpi, bhikkhave, duṭṭhāruko kaṭṭhena vā kaṭhalāya vā ghaṭṭito bhiyyoso mattāya āsavaṁ deti;
an3.27:2.5	evamevaṁ kho, bhikkhave …pe…
an3.27:2.6	seyyathāpi, bhikkhave, tindukālātaṁ kaṭṭhena vā kaṭhalāya vā ghaṭṭitaṁ bhiyyoso mattāya cicciṭāyati ciṭiciṭāyati;
an3.27:2.7	evamevaṁ kho, bhikkhave …pe…
an3.27:2.8	seyyathāpi, bhikkhave, gūthakūpo kaṭṭhena vā kaṭhalāya vā ghaṭṭito bhiyyoso mattāya duggandho hoti;
an3.27:2.9	evamevaṁ kho, bhikkhave, idhekacco puggalo kodhano hoti upāyāsabahulo,
an3.27:2.10	appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti.
an3.27:2.11	Evarūpo, bhikkhave, puggalo ajjhupekkhitabbo na sevitabbo na bhajitabbo na payirupāsitabbo.
an3.27:2.12	Taṁ kissa hetu?
an3.27:2.13	Akkoseyyapi maṁ paribhāseyyapi maṁ anatthampi maṁ kareyyāti.
an3.27:2.14	Tasmā evarūpo puggalo ajjhupekkhitabbo na sevitabbo na bhajitabbo na payirupāsitabbo.
an3.27:3.1	Katamo ca, bhikkhave, puggalo sevitabbo bhajitabbo payirupāsitabbo?
an3.27:3.2	Idha, bhikkhave, ekacco puggalo sīlavā hoti kalyāṇadhammo.
an3.27:3.3	Evarūpo, bhikkhave, puggalo sevitabbo bhajitabbo payirupāsitabbo.
an3.27:3.4	Taṁ kissa hetu?
an3.27:3.5	Kiñcāpi, bhikkhave, evarūpassa puggalassa na diṭṭhānugatiṁ āpajjati, atha kho naṁ kalyāṇo kittisaddo abbhuggacchati:
an3.27:3.6	‘kalyāṇamitto purisapuggalo kalyāṇasahāyo kalyāṇasampavaṅko’ti.
an3.27:3.7	Tasmā evarūpo puggalo sevitabbo bhajitabbo payirupāsitabbo.
an3.27:3.8	Ime kho, bhikkhave, tayo puggalā santo saṁvijjamānā lokasminti.
an3.27:4.1	Nihīyati puriso nihīnasevī,
an3.27:4.2	Na ca hāyetha kadāci tulyasevī;
an3.27:4.3	Seṭṭhamupanamaṁ udeti khippaṁ,
an3.27:4.4	Tasmā attano uttariṁ bhajethā”ti.
an3.27:4.5	Sattamaṁ.
an3.28:0.1	Aṅguttara Nikāya 3.28
an3.28:0.2	3. Puggalavagga
an3.28:0.3	Gūthabhāṇīsutta
an3.28:1.1	“Tayome, bhikkhave, puggalā santo saṁvijjamānā lokasmiṁ.
an3.28:1.2	Katame tayo?
an3.28:1.3	Gūthabhāṇī, pupphabhāṇī, madhubhāṇī.
an3.28:1.4	Katamo ca, bhikkhave, puggalo gūthabhāṇī?
an3.28:1.5	Idha, bhikkhave, ekacco puggalo sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho: ‘ehambho purisa, yaṁ jānāsi taṁ vadehī’ti. So ajānaṁ vā āha: ‘jānāmī’ti, jānaṁ vā āha: ‘na jānāmī’ti, apassaṁ vā āha: ‘passāmī’ti, passaṁ vā āha: ‘na passāmī’ti; iti attahetu vā parahetu vā āmisakiñcikkhahetu vā sampajānamusā bhāsitā hoti.
an3.28:1.6	Ayaṁ vuccati, bhikkhave, puggalo gūthabhāṇī.
an3.28:2.1	Katamo ca, bhikkhave, puggalo pupphabhāṇī?
an3.28:2.2	Idha, bhikkhave, ekacco puggalo sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho: ‘ehambho purisa, yaṁ pajānāsi taṁ vadehī’ti, so ajānaṁ vā āha: ‘na jānāmī’ti, jānaṁ vā āha: ‘jānāmī’ti, apassaṁ vā āha: ‘na passāmī’ti, passaṁ vā āha: ‘passāmī’ti; iti attahetu vā parahetu vā āmisakiñcikkhahetu vā na sampajānamusā bhāsitā hoti.
an3.28:2.3	Ayaṁ vuccati, bhikkhave, puggalo pupphabhāṇī.
an3.28:3.1	Katamo ca, bhikkhave, puggalo madhubhāṇī?
an3.28:3.2	Idha, bhikkhave, ekacco puggalo pharusaṁ vācaṁ pahāya pharusāya vācāya paṭivirato hoti;
an3.28:3.3	yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṁ vācaṁ bhāsitā hoti.
an3.28:3.4	Ayaṁ vuccati, bhikkhave, puggalo madhubhāṇī.
an3.28:3.5	Ime kho, bhikkhave, tayo puggalā santo saṁvijjamānā lokasmin”ti.
an3.28:3.6	Aṭṭhamaṁ.
an3.29:0.1	Aṅguttara Nikāya 3.29
an3.29:0.2	3. Puggalavagga
an3.29:0.3	Andhasutta
an3.29:1.1	“Tayome, bhikkhave, puggalā santo saṁvijjamānā lokasmiṁ.
an3.29:1.2	Katame tayo?
an3.29:1.3	Andho, ekacakkhu, dvicakkhu.
an3.29:1.4	Katamo ca, bhikkhave, puggalo andho?
an3.29:1.5	Idha, bhikkhave, ekaccassa puggalassa tathārūpaṁ cakkhu na hoti yathārūpena cakkhunā anadhigataṁ vā bhogaṁ adhigaccheyya adhigataṁ vā bhogaṁ phātiṁ kareyya;
an3.29:1.6	tathārūpampissa cakkhu na hoti yathārūpena cakkhunā kusalākusale dhamme jāneyya, sāvajjānavajje dhamme jāneyya, hīnappaṇīte dhamme jāneyya, kaṇhasukkasappaṭibhāge dhamme jāneyya.
an3.29:1.7	Ayaṁ vuccati, bhikkhave, puggalo andho.
an3.29:2.1	Katamo ca, bhikkhave, puggalo ekacakkhu?
an3.29:2.2	Idha, bhikkhave, ekaccassa puggalassa tathārūpaṁ cakkhu hoti yathārūpena cakkhunā anadhigataṁ vā bhogaṁ adhigaccheyya adhigataṁ vā bhogaṁ phātiṁ kareyya;
an3.29:2.3	tathārūpaṁ panassa cakkhu na hoti yathārūpena cakkhunā kusalākusale dhamme jāneyya, sāvajjānavajje dhamme jāneyya, hīnappaṇīte dhamme jāneyya, kaṇhasukkasappaṭibhāge dhamme jāneyya.
an3.29:2.4	Ayaṁ vuccati, bhikkhave, puggalo ekacakkhu.
an3.29:3.1	Katamo ca, bhikkhave, puggalo dvicakkhu?
an3.29:3.2	Idha, bhikkhave, ekaccassa puggalassa tathārūpaṁ cakkhu hoti yathārūpena cakkhunā anadhigataṁ vā bhogaṁ adhigaccheyya, adhigataṁ vā bhogaṁ phātiṁ kareyya;
an3.29:3.3	tathārūpampissa cakkhu hoti yathārūpena cakkhunā kusalākusale dhamme jāneyya;
an3.29:3.4	sāvajjānavajje dhamme jāneyya, hīnappaṇīte dhamme jāneyya, kaṇhasukkasappaṭibhāge dhamme jāneyya.
an3.29:3.5	Ayaṁ vuccati, bhikkhave, puggalo dvicakkhu.
an3.29:3.6	Ime kho, bhikkhave, tayo puggalā santo saṁvijjamānā lokasminti.
an3.29:4.1	Na ceva bhogā tathārūpā,
an3.29:4.2	na ca puññāni kubbati;
an3.29:4.3	Ubhayattha kaliggāho,
an3.29:4.4	andhassa hatacakkhuno.
an3.29:5.1	Athāparāyaṁ akkhāto,
an3.29:5.2	Ekacakkhu ca puggalo;
an3.29:5.3	Dhammādhammena saṭhoso,
an3.29:5.4	Bhogāni pariyesati.
an3.29:6.1	Theyyena kūṭakammena,
an3.29:6.2	musāvādena cūbhayaṁ;
an3.29:6.3	Kusalo hoti saṅghātuṁ,
an3.29:6.4	kāmabhogī ca mānavo;
an3.29:6.5	Ito so nirayaṁ gantvā,
an3.29:6.6	ekacakkhu vihaññati.
an3.29:7.1	Dvicakkhu pana akkhāto,
an3.29:7.2	seṭṭho purisapuggalo;
an3.29:7.3	Dhammaladdhehi bhogehi,
an3.29:7.4	uṭṭhānādhigataṁ dhanaṁ.
an3.29:8.1	Dadāti seṭṭhasaṅkappo,
an3.29:8.2	abyaggamānaso naro;
an3.29:8.3	Upeti bhaddakaṁ ṭhānaṁ,
an3.29:8.4	yattha gantvā na socati.
an3.29:9.1	Andhañca ekacakkhuñca,
an3.29:9.2	ārakā parivajjaye;
an3.29:9.3	Dvicakkhuṁ pana sevetha,
an3.29:9.4	seṭṭhaṁ purisapuggalan”ti.
an3.29:9.5	Navamaṁ.
an3.30:0.1	Aṅguttara Nikāya 3.30
an3.30:0.2	3. Puggalavagga
an3.30:0.3	Avakujjasutta
an3.30:1.1	“Tayome, bhikkhave, puggalā santo saṁvijjamānā lokasmiṁ.
an3.30:1.2	Katame tayo?
an3.30:1.3	Avakujjapañño puggalo, ucchaṅgapañño puggalo, puthupañño puggalo.
an3.30:1.4	Katamo ca, bhikkhave, avakujjapañño puggalo?
an3.30:1.5	Idha, bhikkhave, ekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavanāya.
an3.30:1.6	Tassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāsenti.
an3.30:1.7	So tasmiṁ āsane nisinno tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti;
an3.30:1.8	vuṭṭhitopi tamhā āsanā tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti.
an3.30:1.9	Seyyathāpi, bhikkhave, kumbho nikujjo tatra udakaṁ āsittaṁ vivaṭṭati, no saṇṭhāti;
an3.30:1.10	evamevaṁ kho, bhikkhave, idhekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavanāya.
an3.30:1.11	Tassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāsenti.
an3.30:1.12	So tasmiṁ āsane nisinno tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti;
an3.30:1.13	vuṭṭhitopi tamhā āsanā tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti.
an3.30:1.14	Ayaṁ vuccati, bhikkhave, avakujjapañño puggalo.
an3.30:2.1	Katamo ca, bhikkhave, ucchaṅgapañño puggalo?
an3.30:2.2	Idha, bhikkhave, ekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavanāya.
an3.30:2.3	Tassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāsenti.
an3.30:2.4	So tasmiṁ āsane nisinno tassā kathāya ādimpi manasi karoti, majjhampi manasi karoti, pariyosānampi manasi karoti;
an3.30:2.5	vuṭṭhito ca kho tamhā āsanā tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti.
an3.30:2.6	Seyyathāpi, bhikkhave, purisassa ucchaṅge nānākhajjakāni ākiṇṇāni—
an3.30:2.7	tilā taṇḍulā modakā badarā.
an3.30:2.8	So tamhā āsanā vuṭṭhahanto satisammosā pakireyya.
an3.30:2.9	Evamevaṁ kho, bhikkhave, idhekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavanāya.
an3.30:2.10	Tassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāsenti.
an3.30:2.11	So tasmiṁ āsane nisinno tassā kathāya ādimpi manasi karoti, majjhampi manasi karoti, pariyosānampi manasi karoti;
an3.30:2.12	vuṭṭhito ca kho tamhā āsanā tassā kathāya neva ādiṁ manasi karoti, na majjhaṁ manasi karoti, na pariyosānaṁ manasi karoti.
an3.30:2.13	Ayaṁ vuccati, bhikkhave, ucchaṅgapañño puggalo.
an3.30:3.1	Katamo ca, bhikkhave, puthupañño puggalo?
an3.30:3.2	Idha, bhikkhave, ekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavanāya.
an3.30:3.3	Tassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāsenti.
an3.30:3.4	So tasmiṁ āsane nisinno tassā kathāya ādimpi manasi karoti, majjhampi manasi karoti, pariyosānampi manasi karoti;
an3.30:3.5	vuṭṭhitopi tamhā āsanā tassā kathāya ādimpi manasi karoti, majjhampi manasi karoti, pariyosānampi manasi karoti.
an3.30:3.6	Seyyathāpi, bhikkhave, kumbho ukkujjo tatra udakaṁ āsittaṁ saṇṭhāti no vivaṭṭati;
an3.30:3.7	evamevaṁ kho, bhikkhave, idhekacco puggalo ārāmaṁ gantā hoti abhikkhaṇaṁ bhikkhūnaṁ santike dhammassavanāya.
an3.30:3.8	Tassa bhikkhū dhammaṁ desenti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāsenti.
an3.30:3.9	So tasmiṁ āsane nisinno tassā kathāya ādimpi manasi karoti, majjhampi manasi karoti, pariyosānampi manasi karoti;
an3.30:3.10	vuṭṭhitopi tamhā āsanā tassā kathāya ādimpi manasi karoti, majjhampi manasi karoti, pariyosānampi manasi karoti.
an3.30:3.11	Ayaṁ vuccati, bhikkhave, puthupañño puggalo.
an3.30:3.12	Ime kho, bhikkhave, tayo puggalā santo saṁvijjamānā lokasminti.
an3.30:4.1	Avakujjapañño puriso,
an3.30:4.2	dummedho avicakkhaṇo;
an3.30:4.3	Abhikkhaṇampi ce hoti,
an3.30:4.4	gantā bhikkhūna santike.
an3.30:5.1	Ādiṁ kathāya majjhañca,
an3.30:5.2	pariyosānañca tādiso;
an3.30:5.3	Uggahetuṁ na sakkoti,
an3.30:5.4	paññā hissa na vijjati.
an3.30:6.1	Ucchaṅgapañño puriso,
an3.30:6.2	seyyo etena vuccati;
an3.30:6.3	Abhikkhaṇampi ce hoti,
an3.30:6.4	gantā bhikkhūna santike.
an3.30:7.1	Ādiṁ kathāya majjhañca,
an3.30:7.2	pariyosānañca tādiso;
an3.30:7.3	Nisinno āsane tasmiṁ,
an3.30:7.4	uggahetvāna byañjanaṁ;
an3.30:7.5	Vuṭṭhito nappajānāti,
an3.30:7.6	gahitaṁ hissa mussati.
an3.30:8.1	Puthupañño ca puriso,
an3.30:8.2	seyyo etehi vuccati;
an3.30:8.3	Abhikkhaṇampi ce hoti,
an3.30:8.4	gantā bhikkhūna santike.
an3.30:9.1	Ādiṁ kathāya majjhañca,
an3.30:9.2	pariyosānañca tādiso;
an3.30:9.3	Nisinno āsane tasmiṁ,
an3.30:9.4	uggahetvāna byañjanaṁ.
an3.30:10.1	Dhāreti seṭṭhasaṅkappo,
an3.30:10.2	Abyaggamānaso naro;
an3.30:10.3	Dhammānudhammappaṭipanno,
an3.30:10.4	Dukkhassantakaro siyā”ti.
an3.30:10.5	Dasamaṁ.
an3.30:10.6	Puggalavaggo tatiyo.
an3.30:11.0	Tassuddānaṁ
an3.30:11.1	Samiddha gilāna saṅkhārā,
an3.30:11.2	bahukārā vajirena ca;
an3.30:11.3	Sevi jiguccha gūthabhāṇī,
an3.30:11.4	andho ca avakujjatāti.
an3.31:0.1	Aṅguttara Nikāya 3.31
an3.31:0.2	4. Devadūtavagga
an3.31:0.3	Sabrahmakasutta
an3.31:1.1	“Sabrahmakāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
an3.31:1.2	Sapubbācariyakāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
an3.31:1.3	Sāhuneyyāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
an3.31:1.4	‘Brahmā’ti, bhikkhave, mātāpitūnaṁ etaṁ adhivacanaṁ.
an3.31:1.5	‘Pubbācariyā’ti, bhikkhave, mātāpitūnaṁ etaṁ adhivacanaṁ.
an3.31:1.6	‘Āhuneyyā’ti, bhikkhave, mātāpitūnaṁ etaṁ adhivacanaṁ.
an3.31:1.7	Taṁ kissa hetu?
an3.31:1.8	Bahukārā, bhikkhave, mātāpitaro puttānaṁ, āpādakā posakā, imassa lokassa dassetāroti.
an3.31:2.1	Brahmāti mātāpitaro,
an3.31:2.2	pubbācariyāti vuccare;
an3.31:2.3	Āhuneyyā ca puttānaṁ,
an3.31:2.4	pajāya anukampakā.
an3.31:3.1	Tasmā hi ne namasseyya,
an3.31:3.2	sakkareyya ca paṇḍito;
an3.31:3.3	Annena atha pānena,
an3.31:3.4	vatthena sayanena ca;
an3.31:3.5	Ucchādanena nhāpanena,
an3.31:3.6	pādānaṁ dhovanena ca.
an3.31:4.1	Tāya naṁ pāricariyāya,
an3.31:4.2	mātāpitūsu paṇḍitā;
an3.31:4.3	Idheva naṁ pasaṁsanti,
an3.31:4.4	pecca sagge pamodatī”ti.
an3.31:4.5	Paṭhamaṁ.
an3.32:0.1	Aṅguttara Nikāya 3.32
an3.32:0.2	4. Devadūtavagga
an3.32:0.3	Ānandasutta
an3.32:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an3.32:2.1	“Siyā nu kho, bhante, bhikkhuno tathārūpo samādhipaṭilābho yathā imasmiñca saviññāṇake kāye ahaṅkāramamaṅkāramānānusayā nāssu, bahiddhā ca sabbanimittesu ahaṅkāramamaṅkāramānānusayā nāssu;
an3.32:2.2	yañca cetovimuttiṁ paññāvimuttiṁ upasampajja viharato ahaṅkāramamaṅkāramānānusayā na honti tañca cetovimuttiṁ paññāvimuttiṁ upasampajja vihareyyā”ti?
an3.32:2.3	“Siyā, ānanda, bhikkhuno tathārūpo samādhipaṭilābho yathā imasmiñca saviññāṇake kāye ahaṅkāramamaṅkāramānānusayā nāssu, bahiddhā ca sabbanimittesu ahaṅkāramamaṅkāramānānusayā nāssu;
an3.32:2.4	yañca cetovimuttiṁ paññāvimuttiṁ upasampajja viharato ahaṅkāramamaṅkāramānānusayā na honti tañca cetovimuttiṁ paññāvimuttiṁ upasampajja vihareyyā”ti.
an3.32:3.1	“Yathā kathaṁ pana, bhante, siyā bhikkhuno tathārūpo samādhipaṭilābho yathā imasmiñca saviññāṇake kāye ahaṅkāramamaṅkāramānānusayā nāssu, bahiddhā ca sabbanimittesu ahaṅkāramamaṅkāramānānusayā nāssu;
an3.32:3.2	yañca cetovimuttiṁ paññāvimuttiṁ upasampajja viharato ahaṅkāramamaṅkāramānānusayā na honti tañca cetovimuttiṁ paññāvimuttiṁ upasampajja vihareyyā”ti?
an3.32:4.1	“Idhānanda, bhikkhuno evaṁ hoti:
an3.32:4.2	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an3.32:4.3	Evaṁ kho, ānanda, siyā bhikkhuno tathārūpo samādhipaṭilābho yathā imasmiñca saviññāṇake kāye ahaṅkāramamaṅkāramānānusayā nāssu, bahiddhā ca sabbanimittesu ahaṅkāramamaṅkāramānānusayā nāssu;
an3.32:4.4	yañca cetovimuttiṁ paññāvimuttiṁ upasampajja viharato ahaṅkāramamaṅkāramānānusayā na honti tañca cetovimuttiṁ paññāvimuttiṁ upasampajja vihareyyāti.
an3.32:5.1	Idañca pana metaṁ, ānanda, sandhāya bhāsitaṁ pārāyane puṇṇakapañhe:
an3.32:6.1	‘Saṅkhāya lokasmiṁ paroparāni,
an3.32:6.2	Yassiñjitaṁ natthi kuhiñci loke;
an3.32:6.3	Santo vidhūmo anīgho nirāso,
an3.32:6.4	Atāri so jātijaranti brūmī’”ti.
an3.32:6.5	Dutiyaṁ.
an3.33:0.1	Aṅguttara Nikāya 3.33
an3.33:0.2	4. Devadūtavagga
an3.33:0.3	Sāriputtasutta
an3.33:1.1	Atha kho āyasmā sāriputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ sāriputtaṁ bhagavā etadavoca:
an3.33:1.2	“saṅkhittenapi kho ahaṁ, sāriputta, dhammaṁ deseyyaṁ;
an3.33:1.3	vitthārenapi kho ahaṁ, sāriputta, dhammaṁ deseyyaṁ;
an3.33:1.4	saṅkhittavitthārenapi kho ahaṁ, sāriputta, dhammaṁ deseyyaṁ;
an3.33:1.5	aññātāro ca dullabhā”ti.
an3.33:1.6	“Etassa, bhagavā, kālo, etassa, sugata, kālo
an3.33:1.7	yaṁ bhagavā saṅkhittenapi dhammaṁ deseyya, vitthārenapi dhammaṁ deseyya, saṅkhittavitthārenapi dhammaṁ deseyya.
an3.33:1.8	Bhavissanti dhammassa aññātāro”ti.
an3.33:2.1	“Tasmātiha, sāriputta, evaṁ sikkhitabbaṁ:
an3.33:2.2	‘imasmiñca saviññāṇake kāye ahaṅkāramamaṅkāramānānusayā na bhavissanti, bahiddhā ca sabbanimittesu ahaṅkāramamaṅkāramānānusayā na bhavissanti, yañca cetovimuttiṁ paññāvimuttiṁ upasampajja viharato ahaṅkāramamaṅkāramānānusayā na honti tañca cetovimuttiṁ paññāvimuttiṁ upasampajja viharissāmā’ti.
an3.33:2.3	Evañhi kho, sāriputta, sikkhitabbaṁ.
an3.33:3.1	Yato ca kho, sāriputta, bhikkhuno imasmiñca saviññāṇake kāye ahaṅkāramamaṅkāramānānusayā na honti, bahiddhā ca sabbanimittesu ahaṅkāramamaṅkāramānānusayā na honti, yañca cetovimuttiṁ paññāvimuttiṁ upasampajja viharato ahaṅkāramamaṅkāramānānusayā na honti tañca cetovimuttiṁ paññāvimuttiṁ upasampajja viharati;
an3.33:3.2	ayaṁ vuccati, sāriputta:
an3.33:3.3	‘bhikkhu acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassa’.
an3.33:3.4	Idañca pana metaṁ, sāriputta, sandhāya bhāsitaṁ pārāyane udayapañhe:
an3.33:4.1	‘Pahānaṁ kāmasaññānaṁ,
an3.33:4.2	domanassāna cūbhayaṁ;
an3.33:4.3	Thinassa ca panūdanaṁ,
an3.33:4.4	kukkuccānaṁ nivāraṇaṁ.
an3.33:5.1	Upekkhāsatisaṁsuddhaṁ,
an3.33:5.2	dhammatakkapurejavaṁ;
an3.33:5.3	Aññāvimokkhaṁ pabrūmi,
an3.33:5.4	avijjāya pabhedanan’”ti.
an3.33:5.5	Tatiyaṁ.
an3.34:0.1	Aṅguttara Nikāya 3.34
an3.34:0.2	4. Devadūtavagga
an3.34:0.3	Nidānasutta
an3.34:1.1	“Tīṇimāni, bhikkhave, nidānāni kammānaṁ samudayāya.
an3.34:1.2	Katamāni tīṇi?
an3.34:1.3	Lobho nidānaṁ kammānaṁ samudayāya, doso nidānaṁ kammānaṁ samudayāya, moho nidānaṁ kammānaṁ samudayāya.
an3.34:2.1	Yaṁ, bhikkhave, lobhapakataṁ kammaṁ lobhajaṁ lobhanidānaṁ lobhasamudayaṁ, yatthassa attabhāvo nibbattati tattha taṁ kammaṁ vipaccati.
an3.34:2.2	Yattha taṁ kammaṁ vipaccati tattha tassa kammassa vipākaṁ paṭisaṁvedeti, diṭṭhe vā dhamme upapajja vā apare vā pariyāye.
an3.34:3.1	Yaṁ, bhikkhave, dosapakataṁ kammaṁ dosajaṁ dosanidānaṁ dosasamudayaṁ, yatthassa attabhāvo nibbattati tattha taṁ kammaṁ vipaccati.
an3.34:3.2	Yattha taṁ kammaṁ vipaccati tattha tassa kammassa vipākaṁ paṭisaṁvedeti, diṭṭhe vā dhamme upapajja vā apare vā pariyāye.
an3.34:4.1	Yaṁ, bhikkhave, mohapakataṁ kammaṁ mohajaṁ mohanidānaṁ mohasamudayaṁ, yatthassa attabhāvo nibbattati tattha taṁ kammaṁ vipaccati.
an3.34:4.2	Yattha taṁ kammaṁ vipaccati tattha tassa kammassa vipākaṁ paṭisaṁvedeti, diṭṭhe vā dhamme upapajja vā apare vā pariyāye.
an3.34:5.1	Seyyathāpi, bhikkhave, bījāni akhaṇḍāni apūtīni avātātapahatāni sārādāni sukhasayitāni sukhette suparikammakatāya bhūmiyā nikkhittāni.
an3.34:5.2	Devo ca sammādhāraṁ anuppaveccheyya.
an3.34:5.3	Evassu tāni, bhikkhave, bījāni vuddhiṁ viruḷhiṁ vepullaṁ āpajjeyyuṁ.
an3.34:5.4	Evamevaṁ kho, bhikkhave, yaṁ lobhapakataṁ kammaṁ lobhajaṁ lobhanidānaṁ lobhasamudayaṁ, yatthassa attabhāvo nibbattati tattha taṁ kammaṁ vipaccati.
an3.34:5.5	Yattha taṁ kammaṁ vipaccati tattha tassa kammassa vipākaṁ paṭisaṁvedeti, diṭṭhe vā dhamme upapajja vā apare vā pariyāye.
an3.34:6.1	Yaṁ dosapakataṁ kammaṁ …pe…
an3.34:6.2	yaṁ mohapakataṁ kammaṁ mohajaṁ mohanidānaṁ mohasamudayaṁ, yatthassa attabhāvo nibbattati tattha taṁ kammaṁ vipaccati.
an3.34:6.3	Yattha taṁ kammaṁ vipaccati tattha tassa kammassa vipākaṁ paṭisaṁvedeti, diṭṭhe vā dhamme upapajja vā apare vā pariyāye.
an3.34:6.4	Imāni kho, bhikkhave, tīṇi nidānāni kammānaṁ samudayāya.
an3.34:7.1	Tīṇimāni, bhikkhave, nidānāni kammānaṁ samudayāya.
an3.34:7.2	Katamāni tīṇi?
an3.34:7.3	Alobho nidānaṁ kammānaṁ samudayāya, adoso nidānaṁ kammānaṁ samudayāya, amoho nidānaṁ kammānaṁ samudayāya.
an3.34:8.1	Yaṁ, bhikkhave, alobhapakataṁ kammaṁ alobhajaṁ alobhanidānaṁ alobhasamudayaṁ, lobhe vigate evaṁ taṁ kammaṁ pahīnaṁ hoti ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ.
an3.34:9.1	Yaṁ, bhikkhave, adosapakataṁ kammaṁ adosajaṁ adosanidānaṁ adosasamudayaṁ, dose vigate evaṁ taṁ kammaṁ pahīnaṁ hoti ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ.
an3.34:10.1	Yaṁ, bhikkhave, amohapakataṁ kammaṁ amohajaṁ amohanidānaṁ amohasamudayaṁ, mohe vigate evaṁ taṁ kammaṁ pahīnaṁ hoti ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ.
an3.34:11.1	Seyyathāpi, bhikkhave, bījāni akhaṇḍāni apūtīni avātātapahatāni sārādāni sukhasayitāni.
an3.34:11.2	Tāni puriso agginā ḍaheyya.
an3.34:11.3	Agginā ḍahitvā masiṁ kareyya.
an3.34:11.4	Masiṁ karitvā mahāvāte vā ophuṇeyya nadiyā vā sīghasotāya pavāheyya.
an3.34:11.5	Evassu tāni, bhikkhave, bījāni ucchinnamūlāni tālāvatthukatāni anabhāvaṅkatāni āyatiṁ anuppādadhammāni.
an3.34:11.6	Evamevaṁ kho, bhikkhave, yaṁ alobhapakataṁ kammaṁ alobhajaṁ alobhanidānaṁ alobhasamudayaṁ, lobhe vigate evaṁ taṁ kammaṁ pahīnaṁ hoti ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ.
an3.34:12.1	Yaṁ adosapakataṁ kammaṁ …pe…
an3.34:12.2	yaṁ amohapakataṁ kammaṁ amohajaṁ amohanidānaṁ amohasamudayaṁ, mohe vigate evaṁ taṁ kammaṁ pahīnaṁ hoti …pe…
an3.34:12.3	āyatiṁ anuppādadhammaṁ.
an3.34:12.4	Imāni kho, bhikkhave, tīṇi nidānāni kammānaṁ samudayāyāti.
an3.34:13.1	Lobhajaṁ dosajañceva,
an3.34:13.2	mohajañcāpaviddasu;
an3.34:13.3	Yaṁ tena pakataṁ kammaṁ,
an3.34:13.4	appaṁ vā yadi vā bahuṁ;
an3.34:13.5	Idheva taṁ vedaniyaṁ,
an3.34:13.6	vatthu aññaṁ na vijjati.
an3.34:14.1	Tasmā lobhañca dosañca,
an3.34:14.2	mohajañcāpi viddasu;
an3.34:14.3	Vijjaṁ uppādayaṁ bhikkhu,
an3.34:14.4	sabbā duggatiyo jahe”ti.
an3.34:14.5	Catutthaṁ.
an3.35:0.1	Aṅguttara Nikāya 3.35
an3.35:0.2	4. Devadūtavagga
an3.35:0.3	Hatthakasutta
an3.35:1.1	Evaṁ me sutaṁ—
an3.35:1.2	ekaṁ samayaṁ bhagavā āḷaviyaṁ viharati gomagge siṁsapāvane paṇṇasanthare.
an3.35:1.3	Atha kho hatthako āḷavako jaṅghāvihāraṁ anucaṅkamamāno anuvicaramāno addasa bhagavantaṁ gomagge siṁsapāvane paṇṇasanthare nisinnaṁ.
an3.35:1.4	Disvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho hatthako āḷavako bhagavantaṁ etadavoca:
an3.35:1.5	“kacci, bhante bhagavā, sukhamasayitthā”ti?
an3.35:1.6	“Evaṁ, kumāra, sukhamasayitthaṁ.
an3.35:1.7	Ye ca pana loke sukhaṁ senti, ahaṁ tesaṁ aññataro”ti.
an3.35:2.1	“Sītā, bhante, hemantikā ratti, antaraṭṭhako himapātasamayo, kharā gokaṇṭakahatā bhūmi, tanuko paṇṇasantharo, viraḷāni rukkhassa pattāni, sītāni kāsāyāni vatthāni, sīto ca verambho vāto vāyati.
an3.35:2.2	Atha ca pana bhagavā evamāha:
an3.35:2.3	‘evaṁ, kumāra, sukhamasayitthaṁ.
an3.35:2.4	Ye ca pana loke sukhaṁ senti, ahaṁ tesaṁ aññataro’”ti.
an3.35:3.1	“Tena hi, kumāra, taññevettha paṭipucchissāmi. Yathā te khameyya tathā naṁ byākareyyāsi.
an3.35:3.2	Taṁ kiṁ maññasi, kumāra, idhassa gahapatissa vā gahapatiputtassa vā kūṭāgāraṁ ullittāvalittaṁ nivātaṁ phusitaggaḷaṁ pihitavātapānaṁ.
an3.35:3.3	Tatrassa pallaṅko gonakatthato paṭikatthato paṭalikatthato kadalimigapavarapaccattharaṇo sauttaracchado ubhato lohitakūpadhāno;
an3.35:3.4	telappadīpo cettha jhāyeyya;
an3.35:3.5	catasso ca pajāpatiyo manāpāmanāpena paccupaṭṭhitā assu.
an3.35:3.6	Taṁ kiṁ maññasi, kumāra, sukhaṁ vā so sayeyya no vā?
an3.35:3.7	Kathaṁ vā te ettha hotī”ti?
an3.35:3.8	“Sukhaṁ so, bhante, sayeyya.
an3.35:3.9	Ye ca pana loke sukhaṁ senti, so tesaṁ aññataro”ti.
an3.35:4.1	“Taṁ kiṁ maññasi, kumāra,
an3.35:4.2	api nu tassa gahapatissa vā gahapatiputtassa vā uppajjeyyuṁ rāgajā pariḷāhā kāyikā vā cetasikā vā yehi so rāgajehi pariḷāhehi pariḍayhamāno dukkhaṁ sayeyyā”ti?
an3.35:4.3	“Evaṁ, bhante”ti.
an3.35:5.1	“Yehi kho so, kumāra, gahapati vā gahapatiputto vā rāgajehi pariḷāhehi pariḍayhamāno dukkhaṁ sayeyya, so rāgo tathāgatassa pahīno ucchinnamūlo tālāvatthukato anabhāvaṅkato āyatiṁ anuppādadhammo.
an3.35:5.2	Tasmāhaṁ sukhamasayitthaṁ.
an3.35:6.1	Taṁ kiṁ maññasi, kumāra,
an3.35:6.2	api nu tassa gahapatissa vā gahapatiputtassa vā uppajjeyyuṁ dosajā pariḷāhā …pe…
an3.35:6.3	mohajā pariḷāhā kāyikā vā cetasikā vā yehi so mohajehi pariḷāhehi pariḍayhamāno dukkhaṁ sayeyyā”ti?
an3.35:6.4	“Evaṁ, bhante”ti.
an3.35:7.1	“Ye hi kho so, kumāra, gahapati vā gahapatiputto vā mohajehi pariḷāhehi pariḍayhamāno dukkhaṁ sayeyya, so moho tathāgatassa pahīno ucchinnamūlo tālāvatthukato anabhāvaṅkato āyatiṁ anuppādadhammo.
an3.35:7.2	Tasmāhaṁ sukhamasayitthanti.
an3.35:8.1	Sabbadā ve sukhaṁ seti,
an3.35:8.2	brāhmaṇo parinibbuto;
an3.35:8.3	Yo na limpati kāmesu,
an3.35:8.4	sītibhūto nirūpadhi.
an3.35:9.1	Sabbā āsattiyo chetvā,
an3.35:9.2	vineyya hadaye daraṁ;
an3.35:9.3	Upasanto sukhaṁ seti,
an3.35:9.4	santiṁ pappuyya cetaso”ti.
an3.35:9.5	Pañcamaṁ.
an3.36:0.1	Aṅguttara Nikāya 3.36
an3.36:0.2	4. Devadūtavagga
an3.36:0.3	Devadūtasutta
an3.36:1.1	“Tīṇimāni, bhikkhave, devadūtāni.
an3.36:1.2	Katamāni tīṇi?
an3.36:1.3	Idha, bhikkhave, ekacco kāyena duccaritaṁ carati, vācāya duccaritaṁ carati, manasā duccaritaṁ carati.
an3.36:1.4	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an3.36:1.5	Tamenaṁ, bhikkhave, nirayapālā nānābāhāsu gahetvā yamassa rañño dassenti:
an3.36:1.6	‘ayaṁ, deva, puriso amatteyyo apetteyyo asāmañño abrahmañño, na kule jeṭṭhāpacāyī.
an3.36:1.7	Imassa devo daṇḍaṁ paṇetū’ti.
an3.36:2.1	Tamenaṁ, bhikkhave, yamo rājā paṭhamaṁ devadūtaṁ samanuyuñjati samanugāhati samanubhāsati:
an3.36:2.2	‘ambho, purisa, na tvaṁ addasa manussesu paṭhamaṁ devadūtaṁ pātubhūtan’ti?
an3.36:2.3	So evamāha:
an3.36:2.4	‘nāddasaṁ, bhante’ti.
an3.36:3.1	Tamenaṁ, bhikkhave, yamo rājā evamāha:
an3.36:3.2	‘ambho purisa, na tvaṁ addasa manussesu itthiṁ vā purisaṁ vā āsītikaṁ vā nāvutikaṁ vā vassasatikaṁ vā jātiyā jiṇṇaṁ gopānasivaṅkaṁ bhoggaṁ daṇḍaparāyaṇaṁ pavedhamānaṁ gacchantaṁ āturaṁ gatayobbanaṁ khaṇḍadantaṁ palitakesaṁ vilūnaṁ khallitasiraṁ valitaṁ tilakāhatagattan’ti?
an3.36:3.3	So evamāha:
an3.36:3.4	‘addasaṁ, bhante’ti.
an3.36:4.1	Tamenaṁ, bhikkhave, yamo rājā evamāha:
an3.36:4.2	‘ambho, purisa, tassa te viññussa sato mahallakassa na etadahosi—
an3.36:4.3	ahampi khomhi jarādhammo jaraṁ anatīto, handāhaṁ kalyāṇaṁ karomi, kāyena vācāya manasā’ti?
an3.36:4.4	So evamāha:
an3.36:4.5	‘nāsakkhissaṁ, bhante. Pamādassaṁ, bhante’ti.
an3.36:5.1	Tamenaṁ, bhikkhave, yamo rājā evamāha:
an3.36:5.2	‘ambho, purisa, pamādatāya na kalyāṇamakāsi kāyena vācāya manasā.
an3.36:5.3	Taggha tvaṁ, ambho purisa, tathā karissanti yathā taṁ pamattaṁ.
an3.36:5.4	Taṁ kho pana te etaṁ pāpakammaṁ neva mātarā kataṁ, na pitarā kataṁ, na bhātarā kataṁ, na bhaginiyā kataṁ, na mittāmaccehi kataṁ, na ñātisālohitehi kataṁ, na devatāhi kataṁ, na samaṇabrāhmaṇehi kataṁ;
an3.36:5.5	atha kho tayāvetaṁ pāpakammaṁ kataṁ, tvaññevetassa vipākaṁ paṭisaṁvedissasī’ti.
an3.36:6.1	Tamenaṁ, bhikkhave, yamo rājā paṭhamaṁ devadūtaṁ samanuyuñjitvā samanugāhitvā samanubhāsitvā, dutiyaṁ devadūtaṁ samanuyuñjati samanugāhati samanubhāsati:
an3.36:6.2	‘ambho purisa, na tvaṁ addasa manussesu dutiyaṁ devadūtaṁ pātubhūtan’ti?
an3.36:6.3	So evamāha:
an3.36:6.4	‘nāddasaṁ, bhante’ti.
an3.36:6.5	Tamenaṁ, bhikkhave, yamo rājā evamāha:
an3.36:6.6	‘ambho purisa, na tvaṁ addasa manussesu itthiṁ vā purisaṁ vā ābādhikaṁ dukkhitaṁ bāḷhagilānaṁ, sake muttakarīse palipannaṁ semānaṁ, aññehi vuṭṭhāpiyamānaṁ, aññehi saṁvesiyamānan’ti?
an3.36:6.7	So evamāha:
an3.36:6.8	‘addasaṁ, bhante’ti.
an3.36:7.1	Tamenaṁ, bhikkhave, yamo rājā evamāha:
an3.36:7.2	‘ambho purisa, tassa te viññussa sato mahallakassa na etadahosi:
an3.36:7.3	“ahampi khomhi byādhidhammo byādhiṁ anatīto, handāhaṁ kalyāṇaṁ karomi kāyena vācāya manasā”’ti?
an3.36:7.4	So evamāha:
an3.36:7.5	‘nāsakkhissaṁ, bhante. Pamādassaṁ, bhante’ti.
an3.36:8.1	Tamenaṁ, bhikkhave, yamo rājā evamāha:
an3.36:8.2	‘ambho purisa, pamādatāya na kalyāṇamakāsi kāyena vācāya manasā.
an3.36:8.3	Taggha tvaṁ, ambho purisa, tathā karissanti yathā taṁ pamattaṁ.
an3.36:8.4	Taṁ kho pana te etaṁ pāpakammaṁ neva mātarā kataṁ, na pitarā kataṁ, na bhātarā kataṁ, na bhaginiyā kataṁ, na mittāmaccehi kataṁ, na ñātisālohitehi kataṁ, na devatāhi kataṁ, na samaṇabrāhmaṇehi kataṁ;
an3.36:8.5	atha kho tayāvetaṁ pāpakammaṁ kataṁ. Tvaññevetassa vipākaṁ paṭisaṁvedissasī’ti.
an3.36:9.1	Tamenaṁ, bhikkhave, yamo rājā dutiyaṁ devadūtaṁ samanuyuñjitvā samanugāhitvā samanubhāsitvā, tatiyaṁ devadūtaṁ samanuyuñjati samanugāhati samanubhāsati:
an3.36:9.2	‘ambho purisa, na tvaṁ addasa manussesu tatiyaṁ devadūtaṁ pātubhūtan’ti?
an3.36:9.3	So evamāha:
an3.36:9.4	‘nāddasaṁ, bhante’ti.
an3.36:10.1	Tamenaṁ, bhikkhave, yamo rājā evamāha:
an3.36:10.2	‘ambho purisa, na tvaṁ addasa manussesu itthiṁ vā purisaṁ vā ekāhamataṁ vā dvīhamataṁ vā tīhamataṁ vā uddhumātakaṁ vinīlakaṁ vipubbakajātan’ti?
an3.36:10.3	So evamāha:
an3.36:10.4	‘addasaṁ, bhante’ti.
an3.36:11.1	Tamenaṁ, bhikkhave, yamo rājā evamāha:
an3.36:11.2	‘ambho purisa, tassa te viññussa sato mahallakassa na etadahosi—
an3.36:11.3	ahampi khomhi maraṇadhammo maraṇaṁ anatīto, handāhaṁ kalyāṇaṁ karomi kāyena vācāya manasā’ti?
an3.36:11.4	So evamāha:
an3.36:11.5	‘nāsakkhissaṁ, bhante. Pamādassaṁ, bhante’ti.
an3.36:12.1	Tamenaṁ, bhikkhave, yamo rājā evamāha:
an3.36:12.2	‘ambho purisa, pamādatāya na kalyāṇamakāsi kāyena vācāya manasā.
an3.36:12.3	Taggha tvaṁ, ambho purisa, tathā karissanti yathā taṁ pamattaṁ.
an3.36:12.4	Taṁ kho pana te etaṁ pāpakammaṁ neva mātarā kataṁ, na pitarā kataṁ, na bhātarā kataṁ, na bhaginiyā kataṁ, na mittāmaccehi kataṁ, na ñātisālohitehi kataṁ, na devatāhi kataṁ, na samaṇabrāhmaṇehi kataṁ;
an3.36:12.5	atha kho tayāvetaṁ pāpakammaṁ kataṁ. Tvaññevetassa vipākaṁ paṭisaṁvedissasī’”ti.
an3.36:13.1	Tamenaṁ, bhikkhave, yamo rājā tatiyaṁ devadūtaṁ samanuyuñjitvā samanugāhitvā samanubhāsitvā tuṇhī hoti.
an3.36:13.2	Tamenaṁ, bhikkhave, nirayapālā pañcavidhabandhanaṁ nāma kāraṇaṁ karonti.
an3.36:13.3	Tattaṁ ayokhilaṁ hatthe gamenti. Tattaṁ ayokhilaṁ dutiyasmiṁ hatthe gamenti. Tattaṁ ayokhilaṁ pāde gamenti. Tattaṁ ayokhilaṁ dutiyasmiṁ pāde gamenti. Tattaṁ ayokhilaṁ majjhe urasmiṁ gamenti.
an3.36:13.4	So tattha dukkhā tibbā kharā kaṭukā vedanā vediyati, na ca tāva kālaṁ karoti yāva na taṁ pāpakammaṁ byantīhoti.
an3.36:14.1	Tamenaṁ, bhikkhave, nirayapālā saṁvesetvā kudhārīhi tacchanti.
an3.36:14.2	So tattha dukkhā tibbā kharā kaṭukā vedanā vediyati, na ca tāva kālaṁ karoti yāva na taṁ pāpakammaṁ byantīhoti.
an3.36:15.1	Tamenaṁ, bhikkhave, nirayapālā uddhampādaṁ adhosiraṁ gahetvā vāsīhi tacchanti …pe…
an3.36:15.2	tamenaṁ, bhikkhave, nirayapālā rathe yojetvā ādittāya bhūmiyā sampajjalitāya sajotibhūtāya sārentipi paccāsārentipi …pe…
an3.36:15.3	tamenaṁ, bhikkhave, nirayapālā mahantaṁ aṅgārapabbataṁ ādittaṁ sampajjalitaṁ sajotibhūtaṁ āropentipi oropentipi …pe…
an3.36:15.4	tamenaṁ, bhikkhave, nirayapālā uddhampādaṁ adhosiraṁ gahetvā tattāya lohakumbhiyā pakkhipanti, ādittāya sampajjalitāya sajotibhūtāya. (…)
an3.36:15.5	So tattha pheṇuddehakaṁ paccamāno sakimpi uddhaṁ gacchati, sakimpi adho gacchati, sakimpi tiriyaṁ gacchati.
an3.36:15.6	So tattha dukkhā tibbā kharā kaṭukā vedanā vediyati, na ca tāva kālaṁ karoti yāva na taṁ pāpakammaṁ byantīhoti.
an3.36:15.7	Tamenaṁ, bhikkhave, nirayapālā mahāniraye pakkhipanti.
an3.36:15.8	So kho pana, bhikkhave, mahānirayo—
an3.36:16.1	Catukkaṇṇo catudvāro,
an3.36:16.2	vibhatto bhāgaso mito;
an3.36:16.3	Ayopākārapariyanto,
an3.36:16.4	ayasā paṭikujjito.
an3.36:17.1	Tassa ayomayā bhūmi,
an3.36:17.2	Jalitā tejasā yutā;
an3.36:17.3	Samantā yojanasataṁ,
an3.36:17.4	Pharitvā tiṭṭhati sabbadāti.
an3.36:18.1	Bhūtapubbaṁ, bhikkhave, yamassa rañño etadahosi:
an3.36:18.2	‘ye kira, bho, loke pāpakāni kammāni karonti te evarūpā vividhā kammakāraṇā karīyanti.
an3.36:18.3	Aho vatāhaṁ manussattaṁ labheyyaṁ, tathāgato ca loke uppajjeyya arahaṁ sammāsambuddho, tañcāhaṁ bhagavantaṁ payirupāseyyaṁ.
an3.36:18.4	So ca me bhagavā dhammaṁ deseyya, tassa cāhaṁ bhagavato dhammaṁ ājāneyyan’ti.
an3.36:18.5	Taṁ kho panāhaṁ, bhikkhave, na aññassa samaṇassa vā brāhmaṇassa vā sutvā evaṁ vadāmi, api ca kho, bhikkhave, yadeva me sāmaṁ ñātaṁ sāmaṁ diṭṭhaṁ sāmaṁ viditaṁ tadevāhaṁ vadāmīti.
an3.36:19.1	Coditā devadūtehi,
an3.36:19.2	ye pamajjanti māṇavā;
an3.36:19.3	Te dīgharattaṁ socanti,
an3.36:19.4	hīnakāyūpagā narā.
an3.36:20.1	Ye ca kho devadūtehi,
an3.36:20.2	santo sappurisā idha;
an3.36:20.3	Coditā nappamajjanti,
an3.36:20.4	ariyadhamme kudācanaṁ.
an3.36:21.1	Upādāne bhayaṁ disvā,
an3.36:21.2	jātimaraṇasambhave;
an3.36:21.3	Anupādā vimuccanti,
an3.36:21.4	jātimaraṇasaṅkhaye.
an3.36:22.1	Te appamattā sukhino,
an3.36:22.2	diṭṭhadhammābhinibbutā;
an3.36:22.3	Sabbaverabhayātītā,
an3.36:22.4	sabbadukkhaṁ upaccagun”ti.
an3.36:22.5	Chaṭṭhaṁ.
an3.37:0.1	Aṅguttara Nikāya 3.37
an3.37:0.2	4. Devadūtavagga
an3.37:0.3	Catumahārājasutta
an3.37:1.1	“Aṭṭhamiyaṁ, bhikkhave, pakkhassa catunnaṁ mahārājānaṁ amaccā pārisajjā imaṁ lokaṁ anuvicaranti:
an3.37:1.2	‘kacci bahū manussā manussesu matteyyā petteyyā sāmaññā brahmaññā kule jeṭṭhāpacāyino uposathaṁ upavasanti paṭijāgaronti puññāni karontī’ti.
an3.37:1.3	Cātuddasiṁ, bhikkhave, pakkhassa catunnaṁ mahārājānaṁ puttā imaṁ lokaṁ anuvicaranti:
an3.37:1.4	‘kacci bahū manussā manussesu matteyyā petteyyā sāmaññā brahmaññā kule jeṭṭhāpacāyino uposathaṁ upavasanti paṭijāgaronti puññāni karontī’ti.
an3.37:1.5	Tadahu, bhikkhave, uposathe pannarase cattāro mahārājāno sāmaññeva imaṁ lokaṁ anuvicaranti:
an3.37:1.6	‘kacci bahū manussā manussesu matteyyā petteyyā sāmaññā brahmaññā kule jeṭṭhāpacāyino uposathaṁ upavasanti paṭijāgaronti puññāni karontī’ti.
an3.37:2.1	Sace, bhikkhave, appakā honti manussā manussesu matteyyā petteyyā sāmaññā brahmaññā kule jeṭṭhāpacāyino uposathaṁ upavasanti paṭijāgaronti puññāni karonti.
an3.37:2.2	Tamenaṁ, bhikkhave, cattāro mahārājāno devānaṁ tāvatiṁsānaṁ sudhammāya sabhāya sannisinnānaṁ sannipatitānaṁ ārocenti:
an3.37:2.3	‘appakā kho, mārisā, manussā manussesu matteyyā petteyyā sāmaññā brahmaññā kule jeṭṭhāpacāyino uposathaṁ upavasanti paṭijāgaronti puññāni karontī’ti.
an3.37:2.4	Tena kho, bhikkhave, devā tāvatiṁsā anattamanā honti:
an3.37:2.5	‘dibbā vata, bho, kāyā parihāyissanti, paripūrissanti asurakāyā’ti.
an3.37:3.1	Sace pana, bhikkhave, bahū honti manussā manussesu matteyyā petteyyā sāmaññā brahmaññā kule jeṭṭhāpacāyino uposathaṁ upavasanti paṭijāgaronti puññāni karonti.
an3.37:3.2	Tamenaṁ, bhikkhave, cattāro mahārājāno devānaṁ tāvatiṁsānaṁ sudhammāya sabhāya sannisinnānaṁ sannipatitānaṁ ārocenti:
an3.37:3.3	‘bahū kho, mārisā, manussā manussesu matteyyā petteyyā sāmaññā brahmaññā kule jeṭṭhāpacāyino uposathaṁ upavasanti paṭijāgaronti puññāni karontī’ti.
an3.37:3.4	Tena, bhikkhave, devā tāvatiṁsā attamanā honti:
an3.37:3.5	‘dibbā vata bho kāyā paripūrissanti, parihāyissanti asurakāyā’ti.
an3.37:4.1	Bhūtapubbaṁ, bhikkhave, sakko devānamindo deve tāvatiṁse anunayamāno tāyaṁ velāyaṁ imaṁ gāthaṁ abhāsi:
an3.37:5.1	‘Cātuddasiṁ pañcadasiṁ,
an3.37:5.2	yā ca pakkhassa aṭṭhamī;
an3.37:5.3	Pāṭihāriyapakkhañca,
an3.37:5.4	aṭṭhaṅgasusamāgataṁ;
an3.37:5.5	Uposathaṁ upavaseyya,
an3.37:5.6	yopissa mādiso naro’ti.
an3.37:6.1	Sā kho panesā, bhikkhave, sakkena devānamindena gāthā duggītā na sugītā dubbhāsitā na subhāsitā.
an3.37:6.2	Taṁ kissa hetu?
an3.37:6.3	Sakko hi, bhikkhave, devānamindo avītarāgo avītadoso avītamoho.
an3.37:7.1	Yo ca kho so, bhikkhave, bhikkhu arahaṁ khīṇāsavo vusitavā brahmacariyo katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, tassa kho etaṁ, bhikkhave, bhikkhuno kallaṁ vacanāya:
an3.37:8.1	‘Cātuddasiṁ pañcadasiṁ,
an3.37:8.2	yā ca pakkhassa aṭṭhamī;
an3.37:8.3	Pāṭihāriyapakkhañca,
an3.37:8.4	aṭṭhaṅgasusamāgataṁ;
an3.37:8.5	Uposathaṁ upavaseyya,
an3.37:8.6	yopissa mādiso naro’ti.
an3.37:9.1	Taṁ kissa hetu?
an3.37:9.2	So hi, bhikkhave, bhikkhu vītarāgo vītadoso vītamoho”ti.
an3.37:9.3	Sattamaṁ.
an3.38:0.1	Aṅguttara Nikāya 3.38
an3.38:0.2	4. Devadūtavagga
an3.38:0.3	Dutiyacatumahārājasutta
an3.38:1.1	“Bhūtapubbaṁ, bhikkhave, sakko devānamindo deve tāvatiṁse anunayamāno tāyaṁ velāyaṁ imaṁ gāthaṁ abhāsi:
an3.38:2.1	‘Cātuddasiṁ pañcadasiṁ,
an3.38:2.2	yā ca pakkhassa aṭṭhamī;
an3.38:2.3	Pāṭihāriyapakkhañca,
an3.38:2.4	aṭṭhaṅgasusamāgataṁ;
an3.38:2.5	Uposathaṁ upavaseyya,
an3.38:2.6	yopissa mādiso naro’ti.
an3.38:3.1	Sā kho panesā, bhikkhave, sakkena devānamindena gāthā duggītā na sugītā dubbhāsitā na subhāsitā.
an3.38:3.2	Taṁ kissa hetu?
an3.38:3.3	Sakko hi, bhikkhave, devānamindo aparimutto jātiyā jarāya maraṇena sokehi paridevehi dukkhehi domanassehi upāyāsehi, ‘aparimutto dukkhasmā’ti vadāmi.
an3.38:4.1	Yo ca kho so, bhikkhave, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, tassa kho etaṁ, bhikkhave, bhikkhuno kallaṁ vacanāya:
an3.38:5.1	‘Cātuddasiṁ pañcadasiṁ,
an3.38:5.2	yā ca pakkhassa aṭṭhamī;
an3.38:5.3	Pāṭihāriyapakkhañca,
an3.38:5.4	aṭṭhaṅgasusamāgataṁ;
an3.38:5.5	Uposathaṁ upavaseyya,
an3.38:5.6	yopissa mādiso naro’ti.
an3.38:6.1	Taṁ kissa hetu?
an3.38:6.2	So hi, bhikkhave, bhikkhu parimutto jātiyā jarāya maraṇena sokehi paridevehi dukkhehi domanassehi upāyāsehi, ‘parimutto dukkhasmā’ti vadāmī”ti.
an3.38:6.3	Aṭṭhamaṁ.
an3.39:0.1	Aṅguttara Nikāya 3.39
an3.39:0.2	4. Devadūtavagga
an3.39:0.3	Sukhumālasutta
an3.39:1.1	“Sukhumālo ahaṁ, bhikkhave, paramasukhumālo accantasukhumālo.
an3.39:1.2	Mama sudaṁ, bhikkhave, pitu nivesane pokkharaṇiyo kāritā honti.
an3.39:1.3	Ekattha sudaṁ, bhikkhave, uppalaṁ vappati, ekattha padumaṁ, ekattha puṇḍarīkaṁ, yāvadeva mamatthāya.
an3.39:1.4	Na kho panassāhaṁ, bhikkhave, akāsikaṁ candanaṁ dhāremi. Kāsikaṁ, bhikkhave, su me taṁ veṭhanaṁ hoti, kāsikā kañcukā, kāsikaṁ nivāsanaṁ, kāsiko uttarāsaṅgo.
an3.39:1.5	Rattindivaṁ kho pana me su taṁ, bhikkhave, setacchattaṁ dhārīyati:
an3.39:1.6	‘mā naṁ phusi sītaṁ vā uṇhaṁ vā tiṇaṁ vā rajo vā ussāvo vā’ti.
an3.39:2.1	Tassa mayhaṁ, bhikkhave, tayo pāsādā ahesuṁ—eko hemantiko, eko gimhiko, eko vassiko.
an3.39:2.2	So kho ahaṁ, bhikkhave, vassike pāsāde vassike cattāro māse nippurisehi tūriyehi paricārayamāno na heṭṭhāpāsādaṁ orohāmi.
an3.39:2.3	Yathā kho pana, bhikkhave, aññesaṁ nivesane dāsakammakaraporisassa kaṇājakaṁ bhojanaṁ dīyati bilaṅgadutiyaṁ, evamevassu me, bhikkhave, pitu nivesane dāsakammakaraporisassa sālimaṁsodano dīyati.
an3.39:3.1	Tassa mayhaṁ, bhikkhave, evarūpāya iddhiyā samannāgatassa evarūpena ca sukhumālena etadahosi:
an3.39:3.2	‘assutavā kho puthujjano attanā jarādhammo samāno jaraṁ anatīto paraṁ jiṇṇaṁ disvā aṭṭīyati harāyati jigucchati attānaṁyeva atisitvā, ahampi khomhi jarādhammo jaraṁ anatīto.
an3.39:3.3	Ahañceva kho pana jarādhammo samāno jaraṁ anatīto paraṁ jiṇṇaṁ disvā aṭṭīyeyyaṁ harāyeyyaṁ jiguccheyyaṁ na metaṁ assa patirūpan’ti.
an3.39:3.4	Tassa mayhaṁ, bhikkhave, iti paṭisañcikkhato yo yobbane yobbanamado so sabbaso pahīyi.
an3.39:4.1	Assutavā kho puthujjano attanā byādhidhammo samāno byādhiṁ anatīto paraṁ byādhitaṁ disvā aṭṭīyati harāyati jigucchati attānaṁyeva atisitvā:
an3.39:4.2	‘ahampi khomhi byādhidhammo byādhiṁ anatīto, ahañceva kho pana byādhidhammo samāno byādhiṁ anatīto paraṁ byādhikaṁ disvā aṭṭīyeyyaṁ harāyeyyaṁ jiguccheyyaṁ, na metaṁ assa patirūpan’ti.
an3.39:4.3	Tassa mayhaṁ, bhikkhave, iti paṭisañcikkhato yo ārogye ārogyamado so sabbaso pahīyi.
an3.39:5.1	Assutavā kho puthujjano attanā maraṇadhammo samāno maraṇaṁ anatīto paraṁ mataṁ disvā aṭṭīyati harāyati jigucchati attānaṁyeva atisitvā:
an3.39:5.2	‘ahampi khomhi maraṇadhammo, maraṇaṁ anatīto, ahaṁ ceva kho pana maraṇadhammo samāno maraṇaṁ anatīto paraṁ mataṁ disvā aṭṭīyeyyaṁ harāyeyyaṁ jiguccheyyaṁ, na metaṁ assa patirūpan’ti.
an3.39:5.3	Tassa mayhaṁ, bhikkhave, iti paṭisañcikkhato yo jīvite jīvitamado so sabbaso pahīyīti.
an3.39:6.1	Tayome, bhikkhave, madā.
an3.39:6.2	Katame tayo?
an3.39:6.3	Yobbanamado, ārogyamado, jīvitamado.
an3.39:6.4	Yobbanamadamatto vā, bhikkhave, assutavā puthujjano kāyena duccaritaṁ carati, vācāya duccaritaṁ carati, manasā duccaritaṁ carati.
an3.39:6.5	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an3.39:6.6	Ārogyamadamatto vā, bhikkhave, assutavā puthujjano …pe…
an3.39:6.7	jīvitamadamatto vā, bhikkhave, assutavā puthujjano kāyena duccaritaṁ carati, vācāya duccaritaṁ carati, manasā duccaritaṁ carati.
an3.39:6.8	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an3.39:7.1	Yobbanamadamatto vā, bhikkhave, bhikkhu sikkhaṁ paccakkhāya hīnāyāvattati.
an3.39:7.2	Ārogyamadamatto vā, bhikkhave, bhikkhu …pe…
an3.39:7.3	jīvitamadamatto vā, bhikkhave, bhikkhu sikkhaṁ paccakkhāya hīnāyāvattatīti.
an3.39:8.1	Byādhidhammā jarādhammā,
an3.39:8.2	atho maraṇadhammino;
an3.39:8.3	Yathādhammā tathāsantā,
an3.39:8.4	jigucchanti puthujjanā.
an3.39:9.1	Ahañce taṁ jiguccheyyaṁ,
an3.39:9.2	evaṁdhammesu pāṇisu;
an3.39:9.3	Na metaṁ patirūpassa,
an3.39:9.4	mama evaṁ vihārino.
an3.39:10.1	Sohaṁ evaṁ viharanto,
an3.39:10.2	ñatvā dhammaṁ nirūpadhiṁ;
an3.39:10.3	Ārogye yobbanasmiñca,
an3.39:10.4	jīvitasmiñca ye madā.
an3.39:11.1	Sabbe made abhibhosmi,
an3.39:11.2	Nekkhamme daṭṭhu khemataṁ;
an3.39:11.3	Tassa me ahu ussāho,
an3.39:11.4	Nibbānaṁ abhipassato.
an3.39:12.1	Nāhaṁ bhabbo etarahi,
an3.39:12.2	Kāmāni paṭisevituṁ;
an3.39:12.3	Anivatti bhavissāmi,
an3.39:12.4	Brahmacariyaparāyaṇo”ti.
an3.39:12.5	Navamaṁ.
an3.40:0.1	Aṅguttara Nikāya 3.40
an3.40:0.2	4. Devadūtavagga
an3.40:0.3	Ādhipateyyasutta
an3.40:1.1	“Tīṇimāni, bhikkhave, ādhipateyyāni.
an3.40:1.2	Katamāni tīṇi?
an3.40:1.3	Attādhipateyyaṁ, lokādhipateyyaṁ, dhammādhipateyyaṁ.
an3.40:1.4	Katamañca, bhikkhave, attādhipateyyaṁ?
an3.40:1.5	Idha, bhikkhave, bhikkhu araññagato vā rukkhamūlagato vā suññāgāragato vā iti paṭisañcikkhati:
an3.40:1.6	‘na kho panāhaṁ cīvarahetu agārasmā anagāriyaṁ pabbajito.
an3.40:1.7	Na piṇḍapātahetu, na senāsanahetu, na itibhavābhavahetu agārasmā anagāriyaṁ pabbajito.
an3.40:1.8	Api ca khomhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto.
an3.40:1.9	Appeva nāma imassa kevalassa dukkhakkhandhassa antakiriyā paññāyethāti.
an3.40:1.10	Ahañceva kho pana yādisake kāme ohāya agārasmā anagāriyaṁ pabbajito tādisake vā kāme pariyeseyyaṁ tato vā pāpiṭṭhatare, na metaṁ patirūpan’ti.
an3.40:1.11	So iti paṭisañcikkhati:
an3.40:1.12	‘āraddhaṁ kho pana me vīriyaṁ bhavissati asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggan’ti.
an3.40:1.13	So attānaṁyeva adhipatiṁ karitvā akusalaṁ pajahati, kusalaṁ bhāveti, sāvajjaṁ pajahati, anavajjaṁ bhāveti, suddhaṁ attānaṁ pariharati.
an3.40:1.14	Idaṁ vuccati, bhikkhave, attādhipateyyaṁ.
an3.40:2.1	Katamañca, bhikkhave, lokādhipateyyaṁ?
an3.40:2.2	Idha, bhikkhave, bhikkhu araññagato vā rukkhamūlagato vā suññāgāragato vā iti paṭisañcikkhati:
an3.40:2.3	‘na kho panāhaṁ cīvarahetu agārasmā anagāriyaṁ pabbajito.
an3.40:2.4	Na piṇḍapātahetu, na senāsanahetu, na itibhavābhavahetu agārasmā anagāriyaṁ pabbajito.
an3.40:2.5	Api ca khomhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto.
an3.40:2.6	Appeva nāma imassa kevalassa dukkhakkhandhassa antakiriyā paññāyethā’ti.
an3.40:2.7	Ahañceva kho pana evaṁ pabbajito samāno kāmavitakkaṁ vā vitakkeyyaṁ, byāpādavitakkaṁ vā vitakkeyyaṁ, vihiṁsāvitakkaṁ vā vitakkeyyaṁ, mahā kho panāyaṁ lokasannivāso.
an3.40:2.8	Mahantasmiṁ kho pana lokasannivāse santi samaṇabrāhmaṇā iddhimanto dibbacakkhukā paracittaviduno.
an3.40:2.9	Te dūratopi passanti, āsannāpi na dissanti, cetasāpi cittaṁ pajānanti.
an3.40:2.10	Tepi maṁ evaṁ jāneyyuṁ:
an3.40:2.11	‘passatha, bho, imaṁ kulaputtaṁ saddhā agārasmā anagāriyaṁ pabbajito samāno vokiṇṇo viharati pāpakehi akusalehi dhammehī’ti.
an3.40:2.12	devatāpi kho santi iddhimantiniyo dibbacakkhukā paracittaviduniyo.
an3.40:2.13	Tā dūratopi passanti, āsannāpi na dissanti, cetasāpi cittaṁ jānanti.
an3.40:2.14	Tāpi maṁ evaṁ jāneyyuṁ:
an3.40:2.15	‘passatha, bho, imaṁ kulaputtaṁ saddhā agārasmā anagāriyaṁ pabbajito samāno vokiṇṇo viharati pāpakehi akusalehi dhammehī’ti.
an3.40:2.16	So iti paṭisañcikkhati:
an3.40:2.17	‘āraddhaṁ kho pana me vīriyaṁ bhavissati asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggan’ti.
an3.40:2.18	So lokaṁyeva adhipatiṁ karitvā akusalaṁ pajahati, kusalaṁ bhāveti, sāvajjaṁ pajahati, anavajjaṁ bhāveti, suddhaṁ attānaṁ pariharati.
an3.40:2.19	Idaṁ vuccati, bhikkhave, lokādhipateyyaṁ.
an3.40:3.1	Katamañca, bhikkhave, dhammādhipateyyaṁ?
an3.40:3.2	Idha, bhikkhave, bhikkhu araññagato vā rukkhamūlagato vā suññāgāragato vā iti paṭisañcikkhati:
an3.40:3.3	‘na kho panāhaṁ cīvarahetu agārasmā anagāriyaṁ pabbajito.
an3.40:3.4	Na piṇḍapātahetu, na senāsanahetu, na itibhavābhavahetu agārasmā anagāriyaṁ pabbajito.
an3.40:3.5	Api ca khomhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto.
an3.40:3.6	Appeva nāma imassa kevalassa dukkhakkhandhassa antakiriyā paññāyethāti.
an3.40:3.7	Svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhīti.
an3.40:3.8	Santi kho pana me sabrahmacārī jānaṁ passaṁ viharanti.
an3.40:3.9	Ahañceva kho pana evaṁ svākkhāte dhammavinaye pabbajito samāno kusīto vihareyyaṁ pamatto, na metaṁ assa patirūpan’ti.
an3.40:3.10	So iti paṭisañcikkhati:
an3.40:3.11	‘āraddhaṁ kho pana me vīriyaṁ bhavissati asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggan’ti.
an3.40:3.12	So dhammaṁyeva adhipatiṁ karitvā akusalaṁ pajahati, kusalaṁ bhāveti, sāvajjaṁ pajahati, anavajjaṁ bhāveti, suddhaṁ attānaṁ pariharati.
an3.40:3.13	Idaṁ vuccati, bhikkhave, dhammādhipateyyaṁ.
an3.40:3.14	Imāni kho, bhikkhave, tīṇi ādhipateyyānīti.
an3.40:4.1	Natthi loke raho nāma,
an3.40:4.2	pāpakammaṁ pakubbato;
an3.40:4.3	Attā te purisa jānāti,
an3.40:4.4	saccaṁ vā yadi vā musā.
an3.40:5.1	Kalyāṇaṁ vata bho sakkhi,
an3.40:5.2	attānaṁ atimaññasi;
an3.40:5.3	Yo santaṁ attani pāpaṁ,
an3.40:5.4	attānaṁ parigūhasi.
an3.40:6.1	Passanti devā ca tathāgatā ca,
an3.40:6.2	Lokasmiṁ bālaṁ visamaṁ carantaṁ;
an3.40:6.3	Tasmā hi attādhipateyyako ca,
an3.40:6.4	Lokādhipo ca nipako ca jhāyī;
an3.40:6.5	Dhammādhipo ca anudhammacārī,
an3.40:6.6	Na hīyati saccaparakkamo muni.
an3.40:7.1	Pasayha māraṁ abhibhuyya antakaṁ,
an3.40:7.2	Yo ca phusī jātikkhayaṁ padhānavā;
an3.40:7.3	So tādiso lokavidū sumedho,
an3.40:7.4	Sabbesu dhammesu atammayo munī”ti.
an3.40:7.5	Dasamaṁ.
an3.40:7.6	Devadūtavaggo catuttho.
an3.40:8.0	Tassuddānaṁ
an3.40:8.1	Brahma ānanda sāriputto,
an3.40:8.2	Nidānaṁ hatthakena ca;
an3.40:8.3	Dūtā duve ca rājāno,
an3.40:8.4	Sukhumālādhipateyyena cāti.
an3.41:0.1	Aṅguttara Nikāya 3.41
an3.41:0.2	5. Cūḷavagga
an3.41:0.3	Sammukhībhāvasutta
an3.41:1.1	“Tiṇṇaṁ, bhikkhave, sammukhībhāvā saddho kulaputto bahuṁ puññaṁ pasavati.
an3.41:1.2	Katamesaṁ tiṇṇaṁ?
an3.41:1.3	Saddhāya, bhikkhave, sammukhībhāvā saddho kulaputto bahuṁ puññaṁ pasavati.
an3.41:1.4	Deyyadhammassa, bhikkhave, sammukhībhāvā saddho kulaputto bahuṁ puññaṁ pasavati.
an3.41:1.5	Dakkhiṇeyyānaṁ, bhikkhave, sammukhībhāvā saddho kulaputto bahuṁ puññaṁ pasavati.
an3.41:1.6	Imesaṁ kho, bhikkhave, tiṇṇaṁ sammukhībhāvā saddho kulaputto bahuṁ puññaṁ pasavatī”ti.
an3.41:1.7	Paṭhamaṁ.
an3.42:0.1	Aṅguttara Nikāya 3.42
an3.42:0.2	5. Cūḷavagga
an3.42:0.3	Tiṭhānasutta
an3.42:1.1	“Tīhi, bhikkhave, ṭhānehi saddho pasanno veditabbo.
an3.42:1.2	Katamehi tīhi?
an3.42:1.3	Sīlavantānaṁ dassanakāmo hoti, saddhammaṁ sotukāmo hoti, vigatamalamaccherena cetasā agāraṁ ajjhāvasati muttacāgo payatapāṇi vossaggarato yācayogo dānasaṁvibhāgarato.
an3.42:1.4	Imehi kho, bhikkhave, tīhi ṭhānehi saddho pasanno veditabbo.
an3.42:2.1	Dassanakāmo sīlavataṁ,
an3.42:2.2	saddhammaṁ sotumicchati;
an3.42:2.3	Vinaye maccheramalaṁ,
an3.42:2.4	sa ve saddhoti vuccatī”ti.
an3.42:2.5	Dutiyaṁ.
an3.43:0.1	Aṅguttara Nikāya 3.43
an3.43:0.2	5. Cūḷavagga
an3.43:0.3	Atthavasasutta
an3.43:1.1	“Tayo, bhikkhave, atthavase sampassamānena alameva paresaṁ dhammaṁ desetuṁ.
an3.43:1.2	Katame tayo?
an3.43:1.3	Yo dhammaṁ deseti so atthappaṭisaṁvedī ca hoti dhammappaṭisaṁvedī ca.
an3.43:1.4	Yo dhammaṁ suṇāti so atthappaṭisaṁvedī ca hoti dhammappaṭisaṁvedī ca.
an3.43:1.5	Yo ceva dhammaṁ deseti yo ca dhammaṁ suṇāti ubho atthappaṭisaṁvedino ca honti dhammappaṭisaṁvedino ca.
an3.43:1.6	Ime kho, bhikkhave, tayo atthavase sampassamānena alameva paresaṁ dhammaṁ desetun”ti.
an3.43:1.7	Tatiyaṁ.
an3.44:0.1	Aṅguttara Nikāya 3.44
an3.44:0.2	5. Cūḷavagga
an3.44:0.3	Kathāpavattisutta
an3.44:1.1	“Tīhi, bhikkhave, ṭhānehi kathā pavattinī hoti.
an3.44:1.2	Katamehi tīhi?
an3.44:1.3	Yo dhammaṁ deseti so atthappaṭisaṁvedī ca hoti dhammappaṭisaṁvedī ca.
an3.44:1.4	Yo dhammaṁ suṇāti so atthappaṭisaṁvedī ca hoti dhammappaṭisaṁvedī ca.
an3.44:1.5	Yo ceva dhammaṁ deseti yo ca dhammaṁ suṇāti ubho atthappaṭisaṁvedino ca honti dhammappaṭisaṁvedino ca.
an3.44:1.6	Imehi kho, bhikkhave, tīhi ṭhānehi kathā pavattinī hotī”ti.
an3.44:1.7	Catutthaṁ.
an3.45:0.1	Aṅguttara Nikāya 3.45
an3.45:0.2	5. Cūḷavagga
an3.45:0.3	Paṇḍitasutta
an3.45:1.1	“Tīṇimāni, bhikkhave, paṇḍitapaññattāni sappurisapaññattāni.
an3.45:1.2	Katamāni tīṇi?
an3.45:1.3	Dānaṁ, bhikkhave, paṇḍitapaññattaṁ sappurisapaññattaṁ.
an3.45:1.4	Pabbajjā, bhikkhave, paṇḍitapaññattā sappurisapaññattā.
an3.45:1.5	Mātāpitūnaṁ, bhikkhave, upaṭṭhānaṁ paṇḍitapaññattaṁ sappurisapaññattaṁ.
an3.45:1.6	Imāni kho, bhikkhave, tīṇi paṇḍitapaññattāni sappurisapaññattānīti.
an3.45:2.1	Sabbhi dānaṁ upaññattaṁ,
an3.45:2.2	ahiṁsā saṁyamo damo;
an3.45:2.3	Mātāpitu upaṭṭhānaṁ,
an3.45:2.4	santānaṁ brahmacārinaṁ.
an3.45:3.1	Sataṁ etāni ṭhānāni,
an3.45:3.2	yāni sevetha paṇḍito;
an3.45:3.3	Ariyo dassanasampanno,
an3.45:3.4	sa lokaṁ bhajate sivan”ti.
an3.45:3.5	Pañcamaṁ.
an3.46:0.1	Aṅguttara Nikāya 3.46
an3.46:0.2	5. Cūḷavagga
an3.46:0.3	Sīlavantasutta
an3.46:1.1	“Yaṁ, bhikkhave, sīlavanto pabbajitā gāmaṁ vā nigamaṁ vā upanissāya viharanti.
an3.46:1.2	Tattha manussā tīhi ṭhānehi bahuṁ puññaṁ pasavanti.
an3.46:1.3	Katamehi tīhi?
an3.46:1.4	Kāyena, vācāya, manasā.
an3.46:1.5	Yaṁ, bhikkhave, sīlavanto pabbajitā gāmaṁ vā nigamaṁ vā upanissāya viharanti.
an3.46:1.6	Tattha manussā imehi tīhi ṭhānehi bahuṁ puññaṁ pasavantī”ti.
an3.46:1.7	Chaṭṭhaṁ.
an3.47:0.1	Aṅguttara Nikāya 3.47
an3.47:0.2	5. Cūḷavagga
an3.47:0.3	Saṅkhatalakkhaṇasutta
an3.47:1.1	“Tīṇimāni, bhikkhave, saṅkhatassa saṅkhatalakkhaṇāni.
an3.47:1.2	Katamāni tīṇi?
an3.47:1.3	Uppādo paññāyati, vayo paññāyati, ṭhitassa aññathattaṁ paññāyati.
an3.47:1.4	Imāni kho, bhikkhave, tīṇi saṅkhatassa saṅkhatalakkhaṇānī”ti.
an3.47:1.5	Sattamaṁ.
an3.47:2.0	Asaṅkhatalakkhaṇasutta
an3.47:2.1	“Tīṇimāni, bhikkhave, asaṅkhatassa asaṅkhatalakkhaṇāni.
an3.47:2.2	Katamāni tīṇi?
an3.47:2.3	Na uppādo paññāyati, na vayo paññāyati, na ṭhitassa aññathattaṁ paññāyati.
an3.47:2.4	Imāni kho, bhikkhave, tīṇi asaṅkhatassa asaṅkhatalakkhaṇānī”ti.
an3.47:2.5	Aṭṭhamaṁ.
an3.48:0.1	Aṅguttara Nikāya 3.48
an3.48:0.2	5. Cūḷavagga
an3.48:0.3	Pabbatarājasutta
an3.48:1.1	“Himavantaṁ, bhikkhave, pabbatarājaṁ nissāya mahāsālā tīhi vaḍḍhīhi vaḍḍhanti.
an3.48:1.2	Katamāhi tīhi?
an3.48:1.3	Sākhāpattapalāsena vaḍḍhanti, tacapapaṭikāya vaḍḍhanti, pheggusārena vaḍḍhanti.
an3.48:1.4	Himavantaṁ, bhikkhave, pabbatarājaṁ nissāya mahāsālā imāhi tīhi vaḍḍhīhi vaḍḍhanti.
an3.48:2.1	Evamevaṁ kho, bhikkhave, saddhaṁ kulapatiṁ nissāya anto jano tīhi vaḍḍhīhi vaḍḍhati.
an3.48:2.2	Katamāhi tīhi?
an3.48:2.3	Saddhāya vaḍḍhati, sīlena vaḍḍhati, paññāya vaḍḍhati.
an3.48:2.4	Saddhaṁ, bhikkhave, kulapatiṁ nissāya anto jano imāhi tīhi vaḍḍhīhi vaḍḍhatīti.
an3.48:3.1	Yathāpi pabbato selo,
an3.48:3.2	araññasmiṁ brahāvane;
an3.48:3.3	Taṁ rukkhā upanissāya,
an3.48:3.4	vaḍḍhante te vanappatī.
an3.48:4.1	Tatheva sīlasampannaṁ,
an3.48:4.2	saddhaṁ kulapatiṁ idha;
an3.48:4.3	Upanissāya vaḍḍhanti,
an3.48:4.4	puttadārā ca bandhavā;
an3.48:4.5	Amaccā ñātisaṅghā ca,
an3.48:4.6	ye cassa anujīvino.
an3.48:5.1	Tyāssa sīlavato sīlaṁ,
an3.48:5.2	cāgaṁ sucaritāni ca;
an3.48:5.3	Passamānānukubbanti,
an3.48:5.4	attamatthaṁ vicakkhaṇā.
an3.48:6.1	Idha dhammaṁ caritvāna,
an3.48:6.2	maggaṁ sugatigāminaṁ;
an3.48:6.3	Nandino devalokasmiṁ,
an3.48:6.4	modanti kāmakāmino”ti.
an3.48:6.5	Navamaṁ.
an3.49:0.1	Aṅguttara Nikāya 3.49
an3.49:0.2	5. Cūḷavagga
an3.49:0.3	Ātappakaraṇīyasutta
an3.49:1.1	“Tīhi, bhikkhave, ṭhānehi ātappaṁ karaṇīyaṁ.
an3.49:1.2	Katamehi tīhi?
an3.49:1.3	Anuppannānaṁ pāpakānaṁ akusalānaṁ dhammānaṁ anuppādāya ātappaṁ karaṇīyaṁ, anuppannānaṁ kusalānaṁ dhammānaṁ uppādāya ātappaṁ karaṇīyaṁ, uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsanāya ātappaṁ karaṇīyaṁ.
an3.49:1.4	Imehi tīhi, bhikkhave, ṭhānehi ātappaṁ karaṇīyaṁ.
an3.49:2.1	Yato kho, bhikkhave, bhikkhu anuppannānaṁ pāpakānaṁ akusalānaṁ dhammānaṁ anuppādāya ātappaṁ karoti, anuppannānaṁ kusalānaṁ dhammānaṁ uppādāya ātappaṁ karoti, uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsanāya ātappaṁ karoti.
an3.49:2.2	Ayaṁ vuccati, bhikkhave, bhikkhu ātāpī nipako sato sammā dukkhassa antakiriyāyā”ti.
an3.49:2.3	Dasamaṁ.
an3.50:0.1	Aṅguttara Nikāya 3.50
an3.50:0.2	5. Cūḷavagga
an3.50:0.3	Mahācorasutta
an3.50:1.1	“Tīhi, bhikkhave, aṅgehi samannāgato mahācoro sandhimpi chindati, nillopampi harati, ekāgārikampi karoti, paripanthepi tiṭṭhati.
an3.50:1.2	Katamehi tīhi?
an3.50:1.3	Idha, bhikkhave, mahācoro visamanissito ca hoti, gahananissito ca hoti, balavanissito ca hoti.
an3.50:1.4	Kathañca, bhikkhave, mahācoro visamanissito hoti?
an3.50:1.5	Idha, bhikkhave, mahācoro nadīviduggaṁ vā nissito hoti pabbatavisamaṁ vā.
an3.50:1.6	Evaṁ kho, bhikkhave, mahācoro visamanissito hoti.
an3.50:2.1	Kathañca, bhikkhave, mahācoro gahananissito hoti?
an3.50:2.2	Idha, bhikkhave, mahācoro tiṇagahanaṁ vā nissito hoti, rukkhagahanaṁ vā rodhaṁ vā mahāvanasaṇḍaṁ vā.
an3.50:2.3	Evaṁ kho, bhikkhave, mahācoro gahananissito hoti.
an3.50:3.1	Kathañca, bhikkhave, mahācoro balavanissito hoti?
an3.50:3.2	Idha, bhikkhave, mahācoro rājānaṁ vā rājamahāmattānaṁ vā nissito hoti.
an3.50:3.3	Tassa evaṁ hoti:
an3.50:3.4	‘sace maṁ koci kiñci vakkhati, ime me rājāno vā rājamahāmattā vā pariyodhāya atthaṁ bhaṇissantī’ti.
an3.50:3.5	Sace naṁ koci kiñci āha, tyāssa rājāno vā rājamahāmattā vā pariyodhāya atthaṁ bhaṇanti.
an3.50:3.6	Evaṁ kho, bhikkhave, mahācoro balavanissito hoti.
an3.50:3.7	Ime kho, bhikkhave, tīhi aṅgehi samannāgato mahācoro sandhimpi chindati, nillopampi harati, ekāgārikampi karoti, paripanthepi tiṭṭhati.
an3.50:4.1	Evamevaṁ kho, bhikkhave, tīhi aṅgehi samannāgato pāpabhikkhu khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an3.50:4.2	Katamehi tīhi?
an3.50:4.3	Idha, bhikkhave, pāpabhikkhu visamanissito ca hoti gahananissito ca balavanissito ca.
an3.50:5.1	Kathañca, bhikkhave, pāpabhikkhu visamanissito hoti?
an3.50:5.2	Idha, bhikkhave, pāpabhikkhu visamena kāyakammena samannāgato hoti, visamena vacīkammena samannāgato hoti, visamena manokammena samannāgato hoti.
an3.50:5.3	Evaṁ kho, bhikkhave, pāpabhikkhu visamanissito hoti.
an3.50:6.1	Kathañca, bhikkhave, pāpabhikkhu gahananissito hoti?
an3.50:6.2	Idha, bhikkhave, pāpabhikkhu micchādiṭṭhiko hoti, antaggāhikāya diṭṭhiyā samannāgato hoti.
an3.50:6.3	Evaṁ kho, bhikkhave, pāpabhikkhu gahananissito hoti.
an3.50:7.1	Kathañca, bhikkhave, pāpabhikkhu balavanissito hoti?
an3.50:7.2	Idha, bhikkhave, pāpabhikkhu rājānaṁ vā rājamahāmattānaṁ vā nissito hoti.
an3.50:7.3	Tassa evaṁ hoti:
an3.50:7.4	‘sace maṁ koci kiñci vakkhati, ime me rājāno vā rājamahāmattā vā pariyodhāya atthaṁ bhaṇissantī’ti.
an3.50:7.5	Sace naṁ koci kiñci āha, tyāssa rājāno vā rājamahāmattā vā pariyodhāya atthaṁ bhaṇanti.
an3.50:7.6	Evaṁ kho, bhikkhave, pāpabhikkhu balavanissito hoti.
an3.50:7.7	Imehi kho, bhikkhave, tīhi dhammehi samannāgato pāpabhikkhu khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavatī”ti.
an3.50:7.8	Ekādasamaṁ.
an3.50:7.9	Cūḷavaggo pañcamo.
an3.50:8.0	Tassuddānaṁ
an3.50:8.1	Sammukhī ṭhānatthavasaṁ,
an3.50:8.2	pavatti paṇḍita sīlavaṁ;
an3.50:8.3	Saṅkhataṁ pabbatātappaṁ,
an3.50:8.4	mahācorenekādasāti.
an3.50:8.5	Paṭhamo paṇṇāsako samatto.
an3.51:0.1	Aṅguttara Nikāya 3.51
an3.51:0.2	6. Brāhmaṇavagga
an3.51:0.3	Paṭhamadvebrāhmaṇasutta
an3.51:1.1	Atha kho dve brāhmaṇā jiṇṇā vuddhā mahallakā addhagatā vayoanuppattā vīsavassasatikā jātiyā yena bhagavā tenupasaṅkamiṁsu; upasaṅkamitvā bhagavatā saddhiṁ sammodiṁsu.
an3.51:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te brāhmaṇā bhagavantaṁ etadavocuṁ:
an3.51:1.3	“mayamassu, bho gotama, brāhmaṇā jiṇṇā vuddhā mahallakā addhagatā vayoanuppattā vīsavassasatikā jātiyā;
an3.51:1.4	te camhā akatakalyāṇā akatakusalā akatabhīruttāṇā.
an3.51:1.5	Ovadatu no bhavaṁ gotamo, anusāsatu no bhavaṁ gotamo yaṁ amhākaṁ assa dīgharattaṁ hitāya sukhāyā”ti.
an3.51:2.1	“Taggha tumhe, brāhmaṇā, jiṇṇā vuddhā mahallakā addhagatā vayoanuppattā vīsavassasatikā jātiyā;
an3.51:2.2	te cattha akatakalyāṇā akatakusalā akatabhīruttāṇā.
an3.51:2.3	Upanīyati kho ayaṁ, brāhmaṇā, loko jarāya byādhinā maraṇena.
an3.51:2.4	Evaṁ upanīyamāne kho, brāhmaṇā, loke jarāya byādhinā maraṇena, yo idha kāyena saṁyamo vācāya saṁyamo manasā saṁyamo, taṁ tassa petassa tāṇañca leṇañca dīpañca saraṇañca parāyaṇañcāti.
an3.51:3.1	Upanīyati jīvitamappamāyu,
an3.51:3.2	Jarūpanītassa na santi tāṇā;
an3.51:3.3	Etaṁ bhayaṁ maraṇe pekkhamāno,
an3.51:3.4	Puññāni kayirātha sukhāvahāni.
an3.51:4.1	Yodha kāyena saṁyamo,
an3.51:4.2	Vācāya uda cetasā;
an3.51:4.3	Taṁ tassa petassa sukhāya hoti,
an3.51:4.4	Yaṁ jīvamāno pakaroti puññan”ti.
an3.51:4.5	Paṭhamaṁ.
an3.52:0.1	Aṅguttara Nikāya 3.52
an3.52:0.2	6. Brāhmaṇavagga
an3.52:0.3	Dutiyadvebrāhmaṇasutta
an3.52:1.1	Atha kho dve brāhmaṇā jiṇṇā vuddhā mahallakā addhagatā vayoanuppattā vīsavassasatikā jātiyā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te brāhmaṇā bhagavantaṁ etadavocuṁ:
an3.52:1.2	“mayamassu, bho gotama, brāhmaṇā jiṇṇā vuddhā mahallakā addhagatā vayoanuppattā vīsavassasatikā jātiyā;
an3.52:1.3	te camhā akatakalyāṇā akatakusalā akatabhīruttāṇā.
an3.52:1.4	Ovadatu no bhavaṁ gotamo, anusāsatu no bhavaṁ gotamo yaṁ amhākaṁ assa dīgharattaṁ hitāya sukhāyā”ti.
an3.52:2.1	“Taggha tumhe, brāhmaṇā, jiṇṇā vuddhā mahallakā addhagatā vayoanuppattā vīsavassasatikā jātiyā;
an3.52:2.2	te cattha akatakalyāṇā akatakusalā akatabhīruttāṇā.
an3.52:2.3	Āditto kho ayaṁ, brāhmaṇā, loko jarāya byādhinā maraṇena.
an3.52:2.4	Evaṁ āditte kho, brāhmaṇā, loke jarāya byādhinā maraṇena, yo idha kāyena saṁyamo vācāya saṁyamo manasā saṁyamo, taṁ tassa petassa tāṇañca leṇañca dīpañca saraṇañca parāyaṇañcāti.
an3.52:3.1	Ādittasmiṁ agārasmiṁ,
an3.52:3.2	yaṁ nīharati bhājanaṁ;
an3.52:3.3	Taṁ tassa hoti atthāya,
an3.52:3.4	no ca yaṁ tattha ḍayhati.
an3.52:4.1	Evaṁ āditto kho loko,
an3.52:4.2	jarāya maraṇena ca;
an3.52:4.3	Nīharetheva dānena,
an3.52:4.4	dinnaṁ hoti sunīhataṁ.
an3.52:5.1	Yodha kāyena saṁyamo,
an3.52:5.2	Vācāya uda cetasā;
an3.52:5.3	Taṁ tassa petassa sukhāya hoti,
an3.52:5.4	Yaṁ jīvamāno pakaroti puññan”ti.
an3.52:5.5	Dutiyaṁ.
an3.53:0.1	Aṅguttara Nikāya 3.53
an3.53:0.2	6. Brāhmaṇavagga
an3.53:0.3	Aññatarabrāhmaṇasutta
an3.53:1.1	Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi …pe… ekamantaṁ nisinno kho so brāhmaṇo bhagavantaṁ etadavoca:
an3.53:1.2	“‘sandiṭṭhiko dhammo sandiṭṭhiko dhammo’ti, bho gotama, vuccati.
an3.53:1.3	Kittāvatā nu kho, bho gotama, sandiṭṭhiko dhammo hoti akāliko ehipassiko opaneyyiko paccattaṁ veditabbo viññūhī”ti?
an3.53:2.1	“Ratto kho, brāhmaṇa, rāgena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṁ domanassaṁ paṭisaṁvedeti.
an3.53:2.2	Rāge pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikaṁ dukkhaṁ domanassaṁ paṭisaṁvedeti.
an3.53:2.3	Ratto kho …pe… kāyena duccaritaṁ carati, vācāya duccaritaṁ carati, manasā duccaritaṁ carati.
an3.53:2.4	Rāge pahīne neva kāyena duccaritaṁ carati, na vācāya duccaritaṁ carati, na manasā duccaritaṁ carati.
an3.53:2.5	Ratto kho …pe… attatthampi yathābhūtaṁ nappajānāti, paratthampi yathābhūtaṁ nappajānāti, ubhayatthampi yathābhūtaṁ nappajānāti.
an3.53:2.6	Rāge pahīne attatthampi yathābhūtaṁ pajānāti, paratthampi yathābhūtaṁ pajānāti, ubhayatthampi yathābhūtaṁ pajānāti.
an3.53:2.7	Evampi kho, brāhmaṇa, sandiṭṭhiko dhammo hoti …pe….
an3.53:3.1	Duṭṭho kho, brāhmaṇa, dosena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṁ domanassaṁ paṭisaṁvedeti.
an3.53:3.2	Dose pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikampi dukkhaṁ domanassaṁ paṭisaṁvedeti.
an3.53:3.3	Evampi kho, brāhmaṇa, sandiṭṭhiko dhammo hoti …pe….
an3.53:4.1	Mūḷho kho, brāhmaṇa, mohena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṁ domanassaṁ paṭisaṁvedeti.
an3.53:4.2	Mohe pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikaṁ dukkhaṁ domanassaṁ paṭisaṁvedeti.
an3.53:4.3	Evaṁ kho, brāhmaṇa, sandiṭṭhiko dhammo hoti akāliko ehipassiko opaneyyiko paccattaṁ veditabbo viññūhī”ti.
an3.53:5.1	“Abhikkantaṁ, bho gotama, abhikkantaṁ, bho gotama.
an3.53:5.2	Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.
an3.53:5.3	Esāhaṁ bhavantaṁ gotamaṁ saraṇaṁ gacchāmi dhammañca bhikkhusaṅghañca.
an3.53:5.4	Upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an3.53:5.5	Tatiyaṁ.
an3.54:0.1	Aṅguttara Nikāya 3.54
an3.54:0.2	6. Brāhmaṇavagga
an3.54:0.3	Paribbājakasutta
an3.54:1.1	Atha kho aññataro brāhmaṇaparibbājako yena bhagavā tenupasaṅkami; upasaṅkamitvā …pe… ekamantaṁ nisinno kho so brāhmaṇaparibbājako bhagavantaṁ etadavoca:
an3.54:1.2	“‘sandiṭṭhiko dhammo sandiṭṭhiko dhammo’ti, bho gotama, vuccati.
an3.54:1.3	Kittāvatā nu kho, bho gotama, sandiṭṭhiko dhammo hoti akāliko ehipassiko opaneyyiko paccattaṁ veditabbo viññūhī”ti?
an3.54:2.1	“Ratto kho, brāhmaṇa, rāgena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṁ domanassaṁ paṭisaṁvedeti.
an3.54:2.2	Rāge pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikampi dukkhaṁ domanassaṁ paṭisaṁvedeti.
an3.54:3.1	Ratto kho, brāhmaṇa, rāgena abhibhūto pariyādinnacitto kāyena duccaritaṁ carati, vācāya duccaritaṁ carati, manasā duccaritaṁ carati.
an3.54:3.2	Rāge pahīne neva kāyena duccaritaṁ carati, na vācāya duccaritaṁ carati, na manasā duccaritaṁ carati.
an3.54:4.1	Ratto kho, brāhmaṇa, rāgena abhibhūto pariyādinnacitto attatthampi yathābhūtaṁ nappajānāti, paratthampi yathābhūtaṁ nappajānāti, ubhayatthampi yathābhūtaṁ nappajānāti.
an3.54:4.2	Rāge pahīne attatthampi yathābhūtaṁ pajānāti, paratthampi yathābhūtaṁ pajānāti, ubhayatthampi yathābhūtaṁ pajānāti.
an3.54:4.3	Evampi kho, brāhmaṇa, sandiṭṭhiko dhammo hoti …pe….
an3.54:5.1	Duṭṭho kho, brāhmaṇa, dosena …pe…
an3.54:5.2	mūḷho kho, brāhmaṇa, mohena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṁ domanassaṁ paṭisaṁvedeti.
an3.54:5.3	Mohe pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikaṁ dukkhaṁ domanassaṁ paṭisaṁvedeti.
an3.54:6.1	Mūḷho kho, brāhmaṇa, mohena abhibhūto pariyādinnacitto, kāyena duccaritaṁ carati, vācāya duccaritaṁ carati, manasā duccaritaṁ carati.
an3.54:6.2	Mohe pahīne neva kāyena duccaritaṁ carati, na vācāya duccaritaṁ carati, na manasā duccaritaṁ carati.
an3.54:7.1	Mūḷho kho, brāhmaṇa, mohena abhibhūto pariyādinnacitto attatthampi yathābhūtaṁ nappajānāti, paratthampi yathābhūtaṁ nappajānāti, ubhayatthampi yathābhūtaṁ nappajānāti.
an3.54:7.2	Mohe pahīne attatthampi yathābhūtaṁ pajānāti, paratthampi yathābhūtaṁ pajānāti, ubhayatthampi yathābhūtaṁ pajānāti.
an3.54:7.3	Evaṁ kho, brāhmaṇa, sandiṭṭhiko dhammo hoti akāliko ehipassiko opaneyyiko paccattaṁ veditabbo viññūhī”ti.
an3.54:8.1	“Abhikkantaṁ, bho gotama …pe…
an3.54:8.2	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an3.54:8.3	Catutthaṁ.
an3.55:0.1	Aṅguttara Nikāya 3.55
an3.55:0.2	6. Brāhmaṇavagga
an3.55:0.3	Nibbutasutta
an3.55:1.1	Atha kho jāṇussoṇi brāhmaṇo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho jāṇussoṇi brāhmaṇo bhagavantaṁ etadavoca:
an3.55:1.2	“‘sandiṭṭhikaṁ nibbānaṁ sandiṭṭhikaṁ nibbānan’ti, bho gotama, vuccati.
an3.55:1.3	Kittāvatā nu kho, bho gotama, sandiṭṭhikaṁ nibbānaṁ hoti akālikaṁ ehipassikaṁ opaneyyikaṁ paccattaṁ veditabbaṁ viññūhī”ti?
an3.55:2.1	Ratto kho, brāhmaṇa, rāgena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṁ domanassaṁ paṭisaṁvedeti.
an3.55:2.2	Rāge pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikampi dukkhaṁ domanassaṁ paṭisaṁvedeti.
an3.55:2.3	Evampi kho, brāhmaṇa, sandiṭṭhikaṁ nibbānaṁ hoti.
an3.55:3.1	Duṭṭho kho, brāhmaṇa …pe…
an3.55:3.2	mūḷho kho, brāhmaṇa, mohena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṁ domanassaṁ paṭisaṁvedeti.
an3.55:3.3	Mohe pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikaṁ dukkhaṁ domanassaṁ paṭisaṁvedeti.
an3.55:3.4	Evampi kho, brāhmaṇa, sandiṭṭhikaṁ nibbānaṁ hoti.
an3.55:4.1	Yato kho ayaṁ, brāhmaṇa, anavasesaṁ rāgakkhayaṁ paṭisaṁvedeti, anavasesaṁ dosakkhayaṁ paṭisaṁvedeti, anavasesaṁ mohakkhayaṁ paṭisaṁvedeti;
an3.55:4.2	evaṁ kho, brāhmaṇa, sandiṭṭhikaṁ nibbānaṁ hoti akālikaṁ ehipassikaṁ opaneyyikaṁ paccattaṁ veditabbaṁ viññūhī”ti.
an3.55:5.1	“Abhikkantaṁ, bho gotama …pe…
an3.55:5.2	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an3.55:5.3	Pañcamaṁ.
an3.56:0.1	Aṅguttara Nikāya 3.56
an3.56:0.2	6. Brāhmaṇavagga
an3.56:0.3	Palokasutta
an3.56:1.1	Atha kho aññataro brāhmaṇamahāsālo yena bhagavā tenupasaṅkami …pe… ekamantaṁ nisinno kho so brāhmaṇamahāsālo bhagavantaṁ etadavoca:
an3.56:1.2	“sutaṁ metaṁ, bho gotama, pubbakānaṁ brāhmaṇānaṁ vuddhānaṁ mahallakānaṁ ācariyapācariyānaṁ bhāsamānānaṁ:
an3.56:1.3	‘pubbe sudaṁ ayaṁ loko avīci maññe phuṭo ahosi manussehi, kukkuṭasaṁpātikā gāmanigamarājadhāniyo’ti.
an3.56:1.4	Ko nu kho, bho gotama, hetu ko paccayo yenetarahi manussānaṁ khayo hoti, tanuttaṁ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā hontī”ti?
an3.56:2.1	“Etarahi, brāhmaṇa, manussā adhammarāgarattā visamalobhābhibhūtā micchādhammaparetā.
an3.56:2.2	Te adhammarāgarattā visamalobhābhibhūtā micchādhammaparetā tiṇhāni satthāni gahetvā aññamaññaṁ jīvitā voropenti, tena bahū manussā kālaṁ karonti.
an3.56:2.3	Ayampi kho, brāhmaṇa, hetu ayaṁ paccayo yenetarahi manussānaṁ khayo hoti, tanuttaṁ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā honti.
an3.56:3.1	Puna caparaṁ, brāhmaṇa, etarahi manussā adhammarāgarattā visamalobhābhibhūtā micchādhammaparetā.
an3.56:3.2	Tesaṁ adhammarāgarattānaṁ visamalobhābhibhūtānaṁ micchādhammaparetānaṁ devo na sammādhāraṁ anuppavecchati.
an3.56:3.3	Tena dubbhikkhaṁ hoti dussassaṁ setaṭṭhikaṁ salākāvuttaṁ.
an3.56:3.4	Tena bahū manussā kālaṁ karonti.
an3.56:3.5	Ayampi kho, brāhmaṇa, hetu ayaṁ paccayo yenetarahi manussānaṁ khayo hoti, tanuttaṁ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā honti.
an3.56:4.1	Puna caparaṁ, brāhmaṇa, etarahi manussā adhammarāgarattā visamalobhābhibhūtā micchādhammaparetā.
an3.56:4.2	Tesaṁ adhammarāgarattānaṁ visamalobhābhibhūtānaṁ micchādhammaparetānaṁ yakkhā vāḷe amanusse ossajjanti, tena bahū manussā kālaṁ karonti.
an3.56:4.3	Ayampi kho, brāhmaṇa, hetu ayaṁ paccayo yenetarahi manussānaṁ khayo hoti, tanuttaṁ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā hontī”ti.
an3.56:5.1	“Abhikkantaṁ, bho gotama …pe…
an3.56:5.2	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an3.56:5.3	Chaṭṭhaṁ.
an3.57:0.1	Aṅguttara Nikāya 3.57
an3.57:0.2	6. Brāhmaṇavagga
an3.57:0.3	Vacchagottasutta
an3.57:1.1	Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
an3.57:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vacchagotto paribbājako bhagavantaṁ etadavoca:
an3.57:1.3	“sutaṁ metaṁ, bho gotama, samaṇo gotamo evamāha:
an3.57:1.4	‘mayhameva dānaṁ dātabbaṁ, nāññesaṁ dānaṁ dātabbaṁ;
an3.57:1.5	mayhameva sāvakānaṁ dānaṁ dātabbaṁ, nāññesaṁ sāvakānaṁ dānaṁ dātabbaṁ;
an3.57:1.6	mayhameva dinnaṁ mahapphalaṁ, nāññesaṁ dinnaṁ mahapphalaṁ;
an3.57:1.7	mayhameva sāvakānaṁ dinnaṁ mahapphalaṁ, nāññesaṁ sāvakānaṁ dinnaṁ mahapphalan’ti.
an3.57:1.8	Ye te, bho gotama, evamāhaṁsu ‘samaṇo gotamo evamāha:
an3.57:1.9	“mayhameva dānaṁ dātabbaṁ, nāññesaṁ dānaṁ dātabbaṁ.
an3.57:1.10	Mayhameva sāvakānaṁ dānaṁ dātabbaṁ, nāññesaṁ sāvakānaṁ dānaṁ dātabbaṁ.
an3.57:1.11	Mayhameva dinnaṁ mahapphalaṁ, nāññesaṁ dinnaṁ mahapphalaṁ.
an3.57:1.12	Mayhameva sāvakānaṁ dinnaṁ mahapphalaṁ, nāññesaṁ sāvakānaṁ dinnaṁ mahapphalan”’ti.
an3.57:1.13	Kacci te bhoto gotamassa vuttavādino na ca bhavantaṁ gotamaṁ abhūtena abbhācikkhanti, dhammassa cānudhammaṁ byākaronti, na ca koci sahadhammiko vādānupāto gārayhaṁ ṭhānaṁ āgacchati?
an3.57:1.14	Anabbhakkhātukāmā hi mayaṁ bhavantaṁ gotaman”ti.
an3.57:2.1	“Ye te, vaccha, evamāhaṁsu:
an3.57:2.2	‘samaṇo gotamo evamāha:
an3.57:2.3	“mayhameva dānaṁ dātabbaṁ …pe…
an3.57:2.4	nāññesaṁ sāvakānaṁ dinnaṁ mahapphalan”’ti
an3.57:2.5	na me te vuttavādino. Abbhācikkhanti ca pana maṁ asatā abhūtena.
an3.57:2.6	Yo kho, vaccha, paraṁ dānaṁ dadantaṁ vāreti so tiṇṇaṁ antarāyakaro hoti, tiṇṇaṁ pāripanthiko.
an3.57:2.7	Katamesaṁ tiṇṇaṁ?
an3.57:2.8	Dāyakassa puññantarāyakaro hoti, paṭiggāhakānaṁ lābhantarāyakaro hoti, pubbeva kho panassa attā khato ca hoti upahato ca.
an3.57:2.9	Yo kho, vaccha, paraṁ dānaṁ dadantaṁ vāreti so imesaṁ tiṇṇaṁ antarāyakaro hoti, tiṇṇaṁ pāripanthiko.
an3.57:3.1	Ahaṁ kho pana, vaccha, evaṁ vadāmi:
an3.57:3.2	‘ye hi te candanikāya vā oligalle vā pāṇā, tatrapi yo thālidhovanaṁ vā sarāvadhovanaṁ vā chaḍḍeti:
an3.57:3.3	“ye tattha pāṇā te tena yāpentū”’ti, tato nidānampāhaṁ, vaccha, puññassa āgamaṁ vadāmi.
an3.57:3.4	Ko pana vādo manussabhūte.
an3.57:3.5	Api cāhaṁ, vaccha, sīlavato dinnaṁ mahapphalaṁ vadāmi, no tathā dussīlassa, so ca hoti pañcaṅgavippahīno pañcaṅgasamannāgato.
an3.57:4.1	Katamāni pañcaṅgāni pahīnāni honti?
an3.57:4.2	Kāmacchando pahīno hoti, byāpādo pahīno hoti, thinamiddhaṁ pahīnaṁ hoti, uddhaccakukkuccaṁ pahīnaṁ hoti, vicikicchā pahīnā hoti.
an3.57:4.3	Imāni pañcaṅgāni vippahīnāni honti.
an3.57:5.1	Katamehi pañcahi aṅgehi samannāgato hoti?
an3.57:5.2	Asekkhena sīlakkhandhena samannāgato hoti, asekkhena samādhikkhandhena samannāgato hoti, asekkhena paññākkhandhena samannāgato hoti, asekkhena vimuttikkhandhena samannāgato hoti, asekkhena vimuttiñāṇadassanakkhandhena samannāgato hoti;
an3.57:5.3	imehi pañcahi aṅgehi samannāgato hoti.
an3.57:5.4	Iti pañcaṅgavippahīne pañcaṅgasamannāgate dinnaṁ mahapphalanti vadāmīti.
an3.57:6.1	Iti kaṇhāsu setāsu,
an3.57:6.2	rohiṇīsu harīsu vā;
an3.57:6.3	Kammāsāsu sarūpāsu,
an3.57:6.4	gosu pārevatāsu vā.
an3.57:7.1	Yāsu kāsuci etāsu,
an3.57:7.2	danto jāyati puṅgavo;
an3.57:7.3	Dhorayho balasampanno,
an3.57:7.4	kalyāṇajavanikkamo;
an3.57:7.5	Tameva bhāre yuñjanti,
an3.57:7.6	nāssa vaṇṇaṁ parikkhare.
an3.57:8.1	Evamevaṁ manussesu,
an3.57:8.2	yasmiṁ kasmiñci jātiye;
an3.57:8.3	Khattiye brāhmaṇe vesse,
an3.57:8.4	sudde caṇḍālapukkuse.
an3.57:9.1	Yāsu kāsuci etāsu,
an3.57:9.2	danto jāyati subbato;
an3.57:9.3	Dhammaṭṭho sīlasampanno,
an3.57:9.4	saccavādī hirīmano.
an3.57:10.1	Pahīnajātimaraṇo,
an3.57:10.2	brahmacariyassa kevalī;
an3.57:10.3	Pannabhāro visaṁyutto,
an3.57:10.4	katakicco anāsavo.
an3.57:11.1	Pāragū sabbadhammānaṁ,
an3.57:11.2	anupādāya nibbuto;
an3.57:11.3	Tasmiṁyeva viraje khette,
an3.57:11.4	vipulā hoti dakkhiṇā.
an3.57:12.1	Bālā ca avijānantā,
an3.57:12.2	dummedhā assutāvino;
an3.57:12.3	Bahiddhā denti dānāni,
an3.57:12.4	na hi sante upāsare.
an3.57:13.1	Ye ca sante upāsanti,
an3.57:13.2	sappaññe dhīrasammate;
an3.57:13.3	Saddhā ca nesaṁ sugate,
an3.57:13.4	mūlajātā patiṭṭhitā.
an3.57:14.1	Devalokañca te yanti,
an3.57:14.2	kule vā idha jāyare;
an3.57:14.3	Anupubbena nibbānaṁ,
an3.57:14.4	adhigacchanti paṇḍitā”ti.
an3.57:14.5	Sattamaṁ.
an3.58:0.1	Aṅguttara Nikāya 3.58
an3.58:0.2	6. Brāhmaṇavagga
an3.58:0.3	Tikaṇṇasutta
an3.58:1.1	Atha kho tikaṇṇo brāhmaṇo yena bhagavā tenupasaṅkami; upasaṅkamitvā bhagavatā saddhiṁ …pe…
an3.58:1.2	ekamantaṁ nisinno kho tikaṇṇo brāhmaṇo bhagavato sammukhā tevijjānaṁ sudaṁ brāhmaṇānaṁ vaṇṇaṁ bhāsati:
an3.58:1.3	“evampi tevijjā brāhmaṇā, itipi tevijjā brāhmaṇā”ti.
an3.58:2.1	“Yathā kathaṁ pana, brāhmaṇa, brāhmaṇā brāhmaṇaṁ tevijjaṁ paññāpentī”ti?
an3.58:2.2	“Idha, bho gotama, brāhmaṇo ubhato sujāto hoti mātito ca pitito ca, saṁsuddhagahaṇiko yāva sattamā pitāmahayugā, akkhitto anupakkuṭṭho jātivādena, ajjhāyako, mantadharo, tiṇṇaṁ vedānaṁ pāragū sanighaṇḍukeṭubhānaṁ sākkharappabhedānaṁ itihāsapañcamānaṁ, padako, veyyākaraṇo, lokāyatamahāpurisalakkhaṇesu anavayoti.
an3.58:2.3	Evaṁ kho, bho gotama, brāhmaṇā brāhmaṇaṁ tevijjaṁ paññāpentī”ti.
an3.58:3.1	“Aññathā kho, brāhmaṇa, brāhmaṇā brāhmaṇaṁ tevijjaṁ paññāpenti, aññathā ca pana ariyassa vinaye tevijjo hotī”ti.
an3.58:3.2	“Yathā kathaṁ pana, bho gotama, ariyassa vinaye tevijjo hoti?
an3.58:3.3	Sādhu me bhavaṁ gotamo tathā dhammaṁ desetu yathā ariyassa vinaye tevijjo hotī”ti.
an3.58:3.4	“Tena hi, brāhmaṇa, suṇāhi, sādhukaṁ manasi karohi; bhāsissāmī”ti.
an3.58:3.5	“Evaṁ, bho”ti kho tikaṇṇo brāhmaṇo bhagavato paccassosi.
an3.58:3.6	Bhagavā etadavoca:
an3.58:4.1	“Idha, brāhmaṇa, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an3.58:4.2	Vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati.
an3.58:4.3	Pītiyā ca virāgā upekkhako ca viharati sato ca sampajāno, sukhañca kāyena paṭisaṁvedeti yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharati.
an3.58:4.4	Sukhassa ca pahānā dukkhassa ca pahānā, pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
an3.58:5.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṁ abhininnāmeti.
an3.58:5.2	So anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattārīsampi jātiyo paññāsampi jātiyo jātisatampi jātisahassampi jātisatasahassampi, anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe: ‘amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto amutra udapādiṁ. Tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto idhūpapanno’ti. Iti sākāraṁ sauddesaṁ anekavihitaṁ pubbenivāsaṁ anussarati.
an3.58:5.3	Ayamassa paṭhamā vijjā adhigatā hoti;
an3.58:5.4	avijjā vihatā, vijjā uppannā; tamo vihato, āloko uppanno yathā taṁ appamattassa ātāpino pahitattassa viharato.
an3.58:6.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṁ cutūpapātañāṇāya cittaṁ abhininnāmeti.
an3.58:6.2	So dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti: ‘ime vata bhonto sattā kāyaduccaritena samannāgatā …pe… manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā. Ime vā pana bhonto sattā kāyasucaritena samannāgatā, vacīsucaritena samannāgatā, manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā, te kāyassa bhedā paraṁ maraṇā sugatiṁ saggaṁ lokaṁ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti.
an3.58:6.3	Ayamassa dutiyā vijjā adhigatā hoti;
an3.58:6.4	avijjā vihatā, vijjā uppannā; tamo vihato, āloko uppanno yathā taṁ appamattassa ātāpino pahitattassa viharato.
an3.58:7.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṁ khayañāṇāya cittaṁ abhininnāmeti.
an3.58:7.2	So ‘idaṁ dukkhan’ti yathābhūtaṁ pajānāti, ‘ayaṁ dukkhasamudayo’ti yathābhūtaṁ pajānāti, ‘ayaṁ dukkhanirodho’ti yathābhūtaṁ pajānāti, ‘ayaṁ dukkhanirodhagāminī paṭipadā’ti yathābhūtaṁ pajānāti;
an3.58:7.3	‘ime āsavā’ti yathābhūtaṁ pajānāti, ‘ayaṁ āsavasamudayo’ti yathābhūtaṁ pajānāti, ‘ayaṁ āsavanirodho’ti yathābhūtaṁ pajānāti, ‘ayaṁ āsavanirodhagāminī paṭipadā’ti yathābhūtaṁ pajānāti.
an3.58:7.4	Tassa evaṁ jānato evaṁ passato kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccati;
an3.58:7.5	vimuttasmiṁ vimuttamiti ñāṇaṁ hoti.
an3.58:7.6	‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.
an3.58:7.7	Ayamassa tatiyā vijjā adhigatā hoti;
an3.58:7.8	avijjā vihatā, vijjā uppannā; tamo vihato, āloko uppanno yathā taṁ appamattassa ātāpino pahitattassa viharatoti.
an3.58:8.1	Anuccāvacasīlassa,
an3.58:8.2	nipakassa ca jhāyino;
an3.58:8.3	Cittaṁ yassa vasībhūtaṁ,
an3.58:8.4	ekaggaṁ susamāhitaṁ.
an3.58:9.1	Taṁ ve tamonudaṁ dhīraṁ,
an3.58:9.2	tevijjaṁ maccuhāyinaṁ;
an3.58:9.3	Hitaṁ devamanussānaṁ,
an3.58:9.4	āhu sabbappahāyinaṁ.
an3.58:10.1	Tīhi vijjāhi sampannaṁ,
an3.58:10.2	asammūḷhavihārinaṁ;
an3.58:10.3	Buddhaṁ antimadehinaṁ,
an3.58:10.4	taṁ namassanti gotamaṁ.
an3.58:11.1	Pubbenivāsaṁ yo vedī,
an3.58:11.2	saggāpāyañca passati;
an3.58:11.3	Atho jātikkhayaṁ patto,
an3.58:11.4	abhiññāvosito muni.
an3.58:12.1	Etāhi tīhi vijjāhi,
an3.58:12.2	tevijjo hoti brāhmaṇo;
an3.58:12.3	Tamahaṁ vadāmi tevijjaṁ,
an3.58:12.4	nāññaṁ lapitalāpananti.
an3.58:13.1	Evaṁ kho, brāhmaṇa, ariyassa vinaye tevijjo hotī”ti.
an3.58:13.2	“Aññathā, bho gotama, brāhmaṇānaṁ tevijjo, aññathā ca pana ariyassa vinaye tevijjo hoti.
an3.58:13.3	Imassa ca pana, bho gotama, ariyassa vinaye tevijjassa brāhmaṇānaṁ tevijjo kalaṁ nāgghati soḷasiṁ.
an3.58:14.1	Abhikkantaṁ, bho gotama …pe…
an3.58:14.2	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an3.58:14.3	Aṭṭhamaṁ.
an3.59:0.1	Aṅguttara Nikāya 3.59
an3.59:0.2	6. Brāhmaṇavagga
an3.59:0.3	Jāṇussoṇisutta
an3.59:1.1	Atha kho jāṇussoṇi brāhmaṇo yena bhagavā tenupasaṅkami; upasaṅkamitvā bhagavatā saddhiṁ …pe… ekamantaṁ nisinno kho jāṇussoṇi brāhmaṇo bhagavantaṁ etadavoca:
an3.59:1.2	“yassassu, bho gotama, yañño vā saddhaṁ vā thālipāko vā deyyadhammaṁ vā, tevijjesu brāhmaṇesu dānaṁ dadeyyā”ti.
an3.59:1.3	“Yathā kathaṁ pana, brāhmaṇa, brāhmaṇā tevijjaṁ paññapentī”ti?
an3.59:1.4	“Idha kho, bho gotama, brāhmaṇo ubhato sujāto hoti mātito ca pitito ca saṁsuddhagahaṇiko yāva sattamā pitāmahayugā akkhitto anupakkuṭṭho jātivādena, ajjhāyako mantadharo, tiṇṇaṁ vedānaṁ pāragū sanighaṇḍukeṭubhānaṁ sākkharappabhedānaṁ itihāsapañcamānaṁ, padako, veyyākaraṇo, lokāyatamahāpurisalakkhaṇesu anavayoti.
an3.59:1.5	Evaṁ kho, bho gotama, brāhmaṇā tevijjaṁ paññapentī”ti.
an3.59:2.1	“Aññathā kho, brāhmaṇa, brāhmaṇā brāhmaṇaṁ tevijjaṁ paññapenti, aññathā ca pana ariyassa vinaye tevijjo hotī”ti.
an3.59:2.2	“Yathā kathaṁ pana, bho gotama, ariyassa vinaye tevijjo hoti?
an3.59:2.3	Sādhu me bhavaṁ gotamo tathā dhammaṁ desetu yathā ariyassa vinaye tevijjo hotī”ti.
an3.59:2.4	“Tena hi, brāhmaṇa, suṇāhi, sādhukaṁ manasi karohi; bhāsissāmī”ti.
an3.59:2.5	“Evaṁ, bho”ti kho jāṇussoṇi brāhmaṇo bhagavato paccassosi.
an3.59:2.6	Bhagavā etadavoca:
an3.59:3.1	“Idha pana, brāhmaṇa, bhikkhu vivicceva kāmehi …pe…
an3.59:3.2	catutthaṁ jhānaṁ upasampajja viharati.
an3.59:4.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṁ abhininnāmeti.
an3.59:4.2	So anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati.
an3.59:4.3	Ayamassa paṭhamā vijjā adhigatā hoti;
an3.59:4.4	avijjā vihatā, vijjā uppannā; tamo vihato, āloko uppanno yathā taṁ appamattassa ātāpino pahitattassa viharato.
an3.59:5.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṁ cutūpapātañāṇāya cittaṁ abhininnāmeti.
an3.59:5.2	So dibbena cakkhunā visuddhena atikkantamānusakena …pe… yathākammūpage satte pajānāti.
an3.59:5.3	Ayamassa dutiyā vijjā adhigatā hoti;
an3.59:5.4	avijjā vihatā, vijjā uppannā; tamo vihato, āloko uppanno yathā taṁ appamattassa ātāpino pahitattassa viharato.
an3.59:6.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṁ khayañāṇāya cittaṁ abhininnāmeti.
an3.59:6.2	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti;
an3.59:6.3	‘ime āsavā’ti yathābhūtaṁ pajānāti …pe… ‘ayaṁ āsavanirodhagāminī paṭipadā’ti yathābhūtaṁ pajānāti.
an3.59:6.4	Tassa evaṁ jānato evaṁ passato kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccati;
an3.59:6.5	vimuttasmiṁ vimuttamiti ñāṇaṁ hoti.
an3.59:6.6	‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.
an3.59:6.7	Ayamassa tatiyā vijjā adhigatā hoti;
an3.59:6.8	avijjā vihatā, vijjā uppannā; tamo vihato, āloko uppanno yathā taṁ appamattassa ātāpino pahitattassa viharatoti.
an3.59:7.1	Yo sīlabbatasampanno,
an3.59:7.2	pahitatto samāhito;
an3.59:7.3	Cittaṁ yassa vasībhūtaṁ,
an3.59:7.4	ekaggaṁ susamāhitaṁ.
an3.59:8.1	Pubbenivāsaṁ yo vedī,
an3.59:8.2	saggāpāyañca passati;
an3.59:8.3	Atho jātikkhayaṁ patto,
an3.59:8.4	abhiññāvosito muni.
an3.59:9.1	Etāhi tīhi vijjāhi,
an3.59:9.2	tevijjo hoti brāhmaṇo;
an3.59:9.3	Tamahaṁ vadāmi tevijjaṁ,
an3.59:9.4	nāññaṁ lapitalāpananti.
an3.59:10.1	Evaṁ kho, brāhmaṇa, ariyassa vinaye tevijjo hotī”ti.
an3.59:10.2	“Aññathā, bho gotama, brāhmaṇānaṁ tevijjo, aññathā ca pana ariyassa vinaye tevijjo hoti.
an3.59:10.3	Imassa ca, bho gotama, ariyassa vinaye tevijjassa brāhmaṇānaṁ tevijjo kalaṁ nāgghati soḷasiṁ.
an3.59:11.1	Abhikkantaṁ, bho gotama …pe…
an3.59:11.2	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an3.59:11.3	Navamaṁ.
an3.60:0.1	Aṅguttara Nikāya 3.60
an3.60:0.2	6. Brāhmaṇavagga
an3.60:0.3	Saṅgāravasutta
an3.60:1.1	Atha kho saṅgāravo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an3.60:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho saṅgāravo brāhmaṇo bhagavantaṁ etadavoca:
an3.60:1.3	“mayamassu, bho gotama, brāhmaṇā nāma.
an3.60:1.4	Yaññaṁ yajāmapi yajāpemapi.
an3.60:1.5	Tatra, bho gotama, yo ceva yajati yo ca yajāpeti sabbe te anekasārīrikaṁ puññappaṭipadaṁ paṭipannā honti, yadidaṁ yaññādhikaraṇaṁ.
an3.60:1.6	Yo panāyaṁ, bho gotama, yassa vā tassa vā kulā agārasmā anagāriyaṁ pabbajito ekamattānaṁ dameti, ekamattānaṁ sameti, ekamattānaṁ parinibbāpeti, evamassāyaṁ ekasārīrikaṁ puññappaṭipadaṁ paṭipanno hoti, yadidaṁ pabbajjādhikaraṇan”ti.
an3.60:2.1	“Tena hi, brāhmaṇa, taññevettha paṭipucchissāmi. Yathā te khameyya tathā naṁ byākareyyāsi.
an3.60:2.2	Taṁ kiṁ maññasi, brāhmaṇa,
an3.60:2.3	idha tathāgato loke uppajjati arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā.
an3.60:2.4	So evamāha:
an3.60:2.5	‘ethāyaṁ maggo ayaṁ paṭipadā yathāpaṭipanno ahaṁ anuttaraṁ brahmacariyogadhaṁ sayaṁ abhiññā sacchikatvā pavedemi;
an3.60:2.6	etha, tumhepi tathā paṭipajjatha, yathāpaṭipannā tumhepi anuttaraṁ brahmacariyogadhaṁ sayaṁ abhiññā sacchikatvā upasampajja viharissathā’ti.
an3.60:2.7	Iti ayañceva satthā dhammaṁ deseti, pare ca tathatthāya paṭipajjanti, tāni kho pana honti anekānipi satāni anekānipi sahassāni anekānipi satasahassāni.
an3.60:3.1	Taṁ kiṁ maññasi, brāhmaṇa,
an3.60:3.2	iccāyaṁ evaṁ sante ekasārīrikā vā puññappaṭipadā hoti anekasārīrikā vā, yadidaṁ pabbajjādhikaraṇan”ti?
an3.60:3.3	“Iccāyampi, bho gotama, evaṁ sante anekasārīrikā puññappaṭipadā hoti, yadidaṁ pabbajjādhikaraṇan”ti.
an3.60:4.1	Evaṁ vutte, āyasmā ānando saṅgāravaṁ brāhmaṇaṁ etadavoca:
an3.60:4.2	“imāsaṁ te, brāhmaṇa, dvinnaṁ paṭipadānaṁ katamā paṭipadā khamati appatthatarā ca appasamārambhatarā ca mahapphalatarā ca mahānisaṁsatarā cā”ti?
an3.60:4.3	Evaṁ vutte, saṅgāravo brāhmaṇo āyasmantaṁ ānandaṁ etadavoca:
an3.60:4.4	“seyyathāpi bhavaṁ gotamo bhavaṁ cānando.
an3.60:4.5	Ete me pujjā, ete me pāsaṁsā”ti.
an3.60:5.1	Dutiyampi kho āyasmā ānando saṅgāravaṁ brāhmaṇaṁ etadavoca:
an3.60:5.2	“na kho tyāhaṁ, brāhmaṇa, evaṁ pucchāmi:
an3.60:5.3	‘ke vā te pujjā ke vā te pāsaṁsā’ti?
an3.60:5.4	Evaṁ kho tyāhaṁ, brāhmaṇa, pucchāmi:
an3.60:5.5	‘imāsaṁ te, brāhmaṇa, dvinnaṁ paṭipadānaṁ katamā paṭipadā khamati appatthatarā ca appasamārambhatarā ca mahapphalatarā ca mahānisaṁsatarā cā’”ti?
an3.60:5.6	Dutiyampi kho saṅgāravo brāhmaṇo āyasmantaṁ ānandaṁ etadavoca:
an3.60:5.7	“seyyathāpi bhavaṁ gotamo bhavaṁ cānando.
an3.60:5.8	Ete me pujjā, ete me pāsaṁsā”ti.
an3.60:6.1	Tatiyampi kho āyasmā ānando saṅgāravaṁ brāhmaṇaṁ etadavoca:
an3.60:6.2	“na kho tyāhaṁ, brāhmaṇa, evaṁ pucchāmi:
an3.60:6.3	‘ke vā te pujjā ke vā te pāsaṁsā’ti?
an3.60:6.4	Evaṁ kho tyāhaṁ, brāhmaṇa, pucchāmi:
an3.60:6.5	‘imāsaṁ te, brāhmaṇa, dvinnaṁ paṭipadānaṁ katamā paṭipadā khamati appatthatarā ca appasamārambhatarā ca mahapphalatarā ca mahānisaṁsatarā cā’”ti?
an3.60:6.6	Tatiyampi kho saṅgāravo brāhmaṇo āyasmantaṁ ānandaṁ etadavoca:
an3.60:6.7	“seyyathāpi bhavaṁ gotamo bhavaṁ cānando.
an3.60:6.8	Ete me pujjā, ete me pāsaṁsā”ti.
an3.60:7.1	Atha kho bhagavato etadahosi:
an3.60:7.2	“yāva tatiyampi kho saṅgāravo brāhmaṇo ānandena sahadhammikaṁ pañhaṁ puṭṭho saṁsādeti no vissajjeti.
an3.60:7.3	Yannūnāhaṁ parimoceyyan”ti.
an3.60:7.4	Atha kho bhagavā saṅgāravaṁ brāhmaṇaṁ etadavoca:
an3.60:7.5	“kā nvajja, brāhmaṇa, rājantepure rājapurisānaṁ sannisinnānaṁ sannipatitānaṁ antarākathā udapādī”ti?
an3.60:7.6	“Ayaṁ khvajja, bho gotama, rājantepure rājapurisānaṁ sannisinnānaṁ sannipatitānaṁ antarākathā udapādi:
an3.60:7.7	‘pubbe sudaṁ appatarā ceva bhikkhū ahesuṁ bahutarā ca uttari manussadhammā iddhipāṭihāriyaṁ dassesuṁ;
an3.60:7.8	etarahi pana bahutarā ceva bhikkhū appatarā ca uttari manussadhammā iddhipāṭihāriyaṁ dassentī’ti.
an3.60:7.9	Ayaṁ khvajja, bho gotama, rājantepure rājapurisānaṁ sannisinnānaṁ sannipatitānaṁ antarākathā udapādī”ti.
an3.60:8.1	“Tīṇi kho imāni, brāhmaṇa, pāṭihāriyāni.
an3.60:8.2	Katamāni tīṇi?
an3.60:8.3	Iddhipāṭihāriyaṁ, ādesanāpāṭihāriyaṁ, anusāsanīpāṭihāriyaṁ.
an3.60:8.4	Katamañca, brāhmaṇa, iddhipāṭihāriyaṁ?
an3.60:8.5	Idha, brāhmaṇa, ekacco anekavihitaṁ iddhividhaṁ paccanubhoti: ‘ekopi hutvā bahudhā hoti, bahudhāpi hutvā eko hoti; āvibhāvaṁ, tirobhāvaṁ; tirokuṭṭaṁ tiropākāraṁ tiropabbataṁ asajjamāno gacchati, seyyathāpi ākāse; pathaviyāpi ummujjanimujjaṁ karoti, seyyathāpi udake; udakepi abhijjamāne gacchati, seyyathāpi pathaviyaṁ; ākāsepi pallaṅkena kamati, seyyathāpi pakkhī sakuṇo; imepi candimasūriye evaṁmahiddhike evaṁmahānubhāve pāṇinā parimasati parimajjati, yāva brahmalokāpi kāyena vasaṁ vatteti’.
an3.60:8.6	Idaṁ vuccati, brāhmaṇa, iddhipāṭihāriyaṁ.
an3.60:9.1	Katamañca, brāhmaṇa, ādesanāpāṭihāriyaṁ?
an3.60:9.2	Idha, brāhmaṇa, ekacco nimittena ādisati:
an3.60:9.3	‘evampi te mano, itthampi te mano, itipi te cittan’ti.
an3.60:9.4	So bahuñcepi ādisati tatheva taṁ hoti, no aññathā.
an3.60:10.1	Idha pana, brāhmaṇa, ekacco na heva kho nimittena ādisati, api ca kho manussānaṁ vā amanussānaṁ vā devatānaṁ vā saddaṁ sutvā ādisati:
an3.60:10.2	‘evampi te mano, itthampi te mano, itipi te cittan’ti.
an3.60:10.3	So bahuñcepi ādisati tatheva taṁ hoti, no aññathā.
an3.60:11.1	Idha pana, brāhmaṇa, ekacco na heva kho nimittena ādisati napi manussānaṁ vā amanussānaṁ vā devatānaṁ vā saddaṁ sutvā ādisati, api ca kho vitakkayato vicārayato vitakkavipphārasaddaṁ sutvā ādisati:
an3.60:11.2	‘evampi te mano, itthampi te mano, itipi te cittan’ti.
an3.60:11.3	So bahuñcepi ādisati tatheva taṁ hoti, no aññathā.
an3.60:12.1	Idha pana, brāhmaṇa, ekacco na heva kho nimittena ādisati, napi manussānaṁ vā amanussānaṁ vā devatānaṁ vā saddaṁ sutvā ādisati, napi vitakkayato vicārayato vitakkavipphārasaddaṁ sutvā ādisati, api ca kho avitakkaṁ avicāraṁ samādhiṁ samāpannassa cetasā ceto paricca pajānāti:
an3.60:12.2	‘yathā imassa bhoto manosaṅkhārā paṇihitā imassa cittassa anantarā amuṁ nāma vitakkaṁ vitakkessatī’ti.
an3.60:12.3	So bahuñcepi ādisati tatheva taṁ hoti, no aññathā.
an3.60:12.4	Idaṁ vuccati, brāhmaṇa, ādesanāpāṭihāriyaṁ.
an3.60:13.1	Katamañca, brāhmaṇa, anusāsanīpāṭihāriyaṁ?
an3.60:13.2	Idha, brāhmaṇa, ekacco evamanusāsati:
an3.60:13.3	‘evaṁ vitakketha, mā evaṁ vitakkayittha; evaṁ manasi karotha, mā evaṁ manasākattha; idaṁ pajahatha, idaṁ upasampajja viharathā’ti.
an3.60:13.4	Idaṁ vuccati, brāhmaṇa, anusāsanīpāṭihāriyaṁ.
an3.60:13.5	Imāni kho, brāhmaṇa, tīṇi pāṭihāriyāni.
an3.60:13.6	Imesaṁ te, brāhmaṇa, tiṇṇaṁ pāṭihāriyānaṁ katamaṁ pāṭihāriyaṁ khamati abhikkantatarañca paṇītatarañcā”ti?
an3.60:14.1	“Tatra, bho gotama, yadidaṁ pāṭihāriyaṁ idhekacco anekavihitaṁ iddhividhaṁ paccanubhoti …pe…
an3.60:14.2	yāva brāhmalokāpi kāyena vasaṁ vatteti,
an3.60:14.3	idaṁ, bho gotama, pāṭihāriyaṁ yova naṁ karoti sova naṁ paṭisaṁvedeti, yova naṁ karoti tasseva taṁ hoti.
an3.60:14.4	Idaṁ me, bho gotama, pāṭihāriyaṁ māyāsahadhammarūpaṁ viya khāyati.
an3.60:15.1	Yampidaṁ, bho gotama, pāṭihāriyaṁ idhekacco nimittena ādisati:
an3.60:15.2	‘evampi te mano, itthampi te mano, itipi te cittan’ti, so bahuñcepi ādisati tatheva taṁ hoti, no aññathā.
an3.60:15.3	Idha pana, bho gotama, ekacco na heva kho nimittena ādisati, api ca kho manussānaṁ vā amanussānaṁ vā devatānaṁ vā saddaṁ sutvā ādisati …pe…
an3.60:15.4	napi manussānaṁ vā amanussānaṁ vā devatānaṁ vā saddaṁ sutvā ādisati, api ca kho vitakkayato vicārayato vitakkavipphārasaddaṁ sutvā ādisati …pe…
an3.60:15.5	napi vitakkayato vicārayato vitakkavipphārasaddaṁ sutvā ādisati, api ca kho avitakkaṁ avicāraṁ samādhiṁ samāpannassa cetasā ceto paricca pajānāti:
an3.60:15.6	‘yathā imassa bhoto manosaṅkhārā paṇihitā imassa cittassa anantarā amhaṁ nāma vitakkaṁ vitakkessatī’ti, so bahuñcepi ādisati tatheva taṁ hoti, no aññathā.
an3.60:15.7	Idampi, bho gotama, pāṭihāriyaṁ yova naṁ karoti sova naṁ paṭisaṁvedeti, yova naṁ karoti tasseva taṁ hoti.
an3.60:15.8	Idampi me, bho gotama, pāṭihāriyaṁ māyāsahadhammarūpaṁ viya khāyati.
an3.60:16.1	Yañca kho idaṁ, bho gotama, pāṭihāriyaṁ idhekacco evaṁ anusāsati:
an3.60:16.2	‘evaṁ vitakketha, mā evaṁ vitakkayittha; evaṁ manasi karotha, mā evaṁ manasākattha; idaṁ pajahatha, idaṁ upasampajja viharathā’ti.
an3.60:16.3	Idameva, bho gotama, pāṭihāriyaṁ khamati imesaṁ tiṇṇaṁ pāṭihāriyānaṁ abhikkantatarañca paṇītatarañca.
an3.60:17.1	Acchariyaṁ, bho gotama, abbhutaṁ, bho gotama.
an3.60:17.2	Yāvasubhāsitamidaṁ bhotā gotamena imehi ca mayaṁ tīhi pāṭihāriyehi samannāgataṁ bhavantaṁ gotamaṁ dhārema.
an3.60:17.3	Bhavañhi gotamo anekavihitaṁ iddhividhaṁ paccanubhoti …pe… yāva brahmalokāpi kāyena vasaṁ vatteti,
an3.60:17.4	bhavañhi gotamo avitakkaṁ avicāraṁ samādhiṁ samāpannassa cetasā ceto paricca pajānāti:
an3.60:17.5	‘yathā imassa bhoto manosaṅkhārā paṇihitā imassa cittassa anantarā amuṁ nāma vitakkaṁ vitakkessatī’ti.
an3.60:17.6	Bhavañhi gotamo evamanusāsati:
an3.60:17.7	‘evaṁ vitakketha, mā evaṁ vitakkayittha; evaṁ manasi karotha, mā evaṁ manasākattha; idaṁ pajahatha, idaṁ upasampajja viharathā’”ti.
an3.60:18.1	“Addhā kho tyāhaṁ, brāhmaṇa, āsajja upanīya vācā bhāsitā;
an3.60:18.2	api ca tyāhaṁ byākarissāmi.
an3.60:18.3	Ahañhi, brāhmaṇa, anekavihitaṁ iddhividhaṁ paccanubhomi …pe… yāva brahmalokāpi kāyena vasaṁ vattemi.
an3.60:18.4	Ahañhi, brāhmaṇa, avitakkaṁ avicāraṁ samādhiṁ samāpannassa cetasā ceto paricca pajānāmi:
an3.60:18.5	‘yathā imassa bhoto manosaṅkhārā paṇihitā, imassa cittassa anantarā amuṁ nāma vitakkaṁ vitakkessatī’ti.
an3.60:18.6	Ahañhi, brāhmaṇa, evamanusāsāmi:
an3.60:18.7	‘evaṁ vitakketha, mā evaṁ vitakkayittha; evaṁ manasi karotha, mā evaṁ manasākattha; idaṁ pajahatha, idaṁ upasampajja viharathā’”ti.
an3.60:19.1	“Atthi pana, bho gotama, añño ekabhikkhupi yo imehi tīhi pāṭihāriyehi samannāgato, aññatra bhotā gotamenā”ti?
an3.60:19.2	“Na kho, brāhmaṇa, ekaṁyeva sataṁ na dve satāni na tīṇi satāni na cattāri satāni na pañca satāni, atha kho bhiyyova, ye bhikkhū imehi tīhi pāṭihāriyehi samannāgatā”ti.
an3.60:19.3	“Kahaṁ pana, bho gotama, etarahi te bhikkhū viharantī”ti?
an3.60:19.4	“Imasmiṁyeva kho, brāhmaṇa, bhikkhusaṅghe”ti.
an3.60:20.1	“Abhikkantaṁ, bho gotama, abhikkantaṁ, bho gotama.
an3.60:20.2	Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.
an3.60:20.3	Esāhaṁ bhavantaṁ gotamaṁ saraṇaṁ gacchāmi, dhammañca bhikkhusaṅghañca.
an3.60:20.4	Upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an3.60:20.5	Dasamaṁ.
an3.60:20.6	Brāhmaṇavaggo paṭhamo.
an3.60:21.0	Tassuddānaṁ
an3.60:21.1	Dve brāhmaṇā caññataro,
an3.60:21.2	paribbājakena nibbutaṁ;
an3.60:21.3	Palokavaccho tikaṇṇo,
an3.60:21.4	soṇi saṅgāravena cāti.
an3.61:0.1	Aṅguttara Nikāya 3.61
an3.61:0.2	7. Mahāvagga
an3.61:0.3	Titthāyatanasutta
an3.61:1.1	“Tīṇimāni, bhikkhave, titthāyatanāni yāni paṇḍitehi samanuyuñjiyamānāni samanugāhiyamānāni samanubhāsiyamānāni parampi gantvā akiriyāya saṇṭhahanti.
an3.61:1.2	Katamāni tīṇi?
an3.61:1.3	Santi, bhikkhave, eke samaṇabrāhmaṇā evaṁvādino evaṁdiṭṭhino:
an3.61:1.4	‘yaṁ kiñcāyaṁ purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbaṁ taṁ pubbekatahetū’ti.
an3.61:1.5	Santi, bhikkhave, eke samaṇabrāhmaṇā evaṁvādino evaṁdiṭṭhino:
an3.61:1.6	‘yaṁ kiñcāyaṁ purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbaṁ taṁ issaranimmānahetū’ti.
an3.61:1.7	Santi, bhikkhave, eke samaṇabrāhmaṇā evaṁvādino evaṁdiṭṭhino:
an3.61:1.8	‘yaṁ kiñcāyaṁ purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbaṁ taṁ ahetuappaccayā’ti.
an3.61:2.1	Tatra, bhikkhave, ye te samaṇabrāhmaṇā evaṁvādino evaṁdiṭṭhino:
an3.61:2.2	‘yaṁ kiñcāyaṁ purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbaṁ taṁ pubbekatahetū’ti, tyāhaṁ upasaṅkamitvā evaṁ vadāmi:
an3.61:2.3	‘saccaṁ kira tumhe āyasmanto evaṁvādino evaṁdiṭṭhino:
an3.61:2.4	“yaṁ kiñcāyaṁ purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbaṁ taṁ pubbekatahetū”’ti?
an3.61:2.5	Te ca me evaṁ puṭṭhā ‘āmā’ti paṭijānanti.
an3.61:2.6	Tyāhaṁ evaṁ vadāmi:
an3.61:2.7	‘tenahāyasmanto pāṇātipātino bhavissanti pubbekatahetu, adinnādāyino bhavissanti pubbekatahetu, abrahmacārino bhavissanti pubbekatahetu, musāvādino bhavissanti pubbekatahetu, pisuṇavācā bhavissanti pubbekatahetu, pharusavācā bhavissanti pubbekatahetu, samphappalāpino bhavissanti pubbekatahetu, abhijjhāluno bhavissanti pubbekatahetu, byāpannacittā bhavissanti pubbekatahetu, micchādiṭṭhikā bhavissanti pubbekatahetu’.
an3.61:3.1	Pubbekataṁ kho pana, bhikkhave, sārato paccāgacchataṁ na hoti chando vā vāyāmo vā idaṁ vā karaṇīyaṁ idaṁ vā akaraṇīyanti.
an3.61:3.2	Iti karaṇīyākaraṇīye kho pana saccato thetato anupalabbhiyamāne muṭṭhassatīnaṁ anārakkhānaṁ viharataṁ na hoti paccattaṁ sahadhammiko samaṇavādo.
an3.61:3.3	Ayaṁ kho me, bhikkhave, tesu samaṇabrāhmaṇesu evaṁvādīsu evaṁdiṭṭhīsu paṭhamo sahadhammiko niggaho hoti.
an3.61:4.1	Tatra, bhikkhave, ye te samaṇabrāhmaṇā evaṁvādino evaṁdiṭṭhino:
an3.61:4.2	‘yaṁ kiñcāyaṁ purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbaṁ taṁ issaranimmānahetū’ti, tyāhaṁ upasaṅkamitvā evaṁ vadāmi:
an3.61:4.3	‘saccaṁ kira tumhe āyasmanto evaṁvādino evaṁdiṭṭhino—
an3.61:4.4	yaṁ kiñcāyaṁ purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbaṁ taṁ issaranimmānahetū’ti?
an3.61:4.5	Te ca me evaṁ puṭṭhā ‘āmā’ti paṭijānanti.
an3.61:4.6	Tyāhaṁ evaṁ vadāmi:
an3.61:4.7	‘tenahāyasmanto pāṇātipātino bhavissanti issaranimmānahetu, adinnādāyino bhavissanti issaranimmānahetu, abrahmacārino bhavissanti issaranimmānahetu, musāvādino bhavissanti issaranimmānahetu, pisuṇavācā bhavissanti issaranimmānahetu, pharusavācā bhavissanti issaranimmānahetu, samphappalāpino bhavissanti issaranimmānahetu, abhijjhāluno bhavissanti issaranimmānahetu, byāpannacittā bhavissanti issaranimmānahetu, micchādiṭṭhikā bhavissanti issaranimmānahetu’.
an3.61:5.1	Issaranimmānaṁ kho pana, bhikkhave, sārato paccāgacchataṁ na hoti chando vā vāyāmo vā idaṁ vā karaṇīyaṁ idaṁ vā akaraṇīyanti.
an3.61:5.2	Iti karaṇīyākaraṇīye kho pana saccato thetato anupalabbhiyamāne muṭṭhassatīnaṁ anārakkhānaṁ viharataṁ na hoti paccattaṁ sahadhammiko samaṇavādo.
an3.61:5.3	Ayaṁ kho me, bhikkhave, tesu samaṇabrāhmaṇesu evaṁvādīsu evaṁdiṭṭhīsu dutiyo sahadhammiko niggaho hoti.
an3.61:6.1	Tatra, bhikkhave, ye te samaṇabrāhmaṇā evaṁvādino evaṁdiṭṭhino:
an3.61:6.2	‘yaṁ kiñcāyaṁ purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbaṁ taṁ ahetuappaccayā’ti, tyāhaṁ upasaṅkamitvā evaṁ vadāmi:
an3.61:6.3	‘saccaṁ kira tumhe āyasmanto evaṁvādino evaṁdiṭṭhino—
an3.61:6.4	yaṁ kiñcāyaṁ purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbaṁ taṁ ahetuappaccayā’ti?
an3.61:6.5	Te ca me evaṁ puṭṭhā ‘āmā’ti paṭijānanti.
an3.61:6.6	Tyāhaṁ evaṁ vadāmi:
an3.61:6.7	‘tenahāyasmanto pāṇātipātino bhavissanti ahetuappaccayā …pe… micchādiṭṭhikā bhavissanti ahetuappaccayā’”.
an3.61:7.1	Ahetuappaccayaṁ kho pana, bhikkhave, sārato paccāgacchataṁ na hoti chando vā vāyāmo vā idaṁ vā karaṇīyaṁ idaṁ vā akaraṇīyanti.
an3.61:7.2	Iti karaṇīyākaraṇīye kho pana saccato thetato anupalabbhiyamāne muṭṭhassatīnaṁ anārakkhānaṁ viharataṁ na hoti paccattaṁ sahadhammiko samaṇavādo.
an3.61:7.3	Ayaṁ kho me, bhikkhave, tesu samaṇabrāhmaṇesu evaṁvādīsu evaṁdiṭṭhīsu tatiyo sahadhammiko niggaho hoti.
an3.61:8.1	Imāni kho, bhikkhave, tīṇi titthāyatanāni yāni paṇḍitehi samanuyuñjiyamānāni samanugāhiyamānāni samanubhāsiyamānāni parampi gantvā akiriyāya saṇṭhahanti.
an3.61:9.1	Ayaṁ kho pana, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhi.
an3.61:9.2	Katamo ca, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhi?
an3.61:9.3	Imā cha dhātuyoti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhi.
an3.61:9.4	Imāni cha phassāyatanānīti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhi.
an3.61:9.5	Ime aṭṭhārasa manopavicārāti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhi.
an3.61:9.6	Imāni cattāri ariyasaccānīti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhi.
an3.61:10.1	Imā cha dhātuyoti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhīti.
an3.61:10.2	Iti kho panetaṁ vuttaṁ.
an3.61:10.3	Kiñcetaṁ paṭicca vuttaṁ?
an3.61:10.4	Chayimā, bhikkhave, dhātuyo—
an3.61:10.5	pathavīdhātu, āpodhātu, tejodhātu, vāyodhātu, ākāsadhātu, viññāṇadhātu.
an3.61:10.6	Imā cha dhātuyoti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhīti.
an3.61:10.7	Iti yaṁ taṁ vuttaṁ, idametaṁ paṭicca vuttaṁ.
an3.61:11.1	Imāni cha phassāyatanānīti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhīti.
an3.61:11.2	Iti kho panetaṁ vuttaṁ.
an3.61:11.3	Kiñcetaṁ paṭicca vuttaṁ?
an3.61:11.4	Chayimāni, bhikkhave, phassāyatanāni—
an3.61:11.5	cakkhu phassāyatanaṁ, sotaṁ phassāyatanaṁ, ghānaṁ phassāyatanaṁ, jivhā phassāyatanaṁ, kāyo phassāyatanaṁ, mano phassāyatanaṁ.
an3.61:11.6	Imāni cha phassāyatanānīti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhīti.
an3.61:11.7	Iti yaṁ taṁ vuttaṁ, idametaṁ paṭicca vuttaṁ.
an3.61:12.1	Ime aṭṭhārasa manopavicārāti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhīti.
an3.61:12.2	Iti kho panetaṁ vuttaṁ.
an3.61:12.3	Kiñcetaṁ paṭicca vuttaṁ?
an3.61:12.4	Cakkhunā rūpaṁ disvā somanassaṭṭhāniyaṁ rūpaṁ upavicarati domanassaṭṭhāniyaṁ rūpaṁ upavicarati upekkhāṭṭhāniyaṁ rūpaṁ upavicarati,
an3.61:12.5	sotena saddaṁ sutvā …
an3.61:12.6	ghānena gandhaṁ ghāyitvā …
an3.61:12.7	jivhāya rasaṁ sāyitvā …
an3.61:12.8	kāyena phoṭṭhabbaṁ phusitvā …
an3.61:12.9	manasā dhammaṁ viññāya somanassaṭṭhāniyaṁ dhammaṁ upavicarati domanassaṭṭhāniyaṁ dhammaṁ upavicarati upekkhāṭṭhāniyaṁ dhammaṁ upavicarati.
an3.61:12.10	Ime aṭṭhārasa manopavicārāti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhīti.
an3.61:12.11	Iti yaṁ taṁ vuttaṁ, idametaṁ paṭicca vuttaṁ.
an3.61:13.1	Imāni cattāri ariyasaccānīti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhīti.
an3.61:13.2	Iti kho panetaṁ vuttaṁ.
an3.61:13.3	Kiñcetaṁ paṭicca vuttaṁ?
an3.61:13.4	Channaṁ, bhikkhave, dhātūnaṁ upādāya gabbhassāvakkanti hoti;
an3.61:13.5	okkantiyā sati nāmarūpaṁ, nāmarūpapaccayā saḷāyatanaṁ, saḷāyatanapaccayā phasso, phassapaccayā vedanā.
an3.61:13.6	Vediyamānassa kho panāhaṁ, bhikkhave, idaṁ dukkhanti paññapemi, ayaṁ dukkhasamudayoti paññapemi, ayaṁ dukkhanirodhoti paññapemi, ayaṁ dukkhanirodhagāminī paṭipadāti paññapemi.
an3.61:14.1	Katamañca, bhikkhave, dukkhaṁ ariyasaccaṁ?
an3.61:14.2	Jātipi dukkhā, jarāpi dukkhā, (…) maraṇampi dukkhaṁ, sokaparidevadukkhadomanassupāyāsāpi dukkhā, appiyehi sampayogo dukkho, piyehi vippayogo dukkho, yampicchaṁ na labhati tampi dukkhaṁ. Saṅkhittena pañcupādānakkhandhā dukkhā.
an3.61:14.3	Idaṁ vuccati, bhikkhave, dukkhaṁ ariyasaccaṁ.
an3.61:15.1	Katamañca, bhikkhave, dukkhasamudayaṁ ariyasaccaṁ?
an3.61:15.2	Avijjāpaccayā saṅkhārā,
an3.61:15.3	saṅkhārapaccayā viññāṇaṁ,
an3.61:15.4	viññāṇapaccayā nāmarūpaṁ,
an3.61:15.5	nāmarūpapaccayā saḷāyatanaṁ,
an3.61:15.6	saḷāyatanapaccayā phasso,
an3.61:15.7	phassapaccayā vedanā,
an3.61:15.8	vedanāpaccayā taṇhā,
an3.61:15.9	taṇhāpaccayā upādānaṁ,
an3.61:15.10	upādānapaccayā bhavo,
an3.61:15.11	bhavapaccayā jāti,
an3.61:15.12	jātipaccayā jarāmaraṇaṁ sokaparidevadukkhadomanassupāyāsā sambhavanti.
an3.61:15.13	Evametassa kevalassa dukkhakkhandhassa samudayo hoti.
an3.61:15.14	Idaṁ vuccati, bhikkhave, dukkhasamudayaṁ ariyasaccaṁ.
an3.61:16.1	Katamañca, bhikkhave, dukkhanirodhaṁ ariyasaccaṁ?
an3.61:16.2	Avijjāya tveva asesavirāganirodhā saṅkhāranirodho,
an3.61:16.3	saṅkhāranirodhā viññāṇanirodho,
an3.61:16.4	viññāṇanirodhā nāmarūpanirodho,
an3.61:16.5	nāmarūpanirodhā saḷāyatananirodho,
an3.61:16.6	saḷāyatananirodhā phassanirodho,
an3.61:16.7	phassanirodhā vedanānirodho,
an3.61:16.8	vedanānirodhā taṇhānirodho,
an3.61:16.9	taṇhānirodhā upādānanirodho,
an3.61:16.10	upādānanirodhā bhavanirodho,
an3.61:16.11	bhavanirodhā jātinirodho,
an3.61:16.12	jātinirodhā jarāmaraṇaṁ sokaparidevadukkhadomanassupāyāsā nirujjhanti.
an3.61:16.13	Evametassa kevalassa dukkhakkhandhassa nirodho hoti.
an3.61:16.14	Idaṁ vuccati, bhikkhave, dukkhanirodhaṁ ariyasaccaṁ.
an3.61:17.1	Katamañca, bhikkhave, dukkhanirodhagāminī paṭipadā ariyasaccaṁ?
an3.61:17.2	Ayameva ariyo aṭṭhaṅgiko maggo, seyyathidaṁ—
an3.61:17.3	sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.
an3.61:17.4	Idaṁ vuccati, bhikkhave, dukkhanirodhagāminī paṭipadā ariyasaccaṁ.
an3.61:17.5	‘Imāni cattāri ariyasaccānī’ti, bhikkhave, mayā dhammo desito aniggahito asaṅkiliṭṭho anupavajjo appaṭikuṭṭho samaṇehi brāhmaṇehi viññūhīti.
an3.61:17.6	Iti yaṁ taṁ vuttaṁ idametaṁ paṭicca vuttan”ti.
an3.61:17.7	Paṭhamaṁ.
an3.62:0.1	Aṅguttara Nikāya 3.62
an3.62:0.2	7. Mahāvagga
an3.62:0.3	Bhayasutta
an3.62:1.1	“Tīṇimāni, bhikkhave, amātāputtikāni bhayānīti assutavā puthujjano bhāsati.
an3.62:1.2	Katamāni tīṇi?
an3.62:1.3	Hoti so, bhikkhave, samayo yaṁ mahāaggiḍāho vuṭṭhāti.
an3.62:1.4	Mahāaggiḍāhe kho pana, bhikkhave, vuṭṭhite tena gāmāpi ḍayhanti nigamāpi ḍayhanti nagarāpi ḍayhanti.
an3.62:1.5	Gāmesupi ḍayhamānesu nigamesupi ḍayhamānesu nagaresupi ḍayhamānesu tattha mātāpi puttaṁ nappaṭilabhati, puttopi mātaraṁ nappaṭilabhati.
an3.62:1.6	Idaṁ, bhikkhave, paṭhamaṁ amātāputtikaṁ bhayanti assutavā puthujjano bhāsati.
an3.62:2.1	Puna caparaṁ, bhikkhave, hoti so samayo yaṁ mahāmegho vuṭṭhāti.
an3.62:2.2	Mahāmeghe kho pana, bhikkhave, vuṭṭhite mahāudakavāhako sañjāyati.
an3.62:2.3	Mahāudakavāhake kho pana, bhikkhave, sañjāyante tena gāmāpi vuyhanti nigamāpi vuyhanti nagarāpi vuyhanti.
an3.62:2.4	Gāmesupi vuyhamānesu nigamesupi vuyhamānesu nagaresupi vuyhamānesu tattha mātāpi puttaṁ nappaṭilabhati, puttopi mātaraṁ nappaṭilabhati.
an3.62:2.5	Idaṁ, bhikkhave, dutiyaṁ amātāputtikaṁ bhayanti assutavā puthujjano bhāsati.
an3.62:3.1	Puna caparaṁ, bhikkhave, hoti so samayo yaṁ bhayaṁ hoti aṭavisaṅkopo, cakkasamāruḷhā jānapadā pariyāyanti.
an3.62:3.2	Bhaye kho pana, bhikkhave, sati aṭavisaṅkope cakkasamāruḷhesu jānapadesu pariyāyantesu tattha mātāpi puttaṁ nappaṭilabhati, puttopi mātaraṁ nappaṭilabhati.
an3.62:3.3	Idaṁ, bhikkhave, tatiyaṁ amātāputtikaṁ bhayanti assutavā puthujjano bhāsati.
an3.62:3.4	Imāni kho, bhikkhave, tīṇi amātāputtikāni bhayānīti assutavā puthujjano bhāsati.
an3.62:4.1	Tāni kho panimāni, bhikkhave, tīṇi samātāputtikāniyeva bhayāni amātāputtikāni bhayānīti assutavā puthujjano bhāsati.
an3.62:4.2	Katamāni tīṇi?
an3.62:4.3	Hoti so, bhikkhave, samayo yaṁ mahāaggiḍāho vuṭṭhāti.
an3.62:4.4	Mahāaggiḍāhe kho pana, bhikkhave, vuṭṭhite tena gāmāpi ḍayhanti nigamāpi ḍayhanti nagarāpi ḍayhanti.
an3.62:4.5	Gāmesupi ḍayhamānesu nigamesupi ḍayhamānesu nagaresupi ḍayhamānesu hoti so samayo yaṁ kadāci karahaci mātāpi puttaṁ paṭilabhati, puttopi mātaraṁ paṭilabhati.
an3.62:4.6	Idaṁ, bhikkhave, paṭhamaṁ samātāputtikaṁyeva bhayaṁ amātāputtikaṁ bhayanti assutavā puthujjano bhāsati.
an3.62:5.1	Puna caparaṁ, bhikkhave, hoti so samayo yaṁ mahāmegho vuṭṭhāti.
an3.62:5.2	Mahāmeghe kho pana, bhikkhave, vuṭṭhite mahāudakavāhako sañjāyati.
an3.62:5.3	Mahāudakavāhake kho pana, bhikkhave, sañjāte tena gāmāpi vuyhanti nigamāpi vuyhanti nagarāpi vuyhanti.
an3.62:5.4	Gāmesupi vuyhamānesu nigamesupi vuyhamānesu nagaresupi vuyhamānesu hoti so samayo yaṁ kadāci karahaci mātāpi puttaṁ paṭilabhati, puttopi mātaraṁ paṭilabhati.
an3.62:5.5	Idaṁ, bhikkhave, dutiyaṁ samātāputtikaṁyeva bhayaṁ amātāputtikaṁ bhayanti assutavā puthujjano bhāsati.
an3.62:6.1	Puna caparaṁ, bhikkhave, hoti so samayo yaṁ bhayaṁ hoti aṭavisaṅkopo, cakkasamāruḷhā jānapadā pariyāyanti.
an3.62:6.2	Bhaye kho pana, bhikkhave, sati aṭavisaṅkope cakkasamāruḷhesu jānapadesu pariyāyantesu hoti so samayo yaṁ kadāci karahaci mātāpi puttaṁ paṭilabhati, puttopi mātaraṁ paṭilabhati.
an3.62:6.3	Idaṁ, bhikkhave, tatiyaṁ samātāputtikaṁyeva bhayaṁ amātāputtikaṁ bhayanti assutavā puthujjano bhāsati.
an3.62:6.4	Imāni kho, bhikkhave, tīṇi samātāputtikāniyeva bhayāni amātāputtikāni bhayānīti assutavā puthujjano bhāsati.
an3.62:7.1	Tīṇimāni, bhikkhave, amātāputtikāni bhayāni.
an3.62:7.2	Katamāni tīṇi?
an3.62:7.3	Jarābhayaṁ, byādhibhayaṁ, maraṇabhayanti.
an3.62:7.4	Na, bhikkhave, mātā puttaṁ jīramānaṁ evaṁ labhati:
an3.62:7.5	‘ahaṁ jīrāmi, mā me putto jīrī’ti;
an3.62:7.6	putto vā pana mātaraṁ jīramānaṁ na evaṁ labhati:
an3.62:7.7	‘ahaṁ jīrāmi, mā me mātā jīrī’ti.
an3.62:8.1	Na, bhikkhave, mātā puttaṁ byādhiyamānaṁ evaṁ labhati:
an3.62:8.2	‘ahaṁ byādhiyāmi, mā me putto byādhiyī’ti;
an3.62:8.3	putto vā pana mātaraṁ byādhiyamānaṁ na evaṁ labhati:
an3.62:8.4	‘ahaṁ byādhiyāmi, mā me mātā byādhiyī’ti.
an3.62:9.1	Na, bhikkhave, mātā puttaṁ mīyamānaṁ evaṁ labhati:
an3.62:9.2	‘ahaṁ mīyāmi, mā me putto mīyī’ti;
an3.62:9.3	putto vā pana mātaraṁ mīyamānaṁ na evaṁ labhati:
an3.62:9.4	‘ahaṁ mīyāmi, mā me mātā mīyī’ti.
an3.62:9.5	Imāni kho, bhikkhave, tīṇi amātāputtikāni bhayānīti.
an3.62:10.1	Atthi, bhikkhave, maggo atthi paṭipadā imesañca tiṇṇaṁ samātāputtikānaṁ bhayānaṁ imesañca tiṇṇaṁ amātāputtikānaṁ bhayānaṁ pahānāya samatikkamāya saṁvattati.
an3.62:10.2	Katamo ca, bhikkhave, maggo katamā ca paṭipadā imesañca tiṇṇaṁ samātāputtikānaṁ bhayānaṁ imesañca tiṇṇaṁ amātāputtikānaṁ bhayānaṁ pahānāya samatikkamāya saṁvattati?
an3.62:10.3	Ayameva ariyo aṭṭhaṅgiko maggo, seyyathidaṁ—
an3.62:10.4	sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.
an3.62:10.5	Ayaṁ kho, bhikkhave, maggo ayaṁ paṭipadā imesañca tiṇṇaṁ samātāputtikānaṁ bhayānaṁ imesañca tiṇṇaṁ amātāputtikānaṁ bhayānaṁ pahānāya samatikkamāya saṁvattatī”ti.
an3.62:10.6	Dutiyaṁ.
an3.63:0.1	Aṅguttara Nikāya 3.63
an3.63:0.2	7. Mahāvagga
an3.63:0.3	Venāgapurasutta
an3.63:1.1	Ekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena venāgapuraṁ nāma kosalānaṁ brāhmaṇagāmo tadavasari.
an3.63:1.2	Assosuṁ kho venāgapurikā brāhmaṇagahapatikā:
an3.63:1.3	“samaṇo khalu, bho, gotamo sakyaputto sakyakulā pabbajito venāgapuraṁ anuppatto.
an3.63:1.4	Taṁ kho pana bhavantaṁ gotamaṁ evaṁ kalyāṇo kittisaddo abbhuggato:
an3.63:1.5	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an3.63:1.6	So imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti.
an3.63:1.7	So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an3.63:1.8	Sādhu kho pana tathārūpānaṁ arahataṁ dassanaṁ hotī”ti.
an3.63:2.1	Atha kho venāgapurikā brāhmaṇagahapatikā yena bhagavā tenupasaṅkamiṁsu; upasaṅkamitvā appekacce bhagavantaṁ abhivādetvā ekamantaṁ nisīdiṁsu, appekacce bhagavatā saddhiṁ sammodiṁsu, sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu, appekacce yena bhagavā tenañjaliṁ paṇāmetvā ekamantaṁ nisīdiṁsu, appekacce nāmagottaṁ sāvetvā ekamantaṁ nisīdiṁsu, appekacce tuṇhībhūtā ekamantaṁ nisīdiṁsu. Ekamantaṁ nisinno kho venāgapuriko vacchagotto brāhmaṇo bhagavantaṁ etadavoca:
an3.63:3.1	“Acchariyaṁ, bho gotama, abbhutaṁ, bho gotama.
an3.63:3.2	Yāvañcidaṁ bhoto gotamassa vippasannāni indriyāni, parisuddho chavivaṇṇo pariyodāto.
an3.63:3.3	Seyyathāpi, bho gotama, sāradaṁ badarapaṇḍuṁ parisuddhaṁ hoti pariyodātaṁ;
an3.63:3.4	evamevaṁ bhoto gotamassa vippasannāni indriyāni parisuddho chavivaṇṇo pariyodāto.
an3.63:3.5	Seyyathāpi, bho gotama, tālapakkaṁ sampati bandhanā pamuttaṁ parisuddhaṁ hoti pariyodātaṁ;
an3.63:3.6	evamevaṁ bhoto gotamassa vippasannāni indriyāni parisuddho chavivaṇṇo pariyodāto.
an3.63:3.7	Seyyathāpi, bho gotama, nekkhaṁ jambonadaṁ dakkhakammāraputtasuparikammakataṁ ukkāmukhe sukusalasampahaṭṭhaṁ paṇḍukambale nikkhittaṁ bhāsate ca tapate ca virocati ca;
an3.63:3.8	evamevaṁ bhoto gotamassa vippasannāni indriyāni parisuddho chavivaṇṇo pariyodāto.
an3.63:3.9	Yāni tāni, bho gotama, uccāsayanamahāsayanāni, seyyathidaṁ—
an3.63:3.10	āsandi pallaṅko gonako cittako paṭikā paṭalikā tūlikā vikatikā uddalomī ekantalomī kaṭṭissaṁ koseyyaṁ kuttakaṁ hatthattharaṁ assattharaṁ rathattharaṁ ajinappaveṇī kadalimigapavarapaccattharaṇaṁ sauttaracchadaṁ ubhatolohitakūpadhānaṁ, evarūpānaṁ nūna bhavaṁ gotamo uccāsayanamahāsayanānaṁ nikāmalābhī akicchalābhī akasiralābhī”ti.
an3.63:4.1	“Yāni kho pana tāni, brāhmaṇa, uccāsayanamahāsayanāni, seyyathidaṁ—
an3.63:4.2	āsandi pallaṅko gonako cittako paṭikā paṭalikā tūlikā vikatikā uddalomī ekantalomī kaṭṭissaṁ koseyyaṁ kuttakaṁ hatthattharaṁ assattharaṁ rathattharaṁ ajinappaveṇī kadalimigapavarapaccattharaṇaṁ sauttaracchadaṁ ubhatolohitakūpadhānaṁ.
an3.63:4.3	Dullabhāni tāni pabbajitānaṁ laddhā ca pana na kappanti.
an3.63:5.1	Tīṇi kho, imāni, brāhmaṇa, uccāsayanamahāsayanāni, yesāhaṁ etarahi nikāmalābhī akicchalābhī akasiralābhī.
an3.63:5.2	Katamāni tīṇi?
an3.63:5.3	Dibbaṁ uccāsayanamahāsayanaṁ, brahmaṁ uccāsayanamahāsayanaṁ, ariyaṁ uccāsayanamahāsayanaṁ.
an3.63:5.4	Imāni kho, brāhmaṇa, tīṇi uccāsayanamahāsayanāni, yesāhaṁ etarahi nikāmalābhī akicchalābhī akasiralābhī”ti.
an3.63:6.1	“Katamaṁ pana taṁ, bho gotama, dibbaṁ uccāsayanamahāsayanaṁ, yassa bhavaṁ gotamo etarahi nikāmalābhī akicchalābhī akasiralābhī”ti?
an3.63:6.2	“Idhāhaṁ, brāhmaṇa, yaṁ gāmaṁ vā nigamaṁ vā upanissāya viharāmi, so pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisāmi.
an3.63:6.3	So pacchābhattaṁ piṇḍapātapaṭikkanto vanantaññeva pavisāmi.
an3.63:6.4	So yadeva tattha honti tiṇāni vā paṇṇāni vā tāni ekajjhaṁ saṅgharitvā nisīdāmi pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an3.63:6.5	So vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharāmi;
an3.63:6.6	vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharāmi;
an3.63:6.7	pītiyā ca virāgā upekkhako ca viharāmi sato ca sampajāno sukhañca kāyena paṭisaṁvedemi, yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharāmi;
an3.63:6.8	sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharāmi.
an3.63:6.9	So ce ahaṁ, brāhmaṇa, evaṁbhūto caṅkamāmi, dibbo me eso tasmiṁ samaye caṅkamo hoti.
an3.63:6.10	So ce ahaṁ, brāhmaṇa, evaṁbhūto tiṭṭhāmi, dibbaṁ me etaṁ tasmiṁ samaye ṭhānaṁ hoti.
an3.63:6.11	So ce ahaṁ, brāhmaṇa, evaṁbhūto nisīdāmi, dibbaṁ me etaṁ tasmiṁ samaye āsanaṁ hoti.
an3.63:6.12	So ce ahaṁ, brāhmaṇa, evaṁbhūto seyyaṁ kappemi, dibbaṁ me etaṁ tasmiṁ samaye uccāsayanamahāsayanaṁ hoti.
an3.63:6.13	Idaṁ kho, brāhmaṇa, dibbaṁ uccāsayanamahāsayanaṁ, yassāhaṁ etarahi nikāmalābhī akicchalābhī akasiralābhī”ti.
an3.63:7.1	“Acchariyaṁ, bho gotama, abbhutaṁ, bho gotama.
an3.63:7.2	Ko cañño evarūpassa dibbassa uccāsayanamahāsayanassa nikāmalābhī bhavissati akicchalābhī akasiralābhī, aññatra bhotā gotamena.
an3.63:8.1	Katamaṁ pana taṁ, bho gotama, brahmaṁ uccāsayanamahāsayanaṁ, yassa bhavaṁ gotamo etarahi nikāmalābhī akicchalābhī akasiralābhī”ti?
an3.63:8.2	“Idhāhaṁ, brāhmaṇa, yaṁ gāmaṁ vā nigamaṁ vā upanissāya viharāmi, so pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisāmi.
an3.63:8.3	So pacchābhattaṁ piṇḍapātapaṭikkanto vanantaññeva pavisāmi.
an3.63:8.4	So yadeva tattha honti tiṇāni vā paṇṇāni vā tāni ekajjhaṁ saṅgharitvā nisīdāmi pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an3.63:8.5	So mettāsahagatena cetasā ekaṁ disaṁ pharitvā viharāmi, tathā dutiyaṁ, tathā tatiyaṁ, tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharāmi.
an3.63:8.6	Karuṇāsahagatena cetasā …pe…
an3.63:8.7	muditāsahagatena cetasā …
an3.63:8.8	upekkhāsahagatena cetasā ekaṁ disaṁ pharitvā viharāmi, tathā dutiyaṁ, tathā tatiyaṁ, tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjhena pharitvā viharāmi.
an3.63:8.9	So ce ahaṁ, brāhmaṇa, evaṁbhūto caṅkamāmi, brahmā me eso tasmiṁ samaye caṅkamo hoti.
an3.63:8.10	So ce ahaṁ, brāhmaṇa, evaṁbhūto tiṭṭhāmi …pe…
an3.63:8.11	nisīdāmi …pe…
an3.63:8.12	seyyaṁ kappemi, brahmaṁ me etaṁ tasmiṁ samaye uccāsayanamahāsayanaṁ hoti.
an3.63:8.13	Idaṁ kho, brāhmaṇa, brahmaṁ uccāsayanamahāsayanaṁ, yassāhaṁ etarahi nikāmalābhī akicchalābhī akasiralābhī”ti.
an3.63:9.1	“Acchariyaṁ, bho gotama, abbhutaṁ, bho gotama.
an3.63:9.2	Ko cañño evarūpassa brahmassa uccāsayanamahāsayanassa nikāmalābhī bhavissati akicchalābhī akasiralābhī, aññatra bhotā gotamena.
an3.63:10.1	Katamaṁ pana taṁ, bho gotama, ariyaṁ uccāsayanamahāsayanaṁ, yassa bhavaṁ gotamo etarahi nikāmalābhī akicchalābhī akasiralābhī”ti?
an3.63:10.2	“Idhāhaṁ, brāhmaṇa, yaṁ gāmaṁ vā nigamaṁ vā upanissāya viharāmi, so pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisāmi.
an3.63:10.3	So pacchābhattaṁ piṇḍapātapaṭikkanto vanantaññeva pavisāmi.
an3.63:10.4	So yadeva tattha honti tiṇāni vā paṇṇāni vā tāni ekajjhaṁ saṅgharitvā nisīdāmi pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an3.63:10.5	So evaṁ jānāmi:
an3.63:10.6	‘rāgo me pahīno ucchinnamūlo tālāvatthukato anabhāvaṅkato āyatiṁ anuppādadhammo;
an3.63:10.7	doso me pahīno ucchinnamūlo tālāvatthukato anabhāvaṅkato āyatiṁ anuppādadhammo;
an3.63:10.8	moho me pahīno ucchinnamūlo tālāvatthukato anabhāvaṅkato āyatiṁ anuppādadhammo’.
an3.63:10.9	So ce ahaṁ, brāhmaṇa, evaṁbhūto caṅkamāmi, ariyo me eso tasmiṁ samaye caṅkamo hoti.
an3.63:10.10	So ce ahaṁ, brāhmaṇa, evaṁbhūto tiṭṭhāmi …pe…
an3.63:10.11	nisīdāmi …pe…
an3.63:10.12	seyyaṁ kappemi, ariyaṁ me etaṁ tasmiṁ samaye uccāsayanamahāsayanaṁ hoti.
an3.63:10.13	Idaṁ kho, brāhmaṇa, ariyaṁ uccāsayanamahāsayanaṁ, yassāhaṁ etarahi nikāmalābhī akicchalābhī akasiralābhī”ti.
an3.63:11.1	“Acchariyaṁ, bho gotama, abbhutaṁ, bho gotama.
an3.63:11.2	Ko cañño evarūpassa ariyassa uccāsayanamahāsayanassa nikāmalābhī bhavissati akicchalābhī akasiralābhī, aññatra bhotā gotamena.
an3.63:12.1	Abhikkantaṁ, bho gotama, abhikkantaṁ, bho gotama.
an3.63:12.2	Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ kho bhotā gotamena anekapariyāyena dhammo pakāsito.
an3.63:12.3	Ete mayaṁ bhavantaṁ gotamaṁ saraṇaṁ gacchāma dhammañca bhikkhusaṅghañca.
an3.63:12.4	Upāsake no bhavaṁ gotamo dhāretu ajjatagge pāṇupete saraṇaṁ gate”ti.
an3.63:12.5	Tatiyaṁ.
an3.64:0.1	Aṅguttara Nikāya 3.64
an3.64:0.2	7. Mahāvagga
an3.64:0.3	Sarabhasutta
an3.64:1.1	Evaṁ me sutaṁ—
an3.64:1.2	ekaṁ samayaṁ bhagavā rājagahe viharati gijjhakūṭe pabbate.
an3.64:1.3	Tena kho pana samayena sarabho nāma paribbājako acirapakkanto hoti imasmā dhammavinayā.
an3.64:1.4	So rājagahe parisati evaṁ vācaṁ bhāsati:
an3.64:1.5	“aññāto mayā samaṇānaṁ sakyaputtikānaṁ dhammo.
an3.64:1.6	Aññāya ca panāhaṁ samaṇānaṁ sakyaputtikānaṁ dhammaṁ evāhaṁ tasmā dhammavinayā apakkanto”ti.
an3.64:1.7	Atha kho sambahulā bhikkhū pubbaṇhasamayaṁ nivāsetvā pattacīvaramādāya rājagahaṁ piṇḍāya pavisiṁsu.
an3.64:1.8	Assosuṁ kho te bhikkhū sarabhassa paribbājakassa rājagahe parisati evaṁ vācaṁ bhāsamānassa:
an3.64:1.9	“aññāto mayā samaṇānaṁ sakyaputtikānaṁ dhammo.
an3.64:1.10	Aññāya ca panāhaṁ samaṇānaṁ sakyaputtikānaṁ dhammaṁ evāhaṁ tasmā dhammavinayā apakkanto”ti.
an3.64:2.1	Atha kho te bhikkhū rājagahe piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
an3.64:2.2	“sarabho nāma, bhante, paribbājako acirapakkanto imasmā dhammavinayā.
an3.64:2.3	So rājagahe parisati evaṁ vācaṁ bhāsati:
an3.64:2.4	‘aññāto mayā samaṇānaṁ sakyaputtikānaṁ dhammo.
an3.64:2.5	Aññāya ca panāhaṁ samaṇānaṁ sakyaputtikānaṁ dhammaṁ evāhaṁ tasmā dhammavinayā apakkanto’ti.
an3.64:2.6	Sādhu, bhante, bhagavā yena sippinikātīraṁ paribbājakārāmo yena sarabho paribbājako tenupasaṅkamatu anukampaṁ upādāyā”ti.
an3.64:2.7	Adhivāsesi bhagavā tuṇhībhāvena.
an3.64:3.1	Atha kho bhagavā sāyanhasamayaṁ paṭisallānā vuṭṭhito yena sippinikātīraṁ paribbājakārāmo yena sarabho paribbājako tenupasaṅkami; upasaṅkamitvā paññatte āsane nisīdi. Nisajja kho bhagavā sarabhaṁ paribbājakaṁ etadavoca:
an3.64:3.2	“saccaṁ kira tvaṁ, sarabha, evaṁ vadesi:
an3.64:3.3	‘aññāto mayā samaṇānaṁ sakyaputtikānaṁ dhammo.
an3.64:3.4	Aññāya ca panāhaṁ samaṇānaṁ sakyaputtikānaṁ dhammaṁ evāhaṁ tasmā dhammavinayā apakkanto’”ti?
an3.64:3.5	Evaṁ vutte, sarabho paribbājako tuṇhī ahosi.
an3.64:4.1	Dutiyampi kho bhagavā sarabhaṁ paribbājakaṁ etadavoca:
an3.64:4.2	“vadehi, sarabha, kinti te aññāto samaṇānaṁ sakyaputtikānaṁ dhammo?
an3.64:4.3	Sace te aparipūraṁ bhavissati, ahaṁ paripūressāmi.
an3.64:4.4	Sace pana te paripūraṁ bhavissati, ahaṁ anumodissāmī”ti.
an3.64:4.5	Dutiyampi kho sarabho paribbājako tuṇhī ahosi.
an3.64:5.1	Tatiyampi kho bhagavā sarabhaṁ paribbājakaṁ etadavoca:
an3.64:5.2	“yo kho, sarabha, paññāyati samaṇānaṁ sakyaputtikānaṁ dhammo vadehi, sarabha, kinti te aññāto samaṇānaṁ sakyaputtikānaṁ dhammo?
an3.64:5.3	Sace te aparipūraṁ bhavissati, ahaṁ paripūressāmi.
an3.64:5.4	Sace pana te paripūraṁ bhavissati, ahaṁ anumodissāmī”ti.
an3.64:5.5	Tatiyampi kho sarabho paribbājako tuṇhī ahosi.
an3.64:6.1	Atha kho te paribbājakā sarabhaṁ paribbājakaṁ etadavocuṁ:
an3.64:6.2	“yadeva kho tvaṁ, āvuso sarabha, samaṇaṁ gotamaṁ yāceyyāsi tadeva te samaṇo gotamo pavāreti.
an3.64:6.3	Vadehāvuso sarabha, kinti te aññāto samaṇānaṁ sakyaputtikānaṁ dhammo?
an3.64:6.4	Sace te aparipūraṁ bhavissati, samaṇo gotamo paripūressati.
an3.64:6.5	Sace pana te paripūraṁ bhavissati, samaṇo gotamo anumodissatī”ti.
an3.64:6.6	Evaṁ vutte, sarabho paribbājako tuṇhībhūto maṅkubhūto pattakkhandho adhomukho pajjhāyanto appaṭibhāno nisīdi.
an3.64:7.1	Atha kho bhagavā sarabhaṁ paribbājakaṁ tuṇhībhūtaṁ maṅkubhūtaṁ pattakkhandhaṁ adhomukhaṁ pajjhāyantaṁ appaṭibhānaṁ viditvā te paribbājake etadavoca:
an3.64:8.1	“Yo kho maṁ, paribbājakā, evaṁ vadeyya:
an3.64:8.2	‘sammāsambuddhassa te paṭijānato ime dhammā anabhisambuddhā’ti, tamahaṁ tattha sādhukaṁ samanuyuñjeyyaṁ samanugāheyyaṁ samanubhāseyyaṁ.
an3.64:8.3	So vata mayā sādhukaṁ samanuyuñjiyamāno samanugāhiyamāno samanubhāsiyamāno aṭṭhānametaṁ anavakāso yaṁ so tiṇṇaṁ ṭhānānaṁ nāññataraṁ ṭhānaṁ nigaccheyya, aññena vā aññaṁ paṭicarissati, bahiddhā kathaṁ apanāmessati, kopañca dosañca appaccayañca pātukarissati, tuṇhībhūto maṅkubhūto pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako.
an3.64:9.1	Yo kho maṁ, paribbājakā, evaṁ vadeyya:
an3.64:9.2	‘khīṇāsavassa te paṭijānato ime āsavā aparikkhīṇā’ti, tamahaṁ tattha sādhukaṁ samanuyuñjeyyaṁ samanugāheyyaṁ samanubhāseyyaṁ.
an3.64:9.3	So vata mayā sādhukaṁ samanuyuñjiyamāno samanugāhiyamāno samanubhāsiyamāno aṭṭhānametaṁ anavakāso yaṁ so tiṇṇaṁ ṭhānānaṁ nāññataraṁ ṭhānaṁ nigaccheyya, aññena vā aññaṁ paṭicarissati, bahiddhā kathaṁ apanāmessati, kopañca dosañca appaccayañca pātukarissati, tuṇhībhūto maṅkubhūto pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako.
an3.64:10.1	Yo kho maṁ, paribbājakā, evaṁ vadeyya:
an3.64:10.2	‘yassa kho pana te atthāya dhammo desito, so na niyyāti takkarassa sammā dukkhakkhayāyā’ti, tamahaṁ tattha sādhukaṁ samanuyuñjeyyaṁ samanugāheyyaṁ samanubhāseyyaṁ.
an3.64:10.3	So vata mayā sādhukaṁ samanuyuñjiyamāno samanugāhiyamāno samanubhāsiyamāno aṭṭhānametaṁ anavakāso yaṁ so tiṇṇaṁ ṭhānānaṁ nāññataraṁ ṭhānaṁ nigaccheyya, aññena vā aññaṁ paṭicarissati, bahiddhā kathaṁ apanāmessati, kopañca dosañca appaccayañca pātukarissati, tuṇhībhūto maṅkubhūto pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako”ti.
an3.64:10.4	Atha kho bhagavā sippinikātīre paribbājakārāme tikkhattuṁ sīhanādaṁ naditvā vehāsaṁ pakkāmi.
an3.64:11.1	Atha kho te paribbājakā acirapakkantassa bhagavato sarabhaṁ paribbājakaṁ samantato vācāyasannitodakena sañjambharimakaṁsu:
an3.64:11.2	“seyyathāpi, āvuso sarabha, brahāraññe jarasiṅgālo ‘sīhanādaṁ nadissāmī’ti siṅgālakaṁyeva nadati, bheraṇḍakaṁyeva nadati;
an3.64:11.3	evamevaṁ kho tvaṁ, āvuso sarabha, aññatreva samaṇena gotamena ‘sīhanādaṁ nadissāmī’ti siṅgālakaṁyeva nadasi bheraṇḍakaṁyeva nadasi.
an3.64:11.4	Seyyathāpi, āvuso sarabha, ambukasañcarī ‘purisakaravitaṁ ravissāmī’ti ambukasañcariravitaṁyeva ravati;
an3.64:11.5	evamevaṁ kho tvaṁ, āvuso sarabha, aññatreva samaṇena gotamena ‘purisakaravitaṁ ravissāmī’ti, ambukasañcariravitaṁyeva ravasi.
an3.64:11.6	Seyyathāpi, āvuso sarabha, usabho suññāya gosālāya gambhīraṁ naditabbaṁ maññati;
an3.64:11.7	evamevaṁ kho tvaṁ, āvuso sarabha, aññatreva samaṇena gotamena gambhīraṁ naditabbaṁ maññasī”ti.
an3.64:11.8	Atha kho te paribbājakā sarabhaṁ paribbājakaṁ samantato vācāyasannitodakena sañjambharimakaṁsūti.
an3.64:11.9	Catutthaṁ.
an3.65:0.1	Aṅguttara Nikāya 3.65
an3.65:0.2	7. Mahāvagga
an3.65:0.3	Kesamuttisutta
an3.65:1.1	Evaṁ me sutaṁ—
an3.65:1.2	ekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena kesamuttaṁ nāma kālāmānaṁ nigamo tadavasari.
an3.65:1.3	Assosuṁ kho kesamuttiyā kālāmā:
an3.65:1.4	“samaṇo khalu, bho, gotamo sakyaputto sakyakulā pabbajito kesamuttaṁ anuppatto.
an3.65:1.5	Taṁ kho pana bhavantaṁ gotamaṁ evaṁ kalyāṇo kittisaddo abbhuggato:
an3.65:1.6	‘itipi so bhagavā …pe…
an3.65:1.7	sādhu kho pana tathārūpānaṁ arahataṁ dassanaṁ hotī’”ti.
an3.65:2.1	Atha kho kesamuttiyā kālāmā yena bhagavā tenupasaṅkamiṁsu; upasaṅkamitvā appekacce bhagavantaṁ abhivādetvā ekamantaṁ nisīdiṁsu, appekacce bhagavatā saddhiṁ sammodiṁsu, sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu, appekacce yena bhagavā tenañjaliṁ paṇāmetvā ekamantaṁ nisīdiṁsu, appekacce nāmagottaṁ sāvetvā ekamantaṁ nisīdiṁsu, appekacce tuṇhībhūtā ekamantaṁ nisīdiṁsu. Ekamantaṁ nisinnā kho te kesamuttiyā kālāmā bhagavantaṁ etadavocuṁ:
an3.65:3.1	“Santi, bhante, eke samaṇabrāhmaṇā kesamuttaṁ āgacchanti.
an3.65:3.2	Te sakaṁyeva vādaṁ dīpenti jotenti, parappavādaṁ pana khuṁsenti vambhenti paribhavanti omakkhiṁ karonti.
an3.65:3.3	Aparepi, bhante, eke samaṇabrāhmaṇā kesamuttaṁ āgacchanti.
an3.65:3.4	Tepi sakaṁyeva vādaṁ dīpenti jotenti, parappavādaṁ pana khuṁsenti vambhenti paribhavanti omakkhiṁ karonti.
an3.65:3.5	Tesaṁ no, bhante, amhākaṁ hoteva kaṅkhā hoti vicikicchā:
an3.65:3.6	‘ko su nāma imesaṁ bhavataṁ samaṇabrāhmaṇānaṁ saccaṁ āha, ko musā’”ti?
an3.65:3.7	“Alañhi vo, kālāmā, kaṅkhituṁ alaṁ vicikicchituṁ.
an3.65:3.8	Kaṅkhanīyeva pana vo ṭhāne vicikicchā uppannā.
an3.65:4.1	Etha tumhe, kālāmā, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā samaṇo no garūti.
an3.65:4.2	Yadā tumhe, kālāmā, attanāva jāneyyātha:
an3.65:4.3	‘ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṁvattantī’ti, atha tumhe, kālāmā, pajaheyyātha.
an3.65:5.1	Taṁ kiṁ maññatha, kālāmā,
an3.65:5.2	lobho purisassa ajjhattaṁ uppajjamāno uppajjati hitāya vā ahitāya vā”ti?
an3.65:6.1	“Ahitāya, bhante”.
an3.65:7.1	“Luddho panāyaṁ, kālāmā, purisapuggalo lobhena abhibhūto pariyādinnacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti, yaṁ sa hoti dīgharattaṁ ahitāya dukkhāyā”ti.
an3.65:8.1	“Evaṁ, bhante”.
an3.65:9.1	“Taṁ kiṁ maññatha, kālāmā,
an3.65:9.2	doso purisassa ajjhattaṁ uppajjamāno uppajjati hitāya vā ahitāya vā”ti?
an3.65:10.1	“Ahitāya, bhante”.
an3.65:11.1	“Duṭṭho panāyaṁ, kālāmā, purisapuggalo dosena abhibhūto pariyādinnacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti, yaṁ sa hoti dīgharattaṁ ahitāya dukkhāyā”ti.
an3.65:12.1	“Evaṁ, bhante”.
an3.65:13.1	“Taṁ kiṁ maññatha, kālāmā,
an3.65:13.2	moho purisassa ajjhattaṁ uppajjamāno uppajjati hitāya vā ahitāya vā”ti?
an3.65:14.1	“Ahitāya, bhante”.
an3.65:15.1	“Mūḷho panāyaṁ, kālāmā, purisapuggalo mohena abhibhūto pariyādinnacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti, yaṁ sa hoti dīgharattaṁ ahitāya dukkhāyā”ti.
an3.65:16.1	“Evaṁ, bhante”.
an3.65:17.1	“Taṁ kiṁ maññatha, kālāmā, ime dhammā kusalā vā akusalā vā”ti?
an3.65:18.1	“Akusalā, bhante”.
an3.65:19.1	“Sāvajjā vā anavajjā vā”ti?
an3.65:20.1	“Sāvajjā, bhante”.
an3.65:21.1	“Viññugarahitā vā viññuppasatthā vā”ti?
an3.65:22.1	“Viññugarahitā, bhante”.
an3.65:23.1	“Samattā samādinnā ahitāya dukkhāya saṁvattanti, no vā?
an3.65:23.2	Kathaṁ vā ettha hotī”ti?
an3.65:24.1	“Samattā, bhante, samādinnā ahitāya dukkhāya saṁvattantīti.
an3.65:24.2	Evaṁ no ettha hotī”ti.
an3.65:25.1	“Iti kho, kālāmā, yaṁ taṁ avocumhā:
an3.65:25.2	‘etha tumhe, kālāmā.
an3.65:25.3	Mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā samaṇo no garūti.
an3.65:25.4	Yadā tumhe kālāmā attanāva jāneyyātha:
an3.65:25.5	“ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṁvattantīti, atha tumhe, kālāmā, pajaheyyāthā”’ti,
an3.65:25.6	iti yaṁ taṁ vuttaṁ, idametaṁ paṭicca vuttaṁ.
an3.65:26.1	Etha tumhe, kālāmā, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā samaṇo no garūti.
an3.65:26.2	Yadā tumhe, kālāmā, attanāva jāneyyātha:
an3.65:26.3	‘ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā hitāya sukhāya saṁvattantī’ti, atha tumhe, kālāmā, upasampajja vihareyyātha.
an3.65:27.1	Taṁ kiṁ maññatha, kālāmā,
an3.65:27.2	alobho purisassa ajjhattaṁ uppajjamāno uppajjati hitāya vā ahitāya vā”ti?
an3.65:28.1	“Hitāya, bhante”.
an3.65:29.1	“Aluddho panāyaṁ, kālāmā, purisapuggalo lobhena anabhibhūto apariyādinnacitto neva pāṇaṁ hanati, na adinnaṁ ādiyati, na paradāraṁ gacchati, na musā bhaṇati, na parampi tathattāya samādapeti, yaṁ sa hoti dīgharattaṁ hitāya sukhāyā”ti.
an3.65:30.1	“Evaṁ, bhante”.
an3.65:31.1	“Taṁ kiṁ maññatha, kālāmā,
an3.65:31.2	adoso purisassa ajjhattaṁ uppajjamāno uppajjati …pe…
an3.65:31.3	amoho purisassa ajjhattaṁ uppajjamāno uppajjati …pe…
an3.65:31.4	hitāya sukhāyā”ti.
an3.65:32.1	“Evaṁ, bhante”.
an3.65:33.1	“Taṁ kiṁ maññatha, kālāmā, ime dhammā kusalā vā akusalā vā”ti?
an3.65:34.1	“Kusalā, bhante”.
an3.65:35.1	“Sāvajjā vā anavajjā vā”ti?
an3.65:36.1	“Anavajjā, bhante”.
an3.65:37.1	“Viññugarahitā vā viññuppasatthā vā”ti?
an3.65:38.1	“Viññuppasatthā, bhante”.
an3.65:39.1	“Samattā samādinnā hitāya sukhāya saṁvattanti no vā?
an3.65:39.2	Kathaṁ vā ettha hotī”ti?
an3.65:40.1	“Samattā, bhante, samādinnā hitāya sukhāya saṁvattanti.
an3.65:40.2	Evaṁ no ettha hotī”ti.
an3.65:41.1	“Iti kho, kālāmā, yaṁ taṁ avocumhā:
an3.65:41.2	‘etha tumhe, kālāmā.
an3.65:41.3	Mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā samaṇo no garūti.
an3.65:41.4	Yadā tumhe, kālāmā, attanāva jāneyyātha—
an3.65:41.5	ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā hitāya sukhāya saṁvattantīti, atha tumhe, kālāmā, upasampajja vihareyyāthā’ti,
an3.65:41.6	iti yaṁ taṁ vuttaṁ idametaṁ paṭicca vuttaṁ.
an3.65:42.1	Sa kho so, kālāmā, ariyasāvako evaṁ vigatābhijjho vigatabyāpādo asammūḷho sampajāno patissato mettāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjhena pharitvā viharati.
an3.65:42.2	Karuṇāsahagatena cetasā …pe…
an3.65:42.3	muditāsahagatena cetasā …pe…
an3.65:42.4	upekkhāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjhena pharitvā viharati.
an3.65:43.1	Sa kho so, kālāmā, ariyasāvako evaṁ averacitto evaṁ abyāpajjhacitto evaṁ asaṅkiliṭṭhacitto evaṁ visuddhacitto.
an3.65:43.2	Tassa diṭṭheva dhamme cattāro assāsā adhigatā honti.
an3.65:43.3	‘Sace kho pana atthi paro loko, atthi sukatadukkaṭānaṁ kammānaṁ phalaṁ vipāko, athāhaṁ kāyassa bhedā paraṁ maraṇā sugatiṁ saggaṁ lokaṁ upapajjissāmī’ti, ayamassa paṭhamo assāso adhigato hoti.
an3.65:44.1	‘Sace kho pana natthi paro loko, natthi sukatadukkaṭānaṁ kammānaṁ phalaṁ vipāko, athāhaṁ diṭṭheva dhamme averaṁ abyāpajjhaṁ anīghaṁ sukhiṁ attānaṁ pariharāmī’ti, ayamassa dutiyo assāso adhigato hoti.
an3.65:45.1	‘Sace kho pana karoto karīyati pāpaṁ, na kho panāhaṁ kassaci pāpaṁ cetemi.
an3.65:45.2	Akarontaṁ kho pana maṁ pāpakammaṁ kuto dukkhaṁ phusissatī’ti, ayamassa tatiyo assāso adhigato hoti.
an3.65:46.1	‘Sace kho pana karoto na karīyati pāpaṁ, athāhaṁ ubhayeneva visuddhaṁ attānaṁ samanupassāmī’ti, ayamassa catuttho assāso adhigato hoti.
an3.65:47.1	Sa kho so, kālāmā, ariyasāvako evaṁ averacitto evaṁ abyāpajjhacitto evaṁ asaṅkiliṭṭhacitto evaṁ visuddhacitto.
an3.65:47.2	Tassa diṭṭheva dhamme ime cattāro assāsā adhigatā hontī”ti.
an3.65:48.1	“Evametaṁ, bhagavā, evametaṁ, sugata.
an3.65:48.2	Sa kho so, bhante, ariyasāvako evaṁ averacitto evaṁ abyāpajjhacitto evaṁ asaṅkiliṭṭhacitto evaṁ visuddhacitto.
an3.65:48.3	Tassa diṭṭheva dhamme cattāro assāsā adhigatā honti.
an3.65:48.4	‘Sace kho pana atthi paro loko, atthi sukatadukkaṭānaṁ kammānaṁ phalaṁ vipāko, athāhaṁ kāyassa bhedā paraṁ maraṇā sugatiṁ saggaṁ lokaṁ upapajjissāmī’ti, ayamassa paṭhamo assāso adhigato hoti.
an3.65:49.1	‘Sace kho pana natthi paro loko, natthi sukatadukkaṭānaṁ kammānaṁ phalaṁ vipāko, athāhaṁ diṭṭheva dhamme averaṁ abyāpajjhaṁ anīghaṁ sukhiṁ attānaṁ pariharāmī’ti, ayamassa dutiyo assāso adhigato hoti.
an3.65:50.1	‘Sace kho pana karoto karīyati pāpaṁ, na kho panāhaṁ kassaci pāpaṁ cetemi, akarontaṁ kho pana maṁ pāpakammaṁ kuto dukkhaṁ phusissatī’ti, ayamassa tatiyo assāso adhigato hoti.
an3.65:51.1	‘Sace kho pana karoto na karīyati pāpaṁ, athāhaṁ ubhayeneva visuddhaṁ attānaṁ samanupassāmī’ti, ayamassa catuttho assāso adhigato hoti.
an3.65:52.1	Sa kho so, bhante, ariyasāvako evaṁ averacitto evaṁ abyāpajjhacitto evaṁ asaṅkiliṭṭhacitto evaṁ visuddhacitto.
an3.65:52.2	Tassa diṭṭheva dhamme ime cattāro assāsā adhigatā honti.
an3.65:53.1	Abhikkantaṁ, bhante …pe…
an3.65:53.2	ete mayaṁ, bhante, bhagavantaṁ saraṇaṁ gacchāma dhammañca bhikkhusaṅghañca.
an3.65:53.3	Upāsake no, bhante, bhagavā dhāretu ajjatagge pāṇupete saraṇaṁ gate”ti.
an3.65:53.4	Pañcamaṁ.
an3.66:0.1	Aṅguttara Nikāya 3.66
an3.66:0.2	7. Mahāvagga
an3.66:0.3	Sāḷhasutta
an3.66:1.1	Evaṁ me sutaṁ—
an3.66:1.2	ekaṁ samayaṁ āyasmā nandako sāvatthiyaṁ viharati pubbārāme migāramātupāsāde.
an3.66:1.3	Atha kho sāḷho ca migāranattā sāṇo ca sekhuniyanattā yenāyasmā nandako tenupasaṅkamiṁsu; upasaṅkamitvā āyasmantaṁ nandakaṁ abhivādetvā ekamantaṁ nisīdiṁsu. Ekamantaṁ nisinnaṁ kho sāḷhaṁ migāranattāraṁ āyasmā nandako etadavoca:
an3.66:2.1	“Etha tumhe, sāḷhā, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā samaṇo no garūti.
an3.66:2.2	Yadā tumhe, sāḷhā, attanāva jāneyyātha ‘ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṁvattantī’ti, atha tumhe, sāḷhā, pajaheyyātha.
an3.66:3.1	Taṁ kiṁ maññatha, sāḷhā,
an3.66:3.2	atthi lobho”ti?
an3.66:4.1	“Evaṁ, bhante”.
an3.66:5.1	“Abhijjhāti kho ahaṁ, sāḷhā, etamatthaṁ vadāmi.
an3.66:5.2	Luddho kho ayaṁ, sāḷhā, abhijjhālu pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti, yaṁ sa hoti dīgharattaṁ ahitāya dukkhāyā”ti.
an3.66:6.1	“Evaṁ, bhante”.
an3.66:7.1	“Taṁ kiṁ maññatha, sāḷhā,
an3.66:7.2	atthi doso”ti?
an3.66:8.1	“Evaṁ, bhante”.
an3.66:9.1	“Byāpādoti kho ahaṁ, sāḷhā, etamatthaṁ vadāmi.
an3.66:9.2	Duṭṭho kho ayaṁ, sāḷhā, byāpannacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti, yaṁ sa hoti dīgharattaṁ ahitāya dukkhāyā”ti.
an3.66:10.1	“Evaṁ, bhante”.
an3.66:11.1	“Taṁ kiṁ maññatha, sāḷhā,
an3.66:11.2	atthi moho”ti?
an3.66:12.1	“Evaṁ, bhante”.
an3.66:13.1	“Avijjāti kho ahaṁ, sāḷhā, etamatthaṁ vadāmi.
an3.66:13.2	Mūḷho kho ayaṁ, sāḷhā, avijjāgato pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti, yaṁ sa hoti dīgharattaṁ ahitāya dukkhāyā”ti.
an3.66:14.1	“Evaṁ, bhante”.
an3.66:15.1	“Taṁ kiṁ maññatha, sāḷhā, ime dhammā kusalā vā akusalā vā”ti?
an3.66:16.1	“Akusalā, bhante”.
an3.66:17.1	“Sāvajjā vā anavajjā vā”ti?
an3.66:18.1	“Sāvajjā, bhante”.
an3.66:19.1	“Viññugarahitā vā viññuppasatthā vā”ti?
an3.66:20.1	“Viññugarahitā, bhante”.
an3.66:21.1	“Samattā samādinnā ahitāya dukkhāya saṁvattanti, no vā?
an3.66:21.2	Kathaṁ vā ettha hotī”ti?
an3.66:22.1	“Samattā, bhante, samādinnā ahitāya dukkhāya saṁvattantīti.
an3.66:22.2	Evaṁ no ettha hotī”ti.
an3.66:23.1	“Iti kho, sāḷhā, yaṁ taṁ avocumhā:
an3.66:23.2	‘etha tumhe, sāḷhā, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā samaṇo no garūti.
an3.66:23.3	Yadā tumhe, sāḷhā, attanāva jāneyyātha—
an3.66:23.4	ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṁvattantīti, atha tumhe, sāḷhā, pajaheyyāthā’ti,
an3.66:23.5	iti yaṁ taṁ vuttaṁ idametaṁ paṭicca vuttaṁ.
an3.66:24.1	Etha tumhe, sāḷhā, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā samaṇo no garūti.
an3.66:24.2	Yadā tumhe, sāḷhā, attanāva jāneyyātha:
an3.66:24.3	‘ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā hitāya sukhāya saṁvattantī’ti, atha tumhe, sāḷhā, upasampajja vihareyyātha.
an3.66:25.1	Taṁ kiṁ maññatha, sāḷhā, atthi alobho”ti?
an3.66:26.1	“Evaṁ, bhante”.
an3.66:27.1	“Anabhijjhāti kho ahaṁ, sāḷhā, etamatthaṁ vadāmi.
an3.66:27.2	Aluddho kho ayaṁ, sāḷhā, anabhijjhālu neva pāṇaṁ hanati, na adinnaṁ ādiyati, na paradāraṁ gacchati, na musā bhaṇati, parampi na tathattāya samādapeti, yaṁ sa hoti dīgharattaṁ hitāya sukhāyā”ti.
an3.66:28.1	“Evaṁ, bhante”.
an3.66:29.1	“Taṁ kiṁ maññatha, sāḷhā, atthi adoso”ti?
an3.66:30.1	“Evaṁ, bhante”.
an3.66:31.1	“Abyāpādoti kho ahaṁ, sāḷhā, etamatthaṁ vadāmi.
an3.66:31.2	Aduṭṭho kho ayaṁ, sāḷhā, abyāpannacitto neva pāṇaṁ hanati, na adinnaṁ ādiyati, na paradāraṁ gacchati, na musā bhaṇati, parampi na tathattāya samādapeti, yaṁ sa hoti dīgharattaṁ hitāya sukhāyā”ti.
an3.66:32.1	“Evaṁ, bhante”.
an3.66:33.1	“Taṁ kiṁ maññatha, sāḷhā,
an3.66:33.2	atthi amoho”ti?
an3.66:34.1	“Evaṁ, bhante”.
an3.66:35.1	“Vijjāti kho ahaṁ, sāḷhā, etamatthaṁ vadāmi.
an3.66:35.2	Amūḷho kho ayaṁ, sāḷhā, vijjāgato neva pāṇaṁ hanati, na adinnaṁ ādiyati, na paradāraṁ gacchati, na musā bhaṇati, parampi na tathattāya samādapeti, yaṁ sa hoti dīgharattaṁ hitāya sukhāyā”ti.
an3.66:36.1	“Evaṁ, bhante”.
an3.66:37.1	“Taṁ kiṁ maññatha, sāḷhā, ime dhammā kusalā vā akusalā vā”ti?
an3.66:38.1	“Kusalā, bhante”.
an3.66:39.1	“Sāvajjā vā anavajjā vā”ti?
an3.66:40.1	“Anavajjā, bhante”.
an3.66:41.1	“Viññugarahitā vā viññuppasatthā vā”ti?
an3.66:42.1	“Viññuppasatthā, bhante”.
an3.66:43.1	“Samattā samādinnā hitāya sukhāya saṁvattanti, no vā?
an3.66:43.2	Kathaṁ vā ettha hotī”ti?
an3.66:44.1	“Samattā, bhante, samādinnā hitāya sukhāya saṁvattantīti.
an3.66:44.2	Evaṁ no ettha hotī”ti.
an3.66:45.1	“Iti kho, sāḷhā, yaṁ taṁ avocumhā:
an3.66:45.2	‘etha tumhe, sāḷhā, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā samaṇo no garūti.
an3.66:45.3	Yadā tumhe, sāḷhā, attanāva jāneyyātha—
an3.66:45.4	ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā dīgharattaṁ hitāya sukhāya saṁvattantīti, atha tumhe, sāḷhā, upasampajja vihareyyāthā’ti,
an3.66:45.5	iti yaṁ taṁ vuttaṁ idametaṁ paṭicca vuttaṁ.
an3.66:46.1	Sa kho so, sāḷhā, ariyasāvako evaṁ vigatābhijjho vigatabyāpādo asammūḷho sampajāno patissato mettāsahagatena cetasā …pe…
an3.66:46.2	karuṇā …
an3.66:46.3	muditā …
an3.66:46.4	upekkhāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjhena pharitvā viharati.
an3.66:46.5	So evaṁ pajānāti:
an3.66:46.6	‘atthi idaṁ, atthi hīnaṁ, atthi paṇītaṁ, atthi imassa saññāgatassa uttari nissaraṇan’ti.
an3.66:46.7	Tassa evaṁ jānato evaṁ passato kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccati;
an3.66:46.8	vimuttasmiṁ vimuttamiti ñāṇaṁ hoti.
an3.66:46.9	‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.
an3.66:47.1	So evaṁ pajānāti:
an3.66:47.2	‘ahu pubbe lobho, tadahu akusalaṁ, so etarahi natthi, iccetaṁ kusalaṁ;
an3.66:47.3	ahu pubbe doso …pe…
an3.66:47.4	ahu pubbe moho, tadahu akusalaṁ, so etarahi natthi, iccetaṁ kusalan’ti.
an3.66:47.5	So diṭṭheva dhamme nicchāto nibbuto sītibhūto sukhappaṭisaṁvedī brahmabhūtena attanā viharatī”ti.
an3.66:47.6	Chaṭṭhaṁ.
an3.67:0.1	Aṅguttara Nikāya 3.67
an3.67:0.2	7. Mahāvagga
an3.67:0.3	Kathāvatthusutta
an3.67:1.1	“Tīṇimāni, bhikkhave, kathāvatthūni.
an3.67:1.2	Katamāni tīṇi?
an3.67:1.3	Atītaṁ vā, bhikkhave, addhānaṁ ārabbha kathaṁ katheyya:
an3.67:1.4	‘evaṁ ahosi atītamaddhānan’ti.
an3.67:1.5	Anāgataṁ vā, bhikkhave, addhānaṁ ārabbha kathaṁ katheyya:
an3.67:1.6	‘evaṁ bhavissati anāgatamaddhānan’ti.
an3.67:1.7	Etarahi vā, bhikkhave, paccuppannaṁ addhānaṁ ārabbha kathaṁ katheyya:
an3.67:1.8	‘evaṁ hoti etarahi paccuppannamaddhānan’ti.
an3.67:2.1	Kathāsampayogena, bhikkhave, puggalo veditabbo yadi vā kaccho yadi vā akacchoti.
an3.67:2.2	Sacāyaṁ, bhikkhave, puggalo pañhaṁ puṭṭho samāno ekaṁsabyākaraṇīyaṁ pañhaṁ na ekaṁsena byākaroti, vibhajjabyākaraṇīyaṁ pañhaṁ na vibhajja byākaroti, paṭipucchābyākaraṇīyaṁ pañhaṁ na paṭipucchā byākaroti, ṭhapanīyaṁ pañhaṁ na ṭhapeti, evaṁ santāyaṁ, bhikkhave, puggalo akaccho hoti.
an3.67:2.3	Sace panāyaṁ, bhikkhave, puggalo pañhaṁ puṭṭho samāno ekaṁsabyākaraṇīyaṁ pañhaṁ ekaṁsena byākaroti, vibhajjabyākaraṇīyaṁ pañhaṁ vibhajja byākaroti, paṭipucchābyākaraṇīyaṁ pañhaṁ paṭipucchā byākaroti, ṭhapanīyaṁ pañhaṁ ṭhapeti, evaṁ santāyaṁ, bhikkhave, puggalo kaccho hoti.
an3.67:3.1	Kathāsampayogena, bhikkhave, puggalo veditabbo yadi vā kaccho yadi vā akacchoti.
an3.67:3.2	Sacāyaṁ, bhikkhave, puggalo pañhaṁ puṭṭho samāno ṭhānāṭhāne na saṇṭhāti parikappe na saṇṭhāti aññātavāde na saṇṭhāti paṭipadāya na saṇṭhāti, evaṁ santāyaṁ, bhikkhave, puggalo akaccho hoti.
an3.67:3.3	Sace panāyaṁ, bhikkhave, puggalo pañhaṁ puṭṭho samāno ṭhānāṭhāne saṇṭhāti parikappe saṇṭhāti aññātavāde saṇṭhāti paṭipadāya saṇṭhāti, evaṁ santāyaṁ, bhikkhave, puggalo kaccho hoti.
an3.67:4.1	Kathāsampayogena, bhikkhave, puggalo veditabbo yadi vā kaccho yadi vā akacchoti.
an3.67:4.2	Sacāyaṁ, bhikkhave, puggalo pañhaṁ puṭṭho samāno aññenaññaṁ paṭicarati, bahiddhā kathaṁ apanāmeti, kopañca dosañca appaccayañca pātukaroti, evaṁ santāyaṁ, bhikkhave, puggalo akaccho hoti.
an3.67:4.3	Sace panāyaṁ, bhikkhave, puggalo pañhaṁ puṭṭho samāno na aññenaññaṁ paṭicarati na bahiddhā kathaṁ apanāmeti, na kopañca dosañca appaccayañca pātukaroti, evaṁ santāyaṁ, bhikkhave, puggalo kaccho hoti.
an3.67:5.1	Kathāsampayogena, bhikkhave, puggalo veditabbo yadi vā kaccho yadi vā akacchoti.
an3.67:5.2	Sacāyaṁ, bhikkhave, puggalo pañhaṁ puṭṭho samāno abhiharati abhimaddati anupajagghati khalitaṁ gaṇhāti, evaṁ santāyaṁ, bhikkhave, puggalo akaccho hoti.
an3.67:5.3	Sace panāyaṁ, bhikkhave, puggalo pañhaṁ puṭṭho samāno nābhiharati nābhimaddati na anupajagghati na khalitaṁ gaṇhāti, evaṁ santāyaṁ, bhikkhave, puggalo kaccho hoti.
an3.67:6.1	Kathāsampayogena, bhikkhave, puggalo veditabbo yadi vā saupaniso yadi vā anupanisoti.
an3.67:6.2	Anohitasoto, bhikkhave, anupaniso hoti, ohitasoto saupaniso hoti.
an3.67:6.3	So saupaniso samāno abhijānāti ekaṁ dhammaṁ, parijānāti ekaṁ dhammaṁ, pajahati ekaṁ dhammaṁ, sacchikaroti ekaṁ dhammaṁ.
an3.67:6.4	So abhijānanto ekaṁ dhammaṁ, parijānanto ekaṁ dhammaṁ, pajahanto ekaṁ dhammaṁ, sacchikaronto ekaṁ dhammaṁ sammāvimuttiṁ phusati.
an3.67:6.5	Etadatthā, bhikkhave, kathā;
an3.67:6.6	etadatthā mantanā;
an3.67:6.7	etadatthā upanisā;
an3.67:6.8	etadatthaṁ sotāvadhānaṁ, yadidaṁ anupādā cittassa vimokkhoti.
an3.67:7.1	Ye viruddhā sallapanti,
an3.67:7.2	viniviṭṭhā samussitā;
an3.67:7.3	Anariyaguṇamāsajja,
an3.67:7.4	aññoññavivaresino.
an3.67:8.1	Dubbhāsitaṁ vikkhalitaṁ,
an3.67:8.2	sampamohaṁ parājayaṁ;
an3.67:8.3	Aññoññassābhinandanti,
an3.67:8.4	tadariyo kathanācare.
an3.67:9.1	Sace cassa kathākāmo,
an3.67:9.2	kālamaññāya paṇḍito;
an3.67:9.3	Dhammaṭṭhapaṭisaṁyuttā,
an3.67:9.4	yā ariyacaritā kathā.
an3.67:10.1	Taṁ kathaṁ kathaye dhīro,
an3.67:10.2	aviruddho anussito;
an3.67:10.3	Anunnatena manasā,
an3.67:10.4	apaḷāso asāhaso.
an3.67:11.1	Anusūyāyamāno so,
an3.67:11.2	sammadaññāya bhāsati;
an3.67:11.3	Subhāsitaṁ anumodeyya,
an3.67:11.4	dubbhaṭṭhe nāpasādaye.
an3.67:12.1	Upārambhaṁ na sikkheyya,
an3.67:12.2	khalitañca na gāhaye;
an3.67:12.3	Nābhihare nābhimadde,
an3.67:12.4	na vācaṁ payutaṁ bhaṇe.
an3.67:13.1	Aññātatthaṁ pasādatthaṁ,
an3.67:13.2	sataṁ ve hoti mantanā;
an3.67:13.3	Evaṁ kho ariyā mantenti,
an3.67:13.4	esā ariyāna mantanā;
an3.67:13.5	Etadaññāya medhāvī,
an3.67:13.6	na samusseyya mantaye”ti.
an3.67:13.7	Sattamaṁ.
an3.68:0.1	Aṅguttara Nikāya 3.68
an3.68:0.2	7. Mahāvagga
an3.68:0.3	Aññatitthiyasutta
an3.68:1.1	“Sace, bhikkhave, aññatitthiyā paribbājakā evaṁ puccheyyuṁ:
an3.68:1.2	‘tayome, āvuso, dhammā.
an3.68:1.3	Katame tayo?
an3.68:1.4	Rāgo, doso, moho—
an3.68:1.5	ime kho, āvuso, tayo dhammā.
an3.68:1.6	Imesaṁ, āvuso, tiṇṇaṁ dhammānaṁ ko viseso ko adhippayāso kiṁ nānākaraṇan’ti?
an3.68:1.7	Evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ kinti byākareyyāthā”ti?
an3.68:1.8	“Bhagavaṁmūlakā no, bhante, dhammā bhagavaṁnettikā bhagavaṁpaṭisaraṇā. Sādhu vata, bhante, bhagavantaṁyeva paṭibhātu etassa bhāsitassa attho. Bhagavato sutvā bhikkhū dhāressantī”ti.
an3.68:1.9	“Tena hi, bhikkhave, suṇātha, sādhukaṁ manasi karotha, bhāsissāmī”ti.
an3.68:1.10	“Evaṁ, bhante”ti kho te bhikkhū bhagavato paccassosuṁ.
an3.68:1.11	Bhagavā etadavoca:
an3.68:2.1	“Sace, bhikkhave, aññatitthiyā paribbājakā evaṁ puccheyyuṁ:
an3.68:2.2	‘tayome, āvuso, dhammā.
an3.68:2.3	Katame tayo?
an3.68:2.4	Rāgo, doso, moho—
an3.68:2.5	ime kho, āvuso, tayo dhammā;
an3.68:2.6	imesaṁ, āvuso, tiṇṇaṁ dhammānaṁ ko viseso ko adhippayāso kiṁ nānākaraṇan’ti?
an3.68:2.7	Evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:
an3.68:2.8	‘rāgo kho, āvuso, appasāvajjo dandhavirāgī, doso mahāsāvajjo khippavirāgī, moho mahāsāvajjo dandhavirāgī’ti.
an3.68:3.1	‘Ko panāvuso, hetu ko paccayo yena anuppanno vā rāgo uppajjati uppanno vā rāgo bhiyyobhāvāya vepullāya saṁvattatī’ti?
an3.68:3.2	‘“Subhanimittan”tissa vacanīyaṁ.
an3.68:3.3	Tassa subhanimittaṁ ayoniso manasi karoto anuppanno vā rāgo uppajjati uppanno vā rāgo bhiyyobhāvāya vepullāya saṁvattati.
an3.68:3.4	Ayaṁ kho, āvuso, hetu ayaṁ paccayo yena anuppanno vā rāgo uppajjati uppanno vā rāgo bhiyyobhāvāya vepullāya saṁvattatī’ti.
an3.68:4.1	‘Ko panāvuso, hetu ko paccayo yena anuppanno vā doso uppajjati uppanno vā doso bhiyyobhāvāya vepullāya saṁvattatī’ti?
an3.68:4.2	‘“Paṭighanimittan”tissa vacanīyaṁ.
an3.68:4.3	Tassa paṭighanimittaṁ ayoniso manasi karoto anuppanno vā doso uppajjati uppanno vā doso bhiyyobhāvāya vepullāya saṁvattati.
an3.68:4.4	Ayaṁ kho, āvuso, hetu ayaṁ paccayo yena anuppanno vā doso uppajjati uppanno vā doso bhiyyobhāvāya vepullāya saṁvattatī’ti.
an3.68:5.1	‘Ko panāvuso, hetu ko paccayo yena anuppanno vā moho uppajjati uppanno vā moho bhiyyobhāvāya vepullāya saṁvattatī’ti?
an3.68:5.2	‘“Ayoniso manasikāro”tissa vacanīyaṁ.
an3.68:5.3	Tassa ayoniso manasi karoto anuppanno vā moho uppajjati uppanno vā moho bhiyyobhāvāya vepullāya saṁvattati.
an3.68:5.4	Ayaṁ kho, āvuso, hetu ayaṁ paccayo yena anuppanno vā moho uppajjati uppanno vā moho bhiyyobhāvāya vepullāya saṁvattatī’ti.
an3.68:6.1	‘Ko panāvuso, hetu ko paccayo yena anuppanno ceva rāgo nuppajjati uppanno ca rāgo pahīyatī’ti?
an3.68:6.2	‘“Asubhanimittan”tissa vacanīyaṁ.
an3.68:6.3	Tassa asubhanimittaṁ yoniso manasi karoto anuppanno ceva rāgo nuppajjati uppanno ca rāgo pahīyati.
an3.68:6.4	Ayaṁ kho, āvuso, hetu ayaṁ paccayo yena anuppanno ceva rāgo nuppajjati uppanno ca rāgo pahīyatī’ti.
an3.68:7.1	‘Ko panāvuso, hetu ko paccayo yena anuppanno ceva doso nuppajjati uppanno ca doso pahīyatī’ti?
an3.68:7.2	‘“Mettā cetovimuttī”tissa vacanīyaṁ.
an3.68:7.3	Tassa mettaṁ cetovimuttiṁ yoniso manasi karoto anuppanno ceva doso nuppajjati uppanno ca doso pahīyati.
an3.68:7.4	Ayaṁ kho, āvuso, hetu ayaṁ paccayo yena anuppanno ceva doso nuppajjati uppanno ca doso pahīyatī’ti.
an3.68:8.1	‘Ko panāvuso, hetu ko paccayo yena anuppanno ceva moho nuppajjati uppanno ca moho pahīyatī’ti?
an3.68:8.2	‘“Yonisomanasikāro”tissa vacanīyaṁ.
an3.68:8.3	Tassa yoniso manasi karoto anuppanno ceva moho nuppajjati uppanno ca moho pahīyati.
an3.68:8.4	Ayaṁ kho, āvuso, hetu ayaṁ paccayo yena anuppanno vā moho nuppajjati uppanno ca moho pahīyatī’”ti.
an3.68:8.5	Aṭṭhamaṁ.
an3.69:0.1	Aṅguttara Nikāya 3.69
an3.69:0.2	7. Mahāvagga
an3.69:0.3	Akusalamūlasutta
an3.69:1.1	“Tīṇimāni, bhikkhave, akusalamūlāni.
an3.69:1.2	Katamāni tīṇi?
an3.69:1.3	Lobho akusalamūlaṁ, doso akusalamūlaṁ, moho akusalamūlaṁ.
an3.69:2.1	Yadapi, bhikkhave, lobho tadapi akusalamūlaṁ;
an3.69:2.2	yadapi luddho abhisaṅkharoti kāyena vācāya manasā tadapi akusalaṁ;
an3.69:2.3	yadapi luddho lobhena abhibhūto pariyādinnacitto parassa asatā dukkhaṁ uppādayati vadhena vā bandhanena vā jāniyā vā garahāya vā pabbājanāya vā balavamhi balattho itipi tadapi akusalaṁ.
an3.69:2.4	Itissame lobhajā lobhanidānā lobhasamudayā lobhapaccayā aneke pāpakā akusalā dhammā sambhavanti.
an3.69:3.1	Yadapi, bhikkhave, doso tadapi akusalamūlaṁ;
an3.69:3.2	yadapi duṭṭho abhisaṅkharoti kāyena vācāya manasā tadapi akusalaṁ;
an3.69:3.3	yadapi duṭṭho dosena abhibhūto pariyādinnacitto parassa asatā dukkhaṁ uppādayati vadhena vā bandhanena vā jāniyā vā garahāya vā pabbājanāya vā balavamhi balattho itipi tadapi akusalaṁ.
an3.69:3.4	Itissame dosajā dosanidānā dosasamudayā dosapaccayā aneke pāpakā akusalā dhammā sambhavanti.
an3.69:4.1	Yadapi, bhikkhave, moho tadapi akusalamūlaṁ;
an3.69:4.2	yadapi mūḷho abhisaṅkharoti kāyena vācāya manasā tadapi akusalaṁ;
an3.69:4.3	yadapi mūḷho mohena abhibhūto pariyādinnacitto parassa asatā dukkhaṁ uppādayati vadhena vā bandhanena vā jāniyā vā garahāya vā pabbājanāya vā balavamhi balattho itipi tadapi akusalaṁ.
an3.69:4.4	Itissame mohajā mohanidānā mohasamudayā mohapaccayā aneke pāpakā akusalā dhammā sambhavanti.
an3.69:4.5	Evarūpo cāyaṁ, bhikkhave, puggalo vuccati akālavādītipi, abhūtavādītipi, anatthavādītipi, adhammavādītipi, avinayavādītipi.
an3.69:5.1	Kasmā cāyaṁ, bhikkhave, evarūpo puggalo vuccati akālavādītipi, abhūtavādītipi, anatthavādītipi, adhammavādītipi, avinayavādītipi?
an3.69:5.2	Tathāhāyaṁ, bhikkhave, puggalo parassa asatā dukkhaṁ uppādayati vadhena vā bandhanena vā jāniyā vā garahāya vā pabbājanāya vā balavamhi balattho itipi.
an3.69:5.3	Bhūtena kho pana vuccamāno avajānāti, no paṭijānāti;
an3.69:5.4	abhūtena vuccamāno na ātappaṁ karoti, tassa nibbeṭhanāya itipetaṁ atacchaṁ itipetaṁ abhūtanti.
an3.69:5.5	Tasmā evarūpo puggalo vuccati akālavādītipi, abhūtavādītipi, anatthavādītipi, adhammavādītipi, avinayavādītipi.
an3.69:6.1	Evarūpo, bhikkhave, puggalo lobhajehi pāpakehi akusalehi dhammehi abhibhūto pariyādinnacitto diṭṭhe ceva dhamme dukkhaṁ viharati, savighātaṁ saupāyāsaṁ sapariḷāhaṁ.
an3.69:6.2	Kāyassa ca bhedā paraṁ maraṇā duggati pāṭikaṅkhā.
an3.69:7.1	Dosajehi …pe…
an3.69:7.2	mohajehi pāpakehi akusalehi dhammehi abhibhūto pariyādinnacitto diṭṭhe ceva dhamme dukkhaṁ viharati, savighātaṁ saupāyāsaṁ sapariḷāhaṁ.
an3.69:7.3	Kāyassa ca bhedā paraṁ maraṇā duggati pāṭikaṅkhā.
an3.69:7.4	Seyyathāpi, bhikkhave, sālo vā dhavo vā phandano vā tīhi māluvālatāhi uddhasto pariyonaddho anayaṁ āpajjati, byasanaṁ āpajjati, anayabyasanaṁ āpajjati;
an3.69:7.5	evamevaṁ kho, bhikkhave, evarūpo puggalo lobhajehi pāpakehi akusalehi dhammehi abhibhūto pariyādinnacitto diṭṭhe ceva dhamme dukkhaṁ viharati, savighātaṁ saupāyāsaṁ sapariḷāhaṁ.
an3.69:7.6	Kāyassa ca bhedā paraṁ maraṇā duggati pāṭikaṅkhā.
an3.69:8.1	Dosajehi …pe…
an3.69:8.2	mohajehi pāpakehi akusalehi dhammehi abhibhūto pariyādinnacitto diṭṭhe ceva dhamme dukkhaṁ viharati savighātaṁ saupāyāsaṁ sapariḷāhaṁ.
an3.69:8.3	Kāyassa ca bhedā paraṁ maraṇā duggati pāṭikaṅkhā.
an3.69:8.4	Imāni kho, bhikkhave, tīṇi akusalamūlānīti.
an3.69:9.1	Tīṇimāni, bhikkhave, kusalamūlāni.
an3.69:9.2	Katamāni tīṇi?
an3.69:9.3	Alobho kusalamūlaṁ, adoso kusalamūlaṁ, amoho kusalamūlaṁ.
an3.69:10.1	Yadapi, bhikkhave, alobho tadapi kusalamūlaṁ;
an3.69:10.2	yadapi aluddho abhisaṅkharoti kāyena vācāya manasā tadapi kusalaṁ;
an3.69:10.3	yadapi aluddho lobhena anabhibhūto apariyādinnacitto na parassa asatā dukkhaṁ uppādayati vadhena vā bandhanena vā jāniyā vā garahāya vā pabbājanāya vā balavamhi balattho itipi tadapi kusalaṁ.
an3.69:10.4	Itissame alobhajā alobhanidānā alobhasamudayā alobhapaccayā aneke kusalā dhammā sambhavanti.
an3.69:11.1	Yadapi, bhikkhave, adoso tadapi kusalamūlaṁ;
an3.69:11.2	yadapi aduṭṭho abhisaṅkharoti kāyena vācāya manasā tadapi kusalaṁ;
an3.69:11.3	yadapi aduṭṭho dosena anabhibhūto apariyādinnacitto na parassa asatā dukkhaṁ uppādayati vadhena vā bandhanena vā jāniyā vā garahāya vā pabbājanāya vā balavamhi balattho itipi tadapi kusalaṁ.
an3.69:11.4	Itissame adosajā adosanidānā adosasamudayā adosapaccayā aneke kusalā dhammā sambhavanti.
an3.69:12.1	Yadapi, bhikkhave, amoho tadapi kusalamūlaṁ;
an3.69:12.2	yadapi amūḷho abhisaṅkharoti kāyena vācāya manasā tadapi kusalaṁ;
an3.69:12.3	yadapi amūḷho mohena anabhibhūto apariyādinnacitto na parassa asatā dukkhaṁ uppādayati vadhena vā bandhanena vā jāniyā vā garahāya vā pabbājanāya vā balavamhi balattho itipi tadapi kusalaṁ.
an3.69:12.4	Itissame amohajā amohanidānā amohasamudayā amohapaccayā aneke kusalā dhammā sambhavanti.
an3.69:12.5	Evarūpo cāyaṁ, bhikkhave, puggalo vuccati kālavādītipi, bhūtavādītipi, atthavādītipi, dhammavādītipi, vinayavādītipi.
an3.69:13.1	Kasmā cāyaṁ, bhikkhave, evarūpo puggalo vuccati kālavādītipi, bhūtavādītipi, atthavādītipi, dhammavādītipi, vinayavādītipi?
an3.69:13.2	Tathāhāyaṁ, bhikkhave, puggalo na parassa asatā dukkhaṁ uppādayati vadhena vā bandhanena vā jāniyā vā garahāya vā pabbājanāya vā balavamhi balattho itipi.
an3.69:13.3	Bhūtena kho pana vuccamāno paṭijānāti no avajānāti;
an3.69:13.4	abhūtena vuccamāno ātappaṁ karoti tassa nibbeṭhanāya:
an3.69:13.5	‘itipetaṁ atacchaṁ, itipetaṁ abhūtan’ti.
an3.69:13.6	Tasmā evarūpo puggalo vuccati kālavādītipi, atthavādītipi, dhammavādītipi, vinayavādītipi.
an3.69:14.1	Evarūpassa, bhikkhave, puggalassa lobhajā pāpakā akusalā dhammā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an3.69:14.2	Diṭṭheva dhamme sukhaṁ viharati avighātaṁ anupāyāsaṁ apariḷāhaṁ.
an3.69:14.3	Diṭṭheva dhamme parinibbāyati.
an3.69:15.1	Dosajā …pe…
an3.69:15.2	parinibbāyati.
an3.69:15.3	Mohajā …pe…
an3.69:15.4	parinibbāyati.
an3.69:15.5	Seyyathāpi bhikkhave, sālo vā dhavo vā phandano vā tīhi māluvālatāhi uddhasto pariyonaddho.
an3.69:15.6	Atha puriso āgaccheyya kudālapiṭakaṁ ādāya.
an3.69:15.7	So taṁ māluvālataṁ mūle chindeyya, mūle chetvā palikhaṇeyya, palikhaṇitvā mūlāni uddhareyya, antamaso usīranāḷimattānipi.
an3.69:15.8	So taṁ māluvālataṁ khaṇḍākhaṇḍikaṁ chindeyya, khaṇḍākhaṇḍikaṁ chetvā phāleyya, phāletvā sakalikaṁ sakalikaṁ kareyya, sakalikaṁ sakalikaṁ karitvā vātātape visoseyya, vātātape visosetvā agginā ḍaheyya, agginā ḍahitvā masiṁ kareyya, masiṁ karitvā mahāvāte vā ophuṇeyya nadiyā vā sīghasotāya pavāheyya.
an3.69:15.9	Evamassa tā, bhikkhave, māluvālatā ucchinnamūlā tālāvatthukatā anabhāvaṅkatā āyatiṁ anuppādadhammā.
an3.69:15.10	Evamevaṁ kho, bhikkhave, evarūpassa puggalassa lobhajā pāpakā akusalā dhammā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an3.69:15.11	Diṭṭheva dhamme sukhaṁ viharati avighātaṁ anupāyāsaṁ apariḷāhaṁ.
an3.69:15.12	Diṭṭheva dhamme parinibbāyati.
an3.69:16.1	Dosajā …pe…
an3.69:16.2	mohajā pāpakā akusalā dhammā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an3.69:16.3	Diṭṭheva dhamme sukhaṁ viharati avighātaṁ anupāyāsaṁ apariḷāhaṁ.
an3.69:16.4	Diṭṭheva dhamme parinibbāyati.
an3.69:16.5	Imāni kho, bhikkhave, tīṇi kusalamūlānī”ti.
an3.69:16.6	Navamaṁ.
an3.70:0.1	Aṅguttara Nikāya 3.70
an3.70:0.2	7. Mahāvagga
an3.70:0.3	Uposathasutta
an3.70:1.1	Evaṁ me sutaṁ—
an3.70:1.2	ekaṁ samayaṁ bhagavā sāvatthiyaṁ viharati pubbārāme migāramātupāsāde.
an3.70:1.3	Atha kho visākhā migāramātā tadahuposathe yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho visākhaṁ migāramātaraṁ bhagavā etadavoca:
an3.70:1.4	“handa kuto nu tvaṁ, visākhe, āgacchasi divā divassā”ti?
an3.70:1.5	“Uposathāhaṁ, bhante, ajja upavasāmī”ti.
an3.70:2.1	“Tayo khome, visākhe, uposathā.
an3.70:2.2	Katame tayo?
an3.70:2.3	Gopālakuposatho, nigaṇṭhuposatho, ariyuposatho.
an3.70:2.4	Kathañca, visākhe, gopālakuposatho hoti?
an3.70:2.5	Seyyathāpi, visākhe, gopālako sāyanhasamaye sāmikānaṁ gāvo niyyātetvā iti paṭisañcikkhati:
an3.70:2.6	‘ajja kho gāvo amukasmiñca amukasmiñca padese cariṁsu, amukasmiñca amukasmiñca padese pānīyāni piviṁsu;
an3.70:2.7	sve dāni gāvo amukasmiñca amukasmiñca padese carissanti, amukasmiñca amukasmiñca padese pānīyāni pivissantī’ti;
an3.70:2.8	evamevaṁ kho, visākhe, idhekacco uposathiko iti paṭisañcikkhati:
an3.70:2.9	‘ahaṁ khvajja idañcidañca khādanīyaṁ khādiṁ, idañcidañca bhojanīyaṁ bhuñjiṁ;
an3.70:2.10	sve dānāhaṁ idañcidañca khādanīyaṁ khādissāmi, idañcidañca bhojanīyaṁ bhuñjissāmī’ti.
an3.70:2.11	So tena abhijjhāsahagatena cetasā divasaṁ atināmeti.
an3.70:2.12	Evaṁ kho, visākhe, gopālakuposatho hoti.
an3.70:2.13	Evaṁ upavuttho kho, visākhe, gopālakuposatho na mahapphalo hoti na mahānisaṁso na mahājutiko na mahāvipphāro.
an3.70:3.1	Kathañca, visākhe, nigaṇṭhuposatho hoti?
an3.70:3.2	Atthi, visākhe, nigaṇṭhā nāma samaṇajātikā.
an3.70:3.3	Te sāvakaṁ evaṁ samādapenti:
an3.70:3.4	‘ehi tvaṁ, ambho purisa, ye puratthimāya disāya pāṇā paraṁ yojanasataṁ tesu daṇḍaṁ nikkhipāhi;
an3.70:3.5	ye pacchimāya disāya pāṇā paraṁ yojanasataṁ tesu daṇḍaṁ nikkhipāhi;
an3.70:3.6	ye uttarāya disāya pāṇā paraṁ yojanasataṁ tesu daṇḍaṁ nikkhipāhi;
an3.70:3.7	ye dakkhiṇāya disāya pāṇā paraṁ yojanasataṁ tesu daṇḍaṁ nikkhipāhī’ti.
an3.70:3.8	Iti ekaccānaṁ pāṇānaṁ anuddayāya anukampāya samādapenti, ekaccānaṁ pāṇānaṁ nānuddayāya nānukampāya samādapenti.
an3.70:3.9	Te tadahuposathe sāvakaṁ evaṁ samādapenti:
an3.70:3.10	‘ehi tvaṁ, ambho purisa, sabbacelāni nikkhipitvā evaṁ vadehi—
an3.70:3.11	nāhaṁ kvacani kassaci kiñcanatasmiṁ, na ca mama kvacani katthaci kiñcanatatthī’ti.
an3.70:3.12	Jānanti kho panassa mātāpitaro:
an3.70:3.13	‘ayaṁ amhākaṁ putto’ti;
an3.70:3.14	sopi jānāti:
an3.70:3.15	‘ime mayhaṁ mātāpitaro’ti.
an3.70:3.16	Jānāti kho panassa puttadāro:
an3.70:3.17	‘ayaṁ mayhaṁ bhattā’ti;
an3.70:3.18	sopi jānāti:
an3.70:3.19	‘ayaṁ mayhaṁ puttadāro’ti.
an3.70:3.20	Jānanti kho panassa dāsakammakaraporisā:
an3.70:3.21	‘ayaṁ amhākaṁ ayyo’ti;
an3.70:3.22	sopi jānāti:
an3.70:3.23	‘ime mayhaṁ dāsakammakaraporisā’ti.
an3.70:3.24	Iti yasmiṁ samaye sacce samādapetabbā musāvāde tasmiṁ samaye samādapenti.
an3.70:3.25	Idaṁ tassa musāvādasmiṁ vadāmi.
an3.70:3.26	So tassā rattiyā accayena bhoge adinnaṁyeva paribhuñjati.
an3.70:3.27	Idaṁ tassa adinnādānasmiṁ vadāmi.
an3.70:3.28	Evaṁ kho, visākhe, nigaṇṭhuposatho hoti.
an3.70:3.29	Evaṁ upavuttho kho, visākhe, nigaṇṭhuposatho na mahapphalo hoti na mahānisaṁso na mahājutiko na mahāvipphāro.
an3.70:4.1	Kathañca, visākhe, ariyuposatho hoti?
an3.70:4.2	Upakkiliṭṭhassa, visākhe, cittassa upakkamena pariyodapanā hoti.
an3.70:4.3	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:4.4	Idha, visākhe, ariyasāvako tathāgataṁ anussarati:
an3.70:4.5	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an3.70:4.6	Tassa tathāgataṁ anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti, seyyathāpi, visākhe, upakkiliṭṭhassa sīsassa upakkamena pariyodapanā hoti.
an3.70:5.1	Kathañca, visākhe, upakkiliṭṭhassa sīsassa upakkamena pariyodapanā hoti?
an3.70:5.2	Kakkañca paṭicca mattikañca paṭicca udakañca paṭicca purisassa ca tajjaṁ vāyāmaṁ paṭicca, evaṁ kho, visākhe, upakkiliṭṭhassa sīsassa upakkamena pariyodapanā hoti.
an3.70:5.3	Evamevaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:6.1	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:6.2	Idha, visākhe, ariyasāvako tathāgataṁ anussarati:
an3.70:6.3	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an3.70:6.4	Tassa tathāgataṁ anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti.
an3.70:6.5	Ayaṁ vuccati, visākhe:
an3.70:6.6	‘ariyasāvako brahmuposathaṁ upavasati, brahmunā saddhiṁ saṁvasati, brahmañcassa ārabbha cittaṁ pasīdati, pāmojjaṁ uppajjati, ye cittassa upakkilesā te pahīyanti’.
an3.70:6.7	Evaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:7.1	Upakkiliṭṭhassa, visākhe, cittassa upakkamena pariyodapanā hoti.
an3.70:7.2	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:7.3	Idha, visākhe, ariyasāvako dhammaṁ anussarati:
an3.70:7.4	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.
an3.70:7.5	Tassa dhammaṁ anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti, seyyathāpi, visākhe, upakkiliṭṭhassa kāyassa upakkamena pariyodapanā hoti.
an3.70:8.1	Kathañca, visākhe, upakkiliṭṭhassa kāyassa upakkamena pariyodapanā hoti?
an3.70:8.2	Sottiñca paṭicca, cuṇṇañca paṭicca, udakañca paṭicca, purisassa ca tajjaṁ vāyāmaṁ paṭicca.
an3.70:8.3	Evaṁ kho, visākhe, upakkiliṭṭhassa kāyassa upakkamena pariyodapanā hoti.
an3.70:8.4	Evamevaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:9.1	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:9.2	Idha, visākhe, ariyasāvako dhammaṁ anussarati:
an3.70:9.3	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.
an3.70:9.4	Tassa dhammaṁ anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti.
an3.70:9.5	Ayaṁ vuccati, visākhe, ‘ariyasāvako dhammuposathaṁ upavasati, dhammena saddhiṁ saṁvasati, dhammañcassa ārabbha cittaṁ pasīdati, pāmojjaṁ uppajjati, ye cittassa upakkilesā te pahīyanti’.
an3.70:9.6	Evaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:10.1	Upakkiliṭṭhassa, visākhe, cittassa upakkamena pariyodapanā hoti.
an3.70:10.2	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:10.3	Idha, visākhe, ariyasāvako saṅghaṁ anussarati:
an3.70:10.4	‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.
an3.70:10.5	Tassa saṅghaṁ anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti, seyyathāpi, visākhe, upakkiliṭṭhassa vatthassa upakkamena pariyodapanā hoti.
an3.70:11.1	Kathañca, visākhe, upakkiliṭṭhassa vatthassa upakkamena pariyodapanā hoti?
an3.70:11.2	Usmañca paṭicca, khārañca paṭicca, gomayañca paṭicca, udakañca paṭicca, purisassa ca tajjaṁ vāyāmaṁ paṭicca.
an3.70:11.3	Evaṁ kho, visākhe, upakkiliṭṭhassa vatthassa upakkamena pariyodapanā hoti.
an3.70:11.4	Evamevaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:12.1	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:12.2	Idha, visākhe, ariyasāvako saṅghaṁ anussarati:
an3.70:12.3	‘suppaṭipanno bhagavato sāvakasaṅgho …pe… anuttaraṁ puññakkhettaṁ lokassā’ti.
an3.70:12.4	Tassa saṅghaṁ anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti.
an3.70:12.5	Ayaṁ vuccati, visākhe, ‘ariyasāvako saṅghuposathaṁ upavasati, saṅghena saddhiṁ saṁvasati, saṅghañcassa ārabbha cittaṁ pasīdati, pāmojjaṁ uppajjati, ye cittassa upakkilesā te pahīyanti’.
an3.70:12.6	Evaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:13.1	Upakkiliṭṭhassa, visākhe, cittassa upakkamena pariyodapanā hoti.
an3.70:13.2	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:13.3	Idha, visākhe, ariyasāvako attano sīlāni anussarati akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni.
an3.70:13.4	Tassa sīlaṁ anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti, seyyathāpi, visākhe, upakkiliṭṭhassa ādāsassa upakkamena pariyodapanā hoti.
an3.70:14.1	Kathañca, visākhe, upakkiliṭṭhassa ādāsassa upakkamena pariyodapanā hoti?
an3.70:14.2	Telañca paṭicca, chārikañca paṭicca, vālaṇḍupakañca paṭicca, purisassa ca tajjaṁ vāyāmaṁ paṭicca.
an3.70:14.3	Evaṁ kho, visākhe, upakkiliṭṭhassa ādāsassa upakkamena pariyodapanā hoti.
an3.70:14.4	Evamevaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:15.1	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:15.2	Idha, visākhe, ariyasāvako attano sīlāni anussarati akhaṇḍāni …pe… samādhisaṁvattanikāni.
an3.70:15.3	Tassa sīlaṁ anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti.
an3.70:15.4	Ayaṁ vuccati, visākhe, ‘ariyasāvako sīluposathaṁ upavasati, sīlena saddhiṁ saṁvasati, sīlañcassa ārabbha cittaṁ pasīdati, pāmojjaṁ uppajjati, ye cittassa upakkilesā te pahīyanti’.
an3.70:15.5	Evaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:16.1	Upakkiliṭṭhassa, visākhe, cittassa upakkamena pariyodapanā hoti.
an3.70:16.2	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:16.3	Idha, visākhe, ariyasāvako devatā anussarati:
an3.70:16.4	‘santi devā cātumahārājikā, santi devā tāvatiṁsā, santi devā yāmā, santi devā tusitā, santi devā nimmānaratino, santi devā paranimmitavasavattino, santi devā brahmakāyikā, santi devā tatuttari.
an3.70:16.5	Yathārūpāya saddhāya samannāgatā tā devatā ito cutā tatthupapannā, mayhampi tathārūpā saddhā saṁvijjati.
an3.70:16.6	Yathārūpena sīlena samannāgatā tā devatā ito cutā tatthupapannā, mayhampi tathārūpaṁ sīlaṁ saṁvijjati.
an3.70:16.7	Yathārūpena sutena samannāgatā tā devatā ito cutā tatthupapannā, mayhampi tathārūpaṁ sutaṁ saṁvijjati.
an3.70:16.8	Yathārūpena cāgena samannāgatā tā devatā ito cutā tatthupapannā, mayhampi tathārūpo cāgo saṁvijjati.
an3.70:16.9	Yathārūpāya paññāya samannāgatā tā devatā ito cutā tatthupapannā, mayhampi tathārūpā paññā saṁvijjatī’ti.
an3.70:16.10	Tassa attano ca tāsañca devatānaṁ saddhañca sīlañca sutañca cāgañca paññañca anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti, seyyathāpi, visākhe, upakkiliṭṭhassa jātarūpassa upakkamena pariyodapanā hoti.
an3.70:17.1	Kathañca, visākhe, upakkiliṭṭhassa jātarūpassa upakkamena pariyodapanā hoti?
an3.70:17.2	Ukkañca paṭicca, loṇañca paṭicca, gerukañca paṭicca, nāḷikasaṇḍāsañca paṭicca, purisassa ca tajjaṁ vāyāmaṁ paṭicca.
an3.70:17.3	Evaṁ kho, visākhe, upakkiliṭṭhassa jātarūpassa upakkamena pariyodapanā hoti.
an3.70:17.4	Evamevaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:18.1	Kathañca, visākhe, upakkiliṭṭhassa cittassa upakkamena pariyodapanā hoti?
an3.70:18.2	Idha, visākhe, ariyasāvako devatā anussarati:
an3.70:18.3	‘santi devā cātumahārājikā, santi devā tāvatiṁsā …pe… santi devā tatuttari.
an3.70:18.4	Yathārūpāya saddhāya samannāgatā tā devatā ito cutā tatthupapannā, mayhampi tathārūpā saddhā saṁvijjati.
an3.70:18.5	Yathārūpena sīlena …
an3.70:18.6	sutena …
an3.70:18.7	cāgena …
an3.70:18.8	paññāya samannāgatā tā devatā ito cutā tatthupapannā, mayhampi tathārūpā paññā saṁvijjatī’ti.
an3.70:18.9	Tassa attano ca tāsañca devatānaṁ saddhañca sīlañca sutañca cāgañca paññañca anussarato cittaṁ pasīdati, pāmojjaṁ uppajjati, ye cittassa upakkilesā te pahīyanti.
an3.70:18.10	Ayaṁ vuccati, visākhe, ‘ariyasāvako devatuposathaṁ upavasati, devatāhi saddhiṁ saṁvasati, devatā ārabbha cittaṁ pasīdati, pāmojjaṁ uppajjati, ye cittassa upakkilesā te pahīyanti’.
an3.70:18.11	Evaṁ kho, visākhe, upakkiliṭṭhassa cittassa upakkamena pariyodapanā hoti.
an3.70:19.1	Sa kho so, visākhe, ariyasāvako iti paṭisañcikkhati:
an3.70:19.2	‘yāvajīvaṁ arahanto pāṇātipātaṁ pahāya pāṇātipātā paṭiviratā nihitadaṇḍā nihitasatthā lajjī dayāpannā sabbapāṇabhūtahitānukampī viharanti;
an3.70:19.3	ahampajja imañca rattiṁ imañca divasaṁ pāṇātipātaṁ pahāya pāṇātipātā paṭivirato nihitadaṇḍo nihitasattho lajjī dayāpanno sabbapāṇabhūtahitānukampī viharāmi.
an3.70:19.4	Imināpi aṅgena arahataṁ anukaromi, uposatho ca me upavuttho bhavissati.
an3.70:20.1	Yāvajīvaṁ arahanto adinnādānaṁ pahāya adinnādānā paṭiviratā dinnādāyī dinnapāṭikaṅkhī, athenena sucibhūtena attanā viharanti;
an3.70:20.2	ahampajja imañca rattiṁ imañca divasaṁ adinnādānaṁ pahāya adinnādānā paṭivirato dinnādāyī dinnapāṭikaṅkhī, athenena sucibhūtena attanā viharāmi.
an3.70:20.3	Imināpi aṅgena arahataṁ anukaromi, uposatho ca me upavuttho bhavissati.
an3.70:21.1	Yāvajīvaṁ arahanto abrahmacariyaṁ pahāya brahmacārī ārācārī viratā methunā gāmadhammā;
an3.70:21.2	ahampajja imañca rattiṁ imañca divasaṁ abrahmacariyaṁ pahāya brahmacārī ārācārī virato methunā gāmadhammā.
an3.70:21.3	Imināpi aṅgena arahataṁ anukaromi, uposatho ca me upavuttho bhavissati.
an3.70:22.1	Yāvajīvaṁ arahanto musāvādaṁ pahāya musāvādā paṭiviratā saccavādī saccasandhā thetā paccayikā avisaṁvādakā lokassa;
an3.70:22.2	ahampajja imañca rattiṁ imañca divasaṁ musāvādaṁ pahāya musāvādā paṭivirato saccavādī saccasandho theto paccayiko avisaṁvādako lokassa.
an3.70:22.3	Imināpi aṅgena arahataṁ anukaromi, uposatho ca me upavuttho bhavissati.
an3.70:23.1	Yāvajīvaṁ arahanto surāmerayamajjapamādaṭṭhānaṁ pahāya surāmerayamajjapamādaṭṭhānā paṭiviratā;
an3.70:23.2	ahampajja imañca rattiṁ imañca divasaṁ surāmerayamajjapamādaṭṭhānaṁ pahāya surāmerayamajjapamādaṭṭhānā paṭivirato.
an3.70:23.3	Imināpi aṅgena arahataṁ anukaromi, uposatho ca me upavuttho bhavissati.
an3.70:24.1	Yāvajīvaṁ arahanto ekabhattikā rattūparatā viratā vikālabhojanā;
an3.70:24.2	ahampajja imañca rattiṁ imañca divasaṁ ekabhattiko rattūparato virato vikālabhojanā.
an3.70:24.3	Imināpi aṅgena arahataṁ anukaromi, uposatho ca me upavuttho bhavissati.
an3.70:25.1	Yāvajīvaṁ arahanto naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānā paṭiviratā;
an3.70:25.2	ahampajja imañca rattiṁ imañca divasaṁ naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānā paṭivirato.
an3.70:25.3	Imināpi aṅgena arahataṁ anukaromi, uposatho ca me upavuttho bhavissati.
an3.70:26.1	Yāvajīvaṁ arahanto uccāsayanamahāsayanaṁ pahāya uccāsayanamahāsayanā paṭiviratā nīcaseyyaṁ kappenti mañcake vā tiṇasanthārake vā;
an3.70:26.2	ahampajja imañca rattiṁ imañca divasaṁ uccāsayanamahāsayanaṁ pahāya uccāsayanamahāsayanā paṭivirato nīcaseyyaṁ kappemi mañcake vā tiṇasanthārake vā.
an3.70:26.3	Imināpi aṅgena arahataṁ anukaromi, uposatho ca me upavuttho bhavissatī’ti.
an3.70:27.1	Evaṁ kho, visākhe, ariyuposatho hoti.
an3.70:27.2	Evaṁ upavuttho kho, visākhe, ariyuposatho mahapphalo hoti mahānisaṁso mahājutiko mahāvipphāro.
an3.70:28.1	Kīvamahapphalo hoti kīvamahānisaṁso kīvamahājutiko kīvamahāvipphāro?
an3.70:28.2	Seyyathāpi, visākhe, yo imesaṁ soḷasannaṁ mahājanapadānaṁ pahūtarattaratanānaṁ issariyādhipaccaṁ rajjaṁ kāreyya, seyyathidaṁ—
an3.70:28.3	aṅgānaṁ, magadhānaṁ, kāsīnaṁ, kosalānaṁ, vajjīnaṁ, mallānaṁ, cetīnaṁ, vaṅgānaṁ, kurūnaṁ, pañcālānaṁ, macchānaṁ, sūrasenānaṁ, assakānaṁ, avantīnaṁ, gandhārānaṁ, kambojānaṁ, aṭṭhaṅgasamannāgatassa uposathassa etaṁ kalaṁ nāgghati soḷasiṁ.
an3.70:28.4	Taṁ kissa hetu?
an3.70:28.5	Kapaṇaṁ, visākhe, mānusakaṁ rajjaṁ dibbaṁ sukhaṁ upanidhāya.
an3.70:29.1	Yāni, visākhe, mānusakāni paññāsa vassāni, cātumahārājikānaṁ devānaṁ eso eko rattindivo.
an3.70:29.2	Tāya rattiyā tiṁsarattiyo māso.
an3.70:29.3	Tena māsena dvādasamāsiyo saṁvaccharo.
an3.70:29.4	Tena saṁvaccharena dibbāni pañca vassasatāni cātumahārājikānaṁ devānaṁ āyuppamāṇaṁ.
an3.70:29.5	Ṭhānaṁ kho panetaṁ, visākhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā cātumahārājikānaṁ devānaṁ sahabyataṁ upapajjeyya.
an3.70:29.6	Idaṁ kho panetaṁ, visākhe, sandhāya bhāsitaṁ:
an3.70:29.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an3.70:30.1	Yaṁ, visākhe, mānusakaṁ vassasataṁ, tāvatiṁsānaṁ devānaṁ eso eko rattindivo.
an3.70:30.2	Tāya rattiyā tiṁsarattiyo māso.
an3.70:30.3	Tena māsena dvādasamāsiyo saṁvaccharo.
an3.70:30.4	Tena saṁvaccharena dibbaṁ vassasahassaṁ tāvatiṁsānaṁ devānaṁ āyuppamāṇaṁ.
an3.70:30.5	Ṭhānaṁ kho panetaṁ, visākhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā tāvatiṁsānaṁ devānaṁ sahabyataṁ upapajjeyya.
an3.70:30.6	Idaṁ kho panetaṁ, visākhe, sandhāya bhāsitaṁ:
an3.70:30.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an3.70:31.1	Yāni, visākhe, mānusakāni dve vassasatāni, yāmānaṁ devānaṁ eso eko rattindivo.
an3.70:31.2	Tāya rattiyā tiṁsarattiyo māso.
an3.70:31.3	Tena māsena dvādasamāsiyo saṁvaccharo.
an3.70:31.4	Tena saṁvaccharena dibbāni dve vassasahassāni yāmānaṁ devānaṁ āyuppamāṇaṁ.
an3.70:31.5	Ṭhānaṁ kho panetaṁ, visākhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā yāmānaṁ devānaṁ sahabyataṁ upapajjeyya.
an3.70:31.6	Idaṁ kho panetaṁ, visākhe, sandhāya bhāsitaṁ:
an3.70:31.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an3.70:32.1	Yāni, visākhe, mānusakāni cattāri vassasatāni, tusitānaṁ devānaṁ eso eko rattindivo.
an3.70:32.2	Tāya rattiyā tiṁsarattiyo māso.
an3.70:32.3	Tena māsena dvādasamāsiyo saṁvaccharo.
an3.70:32.4	Tena saṁvaccharena dibbāni cattāri vassasahassāni tusitānaṁ devānaṁ āyuppamāṇaṁ.
an3.70:32.5	Ṭhānaṁ kho panetaṁ, visākhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā tusitānaṁ devānaṁ sahabyataṁ upapajjeyya.
an3.70:32.6	Idaṁ kho panetaṁ, visākhe, sandhāya bhāsitaṁ:
an3.70:32.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an3.70:33.1	Yāni, visākhe, mānusakāni aṭṭha vassasatāni, nimmānaratīnaṁ devānaṁ eso eko rattindivo.
an3.70:33.2	Tāya rattiyā tiṁsarattiyo māso.
an3.70:33.3	Tena māsena dvādasamāsiyo saṁvaccharo.
an3.70:33.4	Tena saṁvaccharena dibbāni aṭṭha vassasahassāni nimmānaratīnaṁ devānaṁ āyuppamāṇaṁ.
an3.70:33.5	Ṭhānaṁ kho panetaṁ, visākhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā nimmānaratīnaṁ devānaṁ sahabyataṁ upapajjeyya.
an3.70:33.6	Idaṁ kho panetaṁ, visākhe, sandhāya bhāsitaṁ:
an3.70:33.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an3.70:34.1	Yāni, visākhe, mānusakāni soḷasa vassasatāni, paranimmitavasavattīnaṁ devānaṁ eso eko rattindivo.
an3.70:34.2	Tāya rattiyā tiṁsarattiyo māso.
an3.70:34.3	Tena māsena dvādasamāsiyo saṁvaccharo.
an3.70:34.4	Tena saṁvaccharena dibbāni soḷasa vassasahassāni paranimmitavasavattīnaṁ devānaṁ āyuppamāṇaṁ.
an3.70:34.5	Ṭhānaṁ kho panetaṁ, visākhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā paranimmitavasavattīnaṁ devānaṁ sahabyataṁ upapajjeyya.
an3.70:34.6	Idaṁ kho panetaṁ, visākhe, sandhāya bhāsitaṁ:
an3.70:34.7	‘kapaṇaṁ mānusakaṁ rajjaṁ dibbaṁ sukhaṁ upanidhāyā’ti.
an3.70:35.1	Pāṇaṁ na haññe na cadinnamādiye,
an3.70:35.2	Musā na bhāse na ca majjapo siyā;
an3.70:35.3	Abrahmacariyā virameyya methunā,
an3.70:35.4	Rattiṁ na bhuñjeyya vikālabhojanaṁ.
an3.70:36.1	Mālaṁ na dhāre na ca gandhamācare,
an3.70:36.2	Mañce chamāyaṁ va sayetha santhate;
an3.70:36.3	Etañhi aṭṭhaṅgikamāhuposathaṁ,
an3.70:36.4	Buddhena dukkhantagunā pakāsitaṁ.
an3.70:37.1	Cando ca suriyo ca ubho sudassanā,
an3.70:37.2	Obhāsayaṁ anupariyanti yāvatā;
an3.70:37.3	Tamonudā te pana antalikkhagā,
an3.70:37.4	Nabhe pabhāsanti disāvirocanā.
an3.70:38.1	Etasmiṁ yaṁ vijjati antare dhanaṁ,
an3.70:38.2	Muttā maṇi veḷuriyañca bhaddakaṁ;
an3.70:38.3	Siṅgī suvaṇṇaṁ atha vāpi kañcanaṁ,
an3.70:38.4	Yaṁ jātarūpaṁ haṭakanti vuccati.
an3.70:39.1	Aṭṭhaṅgupetassa uposathassa,
an3.70:39.2	Kalampi te nānubhavanti soḷasiṁ;
an3.70:39.3	Candappabhā tāragaṇā ca sabbe.
an3.70:40.1	Tasmā hi nārī ca naro ca sīlavā,
an3.70:40.2	Aṭṭhaṅgupetaṁ upavassuposathaṁ;
an3.70:40.3	Puññāni katvāna sukhudrayāni,
an3.70:40.4	Aninditā saggamupenti ṭhānan”ti.
an3.70:40.5	Dasamaṁ.
an3.70:40.6	Mahāvaggo sattamo.
an3.70:41.0	Tassuddānaṁ
an3.70:41.1	Titthabhayañca venāgo,
an3.70:41.2	sarabho kesamuttiyā;
an3.70:41.3	Sāḷho cāpi kathāvatthu,
an3.70:41.4	titthiyamūluposathoti.
an3.71:0.1	Aṅguttara Nikāya 3.71
an3.71:0.2	8. Ānandavagga
an3.71:0.3	Channasutta
an3.71:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an3.71:1.2	Atha kho channo paribbājako yenāyasmā ānando tenupasaṅkami; upasaṅkamitvā āyasmatā ānandena saddhiṁ sammodi.
an3.71:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho channo paribbājako āyasmantaṁ ānandaṁ etadavoca:
an3.71:1.4	“tumhepi, āvuso ānanda, rāgassa pahānaṁ paññāpetha, dosassa pahānaṁ paññāpetha, mohassa pahānaṁ paññāpethā”ti.
an3.71:1.5	“Mayaṁ kho, āvuso, rāgassa pahānaṁ paññāpema, dosassa pahānaṁ paññāpema, mohassa pahānaṁ paññapemā”ti.
an3.71:2.1	“Kiṁ pana tumhe, āvuso, rāge ādīnavaṁ disvā rāgassa pahānaṁ paññāpetha, kiṁ dose ādīnavaṁ disvā dosassa pahānaṁ paññāpetha, kiṁ mohe ādīnavaṁ disvā mohassa pahānaṁ paññāpethā”ti?
an3.71:3.1	“Ratto kho, āvuso, rāgena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṁ domanassaṁ paṭisaṁvedeti;
an3.71:3.2	rāge pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikaṁ dukkhaṁ domanassaṁ paṭisaṁvedeti.
an3.71:3.3	Ratto kho, āvuso, rāgena abhibhūto pariyādinnacitto kāyena duccaritaṁ carati, vācāya duccaritaṁ carati, manasā duccaritaṁ carati;
an3.71:3.4	rāge pahīne neva kāyena duccaritaṁ carati, na vācāya duccaritaṁ carati, na manasā duccaritaṁ carati.
an3.71:3.5	Ratto kho, āvuso, rāgena abhibhūto pariyādinnacitto attatthampi yathābhūtaṁ nappajānāti, paratthampi yathābhūtaṁ nappajānāti, ubhayatthampi yathābhūtaṁ nappajānāti;
an3.71:3.6	rāge pahīne attatthampi yathābhūtaṁ pajānāti, paratthampi yathābhūtaṁ pajānāti, ubhayatthampi yathābhūtaṁ pajānāti.
an3.71:3.7	Rāgo kho, āvuso, andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṁvattaniko.
an3.71:4.1	Duṭṭho kho, āvuso, dosena …pe…
an3.71:4.2	mūḷho kho, āvuso, mohena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṁ domanassaṁ paṭisaṁvedeti;
an3.71:4.3	mohe pahīne nevattabyābādhāyapi ceteti, na parabyābādhāyapi ceteti, na ubhayabyābādhāyapi ceteti, na cetasikaṁ dukkhaṁ domanassaṁ paṭisaṁvedeti.
an3.71:4.4	Mūḷho kho, āvuso, mohena abhibhūto pariyādinnacitto kāyena duccaritaṁ carati, vācāya duccaritaṁ carati, manasā duccaritaṁ carati;
an3.71:4.5	mohe pahīne neva kāyena duccaritaṁ carati, na vācāya duccaritaṁ carati, na manasā duccaritaṁ carati.
an3.71:4.6	Mūḷho kho, āvuso, mohena abhibhūto pariyādinnacitto attatthampi yathābhūtaṁ nappajānāti, paratthampi yathābhūtaṁ nappajānāti, ubhayatthampi yathābhūtaṁ nappajānāti;
an3.71:4.7	mohe pahīne attatthampi yathābhūtaṁ pajānāti, paratthampi yathābhūtaṁ pajānāti, ubhayatthampi yathābhūtaṁ pajānāti.
an3.71:4.8	Moho kho, āvuso, andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṁvattaniko.
an3.71:4.9	Idaṁ kho mayaṁ, āvuso, rāge ādīnavaṁ disvā rāgassa pahānaṁ paññāpema.
an3.71:4.10	Idaṁ dose ādīnavaṁ disvā dosassa pahānaṁ paññāpema.
an3.71:4.11	Idaṁ mohe ādīnavaṁ disvā mohassa pahānaṁ paññāpemā”ti.
an3.71:5.1	“Atthi panāvuso, maggo atthi paṭipadā etassa rāgassa dosassa mohassa pahānāyā”ti?
an3.71:5.2	“Atthāvuso, maggo atthi paṭipadā etassa rāgassa dosassa mohassa pahānāyā”ti.
an3.71:5.3	“Katamo panāvuso, maggo katamā paṭipadā etassa rāgassa dosassa mohassa pahānāyā”ti?
an3.71:5.4	“Ayameva ariyo aṭṭhaṅgiko maggo, seyyathidaṁ—
an3.71:5.5	sammādiṭṭhi …pe… sammāsamādhi.
an3.71:5.6	Ayaṁ kho, āvuso, maggo ayaṁ paṭipadā etassa rāgassa dosassa mohassa pahānāyā”ti.
an3.71:5.7	“Bhaddako kho, āvuso, maggo bhaddikā paṭipadā etassa rāgassa dosassa mohassa pahānāya.
an3.71:5.8	Alañca panāvuso ānanda, appamādāyā”ti.
an3.71:5.9	Paṭhamaṁ.
an3.72:0.1	Aṅguttara Nikāya 3.72
an3.72:0.2	8. Ānandavagga
an3.72:0.3	Ājīvakasutta
an3.72:1.1	Ekaṁ samayaṁ āyasmā ānando kosambiyaṁ viharati ghositārāme.
an3.72:1.2	Atha kho aññataro ājīvakasāvako gahapati yenāyasmā ānando tenupasaṅkami; upasaṅkamitvā āyasmantaṁ ānandaṁ abhivādetvā ekamantaṁ nisīdi. Ekamantaṁ nisinno kho so ājīvakasāvako gahapati āyasmantaṁ ānandaṁ etadavoca:
an3.72:2.1	“Kesaṁ no, bhante ānanda, dhammo svākkhāto?
an3.72:2.2	Ke loke suppaṭipannā?
an3.72:2.3	Ke loke sukatā”ti?
an3.72:2.4	“Tena hi, gahapati, taññevettha paṭipucchissāmi, yathā te khameyya tathā naṁ byākareyyāsi.
an3.72:2.5	Taṁ kiṁ maññasi, gahapati,
an3.72:2.6	ye rāgassa pahānāya dhammaṁ desenti, dosassa pahānāya dhammaṁ desenti, mohassa pahānāya dhammaṁ desenti, tesaṁ dhammo svākkhāto no vā?
an3.72:2.7	Kathaṁ vā te ettha hotī”ti?
an3.72:2.8	“Ye, bhante, rāgassa pahānāya dhammaṁ desenti, dosassa pahānāya dhammaṁ desenti, mohassa pahānāya dhammaṁ desenti, tesaṁ dhammo svākkhāto.
an3.72:2.9	Evaṁ me ettha hotī”ti.
an3.72:3.1	“Taṁ kiṁ maññasi, gahapati,
an3.72:3.2	ye rāgassa pahānāya paṭipannā, dosassa pahānāya paṭipannā, mohassa pahānāya paṭipannā, te loke suppaṭipannā no vā?
an3.72:3.3	Kathaṁ vā te ettha hotī”ti?
an3.72:3.4	“Ye, bhante, rāgassa pahānāya paṭipannā, dosassa pahānāya paṭipannā, mohassa pahānāya paṭipannā, te loke suppaṭipannā.
an3.72:3.5	Evaṁ me ettha hotī”ti.
an3.72:4.1	“Taṁ kiṁ maññasi, gahapati,
an3.72:4.2	yesaṁ rāgo pahīno ucchinnamūlo tālāvatthukato anabhāvaṅkato āyatiṁ anuppādadhammo, yesaṁ doso pahīno ucchinnamūlo tālāvatthukato anabhāvaṅkato āyatiṁ anuppādadhammo, yesaṁ moho pahīno ucchinnamūlo tālāvatthukato anabhāvaṅkato āyatiṁ anuppādadhammo, te loke sukatā no vā?
an3.72:4.3	Kathaṁ vā te ettha hotī”ti?
an3.72:4.4	“Yesaṁ, bhante, rāgo pahīno ucchinnamūlo tālāvatthukato anabhāvaṅkato āyatiṁ anuppādadhammo, yesaṁ doso pahīno …pe… yesaṁ moho pahīno ucchinnamūlo tālāvatthukato anabhāvaṅkato āyatiṁ anuppādadhammo, te loke sukatā.
an3.72:4.5	Evaṁ me ettha hotī”ti.
an3.72:5.1	“Iti kho, gahapati, tayāvetaṁ byākataṁ:
an3.72:5.2	‘ye, bhante, rāgassa pahānāya dhammaṁ desenti, dosassa pahānāya dhammaṁ desenti, mohassa pahānāya dhammaṁ desenti, tesaṁ dhammo svākkhāto’ti.
an3.72:5.3	Tayāvetaṁ byākataṁ:
an3.72:5.4	‘ye, bhante, rāgassa pahānāya paṭipannā, dosassa pahānāya paṭipannā, mohassa pahānāya paṭipannā, te loke suppaṭipannā’ti.
an3.72:5.5	Tayāvetaṁ byākataṁ:
an3.72:5.6	‘yesaṁ, bhante, rāgo pahīno ucchinnamūlo tālāvatthukato anabhāvaṅkato āyatiṁ anuppādadhammo, yesaṁ doso pahīno …pe… yesaṁ moho pahīno ucchinnamūlo tālāvatthukato anabhāvaṅkato āyatiṁ anuppādadhammo, te loke sukatā’”ti.
an3.72:6.1	“Acchariyaṁ, bhante, abbhutaṁ, bhante.
an3.72:6.2	Na ceva nāma sadhammukkaṁsanā bhavissati, na ca paradhammāpasādanā.
an3.72:6.3	Āyataneva dhammadesanā, attho ca vutto, attā ca anupanīto.
an3.72:6.4	Tumhe, bhante ānanda, rāgassa pahānāya dhammaṁ desetha, dosassa …pe… mohassa pahanāya dhammaṁ desetha.
an3.72:6.5	Tumhākaṁ, bhante ānanda, dhammo svākkhāto.
an3.72:6.6	Tumhe, bhante ānanda, rāgassa pahānāya paṭipannā, dosassa …pe… mohassa pahānāya paṭipannā.
an3.72:6.7	Tumhe, bhante, loke suppaṭipannā.
an3.72:6.8	Tumhākaṁ, bhante ānanda, rāgo pahīno ucchinnamūlo tālāvatthukato anabhāvaṅkato āyatiṁ anuppādadhammo, tumhākaṁ doso pahīno …pe… tumhākaṁ moho pahīno ucchinnamūlo tālāvatthukato anabhāvaṅkato āyatiṁ anuppādadhammo.
an3.72:6.9	Tumhe loke sukatā.
an3.72:7.1	Abhikkantaṁ, bhante, abhikkantaṁ, bhante.
an3.72:7.2	Seyyathāpi, bhante, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ ayyena ānandena anekapariyāyena dhammo pakāsito.
an3.72:7.3	Esāhaṁ, bhante ānanda, taṁ bhagavantaṁ saraṇaṁ gacchāmi dhammañca bhikkhusaṅghañca.
an3.72:7.4	Upāsakaṁ maṁ ayyo ānando dhāretu, ajjatagge pāṇupetaṁ saraṇaṁ gatan”ti.
an3.72:7.5	Dutiyaṁ.
an3.73:0.1	Aṅguttara Nikāya 3.73
an3.73:0.2	8. Ānandavagga
an3.73:0.3	Mahānāmasakkasutta
an3.73:1.1	Evaṁ me sutaṁ—
an3.73:1.2	ekaṁ samayaṁ bhagavā sakkesu viharati kapilavatthusmiṁ nigrodhārāme.
an3.73:1.3	Tena kho pana samayena bhagavā gilānā vuṭṭhito hoti aciravuṭṭhito gelaññā.
an3.73:1.4	Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho mahānāmo sakko bhagavantaṁ etadavoca:
an3.73:1.5	“dīgharattāhaṁ, bhante, bhagavatā evaṁ dhammaṁ desitaṁ ājānāmi:
an3.73:1.6	‘samāhitassa ñāṇaṁ, no asamāhitassā’ti.
an3.73:1.7	Samādhi nu kho, bhante, pubbe, pacchā ñāṇaṁ;
an3.73:1.8	udāhu ñāṇaṁ pubbe, pacchā samādhī”ti?
an3.73:1.9	Atha kho āyasmato ānandassa etadahosi:
an3.73:1.10	“bhagavā kho gilānavuṭṭhito aciravuṭṭhito gelaññā.
an3.73:1.11	Ayañca mahānāmo sakko bhagavantaṁ atigambhīraṁ pañhaṁ pucchati.
an3.73:1.12	Yannūnāhaṁ mahānāmaṁ sakkaṁ ekamantaṁ apanetvā dhammaṁ deseyyan”ti.
an3.73:2.1	Atha kho āyasmā ānando mahānāmaṁ sakkaṁ bāhāyaṁ gahetvā ekamantaṁ apanetvā mahānāmaṁ sakkaṁ etadavoca:
an3.73:2.2	“sekhampi kho, mahānāma, sīlaṁ vuttaṁ bhagavatā, asekhampi sīlaṁ vuttaṁ bhagavatā; sekhopi samādhi vutto bhagavatā, asekhopi samādhi vutto bhagavatā; sekhāpi paññā vuttā bhagavatā, asekhāpi paññā vuttā bhagavatā.
an3.73:2.3	Katamañca, mahānāma, sekhaṁ sīlaṁ?
an3.73:2.4	Idha, mahānāma, bhikkhu sīlavā hoti pātimokkhasaṁvarasaṁvuto viharati …pe… samādāya sikkhati sikkhāpadesu.
an3.73:2.5	Idaṁ vuccati, mahānāma, sekhaṁ sīlaṁ.
an3.73:3.1	Katamo ca, mahānāma, sekho samādhi?
an3.73:3.2	Idha, mahānāma, bhikkhu vivicceva kāmehi …pe… catutthaṁ jhānaṁ upasampajja viharati.
an3.73:3.3	Ayaṁ vuccati, mahānāma, sekho samādhi.
an3.73:4.1	Katamā ca, mahānāma, sekhā paññā?
an3.73:4.2	Idha, mahānāma, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.73:4.3	Ayaṁ vuccati, mahānāma, sekhā paññā.
an3.73:5.1	Sa kho so, mahānāma, ariyasāvako evaṁ sīlasampanno evaṁ samādhisampanno evaṁ paññāsampanno āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.73:5.2	Evaṁ kho, mahānāma, sekhampi sīlaṁ vuttaṁ bhagavatā, asekhampi sīlaṁ vuttaṁ bhagavatā; sekhopi samādhi vutto bhagavatā, asekhopi samādhi vutto bhagavatā; sekhāpi paññā vuttā bhagavatā, asekhāpi paññā vuttā bhagavatā”ti.
an3.73:5.3	Tatiyaṁ.
an3.74:0.1	Aṅguttara Nikāya 3.74
an3.74:0.2	8. Ānandavagga
an3.74:0.3	Nigaṇṭhasutta
an3.74:1.1	Ekaṁ samayaṁ āyasmā ānando vesāliyaṁ viharati mahāvane kūṭāgārasālāyaṁ.
an3.74:1.2	Atha kho abhayo ca licchavi paṇḍitakumārako ca licchavi yenāyasmā ānando tenupasaṅkamiṁsu; upasaṅkamitvā āyasmantaṁ ānandaṁ abhivādetvā ekamantaṁ nisīdiṁsu. Ekamantaṁ nisinno kho abhayo licchavi āyasmantaṁ ānandaṁ etadavoca:
an3.74:1.3	“nigaṇṭho, bhante, nāṭaputto sabbaññū sabbadassāvī aparisesaṁ ñāṇadassanaṁ paṭijānāti:
an3.74:1.4	‘carato ca me tiṭṭhato ca suttassa ca jāgarassa ca satataṁ samitaṁ ñāṇadassanaṁ paccupaṭṭhitan’ti.
an3.74:1.5	So purāṇānaṁ kammānaṁ tapasā byantībhāvaṁ paññāpeti navānaṁ kammānaṁ akaraṇā setughātaṁ.
an3.74:1.6	Iti kammakkhayā dukkhakkhayo, dukkhakkhayā vedanākkhayo, vedanākkhayā sabbaṁ dukkhaṁ nijjiṇṇaṁ bhavissati—
an3.74:1.7	evametissā sandiṭṭhikāya nijjarāya visuddhiyā samatikkamo hoti.
an3.74:1.8	Idha, bhante, bhagavā kimāhā”ti?
an3.74:2.1	“Tisso kho imā, abhaya, nijjarā visuddhiyo tena bhagavatā jānatā passatā arahatā sammāsambuddhena sammadakkhātā sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya.
an3.74:2.2	Katamā tisso?
an3.74:2.3	Idha, abhaya, bhikkhu sīlavā hoti …pe… samādāya sikkhati sikkhāpadesu.
an3.74:2.4	So navañca kammaṁ na karoti, purāṇañca kammaṁ phussa phussa byantīkaroti.
an3.74:2.5	Sandiṭṭhikā nijjarā akālikā ehipassikā opaneyyikā paccattaṁ veditabbā viññūhīti.
an3.74:3.1	Sa kho so, abhaya, bhikkhu evaṁ sīlasampanno vivicceva kāmehi …pe… catutthaṁ jhānaṁ upasampajja viharati.
an3.74:3.2	So navañca kammaṁ na karoti, purāṇañca kammaṁ phussa phussa byantīkaroti.
an3.74:3.3	Sandiṭṭhikā nijjarā akālikā ehipassikā opaneyyikā paccattaṁ veditabbā viññūhīti.
an3.74:4.1	Sa kho so, abhaya, bhikkhu evaṁ samādhisampanno āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.74:4.2	So navañca kammaṁ na karoti, purāṇañca kammaṁ phussa phussa byantīkaroti.
an3.74:4.3	Sandiṭṭhikā nijjarā akālikā ehipassikā opaneyyikā paccattaṁ veditabbā viññūhīti.
an3.74:4.4	Imā kho, abhaya, tisso nijjarā visuddhiyo tena bhagavatā jānatā passatā arahatā sammāsambuddhena sammadakkhātā sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāyā”ti.
an3.74:5.1	Evaṁ vutte, paṇḍitakumārako licchavi abhayaṁ licchaviṁ etadavoca:
an3.74:5.2	“kiṁ pana tvaṁ, samma abhaya, āyasmato ānandassa subhāsitaṁ subhāsitato nābbhanumodasī”ti?
an3.74:5.3	“Kyāhaṁ, samma paṇḍitakumāraka, āyasmato ānandassa subhāsitaṁ subhāsitato nābbhanumodissāmi.
an3.74:5.4	Muddhāpi tassa vipateyya yo āyasmato ānandassa subhāsitaṁ subhāsitato nābbhanumodeyyā”ti.
an3.74:5.5	Catutthaṁ.
an3.75:0.1	Aṅguttara Nikāya 3.75
an3.75:0.2	8. Ānandavagga
an3.75:0.3	Nivesakasutta
an3.75:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ ānandaṁ bhagavā etadavoca:
an3.75:2.1	“Ye, ānanda, anukampeyyātha ye ca sotabbaṁ maññeyyuṁ mittā vā amaccā vā ñātī vā sālohitā vā te vo, ānanda, tīsu ṭhānesu samādapetabbā nivesetabbā patiṭṭhāpetabbā.
an3.75:2.2	Katamesu tīsu?
an3.75:2.3	Buddhe aveccappasāde samādapetabbā nivesetabbā patiṭṭhāpetabbā:
an3.75:2.4	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ, buddho bhagavā’ti,
an3.75:2.5	dhamme aveccappasāde samādapetabbā nivesetabbā patiṭṭhāpetabbā:
an3.75:2.6	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti,
an3.75:2.7	saṅghe aveccappasāde samādapetabbā nivesetabbā patiṭṭhāpetabbā:
an3.75:2.8	‘suppaṭipanno bhagavato sāvakasaṅgho ujuppaṭipanno bhagavato sāvakasaṅgho ñāyappaṭipanno bhagavato sāvakasaṅgho sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.
an3.75:3.1	Siyā, ānanda, catunnaṁ mahābhūtānaṁ aññathattaṁ—
an3.75:3.2	pathavīdhātuyā āpodhātuyā tejodhātuyā vāyodhātuyā, na tveva buddhe aveccappasādena samannāgatassa ariyasāvakassa siyā aññathattaṁ tatridaṁ aññathattaṁ.
an3.75:3.3	So vatānanda, buddhe aveccappasādena samannāgato ariyasāvako nirayaṁ vā tiracchānayoniṁ vā pettivisayaṁ vā upapajjissatīti netaṁ ṭhānaṁ vijjati.
an3.75:4.1	Siyā, ānanda, catunnaṁ mahābhūtānaṁ aññathattaṁ—
an3.75:4.2	pathavīdhātuyā āpodhātuyā tejodhātuyā vāyodhātuyā, na tveva dhamme …pe…
an3.75:4.3	na tveva saṅghe aveccappasādena samannāgatassa ariyasāvakassa siyā aññathattaṁ tatridaṁ aññathattaṁ.
an3.75:4.4	So vatānanda, saṅghe aveccappasādena samannāgato ariyasāvako nirayaṁ vā tiracchānayoniṁ vā pettivisayaṁ vā upapajjissatīti netaṁ ṭhānaṁ vijjati.
an3.75:5.1	Ye, ānanda, anukampeyyātha ye ca sotabbaṁ maññeyyuṁ mittā vā amaccā vā ñātī vā sālohitā vā te vo, ānanda, imesu tīsu ṭhānesu samādapetabbā nivesetabbā patiṭṭhāpetabbā”ti.
an3.75:5.2	Pañcamaṁ.
an3.76:0.1	Aṅguttara Nikāya 3.76
an3.76:0.2	8. Ānandavagga
an3.76:0.3	Paṭhamabhavasutta
an3.76:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an3.76:1.2	“bhavo, bhavoti, bhante, vuccati.
an3.76:1.3	Kittāvatā nu kho, bhante, bhavo hotī”ti?
an3.76:2.1	“Kāmadhātuvepakkañca, ānanda, kammaṁ nābhavissa, api nu kho kāmabhavo paññāyethā”ti?
an3.76:2.2	“No hetaṁ, bhante”.
an3.76:2.3	“Iti kho, ānanda, kammaṁ khettaṁ, viññāṇaṁ bījaṁ, taṇhā sneho.
an3.76:2.4	Avijjānīvaraṇānaṁ sattānaṁ taṇhāsaṁyojanānaṁ hīnāya dhātuyā viññāṇaṁ patiṭṭhitaṁ evaṁ āyatiṁ punabbhavābhinibbatti hoti. (…)
an3.76:3.1	Rūpadhātuvepakkañca, ānanda, kammaṁ nābhavissa, api nu kho rūpabhavo paññāyethā”ti?
an3.76:3.2	“No hetaṁ, bhante”.
an3.76:3.3	“Iti kho, ānanda, kammaṁ khettaṁ, viññāṇaṁ bījaṁ, taṇhā sneho.
an3.76:3.4	Avijjānīvaraṇānaṁ sattānaṁ taṇhāsaṁyojanānaṁ majjhimāya dhātuyā viññāṇaṁ patiṭṭhitaṁ evaṁ āyatiṁ punabbhavābhinibbatti hoti. (…)
an3.76:4.1	Arūpadhātuvepakkañca, ānanda, kammaṁ nābhavissa, api nu kho arūpabhavo paññāyethā”ti?
an3.76:4.2	“No hetaṁ, bhante”.
an3.76:4.3	“Iti kho, ānanda, kammaṁ khettaṁ, viññāṇaṁ bījaṁ, taṇhā sneho.
an3.76:4.4	Avijjānīvaraṇānaṁ sattānaṁ taṇhāsaṁyojanānaṁ paṇītāya dhātuyā viññāṇaṁ patiṭṭhitaṁ evaṁ āyatiṁ punabbhavābhinibbatti hoti.
an3.76:4.5	Evaṁ kho, ānanda, bhavo hotī”ti.
an3.76:4.6	Chaṭṭhaṁ.
an3.77:0.1	Aṅguttara Nikāya 3.77
an3.77:0.2	8. Ānandavagga
an3.77:0.3	Dutiyabhavasutta
an3.77:1.1	Atha kho āyasmā ānando yena bhagavā tenupasaṅkami …pe… āyasmā ānando bhagavantaṁ etadavoca:
an3.77:1.2	“bhavo, bhavoti, bhante, vuccati.
an3.77:1.3	Kittāvatā nu kho, bhante, bhavo hotī”ti?
an3.77:2.1	“Kāmadhātuvepakkañca, ānanda, kammaṁ nābhavissa, api nu kho kāmabhavo paññāyethā”ti?
an3.77:2.2	“No hetaṁ, bhante”.
an3.77:2.3	“Iti kho, ānanda, kammaṁ khettaṁ, viññāṇaṁ bījaṁ, taṇhā sneho.
an3.77:2.4	Avijjānīvaraṇānaṁ sattānaṁ taṇhāsaṁyojanānaṁ hīnāya dhātuyā cetanā patiṭṭhitā patthanā patiṭṭhitā evaṁ āyatiṁ punabbhavābhinibbatti hoti.
an3.77:3.1	Rūpadhātuvepakkañca, ānanda, kammaṁ nābhavissa, api nu kho rūpabhavo paññāyethā”ti?
an3.77:3.2	“No hetaṁ, bhante”.
an3.77:3.3	“Iti kho, ānanda, kammaṁ khettaṁ, viññāṇaṁ bījaṁ, taṇhā sneho.
an3.77:3.4	Avijjānīvaraṇānaṁ sattānaṁ taṇhāsaṁyojanānaṁ majjhimāya dhātuyā cetanā patiṭṭhitā patthanā patiṭṭhitā evaṁ āyatiṁ punabbhavābhinibbatti hoti.
an3.77:4.1	Arūpadhātuvepakkañca, ānanda, kammaṁ nābhavissa, api nu kho arūpabhavo paññāyethā”ti?
an3.77:4.2	“No hetaṁ, bhante”.
an3.77:4.3	“Iti kho, ānanda, kammaṁ khettaṁ, viññāṇaṁ bījaṁ, taṇhā sneho.
an3.77:4.4	Avijjānīvaraṇānaṁ sattānaṁ taṇhāsaṁyojanānaṁ paṇītāya dhātuyā cetanā patiṭṭhitā patthanā patiṭṭhitā evaṁ āyatiṁ punabbhavābhinibbatti hoti.
an3.77:4.5	Evaṁ kho, ānanda, bhavo hotī”ti.
an3.77:4.6	Sattamaṁ.
an3.78:0.1	Aṅguttara Nikāya 3.78
an3.78:0.2	8. Ānandavagga
an3.78:0.3	Sīlabbatasutta
an3.78:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ ānandaṁ bhagavā etadavoca:
an3.78:1.2	“sabbaṁ nu kho, ānanda, sīlabbataṁ jīvitaṁ brahmacariyaṁ upaṭṭhānasāraṁ saphalan”ti?
an3.78:1.3	“Na khvettha, bhante, ekaṁsenā”ti.
an3.78:1.4	“Tena hānanda, vibhajassū”ti.
an3.78:2.1	“Yañhissa, bhante, sīlabbataṁ jīvitaṁ brahmacariyaṁ upaṭṭhānasāraṁ sevato akusalā dhammā abhivaḍḍhanti kusalā dhammā parihāyanti, evarūpaṁ sīlabbataṁ jīvitaṁ brahmacariyaṁ upaṭṭhānasāraṁ aphalaṁ.
an3.78:2.2	Yañca khvāssa, bhante, sīlabbataṁ jīvitaṁ brahmacariyaṁ upaṭṭhānasāraṁ sevato akusalā dhammā parihāyanti, kusalā dhammā abhivaḍḍhanti, evarūpaṁ sīlabbataṁ jīvitaṁ brahmacariyaṁ upaṭṭhānasāraṁ saphalan”ti.
an3.78:2.3	Idamavoca āyasmā ānando.
an3.78:2.4	Samanuñño satthā ahosi.
an3.78:3.1	Atha kho āyasmā ānando “samanuñño me satthā”ti, uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an3.78:3.2	Atha kho bhagavā acirapakkante āyasmante ānande bhikkhū āmantesi:
an3.78:3.3	“sekho, bhikkhave, ānando;
an3.78:3.4	na ca panassa sulabharūpo samasamo paññāyā”ti.
an3.78:3.5	Aṭṭhamaṁ.
an3.79:0.1	Aṅguttara Nikāya 3.79
an3.79:0.2	8. Ānandavagga
an3.79:0.3	Gandhajātasutta
an3.79:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an3.79:2.1	“Tīṇimāni, bhante, gandhajātāni, yesaṁ anuvātaṁyeva gandho gacchati, no paṭivātaṁ.
an3.79:2.2	Katamāni tīṇi?
an3.79:2.3	Mūlagandho, sāragandho, pupphagandho—
an3.79:2.4	imāni kho, bhante, tīṇi gandhajātāni, yesaṁ anuvātaṁyeva gandho gacchati, no paṭivātaṁ.
an3.79:2.5	Atthi nu kho, bhante, kiñci gandhajātaṁ yassa anuvātampi gandho gacchati, paṭivātampi gandho gacchati, anuvātapaṭivātampi gandho gacchatī”ti?
an3.79:3.1	“Atthānanda, kiñci gandhajātaṁ yassa anuvātampi gandho gacchati, paṭivātampi gandho gacchati, anuvātapaṭivātampi gandho gacchatī”ti.
an3.79:3.2	“Katamañca pana, bhante, gandhajātaṁ yassa anuvātampi gandho gacchati, paṭivātampi gandho gacchati, anuvātapaṭivātampi gandho gacchatī”ti?
an3.79:4.1	“Idhānanda, yasmiṁ gāme vā nigame vā itthī vā puriso vā buddhaṁ saraṇaṁ gato hoti, dhammaṁ saraṇaṁ gato hoti, saṅghaṁ saraṇaṁ gato hoti,
an3.79:4.2	pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti, sīlavā hoti kalyāṇadhammo,
an3.79:4.3	vigatamalamaccherena cetasā agāraṁ ajjhāvasati muttacāgo payatapāṇi vossaggarato yācayogo dānasaṁvibhāgarato.
an3.79:5.1	Tassa disāsu samaṇabrāhmaṇā vaṇṇaṁ bhāsanti:
an3.79:5.2	‘amukasmiṁ nāma gāme vā nigame vā itthī vā puriso vā buddhaṁ saraṇaṁ gato hoti, dhammaṁ saraṇaṁ gato hoti, saṅghaṁ saraṇaṁ gato hoti,
an3.79:5.3	pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti, sīlavā hoti kalyāṇadhammo,
an3.79:5.4	vigatamalamaccherena cetasā agāraṁ ajjhāvasati muttacāgo payatapāṇi vossaggarato yācayogo dānasaṁvibhāgarato’ti.
an3.79:6.1	Devatāpissa vaṇṇaṁ bhāsanti:
an3.79:6.2	‘amukasmiṁ nāma gāme vā nigame vā itthī vā puriso vā buddhaṁ saraṇaṁ gato hoti, dhammaṁ saraṇaṁ gato hoti, saṅghaṁ saraṇaṁ gato hoti,
an3.79:6.3	pāṇātipātā paṭivirato hoti …pe… surāmerayamajjapamādaṭṭhānā paṭivirato hoti, sīlavā hoti kalyāṇadhammo,
an3.79:6.4	vigatamalamaccherena cetasā agāraṁ ajjhāvasati muttacāgo payatapāṇi vossaggarato yācayogo dānasaṁvibhāgarato’ti.
an3.79:6.5	Idaṁ kho taṁ, ānanda, gandhajātaṁ yassa anuvātampi gandho gacchati, paṭivātampi gandho gacchati, anuvātapaṭivātampi gandho gacchatīti.
an3.79:7.1	Na pupphagandho paṭivātameti,
an3.79:7.2	Na candanaṁ tagaramallikā vā;
an3.79:7.3	Satañca gandho paṭivātameti,
an3.79:7.4	Sabbā disā sappuriso pavāyatī”ti.
an3.79:7.5	Navamaṁ.
an3.80:0.1	Aṅguttara Nikāya 3.80
an3.80:0.2	8. Ānandavagga
an3.80:0.3	Cūḷanikāsutta
an3.80:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an3.80:1.2	“sammukhā metaṁ, bhante, bhagavato sutaṁ sammukhā paṭiggahitaṁ:
an3.80:1.3	‘bhagavato, ānanda, sikhissa abhibhū nāma sāvako brahmaloke ṭhito sahassilokadhātuṁ sarena viññāpesī’ti.
an3.80:1.4	Bhagavā pana, bhante, arahaṁ sammāsambuddho kīvatakaṁ pahoti sarena viññāpetun”ti?
an3.80:1.5	“Sāvako so, ānanda, appameyyā tathāgatā”ti.
an3.80:2.1	Dutiyampi kho āyasmā ānando bhagavantaṁ etadavoca:
an3.80:2.2	“sammukhā metaṁ, bhante, bhagavato sutaṁ sammukhā paṭiggahitaṁ:
an3.80:2.3	‘bhagavato, ānanda, sikhissa abhibhū nāma sāvako brahmaloke ṭhito sahassilokadhātuṁ sarena viññāpesī’ti.
an3.80:2.4	Bhagavā pana, bhante, arahaṁ sammāsambuddho kīvatakaṁ pahoti sarena viññāpetun”ti?
an3.80:2.5	“Sāvako so, ānanda, appameyyā tathāgatā”ti.
an3.80:3.1	Tatiyampi kho āyasmā ānando bhagavantaṁ etadavoca:
an3.80:3.2	“sammukhā metaṁ, bhante, bhagavato sutaṁ sammukhā paṭiggahitaṁ:
an3.80:3.3	‘bhagavato, ānanda, sikhissa abhibhū nāma sāvako brahmaloke ṭhito sahassilokadhātuṁ sarena viññāpesī’ti.
an3.80:3.4	Bhagavā pana, bhante, arahaṁ sammāsambuddho kīvatakaṁ pahoti sarena viññāpetun”ti?
an3.80:3.5	“Sutā te, ānanda, sahassī cūḷanikā lokadhātū”ti?
an3.80:3.6	“Etassa, bhagavā, kālo; etassa, sugata, kālo,
an3.80:3.7	yaṁ bhagavā bhāseyya. Bhagavato sutvā bhikkhū dhāressantī”ti.
an3.80:3.8	“Tenahānanda, suṇāhi sādhukaṁ manasi karohi, bhāsissāmī”ti.
an3.80:3.9	“Evaṁ, bhante”ti kho āyasmā ānando bhagavato paccassosi.
an3.80:3.10	Bhagavā etadavoca:
an3.80:4.1	“Yāvatā, ānanda, candimasūriyā pariharanti, disā bhanti virocanā, tāva sahassadhā loko.
an3.80:4.2	Tasmiṁ sahassadhā loke sahassaṁ candānaṁ, sahassaṁ sūriyānaṁ, sahassaṁ sinerupabbatarājānaṁ, sahassaṁ jambudīpānaṁ, sahassaṁ aparagoyānānaṁ, sahassaṁ uttarakurūnaṁ, sahassaṁ pubbavidehānaṁ, cattāri mahāsamuddasahassāni, cattāri mahārājasahassāni, sahassaṁ cātumahārājikānaṁ, sahassaṁ tāvatiṁsānaṁ, sahassaṁ yāmānaṁ, sahassaṁ tusitānaṁ, sahassaṁ nimmānaratīnaṁ, sahassaṁ paranimmitavasavattīnaṁ, sahassaṁ brahmalokānaṁ—
an3.80:4.3	ayaṁ vuccatānanda, sahassī cūḷanikā lokadhātu.
an3.80:5.1	Yāvatānanda, sahassī cūḷanikā lokadhātu tāva sahassadhā loko.
an3.80:5.2	Ayaṁ vuccatānanda, dvisahassī majjhimikā lokadhātu.
an3.80:6.1	Yāvatānanda, dvisahassī majjhimikā lokadhātu tāva sahassadhā loko.
an3.80:6.2	Ayaṁ vuccatānanda, tisahassī mahāsahassī lokadhātu.
an3.80:7.1	Ākaṅkhamāno, ānanda, tathāgato tisahassimahāsahassilokadhātuṁ sarena viññāpeyya, yāvatā pana ākaṅkheyyā”ti.
an3.80:8.1	“Yathā kathaṁ pana, bhante, bhagavā tisahassimahāsahassilokadhātuṁ sarena viññāpeyya, yāvatā pana ākaṅkheyyā”ti?
an3.80:8.2	“Idhānanda, tathāgato tisahassimahāsahassilokadhātuṁ obhāsena phareyya.
an3.80:8.3	Yadā te sattā taṁ ālokaṁ sañjāneyyuṁ, atha tathāgato ghosaṁ kareyya saddamanussāveyya.
an3.80:8.4	Evaṁ kho, ānanda, tathāgato tisahassimahāsahassilokadhātuṁ sarena viññāpeyya, yāvatā pana ākaṅkheyyā”ti.
an3.80:9.1	Evaṁ vutte, āyasmā ānando āyasmantaṁ udāyiṁ etadavoca:
an3.80:9.2	“lābhā vata me, suladdhaṁ vata me,
an3.80:9.3	yassa me satthā evaṁmahiddhiko evaṁmahānubhāvo”ti.
an3.80:9.4	Evaṁ vutte, āyasmā udāyī āyasmantaṁ ānandaṁ etadavoca:
an3.80:9.5	“kiṁ tuyhettha, āvuso ānanda, yadi te satthā evaṁmahiddhiko evaṁmahānubhāvo”ti?
an3.80:9.6	Evaṁ vutte, bhagavā āyasmantaṁ udāyiṁ etadavoca:
an3.80:9.7	“mā hevaṁ, udāyi, mā hevaṁ, udāyi.
an3.80:9.8	Sace, udāyi, ānando avītarāgo kālaṁ kareyya, tena cittappasādena sattakkhattuṁ devesu devarajjaṁ kāreyya, sattakkhattuṁ imasmiṁyeva jambudīpe mahārajjaṁ kāreyya.
an3.80:9.9	Api ca, udāyi, ānando diṭṭheva dhamme parinibbāyissatī”ti.
an3.80:9.10	Dasamaṁ.
an3.80:9.11	Ānandavaggo tatiyo.
an3.80:10.0	Tassuddānaṁ
an3.80:10.1	Channo ājīvako sakko,
an3.80:10.2	nigaṇṭho ca nivesako;
an3.80:10.3	Duve bhavā sīlabbataṁ,
an3.80:10.4	gandhajātañca cūḷanīti.
an3.81:0.1	Aṅguttara Nikāya 3.81
an3.81:0.2	9. Samaṇavagga
an3.81:0.3	Samaṇasutta
an3.81:1.1	“Tīṇimāni, bhikkhave, samaṇassa samaṇiyāni samaṇakaraṇīyāni.
an3.81:1.2	Katamāni tīṇi?
an3.81:1.3	Adhisīlasikkhāsamādānaṁ, adhicittasikkhāsamādānaṁ, adhipaññāsikkhāsamādānaṁ—
an3.81:1.4	imāni kho, bhikkhave, tīṇi samaṇassa samaṇiyāni samaṇakaraṇīyāni.
an3.81:2.1	Tasmātiha, bhikkhave, evaṁ sikkhitabbaṁ:
an3.81:2.2	‘tibbo no chando bhavissati adhisīlasikkhāsamādāne, tibbo no chando bhavissati adhicittasikkhāsamādāne, tibbo no chando bhavissati adhipaññāsikkhāsamādāne’ti.
an3.81:2.3	Evañhi vo, bhikkhave, sikkhitabban”ti.
an3.81:2.4	Paṭhamaṁ.
an3.82:0.1	Aṅguttara Nikāya 3.82
an3.82:0.2	9. Samaṇavagga
an3.82:0.3	Gadrabhasutta
an3.82:1.1	“Seyyathāpi, bhikkhave, gadrabho gogaṇaṁ piṭṭhito piṭṭhito anubandho hoti:
an3.82:1.2	‘ahampi dammo, ahampi dammo’ti.
an3.82:1.3	Tassa na tādiso vaṇṇo hoti seyyathāpi gunnaṁ, na tādiso saro hoti seyyathāpi gunnaṁ, na tādisaṁ padaṁ hoti seyyathāpi gunnaṁ.
an3.82:1.4	So gogaṇaṁyeva piṭṭhito piṭṭhito anubandho hoti:
an3.82:1.5	‘ahampi dammo, ahampi dammo’ti.
an3.82:2.1	Evamevaṁ kho, bhikkhave, idhekacco bhikkhu bhikkhusaṅghaṁ piṭṭhito piṭṭhito anubandho hoti:
an3.82:2.2	‘ahampi bhikkhu, ahampi bhikkhū’ti.
an3.82:2.3	Tassa na tādiso chando hoti adhisīlasikkhāsamādāne seyyathāpi aññesaṁ bhikkhūnaṁ, na tādiso chando hoti adhicittasikkhāsamādāne seyyathāpi aññesaṁ bhikkhūnaṁ, na tādiso chando hoti adhipaññāsikkhāsamādāne seyyathāpi aññesaṁ bhikkhūnaṁ.
an3.82:2.4	So bhikkhusaṅghaṁyeva piṭṭhito piṭṭhito anubandho hoti:
an3.82:2.5	‘ahampi bhikkhu, ahampi bhikkhū’ti.
an3.82:3.1	Tasmātiha, bhikkhave, evaṁ sikkhitabbaṁ:
an3.82:3.2	‘tibbo no chando bhavissati adhisīlasikkhāsamādāne, tibbo no chando bhavissati adhicittasikkhāsamādāne, tibbo no chando bhavissati adhipaññāsikkhāsamādāne’ti.
an3.82:3.3	Evañhi vo, bhikkhave, sikkhitabban”ti.
an3.82:3.4	Dutiyaṁ.
an3.83:0.1	Aṅguttara Nikāya 3.83
an3.83:0.2	9. Samaṇavagga
an3.83:0.3	Khettasutta
an3.83:1.1	“Tīṇimāni, bhikkhave, kassakassa gahapatissa pubbe karaṇīyāni.
an3.83:1.2	Katamāni tīṇi?
an3.83:1.3	Idha, bhikkhave, kassako gahapati paṭikacceva khettaṁ sukaṭṭhaṁ karoti sumatikataṁ.
an3.83:1.4	Paṭikacceva khettaṁ sukaṭṭhaṁ karitvā sumatikataṁ kālena bījāni patiṭṭhāpeti.
an3.83:1.5	Kālena bījāni patiṭṭhāpetvā samayena udakaṁ abhinetipi apanetipi.
an3.83:1.6	Imāni kho, bhikkhave, tīṇi kassakassa gahapatissa pubbe karaṇīyāni.
an3.83:2.1	Evamevaṁ kho, bhikkhave, tīṇimāni bhikkhussa pubbe karaṇīyāni.
an3.83:2.2	Katamāni tīṇi?
an3.83:2.3	Adhisīlasikkhāsamādānaṁ, adhicittasikkhāsamādānaṁ, adhipaññāsikkhāsamādānaṁ—
an3.83:2.4	imāni kho, bhikkhave, tīṇi bhikkhussa pubbe karaṇīyāni.
an3.83:3.1	Tasmātiha, bhikkhave, evaṁ sikkhitabbaṁ:
an3.83:3.2	‘tibbo no chando bhavissati adhisīlasikkhāsamādāne, tibbo no chando bhavissati adhicittasikkhāsamādāne, tibbo no chando bhavissati adhipaññāsikkhāsamādāne’ti.
an3.83:3.3	Evañhi vo, bhikkhave, sikkhitabban”ti.
an3.83:3.4	Tatiyaṁ.
an3.84:0.1	Aṅguttara Nikāya 3.84
an3.84:0.2	9. Samaṇavagga
an3.84:0.3	Vajjiputtasutta
an3.84:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an3.84:1.2	Atha kho aññataro vajjiputtako bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so vajjiputtako bhikkhu bhagavantaṁ etadavoca:
an3.84:1.3	“sādhikamidaṁ, bhante, diyaḍḍhasikkhāpadasataṁ anvaddhamāsaṁ uddesaṁ āgacchati.
an3.84:1.4	Nāhaṁ, bhante, ettha sakkomi sikkhitun”ti.
an3.84:1.5	“Sakkhissasi pana tvaṁ, bhikkhu, tīsu sikkhāsu sikkhituṁ—
an3.84:1.6	adhisīlasikkhāya, adhicittasikkhāya adhipaññāsikkhāyā”ti?
an3.84:1.7	“Sakkomahaṁ, bhante, tīsu sikkhāsu sikkhituṁ—
an3.84:1.8	adhisīlasikkhāya, adhicittasikkhāya, adhipaññāsikkhāyā”ti.
an3.84:1.9	“Tasmātiha tvaṁ, bhikkhu, tīsu sikkhāsu sikkhassu—
an3.84:1.10	adhisīlasikkhāya, adhicittasikkhāya, adhipaññāsikkhāya.
an3.84:2.1	Yato kho tvaṁ, bhikkhu, adhisīlampi sikkhissasi, adhicittampi sikkhissasi, adhipaññampi sikkhissasi, tassa tuyhaṁ bhikkhu adhisīlampi sikkhato adhicittampi sikkhato adhipaññampi sikkhato rāgo pahīyissati, doso pahīyissati, moho pahīyissati.
an3.84:2.2	So tvaṁ rāgassa pahānā dosassa pahānā mohassa pahānā yaṁ akusalaṁ na taṁ karissasi, yaṁ pāpaṁ na taṁ sevissasī”ti.
an3.84:3.1	Atha kho so bhikkhu aparena samayena adhisīlampi sikkhi, adhicittampi sikkhi, adhipaññampi sikkhi.
an3.84:3.2	Tassa adhisīlampi sikkhato adhicittampi sikkhato adhipaññampi sikkhato rāgo pahīyi, doso pahīyi, moho pahīyi.
an3.84:3.3	So rāgassa pahānā dosassa pahānā mohassa pahānā yaṁ akusalaṁ taṁ nākāsi, yaṁ pāpaṁ taṁ na sevīti.
an3.84:3.4	Catutthaṁ.
an3.85:0.1	Aṅguttara Nikāya 3.85
an3.85:0.2	9. Samaṇavagga
an3.85:0.3	Sekkhasutta
an3.85:1.1	Atha kho aññataro bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an3.85:2.1	“‘Sekho, sekho’ti, bhante, vuccati.
an3.85:2.2	Kittāvatā nu kho, bhante, sekho hotī”ti?
an3.85:2.3	“Sikkhatīti kho, bhikkhu, tasmā sekhoti vuccati.
an3.85:2.4	Kiñca sikkhati?
an3.85:2.5	Adhisīlampi sikkhati, adhicittampi sikkhati, adhipaññampi sikkhati.
an3.85:2.6	Sikkhatīti kho, bhikkhu, tasmā sekhoti vuccatīti.
an3.85:3.1	Sekhassa sikkhamānassa,
an3.85:3.2	ujumaggānusārino;
an3.85:3.3	Khayasmiṁ paṭhamaṁ ñāṇaṁ,
an3.85:3.4	tato aññā anantarā.
an3.85:4.1	Tato aññāvimuttassa,
an3.85:4.2	ñāṇaṁ ve hoti tādino;
an3.85:4.3	Akuppā me vimuttīti,
an3.85:4.4	bhavasaṁyojanakkhaye”ti.
an3.85:4.5	Pañcamaṁ.
an3.86:0.1	Aṅguttara Nikāya 3.86
an3.86:0.2	9. Samaṇavagga
an3.86:0.3	Paṭhamasikkhāsutta
an3.86:1.1	“Sādhikamidaṁ, bhikkhave, diyaḍḍhasikkhāpadasataṁ anvaddhamāsaṁ uddesaṁ āgacchati, yattha attakāmā kulaputtā sikkhanti.
an3.86:1.2	Tisso imā, bhikkhave, sikkhā yatthetaṁ sabbaṁ samodhānaṁ gacchati.
an3.86:1.3	Katamā tisso?
an3.86:1.4	Adhisīlasikkhā, adhicittasikkhā adhipaññāsikkhā—
an3.86:1.5	imā kho, bhikkhave, tisso sikkhā, yatthetaṁ sabbaṁ samodhānaṁ gacchati.
an3.86:2.1	Idha, bhikkhave, bhikkhu sīlesu paripūrakārī hoti samādhismiṁ mattaso kārī paññāya mattaso kārī.
an3.86:2.2	So yāni tāni khuddānukhuddakāni sikkhāpadāni tāni āpajjatipi vuṭṭhātipi.
an3.86:2.3	Taṁ kissa hetu?
an3.86:2.4	Na hi mettha, bhikkhave, abhabbatā vuttā.
an3.86:2.5	Yāni ca kho tāni sikkhāpadāni ādibrahmacariyakāni brahmacariyasāruppāni, tattha dhuvasīlo ca hoti ṭhitasīlo ca, samādāya sikkhati sikkhāpadesu.
an3.86:2.6	So tiṇṇaṁ saṁyojanānaṁ parikkhayā sotāpanno hoti avinipātadhammo niyato sambodhiparāyaṇo.
an3.86:3.1	Idha pana, bhikkhave, bhikkhu sīlesu paripūrakārī hoti samādhismiṁ mattaso kārī paññāya mattaso kārī.
an3.86:3.2	So yāni tāni khuddānukhuddakāni sikkhāpadāni tāni āpajjatipi vuṭṭhātipi.
an3.86:3.3	Taṁ kissa hetu?
an3.86:3.4	Na hi mettha, bhikkhave, abhabbatā vuttā.
an3.86:3.5	Yāni ca kho tāni sikkhāpadāni ādibrahmacariyakāni brahmacariyasāruppāni tattha dhuvasīlo ca hoti ṭhitasīlo ca, samādāya sikkhati sikkhāpadesu.
an3.86:3.6	So tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti.
an3.86:4.1	Idha pana, bhikkhave, bhikkhu sīlesu paripūrakārī hoti samādhismiṁ paripūrakārī paññāya mattaso kārī.
an3.86:4.2	So yāni tāni khuddānukhuddakāni sikkhāpadāni tāni āpajjatipi vuṭṭhātipi.
an3.86:4.3	Taṁ kissa hetu?
an3.86:4.4	Na hi mettha, bhikkhave, abhabbatā vuttā.
an3.86:4.5	Yāni ca kho tāni sikkhāpadāni ādibrahmacariyakāni brahmacariyasāruppāni tattha dhuvasīlo ca hoti ṭhitasīlo ca, samādāya sikkhati sikkhāpadesu.
an3.86:4.6	So pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an3.86:5.1	Idha pana, bhikkhave, bhikkhu sīlesu paripūrakārī hoti samādhismiṁ paripūrakārī paññāya paripūrakārī.
an3.86:5.2	So yāni tāni khuddānukhuddakāni sikkhāpadāni tāni āpajjatipi vuṭṭhātipi.
an3.86:5.3	Taṁ kissa hetu?
an3.86:5.4	Na hi mettha, bhikkhave, abhabbatā vuttā.
an3.86:5.5	Yāni ca kho tāni sikkhāpadāni ādibrahmacariyakāni brahmacariyasāruppāni tattha dhuvasīlo ca hoti ṭhitasīlo ca, samādāya sikkhati sikkhāpadesu.
an3.86:5.6	So āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.86:6.1	Iti kho, bhikkhave, padesaṁ padesakārī ārādheti paripūraṁ paripūrakārī.
an3.86:6.2	Avañjhāni tvevāhaṁ, bhikkhave, sikkhāpadāni vadāmī”ti.
an3.86:6.3	Chaṭṭhaṁ.
an3.87:0.1	Aṅguttara Nikāya 3.87
an3.87:0.2	9. Samaṇavagga
an3.87:0.3	Dutiyasikkhāsutta
an3.87:1.1	“Sādhikamidaṁ, bhikkhave, diyaḍḍhasikkhāpadasataṁ anvaddhamāsaṁ uddesaṁ āgacchati yattha attakāmā kulaputtā sikkhanti.
an3.87:1.2	Tisso imā, bhikkhave, sikkhā yatthetaṁ sabbaṁ samodhānaṁ gacchati.
an3.87:1.3	Katamā tisso?
an3.87:1.4	Adhisīlasikkhā, adhicittasikkhā, adhipaññāsikkhā—
an3.87:1.5	imā kho, bhikkhave, tisso sikkhā yatthetaṁ sabbaṁ samodhānaṁ gacchati.
an3.87:2.1	Idha, bhikkhave, bhikkhu sīlesu paripūrakārī hoti samādhismiṁ mattaso kārī paññāya mattaso kārī.
an3.87:2.2	So yāni tāni khuddānukhuddakāni sikkhāpadāni tāni āpajjatipi vuṭṭhātipi.
an3.87:2.3	Taṁ kissa hetu?
an3.87:2.4	Na hi mettha, bhikkhave, abhabbatā vuttā.
an3.87:2.5	Yāni ca kho tāni sikkhāpadāni ādibrahmacariyakāni brahmacariyasāruppāni tattha dhuvasīlo ca hoti ṭhitasīlo ca, samādāya sikkhati sikkhāpadesu.
an3.87:2.6	So tiṇṇaṁ saṁyojanānaṁ parikkhayā sattakkhattuparamo hoti.
an3.87:2.7	Sattakkhattuparamaṁ deve ca manusse ca sandhāvitvā saṁsaritvā dukkhassantaṁ karoti.
an3.87:2.8	So tiṇṇaṁ saṁyojanānaṁ parikkhayā kolaṅkolo hoti, dve vā tīṇi vā kulāni sandhāvitvā saṁsaritvā dukkhassantaṁ karoti.
an3.87:2.9	So tiṇṇaṁ saṁyojanānaṁ parikkhayā ekabījī hoti, ekaṁyeva mānusakaṁ bhavaṁ nibbattetvā dukkhassantaṁ karoti.
an3.87:2.10	So tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti.
an3.87:3.1	Idha pana, bhikkhave, bhikkhu sīlesu paripūrakārī hoti samādhismiṁ paripūrakārī paññāya mattaso kārī.
an3.87:3.2	So yāni tāni khuddānukhuddakāni sikkhāpadāni tāni āpajjatipi vuṭṭhātipi.
an3.87:3.3	Taṁ kissa hetu?
an3.87:3.4	Na hi mettha, bhikkhave, abhabbatā vuttā.
an3.87:3.5	Yāni ca kho tāni sikkhāpadāni ādibrahmacariyakāni brahmacariyasāruppāni tattha dhuvasīlo ca hoti ṭhitasīlo ca, samādāya sikkhati sikkhāpadesu.
an3.87:3.6	So pañcannaṁ orambhāgiyānaṁ saṁyojanānaṁ parikkhayā uddhaṁsoto akaniṭṭhagāmī.
an3.87:3.7	So pañcannaṁ orambhāgiyānaṁ saṁyojanānaṁ parikkhayā sasaṅkhāraparinibbāyī hoti.
an3.87:3.8	So pañcannaṁ orambhāgiyānaṁ saṁyojanānaṁ parikkhayā asaṅkhāraparinibbāyī hoti.
an3.87:3.9	So pañcannaṁ orambhāgiyānaṁ saṁyojanānaṁ parikkhayā upahaccaparinibbāyī hoti.
an3.87:3.10	So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.
an3.87:4.1	Idha pana, bhikkhave, bhikkhu sīlesu paripūrakārī hoti samādhismiṁ paripūrakārī paññāya paripūrakārī.
an3.87:4.2	So yāni tāni khuddānukhuddakāni sikkhāpadāni tāni āpajjatipi vuṭṭhātipi.
an3.87:4.3	Taṁ kissa hetu?
an3.87:4.4	Na hi mettha, bhikkhave, abhabbatā vuttā.
an3.87:4.5	Yāni ca kho tāni sikkhāpadāni ādibrahmacariyakāni brahmacariyasāruppāni, tattha dhuvasīlo ca hoti ṭhitasīlo ca, samādāya sikkhati sikkhāpadesu.
an3.87:4.6	So āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.87:5.1	Iti kho, bhikkhave, padesaṁ padesakārī ārādheti, paripūraṁ paripūrakārī, avañjhāni tvevāhaṁ, bhikkhave, sikkhāpadāni vadāmī”ti.
an3.87:5.2	Sattamaṁ.
an3.88:0.1	Aṅguttara Nikāya 3.88
an3.88:0.2	9. Samaṇavagga
an3.88:0.3	Tatiyasikkhāsutta
an3.88:1.1	“Sādhikamidaṁ, bhikkhave, diyaḍḍhasikkhāpadasataṁ anvaddhamāsaṁ uddesaṁ āgacchati yattha attakāmā kulaputtā sikkhanti.
an3.88:1.2	Tisso imā, bhikkhave, sikkhā yatthetaṁ sabbaṁ samodhānaṁ gacchati.
an3.88:1.3	Katamā tisso?
an3.88:1.4	Adhisīlasikkhā, adhicittasikkhā, adhipaññāsikkhā—
an3.88:1.5	imā kho, bhikkhave, tisso sikkhā yatthetaṁ sabbaṁ samodhānaṁ gacchati.
an3.88:2.1	Idha, bhikkhave, bhikkhu sīlesu paripūrakārī hoti samādhismiṁ paripūrakārī paññāya paripūrakārī.
an3.88:2.2	So yāni tāni khuddānukhuddakāni sikkhāpadāni tāni āpajjatipi vuṭṭhātipi.
an3.88:2.3	Taṁ kissa hetu?
an3.88:2.4	Na hi mettha, bhikkhave, abhabbatā vuttā.
an3.88:2.5	Yāni ca kho tāni sikkhāpadāni ādibrahmacariyakāni brahmacariyasāruppāni tattha dhuvasīlo ca hoti ṭhitasīlo ca, samādāya sikkhati sikkhāpadesu.
an3.88:2.6	So āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.88:2.7	Taṁ vā pana anabhisambhavaṁ appaṭivijjhaṁ pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.
an3.88:2.8	Taṁ vā pana anabhisambhavaṁ appaṭivijjhaṁ pañcannaṁ orambhāgiyānaṁ saṁyojanānaṁ parikkhayā upahaccaparinibbāyī hoti.
an3.88:2.9	Taṁ vā pana anabhisambhavaṁ appaṭivijjhaṁ pañcannaṁ orambhāgiyānaṁ saṁyojanānaṁ parikkhayā asaṅkhāraparinibbāyī hoti.
an3.88:2.10	Taṁ vā pana anabhisambhavaṁ appaṭivijjhaṁ pañcannaṁ orambhāgiyānaṁ saṁyojanānaṁ parikkhayā sasaṅkhāraparinibbāyī hoti.
an3.88:2.11	Taṁ vā pana anabhisambhavaṁ appaṭivijjhaṁ pañcannaṁ orambhāgiyānaṁ saṁyojanānaṁ parikkhayā uddhaṁsoto hoti akaniṭṭhagāmī.
an3.88:2.12	Taṁ vā pana anabhisambhavaṁ appaṭivijjhaṁ tiṇṇaṁ saṁyojanānaṁ parikkhayā, rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti.
an3.88:2.13	Taṁ vā pana anabhisambhavaṁ appaṭivijjhaṁ tiṇṇaṁ saṁyojanānaṁ parikkhayā ekabījī hoti, ekaṁyeva mānusakaṁ bhavaṁ nibbattetvā dukkhassantaṁ karoti.
an3.88:2.14	Taṁ vā pana anabhisambhavaṁ appaṭivijjhaṁ tiṇṇaṁ saṁyojanānaṁ parikkhayā kolaṅkolo hoti, dve vā tīṇi vā kulāni sandhāvitvā saṁsaritvā dukkhassantaṁ karoti.
an3.88:2.15	Taṁ vā pana anabhisambhavaṁ appaṭivijjhaṁ tiṇṇaṁ saṁyojanānaṁ parikkhayā sattakkhattuparamo hoti, sattakkhattuparamaṁ deve ca manusse ca sandhāvitvā saṁsaritvā dukkhassantaṁ karoti.
an3.88:3.1	Iti kho, bhikkhave, paripūraṁ paripūrakārī ārādheti padesaṁ padesakārī.
an3.88:3.2	Avañjhāni tvevāhaṁ, bhikkhave, sikkhāpadāni vadāmī”ti.
an3.88:3.3	Aṭṭhamaṁ.
an3.89:0.1	Aṅguttara Nikāya 3.89
an3.89:0.2	9. Samaṇavagga
an3.89:0.3	Paṭhamasikkhattayasutta
an3.89:1.1	“Tisso imā, bhikkhave, sikkhā.
an3.89:1.2	Katamā tisso?
an3.89:1.3	Adhisīlasikkhā, adhicittasikkhā, adhipaññāsikkhā.
an3.89:2.1	Katamā ca, bhikkhave, adhisīlasikkhā?
an3.89:2.2	Idha, bhikkhave, bhikkhu sīlavā hoti …pe… samādāya sikkhati sikkhāpadesu.
an3.89:2.3	Ayaṁ vuccati, bhikkhave, adhisīlasikkhā.
an3.89:3.1	Katamā ca, bhikkhave, adhicittasikkhā?
an3.89:3.2	Idha, bhikkhave, bhikkhu vivicceva kāmehi …pe… catutthaṁ jhānaṁ upasampajja viharati.
an3.89:3.3	Ayaṁ vuccati, bhikkhave, adhicittasikkhā.
an3.89:4.1	Katamā ca, bhikkhave, adhipaññāsikkhā?
an3.89:4.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.89:4.3	Ayaṁ vuccati, bhikkhave, adhipaññāsikkhā.
an3.89:4.4	Imā kho, bhikkhave, tisso sikkhā”ti.
an3.89:4.5	Navamaṁ.
an3.90:0.1	Aṅguttara Nikāya 3.90
an3.90:0.2	9. Samaṇavagga
an3.90:0.3	Dutiyasikkhattayasutta
an3.90:1.1	“Tisso imā, bhikkhave, sikkhā.
an3.90:1.2	Katamā tisso?
an3.90:1.3	Adhisīlasikkhā, adhicittasikkhā, adhipaññāsikkhā.
an3.90:2.1	Katamā ca, bhikkhave, adhisīlasikkhā?
an3.90:2.2	Idha, bhikkhave, bhikkhu sīlavā hoti …pe… samādāya sikkhati sikkhāpadesu.
an3.90:2.3	Ayaṁ vuccati, bhikkhave, adhisīlasikkhā.
an3.90:3.1	Katamā ca, bhikkhave, adhicittasikkhā?
an3.90:3.2	Idha, bhikkhave, bhikkhu vivicceva kāmehi …pe… catutthaṁ jhānaṁ upasampajja viharati.
an3.90:3.3	Ayaṁ vuccati, bhikkhave, adhicittasikkhā.
an3.90:4.1	Katamā ca, bhikkhave, adhipaññāsikkhā?
an3.90:4.2	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.90:4.3	Ayaṁ vuccati, bhikkhave, adhipaññāsikkhā.
an3.90:4.4	Imā kho, bhikkhave, tisso sikkhāti.
an3.90:5.1	Adhisīlaṁ adhicittaṁ,
an3.90:5.2	adhipaññañca vīriyavā;
an3.90:5.3	Thāmavā dhitimā jhāyī,
an3.90:5.4	sato guttindriyo care.
an3.90:6.1	Yathā pure tathā pacchā,
an3.90:6.2	yathā pacchā tathā pure;
an3.90:6.3	Yathā adho tathā uddhaṁ,
an3.90:6.4	yathā uddhaṁ tathā adho.
an3.90:7.1	Yathā divā tathā rattiṁ,
an3.90:7.2	yathā rattiṁ tathā divā;
an3.90:7.3	Abhibhuyya disā sabbā,
an3.90:7.4	appamāṇasamādhinā.
an3.90:8.1	Tamāhu sekhaṁ paṭipadaṁ,
an3.90:8.2	atho saṁsuddhacāriyaṁ;
an3.90:8.3	Tamāhu loke sambuddhaṁ,
an3.90:8.4	dhīraṁ paṭipadantaguṁ.
an3.90:9.1	Viññāṇassa nirodhena,
an3.90:9.2	taṇhākkhayavimuttino;
an3.90:9.3	Pajjotasseva nibbānaṁ,
an3.90:9.4	vimokkho hoti cetaso”ti.
an3.90:9.5	Dasamaṁ.
an3.91:0.1	Aṅguttara Nikāya 3.91
an3.91:0.2	9. Samaṇavagga
an3.91:0.3	Saṅkavāsutta
an3.91:1.1	Ekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena saṅkavā nāma kosalānaṁ nigamo tadavasari.
an3.91:1.2	Tatra sudaṁ bhagavā saṅkavāyaṁ viharati.
an3.91:1.3	Tena kho pana samayena kassapagotto nāma bhikkhu saṅkavāyaṁ āvāsiko hoti.
an3.91:1.4	Tatra sudaṁ bhagavā sikkhāpadapaṭisaṁyuttāya dhammiyā kathāya bhikkhū sandasseti samādapeti samuttejeti sampahaṁseti.
an3.91:1.5	Atha kho kassapagottassa bhikkhuno bhagavati sikkhāpadapaṭisaṁyuttāya dhammiyā kathāya bhikkhū sandassente samādapente samuttejente sampahaṁsente ahudeva akkhanti ahu appaccayo:
an3.91:1.6	“adhisallikhatevāyaṁ samaṇo”ti.
an3.91:1.7	Atha kho bhagavā saṅkavāyaṁ yathābhirantaṁ viharitvā yena rājagahaṁ tena cārikaṁ pakkāmi.
an3.91:1.8	Anupubbena cārikaṁ caramāno yena rājagahaṁ tadavasari.
an3.91:1.9	Tatra sudaṁ bhagavā rājagahe viharati.
an3.91:2.1	Atha kho kassapagottassa bhikkhuno acirapakkantassa bhagavato ahudeva kukkuccaṁ ahu vippaṭisāro:
an3.91:2.2	“alābhā vata me, na vata me lābhā; dulladdhaṁ vata me, na vata me suladdhaṁ;
an3.91:2.3	yassa me bhagavati sikkhāpadapaṭisaṁyuttāya dhammiyā kathāya bhikkhū sandassente samādapente samuttejente sampahaṁsente ahudeva akkhanti ahu appaccayo:
an3.91:2.4	‘adhisallikhatevāyaṁ samaṇo’ti.
an3.91:2.5	Yannūnāhaṁ yena bhagavā tenupasaṅkameyyaṁ; upasaṅkamitvā bhagavato santike accayaṁ accayato deseyyan”ti.
an3.91:2.6	Atha kho kassapagotto bhikkhu senāsanaṁ saṁsāmetvā pattacīvaramādāya yena rājagahaṁ tena pakkāmi.
an3.91:2.7	Anupubbena yena rājagahaṁ yena gijjhakūṭo pabbato yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho kassapagotto bhikkhu bhagavantaṁ etadavoca:
an3.91:3.1	“Ekamidaṁ, bhante, samayaṁ bhagavā saṅkavāyaṁ viharati, saṅkavā nāma kosalānaṁ nigamo.
an3.91:3.2	Tatra, bhante, bhagavā sikkhāpadapaṭisaṁyuttāya dhammiyā kathāya bhikkhū sandassesi samādapesi samuttejesi sampahaṁsesi.
an3.91:3.3	Tassa mayhaṁ bhagavati sikkhāpadapaṭisaṁyuttāya dhammiyā kathāya bhikkhū sandassente samādapente samuttejente sampahaṁsente ahudeva akkhanti ahu appaccayo:
an3.91:3.4	‘adhisallikhatevāyaṁ samaṇo’ti.
an3.91:3.5	Atha kho bhagavā saṅkavāyaṁ yathābhirantaṁ viharitvā yena rājagahaṁ tena cārikaṁ pakkāmi. (…)
an3.91:3.6	Tassa mayhaṁ, bhante, acirapakkantassa bhagavato ahudeva kukkuccaṁ ahu vippaṭisāro:
an3.91:3.7	‘alābhā vata me, na vata me lābhā; dulladdhaṁ vata me, na vata me suladdhaṁ;
an3.91:3.8	yassa me bhagavati sikkhāpadapaṭisaṁyuttāya dhammiyā kathāya bhikkhū sandassente samādapente samuttejente sampahaṁsente ahudeva akkhanti ahu appaccayo:
an3.91:3.9	“adhisallikhatevāyaṁ samaṇo”ti.
an3.91:3.10	Yannūnāhaṁ yena bhagavā tenupasaṅkameyyaṁ; upasaṅkamitvā bhagavato santike accayaṁ accayato deseyyan’ti.
an3.91:3.11	Accayo maṁ, bhante, accagamā yathābālaṁ yathāmūḷhaṁ yathāakusalaṁ yassa me bhagavati sikkhāpadapaṭisaṁyuttāya dhammiyā kathāya bhikkhū sandassente samādapente samuttejente sampahaṁsente ahudeva akkhanti ahu appaccayo:
an3.91:3.12	‘adhisallikhatevāyaṁ samaṇo’ti.
an3.91:3.13	Tassa me, bhante, bhagavā accayaṁ accayato paṭiggaṇhātu, āyatiṁ saṁvarāyā”ti.
an3.91:4.1	“Taggha taṁ, kassapa, accayo accagamā yathābālaṁ yathāmūḷhaṁ yathāakusalaṁ, yassa te mayi sikkhāpadapaṭisaṁyuttāya dhammiyā kathāya bhikkhū sandassente samādapente samuttejente sampahaṁsente ahudeva akkhanti ahu appaccayo:
an3.91:4.2	‘adhisallikhatevāyaṁ samaṇo’ti.
an3.91:4.3	Yato ca kho tvaṁ, kassapa, accayaṁ accayato disvā yathādhammaṁ paṭikarosi, taṁ te mayaṁ paṭiggaṇhāma.
an3.91:4.4	Vuddhihesā, kassapa, ariyassa vinaye yo accayaṁ accayato disvā yathādhammaṁ paṭikaroti, āyatiṁ saṁvaraṁ āpajjati.
an3.91:5.1	Thero cepi, kassapa, bhikkhu hoti na sikkhākāmo na sikkhāsamādānassa vaṇṇavādī, ye caññe bhikkhū na sikkhākāmā te ca na sikkhāya samādapeti, ye caññe bhikkhū sikkhākāmā tesañca na vaṇṇaṁ bhaṇati bhūtaṁ tacchaṁ kālena, evarūpassāhaṁ, kassapa, therassa bhikkhuno na vaṇṇaṁ bhaṇāmi.
an3.91:5.2	Taṁ kissa hetu?
an3.91:5.3	Satthā hissa vaṇṇaṁ bhaṇatīti aññe naṁ bhikkhū bhajeyyuṁ, ye naṁ bhajeyyuṁ tyāssa diṭṭhānugatiṁ āpajjeyyuṁ, yyāssa diṭṭhānugatiṁ āpajjeyyuṁ tesaṁ taṁ assa dīgharattaṁ ahitāya dukkhāyāti.
an3.91:5.4	Tasmāhaṁ, kassapa, evarūpassa therassa bhikkhuno na vaṇṇaṁ bhaṇāmi.
an3.91:6.1	Majjhimo cepi, kassapa, bhikkhu hoti …pe…
an3.91:6.2	navo cepi, kassapa, bhikkhu hoti na sikkhākāmo na sikkhāsamādānassa vaṇṇavādī, ye caññe bhikkhū na sikkhākāmā te ca na sikkhāya samādapeti, ye caññe bhikkhū sikkhākāmā tesañca na vaṇṇaṁ bhaṇati bhūtaṁ tacchaṁ kālena, evarūpassāhaṁ, kassapa, navassa bhikkhuno na vaṇṇaṁ bhaṇāmi.
an3.91:6.3	Taṁ kissa hetu?
an3.91:6.4	Satthā hissa vaṇṇaṁ bhaṇatīti aññe naṁ bhikkhū bhajeyyuṁ, ye naṁ bhajeyyuṁ tyāssa diṭṭhānugatiṁ āpajjeyyuṁ, yyāssa diṭṭhānugatiṁ āpajjeyyuṁ tesaṁ taṁ assa dīgharattaṁ ahitāya dukkhāyāti.
an3.91:6.5	Tasmāhaṁ, kassapa, evarūpassa navassa bhikkhuno na vaṇṇaṁ bhaṇāmi.
an3.91:7.1	Thero cepi, kassapa, bhikkhu hoti sikkhākāmo sikkhāsamādānassa vaṇṇavādī, ye caññe bhikkhū na sikkhākāmā te ca sikkhāya samādapeti, ye caññe bhikkhū sikkhākāmā tesañca vaṇṇaṁ bhaṇati bhūtaṁ tacchaṁ kālena, evarūpassāhaṁ, kassapa, therassa bhikkhuno vaṇṇaṁ bhaṇāmi.
an3.91:7.2	Taṁ kissa hetu?
an3.91:7.3	Satthā hissa vaṇṇaṁ bhaṇatīti aññe naṁ bhikkhū bhajeyyuṁ, ye naṁ bhajeyyuṁ tyāssa diṭṭhānugatiṁ āpajjeyyuṁ, yyāssa diṭṭhānugatiṁ āpajjeyyuṁ tesaṁ taṁ assa dīgharattaṁ hitāya sukhāyāti.
an3.91:7.4	Tasmāhaṁ, kassapa, evarūpassa therassa bhikkhuno vaṇṇaṁ bhaṇāmi.
an3.91:8.1	Majjhimo cepi, kassapa, bhikkhu hoti sikkhākāmo …pe…
an3.91:8.2	navo cepi, kassapa, bhikkhu hoti sikkhākāmo sikkhāsamādānassa vaṇṇavādī, ye caññe bhikkhū na sikkhākāmā te ca sikkhāya samādapeti, ye caññe bhikkhū sikkhākāmā tesañca vaṇṇaṁ bhaṇati bhūtaṁ tacchaṁ kālena, evarūpassāhaṁ, kassapa, navassa bhikkhuno vaṇṇaṁ bhaṇāmi.
an3.91:8.3	Taṁ kissa hetu?
an3.91:8.4	Satthā hissa vaṇṇaṁ bhaṇatīti aññe naṁ bhikkhū bhajeyyuṁ, ye naṁ bhajeyyuṁ tyāssa diṭṭhānugatiṁ āpajjeyyuṁ, yyāssa diṭṭhānugatiṁ āpajjeyyuṁ tesaṁ taṁ assa dīgharattaṁ hitāya sukhāyāti.
an3.91:8.5	Tasmāhaṁ, kassapa, evarūpassa navassa bhikkhuno vaṇṇaṁ bhaṇāmī”ti.
an3.91:8.6	Ekādasamaṁ.
an3.91:8.7	Samaṇavaggo catuttho.
an3.91:9.0	Tassuddānaṁ
an3.91:9.1	Samaṇo gadrabho khettaṁ,
an3.91:9.2	vajjiputto ca sekkhakaṁ;
an3.91:9.3	Tayo ca sikkhanā vuttā,
an3.91:9.4	dve sikkhā saṅkavāya cāti.
an3.92:0.1	Aṅguttara Nikāya 3.92
an3.92:0.2	10. Loṇakapallavagga
an3.92:0.3	Accāyikasutta
an3.92:1.1	“Tīṇimāni, bhikkhave, kassakassa gahapatissa accāyikāni karaṇīyāni.
an3.92:1.2	Katamāni tīṇi?
an3.92:1.3	Idha, bhikkhave, kassako gahapati sīghaṁ sīghaṁ khettaṁ sukaṭṭhaṁ karoti sumatikataṁ.
an3.92:1.4	Sīghaṁ sīghaṁ khettaṁ sukaṭṭhaṁ karitvā sumatikataṁ sīghaṁ sīghaṁ bījāni patiṭṭhāpeti.
an3.92:1.5	Sīghaṁ sīghaṁ bījāni patiṭṭhāpetvā sīghaṁ sīghaṁ udakaṁ abhinetipi apanetipi.
an3.92:1.6	Imāni kho, bhikkhave, tīṇi kassakassa gahapatissa accāyikāni karaṇīyāni.
an3.92:1.7	Tassa kho taṁ, bhikkhave, kassakassa gahapatissa natthi sā iddhi vā ānubhāvo vā:
an3.92:1.8	‘ajjeva me dhaññāni jāyantu, sveva gabbhīni hontu, uttarasveva paccantū’ti.
an3.92:1.9	Atha kho, bhikkhave, hoti so samayo yaṁ tassa kassakassa gahapatissa tāni dhaññāni utupariṇāmīni jāyantipi gabbhīnipi honti paccantipi.
an3.92:2.1	Evamevaṁ kho, bhikkhave, tīṇimāni bhikkhussa accāyikāni karaṇīyāni.
an3.92:2.2	Katamāni tīṇi?
an3.92:2.3	Adhisīlasikkhāsamādānaṁ, adhicittasikkhāsamādānaṁ, adhipaññāsikkhāsamādānaṁ—
an3.92:2.4	imāni kho, bhikkhave, tīṇi bhikkhussa accāyikāni karaṇīyāni.
an3.92:2.5	Tassa kho taṁ, bhikkhave, bhikkhuno natthi sā iddhi vā ānubhāvo vā:
an3.92:2.6	‘ajjeva me anupādāya āsavehi cittaṁ vimuccatu sve vā uttarasve vā’ti.
an3.92:2.7	Atha kho, bhikkhave, hoti so samayo yaṁ tassa bhikkhuno adhisīlampi sikkhato adhicittampi sikkhato adhipaññampi sikkhato anupādāya āsavehi cittaṁ vimuccati.
an3.92:3.1	Tasmātiha, bhikkhave, evaṁ sikkhitabbaṁ:
an3.92:3.2	‘tibbo no chando bhavissati adhisīlasikkhāsamādāne, tibbo chando bhavissati adhicittasikkhāsamādāne, tibbo chando bhavissati adhipaññāsikkhāsamādāne’ti.
an3.92:3.3	Evañhi vo, bhikkhave, sikkhitabban”ti.
an3.92:3.4	Paṭhamaṁ.
an3.93:0.1	Aṅguttara Nikāya 3.93
an3.93:0.2	10. Loṇakapallavagga
an3.93:0.3	Pavivekasutta
an3.93:1.1	“Tīṇimāni, bhikkhave, aññatitthiyā paribbājakā pavivekāni paññāpenti.
an3.93:1.2	Katamāni tīṇi?
an3.93:1.3	Cīvarapavivekaṁ, piṇḍapātapavivekaṁ, senāsanapavivekaṁ.
an3.93:2.1	Tatridaṁ, bhikkhave, aññatitthiyā paribbājakā cīvarapavivekasmiṁ paññāpenti, sāṇānipi dhārenti, masāṇānipi dhārenti, chavadussānipi dhārenti, paṁsukūlānipi dhārenti, tirīṭānipi dhārenti, ajinampi dhārenti, ajinakkhipampi dhārenti, kusacīrampi dhārenti, vākacīrampi dhārenti, phalakacīrampi dhārenti, kesakambalampi dhārenti, vālakambalampi dhārenti, ulūkapakkhikampi dhārenti.
an3.93:2.2	Idaṁ kho, bhikkhave, aññatitthiyā paribbājakā cīvarapavivekasmiṁ paññāpenti.
an3.93:3.1	Tatridaṁ, bhikkhave, aññatitthiyā paribbājakā piṇḍapātapavivekasmiṁ paññāpenti.
an3.93:3.2	Sākabhakkhāpi honti, sāmākabhakkhāpi honti, nīvārabhakkhāpi honti, daddulabhakkhāpi honti, haṭabhakkhāpi honti, kaṇabhakkhāpi honti, ācāmabhakkhāpi honti, piññākabhakkhāpi honti, tiṇabhakkhāpi honti, gomayabhakkhāpi honti, vanamūlaphalāhārā yāpenti pavattaphalabhojī.
an3.93:3.3	Idaṁ kho, bhikkhave, aññatitthiyā paribbājakā piṇḍapātapavivekasmiṁ paññāpenti.
an3.93:4.1	Tatridaṁ, bhikkhave, aññatitthiyā paribbājakā senāsanapavivekasmiṁ paññāpenti araññaṁ rukkhamūlaṁ susānaṁ vanapatthaṁ abbhokāsaṁ palālapuñjaṁ bhusāgāraṁ.
an3.93:4.2	Idaṁ kho, bhikkhave, aññatitthiyā paribbājakā senāsanapavivekasmiṁ paññāpenti.
an3.93:4.3	Imāni kho, bhikkhave, tīṇi aññatitthiyā paribbājakā pavivekāni paññāpenti.
an3.93:5.1	Tīṇi kho panimāni, bhikkhave, imasmiṁ dhammavinaye bhikkhuno pavivekāni.
an3.93:5.2	Katamāni tīṇi?
an3.93:5.3	Idha, bhikkhave, bhikkhu sīlavā ca hoti, dussīlyañcassa pahīnaṁ hoti, tena ca vivitto hoti;
an3.93:5.4	sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti;
an3.93:5.5	khīṇāsavo ca hoti, āsavā cassa pahīnā honti, tehi ca vivitto hoti.
an3.93:5.6	Yato kho, bhikkhave, bhikkhu sīlavā hoti, dussīlyañcassa pahīnaṁ hoti, tena ca vivitto hoti;
an3.93:5.7	sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti;
an3.93:5.8	khīṇāsavo ca hoti, āsavā cassa pahīnā honti, tehi ca vivitto hoti.
an3.93:5.9	Ayaṁ vuccati, bhikkhave, ‘bhikkhu aggappatto sārappatto suddho sāre patiṭṭhito’.
an3.93:6.1	Seyyathāpi, bhikkhave, kassakassa gahapatissa sampannaṁ sālikkhettaṁ.
an3.93:6.2	Tamenaṁ kassako gahapati sīghaṁ sīghaṁ lavāpeyya.
an3.93:6.3	Sīghaṁ sīghaṁ lavāpetvā sīghaṁ sīghaṁ saṅgharāpeyya.
an3.93:6.4	Sīghaṁ sīghaṁ saṅgharāpetvā sīghaṁ sīghaṁ ubbahāpeyya.
an3.93:6.5	Sīghaṁ sīghaṁ ubbahāpetvā sīghaṁ sīghaṁ puñjaṁ kārāpeyya.
an3.93:6.6	Sīghaṁ sīghaṁ puñjaṁ kārāpetvā sīghaṁ sīghaṁ maddāpeyya.
an3.93:6.7	Sīghaṁ sīghaṁ maddāpetvā sīghaṁ sīghaṁ palālāni uddharāpeyya.
an3.93:6.8	Sīghaṁ sīghaṁ palālāni uddharāpetvā sīghaṁ sīghaṁ bhusikaṁ uddharāpeyya.
an3.93:6.9	Sīghaṁ sīghaṁ bhusikaṁ uddharāpetvā sīghaṁ sīghaṁ opunāpeyya.
an3.93:6.10	Sīghaṁ sīghaṁ opunāpetvā sīghaṁ sīghaṁ atiharāpeyya.
an3.93:6.11	Sīghaṁ sīghaṁ atiharāpetvā sīghaṁ sīghaṁ koṭṭāpeyya.
an3.93:6.12	Sīghaṁ sīghaṁ koṭṭāpetvā sīghaṁ sīghaṁ thusāni uddharāpeyya.
an3.93:6.13	Evamassu tāni, bhikkhave, kassakassa gahapatissa dhaññāni aggappattāni sārappattāni suddhāni sāre patiṭṭhitāni.
an3.93:7.1	Evamevaṁ kho, bhikkhave, yato bhikkhu sīlavā ca hoti, dussīlyañcassa pahīnaṁ hoti, tena ca vivitto hoti;
an3.93:7.2	sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti;
an3.93:7.3	khīṇāsavo ca hoti, āsavā cassa pahīnā honti, tehi ca vivitto hoti.
an3.93:7.4	Ayaṁ vuccati, bhikkhave, ‘bhikkhu aggappatto sārappatto suddho sāre patiṭṭhito’”ti.
an3.93:7.5	Dutiyaṁ.
an3.94:0.1	Aṅguttara Nikāya 3.94
an3.94:0.2	10. Loṇakapallavagga
an3.94:0.3	Saradasutta
an3.94:1.1	“Seyyathāpi, bhikkhave, saradasamaye viddhe vigatavalāhake deve ādicco nabhaṁ abbhussakkamāno sabbaṁ ākāsagataṁ tamagataṁ abhivihacca bhāsate ca tapate ca virocati ca.
an3.94:2.1	Evamevaṁ kho, bhikkhave, yato ariyasāvakassa virajaṁ vītamalaṁ dhammacakkhuṁ uppajjati, saha dassanuppādā, bhikkhave, ariyasāvakassa tīṇi saṁyojanāni pahīyanti—
an3.94:2.2	sakkāyadiṭṭhi, vicikicchā, sīlabbataparāmāso.
an3.94:3.1	Athāparaṁ dvīhi dhammehi niyyāti abhijjhāya ca byāpādena ca.
an3.94:3.2	So vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an3.94:3.3	Tasmiñce, bhikkhave, samaye ariyasāvako kālaṁ kareyya, natthi taṁ saṁyojanaṁ yena saṁyojanena saṁyutto ariyasāvako puna imaṁ lokaṁ āgaccheyyā”ti.
an3.94:3.4	Tatiyaṁ.
an3.95:0.1	Aṅguttara Nikāya 3.95
an3.95:0.2	10. Loṇakapallavagga
an3.95:0.3	Parisāsutta
an3.95:1.1	“Tisso imā, bhikkhave, parisā.
an3.95:1.2	Katamā tisso?
an3.95:1.3	Aggavatī parisā, vaggā parisā, samaggā parisā.
an3.95:2.1	Katamā ca, bhikkhave, aggavatī parisā?
an3.95:2.2	Idha, bhikkhave, yassaṁ parisāyaṁ therā bhikkhū na bāhulikā honti na sāthalikā, okkamane nikkhittadhurā paviveke pubbaṅgamā, vīriyaṁ ārabhanti appattassa pattiyā anadhigatassa adhigamāya asacchikatassa sacchikiriyāya, tesaṁ pacchimā janatā diṭṭhānugatiṁ āpajjati.
an3.95:2.3	Sāpi hoti na bāhulikā na sāthalikā okkamane nikkhittadhurā paviveke pubbaṅgamā, vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an3.95:2.4	Ayaṁ vuccati, bhikkhave, aggavatī parisā.
an3.95:3.1	Katamā ca, bhikkhave, vaggā parisā?
an3.95:3.2	Idha, bhikkhave, yassaṁ parisāyaṁ bhikkhū bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti, ayaṁ vuccati, bhikkhave, vaggā parisā.
an3.95:4.1	Katamā ca, bhikkhave, samaggā parisā?
an3.95:4.2	Idha, bhikkhave, yassaṁ parisāyaṁ bhikkhū samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharanti, ayaṁ vuccati, bhikkhave, samaggā parisā.
an3.95:5.1	Yasmiṁ, bhikkhave, samaye bhikkhū samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharanti, bahuṁ, bhikkhave, bhikkhū tasmiṁ samaye puññaṁ pasavanti.
an3.95:5.2	Brahmaṁ, bhikkhave, vihāraṁ tasmiṁ samaye bhikkhū viharanti, yadidaṁ muditāya cetovimuttiyā.
an3.95:5.3	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an3.95:6.1	Seyyathāpi, bhikkhave, uparipabbate thullaphusitake deve vassante taṁ udakaṁ yathāninnaṁ pavattamānaṁ pabbatakandarapadarasākhā paripūreti, pabbatakandarapadarasākhā paripūrā kusobbhe paripūrenti, kusobbhā paripūrā mahāsobbhe paripūrenti, mahāsobbhā paripūrā kunnadiyo paripūrenti, kunnadiyo paripūrā mahānadiyo paripūrenti, mahānadiyo paripūrā samuddaṁ paripūrenti.
an3.95:7.1	Evamevaṁ kho, bhikkhave, yasmiṁ samaye bhikkhū samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharanti, bahuṁ, bhikkhave, bhikkhū tasmiṁ samaye puññaṁ pasavanti.
an3.95:7.2	Brahmaṁ, bhikkhave, vihāraṁ tasmiṁ samaye bhikkhū viharanti, yadidaṁ muditāya cetovimuttiyā.
an3.95:7.3	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an3.95:7.4	Imā kho, bhikkhave, tisso parisā”ti.
an3.95:7.5	Catutthaṁ.
an3.96:0.1	Aṅguttara Nikāya 3.96
an3.96:0.2	10. Loṇakapallavagga
an3.96:0.3	Paṭhamaājānīyasutta
an3.96:1.1	“Tīhi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhyaṁ gacchati.
an3.96:1.2	Katamehi tīhi?
an3.96:1.3	Idha, bhikkhave, rañño bhadro assājānīyo vaṇṇasampanno ca hoti balasampanno ca javasampanno ca.
an3.96:1.4	Imehi kho, bhikkhave, tīhi aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhyaṁ gacchati.
an3.96:1.5	Evamevaṁ kho, bhikkhave, tīhi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an3.96:1.6	Katamehi tīhi?
an3.96:1.7	Idha, bhikkhave, bhikkhu vaṇṇasampanno ca hoti balasampanno ca javasampanno ca.
an3.96:2.1	Kathañca, bhikkhave, bhikkhu vaṇṇasampanno hoti?
an3.96:2.2	Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an3.96:2.3	Evaṁ kho, bhikkhave, bhikkhu vaṇṇasampanno hoti.
an3.96:3.1	Kathañca, bhikkhave, bhikkhu balasampanno hoti?
an3.96:3.2	Idha, bhikkhave, bhikkhu āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya thāmavā daḷhaparakkamo anikkhittadhuro kusalesu dhammesu.
an3.96:3.3	Evaṁ kho, bhikkhave, bhikkhu balasampanno hoti.
an3.96:4.1	Kathañca, bhikkhave, bhikkhu javasampanno hoti?
an3.96:4.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti;
an3.96:4.3	‘ayaṁ dukkhasamudayo’ti yathābhūtaṁ pajānāti;
an3.96:4.4	‘ayaṁ dukkhanirodho’ti yathābhūtaṁ pajānāti;
an3.96:4.5	‘ayaṁ dukkhanirodhagāminī paṭipadā’ti yathābhūtaṁ pajānāti.
an3.96:4.6	Evaṁ kho, bhikkhave, bhikkhu javasampanno hoti.
an3.96:4.7	Imehi kho, bhikkhave, tīhi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā”ti.
an3.96:4.8	Pañcamaṁ.
an3.97:0.1	Aṅguttara Nikāya 3.97
an3.97:0.2	10. Loṇakapallavagga
an3.97:0.3	Dutiyaājānīyasutta
an3.97:1.1	“Tīhi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhayaṁ gacchati.
an3.97:1.2	Katamehi tīhi?
an3.97:1.3	Idha, bhikkhave, rañño bhadro assājānīyo vaṇṇasampanno ca hoti balasampanno ca javasampanno ca.
an3.97:1.4	Imehi kho, bhikkhave, tīhi aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhyaṁ gacchati.
an3.97:1.5	Evamevaṁ kho, bhikkhave, tīhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an3.97:1.6	Katamehi tīhi?
an3.97:1.7	Idha, bhikkhave, bhikkhu vaṇṇasampanno ca hoti balasampanno ca javasampanno ca.
an3.97:2.1	Kathañca, bhikkhave, bhikkhu vaṇṇasampanno hoti?
an3.97:2.2	Idha, bhikkhave, bhikkhu sīlavā hoti …pe… samādāya sikkhati sikkhāpadesu.
an3.97:2.3	Evaṁ kho, bhikkhave, bhikkhu vaṇṇasampanno hoti.
an3.97:3.1	Kathañca, bhikkhave, bhikkhu balasampanno hoti?
an3.97:3.2	Idha, bhikkhave, bhikkhu āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya thāmavā daḷhaparakkamo anikkhittadhuro kusalesu dhammesu.
an3.97:3.3	Evaṁ kho, bhikkhave, bhikkhu balasampanno hoti.
an3.97:4.1	Kathañca, bhikkhave, bhikkhu javasampanno hoti?
an3.97:4.2	Idha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an3.97:4.3	Evaṁ kho, bhikkhave, bhikkhu javasampanno hoti.
an3.97:4.4	Imehi kho, bhikkhave, tīhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an3.97:4.5	Chaṭṭhaṁ.
an3.98:0.1	Aṅguttara Nikāya 3.98
an3.98:0.2	10. Loṇakapallavagga
an3.98:0.3	Tatiyaājānīyasutta
an3.98:1.1	“Tīhi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhayaṁ gacchati.
an3.98:1.2	Katamehi tīhi?
an3.98:1.3	Idha, bhikkhave, rañño bhadro assājānīyo vaṇṇasampanno ca hoti balasampanno ca javasampanno ca.
an3.98:1.4	Imehi kho, bhikkhave, tīhi aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhyaṁ gacchati.
an3.98:1.5	Evamevaṁ kho, bhikkhave, tīhi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an3.98:1.6	Katamehi tīhi?
an3.98:1.7	Idha, bhikkhave, bhikkhu vaṇṇasampanno ca hoti balasampanno ca javasampanno ca.
an3.98:2.1	Kathañca, bhikkhave, bhikkhu vaṇṇasampanno hoti?
an3.98:2.2	Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an3.98:2.3	Evaṁ kho, bhikkhave, bhikkhu vaṇṇasampanno hoti.
an3.98:3.1	Kathañca, bhikkhave, bhikkhu balasampanno hoti?
an3.98:3.2	Idha, bhikkhave, bhikkhu āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya thāmavā daḷhaparakkamo anikkhittadhuro kusalesu dhammesu.
an3.98:3.3	Evaṁ kho, bhikkhave, bhikkhu balasampanno hoti.
an3.98:4.1	Kathañca, bhikkhave, bhikkhu javasampanno hoti?
an3.98:4.2	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.98:4.3	Evaṁ kho, bhikkhave, bhikkhu javasampanno hoti.
an3.98:4.4	Imehi kho, bhikkhave, tīhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an3.98:4.5	Sattamaṁ.
an3.99:0.1	Aṅguttara Nikāya 3.99
an3.99:0.2	10. Loṇakapallavagga
an3.99:0.3	Potthakasutta
an3.99:1.1	“Navopi, bhikkhave, potthako dubbaṇṇo ca hoti dukkhasamphasso ca appaggho ca;
an3.99:1.2	majjhimopi, bhikkhave, potthako dubbaṇṇo ca hoti dukkhasamphasso ca appaggho ca;
an3.99:1.3	jiṇṇopi, bhikkhave, potthako dubbaṇṇo ca hoti dukkhasamphasso ca appaggho ca.
an3.99:1.4	Jiṇṇampi, bhikkhave, potthakaṁ ukkhaliparimajjanaṁ vā karonti saṅkārakūṭe vā naṁ chaḍḍenti.
an3.99:2.1	Evamevaṁ kho, bhikkhave, navo cepi bhikkhu hoti dussīlo pāpadhammo.
an3.99:2.2	Idamassa dubbaṇṇatāya vadāmi.
an3.99:2.3	Seyyathāpi so, bhikkhave, potthako dubbaṇṇo tathūpamāhaṁ, bhikkhave, imaṁ puggalaṁ vadāmi.
an3.99:2.4	Ye kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ ahitāya dukkhāya.
an3.99:2.5	Idamassa dukkhasamphassatāya vadāmi.
an3.99:2.6	Seyyathāpi so, bhikkhave, potthako dukkhasamphasso tathūpamāhaṁ, bhikkhave, imaṁ puggalaṁ vadāmi.
an3.99:2.7	Yesaṁ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṁ, tesaṁ taṁ na mahapphalaṁ hoti na mahānisaṁsaṁ.
an3.99:2.8	Idamassa appagghatāya vadāmi.
an3.99:2.9	Seyyathāpi so, bhikkhave, potthako appaggho tathūpamāhaṁ, bhikkhave, imaṁ puggalaṁ vadāmi.
an3.99:2.10	Majjhimo cepi, bhikkhave, bhikkhu hoti …pe…
an3.99:2.11	thero cepi, bhikkhave, bhikkhu hoti dussīlo pāpadhammo, idamassa dubbaṇṇatāya vadāmi.
an3.99:2.12	Seyyathāpi so, bhikkhave, potthako dubbaṇṇo tathūpamāhaṁ, bhikkhave, imaṁ puggalaṁ vadāmi.
an3.99:2.13	Ye kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ ahitāya dukkhāya.
an3.99:2.14	Idamassa dukkhasamphassatāya vadāmi.
an3.99:2.15	Seyyathāpi so, bhikkhave, potthako dukkhasamphasso tathūpamāhaṁ, bhikkhave, imaṁ puggalaṁ vadāmi.
an3.99:2.16	Yesaṁ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṁ, tesaṁ taṁ na mahapphalaṁ hoti na mahānisaṁsaṁ.
an3.99:2.17	Idamassa appagghatāya vadāmi.
an3.99:2.18	Seyyathāpi so, bhikkhave, potthako appaggho tathūpamāhaṁ, bhikkhave, imaṁ puggalaṁ vadāmi.
an3.99:3.1	Evarūpo cāyaṁ, bhikkhave, thero bhikkhu saṅghamajjhe bhaṇati.
an3.99:3.2	Tamenaṁ bhikkhū evamāhaṁsu:
an3.99:3.3	‘kiṁ nu kho tuyhaṁ bālassa abyattassa bhaṇitena,
an3.99:3.4	tvampi nāma bhaṇitabbaṁ maññasī’ti.
an3.99:3.5	So kupito anattamano tathārūpiṁ vācaṁ nicchāreti yathārūpāya vācāya saṅgho taṁ ukkhipati, saṅkārakūṭeva naṁ potthakaṁ.
an3.99:4.1	Navampi, bhikkhave, kāsikaṁ vatthaṁ vaṇṇavantañceva hoti sukhasamphassañca mahagghañca; majjhimampi, bhikkhave, kāsikaṁ vatthaṁ vaṇṇavantañceva hoti sukhasamphassañca mahagghañca; jiṇṇampi, bhikkhave, kāsikaṁ vatthaṁ vaṇṇavantañceva hoti sukhasamphassañca mahagghañca.
an3.99:4.2	Jiṇṇampi, bhikkhave, kāsikaṁ vatthaṁ ratanapaliveṭhanaṁ vā karoti gandhakaraṇḍake vā naṁ pakkhipanti.
an3.99:5.1	Evamevaṁ kho, bhikkhave, navo cepi bhikkhu hoti sīlavā kalyāṇadhammo, idamassa suvaṇṇatāya vadāmi.
an3.99:5.2	Seyyathāpi taṁ, bhikkhave, kāsikaṁ vatthaṁ vaṇṇavantaṁ tathūpamāhaṁ, bhikkhave, imaṁ puggalaṁ vadāmi.
an3.99:5.3	Ye kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ hitāya sukhāya.
an3.99:5.4	Idamassa sukhasamphassatāya vadāmi.
an3.99:5.5	Seyyathāpi taṁ, bhikkhave, kāsikaṁ vatthaṁ sukhasamphassaṁ tathūpamāhaṁ, bhikkhave, imaṁ puggalaṁ vadāmi.
an3.99:5.6	Yesaṁ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṁ, tesaṁ taṁ mahapphalaṁ hoti mahānisaṁsaṁ.
an3.99:5.7	Idamassa mahagghatāya vadāmi.
an3.99:5.8	Seyyathāpi taṁ, bhikkhave, kāsikaṁ vatthaṁ mahagghaṁ tathūpamāhaṁ, bhikkhave, imaṁ puggalaṁ vadāmi.
an3.99:5.9	Majjhimo cepi, bhikkhave, bhikkhu hoti …pe…
an3.99:5.10	thero cepi, bhikkhave, bhikkhu hoti …pe… puggalaṁ vadāmi.
an3.99:6.1	Evarūpo cāyaṁ, bhikkhave, thero bhikkhu saṅghamajjhe bhaṇati.
an3.99:6.2	Tamenaṁ bhikkhū evamāhaṁsu:
an3.99:6.3	‘appasaddā āyasmanto hotha, thero bhikkhu dhammañca vinayañca bhaṇatī’ti.
an3.99:6.4	Tasmātiha, bhikkhave, evaṁ sikkhitabbaṁ:
an3.99:6.5	‘kāsikavatthūpamā bhavissāma, na potthakūpamā’ti.
an3.99:6.6	Evañhi vo, bhikkhave, sikkhitabban”ti.
an3.99:6.7	Aṭṭhamaṁ.
an3.100:0.1	Aṅguttara Nikāya 3.100
an3.100:0.2	10. Loṇakapallavagga
an3.100:0.3	Loṇakapallasutta
an3.100:1.1	“Yo, bhikkhave, evaṁ vadeyya:
an3.100:1.2	‘yathā yathāyaṁ puriso kammaṁ karoti tathā tathā taṁ paṭisaṁvediyatī’ti, evaṁ santaṁ, bhikkhave, brahmacariyavāso na hoti, okāso na paññāyati sammā dukkhassa antakiriyāya.
an3.100:1.3	Yo ca kho, bhikkhave, evaṁ vadeyya:
an3.100:1.4	‘yathā yathā vedanīyaṁ ayaṁ puriso kammaṁ karoti tathā tathāssa vipākaṁ paṭisaṁvediyatī’ti, evaṁ santaṁ, bhikkhave, brahmacariyavāso hoti, okāso paññāyati sammā dukkhassa antakiriyāya.
an3.100:1.5	Idha, bhikkhave, ekaccassa puggalassa appamattakampi pāpakammaṁ kataṁ tamenaṁ nirayaṁ upaneti.
an3.100:1.6	Idha pana, bhikkhave, ekaccassa puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva.
an3.100:2.1	Kathaṁrūpassa, bhikkhave, puggalassa appamattakampi pāpakammaṁ kataṁ tamenaṁ nirayaṁ upaneti?
an3.100:2.2	Idha pana, bhikkhave, ekacco puggalo abhāvitakāyo hoti abhāvitasīlo abhāvitacitto abhāvitapañño paritto appātumo appadukkhavihārī.
an3.100:2.3	Evarūpassa, bhikkhave, puggalassa appamattakampi pāpakammaṁ kataṁ tamenaṁ nirayaṁ upaneti.
an3.100:3.1	Kathaṁrūpassa, bhikkhave, puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva?
an3.100:3.2	Idha, bhikkhave, ekacco puggalo bhāvitakāyo hoti bhāvitasīlo bhāvitacitto bhāvitapañño aparitto mahatto appamāṇavihārī.
an3.100:3.3	Evarūpassa, bhikkhave, puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva.
an3.100:4.1	Seyyathāpi, bhikkhave, puriso loṇakapallaṁ paritte udakamallake pakkhipeyya.
an3.100:4.2	Taṁ kiṁ maññatha, bhikkhave,
an3.100:4.3	api nu taṁ parittaṁ udakaṁ amunā loṇakapallena loṇaṁ assa apeyyan”ti?
an3.100:4.4	“Evaṁ, bhante”.
an3.100:4.5	“Taṁ kissa hetu”?
an3.100:4.6	“Aduñhi, bhante, parittaṁ udakakapallake udakaṁ, taṁ amunā loṇakapallena loṇaṁ assa apeyyan”ti.
an3.100:4.7	“Seyyathāpi, bhikkhave, puriso loṇakapallakaṁ gaṅgāya nadiyā pakkhipeyya.
an3.100:4.8	Taṁ kiṁ maññatha, bhikkhave,
an3.100:4.9	api nu sā gaṅgā nadī amunā loṇakapallena loṇaṁ assa apeyyā”ti?
an3.100:4.10	“No hetaṁ, bhante”.
an3.100:4.11	“Taṁ kissa hetu”?
an3.100:4.12	“Asu hi, bhante, gaṅgāya nadiyā mahā udakakkhandho so amunā loṇakapallena loṇo na assa apeyyo”ti.
an3.100:5.1	“Evamevaṁ kho, bhikkhave, idhekaccassa puggalassa appamattakampi pāpakammaṁ kataṁ tamenaṁ nirayaṁ upaneti.
an3.100:5.2	Idha, bhikkhave, ekaccassa puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva.
an3.100:6.1	Kathaṁrūpassa, bhikkhave, puggalassa appamattakampi pāpakammaṁ kataṁ tamenaṁ nirayaṁ upaneti?
an3.100:6.2	Idha, bhikkhave, ekacco puggalo abhāvitakāyo hoti abhāvitasīlo abhāvitacitto abhāvitapañño paritto appātumo appadukkhavihārī.
an3.100:6.3	Evarūpassa, bhikkhave, puggalassa appamattakampi pāpakammaṁ kataṁ tamenaṁ nirayaṁ upaneti.
an3.100:7.1	Kathaṁrūpassa, bhikkhave, puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva?
an3.100:7.2	Idha, bhikkhave, ekacco puggalo bhāvitakāyo hoti bhāvitasīlo bhāvitacitto bhāvitapañño aparitto mahatto appamāṇavihārī.
an3.100:7.3	Evarūpassa, bhikkhave, puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva.
an3.100:8.1	Idha, bhikkhave, ekacco aḍḍhakahāpaṇenapi bandhanaṁ nigacchati, kahāpaṇenapi bandhanaṁ nigacchati, kahāpaṇasatenapi bandhanaṁ nigacchati.
an3.100:8.2	Idha, bhikkhave, ekacco aḍḍhakahāpaṇenapi na bandhanaṁ nigacchati, kahāpaṇenapi na bandhanaṁ nigacchati, kahāpaṇasatenapi na bandhanaṁ nigacchati.
an3.100:9.1	Kathaṁrūpo, bhikkhave, aḍḍhakahāpaṇenapi bandhanaṁ nigacchati, kahāpaṇenapi bandhanaṁ nigacchati, kahāpaṇasatenapi bandhanaṁ nigacchati?
an3.100:9.2	Idha, bhikkhave, ekacco daliddo hoti appassako appabhogo.
an3.100:9.3	Evarūpo, bhikkhave, aḍḍhakahāpaṇenapi bandhanaṁ nigacchati, kahāpaṇenapi bandhanaṁ nigacchati, kahāpaṇasatenapi bandhanaṁ nigacchati.
an3.100:10.1	Kathaṁrūpo, bhikkhave, aḍḍhakahāpaṇenapi na bandhanaṁ nigacchati, kahāpaṇenapi na bandhanaṁ nigacchati, kahāpaṇasatenapi na bandhanaṁ nigacchati?
an3.100:10.2	Idha, bhikkhave, ekacco aḍḍho hoti mahaddhano mahābhogo.
an3.100:10.3	Evarūpo, bhikkhave, aḍḍhakahāpaṇenapi na bandhanaṁ nigacchati, kahāpaṇenapi na bandhanaṁ nigacchati, kahāpaṇasatenapi na bandhanaṁ nigacchati.
an3.100:10.4	Evamevaṁ kho, bhikkhave, idhekaccassa puggalassa appamattakaṁ pāpakammaṁ kataṁ.
an3.100:10.5	Tamenaṁ nirayaṁ upaneti.
an3.100:10.6	Idha, bhikkhave, ekaccassa puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva.
an3.100:11.1	Kathaṁrūpassa, bhikkhave, puggalassa appamattakaṁ pāpakammaṁ kataṁ, tamenaṁ nirayaṁ upaneti?
an3.100:11.2	Idha, bhikkhave, ekacco puggalo abhāvitakāyo hoti abhāvitasīlo abhāvitacitto abhāvitapañño paritto appātumo appadukkhavihārī.
an3.100:11.3	Evarūpassa, bhikkhave, puggalassa tādisaṁyeva appamattakaṁ pāpakammaṁ kataṁ tamenaṁ nirayaṁ upaneti.
an3.100:12.1	Kathaṁrūpassa, bhikkhave, puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva?
an3.100:12.2	Idha, bhikkhave, ekacco puggalo bhāvitakāyo hoti bhāvitasīlo bhāvitacitto bhāvitapañño aparitto mahatto appamāṇavihārī.
an3.100:12.3	Evarūpassa, bhikkhave, puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva.
an3.100:13.1	Idha, bhikkhave, ekacco puggalo bhāvitakāyo hoti bhāvitasīlo bhāvitacitto bhāvitapañño aparitto mahatto appamāṇavihārī.
an3.100:13.2	Evarūpassa, bhikkhave, puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva.
an3.100:13.3	Seyyathāpi, bhikkhave, orabbhiko vā urabbhaghātako vā appekaccaṁ urabbhaṁ adinnaṁ ādiyamānaṁ pahoti hantuṁ vā bandhituṁ vā jāpetuṁ vā yathāpaccayaṁ vā kātuṁ, appekaccaṁ urabbhaṁ adinnaṁ ādiyamānaṁ nappahoti hantuṁ vā bandhituṁ vā jāpetuṁ vā yathāpaccayaṁ vā kātuṁ.
an3.100:14.1	Kathaṁrūpaṁ, bhikkhave, orabbhiko vā urabbhaghātako vā urabbhaṁ adinnaṁ ādiyamānaṁ pahoti hantuṁ vā bandhituṁ vā jāpetuṁ vā yathāpaccayaṁ vā kātuṁ?
an3.100:14.2	Idha, bhikkhave, ekacco daliddo hoti appassako appabhogo.
an3.100:14.3	Evarūpaṁ, bhikkhave, orabbhiko vā urabbhaghātako vā urabbhaṁ adinnaṁ ādiyamānaṁ pahoti hantuṁ vā bandhituṁ vā jāpetuṁ vā yathāpaccayaṁ vā kātuṁ.
an3.100:15.1	Kathaṁrūpaṁ, bhikkhave, orabbhiko vā urabbhaghātako vā urabbhaṁ adinnaṁ ādiyamānaṁ nappahoti hantuṁ vā bandhituṁ vā jāpetuṁ vā yathāpaccayaṁ vā kātuṁ.
an3.100:15.2	Idha, bhikkhave, ekacco aḍḍho hoti mahaddhano mahābhogo rājā vā rājamahāmatto vā.
an3.100:15.3	Evarūpaṁ, bhikkhave, orabbhiko vā urabbhaghātako vā urabbhaṁ adinnaṁ ādiyamānaṁ nappahoti hantuṁ vā bandhituṁ vā jāpetuṁ vā yathāpaccayaṁ vā kātuṁ.
an3.100:15.4	Aññadatthu pañjalikova naṁ yācati:
an3.100:15.5	‘dehi me, mārisa, urabbhaṁ vā urabbhadhanaṁ vā’ti.
an3.100:15.6	Evamevaṁ kho, bhikkhave, idhekaccassa puggalassa tādisaṁyeva appamattakampi pāpakammaṁ kataṁ tamenaṁ nirayaṁ upaneti.
an3.100:15.7	Idha pana, bhikkhave, ekaccassa puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva.
an3.100:16.1	Kathaṁrūpassa, bhikkhave, puggalassa appamattakampi pāpakammaṁ kataṁ tamenaṁ nirayaṁ upaneti?
an3.100:16.2	Idha, bhikkhave, ekacco puggalo abhāvitakāyo hoti abhāvitasīlo abhāvitacitto abhāvitapañño paritto appātumo appadukkhavihārī.
an3.100:16.3	Evarūpassa, bhikkhave, puggalassa appamattakampi pāpakammaṁ kataṁ tamenaṁ nirayaṁ upaneti.
an3.100:17.1	Kathaṁrūpassa, bhikkhave, puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva?
an3.100:17.2	Idha, bhikkhave, ekacco puggalo bhāvitakāyo hoti bhāvitasīlo bhāvitacitto bhāvitapañño aparitto mahatto appamāṇavihārī.
an3.100:17.3	Evarūpassa, bhikkhave, puggalassa tādisaṁyeva appamattakaṁ pāpakammaṁ kataṁ diṭṭhadhammavedanīyaṁ hoti, nāṇupi khāyati, kiṁ bahudeva.
an3.100:18.1	Yo, bhikkhave, evaṁ vadeyya:
an3.100:18.2	‘yathā yathāyaṁ puriso kammaṁ karoti tathā tathā taṁ paṭisaṁvedetī’ti, evaṁ santaṁ, bhikkhave, brahmacariyavāso na hoti, okāso na paññāyati sammā dukkhassa antakiriyāya.
an3.100:18.3	Yo ca kho, bhikkhave, evaṁ vadeyya:
an3.100:18.4	‘yathā yathā vedanīyaṁ ayaṁ puriso kammaṁ karoti tathā tathā tassa vipākaṁ paṭisaṁvedetī’ti, evaṁ santaṁ, bhikkhave, brahmacariyavāso hoti, okāso paññāyati sammā dukkhassa antakiriyāyā”ti.
an3.100:18.5	Navamaṁ.
an3.101:0.1	Aṅguttara Nikāya 3.101
an3.101:0.2	10. Loṇakapallavagga
an3.101:0.3	Paṁsudhovakasutta
an3.101:1.1	“Santi, bhikkhave, jātarūpassa oḷārikā upakkilesā paṁsuvālukā sakkharakaṭhalā.
an3.101:1.2	Tamenaṁ paṁsudhovako vā paṁsudhovakantevāsī vā doṇiyaṁ ākiritvā dhovati sandhovati niddhovati.
an3.101:1.3	Tasmiṁ pahīne tasmiṁ byantīkate santi jātarūpassa majjhimasahagatā upakkilesā sukhumasakkharā thūlavālukā.
an3.101:1.4	Tamenaṁ paṁsudhovako vā paṁsudhovakantevāsī vā dhovati sandhovati niddhovati.
an3.101:1.5	Tasmiṁ pahīne tasmiṁ byantīkate santi jātarūpassa sukhumasahagatā upakkilesā sukhumavālukā kāḷajallikā.
an3.101:1.6	Tamenaṁ paṁsudhovako vā paṁsudhovakantevāsī vā dhovati sandhovati niddhovati.
an3.101:1.7	Tasmiṁ pahīne tasmiṁ byantīkate athāparaṁ suvaṇṇasikatāvasissanti.
an3.101:1.8	Tamenaṁ suvaṇṇakāro vā suvaṇṇakārantevāsī vā jātarūpaṁ mūsāyaṁ pakkhipitvā dhamati sandhamati niddhamati.
an3.101:1.9	Taṁ hoti jātarūpaṁ dhantaṁ sandhantaṁ niddhantaṁ aniddhantakasāvaṁ, na ceva mudu hoti na ca kammaniyaṁ, na ca pabhassaraṁ pabhaṅgu ca, na ca sammā upeti kammāya.
an3.101:1.10	Hoti so, bhikkhave, samayo yaṁ suvaṇṇakāro vā suvaṇṇakārantevāsī vā taṁ jātarūpaṁ dhamati sandhamati niddhamati.
an3.101:1.11	Taṁ hoti jātarūpaṁ dhantaṁ sandhantaṁ niddhantaṁ niddhantakasāvaṁ, mudu ca hoti kammaniyañca pabhassarañca, na ca pabhaṅgu, sammā upeti kammāya.
an3.101:1.12	Yassā yassā ca pilandhanavikatiyā ākaṅkhati—yadi paṭṭikāya, yadi kuṇḍalāya, yadi gīveyyake, yadi suvaṇṇamālāya—tañcassa atthaṁ anubhoti.
an3.101:2.1	Evamevaṁ kho, bhikkhave, santi adhicittamanuyuttassa bhikkhuno oḷārikā upakkilesā kāyaduccaritaṁ vacīduccaritaṁ manoduccaritaṁ, tamenaṁ sacetaso bhikkhu dabbajātiko pajahati vinodeti byantīkaroti anabhāvaṁ gameti.
an3.101:2.2	Tasmiṁ pahīne tasmiṁ byantīkate santi adhicittamanuyuttassa bhikkhuno majjhimasahagatā upakkilesā kāmavitakko byāpādavitakko vihiṁsāvitakko, tamenaṁ sacetaso bhikkhu dabbajātiko pajahati vinodeti byantīkaroti anabhāvaṁ gameti.
an3.101:2.3	Tasmiṁ pahīne tasmiṁ byantīkate santi adhicittamanuyuttassa bhikkhuno sukhumasahagatā upakkilesā ñātivitakko janapadavitakko anavaññattipaṭisaṁyutto vitakko, tamenaṁ sacetaso bhikkhu dabbajātiko pajahati vinodeti byantīkaroti anabhāvaṁ gameti.
an3.101:2.4	Tasmiṁ pahīne tasmiṁ byantīkate athāparaṁ dhammavitakkāvasissanti.
an3.101:2.5	So hoti samādhi na ceva santo na ca paṇīto nappaṭippassaddhaladdho na ekodibhāvādhigato sasaṅkhāraniggayhavāritagato.
an3.101:2.6	Hoti so, bhikkhave, samayo yaṁ taṁ cittaṁ ajjhattaṁyeva santiṭṭhati sannisīdati ekodi hoti samādhiyati.
an3.101:2.7	So hoti samādhi santo paṇīto paṭippassaddhiladdho ekodibhāvādhigato na sasaṅkhāraniggayhavāritagato.
an3.101:2.8	Yassa yassa ca abhiññā sacchikaraṇīyassa dhammassa cittaṁ abhininnāmeti abhiññā sacchikiriyāya tatra tatreva sakkhibhabbataṁ pāpuṇāti sati satiāyatane.
an3.101:3.1	So sace ākaṅkhati: ‘anekavihitaṁ iddhividhaṁ paccanubhaveyyaṁ—ekopi hutvā bahudhā assaṁ, bahudhāpi hutvā eko assaṁ; āvibhāvaṁ, tirobhāvaṁ; tirokuṭṭaṁ tiropākāraṁ tiropabbataṁ asajjamāno gaccheyyaṁ, seyyathāpi ākāse; pathaviyāpi ummujjanimujjaṁ kareyyaṁ, seyyathāpi udake; udakepi abhijjamāne gaccheyyaṁ, seyyathāpi pathaviyaṁ; ākāsepi pallaṅkena kameyyaṁ, seyyathāpi pakkhī sakuṇo; imepi candimasūriye evaṁmahiddhike evaṁmahānubhāve pāṇinā parimaseyyaṁ parimajjeyyaṁ; yāva brahmalokāpi kāyena vasaṁ vatteyyan’ti,
an3.101:3.2	tatra tatreva sakkhibhabbataṁ pāpuṇāti sati satiāyatane.
an3.101:4.1	So sace ākaṅkhati: ‘dibbāya sotadhātuyā visuddhāya atikkantamānusikāya ubho sadde suṇeyyaṁ dibbe ca mānuse ca ye dūre santike cā’ti,
an3.101:4.2	tatra tatreva sakkhibhabbataṁ pāpuṇāti sati satiāyatane.
an3.101:5.1	So sace ākaṅkhati: ‘parasattānaṁ parapuggalānaṁ cetasā ceto paricca pajāneyyaṁ—
an3.101:5.2	sarāgaṁ vā cittaṁ sarāgaṁ cittanti pajāneyyaṁ,
an3.101:5.3	vītarāgaṁ vā cittaṁ vītarāgaṁ cittanti pajāneyyaṁ;
an3.101:5.4	sadosaṁ vā cittaṁ sadosaṁ cittanti pajāneyyaṁ,
an3.101:5.5	vītadosaṁ vā cittaṁ vītadosaṁ cittanti pajāneyyaṁ;
an3.101:5.6	samohaṁ vā cittaṁ samohaṁ cittanti pajāneyyaṁ,
an3.101:5.7	vītamohaṁ vā cittaṁ vītamohaṁ cittanti pajāneyyaṁ;
an3.101:5.8	saṅkhittaṁ vā cittaṁ saṅkhittaṁ cittanti pajāneyyaṁ,
an3.101:5.9	vikkhittaṁ vā cittaṁ vikkhittaṁ cittanti pajāneyyaṁ;
an3.101:5.10	mahaggataṁ vā cittaṁ mahaggataṁ cittanti pajāneyyaṁ,
an3.101:5.11	amahaggataṁ vā cittaṁ amahaggataṁ cittanti pajāneyyaṁ;
an3.101:5.12	sauttaraṁ vā cittaṁ sauttaraṁ cittanti pajāneyyaṁ,
an3.101:5.13	anuttaraṁ vā cittaṁ anuttaraṁ cittanti pajāneyyaṁ;
an3.101:5.14	samāhitaṁ vā cittaṁ samāhitaṁ cittanti pajāneyyaṁ,
an3.101:5.15	asamāhitaṁ vā cittaṁ asamāhitaṁ cittanti pajāneyyaṁ;
an3.101:5.16	vimuttaṁ vā cittaṁ vimuttaṁ cittanti pajāneyyaṁ,
an3.101:5.17	avimuttaṁ vā cittaṁ avimuttaṁ cittanti pajāneyyan’ti,
an3.101:5.18	tatra tatreva sakkhibhabbataṁ pāpuṇāti sati satiāyatane.
an3.101:6.1	So sace ākaṅkhati: ‘anekavihitaṁ pubbenivāsaṁ anussareyyaṁ, seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe: “amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto amutra udapādiṁ; tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto idhūpapanno”ti, iti sākāraṁ sauddesaṁ anekavihitaṁ pubbenivāsaṁ anussareyyan’ti,
an3.101:6.2	tatra tatreva sakkhibhabbataṁ pāpuṇāti sati satiāyatane.
an3.101:7.1	So sace ākaṅkhati: ‘dibbena cakkhunā visuddhena atikkantamānusakena satte passeyyaṁ cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajāneyyaṁ: “ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā; ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā, te kāyassa bhedā paraṁ maraṇā sugatiṁ saggaṁ lokaṁ upapannā”ti, iti dibbena cakkhunā visuddhena atikkantamānusakena satte passeyyaṁ cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajāneyyan’ti,
an3.101:7.2	tatra tatreva sakkhibhabbataṁ pāpuṇāti sati satiāyatane.
an3.101:8.1	So sace ākaṅkhati: ‘āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti,
an3.101:8.2	tatra tatreva sakkhibhabbataṁ pāpuṇāti sati satiāyatane”ti.
an3.101:8.3	Dasamaṁ.
an3.102:0.1	Aṅguttara Nikāya 3.102
an3.102:0.2	10. Loṇakapallavagga
an3.102:0.3	Nimittasutta
an3.102:1.1	“Adhicittamanuyuttena, bhikkhave, bhikkhunā tīṇi nimittāni kālena kālaṁ manasi kātabbāni—
an3.102:1.2	kālena kālaṁ samādhinimittaṁ manasi kātabbaṁ, kālena kālaṁ paggahanimittaṁ manasi kātabbaṁ, kālena kālaṁ upekkhānimittaṁ manasi kātabbaṁ.
an3.102:1.3	Sace, bhikkhave, adhicittamanuyutto bhikkhu ekantaṁ samādhinimittaṁyeva manasi kareyya, ṭhānaṁ taṁ cittaṁ kosajjāya saṁvatteyya.
an3.102:1.4	Sace, bhikkhave, adhicittamanuyutto bhikkhu ekantaṁ paggahanimittaṁyeva manasi kareyya, ṭhānaṁ taṁ cittaṁ uddhaccāya saṁvatteyya.
an3.102:1.5	Sace, bhikkhave, adhicittamanuyutto bhikkhu ekantaṁ upekkhānimittaṁyeva manasi kareyya, ṭhānaṁ taṁ cittaṁ na sammā samādhiyeyya āsavānaṁ khayāya.
an3.102:1.6	Yato ca kho, bhikkhave, adhicittamanuyutto bhikkhu kālena kālaṁ samādhinimittaṁ manasi karoti, kālena kālaṁ paggahanimittaṁ manasi karoti, kālena kālaṁ upekkhānimittaṁ manasi karoti, taṁ hoti cittaṁ muduñca kammaniyañca pabhassarañca, na ca pabhaṅgu, sammā samādhiyati āsavānaṁ khayāya.
an3.102:2.1	Seyyathāpi, bhikkhave, suvaṇṇakāro vā suvaṇṇakārantevāsī vā ukkaṁ bandheyya, ukkaṁ bandhitvā ukkāmukhaṁ ālimpeyya, ukkāmukhaṁ ālimpetvā saṇḍāsena jātarūpaṁ gahetvā ukkāmukhe pakkhipeyya, ukkāmukhe pakkhipitvā kālena kālaṁ abhidhamati, kālena kālaṁ udakena paripphoseti, kālena kālaṁ ajjhupekkhati.
an3.102:2.2	Sace, bhikkhave, suvaṇṇakāro vā suvaṇṇakārantevāsī vā taṁ jātarūpaṁ ekantaṁ abhidhameyya, ṭhānaṁ taṁ jātarūpaṁ ḍaheyya.
an3.102:2.3	Sace, bhikkhave, suvaṇṇakāro vā suvaṇṇakārantevāsī vā taṁ jātarūpaṁ ekantaṁ udakena paripphoseyya, ṭhānaṁ taṁ jātarūpaṁ nibbāpeyya.
an3.102:2.4	Sace, bhikkhave, suvaṇṇakāro vā suvaṇṇakārantevāsī vā taṁ jātarūpaṁ ekantaṁ ajjhupekkheyya, ṭhānaṁ taṁ jātarūpaṁ na sammā paripākaṁ gaccheyya.
an3.102:2.5	Yato ca kho, bhikkhave, suvaṇṇakāro vā suvaṇṇakārantevāsī vā taṁ jātarūpaṁ kālena kālaṁ abhidhamati, kālena kālaṁ udakena paripphoseti, kālena kālaṁ ajjhupekkhati, taṁ hoti jātarūpaṁ muduñca kammaniyañca pabhassarañca, na ca pabhaṅgu, sammā upeti kammāya.
an3.102:2.6	Yassā yassā ca pilandhanavikatiyā ākaṅkhati—yadi paṭṭikāya, yadi kuṇḍalāya, yadi gīveyyake, yadi suvaṇṇamālāya—tañcassa atthaṁ anubhoti.
an3.102:3.1	Evamevaṁ kho, bhikkhave, adhicittamanuyuttena bhikkhunā tīṇi nimittāni kālena kālaṁ manasi kātabbāni—
an3.102:3.2	kālena kālaṁ samādhinimittaṁ manasi kātabbaṁ, kālena kālaṁ paggahanimittaṁ manasi kātabbaṁ, kālena kālaṁ upekkhānimittaṁ manasi kātabbaṁ.
an3.102:3.3	Sace, bhikkhave, adhicittamanuyutto bhikkhu ekantaṁ samādhinimittaṁyeva manasi kareyya, ṭhānaṁ taṁ cittaṁ kosajjāya saṁvatteyya.
an3.102:3.4	Sace, bhikkhave, adhicittamanuyutto bhikkhu ekantaṁ paggahanimittaṁyeva manasi kareyya, ṭhānaṁ taṁ cittaṁ uddhaccāya saṁvatteyya.
an3.102:3.5	Sace, bhikkhave, adhicittamanuyutto bhikkhu ekantaṁ upekkhānimittaṁyeva manasi kareyya, ṭhānaṁ taṁ cittaṁ na sammā samādhiyeyya āsavānaṁ khayāya.
an3.102:3.6	Yato ca kho, bhikkhave, adhicittamanuyutto bhikkhu kālena kālaṁ samādhinimittaṁ manasi karoti, kālena kālaṁ paggahanimittaṁ manasi karoti, kālena kālaṁ upekkhānimittaṁ manasi karoti, taṁ hoti cittaṁ muduñca kammaniyañca pabhassarañca, na ca pabhaṅgu, sammā samādhiyati āsavānaṁ khayāya.
an3.102:3.7	Yassa yassa ca abhiññāsacchikaraṇīyassa dhammassa cittaṁ abhininnāmeti abhiññāsacchikiriyāya, tatra tatreva sakkhibhabbataṁ pāpuṇāti sati satiāyatane.
an3.102:4.1	So sace ākaṅkhati: ‘anekavihitaṁ iddhividhaṁ paccanubhaveyyaṁ …pe…
an3.102:4.2	(cha abhiññā vitthāretabbā.)
an3.102:4.3	
an3.102:4.4	
an3.102:4.5	Āsavānaṁ khayā …pe… sacchikatvā upasampajja vihareyyan’ti,
an3.102:4.6	tatra tatreva sakkhibhabbataṁ pāpuṇāti sati satiāyatane”ti.
an3.102:4.7	Ekādasamaṁ.
an3.102:4.8	Loṇakapallavaggo pañcamo.
an3.102:5.0	Tassuddānaṁ
an3.102:5.1	Accāyikaṁ pavivekaṁ,
an3.102:5.2	Sarado parisā tayo;
an3.102:5.3	Ājānīyā potthako ca,
an3.102:5.4	Loṇaṁ dhovati nimittānīti.
an3.102:5.5	Dutiyo paṇṇāsako samatto.
an3.103:0.1	Aṅguttara Nikāya 3.103
an3.103:0.2	11. Sambodhavagga
an3.103:0.3	Pubbevasambodhasutta
an3.103:1.1	“Pubbeva me, bhikkhave, sambodhā anabhisambuddhassa bodhisattasseva sato etadahosi:
an3.103:1.2	‘ko nu kho loke assādo, ko ādīnavo, kiṁ nissaraṇan’ti?
an3.103:1.3	Tassa mayhaṁ, bhikkhave, etadahosi:
an3.103:1.4	‘yaṁ kho lokaṁ paṭicca uppajjati sukhaṁ somanassaṁ, ayaṁ loke assādo.
an3.103:1.5	Yaṁ loko anicco dukkho vipariṇāmadhammo, ayaṁ loke ādīnavo.
an3.103:1.6	Yo loke chandarāgavinayo chandarāgappahānaṁ, idaṁ loke nissaraṇan’ti.
an3.103:1.7	Yāvakīvañcāhaṁ, bhikkhave, evaṁ lokassa assādañca assādato ādīnavañca ādīnavato nissaraṇañca nissaraṇato yathābhūtaṁ nābbhaññāsiṁ, neva tāvāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.
an3.103:1.8	Yato ca khvāhaṁ, bhikkhave, evaṁ lokassa assādañca assādato ādīnavañca ādīnavato nissaraṇañca nissaraṇato yathābhūtaṁ abbhaññāsiṁ, athāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.
an3.103:1.9	Ñāṇañca pana me dassanaṁ udapādi:
an3.103:1.10	‘akuppā me vimutti, ayamantimā jāti, natthi dāni punabbhavo’”ti.
an3.103:1.11	Paṭhamaṁ.
an3.104:0.1	Aṅguttara Nikāya 3.104
an3.104:0.2	11. Sambodhavagga
an3.104:0.3	Paṭhamaassādasutta
an3.104:1.1	“Lokassāhaṁ, bhikkhave, assādapariyesanaṁ acariṁ. Yo loke assādo tadajjhagamaṁ.
an3.104:1.2	Yāvatako loke assādo, paññāya me so sudiṭṭho.
an3.104:1.3	Lokassāhaṁ, bhikkhave, ādīnavapariyesanaṁ acariṁ. Yo loke ādīnavo tadajjhagamaṁ.
an3.104:1.4	Yāvatako loke ādīnavo, paññāya me so sudiṭṭho.
an3.104:1.5	Lokassāhaṁ, bhikkhave, nissaraṇapariyesanaṁ acariṁ. Yaṁ loke nissaraṇaṁ tadajjhagamaṁ.
an3.104:1.6	Yāvatakaṁ loke nissaraṇaṁ, paññāya me taṁ sudiṭṭhaṁ.
an3.104:1.7	Yāvakīvañcāhaṁ, bhikkhave, lokassa assādañca assādato ādīnavañca ādīnavato nissaraṇañca nissaraṇato yathābhūtaṁ nābbhaññāsiṁ, neva tāvāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.
an3.104:1.8	Yato ca khvāhaṁ, bhikkhave, lokassa assādañca assādato ādīnavañca ādīnavato nissaraṇañca nissaraṇato yathābhūtaṁ abbhaññāsiṁ, athāhaṁ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.
an3.104:1.9	Ñāṇañca pana me dassanaṁ udapādi:
an3.104:1.10	‘akuppā me vimutti, ayamantimā jāti, natthi dāni punabbhavo’”ti.
an3.104:1.11	Dutiyaṁ.
an3.105:0.1	Aṅguttara Nikāya 3.105
an3.105:0.2	11. Sambodhavagga
an3.105:0.3	Dutiyaassādasutta
an3.105:1.1	“No cedaṁ, bhikkhave, loke assādo abhavissa, nayidaṁ sattā loke sārajjeyyuṁ.
an3.105:1.2	Yasmā ca kho, bhikkhave, atthi loke assādo, tasmā sattā loke sārajjanti.
an3.105:1.3	No cedaṁ, bhikkhave, loke ādīnavo abhavissa, nayidaṁ sattā loke nibbindeyyuṁ.
an3.105:1.4	Yasmā ca kho, bhikkhave, atthi loke ādīnavo, tasmā sattā loke nibbindanti.
an3.105:1.5	No cedaṁ, bhikkhave, loke nissaraṇaṁ abhavissa, nayidaṁ sattā lokamhā nissareyyuṁ.
an3.105:1.6	Yasmā ca kho, bhikkhave, atthi loke nissaraṇaṁ, tasmā sattā lokamhā nissaranti.
an3.105:1.7	Yāvakīvañca, bhikkhave, sattā lokassa assādañca assādato ādīnavañca ādīnavato nissaraṇañca nissaraṇato yathābhūtaṁ nābbhaññāsuṁ, neva tāva, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṁyuttā vippamuttā vimariyādīkatena cetasā vihariṁsu.
an3.105:1.8	Yato ca kho, bhikkhave, sattā lokassa assādañca assādato ādīnavañca ādīnavato nissaraṇañca nissaraṇato yathābhūtaṁ abbhaññāsuṁ, atha, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṁyuttā vippamuttā vimariyādīkatena cetasā viharantī”ti.
an3.105:1.9	Tatiyaṁ.
an3.106:0.1	Aṅguttara Nikāya 3.106
an3.106:0.2	11. Sambodhavagga
an3.106:0.3	Samaṇabrāhmaṇasutta
an3.106:1.1	“Ye keci, bhikkhave, samaṇā vā brāhmaṇā vā lokassa assādañca assādato ādīnavañca ādīnavato nissaraṇañca nissaraṇato yathābhūtaṁ nappajānanti,
an3.106:1.2	na me te, bhikkhave, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā, na ca pana te āyasmanto sāmaññatthaṁ vā brahmaññatthaṁ vā diṭṭheva dhamme sayaṁ abhiññā sacchikatvā upasampajja viharanti.
an3.106:1.3	Ye ca kho keci, bhikkhave, samaṇā vā brāhmaṇā vā lokassa assādañca assādato ādīnavañca ādīnavato nissaraṇañca nissaraṇato yathābhūtaṁ pajānanti,
an3.106:1.4	te kho, bhikkhave, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā, te ca panāyasmanto sāmaññatthañca brahmaññatthañca diṭṭheva dhamme sayaṁ abhiññā sacchikatvā upasampajja viharantī”ti.
an3.106:1.5	Catutthaṁ.
an3.107:0.1	Aṅguttara Nikāya 3.107
an3.107:0.2	11. Sambodhavagga
an3.107:0.3	Ruṇṇasutta
an3.107:1.1	“Ruṇṇamidaṁ, bhikkhave, ariyassa vinaye yadidaṁ gītaṁ.
an3.107:1.2	Ummattakamidaṁ, bhikkhave, ariyassa vinaye yadidaṁ naccaṁ.
an3.107:1.3	Komārakamidaṁ, bhikkhave, ariyassa vinaye yadidaṁ ativelaṁ dantavidaṁsakahasitaṁ.
an3.107:1.4	Tasmātiha, bhikkhave, setughāto gīte, setughāto nacce, alaṁ vo dhammappamoditānaṁ sataṁ sitaṁ sitamattāyā”ti.
an3.107:1.5	Pañcamaṁ.
an3.108:0.1	Aṅguttara Nikāya 3.108
an3.108:0.2	11. Sambodhavagga
an3.108:0.3	Atittisutta
an3.108:1.1	“Tiṇṇaṁ, bhikkhave, paṭisevanāya natthi titti.
an3.108:1.2	Katamesaṁ tiṇṇaṁ?
an3.108:1.3	Soppassa, bhikkhave, paṭisevanāya natthi titti.
an3.108:1.4	Surāmerayapānassa, bhikkhave, paṭisevanāya natthi titti.
an3.108:1.5	Methunadhammasamāpattiyā, bhikkhave, paṭisevanāya natthi titti.
an3.108:1.6	Imesaṁ, bhikkhave, tiṇṇaṁ paṭisevanāya natthi tittī”ti.
an3.108:1.7	Chaṭṭhaṁ.
an3.109:0.1	Aṅguttara Nikāya 3.109
an3.109:0.2	11. Sambodhavagga
an3.109:0.3	Arakkhitasutta
an3.109:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an3.109:1.2	“citte, gahapati, arakkhite kāyakammampi arakkhitaṁ hoti, vacīkammampi arakkhitaṁ hoti, manokammampi arakkhitaṁ hoti.
an3.109:1.3	Tassa arakkhitakāyakammantassa arakkhitavacīkammantassa arakkhitamanokammantassa kāyakammampi avassutaṁ hoti, vacīkammampi avassutaṁ hoti, manokammampi avassutaṁ hoti.
an3.109:1.4	Tassa avassutakāyakammantassa avassutavacīkammantassa avassutamanokammantassa kāyakammampi pūtikaṁ hoti, vacīkammampi pūtikaṁ hoti, manokammampi pūtikaṁ hoti.
an3.109:1.5	Tassa pūtikāyakammantassa pūtivacīkammantassa pūtimanokammantassa na bhaddakaṁ maraṇaṁ hoti, na bhaddikā kālakiriyā.
an3.109:2.1	Seyyathāpi, gahapati, kūṭāgāre ducchanne kūṭampi arakkhitaṁ hoti, gopānasiyopi arakkhitā honti, bhittipi arakkhitā hoti;
an3.109:2.2	kūṭampi avassutaṁ hoti, gopānasiyopi avassutā honti, bhittipi avassutā hoti;
an3.109:2.3	kūṭampi pūtikaṁ hoti, gopānasiyopi pūtikā honti, bhittipi pūtikā hoti.
an3.109:3.1	Evamevaṁ kho, gahapati, citte arakkhite kāyakammampi arakkhitaṁ hoti, vacīkammampi arakkhitaṁ hoti, manokammampi arakkhitaṁ hoti.
an3.109:3.2	Tassa arakkhitakāyakammantassa arakkhitavacīkammantassa arakkhitamanokammantassa kāyakammampi avassutaṁ hoti, vacīkammampi avassutaṁ hoti, manokammampi avassutaṁ hoti.
an3.109:3.3	Tassa avassutakāyakammantassa avassutavacīkammantassa avassutamanokammantassa kāyakammampi pūtikaṁ hoti, vacīkammampi pūtikaṁ hoti, manokammampi pūtikaṁ hoti.
an3.109:3.4	Tassa pūtikāyakammantassa pūtivacīkammantassa pūtimanokammantassa na bhaddakaṁ maraṇaṁ hoti, na bhaddikā kālakiriyā.
an3.109:4.1	Citte, gahapati, rakkhite kāyakammampi rakkhitaṁ hoti, vacīkammampi rakkhitaṁ hoti, manokammampi rakkhitaṁ hoti.
an3.109:4.2	Tassa rakkhitakāyakammantassa rakkhitavacīkammantassa rakkhitamanokammantassa kāyakammampi anavassutaṁ hoti, vacīkammampi anavassutaṁ hoti, manokammampi anavassutaṁ hoti.
an3.109:4.3	Tassa anavassutakāyakammantassa anavassutavacīkammantassa anavassutamanokammantassa kāyakammampi apūtikaṁ hoti, vacīkammampi apūtikaṁ hoti, manokammampi apūtikaṁ hoti.
an3.109:4.4	Tassa apūtikāyakammantassa apūtivacīkammantassa apūtimanokammantassa bhaddakaṁ maraṇaṁ hoti, bhaddikā kālakiriyā.
an3.109:5.1	Seyyathāpi, gahapati, kūṭāgāre succhanne kūṭampi rakkhitaṁ hoti, gopānasiyopi rakkhitā honti, bhittipi rakkhitā hoti;
an3.109:5.2	kūṭampi anavassutaṁ hoti, gopānasiyopi anavassutā honti, bhittipi anavassutā hoti;
an3.109:5.3	kūṭampi apūtikaṁ hoti, gopānasiyopi apūtikā honti, bhittipi apūtikā hoti.
an3.109:6.1	Evamevaṁ kho, gahapati, citte rakkhite kāyakammampi rakkhitaṁ hoti, vacīkammampi rakkhitaṁ hoti, manokammampi rakkhitaṁ hoti.
an3.109:6.2	Tassa rakkhitakāyakammantassa rakkhitavacīkammantassa rakkhitamanokammantassa kāyakammampi anavassutaṁ hoti, vacīkammampi anavassutaṁ hoti, manokammampi anavassutaṁ hoti.
an3.109:6.3	Tassa anavassutakāyakammantassa anavassutavacīkammantassa anavassutamanokammantassa kāyakammampi apūtikaṁ hoti, vacīkammampi apūtikaṁ hoti, manokammampi apūtikaṁ hoti.
an3.109:6.4	Tassa apūtikāyakammantassa apūtivacīkammantassa apūtimanokammantassa bhaddakaṁ maraṇaṁ hoti, bhaddikā kālakiriyā”ti.
an3.109:6.5	Sattamaṁ.
an3.110:0.1	Aṅguttara Nikāya 3.110
an3.110:0.2	11. Sambodhavagga
an3.110:0.3	Byāpannasutta
an3.110:1.1	Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an3.110:1.2	“citte, gahapati, byāpanne kāyakammampi byāpannaṁ hoti, vacīkammampi byāpannaṁ hoti, manokammampi byāpannaṁ hoti.
an3.110:1.3	Tassa byāpannakāyakammantassa byāpannavacīkammantassa byāpannamanokammantassa na bhaddakaṁ maraṇaṁ hoti, na bhaddikā kālakiriyā.
an3.110:1.4	Seyyathāpi, gahapati, kūṭāgāre ducchanne kūṭampi byāpannaṁ hoti, gopānasiyopi byāpannā honti, bhittipi byāpannā hoti;
an3.110:1.5	evamevaṁ kho, gahapati, citte byāpanne kāyakammampi byāpannaṁ hoti, vacīkammampi byāpannaṁ hoti, manokammampi byāpannaṁ hoti.
an3.110:1.6	Tassa byāpannakāyakammantassa byāpannavacīkammantassa byāpannamanokammantassa na bhaddakaṁ maraṇaṁ hoti, na bhaddikā kālakiriyā.
an3.110:2.1	Citte, gahapati, abyāpanne kāyakammampi abyāpannaṁ hoti, vacīkammampi abyāpannaṁ hoti, manokammampi abyāpannaṁ hoti.
an3.110:2.2	Tassa abyāpannakāyakammantassa abyāpannavacīkammantassa abyāpannamanokammantassa bhaddakaṁ maraṇaṁ hoti, bhaddikā kālakiriyā.
an3.110:2.3	Seyyathāpi, gahapati, kūṭāgāre succhanne kūṭampi abyāpannaṁ hoti, gopānasiyopi abyāpannā honti, bhittipi abyāpannā hoti;
an3.110:2.4	evamevaṁ kho, gahapati, citte abyāpanne kāyakammampi abyāpannaṁ hoti, vacīkammampi abyāpannaṁ hoti, manokammampi abyāpannaṁ hoti.
an3.110:2.5	Tassa abyāpannakāyakammantassa …pe… abyāpannamanokammantassa bhaddakaṁ maraṇaṁ hoti, bhaddikā kālakiriyā”ti.
an3.110:2.6	Aṭṭhamaṁ.
an3.111:0.1	Aṅguttara Nikāya 3.111
an3.111:0.2	11. Sambodhavagga
an3.111:0.3	Paṭhamanidānasutta
an3.111:1.1	“Tīṇimāni, bhikkhave, nidānāni kammānaṁ samudayāya.
an3.111:1.2	Katamāni tīṇi?
an3.111:1.3	Lobho nidānaṁ kammānaṁ samudayāya, doso nidānaṁ kammānaṁ samudayāya, moho nidānaṁ kammānaṁ samudayāya.
an3.111:1.4	Yaṁ, bhikkhave, lobhapakataṁ kammaṁ lobhajaṁ lobhanidānaṁ lobhasamudayaṁ, taṁ kammaṁ akusalaṁ taṁ kammaṁ sāvajjaṁ taṁ kammaṁ dukkhavipākaṁ, taṁ kammaṁ kammasamudayāya saṁvattati, na taṁ kammaṁ kammanirodhāya saṁvattati.
an3.111:1.5	Yaṁ, bhikkhave, dosapakataṁ kammaṁ dosajaṁ dosanidānaṁ dosasamudayaṁ, taṁ kammaṁ akusalaṁ taṁ kammaṁ sāvajjaṁ taṁ kammaṁ dukkhavipākaṁ, taṁ kammaṁ kammasamudayāya saṁvattati, na taṁ kammaṁ kammanirodhāya saṁvattati.
an3.111:1.6	Yaṁ, bhikkhave, mohapakataṁ kammaṁ mohajaṁ mohanidānaṁ mohasamudayaṁ, taṁ kammaṁ akusalaṁ taṁ kammaṁ sāvajjaṁ taṁ kammaṁ dukkhavipākaṁ, taṁ kammaṁ kammasamudayāya saṁvattati, na taṁ kammaṁ kammanirodhāya saṁvattati.
an3.111:1.7	Imāni kho, bhikkhave, tīṇi nidānāni kammānaṁ samudayāya.
an3.111:2.1	Tīṇimāni, bhikkhave, nidānāni kammānaṁ samudayāya.
an3.111:2.2	Katamāni tīṇi?
an3.111:2.3	Alobho nidānaṁ kammānaṁ samudayāya, adoso nidānaṁ kammānaṁ samudayāya, amoho nidānaṁ kammānaṁ samudayāya.
an3.111:2.4	Yaṁ, bhikkhave, alobhapakataṁ kammaṁ alobhajaṁ alobhanidānaṁ alobhasamudayaṁ, taṁ kammaṁ kusalaṁ taṁ kammaṁ anavajjaṁ taṁ kammaṁ sukhavipākaṁ, taṁ kammaṁ kammanirodhāya saṁvattati, na taṁ kammaṁ kammasamudayāya saṁvattati.
an3.111:2.5	Yaṁ, bhikkhave, adosapakataṁ kammaṁ adosajaṁ adosanidānaṁ adosasamudayaṁ, taṁ kammaṁ kusalaṁ taṁ kammaṁ anavajjaṁ taṁ kammaṁ sukhavipākaṁ, taṁ kammaṁ kammanirodhāya saṁvattati, na taṁ kammaṁ kammasamudayāya saṁvattati.
an3.111:2.6	Yaṁ, bhikkhave, amohapakataṁ kammaṁ amohajaṁ amohanidānaṁ amohasamudayaṁ, taṁ kammaṁ kusalaṁ taṁ kammaṁ anavajjaṁ taṁ kammaṁ sukhavipākaṁ, taṁ kammaṁ kammanirodhāya saṁvattati, na taṁ kammaṁ kammasamudayāya saṁvattati.
an3.111:2.7	Imāni kho, bhikkhave, tīṇi nidānāni kammānaṁ samudayāyā”ti.
an3.111:2.8	Navamaṁ.
an3.112:0.1	Aṅguttara Nikāya 3.112
an3.112:0.2	11. Sambodhavagga
an3.112:0.3	Dutiyanidānasutta
an3.112:1.1	“Tīṇimāni, bhikkhave, nidānāni kammānaṁ samudayāya.
an3.112:1.2	Katamāni tīṇi?
an3.112:1.3	Atīte, bhikkhave, chandarāgaṭṭhāniye dhamme ārabbha chando jāyati;
an3.112:1.4	anāgate, bhikkhave, chandarāgaṭṭhāniye dhamme ārabbha chando jāyati;
an3.112:1.5	paccuppanne, bhikkhave, chandarāgaṭṭhāniye dhamme ārabbha chando jāyati.
an3.112:1.6	Kathañca, bhikkhave, atīte chandarāgaṭṭhāniye dhamme ārabbha chando jāyati?
an3.112:1.7	Atīte, bhikkhave, chandarāgaṭṭhāniye dhamme ārabbha cetasā anuvitakketi anuvicāreti.
an3.112:1.8	Tassa atīte chandarāgaṭṭhāniye dhamme ārabbha cetasā anuvitakkayato anuvicārayato chando jāyati.
an3.112:1.9	Chandajāto tehi dhammehi saṁyutto hoti.
an3.112:1.10	Etamahaṁ, bhikkhave, saṁyojanaṁ vadāmi yo cetaso sārāgo.
an3.112:1.11	Evaṁ kho, bhikkhave, atīte chandarāgaṭṭhāniye dhamme ārabbha chando jāyati.
an3.112:2.1	Kathañca, bhikkhave, anāgate chandarāgaṭṭhāniye dhamme ārabbha chando jāyati?
an3.112:2.2	Anāgate, bhikkhave, chandarāgaṭṭhāniye dhamme ārabbha cetasā anuvitakketi anuvicāreti.
an3.112:2.3	Tassa anāgate chandarāgaṭṭhāniye dhamme ārabbha cetasā anuvitakkayato anuvicārayato chando jāyati.
an3.112:2.4	Chandajāto tehi dhammehi saṁyutto hoti.
an3.112:2.5	Etamahaṁ, bhikkhave, saṁyojanaṁ vadāmi yo cetaso sārāgo.
an3.112:2.6	Evaṁ kho, bhikkhave, anāgate chandarāgaṭṭhāniye dhamme ārabbha chando jāyati.
an3.112:3.1	Kathañca, bhikkhave, paccuppanne chandarāgaṭṭhāniye dhamme ārabbha chando jāyati?
an3.112:3.2	Paccuppanne, bhikkhave, chandarāgaṭṭhāniye dhamme ārabbha cetasā anuvitakketi anuvicāreti.
an3.112:3.3	Tassa paccuppanne chandarāgaṭṭhāniye dhamme ārabbha cetasā anuvitakkayato anuvicārayato chando jāyati.
an3.112:3.4	Chandajāto tehi dhammehi saṁyutto hoti.
an3.112:3.5	Etamahaṁ, bhikkhave, saṁyojanaṁ vadāmi yo cetaso sārāgo.
an3.112:3.6	Evaṁ kho, bhikkhave, paccuppanne chandarāgaṭṭhāniye dhamme ārabbha chando jāyati.
an3.112:3.7	Imāni kho, bhikkhave, tīṇi nidānāni kammānaṁ samudayāya.
an3.112:4.1	Tīṇimāni, bhikkhave, nidānāni kammānaṁ samudayāya.
an3.112:4.2	Katamāni tīṇi?
an3.112:4.3	Atīte, bhikkhave, chandarāgaṭṭhāniye dhamme ārabbha chando na jāyati;
an3.112:4.4	anāgate, bhikkhave, chandarāgaṭṭhāniye dhamme ārabbha chando na jāyati;
an3.112:4.5	paccuppanne, bhikkhave, chandarāgaṭṭhāniye dhamme ārabbha chando na jāyati.
an3.112:5.1	Kathañca, bhikkhave, atīte chandarāgaṭṭhāniye dhamme ārabbha chando na jāyati?
an3.112:5.2	Atītānaṁ, bhikkhave, chandarāgaṭṭhāniyānaṁ dhammānaṁ āyatiṁ vipākaṁ pajānāti.
an3.112:5.3	Āyatiṁ vipākaṁ viditvā tadabhinivatteti.
an3.112:5.4	Tadabhinivattetvā cetasā abhinivijjhitvā paññāya ativijjha passati.
an3.112:5.5	Evaṁ kho, bhikkhave, atīte chandarāgaṭṭhāniye dhamme ārabbha chando na jāyati.
an3.112:6.1	Kathañca, bhikkhave, anāgate chandarāgaṭṭhāniye dhamme ārabbha chando na jāyati?
an3.112:6.2	Anāgatānaṁ, bhikkhave, chandarāgaṭṭhāniyānaṁ dhammānaṁ āyatiṁ vipākaṁ pajānāti.
an3.112:6.3	Āyatiṁ vipākaṁ viditvā tadabhinivatteti.
an3.112:6.4	Tadabhinivattetvā cetasā abhinivijjhitvā paññāya ativijjha passati.
an3.112:6.5	Evaṁ kho, bhikkhave, anāgate chandarāgaṭṭhāniye dhamme ārabbha chando na jāyati.
an3.112:7.1	Kathañca, bhikkhave, paccuppanne chandarāgaṭṭhāniye dhamme ārabbha chando na jāyati?
an3.112:7.2	Paccuppannānaṁ, bhikkhave, chandarāgaṭṭhāniyānaṁ dhammānaṁ āyatiṁ vipākaṁ pajānāti, āyatiṁ vipākaṁ viditvā tadabhinivatteti, tadabhinivattetvā cetasā abhinivijjhitvā paññāya ativijjha passati.
an3.112:7.3	Evaṁ kho, bhikkhave, paccuppanne chandarāgaṭṭhāniye dhamme ārabbha chando na jāyati.
an3.112:7.4	Imāni kho, bhikkhave, tīṇi nidānāni kammānaṁ samudayāyā”ti.
an3.112:7.5	Dasamaṁ.
an3.112:7.6	Sambodhavaggo paṭhamo.
an3.112:8.0	Tassuddānaṁ
an3.112:8.1	Pubbeva duve assādā,
an3.112:8.2	Samaṇo ruṇṇapañcamaṁ;
an3.112:8.3	Atitti dve ca vuttāni,
an3.112:8.4	Nidānāni apare duveti.
an3.113:0.1	Aṅguttara Nikāya 3.113
an3.113:0.2	12. Āpāyikavagga
an3.113:0.3	Āpāyikasutta
an3.113:1.1	“Tayome, bhikkhave, āpāyikā nerayikā idamappahāya.
an3.113:1.2	Katame tayo?
an3.113:1.3	Yo ca abrahmacārī brahmacāripaṭiñño,
an3.113:1.4	yo ca suddhaṁ brahmacariyaṁ carantaṁ amūlakena abrahmacariyena anuddhaṁseti,
an3.113:1.5	yo cāyaṁ evaṁvādī evaṁdiṭṭhi: ‘natthi kāmesu doso’ti, so tāya kāmesu pātabyataṁ āpajjati.
an3.113:1.6	Ime kho, bhikkhave, tayo āpāyikā nerayikā idamappahāyā”ti.
an3.113:1.7	Paṭhamaṁ.
an3.114:0.1	Aṅguttara Nikāya 3.114
an3.114:0.2	12. Āpāyikavagga
an3.114:0.3	Dullabhasutta
an3.114:1.1	“Tiṇṇaṁ, bhikkhave, pātubhāvo dullabho lokasmiṁ.
an3.114:1.2	Katamesaṁ tiṇṇaṁ?
an3.114:1.3	Tathāgatassa, bhikkhave, arahato sammāsambuddhassa pātubhāvo dullabho lokasmiṁ, tathāgatappaveditassa dhammavinayassa desetā puggalo dullabho lokasmiṁ, kataññū katavedī puggalo dullabho lokasmiṁ.
an3.114:1.4	Imesaṁ kho, bhikkhave, tiṇṇaṁ pātubhāvo dullabho lokasmin”ti.
an3.114:1.5	Dutiyaṁ.
an3.115:0.1	Aṅguttara Nikāya 3.115
an3.115:0.2	12. Āpāyikavagga
an3.115:0.3	Appameyyasutta
an3.115:1.1	“Tayome, bhikkhave, puggalā santo saṁvijjamānā lokasmiṁ.
an3.115:1.2	Katame tayo?
an3.115:1.3	Suppameyyo, duppameyyo, appameyyo.
an3.115:1.4	Katamo ca, bhikkhave, puggalo suppameyyo?
an3.115:1.5	Idha, bhikkhave, ekacco puggalo uddhato hoti unnaḷo capalo mukharo vikiṇṇavāco muṭṭhassati asampajāno asamāhito vibbhantacitto pākatindriyo.
an3.115:1.6	Ayaṁ vuccati, bhikkhave, puggalo suppameyyo.
an3.115:2.1	Katamo ca, bhikkhave, puggalo duppameyyo?
an3.115:2.2	Idha, bhikkhave, ekacco puggalo anuddhato hoti anunnaḷo acapalo amukharo avikiṇṇavāco upaṭṭhitassati sampajāno samāhito ekaggacitto saṁvutindriyo.
an3.115:2.3	Ayaṁ vuccati, bhikkhave, puggalo duppameyyo.
an3.115:3.1	Katamo ca, bhikkhave, puggalo appameyyo?
an3.115:3.2	Idha, bhikkhave, bhikkhu arahaṁ hoti khīṇāsavo.
an3.115:3.3	Ayaṁ vuccati, bhikkhave, puggalo appameyyo.
an3.115:3.4	Ime kho, bhikkhave, tayo puggalā santo saṁvijjamānā lokasmin”ti.
an3.115:3.5	Tatiyaṁ.
an3.116:0.1	Aṅguttara Nikāya 3.116
an3.116:0.2	12. Āpāyikavagga
an3.116:0.3	Āneñjasutta
an3.116:1.1	“Tayome, bhikkhave, puggalā santo saṁvijjamānā lokasmiṁ.
an3.116:1.2	Katame tayo?
an3.116:1.3	Idha, bhikkhave, ekacco puggalo sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an3.116:1.4	So tadassādeti taṁ nikāmeti tena ca vittiṁ āpajjati, tatra ṭhito tadadhimutto tabbahulavihārī aparihīno kālaṁ kurumāno ākāsānañcāyatanūpagānaṁ devānaṁ sahabyataṁ upapajjati.
an3.116:1.5	Ākāsānañcāyatanūpagānaṁ, bhikkhave, devānaṁ vīsati kappasahassāni āyuppamāṇaṁ.
an3.116:1.6	Tattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.
an3.116:1.7	Bhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.
an3.116:1.8	Ayaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā.
an3.116:2.1	Puna caparaṁ, bhikkhave, idhekacco puggalo sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.
an3.116:2.2	So tadassādeti taṁ nikāmeti tena ca vittiṁ āpajjati, tatra ṭhito tadadhimutto tabbahulavihārī aparihīno kālaṁ kurumāno viññāṇañcāyatanūpagānaṁ devānaṁ sahabyataṁ upapajjati.
an3.116:2.3	Viññāṇañcāyatanūpagānaṁ, bhikkhave, devānaṁ cattārīsaṁ kappasahassāni āyuppamāṇaṁ.
an3.116:2.4	Tattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.
an3.116:2.5	Bhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.
an3.116:2.6	Ayaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā.
an3.116:3.1	Puna caparaṁ, bhikkhave, idhekacco puggalo sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
an3.116:3.2	So tadassādeti taṁ nikāmeti tena ca vittiṁ āpajjati, tatra ṭhito tadadhimutto tabbahulavihārī aparihīno kālaṁ kurumāno ākiñcaññāyatanūpagānaṁ devānaṁ sahabyataṁ upapajjati.
an3.116:3.3	Ākiñcaññāyatanūpagānaṁ, bhikkhave, devānaṁ saṭṭhi kappasahassāni āyuppamāṇaṁ.
an3.116:3.4	Tattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.
an3.116:3.5	Bhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.
an3.116:3.6	Ayaṁ kho, bhikkhave, viseso, ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā.
an3.116:3.7	Ime kho, bhikkhave, tayo puggalā santo saṁvijjamānā lokasmin”ti.
an3.116:3.8	Catutthaṁ.
an3.117:0.1	Aṅguttara Nikāya 3.117
an3.117:0.2	12. Āpāyikavagga
an3.117:0.3	Vipattisampadāsutta
an3.117:1.1	“Tisso imā, bhikkhave, vipattiyo.
an3.117:1.2	Katamā tisso?
an3.117:1.3	Sīlavipatti, cittavipatti, diṭṭhivipatti.
an3.117:1.4	Katamā ca, bhikkhave, sīlavipatti?
an3.117:1.5	Idha, bhikkhave, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti.
an3.117:1.6	Ayaṁ vuccati, bhikkhave, sīlavipatti.
an3.117:2.1	Katamā ca, bhikkhave, cittavipatti?
an3.117:2.2	Idha, bhikkhave, ekacco abhijjhālu hoti byāpannacitto.
an3.117:2.3	Ayaṁ vuccati, bhikkhave, cittavipatti.
an3.117:3.1	Katamā ca, bhikkhave, diṭṭhivipatti?
an3.117:3.2	Idha, bhikkhave, ekacco micchādiṭṭhiko hoti viparītadassano:
an3.117:3.3	‘natthi dinnaṁ, natthi yiṭṭhaṁ, natthi hutaṁ, natthi sukatadukkaṭānaṁ, kammānaṁ phalaṁ vipāko, natthi ayaṁ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.
an3.117:3.4	Ayaṁ vuccati, bhikkhave, diṭṭhivipatti.
an3.117:3.5	Sīlavipattihetu vā, bhikkhave, sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti;
an3.117:3.6	cittavipattihetu vā, bhikkhave, sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti;
an3.117:3.7	diṭṭhivipattihetu vā, bhikkhave, sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.
an3.117:3.8	Imā kho, bhikkhave, tisso vipattiyoti.
an3.117:4.1	Tisso imā, bhikkhave, sampadā.
an3.117:4.2	Katamā tisso?
an3.117:4.3	Sīlasampadā, cittasampadā, diṭṭhisampadā.
an3.117:5.1	Katamā ca, bhikkhave, sīlasampadā?
an3.117:5.2	Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti.
an3.117:5.3	Ayaṁ vuccati, bhikkhave, sīlasampadā.
an3.117:6.1	Katamā ca, bhikkhave, cittasampadā?
an3.117:6.2	Idha, bhikkhave, ekacco anabhijjhālu hoti abyāpannacitto.
an3.117:6.3	Ayaṁ vuccati, bhikkhave, cittasampadā.
an3.117:7.1	Katamā ca, bhikkhave, diṭṭhisampadā?
an3.117:7.2	Idha, bhikkhave, ekacco sammādiṭṭhiko hoti aviparītadassano:
an3.117:7.3	‘atthi dinnaṁ, atthi yiṭṭhaṁ, atthi hutaṁ, atthi sukatadukkaṭānaṁ kammānaṁ phalaṁ vipāko, atthi ayaṁ loko, atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.
an3.117:7.4	Ayaṁ vuccati, bhikkhave, diṭṭhisampadā.
an3.117:7.5	Sīlasampadāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti;
an3.117:7.6	cittasampadāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti;
an3.117:7.7	diṭṭhisampadāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti.
an3.117:7.8	Imā kho, bhikkhave, tisso sampadā”ti.
an3.117:7.9	Pañcamaṁ.
an3.118:0.1	Aṅguttara Nikāya 3.118
an3.118:0.2	12. Āpāyikavagga
an3.118:0.3	Apaṇṇakasutta
an3.118:1.1	“Tisso imā, bhikkhave, vipattiyo.
an3.118:1.2	Katamā tisso?
an3.118:1.3	Sīlavipatti, cittavipatti, diṭṭhivipatti.
an3.118:2.1	Katamā ca, bhikkhave, sīlavipatti?
an3.118:2.2	Idha, bhikkhave, ekacco pāṇātipātī hoti …pe… samphappalāpī hoti.
an3.118:2.3	Ayaṁ vuccati, bhikkhave, sīlavipatti.
an3.118:3.1	Katamā ca, bhikkhave, cittavipatti?
an3.118:3.2	Idha, bhikkhave, ekacco abhijjhālu hoti byāpannacitto.
an3.118:3.3	Ayaṁ vuccati, bhikkhave, cittavipatti.
an3.118:4.1	Katamā ca, bhikkhave, diṭṭhivipatti?
an3.118:4.2	Idha, bhikkhave, ekacco micchādiṭṭhiko hoti viparītadassano:
an3.118:4.3	‘natthi dinnaṁ, natthi yiṭṭhaṁ …pe… ye imañca lokaṁ parañca lokaṁ sayaṁ abhiññā sacchikatvā pavedentī’ti.
an3.118:4.4	Ayaṁ vuccati, bhikkhave, diṭṭhivipatti.
an3.118:4.5	Sīlavipattihetu vā, bhikkhave …pe… diṭṭhivipattihetu vā, bhikkhave, sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.
an3.118:4.6	Seyyathāpi, bhikkhave, apaṇṇako maṇi uddhaṁ khitto yena yeneva patiṭṭhāti suppatiṭṭhitaṁyeva patiṭṭhāti;
an3.118:4.7	evamevaṁ kho, bhikkhave, sīlavipattihetu vā sattā …pe… upapajjanti.
an3.118:4.8	Imā kho, bhikkhave, tisso vipattiyoti.
an3.118:5.1	Tisso imā, bhikkhave, sampadā.
an3.118:5.2	Katamā tisso?
an3.118:5.3	Sīlasampadā, cittasampadā, diṭṭhisampadā.
an3.118:6.1	Katamā ca, bhikkhave, sīlasampadā?
an3.118:6.2	Idha, bhikkhave, ekacco pāṇātipātā paṭivirato hoti …pe…
an3.118:6.3	ayaṁ vuccati, bhikkhave, sīlasampadā.
an3.118:7.1	Katamā ca, bhikkhave, cittasampadā?
an3.118:7.2	Idha, bhikkhave, ekacco anabhijjhālu hoti abyāpannacitto.
an3.118:7.3	Ayaṁ vuccati, bhikkhave, cittasampadā.
an3.118:8.1	Katamā ca, bhikkhave, diṭṭhisampadā?
an3.118:8.2	Idha, bhikkhave, ekacco sammādiṭṭhiko hoti aviparītadassano:
an3.118:8.3	‘atthi dinnaṁ, atthi yiṭṭhaṁ …pe… ye imañca lokaṁ parañca lokaṁ sayaṁ abhiññā sacchikatvā pavedentī’ti.
an3.118:8.4	Ayaṁ vuccati, bhikkhave, diṭṭhisampadā.
an3.118:8.5	Sīlasampadāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti. Cittasampadāhetu vā …pe… diṭṭhisampadāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti.
an3.118:8.6	Seyyathāpi, bhikkhave, apaṇṇako maṇi uddhaṁ khitto yena yeneva patiṭṭhāti suppatiṭṭhitaṁyeva patiṭṭhāti;
an3.118:8.7	evamevaṁ kho, bhikkhave, sīlasampadāhetu vā sattā kāyassa bhedā paraṁ maraṇā sugatiṁ saggaṁ lokaṁ upapajjanti, cittasampadāhetu vā sattā …pe… diṭṭhisampadāhetu vā sattā kāyassa bhedā paraṁ maraṇā sugatiṁ saggaṁ lokaṁ upapajjanti.
an3.118:8.8	Imā kho, bhikkhave, tisso sampadā”ti.
an3.118:8.9	Chaṭṭhaṁ.
an3.119:0.1	Aṅguttara Nikāya 3.119
an3.119:0.2	12. Āpāyikavagga
an3.119:0.3	Kammantasutta
an3.119:1.1	“Tisso imā, bhikkhave, vipattiyo.
an3.119:1.2	Katamā tisso?
an3.119:1.3	Kammantavipatti, ājīvavipatti, diṭṭhivipatti.
an3.119:1.4	Katamā ca, bhikkhave, kammantavipatti?
an3.119:1.5	Idha, bhikkhave, ekacco pāṇātipātī hoti …pe… samphappalāpī hoti.
an3.119:1.6	Ayaṁ vuccati, bhikkhave, kammantavipatti.
an3.119:2.1	Katamā ca, bhikkhave, ājīvavipatti?
an3.119:2.2	Idha, bhikkhave, ekacco micchāājīvo hoti, micchāājīvena jīvikaṁ kappeti.
an3.119:2.3	Ayaṁ vuccati, bhikkhave, ājīvavipatti.
an3.119:3.1	Katamā ca, bhikkhave, diṭṭhivipatti?
an3.119:3.2	Idha, bhikkhave, ekacco micchādiṭṭhiko hoti viparītadassano:
an3.119:3.3	‘natthi dinnaṁ, natthi yiṭṭhaṁ …pe… ye imañca lokaṁ parañca lokaṁ sayaṁ abhiññā sacchikatvā pavedentī’ti.
an3.119:3.4	Ayaṁ vuccati, bhikkhave, diṭṭhivipatti.
an3.119:3.5	Imā kho, bhikkhave, tisso vipattiyoti.
an3.119:4.1	Tisso imā, bhikkhave, sampadā.
an3.119:4.2	Katamā tisso?
an3.119:4.3	Kammantasampadā, ājīvasampadā, diṭṭhisampadā.
an3.119:4.4	Katamā ca, bhikkhave, kammantasampadā?
an3.119:4.5	Idha, bhikkhave, ekacco pāṇātipātā paṭivirato hoti …pe… samphappalāpā paṭivirato hoti.
an3.119:4.6	Ayaṁ vuccati, bhikkhave, kammantasampadā.
an3.119:5.1	Katamā ca, bhikkhave, ājīvasampadā?
an3.119:5.2	Idha, bhikkhave, ekacco sammāājīvo hoti, sammāājīvena jīvikaṁ kappeti.
an3.119:5.3	Ayaṁ vuccati, bhikkhave, ājīvasampadā.
an3.119:6.1	Katamā ca, bhikkhave, diṭṭhisampadā?
an3.119:6.2	Idha, bhikkhave, ekacco sammādiṭṭhiko hoti aviparītadassano:
an3.119:6.3	‘atthi dinnaṁ, atthi yiṭṭhaṁ …pe… ye imañca lokaṁ parañca lokaṁ sayaṁ abhiññā sacchikatvā pavedentī’ti.
an3.119:6.4	Ayaṁ vuccati, bhikkhave, diṭṭhisampadā.
an3.119:6.5	Imā kho, bhikkhave, tisso sampadā”ti.
an3.119:6.6	Sattamaṁ.
an3.120:0.1	Aṅguttara Nikāya 3.120
an3.120:0.2	12. Āpāyikavagga
an3.120:0.3	Paṭhamasoceyyasutta
an3.120:1.1	“Tīṇimāni, bhikkhave, soceyyāni.
an3.120:1.2	Katamāni tīṇi?
an3.120:1.3	Kāyasoceyyaṁ, vacīsoceyyaṁ, manosoceyyaṁ.
an3.120:1.4	Katamañca, bhikkhave, kāyasoceyyaṁ?
an3.120:1.5	Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti.
an3.120:1.6	Idaṁ vuccati, bhikkhave, kāyasoceyyaṁ.
an3.120:2.1	Katamañca, bhikkhave, vacīsoceyyaṁ?
an3.120:2.2	Idha, bhikkhave, ekacco musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti.
an3.120:2.3	Idaṁ vuccati, bhikkhave, vacīsoceyyaṁ.
an3.120:3.1	Katamañca, bhikkhave, manosoceyyaṁ?
an3.120:3.2	Idha, bhikkhave, ekacco anabhijjhālu hoti abyāpannacitto sammādiṭṭhiko.
an3.120:3.3	Idaṁ vuccati, bhikkhave, manosoceyyaṁ.
an3.120:3.4	Imāni kho, bhikkhave, tīṇi soceyyānī”ti.
an3.120:3.5	Aṭṭhamaṁ.
an3.121:0.1	Aṅguttara Nikāya 3.121
an3.121:0.2	12. Āpāyikavagga
an3.121:0.3	Dutiyasoceyyasutta
an3.121:1.1	“Tīṇimāni, bhikkhave, soceyyāni.
an3.121:1.2	Katamāni tīṇi?
an3.121:1.3	Kāyasoceyyaṁ, vacīsoceyyaṁ, manosoceyyaṁ.
an3.121:1.4	Katamañca, bhikkhave, kāyasoceyyaṁ?
an3.121:1.5	Idha, bhikkhave, bhikkhu pāṇātipātā paṭivirato hoti, adinnādānā paṭivirato hoti, abrahmacariyā paṭivirato hoti.
an3.121:1.6	Idaṁ vuccati, bhikkhave, kāyasoceyyaṁ.
an3.121:2.1	Katamañca, bhikkhave, vacīsoceyyaṁ?
an3.121:2.2	Idha, bhikkhave, bhikkhu musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti.
an3.121:2.3	Idaṁ vuccati, bhikkhave, vacīsoceyyaṁ.
an3.121:3.1	Katamañca, bhikkhave, manosoceyyaṁ?
an3.121:3.2	Idha, bhikkhave, bhikkhu santaṁ vā ajjhattaṁ kāmacchandaṁ: ‘atthi me ajjhattaṁ kāmacchando’ti pajānāti; asantaṁ vā ajjhattaṁ kāmacchandaṁ: ‘natthi me ajjhattaṁ kāmacchando’ti pajānāti; yathā ca anuppannassa kāmacchandassa uppādo hoti, tañca pajānāti; yathā ca uppannassa kāmacchandassa pahānaṁ hoti, tañca pajānāti; yathā ca pahīnassa kāmacchandassa āyatiṁ anuppādo hoti, tañca pajānāti;
an3.121:3.3	santaṁ vā ajjhattaṁ byāpādaṁ: ‘atthi me ajjhattaṁ byāpādo’ti pajānāti; asantaṁ vā ajjhattaṁ byāpādaṁ: ‘natthi me ajjhattaṁ byāpādo’ti pajānāti; yathā ca anuppannassa byāpādassa uppādo hoti, tañca pajānāti; yathā ca uppannassa byāpādassa pahānaṁ hoti, tañca pajānāti; yathā ca pahīnassa byāpādassa āyatiṁ anuppādo hoti, tañca pajānāti;
an3.121:3.4	santaṁ vā ajjhattaṁ thinamiddhaṁ: ‘atthi me ajjhattaṁ thinamiddhan’ti pajānāti; asantaṁ vā ajjhattaṁ thinamiddhaṁ: ‘natthi me ajjhattaṁ thinamiddhan’ti pajānāti; yathā ca anuppannassa thinamiddhassa uppādo hoti, tañca pajānāti; yathā ca uppannassa thinamiddhassa pahānaṁ hoti, tañca pajānāti; yathā ca pahīnassa thinamiddhassa āyatiṁ anuppādo hoti, tañca pajānāti;
an3.121:3.5	santaṁ vā ajjhattaṁ uddhaccakukkuccaṁ: ‘atthi me ajjhattaṁ uddhaccakukkuccan’ti pajānāti; asantaṁ vā ajjhattaṁ uddhaccakukkuccaṁ: ‘natthi me ajjhattaṁ uddhaccakukkuccan’ti pajānāti; yathā ca anuppannassa uddhaccakukkuccassa uppādo hoti, tañca pajānāti; yathā ca uppannassa uddhaccakukkuccassa pahānaṁ hoti, tañca pajānāti; yathā ca pahīnassa uddhaccakukkuccassa āyatiṁ anuppādo hoti, tañca pajānāti;
an3.121:3.6	santaṁ vā ajjhattaṁ vicikicchaṁ: ‘atthi me ajjhattaṁ vicikicchā’ti pajānāti; asantaṁ vā ajjhattaṁ vicikicchaṁ: ‘natthi me ajjhattaṁ vicikicchā’ti pajānāti; yathā ca anuppannāya vicikicchāya uppādo hoti, tañca pajānāti; yathā ca uppannāya vicikicchāya pahānaṁ hoti, tañca pajānāti; yathā ca pahīnāya vicikicchāya āyatiṁ anuppādo hoti, tañca pajānāti.
an3.121:3.7	Idaṁ vuccati, bhikkhave, manosoceyyaṁ.
an3.121:3.8	Imāni kho, bhikkhave, tīṇi soceyyānīti.
an3.121:4.1	Kāyasuciṁ vacīsuciṁ,
an3.121:4.2	cetosuciṁ anāsavaṁ;
an3.121:4.3	Suciṁ soceyyasampannaṁ,
an3.121:4.4	āhu ninhātapāpakan”ti.
an3.121:4.5	Navamaṁ.
an3.122:0.1	Aṅguttara Nikāya 3.122
an3.122:0.2	12. Āpāyikavagga
an3.122:0.3	Moneyyasutta
an3.122:1.1	“Tīṇimāni, bhikkhave, moneyyāni.
an3.122:1.2	Katamāni tīṇi?
an3.122:1.3	Kāyamoneyyaṁ, vacīmoneyyaṁ, manomoneyyaṁ.
an3.122:1.4	Katamañca, bhikkhave, kāyamoneyyaṁ?
an3.122:1.5	Idha, bhikkhave, bhikkhu pāṇātipātā paṭivirato hoti, adinnādānā paṭivirato hoti, abrahmacariyā paṭivirato hoti.
an3.122:1.6	Idaṁ vuccati, bhikkhave, kāyamoneyyaṁ.
an3.122:2.1	Katamañca, bhikkhave, vacīmoneyyaṁ?
an3.122:2.2	Idha, bhikkhave, bhikkhu musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti.
an3.122:2.3	Idaṁ vuccati, bhikkhave, vacīmoneyyaṁ.
an3.122:3.1	Katamañca, bhikkhave, manomoneyyaṁ?
an3.122:3.2	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.122:3.3	Idaṁ vuccati, bhikkhave, manomoneyyaṁ.
an3.122:3.4	Imāni kho, bhikkhave, tīṇi moneyyānīti.
an3.122:4.1	Kāyamuniṁ vacīmuniṁ,
an3.122:4.2	cetomuniṁ anāsavaṁ;
an3.122:4.3	Muniṁ moneyyasampannaṁ,
an3.122:4.4	āhu sabbappahāyinan”ti.
an3.122:4.5	Dasamaṁ.
an3.122:4.6	Āpāyikavaggo dutiyo.
an3.122:5.0	Tassuddānaṁ
an3.122:5.1	Āpāyiko dullabho appameyyaṁ,
an3.122:5.2	Āneñjavipattisampadā;
an3.122:5.3	Apaṇṇako ca kammanto,
an3.122:5.4	Dve soceyyāni moneyyanti.
an3.123:0.1	Aṅguttara Nikāya 3.123
an3.123:0.2	13. Kusināravagga
an3.123:0.3	Kusinārasutta
an3.123:1.1	Ekaṁ samayaṁ bhagavā kusinārāyaṁ viharati baliharaṇe vanasaṇḍe.
an3.123:1.2	Tatra kho bhagavā bhikkhū āmantesi:
an3.123:1.3	“bhikkhavo”ti.
an3.123:1.4	“Bhadante”ti te bhikkhū bhagavato paccassosuṁ.
an3.123:1.5	Bhagavā etadavoca:
an3.123:2.1	“Idha, bhikkhave, bhikkhu aññataraṁ gāmaṁ vā nigamaṁ vā upanissāya viharati.
an3.123:2.2	Tamenaṁ gahapati vā gahapatiputto vā upasaṅkamitvā svātanāya bhattena nimanteti.
an3.123:2.3	Ākaṅkhamāno, bhikkhave, bhikkhu adhivāseti.
an3.123:2.4	So tassā rattiyā accayena pubbaṇhasamayaṁ nivāsetvā pattacīvaramādāya yena tassa gahapatissa vā gahapatiputtassa vā nivesanaṁ tenupasaṅkamati; upasaṅkamitvā paññatte āsane nisīdati.
an3.123:2.5	Tamenaṁ so gahapati vā gahapatiputto vā paṇītena khādanīyena bhojanīyena sahatthā santappeti sampavāreti.
an3.123:3.1	Tassa evaṁ hoti:
an3.123:3.2	‘sādhu vata myāyaṁ gahapati vā gahapatiputto vā paṇītena khādanīyena bhojanīyena sahatthā santappeti sampavāretī’ti.
an3.123:3.3	Evampissa hoti:
an3.123:3.4	‘aho vata māyaṁ gahapati vā gahapatiputto vā āyatimpi evarūpena paṇītena khādanīyena bhojanīyena sahatthā santappeyya sampavāreyyā’ti.
an3.123:3.5	So taṁ piṇḍapātaṁ gathito mucchito ajjhosanno anādīnavadassāvī anissaraṇapañño paribhuñjati.
an3.123:3.6	So tattha kāmavitakkampi vitakketi, byāpādavitakkampi vitakketi, vihiṁsāvitakkampi vitakketi.
an3.123:3.7	Evarūpassāhaṁ, bhikkhave, bhikkhuno dinnaṁ na mahapphalanti vadāmi.
an3.123:3.8	Taṁ kissa hetu?
an3.123:3.9	Pamatto hi, bhikkhave, bhikkhu viharati.
an3.123:4.1	Idha pana, bhikkhave, bhikkhu aññataraṁ gāmaṁ vā nigamaṁ vā upanissāya viharati.
an3.123:4.2	Tamenaṁ gahapati vā gahapatiputto vā upasaṅkamitvā svātanāya bhattena nimanteti.
an3.123:4.3	Ākaṅkhamāno, bhikkhave, bhikkhu adhivāseti.
an3.123:4.4	So tassā rattiyā accayena pubbaṇhasamayaṁ nivāsetvā pattacīvaramādāya yena tassa gahapatissa vā gahapatiputtassa vā nivesanaṁ tenupasaṅkamati; upasaṅkamitvā paññatte āsane nisīdati.
an3.123:4.5	Tamenaṁ so gahapati vā gahapatiputto vā paṇītena khādanīyena bhojanīyena sahatthā santappeti sampavāreti.
an3.123:5.1	Tassa na evaṁ hoti:
an3.123:5.2	‘sādhu vata myāyaṁ gahapati vā gahapatiputto vā paṇītena khādanīyena bhojanīyena sahatthā santappeti sampavāretī’ti.
an3.123:5.3	Evampissa na hoti:
an3.123:5.4	‘aho vata māyaṁ gahapati vā gahapatiputto vā āyatimpi evarūpena paṇītena khādanīyena bhojanīyena sahatthā santappeyya sampavāreyyā’ti.
an3.123:5.5	So taṁ piṇḍapātaṁ agathito amucchito anajjhosanno ādīnavadassāvī nissaraṇapañño paribhuñjati.
an3.123:5.6	So tattha nekkhammavitakkampi vitakketi, abyāpādavitakkampi vitakketi, avihiṁsāvitakkampi vitakketi.
an3.123:5.7	Evarūpassāhaṁ, bhikkhave, bhikkhuno dinnaṁ mahapphalanti vadāmi.
an3.123:5.8	Taṁ kissa hetu?
an3.123:5.9	Appamatto hi, bhikkhave, bhikkhu viharatī”ti.
an3.123:5.10	Paṭhamaṁ.
an3.124:0.1	Aṅguttara Nikāya 3.124
an3.124:0.2	13. Kusināravagga
an3.124:0.3	Bhaṇḍanasutta
an3.124:1.1	“Yassaṁ, bhikkhave, disāyaṁ bhikkhū bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṁ.
an3.124:1.2	Niṭṭhamettha gacchāmi:
an3.124:1.3	‘addhā te āyasmanto tayo dhamme pajahiṁsu, tayo dhamme bahulamakaṁsu.
an3.124:1.4	Katame tayo dhamme pajahiṁsu?
an3.124:1.5	Nekkhammavitakkaṁ, abyāpādavitakkaṁ, avihiṁsāvitakkaṁ—
an3.124:1.6	ime tayo dhamme pajahiṁsu.
an3.124:1.7	Katame tayo dhamme bahulamakaṁsu?
an3.124:1.8	Kāmavitakkaṁ, byāpādavitakkaṁ, vihiṁsāvitakkaṁ—
an3.124:1.9	ime tayo dhamme bahulamakaṁsu’.
an3.124:1.10	Yassaṁ, bhikkhave, disāyaṁ bhikkhū bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṁ.
an3.124:1.11	Niṭṭhamettha gacchāmi:
an3.124:1.12	‘addhā te āyasmanto ime tayo dhamme pajahiṁsu, ime tayo dhamme bahulamakaṁsu’.
an3.124:2.1	Yassaṁ pana, bhikkhave, disāyaṁ bhikkhū samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṁ.
an3.124:2.2	Niṭṭhamettha gacchāmi:
an3.124:2.3	‘addhā te āyasmanto tayo dhamme pajahiṁsu, tayo dhamme bahulamakaṁsu.
an3.124:2.4	Katame tayo dhamme pajahiṁsu?
an3.124:2.5	Kāmavitakkaṁ, byāpādavitakkaṁ, vihiṁsāvitakkaṁ—
an3.124:2.6	ime tayo dhamme pajahiṁsu.
an3.124:2.7	Katame tayo dhamme bahulamakaṁsu?
an3.124:2.8	Nekkhammavitakkaṁ, abyāpādavitakkaṁ, avihiṁsāvitakkaṁ—
an3.124:2.9	ime tayo dhamme bahulamakaṁsu’.
an3.124:2.10	Yassaṁ, bhikkhave, disāyaṁ bhikkhū samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṁ.
an3.124:2.11	Niṭṭhamettha gacchāmi:
an3.124:2.12	‘addhā te āyasmanto ime tayo dhamme pajahiṁsu, ime tayo dhamme bahulamakaṁsū’”ti.
an3.124:2.13	Dutiyaṁ.
an3.125:0.1	Aṅguttara Nikāya 3.125
an3.125:0.2	13. Kusināravagga
an3.125:0.3	Gotamakacetiyasutta
an3.125:1.1	Ekaṁ samayaṁ bhagavā vesāliyaṁ viharati gotamake cetiye.
an3.125:1.2	Tatra kho bhagavā bhikkhū āmantesi:
an3.125:1.3	“bhikkhavo”ti.
an3.125:1.4	“Bhadante”ti te bhikkhū bhagavato paccassosuṁ.
an3.125:1.5	Bhagavā etadavoca:
an3.125:2.1	“Abhiññāyāhaṁ, bhikkhave, dhammaṁ desemi, no anabhiññāya.
an3.125:2.2	Sanidānāhaṁ, bhikkhave, dhammaṁ desemi, no anidānaṁ.
an3.125:2.3	Sappāṭihāriyāhaṁ, bhikkhave, dhammaṁ desemi, no appāṭihāriyaṁ.
an3.125:2.4	Tassa mayhaṁ, bhikkhave, abhiññāya dhammaṁ desayato no anabhiññāya, sanidānaṁ dhammaṁ desayato no anidānaṁ, sappāṭihāriyaṁ dhammaṁ desayato no appāṭihāriyaṁ, karaṇīyo ovādo, karaṇīyā anusāsanī.
an3.125:2.5	Alañca pana vo, bhikkhave, tuṭṭhiyā, alaṁ attamanatāya, alaṁ somanassāya:
an3.125:2.6	‘sammāsambuddho bhagavā, svākkhāto dhammo, suppaṭipanno saṅgho’”ti.
an3.125:3.1	Idamavoca bhagavā.
an3.125:3.2	Attamanā te bhikkhū bhagavato bhāsitaṁ abhinandunti.
an3.125:3.3	Imasmiñca pana veyyākaraṇasmiṁ bhaññamāne sahassī lokadhātu akampitthāti.
an3.125:3.4	Tatiyaṁ.
an3.126:0.1	Aṅguttara Nikāya 3.126
an3.126:0.2	13. Kusināravagga
an3.126:0.3	Bharaṇḍukālāmasutta
an3.126:1.1	Ekaṁ samayaṁ bhagavā kosalesu cārikaṁ caramāno yena kapilavatthu tadavasari.
an3.126:1.2	Assosi kho mahānāmo sakko: “bhagavā kira kapilavatthuṁ anuppatto”ti.
an3.126:1.3	Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitaṁ kho mahānāmaṁ sakkaṁ bhagavā etadavoca:
an3.126:2.1	“Gaccha, mahānāma, kapilavatthusmiṁ, tathārūpaṁ āvasathaṁ jāna yatthajja mayaṁ ekarattiṁ vihareyyāmā”ti.
an3.126:2.2	“Evaṁ, bhante”ti kho mahānāmo sakko bhagavato paṭissutvā kapilavatthuṁ pavisitvā kevalakappaṁ kapilavatthuṁ anvāhiṇḍanto nāddasa kapilavatthusmiṁ tathārūpaṁ āvasathaṁ yatthajja bhagavā ekarattiṁ vihareyya.
an3.126:3.1	Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ etadavoca:
an3.126:3.2	“natthi, bhante, kapilavatthusmiṁ tathārūpo āvasatho yatthajja bhagavā ekarattiṁ vihareyya.
an3.126:3.3	Ayaṁ, bhante, bharaṇḍu kālāmo bhagavato purāṇasabrahmacārī.
an3.126:3.4	Tassajja bhagavā assame ekarattiṁ viharatū”ti.
an3.126:3.5	“Gaccha, mahānāma, santharaṁ paññāpehī”ti.
an3.126:3.6	“Evaṁ, bhante”ti kho mahānāmo sakko bhagavato paṭissutvā yena bharaṇḍussa kālāmassa assamo tenupasaṅkami; upasaṅkamitvā santharaṁ paññāpetvā udakaṁ ṭhapetvā pādānaṁ dhovanāya yena bhagavā tenupasaṅkami; upasaṅkamitvā bhagavantaṁ etadavoca:
an3.126:3.7	“santhato, bhante, santhāro, udakaṁ ṭhapitaṁ pādānaṁ dhovanāya.
an3.126:3.8	Yassadāni, bhante, bhagavā kālaṁ maññatī”ti.
an3.126:4.1	Atha kho bhagavā yena bharaṇḍussa kālāmassa assamo tenupasaṅkami; upasaṅkamitvā paññatte āsane nisīdi.
an3.126:4.2	Nisajja kho bhagavā pāde pakkhālesi.
an3.126:4.3	Atha kho mahānāmassa sakkassa etadahosi:
an3.126:4.4	“akālo kho ajja bhagavantaṁ payirupāsituṁ.
an3.126:4.5	Kilanto bhagavā.
an3.126:4.6	Sve dānāhaṁ bhagavantaṁ payirupāsissāmī”ti bhagavantaṁ abhivādetvā padakkhiṇaṁ katvā pakkāmi.
an3.126:5.1	Atha kho mahānāmo sakko tassā rattiyā accayena yena bhagavā tenupasaṅkami; upasaṅkamitvā ekamantaṁ nisīdi. Ekamantaṁ nisinnaṁ kho mahānāmaṁ sakkaṁ bhagavā etadavoca:
an3.126:5.2	“tayo khome, mahānāma, satthāro santo saṁvijjamānā lokasmiṁ.
an3.126:5.3	Katame tayo?
an3.126:5.4	Idha, mahānāma, ekacco satthā kāmānaṁ pariññaṁ paññāpeti;
an3.126:5.5	na rūpānaṁ pariññaṁ paññāpeti, na vedanānaṁ pariññaṁ paññāpeti.
an3.126:5.6	Idha pana, mahānāma, ekacco satthā kāmānaṁ pariññaṁ paññāpeti, rūpānaṁ pariññaṁ paññāpeti;
an3.126:5.7	na vedanānaṁ pariññaṁ paññāpeti.
an3.126:5.8	Idha pana, mahānāma, ekacco satthā kāmānaṁ pariññaṁ paññāpeti, rūpānaṁ pariññaṁ paññāpeti, vedanānaṁ pariññaṁ paññāpeti.
an3.126:5.9	Ime kho, mahānāma, tayo satthāro santo saṁvijjamānā lokasmiṁ.
an3.126:5.10	Imesaṁ, mahānāma, tiṇṇaṁ satthārānaṁ ekā niṭṭhā udāhu puthu niṭṭhā”ti?
an3.126:6.1	Evaṁ vutte, bharaṇḍu kālāmo mahānāmaṁ sakkaṁ etadavoca:
an3.126:6.2	“ekāti, mahānāma, vadehī”ti.
an3.126:6.3	Evaṁ vutte, bhagavā mahānāmaṁ sakkaṁ etadavoca:
an3.126:6.4	“nānāti, mahānāma, vadehī”ti.
an3.126:6.5	Dutiyampi kho bharaṇḍu kālāmo mahānāmaṁ sakkaṁ etadavoca:
an3.126:6.6	“ekāti, mahānāma, vadehī”ti.
an3.126:6.7	Dutiyampi kho bhagavā mahānāmaṁ sakkaṁ etadavoca:
an3.126:6.8	“nānāti, mahānāma, vadehī”ti.
an3.126:6.9	Tatiyampi kho bharaṇḍu kālāmo mahānāmaṁ sakkaṁ etadavoca:
an3.126:6.10	“ekāti, mahānāma, vadehī”ti.
an3.126:6.11	Tatiyampi kho bhagavā mahānāmaṁ sakkaṁ etadavoca:
an3.126:6.12	“nānāti, mahānāma, vadehī”ti.
an3.126:7.1	Atha kho bharaṇḍu kālāmassa etadahosi:
an3.126:7.2	“mahesakkhassa vatamhi mahānāmassa sakkassa sammukhā samaṇena gotamena yāvatatiyaṁ apasādito.
an3.126:7.3	Yannūnāhaṁ kapilavatthumhā pakkameyyan”ti.
an3.126:7.4	Atha kho bharaṇḍu kālāmo kapilavatthumhā pakkāmi.
an3.126:7.5	Yaṁ kapilavatthumhā pakkāmi tathā pakkantova ahosi na puna paccāgacchīti.
an3.126:7.6	Catutthaṁ.
an3.127:0.1	Aṅguttara Nikāya 3.127
an3.127:0.2	13. Kusināravagga
an3.127:0.3	Hatthakasutta
an3.127:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an3.127:1.2	Atha kho hatthako devaputto abhikkantāya rattiyā abhikkantavaṇṇo kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā:
an3.127:1.3	“bhagavato purato ṭhassāmī”ti osīdatimeva saṁsīdatimeva, na sakkoti saṇṭhātuṁ.
an3.127:1.4	Seyyathāpi nāma sappi vā telaṁ vā vālukāya āsittaṁ osīdatimeva saṁsīdatimeva, na saṇṭhāti;
an3.127:1.5	evamevaṁ hatthako devaputto:
an3.127:1.6	“bhagavato purato ṭhassāmī”ti osīdatimeva saṁsīdatimeva, na sakkoti saṇṭhātuṁ.
an3.127:2.1	Atha kho bhagavā hatthakaṁ devaputtaṁ etadavoca:
an3.127:2.2	“oḷārikaṁ, hatthaka, attabhāvaṁ abhinimmināhī”ti.
an3.127:2.3	“Evaṁ, bhante”ti, kho hatthako devaputto bhagavato paṭissutvā oḷārikaṁ attabhāvaṁ abhinimminitvā bhagavantaṁ abhivādetvā ekamantaṁ aṭṭhāsi.
an3.127:2.4	Ekamantaṁ ṭhitaṁ kho hatthakaṁ devaputtaṁ bhagavā etadavoca:
an3.127:3.1	“Ye te, hatthaka, dhammā pubbe manussabhūtassa pavattino ahesuṁ, api nu te te dhammā etarahi pavattino”ti?
an3.127:3.2	“Ye ca me, bhante, dhammā pubbe manussabhūtassa pavattino ahesuṁ, te ca me dhammā etarahi pavattino;
an3.127:3.3	ye ca me, bhante, dhammā pubbe manussabhūtassa nappavattino ahesuṁ, te ca me dhammā etarahi pavattino.
an3.127:3.4	Seyyathāpi, bhante, bhagavā etarahi ākiṇṇo viharati bhikkhūhi bhikkhunīhi upāsakehi upāsikāhi rājūhi rājamahāmattehi titthiyehi titthiyasāvakehi;
an3.127:3.5	evamevaṁ kho ahaṁ, bhante, ākiṇṇo viharāmi devaputtehi.
an3.127:3.6	Dūratopi, bhante, devaputtā āgacchanti hatthakassa devaputtassa santike ‘dhammaṁ sossāmā’ti.
an3.127:3.7	Tiṇṇāhaṁ, bhante, dhammānaṁ atitto appaṭivāno kālaṅkato.
an3.127:3.8	Katamesaṁ tiṇṇaṁ?
an3.127:3.9	Bhagavato ahaṁ, bhante, dassanassa atitto appaṭivāno kālaṅkato;
an3.127:3.10	saddhammasavanassāhaṁ, bhante, atitto appaṭivāno kālaṅkato;
an3.127:3.11	saṅghassāhaṁ, bhante, upaṭṭhānassa atitto appaṭivāno kālaṅkato.
an3.127:3.12	Imesaṁ kho ahaṁ, bhante, tiṇṇaṁ dhammānaṁ atitto appaṭivāno kālaṅkatoti.
an3.127:4.1	Nāhaṁ bhagavato dassanassa,
an3.127:4.2	Tittimajjhagā kudācanaṁ;
an3.127:4.3	Saṅghassa upaṭṭhānassa,
an3.127:4.4	Saddhammasavanassa ca.
an3.127:5.1	Adhisīlaṁ sikkhamāno,
an3.127:5.2	saddhammasavane rato;
an3.127:5.3	Tiṇṇaṁ dhammānaṁ atitto,
an3.127:5.4	hatthako avihaṁ gato”ti.
an3.127:5.5	Pañcamaṁ.
an3.128:0.1	Aṅguttara Nikāya 3.128
an3.128:0.2	13. Kusināravagga
an3.128:0.3	Kaṭuviyasutta
an3.128:1.1	Ekaṁ samayaṁ bhagavā bārāṇasiyaṁ viharati isipatane migadāye.
an3.128:1.2	Atha kho bhagavā pubbaṇhasamayaṁ nivāsetvā pattacīvaramādāya bārāṇasiṁ piṇḍāya pāvisi.
an3.128:1.3	Addasā kho bhagavā goyogapilakkhasmiṁ piṇḍāya caramāno aññataraṁ bhikkhuṁ rittassādaṁ bāhirassādaṁ muṭṭhassatiṁ asampajānaṁ asamāhitaṁ vibbhantacittaṁ pākatindriyaṁ.
an3.128:1.4	Disvā taṁ bhikkhuṁ etadavoca:
an3.128:2.1	“Mā kho tvaṁ, bhikkhu, attānaṁ kaṭuviyamakāsi.
an3.128:2.2	Taṁ vata, bhikkhu, kaṭuviyakataṁ attānaṁ āmagandhena avassutaṁ makkhikā nānupatissanti nānvāssavissantīti, netaṁ ṭhānaṁ vijjatī”ti.
an3.128:2.3	Atha kho so bhikkhu bhagavatā iminā ovādena ovadito saṁvegamāpādi.
an3.128:2.4	Atha kho bhagavā bārāṇasiyaṁ piṇḍāya caritvā pacchābhattaṁ piṇḍapātapaṭikkanto bhikkhū āmantesi:
an3.128:3.1	“Idhāhaṁ, bhikkhave, pubbaṇhasamayaṁ nivāsetvā pattacīvaramādāya bārāṇasiṁ piṇḍāya pāvisiṁ.
an3.128:3.2	Addasaṁ kho ahaṁ, bhikkhave, goyogapilakkhasmiṁ piṇḍāya caramāno aññataraṁ bhikkhuṁ rittassādaṁ bāhirassādaṁ muṭṭhassatiṁ asampajānaṁ asamāhitaṁ vibbhantacittaṁ pākatindriyaṁ.
an3.128:3.3	Disvā taṁ bhikkhuṁ etadavocaṁ:
an3.128:4.1	‘Mā kho tvaṁ, bhikkhu, attānaṁ kaṭuviyamakāsi.
an3.128:4.2	Taṁ vata bhikkhu kaṭuviyakataṁ attānaṁ āmagandhena avassutaṁ makkhikā nānupatissanti nānvāssavissantīti, netaṁ ṭhānaṁ vijjatī’ti.
an3.128:4.3	Atha kho, bhikkhave, so bhikkhu mayā iminā ovādena ovadito saṁvegamāpādī”ti.
an3.128:4.4	Evaṁ vutte, aññataro bhikkhu bhagavantaṁ etadavoca:
an3.128:4.5	“kiṁ nu kho, bhante, kaṭuviyaṁ?
an3.128:4.6	Ko āmagandho?
an3.128:4.7	Kā makkhikā”ti?
an3.128:5.1	“Abhijjhā kho, bhikkhu, kaṭuviyaṁ;
an3.128:5.2	byāpādo āmagandho;
an3.128:5.3	pāpakā akusalā vitakkā makkhikā.
an3.128:5.4	Taṁ vata, bhikkhu, kaṭuviyakataṁ attānaṁ āmagandhena avassutaṁ makkhikā nānupatissanti nānvāssavissantīti, netaṁ ṭhānaṁ vijjatīti.
an3.128:6.1	Aguttaṁ cakkhusotasmiṁ,
an3.128:6.2	indriyesu asaṁvutaṁ;
an3.128:6.3	Makkhikānupatissanti,
an3.128:6.4	saṅkappā rāganissitā.
an3.128:7.1	Kaṭuviyakato bhikkhu,
an3.128:7.2	āmagandhe avassuto;
an3.128:7.3	Ārakā hoti nibbānā,
an3.128:7.4	vighātasseva bhāgavā.
an3.128:8.1	Gāme vā yadi vāraññe,
an3.128:8.2	aladdhā samathamattano;
an3.128:8.3	Pareti bālo dummedho,
an3.128:8.4	makkhikāhi purakkhato.
an3.128:9.1	Ye ca sīlena sampannā,
an3.128:9.2	paññāyūpasameratā;
an3.128:9.3	Upasantā sukhaṁ senti,
an3.128:9.4	nāsayitvāna makkhikā”ti.
an3.128:9.5	Chaṭṭhaṁ.
an3.129:0.1	Aṅguttara Nikāya 3.129
an3.129:0.2	13. Kusināravagga
an3.129:0.3	Paṭhamaanuruddhasutta
an3.129:1.1	Atha kho āyasmā anuruddho yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā anuruddho bhagavantaṁ etadavoca:
an3.129:1.2	“idhāhaṁ, bhante, dibbena cakkhunā visuddhena atikkantamānusakena yebhuyyena passāmi mātugāmaṁ kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjamānaṁ.
an3.129:1.3	Katihi nu kho, bhante, dhammehi samannāgato mātugāmo kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjatī”ti?
an3.129:2.1	“Tīhi kho, anuruddha, dhammehi samannāgato mātugāmo kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an3.129:2.2	Katamehi tīhi?
an3.129:2.3	Idha, anuruddha, mātugāmo pubbaṇhasamayaṁ maccheramalapariyuṭṭhitena cetasā agāraṁ ajjhāvasati, majjhanhikasamayaṁ issāpariyuṭṭhitena cetasā agāraṁ ajjhāvasati, sāyanhasamayaṁ kāmarāgapariyuṭṭhitena cetasā agāraṁ ajjhāvasati.
an3.129:2.4	Imehi kho, anuruddha, tīhi dhammehi samannāgato mātugāmo kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjatī”ti.
an3.129:2.5	Sattamaṁ.
an3.130:0.1	Aṅguttara Nikāya 3.130
an3.130:0.2	13. Kusināravagga
an3.130:0.3	Dutiyaanuruddhasutta
an3.130:1.1	Atha kho āyasmā anuruddho yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an3.130:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā anuruddho āyasmantaṁ sāriputtaṁ etadavoca:
an3.130:1.3	“idhāhaṁ, āvuso sāriputta, dibbena cakkhunā visuddhena atikkantamānusakena sahassaṁ lokaṁ olokemi.
an3.130:1.4	Āraddhaṁ kho pana me vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ.
an3.130:1.5	Atha ca pana me nānupādāya āsavehi cittaṁ vimuccatī”ti.
an3.130:2.1	“Yaṁ kho te, āvuso anuruddha, evaṁ hoti:
an3.130:2.2	‘ahaṁ dibbena cakkhunā visuddhena atikkantamānusakena sahassaṁ lokaṁ volokemī’ti, idaṁ te mānasmiṁ.
an3.130:2.3	Yampi te, āvuso anuruddha, evaṁ hoti:
an3.130:2.4	‘āraddhaṁ kho pana me vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggan’ti, idaṁ te uddhaccasmiṁ.
an3.130:2.5	Yampi te, āvuso anuruddha, evaṁ hoti:
an3.130:2.6	‘atha ca pana me nānupādāya āsavehi cittaṁ vimuccatī’ti, idaṁ te kukkuccasmiṁ.
an3.130:2.7	Sādhu vatāyasmā anuruddho ime tayo dhamme pahāya, ime tayo dhamme amanasikaritvā amatāya dhātuyā cittaṁ upasaṁharatū”ti.
an3.130:3.1	Atha kho āyasmā anuruddho aparena samayena ime tayo dhamme pahāya, ime tayo dhamme amanasikaritvā amatāya dhātuyā cittaṁ upasaṁhari.
an3.130:3.2	Atha kho āyasmā anuruddho eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
an3.130:3.3	“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
an3.130:3.4	Aññataro ca panāyasmā anuruddho arahataṁ ahosīti.
an3.130:3.5	Aṭṭhamaṁ.
an3.131:0.1	Aṅguttara Nikāya 3.131
an3.131:0.2	13. Kusināravagga
an3.131:0.3	Paṭicchannasutta
an3.131:1.1	“Tīṇimāni, bhikkhave, paṭicchannāni āvahanti, no vivaṭāni.
an3.131:1.2	Katamāni tīṇi?
an3.131:1.3	Mātugāmo, bhikkhave, paṭicchanno āvahati, no vivaṭo;
an3.131:1.4	brāhmaṇānaṁ, bhikkhave, mantā paṭicchannā āvahanti, no vivaṭā;
an3.131:1.5	micchādiṭṭhi, bhikkhave, paṭicchannā āvahati, no vivaṭā.
an3.131:1.6	Imāni kho, bhikkhave, tīṇi paṭicchannāni āvahanti, no vivaṭāni.
an3.131:2.1	Tīṇimāni, bhikkhave, vivaṭāni virocanti, no paṭicchannāni.
an3.131:2.2	Katamāni tīṇi?
an3.131:2.3	Candamaṇḍalaṁ, bhikkhave, vivaṭaṁ virocati, no paṭicchannaṁ;
an3.131:2.4	sūriyamaṇḍalaṁ, bhikkhave, vivaṭaṁ virocati, no paṭicchannaṁ;
an3.131:2.5	tathāgatappavedito dhammavinayo, bhikkhave, vivaṭo virocati, no paṭicchanno.
an3.131:2.6	Imāni kho, bhikkhave, tīṇi vivaṭāni virocanti, no paṭicchannānī”ti.
an3.131:2.7	Navamaṁ.
an3.132:0.1	Aṅguttara Nikāya 3.132
an3.132:0.2	13. Kusināravagga
an3.132:0.3	Lekhasutta
an3.132:1.1	“Tayome, bhikkhave, puggalā santo saṁvijjamānā lokasmiṁ.
an3.132:1.2	Katame tayo?
an3.132:1.3	Pāsāṇalekhūpamo puggalo, pathavilekhūpamo puggalo, udakalekhūpamo puggalo.
an3.132:1.4	Katamo ca, bhikkhave, pāsāṇalekhūpamo puggalo?
an3.132:1.5	Idha, bhikkhave, ekacco puggalo abhiṇhaṁ kujjhati.
an3.132:1.6	So ca khvassa kodho dīgharattaṁ anuseti.
an3.132:1.7	Seyyathāpi, bhikkhave, pāsāṇe lekhā na khippaṁ lujjati vātena vā udakena vā, ciraṭṭhitikā hoti;
an3.132:1.8	evamevaṁ kho, bhikkhave, idhekacco puggalo abhiṇhaṁ kujjhati.
an3.132:1.9	So ca khvassa kodho dīgharattaṁ anuseti.
an3.132:1.10	Ayaṁ vuccati, bhikkhave, pāsāṇalekhūpamo puggalo.
an3.132:2.1	Katamo ca, bhikkhave, pathavilekhūpamo puggalo?
an3.132:2.2	Idha, bhikkhave, ekacco puggalo abhiṇhaṁ kujjhati.
an3.132:2.3	So ca khvassa kodho na dīgharattaṁ anuseti.
an3.132:2.4	Seyyathāpi, bhikkhave, pathaviyā lekhā khippaṁ lujjati vātena vā udakena vā, na ciraṭṭhitikā hoti;
an3.132:2.5	evamevaṁ kho, bhikkhave, idhekacco puggalo abhiṇhaṁ kujjhati.
an3.132:2.6	So ca khvassa kodho na dīgharattaṁ anuseti.
an3.132:2.7	Ayaṁ vuccati, bhikkhave, pathavilekhūpamo puggalo.
an3.132:3.1	Katamo ca, bhikkhave, udakalekhūpamo puggalo?
an3.132:3.2	Idha, bhikkhave, ekacco puggalo āgāḷhenapi vuccamāno pharusenapi vuccamāno amanāpenapi vuccamāno sandhiyatimeva saṁsandatimeva sammodatimeva.
an3.132:3.3	Seyyathāpi, bhikkhave, udake lekhā khippaṁyeva paṭivigacchati, na ciraṭṭhitikā hoti;
an3.132:3.4	evamevaṁ kho, bhikkhave, idhekacco puggalo āgāḷhenapi vuccamāno pharusenapi vuccamāno amanāpenapi vuccamāno sandhiyatimeva saṁsandatimeva sammodatimeva.
an3.132:3.5	Ayaṁ vuccati, bhikkhave, udakalekhūpamo puggalo.
an3.132:3.6	Ime kho, bhikkhave, tayo puggalā santo saṁvijjamānā lokasmin”ti.
an3.132:3.7	Dasamaṁ.
an3.132:3.8	Kusināravaggo tatiyo.
an3.132:4.0	Tassuddānaṁ
an3.132:4.1	Kusinārabhaṇḍanā ceva,
an3.132:4.2	Gotamabharaṇḍuhatthako;
an3.132:4.3	Kaṭuviyaṁ dve anuruddhā,
an3.132:4.4	Paṭicchannaṁ lekhena te dasāti.
an3.133:0.1	Aṅguttara Nikāya 3.133
an3.133:0.2	14. Yodhājīvavagga
an3.133:0.3	Yodhājīvasutta
an3.133:1.1	“Tīhi, bhikkhave, aṅgehi samannāgato yodhājīvo rājāraho hoti rājabhoggo, rañño aṅganteva saṅkhyaṁ gacchati.
an3.133:1.2	Katamehi tīhi?
an3.133:1.3	Idha, bhikkhave, yodhājīvo dūre pātī ca hoti akkhaṇavedhī ca mahato ca kāyassa padāletā.
an3.133:1.4	Imehi, kho, bhikkhave, tīhi aṅgehi samannāgato yodhājīvo rājāraho hoti rājabhoggo, rañño aṅganteva saṅkhyaṁ gacchati.
an3.133:1.5	Evamevaṁ kho, bhikkhave, tīhi aṅgehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an3.133:1.6	Katamehi tīhi?
an3.133:1.7	Idha, bhikkhave, bhikkhu dūre pātī ca hoti akkhaṇavedhī ca mahato ca kāyassa padāletā.
an3.133:2.1	Kathañca, bhikkhave, bhikkhu dūre pātī hoti?
an3.133:2.2	Idha, bhikkhave, bhikkhu yaṁ kiñci rūpaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā, sabbaṁ rūpaṁ: ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya passati.
an3.133:2.3	Yā kāci vedanā atītānāgatapaccuppannā ajjhattā vā bahiddhā vā oḷārikā vā sukhumā vā hīnā vā paṇītā vā yā dūre santike vā, sabbaṁ vedanaṁ: ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya passati.
an3.133:2.4	Yā kāci saññā atītānāgatapaccuppannā ajjhattā vā bahiddhā vā oḷārikā vā sukhumā vā hīnā vā paṇītā vā yā dūre santike vā, sabbaṁ saññaṁ: ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya passati.
an3.133:2.5	Ye keci saṅkhārā atītānāgatapaccuppannā ajjhattā vā bahiddhā vā oḷārikā vā sukhumā vā hīnā vā paṇītā vā ye dūre santike vā, sabbe saṅkhāre: ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya passati.
an3.133:2.6	Yaṁ kiñci viññāṇaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā, sabbaṁ viññāṇaṁ: ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya passati.
an3.133:2.7	Evaṁ kho, bhikkhave, bhikkhu dūre pātī hoti.
an3.133:3.1	Kathañca, bhikkhave, bhikkhu akkhaṇavedhī hoti?
an3.133:3.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti; ‘ayaṁ dukkhasamudayo’ti yathābhūtaṁ pajānāti; ‘ayaṁ dukkhanirodho’ti yathābhūtaṁ pajānāti; ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.133:3.3	Evaṁ kho, bhikkhave, bhikkhu akkhaṇavedhī hoti.
an3.133:4.1	Kathañca, bhikkhave, bhikkhu mahato kāyassa padāletā hoti?
an3.133:4.2	Idha, bhikkhave, bhikkhu mahantaṁ avijjākkhandhaṁ padāleti.
an3.133:4.3	Evaṁ kho, bhikkhave, bhikkhu mahato kāyassa padāletā hoti.
an3.133:4.4	Imehi kho, bhikkhave, tīhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an3.133:4.5	Paṭhamaṁ.
an3.134:0.1	Aṅguttara Nikāya 3.134
an3.134:0.2	14. Yodhājīvavagga
an3.134:0.3	Parisāsutta
an3.134:1.1	“Tisso imā, bhikkhave, parisā.
an3.134:1.2	Katamā tisso?
an3.134:1.3	Ukkācitavinītā parisā, paṭipucchāvinītā parisā, yāvatāvinītā parisā—
an3.134:1.4	imā kho, bhikkhave, tisso parisā”ti.
an3.134:1.5	Dutiyaṁ.
an3.135:0.1	Aṅguttara Nikāya 3.135
an3.135:0.2	14. Yodhājīvavagga
an3.135:0.3	Mittasutta
an3.135:1.1	“Tīhi, bhikkhave, aṅgehi samannāgato mitto sevitabbo.
an3.135:1.2	Katamehi tīhi? (…)
an3.135:1.3	Duddadaṁ dadāti, dukkaraṁ karoti, dukkhamaṁ khamati—
an3.135:1.4	imehi kho, bhikkhave, tīhi aṅgehi samannāgato mitto sevitabbo”ti.
an3.135:1.5	Tatiyaṁ.
an3.136:0.1	Aṅguttara Nikāya 3.136
an3.136:0.2	14. Yodhājīvavagga
an3.136:0.3	Uppādāsutta
an3.136:1.1	“Uppādā vā, bhikkhave, tathāgatānaṁ anuppādā vā tathāgatānaṁ, ṭhitāva sā dhātu dhammaṭṭhitatā dhammaniyāmatā.
an3.136:1.2	Sabbe saṅkhārā aniccā.
an3.136:1.3	Taṁ tathāgato abhisambujjhati abhisameti.
an3.136:1.4	Abhisambujjhitvā abhisametvā ācikkhati deseti paññāpeti paṭṭhapeti vivarati vibhajati uttānīkaroti:
an3.136:1.5	‘sabbe saṅkhārā aniccā’ti.
an3.136:1.6	Uppādā vā, bhikkhave, tathāgatānaṁ anuppādā vā tathāgatānaṁ ṭhitāva sā dhātu dhammaṭṭhitatā dhammaniyāmatā.
an3.136:1.7	Sabbe saṅkhārā dukkhā.
an3.136:1.8	Taṁ tathāgato abhisambujjhati abhisameti.
an3.136:1.9	Abhisambujjhitvā abhisametvā ācikkhati deseti paññāpeti paṭṭhapeti vivarati vibhajati uttānīkaroti:
an3.136:1.10	‘sabbe saṅkhārā dukkhā’ti.
an3.136:1.11	Uppādā vā, bhikkhave, tathāgatānaṁ anuppādā vā tathāgatānaṁ ṭhitāva sā dhātu dhammaṭṭhitatā dhammaniyāmatā.
an3.136:1.12	Sabbe dhammā anattā.
an3.136:1.13	Taṁ tathāgato abhisambujjhati abhisameti.
an3.136:1.14	Abhisambujjhitvā abhisametvā ācikkhati deseti paññāpeti paṭṭhapeti vivarati vibhajati uttānīkaroti:
an3.136:1.15	‘sabbe dhammā anattā’”ti.
an3.136:1.16	Catutthaṁ.
an3.137:0.1	Aṅguttara Nikāya 3.137
an3.137:0.2	14. Yodhājīvavagga
an3.137:0.3	Kesakambalasutta
an3.137:1.1	“Seyyathāpi, bhikkhave, yāni kānici tantāvutānaṁ vatthānaṁ, kesakambalo tesaṁ paṭikiṭṭho akkhāyati.
an3.137:1.2	Kesakambalo, bhikkhave, sīte sīto, uṇhe uṇho, dubbaṇṇo, duggandho, dukkhasamphasso.
an3.137:1.3	Evamevaṁ kho, bhikkhave, yāni kānici puthusamaṇabrāhmaṇavādānaṁ makkhalivādo tesaṁ paṭikiṭṭho akkhāyati.
an3.137:2.1	Makkhali, bhikkhave, moghapuriso evaṁvādī evaṁdiṭṭhi:
an3.137:2.2	‘natthi kammaṁ, natthi kiriyaṁ, natthi vīriyan’ti.
an3.137:2.3	Yepi te, bhikkhave, ahesuṁ atītamaddhānaṁ arahanto sammāsambuddhā, tepi bhagavanto kammavādā ceva ahesuṁ kiriyavādā ca vīriyavādā ca.
an3.137:2.4	Tepi, bhikkhave, makkhali moghapuriso paṭibāhati:
an3.137:2.5	‘natthi kammaṁ, natthi kiriyaṁ, natthi vīriyan’ti.
an3.137:2.6	Yepi te, bhikkhave, bhavissanti anāgatamaddhānaṁ arahanto sammāsambuddhā, tepi bhagavanto kammavādā ceva bhavissanti kiriyavādā ca vīriyavādā ca.
an3.137:2.7	Tepi, bhikkhave, makkhali moghapuriso paṭibāhati:
an3.137:2.8	‘natthi kammaṁ, natthi kiriyaṁ, natthi vīriyan’ti.
an3.137:2.9	Ahampi, bhikkhave, etarahi arahaṁ sammāsambuddho kammavādo ceva kiriyavādo ca vīriyavādo ca.
an3.137:2.10	Mampi, bhikkhave, makkhali moghapuriso paṭibāhati:
an3.137:2.11	‘natthi kammaṁ, natthi kiriyaṁ, natthi vīriyan’ti.
an3.137:3.1	Seyyathāpi, bhikkhave, nadīmukhe khippaṁ uḍḍeyya bahūnaṁ macchānaṁ ahitāya dukkhāya anayāya byasanāya;
an3.137:3.2	evamevaṁ kho, bhikkhave, makkhali moghapuriso manussakhippaṁ maññe loke uppanno bahūnaṁ sattānaṁ ahitāya dukkhāya anayāya byasanāyā”ti.
an3.137:3.3	Pañcamaṁ.
an3.138:0.1	Aṅguttara Nikāya 3.138
an3.138:0.2	14. Yodhājīvavagga
an3.138:0.3	Sampadāsutta
an3.138:1.1	“Tisso imā, bhikkhave, sampadā.
an3.138:1.2	Katamā tisso?
an3.138:1.3	Saddhāsampadā, sīlasampadā, paññāsampadā—
an3.138:1.4	imā kho, bhikkhave, tisso sampadā”ti.
an3.138:1.5	Chaṭṭhaṁ.
an3.139:0.1	Aṅguttara Nikāya 3.139
an3.139:0.2	14. Yodhājīvavagga
an3.139:0.3	Vuddhisutta
an3.139:1.1	“Tisso imā, bhikkhave, vuddhiyo.
an3.139:1.2	Katamā tisso?
an3.139:1.3	Saddhāvuddhi, sīlavuddhi, paññāvuddhi—
an3.139:1.4	imā kho, bhikkhave, tisso vuddhiyo”ti.
an3.139:1.5	Sattamaṁ.
an3.140:0.1	Aṅguttara Nikāya 3.140
an3.140:0.2	14. Yodhājīvavagga
an3.140:0.3	Assakhaḷuṅkasutta
an3.140:1.1	“Tayo ca, bhikkhave, assakhaḷuṅke desessāmi tayo ca purisakhaḷuṅke.
an3.140:1.2	Taṁ suṇātha, sādhukaṁ manasi karotha, bhāsissāmī”ti.
an3.140:1.3	“Evaṁ, bhante”ti kho te bhikkhū bhagavato paccassosuṁ.
an3.140:1.4	Bhagavā etadavoca:
an3.140:2.1	“Katame ca, bhikkhave, tayo assakhaḷuṅkā?
an3.140:2.2	Idha, bhikkhave, ekacco assakhaḷuṅko javasampanno hoti; na vaṇṇasampanno, na ārohapariṇāhasampanno.
an3.140:2.3	Idha pana, bhikkhave, ekacco assakhaḷuṅko javasampanno ca hoti vaṇṇasampanno ca; na ārohapariṇāhasampanno.
an3.140:2.4	Idha pana, bhikkhave, ekacco assakhaḷuṅko javasampanno ca hoti vaṇṇasampanno ca ārohapariṇāhasampanno ca.
an3.140:2.5	Ime kho, bhikkhave, tayo assakhaḷuṅkā.
an3.140:3.1	Katame ca, bhikkhave, tayo purisakhaḷuṅkā?
an3.140:3.2	Idha, bhikkhave, ekacco purisakhaḷuṅko javasampanno hoti; na vaṇṇasampanno, na ārohapariṇāhasampanno.
an3.140:3.3	Idha pana, bhikkhave, ekacco purisakhaḷuṅko javasampanno ca hoti vaṇṇasampanno ca; na ārohapariṇāhasampanno.
an3.140:3.4	Idha pana, bhikkhave, ekacco purisakhaḷuṅko javasampanno ca hoti vaṇṇasampanno ca ārohapariṇāhasampanno ca.
an3.140:4.1	Kathañca, bhikkhave, purisakhaḷuṅko javasampanno hoti; na vaṇṇasampanno na ārohapariṇāhasampanno?
an3.140:4.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.140:4.3	Idamassa javasmiṁ vadāmi.
an3.140:4.4	Abhidhamme kho pana abhivinaye pañhaṁ puṭṭho saṁsādeti, no vissajjeti.
an3.140:4.5	Idamassa na vaṇṇasmiṁ vadāmi.
an3.140:4.6	Na kho pana lābhī hoti cīvarapiṇḍapātasenāsanagilānappaccayabhesajjaparikkhārānaṁ.
an3.140:4.7	Idamassa na ārohapariṇāhasmiṁ vadāmi.
an3.140:4.8	Evaṁ kho, bhikkhave, purisakhaḷuṅko javasampanno hoti; na vaṇṇasampanno, na ārohapariṇāhasampanno.
an3.140:5.1	Kathañca, bhikkhave, purisakhaḷuṅko javasampanno ca hoti vaṇṇasampanno ca; na ārohapariṇāhasampanno?
an3.140:5.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.140:5.3	Idamassa javasmiṁ vadāmi.
an3.140:5.4	Abhidhamme kho pana abhivinaye pañhaṁ puṭṭho vissajjeti, no saṁsādeti.
an3.140:5.5	Idamassa vaṇṇasmiṁ vadāmi.
an3.140:5.6	Na pana lābhī hoti cīvarapiṇḍapātasenāsanagilānappaccayabhesajjaparikkhārānaṁ.
an3.140:5.7	Idamassa na ārohapariṇāhasmiṁ vadāmi.
an3.140:5.8	Evaṁ kho, bhikkhave, purisakhaḷuṅko javasampanno ca hoti vaṇṇasampanno ca; na ārohapariṇāhasampanno.
an3.140:6.1	Kathañca, bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca?
an3.140:6.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an3.140:6.3	Idamassa javasmiṁ vadāmi.
an3.140:6.4	Abhidhamme kho pana abhivinaye pañhaṁ puṭṭho vissajjeti, no saṁsādeti.
an3.140:6.5	Idamassa vaṇṇasmiṁ vadāmi.
an3.140:6.6	Lābhī kho pana hoti cīvarapiṇḍapātasenāsanagilānappaccayabhesajjaparikkhārānaṁ.
an3.140:6.7	Idamassa ārohapariṇāhasmiṁ vadāmi.
an3.140:6.8	Evaṁ kho, bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca.
an3.140:6.9	Ime kho, bhikkhave, tayo purisakhaḷuṅkā”ti.
an3.140:6.10	Aṭṭhamaṁ.
an3.141:0.1	Aṅguttara Nikāya 3.141
an3.141:0.2	14. Yodhājīvavagga
an3.141:0.3	Assaparassasutta
an3.141:1.1	“Tayo ca, bhikkhave, assaparasse desessāmi tayo ca purisaparasse.
an3.141:1.2	Taṁ suṇātha, sādhukaṁ manasi karotha, bhāsissāmī”ti.
an3.141:1.3	“Evaṁ, bhante”ti kho te bhikkhū bhagavato paccassosuṁ.
an3.141:1.4	Bhagavā etadavoca:
an3.141:2.1	“Katame ca, bhikkhave, tayo assaparassā?
an3.141:2.2	Idha, bhikkhave, ekacco assaparasso javasampanno hoti; na vaṇṇasampanno na ārohapariṇāhasampanno.
an3.141:2.3	Idha pana, bhikkhave, ekacco assaparasso javasampanno hoti vaṇṇasampanno ca; na ārohapariṇāhasampanno.
an3.141:2.4	Idha pana, bhikkhave, ekacco assaparasso javasampanno ca hoti vaṇṇasampanno ca ārohapariṇāhasampanno ca.
an3.141:2.5	Ime kho, bhikkhave, tayo assaparassā.
an3.141:3.1	Katame ca, bhikkhave, tayo purisaparassā?
an3.141:3.2	Idha, bhikkhave, ekacco purisaparasso javasampanno hoti; na vaṇṇasampanno na ārohapariṇāhasampanno.
an3.141:3.3	Idha pana, bhikkhave, ekacco purisaparasso javasampanno ca hoti vaṇṇasampanno ca; na ārohapariṇāhasampanno.
an3.141:3.4	Idha pana, bhikkhave, ekacco purisaparasso javasampanno ca hoti vaṇṇasampanno ca ārohapariṇāhasampanno ca.
an3.141:4.1	Kathañca, bhikkhave, purisaparasso javasampanno hoti; na vaṇṇasampanno, na ārohapariṇāhasampanno?
an3.141:4.2	Idha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an3.141:4.3	Idamassa javasmiṁ vadāmi.
an3.141:4.4	Abhidhamme kho pana abhivinaye pañhaṁ puṭṭho saṁsādeti, no vissajjeti.
an3.141:4.5	Idamassa na vaṇṇasmiṁ vadāmi.
an3.141:4.6	Na kho pana lābhī hoti cīvarapiṇḍapātasenāsanagilānappaccayabhesajjaparikkhārānaṁ.
an3.141:4.7	Idamassa na ārohapariṇāhasmiṁ vadāmi. Evaṁ kho, bhikkhave, purisaparasso javasampanno hoti;
an3.141:4.8	na vaṇṇasampanno, na ārohapariṇāhasampanno.
an3.141:5.1	Kathañca, bhikkhave, purisaparasso javasampanno ca hoti vaṇṇasampanno ca, na ārohapariṇāhasampanno?
an3.141:5.2	Idha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an3.141:5.3	Idamassa javasmiṁ vadāmi.
an3.141:5.4	Abhidhamme kho pana abhivinaye pañhaṁ puṭṭho vissajjeti, no saṁsādeti.
an3.141:5.5	Idamassa vaṇṇasmiṁ vadāmi.
an3.141:5.6	Na kho pana lābhī hoti cīvarapiṇḍapātasenāsanagilānappaccayabhesajjaparikkhārānaṁ.
an3.141:5.7	Idamassa na ārohapariṇāhasmiṁ vadāmi.
an3.141:5.8	Evaṁ kho, bhikkhave, purisaparasso javasampanno ca hoti; vaṇṇasampanno ca, na ārohapariṇāhasampanno.
an3.141:6.1	Kathañca, bhikkhave, purisaparasso javasampanno ca hoti vaṇṇasampanno ca ārohapariṇāhasampanno ca?
an3.141:6.2	Idha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an3.141:6.3	Idamassa javasmiṁ vadāmi.
an3.141:6.4	Abhidhamme kho pana abhivinaye pañhaṁ puṭṭho vissajjeti, no saṁsādeti.
an3.141:6.5	Idamassa vaṇṇasmiṁ vadāmi.
an3.141:6.6	Lābhī kho pana hoti cīvarapiṇḍapātasenāsanagilānappaccayabhesajjaparikkhārānaṁ.
an3.141:6.7	Idamassa ārohapariṇāhasmiṁ vadāmi.
an3.141:6.8	Evaṁ kho, bhikkhave, purisaparasso javasampanno ca hoti vaṇṇasampanno ca ārohapariṇāhasampanno ca.
an3.141:6.9	Ime kho, bhikkhave, tayo purisaparassā”ti.
an3.141:6.10	Navamaṁ.
an3.142:0.1	Aṅguttara Nikāya 3.142
an3.142:0.2	14. Yodhājīvavagga
an3.142:0.3	Assājānīyasutta
an3.142:1.1	“Tayo ca, bhikkhave, bhadre assājānīye desessāmi tayo ca bhadre purisājānīye.
an3.142:1.2	Taṁ suṇātha, sādhukaṁ manasi karotha, bhāsissāmī”ti.
an3.142:1.3	“Evaṁ, bhante”ti kho te bhikkhū bhagavato paccassosuṁ.
an3.142:1.4	Bhagavā etadavoca:
an3.142:2.1	“Katame ca, bhikkhave, tayo bhadrā assājānīyā?
an3.142:2.2	Idha, bhikkhave, ekacco bhadro assājānīyo …pe…
an3.142:2.3	javasampanno ca hoti vaṇṇasampanno ca ārohapariṇāhasampanno ca.
an3.142:2.4	Ime kho, bhikkhave, tayo bhadrā assājānīyā.
an3.142:3.1	Katame ca, bhikkhave, tayo bhadrā purisājānīyā?
an3.142:3.2	Idha, bhikkhave, ekacco bhadro purisājānīyo …pe…
an3.142:3.3	javasampanno ca hoti vaṇṇasampanno ca ārohapariṇāhasampanno ca.
an3.142:4.1	Kathañca, bhikkhave, bhadro purisājānīyo …pe…
an3.142:4.2	javasampanno ca hoti vaṇṇasampanno ca ārohapariṇāhasampanno ca?
an3.142:4.3	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an3.142:4.4	Idamassa javasmiṁ vadāmi.
an3.142:4.5	Abhidhamme kho pana abhivinaye pañhaṁ puṭṭho vissajjeti, no saṁsādeti.
an3.142:4.6	Idamassa vaṇṇasmiṁ vadāmi.
an3.142:4.7	Lābhī kho pana hoti cīvarapiṇḍapātasenāsanagilānappaccayabhesajjaparikkhārānaṁ.
an3.142:4.8	Idamassa ārohapariṇāhasmiṁ vadāmi.
an3.142:4.9	Evaṁ kho, bhikkhave, bhadro purisājānīyo javasampanno ca hoti vaṇṇasampanno ca ārohapariṇāhasampanno ca.
an3.142:4.10	Ime kho, bhikkhave, tayo bhadrā purisājānīyā”ti.
an3.142:4.11	Dasamaṁ.
an3.143:0.1	Aṅguttara Nikāya 3.143
an3.143:0.2	14. Yodhājīvavagga
an3.143:0.3	Paṭhamamoranivāpasutta
an3.143:1.1	Ekaṁ samayaṁ bhagavā rājagahe viharati moranivāpe paribbājakārāme.
an3.143:1.2	Tatra kho bhagavā bhikkhū āmantesi:
an3.143:1.3	“bhikkhavo”ti.
an3.143:1.4	“Bhadante”ti te bhikkhū bhagavato paccassosuṁ.
an3.143:1.5	Bhagavā etadavoca:
an3.143:2.1	“Tīhi, bhikkhave, dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an3.143:2.2	Katamehi tīhi?
an3.143:2.3	Asekkhena sīlakkhandhena, asekkhena samādhikkhandhena, asekkhena paññākkhandhena.
an3.143:2.4	Imehi kho, bhikkhave, tīhi dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānan”ti.
an3.143:2.5	Ekādasamaṁ.
an3.144:0.1	Aṅguttara Nikāya 3.144
an3.144:0.2	14. Yodhājīvavagga
an3.144:0.3	Dutiyamoranivāpasutta
an3.144:1.1	“Tīhi, bhikkhave, dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an3.144:1.2	Katamehi tīhi?
an3.144:1.3	Iddhipāṭihāriyena, ādesanāpāṭihāriyena, anusāsanīpāṭihāriyena—
an3.144:1.4	Imehi kho, bhikkhave, tīhi dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānan”ti.
an3.144:1.5	Dvādasamaṁ.
an3.145:0.1	Aṅguttara Nikāya 3.145
an3.145:0.2	14. Yodhājīvavagga
an3.145:0.3	Tatiyamoranivāpasutta
an3.145:1.1	“Tīhi, bhikkhave, dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an3.145:1.2	Katamehi tīhi?
an3.145:1.3	Sammādiṭṭhiyā, sammāñāṇena, sammāvimuttiyā—
an3.145:1.4	Imehi kho, bhikkhave, tīhi dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānan”ti.
an3.145:1.5	Terasamaṁ.
an3.145:1.6	Yodhājīvavaggo cuddasamo.
an3.145:2.0	Tassuddānaṁ
an3.145:2.1	Yodho parisamittañca,
an3.145:2.2	uppādā kesakambalo;
an3.145:2.3	Sampadā vuddhi tayo assā,
an3.145:2.4	tayo moranivāpinoti.
an3.146:0.1	Aṅguttara Nikāya 3.146
an3.146:0.2	15. Maṅgalavagga
an3.146:0.3	Akusalasutta
an3.146:1.1	“Tīhi, bhikkhave, dhammehi samannāgato yathābhataṁ nikkhitto evaṁ niraye.
an3.146:1.2	Katamehi tīhi?
an3.146:1.3	Akusalena kāyakammena, akusalena vacīkammena, akusalena manokammena—
an3.146:1.4	Imehi kho, bhikkhave, tīhi dhammehi samannāgato yathābhataṁ nikkhitto evaṁ niraye.
an3.146:2.1	Tīhi, bhikkhave, dhammehi samannāgato yathābhataṁ nikkhitto evaṁ sagge.
an3.146:2.2	Katamehi tīhi?
an3.146:2.3	Kusalena kāyakammena, kusalena vacīkammena, kusalena manokammena—
an3.146:2.4	Imehi kho, bhikkhave, tīhi dhammehi samannāgato yathābhataṁ nikkhitto evaṁ sagge”ti.
an3.146:2.5	Paṭhamaṁ.
an3.147:0.1	Aṅguttara Nikāya 3.147
an3.147:0.2	15. Maṅgalavagga
an3.147:0.3	Sāvajjasutta
an3.147:1.1	“Tīhi, bhikkhave, dhammehi samannāgato yathābhataṁ nikkhitto evaṁ niraye.
an3.147:1.2	Katamehi tīhi?
an3.147:1.3	Sāvajjena kāyakammena, sāvajjena vacīkammena, sāvajjena manokammena—
an3.147:1.4	Imehi kho, bhikkhave, tīhi dhammehi samannāgato yathābhataṁ nikkhitto evaṁ niraye.
an3.147:2.1	Tīhi, bhikkhave, dhammehi samannāgato yathābhataṁ nikkhitto evaṁ sagge.
an3.147:2.2	Katamehi tīhi?
an3.147:2.3	Anavajjena kāyakammena, anavajjena vacīkammena, anavajjena manokammena—
an3.147:2.4	imehi kho …pe… evaṁ sagge”ti.
an3.147:2.5	Dutiyaṁ.
an3.148:0.1	Aṅguttara Nikāya 3.148
an3.148:0.2	15. Maṅgalavagga
an3.148:0.3	Visamasutta
an3.148:1.1	“Tīhi, bhikkhave …pe…
an3.148:1.2	visamena kāyakammena, visamena vacīkammena, visamena manokammena—
an3.148:1.3	imehi kho …pe… evaṁ niraye.
an3.148:2.1	Tīhi, bhikkhave, dhammehi …pe…
an3.148:2.2	samena kāyakammena, samena vacīkammena, samena manokammena—
an3.148:2.3	imehi kho …pe… evaṁ sagge”ti.
an3.148:2.4	Tatiyaṁ.
an3.149:0.1	Aṅguttara Nikāya 3.149
an3.149:0.2	15. Maṅgalavagga
an3.149:0.3	Asucisutta
an3.149:1.1	“Tīhi, bhikkhave …pe…
an3.149:1.2	asucinā kāyakammena, asucinā vacīkammena, asucinā manokammena—
an3.149:1.3	imehi kho …pe… evaṁ niraye.
an3.149:2.1	Tīhi, bhikkhave …pe…
an3.149:2.2	sucinā kāyakammena, sucinā vacīkammena, sucinā manokammena—
an3.149:2.3	Imehi kho, bhikkhave, tīhi dhammehi samannāgato yathābhataṁ nikkhitto evaṁ sagge”ti.
an3.149:2.4	Catutthaṁ.
an3.150:0.1	Aṅguttara Nikāya 3.150
an3.150:0.2	15. Maṅgalavagga
an3.150:0.3	Paṭhamakhatasutta
an3.150:1.1	“Tīhi, bhikkhave, dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an3.150:1.2	Katamehi tīhi?
an3.150:1.3	Akusalena kāyakammena, akusalena vacīkammena, akusalena manokammena—
an3.150:1.4	Imehi kho, bhikkhave, tīhi dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an3.150:2.1	Tīhi, bhikkhave, dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an3.150:2.2	Katamehi tīhi?
an3.150:2.3	Kusalena kāyakammena, kusalena vacīkammena, kusalena manokammena …pe….
an3.150:2.4	Pañcamaṁ.
an3.151:0.1	Aṅguttara Nikāya 3.151
an3.151:0.2	15. Maṅgalavagga
an3.151:0.3	Dutiyakhatasutta
an3.151:1.1	“Tīhi, bhikkhave …pe…
an3.151:1.2	sāvajjena kāyakammena, sāvajjena vacīkammena, sāvajjena manokammena …pe….
an3.151:2.1	Tīhi, bhikkhave …pe…
an3.151:2.2	anavajjena kāyakammena, anavajjena vacīkammena, anavajjena manokammena …pe….
an3.151:2.3	Chaṭṭhaṁ.
an3.152:0.1	Aṅguttara Nikāya 3.152
an3.152:0.2	15. Maṅgalavagga
an3.152:0.3	Tatiyakhatasutta
an3.152:1.1	“Tīhi, bhikkhave …pe…
an3.152:1.2	visamena kāyakammena, visamena vacīkammena, visamena manokammena …pe….
an3.152:2.1	Tīhi, bhikkhave …pe…
an3.152:2.2	samena kāyakammena, samena vacīkammena, samena manokammena …pe….
an3.152:2.3	Sattamaṁ.
an3.153:0.1	Aṅguttara Nikāya 3.153
an3.153:0.2	15. Maṅgalavagga
an3.153:0.3	Catutthakhatasutta
an3.153:1.1	“Tīhi, bhikkhave …pe…
an3.153:1.2	asucinā kāyakammena, asucinā vacīkammena, asucinā manokammena …pe….
an3.153:2.1	Tīhi, bhikkhave …pe…
an3.153:2.2	sucinā kāyakammena, sucinā vacīkammena, sucinā manokammena—
an3.153:2.3	Imehi kho, bhikkhave, tīhi dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavatī”ti.
an3.153:2.4	Aṭṭhamaṁ.
an3.154:0.1	Aṅguttara Nikāya 3.154
an3.154:0.2	15. Maṅgalavagga
an3.154:0.3	Vandanāsutta
an3.154:1.1	“Tisso imā, bhikkhave, vandanā.
an3.154:1.2	Katamā tisso?
an3.154:1.3	Kāyena, vācāya, manasā—
an3.154:1.4	imā kho, bhikkhave, tisso vandanā”ti.
an3.154:1.5	Navamaṁ.
an3.155:0.1	Aṅguttara Nikāya 3.155
an3.155:0.2	15. Maṅgalavagga
an3.155:0.3	Pubbaṇhasutta
an3.155:1.1	“Ye, bhikkhave, sattā pubbaṇhasamayaṁ kāyena sucaritaṁ caranti, vācāya sucaritaṁ caranti, manasā sucaritaṁ caranti, supubbaṇho, bhikkhave, tesaṁ sattānaṁ.
an3.155:2.1	Ye, bhikkhave, sattā majjhanhikasamayaṁ kāyena sucaritaṁ caranti, vācāya sucaritaṁ caranti, manasā sucaritaṁ caranti, sumajjhanhiko, bhikkhave, tesaṁ sattānaṁ.
an3.155:3.1	Ye, bhikkhave, sattā sāyanhasamayaṁ kāyena sucaritaṁ caranti, vācāya sucaritaṁ caranti, manasā sucaritaṁ caranti, susāyanho, bhikkhave, tesaṁ sattānanti.
an3.155:4.1	Sunakkhattaṁ sumaṅgalaṁ,
an3.155:4.2	suppabhātaṁ suhuṭṭhitaṁ;
an3.155:4.3	Sukhaṇo sumuhutto ca,
an3.155:4.4	suyiṭṭhaṁ brahmacārisu.
an3.155:5.1	Padakkhiṇaṁ kāyakammaṁ,
an3.155:5.2	vācākammaṁ padakkhiṇaṁ;
an3.155:5.3	Padakkhiṇaṁ manokammaṁ,
an3.155:5.4	paṇīdhi te padakkhiṇe;
an3.155:5.5	Padakkhiṇāni katvāna,
an3.155:5.6	labhantatthe padakkhiṇe.
an3.155:6.1	Te atthaladdhā sukhitā,
an3.155:6.2	viruḷhā buddhasāsane;
an3.155:6.3	Arogā sukhitā hotha,
an3.155:6.4	saha sabbehi ñātibhī”ti.
an3.155:6.5	Dasamaṁ.
an3.155:6.6	Maṅgalavaggo pañcamo.
an3.155:7.0	Tassuddānaṁ
an3.155:7.1	Akusalañca sāvajjaṁ,
an3.155:7.2	visamāsucinā saha;
an3.155:7.3	Caturo khatā vandanā,
an3.155:7.4	pubbaṇhena ca te dasāti.
an3.155:7.5	Tatiyo paṇṇāsako samatto.
an3.156:0.1	Aṅguttara Nikāya 3
an3.156:0.2	16. Acelakavagga
an3.156:0.3	~
an3.156:1.1	“Tisso imā, bhikkhave, paṭipadā.
an3.156:1.2	Katamā tisso?
an3.156:1.3	Āgāḷhā paṭipadā, nijjhāmā paṭipadā, majjhimā paṭipadā.
an3.156:1.4	Katamā ca, bhikkhave, āgāḷhā paṭipadā?
an3.156:1.5	Idha, bhikkhave, ekacco evaṁvādī hoti evaṁdiṭṭhi:
an3.156:1.6	‘natthi kāmesu doso’ti.
an3.156:1.7	So kāmesu pātabyataṁ āpajjati.
an3.156:1.8	Ayaṁ vuccati, bhikkhave, āgāḷhā paṭipadā.
an3.156:2.1	Katamā ca, bhikkhave, nijjhāmā paṭipadā?
an3.156:2.2	Idha, bhikkhave, ekacco acelako hoti muttācāro, hatthāpalekhano, naehibhadantiko, natiṭṭhabhadantiko, nābhihaṭaṁ na uddissakataṁ na nimantanaṁ sādiyati.
an3.156:2.3	So na kumbhimukhā paṭiggaṇhāti, na kaḷopimukhā paṭiggaṇhāti na eḷakamantaraṁ na daṇḍamantaraṁ na musalamantaraṁ na dvinnaṁ bhuñjamānānaṁ na gabbhiniyā na pāyamānāya na purisantaragatāya na saṅkittīsu na yattha sā upaṭṭhito hoti na yattha makkhikā saṇḍasaṇḍacārinī na macchaṁ na maṁsaṁ na suraṁ na merayaṁ, na thusodakaṁ pivati.
an3.156:2.4	So ekāgāriko vā hoti ekālopiko, dvāgāriko vā hoti dvālopiko … sattāgāriko vā hoti sattālopiko;
an3.156:2.5	ekissāpi dattiyā yāpeti, dvīhipi dattīhi yāpeti … sattahipi dattīhi yāpeti;
an3.156:2.6	ekāhikampi āhāraṁ āhāreti, dvāhikampi āhāraṁ āhāreti … sattāhikampi āhāraṁ āhāreti—iti evarūpaṁ addhamāsikampi pariyāyabhattabhojanānuyogamanuyutto viharati.
an3.156:3.1	So sākabhakkhopi hoti, sāmākabhakkhopi hoti, nīvārabhakkhopi hoti, daddulabhakkhopi hoti, haṭabhakkhopi hoti, kaṇabhakkhopi hoti, ācāmabhakkhopi hoti, piññākabhakkhopi hoti, tiṇabhakkhopi hoti, gomayabhakkhopi hoti, vanamūlaphalāhāro yāpeti pavattaphalabhojī.
an3.156:4.1	So sāṇānipi dhāreti, masāṇānipi dhāreti, chavadussānipi dhāreti, paṁsukūlānipi dhāreti, tirīṭānipi dhāreti, ajinampi dhāreti, ajinakkhipampi dhāreti, kusacīrampi dhāreti, vākacīrampi dhāreti, phalakacīrampi dhāreti, kesakambalampi dhāreti, vāḷakambalampi dhāreti, ulūkapakkhikampi dhāreti,
an3.156:4.2	kesamassulocakopi hoti kesamassulocanānuyogamanuyutto,
an3.156:4.3	ubbhaṭṭhakopi hoti āsanapaṭikkhitto,
an3.156:4.4	ukkuṭikopi hoti ukkuṭikappadhānamanuyutto,
an3.156:4.5	kaṇṭakāpassayikopi hoti kaṇṭakāpassaye seyyaṁ kappeti,
an3.156:4.6	sāyatatiyakampi udakorohanānuyogamanuyutto viharati—
an3.156:4.7	iti evarūpaṁ anekavihitaṁ kāyassa ātāpanaparitāpanānuyogamanuyutto viharati.
an3.156:4.8	Ayaṁ vuccati, bhikkhave, nijjhāmā paṭipadā.
an3.156:5.1	Katamā ca, bhikkhave, majjhimā paṭipadā?
an3.156:5.2	Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ;
an3.156:5.3	vedanāsu …pe…
an3.156:5.4	citte …pe…
an3.156:5.5	dhammesu dhammānupassī viharati ātāpī sampajāno satimā vineyya loke abhijjhādomanassaṁ.
an3.156:5.6	Ayaṁ vuccati, bhikkhave, majjhimā paṭipadā.
an3.156:5.7	Imā kho, bhikkhave, tisso paṭipadāti.
an3.157:1.1	Tisso imā, bhikkhave, paṭipadā.
an3.157:1.2	Katamā tisso?
an3.157:1.3	Āgāḷhā paṭipadā, nijjhāmā paṭipadā, majjhimā paṭipadā.
an3.157:1.4	Katamā ca, bhikkhave, āgāḷhā paṭipadā …pe…
an3.157:1.5	ayaṁ vuccati, bhikkhave, āgāḷhā paṭipadā.
an3.157:2.1	Katamā ca, bhikkhave, nijjhāmā paṭipadā …pe…
an3.157:2.2	ayaṁ vuccati, bhikkhave, nijjhāmā paṭipadā.
an3.157:3.1	Katamā ca, bhikkhave, majjhimā paṭipadā?
an3.157:3.2	Idha, bhikkhave, bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an3.157:3.3	uppannānaṁ pāpakānaṁ akusalānaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati;
an3.157:3.4	anuppannānaṁ kusalānaṁ dhammānaṁ uppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an3.157:3.5	uppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati ….
an3.158:1.1	Chandasamādhipadhānasaṅkhārasamannāgataṁ iddhipādaṁ bhāveti
an3.158:1.2	vīriyasamādhi …pe…
an3.158:1.3	cittasamādhi …pe…
an3.158:1.4	vīmaṁsāsamādhipadhānasaṅkhārasamannāgataṁ iddhipādaṁ bhāveti …pe….
an3.159:1.1	Saddhindriyaṁ bhāveti …
an3.159:1.2	vīriyindriyaṁ bhāveti …
an3.159:1.3	satindriyaṁ bhāveti …
an3.159:1.4	samādhindriyaṁ bhāveti …
an3.159:1.5	paññindriyaṁ bhāveti …pe….
an3.160:1.1	Saddhābalaṁ bhāveti …
an3.160:1.2	vīriyabalaṁ bhāveti …
an3.160:1.3	satibalaṁ bhāveti …
an3.160:1.4	samādhibalaṁ bhāveti …
an3.160:1.5	paññābalaṁ bhāveti …pe….
an3.161:1.1	Satisambojjhaṅgaṁ bhāveti …
an3.161:1.2	dhammavicayasambojjhaṅgaṁ bhāveti …
an3.161:1.3	vīriyasambojjhaṅgaṁ bhāveti …
an3.161:1.4	pītisambojjhaṅgaṁ bhāveti …
an3.161:1.5	passaddhisambojjhaṅgaṁ bhāveti …
an3.161:1.6	samādhisambojjhaṅgaṁ bhāveti …
an3.161:1.7	upekkhāsambojjhaṅgaṁ bhāveti …pe….
an3.162:1.1	Sammādiṭṭhiṁ bhāveti …
an3.162:1.2	sammāsaṅkappaṁ bhāveti …
an3.162:1.3	sammāvācaṁ bhāveti …
an3.162:1.4	sammākammantaṁ bhāveti …
an3.162:1.5	sammāājīvaṁ bhāveti …
an3.162:1.6	sammāvāyāmaṁ bhāveti …
an3.162:1.7	sammāsatiṁ bhāveti …
an3.162:1.8	sammāsamādhiṁ bhāveti ….
an3.162:1.9	Ayaṁ vuccati, bhikkhave, majjhimā paṭipadā.
an3.162:1.10	Imā kho, bhikkhave, tisso paṭipadā”ti.
an3.162:1.11	Acelakavaggo chaṭṭho.
an3.162:2.0	Tassuddānaṁ
an3.162:2.1	Satipaṭṭhānaṁ sammappadhānaṁ,
an3.162:2.2	Iddhipādindriyena ca;
an3.162:2.3	Balaṁ bojjhaṅgo maggo ca,
an3.162:2.4	Paṭipadāya yojayeti.
an3.163:0.1	Aṅguttara Nikāya 3
an3.163:0.2	17. Kammapathapeyyāla
an3.163:0.3	~
an3.163:1.1	“Tīhi, bhikkhave, dhammehi samannāgato yathābhataṁ nikkhitto evaṁ niraye.
an3.163:1.2	Katamehi tīhi?
an3.163:1.3	Attanā ca pāṇātipātī hoti, parañca pāṇātipāte samādapeti, pāṇātipāte ca samanuñño hoti.
an3.163:1.4	Imehi kho, bhikkhave, tīhi dhammehi samannāgato yathābhataṁ nikkhitto evaṁ niraye.
an3.164:1.1	Tīhi, bhikkhave, dhammehi samannāgato yathābhataṁ nikkhitto evaṁ sagge.
an3.164:1.2	Katamehi tīhi?
an3.164:1.3	Attanā ca pāṇātipātā paṭivirato hoti, parañca pāṇātipātā veramaṇiyā samādapeti, pāṇātipātā veramaṇiyā ca samanuñño hoti …pe….
an3.165:1.1	Attanā ca adinnādāyī hoti, parañca adinnādāne samādapeti, adinnādāne ca samanuñño hoti …pe….
an3.166:1.1	Attanā ca adinnādānā paṭivirato hoti, parañca adinnādānā veramaṇiyā samādapeti, adinnādānā veramaṇiyā ca samanuñño hoti …pe….
an3.167:1.1	Attanā ca kāmesumicchācārī hoti, parañca kāmesumicchācāre samādapeti, kāmesumicchācāre ca samanuñño hoti …pe….
an3.168:1.1	Attanā ca kāmesumicchācārā paṭivirato hoti, parañca kāmesumicchācārā veramaṇiyā samādapeti, kāmesumicchācārā veramaṇiyā ca samanuñño hoti …pe….
an3.169:1.1	Attanā ca musāvādī hoti, parañca musāvāde samādapeti, musāvāde ca samanuñño hoti …pe….
an3.170:1.1	Attanā ca musāvādā paṭivirato hoti, parañca musāvādā veramaṇiyā samādapeti, musāvādā veramaṇiyā ca samanuñño hoti …pe….
an3.171:1.1	Attanā ca pisuṇavāco hoti, parañca pisuṇāya vācāya samādapeti, pisuṇāya vācāya ca samanuñño hoti …pe….
an3.172:1.1	Attanā ca pisuṇāya vācāya paṭivirato hoti, parañca pisuṇāya vācāya veramaṇiyā samādapeti, pisuṇāya vācāya veramaṇiyā ca samanuñño hoti …pe….
an3.173:1.1	Attanā ca pharusavāco hoti, parañca pharusāya vācāya samādapeti, pharusāya vācāya ca samanuñño hoti …pe….
an3.174:1.1	Attanā ca pharusāya vācāya paṭivirato hoti, parañca pharusāya vācāya veramaṇiyā samādapeti, pharusāya vācāya veramaṇiyā ca samanuñño hoti …pe….
an3.175:1.1	Attanā ca samphappalāpī hoti, parañca samphappalāpe samādapeti, samphappalāpe ca samanuñño hoti …pe….
an3.176:1.1	Attanā ca samphappalāpā paṭivirato hoti, parañca samphappalāpā veramaṇiyā samādapeti, samphappalāpā veramaṇiyā ca samanuñño hoti …pe….
an3.177:1.1	Attanā ca abhijjhālu hoti, parañca abhijjhāya samādapeti, abhijjhāya ca samanuñño hoti …pe….
an3.178:1.1	Attanā ca anabhijjhālu hoti, parañca anabhijjhāya samādapeti, anabhijjhāya ca samanuñño hoti …pe….
an3.179:1.1	Attanā ca byāpannacitto hoti, parañca byāpāde samādapeti, byāpāde ca samanuñño hoti …pe….
an3.180:1.1	Attanā ca abyāpannacitto hoti, parañca abyāpāde samādapeti, abyāpāde ca samanuñño hoti …pe….
an3.181:1.1	Attanā ca micchādiṭṭhiko hoti, parañca micchādiṭṭhiyā samādapeti, micchādiṭṭhiyā ca samanuñño hoti …pe….
an3.182:1.1	Attanā ca sammādiṭṭhiko hoti, parañca sammādiṭṭhiyā samādapeti, sammādiṭṭhiyā ca samanuñño hoti.
an3.182:1.2	Imehi kho, bhikkhave, tīhi dhammehi samannāgato yathābhataṁ nikkhitto evaṁ sagge”ti.
an3.182:1.3	Kammapathapeyyālaṁ niṭṭhitaṁ.
an3.182:2.0	Tassuddānaṁ
an3.182:2.1	Pāṇaṁ adinnamicchā ca,
an3.182:2.2	musāvādī ca pisuṇā;
an3.182:2.3	Pharusā samphappalāpo ca,
an3.182:2.4	abhijjhā byāpādadiṭṭhi ca;
an3.182:2.5	Kammapathesu peyyālaṁ,
an3.182:2.6	tikakena niyojayeti.
an3.183-352:0.1	Aṅguttara Nikāya 3
an3.183-352:0.2	18. Rāgapeyyāla
an3.183-352:0.3	~
an3.183-352:1.1	“Rāgassa, bhikkhave, abhiññāya tayo dhammā bhāvetabbā.
an3.183-352:1.2	Katame tayo?
an3.183-352:1.3	Suññato samādhi, animitto samādhi, appaṇihito samādhi—
an3.183-352:1.4	rāgassa, bhikkhave, abhiññāya ime tayo dhammā bhāvetabbā. (…)
an3.183-352:2.1	Rāgassa, bhikkhave, pariññāya …pe…
an3.183-352:2.2	parikkhayāya …
an3.183-352:2.3	pahānāya …
an3.183-352:2.4	khayāya …
an3.183-352:2.5	vayāya …
an3.183-352:2.6	virāgāya …
an3.183-352:2.7	nirodhāya …
an3.183-352:2.8	cāgāya …
an3.183-352:2.9	paṭinissaggāya ime tayo dhammā bhāvetabbā.
an3.183-352:3.1	Dosassa …
an3.183-352:3.2	mohassa …
an3.183-352:3.3	kodhassa …
an3.183-352:3.4	upanāhassa …
an3.183-352:3.5	makkhassa …
an3.183-352:3.6	paḷāsassa …
an3.183-352:3.7	issāya …
an3.183-352:3.8	macchariyassa …
an3.183-352:3.9	māyāya …
an3.183-352:3.10	sāṭheyyassa …
an3.183-352:3.11	thambhassa …
an3.183-352:3.12	sārambhassa …
an3.183-352:3.13	mānassa …
an3.183-352:3.14	atimānassa …
an3.183-352:3.15	madassa …
an3.183-352:3.16	pamādassa …
an3.183-352:3.17	abhiññāya …
an3.183-352:3.18	pariññāya …
an3.183-352:3.19	parikkhayāya …
an3.183-352:3.20	pahānāya …
an3.183-352:3.21	khayāya …
an3.183-352:3.22	vayāya …
an3.183-352:3.23	virāgāya …
an3.183-352:3.24	nirodhāya …
an3.183-352:3.25	cāgāya …
an3.183-352:3.26	paṭinissaggāya ime tayo dhammā bhāvetabbā”ti.
an3.183-352:4.1	Idamavoca bhagavā.
an3.183-352:4.2	Attamanā te bhikkhū bhagavato bhāsitaṁ abhinandunti.
an3.183-352:4.3	Rāgapeyyālaṁ niṭṭhitaṁ.
an3.183-352:5.0	Tassuddānaṁ
an3.183-352:5.1	Rāgaṁ dosañca mohañca,
an3.183-352:5.2	kodhūpanāhapañcamaṁ;
an3.183-352:5.3	Makkhapaḷāsaissā ca,
an3.183-352:5.4	maccharimāyāsāṭheyyā.
an3.183-352:6.1	Thambhasārambhamānañca,
an3.183-352:6.2	atimānamadassa ca;
an3.183-352:6.3	Pamādā sattarasa vuttā,
an3.183-352:6.4	rāgapeyyālanissitā.
an3.183-352:7.1	Ete opammayuttena,
an3.183-352:7.2	āpādena abhiññāya;
an3.183-352:7.3	Pariññāya parikkhayā,
an3.183-352:7.4	pahānakkhayabbayena;
an3.183-352:7.5	Virāganirodhacāgaṁ,
an3.183-352:7.6	paṭinissagge ime dasa.
an3.183-352:8.1	Suññato animitto ca,
an3.183-352:8.2	appaṇihito ca tayo;
an3.183-352:8.3	Samādhimūlakā peyyā—
an3.183-352:8.4	lesupi vavatthitā cāti.
an3.183-352:8.5	Tatiyo paṇṇāsako niṭṭhito.
an3.183-352:8.6	Tikanipātapāḷi niṭṭhitā.
an4.1:0.1	Aṅguttara Nikāya 4.1
an4.1:0.2	1. Bhaṇḍagāmavagga
an4.1:0.3	Anubuddhasutta
an4.1:1.1	Evaṁ me sutaṁ—
an4.1:1.2	ekaṁ samayaṁ bhagavā vajjīsu viharati bhaṇḍagāme.
an4.1:1.3	Tatra kho bhagavā bhikkhū āmantesi:
an4.1:1.4	“bhikkhavo”ti.
an4.1:1.5	“Bhadante”ti te bhikkhū bhagavato paccassosuṁ.
an4.1:1.6	Bhagavā etadavoca:
an4.1:2.1	“Catunnaṁ, bhikkhave, dhammānaṁ ananubodhā appaṭivedhā evamidaṁ dīghamaddhānaṁ sandhāvitaṁ saṁsaritaṁ mamañceva tumhākañca.
an4.1:2.2	Katamesaṁ catunnaṁ?
an4.1:2.3	Ariyassa, bhikkhave, sīlassa ananubodhā appaṭivedhā evamidaṁ dīghamaddhānaṁ sandhāvitaṁ saṁsaritaṁ mamañceva tumhākañca.
an4.1:2.4	Ariyassa, bhikkhave, samādhissa ananubodhā appaṭivedhā evamidaṁ dīghamaddhānaṁ sandhāvitaṁ saṁsaritaṁ mamañceva tumhākañca.
an4.1:2.5	Ariyāya, bhikkhave, paññāya ananubodhā appaṭivedhā evamidaṁ dīghamaddhānaṁ sandhāvitaṁ saṁsaritaṁ mamañceva tumhākañca.
an4.1:2.6	Ariyāya, bhikkhave, vimuttiyā ananubodhā appaṭivedhā evamidaṁ dīghamaddhānaṁ sandhāvitaṁ saṁsaritaṁ mamañceva tumhākañca.
an4.1:2.7	Tayidaṁ, bhikkhave, ariyaṁ sīlaṁ anubuddhaṁ paṭividdhaṁ, ariyo samādhi anubuddho paṭividdho, ariyā paññā anubuddhā paṭividdhā, ariyā vimutti anubuddhā paṭividdhā, ucchinnā bhavataṇhā, khīṇā bhavanetti, natthi dāni punabbhavo”ti.
an4.1:3.1	Idamavoca bhagavā.
an4.1:3.2	Idaṁ vatvāna sugato athāparaṁ etadavoca satthā:
an4.1:4.1	“Sīlaṁ samādhi paññā ca,
an4.1:4.2	vimutti ca anuttarā;
an4.1:4.3	Anubuddhā ime dhammā,
an4.1:4.4	gotamena yasassinā.
an4.1:5.1	Iti buddho abhiññāya,
an4.1:5.2	dhammamakkhāsi bhikkhunaṁ;
an4.1:5.3	Dukkhassantakaro satthā,
an4.1:5.4	cakkhumā parinibbuto”ti.
an4.1:5.5	Paṭhamaṁ.
an4.2:0.1	Aṅguttara Nikāya 4.2
an4.2:0.2	1. Bhaṇḍagāmavagga
an4.2:0.3	Papatitasutta
an4.2:1.1	“Catūhi, bhikkhave, dhammehi asamannāgato ‘imasmā dhammavinayā papatito’ti vuccati.
an4.2:1.2	Katamehi catūhi?
an4.2:1.3	Ariyena, bhikkhave, sīlena asamannāgato ‘imasmā dhammavinayā papatito’ti vuccati.
an4.2:1.4	Ariyena, bhikkhave, samādhinā asamannāgato ‘imasmā dhammavinayā papatito’ti vuccati.
an4.2:1.5	Ariyāya, bhikkhave, paññāya asamannāgato ‘imasmā dhammavinayā papatito’ti vuccati.
an4.2:1.6	Ariyāya, bhikkhave, vimuttiyā asamannāgato ‘imasmā dhammavinayā papatito’ti vuccati.
an4.2:1.7	Imehi kho, bhikkhave, catūhi dhammehi asamannāgato ‘imasmā dhammavinayā papatito’ti vuccati.
an4.2:2.1	Catūhi, bhikkhave, dhammehi samannāgato ‘imasmā dhammavinayā apapatito’ti vuccati.
an4.2:2.2	Katamehi catūhi?
an4.2:2.3	Ariyena, bhikkhave, sīlena samannāgato ‘imasmā dhammavinayā apapatito’ti vuccati.
an4.2:2.4	Ariyena, bhikkhave, samādhinā samannāgato ‘imasmā dhammavinayā apapatito’ti vuccati.
an4.2:2.5	Ariyāya, bhikkhave, paññāya samannāgato ‘imasmā dhammavinayā apapatito’ti vuccati.
an4.2:2.6	Ariyāya, bhikkhave, vimuttiyā samannāgato ‘imasmā dhammavinayā apapatito’ti vuccati.
an4.2:2.7	Imehi kho, bhikkhave, catūhi dhammehi samannāgato ‘imasmā dhammavinayā apapatito’ti vuccatīti.
an4.2:3.1	Cutā patanti patitā,
an4.2:3.2	giddhā ca punarāgatā;
an4.2:3.3	Kataṁ kiccaṁ rataṁ rammaṁ,
an4.2:3.4	sukhenānvāgataṁ sukhan”ti.
an4.2:3.5	Dutiyaṁ.
an4.3:0.1	Aṅguttara Nikāya 4.3
an4.3:0.2	1. Bhaṇḍagāmavagga
an4.3:0.3	Paṭhamakhatasutta
an4.3:1.1	“Catūhi, bhikkhave, dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an4.3:1.2	Katamehi catūhi?
an4.3:1.3	Ananuvicca apariyogāhetvā avaṇṇārahassa vaṇṇaṁ bhāsati,
an4.3:1.4	ananuvicca apariyogāhetvā vaṇṇārahassa avaṇṇaṁ bhāsati,
an4.3:1.5	ananuvicca apariyogāhetvā appasādanīye ṭhāne pasādaṁ upadaṁseti,
an4.3:1.6	ananuvicca apariyogāhetvā pasādanīye ṭhāne appasādaṁ upadaṁseti—
an4.3:1.7	imehi kho, bhikkhave, catūhi dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an4.3:2.1	Catūhi, bhikkhave, dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an4.3:2.2	Katamehi catūhi?
an4.3:2.3	Anuvicca pariyogāhetvā avaṇṇārahassa avaṇṇaṁ bhāsati,
an4.3:2.4	anuvicca pariyogāhetvā vaṇṇārahassa vaṇṇaṁ bhāsati,
an4.3:2.5	anuvicca pariyogāhetvā appasādanīye ṭhāne appasādaṁ upadaṁseti,
an4.3:2.6	anuvicca pariyogāhetvā pasādanīye ṭhāne pasādaṁ upadaṁseti—
an4.3:2.7	imehi kho, bhikkhave, catūhi dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavatīti.
an4.3:3.1	Yo nindiyaṁ pasaṁsati,
an4.3:3.2	Taṁ vā nindati yo pasaṁsiyo;
an4.3:3.3	Vicināti mukhena so kaliṁ,
an4.3:3.4	Kalinā tena sukhaṁ na vindati.
an4.3:4.1	Appamatto ayaṁ kali,
an4.3:4.2	Yo akkhesu dhanaparājayo;
an4.3:4.3	Sabbassāpi sahāpi attanā,
an4.3:4.4	Ayameva mahantataro kali;
an4.3:4.5	Yo sugatesu manaṁ padosaye.
an4.3:5.1	Sataṁ sahassānaṁ nirabbudānaṁ,
an4.3:5.2	Chattiṁsatī pañca ca abbudāni;
an4.3:5.3	Yamariyagarahī nirayaṁ upeti,
an4.3:5.4	Vācaṁ manañca paṇidhāya pāpakan”ti.
an4.3:5.5	Tatiyaṁ.
an4.4:0.1	Aṅguttara Nikāya 4.4
an4.4:0.2	1. Bhaṇḍagāmavagga
an4.4:0.3	Dutiyakhatasutta
an4.4:1.1	“Catūsu, bhikkhave, micchā paṭipajjamāno bālo abyatto asappuriso khataṁ upahataṁ attānaṁ pariharati sāvajjo ca hoti sānuvajjo ca viññūnaṁ, bahuñca apuññaṁ pasavati.
an4.4:1.2	Katamesu catūsu?
an4.4:1.3	Mātari, bhikkhave, micchā paṭipajjamāno bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an4.4:1.4	Pitari, bhikkhave, micchā paṭipajjamāno …pe… tathāgate, bhikkhave, micchā paṭipajjamāno …pe… tathāgatasāvake, bhikkhave, micchā paṭipajjamāno bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an4.4:1.5	Imesu kho, bhikkhave, catūsu micchā paṭipajjamāno bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo ca viññūnaṁ, bahuñca apuññaṁ pasavati.
an4.4:2.1	Catūsu, bhikkhave, sammā paṭipajjamāno paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an4.4:2.2	Katamesu catūsu?
an4.4:2.3	Mātari, bhikkhave, sammā paṭipajjamāno paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an4.4:2.4	Pitari, bhikkhave, sammā paṭipajjamāno …pe… tathāgate, bhikkhave, sammā paṭipajjamāno …pe… tathāgatasāvake, bhikkhave, sammā paṭipajjamāno paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavati.
an4.4:2.5	Imesu kho, bhikkhave, catūsu sammā paṭipajjamāno paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo ca viññūnaṁ, bahuñca puññaṁ pasavatīti.
an4.4:3.1	Mātari pitari cāpi,
an4.4:3.2	yo micchā paṭipajjati;
an4.4:3.3	Tathāgate vā sambuddhe,
an4.4:3.4	atha vā tassa sāvake;
an4.4:3.5	Bahuñca so pasavati,
an4.4:3.6	apuññaṁ tādiso naro.
an4.4:4.1	Tāya naṁ adhammacariyāya,
an4.4:4.2	Mātāpitūsu paṇḍitā;
an4.4:4.3	Idheva naṁ garahanti,
an4.4:4.4	Peccāpāyañca gacchati.
an4.4:5.1	Mātari pitari cāpi,
an4.4:5.2	yo sammā paṭipajjati;
an4.4:5.3	Tathāgate vā sambuddhe,
an4.4:5.4	atha vā tassa sāvake;
an4.4:5.5	Bahuñca so pasavati,
an4.4:5.6	puññaṁ etādiso naro.
an4.4:6.1	Tāya naṁ dhammacariyāya,
an4.4:6.2	mātāpitūsu paṇḍitā;
an4.4:6.3	Idheva naṁ pasaṁsanti,
an4.4:6.4	pecca sagge pamodatī”ti.
an4.4:6.5	Catutthaṁ.
an4.5:0.1	Aṅguttara Nikāya 4.5
an4.5:0.2	1. Bhaṇḍagāmavagga
an4.5:0.3	Anusotasutta
an4.5:1.1	“Cattārome, bhikkhave, puggalā santo saṁvijjamānā lokasmiṁ.
an4.5:1.2	Katame cattāro?
an4.5:1.3	Anusotagāmī puggalo, paṭisotagāmī puggalo, ṭhitatto puggalo, tiṇṇo pāraṅgato thale tiṭṭhati brāhmaṇo.
an4.5:1.4	Katamo ca, bhikkhave, anusotagāmī puggalo?
an4.5:1.5	Idha, bhikkhave, ekacco puggalo kāme ca paṭisevati, pāpañca kammaṁ karoti.
an4.5:1.6	Ayaṁ vuccati, bhikkhave, anusotagāmī puggalo.
an4.5:2.1	Katamo ca, bhikkhave, paṭisotagāmī puggalo?
an4.5:2.2	Idha, bhikkhave, ekacco puggalo kāme ca nappaṭisevati, pāpañca kammaṁ na karoti, sahāpi dukkhena sahāpi domanassena assumukhopi rudamāno paripuṇṇaṁ parisuddhaṁ brahmacariyaṁ carati.
an4.5:2.3	Ayaṁ vuccati, bhikkhave, paṭisotagāmī puggalo.
an4.5:3.1	Katamo ca, bhikkhave, ṭhitatto puggalo?
an4.5:3.2	Idha, bhikkhave, ekacco puggalo pañcannaṁ orambhāgiyānaṁ saṁyojanānaṁ parikkhayā opapātiko hoti, tattha parinibbāyī, anāvattidhammo tasmā lokā.
an4.5:3.3	Ayaṁ vuccati, bhikkhave, ṭhitatto puggalo.
an4.5:4.1	Katamo ca, bhikkhave, puggalo tiṇṇo pāraṅgato thale tiṭṭhati brāhmaṇo?
an4.5:4.2	Idha, bhikkhave, ekacco puggalo āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an4.5:4.3	Ayaṁ vuccati, bhikkhave, puggalo tiṇṇo pāraṅgato thale tiṭṭhati brāhmaṇo.
an4.5:4.4	Ime kho, bhikkhave, cattāro puggalā santo saṁvijjamānā lokasminti.
an4.5:5.1	Ye keci kāmesu asaññatā janā,
an4.5:5.2	Avītarāgā idha kāmabhogino;
an4.5:5.3	Punappunaṁ jātijarūpagāmi te,
an4.5:5.4	Taṇhādhipannā anusotagāmino.
an4.5:6.1	Tasmā hi dhīro idhupaṭṭhitassatī,
an4.5:6.2	Kāme ca pāpe ca asevamāno;
an4.5:6.3	Sahāpi dukkhena jaheyya kāme,
an4.5:6.4	Paṭisotagāmīti tamāhu puggalaṁ.
an4.5:7.1	Yo ve kilesāni pahāya pañca,
an4.5:7.2	Paripuṇṇasekho aparihānadhammo;
an4.5:7.3	Cetovasippatto samāhitindriyo,
an4.5:7.4	Sa ve ṭhitattoti naro pavuccati.
an4.5:8.1	Paroparā yassa samecca dhammā,
an4.5:8.2	Vidhūpitā atthagatā na santi;
an4.5:8.3	Sa ve muni vusitabrahmacariyo,
an4.5:8.4	Lokantagū pāragatoti vuccatī”ti.
an4.5:8.5	Pañcamaṁ.
an4.6:0.1	Aṅguttara Nikāya 4.6
an4.6:0.2	1. Bhaṇḍagāmavagga
an4.6:0.3	Appassutasutta
an4.6:1.1	“Cattārome, bhikkhave, puggalā santo saṁvijjamānā lokasmiṁ.
an4.6:1.2	Katame cattāro?
an4.6:1.3	Appassuto sutena anupapanno,
an4.6:1.4	appassuto sutena upapanno,
an4.6:1.5	bahussuto sutena anupapanno,
an4.6:1.6	bahussuto sutena upapanno.
an4.6:1.7	Kathañca, bhikkhave, puggalo appassuto hoti sutena anupapanno?
an4.6:1.8	Idha, bhikkhave, ekaccassa puggalassa appakaṁ sutaṁ hoti—
an4.6:1.9	suttaṁ geyyaṁ veyyākaraṇaṁ gāthā udānaṁ itivuttakaṁ jātakaṁ abbhutadhammaṁ vedallaṁ.
an4.6:1.10	So tassa appakassa sutassa na atthamaññāya dhammamaññāya dhammānudhammappaṭipanno hoti.
an4.6:1.11	Evaṁ kho, bhikkhave, puggalo appassuto hoti sutena anupapanno.
an4.6:2.1	Kathañca, bhikkhave, puggalo appassuto hoti sutena upapanno?
an4.6:2.2	Idha, bhikkhave, ekaccassa puggalassa appakaṁ sutaṁ hoti—
an4.6:2.3	suttaṁ geyyaṁ veyyākaraṇaṁ gāthā udānaṁ itivuttakaṁ jātakaṁ abbhutadhammaṁ vedallaṁ.
an4.6:2.4	So tassa appakassa sutassa atthamaññāya dhammamaññāya dhammānudhammappaṭipanno hoti.
an4.6:2.5	Evaṁ kho, bhikkhave, puggalo appassuto hoti sutena upapanno.
an4.6:3.1	Kathañca, bhikkhave, puggalo bahussuto hoti sutena anupapanno?
an4.6:3.2	Idha, bhikkhave, ekaccassa puggalassa bahukaṁ sutaṁ hoti—
an4.6:3.3	suttaṁ geyyaṁ veyyākaraṇaṁ gāthā udānaṁ itivuttakaṁ jātakaṁ abbhutadhammaṁ vedallaṁ.
an4.6:3.4	So tassa bahukassa sutassa na atthamaññāya dhammamaññāya dhammānudhammappaṭipanno hoti.
an4.6:3.5	Evaṁ kho, bhikkhave, puggalo bahussuto hoti sutena anupapanno.
an4.6:4.1	Kathañca, bhikkhave, puggalo bahussuto hoti sutena upapanno?
an4.6:4.2	Idha, bhikkhave, ekaccassa puggalassa bahukaṁ sutaṁ hoti—
an4.6:4.3	suttaṁ geyyaṁ veyyākaraṇaṁ gāthā udānaṁ itivuttakaṁ jātakaṁ abbhutadhammaṁ vedallaṁ.
an4.6:4.4	So tassa bahukassa sutassa atthamaññāya dhammamaññāya dhammānudhammappaṭipanno hoti.
an4.6:4.5	Evaṁ kho, bhikkhave, puggalo bahussuto hoti sutena upapanno.
an4.6:4.6	Ime kho, bhikkhave, cattāro puggalā santo saṁvijjamānā lokasminti.
an4.6:5.1	Appassutopi ce hoti,
an4.6:5.2	sīlesu asamāhito;
an4.6:5.3	Ubhayena naṁ garahanti,
an4.6:5.4	sīlato ca sutena ca.
an4.6:6.1	Appassutopi ce hoti,
an4.6:6.2	sīlesu susamāhito;
an4.6:6.3	Sīlato naṁ pasaṁsanti,
an4.6:6.4	tassa sampajjate sutaṁ.
an4.6:7.1	Bahussutopi ce hoti,
an4.6:7.2	sīlesu asamāhito;
an4.6:7.3	Sīlato naṁ garahanti,
an4.6:7.4	nāssa sampajjate sutaṁ.
an4.6:8.1	Bahussutopi ce hoti,
an4.6:8.2	sīlesu susamāhito;
an4.6:8.3	Ubhayena naṁ pasaṁsanti,
an4.6:8.4	sīlato ca sutena ca.
an4.6:9.1	Bahussutaṁ dhammadharaṁ,
an4.6:9.2	sappaññaṁ buddhasāvakaṁ;
an4.6:9.3	Nekkhaṁ jambonadasseva,
an4.6:9.4	ko taṁ ninditumarahati;
an4.6:9.5	Devāpi naṁ pasaṁsanti,
an4.6:9.6	brahmunāpi pasaṁsito”ti.
an4.6:9.7	Chaṭṭhaṁ.
an4.7:0.1	Aṅguttara Nikāya 4.7
an4.7:0.2	1. Bhaṇḍagāmavagga
an4.7:0.3	Sobhanasutta
an4.7:1.1	“Cattārome, bhikkhave, viyattā vinītā visāradā bahussutā dhammadharā dhammānudhammappaṭipannā saṅghaṁ sobhenti.
an4.7:1.2	Katame cattāro?
an4.7:1.3	Bhikkhu, bhikkhave, viyatto vinīto visārado bahussuto dhammadharo dhammānudhammappaṭipanno saṅghaṁ sobheti.
an4.7:1.4	Bhikkhunī, bhikkhave, viyattā vinītā visāradā bahussutā dhammadharā dhammānudhammappaṭipannā saṅghaṁ sobheti.
an4.7:1.5	Upāsako, bhikkhave, viyatto vinīto visārado bahussuto dhammadharo dhammānudhammappaṭipanno saṅghaṁ sobheti.
an4.7:1.6	Upāsikā, bhikkhave, viyattā vinītā visāradā bahussutā dhammadharā dhammānudhammappaṭipannā saṅghaṁ sobheti.
an4.7:1.7	Ime kho, bhikkhave, cattāro viyattā vinītā visāradā bahussutā dhammadharā dhammānudhammappaṭipannā saṅghaṁ sobhentīti.
an4.7:2.1	Yo hoti viyatto ca visārado ca,
an4.7:2.2	Bahussuto dhammadharo ca hoti;
an4.7:2.3	Dhammassa hoti anudhammacārī,
an4.7:2.4	Sa tādiso vuccati saṅghasobhano.
an4.7:3.1	Bhikkhu ca sīlasampanno,
an4.7:3.2	bhikkhunī ca bahussutā;
an4.7:3.3	Upāsako ca yo saddho,
an4.7:3.4	yā ca saddhā upāsikā;
an4.7:3.5	Ete kho saṅghaṁ sobhenti,
an4.7:3.6	ete hi saṅghasobhanā”ti.
an4.7:3.7	Sattamaṁ.
an4.8:0.1	Aṅguttara Nikāya 4.8
an4.8:0.2	1. Bhaṇḍagāmavagga
an4.8:0.3	Vesārajjasutta
an4.8:1.1	“Cattārimāni, bhikkhave, tathāgatassa vesārajjāni, yehi vesārajjehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an4.8:1.2	Katamāni cattāri?
an4.8:1.3	‘“Sammāsambuddhassa te paṭijānato ime dhammā anabhisambuddhā”ti tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessatī’ti nimittametaṁ, bhikkhave, na samanupassāmi.
an4.8:1.4	Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi.
an4.8:2.1	‘“Khīṇāsavassa te paṭijānato ime āsavā aparikkhīṇā”ti tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessatī’ti nimittametaṁ, bhikkhave, na samanupassāmi.
an4.8:2.2	Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi.
an4.8:3.1	‘“Ye kho pana te antarāyikā dhammā vuttā te paṭisevato nālaṁ antarāyāyā”ti tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessatī’ti nimittametaṁ, bhikkhave, na samanupassāmi.
an4.8:3.2	Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi.
an4.8:4.1	‘“Yassa kho pana te atthāya dhammo desito so na niyyāti takkarassa sammā dukkhakkhayāyā”ti tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessatī’ti nimittametaṁ, bhikkhave, na samanupassāmi.
an4.8:4.2	Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi.
an4.8:4.3	Imāni kho, bhikkhave, cattāri tathāgatassa vesārajjāni, yehi vesārajjehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavattetīti.
an4.8:5.1	Ye kecime vādapathā puthussitā,
an4.8:5.2	Yaṁnissitā samaṇabrāhmaṇā ca;
an4.8:5.3	Tathāgataṁ patvā na te bhavanti,
an4.8:5.4	Visāradaṁ vādapathātivattaṁ.
an4.8:6.1	Yo dhammacakkaṁ abhibhuyya kevalī,
an4.8:6.2	Pavattayī sabbabhūtānukampī;
an4.8:6.3	Taṁ tādisaṁ devamanussaseṭṭhaṁ,
an4.8:6.4	Sattā namassanti bhavassa pāragun”ti.
an4.8:6.5	Aṭṭhamaṁ.
an4.9:0.1	Aṅguttara Nikāya 4.9
an4.9:0.2	1. Bhaṇḍagāmavagga
an4.9:0.3	Taṇhuppādasutta
an4.9:1.1	“Cattārome, bhikkhave, taṇhuppādā yattha bhikkhuno taṇhā uppajjamānā uppajjati.
an4.9:1.2	Katame cattāro?
an4.9:1.3	Cīvarahetu vā, bhikkhave, bhikkhuno taṇhā uppajjamānā uppajjati;
an4.9:1.4	piṇḍapātahetu vā, bhikkhave, bhikkhuno taṇhā uppajjamānā uppajjati;
an4.9:1.5	senāsanahetu vā, bhikkhave, bhikkhuno taṇhā uppajjamānā uppajjati;
an4.9:1.6	itibhavābhavahetu vā, bhikkhave, bhikkhuno taṇhā uppajjamānā uppajjati.
an4.9:1.7	Ime kho, bhikkhave, cattāro taṇhuppādā yattha bhikkhuno taṇhā uppajjamānā uppajjatīti.
an4.9:2.1	Taṇhā dutiyo puriso,
an4.9:2.2	dīghamaddhāna saṁsaraṁ;
an4.9:2.3	Itthabhāvaññathābhāvaṁ,
an4.9:2.4	saṁsāraṁ nātivattati.
an4.9:3.1	Evamādīnavaṁ ñatvā,
an4.9:3.2	Taṇhaṁ dukkhassa sambhavaṁ;
an4.9:3.3	Vītataṇho anādāno,
an4.9:3.4	Sato bhikkhu paribbaje”ti.
an4.9:3.5	Navamaṁ.
an4.10:0.1	Aṅguttara Nikāya 4.10
an4.10:0.2	1. Bhaṇḍagāmavagga
an4.10:0.3	Yogasutta
an4.10:1.1	“Cattārome, bhikkhave, yogā.
an4.10:1.2	Katame cattāro?
an4.10:1.3	Kāmayogo, bhavayogo, diṭṭhiyogo, avijjāyogo.
an4.10:1.4	Katamo ca, bhikkhave, kāmayogo?
an4.10:1.5	Idha, bhikkhave, ekacco kāmānaṁ samudayañca atthaṅgamañca assādañca ādīnavañca nissaraṇañca yathābhūtaṁ nappajānāti.
an4.10:1.6	Tassa kāmānaṁ samudayañca atthaṅgamañca assādañca ādīnavañca nissaraṇañca yathābhūtaṁ appajānato yo kāmesu kāmarāgo kāmanandī kāmasneho kāmamucchā kāmapipāsā kāmapariḷāho kāmajjhosānaṁ kāmataṇhā sānuseti.
an4.10:1.7	Ayaṁ vuccati, bhikkhave, kāmayogo.
an4.10:1.8	Iti kāmayogo.
an4.10:2.1	Bhavayogo ca kathaṁ hoti?
an4.10:2.2	Idha, bhikkhave, ekacco bhavānaṁ samudayañca atthaṅgamañca assādañca ādīnavañca nissaraṇañca yathābhūtaṁ nappajānāti.
an4.10:2.3	Tassa bhavānaṁ samudayañca atthaṅgamañca assādañca ādīnavañca nissaraṇañca yathābhūtaṁ appajānato yo bhavesu bhavarāgo bhavanandī bhavasneho bhavamucchā bhavapipāsā bhavapariḷāho bhavajjhosānaṁ bhavataṇhā sānuseti.
an4.10:2.4	Ayaṁ vuccati, bhikkhave, bhavayogo.
an4.10:2.5	Iti kāmayogo bhavayogo.
an4.10:3.1	Diṭṭhiyogo ca kathaṁ hoti?
an4.10:3.2	Idha, bhikkhave, ekacco diṭṭhīnaṁ samudayañca atthaṅgamañca assādañca ādīnavañca nissaraṇañca yathābhūtaṁ nappajānāti.
an4.10:3.3	Tassa diṭṭhīnaṁ samudayañca atthaṅgamañca assādañca ādīnavañca nissaraṇañca yathābhūtaṁ appajānato yo diṭṭhīsu diṭṭhirāgo diṭṭhinandī diṭṭhisneho diṭṭhimucchā diṭṭhipipāsā diṭṭhipariḷāho diṭṭhijjhosānaṁ diṭṭhitaṇhā sānuseti.
an4.10:3.4	Ayaṁ vuccati, bhikkhave, diṭṭhiyogo.
an4.10:3.5	Iti kāmayogo bhavayogo diṭṭhiyogo.
an4.10:4.1	Avijjāyogo ca kathaṁ hoti?
an4.10:4.2	Idha, bhikkhave, ekacco channaṁ phassāyatanānaṁ samudayañca atthaṅgamañca assādañca ādīnavañca nissaraṇañca yathābhūtaṁ nappajānāti.
an4.10:4.3	Tassa channaṁ phassāyatanānaṁ samudayañca atthaṅgamañca assādañca ādīnavañca nissaraṇañca yathābhūtaṁ appajānato yā chasu phassāyatanesu avijjā aññāṇaṁ sānuseti.
an4.10:4.4	Ayaṁ vuccati, bhikkhave, avijjāyogo.
an4.10:4.5	Iti kāmayogo bhavayogo diṭṭhiyogo avijjāyogo,
an4.10:4.6	saṁyutto pāpakehi akusalehi dhammehi saṅkilesikehi ponobhavikehi sadarehi dukkhavipākehi āyatiṁ jātijarāmaraṇikehi. Tasmā ayogakkhemīti vuccati.
an4.10:4.7	Ime kho, bhikkhave, cattāro yogā.
an4.10:5.1	Cattārome, bhikkhave, visaṁyogā.
an4.10:5.2	Katame cattāro?
an4.10:5.3	Kāmayogavisaṁyogo, bhavayogavisaṁyogo, diṭṭhiyogavisaṁyogo, avijjāyogavisaṁyogo.
an4.10:5.4	Katamo ca, bhikkhave, kāmayogavisaṁyogo?
an4.10:5.5	Idha, bhikkhave, ekacco kāmānaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānāti.
an4.10:5.6	Tassa kāmānaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānato yo kāmesu kāmarāgo kāmanandī kāmasneho kāmamucchā kāmapipāsā kāmapariḷāho kāmajjhosānaṁ kāmataṇhā sā nānuseti.
an4.10:5.7	Ayaṁ vuccati, bhikkhave, kāmayogavisaṁyogo.
an4.10:5.8	Iti kāmayogavisaṁyogo.
an4.10:6.1	Bhavayogavisaṁyogo ca kathaṁ hoti?
an4.10:6.2	Idha, bhikkhave, ekacco bhavānaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānāti.
an4.10:6.3	Tassa bhavānaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānato yo bhavesu bhavarāgo bhavanandī bhavasneho bhavamucchā bhavapipāsā bhavapariḷāho bhavajjhosānaṁ bhavataṇhā sā nānuseti.
an4.10:6.4	Ayaṁ vuccati, bhikkhave, bhavayogavisaṁyogo.
an4.10:6.5	Iti kāmayogavisaṁyogo bhavayogavisaṁyogo.
an4.10:7.1	Diṭṭhiyogavisaṁyogo ca kathaṁ hoti?
an4.10:7.2	Idha, bhikkhave, ekacco diṭṭhīnaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānāti.
an4.10:7.3	Tassa diṭṭhīnaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānato yo diṭṭhīsu diṭṭhirāgo diṭṭhinandī diṭṭhisneho diṭṭhimucchā diṭṭhipipāsā diṭṭhipariḷāho diṭṭhijjhosānaṁ diṭṭhitaṇhā sā nānuseti.
an4.10:7.4	Ayaṁ vuccati, bhikkhave, diṭṭhiyogavisaṁyogo.
an4.10:7.5	Iti kāmayogavisaṁyogo bhavayogavisaṁyogo diṭṭhiyogavisaṁyogo.
an4.10:8.1	Avijjāyogavisaṁyogo ca kathaṁ hoti?
an4.10:8.2	Idha, bhikkhave, ekacco channaṁ phassāyatanānaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānāti.
an4.10:8.3	Tassa channaṁ phassāyatanānaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānato yā chasu phassāyatanesu avijjā aññāṇaṁ sā nānuseti.
an4.10:8.4	Ayaṁ vuccati, bhikkhave, avijjāyogavisaṁyogo.
an4.10:8.5	Iti kāmayogavisaṁyogo bhavayogavisaṁyogo diṭṭhiyogavisaṁyogo avijjāyogavisaṁyogo,
an4.10:8.6	visaṁyutto pāpakehi akusalehi dhammehi saṅkilesikehi ponobhavikehi sadarehi dukkhavipākehi āyatiṁ jātijarāmaraṇikehi. Tasmā yogakkhemīti vuccati.
an4.10:8.7	Ime kho, bhikkhave, cattāro visaṁyogāti.
an4.10:9.1	Kāmayogena saṁyuttā,
an4.10:9.2	bhavayogena cūbhayaṁ;
an4.10:9.3	Diṭṭhiyogena saṁyuttā,
an4.10:9.4	avijjāya purakkhatā.
an4.10:10.1	Sattā gacchanti saṁsāraṁ,
an4.10:10.2	jātimaraṇagāmino;
an4.10:10.3	Ye ca kāme pariññāya,
an4.10:10.4	bhavayogañca sabbaso.
an4.10:11.1	Diṭṭhiyogaṁ samūhacca,
an4.10:11.2	avijjañca virājayaṁ;
an4.10:11.3	Sabbayogavisaṁyuttā,
an4.10:11.4	te ve yogātigā munī”ti.
an4.10:11.5	Dasamaṁ.
an4.10:11.6	Bhaṇḍagāmavaggo paṭhamo.
an4.10:12.0	Tassuddānaṁ
an4.10:12.1	Anubuddhaṁ papatitaṁ dve,
an4.10:12.2	Khatā anusotapañcamaṁ;
an4.10:12.3	Appassuto ca sobhanaṁ,
an4.10:12.4	Vesārajjaṁ taṇhāyogena te dasāti.
an4.11:0.1	Aṅguttara Nikāya 4.11
an4.11:0.2	2. Caravagga
an4.11:0.3	Carasutta
an4.11:1.1	“Carato cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
an4.11:1.2	Tañce bhikkhu adhivāseti, nappajahati na vinodeti na byantīkaroti na anabhāvaṁ gameti,
an4.11:1.3	carampi, bhikkhave, bhikkhu evaṁbhūto ‘anātāpī anottāpī satataṁ samitaṁ kusīto hīnavīriyo’ti vuccati.
an4.11:2.1	Ṭhitassa cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
an4.11:2.2	Tañce bhikkhu adhivāseti, nappajahati na vinodeti na byantīkaroti na anabhāvaṁ gameti,
an4.11:2.3	ṭhitopi, bhikkhave, bhikkhu evaṁbhūto ‘anātāpī anottāpī satataṁ samitaṁ kusīto hīnavīriyo’ti vuccati.
an4.11:3.1	Nisinnassa cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
an4.11:3.2	Tañce bhikkhu adhivāseti, nappajahati na vinodeti na byantīkaroti na anabhāvaṁ gameti,
an4.11:3.3	nisinnopi, bhikkhave, bhikkhu evaṁbhūto ‘anātāpī anottāpī satataṁ samitaṁ kusīto hīnavīriyo’ti vuccati.
an4.11:4.1	Sayānassa cepi, bhikkhave, bhikkhuno jāgarassa uppajjati kāmavitakko vā byāpādavitakko vā vihiṁsāvitakko vā.
an4.11:4.2	Tañce bhikkhu adhivāseti, nappajahati na vinodeti na byantīkaroti na anabhāvaṁ gameti,
an4.11:4.3	sayānopi, bhikkhave, bhikkhu jāgaro evaṁbhūto ‘anātāpī anottāpī satataṁ samitaṁ kusīto hīnavīriyo’ti vuccati.
an4.11:5.1	Carato cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
an4.11:5.2	Tañce bhikkhu nādhivāseti, pajahati vinodeti byantīkaroti anabhāvaṁ gameti;
an4.11:5.3	carampi, bhikkhave, bhikkhu evaṁbhūto ‘ātāpī ottāpī satataṁ samitaṁ āraddhavīriyo pahitatto’ti vuccati.
an4.11:6.1	Ṭhitassa cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
an4.11:6.2	Tañce bhikkhu nādhivāseti, pajahati vinodeti byantīkaroti anabhāvaṁ gameti;
an4.11:6.3	ṭhitopi, bhikkhave, bhikkhu evaṁbhūto ‘ātāpī ottāpī satataṁ samitaṁ āraddhavīriyo pahitatto’ti vuccati.
an4.11:7.1	Nisinnassa cepi, bhikkhave, bhikkhuno uppajjati kāmavitakko vā byāpādavitakko vā vihiṁsāvitakko vā.
an4.11:7.2	Tañce bhikkhu nādhivāseti, pajahati vinodeti byantīkaroti anabhāvaṁ gameti;
an4.11:7.3	nisinnopi, bhikkhave, bhikkhu evaṁbhūto ‘ātāpī ottāpī satataṁ samitaṁ āraddhavīriyo pahitatto’ti vuccati.
an4.11:8.1	Sayānassa cepi, bhikkhave, bhikkhuno jāgarassa uppajjati kāmavitakko vā byāpādavitakko vā vihiṁsāvitakko vā.
an4.11:8.2	Tañce bhikkhu nādhivāseti, pajahati vinodeti byantīkaroti anabhāvaṁ gameti;
an4.11:8.3	sayānopi, bhikkhave, bhikkhu jāgaro evaṁbhūto ‘ātāpī ottāpī satataṁ samitaṁ āraddhavīriyo pahitatto’ti vuccatīti.
an4.11:9.1	Caraṁ vā yadi vā tiṭṭhaṁ,
an4.11:9.2	nisinno uda vā sayaṁ;
an4.11:9.3	Yo vitakkaṁ vitakketi,
an4.11:9.4	pāpakaṁ gehanissitaṁ.
an4.11:10.1	Kummaggappaṭipanno so,
an4.11:10.2	Mohaneyyesu mucchito;
an4.11:10.3	Abhabbo tādiso bhikkhu,
an4.11:10.4	Phuṭṭhuṁ sambodhimuttamaṁ.
an4.11:11.1	Yo ca caraṁ vā tiṭṭhaṁ vā,
an4.11:11.2	Nisinno uda vā sayaṁ;
an4.11:11.3	Vitakkaṁ samayitvāna,
an4.11:11.4	Vitakkūpasame rato;
an4.11:11.5	Bhabbo so tādiso bhikkhu,
an4.11:11.6	Phuṭṭhuṁ sambodhimuttaman”ti.
an4.11:11.7	Paṭhamaṁ.
an4.12:0.1	Aṅguttara Nikāya 4.12
an4.12:0.2	2. Caravagga
an4.12:0.3	Sīlasutta
an4.12:1.1	“Sampannasīlā, bhikkhave, viharatha sampannapātimokkhā, pātimokkhasaṁvarasaṁvutā viharatha ācāragocarasampannā, aṇumattesu vajjesu bhayadassāvino samādāya sikkhatha sikkhāpadesu.
an4.12:1.2	Sampannasīlānaṁ vo, bhikkhave, viharataṁ sampannapātimokkhānaṁ pātimokkhasaṁvarasaṁvutānaṁ viharataṁ ācāragocarasampannānaṁ aṇumattesu vajjesu bhayadassāvīnaṁ samādāya sikkhataṁ sikkhāpadesu, kimassa uttari karaṇīyaṁ?
an4.12:2.1	Carato cepi, bhikkhave, bhikkhuno abhijjhābyāpādo vigato hoti, thinamiddhaṁ … uddhaccakukkuccaṁ … vicikicchā pahīnā hoti, āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ, carampi, bhikkhave, bhikkhu evaṁbhūto ‘ātāpī ottāpī satataṁ samitaṁ āraddhavīriyo pahitatto’ti vuccati.
an4.12:3.1	Ṭhitassa cepi, bhikkhave, bhikkhuno abhijjhābyāpādo vigato hoti, thinamiddhaṁ … uddhaccakukkuccaṁ … vicikicchā pahīnā hoti, āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ, ṭhitopi, bhikkhave, bhikkhu evaṁbhūto ‘ātāpī ottāpī satataṁ samitaṁ āraddhavīriyo pahitatto’ti vuccati.
an4.12:4.1	Nisinnassa cepi, bhikkhave, bhikkhuno abhijjhābyāpādo vigato hoti, thinamiddhaṁ … uddhaccakukkuccaṁ … vicikicchā pahīnā hoti, āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ, nisinnopi, bhikkhave, bhikkhu evaṁbhūto ‘ātāpī ottāpī satataṁ samitaṁ āraddhavīriyo pahitatto’ti vuccati.
an4.12:5.1	Sayānassa cepi, bhikkhave, bhikkhuno jāgarassa abhijjhābyāpādo vigato hoti, thinamiddhaṁ … uddhaccakukkuccaṁ … vicikicchā pahīnā hoti, āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ, sayānopi, bhikkhave, bhikkhu jāgaro evaṁbhūto ‘ātāpī ottāpī satataṁ samitaṁ āraddhavīriyo pahitatto’ti vuccatīti.
an4.12:6.1	Yataṁ care yataṁ tiṭṭhe,
an4.12:6.2	Yataṁ acche yataṁ saye;
an4.12:6.3	Yataṁ samiñjaye bhikkhu,
an4.12:6.4	Yatamenaṁ pasāraye.
an4.12:7.1	Uddhaṁ tiriyaṁ apācīnaṁ,
an4.12:7.2	yāvatājagatogati;
an4.12:7.3	Samavekkhitā ca dhammānaṁ,
an4.12:7.4	khandhānaṁ udayabbayaṁ.
an4.12:8.1	Cetosamathasāmīciṁ,
an4.12:8.2	sikkhamānaṁ sadā sataṁ;
an4.12:8.3	Satataṁ pahitattoti,
an4.12:8.4	āhu bhikkhuṁ tathāvidhan”ti.
an4.12:8.5	Dutiyaṁ.
an4.13:0.1	Aṅguttara Nikāya 4.13
an4.13:0.2	2. Caravagga
an4.13:0.3	Padhānasutta
an4.13:1.1	“Cattārimāni, bhikkhave, sammappadhānāni.
an4.13:1.2	Katamāni cattāri?
an4.13:1.3	Idha, bhikkhave, bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an4.13:1.4	uppannānaṁ pāpakānaṁ akusalānaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati;
an4.13:1.5	anuppannānaṁ kusalānaṁ dhammānaṁ uppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an4.13:1.6	uppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati.
an4.13:1.7	Imāni kho, bhikkhave, cattāri sammappadhānānīti.
an4.13:2.1	Sammappadhānā māradheyyābhibhūtā,
an4.13:2.2	Te asitā jātimaraṇabhayassa pāragū;
an4.13:2.3	Te tusitā jetvā māraṁ savāhiniṁ te anejā,
an4.13:2.4	Sabbaṁ namucibalaṁ upātivattā te sukhitā”ti.
an4.13:2.5	Tatiyaṁ.
an4.14:0.1	Aṅguttara Nikāya 4.14
an4.14:0.2	2. Caravagga
an4.14:0.3	Saṁvarasutta
an4.14:1.1	“Cattārimāni, bhikkhave, padhānāni.
an4.14:1.2	Katamāni cattāri?
an4.14:1.3	Saṁvarappadhānaṁ, pahānappadhānaṁ, bhāvanāppadhānaṁ, anurakkhaṇāppadhānaṁ.
an4.14:1.4	Katamañca, bhikkhave, saṁvarappadhānaṁ?
an4.14:1.5	Idha, bhikkhave, bhikkhu cakkhunā rūpaṁ disvā na nimittaggāhī hoti nānubyañjanaggāhī.
an4.14:1.6	Yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati, rakkhati cakkhundriyaṁ, cakkhundriye saṁvaraṁ āpajjati.
an4.14:1.7	Sotena saddaṁ sutvā …
an4.14:1.8	ghānena gandhaṁ ghāyitvā …
an4.14:1.9	jivhāya rasaṁ sāyitvā …
an4.14:1.10	kāyena phoṭṭhabbaṁ phusitvā …
an4.14:1.11	manasā dhammaṁ viññāya na nimittaggāhī hoti nānubyañjanaggāhī,
an4.14:1.12	yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati, rakkhati manindriyaṁ, manindriye saṁvaraṁ āpajjati.
an4.14:1.13	Idaṁ vuccati, bhikkhave, saṁvarappadhānaṁ.
an4.14:2.1	Katamañca, bhikkhave, pahānappadhānaṁ?
an4.14:2.2	Idha, bhikkhave, bhikkhu uppannaṁ kāmavitakkaṁ nādhivāseti pajahati vinodeti byantīkaroti anabhāvaṁ gameti;
an4.14:2.3	uppannaṁ byāpādavitakkaṁ …pe…
an4.14:2.4	uppannaṁ vihiṁsāvitakkaṁ …pe…
an4.14:2.5	uppannuppanne pāpake akusale dhamme nādhivāseti pajahati vinodeti byantīkaroti anabhāvaṁ gameti.
an4.14:2.6	Idaṁ vuccati, bhikkhave, pahānappadhānaṁ.
an4.14:3.1	Katamañca, bhikkhave, bhāvanāppadhānaṁ?
an4.14:3.2	Idha, bhikkhave, bhikkhu satisambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ,
an4.14:3.3	dhammavicayasambojjhaṅgaṁ bhāveti …
an4.14:3.4	vīriyasambojjhaṅgaṁ bhāveti …
an4.14:3.5	pītisambojjhaṅgaṁ bhāveti …
an4.14:3.6	passaddhisambojjhaṅgaṁ bhāveti …
an4.14:3.7	samādhisambojjhaṅgaṁ bhāveti …
an4.14:3.8	upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
an4.14:3.9	Idaṁ vuccati, bhikkhave, bhāvanāppadhānaṁ.
an4.14:4.1	Katamañca, bhikkhave, anurakkhaṇāppadhānaṁ?
an4.14:4.2	Idha, bhikkhave, bhikkhu uppannaṁ bhaddakaṁ samādhinimittaṁ anurakkhati aṭṭhikasaññaṁ puḷavakasaññaṁ vinīlakasaññaṁ vicchiddakasaññaṁ uddhumātakasaññaṁ.
an4.14:4.3	Idaṁ vuccati, bhikkhave, anurakkhaṇāppadhānaṁ.
an4.14:4.4	Imāni kho, bhikkhave, cattāri padhānānīti.
an4.14:5.1	Saṁvaro ca pahānañca,
an4.14:5.2	bhāvanā anurakkhaṇā;
an4.14:5.3	Ete padhānā cattāro,
an4.14:5.4	desitādiccabandhunā;
an4.14:5.5	Yehi bhikkhu idhātāpī,
an4.14:5.6	khayaṁ dukkhassa pāpuṇe”ti.
an4.14:5.7	Catutthaṁ.
an4.15:0.1	Aṅguttara Nikāya 4.15
an4.15:0.2	2. Caravagga
an4.15:0.3	Paññattisutta
an4.15:1.1	“Catasso imā, bhikkhave, aggapaññattiyo.
an4.15:1.2	Katamā catasso?
an4.15:1.3	Etadaggaṁ, bhikkhave, attabhāvīnaṁ yadidaṁ—
an4.15:1.4	rāhu asurindo.
an4.15:1.5	Etadaggaṁ, bhikkhave, kāmabhogīnaṁ yadidaṁ—
an4.15:1.6	rājā mandhātā.
an4.15:1.7	Etadaggaṁ, bhikkhave, ādhipateyyānaṁ yadidaṁ—
an4.15:1.8	māro pāpimā.
an4.15:1.9	Sadevake, bhikkhave, loke samārake sabrahmake sassamaṇabrāhmaṇiyā pajāya sadevamanussāya tathāgato aggamakkhāyati arahaṁ sammāsambuddho.
an4.15:1.10	Imā kho, bhikkhave, catasso aggapaññattiyoti.
an4.15:2.1	Rāhuggaṁ attabhāvīnaṁ,
an4.15:2.2	mandhātā kāmabhoginaṁ;
an4.15:2.3	Māro ādhipateyyānaṁ,
an4.15:2.4	iddhiyā yasasā jalaṁ.
an4.15:3.1	Uddhaṁ tiriyaṁ apācīnaṁ,
an4.15:3.2	yāvatājagatogati;
an4.15:3.3	Sadevakassa lokassa,
an4.15:3.4	buddho aggo pavuccatī”ti.
an4.15:3.5	Pañcamaṁ.
an4.16:0.1	Aṅguttara Nikāya 4.16
an4.16:0.2	2. Caravagga
an4.16:0.3	Sokhummasutta
an4.16:1.1	“Cattārimāni, bhikkhave, sokhummāni.
an4.16:1.2	Katamāni cattāri?
an4.16:1.3	Idha, bhikkhave, bhikkhu rūpasokhummena samannāgato hoti paramena;
an4.16:1.4	tena ca rūpasokhummena aññaṁ rūpasokhummaṁ uttaritaraṁ vā paṇītataraṁ vā na samanupassati;
an4.16:1.5	tena ca rūpasokhummena aññaṁ rūpasokhummaṁ uttaritaraṁ vā paṇītataraṁ vā na pattheti.
an4.16:1.6	Vedanāsokhummena samannāgato hoti paramena;
an4.16:1.7	tena ca vedanāsokhummena aññaṁ vedanāsokhummaṁ uttaritaraṁ vā paṇītataraṁ vā na samanupassati;
an4.16:1.8	tena ca vedanāsokhummena aññaṁ vedanāsokhummaṁ uttaritaraṁ vā paṇītataraṁ vā na pattheti.
an4.16:1.9	Saññāsokhummena samannāgato hoti paramena;
an4.16:1.10	tena ca saññāsokhummena aññaṁ saññāsokhummaṁ uttaritaraṁ vā paṇītataraṁ vā na samanupassati;
an4.16:1.11	tena ca saññāsokhummena aññaṁ saññāsokhummaṁ uttaritaraṁ vā paṇītataraṁ vā na pattheti.
an4.16:1.12	Saṅkhārasokhummena samannāgato hoti paramena;
an4.16:1.13	tena ca saṅkhārasokhummena aññaṁ saṅkhārasokhummaṁ uttaritaraṁ vā paṇītataraṁ vā na samanupassati;
an4.16:1.14	tena ca saṅkhārasokhummena aññaṁ saṅkhārasokhummaṁ uttaritaraṁ vā paṇītataraṁ vā na pattheti.
an4.16:1.15	Imāni kho, bhikkhave, cattāri sokhummānīti.
an4.16:2.1	Rūpasokhummataṁ ñatvā,
an4.16:2.2	vedanānañca sambhavaṁ;
an4.16:2.3	Saññā yato samudeti,
an4.16:2.4	atthaṁ gacchati yattha ca;
an4.16:2.5	Saṅkhāre parato ñatvā,
an4.16:2.6	dukkhato no ca attato.
an4.16:3.1	Sa ve sammaddaso bhikkhu,
an4.16:3.2	santo santipade rato;
an4.16:3.3	Dhāreti antimaṁ dehaṁ,
an4.16:3.4	jetvā māraṁ savāhinin”ti.
an4.16:3.5	Chaṭṭhaṁ.
an4.17:0.1	Aṅguttara Nikāya 4.17
an4.17:0.2	2. Caravagga
an4.17:0.3	Paṭhamaagatisutta
an4.17:1.1	“Cattārimāni, bhikkhave, agatigamanāni.
an4.17:1.2	Katamāni cattāri?
an4.17:1.3	Chandāgatiṁ gacchati, dosāgatiṁ gacchati, mohāgatiṁ gacchati, bhayāgatiṁ gacchati—
an4.17:1.4	Imāni kho, bhikkhave, cattāri agatigamanānīti.
an4.17:2.1	Chandā dosā bhayā mohā,
an4.17:2.2	yo dhammaṁ ativattati;
an4.17:2.3	Nihīyati tassa yaso,
an4.17:2.4	kāḷapakkheva candimā”ti.
an4.17:2.5	Sattamaṁ.
an4.18:0.1	Aṅguttara Nikāya 4.18
an4.18:0.2	2. Caravagga
an4.18:0.3	Dutiyaagatisutta
an4.18:1.1	“Cattārimāni, bhikkhave, nāgatigamanāni.
an4.18:1.2	Katamāni cattāri?
an4.18:1.3	Na chandāgatiṁ gacchati, na dosāgatiṁ gacchati, na mohāgatiṁ gacchati, na bhayāgatiṁ gacchati—
an4.18:1.4	Imāni kho, bhikkhave, cattāri nāgatigamanānīti.
an4.18:2.1	Chandā dosā bhayā mohā,
an4.18:2.2	yo dhammaṁ nātivattati;
an4.18:2.3	Āpūrati tassa yaso,
an4.18:2.4	sukkapakkheva candimā”ti.
an4.18:2.5	Aṭṭhamaṁ.
an4.19:0.1	Aṅguttara Nikāya 4.19
an4.19:0.2	2. Caravagga
an4.19:0.3	Tatiyaagatisutta
an4.19:1.1	“Cattārimāni, bhikkhave, agatigamanāni.
an4.19:1.2	Katamāni cattāri?
an4.19:1.3	Chandāgatiṁ gacchati, dosāgatiṁ gacchati, mohāgatiṁ gacchati, bhayāgatiṁ gacchati—
an4.19:1.4	Imāni kho, bhikkhave, cattāri agatigamanāni.
an4.19:2.1	Cattārimāni, bhikkhave, nāgatigamanāni.
an4.19:2.2	Katamāni cattāri?
an4.19:2.3	Na chandāgatiṁ gacchati, na dosāgatiṁ gacchati, na mohāgatiṁ gacchati, na bhayāgatiṁ gacchati—
an4.19:2.4	Imāni kho, bhikkhave, cattāri nāgatigamanānīti.
an4.19:3.1	Chandā dosā bhayā mohā,
an4.19:3.2	yo dhammaṁ ativattati;
an4.19:3.3	Nihīyati tassa yaso,
an4.19:3.4	kāḷapakkheva candimā.
an4.19:4.1	Chandā dosā bhayā mohā,
an4.19:4.2	yo dhammaṁ nātivattati;
an4.19:4.3	Āpūrati tassa yaso,
an4.19:4.4	sukkapakkheva candimā”ti.
an4.19:4.5	Navamaṁ.
an4.20:0.1	Aṅguttara Nikāya 4.20
an4.20:0.2	2. Caravagga
an4.20:0.3	Bhattuddesakasutta
an4.20:1.1	“Catūhi, bhikkhave, dhammehi samannāgato bhattuddesako yathābhataṁ nikkhitto evaṁ niraye.
an4.20:1.2	Katamehi catūhi?
an4.20:1.3	Chandāgatiṁ gacchati, dosāgatiṁ gacchati, mohāgatiṁ gacchati, bhayāgatiṁ gacchati—
an4.20:1.4	imehi kho, bhikkhave, catūhi dhammehi samannāgato bhattuddesako yathābhataṁ nikkhitto evaṁ niraye.
an4.20:2.1	Catūhi, bhikkhave, dhammehi samannāgato bhattuddesako yathābhataṁ nikkhitto evaṁ sagge.
an4.20:2.2	Katamehi catūhi?
an4.20:2.3	Na chandāgatiṁ gacchati, na dosāgatiṁ gacchati, na mohāgatiṁ gacchati, na bhayāgatiṁ gacchati—
an4.20:2.4	imehi kho, bhikkhave, catūhi dhammehi samannāgato bhattuddesako yathābhataṁ nikkhitto evaṁ saggeti.
an4.20:3.1	Ye keci kāmesu asaññatā janā,
an4.20:3.2	Adhammikā honti adhammagāravā;
an4.20:3.3	Chandā dosā mohā ca bhayā gāmino,
an4.20:3.4	Parisākasaṭo ca panesa vuccati.
an4.20:4.1	Evañhi vuttaṁ samaṇena jānatā,
an4.20:4.2	Tasmā hi te sappurisā pasaṁsiyā;
an4.20:4.3	Dhamme ṭhitā ye na karonti pāpakaṁ,
an4.20:4.4	Na chandā na dosā na mohā na bhayā ca gāmino;
an4.20:4.5	Parisāya maṇḍo ca panesa vuccati,
an4.20:4.6	Evañhi vuttaṁ samaṇena jānatā”ti.
an4.20:4.7	Dasamaṁ.
an4.20:4.8	Caravaggo dutiyo.
an4.20:5.0	Tassuddānaṁ
an4.20:5.1	Caraṁ sīlaṁ padhānāni,
an4.20:5.2	saṁvaraṁ paññatti pañcamaṁ;
an4.20:5.3	Sokhummaṁ tayo agatī,
an4.20:5.4	bhattuddesena te dasāti.
an4.21:0.1	Aṅguttara Nikāya 4.21
an4.21:0.2	3. Uruvelavagga
an4.21:0.3	Paṭhamauruvelasutta
an4.21:1.1	Evaṁ me sutaṁ—
an4.21:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an4.21:1.3	Tatra kho bhagavā bhikkhū āmantesi:
an4.21:1.4	“bhikkhavo”ti.
an4.21:1.5	“Bhadante”ti te bhikkhū bhagavato paccassosuṁ.
an4.21:1.6	Bhagavā etadavoca:
an4.21:2.1	“Ekamidāhaṁ, bhikkhave, samayaṁ uruvelāyaṁ viharāmi najjā nerañjarāya tīre ajapālanigrodhe paṭhamābhisambuddho.
an4.21:2.2	Tassa mayhaṁ, bhikkhave, rahogatassa paṭisallīnassa evaṁ cetaso parivitakko udapādi:
an4.21:2.3	‘dukkhaṁ kho agāravo viharati appatisso.
an4.21:2.4	Kiṁ nu kho ahaṁ samaṇaṁ vā brāhmaṇaṁ vā sakkatvā garuṁ katvā upanissāya vihareyyan’ti?
an4.21:3.1	Tassa mayhaṁ, bhikkhave, etadahosi:
an4.21:3.2	‘aparipūrassa kho ahaṁ sīlakkhandhassa pāripūriyā aññaṁ samaṇaṁ vā brāhmaṇaṁ vā sakkatvā garuṁ katvā upanissāya vihareyyaṁ.
an4.21:3.3	Na kho panāhaṁ passāmi sadevake loke samārake sabrahmake sassamaṇabrāhmaṇiyā pajāya sadevamanussāya aññaṁ samaṇaṁ vā brāhmaṇaṁ vā attanā sīlasampannataraṁ, yamahaṁ sakkatvā garuṁ katvā upanissāya vihareyyaṁ.
an4.21:4.1	Aparipūrassa kho ahaṁ samādhikkhandhassa pāripūriyā aññaṁ samaṇaṁ vā brāhmaṇaṁ vā sakkatvā garuṁ katvā upanissāya vihareyyaṁ.
an4.21:4.2	Na kho panāhaṁ passāmi sadevake loke samārake sabrahmake sassamaṇabrāhmaṇiyā pajāya sadevamanussāya aññaṁ samaṇaṁ vā brāhmaṇaṁ vā attanā samādhisampannataraṁ, yamahaṁ sakkatvā garuṁ katvā upanissāya vihareyyaṁ.
an4.21:5.1	Aparipūrassa kho ahaṁ paññākkhandhassa pāripūriyā aññaṁ samaṇaṁ vā brāhmaṇaṁ vā sakkatvā garuṁ katvā upanissāya vihareyyaṁ.
an4.21:5.2	Na kho panāhaṁ passāmi sadevake loke samārake sabrahmake sassamaṇabrāhmaṇiyā pajāya sadevamanussāya aññaṁ samaṇaṁ vā brāhmaṇaṁ vā attanā paññāsampannataraṁ, yamahaṁ sakkatvā garuṁ katvā upanissāya vihareyyaṁ.
an4.21:6.1	Aparipūrassa kho ahaṁ vimuttikkhandhassa pāripūriyā aññaṁ samaṇaṁ vā brāhmaṇaṁ vā sakkatvā garuṁ katvā upanissāya vihareyyaṁ.
an4.21:6.2	Na kho panāhaṁ passāmi sadevake loke samārake sabrahmake sassamaṇabrāhmaṇiyā pajāya sadevamanussāya aññaṁ samaṇaṁ vā brāhmaṇaṁ vā attanā vimuttisampannataraṁ, yamahaṁ sakkatvā garuṁ katvā upanissāya vihareyyan’ti.
an4.21:7.1	Tassa mayhaṁ, bhikkhave, etadahosi:
an4.21:7.2	‘yannūnāhaṁ yvāyaṁ dhammo mayā abhisambuddho tameva dhammaṁ sakkatvā garuṁ katvā upanissāya vihareyyan’ti.
an4.21:8.1	Atha kho, bhikkhave, brahmā sahampati mama cetasā cetoparivitakkamaññāya—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—brahmaloke antarahito mama purato pāturahosi.
an4.21:8.2	Atha kho, bhikkhave, brahmā sahampati ekaṁsaṁ uttarāsaṅgaṁ karitvā dakkhiṇaṁ jāṇumaṇḍalaṁ pathaviyaṁ nihantvā yenāhaṁ tenañjaliṁ paṇāmetvā maṁ etadavoca:
an4.21:8.3	‘evametaṁ, bhagavā, evametaṁ, sugata.
an4.21:8.4	Yepi te, bhante, ahesuṁ atītamaddhānaṁ arahanto sammāsambuddhā tepi bhagavanto dhammaṁyeva sakkatvā garuṁ katvā upanissāya vihariṁsu;
an4.21:8.5	yepi te, bhante, bhavissanti anāgatamaddhānaṁ arahanto sammāsambuddhā tepi bhagavanto dhammaṁyeva sakkatvā garuṁ katvā upanissāya viharissanti;
an4.21:8.6	bhagavāpi, bhante, etarahi arahaṁ sammāsambuddho dhammaṁyeva sakkatvā garuṁ katvā upanissāya viharatū’ti.
an4.21:8.7	Idamavoca brahmā sahampati.
an4.21:8.8	Idaṁ vatvā athāparaṁ etadavoca:
an4.21:9.1	‘Ye ca atītā sambuddhā,
an4.21:9.2	ye ca buddhā anāgatā;
an4.21:9.3	Yo cetarahi sambuddho,
an4.21:9.4	bahūnaṁ sokanāsano.
an4.21:10.1	Sabbe saddhammagaruno,
an4.21:10.2	vihaṁsu viharanti ca;
an4.21:10.3	Athopi viharissanti,
an4.21:10.4	esā buddhāna dhammatā.
an4.21:11.1	Tasmā hi attakāmena,
an4.21:11.2	mahattamabhikaṅkhatā;
an4.21:11.3	Saddhammo garukātabbo,
an4.21:11.4	saraṁ buddhāna sāsanan’ti.
an4.21:12.1	Idamavoca, bhikkhave, brahmā sahampati.
an4.21:12.2	Idaṁ vatvā maṁ abhivādetvā padakkhiṇaṁ katvā tatthevantaradhāyi.
an4.21:12.3	Atha khvāhaṁ, bhikkhave, brahmuno ca ajjhesanaṁ viditvā attano ca patirūpaṁ yvāyaṁ dhammo mayā abhisambuddho tameva dhammaṁ sakkatvā garuṁ katvā upanissāya vihāsiṁ.
an4.21:12.4	Yato ca kho, bhikkhave, saṅghopi mahattena samannāgato, atha me saṅghepi gāravo”ti.
an4.21:12.5	Paṭhamaṁ.
an4.22:0.1	Aṅguttara Nikāya 4.22
an4.22:0.2	3. Uruvelavagga
an4.22:0.3	Dutiyauruvelasutta
an4.22:1.1	“Ekamidāhaṁ, bhikkhave, samayaṁ uruvelāyaṁ viharāmi najjā nerañjarāya tīre ajapālanigrodhe paṭhamābhisambuddho.
an4.22:1.2	Atha kho, bhikkhave, sambahulā brāhmaṇā jiṇṇā vuddhā mahallakā addhagatā vayoanuppattā yenāhaṁ tenupasaṅkamiṁsu; upasaṅkamitvā mayā saddhiṁ sammodiṁsu.
an4.22:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho, bhikkhave, te brāhmaṇā maṁ etadavocuṁ:
an4.22:1.4	‘sutaṁ netaṁ, bho gotama:
an4.22:1.5	“na samaṇo gotamo brāhmaṇe jiṇṇe vuddhe mahallake addhagate vayoanuppatte abhivādeti vā paccuṭṭheti vā āsanena vā nimantetī”ti.
an4.22:1.6	Tayidaṁ, bho gotama, tatheva.
an4.22:1.7	Na hi bhavaṁ gotamo brāhmaṇe jiṇṇe vuddhe mahallake addhagate vayoanuppatte abhivādeti vā paccuṭṭheti vā āsanena vā nimanteti.
an4.22:1.8	Tayidaṁ, bho gotama, na sampannamevā’ti.
an4.22:2.1	Tassa mayhaṁ, bhikkhave, etadahosi:
an4.22:2.2	‘nayime āyasmanto jānanti theraṁ vā therakaraṇe vā dhamme’ti.
an4.22:2.3	Vuddho cepi, bhikkhave, hoti āsītiko vā nāvutiko vā vassasatiko vā jātiyā.
an4.22:2.4	So ca hoti akālavādī abhūtavādī anatthavādī adhammavādī avinayavādī, anidhānavatiṁ vācaṁ bhāsitā akālena anapadesaṁ apariyantavatiṁ anatthasaṁhitaṁ.
an4.22:2.5	Atha kho so ‘bālo thero’tveva saṅkhaṁ gacchati.
an4.22:3.1	Daharo cepi, bhikkhave, hoti yuvā susukāḷakeso bhadrena yobbanena samannāgato paṭhamena vayasā.
an4.22:3.2	So ca hoti kālavādī bhūtavādī atthavādī dhammavādī vinayavādī nidhānavatiṁ vācaṁ bhāsitā kālena sāpadesaṁ pariyantavatiṁ atthasaṁhitaṁ.
an4.22:3.3	Atha kho so ‘paṇḍito thero’tveva saṅkhaṁ gacchati.
an4.22:4.1	Cattārome, bhikkhave, therakaraṇā dhammā.
an4.22:4.2	Katame cattāro?
an4.22:4.3	Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu
an4.22:4.4	Bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā, diṭṭhiyā suppaṭividdhā.
an4.22:4.5	Catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an4.22:4.6	Āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an4.22:4.7	Ime kho, bhikkhave, cattāro therakaraṇā dhammāti.
an4.22:5.1	Yo uddhatena cittena,
an4.22:5.2	samphañca bahu bhāsati;
an4.22:5.3	Asamāhitasaṅkappo,
an4.22:5.4	asaddhammarato mago;
an4.22:5.5	Ārā so thāvareyyamhā,
an4.22:5.6	pāpadiṭṭhi anādaro.
an4.22:6.1	Yo ca sīlena sampanno,
an4.22:6.2	sutavā paṭibhānavā;
an4.22:6.3	Saññato dhīro dhammesu,
an4.22:6.4	paññāyatthaṁ vipassati.
an4.22:7.1	Pāragū sabbadhammānaṁ,
an4.22:7.2	akhilo paṭibhānavā;
an4.22:7.3	Pahīnajātimaraṇo,
an4.22:7.4	brahmacariyassa kevalī.
an4.22:8.1	Tamahaṁ vadāmi theroti,
an4.22:8.2	yassa no santi āsavā;
an4.22:8.3	Āsavānaṁ khayā bhikkhu,
an4.22:8.4	so theroti pavuccatī”ti.
an4.22:8.5	Dutiyaṁ.
an4.23:0.1	Aṅguttara Nikāya 4.23
an4.23:0.2	3. Uruvelavagga
an4.23:0.3	Lokasutta
an4.23:1.1	“Loko, bhikkhave, tathāgatena abhisambuddho.
an4.23:1.2	Lokasmā tathāgato visaṁyutto.
an4.23:1.3	Lokasamudayo, bhikkhave, tathāgatena abhisambuddho.
an4.23:1.4	Lokasamudayo tathāgatassa pahīno.
an4.23:1.5	Lokanirodho, bhikkhave, tathāgatena abhisambuddho.
an4.23:1.6	Lokanirodho tathāgatassa sacchikato.
an4.23:1.7	Lokanirodhagāminī paṭipadā, bhikkhave, tathāgatena abhisambuddhā.
an4.23:1.8	Lokanirodhagāminī paṭipadā tathāgatassa bhāvitā.
an4.23:2.1	Yaṁ, bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, sabbaṁ taṁ tathāgatena abhisambuddhaṁ.
an4.23:2.2	Tasmā ‘tathāgato’ti vuccati.
an4.23:3.1	Yañca, bhikkhave, rattiṁ tathāgato anuttaraṁ sammāsambodhiṁ abhisambujjhati yañca rattiṁ anupādisesāya nibbānadhātuyā parinibbāyati, yaṁ etasmiṁ antare bhāsati lapati niddisati sabbaṁ taṁ tatheva hoti, no aññathā.
an4.23:3.2	Tasmā ‘tathāgato’ti vuccati.
an4.23:4.1	Yathāvādī, bhikkhave, tathāgato tathākārī, yathākārī tathāvādī.
an4.23:4.2	Iti yathāvādī tathākārī, yathākārī tathāvādī.
an4.23:4.3	Tasmā ‘tathāgato’ti vuccati.
an4.23:5.1	Sadevake, bhikkhave, loke samārake sabrahmake sassamaṇabrāhmaṇiyā pajāya sadevamanussāya tathāgato abhibhū anabhibhūto aññadatthu daso vasavattī.
an4.23:5.2	Tasmā ‘tathāgato’ti vuccati.
an4.23:6.1	Sabbaṁ lokaṁ abhiññāya,
an4.23:6.2	sabbaṁ loke yathātathaṁ;
an4.23:6.3	Sabbaṁ lokaṁ visaṁyutto,
an4.23:6.4	sabbaloke anūpayo.
an4.23:7.1	Sa ve sabbābhibhū dhīro,
an4.23:7.2	sabbaganthappamocano;
an4.23:7.3	Phuṭṭha’ssa paramā santi,
an4.23:7.4	nibbānaṁ akutobhayaṁ.
an4.23:8.1	Esa khīṇāsavo buddho,
an4.23:8.2	anīgho chinnasaṁsayo;
an4.23:8.3	Sabbakammakkhayaṁ patto,
an4.23:8.4	vimutto upadhisaṅkhaye.
an4.23:9.1	Esa so bhagavā buddho,
an4.23:9.2	esa sīho anuttaro;
an4.23:9.3	Sadevakassa lokassa,
an4.23:9.4	brahmacakkaṁ pavattayī.
an4.23:10.1	Iti devā manussā ca,
an4.23:10.2	ye buddhaṁ saraṇaṁ gatā;
an4.23:10.3	Saṅgamma taṁ namassanti,
an4.23:10.4	mahantaṁ vītasāradaṁ.
an4.23:11.1	Danto damayataṁ seṭṭho,
an4.23:11.2	santo samayataṁ isi;
an4.23:11.3	Mutto mocayataṁ aggo,
an4.23:11.4	tiṇṇo tārayataṁ varo.
an4.23:12.1	Iti hetaṁ namassanti,
an4.23:12.2	mahantaṁ vītasāradaṁ;
an4.23:12.3	Sadevakasmiṁ lokasmiṁ,
an4.23:12.4	natthi me paṭipuggalo”ti.
an4.23:12.5	Tatiyaṁ.
an4.24:0.1	Aṅguttara Nikāya 4.24
an4.24:0.2	3. Uruvelavagga
an4.24:0.3	Kāḷakārāmasutta
an4.24:1.1	Ekaṁ samayaṁ bhagavā sākete viharati kāḷakārāme.
an4.24:1.2	Tatra kho bhagavā bhikkhū āmantesi:
an4.24:1.3	“bhikkhavo”ti.
an4.24:1.4	“Bhadante”ti te bhikkhū bhagavato paccassosuṁ.
an4.24:1.5	Bhagavā etadavoca—
an4.24:2.1	Yaṁ, bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tamahaṁ jānāmi.
an4.24:3.1	Yaṁ, bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tamahaṁ abbhaññāsiṁ.
an4.24:3.2	Taṁ tathāgatassa viditaṁ, taṁ tathāgato na upaṭṭhāsi.
an4.24:4.1	Yaṁ, bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tamahaṁ na jānāmīti vadeyyaṁ, taṁ mamassa musā.
an4.24:5.1	Yaṁ, bhikkhave …pe… tamahaṁ jānāmi ca na ca jānāmīti vadeyyaṁ, tampassa tādisameva.
an4.24:6.1	Yaṁ, bhikkhave …pe… tamahaṁ neva jānāmi na na jānāmīti vadeyyaṁ, taṁ mamassa kali.
an4.24:7.1	Iti kho, bhikkhave, tathāgato daṭṭhā daṭṭhabbaṁ, diṭṭhaṁ na maññati, adiṭṭhaṁ na maññati, daṭṭhabbaṁ na maññati, daṭṭhāraṁ na maññati;
an4.24:7.2	sutvā sotabbaṁ, sutaṁ na maññati, asutaṁ na maññati, sotabbaṁ na maññati, sotāraṁ na maññati;
an4.24:7.3	mutvā motabbaṁ, mutaṁ na maññati, amutaṁ na maññati, motabbaṁ na maññati, motāraṁ na maññati;
an4.24:7.4	viññatvā viññātabbaṁ, viññātaṁ na maññati, aviññātaṁ na maññati, viññātabbaṁ na maññati, viññātāraṁ na maññati.
an4.24:7.5	Iti kho, bhikkhave, tathāgato diṭṭhasutamutaviññātabbesu dhammesu tādīyeva tādī.
an4.24:7.6	‘Tamhā ca pana tādimhā añño tādī uttaritaro vā paṇītataro vā natthī’ti vadāmīti.
an4.24:8.1	Yaṁ kiñci diṭṭhaṁva sutaṁ mutaṁ vā,
an4.24:8.2	Ajjhositaṁ saccamutaṁ paresaṁ;
an4.24:8.3	Na tesu tādī sayasaṁvutesu,
an4.24:8.4	Saccaṁ musā vāpi paraṁ daheyya.
an4.24:9.1	Etañca sallaṁ paṭikacca disvā,
an4.24:9.2	Ajjhositā yattha pajā visattā;
an4.24:9.3	Jānāmi passāmi tatheva etaṁ,
an4.24:9.4	Ajjhositaṁ natthi tathāgatānan”ti.
an4.24:9.5	Catutthaṁ.
an4.25:0.1	Aṅguttara Nikāya 4.25
an4.25:0.2	3. Uruvelavagga
an4.25:0.3	Brahmacariyasutta
an4.25:1.1	“Nayidaṁ, bhikkhave, brahmacariyaṁ vussati janakuhanatthaṁ, na janalapanatthaṁ, na lābhasakkārasilokānisaṁsatthaṁ, na itivādappamokkhānisaṁsatthaṁ, na ‘iti maṁ jano jānātū’ti.
an4.25:1.2	Atha kho idaṁ, bhikkhave, brahmacariyaṁ vussati saṁvaratthaṁ pahānatthaṁ virāgatthaṁ nirodhatthanti.
an4.25:2.1	Saṁvaratthaṁ pahānatthaṁ,
an4.25:2.2	brahmacariyaṁ anītihaṁ;
an4.25:2.3	Adesayi so bhagavā,
an4.25:2.4	nibbānogadhagāminaṁ;
an4.25:2.5	Esa maggo mahantehi,
an4.25:2.6	anuyāto mahesibhi.
an4.25:3.1	Ye ca taṁ paṭipajjanti,
an4.25:3.2	yathā buddhena desitaṁ;
an4.25:3.3	Dukkhassantaṁ karissanti,
an4.25:3.4	satthusāsanakārino”ti.
an4.25:3.5	Pañcamaṁ.
an4.26:0.1	Aṅguttara Nikāya 4.26
an4.26:0.2	3. Uruvelavagga
an4.26:0.3	Kuhasutta
an4.26:1.1	“Ye te, bhikkhave, bhikkhū kuhā thaddhā lapā siṅgī unnaḷā asamāhitā, na me te, bhikkhave, bhikkhū māmakā.
an4.26:1.2	Apagatā ca te, bhikkhave, bhikkhū imasmā dhammavinayā, na ca te imasmiṁ dhammavinaye vuddhiṁ viruḷhiṁ vepullaṁ āpajjanti.
an4.26:1.3	Ye ca kho te, bhikkhave, bhikkhū nikkuhā nillapā dhīrā atthaddhā susamāhitā, te kho me, bhikkhave, bhikkhū māmakā.
an4.26:1.4	Anapagatā ca te, bhikkhave, bhikkhū imasmā dhammavinayā. Te ca imasmiṁ dhammavinaye vuddhiṁ viruḷhiṁ vepullaṁ āpajjantīti.
an4.26:2.1	Kuhā thaddhā lapā siṅgī,
an4.26:2.2	unnaḷā asamāhitā;
an4.26:2.3	Na te dhamme virūhanti,
an4.26:2.4	sammāsambuddhadesite.
an4.26:3.1	Nikkuhā nillapā dhīrā,
an4.26:3.2	atthaddhā susamāhitā;
an4.26:3.3	Te ve dhamme virūhanti,
an4.26:3.4	sammāsambuddhadesite”ti.
an4.26:3.5	Chaṭṭhaṁ.
an4.27:0.1	Aṅguttara Nikāya 4.27
an4.27:0.2	3. Uruvelavagga
an4.27:0.3	Santuṭṭhisutta
an4.27:1.1	“Cattārimāni, bhikkhave, appāni ca sulabhāni ca, tāni ca anavajjāni.
an4.27:1.2	Katamāni cattāri?
an4.27:1.3	Paṁsukūlaṁ, bhikkhave, cīvarānaṁ appañca sulabhañca, tañca anavajjaṁ.
an4.27:1.4	Piṇḍiyālopo, bhikkhave, bhojanānaṁ appañca sulabhañca, tañca anavajjaṁ.
an4.27:1.5	Rukkhamūlaṁ, bhikkhave, senāsanānaṁ appañca sulabhañca, tañca anavajjaṁ.
an4.27:1.6	Pūtimuttaṁ, bhikkhave, bhesajjānaṁ appañca sulabhañca, tañca anavajjaṁ.
an4.27:1.7	Imāni kho, bhikkhave, cattāri appāni ca sulabhāni ca, tāni ca anavajjāni.
an4.27:1.8	Yato kho, bhikkhave, bhikkhu appena ca tuṭṭho hoti sulabhena ca, idamassāhaṁ aññataraṁ sāmaññaṅganti vadāmīti.
an4.27:2.1	Anavajjena tuṭṭhassa,
an4.27:2.2	appena sulabhena ca;
an4.27:2.3	Na senāsanamārabbha,
an4.27:2.4	cīvaraṁ pānabhojanaṁ;
an4.27:2.5	Vighāto hoti cittassa,
an4.27:2.6	disā nappaṭihaññati.
an4.27:3.1	Ye cassa dhammā akkhātā,
an4.27:3.2	sāmaññassānulomikā;
an4.27:3.3	Adhiggahitā tuṭṭhassa,
an4.27:3.4	appamattassa sikkhato”ti.
an4.27:3.5	Sattamaṁ.
an4.28:0.1	Aṅguttara Nikāya 4.28
an4.28:0.2	3. Uruvelavagga
an4.28:0.3	Ariyavaṁsasutta
an4.28:1.1	“Cattārome, bhikkhave, ariyavaṁsā aggaññā rattaññā vaṁsaññā porāṇā asaṅkiṇṇā asaṅkiṇṇapubbā, na saṅkīyanti na saṅkīyissanti, appaṭikuṭṭhā samaṇehi brāhmaṇehi viññūhi.
an4.28:1.2	Katame cattāro?
an4.28:1.3	Idha, bhikkhave, bhikkhu santuṭṭho hoti itarītarena cīvarena, itarītaracīvarasantuṭṭhiyā ca vaṇṇavādī, na ca cīvarahetu anesanaṁ appatirūpaṁ āpajjati, aladdhā ca cīvaraṁ na paritassati, laddhā ca cīvaraṁ agadhito amucchito anajjhosanno ādīnavadassāvī nissaraṇapañño paribhuñjati;
an4.28:1.4	tāya ca pana itarītaracīvarasantuṭṭhiyā nevattānukkaṁseti, no paraṁ vambheti.
an4.28:1.5	Yo hi tattha dakkho analaso sampajāno patissato, ayaṁ vuccati, bhikkhave, bhikkhu porāṇe aggaññe ariyavaṁse ṭhito.
an4.28:2.1	Puna caparaṁ, bhikkhave, bhikkhu santuṭṭho hoti itarītarena piṇḍapātena, itarītarapiṇḍapātasantuṭṭhiyā ca vaṇṇavādī, na ca piṇḍapātahetu anesanaṁ appatirūpaṁ āpajjati, aladdhā ca piṇḍapātaṁ na paritassati, laddhā ca piṇḍapātaṁ agadhito amucchito anajjhosanno ādīnavadassāvī nissaraṇapañño paribhuñjati;
an4.28:2.2	tāya ca pana itarītarapiṇḍapātasantuṭṭhiyā nevattānukkaṁseti, no paraṁ vambheti.
an4.28:2.3	Yo hi tattha dakkho analaso sampajāno patissato, ayaṁ vuccati, bhikkhave, bhikkhu porāṇe aggaññe ariyavaṁse ṭhito.
an4.28:3.1	Puna caparaṁ, bhikkhave, bhikkhu santuṭṭho hoti itarītarena senāsanena, itarītarasenāsanasantuṭṭhiyā ca vaṇṇavādī, na ca senāsanahetu anesanaṁ appatirūpaṁ āpajjati, aladdhā ca senāsanaṁ na paritassati, laddhā ca senāsanaṁ agadhito amucchito anajjhosanno ādīnavadassāvī nissaraṇapañño paribhuñjati;
an4.28:3.2	tāya ca pana itarītarasenāsanasantuṭṭhiyā nevattānukkaṁseti, no paraṁ vambheti.
an4.28:3.3	Yo hi tattha dakkho analaso sampajāno patissato, ayaṁ vuccati, bhikkhave, bhikkhu porāṇe aggaññe ariyavaṁse ṭhito.
an4.28:4.1	Puna caparaṁ, bhikkhave, bhikkhu bhāvanārāmo hoti bhāvanārato, pahānārāmo hoti pahānarato;
an4.28:4.2	tāya ca pana bhāvanārāmatāya bhāvanāratiyā pahānārāmatāya pahānaratiyā nevattānukkaṁseti, no paraṁ vambheti.
an4.28:4.3	Yo hi tattha dakkho analaso sampajāno patissato, ayaṁ vuccati, bhikkhave, bhikkhu porāṇe aggaññe ariyavaṁse ṭhito.
an4.28:4.4	Ime kho, bhikkhave, cattāro ariyavaṁsā aggaññā rattaññā vaṁsaññā porāṇā asaṅkiṇṇā asaṅkiṇṇapubbā, na saṅkīyanti na saṅkīyissanti, appaṭikuṭṭhā samaṇehi brāhmaṇehi viññūhi.
an4.28:5.1	Imehi ca pana, bhikkhave, catūhi ariyavaṁsehi samannāgato bhikkhu puratthimāya cepi disāya viharati sveva aratiṁ sahati, na taṁ arati sahati;
an4.28:5.2	pacchimāya cepi disāya viharati sveva aratiṁ sahati, na taṁ arati sahati;
an4.28:5.3	uttarāya cepi disāya viharati sveva aratiṁ sahati, na taṁ arati sahati;
an4.28:5.4	dakkhiṇāya cepi disāya viharati sveva aratiṁ sahati, na taṁ arati sahati.
an4.28:5.5	Taṁ kissa hetu?
an4.28:5.6	Aratiratisaho hi, bhikkhave, dhīroti.
an4.28:6.1	Nārati sahati dhīraṁ,
an4.28:6.2	nārati dhīraṁ sahati;
an4.28:6.3	Dhīrova aratiṁ sahati,
an4.28:6.4	dhīro hi aratissaho.
an4.28:7.1	Sabbakammavihāyīnaṁ,
an4.28:7.2	panuṇṇaṁ ko nivāraye;
an4.28:7.3	Nekkhaṁ jambonadasseva,
an4.28:7.4	ko taṁ ninditumarahati;
an4.28:7.5	Devāpi naṁ pasaṁsanti,
an4.28:7.6	brahmunāpi pasaṁsito”ti.
an4.28:7.7	Aṭṭhamaṁ.
an4.29:0.1	Aṅguttara Nikāya 4.29
an4.29:0.2	3. Uruvelavagga
an4.29:0.3	Dhammapadasutta
an4.29:1.1	“Cattārimāni, bhikkhave, dhammapadāni aggaññāni rattaññāni vaṁsaññāni porāṇāni asaṅkiṇṇāni asaṅkiṇṇapubbāni, na saṅkīyanti na saṅkīyissanti, appaṭikuṭṭhāni samaṇehi brāhmaṇehi viññūhi.
an4.29:1.2	Katamāni cattāri?
an4.29:1.3	Anabhijjhā, bhikkhave, dhammapadaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkīyati na saṅkīyissati, appaṭikuṭṭhaṁ samaṇehi brāhmaṇehi viññūhi.
an4.29:2.1	Abyāpādo, bhikkhave, dhammapadaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkīyati na saṅkīyissati, appaṭikuṭṭhaṁ samaṇehi brāhmaṇehi viññūhi.
an4.29:3.1	Sammāsati, bhikkhave, dhammapadaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkīyati na saṅkīyissati, appaṭikuṭṭhaṁ samaṇehi brāhmaṇehi viññūhi.
an4.29:4.1	Sammāsamādhi, bhikkhave, dhammapadaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkīyati na saṅkīyissati, appaṭikuṭṭhaṁ samaṇehi brāhmaṇehi viññūhi.
an4.29:4.2	Imāni kho, bhikkhave, cattāri dhammapadāni aggaññāni rattaññāni vaṁsaññāni porāṇāni asaṅkiṇṇāni asaṅkiṇṇapubbāni, na saṅkīyanti na saṅkīyissanti, appaṭikuṭṭhāni samaṇehi brāhmaṇehi viññūhīti.
an4.29:5.1	Anabhijjhālu vihareyya,
an4.29:5.2	abyāpannena cetasā;
an4.29:5.3	Sato ekaggacittassa,
an4.29:5.4	ajjhattaṁ susamāhito”ti.
an4.29:5.5	Navamaṁ.
an4.30:0.1	Aṅguttara Nikāya 4.30
an4.30:0.2	3. Uruvelavagga
an4.30:0.3	Paribbājakasutta
an4.30:1.1	Ekaṁ samayaṁ bhagavā rājagahe viharati gijjhakūṭe pabbate.
an4.30:1.2	Tena kho pana samayena sambahulā abhiññātā abhiññātā paribbājakā sippinikātīre paribbājakārāme paṭivasanti, seyyathidaṁ annabhāro varadharo sakuludāyī ca paribbājako aññe ca abhiññātā abhiññātā paribbājakā.
an4.30:1.3	Atha kho bhagavā sāyanhasamayaṁ paṭisallānā vuṭṭhito yena sippinikātīraṁ paribbājakārāmo tenupasaṅkami; upasaṅkamitvā paññatte āsane nisīdi. Nisajja kho bhagavā te paribbājake etadavoca:
an4.30:2.1	“Cattārimāni, paribbājakā, dhammapadāni aggaññāni rattaññāni vaṁsaññāni porāṇāni asaṅkiṇṇāni asaṅkiṇṇapubbāni, na saṅkīyanti na saṅkīyissanti, appaṭikuṭṭhāni samaṇehi brāhmaṇehi viññūhi.
an4.30:2.2	Katamāni cattāri?
an4.30:2.3	Anabhijjhā, paribbājakā, dhammapadaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkīyati na saṅkīyissati, appaṭikuṭṭhaṁ samaṇehi brāhmaṇehi viññūhi.
an4.30:2.4	Abyāpādo, paribbājakā, dhammapadaṁ …pe… sammāsati, paribbājakā, dhammapadaṁ …pe… sammāsamādhi, paribbājakā, dhammapadaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkīyati na saṅkīyissati, appaṭikuṭṭhaṁ samaṇehi brāhmaṇehi viññūhi.
an4.30:2.5	Imāni kho, paribbājakā, cattāri dhammapadāni aggaññāni rattaññāni vaṁsaññāni porāṇāni asaṅkiṇṇāni asaṅkiṇṇapubbāni, na saṅkīyanti na saṅkīyissanti, appaṭikuṭṭhāni samaṇehi brāhmaṇehi viññūhi.
an4.30:3.1	Yo kho, paribbājakā, evaṁ vadeyya:
an4.30:3.2	‘ahametaṁ anabhijjhaṁ dhammapadaṁ paccakkhāya abhijjhāluṁ kāmesu tibbasārāgaṁ samaṇaṁ vā brāhmaṇaṁ vā paññāpessāmī’ti, tamahaṁ tattha evaṁ vadeyyaṁ:
an4.30:3.3	‘etu vadatu byāharatu passāmissānubhāvan’ti.
an4.30:3.4	So vata, paribbājakā, anabhijjhaṁ dhammapadaṁ paccakkhāya abhijjhāluṁ kāmesu tibbasārāgaṁ samaṇaṁ vā brāhmaṇaṁ vā paññāpessatīti netaṁ ṭhānaṁ vijjati.
an4.30:4.1	Yo kho, paribbājakā, evaṁ vadeyya:
an4.30:4.2	‘ahametaṁ abyāpādaṁ dhammapadaṁ paccakkhāya byāpannacittaṁ paduṭṭhamanasaṅkappaṁ samaṇaṁ vā brāhmaṇaṁ vā paññāpessāmī’ti, tamahaṁ tattha evaṁ vadeyyaṁ:
an4.30:4.3	‘etu vadatu byāharatu passāmissānubhāvan’ti.
an4.30:4.4	So vata, paribbājakā, abyāpādaṁ dhammapadaṁ paccakkhāya byāpannacittaṁ paduṭṭhamanasaṅkappaṁ samaṇaṁ vā brāhmaṇaṁ vā paññāpessatīti netaṁ ṭhānaṁ vijjati.
an4.30:5.1	Yo kho, paribbājakā, evaṁ vadeyya:
an4.30:5.2	‘ahametaṁ sammāsatiṁ dhammapadaṁ paccakkhāya muṭṭhassatiṁ asampajānaṁ samaṇaṁ vā brāhmaṇaṁ vā paññāpessāmī’ti, tamahaṁ tattha evaṁ vadeyyaṁ:
an4.30:5.3	‘etu vadatu byāharatu passāmissānubhāvan’ti.
an4.30:5.4	So vata, paribbājakā, sammāsatiṁ dhammapadaṁ paccakkhāya muṭṭhassatiṁ asampajānaṁ samaṇaṁ vā brāhmaṇaṁ vā paññāpessatīti netaṁ ṭhānaṁ vijjati.
an4.30:6.1	Yo kho, paribbājakā, evaṁ vadeyya:
an4.30:6.2	‘ahametaṁ sammāsamādhiṁ dhammapadaṁ paccakkhāya asamāhitaṁ vibbhantacittaṁ samaṇaṁ vā brāhmaṇaṁ vā paññāpessāmī’ti, tamahaṁ tattha evaṁ vadeyyaṁ:
an4.30:6.3	‘etu vadatu byāharatu passāmissānubhāvan’ti.
an4.30:6.4	So vata, paribbājakā, sammāsamādhiṁ dhammapadaṁ paccakkhāya asamāhitaṁ vibbhantacittaṁ samaṇaṁ vā brāhmaṇaṁ vā paññāpessatīti netaṁ ṭhānaṁ vijjati.
an4.30:7.1	Yo kho, paribbājakā, imāni cattāri dhammapadāni garahitabbaṁ paṭikkositabbaṁ maññeyya, tassa diṭṭheva dhamme cattāro sahadhammikā vādānupātā gārayhā ṭhānā āgacchanti.
an4.30:7.2	Katame cattāro?
an4.30:7.3	Anabhijjhañce bhavaṁ dhammapadaṁ garahati paṭikkosati, ye ca hi abhijjhālū kāmesu tibbasārāgā samaṇabrāhmaṇā te bhoto pujjā te bhoto pāsaṁsā.
an4.30:7.4	Abyāpādañce bhavaṁ dhammapadaṁ garahati paṭikkosati, ye ca hi byāpannacittā paduṭṭhamanasaṅkappā samaṇabrāhmaṇā te bhoto pujjā te bhoto pāsaṁsā.
an4.30:7.5	Sammāsatiñce bhavaṁ dhammapadaṁ garahati paṭikkosati, ye ca hi muṭṭhassatī asampajānā samaṇabrāhmaṇā te bhoto pujjā te bhoto pāsaṁsā.
an4.30:7.6	Sammāsamādhiñce bhavaṁ dhammapadaṁ garahati paṭikkosati, ye ca hi asamāhitā vibbhantacittā samaṇabrāhmaṇā te bhoto pujjā te bhoto pāsaṁsā.
an4.30:8.1	Yo kho, paribbājakā, imāni cattāri dhammapadāni garahitabbaṁ paṭikkositabbaṁ maññeyya, tassa diṭṭheva dhamme ime cattāro sahadhammikā vādānupātā gārayhā ṭhānā āgacchanti.
an4.30:8.2	Yepi te, paribbājakā, ahesuṁ ukkalā vassabhaññā ahetukavādā akiriyavādā natthikavādā, tepi imāni cattāri dhammapadāni na garahitabbaṁ na paṭikkositabbaṁ amaññiṁsu.
an4.30:8.3	Taṁ kissa hetu?
an4.30:8.4	Nindābyārosanaupārambhabhayāti.
an4.30:9.1	Abyāpanno sadā sato,
an4.30:9.2	ajjhattaṁ susamāhito;
an4.30:9.3	Abhijjhāvinaye sikkhaṁ,
an4.30:9.4	appamattoti vuccatī”ti.
an4.30:9.5	Dasamaṁ.
an4.30:9.6	Uruvelavaggo tatiyo.
an4.30:10.0	Tassuddānaṁ
an4.30:10.1	Dve uruvelā loko kāḷako,
an4.30:10.2	Brahmacariyena pañcamaṁ;
an4.30:10.3	Kuhaṁ santuṭṭhi vaṁso ca,
an4.30:10.4	Dhammapadaṁ paribbājakena cāti.
an4.31:0.1	Aṅguttara Nikāya 4.31
an4.31:0.2	4. Cakkavagga
an4.31:0.3	Cakkasutta
an4.31:1.1	“Cattārimāni, bhikkhave, cakkāni, yehi samannāgatānaṁ devamanussānaṁ catucakkaṁ vattati, yehi samannāgatā devamanussā nacirasseva mahantattaṁ vepullattaṁ pāpuṇanti bhogesu.
an4.31:1.2	Katamāni cattāri?
an4.31:1.3	Patirūpadesavāso, sappurisāvassayo, attasammāpaṇidhi, pubbe ca katapuññatā—
an4.31:1.4	Imāni kho, bhikkhave, cattāri cakkāni, yehi samannāgatānaṁ devamanussānaṁ catucakkaṁ vattati, yehi samannāgatā devamanussā nacirasseva mahantattaṁ vepullattaṁ pāpuṇanti bhogesūti.
an4.31:2.1	Patirūpe vase dese,
an4.31:2.2	ariyamittakaro siyā;
an4.31:2.3	Sammāpaṇidhisampanno,
an4.31:2.4	pubbe puññakato naro;
an4.31:2.5	Dhaññaṁ dhanaṁ yaso kitti,
an4.31:2.6	sukhañcetaṁdhivattatī”ti.
an4.31:2.7	Paṭhamaṁ.
an4.32:0.1	Aṅguttara Nikāya 4.32
an4.32:0.2	4. Cakkavagga
an4.32:0.3	Saṅgahasutta
an4.32:1.1	“Cattārimāni, bhikkhave, saṅgahavatthūni.
an4.32:1.2	Katamāni cattāri?
an4.32:1.3	Dānaṁ, peyyavajjaṁ, atthacariyā, samānattatā—
an4.32:1.4	Imāni kho, bhikkhave, cattāri saṅgahavatthūnīti.
an4.32:2.1	Dānañca peyyavajjañca,
an4.32:2.2	atthacariyā ca yā idha;
an4.32:2.3	Samānattatā ca dhammesu,
an4.32:2.4	tattha tattha yathārahaṁ;
an4.32:2.5	Ete kho saṅgahā loke,
an4.32:2.6	rathassāṇīva yāyato.
an4.32:3.1	Ete ca saṅgahā nāssu,
an4.32:3.2	na mātā puttakāraṇā;
an4.32:3.3	Labhetha mānaṁ pūjaṁ vā,
an4.32:3.4	pitā vā puttakāraṇā.
an4.32:4.1	Yasmā ca saṅgahā ete,
an4.32:4.2	samavekkhanti paṇḍitā;
an4.32:4.3	Tasmā mahattaṁ papponti,
an4.32:4.4	pāsaṁsā ca bhavanti te”ti.
an4.32:4.5	Dutiyaṁ.
an4.33:0.1	Aṅguttara Nikāya 4.33
an4.33:0.2	4. Cakkavagga
an4.33:0.3	Sīhasutta
an4.33:1.1	“Sīho, bhikkhave, migarājā sāyanhasamayaṁ āsayā nikkhamati.
an4.33:1.2	Āsayā nikkhamitvā vijambhati.
an4.33:1.3	Vijambhitvā samantā catuddisā anuviloketi.
an4.33:1.4	Samantā catuddisā anuviloketvā tikkhattuṁ sīhanādaṁ nadati.
an4.33:1.5	Tikkhattuṁ sīhanādaṁ naditvā gocarāya pakkamati.
an4.33:1.6	Ye kho pana te, bhikkhave, tiracchānagatā pāṇā sīhassa migarañño nadato saddaṁ suṇanti, te yebhuyyena bhayaṁ saṁvegaṁ santāsaṁ āpajjanti.
an4.33:1.7	Bilaṁ bilāsayā pavisanti, dakaṁ dakāsayā pavisanti, vanaṁ vanāsayā pavisanti, ākāsaṁ pakkhino bhajanti.
an4.33:1.8	Yepi te, bhikkhave, rañño nāgā gāmanigamarājadhānīsu daḷhehi varattehi bandhanehi baddhā, tepi tāni bandhanāni sañchinditvā sampadāletvā bhītā muttakarīsaṁ cajamānā yena vā tena vā palāyanti.
an4.33:1.9	Evaṁ mahiddhiko kho, bhikkhave, sīho migarājā tiracchānagatānaṁ pāṇānaṁ, evaṁ mahesakkho evaṁ mahānubhāvo.
an4.33:2.1	Evamevaṁ kho, bhikkhave, yadā tathāgato loke uppajjati arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā, so dhammaṁ deseti:
an4.33:2.2	‘iti sakkāyo, iti sakkāyasamudayo, iti sakkāyanirodho, iti sakkāyanirodhagāminī paṭipadā’ti.
an4.33:2.3	Yepi te, bhikkhave, devā dīghāyukā vaṇṇavanto sukhabahulā uccesu vimānesu ciraṭṭhitikā, tepi tathāgatassa dhammadesanaṁ sutvā yebhuyyena bhayaṁ saṁvegaṁ santāsaṁ āpajjanti:
an4.33:2.4	‘aniccā vata kira, bho, mayaṁ samānā niccamhāti amaññimha;
an4.33:2.5	addhuvā vata kira, bho, mayaṁ samānā dhuvamhāti amaññimha;
an4.33:2.6	asassatā vata kira, bho, mayaṁ samānā sassatamhāti amaññimha.
an4.33:2.7	Mayaṁ kira, bho, aniccā addhuvā asassatā sakkāyapariyāpannā’ti.
an4.33:2.8	Evaṁ mahiddhiko kho, bhikkhave, tathāgato sadevakassa lokassa, evaṁ mahesakkho evaṁ mahānubhāvoti.
an4.33:3.1	Yadā buddho abhiññāya,
an4.33:3.2	dhammacakkaṁ pavattayī;
an4.33:3.3	Sadevakassa lokassa,
an4.33:3.4	satthā appaṭipuggalo.
an4.33:4.1	Sakkāyañca nirodhañca,
an4.33:4.2	sakkāyassa ca sambhavaṁ;
an4.33:4.3	Ariyañcaṭṭhaṅgikaṁ maggaṁ,
an4.33:4.4	dukkhūpasamagāminaṁ.
an4.33:5.1	Yepi dīghāyukā devā,
an4.33:5.2	vaṇṇavanto yasassino;
an4.33:5.3	Bhītā santāsamāpāduṁ,
an4.33:5.4	sīhassevitare migā.
an4.33:6.1	Avītivattā sakkāyaṁ,
an4.33:6.2	aniccā kira bho mayaṁ;
an4.33:6.3	Sutvā arahato vākyaṁ,
an4.33:6.4	vippamuttassa tādino”ti.
an4.33:6.5	Tatiyaṁ.
an4.34:0.1	Aṅguttara Nikāya 4.34
an4.34:0.2	4. Cakkavagga
an4.34:0.3	Aggappasādasutta
an4.34:1.1	“Cattārome, bhikkhave, aggappasādā.
an4.34:1.2	Katame cattāro?
an4.34:1.3	Yāvatā, bhikkhave, sattā apadā vā dvipadā vā catuppadā vā bahuppadā vā rūpino vā arūpino vā saññino vā asaññino vā nevasaññināsaññino vā, tathāgato tesaṁ aggamakkhāyati arahaṁ sammāsambuddho.
an4.34:1.4	Ye, bhikkhave, buddhe pasannā, agge te pasannā.
an4.34:1.5	Agge kho pana pasannānaṁ aggo vipāko hoti.
an4.34:2.1	Yāvatā, bhikkhave, dhammā saṅkhatā, ariyo aṭṭhaṅgiko maggo tesaṁ aggamakkhāyati.
an4.34:2.2	Ye, bhikkhave, ariye aṭṭhaṅgike magge pasannā, agge te pasannā.
an4.34:2.3	Agge kho pana pasannānaṁ aggo vipāko hoti.
an4.34:3.1	Yāvatā, bhikkhave, dhammā saṅkhatā vā asaṅkhatā vā, virāgo tesaṁ aggamakkhāyati, yadidaṁ madanimmadano pipāsavinayo ālayasamugghāto vaṭṭupacchedo taṇhākkhayo virāgo nirodho nibbānaṁ.
an4.34:3.2	Ye, bhikkhave, virāge dhamme pasannā, agge te pasannā.
an4.34:3.3	Agge kho pana pasannānaṁ aggo vipāko hoti.
an4.34:4.1	Yāvatā, bhikkhave, saṅghā vā gaṇā vā, tathāgatasāvakasaṅgho tesaṁ aggamakkhāyati, yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an4.34:4.2	Ye, bhikkhave, saṅghe pasannā, agge te pasannā.
an4.34:4.3	Agge kho pana pasannānaṁ aggo vipāko hoti.
an4.34:4.4	Ime kho, bhikkhave, cattāro aggappasādāti.
an4.34:5.1	Aggato ve pasannānaṁ,
an4.34:5.2	aggaṁ dhammaṁ vijānataṁ;
an4.34:5.3	Agge buddhe pasannānaṁ,
an4.34:5.4	dakkhiṇeyye anuttare.
an4.34:6.1	Agge dhamme pasannānaṁ,
an4.34:6.2	virāgūpasame sukhe;
an4.34:6.3	Agge saṅghe pasannānaṁ,
an4.34:6.4	puññakkhette anuttare.
an4.34:7.1	Aggasmiṁ dānaṁ dadataṁ,
an4.34:7.2	aggaṁ puññaṁ pavaḍḍhati;
an4.34:7.3	Aggaṁ āyu ca vaṇṇo ca,
an4.34:7.4	yaso kitti sukhaṁ balaṁ.
an4.34:8.1	Aggassa dātā medhāvī,
an4.34:8.2	aggadhammasamāhito;
an4.34:8.3	Devabhūto manusso vā,
an4.34:8.4	aggappatto pamodatī”ti.
an4.34:8.5	Catutthaṁ.
an4.35:0.1	Aṅguttara Nikāya 4.35
an4.35:0.2	4. Cakkavagga
an4.35:0.3	Vassakārasutta
an4.35:1.1	Ekaṁ samayaṁ bhagavā rājagahe viharati veḷuvane kalandakanivāpe.
an4.35:1.2	Atha kho vassakāro brāhmaṇo magadhamahāmatto yena bhagavā tenupasaṅkami; upasaṅkamitvā bhagavatā saddhiṁ sammodi.
an4.35:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vassakāro brāhmaṇo magadhamahāmatto bhagavantaṁ etadavoca:
an4.35:2.1	“Catūhi kho mayaṁ, bho gotama, dhammehi samannāgataṁ mahāpaññaṁ mahāpurisaṁ paññāpema.
an4.35:2.2	Katamehi catūhi?
an4.35:2.3	Idha, bho gotama, bahussuto hoti tassa tasseva sutajātassa
an4.35:2.4	tassa tasseva kho pana bhāsitassa atthaṁ jānāti: ‘ayaṁ imassa bhāsitassa attho, ayaṁ imassa bhāsitassa attho’ti.
an4.35:2.5	Satimā kho pana hoti cirakatampi cirabhāsitampi saritā anussaritā
an4.35:2.6	yāni kho pana tāni gahaṭṭhakāni kiṅkaraṇīyāni, tattha dakkho hoti analaso, tatrupāyāya vīmaṁsāya samannāgato alaṁ kātuṁ alaṁ saṁvidhātuṁ.
an4.35:2.7	Imehi kho mayaṁ, bho gotama, catūhi dhammehi samannāgataṁ mahāpaññaṁ mahāpurisaṁ paññāpema.
an4.35:2.8	Sace me, bho gotama, anumoditabbaṁ anumodatu me bhavaṁ gotamo;
an4.35:2.9	sace pana me, bho gotama, paṭikkositabbaṁ paṭikkosatu me bhavaṁ gotamo”ti.
an4.35:3.1	“Neva kho tyāhaṁ, brāhmaṇa, anumodāmi na paṭikkosāmi.
an4.35:3.2	Catūhi kho ahaṁ, brāhmaṇa, dhammehi samannāgataṁ mahāpaññaṁ mahāpurisaṁ paññāpemi.
an4.35:3.3	Katamehi catūhi?
an4.35:3.4	Idha, brāhmaṇa, bahujanahitāya paṭipanno hoti bahujanasukhāya;
an4.35:3.5	bahu’ssa janatā ariye ñāye patiṭṭhāpitā, yadidaṁ kalyāṇadhammatā kusaladhammatā.
an4.35:3.6	So yaṁ vitakkaṁ ākaṅkhati vitakketuṁ taṁ vitakkaṁ vitakketi, yaṁ vitakkaṁ nākaṅkhati vitakketuṁ na taṁ vitakkaṁ vitakketi;
an4.35:3.7	yaṁ saṅkappaṁ ākaṅkhati saṅkappetuṁ taṁ saṅkappaṁ saṅkappeti, yaṁ saṅkappaṁ nākaṅkhati saṅkappetuṁ na taṁ saṅkappaṁ saṅkappeti.
an4.35:3.8	Iti cetovasippatto hoti vitakkapathe.
an4.35:3.9	Catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an4.35:3.10	Āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an4.35:3.11	Neva kho tyāhaṁ, brāhmaṇa, anumodāmi na pana paṭikkosāmi.
an4.35:3.12	Imehi kho ahaṁ, brāhmaṇa, catūhi dhammehi samannāgataṁ mahāpaññaṁ mahāpurisaṁ paññāpemī”ti.
an4.35:4.1	“Acchariyaṁ, bho gotama, abbhutaṁ, bho gotama.
an4.35:4.2	Yāva subhāsitañcidaṁ bhotā gotamena.
an4.35:4.3	Imehi ca mayaṁ, bho gotama, catūhi dhammehi samannāgataṁ bhavantaṁ gotamaṁ dhārema;
an4.35:4.4	bhavañhi gotamo bahujanahitāya paṭipanno bahujanasukhāya;
an4.35:4.5	bahu te janatā ariye ñāye patiṭṭhāpitā, yadidaṁ kalyāṇadhammatā kusaladhammatā.
an4.35:4.6	Bhavañhi gotamo yaṁ vitakkaṁ ākaṅkhati vitakketuṁ taṁ vitakkaṁ vitakketi, yaṁ vitakkaṁ nākaṅkhati vitakketuṁ na taṁ vitakkaṁ vitakketi, yaṁ saṅkappaṁ ākaṅkhati saṅkappetuṁ taṁ saṅkappaṁ saṅkappeti, yaṁ saṅkappaṁ nākaṅkhati saṅkappetuṁ na taṁ saṅkappaṁ saṅkappeti.
an4.35:4.7	Bhavañhi gotamo cetovasippatto vitakkapathe.
an4.35:4.8	Bhavañhi gotamo catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī akicchalābhī akasiralābhī.
an4.35:4.9	Bhavañhi gotamo āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī”ti.
an4.35:5.1	“Addhā kho tyāhaṁ, brāhmaṇa, āsajja upanīya vācā bhāsitā.
an4.35:5.2	Api ca tyāhaṁ byākarissāmi:
an4.35:5.3	‘ahañhi, brāhmaṇa, bahujanahitāya paṭipanno bahujanasukhāya;
an4.35:5.4	bahu me janatā ariye ñāye patiṭṭhāpitā, yadidaṁ kalyāṇadhammatā kusaladhammatā.
an4.35:5.5	Ahañhi, brāhmaṇa, yaṁ vitakkaṁ ākaṅkhāmi vitakketuṁ taṁ vitakkaṁ vitakkemi, yaṁ vitakkaṁ nākaṅkhāmi vitakketuṁ na taṁ vitakkaṁ vitakkemi, yaṁ saṅkappaṁ ākaṅkhāmi saṅkappetuṁ taṁ saṅkappaṁ saṅkappemi, yaṁ saṅkappaṁ nākaṅkhāmi saṅkappetuṁ na taṁ saṅkappaṁ saṅkappemi.
an4.35:5.6	Ahañhi, brāhmaṇa, cetovasippatto vitakkapathe.
an4.35:5.7	Ahañhi, brāhmaṇa, catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī akicchalābhī akasiralābhī.
an4.35:5.8	Ahañhi, brāhmaṇa, āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharāmī’ti.
an4.35:6.1	Yo vedi sabbasattānaṁ,
an4.35:6.2	maccupāsappamocanaṁ;
an4.35:6.3	Hitaṁ devamanussānaṁ,
an4.35:6.4	ñāyaṁ dhammaṁ pakāsayi;
an4.35:6.5	Yaṁ ve disvā ca sutvā ca,
an4.35:6.6	pasīdanti bahū janā.
an4.35:7.1	Maggāmaggassa kusalo,
an4.35:7.2	Katakicco anāsavo;
an4.35:7.3	Buddho antimasārīro,
an4.35:7.4	Mahāpañño mahāpurisoti vuccatī”ti.
an4.35:7.5	Pañcamaṁ.
an4.36:0.1	Aṅguttara Nikāya 4.36
an4.36:0.2	4. Cakkavagga
an4.36:0.3	Doṇasutta
an4.36:1.1	Ekaṁ samayaṁ bhagavā antarā ca ukkaṭṭhaṁ antarā ca setabyaṁ addhānamaggappaṭipanno hoti.
an4.36:1.2	Doṇopi sudaṁ brāhmaṇo antarā ca ukkaṭṭhaṁ antarā ca setabyaṁ addhānamaggappaṭipanno hoti.
an4.36:1.3	Addasā kho doṇo brāhmaṇo bhagavato pādesu cakkāni sahassārāni sanemikāni sanābhikāni sabbākāraparipūrāni;
an4.36:1.4	disvānassa etadahosi:
an4.36:1.5	“acchariyaṁ vata bho, abbhutaṁ vata bho.
an4.36:1.6	Na vatimāni manussabhūtassa padāni bhavissantī”ti.
an4.36:1.7	Atha kho bhagavā maggā okkamma aññatarasmiṁ rukkhamūle nisīdi pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an4.36:1.8	Atha kho doṇo brāhmaṇo bhagavato padāni anugacchanto addasa bhagavantaṁ aññatarasmiṁ rukkhamūle nisinnaṁ pāsādikaṁ pasādanīyaṁ santindriyaṁ santamānasaṁ uttamadamathasamathamanuppattaṁ dantaṁ guttaṁ saṁyatindriyaṁ nāgaṁ.
an4.36:1.9	Disvāna yena bhagavā tenupasaṅkami; upasaṅkamitvā bhagavantaṁ etadavoca:
an4.36:2.1	“Devo no bhavaṁ bhavissatī”ti?
an4.36:2.2	“Na kho ahaṁ, brāhmaṇa, devo bhavissāmī”ti.
an4.36:2.3	“Gandhabbo no bhavaṁ bhavissatī”ti?
an4.36:2.4	“Na kho ahaṁ, brāhmaṇa, gandhabbo bhavissāmī”ti.
an4.36:2.5	“Yakkho no bhavaṁ bhavissatī”ti?
an4.36:2.6	“Na kho ahaṁ, brāhmaṇa, yakkho bhavissāmī”ti.
an4.36:2.7	“Manusso no bhavaṁ bhavissatī”ti?
an4.36:2.8	“Na kho ahaṁ, brāhmaṇa, manusso bhavissāmī”ti.
an4.36:3.1	“‘Devo no bhavaṁ bhavissatī’ti, iti puṭṭho samāno:
an4.36:3.2	‘na kho ahaṁ, brāhmaṇa, devo bhavissāmī’ti vadesi.
an4.36:3.3	‘Gandhabbo no bhavaṁ bhavissatī’ti, iti puṭṭho samāno:
an4.36:3.4	‘na kho ahaṁ, brāhmaṇa, gandhabbo bhavissāmī’ti vadesi.
an4.36:3.5	‘Yakkho no bhavaṁ bhavissatī’ti, iti puṭṭho samāno:
an4.36:3.6	‘na kho ahaṁ, brāhmaṇa, yakkho bhavissāmī’ti vadesi.
an4.36:3.7	‘Manusso no bhavaṁ bhavissatī’ti, iti puṭṭho samāno:
an4.36:3.8	‘na kho ahaṁ, brāhmaṇa, manusso bhavissāmī’ti vadesi.
an4.36:3.9	Atha ko carahi bhavaṁ bhavissatī”ti?
an4.36:4.1	“Yesaṁ kho ahaṁ, brāhmaṇa, āsavānaṁ appahīnattā devo bhaveyyaṁ, te me āsavā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an4.36:4.2	Yesaṁ kho ahaṁ, brāhmaṇa, āsavānaṁ appahīnattā gandhabbo bhaveyyaṁ … yakkho bhaveyyaṁ … manusso bhaveyyaṁ, te me āsavā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an4.36:4.3	Seyyathāpi, brāhmaṇa, uppalaṁ vā padumaṁ vā puṇḍarīkaṁ vā udake jātaṁ udake saṁvaḍḍhaṁ udakā accuggamma tiṭṭhati anupalittaṁ udakena;
an4.36:4.4	evamevaṁ kho ahaṁ, brāhmaṇa, loke jāto loke saṁvaḍḍho lokaṁ abhibhuyya viharāmi anupalitto lokena.
an4.36:4.5	Buddhoti maṁ, brāhmaṇa, dhārehīti.
an4.36:5.1	Yena devūpapatyassa,
an4.36:5.2	gandhabbo vā vihaṅgamo;
an4.36:5.3	Yakkhattaṁ yena gaccheyyaṁ,
an4.36:5.4	manussattañca abbaje;
an4.36:5.5	Te mayhaṁ āsavā khīṇā,
an4.36:5.6	viddhastā vinaḷīkatā.
an4.36:6.1	Puṇḍarīkaṁ yathā vaggu,
an4.36:6.2	Toyena nupalippati;
an4.36:6.3	Nupalippāmi lokena,
an4.36:6.4	Tasmā buddhosmi brāhmaṇā”ti.
an4.36:6.5	Chaṭṭhaṁ.
an4.37:0.1	Aṅguttara Nikāya 4.37
an4.37:0.2	4. Cakkavagga
an4.37:0.3	Aparihāniyasutta
an4.37:1.1	“Catūhi, bhikkhave, dhammehi samannāgato bhikkhu abhabbo parihānāya nibbānasseva santike.
an4.37:1.2	Katamehi catūhi?
an4.37:1.3	Idha, bhikkhave, bhikkhu sīlasampanno hoti, indriyesu guttadvāro hoti, bhojane mattaññū hoti, jāgariyaṁ anuyutto hoti.
an4.37:2.1	Kathañca, bhikkhave, bhikkhu sīlasampanno hoti?
an4.37:2.2	Idha, bhikkhave, bhikkhu sīlavā hoti pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an4.37:2.3	Evaṁ kho, bhikkhave, bhikkhu sīlasampanno hoti.
an4.37:3.1	Kathañca, bhikkhave, bhikkhu indriyesu guttadvāro hoti?
an4.37:3.2	Idha, bhikkhave, bhikkhu cakkhunā rūpaṁ disvā na nimittaggāhī hoti nānubyañjanaggāhī.
an4.37:3.3	Yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati cakkhundriyaṁ; cakkhundriye saṁvaraṁ āpajjati.
an4.37:3.4	Sotena saddaṁ sutvā …
an4.37:3.5	ghānena gandhaṁ ghāyitvā …
an4.37:3.6	jivhāya rasaṁ sāyitvā …
an4.37:3.7	kāyena phoṭṭhabbaṁ phusitvā …
an4.37:3.8	manasā dhammaṁ viññāya na nimittaggāhī hoti nānubyañjanaggāhī.
an4.37:3.9	Yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ; manindriye saṁvaraṁ āpajjati.
an4.37:3.10	Evaṁ kho, bhikkhave, bhikkhu indriyesu guttadvāro hoti.
an4.37:4.1	Kathañca, bhikkhave, bhikkhu bhojane mattaññū hoti?
an4.37:4.2	Idha, bhikkhave, bhikkhu paṭisaṅkhā yoniso āhāraṁ āhāreti:
an4.37:4.3	‘neva davāya na madāya na maṇḍanāya na vibhūsanāya; yāvadeva imassa kāyassa ṭhitiyā yāpanāya vihiṁsūparatiyā brahmacariyānuggahāya. Iti purāṇañca vedanaṁ paṭihaṅkhāmi, navañca vedanaṁ na uppādessāmi, yātrā ca me bhavissati, anavajjatā ca phāsuvihāro cā’ti.
an4.37:4.4	Evaṁ kho, bhikkhave, bhikkhu bhojane mattaññū hoti.
an4.37:5.1	Kathañca, bhikkhave, bhikkhu jāgariyaṁ anuyutto hoti?
an4.37:5.2	Idha, bhikkhave, bhikkhu divasaṁ caṅkamena nisajjāya āvaraṇīyehi dhammehi cittaṁ parisodheti;
an4.37:5.3	rattiyā paṭhamaṁ yāmaṁ caṅkamena nisajjāya āvaraṇīyehi dhammehi cittaṁ parisodheti;
an4.37:5.4	rattiyā majjhimaṁ yāmaṁ dakkhiṇena passena sīhaseyyaṁ kappeti, pāde pādaṁ accādhāya, sato sampajāno uṭṭhānasaññaṁ manasi karitvā;
an4.37:5.5	rattiyā pacchimaṁ yāmaṁ paccuṭṭhāya caṅkamena nisajjāya āvaraṇīyehi dhammehi cittaṁ parisodheti.
an4.37:5.6	Evaṁ kho, bhikkhave, bhikkhu jāgariyaṁ anuyutto hoti.
an4.37:5.7	Imehi kho, bhikkhave, catūhi dhammehi samannāgato bhikkhu abhabbo parihānāya, nibbānasseva santiketi.
an4.37:6.1	Sīle patiṭṭhito bhikkhu,
an4.37:6.2	indriyesu ca saṁvuto;
an4.37:6.3	Bhojanamhi ca mattaññū,
an4.37:6.4	jāgariyaṁ anuyuñjati.
an4.37:7.1	Evaṁ vihārī ātāpī,
an4.37:7.2	ahorattamatandito;
an4.37:7.3	Bhāvayaṁ kusalaṁ dhammaṁ,
an4.37:7.4	yogakkhemassa pattiyā.
an4.37:8.1	Appamādarato bhikkhu,
an4.37:8.2	pamāde bhayadassi vā;
an4.37:8.3	Abhabbo parihānāya,
an4.37:8.4	nibbānasseva santike”ti.
an4.37:8.5	Sattamaṁ.
an4.38:0.1	Aṅguttara Nikāya 4.38
an4.38:0.2	4. Cakkavagga
an4.38:0.3	Patilīnasutta
an4.38:1.1	“Panuṇṇapaccekasacco, bhikkhave, bhikkhu ‘samavayasaṭṭhesano passaddhakāyasaṅkhāro patilīno’ti vuccati.
an4.38:1.2	Kathañca, bhikkhave, bhikkhu panuṇṇapaccekasacco hoti?
an4.38:1.3	Idha, bhikkhave, bhikkhuno yāni tāni puthusamaṇabrāhmaṇānaṁ puthupaccekasaccāni, seyyathidaṁ—
an4.38:1.4	sassato lokoti vā, asassato lokoti vā, antavā lokoti vā, anantavā lokoti vā, taṁ jīvaṁ taṁ sarīranti vā, aññaṁ jīvaṁ aññaṁ sarīranti vā, hoti tathāgato paraṁ maraṇāti vā, na hoti tathāgato paraṁ maraṇāti vā, hoti ca na ca hoti tathāgato paraṁ maraṇāti vā, neva hoti na na hoti tathāgato paraṁ maraṇāti vā;
an4.38:1.5	sabbāni tāni nuṇṇāni honti panuṇṇāni cattāni vantāni muttāni pahīnāni paṭinissaṭṭhāni.
an4.38:1.6	Evaṁ kho, bhikkhave, bhikkhu panuṇṇapaccekasacco hoti.
an4.38:2.1	Kathañca, bhikkhave, bhikkhu samavayasaṭṭhesano hoti?
an4.38:2.2	Idha, bhikkhave, bhikkhuno kāmesanā pahīnā hoti, bhavesanā pahīnā hoti, brahmacariyesanā paṭippassaddhā.
an4.38:2.3	Evaṁ kho, bhikkhave, bhikkhu samavayasaṭṭhesano hoti.
an4.38:3.1	Kathañca, bhikkhave, bhikkhu passaddhakāyasaṅkhāro hoti?
an4.38:3.2	Idha, bhikkhave, bhikkhu sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
an4.38:3.3	Evaṁ kho, bhikkhave, bhikkhu passaddhakāyasaṅkhāro hoti.
an4.38:4.1	Kathañca, bhikkhave, bhikkhu patilīno hoti?
an4.38:4.2	Idha, bhikkhave, bhikkhuno asmimāno pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.
an4.38:4.3	Evaṁ kho, bhikkhave, bhikkhu patilīno hoti.
an4.38:4.4	Panuṇṇapaccekasacco, bhikkhave, bhikkhu ‘samavayasaṭṭhesano passaddhakāyasaṅkhāro patilīno’ti vuccatīti.
an4.38:5.1	Kāmesanā bhavesanā,
an4.38:5.2	brahmacariyesanā saha;
an4.38:5.3	Iti saccaparāmāso,
an4.38:5.4	diṭṭhiṭṭhānā samussayā.
an4.38:6.1	Sabbarāgavirattassa,
an4.38:6.2	taṇhakkhayavimuttino;
an4.38:6.3	Esanā paṭinissaṭṭhā,
an4.38:6.4	diṭṭhiṭṭhānā samūhatā.
an4.38:7.1	Sa ve santo sato bhikkhu,
an4.38:7.2	passaddho aparājito;
an4.38:7.3	Mānābhisamayā buddho,
an4.38:7.4	patilīnoti vuccatī”ti.
an4.38:7.5	Aṭṭhamaṁ.
an4.39:0.1	Aṅguttara Nikāya 4.39
an4.39:0.2	4. Cakkavagga
an4.39:0.3	Ujjayasutta
an4.39:1.1	Atha kho ujjayo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an4.39:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho ujjayo brāhmaṇo bhagavantaṁ etadavoca:
an4.39:1.3	“bhavampi no gotamo yaññaṁ vaṇṇetī”ti?
an4.39:1.4	“Na kho ahaṁ, brāhmaṇa, sabbaṁ yaññaṁ vaṇṇemi;
an4.39:1.5	na panāhaṁ, brāhmaṇa, sabbaṁ yaññaṁ na vaṇṇemi.
an4.39:1.6	Yathārūpe kho, brāhmaṇa, yaññe gāvo haññanti, ajeḷakā haññanti, kukkuṭasūkarā haññanti, vividhā pāṇā saṅghātaṁ āpajjanti;
an4.39:1.7	evarūpaṁ kho ahaṁ, brāhmaṇa, sārambhaṁ yaññaṁ na vaṇṇemi.
an4.39:1.8	Taṁ kissa hetu?
an4.39:1.9	Evarūpañhi, brāhmaṇa, sārambhaṁ yaññaṁ na upasaṅkamanti arahanto vā arahattamaggaṁ vā samāpannā.
an4.39:2.1	Yathārūpe ca kho, brāhmaṇa, yaññe neva gāvo haññanti, na ajeḷakā haññanti, na kukkuṭasūkarā haññanti, na vividhā pāṇā saṅghātaṁ āpajjanti;
an4.39:2.2	evarūpaṁ kho ahaṁ, brāhmaṇa, nirārambhaṁ yaññaṁ vaṇṇemi, yadidaṁ niccadānaṁ anukulayaññaṁ.
an4.39:2.3	Taṁ kissa hetu?
an4.39:2.4	Evarūpañhi, brāhmaṇa, nirārambhaṁ yaññaṁ upasaṅkamanti arahanto vā arahattamaggaṁ vā samāpannāti.
an4.39:3.1	Assamedhaṁ purisamedhaṁ,
an4.39:3.2	Sammāpāsaṁ vājapeyyaṁ niraggaḷaṁ;
an4.39:3.3	Mahāyaññā mahārambhā,
an4.39:3.4	Na te honti mahapphalā.
an4.39:4.1	Ajeḷakā ca gāvo ca,
an4.39:4.2	vividhā yattha haññare;
an4.39:4.3	Na taṁ sammaggatā yaññaṁ,
an4.39:4.4	upayanti mahesino.
an4.39:5.1	Ye ca yaññā nirārambhā,
an4.39:5.2	yajanti anukulaṁ sadā;
an4.39:5.3	Ajeḷakā ca gāvo ca,
an4.39:5.4	vividhā nettha haññare;
an4.39:5.5	Tañca sammaggatā yaññaṁ,
an4.39:5.6	upayanti mahesino.
an4.39:6.1	Etaṁ yajetha medhāvī,
an4.39:6.2	eso yañño mahapphalo;
an4.39:6.3	Etaṁ hi yajamānassa,
an4.39:6.4	seyyo hoti na pāpiyo;
an4.39:6.5	Yañño ca vipulo hoti,
an4.39:6.6	pasīdanti ca devatā”ti.
an4.39:6.7	Navamaṁ.
an4.40:0.1	Aṅguttara Nikāya 4.40
an4.40:0.2	4. Cakkavagga
an4.40:0.3	Udāyīsutta
an4.40:1.1	Atha kho udāyī brāhmaṇo yena bhagavā tenupasaṅkami; upasaṅkamitvā bhagavatā …pe… ekamantaṁ nisinno kho udāyī brāhmaṇo bhagavantaṁ etadavoca:
an4.40:1.2	“bhavampi no gotamo yaññaṁ vaṇṇetī”ti?
an4.40:1.3	“Na kho ahaṁ, brāhmaṇa, sabbaṁ yaññaṁ vaṇṇemi;
an4.40:1.4	na panāhaṁ, brāhmaṇa, sabbaṁ yaññaṁ na vaṇṇemi.
an4.40:1.5	Yathārūpe kho, brāhmaṇa, yaññe gāvo haññanti, ajeḷakā haññanti, kukkuṭasūkarā haññanti, vividhā pāṇā saṅghātaṁ āpajjanti;
an4.40:1.6	evarūpaṁ kho ahaṁ, brāhmaṇa, sārambhaṁ yaññaṁ na vaṇṇemi.
an4.40:1.7	Taṁ kissa hetu?
an4.40:1.8	Evarūpañhi, brāhmaṇa, sārambhaṁ yaññaṁ na upasaṅkamanti arahanto vā arahattamaggaṁ vā samāpannā.
an4.40:2.1	Yathārūpe ca kho, brāhmaṇa, yaññe neva gāvo haññanti, na ajeḷakā haññanti, na kukkuṭasūkarā haññanti, na vividhā pāṇā saṅghātaṁ āpajjanti;
an4.40:2.2	evarūpaṁ kho ahaṁ, brāhmaṇa, nirārambhaṁ yaññaṁ vaṇṇemi, yadidaṁ niccadānaṁ anukulayaññaṁ.
an4.40:2.3	Taṁ kissa hetu?
an4.40:2.4	Evarūpañhi, brāhmaṇa, nirārambhaṁ yaññaṁ upasaṅkamanti arahanto vā arahattamaggaṁ vā samāpannāti.
an4.40:3.1	Abhisaṅkhataṁ nirārambhaṁ,
an4.40:3.2	yaññaṁ kālena kappiyaṁ;
an4.40:3.3	Tādisaṁ upasaṁyanti,
an4.40:3.4	saññatā brahmacārayo.
an4.40:4.1	Vivaṭacchadā ye loke,
an4.40:4.2	vītivattā kulaṁ gatiṁ;
an4.40:4.3	Yaññametaṁ pasaṁsanti,
an4.40:4.4	buddhā yaññassa kovidā.
an4.40:5.1	Yaññe vā yadi vā saddhe,
an4.40:5.2	habyaṁ katvā yathārahaṁ;
an4.40:5.3	Pasannacitto yajati,
an4.40:5.4	sukhette brahmacārisu.
an4.40:6.1	Suhutaṁ suyiṭṭhaṁ suppattaṁ,
an4.40:6.2	Dakkhiṇeyyesu yaṁ kataṁ;
an4.40:6.3	Yañño ca vipulo hoti,
an4.40:6.4	Pasīdanti ca devatā.
an4.40:7.1	Evaṁ yajitvā medhāvī,
an4.40:7.2	saddho muttena cetasā;
an4.40:7.3	Abyābajjhaṁ sukhaṁ lokaṁ,
an4.40:7.4	paṇḍito upapajjatī”ti.
an4.40:7.5	Dasamaṁ.
an4.40:7.6	Cakkavaggo catuttho.
an4.40:8.0	Tassuddānaṁ
an4.40:8.1	Cakko saṅgaho sīho,
an4.40:8.2	Pasādo vassakārena pañcamaṁ;
an4.40:8.3	Doṇo aparihāniyo patilīno,
an4.40:8.4	Ujjayo udāyinā te dasāti.
an4.41:0.1	Aṅguttara Nikāya 4.41
an4.41:0.2	5. Rohitassavagga
an4.41:0.3	Samādhibhāvanāsutta
an4.41:1.1	“Catasso imā, bhikkhave, samādhibhāvanā.
an4.41:1.2	Katamā catasso?
an4.41:1.3	Atthi, bhikkhave, samādhibhāvanā bhāvitā bahulīkatā diṭṭhadhammasukhavihārāya saṁvattati;
an4.41:1.4	atthi, bhikkhave, samādhibhāvanā bhāvitā bahulīkatā ñāṇadassanappaṭilābhāya saṁvattati;
an4.41:1.5	atthi, bhikkhave, samādhibhāvanā bhāvitā bahulīkatā satisampajaññāya saṁvattati;
an4.41:1.6	atthi, bhikkhave, samādhibhāvanā bhāvitā bahulīkatā āsavānaṁ khayāya saṁvattati.
an4.41:2.1	Katamā ca, bhikkhave, samādhibhāvanā bhāvitā bahulīkatā diṭṭhadhammasukhavihārāya saṁvattati?
an4.41:2.2	Idha, bhikkhave, bhikkhu vivicceva kāmehi …pe… catutthaṁ jhānaṁ upasampajja viharati.
an4.41:2.3	Ayaṁ, bhikkhave, samādhibhāvanā bhāvitā bahulīkatā diṭṭhadhammasukhavihārāya saṁvattati.
an4.41:3.1	Katamā ca, bhikkhave, samādhibhāvanā bhāvitā bahulīkatā ñāṇadassanappaṭilābhāya saṁvattati?
an4.41:3.2	Idha, bhikkhave, bhikkhu ālokasaññaṁ manasi karoti, divāsaññaṁ adhiṭṭhāti—
an4.41:3.3	yathā divā tathā rattiṁ, yathā rattiṁ tathā divā.
an4.41:3.4	Iti vivaṭena cetasā apariyonaddhena sappabhāsaṁ cittaṁ bhāveti.
an4.41:3.5	Ayaṁ, bhikkhave, samādhibhāvanā bhāvitā bahulīkatā ñāṇadassanappaṭilābhāya saṁvattati.
an4.41:4.1	Katamā ca, bhikkhave, samādhibhāvanā bhāvitā bahulīkatā satisampajaññāya saṁvattati?
an4.41:4.2	Idha, bhikkhave, bhikkhuno viditā vedanā uppajjanti, viditā upaṭṭhahanti, viditā abbhatthaṁ gacchanti;
an4.41:4.3	viditā saññā …pe… viditā vitakkā uppajjanti, viditā upaṭṭhahanti, viditā abbhatthaṁ gacchanti.
an4.41:4.4	Ayaṁ, bhikkhave, samādhibhāvanā bhāvitā bahulīkatā satisampajaññāya saṁvattati.
an4.41:5.1	Katamā ca, bhikkhave, samādhibhāvanā bhāvitā bahulīkatā āsavānaṁ khayāya saṁvattati?
an4.41:5.2	Idha, bhikkhave, bhikkhu pañcasu upādānakkhandhesu udayabbayānupassī viharati:
an4.41:5.3	‘iti rūpaṁ, iti rūpassa samudayo, iti rūpassa atthaṅgamo;
an4.41:5.4	iti vedanā, iti vedanāya samudayo, iti vedanāya atthaṅgamo;
an4.41:5.5	iti saññā, iti saññāya samudayo, iti saññāya atthaṅgamo;
an4.41:5.6	iti saṅkhārā, iti saṅkhārānaṁ samudayo, iti saṅkhārānaṁ atthaṅgamo;
an4.41:5.7	iti viññāṇaṁ, iti viññāṇassa samudayo, iti viññāṇassa atthaṅgamo’ti.
an4.41:5.8	Ayaṁ, bhikkhave, samādhibhāvanā bhāvitā bahulīkatā āsavānaṁ khayāya saṁvattati.
an4.41:5.9	Imā kho, bhikkhave, catasso samādhibhāvanā.
an4.41:5.10	Idañca pana metaṁ, bhikkhave, sandhāya bhāsitaṁ pārāyane puṇṇakapañhe:
an4.41:6.1	‘Saṅkhāya lokasmiṁ paroparāni,
an4.41:6.2	Yassiñjitaṁ natthi kuhiñci loke;
an4.41:6.3	Santo vidhūmo anīgho nirāso,
an4.41:6.4	Atāri so jātijaranti brūmī’”ti.
an4.41:6.5	Paṭhamaṁ.
an4.42:0.1	Aṅguttara Nikāya 4.42
an4.42:0.2	5. Rohitassavagga
an4.42:0.3	Pañhabyākaraṇasutta
an4.42:1.1	“Cattārimāni, bhikkhave, pañhabyākaraṇāni.
an4.42:1.2	Katamāni cattāri?
an4.42:1.3	Atthi, bhikkhave, pañho ekaṁsabyākaraṇīyo;
an4.42:1.4	atthi, bhikkhave, pañho vibhajjabyākaraṇīyo;
an4.42:1.5	atthi, bhikkhave, pañho paṭipucchābyākaraṇīyo;
an4.42:1.6	atthi, bhikkhave, pañho ṭhapanīyo.
an4.42:1.7	Imāni kho, bhikkhave, cattāri pañhabyākaraṇānīti.
an4.42:2.1	Ekaṁsavacanaṁ ekaṁ,
an4.42:2.2	vibhajjavacanāparaṁ;
an4.42:2.3	Tatiyaṁ paṭipuccheyya,
an4.42:2.4	catutthaṁ pana ṭhāpaye.
an4.42:3.1	Yo ca tesaṁ tattha tattha,
an4.42:3.2	jānāti anudhammataṁ;
an4.42:3.3	Catupañhassa kusalo,
an4.42:3.4	āhu bhikkhuṁ tathāvidhaṁ.
an4.42:4.1	Durāsado duppasaho,
an4.42:4.2	gambhīro duppadhaṁsiyo;
an4.42:4.3	Atho atthe anatthe ca,
an4.42:4.4	ubhayassa hoti kovido.
an4.42:5.1	Anatthaṁ parivajjeti,
an4.42:5.2	atthaṁ gaṇhāti paṇḍito;
an4.42:5.3	Atthābhisamayā dhīro,
an4.42:5.4	paṇḍitoti pavuccatī”ti.
an4.42:5.5	Dutiyaṁ.
an4.43:0.1	Aṅguttara Nikāya 4.43
an4.43:0.2	5. Rohitassavagga
an4.43:0.3	Paṭhamakodhagarusutta
an4.43:1.1	“Cattārome, bhikkhave, puggalā santo saṁvijjamānā lokasmiṁ.
an4.43:1.2	Katame cattāro?
an4.43:1.3	Kodhagaru na saddhammagaru, makkhagaru na saddhammagaru, lābhagaru na saddhammagaru, sakkāragaru na saddhammagaru.
an4.43:1.4	Ime kho, bhikkhave, cattāro puggalā santo saṁvijjamānā lokasmiṁ.
an4.43:2.1	Cattārome, bhikkhave, puggalā santo saṁvijjamānā lokasmiṁ.
an4.43:2.2	Katame cattāro?
an4.43:2.3	Saddhammagaru na kodhagaru, saddhammagaru na makkhagaru, saddhammagaru na lābhagaru, saddhammagaru na sakkāragaru.
an4.43:2.4	Ime kho, bhikkhave, cattāro puggalā santo saṁvijjamānā lokasminti.
an4.43:3.1	Kodhamakkhagarū bhikkhū,
an4.43:3.2	lābhasakkāragāravā;
an4.43:3.3	Na te dhamme virūhanti,
an4.43:3.4	sammāsambuddhadesite.
an4.43:4.1	Ye ca saddhammagaruno,
an4.43:4.2	vihaṁsu viharanti ca;
an4.43:4.3	Te ve dhamme virūhanti,
an4.43:4.4	sammāsambuddhadesite”ti.
an4.43:4.5	Tatiyaṁ.
an4.44:0.1	Aṅguttara Nikāya 4.44
an4.44:0.2	5. Rohitassavagga
an4.44:0.3	Dutiyakodhagarusutta
an4.44:1.1	“Cattārome, bhikkhave, asaddhammā.
an4.44:1.2	Katame cattāro?
an4.44:1.3	Kodhagarutā na saddhammagarutā, makkhagarutā na saddhammagarutā, lābhagarutā na saddhammagarutā, sakkāragarutā na saddhammagarutā.
an4.44:1.4	Ime kho, bhikkhave, cattāro asaddhammā.
an4.44:2.1	Cattārome, bhikkhave, saddhammā.
an4.44:2.2	Katame cattāro?
an4.44:2.3	Saddhammagarutā na kodhagarutā, saddhammagarutā na makkhagarutā, saddhammagarutā na lābhagarutā, saddhammagarutā na sakkāragarutā.
an4.44:2.4	Ime kho, bhikkhave, cattāro saddhammāti.
an4.44:3.1	Kodhamakkhagaru bhikkhu,
an4.44:3.2	lābhasakkāragāravo;
an4.44:3.3	Sukhette pūtibījaṁva,
an4.44:3.4	saddhamme na virūhati.
an4.44:4.1	Ye ca saddhammagaruno,
an4.44:4.2	vihaṁsu viharanti ca;
an4.44:4.3	Te ve dhamme virūhanti,
an4.44:4.4	snehānvayamivosadhā”ti.
an4.44:4.5	Catutthaṁ.
an4.45:0.1	Aṅguttara Nikāya 4.45
an4.45:0.2	5. Rohitassavagga
an4.45:0.3	Rohitassasutta
an4.45:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an4.45:1.2	Atha kho rohitasso devaputto abhikkantāya rattiyā abhikkantavaṇṇo kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho rohitasso devaputto bhagavantaṁ etadavoca:
an4.45:2.1	“Yattha nu kho, bhante, na jāyati na jīyati na mīyati na cavati na upapajjati, sakkā nu kho so, bhante, gamanena lokassa anto ñātuṁ vā daṭṭhuṁ vā pāpuṇituṁ vā”ti?
an4.45:2.2	“Yattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyanti vadāmī”ti.
an4.45:3.1	“Acchariyaṁ, bhante, abbhutaṁ, bhante.
an4.45:3.2	Yāva subhāsitamidaṁ, bhante, bhagavatā:
an4.45:3.3	‘yattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyanti vadāmī’”ti.
an4.45:4.1	“Bhūtapubbāhaṁ, bhante, rohitasso nāma isi ahosiṁ bhojaputto iddhimā vehāsaṅgamo.
an4.45:4.2	Tassa mayhaṁ, bhante, evarūpo javo ahosi, seyyathāpi nāma daḷhadhammā dhanuggaho sikkhito katahattho katūpāsano lahukena asanena appakasirena tiriyaṁ tālacchāyaṁ atipāteyya.
an4.45:4.3	Tassa mayhaṁ, bhante, evarūpo padavītihāro ahosi, seyyathāpi nāma puratthimā samuddā pacchimo samuddo.
an4.45:4.4	Tassa mayhaṁ, bhante, evarūpena javena samannāgatassa evarūpena ca padavītihārena evarūpaṁ icchāgataṁ uppajji:
an4.45:4.5	‘ahaṁ gamanena lokassa antaṁ pāpuṇissāmī’ti.
an4.45:4.6	So kho ahaṁ, bhante, aññatreva asitapītakhāyitasāyitā aññatra uccārapassāvakammā aññatra niddākilamathapaṭivinodanā vassasatāyuko vassasatajīvī vassasataṁ gantvā appatvāva lokassa antaṁ antarāyeva kālaṅkato.
an4.45:5.1	Acchariyaṁ, bhante, abbhutaṁ, bhante.
an4.45:5.2	Yāva subhāsitamidaṁ, bhante, bhagavatā:
an4.45:5.3	‘yattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyanti vadāmī’”ti.
an4.45:6.1	“‘Yattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyan’ti vadāmi.
an4.45:6.2	Na cāhaṁ, āvuso, appatvāva lokassa antaṁ dukkhassa antakiriyaṁ vadāmi.
an4.45:6.3	Api cāhaṁ, āvuso, imasmiṁyeva byāmamatte kaḷevare sasaññimhi samanake lokañca paññāpemi lokasamudayañca lokanirodhañca lokanirodhagāminiñca paṭipadanti.
an4.45:7.1	Gamanena na pattabbo,
an4.45:7.2	lokassanto kudācanaṁ;
an4.45:7.3	Na ca appatvā lokantaṁ,
an4.45:7.4	dukkhā atthi pamocanaṁ.
an4.45:8.1	Tasmā have lokavidū sumedho,
an4.45:8.2	Lokantagū vusitabrahmacariyo;
an4.45:8.3	Lokassa antaṁ samitāvi ñatvā,
an4.45:8.4	Nāsīsatī lokamimaṁ parañcā”ti.
an4.45:8.5	Pañcamaṁ.
an4.46:0.1	Aṅguttara Nikāya 4.46
an4.46:0.2	5. Rohitassavagga
an4.46:0.3	Dutiyarohitassasutta
an4.46:1.1	Atha kho bhagavā tassā rattiyā accayena bhikkhū āmantesi:
an4.46:1.2	“imaṁ, bhikkhave, rattiṁ rohitasso devaputto abhikkantāya rattiyā abhikkantavaṇṇo kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhito kho, bhikkhave, rohitasso devaputto maṁ etadavoca:
an4.46:1.3	‘yattha nu kho, bhante, na jāyati na jīyati na mīyati na cavati na upapajjati, sakkā nu kho so, bhante, gamanena lokassa anto ñātuṁ vā daṭṭhuṁ vā pāpuṇituṁ vā’ti?
an4.46:1.4	Evaṁ vutte, ahaṁ, bhikkhave, rohitassaṁ devaputtaṁ etadavocaṁ:
an4.46:1.5	‘yattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyanti vadāmī’ti.
an4.46:1.6	Evaṁ vutte, bhikkhave, rohitasso devaputto maṁ etadavoca:
an4.46:1.7	‘acchariyaṁ, bhante, abbhutaṁ, bhante.
an4.46:1.8	Yāva subhāsitamidaṁ, bhante, bhagavatā—
an4.46:1.9	yattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyanti vadāmi’.
an4.46:2.1	Bhūtapubbāhaṁ, bhante, rohitasso nāma isi ahosiṁ bhojaputto iddhimā vehāsaṅgamo.
an4.46:2.2	Tassa mayhaṁ, bhante, evarūpo javo ahosi, seyyathāpi nāma daḷhadhammā dhanuggaho sikkhito katahattho katūpāsano lahukena asanena appakasirena tiriyaṁ tālacchāyaṁ atipāteyya.
an4.46:2.3	Tassa mayhaṁ, bhante, evarūpo padavītihāro ahosi, seyyathāpi nāma puratthimā samuddā pacchimo samuddo.
an4.46:2.4	Tassa mayhaṁ, bhante, evarūpena javena samannāgatassa evarūpena ca padavītihārena evarūpaṁ icchāgataṁ uppajji:
an4.46:2.5	‘ahaṁ gamanena lokassa antaṁ pāpuṇissāmī’ti.
an4.46:2.6	So kho ahaṁ, bhante, aññatreva asitapītakhāyitasāyitā aññatra uccārapassāvakammā aññatra niddākilamathapaṭivinodanā vassasatāyuko vassasatajīvī vassasataṁ gantvā appatvāva lokassa antaṁ antarāyeva kālaṅkato.
an4.46:3.1	Acchariyaṁ, bhante, abbhutaṁ, bhante.
an4.46:3.2	Yāva subhāsitamidaṁ, bhante, bhagavatā:
an4.46:3.3	‘yattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyanti vadāmī’ti.
an4.46:3.4	Evaṁ vutte, ahaṁ, bhikkhave, rohitassaṁ devaputtaṁ etadavocaṁ:
an4.46:4.1	‘Yattha kho, āvuso, na jāyati na jīyati na mīyati na cavati na upapajjati, nāhaṁ, taṁ gamanena lokassa antaṁ ñāteyyaṁ daṭṭheyyaṁ patteyyanti vadāmī’ti.
an4.46:4.2	Na cāhaṁ, āvuso, appatvāva lokassa antaṁ dukkhassantakiriyaṁ vadāmi.
an4.46:4.3	Api cāhaṁ, āvuso, imasmiṁyeva byāmamatte kaḷevare sasaññimhi samanake lokañca paññāpemi lokasamudayañca lokanirodhañca lokanirodhagāminiñca paṭipadanti.
an4.46:5.1	Gamanena na pattabbo,
an4.46:5.2	lokassanto kudācanaṁ;
an4.46:5.3	Na ca appatvā lokantaṁ,
an4.46:5.4	dukkhā atthi pamocanaṁ.
an4.46:6.1	Tasmā have lokavidū sumedho,
an4.46:6.2	Lokantagū vusitabrahmacariyo;
an4.46:6.3	Lokassa antaṁ samitāvi ñatvā,
an4.46:6.4	Nāsīsatī lokamimaṁ parañcā”ti.
an4.46:6.5	Chaṭṭhaṁ.
an4.47:0.1	Aṅguttara Nikāya 4.47
an4.47:0.2	5. Rohitassavagga
an4.47:0.3	Suvidūrasutta
an4.47:1.1	“Cattārimāni, bhikkhave, suvidūravidūrāni.
an4.47:1.2	Katamāni cattāri?
an4.47:1.3	Nabhañca, bhikkhave, pathavī ca;
an4.47:1.4	idaṁ paṭhamaṁ suvidūravidūre.
an4.47:1.5	Orimañca, bhikkhave, tīraṁ samuddassa pārimañca;
an4.47:1.6	idaṁ dutiyaṁ suvidūravidūre.
an4.47:1.7	Yato ca, bhikkhave, verocano abbhudeti yattha ca atthameti;
an4.47:1.8	idaṁ tatiyaṁ suvidūravidūre.
an4.47:1.9	Satañca, bhikkhave, dhammo asatañca dhammo;
an4.47:1.10	idaṁ catutthaṁ suvidūravidūre.
an4.47:1.11	Imāni kho, bhikkhave, cattāri suvidūravidūrānīti.
an4.47:2.1	Nabhañca dūre pathavī ca dūre,
an4.47:2.2	Pāraṁ samuddassa tadāhu dūre;
an4.47:2.3	Yato ca verocano abbhudeti,
an4.47:2.4	Pabhaṅkaro yattha ca atthameti;
an4.47:2.5	Tato have dūrataraṁ vadanti,
an4.47:2.6	Satañca dhammaṁ asatañca dhammaṁ.
an4.47:3.1	Abyāyiko hoti sataṁ samāgamo,
an4.47:3.2	Yāvāpi tiṭṭheyya tatheva hoti;
an4.47:3.3	Khippañhi veti asataṁ samāgamo,
an4.47:3.4	Tasmā sataṁ dhammo asabbhi ārakā”ti.
an4.47:3.5	Sattamaṁ.
an4.48:0.1	Aṅguttara Nikāya 4.48
an4.48:0.2	5. Rohitassavagga
an4.48:0.3	Visākhasutta
an4.48:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an4.48:1.2	Tena kho pana samayena āyasmā visākho pañcālaputto upaṭṭhānasālāyaṁ bhikkhū dhammiyā kathāya sandasseti samādapeti samuttejeti sampahaṁseti, poriyā vācāya vissaṭṭhāya anelagalāya atthassa viññāpaniyā pariyāpannāya anissitāya.
an4.48:1.3	Atha kho bhagavā sāyanhasamayaṁ paṭisallānā vuṭṭhito yena upaṭṭhānasālā tenupasaṅkami; upasaṅkamitvā paññatte āsane nisīdi.
an4.48:1.4	Nisajja kho bhagavā bhikkhū āmantesi:
an4.48:2.1	“Ko nu kho, bhikkhave, upaṭṭhānasālāyaṁ bhikkhū dhammiyā kathāya sandasseti samādapeti samuttejeti sampahaṁseti poriyā vācāya vissaṭṭhāya anelagalāya atthassa viññāpaniyā pariyāpannāya anissitāyā”ti?
an4.48:2.2	“Āyasmā, bhante, visākho pañcālaputto upaṭṭhānasālāyaṁ bhikkhū dhammiyā kathāya sandasseti samādapeti samuttejeti sampahaṁseti poriyā vācāya vissaṭṭhāya anelagalāya atthassa viññāpaniyā pariyāpannāya anissitāyā”ti.
an4.48:3.1	Atha kho bhagavā āyasmantaṁ visākhaṁ pañcālaputtaṁ etadavoca:
an4.48:3.2	“sādhu sādhu, visākha.
an4.48:3.3	Sādhu kho tvaṁ, visākha, bhikkhū dhammiyā kathāya sandassesi samādapesi samuttejesi sampahaṁsesi poriyā vācāya vissaṭṭhāya anelagalāya atthassa viññāpaniyā pariyāpannāya anissitāyāti.
an4.48:4.1	Nābhāsamānaṁ jānanti,
an4.48:4.2	missaṁ bālehi paṇḍitaṁ;
an4.48:4.3	Bhāsamānañca jānanti,
an4.48:4.4	desentaṁ amataṁ padaṁ.
an4.48:5.1	Bhāsaye jotaye dhammaṁ,
an4.48:5.2	paggaṇhe isinaṁ dhajaṁ;
an4.48:5.3	Subhāsitadhajā isayo,
an4.48:5.4	dhammo hi isinaṁ dhajo”ti.
an4.48:5.5	Aṭṭhamaṁ.
an4.49:0.1	Aṅguttara Nikāya 4.49
an4.49:0.2	5. Rohitassavagga
an4.49:0.3	Vipallāsasutta
an4.49:1.1	“Cattārome, bhikkhave, saññāvipallāsā cittavipallāsā diṭṭhivipallāsā.
an4.49:1.2	Katame cattāro?
an4.49:1.3	Anicce, bhikkhave, niccanti saññāvipallāso cittavipallāso diṭṭhivipallāso;
an4.49:1.4	dukkhe, bhikkhave, sukhanti saññāvipallāso cittavipallāso diṭṭhivipallāso;
an4.49:1.5	anattani, bhikkhave, attāti saññāvipallāso cittavipallāso diṭṭhivipallāso;
an4.49:1.6	asubhe, bhikkhave, subhanti saññāvipallāso cittavipallāso diṭṭhivipallāso.
an4.49:1.7	Ime kho, bhikkhave, cattāro saññāvipallāsā cittavipallāsā diṭṭhivipallāsā.
an4.49:2.1	Cattārome, bhikkhave, nasaññāvipallāsā nacittavipallāsā nadiṭṭhivipallāsā.
an4.49:2.2	Katame cattāro?
an4.49:2.3	Anicce, bhikkhave, aniccanti nasaññāvipallāso nacittavipallāso nadiṭṭhivipallāso;
an4.49:2.4	dukkhe, bhikkhave, dukkhanti nasaññāvipallāso nacittavipallāso nadiṭṭhivipallāso;
an4.49:2.5	anattani, bhikkhave, anattāti nasaññāvipallāso nacittavipallāso nadiṭṭhivipallāso;
an4.49:2.6	asubhe, bhikkhave, asubhanti nasaññāvipallāso nacittavipallāso nadiṭṭhivipallāso.
an4.49:2.7	Ime kho, bhikkhave, cattāro nasaññāvipallāsā nacittavipallāsā nadiṭṭhivipallāsāti.
an4.49:3.1	Anicce niccasaññino,
an4.49:3.2	dukkhe ca sukhasaññino;
an4.49:3.3	Anattani ca attāti,
an4.49:3.4	asubhe subhasaññino;
an4.49:3.5	Micchādiṭṭhihatā sattā,
an4.49:3.6	khittacittā visaññino.
an4.49:4.1	Te yogayuttā mārassa,
an4.49:4.2	ayogakkhemino janā;
an4.49:4.3	Sattā gacchanti saṁsāraṁ,
an4.49:4.4	jātimaraṇagāmino.
an4.49:5.1	Yadā ca buddhā lokasmiṁ,
an4.49:5.2	Uppajjanti pabhaṅkarā;
an4.49:5.3	Te imaṁ dhammaṁ pakāsenti,
an4.49:5.4	Dukkhūpasamagāminaṁ.
an4.49:6.1	Tesaṁ sutvāna sappaññā,
an4.49:6.2	sacittaṁ paccaladdhā te;
an4.49:6.3	Aniccaṁ aniccato dakkhuṁ,
an4.49:6.4	dukkhamaddakkhu dukkhato.
an4.49:7.1	Anattani anattāti,
an4.49:7.2	asubhaṁ asubhataddasuṁ;
an4.49:7.3	Sammādiṭṭhisamādānā,
an4.49:7.4	sabbaṁ dukkhaṁ upaccagun”ti.
an4.49:7.5	Navamaṁ.
an4.50:0.1	Aṅguttara Nikāya 4.50
an4.50:0.2	5. Rohitassavagga
an4.50:0.3	Upakkilesasutta
an4.50:1.1	“Cattārome, bhikkhave, candimasūriyānaṁ upakkilesā, yehi upakkilesehi upakkiliṭṭhā candimasūriyā na tapanti na bhāsanti na virocanti.
an4.50:1.2	Katame cattāro?
an4.50:1.3	Abbhā, bhikkhave, candimasūriyānaṁ upakkilesā, yena upakkilesena upakkiliṭṭhā candimasūriyā na tapanti na bhāsanti na virocanti.
an4.50:2.1	Mahikā, bhikkhave, candimasūriyānaṁ upakkilesā, yena upakkilesena upakkiliṭṭhā candimasūriyā na tapanti na bhāsanti na virocanti.
an4.50:3.1	Dhūmo rajo, bhikkhave, candimasūriyānaṁ upakkileso, yena upakkilesena upakkiliṭṭhā candimasūriyā na tapanti na bhāsanti na virocanti.
an4.50:4.1	Rāhu, bhikkhave, asurindo candimasūriyānaṁ upakkileso, yena upakkilesena upakkiliṭṭhā candimasūriyā na tapanti na bhāsanti na virocanti.
an4.50:4.2	Ime kho, bhikkhave, cattāro candimasūriyānaṁ upakkilesā, yehi upakkilesehi upakkiliṭṭhā candimasūriyā na tapanti na bhāsanti na virocanti.
an4.50:5.1	Evamevaṁ kho, bhikkhave, cattārome samaṇabrāhmaṇānaṁ upakkilesā, yehi upakkilesehi upakkiliṭṭhā eke samaṇabrāhmaṇā na tapanti na bhāsanti na virocanti.
an4.50:5.2	Katame cattāro?
an4.50:5.3	Santi, bhikkhave, eke samaṇabrāhmaṇā suraṁ pivanti merayaṁ, surāmerayapānā appaṭiviratā.
an4.50:5.4	Ayaṁ, bhikkhave, paṭhamo samaṇabrāhmaṇānaṁ upakkileso, yena upakkilesena upakkiliṭṭhā eke samaṇabrāhmaṇā na tapanti na bhāsanti na virocanti.
an4.50:6.1	Santi, bhikkhave, eke samaṇabrāhmaṇā methunaṁ dhammaṁ paṭisevanti, methunasmā dhammā appaṭiviratā.
an4.50:6.2	Ayaṁ, bhikkhave, dutiyo samaṇabrāhmaṇānaṁ upakkileso, yena upakkilesena upakkiliṭṭhā eke samaṇabrāhmaṇā na tapanti na bhāsanti na virocanti.
an4.50:7.1	Santi, bhikkhave, eke samaṇabrāhmaṇā jātarūparajataṁ sādiyanti, jātarūparajatapaṭiggahaṇā appaṭiviratā.
an4.50:7.2	Ayaṁ, bhikkhave, tatiyo samaṇabrāhmaṇānaṁ upakkileso, yena upakkilesena upakkiliṭṭhā eke samaṇabrāhmaṇā na tapanti na bhāsanti na virocanti.
an4.50:8.1	Santi, bhikkhave, eke samaṇabrāhmaṇā micchājīvena jīvanti, micchājīvā appaṭiviratā.
an4.50:8.2	Ayaṁ, bhikkhave, catuttho samaṇabrāhmaṇānaṁ upakkileso, yena upakkilesena upakkiliṭṭhā eke samaṇabrāhmaṇā na tapanti na bhāsanti na virocanti.
an4.50:8.3	Ime kho, bhikkhave, cattāro samaṇabrāhmaṇānaṁ upakkilesā, yehi upakkilesehi upakkiliṭṭhā eke samaṇabrāhmaṇā na tapanti na bhāsanti na virocantīti.
an4.50:9.1	Rāgadosaparikkiṭṭhā,
an4.50:9.2	eke samaṇabrāhmaṇā;
an4.50:9.3	Avijjānivutā posā,
an4.50:9.4	piyarūpābhinandino.
an4.50:10.1	Suraṁ pivanti merayaṁ,
an4.50:10.2	paṭisevanti methunaṁ;
an4.50:10.3	Rajataṁ jātarūpañca,
an4.50:10.4	sādiyanti aviddasū;
an4.50:10.5	Micchājīvena jīvanti,
an4.50:10.6	eke samaṇabrāhmaṇā.
an4.50:11.1	Ete upakkilesā vuttā,
an4.50:11.2	buddhenādiccabandhunā;
an4.50:11.3	Yehi upakkilesehi,
an4.50:11.4	eke samaṇabrāhmaṇā;
an4.50:11.5	Na tapanti na bhāsanti,
an4.50:11.6	asuddhā sarajā magā.
an4.50:12.1	Andhakārena onaddhā,
an4.50:12.2	taṇhādāsā sanettikā;
an4.50:12.3	Vaḍḍhenti kaṭasiṁ ghoraṁ,
an4.50:12.4	ādiyanti punabbhavan”ti.
an4.50:12.5	Dasamaṁ.
an4.50:12.6	Rohitassavaggo pañcamo.
an4.50:13.0	Tassuddānaṁ
an4.50:13.1	Samādhipañhā dve kodhā,
an4.50:13.2	Rohitassāpare duve;
an4.50:13.3	Suvidūravisākhavipallāsā,
an4.50:13.4	Upakkilesena te dasāti.
an4.50:13.5	Paṭhamo paṇṇāsako samatto.
an4.51:0.1	Aṅguttara Nikāya 4.51
an4.51:0.2	6. Puññābhisandavagga
an4.51:0.3	Paṭhamapuññābhisandasutta
an4.51:1.1	Sāvatthinidānaṁ.
an4.51:1.2	“Cattārome, bhikkhave, puññābhisandā kusalābhisandā sukhassāhārā sovaggikā sukhavipākā saggasaṁvattanikā iṭṭhāya kantāya manāpāya hitāya sukhāya saṁvattanti.
an4.51:1.3	Katame cattāro?
an4.51:1.4	Yassa, bhikkhave, bhikkhu cīvaraṁ paribhuñjamāno appamāṇaṁ cetosamādhiṁ upasampajja viharati, appamāṇo tassa puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an4.51:2.1	Yassa, bhikkhave, bhikkhu piṇḍapātaṁ paribhuñjamāno appamāṇaṁ cetosamādhiṁ upasampajja viharati, appamāṇo tassa puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an4.51:3.1	Yassa, bhikkhave, bhikkhu senāsanaṁ paribhuñjamāno appamāṇaṁ cetosamādhiṁ upasampajja viharati, appamāṇo tassa puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an4.51:4.1	Yassa, bhikkhave, bhikkhu gilānappaccayabhesajjaparikkhāraṁ paribhuñjamāno appamāṇaṁ cetosamādhiṁ upasampajja viharati, appamāṇo tassa puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an4.51:4.2	Ime kho, bhikkhave, cattāro puññābhisandā kusalābhisandā sukhassāhārā sovaggikā sukhavipākā saggasaṁvattanikā iṭṭhāya kantāya manāpāya hitāya sukhāya saṁvattanti.
an4.51:5.1	Imehi ca pana, bhikkhave, catūhi puññābhisandehi kusalābhisandehi samannāgatassa ariyasāvakassa na sukaraṁ puññassa pamāṇaṁ gahetuṁ: ‘ettako puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattatī’ti. Atha kho asaṅkhyeyyo appameyyo mahāpuññakkhandhotveva saṅkhyaṁ gacchati.
an4.51:6.1	Seyyathāpi, bhikkhave, mahāsamudde na sukaraṁ udakassa pamāṇaṁ gahetuṁ: ‘ettakāni udakāḷhakānīti vā, ettakāni udakāḷhakasatānīti vā, ettakāni udakāḷhakasahassānīti vā, ettakāni udakāḷhakasatasahassānīti vā’, atha kho asaṅkhyeyyo appameyyo mahāudakakkhandhotveva saṅkhyaṁ gacchati;
an4.51:6.2	evamevaṁ kho, bhikkhave, imehi catūhi puññābhisandehi kusalābhisandehi samannāgatassa ariyasāvakassa na sukaraṁ puññassa pamāṇaṁ gahetuṁ: ‘ettako puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattatī’ti. Atha kho asaṅkhyeyyo appameyyo mahāpuññakkhandhotveva saṅkhyaṁ gacchatīti.
an4.51:7.1	Mahodadhiṁ aparimitaṁ mahāsaraṁ,
an4.51:7.2	Bahubheravaṁ ratanavarānamālayaṁ;
an4.51:7.3	Najjo yathā naragaṇasaṅghasevitā,
an4.51:7.4	Puthū savantī upayanti sāgaraṁ.
an4.51:8.1	Evaṁ naraṁ annadapānavatthadaṁ,
an4.51:8.2	Seyyānisajjattharaṇassa dāyakaṁ;
an4.51:8.3	Puññassa dhārā upayanti paṇḍitaṁ,
an4.51:8.4	Najjo yathā vārivahāva sāgaran”ti.
an4.51:8.5	Paṭhamaṁ.
an4.52:0.1	Aṅguttara Nikāya 4.52
an4.52:0.2	6. Puññābhisandavagga
an4.52:0.3	Dutiyapuññābhisandasutta
an4.52:1.1	“Cattārome, bhikkhave, puññābhisandā kusalābhisandā sukhassāhārā sovaggikā sukhavipākā saggasaṁvattanikā iṭṭhāya kantāya manāpāya hitāya sukhāya saṁvattanti.
an4.52:1.2	Katame cattāro?
an4.52:1.3	Idha, bhikkhave, ariyasāvako buddhe aveccappasādena samannāgato hoti:
an4.52:1.4	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an4.52:1.5	Ayaṁ, bhikkhave, paṭhamo puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an4.52:2.1	Puna caparaṁ, bhikkhave, ariyasāvako dhamme aveccappasādena samannāgato hoti:
an4.52:2.2	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.
an4.52:2.3	Ayaṁ, bhikkhave, dutiyo puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an4.52:3.1	Puna caparaṁ, bhikkhave, ariyasāvako saṅghe aveccappasādena samannāgato hoti:
an4.52:3.2	‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.
an4.52:3.3	Ayaṁ, bhikkhave, tatiyo puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an4.52:4.1	Puna caparaṁ, bhikkhave, ariyasāvako ariyakantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṁvattanikehi.
an4.52:4.2	Ayaṁ, bhikkhave, catuttho puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an4.52:4.3	Ime kho, bhikkhave, cattāro puññābhisandā kusalābhisandā sukhassāhārā sovaggikā sukhavipākā saggasaṁvattanikā iṭṭhāya kantāya manāpāya hitāya sukhāya saṁvattantīti.
an4.52:5.1	Yassa saddhā tathāgate,
an4.52:5.2	acalā suppatiṭṭhitā;
an4.52:5.3	Sīlañca yassa kalyāṇaṁ,
an4.52:5.4	ariyakantaṁ pasaṁsitaṁ.
an4.52:6.1	Saṅghe pasādo yassatthi,
an4.52:6.2	ujubhūtañca dassanaṁ;
an4.52:6.3	Adaliddoti taṁ āhu,
an4.52:6.4	amoghaṁ tassa jīvitaṁ.
an4.52:7.1	Tasmā saddhañca sīlañca,
an4.52:7.2	pasādaṁ dhammadassanaṁ;
an4.52:7.3	Anuyuñjetha medhāvī,
an4.52:7.4	saraṁ buddhāna sāsanan”ti.
an4.52:7.5	Dutiyaṁ.
an4.53:0.1	Aṅguttara Nikāya 4.53
an4.53:0.2	6. Puññābhisandavagga
an4.53:0.3	Paṭhamasaṁvāsasutta
an4.53:1.1	Ekaṁ samayaṁ bhagavā antarā ca madhuraṁ antarā ca verañjaṁ addhānamaggappaṭipanno hoti.
an4.53:1.2	Sambahulāpi kho gahapatī ca gahapatāniyo ca antarā ca madhuraṁ antarā ca verañjaṁ addhānamaggappaṭipannā honti.
an4.53:1.3	Atha kho bhagavā maggā okkamma aññatarasmiṁ rukkhamūle (…) nisīdi.
an4.53:1.4	Addasaṁsu kho gahapatī ca gahapatāniyo ca bhagavantaṁ aññatarasmiṁ rukkhamūle nisinnaṁ.
an4.53:1.5	Disvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinne kho te gahapatī ca gahapatāniyo ca bhagavā etadavoca:
an4.53:2.1	“Cattārome, gahapatayo, saṁvāsā.
an4.53:2.2	Katame cattāro?
an4.53:2.3	Chavo chavāya saddhiṁ saṁvasati,
an4.53:2.4	chavo deviyā saddhiṁ saṁvasati,
an4.53:2.5	devo chavāya saddhiṁ saṁvasati,
an4.53:2.6	devo deviyā saddhiṁ saṁvasati.
an4.53:3.1	Kathañca, gahapatayo, chavo chavāya saddhiṁ saṁvasati?
an4.53:3.2	Idha, gahapatayo, sāmiko hoti pāṇātipātī adinnādāyī kāmesumicchācārī musāvādī surāmerayamajjapamādaṭṭhāyī dussīlo pāpadhammo maccheramalapariyuṭṭhitena cetasā agāraṁ ajjhāvasati akkosakaparibhāsako samaṇabrāhmaṇānaṁ;
an4.53:3.3	bhariyāpissa hoti pāṇātipātinī adinnādāyinī kāmesumicchācārinī musāvādinī surāmerayamajjapamādaṭṭhāyinī dussīlā pāpadhammā maccheramalapariyuṭṭhitena cetasā agāraṁ ajjhāvasati akkosikaparibhāsikā samaṇabrāhmaṇānaṁ.
an4.53:3.4	Evaṁ kho, gahapatayo, chavo chavāya saddhiṁ saṁvasati.
an4.53:4.1	Kathañca, gahapatayo, chavo deviyā saddhiṁ saṁvasati?
an4.53:4.2	Idha, gahapatayo, sāmiko hoti pāṇātipātī adinnādāyī kāmesumicchācārī musāvādī surāmerayamajjapamādaṭṭhāyī dussīlo pāpadhammo maccheramalapariyuṭṭhitena cetasā agāraṁ ajjhāvasati akkosakaparibhāsako samaṇabrāhmaṇānaṁ;
an4.53:4.3	bhariyā khvassa hoti pāṇātipātā paṭiviratā adinnādānā paṭiviratā kāmesumicchācārā paṭiviratā musāvādā paṭiviratā surāmerayamajjapamādaṭṭhānā paṭiviratā sīlavatī kalyāṇadhammā vigatamalamaccherena cetasā agāraṁ ajjhāvasati anakkosikaparibhāsikā samaṇabrāhmaṇānaṁ.
an4.53:4.4	Evaṁ kho, gahapatayo, chavo deviyā saddhiṁ saṁvasati.
an4.53:5.1	Kathañca, gahapatayo, devo chavāya saddhiṁ saṁvasati?
an4.53:5.2	Idha, gahapatayo, sāmiko hoti pāṇātipātā paṭivirato adinnādānā paṭivirato kāmesumicchācārā paṭivirato musāvādā paṭivirato surāmerayamajjapamādaṭṭhānā paṭivirato sīlavā kalyāṇadhammo vigatamalamaccherena cetasā agāraṁ ajjhāvasati anakkosakaparibhāsako samaṇabrāhmaṇānaṁ;
an4.53:5.3	bhariyā khvassa hoti pāṇātipātinī …pe… surāmerayamajjapamādaṭṭhāyinī dussīlā pāpadhammā maccheramalapariyuṭṭhitena cetasā agāraṁ ajjhāvasati akkosikaparibhāsikā samaṇabrāhmaṇānaṁ.
an4.53:5.4	Evaṁ kho, gahapatayo, devo chavāya saddhiṁ saṁvasati.
an4.53:6.1	Kathañca, gahapatayo, devo deviyā saddhiṁ saṁvasati?
an4.53:6.2	Idha, gahapatayo, sāmiko hoti pāṇātipātā paṭivirato …pe… sīlavā kalyāṇadhammo vigatamalamaccherena cetasā agāraṁ ajjhāvasati anakkosakaparibhāsako samaṇabrāhmaṇānaṁ;
an4.53:6.3	bhariyāpissa hoti pāṇātipātā paṭiviratā …pe… surāmerayamajjapamādaṭṭhānā paṭiviratā sīlavatī kalyāṇadhammā vigatamalamaccherena cetasā agāraṁ ajjhāvasati anakkosikaparibhāsikā samaṇabrāhmaṇānaṁ.
an4.53:6.4	Evaṁ kho, gahapatayo, devo deviyā saddhiṁ saṁvasati.
an4.53:6.5	Ime kho, gahapatayo, cattāro saṁvāsāti.
an4.53:7.1	Ubho ca honti dussīlā,
an4.53:7.2	kadariyā paribhāsakā;
an4.53:7.3	Te honti jānipatayo,
an4.53:7.4	chavā saṁvāsamāgatā.
an4.53:8.1	Sāmiko hoti dussīlo,
an4.53:8.2	kadariyo paribhāsako;
an4.53:8.3	Bhariyā sīlavatī hoti,
an4.53:8.4	vadaññū vītamaccharā;
an4.53:8.5	Sāpi devī saṁvasati,
an4.53:8.6	chavena patinā saha.
an4.53:9.1	Sāmiko sīlavā hoti,
an4.53:9.2	vadaññū vītamaccharo;
an4.53:9.3	Bhariyā hoti dussīlā,
an4.53:9.4	kadariyā paribhāsikā;
an4.53:9.5	Sāpi chavā saṁvasati,
an4.53:9.6	devena patinā saha.
an4.53:10.1	Ubho saddhā vadaññū ca,
an4.53:10.2	saññatā dhammajīvino;
an4.53:10.3	Te honti jānipatayo,
an4.53:10.4	aññamaññaṁ piyaṁvadā.
an4.53:11.1	Atthāsaṁ pacurā honti,
an4.53:11.2	phāsukaṁ upajāyati;
an4.53:11.3	Amittā dummanā honti,
an4.53:11.4	ubhinnaṁ samasīlinaṁ.
an4.53:12.1	Idha dhammaṁ caritvāna,
an4.53:12.2	samasīlabbatā ubho;
an4.53:12.3	Nandino devalokasmiṁ,
an4.53:12.4	modanti kāmakāmino”ti.
an4.53:12.5	Tatiyaṁ.
an4.54:0.1	Aṅguttara Nikāya 4.54
an4.54:0.2	6. Puññābhisandavagga
an4.54:0.3	Dutiyasaṁvāsasutta
an4.54:1.1	“Cattārome, bhikkhave, saṁvāsā.
an4.54:1.2	Katame cattāro?
an4.54:1.3	Chavo chavāya saddhiṁ saṁvasati,
an4.54:1.4	chavo deviyā saddhiṁ saṁvasati,
an4.54:1.5	devo chavāya saddhiṁ saṁvasati,
an4.54:1.6	devo deviyā saddhiṁ saṁvasati.
an4.54:2.1	Kathañca, bhikkhave, chavo chavāya saddhiṁ saṁvasati.
an4.54:2.2	Idha, bhikkhave, sāmiko hoti pāṇātipātī adinnādāyī kāmesumicchācārī musāvādī pisuṇavāco pharusavāco samphappalāpī abhijjhālu byāpannacitto micchādiṭṭhiko dussīlo pāpadhammo maccheramalapariyuṭṭhitena cetasā agāraṁ ajjhāvasati akkosakaparibhāsako samaṇabrāhmaṇānaṁ;
an4.54:2.3	bhariyāpissa hoti pāṇātipātinī adinnādāyinī kāmesumicchācārinī musāvādinī pisuṇavācā pharusavācā samphappalāpinī abhijjhālunī byāpannacittā micchādiṭṭhikā dussīlā pāpadhammā maccheramalapariyuṭṭhitena cetasā agāraṁ ajjhāvasati akkosikaparibhāsikā samaṇabrāhmaṇānaṁ.
an4.54:2.4	Evaṁ kho, bhikkhave, chavo chavāya saddhiṁ saṁvasati.
an4.54:3.1	Kathañca, bhikkhave, chavo deviyā saddhiṁ saṁvasati?
an4.54:3.2	Idha, bhikkhave, sāmiko hoti pāṇātipātī …pe… micchādiṭṭhiko dussīlo pāpadhammo maccheramalapariyuṭṭhitena cetasā agāraṁ ajjhāvasati akkosakaparibhāsako samaṇabrāhmaṇānaṁ;
an4.54:3.3	bhariyā khvassa hoti pāṇātipātā paṭiviratā adinnādānā paṭiviratā kāmesumicchācārā paṭiviratā musāvādā paṭiviratā pisuṇāya vācāya paṭiviratā pharusāya vācāya paṭiviratā samphappalāpā paṭiviratā anabhijjhālunī abyāpannacittā sammādiṭṭhikā sīlavatī kalyāṇadhammā vigatamalamaccherena cetasā agāraṁ ajjhāvasati anakkosikaparibhāsikā samaṇabrāhmaṇānaṁ.
an4.54:3.4	Evaṁ kho, bhikkhave, chavo deviyā saddhiṁ saṁvasati.
an4.54:4.1	Kathañca, bhikkhave, devo chavāya saddhiṁ saṁvasati?
an4.54:4.2	Idha, bhikkhave, sāmiko hoti pāṇātipātā paṭivirato adinnādānā paṭivirato kāmesumicchācārā paṭivirato musāvādā paṭivirato pisuṇāya vācāya paṭivirato pharusāya vācāya paṭivirato samphappalāpā paṭivirato anabhijjhālu abyāpannacitto sammādiṭṭhiko sīlavā kalyāṇadhammo vigatamalamaccherena cetasā agāraṁ ajjhāvasati anakkosakaparibhāsako samaṇabrāhmaṇānaṁ;
an4.54:4.3	bhariyā khvassa hoti pāṇātipātinī …pe… micchādiṭṭhikā dussīlā pāpadhammā maccheramalapariyuṭṭhitena cetasā agāraṁ ajjhāvasati akkosikaparibhāsikā samaṇabrāhmaṇānaṁ.
an4.54:4.4	Evaṁ kho, bhikkhave, devo chavāya saddhiṁ saṁvasati.
an4.54:5.1	Kathañca, bhikkhave, devo deviyā saddhiṁ saṁvasati?
an4.54:5.2	Idha, bhikkhave, sāmiko hoti pāṇātipātā paṭivirato …pe… sammādiṭṭhiko sīlavā kalyāṇadhammo vigatamalamaccherena cetasā agāraṁ ajjhāvasati anakkosakaparibhāsako samaṇabrāhmaṇānaṁ;
an4.54:5.3	bhariyāpissa hoti pāṇātipātā paṭiviratā …pe… sammādiṭṭhikā sīlavatī kalyāṇadhammā vigatamalamaccherena cetasā agāraṁ ajjhāvasati anakkosikaparibhāsikā samaṇabrāhmaṇānaṁ.
an4.54:5.4	Evaṁ kho, bhikkhave, devo deviyā saddhiṁ saṁvasati.
an4.54:5.5	Ime kho, bhikkhave, cattāro saṁvāsāti.
an4.54:6.1	Ubho ca honti dussīlā,
an4.54:6.2	kadariyā paribhāsakā;
an4.54:6.3	Te honti jānipatayo,
an4.54:6.4	chavā saṁvāsamāgatā.
an4.54:7.1	Sāmiko hoti dussīlo,
an4.54:7.2	kadariyo paribhāsako;
an4.54:7.3	Bhariyā sīlavatī hoti,
an4.54:7.4	vadaññū vītamaccharā;
an4.54:7.5	Sāpi devī saṁvasati,
an4.54:7.6	chavena patinā saha.
an4.54:8.1	Sāmiko sīlavā hoti,
an4.54:8.2	vadaññū vītamaccharo;
an4.54:8.3	Bhariyā hoti dussīlā,
an4.54:8.4	kadariyā paribhāsikā;
an4.54:8.5	Sāpi chavā saṁvasati,
an4.54:8.6	devena patinā saha.
an4.54:9.1	Ubho saddhā vadaññū ca,
an4.54:9.2	saññatā dhammajīvino;
an4.54:9.3	Te honti jānipatayo,
an4.54:9.4	aññamaññaṁ piyaṁvadā.
an4.54:10.1	Atthāsaṁ pacurā honti,
an4.54:10.2	phāsukaṁ upajāyati;
an4.54:10.3	Amittā dummanā honti,
an4.54:10.4	ubhinnaṁ samasīlinaṁ.
an4.54:11.1	Idha dhammaṁ caritvāna,
an4.54:11.2	samasīlabbatā ubho;
an4.54:11.3	Nandino devalokasmiṁ,
an4.54:11.4	modanti kāmakāmino”ti.
an4.54:11.5	Catutthaṁ.
an4.55:0.1	Aṅguttara Nikāya 4.55
an4.55:0.2	6. Puññābhisandavagga
an4.55:0.3	Paṭhamasamajīvīsutta
an4.55:1.1	Evaṁ me sutaṁ—
an4.55:1.2	ekaṁ samayaṁ bhagavā bhaggesu viharati susumāragire bhesakaḷāvane migadāye.
an4.55:1.3	Atha kho bhagavā pubbaṇhasamayaṁ nivāsetvā pattacīvaramādāya yena nakulapituno gahapatissa nivesanaṁ tenupasaṅkami; upasaṅkamitvā paññatte āsane nisīdi.
an4.55:1.4	Atha kho nakulapitā ca gahapati nakulamātā ca gahapatānī yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinno kho nakulapitā gahapati bhagavantaṁ etadavoca:
an4.55:2.1	“Yato me, bhante, nakulamātā gahapatānī daharasseva daharā ānītā, nābhijānāmi nakulamātaraṁ gahapatāniṁ manasāpi aticaritā, kuto pana kāyena.
an4.55:2.2	Iccheyyāma mayaṁ, bhante, diṭṭhe ceva dhamme aññamaññaṁ passituṁ abhisamparāyañca aññamaññaṁ passitun”ti.
an4.55:2.3	Nakulamātāpi kho gahapatānī bhagavantaṁ etadavoca:
an4.55:2.4	“yatohaṁ, bhante, nakulapituno gahapatissa daharasseva daharā ānītā, nābhijānāmi nakulapitaraṁ gahapatiṁ manasāpi aticaritā, kuto pana kāyena.
an4.55:2.5	Iccheyyāma mayaṁ, bhante, diṭṭhe ceva dhamme aññamaññaṁ passituṁ abhisamparāyañca aññamaññaṁ passitun”ti.
an4.55:3.1	“Ākaṅkheyyuñce, gahapatayo, ubho jānipatayo diṭṭhe ceva dhamme aññamaññaṁ passituṁ abhisamparāyañca aññamaññaṁ passituṁ ubhova assu samasaddhā samasīlā samacāgā samapaññā, te diṭṭhe ceva dhamme aññamaññaṁ passanti abhisamparāyañca aññamaññaṁ passantīti.
an4.55:4.1	Ubho saddhā vadaññū ca,
an4.55:4.2	saññatā dhammajīvino;
an4.55:4.3	Te honti jānipatayo,
an4.55:4.4	aññamaññaṁ piyaṁvadā.
an4.55:5.1	Atthāsaṁ pacurā honti,
an4.55:5.2	phāsukaṁ upajāyati;
an4.55:5.3	Amittā dummanā honti,
an4.55:5.4	ubhinnaṁ samasīlinaṁ.
an4.55:6.1	Idha dhammaṁ caritvāna,
an4.55:6.2	samasīlabbatā ubho;
an4.55:6.3	Nandino devalokasmiṁ,
an4.55:6.4	modanti kāmakāmino”ti.
an4.55:6.5	Pañcamaṁ.
an4.56:0.1	Aṅguttara Nikāya 4.56
an4.56:0.2	6. Puññābhisandavagga
an4.56:0.3	Dutiyasamajīvīsutta
an4.56:1.1	“Ākaṅkheyyuñce, bhikkhave, ubho jānipatayo diṭṭhe ceva dhamme aññamaññaṁ passituṁ abhisamparāyañca aññamaññaṁ passituṁ ubhova assu samasaddhā samasīlā samacāgā samapaññā, te diṭṭhe ceva dhamme aññamaññaṁ passanti abhisamparāyañca aññamaññaṁ passantīti.
an4.56:2.1	Ubho saddhā vadaññū ca,
an4.56:2.2	saññatā dhammajīvino;
an4.56:2.3	Te honti jānipatayo,
an4.56:2.4	aññamaññaṁ piyaṁvadā.
an4.56:3.1	Atthāsaṁ pacurā honti,
an4.56:3.2	phāsukaṁ upajāyati;
an4.56:3.3	Amittā dummanā honti,
an4.56:3.4	ubhinnaṁ samasīlinaṁ.
an4.56:4.1	Idha dhammaṁ caritvāna,
an4.56:4.2	samasīlabbatā ubho;
an4.56:4.3	Nandino devalokasmiṁ,
an4.56:4.4	modanti kāmakāmino”ti.
an4.56:4.5	Chaṭṭhaṁ.
an4.57:0.1	Aṅguttara Nikāya 4.57
an4.57:0.2	6. Puññābhisandavagga
an4.57:0.3	Suppavāsāsutta
an4.57:1.1	Ekaṁ samayaṁ bhagavā koliyesu viharati pajjanikaṁ nāma koliyānaṁ nigamo.
an4.57:1.2	Atha kho bhagavā pubbaṇhasamayaṁ nivāsetvā pattacīvaramādāya yena suppavāsāya koliyadhītuyā nivesanaṁ tenupasaṅkami; upasaṅkamitvā paññatte āsane nisīdi.
an4.57:1.3	Atha kho suppavāsā koliyadhītā bhagavantaṁ paṇītena khādanīyena bhojanīyena sahatthā santappesi sampavāresi.
an4.57:1.4	Atha kho suppavāsā koliyadhītā bhagavantaṁ bhuttāviṁ onītapattapāṇiṁ ekamantaṁ nisīdi.
an4.57:1.5	Ekamantaṁ nisinnaṁ kho suppavāsaṁ koliyadhītaraṁ bhagavā etadavoca:
an4.57:2.1	“Bhojanaṁ, suppavāse, dentī ariyasāvikā paṭiggāhakānaṁ cattāri ṭhānāni deti.
an4.57:2.2	Katamāni cattāri?
an4.57:2.3	Āyuṁ deti, vaṇṇaṁ deti, sukhaṁ deti, balaṁ deti.
an4.57:2.4	Āyuṁ kho pana datvā āyussa bhāginī hoti dibbassa vā mānusassa vā.
an4.57:2.5	Vaṇṇaṁ datvā vaṇṇassa bhāginī hoti dibbassa vā mānusassa vā.
an4.57:2.6	Sukhaṁ datvā sukhassa bhāginī hoti dibbassa vā mānusassa vā.
an4.57:2.7	Balaṁ datvā balassa bhāginī hoti dibbassa vā mānusassa vā.
an4.57:2.8	Bhojanaṁ, suppavāse, dentī ariyasāvikā paṭiggāhakānaṁ imāni cattāri ṭhānāni detīti.
an4.57:3.1	Susaṅkhataṁ bhojanaṁ yā dadāti,
an4.57:3.2	Suciṁ paṇītaṁ rasasā upetaṁ;
an4.57:3.3	Sā dakkhiṇā ujjugatesu dinnā,
an4.57:3.4	Caraṇūpapannesu mahaggatesu;
an4.57:3.5	Puññena puññaṁ saṁsandamānā,
an4.57:3.6	Mahapphalā lokavidūna vaṇṇitā.
an4.57:4.1	Etādisaṁ yaññamanussarantā,
an4.57:4.2	Ye vedajātā vicaranti loke;
an4.57:4.3	Vineyya maccheramalaṁ samūlaṁ,
an4.57:4.4	Aninditā saggamupenti ṭhānan”ti.
an4.57:4.5	Sattamaṁ.
an4.58:0.1	Aṅguttara Nikāya 4.58
an4.58:0.2	6. Puññābhisandavagga
an4.58:0.3	Sudattasutta
an4.58:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an4.58:2.1	“Bhojanaṁ, gahapati, dadamāno ariyasāvako paṭiggāhakānaṁ cattāri ṭhānāni deti.
an4.58:2.2	Katamāni cattāri?
an4.58:2.3	Āyuṁ deti, vaṇṇaṁ deti, sukhaṁ deti, balaṁ deti.
an4.58:2.4	Āyuṁ kho pana datvā āyussa bhāgī hoti dibbassa vā mānusassa vā.
an4.58:2.5	Vaṇṇaṁ datvā … sukhaṁ datvā … balaṁ datvā balassa bhāgī hoti dibbassa vā mānusassa vā.
an4.58:2.6	Bhojanaṁ, gahapati, dadamāno ariyasāvako paṭiggāhakānaṁ imāni cattāri ṭhānāni detīti.
an4.58:3.1	Yo saññatānaṁ paradattabhojinaṁ,
an4.58:3.2	Kālena sakkacca dadāti bhojanaṁ;
an4.58:3.3	Cattāri ṭhānāni anuppavecchati,
an4.58:3.4	Āyuñca vaṇṇañca sukhaṁ balañca.
an4.58:4.1	So āyudāyī vaṇṇadāyī,
an4.58:4.2	sukhaṁ balaṁ dado naro;
an4.58:4.3	Dīghāyu yasavā hoti,
an4.58:4.4	yattha yatthūpapajjatī”ti.
an4.58:4.5	Aṭṭhamaṁ.
an4.59:0.1	Aṅguttara Nikāya 4.59
an4.59:0.2	6. Puññābhisandavagga
an4.59:0.3	Bhojanasutta
an4.59:1.1	“Bhojanaṁ, bhikkhave, dadamāno dāyako paṭiggāhakānaṁ cattāri ṭhānāni deti.
an4.59:1.2	Katamāni cattāri?
an4.59:1.3	Āyuṁ deti, vaṇṇaṁ deti, sukhaṁ deti, balaṁ deti.
an4.59:1.4	Āyuṁ kho pana datvā āyussa bhāgī hoti dibbassa vā mānusassa vā.
an4.59:1.5	Vaṇṇaṁ datvā … sukhaṁ datvā … balaṁ datvā balassa bhāgī hoti dibbassa vā mānusassa vā.
an4.59:1.6	Bhojanaṁ, bhikkhave, dadamāno dāyako paṭiggāhakānaṁ imāni cattāri ṭhānāni detīti.
an4.59:2.1	Yo saññatānaṁ paradattabhojinaṁ,
an4.59:2.2	Kālena sakkacca dadāti bhojanaṁ;
an4.59:2.3	Cattāri ṭhānāni anuppavecchati,
an4.59:2.4	Āyuñca vaṇṇañca sukhaṁ balañca.
an4.59:3.1	So āyudāyī vaṇṇadāyī,
an4.59:3.2	sukhaṁ balaṁ dado naro;
an4.59:3.3	Dīghāyu yasavā hoti,
an4.59:3.4	yattha yatthūpapajjatī”ti.
an4.59:3.5	Navamaṁ.
an4.60:0.1	Aṅguttara Nikāya 4.60
an4.60:0.2	6. Puññābhisandavagga
an4.60:0.3	Gihisāmīcisutta
an4.60:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an4.60:2.1	“Catūhi kho, gahapati, dhammehi samannāgato ariyasāvako gihisāmīcipaṭipadaṁ paṭipanno hoti yasopaṭilābhiniṁ saggasaṁvattanikaṁ.
an4.60:2.2	Katamehi catūhi?
an4.60:2.3	Idha, gahapati, ariyasāvako bhikkhusaṅghaṁ paccupaṭṭhito hoti cīvarena, bhikkhusaṅghaṁ paccupaṭṭhito hoti piṇḍapātena, bhikkhusaṅghaṁ paccupaṭṭhito hoti senāsanena, bhikkhusaṅghaṁ paccupaṭṭhito hoti gilānappaccayabhesajjaparikkhārena.
an4.60:2.4	Imehi kho, gahapati, catūhi dhammehi samannāgato ariyasāvako gihisāmīcipaṭipadaṁ paṭipanno hoti yasopaṭilābhiniṁ saggasaṁvattanikanti.
an4.60:3.1	Gihisāmīcipaṭipadaṁ,
an4.60:3.2	paṭipajjanti paṇḍitā;
an4.60:3.3	Sammaggate sīlavante,
an4.60:3.4	cīvarena upaṭṭhitā.
an4.60:4.1	Piṇḍapātasayanena,
an4.60:4.2	Gilānappaccayena ca;
an4.60:4.3	Tesaṁ divā ca ratto ca,
an4.60:4.4	Sadā puññaṁ pavaḍḍhati;
an4.60:4.5	Saggañca kamatiṭṭhānaṁ,
an4.60:4.6	Kammaṁ katvāna bhaddakan”ti.
an4.60:4.7	Dasamaṁ.
an4.60:4.8	Puññābhisandavaggo paṭhamo.
an4.60:5.0	Tassuddānaṁ
an4.60:5.1	Dve puññābhisandā dve ca,
an4.60:5.2	saṁvāsā samajīvino;
an4.60:5.3	Suppavāsā sudatto ca,
an4.60:5.4	bhojanaṁ gihisāmicīti.
an4.61:0.1	Aṅguttara Nikāya 4.61
an4.61:0.2	7. Pattakammavagga
an4.61:0.3	Pattakammasutta
an4.61:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an4.61:2.1	“Cattārome, gahapati, dhammā iṭṭhā kantā manāpā dullabhā lokasmiṁ.
an4.61:2.2	Katame cattāro?
an4.61:2.3	Bhogā me uppajjantu sahadhammenāti, ayaṁ paṭhamo dhammo iṭṭho kanto manāpo dullabho lokasmiṁ.
an4.61:3.1	Bhoge laddhā sahadhammena yaso me āgacchatu saha ñātīhi saha upajjhāyehīti, ayaṁ dutiyo dhammo iṭṭho kanto manāpo dullabho lokasmiṁ.
an4.61:4.1	Bhoge laddhā sahadhammena yasaṁ laddhā saha ñātīhi saha upajjhāyehi ciraṁ jīvāmi dīghamāyuṁ pālemīti, ayaṁ tatiyo dhammo iṭṭho kanto manāpo dullabho lokasmiṁ.
an4.61:5.1	Bhoge laddhā sahadhammena yasaṁ laddhā saha ñātīhi saha upajjhāyehi ciraṁ jīvitvā dīghamāyuṁ pāletvā kāyassa bhedā paraṁ maraṇā sugatiṁ saggaṁ lokaṁ upapajjāmīti, ayaṁ catuttho dhammo iṭṭho kanto manāpo dullabho lokasmiṁ.
an4.61:5.2	Ime kho, gahapati, cattāro dhammā iṭṭhā kantā manāpā dullabhā lokasmiṁ.
an4.61:6.1	Imesaṁ kho, gahapati, catunnaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ cattāro dhammā paṭilābhāya saṁvattanti.
an4.61:6.2	Katame cattāro?
an4.61:6.3	Saddhāsampadā, sīlasampadā, cāgasampadā, paññāsampadā.
an4.61:7.1	Katamā ca, gahapati, saddhāsampadā?
an4.61:7.2	Idha, gahapati, ariyasāvako saddho hoti, saddahati tathāgatassa bodhiṁ:
an4.61:7.3	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi, satthā devamanussānaṁ buddho bhagavā’ti.
an4.61:7.4	Ayaṁ vuccati, gahapati, saddhāsampadā.
an4.61:8.1	Katamā ca, gahapati, sīlasampadā?
an4.61:8.2	Idha, gahapati, ariyasāvako pāṇātipātā paṭivirato hoti …pe… surāmerayamajjapamādaṭṭhānā paṭivirato hoti.
an4.61:8.3	Ayaṁ vuccati, gahapati, sīlasampadā.
an4.61:9.1	Katamā ca, gahapati, cāgasampadā?
an4.61:9.2	Idha, gahapati, ariyasāvako vigatamalamaccherena cetasā agāraṁ ajjhāvasati muttacāgo payatapāṇi vosaggarato yācayogo dānasaṁvibhāgarato.
an4.61:9.3	Ayaṁ vuccati, gahapati, cāgasampadā.
an4.61:10.1	Katamā ca, gahapati, paññāsampadā?
an4.61:10.2	Abhijjhāvisamalobhābhibhūtena, gahapati, cetasā viharanto akiccaṁ karoti, kiccaṁ aparādheti.
an4.61:10.3	Akiccaṁ karonto kiccaṁ aparādhento yasā ca sukhā ca dhaṁsati.
an4.61:10.4	Byāpādābhibhūtena, gahapati, cetasā viharanto akiccaṁ karoti, kiccaṁ aparādheti.
an4.61:10.5	Akiccaṁ karonto kiccaṁ aparādhento yasā ca sukhā ca dhaṁsati.
an4.61:10.6	Thinamiddhābhibhūtena, gahapati, cetasā viharanto akiccaṁ karoti kiccaṁ aparādheti.
an4.61:10.7	Akiccaṁ karonto kiccaṁ aparādhento yasā ca sukhā ca dhaṁsati.
an4.61:10.8	Uddhaccakukkuccābhibhūtena, gahapati, cetasā viharanto akiccaṁ karoti, kiccaṁ aparādheti.
an4.61:10.9	Akiccaṁ karonto kiccaṁ aparādhento yasā ca sukhā ca dhaṁsati.
an4.61:10.10	Vicikicchābhibhūtena, gahapati, cetasā viharanto akiccaṁ karoti, kiccaṁ aparādheti.
an4.61:10.11	Akiccaṁ karonto kiccaṁ aparādhento yasā ca sukhā ca dhaṁsati.
an4.61:11.1	Sa kho so, gahapati, ariyasāvako abhijjhāvisamalobho cittassa upakkilesoti, iti viditvā abhijjhāvisamalobhaṁ cittassa upakkilesaṁ pajahati.
an4.61:11.2	Byāpādo cittassa upakkilesoti, iti viditvā byāpādaṁ cittassa upakkilesaṁ pajahati.
an4.61:11.3	Thinamiddhaṁ cittassa upakkilesoti, iti viditvā thinamiddhaṁ cittassa upakkilesaṁ pajahati.
an4.61:11.4	Uddhaccakukkuccaṁ cittassa upakkilesoti, iti viditvā uddhaccakukkuccaṁ cittassa upakkilesaṁ pajahati.
an4.61:11.5	Vicikicchā cittassa upakkilesoti, iti viditvā vicikicchaṁ cittassa upakkilesaṁ pajahati.
an4.61:12.1	Yato ca kho, gahapati, ariyasāvakassa abhijjhāvisamalobho cittassa upakkilesoti, iti viditvā abhijjhāvisamalobho cittassa upakkileso pahīno hoti.
an4.61:12.2	Byāpādo cittassa upakkilesoti, iti viditvā byāpādo cittassa upakkileso pahīno hoti.
an4.61:12.3	Thinamiddhaṁ cittassa upakkilesoti, iti viditvā thinamiddhaṁ cittassa upakkileso pahīno hoti.
an4.61:12.4	Uddhaccakukkuccaṁ cittassa upakkilesoti, iti viditvā uddhaccakukkuccaṁ cittassa upakkileso pahīno hoti.
an4.61:12.5	Vicikicchā cittassa upakkilesoti, iti viditvā vicikicchā cittassa upakkileso pahīno hoti.
an4.61:12.6	Ayaṁ vuccati, gahapati, ariyasāvako mahāpañño puthupañño āpātadaso paññāsampanno.
an4.61:12.7	Ayaṁ vuccati, gahapati, paññāsampadā.
an4.61:12.8	Imesaṁ kho, gahapati, catunnaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ ime cattāro dhammā paṭilābhāya saṁvattanti.
an4.61:13.1	Sa kho so, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi cattāri pattakammāni kattā hoti.
an4.61:13.2	Katamāni cattāri?
an4.61:13.3	Idha, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi attānaṁ sukheti pīṇeti sammā sukhaṁ pariharati.
an4.61:13.4	Mātāpitaro sukheti pīṇeti sammā sukhaṁ pariharati.
an4.61:13.5	Puttadāradāsakammakaraporise sukheti pīṇeti sammā sukhaṁ pariharati.
an4.61:13.6	Mittāmacce sukheti pīṇeti sammā sukhaṁ pariharati.
an4.61:13.7	Idamassa paṭhamaṁ ṭhānagataṁ hoti pattagataṁ āyatanaso paribhuttaṁ.
an4.61:14.1	Puna caparaṁ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi yā tā honti āpadā aggito vā udakato vā rājato vā corato vā appiyato vā dāyādato, tathārūpāsu āpadāsu pariyodhāya saṁvattati.
an4.61:14.2	Sotthiṁ attānaṁ karoti.
an4.61:14.3	Idamassa dutiyaṁ ṭhānagataṁ hoti pattagataṁ āyatanaso paribhuttaṁ.
an4.61:15.1	Puna caparaṁ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi pañcabaliṁ kattā hoti—
an4.61:15.2	ñātibaliṁ, atithibaliṁ, pubbapetabaliṁ, rājabaliṁ, devatābaliṁ.
an4.61:15.3	Idamassa tatiyaṁ ṭhānagataṁ hoti pattagataṁ āyatanaso paribhuttaṁ.
an4.61:16.1	Puna caparaṁ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi ye te samaṇabrāhmaṇā madappamādā paṭiviratā khantisoracce niviṭṭhā ekamattānaṁ damenti, ekamattānaṁ samenti, ekamattānaṁ parinibbāpenti, tathārūpesu samaṇabrāhmaṇesu uddhaggikaṁ dakkhiṇaṁ patiṭṭhāpeti sovaggikaṁ sukhavipākaṁ saggasaṁvattanikaṁ.
an4.61:16.2	Idamassa catutthaṁ ṭhānagataṁ hoti pattagataṁ āyatanaso paribhuttaṁ.
an4.61:17.1	Sa kho so, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi imāni cattāri pattakammāni kattā hoti.
an4.61:17.2	Yassa kassaci, gahapati, aññatra imehi catūhi pattakammehi bhogā parikkhayaṁ gacchanti, ime vuccanti, gahapati, bhogā aṭṭhānagatā apattagatā anāyatanaso paribhuttā.
an4.61:17.3	Yassa kassaci, gahapati, imehi catūhi pattakammehi bhogā parikkhayaṁ gacchanti, ime vuccanti, gahapati, bhogā ṭhānagatā pattagatā āyatanaso paribhuttāti.
an4.61:18.1	Bhuttā bhogā bhatā bhaccā,
an4.61:18.2	Vitiṇṇā āpadāsu me;
an4.61:18.3	Uddhaggā dakkhiṇā dinnā,
an4.61:18.4	Atho pañcabalī katā;
an4.61:18.5	Upaṭṭhitā sīlavanto,
an4.61:18.6	Saññatā brahmacārayo.
an4.61:19.1	Yadatthaṁ bhogaṁ iccheyya,
an4.61:19.2	paṇḍito gharamāvasaṁ;
an4.61:19.3	So me attho anuppatto,
an4.61:19.4	kataṁ ananutāpiyaṁ.
an4.61:20.1	Etaṁ anussaraṁ macco,
an4.61:20.2	ariyadhamme ṭhito naro;
an4.61:20.3	Idheva naṁ pasaṁsanti,
an4.61:20.4	pecca sagge pamodatī”ti.
an4.61:20.5	Paṭhamaṁ.
an4.62:0.1	Aṅguttara Nikāya 4.62
an4.62:0.2	7. Pattakammavagga
an4.62:0.3	Ānaṇyasutta
an4.62:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an4.62:2.1	“Cattārimāni, gahapati, sukhāni adhigamanīyāni gihinā kāmabhoginā kālena kālaṁ samayena samayaṁ upādāya.
an4.62:2.2	Katamāni cattāri?
an4.62:2.3	Atthisukhaṁ, bhogasukhaṁ, ānaṇyasukhaṁ, anavajjasukhaṁ.
an4.62:3.1	Katamañca, gahapati, atthisukhaṁ?
an4.62:3.2	Idha, gahapati, kulaputtassa bhogā honti uṭṭhānavīriyādhigatā bāhābalaparicitā sedāvakkhittā dhammikā dhammaladdhā.
an4.62:3.3	So ‘bhogā me atthi uṭṭhānavīriyādhigatā bāhābalaparicitā sedāvakkhittā dhammikā dhammaladdhā’ti adhigacchati sukhaṁ, adhigacchati somanassaṁ.
an4.62:3.4	Idaṁ vuccati, gahapati, atthisukhaṁ.
an4.62:4.1	Katamañca, gahapati, bhogasukhaṁ?
an4.62:4.2	Idha, gahapati, kulaputto uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi paribhuñjati puññāni ca karoti.
an4.62:4.3	So ‘uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi paribhuñjāmi puññāni ca karomī’ti adhigacchati sukhaṁ, adhigacchati somanassaṁ.
an4.62:4.4	Idaṁ vuccati, gahapati, bhogasukhaṁ.
an4.62:5.1	Katamañca, gahapati, ānaṇyasukhaṁ?
an4.62:5.2	Idha, gahapati, kulaputto na kassaci kiñci dhāreti appaṁ vā bahuṁ vā.
an4.62:5.3	So ‘na kassaci kiñci dhāremi appaṁ vā bahuṁ vā’ti adhigacchati sukhaṁ, adhigacchati somanassaṁ.
an4.62:5.4	Idaṁ vuccati, gahapati, ānaṇyasukhaṁ.
an4.62:6.1	Katamañca, gahapati, anavajjasukhaṁ?
an4.62:6.2	Idha, gahapati, ariyasāvako anavajjena kāyakammena samannāgato hoti, anavajjena vacīkammena samannāgato hoti, anavajjena manokammena samannāgato hoti.
an4.62:6.3	So ‘anavajjenamhi kāyakammena samannāgato, anavajjena vacīkammena samannāgato, anavajjena manokammena samannāgato’ti adhigacchati sukhaṁ, adhigacchati somanassaṁ.
an4.62:6.4	Idaṁ vuccati, gahapati, anavajjasukhaṁ.
an4.62:6.5	Imāni kho, gahapati, cattāri sukhāni adhigamanīyāni gihinā kāmabhoginā kālena kālaṁ samayena samayaṁ upādāyāti.
an4.62:7.1	Ānaṇyasukhaṁ ñatvāna,
an4.62:7.2	Atho atthisukhaṁ paraṁ;
an4.62:7.3	Bhuñjaṁ bhogasukhaṁ macco,
an4.62:7.4	Tato paññā vipassati.
an4.62:8.1	Vipassamāno jānāti,
an4.62:8.2	ubho bhoge sumedhaso;
an4.62:8.3	Anavajjasukhassetaṁ,
an4.62:8.4	kalaṁ nāgghati soḷasin”ti.
an4.62:8.5	Dutiyaṁ.
an4.63:0.1	Aṅguttara Nikāya 4.63
an4.63:0.2	7. Pattakammavagga
an4.63:0.3	Brahmasutta
an4.63:1.1	“Sabrahmakāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
an4.63:1.2	Sapubbācariyakāni, bhikkhave, tāni kulāni, yesaṁ puttānaṁ mātāpitaro ajjhāgāre pūjitā honti.
an4.63:1.3	Sapubbadevatāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
an4.63:1.4	Sāhuneyyakāni, bhikkhave, tāni kulāni yesaṁ puttānaṁ mātāpitaro ajjhāgāre pūjitā honti.
an4.63:2.1	Brahmāti, bhikkhave, mātāpitūnaṁ etaṁ adhivacanaṁ.
an4.63:2.2	Pubbācariyāti, bhikkhave, mātāpitūnaṁ etaṁ adhivacanaṁ.
an4.63:2.3	Pubbadevatāti, bhikkhave, mātāpitūnaṁ etaṁ adhivacanaṁ.
an4.63:2.4	Āhuneyyāti, bhikkhave, mātāpitūnaṁ etaṁ adhivacanaṁ.
an4.63:2.5	Taṁ kissa hetu?
an4.63:2.6	Bahukārā, bhikkhave, mātāpitaro, puttānaṁ āpādakā posakā imassa lokassa dassetāroti.
an4.63:3.1	Brahmāti mātāpitaro,
an4.63:3.2	pubbācariyāti vuccare;
an4.63:3.3	Āhuneyyā ca puttānaṁ,
an4.63:3.4	pajāya anukampakā.
an4.63:4.1	Tasmā hi ne namasseyya,
an4.63:4.2	sakkareyya ca paṇḍito;
an4.63:4.3	Annena atha pānena,
an4.63:4.4	vatthena sayanena ca;
an4.63:4.5	Ucchādanena nhāpanena,
an4.63:4.6	pādānaṁ dhovanena ca.
an4.63:5.1	Tāya naṁ pāricariyāya,
an4.63:5.2	mātāpitūsu paṇḍitā;
an4.63:5.3	Idheva naṁ pasaṁsanti,
an4.63:5.4	pecca sagge pamodatī”ti.
an4.63:5.5	Tatiyaṁ.
an4.64:0.1	Aṅguttara Nikāya 4.64
an4.64:0.2	7. Pattakammavagga
an4.64:0.3	Nirayasutta
an4.64:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.64:1.2	Katamehi catūhi?
an4.64:1.3	Pāṇātipātī hoti, adinnādāyī hoti, kāmesumicchācārī hoti, musāvādī hoti—
an4.64:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ nirayeti.
an4.64:2.1	Pāṇātipāto adinnādānaṁ,
an4.64:2.2	Musāvādo ca vuccati;
an4.64:2.3	Paradāragamanañcāpi,
an4.64:2.4	Nappasaṁsanti paṇḍitā”ti.
an4.64:2.5	Catutthaṁ.
an4.65:0.1	Aṅguttara Nikāya 4.65
an4.65:0.2	7. Pattakammavagga
an4.65:0.3	Rūpasutta
an4.65:1.1	“Cattārome, bhikkhave, puggalā santo saṁvijjamānā lokasmiṁ.
an4.65:1.2	Katame cattāro?
an4.65:1.3	Rūpappamāṇo rūpappasanno, ghosappamāṇo ghosappasanno, lūkhappamāṇo lūkhappasanno, dhammappamāṇo dhammappasanno—
an4.65:1.4	Ime kho, bhikkhave, cattāro puggalā santo saṁvijjamānā lokasminti.
an4.65:2.1	Ye ca rūpe pamāṇiṁsu,
an4.65:2.2	ye ca ghosena anvagū;
an4.65:2.3	Chandarāgavasūpetā,
an4.65:2.4	nābhijānanti te janā.
an4.65:3.1	Ajjhattañca na jānāti,
an4.65:3.2	bahiddhā ca na passati;
an4.65:3.3	Samantāvaraṇo bālo,
an4.65:3.4	sa ve ghosena vuyhati.
an4.65:4.1	Ajjhattañca na jānāti,
an4.65:4.2	bahiddhā ca vipassati;
an4.65:4.3	Bahiddhā phaladassāvī,
an4.65:4.4	sopi ghosena vuyhati.
an4.65:5.1	Ajjhattañca pajānāti,
an4.65:5.2	bahiddhā ca vipassati;
an4.65:5.3	Vinīvaraṇadassāvī,
an4.65:5.4	na so ghosena vuyhatī”ti.
an4.65:5.5	Pañcamaṁ.
an4.66:0.1	Aṅguttara Nikāya 4.66
an4.66:0.2	7. Pattakammavagga
an4.66:0.3	Sarāgasutta
an4.66:1.1	“Cattārome, bhikkhave, puggalā santo saṁvijjamānā lokasmiṁ.
an4.66:1.2	Katame cattāro?
an4.66:1.3	Sarāgo, sadoso, samoho, samāno—
an4.66:1.4	Ime kho, bhikkhave, cattāro puggalā santo saṁvijjamānā lokasminti.
an4.66:2.1	Sārattā rajanīyesu,
an4.66:2.2	Piyarūpābhinandino;
an4.66:2.3	Mohena āvutā sattā,
an4.66:2.4	Baddhā vaḍḍhenti bandhanaṁ.
an4.66:3.1	Rāgajaṁ dosajañcāpi,
an4.66:3.2	mohajaṁ cāpaviddasū;
an4.66:3.3	Karontākusalaṁ kammaṁ,
an4.66:3.4	savighātaṁ dukhudrayaṁ.
an4.66:4.1	Avijjānivutā posā,
an4.66:4.2	andhabhūtā acakkhukā;
an4.66:4.3	Yathā dhammā tathā santā,
an4.66:4.4	na tassevanti maññare”ti.
an4.66:4.5	Chaṭṭhaṁ.
an4.67:0.1	Aṅguttara Nikāya 4.67
an4.67:0.2	7. Pattakammavagga
an4.67:0.3	Ahirājasutta
an4.67:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an4.67:1.2	Tena kho pana samayena sāvatthiyaṁ aññataro bhikkhu ahinā daṭṭho kālaṅkato hoti.
an4.67:1.3	Atha kho sambahulā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
an4.67:1.4	“idha, bhante, sāvatthiyaṁ aññataro bhikkhu ahinā daṭṭho kālaṅkato”ti.
an4.67:2.1	“Na hi nūna so, bhikkhave, bhikkhu cattāri ahirājakulāni mettena cittena phari.
an4.67:2.2	Sace hi so, bhikkhave, bhikkhu cattāri ahirājakulāni mettena cittena phareyya, na hi so, bhikkhave, bhikkhu ahinā daṭṭho kālaṁ kareyya.
an4.67:3.1	Katamāni cattāri?
an4.67:3.2	Virūpakkhaṁ ahirājakulaṁ, erāpathaṁ ahirājakulaṁ, chabyāputtaṁ ahirājakulaṁ, kaṇhāgotamakaṁ ahirājakulaṁ.
an4.67:3.3	Na hi nūna so, bhikkhave, bhikkhu imāni cattāri ahirājakulāni mettena cittena phari.
an4.67:3.4	Sace hi so, bhikkhave, bhikkhu imāni cattāri ahirājakulāni mettena cittena phareyya, na hi so, bhikkhave, bhikkhu ahinā daṭṭho kālaṁ kareyya.
an4.67:4.1	Anujānāmi, bhikkhave, imāni cattāri ahirājakulāni mettena cittena pharituṁ attaguttiyā attarakkhāya attaparittāyāti.
an4.67:5.1	Virūpakkhehi me mettaṁ,
an4.67:5.2	Mettaṁ erāpathehi me;
an4.67:5.3	Chabyāputtehi me mettaṁ,
an4.67:5.4	Mettaṁ kaṇhāgotamakehi ca.
an4.67:6.1	Apādakehi me mettaṁ,
an4.67:6.2	mettaṁ dvipādakehi me;
an4.67:6.3	Catuppadehi me mettaṁ,
an4.67:6.4	mettaṁ bahuppadehi me.
an4.67:7.1	Mā maṁ apādako hiṁsi,
an4.67:7.2	mā maṁ hiṁsi dvipādako;
an4.67:7.3	Mā maṁ catuppado hiṁsi,
an4.67:7.4	mā maṁ hiṁsi bahuppado.
an4.67:8.1	Sabbe sattā sabbe pāṇā,
an4.67:8.2	sabbe bhūtā ca kevalā;
an4.67:8.3	Sabbe bhadrāni passantu,
an4.67:8.4	mā kañci pāpamāgamā.
an4.67:9.1	Appamāṇo buddho,
an4.67:9.2	Appamāṇo dhammo;
an4.67:9.3	Appamāṇo saṅgho,
an4.67:9.4	Pamāṇavantāni sarīsapāni.
an4.67:10.1	Ahivicchikā satapadī,
an4.67:10.2	Uṇṇanābhī sarabū mūsikā;
an4.67:10.3	Katā me rakkhā katā me parittā,
an4.67:10.4	Paṭikkamantu bhūtāni;
an4.67:10.5	Sohaṁ namo bhagavato,
an4.67:10.6	Namo sattannaṁ sammāsambuddhānan”ti.
an4.67:10.7	Sattamaṁ.
an4.68:0.1	Aṅguttara Nikāya 4.68
an4.68:0.2	7. Pattakammavagga
an4.68:0.3	Devadattasutta
an4.68:1.1	Ekaṁ samayaṁ bhagavā rājagahe viharati gijjhakūṭe pabbate acirapakkante devadatte.
an4.68:1.2	Tatra kho bhagavā devadattaṁ ārabbha bhikkhū āmantesi:
an4.68:1.3	“attavadhāya, bhikkhave, devadattassa lābhasakkārasiloko udapādi.
an4.68:1.4	Parābhavāya, bhikkhave, devadattassa lābhasakkārasiloko udapādi.
an4.68:2.1	Seyyathāpi, bhikkhave, kadalī attavadhāya phalaṁ deti, parābhavāya phalaṁ deti;
an4.68:2.2	evamevaṁ kho, bhikkhave, attavadhāya devadattassa lābhasakkārasiloko udapādi, parābhavāya devadattassa lābhasakkārasiloko udapādi.
an4.68:3.1	Seyyathāpi, bhikkhave, veḷu attavadhāya phalaṁ deti, parābhavāya phalaṁ deti;
an4.68:3.2	evamevaṁ kho, bhikkhave, attavadhāya devadattassa lābhasakkārasiloko udapādi, parābhavāya devadattassa lābhasakkārasiloko udapādi.
an4.68:4.1	Seyyathāpi, bhikkhave, naḷo attavadhāya phalaṁ deti, parābhavāya phalaṁ deti;
an4.68:4.2	evamevaṁ kho, bhikkhave, attavadhāya devadattassa lābhasakkārasiloko udapādi, parābhavāya devadattassa lābhasakkārasiloko udapādi.
an4.68:5.1	Seyyathāpi, bhikkhave, assatarī attavadhāya gabbhaṁ gaṇhāti, parābhavāya gabbhaṁ gaṇhāti;
an4.68:5.2	evamevaṁ kho, bhikkhave, attavadhāya devadattassa lābhasakkārasiloko udapādi, parābhavāya devadattassa lābhasakkārasiloko udapādīti.
an4.68:6.1	Phalaṁ ve kadaliṁ hanti,
an4.68:6.2	phalaṁ veḷuṁ phalaṁ naḷaṁ;
an4.68:6.3	Sakkāro kāpurisaṁ hanti,
an4.68:6.4	gabbho assatariṁ yathā”ti.
an4.68:6.5	Aṭṭhamaṁ.
an4.69:0.1	Aṅguttara Nikāya 4.69
an4.69:0.2	7. Pattakammavagga
an4.69:0.3	Padhānasutta
an4.69:1.1	“Cattārimāni, bhikkhave, padhānāni.
an4.69:1.2	Katamāni cattāri?
an4.69:1.3	Saṁvarappadhānaṁ, pahānappadhānaṁ, bhāvanāppadhānaṁ, anurakkhaṇāppadhānaṁ.
an4.69:1.4	Katamañca, bhikkhave, saṁvarappadhānaṁ?
an4.69:1.5	Idha, bhikkhave, bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati.
an4.69:1.6	Idaṁ vuccati, bhikkhave, saṁvarappadhānaṁ.
an4.69:2.1	Katamañca, bhikkhave, pahānappadhānaṁ?
an4.69:2.2	Idha, bhikkhave, bhikkhu uppannānaṁ pāpakānaṁ akusalānaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati.
an4.69:2.3	Idaṁ vuccati, bhikkhave, pahānappadhānaṁ.
an4.69:3.1	Katamañca, bhikkhave, bhāvanāppadhānaṁ?
an4.69:3.2	Idha, bhikkhave, bhikkhu anuppannānaṁ kusalānaṁ dhammānaṁ uppādāya chandaṁ janeti vāyamati vīriyaṁ ārabhati cittaṁ paggaṇhāti padahati.
an4.69:3.3	Idaṁ vuccati, bhikkhave, bhāvanāppadhānaṁ.
an4.69:4.1	Katamañca, bhikkhave, anurakkhaṇāppadhānaṁ?
an4.69:4.2	Idha, bhikkhave, bhikkhu uppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati.
an4.69:4.3	Idaṁ vuccati, bhikkhave, anurakkhaṇāppadhānaṁ.
an4.69:4.4	Imāni kho, bhikkhave, cattāri padhānānīti.
an4.69:5.1	Saṁvaro ca pahānañca,
an4.69:5.2	bhāvanā anurakkhaṇā;
an4.69:5.3	Ete padhānā cattāro,
an4.69:5.4	desitādiccabandhunā;
an4.69:5.5	Yo hi bhikkhu idhātāpī,
an4.69:5.6	khayaṁ dukkhassa pāpuṇe”ti.
an4.69:5.7	Navamaṁ.
an4.70:0.1	Aṅguttara Nikāya 4.70
an4.70:0.2	7. Pattakammavagga
an4.70:0.3	Adhammikasutta
an4.70:1.1	“Yasmiṁ, bhikkhave, samaye rājāno adhammikā honti, rājāyuttāpi tasmiṁ samaye adhammikā honti.
an4.70:1.2	Rājāyuttesu adhammikesu brāhmaṇagahapatikāpi tasmiṁ samaye adhammikā honti.
an4.70:1.3	Brāhmaṇagahapatikesu adhammikesu negamajānapadāpi tasmiṁ samaye adhammikā honti.
an4.70:1.4	Negamajānapadesu adhammikesu visamaṁ candimasūriyā parivattanti.
an4.70:1.5	Visamaṁ candimasūriyesu parivattantesu visamaṁ nakkhattāni tārakarūpāni parivattanti.
an4.70:1.6	Visamaṁ nakkhattesu tārakarūpesu parivattantesu visamaṁ rattindivā parivattanti.
an4.70:1.7	Visamaṁ rattindivesu parivattantesu visamaṁ māsaddhamāsā parivattanti.
an4.70:1.8	Visamaṁ māsaddhamāsesu parivattantesu visamaṁ utusaṁvaccharā parivattanti.
an4.70:1.9	Visamaṁ utusaṁvaccharesu parivattantesu visamaṁ vātā vāyanti visamā apañjasā.
an4.70:1.10	Visamaṁ vātesu vāyantesu visamesu apañjasesu devatā parikupitā bhavanti.
an4.70:1.11	Devatāsu parikupitāsu devo na sammā dhāraṁ anuppavecchati.
an4.70:1.12	Deve na sammā dhāraṁ anuppavecchante visamapākāni sassāni bhavanti.
an4.70:1.13	Visamapākāni, bhikkhave, sassāni manussā paribhuñjantā appāyukā honti dubbaṇṇā ca bavhābādhā ca.
an4.70:2.1	Yasmiṁ, bhikkhave, samaye rājāno dhammikā honti, rājāyuttāpi tasmiṁ samaye dhammikā honti.
an4.70:2.2	Rājāyuttesu dhammikesu brāhmaṇagahapatikāpi tasmiṁ samaye dhammikā honti.
an4.70:2.3	Brāhmaṇagahapatikesu dhammikesu negamajānapadāpi tasmiṁ samaye dhammikā honti.
an4.70:2.4	Negamajānapadesu dhammikesu samaṁ candimasūriyā parivattanti.
an4.70:2.5	Samaṁ candimasūriyesu parivattantesu samaṁ nakkhattāni tārakarūpāni parivattanti.
an4.70:2.6	Samaṁ nakkhattesu tārakarūpesu parivattantesu samaṁ rattindivā parivattanti.
an4.70:2.7	Samaṁ rattindivesu parivattantesu samaṁ māsaddhamāsā parivattanti.
an4.70:2.8	Samaṁ māsaddhamāsesu parivattantesu samaṁ utusaṁvaccharā parivattanti.
an4.70:2.9	Samaṁ utusaṁvaccharesu parivattantesu samaṁ vātā vāyanti samā pañjasā.
an4.70:2.10	Samaṁ vātesu vāyantesu samesu pañjasesu devatā aparikupitā bhavanti.
an4.70:2.11	Devatāsu aparikupitāsu devo sammā dhāraṁ anuppavecchati.
an4.70:2.12	Deve sammā dhāraṁ anuppavecchante samapākāni sassāni bhavanti.
an4.70:2.13	Samapākāni, bhikkhave, sassāni manussā paribhuñjantā dīghāyukā ca honti vaṇṇavanto ca balavanto ca appābādhā cāti.
an4.70:3.1	Gunnañce taramānānaṁ,
an4.70:3.2	jimhaṁ gacchati puṅgavo;
an4.70:3.3	Sabbā tā jimhaṁ gacchanti,
an4.70:3.4	nette jimhaṁ gate sati.
an4.70:4.1	Evamevaṁ manussesu,
an4.70:4.2	yo hoti seṭṭhasammato;
an4.70:4.3	So ce adhammaṁ carati,
an4.70:4.4	pageva itarā pajā;
an4.70:4.5	Sabbaṁ raṭṭhaṁ dukkhaṁ seti,
an4.70:4.6	rājā ce hoti adhammiko.
an4.70:5.1	Gunnañce taramānānaṁ,
an4.70:5.2	ujuṁ gacchati puṅgavo;
an4.70:5.3	Sabbā tā ujuṁ gacchanti,
an4.70:5.4	nette ujuṁ gate sati.
an4.70:6.1	Evamevaṁ manussesu,
an4.70:6.2	yo hoti seṭṭhasammato;
an4.70:6.3	So sace dhammaṁ carati,
an4.70:6.4	pageva itarā pajā;
an4.70:6.5	Sabbaṁ raṭṭhaṁ sukhaṁ seti,
an4.70:6.6	rājā ce hoti dhammiko”ti.
an4.70:6.7	Dasamaṁ.
an4.70:6.8	Pattakammavaggo dutiyo.
an4.70:7.0	Tassuddānaṁ
an4.70:7.1	Pattakammaṁ ānaṇyako,
an4.70:7.2	Sabrahmanirayā rūpena pañcamaṁ;
an4.70:7.3	Sarāgaahirājā devadatto,
an4.70:7.4	Padhānaṁ adhammikena cāti.
an4.71:0.1	Aṅguttara Nikāya 4.71
an4.71:0.2	8. Apaṇṇakavagga
an4.71:0.3	Padhānasutta
an4.71:1.1	“Catūhi, bhikkhave, dhammehi samannāgato bhikkhu apaṇṇakappaṭipadaṁ paṭipanno hoti, yoni cassa āraddhā hoti āsavānaṁ khayāya.
an4.71:1.2	Katamehi catūhi?
an4.71:1.3	Idha, bhikkhave, bhikkhu sīlavā hoti, bahussuto hoti, āraddhavīriyo hoti, paññavā hoti.
an4.71:1.4	Imehi kho, bhikkhave, catūhi dhammehi samannāgato bhikkhu apaṇṇakappaṭipadaṁ paṭipanno hoti, yoni cassa āraddhā hoti āsavānaṁ khayāyā”ti.
an4.71:1.5	Paṭhamaṁ.
an4.72:0.1	Aṅguttara Nikāya 4.72
an4.72:0.2	8. Apaṇṇakavagga
an4.72:0.3	Sammādiṭṭhisutta
an4.72:1.1	“Catūhi, bhikkhave, dhammehi samannāgato bhikkhu apaṇṇakappaṭipadaṁ paṭipanno hoti, yoni cassa āraddhā hoti āsavānaṁ khayāya.
an4.72:1.2	Katamehi catūhi?
an4.72:1.3	Nekkhammavitakkena, abyāpādavitakkena, avihiṁsāvitakkena, sammādiṭṭhiyā—
an4.72:1.4	imehi kho, bhikkhave, catūhi dhammehi samannāgato bhikkhu apaṇṇakappaṭipadaṁ paṭipanno hoti, yoni cassa āraddhā hoti āsavānaṁ khayāyā”ti.
an4.72:1.5	Dutiyaṁ.
an4.73:0.1	Aṅguttara Nikāya 4.73
an4.73:0.2	8. Apaṇṇakavagga
an4.73:0.3	Sappurisasutta
an4.73:1.1	“Catūhi, bhikkhave, dhammehi samannāgato asappuriso veditabbo.
an4.73:1.2	Katamehi catūhi?
an4.73:1.3	Idha, bhikkhave, asappuriso yo hoti parassa avaṇṇo taṁ apuṭṭhopi pātu karoti, ko pana vādo puṭṭhassa.
an4.73:1.4	Puṭṭho kho pana pañhābhinīto ahāpetvā alambitvā paripūraṁ vitthārena parassa avaṇṇaṁ bhāsitā hoti.
an4.73:1.5	Veditabbametaṁ, bhikkhave, asappuriso ayaṁ bhavanti.
an4.73:2.1	Puna caparaṁ, bhikkhave, asappuriso yo hoti parassa vaṇṇo taṁ puṭṭhopi na pātu karoti, ko pana vādo apuṭṭhassa.
an4.73:2.2	Puṭṭho kho pana pañhābhinīto hāpetvā lambitvā aparipūraṁ avitthārena parassa vaṇṇaṁ bhāsitā hoti.
an4.73:2.3	Veditabbametaṁ, bhikkhave, asappuriso ayaṁ bhavanti.
an4.73:3.1	Puna caparaṁ, bhikkhave, asappuriso yo hoti attano avaṇṇo taṁ puṭṭhopi na pātu karoti, ko pana vādo apuṭṭhassa.
an4.73:3.2	Puṭṭho kho pana pañhābhinīto hāpetvā lambitvā aparipūraṁ avitthārena attano avaṇṇaṁ bhāsitā hoti.
an4.73:3.3	Veditabbametaṁ, bhikkhave, asappuriso ayaṁ bhavanti.
an4.73:4.1	Puna caparaṁ, bhikkhave, asappuriso yo hoti attano vaṇṇo taṁ apuṭṭhopi pātu karoti, ko pana vādo puṭṭhassa.
an4.73:4.2	Puṭṭho kho pana pañhābhinīto ahāpetvā alambitvā paripūraṁ vitthārena attano vaṇṇaṁ bhāsitā hoti.
an4.73:4.3	Veditabbametaṁ, bhikkhave, asappuriso ayaṁ bhavanti.
an4.73:4.4	Imehi kho, bhikkhave, catūhi dhammehi samannāgato asappuriso veditabbo.
an4.73:5.1	Catūhi, bhikkhave, dhammehi samannāgato sappuriso veditabbo.
an4.73:5.2	Katamehi catūhi?
an4.73:5.3	Idha, bhikkhave, sappuriso yo hoti parassa avaṇṇo taṁ puṭṭhopi na pātu karoti, ko pana vādo apuṭṭhassa.
an4.73:5.4	Puṭṭho kho pana pañhābhinīto hāpetvā lambitvā aparipūraṁ avitthārena parassa avaṇṇaṁ bhāsitā hoti.
an4.73:5.5	Veditabbametaṁ, bhikkhave, sappuriso ayaṁ bhavanti.
an4.73:6.1	Puna caparaṁ, bhikkhave, sappuriso yo hoti parassa vaṇṇo taṁ apuṭṭhopi pātu karoti, ko pana vādo puṭṭhassa.
an4.73:6.2	Puṭṭho kho pana pañhābhinīto ahāpetvā alambitvā paripūraṁ vitthārena parassa vaṇṇaṁ bhāsitā hoti.
an4.73:6.3	Veditabbametaṁ, bhikkhave, sappuriso ayaṁ bhavanti.
an4.73:7.1	Puna caparaṁ, bhikkhave, sappuriso yo hoti attano avaṇṇo taṁ apuṭṭhopi pātu karoti, ko pana vādo puṭṭhassa.
an4.73:7.2	Puṭṭho kho pana pañhābhinīto ahāpetvā alambitvā paripūraṁ vitthārena attano avaṇṇaṁ bhāsitā hoti.
an4.73:7.3	Veditabbametaṁ, bhikkhave, sappuriso ayaṁ bhavanti.
an4.73:8.1	Puna caparaṁ, bhikkhave, sappuriso yo hoti attano vaṇṇo taṁ puṭṭhopi na pātu karoti, ko pana vādo apuṭṭhassa.
an4.73:8.2	Puṭṭho kho pana pañhābhinīto hāpetvā lambitvā aparipūraṁ avitthārena attano vaṇṇaṁ bhāsitā hoti.
an4.73:8.3	Veditabbametaṁ, bhikkhave, sappuriso ayaṁ bhavanti.
an4.73:8.4	Imehi kho, bhikkhave, catūhi dhammehi samannāgato sappuriso veditabbo.
an4.73:9.1	Seyyathāpi, bhikkhave, vadhukā yaññadeva rattiṁ vā divaṁ vā ānītā hoti, tāvadevassā tibbaṁ hirottappaṁ paccupaṭṭhitaṁ hoti sassuyāpi sasurepi sāmikepi antamaso dāsakammakaraporisesu.
an4.73:9.2	Sā aparena samayena saṁvāsamanvāya vissāsamanvāya sassumpi sasurampi sāmikampi evamāha:
an4.73:9.3	‘apetha, kiṁ pana tumhe jānāthā’ti.
an4.73:9.4	Evamevaṁ kho, bhikkhave, idhekacco bhikkhu yaññadeva rattiṁ vā divaṁ vā agārasmā anagāriyaṁ pabbajito hoti, tāvadevassa tibbaṁ hirottappaṁ paccupaṭṭhitaṁ hoti bhikkhūsu bhikkhunīsu upāsakesu upāsikāsu antamaso ārāmikasamaṇuddesesu.
an4.73:9.5	So aparena samayena saṁvāsamanvāya vissāsamanvāya ācariyampi upajjhāyampi evamāha:
an4.73:9.6	‘apetha, kiṁ pana tumhe jānāthā’ti.
an4.73:9.7	Tasmātiha, bhikkhave, evaṁ sikkhitabbaṁ:
an4.73:9.8	‘adhunāgatavadhukāsamena cetasā viharissāmā’ti.
an4.73:9.9	Evañhi vo, bhikkhave, sikkhitabban”ti.
an4.73:9.10	Tatiyaṁ.
an4.74:0.1	Aṅguttara Nikāya 4.74
an4.74:0.2	8. Apaṇṇakavagga
an4.74:0.3	Paṭhamaaggasutta
an4.74:1.1	“Cattārimāni, bhikkhave, aggāni.
an4.74:1.2	Katamāni cattāri?
an4.74:1.3	Sīlaggaṁ, samādhiggaṁ, paññāggaṁ, vimuttaggaṁ—
an4.74:1.4	Imāni kho, bhikkhave, cattāri aggānī”ti.
an4.74:1.5	Catutthaṁ.
an4.75:0.1	Aṅguttara Nikāya 4.75
an4.75:0.2	8. Apaṇṇakavagga
an4.75:0.3	Dutiyaaggasutta
an4.75:1.1	“Cattārimāni, bhikkhave, aggāni.
an4.75:1.2	Katamāni cattāri?
an4.75:1.3	Rūpaggaṁ, vedanāggaṁ, saññāggaṁ, bhavaggaṁ—
an4.75:1.4	Imāni kho, bhikkhave, cattāri aggānī”ti.
an4.75:1.5	Pañcamaṁ.
an4.76:0.1	Aṅguttara Nikāya 4.76
an4.76:0.2	8. Apaṇṇakavagga
an4.76:0.3	Kusinārasutta
an4.76:1.1	Ekaṁ samayaṁ bhagavā kusinārāyaṁ viharati upavattane mallānaṁ sālavane antarena yamakasālānaṁ parinibbānasamaye.
an4.76:1.2	Tatra kho bhagavā bhikkhū āmantesi:
an4.76:1.3	“bhikkhavo”ti.
an4.76:1.4	“Bhadante”ti te bhikkhū bhagavato paccassosuṁ.
an4.76:1.5	Bhagavā etadavoca:
an4.76:2.1	“Siyā kho pana, bhikkhave, ekabhikkhussapi kaṅkhā vā vimati vā buddhe vā dhamme vā saṅghe vā magge vā paṭipadāya vā, pucchatha, bhikkhave, mā pacchā vippaṭisārino ahuvattha:
an4.76:2.2	‘sammukhībhūto no satthā ahosi, nāsakkhimha bhagavantaṁ sammukhā paṭipucchitun’”ti.
an4.76:2.3	Evaṁ vutte, te bhikkhū tuṇhī ahesuṁ.
an4.76:3.1	Dutiyampi kho bhagavā bhikkhū āmantesi:
an4.76:3.2	“siyā kho pana, bhikkhave, ekabhikkhussapi kaṅkhā vā vimati vā buddhe vā dhamme vā saṅghe vā magge vā paṭipadāya vā, pucchatha, bhikkhave, mā pacchā vippaṭisārino ahuvattha:
an4.76:3.3	‘sammukhībhūto no satthā ahosi, nāsakkhimha bhagavantaṁ sammukhā paṭipucchitun’”ti.
an4.76:3.4	Dutiyampi kho te bhikkhū tuṇhī ahesuṁ.
an4.76:4.1	Tatiyampi kho bhagavā bhikkhū āmantesi:
an4.76:4.2	“siyā kho pana, bhikkhave, ekabhikkhussapi kaṅkhā vā vimati vā buddhe vā dhamme vā saṅghe vā magge vā paṭipadāya vā, pucchatha, bhikkhave, mā pacchā vippaṭisārino ahuvattha:
an4.76:4.3	‘sammukhībhūto no satthā ahosi, nāsakkhimha bhagavantaṁ sammukhā paṭipucchitun’”ti.
an4.76:4.4	Tatiyampi kho te bhikkhū tuṇhī ahesuṁ.
an4.76:5.1	Atha kho bhagavā bhikkhū āmantesi:
an4.76:5.2	“siyā kho pana, bhikkhave, satthugāravenapi na puccheyyātha, sahāyakopi, bhikkhave, sahāyakassa ārocetū”ti.
an4.76:5.3	Evaṁ vutte, te bhikkhū tuṇhī ahesuṁ.
an4.76:5.4	Atha kho āyasmā ānando bhagavantaṁ etadavoca:
an4.76:5.5	“acchariyaṁ, bhante, abbhutaṁ, bhante.
an4.76:5.6	Evaṁ pasanno ahaṁ, bhante. Natthi imasmiṁ bhikkhusaṅghe ekabhikkhussapi kaṅkhā vā vimati vā buddhe vā dhamme vā saṅghe vā magge vā paṭipadāya vā”ti.
an4.76:6.1	“Pasādā kho tvaṁ, ānanda, vadesi. Ñāṇameva hettha, ānanda, tathāgatassa: ‘natthi imasmiṁ bhikkhusaṅghe ekabhikkhussapi kaṅkhā vā vimati vā buddhe vā dhamme vā saṅghe vā magge vā paṭipadāya vā’.
an4.76:6.2	Imesañhi, ānanda, pañcannaṁ bhikkhusatānaṁ yo pacchimako bhikkhu so sotāpanno avinipātadhammo niyato sambodhiparāyaṇo”ti.
an4.76:6.3	Chaṭṭhaṁ.
an4.77:0.1	Aṅguttara Nikāya 4.77
an4.77:0.2	8. Apaṇṇakavagga
an4.77:0.3	Acinteyyasutta
an4.77:1.1	“Cattārimāni, bhikkhave, acinteyyāni, na cintetabbāni; yāni cintento ummādassa vighātassa bhāgī assa.
an4.77:1.2	Katamāni cattāri?
an4.77:1.3	Buddhānaṁ, bhikkhave, buddhavisayo acinteyyo, na cintetabbo;
an4.77:1.4	yaṁ cintento ummādassa vighātassa bhāgī assa.
an4.77:1.5	Jhāyissa, bhikkhave, jhānavisayo acinteyyo, na cintetabbo;
an4.77:1.6	yaṁ cintento ummādassa vighātassa bhāgī assa.
an4.77:1.7	Kammavipāko, bhikkhave, acinteyyo, na cintetabbo;
an4.77:1.8	yaṁ cintento ummādassa vighātassa bhāgī assa.
an4.77:1.9	Lokacintā, bhikkhave, acinteyyā, na cintetabbā;
an4.77:1.10	yaṁ cintento ummādassa vighātassa bhāgī assa.
an4.77:1.11	Imāni kho, bhikkhave, cattāri acinteyyāni, na cintetabbāni; yāni cintento ummādassa vighātassa bhāgī assā”ti.
an4.77:1.12	Sattamaṁ.
an4.78:0.1	Aṅguttara Nikāya 4.78
an4.78:0.2	8. Apaṇṇakavagga
an4.78:0.3	Dakkhiṇasutta
an4.78:1.1	“Catasso imā, bhikkhave, dakkhiṇā visuddhiyo.
an4.78:1.2	Katamā catasso?
an4.78:1.3	Atthi, bhikkhave, dakkhiṇā dāyakato visujjhati, no paṭiggāhakato;
an4.78:1.4	atthi, bhikkhave, dakkhiṇā paṭiggāhakato visujjhati, no dāyakato;
an4.78:1.5	atthi, bhikkhave, dakkhiṇā neva dāyakato visujjhati, no paṭiggāhakato;
an4.78:1.6	atthi, bhikkhave, dakkhiṇā dāyakato ceva visujjhati paṭiggāhakato ca.
an4.78:2.1	Kathañca, bhikkhave, dakkhiṇā dāyakato visujjhati, no paṭiggāhakato?
an4.78:2.2	Idha, bhikkhave, dāyako hoti sīlavā kalyāṇadhammo; paṭiggāhakā honti dussīlā pāpadhammā.
an4.78:2.3	Evaṁ kho, bhikkhave, dakkhiṇā dāyakato visujjhati, no paṭiggāhakato.
an4.78:3.1	Kathañca, bhikkhave, dakkhiṇā paṭiggāhakato visujjhati, no dāyakato?
an4.78:3.2	Idha, bhikkhave, dāyako hoti dussīlo pāpadhammo; paṭiggāhakā honti sīlavanto kalyāṇadhammā.
an4.78:3.3	Evaṁ kho, bhikkhave, dakkhiṇā paṭiggāhakato visujjhati, no dāyakato.
an4.78:4.1	Kathañca, bhikkhave, dakkhiṇā neva dāyakato visujjhati, no paṭiggāhakato?
an4.78:4.2	Idha, bhikkhave, dāyako hoti dussīlo pāpadhammo; paṭiggāhakāpi honti dussīlā pāpadhammā.
an4.78:4.3	Evaṁ kho, bhikkhave, dakkhiṇā neva dāyakato visujjhati, no paṭiggāhakato.
an4.78:5.1	Kathañca, bhikkhave, dakkhiṇā dāyakato ceva visujjhati paṭiggāhakato ca?
an4.78:5.2	Idha, bhikkhave, dāyako hoti sīlavā kalyāṇadhammo; paṭiggāhakāpi honti sīlavanto kalyāṇadhammā.
an4.78:5.3	Evaṁ kho, bhikkhave, dakkhiṇā dāyakato ceva visujjhati paṭiggāhakato ca.
an4.78:5.4	Imā kho, bhikkhave, catasso dakkhiṇā visuddhiyo”ti.
an4.78:5.5	Aṭṭhamaṁ.
an4.79:0.1	Aṅguttara Nikāya 4.79
an4.79:0.2	8. Apaṇṇakavagga
an4.79:0.3	Vaṇijjasutta
an4.79:1.1	Atha kho āyasmā sāriputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā sāriputto bhagavantaṁ etadavoca:
an4.79:1.2	“ko nu kho, bhante, hetu ko paccayo, yena midhekaccassa tādisāva vaṇijjā payuttā chedagāminī hoti?
an4.79:1.3	Ko pana, bhante, hetu ko paccayo, yena midhekaccassa tādisāva vaṇijjā payuttā na yathādhippāyā hoti?
an4.79:1.4	Ko nu kho, bhante, hetu ko paccayo, yena midhekaccassa tādisāva vaṇijjā payuttā yathādhippāyā hoti?
an4.79:1.5	Ko pana, bhante, hetu ko paccayo, yena midhekaccassa tādisāva vaṇijjā payuttā parādhippāyā hotī”ti?
an4.79:2.1	“Idha, sāriputta, ekacco samaṇaṁ vā brāhmaṇaṁ vā upasaṅkamitvā pavāreti: ‘vadatu, bhante, paccayenā’ti. So yena pavāreti taṁ na deti.
an4.79:2.2	So ce tato cuto itthattaṁ āgacchati, so yaññadeva vaṇijjaṁ payojeti, sāssa hoti chedagāminī.
an4.79:3.1	Idha pana, sāriputta, ekacco samaṇaṁ vā brāhmaṇaṁ vā upasaṅkamitvā pavāreti: ‘vadatu, bhante, paccayenā’ti. So yena pavāreti taṁ na yathādhippāyaṁ deti.
an4.79:3.2	So ce tato cuto itthattaṁ āgacchati, so yaññadeva vaṇijjaṁ payojeti, sāssa na hoti yathādhippāyā.
an4.79:4.1	Idha pana, sāriputta, ekacco samaṇaṁ vā brāhmaṇaṁ vā upasaṅkamitvā pavāreti: ‘vadatu, bhante, paccayenā’ti. So yena pavāreti taṁ yathādhippāyaṁ deti.
an4.79:4.2	So ce tato cuto itthattaṁ āgacchati, so yaññadeva vaṇijjaṁ payojeti, sāssa hoti yathādhippāyā.
an4.79:5.1	Idha, sāriputta, ekacco samaṇaṁ vā brāhmaṇaṁ vā upasaṅkamitvā pavāreti: ‘vadatu, bhante, paccayenā’ti. So yena pavāreti taṁ parādhippāyaṁ deti.
an4.79:5.2	So ce tato cuto itthattaṁ āgacchati, so yaññadeva vaṇijjaṁ payojeti, sāssa hoti parādhippāyā.
an4.79:6.1	Ayaṁ kho, sāriputta, hetu ayaṁ paccayo, yena midhekaccassa tādisāva vaṇijjā payuttā chedagāminī hoti.
an4.79:6.2	Ayaṁ pana, sāriputta, hetu ayaṁ paccayo, yena midhekaccassa tādisāva vaṇijjā payuttā na yathādhippāyā hoti.
an4.79:6.3	Ayaṁ kho pana, sāriputta, hetu ayaṁ paccayo, yena midhekaccassa tādisāva vaṇijjā payuttā yathādhippāyā hoti.
an4.79:6.4	Ayaṁ pana, sāriputta, hetu ayaṁ paccayo, yena midhekaccassa tādisāva vaṇijjā payuttā parādhippāyā hotī”ti.
an4.79:6.5	Navamaṁ.
an4.80:0.1	Aṅguttara Nikāya 4.80
an4.80:0.2	8. Apaṇṇakavagga
an4.80:0.3	Kambojasutta
an4.80:1.1	Ekaṁ samayaṁ bhagavā kosambiyaṁ viharati ghositārāme.
an4.80:1.2	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an4.80:2.1	“Ko nu kho, bhante, hetu ko paccayo, yena mātugāmo neva sabhāyaṁ nisīdati, na kammantaṁ payojeti, na kambojaṁ gacchatī”ti?
an4.80:2.2	“Kodhano, ānanda, mātugāmo;
an4.80:2.3	issukī, ānanda, mātugāmo;
an4.80:2.4	maccharī, ānanda, mātugāmo;
an4.80:2.5	duppañño, ānanda, mātugāmo—
an4.80:2.6	ayaṁ kho, ānanda, hetu ayaṁ paccayo, yena mātugāmo neva sabhāyaṁ nisīdati, na kammantaṁ payojeti, na kambojaṁ gacchatī”ti.
an4.80:2.7	Dasamaṁ.
an4.80:2.8	Apaṇṇakavaggo tatiyo.
an4.80:3.0	Tassuddānaṁ
an4.80:3.1	Padhānaṁ diṭṭhisappurisa,
an4.80:3.2	Vadhukā dve ca honti aggāni;
an4.80:3.3	Kusināraacinteyyā,
an4.80:3.4	Dakkhiṇā ca vaṇijjā kambojanti.
an4.81:0.1	Aṅguttara Nikāya 4.81
an4.81:0.2	9. Macalavagga
an4.81:0.3	Pāṇātipātasutta
an4.81:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.81:1.2	Katamehi catūhi?
an4.81:1.3	Pāṇātipātī hoti, adinnādāyī hoti, kāmesumicchācārī hoti, musāvādī hoti—
an4.81:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.81:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.81:2.2	Katamehi catūhi?
an4.81:2.3	Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti—
an4.81:2.4	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.81:2.5	Paṭhamaṁ.
an4.82:0.1	Aṅguttara Nikāya 4.82
an4.82:0.2	9. Macalavagga
an4.82:0.3	Musāvādasutta
an4.82:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.82:1.2	Katamehi catūhi?
an4.82:1.3	Musāvādī hoti, pisuṇavāco hoti, pharusavāco hoti, samphappalāpī hoti—
an4.82:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.82:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.82:2.2	Katamehi catūhi?
an4.82:2.3	Musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti—
an4.82:2.4	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.82:2.5	Dutiyaṁ.
an4.83:0.1	Aṅguttara Nikāya 4.83
an4.83:0.2	9. Macalavagga
an4.83:0.3	Avaṇṇārahasutta
an4.83:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.83:1.2	Katamehi catūhi?
an4.83:1.3	Ananuvicca apariyogāhetvā avaṇṇārahassa vaṇṇaṁ bhāsati,
an4.83:1.4	ananuvicca apariyogāhetvā vaṇṇārahassa avaṇṇaṁ bhāsati,
an4.83:1.5	ananuvicca apariyogāhetvā appasādanīye ṭhāne pasādaṁ upadaṁseti, ananuvicca apariyogāhetvā pasādanīye ṭhāne appasādaṁ upadaṁseti—
an4.83:1.6	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.83:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.83:2.2	Katamehi catūhi?
an4.83:2.3	Anuvicca pariyogāhetvā avaṇṇārahassa avaṇṇaṁ bhāsati,
an4.83:2.4	anuvicca pariyogāhetvā vaṇṇārahassa vaṇṇaṁ bhāsati,
an4.83:2.5	anuvicca pariyogāhetvā appasādanīye ṭhāne appasādaṁ upadaṁseti
an4.83:2.6	anuvicca pariyogāhetvā pasādanīye ṭhāne pasādaṁ upadaṁseti—
an4.83:2.7	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.83:2.8	Tatiyaṁ.
an4.84:0.1	Aṅguttara Nikāya 4.84
an4.84:0.2	9. Macalavagga
an4.84:0.3	Kodhagarusutta
an4.84:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.84:1.2	Katamehi catūhi?
an4.84:1.3	Kodhagaru hoti na saddhammagaru, makkhagaru hoti na saddhammagaru, lābhagaru hoti na saddhammagaru, sakkāragaru hoti na saddhammagaru—
an4.84:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.84:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.84:2.2	Katamehi catūhi?
an4.84:2.3	Saddhammagaru hoti na kodhagaru, saddhammagaru hoti na makkhagaru, saddhammagaru hoti na lābhagaru, saddhammagaru hoti na sakkāragaru—
an4.84:2.4	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.84:2.5	Catutthaṁ.
an4.85:0.1	Aṅguttara Nikāya 4.85
an4.85:0.2	9. Macalavagga
an4.85:0.3	Tamotamasutta
an4.85:1.1	“Cattārome, bhikkhave, puggalā santo saṁvijjamānā lokasmiṁ.
an4.85:1.2	Katame cattāro?
an4.85:1.3	Tamo tamaparāyaṇo,
an4.85:1.4	tamo jotiparāyaṇo,
an4.85:1.5	joti tamaparāyaṇo,
an4.85:1.6	joti jotiparāyaṇo.
an4.85:2.1	Kathañca, bhikkhave, puggalo tamo hoti tamaparāyaṇo?
an4.85:2.2	Idha, bhikkhave, ekacco puggalo nīce kule paccājāto hoti—caṇḍālakule vā venakule vā nesādakule vā rathakārakule vā pukkusakule vā dalidde appannapānabhojane kasiravuttike, yattha kasirena ghāsacchādo labbhati.
an4.85:2.3	So ca hoti dubbaṇṇo duddasiko okoṭimako bavhābādho kāṇo vā kuṇī vā khañjo vā pakkhahato vā, na lābhī annassa pānassa vatthassa yānassa mālāgandhavilepanassa seyyāvasathapadīpeyyassa.
an4.85:2.4	So kāyena duccaritaṁ carati, vācāya duccaritaṁ carati, manasā duccaritaṁ carati.
an4.85:2.5	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an4.85:2.6	Evaṁ kho, bhikkhave, puggalo tamo hoti tamaparāyaṇo.
an4.85:3.1	Kathañca, bhikkhave, puggalo tamo hoti jotiparāyaṇo?
an4.85:3.2	Idha, bhikkhave, ekacco puggalo nīce kule paccājāto hoti—caṇḍālakule vā venakule vā nesādakule vā rathakārakule vā pukkusakule vā dalidde appannapānabhojane kasiravuttike, yattha kasirena ghāsacchādo labbhati;
an4.85:3.3	so ca hoti dubbaṇṇo duddasiko okoṭimako bavhābādho kāṇo vā kuṇī vā khañjo vā pakkhahato vā na lābhī annassa pānassa vatthassa yānassa mālāgandhavilepanassa seyyāvasathapadīpeyyassa.
an4.85:3.4	So kāyena sucaritaṁ carati, vācāya sucaritaṁ carati, manasā sucaritaṁ carati.
an4.85:3.5	So kāyena sucaritaṁ caritvā, vācāya sucaritaṁ caritvā, manasā sucaritaṁ caritvā kāyassa bhedā paraṁ maraṇā sugatiṁ saggaṁ lokaṁ upapajjati.
an4.85:3.6	Evaṁ kho, bhikkhave, puggalo tamo hoti jotiparāyaṇo.
an4.85:4.1	Kathañca, bhikkhave, puggalo joti hoti tamaparāyaṇo?
an4.85:4.2	Idha, bhikkhave, ekacco puggalo ucce kule paccājāto hoti—khattiyamahāsālakule vā brāhmaṇamahāsālakule vā gahapatimahāsālakule vā aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe;
an4.85:4.3	so ca hoti abhirūpo dassanīyo pāsādiko paramāya vaṇṇapokkharatāya samannāgato, lābhī annassa pānassa vatthassa yānassa mālāgandhavilepanassa seyyāvasathapadīpeyyassa.
an4.85:4.4	So kāyena duccaritaṁ carati, vācāya duccaritaṁ carati, manasā duccaritaṁ carati.
an4.85:4.5	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an4.85:4.6	Evaṁ kho, bhikkhave, puggalo joti hoti tamaparāyaṇo.
an4.85:5.1	Kathañca, bhikkhave, puggalo joti hoti jotiparāyaṇo?
an4.85:5.2	Idha, bhikkhave, ekacco puggalo ucce kule paccājāto hoti—khattiyamahāsālakule vā brāhmaṇamahāsālakule vā gahapatimahāsālakule vā aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe;
an4.85:5.3	so ca hoti abhirūpo dassanīyo pāsādiko paramāya vaṇṇapokkharatāya samannāgato, lābhī annassa pānassa vatthassa yānassa mālāgandhavilepanassa seyyāvasathapadīpeyyassa.
an4.85:5.4	So kāyena sucaritaṁ carati, vācāya sucaritaṁ carati, manasā sucaritaṁ carati.
an4.85:5.5	So kāyena sucaritaṁ caritvā, vācāya sucaritaṁ caritvā, manasā sucaritaṁ caritvā kāyassa bhedā paraṁ maraṇā sugatiṁ saggaṁ lokaṁ upapajjati.
an4.85:5.6	Evaṁ kho, bhikkhave, puggalo joti hoti jotiparāyaṇo.
an4.85:5.7	Ime kho, bhikkhave, cattāro puggalā santo saṁvijjamānā lokasmin”ti.
an4.85:5.8	Pañcamaṁ.
an4.86:0.1	Aṅguttara Nikāya 4.86
an4.86:0.2	9. Macalavagga
an4.86:0.3	Oṇatoṇatasutta
an4.86:1.1	“Cattārome, bhikkhave, puggalā santo saṁvijjamānā lokasmiṁ.
an4.86:1.2	Katame cattāro?
an4.86:1.3	Oṇatoṇato,
an4.86:1.4	oṇatuṇṇato,
an4.86:1.5	uṇṇatoṇato,
an4.86:1.6	uṇṇatuṇṇato.
an4.86:1.7	… Ime kho, bhikkhave, cattāro puggalā santo saṁvijjamānā lokasmin”ti.
an4.86:1.8	Chaṭṭhaṁ.
an4.87:0.1	Aṅguttara Nikāya 4.87
an4.87:0.2	9. Macalavagga
an4.87:0.3	Puttasutta
an4.87:1.1	“Cattārome, bhikkhave, puggalā santo saṁvijjamānā lokasmiṁ.
an4.87:1.2	Katame cattāro?
an4.87:1.3	Samaṇamacalo, samaṇapuṇḍarīko, samaṇapadumo, samaṇesu samaṇasukhumālo.
an4.87:2.1	Kathañca, bhikkhave, puggalo samaṇamacalo hoti?
an4.87:2.2	Idha, bhikkhave, bhikkhu sekho hoti pāṭipado;
an4.87:2.3	anuttaraṁ yogakkhemaṁ patthayamāno viharati.
an4.87:2.4	Seyyathāpi, bhikkhave, rañño khattiyassa muddhāvasittassa jeṭṭho putto ābhiseko anabhisitto macalappatto;
an4.87:2.5	evamevaṁ kho, bhikkhave, bhikkhu sekho hoti pāṭipado, anuttaraṁ yogakkhemaṁ patthayamāno viharati.
an4.87:2.6	Evaṁ kho, bhikkhave, puggalo samaṇamacalo hoti.
an4.87:3.1	Kathañca, bhikkhave, puggalo samaṇapuṇḍarīko hoti?
an4.87:3.2	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati, no ca kho aṭṭha vimokkhe kāyena phusitvā viharati.
an4.87:3.3	Evaṁ kho, bhikkhave, puggalo samaṇapuṇḍarīko hoti.
an4.87:4.1	Kathañca, bhikkhave, puggalo samaṇapadumo hoti?
an4.87:4.2	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati, aṭṭha ca vimokkhe kāyena phusitvā viharati.
an4.87:4.3	Evaṁ kho, bhikkhave, puggalo samaṇapadumo hoti.
an4.87:5.1	Kathañca, bhikkhave, puggalo samaṇesu samaṇasukhumālo hoti?
an4.87:5.2	Idha, bhikkhave, bhikkhu yācitova bahulaṁ cīvaraṁ paribhuñjati, appaṁ ayācito; yācitova bahulaṁ piṇḍapātaṁ paribhuñjati, appaṁ ayācito; yācitova bahulaṁ senāsanaṁ paribhuñjati, appaṁ ayācito; yācitova bahulaṁ gilānappaccayabhesajjaparikkhāraṁ paribhuñjati, appaṁ ayācito.
an4.87:5.3	Yehi kho pana sabrahmacārīhi saddhiṁ viharati, tyassa manāpeneva bahulaṁ kāyakammena samudācaranti, appaṁ amanāpena; manāpeneva bahulaṁ vacīkammena samudācaranti, appaṁ amanāpena; manāpeneva bahulaṁ manokammena samudācaranti, appaṁ amanāpena;
an4.87:5.4	manāpaṁyeva bahulaṁ upahāraṁ upaharanti, appaṁ amanāpaṁ.
an4.87:5.5	Yāni kho pana tāni vedayitāni pittasamuṭṭhānāni vā semhasamuṭṭhānāni vā vātasamuṭṭhānāni vā sannipātikāni vā utupariṇāmajāni vā visamaparihārajāni vā opakkamikāni vā kammavipākajāni vā, tāni panassa na bahudeva uppajjanti. Appābādho hoti.
an4.87:5.6	Catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī,
an4.87:5.7	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an4.87:5.8	Evaṁ kho, bhikkhave, puggalo samaṇesu samaṇasukhumālo hoti.
an4.87:6.1	Yañhi taṁ, bhikkhave, sammā vadamāno vadeyya samaṇesu samaṇasukhumāloti, mameva taṁ, bhikkhave, sammā vadamāno vadeyya samaṇesu samaṇasukhumāloti.
an4.87:6.2	Ahañhi, bhikkhave, yācitova bahulaṁ cīvaraṁ paribhuñjāmi, appaṁ ayācito; yācitova bahulaṁ piṇḍapātaṁ paribhuñjāmi, appaṁ ayācito; yācitova bahulaṁ senāsanaṁ paribhuñjāmi, appaṁ ayācito; yācitova bahulaṁ gilānappaccayabhesajjaparikkhāraṁ paribhuñjāmi, appaṁ ayācito.
an4.87:6.3	Yehi kho pana bhikkhūhi saddhiṁ viharāmi te me manāpeneva bahulaṁ kāyakammena samudācaranti, appaṁ amanāpena; manāpeneva bahulaṁ vacīkammena samudācaranti, appaṁ amanāpena; manāpeneva bahulaṁ manokammena samudācaranti, appaṁ amanāpena; manāpaṁyeva bahulaṁ upahāraṁ upaharanti, appaṁ amanāpaṁ.
an4.87:6.4	Yāni kho pana tāni vedayitāni pittasamuṭṭhānāni vā semhasamuṭṭhānāni vā vātasamuṭṭhānāni vā sannipātikāni vā utupariṇāmajāni vā visamaparihārajāni vā opakkamikāni vā kammavipākajāni vā, tāni me na bahudeva uppajjanti. Appābādhohamasmi.
an4.87:6.5	Catunnaṁ kho panasmi jhānānaṁ ābhicetasikānaṁ diṭṭhadhammasukhavihārānaṁ nikāmalābhī akicchalābhī akasiralābhī,
an4.87:6.6	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharāmi.
an4.87:7.1	Yañhi taṁ, bhikkhave, sammā vadamāno vadeyya samaṇesu samaṇasukhumāloti, mameva taṁ, bhikkhave, sammā vadamāno vadeyya samaṇesu samaṇasukhumāloti.
an4.87:7.2	Ime kho, bhikkhave, cattāro puggalā santo saṁvijjamānā lokasmin”ti.
an4.87:7.3	Sattamaṁ.
an4.88:0.1	Aṅguttara Nikāya 4.88
an4.88:0.2	9. Macalavagga
an4.88:0.3	Saṁyojanasutta
an4.88:1.1	“Cattārome, bhikkhave, puggalā santo saṁvijjamānā lokasmiṁ.
an4.88:1.2	Katame cattāro?
an4.88:1.3	Samaṇamacalo, samaṇapuṇḍarīko, samaṇapadumo, samaṇesu samaṇasukhumālo.
an4.88:2.1	Kathañca, bhikkhave, puggalo samaṇamacalo hoti?
an4.88:2.2	Idha, bhikkhave, bhikkhu tiṇṇaṁ saṁyojanānaṁ parikkhayā sotāpanno hoti avinipātadhammo niyato sambodhiparāyaṇo.
an4.88:2.3	Evaṁ kho, bhikkhave, puggalo samaṇamacalo hoti.
an4.88:3.1	Kathañca, bhikkhave, puggalo samaṇapuṇḍarīko hoti?
an4.88:3.2	Idha, bhikkhave, bhikkhu tiṇṇaṁ saṁyojanānaṁ parikkhayā, rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti.
an4.88:3.3	Evaṁ kho, bhikkhave, puggalo samaṇapuṇḍarīko hoti.
an4.88:4.1	Kathañca, bhikkhave, puggalo samaṇapadumo hoti?
an4.88:4.2	Idha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an4.88:4.3	Evaṁ kho, bhikkhave, puggalo samaṇapadumo hoti.
an4.88:5.1	Kathañca, bhikkhave, puggalo samaṇesu samaṇasukhumālo hoti?
an4.88:5.2	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an4.88:5.3	Evaṁ kho, bhikkhave, puggalo samaṇesu samaṇasukhumālo hoti.
an4.88:5.4	Ime kho, bhikkhave, cattāro puggalā santo saṁvijjamānā lokasmin”ti.
an4.88:5.5	Aṭṭhamaṁ.
an4.89:0.1	Aṅguttara Nikāya 4.89
an4.89:0.2	9. Macalavagga
an4.89:0.3	Sammādiṭṭhisutta
an4.89:1.1	“Cattārome, bhikkhave, puggalā santo saṁvijjamānā lokasmiṁ.
an4.89:1.2	Katame cattāro?
an4.89:1.3	Samaṇamacalo, samaṇapuṇḍarīko, samaṇapadumo, samaṇesu samaṇasukhumālo.
an4.89:2.1	Kathañca, bhikkhave, puggalo samaṇamacalo hoti?
an4.89:2.2	Idha, bhikkhave, bhikkhu sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti.
an4.89:2.3	Evaṁ kho, bhikkhave, puggalo samaṇamacalo hoti.
an4.89:3.1	Kathañca, bhikkhave, puggalo samaṇapuṇḍarīko hoti?
an4.89:3.2	Idha, bhikkhave, bhikkhu sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti, sammāñāṇī hoti, sammāvimutti hoti, no ca kho aṭṭha vimokkhe kāyena phusitvā viharati.
an4.89:3.3	Evaṁ kho, bhikkhave, puggalo samaṇapuṇḍarīko hoti.
an4.89:4.1	Kathañca, bhikkhave, puggalo samaṇapadumo hoti?
an4.89:4.2	Idha, bhikkhave, bhikkhu sammādiṭṭhiko hoti …pe… sammāvimutti hoti, aṭṭha ca vimokkhe kāyena phusitvā viharati.
an4.89:4.3	Evaṁ kho, bhikkhave, puggalo samaṇapadumo hoti.
an4.89:5.1	Kathañca, bhikkhave, puggalo samaṇesu samaṇasukhumālo hoti?
an4.89:5.2	Idha, bhikkhave, bhikkhu yācitova bahulaṁ cīvaraṁ paribhuñjati, appaṁ ayācito …pe… yañhi taṁ, bhikkhave, sammā vadamāno vadeyya samaṇesu samaṇasukhumāloti, mameva taṁ, bhikkhave, sammā vadamāno vadeyya samaṇesu samaṇasukhumāloti.
an4.89:5.3	Ime kho, bhikkhave, cattāro puggalā santo saṁvijjamānā lokasmin”ti.
an4.89:5.4	Navamaṁ.
an4.90:0.1	Aṅguttara Nikāya 4.90
an4.90:0.2	9. Macalavagga
an4.90:0.3	Khandhasutta
an4.90:1.1	“Cattārome, bhikkhave, puggalā santo saṁvijjamānā lokasmiṁ.
an4.90:1.2	Katame cattāro?
an4.90:1.3	Samaṇamacalo, samaṇapuṇḍarīko, samaṇapadumo, samaṇesu samaṇasukhumālo.
an4.90:2.1	Kathañca, bhikkhave, puggalo samaṇamacalo hoti?
an4.90:2.2	Idha, bhikkhave, bhikkhu sekho hoti appattamānaso, anuttaraṁ yogakkhemaṁ patthayamāno viharati.
an4.90:2.3	Evaṁ kho, bhikkhave, puggalo samaṇamacalo hoti.
an4.90:3.1	Kathañca, bhikkhave, puggalo samaṇapuṇḍarīko hoti?
an4.90:3.2	Idha, bhikkhave, bhikkhu pañcasu upādānakkhandhesu udayabbayānupassī viharati:
an4.90:3.3	‘iti rūpaṁ, iti rūpassa samudayo, iti rūpassa atthaṅgamo;
an4.90:3.4	iti vedanā …pe…
an4.90:3.5	iti saññā …pe…
an4.90:3.6	iti saṅkhārā …pe…
an4.90:3.7	iti viññāṇaṁ, iti viññāṇassa samudayo, iti viññāṇassa atthaṅgamo’ti;
an4.90:3.8	no ca kho aṭṭha vimokkhe kāyena phusitvā viharati.
an4.90:3.9	Evaṁ kho, bhikkhave, puggalo samaṇapuṇḍarīko hoti.
an4.90:4.1	Kathañca, bhikkhave, puggalo samaṇapadumo hoti?
an4.90:4.2	Idha, bhikkhave, bhikkhu pañcasu upādānakkhandhesu udayabbayānupassī viharati:
an4.90:4.3	‘iti rūpaṁ, iti rūpassa samudayo, iti rūpassa atthaṅgamo;
an4.90:4.4	iti vedanā …pe…
an4.90:4.5	iti saññā …pe…
an4.90:4.6	iti saṅkhārā …pe…
an4.90:4.7	iti viññāṇaṁ, iti viññāṇassa samudayo, iti viññāṇassa atthaṅgamo’ti;
an4.90:4.8	aṭṭha ca vimokkhe kāyena phusitvā viharati.
an4.90:4.9	Evaṁ kho, bhikkhave, puggalo samaṇapadumo hoti.
an4.90:5.1	Kathañca, bhikkhave, puggalo samaṇesu samaṇasukhumālo hoti?
an4.90:5.2	Idha, bhikkhave, bhikkhu yācitova bahulaṁ cīvaraṁ paribhuñjati, appaṁ ayācito …pe… mameva taṁ, bhikkhave, sammā vadamāno vadeyya samaṇesu samaṇasukhumāloti.
an4.90:5.3	Ime kho, bhikkhave, cattāro puggalā santo saṁvijjamānā lokasmin”ti.
an4.90:5.4	Dasamaṁ.
an4.90:5.5	Macalavaggo catuttho.
an4.90:6.0	Tassuddānaṁ
an4.90:6.1	Pāṇātipāto ca musā,
an4.90:6.2	avaṇṇakodhatamoṇatā;
an4.90:6.3	Putto saṁyojanañceva,
an4.90:6.4	diṭṭhi khandhena te dasāti.
an4.91:0.1	Aṅguttara Nikāya 4.91
an4.91:0.2	10. Asuravagga
an4.91:0.3	Asurasutta
an4.91:1.1	“Cattārome, bhikkhave, puggalā santo saṁvijjamānā lokasmiṁ.
an4.91:1.2	Katame cattāro?
an4.91:1.3	Asuro asuraparivāro,
an4.91:1.4	asuro devaparivāro,
an4.91:1.5	devo asuraparivāro,
an4.91:1.6	devo devaparivāro.
an4.91:2.1	Kathañca, bhikkhave, puggalo asuro hoti asuraparivāro?
an4.91:2.2	Idha, bhikkhave, ekacco puggalo dussīlo hoti pāpadhammo, parisāpissa hoti dussīlā pāpadhammā.
an4.91:2.3	Evaṁ kho, bhikkhave, puggalo asuro hoti asuraparivāro.
an4.91:3.1	Kathañca, bhikkhave, puggalo asuro hoti devaparivāro?
an4.91:3.2	Idha, bhikkhave, ekacco puggalo dussīlo hoti pāpadhammo, parisā ca khvassa hoti sīlavatī kalyāṇadhammā.
an4.91:3.3	Evaṁ kho, bhikkhave, puggalo asuro hoti devaparivāro.
an4.91:4.1	Kathañca, bhikkhave, puggalo devo hoti asuraparivāro?
an4.91:4.2	Idha, bhikkhave, ekacco puggalo sīlavā hoti kalyāṇadhammo, parisā ca khvassa hoti dussīlā pāpadhammā.
an4.91:4.3	Evaṁ kho, bhikkhave, puggalo devo hoti asuraparivāro.
an4.91:5.1	Kathañca, bhikkhave, puggalo devo hoti devaparivāro?
an4.91:5.2	Idha, bhikkhave, ekacco puggalo sīlavā hoti kalyāṇadhammo, parisāpissa hoti sīlavatī kalyāṇadhammā.
an4.91:5.3	Evaṁ kho, bhikkhave, puggalo devo hoti, devaparivāro.
an4.91:5.4	Ime kho, bhikkhave, cattāro puggalā santo saṁvijjamānā lokasmin”ti.
an4.91:5.5	Paṭhamaṁ.
an4.92:0.1	Aṅguttara Nikāya 4.92
an4.92:0.2	10. Asuravagga
an4.92:0.3	Paṭhamasamādhisutta
an4.92:1.1	“Cattārome, bhikkhave, puggalā santo saṁvijjamānā lokasmiṁ.
an4.92:1.2	Katame cattāro?
an4.92:1.3	Idha, bhikkhave, ekacco puggalo lābhī hoti ajjhattaṁ cetosamathassa, na lābhī adhipaññādhammavipassanāya.
an4.92:1.4	Idha pana, bhikkhave, ekacco puggalo lābhī hoti adhipaññādhammavipassanāya, na lābhī ajjhattaṁ cetosamathassa.
an4.92:1.5	Idha pana, bhikkhave, ekacco puggalo na ceva lābhī hoti ajjhattaṁ cetosamathassa na ca lābhī adhipaññādhammavipassanāya.
an4.92:1.6	Idha pana, bhikkhave, ekacco puggalo lābhī ceva hoti ajjhattaṁ cetosamathassa lābhī ca adhipaññādhammavipassanāya.
an4.92:1.7	Ime kho, bhikkhave, cattāro puggalā santo saṁvijjamānā lokasmin”ti.
an4.92:1.8	Dutiyaṁ.
an4.93:0.1	Aṅguttara Nikāya 4.93
an4.93:0.2	10. Asuravagga
an4.93:0.3	Dutiyasamādhisutta
an4.93:1.1	“Cattārome, bhikkhave, puggalā santo saṁvijjamānā lokasmiṁ.
an4.93:1.2	Katame cattāro?
an4.93:1.3	Idha, bhikkhave, ekacco puggalo lābhī hoti ajjhattaṁ cetosamathassa, na lābhī adhipaññādhammavipassanāya.
an4.93:1.4	Idha pana, bhikkhave, ekacco puggalo lābhī hoti adhipaññādhammavipassanāya, na lābhī ajjhattaṁ cetosamathassa.
an4.93:1.5	Idha pana, bhikkhave, ekacco puggalo na ceva lābhī hoti ajjhattaṁ cetosamathassa na ca lābhī adhipaññādhammavipassanāya.
an4.93:1.6	Idha pana, bhikkhave, ekacco puggalo lābhī ceva hoti ajjhattaṁ cetosamathassa lābhī ca adhipaññādhammavipassanāya.
an4.93:2.1	Tatra, bhikkhave, yvāyaṁ puggalo lābhī hoti ajjhattaṁ cetosamathassa na lābhī adhipaññādhammavipassanāya, tena, bhikkhave, puggalena ajjhattaṁ cetosamathe patiṭṭhāya adhipaññādhammavipassanāya yogo karaṇīyo.
an4.93:2.2	So aparena samayena lābhī ceva hoti ajjhattaṁ cetosamathassa lābhī ca adhipaññādhammavipassanāya.
an4.93:3.1	Tatra, bhikkhave, yvāyaṁ puggalo lābhī adhipaññādhammavipassanāya na lābhī ajjhattaṁ cetosamathassa, tena, bhikkhave, puggalena adhipaññādhammavipassanāya patiṭṭhāya ajjhattaṁ cetosamathe yogo karaṇīyo.
an4.93:3.2	So aparena samayena lābhī ceva hoti adhipaññādhammavipassanāya lābhī ca ajjhattaṁ cetosamathassa.
an4.93:4.1	Tatra, bhikkhave, yvāyaṁ puggalo na ceva lābhī ajjhattaṁ cetosamathassa na ca lābhī adhipaññādhammavipassanāya, tena, bhikkhave, puggalena tesaṁyeva kusalānaṁ dhammānaṁ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an4.93:4.2	Seyyathāpi, bhikkhave, ādittacelo vā ādittasīso vā tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya;
an4.93:4.3	evamevaṁ kho, bhikkhave, tena puggalena tesaṁyeva kusalānaṁ dhammānaṁ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an4.93:4.4	So aparena samayena lābhī ceva hoti ajjhattaṁ cetosamathassa lābhī ca adhipaññādhammavipassanāya.
an4.93:5.1	Tatra, bhikkhave, yvāyaṁ puggalo lābhī ceva hoti ajjhattaṁ cetosamathassa lābhī ca adhipaññādhammavipassanāya, tena, bhikkhave, puggalena tesuyeva kusalesu dhammesu patiṭṭhāya uttari āsavānaṁ khayāya yogo karaṇīyo.
an4.93:5.2	Ime kho, bhikkhave, cattāro puggalā santo saṁvijjamānā lokasmin”ti.
an4.93:5.3	Tatiyaṁ.
an4.94:0.1	Aṅguttara Nikāya 4.94
an4.94:0.2	10. Asuravagga
an4.94:0.3	Tatiyasamādhisutta
an4.94:1.1	“Cattārome, bhikkhave, puggalā santo saṁvijjamānā lokasmiṁ.
an4.94:1.2	Katame cattāro?
an4.94:1.3	Idha, bhikkhave, ekacco puggalo lābhī hoti ajjhattaṁ cetosamathassa, na lābhī adhipaññādhammavipassanāya.
an4.94:1.4	Idha pana, bhikkhave, ekacco puggalo lābhī hoti adhipaññādhammavipassanāya, na lābhī ajjhattaṁ cetosamathassa.
an4.94:1.5	Idha pana, bhikkhave, ekacco puggalo na ceva lābhī hoti ajjhattaṁ cetosamathassa na ca lābhī adhipaññādhammavipassanāya.
an4.94:1.6	Idha pana, bhikkhave, ekacco puggalo lābhī ceva hoti ajjhattaṁ cetosamathassa lābhī ca adhipaññādhammavipassanāya.
an4.94:2.1	Tatra, bhikkhave, yvāyaṁ puggalo lābhī ajjhattaṁ cetosamathassa na lābhī adhipaññādhammavipassanāya, tena, bhikkhave, puggalena yvāyaṁ puggalo lābhī adhipaññādhammavipassanāya so upasaṅkamitvā evamassa vacanīyo:
an4.94:2.2	‘kathaṁ nu kho, āvuso, saṅkhārā daṭṭhabbā?
an4.94:2.3	Kathaṁ saṅkhārā sammasitabbā?
an4.94:2.4	Kathaṁ saṅkhārā vipassitabbā’ti?
an4.94:2.5	Tassa so yathādiṭṭhaṁ yathāviditaṁ byākaroti:
an4.94:2.6	‘evaṁ kho, āvuso, saṅkhārā daṭṭhabbā, evaṁ saṅkhārā sammasitabbā, evaṁ saṅkhārā vipassitabbā’ti.
an4.94:2.7	So aparena samayena lābhī ceva hoti ajjhattaṁ cetosamathassa lābhī ca adhipaññādhammavipassanāya.
an4.94:3.1	Tatra, bhikkhave, yvāyaṁ puggalo lābhī adhipaññādhammavipassanāya na lābhī ajjhattaṁ cetosamathassa, tena, bhikkhave, puggalena yvāyaṁ puggalo lābhī ajjhattaṁ cetosamathassa so upasaṅkamitvā evamassa vacanīyo:
an4.94:3.2	‘kathaṁ nu kho, āvuso, cittaṁ saṇṭhapetabbaṁ?
an4.94:3.3	Kathaṁ cittaṁ sannisādetabbaṁ?
an4.94:3.4	Kathaṁ cittaṁ ekodi kātabbaṁ?
an4.94:3.5	Kathaṁ cittaṁ samādahātabban’ti?
an4.94:3.6	Tassa so yathādiṭṭhaṁ yathāviditaṁ byākaroti:
an4.94:3.7	‘evaṁ kho, āvuso, cittaṁ saṇṭhapetabbaṁ, evaṁ cittaṁ sannisādetabbaṁ, evaṁ cittaṁ ekodi kātabbaṁ, evaṁ cittaṁ samādahātabban’ti.
an4.94:3.8	So aparena samaye lābhī ceva hoti adhipaññādhammavipassanāya lābhī ca ajjhattaṁ cetosamathassa.
an4.94:4.1	Tatra, bhikkhave, yvāyaṁ puggalo na ceva lābhī ajjhattaṁ cetosamathassa na ca lābhī adhipaññādhammavipassanāya, tena, bhikkhave, puggalena yvāyaṁ puggalo lābhī ceva ajjhattaṁ cetosamathassa lābhī ca adhipaññādhammavipassanāya so upasaṅkamitvā evamassa vacanīyo:
an4.94:4.2	‘kathaṁ nu kho, āvuso, cittaṁ saṇṭhapetabbaṁ?
an4.94:4.3	Kathaṁ cittaṁ sannisādetabbaṁ?
an4.94:4.4	Kathaṁ cittaṁ ekodi kātabbaṁ?
an4.94:4.5	Kathaṁ cittaṁ samādahātabbaṁ?
an4.94:4.6	Kathaṁ saṅkhārā daṭṭhabbā?
an4.94:4.7	Kathaṁ saṅkhārā sammasitabbā?
an4.94:4.8	Kathaṁ saṅkhārā vipassitabbā’ti?
an4.94:4.9	Tassa so yathādiṭṭhaṁ yathāviditaṁ byākaroti:
an4.94:4.10	‘evaṁ kho, āvuso, cittaṁ saṇṭhapetabbaṁ, evaṁ cittaṁ sannisādetabbaṁ, evaṁ cittaṁ ekodi kātabbaṁ, evaṁ cittaṁ samādahātabbaṁ, evaṁ saṅkhārā daṭṭhabbā, evaṁ saṅkhārā sammasitabbā, evaṁ saṅkhārā vipassitabbā’ti.
an4.94:4.11	So aparena samayena lābhī ceva hoti ajjhattaṁ cetosamathassa lābhī ca adhipaññādhammavipassanāya.
an4.94:5.1	Tatra, bhikkhave, yvāyaṁ puggalo lābhī ceva hoti ajjhattaṁ cetosamathassa lābhī ca adhipaññādhammavipassanāya, tena, bhikkhave, puggalena tesu ceva kusalesu dhammesu patiṭṭhāya uttari āsavānaṁ khayāya yogo karaṇīyo.
an4.94:5.2	Ime kho, bhikkhave, cattāro puggalā santo saṁvijjamānā lokasmin”ti.
an4.94:5.3	Catutthaṁ.
an4.95:0.1	Aṅguttara Nikāya 4.95
an4.95:0.2	10. Asuravagga
an4.95:0.3	Chavālātasutta
an4.95:1.1	“Cattārome, bhikkhave, puggalā santo saṁvijjamānā lokasmiṁ.
an4.95:1.2	Katame cattāro?
an4.95:1.3	Nevattahitāya paṭipanno no parahitāya,
an4.95:1.4	parahitāya paṭipanno no attahitāya,
an4.95:1.5	attahitāya paṭipanno no parahitāya,
an4.95:1.6	attahitāya ceva paṭipanno parahitāya ca.
an4.95:2.1	Seyyathāpi, bhikkhave, chavālātaṁ ubhato padittaṁ, majjhe gūthagataṁ, neva gāme kaṭṭhatthaṁ pharati na araññe (…);
an4.95:2.2	tathūpamāhaṁ, bhikkhave, imaṁ puggalaṁ vadāmi yvāyaṁ puggalo nevattahitāya paṭipanno no parahitāya.
an4.95:3.1	Tatra, bhikkhave, yvāyaṁ puggalo parahitāya paṭipanno no attahitāya, ayaṁ imesaṁ dvinnaṁ puggalānaṁ abhikkantataro ca paṇītataro ca.
an4.95:3.2	Tatra, bhikkhave, yvāyaṁ puggalo attahitāya paṭipanno no parahitāya, ayaṁ imesaṁ tiṇṇaṁ puggalānaṁ abhikkantataro ca paṇītataro ca.
an4.95:3.3	Tatra, bhikkhave, yvāyaṁ puggalo attahitāya ceva paṭipanno parahitāya ca, ayaṁ imesaṁ catunnaṁ puggalānaṁ aggo ca seṭṭho ca pāmokkho ca uttamo ca pavaro ca.
an4.95:4.1	Seyyathāpi, bhikkhave, gavā khīraṁ, khīramhā dadhi, dadhimhā navanītaṁ, navanītamhā sappi, sappimhā sappimaṇḍo, sappimaṇḍo tattha aggamakkhāyati;
an4.95:4.2	evamevaṁ kho, bhikkhave, yvāyaṁ puggalo attahitāya ceva paṭipanno parahitāya ca, ayaṁ imesaṁ catunnaṁ puggalānaṁ aggo ca seṭṭho ca pāmokkho ca uttamo ca pavaro ca.
an4.95:4.3	Ime kho, bhikkhave, cattāro puggalā santo saṁvijjamānā lokasmin”ti.
an4.95:4.4	Pañcamaṁ.
an4.96:0.1	Aṅguttara Nikāya 4.96
an4.96:0.2	10. Asuravagga
an4.96:0.3	Rāgavinayasutta
an4.96:1.1	“Cattārome, bhikkhave, puggalā santo saṁvijjamānā lokasmiṁ.
an4.96:1.2	Katame cattāro?
an4.96:1.3	Attahitāya paṭipanno no parahitāya,
an4.96:1.4	parahitāya paṭipanno no attahitāya,
an4.96:1.5	nevattahitāya paṭipanno no parahitāya,
an4.96:1.6	attahitāya ceva paṭipanno parahitāya ca.
an4.96:2.1	Kathañca, bhikkhave, puggalo attahitāya paṭipanno hoti no parahitāya?
an4.96:2.2	Idha, bhikkhave, ekacco puggalo attanā rāgavinayāya paṭipanno hoti, no paraṁ rāgavinayāya samādapeti;
an4.96:2.3	attanā dosavinayāya paṭipanno hoti, no paraṁ dosavinayāya samādapeti;
an4.96:2.4	attanā mohavinayāya paṭipanno hoti, no paraṁ mohavinayāya samādapeti.
an4.96:2.5	Evaṁ kho, bhikkhave, puggalo attahitāya paṭipanno hoti, no parahitāya.
an4.96:3.1	Kathañca, bhikkhave, puggalo parahitāya paṭipanno hoti, no attahitāya?
an4.96:3.2	Idha, bhikkhave, ekacco puggalo attanā na rāgavinayāya paṭipanno hoti, paraṁ rāgavinayāya samādapeti;
an4.96:3.3	attanā na dosavinayāya paṭipanno hoti, paraṁ dosavinayāya samādapeti;
an4.96:3.4	attanā na mohavinayāya paṭipanno hoti, paraṁ mohavinayāya samādapeti.
an4.96:3.5	Evaṁ kho, bhikkhave, puggalo parahitāya paṭipanno hoti, no attahitāya.
an4.96:4.1	Kathañca, bhikkhave, puggalo nevattahitāya paṭipanno hoti, no parahitāya?
an4.96:4.2	Idha, bhikkhave, ekacco puggalo attanā na rāgavinayāya paṭipanno hoti, no paraṁ rāgavinayāya samādapeti;
an4.96:4.3	attanā na dosavinayāya paṭipanno hoti, no paraṁ dosavinayāya samādapeti;
an4.96:4.4	attanā na mohavinayāya paṭipanno hoti, no paraṁ mohavinayāya samādapeti.
an4.96:4.5	Evaṁ kho, bhikkhave, puggalo nevattahitāya paṭipanno hoti, no parahitāya.
an4.96:5.1	Kathañca, bhikkhave, puggalo attahitāya ceva paṭipanno hoti parahitāya ca?
an4.96:5.2	Idha, bhikkhave, ekacco puggalo attanā ca rāgavinayāya paṭipanno hoti, parañca rāgavinayāya samādapeti;
an4.96:5.3	attanā ca dosavinayāya paṭipanno hoti, parañca dosavinayāya samādapeti;
an4.96:5.4	attanā ca mohavinayāya paṭipanno hoti, parañca mohavinayāya samādapeti.
an4.96:5.5	Evaṁ kho, bhikkhave, puggalo attahitāya ceva paṭipanno hoti parahitāya ca.
an4.96:5.6	Ime kho, bhikkhave, cattāro puggalā santo saṁvijjamānā lokasmin”ti.
an4.96:5.7	Chaṭṭhaṁ.
an4.97:0.1	Aṅguttara Nikāya 4.97
an4.97:0.2	10. Asuravagga
an4.97:0.3	Khippanisantisutta
an4.97:1.1	“Cattārome, bhikkhave, puggalā santo saṁvijjamānā lokasmiṁ.
an4.97:1.2	Katame cattāro?
an4.97:1.3	attahitāya paṭipanno no parahitāya,
an4.97:1.4	parahitāya paṭipanno no attahitāya,
an4.97:1.5	nevattahitāya paṭipanno no parahitāya,
an4.97:1.6	attahitāya ceva paṭipanno parahitāya ca.
an4.97:2.1	Kathañca, bhikkhave, puggalo attahitāya paṭipanno hoti, no parahitāya?
an4.97:2.2	Idha, bhikkhave, ekacco puggalo khippanisantī ca hoti kusalesu dhammesu, sutānañca dhammānaṁ dhārakajātiko hoti, dhātānañca dhammānaṁ atthūpaparikkhī hoti atthamaññāya dhammamaññāya, dhammānudhammappaṭipanno hoti;
an4.97:2.3	no ca kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā, no ca sandassako hoti samādapako samuttejako sampahaṁsako sabrahmacārīnaṁ.
an4.97:2.4	Evaṁ kho, bhikkhave, puggalo attahitāya paṭipanno hoti, no parahitāya.
an4.97:3.1	Kathañca, bhikkhave, puggalo parahitāya paṭipanno hoti, no attahitāya?
an4.97:3.2	Idha, bhikkhave, ekacco puggalo na heva kho khippanisantī hoti kusalesu dhammesu, no ca sutānaṁ dhammānaṁ dhārakajātiko hoti, no ca dhātānaṁ dhammānaṁ atthūpaparikkhī hoti, no ca atthamaññāya dhammamaññāya dhammānudhammappaṭipanno hoti;
an4.97:3.3	kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā, sandassako ca hoti samādapako samuttejako sampahaṁsako sabrahmacārīnaṁ.
an4.97:3.4	Evaṁ kho, bhikkhave, puggalo parahitāya paṭipanno hoti, no attahitāya.
an4.97:4.1	Kathañca, bhikkhave, puggalo nevattahitāya paṭipanno hoti, no parahitāya?
an4.97:4.2	Idha, bhikkhave, ekacco puggalo na heva kho khippanisantī hoti kusalesu dhammesu, no ca sutānaṁ dhammānaṁ dhārakajātiko hoti, no ca dhātānaṁ dhammānaṁ atthūpaparikkhī hoti, no ca atthamaññāya dhammamaññāya dhammānudhammappaṭipanno hoti;
an4.97:4.3	no ca kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā, no ca sandassako hoti samādapako samuttejako sampahaṁsako sabrahmacārīnaṁ.
an4.97:4.4	Evaṁ kho, bhikkhave, puggalo nevattahitāya paṭipanno hoti, no parahitāya.
an4.97:5.1	Kathañca, bhikkhave, puggalo attahitāya ceva paṭipanno hoti parahitāya ca?
an4.97:5.2	Idha, bhikkhave, ekacco puggalo khippanisantī ca hoti kusalesu dhammesu, sutānañca dhammānaṁ dhārakajātiko hoti, dhātānañca dhammānaṁ atthūpaparikkhī hoti atthamaññāya dhammamaññāya, dhammānudhammappaṭipanno hoti;
an4.97:5.3	kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā, sandassako ca hoti samādapako samuttejako sampahaṁsako sabrahmacārīnaṁ.
an4.97:5.4	Evaṁ kho, bhikkhave, puggalo attahitāya ceva paṭipanno hoti parahitāya ca.
an4.97:5.5	Ime kho, bhikkhave, cattāro puggalā santo saṁvijjamānā lokasmin”ti.
an4.97:5.6	Sattamaṁ.
an4.98:0.1	Aṅguttara Nikāya 4.98
an4.98:0.2	10. Asuravagga
an4.98:0.3	Attahitasutta
an4.98:1.1	“Cattārome, bhikkhave, puggalā santo saṁvijjamānā lokasmiṁ.
an4.98:1.2	Katame cattāro?
an4.98:1.3	Attahitāya paṭipanno no parahitāya,
an4.98:1.4	parahitāya paṭipanno no attahitāya,
an4.98:1.5	nevattahitāya paṭipanno no parahitāya,
an4.98:1.6	attahitāya ceva paṭipanno parahitāya ca.
an4.98:1.7	Ime kho, bhikkhave, cattāro puggalā santo saṁvijjamānā lokasmin”ti.
an4.98:1.8	Aṭṭhamaṁ.
an4.99:0.1	Aṅguttara Nikāya 4.99
an4.99:0.2	10. Asuravagga
an4.99:0.3	Sikkhāpadasutta
an4.99:1.1	“Cattārome, bhikkhave, puggalā santo saṁvijjamānā lokasmiṁ.
an4.99:1.2	Katame cattāro?
an4.99:1.3	attahitāya paṭipanno no parahitāya,
an4.99:1.4	parahitāya paṭipanno no attahitāya,
an4.99:1.5	nevattahitāya paṭipanno no parahitāya,
an4.99:1.6	attahitāya ceva paṭipanno parahitāya ca.
an4.99:2.1	Kathañca, bhikkhave, puggalo attahitāya paṭipanno hoti, no parahitāya?
an4.99:2.2	Idha, bhikkhave, ekacco puggalo attanā pāṇātipātā paṭivirato hoti, no paraṁ pāṇātipātā veramaṇiyā samādapeti;
an4.99:2.3	attanā adinnādānā paṭivirato hoti, no paraṁ adinnādānā veramaṇiyā samādapeti;
an4.99:2.4	attanā kāmesumicchācārā paṭivirato hoti, no paraṁ kāmesumicchācārā veramaṇiyā samādapeti;
an4.99:2.5	attanā musāvādā paṭivirato hoti, no paraṁ musāvādā veramaṇiyā samādapeti;
an4.99:2.6	attanā surāmerayamajjapamādaṭṭhānā paṭivirato hoti, no paraṁ surāmerayamajjapamādaṭṭhānā veramaṇiyā samādapeti.
an4.99:2.7	Evaṁ kho, bhikkhave, puggalo attahitāya paṭipanno hoti, no parahitāya.
an4.99:3.1	Kathañca, bhikkhave, puggalo parahitāya paṭipanno hoti, no attahitāya?
an4.99:3.2	Idha, bhikkhave, ekacco puggalo attanā pāṇātipātā appaṭivirato hoti, paraṁ pāṇātipātā veramaṇiyā samādapeti;
an4.99:3.3	attanā adinnādānā appaṭivirato hoti, paraṁ adinnādānā veramaṇiyā samādapeti;
an4.99:3.4	attanā kāmesumicchācārā appaṭivirato hoti, paraṁ kāmesumicchācārā veramaṇiyā samādapeti;
an4.99:3.5	attanā musāvādā appaṭivirato hoti, paraṁ musāvādā veramaṇiyā samādapeti;
an4.99:3.6	attanā surāmerayamajjapamādaṭṭhānā appaṭivirato hoti, paraṁ surāmerayamajjapamādaṭṭhānā veramaṇiyā samādapeti.
an4.99:3.7	Evaṁ kho, bhikkhave, puggalo parahitāya paṭipanno hoti, no attahitāya.
an4.99:4.1	Kathañca, bhikkhave, puggalo nevattahitāya paṭipanno hoti no parahitāya?
an4.99:4.2	Idha, bhikkhave, ekacco puggalo attanā pāṇātipātā appaṭivirato hoti, no paraṁ pāṇātipātā veramaṇiyā samādapeti …pe… attanā surāmerayamajjapamādaṭṭhānā appaṭivirato hoti, no paraṁ surāmerayamajjapamādaṭṭhānā veramaṇiyā samādapeti.
an4.99:4.3	Evaṁ kho, bhikkhave, puggalo nevattahitāya paṭipanno hoti, no parahitāya.
an4.99:5.1	Kathañca, bhikkhave, puggalo attahitāya ceva paṭipanno hoti parahitāya ca?
an4.99:5.2	Idha, bhikkhave, ekacco puggalo attanā ca pāṇātipātā paṭivirato hoti, parañca pāṇātipātā veramaṇiyā samādapeti …pe… attanā ca surāmerayamajjapamādaṭṭhānā paṭivirato hoti, parañca surāmerayamajjapamādaṭṭhānā veramaṇiyā samādapeti.
an4.99:5.3	Evaṁ kho, bhikkhave, puggalo attahitāya ceva paṭipanno hoti parahitāya ca.
an4.99:5.4	Ime kho, bhikkhave, cattāro puggalā santo saṁvijjamānā lokasmin”ti.
an4.99:5.5	Navamaṁ.
an4.100:0.1	Aṅguttara Nikāya 4.100
an4.100:0.2	10. Asuravagga
an4.100:0.3	Potaliyasutta
an4.100:1.1	Atha kho potaliyo paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
an4.100:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinnaṁ kho potaliyaṁ paribbājakaṁ bhagavā etadavoca:
an4.100:2.1	“Cattārome, potaliya, puggalā santo saṁvijjamānā lokasmiṁ.
an4.100:2.2	Katame cattāro?
an4.100:2.3	Idha, potaliya, ekacco puggalo avaṇṇārahassa avaṇṇaṁ bhāsitā hoti bhūtaṁ tacchaṁ kālena, no ca kho vaṇṇārahassa vaṇṇaṁ bhāsitā hoti bhūtaṁ tacchaṁ kālena.
an4.100:2.4	Idha pana, potaliya, ekacco puggalo vaṇṇārahassa vaṇṇaṁ bhāsitā hoti bhūtaṁ tacchaṁ kālena, no ca kho avaṇṇārahassa avaṇṇaṁ bhāsitā hoti bhūtaṁ tacchaṁ kālena.
an4.100:2.5	Idha pana, potaliya, ekacco puggalo neva avaṇṇārahassa avaṇṇaṁ bhāsitā hoti bhūtaṁ tacchaṁ kālena, no ca vaṇṇārahassa vaṇṇaṁ bhāsitā hoti bhūtaṁ tacchaṁ kālena.
an4.100:2.6	Idha pana, potaliya, ekacco puggalo avaṇṇārahassa ca avaṇṇaṁ bhāsitā hoti bhūtaṁ tacchaṁ kālena, vaṇṇārahassa ca vaṇṇaṁ bhāsitā hoti bhūtaṁ tacchaṁ kālena.
an4.100:2.7	Ime kho, potaliya, cattāro puggalā santo saṁvijjamānā lokasmiṁ.
an4.100:2.8	Imesaṁ kho, potaliya, catunnaṁ puggalānaṁ katamo te puggalo khamati abhikkantataro ca paṇītataro cā”ti?
an4.100:3.1	“Cattārome, bho gotama, puggalā santo saṁvijjamānā lokasmiṁ.
an4.100:3.2	Katame cattāro?
an4.100:3.3	Idha, bho gotama, ekacco puggalo avaṇṇārahassa avaṇṇaṁ bhāsitā hoti bhūtaṁ tacchaṁ kālena, no ca kho vaṇṇārahassa vaṇṇaṁ bhāsitā hoti bhūtaṁ tacchaṁ kālena.
an4.100:3.4	Idha pana, bho gotama, ekacco puggalo vaṇṇārahassa vaṇṇaṁ bhāsitā hoti bhūtaṁ tacchaṁ kālena, no ca kho avaṇṇārahassa avaṇṇaṁ bhāsitā hoti bhūtaṁ tacchaṁ kālena.
an4.100:3.5	Idha pana, bho gotama, ekacco puggalo neva avaṇṇārahassa avaṇṇaṁ bhāsitā hoti bhūtaṁ tacchaṁ kālena, no ca vaṇṇārahassa vaṇṇaṁ bhāsitā hoti bhūtaṁ tacchaṁ kālena.
an4.100:3.6	Idha pana, bho gotama, ekacco puggalo avaṇṇārahassa ca avaṇṇaṁ bhāsitā hoti bhūtaṁ tacchaṁ kālena, vaṇṇārahassa ca vaṇṇaṁ bhāsitā hoti bhūtaṁ tacchaṁ kālena.
an4.100:3.7	Ime kho, bho gotama, cattāro puggalā santo saṁvijjamānā lokasmiṁ.
an4.100:3.8	Imesaṁ, bho gotama, catunnaṁ puggalānaṁ yvāyaṁ puggalo neva avaṇṇārahassa avaṇṇaṁ bhāsitā hoti bhūtaṁ tacchaṁ kālena, no ca vaṇṇārahassa vaṇṇaṁ bhāsitā hoti bhūtaṁ tacchaṁ kālena;
an4.100:3.9	ayaṁ me puggalo khamati imesaṁ catunnaṁ puggalānaṁ abhikkantataro ca paṇītataro ca.
an4.100:3.10	Taṁ kissa hetu?
an4.100:3.11	Abhikkantā hesā, bho gotama, yadidaṁ upekkhā”ti.
an4.100:4.1	“Cattārome, potaliya, puggalā santo saṁvijjamānā lokasmiṁ.
an4.100:4.2	Katame cattāro …pe… ime kho, potaliya, cattāro puggalā santo saṁvijjamānā lokasmiṁ.
an4.100:4.3	Imesaṁ kho, potaliya, catunnaṁ puggalānaṁ yvāyaṁ puggalo avaṇṇārahassa ca avaṇṇaṁ bhāsitā hoti bhūtaṁ tacchaṁ kālena, vaṇṇārahassa ca vaṇṇaṁ bhāsitā hoti bhūtaṁ tacchaṁ kālena;
an4.100:4.4	ayaṁ imesaṁ catunnaṁ puggalānaṁ abhikkantataro ca paṇītataro ca.
an4.100:4.5	Taṁ kissa hetu?
an4.100:4.6	Abhikkantā hesā, potaliya, yadidaṁ tattha tattha kālaññutā”ti.
an4.100:5.1	“Cattārome, bho gotama, puggalā santo saṁvijjamānā lokasmiṁ.
an4.100:5.2	Katame cattāro …pe… ime kho, bho gotama, cattāro puggalā santo saṁvijjamānā lokasmiṁ.
an4.100:5.3	Imesaṁ, bho gotama, catunnaṁ puggalānaṁ yvāyaṁ puggalo avaṇṇārahassa ca avaṇṇaṁ bhāsitā bhūtaṁ tacchaṁ kālena, vaṇṇārahassa ca vaṇṇaṁ bhāsitā bhūtaṁ tacchaṁ kālena;
an4.100:5.4	ayaṁ me puggalo khamati imesaṁ catunnaṁ puggalānaṁ abhikkantataro ca paṇītataro ca.
an4.100:5.5	Taṁ kissa hetu?
an4.100:5.6	Abhikkantā hesā, bho gotama, yadidaṁ tattha tattha kālaññutā.
an4.100:6.1	Abhikkantaṁ, bho gotama, abhikkantaṁ, bho gotama.
an4.100:6.2	Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.
an4.100:6.3	Esāhaṁ bhavantaṁ gotamaṁ saraṇaṁ gacchāmi dhammañca bhikkhusaṅghañca.
an4.100:6.4	Upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an4.100:6.5	Dasamaṁ.
an4.100:6.6	Asuravaggo pañcamo.
an4.100:7.0	Tassuddānaṁ
an4.100:7.1	Asuro tayo samādhī,
an4.100:7.2	chavālātena pañcamaṁ;
an4.100:7.3	Rāgo nisanti attahitaṁ,
an4.100:7.4	sikkhā potaliyena cāti.
an4.100:7.5	Dutiyo paṇṇāsako samatto.
an4.101:0.1	Aṅguttara Nikāya 4.101
an4.101:0.2	11. Valāhakavagga
an4.101:0.3	Paṭhamavalāhakasutta
an4.101:1.1	Evaṁ me sutaṁ—
an4.101:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an4.101:1.3	Tatra kho bhagavā bhikkhū āmantesi:
an4.101:1.4	“bhikkhavo”ti.
an4.101:1.5	“Bhadante”ti te bhikkhū bhagavato paccassosuṁ.
an4.101:1.6	Bhagavā etadavoca:
an4.101:2.1	“Cattārome, bhikkhave, valāhakā.
an4.101:2.2	Katame cattāro?
an4.101:2.3	Gajjitā no vassitā,
an4.101:2.4	vassitā no gajjitā,
an4.101:2.5	neva gajjitā no vassitā,
an4.101:2.6	gajjitā ca vassitā ca.
an4.101:2.7	Ime kho, bhikkhave, cattāro valāhakā.
an4.101:2.8	Evamevaṁ kho, bhikkhave, cattāro valāhakūpamā puggalā santo saṁvijjamānā lokasmiṁ.
an4.101:2.9	Katame cattāro?
an4.101:2.10	Gajjitā no vassitā,
an4.101:2.11	vassitā no gajjitā,
an4.101:2.12	neva gajjitā no vassitā,
an4.101:2.13	gajjitā ca vassitā ca.
an4.101:3.1	Kathañca, bhikkhave, puggalo gajjitā hoti no vassitā?
an4.101:3.2	Idha, bhikkhave, ekacco puggalo bhāsitā hoti, no kattā.
an4.101:3.3	Evaṁ kho, bhikkhave, puggalo gajjitā hoti, no vassitā.
an4.101:3.4	Seyyathāpi so, bhikkhave, valāhako gajjitā, no vassitā;
an4.101:3.5	tathūpamāhaṁ, bhikkhave, imaṁ puggalaṁ vadāmi.
an4.101:4.1	Kathañca, bhikkhave, puggalo vassitā hoti, no gajjitā?
an4.101:4.2	Idha, bhikkhave, ekacco puggalo kattā hoti, no bhāsitā.
an4.101:4.3	Evaṁ kho, bhikkhave, puggalo vassitā hoti, no gajjitā.
an4.101:4.4	Seyyathāpi so, bhikkhave, valāhako vassitā, no gajjitā;
an4.101:4.5	tathūpamāhaṁ, bhikkhave, imaṁ puggalaṁ vadāmi.
an4.101:5.1	Kathañca, bhikkhave, puggalo neva gajjitā hoti, no vassitā?
an4.101:5.2	Idha, bhikkhave, ekacco puggalo neva bhāsitā hoti, no kattā.
an4.101:5.3	Evaṁ kho, bhikkhave, puggalo neva gajjitā hoti, no vassitā.
an4.101:5.4	Seyyathāpi so, bhikkhave, valāhako neva gajjitā, no vassitā;
an4.101:5.5	tathūpamāhaṁ, bhikkhave, imaṁ puggalaṁ vadāmi.
an4.101:6.1	Kathañca, bhikkhave, puggalo gajjitā ca hoti vassitā ca?
an4.101:6.2	Idha, bhikkhave, ekacco puggalo bhāsitā ca hoti kattā ca.
an4.101:6.3	Evaṁ kho, bhikkhave, puggalo gajjitā ca hoti vassitā ca.
an4.101:6.4	Seyyathāpi so, bhikkhave, valāhako gajjitā ca vassitā ca;
an4.101:6.5	tathūpamāhaṁ, bhikkhave, imaṁ puggalaṁ vadāmi.
an4.101:6.6	Ime kho, bhikkhave, cattāro valāhakūpamā puggalā santo saṁvijjamānā lokasmin”ti.
an4.101:6.7	Paṭhamaṁ.
an4.102:0.1	Aṅguttara Nikāya 4.102
an4.102:0.2	11. Valāhakavagga
an4.102:0.3	Dutiyavalāhakasutta
an4.102:1.1	“Cattārome, bhikkhave, valāhakā.
an4.102:1.2	Katame cattāro?
an4.102:1.3	Gajjitā no vassitā,
an4.102:1.4	vassitā no gajjitā,
an4.102:1.5	neva gajjitā no vassitā,
an4.102:1.6	gajjitā ca vassitā ca.
an4.102:1.7	Ime kho, bhikkhave, cattāro valāhakā.
an4.102:1.8	Evamevaṁ kho, bhikkhave, cattāro valāhakūpamā puggalā santo saṁvijjamānā lokasmiṁ.
an4.102:1.9	Katame cattāro?
an4.102:1.10	Gajjitā no vassitā,
an4.102:1.11	vassitā no gajjitā,
an4.102:1.12	neva gajjitā no vassitā,
an4.102:1.13	gajjitā ca vassitā ca.
an4.102:2.1	Kathañca, bhikkhave, puggalo gajjitā hoti, no vassitā?
an4.102:2.2	Idha, bhikkhave, ekacco puggalo dhammaṁ pariyāpuṇāti—
an4.102:2.3	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.102:2.4	So ‘idaṁ dukkhan’ti yathābhūtaṁ nappajānāti, ‘ayaṁ dukkhasamudayo’ti yathābhūtaṁ nappajānāti, ‘ayaṁ dukkhanirodho’ti yathābhūtaṁ nappajānāti, ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.102:2.5	Evaṁ kho, bhikkhave, puggalo gajjitā hoti, no vassitā.
an4.102:2.6	Seyyathāpi so, bhikkhave, valāhako gajjitā, no vassitā;
an4.102:2.7	tathūpamāhaṁ, bhikkhave, imaṁ puggalaṁ vadāmi.
an4.102:3.1	Kathañca, bhikkhave, puggalo vassitā hoti, no gajjitā?
an4.102:3.2	Idha, bhikkhave, ekacco puggalo dhammaṁ na pariyāpuṇāti—
an4.102:3.3	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.102:3.4	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.102:3.5	Evaṁ kho, bhikkhave, puggalo vassitā hoti, no gajjitā.
an4.102:3.6	Seyyathāpi so, bhikkhave, valāhako vassitā, no gajjitā;
an4.102:3.7	tathūpamāhaṁ, bhikkhave, imaṁ puggalaṁ vadāmi.
an4.102:4.1	Kathañca, bhikkhave, puggalo neva gajjitā hoti, no vassitā?
an4.102:4.2	Idha, bhikkhave, ekacco puggalo neva dhammaṁ pariyāpuṇāti—
an4.102:4.3	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.102:4.4	So ‘idaṁ dukkhan’ti yathābhūtaṁ nappajānāti …pe… ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.102:4.5	Evaṁ kho, bhikkhave, puggalo neva gajjitā hoti, no vassitā.
an4.102:4.6	Seyyathāpi so, bhikkhave, valāhako neva gajjitā, no vassitā;
an4.102:4.7	tathūpamāhaṁ, bhikkhave, imaṁ puggalaṁ vadāmi.
an4.102:5.1	Kathañca, bhikkhave, puggalo gajjitā ca hoti vassitā ca?
an4.102:5.2	Idha, bhikkhave, ekacco puggalo dhammaṁ pariyāpuṇāti—
an4.102:5.3	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.102:5.4	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.102:5.5	Evaṁ kho, bhikkhave, puggalo gajjitā ca hoti vassitā ca.
an4.102:5.6	Seyyathāpi so, bhikkhave, valāhako gajjitā ca vassitā ca;
an4.102:5.7	tathūpamāhaṁ, bhikkhave, imaṁ puggalaṁ vadāmi.
an4.102:5.8	Ime kho, bhikkhave, cattāro valāhakūpamā puggalā santo saṁvijjamānā lokasmin”ti.
an4.102:5.9	Dutiyaṁ.
an4.103:0.1	Aṅguttara Nikāya 4.103
an4.103:0.2	11. Valāhakavagga
an4.103:0.3	Kumbhasutta
an4.103:1.1	“Cattārome, bhikkhave, kumbhā.
an4.103:1.2	Katame cattāro?
an4.103:1.3	Tuccho pihito,
an4.103:1.4	pūro vivaṭo,
an4.103:1.5	tuccho vivaṭo,
an4.103:1.6	pūro pihito—
an4.103:1.7	Ime kho, bhikkhave, cattāro kumbhā.
an4.103:1.8	Evamevaṁ kho, bhikkhave, cattāro kumbhūpamā puggalā santo saṁvijjamānā lokasmiṁ.
an4.103:1.9	Katame cattāro?
an4.103:1.10	Tuccho pihito,
an4.103:1.11	pūro vivaṭo,
an4.103:1.12	tuccho vivaṭo,
an4.103:1.13	pūro pihito.
an4.103:2.1	Kathañca, bhikkhave, puggalo tuccho hoti pihito?
an4.103:2.2	Idha, bhikkhave, ekaccassa puggalassa pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.103:2.3	So ‘idaṁ dukkhan’ti yathābhūtaṁ nappajānāti …pe… ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.103:2.4	Evaṁ kho, bhikkhave, puggalo tuccho hoti pihito.
an4.103:2.5	Seyyathāpi so, bhikkhave, kumbho tuccho pihito;
an4.103:2.6	tathūpamāhaṁ, bhikkhave, imaṁ puggalaṁ vadāmi.
an4.103:3.1	Kathañca, bhikkhave, puggalo pūro hoti vivaṭo?
an4.103:3.2	Idha, bhikkhave, ekaccassa puggalassa na pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.103:3.3	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.103:3.4	Evaṁ kho, bhikkhave, puggalo pūro hoti vivaṭo.
an4.103:3.5	Seyyathāpi so, bhikkhave, kumbho pūro vivaṭo;
an4.103:3.6	tathūpamāhaṁ, bhikkhave, imaṁ puggalaṁ vadāmi.
an4.103:4.1	Kathañca, bhikkhave, puggalo tuccho hoti vivaṭo?
an4.103:4.2	Idha, bhikkhave, ekaccassa puggalassa na pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.103:4.3	So ‘idaṁ dukkhan’ti yathābhūtaṁ nappajānāti …pe… ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.103:4.4	Evaṁ kho, bhikkhave, puggalo tuccho hoti vivaṭo.
an4.103:4.5	Seyyathāpi so, bhikkhave, kumbho tuccho vivaṭo;
an4.103:4.6	tathūpamāhaṁ, bhikkhave, imaṁ puggalaṁ vadāmi.
an4.103:5.1	Kathañca, bhikkhave, puggalo pūro hoti pihito?
an4.103:5.2	Idha, bhikkhave, ekaccassa puggalassa pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.103:5.3	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.103:5.4	Evaṁ kho, bhikkhave, puggalo pūro hoti pihito.
an4.103:5.5	Seyyathāpi so, bhikkhave, kumbho pūro pihito;
an4.103:5.6	tathūpamāhaṁ, bhikkhave, imaṁ puggalaṁ vadāmi.
an4.103:5.7	Ime kho, bhikkhave, cattāro kumbhūpamā puggalā santo saṁvijjamānā lokasmin”ti.
an4.103:5.8	Tatiyaṁ.
an4.104:0.1	Aṅguttara Nikāya 4.104
an4.104:0.2	11. Valāhakavagga
an4.104:0.3	Udakarahadasutta
an4.104:1.1	“Cattārome, bhikkhave, udakarahadā.
an4.104:1.2	Katame cattāro?
an4.104:1.3	Uttāno gambhīrobhāso,
an4.104:1.4	gambhīro uttānobhāso,
an4.104:1.5	uttāno uttānobhāso,
an4.104:1.6	gambhīro gambhīrobhāso—
an4.104:1.7	Ime kho, bhikkhave, cattāro udakarahadā.
an4.104:1.8	Evamevaṁ kho, bhikkhave, cattāro udakarahadūpamā puggalā santo saṁvijjamānā lokasmiṁ.
an4.104:1.9	Katame cattāro?
an4.104:1.10	Uttāno gambhīrobhāso,
an4.104:1.11	gambhīro uttānobhāso,
an4.104:1.12	uttāno uttānobhāso,
an4.104:1.13	gambhīro gambhīrobhāso.
an4.104:2.1	Kathañca, bhikkhave, puggalo uttāno hoti gambhīrobhāso?
an4.104:2.2	Idha, bhikkhave, ekaccassa puggalassa pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.104:2.3	So ‘idaṁ dukkhan’ti yathābhūtaṁ nappajānāti …pe… ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.104:2.4	Evaṁ kho, bhikkhave, puggalo uttāno hoti gambhīrobhāso.
an4.104:2.5	Seyyathāpi so, bhikkhave, udakarahado uttāno gambhīrobhāso;
an4.104:2.6	tathūpamāhaṁ, bhikkhave, imaṁ puggalaṁ vadāmi.
an4.104:3.1	Kathañca, bhikkhave, puggalo gambhīro hoti uttānobhāso?
an4.104:3.2	Idha, bhikkhave, ekaccassa puggalassa na pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.104:3.3	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.104:3.4	Evaṁ kho, bhikkhave, puggalo gambhīro hoti uttānobhāso.
an4.104:3.5	Seyyathāpi so, bhikkhave, udakarahado gambhīro uttānobhāso;
an4.104:3.6	tathūpamāhaṁ, bhikkhave, imaṁ puggalaṁ vadāmi.
an4.104:4.1	Kathañca, bhikkhave, puggalo uttāno hoti uttānobhāso?
an4.104:4.2	Idha, bhikkhave, ekaccassa puggalassa na pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.104:4.3	So ‘idaṁ dukkhan’ti yathābhūtaṁ nappajānāti …pe… ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.104:4.4	Evaṁ kho, bhikkhave, puggalo uttāno hoti uttānobhāso.
an4.104:4.5	Seyyathāpi so, bhikkhave, udakarahado uttāno uttānobhāso;
an4.104:4.6	tathūpamāhaṁ, bhikkhave, imaṁ puggalaṁ vadāmi.
an4.104:5.1	Kathañca, bhikkhave, puggalo gambhīro hoti gambhīrobhāso?
an4.104:5.2	Idha, bhikkhave, ekaccassa puggalassa pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.104:5.3	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.104:5.4	Evaṁ kho, bhikkhave, puggalo gambhīro hoti gambhīrobhāso.
an4.104:5.5	Seyyathāpi so, bhikkhave, udakarahado gambhīro gambhīrobhāso;
an4.104:5.6	tathūpamāhaṁ, bhikkhave, imaṁ puggalaṁ vadāmi.
an4.104:5.7	Ime kho, bhikkhave, cattāro udakarahadūpamā puggalā santo saṁvijjamānā lokasmin”ti.
an4.104:5.8	Catutthaṁ.
an4.105:0.1	Aṅguttara Nikāya 4.105
an4.105:0.2	11. Valāhakavagga
an4.105:0.3	Ambasutta
an4.105:1.1	“Cattārimāni, bhikkhave, ambāni.
an4.105:1.2	Katamāni cattāri?
an4.105:1.3	Āmaṁ pakkavaṇṇi,
an4.105:1.4	pakkaṁ āmavaṇṇi,
an4.105:1.5	āmaṁ āmavaṇṇi,
an4.105:1.6	pakkaṁ pakkavaṇṇi—
an4.105:1.7	Imāni kho, bhikkhave, cattāri ambāni.
an4.105:1.8	Evamevaṁ kho, bhikkhave, cattāro ambūpamā puggalā santo saṁvijjamānā lokasmiṁ.
an4.105:1.9	Katame cattāro?
an4.105:1.10	Āmo pakkavaṇṇī,
an4.105:1.11	pakko āmavaṇṇī,
an4.105:1.12	āmo āmavaṇṇī,
an4.105:1.13	pakko pakkavaṇṇī.
an4.105:2.1	Kathañca, bhikkhave, puggalo āmo hoti pakkavaṇṇī?
an4.105:2.2	Idha, bhikkhave, ekaccassa puggalassa pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.105:2.3	So ‘idaṁ dukkhan’ti yathābhūtaṁ nappajānāti …pe… ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.105:2.4	Evaṁ kho, bhikkhave, puggalo āmo hoti pakkavaṇṇī.
an4.105:2.5	Seyyathāpi taṁ, bhikkhave, ambaṁ āmaṁ pakkavaṇṇi;
an4.105:2.6	tathūpamāhaṁ, bhikkhave, imaṁ puggalaṁ vadāmi.
an4.105:3.1	Kathañca, bhikkhave, puggalo pakko hoti āmavaṇṇī?
an4.105:3.2	Idha, bhikkhave, ekaccassa puggalassa na pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.105:3.3	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.105:3.4	Evaṁ kho, bhikkhave, puggalo pakko hoti āmavaṇṇī.
an4.105:3.5	Seyyathāpi taṁ, bhikkhave, ambaṁ pakkaṁ āmavaṇṇi;
an4.105:3.6	tathūpamāhaṁ, bhikkhave, imaṁ puggalaṁ vadāmi.
an4.105:4.1	Kathañca, bhikkhave, puggalo āmo hoti āmavaṇṇī?
an4.105:4.2	Idha, bhikkhave, ekaccassa puggalassa na pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.105:4.3	So ‘idaṁ dukkhan’ti yathābhūtaṁ nappajānāti …pe… ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.105:4.4	Evaṁ kho, bhikkhave, puggalo āmo hoti āmavaṇṇī.
an4.105:4.5	Seyyathāpi taṁ, bhikkhave, ambaṁ āmaṁ āmavaṇṇi;
an4.105:4.6	tathūpamāhaṁ, bhikkhave, imaṁ puggalaṁ vadāmi.
an4.105:5.1	Kathañca, bhikkhave, puggalo pakko hoti pakkavaṇṇī?
an4.105:5.2	Idha, bhikkhave, ekaccassa puggalassa pāsādikaṁ hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ.
an4.105:5.3	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.105:5.4	Evaṁ kho, bhikkhave, puggalo pakko hoti pakkavaṇṇī.
an4.105:5.5	Seyyathāpi taṁ, bhikkhave, ambaṁ pakkaṁ pakkavaṇṇi;
an4.105:5.6	tathūpamāhaṁ, bhikkhave, imaṁ puggalaṁ vadāmi.
an4.105:5.7	Ime kho, bhikkhave, cattāro ambūpamā puggalā santo saṁvijjamānā lokasmin”ti.
an4.105:5.8	Pañcamaṁ.
an4.106:0.1	Aṅguttara Nikāya 4.106
an4.106:0.2	11. Valāhakavagga
an4.106:0.3	[Dutiyaambasutta]
an4.106:1.1	()
an4.107:0.1	Aṅguttara Nikāya 4.107
an4.107:0.2	11. Valāhakavagga
an4.107:0.3	Mūsikasutta
an4.107:1.1	“Catasso imā, bhikkhave, mūsikā.
an4.107:1.2	Katamā catasso?
an4.107:1.3	Gādhaṁ kattā no vasitā,
an4.107:1.4	vasitā no gādhaṁ kattā,
an4.107:1.5	neva gādhaṁ kattā no vasitā,
an4.107:1.6	gādhaṁ kattā ca vasitā ca—
an4.107:1.7	imā kho, bhikkhave, catasso mūsikā.
an4.107:1.8	Evamevaṁ kho, bhikkhave, cattāro mūsikūpamā puggalā santo saṁvijjamānā lokasmiṁ.
an4.107:1.9	Katame cattāro?
an4.107:1.10	Gādhaṁ kattā no vasitā,
an4.107:1.11	vasitā no gādhaṁ kattā,
an4.107:1.12	neva gādhaṁ kattā no vasitā,
an4.107:1.13	gādhaṁ kattā ca vasitā ca.
an4.107:2.1	Kathañca, bhikkhave, puggalo gādhaṁ kattā hoti no vasitā?
an4.107:2.2	Idha, bhikkhave, ekacco puggalo dhammaṁ pariyāpuṇāti—
an4.107:2.3	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.107:2.4	So ‘idaṁ dukkhan’ti yathābhūtaṁ nappajānāti …pe… ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.107:2.5	Evaṁ kho, bhikkhave, puggalo gādhaṁ kattā hoti, no vasitā.
an4.107:2.6	Seyyathāpi sā, bhikkhave, mūsikā gādhaṁ kattā, no vasitā;
an4.107:2.7	tathūpamāhaṁ, bhikkhave, imaṁ puggalaṁ vadāmi.
an4.107:3.1	Kathañca, bhikkhave, puggalo vasitā hoti, no gādhaṁ kattā?
an4.107:3.2	Idha, bhikkhave, ekacco puggalo dhammaṁ na pariyāpuṇāti—
an4.107:3.3	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.107:3.4	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.107:3.5	Evaṁ kho, bhikkhave, puggalo vasitā hoti, no gādhaṁ kattā.
an4.107:3.6	Seyyathāpi sā, bhikkhave, mūsikā vasitā hoti, no gādhaṁ kattā;
an4.107:3.7	tathūpamāhaṁ, bhikkhave, imaṁ, puggalaṁ vadāmi.
an4.107:4.1	Kathañca, bhikkhave, puggalo neva gādhaṁ kattā hoti no vasitā?
an4.107:4.2	Idha, bhikkhave, ekacco puggalo dhammaṁ na pariyāpuṇāti—
an4.107:4.3	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.107:4.4	So ‘idaṁ dukkhan’ti yathābhūtaṁ nappajānāti …pe… ‘ayaṁ dukkhanirodhagāminī paṭipadā’ti yathābhūtaṁ nappajānāti.
an4.107:4.5	Evaṁ kho, bhikkhave, puggalo neva gādhaṁ kattā hoti, no vasitā.
an4.107:4.6	Seyyathāpi sā, bhikkhave, mūsikā neva gādhaṁ kattā hoti, no vasitā;
an4.107:4.7	tathūpamāhaṁ, bhikkhave, imaṁ puggalaṁ vadāmi.
an4.107:5.1	Kathañca, bhikkhave, puggalo gādhaṁ kattā ca hoti vasitā ca?
an4.107:5.2	Idha, bhikkhave, ekacco puggalo dhammaṁ pariyāpuṇāti—
an4.107:5.3	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.107:5.4	So ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.107:5.5	Evaṁ kho, bhikkhave, puggalo gādhaṁ kattā ca hoti vasitā ca.
an4.107:5.6	Seyyathāpi sā, bhikkhave, mūsikā gādhaṁ kattā ca hoti vasitā ca;
an4.107:5.7	tathūpamāhaṁ, bhikkhave, imaṁ puggalaṁ vadāmi.
an4.107:5.8	Ime kho, bhikkhave, cattāro mūsikūpamā puggalā santo saṁvijjamānā lokasmin”ti.
an4.107:5.9	Sattamaṁ.
an4.108:0.1	Aṅguttara Nikāya 4.108
an4.108:0.2	11. Valāhakavagga
an4.108:0.3	Balībaddasutta
an4.108:1.1	“Cattārome, bhikkhave, balībaddā.
an4.108:1.2	Katame cattāro?
an4.108:1.3	Sagavacaṇḍo no paragavacaṇḍo,
an4.108:1.4	paragavacaṇḍo no sagavacaṇḍo,
an4.108:1.5	sagavacaṇḍo ca paragavacaṇḍo ca,
an4.108:1.6	neva sagavacaṇḍo no paragavacaṇḍo—
an4.108:1.7	Ime kho, bhikkhave, cattāro balībaddā.
an4.108:1.8	Evamevaṁ kho, bhikkhave, cattāro balībaddūpamā puggalā santo saṁvijjamānā lokasmiṁ.
an4.108:1.9	Katame cattāro?
an4.108:1.10	Sagavacaṇḍo no paragavacaṇḍo,
an4.108:1.11	paragavacaṇḍo no sagavacaṇḍo,
an4.108:1.12	sagavacaṇḍo ca paragavacaṇḍo ca,
an4.108:1.13	neva sagavacaṇḍo no paragavacaṇḍo.
an4.108:2.1	Kathañca, bhikkhave, puggalo sagavacaṇḍo hoti, no paragavacaṇḍo?
an4.108:2.2	Idha, bhikkhave, ekacco puggalo sakaparisaṁ ubbejetā hoti, no paraparisaṁ.
an4.108:2.3	Evaṁ kho, bhikkhave, puggalo sagavacaṇḍo hoti, no paragavacaṇḍo.
an4.108:2.4	Seyyathāpi so, bhikkhave, balībaddo sagavacaṇḍo, no paragavacaṇḍo;
an4.108:2.5	tathūpamāhaṁ, bhikkhave, imaṁ puggalaṁ vadāmi.
an4.108:3.1	Kathañca, bhikkhave, puggalo paragavacaṇḍo hoti, no sagavacaṇḍo?
an4.108:3.2	Idha, bhikkhave, ekacco puggalo paraparisaṁ ubbejetā hoti, no sakaparisaṁ.
an4.108:3.3	Evaṁ kho, bhikkhave, puggalo paragavacaṇḍo hoti, no sagavacaṇḍo.
an4.108:3.4	Seyyathāpi so, bhikkhave, balībaddo paragavacaṇḍo, no sagavacaṇḍo;
an4.108:3.5	tathūpamāhaṁ, bhikkhave, imaṁ puggalaṁ vadāmi.
an4.108:4.1	Kathañca, bhikkhave, puggalo sagavacaṇḍo ca hoti paragavacaṇḍo ca?
an4.108:4.2	Idha, bhikkhave, ekacco puggalo sakaparisaṁ ubbejetā hoti paraparisañca.
an4.108:4.3	Evaṁ kho, bhikkhave, puggalo sagavacaṇḍo ca hoti paragavacaṇḍo ca.
an4.108:4.4	Seyyathāpi so, bhikkhave, balībaddo sagavacaṇḍo ca paragavacaṇḍo ca;
an4.108:4.5	tathūpamāhaṁ, bhikkhave, imaṁ puggalaṁ vadāmi.
an4.108:5.1	Kathañca, bhikkhave, puggalo neva sagavacaṇḍo hoti no paragavacaṇḍo?
an4.108:5.2	Idha, bhikkhave, ekacco puggalo neva sakaparisaṁ ubbejetā hoti, no paraparisañca.
an4.108:5.3	Evaṁ kho, bhikkhave, puggalo neva sagavacaṇḍo hoti, no paragavacaṇḍo.
an4.108:5.4	Seyyathāpi so, bhikkhave, balībaddo neva sagavacaṇḍo, no paragavacaṇḍo;
an4.108:5.5	tathūpamāhaṁ, bhikkhave, imaṁ puggalaṁ vadāmi.
an4.108:5.6	Ime kho, bhikkhave, cattāro balībaddūpamā puggalā santo saṁvijjamānā lokasmin”ti.
an4.108:5.7	Aṭṭhamaṁ.
an4.109:0.1	Aṅguttara Nikāya 4.109
an4.109:0.2	11. Valāhakavagga
an4.109:0.3	Rukkhasutta
an4.109:1.1	“Cattārome, bhikkhave, rukkhā.
an4.109:1.2	Katame cattāro?
an4.109:1.3	Pheggu phegguparivāro,
an4.109:1.4	pheggu sāraparivāro,
an4.109:1.5	sāro phegguparivāro,
an4.109:1.6	sāro sāraparivāro—
an4.109:1.7	Ime kho, bhikkhave, cattāro rukkhā.
an4.109:1.8	Evamevaṁ kho, bhikkhave, cattāro rukkhūpamā puggalā santo saṁvijjamānā lokasmiṁ.
an4.109:1.9	Katame cattāro?
an4.109:1.10	Pheggu phegguparivāro,
an4.109:1.11	pheggu sāraparivāro,
an4.109:1.12	sāro phegguparivāro,
an4.109:1.13	sāro sāraparivāro.
an4.109:2.1	Kathañca, bhikkhave, puggalo pheggu hoti phegguparivāro?
an4.109:2.2	Idha, bhikkhave, ekacco puggalo dussīlo hoti pāpadhammo;
an4.109:2.3	parisāpissa hoti dussīlā pāpadhammā.
an4.109:2.4	Evaṁ kho, bhikkhave, puggalo pheggu hoti phegguparivāro.
an4.109:2.5	Seyyathāpi so, bhikkhave, rukkho pheggu phegguparivāro;
an4.109:2.6	tathūpamāhaṁ, bhikkhave, imaṁ puggalaṁ vadāmi.
an4.109:3.1	Kathañca, bhikkhave, puggalo pheggu hoti sāraparivāro?
an4.109:3.2	Idha, bhikkhave, ekacco puggalo dussīlo hoti pāpadhammo;
an4.109:3.3	parisā ca khvassa hoti sīlavatī kalyāṇadhammā.
an4.109:3.4	Evaṁ kho, bhikkhave, puggalo pheggu hoti sāraparivāro.
an4.109:3.5	Seyyathāpi so, bhikkhave, rukkho pheggu sāraparivāro;
an4.109:3.6	tathūpamāhaṁ, bhikkhave, imaṁ puggalaṁ vadāmi.
an4.109:4.1	Kathañca, bhikkhave, puggalo sāro hoti phegguparivāro?
an4.109:4.2	Idha, bhikkhave, ekacco puggalo sīlavā hoti kalyāṇadhammo;
an4.109:4.3	parisā ca khvassa hoti dussīlā pāpadhammā.
an4.109:4.4	Evaṁ kho, bhikkhave, puggalo sāro hoti phegguparivāro.
an4.109:4.5	Seyyathāpi so, bhikkhave, rukkho sāro phegguparivāro;
an4.109:4.6	tathūpamāhaṁ, bhikkhave, imaṁ puggalaṁ vadāmi.
an4.109:5.1	Kathañca, bhikkhave, puggalo sāro hoti sāraparivāro?
an4.109:5.2	Idha, bhikkhave, ekacco puggalo sīlavā hoti kalyāṇadhammo;
an4.109:5.3	parisāpissa hoti sīlavatī kalyāṇadhammā.
an4.109:5.4	Evaṁ kho, bhikkhave, puggalo sāro hoti sāraparivāro.
an4.109:5.5	Seyyathāpi so, bhikkhave, rukkho sāro sāraparivāro;
an4.109:5.6	tathūpamāhaṁ, bhikkhave, imaṁ puggalaṁ vadāmi.
an4.109:5.7	Ime kho, bhikkhave, cattāro rukkhūpamā puggalā santo saṁvijjamānā lokasmin”ti.
an4.109:5.8	Navamaṁ.
an4.110:0.1	Aṅguttara Nikāya 4.110
an4.110:0.2	11. Valāhakavagga
an4.110:0.3	Āsīvisasutta
an4.110:1.1	“Cattārome, bhikkhave, āsīvisā.
an4.110:1.2	Katame cattāro?
an4.110:1.3	Āgataviso na ghoraviso,
an4.110:1.4	ghoraviso na āgataviso,
an4.110:1.5	āgataviso ca ghoraviso ca,
an4.110:1.6	nevāgataviso na ghoraviso—
an4.110:1.7	Ime kho, bhikkhave, cattāro āsīvisā.
an4.110:1.8	Evamevaṁ kho, bhikkhave, cattāro āsīvisūpamā puggalā santo saṁvijjamānā lokasmiṁ.
an4.110:1.9	Katame cattāro?
an4.110:1.10	Āgataviso na ghoraviso,
an4.110:1.11	ghoraviso na āgataviso,
an4.110:1.12	āgataviso ca ghoraviso ca,
an4.110:1.13	nevāgataviso na ghoraviso.
an4.110:2.1	Kathañca, bhikkhave, puggalo āgataviso hoti, na ghoraviso?
an4.110:2.2	Idha, bhikkhave, ekacco puggalo abhiṇhaṁ kujjhati.
an4.110:2.3	So ca khvassa kodho na dīgharattaṁ anuseti.
an4.110:2.4	Evaṁ kho, bhikkhave, puggalo āgataviso hoti, na ghoraviso.
an4.110:2.5	Seyyathāpi so, bhikkhave, āsīviso āgataviso, na ghoraviso;
an4.110:2.6	tathūpamāhaṁ, bhikkhave, imaṁ puggalaṁ vadāmi.
an4.110:3.1	Kathañca, bhikkhave, puggalo ghoraviso hoti, na āgataviso?
an4.110:3.2	Idha, bhikkhave, ekacco puggalo na heva kho abhiṇhaṁ kujjhati.
an4.110:3.3	So ca khvassa kodho dīgharattaṁ anuseti.
an4.110:3.4	Evaṁ kho, bhikkhave, puggalo ghoraviso hoti, na āgataviso.
an4.110:3.5	Seyyathāpi so, bhikkhave, āsīviso ghoraviso, na āgataviso;
an4.110:3.6	tathūpamāhaṁ, bhikkhave, imaṁ puggalaṁ vadāmi.
an4.110:4.1	Kathañca, bhikkhave, puggalo āgataviso ca hoti ghoraviso ca?
an4.110:4.2	Idha, bhikkhave, ekacco puggalo abhiṇhaṁ kujjhati.
an4.110:4.3	So ca khvassa kodho dīgharattaṁ anuseti.
an4.110:4.4	Evaṁ kho, bhikkhave, puggalo āgataviso ca hoti ghoraviso ca.
an4.110:4.5	Seyyathāpi so, bhikkhave, āsīviso āgataviso ca ghoraviso ca;
an4.110:4.6	tathūpamāhaṁ, bhikkhave, imaṁ puggalaṁ vadāmi.
an4.110:5.1	Kathañca, bhikkhave, puggalo nevāgataviso hoti na ghoraviso?
an4.110:5.2	Idha, bhikkhave, ekacco puggalo na heva kho abhiṇhaṁ kujjhati.
an4.110:5.3	So ca khvassa kodho na dīgharattaṁ anuseti.
an4.110:5.4	Evaṁ kho, bhikkhave, puggalo nevāgataviso hoti, na ghoraviso.
an4.110:5.5	Seyyathāpi so, bhikkhave, āsīviso nevāgataviso na ghoraviso;
an4.110:5.6	tathūpamāhaṁ, bhikkhave, imaṁ puggalaṁ vadāmi.
an4.110:5.7	Ime kho, bhikkhave, cattāro āsīvisūpamā puggalā santo saṁvijjamānā lokasmin”ti.
an4.110:5.8	Dasamaṁ.
an4.110:5.9	Valāhakavaggo paṭhamo.
an4.110:6.0	Tassuddānaṁ
an4.110:6.1	Dve valāhā kumbha udaka,
an4.110:6.2	rahadā dve honti ambāni;
an4.110:6.3	Mūsikā balībaddā rukkhā,
an4.110:6.4	āsīvisena te dasāti.
an4.111:0.1	Aṅguttara Nikāya 4.111
an4.111:0.2	12. Kesivagga
an4.111:0.3	Kesisutta
an4.111:1.1	Atha kho kesi assadammasārathi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho kesiṁ assadammasārathiṁ bhagavā etadavoca:
an4.111:1.2	“tvaṁ khosi, kesi, paññāto assadammasārathīti.
an4.111:1.3	Kathaṁ pana tvaṁ, kesi, assadammaṁ vinesī”ti?
an4.111:1.4	“Ahaṁ kho, bhante, assadammaṁ saṇhenapi vinemi, pharusenapi vinemi, saṇhapharusenapi vinemī”ti.
an4.111:1.5	“Sace te, kesi, assadammo saṇhena vinayaṁ na upeti, pharusena vinayaṁ na upeti, saṇhapharusena vinayaṁ na upeti, kinti naṁ karosī”ti?
an4.111:1.6	“Sace me, bhante, assadammo saṇhena vinayaṁ na upeti, pharusena vinayaṁ na upeti, saṇhapharusena vinayaṁ na upeti;
an4.111:1.7	hanāmi naṁ, bhante.
an4.111:1.8	Taṁ kissa hetu?
an4.111:1.9	‘Mā me ācariyakulassa avaṇṇo ahosī’ti.
an4.111:2.1	Bhagavā pana, bhante, anuttaro purisadammasārathi.
an4.111:2.2	Kathaṁ pana, bhante, bhagavā purisadammaṁ vinetī”ti?
an4.111:2.3	“Ahaṁ kho, kesi, purisadammaṁ saṇhenapi vinemi, pharusenapi vinemi, saṇhapharusenapi vinemi.
an4.111:2.4	Tatridaṁ, kesi, saṇhasmiṁ—
an4.111:2.5	iti kāyasucaritaṁ iti kāyasucaritassa vipāko, iti vacīsucaritaṁ iti vacīsucaritassa vipāko, iti manosucaritaṁ iti manosucaritassa vipāko, iti devā, iti manussāti.
an4.111:2.6	Tatridaṁ, kesi, pharusasmiṁ—
an4.111:2.7	iti kāyaduccaritaṁ iti kāyaduccaritassa vipāko, iti vacīduccaritaṁ iti vacīduccaritassa vipāko, iti manoduccaritaṁ iti manoduccaritassa vipāko, iti nirayo, iti tiracchānayoni, iti pettivisayoti.
an4.111:3.1	Tatridaṁ, kesi, saṇhapharusasmiṁ—
an4.111:3.2	iti kāyasucaritaṁ iti kāyasucaritassa vipāko, iti kāyaduccaritaṁ iti kāyaduccaritassa vipāko, iti vacīsucaritaṁ iti vacīsucaritassa vipāko, iti vacīduccaritaṁ iti vacīduccaritassa vipāko, iti manosucaritaṁ iti manosucaritassa vipāko, iti manoduccaritaṁ iti manoduccaritassa vipāko, iti devā, iti manussā, iti nirayo, iti tiracchānayoni, iti pettivisayo”ti.
an4.111:4.1	“Sace te, bhante, purisadammo saṇhena vinayaṁ na upeti, pharusena vinayaṁ na upeti, saṇhapharusena vinayaṁ na upeti, kinti naṁ bhagavā karotī”ti?
an4.111:4.2	“Sace me, kesi, purisadammo saṇhena vinayaṁ na upeti, pharusena vinayaṁ na upeti, saṇhapharusena vinayaṁ na upeti, hanāmi naṁ, kesī”ti.
an4.111:4.3	“Na kho, bhante, bhagavato pāṇātipāto kappati.
an4.111:4.4	Atha ca pana bhagavā evamāha:
an4.111:4.5	‘hanāmi naṁ, kesī’”ti.
an4.111:4.6	“Saccaṁ, kesi.
an4.111:4.7	Na tathāgatassa pāṇātipāto kappati.
an4.111:4.8	Api ca yo purisadammo saṇhena vinayaṁ na upeti, pharusena vinayaṁ na upeti, saṇhapharusena vinayaṁ na upeti, na taṁ tathāgato vattabbaṁ anusāsitabbaṁ maññati, nāpi viññū sabrahmacārī vattabbaṁ anusāsitabbaṁ maññanti.
an4.111:4.9	Vadho heso, kesi, ariyassa vinaye—
an4.111:4.10	yaṁ na tathāgato vattabbaṁ anusāsitabbaṁ maññati, nāpi viññū sabrahmacārī vattabbaṁ anusāsitabbaṁ maññantī”ti.
an4.111:5.1	“So hi nūna, bhante, suhato hoti—
an4.111:5.2	yaṁ na tathāgato vattabbaṁ anusāsitabbaṁ maññati, nāpi viññū sabrahmacārī vattabbaṁ anusāsitabbaṁ maññantīti.
an4.111:5.3	Abhikkantaṁ, bhante, abhikkantaṁ, bhante …pe… upāsakaṁ maṁ, bhante, bhagavā dhāretu ajjatagge pāṇupetaṁ saraṇaṁ gatan”ti.
an4.111:5.4	Paṭhamaṁ.
an4.112:0.1	Aṅguttara Nikāya 4.112
an4.112:0.2	12. Kesivagga
an4.112:0.3	Javasutta
an4.112:1.1	“Catūhi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhaṁ gacchati.
an4.112:1.2	Katamehi catūhi?
an4.112:1.3	Ajjavena, javena, khantiyā, soraccena—
an4.112:1.4	imehi kho, bhikkhave, catūhi aṅgehi samannāgato rañño bhadro assājānīyo rājāraho hoti, rājabhoggo, rañño aṅganteva saṅkhaṁ gacchati.
an4.112:2.1	Evamevaṁ kho, bhikkhave, catūhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an4.112:2.2	Katamehi catūhi?
an4.112:2.3	Ajjavena, javena, khantiyā, soraccena—
an4.112:2.4	imehi kho, bhikkhave, catūhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an4.112:2.5	Dutiyaṁ.
an4.113:0.1	Aṅguttara Nikāya 4.113
an4.113:0.2	12. Kesivagga
an4.113:0.3	Patodasutta
an4.113:1.1	“Cattārome, bhikkhave, bhadrā assājānīyā santo saṁvijjamānā lokasmiṁ.
an4.113:1.2	Katame cattāro?
an4.113:1.3	Idha, bhikkhave, ekacco bhadro assājānīyo patodacchāyaṁ disvā saṁvijjati saṁvegaṁ āpajjati:
an4.113:1.4	‘kiṁ nu kho maṁ ajja assadammasārathi kāraṇaṁ kāressati, kimassāhaṁ paṭikaromī’ti.
an4.113:1.5	Evarūpopi, bhikkhave, idhekacco bhadro assājānīyo hoti.
an4.113:1.6	Ayaṁ, bhikkhave, paṭhamo bhadro assājānīyo santo saṁvijjamāno lokasmiṁ.
an4.113:2.1	Puna caparaṁ, bhikkhave, idhekacco bhadro assājānīyo na heva kho patodacchāyaṁ disvā saṁvijjati saṁvegaṁ āpajjati, api ca kho lomavedhaviddho saṁvijjati saṁvegaṁ āpajjati:
an4.113:2.2	‘kiṁ nu kho maṁ ajja assadammasārathi kāraṇaṁ kāressati, kimassāhaṁ paṭikaromī’ti.
an4.113:2.3	Evarūpopi, bhikkhave, idhekacco bhadro assājānīyo hoti.
an4.113:2.4	Ayaṁ, bhikkhave, dutiyo bhadro assājānīyo santo saṁvijjamāno lokasmiṁ.
an4.113:3.1	Puna caparaṁ, bhikkhave, idhekacco bhadro assājānīyo na heva kho patodacchāyaṁ disvā saṁvijjati saṁvegaṁ āpajjati nāpi lomavedhaviddho saṁvijjati saṁvegaṁ āpajjati, api ca kho cammavedhaviddho saṁvijjati saṁvegaṁ āpajjati:
an4.113:3.2	‘kiṁ nu kho maṁ ajja assadammasārathi kāraṇaṁ kāressati, kimassāhaṁ paṭikaromī’ti.
an4.113:3.3	Evarūpopi, bhikkhave, idhekacco bhadro assājānīyo hoti.
an4.113:3.4	Ayaṁ, bhikkhave, tatiyo bhadro assājānīyo santo saṁvijjamāno lokasmiṁ.
an4.113:4.1	Puna caparaṁ, bhikkhave, idhekacco bhadro assājānīyo na heva kho patodacchāyaṁ disvā saṁvijjati saṁvegaṁ āpajjati nāpi lomavedhaviddho saṁvijjati saṁvegaṁ āpajjati nāpi cammavedhaviddho saṁvijjati saṁvegaṁ āpajjati, api ca kho aṭṭhivedhaviddho saṁvijjati saṁvegaṁ āpajjati:
an4.113:4.2	‘kiṁ nu kho maṁ ajja assadammasārathi kāraṇaṁ kāressati, kimassāhaṁ paṭikaromī’ti.
an4.113:4.3	Evarūpopi, bhikkhave, idhekacco bhadro assājānīyo hoti.
an4.113:4.4	Ayaṁ, bhikkhave, catuttho bhadro assājānīyo santo saṁvijjamāno lokasmiṁ.
an4.113:4.5	Ime kho, bhikkhave, cattāro bhadrā assājānīyā santo saṁvijjamānā lokasmiṁ.
an4.113:5.1	Evamevaṁ kho, bhikkhave, cattārome bhadrā purisājānīyā santo saṁvijjamānā lokasmiṁ.
an4.113:5.2	Katame cattāro?
an4.113:5.3	Idha, bhikkhave, ekacco bhadro purisājānīyo suṇāti:
an4.113:5.4	‘amukasmiṁ nāma gāme vā nigame vā itthī vā puriso vā dukkhito vā kālaṅkato vā’ti.
an4.113:5.5	So tena saṁvijjati, saṁvegaṁ āpajjati.
an4.113:5.6	Saṁviggo yoniso padahati.
an4.113:5.7	Pahitatto kāyena ceva paramasaccaṁ sacchikaroti, paññāya ca ativijjha passati.
an4.113:5.8	Seyyathāpi so, bhikkhave, bhadro assājānīyo patodacchāyaṁ disvā saṁvijjati saṁvegaṁ āpajjati;
an4.113:5.9	tathūpamāhaṁ, bhikkhave, imaṁ bhadraṁ purisājānīyaṁ vadāmi.
an4.113:5.10	Evarūpopi, bhikkhave, idhekacco bhadro purisājānīyo hoti.
an4.113:5.11	Ayaṁ, bhikkhave, paṭhamo bhadro purisājānīyo santo saṁvijjamāno lokasmiṁ.
an4.113:6.1	Puna caparaṁ, bhikkhave, idhekacco bhadro purisājānīyo na heva kho suṇāti:
an4.113:6.2	‘amukasmiṁ nāma gāme vā nigame vā itthī vā puriso vā dukkhito vā kālaṅkato vā’ti, api ca kho sāmaṁ passati itthiṁ vā purisaṁ vā dukkhitaṁ vā kālaṅkataṁ vā.
an4.113:6.3	So tena saṁvijjati, saṁvegaṁ āpajjati.
an4.113:6.4	Saṁviggo yoniso padahati.
an4.113:6.5	Pahitatto kāyena ceva paramasaccaṁ sacchikaroti, paññāya ca ativijjha passati.
an4.113:6.6	Seyyathāpi so, bhikkhave, bhadro assājānīyo lomavedhaviddho saṁvijjati saṁvegaṁ āpajjati;
an4.113:6.7	tathūpamāhaṁ, bhikkhave, imaṁ bhadraṁ purisājānīyaṁ vadāmi.
an4.113:6.8	Evarūpopi, bhikkhave, idhekacco bhadro purisājānīyo hoti.
an4.113:6.9	Ayaṁ, bhikkhave, dutiyo bhadro purisājānīyo santo saṁvijjamāno lokasmiṁ.
an4.113:7.1	Puna caparaṁ, bhikkhave, idhekacco bhadro purisājānīyo na heva kho suṇāti:
an4.113:7.2	‘amukasmiṁ nāma gāme vā nigame vā itthī vā puriso vā dukkhito vā kālaṅkato vā’ti, nāpi sāmaṁ passati itthiṁ vā purisaṁ vā dukkhitaṁ vā kālaṅkataṁ vā, api ca khvassa ñāti vā sālohito vā dukkhito vā hoti kālaṅkato vā.
an4.113:7.3	So tena saṁvijjati, saṁvegaṁ āpajjati.
an4.113:7.4	Saṁviggo yoniso padahati.
an4.113:7.5	Pahitatto kāyena ceva paramasaccaṁ sacchikaroti, paññāya ca ativijjha passati.
an4.113:7.6	Seyyathāpi so, bhikkhave, bhadro assājānīyo cammavedhaviddho saṁvijjati saṁvegaṁ āpajjati;
an4.113:7.7	tathūpamāhaṁ, bhikkhave, imaṁ bhadraṁ purisājānīyaṁ vadāmi.
an4.113:7.8	Evarūpopi, bhikkhave, idhekacco bhadro purisājānīyo hoti.
an4.113:7.9	Ayaṁ, bhikkhave, tatiyo bhadro purisājānīyo santo saṁvijjamāno lokasmiṁ.
an4.113:8.1	Puna caparaṁ, bhikkhave, idhekacco bhadro purisājānīyo na heva kho suṇāti:
an4.113:8.2	‘amukasmiṁ nāma gāme vā nigame vā itthī vā puriso vā dukkhito vā kālaṅkato vā’ti, nāpi sāmaṁ passati itthiṁ vā purisaṁ vā dukkhitaṁ vā kālaṅkataṁ vā, nāpissa ñāti vā sālohito vā dukkhito vā hoti kālaṅkato vā, api ca kho sāmaññeva phuṭṭho hoti sārīrikāhi vedanāhi dukkhāhi tibbāhi kharāhi kaṭukāhi asātāhi amanāpāhi pāṇaharāhi.
an4.113:8.3	So tena saṁvijjati, saṁvegaṁ āpajjati.
an4.113:8.4	Saṁviggo yoniso padahati.
an4.113:8.5	Pahitatto kāyena ceva paramasaccaṁ sacchikaroti, paññāya ca ativijjha passati.
an4.113:8.6	Seyyathāpi so, bhikkhave, bhadro assājānīyo aṭṭhivedhaviddho saṁvijjati saṁvegaṁ āpajjati;
an4.113:8.7	tathūpamāhaṁ, bhikkhave, imaṁ bhadraṁ purisājānīyaṁ vadāmi.
an4.113:8.8	Evarūpopi, bhikkhave, idhekacco bhadro purisājānīyo hoti.
an4.113:8.9	Ayaṁ, bhikkhave, catuttho bhadro purisājānīyo santo saṁvijjamāno lokasmiṁ.
an4.113:8.10	Ime kho, bhikkhave, cattāro bhadrā purisājānīyā santo saṁvijjamānā lokasmin”ti.
an4.113:8.11	Tatiyaṁ.
an4.114:0.1	Aṅguttara Nikāya 4.114
an4.114:0.2	12. Kesivagga
an4.114:0.3	Nāgasutta
an4.114:1.1	“Catūhi, bhikkhave, aṅgehi samannāgato rañño nāgo rājāraho hoti rājabhoggo, rañño aṅganteva saṅkhaṁ gacchati.
an4.114:1.2	Katamehi catūhi?
an4.114:1.3	Idha, bhikkhave, rañño nāgo sotā ca hoti, hantā ca, khantā ca, gantā ca.
an4.114:2.1	Kathañca, bhikkhave, rañño nāgo sotā hoti?
an4.114:2.2	Idha, bhikkhave, rañño nāgo yamenaṁ hatthidammasārathi kāraṇaṁ kāreti—
an4.114:2.3	yadi vā katapubbaṁ yadi vā akatapubbaṁ—
an4.114:2.4	taṁ aṭṭhiṁ katvā manasi katvā sabbacetasā samannāharitvā ohitasoto suṇāti.
an4.114:2.5	Evaṁ kho, bhikkhave, rañño nāgo sotā hoti.
an4.114:3.1	Kathañca, bhikkhave, rañño nāgo hantā hoti?
an4.114:3.2	Idha, bhikkhave, rañño nāgo saṅgāmagato hatthimpi hanati, hatthāruhampi hanati, assampi hanati, assāruhampi hanati, rathampi hanati, rathikampi hanati, pattikampi hanati.
an4.114:3.3	Evaṁ kho, bhikkhave, rañño nāgo hantā hoti.
an4.114:4.1	Kathañca, bhikkhave, rañño nāgo khantā hoti?
an4.114:4.2	Idha bhikkhave, rañño nāgo saṅgāmagato khamo hoti sattippahārānaṁ asippahārānaṁ usuppahārānaṁ pharasuppahārānaṁ bheripaṇavasaṅkhatiṇavaninnādasaddānaṁ.
an4.114:4.3	Evaṁ kho, bhikkhave, rañño nāgo khantā hoti.
an4.114:5.1	Kathañca, bhikkhave, rañño nāgo gantā hoti?
an4.114:5.2	Idha, bhikkhave, rañño nāgo yamenaṁ hatthidammasārathi disaṁ peseti—
an4.114:5.3	yadi vā gatapubbaṁ yadi vā agatapubbaṁ—
an4.114:5.4	taṁ khippameva gantā hoti.
an4.114:5.5	Evaṁ kho, bhikkhave, rañño nāgo gantā hoti.
an4.114:5.6	Imehi kho, bhikkhave, catūhi aṅgehi samannāgato rañño nāgo rājāraho hoti rājabhoggo, rañño aṅganteva saṅkhaṁ gacchati.
an4.114:6.1	Evamevaṁ kho, bhikkhave, catūhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an4.114:6.2	Katamehi catūhi?
an4.114:6.3	Idha, bhikkhave, bhikkhu sotā ca hoti, hantā ca, khantā ca, gantā ca.
an4.114:7.1	Kathañca, bhikkhave, bhikkhu sotā hoti?
an4.114:7.2	Idha, bhikkhave, bhikkhu tathāgatappavedite dhammavinaye desiyamāne aṭṭhiṁ katvā manasi katvā sabbacetasā samannāharitvā ohitasoto dhammaṁ suṇāti.
an4.114:7.3	Evaṁ kho, bhikkhave, bhikkhu sotā hoti.
an4.114:8.1	Kathañca, bhikkhave, bhikkhu hantā hoti?
an4.114:8.2	Idha, bhikkhave, bhikkhu uppannaṁ kāmavitakkaṁ nādhivāseti pajahati vinodeti hanati byantīkaroti anabhāvaṁ gameti, uppannaṁ byāpādavitakkaṁ …pe… uppannaṁ vihiṁsāvitakkaṁ …pe… uppannuppanne pāpake akusale dhamme nādhivāseti pajahati vinodeti hanati byantīkaroti anabhāvaṁ gameti.
an4.114:8.3	Evaṁ kho, bhikkhave, bhikkhu hantā hoti.
an4.114:9.1	Kathañca, bhikkhave, bhikkhu khantā hoti?
an4.114:9.2	Idha, bhikkhave, bhikkhu khamo hoti sītassa uṇhassa jighacchāya pipāsāya, ḍaṁsamakasavātātapasarīsapasamphassānaṁ duruttānaṁ durāgatānaṁ vacanapathānaṁ uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko hoti.
an4.114:9.3	Evaṁ kho, bhikkhave, bhikkhu khantā hoti.
an4.114:10.1	Kathañca, bhikkhave, bhikkhu gantā hoti?
an4.114:10.2	Idha, bhikkhave, bhikkhu yāyaṁ disā agatapubbā iminā dīghena addhunā yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānaṁ, taṁ khippaññeva gantā hoti.
an4.114:10.3	Evaṁ kho, bhikkhave, bhikkhu gantā hoti.
an4.114:10.4	Imehi kho, bhikkhave, catūhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an4.114:10.5	Catutthaṁ.
an4.115:0.1	Aṅguttara Nikāya 4.115
an4.115:0.2	12. Kesivagga
an4.115:0.3	Ṭhānasutta
an4.115:1.1	“Cattārimāni, bhikkhave, ṭhānāni.
an4.115:1.2	Katamāni cattāri?
an4.115:1.3	Atthi, bhikkhave, ṭhānaṁ amanāpaṁ kātuṁ;
an4.115:1.4	tañca kayiramānaṁ anatthāya saṁvattati.
an4.115:1.5	Atthi, bhikkhave, ṭhānaṁ amanāpaṁ kātuṁ;
an4.115:1.6	tañca kayiramānaṁ atthāya saṁvattati.
an4.115:1.7	Atthi, bhikkhave, ṭhānaṁ manāpaṁ kātuṁ;
an4.115:1.8	tañca kayiramānaṁ anatthāya saṁvattati.
an4.115:1.9	Atthi, bhikkhave, ṭhānaṁ manāpaṁ kātuṁ;
an4.115:1.10	tañca kayiramānaṁ atthāya saṁvattati.
an4.115:2.1	Tatra, bhikkhave, yamidaṁ ṭhānaṁ amanāpaṁ kātuṁ;
an4.115:2.2	tañca kayiramānaṁ anatthāya saṁvattati—
an4.115:2.3	idaṁ, bhikkhave, ṭhānaṁ ubhayeneva na kattabbaṁ maññati.
an4.115:2.4	Yampidaṁ ṭhānaṁ amanāpaṁ kātuṁ;
an4.115:2.5	imināpi naṁ na kattabbaṁ maññati.
an4.115:2.6	Yampidaṁ ṭhānaṁ kayiramānaṁ anatthāya saṁvattati;
an4.115:2.7	imināpi naṁ na kattabbaṁ maññati.
an4.115:2.8	Idaṁ, bhikkhave, ṭhānaṁ ubhayeneva na kattabbaṁ maññati.
an4.115:3.1	Tatra, bhikkhave, yamidaṁ ṭhānaṁ amanāpaṁ kātuṁ;
an4.115:3.2	tañca kayiramānaṁ atthāya saṁvattati—
an4.115:3.3	imasmiṁ, bhikkhave, ṭhāne bālo ca paṇḍito ca veditabbo purisathāme purisavīriye purisaparakkame.
an4.115:3.4	Na, bhikkhave, bālo iti paṭisañcikkhati:
an4.115:3.5	‘kiñcāpi kho idaṁ ṭhānaṁ amanāpaṁ kātuṁ;
an4.115:3.6	atha carahidaṁ ṭhānaṁ kayiramānaṁ atthāya saṁvattatī’ti.
an4.115:3.7	So taṁ ṭhānaṁ na karoti.
an4.115:3.8	Tassa taṁ ṭhānaṁ akayiramānaṁ anatthāya saṁvattati.
an4.115:3.9	Paṇḍito ca kho, bhikkhave, iti paṭisañcikkhati:
an4.115:3.10	‘kiñcāpi kho idaṁ ṭhānaṁ amanāpaṁ kātuṁ;
an4.115:3.11	atha carahidaṁ ṭhānaṁ kayiramānaṁ atthāya saṁvattatī’ti.
an4.115:3.12	So taṁ ṭhānaṁ karoti.
an4.115:3.13	Tassa taṁ ṭhānaṁ kayiramānaṁ atthāya saṁvattati.
an4.115:4.1	Tatra, bhikkhave, yamidaṁ ṭhānaṁ manāpaṁ kātuṁ;
an4.115:4.2	tañca kayiramānaṁ anatthāya saṁvattati—
an4.115:4.3	imasmimpi, bhikkhave, ṭhāne bālo ca paṇḍito ca veditabbo purisathāme purisavīriye purisaparakkame.
an4.115:4.4	Na, bhikkhave, bālo iti paṭisañcikkhati:
an4.115:4.5	‘kiñcāpi kho idaṁ ṭhānaṁ manāpaṁ kātuṁ;
an4.115:4.6	atha carahidaṁ ṭhānaṁ kayiramānaṁ anatthāya saṁvattatī’ti.
an4.115:4.7	So taṁ ṭhānaṁ karoti.
an4.115:4.8	Tassa taṁ ṭhānaṁ kayiramānaṁ anatthāya saṁvattati.
an4.115:4.9	Paṇḍito ca kho, bhikkhave, iti paṭisañcikkhati:
an4.115:4.10	‘kiñcāpi kho idaṁ ṭhānaṁ manāpaṁ kātuṁ;
an4.115:4.11	atha carahidaṁ ṭhānaṁ kayiramānaṁ anatthāya saṁvattatī’ti.
an4.115:4.12	So taṁ ṭhānaṁ na karoti.
an4.115:4.13	Tassa taṁ ṭhānaṁ akayiramānaṁ atthāya saṁvattati.
an4.115:5.1	Tatra, bhikkhave, yamidaṁ ṭhānaṁ manāpaṁ kātuṁ, tañca kayiramānaṁ atthāya saṁvattati—
an4.115:5.2	idaṁ, bhikkhave, ṭhānaṁ ubhayeneva kattabbaṁ maññati.
an4.115:5.3	Yampidaṁ ṭhānaṁ manāpaṁ kātuṁ, imināpi naṁ kattabbaṁ maññati;
an4.115:5.4	yampidaṁ ṭhānaṁ kayiramānaṁ atthāya saṁvattati, imināpi naṁ kattabbaṁ maññati.
an4.115:5.5	Idaṁ, bhikkhave, ṭhānaṁ ubhayeneva kattabbaṁ maññati.
an4.115:5.6	Imāni kho, bhikkhave, cattāri ṭhānānī”ti.
an4.115:5.7	Pañcamaṁ.
an4.116:0.1	Aṅguttara Nikāya 4.116
an4.116:0.2	12. Kesivagga
an4.116:0.3	Appamādasutta
an4.116:1.1	“Catūhi, bhikkhave, ṭhānehi appamādo karaṇīyo.
an4.116:1.2	Katamehi catūhi?
an4.116:1.3	Kāyaduccaritaṁ, bhikkhave, pajahatha, kāyasucaritaṁ bhāvetha;
an4.116:1.4	tattha ca mā pamādattha.
an4.116:1.5	Vacīduccaritaṁ, bhikkhave, pajahatha, vacīsucaritaṁ bhāvetha;
an4.116:1.6	tattha ca mā pamādattha.
an4.116:1.7	Manoduccaritaṁ, bhikkhave, pajahatha, manosucaritaṁ bhāvetha;
an4.116:1.8	tattha ca mā pamādattha.
an4.116:1.9	Micchādiṭṭhiṁ, bhikkhave, pajahatha, sammādiṭṭhiṁ bhāvetha;
an4.116:1.10	tattha ca mā pamādattha.
an4.116:2.1	Yato kho, bhikkhave, bhikkhuno kāyaduccaritaṁ pahīnaṁ hoti kāyasucaritaṁ bhāvitaṁ, vacīduccaritaṁ pahīnaṁ hoti vacīsucaritaṁ bhāvitaṁ, manoduccaritaṁ pahīnaṁ hoti manosucaritaṁ bhāvitaṁ, micchādiṭṭhi pahīnā hoti sammādiṭṭhi bhāvitā, so na bhāyati samparāyikassa maraṇassā”ti.
an4.116:2.2	Chaṭṭhaṁ.
an4.117:0.1	Aṅguttara Nikāya 4.117
an4.117:0.2	12. Kesivagga
an4.117:0.3	Ārakkhasutta
an4.117:1.1	“Catūsu, bhikkhave, ṭhānesu attarūpena appamādo sati cetaso ārakkho karaṇīyo.
an4.117:1.2	Katamesu catūsu?
an4.117:1.3	‘Mā me rajanīyesu dhammesu cittaṁ rajjī’ti attarūpena appamādo sati cetaso ārakkho karaṇīyo;
an4.117:1.4	‘mā me dosanīyesu dhammesu cittaṁ dussī’ti attarūpena appamādo sati cetaso ārakkho karaṇīyo;
an4.117:1.5	‘mā me mohanīyesu dhammesu cittaṁ muyhī’ti attarūpena appamādo sati cetaso ārakkho karaṇīyo;
an4.117:1.6	‘mā me madanīyesu dhammesu cittaṁ majjī’ti attarūpena appamādo sati cetaso ārakkho karaṇīyo.
an4.117:2.1	Yato kho, bhikkhave, bhikkhuno rajanīyesu dhammesu cittaṁ na rajjati vītarāgattā, dosanīyesu dhammesu cittaṁ na dussati vītadosattā, mohanīyesu dhammesu cittaṁ na muyhati vītamohattā, madanīyesu dhammesu cittaṁ na majjati vītamadattā, so na chambhati na kampati na vedhati na santāsaṁ āpajjati, na ca pana samaṇavacanahetupi gacchatī”ti.
an4.117:2.2	Sattamaṁ.
an4.118:0.1	Aṅguttara Nikāya 4.118
an4.118:0.2	12. Kesivagga
an4.118:0.3	Saṁvejanīyasutta
an4.118:1.1	“Cattārimāni, bhikkhave, saddhassa kulaputtassa dassanīyāni saṁvejanīyāni ṭhānāni.
an4.118:1.2	Katamāni cattāri?
an4.118:1.3	‘Idha tathāgato jāto’ti, bhikkhave, saddhassa kulaputtassa dassanīyaṁ saṁvejanīyaṁ ṭhānaṁ.
an4.118:1.4	‘Idha tathāgato anuttaraṁ sammāsambodhiṁ abhisambuddho’ti, bhikkhave, saddhassa kulaputtassa dassanīyaṁ saṁvejanīyaṁ ṭhānaṁ.
an4.118:1.5	‘Idha tathāgato anuttaraṁ dhammacakkaṁ pavattesī’ti, bhikkhave, saddhassa kulaputtassa dassanīyaṁ saṁvejanīyaṁ ṭhānaṁ.
an4.118:1.6	‘Idha tathāgato anupādisesāya nibbānadhātuyā parinibbuto’ti, bhikkhave, saddhassa kulaputtassa dassanīyaṁ saṁvejanīyaṁ ṭhānaṁ.
an4.118:1.7	Imāni kho, bhikkhave, cattāri saddhassa kulaputtassa dassanīyāni saṁvejanīyāni ṭhānānī”ti.
an4.118:1.8	Aṭṭhamaṁ.
an4.119:0.1	Aṅguttara Nikāya 4.119
an4.119:0.2	12. Kesivagga
an4.119:0.3	Paṭhamabhayasutta
an4.119:1.1	“Cattārimāni, bhikkhave, bhayāni.
an4.119:1.2	Katamāni cattāri?
an4.119:1.3	Jātibhayaṁ, jarābhayaṁ, byādhibhayaṁ, maraṇabhayaṁ—
an4.119:1.4	Imāni kho, bhikkhave, cattāri bhayānī”ti.
an4.119:1.5	Navamaṁ.
an4.120:0.1	Aṅguttara Nikāya 4.120
an4.120:0.2	12. Kesivagga
an4.120:0.3	Dutiyabhayasutta
an4.120:1.1	“Cattārimāni, bhikkhave, bhayāni.
an4.120:1.2	Katamāni cattāri?
an4.120:1.3	Aggibhayaṁ, udakabhayaṁ, rājabhayaṁ, corabhayaṁ—
an4.120:1.4	Imāni kho, bhikkhave, cattāri bhayānī”ti.
an4.120:1.5	Dasamaṁ.
an4.120:1.6	Kesivaggo dutiyo.
an4.120:2.0	Tassuddānaṁ
an4.120:2.1	Kesi javo patodo ca,
an4.120:2.2	Nāgo ṭhānena pañcamaṁ;
an4.120:2.3	Appamādo ca ārakkho,
an4.120:2.4	Saṁvejanīyañca dve bhayāti.
an4.121:0.1	Aṅguttara Nikāya 4.121
an4.121:0.2	13. Bhayavagga
an4.121:0.3	Attānuvādasutta
an4.121:1.1	“Cattārimāni, bhikkhave, bhayāni.
an4.121:1.2	Katamāni cattāri?
an4.121:1.3	Attānuvādabhayaṁ, parānuvādabhayaṁ, daṇḍabhayaṁ, duggatibhayaṁ.
an4.121:2.1	Katamañca, bhikkhave, attānuvādabhayaṁ?
an4.121:2.2	Idha, bhikkhave, ekacco iti paṭisañcikkhati:
an4.121:2.3	‘ahañceva kho pana kāyena duccaritaṁ careyyaṁ, vācāya duccaritaṁ careyyaṁ, manasā duccaritaṁ careyyaṁ, kiñca taṁ yaṁ maṁ attā sīlato na upavadeyyā’ti.
an4.121:2.4	So attānuvādabhayassa bhīto kāyaduccaritaṁ pahāya kāyasucaritaṁ bhāveti, vacīduccaritaṁ pahāya vacīsucaritaṁ bhāveti, manoduccaritaṁ pahāya manosucaritaṁ bhāveti, suddhaṁ attānaṁ pariharati.
an4.121:2.5	Idaṁ vuccati, bhikkhave, attānuvādabhayaṁ.
an4.121:3.1	Katamañca, bhikkhave, parānuvādabhayaṁ?
an4.121:3.2	Idha, bhikkhave, ekacco iti paṭisañcikkhati:
an4.121:3.3	‘ahañceva kho pana kāyena duccaritaṁ careyyaṁ, vācāya duccaritaṁ careyyaṁ, manasā duccaritaṁ careyyaṁ, kiñca taṁ yaṁ maṁ pare sīlato na upavadeyyun’ti.
an4.121:3.4	So parānuvādabhayassa bhīto kāyaduccaritaṁ pahāya kāyasucaritaṁ bhāveti, vacīduccaritaṁ pahāya vacīsucaritaṁ bhāveti, manoduccaritaṁ pahāya manosucaritaṁ bhāveti, suddhaṁ attānaṁ pariharati.
an4.121:3.5	Idaṁ vuccati, bhikkhave, parānuvādabhayaṁ.
an4.121:4.1	Katamañca, bhikkhave, daṇḍabhayaṁ?
an4.121:4.2	Idha, bhikkhave, ekacco passati coraṁ āgucāriṁ, rājāno gahetvā vividhā kammakāraṇā kārente,
an4.121:4.3	kasāhipi tāḷente, vettehipi tāḷente, addhadaṇḍakehipi tāḷente, hatthampi chindante, pādampi chindante, hatthapādampi chindante, kaṇṇampi chindante, nāsampi chindante, kaṇṇanāsampi chindante, bilaṅgathālikampi karonte, saṅkhamuṇḍikampi karonte, rāhumukhampi karonte, jotimālikampi karonte, hatthapajjotikampi karonte, erakavattikampi karonte, cīrakavāsikampi karonte, eṇeyyakampi karonte, balisamaṁsikampi karonte, kahāpaṇakampi karonte, khārāpatacchikampi karonte, palighaparivattikampi karonte, palālapīṭhakampi karonte, tattenapi telena osiñcante, sunakhehipi khādāpente, jīvantampi sūle uttāsente, asināpi sīsaṁ chindante.
an4.121:5.1	Tassa evaṁ hoti:
an4.121:5.2	‘yathārūpānaṁ kho pāpakānaṁ kammānaṁ hetu coraṁ āgucāriṁ rājāno gahetvā vividhā kammakāraṇā kārenti, kasāhipi tāḷenti …pe… asināpi sīsaṁ chindanti, ahañceva kho pana evarūpaṁ pāpakammaṁ kareyyaṁ, mampi rājāno gahetvā evarūpā vividhā kammakāraṇā kāreyyuṁ, kasāhipi tāḷeyyuṁ, vettehipi tāḷeyyuṁ, addhadaṇḍakehipi tāḷeyyuṁ, hatthampi chindeyyuṁ, pādampi chindeyyuṁ, hatthapādampi chindeyyuṁ, kaṇṇampi chindeyyuṁ, nāsampi chindeyyuṁ, kaṇṇanāsampi chindeyyuṁ, bilaṅgathālikampi kareyyuṁ, saṅkhamuṇḍikampi kareyyuṁ;
an4.121:5.3	rāhumukhampi kareyyuṁ, jotimālikampi kareyyuṁ, hatthapajjotikampi kareyyuṁ, erakavattikampi kareyyuṁ, cīrakavāsikampi kareyyuṁ, eṇeyyakampi kareyyuṁ, balisamaṁsikampi kareyyuṁ, kahāpaṇakampi kareyyuṁ, khārāpatacchikampi kareyyuṁ, palighaparivattikampi kareyyuṁ, palālapīṭhakampi kareyyuṁ, tattenapi telena osiñceyyuṁ, sunakhehipi khādāpeyyuṁ, jīvantampi sūle uttāseyyuṁ, asināpi sīsaṁ chindeyyun’ti.
an4.121:5.4	So daṇḍabhayassa bhīto na paresaṁ pābhataṁ vilumpanto carati.
an4.121:5.5	Kāyaduccaritaṁ pahāya …pe… suddhaṁ attānaṁ pariharati.
an4.121:5.6	Idaṁ vuccati, bhikkhave, daṇḍabhayaṁ.
an4.121:6.1	Katamañca, bhikkhave, duggatibhayaṁ?
an4.121:6.2	Idha, bhikkhave, ekacco iti paṭisañcikkhati:
an4.121:6.3	‘kāyaduccaritassa kho pāpako vipāko abhisamparāyaṁ, vacīduccaritassa pāpako vipāko abhisamparāyaṁ, manoduccaritassa pāpako vipāko abhisamparāyaṁ.
an4.121:6.4	Ahañceva kho pana kāyena duccaritaṁ careyyaṁ, vācāya duccaritaṁ careyyaṁ, manasā duccaritaṁ careyyaṁ, kiñca taṁ yāhaṁ na kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyyan’ti.
an4.121:6.5	So duggatibhayassa bhīto kāyaduccaritaṁ pahāya kāyasucaritaṁ bhāveti, vacīduccaritaṁ pahāya vacīsucaritaṁ bhāveti, manoduccaritaṁ pahāya manosucaritaṁ bhāveti, suddhaṁ attānaṁ pariharati.
an4.121:6.6	Idaṁ vuccati, bhikkhave, duggatibhayaṁ.
an4.121:6.7	Imāni kho, bhikkhave, cattāri bhayānī”ti.
an4.121:6.8	Paṭhamaṁ.
an4.122:0.1	Aṅguttara Nikāya 4.122
an4.122:0.2	13. Bhayavagga
an4.122:0.3	Ūmibhayasutta
an4.122:1.1	“Cattārimāni, bhikkhave, bhayāni udakorohantassa pāṭikaṅkhitabbāni.
an4.122:1.2	Katamāni cattāri?
an4.122:1.3	Ūmibhayaṁ, kumbhīlabhayaṁ, āvaṭṭabhayaṁ, susukābhayaṁ—
an4.122:1.4	Imāni kho, bhikkhave, cattāri bhayāni udakorohantassa pāṭikaṅkhitabbāni.
an4.122:1.5	Evamevaṁ kho, bhikkhave, cattāri bhayāni idhekaccassa kulaputtassa imasmiṁ dhammavinaye agārasmā anagāriyaṁ pabbajitassa pāṭikaṅkhitabbāni.
an4.122:1.6	Katamāni cattāri?
an4.122:1.7	Ūmibhayaṁ, kumbhīlabhayaṁ, āvaṭṭabhayaṁ, susukābhayaṁ.
an4.122:2.1	Katamañca, bhikkhave, ūmibhayaṁ?
an4.122:2.2	Idha, bhikkhave, ekacco kulaputto saddhā agārasmā anagāriyaṁ pabbajito hoti:
an4.122:2.3	‘otiṇṇomhi jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto;
an4.122:2.4	appeva nāma imassa kevalassa dukkhakkhandhassa antakiriyā paññāyethā’ti.
an4.122:2.5	Tamenaṁ tathā pabbajitaṁ samānaṁ sabrahmacārino ovadanti anusāsanti:
an4.122:2.6	‘evaṁ te abhikkamitabbaṁ, evaṁ te paṭikkamitabbaṁ, evaṁ te āloketabbaṁ, evaṁ te viloketabbaṁ, evaṁ te samiñjitabbaṁ, evaṁ te pasāritabbaṁ, evaṁ te saṅghāṭipattacīvaraṁ dhāretabban’ti.
an4.122:2.7	Tassa evaṁ hoti:
an4.122:2.8	‘mayaṁ kho pubbe agāriyabhūtā samānā aññe ovadāmapi anusāsāmapi.
an4.122:2.9	Ime panamhākaṁ puttamattā maññe nattamattā maññe ovaditabbaṁ anusāsitabbaṁ maññantī’ti.
an4.122:2.10	So kupito anattamano sikkhaṁ paccakkhāya hīnāyāvattati.
an4.122:2.11	Ayaṁ vuccati, bhikkhave, bhikkhu ūmibhayassa bhīto sikkhaṁ paccakkhāya hīnāyāvatto.
an4.122:2.12	Ūmibhayanti kho, bhikkhave, kodhūpāyāsassetaṁ adhivacanaṁ.
an4.122:2.13	Idaṁ vuccati, bhikkhave, ūmibhayaṁ.
an4.122:3.1	Katamañca, bhikkhave, kumbhīlabhayaṁ?
an4.122:3.2	Idha, bhikkhave, ekacco kulaputto saddhā agārasmā anagāriyaṁ pabbajito hoti:
an4.122:3.3	‘otiṇṇomhi jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto;
an4.122:3.4	appeva nāma imassa kevalassa dukkhakkhandhassa antakiriyā paññāyethā’ti.
an4.122:3.5	Tamenaṁ tathā pabbajitaṁ samānaṁ sabrahmacārino ovadanti anusāsanti:
an4.122:3.6	‘idaṁ te khāditabbaṁ, idaṁ te na khāditabbaṁ, idaṁ te bhuñjitabbaṁ, idaṁ te na bhuñjitabbaṁ, idaṁ te sāyitabbaṁ, idaṁ te na sāyitabbaṁ, idaṁ te pātabbaṁ, idaṁ te na pātabbaṁ, kappiyaṁ te khāditabbaṁ, akappiyaṁ te na khāditabbaṁ, kappiyaṁ te bhuñjitabbaṁ, akappiyaṁ te na bhuñjitabbaṁ, kappiyaṁ te sāyitabbaṁ, akappiyaṁ te na sāyitabbaṁ, kappiyaṁ te pātabbaṁ, akappiyaṁ te na pātabbaṁ, kāle te khāditabbaṁ, vikāle te na khāditabbaṁ, kāle te bhuñjitabbaṁ, vikāle te na bhuñjitabbaṁ, kāle te sāyitabbaṁ, vikāle te na sāyitabbaṁ, kāle te pātabbaṁ, vikāle te na pātabban’ti.
an4.122:3.7	Tassa evaṁ hoti:
an4.122:3.8	‘mayaṁ kho pubbe agāriyabhūtā samānā yaṁ icchāma taṁ khādāma, yaṁ na icchāma na taṁ khādāma;
an4.122:3.9	yaṁ icchāma taṁ bhuñjāma, yaṁ na icchāma na taṁ bhuñjāma;
an4.122:3.10	yaṁ icchāma taṁ sāyāma, yaṁ na icchāma na taṁ sāyāma;
an4.122:3.11	yaṁ icchāma taṁ pivāma, yaṁ na icchāma na taṁ pivāma;
an4.122:3.12	kappiyampi khādāma akappiyampi khādāma kappiyampi bhuñjāma akappiyampi bhuñjāma kappiyampi sāyāma akappiyampi sāyāma kappiyampi pivāma akappiyampi pivāma, kālepi khādāma vikālepi khādāma kālepi bhuñjāma vikālepi bhuñjāma kālepi sāyāma vikālepi sāyāma kālepi pivāma vikālepi pivāma;
an4.122:3.13	yampi no saddhā gahapatikā divā vikāle paṇītaṁ khādanīyaṁ vā bhojanīyaṁ vā denti, tatrapime mukhāvaraṇaṁ maññe karontī’ti.
an4.122:3.14	So kupito anattamano sikkhaṁ paccakkhāya hīnāyāvattati.
an4.122:3.15	Ayaṁ vuccati, bhikkhave, bhikkhu kumbhīlabhayassa bhīto sikkhaṁ paccakkhāya hīnāyāvatto.
an4.122:3.16	Kumbhīlabhayanti kho, bhikkhave, odarikattassetaṁ adhivacanaṁ.
an4.122:3.17	Idaṁ vuccati, bhikkhave, kumbhīlabhayaṁ.
an4.122:4.1	Katamañca, bhikkhave, āvaṭṭabhayaṁ?
an4.122:4.2	Idha, bhikkhave, ekacco kulaputto saddhā agārasmā anagāriyaṁ pabbajito hoti:
an4.122:4.3	‘otiṇṇomhi jātiyā jarāya maraṇena sokehi paridevehi, dukkhehi domanassehi upāyāsehi dukkhotiṇṇo dukkhapareto;
an4.122:4.4	appeva nāma imassa kevalassa dukkhakkhandhassa antakiriyā paññāyethā’ti.
an4.122:4.5	So evaṁ pabbajito samāno pubbaṇhasamayaṁ nivāsetvā pattacīvaramādāya gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.
an4.122:4.6	So tattha passati gahapatiṁ vā gahapatiputtaṁ vā pañcahi kāmaguṇehi samappitaṁ samaṅgībhūtaṁ paricārayamānaṁ.
an4.122:4.7	Tassa evaṁ hoti:
an4.122:4.8	‘mayaṁ kho pubbe agāriyabhūtā samānā pañcahi kāmaguṇehi samappitā samaṅgībhūtā paricārimhā;
an4.122:4.9	saṁvijjanti kho pana me kule bhogā.
an4.122:4.10	Sakkā bhoge ca bhuñjituṁ puññāni ca kātuṁ.
an4.122:4.11	Yannūnāhaṁ sikkhaṁ paccakkhāya hīnāyāvattitvā bhoge ca bhuñjeyyaṁ puññāni ca kareyyan’ti.
an4.122:4.12	So sikkhaṁ paccakkhāya hīnāyāvattati.
an4.122:4.13	Ayaṁ vuccati, bhikkhave, bhikkhu āvaṭṭabhayassa bhīto sikkhaṁ paccakkhāya hīnāyāvatto.
an4.122:4.14	Āvaṭṭabhayanti kho, bhikkhave, pañcannetaṁ kāmaguṇānaṁ adhivacanaṁ.
an4.122:4.15	Idaṁ vuccati, bhikkhave, āvaṭṭabhayaṁ.
an4.122:5.1	Katamañca, bhikkhave, susukābhayaṁ?
an4.122:5.2	Idha, bhikkhave, ekacco kulaputto saddhā agārasmā anagāriyaṁ pabbajito hoti:
an4.122:5.3	‘otiṇṇomhi jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto;
an4.122:5.4	appeva nāma imassa kevalassa dukkhakkhandhassa antakiriyā paññāyethā’ti.
an4.122:5.5	So evaṁ pabbajito samāno pubbaṇhasamayaṁ nivāsetvā pattacīvaramādāya gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.
an4.122:5.6	So tattha passati mātugāmaṁ dunnivatthaṁ vā duppārutaṁ vā.
an4.122:5.7	Tassa mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.
an4.122:5.8	So rāgānuddhaṁsitena cittena sikkhaṁ paccakkhāya hīnāyāvattati.
an4.122:5.9	Ayaṁ vuccati, bhikkhave, bhikkhu susukābhayassa bhīto sikkhaṁ paccakkhāya hīnāyāvatto.
an4.122:5.10	Susukābhayanti kho, bhikkhave, mātugāmassetaṁ adhivacanaṁ.
an4.122:5.11	Idaṁ vuccati, bhikkhave, susukābhayaṁ.
an4.122:5.12	Imāni kho, bhikkhave, cattāri bhayāni idhekaccassa kulaputtassa imasmiṁ dhammavinaye agārasmā anagāriyaṁ pabbajitassa pāṭikaṅkhitabbānī”ti.
an4.122:5.13	Dutiyaṁ.
an4.123:0.1	Aṅguttara Nikāya 4.123
an4.123:0.2	13. Bhayavagga
an4.123:0.3	Paṭhamanānākaraṇasutta
an4.123:1.1	“Cattārome, bhikkhave, puggalā santo saṁvijjamānā lokasmiṁ.
an4.123:1.2	Katame cattāro?
an4.123:1.3	Idha, bhikkhave, ekacco puggalo vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an4.123:1.4	So tadassādeti, taṁ nikāmeti, tena ca vittiṁ āpajjati.
an4.123:1.5	Tattha ṭhito tadadhimutto tabbahulavihārī aparihīno kālaṁ kurumāno brahmakāyikānaṁ devānaṁ sahabyataṁ upapajjati.
an4.123:1.6	Brahmakāyikānaṁ, bhikkhave, devānaṁ kappo āyuppamāṇaṁ.
an4.123:1.7	Tattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.
an4.123:1.8	Bhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.
an4.123:1.9	Ayaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.
an4.123:2.1	Puna caparaṁ, bhikkhave, idhekacco puggalo vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati.
an4.123:2.2	So tadassādeti, taṁ nikāmeti, tena ca vittiṁ āpajjati.
an4.123:2.3	Tattha ṭhito tadadhimutto tabbahulavihārī aparihīno kālaṁ kurumāno ābhassarānaṁ devānaṁ sahabyataṁ upapajjati.
an4.123:2.4	Ābhassarānaṁ, bhikkhave, devānaṁ dve kappā āyuppamāṇaṁ.
an4.123:2.5	Tattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.
an4.123:2.6	Bhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.
an4.123:2.7	Ayaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.
an4.123:3.1	Puna caparaṁ, bhikkhave, idhekacco puggalo pītiyā ca virāgā upekkhako ca viharati sato ca sampajāno sukhañca kāyena paṭisaṁvedeti yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharati.
an4.123:3.2	So tadassādeti, taṁ nikāmeti, tena ca vittiṁ āpajjati.
an4.123:3.3	Tattha ṭhito tadadhimutto tabbahulavihārī aparihīno, kālaṁ kurumāno subhakiṇhānaṁ devānaṁ sahabyataṁ upapajjati.
an4.123:3.4	Subhakiṇhānaṁ, bhikkhave, devānaṁ cattāro kappā āyuppamāṇaṁ.
an4.123:3.5	Tattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.
an4.123:3.6	Bhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.
an4.123:3.7	Ayaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.
an4.123:4.1	Puna caparaṁ, bhikkhave, idhekacco puggalo sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
an4.123:4.2	So tadassādeti, taṁ nikāmeti, tena ca vittiṁ āpajjati.
an4.123:4.3	Tattha ṭhito tadadhimutto tabbahulavihārī aparihīno kālaṁ kurumāno vehapphalānaṁ devānaṁ sahabyataṁ upapajjati.
an4.123:4.4	Vehapphalānaṁ, bhikkhave, devānaṁ pañca kappasatāni āyuppamāṇaṁ.
an4.123:4.5	Tattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.
an4.123:4.6	Bhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.
an4.123:4.7	Ayaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.
an4.123:4.8	Ime kho, bhikkhave, cattāro puggalā santo saṁvijjamānā lokasmin”ti.
an4.123:4.9	Tatiyaṁ.
an4.124:0.1	Aṅguttara Nikāya 4.124
an4.124:0.2	13. Bhayavagga
an4.124:0.3	Dutiyanānākaraṇasutta
an4.124:1.1	“Cattārome, bhikkhave, puggalā santo saṁvijjamānā lokasmiṁ.
an4.124:1.2	Katame cattāro?
an4.124:1.3	Idha, bhikkhave, ekacco puggalo vivicceva kāmehi …pe… paṭhamaṁ jhānaṁ upasampajja viharati.
an4.124:1.4	So yadeva tattha hoti rūpagataṁ vedanāgataṁ saññāgataṁ saṅkhāragataṁ viññāṇagataṁ, te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an4.124:1.5	So kāyassa bhedā paraṁ maraṇā suddhāvāsānaṁ devānaṁ sahabyataṁ upapajjati.
an4.124:1.6	Ayaṁ, bhikkhave, upapatti asādhāraṇā puthujjanehi.
an4.124:2.1	Puna caparaṁ, bhikkhave, idhekacco puggalo vitakkavicārānaṁ vūpasamā …pe… dutiyaṁ jhānaṁ …pe… tatiyaṁ jhānaṁ …pe… catutthaṁ jhānaṁ upasampajja viharati.
an4.124:2.2	So yadeva tattha hoti rūpagataṁ vedanāgataṁ saññāgataṁ saṅkhāragataṁ viññāṇagataṁ, te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an4.124:2.3	So kāyassa bhedā paraṁ maraṇā suddhāvāsānaṁ devānaṁ sahabyataṁ upapajjati.
an4.124:2.4	Ayaṁ, bhikkhave, upapatti asādhāraṇā puthujjanehi.
an4.124:2.5	Ime kho, bhikkhave, cattāro puggalā santo saṁvijjamānā lokasmin”ti.
an4.124:2.6	Catutthaṁ.
an4.125:0.1	Aṅguttara Nikāya 4.125
an4.125:0.2	13. Bhayavagga
an4.125:0.3	Paṭhamamettāsutta
an4.125:1.1	“Cattārome, bhikkhave, puggalā santo saṁvijjamānā lokasmiṁ.
an4.125:1.2	Katame cattāro?
an4.125:1.3	Idha, bhikkhave, ekacco puggalo mettāsahagatena cetasā ekaṁ disaṁ pharitvā viharati, tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati.
an4.125:1.4	So tadassādeti, taṁ nikāmeti, tena ca vittiṁ āpajjati.
an4.125:1.5	Tattha ṭhito tadadhimutto tabbahulavihārī aparihīno kālaṁ kurumāno brahmakāyikānaṁ devānaṁ sahabyataṁ upapajjati.
an4.125:1.6	Brahmakāyikānaṁ, bhikkhave, devānaṁ kappo āyuppamāṇaṁ.
an4.125:1.7	Tattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.
an4.125:1.8	Bhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.
an4.125:1.9	Ayaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.
an4.125:2.1	Puna caparaṁ, bhikkhave, idhekacco puggalo karuṇāsahagatena cetasā …pe…
an4.125:2.2	muditāsahagatena cetasā …pe…
an4.125:2.3	upekkhāsahagatena cetasā ekaṁ disaṁ pharitvā viharati, tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
an4.125:2.4	So tadassādeti, taṁ nikāmeti, tena ca vittiṁ āpajjati.
an4.125:2.5	Tattha ṭhito tadadhimutto tabbahulavihārī aparihīno kālaṁ kurumāno ābhassarānaṁ devānaṁ sahabyataṁ upapajjati.
an4.125:2.6	Ābhassarānaṁ, bhikkhave, devānaṁ dve kappā āyuppamāṇaṁ …pe… subhakiṇhānaṁ devānaṁ sahabyataṁ upapajjati.
an4.125:2.7	Subhakiṇhānaṁ, bhikkhave, devānaṁ cattāro kappā āyuppamāṇaṁ …pe… vehapphalānaṁ devānaṁ sahabyataṁ upapajjati.
an4.125:2.8	Vehapphalānaṁ, bhikkhave, devānaṁ pañca kappasatāni āyuppamāṇaṁ.
an4.125:2.9	Tattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.
an4.125:2.10	Bhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.
an4.125:2.11	Ayaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.
an4.125:2.12	Ime kho, bhikkhave, cattāro puggalā santo saṁvijjamānā lokasmin”ti.
an4.125:2.13	Pañcamaṁ.
an4.126:0.1	Aṅguttara Nikāya 4.126
an4.126:0.2	13. Bhayavagga
an4.126:0.3	Dutiyamettāsutta
an4.126:1.1	“Cattārome, bhikkhave, puggalā santo saṁvijjamānā lokasmiṁ.
an4.126:1.2	Katame cattāro?
an4.126:1.3	Idha, bhikkhave, ekacco puggalo mettāsahagatena cetasā ekaṁ disaṁ pharitvā viharati, tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati.
an4.126:1.4	So yadeva tattha hoti rūpagataṁ vedanāgataṁ saññāgataṁ saṅkhāragataṁ viññāṇagataṁ te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an4.126:1.5	So kāyassa bhedā paraṁ maraṇā suddhāvāsānaṁ devānaṁ sahabyataṁ upapajjati.
an4.126:1.6	Ayaṁ, bhikkhave, upapatti asādhāraṇā puthujjanehi.
an4.126:2.1	Puna caparaṁ, bhikkhave, idhekacco puggalo karuṇā …pe…
an4.126:2.2	muditā …pe…
an4.126:2.3	upekkhāsahagatena cetasā ekaṁ disaṁ pharitvā viharati, tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
an4.126:2.4	So yadeva tattha hoti rūpagataṁ vedanāgataṁ saññāgataṁ saṅkhāragataṁ viññāṇagataṁ te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an4.126:2.5	So kāyassa bhedā paraṁ maraṇā suddhāvāsānaṁ devānaṁ sahabyataṁ upapajjati.
an4.126:2.6	Ayaṁ, bhikkhave, upapatti asādhāraṇā puthujjanehi.
an4.126:2.7	Ime kho, bhikkhave, cattāro puggalā santo saṁvijjamānā lokasminti.
an4.126:2.8	Chaṭṭhaṁ.
an4.127:0.1	Aṅguttara Nikāya 4.127
an4.127:0.2	13. Bhayavagga
an4.127:0.3	Paṭhamatathāgataacchariyasutta
an4.127:1.1	“Tathāgatassa, bhikkhave, arahato sammāsambuddhassa pātubhāvā cattāro acchariyā abbhutā dhammā pātubhavanti.
an4.127:1.2	Katame cattāro?
an4.127:1.3	Yadā, bhikkhave, bodhisatto tusitā kāyā cavitvā sato sampajāno mātukucchiṁ okkamati, atha sadevake loke samārake sabrahmake sassamaṇabrāhmaṇiyā pajāya sadevamanussāya appamāṇo uḷāro obhāso pātubhavati atikkammeva devānaṁ devānubhāvaṁ.
an4.127:1.4	Yāpi tā lokantarikā aghā asaṁvutā andhakārā andhakāratimisā yatthapimesaṁ candimasūriyānaṁ evaṁmahiddhikānaṁ evaṁmahānubhāvānaṁ ābhā nānubhonti, tatthapi appamāṇo uḷāro obhāso pātubhavati atikkammeva devānaṁ devānubhāvaṁ.
an4.127:1.5	Yepi tattha sattā upapannā tepi tenobhāsena aññamaññaṁ sañjānanti:
an4.127:1.6	‘aññepi kira, bho, santi sattā idhūpapannā’ti.
an4.127:1.7	Tathāgatassa, bhikkhave, arahato sammāsambuddhassa pātubhāvā ayaṁ paṭhamo acchariyo abbhuto dhammo pātubhavati.
an4.127:2.1	Puna caparaṁ, bhikkhave, yadā bodhisatto sato sampajāno mātukucchimhā nikkhamati, atha sadevake loke samārake sabrahmake sassamaṇabrāhmaṇiyā pajāya sadevamanussāya appamāṇo uḷāro obhāso pātubhavati atikkammeva devānaṁ devānubhāvaṁ.
an4.127:2.2	Yāpi tā lokantarikā aghā asaṁvutā andhakārā andhakāratimisā yatthapimesaṁ candimasūriyānaṁ evaṁmahiddhikānaṁ evaṁmahānubhāvānaṁ ābhā nānubhonti, tatthapi appamāṇo uḷāro obhāso pātubhavati atikkammeva devānaṁ devānubhāvaṁ.
an4.127:2.3	Yepi tattha sattā upapannā tepi tenobhāsena aññamaññaṁ sañjānanti:
an4.127:2.4	‘aññepi kira, bho, santi sattā idhūpapannā’ti.
an4.127:2.5	Tathāgatassa, bhikkhave, arahato sammāsambuddhassa pātubhāvā ayaṁ dutiyo acchariyo abbhuto dhammo pātubhavati.
an4.127:3.1	Puna caparaṁ, bhikkhave, yadā tathāgato anuttaraṁ sammāsambodhiṁ abhisambujjhati, atha sadevake loke samārake sabrahmake sassamaṇabrāhmaṇiyā pajāya sadevamanussāya appamāṇo uḷāro obhāso pātubhavati atikkammeva devānaṁ devānubhāvaṁ.
an4.127:3.2	Yāpi tā lokantarikā aghā asaṁvutā andhakārā andhakāratimisā yatthapimesaṁ candimasūriyānaṁ evaṁmahiddhikānaṁ evaṁmahānubhāvānaṁ ābhā nānubhonti, tatthapi appamāṇo uḷāro obhāso pātubhavati atikkammeva devānaṁ devānubhāvaṁ.
an4.127:3.3	Yepi tattha sattā upapannā tepi tenobhāsena aññamaññaṁ sañjānanti:
an4.127:3.4	‘aññepi kira, bho, santi sattā idhūpapannā’ti.
an4.127:3.5	Tathāgatassa, bhikkhave, arahato sammāsambuddhassa pātubhāvā ayaṁ tatiyo acchariyo abbhuto dhammo pātubhavati.
an4.127:4.1	Puna caparaṁ, bhikkhave, yadā tathāgato anuttaraṁ dhammacakkaṁ pavatteti, atha sadevake loke samārake sabrahmake sassamaṇabrāhmaṇiyā pajāya sadevamanussāya appamāṇo uḷāro obhāso pātubhavati atikkammeva devānaṁ devānubhāvaṁ.
an4.127:4.2	Yāpi tā lokantarikā aghā asaṁvutā andhakārā andhakāratimisā yatthapimesaṁ candimasūriyānaṁ evaṁmahiddhikānaṁ evaṁmahānubhāvānaṁ ābhā nānubhonti, tatthapi appamāṇo uḷāro obhāso pātubhavati atikkammeva devānaṁ devānubhāvaṁ.
an4.127:4.3	Yepi tattha sattā upapannā tepi tenobhāsena aññamaññaṁ sañjānanti:
an4.127:4.4	‘aññepi kira, bho, santi sattā idhūpapannā’ti.
an4.127:4.5	Tathāgatassa, bhikkhave, arahato sammāsambuddhassa pātubhāvā ayaṁ catuttho acchariyo abbhuto dhammo pātubhavati.
an4.127:4.6	Tathāgatassa, bhikkhave, arahato sammāsambuddhassa pātubhāvā ime cattāro acchariyā abbhutā dhammā pātubhavantī”ti.
an4.127:4.7	Sattamaṁ.
an4.128:0.1	Aṅguttara Nikāya 4.128
an4.128:0.2	13. Bhayavagga
an4.128:0.3	Dutiyatathāgataacchariyasutta
an4.128:1.1	“Tathāgatassa, bhikkhave, arahato sammāsambuddhassa pātubhāvā cattāro acchariyā abbhutā dhammā pātubhavanti.
an4.128:1.2	Katame cattāro?
an4.128:1.3	Ālayārāmā, bhikkhave, pajā ālayaratā ālayasammuditā;
an4.128:1.4	sā tathāgatena anālaye dhamme desiyamāne sussūsati sotaṁ odahati aññā cittaṁ upaṭṭhapeti.
an4.128:1.5	Tathāgatassa, bhikkhave, arahato sammāsambuddhassa pātubhāvā ayaṁ paṭhamo acchariyo abbhuto dhammo pātubhavati.
an4.128:2.1	Mānārāmā, bhikkhave, pajā mānaratā mānasammuditā.
an4.128:2.2	Sā tathāgatena mānavinaye dhamme desiyamāne sussūsati sotaṁ odahati aññā cittaṁ upaṭṭhapeti.
an4.128:2.3	Tathāgatassa, bhikkhave, arahato sammāsambuddhassa pātubhāvā ayaṁ dutiyo acchariyo abbhuto dhammo pātubhavati.
an4.128:3.1	Anupasamārāmā, bhikkhave, pajā anupasamaratā anupasamasammuditā.
an4.128:3.2	Sā tathāgatena opasamike dhamme desiyamāne sussūsati sotaṁ odahati aññā cittaṁ upaṭṭhapeti.
an4.128:3.3	Tathāgatassa, bhikkhave, arahato sammāsambuddhassa pātubhāvā ayaṁ tatiyo acchariyo abbhuto dhammo pātubhavati.
an4.128:4.1	Avijjāgatā, bhikkhave, pajā aṇḍabhūtā pariyonaddhā.
an4.128:4.2	Sā tathāgatena avijjāvinaye dhamme desiyamāne sussūsati sotaṁ odahati aññā cittaṁ upaṭṭhapeti.
an4.128:4.3	Tathāgatassa, bhikkhave, arahato sammāsambuddhassa pātubhāvā ayaṁ catuttho acchariyo abbhuto dhammo pātubhavati.
an4.128:4.4	Tathāgatassa, bhikkhave, arahato sammāsambuddhassa pātubhāvā ime cattāro acchariyā abbhutā dhammā pātubhavantī”ti.
an4.128:4.5	Aṭṭhamaṁ.
an4.129:0.1	Aṅguttara Nikāya 4.129
an4.129:0.2	13. Bhayavagga
an4.129:0.3	Ānandaacchariyasutta
an4.129:1.1	“Cattārome, bhikkhave, acchariyā abbhutā dhammā ānande.
an4.129:1.2	Katame cattāro?
an4.129:1.3	Sace, bhikkhave, bhikkhuparisā ānandaṁ dassanāya upasaṅkamati, dassanenapi sā attamanā hoti.
an4.129:1.4	Tatra ce ānando dhammaṁ bhāsati, bhāsitenapi sā attamanā hoti.
an4.129:1.5	Atittāva, bhikkhave, bhikkhuparisā hoti, atha ānando tuṇhī bhavati.
an4.129:2.1	Sace, bhikkhave, bhikkhuniparisā ānandaṁ dassanāya upasaṅkamati, dassanenapi sā attamanā hoti.
an4.129:2.2	Tattha ce ānando dhammaṁ bhāsati, bhāsitenapi sā attamanā hoti.
an4.129:2.3	Atittāva, bhikkhave, bhikkhuniparisā hoti, atha ānando tuṇhī bhavati.
an4.129:3.1	Sace, bhikkhave, upāsakaparisā ānandaṁ dassanāya upasaṅkamati, dassanenapi sā attamanā hoti.
an4.129:3.2	Tatra ce ānando dhammaṁ bhāsati, bhāsitenapi sā attamanā hoti.
an4.129:3.3	Atittāva, bhikkhave, upāsakaparisā hoti, atha ānando tuṇhī bhavati.
an4.129:4.1	Sace, bhikkhave, upāsikāparisā ānandaṁ dassanāya upasaṅkamati, dassanenapi sā attamanā hoti.
an4.129:4.2	Tatra ce ānando dhammaṁ bhāsati, bhāsitenapi sā attamanā hoti.
an4.129:4.3	Atittāva, bhikkhave, upāsikāparisā hoti, atha ānando tuṇhī bhavati.
an4.129:4.4	Ime kho, bhikkhave, cattāro acchariyā abbhutā dhammā ānande”ti.
an4.129:4.5	Navamaṁ.
an4.130:0.1	Aṅguttara Nikāya 4.130
an4.130:0.2	13. Bhayavagga
an4.130:0.3	Cakkavattiacchariyasutta
an4.130:1.1	“Cattārome, bhikkhave, acchariyā abbhutā dhammā raññe cakkavattimhi.
an4.130:1.2	Katame cattāro?
an4.130:1.3	Sace, bhikkhave, khattiyaparisā rājānaṁ cakkavattiṁ dassanāya upasaṅkamati, dassanenapi sā attamanā hoti.
an4.130:1.4	Tatra ce rājā cakkavattī bhāsati, bhāsitenapi sā attamanā hoti.
an4.130:1.5	Atittāva, bhikkhave, khattiyaparisā hoti, atha rājā cakkavattī tuṇhī bhavati.
an4.130:2.1	Sace, bhikkhave, brāhmaṇaparisā rājānaṁ cakkavattiṁ dassanāya upasaṅkamati, dassanenapi sā attamanā hoti.
an4.130:2.2	Tatra ce rājā cakkavattī bhāsati, bhāsitenapi sā attamanā hoti.
an4.130:2.3	Atittāva, bhikkhave, brāhmaṇaparisā hoti, atha rājā cakkavattī tuṇhī bhavati.
an4.130:3.1	Sace, bhikkhave, gahapatiparisā rājānaṁ cakkavattiṁ dassanāya upasaṅkamati, dassanenapi sā attamanā hoti.
an4.130:3.2	Tatra ce rājā cakkavattī bhāsati, bhāsitenapi sā attamanā hoti.
an4.130:3.3	Atittāva, bhikkhave, gahapatiparisā hoti, atha rājā cakkavattī tuṇhī bhavati.
an4.130:4.1	Sace, bhikkhave, samaṇaparisā rājānaṁ cakkavattiṁ dassanāya upasaṅkamati, dassanenapi sā attamanā hoti.
an4.130:4.2	Tatra ce rājā cakkavattī bhāsati, bhāsitenapi sā attamanā hoti.
an4.130:4.3	Atittāva, bhikkhave, samaṇaparisā hoti, atha rājā cakkavattī tuṇhī bhavati.
an4.130:4.4	Ime kho, bhikkhave, cattāro acchariyā abbhutā dhammā raññe cakkavattimhi.
an4.130:5.1	Evamevaṁ kho, bhikkhave, cattāro acchariyā abbhutā dhammā ānande.
an4.130:5.2	Katame cattāro?
an4.130:5.3	Sace, bhikkhave, bhikkhuparisā ānandaṁ dassanāya upasaṅkamati, dassanenapi sā attamanā hoti.
an4.130:5.4	Tatra ce ānando dhammaṁ bhāsati, bhāsitenapi sā attamanā hoti.
an4.130:5.5	Atittāva, bhikkhave, bhikkhuparisā hoti, atha ānando tuṇhī bhavati.
an4.130:6.1	Sace, bhikkhave, bhikkhuniparisā …pe… sace, bhikkhave, upāsakaparisā …pe… sace, bhikkhave, upāsikāparisā ānandaṁ dassanāya upasaṅkamati, dassanenapi sā attamanā hoti.
an4.130:6.2	Tatra ce ānando dhammaṁ bhāsati, bhāsitenapi sā attamanā hoti.
an4.130:6.3	Atittāva, bhikkhave, upāsikāparisā hoti, atha ānando tuṇhī bhavati.
an4.130:6.4	Ime kho, bhikkhave, cattāro acchariyā abbhutā dhammā ānande”ti.
an4.130:6.5	Dasamaṁ.
an4.130:6.6	Bhayavaggo tatiyo.
an4.130:7.0	Tassuddānaṁ
an4.130:7.1	Attānuvādaūmi ca,
an4.130:7.2	dve ca nānā dve ca honti;
an4.130:7.3	Mettā dve ca acchariyā,
an4.130:7.4	aparā ca tathā duveti.
an4.131:0.1	Aṅguttara Nikāya 4.131
an4.131:0.2	14. Puggalavagga
an4.131:0.3	Saṁyojanasutta
an4.131:1.1	“Cattārome, bhikkhave, puggalā santo saṁvijjamānā lokasmiṁ.
an4.131:1.2	Katame cattāro?
an4.131:1.3	Idha, bhikkhave, ekaccassa puggalassa orambhāgiyāni saṁyojanāni appahīnāni honti, upapattipaṭilābhiyāni saṁyojanāni appahīnāni honti, bhavapaṭilābhiyāni saṁyojanāni appahīnāni honti.
an4.131:2.1	Idha pana, bhikkhave, ekaccassa puggalassa orambhāgiyāni saṁyojanāni pahīnāni honti, upapattipaṭilābhiyāni saṁyojanāni appahīnāni honti, bhavapaṭilābhiyāni saṁyojanāni appahīnāni honti.
an4.131:3.1	Idha pana, bhikkhave, ekaccassa puggalassa orambhāgiyāni saṁyojanāni pahīnāni honti, upapattipaṭilābhiyāni saṁyojanāni pahīnāni honti, bhavapaṭilābhiyāni saṁyojanāni appahīnāni honti.
an4.131:4.1	Idha pana, bhikkhave, ekaccassa puggalassa orambhāgiyāni saṁyojanāni pahīnāni honti, upapattipaṭilābhiyāni saṁyojanāni pahīnāni honti, bhavapaṭilābhiyāni saṁyojanāni pahīnāni honti.
an4.131:5.1	Katamassa, bhikkhave, puggalassa orambhāgiyāni saṁyojanāni appahīnāni, upapattipaṭilābhiyāni saṁyojanāni appahīnāni, bhavapaṭilābhiyāni saṁyojanāni appahīnāni?
an4.131:5.2	Sakadāgāmissa.
an4.131:5.3	Imassa kho, bhikkhave, puggalassa orambhāgiyāni saṁyojanāni appahīnāni, upapattipaṭilābhiyāni saṁyojanāni appahīnāni, bhavapaṭilābhiyāni saṁyojanāni appahīnāni.
an4.131:6.1	Katamassa, bhikkhave, puggalassa orambhāgiyāni saṁyojanāni pahīnāni, upapattipaṭilābhiyāni saṁyojanāni appahīnāni, bhavapaṭilābhiyāni saṁyojanāni appahīnāni?
an4.131:6.2	Uddhaṁsotassa akaniṭṭhagāmino.
an4.131:6.3	Imassa kho, bhikkhave, puggalassa orambhāgiyāni saṁyojanāni pahīnāni, upapattipaṭilābhiyāni saṁyojanāni appahīnāni, bhavapaṭilābhiyāni saṁyojanāni appahīnāni.
an4.131:7.1	Katamassa, bhikkhave, puggalassa orambhāgiyāni saṁyojanāni pahīnāni, upapattipaṭilābhiyāni saṁyojanāni pahīnāni, bhavapaṭilābhiyāni saṁyojanāni appahīnāni?
an4.131:7.2	Antarāparinibbāyissa.
an4.131:7.3	Imassa kho, bhikkhave, puggalassa orambhāgiyāni saṁyojanāni pahīnāni, upapattipaṭilābhiyāni saṁyojanāni pahīnāni, bhavapaṭilābhiyāni saṁyojanāni appahīnāni.
an4.131:8.1	Katamassa, bhikkhave, puggalassa orambhāgiyāni saṁyojanāni pahīnāni, upapattipaṭilābhiyāni saṁyojanāni pahīnāni, bhavapaṭilābhiyāni saṁyojanāni pahīnāni?
an4.131:8.2	Arahato.
an4.131:8.3	Imassa kho, bhikkhave, puggalassa orambhāgiyāni saṁyojanāni pahīnāni, upapattipaṭilābhiyāni saṁyojanāni pahīnāni, bhavapaṭilābhiyāni saṁyojanāni pahīnāni.
an4.131:8.4	Ime kho, bhikkhave, cattāro puggalā santo saṁvijjamānā lokasmin”ti.
an4.131:8.5	Paṭhamaṁ.
an4.132:0.1	Aṅguttara Nikāya 4.132
an4.132:0.2	14. Puggalavagga
an4.132:0.3	Paṭibhānasutta
an4.132:1.1	“Cattārome, bhikkhave, puggalā santo saṁvijjamānā lokasmiṁ.
an4.132:1.2	Katame cattāro?
an4.132:1.3	Yuttappaṭibhāno, no muttappaṭibhāno;
an4.132:1.4	muttappaṭibhāno, no yuttappaṭibhāno;
an4.132:1.5	yuttappaṭibhāno ca muttappaṭibhāno ca;
an4.132:1.6	neva yuttappaṭibhāno na muttappaṭibhāno—
an4.132:1.7	ime kho, bhikkhave, cattāro puggalā santo saṁvijjamānā lokasmin”ti.
an4.132:1.8	Dutiyaṁ.
an4.133:0.1	Aṅguttara Nikāya 4.133
an4.133:0.2	14. Puggalavagga
an4.133:0.3	Ugghaṭitaññūsutta
an4.133:1.1	“Cattārome, bhikkhave, puggalā santo saṁvijjamānā lokasmiṁ.
an4.133:1.2	Katame cattāro?
an4.133:1.3	Ugghaṭitaññū, vipañcitaññū, neyyo, padaparamo—
an4.133:1.4	Ime kho, bhikkhave, cattāro puggalā santo saṁvijjamānā lokasmin”ti.
an4.133:1.5	Tatiyaṁ.
an4.134:0.1	Aṅguttara Nikāya 4.134
an4.134:0.2	14. Puggalavagga
an4.134:0.3	Uṭṭhānaphalasutta
an4.134:1.1	“Cattārome, bhikkhave, puggalā santo saṁvijjamānā lokasmiṁ.
an4.134:1.2	Katame cattāro?
an4.134:1.3	Uṭṭhānaphalūpajīvī na kammaphalūpajīvī,
an4.134:1.4	kammaphalūpajīvī na uṭṭhānaphalūpajīvī,
an4.134:1.5	uṭṭhānaphalūpajīvī ceva kammaphalūpajīvī ca,
an4.134:1.6	neva uṭṭhānaphalūpajīvī na kammaphalūpajīvī—
an4.134:1.7	Ime kho, bhikkhave, cattāro puggalā santo saṁvijjamānā lokasmin”ti.
an4.134:1.8	Catutthaṁ.
an4.135:0.1	Aṅguttara Nikāya 4.135
an4.135:0.2	14. Puggalavagga
an4.135:0.3	Sāvajjasutta
an4.135:1.1	“Cattārome, bhikkhave, puggalā santo saṁvijjamānā lokasmiṁ.
an4.135:1.2	Katame cattāro?
an4.135:1.3	Sāvajjo, vajjabahulo, appavajjo, anavajjo.
an4.135:2.1	Kathañca, bhikkhave, puggalo sāvajjo hoti?
an4.135:2.2	Idha, bhikkhave, ekacco puggalo sāvajjena kāyakammena samannāgato hoti, sāvajjena vacīkammena samannāgato hoti, sāvajjena manokammena samannāgato hoti.
an4.135:2.3	Evaṁ kho, bhikkhave, puggalo sāvajjo hoti.
an4.135:3.1	Kathañca, bhikkhave, puggalo vajjabahulo hoti?
an4.135:3.2	Idha, bhikkhave, ekacco puggalo sāvajjena bahulaṁ kāyakammena samannāgato hoti, appaṁ anavajjena;
an4.135:3.3	sāvajjena bahulaṁ vacīkammena samannāgato hoti, appaṁ anavajjena;
an4.135:3.4	sāvajjena bahulaṁ manokammena samannāgato hoti, appaṁ anavajjena.
an4.135:3.5	Evaṁ kho, bhikkhave, puggalo vajjabahulo hoti.
an4.135:4.1	Kathañca, bhikkhave, puggalo appavajjo hoti?
an4.135:4.2	Idha, bhikkhave, ekacco puggalo anavajjena bahulaṁ kāyakammena samannāgato hoti, appaṁ sāvajjena;
an4.135:4.3	anavajjena bahulaṁ vacīkammena samannāgato hoti, appaṁ sāvajjena;
an4.135:4.4	anavajjena bahulaṁ manokammena samannāgato hoti, appaṁ sāvajjena.
an4.135:4.5	Evaṁ kho, bhikkhave, puggalo appavajjo hoti.
an4.135:5.1	Kathañca, bhikkhave, puggalo anavajjo hoti?
an4.135:5.2	Idha, bhikkhave, ekacco puggalo anavajjena kāyakammena samannāgato hoti, anavajjena vacīkammena samannāgato hoti, anavajjena manokammena samannāgato hoti.
an4.135:5.3	Evaṁ kho, bhikkhave, puggalo anavajjo hoti.
an4.135:5.4	Ime kho, bhikkhave, cattāro puggalā santo saṁvijjamānā lokasmin”ti.
an4.135:5.5	Pañcamaṁ.
an4.136:0.1	Aṅguttara Nikāya 4.136
an4.136:0.2	14. Puggalavagga
an4.136:0.3	Paṭhamasīlasutta
an4.136:1.1	“Cattārome, bhikkhave, puggalā santo saṁvijjamānā lokasmiṁ.
an4.136:1.2	Katame cattāro?
an4.136:1.3	Idha, bhikkhave, ekacco puggalo sīlesu na paripūrakārī hoti, samādhismiṁ na paripūrakārī, paññāya na paripūrakārī.
an4.136:2.1	Idha pana, bhikkhave, ekacco puggalo sīlesu paripūrakārī hoti, samādhismiṁ na paripūrakārī, paññāya na paripūrakārī.
an4.136:3.1	Idha pana, bhikkhave, ekacco puggalo sīlesu paripūrakārī hoti, samādhismiṁ paripūrakārī, paññāya na paripūrakārī.
an4.136:4.1	Idha pana, bhikkhave, ekacco puggalo sīlesu paripūrakārī hoti, samādhismiṁ paripūrakārī, paññāya paripūrakārī.
an4.136:4.2	Ime kho, bhikkhave, cattāro puggalā santo saṁvijjamānā lokasmin”ti.
an4.136:4.3	Chaṭṭhaṁ.
an4.137:0.1	Aṅguttara Nikāya 4.137
an4.137:0.2	14. Puggalavagga
an4.137:0.3	Dutiyasīlasutta
an4.137:1.1	“Cattārome, bhikkhave, puggalā santo saṁvijjamānā lokasmiṁ.
an4.137:1.2	Katame cattāro?
an4.137:1.3	Idha, bhikkhave, ekacco puggalo na sīlagaru hoti na sīlādhipateyyo, na samādhigaru hoti na samādhādhipateyyo, na paññāgaru hoti na paññādhipateyyo.
an4.137:2.1	Idha pana, bhikkhave, ekacco puggalo sīlagaru hoti sīlādhipateyyo, na samādhigaru hoti na samādhādhipateyyo, na paññāgaru hoti na paññādhipateyyo.
an4.137:3.1	Idha pana, bhikkhave, ekacco puggalo sīlagaru hoti sīlādhipateyyo, samādhigaru hoti samādhādhipateyyo, na paññāgaru hoti na paññādhipateyyo.
an4.137:4.1	Idha pana, bhikkhave, ekacco puggalo sīlagaru hoti sīlādhipateyyo, samādhigaru hoti samādhādhipateyyo, paññāgaru hoti paññādhipateyyo.
an4.137:4.2	Ime kho, bhikkhave, cattāro puggalā santo saṁvijjamānā lokasmin”ti.
an4.137:4.3	Sattamaṁ.
an4.138:0.1	Aṅguttara Nikāya 4.138
an4.138:0.2	14. Puggalavagga
an4.138:0.3	Nikaṭṭhasutta
an4.138:1.1	“Cattārome, bhikkhave, puggalā santo saṁvijjamānā lokasmiṁ.
an4.138:1.2	Katame cattāro?
an4.138:1.3	Nikaṭṭhakāyo anikaṭṭhacitto,
an4.138:1.4	anikaṭṭhakāyo nikaṭṭhacitto,
an4.138:1.5	anikaṭṭhakāyo ca anikaṭṭhacitto ca,
an4.138:1.6	nikaṭṭhakāyo ca nikaṭṭhacitto ca.
an4.138:2.1	Kathañca, bhikkhave, puggalo nikaṭṭhakāyo hoti anikaṭṭhacitto?
an4.138:2.2	Idha, bhikkhave, ekacco puggalo araññavanapatthāni pantāni senāsanāni paṭisevati.
an4.138:2.3	So tattha kāmavitakkampi vitakketi byāpādavitakkampi vitakketi vihiṁsāvitakkampi vitakketi.
an4.138:2.4	Evaṁ kho, bhikkhave, puggalo nikaṭṭhakāyo hoti anikaṭṭhacitto.
an4.138:3.1	Kathañca, bhikkhave, puggalo anikaṭṭhakāyo hoti nikaṭṭhacitto?
an4.138:3.2	Idha, bhikkhave, ekacco puggalo naheva kho araññavanapatthāni pantāni senāsanāni paṭisevati.
an4.138:3.3	So tattha nekkhammavitakkampi vitakketi abyāpādavitakkampi vitakketi avihiṁsāvitakkampi vitakketi.
an4.138:3.4	Evaṁ kho, bhikkhave, puggalo anikaṭṭhakāyo hoti nikaṭṭhacitto.
an4.138:4.1	Kathañca, bhikkhave, puggalo anikaṭṭhakāyo ca hoti anikaṭṭhacitto ca?
an4.138:4.2	Idha, bhikkhave, ekacco puggalo naheva kho araññavanapatthāni pantāni senāsanāni paṭisevati.
an4.138:4.3	So tattha kāmavitakkampi vitakketi byāpādavitakkampi vitakketi vihiṁsāvitakkampi vitakketi.
an4.138:4.4	Evaṁ kho, bhikkhave, puggalo anikaṭṭhakāyo ca hoti anikaṭṭhacitto ca.
an4.138:5.1	Kathañca, bhikkhave, puggalo nikaṭṭhakāyo ca hoti nikaṭṭhacitto ca?
an4.138:5.2	Idha, bhikkhave, ekacco puggalo araññavanapatthāni pantāni senāsanāni paṭisevati.
an4.138:5.3	So tattha nekkhammavitakkampi vitakketi abyāpādavitakkampi vitakketi avihiṁsāvitakkampi vitakketi.
an4.138:5.4	Evaṁ kho, bhikkhave, puggalo nikaṭṭhakāyo ca hoti nikaṭṭhacitto ca.
an4.138:5.5	Ime kho, bhikkhave, cattāro puggalā santo saṁvijjamānā lokasmin”ti.
an4.138:5.6	Aṭṭhamaṁ.
an4.139:0.1	Aṅguttara Nikāya 4.139
an4.139:0.2	14. Puggalavagga
an4.139:0.3	Dhammakathikasutta
an4.139:1.1	“Cattārome, bhikkhave, dhammakathikā.
an4.139:1.2	Katame cattāro?
an4.139:1.3	Idha, bhikkhave, ekacco dhammakathiko appañca bhāsati asahitañca;
an4.139:1.4	parisā cassa na kusalā hoti sahitāsahitassa.
an4.139:1.5	Evarūpo, bhikkhave, dhammakathiko evarūpāya parisāya dhammakathikotveva saṅkhaṁ gacchati.
an4.139:2.1	Idha pana, bhikkhave, ekacco dhammakathiko appañca bhāsati sahitañca;
an4.139:2.2	parisā cassa kusalā hoti sahitāsahitassa.
an4.139:2.3	Evarūpo, bhikkhave, dhammakathiko evarūpāya parisāya dhammakathikotveva saṅkhaṁ gacchati.
an4.139:3.1	Idha pana, bhikkhave, ekacco dhammakathiko bahuñca bhāsati asahitañca;
an4.139:3.2	parisā cassa na kusalā hoti sahitāsahitassa.
an4.139:3.3	Evarūpo, bhikkhave, dhammakathiko evarūpāya parisāya dhammakathikotveva saṅkhaṁ gacchati.
an4.139:4.1	Idha pana, bhikkhave, ekacco dhammakathiko bahuñca bhāsati sahitañca;
an4.139:4.2	parisā cassa kusalā hoti sahitāsahitassa.
an4.139:4.3	Evarūpo, bhikkhave, dhammakathiko evarūpāya parisāya dhammakathikotveva saṅkhaṁ gacchati.
an4.139:4.4	Ime kho, bhikkhave, cattāro dhammakathikā”ti.
an4.139:4.5	Navamaṁ.
an4.140:0.1	Aṅguttara Nikāya 4.140
an4.140:0.2	14. Puggalavagga
an4.140:0.3	Vādīsutta
an4.140:1.1	“Cattārome, bhikkhave, vādī.
an4.140:1.2	Katame cattāro?
an4.140:1.3	Atthi, bhikkhave, vādī atthato pariyādānaṁ gacchati, no byañjanato;
an4.140:1.4	atthi, bhikkhave, vādī byañjanato pariyādānaṁ gacchati, no atthato;
an4.140:1.5	atthi, bhikkhave, vādī atthato ca byañjanato ca pariyādānaṁ gacchati;
an4.140:1.6	atthi, bhikkhave, vādī nevatthato no byañjanato pariyādānaṁ gacchati.
an4.140:1.7	Ime kho, bhikkhave, cattāro vādī.
an4.140:1.8	Aṭṭhānametaṁ, bhikkhave, anavakāso yaṁ catūhi paṭisambhidāhi samannāgato atthato vā byañjanato vā pariyādānaṁ gaccheyyā”ti.
an4.140:1.9	Dasamaṁ.
an4.140:1.10	Puggalavaggo catuttho.
an4.140:2.0	Tassuddānaṁ
an4.140:2.1	Saṁyojanaṁ paṭibhāno,
an4.140:2.2	ugghaṭitaññu uṭṭhānaṁ;
an4.140:2.3	Sāvajjo dve ca sīlāni,
an4.140:2.4	nikaṭṭha dhamma vādī cāti.
an4.141:0.1	Aṅguttara Nikāya 4.141
an4.141:0.2	15. Ābhāvagga
an4.141:0.3	Ābhāsutta
an4.141:1.1	“Catasso imā, bhikkhave, ābhā.
an4.141:1.2	Katamā catasso?
an4.141:1.3	Candābhā, sūriyābhā, aggābhā, paññābhā—
an4.141:1.4	imā kho, bhikkhave, catasso ābhā.
an4.141:1.5	Etadaggaṁ, bhikkhave, imāsaṁ catunnaṁ ābhānaṁ yadidaṁ paññābhā”ti.
an4.141:1.6	Paṭhamaṁ.
an4.142:0.1	Aṅguttara Nikāya 4.142
an4.142:0.2	15. Ābhāvagga
an4.142:0.3	Pabhāsutta
an4.142:1.1	“Catasso imā, bhikkhave, pabhā.
an4.142:1.2	Katamā catasso?
an4.142:1.3	Candappabhā, sūriyappabhā, aggippabhā, paññāpabhā—
an4.142:1.4	imā kho, bhikkhave, catasso pabhā.
an4.142:1.5	Etadaggaṁ, bhikkhave, imāsaṁ catunnaṁ pabhānaṁ yadidaṁ paññāpabhā”ti.
an4.142:1.6	Dutiyaṁ.
an4.143:0.1	Aṅguttara Nikāya 4.143
an4.143:0.2	15. Ābhāvagga
an4.143:0.3	Ālokasutta
an4.143:1.1	“Cattārome, bhikkhave, ālokā.
an4.143:1.2	Katame cattāro?
an4.143:1.3	Candāloko, sūriyāloko, aggāloko, paññāloko—
an4.143:1.4	Ime kho, bhikkhave, cattāro ālokā.
an4.143:1.5	Etadaggaṁ, bhikkhave, imesaṁ catunnaṁ ālokānaṁ yadidaṁ paññāloko”ti.
an4.143:1.6	Tatiyaṁ.
an4.144:0.1	Aṅguttara Nikāya 4.144
an4.144:0.2	15. Ābhāvagga
an4.144:0.3	Obhāsasutta
an4.144:1.1	“Cattārome, bhikkhave, obhāsā.
an4.144:1.2	Katame cattāro?
an4.144:1.3	Candobhāso, sūriyobhāso, aggobhāso, paññobhāso—
an4.144:1.4	Ime kho, bhikkhave, cattāro obhāsā.
an4.144:1.5	Etadaggaṁ, bhikkhave, imesaṁ catunnaṁ obhāsānaṁ yadidaṁ paññobhāso”ti.
an4.144:1.6	Catutthaṁ.
an4.145:0.1	Aṅguttara Nikāya 4.145
an4.145:0.2	15. Ābhāvagga
an4.145:0.3	Pajjotasutta
an4.145:1.1	“Cattārome, bhikkhave, pajjotā.
an4.145:1.2	Katame cattāro?
an4.145:1.3	Candapajjoto, sūriyapajjoto, aggipajjoto, paññāpajjoto—
an4.145:1.4	Ime kho, bhikkhave, cattāro pajjotā.
an4.145:1.5	Etadaggaṁ, bhikkhave, imesaṁ catunnaṁ pajjotānaṁ yadidaṁ paññāpajjoto”ti.
an4.145:1.6	Pañcamaṁ.
an4.146:0.1	Aṅguttara Nikāya 4.146
an4.146:0.2	15. Ābhāvagga
an4.146:0.3	Paṭhamakālasutta
an4.146:1.1	“Cattārome, bhikkhave, kālā.
an4.146:1.2	Katame cattāro?
an4.146:1.3	Kālena dhammassavanaṁ, kālena dhammasākacchā, kālena sammasanā, kālena vipassanā—
an4.146:1.4	Ime kho, bhikkhave, cattāro kālā”ti.
an4.146:1.5	Chaṭṭhaṁ.
an4.147:0.1	Aṅguttara Nikāya 4.147
an4.147:0.2	15. Ābhāvagga
an4.147:0.3	Dutiyakālasutta
an4.147:1.1	“Cattārome, bhikkhave, kālā sammā bhāviyamānā sammā anuparivattiyamānā anupubbena āsavānaṁ khayaṁ pāpenti.
an4.147:1.2	Katame cattāro?
an4.147:1.3	Kālena dhammassavanaṁ, kālena dhammasākacchā, kālena sammasanā, kālena vipassanā—
an4.147:1.4	Ime kho, bhikkhave, cattāro kālā sammā bhāviyamānā sammā anuparivattiyamānā anupubbena āsavānaṁ khayaṁ pāpenti.
an4.147:2.1	Seyyathāpi, bhikkhave, uparipabbate thullaphusitake deve vassante taṁ udakaṁ yathāninnaṁ pavattamānaṁ pabbatakandarapadarasākhā paripūreti; pabbatakandarapadarasākhā paripūrā kusobbhe paripūrenti; kusobbhā paripūrā mahāsobbhe paripūrenti; mahāsobbhā paripūrā kunnadiyo paripūrenti; kunnadiyo paripūrā mahānadiyo paripūrenti; mahānadiyo paripūrā samuddaṁ paripūrenti.
an4.147:2.2	Evamevaṁ kho, bhikkhave, ime cattāro kālā sammā bhāviyamānā sammā anuparivattiyamānā anupubbena āsavānaṁ khayaṁ pāpentī”ti.
an4.147:2.3	Sattamaṁ.
an4.148:0.1	Aṅguttara Nikāya 4.148
an4.148:0.2	15. Ābhāvagga
an4.148:0.3	Duccaritasutta
an4.148:1.1	“Cattārimāni, bhikkhave, vacīduccaritāni.
an4.148:1.2	Katamāni cattāri?
an4.148:1.3	Musāvādo, pisuṇā vācā, pharusā vācā, samphappalāpo—
an4.148:1.4	Imāni kho, bhikkhave, cattāri vacīduccaritānī”ti.
an4.148:1.5	Aṭṭhamaṁ.
an4.149:0.1	Aṅguttara Nikāya 4.149
an4.149:0.2	15. Ābhāvagga
an4.149:0.3	Sucaritasutta
an4.149:1.1	“Cattārimāni, bhikkhave, vacīsucaritāni.
an4.149:1.2	Katamāni cattāri?
an4.149:1.3	Saccavācā, apisuṇā vācā, saṇhā vācā, mantabhāsā—
an4.149:1.4	Imāni kho, bhikkhave, cattāri vacīsucaritānī”ti.
an4.149:1.5	Navamaṁ.
an4.150:0.1	Aṅguttara Nikāya 4.150
an4.150:0.2	15. Ābhāvagga
an4.150:0.3	Sārasutta
an4.150:1.1	“Cattārome, bhikkhave, sārā.
an4.150:1.2	Katame cattāro?
an4.150:1.3	Sīlasāro, samādhisāro, paññāsāro, vimuttisāro—
an4.150:1.4	Ime kho, bhikkhave, cattāro sārā”ti.
an4.150:1.5	Dasamaṁ.
an4.150:1.6	Ābhāvaggo pañcamo.
an4.150:2.0	Tassuddānaṁ
an4.150:2.1	Ābhā pabhā ca ālokā,
an4.150:2.2	obhāsā ceva pajjotā;
an4.150:2.3	Dve kālā caritā dve ca,
an4.150:2.4	honti sārena te dasāti.
an4.150:2.5	Tatiyo paṇṇāsako samatto.
an4.151:0.1	Aṅguttara Nikāya 4.151
an4.151:0.2	16. Indriyavagga
an4.151:0.3	Indriyasutta
an4.151:1.1	“Cattārimāni, bhikkhave, indriyāni.
an4.151:1.2	Katamāni cattāri?
an4.151:1.3	Saddhindriyaṁ, vīriyindriyaṁ, satindriyaṁ, samādhindriyaṁ—
an4.151:1.4	Imāni kho, bhikkhave, cattāri indriyānī”ti.
an4.151:1.5	Paṭhamaṁ.
an4.152:0.1	Aṅguttara Nikāya 4.152
an4.152:0.2	16. Indriyavagga
an4.152:0.3	Saddhābalasutta
an4.152:1.1	“Cattārimāni, bhikkhave, balāni.
an4.152:1.2	Katamāni cattāri?
an4.152:1.3	Saddhābalaṁ, vīriyabalaṁ, satibalaṁ, samādhibalaṁ—
an4.152:1.4	Imāni kho, bhikkhave, cattāri balānī”ti.
an4.152:1.5	Dutiyaṁ.
an4.153:0.1	Aṅguttara Nikāya 4.153
an4.153:0.2	16. Indriyavagga
an4.153:0.3	Paññābalasutta
an4.153:1.1	“Cattārimāni, bhikkhave, balāni.
an4.153:1.2	Katamāni cattāri?
an4.153:1.3	Paññābalaṁ, vīriyabalaṁ, anavajjabalaṁ, saṅgahabalaṁ—
an4.153:1.4	Imāni kho, bhikkhave, cattāri balānī”ti.
an4.153:1.5	Tatiyaṁ.
an4.154:0.1	Aṅguttara Nikāya 4.154
an4.154:0.2	16. Indriyavagga
an4.154:0.3	Satibalasutta
an4.154:1.1	“Cattārimāni, bhikkhave, balāni.
an4.154:1.2	Katamāni cattāri?
an4.154:1.3	Satibalaṁ, samādhibalaṁ, anavajjabalaṁ, saṅgahabalaṁ—
an4.154:1.4	Imāni kho, bhikkhave, cattāri balānī”ti.
an4.154:1.5	Catutthaṁ.
an4.155:0.1	Aṅguttara Nikāya 4.155
an4.155:0.2	16. Indriyavagga
an4.155:0.3	Paṭisaṅkhānabalasutta
an4.155:1.1	“Cattārimāni, bhikkhave, balāni.
an4.155:1.2	Katamāni cattāri?
an4.155:1.3	Paṭisaṅkhānabalaṁ, bhāvanābalaṁ, anavajjabalaṁ, saṅgahabalaṁ—
an4.155:1.4	Imāni kho, bhikkhave, cattāri balānī”ti.
an4.155:1.5	Pañcamaṁ.
an4.156:0.1	Aṅguttara Nikāya 4.156
an4.156:0.2	16. Indriyavagga
an4.156:0.3	Kappasutta
an4.156:1.1	“Cattārimāni, bhikkhave, kappassa asaṅkhyeyyāni.
an4.156:1.2	Katamāni cattāri?
an4.156:1.3	Yadā, bhikkhave, kappo saṁvaṭṭati, taṁ na sukaraṁ saṅkhātuṁ—
an4.156:1.4	ettakāni vassānīti vā, ettakāni vassasatānīti vā, ettakāni vassasahassānīti vā, ettakāni vassasatasahassānīti vā.
an4.156:2.1	Yadā, bhikkhave, kappo saṁvaṭṭo tiṭṭhati, taṁ na sukaraṁ saṅkhātuṁ—
an4.156:2.2	ettakāni vassānīti vā, ettakāni vassasatānīti vā, ettakāni vassasahassānīti vā, ettakāni vassasatasahassānīti vā.
an4.156:3.1	Yadā, bhikkhave, kappo vivaṭṭati, taṁ na sukaraṁ saṅkhātuṁ—
an4.156:3.2	ettakāni vassānīti vā, ettakāni vassasatānīti vā, ettakāni vassasahassānīti vā, ettakāni vassasatasahassānīti vā.
an4.156:4.1	Yadā, bhikkhave, kappo vivaṭṭo tiṭṭhati, taṁ na sukaraṁ saṅkhātuṁ—
an4.156:4.2	ettakāni vassānīti vā, ettakāni vassasatānīti vā, ettakāni vassasahassānīti vā, ettakāni vassasatasahassānīti vā.
an4.156:4.3	Imāni kho, bhikkhave, cattāri kappassa asaṅkhyeyyānī”ti.
an4.156:4.4	Chaṭṭhaṁ.
an4.157:0.1	Aṅguttara Nikāya 4.157
an4.157:0.2	16. Indriyavagga
an4.157:0.3	Rogasutta
an4.157:1.1	“Dveme, bhikkhave, rogā.
an4.157:1.2	Katame dve?
an4.157:1.3	Kāyiko ca rogo cetasiko ca rogo.
an4.157:1.4	Dissanti, bhikkhave, sattā kāyikena rogena ekampi vassaṁ ārogyaṁ paṭijānamānā, dvepi vassāni ārogyaṁ paṭijānamānā, tīṇipi vassāni ārogyaṁ paṭijānamānā, cattāripi vassāni ārogyaṁ paṭijānamānā, pañcapi vassāni ārogyaṁ paṭijānamānā, dasapi vassāni ārogyaṁ paṭijānamānā, vīsatipi vassāni ārogyaṁ paṭijānamānā, tiṁsampi vassāni ārogyaṁ paṭijānamānā, cattārīsampi vassāni ārogyaṁ paṭijānamānā, paññāsampi vassāni ārogyaṁ paṭijānamānā, vassasatampi, bhiyyopi ārogyaṁ paṭijānamānā.
an4.157:1.5	Te, bhikkhave, sattā sudullabhā lokasmiṁ ye cetasikena rogena muhuttampi ārogyaṁ paṭijānanti, aññatra khīṇāsavehi.
an4.157:2.1	Cattārome, bhikkhave, pabbajitassa rogā.
an4.157:2.2	Katame cattāro?
an4.157:2.3	Idha, bhikkhave, bhikkhu mahiccho hoti vighātavā asantuṭṭho itarītaracīvarapiṇḍapātasenāsanagilānappaccayabhesajjaparikkhārena.
an4.157:2.4	So mahiccho samāno vighātavā asantuṭṭho itarītaracīvarapiṇḍapātasenāsanagilānappaccayabhesajjaparikkhārena pāpikaṁ icchaṁ paṇidahati anavaññappaṭilābhāya lābhasakkārasilokappaṭilābhāya.
an4.157:2.5	So uṭṭhahati ghaṭati vāyamati anavaññappaṭilābhāya lābhasakkārasilokappaṭilābhāya.
an4.157:2.6	So saṅkhāya kulāni upasaṅkamati, saṅkhāya nisīdati, saṅkhāya dhammaṁ bhāsati, saṅkhāya uccārapassāvaṁ sandhāreti.
an4.157:2.7	Ime kho, bhikkhave, cattāro pabbajitassa rogā.
an4.157:3.1	Tasmātiha, bhikkhave, evaṁ sikkhitabbaṁ:
an4.157:3.2	‘na mahicchā bhavissāma vighātavanto asantuṭṭhā itarītaracīvarapiṇḍapātasenāsanagilānappaccayabhesajjaparikkhārena, na pāpikaṁ icchaṁ paṇidahissāma anavaññappaṭilābhāya lābhasakkārasilokappaṭilābhāya, na uṭṭhahissāma na ghaṭessāma na vāyamissāma anavaññappaṭilābhāya lābhasakkārasilokappaṭilābhāya, khamā bhavissāma sītassa uṇhassa jighacchāya pipāsāya ḍaṁsamakasavātātapasarīsapasamphassānaṁ duruttānaṁ durāgatānaṁ vacanapathānaṁ, uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātikā bhavissāmā’ti.
an4.157:3.3	Evañhi vo, bhikkhave, sikkhitabban”ti.
an4.157:3.4	Sattamaṁ.
an4.158:0.1	Aṅguttara Nikāya 4.158
an4.158:0.2	16. Indriyavagga
an4.158:0.3	Parihānisutta
an4.158:1.1	Tatra kho āyasmā sāriputto bhikkhū āmantesi:
an4.158:1.2	“āvuso bhikkhave”ti.
an4.158:1.3	“Āvuso”ti kho te bhikkhū āyasmato sāriputtassa paccassosuṁ.
an4.158:1.4	Āyasmā sāriputto etadavoca:
an4.158:2.1	“Yo hi koci, āvuso, bhikkhu vā bhikkhunī vā cattāro dhamme attani samanupassati, niṭṭhamettha gantabbaṁ:
an4.158:2.2	‘parihāyāmi kusalehi dhammehi’.
an4.158:2.3	Parihānametaṁ vuttaṁ bhagavatā.
an4.158:2.4	Katame cattāro?
an4.158:2.5	Rāgavepullattaṁ, dosavepullattaṁ, mohavepullattaṁ, gambhīresu kho panassa ṭhānāṭhānesu paññācakkhu na kamati.
an4.158:2.6	Yo hi koci, āvuso, bhikkhu vā bhikkhunī vā ime cattāro dhamme attani samanupassati, niṭṭhamettha gantabbaṁ:
an4.158:2.7	‘parihāyāmi kusalehi dhammehi’.
an4.158:2.8	Parihānametaṁ vuttaṁ bhagavatā.
an4.158:3.1	Yo hi koci, āvuso, bhikkhu vā bhikkhunī vā cattāro dhamme attani samanupassati, niṭṭhamettha gantabbaṁ:
an4.158:3.2	‘na parihāyāmi kusalehi dhammehi’.
an4.158:3.3	Aparihānametaṁ vuttaṁ bhagavatā.
an4.158:3.4	Katame cattāro?
an4.158:3.5	Rāgatanuttaṁ, dosatanuttaṁ, mohatanuttaṁ, gambhīresu kho panassa ṭhānāṭhānesu paññācakkhu kamati.
an4.158:3.6	Yo hi koci, āvuso, bhikkhu vā bhikkhunī vā ime cattāro dhamme attani samanupassati, niṭṭhamettha gantabbaṁ:
an4.158:3.7	‘na parihāyāmi kusalehi dhammehi’.
an4.158:3.8	Aparihānametaṁ vuttaṁ bhagavatā”ti.
an4.158:3.9	Aṭṭhamaṁ.
an4.159:0.1	Aṅguttara Nikāya 4.159
an4.159:0.2	16. Indriyavagga
an4.159:0.3	Bhikkhunīsutta
an4.159:1.1	Evaṁ me sutaṁ—
an4.159:1.2	ekaṁ samayaṁ āyasmā ānando kosambiyaṁ viharati ghositārāme.
an4.159:1.3	Atha kho aññatarā bhikkhunī aññataraṁ purisaṁ āmantesi:
an4.159:1.4	“ehi tvaṁ, ambho purisa, yenayyo ānando tenupasaṅkama; upasaṅkamitvā mama vacanena ayyassa ānandassa pāde sirasā vanda:
an4.159:1.5	‘itthannāmā, bhante, bhikkhunī ābādhikinī dukkhitā bāḷhagilānā.
an4.159:1.6	Sā ayyassa ānandassa pāde sirasā vandatī’ti. Evañca vadehi:
an4.159:1.7	‘sādhu kira, bhante, ayyo ānando yena bhikkhunupassayo yena sā bhikkhunī tenupasaṅkamatu anukampaṁ upādāyā’”ti.
an4.159:1.8	“Evaṁ, ayye”ti kho so puriso tassā bhikkhuniyā paṭissutvā yenāyasmā ānando tenupasaṅkami; upasaṅkamitvā āyasmantaṁ ānandaṁ abhivādetvā ekamantaṁ nisīdi. Ekamantaṁ nisinno kho so puriso āyasmantaṁ ānandaṁ etadavoca:
an4.159:2.1	“Itthannāmā, bhante, bhikkhunī ābādhikinī dukkhitā bāḷhagilānā.
an4.159:2.2	Sā āyasmato ānandassa pāde sirasā vandati, evañca vadeti:
an4.159:2.3	‘sādhu kira, bhante, āyasmā ānando yena bhikkhunupassayo yena sā bhikkhunī tenupasaṅkamatu anukampaṁ upādāyā’”ti.
an4.159:2.4	Adhivāsesi kho āyasmā ānando tuṇhībhāvena.
an4.159:3.1	Atha kho āyasmā ānando nivāsetvā pattacīvaramādāya yena bhikkhunupassayo yena sā bhikkhunī tenupasaṅkami.
an4.159:3.2	Addasā kho sā bhikkhunī āyasmantaṁ ānandaṁ dūratova āgacchantaṁ.
an4.159:3.3	Disvā sasīsaṁ pārupitvā mañcake nipajji.
an4.159:3.4	Atha kho āyasmā ānando yena sā bhikkhunī tenupasaṅkami; upasaṅkamitvā paññatte āsane nisīdi. Nisajja kho āyasmā ānando taṁ bhikkhuniṁ etadavoca:
an4.159:4.1	“Āhārasambhūto ayaṁ, bhagini, kāyo āhāraṁ nissāya.
an4.159:4.2	Āhāro pahātabbo.
an4.159:4.3	Taṇhāsambhūto ayaṁ, bhagini, kāyo taṇhaṁ nissāya.
an4.159:4.4	Taṇhā pahātabbā.
an4.159:4.5	Mānasambhūto ayaṁ, bhagini, kāyo mānaṁ nissāya.
an4.159:4.6	Māno pahātabbo.
an4.159:4.7	Methunasambhūto ayaṁ, bhagini, kāyo.
an4.159:4.8	Methune ca setughāto vutto bhagavatā.
an4.159:5.1	‘Āhārasambhūto ayaṁ, bhagini, kāyo āhāraṁ nissāya.
an4.159:5.2	Āhāro pahātabbo’ti, iti kho panetaṁ vuttaṁ.
an4.159:5.3	Kiñcetaṁ paṭicca vuttaṁ?
an4.159:5.4	Idha, bhagini, bhikkhu paṭisaṅkhā yoniso āhāraṁ āhāreti:
an4.159:5.5	‘neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṁsūparatiyā brahmacariyānuggahāya. Iti purāṇañca vedanaṁ paṭihaṅkhāmi, navañca vedanaṁ na uppādessāmi. Yātrā ca me bhavissati anavajjatā ca phāsuvihāro cā’ti.
an4.159:5.6	So aparena samayena āhāraṁ nissāya āhāraṁ pajahati.
an4.159:5.7	‘Āhārasambhūto ayaṁ, bhagini, kāyo āhāraṁ nissāya āhāro pahātabbo’ti,
an4.159:5.8	iti yaṁ taṁ vuttaṁ idametaṁ paṭicca vuttaṁ.
an4.159:6.1	‘Taṇhāsambhūto ayaṁ, bhagini, kāyo taṇhaṁ nissāya.
an4.159:6.2	Taṇhā pahātabbā’ti, iti kho panetaṁ vuttaṁ.
an4.159:6.3	Kiñcetaṁ paṭicca vuttaṁ?
an4.159:6.4	Idha, bhagini, bhikkhu suṇāti:
an4.159:6.5	‘itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.
an4.159:6.6	Tassa evaṁ hoti:
an4.159:6.7	‘kudāssu nāma ahampi āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissāmī’ti.
an4.159:6.8	So aparena samayena taṇhaṁ nissāya taṇhaṁ pajahati.
an4.159:6.9	‘Taṇhāsambhūto ayaṁ, bhagini, kāyo taṇhaṁ nissāya taṇhā pahātabbā’ti,
an4.159:6.10	iti yaṁ taṁ vuttaṁ idametaṁ paṭicca vuttaṁ.
an4.159:7.1	‘Mānasambhūto ayaṁ, bhagini, kāyo mānaṁ nissāya.
an4.159:7.2	Māno pahātabbo’ti, iti kho panetaṁ vuttaṁ.
an4.159:7.3	Kiñcetaṁ paṭicca vuttaṁ?
an4.159:7.4	Idha, bhagini, bhikkhu suṇāti:
an4.159:7.5	‘itthannāmo kira bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.
an4.159:7.6	Tassa evaṁ hoti:
an4.159:7.7	‘so hi nāma āyasmā āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissati;
an4.159:7.8	kimaṅgaṁ panāhan’ti.
an4.159:7.9	So aparena samayena mānaṁ nissāya mānaṁ pajahati.
an4.159:7.10	‘Mānasambhūto ayaṁ, bhagini, kāyo, mānaṁ nissāya māno pahātabbo’ti,
an4.159:7.11	iti yaṁ taṁ vuttaṁ idametaṁ paṭicca vuttaṁ.
an4.159:8.1	Methunasambhūto ayaṁ, bhagini, kāyo.
an4.159:8.2	Methune ca setughāto vutto bhagavatā”ti.
an4.159:9.1	Atha kho sā bhikkhunī mañcakā vuṭṭhahitvā ekaṁsaṁ uttarāsaṅgaṁ karitvā āyasmato ānandassa pādesu sirasā nipatitvā āyasmantaṁ ānandaṁ etadavoca:
an4.159:9.2	“accayo maṁ, bhante, accagamā, yathābālaṁ yathāmūḷhaṁ yathāakusalaṁ, yāhaṁ evamakāsiṁ.
an4.159:9.3	Tassā me, bhante, ayyo ānando accayaṁ accayato paṭiggaṇhātu, āyatiṁ saṁvarāyā”ti.
an4.159:9.4	“Taggha taṁ, bhagini, accayo accagamā, yathābālaṁ yathāmūḷhaṁ yathāakusalaṁ, yā tvaṁ evamakāsi.
an4.159:9.5	Yato ca kho tvaṁ, bhagini, accayaṁ accayato disvā yathādhammaṁ paṭikarosi, taṁ te mayaṁ paṭiggaṇhāma.
an4.159:9.6	Vuddhi hesā, bhagini, ariyassa vinaye yo accayaṁ accayato disvā yathādhammaṁ paṭikaroti āyatiṁ saṁvaraṁ āpajjatī”ti.
an4.159:9.7	Navamaṁ.
an4.160:0.1	Aṅguttara Nikāya 4.160
an4.160:0.2	16. Indriyavagga
an4.160:0.3	Sugatavinayasutta
an4.160:1.1	“Sugato vā, bhikkhave, loke tiṭṭhamāno sugatavinayo vā tadassa bahujanahitāya bahujanasukhāya lokānukampāya atthāya hitāya sukhāya devamanussānaṁ.
an4.160:2.1	Katamo ca, bhikkhave, sugato?
an4.160:2.2	Idha, bhikkhave, tathāgato loke uppajjati arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā.
an4.160:2.3	Ayaṁ, bhikkhave, sugato.
an4.160:3.1	Katamo ca, bhikkhave, sugatavinayo?
an4.160:3.2	So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an4.160:3.3	Ayaṁ, bhikkhave, sugatavinayo.
an4.160:3.4	Evaṁ sugato vā, bhikkhave, loke tiṭṭhamāno sugatavinayo vā tadassa bahujanahitāya bahujanasukhāya lokānukampāya atthāya hitāya sukhāya devamanussānanti.
an4.160:4.1	Cattārome, bhikkhave, dhammā saddhammassa sammosāya antaradhānāya saṁvattanti.
an4.160:4.2	Katame cattāro?
an4.160:4.3	Idha, bhikkhave, bhikkhū duggahitaṁ suttantaṁ pariyāpuṇanti dunnikkhittehi padabyañjanehi.
an4.160:4.4	Dunnikkhittassa, bhikkhave, padabyañjanassa atthopi dunnayo hoti.
an4.160:4.5	Ayaṁ, bhikkhave, paṭhamo dhammo saddhammassa sammosāya antaradhānāya saṁvattati.
an4.160:5.1	Puna caparaṁ, bhikkhave, bhikkhū dubbacā honti dovacassakaraṇehi dhammehi samannāgatā akkhamā appadakkhiṇaggāhino anusāsaniṁ.
an4.160:5.2	Ayaṁ, bhikkhave, dutiyo dhammo saddhammassa sammosāya antaradhānāya saṁvattati.
an4.160:6.1	Puna caparaṁ, bhikkhave, ye te bhikkhū bahussutā āgatāgamā dhammadharā vinayadharā mātikādharā, te na sakkaccaṁ suttantaṁ paraṁ vācenti.
an4.160:6.2	Tesaṁ accayena chinnamūlako suttanto hoti appaṭisaraṇo.
an4.160:6.3	Ayaṁ, bhikkhave, tatiyo dhammo saddhammassa sammosāya antaradhānāya saṁvattati.
an4.160:7.1	Puna caparaṁ, bhikkhave, therā bhikkhū bāhulikā honti sāthalikā, okkamane pubbaṅgamā, paviveke nikkhittadhurā, na vīriyaṁ ārabhanti appattassa pattiyā anadhigatassa adhigamāya asacchikatassa sacchikiriyāya.
an4.160:7.2	Tesaṁ pacchimā janatā diṭṭhānugatiṁ āpajjati.
an4.160:7.3	Sāpi hoti bāhulikā sāthalikā, okkamane pubbaṅgamā, paviveke nikkhittadhurā, na vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an4.160:7.4	Ayaṁ, bhikkhave, catuttho dhammo saddhammassa sammosāya antaradhānāya saṁvattati.
an4.160:7.5	Ime kho, bhikkhave, cattāro dhammā saddhammassa sammosāya antaradhānāya saṁvattantīti.
an4.160:8.1	Cattārome, bhikkhave, dhammā saddhammassa ṭhitiyā asammosāya anantaradhānāya saṁvattanti.
an4.160:8.2	Katame cattāro?
an4.160:8.3	Idha, bhikkhave, bhikkhū suggahitaṁ suttantaṁ pariyāpuṇanti sunikkhittehi padabyañjanehi.
an4.160:8.4	Sunikkhittassa, bhikkhave, padabyañjanassa atthopi sunayo hoti.
an4.160:8.5	Ayaṁ, bhikkhave, paṭhamo dhammo saddhammassa ṭhitiyā asammosāya anantaradhānāya saṁvattati.
an4.160:9.1	Puna caparaṁ, bhikkhave, bhikkhū suvacā honti sovacassakaraṇehi dhammehi samannāgatā khamā padakkhiṇaggāhino anusāsaniṁ.
an4.160:9.2	Ayaṁ, bhikkhave, dutiyo dhammo saddhammassa ṭhitiyā asammosāya anantaradhānāya saṁvattati.
an4.160:10.1	Puna caparaṁ, bhikkhave, ye te bhikkhū bahussutā āgatāgamā dhammadharā vinayadharā mātikādharā, te sakkaccaṁ suttantaṁ paraṁ vācenti.
an4.160:10.2	Tesaṁ accayena nacchinnamūlako suttanto hoti sappaṭisaraṇo.
an4.160:10.3	Ayaṁ, bhikkhave, tatiyo dhammo saddhammassa ṭhitiyā asammosāya anantaradhānāya saṁvattati.
an4.160:11.1	Puna caparaṁ, bhikkhave, therā bhikkhū na bāhulikā honti na sāthalikā, okkamane nikkhittadhurā, paviveke pubbaṅgamā, vīriyaṁ ārabhanti appattassa pattiyā anadhigatassa adhigamāya asacchikatassa sacchikiriyāya.
an4.160:11.2	Tesaṁ pacchimā janatā diṭṭhānugatiṁ āpajjati.
an4.160:11.3	Sāpi hoti na bāhulikā na sāthalikā, okkamane nikkhittadhurā, paviveke pubbaṅgamā, vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an4.160:11.4	Ayaṁ, bhikkhave, catuttho dhammo saddhammassa ṭhitiyā asammosāya anantaradhānāya saṁvattati.
an4.160:11.5	Ime kho, bhikkhave, cattāro dhammā saddhammassa ṭhitiyā asammosāya anantaradhānāya saṁvattantī”ti.
an4.160:11.6	Dasamaṁ.
an4.160:11.7	Indriyavaggo paṭhamo.
an4.160:12.0	Tassuddānaṁ
an4.160:12.1	Indriyāni saddhā paññā,
an4.160:12.2	sati saṅkhānapañcamaṁ;
an4.160:12.3	Kappo rogo parihāni,
an4.160:12.4	bhikkhunī sugatena cāti.
an4.161:0.1	Aṅguttara Nikāya 4.161
an4.161:0.2	17. Paṭipadāvagga
an4.161:0.3	Saṅkhittasutta
an4.161:1.1	“Catasso imā, bhikkhave, paṭipadā.
an4.161:1.2	Katamā catasso?
an4.161:1.3	Dukkhā paṭipadā dandhābhiññā,
an4.161:1.4	dukkhā paṭipadā khippābhiññā,
an4.161:1.5	sukhā paṭipadā dandhābhiññā,
an4.161:1.6	sukhā paṭipadā khippābhiññā—
an4.161:1.7	imā kho, bhikkhave, catasso paṭipadā”ti.
an4.161:1.8	Paṭhamaṁ.
an4.162:0.1	Aṅguttara Nikāya 4.162
an4.162:0.2	17. Paṭipadāvagga
an4.162:0.3	Vitthārasutta
an4.162:1.1	“Catasso imā, bhikkhave, paṭipadā.
an4.162:1.2	Katamā catasso?
an4.162:1.3	Dukkhā paṭipadā dandhābhiññā,
an4.162:1.4	dukkhā paṭipadā khippābhiññā,
an4.162:1.5	sukhā paṭipadā dandhābhiññā,
an4.162:1.6	sukhā paṭipadā khippābhiññā.
an4.162:2.1	Katamā ca, bhikkhave, dukkhā paṭipadā dandhābhiññā?
an4.162:2.2	Idha, bhikkhave, ekacco pakatiyāpi tibbarāgajātiko hoti, abhikkhaṇaṁ rāgajaṁ dukkhaṁ domanassaṁ paṭisaṁvedeti.
an4.162:2.3	Pakatiyāpi tibbadosajātiko hoti, abhikkhaṇaṁ dosajaṁ dukkhaṁ domanassaṁ paṭisaṁvedeti.
an4.162:2.4	Pakatiyāpi tibbamohajātiko hoti, abhikkhaṇaṁ mohajaṁ dukkhaṁ domanassaṁ paṭisaṁvedeti.
an4.162:2.5	Tassimāni pañcindriyāni mudūni pātubhavanti—
an4.162:2.6	saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.
an4.162:2.7	So imesaṁ pañcannaṁ indriyānaṁ muduttā dandhaṁ ānantariyaṁ pāpuṇāti āsavānaṁ khayāya.
an4.162:2.8	Ayaṁ vuccati, bhikkhave, dukkhā paṭipadā dandhābhiññā.
an4.162:3.1	Katamā ca, bhikkhave, dukkhā paṭipadā khippābhiññā?
an4.162:3.2	Idha, bhikkhave, ekacco pakatiyāpi tibbarāgajātiko hoti, abhikkhaṇaṁ rāgajaṁ dukkhaṁ domanassaṁ paṭisaṁvedeti.
an4.162:3.3	Pakatiyāpi tibbadosajātiko hoti, abhikkhaṇaṁ dosajaṁ dukkhaṁ domanassaṁ paṭisaṁvedeti.
an4.162:3.4	Pakatiyāpi tibbamohajātiko hoti, abhikkhaṇaṁ mohajaṁ dukkhaṁ domanassaṁ paṭisaṁvedeti.
an4.162:3.5	Tassimāni pañcindriyāni adhimattāni pātubhavanti—
an4.162:3.6	saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.
an4.162:3.7	So imesaṁ pañcannaṁ indriyānaṁ adhimattattā khippaṁ ānantariyaṁ pāpuṇāti āsavānaṁ khayāya.
an4.162:3.8	Ayaṁ vuccati, bhikkhave, dukkhā paṭipadā khippābhiññā.
an4.162:4.1	Katamā ca, bhikkhave, sukhā paṭipadā dandhābhiññā?
an4.162:4.2	Idha, bhikkhave, ekacco pakatiyāpi na tibbarāgajātiko hoti, nābhikkhaṇaṁ rāgajaṁ dukkhaṁ domanassaṁ paṭisaṁvedeti.
an4.162:4.3	Pakatiyāpi na tibbadosajātiko hoti, nābhikkhaṇaṁ dosajaṁ dukkhaṁ domanassaṁ paṭisaṁvedeti.
an4.162:4.4	Pakatiyāpi na tibbamohajātiko hoti, nābhikkhaṇaṁ mohajaṁ dukkhaṁ domanassaṁ paṭisaṁvedeti.
an4.162:4.5	Tassimāni pañcindriyāni mudūni pātubhavanti—
an4.162:4.6	saddhindriyaṁ …pe… paññindriyaṁ.
an4.162:4.7	So imesaṁ pañcannaṁ indriyānaṁ muduttā dandhaṁ ānantariyaṁ pāpuṇāti āsavānaṁ khayāya.
an4.162:4.8	Ayaṁ vuccati, bhikkhave, sukhā paṭipadā dandhābhiññā.
an4.162:5.1	Katamā ca, bhikkhave, sukhā paṭipadā khippābhiññā?
an4.162:5.2	Idha, bhikkhave, ekacco pakatiyāpi na tibbarāgajātiko hoti, nābhikkhaṇaṁ rāgajaṁ dukkhaṁ domanassaṁ paṭisaṁvedeti.
an4.162:5.3	Pakatiyāpi na tibbadosajātiko hoti, nābhikkhaṇaṁ dosajaṁ dukkhaṁ domanassaṁ paṭisaṁvedeti.
an4.162:5.4	Pakatiyāpi na tibbamohajātiko hoti, nābhikkhaṇaṁ mohajaṁ dukkhaṁ domanassaṁ paṭisaṁvedeti.
an4.162:5.5	Tassimāni pañcindriyāni adhimattāni pātubhavanti—
an4.162:5.6	saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.
an4.162:5.7	So imesaṁ pañcannaṁ indriyānaṁ adhimattattā khippaṁ ānantariyaṁ pāpuṇāti āsavānaṁ khayāya.
an4.162:5.8	Ayaṁ vuccati, bhikkhave, sukhā paṭipadā khippābhiññā.
an4.162:5.9	Imā kho, bhikkhave, catasso paṭipadā”ti.
an4.162:5.10	Dutiyaṁ.
an4.163:0.1	Aṅguttara Nikāya 4.163
an4.163:0.2	17. Paṭipadāvagga
an4.163:0.3	Asubhasutta
an4.163:1.1	“Catasso imā, bhikkhave, paṭipadā.
an4.163:1.2	Katamā catasso?
an4.163:1.3	Dukkhā paṭipadā dandhābhiññā,
an4.163:1.4	dukkhā paṭipadā khippābhiññā,
an4.163:1.5	sukhā paṭipadā dandhābhiññā,
an4.163:1.6	sukhā paṭipadā khippābhiññā.
an4.163:2.1	Katamā ca, bhikkhave, dukkhā paṭipadā dandhābhiññā?
an4.163:2.2	Idha, bhikkhave, bhikkhu asubhānupassī kāye viharati, āhāre paṭikūlasaññī, sabbaloke anabhiratisaññī, sabbasaṅkhāresu aniccānupassī;
an4.163:2.3	maraṇasaññā kho panassa ajjhattaṁ sūpaṭṭhitā hoti.
an4.163:2.4	So imāni pañca sekhabalāni upanissāya viharati—
an4.163:2.5	saddhābalaṁ, hiribalaṁ, ottappabalaṁ, vīriyabalaṁ, paññābalaṁ.
an4.163:2.6	Tassimāni pañcindriyāni mudūni pātubhavanti—
an4.163:2.7	saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.
an4.163:2.8	So imesaṁ pañcannaṁ indriyānaṁ muduttā dandhaṁ ānantariyaṁ pāpuṇāti āsavānaṁ khayāya.
an4.163:2.9	Ayaṁ vuccati, bhikkhave, dukkhā paṭipadā dandhābhiññā.
an4.163:3.1	Katamā ca, bhikkhave, dukkhā paṭipadā khippābhiññā?
an4.163:3.2	Idha, bhikkhave, bhikkhu asubhānupassī kāye viharati, āhāre paṭikūlasaññī, sabbaloke anabhiratisaññī, sabbasaṅkhāresu aniccānupassī;
an4.163:3.3	maraṇasaññā kho panassa ajjhattaṁ sūpaṭṭhitā hoti.
an4.163:3.4	So imāni pañca sekhabalāni upanissāya viharati—
an4.163:3.5	saddhābalaṁ …pe… paññābalaṁ.
an4.163:3.6	Tassimāni pañcindriyāni adhimattāni pātubhavanti—
an4.163:3.7	saddhindriyaṁ …pe… paññindriyaṁ.
an4.163:3.8	So imesaṁ pañcannaṁ indriyānaṁ adhimattattā khippaṁ ānantariyaṁ pāpuṇāti āsavānaṁ khayāya.
an4.163:3.9	Ayaṁ vuccati, bhikkhave, dukkhā paṭipadā khippābhiññā.
an4.163:4.1	Katamā ca, bhikkhave, sukhā paṭipadā dandhābhiññā?
an4.163:4.2	Idha bhikkhave, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati;
an4.163:4.3	vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati;
an4.163:4.4	pītiyā ca virāgā upekkhako ca viharati sato ca sampajāno sukhañca kāyena paṭisaṁvedeti yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharati;
an4.163:4.5	sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
an4.163:4.6	So imāni pañca sekhabalāni upanissāya viharati—
an4.163:4.7	saddhābalaṁ …pe… paññābalaṁ.
an4.163:4.8	Tassimāni pañcindriyāni mudūni pātubhavanti—
an4.163:4.9	saddhindriyaṁ …pe… paññindriyaṁ.
an4.163:4.10	So imesaṁ pañcannaṁ indriyānaṁ muduttā dandhaṁ ānantariyaṁ pāpuṇāti āsavānaṁ khayāya.
an4.163:4.11	Ayaṁ vuccati, bhikkhave, sukhā paṭipadā dandhābhiññā.
an4.163:5.1	Katamā ca, bhikkhave, sukhā paṭipadā khippābhiññā?
an4.163:5.2	Idha, bhikkhave, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati …pe… dutiyaṁ jhānaṁ …pe… tatiyaṁ jhānaṁ …pe… catutthaṁ jhānaṁ upasampajja viharati.
an4.163:5.3	So imāni pañca sekhabalāni upanissāya viharati—
an4.163:5.4	saddhābalaṁ, hiribalaṁ, ottappabalaṁ, vīriyabalaṁ, paññābalaṁ.
an4.163:5.5	Tassimāni pañcindriyāni adhimattāni pātubhavanti—
an4.163:5.6	saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.
an4.163:5.7	So imesaṁ pañcannaṁ indriyānaṁ adhimattattā khippaṁ ānantariyaṁ pāpuṇāti āsavānaṁ khayāya.
an4.163:5.8	Ayaṁ vuccati, bhikkhave, sukhā paṭipadā khippābhiññā.
an4.163:5.9	Imā kho, bhikkhave, catasso paṭipadā”ti.
an4.163:5.10	Tatiyaṁ.
an4.164:0.1	Aṅguttara Nikāya 4.164
an4.164:0.2	17. Paṭipadāvagga
an4.164:0.3	Paṭhamakhamasutta
an4.164:1.1	“Catasso imā, bhikkhave, paṭipadā.
an4.164:1.2	Katamā catasso?
an4.164:1.3	Akkhamā paṭipadā, khamā paṭipadā, damā paṭipadā, samā paṭipadā.
an4.164:1.4	Katamā ca, bhikkhave, akkhamā paṭipadā?
an4.164:1.5	Idha, bhikkhave, ekacco akkosantaṁ paccakkosati, rosantaṁ paṭirosati, bhaṇḍantaṁ paṭibhaṇḍati.
an4.164:1.6	Ayaṁ vuccati, bhikkhave, akkhamā paṭipadā.
an4.164:2.1	Katamā ca, bhikkhave, khamā paṭipadā?
an4.164:2.2	Idha, bhikkhave, ekacco akkosantaṁ na paccakkosati, rosantaṁ na paṭirosati, bhaṇḍantaṁ na paṭibhaṇḍati.
an4.164:2.3	Ayaṁ vuccati, bhikkhave, khamā paṭipadā.
an4.164:3.1	Katamā ca, bhikkhave, damā paṭipadā?
an4.164:3.2	Idha, bhikkhave, bhikkhu cakkhunā rūpaṁ disvā na nimittaggāhī hoti nānubyañjanaggāhī;
an4.164:3.3	yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati cakkhundriyaṁ; cakkhundriye saṁvaraṁ āpajjati.
an4.164:3.4	Sotena saddaṁ sutvā …
an4.164:3.5	ghānena gandhaṁ ghāyitvā …
an4.164:3.6	jivhāya rasaṁ sāyitvā …
an4.164:3.7	kāyena phoṭṭhabbaṁ phusitvā …
an4.164:3.8	manasā dhammaṁ viññāya na nimittaggāhī hoti nānubyañjanaggāhī;
an4.164:3.9	yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ; manindriye saṁvaraṁ āpajjati.
an4.164:3.10	Ayaṁ vuccati, bhikkhave, damā paṭipadā.
an4.164:4.1	Katamā ca, bhikkhave, samā paṭipadā?
an4.164:4.2	Idha, bhikkhave, bhikkhu uppannaṁ kāmavitakkaṁ nādhivāseti pajahati vinodeti sameti byantīkaroti anabhāvaṁ gameti; uppannaṁ byāpādavitakkaṁ …pe… uppannaṁ vihiṁsāvitakkaṁ … uppannuppanne pāpake akusale dhamme nādhivāseti pajahati vinodeti sameti byantīkaroti anabhāvaṁ gameti.
an4.164:4.3	Ayaṁ vuccati, bhikkhave, samā paṭipadā.
an4.164:4.4	Imā kho, bhikkhave, catasso paṭipadā”ti.
an4.164:4.5	Catutthaṁ.
an4.165:0.1	Aṅguttara Nikāya 4.165
an4.165:0.2	17. Paṭipadāvagga
an4.165:0.3	Dutiyakhamasutta
an4.165:1.1	“Catasso imā, bhikkhave, paṭipadā.
an4.165:1.2	Katamā catasso?
an4.165:1.3	Akkhamā paṭipadā, khamā paṭipadā, damā paṭipadā, samā paṭipadā.
an4.165:2.1	Katamā ca, bhikkhave, akkhamā paṭipadā?
an4.165:2.2	Idha, bhikkhave, ekacco akkhamo hoti sītassa uṇhassa jighacchāya pipāsāya, ḍaṁsamakasavātātapasarīsapasamphassānaṁ duruttānaṁ durāgatānaṁ vacanapathānaṁ uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ anadhivāsakajātiko hoti.
an4.165:2.3	Ayaṁ vuccati, bhikkhave, akkhamā paṭipadā.
an4.165:3.1	Katamā ca, bhikkhave, khamā paṭipadā?
an4.165:3.2	Idha, bhikkhave, ekacco khamo hoti sītassa uṇhassa jighacchāya pipāsāya, ḍaṁsamakasavātātapasarīsapasamphassānaṁ duruttānaṁ durāgatānaṁ vacanapathānaṁ uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko hoti.
an4.165:3.3	Ayaṁ vuccati, bhikkhave, khamā paṭipadā.
an4.165:4.1	Katamā ca, bhikkhave, damā paṭipadā?
an4.165:4.2	Idha, bhikkhave, bhikkhu cakkhunā rūpaṁ disvā na nimittaggāhī hoti …pe…
an4.165:4.3	sotena saddaṁ sutvā …
an4.165:4.4	ghānena gandhaṁ ghāyitvā …
an4.165:4.5	jivhāya rasaṁ sāyitvā …
an4.165:4.6	kāyena phoṭṭhabbaṁ phusitvā …
an4.165:4.7	manasā dhammaṁ viññāya na nimittaggāhī hoti nānubyañjanaggāhī;
an4.165:4.8	yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ; manindriye saṁvaraṁ āpajjati.
an4.165:4.9	Ayaṁ vuccati, bhikkhave, damā paṭipadā.
an4.165:5.1	Katamā ca, bhikkhave, samā paṭipadā?
an4.165:5.2	Idha, bhikkhave, bhikkhu uppannaṁ kāmavitakkaṁ nādhivāseti pajahati vinodeti sameti byantīkaroti anabhāvaṁ gameti, uppannaṁ byāpādavitakkaṁ …pe… uppannaṁ vihiṁsāvitakkaṁ … uppannuppanne pāpake akusale dhamme nādhivāseti pajahati vinodeti sameti byantīkaroti anabhāvaṁ gameti.
an4.165:5.3	Ayaṁ vuccati, bhikkhave, samā paṭipadā.
an4.165:5.4	Imā kho, bhikkhave, catasso paṭipadā”ti.
an4.165:5.5	Pañcamaṁ.
an4.166:0.1	Aṅguttara Nikāya 4.166
an4.166:0.2	17. Paṭipadāvagga
an4.166:0.3	Ubhayasutta
an4.166:1.1	“Catasso imā, bhikkhave, paṭipadā.
an4.166:1.2	Katamā catasso?
an4.166:1.3	Dukkhā paṭipadā dandhābhiññā,
an4.166:1.4	dukkhā paṭipadā khippābhiññā,
an4.166:1.5	sukhā paṭipadā dandhābhiññā,
an4.166:1.6	sukhā paṭipadā khippābhiññā.
an4.166:2.1	Tatra, bhikkhave, yāyaṁ paṭipadā dukkhā dandhābhiññā, ayaṁ, bhikkhave, paṭipadā ubhayeneva hīnā akkhāyati. Yampāyaṁ paṭipadā dukkhā, imināpāyaṁ hīnā akkhāyati; yampāyaṁ paṭipadā dandhā, imināpāyaṁ hīnā akkhāyati.
an4.166:2.2	Ayaṁ, bhikkhave, paṭipadā ubhayeneva hīnā akkhāyati.
an4.166:3.1	Tatra, bhikkhave, yāyaṁ paṭipadā dukkhā khippābhiññā, ayaṁ, bhikkhave, paṭipadā dukkhattā hīnā akkhāyati.
an4.166:4.1	Tatra, bhikkhave, yāyaṁ paṭipadā sukhā dandhābhiññā, ayaṁ, bhikkhave, paṭipadā dandhattā hīnā akkhāyati.
an4.166:5.1	Tatra, bhikkhave, yāyaṁ paṭipadā sukhā khippābhiññā, ayaṁ, bhikkhave, paṭipadā ubhayeneva paṇītā akkhāyati. Yampāyaṁ paṭipadā sukhā, imināpāyaṁ paṇītā akkhāyati; yampāyaṁ paṭipadā khippā, imināpāyaṁ paṇītā akkhāyati.
an4.166:5.2	Ayaṁ, bhikkhave, paṭipadā ubhayeneva paṇītā akkhāyati.
an4.166:5.3	Imā kho, bhikkhave, catasso paṭipadā”ti.
an4.166:5.4	Chaṭṭhaṁ.
an4.167:0.1	Aṅguttara Nikāya 4.167
an4.167:0.2	17. Paṭipadāvagga
an4.167:0.3	Mahāmoggallānasutta
an4.167:1.1	Atha kho āyasmā sāriputto yenāyasmā mahāmoggallāno tenupasaṅkami; upasaṅkamitvā āyasmatā mahāmoggallānena saddhiṁ sammodi.
an4.167:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā sāriputto āyasmantaṁ mahāmoggallānaṁ etadavoca:
an4.167:2.1	“Catasso imā, āvuso moggallāna, paṭipadā.
an4.167:2.2	Katamā catasso?
an4.167:2.3	Dukkhā paṭipadā dandhābhiññā,
an4.167:2.4	dukkhā paṭipadā khippābhiññā,
an4.167:2.5	sukhā paṭipadā dandhābhiññā,
an4.167:2.6	sukhā paṭipadā khippābhiññā.
an4.167:2.7	Imā kho, āvuso, catasso paṭipadā.
an4.167:2.8	Imāsaṁ, āvuso, catunnaṁ paṭipadānaṁ katamaṁ te paṭipadaṁ āgamma anupādāya āsavehi cittaṁ vimuttan”ti?
an4.167:3.1	“Catasso imā, āvuso sāriputta, paṭipadā.
an4.167:3.2	Katamā catasso?
an4.167:3.3	Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā.
an4.167:3.4	Imā kho, āvuso, catasso paṭipadā.
an4.167:3.5	Imāsaṁ, āvuso, catunnaṁ paṭipadānaṁ yāyaṁ paṭipadā dukkhā khippābhiññā, imaṁ me paṭipadaṁ āgamma anupādāya āsavehi cittaṁ vimuttan”ti.
an4.167:3.6	Sattamaṁ.
an4.168:0.1	Aṅguttara Nikāya 4.168
an4.168:0.2	17. Paṭipadāvagga
an4.168:0.3	Sāriputtasutta
an4.168:1.1	Atha kho āyasmā mahāmoggallāno yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an4.168:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā mahāmoggallāno āyasmantaṁ sāriputtaṁ etadavoca:
an4.168:2.1	“Catasso imā, āvuso sāriputta, paṭipadā.
an4.168:2.2	Katamā catasso?
an4.168:2.3	Dukkhā paṭipadā dandhābhiññā,
an4.168:2.4	dukkhā paṭipadā khippābhiññā,
an4.168:2.5	sukhā paṭipadā dandhābhiññā,
an4.168:2.6	sukhā paṭipadā khippābhiññā.
an4.168:2.7	Imā kho, āvuso, catasso paṭipadā.
an4.168:2.8	Imāsaṁ, āvuso, catunnaṁ paṭipadānaṁ katamaṁ te paṭipadaṁ āgamma anupādāya āsavehi cittaṁ vimuttan”ti?
an4.168:3.1	“Catasso imā, āvuso moggallāna, paṭipadā.
an4.168:3.2	Katamā catasso?
an4.168:3.3	Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā.
an4.168:3.4	Imā kho, āvuso, catasso paṭipadā.
an4.168:3.5	Imāsaṁ, āvuso, catunnaṁ paṭipadānaṁ yāyaṁ paṭipadā sukhā khippābhiññā, imaṁ me paṭipadaṁ āgamma anupādāya āsavehi cittaṁ vimuttan”ti.
an4.168:3.6	Aṭṭhamaṁ.
an4.169:0.1	Aṅguttara Nikāya 4.169
an4.169:0.2	17. Paṭipadāvagga
an4.169:0.3	Sasaṅkhārasutta
an4.169:1.1	“Cattārome, bhikkhave, puggalā santo saṁvijjamānā lokasmiṁ.
an4.169:1.2	Katame cattāro?
an4.169:1.3	Idha, bhikkhave, ekacco puggalo diṭṭheva dhamme sasaṅkhāraparinibbāyī hoti.
an4.169:1.4	Idha pana, bhikkhave, ekacco puggalo kāyassa bhedā sasaṅkhāraparinibbāyī hoti.
an4.169:1.5	Idha pana, bhikkhave, ekacco puggalo diṭṭheva dhamme asaṅkhāraparinibbāyī hoti.
an4.169:1.6	Idha pana, bhikkhave, ekacco puggalo kāyassa bhedā asaṅkhāraparinibbāyī hoti.
an4.169:2.1	Kathañca, bhikkhave, puggalo diṭṭheva dhamme sasaṅkhāraparinibbāyī hoti?
an4.169:2.2	Idha, bhikkhave, bhikkhu asubhānupassī kāye viharati, āhāre paṭikūlasaññī, sabbaloke anabhiratisaññī, sabbasaṅkhāresu aniccānupassī.
an4.169:2.3	Maraṇasaññā kho panassa ajjhattaṁ sūpaṭṭhitā hoti.
an4.169:2.4	So imāni pañca sekhabalāni upanissāya viharati—
an4.169:2.5	saddhābalaṁ, hiribalaṁ, ottappabalaṁ, vīriyabalaṁ, paññābalaṁ.
an4.169:2.6	Tassimāni pañcindriyāni adhimattāni pātubhavanti—
an4.169:2.7	saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.
an4.169:2.8	So imesaṁ pañcannaṁ indriyānaṁ adhimattattā diṭṭheva dhamme sasaṅkhāraparinibbāyī hoti.
an4.169:2.9	Evaṁ kho, bhikkhave, puggalo diṭṭheva dhamme sasaṅkhāraparinibbāyī hoti.
an4.169:3.1	Kathañca, bhikkhave, puggalo kāyassa bhedā sasaṅkhāraparinibbāyī hoti?
an4.169:3.2	Idha, bhikkhave, bhikkhu asubhānupassī kāye viharati, āhāre paṭikūlasaññī, sabbaloke anabhiratisaññī, sabbasaṅkhāresu aniccānupassī.
an4.169:3.3	Maraṇasaññā kho panassa ajjhattaṁ sūpaṭṭhitā hoti.
an4.169:3.4	So imāni pañca sekhabalāni upanissāya viharati—
an4.169:3.5	saddhābalaṁ, hiribalaṁ, ottappabalaṁ, vīriyabalaṁ, paññābalaṁ.
an4.169:3.6	Tassimāni pañcindriyāni mudūni pātubhavanti—
an4.169:3.7	saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.
an4.169:3.8	So imesaṁ pañcannaṁ indriyānaṁ muduttā kāyassa bhedā sasaṅkhāraparinibbāyī hoti.
an4.169:3.9	Evaṁ kho, bhikkhave, puggalo kāyassa bhedā sasaṅkhāraparinibbāyī hoti.
an4.169:4.1	Kathañca, bhikkhave, puggalo diṭṭheva dhamme asaṅkhāraparinibbāyī hoti?
an4.169:4.2	Idha, bhikkhave, bhikkhu vivicceva kāmehi …pe… paṭhamaṁ jhānaṁ …pe… dutiyaṁ jhānaṁ …pe… tatiyaṁ jhānaṁ …pe… catutthaṁ jhānaṁ upasampajja viharati.
an4.169:4.3	So imāni pañca sekhabalāni upanissāya viharati—
an4.169:4.4	saddhābalaṁ …pe… paññābalaṁ.
an4.169:4.5	Tassimāni pañcindriyāni adhimattāni pātubhavanti—
an4.169:4.6	saddhindriyaṁ …pe… paññindriyaṁ.
an4.169:4.7	So imesaṁ pañcannaṁ indriyānaṁ adhimattattā diṭṭheva dhamme asaṅkhāraparinibbāyī hoti.
an4.169:4.8	Evaṁ kho, bhikkhave, puggalo diṭṭheva dhamme asaṅkhāraparinibbāyī hoti.
an4.169:5.1	Kathañca, bhikkhave, puggalo kāyassa bhedā asaṅkhāraparinibbāyī hoti?
an4.169:5.2	Idha, bhikkhave, bhikkhu vivicceva kāmehi …pe… paṭhamaṁ jhānaṁ …pe… dutiyaṁ jhānaṁ …pe… tatiyaṁ jhānaṁ …pe… catutthaṁ jhānaṁ upasampajja viharati.
an4.169:5.3	So imāni pañca sekhabalāni upanissāya viharati—
an4.169:5.4	saddhābalaṁ, hiribalaṁ, ottappabalaṁ, vīriyabalaṁ, paññābalaṁ.
an4.169:5.5	Tassimāni pañcindriyāni …pe… paññindriyaṁ.
an4.169:5.6	So imesaṁ pañcannaṁ indriyānaṁ muduttā kāyassa bhedā asaṅkhāraparinibbāyī hoti.
an4.169:5.7	Evaṁ kho, bhikkhave, puggalo kāyassa bhedā asaṅkhāraparinibbāyī hoti.
an4.169:5.8	Ime kho, bhikkhave, cattāro puggalā santo saṁvijjamānā lokasmin”ti.
an4.169:5.9	Navamaṁ.
an4.170:0.1	Aṅguttara Nikāya 4.170
an4.170:0.2	17. Paṭipadāvagga
an4.170:0.3	Yuganaddhasutta
an4.170:1.1	Evaṁ me sutaṁ—
an4.170:1.2	ekaṁ samayaṁ āyasmā ānando kosambiyaṁ viharati ghositārāme.
an4.170:1.3	Tatra kho āyasmā ānando bhikkhū āmantesi:
an4.170:1.4	“āvuso bhikkhave”ti.
an4.170:1.5	“Āvuso”ti kho te bhikkhū āyasmato ānandassa paccassosuṁ.
an4.170:1.6	Āyasmā ānando etadavoca:
an4.170:2.1	“Yo hi koci, āvuso, bhikkhu vā bhikkhunī vā mama santike arahattappattiṁ byākaroti, sabbo so catūhi maggehi, etesaṁ vā aññatarena.
an4.170:3.1	Katamehi catūhi?
an4.170:3.2	Idha, āvuso, bhikkhu samathapubbaṅgamaṁ vipassanaṁ bhāveti.
an4.170:3.3	Tassa samathapubbaṅgamaṁ vipassanaṁ bhāvayato maggo sañjāyati.
an4.170:3.4	So taṁ maggaṁ āsevati bhāveti bahulīkaroti.
an4.170:3.5	Tassa taṁ maggaṁ āsevato bhāvayato bahulīkaroto saṁyojanāni pahīyanti, anusayā byantīhonti.
an4.170:4.1	Puna caparaṁ, āvuso, bhikkhu vipassanāpubbaṅgamaṁ samathaṁ bhāveti.
an4.170:4.2	Tassa vipassanāpubbaṅgamaṁ samathaṁ bhāvayato maggo sañjāyati.
an4.170:4.3	So taṁ maggaṁ āsevati bhāveti bahulīkaroti.
an4.170:4.4	Tassa taṁ maggaṁ āsevato bhāvayato bahulīkaroto saṁyojanāni pahīyanti, anusayā byantīhonti.
an4.170:5.1	Puna caparaṁ, āvuso, bhikkhu samathavipassanaṁ yuganaddhaṁ bhāveti.
an4.170:5.2	Tassa samathavipassanaṁ yuganaddhaṁ bhāvayato maggo sañjāyati.
an4.170:5.3	So taṁ maggaṁ āsevati bhāveti bahulīkaroti.
an4.170:5.4	Tassa taṁ maggaṁ āsevato bhāvayato bahulīkaroto saṁyojanāni pahīyanti, anusayā byantīhonti.
an4.170:6.1	Puna caparaṁ, āvuso, bhikkhuno dhammuddhaccaviggahitaṁ mānasaṁ hoti.
an4.170:6.2	Hoti so, āvuso, samayo yaṁ taṁ cittaṁ ajjhattameva santiṭṭhati sannisīdati ekodi hoti samādhiyati.
an4.170:6.3	Tassa maggo sañjāyati.
an4.170:6.4	So taṁ maggaṁ āsevati bhāveti bahulīkaroti.
an4.170:6.5	Tassa taṁ maggaṁ āsevato bhāvayato bahulīkaroto saṁyojanāni pahīyanti, anusayā byantīhonti.
an4.170:7.1	Yo hi koci, āvuso, bhikkhu vā bhikkhunī vā mama santike arahattappattiṁ byākaroti, sabbo so imehi catūhi maggehi, etesaṁ vā aññatarenā”ti.
an4.170:7.2	Dasamaṁ.
an4.170:7.3	Paṭipadāvaggo dutiyo.
an4.170:8.0	Tassuddānaṁ
an4.170:8.1	Saṅkhittaṁ vitthārāsubhaṁ,
an4.170:8.2	Dve khamā ubhayena ca;
an4.170:8.3	Moggallāno sāriputto,
an4.170:8.4	Sasaṅkhāraṁ yuganaddhena cāti.
an4.171:0.1	Aṅguttara Nikāya 4.171
an4.171:0.2	18. Sañcetaniyavagga
an4.171:0.3	Cetanāsutta
an4.171:1.1	“Kāye vā, bhikkhave, sati kāyasañcetanāhetu uppajjati ajjhattaṁ sukhadukkhaṁ.
an4.171:1.2	Vācāya vā, bhikkhave, sati vacīsañcetanāhetu uppajjati ajjhattaṁ sukhadukkhaṁ.
an4.171:1.3	Mane vā, bhikkhave, sati manosañcetanāhetu uppajjati ajjhattaṁ sukhadukkhaṁ avijjāpaccayāva.
an4.171:2.1	Sāmaṁ vā taṁ, bhikkhave, kāyasaṅkhāraṁ abhisaṅkharoti, yaṁpaccayāssa taṁ uppajjati ajjhattaṁ sukhadukkhaṁ.
an4.171:2.2	Pare vāssa taṁ, bhikkhave, kāyasaṅkhāraṁ abhisaṅkharonti, yaṁpaccayāssa taṁ uppajjati ajjhattaṁ sukhadukkhaṁ.
an4.171:2.3	Sampajāno vā taṁ, bhikkhave, kāyasaṅkhāraṁ abhisaṅkharoti, yaṁpaccayāssa taṁ uppajjati ajjhattaṁ sukhadukkhaṁ.
an4.171:2.4	Asampajāno vā taṁ, bhikkhave, kāyasaṅkhāraṁ abhisaṅkharoti, yaṁpaccayāssa taṁ uppajjati ajjhattaṁ sukhadukkhaṁ.
an4.171:3.1	Sāmaṁ vā taṁ, bhikkhave, vacīsaṅkhāraṁ abhisaṅkharoti, yaṁpaccayāssa taṁ uppajjati ajjhattaṁ sukhadukkhaṁ;
an4.171:3.2	pare vāssa taṁ, bhikkhave, vacīsaṅkhāraṁ abhisaṅkharonti;
an4.171:3.3	yaṁpaccayāssa taṁ uppajjati ajjhattaṁ sukhadukkhaṁ;
an4.171:3.4	sampajāno vā taṁ, bhikkhave, vacīsaṅkhāraṁ abhisaṅkharoti, yaṁpaccayāssa taṁ uppajjati ajjhattaṁ sukhadukkhaṁ;
an4.171:3.5	asampajāno vā taṁ, bhikkhave, vacīsaṅkhāraṁ abhisaṅkharoti, yaṁpaccayāssa taṁ uppajjati ajjhattaṁ sukhadukkhaṁ.
an4.171:4.1	Sāmaṁ vā taṁ, bhikkhave, manosaṅkhāraṁ abhisaṅkharoti, yaṁpaccayāssa taṁ uppajjati ajjhattaṁ sukhadukkhaṁ;
an4.171:4.2	pare vāssa taṁ, bhikkhave, manosaṅkhāraṁ abhisaṅkharonti, yaṁpaccayāssa taṁ uppajjati ajjhattaṁ sukhadukkhaṁ;
an4.171:4.3	sampajāno vā taṁ, bhikkhave, manosaṅkhāraṁ abhisaṅkharoti, yaṁpaccayāssa taṁ uppajjati ajjhattaṁ sukhadukkhaṁ;
an4.171:4.4	asampajāno vā taṁ, bhikkhave, manosaṅkhāraṁ abhisaṅkharoti, yaṁpaccayāssa taṁ uppajjati ajjhattaṁ sukhadukkhaṁ.
an4.171:5.1	Imesu, bhikkhave, dhammesu avijjā anupatitā,
an4.171:5.2	avijjāya tveva asesavirāganirodhā so kāyo na hoti yaṁpaccayāssa taṁ uppajjati ajjhattaṁ sukhadukkhaṁ, sā vācā na hoti yaṁpaccayāssa taṁ uppajjati ajjhattaṁ sukhadukkhaṁ, so mano na hoti yaṁpaccayāssa taṁ uppajjati ajjhattaṁ sukhadukkhaṁ,
an4.171:5.3	khettaṁ taṁ na hoti …pe… vatthu taṁ na hoti …pe… āyatanaṁ taṁ na hoti …pe… adhikaraṇaṁ taṁ na hoti yaṁpaccayāssa taṁ uppajjati ajjhattaṁ sukhadukkhanti.
an4.171:6.1	Cattārome, bhikkhave, attabhāvapaṭilābhā.
an4.171:6.2	Katame cattāro?
an4.171:6.3	Atthi, bhikkhave, attabhāvapaṭilābho, yasmiṁ attabhāvapaṭilābhe attasañcetanā kamati, no parasañcetanā.
an4.171:6.4	Atthi, bhikkhave, attabhāvapaṭilābho, yasmiṁ attabhāvapaṭilābhe parasañcetanā kamati, no attasañcetanā.
an4.171:6.5	Atthi, bhikkhave, attabhāvapaṭilābho, yasmiṁ attabhāvapaṭilābhe attasañcetanā ca kamati parasañcetanā ca.
an4.171:6.6	Atthi, bhikkhave, attabhāvapaṭilābho, yasmiṁ attabhāvapaṭilābhe nevattasañcetanā kamati, no parasañcetanā.
an4.171:6.7	Ime kho, bhikkhave, cattāro attabhāvapaṭilābhā”ti.
an4.171:7.1	Evaṁ vutte, āyasmā sāriputto bhagavantaṁ etadavoca:
an4.171:7.2	“imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmi:
an4.171:7.3	‘tatra, bhante, yāyaṁ attabhāvapaṭilābho yasmiṁ attabhāvapaṭilābhe attasañcetanā kamati no parasañcetanā, attasañcetanāhetu tesaṁ sattānaṁ tamhā kāyā cuti hoti.
an4.171:7.4	Tatra, bhante, yāyaṁ attabhāvapaṭilābho yasmiṁ attabhāvapaṭilābhe parasañcetanā kamati no attasañcetanā, parasañcetanāhetu tesaṁ sattānaṁ tamhā kāyā cuti hoti.
an4.171:7.5	Tatra, bhante, yāyaṁ attabhāvapaṭilābho yasmiṁ attabhāvapaṭilābhe attasañcetanā ca kamati parasañcetanā ca, attasañcetanā ca parasañcetanā ca hetu tesaṁ sattānaṁ tamhā kāyā cuti hoti.
an4.171:7.6	Tatra, bhante, yāyaṁ attabhāvapaṭilābho yasmiṁ attabhāvapaṭilābhe neva attasañcetanā kamati no parasañcetanā, katame tena devā daṭṭhabbā’”ti?
an4.171:7.7	“Nevasaññānāsaññāyatanūpagā, sāriputta, devā tena daṭṭhabbā”ti.
an4.171:8.1	“Ko nu kho, bhante, hetu ko paccayo, yena m’idhekacce sattā tamhā kāyā cutā āgāmino honti āgantāro itthattaṁ?
an4.171:8.2	Ko pana, bhante, hetu ko paccayo, yena m’idhekacce sattā tamhā kāyā cutā anāgāmino honti anāgantāro itthattan”ti?
an4.171:8.3	“Idha, sāriputta, ekaccassa puggalassa orambhāgiyāni saṁyojanāni appahīnāni honti, so diṭṭheva dhamme nevasaññānāsaññāyatanaṁ upasampajja viharati.
an4.171:8.4	So tadassādeti, taṁ nikāmeti, tena ca vittiṁ āpajjati;
an4.171:8.5	tattha ṭhito tadadhimutto tabbahulavihārī aparihīno kālaṁ kurumāno nevasaññānāsaññāyatanūpagānaṁ devānaṁ sahabyataṁ upapajjati.
an4.171:8.6	So tato cuto āgāmī hoti āgantā itthattaṁ.
an4.171:9.1	Idha pana, sāriputta, ekaccassa puggalassa orambhāgiyāni saṁyojanāni pahīnāni honti, so diṭṭheva dhamme nevasaññānāsaññāyatanaṁ upasampajja viharati.
an4.171:9.2	So tadassādeti, taṁ nikāmeti, tena ca vittiṁ āpajjati;
an4.171:9.3	tattha ṭhito tadadhimutto tabbahulavihārī aparihīno kālaṁ kurumāno nevasaññānāsaññāyatanūpagānaṁ devānaṁ sahabyataṁ upapajjati.
an4.171:9.4	So tato cuto anāgāmī hoti anāgantā itthattaṁ.
an4.171:10.1	Ayaṁ kho, sāriputta, hetu ayaṁ paccayo, yena m’idhekacce sattā tamhā kāyā cutā āgāmino honti āgantāro itthattaṁ.
an4.171:10.2	Ayaṁ pana, sāriputta, hetu ayaṁ paccayo, yena m’idhekacce sattā tamhā kāyā cutā anāgāmino honti anāgantāro itthattan”ti.
an4.171:10.3	Paṭhamaṁ.
an4.172:0.1	Aṅguttara Nikāya 4.172
an4.172:0.2	18. Sañcetaniyavagga
an4.172:0.3	Vibhattisutta
an4.172:1.1	Tatra kho āyasmā sāriputto bhikkhū āmantesi:
an4.172:1.2	“āvuso bhikkhave”ti.
an4.172:1.3	“Āvuso”ti kho te bhikkhū āyasmato sāriputtassa paccassosuṁ.
an4.172:1.4	Āyasmā sāriputto etadavoca:
an4.172:2.1	“Addhamāsūpasampannena me, āvuso, atthapaṭisambhidā sacchikatā odhiso byañjanaso.
an4.172:2.2	Tamahaṁ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi.
an4.172:2.3	Yassa kho panassa kaṅkhā vā vimati vā, so maṁ pañhena.
an4.172:2.4	Ahaṁ veyyākaraṇena sammukhībhūto no satthā yo no dhammānaṁ sukusalo.
an4.172:3.1	Addhamāsūpasampannena me, āvuso, dhammapaṭisambhidā sacchikatā odhiso byañjanaso.
an4.172:3.2	Tamahaṁ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi.
an4.172:3.3	Yassa kho panassa kaṅkhā vā vimati vā, so maṁ pañhena.
an4.172:3.4	Ahaṁ veyyākaraṇena sammukhībhūto no satthā yo no dhammānaṁ sukusalo.
an4.172:4.1	Addhamāsūpasampannena me, āvuso, niruttipaṭisambhidā sacchikatā odhiso byañjanaso.
an4.172:4.2	Tamahaṁ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi.
an4.172:4.3	Yassa kho panassa kaṅkhā vā vimati vā, so maṁ pañhena.
an4.172:4.4	Ahaṁ veyyākaraṇena sammukhībhūto no satthā yo no dhammānaṁ sukusalo.
an4.172:5.1	Addhamāsūpasampannena me, āvuso, paṭibhānapaṭisambhidā sacchikatā odhiso byañjanaso.
an4.172:5.2	Tamahaṁ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi.
an4.172:5.3	Yassa kho panassa kaṅkhā vā vimati vā, so maṁ pañhena.
an4.172:5.4	Ahaṁ veyyākaraṇena sammukhībhūto no satthā yo no dhammānaṁ sukusalo”ti.
an4.172:5.5	Dutiyaṁ.
an4.173:0.1	Aṅguttara Nikāya 4.173
an4.173:0.2	18. Sañcetaniyavagga
an4.173:0.3	Mahākoṭṭhikasutta
an4.173:1.1	Atha kho āyasmā mahākoṭṭhiko yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an4.173:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā mahākoṭṭhiko āyasmantaṁ sāriputtaṁ etadavoca:
an4.173:2.1	“Channaṁ, āvuso, phassāyatanānaṁ asesavirāganirodhā atthaññaṁ kiñcī”ti?
an4.173:3.1	“Mā hevaṁ, āvuso”.
an4.173:4.1	“Channaṁ, āvuso, phassāyatanānaṁ asesavirāganirodhā natthaññaṁ kiñcī”ti?
an4.173:5.1	“Mā hevaṁ, āvuso”.
an4.173:6.1	“Channaṁ, āvuso, phassāyatanānaṁ asesavirāganirodhā atthi ca natthi ca aññaṁ kiñcī”ti?
an4.173:7.1	“Mā hevaṁ, āvuso”.
an4.173:8.1	“Channaṁ, āvuso, phassāyatanānaṁ asesavirāganirodhā nevatthi no natthaññaṁ kiñcī”ti?
an4.173:9.1	“Mā hevaṁ, āvuso”.
an4.173:10.1	“‘Channaṁ, āvuso, phassāyatanānaṁ asesavirāganirodhā atthaññaṁ kiñcī’ti, iti puṭṭho samāno ‘mā hevaṁ, āvuso’ti vadesi.
an4.173:10.2	‘Channaṁ, āvuso, phassāyatanānaṁ asesavirāganirodhā natthaññaṁ kiñcī’ti, iti puṭṭho samāno:
an4.173:10.3	‘mā hevaṁ, āvuso’ti vadesi.
an4.173:10.4	‘Channaṁ, āvuso, phassāyatanānaṁ asesavirāganirodhā atthi ca natthi ca aññaṁ kiñcī’ti, iti puṭṭho samāno:
an4.173:10.5	‘mā hevaṁ, āvuso’ti vadesi.
an4.173:10.6	‘Channaṁ, āvuso, phassāyatanānaṁ asesavirāganirodhā nevatthi no natthaññaṁ kiñcī’ti, iti puṭṭho samāno:
an4.173:10.7	‘mā hevaṁ, āvuso’ti vadesi.
an4.173:10.8	Yathā kathaṁ pana, āvuso, imassa bhāsitassa attho daṭṭhabbo”ti?
an4.173:11.1	“‘Channaṁ, āvuso, phassāyatanānaṁ asesavirāganirodhā atthaññaṁ kiñcī’ti, iti vadaṁ appapañcaṁ papañceti.
an4.173:11.2	‘Channaṁ, āvuso, phassāyatanānaṁ asesavirāganirodhā natthaññaṁ kiñcī’ti, iti vadaṁ appapañcaṁ papañceti.
an4.173:11.3	‘Channaṁ, āvuso, phassāyatanānaṁ asesavirāganirodhā atthi ca natthi ca aññaṁ kiñcī’ti, iti vadaṁ appapañcaṁ papañceti.
an4.173:11.4	‘Channaṁ, āvuso, phassāyatanānaṁ asesavirāganirodhā nevatthi no natthaññaṁ kiñcī’ti, iti vadaṁ appapañcaṁ papañceti.
an4.173:11.5	Yāvatā, āvuso, channaṁ phassāyatanānaṁ gati tāvatā papañcassa gati;
an4.173:11.6	yāvatā papañcassa gati tāvatā channaṁ phassāyatanānaṁ gati.
an4.173:11.7	Channaṁ, āvuso, phassāyatanānaṁ asesavirāganirodhā papañcanirodho papañcavūpasamo”ti.
an4.173:11.8	Tatiyaṁ.
an4.174:0.1	Aṅguttara Nikāya 4.174
an4.174:0.2	18. Sañcetaniyavagga
an4.174:0.3	Ānandasutta
an4.174:1.1	Atha kho āyasmā ānando yenāyasmā mahākoṭṭhiko tenupasaṅkami; upasaṅkamitvā āyasmatā mahākoṭṭhikena saddhiṁ sammodi.
an4.174:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā ānando āyasmantaṁ mahākoṭṭhikaṁ etadavoca:
an4.174:2.1	“Channaṁ, āvuso, phassāyatanānaṁ asesavirāganirodhā atthaññaṁ kiñcī”ti?
an4.174:3.1	“Mā hevaṁ, āvuso”.
an4.174:4.1	“Channaṁ, āvuso, phassāyatanānaṁ asesavirāganirodhā natthaññaṁ kiñcī”ti?
an4.174:5.1	“Mā hevaṁ, āvuso”.
an4.174:6.1	“Channaṁ, āvuso, phassāyatanānaṁ asesavirāganirodhā atthi ca natthi ca aññaṁ kiñcī”ti?
an4.174:7.1	“Mā hevaṁ, āvuso”.
an4.174:8.1	“Channaṁ, āvuso, phassāyatanānaṁ asesavirāganirodhā nevatthi no natthaññaṁ kiñcī”ti?
an4.174:9.1	“Mā hevaṁ, āvuso”.
an4.174:10.1	“‘Channaṁ, āvuso, phassāyatanānaṁ asesavirāganirodhā atthaññaṁ kiñcī’ti, iti puṭṭho samāno:
an4.174:10.2	‘mā hevaṁ, āvuso’ti vadesi.
an4.174:10.3	‘Channaṁ, āvuso, phassāyatanānaṁ asesavirāganirodhā natthaññaṁ kiñcī’ti, iti puṭṭho samāno:
an4.174:10.4	‘mā hevaṁ, āvuso’ti vadesi.
an4.174:10.5	‘Channaṁ, āvuso, phassāyatanānaṁ asesavirāganirodhā atthi ca natthi ca aññaṁ kiñcī’ti, iti puṭṭho samāno:
an4.174:10.6	‘mā hevaṁ, āvuso’ti vadesi.
an4.174:10.7	‘Channaṁ, āvuso, phassāyatanānaṁ asesavirāganirodhā nevatthi no natthaññaṁ kiñcī’ti, iti puṭṭho samāno:
an4.174:10.8	‘mā hevaṁ, āvuso’ti vadesi.
an4.174:10.9	Yathā kathaṁ panāvuso, imassa bhāsitassa attho daṭṭhabbo”ti?
an4.174:11.1	“‘Channaṁ, āvuso, phassāyatanānaṁ asesavirāganirodhā atthaññaṁ kiñcī’ti, iti vadaṁ appapañcaṁ papañceti.
an4.174:11.2	‘Channaṁ, āvuso, phassāyatanānaṁ asesavirāganirodhā natthaññaṁ kiñcī’ti, iti vadaṁ appapañcaṁ papañceti.
an4.174:11.3	‘Channaṁ, āvuso, phassāyatanānaṁ asesavirāganirodhā atthi ca natthi ca aññaṁ kiñcī’ti, iti vadaṁ appapañcaṁ papañceti.
an4.174:11.4	‘Channaṁ, āvuso, phassāyatanānaṁ asesavirāganirodhā nevatthi no natthaññaṁ kiñcī’ti, iti vadaṁ appapañcaṁ papañceti.
an4.174:11.5	Yāvatā, āvuso, channaṁ phassāyatanānaṁ gati tāvatā papañcassa gati.
an4.174:11.6	Yāvatā papañcassa gati tāvatā channaṁ phassāyatanānaṁ gati.
an4.174:11.7	Channaṁ, āvuso, phassāyatanānaṁ asesavirāganirodhā papañcanirodho papañcavūpasamo”ti.
an4.174:11.8	Catutthaṁ.
an4.175:0.1	Aṅguttara Nikāya 4.175
an4.175:0.2	18. Sañcetaniyavagga
an4.175:0.3	Upavāṇasutta
an4.175:1.1	Atha kho āyasmā upavāṇo yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an4.175:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā upavāṇo āyasmantaṁ sāriputtaṁ etadavoca:
an4.175:2.1	“Kiṁ nu kho, āvuso sāriputta, vijjāyantakaro hotī”ti?
an4.175:3.1	“No hidaṁ, āvuso”.
an4.175:4.1	“Kiṁ panāvuso sāriputta, caraṇenantakaro hotī”ti?
an4.175:5.1	“No hidaṁ, āvuso”.
an4.175:6.1	“Kiṁ panāvuso sāriputta, vijjācaraṇenantakaro hotī”ti?
an4.175:7.1	“No hidaṁ, āvuso”.
an4.175:8.1	“Kiṁ panāvuso sāriputta, aññatra vijjācaraṇenantakaro hotī”ti?
an4.175:9.1	“No hidaṁ, āvuso”.
an4.175:10.1	“‘Kiṁ nu kho, āvuso sāriputta, vijjāyantakaro hotī’ti, iti puṭṭho samāno:
an4.175:10.2	‘no hidaṁ, āvuso’ti vadesi.
an4.175:10.3	‘Kiṁ panāvuso sāriputta, caraṇenantakaro hotī’ti, iti puṭṭho samāno:
an4.175:10.4	‘no hidaṁ, āvuso’ti vadesi.
an4.175:10.5	‘Kiṁ panāvuso sāriputta, vijjācaraṇenantakaro hotī’ti, iti puṭṭho samāno:
an4.175:10.6	‘no hidaṁ, āvuso’ti vadesi.
an4.175:10.7	‘Kiṁ panāvuso sāriputta, aññatra vijjācaraṇenantakaro hotī’ti, iti puṭṭho samāno:
an4.175:10.8	‘no hidaṁ, āvuso’ti vadesi.
an4.175:10.9	Yathā kathaṁ panāvuso, antakaro hotī”ti?
an4.175:11.1	“Vijjāya ce, āvuso, antakaro abhavissa, saupādānova samāno antakaro abhavissa.
an4.175:11.2	Caraṇena ce, āvuso, antakaro abhavissa, saupādānova samāno antakaro abhavissa.
an4.175:11.3	Vijjācaraṇena ce, āvuso, antakaro abhavissa, saupādānova samāno antakaro abhavissa.
an4.175:11.4	Aññatra vijjācaraṇena ce, āvuso, antakaro abhavissa, puthujjano antakaro abhavissa.
an4.175:11.5	Puthujjano hi, āvuso, aññatra vijjācaraṇena.
an4.175:11.6	Caraṇavipanno kho, āvuso, yathābhūtaṁ na jānāti na passati.
an4.175:11.7	Caraṇasampanno yathābhūtaṁ jānāti passati.
an4.175:11.8	Yathābhūtaṁ jānaṁ passaṁ antakaro hotī”ti.
an4.175:11.9	Pañcamaṁ.
an4.176:0.1	Aṅguttara Nikāya 4.176
an4.176:0.2	18. Sañcetaniyavagga
an4.176:0.3	Āyācanasutta
an4.176:1.1	“Saddho, bhikkhave, bhikkhu evaṁ sammā āyācamāno āyāceyya:
an4.176:1.2	‘tādiso homi yādisā sāriputtamoggallānā’ti.
an4.176:1.3	Esā, bhikkhave, tulā etaṁ pamāṇaṁ mama sāvakānaṁ bhikkhūnaṁ, yadidaṁ sāriputtamoggallānā.
an4.176:2.1	Saddhā, bhikkhave, bhikkhunī evaṁ sammā āyācamānā āyāceyya:
an4.176:2.2	‘tādisā homi yādisā khemā ca bhikkhunī uppalavaṇṇā cā’ti.
an4.176:2.3	Esā, bhikkhave, tulā etaṁ pamāṇaṁ mama sāvikānaṁ bhikkhunīnaṁ, yadidaṁ khemā ca bhikkhunī uppalavaṇṇā ca.
an4.176:3.1	Saddho, bhikkhave, upāsako evaṁ sammā āyācamāno āyāceyya:
an4.176:3.2	‘tādiso homi yādiso citto ca gahapati hatthako ca āḷavako’ti.
an4.176:3.3	Esā, bhikkhave, tulā etaṁ pamāṇaṁ mama sāvakānaṁ upāsakānaṁ, yadidaṁ citto ca gahapati hatthako ca āḷavako.
an4.176:4.1	Saddhā, bhikkhave, upāsikā evaṁ sammā āyācamānā āyāceyya:
an4.176:4.2	‘tādisā homi yādisā khujjuttarā ca upāsikā veḷukaṇḍakiyā ca nandamātā’ti.
an4.176:4.3	Esā, bhikkhave, tulā etaṁ pamāṇaṁ mama sāvikānaṁ upāsikānaṁ, yadidaṁ khujjuttarā ca upāsikā veḷukaṇḍakiyā ca nandamātā”ti.
an4.176:4.4	Chaṭṭhaṁ.
an4.177:0.1	Aṅguttara Nikāya 4.177
an4.177:0.2	18. Sañcetaniyavagga
an4.177:0.3	Rāhulasutta
an4.177:1.1	Atha kho āyasmā rāhulo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ rāhulaṁ bhagavā etadavoca:
an4.177:2.1	“Yā ca, rāhula, ajjhattikā pathavīdhātu yā ca bāhirā pathavīdhātu, pathavīdhāturevesā.
an4.177:2.2	‘Taṁ netaṁ mama, nesohamasmi, na meso attā’ti, evametaṁ yathābhūtaṁ sammappaññāya daṭṭhabbaṁ.
an4.177:2.3	Evametaṁ yathābhūtaṁ sammappaññāya disvā pathavīdhātuyā nibbindati, pathavīdhātuyā cittaṁ virājeti.
an4.177:3.1	Yā ca, rāhula, ajjhattikā āpodhātu yā ca bāhirā āpodhātu, āpodhāturevesā.
an4.177:3.2	‘Taṁ netaṁ mama, nesohamasmi, na meso attā’ti, evametaṁ yathābhūtaṁ sammappaññāya daṭṭhabbaṁ.
an4.177:3.3	Evametaṁ yathābhūtaṁ sammappaññāya disvā āpodhātuyā nibbindati, āpodhātuyā cittaṁ virājeti.
an4.177:4.1	Yā ca, rāhula, ajjhattikā tejodhātu yā ca bāhirā tejodhātu, tejodhāturevesā.
an4.177:4.2	‘Taṁ netaṁ mama, nesohamasmi, na meso attā’ti, evametaṁ yathābhūtaṁ sammappaññāya daṭṭhabbaṁ.
an4.177:4.3	Evametaṁ yathābhūtaṁ sammappaññāya disvā tejodhātuyā nibbindati, tejodhātuyā cittaṁ virājeti.
an4.177:5.1	Yā ca, rāhula, ajjhattikā vāyodhātu yā ca bāhirā vāyodhātu, vāyodhāturevesā.
an4.177:5.2	‘Taṁ netaṁ mama, nesohamasmi, na meso attā’ti, evametaṁ yathābhūtaṁ sammappaññāya daṭṭhabbaṁ.
an4.177:5.3	Evametaṁ yathābhūtaṁ sammappaññāya disvā vāyodhātuyā nibbindati, vāyodhātuyā cittaṁ virājeti.
an4.177:6.1	Yato kho, rāhula, bhikkhu imāsu catūsu dhātūsu nevattānaṁ na attaniyaṁ samanupassati, ayaṁ vuccati, rāhula, bhikkhu acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā”ti.
an4.177:6.2	Sattamaṁ.
an4.178:0.1	Aṅguttara Nikāya 4.178
an4.178:0.2	18. Sañcetaniyavagga
an4.178:0.3	Jambālīsutta
an4.178:1.1	“Cattārome, bhikkhave, puggalā santo saṁvijjamānā lokasmiṁ.
an4.178:1.2	Katame cattāro?
an4.178:1.3	Idha, bhikkhave, bhikkhu aññataraṁ santaṁ cetovimuttiṁ upasampajja viharati.
an4.178:1.4	So sakkāyanirodhaṁ manasi karoti.
an4.178:1.5	Tassa sakkāyanirodhaṁ manasi karoto sakkāyanirodhe cittaṁ na pakkhandati nappasīdati na santiṭṭhati nādhimuccati.
an4.178:1.6	Tassa kho evaṁ, bhikkhave, bhikkhuno na sakkāyanirodho pāṭikaṅkho.
an4.178:1.7	Seyyathāpi, bhikkhave, puriso lepagatena hatthena sākhaṁ gaṇheyya, tassa so hattho sajjeyyapi gaṇheyyapi bajjheyyapi;
an4.178:1.8	evamevaṁ kho, bhikkhave, bhikkhu aññataraṁ santaṁ cetovimuttiṁ upasampajja viharati.
an4.178:1.9	So sakkāyanirodhaṁ manasi karoti.
an4.178:1.10	Tassa sakkāyanirodhaṁ manasi karoto sakkāyanirodhe cittaṁ na pakkhandati nappasīdati na santiṭṭhati nādhimuccati.
an4.178:1.11	Tassa kho evaṁ, bhikkhave, bhikkhuno na sakkāyanirodho pāṭikaṅkho.
an4.178:2.1	Idha pana, bhikkhave, bhikkhu aññataraṁ santaṁ cetovimuttiṁ upasampajja viharati.
an4.178:2.2	So sakkāyanirodhaṁ manasi karoti.
an4.178:2.3	Tassa sakkāyanirodhaṁ manasi karoto sakkāyanirodhe cittaṁ pakkhandati pasīdati santiṭṭhati adhimuccati.
an4.178:2.4	Tassa kho evaṁ, bhikkhave, bhikkhuno sakkāyanirodho pāṭikaṅkho.
an4.178:2.5	Seyyathāpi, bhikkhave, puriso suddhena hatthena sākhaṁ gaṇheyya, tassa so hattho neva sajjeyya na gaṇheyya na bajjheyya;
an4.178:2.6	evamevaṁ kho, bhikkhave, bhikkhu aññataraṁ santaṁ cetovimuttiṁ upasampajja viharati.
an4.178:2.7	So sakkāyanirodhaṁ manasi karoti.
an4.178:2.8	Tassa sakkāyanirodhaṁ manasi karoto sakkāyanirodhe cittaṁ pakkhandati pasīdati santiṭṭhati adhimuccati.
an4.178:2.9	Tassa kho evaṁ, bhikkhave, bhikkhuno sakkāyanirodho pāṭikaṅkho.
an4.178:3.1	Idha pana, bhikkhave, bhikkhu aññataraṁ santaṁ cetovimuttiṁ upasampajja viharati.
an4.178:3.2	So avijjāppabhedaṁ manasi karoti.
an4.178:3.3	Tassa avijjāppabhedaṁ manasi karoto avijjāppabhede cittaṁ na pakkhandati nappasīdati na santiṭṭhati nādhimuccati.
an4.178:3.4	Tassa kho evaṁ, bhikkhave, bhikkhuno na avijjāppabhedo pāṭikaṅkho.
an4.178:3.5	Seyyathāpi, bhikkhave, jambālī anekavassagaṇikā.
an4.178:3.6	Tassā puriso yāni ceva āyamukhāni tāni pidaheyya, yāni ca apāyamukhāni tāni vivareyya, devo ca na sammā dhāraṁ anuppaveccheyya.
an4.178:3.7	Evañhi tassā, bhikkhave, jambāliyā na āḷippabhedo pāṭikaṅkho.
an4.178:3.8	Evamevaṁ kho, bhikkhave, bhikkhu aññataraṁ santaṁ cetovimuttiṁ upasampajja viharati.
an4.178:3.9	So avijjāppabhedaṁ manasi karoti.
an4.178:3.10	Tassa avijjāppabhedaṁ manasi karoto avijjāppabhede cittaṁ na pakkhandati nappasīdati na santiṭṭhati nādhimuccati.
an4.178:3.11	Tassa kho evaṁ, bhikkhave, bhikkhuno na avijjāppabhedo pāṭikaṅkho.
an4.178:4.1	Idha pana, bhikkhave, bhikkhu aññataraṁ santaṁ cetovimuttiṁ upasampajja viharati.
an4.178:4.2	So avijjāppabhedaṁ manasi karoti.
an4.178:4.3	Tassa avijjāppabhedaṁ manasi karoto avijjāppabhede cittaṁ pakkhandati pasīdati santiṭṭhati adhimuccati.
an4.178:4.4	Tassa kho evaṁ, bhikkhave, bhikkhuno avijjāppabhedo pāṭikaṅkho.
an4.178:4.5	Seyyathāpi, bhikkhave, jambālī anekavassagaṇikā.
an4.178:4.6	Tassā puriso yāni ceva āyamukhāni tāni vivareyya, yāni ca apāyamukhāni tāni pidaheyya, devo ca sammā dhāraṁ anuppaveccheyya.
an4.178:4.7	Evañhi tassā, bhikkhave, jambāliyā āḷippabhedo pāṭikaṅkho.
an4.178:4.8	Evamevaṁ kho, bhikkhave, bhikkhu aññataraṁ santaṁ cetovimuttiṁ upasampajja viharati.
an4.178:4.9	So avijjāppabhedaṁ manasi karoti.
an4.178:4.10	Tassa avijjāppabhedaṁ manasi karoto avijjāppabhede cittaṁ pakkhandati pasīdati santiṭṭhati adhimuccati.
an4.178:4.11	Tassa kho evaṁ, bhikkhave, bhikkhuno avijjāppabhedo pāṭikaṅkho.
an4.178:4.12	Ime kho, bhikkhave, cattāro puggalā santo saṁvijjamānā lokasmin”ti.
an4.178:4.13	Aṭṭhamaṁ.
an4.179:0.1	Aṅguttara Nikāya 4.179
an4.179:0.2	18. Sañcetaniyavagga
an4.179:0.3	Nibbānasutta
an4.179:1.1	Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an4.179:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā ānando āyasmantaṁ sāriputtaṁ etadavoca:
an4.179:1.3	“ko nu kho, āvuso sāriputta, hetu ko paccayo, yena m’idhekacce sattā diṭṭheva dhamme na parinibbāyantī”ti?
an4.179:2.1	“Idhāvuso ānanda, sattā imā hānabhāgiyā saññāti yathābhūtaṁ nappajānanti, imā ṭhitibhāgiyā saññāti yathābhūtaṁ nappajānanti, imā visesabhāgiyā saññāti yathābhūtaṁ nappajānanti, imā nibbedhabhāgiyā saññāti yathābhūtaṁ nappajānanti.
an4.179:2.2	Ayaṁ kho, āvuso ānanda, hetu ayaṁ paccayo, yena m’idhekacce sattā diṭṭheva dhamme na parinibbāyantī”ti.
an4.179:3.1	“Ko panāvuso sāriputta, hetu ko paccayo, yena m’idhekacce sattā diṭṭheva dhamme parinibbāyantī”ti?
an4.179:3.2	“Idhāvuso ānanda, sattā imā hānabhāgiyā saññāti yathābhūtaṁ pajānanti, imā ṭhitibhāgiyā saññāti yathābhūtaṁ pajānanti, imā visesabhāgiyā saññāti yathābhūtaṁ pajānanti, imā nibbedhabhāgiyā saññāti yathābhūtaṁ pajānanti.
an4.179:3.3	Ayaṁ kho, āvuso ānanda, hetu ayaṁ paccayo, yena m’idhekacce sattā diṭṭheva dhamme parinibbāyantī”ti.
an4.179:3.4	Navamaṁ.
an4.180:0.1	Aṅguttara Nikāya 4.180
an4.180:0.2	18. Sañcetaniyavagga
an4.180:0.3	Mahāpadesasutta
an4.180:1.1	Ekaṁ samayaṁ bhagavā bhoganagare viharati ānandacetiye.
an4.180:1.2	Tatra kho bhagavā bhikkhū āmantesi:
an4.180:1.3	“bhikkhavo”ti.
an4.180:1.4	“Bhadante”ti te bhikkhū bhagavato paccassosuṁ.
an4.180:1.5	Bhagavā etadavoca:
an4.180:1.6	“cattārome, bhikkhave, mahāpadese desessāmi,
an4.180:1.7	taṁ suṇātha, sādhukaṁ manasi karotha, bhāsissāmī”ti.
an4.180:1.8	“Evaṁ, bhante”ti kho te bhikkhū bhagavato paccassosuṁ.
an4.180:1.9	Bhagavā etadavoca:
an4.180:2.1	“Katame, bhikkhave, cattāro mahāpadesā?
an4.180:2.2	Idha, bhikkhave, bhikkhu evaṁ vadeyya:
an4.180:2.3	‘sammukhā metaṁ, āvuso, bhagavato sutaṁ sammukhā paṭiggahitaṁ—
an4.180:2.4	ayaṁ dhammo, ayaṁ vinayo, idaṁ satthusāsanan’ti.
an4.180:2.5	Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.
an4.180:2.6	Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.
an4.180:2.7	Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṁ:
an4.180:2.8	‘addhā idaṁ na ceva tassa bhagavato vacanaṁ arahato sammāsambuddhassa;
an4.180:2.9	imassa ca bhikkhuno duggahitan’ti.
an4.180:2.10	Iti hetaṁ, bhikkhave, chaḍḍeyyātha.
an4.180:3.1	Idha pana, bhikkhave, bhikkhu evaṁ vadeyya:
an4.180:3.2	‘sammukhā metaṁ, āvuso, bhagavato sutaṁ sammukhā paṭiggahitaṁ—
an4.180:3.3	ayaṁ dhammo, ayaṁ vinayo, idaṁ satthusāsanan’ti.
an4.180:3.4	Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.
an4.180:3.5	Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.
an4.180:3.6	Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṁ:
an4.180:3.7	‘addhā idaṁ tassa bhagavato vacanaṁ arahato sammāsambuddhassa;
an4.180:3.8	imassa ca bhikkhuno suggahitan’ti.
an4.180:3.9	Idaṁ, bhikkhave, paṭhamaṁ mahāpadesaṁ dhāreyyātha.
an4.180:4.1	Idha pana, bhikkhave, bhikkhu evaṁ vadeyya:
an4.180:4.2	‘asukasmiṁ nāma āvāse saṅgho viharati sathero sapāmokkho.
an4.180:4.3	Tassa me saṅghassa sammukhā sutaṁ sammukhā paṭiggahitaṁ—
an4.180:4.4	ayaṁ dhammo, ayaṁ vinayo, idaṁ satthusāsanan’ti.
an4.180:4.5	Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.
an4.180:4.6	Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.
an4.180:4.7	Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṁ:
an4.180:4.8	‘addhā idaṁ na ceva tassa bhagavato vacanaṁ arahato sammāsambuddhassa;
an4.180:4.9	tassa ca saṅghassa duggahitan’ti.
an4.180:4.10	Iti hetaṁ, bhikkhave, chaḍḍeyyātha.
an4.180:5.1	Idha pana, bhikkhave, bhikkhu evaṁ vadeyya:
an4.180:5.2	‘asukasmiṁ nāma āvāse saṅgho viharati sathero sapāmokkho.
an4.180:5.3	Tassa me saṅghassa sammukhā sutaṁ sammukhā paṭiggahitaṁ—
an4.180:5.4	ayaṁ dhammo, ayaṁ vinayo, idaṁ satthusāsanan’ti.
an4.180:5.5	Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.
an4.180:5.6	Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.
an4.180:5.7	Tāni ce sutte otāriyamānāni, vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṁ:
an4.180:5.8	‘addhā idaṁ tassa bhagavato vacanaṁ arahato sammāsambuddhassa;
an4.180:5.9	tassa ca saṅghassa suggahitan’ti.
an4.180:5.10	Idaṁ, bhikkhave, dutiyaṁ mahāpadesaṁ dhāreyyātha.
an4.180:6.1	Idha pana, bhikkhave, bhikkhu evaṁ vadeyya:
an4.180:6.2	‘asukasmiṁ nāma āvāse sambahulā therā bhikkhū viharanti bahussutā āgatāgamā dhammadharā vinayadharā mātikādharā.
an4.180:6.3	Tesaṁ me therānaṁ sammukhā sutaṁ sammukhā paṭiggahitaṁ—
an4.180:6.4	ayaṁ dhammo, ayaṁ vinayo, idaṁ satthusāsanan’ti.
an4.180:6.5	Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.
an4.180:6.6	Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.
an4.180:6.7	Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṁ:
an4.180:6.8	‘addhā idaṁ na ceva tassa bhagavato vacanaṁ arahato sammāsambuddhassa;
an4.180:6.9	tesañca therānaṁ duggahitan’ti.
an4.180:6.10	Iti hetaṁ, bhikkhave, chaḍḍeyyātha.
an4.180:7.1	Idha pana, bhikkhave, bhikkhu evaṁ vadeyya:
an4.180:7.2	‘asukasmiṁ nāma āvāse sambahulā therā bhikkhū viharanti bahussutā āgatāgamā dhammadharā vinayadharā mātikādharā.
an4.180:7.3	Tesaṁ me therānaṁ sammukhā sutaṁ sammukhā paṭiggahitaṁ—
an4.180:7.4	ayaṁ dhammo, ayaṁ vinayo, idaṁ satthusāsanan’ti.
an4.180:7.5	Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.
an4.180:7.6	Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.
an4.180:7.7	Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṁ:
an4.180:7.8	‘addhā idaṁ tassa bhagavato vacanaṁ arahato sammāsambuddhassa;
an4.180:7.9	tesañca therānaṁ suggahitan’ti.
an4.180:7.10	Idaṁ, bhikkhave, tatiyaṁ mahāpadesaṁ dhāreyyātha.
an4.180:8.1	Idha pana, bhikkhave, bhikkhu evaṁ vadeyya:
an4.180:8.2	‘asukasmiṁ nāma āvāse eko thero bhikkhu viharati bahussuto āgatāgamo dhammadharo vinayadharo mātikādharo.
an4.180:8.3	Tassa me therassa sammukhā sutaṁ sammukhā paṭiggahitaṁ—
an4.180:8.4	ayaṁ dhammo, ayaṁ vinayo, idaṁ satthusāsanan’ti.
an4.180:8.5	Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.
an4.180:8.6	Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.
an4.180:8.7	Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṁ:
an4.180:8.8	‘addhā idaṁ na ceva tassa bhagavato vacanaṁ arahato sammāsambuddhassa;
an4.180:8.9	tassa ca therassa duggahitan’ti.
an4.180:8.10	Iti hetaṁ, bhikkhave, chaḍḍeyyātha.
an4.180:9.1	Idha pana, bhikkhave, bhikkhu evaṁ vadeyya:
an4.180:9.2	‘asukasmiṁ nāma āvāse eko thero bhikkhu viharati bahussuto āgatāgamo dhammadharo vinayadharo mātikādharo.
an4.180:9.3	Tassa me therassa sammukhā sutaṁ sammukhā paṭiggahitaṁ—
an4.180:9.4	ayaṁ dhammo, ayaṁ vinayo, idaṁ satthusāsanan’ti.
an4.180:9.5	Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.
an4.180:9.6	Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.
an4.180:9.7	Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṁ:
an4.180:9.8	‘addhā idaṁ tassa bhagavato vacanaṁ arahato sammāsambuddhassa;
an4.180:9.9	tassa ca therassa suggahitan’ti.
an4.180:9.10	Idaṁ, bhikkhave, catutthaṁ mahāpadesaṁ dhāreyyātha.
an4.180:9.11	Ime kho, bhikkhave, cattāro mahāpadesā”ti.
an4.180:9.12	Dasamaṁ.
an4.180:9.13	Sañcetaniyavaggo tatiyo.
an4.180:10.0	Tassuddānaṁ
an4.180:10.1	Cetanā vibhatti koṭṭhiko,
an4.180:10.2	Ānando upavāṇapañcamaṁ;
an4.180:10.3	Āyācana rāhula jambālī,
an4.180:10.4	Nibbānaṁ mahāpadesenāti.
an4.181:0.1	Aṅguttara Nikāya 4.181
an4.181:0.2	19. Brāhmaṇavagga
an4.181:0.3	Yodhājīvasutta
an4.181:1.1	“Catūhi, bhikkhave, aṅgehi samannāgato yodhājīvo rājāraho hoti rājabhoggo, rañño aṅganteva saṅkhaṁ gacchati.
an4.181:1.2	Katamehi catūhi?
an4.181:1.3	Idha, bhikkhave, yodhājīvo ṭhānakusalo ca hoti, dūrepātī ca, akkhaṇavedhī ca, mahato ca kāyassa padāletā.
an4.181:1.4	Imehi kho, bhikkhave, catūhi aṅgehi samannāgato yodhājīvo rājāraho hoti rājabhoggo, rañño aṅganteva saṅkhaṁ gacchati.
an4.181:1.5	Evamevaṁ kho, bhikkhave, catūhi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an4.181:1.6	Katamehi catūhi?
an4.181:1.7	Idha, bhikkhave, bhikkhu ṭhānakusalo ca hoti, dūrepātī ca, akkhaṇavedhī ca, mahato ca kāyassa padāletā.
an4.181:2.1	Kathañca, bhikkhave, bhikkhu ṭhānakusalo hoti?
an4.181:2.2	Idha, bhikkhave, bhikkhu sīlavā hoti …pe… samādāya sikkhati sikkhāpadesu.
an4.181:2.3	Evaṁ kho, bhikkhave, bhikkhu ṭhānakusalo hoti.
an4.181:3.1	Kathañca, bhikkhave, bhikkhu dūrepātī hoti?
an4.181:3.2	Idha, bhikkhave, bhikkhu yaṁ kiñci rūpaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā, sabbaṁ rūpaṁ ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya passati.
an4.181:3.3	Yā kāci vedanā …
an4.181:3.4	yā kāci saññā …
an4.181:3.5	ye keci saṅkhārā …
an4.181:3.6	yaṁ kiñci viññāṇaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā, sabbaṁ viññāṇaṁ ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya passati.
an4.181:3.7	Evaṁ kho, bhikkhave, bhikkhu dūrepātī hoti.
an4.181:4.1	Kathañca, bhikkhave, bhikkhu akkhaṇavedhī hoti?
an4.181:4.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.181:4.3	Evaṁ kho, bhikkhave, bhikkhu akkhaṇavedhī hoti.
an4.181:5.1	Kathañca, bhikkhave, bhikkhu mahato kāyassa padāletā hoti?
an4.181:5.2	Idha, bhikkhave, bhikkhu mahantaṁ avijjākkhandhaṁ padāletā.
an4.181:5.3	Evaṁ kho, bhikkhave, bhikkhu mahato kāyassa padāletā hoti.
an4.181:5.4	Imehi kho, bhikkhave, catūhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an4.181:5.5	Paṭhamaṁ.
an4.182:0.1	Aṅguttara Nikāya 4.182
an4.182:0.2	19. Brāhmaṇavagga
an4.182:0.3	Pāṭibhogasutta
an4.182:1.1	“Catunnaṁ, bhikkhave, dhammānaṁ natthi koci pāṭibhogo—
an4.182:1.2	samaṇo vā brāhmaṇo vā devo vā māro vā brahmā vā koci vā lokasmiṁ.
an4.182:2.1	Katamesaṁ catunnaṁ?
an4.182:2.2	‘Jarādhammaṁ mā jīrī’ti natthi koci pāṭibhogo—
an4.182:2.3	samaṇo vā brāhmaṇo vā devo vā māro vā brahmā vā koci vā lokasmiṁ;
an4.182:2.4	‘byādhidhammaṁ mā byādhiyī’ti natthi koci pāṭibhogo—
an4.182:2.5	samaṇo vā brāhmaṇo vā devo vā māro vā brahmā vā koci vā lokasmiṁ;
an4.182:2.6	‘maraṇadhammaṁ mā mīyī’ti natthi koci pāṭibhogo—
an4.182:2.7	samaṇo vā brāhmaṇo vā devo vā māro vā brahmā vā koci vā lokasmiṁ;
an4.182:2.8	‘yāni kho pana tāni pubbe attanā katāni pāpakāni kammāni saṅkilesikāni ponobhavikāni sadarāni dukkhavipākāni āyatiṁ jātijarāmaraṇikāni, tesaṁ vipāko mā nibbattī’ti natthi koci pāṭibhogo—
an4.182:2.9	samaṇo vā brāhmaṇo vā devo vā māro vā brahmā vā koci vā lokasmiṁ.
an4.182:3.1	Imesaṁ kho, bhikkhave, catunnaṁ dhammānaṁ natthi koci pāṭibhogo—
an4.182:3.2	samaṇo vā brāhmaṇo vā devo vā māro vā brahmā vā koci vā lokasmin”ti.
an4.182:3.3	Dutiyaṁ.
an4.183:0.1	Aṅguttara Nikāya 4.183
an4.183:0.2	19. Brāhmaṇavagga
an4.183:0.3	Sutasutta
an4.183:1.1	Ekaṁ samayaṁ bhagavā rājagahe viharati veḷuvane kalandakanivāpe.
an4.183:1.2	Atha kho vassakāro brāhmaṇo magadhamahāmatto yena bhagavā tenupasaṅkami; upasaṅkamitvā bhagavatā saddhiṁ sammodi.
an4.183:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vassakāro brāhmaṇo magadhamahāmatto bhagavantaṁ etadavoca:
an4.183:2.1	“Ahañhi, bho gotama, evaṁvādī evaṁdiṭṭhi:
an4.183:2.2	‘yo koci diṭṭhaṁ bhāsati—
an4.183:2.3	evaṁ me diṭṭhanti, natthi tato doso;
an4.183:2.4	yo koci sutaṁ bhāsati—
an4.183:2.5	evaṁ me sutanti, natthi tato doso;
an4.183:2.6	yo koci mutaṁ bhāsati—
an4.183:2.7	evaṁ me mutanti, natthi tato doso;
an4.183:2.8	yo koci viññātaṁ bhāsati—
an4.183:2.9	evaṁ me viññātanti, natthi tato doso’”ti.
an4.183:3.1	“Nāhaṁ, brāhmaṇa, sabbaṁ diṭṭhaṁ bhāsitabbanti vadāmi;
an4.183:3.2	na panāhaṁ, brāhmaṇa, sabbaṁ diṭṭhaṁ na bhāsitabbanti vadāmi;
an4.183:3.3	nāhaṁ, brāhmaṇa, sabbaṁ sutaṁ bhāsitabbanti vadāmi;
an4.183:3.4	na panāhaṁ, brāhmaṇa, sabbaṁ sutaṁ na bhāsitabbanti vadāmi;
an4.183:3.5	nāhaṁ, brāhmaṇa, sabbaṁ mutaṁ bhāsitabbanti vadāmi;
an4.183:3.6	na panāhaṁ, brāhmaṇa, sabbaṁ mutaṁ na bhāsitabbanti vadāmi;
an4.183:3.7	nāhaṁ, brāhmaṇa, sabbaṁ viññātaṁ bhāsitabbanti vadāmi;
an4.183:3.8	na panāhaṁ, brāhmaṇa, sabbaṁ viññātaṁ na bhāsitabbanti vadāmi.
an4.183:4.1	Yañhi, brāhmaṇa, diṭṭhaṁ bhāsato akusalā dhammā abhivaḍḍhanti, kusalā dhammā parihāyanti, evarūpaṁ diṭṭhaṁ na bhāsitabbanti vadāmi.
an4.183:4.2	Yañca khvassa, brāhmaṇa, diṭṭhaṁ abhāsato kusalā dhammā parihāyanti, akusalā dhammā abhivaḍḍhanti, evarūpaṁ diṭṭhaṁ bhāsitabbanti vadāmi.
an4.183:5.1	Yañhi, brāhmaṇa, sutaṁ bhāsato akusalā dhammā abhivaḍḍhanti, kusalā dhammā parihāyanti, evarūpaṁ sutaṁ na bhāsitabbanti vadāmi.
an4.183:5.2	Yañca khvassa, brāhmaṇa, sutaṁ abhāsato kusalā dhammā parihāyanti, akusalā dhammā abhivaḍḍhanti, evarūpaṁ sutaṁ bhāsitabbanti vadāmi.
an4.183:6.1	Yañhi, brāhmaṇa, mutaṁ bhāsato akusalā dhammā abhivaḍḍhanti, kusalā dhammā parihāyanti, evarūpaṁ mutaṁ na bhāsitabbanti vadāmi.
an4.183:6.2	Yañca khvassa, brāhmaṇa, mutaṁ abhāsato kusalā dhammā parihāyanti, akusalā dhammā abhivaḍḍhanti, evarūpaṁ mutaṁ bhāsitabbanti vadāmi.
an4.183:7.1	Yañhi, brāhmaṇa, viññātaṁ bhāsato akusalā dhammā abhivaḍḍhanti, kusalā dhammā parihāyanti, evarūpaṁ viññātaṁ na bhāsitabbanti vadāmi.
an4.183:7.2	Yañca khvassa, brāhmaṇa, viññātaṁ abhāsato kusalā dhammā parihāyanti, akusalā dhammā abhivaḍḍhanti, evarūpaṁ viññātaṁ bhāsitabbanti vadāmī”ti.
an4.183:8.1	Atha kho vassakāro brāhmaṇo magadhamahāmatto bhagavato bhāsitaṁ abhinanditvā anumoditvā uṭṭhāyāsanā pakkāmīti.
an4.183:8.2	Tatiyaṁ.
an4.184:0.1	Aṅguttara Nikāya 4.184
an4.184:0.2	19. Brāhmaṇavagga
an4.184:0.3	Abhayasutta
an4.184:1.1	Atha kho jāṇussoṇi brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an4.184:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho jāṇussoṇi brāhmaṇo bhagavantaṁ etadavoca:
an4.184:2.1	“Ahañhi, bho gotama, evaṁvādī evaṁdiṭṭhi:
an4.184:2.2	‘natthi yo maraṇadhammo samāno na bhāyati, na santāsaṁ āpajjati maraṇassā’”ti.
an4.184:2.3	“Atthi, brāhmaṇa, maraṇadhammo samāno bhāyati, santāsaṁ āpajjati maraṇassa;
an4.184:2.4	atthi pana, brāhmaṇa, maraṇadhammo samāno na bhāyati, na santāsaṁ āpajjati maraṇassa.
an4.184:3.1	Katamo ca, brāhmaṇa, maraṇadhammo samāno bhāyati, santāsaṁ āpajjati maraṇassa?
an4.184:3.2	Idha, brāhmaṇa, ekacco kāmesu avītarāgo hoti avigatacchando avigatapemo avigatapipāso avigatapariḷāho avigatataṇho.
an4.184:3.3	Tamenaṁ aññataro gāḷho rogātaṅko phusati.
an4.184:3.4	Tassa aññatarena gāḷhena rogātaṅkena phuṭṭhassa evaṁ hoti:
an4.184:3.5	‘piyā vata maṁ kāmā jahissanti, piye cāhaṁ kāme jahissāmī’ti.
an4.184:3.6	So socati kilamati paridevati, urattāḷiṁ kandati, sammohaṁ āpajjati.
an4.184:3.7	Ayaṁ kho, brāhmaṇa, maraṇadhammo samāno bhāyati, santāsaṁ āpajjati maraṇassa.
an4.184:4.1	Puna caparaṁ, brāhmaṇa, idhekacco kāye avītarāgo hoti avigatacchando avigatapemo avigatapipāso avigatapariḷāho avigatataṇho.
an4.184:4.2	Tamenaṁ aññataro gāḷho rogātaṅko phusati.
an4.184:4.3	Tassa aññatarena gāḷhena rogātaṅkena phuṭṭhassa evaṁ hoti:
an4.184:4.4	‘piyo vata maṁ kāyo jahissati, piyañcāhaṁ kāyaṁ jahissāmī’ti.
an4.184:4.5	So socati kilamati paridevati, urattāḷiṁ kandati, sammohaṁ āpajjati.
an4.184:4.6	Ayampi kho, brāhmaṇa, maraṇadhammo samāno bhāyati, santāsaṁ āpajjati maraṇassa.
an4.184:5.1	Puna caparaṁ, brāhmaṇa, idhekacco akatakalyāṇo hoti akatakusalo akatabhīruttāṇo katapāpo kataluddo katakibbiso.
an4.184:5.2	Tamenaṁ aññataro gāḷho rogātaṅko phusati.
an4.184:5.3	Tassa aññatarena gāḷhena rogātaṅkena phuṭṭhassa evaṁ hoti:
an4.184:5.4	‘akataṁ vata me kalyāṇaṁ, akataṁ kusalaṁ, akataṁ bhīruttāṇaṁ;
an4.184:5.5	kataṁ pāpaṁ, kataṁ luddaṁ, kataṁ kibbisaṁ.
an4.184:5.6	Yāvatā, bho, akatakalyāṇānaṁ akatakusalānaṁ akatabhīruttāṇānaṁ katapāpānaṁ kataluddānaṁ katakibbisānaṁ gati taṁ gatiṁ pecca gacchāmī’ti.
an4.184:5.7	So socati kilamati paridevati, urattāḷiṁ kandati, sammohaṁ āpajjati.
an4.184:5.8	Ayampi kho, brāhmaṇa, maraṇadhammo samāno bhāyati, santāsaṁ āpajjati maraṇassa.
an4.184:6.1	Puna caparaṁ, brāhmaṇa, idhekacco kaṅkhī hoti vicikicchī aniṭṭhaṅgato saddhamme.
an4.184:6.2	Tamenaṁ aññataro gāḷho rogātaṅko phusati.
an4.184:6.3	Tassa aññatarena gāḷhena rogātaṅkena phuṭṭhassa evaṁ hoti:
an4.184:6.4	‘kaṅkhī vatamhi vicikicchī aniṭṭhaṅgato saddhamme’ti.
an4.184:6.5	So socati kilamati paridevati, urattāḷiṁ kandati, sammohaṁ āpajjati.
an4.184:6.6	Ayampi kho, brāhmaṇa, maraṇadhammo samāno bhāyati, santāsaṁ āpajjati maraṇassa.
an4.184:6.7	Ime kho, brāhmaṇa, cattāro maraṇadhammā samānā bhāyanti, santāsaṁ āpajjanti maraṇassa.
an4.184:7.1	Katamo ca, brāhmaṇa, maraṇadhammo samāno na bhāyati, na santāsaṁ āpajjati maraṇassa?
an4.184:7.2	Idha, brāhmaṇa, ekacco kāmesu vītarāgo hoti vigatacchando vigatapemo vigatapipāso vigatapariḷāho vigatataṇho.
an4.184:7.3	Tamenaṁ aññataro gāḷho rogātaṅko phusati.
an4.184:7.4	Tassa aññatarena gāḷhena rogātaṅkena phuṭṭhassa na evaṁ hoti:
an4.184:7.5	‘piyā vata maṁ kāmā jahissanti, piye cāhaṁ kāme jahissāmī’ti.
an4.184:7.6	So na socati na kilamati na paridevati, na urattāḷiṁ kandati, na sammohaṁ āpajjati.
an4.184:7.7	Ayaṁ kho, brāhmaṇa, maraṇadhammo samāno na bhāyati, na santāsaṁ āpajjati maraṇassa.
an4.184:8.1	Puna caparaṁ, brāhmaṇa, idhekacco kāye vītarāgo hoti vigatacchando vigatapemo vigatapipāso vigatapariḷāho vigatataṇho.
an4.184:8.2	Tamenaṁ aññataro gāḷho rogātaṅko phusati.
an4.184:8.3	Tassa aññatarena gāḷhena rogātaṅkena phuṭṭhassa na evaṁ hoti:
an4.184:8.4	‘piyo vata maṁ kāyo jahissati, piyañcāhaṁ kāyaṁ jahissāmī’ti.
an4.184:8.5	So na socati na kilamati na paridevati, na urattāḷiṁ kandati, na sammohaṁ āpajjati.
an4.184:8.6	Ayampi kho, brāhmaṇa, maraṇadhammo samāno na bhāyati, na santāsaṁ āpajjati maraṇassa.
an4.184:9.1	Puna caparaṁ, brāhmaṇa, idhekacco akatapāpo hoti akataluddo akatakibbiso katakalyāṇo katakusalo katabhīruttāṇo.
an4.184:9.2	Tamenaṁ aññataro gāḷho rogātaṅko phusati.
an4.184:9.3	Tassa aññatarena gāḷhena rogātaṅkena phuṭṭhassa evaṁ hoti:
an4.184:9.4	‘akataṁ vata me pāpaṁ, akataṁ luddaṁ, akataṁ kibbisaṁ;
an4.184:9.5	kataṁ kalyāṇaṁ, kataṁ kusalaṁ, kataṁ bhīruttāṇaṁ.
an4.184:9.6	Yāvatā, bho, akatapāpānaṁ akataluddānaṁ akatakibbisānaṁ katakalyāṇānaṁ katakusalānaṁ katabhīruttāṇānaṁ gati taṁ gatiṁ pecca gacchāmī’ti.
an4.184:9.7	So na socati na kilamati na paridevati, na urattāḷiṁ kandati, na sammohaṁ āpajjati.
an4.184:9.8	Ayampi kho, brāhmaṇa, maraṇadhammo samāno na bhāyati, na santāsaṁ āpajjati maraṇassa.
an4.184:10.1	Puna caparaṁ, brāhmaṇa, idhekacco akaṅkhī hoti avicikicchī niṭṭhaṅgato saddhamme.
an4.184:10.2	Tamenaṁ aññataro gāḷho rogātaṅko phusati.
an4.184:10.3	Tassa aññatarena gāḷhena rogātaṅkena phuṭṭhassa evaṁ hoti:
an4.184:10.4	‘akaṅkhī vatamhi avicikicchī niṭṭhaṅgato saddhamme’ti.
an4.184:10.5	So na socati na kilamati na paridevati, na urattāḷiṁ kandati, na sammohaṁ āpajjati.
an4.184:10.6	Ayampi kho, brāhmaṇa, maraṇadhammo samāno na bhāyati, na santāsaṁ āpajjati maraṇassa.
an4.184:10.7	Ime kho, brāhmaṇa, cattāro maraṇadhammā samānā na bhāyanti, na santāsaṁ āpajjanti maraṇassā”ti.
an4.184:11.1	“Abhikkantaṁ, bho gotama, abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an4.184:11.2	Catutthaṁ.
an4.185:0.1	Aṅguttara Nikāya 4.185
an4.185:0.2	19. Brāhmaṇavagga
an4.185:0.3	Brāhmaṇasaccasutta
an4.185:1.1	Ekaṁ samayaṁ bhagavā rājagahe viharati gijjhakūṭe pabbate.
an4.185:1.2	Tena kho pana samayena sambahulā abhiññātā abhiññātā paribbājakā sippinikātīre paribbājakārāme paṭivasanti, seyyathidaṁ annabhāro varadharo sakuludāyī ca paribbājako aññe ca abhiññātā abhiññātā paribbājakā.
an4.185:1.3	Atha kho bhagavā sāyanhasamayaṁ paṭisallānā vuṭṭhito yena sippinikātīre paribbājakārāmo tenupasaṅkami.
an4.185:2.1	Tena kho pana samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarā kathā udapādi:
an4.185:2.2	“itipi brāhmaṇasaccāni, itipi brāhmaṇasaccānī”ti.
an4.185:2.3	Atha kho bhagavā yena te paribbājakā tenupasaṅkami; upasaṅkamitvā paññatte āsane nisīdi. Nisajja kho bhagavā te paribbājake etadavoca:
an4.185:3.1	“Kāya nuttha, paribbājakā, etarahi kathāya sannisinnā, kā ca pana vo antarākathā vippakatā”ti?
an4.185:3.2	“Idha, bho gotama, amhākaṁ sannisinnānaṁ sannipatitānaṁ ayamantarākathā udapādi:
an4.185:3.3	‘itipi brāhmaṇasaccāni, itipi brāhmaṇasaccānī’”ti.
an4.185:4.1	“Cattārimāni, paribbājakā, brāhmaṇasaccāni mayā sayaṁ abhiññā sacchikatvā paveditāni.
an4.185:4.2	Katamāni cattāri?
an4.185:4.3	Idha, paribbājakā, brāhmaṇo evamāha:
an4.185:4.4	‘sabbe pāṇā avajjhā’ti.
an4.185:4.5	Iti vadaṁ brāhmaṇo saccaṁ āha, no musā.
an4.185:4.6	So tena na samaṇoti maññati, na brāhmaṇoti maññati, na seyyohamasmīti maññati, na sadisohamasmīti maññati, na hīnohamasmīti maññati.
an4.185:4.7	Api ca yadeva tattha saccaṁ tadabhiññāya pāṇānaṁyeva anuddayāya anukampāya paṭipanno hoti.
an4.185:5.1	Puna caparaṁ, paribbājakā, brāhmaṇo evamāha:
an4.185:5.2	‘sabbe kāmā aniccā dukkhā vipariṇāmadhammā’ti.
an4.185:5.3	Iti vadaṁ brāhmaṇo saccamāha, no musā.
an4.185:5.4	So tena na samaṇoti maññati, na brāhmaṇoti maññati, na seyyohamasmīti maññati, na sadisohamasmīti maññati, na hīnohamasmīti maññati.
an4.185:5.5	Api ca yadeva tattha saccaṁ tadabhiññāya kāmānaṁyeva nibbidāya virāgāya nirodhāya paṭipanno hoti.
an4.185:6.1	Puna caparaṁ, paribbājakā, brāhmaṇo evamāha:
an4.185:6.2	‘sabbe bhavā aniccā …pe… tadabhiññāya bhavānaṁyeva nibbidāya virāgāya nirodhāya paṭipanno hoti.
an4.185:7.1	Puna caparaṁ, paribbājakā, brāhmaṇo evamāha:
an4.185:7.2	‘nāhaṁ kvacani kassaci kiñcanatasmiṁ na ca mama kvacani katthaci kiñcanatatthī’ti.
an4.185:7.3	Iti vadaṁ brāhmaṇo saccaṁ āha, no musā.
an4.185:7.4	So tena na samaṇoti maññati, na brāhmaṇoti maññati, na seyyohamasmīti maññati, na sadisohamasmīti maññati, na hīnohamasmīti maññati.
an4.185:7.5	Api ca yadeva tattha saccaṁ tadabhiññāya ākiñcaññaṁyeva paṭipadaṁ paṭipanno hoti.
an4.185:7.6	Imāni kho, paribbājakā, cattāri brāhmaṇasaccāni mayā sayaṁ abhiññā sacchikatvā paveditānī”ti.
an4.185:7.7	Pañcamaṁ.
an4.186:0.1	Aṅguttara Nikāya 4.186
an4.186:0.2	19. Brāhmaṇavagga
an4.186:0.3	Ummaggasutta
an4.186:1.1	Atha kho aññataro bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an4.186:1.2	“kena nu kho, bhante, loko nīyati, kena loko parikassati, kassa ca uppannassa vasaṁ gacchatī”ti?
an4.186:2.1	“Sādhu sādhu, bhikkhu.
an4.186:2.2	Bhaddako kho te, bhikkhu, ummaggo, bhaddakaṁ paṭibhānaṁ, kalyāṇī paripucchā.
an4.186:2.3	Evañhi tvaṁ, bhikkhu, pucchasi:
an4.186:2.4	‘kena nu kho, bhante, loko nīyati, kena loko parikassati, kassa ca uppannassa vasaṁ gacchatī’”ti?
an4.186:2.5	“Evaṁ, bhante”.
an4.186:2.6	“Cittena kho, bhikkhu, loko nīyati, cittena parikassati, cittassa uppannassa vasaṁ gacchatī”ti.
an4.186:3.1	“Sādhu, bhante”ti kho so bhikkhu bhagavato bhāsitaṁ abhinanditvā anumoditvā bhagavantaṁ uttari pañhaṁ apucchi:
an4.186:3.2	“‘bahussuto dhammadharo, bahussuto dhammadharo’ti, bhante, vuccati.
an4.186:3.3	Kittāvatā nu kho, bhante, bahussuto dhammadharo hotī”ti?
an4.186:4.1	“Sādhu sādhu, bhikkhu.
an4.186:4.2	Bhaddako kho te, bhikkhu ummaggo, bhaddakaṁ paṭibhānaṁ, kalyāṇī paripucchā.
an4.186:4.3	Evañhi tvaṁ, bhikkhu, pucchasi:
an4.186:4.4	‘bahussuto dhammadharo, bahussuto dhammadharoti, bhante, vuccati.
an4.186:4.5	Kittāvatā nu kho, bhante, bahussuto dhammadharo hotī’”ti?
an4.186:4.6	“Evaṁ, bhante”.
an4.186:4.7	“Bahū kho, bhikkhu, mayā dhammā desitā—
an4.186:4.8	suttaṁ, geyyaṁ, veyyākaraṇaṁ, gāthā, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.186:4.9	Catuppadāya cepi, bhikkhu, gāthāya atthamaññāya dhammamaññāya dhammānudhammappaṭipanno hoti bahussuto dhammadharoti alaṁvacanāyā”ti.
an4.186:5.1	“Sādhu, bhante”ti kho so bhikkhu bhagavato bhāsitaṁ abhinanditvā anumoditvā bhagavantaṁ uttari pañhaṁ apucchi:
an4.186:5.2	“‘sutavā nibbedhikapañño, sutavā nibbedhikapañño’ti, bhante, vuccati.
an4.186:5.3	Kittāvatā nu kho, bhante, sutavā nibbedhikapañño hotī”ti?
an4.186:6.1	“Sādhu sādhu, bhikkhu.
an4.186:6.2	Bhaddako kho te, bhikkhu, ummaggo, bhaddakaṁ paṭibhānaṁ, kalyāṇī paripucchā.
an4.186:6.3	Evañhi tvaṁ, bhikkhu, pucchasi:
an4.186:6.4	‘sutavā nibbedhikapañño, sutavā nibbedhikapaññoti, bhante, vuccati.
an4.186:6.5	Kittāvatā nu kho, bhante, sutavā nibbedhikapañño hotī’”ti?
an4.186:6.6	“Evaṁ, bhante”.
an4.186:6.7	“Idha, bhikkhu, bhikkhuno ‘idaṁ dukkhan’ti sutaṁ hoti, paññāya cassa atthaṁ ativijjha passati;
an4.186:6.8	‘ayaṁ dukkhasamudayo’ti sutaṁ hoti, paññāya cassa atthaṁ ativijjha passati;
an4.186:6.9	‘ayaṁ dukkhanirodho’ti sutaṁ hoti, paññāya cassa atthaṁ ativijjha passati;
an4.186:6.10	‘ayaṁ dukkhanirodhagāminī paṭipadā’ti sutaṁ hoti, paññāya cassa atthaṁ ativijjha passati.
an4.186:6.11	Evaṁ kho, bhikkhu, sutavā nibbedhikapañño hotī”ti.
an4.186:7.1	“Sādhu, bhante”ti kho so bhikkhu bhagavato bhāsitaṁ abhinanditvā anumoditvā bhagavantaṁ uttari pañhaṁ apucchi:
an4.186:7.2	“‘paṇḍito mahāpañño, paṇḍito mahāpañño’ti, bhante, vuccati.
an4.186:7.3	Kittāvatā nu kho, bhante, paṇḍito mahāpañño hotī”ti?
an4.186:8.1	“Sādhu sādhu, bhikkhu.
an4.186:8.2	Bhaddako kho te, bhikkhu, ummaggo, bhaddakaṁ paṭibhānaṁ, kalyāṇī paripucchā.
an4.186:8.3	Evañhi tvaṁ bhikkhu pucchasi:
an4.186:8.4	‘paṇḍito mahāpañño, paṇḍito mahāpaññoti, bhante, vuccati.
an4.186:8.5	Kittāvatā nu kho, bhante, paṇḍito mahāpañño hotī’”ti?
an4.186:8.6	“Evaṁ, bhante”.
an4.186:8.7	“Idha, bhikkhu, paṇḍito mahāpañño nevattabyābādhāya ceteti na parabyābādhāya ceteti na ubhayabyābādhāya ceteti attahitaparahitaubhayahitasabbalokahitameva cintayamāno cinteti.
an4.186:8.8	Evaṁ kho, bhikkhu, paṇḍito mahāpañño hotī”ti.
an4.186:8.9	Chaṭṭhaṁ.
an4.187:0.1	Aṅguttara Nikāya 4.187
an4.187:0.2	19. Brāhmaṇavagga
an4.187:0.3	Vassakārasutta
an4.187:1.1	Ekaṁ samayaṁ bhagavā rājagahe viharati veḷuvane kalandakanivāpe.
an4.187:1.2	Atha kho vassakāro brāhmaṇo magadhamahāmatto yena bhagavā tenupasaṅkami; upasaṅkamitvā bhagavatā saddhiṁ sammodi.
an4.187:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vassakāro brāhmaṇo magadhamahāmatto bhagavantaṁ etadavoca:
an4.187:2.1	“Jāneyya nu kho, bho gotama, asappuriso asappurisaṁ:
an4.187:2.2	‘asappuriso ayaṁ bhavan’”ti?
an4.187:2.3	“Aṭṭhānaṁ kho etaṁ, brāhmaṇa, anavakāso yaṁ asappuriso asappurisaṁ jāneyya:
an4.187:2.4	‘asappuriso ayaṁ bhavan’”ti.
an4.187:2.5	“Jāneyya pana, bho gotama, asappuriso sappurisaṁ:
an4.187:2.6	‘sappuriso ayaṁ bhavan’”ti?
an4.187:2.7	“Etampi kho, brāhmaṇa, aṭṭhānaṁ anavakāso yaṁ asappuriso sappurisaṁ jāneyya:
an4.187:2.8	‘sappuriso ayaṁ bhavan’”ti.
an4.187:2.9	“Jāneyya nu kho, bho gotama, sappuriso sappurisaṁ:
an4.187:2.10	‘sappuriso ayaṁ bhavan’”ti?
an4.187:2.11	“Ṭhānaṁ kho etaṁ, brāhmaṇa, vijjati yaṁ sappuriso sappurisaṁ jāneyya:
an4.187:2.12	‘sappuriso ayaṁ bhavan’”ti.
an4.187:2.13	“Jāneyya pana, bho gotama, sappuriso asappurisaṁ:
an4.187:2.14	‘asappuriso ayaṁ bhavan’”ti?
an4.187:2.15	“Etampi kho, brāhmaṇa, ṭhānaṁ vijjati yaṁ sappuriso asappurisaṁ jāneyya:
an4.187:2.16	‘asappuriso ayaṁ bhavan’”ti.
an4.187:3.1	“Acchariyaṁ, bho gotama, abbhutaṁ, bho gotama.
an4.187:3.2	Yāva subhāsitañcidaṁ bhotā gotamena:
an4.187:3.3	‘aṭṭhānaṁ kho etaṁ, brāhmaṇa, anavakāso yaṁ asappuriso asappurisaṁ jāneyya—
an4.187:3.4	asappuriso ayaṁ bhavanti.
an4.187:3.5	Etampi kho, brāhmaṇa, aṭṭhānaṁ anavakāso yaṁ asappuriso sappurisaṁ jāneyya—
an4.187:3.6	sappuriso ayaṁ bhavanti.
an4.187:3.7	Ṭhānaṁ kho etaṁ, brāhmaṇa, vijjati yaṁ sappuriso sappurisaṁ jāneyya—
an4.187:3.8	sappuriso ayaṁ bhavanti.
an4.187:3.9	Etampi kho, brāhmaṇa, ṭhānaṁ vijjati yaṁ sappuriso asappurisaṁ jāneyya—
an4.187:3.10	asappuriso ayaṁ bhavan’ti.
an4.187:4.1	Ekamidaṁ, bho gotama, samayaṁ todeyyassa brāhmaṇassa parisati parūpārambhaṁ vattenti:
an4.187:4.2	‘bālo ayaṁ rājā eḷeyyo samaṇe rāmaputte abhippasanno, samaṇe ca pana rāmaputte evarūpaṁ paramanipaccakāraṁ karoti, yadidaṁ abhivādanaṁ paccuṭṭhānaṁ añjalikammaṁ sāmīcikammanti.
an4.187:4.3	Imepi rañño eḷeyyassa parihārakā bālā—
an4.187:4.4	yamako moggallo uggo nāvindakī gandhabbo aggivesso, ye samaṇe rāmaputte abhippasannā, samaṇe ca pana rāmaputte evarūpaṁ paramanipaccakāraṁ karonti, yadidaṁ abhivādanaṁ paccuṭṭhānaṁ añjalikammaṁ sāmīcikamman’ti.
an4.187:4.5	Tyāssudaṁ todeyyo brāhmaṇo iminā nayena neti.
an4.187:4.6	‘Taṁ kiṁ maññanti, bhonto,
an4.187:4.7	paṇḍito rājā eḷeyyo karaṇīyādhikaraṇīyesu vacanīyādhivacanīyesu alamatthadasatarehi alamatthadasataro’ti?
an4.187:4.8	‘Evaṁ, bho, paṇḍito rājā eḷeyyo karaṇīyādhikaraṇīyesu vacanīyādhivacanīyesu alamatthadasatarehi alamatthadasataroti.
an4.187:5.1	Yasmā ca kho, bho, samaṇo rāmaputto raññā eḷeyyena paṇḍitena paṇḍitataro karaṇīyādhikaraṇīyesu vacanīyādhivacanīyesu alamatthadasatarena alamatthadasataro, tasmā rājā eḷeyyo samaṇe rāmaputte abhippasanno, samaṇe ca pana rāmaputte evarūpaṁ paramanipaccakāraṁ karoti, yadidaṁ abhivādanaṁ paccuṭṭhānaṁ añjalikammaṁ sāmīcikammaṁ’.
an4.187:6.1	‘Taṁ kiṁ maññanti, bhonto,
an4.187:6.2	paṇḍitā rañño eḷeyyassa parihārakā—
an4.187:6.3	yamako moggallo uggo nāvindakī gandhabbo aggivesso, karaṇīyādhikaraṇīyesu vacanīyādhivacanīyesu alamatthadasatarehi alamatthadasatarā’ti?
an4.187:6.4	‘Evaṁ, bho, paṇḍitā rañño eḷeyyassa parihārakā—
an4.187:6.5	yamako moggallo uggo nāvindakī gandhabbo aggivesso, karaṇīyādhikaraṇīyesu vacanīyādhivacanīyesu alamatthadasatarehi alamatthadasatarāti.
an4.187:7.1	Yasmā ca kho, bho, samaṇo rāmaputto rañño eḷeyyassa parihārakehi paṇḍitehi paṇḍitataro karaṇīyādhikaraṇīyesu vacanīyādhivacanīyesu alamatthadasatarehi alamatthadasataro, tasmā rañño eḷeyyassa parihārakā samaṇe rāmaputte abhippasannā;
an4.187:7.2	samaṇe ca pana rāmaputte evarūpaṁ paramanipaccakāraṁ karonti, yadidaṁ abhivādanaṁ paccuṭṭhānaṁ añjalikammaṁ sāmīcikamman’ti.
an4.187:8.1	Acchariyaṁ, bho gotama, abbhutaṁ, bho gotama.
an4.187:8.2	Yāva subhāsitañcidaṁ bhotā gotamena:
an4.187:8.3	‘aṭṭhānaṁ kho etaṁ, brāhmaṇa, anavakāso yaṁ asappuriso asappurisaṁ jāneyya—
an4.187:8.4	asappuriso ayaṁ bhavanti.
an4.187:8.5	Etampi kho, brāhmaṇa, aṭṭhānaṁ anavakāso yaṁ asappuriso sappurisaṁ jāneyya—
an4.187:8.6	sappuriso ayaṁ bhavanti.
an4.187:8.7	Ṭhānaṁ kho etaṁ, brāhmaṇa, vijjati yaṁ sappuriso sappurisaṁ jāneyya—
an4.187:8.8	sappuriso ayaṁ bhavanti.
an4.187:8.9	Etampi kho, brāhmaṇa, ṭhānaṁ vijjati yaṁ sappuriso asappurisaṁ jāneyya—
an4.187:8.10	asappuriso ayaṁ bhavan’ti.
an4.187:8.11	Handa ca dāni mayaṁ, bho gotama, gacchāma.
an4.187:8.12	Bahukiccā mayaṁ bahukaraṇīyā”ti.
an4.187:8.13	“Yassadāni tvaṁ, brāhmaṇa, kālaṁ maññasī”ti.
an4.187:9.1	Atha kho vassakāro brāhmaṇo magadhamahāmatto bhagavato bhāsitaṁ abhinanditvā anumoditvā uṭṭhāyāsanā pakkāmīti.
an4.187:9.2	Sattamaṁ.
an4.188:0.1	Aṅguttara Nikāya 4.188
an4.188:0.2	19. Brāhmaṇavagga
an4.188:0.3	Upakasutta
an4.188:1.1	Ekaṁ samayaṁ bhagavā rājagahe viharati gijjhakūṭe pabbate.
an4.188:1.2	Atha kho upako maṇḍikāputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho upako maṇḍikāputto bhagavantaṁ etadavoca:
an4.188:2.1	“Ahañhi, bhante, evaṁvādī evaṁdiṭṭhi:
an4.188:2.2	‘yo koci parūpārambhaṁ vatteti, parūpārambhaṁ vattento sabbo so na upapādeti.
an4.188:2.3	Anupapādento gārayho hoti upavajjo’”ti.
an4.188:2.4	“Parūpārambhañce, upaka, vatteti parūpārambhaṁ vattento na upapādeti, anupapādento gārayho hoti upavajjo.
an4.188:2.5	Tvaṁ kho, upaka, parūpārambhaṁ vattesi, parūpārambhaṁ vattento na upapādesi, anupapādento gārayho hosi upavajjo”ti.
an4.188:2.6	“Seyyathāpi, bhante, ummujjamānakaṁyeva mahatā pāsena bandheyya;
an4.188:2.7	evamevaṁ kho ahaṁ, bhante, ummujjamānakoyeva bhagavatā mahatā vādapāsena baddho”ti.
an4.188:3.1	“Idaṁ akusalanti kho, upaka, mayā paññattaṁ.
an4.188:3.2	Tattha aparimāṇā padā aparimāṇā byañjanā aparimāṇā tathāgatassa dhammadesanā—
an4.188:3.3	itipidaṁ akusalanti.
an4.188:3.4	Taṁ kho panidaṁ akusalaṁ pahātabbanti kho, upaka, mayā paññattaṁ.
an4.188:3.5	Tattha aparimāṇā padā aparimāṇā byañjanā aparimāṇā tathāgatassa dhammadesanā—
an4.188:3.6	itipidaṁ akusalaṁ pahātabbanti.
an4.188:4.1	Idaṁ kusalanti kho, upaka, mayā paññattaṁ.
an4.188:4.2	Tattha aparimāṇā padā aparimāṇā byañjanā aparimāṇā tathāgatassa dhammadesanā—
an4.188:4.3	itipidaṁ kusalanti.
an4.188:4.4	Taṁ kho panidaṁ kusalaṁ bhāvetabbanti kho, upaka, mayā paññattaṁ.
an4.188:4.5	Tattha aparimāṇā padā aparimāṇā byañjanā aparimāṇā tathāgatassa dhammadesanā—
an4.188:4.6	itipidaṁ kusalaṁ bhāvetabban”ti.
an4.188:5.1	Atha kho upako maṇḍikāputto bhagavato bhāsitaṁ abhinanditvā anumoditvā uṭṭhāyāsanā bhagavantaṁ abhivādetvā padakkhiṇaṁ katvā yena rājā māgadho ajātasattu vedehiputto tenupasaṅkami; upasaṅkamitvā yāvatako ahosi bhagavatā saddhiṁ kathāsallāpo taṁ sabbaṁ rañño māgadhassa ajātasattussa vedehiputtassa ārocesi.
an4.188:5.2	Evaṁ vutte, rājā māgadho ajātasattu vedehiputto kupito anattamano upakaṁ maṇḍikāputtaṁ etadavoca:
an4.188:5.3	“yāva dhaṁsī vatāyaṁ loṇakāradārako yāva mukharo yāva pagabbo yatra hi nāma taṁ bhagavantaṁ arahantaṁ sammāsambuddhaṁ āsādetabbaṁ maññissati;
an4.188:5.4	apehi tvaṁ, upaka, vinassa, mā taṁ addasan”ti.
an4.188:5.5	Aṭṭhamaṁ.
an4.189:0.1	Aṅguttara Nikāya 4.189
an4.189:0.2	19. Brāhmaṇavagga
an4.189:0.3	Sacchikaraṇīyasutta
an4.189:1.1	“Cattārome, bhikkhave, sacchikaraṇīyā dhammā.
an4.189:1.2	Katame cattāro?
an4.189:1.3	Atthi, bhikkhave, dhammā kāyena sacchikaraṇīyā;
an4.189:1.4	atthi, bhikkhave, dhammā satiyā sacchikaraṇīyā;
an4.189:1.5	atthi, bhikkhave, dhammā cakkhunā sacchikaraṇīyā;
an4.189:1.6	atthi, bhikkhave, dhammā paññāya sacchikaraṇīyā.
an4.189:1.7	Katame ca, bhikkhave, dhammā kāyena sacchikaraṇīyā?
an4.189:1.8	Aṭṭha vimokkhā, bhikkhave, kāyena sacchikaraṇīyā.
an4.189:2.1	Katame ca, bhikkhave, dhammā satiyā sacchikaraṇīyā?
an4.189:2.2	Pubbenivāso, bhikkhave, satiyā sacchikaraṇīyo.
an4.189:3.1	Katame ca, bhikkhave, dhammā cakkhunā sacchikaraṇīyā?
an4.189:3.2	Sattānaṁ cutūpapāto, bhikkhave, cakkhunā sacchikaraṇīyo.
an4.189:4.1	Katame ca, bhikkhave, dhammā paññāya sacchikaraṇīyā?
an4.189:4.2	Āsavānaṁ khayo, bhikkhave, paññāya sacchikaraṇīyo.
an4.189:4.3	Ime kho, bhikkhave, cattāro sacchikaraṇīyā dhammā”ti.
an4.189:4.4	Navamaṁ.
an4.190:0.1	Aṅguttara Nikāya 4.190
an4.190:0.2	19. Brāhmaṇavagga
an4.190:0.3	Uposathasutta
an4.190:1.1	Ekaṁ samayaṁ bhagavā sāvatthiyaṁ viharati pubbārāme migāramātupāsāde.
an4.190:1.2	Tena kho pana samayena bhagavā tadahuposathe bhikkhusaṅghaparivuto nisinno hoti.
an4.190:1.3	Atha kho bhagavā tuṇhībhūtaṁ tuṇhībhūtaṁ bhikkhusaṅghaṁ anuviloketvā bhikkhū āmantesi:
an4.190:2.1	“Apalāpāyaṁ, bhikkhave, parisā nippalāpāyaṁ, bhikkhave, parisā suddhā sāre patiṭṭhitā.
an4.190:2.2	Tathārūpo ayaṁ, bhikkhave, bhikkhusaṅgho, tathārūpāyaṁ, bhikkhave, parisā.
an4.190:2.3	Yathārūpā parisā dullabhā dassanāyapi lokasmiṁ, tathārūpo ayaṁ, bhikkhave, bhikkhusaṅgho, tathārūpāyaṁ, bhikkhave, parisā.
an4.190:2.4	Yathārūpā parisā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassa, tathārūpo ayaṁ, bhikkhave, bhikkhusaṅgho, tathārūpāyaṁ, bhikkhave, parisā.
an4.190:2.5	Yathārūpāya parisāya appaṁ dinnaṁ bahu hoti bahu dinnaṁ bahutaraṁ, tathārūpo ayaṁ, bhikkhave, bhikkhusaṅgho, tathārūpāyaṁ, bhikkhave, parisā.
an4.190:2.6	Yathārūpaṁ parisaṁ alaṁ yojanagaṇanānipi dassanāya gantuṁ api puṭosenāpi, tathārūpo ayaṁ, bhikkhave, bhikkhusaṅgho, tathārūpāyaṁ, bhikkhave, parisā.
an4.190:3.1	Santi, bhikkhave, bhikkhū imasmiṁ bhikkhusaṅghe devappattā viharanti;
an4.190:3.2	santi, bhikkhave, bhikkhū imasmiṁ bhikkhusaṅghe brahmappattā viharanti;
an4.190:3.3	santi, bhikkhave, bhikkhū imasmiṁ bhikkhusaṅghe āneñjappattā viharanti;
an4.190:3.4	santi, bhikkhave, bhikkhū imasmiṁ bhikkhusaṅghe ariyappattā viharanti.
an4.190:4.1	Kathañca, bhikkhave, bhikkhu devappatto hoti?
an4.190:4.2	Idha, bhikkhave, bhikkhu vivicceva kāmehi …pe… paṭhamaṁ jhānaṁ upasampajja viharati;
an4.190:4.3	vitakkavicārānaṁ vūpasamā …pe… dutiyaṁ jhānaṁ …pe… tatiyaṁ jhānaṁ …pe… catutthaṁ jhānaṁ upasampajja viharati.
an4.190:4.4	Evaṁ kho, bhikkhave, bhikkhu devappatto hoti.
an4.190:5.1	Kathañca, bhikkhave, bhikkhu brahmappatto hoti?
an4.190:5.2	Idha, bhikkhave, bhikkhu mettāsahagatena cetasā ekaṁ disaṁ pharitvā viharati, tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati.
an4.190:5.3	Karuṇā …
an4.190:5.4	muditā …
an4.190:5.5	upekkhāsahagatena cetasā ekaṁ disaṁ pharitvā viharati, tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
an4.190:5.6	Evaṁ kho, bhikkhave, bhikkhu brahmappatto hoti.
an4.190:6.1	Kathañca, bhikkhave, bhikkhu āneñjappatto hoti?
an4.190:6.2	Idha, bhikkhave, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an4.190:6.3	Sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.
an4.190:6.4	Sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
an4.190:6.5	Sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
an4.190:6.6	Evaṁ kho, bhikkhave, bhikkhu āneñjappatto hoti.
an4.190:7.1	Kathañca, bhikkhave, bhikkhu ariyappatto hoti?
an4.190:7.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.190:7.3	Evaṁ kho, bhikkhave, bhikkhu ariyappatto hotī”ti.
an4.190:7.4	Dasamaṁ.
an4.190:7.5	Brāhmaṇavaggo catuttho.
an4.190:8.0	Tassuddānaṁ
an4.190:8.1	Yodhā pāṭibhogasutaṁ,
an4.190:8.2	Abhayaṁ brāhmaṇasaccena pañcamaṁ;
an4.190:8.3	Ummaggavassakāro,
an4.190:8.4	Upako sacchikiriyā ca uposathoti.
an4.191:0.1	Aṅguttara Nikāya 4.191
an4.191:0.2	20. Mahāvagga
an4.191:0.3	Sotānugatasutta
an4.191:1.1	“Sotānugatānaṁ, bhikkhave, dhammānaṁ, vacasā paricitānaṁ, manasānupekkhitānaṁ, diṭṭhiyā suppaṭividdhānaṁ cattāro ānisaṁsā pāṭikaṅkhā.
an4.191:1.2	Katame cattāro?
an4.191:1.3	Idha, bhikkhave, bhikkhu dhammaṁ pariyāpuṇāti—
an4.191:1.4	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.191:1.5	Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā.
an4.191:1.6	So muṭṭhassati kālaṁ kurumāno aññataraṁ devanikāyaṁ upapajjati.
an4.191:1.7	Tassa tattha sukhino dhammapadā plavanti.
an4.191:1.8	Dandho, bhikkhave, satuppādo;
an4.191:1.9	atha so satto khippaṁyeva visesagāmī hoti.
an4.191:1.10	Sotānugatānaṁ, bhikkhave, dhammānaṁ, vacasā paricitānaṁ, manasānupekkhitānaṁ, diṭṭhiyā suppaṭividdhānaṁ ayaṁ paṭhamo ānisaṁso pāṭikaṅkho.
an4.191:2.1	Puna caparaṁ, bhikkhave, bhikkhu dhammaṁ pariyāpuṇāti—
an4.191:2.2	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.191:2.3	Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā.
an4.191:2.4	So muṭṭhassati kālaṁ kurumāno aññataraṁ devanikāyaṁ upapajjati.
an4.191:2.5	Tassa tattha na heva kho sukhino dhammapadā plavanti;
an4.191:2.6	api ca kho bhikkhu iddhimā cetovasippatto devaparisāyaṁ dhammaṁ deseti.
an4.191:2.7	Tassa evaṁ hoti:
an4.191:2.8	‘ayaṁ vā so dhammavinayo, yatthāhaṁ pubbe brahmacariyaṁ acarin’ti.
an4.191:2.9	Dandho, bhikkhave, satuppādo;
an4.191:2.10	atha so satto khippameva visesagāmī hoti.
an4.191:2.11	Seyyathāpi, bhikkhave, puriso kusalo bherisaddassa.
an4.191:2.12	So addhānamaggappaṭipanno bherisaddaṁ suṇeyya.
an4.191:2.13	Tassa na heva kho assa kaṅkhā vā vimati vā:
an4.191:2.14	‘bherisaddo nu kho, na nu kho bherisaddo’ti.
an4.191:2.15	Atha kho bherisaddotveva niṭṭhaṁ gaccheyya.
an4.191:2.16	Evamevaṁ kho, bhikkhave, bhikkhu dhammaṁ pariyāpuṇāti—
an4.191:2.17	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.191:2.18	Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā.
an4.191:2.19	So muṭṭhassati kālaṁ kurumāno aññataraṁ devanikāyaṁ upapajjati.
an4.191:2.20	Tassa tattha na heva kho sukhino dhammapadā plavanti;
an4.191:2.21	api ca kho bhikkhu iddhimā cetovasippatto devaparisāyaṁ dhammaṁ deseti.
an4.191:2.22	Tassa evaṁ hoti:
an4.191:2.23	‘ayaṁ vā so dhammavinayo, yatthāhaṁ pubbe brahmacariyaṁ acarin’ti.
an4.191:2.24	Dandho, bhikkhave, satuppādo;
an4.191:2.25	atha so satto khippaṁyeva visesagāmī hoti.
an4.191:2.26	Sotānugatānaṁ, bhikkhave, dhammānaṁ, vacasā paricitānaṁ, manasānupekkhitānaṁ, diṭṭhiyā suppaṭividdhānaṁ ayaṁ dutiyo ānisaṁso pāṭikaṅkho.
an4.191:3.1	Puna caparaṁ, bhikkhave, bhikkhu dhammaṁ pariyāpuṇāti—
an4.191:3.2	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.191:3.3	Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā.
an4.191:3.4	So muṭṭhassati kālaṁ kurumāno aññataraṁ devanikāyaṁ upapajjati.
an4.191:3.5	Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṁ dhammaṁ deseti;
an4.191:3.6	api ca kho devaputto devaparisāyaṁ dhammaṁ deseti.
an4.191:3.7	Tassa evaṁ hoti:
an4.191:3.8	‘ayaṁ vā so dhammavinayo, yatthāhaṁ pubbe brahmacariyaṁ acarin’ti.
an4.191:3.9	Dandho, bhikkhave, satuppādo;
an4.191:3.10	atha so satto khippaṁyeva visesagāmī hoti.
an4.191:3.11	Seyyathāpi, bhikkhave, puriso kusalo saṅkhasaddassa.
an4.191:3.12	So addhānamaggappaṭipanno saṅkhasaddaṁ suṇeyya.
an4.191:3.13	Tassa na heva kho assa kaṅkhā vā vimati vā:
an4.191:3.14	‘saṅkhasaddo nu kho, na nu kho saṅkhasaddo’ti.
an4.191:3.15	Atha kho saṅkhasaddotveva niṭṭhaṁ gaccheyya.
an4.191:3.16	Evamevaṁ kho, bhikkhave, bhikkhu dhammaṁ pariyāpuṇāti—
an4.191:3.17	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.191:3.18	Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā.
an4.191:3.19	So muṭṭhassati kālaṁ kurumāno aññataraṁ devanikāyaṁ upapajjati.
an4.191:3.20	Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṁ dhammaṁ deseti;
an4.191:3.21	api ca kho devaputto devaparisāyaṁ dhammaṁ deseti.
an4.191:3.22	Tassa evaṁ hoti:
an4.191:3.23	‘ayaṁ vā so dhammavinayo, yatthāhaṁ pubbe brahmacariyaṁ acarin’ti.
an4.191:3.24	Dandho, bhikkhave, satuppādo;
an4.191:3.25	atha so satto khippaṁyeva visesagāmī hoti.
an4.191:3.26	Sotānugatānaṁ, bhikkhave, dhammānaṁ, vacasā paricitānaṁ, manasānupekkhitānaṁ, diṭṭhiyā suppaṭividdhānaṁ ayaṁ tatiyo ānisaṁso pāṭikaṅkho.
an4.191:4.1	Puna caparaṁ, bhikkhave, bhikkhu dhammaṁ pariyāpuṇāti—
an4.191:4.2	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.191:4.3	Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā.
an4.191:4.4	So muṭṭhassati kālaṁ kurumāno aññataraṁ devanikāyaṁ upapajjati.
an4.191:4.5	Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṁ dhammaṁ deseti, napi devaputto devaparisāyaṁ dhammaṁ deseti;
an4.191:4.6	api ca kho opapātiko opapātikaṁ sāreti:
an4.191:4.7	‘sarasi tvaṁ, mārisa, sarasi tvaṁ, mārisa, yattha mayaṁ pubbe brahmacariyaṁ acarimhā’ti.
an4.191:4.8	So evamāha:
an4.191:4.9	‘sarāmi, mārisa, sarāmi, mārisā’ti.
an4.191:4.10	Dandho, bhikkhave, satuppādo;
an4.191:4.11	atha so satto khippaṁyeva visesagāmī hoti.
an4.191:4.12	Seyyathāpi, bhikkhave, dve sahāyakā sahapaṁsukīḷikā.
an4.191:4.13	Te kadāci karahaci aññamaññaṁ samāgaccheyyuṁ.
an4.191:4.14	Añño pana sahāyako sahāyakaṁ evaṁ vadeyya:
an4.191:4.15	‘idampi, samma, sarasi, idampi, samma, sarasī’ti.
an4.191:4.16	So evaṁ vadeyya:
an4.191:4.17	‘sarāmi, samma, sarāmi, sammā’ti.
an4.191:4.18	Evamevaṁ kho, bhikkhave, bhikkhu dhammaṁ pariyāpuṇāti—
an4.191:4.19	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an4.191:4.20	Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā.
an4.191:4.21	So muṭṭhassati kālaṁ kurumāno aññataraṁ devanikāyaṁ upapajjati.
an4.191:4.22	Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṁ dhammaṁ deseti, napi devaputto devaparisāyaṁ dhammaṁ deseti;
an4.191:4.23	api ca kho opapātiko opapātikaṁ sāreti:
an4.191:4.24	‘sarasi tvaṁ, mārisa, sarasi tvaṁ, mārisa, yattha mayaṁ pubbe brahmacariyaṁ acarimhā’ti.
an4.191:4.25	So evamāha:
an4.191:4.26	‘sarāmi, mārisa, sarāmi, mārisā’ti.
an4.191:4.27	Dandho, bhikkhave, satuppādo;
an4.191:4.28	atha kho so satto khippaṁyeva visesagāmī hoti.
an4.191:4.29	Sotānugatānaṁ, bhikkhave, dhammānaṁ, vacasā paricitānaṁ, manasānupekkhitānaṁ, diṭṭhiyā suppaṭividdhānaṁ ayaṁ catuttho ānisaṁso pāṭikaṅkho.
an4.191:4.30	Sotānugatānaṁ, bhikkhave, dhammānaṁ, vacasā paricitānaṁ, manasānupekkhitānaṁ diṭṭhiyā suppaṭividdhānaṁ ime cattāro ānisaṁsā pāṭikaṅkhā”ti.
an4.191:4.31	Paṭhamaṁ.
an4.192:0.1	Aṅguttara Nikāya 4.192
an4.192:0.2	20. Mahāvagga
an4.192:0.3	Ṭhānasutta
an4.192:1.1	“Cattārimāni, bhikkhave, ṭhānāni catūhi ṭhānehi veditabbāni.
an4.192:1.2	Katamāni cattāri?
an4.192:1.3	Saṁvāsena, bhikkhave, sīlaṁ veditabbaṁ, tañca kho dīghena addhunā, na ittaraṁ; manasikarotā, no amanasikarotā; paññavatā, no duppaññena.
an4.192:1.4	Saṁvohārena, bhikkhave, soceyyaṁ veditabbaṁ, tañca kho dīghena addhunā, na ittaraṁ; manasikarotā, no amanasikarotā; paññavatā, no duppaññena.
an4.192:1.5	Āpadāsu, bhikkhave, thāmo veditabbo, so ca kho dīghena addhunā, na ittaraṁ; manasikarotā, no amanasikarotā; paññavatā, no duppaññena.
an4.192:1.6	Sākacchāya, bhikkhave, paññā veditabbā, sā ca kho dīghena addhunā, na ittaraṁ; manasikarotā, no amanasikarotā; paññavatā, no duppaññenāti.
an4.192:2.1	‘Saṁvāsena, bhikkhave, sīlaṁ veditabbaṁ, tañca kho dīghena addhunā, na ittaraṁ; manasikarotā, no amanasikarotā; paññavatā, no duppaññenā’ti,
an4.192:2.2	iti kho panetaṁ vuttaṁ. Kiñcetaṁ paṭicca vuttaṁ?
an4.192:2.3	Idha, bhikkhave, puggalo puggalena saddhiṁ saṁvasamāno evaṁ jānāti:
an4.192:2.4	‘dīgharattaṁ kho ayamāyasmā khaṇḍakārī chiddakārī sabalakārī kammāsakārī, na santatakārī na santatavutti;
an4.192:2.5	sīlesu dussīlo ayamāyasmā, nāyamāyasmā sīlavā’ti.
an4.192:3.1	Idha pana, bhikkhave, puggalo puggalena saddhiṁ saṁvasamāno evaṁ jānāti:
an4.192:3.2	‘dīgharattaṁ kho ayamāyasmā akhaṇḍakārī acchiddakārī asabalakārī akammāsakārī santatakārī santatavutti;
an4.192:3.3	sīlesu sīlavā ayamāyasmā, nāyamāyasmā dussīlo’ti.
an4.192:3.4	‘Saṁvāsena, bhikkhave, sīlaṁ veditabbaṁ, tañca kho dīghena addhunā, na ittaraṁ; manasikarotā, no amanasikarotā; paññavatā, no duppaññenā’ti, iti yaṁ taṁ vuttaṁ idametaṁ paṭicca vuttaṁ.
an4.192:4.1	‘Saṁvohārena, bhikkhave, soceyyaṁ veditabbaṁ, tañca kho dīghena addhunā, na ittaraṁ; manasikarotā, no amanasikarotā; paññavatā, no duppaññenā’ti,
an4.192:4.2	iti kho panetaṁ vuttaṁ. Kiñcetaṁ paṭicca vuttaṁ?
an4.192:4.3	Idha, bhikkhave, puggalo puggalena saddhiṁ saṁvoharamāno evaṁ jānāti:
an4.192:4.4	‘aññathā kho ayamāyasmā ekena eko voharati, aññathā dvīhi, aññathā tīhi, aññathā sambahulehi;
an4.192:4.5	vokkamati ayamāyasmā purimavohārā pacchimavohāraṁ;
an4.192:4.6	aparisuddhavohāro ayamāyasmā, nāyamāyasmā parisuddhavohāro’ti.
an4.192:5.1	Idha pana, bhikkhave, puggalo puggalena saddhiṁ saṁvoharamāno evaṁ jānāti:
an4.192:5.2	‘yatheva kho ayamāyasmā ekena eko voharati, tathā dvīhi, tathā tīhi, tathā sambahulehi.
an4.192:5.3	Nāyamāyasmā vokkamati purimavohārā pacchimavohāraṁ;
an4.192:5.4	parisuddhavohāro ayamāyasmā, nāyamāyasmā aparisuddhavohāro’ti.
an4.192:5.5	‘Saṁvohārena, bhikkhave, soceyyaṁ veditabbaṁ, tañca kho dīghena addhunā, na ittaraṁ; manasikarotā, no amanasikarotā; paññavatā, no duppaññenā’ti, iti yaṁ taṁ vuttaṁ idametaṁ paṭicca vuttaṁ.
an4.192:6.1	‘Āpadāsu, bhikkhave, thāmo veditabbo, so ca kho dīghena addhunā, na ittaraṁ; manasikarotā, no amanasikarotā; paññavatā, no duppaññenā’ti,
an4.192:6.2	iti kho panetaṁ vuttaṁ. Kiñcetaṁ paṭicca vuttaṁ?
an4.192:6.3	Idha, bhikkhave, ekacco ñātibyasanena vā phuṭṭho samāno, bhogabyasanena vā phuṭṭho samāno, rogabyasanena vā phuṭṭho samāno na iti paṭisañcikkhati:
an4.192:6.4	‘tathābhūto kho ayaṁ lokasannivāso tathābhūto ayaṁ attabhāvapaṭilābho yathābhūte lokasannivāse yathābhūte attabhāvapaṭilābhe aṭṭha lokadhammā lokaṁ anuparivattanti loko ca aṭṭha lokadhamme anuparivattati—
an4.192:6.5	lābho ca, alābho ca, yaso ca, ayaso ca, nindā ca, pasaṁsā ca, sukhañca, dukkhañcā’ti.
an4.192:6.6	So ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno socati kilamati paridevati, urattāḷiṁ kandati, sammohaṁ āpajjati.
an4.192:7.1	Idha pana, bhikkhave, ekacco ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno iti paṭisañcikkhati:
an4.192:7.2	‘tathābhūto kho ayaṁ lokasannivāso tathābhūto ayaṁ attabhāvapaṭilābho yathābhūte lokasannivāse yathābhūte attabhāvapaṭilābhe aṭṭha lokadhammā lokaṁ anuparivattanti loko ca aṭṭha lokadhamme anuparivattati—
an4.192:7.3	lābho ca, alābho ca, yaso ca, ayaso ca, nindā ca, pasaṁsā ca, sukhañca, dukkhañcā’ti.
an4.192:7.4	So ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno na socati na kilamati na paridevati, na urattāḷiṁ kandati, na sammohaṁ āpajjati.
an4.192:7.5	‘Āpadāsu, bhikkhave, thāmo veditabbo, so ca kho dīghena addhunā, na ittaraṁ; manasikarotā, no amanasikarotā; paññavatā, no duppaññenā’ti,
an4.192:7.6	iti yaṁ taṁ vuttaṁ idametaṁ paṭicca vuttaṁ.
an4.192:8.1	‘Sākacchāya, bhikkhave, paññā veditabbā, sā ca kho dīghena addhunā, na ittaraṁ; manasikarotā, no amanasikarotā; paññavatā, no duppaññenā’ti,
an4.192:8.2	iti kho panetaṁ vuttaṁ. Kiñcetaṁ paṭicca vuttaṁ?
an4.192:8.3	Idha, bhikkhave, puggalo puggalena saddhiṁ sākacchāyamāno evaṁ jānāti:
an4.192:8.4	‘yathā kho imassa āyasmato ummaggo yathā ca abhinīhāro yathā ca pañhāsamudāhāro, duppañño ayamāyasmā, nāyamāyasmā paññavā.
an4.192:8.5	Taṁ kissa hetu?
an4.192:8.6	Tathā hi ayamāyasmā na ceva gambhīraṁ atthapadaṁ udāharati santaṁ paṇītaṁ atakkāvacaraṁ nipuṇaṁ paṇḍitavedanīyaṁ.
an4.192:8.7	Yañca ayamāyasmā dhammaṁ bhāsati tassa ca nappaṭibalo saṅkhittena vā vitthārena vā atthaṁ ācikkhituṁ desetuṁ paññāpetuṁ paṭṭhapetuṁ vivarituṁ vibhajituṁ uttānīkātuṁ.
an4.192:8.8	Duppañño ayamāyasmā, nāyamāyasmā paññavā’ti.
an4.192:9.1	Seyyathāpi, bhikkhave, cakkhumā puriso udakarahadassa tīre ṭhito passeyya parittaṁ macchaṁ ummujjamānaṁ.
an4.192:9.2	Tassa evamassa:
an4.192:9.3	‘yathā kho imassa macchassa ummaggo yathā ca ūmighāto yathā ca vegāyitattaṁ, paritto ayaṁ maccho, nāyaṁ maccho mahanto’ti.
an4.192:9.4	Evamevaṁ kho, bhikkhave, puggalo puggalena saddhiṁ sākacchāyamāno evaṁ jānāti:
an4.192:9.5	‘yathā kho imassa āyasmato ummaggo yathā ca abhinīhāro yathā ca pañhāsamudāhāro, duppañño ayamāyasmā, nāyamāyasmā paññavā.
an4.192:9.6	Taṁ kissa hetu?
an4.192:9.7	Tathā hi ayamāyasmā na ceva gambhīraṁ atthapadaṁ udāharati santaṁ paṇītaṁ atakkāvacaraṁ nipuṇaṁ paṇḍitavedanīyaṁ.
an4.192:9.8	Yañca ayamāyasmā dhammaṁ bhāsati, tassa ca na paṭibalo saṅkhittena vā vitthārena vā atthaṁ ācikkhituṁ desetuṁ paññāpetuṁ paṭṭhapetuṁ vivarituṁ vibhajituṁ uttānīkātuṁ.
an4.192:9.9	Duppañño ayamāyasmā, nāyamāyasmā paññavā’ti.
an4.192:10.1	Idha pana, bhikkhave, puggalo puggalena saddhiṁ sākacchāyamāno evaṁ jānāti:
an4.192:10.2	‘yathā kho imassa āyasmato ummaggo yathā ca abhinīhāro yathā ca pañhāsamudāhāro, paññavā ayamāyasmā, nāyamāyasmā duppañño.
an4.192:10.3	Taṁ kissa hetu?
an4.192:10.4	Tathā hi ayamāyasmā gambhīrañceva atthapadaṁ udāharati santaṁ paṇītaṁ atakkāvacaraṁ nipuṇaṁ paṇḍitavedanīyaṁ.
an4.192:10.5	Yañca ayamāyasmā dhammaṁ bhāsati, tassa ca paṭibalo saṅkhittena vā vitthārena vā atthaṁ ācikkhituṁ desetuṁ paññāpetuṁ paṭṭhapetuṁ vivarituṁ vibhajituṁ uttānīkātuṁ.
an4.192:10.6	Paññavā ayamāyasmā, nāyamāyasmā duppañño’ti.
an4.192:11.1	Seyyathāpi, bhikkhave, cakkhumā puriso udakarahadassa tīre ṭhito passeyya mahantaṁ macchaṁ ummujjamānaṁ.
an4.192:11.2	Tassa evamassa:
an4.192:11.3	‘yathā kho imassa macchassa ummaggo yathā ca ūmighāto yathā ca vegāyitattaṁ, mahanto ayaṁ maccho, nāyaṁ maccho paritto’ti.
an4.192:11.4	Evamevaṁ kho, bhikkhave, puggalo puggalena saddhiṁ sākacchāyamāno evaṁ jānāti:
an4.192:11.5	‘yathā kho imassa āyasmato ummaggo yathā ca abhinīhāro yathā ca pañhāsamudāhāro, paññavā ayamāyasmā, nāyamāyasmā duppañño.
an4.192:11.6	Taṁ kissa hetu?
an4.192:11.7	Tathā hi ayamāyasmā gambhīrañceva atthapadaṁ udāharati santaṁ paṇītaṁ atakkāvacaraṁ nipuṇaṁ paṇḍitavedanīyaṁ.
an4.192:11.8	Yañca ayamāyasmā dhammaṁ bhāsati, tassa ca paṭibalo saṅkhittena vā vitthārena vā atthaṁ ācikkhituṁ desetuṁ paññāpetuṁ paṭṭhapetuṁ vivarituṁ vibhajituṁ uttānīkātuṁ.
an4.192:11.9	Paññavā ayamāyasmā, nāyamāyasmā duppañño’ti.
an4.192:12.1	‘Sākacchāya, bhikkhave, paññā veditabbā, sā ca kho dīghena addhunā, na ittaraṁ; manasikarotā, no amanasikarotā; paññavatā, no duppaññenā’ti, iti yaṁ taṁ vuttaṁ idametaṁ paṭicca vuttaṁ.
an4.192:12.2	Imāni kho, bhikkhave, cattāri ṭhānāni imehi catūhi ṭhānehi veditabbānī”ti.
an4.192:12.3	Dutiyaṁ.
an4.193:0.1	Aṅguttara Nikāya 4.193
an4.193:0.2	20. Mahāvagga
an4.193:0.3	Bhaddiyasutta
an4.193:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an4.193:1.2	Atha kho bhaddiyo licchavi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho bhaddiyo licchavi bhagavantaṁ etadavoca:
an4.193:2.1	“Sutaṁ metaṁ, bhante:
an4.193:2.2	‘māyāvī samaṇo gotamo āvaṭṭaniṁ māyaṁ jānāti yāya aññatitthiyānaṁ sāvake āvaṭṭetī’ti.
an4.193:2.3	Ye te, bhante, evamāhaṁsu:
an4.193:2.4	‘māyāvī samaṇo gotamo āvaṭṭaniṁ māyaṁ jānāti yāya aññatitthiyānaṁ sāvake āvaṭṭetī’ti, kacci te, bhante, bhagavato vuttavādino, na ca bhagavantaṁ abhūtena abbhācikkhanti, dhammassa ca anudhammaṁ byākaronti, na ca koci sahadhammiko vādānupāto gārayhaṁ ṭhānaṁ āgacchati, anabbhakkhātukāmā hi mayaṁ, bhante, bhagavantan”ti?
an4.193:3.1	“Etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti.
an4.193:3.2	Yadā tumhe, bhaddiya, attanāva jāneyyātha:
an4.193:3.3	‘ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṁvattantī’ti, atha tumhe, bhaddiya, pajaheyyātha.
an4.193:4.1	Taṁ kiṁ maññatha, bhaddiya,
an4.193:4.2	lobho purisassa ajjhattaṁ uppajjamāno uppajjati hitāya vā ahitāya vā”ti?
an4.193:4.3	“Ahitāya, bhante”.
an4.193:4.4	“Luddho panāyaṁ, bhaddiya, purisapuggalo lobhena abhibhūto pariyādinnacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti yaṁsa hoti dīgharattaṁ ahitāya dukkhāyā”ti.
an4.193:4.5	“Evaṁ, bhante”.
an4.193:5.1	“Taṁ kiṁ maññatha, bhaddiya,
an4.193:5.2	doso purisassa …pe… moho purisassa …pe… sārambho purisassa ajjhattaṁ uppajjamāno uppajjati hitāya vā ahitāya vā”ti?
an4.193:5.3	“Ahitāya, bhante”.
an4.193:5.4	“Sāraddho panāyaṁ, bhaddiya, purisapuggalo sārambhena abhibhūto pariyādinnacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti yaṁsa hoti dīgharattaṁ ahitāya dukkhāyā”ti.
an4.193:5.5	“Evaṁ, bhante”.
an4.193:6.1	“Taṁ kiṁ maññatha, bhaddiya, ime dhammā kusalā vā akusalā vā”ti?
an4.193:6.2	“Akusalā, bhante”.
an4.193:6.3	“Sāvajjā vā anavajjā vā”ti?
an4.193:6.4	“Sāvajjā, bhante”.
an4.193:6.5	“Viññugarahitā vā viññuppasatthā vā”ti?
an4.193:6.6	“Viññugarahitā, bhante”.
an4.193:6.7	“Samattā samādinnā ahitāya dukkhāya saṁvattanti, no vā?
an4.193:6.8	Kathaṁ vā ettha hotī”ti?
an4.193:6.9	“Samattā, bhante, samādinnā ahitāya dukkhāya saṁvattanti.
an4.193:6.10	Evaṁ no ettha hotī”ti.
an4.193:7.1	“Iti kho, bhaddiya, yaṁ taṁ te avocumhā—
an4.193:7.2	etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti.
an4.193:7.3	Yadā tumhe, bhaddiya, attanāva jāneyyātha:
an4.193:7.4	‘ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṁvattantīti, atha tumhe, bhaddiya, pajaheyyāthā’ti,
an4.193:7.5	iti yaṁ taṁ vuttaṁ idametaṁ paṭicca vuttaṁ.
an4.193:8.1	Etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti.
an4.193:8.2	Yadā tumhe, bhaddiya, attanāva jāneyyātha:
an4.193:8.3	‘ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā hitāya sukhāya saṁvattantī’ti, atha tumhe, bhaddiya, upasampajja vihareyyāthāti.
an4.193:9.1	Taṁ kiṁ maññatha, bhaddiya,
an4.193:9.2	alobho purisassa ajjhattaṁ uppajjamāno uppajjati hitāya vā ahitāya vā”ti?
an4.193:9.3	“Hitāya, bhante”.
an4.193:9.4	“Aluddho panāyaṁ, bhaddiya, purisapuggalo lobhena anabhibhūto apariyādinnacitto neva pāṇaṁ hanati, na adinnaṁ ādiyati, na paradāraṁ gacchati, na musā bhaṇati, parampi tathattāya na samādapeti yaṁsa hoti dīgharattaṁ hitāya sukhāyā”ti.
an4.193:9.5	“Evaṁ, bhante”.
an4.193:10.1	“Taṁ kiṁ maññatha, bhaddiya, adoso purisassa …pe… amoho purisassa …pe… asārambho purisassa ajjhattaṁ uppajjamāno uppajjati hitāya vā ahitāya vā”ti?
an4.193:10.2	“Hitāya, bhante”.
an4.193:10.3	“Asāraddho panāyaṁ, bhaddiya, purisapuggalo sārambhena anabhibhūto apariyādinnacitto neva pāṇaṁ hanati, na adinnaṁ ādiyati, na paradāraṁ gacchati, na musā bhaṇati, parampi tathattāya na samādapeti yaṁsa hoti dīgharattaṁ hitāya sukhāyā”ti.
an4.193:10.4	“Evaṁ, bhante”.
an4.193:11.1	“Taṁ kiṁ maññatha, bhaddiya, ime dhammā kusalā vā akusalā vā”ti?
an4.193:11.2	“Kusalā, bhante”.
an4.193:11.3	“Sāvajjā vā anavajjā vā”ti?
an4.193:11.4	“Anavajjā, bhante”.
an4.193:11.5	“Viññugarahitā vā viññuppasatthā vā”ti?
an4.193:11.6	“Viññuppasatthā, bhante”.
an4.193:11.7	“Samattā samādinnā hitāya sukhāya saṁvattanti no vā?
an4.193:11.8	Kathaṁ vā ettha hotī”ti?
an4.193:11.9	“Samattā, bhante, samādinnā hitāya sukhāya saṁvattanti.
an4.193:11.10	Evaṁ no ettha hotī”ti.
an4.193:12.1	“Iti kho, bhaddiya, yaṁ taṁ te avocumhā—
an4.193:12.2	etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti.
an4.193:12.3	Yadā tumhe, bhaddiya, attanāva jāneyyātha:
an4.193:12.4	‘ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā hitāya sukhāya saṁvattantīti, atha tumhe, bhaddiya, upasampajja vihareyyāthā’ti,
an4.193:12.5	iti yaṁ taṁ vuttaṁ idametaṁ paṭicca vuttaṁ.
an4.193:13.1	Ye kho te, bhaddiya, loke santo sappurisā te sāvakaṁ evaṁ samādapenti:
an4.193:13.2	‘ehi tvaṁ, ambho purisa, lobhaṁ vineyya viharāhi.
an4.193:13.3	Lobhaṁ vineyya viharanto na lobhajaṁ kammaṁ karissasi kāyena vācāya manasā.
an4.193:13.4	Dosaṁ vineyya viharāhi.
an4.193:13.5	Dosaṁ vineyya viharanto na dosajaṁ kammaṁ karissasi kāyena vācāya manasā.
an4.193:13.6	Mohaṁ vineyya viharāhi.
an4.193:13.7	Mohaṁ vineyya viharanto na mohajaṁ kammaṁ karissasi kāyena vācāya manasā.
an4.193:13.8	Sārambhaṁ vineyya viharāhi.
an4.193:13.9	Sārambhaṁ vineyya viharanto na sārambhajaṁ kammaṁ karissasi kāyena vācāya manasā’”ti.
an4.193:14.1	Evaṁ vutte, bhaddiyo licchavi bhagavantaṁ etadavoca:
an4.193:14.2	“abhikkantaṁ, bhante …pe… upāsakaṁ maṁ, bhante, bhagavā dhāretu ajjatagge pāṇupetaṁ saraṇaṁ gatan”ti.
an4.193:15.1	“Api nu tāhaṁ, bhaddiya, evaṁ avacaṁ:
an4.193:15.2	‘ehi me tvaṁ, bhaddiya, sāvako hohi;
an4.193:15.3	ahaṁ satthā bhavissāmī’”ti?
an4.193:15.4	“No hetaṁ, bhante”.
an4.193:15.5	“Evaṁvādiṁ kho maṁ, bhaddiya, evamakkhāyiṁ eke samaṇabrāhmaṇā asatā tucchā musā abhūtena abbhācikkhanti:
an4.193:15.6	‘māyāvī samaṇo gotamo āvaṭṭaniṁ māyaṁ jānāti yāya aññatitthiyānaṁ sāvake āvaṭṭetī’”ti.
an4.193:15.7	“Bhaddikā, bhante, āvaṭṭanī māyā.
an4.193:15.8	Kalyāṇī, bhante, āvaṭṭanī māyā.
an4.193:15.9	Piyā me, bhante, ñātisālohitā imāya āvaṭṭaniyā āvaṭṭeyyuṁ, piyānampi me assa ñātisālohitānaṁ dīgharattaṁ hitāya sukhāya.
an4.193:15.10	Sabbe cepi, bhante, khattiyā imāya āvaṭṭaniyā āvaṭṭeyyuṁ, sabbesampissa khattiyānaṁ dīgharattaṁ hitāya sukhāya.
an4.193:15.11	Sabbe cepi, bhante, brāhmaṇā … vessā … suddā imāya āvaṭṭaniyā āvaṭṭeyyuṁ, sabbesampissa suddānaṁ dīgharattaṁ hitāya sukhāyā”ti.
an4.193:16.1	“Evametaṁ, bhaddiya, evametaṁ, bhaddiya.
an4.193:16.2	Sabbe cepi, bhaddiya, khattiyā imāya āvaṭṭaniyā āvaṭṭeyyuṁ akusaladhammappahānāya kusaladhammūpasampadāya, sabbesampissa khattiyānaṁ dīgharattaṁ hitāya sukhāya.
an4.193:16.3	Sabbe cepi, bhaddiya, brāhmaṇā … vessā … suddā āvaṭṭeyyuṁ akusaladhammappahānāya kusaladhammūpasampadāya, sabbesampissa suddānaṁ dīgharattaṁ hitāya sukhāya.
an4.193:16.4	Sadevako cepi, bhaddiya, loko samārako sabrahmako sassamaṇabrāhmaṇī pajā sadevamanussā imāya āvaṭṭaniyā āvaṭṭeyyuṁ akusaladhammappahānāya kusaladhammūpasampadāya, sadevakassapissa lokassa samārakassa sabrahmakassa sassamaṇabrāhmaṇiyā pajāya sadevamanussāya dīgharattaṁ hitāya sukhāya.
an4.193:16.5	Ime cepi, bhaddiya, mahāsālā imāya āvaṭṭaniyā āvaṭṭeyyuṁ akusaladhammappahānāya kusaladhammūpasampadāya, imesampissa mahāsālānaṁ dīgharattaṁ hitāya sukhāya (…).
an4.193:16.6	Ko pana vādo manussabhūtassā”ti.
an4.193:16.7	Tatiyaṁ.
an4.194:0.1	Aṅguttara Nikāya 4.194
an4.194:0.2	20. Mahāvagga
an4.194:0.3	Sāmugiyasutta
an4.194:1.1	Ekaṁ samayaṁ āyasmā ānando koliyesu viharati sāmugaṁ nāma koliyānaṁ nigamo.
an4.194:1.2	Atha kho sambahulā sāmugiyā koliyaputtā yenāyasmā ānando tenupasaṅkamiṁsu; upasaṅkamitvā āyasmantaṁ ānandaṁ abhivādetvā ekamantaṁ nisīdiṁsu. Ekamantaṁ nisinne kho te sāmugiye koliyaputte āyasmā ānando etadavoca:
an4.194:2.1	“Cattārimāni, byagghapajjā, pārisuddhipadhāniyaṅgāni tena bhagavatā jānatā passatā arahatā sammāsambuddhena sammadakkhātāni sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya.
an4.194:2.2	Katamāni cattāri?
an4.194:2.3	Sīlapārisuddhipadhāniyaṅgaṁ, cittapārisuddhipadhāniyaṅgaṁ, diṭṭhipārisuddhipadhāniyaṅgaṁ, vimuttipārisuddhipadhāniyaṅgaṁ.
an4.194:3.1	Katamañca, byagghapajjā, sīlapārisuddhipadhāniyaṅgaṁ?
an4.194:3.2	Idha, byagghapajjā, bhikkhu sīlavā hoti …pe… samādāya sikkhati sikkhāpadesu.
an4.194:3.3	Ayaṁ vuccati, byagghapajjā, sīlapārisuddhi.
an4.194:3.4	Iti evarūpiṁ sīlapārisuddhiṁ aparipūraṁ vā paripūressāmi paripūraṁ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṁ vuccati, byagghapajjā, sīlapārisuddhipadhāniyaṅgaṁ.
an4.194:4.1	Katamañca, byagghapajjā, cittapārisuddhipadhāniyaṅgaṁ?
an4.194:4.2	Idha, byagghapajjā, bhikkhu vivicceva kāmehi …pe… catutthaṁ jhānaṁ upasampajja viharati.
an4.194:4.3	Ayaṁ vuccati, byagghapajjā, cittapārisuddhi.
an4.194:4.4	Iti evarūpiṁ cittapārisuddhiṁ aparipūraṁ vā paripūressāmi paripūraṁ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṁ vuccati, byagghapajjā, cittapārisuddhipadhāniyaṅgaṁ.
an4.194:5.1	Katamañca, byagghapajjā, diṭṭhipārisuddhipadhāniyaṅgaṁ?
an4.194:5.2	Idha, byagghapajjā, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.194:5.3	Ayaṁ vuccati, byagghapajjā, diṭṭhipārisuddhi.
an4.194:5.4	Iti evarūpiṁ diṭṭhipārisuddhiṁ aparipūraṁ vā …pe… tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṁ vuccati, byagghapajjā, diṭṭhipārisuddhipadhāniyaṅgaṁ.
an4.194:6.1	Katamañca, byagghapajjā, vimuttipārisuddhipadhāniyaṅgaṁ?
an4.194:6.2	Sa kho so, byagghapajjā, ariyasāvako iminā ca sīlapārisuddhipadhāniyaṅgena samannāgato iminā ca cittapārisuddhipadhāniyaṅgena samannāgato iminā ca diṭṭhipārisuddhipadhāniyaṅgena samannāgato rajanīyesu dhammesu cittaṁ virājeti, vimocanīyesu dhammesu cittaṁ vimoceti.
an4.194:6.3	So rajanīyesu dhammesu cittaṁ virājetvā, vimocanīyesu dhammesu cittaṁ vimocetvā sammāvimuttiṁ phusati.
an4.194:6.4	Ayaṁ vuccati, byagghapajjā, vimuttipārisuddhi.
an4.194:6.5	Iti evarūpiṁ vimuttipārisuddhiṁ aparipūraṁ vā paripūressāmi paripūraṁ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṁ vuccati, byagghapajjā, vimuttipārisuddhipadhāniyaṅgaṁ.
an4.194:7.1	Imāni kho, byagghapajjā, cattāri pārisuddhipadhāniyaṅgāni tena bhagavatā jānatā passatā arahatā sammāsambuddhena sammadakkhātāni sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāyā”ti.
an4.194:7.2	Catutthaṁ.
an4.195:0.1	Aṅguttara Nikāya 4.195
an4.195:0.2	20. Mahāvagga
an4.195:0.3	Vappasutta
an4.195:1.1	Ekaṁ samayaṁ bhagavā sakkesu viharati kapilavatthusmiṁ nigrodhārāme.
an4.195:1.2	Atha kho vappo sakko nigaṇṭhasāvako yenāyasmā mahāmoggallāno tenupasaṅkami; upasaṅkamitvā āyasmantaṁ mahāmoggallānaṁ abhivādetvā ekamantaṁ nisīdi. Ekamantaṁ nisinnaṁ kho vappaṁ sakkaṁ nigaṇṭhasāvakaṁ āyasmā mahāmoggallāno etadavoca:
an4.195:2.1	“Idhassa, vappa, kāyena saṁvuto vācāya saṁvuto manasā saṁvuto avijjāvirāgā vijjuppādā.
an4.195:2.2	Passasi no tvaṁ, vappa, taṁ ṭhānaṁ yatonidānaṁ purisaṁ dukkhavedaniyā āsavā assaveyyuṁ abhisamparāyan”ti?
an4.195:2.3	“Passāmahaṁ, bhante, taṁ ṭhānaṁ.
an4.195:2.4	Idhassa, bhante, pubbe pāpakammaṁ kataṁ avipakkavipākaṁ.
an4.195:2.5	Tatonidānaṁ purisaṁ dukkhavedaniyā āsavā assaveyyuṁ abhisamparāyan”ti.
an4.195:2.6	Ayañceva kho pana āyasmato mahāmoggallānassa vappena sakkena nigaṇṭhasāvakena saddhiṁ antarākathā vippakatā hoti.
an4.195:3.1	Atha kho bhagavā sāyanhasamayaṁ paṭisallānā vuṭṭhito yena upaṭṭhānasālā tenupasaṅkami; upasaṅkamitvā paññatte āsane nisīdi. Nisajja kho bhagavā āyasmantaṁ mahāmoggallānaṁ etadavoca:
an4.195:4.1	“Kāya nuttha, moggallāna, etarahi kathāya sannisinnā; kā ca pana vo antarākathā vippakatā”ti?
an4.195:4.2	“Idhāhaṁ, bhante, vappaṁ sakkaṁ nigaṇṭhasāvakaṁ etadavocaṁ:
an4.195:4.3	‘idhassa, vappa, kāyena saṁvuto vācāya saṁvuto manasā saṁvuto avijjāvirāgā vijjuppādā.
an4.195:4.4	Passasi no tvaṁ, vappa, taṁ ṭhānaṁ yatonidānaṁ purisaṁ dukkhavedaniyā āsavā assaveyyuṁ abhisamparāyan’ti?
an4.195:4.5	Evaṁ vutte, bhante, vappo sakko nigaṇṭhasāvako maṁ etadavoca:
an4.195:4.6	‘passāmahaṁ, bhante, taṁ ṭhānaṁ.
an4.195:4.7	Idhassa, bhante, pubbe pāpakammaṁ kataṁ avipakkavipākaṁ.
an4.195:4.8	Tatonidānaṁ purisaṁ dukkhavedaniyā āsavā assaveyyuṁ abhisamparāyan’ti.
an4.195:4.9	Ayaṁ kho no, bhante, vappena sakkena nigaṇṭhasāvakena saddhiṁ antarākathā vippakatā; atha bhagavā anuppatto”ti.
an4.195:5.1	Atha kho bhagavā vappaṁ sakkaṁ nigaṇṭhasāvakaṁ etadavoca:
an4.195:5.2	“sace me tvaṁ, vappa, anuññeyyañceva anujāneyyāsi, paṭikkositabbañca paṭikkoseyyāsi, yassa ca me bhāsitassa atthaṁ na jāneyyāsi mamevettha uttari paṭipuccheyyāsi:
an4.195:5.3	‘idaṁ, bhante, kathaṁ, imassa ko attho’ti, siyā no ettha kathāsallāpo”ti.
an4.195:5.4	“Anuññeyyañcevāhaṁ, bhante, bhagavato anujānissāmi, paṭikkositabbañca paṭikkosissāmi, yassa cāhaṁ bhagavato bhāsitassa atthaṁ na jānissāmi bhagavantaṁyevettha uttari paṭipucchissāmi:
an4.195:5.5	‘idaṁ, bhante, kathaṁ, imassa ko attho’ti?
an4.195:5.6	Hotu no ettha kathāsallāpo”ti.
an4.195:6.1	“Taṁ kiṁ maññasi, vappa,
an4.195:6.2	ye kāyasamārambhapaccayā uppajjanti āsavā vighātapariḷāhā, kāyasamārambhā paṭiviratassa evaṁsa te āsavā vighātapariḷāhā na honti.
an4.195:6.3	So navañca kammaṁ na karoti, purāṇañca kammaṁ phussa phussa byantīkaroti, sandiṭṭhikā nijjarā akālikā ehipassikā opaneyyikā paccattaṁ veditabbā viññūhi.
an4.195:6.4	Passasi no tvaṁ, vappa, taṁ ṭhānaṁ yatonidānaṁ purisaṁ dukkhavedaniyā āsavā assaveyyuṁ abhisamparāyan”ti?
an4.195:6.5	“No hetaṁ, bhante”.
an4.195:7.1	“Taṁ kiṁ maññasi, vappa,
an4.195:7.2	ye vacīsamārambhapaccayā uppajjanti āsavā vighātapariḷāhā, vacīsamārambhā paṭiviratassa evaṁsa te āsavā vighātapariḷāhā na honti.
an4.195:7.3	So navañca kammaṁ na karoti, purāṇañca kammaṁ phussa phussa byantīkaroti.
an4.195:7.4	Sandiṭṭhikā nijjarā akālikā ehipassikā opaneyyikā paccattaṁ veditabbā viññūhi.
an4.195:7.5	Passasi no tvaṁ, vappa, taṁ ṭhānaṁ yatonidānaṁ purisaṁ dukkhavedaniyā āsavā assaveyyuṁ abhisamparāyan”ti?
an4.195:7.6	“No hetaṁ, bhante”.
an4.195:8.1	“Taṁ kiṁ maññasi, vappa,
an4.195:8.2	ye manosamārambhapaccayā uppajjanti āsavā vighātapariḷāhā, manosamārambhā paṭiviratassa evaṁsa te āsavā vighātapariḷāhā na honti.
an4.195:8.3	So navañca kammaṁ na karoti, purāṇañca kammaṁ phussa phussa byantīkaroti.
an4.195:8.4	Sandiṭṭhikā nijjarā akālikā ehipassikā opaneyyikā paccattaṁ veditabbā viññūhi.
an4.195:8.5	Passasi no tvaṁ, vappa, taṁ ṭhānaṁ yatonidānaṁ purisaṁ dukkhavedaniyā āsavā assaveyyuṁ abhisamparāyan”ti?
an4.195:8.6	“No hetaṁ, bhante”.
an4.195:9.1	“Taṁ kiṁ maññasi, vappa,
an4.195:9.2	ye avijjāpaccayā uppajjanti āsavā vighātapariḷāhā, avijjāvirāgā vijjuppādā evaṁsa te āsavā vighātapariḷāhā na honti.
an4.195:9.3	So navañca kammaṁ na karoti, purāṇañca kammaṁ phussa phussa byantīkaroti.
an4.195:9.4	Sandiṭṭhikā nijjarā akālikā ehipassikā opaneyyikā paccattaṁ veditabbā viññūhi.
an4.195:9.5	Passasi no tvaṁ, vappa, taṁ ṭhānaṁ yatonidānaṁ purisaṁ dukkhavedaniyā āsavā assaveyyuṁ abhisamparāyan”ti?
an4.195:9.6	“No hetaṁ, bhante”.
an4.195:10.1	“Evaṁ sammā vimuttacittassa kho, vappa, bhikkhuno cha satatavihārā adhigatā honti.
an4.195:10.2	So cakkhunā rūpaṁ disvā neva sumano hoti na dummano; upekkhako viharati sato sampajāno.
an4.195:10.3	Sotena saddaṁ sutvā …pe…
an4.195:10.4	ghānena gandhaṁ ghāyitvā …pe…
an4.195:10.5	jivhāya rasaṁ sāyitvā …pe…
an4.195:10.6	kāyena phoṭṭhabbaṁ phusitvā …pe…
an4.195:10.7	manasā dhammaṁ viññāya neva sumano hoti na dummano; upekkhako viharati sato sampajāno.
an4.195:10.8	So kāyapariyantikaṁ vedanaṁ vediyamāno ‘kāyapariyantikaṁ vedanaṁ vediyāmī’ti pajānāti; jīvitapariyantikaṁ vedanaṁ vediyamāno ‘jīvitapariyantikaṁ vedanaṁ vediyāmī’ti pajānāti;
an4.195:10.9	‘kāyassa bhedā uddhaṁ jīvitapariyādānā idheva sabbavedayitāni anabhinanditāni sītī bhavissantī’ti pajānāti.
an4.195:11.1	Seyyathāpi, vappa, thūṇaṁ paṭicca chāyā paññāyati.
an4.195:11.2	Atha puriso āgaccheyya kuddālapiṭakaṁ ādāya.
an4.195:11.3	So taṁ thūṇaṁ mūle chindeyya;
an4.195:11.4	mūle chinditvā palikhaṇeyya;
an4.195:11.5	palikhaṇitvā mūlāni uddhareyya, antamaso usīranāḷimattānipi.
an4.195:11.6	So taṁ thūṇaṁ khaṇḍākhaṇḍikaṁ chindeyya.
an4.195:11.7	Khaṇḍākhaṇḍikaṁ chetvā phāleyya.
an4.195:11.8	Phāletvā sakalikaṁ sakalikaṁ kareyya.
an4.195:11.9	Sakalikaṁ sakalikaṁ katvā vātātape visoseyya.
an4.195:11.10	Vātātape visosetvā agginā ḍaheyya.
an4.195:11.11	Agginā ḍahetvā masiṁ kareyya.
an4.195:11.12	Masiṁ karitvā mahāvāte vā ophuṇeyya nadiyā vā sīghasotāya pavāheyya.
an4.195:11.13	Evaṁ hissa, vappa, yā thūṇaṁ paṭicca chāyā sā ucchinnamūlā tālāvatthukatā anabhāvaṅkatā āyatiṁ anuppādadhammā.
an4.195:12.1	Evamevaṁ kho, vappa, evaṁ sammā vimuttacittassa bhikkhuno cha satatavihārā adhigatā honti.
an4.195:12.2	So cakkhunā rūpaṁ disvā neva sumano hoti na dummano; upekkhako viharati sato sampajāno.
an4.195:12.3	Sotena saddaṁ sutvā …pe…
an4.195:12.4	ghānena gandhaṁ ghāyitvā …pe…
an4.195:12.5	jivhāya rasaṁ sāyitvā …pe…
an4.195:12.6	kāyena phoṭṭhabbaṁ phusitvā …pe…
an4.195:12.7	manasā dhammaṁ viññāya neva sumano hoti na dummano; upekkhako viharati sato sampajāno.
an4.195:12.8	So kāyapariyantikaṁ vedanaṁ vediyamāno ‘kāyapariyantikaṁ vedanaṁ vediyāmī’ti pajānāti; jīvitapariyantikaṁ vedanaṁ vediyamāno ‘jīvitapariyantikaṁ vedanaṁ vediyāmī’ti pajānāti;
an4.195:12.9	‘kāyassa bhedā uddhaṁ jīvitapariyādānā idheva sabbavedayitāni anabhinanditāni sītī bhavissantī’ti pajānāti”.
an4.195:13.1	Evaṁ vutte, vappo sakko nigaṇṭhasāvako bhagavantaṁ etadavoca:
an4.195:13.2	“seyyathāpi, bhante, puriso udayatthiko assapaṇiyaṁ poseyya.
an4.195:13.3	So udayañceva nādhigaccheyya, uttariñca kilamathassa vighātassa bhāgī assa.
an4.195:13.4	Evamevaṁ kho ahaṁ, bhante, udayatthiko bāle nigaṇṭhe payirupāsiṁ.
an4.195:13.5	Svāhaṁ udayañceva nādhigacchiṁ, uttariñca kilamathassa vighātassa bhāgī ahosiṁ.
an4.195:13.6	Esāhaṁ, bhante, ajjatagge yo me bālesu nigaṇṭhesu pasādo taṁ mahāvāte vā ophuṇāmi nadiyā vā sīghasotāya pavāhemi.
an4.195:13.7	Abhikkantaṁ, bhante …pe… upāsakaṁ maṁ, bhante, bhagavā dhāretu ajjatagge pāṇupetaṁ saraṇaṁ gatan”ti.
an4.195:13.8	Pañcamaṁ.
an4.196:0.1	Aṅguttara Nikāya 4.196
an4.196:0.2	20. Mahāvagga
an4.196:0.3	Sāḷhasutta
an4.196:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an4.196:1.2	Atha kho sāḷho ca licchavi abhayo ca licchavi yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinno kho sāḷho licchavi bhagavantaṁ etadavoca:
an4.196:2.1	“Santi, bhante, eke samaṇabrāhmaṇā dvayena oghassa nittharaṇaṁ paññapenti—
an4.196:2.2	sīlavisuddhihetu ca tapojigucchāhetu ca.
an4.196:2.3	Idha, bhante, bhagavā kimāhā”ti?
an4.196:3.1	“Sīlavisuddhiṁ kho ahaṁ, sāḷha, aññataraṁ sāmaññaṅganti vadāmi.
an4.196:3.2	Ye te, sāḷha, samaṇabrāhmaṇā tapojigucchāvādā tapojigucchāsārā tapojigucchāallīnā viharanti, abhabbā te oghassa nittharaṇāya.
an4.196:3.3	Yepi te, sāḷha, samaṇabrāhmaṇā aparisuddhakāyasamācārā aparisuddhavacīsamācārā aparisuddhamanosamācārā aparisuddhājīvā, abhabbā te ñāṇadassanāya anuttarāya sambodhāya.
an4.196:4.1	Seyyathāpi, sāḷha, puriso nadiṁ taritukāmo tiṇhaṁ kuṭhāriṁ ādāya vanaṁ paviseyya.
an4.196:4.2	So tattha passeyya mahatiṁ sālalaṭṭhiṁ ujuṁ navaṁ akukkuccakajātaṁ.
an4.196:4.3	Tamenaṁ mūle chindeyya;
an4.196:4.4	mūle chetvā agge chindeyya;
an4.196:4.5	agge chetvā sākhāpalāsaṁ suvisodhitaṁ visodheyya;
an4.196:4.6	sākhāpalāsaṁ suvisodhitaṁ visodhetvā kuṭhārīhi taccheyya;
an4.196:4.7	kuṭhārīhi tacchetvā vāsīhi taccheyya;
an4.196:4.8	vāsīhi tacchetvā lekhaṇiyā likheyya;
an4.196:4.9	lekhaṇiyā likhitvā pāsāṇaguḷena dhoveyya;
an4.196:4.10	pāsāṇaguḷena dhovetvā nadiṁ patāreyya.
an4.196:5.1	Taṁ kiṁ maññasi, sāḷha,
an4.196:5.2	bhabbo nu kho so puriso nadiṁ taritun”ti?
an4.196:5.3	“No hetaṁ, bhante”.
an4.196:5.4	“Taṁ kissa hetu”?
an4.196:5.5	“Asu hi, bhante, sālalaṭṭhi bahiddhā suparikammakatā anto avisuddhā.
an4.196:5.6	Tassetaṁ pāṭikaṅkhaṁ—sālalaṭṭhi saṁsīdissati, puriso anayabyasanaṁ āpajjissatī”ti.
an4.196:6.1	“Evamevaṁ kho, sāḷha, ye te samaṇabrāhmaṇā tapojigucchāvādā tapojigucchāsārā tapojigucchāallīnā viharanti, abhabbā te oghassa nittharaṇāya.
an4.196:6.2	Yepi te, sāḷha, samaṇabrāhmaṇā aparisuddhakāyasamācārā aparisuddhavacīsamācārā aparisuddhamanosamācārā aparisuddhājīvā, abhabbā te ñāṇadassanāya anuttarāya sambodhāya.
an4.196:7.1	Ye ca kho te, sāḷha, samaṇabrāhmaṇā na tapojigucchāvādā na tapojigucchāsārā na tapojigucchāallīnā viharanti, bhabbā te oghassa nittharaṇāya.
an4.196:7.2	Yepi te, sāḷha, samaṇabrāhmaṇā parisuddhakāyasamācārā parisuddhavacīsamācārā parisuddhamanosamācārā parisuddhājīvā, bhabbā te ñāṇadassanāya anuttarāya sambodhāya.
an4.196:8.1	Seyyathāpi, sāḷha, puriso nadiṁ taritukāmo tiṇhaṁ kuṭhāriṁ ādāya vanaṁ paviseyya.
an4.196:8.2	So tattha passeyya mahatiṁ sālalaṭṭhiṁ ujuṁ navaṁ akukkuccakajātaṁ.
an4.196:8.3	Tamenaṁ mūle chindeyya;
an4.196:8.4	mūle chinditvā agge chindeyya;
an4.196:8.5	agge chinditvā sākhāpalāsaṁ suvisodhitaṁ visodheyya;
an4.196:8.6	sākhāpalāsaṁ suvisodhitaṁ visodhetvā kuṭhārīhi taccheyya;
an4.196:8.7	kuṭhārīhi tacchetvā vāsīhi taccheyya;
an4.196:8.8	vāsīhi tacchetvā nikhādanaṁ ādāya anto suvisodhitaṁ visodheyya;
an4.196:8.9	anto suvisodhitaṁ visodhetvā lekhaṇiyā likheyya;
an4.196:8.10	lekhaṇiyā likhitvā pāsāṇaguḷena dhoveyya;
an4.196:8.11	pāsāṇaguḷena dhovetvā nāvaṁ kareyya;
an4.196:8.12	nāvaṁ katvā phiyārittaṁ bandheyya;
an4.196:8.13	phiyārittaṁ bandhitvā nadiṁ patāreyya.
an4.196:9.1	Taṁ kiṁ maññasi, sāḷha,
an4.196:9.2	bhabbo nu kho so puriso nadiṁ taritun”ti?
an4.196:9.3	“Evaṁ, bhante”.
an4.196:9.4	“Taṁ kissa hetu”?
an4.196:9.5	“Asu hi, bhante, sālalaṭṭhi bahiddhā suparikammakatā, anto suvisuddhā nāvākatā phiyārittabaddhā.
an4.196:9.6	Tassetaṁ pāṭikaṅkhaṁ:
an4.196:9.7	‘nāvā na saṁsīdissati, puriso sotthinā pāraṁ gamissatī’”ti.
an4.196:10.1	“Evamevaṁ kho, sāḷha, ye te samaṇabrāhmaṇā na tapojigucchāvādā na tapojigucchāsārā na tapojigucchāallīnā viharanti, bhabbā te oghassa nittharaṇāya.
an4.196:10.2	Yepi te, sāḷha, samaṇabrāhmaṇā parisuddhakāyasamācārā parisuddhavacīsamācārā parisuddhamanosamācārā parisuddhājīvā, bhabbā te ñāṇadassanāya anuttarāya sambodhāya.
an4.196:10.3	Seyyathāpi, sāḷha, yodhājīvo bahūni cepi kaṇḍacitrakāni jānāti;
an4.196:10.4	atha kho so tīhi ṭhānehi rājāraho hoti rājabhoggo, rañño aṅganteva saṅkhaṁ gacchati.
an4.196:10.5	Katamehi tīhi?
an4.196:10.6	Dūrepātī ca, akkhaṇavedhī ca, mahato ca kāyassa padāletā.
an4.196:11.1	Seyyathāpi, sāḷha, yodhājīvo dūrepātī;
an4.196:11.2	evamevaṁ kho, sāḷha, ariyasāvako sammāsamādhi hoti.
an4.196:11.3	Sammāsamādhi, sāḷha, ariyasāvako yaṁ kiñci rūpaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā sabbaṁ rūpaṁ ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya passati.
an4.196:11.4	Yā kāci vedanā …
an4.196:11.5	yā kāci saññā …
an4.196:11.6	ye keci saṅkhārā …
an4.196:11.7	yaṁ kiñci viññāṇaṁ atītānāgatapaccuppannaṁ ajjhattaṁ vā bahiddhā vā oḷārikaṁ vā sukhumaṁ vā hīnaṁ vā paṇītaṁ vā yaṁ dūre santike vā, sabbaṁ viññāṇaṁ ‘netaṁ mama, nesohamasmi, na meso attā’ti evametaṁ yathābhūtaṁ sammappaññāya passati.
an4.196:12.1	Seyyathāpi, sāḷha, yodhājīvo akkhaṇavedhī;
an4.196:12.2	evamevaṁ kho, sāḷha, ariyasāvako sammādiṭṭhi hoti.
an4.196:12.3	Sammādiṭṭhi, sāḷha, ariyasāvako ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.196:13.1	Seyyathāpi, sāḷha, yodhājīvo mahato kāyassa padāletā;
an4.196:13.2	evamevaṁ kho, sāḷha, ariyasāvako sammāvimutti hoti.
an4.196:13.3	Sammāvimutti, sāḷha, ariyasāvako mahantaṁ avijjākkhandhaṁ padāletī”ti.
an4.196:13.4	Chaṭṭhaṁ.
an4.197:0.1	Aṅguttara Nikāya 4.197
an4.197:0.2	20. Mahāvagga
an4.197:0.3	Mallikādevīsutta
an4.197:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an4.197:1.2	Atha kho mallikā devī yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnā kho mallikā devī bhagavantaṁ etadavoca:
an4.197:2.1	“Ko nu kho, bhante, hetu ko paccayo, yena midhekacco mātugāmo dubbaṇṇā ca hoti durūpā supāpikā dassanāya;
an4.197:2.2	daliddā ca hoti appassakā appabhogā appesakkhā ca?
an4.197:3.1	Ko pana, bhante, hetu ko paccayo, yena midhekacco mātugāmo dubbaṇṇā ca hoti durūpā supāpikā dassanāya;
an4.197:3.2	aḍḍhā ca hoti mahaddhanā mahābhogā mahesakkhā ca?
an4.197:4.1	Ko nu kho, bhante, hetu ko paccayo, yena midhekacco mātugāmo abhirūpā ca hoti dassanīyā pāsādikā paramāya vaṇṇapokkharatāya samannāgatā;
an4.197:4.2	daliddā ca hoti appassakā appabhogā appesakkhā ca?
an4.197:5.1	Ko pana, bhante, hetu ko paccayo, yena midhekacco mātugāmo abhirūpā ca hoti dassanīyā pāsādikā paramāya vaṇṇapokkharatāya samannāgatā, aḍḍhā ca hoti mahaddhanā mahābhogā mahesakkhā cā”ti?
an4.197:6.1	“Idha, mallike, ekacco mātugāmo kodhanā hoti upāyāsabahulā.
an4.197:6.2	Appampi vuttā samānā abhisajjati kuppati byāpajjati patitthīyati, kopañca dosañca appaccayañca pātukaroti.
an4.197:6.3	Sā na dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an4.197:6.4	Issāmanikā kho pana hoti;
an4.197:6.5	paralābhasakkāragarukāramānanavandanapūjanāsu issati upadussati issaṁ bandhati.
an4.197:6.6	Sā ce tato cutā itthattaṁ āgacchati, sā yattha yattha paccājāyati dubbaṇṇā ca hoti durūpā supāpikā dassanāya;
an4.197:6.7	daliddā ca hoti appassakā appabhogā appesakkhā ca.
an4.197:7.1	Idha pana, mallike, ekacco mātugāmo kodhanā hoti upāyāsabahulā.
an4.197:7.2	Appampi vuttā samānā abhisajjati kuppati byāpajjati patitthīyati, kopañca dosañca appaccayañca pātukaroti.
an4.197:7.3	Sā dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an4.197:7.4	Anissāmanikā kho pana hoti;
an4.197:7.5	paralābhasakkāragarukāramānanavandanapūjanāsu na issati na upadussati na issaṁ bandhati.
an4.197:7.6	Sā ce tato cutā itthattaṁ āgacchati, sā yattha yattha paccājāyati dubbaṇṇā ca hoti durūpā supāpikā dassanāya;
an4.197:7.7	aḍḍhā ca hoti mahaddhanā mahābhogā mahesakkhā ca.
an4.197:8.1	Idha pana, mallike, ekacco mātugāmo akkodhanā hoti anupāyāsabahulā.
an4.197:8.2	Bahumpi vuttā samānā nābhisajjati na kuppati na byāpajjati na patitthīyati, na kopañca dosañca appaccayañca pātukaroti.
an4.197:8.3	Sā na dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an4.197:8.4	Issāmanikā kho pana hoti;
an4.197:8.5	paralābhasakkāragarukāramānanavandanapūjanāsu issati upadussati issaṁ bandhati.
an4.197:8.6	Sā ce tato cutā itthattaṁ āgacchati, sā yattha yattha paccājāyati abhirūpā ca hoti dassanīyā pāsādikā paramāya vaṇṇapokkharatāya samannāgatā;
an4.197:8.7	daliddā ca hoti appassakā appabhogā appesakkhā ca.
an4.197:9.1	Idha pana, mallike, ekacco mātugāmo akkodhanā hoti anupāyāsabahulā.
an4.197:9.2	Bahumpi vuttā samānā nābhisajjati na kuppati na byāpajjati na patitthīyati, na kopañca dosañca appaccayañca pātukaroti.
an4.197:9.3	Sā dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an4.197:9.4	Anissāmanikā kho pana hoti;
an4.197:9.5	paralābhasakkāragarukāramānanavandanapūjanāsu na issati na upadussati na issaṁ bandhati.
an4.197:9.6	Sā ce tato cutā itthattaṁ āgacchati, sā yattha yattha paccājāyati abhirūpā ca hoti dassanīyā pāsādikā paramāya vaṇṇapokkharatāya samannāgatā;
an4.197:9.7	aḍḍhā ca hoti mahaddhanā mahābhogā mahesakkhā ca.
an4.197:10.1	Ayaṁ kho, mallike, hetu ayaṁ paccayo, yena midhekacco mātugāmo dubbaṇṇā ca hoti durūpā supāpikā dassanāya;
an4.197:10.2	daliddā ca hoti appassakā appabhogā appesakkhā ca.
an4.197:10.3	Ayaṁ pana, mallike, hetu ayaṁ paccayo, yena midhekacco mātugāmo dubbaṇṇā ca hoti durūpā supāpikā dassanāya;
an4.197:10.4	aḍḍhā ca hoti mahaddhanā mahābhogā mahesakkhā ca.
an4.197:10.5	Ayaṁ kho, mallike, hetu ayaṁ paccayo, yena midhekacco mātugāmo abhirūpā ca hoti dassanīyā pāsādikā paramāya vaṇṇapokkharatāya samannāgatā;
an4.197:10.6	daliddā ca hoti appassakā appabhogā appesakkhā ca.
an4.197:10.7	Ayaṁ pana, mallike, hetu ayaṁ paccayo, yena midhekacco mātugāmo abhirūpā ca hoti dassanīyā pāsādikā paramāya vaṇṇapokkharatāya samannāgatā;
an4.197:10.8	aḍḍhā ca hoti mahaddhanā mahābhogā mahesakkhā cā”ti.
an4.197:11.1	Evaṁ vutte, mallikā devī bhagavantaṁ etadavoca:
an4.197:11.2	“yā nūnāhaṁ, bhante, aññaṁ jātiṁ kodhanā ahosiṁ upāyāsabahulā,
an4.197:11.3	appampi vuttā samānā abhisajjiṁ kuppiṁ byāpajjiṁ patitthīyiṁ kopañca dosañca appaccayañca pātvākāsiṁ,
an4.197:11.4	sāhaṁ, bhante, etarahi dubbaṇṇā durūpā supāpikā dassanāya.
an4.197:12.1	Yā nūnāhaṁ, bhante, aññaṁ jātiṁ dātā ahosiṁ samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ, sāhaṁ, bhante, etarahi aḍḍhā mahaddhanā mahābhogā.
an4.197:13.1	Yā nūnāhaṁ, bhante, aññaṁ jātiṁ anissāmanikā ahosiṁ, paralābhasakkāragarukāramānanavandanapūjanāsu na issiṁ na upadussiṁ na issaṁ bandhiṁ, sāhaṁ, bhante, etarahi mahesakkhā.
an4.197:13.2	Santi kho pana, bhante, imasmiṁ rājakule khattiyakaññāpi brāhmaṇakaññāpi gahapatikaññāpi, tāsāhaṁ issarādhipaccaṁ kāremi.
an4.197:13.3	Esāhaṁ, bhante, ajjatagge akkodhanā bhavissāmi anupāyāsabahulā,
an4.197:13.4	bahumpi vuttā samānā nābhisajjissāmi na kuppissāmi na byāpajjissāmi na patitthīyissāmi, kopañca dosañca appaccayañca na pātukarissāmi;
an4.197:13.5	dassāmi samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an4.197:13.6	Anissāmanikā bhavissāmi, paralābhasakkāragarukāramānanavandanapūjanāsu na ississāmi na upadussissāmi na issaṁ bandhissāmi.
an4.197:13.7	Abhikkantaṁ, bhante …pe… upāsikaṁ maṁ, bhante, bhagavā dhāretu ajjatagge pāṇupetaṁ saraṇaṁ gatan”ti.
an4.197:13.8	Sattamaṁ.
an4.198:0.1	Aṅguttara Nikāya 4.198
an4.198:0.2	20. Mahāvagga
an4.198:0.3	Attantapasutta
an4.198:1.1	“Cattārome, bhikkhave, puggalā santo saṁvijjamānā lokasmiṁ.
an4.198:1.2	Katame cattāro?
an4.198:1.3	Idha, bhikkhave, ekacco puggalo attantapo hoti attaparitāpanānuyogamanuyutto.
an4.198:1.4	Idha pana, bhikkhave, ekacco puggalo parantapo hoti paraparitāpanānuyogamanuyutto.
an4.198:1.5	Idha pana, bhikkhave, ekacco puggalo attantapo ca hoti attaparitāpanānuyogamanuyutto, parantapo ca paraparitāpanānuyogamanuyutto.
an4.198:1.6	Idha pana, bhikkhave, ekacco puggalo nevattantapo hoti nāttaparitāpanānuyogamanuyutto na parantapo na paraparitāpanānuyogamanuyutto.
an4.198:1.7	So neva attantapo na parantapo diṭṭheva dhamme nicchāto nibbuto sītībhūto sukhappaṭisaṁvedī brahmabhūtena attanā viharati.
an4.198:2.1	Kathañca, bhikkhave, puggalo attantapo hoti attaparitāpanānuyogamanuyutto?
an4.198:2.2	Idha, bhikkhave, ekacco acelako hoti muttācāro hatthāpalekhano naehibhaddantiko natiṭṭhabhaddantiko nābhihaṭaṁ na uddissakataṁ na nimantanaṁ sādiyati.
an4.198:2.3	So na kumbhimukhā paṭiggaṇhāti, na kaḷopimukhā paṭiggaṇhāti, na eḷakamantaraṁ na daṇḍamantaraṁ na musalamantaraṁ na dvinnaṁ bhuñjamānānaṁ na gabbhiniyā na pāyamānāya na purisantaragatāya na saṅkittīsu na yattha sā upaṭṭhito hoti na yattha makkhikā saṇḍasaṇḍacārinī na macchaṁ na maṁsaṁ na suraṁ na merayaṁ na thusodakaṁ pivati.
an4.198:2.4	So ekāgāriko vā hoti ekālopiko dvāgāriko vā hoti dvālopiko …pe… sattāgāriko vā hoti sattālopiko;
an4.198:2.5	ekissāpi dattiyā yāpeti dvīhipi dattīhi yāpeti …pe… sattahipi dattīhi yāpeti;
an4.198:2.6	ekāhikampi āhāraṁ āhāreti dvāhikampi āhāraṁ āhāreti …pe… sattāhikampi āhāraṁ āhāreti. Iti evarūpaṁ aḍḍhamāsikampi pariyāyabhattabhojanānuyogamanuyutto viharati.
an4.198:3.1	So sākabhakkhopi hoti sāmākabhakkhopi hoti nīvārabhakkhopi hoti daddulabhakkhopi hoti haṭabhakkhopi hoti kaṇabhakkhopi hoti ācāmabhakkhopi hoti piññākabhakkhopi hoti tiṇabhakkhopi hoti gomayabhakkhopi hoti; vanamūlaphalāhāropi yāpeti pavattaphalabhojī.
an4.198:4.1	So sāṇānipi dhāreti masāṇānipi dhāreti chavadussānipi dhāreti paṁsukūlānipi dhāreti tirīṭānipi dhāreti ajinampi dhāreti ajinakkhipampi dhāreti kusacīrampi dhāreti vākacīrampi dhāreti phalakacīrampi dhāreti kesakambalampi dhāreti vāḷakambalampi dhāreti ulūkapakkhampi dhāreti;
an4.198:4.2	kesamassulocakopi hoti kesamassulocanānuyogamanuyutto;
an4.198:4.3	ubbhaṭṭhakopi hoti āsanappaṭikkhitto;
an4.198:4.4	ukkuṭikopi hoti ukkuṭikappadhānamanuyutto;
an4.198:4.5	kaṇṭakāpassayikopi hoti kaṇṭakāpassaye seyyaṁ kappeti;
an4.198:4.6	sāyatatiyakampi udakorohanānuyogamanuyutto viharati.
an4.198:4.7	Iti evarūpaṁ anekavihitaṁ kāyassa ātāpanaparitāpanānuyogamanuyutto viharati.
an4.198:4.8	Evaṁ kho, bhikkhave, puggalo attantapo hoti attaparitāpanānuyogamanuyutto.
an4.198:5.1	Kathañca, bhikkhave, puggalo parantapo hoti paraparitāpanānuyogamanuyutto?
an4.198:5.2	Idha, bhikkhave, ekacco puggalo orabbhiko hoti sūkariko sākuṇiko māgaviko luddo macchaghātako coro coraghātako goghātako bandhanāgāriko, ye vā panaññepi keci kurūrakammantā.
an4.198:5.3	Evaṁ kho, bhikkhave, puggalo parantapo hoti paraparitāpanānuyogamanuyutto.
an4.198:6.1	Kathañca, bhikkhave, puggalo attantapo ca hoti attaparitāpanānuyogamanuyutto parantapo ca paraparitāpanānuyogamanuyutto?
an4.198:6.2	Idha, bhikkhave, ekacco puggalo rājā vā hoti khattiyo muddhāvasitto, brāhmaṇo vā hoti mahāsālo.
an4.198:6.3	So puratthimena nagarassa navaṁ santhāgāraṁ kārāpetvā kesamassuṁ ohāretvā kharājinaṁ nivāsetvā sappitelena kāyaṁ abbhañjitvā magavisāṇena piṭṭhiṁ kaṇḍuvamāno navaṁ santhāgāraṁ pavisati, saddhiṁ mahesiyā brāhmaṇena ca purohitena.
an4.198:6.4	So tattha anantarahitāya bhūmiyā haritupalittāya seyyaṁ kappeti.
an4.198:6.5	Ekissāya gāviyā sarūpavacchāya yaṁ ekasmiṁ thane khīraṁ hoti tena rājā yāpeti; yaṁ dutiyasmiṁ thane khīraṁ hoti tena mahesī yāpeti; yaṁ tatiyasmiṁ thane khīraṁ hoti tena brāhmaṇo purohito yāpeti; yaṁ catutthasmiṁ thane khīraṁ hoti tena aggiṁ juhati; avasesena vacchako yāpeti.
an4.198:6.6	So evamāha:
an4.198:6.7	‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāya, ettakā assā haññantu yaññatthāya, ettakā rukkhā chijjantu yūpatthāya, ettakā dabbhā lūyantu barihisatthāyā’ti.
an4.198:6.8	Yepissa te honti dāsāti vā pessāti vā kammakarāti vā tepi daṇḍatajjitā bhayatajjitā assumukhā rudamānā parikammāni karonti.
an4.198:6.9	Evaṁ kho, bhikkhave, puggalo attantapo ca hoti attaparitāpanānuyogamanuyutto parantapo ca paraparitāpanānuyogamanuyutto.
an4.198:7.1	Kathañca, bhikkhave, puggalo nevattantapo hoti nāttaparitāpanānuyogamanuyutto na parantapo na paraparitāpanānuyogamanuyutto?
an4.198:7.2	So anattantapo aparantapo diṭṭheva dhamme nicchāto nibbuto sītībhūto sukhappaṭisaṁvedī brahmabhūtena attanā viharati.
an4.198:7.3	Idha, bhikkhave, tathāgato loke uppajjati arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā.
an4.198:7.4	So imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti.
an4.198:7.5	So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an4.198:7.6	Taṁ dhammaṁ suṇāti gahapati vā gahapatiputto vā aññatarasmiṁ vā kule paccājāto.
an4.198:7.7	So taṁ dhammaṁ sutvā tathāgate saddhaṁ paṭilabhati.
an4.198:7.8	So tena saddhāpaṭilābhena samannāgato iti paṭisañcikkhati:
an4.198:7.9	‘sambādho gharāvāso rajāpatho, abbhokāso pabbajjā;
an4.198:7.10	nayidaṁ sukaraṁ agāraṁ ajjhāvasatā ekantaparipuṇṇaṁ ekantaparisuddhaṁ saṅkhalikhitaṁ brahmacariyaṁ carituṁ;
an4.198:7.11	yannūnāhaṁ kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajeyyan’ti.
an4.198:7.12	So aparena samayena appaṁ vā bhogakkhandhaṁ pahāya, mahantaṁ vā bhogakkhandhaṁ pahāya, appaṁ vā ñātiparivaṭṭaṁ pahāya, mahantaṁ vā ñātiparivaṭṭaṁ pahāya, kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajati.
an4.198:8.1	So evaṁ pabbajito samāno bhikkhūnaṁ sikkhāsājīvasamāpanno pāṇātipātaṁ pahāya pāṇātipātā paṭivirato hoti nihitadaṇḍo nihitasattho lajjī dayāpanno, sabbapāṇabhūtahitānukampī viharati.
an4.198:8.2	Adinnādānaṁ pahāya adinnādānā paṭivirato hoti dinnādāyī dinnapāṭikaṅkhī, athenena sucibhūtena attanā viharati.
an4.198:8.3	Abrahmacariyaṁ pahāya brahmacārī hoti ārācārī virato asaddhammā gāmadhammā.
an4.198:8.4	Musāvādaṁ pahāya musāvādā paṭivirato hoti saccavādī saccasandho theto paccayiko avisaṁvādako lokassa.
an4.198:8.5	Pisuṇaṁ vācaṁ pahāya pisuṇāya vācāya paṭivirato hoti, na ito sutvā amutra akkhātā imesaṁ bhedāya, na amutra vā sutvā imesaṁ akkhātā amūsaṁ bhedāya; iti bhinnānaṁ vā sandhātā, sahitānaṁ vā anuppadātā, samaggārāmo samaggarato samagganandī samaggakaraṇiṁ vācaṁ bhāsitā hoti.
an4.198:8.6	Pharusaṁ vācaṁ pahāya pharusāya vācāya paṭivirato hoti; yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṁ vācaṁ bhāsitā hoti.
an4.198:8.7	Samphappalāpaṁ pahāya samphappalāpā paṭivirato hoti kālavādī bhūtavādī atthavādī dhammavādī vinayavādī; nidhānavatiṁ vācaṁ bhāsitā hoti kālena sāpadesaṁ pariyantavatiṁ atthasaṁhitaṁ.
an4.198:9.1	So bījagāmabhūtagāmasamārambhā paṭivirato hoti.
an4.198:9.2	Ekabhattiko hoti rattūparato virato vikālabhojanā.
an4.198:9.3	Naccagītavāditavisūkadassanā paṭivirato hoti.
an4.198:9.4	Mālāgandhavilepanadhāraṇamaṇḍanavibhūsanaṭṭhānā paṭivirato hoti.
an4.198:9.5	Uccāsayanamahāsayanā paṭivirato hoti.
an4.198:9.6	Jātarūparajatapaṭiggahaṇā paṭivirato hoti.
an4.198:9.7	Āmakadhaññapaṭiggahaṇā paṭivirato hoti.
an4.198:9.8	Āmakamaṁsapaṭiggahaṇā paṭivirato hoti.
an4.198:9.9	Itthikumārikapaṭiggahaṇā paṭivirato hoti.
an4.198:9.10	Dāsidāsapaṭiggahaṇā paṭivirato hoti.
an4.198:9.11	Ajeḷakapaṭiggahaṇā paṭivirato hoti.
an4.198:9.12	Kukkuṭasūkarapaṭiggahaṇā paṭivirato hoti.
an4.198:9.13	Hatthigavāssavaḷavapaṭiggahaṇā paṭivirato hoti.
an4.198:9.14	Khettavatthupaṭiggahaṇā paṭivirato hoti.
an4.198:9.15	Dūteyyapahiṇagamanānuyogā paṭivirato hoti.
an4.198:9.16	Kayavikkayā paṭivirato hoti.
an4.198:9.17	Tulākūṭakaṁsakūṭamānakūṭā paṭivirato hoti.
an4.198:9.18	Ukkoṭanavañcananikatisāciyogā paṭivirato hoti.
an4.198:9.19	Chedanavadhabandhanaviparāmosaālopasahasākārā paṭivirato hoti.
an4.198:10.1	So santuṭṭho hoti kāyaparihārikena cīvarena kucchiparihārikena piṇḍapātena. So yena yeneva pakkamati samādāyeva pakkamati.
an4.198:10.2	Seyyathāpi nāma pakkhī sakuṇo yena yeneva ḍeti, sapattabhārova ḍeti;
an4.198:10.3	evamevaṁ bhikkhu santuṭṭho hoti kāyaparihārikena cīvarena kucchiparihārikena piṇḍapātena. So yena yeneva pakkamati, samādāyeva pakkamati.
an4.198:10.4	So iminā ariyena sīlakkhandhena samannāgato ajjhattaṁ anavajjasukhaṁ paṭisaṁvedeti.
an4.198:11.1	So cakkhunā rūpaṁ disvā na nimittaggāhī hoti nānubyañjanaggāhī.
an4.198:11.2	Yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati cakkhundriyaṁ; cakkhundriye saṁvaraṁ āpajjati.
an4.198:11.3	Sotena saddaṁ sutvā …
an4.198:11.4	ghānena gandhaṁ ghāyitvā …
an4.198:11.5	jivhāya rasaṁ sāyitvā …
an4.198:11.6	kāyena phoṭṭhabbaṁ phusitvā …
an4.198:11.7	manasā dhammaṁ viññāya na nimittaggāhī hoti nānubyañjanaggāhī.
an4.198:11.8	Yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ; manindriye saṁvaraṁ āpajjati.
an4.198:11.9	So iminā ariyena indriyasaṁvarena samannāgato ajjhattaṁ abyāsekasukhaṁ paṭisaṁvedeti.
an4.198:12.1	So abhikkante paṭikkante sampajānakārī hoti, ālokite vilokite sampajānakārī hoti, samiñjite pasārite sampajānakārī hoti, saṅghāṭipattacīvaradhāraṇe sampajānakārī hoti, asite pīte khāyite sāyite sampajānakārī hoti, uccārapassāvakamme sampajānakārī hoti, gate ṭhite nisinne sutte jāgarite bhāsite tuṇhībhāve sampajānakārī hoti.
an4.198:13.1	So iminā ca ariyena sīlakkhandhena samannāgato, imāya ca ariyāya santuṭṭhiyā samannāgato, iminā ca ariyena indriyasaṁvarena samannāgato, iminā ca ariyena satisampajaññena samannāgato
an4.198:13.2	vivittaṁ senāsanaṁ bhajati araññaṁ rukkhamūlaṁ pabbataṁ kandaraṁ giriguhaṁ susānaṁ vanappatthaṁ abbhokāsaṁ palālapuñjaṁ.
an4.198:13.3	So pacchābhattaṁ piṇḍapātapaṭikkanto nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an4.198:13.4	So abhijjhaṁ loke pahāya vigatābhijjhena cetasā viharati, abhijjhāya cittaṁ parisodheti.
an4.198:13.5	Byāpādapadosaṁ pahāya abyāpannacitto viharati sabbapāṇabhūtahitānukampī, byāpādapadosā cittaṁ parisodheti.
an4.198:13.6	Thinamiddhaṁ pahāya vigatathinamiddho viharati ālokasaññī sato sampajāno, thinamiddhā cittaṁ parisodheti.
an4.198:13.7	Uddhaccakukkuccaṁ pahāya anuddhato viharati ajjhattaṁ vūpasantacitto, uddhaccakukkuccā cittaṁ parisodheti.
an4.198:13.8	Vicikicchaṁ pahāya tiṇṇavicikiccho viharati akathaṅkathī kusalesu dhammesu, vicikicchāya cittaṁ parisodheti.
an4.198:13.9	So ime pañca nīvaraṇe pahāya cetaso upakkilese paññāya dubbalīkaraṇe
an4.198:13.10	vivicceva kāmehi …pe… catutthaṁ jhānaṁ upasampajja viharati.
an4.198:14.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya …pe…
an4.198:14.2	sattānaṁ cutūpapātañāṇāya …pe…
an4.198:14.3	āsavānaṁ khayañāṇāya cittaṁ abhininnāmeti.
an4.198:14.4	So ‘idaṁ dukkhan’ti yathābhūtaṁ pajānāti, ‘ayaṁ dukkhasamudayo’ti yathābhūtaṁ pajānāti, ‘ayaṁ dukkhanirodho’ti yathābhūtaṁ pajānāti, ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.198:14.5	‘Ime āsavā’ti yathābhūtaṁ pajānāti, ‘ayaṁ āsavasamudayo’ti yathābhūtaṁ pajānāti, ‘ayaṁ āsavanirodho’ti yathābhūtaṁ pajānāti, ‘ayaṁ āsavanirodhagāminī paṭipadā’ti yathābhūtaṁ pajānāti.
an4.198:15.1	Tassa evaṁ jānato evaṁ passato kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccati;
an4.198:15.2	vimuttasmiṁ vimuttamiti ñāṇaṁ hoti.
an4.198:15.3	‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.
an4.198:15.4	Evaṁ kho, bhikkhave, puggalo nevattantapo hoti nāttaparitāpanānuyogamanuyutto na parantapo na paraparitāpanānuyogamanuyutto.
an4.198:15.5	So na attantapo na parantapo diṭṭheva dhamme nicchāto nibbuto sītībhūto sukhappaṭisaṁvedī brahmabhūtena attanā viharati.
an4.198:15.6	Ime kho, bhikkhave, cattāro puggalā santo saṁvijjamānā lokasmin”ti.
an4.198:15.7	Aṭṭhamaṁ.
an4.199:0.1	Aṅguttara Nikāya 4.199
an4.199:0.2	20. Mahāvagga
an4.199:0.3	Taṇhāsutta
an4.199:1.1	Bhagavā etadavoca:
an4.199:1.2	“taṇhaṁ vo, bhikkhave, desessāmi jāliniṁ saritaṁ visaṭaṁ visattikaṁ, yāya ayaṁ loko uddhasto pariyonaddho tantākulakajāto gulāguṇṭhikajāto muñjapabbajabhūto apāyaṁ duggatiṁ vinipātaṁ saṁsāraṁ nātivattati.
an4.199:1.3	Taṁ suṇātha, sādhukaṁ manasi karotha, bhāsissāmī”ti.
an4.199:1.4	“Evaṁ, bhante”ti kho te bhikkhū bhagavato paccassosuṁ.
an4.199:1.5	Bhagavā etadavoca:
an4.199:2.1	“Katamā ca sā, bhikkhave, taṇhā jālinī saritā visaṭā visattikā, yāya ayaṁ loko uddhasto pariyonaddho tantākulakajāto gulāguṇṭhikajāto muñjapabbajabhūto apāyaṁ duggatiṁ vinipātaṁ saṁsāraṁ nātivattati?
an4.199:2.2	Aṭṭhārasa kho panimāni, bhikkhave, taṇhāvicaritāni ajjhattikassa upādāya, aṭṭhārasa taṇhāvicaritāni bāhirassa upādāya.
an4.199:3.1	Katamāni aṭṭhārasa taṇhāvicaritāni ajjhattikassa upādāya?
an4.199:3.2	Asmīti, bhikkhave, sati itthasmīti hoti, evaṁsmīti hoti, aññathāsmīti hoti, asasmīti hoti, satasmīti hoti, santi hoti, itthaṁ santi hoti, evaṁ santi hoti, aññathā santi hoti, apihaṁ santi hoti, apihaṁ itthaṁ santi hoti, apihaṁ evaṁ santi hoti, apihaṁ aññathā santi hoti, bhavissanti hoti, itthaṁ bhavissanti hoti, evaṁ bhavissanti hoti, aññathā bhavissanti hoti.
an4.199:3.3	Imāni aṭṭhārasa taṇhāvicaritāni ajjhattikassa upādāya.
an4.199:4.1	Katamāni aṭṭhārasa taṇhāvicaritāni bāhirassa upādāya?
an4.199:4.2	Imināsmīti, bhikkhave, sati iminā itthasmīti hoti, iminā evaṁsmīti hoti, iminā aññathāsmīti hoti, iminā asasmīti hoti, iminā satasmīti hoti, iminā santi hoti, iminā itthaṁ santi hoti, iminā evaṁ santi hoti, iminā aññathā santi hoti, iminā apihaṁ santi hoti, iminā apihaṁ itthaṁ santi hoti, iminā apihaṁ evaṁ santi hoti, iminā apihaṁ aññathā santi hoti, iminā bhavissanti hoti, iminā itthaṁ bhavissanti hoti, iminā evaṁ bhavissanti hoti, iminā aññathā bhavissanti hoti.
an4.199:4.3	Imāni aṭṭhārasa taṇhāvicaritāni bāhirassa upādāya.
an4.199:5.1	Iti aṭṭhārasa taṇhāvicaritāni ajjhattikassa upādāya, aṭṭhārasa taṇhāvicaritāni bāhirassa upādāya.
an4.199:5.2	Imāni vuccanti, bhikkhave, chattiṁsa taṇhāvicaritāni.
an4.199:5.3	Iti evarūpāni atītāni chattiṁsa taṇhāvicaritāni, anāgatāni chattiṁsa taṇhāvicaritāni, paccuppannāni chattiṁsa taṇhāvicaritāni.
an4.199:5.4	Evaṁ aṭṭhasataṁ taṇhāvicaritaṁ honti.
an4.199:6.1	Ayaṁ kho sā, bhikkhave, taṇhā jālinī saritā visaṭā visattikā, yāya ayaṁ loko uddhasto pariyonaddho tantākulakajāto guṇāguṇṭhikajāto muñjapabbajabhūto apāyaṁ duggatiṁ vinipātaṁ saṁsāraṁ nātivattatī”ti.
an4.199:6.2	Navamaṁ.
an4.200:0.1	Aṅguttara Nikāya 4.200
an4.200:0.2	20. Mahāvagga
an4.200:0.3	Pemasutta
an4.200:1.1	“Cattārimāni, bhikkhave, pemāni jāyanti.
an4.200:1.2	Katamāni cattāri?
an4.200:1.3	Pemā pemaṁ jāyati,
an4.200:1.4	pemā doso jāyati,
an4.200:1.5	dosā pemaṁ jāyati,
an4.200:1.6	dosā doso jāyati.
an4.200:2.1	Kathañca, bhikkhave, pemā pemaṁ jāyati?
an4.200:2.2	Idha, bhikkhave, puggalo puggalassa iṭṭho hoti kanto manāpo.
an4.200:2.3	Taṁ pare iṭṭhena kantena manāpena samudācaranti.
an4.200:2.4	Tassa evaṁ hoti:
an4.200:2.5	‘yo kho myāyaṁ puggalo iṭṭho kanto manāpo, taṁ pare iṭṭhena kantena manāpena samudācarantī’ti.
an4.200:2.6	So tesu pemaṁ janeti.
an4.200:2.7	Evaṁ kho, bhikkhave, pemā pemaṁ jāyati.
an4.200:3.1	Kathañca, bhikkhave, pemā doso jāyati?
an4.200:3.2	Idha, bhikkhave, puggalo puggalassa iṭṭho hoti kanto manāpo.
an4.200:3.3	Taṁ pare aniṭṭhena akantena amanāpena samudācaranti.
an4.200:3.4	Tassa evaṁ hoti:
an4.200:3.5	‘yo kho myāyaṁ puggalo iṭṭho kanto manāpo, taṁ pare aniṭṭhena akantena amanāpena samudācarantī’ti.
an4.200:3.6	So tesu dosaṁ janeti.
an4.200:3.7	Evaṁ kho, bhikkhave, pemā doso jāyati.
an4.200:4.1	Kathañca, bhikkhave, dosā pemaṁ jāyati?
an4.200:4.2	Idha, bhikkhave, puggalo puggalassa aniṭṭho hoti akanto amanāpo.
an4.200:4.3	Taṁ pare aniṭṭhena akantena amanāpena samudācaranti.
an4.200:4.4	Tassa evaṁ hoti:
an4.200:4.5	‘yo kho myāyaṁ puggalo aniṭṭho akanto amanāpo, taṁ pare aniṭṭhena akantena amanāpena samudācarantī’ti.
an4.200:4.6	So tesu pemaṁ janeti.
an4.200:4.7	Evaṁ kho, bhikkhave, dosā pemaṁ jāyati.
an4.200:5.1	Kathañca, bhikkhave, dosā doso jāyati?
an4.200:5.2	Idha, bhikkhave, puggalo puggalassa aniṭṭho hoti akanto amanāpo.
an4.200:5.3	Taṁ pare iṭṭhena kantena manāpena samudācaranti.
an4.200:5.4	Tassa evaṁ hoti:
an4.200:5.5	‘yo kho myāyaṁ puggalo aniṭṭho akanto amanāpo, taṁ pare iṭṭhena kantena manāpena samudācarantī’ti.
an4.200:5.6	So tesu dosaṁ janeti.
an4.200:5.7	Evaṁ kho, bhikkhave, dosā doso jāyati.
an4.200:5.8	Imāni kho, bhikkhave, cattāri pemāni jāyanti.
an4.200:6.1	Yasmiṁ, bhikkhave, samaye bhikkhu vivicceva kāmehi …pe… paṭhamaṁ jhānaṁ upasampajja viharati,
an4.200:6.2	yampissa pemā pemaṁ jāyati tampissa tasmiṁ samaye na hoti, yopissa pemā doso jāyati sopissa tasmiṁ samaye na hoti, yampissa dosā pemaṁ jāyati tampissa tasmiṁ samaye na hoti, yopissa dosā doso jāyati sopissa tasmiṁ samaye na hoti.
an4.200:7.1	Yasmiṁ, bhikkhave, samaye bhikkhu vitakkavicārānaṁ vūpasamā …pe… dutiyaṁ jhānaṁ …pe… tatiyaṁ jhānaṁ …pe… catutthaṁ jhānaṁ upasampajja viharati,
an4.200:7.2	yampissa pemā pemaṁ jāyati tampissa tasmiṁ samaye na hoti, yopissa pemā doso jāyati sopissa tasmiṁ samaye na hoti, yampissa dosā pemaṁ jāyati tampissa tasmiṁ samaye na hoti, yopissa dosā doso jāyati sopissa tasmiṁ samaye na hoti.
an4.200:8.1	Yasmiṁ, bhikkhave, samaye bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati, yampissa pemā pemaṁ jāyati tampissa pahīnaṁ hoti ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ, yopissa pemā doso jāyati sopissa pahīno hoti ucchinnamūlo tālāvatthukato anabhāvaṅkato āyatiṁ anuppādadhammo,
an4.200:8.2	yampissa dosā pemaṁ jāyati tampissa pahīnaṁ hoti ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ, yopissa dosā doso jāyati sopissa pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.
an4.200:8.3	Ayaṁ vuccati, bhikkhave, bhikkhu neva usseneti na paṭiseneti na dhūpāyati na pajjalati na sampajjhāyati.
an4.200:9.1	Kathañca, bhikkhave, bhikkhu usseneti?
an4.200:9.2	Idha, bhikkhave, bhikkhu rūpaṁ attato samanupassati, rūpavantaṁ vā attānaṁ, attani vā rūpaṁ, rūpasmiṁ vā attānaṁ;
an4.200:9.3	vedanaṁ attato samanupassati, vedanāvantaṁ vā attānaṁ, attani vā vedanaṁ, vedanāya vā attānaṁ;
an4.200:9.4	saññaṁ attato samanupassati, saññāvantaṁ vā attānaṁ, attani vā saññaṁ, saññāya vā attānaṁ;
an4.200:9.5	saṅkhāre attato samanupassati, saṅkhāravantaṁ vā attānaṁ, attani vā saṅkhāre, saṅkhāresu vā attānaṁ;
an4.200:9.6	viññāṇaṁ attato samanupassati, viññāṇavantaṁ vā attānaṁ, attani vā viññāṇaṁ, viññāṇasmiṁ vā attānaṁ.
an4.200:9.7	Evaṁ kho, bhikkhave, bhikkhu usseneti.
an4.200:10.1	Kathañca, bhikkhave, bhikkhu na usseneti?
an4.200:10.2	Idha, bhikkhave, bhikkhu na rūpaṁ attato samanupassati, na rūpavantaṁ vā attānaṁ, na attani vā rūpaṁ, na rūpasmiṁ vā attānaṁ;
an4.200:10.3	na vedanaṁ attato samanupassati, na vedanāvantaṁ vā attānaṁ, na attani vā vedanaṁ, na vedanāya vā attānaṁ;
an4.200:10.4	na saññaṁ attato samanupassati, na saññāvantaṁ vā attānaṁ, na attani vā saññaṁ, na saññāya vā attānaṁ;
an4.200:10.5	na saṅkhāre attato samanupassati, na saṅkhāravantaṁ vā attānaṁ, na attani vā saṅkhāre, na saṅkhāresu vā attānaṁ;
an4.200:10.6	na viññāṇaṁ attato samanupassati, na viññāṇavantaṁ vā attānaṁ, na attani vā viññāṇaṁ, na viññāṇasmiṁ vā attānaṁ.
an4.200:10.7	Evaṁ kho, bhikkhave, bhikkhu na usseneti.
an4.200:11.1	Kathañca, bhikkhave, bhikkhu paṭiseneti?
an4.200:11.2	Idha, bhikkhave, bhikkhu akkosantaṁ paccakkosati, rosantaṁ paṭirosati, bhaṇḍantaṁ paṭibhaṇḍati.
an4.200:11.3	Evaṁ kho, bhikkhave, bhikkhu paṭiseneti.
an4.200:12.1	Kathañca, bhikkhave, bhikkhu na paṭiseneti?
an4.200:12.2	Idha, bhikkhave, bhikkhu akkosantaṁ na paccakkosati, rosantaṁ na paṭirosati, bhaṇḍantaṁ na paṭibhaṇḍati.
an4.200:12.3	Evaṁ kho, bhikkhave, bhikkhu na paṭiseneti.
an4.200:13.1	Kathañca, bhikkhave, bhikkhu dhūpāyati?
an4.200:13.2	Asmīti, bhikkhave, sati itthasmīti hoti, evaṁsmīti hoti, aññathāsmīti hoti, asasmīti hoti, satasmīti hoti, santi hoti, itthaṁ santi hoti, evaṁ santi hoti, aññathā santi hoti, apihaṁ santi hoti, apihaṁ itthaṁ santi hoti, apihaṁ evaṁ santi hoti, apihaṁ aññathā santi hoti, bhavissanti hoti, itthaṁ bhavissanti hoti, evaṁ bhavissanti hoti, aññathā bhavissanti hoti.
an4.200:13.3	Evaṁ kho, bhikkhave, bhikkhu dhūpāyati.
an4.200:14.1	Kathañca, bhikkhave, bhikkhu na dhūpāyati?
an4.200:14.2	Asmīti, bhikkhave, asati itthasmīti na hoti, evaṁsmīti na hoti, aññathāsmīti na hoti, asasmīti na hoti, satasmīti na hoti, santi na hoti, itthaṁ santi na hoti, evaṁ santi na hoti, aññathā santi na hoti, apihaṁ santi na hoti, apihaṁ itthaṁ santi na hoti, apihaṁ evaṁ santi na hoti, apihaṁ aññathā santi na hoti, bhavissanti na hoti, itthaṁ bhavissanti na hoti, evaṁ bhavissanti na hoti, aññathā bhavissanti na hoti.
an4.200:14.3	Evaṁ kho, bhikkhave, bhikkhu na dhūpāyati.
an4.200:15.1	Kathañca, bhikkhave, bhikkhu pajjalati?
an4.200:15.2	Iminā asmīti, bhikkhave, sati iminā itthasmīti hoti, iminā evaṁsmīti hoti, iminā aññathāsmīti hoti, iminā asasmīti hoti, iminā satasmīti hoti, iminā santi hoti, iminā itthaṁ santi hoti, iminā evaṁ santi hoti, iminā aññathā santi hoti, iminā apihaṁ santi hoti, iminā apihaṁ itthaṁ santi hoti, iminā apihaṁ evaṁ santi hoti, iminā apihaṁ aññathā santi hoti, iminā bhavissanti hoti, iminā itthaṁ bhavissanti hoti, iminā evaṁ bhavissanti hoti, iminā aññathā bhavissanti hoti.
an4.200:15.3	Evaṁ kho, bhikkhave, bhikkhu pajjalati.
an4.200:16.1	Kathañca, bhikkhave, bhikkhu na pajjalati?
an4.200:16.2	Iminā asmīti, bhikkhave, asati iminā itthasmīti na hoti, iminā evaṁsmīti na hoti, iminā aññathāsmīti na hoti, iminā asasmīti na hoti, iminā satasmīti na hoti, iminā santi na hoti, iminā itthaṁ santi na hoti, iminā evaṁ santi na hoti, iminā aññathā santi na hoti, iminā apihaṁ santi na hoti, iminā apihaṁ itthaṁ santi na hoti, iminā apihaṁ evaṁ santi na hoti, iminā apihaṁ aññathā santi na hoti, iminā bhavissanti na hoti, iminā itthaṁ bhavissanti na hoti, iminā evaṁ bhavissanti na hoti, iminā aññathā bhavissanti na hoti.
an4.200:16.3	Evaṁ kho, bhikkhave, bhikkhu na pajjalati.
an4.200:17.1	Kathañca, bhikkhave, bhikkhu sampajjhāyati?
an4.200:17.2	Idha, bhikkhave, bhikkhuno asmimāno pahīno na hoti ucchinnamūlo tālāvatthukato anabhāvaṅkato āyatiṁ anuppādadhammo.
an4.200:17.3	Evaṁ kho, bhikkhave, bhikkhu sampajjhāyati.
an4.200:18.1	Kathañca, bhikkhave, bhikkhu na sampajjhāyati?
an4.200:18.2	Idha, bhikkhave, bhikkhuno asmimāno pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.
an4.200:18.3	Evaṁ kho, bhikkhave, bhikkhu na sampajjhāyatī”ti.
an4.200:18.4	Dasamaṁ.
an4.200:18.5	Mahāvaggo pañcamo.
an4.200:19.0	Tassuddānaṁ
an4.200:19.1	Sotānugataṁ ṭhānaṁ,
an4.200:19.2	Bhaddiya sāmugiya vappa sāḷhā ca;
an4.200:19.3	Mallika attantāpo,
an4.200:19.4	Taṇhā pemena ca dasā teti.
an4.200:19.5	Catuttho mahāpaṇṇāsako samatto.
an4.201:0.1	Aṅguttara Nikāya 4.201
an4.201:0.2	21. Sappurisavagga
an4.201:0.3	Sikkhāpadasutta
an4.201:1.1	“Asappurisañca vo, bhikkhave, desessāmi, asappurisena asappurisatarañca;
an4.201:1.2	sappurisañca, sappurisena sappurisatarañca.
an4.201:1.3	Taṁ suṇātha, sādhukaṁ manasi karotha, bhāsissāmī”ti.
an4.201:1.4	“Evaṁ, bhante”ti kho te bhikkhū bhagavato paccassosuṁ.
an4.201:1.5	Bhagavā etadavoca:
an4.201:2.1	“Katamo ca, bhikkhave, asappuriso?
an4.201:2.2	Idha, bhikkhave, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, surāmerayamajjapamādaṭṭhāyī hoti.
an4.201:2.3	Ayaṁ vuccati, bhikkhave, asappuriso.
an4.201:3.1	Katamo ca, bhikkhave, asappurisena asappurisataro?
an4.201:3.2	Idha, bhikkhave, ekacco attanā ca pāṇātipātī hoti, parañca pāṇātipāte samādapeti;
an4.201:3.3	attanā ca adinnādāyī hoti, parañca adinnādāne samādapeti;
an4.201:3.4	attanā ca kāmesumicchācārī hoti, parañca kāmesumicchācāre samādapeti;
an4.201:3.5	attanā ca musāvādī hoti, parañca musāvāde samādapeti;
an4.201:3.6	attanā ca surāmerayamajjapamādaṭṭhāyī hoti, parañca surāmerayamajjapamādaṭṭhāne samādapeti.
an4.201:3.7	Ayaṁ vuccati, bhikkhave, asappurisena asappurisataro.
an4.201:4.1	Katamo ca, bhikkhave, sappuriso?
an4.201:4.2	Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti.
an4.201:4.3	Ayaṁ vuccati, bhikkhave, sappuriso.
an4.201:5.1	Katamo ca, bhikkhave, sappurisena sappurisataro?
an4.201:5.2	Idha, bhikkhave, ekacco attanā ca pāṇātipātā paṭivirato hoti, parañca pāṇātipātā veramaṇiyā samādapeti;
an4.201:5.3	attanā ca adinnādānā paṭivirato hoti, parañca adinnādānā veramaṇiyā samādapeti;
an4.201:5.4	attanā ca kāmesumicchācārā paṭivirato hoti, parañca kāmesumicchācārā veramaṇiyā samādapeti;
an4.201:5.5	attanā ca musāvādā paṭivirato hoti, parañca musāvādā veramaṇiyā samādapeti;
an4.201:5.6	attanā ca surāmerayamajjapamādaṭṭhānā paṭivirato hoti, parañca surāmerayamajjapamādaṭṭhānā veramaṇiyā samādapeti.
an4.201:5.7	Ayaṁ vuccati, bhikkhave, sappurisena sappurisataro”ti.
an4.201:5.8	Paṭhamaṁ.
an4.202:0.1	Aṅguttara Nikāya 4.202
an4.202:0.2	21. Sappurisavagga
an4.202:0.3	Assaddhasutta
an4.202:1.1	“Asappurisañca vo, bhikkhave, desessāmi, asappurisena asappurisatarañca;
an4.202:1.2	sappurisañca, sappurisena sappurisatarañca. Taṁ suṇātha …pe….
an4.202:2.1	“Katamo ca, bhikkhave, asappuriso?
an4.202:2.2	Idha, bhikkhave, ekacco assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti.
an4.202:2.3	Ayaṁ vuccati, bhikkhave, asappuriso.
an4.202:3.1	Katamo ca, bhikkhave, asappurisena asappurisataro?
an4.202:3.2	Idha, bhikkhave, ekacco attanā ca assaddho hoti, parañca assaddhiye samādapeti;
an4.202:3.3	attanā ca ahiriko hoti, parañca ahirikatāya samādapeti;
an4.202:3.4	attanā ca anottappī hoti, parañca anottappe samādapeti;
an4.202:3.5	attanā ca appassuto hoti, parañca appassute samādapeti;
an4.202:3.6	attanā ca kusīto hoti, parañca kosajje samādapeti;
an4.202:3.7	attanā ca muṭṭhassati hoti, parañca muṭṭhassacce samādapeti;
an4.202:3.8	attanā ca duppañño hoti, parañca duppaññatāya samādapeti.
an4.202:3.9	Ayaṁ vuccati, bhikkhave, asappurisena asappurisataro.
an4.202:4.1	Katamo ca, bhikkhave, sappuriso?
an4.202:4.2	Idha, bhikkhave, ekacco saddho hoti, hirimā hoti, ottappī hoti, bahussuto hoti, āraddhavīriyo hoti, satimā hoti, paññavā hoti.
an4.202:4.3	Ayaṁ vuccati, bhikkhave, sappuriso.
an4.202:5.1	Katamo ca, bhikkhave, sappurisena sappurisataro?
an4.202:5.2	Idha, bhikkhave, ekacco attanā ca saddhāsampanno hoti, parañca saddhāsampadāya samādapeti;
an4.202:5.3	attanā ca hirimā hoti, parañca hirimatāya samādapeti;
an4.202:5.4	attanā ca ottappī hoti, parañca ottappe samādapeti;
an4.202:5.5	attanā ca bahussuto hoti, parañca bāhusacce samādapeti;
an4.202:5.6	attanā ca āraddhavīriyo hoti, parañca vīriyārambhe samādapeti;
an4.202:5.7	attanā ca upaṭṭhitassati hoti, parañca satiupaṭṭhāne samādapeti;
an4.202:5.8	attanā ca paññāsampanno hoti, parañca paññāsampadāya samādapeti.
an4.202:5.9	Ayaṁ vuccati, bhikkhave, sappurisena sappurisataro”ti.
an4.202:5.10	Dutiyaṁ.
an4.203:0.1	Aṅguttara Nikāya 4.203
an4.203:0.2	21. Sappurisavagga
an4.203:0.3	Sattakammasutta
an4.203:1.1	“Asappurisañca vo, bhikkhave, desessāmi, asappurisena asappurisatarañca;
an4.203:1.2	sappurisañca, sappurisena sappurisatarañca. Taṁ suṇātha …pe….
an4.203:2.1	“Katamo ca, bhikkhave, asappuriso?
an4.203:2.2	Idha, bhikkhave, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti.
an4.203:2.3	Ayaṁ vuccati, bhikkhave, asappuriso.
an4.203:3.1	Katamo ca, bhikkhave, asappurisena asappurisataro?
an4.203:3.2	Idha, bhikkhave, ekacco attanā ca pāṇātipātī hoti, parañca pāṇātipāte samādapeti;
an4.203:3.3	attanā ca adinnādāyī hoti, parañca adinnādāne samādapeti;
an4.203:3.4	attanā ca kāmesumicchācārī hoti, parañca kāmesumicchācāre samādapeti;
an4.203:3.5	attanā ca musāvādī hoti, parañca musāvāde samādapeti;
an4.203:3.6	attanā ca pisuṇavāco hoti, parañca pisuṇāya vācāya samādapeti;
an4.203:3.7	attanā ca pharusavāco hoti, parañca pharusāya vācāya samādapeti;
an4.203:3.8	attanā ca samphappalāpī hoti, parañca samphappalāpe samādapeti.
an4.203:3.9	Ayaṁ vuccati, bhikkhave, asappurisena asappurisataro.
an4.203:4.1	Katamo ca, bhikkhave, sappuriso?
an4.203:4.2	Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato, hoti, samphappalāpā paṭivirato hoti.
an4.203:4.3	Ayaṁ vuccati, bhikkhave, sappuriso.
an4.203:5.1	Katamo ca, bhikkhave, sappurisena sappurisataro?
an4.203:5.2	Idha, bhikkhave, ekacco attanā ca pāṇātipātā paṭivirato hoti, parañca pāṇātipātā veramaṇiyā samādapeti;
an4.203:5.3	attanā ca adinnādānā paṭivirato hoti, parañca adinnādānā veramaṇiyā samādapeti;
an4.203:5.4	attanā ca kāmesumicchācārā paṭivirato hoti, parañca kāmesumicchācārā veramaṇiyā samādapeti;
an4.203:5.5	attanā ca musāvādā paṭivirato hoti, parañca musāvādā veramaṇiyā samādapeti;
an4.203:5.6	attanā ca pisuṇāya vācāya paṭivirato hoti, parañca pisuṇāya vācāya veramaṇiyā samādapeti;
an4.203:5.7	attanā ca pharusāya vācāya paṭivirato hoti, parañca pharusāya vācāya veramaṇiyā samādapeti;
an4.203:5.8	attanā ca samphappalāpā paṭivirato hoti, parañca samphappalāpā veramaṇiyā samādapeti.
an4.203:5.9	Ayaṁ vuccati, bhikkhave, sappurisena sappurisataro”ti.
an4.203:5.10	Tatiyaṁ.
an4.204:0.1	Aṅguttara Nikāya 4.204
an4.204:0.2	21. Sappurisavagga
an4.204:0.3	Dasakammasutta
an4.204:1.1	“Asappurisañca vo, bhikkhave, desessāmi, asappurisena asappurisatarañca;
an4.204:1.2	sappurisañca, sappurisena sappurisatarañca. Taṁ suṇātha …pe….
an4.204:2.1	“Katamo ca, bhikkhave, asappuriso?
an4.204:2.2	Idha, bhikkhave, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhiko hoti.
an4.204:2.3	Ayaṁ vuccati, bhikkhave, asappuriso.
an4.204:3.1	Katamo ca, bhikkhave, asappurisena asappurisataro?
an4.204:3.2	Idha, bhikkhave, ekacco attanā ca pāṇātipātī hoti, parañca pāṇātipāte samādapeti …pe… attanā ca abhijjhālu hoti, parañca abhijjhāya samādapeti;
an4.204:3.3	attanā ca byāpannacitto hoti, parañca byāpāde samādapeti, attanā ca micchādiṭṭhiko hoti, parañca micchādiṭṭhiyā samādapeti.
an4.204:3.4	Ayaṁ vuccati, bhikkhave, asappurisena asappurisataro.
an4.204:4.1	Katamo ca, bhikkhave, sappuriso?
an4.204:4.2	Idha, bhikkhave, ekacco pāṇātipātā paṭivirato hoti …pe… anabhijjhālu hoti, abyāpannacitto hoti, sammādiṭṭhiko hoti.
an4.204:4.3	Ayaṁ vuccati, bhikkhave, sappuriso.
an4.204:5.1	Katamo ca, bhikkhave, sappurisena sappurisataro?
an4.204:5.2	Idha, bhikkhave, ekacco attanā ca pāṇātipātā paṭivirato hoti, parañca pāṇātipātā veramaṇiyā samādapeti …pe… attanā ca anabhijjhālu hoti, parañca anabhijjhāya samādapeti;
an4.204:5.3	attanā ca abyāpannacitto hoti, parañca abyāpāde samādapeti;
an4.204:5.4	attanā ca sammādiṭṭhiko hoti, parañca sammādiṭṭhiyā samādapeti.
an4.204:5.5	Ayaṁ vuccati, bhikkhave, sappurisena sappurisataro”ti.
an4.204:5.6	Catutthaṁ.
an4.205:0.1	Aṅguttara Nikāya 4.205
an4.205:0.2	21. Sappurisavagga
an4.205:0.3	Aṭṭhaṅgikasutta
an4.205:1.1	“Asappurisañca vo, bhikkhave, desessāmi, asappurisena asappurisatarañca;
an4.205:1.2	sappurisañca, sappurisena sappurisatarañca. Taṁ suṇātha …pe….
an4.205:2.1	“Katamo ca, bhikkhave, asappuriso?
an4.205:2.2	Idha, bhikkhave, ekacco micchādiṭṭhiko hoti, micchāsaṅkappo hoti, micchāvāco hoti, micchākammanto hoti, micchāājīvo hoti, micchāvāyāmo hoti, micchāsati hoti, micchāsamādhi hoti.
an4.205:2.3	Ayaṁ vuccati, bhikkhave, asappuriso.
an4.205:3.1	Katamo ca, bhikkhave, asappurisena asappurisataro?
an4.205:3.2	Idha bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti;
an4.205:3.3	attanā ca micchāsaṅkappo hoti, parañca micchāsaṅkappe samādapeti;
an4.205:3.4	attanā ca micchāvāco hoti, parañca micchāvācāya samādapeti;
an4.205:3.5	attanā ca micchākammanto hoti, parañca micchākammante samādapeti;
an4.205:3.6	attanā ca micchāājīvo hoti, parañca micchāājīve samādapeti;
an4.205:3.7	attanā ca micchāvāyāmo hoti, parañca micchāvāyāme samādapeti;
an4.205:3.8	attanā ca micchāsati hoti, parañca micchāsatiyā samādapeti;
an4.205:3.9	attanā ca micchāsamādhi hoti, parañca micchāsamādhimhi samādapeti.
an4.205:3.10	Ayaṁ vuccati, bhikkhave, asappurisena asappurisataro.
an4.205:4.1	Katamo ca, bhikkhave, sappuriso?
an4.205:4.2	Idha, bhikkhave, ekacco sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti.
an4.205:4.3	Ayaṁ vuccati, bhikkhave, sappuriso.
an4.205:5.1	Katamo ca, bhikkhave, sappurisena sappurisataro?
an4.205:5.2	Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti;
an4.205:5.3	attanā ca sammāsaṅkappo hoti, parañca sammāsaṅkappe samādapeti;
an4.205:5.4	attanā ca sammāvāco hoti, parañca sammāvācāya samādapeti;
an4.205:5.5	attanā ca sammākammanto hoti, parañca sammākammante samādapeti;
an4.205:5.6	attanā ca sammāājīvo hoti, parañca sammāājīve samādapeti;
an4.205:5.7	attanā ca sammāvāyāmo hoti, parañca sammāvāyāme samādapeti;
an4.205:5.8	attanā ca sammāsati hoti, parañca sammāsatiyā samādapeti;
an4.205:5.9	attanā ca sammāsamādhi hoti, parañca sammāsamādhimhi samādapeti.
an4.205:5.10	Ayaṁ vuccati, bhikkhave, sappurisena sappurisataro”ti.
an4.205:5.11	Pañcamaṁ.
an4.206:0.1	Aṅguttara Nikāya 4.206
an4.206:0.2	21. Sappurisavagga
an4.206:0.3	Dasamaggasutta
an4.206:1.1	“Asappurisañca vo, bhikkhave, desessāmi, asappurisena asappurisatarañca;
an4.206:1.2	sappurisañca, sappurisena sappurisatarañca. Taṁ suṇātha …pe….
an4.206:2.1	“Katamo ca, bhikkhave, asappuriso?
an4.206:2.2	Idha, bhikkhave, ekacco micchādiṭṭhiko hoti …pe… micchāñāṇī hoti, micchāvimutti hoti.
an4.206:2.3	Ayaṁ vuccati, bhikkhave, asappuriso.
an4.206:3.1	Katamo ca, bhikkhave, asappurisena asappurisataro?
an4.206:3.2	Idha, bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti …pe… attanā ca micchāñāṇī hoti, parañca micchāñāṇe samādapeti;
an4.206:3.3	attanā ca micchāvimutti hoti, parañca micchāvimuttiyā samādapeti.
an4.206:3.4	Ayaṁ vuccati, bhikkhave, asappurisena asappurisataro.
an4.206:4.1	Katamo ca, bhikkhave, sappuriso?
an4.206:4.2	Idha, bhikkhave, ekacco sammādiṭṭhiko hoti …pe… sammāñāṇī hoti, sammāvimutti hoti.
an4.206:4.3	Ayaṁ vuccati, bhikkhave, sappuriso.
an4.206:5.1	Katamo ca, bhikkhave, sappurisena sappurisataro?
an4.206:5.2	Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti …pe… attanā ca sammāñāṇī hoti, parañca sammāñāṇe samādapeti;
an4.206:5.3	attanā ca sammāvimutti hoti, parañca sammāvimuttiyā samādapeti.
an4.206:5.4	Ayaṁ vuccati, bhikkhave, sappurisena sappurisataro”ti.
an4.206:5.5	Chaṭṭhaṁ.
an4.207:0.1	Aṅguttara Nikāya 4.207
an4.207:0.2	21. Sappurisavagga
an4.207:0.3	Paṭhamapāpadhammasutta
an4.207:1.1	“Pāpañca vo, bhikkhave, desessāmi, pāpena pāpatarañca;
an4.207:1.2	kalyāṇañca, kalyāṇena kalyāṇatarañca. Taṁ suṇātha …pe….
an4.207:2.1	Katamo ca, bhikkhave, pāpo?
an4.207:2.2	Idha, bhikkhave, ekacco pāṇātipātī hoti …pe… micchādiṭṭhiko hoti.
an4.207:2.3	Ayaṁ vuccati, bhikkhave, pāpo.
an4.207:3.1	Katamo ca, bhikkhave, pāpena pāpataro?
an4.207:3.2	Idha, bhikkhave, ekacco attanā ca pāṇātipātī hoti, parañca pāṇātipāte samādapeti …pe… attanā ca micchādiṭṭhiko hoti, parañca micchādiṭṭhiyā samādapeti.
an4.207:3.3	Ayaṁ vuccati, bhikkhave, pāpena pāpataro.
an4.207:4.1	Katamo ca, bhikkhave, kalyāṇo?
an4.207:4.2	Idha, bhikkhave, ekacco pāṇātipātā paṭivirato hoti …pe… sammādiṭṭhiko hoti.
an4.207:4.3	Ayaṁ vuccati, bhikkhave, kalyāṇo.
an4.207:5.1	“Katamo ca, bhikkhave, kalyāṇena kalyāṇataro?
an4.207:5.2	Idha, bhikkhave, ekacco attanā ca pāṇātipātā paṭivirato hoti, parañca pāṇātipātā veramaṇiyā samādapeti …pe… attanā ca sammādiṭṭhiko hoti, parañca sammādiṭṭhiyā samādapeti.
an4.207:5.3	Ayaṁ vuccati, bhikkhave, kalyāṇena kalyāṇataro”ti.
an4.207:5.4	Sattamaṁ.
an4.208:0.1	Aṅguttara Nikāya 4.208
an4.208:0.2	21. Sappurisavagga
an4.208:0.3	Dutiyapāpadhammasutta
an4.208:1.1	“Pāpañca vo, bhikkhave, desessāmi, pāpena pāpatarañca;
an4.208:1.2	kalyāṇañca, kalyāṇena kalyāṇatarañca.
an4.208:1.3	Taṁ suṇātha …pe…
an4.208:2.1	“Katamo ca, bhikkhave, pāpo?
an4.208:2.2	Idha, bhikkhave, ekacco micchādiṭṭhiko hoti …pe… micchāñāṇī hoti, micchāvimutti hoti.
an4.208:2.3	Ayaṁ vuccati, bhikkhave, pāpo.
an4.208:3.1	Katamo ca, bhikkhave, pāpena pāpataro?
an4.208:3.2	Idha, bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti …pe… attanā ca micchāñāṇī hoti, parañca micchāñāṇe samādapeti;
an4.208:3.3	attanā ca micchāvimutti hoti, parañca micchāvimuttiyā samādapeti.
an4.208:3.4	Ayaṁ vuccati, bhikkhave, pāpena pāpataro.
an4.208:4.1	Katamo ca, bhikkhave, kalyāṇo?
an4.208:4.2	Idha, bhikkhave, ekacco sammādiṭṭhiko hoti …pe… sammāñāṇī hoti, sammāvimutti hoti.
an4.208:4.3	Ayaṁ vuccati, bhikkhave, kalyāṇo.
an4.208:5.1	Katamo ca, bhikkhave, kalyāṇena kalyāṇataro?
an4.208:5.2	Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti …pe… attanā ca sammāñāṇī hoti, parañca sammāñāṇe samādapeti;
an4.208:5.3	attanā ca sammāvimutti hoti, parañca sammāvimuttiyā samādapeti.
an4.208:5.4	Ayaṁ vuccati, bhikkhave, kalyāṇena kalyāṇataro”ti.
an4.208:5.5	Aṭṭhamaṁ.
an4.209:0.1	Aṅguttara Nikāya 4.209
an4.209:0.2	21. Sappurisavagga
an4.209:0.3	Tatiyapāpadhammasutta
an4.209:1.1	“Pāpadhammañca vo, bhikkhave, desessāmi, pāpadhammena pāpadhammatarañca;
an4.209:1.2	kalyāṇadhammañca, kalyāṇadhammena kalyāṇadhammatarañca. Taṁ suṇātha …pe….
an4.209:2.1	“Katamo ca, bhikkhave, pāpadhammo?
an4.209:2.2	Idha, bhikkhave, ekacco pāṇātipātī hoti …pe… micchādiṭṭhiko hoti.
an4.209:2.3	Ayaṁ vuccati, bhikkhave, pāpadhammo.
an4.209:3.1	Katamo ca, bhikkhave, pāpadhammena pāpadhammataro?
an4.209:3.2	Idha bhikkhave, ekacco attanā ca pāṇātipātī hoti, parañca pāṇātipāte samādapeti …pe… attanā ca micchādiṭṭhiko hoti, parañca micchādiṭṭhiyā samādapeti.
an4.209:3.3	Ayaṁ vuccati, bhikkhave, pāpadhammena pāpadhammataro.
an4.209:4.1	Katamo ca, bhikkhave, kalyāṇadhammo?
an4.209:4.2	Idha, bhikkhave, ekacco pāṇātipātā paṭivirato hoti …pe… sammādiṭṭhiko hoti.
an4.209:4.3	Ayaṁ vuccati, bhikkhave, kalyāṇadhammo.
an4.209:5.1	Katamo ca, bhikkhave, kalyāṇadhammena kalyāṇadhammataro?
an4.209:5.2	Idha, bhikkhave, ekacco attanā ca pāṇātipātā paṭivirato hoti, parañca pāṇātipātā veramaṇiyā samādapeti …pe… attanā ca sammādiṭṭhiko hoti, parañca sammādiṭṭhiyā samādapeti.
an4.209:5.3	Ayaṁ vuccati, bhikkhave, kalyāṇadhammena kalyāṇadhammataro”ti.
an4.209:5.4	Navamaṁ.
an4.210:0.1	Aṅguttara Nikāya 4.210
an4.210:0.2	21. Sappurisavagga
an4.210:0.3	Catutthapāpadhammasutta
an4.210:1.1	“Pāpadhammañca vo, bhikkhave, desessāmi, pāpadhammena pāpadhammatarañca;
an4.210:1.2	kalyāṇadhammañca, kalyāṇadhammena kalyāṇadhammatarañca. Taṁ suṇātha …pe….
an4.210:2.1	“Katamo ca, bhikkhave, pāpadhammo?
an4.210:2.2	Idha, bhikkhave, ekacco micchādiṭṭhiko hoti …pe… micchāñāṇī hoti, micchāvimutti hoti.
an4.210:2.3	Ayaṁ vuccati, bhikkhave, pāpadhammo.
an4.210:3.1	Katamo ca, bhikkhave, pāpadhammena pāpadhammataro?
an4.210:3.2	Idha, bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti …pe… attanā ca micchāñāṇī hoti, parañca micchāñāṇe samādapeti;
an4.210:3.3	attanā ca micchāvimutti hoti, parañca micchāvimuttiyā samādapeti.
an4.210:3.4	Ayaṁ vuccati, bhikkhave, pāpadhammena pāpadhammataro.
an4.210:4.1	Katamo ca, bhikkhave, kalyāṇadhammo?
an4.210:4.2	Idha, bhikkhave, ekacco sammādiṭṭhiko hoti …pe… sammāñāṇī hoti, sammāvimutti hoti.
an4.210:4.3	Ayaṁ vuccati, bhikkhave, kalyāṇadhammo.
an4.210:5.1	Katamo ca, bhikkhave, kalyāṇadhammena kalyāṇadhammataro?
an4.210:5.2	Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti …pe… attanā ca sammāñāṇī hoti, parañca sammāñāṇe samādapeti;
an4.210:5.3	attanā ca sammāvimutti hoti, parañca sammāvimuttiyā samādapeti.
an4.210:5.4	Ayaṁ vuccati, bhikkhave, kalyāṇadhammena kalyāṇadhammataro”ti.
an4.210:5.5	Dasamaṁ.
an4.210:5.6	Sappurisavaggo paṭhamo.
an4.210:6.0	Tassuddānaṁ
an4.210:6.1	Sikkhāpadañca assaddhaṁ,
an4.210:6.2	Sattakammaṁ atho ca dasakammaṁ;
an4.210:6.3	Aṭṭhaṅgikañca dasamaggaṁ,
an4.210:6.4	Dve pāpadhammā apare dveti.
an4.211:0.1	Aṅguttara Nikāya 4.211
an4.211:0.2	22. Parisāvagga
an4.211:0.3	Parisāsutta
an4.211:1.1	“Cattārome, bhikkhave, parisadūsanā.
an4.211:1.2	Katame cattāro?
an4.211:1.3	Bhikkhu, bhikkhave, dussīlo pāpadhammo parisadūsano;
an4.211:1.4	bhikkhunī, bhikkhave, dussīlā pāpadhammā parisadūsanā;
an4.211:1.5	upāsako, bhikkhave, dussīlo pāpadhammo parisadūsano;
an4.211:1.6	upāsikā, bhikkhave, dussīlā pāpadhammā parisadūsanā.
an4.211:1.7	Ime kho, bhikkhave, cattāro parisadūsanā.
an4.211:2.1	Cattārome, bhikkhave, parisasobhanā.
an4.211:2.2	Katame cattāro?
an4.211:2.3	Bhikkhu, bhikkhave, sīlavā kalyāṇadhammo parisasobhano;
an4.211:2.4	bhikkhunī, bhikkhave, sīlavatī kalyāṇadhammā parisasobhanā;
an4.211:2.5	upāsako, bhikkhave, sīlavā kalyāṇadhammo parisasobhano;
an4.211:2.6	upāsikā, bhikkhave, sīlavatī kalyāṇadhammā parisasobhanā.
an4.211:2.7	Ime kho, bhikkhave, cattāro parisasobhanā”ti.
an4.211:2.8	Paṭhamaṁ.
an4.212:0.1	Aṅguttara Nikāya 4.212
an4.212:0.2	22. Parisāvagga
an4.212:0.3	Diṭṭhisutta
an4.212:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.212:1.2	Katamehi catūhi?
an4.212:1.3	Kāyaduccaritena, vacīduccaritena, manoduccaritena, micchādiṭṭhiyā—
an4.212:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.212:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.212:2.2	Katamehi catūhi?
an4.212:2.3	Kāyasucaritena, vacīsucaritena, manosucaritena, sammādiṭṭhiyā—
an4.212:2.4	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.212:2.5	Dutiyaṁ.
an4.213:0.1	Aṅguttara Nikāya 4.213
an4.213:0.2	22. Parisāvagga
an4.213:0.3	Akataññutāsutta
an4.213:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.213:1.2	Katamehi catūhi?
an4.213:1.3	Kāyaduccaritena, vacīduccaritena, manoduccaritena, akataññutā akataveditā—
an4.213:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.213:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.213:2.2	Katamehi catūhi?
an4.213:2.3	Kāyasucaritena, vacīsucaritena, manosucaritena, kataññutā kataveditā—
an4.213:2.4	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.213:2.5	Tatiyaṁ.
an4.214:0.1	Aṅguttara Nikāya 4.214
an4.214:0.2	22. Parisāvagga
an4.214:0.3	Pāṇātipātīsutta
an4.214:1.1	…pe… Pāṇātipātī hoti, adinnādāyī hoti, kāmesumicchācārī hoti, musāvādī hoti …pe… pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti.
an4.214:1.2	Catutthaṁ.
an4.215:0.1	Aṅguttara Nikāya 4.215
an4.215:0.2	22. Parisāvagga
an4.215:0.3	Paṭhamamaggasutta
an4.215:1.1	…pe… Micchādiṭṭhiko hoti, micchāsaṅkappo hoti, micchāvāco hoti, micchākammanto hoti …pe… sammādiṭṭhiko hoti, sammāsaṅkappo hoti, sammāvāco hoti, sammākammanto hoti.
an4.215:1.2	Pañcamaṁ.
an4.216:0.1	Aṅguttara Nikāya 4.216
an4.216:0.2	22. Parisāvagga
an4.216:0.3	Dutiyamaggasutta
an4.216:1.1	…pe… Micchāājīvo hoti, micchāvāyāmo hoti, micchāsati hoti, micchāsamādhi hoti …pe… sammāājīvo hoti, sammāvāyāmo hoti, sammāsati hoti, sammāsamādhi hoti.
an4.216:1.2	Chaṭṭhaṁ.
an4.217:0.1	Aṅguttara Nikāya 4.217
an4.217:0.2	22. Parisāvagga
an4.217:0.3	Paṭhamavohārapathasutta
an4.217:1.1	…pe… Adiṭṭhe diṭṭhavādī hoti, asute sutavādī hoti, amute mutavādī hoti, aviññāte viññātavādī hoti …pe… adiṭṭhe adiṭṭhavādī hoti, asute asutavādī hoti, amute amutavādī hoti, aviññāte aviññātavādī hoti.
an4.217:1.2	Sattamaṁ.
an4.218:0.1	Aṅguttara Nikāya 4.218
an4.218:0.2	22. Parisāvagga
an4.218:0.3	Dutiyavohārapathasutta
an4.218:1.1	…pe… Diṭṭhe adiṭṭhavādī hoti, sute asutavādī hoti, mute amutavādī hoti, viññāte aviññātavādī hoti …pe… diṭṭhe diṭṭhavādī hoti, sute sutavādī hoti, mute mutavādī hoti, viññāte viññātavādī hoti.
an4.218:1.2	Aṭṭhamaṁ.
an4.219:0.1	Aṅguttara Nikāya 4.219
an4.219:0.2	22. Parisāvagga
an4.219:0.3	Ahirikasutta
an4.219:1.1	…pe… Assaddho hoti, dussīlo hoti, ahiriko hoti, anottappī hoti …pe… saddho hoti, sīlavā hoti, hirimā hoti, ottappī hoti.
an4.219:1.2	Navamaṁ.
an4.220:0.1	Aṅguttara Nikāya 4.220
an4.220:0.2	22. Parisāvagga
an4.220:0.3	Dussīlasutta
an4.220:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.220:1.2	Katamehi catūhi?
an4.220:1.3	Assaddho hoti, dussīlo hoti, kusīto hoti, duppañño hoti—
an4.220:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.220:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.220:2.2	Katamehi catūhi?
an4.220:2.3	Saddho hoti, sīlavā hoti, āraddhavīriyo hoti, paññavā hoti—
an4.220:2.4	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.220:2.5	Dasamaṁ.
an4.220:2.6	Parisasobhaṇavaggo dutiyo.
an4.220:3.0	Tassuddānaṁ
an4.220:3.1	Parisā diṭṭhi akataññutā,
an4.220:3.2	Pāṇātipātāpi dve maggā;
an4.220:3.3	Dve vohārapathā vuttā,
an4.220:3.4	Ahirikaṁ duppaññena cāti.
an4.221:0.1	Aṅguttara Nikāya 4.221
an4.221:0.2	23. Duccaritavagga
an4.221:0.3	Duccaritasutta
an4.221:1.1	“Cattārimāni, bhikkhave, vacīduccaritāni.
an4.221:1.2	Katamāni cattāri?
an4.221:1.3	Musāvādo, pisuṇā vācā, pharusā vācā, samphappalāpo—
an4.221:1.4	Imāni kho, bhikkhave, cattāri vacīduccaritāni.
an4.221:1.5	Cattārimāni, bhikkhave, vacīsucaritāni.
an4.221:1.6	Katamāni cattāri?
an4.221:1.7	Saccavācā, apisuṇā vācā, saṇhā vācā, mantavācā—
an4.221:1.8	Imāni kho, bhikkhave, cattāri vacīsucaritānī”ti.
an4.221:1.9	Paṭhamaṁ.
an4.222:0.1	Aṅguttara Nikāya 4.222
an4.222:0.2	23. Duccaritavagga
an4.222:0.3	Diṭṭhisutta
an4.222:1.1	“Catūhi, bhikkhave, dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo viññūnaṁ; bahuñca apuññaṁ pasavati.
an4.222:1.2	Katamehi catūhi?
an4.222:1.3	Kāyaduccaritena, vacīduccaritena, manoduccaritena, micchādiṭṭhiyā—
an4.222:1.4	imehi kho, bhikkhave, catūhi dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo viññūnaṁ, bahuñca apuññaṁ pasavati.
an4.222:2.1	Catūhi, bhikkhave, dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo viññūnaṁ, bahuñca puññaṁ pasavati.
an4.222:2.2	Katamehi catūhi?
an4.222:2.3	Kāyasucaritena, vacīsucaritena, manosucaritena, sammādiṭṭhiyā—
an4.222:2.4	imehi kho, bhikkhave, catūhi dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo viññūnaṁ; bahuñca puññaṁ pasavatī”ti.
an4.222:2.5	Dutiyaṁ.
an4.223:0.1	Aṅguttara Nikāya 4.223
an4.223:0.2	23. Duccaritavagga
an4.223:0.3	Akataññutāsutta
an4.223:1.1	“Catūhi, bhikkhave, dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo viññūnaṁ, bahuñca apuññaṁ pasavati.
an4.223:1.2	Katamehi catūhi?
an4.223:1.3	Kāyaduccaritena, vacīduccaritena, manoduccaritena, akataññutā akataveditā—
an4.223:1.4	imehi …pe… kāyasucaritena, vacīsucaritena, manosucaritena kataññutākataveditā …pe….
an4.223:1.5	Tatiyaṁ.
an4.224:0.1	Aṅguttara Nikāya 4.224
an4.224:0.2	23. Duccaritavagga
an4.224:0.3	Pāṇātipātīsutta
an4.224:1.1	…pe… Pāṇātipātī hoti, adinnādāyī hoti, kāmesumicchācārī hoti, musāvādī hoti …pe… pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti …pe….
an4.224:1.2	Catutthaṁ.
an4.225:0.1	Aṅguttara Nikāya 4.225
an4.225:0.2	23. Duccaritavagga
an4.225:0.3	Paṭhamamaggasutta
an4.225:1.1	…pe… Micchādiṭṭhiko hoti, micchāsaṅkappo hoti, micchāvāco hoti, micchākammanto hoti …pe… sammādiṭṭhiko hoti, sammāsaṅkappo hoti, sammāvāco hoti, sammākammanto hoti …pe….
an4.225:1.2	Pañcamaṁ.
an4.226:0.1	Aṅguttara Nikāya 4.226
an4.226:0.2	23. Duccaritavagga
an4.226:0.3	Dutiyamaggasutta
an4.226:1.1	…pe… Micchāājīvo hoti, micchāvāyāmo hoti, micchāsati hoti, micchāsamādhi hoti …pe… sammāājīvo hoti, sammāvāyāmo hoti, sammāsati hoti, sammāsamādhi hoti …pe….
an4.226:1.2	Chaṭṭhaṁ.
an4.227:0.1	Aṅguttara Nikāya 4.227
an4.227:0.2	23. Duccaritavagga
an4.227:0.3	Paṭhamavohārapathasutta
an4.227:1.1	…pe… Adiṭṭhe diṭṭhavādī hoti, asute sutavādī hoti, amute mutavādī hoti, aviññāte viññātavādī hoti …pe… adiṭṭhe adiṭṭhavādī hoti, asute asutavādī hoti, amute amutavādī hoti, aviññāte aviññātavādī hoti …pe….
an4.227:1.2	Sattamaṁ.
an4.228:0.1	Aṅguttara Nikāya 4.228
an4.228:0.2	23. Duccaritavagga
an4.228:0.3	Dutiyavohārapathasutta
an4.228:1.1	…pe… Diṭṭhe adiṭṭhavādī hoti, sute asutavādī hoti, mute amutavādī hoti, viññāte aviññātavādī hoti …pe… diṭṭhe diṭṭhavādī hoti, sute sutavādī hoti, mute mutavādī hoti, viññāte viññātavādī hoti …pe….
an4.228:1.2	Aṭṭhamaṁ.
an4.229:0.1	Aṅguttara Nikāya 4.229
an4.229:0.2	23. Duccaritavagga
an4.229:0.3	Ahirikasutta
an4.229:1.1	…pe… Assaddho hoti, dussīlo hoti, ahiriko hoti, anottappī hoti …pe… saddho hoti, sīlavā hoti, hirimā hoti, ottappī hoti …pe….
an4.229:1.2	Navamaṁ.
an4.230:0.1	Aṅguttara Nikāya 4.230
an4.230:0.2	23. Duccaritavagga
an4.230:0.3	Duppaññasutta
an4.230:1.1	…pe… Assaddho hoti, dussīlo hoti, kusīto hoti, duppañño hoti …pe… saddho hoti, sīlavā hoti, āraddhavīriyo hoti, paññavā hoti—
an4.230:1.2	imehi kho, bhikkhave, catūhi dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo viññūnaṁ, bahuñca puññaṁ pasavatī”ti.
an4.230:1.3	Dasamaṁ.
an4.231:0.1	Aṅguttara Nikāya 4.231
an4.231:0.2	23. Duccaritavagga
an4.231:0.3	Kavisutta
an4.231:1.1	“Cattārome, bhikkhave, kavī.
an4.231:1.2	Katame cattāro?
an4.231:1.3	Cintākavi, sutakavi, atthakavi, paṭibhānakavi—
an4.231:1.4	Ime kho, bhikkhave, cattāro kavī”ti.
an4.231:1.5	Ekādasamaṁ.
an4.231:1.6	Duccaritavaggo tatiyo.
an4.231:2.0	Tassuddānaṁ
an4.231:2.1	Duccaritaṁ diṭṭhi akataññū ca,
an4.231:2.2	Pāṇātipātāpi dve maggā;
an4.231:2.3	Dve vohārapathā vuttā,
an4.231:2.4	Ahirikaṁ duppaññakavinā cāti.
an4.232:0.1	Aṅguttara Nikāya 4.232
an4.232:0.2	24. Kammavagga
an4.232:0.3	Saṅkhittasutta
an4.232:1.1	“Cattārimāni, bhikkhave, kammāni mayā sayaṁ abhiññā sacchikatvā paveditāni.
an4.232:1.2	Katamāni cattāri?
an4.232:1.3	Atthi, bhikkhave, kammaṁ kaṇhaṁ kaṇhavipākaṁ;
an4.232:1.4	atthi, bhikkhave, kammaṁ sukkaṁ sukkavipākaṁ;
an4.232:1.5	atthi, bhikkhave, kammaṁ kaṇhasukkaṁ kaṇhasukkavipākaṁ;
an4.232:1.6	atthi, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.232:1.7	Imāni kho, bhikkhave, cattāri kammāni mayā sayaṁ abhiññā sacchikatvā paveditānī”ti.
an4.232:1.8	Paṭhamaṁ.
an4.233:0.1	Aṅguttara Nikāya 4.233
an4.233:0.2	24. Kammavagga
an4.233:0.3	Vitthārasutta
an4.233:1.1	“Cattārimāni, bhikkhave, kammāni mayā sayaṁ abhiññā sacchikatvā paveditāni.
an4.233:1.2	Katamāni cattāri?
an4.233:1.3	Atthi, bhikkhave, kammaṁ kaṇhaṁ kaṇhavipākaṁ;
an4.233:1.4	atthi, bhikkhave, kammaṁ sukkaṁ sukkavipākaṁ;
an4.233:1.5	atthi, bhikkhave, kammaṁ kaṇhasukkaṁ kaṇhasukkavipākaṁ;
an4.233:1.6	atthi, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.233:2.1	Katamañca, bhikkhave, kammaṁ kaṇhaṁ kaṇhavipākaṁ?
an4.233:2.2	Idha, bhikkhave, ekacco sabyābajjhaṁ kāyasaṅkhāraṁ abhisaṅkharoti, sabyābajjhaṁ vacīsaṅkhāraṁ abhisaṅkharoti, sabyābajjhaṁ manosaṅkhāraṁ abhisaṅkharoti.
an4.233:2.3	So sabyābajjhaṁ kāyasaṅkhāraṁ abhisaṅkharitvā, sabyābajjhaṁ vacīsaṅkhāraṁ abhisaṅkharitvā, sabyābajjhaṁ manosaṅkhāraṁ abhisaṅkharitvā sabyābajjhaṁ lokaṁ upapajjati.
an4.233:2.4	Tamenaṁ sabyābajjhaṁ lokaṁ upapannaṁ samānaṁ sabyābajjhā phassā phusanti.
an4.233:2.5	So sabyābajjhehi phassehi phuṭṭho samāno sabyābajjhaṁ vedanaṁ vediyati ekantadukkhaṁ, seyyathāpi sattā nerayikā.
an4.233:2.6	Idaṁ vuccati, bhikkhave, kammaṁ kaṇhaṁ kaṇhavipākaṁ.
an4.233:3.1	Katamañca, bhikkhave, kammaṁ sukkaṁ sukkavipākaṁ?
an4.233:3.2	Idha, bhikkhave, ekacco abyābajjhaṁ kāyasaṅkhāraṁ abhisaṅkharoti, abyābajjhaṁ vacīsaṅkhāraṁ abhisaṅkharoti, abyābajjhaṁ manosaṅkhāraṁ abhisaṅkharoti.
an4.233:3.3	So abyābajjhaṁ kāyasaṅkhāraṁ abhisaṅkharitvā, abyābajjhaṁ vacīsaṅkhāraṁ abhisaṅkharitvā, abyābajjhaṁ manosaṅkhāraṁ abhisaṅkharitvā abyābajjhaṁ lokaṁ upapajjati.
an4.233:3.4	Tamenaṁ abyābajjhaṁ lokaṁ upapannaṁ samānaṁ abyābajjhā phassā phusanti.
an4.233:3.5	So abyābajjhehi phassehi phuṭṭho samāno abyābajjhaṁ vedanaṁ vediyati ekantasukhaṁ, seyyathāpi devā subhakiṇhā.
an4.233:3.6	Idaṁ vuccati, bhikkhave, kammaṁ sukkaṁ sukkavipākaṁ.
an4.233:4.1	Katamañca, bhikkhave, kammaṁ kaṇhasukkaṁ kaṇhasukkavipākaṁ?
an4.233:4.2	Idha, bhikkhave, ekacco sabyābajjhampi abyābajjhampi kāyasaṅkhāraṁ abhisaṅkharoti, sabyābajjhampi abyābajjhampi vacīsaṅkhāraṁ abhisaṅkharoti, sabyābajjhampi abyābajjhampi manosaṅkhāraṁ abhisaṅkharoti.
an4.233:4.3	So sabyābajjhampi abyābajjhampi kāyasaṅkhāraṁ abhisaṅkharitvā, sabyābajjhampi abyābajjhampi vacīsaṅkhāraṁ abhisaṅkharitvā, sabyābajjhampi abyābajjhampi manosaṅkhāraṁ abhisaṅkharitvā sabyābajjhampi abyābajjhampi lokaṁ upapajjati.
an4.233:4.4	Tamenaṁ sabyābajjhampi abyābajjhampi lokaṁ upapannaṁ samānaṁ sabyābajjhāpi abyābajjhāpi phassā phusanti.
an4.233:4.5	So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṁ vediyati vokiṇṇasukhadukkhaṁ, seyyathāpi manussā ekacce ca devā ekacce ca vinipātikā.
an4.233:4.6	Idaṁ vuccati, bhikkhave, kammaṁ kaṇhasukkaṁ kaṇhasukkavipākaṁ.
an4.233:5.1	Katamañca, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati?
an4.233:5.2	Tatra, bhikkhave, yamidaṁ kammaṁ kaṇhaṁ kaṇhavipākaṁ tassa pahānāya yā cetanā, yamidaṁ kammaṁ sukkaṁ sukkavipākaṁ tassa pahānāya yā cetanā, yamidaṁ kammaṁ kaṇhasukkaṁ kaṇhasukkavipākaṁ tassa pahānāya yā cetanā—
an4.233:5.3	idaṁ vuccati, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.233:5.4	Imāni kho, bhikkhave, cattāri kammāni mayā sayaṁ abhiññā sacchikatvā paveditānī”ti.
an4.233:5.5	Dutiyaṁ.
an4.234:0.1	Aṅguttara Nikāya 4.234
an4.234:0.2	24. Kammavagga
an4.234:0.3	Soṇakāyanasutta
an4.234:1.1	Atha kho sikhāmoggallāno brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an4.234:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho sikhāmoggallāno brāhmaṇo bhagavantaṁ etadavoca:
an4.234:2.1	“Purimāni, bho gotama, divasāni purimatarāni soṇakāyano māṇavo yenāhaṁ tenupasaṅkami; upasaṅkamitvā maṁ etadavoca:
an4.234:2.2	‘samaṇo gotamo sabbakammānaṁ akiriyaṁ paññapeti, sabbakammānaṁ kho pana akiriyaṁ paññapento ucchedaṁ āha lokassa’—
an4.234:2.3	kammasaccāyaṁ, bho, loko kammasamārambhaṭṭhāyī”ti.
an4.234:3.1	“Dassanampi kho ahaṁ, brāhmaṇa, soṇakāyanassa māṇavassa nābhijānāmi;
an4.234:3.2	kuto panevarūpo kathāsallāpo.
an4.234:3.3	Cattārimāni, brāhmaṇa, kammāni mayā sayaṁ abhiññā sacchikatvā paveditāni.
an4.234:3.4	Katamāni cattāri?
an4.234:3.5	Atthi, brāhmaṇa, kammaṁ kaṇhaṁ kaṇhavipākaṁ;
an4.234:3.6	atthi, brāhmaṇa, kammaṁ sukkaṁ sukkavipākaṁ;
an4.234:3.7	atthi, brāhmaṇa, kammaṁ kaṇhasukkaṁ kaṇhasukkavipākaṁ;
an4.234:3.8	atthi, brāhmaṇa, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.234:4.1	Katamañca, brāhmaṇa, kammaṁ kaṇhaṁ kaṇhavipākaṁ?
an4.234:4.2	Idha, brāhmaṇa, ekacco sabyābajjhaṁ kāyasaṅkhāraṁ abhisaṅkharoti, sabyābajjhaṁ vacīsaṅkhāraṁ abhisaṅkharoti, sabyābajjhaṁ manosaṅkhāraṁ abhisaṅkharoti.
an4.234:4.3	So sabyābajjhaṁ kāyasaṅkhāraṁ abhisaṅkharitvā, sabyābajjhaṁ vacīsaṅkhāraṁ abhisaṅkharitvā, sabyābajjhaṁ manosaṅkhāraṁ abhisaṅkharitvā sabyābajjhaṁ lokaṁ upapajjati.
an4.234:4.4	Tamenaṁ sabyābajjhaṁ lokaṁ upapannaṁ samānaṁ sabyābajjhā phassā phusanti.
an4.234:4.5	So sabyābajjhehi phassehi phuṭṭho samāno sabyābajjhaṁ vedanaṁ vediyati ekantadukkhaṁ, seyyathāpi sattā nerayikā.
an4.234:4.6	Idaṁ vuccati, brāhmaṇa, kammaṁ kaṇhaṁ kaṇhavipākaṁ.
an4.234:5.1	Katamañca, brāhmaṇa, kammaṁ sukkaṁ sukkavipākaṁ?
an4.234:5.2	Idha, brāhmaṇa, ekacco abyābajjhaṁ kāyasaṅkhāraṁ abhisaṅkharoti, abyābajjhaṁ vacīsaṅkhāraṁ abhisaṅkharoti, abyābajjhaṁ manosaṅkhāraṁ abhisaṅkharoti.
an4.234:5.3	So abyābajjhaṁ kāyasaṅkhāraṁ abhisaṅkharitvā, abyābajjhaṁ vacīsaṅkhāraṁ abhisaṅkharitvā, abyābajjhaṁ manosaṅkhāraṁ abhisaṅkharitvā abyābajjhaṁ lokaṁ upapajjati.
an4.234:5.4	Tamenaṁ abyābajjhaṁ lokaṁ upapannaṁ samānaṁ abyābajjhā phassā phusanti.
an4.234:5.5	So abyābajjhehi phassehi phuṭṭho samāno abyābajjhaṁ vedanaṁ vediyati ekantasukhaṁ, seyyathāpi devā subhakiṇhā.
an4.234:5.6	Idaṁ vuccati, brāhmaṇa, kammaṁ sukkaṁ sukkavipākaṁ.
an4.234:6.1	Katamañca, brāhmaṇa, kammaṁ kaṇhasukkaṁ kaṇhasukkavipākaṁ?
an4.234:6.2	Idha, brāhmaṇa, ekacco sabyābajjhampi abyābajjhampi kāyasaṅkhāraṁ abhisaṅkharoti, sabyābajjhampi abyābajjhampi vacīsaṅkhāraṁ abhisaṅkharoti, sabyābajjhampi abyābajjhampi manosaṅkhāraṁ abhisaṅkharoti.
an4.234:6.3	So sabyābajjhampi abyābajjhampi kāyasaṅkhāraṁ abhisaṅkharitvā, sabyābajjhampi abyābajjhampi vacīsaṅkhāraṁ abhisaṅkharitvā, sabyābajjhampi abyābajjhampi manosaṅkhāraṁ abhisaṅkharitvā sabyābajjhampi abyābajjhampi lokaṁ upapajjati.
an4.234:6.4	Tamenaṁ sabyābajjhampi abyābajjhampi lokaṁ upapannaṁ samānaṁ sabyābajjhāpi abyābajjhāpi phassā phusanti.
an4.234:6.5	So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṁ vediyati vokiṇṇasukhadukkhaṁ, seyyathāpi manussā ekacce ca devā ekacce ca vinipātikā.
an4.234:6.6	Idaṁ vuccati, brāhmaṇa, kammaṁ kaṇhasukkaṁ kaṇhasukkavipākaṁ.
an4.234:7.1	Katamañca, brāhmaṇa, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati?
an4.234:7.2	Tatra, brāhmaṇa, yamidaṁ kammaṁ kaṇhaṁ kaṇhavipākaṁ tassa pahānāya yā cetanā, yamidaṁ kammaṁ sukkaṁ sukkavipākaṁ tassa pahānāya yā cetanā, yamidaṁ kammaṁ kaṇhasukkaṁ kaṇhasukkavipākaṁ tassa pahānāya yā cetanā—
an4.234:7.3	idaṁ vuccati, brāhmaṇa, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.234:7.4	Imāni kho, brāhmaṇa, cattāri kammāni mayā sayaṁ abhiññā sacchikatvā paveditānī”ti.
an4.234:7.5	Tatiyaṁ.
an4.235:0.1	Aṅguttara Nikāya 4.235
an4.235:0.2	24. Kammavagga
an4.235:0.3	Paṭhamasikkhāpadasutta
an4.235:1.1	“Cattārimāni, bhikkhave, kammāni mayā sayaṁ abhiññā sacchikatvā paveditāni.
an4.235:1.2	Katamāni cattāri?
an4.235:1.3	Atthi, bhikkhave, kammaṁ kaṇhaṁ kaṇhavipākaṁ;
an4.235:1.4	atthi, bhikkhave, kammaṁ sukkaṁ sukkavipākaṁ;
an4.235:1.5	atthi, bhikkhave, kammaṁ kaṇhasukkaṁ kaṇhasukkavipākaṁ;
an4.235:1.6	atthi, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.235:1.7	Katamañca, bhikkhave, kammaṁ kaṇhaṁ kaṇhavipākaṁ?
an4.235:1.8	Idha, bhikkhave, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, surāmerayamajjapamādaṭṭhāyī hoti.
an4.235:1.9	Idaṁ vuccati, bhikkhave, kammaṁ kaṇhaṁ kaṇhavipākaṁ.
an4.235:2.1	Katamañca, bhikkhave, kammaṁ sukkaṁ sukkavipākaṁ?
an4.235:2.2	Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti.
an4.235:2.3	Idaṁ vuccati, bhikkhave, kammaṁ sukkaṁ sukkavipākaṁ.
an4.235:3.1	Katamañca, bhikkhave, kammaṁ kaṇhasukkaṁ kaṇhasukkavipākaṁ?
an4.235:3.2	Idha, bhikkhave, ekacco sabyābajjhampi abyābajjhampi kāyasaṅkhāraṁ abhisaṅkharoti …pe… idaṁ vuccati, bhikkhave, kammaṁ kaṇhasukkaṁ kaṇhasukkavipākaṁ.
an4.235:4.1	Katamañca, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati?
an4.235:4.2	Tatra, bhikkhave, yamidaṁ kammaṁ kaṇhaṁ kaṇhavipākaṁ …pe… idaṁ vuccati, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.235:4.3	Imāni kho, bhikkhave, cattāri kammāni mayā sayaṁ abhiññā sacchikatvā paveditānī”ti.
an4.235:4.4	Catutthaṁ.
an4.236:0.1	Aṅguttara Nikāya 4.236
an4.236:0.2	24. Kammavagga
an4.236:0.3	Dutiyasikkhāpadasutta
an4.236:1.1	“Cattārimāni, bhikkhave, kammāni mayā sayaṁ abhiññā sacchikatvā paveditāni.
an4.236:1.2	Katamāni cattāri?
an4.236:1.3	Atthi, bhikkhave, kammaṁ kaṇhaṁ kaṇhavipākaṁ;
an4.236:1.4	atthi, bhikkhave, kammaṁ sukkaṁ sukkavipākaṁ;
an4.236:1.5	atthi, bhikkhave, kammaṁ kaṇhasukkaṁ kaṇhasukkavipākaṁ;
an4.236:1.6	atthi, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.236:2.1	Katamañca, bhikkhave, kammaṁ kaṇhaṁ kaṇhavipākaṁ?
an4.236:2.2	Idha, bhikkhave, ekaccena mātā jīvitā voropitā hoti, pitā jīvitā voropito hoti, arahaṁ jīvitā voropito hoti, tathāgatassa duṭṭhena cittena lohitaṁ uppāditaṁ hoti, saṅgho bhinno hoti.
an4.236:2.3	Idaṁ vuccati, bhikkhave, kammaṁ kaṇhaṁ kaṇhavipākaṁ.
an4.236:3.1	Katamañca, bhikkhave, kammaṁ sukkaṁ sukkavipākaṁ?
an4.236:3.2	Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi hoti.
an4.236:3.3	Idaṁ vuccati, bhikkhave, kammaṁ sukkaṁ sukkavipākaṁ.
an4.236:4.1	Katamañca, bhikkhave, kammaṁ kaṇhasukkaṁ kaṇhasukkavipākaṁ?
an4.236:4.2	Idha, bhikkhave, ekacco sabyābajjhampi abyābajjhampi kāyasaṅkhāraṁ abhisaṅkharoti …pe… idaṁ vuccati, bhikkhave, kammaṁ kaṇhasukkaṁ kaṇhasukkavipākaṁ.
an4.236:5.1	Katamañca, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati?
an4.236:5.2	Tatra, bhikkhave, yamidaṁ kammaṁ kaṇhaṁ kaṇhavipākaṁ …pe… idaṁ vuccati, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.236:5.3	Imāni kho, bhikkhave, cattāri kammāni mayā sayaṁ abhiññā sacchikatvā paveditānī”ti.
an4.236:5.4	Pañcamaṁ.
an4.237:0.1	Aṅguttara Nikāya 4.237
an4.237:0.2	24. Kammavagga
an4.237:0.3	Ariyamaggasutta
an4.237:1.1	“Cattārimāni, bhikkhave, kammāni mayā sayaṁ abhiññā sacchikatvā paveditāni.
an4.237:1.2	Katamāni cattāri?
an4.237:1.3	Atthi, bhikkhave, kammaṁ kaṇhaṁ kaṇhavipākaṁ;
an4.237:1.4	atthi, bhikkhave, kammaṁ sukkaṁ sukkavipākaṁ;
an4.237:1.5	atthi, bhikkhave, kammaṁ kaṇhasukkaṁ kaṇhasukkavipākaṁ;
an4.237:1.6	atthi, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.237:2.1	Katamañca, bhikkhave, kammaṁ kaṇhaṁ kaṇhavipākaṁ?
an4.237:2.2	Idha, bhikkhave, ekacco sabyābajjhaṁ kāyasaṅkhāraṁ abhisaṅkharoti …pe… idaṁ vuccati, bhikkhave, kammaṁ kaṇhaṁ kaṇhavipākaṁ.
an4.237:3.1	Katamañca, bhikkhave, kammaṁ sukkaṁ sukkavipākaṁ?
an4.237:3.2	Idha, bhikkhave, ekacco abyābajjhaṁ kāyasaṅkhāraṁ abhisaṅkharoti …pe… idaṁ vuccati, bhikkhave, kammaṁ sukkaṁ sukkavipākaṁ.
an4.237:4.1	Katamañca, bhikkhave, kammaṁ kaṇhasukkaṁ kaṇhasukkavipākaṁ?
an4.237:4.2	Idha, bhikkhave, ekacco sabyābajjhampi abyābajjhampi kāyasaṅkhāraṁ abhisaṅkharoti …pe… idaṁ vuccati, bhikkhave, kammaṁ kaṇhasukkaṁ kaṇhasukkavipākaṁ.
an4.237:5.1	Katamañca, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati?
an4.237:5.2	Sammādiṭṭhi …pe… sammāsamādhi.
an4.237:5.3	Idaṁ vuccati, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.237:5.4	Imāni kho, bhikkhave, cattāri kammāni mayā sayaṁ abhiññā sacchikatvā paveditānī”ti.
an4.237:5.5	Chaṭṭhaṁ.
an4.238:0.1	Aṅguttara Nikāya 4.238
an4.238:0.2	24. Kammavagga
an4.238:0.3	Bojjhaṅgasutta
an4.238:1.1	“Cattārimāni, bhikkhave, kammāni …pe… kaṇhaṁ kaṇhavipākaṁ …pe…
an4.238:1.2	idha, bhikkhave, ekacco sabyābajjhaṁ kāyasaṅkhāraṁ abhisaṅkharoti …pe… idaṁ vuccati, bhikkhave, kammaṁ kaṇhaṁ kaṇhavipākaṁ.
an4.238:2.1	Katamañca, bhikkhave, kammaṁ sukkaṁ sukkavipākaṁ?
an4.238:2.2	Idha, bhikkhave, ekacco abyābajjhaṁ kāyasaṅkhāraṁ abhisaṅkharoti …pe… idaṁ vuccati, bhikkhave, kammaṁ sukkaṁ sukkavipākaṁ.
an4.238:3.1	Katamañca, bhikkhave, kammaṁ kaṇhasukkaṁ kaṇhasukkavipākaṁ?
an4.238:3.2	Idha, bhikkhave, ekacco sabyābajjhampi abyābajjhampi kāyasaṅkhāraṁ abhisaṅkharoti …pe… idaṁ vuccati, bhikkhave, kammaṁ kaṇhasukkaṁ kaṇhasukkavipākaṁ.
an4.238:4.1	Katamañca, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati?
an4.238:4.2	Satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo—
an4.238:4.3	idaṁ vuccati, bhikkhave, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.
an4.238:4.4	Imāni kho, bhikkhave, cattāri kammāni mayā sayaṁ abhiññā sacchikatvā paveditānī”ti.
an4.238:4.5	Sattamaṁ.
an4.239:0.1	Aṅguttara Nikāya 4.239
an4.239:0.2	24. Kammavagga
an4.239:0.3	Sāvajjasutta
an4.239:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.239:1.2	Katamehi catūhi?
an4.239:1.3	Sāvajjena kāyakammena, sāvajjena vacīkammena, sāvajjena manokammena, sāvajjāya diṭṭhiyā—
an4.239:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.239:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.239:2.2	Katamehi catūhi?
an4.239:2.3	Anavajjena kāyakammena, anavajjena vacīkammena, anavajjena manokammena, anavajjāya diṭṭhiyā—
an4.239:2.4	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.239:2.5	Aṭṭhamaṁ.
an4.240:0.1	Aṅguttara Nikāya 4.240
an4.240:0.2	24. Kammavagga
an4.240:0.3	Abyābajjhasutta
an4.240:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.240:1.2	Katamehi catūhi?
an4.240:1.3	Sabyābajjhena kāyakammena, sabyābajjhena vacīkammena, sabyābajjhena manokammena, sabyābajjhāya diṭṭhiyā—
an4.240:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.240:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.240:2.2	Katamehi catūhi?
an4.240:2.3	Abyābajjhena kāyakammena, abyābajjhena vacīkammena, abyābajjhena manokammena, abyābajjhāya diṭṭhiyā—
an4.240:2.4	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.240:2.5	Navamaṁ.
an4.241:0.1	Aṅguttara Nikāya 4.241
an4.241:0.2	24. Kammavagga
an4.241:0.3	Samaṇasutta
an4.241:1.1	“‘Idheva, bhikkhave, paṭhamo samaṇo, idha dutiyo samaṇo, idha tatiyo samaṇo, idha catuttho samaṇo;
an4.241:1.2	suññā parappavādā samaṇehi aññehī’ti—
an4.241:1.3	evametaṁ, bhikkhave, sammā sīhanādaṁ nadatha.
an4.241:2.1	Katamo ca, bhikkhave, paṭhamo samaṇo?
an4.241:2.2	Idha, bhikkhave, bhikkhu tiṇṇaṁ saṁyojanānaṁ parikkhayā sotāpanno hoti avinipātadhammo niyato sambodhiparāyaṇo.
an4.241:2.3	Ayaṁ, bhikkhave, paṭhamo samaṇo.
an4.241:3.1	Katamo ca, bhikkhave, dutiyo samaṇo?
an4.241:3.2	Idha, bhikkhave, bhikkhu tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti.
an4.241:3.3	Ayaṁ, bhikkhave, dutiyo samaṇo.
an4.241:4.1	Katamo ca, bhikkhave, tatiyo samaṇo?
an4.241:4.2	Idha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an4.241:4.3	Ayaṁ, bhikkhave, tatiyo samaṇo.
an4.241:5.1	Katamo ca, bhikkhave, catuttho samaṇo?
an4.241:5.2	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an4.241:5.3	Ayaṁ, bhikkhave, catuttho samaṇo.
an4.241:6.1	‘Idheva, bhikkhave, paṭhamo samaṇo, idha dutiyo samaṇo, idha tatiyo samaṇo, idha catuttho samaṇo;
an4.241:6.2	suññā parappavādā samaṇebhi aññehī’ti—
an4.241:6.3	evametaṁ, bhikkhave, sammā sīhanādaṁ nadathā”ti.
an4.241:6.4	Dasamaṁ.
an4.242:0.1	Aṅguttara Nikāya 4.242
an4.242:0.2	24. Kammavagga
an4.242:0.3	Sappurisānisaṁsasutta
an4.242:1.1	“Sappurisaṁ, bhikkhave, nissāya cattāro ānisaṁsā pāṭikaṅkhā.
an4.242:1.2	Katame cattāro?
an4.242:1.3	Ariyena sīlena vaḍḍhati, ariyena samādhinā vaḍḍhati, ariyāya paññāya vaḍḍhati, ariyāya vimuttiyā vaḍḍhati—
an4.242:1.4	sappurisaṁ, bhikkhave, nissāya ime cattāro ānisaṁsā pāṭikaṅkhā”ti.
an4.242:1.5	Ekādasamaṁ.
an4.242:1.6	Kammavaggo catuttho.
an4.242:2.0	Tassuddānaṁ
an4.242:2.1	Saṅkhitta vitthāra soṇakāyana,
an4.242:2.2	Sikkhāpadaṁ ariyamaggo bojjhaṅgaṁ;
an4.242:2.3	Sāvajjañceva abyābajjhaṁ,
an4.242:2.4	Samaṇo ca sappurisānisaṁsoti.
an4.243:0.1	Aṅguttara Nikāya 4.243
an4.243:0.2	25. Āpattibhayavagga
an4.243:0.3	Saṅghabhedakasutta
an4.243:1.1	Ekaṁ samayaṁ bhagavā kosambiyaṁ viharati ghositārāme.
an4.243:1.2	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ ānandaṁ bhagavā etadavoca:
an4.243:1.3	“api nu taṁ, ānanda, adhikaraṇaṁ vūpasantan”ti?
an4.243:1.4	“Kuto taṁ, bhante, adhikaraṇaṁ vūpasamissati.
an4.243:1.5	Āyasmato, bhante, anuruddhassa bāhiyo nāma saddhivihāriko kevalakappaṁ saṅghabhedāya ṭhito.
an4.243:1.6	Tatrāyasmā anuruddho na ekavācikampi bhaṇitabbaṁ maññatī”ti.
an4.243:2.1	“Kadā panānanda, anuruddho saṅghamajjhe adhikaraṇesu voyuñjati.
an4.243:2.2	Nanu, ānanda, yāni kānici adhikaraṇāni uppajjanti, sabbāni tāni tumhe ceva vūpasametha sāriputtamoggallānā ca.
an4.243:3.1	Cattārome, ānanda, atthavase sampassamāno pāpabhikkhu saṅghabhedena nandati.
an4.243:3.2	Katame cattāro?
an4.243:3.3	Idhānanda, pāpabhikkhu dussīlo hoti pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto.
an4.243:3.4	Tassa evaṁ hoti:
an4.243:3.5	‘sace kho maṁ bhikkhū jānissanti—
an4.243:3.6	dussīlo pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujātoti, samaggā maṁ santā nāsessanti;
an4.243:3.7	vaggā pana maṁ na nāsessantī’ti.
an4.243:3.8	Idaṁ, ānanda, paṭhamaṁ atthavasaṁ sampassamāno pāpabhikkhu saṅghabhedena nandati.
an4.243:4.1	Puna caparaṁ, ānanda, pāpabhikkhu micchādiṭṭhiko hoti, antaggāhikāya diṭṭhiyā samannāgato.
an4.243:4.2	Tassa evaṁ hoti:
an4.243:4.3	‘sace kho maṁ bhikkhū jānissanti—
an4.243:4.4	micchādiṭṭhiko antaggāhikāya diṭṭhiyā samannāgatoti, samaggā maṁ santā nāsessanti;
an4.243:4.5	vaggā pana maṁ na nāsessantī’ti.
an4.243:4.6	Idaṁ, ānanda, dutiyaṁ atthavasaṁ sampassamāno pāpabhikkhu saṅghabhedena nandati.
an4.243:5.1	Puna caparaṁ, ānanda, pāpabhikkhu micchāājīvo hoti, micchāājīvena jīvikaṁ kappeti.
an4.243:5.2	Tassa evaṁ hoti:
an4.243:5.3	‘sace kho maṁ bhikkhū jānissanti—
an4.243:5.4	micchāājīvo micchāājīvena jīvikaṁ kappetīti, samaggā maṁ santā nāsessanti;
an4.243:5.5	vaggā pana maṁ na nāsessantī’ti.
an4.243:5.6	Idaṁ, ānanda, tatiyaṁ atthavasaṁ sampassamāno pāpabhikkhu saṅghabhedena nandati.
an4.243:6.1	Puna caparaṁ, ānanda, pāpabhikkhu lābhakāmo hoti sakkārakāmo anavaññattikāmo.
an4.243:6.2	Tassa evaṁ hoti:
an4.243:6.3	‘sace kho maṁ bhikkhū jānissanti—
an4.243:6.4	lābhakāmo sakkārakāmo anavaññattikāmoti, samaggā maṁ santā na sakkarissanti na garuṁ karissanti na mānessanti na pūjessanti;
an4.243:6.5	vaggā pana maṁ sakkarissanti garuṁ karissanti mānessanti pūjessantī’ti.
an4.243:6.6	Idaṁ, ānanda, catutthaṁ atthavasaṁ sampassamāno pāpabhikkhu saṅghabhedena nandati.
an4.243:6.7	Ime kho, ānanda, cattāro atthavase sampassamāno pāpabhikkhu saṅghabhedena nandatī”ti.
an4.243:6.8	Paṭhamaṁ.
an4.244:0.1	Aṅguttara Nikāya 4.244
an4.244:0.2	25. Āpattibhayavagga
an4.244:0.3	Āpattibhayasutta
an4.244:1.1	“Cattārimāni, bhikkhave, āpattibhayāni.
an4.244:1.2	Katamāni cattāri?
an4.244:1.3	Seyyathāpi, bhikkhave, coraṁ āgucāriṁ gahetvā rañño dasseyyuṁ:
an4.244:1.4	‘ayaṁ te, deva, coro āgucārī.
an4.244:1.5	Imassa devo daṇḍaṁ paṇetū’ti.
an4.244:1.6	Tamenaṁ rājā evaṁ vadeyya:
an4.244:1.7	‘gacchatha, bho, imaṁ purisaṁ daḷhāya rajjuyā pacchābāhaṁ gāḷhabandhanaṁ bandhitvā khuramuṇḍaṁ karitvā kharassarena paṇavena rathikāya rathikaṁ siṅghāṭakena siṅghāṭakaṁ parinetvā dakkhiṇena dvārena nikkhāmetvā dakkhiṇato nagarassa sīsaṁ chindathā’ti.
an4.244:1.8	Tamenaṁ rañño purisā daḷhāya rajjuyā pacchābāhaṁ gāḷhabandhanaṁ bandhitvā khuramuṇḍaṁ karitvā kharassarena paṇavena rathikāya rathikaṁ siṅghāṭakena siṅghāṭakaṁ parinetvā dakkhiṇena dvārena nikkhāmetvā dakkhiṇato nagarassa sīsaṁ chindeyyuṁ.
an4.244:1.9	Tatraññatarassa thalaṭṭhassa purisassa evamassa:
an4.244:1.10	‘pāpakaṁ vata, bho, ayaṁ puriso kammaṁ akāsi gārayhaṁ sīsacchejjaṁ.
an4.244:1.11	Yatra hi nāma rañño purisā daḷhāya rajjuyā pacchābāhaṁ gāḷhabandhanaṁ bandhitvā khuramuṇḍaṁ karitvā kharassarena paṇavena rathikāya rathikaṁ siṅghāṭakena siṅghāṭakaṁ parinetvā dakkhiṇena dvārena nikkhāmetvā dakkhiṇato nagarassa sīsaṁ chindissanti.
an4.244:1.12	So vatassāhaṁ evarūpaṁ pāpakammaṁ na kareyyaṁ gārayhaṁ sīsacchejjan’ti.
an4.244:1.13	Evamevaṁ kho, bhikkhave, yassa kassaci bhikkhussa vā bhikkhuniyā vā evaṁ tibbā bhayasaññā paccupaṭṭhitā hoti pārājikesu dhammesu.
an4.244:1.14	Tassetaṁ pāṭikaṅkhaṁ—anāpanno vā pārājikaṁ dhammaṁ na āpajjissati, āpanno vā pārājikaṁ dhammaṁ yathādhammaṁ paṭikarissati.
an4.244:2.1	Seyyathāpi, bhikkhave, puriso kāḷavatthaṁ paridhāya kese pakiritvā musalaṁ khandhe āropetvā mahājanakāyaṁ upasaṅkamitvā evaṁ vadeyya:
an4.244:2.2	‘ahaṁ, bhante, pāpakammaṁ akāsiṁ gārayhaṁ mosallaṁ, yena me āyasmanto attamanā honti taṁ karomī’ti.
an4.244:2.3	Tatraññatarassa thalaṭṭhassa purisassa evamassa:
an4.244:2.4	‘pāpakaṁ vata, bho, ayaṁ puriso kammaṁ akāsi gārayhaṁ mosallaṁ.
an4.244:2.5	Yatra hi nāma kāḷavatthaṁ paridhāya kese pakiritvā musalaṁ khandhe āropetvā mahājanakāyaṁ upasaṅkamitvā evaṁ vakkhati:
an4.244:2.6	“ahaṁ, bhante, pāpakammaṁ akāsiṁ gārayhaṁ mosallaṁ, yena me āyasmanto attamanā honti taṁ karomī”ti.
an4.244:2.7	So vatassāhaṁ evarūpaṁ pāpakammaṁ na kareyyaṁ gārayhaṁ mosallan’ti.
an4.244:2.8	Evamevaṁ kho, bhikkhave, yassa kassaci bhikkhussa vā bhikkhuniyā vā evaṁ tibbā bhayasaññā paccupaṭṭhitā hoti saṅghādisesesu dhammesu, tassetaṁ pāṭikaṅkhaṁ—anāpanno vā saṅghādisesaṁ dhammaṁ na āpajjissati, āpanno vā saṅghādisesaṁ dhammaṁ yathādhammaṁ paṭikarissati.
an4.244:3.1	Seyyathāpi, bhikkhave, puriso kāḷavatthaṁ paridhāya kese pakiritvā bhasmapuṭaṁ khandhe āropetvā mahājanakāyaṁ upasaṅkamitvā evaṁ vadeyya:
an4.244:3.2	‘ahaṁ, bhante, pāpakammaṁ akāsiṁ gārayhaṁ bhasmapuṭaṁ.
an4.244:3.3	Yena me āyasmanto attamanā honti taṁ karomī’ti.
an4.244:3.4	Tatraññatarassa thalaṭṭhassa purisassa evamassa:
an4.244:3.5	‘pāpakaṁ vata, bho, ayaṁ puriso kammaṁ akāsi gārayhaṁ bhasmapuṭaṁ.
an4.244:3.6	Yatra hi nāma kāḷavatthaṁ paridhāya kese pakiritvā bhasmapuṭaṁ khandhe āropetvā mahājanakāyaṁ upasaṅkamitvā evaṁ vakkhati:
an4.244:3.7	“ahaṁ, bhante, pāpakammaṁ akāsiṁ gārayhaṁ bhasmapuṭaṁ;
an4.244:3.8	yena me āyasmanto attamanā honti taṁ karomī”ti.
an4.244:3.9	So vatassāhaṁ evarūpaṁ pāpakammaṁ na kareyyaṁ gārayhaṁ bhasmapuṭan’ti.
an4.244:3.10	Evamevaṁ kho, bhikkhave, yassa kassaci bhikkhussa vā bhikkhuniyā vā evaṁ tibbā bhayasaññā paccupaṭṭhitā hoti pācittiyesu dhammesu, tassetaṁ pāṭikaṅkhaṁ—anāpanno vā pācittiyaṁ dhammaṁ na āpajjissati, āpanno vā pācittiyaṁ dhammaṁ yathādhammaṁ paṭikarissati.
an4.244:4.1	Seyyathāpi, bhikkhave, puriso kāḷavatthaṁ paridhāya kese pakiritvā mahājanakāyaṁ upasaṅkamitvā evaṁ vadeyya:
an4.244:4.2	‘ahaṁ, bhante, pāpakammaṁ akāsiṁ gārayhaṁ upavajjaṁ.
an4.244:4.3	Yena me āyasmanto attamanā honti taṁ karomī’ti.
an4.244:4.4	Tatraññatarassa thalaṭṭhassa purisassa evamassa:
an4.244:4.5	‘pāpakaṁ vata, bho, ayaṁ puriso kammaṁ akāsi gārayhaṁ upavajjaṁ.
an4.244:4.6	Yatra hi nāma kāḷavatthaṁ paridhāya kese pakiritvā mahājanakāyaṁ upasaṅkamitvā evaṁ vakkhati:
an4.244:4.7	“ahaṁ, bhante, pāpakammaṁ akāsiṁ gārayhaṁ upavajjaṁ;
an4.244:4.8	yena me āyasmanto attamanā honti taṁ karomī”ti.
an4.244:4.9	So vatassāhaṁ evarūpaṁ pāpakammaṁ na kareyyaṁ gārayhaṁ upavajjan’ti.
an4.244:4.10	Evamevaṁ kho, bhikkhave, yassa kassaci bhikkhussa vā bhikkhuniyā vā evaṁ tibbā bhayasaññā paccupaṭṭhitā hoti pāṭidesanīyesu dhammesu, tassetaṁ pāṭikaṅkhaṁ—anāpanno vā pāṭidesanīyaṁ dhammaṁ na āpajjissati, āpanno vā pāṭidesanīyaṁ dhammaṁ yathādhammaṁ paṭikarissati.
an4.244:4.11	Imāni kho, bhikkhave, cattāri āpattibhayānī”ti.
an4.244:4.12	Dutiyaṁ.
an4.245:0.1	Aṅguttara Nikāya 4.245
an4.245:0.2	25. Āpattibhayavagga
an4.245:0.3	Sikkhānisaṁsasutta
an4.245:1.1	“Sikkhānisaṁsamidaṁ, bhikkhave, brahmacariyaṁ vussati paññuttaraṁ vimuttisāraṁ satādhipateyyaṁ.
an4.245:1.2	Kathañca, bhikkhave, sikkhānisaṁsaṁ hoti?
an4.245:1.3	Idha, bhikkhave, mayā sāvakānaṁ ābhisamācārikā sikkhā paññattā appasannānaṁ pasādāya pasannānaṁ bhiyyobhāvāya.
an4.245:1.4	Yathā yathā, bhikkhave, mayā sāvakānaṁ ābhisamācārikā sikkhā paññattā appasannānaṁ pasādāya pasannānaṁ bhiyyobhāvāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.
an4.245:2.1	Puna caparaṁ, bhikkhave, mayā sāvakānaṁ ādibrahmacariyikā sikkhā paññattā sabbaso sammā dukkhakkhayāya.
an4.245:2.2	Yathā yathā, bhikkhave, mayā sāvakānaṁ ādibrahmacariyikā sikkhā paññattā sabbaso sammā dukkhakkhayāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.
an4.245:2.3	Evaṁ kho, bhikkhave, sikkhānisaṁsaṁ hoti.
an4.245:3.1	Kathañca, bhikkhave, paññuttaraṁ hoti?
an4.245:3.2	Idha, bhikkhave, mayā sāvakānaṁ dhammā desitā sabbaso sammā dukkhakkhayāya.
an4.245:3.3	Yathā yathā, bhikkhave, mayā sāvakānaṁ dhammā desitā sabbaso sammā dukkhakkhayāya tathā tathāssa te dhammā paññāya samavekkhitā honti.
an4.245:3.4	Evaṁ kho, bhikkhave, paññuttaraṁ hoti.
an4.245:4.1	Kathañca, bhikkhave, vimuttisāraṁ hoti?
an4.245:4.2	Idha, bhikkhave, mayā sāvakānaṁ dhammā desitā sabbaso sammā dukkhakkhayāya.
an4.245:4.3	Yathā yathā, bhikkhave, mayā sāvakānaṁ dhammā desitā sabbaso sammā dukkhakkhayāya tathā tathāssa te dhammā vimuttiyā phusitā honti.
an4.245:4.4	Evaṁ kho, bhikkhave, vimuttisāraṁ hoti.
an4.245:5.1	Kathañca, bhikkhave, satādhipateyyaṁ hoti?
an4.245:5.2	‘Iti aparipūraṁ vā ābhisamācārikaṁ sikkhaṁ paripūressāmi, paripūraṁ vā ābhisamācārikaṁ sikkhaṁ tattha tattha paññāya anuggahessāmī’ti—ajjhattaṁyeva sati sūpaṭṭhitā hoti.
an4.245:5.3	‘Iti aparipūraṁ vā ādibrahmacariyikaṁ sikkhaṁ paripūressāmi, paripūraṁ vā ādibrahmacariyikaṁ sikkhaṁ tattha tattha paññāya anuggahessāmī’ti—ajjhattaṁyeva sati sūpaṭṭhitā hoti.
an4.245:5.4	‘Iti asamavekkhitaṁ vā dhammaṁ paññāya samavekkhissāmi, samavekkhitaṁ vā dhammaṁ tattha tattha paññāya anuggahessāmī’ti—ajjhattaṁyeva sati sūpaṭṭhitā hoti.
an4.245:5.5	‘Iti aphusitaṁ vā dhammaṁ vimuttiyā phusissāmi, phusitaṁ vā dhammaṁ tattha tattha paññāya anuggahessāmī’ti—ajjhattaṁyeva sati sūpaṭṭhitā hoti.
an4.245:5.6	Evaṁ kho, bhikkhave, satādhipateyyaṁ hoti.
an4.245:5.7	‘Sikkhānisaṁsamidaṁ, bhikkhave, brahmacariyaṁ vussati paññuttaraṁ vimuttisāraṁ satādhipateyyan’ti,
an4.245:5.8	iti yaṁ taṁ vuttaṁ idametaṁ paṭicca vuttan”ti.
an4.245:5.9	Tatiyaṁ.
an4.246:0.1	Aṅguttara Nikāya 4.246
an4.246:0.2	25. Āpattibhayavagga
an4.246:0.3	Seyyāsutta
an4.246:1.1	“Catasso imā, bhikkhave, seyyā.
an4.246:1.2	Katamā catasso?
an4.246:1.3	Petaseyyā, kāmabhogiseyyā, sīhaseyyā, tathāgataseyyā.
an4.246:1.4	Katamā ca, bhikkhave, petaseyyā?
an4.246:1.5	Yebhuyyena, bhikkhave, petā uttānā senti;
an4.246:1.6	ayaṁ vuccati, bhikkhave, petaseyyā.
an4.246:2.1	Katamā ca, bhikkhave, kāmabhogiseyyā?
an4.246:2.2	Yebhuyyena, bhikkhave, kāmabhogī vāmena passena senti;
an4.246:2.3	ayaṁ vuccati, bhikkhave, kāmabhogiseyyā.
an4.246:3.1	Katamā ca, bhikkhave, sīhaseyyā?
an4.246:3.2	Sīho, bhikkhave, migarājā dakkhiṇena passena seyyaṁ kappeti, pāde pādaṁ accādhāya, antarasatthimhi naṅguṭṭhaṁ anupakkhipitvā.
an4.246:3.3	So paṭibujjhitvā purimaṁ kāyaṁ abbhunnāmetvā pacchimaṁ kāyaṁ anuviloketi.
an4.246:3.4	Sace, bhikkhave, sīho migarājā kiñci passati kāyassa vikkhittaṁ vā visaṭaṁ vā, tena, bhikkhave, sīho migarājā anattamano hoti.
an4.246:3.5	Sace pana, bhikkhave, sīho migarājā na kiñci passati kāyassa vikkhittaṁ vā visaṭaṁ vā, tena, bhikkhave, sīho migarājā attamano hoti.
an4.246:3.6	Ayaṁ vuccati, bhikkhave, sīhaseyyā.
an4.246:4.1	Katamā ca, bhikkhave, tathāgataseyyā?
an4.246:4.2	Idha, bhikkhave, tathāgato vivicceva kāmehi …pe… catutthaṁ jhānaṁ upasampajja viharati.
an4.246:4.3	Ayaṁ vuccati, bhikkhave, tathāgataseyyā.
an4.246:4.4	Imā kho, bhikkhave, catasso seyyā”ti.
an4.246:4.5	Catutthaṁ.
an4.247:0.1	Aṅguttara Nikāya 4.247
an4.247:0.2	25. Āpattibhayavagga
an4.247:0.3	Thūpārahasutta
an4.247:1.1	“Cattārome, bhikkhave, thūpārahā.
an4.247:1.2	Katame cattāro?
an4.247:1.3	Tathāgato arahaṁ sammāsambuddho thūpāraho, paccekabuddho thūpāraho, tathāgatasāvako thūpāraho, rājā cakkavattī thūpāraho—
an4.247:1.4	Ime kho, bhikkhave, cattāro thūpārahā”ti.
an4.247:1.5	Pañcamaṁ.
an4.248:0.1	Aṅguttara Nikāya 4.248
an4.248:0.2	25. Āpattibhayavagga
an4.248:0.3	Paññāvuddhisutta
an4.248:1.1	“Cattārome, bhikkhave, dhammā paññāvuddhiyā saṁvattanti.
an4.248:1.2	Katame cattāro?
an4.248:1.3	Sappurisasaṁsevo, saddhammasavanaṁ, yonisomanasikāro, dhammānudhammappaṭipatti—
an4.248:1.4	Ime kho, bhikkhave, cattāro dhammā paññāvuddhiyā saṁvattantī”ti.
an4.248:1.5	Chaṭṭhaṁ.
an4.249:0.1	Aṅguttara Nikāya 4.249
an4.249:0.2	25. Āpattibhayavagga
an4.249:0.3	Bahukārasutta
an4.249:1.1	“Cattārome, bhikkhave, dhammā manussabhūtassa bahukārā honti.
an4.249:1.2	Katame cattāro?
an4.249:1.3	Sappurisasaṁsevo, saddhammasavanaṁ, yonisomanasikāro, dhammānudhammappaṭipatti—
an4.249:1.4	Ime kho, bhikkhave, cattāro dhammā manussabhūtassa bahukārā hontī”ti.
an4.249:1.5	Sattamaṁ.
an4.250:0.1	Aṅguttara Nikāya 4.250
an4.250:0.2	25. Āpattibhayavagga
an4.250:0.3	Paṭhamavohārasutta
an4.250:1.1	“Cattārome, bhikkhave, anariyavohārā.
an4.250:1.2	Katame cattāro?
an4.250:1.3	Adiṭṭhe diṭṭhavāditā, asute sutavāditā, amute mutavāditā, aviññāte viññātavāditā—
an4.250:1.4	Ime kho, bhikkhave, cattāro anariyavohārā”ti.
an4.250:1.5	Aṭṭhamaṁ.
an4.251:0.1	Aṅguttara Nikāya 4.251
an4.251:0.2	25. Āpattibhayavagga
an4.251:0.3	Dutiyavohārasutta
an4.251:1.1	“Cattārome, bhikkhave, ariyavohārā.
an4.251:1.2	Katame cattāro?
an4.251:1.3	Adiṭṭhe adiṭṭhavāditā, asute asutavāditā, amute amutavāditā, aviññāte aviññātavāditā—
an4.251:1.4	Ime kho, bhikkhave, cattāro ariyavohārā”ti.
an4.251:1.5	Navamaṁ.
an4.252:0.1	Aṅguttara Nikāya 4.252
an4.252:0.2	25. Āpattibhayavagga
an4.252:0.3	Tatiyavohārasutta
an4.252:1.1	“Cattārome, bhikkhave, anariyavohārā.
an4.252:1.2	Katame cattāro?
an4.252:1.3	Diṭṭhe adiṭṭhavāditā, sute asutavāditā, mute amutavāditā, viññāte aviññātavāditā—
an4.252:1.4	Ime kho, bhikkhave, cattāro anariyavohārā”ti.
an4.252:1.5	Dasamaṁ.
an4.253:0.1	Aṅguttara Nikāya 4.253
an4.253:0.2	25. Āpattibhayavagga
an4.253:0.3	Catutthavohārasutta
an4.253:1.1	“Cattārome, bhikkhave, ariyavohārā.
an4.253:1.2	Katame cattāro?
an4.253:1.3	Diṭṭhe diṭṭhavāditā, sute sutavāditā, mute mutavāditā, viññāte viññātavāditā—
an4.253:1.4	Ime kho, bhikkhave, cattāro ariyavohārā”ti.
an4.253:1.5	Ekādasamaṁ.
an4.253:1.6	Āpattibhayavaggo pañcamo.
an4.253:2.0	Tassuddānaṁ
an4.253:2.1	Bhedaāpatti sikkhā ca,
an4.253:2.2	seyyā thūpārahena ca;
an4.253:2.3	Paññāvuddhi bahukārā,
an4.253:2.4	vohārā caturo ṭhitāti.
an4.253:2.5	Pañcamo paṇṇāsako samatto.
an4.254:0.1	Aṅguttara Nikāya 4.254
an4.254:0.2	26. Abhiññāvagga
an4.254:0.3	Abhiññāsutta
an4.254:1.1	“Cattārome, bhikkhave, dhammā.
an4.254:1.2	Katame cattāro?
an4.254:1.3	Atthi, bhikkhave, dhammā abhiññā pariññeyyā;
an4.254:1.4	atthi, bhikkhave, dhammā abhiññā pahātabbā;
an4.254:1.5	atthi, bhikkhave, dhammā abhiññā bhāvetabbā;
an4.254:1.6	atthi, bhikkhave, dhammā abhiññā sacchikātabbā.
an4.254:2.1	Katame ca, bhikkhave, dhammā abhiññā pariññeyyā?
an4.254:2.2	Pañcupādānakkhandhā—
an4.254:2.3	ime vuccanti, bhikkhave, dhammā abhiññā pariññeyyā.
an4.254:3.1	Katame ca, bhikkhave, dhammā abhiññā pahātabbā?
an4.254:3.2	Avijjā ca bhavataṇhā ca—
an4.254:3.3	ime vuccanti, bhikkhave, dhammā abhiññā pahātabbā.
an4.254:4.1	Katame ca, bhikkhave, dhammā abhiññā bhāvetabbā?
an4.254:4.2	Samatho ca vipassanā ca—
an4.254:4.3	ime vuccanti, bhikkhave, dhammā abhiññā bhāvetabbā.
an4.254:5.1	Katame ca, bhikkhave, dhammā abhiññā sacchikātabbā?
an4.254:5.2	Vijjā ca vimutti ca—
an4.254:5.3	ime vuccanti, bhikkhave, dhammā abhiññā sacchikātabbā.
an4.254:5.4	Ime kho, bhikkhave, cattāro dhammā”ti.
an4.254:5.5	Paṭhamaṁ.
an4.255:0.1	Aṅguttara Nikāya 4.255
an4.255:0.2	26. Abhiññāvagga
an4.255:0.3	Pariyesanāsutta
an4.255:1.1	“Catasso imā, bhikkhave, anariyapariyesanā.
an4.255:1.2	Katamā catasso?
an4.255:1.3	Idha, bhikkhave, ekacco attanā jarādhammo samāno jarādhammaṁyeva pariyesati;
an4.255:1.4	attanā byādhidhammo samāno byādhidhammaṁyeva pariyesati;
an4.255:1.5	attanā maraṇadhammo samāno maraṇadhammaṁyeva pariyesati;
an4.255:1.6	attanā saṅkilesadhammo samāno saṅkilesadhammaṁyeva pariyesati.
an4.255:1.7	Imā kho, bhikkhave, catasso anariyapariyesanā.
an4.255:2.1	Catasso imā, bhikkhave, ariyapariyesanā.
an4.255:2.2	Katamā catasso?
an4.255:2.3	Idha, bhikkhave, ekacco attanā jarādhammo samāno jarādhamme ādīnavaṁ viditvā ajaraṁ anuttaraṁ yogakkhemaṁ nibbānaṁ pariyesati;
an4.255:2.4	attanā byādhidhammo samāno byādhidhamme ādīnavaṁ viditvā abyādhiṁ anuttaraṁ yogakkhemaṁ nibbānaṁ pariyesati;
an4.255:2.5	attanā maraṇadhammo samāno maraṇadhamme ādīnavaṁ viditvā amataṁ anuttaraṁ yogakkhemaṁ nibbānaṁ pariyesati;
an4.255:2.6	attanā saṅkilesadhammo samāno saṅkilesadhamme ādīnavaṁ viditvā asaṅkiliṭṭhaṁ anuttaraṁ yogakkhemaṁ nibbānaṁ pariyesati.
an4.255:2.7	Imā kho, bhikkhave, catasso ariyapariyesanā”ti.
an4.255:2.8	Dutiyaṁ.
an4.256:0.1	Aṅguttara Nikāya 4.256
an4.256:0.2	26. Abhiññāvagga
an4.256:0.3	Saṅgahavatthusutta
an4.256:1.1	“Cattārimāni, bhikkhave, saṅgahavatthūni.
an4.256:1.2	Katamāni cattāri?
an4.256:1.3	Dānaṁ, peyyavajjaṁ, atthacariyā, samānattatā—
an4.256:1.4	Imāni kho, bhikkhave, cattāri saṅgahavatthūnī”ti.
an4.256:1.5	Tatiyaṁ.
an4.257:0.1	Aṅguttara Nikāya 4.257
an4.257:0.2	26. Abhiññāvagga
an4.257:0.3	Mālukyaputtasutta
an4.257:1.1	Atha kho āyasmā mālukyaputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā mālukyaputto bhagavantaṁ etadavoca:
an4.257:2.1	“Sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.
an4.257:2.2	“Ettha idāni, mālukyaputta, kiṁ dahare bhikkhū vakkhāma;
an4.257:2.3	yatra hi nāma tvaṁ jiṇṇo vuddho mahallako tathāgatassa saṅkhittena ovādaṁ yācasī”ti.
an4.257:2.4	“Desetu me, bhante, bhagavā saṅkhittena dhammaṁ; desetu sugato saṅkhittena dhammaṁ. Appeva nāmāhaṁ bhagavato bhāsitassa atthaṁ ājāneyyaṁ; appeva nāmāhaṁ bhagavato bhāsitassa dāyādo assan”ti.
an4.257:3.1	“Cattārome, mālukyaputta, taṇhuppādā yattha bhikkhuno taṇhā uppajjamānā uppajjati.
an4.257:3.2	Katame cattāro?
an4.257:3.3	Cīvarahetu vā, mālukyaputta, bhikkhuno taṇhā uppajjamānā uppajjati.
an4.257:3.4	Piṇḍapātahetu vā, mālukyaputta, bhikkhuno taṇhā uppajjamānā uppajjati.
an4.257:3.5	Senāsanahetu vā, mālukyaputta, bhikkhuno taṇhā uppajjamānā uppajjati.
an4.257:3.6	Itibhavābhavahetu vā, mālukyaputta, bhikkhuno taṇhā uppajjamānā uppajjati.
an4.257:3.7	Ime kho, mālukyaputta, cattāro taṇhuppādā yattha bhikkhuno taṇhā uppajjamānā uppajjati.
an4.257:3.8	Yato kho, mālukyaputta, bhikkhuno taṇhā pahīnā hoti ucchinnamūlā tālāvatthukatā anabhāvaṅkatā āyatiṁ anuppādadhammā, ayaṁ vuccati, mālukyaputta, ‘bhikkhu acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā’”ti.
an4.257:4.1	Atha kho āyasmā mālukyaputto bhagavatā iminā ovādena ovadito uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an4.257:4.2	Atha kho āyasmā mālukyaputto eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
an4.257:4.3	“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
an4.257:4.4	Aññataro ca panāyasmā mālukyaputto arahataṁ ahosīti.
an4.257:4.5	Catutthaṁ.
an4.258:0.1	Aṅguttara Nikāya 4.258
an4.258:0.2	26. Abhiññāvagga
an4.258:0.3	Kulasutta
an4.258:1.1	“Yāni kānici, bhikkhave, kulāni bhogesu mahattaṁ pattāni na ciraṭṭhitikāni bhavanti, sabbāni tāni catūhi ṭhānehi, etesaṁ vā aññatarena.
an4.258:1.2	Katamehi catūhi?
an4.258:1.3	Naṭṭhaṁ na gavesanti, jiṇṇaṁ na paṭisaṅkharonti, aparimitapānabhojanā honti, dussīlaṁ itthiṁ vā purisaṁ vā ādhipacce ṭhapenti.
an4.258:1.4	Yāni kānici, bhikkhave, kulāni bhogesu mahattaṁ pattāni na ciraṭṭhitikāni bhavanti, sabbāni tāni imehi catūhi ṭhānehi, etesaṁ vā aññatarena.
an4.258:2.1	Yāni kānici, bhikkhave, kulāni bhogesu mahattaṁ pattāni ciraṭṭhitikāni bhavanti, sabbāni tāni catūhi ṭhānehi, etesaṁ vā aññatarena.
an4.258:2.2	Katamehi catūhi?
an4.258:2.3	Naṭṭhaṁ gavesanti, jiṇṇaṁ paṭisaṅkharonti, parimitapānabhojanā honti, sīlavantaṁ itthiṁ vā purisaṁ vā ādhipacce ṭhapenti.
an4.258:2.4	Yāni kānici, bhikkhave, kulāni bhogesu mahattaṁ pattāni ciraṭṭhitikāni bhavanti, sabbāni tāni imehi catūhi ṭhānehi, etesaṁ vā aññatarenā”ti.
an4.258:2.5	Pañcamaṁ.
an4.259:0.1	Aṅguttara Nikāya 4.259
an4.259:0.2	26. Abhiññāvagga
an4.259:0.3	Paṭhamaājānīyasutta
an4.259:1.1	“Catūhi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhaṁ gacchati.
an4.259:1.2	Katamehi catūhi?
an4.259:1.3	Idha, bhikkhave, rañño bhadro assājānīyo vaṇṇasampanno ca hoti balasampanno ca javasampanno ca ārohapariṇāhasampanno ca.
an4.259:1.4	Imehi kho, bhikkhave, catūhi aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhaṁ gacchati.
an4.259:2.1	Evamevaṁ kho, bhikkhave, catūhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an4.259:2.2	Katamehi catūhi?
an4.259:2.3	Idha, bhikkhave, bhikkhu vaṇṇasampanno ca hoti balasampanno ca javasampanno ca ārohapariṇāhasampanno ca.
an4.259:3.1	Kathañca, bhikkhave, bhikkhu vaṇṇasampanno hoti?
an4.259:3.2	Idha, bhikkhave, bhikkhu sīlavā hoti …pe… samādāya sikkhati sikkhāpadesu.
an4.259:3.3	Evaṁ kho, bhikkhave, bhikkhu vaṇṇasampanno hoti.
an4.259:4.1	Kathañca, bhikkhave, bhikkhu balasampanno hoti?
an4.259:4.2	Idha, bhikkhave, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an4.259:4.3	Evaṁ kho, bhikkhave, bhikkhu balasampanno hoti.
an4.259:5.1	Kathañca, bhikkhave, bhikkhu javasampanno hoti?
an4.259:5.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an4.259:5.3	Evaṁ kho, bhikkhave, bhikkhu javasampanno hoti.
an4.259:6.1	Kathañca, bhikkhave, bhikkhu ārohapariṇāhasampanno hoti?
an4.259:6.2	Idha, bhikkhave, bhikkhu lābhī hoti cīvarapiṇḍapātasenāsanagilānapaccayabhesajjaparikkhārānaṁ.
an4.259:6.3	Evaṁ kho, bhikkhave, bhikkhu ārohapariṇāhasampanno hoti.
an4.259:7.1	Imehi kho, bhikkhave, catūhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an4.259:7.2	Chaṭṭhaṁ.
an4.260:0.1	Aṅguttara Nikāya 4.260
an4.260:0.2	26. Abhiññāvagga
an4.260:0.3	Dutiyaājānīyasutta
an4.260:1.1	“Catūhi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhaṁ gacchati.
an4.260:1.2	Katamehi catūhi?
an4.260:1.3	Idha, bhikkhave, rañño bhadro assājānīyo vaṇṇasampanno ca hoti, balasampanno ca, javasampanno ca, ārohapariṇāhasampanno ca.
an4.260:1.4	Imehi kho, bhikkhave, catūhi aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhaṁ gacchati.
an4.260:2.1	Evamevaṁ kho, bhikkhave, catūhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an4.260:2.2	Katamehi catūhi?
an4.260:2.3	Idha, bhikkhave, bhikkhu vaṇṇasampanno ca hoti, balasampanno ca, javasampanno ca, ārohapariṇāhasampanno ca.
an4.260:3.1	Kathañca, bhikkhave, bhikkhu vaṇṇasampanno hoti?
an4.260:3.2	Idha, bhikkhave, bhikkhu sīlavā hoti …pe… samādāya sikkhati sikkhāpadesu.
an4.260:3.3	Evaṁ kho, bhikkhave, bhikkhu vaṇṇasampanno hoti.
an4.260:4.1	Kathañca, bhikkhave, bhikkhu balasampanno hoti?
an4.260:4.2	Idha, bhikkhave, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an4.260:4.3	Evaṁ kho, bhikkhave, bhikkhu balasampanno hoti.
an4.260:5.1	Kathañca, bhikkhave, bhikkhu javasampanno hoti?
an4.260:5.2	Idha, bhikkhave, bhikkhu āsavānaṁ khayā …pe… sacchikatvā upasampajja viharati.
an4.260:5.3	Evaṁ kho, bhikkhave, bhikkhu javasampanno hoti.
an4.260:6.1	Kathañca, bhikkhave, bhikkhu ārohapariṇāhasampanno hoti?
an4.260:6.2	Idha, bhikkhave, bhikkhu lābhī hoti cīvarapiṇḍapātasenāsanagilānapaccayabhesajjaparikkhārānaṁ.
an4.260:6.3	Evaṁ kho, bhikkhave, bhikkhu ārohapariṇāhasampanno hoti.
an4.260:7.1	Imehi kho, bhikkhave, catūhi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an4.260:7.2	Sattamaṁ.
an4.261:0.1	Aṅguttara Nikāya 4.261
an4.261:0.2	26. Abhiññāvagga
an4.261:0.3	Balasutta
an4.261:1.1	“Cattārimāni, bhikkhave, balāni.
an4.261:1.2	Katamāni cattāri?
an4.261:1.3	Vīriyabalaṁ, satibalaṁ, samādhibalaṁ, paññābalaṁ—
an4.261:1.4	Imāni kho, bhikkhave, cattāri balānī”ti.
an4.261:1.5	Aṭṭhamaṁ.
an4.262:0.1	Aṅguttara Nikāya 4.262
an4.262:0.2	26. Abhiññāvagga
an4.262:0.3	Araññasutta
an4.262:1.1	“Catūhi, bhikkhave, dhammehi samannāgato bhikkhu nālaṁ araññavanapatthāni pantāni senāsanāni paṭisevituṁ.
an4.262:1.2	Katamehi catūhi?
an4.262:1.3	Kāmavitakkena, byāpādavitakkena, vihiṁsāvitakkena, duppañño hoti jaḷo elamūgo—
an4.262:1.4	imehi kho, bhikkhave, catūhi dhammehi samannāgato bhikkhu nālaṁ araññavanapatthāni pantāni senāsanāni paṭisevituṁ.
an4.262:2.1	Catūhi, bhikkhave, dhammehi samannāgato bhikkhu alaṁ araññavanapatthāni pantāni senāsanāni paṭisevituṁ.
an4.262:2.2	Katamehi catūhi?
an4.262:2.3	Nekkhammavitakkena, abyāpādavitakkena, avihiṁsāvitakkena, paññavā hoti ajaḷo anelamūgo—
an4.262:2.4	imehi kho, bhikkhave, catūhi dhammehi samannāgato bhikkhu alaṁ araññavanapatthāni pantāni senāsanāni paṭisevitun”ti.
an4.262:2.5	Navamaṁ.
an4.263:0.1	Aṅguttara Nikāya 4.263
an4.263:0.2	26. Abhiññāvagga
an4.263:0.3	Kammasutta
an4.263:1.1	“Catūhi, bhikkhave, dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo viññūnaṁ, bahuñca apuññaṁ pasavati.
an4.263:1.2	Katamehi catūhi?
an4.263:1.3	Sāvajjena kāyakammena, sāvajjena vacīkammena, sāvajjena manokammena, sāvajjāya diṭṭhiyā—
an4.263:1.4	imehi kho, bhikkhave, catūhi dhammehi samannāgato bālo abyatto asappuriso khataṁ upahataṁ attānaṁ pariharati, sāvajjo ca hoti sānuvajjo viññūnaṁ, bahuñca apuññaṁ pasavati.
an4.263:2.1	Catūhi, bhikkhave, dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo viññūnaṁ, bahuñca puññaṁ pasavati.
an4.263:2.2	Katamehi catūhi?
an4.263:2.3	Anavajjena kāyakammena, anavajjena vacīkammena, anavajjena manokammena, anavajjāya diṭṭhiyā—
an4.263:2.4	imehi kho, bhikkhave, catūhi dhammehi samannāgato paṇḍito viyatto sappuriso akkhataṁ anupahataṁ attānaṁ pariharati, anavajjo ca hoti ananuvajjo viññūnaṁ, bahuñca puññaṁ pasavatī”ti.
an4.263:2.5	Dasamaṁ.
an4.263:2.6	Abhiññāvaggo chaṭṭho.
an4.263:3.0	Tassuddānaṁ
an4.263:3.1	Abhiññā pariyesanā,
an4.263:3.2	saṅgahaṁ mālukyaputto;
an4.263:3.3	Kulaṁ dve ca ājānīyā,
an4.263:3.4	balaṁ araññakammunāti.
an4.264:0.1	Aṅguttara Nikāya 4.264
an4.264:0.2	27. Kammapathavagga
an4.264:0.3	Pāṇātipātīsutta
an4.264:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.264:1.2	Katamehi catūhi?
an4.264:1.3	Attanā ca pāṇātipātī hoti, parañca pāṇātipāte samādapeti, pāṇātipāte ca samanuñño hoti, pāṇātipātassa ca vaṇṇaṁ bhāsati—
an4.264:1.4	imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.
an4.264:2.1	Catūhi, bhikkhave, dhammehi samannāgato yathābhataṁ nikkhitto evaṁ sagge.
an4.264:2.2	Katamehi catūhi?
an4.264:2.3	Attanā ca pāṇātipātā paṭivirato hoti, parañca pāṇātipātā veramaṇiyā samādapeti, pāṇātipātā veramaṇiyā ca samanuñño hoti, pāṇātipātā veramaṇiyā ca vaṇṇaṁ bhāsati—
an4.264:2.4	imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.
an4.264:2.5	Paṭhamaṁ.
an4.265:0.1	Aṅguttara Nikāya 4.265
an4.265:0.2	27. Kammapathavagga
an4.265:0.3	Adinnādāyīsutta
an4.265:1.1	“Catūhi, bhikkhave, dhammehi samannāgato yathābhataṁ nikkhitto evaṁ niraye.
an4.265:1.2	Katamehi catūhi?
an4.265:1.3	Attanā ca adinnādāyī hoti, parañca adinnādāne samādapeti, adinnādāne ca samanuñño hoti, adinnādānassa ca vaṇṇaṁ bhāsati—
an4.265:1.4	imehi kho …pe….
an4.265:2.1	Attanā ca adinnādānā paṭivirato hoti, parañca adinnādānā veramaṇiyā samādapeti, adinnādānā veramaṇiyā ca samanuñño hoti, adinnādānā veramaṇiyā ca vaṇṇaṁ bhāsati—imehi kho, bhikkhave …pe….
an4.265:2.2	Dutiyaṁ.
an4.266:0.1	Aṅguttara Nikāya 4.266
an4.266:0.2	27. Kammapathavagga
an4.266:0.3	Micchācārīsutta
an4.266:1.1	…pe… Attanā ca kāmesumicchācārī hoti, parañca kāmesumicchācāre samādapeti, kāmesumicchācāre ca samanuñño hoti, kāmesumicchācārassa ca vaṇṇaṁ bhāsati—imehi kho …pe….
an4.266:2.1	Attanā ca kāmesumicchācārā paṭivirato hoti, parañca kāmesumicchācārā veramaṇiyā samādapeti, kāmesumicchācārā veramaṇiyā ca samanuñño hoti, kāmesumicchācārā veramaṇiyā ca vaṇṇaṁ bhāsati—imehi kho …pe….
an4.266:2.2	Tatiyaṁ.
an4.267:0.1	Aṅguttara Nikāya 4.267
an4.267:0.2	27. Kammapathavagga
an4.267:0.3	Musāvādīsutta
an4.267:1.1	…pe… Attanā ca musāvādī hoti, parañca musāvāde samādapeti, musāvāde ca samanuñño hoti, musāvādassa ca vaṇṇaṁ bhāsati—imehi kho …pe….
an4.267:2.1	Attanā ca musāvādā paṭivirato hoti, parañca musāvādā veramaṇiyā samādapeti, musāvādā veramaṇiyā ca samanuñño hoti, musāvādā veramaṇiyā ca vaṇṇaṁ bhāsati—imehi …pe….
an4.267:2.2	Catutthaṁ.
an4.268:0.1	Aṅguttara Nikāya 4.268
an4.268:0.2	27. Kammapathavagga
an4.268:0.3	Pisuṇavācāsutta
an4.268:1.1	…pe… Attanā ca pisuṇavāco hoti, parañca pisuṇāya vācāya samādapeti, pisuṇāya vācāya ca samanuñño hoti, pisuṇāya vācāya ca vaṇṇaṁ bhāsati—imehi …pe….
an4.268:2.1	Attanā ca pisuṇāya vācāya paṭivirato hoti, parañca pisuṇāya vācāya veramaṇiyā samādapeti, pisuṇāya vācāya veramaṇiyā ca samanuñño hoti, pisuṇāya vācāya veramaṇiyā ca vaṇṇaṁ bhāsati—imehi …pe….
an4.268:2.2	Pañcamaṁ.
an4.269:0.1	Aṅguttara Nikāya 4.269
an4.269:0.2	27. Kammapathavagga
an4.269:0.3	Pharusavācāsutta
an4.269:1.1	…pe… Attanā ca pharusavāco hoti, parañca pharusāya vācāya samādapeti, pharusāya vācāya ca samanuñño hoti, pharusāya vācāya ca vaṇṇaṁ bhāsati …pe….
an4.269:2.1	Attanā ca pharusāya vācāya paṭivirato hoti, parañca pharusāya vācāya veramaṇiyā samādapeti, pharusāya vācāya veramaṇiyā ca samanuñño hoti, pharusāya vācāya veramaṇiyā ca vaṇṇaṁ bhāsati—imehi kho …pe….
an4.269:2.2	Chaṭṭhaṁ.
an4.270:0.1	Aṅguttara Nikāya 4.270
an4.270:0.2	27. Kammapathavagga
an4.270:0.3	Samphappalāpasutta
an4.270:1.1	…pe… Attanā ca samphappalāpī hoti, parañca samphappalāpe samādapeti, samphappalāpe ca samanuñño hoti, samphappalāpassa ca vaṇṇaṁ bhāsati—imehi …pe….
an4.270:2.1	Attanā ca samphappalāpā paṭivirato hoti, parañca samphappalāpā veramaṇiyā samādapeti, samphappalāpā veramaṇiyā ca samanuñño hoti, samphappalāpā veramaṇiyā ca vaṇṇaṁ bhāsati—imehi kho, bhikkhave …pe….
an4.270:2.2	Sattamaṁ.
an4.271:0.1	Aṅguttara Nikāya 4.271
an4.271:0.2	27. Kammapathavagga
an4.271:0.3	Abhijjhālusutta
an4.271:1.1	…pe… Attanā ca abhijjhālu hoti, parañca abhijjhāya samādapeti, abhijjhāya ca samanuñño hoti, abhijjhāya ca vaṇṇaṁ bhāsati …pe….
an4.271:2.1	Attanā ca anabhijjhālu hoti, parañca anabhijjhāya samādapeti, anabhijjhāya ca samanuñño hoti, anabhijjhāya ca vaṇṇaṁ bhāsati—imehi kho …pe….
an4.271:2.2	Aṭṭhamaṁ.
an4.272:0.1	Aṅguttara Nikāya 4.272
an4.272:0.2	27. Kammapathavagga
an4.272:0.3	Byāpannacittasutta
an4.272:1.1	…pe… Attanā ca byāpannacitto hoti, parañca byāpāde samādapeti, byāpāde ca samanuñño hoti, byāpādassa ca vaṇṇaṁ bhāsati—imehi …pe….
an4.272:2.1	Attanā ca abyāpannacitto hoti, parañca abyāpāde samādapeti, abyāpāde ca samanuñño hoti, abyāpādassa ca vaṇṇaṁ bhāsati—imehi …pe….
an4.272:2.2	Navamaṁ.
an4.273:0.1	Aṅguttara Nikāya 4.273
an4.273:0.2	27. Kammapathavagga
an4.273:0.3	Micchādiṭṭhisutta
an4.273:1.1	…pe… Attanā ca micchādiṭṭhiko hoti, parañca micchādiṭṭhiyā samādapeti, micchādiṭṭhiyā ca samanuñño hoti, micchādiṭṭhiyā ca vaṇṇaṁ bhāsati—imehi …pe….
an4.273:2.1	Attanā ca sammādiṭṭhiko hoti, parañca sammādiṭṭhiyā samādapeti, sammādiṭṭhiyā ca samanuñño hoti, sammādiṭṭhiyā ca vaṇṇaṁ bhāsati—
an4.273:2.2	imehi kho, bhikkhave, catūhi dhammehi samannāgato yathābhataṁ nikkhitto evaṁ saggeti.
an4.273:2.3	Dasamaṁ.
an4.273:2.4	Kammapathavaggo sattamo.
an4.274:0.1	Aṅguttara Nikāya 4.274
an4.274:0.2	28. Rāgapeyyāla
an4.274:0.3	Satipaṭṭhānasutta
an4.274:1.1	“Rāgassa, bhikkhave, abhiññāya cattāro dhammā bhāvetabbā.
an4.274:1.2	Katame cattāro?
an4.274:1.3	Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ;
an4.274:1.4	vedanāsu …pe… citte …pe… dhammesu dhammānupassī viharati ātāpī sampajāno satimā vineyya loke abhijjhādomanassaṁ.
an4.274:1.5	Rāgassa, bhikkhave, abhiññāya ime cattāro dhammā bhāvetabbā”ti.
an4.274:1.6	Paṭhamaṁ.
an4.275:0.1	Aṅguttara Nikāya 4.275
an4.275:0.2	28. Rāgapeyyāla
an4.275:0.3	Sammappadhānasutta
an4.275:1.1	“Rāgassa, bhikkhave, abhiññāya cattāro dhammā bhāvetabbā.
an4.275:1.2	Katame cattāro?
an4.275:1.3	Idha, bhikkhave, bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an4.275:1.4	uppannānaṁ pāpakānaṁ akusalānaṁ dhammānaṁ pahānāya …pe… anuppannānaṁ kusalānaṁ dhammānaṁ uppādāya …pe… uppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati.
an4.275:1.5	Rāgassa, bhikkhave, abhiññāya ime cattāro dhammā bhāvetabbā”ti.
an4.275:1.6	Dutiyaṁ.
an4.276:0.1	Aṅguttara Nikāya 4.276
an4.276:0.2	28. Rāgapeyyāla
an4.276:0.3	Iddhipādasutta
an4.276:1.1	“Rāgassa, bhikkhave, abhiññāya cattāro dhammā bhāvetabbā.
an4.276:1.2	Katame cattāro?
an4.276:1.3	Idha, bhikkhave, bhikkhu chandasamādhipadhānasaṅkhārasamannāgataṁ iddhipādaṁ bhāveti;
an4.276:1.4	vīriyasamādhi …pe…
an4.276:1.5	cittasamādhi …pe…
an4.276:1.6	vīmaṁsāsamādhipadhānasaṅkhārasamannāgataṁ iddhipādaṁ bhāveti.
an4.276:1.7	Rāgassa, bhikkhave, abhiññāya ime cattāro dhammā bhāvetabbā”ti.
an4.276:1.8	Tatiyaṁ.
an4.277-303:0.1	Aṅguttara Nikāya 4.277–303
an4.277-303:0.2	28. Rāgapeyyāla
an4.277-303:0.3	Pariññādisutta
an4.277-303:1.1	“Rāgassa, bhikkhave, pariññāya …pe… parikkhayāya … pahānāya … khayāya … vayāya … virāgāya … nirodhāya … cāgāya … paṭinissaggāya cattāro dhammā bhāvetabbā …pe….
an4.277-303:1.2	Tiṁsatimaṁ.
an4.304-783:0.1	Aṅguttara Nikāya 4.304–783
an4.304-783:0.2	28. Rāgapeyyāla
an4.304-783:0.3	Dosaabhiññādisutta
an4.304-783:1.1	“Dosassa …pe… mohassa … kodhassa … upanāhassa … makkhassa … paḷāsassa … issāya … macchariyassa … māyāya … sāṭheyyassa … thambhassa … sārambhassa … mānassa … atimānassa … madassa … pamādassa abhiññāya … pariññāya … parikkhayāya … pahānāya … khayāya … vayāya … virāgāya … nirodhāya … cāgāya … paṭinissaggāya ime cattāro dhammā bhāvetabbā”ti.
an4.304-783:1.2	Dasuttarapañcasatimaṁ.
an4.304-783:1.3	Rāgapeyyālaṁ niṭṭhitaṁ.
an4.304-783:1.4	Pañcamo paṇṇāsako samatto.
an4.304-783:1.5	Catukkanipātapāḷi niṭṭhitā.
an5.1:0.1	Aṅguttara Nikāya 5.1
an5.1:0.2	1. Sekhabalavagga
an5.1:0.3	Saṅkhittasutta
an5.1:1.1	Evaṁ me sutaṁ—
an5.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an5.1:1.3	Tatra kho bhagavā bhikkhū āmantesi:
an5.1:1.4	“bhikkhavo”ti.
an5.1:1.5	“Bhadante”ti te bhikkhū bhagavato paccassosuṁ.
an5.1:1.6	Bhagavā etadavoca:
an5.1:2.1	“Pañcimāni, bhikkhave, sekhabalāni.
an5.1:2.2	Katamāni pañca?
an5.1:2.3	Saddhābalaṁ, hirībalaṁ, ottappabalaṁ, vīriyabalaṁ, paññābalaṁ—
an5.1:2.4	imāni kho, bhikkhave, pañca sekhabalāni.
an5.1:3.1	Tasmātiha, bhikkhave, evaṁ sikkhitabbaṁ:
an5.1:3.2	‘saddhābalena samannāgatā bhavissāma sekhabalena, hirībalena samannāgatā bhavissāma sekhabalena, ottappabalena samannāgatā bhavissāma sekhabalena, vīriyabalena samannāgatā bhavissāma sekhabalena, paññābalena samannāgatā bhavissāma sekhabalenā’ti.
an5.1:3.3	Evañhi vo, bhikkhave, sikkhitabban”ti.
an5.1:3.4	Idamavoca bhagavā.
an5.1:3.5	Attamanā te bhikkhū bhagavato bhāsitaṁ abhinandunti.
an5.1:3.6	Paṭhamaṁ.
an5.2:0.1	Aṅguttara Nikāya 5.2
an5.2:0.2	1. Sekhabalavagga
an5.2:0.3	Vitthatasutta
an5.2:1.1	“Pañcimāni, bhikkhave, sekhabalāni.
an5.2:1.2	Katamāni pañca?
an5.2:1.3	Saddhābalaṁ, hirībalaṁ, ottappabalaṁ, vīriyabalaṁ, paññābalaṁ.
an5.2:2.1	Katamañca, bhikkhave, saddhābalaṁ?
an5.2:2.2	Idha, bhikkhave, ariyasāvako saddho hoti, saddahati tathāgatassa bodhiṁ:
an5.2:2.3	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an5.2:2.4	Idaṁ vuccati, bhikkhave, saddhābalaṁ.
an5.2:3.1	Katamañca, bhikkhave, hirībalaṁ?
an5.2:3.2	Idha, bhikkhave, ariyasāvako hirīmā hoti, hirīyati kāyaduccaritena vacīduccaritena manoduccaritena, hirīyati pāpakānaṁ akusalānaṁ dhammānaṁ samāpattiyā.
an5.2:3.3	Idaṁ vuccati, bhikkhave, hirībalaṁ.
an5.2:4.1	Katamañca, bhikkhave, ottappabalaṁ?
an5.2:4.2	Idha, bhikkhave, ariyasāvako ottappī hoti, ottappati kāyaduccaritena vacīduccaritena manoduccaritena, ottappati pāpakānaṁ akusalānaṁ dhammānaṁ samāpattiyā.
an5.2:4.3	Idaṁ vuccati, bhikkhave, ottappabalaṁ.
an5.2:5.1	Katamañca, bhikkhave, vīriyabalaṁ?
an5.2:5.2	Idha, bhikkhave, ariyasāvako āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an5.2:5.3	Idaṁ vuccati, bhikkhave, vīriyabalaṁ.
an5.2:6.1	Katamañca, bhikkhave, paññābalaṁ?
an5.2:6.2	Idha, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an5.2:6.3	Idaṁ vuccati, bhikkhave, paññābalaṁ.
an5.2:6.4	Imāni kho, bhikkhave, pañca sekhabalāni.
an5.2:7.1	Tasmātiha, bhikkhave, evaṁ sikkhitabbaṁ:
an5.2:7.2	‘saddhābalena samannāgatā bhavissāma sekhabalena, hirībalena … ottappabalena … vīriyabalena … paññābalena samannāgatā bhavissāma sekhabalenā’ti.
an5.2:7.3	Evañhi kho, bhikkhave, sikkhitabban”ti.
an5.2:7.4	Dutiyaṁ.
an5.3:0.1	Aṅguttara Nikāya 5.3
an5.3:0.2	1. Sekhabalavagga
an5.3:0.3	Dukkhasutta
an5.3:1.1	“Pañcahi, bhikkhave, dhammehi samannāgato bhikkhu diṭṭheva dhamme dukkhaṁ viharati savighātaṁ saupāyāsaṁ sapariḷāhaṁ, kāyassa ca bhedā paraṁ maraṇā duggati pāṭikaṅkhā.
an5.3:1.2	Katamehi pañcahi?
an5.3:1.3	Idha, bhikkhave, bhikkhu assaddho hoti, ahiriko hoti, anottappī hoti, kusīto hoti, duppañño hoti.
an5.3:1.4	Imehi kho, bhikkhave, pañcahi dhammehi samannāgato bhikkhu diṭṭheva dhamme dukkhaṁ viharati savighātaṁ saupāyāsaṁ sapariḷāhaṁ, kāyassa ca bhedā paraṁ maraṇā duggati pāṭikaṅkhā.
an5.3:2.1	Pañcahi, bhikkhave, dhammehi samannāgato bhikkhu diṭṭheva dhamme sukhaṁ viharati avighātaṁ anupāyāsaṁ apariḷāhaṁ, kāyassa ca bhedā paraṁ maraṇā sugati pāṭikaṅkhā.
an5.3:2.2	Katamehi pañcahi?
an5.3:2.3	Idha, bhikkhave, bhikkhu saddho hoti, hirīmā hoti, ottappī hoti, āraddhavīriyo hoti, paññavā hoti.
an5.3:2.4	Imehi kho, bhikkhave, pañcahi dhammehi samannāgato bhikkhu diṭṭheva dhamme sukhaṁ viharati avighātaṁ anupāyāsaṁ apariḷāhaṁ, kāyassa ca bhedā paraṁ maraṇā sugati pāṭikaṅkhā”ti.
an5.3:2.5	Tatiyaṁ.
an5.4:0.1	Aṅguttara Nikāya 5.4
an5.4:0.2	1. Sekhabalavagga
an5.4:0.3	Yathābhatasutta
an5.4:1.1	“Pañcahi, bhikkhave, dhammehi samannāgato bhikkhu yathābhataṁ nikkhitto evaṁ niraye.
an5.4:1.2	Katamehi pañcahi?
an5.4:1.3	Idha, bhikkhave, bhikkhu assaddho hoti, ahiriko hoti, anottappī hoti, kusīto hoti, duppañño hoti.
an5.4:1.4	Imehi kho, bhikkhave, pañcahi dhammehi samannāgato bhikkhu yathābhataṁ nikkhitto evaṁ niraye.
an5.4:2.1	Pañcahi, bhikkhave, dhammehi samannāgato bhikkhu yathābhataṁ nikkhitto evaṁ sagge.
an5.4:2.2	Katamehi pañcahi?
an5.4:2.3	Idha, bhikkhave, bhikkhu saddho hoti, hirīmā hoti, ottappī hoti, āraddhavīriyo hoti, paññavā hoti.
an5.4:2.4	Imehi kho, bhikkhave, pañcahi dhammehi samannāgato bhikkhu yathābhataṁ nikkhitto evaṁ sagge”ti.
an5.4:2.5	Catutthaṁ.
an5.5:0.1	Aṅguttara Nikāya 5.5
an5.5:0.2	1. Sekhabalavagga
an5.5:0.3	Sikkhāsutta
an5.5:1.1	“Yo hi koci, bhikkhave, bhikkhu vā bhikkhunī vā sikkhaṁ paccakkhāya hīnāyāvattati, tassa diṭṭheva dhamme pañca sahadhammikā vādānupātā gārayhā ṭhānā āgacchanti.
an5.5:1.2	Katame pañca?
an5.5:1.3	Saddhāpi nāma te nāhosi kusalesu dhammesu, hirīpi nāma te nāhosi kusalesu dhammesu, ottappampi nāma te nāhosi kusalesu dhammesu, vīriyampi nāma te nāhosi kusalesu dhammesu, paññāpi nāma te nāhosi kusalesu dhammesu.
an5.5:1.4	Yo hi koci, bhikkhave, bhikkhu vā bhikkhunī vā sikkhaṁ paccakkhāya hīnāyāvattati, tassa diṭṭheva dhamme ime pañca sahadhammikā vādānupātā gārayhā ṭhānā āgacchanti.
an5.5:2.1	Yo hi koci, bhikkhave, bhikkhu vā bhikkhunī vā sahāpi dukkhena sahāpi domanassena assumukho rudamāno paripuṇṇaṁ parisuddhaṁ brahmacariyaṁ carati, tassa diṭṭheva dhamme pañca sahadhammikā pāsaṁsā ṭhānā āgacchanti.
an5.5:2.2	Katame pañca?
an5.5:2.3	Saddhāpi nāma te ahosi kusalesu dhammesu, hirīpi nāma te ahosi kusalesu dhammesu, ottappampi nāma te ahosi kusalesu dhammesu, vīriyampi nāma te ahosi kusalesu dhammesu, paññāpi nāma te ahosi kusalesu dhammesu.
an5.5:2.4	Yo hi koci, bhikkhave, bhikkhu vā bhikkhunī vā sahāpi dukkhena sahāpi domanassena assumukho rudamāno paripuṇṇaṁ parisuddhaṁ brahmacariyaṁ carati, tassa diṭṭheva dhamme ime pañca sahadhammikā pāsaṁsā ṭhānā āgacchantī”ti.
an5.5:2.5	Pañcamaṁ.
an5.6:0.1	Aṅguttara Nikāya 5.6
an5.6:0.2	1. Sekhabalavagga
an5.6:0.3	Samāpattisutta
an5.6:1.1	“Na tāva, bhikkhave, akusalassa samāpatti hoti yāva saddhā paccupaṭṭhitā hoti kusalesu dhammesu.
an5.6:1.2	Yato ca kho, bhikkhave, saddhā antarahitā hoti, assaddhiyaṁ pariyuṭṭhāya tiṭṭhati;
an5.6:1.3	atha akusalassa samāpatti hoti.
an5.6:2.1	Na tāva, bhikkhave, akusalassa samāpatti hoti yāva hirī paccupaṭṭhitā hoti kusalesu dhammesu.
an5.6:2.2	Yato ca kho, bhikkhave, hirī antarahitā hoti, ahirikaṁ pariyuṭṭhāya tiṭṭhati;
an5.6:2.3	atha akusalassa samāpatti hoti.
an5.6:3.1	Na tāva, bhikkhave, akusalassa samāpatti hoti yāva ottappaṁ paccupaṭṭhitaṁ hoti kusalesu dhammesu.
an5.6:3.2	Yato ca kho, bhikkhave, ottappaṁ antarahitaṁ hoti, anottappaṁ pariyuṭṭhāya tiṭṭhati;
an5.6:3.3	atha akusalassa samāpatti hoti.
an5.6:4.1	Na tāva, bhikkhave, akusalassa samāpatti hoti yāva vīriyaṁ paccupaṭṭhitaṁ hoti kusalesu dhammesu.
an5.6:4.2	Yato ca kho, bhikkhave, vīriyaṁ antarahitaṁ hoti, kosajjaṁ pariyuṭṭhāya tiṭṭhati;
an5.6:4.3	atha akusalassa samāpatti hoti.
an5.6:5.1	Na tāva, bhikkhave, akusalassa samāpatti hoti yāva paññā paccupaṭṭhitā hoti kusalesu dhammesu.
an5.6:5.2	Yato ca kho, bhikkhave, paññā antarahitā hoti, duppaññā pariyuṭṭhāya tiṭṭhati;
an5.6:5.3	atha akusalassa samāpatti hotī”ti.
an5.6:5.4	Chaṭṭhaṁ.
an5.7:0.1	Aṅguttara Nikāya 5.7
an5.7:0.2	1. Sekhabalavagga
an5.7:0.3	Kāmasutta
an5.7:1.1	“Yebhuyyena, bhikkhave, sattā kāmesu laḷitā.
an5.7:1.2	Asitabyābhaṅgiṁ, bhikkhave, kulaputto ohāya agārasmā anagāriyaṁ pabbajito hoti, ‘saddhāpabbajito kulaputto’ti alaṁvacanāya.
an5.7:1.3	Taṁ kissa hetu?
an5.7:1.4	Labbhā, bhikkhave, yobbanena kāmā te ca kho yādisā vā tādisā vā.
an5.7:1.5	Ye ca, bhikkhave, hīnā kāmā ye ca majjhimā kāmā ye ca paṇītā kāmā, sabbe kāmā ‘kāmā’tveva saṅkhaṁ gacchanti.
an5.7:1.6	Seyyathāpi, bhikkhave, daharo kumāro mando uttānaseyyako dhātiyā pamādamanvāya kaṭṭhaṁ vā kaṭhalaṁ vā mukhe āhareyya.
an5.7:1.7	Tamenaṁ dhāti sīghaṁ sīghaṁ manasi kareyya;
an5.7:1.8	sīghaṁ sīghaṁ manasi karitvā sīghaṁ sīghaṁ āhareyya.
an5.7:1.9	No ce sakkuṇeyya sīghaṁ sīghaṁ āharituṁ, vāmena hatthena sīsaṁ pariggahetvā dakkhiṇena hatthena vaṅkaṅguliṁ karitvā salohitampi āhareyya.
an5.7:1.10	Taṁ kissa hetu?
an5.7:1.11	‘Atthesā, bhikkhave, kumārassa vihesā;
an5.7:1.12	nesā natthī’ti vadāmi.
an5.7:1.13	Karaṇīyañca kho etaṁ, bhikkhave, dhātiyā atthakāmāya hitesiniyā anukampikāya, anukampaṁ upādāya.
an5.7:1.14	Yato ca kho, bhikkhave, so kumāro vuddho hoti alaṁpañño, anapekkhā dāni, bhikkhave, dhāti tasmiṁ kumāre hoti:
an5.7:1.15	‘attagutto dāni kumāro nālaṁ pamādāyā’ti.
an5.7:2.1	Evamevaṁ kho, bhikkhave, yāvakīvañca bhikkhuno saddhāya akataṁ hoti kusalesu dhammesu, hiriyā akataṁ hoti kusalesu dhammesu, ottappena akataṁ hoti kusalesu dhammesu, vīriyena akataṁ hoti kusalesu dhammesu, paññāya akataṁ hoti kusalesu dhammesu, anurakkhitabbo tāva me so, bhikkhave, bhikkhu hoti.
an5.7:2.2	Yato ca kho, bhikkhave, bhikkhuno saddhāya kataṁ hoti kusalesu dhammesu, hiriyā kataṁ hoti kusalesu dhammesu, ottappena kataṁ hoti kusalesu dhammesu, vīriyena kataṁ hoti kusalesu dhammesu, paññāya kataṁ hoti kusalesu dhammesu, anapekkho dānāhaṁ, bhikkhave, tasmiṁ bhikkhusmiṁ homi:
an5.7:2.3	‘attagutto dāni bhikkhu nālaṁ pamādāyā’”ti.
an5.7:2.4	Sattamaṁ.
an5.8:0.1	Aṅguttara Nikāya 5.8
an5.8:0.2	1. Sekhabalavagga
an5.8:0.3	Cavanasutta
an5.8:1.1	“Pañcahi, bhikkhave, dhammehi samannāgato bhikkhu cavati, nappatiṭṭhāti saddhamme.
an5.8:1.2	Katamehi pañcahi?
an5.8:1.3	Assaddho, bhikkhave, bhikkhu cavati, nappatiṭṭhāti saddhamme.
an5.8:1.4	Ahiriko, bhikkhave, bhikkhu cavati, nappatiṭṭhāti saddhamme.
an5.8:1.5	Anottappī, bhikkhave, bhikkhu cavati, nappatiṭṭhāti saddhamme.
an5.8:1.6	Kusīto, bhikkhave, bhikkhu cavati, nappatiṭṭhāti saddhamme.
an5.8:1.7	Duppañño, bhikkhave, bhikkhu cavati, nappatiṭṭhāti saddhamme.
an5.8:1.8	Imehi kho, bhikkhave, pañcahi dhammehi samannāgato bhikkhu cavati, nappatiṭṭhāti saddhamme.
an5.8:2.1	Pañcahi, bhikkhave, dhammehi samannāgato bhikkhu na cavati, patiṭṭhāti saddhamme.
an5.8:2.2	Katamehi pañcahi?
an5.8:2.3	Saddho, bhikkhave, bhikkhu na cavati, patiṭṭhāti saddhamme.
an5.8:2.4	Hirīmā, bhikkhave, bhikkhu na cavati, patiṭṭhāti saddhamme.
an5.8:2.5	Ottappī, bhikkhave, bhikkhu na cavati, patiṭṭhāti saddhamme.
an5.8:2.6	Āraddhavīriyo, bhikkhave, bhikkhu na cavati, patiṭṭhāti saddhamme.
an5.8:2.7	Paññavā, bhikkhave, bhikkhu na cavati, patiṭṭhāti saddhamme.
an5.8:2.8	Imehi kho, bhikkhave, pañcahi dhammehi samannāgato bhikkhu na cavati, patiṭṭhāti saddhamme”ti.
an5.8:2.9	Aṭṭhamaṁ.
an5.9:0.1	Aṅguttara Nikāya 5.9
an5.9:0.2	1. Sekhabalavagga
an5.9:0.3	Paṭhamaagāravasutta
an5.9:1.1	“Pañcahi, bhikkhave, dhammehi samannāgato bhikkhu agāravo appatisso cavati, nappatiṭṭhāti saddhamme.
an5.9:1.2	Katamehi pañcahi?
an5.9:1.3	Assaddho, bhikkhave, bhikkhu agāravo appatisso cavati, nappatiṭṭhāti saddhamme.
an5.9:1.4	Ahiriko, bhikkhave, bhikkhu agāravo appatisso cavati, nappatiṭṭhāti saddhamme.
an5.9:1.5	Anottappī, bhikkhave, bhikkhu agāravo appatisso cavati, nappatiṭṭhāti saddhamme.
an5.9:1.6	Kusīto, bhikkhave, bhikkhu agāravo appatisso cavati, nappatiṭṭhāti saddhamme.
an5.9:1.7	Duppañño, bhikkhave, bhikkhu agāravo appatisso cavati, nappatiṭṭhāti saddhamme.
an5.9:1.8	Imehi kho, bhikkhave, pañcahi dhammehi samannāgato bhikkhu agāravo appatisso cavati, nappatiṭṭhāti saddhamme.
an5.9:2.1	Pañcahi, bhikkhave, dhammehi samannāgato bhikkhu sagāravo sappatisso na cavati, patiṭṭhāti saddhamme.
an5.9:2.2	Katamehi pañcahi?
an5.9:2.3	Saddho, bhikkhave, bhikkhu sagāravo sappatisso na cavati, patiṭṭhāti saddhamme.
an5.9:2.4	Hirīmā, bhikkhave, bhikkhu sagāravo sappatisso na cavati, patiṭṭhāti saddhamme.
an5.9:2.5	Ottappī, bhikkhave, bhikkhu sagāravo sappatisso na cavati, patiṭṭhāti saddhamme.
an5.9:2.6	Āraddhavīriyo, bhikkhave, bhikkhu sagāravo sappatisso na cavati, patiṭṭhāti saddhamme.
an5.9:2.7	Paññavā, bhikkhave, bhikkhu sagāravo sappatisso na cavati, patiṭṭhāti saddhamme.
an5.9:2.8	Imehi kho, bhikkhave, pañcahi dhammehi samannāgato bhikkhu sagāravo sappatisso na cavati, patiṭṭhāti saddhamme”ti.
an5.9:2.9	Navamaṁ.
an5.10:0.1	Aṅguttara Nikāya 5.10
an5.10:0.2	1. Sekhabalavagga
an5.10:0.3	Dutiyaagāravasutta
an5.10:1.1	“Pañcahi, bhikkhave, dhammehi samannāgato bhikkhu agāravo appatisso abhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:1.2	Katamehi pañcahi?
an5.10:1.3	Assaddho, bhikkhave, bhikkhu agāravo appatisso abhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:1.4	Ahiriko, bhikkhave, bhikkhu agāravo appatisso abhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:1.5	Anottappī, bhikkhave, bhikkhu agāravo appatisso abhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:1.6	Kusīto, bhikkhave, bhikkhu agāravo appatisso abhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:1.7	Duppañño, bhikkhave, bhikkhu agāravo appatisso abhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:1.8	Imehi kho, bhikkhave, pañcahi dhammehi samannāgato bhikkhu agāravo appatisso abhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:2.1	Pañcahi, bhikkhave, dhammehi samannāgato bhikkhu sagāravo sappatisso bhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:2.2	Katamehi pañcahi?
an5.10:2.3	Saddho, bhikkhave, bhikkhu sagāravo sappatisso bhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:2.4	Hirīmā, bhikkhave, bhikkhu …pe… ottappī, bhikkhave, bhikkhu …pe… āraddhavīriyo, bhikkhave, bhikkhu …pe… paññavā, bhikkhave, bhikkhu sagāravo sappatisso bhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an5.10:2.5	Imehi kho, bhikkhave, pañcahi dhammehi samannāgato bhikkhu sagāravo sappatisso bhabbo imasmiṁ dhammavinaye vuddhiṁ virūḷhiṁ vepullaṁ āpajjitun”ti.
an5.10:2.6	Dasamaṁ.
an5.10:2.7	Sekhabalavaggo paṭhamo.
an5.10:3.0	Tassuddānaṁ
an5.10:3.1	Saṅkhittaṁ vitthataṁ dukkhā,
an5.10:3.2	bhataṁ sikkhāya pañcamaṁ;
an5.10:3.3	Samāpatti ca kāmesu,
an5.10:3.4	cavanā dve agāravāti.
an5.11:0.1	Aṅguttara Nikāya 5.11
an5.11:0.2	2. Balavagga
an5.11:0.3	Ananussutasutta
an5.11:1.1	“Pubbāhaṁ, bhikkhave, ananussutesu dhammesu abhiññāvosānapāramippatto paṭijānāmi.
an5.11:1.2	Pañcimāni, bhikkhave, tathāgatassa tathāgatabalāni, yehi balehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an5.11:1.3	Katamāni pañca?
an5.11:1.4	Saddhābalaṁ, hirībalaṁ, ottappabalaṁ, vīriyabalaṁ, paññābalaṁ—
an5.11:1.5	imāni kho, bhikkhave, pañca tathāgatassa tathāgatabalāni yehi balehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavattetī”ti.
an5.11:1.6	Paṭhamaṁ.
an5.12:0.1	Aṅguttara Nikāya 5.12
an5.12:0.2	2. Balavagga
an5.12:0.3	Kūṭasutta
an5.12:1.1	“Pañcimāni, bhikkhave, sekhabalāni.
an5.12:1.2	Katamāni pañca?
an5.12:1.3	Saddhābalaṁ, hirībalaṁ, ottappabalaṁ, vīriyabalaṁ, paññābalaṁ—
an5.12:1.4	imāni kho, bhikkhave, pañca sekhabalāni.
an5.12:1.5	Imesaṁ kho, bhikkhave, pañcannaṁ sekhabalānaṁ etaṁ aggaṁ etaṁ saṅgāhikaṁ etaṁ saṅghātaniyaṁ, yadidaṁ paññābalaṁ.
an5.12:2.1	Seyyathāpi, bhikkhave, kūṭāgārassa etaṁ aggaṁ etaṁ saṅgāhikaṁ etaṁ saṅghātaniyaṁ, yadidaṁ kūṭaṁ.
an5.12:2.2	Evamevaṁ kho, bhikkhave, imesaṁ pañcannaṁ sekhabalānaṁ etaṁ aggaṁ etaṁ saṅgāhikaṁ etaṁ saṅghātaniyaṁ, yadidaṁ paññābalaṁ.
an5.12:3.1	Tasmātiha, bhikkhave, evaṁ sikkhitabbaṁ:
an5.12:3.2	‘saddhābalena samannāgatā bhavissāma sekhabalena, hirībalena … ottappabalena … vīriyabalena … paññābalena samannāgatā bhavissāma sekhabalenā’ti.
an5.12:3.3	Evañhi vo, bhikkhave, sikkhitabban”ti.
an5.12:3.4	Dutiyaṁ.
an5.13:0.1	Aṅguttara Nikāya 5.13
an5.13:0.2	2. Balavagga
an5.13:0.3	Saṅkhittasutta
an5.13:1.1	“Pañcimāni, bhikkhave, balāni.
an5.13:1.2	Katamāni pañca?
an5.13:1.3	Saddhābalaṁ, vīriyabalaṁ, satibalaṁ, samādhibalaṁ, paññābalaṁ—
an5.13:1.4	imāni kho, bhikkhave, pañca balānī”ti.
an5.13:1.5	Tatiyaṁ.
an5.14:0.1	Aṅguttara Nikāya 5.14
an5.14:0.2	2. Balavagga
an5.14:0.3	Vitthatasutta
an5.14:1.1	“Pañcimāni, bhikkhave, balāni.
an5.14:1.2	Katamāni pañca?
an5.14:1.3	Saddhābalaṁ, vīriyabalaṁ, satibalaṁ, samādhibalaṁ, paññābalaṁ.
an5.14:2.1	Katamañca, bhikkhave, saddhābalaṁ?
an5.14:2.2	Idha, bhikkhave, ariyasāvako saddho hoti, saddahati tathāgatassa bodhiṁ:
an5.14:2.3	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an5.14:2.4	Idaṁ vuccati, bhikkhave, saddhābalaṁ.
an5.14:3.1	Katamañca, bhikkhave, vīriyabalaṁ?
an5.14:3.2	Idha, bhikkhave, ariyasāvako āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya thāmavā daḷhaparakkamo anikkhittadhuro kusalesu dhammesu.
an5.14:3.3	Idaṁ vuccati, bhikkhave, vīriyabalaṁ.
an5.14:4.1	Katamañca, bhikkhave, satibalaṁ?
an5.14:4.2	Idha, bhikkhave, ariyasāvako satimā hoti paramena satinepakkena samannāgato, cirakatampi cirabhāsitampi saritā anussaritā.
an5.14:4.3	Idaṁ vuccati, bhikkhave, satibalaṁ.
an5.14:5.1	Katamañca, bhikkhave, samādhibalaṁ?
an5.14:5.2	Idha, bhikkhave, ariyasāvako vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati;
an5.14:5.3	vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati;
an5.14:5.4	pītiyā ca virāgā upekkhako ca viharati sato ca sampajāno sukhañca kāyena paṭisaṁvedeti yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharati;
an5.14:5.5	sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
an5.14:5.6	Idaṁ vuccati, bhikkhave, samādhibalaṁ.
an5.14:6.1	Katamañca, bhikkhave, paññābalaṁ?
an5.14:6.2	Idha, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an5.14:6.3	Idaṁ vuccati, bhikkhave, paññābalaṁ.
an5.14:6.4	Imāni kho, bhikkhave, pañca balānī”ti.
an5.14:6.5	Catutthaṁ.
an5.15:0.1	Aṅguttara Nikāya 5.15
an5.15:0.2	2. Balavagga
an5.15:0.3	Daṭṭhabbasutta
an5.15:1.1	“Pañcimāni, bhikkhave, balāni.
an5.15:1.2	Katamāni pañca?
an5.15:1.3	Saddhābalaṁ, vīriyabalaṁ, satibalaṁ, samādhibalaṁ, paññābalaṁ.
an5.15:1.4	Kattha ca, bhikkhave, saddhābalaṁ daṭṭhabbaṁ?
an5.15:1.5	Catūsu sotāpattiyaṅgesu.
an5.15:1.6	Ettha saddhābalaṁ daṭṭhabbaṁ.
an5.15:1.7	Kattha ca, bhikkhave, vīriyabalaṁ daṭṭhabbaṁ?
an5.15:1.8	Catūsu sammappadhānesu.
an5.15:1.9	Ettha vīriyabalaṁ daṭṭhabbaṁ.
an5.15:1.10	Kattha ca, bhikkhave, satibalaṁ daṭṭhabbaṁ?
an5.15:1.11	Catūsu satipaṭṭhānesu.
an5.15:1.12	Ettha satibalaṁ daṭṭhabbaṁ.
an5.15:1.13	Kattha ca, bhikkhave, samādhibalaṁ daṭṭhabbaṁ?
an5.15:1.14	Catūsu jhānesu.
an5.15:1.15	Ettha samādhibalaṁ daṭṭhabbaṁ.
an5.15:1.16	Kattha ca, bhikkhave, paññābalaṁ daṭṭhabbaṁ?
an5.15:1.17	Catūsu ariyasaccesu.
an5.15:1.18	Ettha paññābalaṁ daṭṭhabbaṁ.
an5.15:1.19	Imāni kho, bhikkhave, pañca balānī”ti.
an5.15:1.20	Pañcamaṁ.
an5.16:0.1	Aṅguttara Nikāya 5.16
an5.16:0.2	2. Balavagga
an5.16:0.3	Punakūṭasutta
an5.16:1.1	“Pañcimāni, bhikkhave, balāni.
an5.16:1.2	Katamāni pañca?
an5.16:1.3	Saddhābalaṁ, vīriyabalaṁ, satibalaṁ, samādhibalaṁ, paññābalaṁ—
an5.16:1.4	imāni kho, bhikkhave, pañca balāni.
an5.16:1.5	Imesaṁ kho, bhikkhave, pañcannaṁ balānaṁ etaṁ aggaṁ etaṁ saṅgāhikaṁ etaṁ saṅghātaniyaṁ, yadidaṁ paññābalaṁ.
an5.16:1.6	Seyyathāpi, bhikkhave, kūṭāgārassa etaṁ aggaṁ etaṁ saṅgāhikaṁ etaṁ saṅghātaniyaṁ, yadidaṁ kūṭaṁ.
an5.16:1.7	Evamevaṁ kho, bhikkhave, imesaṁ pañcannaṁ balānaṁ etaṁ aggaṁ etaṁ saṅgāhikaṁ etaṁ saṅghātaniyaṁ, yadidaṁ paññābalan”ti.
an5.16:1.8	Chaṭṭhaṁ.
an5.17:0.1	Aṅguttara Nikāya 5.17
an5.17:0.2	2. Balavagga
an5.17:0.3	Paṭhamahitasutta
an5.17:1.1	“Pañcahi, bhikkhave, dhammehi samannāgato bhikkhu attahitāya paṭipanno hoti, no parahitāya.
an5.17:1.2	Katamehi pañcahi?
an5.17:1.3	Idha, bhikkhave, bhikkhu attanā sīlasampanno hoti, no paraṁ sīlasampadāya samādapeti;
an5.17:1.4	attanā samādhisampanno hoti, no paraṁ samādhisampadāya samādapeti;
an5.17:1.5	attanā paññāsampanno hoti, no paraṁ paññāsampadāya samādapeti;
an5.17:1.6	attanā vimuttisampanno hoti, no paraṁ vimuttisampadāya samādapeti;
an5.17:1.7	attanā vimuttiñāṇadassanasampanno hoti, no paraṁ vimuttiñāṇadassanasampadāya samādapeti.
an5.17:1.8	Imehi kho, bhikkhave, pañcahi aṅgehi samannāgato bhikkhu attahitāya paṭipanno hoti, no parahitāyā”ti.
an5.17:1.9	Sattamaṁ.
an5.18:0.1	Aṅguttara Nikāya 5.18
an5.18:0.2	2. Balavagga
an5.18:0.3	Dutiyahitasutta
an5.18:1.1	“Pañcahi, bhikkhave, dhammehi samannāgato bhikkhu parahitāya paṭipanno hoti, no attahitāya.
an5.18:1.2	Katamehi pañcahi?
an5.18:1.3	Idha, bhikkhave, bhikkhu attanā na sīlasampanno hoti, paraṁ sīlasampadāya samādapeti;
an5.18:1.4	attanā na samādhisampanno hoti, paraṁ samādhisampadāya samādapeti;
an5.18:1.5	attanā na paññāsampanno hoti, paraṁ paññāsampadāya samādapeti;
an5.18:1.6	attanā na vimuttisampanno hoti, paraṁ vimuttisampadāya samādapeti;
an5.18:1.7	attanā na vimuttiñāṇadassanasampanno hoti, paraṁ vimuttiñāṇadassanasampadāya samādapeti.
an5.18:1.8	Imehi kho, bhikkhave, pañcahi dhammehi samannāgato bhikkhu parahitāya paṭipanno hoti, no attahitāyā”ti.
an5.18:1.9	Aṭṭhamaṁ.
an5.19:0.1	Aṅguttara Nikāya 5.19
an5.19:0.2	2. Balavagga
an5.19:0.3	Tatiyahitasutta
an5.19:1.1	“Pañcahi, bhikkhave, dhammehi samannāgato bhikkhu neva attahitāya paṭipanno hoti, no parahitāya.
an5.19:1.2	Katamehi pañcahi?
an5.19:1.3	Idha, bhikkhave, bhikkhu attanā na sīlasampanno hoti, no paraṁ sīlasampadāya samādapeti;
an5.19:1.4	attanā na samādhisampanno hoti, no paraṁ samādhisampadāya samādapeti;
an5.19:1.5	attanā na paññāsampanno hoti, no paraṁ paññāsampadāya samādapeti;
an5.19:1.6	attanā na vimuttisampanno hoti, no paraṁ vimuttisampadāya samādapeti;
an5.19:1.7	attanā na vimuttiñāṇadassanasampanno hoti, no paraṁ vimuttiñāṇadassanasampadāya samādapeti.
an5.19:1.8	Imehi kho, bhikkhave, pañcahi dhammehi samannāgato bhikkhu neva attahitāya paṭipanno hoti, no parahitāyā”ti.
an5.19:1.9	Navamaṁ.
an5.20:0.1	Aṅguttara Nikāya 5.20
an5.20:0.2	2. Balavagga
an5.20:0.3	Catutthahitasutta
an5.20:1.1	“Pañcahi, bhikkhave, dhammehi samannāgato bhikkhu attahitāya ca paṭipanno hoti parahitāya ca.
an5.20:1.2	Katamehi pañcahi?
an5.20:1.3	Idha, bhikkhave, bhikkhu attanā ca sīlasampanno hoti, parañca sīlasampadāya samādapeti;
an5.20:1.4	attanā ca samādhisampanno hoti, parañca samādhisampadāya samādapeti, attanā ca paññāsampanno hoti, parañca paññāsampadāya samādapeti;
an5.20:1.5	attanā ca vimuttisampanno hoti, parañca vimuttisampadāya samādapeti;
an5.20:1.6	attanā ca vimuttiñāṇadassanasampanno hoti, parañca vimuttiñāṇadassanasampadāya samādapeti.
an5.20:1.7	Imehi kho, bhikkhave, pañcahi dhammehi samannāgato bhikkhu attahitāya ca paṭipanno hoti parahitāya cā”ti.
an5.20:1.8	Dasamaṁ.
an5.20:1.9	Balavaggo dutiyo.
an5.20:2.0	Tassuddānaṁ
an5.20:2.1	Ananussutakūṭañca,
an5.20:2.2	saṅkhittaṁ vitthatena ca;
an5.20:2.3	Daṭṭhabbañca puna kūṭaṁ,
an5.20:2.4	cattāropi hitena cāti.
an5.21:0.1	Aṅguttara Nikāya 5.21
an5.21:0.2	3. Pañcaṅgikavagga
an5.21:0.3	Paṭhamaagāravasutta
an5.21:1.1	“So vata, bhikkhave, bhikkhu agāravo appatisso asabhāgavuttiko ‘sabrahmacārīsu ābhisamācārikaṁ dhammaṁ paripūressatī’ti netaṁ ṭhānaṁ vijjati.
an5.21:1.2	‘Ābhisamācārikaṁ dhammaṁ aparipūretvā sekhaṁ dhammaṁ paripūressatī’ti netaṁ ṭhānaṁ vijjati.
an5.21:1.3	‘Sekhaṁ dhammaṁ aparipūretvā sīlāni paripūressatī’ti netaṁ ṭhānaṁ vijjati.
an5.21:1.4	‘Sīlāni aparipūretvā sammādiṭṭhiṁ paripūressatī’ti netaṁ ṭhānaṁ vijjati.
an5.21:1.5	‘Sammādiṭṭhiṁ aparipūretvā sammāsamādhiṁ paripūressatī’ti netaṁ ṭhānaṁ vijjati.
an5.21:2.1	So vata, bhikkhave, bhikkhu sagāravo sappatisso sabhāgavuttiko ‘sabrahmacārīsu ābhisamācārikaṁ dhammaṁ paripūressatī’ti ṭhānametaṁ vijjati.
an5.21:2.2	‘Ābhisamācārikaṁ dhammaṁ paripūretvā sekhaṁ dhammaṁ paripūressatī’ti ṭhānametaṁ vijjati.
an5.21:2.3	‘Sekhaṁ dhammaṁ paripūretvā sīlāni paripūressatī’ti ṭhānametaṁ vijjati.
an5.21:2.4	‘Sīlāni paripūretvā sammādiṭṭhiṁ paripūressatī’ti ṭhānametaṁ vijjati.
an5.21:2.5	‘Sammādiṭṭhiṁ paripūretvā sammāsamādhiṁ paripūressatī’ti ṭhānametaṁ vijjatī”ti.
an5.21:2.6	Paṭhamaṁ.
an5.22:0.1	Aṅguttara Nikāya 5.22
an5.22:0.2	3. Pañcaṅgikavagga
an5.22:0.3	Dutiyaagāravasutta
an5.22:1.1	“So vata, bhikkhave, bhikkhu agāravo appatisso asabhāgavuttiko ‘sabrahmacārīsu ābhisamācārikaṁ dhammaṁ paripūressatī’ti netaṁ ṭhānaṁ vijjati.
an5.22:1.2	‘Ābhisamācārikaṁ dhammaṁ aparipūretvā sekhaṁ dhammaṁ paripūressatī’ti netaṁ ṭhānaṁ vijjati.
an5.22:1.3	‘Sekhaṁ dhammaṁ aparipūretvā sīlakkhandhaṁ paripūressatī’ti netaṁ ṭhānaṁ vijjati.
an5.22:1.4	‘Sīlakkhandhaṁ aparipūretvā samādhikkhandhaṁ paripūressatī’ti netaṁ ṭhānaṁ vijjati.
an5.22:1.5	‘Samādhikkhandhaṁ aparipūretvā paññākkhandhaṁ paripūressatī’ti netaṁ ṭhānaṁ vijjati.
an5.22:2.1	So vata, bhikkhave, bhikkhu sagāravo sappatisso sabhāgavuttiko ‘sabrahmacārīsu ābhisamācārikaṁ dhammaṁ paripūressatī’ti ṭhānametaṁ vijjati.
an5.22:2.2	‘Ābhisamācārikaṁ dhammaṁ paripūretvā sekhaṁ dhammaṁ paripūressatī’ti ṭhānametaṁ vijjati.
an5.22:2.3	‘Sekhaṁ dhammaṁ paripūretvā sīlakkhandhaṁ paripūressatī’ti ṭhānametaṁ vijjati.
an5.22:2.4	‘Sīlakkhandhaṁ paripūretvā samādhikkhandhaṁ paripūressatī’ti ṭhānametaṁ vijjati.
an5.22:2.5	‘Samādhikkhandhaṁ paripūretvā paññākkhandhaṁ paripūressatī’ti ṭhānametaṁ vijjatī”ti.
an5.22:2.6	Dutiyaṁ.
an5.23:0.1	Aṅguttara Nikāya 5.23
an5.23:0.2	3. Pañcaṅgikavagga
an5.23:0.3	Upakkilesasutta
an5.23:1.1	“Pañcime, bhikkhave, jātarūpassa upakkilesā, yehi upakkilesehi upakkiliṭṭhaṁ jātarūpaṁ na ceva mudu hoti na ca kammaniyaṁ na ca pabhassaraṁ pabhaṅgu ca na ca sammā upeti kammāya.
an5.23:1.2	Katame pañca?
an5.23:1.3	Ayo, lohaṁ, tipu, sīsaṁ, sajjhaṁ—
an5.23:1.4	ime kho, bhikkhave, pañca jātarūpassa upakkilesā, yehi upakkilesehi upakkiliṭṭhaṁ jātarūpaṁ na ceva mudu hoti na ca kammaniyaṁ na ca pabhassaraṁ pabhaṅgu ca na ca sammā upeti kammāya.
an5.23:1.5	Yato ca kho, bhikkhave, jātarūpaṁ imehi pañcahi upakkilesehi vimuttaṁ hoti, taṁ hoti jātarūpaṁ mudu ca kammaniyañca pabhassarañca na ca pabhaṅgu sammā upeti kammāya.
an5.23:1.6	Yassā yassā ca piḷandhanavikatiyā ākaṅkhati—yadi muddikāya yadi kuṇḍalāya yadi gīveyyakāya yadi suvaṇṇamālāya—tañcassa atthaṁ anubhoti.
an5.23:2.1	Evamevaṁ kho, bhikkhave, pañcime cittassa upakkilesā, yehi upakkilesehi upakkiliṭṭhaṁ cittaṁ na ceva mudu hoti na ca kammaniyaṁ na ca pabhassaraṁ pabhaṅgu ca na ca sammā samādhiyati āsavānaṁ khayāya.
an5.23:2.2	Katame pañca?
an5.23:2.3	Kāmacchando, byāpādo, thinamiddhaṁ, uddhaccakukkuccaṁ, vicikicchā—
an5.23:2.4	ime kho, bhikkhave, pañca cittassa upakkilesā yehi upakkilesehi upakkiliṭṭhaṁ cittaṁ na ceva mudu hoti na ca kammaniyaṁ na ca pabhassaraṁ pabhaṅgu ca na ca sammā samādhiyati āsavānaṁ khayāya.
an5.23:2.5	Yato ca kho, bhikkhave, cittaṁ imehi pañcahi upakkilesehi vimuttaṁ hoti, taṁ hoti cittaṁ mudu ca kammaniyañca pabhassarañca na ca pabhaṅgu sammā samādhiyati āsavānaṁ khayāya.
an5.23:2.6	Yassa yassa ca abhiññāsacchikaraṇīyassa dhammassa cittaṁ abhininnāmeti abhiññāsacchikiriyāya tatra tatreva sakkhibhabbataṁ pāpuṇāti sati sati āyatane.
an5.23:3.1	So sace ākaṅkhati: ‘anekavihitaṁ iddhividhaṁ paccanubhaveyyaṁ—ekopi hutvā bahudhā assaṁ, bahudhāpi hutvā eko assaṁ; āvibhāvaṁ, tirobhāvaṁ; tirokuṭṭaṁ tiropākāraṁ tiropabbataṁ asajjamāno gaccheyyaṁ, seyyathāpi ākāse; pathaviyāpi ummujjanimujjaṁ kareyyaṁ, seyyathāpi udake; udakepi abhijjamāno gaccheyyaṁ, seyyathāpi pathaviyaṁ; ākāsepi pallaṅkena kameyyaṁ, seyyathāpi pakkhī sakuṇo; imepi candimasūriye evaṁmahiddhike evaṁmahānubhāve pāṇinā parimaseyyaṁ parimajjeyyaṁ yāva brahmalokāpi kāyena vasaṁ vatteyyan’ti,
an5.23:3.2	tatra tatreva sakkhibhabbataṁ pāpuṇāti sati sati āyatane.
an5.23:4.1	So sace ākaṅkhati: ‘dibbāya sotadhātuyā visuddhāya atikkantamānusikāya ubho sadde suṇeyyaṁ—dibbe ca mānuse ca ye dūre santike cā’ti,
an5.23:4.2	tatra tatreva sakkhibhabbataṁ pāpuṇāti sati sati āyatane.
an5.23:5.1	So sace ākaṅkhati: ‘parasattānaṁ parapuggalānaṁ cetasā ceto paricca pajāneyyaṁ—
an5.23:5.2	sarāgaṁ vā cittaṁ sarāgaṁ cittanti pajāneyyaṁ,
an5.23:5.3	vītarāgaṁ vā cittaṁ vītarāgaṁ cittanti pajāneyyaṁ,
an5.23:5.4	sadosaṁ vā cittaṁ sadosaṁ cittanti pajāneyyaṁ,
an5.23:5.5	vītadosaṁ vā cittaṁ vītadosaṁ cittanti pajāneyyaṁ,
an5.23:5.6	samohaṁ vā cittaṁ samohaṁ cittanti pajāneyyaṁ,
an5.23:5.7	vītamohaṁ vā cittaṁ vītamohaṁ cittanti pajāneyyaṁ,
an5.23:5.8	saṅkhittaṁ vā cittaṁ saṅkhittaṁ cittanti pajāneyyaṁ,
an5.23:5.9	vikkhittaṁ vā cittaṁ vikkhittaṁ cittanti pajāneyyaṁ,
an5.23:5.10	mahaggataṁ vā cittaṁ mahaggataṁ cittanti pajāneyyaṁ,
an5.23:5.11	amahaggataṁ vā cittaṁ amahaggataṁ cittanti pajāneyyaṁ,
an5.23:5.12	sauttaraṁ vā cittaṁ sauttaraṁ cittanti pajāneyyaṁ,
an5.23:5.13	anuttaraṁ vā cittaṁ anuttaraṁ cittanti pajāneyyaṁ,
an5.23:5.14	samāhitaṁ vā cittaṁ samāhitaṁ cittanti pajāneyyaṁ,
an5.23:5.15	asamāhitaṁ vā cittaṁ asamāhitaṁ cittanti pajāneyyaṁ,
an5.23:5.16	vimuttaṁ vā cittaṁ vimuttaṁ cittanti pajāneyyaṁ,
an5.23:5.17	avimuttaṁ vā cittaṁ avimuttaṁ cittanti pajāneyyan’ti,
an5.23:5.18	tatra tatreva sakkhibhabbataṁ pāpuṇāti sati sati āyatane.
an5.23:6.1	So sace ākaṅkhati: ‘anekavihitaṁ pubbenivāsaṁ anussareyyaṁ, seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattārīsampi jātiyo paññāsampi jātiyo jātisatampi jātisahassampi jātisatasahassampi anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe—amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto amutra udapādiṁ; tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto idhūpapannoti, iti sākāraṁ sauddesaṁ anekavihitaṁ pubbenivāsaṁ anussareyyan’ti,
an5.23:6.2	tatra tatreva sakkhibhabbataṁ pāpuṇāti sati sati āyatane.
an5.23:7.1	So sace ākaṅkhati: ‘dibbena cakkhunā visuddhena atikkantamānusakena satte passeyyaṁ cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajāneyyaṁ—ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā; ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā, te kāyassa bhedā paraṁ maraṇā sugatiṁ saggaṁ lokaṁ upapannāti, iti dibbena cakkhunā visuddhena atikkantamānusakena satte passeyyaṁ cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajāneyyan’ti,
an5.23:7.2	tatra tatreva sakkhibhabbataṁ pāpuṇāti sati sati āyatane.
an5.23:8.1	So sace ākaṅkhati: ‘āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti,
an5.23:8.2	tatra tatreva sakkhibhabbataṁ pāpuṇāti sati sati āyatane”ti.
an5.23:8.3	Tatiyaṁ.
an5.24:0.1	Aṅguttara Nikāya 5.24
an5.24:0.2	3. Pañcaṅgikavagga
an5.24:0.3	Dussīlasutta
an5.24:1.1	“Dussīlassa, bhikkhave, sīlavipannassa hatūpaniso hoti sammāsamādhi;
an5.24:1.2	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ;
an5.24:1.3	yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo;
an5.24:1.4	nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an5.24:1.5	Seyyathāpi, bhikkhave, rukkho sākhāpalāsavipanno.
an5.24:1.6	Tassa papaṭikāpi na pāripūriṁ gacchati, tacopi na pāripūriṁ gacchati, pheggupi na pāripūriṁ gacchati, sāropi na pāripūriṁ gacchati;
an5.24:1.7	evamevaṁ kho, bhikkhave, dussīlassa sīlavipannassa hatūpaniso hoti sammāsamādhi;
an5.24:1.8	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ;
an5.24:1.9	yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo;
an5.24:1.10	nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an5.24:2.1	Sīlavato, bhikkhave, sīlasampannassa upanisasampanno hoti sammāsamādhi;
an5.24:2.2	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ;
an5.24:2.3	yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo;
an5.24:2.4	nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanaṁ.
an5.24:2.5	Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṁ gacchati, tacopi pāripūriṁ gacchati, pheggupi pāripūriṁ gacchati, sāropi pāripūriṁ gacchati;
an5.24:2.6	evamevaṁ kho, bhikkhave, sīlavato sīlasampannassa upanisasampanno hoti sammāsamādhi;
an5.24:2.7	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ;
an5.24:2.8	yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo;
an5.24:2.9	nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanan”ti.
an5.24:2.10	Catutthaṁ.
an5.25:0.1	Aṅguttara Nikāya 5.25
an5.25:0.2	3. Pañcaṅgikavagga
an5.25:0.3	Anuggahitasutta
an5.25:1.1	“Pañcahi, bhikkhave, aṅgehi anuggahitā sammādiṭṭhi cetovimuttiphalā ca hoti cetovimuttiphalānisaṁsā ca, paññāvimuttiphalā ca hoti paññāvimuttiphalānisaṁsā ca.
an5.25:2.1	Katamehi pañcahi?
an5.25:2.2	Idha, bhikkhave, sammādiṭṭhi sīlānuggahitā ca hoti, sutānuggahitā ca hoti, sākacchānuggahitā ca hoti, samathānuggahitā ca hoti, vipassanānuggahitā ca hoti.
an5.25:2.3	Imehi kho, bhikkhave, pañcahi aṅgehi anuggahitā sammādiṭṭhi cetovimuttiphalā ca hoti cetovimuttiphalānisaṁsā ca, paññāvimuttiphalā ca hoti paññāvimuttiphalānisaṁsā cā”ti.
an5.25:2.4	Pañcamaṁ.
an5.26:0.1	Aṅguttara Nikāya 5.26
an5.26:0.2	3. Pañcaṅgikavagga
an5.26:0.3	Vimuttāyatanasutta
an5.26:1.1	“Pañcimāni, bhikkhave, vimuttāyatanāni yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇāti.
an5.26:2.1	Katamāni pañca?
an5.26:2.2	Idha, bhikkhave, bhikkhuno satthā dhammaṁ deseti aññataro vā garuṭṭhāniyo sabrahmacārī.
an5.26:2.3	Yathā yathā, bhikkhave, tassa bhikkhuno satthā dhammaṁ deseti, aññataro vā garuṭṭhāniyo sabrahmacārī tathā tathā so tasmiṁ dhamme atthapaṭisaṁvedī ca hoti dhammapaṭisaṁvedī ca.
an5.26:2.4	Tassa atthapaṭisaṁvedino dhammapaṭisaṁvedino pāmojjaṁ jāyati.
an5.26:2.5	Pamuditassa pīti jāyati.
an5.26:2.6	Pītimanassa kāyo passambhati.
an5.26:2.7	Passaddhakāyo sukhaṁ vedeti.
an5.26:2.8	Sukhino cittaṁ samādhiyati.
an5.26:2.9	Idaṁ, bhikkhave, paṭhamaṁ vimuttāyatanaṁ yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇāti.
an5.26:3.1	Puna caparaṁ, bhikkhave, bhikkhuno na heva kho satthā dhammaṁ deseti, aññataro vā garuṭṭhāniyo sabrahmacārī, api ca kho yathāsutaṁ yathāpariyattaṁ dhammaṁ vitthārena paresaṁ deseti.
an5.26:3.2	Yathā yathā, bhikkhave, bhikkhu yathāsutaṁ yathāpariyattaṁ dhammaṁ vitthārena paresaṁ deseti tathā tathā so tasmiṁ dhamme atthapaṭisaṁvedī ca hoti dhammapaṭisaṁvedī ca.
an5.26:3.3	Tassa atthapaṭisaṁvedino dhammapaṭisaṁvedino pāmojjaṁ jāyati.
an5.26:3.4	Pamuditassa pīti jāyati.
an5.26:3.5	Pītimanassa kāyo passambhati.
an5.26:3.6	Passaddhakāyo sukhaṁ vedeti.
an5.26:3.7	Sukhino cittaṁ samādhiyati.
an5.26:3.8	Idaṁ, bhikkhave, dutiyaṁ vimuttāyatanaṁ yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇāti.
an5.26:4.1	Puna caparaṁ, bhikkhave, bhikkhuno na heva kho satthā dhammaṁ deseti, aññataro vā garuṭṭhāniyo sabrahmacārī, nāpi yathāsutaṁ yathāpariyattaṁ dhammaṁ vitthārena paresaṁ deseti, api ca kho yathāsutaṁ yathāpariyattaṁ dhammaṁ vitthārena sajjhāyaṁ karoti.
an5.26:4.2	Yathā yathā, bhikkhave, bhikkhu yathāsutaṁ yathāpariyattaṁ dhammaṁ vitthārena sajjhāyaṁ karoti tathā tathā so tasmiṁ dhamme atthapaṭisaṁvedī ca hoti dhammapaṭisaṁvedī ca.
an5.26:4.3	Tassa atthapaṭisaṁvedino dhammapaṭisaṁvedino pāmojjaṁ jāyati.
an5.26:4.4	Pamuditassa pīti jāyati.
an5.26:4.5	Pītimanassa kāyo passambhati.
an5.26:4.6	Passaddhakāyo sukhaṁ vedeti.
an5.26:4.7	Sukhino cittaṁ samādhiyati.
an5.26:4.8	Idaṁ, bhikkhave, tatiyaṁ vimuttāyatanaṁ yattha bhikkhuno appamattassa ātāpino …pe… yogakkhemaṁ anupāpuṇāti.
an5.26:5.1	Puna caparaṁ, bhikkhave, bhikkhuno na heva kho satthā dhammaṁ deseti, aññataro vā garuṭṭhāniyo sabrahmacārī, nāpi yathāsutaṁ yathāpariyattaṁ dhammaṁ vitthārena paresaṁ deseti, nāpi yathāsutaṁ yathāpariyattaṁ dhammaṁ vitthārena sajjhāyaṁ karoti;
an5.26:5.2	api ca kho yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati.
an5.26:5.3	Yathā yathā, bhikkhave, bhikkhu yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati tathā tathā so tasmiṁ dhamme atthapaṭisaṁvedī ca hoti dhammapaṭisaṁvedī ca.
an5.26:5.4	Tassa atthapaṭisaṁvedino dhammapaṭisaṁvedino pāmojjaṁ jāyati.
an5.26:5.5	Pamuditassa pīti jāyati.
an5.26:5.6	Pītimanassa kāyo passambhati.
an5.26:5.7	Passaddhakāyo sukhaṁ vedeti.
an5.26:5.8	Sukhino cittaṁ samādhiyati.
an5.26:5.9	Idaṁ, bhikkhave, catutthaṁ vimuttāyatanaṁ yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇāti.
an5.26:6.1	Puna caparaṁ, bhikkhave, bhikkhuno na heva kho satthā dhammaṁ deseti aññataro vā garuṭṭhāniyo sabrahmacārī, nāpi yathāsutaṁ yathāpariyattaṁ dhammaṁ vitthārena paresaṁ deseti, nāpi yathāsutaṁ yathāpariyattaṁ dhammaṁ vitthārena sajjhāyaṁ karoti, nāpi yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati;
an5.26:6.2	api ca khvassa aññataraṁ samādhinimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya.
an5.26:6.3	Yathā yathā, bhikkhave, bhikkhuno aññataraṁ samādhinimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya tathā tathā so tasmiṁ dhamme atthapaṭisaṁvedī ca hoti dhammapaṭisaṁvedī ca.
an5.26:6.4	Tassa atthapaṭisaṁvedino dhammapaṭisaṁvedino pāmojjaṁ jāyati.
an5.26:6.5	Pamuditassa pīti jāyati.
an5.26:6.6	Pītimanassa kāyo passambhati.
an5.26:6.7	Passaddhakāyo sukhaṁ vedeti.
an5.26:6.8	Sukhino cittaṁ samādhiyati.
an5.26:6.9	Idaṁ, bhikkhave, pañcamaṁ vimuttāyatanaṁ yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇāti.
an5.26:7.1	Imāni kho, bhikkhave, pañca vimuttāyatanāni yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇātī”ti.
an5.26:7.2	Chaṭṭhaṁ.
an5.27:0.1	Aṅguttara Nikāya 5.27
an5.27:0.2	3. Pañcaṅgikavagga
an5.27:0.3	Samādhisutta
an5.27:1.1	“Samādhiṁ, bhikkhave, bhāvetha appamāṇaṁ nipakā patissatā.
an5.27:1.2	Samādhiṁ, bhikkhave, bhāvayataṁ appamāṇaṁ nipakānaṁ patissatānaṁ pañca ñāṇāni paccattaññeva uppajjanti.
an5.27:1.3	Katamāni pañca?
an5.27:1.4	‘Ayaṁ samādhi paccuppannasukho ceva āyatiñca sukhavipāko’ti paccattaññeva ñāṇaṁ uppajjati,
an5.27:1.5	‘ayaṁ samādhi ariyo nirāmiso’ti paccattaññeva ñāṇaṁ uppajjati,
an5.27:1.6	‘ayaṁ samādhi akāpurisasevito’ti paccattaññeva ñāṇaṁ uppajjati,
an5.27:1.7	‘ayaṁ samādhi santo paṇīto paṭippassaddhaladdho ekodibhāvādhigato, na sasaṅkhāraniggayhavāritagato’ti paccattaññeva ñāṇaṁ uppajjati,
an5.27:1.8	‘sato kho panāhaṁ imaṁ samāpajjāmi sato vuṭṭhahāmī’ti paccattaññeva ñāṇaṁ uppajjati.
an5.27:2.1	Samādhiṁ, bhikkhave, bhāvetha appamāṇaṁ nipakā patissatā.
an5.27:2.2	Samādhiṁ, bhikkhave, bhāvayataṁ appamāṇaṁ nipakānaṁ patissatānaṁ imāni pañca ñāṇāni paccattaññeva uppajjantī”ti.
an5.27:2.3	Sattamaṁ.
an5.28:0.1	Aṅguttara Nikāya 5.28
an5.28:0.2	3. Pañcaṅgikavagga
an5.28:0.3	Pañcaṅgikasutta
an5.28:1.1	“Ariyassa, bhikkhave, pañcaṅgikassa sammāsamādhissa bhāvanaṁ desessāmi.
an5.28:1.2	Taṁ suṇātha, sādhukaṁ manasi karotha, bhāsissāmī”ti.
an5.28:1.3	“Evaṁ, bhante”ti kho te bhikkhū bhagavato paccassosuṁ.
an5.28:1.4	Bhagavā etadavoca:
an5.28:2.1	“Katamā ca, bhikkhave, ariyassa pañcaṅgikassa sammāsamādhissa bhāvanā?
an5.28:2.2	Idha, bhikkhave, bhikkhu vivicceva kāmehi …pe… paṭhamaṁ jhānaṁ upasampajja viharati.
an5.28:2.3	So imameva kāyaṁ vivekajena pītisukhena abhisandeti parisandeti paripūreti parippharati; nāssa kiñci sabbāvato kāyassa vivekajena pītisukhena apphuṭaṁ hoti.
an5.28:2.4	Seyyathāpi, bhikkhave, dakkho nhāpako vā nhāpakantevāsī vā kaṁsathāle nhānīyacuṇṇāni ākiritvā udakena paripphosakaṁ paripphosakaṁ sanneyya. Sāyaṁ nhānīyapiṇḍi snehānugatā snehaparetā santarabāhirā phuṭā snehena, na ca paggharinī.
an5.28:2.5	Evamevaṁ kho, bhikkhave, bhikkhu imameva kāyaṁ vivekajena pītisukhena abhisandeti parisandeti paripūreti parippharati;
an5.28:2.6	nāssa kiñci sabbāvato kāyassa vivekajena pītisukhena apphuṭaṁ hoti.
an5.28:2.7	Ariyassa, bhikkhave, pañcaṅgikassa sammāsamādhissa ayaṁ paṭhamā bhāvanā.
an5.28:3.1	Puna caparaṁ, bhikkhave, bhikkhu vitakkavicārānaṁ vūpasamā …pe… dutiyaṁ jhānaṁ upasampajja viharati.
an5.28:3.2	So imameva kāyaṁ samādhijena pītisukhena abhisandeti parisandeti paripūreti parippharati;
an5.28:3.3	nāssa kiñci sabbāvato kāyassa samādhijena pītisukhena apphuṭaṁ hoti.
an5.28:3.4	Seyyathāpi, bhikkhave, udakarahado gambhīro ubbhidodako. Tassa nevassa puratthimāya disāya udakassa āyamukhaṁ, na pacchimāya disāya udakassa āyamukhaṁ, na uttarāya disāya udakassa āyamukhaṁ, na dakkhiṇāya disāya udakassa āyamukhaṁ, devo ca kālena kālaṁ sammā dhāraṁ nānuppaveccheyya.
an5.28:3.5	Atha kho tamhāva udakarahadā sītā vāridhārā ubbhijjitvā tameva udakarahadaṁ sītena vārinā abhisandeyya parisandeyya paripūreyya paripphareyya; nāssa kiñci sabbāvato udakarahadassa sītena vārinā apphuṭaṁ assa.
an5.28:3.6	Evamevaṁ kho, bhikkhave, bhikkhu imameva kāyaṁ samādhijena pītisukhena abhisandeti parisandeti paripūreti parippharati;
an5.28:3.7	nāssa kiñci sabbāvato kāyassa samādhijena pītisukhena apphuṭaṁ hoti.
an5.28:3.8	Ariyassa, bhikkhave, pañcaṅgikassa sammāsamādhissa ayaṁ dutiyā bhāvanā.
an5.28:4.1	Puna caparaṁ, bhikkhave, bhikkhu pītiyā ca virāgā …pe… tatiyaṁ jhānaṁ upasampajja viharati.
an5.28:4.2	So imameva kāyaṁ nippītikena sukhena abhisandeti parisandeti paripūreti parippharati;
an5.28:4.3	nāssa kiñci sabbāvato kāyassa nippītikena sukhena apphuṭaṁ hoti.
an5.28:4.4	Seyyathāpi, bhikkhave, uppaliniyaṁ vā paduminiyaṁ vā puṇḍarīkiniyaṁ vā appekaccāni uppalāni vā padumāni vā puṇḍarīkāni vā udake jātāni udake saṁvaḍḍhāni udakānuggatāni anto nimuggaposīni.
an5.28:4.5	Tāni yāva caggā yāva ca mūlā sītena vārinā abhisannāni parisannāni paripūrāni paripphuṭāni;
an5.28:4.6	nāssa kiñci sabbāvataṁ uppalānaṁ vā padumānaṁ vā puṇḍarīkānaṁ vā sītena vārinā apphuṭaṁ assa.
an5.28:4.7	Evamevaṁ kho, bhikkhave, bhikkhu imameva kāyaṁ nippītikena sukhena abhisandeti parisandeti paripūreti parippharati;
an5.28:4.8	nāssa kiñci sabbāvato kāyassa nippītikena sukhena apphuṭaṁ hoti.
an5.28:4.9	Ariyassa, bhikkhave, pañcaṅgikassa sammāsamādhissa ayaṁ tatiyā bhāvanā.
an5.28:5.1	Puna caparaṁ, bhikkhave, bhikkhu sukhassa ca pahānā …pe… catutthaṁ jhānaṁ upasampajja viharati.
an5.28:5.2	So imameva kāyaṁ parisuddhena cetasā pariyodātena pharitvā nisinno hoti;
an5.28:5.3	nāssa kiñci sabbāvato kāyassa parisuddhena cetasā pariyodātena apphuṭaṁ hoti.
an5.28:5.4	Seyyathāpi, bhikkhave, puriso odātena vatthena sasīsaṁ pārupitvā nisinno assa;
an5.28:5.5	nāssa kiñci sabbāvato kāyassa odātena vatthena apphuṭaṁ assa.
an5.28:5.6	Evamevaṁ kho, bhikkhave, bhikkhu imameva kāyaṁ parisuddhena cetasā pariyodātena pharitvā nisinno hoti;
an5.28:5.7	nāssa kiñci sabbāvato kāyassa parisuddhena cetasā pariyodātena apphuṭaṁ hoti.
an5.28:5.8	Ariyassa, bhikkhave, pañcaṅgikassa sammāsamādhissa ayaṁ catutthā bhāvanā.
an5.28:6.1	Puna caparaṁ, bhikkhave, bhikkhuno paccavekkhaṇānimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya.
an5.28:6.2	Seyyathāpi, bhikkhave, aññova aññaṁ paccavekkheyya, ṭhito vā nisinnaṁ paccavekkheyya, nisinno vā nipannaṁ paccavekkheyya.
an5.28:6.3	Evamevaṁ kho, bhikkhave, bhikkhuno paccavekkhaṇānimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya.
an5.28:6.4	Ariyassa, bhikkhave, pañcaṅgikassa sammāsamādhissa ayaṁ pañcamā bhāvanā.
an5.28:7.1	Evaṁ bhāvite kho, bhikkhave, bhikkhu ariye pañcaṅgike sammāsamādhimhi evaṁ bahulīkate yassa yassa abhiññāsacchikaraṇīyassa dhammassa cittaṁ abhininnāmeti abhiññāsacchikiriyāya, tatra tatreva sakkhibhabbataṁ pāpuṇāti sati sati āyatane.
an5.28:8.1	Seyyathāpi, bhikkhave, udakamaṇiko ādhāre ṭhapito pūro udakassa samatittiko kākapeyyo.
an5.28:8.2	Tamenaṁ balavā puriso yato yato āvajjeyya, āgaccheyya udakan”ti?
an5.28:8.3	“Evaṁ, bhante”.
an5.28:8.4	“Evamevaṁ kho, bhikkhave, bhikkhu evaṁ bhāvite ariye pañcaṅgike sammāsamādhimhi evaṁ bahulīkate yassa yassa abhiññāsacchikaraṇīyassa dhammassa cittaṁ abhininnāmeti abhiññāsacchikiriyāya, tatra tatreva sakkhibhabbataṁ pāpuṇāti sati sati āyatane.
an5.28:9.1	Seyyathāpi, bhikkhave, same bhūmibhāge pokkharaṇī caturaṁsā ālibaddhā pūrā udakassa samatittikā kākapeyyā.
an5.28:9.2	Tamenaṁ balavā puriso yato yato āliṁ muñceyya, āgaccheyya udakan”ti?
an5.28:9.3	“Evaṁ, bhante”.
an5.28:9.4	“Evamevaṁ kho, bhikkhave, bhikkhu evaṁ bhāvite ariye pañcaṅgike sammāsamādhimhi evaṁ bahulīkate yassa yassa abhiññāsacchikaraṇīyassa dhammassa …pe… sati sati āyatane.
an5.28:10.1	Seyyathāpi, bhikkhave, subhūmiyaṁ catumahāpathe ājaññaratho yutto assa ṭhito odhastapatodo.
an5.28:10.2	Tamenaṁ dakkho yoggācariyo assadammasārathi abhiruhitvā vāmena hatthena rasmiyo gahetvā dakkhiṇena hatthena patodaṁ gahetvā yenicchakaṁ yadicchakaṁ sāreyyapi paccāsāreyyapi.
an5.28:10.3	Evamevaṁ kho, bhikkhave, bhikkhu evaṁ bhāvite ariye pañcaṅgike sammāsamādhimhi evaṁ bahulīkate yassa yassa abhiññāsacchikaraṇīyassa dhammassa cittaṁ abhininnāmeti abhiññāsacchikiriyāya,
an5.28:10.4	tatra tatreva sakkhibhabbataṁ pāpuṇāti sati sati āyatane.
an5.28:11.1	So sace ākaṅkhati: ‘anekavihitaṁ iddhividhaṁ paccanubhaveyyaṁ—ekopi hutvā bahudhā assaṁ …pe… yāva brahmalokāpi kāyena vasaṁ vatteyyan’ti,
an5.28:11.2	tatra tatreva sakkhibhabbataṁ pāpuṇāti sati sati āyatane.
an5.28:12.1	So sace ākaṅkhati: ‘dibbāya sotadhātuyā visuddhāya atikkantamānusikāya ubho sadde suṇeyyaṁ—dibbe ca mānuse ca ye dūre santike cā’ti,
an5.28:12.2	tatra tatreva sakkhibhabbataṁ pāpuṇāti sati sati āyatane.
an5.28:13.1	So sace ākaṅkhati: ‘parasattānaṁ parapuggalānaṁ cetasā ceto paricca pajāneyyaṁ—
an5.28:13.2	sarāgaṁ vā cittaṁ sarāgaṁ cittanti pajāneyyaṁ,
an5.28:13.3	vītarāgaṁ vā cittaṁ vītarāgaṁ cittanti pajāneyyaṁ,
an5.28:13.4	sadosaṁ vā cittaṁ …
an5.28:13.5	vītadosaṁ vā cittaṁ …
an5.28:13.6	samohaṁ vā cittaṁ …
an5.28:13.7	vītamohaṁ vā cittaṁ …
an5.28:13.8	saṅkhittaṁ vā cittaṁ …
an5.28:13.9	vikkhittaṁ vā cittaṁ …
an5.28:13.10	mahaggataṁ vā cittaṁ …
an5.28:13.11	amahaggataṁ vā cittaṁ …
an5.28:13.12	sauttaraṁ vā cittaṁ …
an5.28:13.13	anuttaraṁ vā cittaṁ …
an5.28:13.14	samāhitaṁ vā cittaṁ …
an5.28:13.15	asamāhitaṁ vā cittaṁ …
an5.28:13.16	vimuttaṁ vā cittaṁ …
an5.28:13.17	avimuttaṁ vā cittaṁ avimuttaṁ cittanti pajāneyyan’ti,
an5.28:13.18	tatra tatreva sakkhibhabbataṁ pāpuṇāti sati sati āyatane.
an5.28:14.1	So sace ākaṅkhati: ‘anekavihitaṁ pubbenivāsaṁ anussareyyaṁ, seyyathidaṁ—ekampi jātiṁ, dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussareyyan’ti,
an5.28:14.2	tatra tatreva sakkhibhabbataṁ pāpuṇāti sati sati āyatane.
an5.28:15.1	So sace ākaṅkhati: ‘dibbena cakkhunā visuddhena atikkantamānusakena …pe… yathākammūpage satte pajāneyyan’ti,
an5.28:15.2	tatra tatreva sakkhibhabbataṁ pāpuṇāti sati sati āyatane.
an5.28:16.1	So sace ākaṅkhati: ‘āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti,
an5.28:16.2	tatra tatreva sakkhibhabbataṁ pāpuṇāti sati sati āyatane”ti.
an5.28:16.3	Aṭṭhamaṁ.
an5.29:0.1	Aṅguttara Nikāya 5.29
an5.29:0.2	3. Pañcaṅgikavagga
an5.29:0.3	Caṅkamasutta
an5.29:1.1	“Pañcime, bhikkhave, caṅkame ānisaṁsā.
an5.29:1.2	Katame pañca?
an5.29:1.3	Addhānakkhamo hoti, padhānakkhamo hoti, appābādho hoti, asitaṁ pītaṁ khāyitaṁ sāyitaṁ sammā pariṇāmaṁ gacchati, caṅkamādhigato samādhi ciraṭṭhitiko hoti.
an5.29:1.4	Ime kho, bhikkhave, pañca caṅkame ānisaṁsā”ti.
an5.29:1.5	Navamaṁ.
an5.30:0.1	Aṅguttara Nikāya 5.30
an5.30:0.2	3. Pañcaṅgikavagga
an5.30:0.3	Nāgitasutta
an5.30:1.1	Evaṁ me sutaṁ—
an5.30:1.2	ekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena icchānaṅgalaṁ nāma kosalānaṁ brāhmaṇagāmo tadavasari.
an5.30:1.3	Tatra sudaṁ bhagavā icchānaṅgale viharati icchānaṅgalavanasaṇḍe.
an5.30:1.4	Assosuṁ kho icchānaṅgalakā brāhmaṇagahapatikā:
an5.30:1.5	“samaṇo khalu bho gotamo sakyaputto sakyakulā pabbajito icchānaṅgalaṁ anuppatto; icchānaṅgale viharati icchānaṅgalavanasaṇḍe.
an5.30:1.6	Taṁ kho pana bhavantaṁ gotamaṁ evaṁ kalyāṇo kittisaddo abbhuggato:
an5.30:1.7	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi, satthā devamanussānaṁ buddho bhagavāti’.
an5.30:1.8	So imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti.
an5.30:1.9	So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an5.30:1.10	Sādhu kho pana tathārūpānaṁ arahataṁ dassanaṁ hotī”ti.
an5.30:1.11	Atha kho icchānaṅgalakā brāhmaṇagahapatikā tassā rattiyā accayena pahūtaṁ khādanīyaṁ bhojanīyaṁ ādāya yena icchānaṅgalavanasaṇḍo tenupasaṅkamiṁsu; upasaṅkamitvā bahidvārakoṭṭhake aṭṭhaṁsu uccāsaddamahāsaddā.
an5.30:2.1	Tena kho pana samayena āyasmā nāgito bhagavato upaṭṭhāko hoti.
an5.30:2.2	Atha kho bhagavā āyasmantaṁ nāgitaṁ āmantesi:
an5.30:2.3	“ke pana kho, nāgita, uccāsaddamahāsaddā, kevaṭṭā maññe macchavilope”ti?
an5.30:2.4	“Ete, bhante, icchānaṅgalakā brāhmaṇagahapatikā pahūtaṁ khādanīyaṁ bhojanīyaṁ ādāya bahidvārakoṭṭhake ṭhitā bhagavantaññeva uddissa bhikkhusaṅghañcā”ti.
an5.30:2.5	“Māhaṁ, nāgita, yasena samāgamaṁ, mā ca mayā yaso.
an5.30:2.6	Yo kho, nāgita, nayimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī, yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī.
an5.30:2.7	So taṁ mīḷhasukhaṁ middhasukhaṁ lābhasakkārasilokasukhaṁ sādiyeyyā”ti.
an5.30:3.1	“Adhivāsetu dāni, bhante, bhagavā, adhivāsetu sugato;
an5.30:3.2	adhivāsanakālo dāni, bhante, bhagavato.
an5.30:3.3	Yena yeneva dāni bhagavā gamissati taṁninnāva gamissanti brāhmaṇagahapatikā negamā ceva jānapadā ca.
an5.30:3.4	Seyyathāpi, bhante, thullaphusitake deve vassante yathāninnaṁ udakāni pavattanti;
an5.30:3.5	evamevaṁ kho, bhante, yena yeneva dāni bhagavā gamissati, taṁninnāva gamissanti brāhmaṇagahapatikā negamā ceva jānapadā ca.
an5.30:3.6	Taṁ kissa hetu?
an5.30:3.7	Tathā hi, bhante, bhagavato sīlapaññāṇan”ti.
an5.30:4.1	“Māhaṁ, nāgita, yasena samāgamaṁ, mā ca mayā yaso.
an5.30:4.2	Yo kho, nāgita, nayimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī, yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī.
an5.30:4.3	So taṁ mīḷhasukhaṁ middhasukhaṁ lābhasakkārasilokasukhaṁ sādiyeyya.
an5.30:4.4	Asitapītakhāyitasāyitassa kho, nāgita, uccārapassāvo—
an5.30:4.5	eso tassa nissando.
an5.30:4.6	Piyānaṁ kho, nāgita, vipariṇāmaññathābhāvā uppajjanti sokaparidevadukkhadomanassupāyāsā—
an5.30:4.7	eso tassa nissando.
an5.30:4.8	Asubhanimittānuyogaṁ anuyuttassa kho, nāgita, subhanimitte pāṭikulyatā saṇṭhāti—
an5.30:4.9	eso tassa nissando.
an5.30:4.10	Chasu kho, nāgita, phassāyatanesu aniccānupassino viharato phasse pāṭikulyatā saṇṭhāti—
an5.30:4.11	eso tassa nissando.
an5.30:4.12	Pañcasu kho, nāgita, upādānakkhandhesu udayabbayānupassino viharato upādāne pāṭikulyatā saṇṭhāti—
an5.30:4.13	eso tassa nissando”ti.
an5.30:4.14	Dasamaṁ.
an5.30:4.15	Pañcaṅgikavaggo tatiyo.
an5.30:5.0	Tassuddānaṁ
an5.30:5.1	Dve agāravupakkilesā,
an5.30:5.2	Dussīlānuggahitena ca;
an5.30:5.3	Vimuttisamādhipañcaṅgikā,
an5.30:5.4	Caṅkamaṁ nāgitena cāti.
an5.31:0.1	Aṅguttara Nikāya 5.31
an5.31:0.2	4. Sumanavagga
an5.31:0.3	Sumanasutta
an5.31:1.1	Ekaṁ samayaṁ …pe… anāthapiṇḍikassa ārāme.
an5.31:1.2	Atha kho sumanā rājakumārī pañcahi rathasatehi pañcahi rājakumārisatehi parivutā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnā kho sumanā rājakumārī bhagavantaṁ etadavoca:
an5.31:2.1	“Idhassu, bhante, bhagavato dve sāvakā samasaddhā samasīlā samapaññā—
an5.31:2.2	eko dāyako, eko adāyako.
an5.31:2.3	Te kāyassa bhedā paraṁ maraṇā sugatiṁ saggaṁ lokaṁ upapajjeyyuṁ.
an5.31:2.4	Devabhūtānaṁ pana nesaṁ, bhante, siyā viseso, siyā nānākaraṇan”ti?
an5.31:3.1	“Siyā, sumane”ti bhagavā avoca:
an5.31:3.2	“yo so, sumane, dāyako so amuṁ adāyakaṁ devabhūto samāno pañcahi ṭhānehi adhigaṇhāti—
an5.31:3.3	dibbena āyunā, dibbena vaṇṇena, dibbena sukhena, dibbena yasena, dibbena ādhipateyyena.
an5.31:3.4	Yo so, sumane, dāyako so amuṁ adāyakaṁ devabhūto samāno imehi pañcahi ṭhānehi adhigaṇhāti”.
an5.31:4.1	“Sace pana te, bhante, tato cutā itthattaṁ āgacchanti, manussabhūtānaṁ pana nesaṁ, bhante, siyā viseso, siyā nānākaraṇan”ti?
an5.31:4.2	“Siyā, sumane”ti bhagavā avoca:
an5.31:4.3	“yo so, sumane, dāyako so amuṁ adāyakaṁ manussabhūto samāno pañcahi ṭhānehi adhigaṇhāti—
an5.31:4.4	mānusakena āyunā, mānusakena vaṇṇena, mānusakena sukhena, mānusakena yasena, mānusakena ādhipateyyena.
an5.31:4.5	Yo so, sumane, dāyako so amuṁ adāyakaṁ manussabhūto samāno imehi pañcahi ṭhānehi adhigaṇhāti”.
an5.31:5.1	“Sace pana te, bhante, ubho agārasmā anagāriyaṁ pabbajanti, pabbajitānaṁ pana nesaṁ, bhante, siyā viseso, siyā nānākaraṇan”ti?
an5.31:5.2	“Siyā, sumane”ti bhagavā avoca:
an5.31:5.3	“yo so, sumane, dāyako so amuṁ adāyakaṁ pabbajito samāno pañcahi ṭhānehi adhigaṇhāti—
an5.31:5.4	yācitova bahulaṁ cīvaraṁ paribhuñjati appaṁ ayācito, yācitova bahulaṁ piṇḍapātaṁ paribhuñjati appaṁ ayācito, yācitova bahulaṁ senāsanaṁ paribhuñjati appaṁ ayācito, yācitova bahulaṁ gilānapaccayabhesajjaparikkhāraṁ paribhuñjati appaṁ ayācito.
an5.31:5.5	Yehi kho pana sabrahmacārīhi saddhiṁ viharati tyassa manāpeneva bahulaṁ kāyakammena samudācaranti appaṁ amanāpena, manāpeneva bahulaṁ vacīkammena samudācaranti appaṁ amanāpena, manāpeneva bahulaṁ manokammena samudācaranti appaṁ amanāpena, manāpaṁyeva bahulaṁ upahāraṁ upaharanti appaṁ amanāpaṁ.
an5.31:5.6	Yo so, sumane, dāyako so amuṁ adāyakaṁ pabbajito samāno imehi pañcahi ṭhānehi adhigaṇhātī”ti.
an5.31:6.1	“Sace pana te, bhante, ubho arahattaṁ pāpuṇanti, arahattappattānaṁ pana nesaṁ, bhante, siyā viseso, siyā nānākaraṇan”ti?
an5.31:6.2	“Ettha kho panesāhaṁ, sumane, na kiñci nānākaraṇaṁ vadāmi, yadidaṁ vimuttiyā vimuttin”ti.
an5.31:7.1	“Acchariyaṁ, bhante, abbhutaṁ, bhante.
an5.31:7.2	Yāvañcidaṁ, bhante, alameva dānāni dātuṁ alaṁ puññāni kātuṁ;
an5.31:7.3	yatra hi nāma devabhūtassāpi upakārāni puññāni, manussabhūtassāpi upakārāni puññāni, pabbajitassāpi upakārāni puññānī”ti.
an5.31:7.4	“Evametaṁ, sumane.
an5.31:7.5	Alañhi, sumane, dānāni dātuṁ alaṁ puññāni kātuṁ.
an5.31:7.6	Devabhūtassāpi upakārāni puññāni, manussabhūtassāpi upakārāni puññāni, pabbajitassāpi upakārāni puññānī”ti.
an5.31:8.1	Idamavoca bhagavā.
an5.31:8.2	Idaṁ vatvāna sugato athāparaṁ etadavoca satthā:
an5.31:9.1	“Yathāpi cando vimalo,
an5.31:9.2	gacchaṁ ākāsadhātuyā;
an5.31:9.3	Sabbe tārāgaṇe loke,
an5.31:9.4	ābhāya atirocati.
an5.31:10.1	Tatheva sīlasampanno,
an5.31:10.2	saddho purisapuggalo;
an5.31:10.3	Sabbe maccharino loke,
an5.31:10.4	cāgena atirocati.
an5.31:11.1	Yathāpi megho thanayaṁ,
an5.31:11.2	vijjumālī satakkaku;
an5.31:11.3	Thalaṁ ninnañca pūreti,
an5.31:11.4	abhivassaṁ vasundharaṁ.
an5.31:12.1	Evaṁ dassanasampanno,
an5.31:12.2	sammāsambuddhasāvako;
an5.31:12.3	Macchariṁ adhigaṇhāti,
an5.31:12.4	pañcaṭhānehi paṇḍito.
an5.31:13.1	Āyunā yasasā ceva,
an5.31:13.2	vaṇṇena ca sukhena ca;
an5.31:13.3	Sa ve bhogaparibyūḷho,
an5.31:13.4	pecca sagge pamodatī”ti.
an5.31:13.5	Paṭhamaṁ.
an5.32:0.1	Aṅguttara Nikāya 5.32
an5.32:0.2	4. Sumanavagga
an5.32:0.3	Cundīsutta
an5.32:1.1	Ekaṁ samayaṁ bhagavā rājagahe viharati veḷuvane kalandakanivāpe.
an5.32:1.2	Atha kho cundī rājakumārī pañcahi rathasatehi pañcahi ca kumārisatehi parivutā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnā kho cundī rājakumārī bhagavantaṁ etadavoca:
an5.32:2.1	“Amhākaṁ, bhante, bhātā cundo nāma rājakumāro, so evamāha:
an5.32:2.2	‘yadeva so hoti itthī vā puriso vā buddhaṁ saraṇaṁ gato, dhammaṁ saraṇaṁ gato, saṅghaṁ saraṇaṁ gato, pāṇātipātā paṭivirato, adinnādānā paṭivirato, kāmesumicchācārā paṭivirato, musāvādā paṭivirato, surāmerayamajjapamādaṭṭhānā paṭivirato, so kāyassa bhedā paraṁ maraṇā sugatiṁyeva upapajjati, no duggatin’ti.
an5.32:2.3	Sāhaṁ, bhante, bhagavantaṁ pucchāmi:
an5.32:2.4	‘kathaṁrūpe kho, bhante, satthari pasanno kāyassa bhedā paraṁ maraṇā sugatiṁyeva upapajjati, no duggatiṁ?
an5.32:2.5	Kathaṁrūpe dhamme pasanno kāyassa bhedā paraṁ maraṇā sugatiṁyeva upapajjati, no duggatiṁ?
an5.32:2.6	Kathaṁrūpe saṅghe pasanno kāyassa bhedā paraṁ maraṇā sugatiṁyeva upapajjati, no duggatiṁ?
an5.32:2.7	Kathaṁrūpesu sīlesu paripūrakārī kāyassa bhedā paraṁ maraṇā sugatiṁyeva upapajjati, no duggatin’”ti?
an5.32:3.1	“Yāvatā, cundi, sattā apadā vā dvipadā vā catuppadā vā bahuppadā vā rūpino vā arūpino vā saññino vā asaññino vā nevasaññināsaññino vā, tathāgato tesaṁ aggamakkhāyati arahaṁ sammāsambuddho.
an5.32:3.2	Ye kho, cundi, buddhe pasannā, agge te pasannā.
an5.32:3.3	Agge kho pana pasannānaṁ aggo vipāko hoti.
an5.32:4.1	Yāvatā, cundi, dhammā saṅkhatā, ariyo aṭṭhaṅgiko maggo tesaṁ aggamakkhāyati.
an5.32:4.2	Ye, cundi, ariye aṭṭhaṅgike magge pasannā, agge te pasannā, agge kho pana pasannānaṁ aggo vipāko hoti.
an5.32:5.1	Yāvatā, cundi, dhammā saṅkhatā vā asaṅkhatā vā, virāgo tesaṁ aggamakkhāyati, yadidaṁ—
an5.32:5.2	madanimmadano pipāsavinayo ālayasamugghāto vaṭṭupacchedo taṇhākkhayo virāgo nirodho nibbānaṁ.
an5.32:5.3	Ye kho, cundi, virāge dhamme pasannā, agge te pasannā.
an5.32:5.4	Agge kho pana pasannānaṁ aggo vipāko hoti.
an5.32:6.1	Yāvatā, cundi, saṅghā vā gaṇā vā, tathāgatasāvakasaṅgho tesaṁ aggamakkhāyati, yadidaṁ—
an5.32:6.2	cattāri purisayugāni aṭṭha purisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an5.32:6.3	Ye kho, cundi, saṅghe pasannā, agge te pasannā.
an5.32:6.4	Agge kho pana pasannānaṁ aggo vipāko hoti.
an5.32:7.1	Yāvatā, cundi, sīlāni, ariyakantāni sīlāni tesaṁ aggamakkhāyati, yadidaṁ—
an5.32:7.2	akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni.
an5.32:7.3	Ye kho, cundi, ariyakantesu sīlesu paripūrakārino, agge te paripūrakārino.
an5.32:7.4	Agge kho pana paripūrakārīnaṁ aggo vipāko hotīti.
an5.32:8.1	Aggato ve pasannānaṁ,
an5.32:8.2	aggaṁ dhammaṁ vijānataṁ;
an5.32:8.3	Agge buddhe pasannānaṁ,
an5.32:8.4	dakkhiṇeyye anuttare.
an5.32:9.1	Agge dhamme pasannānaṁ,
an5.32:9.2	virāgūpasame sukhe;
an5.32:9.3	Agge saṅghe pasannānaṁ,
an5.32:9.4	puññakkhette anuttare.
an5.32:10.1	Aggasmiṁ dānaṁ dadataṁ,
an5.32:10.2	aggaṁ puññaṁ pavaḍḍhati;
an5.32:10.3	Aggaṁ āyu ca vaṇṇo ca,
an5.32:10.4	yaso kitti sukhaṁ balaṁ.
an5.32:11.1	Aggassa dātā medhāvī,
an5.32:11.2	aggadhammasamāhito;
an5.32:11.3	Devabhūto manusso vā,
an5.32:11.4	aggappatto pamodatī”ti.
an5.32:11.5	Dutiyaṁ.
an5.33:0.1	Aṅguttara Nikāya 5.33
an5.33:0.2	4. Sumanavagga
an5.33:0.3	Uggahasutta
an5.33:1.1	Ekaṁ samayaṁ bhagavā bhaddiye viharati jātiyā vane.
an5.33:1.2	Atha kho uggaho meṇḍakanattā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho uggaho meṇḍakanattā bhagavantaṁ etadavoca:
an5.33:2.1	“Adhivāsetu me, bhante, bhagavā svātanāya attacatuttho bhattan”ti.
an5.33:2.2	Adhivāsesi bhagavā tuṇhībhāvena.
an5.33:2.3	Atha kho uggaho meṇḍakanattā bhagavato adhivāsanaṁ viditvā uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an5.33:3.1	Atha kho bhagavā tassā rattiyā accayena pubbaṇhasamayaṁ nivāsetvā pattacīvaramādāya yena uggahassa meṇḍakanattuno nivesanaṁ tenupasaṅkami; upasaṅkamitvā paññatte āsane nisīdi.
an5.33:3.2	Atha kho uggaho meṇḍakanattā bhagavantaṁ paṇītena khādanīyena bhojanīyena sahatthā santappesi sampavāresi.
an5.33:3.3	Atha kho uggaho meṇḍakanattā bhagavantaṁ bhuttāviṁ onītapattapāṇiṁ ekamantaṁ nisīdi.
an5.33:3.4	Ekamantaṁ nisinno kho uggaho meṇḍakanattā bhagavantaṁ etadavoca:
an5.33:3.5	“imā me, bhante, kumāriyo patikulāni gamissanti.
an5.33:3.6	Ovadatu tāsaṁ, bhante, bhagavā;
an5.33:3.7	anusāsatu tāsaṁ, bhante, bhagavā, yaṁ tāsaṁ assa dīgharattaṁ hitāya sukhāyā”ti.
an5.33:4.1	Atha kho bhagavā tā kumāriyo etadavoca:
an5.33:4.2	“tasmātiha, kumāriyo, evaṁ sikkhitabbaṁ:
an5.33:4.3	‘yassa vo mātāpitaro bhattuno dassanti atthakāmā hitesino anukampakā anukampaṁ upādāya, tassa bhavissāma pubbuṭṭhāyiniyo pacchānipātiniyo kiṅkārapaṭissāviniyo manāpacāriniyo piyavādiniyo’ti.
an5.33:4.4	Evañhi vo, kumāriyo, sikkhitabbaṁ.
an5.33:5.1	Tasmātiha, kumāriyo, evaṁ sikkhitabbaṁ:
an5.33:5.2	‘ye te bhattu garuno bhavissanti mātāti vā pitāti vā samaṇabrāhmaṇāti vā, te sakkarissāma garuṁ karissāma mānessāma pūjessāma abbhāgate ca āsanodakena paṭipūjessāmā’ti.
an5.33:5.3	Evañhi vo, kumāriyo, sikkhitabbaṁ.
an5.33:6.1	Tasmātiha, kumāriyo, evaṁ sikkhitabbaṁ:
an5.33:6.2	‘ye te bhattu abbhantarā kammantā uṇṇāti vā kappāsāti vā, tattha dakkhā bhavissāma analasā, tatrupāyāya vīmaṁsāya samannāgatā, alaṁ kātuṁ alaṁ saṁvidhātun’ti.
an5.33:6.3	Evañhi vo, kumāriyo, sikkhitabbaṁ.
an5.33:7.1	Tasmātiha, kumāriyo, evaṁ sikkhitabbaṁ:
an5.33:7.2	‘yo so bhattu abbhantaro antojano dāsāti vā pessāti vā kammakarāti vā, tesaṁ katañca katato jānissāma akatañca akatato jānissāma, gilānakānañca balābalaṁ jānissāma, khādanīyaṁ bhojanīyañcassa paccaṁsena saṁvibhajissāmā’ti.
an5.33:7.3	Evañhi vo, kumāriyo, sikkhitabbaṁ.
an5.33:8.1	Tasmātiha, kumāriyo, evaṁ sikkhitabbaṁ:
an5.33:8.2	‘yaṁ bhattā āharissati dhanaṁ vā dhaññaṁ vā rajataṁ vā jātarūpaṁ vā, taṁ ārakkhena guttiyā sampādessāma, tattha ca bhavissāma adhuttī athenī asoṇḍī avināsikāyo’ti.
an5.33:8.3	Evañhi vo, kumāriyo, sikkhitabbaṁ.
an5.33:8.4	Imehi kho, kumāriyo, pañcahi dhammehi samannāgato mātugāmo kāyassa bhedā paraṁ maraṇā manāpakāyikānaṁ devānaṁ sahabyataṁ upapajjatīti.
an5.33:9.1	Yo naṁ bharati sabbadā,
an5.33:9.2	niccaṁ ātāpi ussuko;
an5.33:9.3	Sabbakāmaharaṁ posaṁ,
an5.33:9.4	bhattāraṁ nātimaññati.
an5.33:10.1	Na cāpi sotthi bhattāraṁ,
an5.33:10.2	issācārena rosaye;
an5.33:10.3	Bhattu ca garuno sabbe,
an5.33:10.4	paṭipūjeti paṇḍitā.
an5.33:11.1	Uṭṭhāhikā analasā,
an5.33:11.2	saṅgahitaparijjanā;
an5.33:11.3	Bhattu manāpaṁ carati,
an5.33:11.4	sambhataṁ anurakkhati.
an5.33:12.1	Yā evaṁ vattatī nārī,
an5.33:12.2	bhattuchandavasānugā;
an5.33:12.3	Manāpā nāma te devā,
an5.33:12.4	yattha sā upapajjatī”ti.
an5.33:12.5	Tatiyaṁ.
an5.34:0.1	Aṅguttara Nikāya 5.34
an5.34:0.2	4. Sumanavagga
an5.34:0.3	Sīhasenāpatisutta
an5.34:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an5.34:1.2	Atha kho sīho senāpati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho sīho senāpati bhagavantaṁ etadavoca:
an5.34:1.3	“sakkā nu kho, bhante, bhagavā sandiṭṭhikaṁ dānaphalaṁ paññāpetun”ti?
an5.34:2.1	“Sakkā, sīhā”ti bhagavā avoca:
an5.34:2.2	“dāyako, sīha, dānapati bahuno janassa piyo hoti manāpo.
an5.34:2.3	Yampi, sīha, dāyako dānapati bahuno janassa piyo hoti manāpo, idampi sandiṭṭhikaṁ dānaphalaṁ.
an5.34:3.1	Puna caparaṁ, sīha, dāyakaṁ dānapatiṁ santo sappurisā bhajanti.
an5.34:3.2	Yampi, sīha, dāyakaṁ dānapatiṁ santo sappurisā bhajanti, idampi sandiṭṭhikaṁ dānaphalaṁ.
an5.34:4.1	Puna caparaṁ, sīha, dāyakassa dānapatino kalyāṇo kittisaddo abbhuggacchati.
an5.34:4.2	Yampi, sīha, dāyakassa dānapatino kalyāṇo kittisaddo abbhuggacchati, idampi sandiṭṭhikaṁ dānaphalaṁ.
an5.34:5.1	Puna caparaṁ, sīha, dāyako dānapati yaṁ yadeva parisaṁ upasaṅkamati—yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ—visārado upasaṅkamati amaṅkubhūto.
an5.34:5.2	Yampi, sīha, dāyako dānapati yaṁ yadeva parisaṁ upasaṅkamati—yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ—visārado upasaṅkamati amaṅkubhūto, idampi sandiṭṭhikaṁ dānaphalaṁ.
an5.34:6.1	Puna caparaṁ, sīha, dāyako dānapati kāyassa bhedā paraṁ maraṇā sugatiṁ saggaṁ lokaṁ upapajjati.
an5.34:6.2	Yampi, sīha, dāyako dānapati kāyassa bhedā paraṁ maraṇā sugatiṁ saggaṁ lokaṁ upapajjati, idaṁ samparāyikaṁ dānaphalan”ti.
an5.34:7.1	Evaṁ vutte, sīho senāpati bhagavantaṁ etadavoca:
an5.34:7.2	“yānimāni, bhante, bhagavatā cattāri sandiṭṭhikāni dānaphalāni akkhātāni, nāhaṁ ettha bhagavato saddhāya gacchāmi; ahaṁ petāni jānāmi.
an5.34:7.3	Ahaṁ, bhante, dāyako dānapati bahuno janassa piyo manāpo.
an5.34:7.4	Ahaṁ, bhante, dāyako dānapati; maṁ santo sappurisā bhajanti.
an5.34:7.5	Ahaṁ, bhante, dāyako dānapati; mayhaṁ kalyāṇo kittisaddo abbhuggato: ‘sīho senāpati dāyako kārako saṅghupaṭṭhāko’ti.
an5.34:7.6	Ahaṁ, bhante, dāyako dānapati yaṁ yadeva parisaṁ upasaṅkamāmi—yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ—visārado upasaṅkamāmi amaṅkubhūto.
an5.34:7.7	Yānimāni, bhante, bhagavatā cattāri sandiṭṭhikāni dānaphalāni akkhātāni, nāhaṁ ettha bhagavato saddhāya gacchāmi; ahaṁ petāni jānāmi.
an5.34:7.8	Yañca kho maṁ, bhante, bhagavā evamāha:
an5.34:7.9	‘dāyako, sīha, dānapati kāyassa bhedā paraṁ maraṇā sugatiṁ saggaṁ lokaṁ upapajjatī’ti, etāhaṁ na jānāmi; ettha ca panāhaṁ bhagavato saddhāya gacchāmī”ti.
an5.34:7.10	“Evametaṁ, sīha, evametaṁ, sīha.
an5.34:7.11	Dāyako dānapati kāyassa bhedā paraṁ maraṇā sugatiṁ saggaṁ lokaṁ upapajjatīti.
an5.34:8.1	Dadaṁ piyo hoti bhajanti naṁ bahū,
an5.34:8.2	Kittiñca pappoti yaso ca vaḍḍhati;
an5.34:8.3	Amaṅkubhūto parisaṁ vigāhati,
an5.34:8.4	Visārado hoti naro amaccharī.
an5.34:9.1	Tasmā hi dānāni dadanti paṇḍitā,
an5.34:9.2	Vineyya maccheramalaṁ sukhesino;
an5.34:9.3	Te dīgharattaṁ tidive patiṭṭhitā,
an5.34:9.4	Devānaṁ sahabyagatā ramanti te.
an5.34:10.1	Katāvakāsā katakusalā ito cutā,
an5.34:10.2	Sayaṁpabhā anuvicaranti nandanaṁ;
an5.34:10.3	Te tattha nandanti ramanti modare,
an5.34:10.4	Samappitā kāmaguṇehi pañcahi;
an5.34:10.5	Katvāna vākyaṁ asitassa tādino,
an5.34:10.6	Ramanti sagge sugatassa sāvakā”ti.
an5.34:10.7	Catutthaṁ.
an5.35:0.1	Aṅguttara Nikāya 5.35
an5.35:0.2	4. Sumanavagga
an5.35:0.3	Dānānisaṁsasutta
an5.35:1.1	“Pañcime, bhikkhave, dāne ānisaṁsā.
an5.35:1.2	Katame pañca?
an5.35:1.3	Bahuno janassa piyo hoti manāpo;
an5.35:1.4	santo sappurisā bhajanti;
an5.35:1.5	kalyāṇo kittisaddo abbhuggacchati;
an5.35:1.6	gihidhammā anapagato hoti;
an5.35:1.7	kāyassa bhedā paraṁ maraṇā sugatiṁ saggaṁ lokaṁ upapajjati.
an5.35:1.8	Ime kho, bhikkhave, pañca dāne ānisaṁsāti.
an5.35:2.1	Dadamāno piyo hoti,
an5.35:2.2	sataṁ dhammaṁ anukkamaṁ;
an5.35:2.3	Santo naṁ sadā bhajanti,
an5.35:2.4	saññatā brahmacārayo.
an5.35:3.1	Te tassa dhammaṁ desenti,
an5.35:3.2	Sabbadukkhāpanūdanaṁ;
an5.35:3.3	Yaṁ so dhammaṁ idhaññāya,
an5.35:3.4	Parinibbāti anāsavo”ti.
an5.35:3.5	Pañcamaṁ.
an5.36:0.1	Aṅguttara Nikāya 5.36
an5.36:0.2	4. Sumanavagga
an5.36:0.3	Kāladānasutta
an5.36:1.1	“Pañcimāni, bhikkhave, kāladānāni.
an5.36:1.2	Katamāni pañca?
an5.36:1.3	Āgantukassa dānaṁ deti;
an5.36:1.4	gamikassa dānaṁ deti;
an5.36:1.5	gilānassa dānaṁ deti;
an5.36:1.6	dubbhikkhe dānaṁ deti;
an5.36:1.7	yāni tāni navasassāni navaphalāni tāni paṭhamaṁ sīlavantesu patiṭṭhāpeti.
an5.36:1.8	Imāni kho, bhikkhave, pañca kāladānānīti.
an5.36:2.1	Kāle dadanti sappaññā,
an5.36:2.2	vadaññū vītamaccharā;
an5.36:2.3	Kālena dinnaṁ ariyesu,
an5.36:2.4	ujubhūtesu tādisu.
an5.36:3.1	Vippasannamanā tassa,
an5.36:3.2	vipulā hoti dakkhiṇā;
an5.36:3.3	Ye tattha anumodanti,
an5.36:3.4	veyyāvaccaṁ karonti vā;
an5.36:3.5	Na tena dakkhiṇā ūnā,
an5.36:3.6	tepi puññassa bhāgino.
an5.36:4.1	Tasmā dade appaṭivānacitto,
an5.36:4.2	Yattha dinnaṁ mahapphalaṁ;
an5.36:4.3	Puññāni paralokasmiṁ,
an5.36:4.4	Patiṭṭhā honti pāṇinan”ti.
an5.36:4.5	Chaṭṭhaṁ.
an5.37:0.1	Aṅguttara Nikāya 5.37
an5.37:0.2	4. Sumanavagga
an5.37:0.3	Bhojanasutta
an5.37:1.1	“Bhojanaṁ, bhikkhave, dadamāno dāyako paṭiggāhakānaṁ pañca ṭhānāni deti.
an5.37:1.2	Katamāni pañca?
an5.37:1.3	Āyuṁ deti, vaṇṇaṁ deti, sukhaṁ deti, balaṁ deti, paṭibhānaṁ deti.
an5.37:1.4	Āyuṁ kho pana datvā āyussa bhāgī hoti dibbassa vā mānusassa vā;
an5.37:1.5	vaṇṇaṁ datvā vaṇṇassa bhāgī hoti dibbassa vā mānusassa vā;
an5.37:1.6	sukhaṁ datvā sukhassa bhāgī hoti dibbassa vā mānusassa vā;
an5.37:1.7	balaṁ datvā balassa bhāgī hoti dibbassa vā mānusassa vā;
an5.37:1.8	paṭibhānaṁ datvā paṭibhānassa bhāgī hoti dibbassa vā mānusassa vā.
an5.37:1.9	Bhojanaṁ, bhikkhave, dadamāno dāyako paṭiggāhakānaṁ imāni pañca ṭhānāni detīti.
an5.37:2.1	Āyudo balado dhīro,
an5.37:2.2	vaṇṇado paṭibhānado;
an5.37:2.3	Sukhassa dātā medhāvī,
an5.37:2.4	sukhaṁ so adhigacchati.
an5.37:3.1	Āyuṁ datvā balaṁ vaṇṇaṁ,
an5.37:3.2	sukhañca paṭibhānakaṁ;
an5.37:3.3	Dīghāyu yasavā hoti,
an5.37:3.4	yattha yatthūpapajjatī”ti.
an5.37:3.5	Sattamaṁ.
an5.38:0.1	Aṅguttara Nikāya 5.38
an5.38:0.2	4. Sumanavagga
an5.38:0.3	Saddhasutta
an5.38:1.1	“Pañcime, bhikkhave, saddhe kulaputte ānisaṁsā.
an5.38:1.2	Katame pañca?
an5.38:1.3	Ye te, bhikkhave, loke santo sappurisā te saddhaññeva paṭhamaṁ anukampantā anukampanti, no tathā assaddhaṁ;
an5.38:1.4	saddhaññeva paṭhamaṁ upasaṅkamantā upasaṅkamanti, no tathā assaddhaṁ;
an5.38:1.5	saddhaññeva paṭhamaṁ paṭiggaṇhantā paṭiggaṇhanti, no tathā assaddhaṁ;
an5.38:1.6	saddhaññeva paṭhamaṁ dhammaṁ desentā desenti, no tathā assaddhaṁ;
an5.38:1.7	saddho kāyassa bhedā paraṁ maraṇā sugatiṁ saggaṁ lokaṁ upapajjati.
an5.38:1.8	Ime kho, bhikkhave, pañca saddhe kulaputte ānisaṁsā.
an5.38:2.1	Seyyathāpi, bhikkhave, subhūmiyaṁ catumahāpathe mahānigrodho samantā pakkhīnaṁ paṭisaraṇaṁ hoti;
an5.38:2.2	evamevaṁ kho, bhikkhave, saddho kulaputto bahuno janassa paṭisaraṇaṁ hoti bhikkhūnaṁ bhikkhunīnaṁ upāsakānaṁ upāsikānanti.
an5.38:3.1	Sākhāpattaphalūpeto,
an5.38:3.2	khandhimāva mahādumo;
an5.38:3.3	Mūlavā phalasampanno,
an5.38:3.4	patiṭṭhā hoti pakkhinaṁ.
an5.38:4.1	Manorame āyatane,
an5.38:4.2	sevanti naṁ vihaṅgamā;
an5.38:4.3	Chāyaṁ chāyatthikā yanti,
an5.38:4.4	phalatthā phalabhojino.
an5.38:5.1	Tatheva sīlasampannaṁ,
an5.38:5.2	saddhaṁ purisapuggalaṁ;
an5.38:5.3	Nivātavuttiṁ atthaddhaṁ,
an5.38:5.4	sorataṁ sakhilaṁ muduṁ.
an5.38:6.1	Vītarāgā vītadosā,
an5.38:6.2	vītamohā anāsavā;
an5.38:6.3	Puññakkhettāni lokasmiṁ,
an5.38:6.4	sevanti tādisaṁ naraṁ.
an5.38:7.1	Te tassa dhammaṁ desenti,
an5.38:7.2	Sabbadukkhāpanūdanaṁ;
an5.38:7.3	Yaṁ so dhammaṁ idhaññāya,
an5.38:7.4	Parinibbāti anāsavo”ti.
an5.38:7.5	Aṭṭhamaṁ.
an5.39:0.1	Aṅguttara Nikāya 5.39
an5.39:0.2	4. Sumanavagga
an5.39:0.3	Puttasutta
an5.39:1.1	“Pañcimāni, bhikkhave, ṭhānāni sampassantā mātāpitaro puttaṁ icchanti kule jāyamānaṁ.
an5.39:1.2	Katamāni pañca?
an5.39:1.3	Bhato vā no bharissati;
an5.39:1.4	kiccaṁ vā no karissati;
an5.39:1.5	kulavaṁso ciraṁ ṭhassati;
an5.39:1.6	dāyajjaṁ paṭipajjissati;
an5.39:1.7	atha vā pana petānaṁ kālaṅkatānaṁ dakkhiṇaṁ anuppadassatīti.
an5.39:1.8	Imāni kho, bhikkhave, pañca ṭhānāni sampassantā mātāpitaro puttaṁ icchanti kule jāyamānanti.
an5.39:2.1	Pañca ṭhānāni sampassaṁ,
an5.39:2.2	puttaṁ icchanti paṇḍitā;
an5.39:2.3	Bhato vā no bharissati,
an5.39:2.4	kiccaṁ vā no karissati.
an5.39:3.1	Kulavaṁso ciraṁ tiṭṭhe,
an5.39:3.2	dāyajjaṁ paṭipajjati;
an5.39:3.3	Atha vā pana petānaṁ,
an5.39:3.4	dakkhiṇaṁ anuppadassati.
an5.39:4.1	Ṭhānānetāni sampassaṁ,
an5.39:4.2	puttaṁ icchanti paṇḍitā;
an5.39:4.3	Tasmā santo sappurisā,
an5.39:4.4	kataññū katavedino.
an5.39:5.1	Bharanti mātāpitaro,
an5.39:5.2	pubbe katamanussaraṁ;
an5.39:5.3	Karonti nesaṁ kiccāni,
an5.39:5.4	yathā taṁ pubbakārinaṁ.
an5.39:6.1	Ovādakārī bhataposī,
an5.39:6.2	kulavaṁsaṁ ahāpayaṁ;
an5.39:6.3	Saddho sīlena sampanno,
an5.39:6.4	putto hoti pasaṁsiyo”ti.
an5.39:6.5	Navamaṁ.
an5.40:0.1	Aṅguttara Nikāya 5.40
an5.40:0.2	4. Sumanavagga
an5.40:0.3	Mahāsālaputtasutta
an5.40:1.1	“Himavantaṁ, bhikkhave, pabbatarājaṁ nissāya mahāsālā pañcahi vaḍḍhīhi vaḍḍhanti.
an5.40:1.2	Katamāhi pañcahi?
an5.40:1.3	Sākhāpattapalāsena vaḍḍhanti;
an5.40:1.4	tacena vaḍḍhanti;
an5.40:1.5	papaṭikāya vaḍḍhanti;
an5.40:1.6	pheggunā vaḍḍhanti;
an5.40:1.7	sārena vaḍḍhanti.
an5.40:1.8	Himavantaṁ, bhikkhave, pabbatarājaṁ nissāya mahāsālā imāhi pañcahi vaḍḍhīhi vaḍḍhanti.
an5.40:1.9	Evamevaṁ kho, bhikkhave, saddhaṁ kulaputtaṁ nissāya antojano pañcahi vaḍḍhīhi vaḍḍhati.
an5.40:1.10	Katamāhi pañcahi?
an5.40:1.11	Saddhāya vaḍḍhati;
an5.40:1.12	sīlena vaḍḍhati;
an5.40:1.13	sutena vaḍḍhati;
an5.40:1.14	cāgena vaḍḍhati;
an5.40:1.15	paññāya vaḍḍhati.
an5.40:1.16	Saddhaṁ, bhikkhave, kulaputtaṁ nissāya antojano imāhi pañcahi vaḍḍhīhi vaḍḍhatīti.
an5.40:2.1	Yathā hi pabbato selo,
an5.40:2.2	araññasmiṁ brahāvane;
an5.40:2.3	Taṁ rukkhā upanissāya,
an5.40:2.4	vaḍḍhante te vanappatī.
an5.40:3.1	Tatheva sīlasampannaṁ,
an5.40:3.2	Saddhaṁ kulaputtaṁ imaṁ;
an5.40:3.3	Upanissāya vaḍḍhanti,
an5.40:3.4	Puttadārā ca bandhavā;
an5.40:3.5	Amaccā ñātisaṅghā ca,
an5.40:3.6	Ye cassa anujīvino.
an5.40:4.1	Tyassa sīlavato sīlaṁ,
an5.40:4.2	cāgaṁ sucaritāni ca;
an5.40:4.3	Passamānānukubbanti,
an5.40:4.4	ye bhavanti vicakkhaṇā.
an5.40:5.1	Idha dhammaṁ caritvāna,
an5.40:5.2	maggaṁ sugatigāminaṁ;
an5.40:5.3	Nandino devalokasmiṁ,
an5.40:5.4	modanti kāmakāmino”ti.
an5.40:5.5	Dasamaṁ.
an5.40:5.6	Sumanavaggo catuttho.
an5.40:6.0	Tassuddānaṁ
an5.40:6.1	Sumanā cundī uggaho,
an5.40:6.2	sīho dānānisaṁsako;
an5.40:6.3	Kālabhojanasaddhā ca,
an5.40:6.4	puttasālehi te dasāti.
an5.41:0.1	Aṅguttara Nikāya 5.41
an5.41:0.2	5. Muṇḍarājavagga
an5.41:0.3	Ādiyasutta
an5.41:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an5.41:1.2	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an5.41:1.3	“pañcime, gahapati, bhogānaṁ ādiyā.
an5.41:1.4	Katame pañca?
an5.41:1.5	Idha, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi attānaṁ sukheti pīṇeti sammā sukhaṁ pariharati;
an5.41:1.6	mātāpitaro sukheti pīṇeti sammā sukhaṁ pariharati;
an5.41:1.7	puttadāradāsakammakaraporise sukheti pīṇeti sammā sukhaṁ pariharati.
an5.41:1.8	Ayaṁ paṭhamo bhogānaṁ ādiyo.
an5.41:2.1	Puna caparaṁ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi mittāmacce sukheti pīṇeti sammā sukhaṁ pariharati.
an5.41:2.2	Ayaṁ dutiyo bhogānaṁ ādiyo.
an5.41:3.1	Puna caparaṁ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi yā tā honti āpadā—
an5.41:3.2	aggito vā udakato vā rājato vā corato vā appiyato vā dāyādato—
an5.41:3.3	tathārūpāsu āpadāsu bhogehi pariyodhāya vattati, sotthiṁ attānaṁ karoti.
an5.41:3.4	Ayaṁ tatiyo bhogānaṁ ādiyo.
an5.41:4.1	Puna caparaṁ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi pañcabaliṁ kattā hoti.
an5.41:4.2	Ñātibaliṁ, atithibaliṁ, pubbapetabaliṁ, rājabaliṁ, devatābaliṁ—
an5.41:4.3	ayaṁ catuttho bhogānaṁ ādiyo.
an5.41:5.1	Puna caparaṁ, gahapati, ariyasāvako uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi ye te samaṇabrāhmaṇā madappamādā paṭiviratā khantisoracce niviṭṭhā ekamattānaṁ damenti ekamattānaṁ samenti ekamattānaṁ parinibbāpenti, tathārūpesu samaṇabrāhmaṇesu uddhaggikaṁ dakkhiṇaṁ patiṭṭhāpeti sovaggikaṁ sukhavipākaṁ saggasaṁvattanikaṁ.
an5.41:5.2	Ayaṁ pañcamo bhogānaṁ ādiyo.
an5.41:5.3	Ime kho, gahapati, pañca bhogānaṁ ādiyā.
an5.41:6.1	Tassa ce, gahapati, ariyasāvakassa ime pañca bhogānaṁ ādiye ādiyato bhogā parikkhayaṁ gacchanti, tassa evaṁ hoti:
an5.41:6.2	‘ye vata bhogānaṁ ādiyā te cāhaṁ ādiyāmi bhogā ca me parikkhayaṁ gacchantī’ti.
an5.41:6.3	Itissa hoti avippaṭisāro.
an5.41:6.4	Tassa ce, gahapati, ariyasāvakassa ime pañca bhogānaṁ ādiye ādiyato bhogā abhivaḍḍhanti, tassa evaṁ hoti:
an5.41:6.5	‘ye vata bhogānaṁ ādiyā te cāhaṁ ādiyāmi bhogā ca me abhivaḍḍhantī’ti.
an5.41:6.6	Itissa hoti ubhayeneva avippaṭisāroti.
an5.41:7.1	Bhuttā bhogā bhatā bhaccā,
an5.41:7.2	vitiṇṇā āpadāsu me;
an5.41:7.3	Uddhaggā dakkhiṇā dinnā,
an5.41:7.4	atho pañcabalīkatā;
an5.41:7.5	Upaṭṭhitā sīlavanto,
an5.41:7.6	saññatā brahmacārayo.
an5.41:8.1	Yadatthaṁ bhogaṁ iccheyya,
an5.41:8.2	paṇḍito gharamāvasaṁ;
an5.41:8.3	So me attho anuppatto,
an5.41:8.4	kataṁ ananutāpiyaṁ.
an5.41:9.1	Etaṁ anussaraṁ macco,
an5.41:9.2	ariyadhamme ṭhito naro;
an5.41:9.3	Idheva naṁ pasaṁsanti,
an5.41:9.4	pecca sagge pamodatī”ti.
an5.41:9.5	Paṭhamaṁ.
an5.42:0.1	Aṅguttara Nikāya 5.42
an5.42:0.2	5. Muṇḍarājavagga
an5.42:0.3	Sappurisasutta
an5.42:1.1	“Sappuriso, bhikkhave, kule jāyamāno bahuno janassa atthāya hitāya sukhāya hoti;
an5.42:1.2	mātāpitūnaṁ atthāya hitāya sukhāya hoti;
an5.42:1.3	puttadārassa atthāya hitāya sukhāya hoti;
an5.42:1.4	dāsakammakaraporisassa atthāya hitāya sukhāya hoti;
an5.42:1.5	mittāmaccānaṁ atthāya hitāya sukhāya hoti;
an5.42:1.6	samaṇabrāhmaṇānaṁ atthāya hitāya sukhāya hoti.
an5.42:2.1	Seyyathāpi, bhikkhave, mahāmegho sabbasassāni sampādento bahuno janassa atthāya hitāya sukhāya hoti;
an5.42:2.2	evamevaṁ kho, bhikkhave, sappuriso kule jāyamāno bahuno janassa atthāya hitāya sukhāya hoti;
an5.42:2.3	mātāpitūnaṁ atthāya hitāya sukhāya hoti;
an5.42:2.4	puttadārassa atthāya hitāya sukhāya hoti;
an5.42:2.5	dāsakammakaraporisassa atthāya hitāya sukhāya hoti;
an5.42:2.6	mittāmaccānaṁ atthāya hitāya sukhāya hoti;
an5.42:2.7	samaṇabrāhmaṇānaṁ atthāya hitāya sukhāya hotīti.
an5.42:3.1	Hito bahunnaṁ paṭipajja bhoge,
an5.42:3.2	Taṁ devatā rakkhati dhammaguttaṁ;
an5.42:3.3	Bahussutaṁ sīlavatūpapannaṁ,
an5.42:3.4	Dhamme ṭhitaṁ na vijahati kitti.
an5.42:4.1	Dhammaṭṭhaṁ sīlasampannaṁ,
an5.42:4.2	saccavādiṁ hirīmanaṁ;
an5.42:4.3	Nekkhaṁ jambonadasseva,
an5.42:4.4	ko taṁ ninditumarahati;
an5.42:4.5	Devāpi naṁ pasaṁsanti,
an5.42:4.6	brahmunāpi pasaṁsito”ti.
an5.42:4.7	Dutiyaṁ.
an5.43:0.1	Aṅguttara Nikāya 5.43
an5.43:0.2	5. Muṇḍarājavagga
an5.43:0.3	Iṭṭhasutta
an5.43:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an5.43:2.1	“Pañcime, gahapati, dhammā iṭṭhā kantā manāpā dullabhā lokasmiṁ.
an5.43:2.2	Katame pañca?
an5.43:2.3	Āyu, gahapati, iṭṭho kanto manāpo dullabho lokasmiṁ;
an5.43:2.4	vaṇṇo iṭṭho kanto manāpo dullabho lokasmiṁ;
an5.43:2.5	sukhaṁ iṭṭhaṁ kantaṁ manāpaṁ dullabhaṁ lokasmiṁ;
an5.43:2.6	yaso iṭṭho kanto manāpo dullabho lokasmiṁ;
an5.43:2.7	saggā iṭṭhā kantā manāpā dullabhā lokasmiṁ.
an5.43:2.8	Ime kho, gahapati, pañca dhammā iṭṭhā kantā manāpā dullabhā lokasmiṁ.
an5.43:3.1	Imesaṁ kho, gahapati, pañcannaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ na āyācanahetu vā patthanāhetu vā paṭilābhaṁ vadāmi.
an5.43:3.2	Imesaṁ kho, gahapati, pañcannaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ āyācanahetu vā patthanāhetu vā paṭilābho abhavissa, ko idha kena hāyetha?
an5.43:4.1	Na kho, gahapati, arahati ariyasāvako āyukāmo āyuṁ āyācituṁ vā abhinandituṁ vā āyussa vāpi hetu.
an5.43:4.2	Āyukāmena, gahapati, ariyasāvakena āyusaṁvattanikā paṭipadā paṭipajjitabbā.
an5.43:4.3	Āyusaṁvattanikā hissa paṭipadā paṭipannā āyupaṭilābhāya saṁvattati.
an5.43:4.4	So lābhī hoti āyussa dibbassa vā mānusassa vā.
an5.43:5.1	Na kho, gahapati, arahati ariyasāvako vaṇṇakāmo vaṇṇaṁ āyācituṁ vā abhinandituṁ vā vaṇṇassa vāpi hetu.
an5.43:5.2	Vaṇṇakāmena, gahapati, ariyasāvakena vaṇṇasaṁvattanikā paṭipadā paṭipajjitabbā.
an5.43:5.3	Vaṇṇasaṁvattanikā hissa paṭipadā paṭipannā vaṇṇapaṭilābhāya saṁvattati.
an5.43:5.4	So lābhī hoti vaṇṇassa dibbassa vā mānusassa vā.
an5.43:6.1	Na kho, gahapati, arahati ariyasāvako sukhakāmo sukhaṁ āyācituṁ vā abhinandituṁ vā sukhassa vāpi hetu.
an5.43:6.2	Sukhakāmena, gahapati, ariyasāvakena sukhasaṁvattanikā paṭipadā paṭipajjitabbā.
an5.43:6.3	Sukhasaṁvattanikā hissa paṭipadā paṭipannā sukhapaṭilābhāya saṁvattati.
an5.43:6.4	So lābhī hoti sukhassa dibbassa vā mānusassa vā.
an5.43:7.1	Na kho, gahapati, arahati ariyasāvako yasakāmo yasaṁ āyācituṁ vā abhinandituṁ vā yasassa vāpi hetu.
an5.43:7.2	Yasakāmena, gahapati, ariyasāvakena yasasaṁvattanikā paṭipadā paṭipajjitabbā.
an5.43:7.3	Yasasaṁvattanikā hissa paṭipadā paṭipannā yasapaṭilābhāya saṁvattati.
an5.43:7.4	So lābhī hoti yasassa dibbassa vā mānusassa vā.
an5.43:8.1	Na kho, gahapati, arahati ariyasāvako saggakāmo saggaṁ āyācituṁ vā abhinandituṁ vā saggānaṁ vāpi hetu.
an5.43:8.2	Saggakāmena, gahapati, ariyasāvakena saggasaṁvattanikā paṭipadā paṭipajjitabbā.
an5.43:8.3	Saggasaṁvattanikā hissa paṭipadā paṭipannā saggapaṭilābhāya saṁvattati.
an5.43:8.4	So lābhī hoti saggānanti.
an5.43:9.1	Āyuṁ vaṇṇaṁ yasaṁ kittiṁ,
an5.43:9.2	Saggaṁ uccākulīnataṁ;
an5.43:9.3	Ratiyo patthayānena,
an5.43:9.4	Uḷārā aparāparā.
an5.43:10.1	Appamādaṁ pasaṁsanti,
an5.43:10.2	puññakiriyāsu paṇḍitā;
an5.43:10.3	Appamatto ubho atthe,
an5.43:10.4	adhigaṇhāti paṇḍito.
an5.43:11.1	Diṭṭhe dhamme ca yo attho,
an5.43:11.2	yo cattho samparāyiko;
an5.43:11.3	Atthābhisamayā dhīro,
an5.43:11.4	paṇḍitoti pavuccatī”ti.
an5.43:11.5	Tatiyaṁ.
an5.44:0.1	Aṅguttara Nikāya 5.44
an5.44:0.2	5. Muṇḍarājavagga
an5.44:0.3	Manāpadāyīsutta
an5.44:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an5.44:1.2	Atha kho bhagavā pubbaṇhasamayaṁ nivāsetvā pattacīvaramādāya yena uggassa gahapatino vesālikassa nivesanaṁ tenupasaṅkami; upasaṅkamitvā paññatte āsane nisīdi.
an5.44:1.3	Atha kho uggo gahapati vesāliko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho uggo gahapati vesāliko bhagavantaṁ etadavoca:
an5.44:2.1	“Sammukhā metaṁ, bhante, bhagavato sutaṁ sammukhā paṭiggahitaṁ:
an5.44:2.2	‘manāpadāyī labhate manāpan’ti.
an5.44:2.3	Manāpaṁ me, bhante, sālapupphakaṁ khādanīyaṁ;
an5.44:2.4	taṁ me bhagavā paṭiggaṇhātu anukampaṁ upādāyā”ti.
an5.44:2.5	Paṭiggahesi bhagavā anukampaṁ upādāya.
an5.44:3.1	“Sammukhā metaṁ, bhante, bhagavato sutaṁ sammukhā paṭiggahitaṁ:
an5.44:3.2	‘manāpadāyī labhate manāpan’ti.
an5.44:3.3	Manāpaṁ me, bhante, sampannakolakaṁ sūkaramaṁsaṁ;
an5.44:3.4	taṁ me bhagavā paṭiggaṇhātu anukampaṁ upādāyā”ti.
an5.44:3.5	Paṭiggahesi bhagavā anukampaṁ upādāya.
an5.44:4.1	“Sammukhā metaṁ, bhante, bhagavato sutaṁ sammukhā paṭiggahitaṁ:
an5.44:4.2	‘manāpadāyī labhate manāpan’ti.
an5.44:4.3	Manāpaṁ me, bhante, nibbattatelakaṁ nāliyasākaṁ;
an5.44:4.4	taṁ me bhagavā paṭiggaṇhātu anukampaṁ upādāyā”ti.
an5.44:4.5	Paṭiggahesi bhagavā anukampaṁ upādāya.
an5.44:5.1	“Sammukhā metaṁ, bhante, bhagavato sutaṁ sammukhā paṭiggahitaṁ:
an5.44:5.2	‘manāpadāyī labhate manāpan’ti.
an5.44:5.3	Manāpo me, bhante, sālīnaṁ odano vicitakāḷako anekasūpo anekabyañjano;
an5.44:5.4	taṁ me bhagavā paṭiggaṇhātu anukampaṁ upādāyā”ti.
an5.44:5.5	Paṭiggahesi bhagavā anukampaṁ upādāya.
an5.44:6.1	“Sammukhā metaṁ, bhante, bhagavato sutaṁ sammukhā paṭiggahitaṁ:
an5.44:6.2	‘manāpadāyī labhate manāpan’ti.
an5.44:6.3	Manāpāni me, bhante, kāsikāni vatthāni;
an5.44:6.4	tāni me bhagavā paṭiggaṇhātu anukampaṁ upādāyā”ti.
an5.44:6.5	Paṭiggahesi bhagavā anukampaṁ upādāya.
an5.44:7.1	“Sammukhā metaṁ, bhante, bhagavato sutaṁ sammukhā paṭiggahitaṁ:
an5.44:7.2	‘manāpadāyī labhate manāpan’ti.
an5.44:7.3	Manāpo me, bhante, pallaṅko gonakatthato paṭalikatthato kadalimigapavarapaccattharaṇo sauttaracchado ubhatolohitakūpadhāno.
an5.44:7.4	Api ca, bhante, mayampetaṁ jānāma:
an5.44:7.5	‘netaṁ bhagavato kappatī’ti.
an5.44:7.6	Idaṁ me, bhante, candanaphalakaṁ agghati adhikasatasahassaṁ;
an5.44:7.7	taṁ me bhagavā paṭiggaṇhātu anukampaṁ upādāyā”ti.
an5.44:7.8	Paṭiggahesi bhagavā anukampaṁ upādāya.
an5.44:7.9	Atha kho bhagavā uggaṁ gahapatiṁ vesālikaṁ iminā anumodanīyena anumodi:
an5.44:8.1	“Manāpadāyī labhate manāpaṁ,
an5.44:8.2	Yo ujjubhūtesu dadāti chandasā;
an5.44:8.3	Acchādanaṁ sayanamannapānaṁ,
an5.44:8.4	Nānāppakārāni ca paccayāni.
an5.44:9.1	Cattañca muttañca anuggahītaṁ,
an5.44:9.2	Khettūpame arahante viditvā;
an5.44:9.3	So duccajaṁ sappuriso cajitvā,
an5.44:9.4	Manāpadāyī labhate manāpan”ti.
an5.44:10.1	Atha kho bhagavā uggaṁ gahapatiṁ vesālikaṁ iminā anumodanīyena anumoditvā uṭṭhāyāsanā pakkāmi.
an5.44:11.1	Atha kho uggo gahapati vesāliko aparena samayena kālamakāsi.
an5.44:11.2	Kālaṅkato ca uggo gahapati vesāliko aññataraṁ manomayaṁ kāyaṁ upapajji.
an5.44:11.3	Tena kho pana samayena bhagavā sāvatthiyaṁ viharati jetavane anāthapiṇḍikassa ārāme.
an5.44:11.4	Atha kho uggo devaputto abhikkantāya rattiyā abhikkantavaṇṇo kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitaṁ kho uggaṁ devaputtaṁ bhagavā etadavoca:
an5.44:11.5	“kacci te, ugga, yathādhippāyo”ti?
an5.44:11.6	“Taggha me, bhagavā, yathādhippāyo”ti.
an5.44:11.7	Atha kho bhagavā uggaṁ devaputtaṁ gāthāhi ajjhabhāsi:
an5.44:12.1	“Manāpadāyī labhate manāpaṁ,
an5.44:12.2	Aggassa dātā labhate punaggaṁ;
an5.44:12.3	Varassa dātā varalābhi hoti,
an5.44:12.4	Seṭṭhaṁ dado seṭṭhamupeti ṭhānaṁ.
an5.44:13.1	Yo aggadāyī varadāyī,
an5.44:13.2	seṭṭhadāyī ca yo naro;
an5.44:13.3	Dīghāyu yasavā hoti,
an5.44:13.4	yattha yatthūpapajjatī”ti.
an5.44:13.5	Catutthaṁ.
an5.45:0.1	Aṅguttara Nikāya 5.45
an5.45:0.2	5. Muṇḍarājavagga
an5.45:0.3	Puññābhisandasutta
an5.45:1.1	“Pañcime, bhikkhave, puññābhisandā kusalābhisandā sukhassāhārā sovaggikā sukhavipākā saggasaṁvattanikā iṭṭhāya kantāya manāpāya hitāya sukhāya saṁvattanti.
an5.45:2.1	Katame pañca?
an5.45:2.2	Yassa, bhikkhave, bhikkhu cīvaraṁ paribhuñjamāno appamāṇaṁ cetosamādhiṁ upasampajja viharati, appamāṇo tassa puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an5.45:3.1	Yassa, bhikkhave, bhikkhu piṇḍapātaṁ paribhuñjamāno …pe… yassa, bhikkhave, bhikkhu vihāraṁ paribhuñjamāno …pe… yassa, bhikkhave, bhikkhu mañcapīṭhaṁ paribhuñjamāno …pe….
an5.45:4.1	Yassa, bhikkhave, bhikkhu gilānappaccayabhesajjaparikkhāraṁ paribhuñjamāno appamāṇaṁ cetosamādhiṁ upasampajja viharati, appamāṇo tassa puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.
an5.45:4.2	Ime kho, bhikkhave, pañca puññābhisandā kusalābhisandā sukhassāhārā sovaggikā sukhavipākā saggasaṁvattanikā iṭṭhāya kantāya manāpāya hitāya sukhāya saṁvattanti.
an5.45:5.1	Imehi ca pana, bhikkhave, pañcahi puññābhisandehi kusalābhisandehi samannāgatassa ariyasāvakassa na sukaraṁ puññassa pamāṇaṁ gahetuṁ:
an5.45:5.2	‘ettako puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattatī’ti.
an5.45:5.3	Atha kho asaṅkheyyo appameyyo mahāpuññakkhandhotveva saṅkhaṁ gacchati.
an5.45:6.1	Seyyathāpi, bhikkhave, mahāsamudde na sukaraṁ udakassa pamāṇaṁ gahetuṁ:
an5.45:6.2	‘ettakāni udakāḷhakānīti vā ettakāni udakāḷhakasatānīti vā ettakāni udakāḷhakasahassānīti vā ettakāni udakāḷhakasatasahassānīti vā;
an5.45:6.3	atha kho asaṅkheyyo appameyyo mahāudakakkhandhotveva saṅkhaṁ gacchati’.
an5.45:6.4	Evamevaṁ kho, bhikkhave, imehi pañcahi puññābhisandehi kusalābhisandehi samannāgatassa ariyasāvakassa na sukaraṁ puññassa pamāṇaṁ gahetuṁ:
an5.45:6.5	‘ettako puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattatī’ti.
an5.45:6.6	Atha kho asaṅkheyyo appameyyo mahāpuññakkhandhotveva saṅkhaṁ gacchatīti.
an5.45:7.1	Mahodadhiṁ aparimitaṁ mahāsaraṁ,
an5.45:7.2	Bahubheravaṁ ratnagaṇānamālayaṁ;
an5.45:7.3	Najjo yathā naragaṇasaṅghasevitā,
an5.45:7.4	Puthū savantī upayanti sāgaraṁ.
an5.45:8.1	Evaṁ naraṁ annadapānavatthadaṁ,
an5.45:8.2	Seyyānisajjattharaṇassa dāyakaṁ;
an5.45:8.3	Puññassa dhārā upayanti paṇḍitaṁ,
an5.45:8.4	Najjo yathā vārivahāva sāgaran”ti.
an5.45:8.5	Pañcamaṁ.
an5.46:0.1	Aṅguttara Nikāya 5.46
an5.46:0.2	5. Muṇḍarājavagga
an5.46:0.3	Sampadāsutta
an5.46:1.1	“Pañcimā, bhikkhave, sampadā.
an5.46:1.2	Katamā pañca?
an5.46:1.3	Saddhāsampadā, sīlasampadā, sutasampadā, cāgasampadā, paññāsampadā—
an5.46:1.4	imā kho, bhikkhave, pañca sampadā”ti.
an5.46:1.5	Chaṭṭhaṁ.
an5.47:0.1	Aṅguttara Nikāya 5.47
an5.47:0.2	5. Muṇḍarājavagga
an5.47:0.3	Dhanasutta
an5.47:1.1	“Pañcimāni, bhikkhave, dhanāni.
an5.47:1.2	Katamāni pañca?
an5.47:1.3	Saddhādhanaṁ, sīladhanaṁ, sutadhanaṁ, cāgadhanaṁ, paññādhanaṁ.
an5.47:2.1	Katamañca, bhikkhave, saddhādhanaṁ?
an5.47:2.2	Idha, bhikkhave, ariyasāvako saddho hoti, saddahati tathāgatassa bodhiṁ:
an5.47:2.3	‘itipi so bhagavā …pe… satthā devamanussānaṁ buddho bhagavā’ti.
an5.47:2.4	Idaṁ vuccati, bhikkhave, saddhādhanaṁ.
an5.47:3.1	Katamañca, bhikkhave, sīladhanaṁ?
an5.47:3.2	Idha, bhikkhave, ariyasāvako pāṇātipātā paṭivirato hoti …pe… surāmerayamajjapamādaṭṭhānā paṭivirato hoti.
an5.47:3.3	Idaṁ vuccati, bhikkhave, sīladhanaṁ.
an5.47:4.1	Katamañca, bhikkhave, sutadhanaṁ?
an5.47:4.2	Idha, bhikkhave, ariyasāvako bahussuto hoti …pe… diṭṭhiyā suppaṭividdho.
an5.47:4.3	Idaṁ vuccati, bhikkhave, sutadhanaṁ.
an5.47:5.1	Katamañca, bhikkhave, cāgadhanaṁ?
an5.47:5.2	Idha, bhikkhave, ariyasāvako vigatamalamaccherena cetasā agāraṁ ajjhāvasati muttacāgo payatapāṇi vosaggarato yācayogo dānasaṁvibhāgarato.
an5.47:5.3	Idaṁ vuccati, bhikkhave, cāgadhanaṁ.
an5.47:6.1	Katamañca, bhikkhave, paññādhanaṁ?
an5.47:6.2	Idha, bhikkhave, ariyasāvako paññavā hoti, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an5.47:6.3	Idaṁ vuccati, bhikkhave, paññādhanaṁ.
an5.47:6.4	Imāni kho, bhikkhave, pañca dhanānīti.
an5.47:7.1	Yassa saddhā tathāgate,
an5.47:7.2	acalā suppatiṭṭhitā;
an5.47:7.3	Sīlañca yassa kalyāṇaṁ,
an5.47:7.4	ariyakantaṁ pasaṁsitaṁ.
an5.47:8.1	Saṅghe pasādo yassatthi,
an5.47:8.2	ujubhūtañca dassanaṁ;
an5.47:8.3	Adaliddoti taṁ āhu,
an5.47:8.4	amoghaṁ tassa jīvitaṁ.
an5.47:9.1	Tasmā saddhañca sīlañca,
an5.47:9.2	pasādaṁ dhammadassanaṁ;
an5.47:9.3	Anuyuñjetha medhāvī,
an5.47:9.4	saraṁ buddhāna sāsanan”ti.
an5.47:9.5	Sattamaṁ.
an5.48:0.1	Aṅguttara Nikāya 5.48
an5.48:0.2	5. Muṇḍarājavagga
an5.48:0.3	Alabbhanīyaṭhānasutta
an5.48:1.1	“Pañcimāni, bhikkhave, alabbhanīyāni ṭhānāni samaṇena vā brāhmaṇena vā devena vā mārena vā brahmunā vā kenaci vā lokasmiṁ.
an5.48:1.2	Katamāni pañca?
an5.48:1.3	‘Jarādhammaṁ mā jīrī’ti alabbhanīyaṁ ṭhānaṁ samaṇena vā brāhmaṇena vā devena vā mārena vā brahmunā vā kenaci vā lokasmiṁ.
an5.48:1.4	‘Byādhidhammaṁ mā byādhīyī’ti …pe… ‘maraṇadhammaṁ mā mīyī’ti … ‘khayadhammaṁ mā khīyī’ti … ‘nassanadhammaṁ mā nassī’ti alabbhanīyaṁ ṭhānaṁ samaṇena vā brāhmaṇena vā devena vā mārena vā brahmunā vā kenaci vā lokasmiṁ.
an5.48:2.1	Assutavato, bhikkhave, puthujjanassa jarādhammaṁ jīrati.
an5.48:2.2	So jarādhamme jiṇṇe na iti paṭisañcikkhati:
an5.48:2.3	‘na kho mayhevekassa jarādhammaṁ jīrati, atha kho yāvatā sattānaṁ āgati gati cuti upapatti sabbesaṁ sattānaṁ jarādhammaṁ jīrati.
an5.48:2.4	Ahañceva kho pana jarādhamme jiṇṇe soceyyaṁ kilameyyaṁ parideveyyaṁ, urattāḷiṁ kandeyyaṁ, sammohaṁ āpajjeyyaṁ, bhattampi me nacchādeyya, kāyepi dubbaṇṇiyaṁ okkameyya, kammantāpi nappavatteyyuṁ, amittāpi attamanā assu, mittāpi dummanā assū’ti.
an5.48:2.5	So jarādhamme jiṇṇe socati kilamati paridevati, urattāḷiṁ kandati, sammohaṁ āpajjati.
an5.48:2.6	Ayaṁ vuccati, bhikkhave:
an5.48:2.7	‘assutavā puthujjano viddho savisena sokasallena attānaṁyeva paritāpeti’.
an5.48:3.1	Puna caparaṁ, bhikkhave, assutavato puthujjanassa byādhidhammaṁ byādhīyati …pe… maraṇadhammaṁ mīyati … khayadhammaṁ khīyati … nassanadhammaṁ nassati.
an5.48:3.2	So nassanadhamme naṭṭhe na iti paṭisañcikkhati:
an5.48:3.3	‘na kho mayhevekassa nassanadhammaṁ nassati, atha kho yāvatā sattānaṁ āgati gati cuti upapatti sabbesaṁ sattānaṁ nassanadhammaṁ nassati.
an5.48:3.4	Ahañceva kho pana nassanadhamme naṭṭhe soceyyaṁ kilameyyaṁ parideveyyaṁ, urattāḷiṁ kandeyyaṁ, sammohaṁ āpajjeyyaṁ, bhattampi me nacchādeyya, kāyepi dubbaṇṇiyaṁ okkameyya, kammantāpi nappavatteyyuṁ, amittāpi attamanā assu, mittāpi dummanā assū’ti.
an5.48:3.5	So nassanadhamme naṭṭhe socati kilamati paridevati, urattāḷiṁ kandati, sammohaṁ āpajjati.
an5.48:3.6	Ayaṁ vuccati, bhikkhave:
an5.48:3.7	‘assutavā puthujjano viddho savisena sokasallena attānaṁyeva paritāpeti’.
an5.48:4.1	Sutavato ca kho, bhikkhave, ariyasāvakassa jarādhammaṁ jīrati.
an5.48:4.2	So jarādhamme jiṇṇe iti paṭisañcikkhati:
an5.48:4.3	‘na kho mayhevekassa jarādhammaṁ jīrati, atha kho yāvatā sattānaṁ āgati gati cuti upapatti sabbesaṁ sattānaṁ jarādhammaṁ jīrati.
an5.48:4.4	Ahañceva kho pana jarādhamme jiṇṇe soceyyaṁ kilameyyaṁ parideveyyaṁ, urattāḷiṁ kandeyyaṁ, sammohaṁ āpajjeyyaṁ, bhattampi me nacchādeyya, kāyepi dubbaṇṇiyaṁ okkameyya, kammantāpi nappavatteyyuṁ, amittāpi attamanā assu, mittāpi dummanā assū’ti.
an5.48:4.5	So jarādhamme jiṇṇe na socati na kilamati na paridevati, na urattāḷiṁ kandati, na sammohaṁ āpajjati.
an5.48:4.6	Ayaṁ vuccati, bhikkhave:
an5.48:4.7	‘sutavā ariyasāvako abbuhi savisaṁ sokasallaṁ, yena viddho assutavā puthujjano attānaṁyeva paritāpeti.
an5.48:4.8	Asoko visallo ariyasāvako attānaṁyeva parinibbāpeti’.
an5.48:5.1	Puna caparaṁ, bhikkhave, sutavato ariyasāvakassa byādhidhammaṁ byādhīyati …pe… maraṇadhammaṁ mīyati … khayadhammaṁ khīyati … nassanadhammaṁ nassati.
an5.48:5.2	So nassanadhamme naṭṭhe iti paṭisañcikkhati:
an5.48:5.3	‘na kho mayhevekassa nassanadhammaṁ nassati, atha kho yāvatā sattānaṁ āgati gati cuti upapatti sabbesaṁ sattānaṁ nassanadhammaṁ nassati.
an5.48:5.4	Ahañceva kho pana nassanadhamme naṭṭhe soceyyaṁ kilameyyaṁ parideveyyaṁ, urattāḷiṁ kandeyyaṁ, sammohaṁ āpajjeyyaṁ, bhattampi me nacchādeyya, kāyepi dubbaṇṇiyaṁ okkameyya, kammantāpi nappavatteyyuṁ, amittāpi attamanā assu, mittāpi dummanā assū’ti.
an5.48:5.5	So nassanadhamme naṭṭhe na socati na kilamati na paridevati, na urattāḷiṁ kandati, na sammohaṁ āpajjati.
an5.48:5.6	Ayaṁ vuccati, bhikkhave:
an5.48:5.7	‘sutavā ariyasāvako abbuhi savisaṁ sokasallaṁ, yena viddho assutavā puthujjano attānaṁyeva paritāpeti.
an5.48:5.8	Asoko visallo ariyasāvako attānaṁyeva parinibbāpetī’ti.
an5.48:6.1	Imāni kho, bhikkhave, pañca alabbhanīyāni ṭhānāni samaṇena vā brāhmaṇena vā devena vā mārena vā brahmunā vā kenaci vā lokasminti.
an5.48:7.1	Na socanāya paridevanāya,
an5.48:7.2	Atthodha labbhā api appakopi;
an5.48:7.3	Socantamenaṁ dukhitaṁ viditvā,
an5.48:7.4	Paccatthikā attamanā bhavanti.
an5.48:8.1	Yato ca kho paṇḍito āpadāsu,
an5.48:8.2	Na vedhatī atthavinicchayaññū;
an5.48:8.3	Paccatthikāssa dukhitā bhavanti,
an5.48:8.4	Disvā mukhaṁ avikāraṁ purāṇaṁ.
an5.48:9.1	Jappena mantena subhāsitena,
an5.48:9.2	Anuppadānena paveṇiyā vā;
an5.48:9.3	Yathā yathā yattha labhetha atthaṁ,
an5.48:9.4	Tathā tathā tattha parakkameyya.
an5.48:10.1	Sace pajāneyya alabbhaneyyo,
an5.48:10.2	Mayāva aññena vā esa attho;
an5.48:10.3	Asocamāno adhivāsayeyya,
an5.48:10.4	Kammaṁ daḷhaṁ kinti karomi dānī”ti.
an5.48:10.5	Aṭṭhamaṁ.
an5.49:0.1	Aṅguttara Nikāya 5.49
an5.49:0.2	5. Muṇḍarājavagga
an5.49:0.3	Kosalasutta
an5.49:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an5.49:1.2	Atha kho rājā pasenadi kosalo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an5.49:2.1	Tena kho pana samayena mallikā devī kālaṅkatā hoti.
an5.49:2.2	Atha kho aññataro puriso yena rājā pasenadi kosalo tenupasaṅkami; upasaṅkamitvā rañño pasenadissa kosalassa upakaṇṇake āroceti:
an5.49:2.3	“mallikā devī, deva, kālaṅkatā”ti.
an5.49:2.4	Evaṁ vutte, rājā pasenadi kosalo dukkhī dummano pattakkhandho adhomukho pajjhāyanto appaṭibhāno nisīdi.
an5.49:3.1	Atha kho bhagavā rājānaṁ pasenadiṁ kosalaṁ dukkhiṁ dummanaṁ pattakkhandhaṁ adhomukhaṁ pajjhāyantaṁ appaṭibhānaṁ viditvā rājānaṁ pasenadiṁ kosalaṁ etadavoca:
an5.49:3.2	“pañcimāni, mahārāja, alabbhanīyāni ṭhānāni samaṇena vā brāhmaṇena vā devena vā mārena vā brahmunā vā kenaci vā lokasmiṁ.
an5.49:3.3	Katamāni pañca?
an5.49:3.4	‘Jarādhammaṁ mā jīrī’ti alabbhanīyaṁ ṭhānaṁ …pe… na socanāya paridevanāya …pe… kammaṁ daḷhaṁ kinti karomi dānī”ti.
an5.49:3.5	Navamaṁ.
an5.50:0.1	Aṅguttara Nikāya 5.50
an5.50:0.2	5. Muṇḍarājavagga
an5.50:0.3	Nāradasutta
an5.50:1.1	Ekaṁ samayaṁ āyasmā nārado pāṭaliputte viharati kukkuṭārāme.
an5.50:1.2	Tena kho pana samayena muṇḍassa rañño bhaddā devī kālaṅkatā hoti piyā manāpā.
an5.50:1.3	So bhaddāya deviyā kālaṅkatāya piyāya manāpāya neva nhāyati na vilimpati na bhattaṁ bhuñjati na kammantaṁ payojeti—
an5.50:1.4	rattindivaṁ bhaddāya deviyā sarīre ajjhomucchito.
an5.50:1.5	Atha kho muṇḍo rājā piyakaṁ kosārakkhaṁ āmantesi:
an5.50:1.6	“tena hi, samma piyaka, bhaddāya deviyā sarīraṁ āyasāya teladoṇiyā pakkhipitvā aññissā āyasāya doṇiyā paṭikujjatha, yathā mayaṁ bhaddāya deviyā sarīraṁ cirataraṁ passeyyāmā”ti.
an5.50:1.7	“Evaṁ, devā”ti kho piyako kosārakkho muṇḍassa rañño paṭissutvā bhaddāya deviyā sarīraṁ āyasāya teladoṇiyā pakkhipitvā aññissā āyasāya doṇiyā paṭikujji.
an5.50:2.1	Atha kho piyakassa kosārakkhassa etadahosi:
an5.50:2.2	“imassa kho muṇḍassa rañño bhaddā devī kālaṅkatā piyā manāpā.
an5.50:2.3	So bhaddāya deviyā kālaṅkatāya piyāya manāpāya neva nhāyati na vilimpati na bhattaṁ bhuñjati na kammantaṁ payojeti—
an5.50:2.4	rattindivaṁ bhaddāya deviyā sarīre ajjhomucchito.
an5.50:2.5	Kaṁ nu kho muṇḍo rājā samaṇaṁ vā brāhmaṇaṁ vā payirupāseyya, yassa dhammaṁ sutvā sokasallaṁ pajaheyyā”ti.
an5.50:3.1	Atha kho piyakassa kosārakkhassa etadahosi:
an5.50:3.2	“ayaṁ kho āyasmā nārado pāṭaliputte viharati kukkuṭārāme.
an5.50:3.3	Taṁ kho panāyasmantaṁ nāradaṁ evaṁ kalyāṇo kittisaddo abbhuggato:
an5.50:3.4	‘paṇḍito viyatto medhāvī bahussuto cittakathī kalyāṇapaṭibhāno vuddho ceva arahā ca’.
an5.50:3.5	Yannūna muṇḍo rājā āyasmantaṁ nāradaṁ payirupāseyya, appeva nāma muṇḍo rājā āyasmato nāradassa dhammaṁ sutvā sokasallaṁ pajaheyyā”ti.
an5.50:4.1	Atha kho piyako kosārakkho yena muṇḍo rājā tenupasaṅkami; upasaṅkamitvā muṇḍaṁ rājānaṁ etadavoca:
an5.50:4.2	“ayaṁ kho, deva, āyasmā nārado pāṭaliputte viharati kukkuṭārāme.
an5.50:4.3	Taṁ kho panāyasmantaṁ nāradaṁ evaṁ kalyāṇo kittisaddo abbhuggato:
an5.50:4.4	‘paṇḍito viyatto medhāvī bahussuto cittakathī kalyāṇapaṭibhāno vuddho ceva arahā ca’.
an5.50:4.5	Yadi pana devo āyasmantaṁ nāradaṁ payirupāseyya, appeva nāma devo āyasmato nāradassa dhammaṁ sutvā sokasallaṁ pajaheyyā”ti.
an5.50:4.6	“Tena hi, samma piyaka, āyasmantaṁ nāradaṁ paṭivedehi.
an5.50:4.7	Kathañhi nāma mādiso samaṇaṁ vā brāhmaṇaṁ vā vijite vasantaṁ pubbe appaṭisaṁvidito upasaṅkamitabbaṁ maññeyyā”ti.
an5.50:4.8	“Evaṁ, devā”ti kho piyako kosārakkho muṇḍassa rañño paṭissutvā yenāyasmā nārado tenupasaṅkami; upasaṅkamitvā āyasmantaṁ nāradaṁ abhivādetvā ekamantaṁ nisīdi. Ekamantaṁ nisinno kho piyako kosārakkho āyasmantaṁ nāradaṁ etadavoca:
an5.50:5.1	“Imassa, bhante, muṇḍassa rañño bhaddā devī kālaṅkatā piyā manāpā.
an5.50:5.2	So bhaddāya deviyā kālaṅkatāya piyāya manāpāya neva nhāyati na vilimpati na bhattaṁ bhuñjati na kammantaṁ payojeti—
an5.50:5.3	rattindivaṁ bhaddāya deviyā sarīre ajjhomucchito.
an5.50:5.4	Sādhu, bhante, āyasmā nārado muṇḍassa rañño tathā dhammaṁ desetu yathā muṇḍo rājā āyasmato nāradassa dhammaṁ sutvā sokasallaṁ pajaheyyā”ti.
an5.50:5.5	“Yassadāni, piyaka, muṇḍo rājā kālaṁ maññatī”ti.
an5.50:6.1	Atha kho piyako kosārakkho uṭṭhāyāsanā āyasmantaṁ nāradaṁ abhivādetvā padakkhiṇaṁ katvā yena muṇḍo rājā tenupasaṅkami; upasaṅkamitvā muṇḍaṁ rājānaṁ etadavoca:
an5.50:6.2	“katāvakāso kho, deva, āyasmatā nāradena.
an5.50:6.3	Yassadāni devo kālaṁ maññatī”ti.
an5.50:6.4	“Tena hi, samma piyaka, bhadrāni bhadrāni yānāni yojāpehī”ti.
an5.50:6.5	“Evaṁ, devā”ti kho piyako kosārakkho muṇḍassa rañño paṭissutvā bhadrāni bhadrāni yānāni yojāpetvā muṇḍaṁ rājānaṁ etadavoca:
an5.50:6.6	“yuttāni kho te, deva, bhadrāni bhadrāni yānāni.
an5.50:6.7	Yassadāni devo kālaṁ maññatī”ti.
an5.50:7.1	Atha kho muṇḍo rājā bhadraṁ yānaṁ abhiruhitvā bhadrehi bhadrehi yānehi yena kukkuṭārāmo tena pāyāsi mahaccā rājānubhāvena āyasmantaṁ nāradaṁ dassanāya.
an5.50:7.2	Yāvatikā yānassa bhūmi yānena gantvā, yānā paccorohitvā pattikova ārāmaṁ pāvisi.
an5.50:7.3	Atha kho muṇḍo rājā yena āyasmā nārado tenupasaṅkami; upasaṅkamitvā āyasmantaṁ nāradaṁ abhivādetvā ekamantaṁ nisīdi. Ekamantaṁ nisinnaṁ kho muṇḍaṁ rājānaṁ āyasmā nārado etadavoca:
an5.50:8.1	“Pañcimāni, mahārāja, alabbhanīyāni ṭhānāni samaṇena vā brāhmaṇena vā devena vā mārena vā brahmunā vā kenaci vā lokasmiṁ.
an5.50:8.2	Katamāni pañca?
an5.50:8.3	‘Jarādhammaṁ mā jīrī’ti alabbhanīyaṁ ṭhānaṁ samaṇena vā brāhmaṇena vā devena vā mārena vā brahmunā vā kenaci vā lokasmiṁ.
an5.50:8.4	‘Byādhidhammaṁ mā byādhīyī’ti …pe… ‘maraṇadhammaṁ mā mīyī’ti … ‘khayadhammaṁ mā khīyī’ti … ‘nassanadhammaṁ mā nassī’ti alabbhanīyaṁ ṭhānaṁ samaṇena vā brāhmaṇena vā devena vā mārena vā brahmunā vā kenaci vā lokasmiṁ.
an5.50:9.1	Assutavato, mahārāja, puthujjanassa jarādhammaṁ jīrati.
an5.50:9.2	So jarādhamme jiṇṇe na iti paṭisañcikkhati:
an5.50:9.3	‘na kho mayhevekassa jarādhammaṁ jīrati, atha kho yāvatā sattānaṁ āgati gati cuti upapatti sabbesaṁ sattānaṁ jarādhammaṁ jīrati.
an5.50:9.4	Ahañceva kho pana jarādhamme jiṇṇe soceyyaṁ kilameyyaṁ parideveyyaṁ, urattāḷiṁ kandeyyaṁ, sammohaṁ āpajjeyyaṁ, bhattampi me nacchādeyya, kāyepi dubbaṇṇiyaṁ okkameyya, kammantāpi nappavatteyyuṁ, amittāpi attamanā assu, mittāpi dummanā assū’ti.
an5.50:9.5	So jarādhamme jiṇṇe socati kilamati paridevati, urattāḷiṁ kandati, sammohaṁ āpajjati.
an5.50:9.6	Ayaṁ vuccati, mahārāja:
an5.50:9.7	‘assutavā puthujjano viddho savisena sokasallena attānaṁyeva paritāpeti’.
an5.50:10.1	Puna caparaṁ, mahārāja, assutavato puthujjanassa byādhidhammaṁ byādhīyati …pe… maraṇadhammaṁ mīyati … khayadhammaṁ khīyati … nassanadhammaṁ nassati.
an5.50:10.2	So nassanadhamme naṭṭhe na iti paṭisañcikkhati:
an5.50:10.3	‘na kho mayhevekassa nassanadhammaṁ nassati, atha kho yāvatā sattānaṁ āgati gati cuti upapatti sabbesaṁ sattānaṁ nassanadhammaṁ nassati.
an5.50:10.4	Ahañceva kho pana nassanadhamme naṭṭhe soceyyaṁ kilameyyaṁ parideveyyaṁ, urattāḷiṁ kandeyyaṁ, sammohaṁ āpajjeyyaṁ, bhattampi me nacchādeyya, kāyepi dubbaṇṇiyaṁ okkameyya, kammantāpi nappavatteyyuṁ, amittāpi attamanā assu, mittāpi dummanā assū’ti.
an5.50:10.5	So nassanadhamme naṭṭhe socati kilamati paridevati, urattāḷiṁ kandati, sammohaṁ āpajjati.
an5.50:10.6	Ayaṁ vuccati, mahārāja:
an5.50:10.7	‘assutavā puthujjano viddho savisena sokasallena attānaṁyeva paritāpeti’.
an5.50:11.1	Sutavato ca kho, mahārāja, ariyasāvakassa jarādhammaṁ jīrati.
an5.50:11.2	So jarādhamme jiṇṇe iti paṭisañcikkhati:
an5.50:11.3	‘na kho mayhevekassa jarādhammaṁ jīrati, atha kho yāvatā sattānaṁ āgati gati cuti upapatti sabbesaṁ sattānaṁ jarādhammaṁ jīrati.
an5.50:11.4	Ahañceva kho pana jarādhamme jiṇṇe soceyyaṁ kilameyyaṁ parideveyyaṁ, urattāḷiṁ kandeyyaṁ, sammohaṁ āpajjeyyaṁ, bhattampi me nacchādeyya, kāyepi dubbaṇṇiyaṁ okkameyya, kammantāpi nappavatteyyuṁ, amittāpi attamanā assu, mittāpi dummanā assū’ti.
an5.50:11.5	So jarādhamme jiṇṇe na socati na kilamati na paridevati, na urattāḷiṁ kandati, na sammohaṁ āpajjati.
an5.50:11.6	Ayaṁ vuccati, mahārāja:
an5.50:11.7	‘sutavā ariyasāvako abbuhi savisaṁ sokasallaṁ, yena viddho assutavā puthujjano attānaṁyeva paritāpeti.
an5.50:11.8	Asoko visallo ariyasāvako attānaṁyeva parinibbāpeti’.
an5.50:12.1	Puna caparaṁ, mahārāja, sutavato ariyasāvakassa byādhidhammaṁ byādhīyati …pe… maraṇadhammaṁ mīyati … khayadhammaṁ khīyati … nassanadhammaṁ nassati.
an5.50:12.2	So nassanadhamme naṭṭhe iti paṭisañcikkhati:
an5.50:12.3	‘na kho mayhevekassa nassanadhammaṁ nassati, atha kho yāvatā sattānaṁ āgati gati cuti upapatti sabbesaṁ sattānaṁ nassanadhammaṁ nassati.
an5.50:12.4	Ahañceva kho pana nassanadhamme naṭṭhe soceyyaṁ kilameyyaṁ parideveyyaṁ, urattāḷiṁ kandeyyaṁ, sammohaṁ āpajjeyyaṁ, bhattampi me nacchādeyya, kāyepi dubbaṇṇiyaṁ okkameyya, kammantāpi nappavatteyyuṁ, amittāpi attamanā assu, mittāpi dummanā assū’ti.
an5.50:12.5	So nassanadhamme naṭṭhe na socati na kilamati na paridevati, na urattāḷiṁ kandati, na sammohaṁ āpajjati.
an5.50:12.6	Ayaṁ vuccati, mahārāja:
an5.50:12.7	‘sutavā ariyasāvako abbuhi savisaṁ sokasallaṁ, yena viddho assutavā puthujjano attānaṁyeva paritāpeti.
an5.50:12.8	Asoko visallo ariyasāvako attānaṁyeva parinibbāpeti’.
an5.50:13.1	Imāni kho, mahārāja, pañca alabbhanīyāni ṭhānāni samaṇena vā brāhmaṇena vā devena vā mārena vā brahmunā vā kenaci vā lokasminti.
an5.50:14.1	Na socanāya paridevanāya,
an5.50:14.2	Atthodha labbhā api appakopi;
an5.50:14.3	Socantamenaṁ dukhitaṁ viditvā,
an5.50:14.4	Paccatthikā attamanā bhavanti.
an5.50:15.1	Yato ca kho paṇḍito āpadāsu,
an5.50:15.2	Na vedhatī atthavinicchayaññū;
an5.50:15.3	Paccatthikāssa dukhitā bhavanti,
an5.50:15.4	Disvā mukhaṁ avikāraṁ purāṇaṁ.
an5.50:16.1	Jappena mantena subhāsitena,
an5.50:16.2	Anuppadānena paveṇiyā vā;
an5.50:16.3	Yathā yathā yattha labhetha atthaṁ,
an5.50:16.4	Tathā tathā tattha parakkameyya.
an5.50:17.1	Sace pajāneyya alabbhaneyyo,
an5.50:17.2	Mayāva aññena vā esa attho;
an5.50:17.3	Asocamāno adhivāsayeyya,
an5.50:17.4	Kammaṁ daḷhaṁ kinti karomi dānī”ti.
an5.50:18.1	Evaṁ vutte, muṇḍo rājā āyasmantaṁ nāradaṁ etadavoca:
an5.50:18.2	“ko nāmo ayaṁ, bhante, dhammapariyāyo”ti?
an5.50:18.3	“Sokasallaharaṇo nāma ayaṁ, mahārāja, dhammapariyāyo”ti.
an5.50:18.4	“Taggha, bhante, sokasallaharaṇo.
an5.50:18.5	Imañhi me, bhante, dhammapariyāyaṁ sutvā sokasallaṁ pahīnan”ti.
an5.50:19.1	Atha kho muṇḍo rājā piyakaṁ kosārakkhaṁ āmantesi:
an5.50:19.2	“tena hi, samma piyaka, bhaddāya deviyā sarīraṁ jhāpetha; thūpañcassā karotha.
an5.50:19.3	Ajjatagge dāni mayaṁ nhāyissāma ceva vilimpissāma bhattañca bhuñjissāma kammante ca payojessāmā”ti.
an5.50:19.4	Dasamaṁ.
an5.50:19.5	Muṇḍarājavaggo pañcamo.
an5.50:20.0	Tassuddānaṁ
an5.50:20.1	Ādiyo sappuriso iṭṭhā,
an5.50:20.2	manāpadāyībhisandaṁ;
an5.50:20.3	Sampadā ca dhanaṁ ṭhānaṁ,
an5.50:20.4	kosalo nāradena cāti.
an5.50:20.5	Paṭhamo paṇṇāsako samatto.
an5.51:0.1	Aṅguttara Nikāya 5.51
an5.51:0.2	6. Nīvaraṇavagga
an5.51:0.3	Āvaraṇasutta
an5.51:1.1	Evaṁ me sutaṁ—
an5.51:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an5.51:1.3	Tatra kho bhagavā bhikkhū āmantesi:
an5.51:1.4	“bhikkhavo”ti.
an5.51:1.5	“Bhadante”ti te bhikkhū bhagavato paccassosuṁ.
an5.51:1.6	Bhagavā etadavoca:
an5.51:2.1	“Pañcime, bhikkhave, āvaraṇā nīvaraṇā cetaso ajjhāruhā paññāya dubbalīkaraṇā.
an5.51:2.2	Katame pañca?
an5.51:2.3	Kāmacchando, bhikkhave, āvaraṇo nīvaraṇo cetaso ajjhāruho paññāya dubbalīkaraṇo.
an5.51:2.4	Byāpādo, bhikkhave, āvaraṇo nīvaraṇo cetaso ajjhāruho paññāya dubbalīkaraṇo.
an5.51:2.5	Thinamiddhaṁ, bhikkhave, āvaraṇaṁ nīvaraṇaṁ cetaso ajjhāruhaṁ paññāya dubbalīkaraṇaṁ.
an5.51:2.6	Uddhaccakukkuccaṁ, bhikkhave, āvaraṇaṁ nīvaraṇaṁ cetaso ajjhāruhaṁ paññāya dubbalīkaraṇaṁ.
an5.51:2.7	Vicikicchā, bhikkhave, āvaraṇā nīvaraṇā cetaso ajjhāruhā paññāya dubbalīkaraṇā.
an5.51:2.8	Ime kho, bhikkhave, pañca āvaraṇā nīvaraṇā cetaso ajjhāruhā paññāya dubbalīkaraṇā.
an5.51:3.1	So vata, bhikkhave, bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe appahāya, abalāya paññāya dubbalāya attatthaṁ vā ñassati paratthaṁ vā ñassati ubhayatthaṁ vā ñassati uttari vā manussadhammā alamariyañāṇadassanavisesaṁ sacchikarissatīti netaṁ ṭhānaṁ vijjati.
an5.51:3.2	Seyyathāpi, bhikkhave, nadī pabbateyyā dūraṅgamā sīghasotā hārahārinī.
an5.51:3.3	Tassā puriso ubhato naṅgalamukhāni vivareyya.
an5.51:3.4	Evañhi so, bhikkhave, majjhe nadiyā soto vikkhitto visaṭo byādiṇṇo neva dūraṅgamo assa na sīghasoto na hārahārī.
an5.51:3.5	Evamevaṁ kho, bhikkhave, so vata bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe appahāya, abalāya paññāya dubbalāya attatthaṁ vā ñassati paratthaṁ vā ñassati ubhayatthaṁ vā ñassati uttari vā manussadhammā alamariyañāṇadassanavisesaṁ sacchikarissatīti netaṁ ṭhānaṁ vijjati.
an5.51:4.1	So vata, bhikkhave, bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe pahāya, balavatiyā paññāya attatthaṁ vā ñassati paratthaṁ vā ñassati ubhayatthaṁ vā ñassati uttari vā manussadhammā alamariyañāṇadassanavisesaṁ sacchikarissatīti ṭhānametaṁ vijjati.
an5.51:4.2	Seyyathāpi, bhikkhave, nadī pabbateyyā dūraṅgamā sīghasotā hārahārinī.
an5.51:4.3	Tassā puriso ubhato naṅgalamukhāni pidaheyya.
an5.51:4.4	Evañhi so, bhikkhave, majjhe nadiyā soto avikkhitto avisaṭo abyādiṇṇo dūraṅgamo ceva assa sīghasoto ca hārahārī ca.
an5.51:4.5	Evamevaṁ kho, bhikkhave, so vata bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe pahāya, balavatiyā paññāya attatthaṁ vā ñassati paratthaṁ vā ñassati ubhayatthaṁ vā ñassati uttari vā manussadhammā alamariyañāṇadassanavisesaṁ sacchikarissatīti ṭhānametaṁ vijjatī”ti.
an5.51:4.6	Paṭhamaṁ.
an5.52:0.1	Aṅguttara Nikāya 5.52
an5.52:0.2	6. Nīvaraṇavagga
an5.52:0.3	Akusalarāsisutta
an5.52:1.1	“Akusalarāsīti, bhikkhave, vadamāno pañca nīvaraṇe sammā vadamāno vadeyya.
an5.52:1.2	Kevalo hāyaṁ, bhikkhave, akusalarāsi yadidaṁ pañca nīvaraṇā.
an5.52:1.3	Katame pañca?
an5.52:1.4	Kāmacchandanīvaraṇaṁ, byāpādanīvaraṇaṁ, thinamiddhanīvaraṇaṁ, uddhaccakukkuccanīvaraṇaṁ, vicikicchānīvaraṇaṁ.
an5.52:1.5	Akusalarāsīti, bhikkhave, vadamāno ime pañca nīvaraṇe sammā vadamāno vadeyya.
an5.52:1.6	Kevalo hāyaṁ, bhikkhave, akusalarāsi yadidaṁ pañca nīvaraṇā”ti.
an5.52:1.7	Dutiyaṁ.
an5.53:0.1	Aṅguttara Nikāya 5.53
an5.53:0.2	6. Nīvaraṇavagga
an5.53:0.3	Padhāniyaṅgasutta
an5.53:1.1	“Pañcimāni, bhikkhave, padhāniyaṅgāni.
an5.53:1.2	Katamāni pañca?
an5.53:1.3	Idha, bhikkhave, bhikkhu saddho hoti, saddahati tathāgatassa bodhiṁ:
an5.53:1.4	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an5.53:1.5	Appābādho hoti appātaṅko;
an5.53:1.6	samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya;
an5.53:1.7	asaṭho hoti amāyāvī;
an5.53:1.8	yathābhūtaṁ attānaṁ āvikattā satthari vā viññūsu vā sabrahmacārīsu;
an5.53:1.9	āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu;
an5.53:1.10	paññavā hoti, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an5.53:1.11	Imāni kho, bhikkhave, pañca padhāniyaṅgānī”ti.
an5.53:1.12	Tatiyaṁ.
an5.54:0.1	Aṅguttara Nikāya 5.54
an5.54:0.2	6. Nīvaraṇavagga
an5.54:0.3	Samayasutta
an5.54:1.1	“Pañcime, bhikkhave, asamayā padhānāya.
an5.54:1.2	Katame pañca?
an5.54:1.3	Idha, bhikkhave, bhikkhu jiṇṇo hoti jarāyābhibhūto.
an5.54:1.4	Ayaṁ, bhikkhave, paṭhamo asamayo padhānāya.
an5.54:2.1	Puna caparaṁ, bhikkhave, bhikkhu byādhito hoti byādhinābhibhūto.
an5.54:2.2	Ayaṁ, bhikkhave, dutiyo asamayo padhānāya.
an5.54:3.1	Puna caparaṁ, bhikkhave, dubbhikkhaṁ hoti dussassaṁ dullabhapiṇḍaṁ, na sukaraṁ uñchena paggahena yāpetuṁ.
an5.54:3.2	Ayaṁ, bhikkhave, tatiyo asamayo padhānāya.
an5.54:4.1	Puna caparaṁ, bhikkhave, bhayaṁ hoti aṭavisaṅkopo, cakkasamārūḷhā jānapadā pariyāyanti.
an5.54:4.2	Ayaṁ, bhikkhave, catuttho asamayo padhānāya.
an5.54:5.1	Puna caparaṁ, bhikkhave, saṅgho bhinno hoti.
an5.54:5.2	Saṅghe kho pana, bhikkhave, bhinne aññamaññaṁ akkosā ca honti, aññamaññaṁ paribhāsā ca honti, aññamaññaṁ parikkhepā ca honti, aññamaññaṁ pariccajā ca honti.
an5.54:5.3	Tattha appasannā ceva nappasīdanti, pasannānañca ekaccānaṁ aññathattaṁ hoti.
an5.54:5.4	Ayaṁ, bhikkhave, pañcamo asamayo padhānāya.
an5.54:5.5	Ime kho, bhikkhave, pañca asamayā padhānāyāti.
an5.54:6.1	Pañcime, bhikkhave, samayā padhānāya.
an5.54:6.2	Katame pañca?
an5.54:6.3	Idha, bhikkhave, bhikkhu daharo hoti yuvā susu kāḷakeso bhadrena yobbanena samannāgato paṭhamena vayasā.
an5.54:6.4	Ayaṁ, bhikkhave, paṭhamo samayo padhānāya.
an5.54:7.1	Puna caparaṁ, bhikkhave, bhikkhu appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya.
an5.54:7.2	Ayaṁ, bhikkhave, dutiyo samayo padhānāya.
an5.54:8.1	Puna caparaṁ, bhikkhave, subhikkhaṁ hoti susassaṁ sulabhapiṇḍaṁ, sukaraṁ uñchena paggahena yāpetuṁ.
an5.54:8.2	Ayaṁ, bhikkhave, tatiyo samayo padhānāya.
an5.54:9.1	Puna caparaṁ, bhikkhave, manussā samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharanti.
an5.54:9.2	Ayaṁ, bhikkhave, catuttho samayo padhānāya.
an5.54:10.1	Puna caparaṁ, bhikkhave, saṅgho samaggo sammodamāno avivadamāno ekuddeso phāsu viharati.
an5.54:10.2	Saṅghe kho pana, bhikkhave, samagge na ceva aññamaññaṁ akkosā honti, na ca aññamaññaṁ paribhāsā honti, na ca aññamaññaṁ parikkhepā honti, na ca aññamaññaṁ pariccajā honti.
an5.54:10.3	Tattha appasannā ceva pasīdanti, pasannānañca bhiyyobhāvo hoti.
an5.54:10.4	Ayaṁ, bhikkhave, pañcamo samayo padhānāya.
an5.54:10.5	Ime kho, bhikkhave, pañca samayā padhānāyā”ti.
an5.54:10.6	Catutthaṁ.
an5.55:0.1	Aṅguttara Nikāya 5.55
an5.55:0.2	6. Nīvaraṇavagga
an5.55:0.3	Mātāputtasutta
an5.55:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an5.55:1.2	Tena kho pana samayena sāvatthiyaṁ ubho mātāputtā vassāvāsaṁ upagamiṁsu—
an5.55:1.3	bhikkhu ca bhikkhunī ca.
an5.55:1.4	Te aññamaññassa abhiṇhaṁ dassanakāmā ahesuṁ.
an5.55:1.5	Mātāpi puttassa abhiṇhaṁ dassanakāmā ahosi;
an5.55:1.6	puttopi mātaraṁ abhiṇhaṁ dassanakāmo ahosi.
an5.55:1.7	Tesaṁ abhiṇhaṁ dassanā saṁsaggo ahosi.
an5.55:1.8	Saṁsagge sati vissāso ahosi.
an5.55:1.9	Vissāse sati otāro ahosi.
an5.55:1.10	Te otiṇṇacittā sikkhaṁ apaccakkhāya dubbalyaṁ anāvikatvā methunaṁ dhammaṁ paṭiseviṁsu.
an5.55:2.1	Atha kho sambahulā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
an5.55:2.2	“idha, bhante, sāvatthiyaṁ ubho mātāputtā vassāvāsaṁ upagamiṁsu—
an5.55:2.3	bhikkhu ca bhikkhunī ca, te aññamaññassa abhiṇhaṁ dassanakāmā ahesuṁ, mātāpi puttassa abhiṇhaṁ dassanakāmā ahosi, puttopi mātaraṁ abhiṇhaṁ dassanakāmo ahosi.
an5.55:2.4	Tesaṁ abhiṇhaṁ dassanā saṁsaggo ahosi, saṁsagge sati vissāso ahosi, vissāse sati otāro ahosi, te otiṇṇacittā sikkhaṁ apaccakkhāya dubbalyaṁ anāvikatvā methunaṁ dhammaṁ paṭiseviṁsū”ti.
an5.55:3.1	“Kiṁ nu so, bhikkhave, moghapuriso maññati:
an5.55:3.2	‘na mātā putte sārajjati, putto vā pana mātarī’ti?
an5.55:3.3	Nāhaṁ, bhikkhave, aññaṁ ekarūpampi samanupassāmi evaṁ rajanīyaṁ evaṁ kamanīyaṁ evaṁ madanīyaṁ evaṁ bandhanīyaṁ evaṁ mucchanīyaṁ evaṁ antarāyakaraṁ anuttarassa yogakkhemassa adhigamāya yathayidaṁ, bhikkhave, itthirūpaṁ.
an5.55:3.4	Itthirūpe, bhikkhave, sattā rattā giddhā gathitā mucchitā ajjhosannā.
an5.55:3.5	Te dīgharattaṁ socanti itthirūpavasānugā.
an5.55:4.1	Nāhaṁ, bhikkhave, aññaṁ ekasaddampi … ekagandhampi … ekarasampi … ekaphoṭṭhabbampi samanupassāmi evaṁ rajanīyaṁ evaṁ kamanīyaṁ evaṁ madanīyaṁ evaṁ bandhanīyaṁ evaṁ mucchanīyaṁ evaṁ antarāyakaraṁ anuttarassa yogakkhemassa adhigamāya yathayidaṁ, bhikkhave, itthiphoṭṭhabbaṁ.
an5.55:4.2	Itthiphoṭṭhabbe, bhikkhave, sattā rattā giddhā gathitā mucchitā ajjhosannā.
an5.55:4.3	Te dīgharattaṁ socanti itthiphoṭṭhabbavasānugā.
an5.55:5.1	Itthī, bhikkhave, gacchantīpi purisassa cittaṁ pariyādāya tiṭṭhati;
an5.55:5.2	ṭhitāpi …pe… nisinnāpi … sayānāpi … hasantīpi … bhaṇantīpi … gāyantīpi … rodantīpi … ugghātitāpi … matāpi purisassa cittaṁ pariyādāya tiṭṭhati.
an5.55:5.3	Yañhi taṁ, bhikkhave, sammā vadamāno vadeyya:
an5.55:5.4	‘samantapāso mārassā’ti mātugāmaṁyeva sammā vadamāno vadeyya:
an5.55:5.5	‘samantapāso mārassā’ti.
an5.55:6.1	Sallape asihatthena,
an5.55:6.2	pisācenāpi sallape;
an5.55:6.3	Āsīvisampi āsīde,
an5.55:6.4	yena daṭṭho na jīvati;
an5.55:6.5	Na tveva eko ekāya,
an5.55:6.6	mātugāmena sallape.
an5.55:7.1	Muṭṭhassatiṁ tā bandhanti,
an5.55:7.2	pekkhitena sitena ca;
an5.55:7.3	Athopi dunnivatthena,
an5.55:7.4	mañjunā bhaṇitena ca;
an5.55:7.5	Neso jano svāsīsado,
an5.55:7.6	api ugghātito mato.
an5.55:8.1	Pañca kāmaguṇā ete,
an5.55:8.2	itthirūpasmiṁ dissare;
an5.55:8.3	Rūpā saddā rasā gandhā,
an5.55:8.4	phoṭṭhabbā ca manoramā.
an5.55:9.1	Tesaṁ kāmoghavūḷhānaṁ,
an5.55:9.2	kāme aparijānataṁ;
an5.55:9.3	Kālaṁ gati bhavābhavaṁ,
an5.55:9.4	saṁsārasmiṁ purakkhatā.
an5.55:10.1	Ye ca kāme pariññāya,
an5.55:10.2	caranti akutobhayā;
an5.55:10.3	Te ve pāraṅgatā loke,
an5.55:10.4	ye pattā āsavakkhayan”ti.
an5.55:10.5	Pañcamaṁ.
an5.56:0.1	Aṅguttara Nikāya 5.56
an5.56:0.2	6. Nīvaraṇavagga
an5.56:0.3	Upajjhāyasutta
an5.56:1.1	Atha kho aññataro bhikkhu yena sako upajjhāyo tenupasaṅkami; upasaṅkamitvā sakaṁ upajjhāyaṁ etadavoca:
an5.56:1.2	“etarahi me, bhante, madhurakajāto ceva kāyo, disā ca me na pakkhāyanti, dhammā ca maṁ nappaṭibhanti, thinamiddhañca me cittaṁ pariyādāya tiṭṭhati, anabhirato ca brahmacariyaṁ carāmi, atthi ca me dhammesu vicikicchā”ti.
an5.56:2.1	Atha kho so bhikkhu taṁ saddhivihārikaṁ bhikkhuṁ ādāya yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an5.56:2.2	“ayaṁ, bhante, bhikkhu evamāha:
an5.56:2.3	‘etarahi me, bhante, madhurakajāto ceva kāyo, disā ca maṁ na pakkhāyanti, dhammā ca me nappaṭibhanti, thinamiddhañca me cittaṁ pariyādāya tiṭṭhati, anabhirato ca brahmacariyaṁ carāmi, atthi ca me dhammesu vicikicchā’”ti.
an5.56:3.1	“Evañhetaṁ, bhikkhu, hoti indriyesu aguttadvārassa, bhojane amattaññuno, jāgariyaṁ ananuyuttassa, avipassakassa kusalānaṁ dhammānaṁ, pubbarattāpararattaṁ bodhipakkhiyānaṁ dhammānaṁ bhāvanānuyogaṁ ananuyuttassa viharato, yaṁ madhurakajāto ceva kāyo hoti, disā cassa na pakkhāyanti, dhammā ca taṁ nappaṭibhanti, thinamiddhañcassa cittaṁ pariyādāya tiṭṭhati, anabhirato ca brahmacariyaṁ carati, hoti cassa dhammesu vicikicchā.
an5.56:3.2	Tasmātiha te, bhikkhu, evaṁ sikkhitabbaṁ:
an5.56:3.3	‘indriyesu guttadvāro bhavissāmi, bhojane mattaññū, jāgariyaṁ anuyutto, vipassako kusalānaṁ dhammānaṁ, pubbarattāpararattaṁ bodhipakkhiyānaṁ dhammānaṁ bhāvanānuyogaṁ anuyutto viharissāmī’ti.
an5.56:3.4	Evañhi te, bhikkhu, sikkhitabban”ti.
an5.56:4.1	Atha kho so bhikkhu bhagavatā iminā ovādena ovadito uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an5.56:4.2	Atha kho so bhikkhu eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
an5.56:4.3	“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
an5.56:4.4	Aññataro pana so bhikkhu arahataṁ ahosi.
an5.56:5.1	Atha kho so bhikkhu arahattaṁ patto yena sako upajjhāyo tenupasaṅkami; upasaṅkamitvā sakaṁ upajjhāyaṁ etadavoca:
an5.56:5.2	“etarahi me, bhante, na ceva madhurakajāto kāyo, disā ca me pakkhāyanti, dhammā ca maṁ paṭibhanti, thinamiddhañca me cittaṁ na pariyādāya tiṭṭhati, abhirato ca brahmacariyaṁ carāmi, natthi ca me dhammesu vicikicchā”ti.
an5.56:5.3	Atha kho so bhikkhu taṁ saddhivihārikaṁ bhikkhuṁ ādāya yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an5.56:5.4	“ayaṁ, bhante, bhikkhu evamāha:
an5.56:5.5	‘etarahi me, bhante, na ceva madhurakajāto kāyo, disā ca me pakkhāyanti, dhammā ca maṁ paṭibhanti, thinamiddhañca me cittaṁ na pariyādāya tiṭṭhati, abhirato ca brahmacariyaṁ carāmi, natthi ca me dhammesu vicikicchā’”ti.
an5.56:6.1	“Evañhetaṁ, bhikkhu, hoti indriyesu guttadvārassa, bhojane mattaññuno, jāgariyaṁ anuyuttassa, vipassakassa kusalānaṁ dhammānaṁ, pubbarattāpararattaṁ bodhipakkhiyānaṁ dhammānaṁ bhāvanānuyogaṁ anuyuttassa viharato, yaṁ na ceva madhurakajāto kāyo hoti, disā cassa pakkhāyanti, dhammā ca taṁ paṭibhanti, thinamiddhañcassa cittaṁ na pariyādāya tiṭṭhati, abhirato ca brahmacariyaṁ carati, na cassa hoti dhammesu vicikicchā.
an5.56:6.2	Tasmātiha vo, bhikkhave, evaṁ sikkhitabbaṁ:
an5.56:6.3	‘indriyesu guttadvārā bhavissāma, bhojane mattaññuno, jāgariyaṁ anuyuttā, vipassakā kusalānaṁ dhammānaṁ, pubbarattāpararattaṁ bodhipakkhiyānaṁ dhammānaṁ bhāvanānuyogaṁ anuyuttā viharissāmā’ti.
an5.56:6.4	Evañhi vo, bhikkhave, sikkhitabban”ti.
an5.56:6.5	Chaṭṭhaṁ.
an5.57:0.1	Aṅguttara Nikāya 5.57
an5.57:0.2	6. Nīvaraṇavagga
an5.57:0.3	Abhiṇhapaccavekkhitabbaṭhānasutta
an5.57:1.1	“Pañcimāni, bhikkhave, ṭhānāni abhiṇhaṁ paccavekkhitabbāni itthiyā vā purisena vā gahaṭṭhena vā pabbajitena vā.
an5.57:1.2	Katamāni pañca?
an5.57:1.3	‘Jarādhammomhi, jaraṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:1.4	‘Byādhidhammomhi, byādhiṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:1.5	‘Maraṇadhammomhi, maraṇaṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:1.6	‘Sabbehi me piyehi manāpehi nānābhāvo vinābhāvo’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:1.7	‘Kammassakomhi, kammadāyādo kammayoni kammabandhu kammapaṭisaraṇo.
an5.57:1.8	Yaṁ kammaṁ karissāmi—kalyāṇaṁ vā pāpakaṁ vā—
an5.57:1.9	tassa dāyādo bhavissāmī’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:2.1	Kiñca, bhikkhave, atthavasaṁ paṭicca ‘jarādhammomhi, jaraṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?
an5.57:2.2	Atthi, bhikkhave, sattānaṁ yobbane yobbanamado, yena madena mattā kāyena duccaritaṁ caranti, vācāya duccaritaṁ caranti, manasā duccaritaṁ caranti.
an5.57:2.3	Tassa taṁ ṭhānaṁ abhiṇhaṁ paccavekkhato yo yobbane yobbanamado so sabbaso vā pahīyati tanu vā pana hoti.
an5.57:2.4	Idaṁ kho, bhikkhave, atthavasaṁ paṭicca ‘jarādhammomhi, jaraṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:3.1	Kiñca, bhikkhave, atthavasaṁ paṭicca ‘byādhidhammomhi, byādhiṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?
an5.57:3.2	Atthi, bhikkhave, sattānaṁ ārogye ārogyamado, yena madena mattā kāyena duccaritaṁ caranti, vācāya duccaritaṁ caranti, manasā duccaritaṁ caranti.
an5.57:3.3	Tassa taṁ ṭhānaṁ abhiṇhaṁ paccavekkhato yo ārogye ārogyamado so sabbaso vā pahīyati tanu vā pana hoti.
an5.57:3.4	Idaṁ kho, bhikkhave, atthavasaṁ paṭicca ‘byādhidhammomhi, byādhiṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:4.1	Kiñca, bhikkhave, atthavasaṁ paṭicca ‘maraṇadhammomhi, maraṇaṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?
an5.57:4.2	Atthi, bhikkhave, sattānaṁ jīvite jīvitamado, yena madena mattā kāyena duccaritaṁ caranti, vācāya duccaritaṁ caranti, manasā duccaritaṁ caranti.
an5.57:4.3	Tassa taṁ ṭhānaṁ abhiṇhaṁ paccavekkhato yo jīvite jīvitamado so sabbaso vā pahīyati tanu vā pana hoti.
an5.57:4.4	Idaṁ kho, bhikkhave, atthavasaṁ paṭicca ‘maraṇadhammomhi, maraṇaṁ anatīto’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:5.1	Kiñca, bhikkhave, atthavasaṁ paṭicca ‘sabbehi me piyehi manāpehi nānābhāvo vinābhāvo’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?
an5.57:5.2	Atthi, bhikkhave, sattānaṁ piyesu manāpesu yo chandarāgo yena rāgena rattā kāyena duccaritaṁ caranti, vācāya duccaritaṁ caranti, manasā duccaritaṁ caranti.
an5.57:5.3	Tassa taṁ ṭhānaṁ abhiṇhaṁ paccavekkhato yo piyesu manāpesu chandarāgo so sabbaso vā pahīyati tanu vā pana hoti.
an5.57:5.4	Idaṁ kho, bhikkhave, atthavasaṁ paṭicca ‘sabbehi me piyehi manāpehi nānābhāvo vinābhāvo’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:6.1	Kiñca, bhikkhave, atthavasaṁ paṭicca ‘kammassakomhi, kammadāyādo kammayoni kammabandhu kammapaṭisaraṇo, yaṁ kammaṁ karissāmi—
an5.57:6.2	kalyāṇaṁ vā pāpakaṁ vā—tassa dāyādo bhavissāmī’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā?
an5.57:6.3	Atthi, bhikkhave, sattānaṁ kāyaduccaritaṁ vacīduccaritaṁ manoduccaritaṁ.
an5.57:6.4	Tassa taṁ ṭhānaṁ abhiṇhaṁ paccavekkhato sabbaso vā duccaritaṁ pahīyati tanu vā pana hoti.
an5.57:6.5	Idaṁ kho, bhikkhave, atthavasaṁ paṭicca ‘kammassakomhi, kammadāyādo kammayoni kammabandhu kammapaṭisaraṇo, yaṁ kammaṁ karissāmi—
an5.57:6.6	kalyāṇaṁ vā pāpakaṁ vā—
an5.57:6.7	tassa dāyādo bhavissāmī’ti abhiṇhaṁ paccavekkhitabbaṁ itthiyā vā purisena vā gahaṭṭhena vā pabbajitena vā.
an5.57:7.1	Sa kho so, bhikkhave, ariyasāvako iti paṭisañcikkhati:
an5.57:7.2	‘na kho ahaññeveko jarādhammo jaraṁ anatīto, atha kho yāvatā sattānaṁ āgati gati cuti upapatti sabbe sattā jarādhammā jaraṁ anatītā’ti.
an5.57:7.3	Tassa taṁ ṭhānaṁ abhiṇhaṁ paccavekkhato maggo sañjāyati.
an5.57:7.4	So taṁ maggaṁ āsevati bhāveti bahulīkaroti.
an5.57:7.5	Tassa taṁ maggaṁ āsevato bhāvayato bahulīkaroto saṁyojanāni sabbaso pahīyanti anusayā byantīhonti.
an5.57:8.1	‘Na kho ahaññeveko byādhidhammo byādhiṁ anatīto, atha kho yāvatā sattānaṁ āgati gati cuti upapatti sabbe sattā byādhidhammā byādhiṁ anatītā’ti.
an5.57:8.2	Tassa taṁ ṭhānaṁ abhiṇhaṁ paccavekkhato maggo sañjāyati.
an5.57:8.3	So taṁ maggaṁ āsevati bhāveti bahulīkaroti.
an5.57:8.4	Tassa taṁ maggaṁ āsevato bhāvayato bahulīkaroto saṁyojanāni sabbaso pahīyanti, anusayā byantīhonti.
an5.57:9.1	‘Na kho ahaññeveko maraṇadhammo maraṇaṁ anatīto, atha kho yāvatā sattānaṁ āgati gati cuti upapatti sabbe sattā maraṇadhammā maraṇaṁ anatītā’ti.
an5.57:9.2	Tassa taṁ ṭhānaṁ abhiṇhaṁ paccavekkhato maggo sañjāyati.
an5.57:9.3	So taṁ maggaṁ āsevati bhāveti bahulīkaroti.
an5.57:9.4	Tassa taṁ maggaṁ āsevato bhāvayato bahulīkaroto saṁyojanāni sabbaso pahīyanti, anusayā byantīhonti.
an5.57:10.1	‘Na kho mayhevekassa sabbehi piyehi manāpehi nānābhāvo vinābhāvo, atha kho yāvatā sattānaṁ āgati gati cuti upapatti sabbesaṁ sattānaṁ piyehi manāpehi nānābhāvo vinābhāvo’ti.
an5.57:10.2	Tassa taṁ ṭhānaṁ abhiṇhaṁ paccavekkhato maggo sañjāyati.
an5.57:10.3	So taṁ maggaṁ āsevati bhāveti bahulīkaroti.
an5.57:10.4	Tassa taṁ maggaṁ āsevato bhāvayato bahulīkaroto saṁyojanāni sabbaso pahīyanti, anusayā byantīhonti.
an5.57:11.1	‘Na kho ahaññeveko kammassako kammadāyādo kammayoni kammabandhu kammapaṭisaraṇo, yaṁ kammaṁ karissāmi—kalyāṇaṁ vā pāpakaṁ vā—tassa dāyādo bhavissāmi;
an5.57:11.2	atha kho yāvatā sattānaṁ āgati gati cuti upapatti sabbe sattā kammassakā kammadāyādā kammayoni kammabandhu kammapaṭisaraṇā, yaṁ kammaṁ karissanti—kalyāṇaṁ vā pāpakaṁ vā—tassa dāyādā bhavissantī’ti.
an5.57:11.3	Tassa taṁ ṭhānaṁ abhiṇhaṁ paccavekkhato maggo sañjāyati.
an5.57:11.4	So taṁ maggaṁ āsevati bhāveti bahulīkaroti.
an5.57:11.5	Tassa taṁ maggaṁ āsevato bhāvayato bahulīkaroto saṁyojanāni sabbaso pahīyanti, anusayā byantīhontīti.
an5.57:12.1	Byādhidhammā jarādhammā,
an5.57:12.2	atho maraṇadhammino;
an5.57:12.3	Yathā dhammā tathā sattā,
an5.57:12.4	jigucchanti puthujjanā.
an5.57:13.1	Ahañce taṁ jiguccheyyaṁ,
an5.57:13.2	evaṁ dhammesu pāṇisu;
an5.57:13.3	Na metaṁ patirūpassa,
an5.57:13.4	mama evaṁ vihārino.
an5.57:14.1	Sohaṁ evaṁ viharanto,
an5.57:14.2	ñatvā dhammaṁ nirūpadhiṁ;
an5.57:14.3	Ārogye yobbanasmiñca,
an5.57:14.4	jīvitasmiñca ye madā.
an5.57:15.1	Sabbe made abhibhosmi,
an5.57:15.2	Nekkhammaṁ daṭṭhu khemato;
an5.57:15.3	Tassa me ahu ussāho,
an5.57:15.4	Nibbānaṁ abhipassato.
an5.57:16.1	Nāhaṁ bhabbo etarahi,
an5.57:16.2	Kāmāni paṭisevituṁ;
an5.57:16.3	Anivatti bhavissāmi,
an5.57:16.4	Brahmacariyaparāyaṇo”ti.
an5.57:16.5	Sattamaṁ.
an5.58:0.1	Aṅguttara Nikāya 5.58
an5.58:0.2	6. Nīvaraṇavagga
an5.58:0.3	Licchavikumārakasutta
an5.58:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an5.58:1.2	Atha kho bhagavā pubbaṇhasamayaṁ nivāsetvā pattacīvaramādāya vesāliṁ piṇḍāya pāvisi.
an5.58:1.3	Vesāliyaṁ piṇḍāya caritvā pacchābhattaṁ piṇḍapātapaṭikkanto mahāvanaṁ ajjhogāhetvā aññatarasmiṁ rukkhamūle divāvihāraṁ nisīdi.
an5.58:2.1	Tena kho pana samayena sambahulā licchavikumārakā sajjāni dhanūni ādāya kukkurasaṅghaparivutā mahāvane anucaṅkamamānā anuvicaramānā addasu bhagavantaṁ aññatarasmiṁ rukkhamūle nisinnaṁ;
an5.58:2.2	disvāna sajjāni dhanūni nikkhipitvā kukkurasaṅghaṁ ekamantaṁ uyyojetvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā tuṇhībhūtā tuṇhībhūtā pañjalikā bhagavantaṁ payirupāsanti.
an5.58:3.1	Tena kho pana samayena mahānāmo licchavi mahāvane jaṅghāvihāraṁ anucaṅkamamāno addasa te licchavikumārake tuṇhībhūte tuṇhībhūte pañjalike bhagavantaṁ payirupāsante;
an5.58:3.2	disvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an5.58:3.3	Ekamantaṁ nisinno kho mahānāmo licchavi udānaṁ udānesi:
an5.58:3.4	“bhavissanti vajjī, bhavissanti vajjī”ti.
an5.58:4.1	“Kiṁ pana tvaṁ, mahānāma, evaṁ vadesi:
an5.58:4.2	‘bhavissanti vajjī, bhavissanti vajjī’”ti?
an5.58:4.3	“Ime, bhante, licchavikumārakā caṇḍā pharusā apānubhā.
an5.58:4.4	Yānipi tāni kulesu paheṇakāni pahīyanti, ucchūti vā badarāti vā pūvāti vā modakāti vā saṅkulikāti vā, tāni vilumpitvā vilumpitvā khādanti;
an5.58:4.5	kulitthīnampi kulakumārīnampi pacchāliyaṁ khipanti.
an5.58:4.6	Te dānime tuṇhībhūtā tuṇhībhūtā pañjalikā bhagavantaṁ payirupāsantī”ti.
an5.58:5.1	“Yassa kassaci, mahānāma, kulaputtassa pañca dhammā saṁvijjanti—
an5.58:5.2	yadi vā rañño khattiyassa muddhāvasittassa, yadi vā raṭṭhikassa pettanikassa, yadi vā senāya senāpatikassa, yadi vā gāmagāmaṇikassa, yadi vā pūgagāmaṇikassa, ye vā pana kulesu paccekādhipaccaṁ kārenti, vuddhiyeva pāṭikaṅkhā, no parihāni.
an5.58:6.1	Katame pañca?
an5.58:6.2	Idha, mahānāma, kulaputto uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi mātāpitaro sakkaroti garuṁ karoti māneti pūjeti.
an5.58:6.3	Tamenaṁ mātāpitaro sakkatā garukatā mānitā pūjitā kalyāṇena manasā anukampanti:
an5.58:6.4	‘ciraṁ jīva, dīghamāyuṁ pālehī’ti.
an5.58:6.5	Mātāpitānukampitassa, mahānāma, kulaputtassa vuddhiyeva pāṭikaṅkhā, no parihāni.
an5.58:7.1	Puna caparaṁ, mahānāma, kulaputto uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi puttadāradāsakammakaraporise sakkaroti garuṁ karoti māneti pūjeti.
an5.58:7.2	Tamenaṁ puttadāradāsakammakaraporisā sakkatā garukatā mānitā pūjitā kalyāṇena manasā anukampanti:
an5.58:7.3	‘ciraṁ jīva, dīghamāyuṁ pālehī’ti.
an5.58:7.4	Puttadāradāsakammakaraporisānukampitassa, mahānāma, kulaputtassa vuddhiyeva pāṭikaṅkhā, no parihāni.
an5.58:8.1	Puna caparaṁ, mahānāma, kulaputto uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi khettakammantasāmantasabyohāre sakkaroti garuṁ karoti māneti pūjeti.
an5.58:8.2	Tamenaṁ khettakammantasāmantasabyohārā sakkatā garukatā mānitā pūjitā kalyāṇena manasā anukampanti:
an5.58:8.3	‘ciraṁ jīva, dīghamāyuṁ pālehī’ti.
an5.58:8.4	Khettakammantasāmantasabyohārānukampitassa, mahānāma, kulaputtassa vuddhiyeva pāṭikaṅkhā, no parihāni.
an5.58:9.1	Puna caparaṁ, mahānāma, kulaputto uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi yāvatā balipaṭiggāhikā devatā sakkaroti garuṁ karoti māneti pūjeti.
an5.58:9.2	Tamenaṁ balipaṭiggāhikā devatā sakkatā garukatā mānitā pūjitā kalyāṇena manasā anukampanti:
an5.58:9.3	‘ciraṁ jīva, dīghamāyuṁ pālehī’ti.
an5.58:9.4	devatānukampitassa, mahānāma, kulaputtassa vuddhiyeva pāṭikaṅkhā, no parihāni.
an5.58:10.1	Puna caparaṁ, mahānāma, kulaputto uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi samaṇabrāhmaṇe sakkaroti garuṁ karoti māneti pūjeti.
an5.58:10.2	Tamenaṁ samaṇabrāhmaṇā sakkatā garukatā mānitā pūjitā kalyāṇena manasā anukampanti:
an5.58:10.3	‘ciraṁ jīva, dīghamāyuṁ pālehī’ti.
an5.58:10.4	Samaṇabrāhmaṇānukampitassa, mahānāma, kulaputtassa vuddhiyeva pāṭikaṅkhā, no parihāni.
an5.58:11.1	Yassa kassaci, mahānāma, kulaputtassa ime pañca dhammā saṁvijjanti—
an5.58:11.2	yadi vā rañño khattiyassa muddhābhisittassa, yadi vā raṭṭhikassa pettanikassa, yadi vā senāya senāpatikassa, yadi vā gāmagāmaṇikassa, yadi vā pūgagāmaṇikassa, ye vā pana kulesu paccekādhipaccaṁ kārenti, vuddhiyeva pāṭikaṅkhā, no parihānīti.
an5.58:12.1	Mātāpitukiccakaro,
an5.58:12.2	puttadārahito sadā;
an5.58:12.3	Antojanassa atthāya,
an5.58:12.4	ye cassa anujīvino.
an5.58:13.1	Ubhinnañceva atthāya,
an5.58:13.2	Vadaññū hoti sīlavā;
an5.58:13.3	Ñātīnaṁ pubbapetānaṁ,
an5.58:13.4	Diṭṭhe dhamme ca jīvataṁ.
an5.58:14.1	Samaṇānaṁ brāhmaṇānaṁ,
an5.58:14.2	devatānañca paṇḍito;
an5.58:14.3	Vittisañjanano hoti,
an5.58:14.4	dhammena gharamāvasaṁ.
an5.58:15.1	So karitvāna kalyāṇaṁ,
an5.58:15.2	pujjo hoti pasaṁsiyo;
an5.58:15.3	Idheva naṁ pasaṁsanti,
an5.58:15.4	pecca sagge pamodatī”ti.
an5.58:15.5	Aṭṭhamaṁ.
an5.59:0.1	Aṅguttara Nikāya 5.59
an5.59:0.2	6. Nīvaraṇavagga
an5.59:0.3	Paṭhamavuḍḍhapabbajitasutta
an5.59:1.1	“Pañcahi, bhikkhave, dhammehi samannāgato dullabho vuḍḍhapabbajito.
an5.59:1.2	Katamehi pañcahi?
an5.59:1.3	Dullabho, bhikkhave, vuḍḍhapabbajito nipuṇo, dullabho ākappasampanno, dullabho bahussuto, dullabho dhammakathiko, dullabho vinayadharo.
an5.59:1.4	Imehi kho, bhikkhave, pañcahi dhammehi samannāgato dullabho vuḍḍhapabbajitoti.
an5.59:1.5	Navamaṁ.
an5.60:0.1	Aṅguttara Nikāya 5.60
an5.60:0.2	6. Nīvaraṇavagga
an5.60:0.3	Dutiyavuḍḍhapabbajitasutta
an5.60:1.1	Pañcahi, bhikkhave, dhammehi samannāgato dullabho vuḍḍhapabbajito.
an5.60:1.2	Katamehi pañcahi?
an5.60:1.3	Dullabho, bhikkhave, vuḍḍhapabbajito suvaco, dullabho suggahitaggāhī, dullabho padakkhiṇaggāhī, dullabho dhammakathiko, dullabho vinayadharo.
an5.60:1.4	Imehi kho, bhikkhave, pañcahi dhammehi samannāgato dullabho vuḍḍhapabbajito”ti.
an5.60:1.5	Dasamaṁ.
an5.60:1.6	Nīvaraṇavaggo paṭhamo.
an5.60:2.0	Tassuddānaṁ
an5.60:2.1	Āvaraṇaṁ rāsi aṅgāni,
an5.60:2.2	samayaṁ mātuputtikā;
an5.60:2.3	Upajjhā ṭhānā licchavi,
an5.60:2.4	kumārā aparā duveti.
an5.61:0.1	Aṅguttara Nikāya 5.61
an5.61:0.2	7. Saññāvagga
an5.61:0.3	Paṭhamasaññāsutta
an5.61:1.1	“Pañcimā, bhikkhave, saññā bhāvitā bahulīkatā mahapphalā honti mahānisaṁsā amatogadhā amatapariyosānā.
an5.61:1.2	Katamā pañca?
an5.61:1.3	Asubhasaññā, maraṇasaññā, ādīnavasaññā, āhāre paṭikūlasaññā, sabbaloke anabhiratasaññā—
an5.61:1.4	imā kho, bhikkhave, pañca saññā bhāvitā bahulīkatā mahapphalā honti mahānisaṁsā amatogadhā amatapariyosānā”ti.
an5.61:1.5	Paṭhamaṁ.
an5.62:0.1	Aṅguttara Nikāya 5.62
an5.62:0.2	7. Saññāvagga
an5.62:0.3	Dutiyasaññāsutta
an5.62:1.1	“Pañcimā, bhikkhave, saññā bhāvitā bahulīkatā mahapphalā honti mahānisaṁsā amatogadhā amatapariyosānā.
an5.62:1.2	Katamā pañca?
an5.62:1.3	Aniccasaññā, anattasaññā, maraṇasaññā, āhāre paṭikūlasaññā, sabbaloke anabhiratasaññā—
an5.62:1.4	imā kho, bhikkhave, pañca saññā bhāvitā bahulīkatā mahapphalā honti mahānisaṁsā amatogadhā amatapariyosānā”ti.
an5.62:1.5	Dutiyaṁ.
an5.63:0.1	Aṅguttara Nikāya 5.63
an5.63:0.2	7. Saññāvagga
an5.63:0.3	Paṭhamavaḍḍhisutta
an5.63:1.1	“Pañcahi, bhikkhave, vaḍḍhīhi vaḍḍhamāno ariyasāvako ariyāya vaḍḍhiyā vaḍḍhati, sārādāyī ca hoti varādāyī ca kāyassa.
an5.63:1.2	Katamāhi pañcahi?
an5.63:1.3	Saddhāya vaḍḍhati, sīlena vaḍḍhati, sutena vaḍḍhati, cāgena vaḍḍhati, paññāya vaḍḍhati—
an5.63:1.4	imāhi kho, bhikkhave, pañcahi vaḍḍhīhi vaḍḍhamāno ariyasāvako ariyāya vaḍḍhiyā vaḍḍhati, sārādāyī ca hoti varādāyī ca kāyassā”ti.
an5.63:2.1	“Saddhāya sīlena ca yo pavaḍḍhati,
an5.63:2.2	Paññāya cāgena sutena cūbhayaṁ;
an5.63:2.3	So tādiso sappuriso vicakkhaṇo,
an5.63:2.4	Ādīyatī sāramidheva attano”ti.
an5.63:2.5	Tatiyaṁ.
an5.64:0.1	Aṅguttara Nikāya 5.64
an5.64:0.2	7. Saññāvagga
an5.64:0.3	Dutiyavaḍḍhisutta
an5.64:1.1	“Pañcahi, bhikkhave, vaḍḍhīhi vaḍḍhamānā ariyasāvikā ariyāya vaḍḍhiyā vaḍḍhati, sārādāyinī ca hoti varādāyinī ca kāyassa.
an5.64:1.2	Katamāhi pañcahi?
an5.64:1.3	Saddhāya vaḍḍhati, sīlena vaḍḍhati, sutena vaḍḍhati, cāgena vaḍḍhati, paññāya vaḍḍhati—
an5.64:1.4	imāhi kho, bhikkhave, pañcahi vaḍḍhīhi vaḍḍhamānā ariyasāvikā ariyāya vaḍḍhiyā vaḍḍhati, sārādāyinī ca hoti varādāyinī ca kāyassāti.
an5.64:2.1	Saddhāya sīlena ca yā pavaḍḍhati,
an5.64:2.2	Paññāya cāgena sutena cūbhayaṁ;
an5.64:2.3	Sā tādisī sīlavatī upāsikā,
an5.64:2.4	Ādīyatī sāramidheva attano”ti.
an5.64:2.5	Catutthaṁ.
an5.65:0.1	Aṅguttara Nikāya 5.65
an5.65:0.2	7. Saññāvagga
an5.65:0.3	Sākacchasutta
an5.65:1.1	“Pañcahi, bhikkhave, dhammehi samannāgato bhikkhu alaṁsākaccho sabrahmacārīnaṁ.
an5.65:1.2	Katamehi pañcahi?
an5.65:1.3	Idha, bhikkhave, bhikkhu attanā ca sīlasampanno hoti, sīlasampadāya kathāya ca āgataṁ pañhaṁ byākattā hoti;
an5.65:1.4	attanā ca samādhisampanno hoti, samādhisampadāya kathāya ca āgataṁ pañhaṁ byākattā hoti;
an5.65:1.5	attanā ca paññāsampanno hoti, paññāsampadāya kathāya ca āgataṁ pañhaṁ byākattā hoti;
an5.65:1.6	attanā ca vimuttisampanno hoti, vimuttisampadāya kathāya ca āgataṁ pañhaṁ byākattā hoti;
an5.65:1.7	attanā ca vimuttiñāṇadassanasampanno hoti, vimuttiñāṇadassanasampadāya kathāya ca āgataṁ pañhaṁ byākattā hoti.
an5.65:1.8	Imehi kho, bhikkhave, pañcahi dhammehi samannāgato bhikkhu alaṁsākaccho sabrahmacārīnan”ti.
an5.65:1.9	Pañcamaṁ.
an5.66:0.1	Aṅguttara Nikāya 5.66
an5.66:0.2	7. Saññāvagga
an5.66:0.3	Sājīvasutta
an5.66:1.1	“Pañcahi, bhikkhave, dhammehi samannāgato bhikkhu alaṁsājīvo sabrahmacārīnaṁ.
an5.66:1.2	Katamehi pañcahi?
an5.66:1.3	Idha, bhikkhave, bhikkhu attanā ca sīlasampanno hoti, sīlasampadāya kathāya ca kataṁ pañhaṁ byākattā hoti;
an5.66:1.4	attanā ca samādhisampanno hoti, samādhisampadāya kathāya ca kataṁ pañhaṁ byākattā hoti;
an5.66:1.5	attanā ca paññāsampanno hoti, paññāsampadāya kathāya ca kataṁ pañhaṁ byākattā hoti;
an5.66:1.6	attanā ca vimuttisampanno hoti, vimuttisampadāya kathāya ca kataṁ pañhaṁ byākattā hoti;
an5.66:1.7	attanā ca vimuttiñāṇadassanasampanno hoti, vimuttiñāṇadassanasampadāya kathāya ca kataṁ pañhaṁ byākattā hoti.
an5.66:1.8	Imehi kho, bhikkhave, pañcahi dhammehi samannāgato bhikkhu alaṁsājīvo sabrahmacārīnan”ti.
an5.66:1.9	Chaṭṭhaṁ.
an5.67:0.1	Aṅguttara Nikāya 5.67
an5.67:0.2	7. Saññāvagga
an5.67:0.3	Paṭhamaiddhipādasutta
an5.67:1.1	“Yo hi koci, bhikkhave, bhikkhu vā bhikkhunī vā pañca dhamme bhāveti, pañca dhamme bahulīkaroti, tassa dvinnaṁ phalānaṁ aññataraṁ phalaṁ pāṭikaṅkhaṁ—
an5.67:1.2	diṭṭheva dhamme aññā, sati vā upādisese anāgāmitā.
an5.67:2.1	Katame pañca?
an5.67:2.2	Idha, bhikkhave, bhikkhu chandasamādhipadhānasaṅkhārasamannāgataṁ iddhipādaṁ bhāveti,
an5.67:2.3	vīriyasamādhi …pe…
an5.67:2.4	cittasamādhi …
an5.67:2.5	vīmaṁsāsamādhipadhānasaṅkhārasamannāgataṁ iddhipādaṁ bhāveti,
an5.67:2.6	ussoḷhiññeva pañcamiṁ.
an5.67:2.7	Yo hi koci, bhikkhave, bhikkhu vā bhikkhunī vā ime pañca dhamme bhāveti, ime pañca dhamme bahulīkaroti, tassa dvinnaṁ phalānaṁ aññataraṁ phalaṁ pāṭikaṅkhaṁ—
an5.67:2.8	diṭṭheva dhamme aññā, sati vā upādisese anāgāmitā”ti.
an5.67:2.9	Sattamaṁ.
an5.68:0.1	Aṅguttara Nikāya 5.68
an5.68:0.2	7. Saññāvagga
an5.68:0.3	Dutiyaiddhipādasutta
an5.68:1.1	“Pubbevāhaṁ, bhikkhave, sambodhā anabhisambuddho bodhisattova samāno pañca dhamme bhāvesiṁ, pañca dhamme bahulīkāsiṁ.
an5.68:1.2	Katame pañca?
an5.68:1.3	Chandasamādhipadhānasaṅkhārasamannāgataṁ iddhipādaṁ bhāvesiṁ,
an5.68:1.4	vīriyasamādhi …
an5.68:1.5	cittasamādhi …
an5.68:1.6	vīmaṁsāsamādhipadhānasaṅkhārasamannāgataṁ iddhipādaṁ bhāvesiṁ,
an5.68:1.7	ussoḷhiññeva pañcamiṁ.
an5.68:1.8	So kho ahaṁ, bhikkhave, imesaṁ ussoḷhipañcamānaṁ dhammānaṁ bhāvitattā bahulīkatattā yassa yassa abhiññāsacchikaraṇīyassa dhammassa cittaṁ abhininnāmesiṁ abhiññāsacchikiriyāya,
an5.68:1.9	tatra tatreva sakkhibhabbataṁ pāpuṇiṁ sati sati āyatane.
an5.68:2.1	So sace ākaṅkhiṁ: ‘anekavihitaṁ iddhividhaṁ paccanubhaveyyaṁ …pe… yāva brahmalokāpi kāyena vasaṁ vatteyyan’ti,
an5.68:2.2	tatra tatreva sakkhibhabbataṁ pāpuṇiṁ sati sati āyatane.
an5.68:3.1	So sace ākaṅkhiṁ …pe… ‘āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti,
an5.68:3.2	tatra tatreva sakkhibhabbataṁ pāpuṇiṁ sati sati āyatane”ti.
an5.68:3.3	Aṭṭhamaṁ.
an5.69:0.1	Aṅguttara Nikāya 5.69
an5.69:0.2	7. Saññāvagga
an5.69:0.3	Nibbidāsutta
an5.69:1.1	“Pañcime, bhikkhave, dhammā bhāvitā bahulīkatā ekantanibbidāya virāgāya nirodhāya upasamāya abhiññāya sambodhāya nibbānāya saṁvattanti.
an5.69:2.1	Katame pañca?
an5.69:2.2	Idha, bhikkhave, bhikkhu asubhānupassī kāye viharati, āhāre paṭikūlasaññī, sabbaloke anabhiratasaññī, sabbasaṅkhāresu aniccānupassī, maraṇasaññā kho panassa ajjhattaṁ sūpaṭṭhitā hoti.
an5.69:2.3	Ime kho, bhikkhave, pañca dhammā bhāvitā bahulīkatā ekantanibbidāya virāgāya nirodhāya upasamāya abhiññāya sambodhāya nibbānāya saṁvattantī”ti.
an5.69:2.4	Navamaṁ.
an5.70:0.1	Aṅguttara Nikāya 5.70
an5.70:0.2	7. Saññāvagga
an5.70:0.3	Āsavakkhayasutta
an5.70:1.1	“Pañcime, bhikkhave, dhammā bhāvitā bahulīkatā āsavānaṁ khayāya saṁvattanti.
an5.70:1.2	Katame pañca?
an5.70:1.3	Idha, bhikkhave, bhikkhu asubhānupassī kāye viharati, āhāre paṭikūlasaññī, sabbaloke anabhiratasaññī, sabbasaṅkhāresu aniccānupassī, maraṇasaññā kho panassa ajjhattaṁ sūpaṭṭhitā hoti.
an5.70:1.4	Ime kho, bhikkhave, pañca dhammā bhāvitā bahulīkatā āsavānaṁ khayāya saṁvattantī”ti.
an5.70:1.5	Dasamaṁ.
an5.70:1.6	Saññāvaggo dutiyo.
an5.70:2.0	Tassuddānaṁ
an5.70:2.1	Dve ca saññā dve vaḍḍhī ca,
an5.70:2.2	sākacchena ca sājīvaṁ;
an5.70:2.3	Iddhipādā ca dve vuttā,
an5.70:2.4	nibbidā cāsavakkhayāti.
an5.71:0.1	Aṅguttara Nikāya 5.71
an5.71:0.2	8. Yodhājīvavagga
an5.71:0.3	Paṭhamacetovimuttiphalasutta
an5.71:1.1	“Pañcime, bhikkhave, dhammā bhāvitā bahulīkatā cetovimuttiphalā ca honti cetovimuttiphalānisaṁsā ca, paññāvimuttiphalā ca honti paññāvimuttiphalānisaṁsā ca.
an5.71:2.1	Katame pañca?
an5.71:2.2	Idha, bhikkhave, bhikkhu asubhānupassī kāye viharati, āhāre paṭikūlasaññī, sabbaloke anabhiratasaññī, sabbasaṅkhāresu aniccānupassī, maraṇasaññā kho panassa ajjhattaṁ sūpaṭṭhitā hoti.
an5.71:2.3	Ime kho, bhikkhave, pañca dhammā bhāvitā bahulīkatā cetovimuttiphalā ca honti cetovimuttiphalānisaṁsā ca, paññāvimuttiphalā ca honti paññāvimuttiphalānisaṁsā ca.
an5.71:2.4	Yato kho, bhikkhave, bhikkhu cetovimutto ca hoti paññāvimutto ca hoti—
an5.71:2.5	ayaṁ vuccati, bhikkhave, ‘bhikkhu ukkhittapaligho itipi, saṅkiṇṇaparikho itipi, abbūḷhesiko itipi, niraggaḷo itipi, ariyo pannaddhajo pannabhāro visaṁyutto itipi’.
an5.71:3.1	Kathañca, bhikkhave, bhikkhu ukkhittapaligho hoti?
an5.71:3.2	Idha, bhikkhave, bhikkhuno avijjā pahīnā hoti ucchinnamūlā tālāvatthukatā anabhāvaṅkatā āyatiṁ anuppādadhammā.
an5.71:3.3	Evaṁ kho, bhikkhave, bhikkhu ukkhittapaligho hoti.
an5.71:4.1	Kathañca, bhikkhave, bhikkhu saṅkiṇṇaparikho hoti?
an5.71:4.2	Idha, bhikkhave, bhikkhuno ponobhaviko jātisaṁsāro pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.
an5.71:4.3	Evaṁ kho, bhikkhave, bhikkhu saṅkiṇṇaparikho hoti.
an5.71:5.1	Kathañca, bhikkhave, bhikkhu abbūḷhesiko hoti?
an5.71:5.2	Idha, bhikkhave, bhikkhuno taṇhā pahīnā hoti ucchinnamūlā tālāvatthukatā anabhāvaṅkatā āyatiṁ anuppādadhammā.
an5.71:5.3	Evaṁ kho, bhikkhave, bhikkhu abbūḷhesiko hoti.
an5.71:6.1	Kathañca, bhikkhave, bhikkhu niraggaḷo hoti?
an5.71:6.2	Idha, bhikkhave, bhikkhuno pañcorambhāgiyāni saṁyojanāni pahīnāni honti ucchinnamūlāni tālāvatthukatāni anabhāvaṅkatāni āyatiṁ anuppādadhammāni.
an5.71:6.3	Evaṁ kho, bhikkhave, bhikkhu niraggaḷo hoti.
an5.71:7.1	Kathañca, bhikkhave, bhikkhu ariyo pannaddhajo pannabhāro visaṁyutto hoti?
an5.71:7.2	Idha, bhikkhave, bhikkhuno asmimāno pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.
an5.71:7.3	Evaṁ kho, bhikkhave, bhikkhu ariyo pannaddhajo pannabhāro visaṁyutto hotī”ti.
an5.71:7.4	Paṭhamaṁ.
an5.72:0.1	Aṅguttara Nikāya 5.72
an5.72:0.2	8. Yodhājīvavagga
an5.72:0.3	Dutiyacetovimuttiphalasutta
an5.72:1.1	“Pañcime, bhikkhave, dhammā bhāvitā bahulīkatā cetovimuttiphalā ca honti cetovimuttiphalānisaṁsā ca, paññāvimuttiphalā ca honti paññāvimuttiphalānisaṁsā ca.
an5.72:1.2	Katame pañca?
an5.72:1.3	Aniccasaññā, anicce dukkhasaññā, dukkhe anattasaññā, pahānasaññā, virāgasaññā—
an5.72:1.4	ime kho, bhikkhave, pañca dhammā bhāvitā bahulīkatā cetovimuttiphalā ca honti cetovimuttiphalānisaṁsā ca, paññāvimuttiphalā ca honti paññāvimuttiphalānisaṁsā ca.
an5.72:1.5	Yato kho, bhikkhave, bhikkhu cetovimutto ca hoti paññāvimutto ca—
an5.72:1.6	ayaṁ vuccati, bhikkhave, ‘bhikkhu ukkhittapaligho itipi, saṅkiṇṇaparikho itipi, abbūḷhesiko itipi, niraggaḷo itipi, ariyo pannaddhajo pannabhāro visaṁyutto itipi’”.
an5.72:2.1	“Kathañca, bhikkhave, bhikkhu ukkhittapaligho hoti?
an5.72:2.2	Idha, bhikkhave, bhikkhuno avijjā pahīnā hoti ucchinnamūlā tālāvatthukatā anabhāvaṅkatā āyatiṁ anuppādadhammā.
an5.72:2.3	Evaṁ kho, bhikkhave, bhikkhu ukkhittapaligho hoti.
an5.72:3.1	Kathañca, bhikkhave, bhikkhu saṅkiṇṇaparikho hoti?
an5.72:3.2	Idha, bhikkhave, bhikkhuno ponobhaviko jātisaṁsāro pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.
an5.72:3.3	Evaṁ kho, bhikkhave, bhikkhu saṅkiṇṇaparikho hoti.
an5.72:4.1	Kathañca, bhikkhave, bhikkhu abbūḷhesiko hoti?
an5.72:4.2	Idha, bhikkhave, bhikkhuno taṇhā pahīnā hoti ucchinnamūlā tālāvatthukatā anabhāvaṅkatā āyatiṁ anuppādadhammā.
an5.72:4.3	Evaṁ kho, bhikkhave, bhikkhu abbūḷhesiko hoti.
an5.72:5.1	Kathañca, bhikkhave, bhikkhu niraggaḷo hoti?
an5.72:5.2	Idha, bhikkhave, bhikkhuno pañcorambhāgiyāni saṁyojanāni pahīnāni honti ucchinnamūlāni tālāvatthukatāni anabhāvaṅkatāni āyatiṁ anuppādadhammāni.
an5.72:5.3	Evaṁ kho, bhikkhave, bhikkhu niraggaḷo hoti.
an5.72:6.1	Kathañca, bhikkhave, bhikkhu ariyo pannaddhajo pannabhāro visaṁyutto hoti?
an5.72:6.2	Idha, bhikkhave, bhikkhuno asmimāno pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.
an5.72:6.3	Evaṁ kho, bhikkhave, bhikkhu ariyo pannaddhajo pannabhāro visaṁyutto hotī”ti.
an5.72:6.4	Dutiyaṁ.
an5.73:0.1	Aṅguttara Nikāya 5.73
an5.73:0.2	8. Yodhājīvavagga
an5.73:0.3	Paṭhamadhammavihārīsutta
an5.73:1.1	Atha kho aññataro bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an5.73:1.2	“‘dhammavihārī, dhammavihārī’ti, bhante, vuccati.
an5.73:1.3	Kittāvatā nu kho, bhante, bhikkhu dhammavihārī hotī”ti?
an5.73:2.1	“Idha, bhikkhu, bhikkhu dhammaṁ pariyāpuṇāti—
an5.73:2.2	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an5.73:2.3	So tāya dhammapariyattiyā divasaṁ atināmeti, riñcati paṭisallānaṁ, nānuyuñjati ajjhattaṁ cetosamathaṁ.
an5.73:2.4	Ayaṁ vuccati, bhikkhu: ‘bhikkhu pariyattibahulo, no dhammavihārī’.
an5.73:3.1	Puna caparaṁ, bhikkhu, bhikkhu yathāsutaṁ yathāpariyattaṁ dhammaṁ vitthārena paresaṁ deseti.
an5.73:3.2	So tāya dhammapaññattiyā divasaṁ atināmeti, riñcati paṭisallānaṁ, nānuyuñjati ajjhattaṁ cetosamathaṁ.
an5.73:3.3	Ayaṁ vuccati, bhikkhu: ‘bhikkhu paññattibahulo, no dhammavihārī’.
an5.73:4.1	Puna caparaṁ, bhikkhu, bhikkhu yathāsutaṁ yathāpariyattaṁ dhammaṁ vitthārena sajjhāyaṁ karoti.
an5.73:4.2	So tena sajjhāyena divasaṁ atināmeti, riñcati paṭisallānaṁ, nānuyuñjati ajjhattaṁ cetosamathaṁ.
an5.73:4.3	Ayaṁ vuccati, bhikkhu: ‘bhikkhu sajjhāyabahulo, no dhammavihārī’.
an5.73:5.1	Puna caparaṁ, bhikkhu, bhikkhu yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati.
an5.73:5.2	So tehi dhammavitakkehi divasaṁ atināmeti, riñcati paṭisallānaṁ, nānuyuñjati ajjhattaṁ cetosamathaṁ.
an5.73:5.3	Ayaṁ vuccati, bhikkhu: ‘bhikkhu vitakkabahulo, no dhammavihārī’.
an5.73:6.1	Idha, bhikkhu, bhikkhu dhammaṁ pariyāpuṇāti—
an5.73:6.2	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an5.73:6.3	So tāya dhammapariyattiyā na divasaṁ atināmeti, nāpi riñcati paṭisallānaṁ, anuyuñjati ajjhattaṁ cetosamathaṁ.
an5.73:6.4	Evaṁ kho, bhikkhu, bhikkhu dhammavihārī hoti.
an5.73:7.1	Iti kho, bhikkhu, desito mayā pariyattibahulo, desito paññattibahulo, desito sajjhāyabahulo, desito vitakkabahulo, desito dhammavihārī.
an5.73:7.2	Yaṁ kho, bhikkhu, satthārā karaṇīyaṁ sāvakānaṁ hitesinā anukampakena anukampaṁ upādāya, kataṁ vo taṁ mayā.
an5.73:7.3	Etāni, bhikkhu, rukkhamūlāni, etāni suññāgārāni. Jhāyatha, bhikkhu, mā pamādattha, mā pacchā vippaṭisārino ahuvattha. Ayaṁ vo amhākaṁ anusāsanī”ti.
an5.73:7.4	Tatiyaṁ.
an5.74:0.1	Aṅguttara Nikāya 5.74
an5.74:0.2	8. Yodhājīvavagga
an5.74:0.3	Dutiyadhammavihārīsutta
an5.74:1.1	Atha kho aññataro bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an5.74:1.2	“‘dhammavihārī, dhammavihārī’ti, bhante, vuccati.
an5.74:1.3	Kittāvatā nu kho, bhante, bhikkhu dhammavihārī hotī”ti?
an5.74:2.1	“Idha, bhikkhu, bhikkhu dhammaṁ pariyāpuṇāti—
an5.74:2.2	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ;
an5.74:2.3	uttari cassa paññāya atthaṁ nappajānāti.
an5.74:2.4	Ayaṁ vuccati, bhikkhu: ‘bhikkhu pariyattibahulo, no dhammavihārī’.
an5.74:3.1	Puna caparaṁ, bhikkhu, bhikkhu yathāsutaṁ yathāpariyattaṁ dhammaṁ vitthārena paresaṁ deseti, uttari cassa paññāya atthaṁ nappajānāti.
an5.74:3.2	Ayaṁ vuccati, bhikkhu: ‘bhikkhu paññattibahulo, no dhammavihārī’.
an5.74:4.1	Puna caparaṁ, bhikkhu, bhikkhu yathāsutaṁ yathāpariyattaṁ dhammaṁ vitthārena sajjhāyaṁ karoti, uttari cassa paññāya atthaṁ nappajānāti.
an5.74:4.2	Ayaṁ vuccati, bhikkhu: ‘bhikkhu sajjhāyabahulo, no dhammavihārī’.
an5.74:5.1	Puna caparaṁ, bhikkhu, bhikkhu yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati, uttari cassa paññāya atthaṁ nappajānāti.
an5.74:5.2	Ayaṁ vuccati, bhikkhu: ‘bhikkhu vitakkabahulo, no dhammavihārī’.
an5.74:6.1	Idha, bhikkhu, bhikkhu dhammaṁ pariyāpuṇāti—
an5.74:6.2	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ;
an5.74:6.3	uttari cassa paññāya atthaṁ pajānāti.
an5.74:6.4	Evaṁ kho, bhikkhu, bhikkhu dhammavihārī hoti.
an5.74:7.1	Iti kho, bhikkhu, desito mayā pariyattibahulo, desito paññattibahulo, desito sajjhāyabahulo, desito vitakkabahulo, desito dhammavihārī.
an5.74:7.2	Yaṁ kho, bhikkhu, satthārā karaṇīyaṁ sāvakānaṁ hitesinā anukampakena anukampaṁ upādāya, kataṁ vo taṁ mayā.
an5.74:7.3	Etāni, bhikkhu, rukkhamūlāni, etāni suññāgārāni. Jhāyatha bhikkhu, mā pamādattha, mā pacchā vippaṭisārino ahuvattha. Ayaṁ vo amhākaṁ anusāsanī”ti.
an5.74:7.4	Catutthaṁ.
an5.75:0.1	Aṅguttara Nikāya 5.75
an5.75:0.2	8. Yodhājīvavagga
an5.75:0.3	Paṭhamayodhājīvasutta
an5.75:1.1	“Pañcime, bhikkhave, yodhājīvā santo saṁvijjamānā lokasmiṁ.
an5.75:1.2	Katame pañca?
an5.75:1.3	Idha, bhikkhave, ekacco yodhājīvo rajaggaññeva disvā saṁsīdati visīdati na santhambhati na sakkoti saṅgāmaṁ otarituṁ.
an5.75:1.4	Evarūpopi, bhikkhave, idhekacco yodhājīvo hoti.
an5.75:1.5	Ayaṁ, bhikkhave, paṭhamo yodhājīvo santo saṁvijjamāno lokasmiṁ.
an5.75:2.1	Puna caparaṁ, bhikkhave, idhekacco yodhājīvo sahati rajaggaṁ;
an5.75:2.2	api ca kho dhajaggaññeva disvā saṁsīdati visīdati, na santhambhati, na sakkoti saṅgāmaṁ otarituṁ.
an5.75:2.3	Evarūpopi, bhikkhave, idhekacco yodhājīvo hoti.
an5.75:2.4	Ayaṁ, bhikkhave, dutiyo yodhājīvo santo saṁvijjamāno lokasmiṁ.
an5.75:3.1	Puna caparaṁ, bhikkhave, idhekacco yodhājīvo sahati rajaggaṁ sahati dhajaggaṁ;
an5.75:3.2	api ca kho ussāraṇaññeva sutvā saṁsīdati visīdati, na santhambhati, na sakkoti saṅgāmaṁ otarituṁ.
an5.75:3.3	Evarūpopi, bhikkhave, idhekacco yodhājīvo hoti.
an5.75:3.4	Ayaṁ, bhikkhave, tatiyo yodhājīvo santo saṁvijjamāno lokasmiṁ.
an5.75:4.1	Puna caparaṁ, bhikkhave, idhekacco yodhājīvo sahati rajaggaṁ, sahati dhajaggaṁ, sahati ussāraṇaṁ;
an5.75:4.2	api ca kho sampahāre haññati byāpajjati.
an5.75:4.3	Evarūpopi, bhikkhave, idhekacco yodhājīvo hoti.
an5.75:4.4	Ayaṁ, bhikkhave, catuttho yodhājīvo santo saṁvijjamāno lokasmiṁ.
an5.75:5.1	Puna caparaṁ, bhikkhave, idhekacco yodhājīvo sahati rajaggaṁ, sahati dhajaggaṁ, sahati ussāraṇaṁ, sahati sampahāraṁ.
an5.75:5.2	So taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati.
an5.75:5.3	Evarūpopi, bhikkhave, idhekacco yodhājīvo hoti.
an5.75:5.4	Ayaṁ, bhikkhave, pañcamo yodhājīvo santo saṁvijjamāno lokasmiṁ.
an5.75:5.5	Ime kho, bhikkhave, pañca yodhājīvā santo saṁvijjamānā lokasmiṁ.
an5.75:6.1	Evamevaṁ kho, bhikkhave, pañcime yodhājīvūpamā puggalā santo saṁvijjamānā bhikkhūsu.
an5.75:6.2	Katame pañca?
an5.75:6.3	Idha, bhikkhave, bhikkhu rajaggaññeva disvā saṁsīdati visīdati, na santhambhati, na sakkoti brahmacariyaṁ sandhāretuṁ.
an5.75:6.4	Sikkhādubbalyaṁ āvikatvā sikkhaṁ paccakkhāya hīnāyāvattati.
an5.75:6.5	Kimassa rajaggasmiṁ?
an5.75:6.6	Idha, bhikkhave, bhikkhu suṇāti:
an5.75:6.7	‘amukasmiṁ nāma gāme vā nigame vā itthī vā kumārī vā abhirūpā dassanīyā pāsādikā paramāya vaṇṇapokkharatāya samannāgatā’ti.
an5.75:6.8	So taṁ sutvā saṁsīdati visīdati, na santhambhati, na sakkoti brahmacariyaṁ sandhāretuṁ.
an5.75:6.9	Sikkhādubbalyaṁ āvikatvā sikkhaṁ paccakkhāya hīnāyāvattati.
an5.75:6.10	Idamassa rajaggasmiṁ.
an5.75:7.1	Seyyathāpi so, bhikkhave, yodhājīvo rajaggaññeva disvā saṁsīdati visīdati, na santhambhati, na sakkoti saṅgāmaṁ otarituṁ;
an5.75:7.2	tathūpamāhaṁ, bhikkhave, imaṁ puggalaṁ vadāmi.
an5.75:7.3	Evarūpopi, bhikkhave, idhekacco puggalo hoti.
an5.75:7.4	Ayaṁ, bhikkhave, paṭhamo yodhājīvūpamo puggalo santo saṁvijjamāno bhikkhūsu.
an5.75:8.1	Puna caparaṁ, bhikkhave, bhikkhu sahati rajaggaṁ;
an5.75:8.2	api ca kho dhajaggaññeva disvā saṁsīdati visīdati, na santhambhati, na sakkoti brahmacariyaṁ sandhāretuṁ.
an5.75:8.3	Sikkhādubbalyaṁ āvikatvā sikkhaṁ paccakkhāya hīnāyāvattati.
an5.75:8.4	Kimassa dhajaggasmiṁ?
an5.75:8.5	Idha, bhikkhave, bhikkhu na heva kho suṇāti:
an5.75:8.6	‘amukasmiṁ nāma gāme vā nigame vā itthī vā kumārī vā abhirūpā dassanīyā pāsādikā paramāya vaṇṇapokkharatāya samannāgatā’ti;
an5.75:8.7	api ca kho sāmaṁ passati itthiṁ vā kumāriṁ vā abhirūpaṁ dassanīyaṁ pāsādikaṁ paramāya vaṇṇapokkharatāya samannāgataṁ.
an5.75:8.8	So taṁ disvā saṁsīdati visīdati, na santhambhati, na sakkoti brahmacariyaṁ sandhāretuṁ.
an5.75:8.9	Sikkhādubbalyaṁ āvikatvā sikkhaṁ paccakkhāya hīnāyāvattati.
an5.75:8.10	Idamassa dhajaggasmiṁ.
an5.75:9.1	Seyyathāpi so, bhikkhave, yodhājīvo sahati rajaggaṁ;
an5.75:9.2	api ca kho dhajaggaññeva disvā saṁsīdati visīdati, na santhambhati, na sakkoti saṅgāmaṁ otarituṁ;
an5.75:9.3	tathūpamāhaṁ, bhikkhave, imaṁ puggalaṁ vadāmi.
an5.75:9.4	Evarūpopi, bhikkhave, idhekacco puggalo hoti.
an5.75:9.5	Ayaṁ, bhikkhave, dutiyo yodhājīvūpamo puggalo santo saṁvijjamāno bhikkhūsu.
an5.75:10.1	Puna caparaṁ, bhikkhave, bhikkhu sahati rajaggaṁ, sahati dhajaggaṁ;
an5.75:10.2	api ca kho ussāraṇaññeva sutvā saṁsīdati visīdati, na santhambhati, na sakkoti brahmacariyaṁ sandhāretuṁ.
an5.75:10.3	Sikkhādubbalyaṁ āvikatvā sikkhaṁ paccakkhāya hīnāyāvattati.
an5.75:10.4	Kimassa ussāraṇāya?
an5.75:10.5	Idha, bhikkhave, bhikkhuṁ araññagataṁ vā rukkhamūlagataṁ vā suññāgāragataṁ vā mātugāmo upasaṅkamitvā ūhasati ullapati ujjagghati uppaṇḍeti.
an5.75:10.6	So mātugāmena ūhasiyamāno ullapiyamāno ujjagghiyamāno uppaṇḍiyamāno saṁsīdati visīdati, na santhambhati, na sakkoti brahmacariyaṁ sandhāretuṁ.
an5.75:10.7	Sikkhādubbalyaṁ āvikatvā sikkhaṁ paccakkhāya hīnāyāvattati.
an5.75:10.8	Idamassa ussāraṇāya.
an5.75:11.1	Seyyathāpi so, bhikkhave, yodhājīvo sahati rajaggaṁ, sahati dhajaggaṁ;
an5.75:11.2	api ca kho ussāraṇaññeva sutvā saṁsīdati visīdati, na santhambhati, na sakkoti saṅgāmaṁ otarituṁ;
an5.75:11.3	tathūpamāhaṁ, bhikkhave, imaṁ puggalaṁ vadāmi.
an5.75:11.4	Evarūpopi, bhikkhave, idhekacco puggalo hoti.
an5.75:11.5	Ayaṁ, bhikkhave, tatiyo yodhājīvūpamo puggalo santo saṁvijjamāno bhikkhūsu.
an5.75:12.1	Puna caparaṁ, bhikkhave, bhikkhu sahati rajaggaṁ, sahati dhajaggaṁ, sahati ussāraṇaṁ;
an5.75:12.2	api ca kho sampahāre haññati byāpajjati.
an5.75:12.3	Kimassa sampahārasmiṁ?
an5.75:12.4	Idha, bhikkhave, bhikkhuṁ araññagataṁ vā rukkhamūlagataṁ vā suññāgāragataṁ vā mātugāmo upasaṅkamitvā abhinisīdati abhinipajjati ajjhottharati.
an5.75:12.5	So mātugāmena abhinisīdiyamāno abhinipajjiyamāno ajjhotthariyamāno sikkhaṁ apaccakkhāya dubbalyaṁ anāvikatvā methunaṁ dhammaṁ paṭisevati.
an5.75:12.6	Idamassa sampahārasmiṁ.
an5.75:13.1	Seyyathāpi so, bhikkhave, yodhājīvo sahati rajaggaṁ, sahati dhajaggaṁ, sahati ussāraṇaṁ, api ca kho sampahāre haññati byāpajjati;
an5.75:13.2	tathūpamāhaṁ, bhikkhave, imaṁ puggalaṁ vadāmi.
an5.75:13.3	Evarūpopi, bhikkhave, idhekacco puggalo hoti.
an5.75:13.4	Ayaṁ, bhikkhave, catuttho yodhājīvūpamo puggalo santo saṁvijjamāno bhikkhūsu.
an5.75:14.1	Puna caparaṁ, bhikkhave, bhikkhu sahati rajaggaṁ, sahati dhajaggaṁ, sahati ussāraṇaṁ, sahati sampahāraṁ, so taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati.
an5.75:14.2	Kimassa saṅgāmavijayasmiṁ?
an5.75:14.3	Idha, bhikkhave, bhikkhuṁ araññagataṁ vā rukkhamūlagataṁ vā suññāgāragataṁ vā mātugāmo upasaṅkamitvā abhinisīdati abhinipajjati ajjhottharati.
an5.75:14.4	So mātugāmena abhinisīdiyamāno abhinipajjiyamāno ajjhotthariyamāno viniveṭhetvā vinimocetvā yena kāmaṁ pakkamati.
an5.75:14.5	So vivittaṁ senāsanaṁ bhajati araññaṁ rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ palālapuñjaṁ.
an5.75:15.1	So araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an5.75:15.2	So abhijjhaṁ loke pahāya vigatābhijjhena cetasā viharati, abhijjhāya cittaṁ parisodheti;
an5.75:15.3	byāpādapadosaṁ pahāya abyāpannacitto viharati, sabbapāṇabhūtahitānukampī byāpādapadosā cittaṁ parisodheti;
an5.75:15.4	thinamiddhaṁ pahāya vigatathinamiddho viharati ālokasaññī sato sampajāno, thinamiddhā cittaṁ parisodheti;
an5.75:15.5	uddhaccakukkuccaṁ pahāya anuddhato viharati ajjhattaṁ vūpasantacitto, uddhaccakukkuccā cittaṁ parisodheti;
an5.75:15.6	vicikicchaṁ pahāya tiṇṇavicikiccho viharati akathaṅkathī kusalesu dhammesu, vicikicchāya cittaṁ parisodheti.
an5.75:15.7	So ime pañca nīvaraṇe pahāya cetaso upakkilese paññāya dubbalīkaraṇe
an5.75:15.8	vivicceva kāmehi …pe…
an5.75:15.9	catutthaṁ jhānaṁ upasampajja viharati.
an5.75:16.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṁ khayañāṇāya cittaṁ abhininnāmeti.
an5.75:16.2	So ‘idaṁ dukkhan’ti yathābhūtaṁ pajānāti, ‘ayaṁ dukkhasamudayo’ti yathābhūtaṁ pajānāti, ‘ayaṁ dukkhanirodho’ti yathābhūtaṁ pajānāti, ‘ayaṁ dukkhanirodhagāminī paṭipadā’ti yathābhūtaṁ pajānāti,
an5.75:16.3	‘ime āsavā’ti yathābhūtaṁ pajānāti, ‘ayaṁ āsavasamudayo’ti yathābhūtaṁ pajānāti, ‘ayaṁ āsavanirodho’ti yathābhūtaṁ pajānāti, ‘ayaṁ āsavanirodhagāminī paṭipadā’ti yathābhūtaṁ pajānāti.
an5.75:16.4	Tassa evaṁ jānato evaṁ passato kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccati,
an5.75:16.5	vimuttasmiṁ vimuttamiti ñāṇaṁ hoti.
an5.75:16.6	‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.
an5.75:16.7	Idamassa saṅgāmavijayasmiṁ.
an5.75:17.1	Seyyathāpi so, bhikkhave, yodhājīvo sahati rajaggaṁ, sahati dhajaggaṁ, sahati ussāraṇaṁ, sahati sampahāraṁ, so taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati;
an5.75:17.2	tathūpamāhaṁ, bhikkhave, imaṁ puggalaṁ vadāmi.
an5.75:17.3	Evarūpopi, bhikkhave, idhekacco puggalo hoti.
an5.75:17.4	Ayaṁ, bhikkhave, pañcamo yodhājīvūpamo puggalo santo saṁvijjamāno bhikkhūsu.
an5.75:17.5	Ime kho, bhikkhave, pañca yodhājīvūpamā puggalā santo saṁvijjamānā bhikkhūsū”ti.
an5.75:17.6	Pañcamaṁ.
an5.76:0.1	Aṅguttara Nikāya 5.76
an5.76:0.2	8. Yodhājīvavagga
an5.76:0.3	Dutiyayodhājīvasutta
an5.76:1.1	“Pañcime, bhikkhave, yodhājīvā santo saṁvijjamānā lokasmiṁ.
an5.76:1.2	Katame pañca?
an5.76:1.3	Idha, bhikkhave, ekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.
an5.76:1.4	So tasmiṁ saṅgāme ussahati vāyamati.
an5.76:1.5	Tamenaṁ ussahantaṁ vāyamantaṁ pare hananti pariyāpādenti.
an5.76:1.6	Evarūpopi, bhikkhave, idhekacco yodhājīvo hoti.
an5.76:1.7	Ayaṁ, bhikkhave, paṭhamo yodhājīvo santo saṁvijjamāno lokasmiṁ.
an5.76:2.1	Puna caparaṁ, bhikkhave, idhekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.
an5.76:2.2	So tasmiṁ saṅgāme ussahati vāyamati.
an5.76:2.3	Tamenaṁ ussahantaṁ vāyamantaṁ pare upalikkhanti, tamenaṁ apanenti;
an5.76:2.4	apanetvā ñātakānaṁ nenti.
an5.76:2.5	So ñātakehi nīyamāno appatvāva ñātake antarāmagge kālaṁ karoti.
an5.76:2.6	Evarūpopi, bhikkhave, idhekacco yodhājīvo hoti.
an5.76:2.7	Ayaṁ, bhikkhave, dutiyo yodhājīvo santo saṁvijjamāno lokasmiṁ.
an5.76:3.1	Puna caparaṁ, bhikkhave, idhekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.
an5.76:3.2	So tasmiṁ saṅgāme ussahati vāyamati.
an5.76:3.3	Tamenaṁ ussahantaṁ vāyamantaṁ pare upalikkhanti, tamenaṁ apanenti;
an5.76:3.4	apanetvā ñātakānaṁ nenti.
an5.76:3.5	Tamenaṁ ñātakā upaṭṭhahanti paricaranti.
an5.76:3.6	So ñātakehi upaṭṭhahiyamāno paricariyamāno teneva ābādhena kālaṁ karoti.
an5.76:3.7	Evarūpopi, bhikkhave, idhekacco yodhājīvo hoti.
an5.76:3.8	Ayaṁ, bhikkhave, tatiyo yodhājīvo santo saṁvijjamāno lokasmiṁ.
an5.76:4.1	Puna caparaṁ, bhikkhave, idhekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.
an5.76:4.2	So tasmiṁ saṅgāme ussahati vāyamati.
an5.76:4.3	Tamenaṁ ussahantaṁ vāyamantaṁ pare upalikkhanti, tamenaṁ apanenti;
an5.76:4.4	apanetvā ñātakānaṁ nenti.
an5.76:4.5	Tamenaṁ ñātakā upaṭṭhahanti paricaranti.
an5.76:4.6	So ñātakehi upaṭṭhahiyamāno paricariyamāno vuṭṭhāti tamhā ābādhā.
an5.76:4.7	Evarūpopi, bhikkhave, idhekacco yodhājīvo hoti.
an5.76:4.8	Ayaṁ, bhikkhave, catuttho yodhājīvo santo saṁvijjamāno lokasmiṁ.
an5.76:5.1	Puna caparaṁ, bhikkhave, idhekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.
an5.76:5.2	So taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati.
an5.76:5.3	Evarūpopi, bhikkhave, idhekacco yodhājīvo hoti.
an5.76:5.4	Ayaṁ, bhikkhave, pañcamo yodhājīvo santo saṁvijjamāno lokasmiṁ.
an5.76:5.5	Ime kho, bhikkhave, pañca yodhājīvā santo saṁvijjamānā lokasmiṁ.
an5.76:6.1	Evamevaṁ kho, bhikkhave, pañcime yodhājīvūpamā puggalā santo saṁvijjamānā bhikkhūsu.
an5.76:6.2	Katame pañca?
an5.76:6.3	Idha, bhikkhave, bhikkhu aññataraṁ gāmaṁ vā nigamaṁ vā upanissāya viharati.
an5.76:6.4	So pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.
an5.76:6.5	So tattha passati mātugāmaṁ dunnivatthaṁ vā duppārutaṁ vā.
an5.76:6.6	Tassa taṁ mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.
an5.76:6.7	So rāgānuddhaṁsitena cittena sikkhaṁ apaccakkhāya dubbalyaṁ anāvikatvā methunaṁ dhammaṁ paṭisevati.
an5.76:7.1	Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so tasmiṁ saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti; tathūpamāhaṁ, bhikkhave, imaṁ puggalaṁ vadāmi. Evarūpopi, bhikkhave, idhekacco puggalo hoti.
an5.76:7.2	Ayaṁ, bhikkhave, paṭhamo yodhājīvūpamo puggalo santo saṁvijjamāno bhikkhūsu.
an5.76:8.1	Puna caparaṁ, bhikkhave, bhikkhu aññataraṁ gāmaṁ vā nigamaṁ vā upanissāya viharati.
an5.76:8.2	So pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.
an5.76:8.3	So tattha passati mātugāmaṁ dunnivatthaṁ vā duppārutaṁ vā.
an5.76:8.4	Tassa taṁ mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.
an5.76:8.5	So rāgānuddhaṁsitena cittena pariḍayhateva kāyena pariḍayhati cetasā.
an5.76:8.6	Tassa evaṁ hoti:
an5.76:8.7	‘yannūnāhaṁ ārāmaṁ gantvā bhikkhūnaṁ āroceyyaṁ—
an5.76:8.8	rāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;
an5.76:8.9	sikkhādubbalyaṁ āvikatvā sikkhaṁ paccakkhāya hīnāyāvattissāmī’ti.
an5.76:8.10	So ārāmaṁ gacchanto appatvāva ārāmaṁ antarāmagge sikkhādubbalyaṁ āvikatvā sikkhaṁ paccakkhāya hīnāyāvattati.
an5.76:9.1	Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so tasmiṁ saṅgāme ussahati vāyamati, tamenaṁ ussahantaṁ vāyamantaṁ pare upalikkhanti, tamenaṁ apanenti; apanetvā ñātakānaṁ nenti. So ñātakehi nīyamāno appatvāva ñātake antarāmagge kālaṁ karoti; tathūpamāhaṁ, bhikkhave, imaṁ puggalaṁ vadāmi. Evarūpopi, bhikkhave, idhekacco puggalo hoti.
an5.76:9.2	Ayaṁ, bhikkhave, dutiyo yodhājīvūpamo puggalo santo saṁvijjamāno bhikkhūsu.
an5.76:10.1	Puna caparaṁ, bhikkhave, bhikkhu aññataraṁ gāmaṁ vā nigamaṁ vā upanissāya viharati.
an5.76:10.2	So pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.
an5.76:10.3	So tattha passati mātugāmaṁ dunnivatthaṁ vā duppārutaṁ vā.
an5.76:10.4	Tassa taṁ mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.
an5.76:10.5	So rāgānuddhaṁsitena cittena pariḍayhateva kāyena pariḍayhati cetasā.
an5.76:10.6	Tassa evaṁ hoti:
an5.76:10.7	‘yannūnāhaṁ ārāmaṁ gantvā bhikkhūnaṁ āroceyyaṁ—
an5.76:10.8	rāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;
an5.76:10.9	sikkhādubbalyaṁ āvikatvā sikkhaṁ paccakkhāya hīnāyāvattissāmī’ti.
an5.76:10.10	So ārāmaṁ gantvā bhikkhūnaṁ āroceti:
an5.76:10.11	‘rāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;
an5.76:10.12	sikkhādubbalyaṁ āvikatvā sikkhaṁ paccakkhāya hīnāyāvattissāmī’ti.
an5.76:11.1	Tamenaṁ sabrahmacārī ovadanti anusāsanti:
an5.76:11.2	‘appassādā, āvuso, kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.3	Aṭṭhikaṅkalūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.4	Maṁsapesūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.5	Tiṇukkūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.6	Aṅgārakāsūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.7	Supinakūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.8	Yācitakūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.9	Rukkhaphalūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.10	Asisūnūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.11	Sattisūlūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.12	Sappasirūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:11.13	Abhiramatāyasmā brahmacariye;
an5.76:11.14	māyasmā sikkhādubbalyaṁ āvikatvā sikkhaṁ paccakkhāya hīnāyāvattī’ti.
an5.76:12.1	So sabrahmacārīhi evaṁ ovadiyamāno evaṁ anusāsiyamāno evamāha:
an5.76:12.2	‘kiñcāpi, āvuso, appassādā kāmā vuttā bhagavatā bahudukkhā bahupāyāsā, ādīnavo ettha bhiyyo;
an5.76:12.3	atha kho nevāhaṁ sakkomi brahmacariyaṁ sandhāretuṁ, sikkhādubbalyaṁ āvikatvā sikkhaṁ paccakkhāya hīnāyāvattissāmī’ti.
an5.76:12.4	So sikkhādubbalyaṁ āvikatvā sikkhaṁ paccakkhāya hīnāyāvattati.
an5.76:13.1	Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so tasmiṁ saṅgāme ussahati vāyamati, tamenaṁ ussahantaṁ vāyamantaṁ pare upalikkhanti, tamenaṁ apanenti; apanetvā ñātakānaṁ nenti, tamenaṁ ñātakā upaṭṭhahanti paricaranti. So ñātakehi upaṭṭhahiyamāno paricariyamāno teneva ābādhena kālaṁ karoti; tathūpamāhaṁ, bhikkhave, imaṁ puggalaṁ vadāmi. Evarūpopi, bhikkhave, idhekacco puggalo hoti.
an5.76:13.2	Ayaṁ, bhikkhave, tatiyo yodhājīvūpamo puggalo santo saṁvijjamāno bhikkhūsu.
an5.76:14.1	Puna caparaṁ, bhikkhave, bhikkhu aññataraṁ gāmaṁ vā nigamaṁ vā upanissāya viharati.
an5.76:14.2	So pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.
an5.76:14.3	So tattha passati mātugāmaṁ dunnivatthaṁ vā duppārutaṁ vā.
an5.76:14.4	Tassa taṁ mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.
an5.76:14.5	So rāgānuddhaṁsitena cittena pariḍayhateva kāyena pariḍayhati cetasā.
an5.76:14.6	Tassa evaṁ hoti:
an5.76:14.7	‘yannūnāhaṁ ārāmaṁ gantvā bhikkhūnaṁ āroceyyaṁ—
an5.76:14.8	rāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;
an5.76:14.9	sikkhādubbalyaṁ āvikatvā sikkhaṁ paccakkhāya hīnāyāvattissāmī’ti.
an5.76:14.10	So ārāmaṁ gantvā bhikkhūnaṁ āroceti:
an5.76:14.11	‘rāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;
an5.76:14.12	sikkhādubbalyaṁ āvikatvā sikkhaṁ paccakkhāya hīnāyāvattissāmī’ti.
an5.76:15.1	Tamenaṁ sabrahmacārī ovadanti anusāsanti:
an5.76:15.2	‘appassādā, āvuso, kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:15.3	Aṭṭhikaṅkalūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:15.4	Maṁsapesūpamā kāmā vuttā bhagavatā …pe… tiṇukkūpamā kāmā vuttā bhagavatā … aṅgārakāsūpamā kāmā vuttā bhagavatā … supinakūpamā kāmā vuttā bhagavatā … yācitakūpamā kāmā vuttā bhagavatā … rukkhaphalūpamā kāmā vuttā bhagavatā … asisūnūpamā kāmā vuttā bhagavatā … sattisūlūpamā kāmā vuttā bhagavatā … sappasirūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.
an5.76:15.5	Abhiramatāyasmā brahmacariye;
an5.76:15.6	māyasmā sikkhādubbalyaṁ āvikatvā sikkhaṁ paccakkhāya hīnāyāvattī’ti.
an5.76:16.1	So sabrahmacārīhi evaṁ ovadiyamāno evaṁ anusāsiyamāno evamāha:
an5.76:16.2	‘ussahissāmi, āvuso, vāyamissāmi, āvuso, abhiramissāmi, āvuso.
an5.76:16.3	Na dānāhaṁ, āvuso, sikkhādubbalyaṁ āvikatvā sikkhaṁ paccakkhāya hīnāyāvattissāmī’ti.
an5.76:17.1	Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so tasmiṁ saṅgāme ussahati vāyamati, tamenaṁ ussahantaṁ vāyamantaṁ pare upalikkhanti, tamenaṁ apanenti; apanetvā ñātakānaṁ nenti, tamenaṁ ñātakā upaṭṭhahanti paricaranti. So ñātakehi upaṭṭhahiyamāno paricariyamāno vuṭṭhāti tamhā ābādhā; tathūpamāhaṁ, bhikkhave, imaṁ puggalaṁ vadāmi.
an5.76:17.2	Evarūpopi, bhikkhave, idhekacco puggalo hoti.
an5.76:17.3	Ayaṁ, bhikkhave, catuttho yodhājīvūpamo puggalo santo saṁvijjamāno bhikkhūsu.
an5.76:18.1	Puna caparaṁ, bhikkhave, bhikkhu aññataraṁ gāmaṁ vā nigamaṁ vā upanissāya viharati.
an5.76:18.2	So pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati rakkhiteneva kāyena rakkhitāya vācāya rakkhitena cittena upaṭṭhitāya satiyā saṁvutehi indriyehi.
an5.76:18.3	So cakkhunā rūpaṁ disvā na nimittaggāhī hoti nānubyañjanaggāhī.
an5.76:18.4	Yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati cakkhundriyaṁ; cakkhundriye saṁvaraṁ āpajjati.
an5.76:18.5	Sotena saddaṁ sutvā …
an5.76:18.6	ghānena gandhaṁ ghāyitvā …
an5.76:18.7	jivhāya rasaṁ sāyitvā …
an5.76:18.8	kāyena phoṭṭhabbaṁ phusitvā …
an5.76:18.9	manasā dhammaṁ viññāya na nimittaggāhī hoti nānubyañjanaggāhī.
an5.76:18.10	Yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ; manindriye saṁvaraṁ āpajjati.
an5.76:18.11	So pacchābhattaṁ piṇḍapātapaṭikkanto
an5.76:18.12	vivittaṁ senāsanaṁ bhajati araññaṁ rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ palālapuñjaṁ.
an5.76:18.13	So araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an5.76:18.14	So abhijjhaṁ loke pahāya …pe… so ime pañca nīvaraṇe pahāya cetaso upakkilese paññāya dubbalīkaraṇe
an5.76:18.15	vivicceva kāmehi …pe… catutthaṁ jhānaṁ upasampajja viharati.
an5.76:19.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṁ khayañāṇāya cittaṁ abhininnāmeti.
an5.76:19.2	So ‘idaṁ dukkhan’ti yathābhūtaṁ pajānāti …pe…
an5.76:19.3	nāparaṁ itthattāyāti pajānāti.
an5.76:20.1	Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati; tathūpamāhaṁ, bhikkhave, imaṁ puggalaṁ vadāmi.
an5.76:20.2	Evarūpopi, bhikkhave, idhekacco puggalo hoti.
an5.76:20.3	Ayaṁ, bhikkhave, pañcamo yodhājīvūpamo puggalo santo saṁvijjamāno bhikkhūsu.
an5.76:20.4	Ime kho, bhikkhave, pañca yodhājīvūpamā puggalā santo saṁvijjamānā bhikkhūsū”ti.
an5.76:20.5	Chaṭṭhaṁ.
an5.77:0.1	Aṅguttara Nikāya 5.77
an5.77:0.2	8. Yodhājīvavagga
an5.77:0.3	Paṭhamaanāgatabhayasutta
an5.77:1.1	“Pañcimāni, bhikkhave, anāgatabhayāni sampassamānena alameva āraññikena bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.77:2.1	Katamāni pañca?
an5.77:2.2	Idha, bhikkhave, āraññiko bhikkhu iti paṭisañcikkhati:
an5.77:2.3	‘ahaṁ kho etarahi ekako araññe viharāmi.
an5.77:2.4	Ekakaṁ kho pana maṁ araññe viharantaṁ
an5.77:2.5	ahi vā maṁ ḍaṁseyya, vicchiko vā maṁ ḍaṁseyya, satapadī vā maṁ ḍaṁseyya,
an5.77:2.6	tena me assa kālaṅkiriyā, so mamassa antarāyo;
an5.77:2.7	handāhaṁ vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
an5.77:2.8	Idaṁ, bhikkhave, paṭhamaṁ anāgatabhayaṁ sampassamānena alameva āraññikena bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.77:3.1	Puna caparaṁ, bhikkhave, āraññiko bhikkhu iti paṭisañcikkhati:
an5.77:3.2	‘ahaṁ kho etarahi ekako araññe viharāmi.
an5.77:3.3	Ekako kho panāhaṁ araññe viharanto
an5.77:3.4	upakkhalitvā vā papateyyaṁ, bhattaṁ vā bhuttaṁ me byāpajjeyya, pittaṁ vā me kuppeyya, semhaṁ vā me kuppeyya, satthakā vā me vātā kuppeyyuṁ,
an5.77:3.5	tena me assa kālaṅkiriyā, so mamassa antarāyo;
an5.77:3.6	handāhaṁ vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
an5.77:3.7	Idaṁ, bhikkhave, dutiyaṁ anāgatabhayaṁ sampassamānena alameva āraññikena bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.77:4.1	Puna caparaṁ, bhikkhave, āraññiko bhikkhu iti paṭisañcikkhati:
an5.77:4.2	‘ahaṁ kho etarahi ekako araññe viharāmi.
an5.77:4.3	Ekako kho panāhaṁ araññe viharanto
an5.77:4.4	vāḷehi samāgaccheyyaṁ, sīhena vā byagghena vā dīpinā vā acchena vā taracchena vā, te maṁ jīvitā voropeyyuṁ,
an5.77:4.5	tena me assa kālaṅkiriyā, so mamassa antarāyo;
an5.77:4.6	handāhaṁ vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
an5.77:4.7	Idaṁ, bhikkhave, tatiyaṁ anāgatabhayaṁ sampassamānena alameva āraññikena bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.77:5.1	Puna caparaṁ, bhikkhave, āraññiko bhikkhu iti paṭisañcikkhati:
an5.77:5.2	‘ahaṁ kho etarahi ekako araññe viharāmi.
an5.77:5.3	Ekako kho panāhaṁ araññe viharanto
an5.77:5.4	māṇavehi samāgaccheyyaṁ katakammehi vā akatakammehi vā, te maṁ jīvitā voropeyyuṁ,
an5.77:5.5	tena me assa kālaṅkiriyā, so mamassa antarāyo;
an5.77:5.6	handāhaṁ vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
an5.77:5.7	Idaṁ, bhikkhave, catutthaṁ anāgatabhayaṁ sampassamānena alameva āraññikena bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.77:6.1	Puna caparaṁ, bhikkhave, āraññiko bhikkhu iti paṭisañcikkhati:
an5.77:6.2	‘ahaṁ kho etarahi ekako araññe viharāmi.
an5.77:6.3	Santi kho panāraññe vāḷā amanussā, te maṁ jīvitā voropeyyuṁ,
an5.77:6.4	tena me assa kālaṅkiriyā, so mamassa antarāyo;
an5.77:6.5	handāhaṁ vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
an5.77:6.6	Idaṁ, bhikkhave, pañcamaṁ anāgatabhayaṁ sampassamānena alameva āraññikena bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.77:7.1	Imāni kho, bhikkhave, pañca anāgatabhayāni sampassamānena alameva āraññikena bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāyā”ti.
an5.77:7.2	Sattamaṁ.
an5.78:0.1	Aṅguttara Nikāya 5.78
an5.78:0.2	8. Yodhājīvavagga
an5.78:0.3	Dutiyaanāgatabhayasutta
an5.78:1.1	“Pañcimāni, bhikkhave, anāgatabhayāni sampassamānena alameva bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.78:1.2	Katamāni pañca?
an5.78:1.3	Idha, bhikkhave, bhikkhu iti paṭisañcikkhati:
an5.78:1.4	‘ahaṁ kho etarahi daharo yuvā susukāḷakeso bhadrena yobbanena samannāgato paṭhamena vayasā.
an5.78:1.5	Hoti kho pana so samayo yaṁ imaṁ kāyaṁ jarā phusati.
an5.78:1.6	Jiṇṇena kho pana jarāya abhibhūtena na sukaraṁ buddhānaṁ sāsanaṁ manasi kātuṁ, na sukarāni araññavanapatthāni pantāni senāsanāni paṭisevituṁ.
an5.78:1.7	Purā maṁ so dhammo āgacchati aniṭṭho akanto amanāpo;
an5.78:1.8	handāhaṁ paṭikacceva vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāya, yenāhaṁ dhammena samannāgato jiṇṇakopi phāsuṁ viharissāmī’ti.
an5.78:1.9	Idaṁ, bhikkhave, paṭhamaṁ anāgatabhayaṁ sampassamānena alameva bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.78:2.1	Puna caparaṁ, bhikkhave, bhikkhu iti paṭisañcikkhati:
an5.78:2.2	‘ahaṁ kho etarahi appābādho appātaṅko samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya.
an5.78:2.3	Hoti kho pana so samayo yaṁ imaṁ kāyaṁ byādhi phusati.
an5.78:2.4	Byādhitena kho pana byādhinā abhibhūtena na sukaraṁ buddhānaṁ sāsanaṁ manasi kātuṁ, na sukarāni araññavanapatthāni pantāni senāsanāni paṭisevituṁ.
an5.78:2.5	Purā maṁ so dhammo āgacchati aniṭṭho akanto amanāpo;
an5.78:2.6	handāhaṁ paṭikacceva vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāya, yenāhaṁ dhammena samannāgato byādhitopi phāsuṁ viharissāmī’ti.
an5.78:2.7	Idaṁ, bhikkhave, dutiyaṁ anāgatabhayaṁ sampassamānena alameva bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.78:3.1	Puna caparaṁ, bhikkhave, bhikkhu iti paṭisañcikkhati:
an5.78:3.2	‘etarahi kho subhikkhaṁ susassaṁ sulabhapiṇḍaṁ, sukaraṁ uñchena paggahena yāpetuṁ.
an5.78:3.3	Hoti kho pana so samayo yaṁ dubbhikkhaṁ hoti dussassaṁ dullabhapiṇḍaṁ, na sukaraṁ uñchena paggahena yāpetuṁ.
an5.78:3.4	Dubbhikkhe kho pana manussā yena subhikkhaṁ tena saṅkamanti.
an5.78:3.5	Tattha saṅgaṇikavihāro hoti ākiṇṇavihāro.
an5.78:3.6	Saṅgaṇikavihāre kho pana sati ākiṇṇavihāre na sukaraṁ buddhānaṁ sāsanaṁ manasi kātuṁ, na sukarāni araññavanapatthāni pantāni senāsanāni paṭisevituṁ.
an5.78:3.7	Purā maṁ so dhammo āgacchati aniṭṭho akanto amanāpo;
an5.78:3.8	handāhaṁ paṭikacceva vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāya, yenāhaṁ dhammena samannāgato dubbhikkhepi phāsu viharissāmī’ti.
an5.78:3.9	Idaṁ, bhikkhave, tatiyaṁ anāgatabhayaṁ sampassamānena alameva bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.78:4.1	Puna caparaṁ, bhikkhave, bhikkhu iti paṭisañcikkhati:
an5.78:4.2	‘etarahi kho manussā samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharanti.
an5.78:4.3	Hoti kho pana so samayo yaṁ bhayaṁ hoti aṭavisaṅkopo, cakkasamārūḷhā jānapadā pariyāyanti.
an5.78:4.4	Bhaye kho pana sati manussā yena khemaṁ tena saṅkamanti.
an5.78:4.5	Tattha saṅgaṇikavihāro hoti ākiṇṇavihāro.
an5.78:4.6	Saṅgaṇikavihāre kho pana sati ākiṇṇavihāre na sukaraṁ buddhānaṁ sāsanaṁ manasi kātuṁ, na sukarāni araññavanapatthāni pantāni senāsanāni paṭisevituṁ.
an5.78:4.7	Purā maṁ so dhammo āgacchati aniṭṭho akanto amanāpo;
an5.78:4.8	handāhaṁ paṭikacceva vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāya, yenāhaṁ dhammena samannāgato bhayepi phāsuṁ viharissāmī’ti.
an5.78:4.9	Idaṁ, bhikkhave, catutthaṁ anāgatabhayaṁ sampassamānena alameva bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.78:5.1	Puna caparaṁ, bhikkhave, bhikkhu iti paṭisañcikkhati:
an5.78:5.2	‘etarahi kho saṅgho samaggo sammodamāno avivadamāno ekuddeso phāsu viharati.
an5.78:5.3	Hoti kho pana so samayo yaṁ saṅgho bhijjati.
an5.78:5.4	Saṅghe kho pana bhinne na sukaraṁ buddhānaṁ sāsanaṁ manasi kātuṁ, na sukarāni araññavanapatthāni pantāni senāsanāni paṭisevituṁ.
an5.78:5.5	Purā maṁ so dhammo āgacchati aniṭṭho akanto amanāpo;
an5.78:5.6	handāhaṁ paṭikacceva vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāya, yenāhaṁ dhammena samannāgato bhinnepi saṅghe phāsuṁ viharissāmī’ti.
an5.78:5.7	Idaṁ, bhikkhave, pañcamaṁ anāgatabhayaṁ sampassamānena alameva bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāya.
an5.78:6.1	Imāni kho, bhikkhave, pañca anāgatabhayāni sampassamānena alameva bhikkhunā appamattena ātāpinā pahitattena viharituṁ appattassa pattiyā anadhigatassa adhigamāya asacchikatassa sacchikiriyāyā”ti.
an5.78:6.2	Aṭṭhamaṁ.
an5.79:0.1	Aṅguttara Nikāya 5.79
an5.79:0.2	8. Yodhājīvavagga
an5.79:0.3	Tatiyaanāgatabhayasutta
an5.79:1.1	“Pañcimāni, bhikkhave, anāgatabhayāni etarahi asamuppannāni āyatiṁ samuppajjissanti.
an5.79:1.2	Tāni vo paṭibujjhitabbāni;
an5.79:1.3	paṭibujjhitvā ca tesaṁ pahānāya vāyamitabbaṁ.
an5.79:2.1	Katamāni pañca?
an5.79:2.2	Bhavissanti, bhikkhave, bhikkhū anāgatamaddhānaṁ abhāvitakāyā abhāvitasīlā abhāvitacittā abhāvitapaññā.
an5.79:2.3	Te abhāvitakāyā samānā abhāvitasīlā abhāvitacittā abhāvitapaññā aññe upasampādessanti.
an5.79:2.4	Tepi na sakkhissanti vinetuṁ adhisīle adhicitte adhipaññāya.
an5.79:2.5	Tepi bhavissanti abhāvitakāyā abhāvitasīlā abhāvitacittā abhāvitapaññā.
an5.79:2.6	Te abhāvitakāyā samānā abhāvitasīlā abhāvitacittā abhāvitapaññā aññe upasampādessanti.
an5.79:2.7	Tepi na sakkhissanti vinetuṁ adhisīle adhicitte adhipaññāya.
an5.79:2.8	Tepi bhavissanti abhāvitakāyā abhāvitasīlā abhāvitacittā abhāvitapaññā.
an5.79:2.9	Iti kho, bhikkhave, dhammasandosā vinayasandoso;
an5.79:2.10	vinayasandosā dhammasandoso.
an5.79:2.11	Idaṁ, bhikkhave, paṭhamaṁ anāgatabhayaṁ etarahi asamuppannaṁ āyatiṁ samuppajjissati.
an5.79:2.12	Taṁ vo paṭibujjhitabbaṁ;
an5.79:2.13	paṭibujjhitvā ca tassa pahānāya vāyamitabbaṁ.
an5.79:3.1	Puna caparaṁ, bhikkhave, bhavissanti bhikkhū anāgatamaddhānaṁ abhāvitakāyā abhāvitasīlā abhāvitacittā abhāvitapaññā.
an5.79:3.2	Te abhāvitakāyā samānā abhāvitasīlā abhāvitacittā abhāvitapaññā aññesaṁ nissayaṁ dassanti.
an5.79:3.3	Tepi na sakkhissanti vinetuṁ adhisīle adhicitte adhipaññāya.
an5.79:3.4	Tepi bhavissanti abhāvitakāyā abhāvitasīlā abhāvitacittā abhāvitapaññā.
an5.79:3.5	Te abhāvitakāyā samānā abhāvitasīlā abhāvitacittā abhāvitapaññā aññesaṁ nissayaṁ dassanti.
an5.79:3.6	Tepi na sakkhissanti vinetuṁ adhisīle adhicitte adhipaññāya.
an5.79:3.7	Tepi bhavissanti abhāvitakāyā abhāvitasīlā abhāvitacittā abhāvitapaññā.
an5.79:3.8	Iti kho, bhikkhave, dhammasandosā vinayasandoso;
an5.79:3.9	vinayasandosā dhammasandoso.
an5.79:3.10	Idaṁ, bhikkhave, dutiyaṁ anāgatabhayaṁ etarahi asamuppannaṁ āyatiṁ samuppajjissati.
an5.79:3.11	Taṁ vo paṭibujjhitabbaṁ;
an5.79:3.12	paṭibujjhitvā ca tassa pahānāya vāyamitabbaṁ.
an5.79:4.1	Puna caparaṁ, bhikkhave, bhavissanti bhikkhū anāgatamaddhānaṁ abhāvitakāyā abhāvitasīlā abhāvitacittā abhāvitapaññā.
an5.79:4.2	Te abhāvitakāyā samānā abhāvitasīlā abhāvitacittā abhāvitapaññā abhidhammakathaṁ vedallakathaṁ kathentā kaṇhadhammaṁ okkamamānā na bujjhissanti.
an5.79:4.3	Iti kho, bhikkhave, dhammasandosā vinayasandoso;
an5.79:4.4	vinayasandosā dhammasandoso.
an5.79:4.5	Idaṁ, bhikkhave, tatiyaṁ anāgatabhayaṁ etarahi asamuppannaṁ āyatiṁ samuppajjissati.
an5.79:4.6	Taṁ vo paṭibujjhitabbaṁ;
an5.79:4.7	paṭibujjhitvā ca tassa pahānāya vāyamitabbaṁ.
an5.79:5.1	Puna caparaṁ, bhikkhave, bhavissanti bhikkhū anāgatamaddhānaṁ abhāvitakāyā abhāvitasīlā abhāvitacittā abhāvitapaññā.
an5.79:5.2	Te abhāvitakāyā samānā abhāvitasīlā abhāvitacittā abhāvitapaññā ye te suttantā tathāgatabhāsitā gambhīrā gambhīratthā lokuttarā suññatāppaṭisaṁyuttā, tesu bhaññamānesu na sussūsissanti, na sotaṁ odahissanti, na aññā cittaṁ upaṭṭhapessanti, na ca te dhamme uggahetabbaṁ pariyāpuṇitabbaṁ maññissanti.
an5.79:5.3	Ye pana te suttantā kavitā kāveyyā cittakkharā cittabyañjanā bāhirakā sāvakabhāsitā, tesu bhaññamānesu sussūsissanti, sotaṁ odahissanti, aññā cittaṁ upaṭṭhapessanti, te ca dhamme uggahetabbaṁ pariyāpuṇitabbaṁ maññissanti.
an5.79:5.4	Iti kho, bhikkhave, dhammasandosā vinayasandoso;
an5.79:5.5	vinayasandosā dhammasandoso.
an5.79:5.6	Idaṁ, bhikkhave, catutthaṁ anāgatabhayaṁ etarahi asamuppannaṁ āyatiṁ samuppajjissati.
an5.79:5.7	Taṁ vo paṭibujjhitabbaṁ;
an5.79:5.8	paṭibujjhitvā ca tassa pahānāya vāyamitabbaṁ.
an5.79:6.1	Puna caparaṁ, bhikkhave, bhavissanti bhikkhū anāgatamaddhānaṁ abhāvitakāyā abhāvitasīlā abhāvitacittā abhāvitapaññā.
an5.79:6.2	Te abhāvitakāyā samānā abhāvitasīlā abhāvitacittā abhāvitapaññā therā bhikkhū bāhulikā bhavissanti sāthalikā okkamane pubbaṅgamā paviveke nikkhittadhurā, na vīriyaṁ ārabhissanti appattassa pattiyā anadhigatassa adhigamāya asacchikatassa sacchikiriyāya.
an5.79:6.3	Tesaṁ pacchimā janatā diṭṭhānugatiṁ āpajjissati.
an5.79:6.4	Sāpi bhavissati bāhulikā sāthalikā okkamane pubbaṅgamā paviveke nikkhittadhurā, na vīriyaṁ ārabhissati appattassa pattiyā anadhigatassa adhigamāya asacchikatassa sacchikiriyāya.
an5.79:6.5	Iti kho, bhikkhave, dhammasandosā vinayasandoso;
an5.79:6.6	vinayasandosā dhammasandoso.
an5.79:6.7	Idaṁ, bhikkhave, pañcamaṁ anāgatabhayaṁ etarahi asamuppannaṁ āyatiṁ samuppajjissati.
an5.79:6.8	Taṁ vo paṭibujjhitabbaṁ;
an5.79:6.9	paṭibujjhitvā ca tassa pahānāya vāyamitabbaṁ.
an5.79:7.1	Imāni kho, bhikkhave, pañca anāgatabhayāni etarahi asamuppannāni āyatiṁ samuppajjissanti.
an5.79:7.2	Tāni vo paṭibujjhitabbāni;
an5.79:7.3	paṭibujjhitvā ca tesaṁ pahānāya vāyamitabban”ti.
an5.79:7.4	Navamaṁ.
an5.80:0.1	Aṅguttara Nikāya 5.80
an5.80:0.2	8. Yodhājīvavagga
an5.80:0.3	Catutthaanāgatabhayasutta
an5.80:1.1	“Pañcimāni, bhikkhave, anāgatabhayāni etarahi asamuppannāni āyatiṁ samuppajjissanti.
an5.80:1.2	Tāni vo paṭibujjhitabbāni;
an5.80:1.3	paṭibujjhitvā ca tesaṁ pahānāya vāyamitabbaṁ.
an5.80:2.1	Katamāni pañca?
an5.80:2.2	Bhavissanti, bhikkhave, bhikkhū anāgatamaddhānaṁ cīvare kalyāṇakāmā.
an5.80:2.3	Te cīvare kalyāṇakāmā samānā riñcissanti paṁsukūlikattaṁ, riñcissanti araññavanapatthāni pantāni senāsanāni;
an5.80:2.4	gāmanigamarājadhānīsu osaritvā vāsaṁ kappessanti, cīvarahetu ca anekavihitaṁ anesanaṁ appatirūpaṁ āpajjissanti.
an5.80:2.5	Idaṁ, bhikkhave, paṭhamaṁ anāgatabhayaṁ etarahi asamuppannaṁ āyatiṁ samuppajjissati.
an5.80:2.6	Taṁ vo paṭibujjhitabbaṁ;
an5.80:2.7	paṭibujjhitvā ca tassa pahānāya vāyamitabbaṁ.
an5.80:3.1	Puna caparaṁ, bhikkhave, bhavissanti bhikkhū anāgatamaddhānaṁ piṇḍapāte kalyāṇakāmā.
an5.80:3.2	Te piṇḍapāte kalyāṇakāmā samānā riñcissanti piṇḍapātikattaṁ, riñcissanti araññavanapatthāni pantāni senāsanāni;
an5.80:3.3	gāmanigamarājadhānīsu osaritvā vāsaṁ kappessanti jivhaggena rasaggāni pariyesamānā, piṇḍapātahetu ca anekavihitaṁ anesanaṁ appatirūpaṁ āpajjissanti.
an5.80:3.4	Idaṁ, bhikkhave, dutiyaṁ anāgatabhayaṁ etarahi asamuppannaṁ āyatiṁ samuppajjissati.
an5.80:3.5	Taṁ vo paṭibujjhitabbaṁ;
an5.80:3.6	paṭibujjhitvā ca tassa pahānāya vāyamitabbaṁ.
an5.80:4.1	Puna caparaṁ, bhikkhave, bhavissanti bhikkhū anāgatamaddhānaṁ senāsane kalyāṇakāmā.
an5.80:4.2	Te senāsane kalyāṇakāmā samānā riñcissanti rukkhamūlikattaṁ, riñcissanti araññavanapatthāni pantāni senāsanāni;
an5.80:4.3	gāmanigamarājadhānīsu osaritvā vāsaṁ kappessanti, senāsanahetu ca anekavihitaṁ anesanaṁ appatirūpaṁ āpajjissanti.
an5.80:4.4	Idaṁ, bhikkhave, tatiyaṁ anāgatabhayaṁ etarahi asamuppannaṁ āyatiṁ samuppajjissati.
an5.80:4.5	Taṁ vo paṭibujjhitabbaṁ;
an5.80:4.6	paṭibujjhitvā ca tassa pahānāya vāyamitabbaṁ.
an5.80:5.1	Puna caparaṁ, bhikkhave, bhavissanti bhikkhū anāgatamaddhānaṁ bhikkhunīsikkhamānāsamaṇuddesehi saṁsaṭṭhā viharissanti.
an5.80:5.2	Bhikkhunīsikkhamānāsamaṇuddesehi saṁsagge kho pana, bhikkhave, sati etaṁ pāṭikaṅkhaṁ:
an5.80:5.3	‘anabhiratā vā brahmacariyaṁ carissanti, aññataraṁ vā saṅkiliṭṭhaṁ āpattiṁ āpajjissanti, sikkhaṁ vā paccakkhāya hīnāyāvattissanti’.
an5.80:5.4	Idaṁ, bhikkhave, catutthaṁ anāgatabhayaṁ etarahi asamuppannaṁ āyatiṁ samuppajjissati.
an5.80:5.5	Taṁ vo paṭibujjhitabbaṁ;
an5.80:5.6	paṭibujjhitvā ca tassa pahānāya vāyamitabbaṁ.
an5.80:6.1	Puna caparaṁ, bhikkhave, bhavissanti bhikkhū anāgatamaddhānaṁ ārāmikasamaṇuddesehi saṁsaṭṭhā viharissanti.
an5.80:6.2	Ārāmikasamaṇuddesehi saṁsagge kho pana, bhikkhave, sati etaṁ pāṭikaṅkhaṁ:
an5.80:6.3	‘anekavihitaṁ sannidhikāraparibhogaṁ anuyuttā viharissanti, oḷārikampi nimittaṁ karissanti, pathaviyāpi haritaggepi’.
an5.80:6.4	Idaṁ, bhikkhave, pañcamaṁ anāgatabhayaṁ etarahi asamuppannaṁ āyatiṁ samuppajjissati.
an5.80:6.5	Taṁ vo paṭibujjhitabbaṁ;
an5.80:6.6	paṭibujjhitvā ca tassa pahānāya vāyamitabbaṁ.
an5.80:7.1	Imāni kho, bhikkhave, pañca anāgatabhayāni etarahi asamuppannāni āyatiṁ samuppajjissanti.
an5.80:7.2	Tāni vo paṭibujjhitabbāni;
an5.80:7.3	paṭibujjhitvā ca tesaṁ pahānāya vāyamitabban”ti.
an5.80:7.4	Dasamaṁ.
an5.80:7.5	Yodhājīvavaggo tatiyo.
an5.80:8.0	Tassuddānaṁ
an5.80:8.1	Dve cetovimuttiphalā,
an5.80:8.2	dve ca dhammavihārino;
an5.80:8.3	Yodhājīvā ca dve vuttā,
an5.80:8.4	cattāro ca anāgatāti.
an5.81:0.1	Aṅguttara Nikāya 5.81
an5.81:0.2	9. Theravagga
an5.81:0.3	Rajanīyasutta
an5.81:1.1	“Pañcahi, bhikkhave, dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an5.81:1.2	Katamehi pañcahi?
an5.81:1.3	Rajanīye rajjati, dussanīye dussati, mohanīye muyhati, kuppanīye kuppati, madanīye majjati—
an5.81:1.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an5.81:2.1	Pañcahi, bhikkhave, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.81:2.2	Katamehi pañcahi?
an5.81:2.3	Rajanīye na rajjati, dussanīye na dussati, mohanīye na muyhati, kuppanīye na kuppati, madanīye na majjati—
an5.81:2.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an5.81:2.5	Paṭhamaṁ.
an5.82:0.1	Aṅguttara Nikāya 5.82
an5.82:0.2	9. Theravagga
an5.82:0.3	Vītarāgasutta
an5.82:1.1	“Pañcahi, bhikkhave, dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an5.82:1.2	Katamehi pañcahi?
an5.82:1.3	Avītarāgo hoti, avītadoso hoti, avītamoho hoti, makkhī ca, paḷāsī ca—
an5.82:1.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an5.82:2.1	Pañcahi, bhikkhave, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.82:2.2	Katamehi pañcahi?
an5.82:2.3	Vītarāgo hoti, vītadoso hoti, vītamoho hoti, amakkhī ca, apaḷāsī ca—
an5.82:2.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an5.82:2.5	Dutiyaṁ.
an5.83:0.1	Aṅguttara Nikāya 5.83
an5.83:0.2	9. Theravagga
an5.83:0.3	Kuhakasutta
an5.83:1.1	“Pañcahi, bhikkhave, dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an5.83:1.2	Katamehi pañcahi?
an5.83:1.3	Kuhako ca hoti, lapako ca, nemittiko ca, nippesiko ca, lābhena ca lābhaṁ nijigīsitā—
an5.83:1.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an5.83:2.1	Pañcahi, bhikkhave, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.83:2.2	Katamehi pañcahi?
an5.83:2.3	Na ca kuhako hoti, na ca lapako, na ca nemittiko, na ca nippesiko, na ca lābhena lābhaṁ nijigīsitā—
an5.83:2.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an5.83:2.5	Tatiyaṁ.
an5.84:0.1	Aṅguttara Nikāya 5.84
an5.84:0.2	9. Theravagga
an5.84:0.3	Assaddhasutta
an5.84:1.1	“Pañcahi, bhikkhave, dhammehi samannāgato thero bhikkhu sabrahmacārīnaṁ appiyo ca hoti, amanāpo ca agaru ca abhāvanīyo ca.
an5.84:1.2	Katamehi pañcahi?
an5.84:1.3	Assaddho hoti, ahiriko hoti, anottappī hoti, kusīto hoti, duppañño hoti—
an5.84:1.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an5.84:2.1	Pañcahi, bhikkhave, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.84:2.2	Katamehi pañcahi?
an5.84:2.3	Saddho hoti, hirīmā hoti, ottappī hoti, āraddhavīriyo hoti, paññavā hoti—
an5.84:2.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an5.84:2.5	Catutthaṁ.
an5.85:0.1	Aṅguttara Nikāya 5.85
an5.85:0.2	9. Theravagga
an5.85:0.3	Akkhamasutta
an5.85:1.1	“Pañcahi, bhikkhave, dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an5.85:1.2	Katamehi pañcahi?
an5.85:1.3	Akkhamo hoti rūpānaṁ, akkhamo saddānaṁ, akkhamo gandhānaṁ, akkhamo rasānaṁ, akkhamo phoṭṭhabbānaṁ—
an5.85:1.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an5.85:2.1	Pañcahi, bhikkhave, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.85:2.2	Katamehi pañcahi?
an5.85:2.3	Khamo hoti rūpānaṁ, khamo saddānaṁ, khamo gandhānaṁ, khamo rasānaṁ, khamo phoṭṭhabbānaṁ—
an5.85:2.4	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an5.85:2.5	Pañcamaṁ.
an5.86:0.1	Aṅguttara Nikāya 5.86
an5.86:0.2	9. Theravagga
an5.86:0.3	Paṭisambhidāpattasutta
an5.86:1.1	“Pañcahi, bhikkhave, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.86:1.2	Katamehi pañcahi?
an5.86:1.3	Atthapaṭisambhidāpatto hoti, dhammapaṭisambhidāpatto hoti, niruttipaṭisambhidāpatto hoti, paṭibhānapaṭisambhidāpatto hoti,
an5.86:1.4	yāni tāni sabrahmacārīnaṁ uccāvacāni kiṅkaraṇīyāni tattha dakkho hoti analaso tatrupāyāya vīmaṁsāya samannāgato alaṁ kātuṁ alaṁ saṁvidhātuṁ—
an5.86:1.5	imehi kho, bhikkhave, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an5.86:1.6	Chaṭṭhaṁ.
an5.87:0.1	Aṅguttara Nikāya 5.87
an5.87:0.2	9. Theravagga
an5.87:0.3	Sīlavantasutta
an5.87:1.1	“Pañcahi, bhikkhave, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.87:1.2	Katamehi pañcahi?
an5.87:1.3	Sīlavā hoti, pātimokkhasaṁvarasaṁvuto viharati. Ācāragocarasampanno aṇumattesu vajjesu bhayadassāvī, samādāya sikkhati sikkhāpadesu;
an5.87:1.4	bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā;
an5.87:1.5	kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā;
an5.87:1.6	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;
an5.87:1.7	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an5.87:1.8	Imehi kho, bhikkhave, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an5.87:1.9	Sattamaṁ.
an5.88:0.1	Aṅguttara Nikāya 5.88
an5.88:0.2	9. Theravagga
an5.88:0.3	Therasutta
an5.88:1.1	“Pañcahi, bhikkhave, dhammehi samannāgato thero bhikkhu bahujanaahitāya paṭipanno hoti bahujanaasukhāya bahuno janassa anatthāya ahitāya dukkhāya devamanussānaṁ.
an5.88:2.1	Katamehi pañcahi?
an5.88:2.2	Thero hoti rattaññū cirapabbajito;
an5.88:2.3	ñāto hoti yasassī sagahaṭṭhapabbajitānaṁ bahujanaparivāro;
an5.88:2.4	lābhī hoti cīvarapiṇḍapātasenāsanagilānappaccayabhesajjaparikkhārānaṁ;
an5.88:2.5	bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā appaṭividdhā;
an5.88:2.6	micchādiṭṭhiko hoti viparītadassano, so bahujanaṁ saddhammā vuṭṭhāpetvā asaddhamme patiṭṭhāpeti.
an5.88:2.7	Thero bhikkhu rattaññū cirapabbajito itipissa diṭṭhānugatiṁ āpajjanti, ñāto thero bhikkhu yasassī sagahaṭṭhapabbajitānaṁ bahujanaparivāro itipissa diṭṭhānugatiṁ āpajjanti, lābhī thero bhikkhu cīvarapiṇḍapātasenāsanagilānappaccayabhesajjaparikkhārānaṁ itipissa diṭṭhānugatiṁ āpajjanti, bahussuto thero bhikkhu sutadharo sutasannicayo itipissa diṭṭhānugatiṁ āpajjanti.
an5.88:2.8	Imehi kho, bhikkhave, pañcahi dhammehi samannāgato thero bhikkhu bahujanaahitāya paṭipanno hoti bahujanaasukhāya bahuno janassa anatthāya ahitāya dukkhāya devamanussānaṁ.
an5.88:3.1	Pañcahi, bhikkhave, dhammehi samannāgato thero bhikkhu bahujanahitāya paṭipanno hoti bahujanasukhāya bahuno janassa atthāya hitāya sukhāya devamanussānaṁ.
an5.88:4.1	Katamehi pañcahi?
an5.88:4.2	Thero hoti rattaññū cirapabbajito;
an5.88:4.3	ñāto hoti yasassī sagahaṭṭhapabbajitānaṁ bahujanaparivāro;
an5.88:4.4	lābhī hoti cīvarapiṇḍapātasenāsanagilānappaccayabhesajjaparikkhārānaṁ;
an5.88:4.5	bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā;
an5.88:4.6	sammādiṭṭhiko hoti aviparītadassano, so bahujanaṁ asaddhammā vuṭṭhāpetvā saddhamme patiṭṭhāpeti.
an5.88:4.7	Thero bhikkhu rattaññū cirapabbajito itipissa diṭṭhānugatiṁ āpajjanti, ñāto thero bhikkhu yasassī sagahaṭṭhapabbajitānaṁ bahujanaparivāro itipissa diṭṭhānugatiṁ āpajjanti, lābhī thero bhikkhu cīvarapiṇḍapātasenāsanagilānappaccayabhesajjaparikkhārānaṁ itipissa diṭṭhānugatiṁ āpajjanti, bahussuto thero bhikkhu sutadharo sutasannicayo itipissa diṭṭhānugatiṁ āpajjanti.
an5.88:4.8	Imehi kho, bhikkhave, pañcahi dhammehi samannāgato thero bhikkhu bahujanahitāya paṭipanno hoti bahujanasukhāya bahuno janassa atthāya hitāya sukhāya devamanussānan”ti.
an5.88:4.9	Aṭṭhamaṁ.
an5.89:0.1	Aṅguttara Nikāya 5.89
an5.89:0.2	9. Theravagga
an5.89:0.3	Paṭhamasekhasutta
an5.89:1.1	“Pañcime, bhikkhave, dhammā sekhassa bhikkhuno parihānāya saṁvattanti.
an5.89:1.2	Katame pañca?
an5.89:1.3	Kammārāmatā, bhassārāmatā, niddārāmatā, saṅgaṇikārāmatā, yathāvimuttaṁ cittaṁ na paccavekkhati—
an5.89:1.4	ime kho, bhikkhave, pañca dhammā sekhassa bhikkhuno parihānāya saṁvattanti.
an5.89:2.1	Pañcime, bhikkhave, dhammā sekhassa bhikkhuno aparihānāya saṁvattanti.
an5.89:2.2	Katame pañca?
an5.89:2.3	Na kammārāmatā, na bhassārāmatā, na niddārāmatā, na saṅgaṇikārāmatā, yathāvimuttaṁ cittaṁ paccavekkhati—
an5.89:2.4	ime kho, bhikkhave, pañca dhammā sekhassa bhikkhuno aparihānāya saṁvattantī”ti.
an5.89:2.5	Navamaṁ.
an5.90:0.1	Aṅguttara Nikāya 5.90
an5.90:0.2	9. Theravagga
an5.90:0.3	Dutiyasekhasutta
an5.90:1.1	“Pañcime, bhikkhave, dhammā sekhassa bhikkhuno parihānāya saṁvattanti.
an5.90:1.2	Katame pañca?
an5.90:1.3	Idha, bhikkhave, sekho bhikkhu bahukicco hoti bahukaraṇīyo viyatto kiṅkaraṇīyesu;
an5.90:1.4	riñcati paṭisallānaṁ, nānuyuñjati ajjhattaṁ cetosamathaṁ.
an5.90:1.5	Ayaṁ, bhikkhave, paṭhamo dhammo sekhassa bhikkhuno parihānāya saṁvattati.
an5.90:2.1	Puna caparaṁ, bhikkhave, sekho bhikkhu appamattakena kammena divasaṁ atināmeti;
an5.90:2.2	riñcati paṭisallānaṁ, nānuyuñjati ajjhattaṁ cetosamathaṁ.
an5.90:2.3	Ayaṁ, bhikkhave, dutiyo dhammo sekhassa bhikkhuno parihānāya saṁvattati.
an5.90:3.1	Puna caparaṁ, bhikkhave, sekho bhikkhu saṁsaṭṭho viharati gahaṭṭhapabbajitehi ananulomikena gihisaṁsaggena;
an5.90:3.2	riñcati paṭisallānaṁ, nānuyuñjati ajjhattaṁ cetosamathaṁ.
an5.90:3.3	Ayaṁ, bhikkhave, tatiyo dhammo sekhassa bhikkhuno parihānāya saṁvattati.
an5.90:4.1	Puna caparaṁ, bhikkhave, sekho bhikkhu akālena gāmaṁ pavisati, atidivā paṭikkamati;
an5.90:4.2	riñcati paṭisallānaṁ, nānuyuñjati ajjhattaṁ cetosamathaṁ.
an5.90:4.3	Ayaṁ, bhikkhave, catuttho dhammo sekhassa bhikkhuno parihānāya saṁvattati.
an5.90:5.1	Puna caparaṁ, bhikkhave, sekho bhikkhu yāyaṁ kathā ābhisallekhikā cetovivaraṇasappāyā, seyyathidaṁ—
an5.90:5.2	appicchakathā santuṭṭhikathā pavivekakathā asaṁsaggakathā vīriyārambhakathā sīlakathā samādhikathā paññākathā vimuttikathā vimuttiñāṇadassanakathā, evarūpiyā kathāya na nikāmalābhī hoti na akicchalābhī na akasiralābhī;
an5.90:5.3	riñcati paṭisallānaṁ, nānuyuñjati ajjhattaṁ cetosamathaṁ.
an5.90:5.4	Ayaṁ, bhikkhave, pañcamo dhammo sekhassa bhikkhuno parihānāya saṁvattati.
an5.90:5.5	Ime kho, bhikkhave, pañca dhammā sekhassa bhikkhuno parihānāya saṁvattanti.
an5.90:6.1	Pañcime, bhikkhave, dhammā sekhassa bhikkhuno aparihānāya saṁvattanti.
an5.90:6.2	Katame pañca?
an5.90:6.3	Idha, bhikkhave, sekho bhikkhu na bahukicco hoti na bahukaraṇīyo viyatto kiṅkaraṇīyesu;
an5.90:6.4	na riñcati paṭisallānaṁ, anuyuñjati ajjhattaṁ cetosamathaṁ.
an5.90:6.5	Ayaṁ, bhikkhave, paṭhamo dhammo sekhassa bhikkhuno aparihānāya saṁvattati.
an5.90:7.1	Puna caparaṁ, bhikkhave, sekho bhikkhu na appamattakena kammena divasaṁ atināmeti;
an5.90:7.2	na riñcati paṭisallānaṁ, anuyuñjati ajjhattaṁ cetosamathaṁ.
an5.90:7.3	Ayaṁ, bhikkhave, dutiyo dhammo sekhassa bhikkhuno aparihānāya saṁvattati.
an5.90:8.1	Puna caparaṁ, bhikkhave, sekho bhikkhu asaṁsaṭṭho viharati gahaṭṭhapabbajitehi ananulomikena gihisaṁsaggena;
an5.90:8.2	na riñcati paṭisallānaṁ, anuyuñjati ajjhattaṁ cetosamathaṁ.
an5.90:8.3	Ayaṁ, bhikkhave, tatiyo dhammo sekhassa bhikkhuno aparihānāya saṁvattati.
an5.90:9.1	Puna caparaṁ, bhikkhave, sekho bhikkhu na atikālena gāmaṁ pavisati, nātidivā paṭikkamati;
an5.90:9.2	na riñcati paṭisallānaṁ, anuyuñjati ajjhattaṁ cetosamathaṁ.
an5.90:9.3	Ayaṁ, bhikkhave, catuttho dhammo sekhassa bhikkhuno aparihānāya saṁvattati.
an5.90:10.1	Puna caparaṁ, bhikkhave, sekho bhikkhu yāyaṁ kathā ābhisallekhikā cetovivaraṇasappāyā, seyyathidaṁ—
an5.90:10.2	appicchakathā santuṭṭhikathā pavivekakathā asaṁsaggakathā vīriyārambhakathā sīlakathā samādhikathā paññākathā vimuttikathā vimuttiñāṇadassanakathā, evarūpiyā kathāya nikāmalābhī hoti akicchalābhī akasiralābhī;
an5.90:10.3	na riñcati paṭisallānaṁ, anuyuñjati ajjhattaṁ cetosamathaṁ.
an5.90:10.4	Ayaṁ, bhikkhave, pañcamo dhammo sekhassa bhikkhuno aparihānāya saṁvattati.
an5.90:10.5	Ime kho, bhikkhave, pañca dhammā sekhassa bhikkhuno aparihānāya saṁvattantī”ti.
an5.90:10.6	Dasamaṁ.
an5.90:10.7	Theravaggo catuttho.
an5.90:11.0	Tassuddānaṁ
an5.90:11.1	Rajanīyo vītarāgo,
an5.90:11.2	kuhakāssaddhaakkhamā;
an5.90:11.3	Paṭisambhidā ca sīlena,
an5.90:11.4	thero sekhā pare duveti.
an5.91:0.1	Aṅguttara Nikāya 5.91
an5.91:0.2	10. Kakudhavagga
an5.91:0.3	Paṭhamasampadāsutta
an5.91:1.1	“Pañcimā, bhikkhave, sampadā.
an5.91:1.2	Katamā pañca?
an5.91:1.3	Saddhāsampadā, sīlasampadā, sutasampadā, cāgasampadā, paññāsampadā—
an5.91:1.4	imā kho, bhikkhave, pañca sampadā”ti.
an5.91:1.5	Paṭhamaṁ.
an5.92:0.1	Aṅguttara Nikāya 5.92
an5.92:0.2	10. Kakudhavagga
an5.92:0.3	Dutiyasampadāsutta
an5.92:1.1	“Pañcimā, bhikkhave, sampadā.
an5.92:1.2	Katamā pañca?
an5.92:1.3	Sīlasampadā, samādhisampadā, paññāsampadā, vimuttisampadā, vimuttiñāṇadassanasampadā—
an5.92:1.4	imā kho, bhikkhave, pañca sampadā”ti.
an5.92:1.5	Dutiyaṁ.
an5.93:0.1	Aṅguttara Nikāya 5.93
an5.93:0.2	10. Kakudhavagga
an5.93:0.3	Byākaraṇasutta
an5.93:1.1	“Pañcimāni, bhikkhave, aññābyākaraṇāni.
an5.93:1.2	Katamāni pañca?
an5.93:1.3	Mandattā momūhattā aññaṁ byākaroti;
an5.93:1.4	pāpiccho icchāpakato aññaṁ byākaroti;
an5.93:1.5	ummādā cittakkhepā aññaṁ byākaroti;
an5.93:1.6	adhimānena aññaṁ byākaroti;
an5.93:1.7	sammadeva aññaṁ byākaroti.
an5.93:1.8	Imāni kho, bhikkhave, pañca aññābyākaraṇānī”ti.
an5.93:1.9	Tatiyaṁ.
an5.94:0.1	Aṅguttara Nikāya 5.94
an5.94:0.2	10. Kakudhavagga
an5.94:0.3	Phāsuvihārasutta
an5.94:1.1	“Pañcime, bhikkhave, phāsuvihārā.
an5.94:1.2	Katame pañca?
an5.94:1.3	Idha, bhikkhave, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati;
an5.94:1.4	vitakkavicārānaṁ vūpasamā …pe… dutiyaṁ jhānaṁ … tatiyaṁ jhānaṁ … catutthaṁ jhānaṁ upasampajja viharati;
an5.94:1.5	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an5.94:1.6	Ime kho, bhikkhave, pañca phāsuvihārā”ti.
an5.94:1.7	Catutthaṁ.
an5.95:0.1	Aṅguttara Nikāya 5.95
an5.95:0.2	10. Kakudhavagga
an5.95:0.3	Akuppasutta
an5.95:1.1	“Pañcahi, bhikkhave, dhammehi samannāgato bhikkhu nacirasseva akuppaṁ paṭivijjhati.
an5.95:1.2	Katamehi pañcahi?
an5.95:1.3	Idha, bhikkhave, bhikkhu atthapaṭisambhidāpatto hoti, dhammapaṭisambhidāpatto hoti, niruttipaṭisambhidāpatto hoti, paṭibhānapaṭisambhidāpatto hoti, yathāvimuttaṁ cittaṁ paccavekkhati.
an5.95:1.4	Imehi kho, bhikkhave, pañcahi dhammehi samannāgato bhikkhu nacirasseva akuppaṁ paṭivijjhatī”ti.
an5.95:1.5	Pañcamaṁ.
an5.96:0.1	Aṅguttara Nikāya 5.96
an5.96:0.2	10. Kakudhavagga
an5.96:0.3	Sutadharasutta
an5.96:1.1	“Pañcahi, bhikkhave, dhammehi samannāgato bhikkhu ānāpānassatiṁ āsevanto nacirasseva akuppaṁ paṭivijjhati.
an5.96:1.2	Katamehi pañcahi?
an5.96:1.3	Idha, bhikkhave, bhikkhu appaṭṭho hoti appakicco subharo susantoso jīvitaparikkhāresu;
an5.96:1.4	appāhāro hoti anodarikattaṁ anuyutto;
an5.96:1.5	appamiddho hoti jāgariyaṁ anuyutto;
an5.96:1.6	bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā;
an5.96:1.7	yathāvimuttaṁ cittaṁ paccavekkhati.
an5.96:1.8	Imehi kho, bhikkhave, pañcahi dhammehi samannāgato bhikkhu ānāpānassatiṁ āsevanto nacirasseva akuppaṁ paṭivijjhatī”ti.
an5.96:1.9	Chaṭṭhaṁ.
an5.97:0.1	Aṅguttara Nikāya 5.97
an5.97:0.2	10. Kakudhavagga
an5.97:0.3	Kathāsutta
an5.97:1.1	“Pañcahi, bhikkhave, dhammehi samannāgato bhikkhu ānāpānassatiṁ bhāvento nacirasseva akuppaṁ paṭivijjhati.
an5.97:1.2	Katamehi pañcahi?
an5.97:1.3	Idha, bhikkhave, bhikkhu appaṭṭho hoti appakicco subharo susantoso jīvitaparikkhāresu;
an5.97:1.4	appāhāro hoti anodarikattaṁ anuyutto;
an5.97:1.5	appamiddho hoti jāgariyaṁ anuyutto;
an5.97:1.6	yāyaṁ kathā ābhisallekhikā cetovivaraṇasappāyā, seyyathidaṁ—
an5.97:1.7	appicchakathā …pe… vimuttiñāṇadassanakathā, evarūpiyā kathāya nikāmalābhī hoti akicchalābhī akasiralābhī;
an5.97:1.8	yathāvimuttaṁ cittaṁ paccavekkhati.
an5.97:1.9	Imehi kho, bhikkhave, pañcahi dhammehi samannāgato bhikkhu ānāpānassatiṁ bhāvento nacirasseva akuppaṁ paṭivijjhatī”ti.
an5.97:1.10	Sattamaṁ.
an5.98:0.1	Aṅguttara Nikāya 5.98
an5.98:0.2	10. Kakudhavagga
an5.98:0.3	Āraññakasutta
an5.98:1.1	“Pañcahi, bhikkhave, dhammehi samannāgato bhikkhu ānāpānassatiṁ bahulīkaronto nacirasseva akuppaṁ paṭivijjhati.
an5.98:1.2	Katamehi pañcahi?
an5.98:1.3	Idha, bhikkhave, bhikkhu appaṭṭho hoti appakicco subharo susantoso jīvitaparikkhāresu;
an5.98:1.4	appāhāro hoti anodarikattaṁ anuyutto;
an5.98:1.5	appamiddho hoti jāgariyaṁ anuyutto;
an5.98:1.6	āraññako hoti pantasenāsano;
an5.98:1.7	yathāvimuttaṁ cittaṁ paccavekkhati.
an5.98:1.8	Imehi kho, bhikkhave, pañcahi dhammehi samannāgato bhikkhu ānāpānassatiṁ bahulīkaronto nacirasseva akuppaṁ paṭivijjhatī”ti.
an5.98:1.9	Aṭṭhamaṁ.
an5.99:0.1	Aṅguttara Nikāya 5.99
an5.99:0.2	10. Kakudhavagga
an5.99:0.3	Sīhasutta
an5.99:1.1	“Sīho, bhikkhave, migarājā sāyanhasamayaṁ āsayā nikkhamati;
an5.99:1.2	āsayā nikkhamitvā vijambhati;
an5.99:1.3	vijambhitvā samantā catuddisaṁ anuviloketi;
an5.99:1.4	samantā catuddisaṁ anuviloketvā tikkhattuṁ sīhanādaṁ nadati;
an5.99:1.5	tikkhattuṁ sīhanādaṁ naditvā gocarāya pakkamati.
an5.99:1.6	So hatthissa cepi pahāraṁ deti, sakkaccaññeva pahāraṁ deti, no asakkaccaṁ;
an5.99:1.7	mahiṁsassa cepi pahāraṁ deti, sakkaccaññeva pahāraṁ deti, no asakkaccaṁ;
an5.99:1.8	gavassa cepi pahāraṁ deti, sakkaccaññeva pahāraṁ deti, no asakkaccaṁ;
an5.99:1.9	dīpissa cepi pahāraṁ deti, sakkaccaññeva pahāraṁ deti, no asakkaccaṁ;
an5.99:1.10	khuddakānañcepi pāṇānaṁ pahāraṁ deti antamaso sasabiḷārānampi, sakkaccaññeva pahāraṁ deti, no asakkaccaṁ.
an5.99:1.11	Taṁ kissa hetu?
an5.99:1.12	‘Mā me yoggapatho nassā’ti.
an5.99:2.1	Sīhoti kho, bhikkhave, tathāgatassetaṁ adhivacanaṁ arahato sammāsambuddhassa.
an5.99:2.2	Yaṁ kho, bhikkhave, tathāgato parisāya dhammaṁ deseti, idamassa hoti sīhanādasmiṁ.
an5.99:2.3	Bhikkhūnañcepi, bhikkhave, tathāgato dhammaṁ deseti, sakkaccaññeva tathāgato dhammaṁ deseti, no asakkaccaṁ;
an5.99:2.4	bhikkhunīnañcepi, bhikkhave, tathāgato dhammaṁ deseti, sakkaccaññeva tathāgato dhammaṁ deseti, no asakkaccaṁ;
an5.99:2.5	upāsakānañcepi, bhikkhave, tathāgato dhammaṁ deseti, sakkaccaññeva tathāgato dhammaṁ deseti, no asakkaccaṁ;
an5.99:2.6	upāsikānañcepi, bhikkhave, tathāgato dhammaṁ deseti, sakkaccaññeva tathāgato dhammaṁ deseti, no asakkaccaṁ;
an5.99:2.7	puthujjanānañcepi, bhikkhave, tathāgato dhammaṁ deseti antamaso annabhāranesādānampi, sakkaccaññeva tathāgato dhammaṁ deseti, no asakkaccaṁ.
an5.99:2.8	Taṁ kissa hetu?
an5.99:2.9	Dhammagaru, bhikkhave, tathāgato dhammagāravo”ti.
an5.99:2.10	Navamaṁ.
an5.100:0.1	Aṅguttara Nikāya 5.100
an5.100:0.2	10. Kakudhavagga
an5.100:0.3	Kakudhatherasutta
an5.100:1.1	Evaṁ me sutaṁ—
an5.100:1.2	ekaṁ samayaṁ bhagavā kosambiyaṁ viharati ghositārāme.
an5.100:1.3	Tena kho pana samayena kakudho nāma koliyaputto āyasmato mahāmoggallānassa upaṭṭhāko adhunākālaṅkato aññataraṁ manomayaṁ kāyaṁ upapanno.
an5.100:1.4	Tassa evarūpo attabhāvapaṭilābho hoti—seyyathāpi nāma dve vā tīṇi vā māgadhakāni gāmakkhettāni.
an5.100:1.5	So tena attabhāvapaṭilābhena neva attānaṁ no paraṁ byābādheti.
an5.100:2.1	Atha kho kakudho devaputto yenāyasmā mahāmoggallāno tenupasaṅkami; upasaṅkamitvā āyasmantaṁ mahāmoggallānaṁ abhivādetvā ekamantaṁ aṭṭhāsi. Ekamantaṁ ṭhito kho kakudho devaputto āyasmantaṁ mahāmoggallānaṁ etadavoca:
an5.100:2.2	“devadattassa, bhante, evarūpaṁ icchāgataṁ uppajji:
an5.100:2.3	‘ahaṁ bhikkhusaṅghaṁ pariharissāmī’ti.
an5.100:2.4	Sahacittuppādā ca, bhante, devadatto tassā iddhiyā parihīno”ti.
an5.100:2.5	Idamavoca kakudho devaputto.
an5.100:2.6	Idaṁ vatvā āyasmantaṁ mahāmoggallānaṁ abhivādetvā padakkhiṇaṁ katvā tatthevantaradhāyi.
an5.100:3.1	Atha kho āyasmā mahāmoggallāno yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā mahāmoggallāno bhagavantaṁ etadavoca:
an5.100:4.1	“Kakudho nāma, bhante, koliyaputto mamaṁ upaṭṭhāko adhunākālaṅkato aññataraṁ manomayaṁ kāyaṁ upapanno hoti.
an5.100:4.2	Tassa evarūpo attabhāvapaṭilābho—seyyathāpi nāma dve vā tīṇi vā māgadhakāni gāmakkhettāni.
an5.100:4.3	So tena attabhāvapaṭilābhena neva attānaṁ no paraṁ byābādheti.
an5.100:4.4	Atha kho, bhante, kakudho devaputto yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhito kho, bhante, kakudho devaputto maṁ etadavoca:
an5.100:4.5	‘devadattassa, bhante, evarūpaṁ icchāgataṁ uppajji—
an5.100:4.6	ahaṁ bhikkhusaṅghaṁ pariharissāmīti.
an5.100:4.7	Sahacittuppādā ca, bhante, devadatto tassā iddhiyā parihīno’ti.
an5.100:4.8	Idamavoca, bhante, kakudho devaputto.
an5.100:4.9	Idaṁ vatvā maṁ abhivādetvā padakkhiṇaṁ katvā tatthevantaradhāyī”ti.
an5.100:5.1	“Kiṁ pana te, moggallāna, kakudho devaputto cetasā ceto paricca vidito:
an5.100:5.2	‘yaṁ kiñci kakudho devaputto bhāsati sabbaṁ taṁ tatheva hoti, no aññathā’”ti?
an5.100:5.3	“Cetasā ceto paricca vidito me, bhante, kakudho devaputto:
an5.100:5.4	‘yaṁ kiñci kakudho devaputto bhāsati sabbaṁ taṁ tatheva hoti, no aññathā’”ti.
an5.100:5.5	“Rakkhassetaṁ, moggallāna, vācaṁ.
an5.100:5.6	Rakkhassetaṁ, moggallāna, vācaṁ.
an5.100:5.7	Idāni so moghapuriso attanāva attānaṁ pātukarissati.
an5.100:6.1	Pañcime, moggallāna, satthāro santo saṁvijjamānā lokasmiṁ.
an5.100:6.2	Katame pañca?
an5.100:6.3	Idha, moggallāna, ekacco satthā aparisuddhasīlo samāno ‘parisuddhasīlomhī’ti paṭijānāti ‘parisuddhaṁ me sīlaṁ pariyodātaṁ asaṅkiliṭṭhan’ti.
an5.100:6.4	Tamenaṁ sāvakā evaṁ jānanti:
an5.100:6.5	‘ayaṁ kho bhavaṁ satthā aparisuddhasīlo samāno parisuddhasīlomhī’ti paṭijānāti ‘parisuddhaṁ me sīlaṁ pariyodātaṁ asaṅkiliṭṭhan’ti.
an5.100:6.6	Mayañceva kho pana gihīnaṁ āroceyyāma, nāssassa manāpaṁ.
an5.100:6.7	Yaṁ kho panassa amanāpaṁ, kathaṁ naṁ mayaṁ tena samudācareyyāma:
an5.100:6.8	‘sammannati kho pana cīvarapiṇḍapātasenāsanagilānappaccayabhesajjaparikkhārena;
an5.100:6.9	yaṁ tumo karissati tumova tena paññāyissatī’ti.
an5.100:6.10	Evarūpaṁ kho, moggallāna, satthāraṁ sāvakā sīlato rakkhanti;
an5.100:6.11	evarūpo ca pana satthā sāvakehi sīlato rakkhaṁ paccāsīsati.
an5.100:7.1	Puna caparaṁ, moggallāna, idhekacco satthā aparisuddhājīvo samāno ‘parisuddhājīvomhī’ti paṭijānāti ‘parisuddho me ājīvo pariyodāto asaṅkiliṭṭho’ti.
an5.100:7.2	Tamenaṁ sāvakā evaṁ jānanti:
an5.100:7.3	‘ayaṁ kho bhavaṁ satthā aparisuddhājīvo samāno parisuddhājīvomhī’ti paṭijānāti ‘parisuddho me ājīvo pariyodāto asaṅkiliṭṭho’ti.
an5.100:7.4	Mayañceva kho pana gihīnaṁ āroceyyāma, nāssassa manāpaṁ.
an5.100:7.5	Yaṁ kho panassa amanāpaṁ, kathaṁ naṁ mayaṁ tena samudācareyyāma:
an5.100:7.6	‘sammannati kho pana cīvarapiṇḍapātasenāsanagilānappaccayabhesajjaparikkhārena;
an5.100:7.7	yaṁ tumo karissati tumova tena paññāyissatī’ti.
an5.100:7.8	Evarūpaṁ kho, moggallāna, satthāraṁ sāvakā ājīvato rakkhanti;
an5.100:7.9	evarūpo ca pana satthā sāvakehi ājīvato rakkhaṁ paccāsīsati.
an5.100:8.1	Puna caparaṁ, moggallāna, idhekacco satthā aparisuddhadhammadesano samāno ‘parisuddhadhammadesanomhī’ti paṭijānāti ‘parisuddhā me dhammadesanā pariyodātā asaṅkiliṭṭhā’ti.
an5.100:8.2	Tamenaṁ sāvakā evaṁ jānanti:
an5.100:8.3	‘ayaṁ kho bhavaṁ satthā aparisuddhadhammadesano samāno parisuddhadhammadesanomhī’ti paṭijānāti ‘parisuddhā me dhammadesanā pariyodātā asaṅkiliṭṭhā’ti.
an5.100:8.4	Mayañceva kho pana gihīnaṁ āroceyyāma, nāssassa manāpaṁ.
an5.100:8.5	Yaṁ kho panassa amanāpaṁ, kathaṁ naṁ mayaṁ tena samudācareyyāma:
an5.100:8.6	‘sammannati kho pana cīvarapiṇḍapātasenāsanagilānappaccayabhesajjaparikkhārena;
an5.100:8.7	yaṁ tumo karissati tumova tena paññāyissatī’ti.
an5.100:8.8	Evarūpaṁ kho, moggallāna, satthāraṁ sāvakā dhammadesanato rakkhanti;
an5.100:8.9	evarūpo ca pana satthā sāvakehi dhammadesanato rakkhaṁ paccāsīsati.
an5.100:9.1	Puna caparaṁ, moggallāna, idhekacco satthā aparisuddhaveyyākaraṇo samāno ‘parisuddhaveyyākaraṇomhī’ti paṭijānāti ‘parisuddhaṁ me veyyākaraṇaṁ pariyodātaṁ asaṅkiliṭṭhan’ti.
an5.100:9.2	Tamenaṁ sāvakā evaṁ jānanti:
an5.100:9.3	‘ayaṁ kho bhavaṁ satthā aparisuddhaveyyākaraṇo samāno parisuddhaveyyākaraṇomhī’ti paṭijānāti ‘parisuddhaṁ me veyyākaraṇaṁ pariyodātaṁ asaṅkiliṭṭhan’ti.
an5.100:9.4	Mayañceva kho pana gihīnaṁ āroceyyāma, nāssassa manāpaṁ.
an5.100:9.5	Yaṁ kho panassa amanāpaṁ, kathaṁ naṁ mayaṁ tena samudācareyyāma:
an5.100:9.6	‘sammannati kho pana cīvarapiṇḍapātasenāsanagilānappaccayabhesajjaparikkhārena;
an5.100:9.7	yaṁ tumo karissati tumova tena paññāyissatī’ti.
an5.100:9.8	Evarūpaṁ kho, moggallāna, satthāraṁ sāvakā veyyākaraṇato rakkhanti;
an5.100:9.9	evarūpo ca pana satthā sāvakehi veyyākaraṇato rakkhaṁ paccāsīsati.
an5.100:10.1	Puna caparaṁ, moggallāna, idhekacco satthā aparisuddhañāṇadassano samāno ‘parisuddhañāṇadassanomhī’ti paṭijānāti ‘parisuddhaṁ me ñāṇadassanaṁ pariyodātaṁ asaṅkiliṭṭhan’ti.
an5.100:10.2	Tamenaṁ sāvakā evaṁ jānanti:
an5.100:10.3	‘ayaṁ kho bhavaṁ satthā aparisuddhañāṇadassano samāno parisuddhañāṇadassanomhī’ti paṭijānāti ‘parisuddhaṁ me ñāṇadassanaṁ pariyodātaṁ asaṅkiliṭṭhan’ti.
an5.100:10.4	Mayañceva kho pana gihīnaṁ āroceyyāma, nāssassa manāpaṁ.
an5.100:10.5	Yaṁ kho panassa amanāpaṁ, kathaṁ naṁ mayaṁ tena samudācareyyāma:
an5.100:10.6	‘sammannati kho pana cīvarapiṇḍapātasenāsanagilānappaccayabhesajjaparikkhārena;
an5.100:10.7	yaṁ tumo karissati tumova tena paññāyissatī’ti.
an5.100:10.8	Evarūpaṁ kho, moggallāna, satthāraṁ sāvakā ñāṇadassanato rakkhanti;
an5.100:10.9	evarūpo ca pana satthā sāvakehi ñāṇadassanato rakkhaṁ paccāsīsati.
an5.100:10.10	Ime kho, moggallāna, pañca satthāro santo saṁvijjamānā lokasmiṁ.
an5.100:11.1	Ahaṁ kho pana, moggallāna, parisuddhasīlo samāno ‘parisuddhasīlomhī’ti paṭijānāmi ‘parisuddhaṁ me sīlaṁ pariyodātaṁ asaṅkiliṭṭhan’ti.
an5.100:11.2	Na ca maṁ sāvakā sīlato rakkhanti, na cāhaṁ sāvakehi sīlato rakkhaṁ paccāsīsāmi.
an5.100:11.3	Parisuddhājīvo samāno ‘parisuddhājīvomhī’ti paṭijānāmi ‘parisuddho me ājīvo pariyodāto asaṅkiliṭṭho’ti.
an5.100:11.4	Na ca maṁ sāvakā ājīvato rakkhanti, na cāhaṁ sāvakehi ājīvato rakkhaṁ paccāsīsāmi.
an5.100:11.5	Parisuddhadhammadesano samāno ‘parisuddhadhammadesanomhī’ti paṭijānāmi ‘parisuddhā me dhammadesanā pariyodātā asaṅkiliṭṭhā’ti.
an5.100:11.6	Na ca maṁ sāvakā dhammadesanato rakkhanti, na cāhaṁ sāvakehi dhammadesanato rakkhaṁ paccāsīsāmi.
an5.100:11.7	Parisuddhaveyyākaraṇo samāno ‘parisuddhaveyyākaraṇomhī’ti paṭijānāmi ‘parisuddhaṁ me veyyākaraṇaṁ pariyodātaṁ asaṅkiliṭṭhan’ti.
an5.100:11.8	Na ca maṁ sāvakā veyyākaraṇato rakkhanti, na cāhaṁ sāvakehi veyyākaraṇato rakkhaṁ paccāsīsāmi.
an5.100:11.9	Parisuddhañāṇadassano samāno ‘parisuddhañāṇadassanomhī’ti paṭijānāmi ‘parisuddhaṁ me ñāṇadassanaṁ pariyodātaṁ asaṅkiliṭṭhan’ti.
an5.100:11.10	Na ca maṁ sāvakā ñāṇadassanato rakkhanti, na cāhaṁ sāvakehi ñāṇadassanato rakkhaṁ paccāsīsāmī”ti.
an5.100:11.11	Dasamaṁ.
an5.100:11.12	Kakudhavaggo pañcamo.
an5.100:12.0	Tassuddānaṁ
an5.100:12.1	Dve sampadā byākaraṇaṁ,
an5.100:12.2	phāsu akuppapañcamaṁ;
an5.100:12.3	Sutaṁ kathā āraññako,
an5.100:12.4	sīho ca kakudho dasāti.
an5.100:12.5	Dutiyo paṇṇāsako samatto.
an5.101:0.1	Aṅguttara Nikāya 5.101
an5.101:0.2	11. Phāsuvihāravagga
an5.101:0.3	Sārajjasutta
an5.101:1.1	“Pañcime, bhikkhave, sekhavesārajjakaraṇā dhammā.
an5.101:1.2	Katame pañca?
an5.101:1.3	Idha, bhikkhave, bhikkhu saddho hoti, sīlavā hoti, bahussuto hoti, āraddhavīriyo hoti, paññavā hoti.
an5.101:2.1	Yaṁ, bhikkhave, assaddhassa sārajjaṁ hoti, saddhassa taṁ sārajjaṁ na hoti.
an5.101:2.2	Tasmāyaṁ dhammo sekhavesārajjakaraṇo.
an5.101:3.1	Yaṁ, bhikkhave, dussīlassa sārajjaṁ hoti, sīlavato taṁ sārajjaṁ na hoti.
an5.101:3.2	Tasmāyaṁ dhammo sekhavesārajjakaraṇo.
an5.101:4.1	Yaṁ, bhikkhave, appassutassa sārajjaṁ hoti, bahussutassa taṁ sārajjaṁ na hoti.
an5.101:4.2	Tasmāyaṁ dhammo sekhavesārajjakaraṇo.
an5.101:5.1	Yaṁ, bhikkhave, kusītassa sārajjaṁ hoti, āraddhavīriyassa taṁ sārajjaṁ na hoti.
an5.101:5.2	Tasmāyaṁ dhammo sekhavesārajjakaraṇo.
an5.101:6.1	Yaṁ, bhikkhave, duppaññassa sārajjaṁ hoti, paññavato taṁ sārajjaṁ na hoti.
an5.101:6.2	Tasmāyaṁ dhammo sekhavesārajjakaraṇo.
an5.101:6.3	Ime kho, bhikkhave, pañca sekhavesārajjakaraṇā dhammā”ti.
an5.101:6.4	Paṭhamaṁ.
an5.102:0.1	Aṅguttara Nikāya 5.102
an5.102:0.2	11. Phāsuvihāravagga
an5.102:0.3	Ussaṅkitasutta
an5.102:1.1	“Pañcahi, bhikkhave, dhammehi samannāgato bhikkhu ussaṅkitaparisaṅkito hoti pāpabhikkhūti api akuppadhammopi.
an5.102:2.1	Katamehi pañcahi?
an5.102:2.2	Idha, bhikkhave, bhikkhu vesiyāgocaro vā hoti, vidhavāgocaro vā hoti, thullakumārikāgocaro vā hoti, paṇḍakagocaro vā hoti, bhikkhunīgocaro vā hoti.
an5.102:3.1	Imehi kho, bhikkhave, pañcahi dhammehi samannāgato bhikkhu ussaṅkitaparisaṅkito hoti pāpabhikkhūti api akuppadhammopī”ti.
an5.102:3.2	Dutiyaṁ.
an5.103:0.1	Aṅguttara Nikāya 5.103
an5.103:0.2	11. Phāsuvihāravagga
an5.103:0.3	Mahācorasutta
an5.103:1.1	“Pañcahi, bhikkhave, aṅgehi samannāgato mahācoro sandhimpi chindati, nillopampi harati, ekāgārikampi karoti, paripanthepi tiṭṭhati.
an5.103:1.2	Katamehi pañcahi?
an5.103:1.3	Idha, bhikkhave, mahācoro visamanissito ca hoti, gahananissito ca, balavanissito ca, bhogacāgī ca, ekacārī ca.
an5.103:2.1	Kathañca, bhikkhave, mahācoro visamanissito hoti?
an5.103:2.2	Idha, bhikkhave, mahācoro nadīviduggaṁ vā nissito hoti pabbatavisamaṁ vā.
an5.103:2.3	Evaṁ kho, bhikkhave, mahācoro visamanissito hoti.
an5.103:3.1	Kathañca, bhikkhave, mahācoro gahananissito hoti?
an5.103:3.2	Idha, bhikkhave, mahācoro tiṇagahanaṁ vā nissito hoti rukkhagahanaṁ vā rodhaṁ vā mahāvanasaṇḍaṁ vā.
an5.103:3.3	Evaṁ kho, bhikkhave, mahācoro gahananissito hoti.
an5.103:4.1	Kathañca, bhikkhave, mahācoro balavanissito hoti?
an5.103:4.2	Idha, bhikkhave, mahācoro rājānaṁ vā rājamahāmattānaṁ vā nissito hoti.
an5.103:4.3	Tassa evaṁ hoti:
an5.103:4.4	‘sace maṁ koci kiñci vakkhati, ime me rājāno vā rājamahāmattā vā pariyodhāya atthaṁ bhaṇissantī’ti.
an5.103:4.5	Sace naṁ koci kiñci āha, tyassa rājāno vā rājamahāmattā vā pariyodhāya atthaṁ bhaṇanti.
an5.103:4.6	Evaṁ kho, bhikkhave, mahācoro balavanissito hoti.
an5.103:5.1	Kathañca, bhikkhave, mahācoro bhogacāgī hoti?
an5.103:5.2	Idha, bhikkhave, mahācoro aḍḍho hoti mahaddhano mahābhogo.
an5.103:5.3	Tassa evaṁ hoti:
an5.103:5.4	‘sace maṁ koci kiñci vakkhati, ito bhogena paṭisantharissāmī’ti.
an5.103:5.5	Sace naṁ koci kiñci āha, tato bhogena paṭisantharati.
an5.103:5.6	Evaṁ kho, bhikkhave, mahācoro bhogacāgī hoti.
an5.103:6.1	Kathañca, bhikkhave, mahācoro ekacārī hoti?
an5.103:6.2	Idha, bhikkhave, mahācoro ekakova gahaṇāni kattā hoti.
an5.103:6.3	Taṁ kissa hetu?
an5.103:6.4	‘Mā me guyhamantā bahiddhā sambhedaṁ agamaṁsū’ti.
an5.103:6.5	Evaṁ kho, bhikkhave, mahācoro ekacārī hoti.
an5.103:7.1	Imehi kho, bhikkhave, pañcahaṅgehi samannāgato mahācoro sandhimpi chindati nillopampi harati ekāgārikampi karoti paripanthepi tiṭṭhati.
an5.103:8.1	Evamevaṁ kho, bhikkhave, pañcahi dhammehi samannāgato pāpabhikkhu khataṁ upahataṁ attānaṁ pariharati, sāvajjo ca hoti sānuvajjo viññūnaṁ, bahuñca apuññaṁ pasavati.
an5.103:8.2	Katamehi pañcahi?
an5.103:8.3	Idha, bhikkhave, pāpabhikkhu visamanissito ca hoti, gahananissito ca, balavanissito ca, bhogacāgī ca, ekacārī ca.
an5.103:9.1	Kathañca, bhikkhave, pāpabhikkhu visamanissito hoti?
an5.103:9.2	Idha, bhikkhave, pāpabhikkhu visamena kāyakammena samannāgato hoti, visamena vacīkammena samannāgato hoti, visamena manokammena samannāgato hoti.
an5.103:9.3	Evaṁ kho, bhikkhave, pāpabhikkhu visamanissito hoti.
an5.103:10.1	Kathañca, bhikkhave, pāpabhikkhu gahananissito hoti?
an5.103:10.2	Idha, bhikkhave, pāpabhikkhu micchādiṭṭhiko hoti antaggāhikāya diṭṭhiyā samannāgato.
an5.103:10.3	Evaṁ kho, bhikkhave, pāpabhikkhu gahananissito hoti.
an5.103:11.1	Kathañca, bhikkhave, pāpabhikkhu balavanissito hoti?
an5.103:11.2	Idha, bhikkhave, pāpabhikkhu rājānaṁ vā rājamahāmattānaṁ vā nissito hoti.
an5.103:11.3	Tassa evaṁ hoti:
an5.103:11.4	‘sace maṁ koci kiñci vakkhati, ime me rājāno vā rājamahāmattā vā pariyodhāya atthaṁ bhaṇissantī’ti.
an5.103:11.5	Sace naṁ koci kiñci āha, tyassa rājāno vā rājamahāmattā vā pariyodhāya atthaṁ bhaṇanti.
an5.103:11.6	Evaṁ kho, bhikkhave, pāpabhikkhu balavanissito hoti.
an5.103:12.1	Kathañca, bhikkhave, pāpabhikkhu bhogacāgī hoti?
an5.103:12.2	Idha, bhikkhave, pāpabhikkhu lābhī hoti cīvarapiṇḍapātasenāsanagilānappaccayabhesajjaparikkhārānaṁ.
an5.103:12.3	Tassa evaṁ hoti:
an5.103:12.4	‘sace maṁ koci kiñci vakkhati, ito lābhena paṭisantharissāmī’ti.
an5.103:12.5	Sace naṁ koci kiñci āha, tato lābhena paṭisantharati.
an5.103:12.6	Evaṁ kho, bhikkhave, pāpabhikkhu bhogacāgī hoti.
an5.103:13.1	Kathañca, bhikkhave, pāpabhikkhu ekacārī hoti?
an5.103:13.2	Idha, bhikkhave, pāpabhikkhu ekakova paccantimesu janapadesu nivāsaṁ kappeti.
an5.103:13.3	So tattha kulāni upasaṅkamanto lābhaṁ labhati.
an5.103:13.4	Evaṁ kho, bhikkhave, pāpabhikkhu ekacārī hoti.
an5.103:14.1	Imehi kho, bhikkhave, pañcahi dhammehi samannāgato pāpabhikkhu khataṁ upahataṁ attānaṁ pariharati, sāvajjo ca hoti sānuvajjo viññūnaṁ, bahuñca apuññaṁ pasavatī”ti.
an5.103:14.2	Tatiyaṁ.
an5.104:0.1	Aṅguttara Nikāya 5.104
an5.104:0.2	11. Phāsuvihāravagga
an5.104:0.3	Samaṇasukhumālasutta
an5.104:1.1	“Pañcahi, bhikkhave, dhammehi samannāgato bhikkhu samaṇesu samaṇasukhumālo hoti.
an5.104:2.1	Katamehi pañcahi?
an5.104:2.2	Idha, bhikkhave, bhikkhu yācitova bahulaṁ cīvaraṁ paribhuñjati, appaṁ ayācito; yācitova bahulaṁ piṇḍapātaṁ paribhuñjati, appaṁ ayācito; yācitova bahulaṁ senāsanaṁ paribhuñjati, appaṁ ayācito; yācitova bahulaṁ gilānapaccayabhesajjaparikkhāraṁ paribhuñjati, appaṁ ayācito.
an5.104:2.3	Yehi kho pana sabrahmacārīhi saddhiṁ viharati, tyassa manāpeneva bahulaṁ kāyakammena samudācaranti, appaṁ amanāpena; manāpeneva bahulaṁ vacīkammena samudācaranti, appaṁ amanāpena; manāpeneva bahulaṁ manokammena samudācaranti, appaṁ amanāpena;
an5.104:2.4	manāpaṁyeva upahāraṁ upaharanti, appaṁ amanāpaṁ.
an5.104:2.5	Yāni kho pana tāni vedayitāni pittasamuṭṭhānāni vā semhasamuṭṭhānāni vā vātasamuṭṭhānāni vā sannipātikāni vā utupariṇāmajāni vā visamaparihārajāni vā opakkamikāni vā kammavipākajāni vā, tānissa na bahudeva uppajjanti.
an5.104:2.6	Appābādho hoti, catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī,
an5.104:2.7	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an5.104:2.8	Imehi kho, bhikkhave, pañcahi dhammehi samannāgato bhikkhu samaṇesu samaṇasukhumālo hoti.
an5.104:3.1	Yañhi taṁ, bhikkhave, sammā vadamāno vadeyya: ‘samaṇesu samaṇasukhumālo’ti, mameva taṁ, bhikkhave, sammā vadamāno vadeyya: ‘samaṇesu samaṇasukhumālo’ti.
an5.104:3.2	Ahañhi, bhikkhave, yācitova bahulaṁ cīvaraṁ paribhuñjāmi, appaṁ ayācito; yācitova bahulaṁ piṇḍapātaṁ paribhuñjāmi, appaṁ ayācito; yācitova bahulaṁ senāsanaṁ paribhuñjāmi, appaṁ ayācito; yācitova bahulaṁ gilānapaccayabhesajjaparikkhāraṁ paribhuñjāmi, appaṁ ayācito.
an5.104:3.3	Yehi kho pana bhikkhūhi saddhiṁ viharāmi, te maṁ manāpeneva bahulaṁ kāyakammena samudācaranti, appaṁ amanāpena; manāpeneva bahulaṁ vacīkammena samudācaranti, appaṁ amanāpena; manāpeneva bahulaṁ manokammena samudācaranti, appaṁ amanāpena;
an5.104:3.4	manāpaṁyeva upahāraṁ upaharanti, appaṁ amanāpaṁ.
an5.104:3.5	Yāni kho pana tāni vedayitāni—pittasamuṭṭhānāni vā semhasamuṭṭhānāni vā vātasamuṭṭhānāni vā sannipātikāni vā utupariṇāmajāni vā visamaparihārajāni vā opakkamikāni vā kammavipākajāni vā—tāni me na bahudeva uppajjanti. Appābādhohamasmi.
an5.104:3.6	catunnaṁ kho panasmi jhānānaṁ ābhicetasikānaṁ diṭṭhadhammasukhavihārānaṁ nikāmalābhī akicchalābhī akasiralābhī,
an5.104:3.7	āsavānaṁ khayā …pe… sacchikatvā upasampajja viharāmi.
an5.104:4.1	Yañhi taṁ, bhikkhave, sammā vadamāno vadeyya: ‘samaṇesu samaṇasukhumālo’ti, mameva taṁ, bhikkhave, sammā vadamāno vadeyya: ‘samaṇesu samaṇasukhumālo’”ti.
an5.104:4.2	Catutthaṁ.
an5.105:0.1	Aṅguttara Nikāya 5.105
an5.105:0.2	11. Phāsuvihāravagga
an5.105:0.3	Phāsuvihārasutta
an5.105:1.1	“Pañcime, bhikkhave, phāsuvihārā.
an5.105:1.2	Katame pañca?
an5.105:1.3	Idha, bhikkhave, bhikkhuno mettaṁ kāyakammaṁ paccupaṭṭhitaṁ hoti sabrahmacārīsu āvi ceva raho ca, mettaṁ vacīkammaṁ … mettaṁ manokammaṁ paccupaṭṭhitaṁ hoti sabrahmacārīsu āvi ceva raho ca.
an5.105:1.4	Yāni tāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni, tathārūpehi sīlehi sīlasāmaññagato viharati sabrahmacārīhi āvi ceva raho ca.
an5.105:1.5	Yāyaṁ diṭṭhi ariyā niyyānikā niyyāti takkarassa sammā dukkhakkhayāya, tathārūpāya diṭṭhiyā diṭṭhisāmaññagato viharati sabrahmacārīhi āvi ceva raho ca.
an5.105:1.6	Ime kho, bhikkhave, pañca phāsuvihārā”ti.
an5.105:1.7	Pañcamaṁ.
an5.106:0.1	Aṅguttara Nikāya 5.106
an5.106:0.2	11. Phāsuvihāravagga
an5.106:0.3	Ānandasutta
an5.106:1.1	Ekaṁ samayaṁ bhagavā kosambiyaṁ viharati ghositārāme.
an5.106:1.2	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an5.106:2.1	“Kittāvatā nu kho, bhante, bhikkhu saṅghe viharanto phāsuṁ vihareyyā”ti?
an5.106:2.2	“Yato kho, ānanda, bhikkhu attanā sīlasampanno hoti, no paraṁ adhisīle sampavattā;
an5.106:2.3	ettāvatāpi kho, ānanda, bhikkhu saṅghe viharanto phāsuṁ vihareyyā”ti.
an5.106:3.1	“Siyā pana, bhante, aññopi pariyāyo yathā bhikkhu saṅghe viharanto phāsuṁ vihareyyā”ti?
an5.106:3.2	“Siyā, ānanda.
an5.106:3.3	Yato kho, ānanda, bhikkhu attanā sīlasampanno hoti, no paraṁ adhisīle sampavattā;
an5.106:3.4	attānupekkhī ca hoti, no parānupekkhī;
an5.106:3.5	ettāvatāpi kho, ānanda, bhikkhu saṅghe viharanto phāsuṁ vihareyyā”ti.
an5.106:4.1	“Siyā pana, bhante, aññopi pariyāyo yathā bhikkhu saṅghe viharanto phāsuṁ vihareyyā”ti?
an5.106:4.2	“Siyā, ānanda.
an5.106:4.3	Yato kho, ānanda, bhikkhu attanā sīlasampanno hoti, no paraṁ adhisīle sampavattā;
an5.106:4.4	attānupekkhī ca hoti, no parānupekkhī;
an5.106:4.5	apaññāto ca hoti, tena ca apaññātakena no paritassati;
an5.106:4.6	ettāvatāpi kho, ānanda, bhikkhu saṅghe viharanto phāsuṁ vihareyyā”ti.
an5.106:5.1	“Siyā pana, bhante, aññopi pariyāyo yathā bhikkhu saṅghe viharanto phāsuṁ vihareyyā”ti?
an5.106:5.2	“Siyā, ānanda.
an5.106:5.3	Yato kho, ānanda, bhikkhu attanā sīlasampanno hoti, no paraṁ adhisīle sampavattā;
an5.106:5.4	attānupekkhī ca hoti, no parānupekkhī;
an5.106:5.5	apaññāto ca hoti, tena ca apaññātakena no paritassati;
an5.106:5.6	catunnañca jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;
an5.106:5.7	ettāvatāpi kho, ānanda, bhikkhu saṅghe viharanto phāsuṁ vihareyyā”ti.
an5.106:6.1	“Siyā pana, bhante, aññopi pariyāyo yathā bhikkhu saṅghe viharanto phāsuṁ vihareyyā”ti?
an5.106:6.2	“Siyā, ānanda.
an5.106:6.3	Yato kho, ānanda, bhikkhu attanā sīlasampanno hoti, no paraṁ adhisīle sampavattā;
an5.106:6.4	attānupekkhī ca hoti, no parānupekkhī;
an5.106:6.5	apaññāto ca hoti, tena ca apaññātakena no paritassati;
an5.106:6.6	catunnañca jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;
an5.106:6.7	āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati;
an5.106:6.8	ettāvatāpi kho, ānanda, bhikkhu saṅghe viharanto phāsuṁ vihareyya.
an5.106:7.1	Imamhā cāhaṁ, ānanda, phāsuvihārā añño phāsuvihāro uttaritaro vā paṇītataro vā natthīti vadāmī”ti.
an5.106:7.2	Chaṭṭhaṁ.
an5.107:0.1	Aṅguttara Nikāya 5.107
an5.107:0.2	11. Phāsuvihāravagga
an5.107:0.3	Sīlasutta
an5.107:1.1	“Pañcahi, bhikkhave, dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an5.107:2.1	Katamehi pañcahi?
an5.107:2.2	Idha, bhikkhave, bhikkhu sīlasampanno hoti, samādhisampanno hoti, paññāsampanno hoti, vimuttisampanno hoti, vimuttiñāṇadassanasampanno hoti.
an5.107:3.1	Imehi kho, bhikkhave, pañcahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā”ti.
an5.107:3.2	Sattamaṁ.
an5.108:0.1	Aṅguttara Nikāya 5.108
an5.108:0.2	11. Phāsuvihāravagga
an5.108:0.3	Asekhasutta
an5.108:1.1	“Pañcahi, bhikkhave, dhammehi samannāgato bhikkhu āhuneyyo hoti pāhuneyyo dakkhiṇeyyo …pe… anuttaraṁ puññakkhettaṁ lokassa.
an5.108:2.1	Katamehi, pañcahi?
an5.108:2.2	Idha, bhikkhave, bhikkhu asekhena sīlakkhandhena samannāgato hoti, asekhena samādhikkhandhena samannāgato hoti, asekhena paññākkhandhena samannāgato hoti, asekhena vimuttikkhandhena samannāgato hoti, asekhena vimuttiñāṇadassanakkhandhena samannāgato hoti.
an5.108:2.3	Imehi kho, bhikkhave, pañcahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an5.108:2.4	Aṭṭhamaṁ.
an5.109:0.1	Aṅguttara Nikāya 5.109
an5.109:0.2	11. Phāsuvihāravagga
an5.109:0.3	Cātuddisasutta
an5.109:1.1	“Pañcahi, bhikkhave, dhammehi samannāgato bhikkhu cātuddiso hoti.
an5.109:1.2	Katamehi pañcahi?
an5.109:1.3	Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu;
an5.109:1.4	bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā;
an5.109:1.5	santuṭṭho hoti itarītaracīvarapiṇḍapātasenāsanagilānappaccayabhesajjaparikkhārena;
an5.109:1.6	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;
an5.109:1.7	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an5.109:1.8	Imehi, kho, bhikkhave, pañcahi dhammehi samannāgato bhikkhu cātuddiso hotī”ti.
an5.109:1.9	Navamaṁ.
an5.110:0.1	Aṅguttara Nikāya 5.110
an5.110:0.2	11. Phāsuvihāravagga
an5.110:0.3	Araññasutta
an5.110:1.1	“Pañcahi, bhikkhave, dhammehi samannāgato bhikkhu alaṁ araññavanapatthāni pantāni senāsanāni paṭisevituṁ.
an5.110:1.2	Katamehi pañcahi?
an5.110:1.3	Idha, bhikkhave, bhikkhu sīlavā hoti …pe… samādāya sikkhati sikkhāpadesu;
an5.110:1.4	bahussuto hoti …pe… diṭṭhiyā suppaṭividdhā;
an5.110:1.5	āraddhavīriyo viharati thāmavā daḷhaparakkamo anikkhittadhuro kusalesu dhammesu;
an5.110:1.6	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;
an5.110:1.7	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an5.110:1.8	Imehi kho, bhikkhave, pañcahi dhammehi samannāgato bhikkhu alaṁ araññavanapatthāni pantāni senāsanāni paṭisevitun”ti.
an5.110:1.9	Dasamaṁ.
an5.110:1.10	Phāsuvihāravaggo paṭhamo.
an5.110:2.0	Tassuddānaṁ
an5.110:2.1	Sārajjaṁ saṅkito coro,
an5.110:2.2	Sukhumālaṁ phāsu pañcamaṁ;
an5.110:2.3	Ānanda sīlāsekhā ca,
an5.110:2.4	Cātuddiso araññena cāti.
an5.111:0.1	Aṅguttara Nikāya 5.111
an5.111:0.2	12. Andhakavindavagga
an5.111:0.3	Kulūpakasutta
an5.111:1.1	“Pañcahi, bhikkhave, dhammehi samannāgato kulūpako bhikkhu kulesu appiyo ca hoti amanāpo ca agaru ca abhāvanīyo ca.
an5.111:1.2	Katamehi pañcahi?
an5.111:1.3	Asanthavavissāsī ca hoti, anissaravikappī ca, vissaṭṭhupasevī ca, upakaṇṇakajappī ca, atiyācanako ca.
an5.111:1.4	Imehi kho, bhikkhave, pañcahi dhammehi samannāgato kulūpako bhikkhu kulesu appiyo ca hoti amanāpo ca agaru ca abhāvanīyo ca.
an5.111:2.1	Pañcahi, bhikkhave, dhammehi samannāgato kulūpako bhikkhu kulesu piyo ca hoti manāpo ca garu ca bhāvanīyo ca.
an5.111:2.2	Katamehi pañcahi?
an5.111:2.3	Na asanthavavissāsī ca hoti, na anissaravikappī ca, na vissaṭṭhupasevī ca, na upakaṇṇakajappī ca, na atiyācanako ca.
an5.111:2.4	Imehi kho, bhikkhave, pañcahi dhammehi samannāgato kulūpako bhikkhu kulesu piyo ca hoti manāpo ca garu ca bhāvanīyo cā”ti.
an5.111:2.5	Paṭhamaṁ.
an5.112:0.1	Aṅguttara Nikāya 5.112
an5.112:0.2	12. Andhakavindavagga
an5.112:0.3	Pacchāsamaṇasutta
an5.112:1.1	“Pañcahi, bhikkhave, dhammehi samannāgato pacchāsamaṇo na ādātabbo.
an5.112:1.2	Katamehi pañcahi?
an5.112:1.3	Atidūre vā gacchati accāsanne vā, na pattapariyāpannaṁ gaṇhati, āpattisāmantā bhaṇamānaṁ na nivāreti, bhaṇamānassa antarantarā kathaṁ opāteti, duppañño hoti jaḷo eḷamūgo.
an5.112:1.4	Imehi kho, bhikkhave, pañcahi dhammehi samannāgato pacchāsamaṇo na ādātabbo.
an5.112:2.1	Pañcahi, bhikkhave, dhammehi samannāgato pacchāsamaṇo ādātabbo.
an5.112:2.2	Katamehi pañcahi?
an5.112:2.3	Nātidūre gacchati na accāsanne, pattapariyāpannaṁ gaṇhati, āpattisāmantā bhaṇamānaṁ nivāreti, bhaṇamānassa na antarantarā kathaṁ opāteti, paññavā hoti ajaḷo aneḷamūgo.
an5.112:2.4	Imehi kho, bhikkhave, pañcahi dhammehi samannāgato pacchāsamaṇo ādātabbo”ti.
an5.112:2.5	Dutiyaṁ.
an5.113:0.1	Aṅguttara Nikāya 5.113
an5.113:0.2	12. Andhakavindavagga
an5.113:0.3	Sammāsamādhisutta
an5.113:1.1	“Pañcahi, bhikkhave, dhammehi samannāgato bhikkhu abhabbo sammāsamādhiṁ upasampajja viharituṁ.
an5.113:1.2	Katamehi pañcahi?
an5.113:1.3	Idha, bhikkhave, bhikkhu akkhamo hoti rūpānaṁ, akkhamo saddānaṁ, akkhamo gandhānaṁ, akkhamo rasānaṁ, akkhamo phoṭṭhabbānaṁ.
an5.113:1.4	Imehi kho, bhikkhave, pañcahi dhammehi samannāgato bhikkhu abhabbo sammāsamādhiṁ upasampajja viharituṁ.
an5.113:2.1	Pañcahi, bhikkhave, dhammehi samannāgato bhikkhu bhabbo sammāsamādhiṁ upasampajja viharituṁ.
an5.113:2.2	Katamehi pañcahi?
an5.113:2.3	Idha, bhikkhave, bhikkhu khamo hoti rūpānaṁ, khamo saddānaṁ, khamo gandhānaṁ, khamo rasānaṁ, khamo phoṭṭhabbānaṁ.
an5.113:2.4	Imehi kho, bhikkhave, pañcahi dhammehi samannāgato bhikkhu bhabbo sammāsamādhiṁ upasampajja viharitun”ti.
an5.113:2.5	Tatiyaṁ.
an5.114:0.1	Aṅguttara Nikāya 5.114
an5.114:0.2	12. Andhakavindavagga
an5.114:0.3	Andhakavindasutta
an5.114:1.1	Ekaṁ samayaṁ bhagavā magadhesu viharati andhakavinde.
an5.114:1.2	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ ānandaṁ bhagavā etadavoca:
an5.114:2.1	“Ye te, ānanda, bhikkhū navā acirapabbajitā adhunāgatā imaṁ dhammavinayaṁ, te vo, ānanda, bhikkhū pañcasu dhammesu samādapetabbā nivesetabbā patiṭṭhāpetabbā.
an5.114:2.2	Katamesu pañcasu?
an5.114:2.3	‘Etha tumhe, āvuso, sīlavā hotha, pātimokkhasaṁvarasaṁvutā viharatha ācāragocarasampannā aṇumattesu vajjesu bhayadassāvino, samādāya sikkhatha sikkhāpadesū’ti—iti pātimokkhasaṁvare samādapetabbā nivesetabbā patiṭṭhāpetabbā.
an5.114:3.1	‘Etha tumhe, āvuso, indriyesu guttadvārā viharatha ārakkhasatino nipakkasatino, sārakkhitamānasā satārakkhena cetasā samannāgatā’ti—iti indriyasaṁvare samādapetabbā nivesetabbā patiṭṭhāpetabbā.
an5.114:4.1	‘Etha tumhe, āvuso, appabhassā hotha, bhasse pariyantakārino’ti—iti bhassapariyante samādapetabbā nivesetabbā patiṭṭhāpetabbā.
an5.114:5.1	‘Etha tumhe, āvuso, āraññikā hotha, araññavanapatthāni pantāni senāsanāni paṭisevathā’ti—iti kāyavūpakāse samādapetabbā nivesetabbā patiṭṭhāpetabbā.
an5.114:6.1	‘Etha tumhe, āvuso, sammādiṭṭhikā hotha sammādassanena samannāgatā’ti—iti sammādassane samādapetabbā nivesetabbā patiṭṭhāpetabbā.
an5.114:6.2	Ye te, ānanda, bhikkhū navā acirapabbajitā adhunāgatā imaṁ dhammavinayaṁ, te vo, ānanda, bhikkhū imesu pañcasu dhammesu samādapetabbā nivesetabbā patiṭṭhāpetabbā”ti.
an5.114:6.3	Catutthaṁ.
an5.115:0.1	Aṅguttara Nikāya 5.115
an5.115:0.2	12. Andhakavindavagga
an5.115:0.3	Maccharinīsutta
an5.115:1.1	“Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ niraye.
an5.115:1.2	Katamehi pañcahi?
an5.115:1.3	Āvāsamaccharinī hoti, kulamaccharinī hoti, lābhamaccharinī hoti, vaṇṇamaccharinī hoti, dhammamaccharinī hoti.
an5.115:1.4	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ niraye.
an5.115:2.1	Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ sagge.
an5.115:2.2	Katamehi pañcahi?
an5.115:2.3	Na āvāsamaccharinī hoti, na kulamaccharinī hoti, na lābhamaccharinī hoti, na vaṇṇamaccharinī hoti, na dhammamaccharinī hoti.
an5.115:2.4	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ sagge”ti.
an5.115:2.5	Pañcamaṁ.
an5.116:0.1	Aṅguttara Nikāya 5.116
an5.116:0.2	12. Andhakavindavagga
an5.116:0.3	Vaṇṇanāsutta
an5.116:1.1	“Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ niraye.
an5.116:1.2	Katamehi pañcahi?
an5.116:1.3	Ananuvicca apariyogāhetvā avaṇṇārahassa vaṇṇaṁ bhāsati,
an5.116:1.4	ananuvicca apariyogāhetvā vaṇṇārahassa avaṇṇaṁ bhāsati,
an5.116:1.5	ananuvicca apariyogāhetvā appasādanīye ṭhāne pasādaṁ upadaṁseti,
an5.116:1.6	ananuvicca apariyogāhetvā pasādanīye ṭhāne appasādaṁ upadaṁseti,
an5.116:1.7	saddhādeyyaṁ vinipāteti.
an5.116:1.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ niraye.
an5.116:2.1	Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ sagge.
an5.116:2.2	Katamehi pañcahi?
an5.116:2.3	Anuvicca pariyogāhetvā avaṇṇārahassa avaṇṇaṁ bhāsati,
an5.116:2.4	anuvicca pariyogāhetvā vaṇṇārahassa vaṇṇaṁ bhāsati,
an5.116:2.5	anuvicca pariyogāhetvā appasādanīye ṭhāne appasādaṁ upadaṁseti,
an5.116:2.6	anuvicca pariyogāhetvā pasādanīye ṭhāne pasādaṁ upadaṁseti,
an5.116:2.7	saddhādeyyaṁ na vinipāteti.
an5.116:2.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ sagge”ti.
an5.116:2.9	Chaṭṭhaṁ.
an5.117:0.1	Aṅguttara Nikāya 5.117
an5.117:0.2	12. Andhakavindavagga
an5.117:0.3	Issukinīsutta
an5.117:1.1	“Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ niraye.
an5.117:1.2	Katamehi pañcahi?
an5.117:1.3	Ananuvicca apariyogāhetvā avaṇṇārahassa vaṇṇaṁ bhāsati,
an5.117:1.4	ananuvicca apariyogāhetvā vaṇṇārahassa avaṇṇaṁ bhāsati,
an5.117:1.5	issukinī ca hoti,
an5.117:1.6	maccharinī ca,
an5.117:1.7	saddhādeyyaṁ vinipāteti.
an5.117:1.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ niraye.
an5.117:2.1	Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ sagge.
an5.117:2.2	Katamehi pañcahi?
an5.117:2.3	Anuvicca pariyogāhetvā avaṇṇārahassa avaṇṇaṁ bhāsati,
an5.117:2.4	anuvicca pariyogāhetvā vaṇṇārahassa vaṇṇaṁ bhāsati,
an5.117:2.5	anissukinī ca hoti,
an5.117:2.6	amaccharinī ca,
an5.117:2.7	saddhādeyyaṁ na vinipāteti.
an5.117:2.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ sagge”ti.
an5.117:2.9	Sattamaṁ.
an5.118:0.1	Aṅguttara Nikāya 5.118
an5.118:0.2	12. Andhakavindavagga
an5.118:0.3	Micchādiṭṭhikasutta
an5.118:1.1	“Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ niraye.
an5.118:1.2	Katamehi pañcahi?
an5.118:1.3	Ananuvicca apariyogāhetvā avaṇṇārahassa vaṇṇaṁ bhāsati,
an5.118:1.4	ananuvicca apariyogāhetvā vaṇṇārahassa avaṇṇaṁ bhāsati,
an5.118:1.5	micchādiṭṭhikā ca hoti,
an5.118:1.6	micchāsaṅkappā ca,
an5.118:1.7	saddhādeyyaṁ vinipāteti.
an5.118:1.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ niraye.
an5.118:2.1	Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ sagge.
an5.118:2.2	Katamehi pañcahi?
an5.118:2.3	Anuvicca pariyogāhetvā avaṇṇārahassa avaṇṇaṁ bhāsati,
an5.118:2.4	anuvicca pariyogāhetvā vaṇṇārahassa vaṇṇaṁ bhāsati,
an5.118:2.5	sammādiṭṭhikā ca hoti,
an5.118:2.6	sammāsaṅkappā ca,
an5.118:2.7	saddhādeyyaṁ na vinipāteti.
an5.118:2.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ sagge”ti.
an5.118:2.9	Aṭṭhamaṁ.
an5.119:0.1	Aṅguttara Nikāya 5.119
an5.119:0.2	12. Andhakavindavagga
an5.119:0.3	Micchāvācāsutta
an5.119:1.1	“Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ niraye.
an5.119:1.2	Katamehi pañcahi?
an5.119:1.3	Ananuvicca apariyogāhetvā avaṇṇārahassa vaṇṇaṁ bhāsati,
an5.119:1.4	ananuvicca apariyogāhetvā vaṇṇārahassa avaṇṇaṁ bhāsati,
an5.119:1.5	micchāvācā ca hoti,
an5.119:1.6	micchākammantā ca,
an5.119:1.7	saddhādeyyaṁ vinipāteti.
an5.119:1.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ niraye.
an5.119:2.1	Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ sagge.
an5.119:2.2	Katamehi pañcahi?
an5.119:2.3	Anuvicca pariyogāhetvā avaṇṇārahassa avaṇṇaṁ bhāsati,
an5.119:2.4	anuvicca pariyogāhetvā vaṇṇārahassa vaṇṇaṁ bhāsati,
an5.119:2.5	sammāvācā ca hoti,
an5.119:2.6	sammākammantā ca,
an5.119:2.7	saddhādeyyaṁ na vinipāteti.
an5.119:2.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ sagge”ti.
an5.119:2.9	Navamaṁ.
an5.120:0.1	Aṅguttara Nikāya 5.120
an5.120:0.2	12. Andhakavindavagga
an5.120:0.3	Micchāvāyāmasutta
an5.120:1.1	“Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ niraye.
an5.120:1.2	Katamehi pañcahi?
an5.120:1.3	Ananuvicca apariyogāhetvā avaṇṇārahassa vaṇṇaṁ bhāsati,
an5.120:1.4	ananuvicca apariyogāhetvā vaṇṇārahassa avaṇṇaṁ bhāsati,
an5.120:1.5	micchāvāyāmā ca hoti,
an5.120:1.6	micchāsatinī ca,
an5.120:1.7	saddhādeyyaṁ vinipāteti.
an5.120:1.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ niraye.
an5.120:2.1	Pañcahi, bhikkhave, dhammehi samannāgatā bhikkhunī yathābhataṁ nikkhittā evaṁ sagge.
an5.120:2.2	Katamehi pañcahi?
an5.120:2.3	Anuvicca pariyogāhetvā avaṇṇārahassa avaṇṇaṁ bhāsati,
an5.120:2.4	anuvicca pariyogāhetvā vaṇṇārahassa vaṇṇaṁ bhāsati,
an5.120:2.5	sammāvāyāmā ca hoti,
an5.120:2.6	sammāsatinī ca,
an5.120:2.7	saddhādeyyaṁ na vinipāteti.
an5.120:2.8	Imehi kho, bhikkhave, pañcahi dhammehi samannāgatā bhikkhunī yathābhataṁ nikkhittā evaṁ sagge”ti.
an5.120:2.9	Dasamaṁ.
an5.120:2.10	Andhakavindavaggo dutiyo.
an5.120:3.0	Tassuddānaṁ
an5.120:3.1	Kulūpako pacchāsamaṇo,
an5.120:3.2	samādhiandhakavindaṁ;
an5.120:3.3	Maccharī vaṇṇanā issā,
an5.120:3.4	diṭṭhivācāya vāyamāti.
an5.121:0.1	Aṅguttara Nikāya 5.121
an5.121:0.2	13. Gilānavagga
an5.121:0.3	Gilānasutta
an5.121:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an5.121:1.2	Atha kho bhagavā sāyanhasamayaṁ paṭisallānā vuṭṭhito yena gilānasālā tenupasaṅkami.
an5.121:1.3	Addasā kho bhagavā aññataraṁ bhikkhuṁ dubbalaṁ gilānakaṁ;
an5.121:1.4	disvā paññatte āsane nisīdi.
an5.121:1.5	Nisajja kho bhagavā bhikkhū āmantesi:
an5.121:2.1	“Yaṁ kiñci, bhikkhave, bhikkhuṁ dubbalaṁ gilānakaṁ pañca dhammā na vijahanti, tassetaṁ pāṭikaṅkhaṁ:
an5.121:2.2	‘nacirasseva āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharissatī’ti.
an5.121:3.1	Katame pañca?
an5.121:3.2	Idha, bhikkhave, bhikkhu asubhānupassī kāye viharati, āhāre paṭikūlasaññī, sabbaloke anabhiratasaññī, sabbasaṅkhāresu aniccānupassī, maraṇasaññā kho panassa ajjhattaṁ sūpaṭṭhitā hoti.
an5.121:3.3	Yaṁ kiñci, bhikkhave, bhikkhuṁ dubbalaṁ gilānakaṁ ime pañca dhammā na vijahanti, tassetaṁ pāṭikaṅkhaṁ:
an5.121:3.4	‘nacirasseva āsavānaṁ khayā …pe… sacchikatvā upasampajja viharissatī’”ti.
an5.121:3.5	Paṭhamaṁ.
an5.122:0.1	Aṅguttara Nikāya 5.122
an5.122:0.2	13. Gilānavagga
an5.122:0.3	Satisūpaṭṭhitasutta
an5.122:1.1	“Yo hi koci, bhikkhave, bhikkhu vā bhikkhunī vā pañca dhamme bhāveti pañca dhamme bahulīkaroti, tassa dvinnaṁ phalānaṁ aññataraṁ phalaṁ pāṭikaṅkhaṁ—
an5.122:1.2	diṭṭheva dhamme aññā, sati vā upādisese anāgāmitā.
an5.122:2.1	Katame pañca?
an5.122:2.2	Idha, bhikkhave, bhikkhuno ajjhattaññeva sati sūpaṭṭhitā hoti dhammānaṁ udayatthagāminiyā paññāya, asubhānupassī kāye viharati, āhāre paṭikūlasaññī, sabbaloke anabhiratasaññī, sabbasaṅkhāresu aniccānupassī.
an5.122:2.3	Yo hi koci, bhikkhave, bhikkhu vā bhikkhunī vā ime pañca dhamme bhāveti ime pañca dhamme bahulīkaroti, tassa dvinnaṁ phalānaṁ aññataraṁ phalaṁ pāṭikaṅkhaṁ—
an5.122:2.4	diṭṭheva dhamme aññā, sati vā upādisese anāgāmitā”ti.
an5.122:2.5	Dutiyaṁ.
an5.123:0.1	Aṅguttara Nikāya 5.123
an5.123:0.2	13. Gilānavagga
an5.123:0.3	Paṭhamaupaṭṭhākasutta
an5.123:1.1	“Pañcahi, bhikkhave, dhammehi samannāgato gilāno dūpaṭṭhāko hoti.
an5.123:1.2	Katamehi pañcahi?
an5.123:1.3	Asappāyakārī hoti, sappāye mattaṁ na jānāti, bhesajjaṁ nappaṭisevitā hoti, atthakāmassa gilānupaṭṭhākassa na yathābhūtaṁ ābādhaṁ āvikattā hoti abhikkamantaṁ vā abhikkamatīti paṭikkamantaṁ vā paṭikkamatīti ṭhitaṁ vā ṭhitoti, uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ anadhivāsakajātiko hoti.
an5.123:1.4	Imehi kho, bhikkhave, pañcahi dhammehi samannāgato gilāno dūpaṭṭhāko hoti.
an5.123:2.1	Pañcahi, bhikkhave, dhammehi samannāgato gilāno sūpaṭṭhāko hoti.
an5.123:2.2	Katamehi pañcahi?
an5.123:2.3	Sappāyakārī hoti, sappāye mattaṁ jānāti, bhesajjaṁ paṭisevitā hoti, atthakāmassa gilānupaṭṭhākassa yathābhūtaṁ ābādhaṁ āvikattā hoti abhikkamantaṁ vā abhikkamatīti paṭikkamantaṁ vā paṭikkamatīti ṭhitaṁ vā ṭhitoti, uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko hoti.
an5.123:2.4	Imehi kho, bhikkhave, pañcahi dhammehi samannāgato gilāno sūpaṭṭhāko hotī”ti.
an5.123:2.5	Tatiyaṁ.
an5.124:0.1	Aṅguttara Nikāya 5.124
an5.124:0.2	13. Gilānavagga
an5.124:0.3	Dutiyaupaṭṭhākasutta
an5.124:1.1	“Pañcahi, bhikkhave, dhammehi samannāgato gilānupaṭṭhāko nālaṁ gilānaṁ upaṭṭhātuṁ.
an5.124:1.2	Katamehi pañcahi?
an5.124:1.3	Nappaṭibalo hoti bhesajjaṁ saṁvidhātuṁ;
an5.124:1.4	sappāyāsappāyaṁ na jānāti, asappāyaṁ upanāmeti, sappāyaṁ apanāmeti;
an5.124:1.5	āmisantaro gilānaṁ upaṭṭhāti, no mettacitto;
an5.124:1.6	jegucchī hoti uccāraṁ vā passāvaṁ vā vantaṁ vā kheḷaṁ vā nīharituṁ;
an5.124:1.7	nappaṭibalo hoti gilānaṁ kālena kālaṁ dhammiyā kathāya sandassetuṁ samādapetuṁ samuttejetuṁ sampahaṁsetuṁ.
an5.124:1.8	Imehi kho, bhikkhave, pañcahi dhammehi samannāgato gilānupaṭṭhāko nālaṁ gilānaṁ upaṭṭhātuṁ.
an5.124:2.1	Pañcahi, bhikkhave, dhammehi samannāgato gilānupaṭṭhāko alaṁ gilānaṁ upaṭṭhātuṁ.
an5.124:2.2	Katamehi pañcahi?
an5.124:2.3	Paṭibalo hoti bhesajjaṁ saṁvidhātuṁ;
an5.124:2.4	sappāyāsappāyaṁ jānāti, asappāyaṁ apanāmeti, sappāyaṁ upanāmeti;
an5.124:2.5	mettacitto gilānaṁ upaṭṭhāti, no āmisantaro;
an5.124:2.6	ajegucchī hoti uccāraṁ vā passāvaṁ vā vantaṁ vā kheḷaṁ vā nīharituṁ;
an5.124:2.7	paṭibalo hoti gilānaṁ kālena kālaṁ dhammiyā kathāya sandassetuṁ samādapetuṁ samuttejetuṁ sampahaṁsetuṁ.
an5.124:2.8	Imehi kho, bhikkhave, pañcahi dhammehi samannāgato gilānupaṭṭhāko alaṁ gilānaṁ upaṭṭhātun”ti.
an5.124:2.9	Catutthaṁ.
an5.125:0.1	Aṅguttara Nikāya 5.125
an5.125:0.2	13. Gilānavagga
an5.125:0.3	Paṭhamaanāyussāsutta
an5.125:1.1	“Pañcime, bhikkhave, dhammā anāyussā.
an5.125:1.2	Katame pañca?
an5.125:1.3	Asappāyakārī hoti, sappāye mattaṁ na jānāti, apariṇatabhojī ca hoti, akālacārī ca hoti, abrahmacārī ca.
an5.125:1.4	Ime kho, bhikkhave, pañca dhammā anāyussā.
an5.125:2.1	Pañcime, bhikkhave, dhammā āyussā.
an5.125:2.2	Katame pañca?
an5.125:2.3	Sappāyakārī hoti, sappāye mattaṁ jānāti, pariṇatabhojī ca hoti, kālacārī ca hoti, brahmacārī ca.
an5.125:2.4	Ime kho, bhikkhave, pañca dhammā āyussā”ti.
an5.125:2.5	Pañcamaṁ.
an5.126:0.1	Aṅguttara Nikāya 5.126
an5.126:0.2	13. Gilānavagga
an5.126:0.3	Dutiyaanāyussāsutta
an5.126:1.1	“Pañcime, bhikkhave, dhammā anāyussā.
an5.126:1.2	Katame pañca?
an5.126:1.3	Asappāyakārī hoti, sappāye mattaṁ na jānāti, apariṇatabhojī ca hoti, dussīlo ca, pāpamitto ca.
an5.126:1.4	Ime kho, bhikkhave, pañca dhammā anāyussā.
an5.126:2.1	Pañcime, bhikkhave, dhammā āyussā.
an5.126:2.2	Katame pañca?
an5.126:2.3	Sappāyakārī hoti, sappāye mattaṁ jānāti, pariṇatabhojī ca hoti, sīlavā ca, kalyāṇamitto ca.
an5.126:2.4	Ime kho, bhikkhave, pañca dhammā āyussā”ti.
an5.126:2.5	Chaṭṭhaṁ.
an5.127:0.1	Aṅguttara Nikāya 5.127
an5.127:0.2	13. Gilānavagga
an5.127:0.3	Vapakāsasutta
an5.127:1.1	“Pañcahi, bhikkhave, dhammehi samannāgato bhikkhu nālaṁ saṅghamhā vapakāsituṁ.
an5.127:1.2	Katamehi pañcahi?
an5.127:1.3	Idha, bhikkhave, bhikkhu asantuṭṭho hoti itarītarena cīvarena, asantuṭṭho hoti itarītarena piṇḍapātena, asantuṭṭho hoti itarītarena senāsanena, asantuṭṭho hoti itarītarena gilānappaccayabhesajjaparikkhārena, kāmasaṅkappabahulo ca viharati.
an5.127:1.4	Imehi kho, bhikkhave, pañcahi dhammehi samannāgato bhikkhu nālaṁ saṅghamhā vapakāsituṁ.
an5.127:2.1	Pañcahi, bhikkhave, dhammehi samannāgato bhikkhu alaṁ saṅghamhā vapakāsituṁ.
an5.127:2.2	Katamehi pañcahi?
an5.127:2.3	Idha, bhikkhave, bhikkhu santuṭṭho hoti itarītarena cīvarena, santuṭṭho hoti itarītarena piṇḍapātena, santuṭṭho hoti itarītarena senāsanena, santuṭṭho hoti itarītarena gilānappaccayabhesajjaparikkhārena, nekkhammasaṅkappabahulo ca viharati.
an5.127:2.4	Imehi kho, bhikkhave, pañcahi dhammehi samannāgato bhikkhu alaṁ saṅghamhā vapakāsitun”ti.
an5.127:2.5	Sattamaṁ.
an5.128:0.1	Aṅguttara Nikāya 5.128
an5.128:0.2	13. Gilānavagga
an5.128:0.3	Samaṇasukhasutta
an5.128:1.1	“Pañcimāni, bhikkhave, samaṇadukkhāni.
an5.128:1.2	Katamāni pañca?
an5.128:1.3	Idha, bhikkhave, bhikkhu asantuṭṭho hoti itarītarena cīvarena, asantuṭṭho hoti itarītarena piṇḍapātena, asantuṭṭho hoti itarītarena senāsanena, asantuṭṭho hoti itarītarena gilānappaccayabhesajjaparikkhārena, anabhirato ca brahmacariyaṁ carati.
an5.128:1.4	Imāni kho, bhikkhave, pañca samaṇadukkhāni.
an5.128:2.1	Pañcimāni, bhikkhave, samaṇasukhāni.
an5.128:2.2	Katamāni pañca?
an5.128:2.3	Idha, bhikkhave, bhikkhu santuṭṭho hoti itarītarena cīvarena, santuṭṭho hoti itarītarena piṇḍapātena, santuṭṭho hoti itarītarena senāsanena, santuṭṭho hoti itarītarena gilānappaccayabhesajjaparikkhārena, abhirato ca brahmacariyaṁ carati.
an5.128:2.4	Imāni kho, bhikkhave, pañca samaṇasukhānī”ti.
an5.128:2.5	Aṭṭhamaṁ.
an5.129:0.1	Aṅguttara Nikāya 5.129
an5.129:0.2	13. Gilānavagga
an5.129:0.3	Parikuppasutta
an5.129:1.1	“Pañcime, bhikkhave, āpāyikā nerayikā parikuppā atekicchā.
an5.129:1.2	Katame pañca?
an5.129:1.3	Mātā jīvitā voropitā hoti, pitā jīvitā voropito hoti, arahaṁ jīvitā voropito hoti, tathāgatassa duṭṭhena cittena lohitaṁ uppāditaṁ hoti, saṅgho bhinno hoti.
an5.129:1.4	Ime kho, bhikkhave, pañca āpāyikā nerayikā parikuppā atekicchā”ti.
an5.129:1.5	Navamaṁ.
an5.130:0.1	Aṅguttara Nikāya 5.130
an5.130:0.2	13. Gilānavagga
an5.130:0.3	Byasanasutta
an5.130:1.1	“Pañcimāni, bhikkhave, byasanāni.
an5.130:1.2	Katamāni pañca?
an5.130:1.3	Ñātibyasanaṁ, bhogabyasanaṁ, rogabyasanaṁ, sīlabyasanaṁ, diṭṭhibyasanaṁ.
an5.130:1.4	Na, bhikkhave, sattā ñātibyasanahetu vā bhogabyasanahetu vā rogabyasanahetu vā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.
an5.130:1.5	Sīlabyasanahetu vā, bhikkhave, sattā diṭṭhibyasanahetu vā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.
an5.130:1.6	Imāni kho, bhikkhave, pañca byasanāni.
an5.130:2.1	Pañcimā, bhikkhave, sampadā.
an5.130:2.2	Katamā pañca?
an5.130:2.3	Ñātisampadā, bhogasampadā, ārogyasampadā, sīlasampadā, diṭṭhisampadā.
an5.130:2.4	Na, bhikkhave, sattā ñātisampadāhetu vā bhogasampadāhetu vā ārogyasampadāhetu vā kāyassa bhedā paraṁ maraṇā sugatiṁ saggaṁ lokaṁ upapajjanti.
an5.130:2.5	Sīlasampadāhetu vā, bhikkhave, sattā diṭṭhisampadāhetu vā kāyassa bhedā paraṁ maraṇā sugatiṁ saggaṁ lokaṁ upapajjanti.
an5.130:2.6	Imā kho, bhikkhave, pañca sampadā”ti.
an5.130:2.7	Dasamaṁ.
an5.130:2.8	Gilānavaggo tatiyo.
an5.130:3.0	Tassuddānaṁ
an5.130:3.1	Gilāno satisūpaṭṭhi,
an5.130:3.2	Dve upaṭṭhākā duvāyusā;
an5.130:3.3	Vapakāsasamaṇasukhā,
an5.130:3.4	Parikuppaṁ byasanena cāti.
an5.131:0.1	Aṅguttara Nikāya 5.131
an5.131:0.2	14. Rājavagga
an5.131:0.3	Paṭhamacakkānuvattanasutta
an5.131:1.1	“Pañcahi, bhikkhave, aṅgehi samannāgato rājā cakkavattī dhammeneva cakkaṁ vatteti;
an5.131:1.2	taṁ hoti cakkaṁ appaṭivattiyaṁ kenaci manussabhūtena paccatthikena pāṇinā.
an5.131:2.1	Katamehi pañcahi?
an5.131:2.2	Idha, bhikkhave, rājā cakkavattī atthaññū ca hoti, dhammaññū ca, mattaññū ca, kālaññū ca, parisaññū ca.
an5.131:2.3	Imehi kho, bhikkhave, pañcahi aṅgehi samannāgato rājā cakkavattī dhammeneva cakkaṁ pavatteti;
an5.131:2.4	taṁ hoti cakkaṁ appaṭivattiyaṁ kenaci manussabhūtena paccatthikena pāṇinā.
an5.131:3.1	Evamevaṁ kho, bhikkhave, pañcahi dhammehi samannāgato tathāgato arahaṁ sammāsambuddho dhammeneva anuttaraṁ dhammacakkaṁ pavatteti;
an5.131:3.2	taṁ hoti cakkaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmiṁ.
an5.131:4.1	Katamehi pañcahi?
an5.131:4.2	Idha, bhikkhave, tathāgato arahaṁ sammāsambuddho atthaññū, dhammaññū, mattaññū, kālaññū, parisaññū.
an5.131:4.3	Imehi kho, bhikkhave, pañcahi dhammehi samannāgato tathāgato arahaṁ sammāsambuddho dhammeneva anuttaraṁ dhammacakkaṁ pavatteti;
an5.131:4.4	taṁ hoti dhammacakkaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.
an5.131:4.5	Paṭhamaṁ.
an5.132:0.1	Aṅguttara Nikāya 5.132
an5.132:0.2	14. Rājavagga
an5.132:0.3	Dutiyacakkānuvattanasutta
an5.132:1.1	“Pañcahi, bhikkhave, aṅgehi samannāgato rañño cakkavattissa jeṭṭho putto pitarā pavattitaṁ cakkaṁ dhammeneva anuppavatteti;
an5.132:1.2	taṁ hoti cakkaṁ appaṭivattiyaṁ kenaci manussabhūtena paccatthikena pāṇinā.
an5.132:2.1	Katamehi pañcahi?
an5.132:2.2	Idha, bhikkhave, rañño cakkavattissa jeṭṭho putto atthaññū ca hoti, dhammaññū ca, mattaññū ca, kālaññū ca, parisaññū ca.
an5.132:2.3	Imehi kho, bhikkhave, pañcahi aṅgehi samannāgato rañño cakkavattissa jeṭṭho putto pitarā pavattitaṁ cakkaṁ dhammeneva anuppavatteti;
an5.132:2.4	taṁ hoti cakkaṁ appaṭivattiyaṁ kenaci manussabhūtena paccatthikena pāṇinā.
an5.132:3.1	Evamevaṁ kho, bhikkhave, pañcahi dhammehi samannāgato sāriputto tathāgatena anuttaraṁ dhammacakkaṁ pavattitaṁ sammadeva anuppavatteti;
an5.132:3.2	taṁ hoti cakkaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmiṁ.
an5.132:4.1	Katamehi pañcahi?
an5.132:4.2	Idha, bhikkhave, sāriputto atthaññū, dhammaññū, mattaññū, kālaññū, parisaññū.
an5.132:4.3	Imehi kho, bhikkhave, pañcahi dhammehi samannāgato sāriputto tathāgatena anuttaraṁ dhammacakkaṁ pavattitaṁ sammadeva anuppavatteti;
an5.132:4.4	taṁ hoti cakkaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.
an5.132:4.5	Dutiyaṁ.
an5.133:0.1	Aṅguttara Nikāya 5.133
an5.133:0.2	14. Rājavagga
an5.133:0.3	Dhammarājāsutta
an5.133:1.1	“Yopi so, bhikkhave, rājā cakkavattī dhammiko dhammarājā, sopi na arājakaṁ cakkaṁ vattetī”ti.
an5.133:1.2	Evaṁ vutte aññataro bhikkhu bhagavantaṁ etadavoca:
an5.133:1.3	“ko pana, bhante, rañño cakkavattissa dhammikassa dhammarañño rājā”ti?
an5.133:1.4	“Dhammo, bhikkhū”ti bhagavā avoca.
an5.133:2.1	“Idha, bhikkhu, rājā cakkavattī dhammiko dhammarājā dhammaññeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahati antojanasmiṁ.
an5.133:3.1	Puna caparaṁ, bhikkhu, rājā cakkavattī dhammiko dhammarājā dhammaññeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahati khattiyesu anuyantesu …pe… balakāyasmiṁ brāhmaṇagahapatikesu negamajānapadesu samaṇabrāhmaṇesu migapakkhīsu.
an5.133:3.2	Sa kho so, bhikkhu, rājā cakkavattī dhammiko dhammarājā dhammaññeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahitvā antojanasmiṁ dhammikaṁ rakkhāvaraṇaguttiṁ saṁvidahitvā khattiyesu anuyantesu balakāyasmiṁ brāhmaṇagahapatikesu negamajānapadesu samaṇabrāhmaṇesu migapakkhīsu dhammeneva cakkaṁ pavatteti;
an5.133:3.3	taṁ hoti cakkaṁ appaṭivattiyaṁ kenaci manussabhūtena paccatthikena pāṇinā.
an5.133:4.1	Evamevaṁ kho, bhikkhu, tathāgato arahaṁ sammāsambuddho dhammiko dhammarājā dhammaññeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahati bhikkhūsu:
an5.133:4.2	‘evarūpaṁ kāyakammaṁ sevitabbaṁ, evarūpaṁ kāyakammaṁ na sevitabbaṁ;
an5.133:4.3	evarūpaṁ vacīkammaṁ sevitabbaṁ, evarūpaṁ vacīkammaṁ na sevitabbaṁ;
an5.133:4.4	evarūpaṁ manokammaṁ sevitabbaṁ, evarūpaṁ manokammaṁ na sevitabbaṁ;
an5.133:4.5	evarūpo ājīvo sevitabbo, evarūpo ājīvo na sevitabbo;
an5.133:4.6	evarūpo gāmanigamo sevitabbo, evarūpo gāmanigamo na sevitabbo’ti.
an5.133:5.1	Puna caparaṁ, bhikkhu, tathāgato arahaṁ sammāsambuddho dhammiko dhammarājā dhammaññeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahati bhikkhunīsu …pe… upāsakesu …pe… upāsikāsu:
an5.133:5.2	‘evarūpaṁ kāyakammaṁ sevitabbaṁ, evarūpaṁ kāyakammaṁ na sevitabbaṁ;
an5.133:5.3	evarūpaṁ vacīkammaṁ sevitabbaṁ, evarūpaṁ vacīkammaṁ na sevitabbaṁ;
an5.133:5.4	evarūpaṁ manokammaṁ sevitabbaṁ, evarūpaṁ manokammaṁ na sevitabbaṁ;
an5.133:5.5	evarūpo ājīvo sevitabbo, evarūpo ājīvo na sevitabbo;
an5.133:5.6	evarūpo gāmanigamo sevitabbo, evarūpo gāmanigamo na sevitabbo’ti.
an5.133:6.1	Sa kho so, bhikkhu, tathāgato arahaṁ sammāsambuddho dhammiko dhammarājā dhammaññeva nissāya dhammaṁ sakkaronto dhammaṁ garuṁ karonto dhammaṁ apacāyamāno dhammaddhajo dhammaketu dhammādhipateyyo dhammikaṁ rakkhāvaraṇaguttiṁ saṁvidahitvā bhikkhūsu, dhammikaṁ rakkhāvaraṇaguttiṁ saṁvidahitvā bhikkhunīsu, dhammikaṁ rakkhāvaraṇaguttiṁ saṁvidahitvā upāsakesu, dhammikaṁ rakkhāvaraṇaguttiṁ saṁvidahitvā upāsikāsu dhammeneva anuttaraṁ dhammacakkaṁ pavatteti;
an5.133:6.2	taṁ hoti cakkaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin”ti.
an5.133:6.3	Tatiyaṁ.
an5.134:0.1	Aṅguttara Nikāya 5.134
an5.134:0.2	14. Rājavagga
an5.134:0.3	Yassaṁdisaṁsutta
an5.134:1.1	“Pañcahi, bhikkhave, aṅgehi samannāgato rājā khattiyo muddhāvasitto yassaṁ yassaṁ disāyaṁ viharati, sakasmiṁyeva vijite viharati.
an5.134:2.1	Katamehi pañcahi?
an5.134:2.2	Idha, bhikkhave, rājā khattiyo muddhāvasitto ubhato sujāto hoti mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena;
an5.134:2.3	aḍḍho hoti mahaddhano mahābhogo paripuṇṇakosakoṭṭhāgāro;
an5.134:2.4	balavā kho pana hoti caturaṅginiyā senāya samannāgato assavāya ovādapaṭikarāya;
an5.134:2.5	pariṇāyako kho panassa hoti paṇḍito viyatto medhāvī paṭibalo atītānāgatapaccuppanne atthe cintetuṁ;
an5.134:2.6	tassime cattāro dhammā yasaṁ paripācenti.
an5.134:2.7	So iminā yasapañcamena dhammena samannāgato yassaṁ yassaṁ disāyaṁ viharati, sakasmiṁyeva vijite viharati.
an5.134:2.8	Taṁ kissa hetu?
an5.134:2.9	Evañhetaṁ, bhikkhave, hoti vijitāvīnaṁ.
an5.134:3.1	Evamevaṁ kho, bhikkhave, pañcahi dhammehi samannāgato bhikkhu yassaṁ yassaṁ disāyaṁ viharati, vimuttacittova viharati.
an5.134:3.2	Katamehi pañcahi?
an5.134:3.3	Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu—
an5.134:3.4	rājāva khattiyo muddhāvasitto jātisampanno;
an5.134:3.5	bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā—
an5.134:3.6	rājāva khattiyo muddhāvasitto aḍḍho mahaddhano mahābhogo paripuṇṇakosakoṭṭhāgāro;
an5.134:3.7	āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya thāmavā daḷhaparakkamo anikkhittadhuro kusalesu dhammesu—
an5.134:3.8	rājāva khattiyo muddhāvasitto balasampanno;
an5.134:3.9	paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā—
an5.134:3.10	rājāva khattiyo muddhāvasitto pariṇāyakasampanno;
an5.134:3.11	tassime cattāro dhammā vimuttiṁ paripācenti.
an5.134:3.12	So iminā vimuttipañcamena dhammena samannāgato yassaṁ yassaṁ disāyaṁ viharati vimuttacittova viharati.
an5.134:3.13	Taṁ kissa hetu?
an5.134:3.14	Evañhetaṁ, bhikkhave, hoti vimuttacittānan”ti.
an5.134:3.15	Catutthaṁ.
an5.135:0.1	Aṅguttara Nikāya 5.135
an5.135:0.2	14. Rājavagga
an5.135:0.3	Paṭhamapatthanāsutta
an5.135:1.1	“Pañcahi, bhikkhave, aṅgehi samannāgato rañño khattiyassa muddhāvasittassa jeṭṭho putto rajjaṁ pattheti.
an5.135:1.2	Katamehi pañcahi?
an5.135:1.3	Idha, bhikkhave, rañño khattiyassa muddhāvasittassa jeṭṭho putto ubhato sujāto hoti mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena;
an5.135:1.4	abhirūpo hoti dassanīyo pāsādiko paramāya vaṇṇapokkharatāya samannāgato;
an5.135:1.5	mātāpitūnaṁ piyo hoti manāpo;
an5.135:1.6	negamajānapadassa piyo hoti manāpo;
an5.135:1.7	yāni tāni raññaṁ khattiyānaṁ muddhāvasittānaṁ sippaṭṭhānāni hatthismiṁ vā assasmiṁ vā rathasmiṁ vā dhanusmiṁ vā tharusmiṁ vā tattha sikkhito hoti anavayo.
an5.135:2.1	Tassa evaṁ hoti:
an5.135:2.2	‘ahaṁ khomhi ubhato sujāto mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena.
an5.135:2.3	Kasmāhaṁ rajjaṁ na pattheyyaṁ.
an5.135:2.4	Ahaṁ khomhi abhirūpo dassanīyo pāsādiko paramāya vaṇṇapokkharatāya samannāgato.
an5.135:2.5	Kasmāhaṁ rajjaṁ na pattheyyaṁ.
an5.135:2.6	Ahaṁ khomhi mātāpitūnaṁ piyo manāpo.
an5.135:2.7	Kasmāhaṁ rajjaṁ na pattheyyaṁ.
an5.135:2.8	Ahaṁ khomhi negamajānapadassa piyo manāpo.
an5.135:2.9	Kasmāhaṁ rajjaṁ na pattheyyaṁ.
an5.135:2.10	Ahaṁ khomhi yāni tāni raññaṁ khattiyānaṁ muddhāvasittānaṁ sippaṭṭhānāni hatthismiṁ vā assasmiṁ vā rathasmiṁ vā dhanusmiṁ vā tharusmiṁ vā, tattha sikkhito anavayo.
an5.135:2.11	Kasmāhaṁ rajjaṁ na pattheyyan’ti.
an5.135:2.12	Imehi kho, bhikkhave, pañcahi aṅgehi samannāgato rañño khattiyassa muddhāvasittassa jeṭṭho putto rajjaṁ pattheti.
an5.135:3.1	Evamevaṁ kho, bhikkhave, pañcahi dhammehi samannāgato bhikkhu āsavānaṁ khayaṁ pattheti.
an5.135:3.2	Katamehi pañcahi?
an5.135:3.3	Idha, bhikkhave, bhikkhu saddho hoti, saddahati tathāgatassa bodhiṁ:
an5.135:3.4	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an5.135:3.5	Appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya;
an5.135:3.6	asaṭho hoti amāyāvī, yathābhūtaṁ attānaṁ āvikattā satthari vā viññūsu vā sabrahmacārīsu;
an5.135:3.7	āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu;
an5.135:3.8	paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an5.135:4.1	Tassa evaṁ hoti:
an5.135:4.2	‘ahaṁ khomhi saddho, saddahāmi tathāgatassa bodhiṁ:
an5.135:4.3	“itipi so bhagavā arahaṁ sammāsambuddho …pe… satthā devamanussānaṁ buddho bhagavā”ti.
an5.135:4.4	Kasmāhaṁ āsavānaṁ khayaṁ na pattheyyaṁ.
an5.135:4.5	Ahaṁ khomhi appābādho appātaṅko samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya.
an5.135:4.6	Kasmāhaṁ āsavānaṁ khayaṁ na pattheyyaṁ.
an5.135:4.7	Ahaṁ khomhi asaṭho amāyāvī yathābhūtaṁ attānaṁ āvikattā satthari vā viññūsu vā sabrahmacārīsu.
an5.135:4.8	Kasmāhaṁ āsavānaṁ khayaṁ na pattheyyaṁ.
an5.135:4.9	Ahaṁ khomhi āraddhavīriyo viharāmi akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an5.135:4.10	Kasmāhaṁ āsavānaṁ khayaṁ na pattheyyaṁ.
an5.135:4.11	Ahaṁ khomhi paññavā udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an5.135:4.12	Kasmāhaṁ āsavānaṁ khayaṁ na pattheyyan’ti.
an5.135:4.13	Imehi kho, bhikkhave, pañcahi dhammehi samannāgato bhikkhu āsavānaṁ khayaṁ patthetī”ti.
an5.135:4.14	Pañcamaṁ.
an5.136:0.1	Aṅguttara Nikāya 5.136
an5.136:0.2	14. Rājavagga
an5.136:0.3	Dutiyapatthanāsutta
an5.136:1.1	“Pañcahi, bhikkhave, aṅgehi samannāgato rañño khattiyassa muddhāvasittassa jeṭṭho putto oparajjaṁ pattheti.
an5.136:1.2	Katamehi pañcahi?
an5.136:1.3	Idha, bhikkhave, rañño khattiyassa muddhāvasittassa jeṭṭho putto ubhato sujāto hoti mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena;
an5.136:1.4	abhirūpo hoti dassanīyo pāsādiko paramāya vaṇṇapokkharatāya samannāgato;
an5.136:1.5	mātāpitūnaṁ piyo hoti manāpo,
an5.136:1.6	balakāyassa piyo hoti manāpo;
an5.136:1.7	paṇḍito hoti viyatto medhāvī paṭibalo atītānāgatapaccuppanne atthe cintetuṁ.
an5.136:2.1	Tassa evaṁ hoti:
an5.136:2.2	‘ahaṁ khomhi ubhato sujāto mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena.
an5.136:2.3	Kasmāhaṁ oparajjaṁ na pattheyyaṁ.
an5.136:2.4	Ahaṁ khomhi abhirūpo dassanīyo pāsādiko paramāya vaṇṇapokkharatāya samannāgato.
an5.136:2.5	Kasmāhaṁ oparajjaṁ na pattheyyaṁ.
an5.136:2.6	Ahaṁ khomhi mātāpitūnaṁ piyo manāpo.
an5.136:2.7	Kasmāhaṁ oparajjaṁ na pattheyyaṁ.
an5.136:2.8	Ahaṁ khomhi balakāyassa piyo manāpo.
an5.136:2.9	Kasmāhaṁ oparajjaṁ na pattheyyaṁ.
an5.136:2.10	Ahaṁ khomhi paṇḍito viyatto medhāvī paṭibalo atītānāgatapaccuppanne atthe cintetuṁ.
an5.136:2.11	Kasmāhaṁ oparajjaṁ na pattheyyan’ti.
an5.136:2.12	Imehi kho, bhikkhave, pañcahi aṅgehi samannāgato rañño khattiyassa muddhāvasittassa jeṭṭho putto oparajjaṁ pattheti.
an5.136:3.1	Evamevaṁ kho, bhikkhave, pañcahi dhammehi samannāgato bhikkhu āsavānaṁ khayaṁ pattheti.
an5.136:3.2	Katamehi pañcahi?
an5.136:3.3	Idha, bhikkhave, bhikkhu sīlavā hoti …pe… samādāya sikkhati sikkhāpadesu;
an5.136:3.4	bahussuto hoti …pe… diṭṭhiyā suppaṭividdhā;
an5.136:3.5	catūsu satipaṭṭhānesu suppatiṭṭhitacitto hoti;
an5.136:3.6	āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu;
an5.136:3.7	paññavā hoti, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an5.136:4.1	Tassa evaṁ hoti:
an5.136:4.2	‘ahaṁ khomhi sīlavā, pātimokkhasaṁvarasaṁvuto viharāmi ācāragocarasampanno aṇumattesu vajjesu bhayadassāvī, samādāya sikkhāmi sikkhāpadesu.
an5.136:4.3	Kasmāhaṁ āsavānaṁ khayaṁ na pattheyyaṁ.
an5.136:4.4	Ahaṁ khomhi bahussuto sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpā me dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an5.136:4.5	Kasmāhaṁ āsavānaṁ khayaṁ na pattheyyaṁ.
an5.136:4.6	Ahaṁ khomhi catūsu satipaṭṭhānesu suppatiṭṭhitacitto.
an5.136:4.7	Kasmāhaṁ āsavānaṁ khayaṁ na pattheyyaṁ.
an5.136:4.8	Ahaṁ khomhi āraddhavīriyo viharāmi akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an5.136:4.9	Kasmāhaṁ āsavānaṁ khayaṁ na pattheyyaṁ.
an5.136:4.10	Ahaṁ khomhi paññavā udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an5.136:4.11	Kasmāhaṁ āsavānaṁ khayaṁ na pattheyyan’ti.
an5.136:4.12	Imehi kho, bhikkhave, pañcahi dhammehi samannāgato bhikkhu āsavānaṁ khayaṁ patthetī”ti.
an5.136:4.13	Chaṭṭhaṁ.
an5.137:0.1	Aṅguttara Nikāya 5.137
an5.137:0.2	14. Rājavagga
an5.137:0.3	Appaṁsupatisutta
an5.137:1.1	“Pañcime, bhikkhave, appaṁ rattiyā supanti, bahuṁ jagganti.
an5.137:1.2	Katame pañca?
an5.137:1.3	Itthī, bhikkhave, purisādhippāyā appaṁ rattiyā supati, bahuṁ jaggati.
an5.137:1.4	Puriso, bhikkhave, itthādhippāyo appaṁ rattiyā supati, bahuṁ jaggati.
an5.137:1.5	Coro, bhikkhave, ādānādhippāyo appaṁ rattiyā supati, bahuṁ jaggati.
an5.137:1.6	Rājā, bhikkhave, rājakaraṇīyesu yutto appaṁ rattiyā supati, bahuṁ jaggati.
an5.137:1.7	Bhikkhu, bhikkhave, visaṁyogādhippāyo appaṁ rattiyā supati, bahuṁ jaggati.
an5.137:1.8	Ime kho, bhikkhave, pañca appaṁ rattiyā supanti, bahuṁ jaggantī”ti.
an5.137:1.9	Sattamaṁ.
an5.138:0.1	Aṅguttara Nikāya 5.138
an5.138:0.2	14. Rājavagga
an5.138:0.3	Bhattādakasutta
an5.138:1.1	“Pañcahi, bhikkhave, aṅgehi samannāgato rañño nāgo bhattādako ca hoti okāsapharaṇo ca laṇḍasāraṇo ca salākaggāhī ca rañño nāgotveva saṅkhaṁ gacchati.
an5.138:1.2	Katamehi pañcahi?
an5.138:1.3	Idha, bhikkhave, rañño nāgo akkhamo hoti rūpānaṁ, akkhamo saddānaṁ, akkhamo gandhānaṁ, akkhamo rasānaṁ, akkhamo phoṭṭhabbānaṁ.
an5.138:1.4	Imehi kho, bhikkhave, pañcahi aṅgehi samannāgato rañño nāgo bhattādako ca okāsapharaṇo ca laṇḍasāraṇo ca salākaggāhī ca, rañño nāgotveva saṅkhaṁ gacchati.
an5.138:2.1	Evamevaṁ kho, bhikkhave, pañcahi dhammehi samannāgato bhikkhu bhattādako ca hoti, okāsapharaṇo ca mañcapīṭhamaddano ca salākaggāhī ca, bhikkhutveva saṅkhaṁ gacchati.
an5.138:2.2	Katamehi pañcahi?
an5.138:2.3	Idha, bhikkhave, bhikkhu akkhamo hoti rūpānaṁ, akkhamo saddānaṁ, akkhamo gandhānaṁ, akkhamo rasānaṁ, akkhamo phoṭṭhabbānaṁ.
an5.138:2.4	Imehi kho, bhikkhave, pañcahi dhammehi samannāgato bhikkhu bhattādako ca hoti okāsapharaṇo ca mañcapīṭhamaddano ca salākaggāhī ca, bhikkhutveva saṅkhaṁ gacchatī”ti.
an5.138:2.5	Aṭṭhamaṁ.
an5.139:0.1	Aṅguttara Nikāya 5.139
an5.139:0.2	14. Rājavagga
an5.139:0.3	Akkhamasutta
an5.139:1.1	“Pañcahi, bhikkhave, aṅgehi samannāgato rañño nāgo na rājāraho hoti na rājabhoggo, na rañño aṅgaṁtveva saṅkhaṁ gacchati.
an5.139:1.2	Katamehi pañcahi?
an5.139:1.3	Idha, bhikkhave, rañño nāgo akkhamo hoti rūpānaṁ, akkhamo saddānaṁ, akkhamo gandhānaṁ, akkhamo rasānaṁ, akkhamo phoṭṭhabbānaṁ.
an5.139:2.1	Kathañca, bhikkhave, rañño nāgo akkhamo hoti rūpānaṁ?
an5.139:2.2	Idha, bhikkhave, rañño nāgo saṅgāmagato hatthikāyaṁ vā disvā assakāyaṁ vā disvā rathakāyaṁ vā disvā pattikāyaṁ vā disvā saṁsīdati visīdati, na santhambhati na sakkoti saṅgāmaṁ otarituṁ.
an5.139:2.3	Evaṁ kho, bhikkhave, rañño nāgo akkhamo hoti rūpānaṁ.
an5.139:3.1	Kathañca, bhikkhave, rañño nāgo akkhamo hoti saddānaṁ?
an5.139:3.2	Idha, bhikkhave, rañño nāgo saṅgāmagato hatthisaddaṁ vā sutvā assasaddaṁ vā sutvā rathasaddaṁ vā sutvā pattisaddaṁ vā sutvā bheripaṇavasaṅkhatiṇavaninnādasaddaṁ vā sutvā saṁsīdati visīdati, na santhambhati na sakkoti saṅgāmaṁ otarituṁ.
an5.139:3.3	Evaṁ kho, bhikkhave, rañño nāgo akkhamo hoti saddānaṁ.
an5.139:4.1	Kathañca, bhikkhave, rañño nāgo akkhamo hoti gandhānaṁ?
an5.139:4.2	Idha, bhikkhave, rañño nāgo saṅgāmagato ye te rañño nāgā abhijātā saṅgāmāvacarā tesaṁ muttakarīsassa gandhaṁ ghāyitvā saṁsīdati visīdati, na santhambhati na sakkoti saṅgāmaṁ otarituṁ.
an5.139:4.3	Evaṁ kho, bhikkhave, rañño nāgo akkhamo hoti gandhānaṁ.
an5.139:5.1	Kathañca, bhikkhave, rañño nāgo akkhamo hoti rasānaṁ?
an5.139:5.2	Idha, bhikkhave, rañño nāgo saṅgāmagato ekissā vā tiṇodakadattiyā vimānito dvīhi vā tīhi vā catūhi vā pañcahi vā tiṇodakadattīhi vimānito saṁsīdati visīdati, na santhambhati na sakkoti saṅgāmaṁ otarituṁ.
an5.139:5.3	Evaṁ kho, bhikkhave, rañño nāgo akkhamo hoti rasānaṁ.
an5.139:6.1	Kathañca, bhikkhave, rañño nāgo akkhamo hoti phoṭṭhabbānaṁ?
an5.139:6.2	Idha, bhikkhave, rañño nāgo saṅgāmagato ekena vā saravegena viddho, dvīhi vā tīhi vā catūhi vā pañcahi vā saravegehi viddho saṁsīdati visīdati, na santhambhati na sakkoti saṅgāmaṁ otarituṁ.
an5.139:6.3	Evaṁ kho, bhikkhave, rañño nāgo akkhamo hoti phoṭṭhabbānaṁ.
an5.139:7.1	Imehi kho, bhikkhave, pañcahi aṅgehi samannāgato rañño nāgo na rājāraho hoti na rājabhoggo na rañño aṅgaṁtveva saṅkhaṁ gacchati.
an5.139:8.1	Evamevaṁ kho, bhikkhave, pañcahi aṅgehi samannāgato bhikkhu na āhuneyyo hoti na pāhuneyyo na dakkhiṇeyyo na añjalikaraṇīyo na anuttaraṁ puññakkhettaṁ lokassa.
an5.139:8.2	Katamehi pañcahi?
an5.139:8.3	Idha, bhikkhave, bhikkhu akkhamo hoti rūpānaṁ, akkhamo saddānaṁ, akkhamo gandhānaṁ, akkhamo rasānaṁ, akkhamo phoṭṭhabbānaṁ.
an5.139:9.1	Kathañca, bhikkhave, bhikkhu akkhamo hoti rūpānaṁ?
an5.139:9.2	Idha, bhikkhave, bhikkhu cakkhunā rūpaṁ disvā rajanīye rūpe sārajjati, na sakkoti cittaṁ samādahituṁ.
an5.139:9.3	Evaṁ kho, bhikkhave, bhikkhu akkhamo hoti rūpānaṁ.
an5.139:10.1	Kathañca, bhikkhave, bhikkhu akkhamo hoti saddānaṁ?
an5.139:10.2	Idha, bhikkhave, bhikkhu sotena saddaṁ sutvā rajanīye sadde sārajjati, na sakkoti cittaṁ samādahituṁ.
an5.139:10.3	Evaṁ kho, bhikkhave, bhikkhu akkhamo hoti saddānaṁ.
an5.139:11.1	Kathañca, bhikkhave, bhikkhu akkhamo hoti gandhānaṁ?
an5.139:11.2	Idha, bhikkhave, bhikkhu ghānena gandhaṁ ghāyitvā rajanīye gandhe sārajjati, na sakkoti cittaṁ samādahituṁ.
an5.139:11.3	Evaṁ kho, bhikkhave, bhikkhu akkhamo hoti gandhānaṁ.
an5.139:12.1	Kathañca, bhikkhave, bhikkhu akkhamo hoti rasānaṁ?
an5.139:12.2	Idha, bhikkhave, bhikkhu jivhāya rasaṁ sāyitvā rajanīye rase sārajjati, na sakkoti cittaṁ samādahituṁ.
an5.139:12.3	Evaṁ kho, bhikkhave, bhikkhu akkhamo hoti rasānaṁ.
an5.139:13.1	Kathañca, bhikkhave, bhikkhu akkhamo hoti phoṭṭhabbānaṁ?
an5.139:13.2	Idha, bhikkhave, bhikkhu kāyena phoṭṭhabbaṁ phusitvā rajanīye phoṭṭhabbe sārajjati, na sakkoti cittaṁ samādahituṁ.
an5.139:13.3	Evaṁ kho, bhikkhave, bhikkhu akkhamo hoti phoṭṭhabbānaṁ.
an5.139:14.1	Imehi kho, bhikkhave, pañcahi dhammehi samannāgato bhikkhu na āhuneyyo hoti na pāhuneyyo na dakkhiṇeyyo na añjalikaraṇīyo na anuttaraṁ puññakkhettaṁ lokassa.
an5.139:15.1	Pañcahi, bhikkhave, aṅgehi samannāgato rañño nāgo rājāraho hoti rājabhoggo, rañño aṅgaṁtveva saṅkhaṁ gacchati.
an5.139:15.2	Katamehi pañcahi?
an5.139:15.3	Idha, bhikkhave, rañño nāgo khamo hoti rūpānaṁ, khamo saddānaṁ, khamo gandhānaṁ, khamo rasānaṁ, khamo phoṭṭhabbānaṁ.
an5.139:16.1	Kathañca, bhikkhave, rañño nāgo khamo hoti rūpānaṁ?
an5.139:16.2	Idha, bhikkhave, rañño nāgo saṅgāmagato hatthikāyaṁ vā disvā assakāyaṁ vā disvā rathakāyaṁ vā disvā pattikāyaṁ vā disvā na saṁsīdati na visīdati, santhambhati sakkoti saṅgāmaṁ otarituṁ.
an5.139:16.3	Evaṁ kho, bhikkhave, rañño nāgo khamo hoti rūpānaṁ.
an5.139:17.1	Kathañca, bhikkhave, rañño nāgo khamo hoti saddānaṁ?
an5.139:17.2	Idha, bhikkhave, rañño nāgo saṅgāmagato hatthisaddaṁ vā sutvā assasaddaṁ vā sutvā rathasaddaṁ vā sutvā pattisaddaṁ vā sutvā bheripaṇavasaṅkhatiṇavaninnādasaddaṁ vā sutvā na saṁsīdati na visīdati, santhambhati sakkoti saṅgāmaṁ otarituṁ.
an5.139:17.3	Evaṁ kho, bhikkhave, rañño nāgo khamo hoti saddānaṁ.
an5.139:18.1	Kathañca, bhikkhave, rañño nāgo khamo hoti gandhānaṁ?
an5.139:18.2	Idha, bhikkhave, rañño nāgo saṅgāmagato ye te rañño nāgā abhijātā saṅgāmāvacarā tesaṁ muttakarīsassa gandhaṁ ghāyitvā na saṁsīdati na visīdati, santhambhati sakkoti saṅgāmaṁ otarituṁ.
an5.139:18.3	Evaṁ kho, bhikkhave, rañño nāgo khamo hoti gandhānaṁ.
an5.139:19.1	Kathañca, bhikkhave, rañño nāgo khamo hoti rasānaṁ?
an5.139:19.2	Idha, bhikkhave, rañño nāgo saṅgāmagato ekissā vā tiṇodakadattiyā vimānito dvīhi vā tīhi vā catūhi vā pañcahi vā tiṇodakadattīhi vimānito na saṁsīdati na visīdati, santhambhati sakkoti saṅgāmaṁ otarituṁ.
an5.139:19.3	Evaṁ kho, bhikkhave, rañño nāgo khamo hoti rasānaṁ.
an5.139:20.1	Kathañca, bhikkhave, rañño nāgo khamo hoti phoṭṭhabbānaṁ?
an5.139:20.2	Idha, bhikkhave, rañño nāgo saṅgāmagato ekena vā saravegena viddho, dvīhi vā tīhi vā catūhi vā pañcahi vā saravegehi viddho na saṁsīdati na visīdati, santhambhati sakkoti saṅgāmaṁ otarituṁ.
an5.139:20.3	Evaṁ kho, bhikkhave, rañño nāgo khamo hoti phoṭṭhabbānaṁ.
an5.139:21.1	Imehi kho, bhikkhave, pañcahi aṅgehi samannāgato rañño nāgo rājāraho hoti rājabhoggo, rañño aṅgaṁtveva saṅkhaṁ gacchati.
an5.139:22.1	Evamevaṁ kho, bhikkhave, pañcahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an5.139:22.2	Katamehi pañcahi?
an5.139:22.3	Idha, bhikkhave, bhikkhu khamo hoti rūpānaṁ, khamo saddānaṁ, khamo gandhānaṁ, khamo rasānaṁ, khamo phoṭṭhabbānaṁ.
an5.139:23.1	Kathañca, bhikkhave, bhikkhu khamo hoti rūpānaṁ?
an5.139:23.2	Idha, bhikkhave, bhikkhu cakkhunā rūpaṁ disvā rajanīye rūpe na sārajjati, sakkoti cittaṁ samādahituṁ.
an5.139:23.3	Evaṁ kho, bhikkhave, bhikkhu khamo hoti rūpānaṁ.
an5.139:24.1	Kathañca, bhikkhave, bhikkhu khamo hoti saddānaṁ?
an5.139:24.2	Idha, bhikkhave, bhikkhu sotena saddaṁ sutvā rajanīye sadde na sārajjati, sakkoti cittaṁ samādahituṁ.
an5.139:24.3	Evaṁ kho, bhikkhave, bhikkhu khamo hoti saddānaṁ.
an5.139:25.1	Kathañca, bhikkhave, bhikkhu khamo hoti gandhānaṁ.
an5.139:25.2	Idha, bhikkhave, bhikkhu ghānena gandhaṁ ghāyitvā rajanīye gandhe na sārajjati, sakkoti cittaṁ samādahituṁ.
an5.139:25.3	Evaṁ kho, bhikkhave, bhikkhu khamo hoti gandhānaṁ.
an5.139:26.1	Kathañca, bhikkhave, bhikkhu khamo hoti rasānaṁ?
an5.139:26.2	Idha, bhikkhave, bhikkhu jivhāya rasaṁ sāyitvā rajanīye rase na sārajjati, sakkoti cittaṁ samādahituṁ.
an5.139:26.3	Evaṁ kho, bhikkhave, bhikkhu khamo hoti rasānaṁ.
an5.139:27.1	Kathañca, bhikkhave, bhikkhu khamo hoti phoṭṭhabbānaṁ?
an5.139:27.2	Idha, bhikkhave, bhikkhu kāyena phoṭṭhabbaṁ phusitvā rajanīye phoṭṭhabbe na sārajjati, sakkoti cittaṁ samādahituṁ.
an5.139:27.3	Evaṁ kho, bhikkhave, bhikkhu khamo hoti phoṭṭhabbānaṁ.
an5.139:28.1	Imehi kho, bhikkhave, pañcahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā”ti.
an5.139:28.2	Navamaṁ.
an5.140:0.1	Aṅguttara Nikāya 5.140
an5.140:0.2	14. Rājavagga
an5.140:0.3	Sotasutta
an5.140:1.1	“Pañcahi, bhikkhave, aṅgehi samannāgato rañño nāgo rājāraho hoti rājabhoggo, rañño aṅgaṁtveva saṅkhaṁ gacchati.
an5.140:1.2	Katamehi pañcahi?
an5.140:1.3	Idha, bhikkhave, rañño nāgo sotā ca hoti, hantā ca, rakkhitā ca, khantā ca, gantā ca.
an5.140:2.1	Kathañca, bhikkhave, rañño nāgo sotā hoti?
an5.140:2.2	Idha, bhikkhave, rañño nāgo yamenaṁ hatthidammasārathi kāraṇaṁ kāreti—
an5.140:2.3	yadi vā katapubbaṁ yadi vā akatapubbaṁ—
an5.140:2.4	taṁ aṭṭhiṁ katvā manasi katvā sabbaṁ cetasā samannāharitvā ohitasoto suṇāti.
an5.140:2.5	Evaṁ kho, bhikkhave, rañño nāgo sotā hoti.
an5.140:3.1	Kathañca, bhikkhave, rañño nāgo hantā hoti?
an5.140:3.2	Idha, bhikkhave, rañño nāgo saṅgāmagato hatthimpi hanati, hatthāruhampi hanati, assampi hanati, assāruhampi hanati, rathampi hanati, rathikampi hanati, pattikampi hanati.
an5.140:3.3	Evaṁ kho, bhikkhave, rañño nāgo hantā hoti.
an5.140:4.1	Kathañca, bhikkhave, rañño nāgo rakkhitā hoti?
an5.140:4.2	Idha, bhikkhave, rañño nāgo saṅgāmagato rakkhati purimaṁ kāyaṁ, rakkhati pacchimaṁ kāyaṁ, rakkhati purime pāde, rakkhati pacchime pāde, rakkhati sīsaṁ, rakkhati kaṇṇe, rakkhati dante, rakkhati soṇḍaṁ, rakkhati vāladhiṁ, rakkhati hatthāruhaṁ.
an5.140:4.3	Evaṁ kho, bhikkhave, rañño nāgo rakkhitā hoti.
an5.140:5.1	Kathañca, bhikkhave, rañño nāgo khantā hoti?
an5.140:5.2	Idha, bhikkhave, rañño nāgo saṅgāmagato khamo hoti sattippahārānaṁ asippahārānaṁ usuppahārānaṁ pharasuppahārānaṁ bheripaṇavasaṅkhatiṇavaninnādasaddānaṁ.
an5.140:5.3	Evaṁ kho, bhikkhave, rañño nāgo khantā hoti.
an5.140:6.1	Kathañca, bhikkhave, rañño nāgo gantā hoti?
an5.140:6.2	Idha, bhikkhave, rañño nāgo yamenaṁ hatthidammasārathi disaṁ peseti—
an5.140:6.3	yadi vā gatapubbaṁ yadi vā agatapubbaṁ—
an5.140:6.4	taṁ khippameva gantā hoti.
an5.140:6.5	Evaṁ kho, bhikkhave, rañño nāgo gantā hoti.
an5.140:7.1	Imehi kho, bhikkhave, pañcahi aṅgehi samannāgato rañño nāgo rājāraho hoti rājabhoggo, rañño aṅgantveva saṅkhaṁ gacchati.
an5.140:8.1	Evamevaṁ kho, bhikkhave, pañcahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an5.140:8.2	Katamehi pañcahi?
an5.140:8.3	Idha, bhikkhave, bhikkhu sotā ca hoti, hantā ca, rakkhitā ca, khantā ca, gantā ca.
an5.140:9.1	Kathañca, bhikkhave, bhikkhu sotā hoti?
an5.140:9.2	Idha, bhikkhave, bhikkhu tathāgatappavedite dhammavinaye desiyamāne aṭṭhiṅkatvā manasi katvā sabbaṁ cetasā samannāharitvā ohitasoto dhammaṁ suṇāti.
an5.140:9.3	Evaṁ kho, bhikkhave, bhikkhu sotā hoti.
an5.140:10.1	Kathañca, bhikkhave, bhikkhu hantā hoti?
an5.140:10.2	Idha, bhikkhave, bhikkhu uppannaṁ kāmavitakkaṁ nādhivāseti, pajahati vinodeti hanati byantīkaroti anabhāvaṁ gameti; uppannaṁ byāpādavitakkaṁ …pe… uppannaṁ vihiṁsāvitakkaṁ …pe… uppannuppanne pāpake akusale dhamme nādhivāseti, pajahati vinodeti hanati byantīkaroti anabhāvaṁ gameti.
an5.140:10.3	Evaṁ kho, bhikkhave, bhikkhu hantā hoti.
an5.140:11.1	Kathañca, bhikkhave, bhikkhu rakkhitā hoti?
an5.140:11.2	Idha, bhikkhave, bhikkhu cakkhunā rūpaṁ disvā na nimittaggāhī hoti nānubyañjanaggāhī.
an5.140:11.3	Yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati cakkhundriyaṁ; cakkhundriye saṁvaraṁ āpajjati.
an5.140:11.4	Sotena saddaṁ sutvā …
an5.140:11.5	ghānena gandhaṁ ghāyitvā …
an5.140:11.6	jivhāya rasaṁ sāyitvā …
an5.140:11.7	kāyena phoṭṭhabbaṁ phusitvā …
an5.140:11.8	manasā dhammaṁ viññāya na nimittaggāhī hoti nānubyañjanaggāhī.
an5.140:11.9	Yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ; manindriye saṁvaraṁ āpajjati.
an5.140:11.10	Evaṁ kho, bhikkhave, bhikkhu rakkhitā hoti.
an5.140:12.1	Kathañca, bhikkhave, bhikkhu khantā hoti?
an5.140:12.2	Idha, bhikkhave, bhikkhu khamo hoti sītassa uṇhassa jighacchāya pipāsāya ḍaṁsamakasavātātapasarīsapasamphassānaṁ; duruttānaṁ durāgatānaṁ vacanapathānaṁ uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko hoti.
an5.140:12.3	Evaṁ kho, bhikkhave, bhikkhu khantā hoti.
an5.140:13.1	Kathañca, bhikkhave, bhikkhu gantā hoti?
an5.140:13.2	Idha, bhikkhave, bhikkhu yā sā disā agatapubbā iminā dīghena addhunā, yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānaṁ, taṁ khippaññeva gantā hoti.
an5.140:13.3	Evaṁ kho, bhikkhave, bhikkhu gantā hoti.
an5.140:14.1	Imehi kho, bhikkhave, pañcahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an5.140:14.2	Dasamaṁ.
an5.140:14.3	Rājavaggo catuttho.
an5.140:15.0	Tassuddānaṁ
an5.140:15.1	Cakkānuvattanā rājā,
an5.140:15.2	Yassaṁdisaṁ dve ceva patthanā;
an5.140:15.3	Appaṁsupati bhattādo,
an5.140:15.4	Akkhamo ca sotena cāti.
an5.141:0.1	Aṅguttara Nikāya 5.141
an5.141:0.2	15. Tikaṇḍakīvagga
an5.141:0.3	Avajānātisutta
an5.141:1.1	“Pañcime, bhikkhave, puggalā santo saṁvijjamānā lokasmiṁ.
an5.141:1.2	Katame pañca?
an5.141:1.3	Datvā avajānāti, saṁvāsena avajānāti, ādheyyamukho hoti, lolo hoti, mando momūho hoti.
an5.141:2.1	Kathañca, bhikkhave, puggalo datvā avajānāti?
an5.141:2.2	Idha, bhikkhave, puggalo puggalassa deti cīvarapiṇḍapātasenāsanagilānappaccayabhesajjaparikkhāraṁ.
an5.141:2.3	Tassa evaṁ hoti:
an5.141:2.4	‘ahaṁ demi;
an5.141:2.5	ayaṁ paṭiggaṇhātī’ti.
an5.141:2.6	Tamenaṁ datvā avajānāti.
an5.141:2.7	Evaṁ kho, bhikkhave, puggalo datvā avajānāti.
an5.141:3.1	Kathañca, bhikkhave, puggalo saṁvāsena avajānāti?
an5.141:3.2	Idha, bhikkhave, puggalo puggalena saddhiṁ saṁvasati dve vā tīṇi vā vassāni.
an5.141:3.3	Tamenaṁ saṁvāsena avajānāti.
an5.141:3.4	Evaṁ kho, bhikkhave, puggalo saṁvāsena avajānāti.
an5.141:4.1	Kathañca, bhikkhave, puggalo ādheyyamukho hoti?
an5.141:4.2	Idha, bhikkhave, ekacco puggalo parassa vaṇṇe vā avaṇṇe vā bhāsiyamāne taṁ khippaññeva adhimuccitā hoti.
an5.141:4.3	Evaṁ kho, bhikkhave, puggalo ādheyyamukho hoti.
an5.141:5.1	Kathañca, bhikkhave, puggalo lolo hoti?
an5.141:5.2	Idha, bhikkhave, ekacco puggalo ittarasaddho hoti ittarabhattī ittarapemo ittarappasādo.
an5.141:5.3	Evaṁ kho, bhikkhave, puggalo lolo hoti.
an5.141:6.1	Kathañca, bhikkhave, puggalo mando momūho hoti?
an5.141:6.2	Idha, bhikkhave, ekacco puggalo kusalākusale dhamme na jānāti, sāvajjānavajje dhamme na jānāti, hīnappaṇīte dhamme na jānāti, kaṇhasukkasappaṭibhāge dhamme na jānāti.
an5.141:6.3	Evaṁ kho, bhikkhave, puggalo mando momūho hoti.
an5.141:6.4	Ime kho, bhikkhave, pañca puggalā santo saṁvijjamānā lokasmin”ti.
an5.141:6.5	Paṭhamaṁ.
an5.142:0.1	Aṅguttara Nikāya 5.142
an5.142:0.2	15. Tikaṇḍakīvagga
an5.142:0.3	Ārabhatisutta
an5.142:1.1	“Pañcime, bhikkhave, puggalā santo saṁvijjamānā lokasmiṁ.
an5.142:1.2	Katame pañca?
an5.142:1.3	Idha, bhikkhave, ekacco puggalo ārabhati ca vippaṭisārī ca hoti;
an5.142:1.4	tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti.
an5.142:2.1	Idha pana, bhikkhave, ekacco puggalo ārabhati, na vippaṭisārī hoti;
an5.142:2.2	tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti.
an5.142:3.1	Idha pana, bhikkhave, ekacco puggalo na ārabhati, vippaṭisārī hoti;
an5.142:3.2	tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti.
an5.142:4.1	Idha pana, bhikkhave, ekacco puggalo na ārabhati na vippaṭisārī hoti;
an5.142:4.2	tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti.
an5.142:5.1	Idha pana, bhikkhave, ekacco puggalo na ārabhati na vippaṭisārī hoti;
an5.142:5.2	tañca cetovimuttiṁ paññāvimuttiṁ yathābhūtaṁ pajānāti yatthassa te uppannā pāpakā akusalā dhammā aparisesā nirujjhanti.
an5.142:6.1	Tatra, bhikkhave, yvāyaṁ puggalo ārabhati ca vippaṭisārī ca hoti,
an5.142:6.2	tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti,
an5.142:6.3	so evamassa vacanīyo:
an5.142:6.4	‘āyasmato kho ārambhajā āsavā saṁvijjanti, vippaṭisārajā āsavā pavaḍḍhanti, sādhu vatāyasmā ārambhaje āsave pahāya vippaṭisāraje āsave paṭivinodetvā cittaṁ paññañca bhāvetu;
an5.142:6.5	evamāyasmā amunā pañcamena puggalena samasamo bhavissatī’ti.
an5.142:7.1	Tatra, bhikkhave, yvāyaṁ puggalo ārabhati na vippaṭisārī hoti,
an5.142:7.2	tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti,
an5.142:7.3	so evamassa vacanīyo:
an5.142:7.4	‘āyasmato kho ārambhajā āsavā saṁvijjanti, vippaṭisārajā āsavā na pavaḍḍhanti, sādhu vatāyasmā ārambhaje āsave pahāya cittaṁ paññañca bhāvetu;
an5.142:7.5	evamāyasmā amunā pañcamena puggalena samasamo bhavissatī’ti.
an5.142:8.1	Tatra, bhikkhave, yvāyaṁ puggalo na ārabhati vippaṭisārī hoti,
an5.142:8.2	tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti,
an5.142:8.3	so evamassa vacanīyo:
an5.142:8.4	‘āyasmato kho ārambhajā āsavā na saṁvijjanti, vippaṭisārajā āsavā pavaḍḍhanti, sādhu vatāyasmā vippaṭisāraje āsave paṭivinodetvā cittaṁ paññañca bhāvetu;
an5.142:8.5	evamāyasmā amunā pañcamena puggalena samasamo bhavissatī’ti.
an5.142:9.1	Tatra, bhikkhave, yvāyaṁ puggalo na ārabhati na vippaṭisārī hoti,
an5.142:9.2	tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti,
an5.142:9.3	so evamassa vacanīyo:
an5.142:9.4	‘āyasmato kho ārambhajā āsavā na saṁvijjanti, vippaṭisārajā āsavā na pavaḍḍhanti, sādhu vatāyasmā cittaṁ paññañca bhāvetu;
an5.142:9.5	evamāyasmā amunā pañcamena puggalena samasamo bhavissatī’ti.
an5.142:10.1	Iti kho, bhikkhave, ime cattāro puggalā amunā pañcamena puggalena evaṁ ovadiyamānā evaṁ anusāsiyamānā anupubbena āsavānaṁ khayaṁ pāpuṇantī”ti.
an5.142:10.2	Dutiyaṁ.
an5.143:0.1	Aṅguttara Nikāya 5.143
an5.143:0.2	15. Tikaṇḍakīvagga
an5.143:0.3	Sārandadasutta
an5.143:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an5.143:1.2	Atha kho bhagavā pubbaṇhasamayaṁ nivāsetvā pattacīvaramādāya vesāliṁ piṇḍāya pāvisi.
an5.143:1.3	Tena kho pana samayena pañcamattānaṁ licchavisatānaṁ sārandade cetiye sannisinnānaṁ sannipatitānaṁ ayamantarākathā udapādi:
an5.143:1.4	“pañcannaṁ ratanānaṁ pātubhāvo dullabho lokasmiṁ.
an5.143:1.5	Katamesaṁ pañcannaṁ?
an5.143:1.6	Hatthiratanassa pātubhāvo dullabho lokasmiṁ, assaratanassa pātubhāvo dullabho lokasmiṁ, maṇiratanassa pātubhāvo dullabho lokasmiṁ, itthiratanassa pātubhāvo dullabho lokasmiṁ, gahapatiratanassa pātubhāvo dullabho lokasmiṁ.
an5.143:1.7	Imesaṁ pañcannaṁ ratanānaṁ pātubhāvo dullabho lokasmin”ti.
an5.143:2.1	Atha kho te licchavī magge purisaṁ ṭhapesuṁ:
an5.143:2.2	“yadā tvaṁ, ambho purisa, passeyyāsi bhagavantaṁ, atha amhākaṁ āroceyyāsī”ti.
an5.143:2.3	Addasā kho so puriso bhagavantaṁ dūratova āgacchantaṁ;
an5.143:2.4	disvāna yena te licchavī tenupasaṅkami; upasaṅkamitvā te licchavī etadavoca:
an5.143:2.5	“ayaṁ so, bhante, bhagavā gacchati arahaṁ sammāsambuddho;
an5.143:2.6	yassadāni kālaṁ maññathā”ti.
an5.143:3.1	Atha kho te licchavī yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ aṭṭhaṁsu. Ekamantaṁ ṭhitā kho te licchavī bhagavantaṁ etadavocuṁ:
an5.143:4.1	“Sādhu, bhante, yena sārandadaṁ cetiyaṁ tenupasaṅkamatu anukampaṁ upādāyā”ti.
an5.143:4.2	Adhivāsesi bhagavā tuṇhībhāvena.
an5.143:4.3	Atha kho bhagavā yena sārandadaṁ cetiyaṁ tenupasaṅkami; upasaṅkamitvā paññatte āsane nisīdi. Nisajja kho bhagavā te licchavī etadavoca:
an5.143:4.4	“kāya nuttha, licchavī, etarahi kathāya sannisinnā, kā ca pana vo antarākathā vippakatā”ti?
an5.143:4.5	“Idha, bhante, amhākaṁ sannisinnānaṁ sannipatitānaṁ ayamantarākathā udapādi:
an5.143:4.6	‘pañcannaṁ ratanānaṁ pātubhāvo dullabho lokasmiṁ.
an5.143:4.7	Katamesaṁ pañcannaṁ?
an5.143:4.8	Hatthiratanassa pātubhāvo dullabho lokasmiṁ, assaratanassa pātubhāvo dullabho lokasmiṁ, maṇiratanassa pātubhāvo dullabho lokasmiṁ, itthiratanassa pātubhāvo dullabho lokasmiṁ, gahapatiratanassa pātubhāvo dullabho lokasmiṁ.
an5.143:4.9	Imesaṁ pañcannaṁ ratanānaṁ pātubhāvo dullabho lokasmin’”ti.
an5.143:5.1	“Kāmādhimuttānaṁ vata bho licchavīnaṁ kāmaṁyeva ārabbha antarākathā udapādi.
an5.143:5.2	Pañcannaṁ, licchavī, ratanānaṁ pātubhāvo dullabho lokasmiṁ.
an5.143:5.3	Katamesaṁ pañcannaṁ?
an5.143:5.4	Tathāgatassa arahato sammāsambuddhassa pātubhāvo dullabho lokasmiṁ,
an5.143:5.5	tathāgatappaveditassa dhammavinayassa desetā puggalo dullabho lokasmiṁ,
an5.143:5.6	tathāgatappaveditassa dhammavinayassa desitassa viññātā puggalo dullabho lokasmiṁ,
an5.143:5.7	tathāgatappaveditassa dhammavinayassa desitassa viññātā dhammānudhammappaṭipanno puggalo dullabho lokasmiṁ,
an5.143:5.8	kataññū katavedī puggalo dullabho lokasmiṁ.
an5.143:5.9	Imesaṁ kho, licchavī, pañcannaṁ ratanānaṁ pātubhāvo dullabho lokasmin”ti.
an5.143:5.10	Tatiyaṁ.
an5.144:0.1	Aṅguttara Nikāya 5.144
an5.144:0.2	15. Tikaṇḍakīvagga
an5.144:0.3	Tikaṇḍakīsutta
an5.144:1.1	Ekaṁ samayaṁ bhagavā sākete viharati tikaṇḍakīvane.
an5.144:1.2	Tatra kho bhagavā bhikkhū āmantesi:
an5.144:1.3	“bhikkhavo”ti.
an5.144:1.4	“Bhadante”ti te bhikkhū bhagavato paccassosuṁ.
an5.144:1.5	Bhagavā etadavoca:
an5.144:2.1	“Sādhu, bhikkhave, bhikkhu kālena kālaṁ appaṭikūle paṭikūlasaññī vihareyya.
an5.144:2.2	Sādhu, bhikkhave, bhikkhu kālena kālaṁ paṭikūle appaṭikūlasaññī vihareyya.
an5.144:2.3	Sādhu, bhikkhave, bhikkhu kālena kālaṁ appaṭikūle ca paṭikūle ca paṭikūlasaññī vihareyya.
an5.144:2.4	Sādhu, bhikkhave, bhikkhu kālena kālaṁ paṭikūle ca appaṭikūle ca appaṭikūlasaññī vihareyya.
an5.144:2.5	Sādhu, bhikkhave, bhikkhu kālena kālaṁ paṭikūlañca appaṭikūlañca tadubhayaṁ abhinivajjetvā upekkhako vihareyya sato sampajāno.
an5.144:3.1	Kiñca, bhikkhave, bhikkhu atthavasaṁ paṭicca appaṭikūle paṭikūlasaññī vihareyya?
an5.144:3.2	‘Mā me rajanīyesu dhammesu rāgo udapādī’ti—
an5.144:3.3	idaṁ kho, bhikkhave, bhikkhu atthavasaṁ paṭicca appaṭikūle paṭikūlasaññī vihareyya.
an5.144:4.1	Kiñca, bhikkhave, bhikkhu atthavasaṁ paṭicca paṭikūle appaṭikūlasaññī vihareyya?
an5.144:4.2	‘Mā me dosanīyesu dhammesu doso udapādī’ti—
an5.144:4.3	idaṁ kho, bhikkhave, bhikkhu atthavasaṁ paṭicca paṭikūle appaṭikūlasaññī vihareyya.
an5.144:5.1	Kiñca, bhikkhave, bhikkhu atthavasaṁ paṭicca appaṭikūle ca paṭikūle ca paṭikūlasaññī vihareyya?
an5.144:5.2	‘Mā me rajanīyesu dhammesu rāgo udapādi, mā me dosanīyesu dhammesu doso udapādī’ti—
an5.144:5.3	idaṁ kho, bhikkhave, bhikkhu atthavasaṁ paṭicca appaṭikūle ca paṭikūle ca paṭikūlasaññī vihareyya.
an5.144:6.1	Kiñca, bhikkhave, bhikkhu atthavasaṁ paṭicca paṭikūle ca appaṭikūle ca appaṭikūlasaññī vihareyya?
an5.144:6.2	‘Mā me dosanīyesu dhammesu doso udapādi, mā me rajanīyesu dhammesu rāgo udapādī’ti—
an5.144:6.3	idaṁ kho, bhikkhave, bhikkhu atthavasaṁ paṭicca paṭikūle ca appaṭikūle ca appaṭikūlasaññī vihareyya.
an5.144:7.1	Kiñca, bhikkhave, bhikkhu atthavasaṁ paṭicca paṭikūlañca appaṭikūlañca tadubhayaṁ abhinivajjetvā upekkhako vihareyya?
an5.144:7.2	‘Sato sampajāno mā me kvacani katthaci kiñcanaṁ rajanīyesu dhammesu rāgo udapādi, mā me kvacani katthaci kiñcanaṁ dosanīyesu dhammesu doso udapādi, mā me kvacani katthaci kiñcanaṁ mohanīyesu dhammesu moho udapādī’ti—
an5.144:7.3	idaṁ kho, bhikkhave, bhikkhu atthavasaṁ paṭicca paṭikūlañca appaṭikūlañca tadubhayaṁ abhinivajjetvā upekkhako vihareyya sato sampajāno”ti.
an5.144:7.4	Catutthaṁ.
an5.145:0.1	Aṅguttara Nikāya 5.145
an5.145:0.2	15. Tikaṇḍakīvagga
an5.145:0.3	Nirayasutta
an5.145:1.1	“Pañcahi, bhikkhave, dhammehi samannāgato yathābhataṁ nikkhitto evaṁ niraye.
an5.145:1.2	Katamehi pañcahi?
an5.145:1.3	Pāṇātipātī hoti, adinnādāyī hoti, kāmesumicchācārī hoti, musāvādī hoti, surāmerayamajjapamādaṭṭhāyī hoti.
an5.145:1.4	Imehi kho, bhikkhave, pañcahi dhammehi samannāgato yathābhataṁ nikkhitto evaṁ niraye.
an5.145:2.1	Pañcahi, bhikkhave, dhammehi samannāgato yathābhataṁ nikkhitto evaṁ sagge.
an5.145:2.2	Katamehi pañcahi?
an5.145:2.3	Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti.
an5.145:2.4	Imehi kho, bhikkhave, pañcahi dhammehi samannāgato yathābhataṁ nikkhitto evaṁ sagge”ti.
an5.145:2.5	Pañcamaṁ.
an5.146:0.1	Aṅguttara Nikāya 5.146
an5.146:0.2	15. Tikaṇḍakīvagga
an5.146:0.3	Mittasutta
an5.146:1.1	“Pañcahi, bhikkhave, dhammehi samannāgato bhikkhu mitto na sevitabbo.
an5.146:1.2	Katamehi pañcahi?
an5.146:1.3	Kammantaṁ kāreti, adhikaraṇaṁ ādiyati, pāmokkhesu bhikkhūsu paṭiviruddho hoti, dīghacārikaṁ anavatthacārikaṁ anuyutto viharati, nappaṭibalo hoti kālena kālaṁ dhammiyā kathāya sandassetuṁ samādapetuṁ samuttejetuṁ sampahaṁsetuṁ.
an5.146:1.4	Imehi kho, bhikkhave, pañcahi dhammehi samannāgato bhikkhu mitto na sevitabbo.
an5.146:2.1	Pañcahi, bhikkhave, dhammehi samannāgato bhikkhu mitto sevitabbo.
an5.146:2.2	Katamehi pañcahi?
an5.146:2.3	Na kammantaṁ kāreti, na adhikaraṇaṁ ādiyati, na pāmokkhesu bhikkhūsu paṭiviruddho hoti, na dīghacārikaṁ anavatthacārikaṁ anuyutto viharati, paṭibalo hoti kālena kālaṁ dhammiyā kathāya sandassetuṁ samādapetuṁ samuttejetuṁ sampahaṁsetuṁ.
an5.146:2.4	Imehi kho, bhikkhave, pañcahi dhammehi samannāgato bhikkhu mitto sevitabbo”ti.
an5.146:2.5	Chaṭṭhaṁ.
an5.147:0.1	Aṅguttara Nikāya 5.147
an5.147:0.2	15. Tikaṇḍakīvagga
an5.147:0.3	Asappurisadānasutta
an5.147:1.1	“Pañcimāni, bhikkhave, asappurisadānāni.
an5.147:1.2	Katamāni pañca?
an5.147:1.3	Asakkaccaṁ deti, acittīkatvā deti, asahatthā deti, apaviddhaṁ deti, anāgamanadiṭṭhiko deti.
an5.147:1.4	Imāni kho, bhikkhave, pañca asappurisadānāni.
an5.147:2.1	Pañcimāni, bhikkhave, sappurisadānāni.
an5.147:2.2	Katamāni pañca?
an5.147:2.3	Sakkaccaṁ deti, cittīkatvā deti, sahatthā deti, anapaviddhaṁ deti, āgamanadiṭṭhiko deti.
an5.147:2.4	Imāni kho, bhikkhave, pañca sappurisadānānī”ti.
an5.147:2.5	Sattamaṁ.
an5.148:0.1	Aṅguttara Nikāya 5.148
an5.148:0.2	15. Tikaṇḍakīvagga
an5.148:0.3	Sappurisadānasutta
an5.148:1.1	“Pañcimāni, bhikkhave, sappurisadānāni.
an5.148:1.2	Katamāni pañca?
an5.148:1.3	Saddhāya dānaṁ deti, sakkaccaṁ dānaṁ deti, kālena dānaṁ deti, anuggahitacitto dānaṁ deti, attānañca parañca anupahacca dānaṁ deti.
an5.148:2.1	Saddhāya kho pana, bhikkhave, dānaṁ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo, abhirūpo ca hoti dassanīyo pāsādiko paramāya vaṇṇapokkharatāya samannāgato.
an5.148:3.1	Sakkaccaṁ kho pana, bhikkhave, dānaṁ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo.
an5.148:3.2	Yepissa te honti puttāti vā dārāti vā dāsāti vā pessāti vā kammakarāti vā, tepi sussūsanti sotaṁ odahanti aññā cittaṁ upaṭṭhapenti.
an5.148:4.1	Kālena kho pana, bhikkhave, dānaṁ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo;
an5.148:4.2	kālāgatā cassa atthā pacurā honti.
an5.148:5.1	Anuggahitacitto kho pana, bhikkhave, dānaṁ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo;
an5.148:5.2	uḷāresu ca pañcasu kāmaguṇesu bhogāya cittaṁ namati.
an5.148:6.1	Attānañca parañca anupahacca kho pana, bhikkhave, dānaṁ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo;
an5.148:6.2	na cassa kutoci bhogānaṁ upaghāto āgacchati aggito vā udakato vā rājato vā corato vā appiyato vā dāyādato.
an5.148:6.3	Imāni kho, bhikkhave, pañca sappurisadānānī”ti.
an5.148:6.4	Aṭṭhamaṁ.
an5.149:0.1	Aṅguttara Nikāya 5.149
an5.149:0.2	15. Tikaṇḍakīvagga
an5.149:0.3	Paṭhamasamayavimuttasutta
an5.149:1.1	“Pañcime, bhikkhave, dhammā samayavimuttassa bhikkhuno parihānāya saṁvattanti.
an5.149:1.2	Katame pañca?
an5.149:1.3	Kammārāmatā, bhassārāmatā, niddārāmatā, saṅgaṇikārāmatā, yathāvimuttaṁ cittaṁ na paccavekkhati.
an5.149:1.4	Ime kho, bhikkhave, pañca dhammā samayavimuttassa bhikkhuno parihānāya saṁvattanti.
an5.149:2.1	Pañcime, bhikkhave, dhammā samayavimuttassa bhikkhuno aparihānāya saṁvattanti.
an5.149:2.2	Katame pañca?
an5.149:2.3	Na kammārāmatā, na bhassārāmatā, na niddārāmatā, na saṅgaṇikārāmatā, yathāvimuttaṁ cittaṁ paccavekkhati.
an5.149:2.4	Ime kho, bhikkhave, pañca dhammā samayavimuttassa bhikkhuno aparihānāya saṁvattantī”ti.
an5.149:2.5	Navamaṁ.
an5.150:0.1	Aṅguttara Nikāya 5.150
an5.150:0.2	15. Tikaṇḍakīvagga
an5.150:0.3	Dutiyasamayavimuttasutta
an5.150:1.1	“Pañcime, bhikkhave, dhammā samayavimuttassa bhikkhuno parihānāya saṁvattanti.
an5.150:1.2	Katame pañca?
an5.150:1.3	Kammārāmatā, bhassārāmatā, niddārāmatā, indriyesu aguttadvāratā, bhojane amattaññutā.
an5.150:1.4	Ime kho, bhikkhave, pañca dhammā samayavimuttassa bhikkhuno parihānāya saṁvattanti.
an5.150:2.1	Pañcime, bhikkhave, dhammā samayavimuttassa bhikkhuno aparihānāya saṁvattanti.
an5.150:2.2	Katame pañca?
an5.150:2.3	Na kammārāmatā, na bhassārāmatā, na niddārāmatā, indriyesu guttadvāratā, bhojane mattaññutā.
an5.150:2.4	Ime kho, bhikkhave, pañca dhammā samayavimuttassa bhikkhuno aparihānāya saṁvattantī”ti.
an5.150:2.5	Dasamaṁ.
an5.150:2.6	Tikaṇḍakīvaggo pañcamo.
an5.150:3.0	Tassuddānaṁ
an5.150:3.1	Datvā avajānāti ārabhati ca,
an5.150:3.2	Sārandada tikaṇḍa nirayena ca;
an5.150:3.3	Mitto asappurisasappurisena,
an5.150:3.4	Samayavimuttaṁ apare dveti.
an5.150:3.5	Tatiyo paṇṇāsako samatto.
an5.151:0.1	Aṅguttara Nikāya 5.151
an5.151:0.2	16. Saddhammavagga
an5.151:0.3	Paṭhamasammattaniyāmasutta
an5.151:1.1	“Pañcahi, bhikkhave, dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an5.151:1.2	Katamehi pañcahi?
an5.151:1.3	Kathaṁ paribhoti, kathikaṁ paribhoti, attānaṁ paribhoti, vikkhittacitto dhammaṁ suṇāti, anekaggacitto ayoniso ca manasi karoti.
an5.151:1.4	Imehi kho, bhikkhave, pañcahi dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an5.151:2.1	Pañcahi, bhikkhave, dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattaṁ.
an5.151:2.2	Katamehi pañcahi?
an5.151:2.3	Na kathaṁ paribhoti, na kathikaṁ paribhoti, na attānaṁ paribhoti, avikkhittacitto dhammaṁ suṇāti, ekaggacitto yoniso ca manasi karoti.
an5.151:2.4	Imehi kho, bhikkhave, pañcahi dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattan”ti.
an5.151:2.5	Paṭhamaṁ.
an5.152:0.1	Aṅguttara Nikāya 5.152
an5.152:0.2	16. Saddhammavagga
an5.152:0.3	Dutiyasammattaniyāmasutta
an5.152:1.1	“Pañcahi, bhikkhave, dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an5.152:1.2	Katamehi pañcahi?
an5.152:1.3	Kathaṁ paribhoti, kathikaṁ paribhoti, attānaṁ paribhoti, duppañño hoti jaḷo eḷamūgo, anaññāte aññātamānī hoti.
an5.152:1.4	Imehi kho, bhikkhave, pañcahi dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an5.152:2.1	Pañcahi, bhikkhave, dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattaṁ.
an5.152:2.2	Katamehi pañcahi?
an5.152:2.3	Na kathaṁ paribhoti, na kathikaṁ paribhoti, na attānaṁ paribhoti, paññavā hoti ajaḷo aneḷamūgo, na anaññāte aññātamānī hoti.
an5.152:2.4	Imehi kho, bhikkhave, pañcahi dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattan”ti.
an5.152:2.5	Dutiyaṁ.
an5.153:0.1	Aṅguttara Nikāya 5.153
an5.153:0.2	16. Saddhammavagga
an5.153:0.3	Tatiyasammattaniyāmasutta
an5.153:1.1	“Pañcahi, bhikkhave, dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an5.153:1.2	Katamehi pañcahi?
an5.153:1.3	Makkhī dhammaṁ suṇāti makkhapariyuṭṭhito, upārambhacitto dhammaṁ suṇāti randhagavesī, dhammadesake āhatacitto hoti khīlajāto, duppañño hoti jaḷo eḷamūgo, anaññāte aññātamānī hoti.
an5.153:1.4	Imehi kho, bhikkhave, pañcahi dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an5.153:2.1	Pañcahi, bhikkhave, dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattaṁ.
an5.153:2.2	Katamehi pañcahi?
an5.153:2.3	Amakkhī dhammaṁ suṇāti na makkhapariyuṭṭhito, anupārambhacitto dhammaṁ suṇāti na randhagavesī, dhammadesake anāhatacitto hoti akhīlajāto, paññavā hoti ajaḷo aneḷamūgo, na anaññāte aññātamānī hoti.
an5.153:2.4	Imehi kho, bhikkhave, pañcahi dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattan”ti.
an5.153:2.5	Tatiyaṁ.
an5.154:0.1	Aṅguttara Nikāya 5.154
an5.154:0.2	16. Saddhammavagga
an5.154:0.3	Paṭhamasaddhammasammosasutta
an5.154:1.1	“Pañcime, bhikkhave, dhammā saddhammassa sammosāya antaradhānāya saṁvattanti.
an5.154:1.2	Katame pañca?
an5.154:1.3	Idha, bhikkhave, bhikkhū na sakkaccaṁ dhammaṁ suṇanti, na sakkaccaṁ dhammaṁ pariyāpuṇanti, na sakkaccaṁ dhammaṁ dhārenti, na sakkaccaṁ dhātānaṁ dhammānaṁ atthaṁ upaparikkhanti, na sakkaccaṁ atthamaññāya dhammamaññāya dhammānudhammaṁ paṭipajjanti.
an5.154:1.4	Ime kho, bhikkhave, pañca dhammā saddhammassa sammosāya antaradhānāya saṁvattanti.
an5.154:2.1	Pañcime, bhikkhave, dhammā saddhammassa ṭhitiyā asammosāya anantaradhānāya saṁvattanti.
an5.154:2.2	Katame pañca?
an5.154:2.3	Idha, bhikkhave, bhikkhū sakkaccaṁ dhammaṁ suṇanti, sakkaccaṁ dhammaṁ pariyāpuṇanti, sakkaccaṁ dhammaṁ dhārenti, sakkaccaṁ dhātānaṁ dhammānaṁ atthaṁ upaparikkhanti, sakkaccaṁ atthamaññāya dhammamaññāya dhammānudhammaṁ paṭipajjanti.
an5.154:2.4	Ime kho, bhikkhave, pañca dhammā saddhammassa ṭhitiyā asammosāya anantaradhānāya saṁvattantī”ti.
an5.154:2.5	Catutthaṁ.
an5.155:0.1	Aṅguttara Nikāya 5.155
an5.155:0.2	16. Saddhammavagga
an5.155:0.3	Dutiyasaddhammasammosasutta
an5.155:1.1	“Pañcime, bhikkhave, dhammā saddhammassa sammosāya antaradhānāya saṁvattanti.
an5.155:1.2	Katame pañca?
an5.155:1.3	Idha, bhikkhave, bhikkhū dhammaṁ na pariyāpuṇanti—
an5.155:1.4	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an5.155:1.5	Ayaṁ, bhikkhave, paṭhamo dhammo saddhammassa sammosāya antaradhānāya saṁvattati.
an5.155:2.1	Puna caparaṁ, bhikkhave, bhikkhū yathāsutaṁ yathāpariyattaṁ dhammaṁ na vitthārena paresaṁ desenti.
an5.155:2.2	Ayaṁ, bhikkhave, dutiyo dhammo saddhammassa sammosāya antaradhānāya saṁvattati.
an5.155:3.1	Puna caparaṁ, bhikkhave, bhikkhū yathāsutaṁ yathāpariyattaṁ dhammaṁ na vitthārena paraṁ vācenti.
an5.155:3.2	Ayaṁ, bhikkhave, tatiyo dhammo saddhammassa sammosāya antaradhānāya saṁvattati.
an5.155:4.1	Puna caparaṁ, bhikkhave, bhikkhū yathāsutaṁ yathāpariyattaṁ dhammaṁ na vitthārena sajjhāyaṁ karonti.
an5.155:4.2	Ayaṁ, bhikkhave, catuttho dhammo saddhammassa sammosāya antaradhānāya saṁvattati.
an5.155:5.1	Puna caparaṁ, bhikkhave, bhikkhū yathāsutaṁ yathāpariyattaṁ dhammaṁ na cetasā anuvitakkenti anuvicārenti manasānupekkhanti.
an5.155:5.2	Ayaṁ, bhikkhave, pañcamo dhammo saddhammassa sammosāya antaradhānāya saṁvattati.
an5.155:5.3	Ime kho, bhikkhave, pañca dhammā saddhammassa sammosāya antaradhānāya saṁvattanti.
an5.155:6.1	Pañcime, bhikkhave, dhammā saddhammassa ṭhitiyā asammosāya anantaradhānāya saṁvattanti.
an5.155:6.2	Katame pañca?
an5.155:6.3	Idha, bhikkhave, bhikkhū dhammaṁ pariyāpuṇanti—
an5.155:6.4	suttaṁ, geyyaṁ, veyyākaraṇaṁ, gāthaṁ, udānaṁ, itivuttakaṁ, jātakaṁ, abbhutadhammaṁ, vedallaṁ.
an5.155:6.5	Ayaṁ, bhikkhave, paṭhamo dhammo saddhammassa ṭhitiyā asammosāya anantaradhānāya saṁvattati.
an5.155:7.1	Puna caparaṁ, bhikkhave, bhikkhū yathāsutaṁ yathāpariyattaṁ dhammaṁ vitthārena paresaṁ desenti.
an5.155:7.2	Ayaṁ, bhikkhave, dutiyo dhammo saddhammassa ṭhitiyā asammosāya anantaradhānāya saṁvattati.
an5.155:8.1	Puna caparaṁ, bhikkhave, bhikkhū yathāsutaṁ yathāpariyattaṁ dhammaṁ vitthārena paraṁ vācenti.
an5.155:8.2	Ayaṁ, bhikkhave, tatiyo dhammo saddhammassa ṭhitiyā asammosāya anantaradhānāya saṁvattati.
an5.155:9.1	Puna caparaṁ, bhikkhave, bhikkhū yathāsutaṁ yathāpariyattaṁ dhammaṁ vitthārena sajjhāyaṁ karonti.
an5.155:9.2	Ayaṁ, bhikkhave, catuttho dhammo saddhammassa ṭhitiyā asammosāya anantaradhānāya saṁvattati.
an5.155:10.1	Puna caparaṁ, bhikkhave, bhikkhū yathāsutaṁ yathāpariyattaṁ dhammaṁ cetasā anuvitakkenti anuvicārenti manasānupekkhanti.
an5.155:10.2	Ayaṁ, bhikkhave, pañcamo dhammo saddhammassa ṭhitiyā asammosāya anantaradhānāya saṁvattati.
an5.155:10.3	Ime kho, bhikkhave, pañca dhammā saddhammassa ṭhitiyā asammosāya anantaradhānāya saṁvattantī”ti.
an5.155:10.4	Pañcamaṁ.
an5.156:0.1	Aṅguttara Nikāya 5.156
an5.156:0.2	16. Saddhammavagga
an5.156:0.3	Tatiyasaddhammasammosasutta
an5.156:1.1	“Pañcime, bhikkhave, dhammā saddhammassa sammosāya antaradhānāya saṁvattanti.
an5.156:1.2	Katame pañca?
an5.156:1.3	Idha, bhikkhave, bhikkhū duggahitaṁ suttantaṁ pariyāpuṇanti dunnikkhittehi padabyañjanehi.
an5.156:1.4	Dunnikkhittassa, bhikkhave, padabyañjanassa atthopi dunnayo hoti.
an5.156:1.5	Ayaṁ, bhikkhave, paṭhamo dhammo saddhammassa sammosāya antaradhānāya saṁvattati.
an5.156:2.1	Puna caparaṁ, bhikkhave, bhikkhū dubbacā honti, dovacassakaraṇehi dhammehi samannāgatā, akkhamā appadakkhiṇaggāhino anusāsaniṁ.
an5.156:2.2	Ayaṁ, bhikkhave, dutiyo dhammo saddhammassa sammosāya antaradhānāya saṁvattati.
an5.156:3.1	Puna caparaṁ, bhikkhave, ye te bhikkhū bahussutā āgatāgamā dhammadharā vinayadharā mātikādharā, te na sakkaccaṁ suttantaṁ paraṁ vācenti;
an5.156:3.2	tesaṁ accayena chinnamūlako suttanto hoti appaṭisaraṇo.
an5.156:3.3	Ayaṁ, bhikkhave, tatiyo dhammo saddhammassa sammosāya antaradhānāya saṁvattati.
an5.156:4.1	Puna caparaṁ, bhikkhave, therā bhikkhū bāhulikā honti sāthalikā okkamane pubbaṅgamā paviveke nikkhittadhurā, na vīriyaṁ ārabhanti appattassa pattiyā anadhigatassa adhigamāya asacchikatassa sacchikiriyāya.
an5.156:4.2	Tesaṁ pacchimā janatā diṭṭhānugatiṁ āpajjati.
an5.156:4.3	Sāpi hoti bāhulikā sāthalikā okkamane pubbaṅgamā paviveke nikkhittadhurā, na vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an5.156:4.4	Ayaṁ, bhikkhave, catuttho dhammo saddhammassa sammosāya antaradhānāya saṁvattati.
an5.156:5.1	Puna caparaṁ, bhikkhave, saṅgho bhinno hoti.
an5.156:5.2	Saṅghe kho pana, bhikkhave, bhinne aññamaññaṁ akkosā ca honti, aññamaññaṁ paribhāsā ca honti, aññamaññaṁ parikkhepā ca honti, aññamaññaṁ pariccajanā ca honti.
an5.156:5.3	Tattha appasannā ceva nappasīdanti, pasannānañca ekaccānaṁ aññathattaṁ hoti.
an5.156:5.4	Ayaṁ, bhikkhave, pañcamo dhammo saddhammassa sammosāya antaradhānāya saṁvattati.
an5.156:5.5	Ime kho, bhikkhave, pañca dhammā saddhammassa sammosāya antaradhānāya saṁvattanti.
an5.156:6.1	Pañcime, bhikkhave, dhammā saddhammassa ṭhitiyā asammosāya anantaradhānāya saṁvattanti.
an5.156:6.2	Katame pañca?
an5.156:6.3	Idha, bhikkhave, bhikkhū suggahitaṁ suttantaṁ pariyāpuṇanti sunikkhittehi padabyañjanehi.
an5.156:6.4	Sunikkhittassa, bhikkhave, padabyañjanassa atthopi sunayo hoti.
an5.156:6.5	Ayaṁ, bhikkhave, paṭhamo dhammo saddhammassa ṭhitiyā asammosāya anantaradhānāya saṁvattati.
an5.156:7.1	Puna caparaṁ, bhikkhave, bhikkhū suvacā honti sovacassakaraṇehi dhammehi samannāgatā, khamā padakkhiṇaggāhino anusāsaniṁ.
an5.156:7.2	Ayaṁ, bhikkhave, dutiyo dhammo saddhammassa ṭhitiyā asammosāya anantaradhānāya saṁvattati.
an5.156:8.1	Puna caparaṁ, bhikkhave, ye te bhikkhū bahussutā āgatāgamā dhammadharā vinayadharā mātikādharā, te sakkaccaṁ suttantaṁ paraṁ vācenti;
an5.156:8.2	tesaṁ accayena na chinnamūlako suttanto hoti sappaṭisaraṇo.
an5.156:8.3	Ayaṁ, bhikkhave, tatiyo dhammo saddhammassa ṭhitiyā asammosāya anantaradhānāya saṁvattati.
an5.156:9.1	Puna caparaṁ, bhikkhave, therā bhikkhū na bāhulikā honti na sāthalikā, okkamane nikkhittadhurā paviveke pubbaṅgamā; vīriyaṁ ārabhanti appattassa pattiyā anadhigatassa adhigamāya asacchikatassa sacchikiriyāya.
an5.156:9.2	Tesaṁ pacchimā janatā diṭṭhānugatiṁ āpajjati.
an5.156:9.3	Sāpi hoti na bāhulikā na sāthalikā, okkamane nikkhittadhurā paviveke pubbaṅgamā, vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an5.156:9.4	Ayaṁ, bhikkhave, catuttho dhammo saddhammassa ṭhitiyā asammosāya anantaradhānāya saṁvattati.
an5.156:10.1	Puna caparaṁ, bhikkhave, saṅgho samaggo sammodamāno avivadamāno ekuddeso phāsuṁ viharati.
an5.156:10.2	Saṅghe kho pana, bhikkhave, samagge na ceva aññamaññaṁ akkosā honti, na ca aññamaññaṁ paribhāsā honti, na ca aññamaññaṁ parikkhepā honti, na ca aññamaññaṁ pariccajanā honti.
an5.156:10.3	Tattha appasannā ceva pasīdanti, pasannānañca bhiyyobhāvo hoti.
an5.156:10.4	Ayaṁ, bhikkhave, pañcamo dhammo saddhammassa ṭhitiyā asammosāya anantaradhānāya saṁvattati.
an5.156:10.5	Ime kho, bhikkhave, pañca dhammā saddhammassa ṭhitiyā asammosāya anantaradhānāya saṁvattantī”ti.
an5.156:10.6	Chaṭṭhaṁ.
an5.157:0.1	Aṅguttara Nikāya 5.157
an5.157:0.2	16. Saddhammavagga
an5.157:0.3	Dukkathāsutta
an5.157:1.1	“Pañcannaṁ, bhikkhave, puggalānaṁ kathā dukkathā puggale puggalaṁ upanidhāya.
an5.157:1.2	Katamesaṁ pañcannaṁ?
an5.157:1.3	Assaddhassa, bhikkhave, saddhākathā dukkathā;
an5.157:1.4	dussīlassa sīlakathā dukkathā;
an5.157:1.5	appassutassa bāhusaccakathā dukkathā;
an5.157:1.6	maccharissa cāgakathā dukkathā;
an5.157:1.7	duppaññassa paññākathā dukkathā.
an5.157:2.1	Kasmā ca, bhikkhave, assaddhassa saddhākathā dukkathā?
an5.157:2.2	Assaddho, bhikkhave, saddhākathāya kacchamānāya abhisajjati kuppati byāpajjati patitthīyati kopañca dosañca appaccayañca pātukaroti.
an5.157:2.3	Taṁ kissa hetu?
an5.157:2.4	Tañhi so, bhikkhave, saddhāsampadaṁ attani na samanupassati, na ca labhati tatonidānaṁ pītipāmojjaṁ.
an5.157:2.5	Tasmā assaddhassa saddhākathā dukkathā.
an5.157:3.1	Kasmā ca, bhikkhave, dussīlassa sīlakathā dukkathā?
an5.157:3.2	Dussīlo, bhikkhave, sīlakathāya kacchamānāya abhisajjati kuppati byāpajjati patitthīyati kopañca dosañca appaccayañca pātukaroti.
an5.157:3.3	Taṁ kissa hetu?
an5.157:3.4	Tañhi so, bhikkhave, sīlasampadaṁ attani na samanupassati na ca labhati tatonidānaṁ pītipāmojjaṁ.
an5.157:3.5	Tasmā dussīlassa sīlakathā dukkathā.
an5.157:4.1	Kasmā ca, bhikkhave, appassutassa bāhusaccakathā dukkathā?
an5.157:4.2	Appassuto, bhikkhave, bāhusaccakathāya kacchamānāya abhisajjati kuppati byāpajjati patitthīyati kopañca dosañca appaccayañca pātukaroti.
an5.157:4.3	Taṁ kissa hetu?
an5.157:4.4	Tañhi so, bhikkhave, sutasampadaṁ attani na samanupassati, na ca labhati tatonidānaṁ pītipāmojjaṁ.
an5.157:4.5	Tasmā appassutassa bāhusaccakathā dukkathā.
an5.157:5.1	Kasmā ca, bhikkhave, maccharissa cāgakathā dukkathā?
an5.157:5.2	Maccharī, bhikkhave, cāgakathāya kacchamānāya abhisajjati kuppati byāpajjati patitthīyati kopañca dosañca appaccayañca pātukaroti.
an5.157:5.3	Taṁ kissa hetu?
an5.157:5.4	Tañhi so, bhikkhave, cāgasampadaṁ attani na samanupassati na ca labhati tatonidānaṁ pītipāmojjaṁ.
an5.157:5.5	Tasmā maccharissa cāgakathā dukkathā.
an5.157:6.1	Kasmā ca, bhikkhave, duppaññassa paññākathā dukkathā?
an5.157:6.2	Duppañño, bhikkhave, paññākathāya kacchamānāya abhisajjati kuppati byāpajjati patitthīyati kopañca dosañca appaccayañca pātukaroti.
an5.157:6.3	Taṁ kissa hetu?
an5.157:6.4	Tañhi so, bhikkhave, paññāsampadaṁ attani na samanupassati, na ca labhati tatonidānaṁ pītipāmojjaṁ.
an5.157:6.5	Tasmā duppaññassa paññākathā dukkathā.
an5.157:6.6	Imesaṁ kho, bhikkhave, pañcannaṁ puggalānaṁ kathā dukkathā puggale puggalaṁ upanidhāya.
an5.157:7.1	Pañcannaṁ, bhikkhave, puggalānaṁ kathā sukathā puggale puggalaṁ upanidhāya.
an5.157:7.2	Katamesaṁ pañcannaṁ?
an5.157:7.3	Saddhassa, bhikkhave, saddhākathā sukathā;
an5.157:7.4	sīlavato sīlakathā sukathā;
an5.157:7.5	bahussutassa bāhusaccakathā sukathā;
an5.157:7.6	cāgavato cāgakathā sukathā;
an5.157:7.7	paññavato paññākathā sukathā.
an5.157:8.1	Kasmā ca, bhikkhave, saddhassa saddhākathā sukathā?
an5.157:8.2	Saddho, bhikkhave, saddhākathāya kacchamānāya nābhisajjati na kuppati na byāpajjati na patitthīyati na kopañca dosañca appaccayañca pātukaroti.
an5.157:8.3	Taṁ kissa hetu?
an5.157:8.4	Tañhi so, bhikkhave, saddhāsampadaṁ attani samanupassati labhati ca tatonidānaṁ pītipāmojjaṁ.
an5.157:8.5	Tasmā saddhassa saddhākathā sukathā.
an5.157:9.1	Kasmā ca, bhikkhave, sīlavato sīlakathā sukathā?
an5.157:9.2	Sīlavā, bhikkhave, sīlakathāya kacchamānāya nābhisajjati na kuppati na byāpajjati na patitthīyati na kopañca dosañca appaccayañca pātukaroti.
an5.157:9.3	Taṁ kissa hetu?
an5.157:9.4	Tañhi so, bhikkhave, sīlasampadaṁ attani samanupassati, labhati ca tatonidānaṁ pītipāmojjaṁ.
an5.157:9.5	Tasmā sīlavato sīlakathā sukathā.
an5.157:10.1	Kasmā ca, bhikkhave, bahussutassa bāhusaccakathā sukathā?
an5.157:10.2	Bahussuto, bhikkhave, bāhusaccakathāya kacchamānāya nābhisajjati na kuppati na byāpajjati na patitthīyati na kopañca dosañca appaccayañca pātukaroti.
an5.157:10.3	Taṁ kissa hetu?
an5.157:10.4	Tañhi so, bhikkhave, sutasampadaṁ attani samanupassati, labhati ca tatonidānaṁ pītipāmojjaṁ.
an5.157:10.5	Tasmā bahussutassa bāhusaccakathā sukathā.
an5.157:11.1	Kasmā ca, bhikkhave, cāgavato cāgakathā sukathā?
an5.157:11.2	Cāgavā, bhikkhave, cāgakathāya kacchamānāya nābhisajjati na kuppati na byāpajjati na patitthīyati na kopañca dosañca appaccayañca pātukaroti.
an5.157:11.3	Taṁ kissa hetu?
an5.157:11.4	Tañhi so, bhikkhave, cāgasampadaṁ attani samanupassati, labhati ca tatonidānaṁ pītipāmojjaṁ.
an5.157:11.5	Tasmā cāgavato cāgakathā sukathā.
an5.157:12.1	Kasmā ca, bhikkhave, paññavato paññākathā sukathā?
an5.157:12.2	Paññavā, bhikkhave, paññākathāya kacchamānāya nābhisajjati na kuppati na byāpajjati na patitthīyati na kopañca dosañca appaccayañca pātukaroti.
an5.157:12.3	Taṁ kissa hetu?
an5.157:12.4	Tañhi so, bhikkhave, paññāsampadaṁ attani samanupassati labhati ca tatonidānaṁ pītipāmojjaṁ.
an5.157:12.5	Tasmā paññavato paññākathā sukathā.
an5.157:12.6	Imesaṁ kho, bhikkhave, pañcannaṁ puggalānaṁ kathā sukathā puggale puggalaṁ upanidhāyā”ti.
an5.157:12.7	Sattamaṁ.
an5.158:0.1	Aṅguttara Nikāya 5.158
an5.158:0.2	16. Saddhammavagga
an5.158:0.3	Sārajjasutta
an5.158:1.1	“Pañcahi, bhikkhave, dhammehi samannāgato bhikkhu sārajjaṁ okkanto hoti.
an5.158:1.2	Katamehi pañcahi?
an5.158:1.3	Idha, bhikkhave, bhikkhu assaddho hoti, dussīlo hoti, appassuto hoti, kusīto hoti, duppañño hoti.
an5.158:1.4	Imehi kho, bhikkhave, pañcahi, dhammehi samannāgato bhikkhu sārajjaṁ okkanto hoti.
an5.158:2.1	Pañcahi, bhikkhave, dhammehi samannāgato bhikkhu visārado hoti.
an5.158:2.2	Katamehi pañcahi?
an5.158:2.3	Idha, bhikkhave, bhikkhu saddho hoti, sīlavā hoti, bahussuto hoti, āraddhavīriyo hoti, paññavā hoti.
an5.158:2.4	Imehi kho, bhikkhave, pañcahi dhammehi samannāgato bhikkhu visārado hotī”ti.
an5.158:2.5	Aṭṭhamaṁ.
an5.159:0.1	Aṅguttara Nikāya 5.159
an5.159:0.2	16. Saddhammavagga
an5.159:0.3	Udāyīsutta
an5.159:1.1	Evaṁ me sutaṁ—
an5.159:1.2	ekaṁ samayaṁ bhagavā kosambiyaṁ viharati ghositārāme.
an5.159:1.3	Tena kho pana samayena āyasmā udāyī mahatiyā gihiparisāya parivuto dhammaṁ desento nisinno hoti.
an5.159:1.4	Addasā kho āyasmā ānando āyasmantaṁ udāyiṁ mahatiyā gihiparisāya parivutaṁ dhammaṁ desentaṁ nisinnaṁ.
an5.159:1.5	Disvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an5.159:1.6	“āyasmā, bhante, udāyī mahatiyā gihiparisāya parivuto dhammaṁ desetī”ti.
an5.159:2.1	“Na kho, ānanda, sukaraṁ paresaṁ dhammaṁ desetuṁ.
an5.159:2.2	Paresaṁ, ānanda, dhammaṁ desentena pañca dhamme ajjhattaṁ upaṭṭhāpetvā paresaṁ dhammo desetabbo.
an5.159:2.3	Katame pañca?
an5.159:2.4	‘Anupubbiṁ kathaṁ kathessāmī’ti paresaṁ dhammo desetabbo;
an5.159:2.5	‘pariyāyadassāvī kathaṁ kathessāmī’ti paresaṁ dhammo desetabbo;
an5.159:2.6	‘anuddayataṁ paṭicca kathaṁ kathessāmī’ti paresaṁ dhammo desetabbo;
an5.159:2.7	‘na āmisantaro kathaṁ kathessāmī’ti paresaṁ dhammo desetabbo;
an5.159:2.8	‘attānañca parañca anupahacca kathaṁ kathessāmī’ti paresaṁ dhammo desetabbo.
an5.159:2.9	Na kho, ānanda, sukaraṁ paresaṁ dhammaṁ desetuṁ.
an5.159:2.10	Paresaṁ, ānanda, dhammaṁ desentena ime pañca dhamme ajjhattaṁ upaṭṭhāpetvā paresaṁ dhammo desetabbo”ti.
an5.159:2.11	Navamaṁ.
an5.160:0.1	Aṅguttara Nikāya 5.160
an5.160:0.2	16. Saddhammavagga
an5.160:0.3	Duppaṭivinodayasutta
an5.160:1.1	“Pañcime, bhikkhave, uppannā duppaṭivinodayā.
an5.160:1.2	Katame pañca?
an5.160:1.3	Uppanno rāgo duppaṭivinodayo, uppanno doso duppaṭivinodayo, uppanno moho duppaṭivinodayo, uppannaṁ paṭibhānaṁ duppaṭivinodayaṁ, uppannaṁ gamikacittaṁ duppaṭivinodayaṁ.
an5.160:1.4	Ime kho, bhikkhave, pañca uppannā duppaṭivinodayā”ti.
an5.160:1.5	Dasamaṁ.
an5.160:1.6	Saddhammavaggo paṭhamo.
an5.160:2.0	Tassuddānaṁ
an5.160:2.1	Tayo sammattaniyāmā,
an5.160:2.2	tayo saddhammasammosā;
an5.160:2.3	Dukkathā ceva sārajjaṁ,
an5.160:2.4	udāyidubbinodayāti.
an5.161:0.1	Aṅguttara Nikāya 5.161
an5.161:0.2	17. Āghātavagga
an5.161:0.3	Paṭhamaāghātapaṭivinayasutta
an5.161:1.1	“Pañcime, bhikkhave, āghātapaṭivinayā yattha bhikkhuno uppanno āghāto sabbaso paṭivinetabbo.
an5.161:1.2	Katame pañca?
an5.161:1.3	Yasmiṁ, bhikkhave, puggale āghāto jāyetha, mettā tasmiṁ puggale bhāvetabbā;
an5.161:1.4	evaṁ tasmiṁ puggale āghāto paṭivinetabbo.
an5.161:1.5	Yasmiṁ, bhikkhave, puggale āghāto jāyetha, karuṇā tasmiṁ puggale bhāvetabbā;
an5.161:1.6	evaṁ tasmiṁ puggale āghāto paṭivinetabbo.
an5.161:1.7	Yasmiṁ, bhikkhave, puggale āghāto jāyetha, upekkhā tasmiṁ puggale bhāvetabbā;
an5.161:1.8	evaṁ tasmiṁ puggale āghāto paṭivinetabbo.
an5.161:1.9	Yasmiṁ, bhikkhave, puggale āghāto jāyetha, asatiamanasikāro tasmiṁ puggale āpajjitabbo;
an5.161:1.10	evaṁ tasmiṁ puggale āghāto paṭivinetabbo.
an5.161:1.11	Yasmiṁ, bhikkhave, puggale āghāto jāyetha, kammassakatā tasmiṁ puggale adhiṭṭhātabbā:
an5.161:1.12	‘kammassako ayamāyasmā kammadāyādo kammayoni kammabandhu kammapaṭisaraṇo,
an5.161:1.13	yaṁ kammaṁ karissati kalyāṇaṁ vā pāpakaṁ vā tassa dāyādo bhavissatī’ti;
an5.161:1.14	evaṁ tasmiṁ puggale āghāto paṭivinetabbo.
an5.161:1.15	Ime kho, bhikkhave, pañca āghātapaṭivinayā, yattha bhikkhuno uppanno āghāto sabbaso paṭivinetabbo”ti.
an5.161:1.16	Paṭhamaṁ.
an5.162:0.1	Aṅguttara Nikāya 5.162
an5.162:0.2	17. Āghātavagga
an5.162:0.3	Dutiyaāghātapaṭivinayasutta
an5.162:1.1	Tatra kho āyasmā sāriputto bhikkhū āmantesi:
an5.162:1.2	“āvuso bhikkhave”ti.
an5.162:1.3	“Āvuso”ti kho te bhikkhū āyasmato sāriputtassa paccassosuṁ.
an5.162:1.4	Āyasmā sāriputto etadavoca:
an5.162:2.1	“Pañcime, āvuso, āghātapaṭivinayā yattha bhikkhuno uppanno āghāto sabbaso paṭivinetabbo.
an5.162:2.2	Katame pañca?
an5.162:2.3	Idhāvuso, ekacco puggalo aparisuddhakāyasamācāro hoti parisuddhavacīsamācāro;
an5.162:2.4	evarūpepi, āvuso, puggale āghāto paṭivinetabbo.
an5.162:2.5	Idha panāvuso, ekacco puggalo aparisuddhavacīsamācāro hoti parisuddhakāyasamācāro;
an5.162:2.6	evarūpepi, āvuso, puggale āghāto paṭivinetabbo.
an5.162:2.7	Idha panāvuso, ekacco puggalo aparisuddhakāyasamācāro hoti aparisuddhavacīsamācāro, labhati ca kālena kālaṁ cetaso vivaraṁ cetaso pasādaṁ;
an5.162:2.8	evarūpepi, āvuso, puggale āghāto paṭivinetabbo.
an5.162:2.9	Idha panāvuso, ekacco puggalo aparisuddhakāyasamācāro hoti aparisuddhavacīsamācāro, na ca labhati kālena kālaṁ cetaso vivaraṁ cetaso pasādaṁ;
an5.162:2.10	evarūpepi, āvuso, puggale āghāto paṭivinetabbo.
an5.162:2.11	Idha panāvuso, ekacco puggalo parisuddhakāyasamācāro parisuddhavacīsamācāro, labhati ca kālena vā kālaṁ cetaso vivaraṁ cetaso pasādaṁ;
an5.162:2.12	evarūpepi, āvuso, puggale āghāto paṭivinetabbo.
an5.162:3.1	Tatrāvuso, yvāyaṁ puggalo aparisuddhakāyasamācāro parisuddhavacīsamācāro, kathaṁ tasmiṁ puggale āghāto paṭivinetabbo?
an5.162:3.2	Seyyathāpi, āvuso, bhikkhu paṁsukūliko rathiyāya nantakaṁ disvā vāmena pādena niggaṇhitvā dakkhiṇena pādena pattharitvā, yo tattha sāro taṁ paripātetvā ādāya pakkameyya;
an5.162:3.3	evamevaṁ khvāvuso, yvāyaṁ puggalo aparisuddhakāyasamācāro parisuddhavacīsamācāro, yāssa aparisuddhakāyasamācāratā na sāssa tasmiṁ samaye manasi kātabbā, yā ca khvassa parisuddhavacīsamācāratā sāssa tasmiṁ samaye manasi kātabbā.
an5.162:3.4	Evaṁ tasmiṁ puggale āghāto paṭivinetabbo.
an5.162:4.1	Tatrāvuso, yvāyaṁ puggalo aparisuddhavacīsamācāro parisuddhakāyasamācāro, kathaṁ tasmiṁ puggale āghāto paṭivinetabbo?
an5.162:4.2	Seyyathāpi, āvuso, pokkharaṇī sevālapaṇakapariyonaddhā.
an5.162:4.3	Atha puriso āgaccheyya ghammābhitatto ghammapareto kilanto tasito pipāsito.
an5.162:4.4	So taṁ pokkharaṇiṁ ogāhetvā ubhohi hatthehi iticiti ca sevālapaṇakaṁ apaviyūhitvā añjalinā pivitvā pakkameyya.
an5.162:4.5	Evamevaṁ kho, āvuso, yvāyaṁ puggalo aparisuddhavacīsamācāro parisuddhakāyasamācāro, yāssa aparisuddhavacīsamācāratā na sāssa tasmiṁ samaye manasi kātabbā, yā ca khvassa parisuddhakāyasamācāratā sāssa tasmiṁ samaye manasi kātabbā.
an5.162:4.6	Evaṁ tasmiṁ puggale āghāto paṭivinetabbo.
an5.162:5.1	Tatrāvuso, yvāyaṁ puggalo aparisuddhakāyasamācāro aparisuddhavacīsamācāro labhati ca kālena kālaṁ cetaso vivaraṁ cetaso pasādaṁ, kathaṁ tasmiṁ puggale āghāto paṭivinetabbo?
an5.162:5.2	Seyyathāpi, āvuso, parittaṁ gopade udakaṁ.
an5.162:5.3	Atha puriso āgaccheyya ghammābhitatto ghammapareto kilanto tasito pipāsito.
an5.162:5.4	Tassa evamassa:
an5.162:5.5	‘idaṁ kho parittaṁ gopade udakaṁ.
an5.162:5.6	Sacāhaṁ añjalinā vā pivissāmi bhājanena vā khobhessāmipi taṁ loḷessāmipi taṁ apeyyampi taṁ karissāmi.
an5.162:5.7	Yannūnāhaṁ catukkuṇḍiko nipatitvā gopītakaṁ pivitvā pakkameyyan’ti.
an5.162:5.8	So catukkuṇḍiko nipatitvā gopītakaṁ pivitvā pakkameyya.
an5.162:5.9	Evamevaṁ kho, āvuso, yvāyaṁ puggalo aparisuddhakāyasamācāro aparisuddhavacīsamācāro labhati ca kālena kālaṁ cetaso vivaraṁ cetaso pasādaṁ, yāssa aparisuddhakāyasamācāratā na sāssa tasmiṁ samaye manasi kātabbā;
an5.162:5.10	yāpissa aparisuddhavacīsamācāratā na sāpissa tasmiṁ samaye manasi kātabbā.
an5.162:5.11	Yañca kho so labhati kālena kālaṁ cetaso vivaraṁ cetaso pasādaṁ, tamevassa tasmiṁ samaye manasi kātabbaṁ.
an5.162:5.12	Evaṁ tasmiṁ puggale āghāto paṭivinetabbo.
an5.162:6.1	Tatrāvuso, yvāyaṁ puggalo aparisuddhakāyasamācāro aparisuddhavacīsamācāro na ca labhati kālena kālaṁ cetaso vivaraṁ cetaso pasādaṁ, kathaṁ tasmiṁ puggale āghāto paṭivinetabbo?
an5.162:6.2	Seyyathāpi, āvuso, puriso ābādhiko dukkhito bāḷhagilāno addhānamaggappaṭipanno.
an5.162:6.3	Tassa puratopissa dūre gāmo pacchatopissa dūre gāmo.
an5.162:6.4	So na labheyya sappāyāni bhojanāni, na labheyya sappāyāni bhesajjāni, na labheyya patirūpaṁ upaṭṭhākaṁ, na labheyya gāmantanāyakaṁ.
an5.162:6.5	Tamenaṁ aññataro puriso passeyya addhānamaggappaṭipanno.
an5.162:6.6	So tasmiṁ purise kāruññaṁyeva upaṭṭhāpeyya, anuddayaṁyeva upaṭṭhāpeyya, anukampaṁyeva upaṭṭhāpeyya:
an5.162:6.7	‘aho vatāyaṁ puriso labheyya sappāyāni bhojanāni, labheyya sappāyāni bhesajjāni, labheyya patirūpaṁ upaṭṭhākaṁ, labheyya gāmantanāyakaṁ.
an5.162:6.8	Taṁ kissa hetu?
an5.162:6.9	Māyaṁ puriso idheva anayabyasanaṁ āpajjī’ti.
an5.162:6.10	Evamevaṁ kho, āvuso, yvāyaṁ puggalo aparisuddhakāyasamācāro aparisuddhavacīsamācāro na ca labhati kālena kālaṁ cetaso vivaraṁ cetaso pasādaṁ, evarūpepi, āvuso, puggale kāruññaṁyeva upaṭṭhāpetabbaṁ anuddayāyeva upaṭṭhāpetabbā anukampāyeva upaṭṭhāpetabbā:
an5.162:6.11	‘aho vata ayamāyasmā kāyaduccaritaṁ pahāya kāyasucaritaṁ bhāveyya, vacīduccaritaṁ pahāya vacīsucaritaṁ bhāveyya, manoduccaritaṁ pahāya manosucaritaṁ bhāveyya.
an5.162:6.12	Taṁ kissa hetu?
an5.162:6.13	Māyaṁ āyasmā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjī’ti.
an5.162:6.14	Evaṁ tasmiṁ puggale āghāto paṭivinetabbo.
an5.162:7.1	Tatrāvuso, yvāyaṁ puggalo parisuddhakāyasamācāro parisuddhavacīsamācāro labhati ca kālena kālaṁ cetaso vivaraṁ cetaso pasādaṁ, kathaṁ tasmiṁ puggale āghāto paṭivinetabbo?
an5.162:7.2	Seyyathāpi, āvuso, pokkharaṇī acchodakā sātodakā sītodakā setakā supatitthā ramaṇīyā nānārukkhehi sañchannā.
an5.162:7.3	Atha puriso āgaccheyya ghammābhitatto ghammapareto kilanto tasito pipāsito.
an5.162:7.4	So taṁ pokkharaṇiṁ ogāhetvā nhātvā ca pivitvā ca paccuttaritvā tattheva rukkhacchāyāya nisīdeyya vā nipajjeyya vā.
an5.162:8.1	Evamevaṁ kho, āvuso, yvāyaṁ puggalo parisuddhakāyasamācāro parisuddhavacīsamācāro labhati ca kālena kālaṁ cetaso vivaraṁ cetaso pasādaṁ, yāpissa parisuddhakāyasamācāratā sāpissa tasmiṁ samaye manasi kātabbā;
an5.162:8.2	yāpissa parisuddhavacīsamācāratā sāpissa tasmiṁ samaye manasi kātabbā;
an5.162:8.3	yampi labhati kālena kālaṁ cetaso vivaraṁ cetaso pasādaṁ, tampissa tasmiṁ samaye manasi kātabbaṁ.
an5.162:8.4	Evaṁ tasmiṁ puggale āghāto paṭivinetabbo.
an5.162:8.5	Samantapāsādikaṁ, āvuso, puggalaṁ āgamma cittaṁ pasīdati.
an5.162:9.1	Ime kho, āvuso, pañca āghātapaṭivinayā, yattha bhikkhuno uppanno āghāto sabbaso paṭivinetabbo”ti.
an5.162:9.2	Dutiyaṁ.
an5.163:0.1	Aṅguttara Nikāya 5.163
an5.163:0.2	17. Āghātavagga
an5.163:0.3	Sākacchasutta
an5.163:1.1	Tatra kho āyasmā sāriputto bhikkhū āmantesi:
an5.163:1.2	“āvuso bhikkhave”ti.
an5.163:1.3	“Āvuso”ti kho te bhikkhū āyasmato sāriputtassa paccassosuṁ.
an5.163:1.4	Āyasmā sāriputto etadavoca:
an5.163:2.1	“Pañcahāvuso, dhammehi samannāgato bhikkhu alaṁ sākaccho sabrahmacārīnaṁ.
an5.163:2.2	Katamehi pañcahi?
an5.163:2.3	Idhāvuso, bhikkhu attanā ca sīlasampanno hoti, sīlasampadākathāya ca āgataṁ pañhaṁ byākattā hoti;
an5.163:2.4	attanā ca samādhisampanno hoti, samādhisampadākathāya ca āgataṁ pañhaṁ byākattā hoti;
an5.163:2.5	attanā ca paññāsampanno hoti, paññāsampadākathāya ca āgataṁ pañhaṁ byākattā hoti;
an5.163:2.6	attanā ca vimuttisampanno hoti, vimuttisampadākathāya ca āgataṁ pañhaṁ byākattā hoti;
an5.163:2.7	attanā ca vimuttiñāṇadassanasampanno hoti, vimuttiñāṇadassanasampadākathāya ca āgataṁ pañhaṁ byākattā hoti.
an5.163:2.8	Imehi kho, āvuso, pañcahi dhammehi samannāgato bhikkhu alaṁ sākaccho sabrahmacārīnan”ti.
an5.163:2.9	Tatiyaṁ.
an5.164:0.1	Aṅguttara Nikāya 5.164
an5.164:0.2	17. Āghātavagga
an5.164:0.3	Sājīvasutta
an5.164:1.1	Tatra kho āyasmā sāriputto bhikkhū āmantesi …pe…
an5.164:1.2	pañcahi, āvuso, dhammehi samannāgato bhikkhu alaṁsājīvo sabrahmacārīnaṁ.
an5.164:1.3	Katamehi pañcahi?
an5.164:1.4	Idhāvuso, bhikkhu attanā ca sīlasampanno hoti, sīlasampadākathāya ca āgataṁ pañhaṁ byākattā hoti;
an5.164:1.5	attanā ca samādhisampanno hoti, samādhisampadākathāya ca āgataṁ pañhaṁ byākattā hoti;
an5.164:1.6	attanā ca paññāsampanno hoti, paññāsampadākathāya ca āgataṁ pañhaṁ byākattā hoti;
an5.164:1.7	attanā ca vimuttisampanno hoti, vimuttisampadākathāya ca āgataṁ pañhaṁ byākattā hoti;
an5.164:1.8	attanā ca vimuttiñāṇadassanasampanno hoti, vimuttiñāṇadassanasampadākathāya ca āgataṁ pañhaṁ byākattā hoti.
an5.164:1.9	Imehi kho, āvuso, pañcahi dhammehi samannāgato bhikkhu alaṁsājīvo sabrahmacārīnan”ti.
an5.164:1.10	Catutthaṁ.
an5.165:0.1	Aṅguttara Nikāya 5.165
an5.165:0.2	17. Āghātavagga
an5.165:0.3	Pañhapucchāsutta
an5.165:1.1	Tatra kho āyasmā sāriputto bhikkhū āmantesi …pe… “yo hi koci, āvuso, paraṁ pañhaṁ pucchati, sabbo so pañcahi ṭhānehi, etesaṁ vā aññatarena.
an5.165:1.2	Katamehi pañcahi?
an5.165:1.3	Mandattā momūhattā paraṁ pañhaṁ pucchati, pāpiccho icchāpakato paraṁ pañhaṁ pucchati, paribhavaṁ paraṁ pañhaṁ pucchati, aññātukāmo paraṁ pañhaṁ pucchati, atha vā panevaṁcitto paraṁ pañhaṁ pucchati:
an5.165:1.4	‘sace me pañhaṁ puṭṭho sammadeva byākarissati iccetaṁ kusalaṁ, no ce me pañhaṁ puṭṭho sammadeva byākarissati ahamassa sammadeva byākarissāmī’ti.
an5.165:1.5	Yo hi koci, āvuso, paraṁ pañhaṁ pucchati, sabbo so imehi pañcahi ṭhānehi, etesaṁ vā aññatarena.
an5.165:1.6	Ahaṁ kho panāvuso, evaṁcitto paraṁ pañhaṁ pucchāmi:
an5.165:1.7	‘sace me pañhaṁ puṭṭho sammadeva byākarissati iccetaṁ kusalaṁ, no ce me pañhaṁ puṭṭho sammadeva byākarissati, ahamassa sammadeva byākarissāmī’”ti.
an5.165:1.8	Pañcamaṁ.
an5.166:0.1	Aṅguttara Nikāya 5.166
an5.166:0.2	17. Āghātavagga
an5.166:0.3	Nirodhasutta
an5.166:1.1	Tatra kho āyasmā sāriputto bhikkhū āmantesi …pe…
an5.166:1.2	“idhāvuso, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—
an5.166:1.3	atthetaṁ ṭhānaṁ.
an5.166:1.4	No ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—
an5.166:1.5	atthetaṁ ṭhānan”ti.
an5.166:2.1	Evaṁ vutte, āyasmā udāyī āyasmantaṁ sāriputtaṁ etadavoca:
an5.166:2.2	“aṭṭhānaṁ kho etaṁ, āvuso sāriputta, anavakāso yaṁ so bhikkhu atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—
an5.166:2.3	natthetaṁ ṭhānan”ti.
an5.166:3.1	Dutiyampi kho …pe… tatiyampi kho āyasmā sāriputto bhikkhū āmantesi:
an5.166:3.2	“idhāvuso, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—
an5.166:3.3	atthetaṁ ṭhānaṁ.
an5.166:3.4	No ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—
an5.166:3.5	atthetaṁ ṭhānan”ti.
an5.166:4.1	Tatiyampi kho āyasmā udāyī āyasmantaṁ sāriputtaṁ etadavoca:
an5.166:4.2	“aṭṭhānaṁ kho etaṁ, āvuso sāriputta, anavakāso yaṁ so bhikkhu atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—
an5.166:4.3	natthetaṁ ṭhānan”ti.
an5.166:5.1	Atha kho āyasmato sāriputtassa etadahosi:
an5.166:5.2	“yāvatatiyakampi kho me āyasmā udāyī paṭikkosati, na ca me koci bhikkhu anumodati.
an5.166:5.3	Yannūnāhaṁ yena bhagavā tenupasaṅkameyyan”ti.
an5.166:5.4	Atha kho āyasmā sāriputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an5.166:5.5	Ekamantaṁ nisinno kho āyasmā sāriputto bhikkhū āmantesi:
an5.166:5.6	“idhāvuso, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—
an5.166:5.7	atthetaṁ ṭhānaṁ.
an5.166:5.8	No ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—
an5.166:5.9	atthetaṁ ṭhānan”ti.
an5.166:6.1	Evaṁ vutte, āyasmā udāyī āyasmantaṁ sāriputtaṁ etadavoca:
an5.166:6.2	“aṭṭhānaṁ kho etaṁ, āvuso sāriputta, anavakāso yaṁ so bhikkhu atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—
an5.166:6.3	natthetaṁ ṭhānan”ti.
an5.166:7.1	Dutiyampi kho …pe… tatiyampi kho āyasmā sāriputto bhikkhū āmantesi:
an5.166:7.2	“idhāvuso, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—
an5.166:7.3	atthetaṁ ṭhānaṁ.
an5.166:7.4	No ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—
an5.166:7.5	atthetaṁ ṭhānan”ti.
an5.166:8.1	Tatiyampi kho āyasmā udāyī āyasmantaṁ sāriputtaṁ etadavoca:
an5.166:8.2	“aṭṭhānaṁ kho etaṁ, āvuso sāriputta, anavakāso yaṁ so bhikkhu atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—
an5.166:8.3	natthetaṁ ṭhānan”ti.
an5.166:9.1	Atha kho āyasmato sāriputtassa etadahosi:
an5.166:9.2	“bhagavatopi kho me sammukhā āyasmā udāyī yāvatatiyakaṁ paṭikkosati, na ca me koci bhikkhu anumodati.
an5.166:9.3	Yannūnāhaṁ tuṇhī assan”ti.
an5.166:9.4	Atha kho āyasmā sāriputto tuṇhī ahosi.
an5.166:10.1	Atha kho bhagavā āyasmantaṁ udāyiṁ āmantesi:
an5.166:10.2	“kaṁ pana tvaṁ, udāyi, manomayaṁ kāyaṁ paccesī”ti?
an5.166:10.3	“Ye te, bhante, devā arūpino saññāmayā”ti.
an5.166:10.4	“Kiṁ nu kho tuyhaṁ, udāyi, bālassa abyattassa bhaṇitena.
an5.166:10.5	Tvampi nāma bhaṇitabbaṁ maññasī”ti.
an5.166:11.1	Atha kho bhagavā āyasmantaṁ ānandaṁ āmantesi:
an5.166:11.2	“atthi nāma, ānanda, theraṁ bhikkhuṁ vihesiyamānaṁ ajjhupekkhissatha.
an5.166:11.3	Na hi nāma, ānanda, kāruññampi bhavissati theramhi bhikkhumhi vihesiyamānamhī”ti.
an5.166:12.1	Atha kho bhagavā bhikkhū āmantesi:
an5.166:12.2	“idha, bhikkhave, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—
an5.166:12.3	atthetaṁ ṭhānaṁ.
an5.166:12.4	No ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—
an5.166:12.5	atthetaṁ ṭhānan”ti.
an5.166:12.6	Idamavoca bhagavā.
an5.166:12.7	Idaṁ vatvāna sugato uṭṭhāyāsanā vihāraṁ pāvisi.
an5.166:13.1	Atha kho āyasmā ānando acirapakkantassa bhagavato yenāyasmā upavāṇo tenupasaṅkami; upasaṅkamitvā āyasmantaṁ upavāṇaṁ etadavoca:
an5.166:13.2	“idhāvuso upavāṇa, aññe there bhikkhū vihesenti.
an5.166:13.3	Mayaṁ tena na muccāma.
an5.166:13.4	Anacchariyaṁ kho, panetaṁ āvuso upavāṇa, yaṁ bhagavā sāyanhasamayaṁ paṭisallānā vuṭṭhito etadeva ārabbha udāhareyya yathā āyasmantaṁyevettha upavāṇaṁ paṭibhāseyya.
an5.166:13.5	Idāneva amhākaṁ sārajjaṁ okkantan”ti.
an5.166:13.6	Atha kho bhagavā sāyanhasamayaṁ paṭisallānā vuṭṭhito yena upaṭṭhānasālā tenupasaṅkami; upasaṅkamitvā paññatte āsane nisīdi. Nisajja kho bhagavā āyasmantaṁ upavāṇaṁ etadavoca:
an5.166:14.1	“Katihi nu kho, upavāṇa, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti?
an5.166:14.2	“Pañcahi, bhante, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.166:14.3	Katamehi pañcahi?
an5.166:14.4	Idha, bhante, thero bhikkhu sīlavā hoti …pe… samādāya sikkhati sikkhāpadesu;
an5.166:14.5	bahussuto hoti …pe… diṭṭhiyā suppaṭividdhā;
an5.166:14.6	kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā;
an5.166:14.7	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;
an5.166:14.8	āsavānaṁ khayā …pe… sacchikatvā upasampajja viharati.
an5.166:14.9	Imehi kho, bhante, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an5.166:15.1	“Sādhu sādhu, upavāṇa.
an5.166:15.2	Imehi kho, upavāṇa, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.166:15.3	Ime ce, upavāṇa, pañca dhammā therassa bhikkhuno na saṁvijjeyyuṁ, taṁ sabrahmacārī na sakkareyyuṁ na garuṁ kareyyuṁ na māneyyuṁ na pūjeyyuṁ khaṇḍiccena pāliccena valittacatāya.
an5.166:15.4	Yasmā ca kho, upavāṇa, ime pañca dhammā therassa bhikkhuno saṁvijjanti, tasmā taṁ sabrahmacārī sakkaronti garuṁ karonti mānenti pūjentī”ti.
an5.166:15.5	Chaṭṭhaṁ.
an5.167:0.1	Aṅguttara Nikāya 5.167
an5.167:0.2	17. Āghātavagga
an5.167:0.3	Codanāsutta
an5.167:1.1	Tatra kho āyasmā sāriputto bhikkhū āmantesi:
an5.167:1.2	“codakena, āvuso, bhikkhunā paraṁ codetukāmena pañca dhamme ajjhattaṁ upaṭṭhāpetvā paro codetabbo.
an5.167:2.1	Katame pañca?
an5.167:2.2	Kālena vakkhāmi, no akālena;
an5.167:2.3	bhūtena vakkhāmi, no abhūtena;
an5.167:2.4	saṇhena vakkhāmi, no pharusena;
an5.167:2.5	atthasaṁhitena vakkhāmi, no anatthasaṁhitena;
an5.167:2.6	mettacitto vakkhāmi, no dosantaro.
an5.167:2.7	Codakena, āvuso, bhikkhunā paraṁ codetukāmena ime pañca dhamme ajjhattaṁ upaṭṭhāpetvā paro codetabbo.
an5.167:3.1	Idhāhaṁ, āvuso, ekaccaṁ puggalaṁ passāmi akālena codiyamānaṁ no kālena kupitaṁ, abhūtena codiyamānaṁ no bhūtena kupitaṁ, pharusena codiyamānaṁ no saṇhena kupitaṁ, anatthasaṁhitena codiyamānaṁ no atthasaṁhitena kupitaṁ, dosantarena codiyamānaṁ no mettacittena kupitaṁ.
an5.167:4.1	Adhammacuditassa, āvuso, bhikkhuno pañcahākārehi avippaṭisāro upadahātabbo:
an5.167:4.2	‘akālenāyasmā cudito no kālena, alaṁ te avippaṭisārāya;
an5.167:4.3	abhūtenāyasmā cudito no bhūtena, alaṁ te avippaṭisārāya;
an5.167:4.4	pharusenāyasmā cudito no saṇhena, alaṁ te avippaṭisārāya;
an5.167:4.5	anatthasaṁhitenāyasmā cudito no atthasaṁhitena, alaṁ te avippaṭisārāya;
an5.167:4.6	dosantarenāyasmā cudito no mettacittena, alaṁ te avippaṭisārāyā’ti.
an5.167:4.7	Adhammacuditassa, āvuso, bhikkhuno imehi pañcahākārehi avippaṭisāro upadahātabbo.
an5.167:5.1	Adhammacodakassa, āvuso, bhikkhuno pañcahākārehi vippaṭisāro upadahātabbo:
an5.167:5.2	‘akālena te, āvuso, codito no kālena, alaṁ te vippaṭisārāya;
an5.167:5.3	abhūtena te, āvuso, codito no bhūtena, alaṁ te vippaṭisārāya;
an5.167:5.4	pharusena te, āvuso, codito no saṇhena, alaṁ te vippaṭisārāya;
an5.167:5.5	anatthasaṁhitena te, āvuso, codito no atthasaṁhitena, alaṁ te vippaṭisārāya;
an5.167:5.6	dosantarena te, āvuso, codito no mettacittena, alaṁ te vippaṭisārāyā’ti.
an5.167:5.7	Adhammacodakassa, āvuso, bhikkhuno imehi pañcahākārehi vippaṭisāro upadahātabbo.
an5.167:5.8	Taṁ kissa hetu?
an5.167:5.9	Yathā na aññopi bhikkhu abhūtena codetabbaṁ maññeyyāti.
an5.167:6.1	Idha panāhaṁ, āvuso, ekaccaṁ puggalaṁ passāmi kālena codiyamānaṁ no akālena kupitaṁ, bhūtena codiyamānaṁ no abhūtena kupitaṁ, saṇhena codiyamānaṁ no pharusena kupitaṁ, atthasaṁhitena codiyamānaṁ no anatthasaṁhitena kupitaṁ, mettacittena codiyamānaṁ no dosantarena kupitaṁ.
an5.167:7.1	Dhammacuditassa, āvuso, bhikkhuno pañcahākārehi vippaṭisāro upadahātabbo:
an5.167:7.2	‘kālenāyasmā cudito no akālena, alaṁ te vippaṭisārāya;
an5.167:7.3	bhūtenāyasmā cudito no abhūtena, alaṁ te vippaṭisārāya;
an5.167:7.4	saṇhenāyasmā cudito no pharusena, alaṁ te vippaṭisārāya;
an5.167:7.5	atthasaṁhitenāyasmā cudito no anatthasaṁhitena, alaṁ te vippaṭisārāya;
an5.167:7.6	mettacittenāyasmā cudito no dosantarena, alaṁ te vippaṭisārāyā’ti.
an5.167:7.7	Dhammacuditassa, āvuso, bhikkhuno imehi pañcahākārehi vippaṭisāro upadahātabbo.
an5.167:8.1	Dhammacodakassa, āvuso, bhikkhuno pañcahākārehi avippaṭisāro upadahātabbo:
an5.167:8.2	‘kālena te, āvuso, codito no akālena, alaṁ te avippaṭisārāya;
an5.167:8.3	bhūtena te, āvuso, codito no abhūtena, alaṁ te avippaṭisārāya;
an5.167:8.4	saṇhena te, āvuso, codito no pharusena, alaṁ te avippaṭisārāya;
an5.167:8.5	atthasaṁhitena te, āvuso, codito no anatthasaṁhitena, alaṁ te avippaṭisārāya;
an5.167:8.6	mettacittena te, āvuso, codito no dosantarena, alaṁ te avippaṭisārāyā’ti.
an5.167:8.7	Dhammacodakassa, āvuso, bhikkhuno imehi pañcahākārehi avippaṭisāro upadahātabbo.
an5.167:8.8	Taṁ kissa hetu?
an5.167:8.9	Yathā aññopi bhikkhu bhūtena coditabbaṁ maññeyyāti.
an5.167:9.1	Cuditena, āvuso, puggalena dvīsu dhammesu patiṭṭhātabbaṁ—
an5.167:9.2	sacce ca, akuppe ca.
an5.167:9.3	Mañcepi, āvuso, pare codeyyuṁ kālena vā akālena vā bhūtena vā abhūtena vā saṇhena vā pharusena vā atthasaṁhitena vā anatthasaṁhitena vā mettacittā vā dosantarā vā, ahampi dvīsuyeva dhammesu patiṭṭhaheyyaṁ—
an5.167:9.4	sacce ca, akuppe ca.
an5.167:9.5	Sace jāneyyaṁ:
an5.167:9.6	‘attheso mayi dhammo’ti, ‘atthī’ti naṁ vadeyyaṁ:
an5.167:9.7	‘saṁvijjateso mayi dhammo’ti.
an5.167:9.8	Sace jāneyyaṁ:
an5.167:9.9	‘nattheso mayi dhammo’ti, ‘natthī’ti naṁ vadeyyaṁ:
an5.167:9.10	‘neso dhammo mayi saṁvijjatī’”ti.
an5.167:10.1	“Evampi kho te, sāriputta, vuccamānā atha ca panidhekacce moghapurisā na padakkhiṇaṁ gaṇhantī”ti.
an5.167:11.1	“Ye te, bhante, puggalā assaddhā jīvikatthā na saddhā agārasmā anagāriyaṁ pabbajitā saṭhā māyāvino ketabino uddhatā unnaḷā capalā mukharā vikiṇṇavācā indriyesu aguttadvārā bhojane amattaññuno jāgariyaṁ ananuyuttā sāmaññe anapekkhavanto sikkhāya na tibbagāravā bāhulikā sāthalikā okkamane pubbaṅgamā paviveke nikkhittadhurā kusītā hīnavīriyā muṭṭhassatino asampajānā asamāhitā vibbhantacittā duppaññā eḷamūgā, te mayā evaṁ vuccamānā na padakkhiṇaṁ gaṇhanti.
an5.167:12.1	Ye pana te, bhante, kulaputtā saddhā agārasmā anagāriyaṁ pabbajitā asaṭhā amāyāvino aketabino anuddhatā anunnaḷā acapalā amukharā avikiṇṇavācā indriyesu guttadvārā bhojane mattaññuno jāgariyaṁ anuyuttā sāmaññe apekkhavanto sikkhāya tibbagāravā na bāhulikā na sāthalikā okkamane nikkhittadhurā paviveke pubbaṅgamā āraddhavīriyā pahitattā upaṭṭhitassatino sampajānā samāhitā ekaggacittā paññavanto aneḷamūgā, te mayā evaṁ vuccamānā padakkhiṇaṁ gaṇhantī”ti.
an5.167:13.1	“Ye te, sāriputta, puggalā assaddhā jīvikatthā na saddhā agārasmā anagāriyaṁ pabbajitā saṭhā māyāvino ketabino uddhatā unnaḷā capalā mukharā vikiṇṇavācā indriyesu aguttadvārā bhojane amattaññuno jāgariyaṁ ananuyuttā sāmaññe anapekkhavanto sikkhāya na tibbagāravā bāhulikā sāthalikā okkamane pubbaṅgamā paviveke nikkhittadhurā kusītā hīnavīriyā muṭṭhassatino asampajānā asamāhitā vibbhantacittā duppaññā eḷamūgā, tiṭṭhantu te.
an5.167:14.1	Ye pana te, sāriputta, kulaputtā saddhā agārasmā anagāriyaṁ pabbajitā asaṭhā amāyāvino aketabino anuddhatā anunnaḷā acapalā amukharā avikiṇṇavācā indriyesu guttadvārā bhojane mattaññuno jāgariyaṁ anuyuttā sāmaññe apekkhavanto sikkhāya tibbagāravā na bāhulikā na sāthalikā okkamane nikkhittadhurā paviveke pubbaṅgamā āraddhavīriyā pahitattā upaṭṭhitassatino sampajānā samāhitā ekaggacittā paññavanto aneḷamūgā, te tvaṁ, sāriputta, vadeyyāsi.
an5.167:14.2	Ovada, sāriputta, sabrahmacārī;
an5.167:14.3	anusāsa, sāriputta, sabrahmacārī:
an5.167:14.4	‘asaddhammā vuṭṭhāpetvā saddhamme patiṭṭhāpessāmi sabrahmacārī’ti.
an5.167:14.5	Evañhi te, sāriputta, sikkhitabban”ti.
an5.167:14.6	Sattamaṁ.
an5.168:0.1	Aṅguttara Nikāya 5.168
an5.168:0.2	17. Āghātavagga
an5.168:0.3	Sīlasutta
an5.168:1.1	Tatra kho āyasmā sāriputto bhikkhū āmantesi:
an5.168:1.2	“dussīlassa, āvuso, sīlavipannassa hatūpaniso hoti sammāsamādhi;
an5.168:1.3	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ;
an5.168:1.4	yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo;
an5.168:1.5	nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an5.168:1.6	Seyyathāpi, āvuso, rukkho sākhāpalāsavipanno.
an5.168:1.7	Tassa papaṭikāpi na pāripūriṁ gacchati, tacopi pheggupi sāropi na pāripūriṁ gacchati.
an5.168:1.8	Evamevaṁ kho, āvuso, dussīlassa sīlavipannassa hatūpaniso hoti sammāsamādhi;
an5.168:1.9	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ;
an5.168:1.10	yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo;
an5.168:1.11	nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an5.168:2.1	Sīlavato, āvuso, sīlasampannassa upanisasampanno hoti sammāsamādhi;
an5.168:2.2	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ;
an5.168:2.3	yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo;
an5.168:2.4	nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanaṁ.
an5.168:2.5	Seyyathāpi, āvuso, rukkho, sākhāpalāsasampanno. Tassa papaṭikāpi pāripūriṁ gacchati, tacopi pheggupi sāropi pāripūriṁ gacchati.
an5.168:2.6	Evamevaṁ kho, āvuso, sīlavato sīlasampannassa upanisasampanno hoti sammāsamādhi;
an5.168:2.7	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ;
an5.168:2.8	yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo;
an5.168:2.9	nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanan”ti.
an5.168:2.10	Aṭṭhamaṁ.
an5.169:0.1	Aṅguttara Nikāya 5.169
an5.169:0.2	17. Āghātavagga
an5.169:0.3	Khippanisantisutta
an5.169:1.1	Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an5.169:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā ānando āyasmantaṁ sāriputtaṁ etadavoca:
an5.169:2.1	“Kittāvatā nu kho, āvuso sāriputta, bhikkhu khippanisanti ca hoti, kusalesu dhammesu suggahitaggāhī ca, bahuñca gaṇhāti, gahitañcassa nappamussatī”ti?
an5.169:2.2	“Āyasmā kho ānando bahussuto.
an5.169:2.3	Paṭibhātu āyasmantaṁyeva ānandan”ti.
an5.169:2.4	“Tenahāvuso sāriputta, suṇāhi, sādhukaṁ manasi karohi; bhāsissāmī”ti.
an5.169:2.5	“Evamāvuso”ti kho āyasmā sāriputto āyasmato ānandassa paccassosi.
an5.169:2.6	Āyasmā ānando etadavoca:
an5.169:3.1	“Idhāvuso sāriputta, bhikkhu atthakusalo ca hoti, dhammakusalo ca, byañjanakusalo ca, niruttikusalo ca, pubbāparakusalo ca.
an5.169:3.2	Ettāvatā kho, āvuso sāriputta, bhikkhu khippanisanti ca hoti kusalesu dhammesu, suggahitaggāhī ca, bahuñca gaṇhāti, gahitañcassa nappamussatī”ti.
an5.169:3.3	“Acchariyaṁ, āvuso, abbhutaṁ, āvuso.
an5.169:3.4	Yāva subhāsitañcidaṁ āyasmatā ānandena.
an5.169:3.5	Imehi ca mayaṁ pañcahi dhammehi samannāgataṁ āyasmantaṁ ānandaṁ dhārema:
an5.169:3.6	‘āyasmā ānando atthakusalo dhammakusalo byañjanakusalo niruttikusalo pubbāparakusalo’”ti.
an5.169:3.7	Navamaṁ.
an5.170:0.1	Aṅguttara Nikāya 5.170
an5.170:0.2	17. Āghātavagga
an5.170:0.3	Bhaddajisutta
an5.170:1.1	Ekaṁ samayaṁ āyasmā ānando kosambiyaṁ viharati ghositārāme.
an5.170:1.2	Atha kho āyasmā bhaddaji yenāyasmā ānando tenupasaṅkami; upasaṅkamitvā āyasmatā ānandena saddhiṁ sammodi.
an5.170:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinnaṁ kho āyasmantaṁ bhaddajiṁ āyasmā ānando etadavoca:
an5.170:1.4	“kiṁ nu kho, āvuso bhaddaji, dassanānaṁ aggaṁ, kiṁ savanānaṁ aggaṁ, kiṁ sukhānaṁ aggaṁ, kiṁ saññānaṁ aggaṁ, kiṁ bhavānaṁ aggan”ti?
an5.170:2.1	“Atthāvuso, brahmā abhibhū anabhibhūto aññadatthudaso vasavattī, yo taṁ brahmānaṁ passati, idaṁ dassanānaṁ aggaṁ.
an5.170:2.2	Atthāvuso, ābhassarā nāma devā sukhena abhisannā parisannā.
an5.170:2.3	Te kadāci karahaci udānaṁ udānenti:
an5.170:2.4	‘aho sukhaṁ, aho sukhan’ti.
an5.170:2.5	Yo taṁ saddaṁ suṇāti, idaṁ savanānaṁ aggaṁ.
an5.170:2.6	Atthāvuso, subhakiṇhā nāma devā.
an5.170:2.7	Te santaṁyeva tusitā sukhaṁ paṭivedenti, idaṁ sukhānaṁ aggaṁ.
an5.170:2.8	Atthāvuso, ākiñcaññāyatanūpagā devā, idaṁ saññānaṁ aggaṁ.
an5.170:2.9	Atthāvuso, nevasaññānāsaññāyatanūpagā devā, idaṁ bhavānaṁ aggan”ti.
an5.170:2.10	“Sameti kho idaṁ āyasmato bhaddajissa, yadidaṁ bahunā janenā”ti?
an5.170:3.1	“Āyasmā kho ānando bahussuto.
an5.170:3.2	Paṭibhātu āyasmantaṁyeva ānandan”ti.
an5.170:3.3	“Tenahāvuso bhaddaji, suṇāhi, sādhukaṁ manasi karohi; bhāsissāmī”ti.
an5.170:3.4	“Evamāvuso”ti kho āyasmā bhaddaji āyasmato ānandassa paccassosi.
an5.170:3.5	Āyasmā ānando etadavoca:
an5.170:4.1	“Yathā passato kho, āvuso, anantarā āsavānaṁ khayo hoti, idaṁ dassanānaṁ aggaṁ.
an5.170:4.2	Yathā suṇato anantarā āsavānaṁ khayo hoti, idaṁ savanānaṁ aggaṁ.
an5.170:4.3	Yathā sukhitassa anantarā āsavānaṁ khayo hoti, idaṁ sukhānaṁ aggaṁ.
an5.170:4.4	Yathā saññissa anantarā āsavānaṁ khayo hoti, idaṁ saññānaṁ aggaṁ.
an5.170:4.5	Yathā bhūtassa anantarā āsavānaṁ khayo hoti, idaṁ bhavānaṁ aggan”ti.
an5.170:4.6	Dasamaṁ.
an5.170:4.7	Āghātavaggo dutiyo.
an5.170:5.0	Tassuddānaṁ
an5.170:5.1	Dve āghātavinayā,
an5.170:5.2	sākacchā sājīvato pañhaṁ;
an5.170:5.3	Pucchā nirodho codanā,
an5.170:5.4	sīlaṁ nisanti bhaddajīti.
an5.171:0.1	Aṅguttara Nikāya 5.171
an5.171:0.2	18. Upāsakavagga
an5.171:0.3	Sārajjasutta
an5.171:1.1	Evaṁ me sutaṁ—
an5.171:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an5.171:1.3	Tatra kho bhagavā bhikkhū āmantesi:
an5.171:1.4	“bhikkhavo”ti.
an5.171:1.5	“Bhadante”ti te bhikkhū bhagavato paccassosuṁ.
an5.171:1.6	Bhagavā etadavoca:
an5.171:2.1	“Pañcahi, bhikkhave, dhammehi samannāgato upāsako sārajjaṁ okkanto hoti.
an5.171:2.2	Katamehi pañcahi?
an5.171:2.3	Pāṇātipātī hoti, adinnādāyī hoti, kāmesumicchācārī hoti, musāvādī hoti, surāmerayamajjapamādaṭṭhāyī hoti.
an5.171:2.4	Imehi kho, bhikkhave, pañcahi dhammehi samannāgato upāsako sārajjaṁ okkanto hoti.
an5.171:3.1	Pañcahi, bhikkhave, dhammehi samannāgato upāsako visārado hoti.
an5.171:3.2	Katamehi pañcahi?
an5.171:3.3	Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti.
an5.171:3.4	Imehi kho, bhikkhave, pañcahi dhammehi samannāgato upāsako visārado hotī”ti.
an5.171:3.5	Paṭhamaṁ.
an5.172:0.1	Aṅguttara Nikāya 5.172
an5.172:0.2	18. Upāsakavagga
an5.172:0.3	Visāradasutta
an5.172:1.1	“Pañcahi, bhikkhave, dhammehi samannāgato upāsako avisārado agāraṁ ajjhāvasati.
an5.172:1.2	Katamehi pañcahi?
an5.172:1.3	Pāṇātipātī hoti …pe… surāmerayamajjapamādaṭṭhāyī hoti.
an5.172:1.4	Imehi kho, bhikkhave, pañcahi dhammehi samannāgato upāsako avisārado agāraṁ ajjhāvasati.
an5.172:2.1	Pañcahi, bhikkhave, dhammehi samannāgato upāsako visārado agāraṁ ajjhāvasati.
an5.172:2.2	Katamehi pañcahi?
an5.172:2.3	Pāṇātipātā paṭivirato hoti …pe… surāmerayamajjapamādaṭṭhānā paṭivirato hoti.
an5.172:2.4	Imehi kho, bhikkhave, pañcahi dhammehi samannāgato upāsako visārado agāraṁ ajjhāvasatī”ti.
an5.172:2.5	Dutiyaṁ.
an5.173:0.1	Aṅguttara Nikāya 5.173
an5.173:0.2	18. Upāsakavagga
an5.173:0.3	Nirayasutta
an5.173:1.1	“Pañcahi, bhikkhave, dhammehi samannāgato upāsako yathābhataṁ nikkhitto evaṁ niraye.
an5.173:1.2	Katamehi pañcahi?
an5.173:1.3	Pāṇātipātī hoti …pe… surāmerayamajjapamādaṭṭhāyī hoti.
an5.173:1.4	Imehi kho, bhikkhave, pañcahi dhammehi samannāgato upāsako yathābhataṁ nikkhitto evaṁ niraye.
an5.173:2.1	Pañcahi, bhikkhave, dhammehi samannāgato upāsako yathābhataṁ nikkhitto evaṁ sagge.
an5.173:2.2	Katamehi pañcahi?
an5.173:2.3	Pāṇātipātā paṭivirato hoti …pe… surāmerayamajjapamādaṭṭhānā paṭivirato hoti.
an5.173:2.4	Imehi kho, bhikkhave, pañcahi dhammehi samannāgato upāsako yathābhataṁ nikkhitto evaṁ sagge”ti.
an5.173:2.5	Tatiyaṁ.
an5.174:0.1	Aṅguttara Nikāya 5.174
an5.174:0.2	18. Upāsakavagga
an5.174:0.3	Verasutta
an5.174:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an5.174:2.1	“Pañca, gahapati, bhayāni verāni appahāya ‘dussīlo’ iti vuccati, nirayañca upapajjati.
an5.174:2.2	Katamāni pañca?
an5.174:2.3	Pāṇātipātaṁ, adinnādānaṁ, kāmesumicchācāraṁ, musāvādaṁ, surāmerayamajjapamādaṭṭhānaṁ—
an5.174:2.4	imāni kho, gahapati, pañca bhayāni verāni appahāya ‘dussīlo’ iti vuccati, nirayañca upapajjati.
an5.174:3.1	Pañca, gahapati, bhayāni verāni pahāya ‘sīlavā’ iti vuccati, sugatiñca upapajjati.
an5.174:3.2	Katamāni pañca?
an5.174:3.3	Pāṇātipātaṁ, adinnādānaṁ, kāmesumicchācāraṁ, musāvādaṁ, surāmerayamajjapamādaṭṭhānaṁ—
an5.174:3.4	imāni kho, gahapati, pañca bhayāni verāni pahāya ‘sīlavā’ iti vuccati, sugatiñca upapajjati.
an5.174:4.1	Yaṁ, gahapati, pāṇātipātī pāṇātipātapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedeti, pāṇātipātā paṭivirato neva diṭṭhadhammikaṁ bhayaṁ veraṁ pasavati, na samparāyikaṁ bhayaṁ veraṁ pasavati, na cetasikaṁ dukkhaṁ domanassaṁ paṭisaṁvedeti.
an5.174:4.2	Pāṇātipātā paṭiviratassa evaṁ taṁ bhayaṁ veraṁ vūpasantaṁ hoti.
an5.174:5.1	Yaṁ, gahapati, adinnādāyī …pe….
an5.174:6.1	Yaṁ, gahapati, kāmesumicchācārī …pe….
an5.174:7.1	Yaṁ, gahapati, musāvādī …pe….
an5.174:8.1	Yaṁ, gahapati, surāmerayamajjapamādaṭṭhāyī surāmerayamajjapamādaṭṭhānapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedeti, surāmerayamajjapamādaṭṭhānā paṭivirato neva diṭṭhadhammikaṁ bhayaṁ veraṁ pasavati, na samparāyikaṁ bhayaṁ veraṁ pasavati, na cetasikaṁ dukkhaṁ domanassaṁ paṭisaṁvedeti.
an5.174:8.2	Surāmerayamajjapamādaṭṭhānā paṭiviratassa evaṁ taṁ bhayaṁ veraṁ vūpasantaṁ hotīti.
an5.174:9.1	Yo pāṇamatipāteti,
an5.174:9.2	musāvādañca bhāsati;
an5.174:9.3	Loke adinnaṁ ādiyati,
an5.174:9.4	paradārañca gacchati;
an5.174:9.5	Surāmerayapānañca,
an5.174:9.6	yo naro anuyuñjati.
an5.174:10.1	Appahāya pañca verāni,
an5.174:10.2	dussīlo iti vuccati;
an5.174:10.3	Kāyassa bhedā duppañño,
an5.174:10.4	nirayaṁ sopapajjati.
an5.174:11.1	Yo pāṇaṁ nātipāteti,
an5.174:11.2	musāvādaṁ na bhāsati;
an5.174:11.3	Loke adinnaṁ nādiyati,
an5.174:11.4	paradāraṁ na gacchati;
an5.174:11.5	Surāmerayapānañca,
an5.174:11.6	yo naro nānuyuñjati.
an5.174:12.1	Pahāya pañca verāni,
an5.174:12.2	sīlavā iti vuccati;
an5.174:12.3	Kāyassa bhedā sappañño,
an5.174:12.4	sugatiṁ sopapajjatī”ti.
an5.174:12.5	Catutthaṁ.
an5.175:0.1	Aṅguttara Nikāya 5.175
an5.175:0.2	18. Upāsakavagga
an5.175:0.3	Caṇḍālasutta
an5.175:1.1	“Pañcahi, bhikkhave, dhammehi samannāgato upāsako upāsakacaṇḍālo ca hoti upāsakamalañca upāsakapatikuṭṭho ca.
an5.175:1.2	Katamehi pañcahi?
an5.175:1.3	Assaddho hoti;
an5.175:1.4	dussīlo hoti;
an5.175:1.5	kotūhalamaṅgaliko hoti, maṅgalaṁ pacceti no kammaṁ;
an5.175:1.6	ito ca bahiddhā dakkhiṇeyyaṁ gavesati;
an5.175:1.7	tattha ca pubbakāraṁ karoti.
an5.175:1.8	Imehi kho, bhikkhave, pañcahi dhammehi samannāgato upāsako upāsakacaṇḍālo ca hoti upāsakamalañca upāsakapatikuṭṭho ca.
an5.175:2.1	Pañcahi, bhikkhave, dhammehi samannāgato upāsako upāsakaratanañca hoti upāsakapadumañca upāsakapuṇḍarīkañca.
an5.175:2.2	Katamehi pañcahi?
an5.175:2.3	Saddho hoti;
an5.175:2.4	sīlavā hoti;
an5.175:2.5	akotūhalamaṅgaliko hoti, kammaṁ pacceti no maṅgalaṁ;
an5.175:2.6	na ito bahiddhā dakkhiṇeyyaṁ gavesati;
an5.175:2.7	idha ca pubbakāraṁ karoti.
an5.175:2.8	Imehi kho, bhikkhave, pañcahi dhammehi samannāgato upāsako upāsakaratanañca hoti upāsakapadumañca upāsakapuṇḍarīkañcā”ti.
an5.175:2.9	Pañcamaṁ.
an5.176:0.1	Aṅguttara Nikāya 5.176
an5.176:0.2	18. Upāsakavagga
an5.176:0.3	Pītisutta
an5.176:1.1	Atha kho anāthapiṇḍiko gahapati pañcamattehi upāsakasatehi parivuto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an5.176:2.1	“Tumhe kho, gahapati, bhikkhusaṅghaṁ paccupaṭṭhitā cīvarapiṇḍapātasenāsanagilānappaccayabhesajjaparikkhārena.
an5.176:2.2	Na kho, gahapati, tāvatakeneva tuṭṭhi karaṇīyā:
an5.176:2.3	‘mayaṁ bhikkhusaṅghaṁ paccupaṭṭhitā cīvarapiṇḍapātasenāsanagilānappaccayabhesajjaparikkhārenā’ti.
an5.176:2.4	Tasmātiha, gahapati, evaṁ sikkhitabbaṁ:
an5.176:2.5	‘kinti mayaṁ kālena kālaṁ pavivekaṁ pītiṁ upasampajja vihareyyāmā’ti.
an5.176:2.6	Evañhi vo, gahapati, sikkhitabban”ti.
an5.176:3.1	Evaṁ vutte, āyasmā sāriputto bhagavantaṁ etadavoca:
an5.176:3.2	“acchariyaṁ, bhante, abbhutaṁ, bhante.
an5.176:3.3	Yāva subhāsitañcidaṁ, bhante, bhagavatā:
an5.176:3.4	‘tumhe kho, gahapati, bhikkhusaṅghaṁ paccupaṭṭhitā cīvarapiṇḍapātasenāsanagilānappaccayabhesajjaparikkhārena.
an5.176:3.5	Na kho, gahapati, tāvatakeneva tuṭṭhi karaṇīyā—
an5.176:3.6	mayaṁ bhikkhusaṅghaṁ paccupaṭṭhitā cīvarapiṇḍapātasenāsanagilānappaccayabhesajjaparikkhārenāti.
an5.176:3.7	Tasmātiha, gahapati, evaṁ sikkhitabbaṁ—
an5.176:3.8	kinti mayaṁ kālena kālaṁ pavivekaṁ pītiṁ upasampajja vihareyyāmāti.
an5.176:3.9	Evañhi vo, gahapati, sikkhitabban’ti.
an5.176:3.10	Yasmiṁ, bhante, samaye ariyasāvako pavivekaṁ pītiṁ upasampajja viharati, pañcassa ṭhānāni tasmiṁ samaye na honti.
an5.176:3.11	Yampissa kāmūpasaṁhitaṁ dukkhaṁ domanassaṁ, tampissa tasmiṁ samaye na hoti.
an5.176:3.12	Yampissa kāmūpasaṁhitaṁ sukhaṁ somanassaṁ, tampissa tasmiṁ samaye na hoti.
an5.176:3.13	Yampissa akusalūpasaṁhitaṁ dukkhaṁ domanassaṁ, tampissa tasmiṁ samaye na hoti.
an5.176:3.14	Yampissa akusalūpasaṁhitaṁ sukhaṁ somanassaṁ, tampissa tasmiṁ samaye na hoti.
an5.176:3.15	Yampissa kusalūpasaṁhitaṁ dukkhaṁ domanassaṁ, tampissa tasmiṁ samaye na hoti.
an5.176:3.16	Yasmiṁ, bhante, samaye ariyasāvako pavivekaṁ pītiṁ upasampajja viharati, imānissa pañca ṭhānāni tasmiṁ samaye na hontī”ti.
an5.176:4.1	“Sādhu sādhu, sāriputta.
an5.176:4.2	Yasmiṁ, sāriputta, samaye ariyasāvako pavivekaṁ pītiṁ upasampajja viharati, pañcassa ṭhānāni tasmiṁ samaye na honti.
an5.176:4.3	Yampissa kāmūpasaṁhitaṁ dukkhaṁ domanassaṁ, tampissa tasmiṁ samaye na hoti.
an5.176:4.4	Yampissa kāmūpasaṁhitaṁ sukhaṁ somanassaṁ, tampissa tasmiṁ samaye na hoti.
an5.176:4.5	Yampissa akusalūpasaṁhitaṁ dukkhaṁ domanassaṁ, tampissa tasmiṁ samaye na hoti.
an5.176:4.6	Yampissa akusalūpasaṁhitaṁ sukhaṁ somanassaṁ, tampissa tasmiṁ samaye na hoti.
an5.176:4.7	Yampissa kusalūpasaṁhitaṁ dukkhaṁ domanassaṁ, tampissa tasmiṁ samaye na hoti.
an5.176:4.8	Yasmiṁ, sāriputta, samaye ariyasāvako pavivekaṁ pītiṁ upasampajja viharati, imānissa pañca ṭhānāni tasmiṁ samaye na hontī”ti.
an5.176:4.9	Chaṭṭhaṁ.
an5.177:0.1	Aṅguttara Nikāya 5.177
an5.177:0.2	18. Upāsakavagga
an5.177:0.3	Vaṇijjāsutta
an5.177:1.1	“Pañcimā, bhikkhave, vaṇijjā upāsakena akaraṇīyā.
an5.177:1.2	Katamā pañca?
an5.177:1.3	Satthavaṇijjā, sattavaṇijjā, maṁsavaṇijjā, majjavaṇijjā, visavaṇijjā—
an5.177:1.4	imā kho, bhikkhave, pañca vaṇijjā upāsakena akaraṇīyā”ti.
an5.177:1.5	Sattamaṁ.
an5.178:0.1	Aṅguttara Nikāya 5.178
an5.178:0.2	18. Upāsakavagga
an5.178:0.3	Rājāsutta
an5.178:1.1	“Taṁ kiṁ maññatha, bhikkhave,
an5.178:1.2	api nu tumhehi diṭṭhaṁ vā sutaṁ vā:
an5.178:1.3	‘ayaṁ puriso pāṇātipātaṁ pahāya pāṇātipātā paṭiviratoti.
an5.178:1.4	Tamenaṁ rājāno gahetvā pāṇātipātā veramaṇihetu hananti vā bandhanti vā pabbājenti vā yathāpaccayaṁ vā karontī’”ti?
an5.178:1.5	“No hetaṁ, bhante”.
an5.178:1.6	“Sādhu, bhikkhave.
an5.178:1.7	Mayāpi kho etaṁ, bhikkhave, neva diṭṭhaṁ na sutaṁ:
an5.178:1.8	‘ayaṁ puriso pāṇātipātaṁ pahāya pāṇātipātā paṭiviratoti.
an5.178:1.9	Tamenaṁ rājāno gahetvā pāṇātipātā veramaṇihetu hananti vā bandhanti vā pabbājenti vā yathāpaccayaṁ vā karontī’ti.
an5.178:1.10	Api ca khvassa tatheva pāpakammaṁ pavedenti:
an5.178:1.11	‘ayaṁ puriso itthiṁ vā purisaṁ vā jīvitā voropesīti.
an5.178:1.12	Tamenaṁ rājāno gahetvā pāṇātipātahetu hananti vā bandhanti vā pabbājenti vā yathāpaccayaṁ vā karonti.
an5.178:1.13	Api nu tumhehi evarūpaṁ diṭṭhaṁ vā sutaṁ vā’”ti?
an5.178:1.14	“Diṭṭhañca no, bhante, sutañca suyyissati cā”ti.
an5.178:2.1	“Taṁ kiṁ maññatha, bhikkhave,
an5.178:2.2	api nu tumhehi diṭṭhaṁ vā sutaṁ vā:
an5.178:2.3	‘ayaṁ puriso adinnādānaṁ pahāya adinnādānā paṭiviratoti.
an5.178:2.4	Tamenaṁ rājāno gahetvā adinnādānā veramaṇihetu hananti vā bandhanti vā pabbājenti vā yathāpaccayaṁ vā karontī’”ti?
an5.178:2.5	“No hetaṁ bhante”.
an5.178:2.6	“Sādhu, bhikkhave.
an5.178:2.7	Mayāpi kho etaṁ, bhikkhave, neva diṭṭhaṁ na sutaṁ:
an5.178:2.8	‘ayaṁ puriso adinnādānaṁ pahāya adinnādānā paṭiviratoti.
an5.178:2.9	Tamenaṁ rājāno gahetvā adinnādānā veramaṇihetu hananti vā bandhanti vā pabbājenti vā yathāpaccayaṁ vā karontī’ti.
an5.178:2.10	Api ca khvassa tatheva pāpakammaṁ pavedenti:
an5.178:2.11	‘ayaṁ puriso gāmā vā araññā vā adinnaṁ theyyasaṅkhātaṁ ādiyīti.
an5.178:2.12	Tamenaṁ rājāno gahetvā adinnādānahetu hananti vā bandhanti vā pabbājenti vā yathāpaccayaṁ vā karonti.
an5.178:2.13	Api nu tumhehi evarūpaṁ diṭṭhaṁ vā sutaṁ vā’”ti?
an5.178:2.14	“Diṭṭhañca no, bhante, sutañca suyyissati cā”ti.
an5.178:3.1	“Taṁ kiṁ maññatha, bhikkhave,
an5.178:3.2	api nu tumhehi diṭṭhaṁ vā sutaṁ vā:
an5.178:3.3	‘ayaṁ puriso kāmesumicchācāraṁ pahāya kāmesumicchācārā paṭiviratoti.
an5.178:3.4	Tamenaṁ rājāno gahetvā kāmesumicchācārā veramaṇihetu hananti vā bandhanti vā pabbājenti vā yathāpaccayaṁ vā karontī’”ti?
an5.178:3.5	“No hetaṁ, bhante”.
an5.178:3.6	“Sādhu, bhikkhave.
an5.178:3.7	Mayāpi kho etaṁ, bhikkhave, neva diṭṭhaṁ na sutaṁ:
an5.178:3.8	‘ayaṁ puriso kāmesumicchācāraṁ pahāya kāmesumicchācārā paṭiviratoti.
an5.178:3.9	Tamenaṁ rājāno gahetvā kāmesumicchācārā veramaṇihetu hananti vā bandhanti vā pabbājenti vā yathāpaccayaṁ vā karontī’ti.
an5.178:3.10	Api ca khvassa tatheva pāpakammaṁ pavedenti:
an5.178:3.11	‘ayaṁ puriso paritthīsu parakumārīsu cārittaṁ āpajjīti.
an5.178:3.12	Tamenaṁ rājāno gahetvā kāmesumicchācārahetu hananti vā bandhanti vā pabbājenti vā yathāpaccayaṁ vā karonti.
an5.178:3.13	Api nu tumhehi evarūpaṁ diṭṭhaṁ vā sutaṁ vā’”ti?
an5.178:3.14	“Diṭṭhañca no, bhante, sutañca suyyissati cā”ti.
an5.178:4.1	“Taṁ kiṁ maññatha, bhikkhave,
an5.178:4.2	api nu tumhehi diṭṭhaṁ vā sutaṁ vā:
an5.178:4.3	‘ayaṁ puriso musāvādaṁ pahāya musāvādā paṭiviratoti.
an5.178:4.4	Tamenaṁ rājāno gahetvā musāvādā veramaṇihetu hananti vā bandhanti vā pabbājenti vā yathāpaccayaṁ vā karontī’”ti?
an5.178:4.5	“No hetaṁ, bhante”.
an5.178:4.6	“Sādhu, bhikkhave.
an5.178:4.7	Mayāpi kho etaṁ, bhikkhave, neva diṭṭhaṁ na sutaṁ:
an5.178:4.8	‘ayaṁ puriso musāvādaṁ pahāya musāvādā paṭiviratoti.
an5.178:4.9	Tamenaṁ rājāno gahetvā musāvādā veramaṇihetu hananti vā bandhanti vā pabbājenti vā yathāpaccayaṁ vā karontī’ti.
an5.178:4.10	Api ca khvassa tatheva pāpakammaṁ pavedenti:
an5.178:4.11	‘ayaṁ puriso gahapatissa vā gahapatiputtassa vā musāvādena atthaṁ pabhañjīti.
an5.178:4.12	Tamenaṁ rājāno gahetvā musāvādahetu hananti vā bandhanti vā pabbājenti vā yathāpaccayaṁ vā karonti.
an5.178:4.13	Api nu tumhehi evarūpaṁ diṭṭhaṁ vā sutaṁ vā’”ti?
an5.178:4.14	“Diṭṭhañca no, bhante, sutañca suyyissati cā”ti.
an5.178:5.1	“Taṁ kiṁ maññatha, bhikkhave,
an5.178:5.2	api nu tumhehi diṭṭhaṁ vā sutaṁ vā:
an5.178:5.3	‘ayaṁ puriso surāmerayamajjapamādaṭṭhānaṁ pahāya surāmerayamajjapamādaṭṭhānā paṭiviratoti.
an5.178:5.4	Tamenaṁ rājāno gahetvā surāmerayamajjapamādaṭṭhānā veramaṇihetu hananti vā bandhanti vā pabbājenti vā yathāpaccayaṁ vā karontī’”ti?
an5.178:5.5	“No hetaṁ, bhante”.
an5.178:5.6	“Sādhu, bhikkhave.
an5.178:5.7	Mayāpi kho etaṁ, bhikkhave, neva diṭṭhaṁ na sutaṁ:
an5.178:5.8	‘ayaṁ puriso surāmerayamajjapamādaṭṭhānaṁ pahāya surāmerayamajjapamādaṭṭhānā paṭiviratoti.
an5.178:5.9	Tamenaṁ rājāno gahetvā surāmerayamajjapamādaṭṭhānā veramaṇihetu hananti vā bandhanti vā pabbājenti vā yathāpaccayaṁ vā karontī’ti.
an5.178:5.10	Api ca khvassa tatheva pāpakammaṁ pavedenti:
an5.178:5.11	‘ayaṁ puriso surāmerayamajjapamādaṭṭhānaṁ anuyutto itthiṁ vā purisaṁ vā jīvitā voropesi;
an5.178:5.12	ayaṁ puriso surāmerayamajjapamādaṭṭhānaṁ anuyutto gāmā vā araññā vā adinnaṁ theyyasaṅkhātaṁ ādiyi;
an5.178:5.13	ayaṁ puriso surāmerayamajjapamādaṭṭhānaṁ anuyutto paritthīsu parakumārīsu cārittaṁ āpajji;
an5.178:5.14	ayaṁ puriso surāmerayamajjapamādaṭṭhānaṁ anuyutto gahapatissa vā gahapatiputtassa vā musāvādena atthaṁ pabhañjīti.
an5.178:5.15	Tamenaṁ rājāno gahetvā surāmerayamajjapamādaṭṭhānahetu hananti vā bandhanti vā pabbājenti vā yathāpaccayaṁ vā karonti.
an5.178:5.16	Api nu tumhehi evarūpaṁ diṭṭhaṁ vā sutaṁ vā’”ti?
an5.178:5.17	“Diṭṭhañca no, bhante, sutañca suyyissati cā”ti.
an5.178:5.18	Aṭṭhamaṁ.
an5.179:0.1	Aṅguttara Nikāya 5.179
an5.179:0.2	18. Upāsakavagga
an5.179:0.3	Gihisutta
an5.179:1.1	Atha kho anāthapiṇḍiko gahapati pañcamattehi upāsakasatehi parivuto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an5.179:1.2	Atha kho bhagavā āyasmantaṁ sāriputtaṁ āmantesi:
an5.179:1.3	“yaṁ kañci, sāriputta, jāneyyātha gihiṁ odātavasanaṁ pañcasu sikkhāpadesu saṁvutakammantaṁ catunnaṁ ābhicetasikānaṁ diṭṭhadhammasukhavihārānaṁ nikāmalābhiṁ akicchalābhiṁ akasiralābhiṁ, so ākaṅkhamāno attanāva attānaṁ byākareyya:
an5.179:1.4	‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo’ti.
an5.179:2.1	Katamesu pañcasu sikkhāpadesu saṁvutakammanto hoti?
an5.179:2.2	Idha, sāriputta, ariyasāvako pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti.
an5.179:2.3	Imesu pañcasu sikkhāpadesu saṁvutakammanto hoti.
an5.179:3.1	Katamesaṁ catunnaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī?
an5.179:3.2	Idha, sāriputta, ariyasāvako buddhe aveccappasādena samannāgato hoti:
an5.179:3.3	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi, satthā devamanussānaṁ buddho bhagavā’ti.
an5.179:3.4	Ayamassa paṭhamo ābhicetasiko diṭṭhadhammasukhavihāro adhigato hoti avisuddhassa cittassa visuddhiyā apariyodātassa cittassa pariyodapanāya.
an5.179:4.1	Puna caparaṁ, sāriputta, ariyasāvako dhamme aveccappasādena samannāgato hoti:
an5.179:4.2	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.
an5.179:4.3	Ayamassa dutiyo ābhicetasiko diṭṭhadhammasukhavihāro adhigato hoti avisuddhassa cittassa visuddhiyā apariyodātassa cittassa pariyodapanāya.
an5.179:5.1	Puna caparaṁ, sāriputta, ariyasāvako saṅghe aveccappasādena samannāgato hoti:
an5.179:5.2	‘suppaṭipanno bhagavato sāvakasaṅgho ujuppaṭipanno bhagavato sāvakasaṅgho ñāyappaṭipanno bhagavato sāvakasaṅgho sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.
an5.179:5.3	Ayamassa tatiyo ābhicetasiko diṭṭhadhammasukhavihāro adhigato hoti avisuddhassa cittassa visuddhiyā apariyodātassa cittassa pariyodapanāya.
an5.179:6.1	Puna caparaṁ, sāriputta, ariyasāvako ariyakantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṁvattanikehi.
an5.179:6.2	Ayamassa catuttho ābhicetasiko diṭṭhadhammasukhavihāro adhigato hoti avisuddhassa cittassa visuddhiyā apariyodātassa cittassa pariyodapanāya.
an5.179:6.3	Imesaṁ catunnaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an5.179:7.1	Yaṁ kañci, sāriputta, jāneyyātha gihiṁ odātavasanaṁ—imesu pañcasu sikkhāpadesu saṁvutakammantaṁ, imesañca catunnaṁ ābhicetasikānaṁ diṭṭhadhammasukhavihārānaṁ nikāmalābhiṁ akicchalābhiṁ akasiralābhiṁ, so ākaṅkhamāno attanāva attānaṁ byākareyya:
an5.179:7.2	‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo’ti.
an5.179:8.1	Nirayesu bhayaṁ disvā,
an5.179:8.2	pāpāni parivajjaye;
an5.179:8.3	Ariyadhammaṁ samādāya,
an5.179:8.4	paṇḍito parivajjaye.
an5.179:9.1	Na hiṁse pāṇabhūtāni,
an5.179:9.2	vijjamāne parakkame;
an5.179:9.3	Musā ca na bhaṇe jānaṁ,
an5.179:9.4	adinnaṁ na parāmase.
an5.179:10.1	Sehi dārehi santuṭṭho,
an5.179:10.2	paradārañca ārame;
an5.179:10.3	Merayaṁ vāruṇiṁ jantu,
an5.179:10.4	na pive cittamohaniṁ.
an5.179:11.1	Anussareyya sambuddhaṁ,
an5.179:11.2	dhammañcānuvitakkaye;
an5.179:11.3	Abyāpajjaṁ hitaṁ cittaṁ,
an5.179:11.4	devalokāya bhāvaye.
an5.179:12.1	Upaṭṭhite deyyadhamme,
an5.179:12.2	puññatthassa jigīsato;
an5.179:12.3	Santesu paṭhamaṁ dinnā,
an5.179:12.4	vipulā hoti dakkhiṇā.
an5.179:13.1	Santo have pavakkhāmi,
an5.179:13.2	sāriputta suṇohi me;
an5.179:13.3	Iti kaṇhāsu setāsu,
an5.179:13.4	rohiṇīsu harīsu vā.
an5.179:14.1	Kammāsāsu sarūpāsu,
an5.179:14.2	gosu pārevatāsu vā;
an5.179:14.3	Yāsu kāsuci etāsu,
an5.179:14.4	danto jāyati puṅgavo.
an5.179:15.1	Dhorayho balasampanno,
an5.179:15.2	kalyāṇajavanikkamo;
an5.179:15.3	Tameva bhāre yuñjanti,
an5.179:15.4	nāssa vaṇṇaṁ parikkhare.
an5.179:16.1	Evamevaṁ manussesu,
an5.179:16.2	yasmiṁ kismiñci jātiye;
an5.179:16.3	Khattiye brāhmaṇe vesse,
an5.179:16.4	sudde caṇḍālapukkuse.
an5.179:17.1	Yāsu kāsuci etāsu,
an5.179:17.2	danto jāyati subbato;
an5.179:17.3	Dhammaṭṭho sīlasampanno,
an5.179:17.4	saccavādī hirīmano.
an5.179:18.1	Pahīnajātimaraṇo,
an5.179:18.2	brahmacariyassa kevalī;
an5.179:18.3	Pannabhāro visaṁyutto,
an5.179:18.4	katakicco anāsavo.
an5.179:19.1	Pāragū sabbadhammānaṁ,
an5.179:19.2	anupādāya nibbuto;
an5.179:19.3	Tasmiñca viraje khette,
an5.179:19.4	vipulā hoti dakkhiṇā.
an5.179:20.1	Bālā ca avijānantā,
an5.179:20.2	dummedhā assutāvino;
an5.179:20.3	Bahiddhā dadanti dānāni,
an5.179:20.4	na hi sante upāsare.
an5.179:21.1	Ye ca sante upāsanti,
an5.179:21.2	sappaññe dhīrasammate;
an5.179:21.3	Saddhā ca nesaṁ sugate,
an5.179:21.4	mūlajātā patiṭṭhitā.
an5.179:22.1	Devalokañca te yanti,
an5.179:22.2	kule vā idha jāyare;
an5.179:22.3	Anupubbena nibbānaṁ,
an5.179:22.4	adhigacchanti paṇḍitā”ti.
an5.179:22.5	Navamaṁ.
an5.180:0.1	Aṅguttara Nikāya 5.180
an5.180:0.2	18. Upāsakavagga
an5.180:0.3	Gavesīsutta
an5.180:1.1	Ekaṁ samayaṁ bhagavā kosalesu cārikaṁ carati mahatā bhikkhusaṅghena saddhiṁ.
an5.180:1.2	Addasā kho bhagavā addhānamaggappaṭipanno aññatarasmiṁ padese mahantaṁ sālavanaṁ;
an5.180:1.3	disvāna maggā okkamma yena taṁ sālavanaṁ tenupasaṅkami; upasaṅkamitvā taṁ sālavanaṁ ajjhogāhetvā aññatarasmiṁ padese sitaṁ pātvākāsi.
an5.180:2.1	Atha kho āyasmato ānandassa etadahosi:
an5.180:2.2	“ko nu kho hetu ko paccayo bhagavato sitassa pātukammāya?
an5.180:2.3	Na akāraṇena tathāgatā sitaṁ pātukarontī”ti.
an5.180:2.4	Atha kho āyasmā ānando bhagavantaṁ etadavoca:
an5.180:2.5	“ko nu kho, bhante, hetu ko paccayo bhagavato sitassa pātukammāya?
an5.180:2.6	Na akāraṇena tathāgatā sitaṁ pātukarontī”ti.
an5.180:3.1	“Bhūtapubbaṁ, ānanda, imasmiṁ padese nagaraṁ ahosi iddhañceva phītañca bahujanaṁ ākiṇṇamanussaṁ.
an5.180:3.2	Taṁ kho panānanda, nagaraṁ kassapo bhagavā arahaṁ sammāsambuddho upanissāya vihāsi.
an5.180:3.3	Kassapassa kho panānanda, bhagavato arahato sammāsambuddhassa gavesī nāma upāsako ahosi sīlesu aparipūrakārī.
an5.180:3.4	Gavesinā kho, ānanda, upāsakena pañcamattāni upāsakasatāni paṭidesitāni samādapitāni ahesuṁ sīlesu aparipūrakārino.
an5.180:3.5	Atha kho, ānanda, gavesissa upāsakassa etadahosi:
an5.180:3.6	‘ahaṁ kho imesaṁ pañcannaṁ upāsakasatānaṁ bahūpakāro pubbaṅgamo samādapetā, ahañcamhi sīlesu aparipūrakārī, imāni ca pañca upāsakasatāni sīlesu aparipūrakārino.
an5.180:3.7	Iccetaṁ samasamaṁ, natthi kiñci atirekaṁ;
an5.180:3.8	handāhaṁ atirekāyā’ti.
an5.180:4.1	Atha kho, ānanda, gavesī upāsako yena tāni pañca upāsakasatāni tenupasaṅkami; upasaṅkamitvā tāni pañca upāsakasatāni etadavoca:
an5.180:4.2	‘ajjatagge maṁ āyasmanto sīlesu paripūrakāriṁ dhārethā’ti.
an5.180:4.3	Atha kho, ānanda, tesaṁ pañcannaṁ upāsakasatānaṁ etadahosi:
an5.180:4.4	‘ayyo kho gavesī amhākaṁ bahūpakāro pubbaṅgamo samādapetā.
an5.180:4.5	Ayyo hi nāma gavesī sīlesu paripūrakārī bhavissati.
an5.180:4.6	Kimaṅgaṁ pana mayan’ti.
an5.180:4.7	Atha kho, ānanda, tāni pañca upāsakasatāni yena gavesī upāsako tenupasaṅkamiṁsu; upasaṅkamitvā gavesiṁ upāsakaṁ etadavocuṁ:
an5.180:4.8	‘ajjatagge ayyo gavesī imānipi pañca upāsakasatāni sīlesu paripūrakārino dhāretū’ti.
an5.180:4.9	Atha kho, ānanda, gavesissa upāsakassa etadahosi:
an5.180:4.10	‘ahaṁ kho imesaṁ pañcannaṁ upāsakasatānaṁ bahūpakāro pubbaṅgamo samādapetā, ahañcamhi sīlesu paripūrakārī, imānipi pañca upāsakasatāni sīlesu paripūrakārino.
an5.180:4.11	Iccetaṁ samasamaṁ, natthi kiñci atirekaṁ;
an5.180:4.12	handāhaṁ atirekāyā’ti.
an5.180:5.1	Atha kho, ānanda, gavesī upāsako yena tāni pañca upāsakasatāni tenupasaṅkami; upasaṅkamitvā tāni pañca upāsakasatāni etadavoca:
an5.180:5.2	‘ajjatagge maṁ āyasmanto brahmacāriṁ dhāretha ārācāriṁ virataṁ methunā gāmadhammā’ti.
an5.180:5.3	Atha kho, ānanda, tesaṁ pañcannaṁ upāsakasatānaṁ etadahosi:
an5.180:5.4	‘ayyo kho gavesī amhākaṁ bahūpakāro pubbaṅgamo samādapetā.
an5.180:5.5	Ayyo hi nāma gavesī brahmacārī bhavissati ārācārī virato methunā gāmadhammā.
an5.180:5.6	Kimaṅgaṁ pana mayan’ti.
an5.180:5.7	Atha kho, ānanda, tāni pañca upāsakasatāni yena gavesī upāsako tenupasaṅkamiṁsu; upasaṅkamitvā gavesiṁ upāsakaṁ etadavocuṁ:
an5.180:5.8	‘ajjatagge ayyo gavesī imānipi pañca upāsakasatāni brahmacārino dhāretu ārācārino viratā methunā gāmadhammā’ti.
an5.180:5.9	Atha kho, ānanda, gavesissa upāsakassa etadahosi:
an5.180:5.10	‘ahaṁ kho imesaṁ pañcannaṁ upāsakasatānaṁ bahūpakāro pubbaṅgamo samādapetā.
an5.180:5.11	Ahañcamhi sīlesu paripūrakārī.
an5.180:5.12	Imānipi pañca upāsakasatāni sīlesu paripūrakārino.
an5.180:5.13	Ahañcamhi brahmacārī ārācārī virato methunā gāmadhammā.
an5.180:5.14	Imānipi pañca upāsakasatāni brahmacārino ārācārino viratā methunā gāmadhammā.
an5.180:5.15	Iccetaṁ samasamaṁ, natthi kiñci atirekaṁ;
an5.180:5.16	handāhaṁ atirekāyā’ti.
an5.180:6.1	Atha kho, ānanda, gavesī upāsako yena tāni pañca upāsakasatāni tenupasaṅkami; upasaṅkamitvā tāni pañca upāsakasatāni etadavoca:
an5.180:6.2	‘ajjatagge maṁ āyasmanto ekabhattikaṁ dhāretha rattūparataṁ virataṁ vikālabhojanā’ti.
an5.180:6.3	Atha kho, ānanda, tesaṁ pañcannaṁ upāsakasatānaṁ etadahosi:
an5.180:6.4	‘ayyo kho gavesī bahūpakāro pubbaṅgamo samādapetā.
an5.180:6.5	Ayyo hi nāma gavesī ekabhattiko bhavissati rattūparato virato vikālabhojanā.
an5.180:6.6	Kimaṅgaṁ pana mayan’ti.
an5.180:6.7	Atha kho, ānanda, tāni pañca upāsakasatāni yena gavesī upāsako tenupasaṅkamiṁsu; upasaṅkamitvā gavesiṁ upāsakaṁ etadavocuṁ:
an5.180:6.8	‘ajjatagge ayyo gavesī imānipi pañca upāsakasatāni ekabhattike dhāretu rattūparate virate vikālabhojanā’ti.
an5.180:6.9	Atha kho, ānanda, gavesissa upāsakassa etadahosi:
an5.180:6.10	‘ahaṁ kho imesaṁ pañcannaṁ upāsakasatānaṁ bahūpakāro pubbaṅgamo samādapetā.
an5.180:6.11	Ahañcamhi sīlesu paripūrakārī.
an5.180:6.12	Imānipi pañca upāsakasatāni sīlesu paripūrakārino.
an5.180:6.13	Ahañcamhi brahmacārī ārācārī virato methunā gāmadhammā.
an5.180:6.14	Imānipi pañca upāsakasatāni brahmacārino ārācārino viratā methunā gāmadhammā.
an5.180:6.15	Ahañcamhi ekabhattiko rattūparato virato vikālabhojanā.
an5.180:6.16	Imānipi pañca upāsakasatāni ekabhattikā rattūparatā viratā vikālabhojanā.
an5.180:6.17	Iccetaṁ samasamaṁ, natthi kiñci atirekaṁ;
an5.180:6.18	handāhaṁ atirekāyā’ti.
an5.180:7.1	Atha kho, ānanda, gavesī upāsako yena kassapo bhagavā arahaṁ sammāsambuddho tenupasaṅkami; upasaṅkamitvā kassapaṁ bhagavantaṁ arahantaṁ sammāsambuddhaṁ etadavoca:
an5.180:7.2	‘labheyyāhaṁ, bhante, bhagavato santike pabbajjaṁ labheyyaṁ upasampadan’ti.
an5.180:7.3	Alattha kho, ānanda, gavesī upāsako kassapassa bhagavato arahato sammāsambuddhassa santike pabbajjaṁ, alattha upasampadaṁ.
an5.180:7.4	Acirūpasampanno kho panānanda, gavesī bhikkhu eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
an5.180:7.5	‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti abbhaññāsi.
an5.180:7.6	Aññataro ca panānanda, gavesī bhikkhu arahataṁ ahosi.
an5.180:8.1	Atha kho, ānanda, tesaṁ pañcannaṁ upāsakasatānaṁ etadahosi:
an5.180:8.2	‘ayyo kho gavesī amhākaṁ bahūpakāro pubbaṅgamo samādapetā.
an5.180:8.3	Ayyo hi nāma gavesī kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajissati.
an5.180:8.4	Kimaṅgaṁ pana mayan’ti.
an5.180:8.5	Atha kho, ānanda, tāni pañca upāsakasatāni yena kassapo bhagavā arahaṁ sammāsambuddho tenupasaṅkamiṁsu; upasaṅkamitvā kassapaṁ bhagavantaṁ arahantaṁ sammāsambuddhaṁ etadavocuṁ:
an5.180:8.6	‘labheyyāma mayaṁ, bhante, bhagavato santike pabbajjaṁ, labheyyāma upasampadan’ti.
an5.180:8.7	Alabhiṁsu kho, ānanda, tāni pañca upāsakasatāni kassapassa bhagavato arahato sammāsambuddhassa santike pabbajjaṁ, alabhiṁsu upasampadaṁ.
an5.180:9.1	Atha kho, ānanda, gavesissa bhikkhuno etadahosi:
an5.180:9.2	‘ahaṁ kho imassa anuttarassa vimuttisukhassa nikāmalābhī homi akicchalābhī akasiralābhī.
an5.180:9.3	Aho vatimānipi pañca bhikkhusatāni imassa anuttarassa vimuttisukhassa nikāmalābhino assu akicchalābhino akasiralābhino’ti.
an5.180:9.4	Atha kho, ānanda, tāni pañca bhikkhusatāni vūpakaṭṭhā appamattā ātāpino pahitattā viharantā nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—
an5.180:9.5	brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihariṁsu.
an5.180:9.6	‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti abbhaññiṁsu.
an5.180:10.1	Iti kho, ānanda, tāni pañca bhikkhusatāni gavesīpamukhāni uttaruttari paṇītapaṇītaṁ vāyamamānā anuttaraṁ vimuttiṁ sacchākaṁsu.
an5.180:10.2	Tasmātiha, ānanda, evaṁ sikkhitabbaṁ:
an5.180:10.3	‘uttaruttari paṇītapaṇītaṁ vāyamamānā anuttaraṁ vimuttiṁ sacchikarissāmā’ti.
an5.180:10.4	Evañhi vo, ānanda, sikkhitabban”ti.
an5.180:10.5	Dasamaṁ.
an5.180:10.6	Upāsakavaggo tatiyo.
an5.180:11.0	Tassuddānaṁ
an5.180:11.1	Sārajjaṁ visārado nirayaṁ,
an5.180:11.2	Veraṁ caṇḍālapañcamaṁ;
an5.180:11.3	Pīti vaṇijjā rājāno,
an5.180:11.4	Gihī ceva gavesināti.
an5.181:0.1	Aṅguttara Nikāya 5.181
an5.181:0.2	19. Araññavagga
an5.181:0.3	Āraññikasutta
an5.181:1.1	“Pañcime, bhikkhave, āraññikā.
an5.181:1.2	Katame pañca?
an5.181:1.3	Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṁ buddhehi buddhasāvakehīti āraññiko hoti, appicchataṁyeva nissāya santuṭṭhiṁyeva nissāya sallekhaṁyeva nissāya pavivekaṁyeva nissāya idamatthitaṁyeva nissāya āraññiko hoti.
an5.181:1.4	Ime kho, bhikkhave, pañca āraññikā.
an5.181:1.5	Imesaṁ kho, bhikkhave, pañcannaṁ āraññikānaṁ yvāyaṁ āraññiko appicchataṁyeva nissāya santuṭṭhiṁyeva nissāya sallekhaṁyeva nissāya pavivekaṁyeva nissāya idamatthitaṁyeva nissāya āraññiko hoti, ayaṁ imesaṁ pañcannaṁ āraññikānaṁ aggo ca seṭṭho ca mokkho ca uttamo ca pavaro ca.
an5.181:2.1	Seyyathāpi, bhikkhave, gavā khīraṁ, khīramhā dadhi, dadhimhā navanītaṁ, navanītamhā sappi, sappimhā sappimaṇḍo, sappimaṇḍo tattha aggamakkhāyati;
an5.181:2.2	evamevaṁ kho, bhikkhave, imesaṁ pañcannaṁ āraññikānaṁ yvāyaṁ āraññiko appicchataṁyeva nissāya santuṭṭhiṁyeva nissāya sallekhaṁyeva nissāya pavivekaṁyeva nissāya idamatthitaṁyeva nissāya āraññiko hoti, ayaṁ imesaṁ pañcannaṁ āraññikānaṁ aggo ca seṭṭho ca mokkho ca uttamo ca pavaro cā”ti.
an5.181:2.3	Paṭhamaṁ.
an5.182:0.1	Aṅguttara Nikāya 5.182
an5.182:0.2	19. Araññavagga
an5.182:0.3	Cīvarasutta
an5.182:1.1	“Pañcime, bhikkhave, paṁsukūlikā.
an5.182:1.2	Katame pañca?
an5.182:1.3	Mandattā momūhattā paṁsukūliko hoti …pe… idamatthitaṁyeva nissāya paṁsukūliko hoti.
an5.182:1.4	Ime kho, bhikkhave, pañca paṁsukūlikā”ti.
an5.182:1.5	Dutiyaṁ.
an5.183:0.1	Aṅguttara Nikāya 5.183
an5.183:0.2	19. Araññavagga
an5.183:0.3	Rukkhamūlikasutta
an5.183:1.1	“Pañcime, bhikkhave, rukkhamūlikā.
an5.183:1.2	Katame pañca?
an5.183:1.3	Mandattā momūhattā rukkhamūliko hoti …pe… idamatthitaṁyeva nissāya rukkhamūliko hoti.
an5.183:1.4	Ime kho, bhikkhave, pañca rukkhamūlikā”ti.
an5.183:1.5	Tatiyaṁ.
an5.184:0.1	Aṅguttara Nikāya 5.184
an5.184:0.2	19. Araññavagga
an5.184:0.3	Sosānikasutta
an5.184:1.1	“Pañcime, bhikkhave, sosānikā.
an5.184:1.2	Katame pañca?
an5.184:1.3	Mandattā momūhattā sosāniko hoti …pe… idamatthitaṁyeva nissāya sosāniko hoti.
an5.184:1.4	Ime kho, bhikkhave, pañca sosānikā”ti.
an5.184:1.5	Catutthaṁ.
an5.185:0.1	Aṅguttara Nikāya 5.185
an5.185:0.2	19. Araññavagga
an5.185:0.3	Abbhokāsikasutta
an5.185:1.1	“Pañcime, bhikkhave, abbhokāsikā …pe….
an5.185:1.2	Pañcamaṁ.
an5.186:0.1	Aṅguttara Nikāya 5.186
an5.186:0.2	19. Araññavagga
an5.186:0.3	Nesajjikasutta
an5.186:1.1	“Pañcime, bhikkhave, nesajjikā …pe….
an5.186:1.2	Chaṭṭhaṁ.
an5.187:0.1	Aṅguttara Nikāya 5.187
an5.187:0.2	19. Araññavagga
an5.187:0.3	Yathāsanthatikasutta
an5.187:1.1	“Pañcime, bhikkhave, yathāsanthatikā …pe….
an5.187:1.2	Sattamaṁ.
an5.188:0.1	Aṅguttara Nikāya 5.188
an5.188:0.2	19. Araññavagga
an5.188:0.3	Ekāsanikasutta
an5.188:1.1	“Pañcime, bhikkhave, ekāsanikā …pe….
an5.188:1.2	Aṭṭhamaṁ.
an5.189:0.1	Aṅguttara Nikāya 5.189
an5.189:0.2	19. Araññavagga
an5.189:0.3	Khalupacchābhattikasutta
an5.189:1.1	“Pañcime, bhikkhave, khalupacchābhattikā …pe….
an5.189:1.2	Navamaṁ.
an5.190:0.1	Aṅguttara Nikāya 5.190
an5.190:0.2	19. Araññavagga
an5.190:0.3	Pattapiṇḍikasutta
an5.190:1.1	“Pañcime, bhikkhave, pattapiṇḍikā.
an5.190:1.2	Katame pañca?
an5.190:1.3	Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, ‘vaṇṇitaṁ buddhehi buddhasāvakehī’ti pattapiṇḍiko hoti, appicchataṁyeva nissāya santuṭṭhiṁyeva nissāya sallekhaṁyeva nissāya pavivekaṁyeva nissāya idamatthitaṁyeva nissāya pattapiṇḍiko hoti.
an5.190:1.4	Ime kho, bhikkhave, pañca pattapiṇḍikā.
an5.190:1.5	Imesaṁ kho, bhikkhave, pañcannaṁ pattapiṇḍikānaṁ yvāyaṁ pattapiṇḍiko appicchataṁyeva nissāya santuṭṭhiṁyeva nissāya sallekhaṁyeva nissāya pavivekaṁyeva nissāya idamatthitaṁyeva nissāya pattapiṇḍiko hoti, ayaṁ imesaṁ pañcannaṁ pattapiṇḍikānaṁ aggo ca seṭṭho ca mokkho ca uttamo ca pavaro ca.
an5.190:2.1	Seyyathāpi, bhikkhave, gavā khīraṁ, khīramhā dadhi, dadhimhā navanītaṁ, navanītamhā sappi, sappimhā sappimaṇḍo, sappimaṇḍo tattha aggamakkhāyati;
an5.190:2.2	evamevaṁ kho, bhikkhave, imesaṁ pañcannaṁ pattapiṇḍikānaṁ yvāyaṁ pattapiṇḍiko appicchataṁyeva nissāya santuṭṭhiṁyeva nissāya sallekhaṁyeva nissāya pavivekaṁyeva nissāya idamatthitaṁyeva nissāya pattapiṇḍiko hoti, ayaṁ imesaṁ pañcannaṁ pattapiṇḍikānaṁ aggo ca seṭṭho ca mokkho ca uttamo ca pavaro cā”ti.
an5.190:2.3	Dasamaṁ.
an5.190:2.4	Araññavaggo catuttho.
an5.190:3.0	Tassuddānaṁ
an5.190:3.1	Araññaṁ cīvaraṁ rukkha,
an5.190:3.2	Susānaṁ abbhokāsikaṁ;
an5.190:3.3	Nesajjaṁ santhataṁ ekāsanikaṁ,
an5.190:3.4	Khalupacchāpiṇḍikena cāti.
an5.191:0.1	Aṅguttara Nikāya 5.191
an5.191:0.2	20. Brāhmaṇavagga
an5.191:0.3	Soṇasutta
an5.191:1.1	“Pañcime, bhikkhave, porāṇā brāhmaṇadhammā etarahi sunakhesu sandissanti, no brāhmaṇesu.
an5.191:1.2	Katame pañca?
an5.191:1.3	Pubbe sudaṁ, bhikkhave, brāhmaṇā brāhmaṇiṁyeva gacchanti, no abrāhmaṇiṁ.
an5.191:1.4	Etarahi, bhikkhave, brāhmaṇā brāhmaṇimpi gacchanti, abrāhmaṇimpi gacchanti.
an5.191:1.5	Etarahi, bhikkhave, sunakhā sunakhiṁyeva gacchanti, no asunakhiṁ.
an5.191:1.6	Ayaṁ, bhikkhave, paṭhamo porāṇo brāhmaṇadhammo etarahi sunakhesu sandissati, no brāhmaṇesu.
an5.191:2.1	Pubbe sudaṁ, bhikkhave, brāhmaṇā brāhmaṇiṁ utuniṁyeva gacchanti, no anutuniṁ.
an5.191:2.2	Etarahi, bhikkhave, brāhmaṇā brāhmaṇiṁ utunimpi gacchanti, anutunimpi gacchanti.
an5.191:2.3	Etarahi, bhikkhave, sunakhā sunakhiṁ utuniṁyeva gacchanti, no anutuniṁ.
an5.191:2.4	Ayaṁ, bhikkhave, dutiyo porāṇo brāhmaṇadhammo etarahi sunakhesu sandissati, no brāhmaṇesu.
an5.191:3.1	Pubbe sudaṁ, bhikkhave, brāhmaṇā brāhmaṇiṁ neva kiṇanti no vikkiṇanti, sampiyeneva saṁvāsaṁ sambandhāya sampavattenti.
an5.191:3.2	Etarahi, bhikkhave, brāhmaṇā brāhmaṇiṁ kiṇantipi vikkiṇantipi, sampiyenapi saṁvāsaṁ sambandhāya sampavattenti.
an5.191:3.3	Etarahi, bhikkhave, sunakhā sunakhiṁ neva kiṇanti no vikkiṇanti, sampiyeneva saṁvāsaṁ sambandhāya sampavattenti.
an5.191:3.4	Ayaṁ, bhikkhave, tatiyo porāṇo brāhmaṇadhammo etarahi sunakhesu sandissati, no brāhmaṇesu.
an5.191:4.1	Pubbe sudaṁ, bhikkhave, brāhmaṇā na sannidhiṁ karonti dhanassapi dhaññassapi rajatassapi jātarūpassapi.
an5.191:4.2	Etarahi, bhikkhave, brāhmaṇā sannidhiṁ karonti dhanassapi dhaññassapi rajatassapi jātarūpassapi.
an5.191:4.3	Etarahi, bhikkhave, sunakhā na sannidhiṁ karonti dhanassapi dhaññassapi rajatassapi jātarūpassapi.
an5.191:4.4	Ayaṁ, bhikkhave, catuttho porāṇo brāhmaṇadhammo etarahi sunakhesu sandissati, no brāhmaṇesu.
an5.191:5.1	Pubbe sudaṁ, bhikkhave, brāhmaṇā sāyaṁ sāyamāsāya pāto pātarāsāya bhikkhaṁ pariyesanti.
an5.191:5.2	Etarahi, bhikkhave, brāhmaṇā yāvadatthaṁ udarāvadehakaṁ bhuñjitvā avasesaṁ ādāya pakkamanti.
an5.191:5.3	Etarahi, bhikkhave, sunakhā sāyaṁ sāyamāsāya pāto pātarāsāya bhikkhaṁ pariyesanti.
an5.191:5.4	Ayaṁ, bhikkhave, pañcamo porāṇo brāhmaṇadhammo etarahi sunakhesu sandissati, no brāhmaṇesu.
an5.191:5.5	Ime kho, bhikkhave, pañca porāṇā brāhmaṇadhammā etarahi sunakhesu sandissanti, no brāhmaṇesū”ti.
an5.191:5.6	Paṭhamaṁ.
an5.192:0.1	Aṅguttara Nikāya 5.192
an5.192:0.2	20. Brāhmaṇavagga
an5.192:0.3	Doṇabrāhmaṇasutta
an5.192:1.1	Atha kho doṇo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an5.192:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho doṇo brāhmaṇo bhagavantaṁ etadavoca:
an5.192:2.1	“Sutaṁ metaṁ, bho gotama:
an5.192:2.2	‘na samaṇo gotamo brāhmaṇe jiṇṇe vuḍḍhe mahallake addhagate vayoanuppatte abhivādeti vā paccuṭṭheti vā āsanena vā nimantetī’ti.
an5.192:2.3	Tayidaṁ, bho gotama, tatheva.
an5.192:2.4	Na hi bhavaṁ gotamo brāhmaṇe jiṇṇe vuḍḍhe mahallake addhagate vayoanuppatte abhivādeti vā paccuṭṭheti vā āsanena vā nimanteti.
an5.192:2.5	Tayidaṁ, bho gotama, na sampannamevā”ti.
an5.192:2.6	“Tvampi no, doṇa, brāhmaṇo paṭijānāsī”ti?
an5.192:2.7	“Yañhi taṁ, bho gotama, sammā vadamāno vadeyya:
an5.192:2.8	‘brāhmaṇo ubhato sujāto—
an5.192:2.9	mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena, ajjhāyako mantadharo, tiṇṇaṁ vedānaṁ pāragū sanighaṇḍukeṭubhānaṁ sākkharappabhedānaṁ itihāsapañcamānaṁ, padako veyyākaraṇo lokāyatamahāpurisalakkhaṇesu anavayo’ti, mameva taṁ, bho gotama, sammā vadamāno vadeyya.
an5.192:2.10	Ahañhi, bho gotama, brāhmaṇo ubhato sujāto—
an5.192:2.11	mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena, ajjhāyako mantadharo, tiṇṇaṁ vedānaṁ pāragū sanighaṇḍukeṭubhānaṁ sākkharappabhedānaṁ itihāsapañcamānaṁ, padako veyyākaraṇo lokāyatamahāpurisalakkhaṇesu anavayo”ti.
an5.192:3.1	“Ye kho te, doṇa, brāhmaṇānaṁ pubbakā isayo mantānaṁ kattāro mantānaṁ pavattāro, yesamidaṁ etarahi brāhmaṇā porāṇaṁ mantapadaṁ gītaṁ pavuttaṁ samihitaṁ tadanugāyanti tadanubhāsanti bhāsitamanubhāsanti sajjhāyitamanusajjhāyanti vācitamanuvācenti, seyyathidaṁ—aṭṭhako, vāmako, vāmadevo, vessāmitto, yamadaggi, aṅgīraso, bhāradvājo, vāseṭṭho, kassapo, bhagu;
an5.192:3.2	tyāssume pañca brāhmaṇe paññāpenti—
an5.192:3.3	brahmasamaṁ, devasamaṁ, mariyādaṁ, sambhinnamariyādaṁ, brāhmaṇacaṇḍālaṁyeva pañcamaṁ.
an5.192:3.4	Tesaṁ tvaṁ doṇa, katamo”ti?
an5.192:4.1	“Na kho mayaṁ, bho gotama, pañca brāhmaṇe jānāma, atha kho mayaṁ brāhmaṇātveva jānāma.
an5.192:4.2	Sādhu me bhavaṁ gotamo tathā dhammaṁ desetu yathā ahaṁ ime pañca brāhmaṇe jāneyyan”ti.
an5.192:4.3	“Tena hi, brāhmaṇa, suṇohi, sādhukaṁ manasi karohi; bhāsissāmī”ti.
an5.192:4.4	“Evaṁ, bho”ti kho doṇo brāhmaṇo bhagavato paccassosi.
an5.192:4.5	Bhagavā etadavoca:
an5.192:5.1	“Kathañca, doṇa, brāhmaṇo brahmasamo hoti?
an5.192:5.2	Idha, doṇa, brāhmaṇo ubhato sujāto hoti—
an5.192:5.3	mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena.
an5.192:5.4	So aṭṭhacattālīsavassāni komārabrahmacariyaṁ carati mante adhīyamāno.
an5.192:5.5	Aṭṭhacattālīsavassāni komārabrahmacariyaṁ caritvā mante adhīyitvā ācariyassa ācariyadhanaṁ pariyesati dhammeneva, no adhammena.
an5.192:6.1	Tattha ca, doṇa, ko dhammo?
an5.192:6.2	Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṁ bhikkhācariyāya kapālaṁ anatimaññamāno.
an5.192:6.3	So ācariyassa ācariyadhanaṁ niyyādetvā kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajati.
an5.192:6.4	So evaṁ pabbajito samāno mettāsahagatena cetasā ekaṁ disaṁ pharitvā viharati, tathā dutiyaṁ tathā tatiyaṁ tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati.
an5.192:6.5	Karuṇā …pe…
an5.192:6.6	muditā …
an5.192:6.7	upekkhāsahagatena cetasā ekaṁ disaṁ pharitvā viharati, tathā dutiyaṁ tathā tatiyaṁ tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
an5.192:6.8	So ime cattāro brahmavihāre bhāvetvā kāyassa bhedā paraṁ maraṇā sugatiṁ brahmalokaṁ upapajjati.
an5.192:6.9	Evaṁ kho, doṇa, brāhmaṇo brahmasamo hoti.
an5.192:7.1	Kathañca, doṇa, brāhmaṇo devasamo hoti?
an5.192:7.2	Idha, doṇa, brāhmaṇo ubhato sujāto hoti—
an5.192:7.3	mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena.
an5.192:7.4	So aṭṭhacattālīsavassāni komārabrahmacariyaṁ carati mante adhīyamāno.
an5.192:7.5	Aṭṭhacattālīsavassāni komārabrahmacariyaṁ caritvā mante adhīyitvā ācariyassa ācariyadhanaṁ pariyesati dhammeneva, no adhammena.
an5.192:7.6	Tattha ca, doṇa, ko dhammo?
an5.192:7.7	Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṁ bhikkhācariyāya kapālaṁ anatimaññamāno.
an5.192:7.8	So ācariyassa ācariyadhanaṁ niyyādetvā dāraṁ pariyesati dhammeneva, no adhammena.
an5.192:8.1	Tattha ca, doṇa, ko dhammo?
an5.192:8.2	Neva kayena na vikkayena, brāhmaṇiṁyeva udakūpassaṭṭhaṁ.
an5.192:8.3	So brāhmaṇiṁyeva gacchati, na khattiyiṁ na vessiṁ na suddiṁ na caṇḍāliṁ na nesādiṁ na veniṁ na rathakāriṁ na pukkusiṁ gacchati, na gabbhiniṁ gacchati, na pāyamānaṁ gacchati, na anutuniṁ gacchati.
an5.192:8.4	Kasmā ca, doṇa, brāhmaṇo na gabbhiniṁ gacchati?
an5.192:8.5	Sace, doṇa, brāhmaṇo gabbhiniṁ gacchati, atimīḷhajo nāma so hoti māṇavako vā māṇavikā vā.
an5.192:8.6	Tasmā, doṇa, brāhmaṇo na gabbhiniṁ gacchati.
an5.192:8.7	Kasmā ca, doṇa, brāhmaṇo na pāyamānaṁ gacchati?
an5.192:8.8	Sace, doṇa, brāhmaṇo pāyamānaṁ gacchati, asucipaṭipīḷito nāma so hoti māṇavako vā māṇavikā vā.
an5.192:8.9	Tasmā, doṇa, brāhmaṇo na pāyamānaṁ gacchati.
an5.192:8.10	Tassa sā hoti brāhmaṇī neva kāmatthā na davatthā na ratatthā, pajatthāva brāhmaṇassa brāhmaṇī hoti.
an5.192:8.11	So methunaṁ uppādetvā kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajati.
an5.192:8.12	So evaṁ pabbajito samāno vivicceva kāmehi …pe… catutthaṁ jhānaṁ upasampajja viharati.
an5.192:8.13	So ime cattāro jhāne bhāvetvā kāyassa bhedā paraṁ maraṇā sugatiṁ saggaṁ lokaṁ upapajjati.
an5.192:8.14	Evaṁ kho, doṇa, brāhmaṇo devasamo hoti.
an5.192:9.1	Kathañca, doṇa, brāhmaṇo mariyādo hoti?
an5.192:9.2	Idha, doṇa, brāhmaṇo ubhato sujāto hoti—
an5.192:9.3	mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena.
an5.192:9.4	So aṭṭhacattālīsavassāni komārabrahmacariyaṁ carati mante adhīyamāno.
an5.192:9.5	Aṭṭhacattālīsavassāni komārabrahmacariyaṁ caritvā mante adhīyitvā ācariyassa ācariyadhanaṁ pariyesati dhammeneva, no adhammena.
an5.192:9.6	Tattha ca, doṇa, ko dhammo?
an5.192:9.7	Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṁ bhikkhācariyāya kapālaṁ anatimaññamāno.
an5.192:9.8	So ācariyassa ācariyadhanaṁ niyyādetvā dāraṁ pariyesati dhammeneva, no adhammena.
an5.192:10.1	Tattha ca, doṇa, ko dhammo?
an5.192:10.2	Neva kayena na vikkayena, brāhmaṇiṁyeva udakūpassaṭṭhaṁ.
an5.192:10.3	So brāhmaṇiṁyeva gacchati, na khattiyiṁ na vessiṁ na suddiṁ na caṇḍāliṁ na nesādiṁ na veniṁ na rathakāriṁ na pukkusiṁ gacchati, na gabbhiniṁ gacchati, na pāyamānaṁ gacchati, na anutuniṁ gacchati.
an5.192:10.4	Kasmā ca, doṇa, brāhmaṇo na gabbhiniṁ gacchati?
an5.192:10.5	Sace, doṇa, brāhmaṇo gabbhiniṁ gacchati, atimīḷhajo nāma so hoti māṇavako vā māṇavikā vā.
an5.192:10.6	Tasmā, doṇa, brāhmaṇo na gabbhiniṁ gacchati.
an5.192:10.7	Kasmā ca, doṇa, brāhmaṇo na pāyamānaṁ gacchati?
an5.192:10.8	Sace, doṇa, brāhmaṇo pāyamānaṁ gacchati, asucipaṭipīḷito nāma so hoti māṇavako vā māṇavikā vā.
an5.192:10.9	Tasmā, doṇa, brāhmaṇo na pāyamānaṁ gacchati.
an5.192:10.10	Tassa sā hoti brāhmaṇī neva kāmatthā na davatthā na ratatthā, pajatthāva brāhmaṇassa brāhmaṇī hoti.
an5.192:10.11	So methunaṁ uppādetvā tameva puttassādaṁ nikāmayamāno kuṭumbaṁ ajjhāvasati, na agārasmā anagāriyaṁ pabbajati.
an5.192:10.12	Yāva porāṇānaṁ brāhmaṇānaṁ mariyādo tattha tiṭṭhati, taṁ na vītikkamati.
an5.192:10.13	‘Yāva porāṇānaṁ brāhmaṇānaṁ mariyādo tattha brāhmaṇo ṭhito taṁ na vītikkamatī’ti, kho, doṇa, tasmā brāhmaṇo mariyādoti vuccati.
an5.192:10.14	Evaṁ kho, doṇa, brāhmaṇo mariyādo hoti.
an5.192:11.1	Kathañca, doṇa, brāhmaṇo sambhinnamariyādo hoti?
an5.192:11.2	Idha, doṇa, brāhmaṇo ubhato sujāto hoti—
an5.192:11.3	mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena.
an5.192:11.4	So aṭṭhacattālīsavassāni komārabrahmacariyaṁ carati mante adhīyamāno.
an5.192:11.5	Aṭṭhacattālīsavassāni komārabrahmacariyaṁ caritvā mante adhīyitvā ācariyassa ācariyadhanaṁ pariyesati dhammeneva, no adhammena.
an5.192:12.1	Tattha ca, doṇa, ko dhammo?
an5.192:12.2	Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṁ bhikkhācariyāya kapālaṁ anatimaññamāno.
an5.192:12.3	So ācariyassa ācariyadhanaṁ niyyādetvā dāraṁ pariyesati dhammenapi adhammenapi kayenapi vikkayenapi brāhmaṇimpi udakūpassaṭṭhaṁ.
an5.192:12.4	So brāhmaṇimpi gacchati khattiyimpi gacchati vessimpi gacchati suddimpi gacchati caṇḍālimpi gacchati nesādimpi gacchati venimpi gacchati rathakārimpi gacchati pukkusimpi gacchati gabbhinimpi gacchati pāyamānampi gacchati utunimpi gacchati anutunimpi gacchati.
an5.192:12.5	Tassa sā hoti brāhmaṇī kāmatthāpi davatthāpi ratatthāpi pajatthāpi brāhmaṇassa brāhmaṇī hoti.
an5.192:12.6	Yāva porāṇānaṁ brāhmaṇānaṁ mariyādo tattha na tiṭṭhati, taṁ vītikkamati.
an5.192:12.7	‘Yāva porāṇānaṁ brāhmaṇānaṁ mariyādo tattha brāhmaṇo na ṭhito taṁ vītikkamatī’ti kho, doṇa, tasmā brāhmaṇo sambhinnamariyādoti vuccati.
an5.192:12.8	Evaṁ kho, doṇa, brāhmaṇo sambhinnamariyādo hoti.
an5.192:13.1	Kathañca, doṇa, brāhmaṇo brāhmaṇacaṇḍālo hoti?
an5.192:13.2	Idha, doṇa, brāhmaṇo ubhato sujāto hoti—
an5.192:13.3	mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena.
an5.192:13.4	So aṭṭhacattālīsavassāni komārabrahmacariyaṁ carati mante adhīyamāno.
an5.192:13.5	Aṭṭhacattālīsavassāni komārabrahmacariyaṁ caritvā mante adhīyitvā ācariyassa ācariyadhanaṁ pariyesati dhammenapi adhammenapi
an5.192:13.6	kasiyāpi vaṇijjāyapi gorakkhenapi issatthenapi rājaporisenapi sippaññatarenapi, kevalampi bhikkhācariyāya, kapālaṁ anatimaññamāno.
an5.192:14.1	So ācariyassa ācariyadhanaṁ niyyādetvā dāraṁ pariyesati dhammenapi adhammenapi kayenapi vikkayenapi brāhmaṇimpi udakūpassaṭṭhaṁ.
an5.192:14.2	So brāhmaṇimpi gacchati khattiyimpi gacchati vessimpi gacchati suddimpi gacchati caṇḍālimpi gacchati nesādimpi gacchati venimpi gacchati rathakārimpi gacchati pukkusimpi gacchati gabbhinimpi gacchati pāyamānampi gacchati utunimpi gacchati anutunimpi gacchati.
an5.192:14.3	Tassa sā hoti brāhmaṇī kāmatthāpi davatthāpi ratatthāpi pajatthāpi brāhmaṇassa brāhmaṇī hoti.
an5.192:14.4	So sabbakammehi jīvikaṁ kappeti.
an5.192:14.5	Tamenaṁ brāhmaṇā evamāhaṁsu:
an5.192:14.6	‘kasmā bhavaṁ brāhmaṇo paṭijānamāno sabbakammehi jīvikaṁ kappetī’ti?
an5.192:14.7	So evamāha:
an5.192:14.8	‘seyyathāpi, bho, aggi sucimpi ḍahati asucimpi ḍahati, na ca tena aggi upalippati;
an5.192:14.9	evamevaṁ kho, bho, sabbakammehi cepi brāhmaṇo jīvikaṁ kappeti, na ca tena brāhmaṇo upalippati.
an5.192:14.10	Sabbakammehi jīvikaṁ kappetī’ti kho, doṇa, tasmā brāhmaṇo brāhmaṇacaṇḍāloti vuccati.
an5.192:14.11	Evaṁ kho, doṇa, brāhmaṇo brāhmaṇacaṇḍālo hoti.
an5.192:15.1	Ye kho te, doṇa, brāhmaṇānaṁ pubbakā isayo mantānaṁ kattāro mantānaṁ pavattāro yesamidaṁ etarahi brāhmaṇā porāṇaṁ mantapadaṁ gītaṁ pavuttaṁ samīhitaṁ tadanugāyanti tadanubhāsanti bhāsitamanubhāsanti sajjhāyitamanusajjhāyanti vācitamanuvācenti, seyyathidaṁ—aṭṭhako, vāmako, vāmadevo, vessāmitto, yamadaggi, aṅgīraso, bhāradvājo, vāseṭṭho, kassapo, bhagu;
an5.192:15.2	tyassume pañca brāhmaṇe paññāpenti—
an5.192:15.3	brahmasamaṁ, devasamaṁ, mariyādaṁ, sambhinnamariyādaṁ, brāhmaṇacaṇḍālaṁyeva pañcamaṁ.
an5.192:15.4	Tesaṁ tvaṁ, doṇa, katamoti?
an5.192:16.1	Evaṁ sante mayaṁ, bho gotama, brāhmaṇacaṇḍālampi na pūrema.
an5.192:16.2	Abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an5.192:16.3	Dutiyaṁ.
an5.193:0.1	Aṅguttara Nikāya 5.193
an5.193:0.2	20. Brāhmaṇavagga
an5.193:0.3	Saṅgāravasutta
an5.193:1.1	Atha kho saṅgāravo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an5.193:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho saṅgāravo brāhmaṇo bhagavantaṁ etadavoca:
an5.193:1.3	“ko nu kho, bho gotama, hetu ko paccayo, yena kadāci dīgharattaṁ sajjhāyakatāpi mantā nappaṭibhanti, pageva asajjhāyakatā?
an5.193:1.4	Ko pana, bho gotama, hetu ko paccayo, yena kadāci dīgharattaṁ asajjhāyakatāpi mantā paṭibhanti, pageva sajjhāyakatā”ti?
an5.193:2.1	Yasmiṁ, brāhmaṇa, samaye kāmarāgapariyuṭṭhitena cetasā viharati kāmarāgaparetena, uppannassa ca kāmarāgassa nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi tasmiṁ samaye yathābhūtaṁ nappajānāti na passati, ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:2.2	Seyyathāpi, brāhmaṇa, udapatto saṁsaṭṭho lākhāya vā haliddiyā vā nīliyā vā mañjiṭṭhāya vā.
an5.193:2.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ nappajāneyya na passeyya.
an5.193:2.4	Evamevaṁ kho, brāhmaṇa, yasmiṁ samaye kāmarāgapariyuṭṭhitena cetasā viharati kāmarāgaparetena, uppannassa ca kāmarāgassa nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi …pe… ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:3.1	Puna caparaṁ, brāhmaṇa, yasmiṁ samaye byāpādapariyuṭṭhitena cetasā viharati byāpādaparetena, uppannassa ca byāpādassa nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi …pe… ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:3.2	Seyyathāpi, brāhmaṇa, udapatto agginā santatto ukkudhito ussadakajāto.
an5.193:3.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ nappajāneyya na passeyya.
an5.193:3.4	Evamevaṁ kho, brāhmaṇa, yasmiṁ samaye byāpādapariyuṭṭhitena cetasā viharati byāpādaparetena, uppannassa ca byāpādassa nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi …pe… ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:4.1	Puna caparaṁ, brāhmaṇa, yasmiṁ samaye thinamiddhapariyuṭṭhitena cetasā viharati thinamiddhaparetena, uppannassa ca thinamiddhassa nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi …pe… ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:4.2	Seyyathāpi, brāhmaṇa, udapatto sevālapaṇakapariyonaddho.
an5.193:4.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ nappajāneyya na passeyya.
an5.193:4.4	Evamevaṁ kho, brāhmaṇa, yasmiṁ samaye thinamiddhapariyuṭṭhitena cetasā viharati thinamiddhaparetena, uppannassa ca thinamiddhassa nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi …pe… ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:5.1	Puna caparaṁ, brāhmaṇa, yasmiṁ samaye uddhaccakukkuccapariyuṭṭhitena cetasā viharati uddhaccakukkuccaparetena, uppannassa ca uddhaccakukkuccassa nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi …pe… ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:5.2	Seyyathāpi, brāhmaṇa, udapatto vāterito calito bhanto ūmijāto.
an5.193:5.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ nappajāneyya na passeyya.
an5.193:5.4	Evamevaṁ kho, brāhmaṇa, yasmiṁ samaye uddhaccakukkuccapariyuṭṭhitena cetasā viharati uddhaccakukkuccaparetena, uppannassa ca uddhaccakukkuccassa nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi …pe… ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:6.1	Puna caparaṁ, brāhmaṇa, yasmiṁ samaye vicikicchāpariyuṭṭhitena cetasā viharati vicikicchāparetena, uppannāya ca vicikicchāya nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi …pe… ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:6.2	Seyyathāpi, brāhmaṇa, udapatto āvilo luḷito kalalībhūto andhakāre nikkhitto.
an5.193:6.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ nappajāneyya na passeyya.
an5.193:6.4	Evamevaṁ kho, brāhmaṇa, yasmiṁ samaye vicikicchāpariyuṭṭhitena cetasā viharati vicikicchāparetena, uppannāya ca vicikicchāya nissaraṇaṁ yathābhūtaṁ nappajānāti, attatthampi tasmiṁ samaye yathābhūtaṁ nappajānāti na passati, paratthampi …pe… ubhayatthampi tasmiṁ samaye yathābhūtaṁ nappajānāti na passati, dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:7.1	Yasmiñca kho, brāhmaṇa, samaye na kāmarāgapariyuṭṭhitena cetasā viharati na kāmarāgaparetena, uppannassa ca kāmarāgassa nissaraṇaṁ yathābhūtaṁ pajānāti, attatthampi tasmiṁ samaye yathābhūtaṁ pajānāti passati, paratthampi tasmiṁ samaye yathābhūtaṁ pajānāti passati, ubhayatthampi tasmiṁ samaye yathābhūtaṁ pajānāti passati, dīgharattaṁ asajjhāyakatāpi mantā paṭibhanti, pageva sajjhāyakatā.
an5.193:7.2	Seyyathāpi, brāhmaṇa, udapatto asaṁsaṭṭho lākhāya vā haliddiyā vā nīliyā vā mañjiṭṭhāya vā.
an5.193:7.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ pajāneyya passeyya.
an5.193:7.4	Evamevaṁ kho, brāhmaṇa, yasmiṁ samaye na kāmarāgapariyuṭṭhitena cetasā viharati …pe….
an5.193:8.1	Puna caparaṁ, brāhmaṇa, yasmiṁ samaye na byāpādapariyuṭṭhitena cetasā viharati …pe…
an5.193:8.2	seyyathāpi, brāhmaṇa, udapatto agginā asantatto anukkudhito anussadakajāto.
an5.193:8.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ pajāneyya passeyya.
an5.193:8.4	Evamevaṁ kho, brāhmaṇa, yasmiṁ samaye na byāpādapariyuṭṭhitena cetasā viharati …pe….
an5.193:9.1	Puna caparaṁ, brāhmaṇa, yasmiṁ samaye na thinamiddhapariyuṭṭhitena cetasā viharati …pe…
an5.193:9.2	seyyathāpi, brāhmaṇa, udapatto na sevālapaṇakapariyonaddho.
an5.193:9.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ pajāneyya passeyya.
an5.193:9.4	Evamevaṁ kho, brāhmaṇa, yasmiṁ samaye na thinamiddhapariyuṭṭhitena cetasā viharati …pe….
an5.193:10.1	Puna caparaṁ, brāhmaṇa, yasmiṁ samaye na uddhaccakukkuccapariyuṭṭhitena cetasā viharati …pe…
an5.193:10.2	seyyathāpi, brāhmaṇa, udapatto na vāterito na calito na bhanto na ūmijāto.
an5.193:10.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ pajāneyya passeyya.
an5.193:10.4	Evamevaṁ kho, brāhmaṇa, yasmiṁ samaye na uddhaccakukkuccapariyuṭṭhitena cetasā viharati …pe….
an5.193:11.1	Puna caparaṁ, brāhmaṇa, yasmiṁ samaye na vicikicchāpariyuṭṭhitena cetasā viharati na vicikicchāparetena, uppannāya ca vicikicchāya nissaraṇaṁ yathābhūtaṁ pajānāti, attatthampi tasmiṁ samaye yathābhūtaṁ pajānāti passati, paratthampi tasmiṁ samaye yathābhūtaṁ pajānāti passati, ubhayatthampi tasmiṁ samaye yathābhūtaṁ pajānāti passati, dīgharattaṁ asajjhāyakatāpi mantā paṭibhanti, pageva sajjhāyakatā.
an5.193:11.2	Seyyathāpi, brāhmaṇa, udapatto accho vippasanno anāvilo āloke nikkhitto.
an5.193:11.3	Tattha cakkhumā puriso sakaṁ mukhanimittaṁ paccavekkhamāno yathābhūtaṁ pajāneyya passeyya.
an5.193:11.4	Evamevaṁ kho, brāhmaṇa, yasmiṁ samaye na vicikicchāpariyuṭṭhitena cetasā viharati na vicikicchāparetena, uppannāya ca vicikicchāya nissaraṇaṁ yathābhūtaṁ pajānāti, attatthampi tasmiṁ samaye yathābhūtaṁ pajānāti passati, paratthampi …pe… ubhayatthampi tasmiṁ samaye yathābhūtaṁ pajānāti passati, dīgharattaṁ asajjhāyakatāpi mantā paṭibhanti, pageva sajjhāyakatā.
an5.193:12.1	Ayaṁ kho, brāhmaṇa, hetu ayaṁ paccayo, yena kadāci dīgharattaṁ sajjhāyakatāpi mantā nappaṭibhanti, pageva asajjhāyakatā.
an5.193:12.2	Ayaṁ pana, brāhmaṇa, hetu ayaṁ paccayo, yena kadāci dīgharattaṁ asajjhāyakatāpi mantā paṭibhanti, pageva sajjhāyakatā”ti.
an5.193:13.1	“Abhikkantaṁ, bho gotama …pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an5.193:13.2	Tatiyaṁ.
an5.194:0.1	Aṅguttara Nikāya 5.194
an5.194:0.2	20. Brāhmaṇavagga
an5.194:0.3	Kāraṇapālīsutta
an5.194:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an5.194:1.2	Tena kho pana samayena kāraṇapālī brāhmaṇo licchavīnaṁ kammantaṁ kāreti.
an5.194:1.3	Addasā kho kāraṇapālī brāhmaṇo piṅgiyāniṁ brāhmaṇaṁ dūratova āgacchantaṁ;
an5.194:1.4	disvā piṅgiyāniṁ brāhmaṇaṁ etadavoca:
an5.194:2.1	“Handa kuto nu bhavaṁ piṅgiyānī āgacchati divā divassā”ti?
an5.194:2.2	“Itohaṁ, bho, āgacchāmi samaṇassa gotamassa santikā”ti.
an5.194:2.3	“Taṁ kiṁ maññati bhavaṁ piṅgiyānī samaṇassa gotamassa paññāveyyattiyaṁ? Paṇḍito maññe”ti?
an5.194:2.4	“Ko cāhaṁ, bho, ko ca samaṇassa gotamassa paññāveyyattiyaṁ jānissāmi.
an5.194:2.5	Sopi nūnassa tādisova yo samaṇassa gotamassa paññāveyyattiyaṁ jāneyyā”ti.
an5.194:2.6	“Uḷārāya khalu bhavaṁ piṅgiyānī samaṇaṁ gotamaṁ pasaṁsāya pasaṁsatī”ti.
an5.194:2.7	“Ko cāhaṁ, bho, ko ca samaṇaṁ gotamaṁ pasaṁsissāmi.
an5.194:2.8	Pasatthappasatthova so bhavaṁ gotamo seṭṭho devamanussānan”ti.
an5.194:2.9	“Kiṁ pana bhavaṁ piṅgiyānī atthavasaṁ sampassamāno samaṇe gotame evaṁ abhippasanno”ti?
an5.194:3.1	“Seyyathāpi, bho, puriso aggarasaparititto na aññesaṁ hīnānaṁ rasānaṁ piheti;
an5.194:3.2	evamevaṁ kho, bho, yato yato tassa bhoto gotamassa dhammaṁ suṇāti—
an5.194:3.3	yadi suttaso, yadi geyyaso, yadi veyyākaraṇaso, yadi abbhutadhammaso—
an5.194:3.4	tato tato na aññesaṁ puthusamaṇabrāhmaṇappavādānaṁ piheti.
an5.194:4.1	Seyyathāpi, bho, puriso jighacchādubbalyapareto madhupiṇḍikaṁ adhigaccheyya.
an5.194:4.2	So yato yato sāyetha, labhateva sādurasaṁ asecanakaṁ;
an5.194:4.3	evamevaṁ kho, bho, yato yato tassa bhoto gotamassa dhammaṁ suṇāti—
an5.194:4.4	yadi suttaso, yadi geyyaso, yadi veyyākaraṇaso, yadi abbhutadhammaso—
an5.194:4.5	tato tato labhateva attamanataṁ, labhati cetaso pasādaṁ.
an5.194:5.1	Seyyathāpi, bho, puriso candanaghaṭikaṁ adhigaccheyya—
an5.194:5.2	haricandanassa vā lohitacandanassa vā.
an5.194:5.3	So yato yato ghāyetha—
an5.194:5.4	yadi mūlato, yadi majjhato, yadi aggato—
an5.194:5.5	adhigacchateva surabhigandhaṁ asecanakaṁ;
an5.194:5.6	evamevaṁ kho, bho, yato yato tassa bhoto gotamassa dhammaṁ suṇāti—
an5.194:5.7	yadi suttaso, yadi geyyaso, yadi veyyākaraṇaso, yadi abbhutadhammaso—
an5.194:5.8	tato tato adhigacchati pāmojjaṁ adhigacchati somanassaṁ.
an5.194:6.1	Seyyathāpi, bho, puriso ābādhiko dukkhito bāḷhagilāno.
an5.194:6.2	Tassa kusalo bhisakko ṭhānaso ābādhaṁ nīhareyya;
an5.194:6.3	evamevaṁ kho, bho, yato yato tassa bhoto gotamassa dhammaṁ suṇāti—
an5.194:6.4	yadi suttaso, yadi geyyaso, yadi veyyākaraṇaso, yadi abbhutadhammaso—
an5.194:6.5	tato tato sokaparidevadukkhadomanassupāyāsā abbhatthaṁ gacchanti.
an5.194:7.1	Seyyathāpi, bho, pokkharaṇī acchodakā sātodakā sītodakā setakā supatitthā ramaṇīyā.
an5.194:7.2	Atha puriso āgaccheyya ghammābhitatto ghammapareto kilanto tasito pipāsito.
an5.194:7.3	So taṁ pokkharaṇiṁ ogāhetvā nhātvā ca pivitvā ca sabbadarathakilamathapariḷāhaṁ paṭippassambheyya.
an5.194:7.4	Evamevaṁ kho, bho, yato yato tassa bhoto gotamassa dhammaṁ suṇāti—
an5.194:7.5	yadi suttaso, yadi geyyaso, yadi veyyākaraṇaso, yadi abbhutadhammaso—
an5.194:7.6	tato tato sabbadarathakilamathapariḷāhā paṭippassambhantī”ti.
an5.194:8.1	Evaṁ vutte, kāraṇapālī brāhmaṇo uṭṭhāyāsanā ekaṁsaṁ uttarāsaṅgaṁ karitvā dakkhiṇaṁ jāṇumaṇḍalaṁ pathaviyaṁ nihantvā yena bhagavā tenañjaliṁ paṇāmetvā tikkhattuṁ udānaṁ udānesi:
an5.194:9.1	“Namo tassa bhagavato arahato sammāsambuddhassa.
an5.194:10.1	Namo tassa bhagavato arahato sammāsambuddhassa.
an5.194:11.1	Namo tassa bhagavato arahato sammāsambuddhassāti.
an5.194:12.1	Abhikkantaṁ, bho piṅgiyāni, abhikkantaṁ, bho piṅgiyāni.
an5.194:12.2	Seyyathāpi, bho piṅgiyāni, nikkujjitaṁ vā ukkujjeyya paṭicchannaṁ vā vivareyya, mūḷhassa vā maggaṁ ācikkheyya andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā piṅgiyāninā anekapariyāyena dhammo pakāsito.
an5.194:12.3	Esāhaṁ, bho piṅgiyāni, taṁ bhavantaṁ gotamaṁ saraṇaṁ gacchāmi dhammañca bhikkhusaṅghañca.
an5.194:12.4	Upāsakaṁ maṁ bhavaṁ piṅgiyānī dhāretu, ajjatagge pāṇupetaṁ saraṇaṁ gatan”ti.
an5.194:12.5	Catutthaṁ.
an5.195:0.1	Aṅguttara Nikāya 5.195
an5.195:0.2	20. Brāhmaṇavagga
an5.195:0.3	Piṅgiyānīsutta
an5.195:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an5.195:1.2	Tena kho pana samayena pañcamattāni licchavisatāni bhagavantaṁ payirupāsanti.
an5.195:1.3	Appekacce licchavī nīlā honti nīlavaṇṇā nīlavatthā nīlālaṅkārā, appekacce licchavī pītā honti pītavaṇṇā pītavatthā pītālaṅkārā, appekacce licchavī lohitakā honti lohitakavaṇṇā lohitakavatthā lohitakālaṅkārā, appekacce licchavī odātā honti odātavaṇṇā odātavatthā odātālaṅkārā.
an5.195:1.4	Tyassudaṁ bhagavā atirocati vaṇṇena ceva yasasā ca.
an5.195:2.1	Atha kho piṅgiyānī brāhmaṇo uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca:
an5.195:2.2	“paṭibhāti maṁ, bhagavā, paṭibhāti maṁ, sugatā”ti.
an5.195:2.3	“Paṭibhātu taṁ piṅgiyānī”ti bhagavā avoca.
an5.195:2.4	Atha kho piṅgiyānī brāhmaṇo bhagavato sammukhā sāruppāya gāthāya abhitthavi:
an5.195:3.1	“Padmaṁ yathā kokanadaṁ sugandhaṁ,
an5.195:3.2	Pāto siyā phullamavītagandhaṁ;
an5.195:3.3	Aṅgīrasaṁ passa virocamānaṁ,
an5.195:3.4	Tapantamādiccamivantalikkhe”ti.
an5.195:4.1	Atha kho te licchavī pañcahi uttarāsaṅgasatehi piṅgiyāniṁ brāhmaṇaṁ acchādesuṁ.
an5.195:4.2	Atha kho piṅgiyānī brāhmaṇo tehi pañcahi uttarāsaṅgasatehi bhagavantaṁ acchādesi.
an5.195:5.1	Atha kho bhagavā te licchavī etadavoca:
an5.195:5.2	“pañcannaṁ, licchavī, ratanānaṁ pātubhāvo dullabho lokasmiṁ.
an5.195:5.3	Katamesaṁ pañcannaṁ?
an5.195:5.4	Tathāgatassa arahato sammāsambuddhassa pātubhāvo dullabho lokasmiṁ.
an5.195:5.5	Tathāgatappaveditassa dhammavinayassa desetā puggalo dullabho lokasmiṁ.
an5.195:5.6	Tathāgatappaveditassa dhammavinayassa desitassa viññātā puggalo dullabho lokasmiṁ.
an5.195:5.7	Tathāgatappaveditassa dhammavinayassa desitassa viññātā dhammānudhammappaṭipanno puggalo dullabho lokasmiṁ.
an5.195:5.8	Kataññū katavedī puggalo dullabho lokasmiṁ.
an5.195:5.9	Imesaṁ kho, licchavī, pañcannaṁ ratanānaṁ pātubhāvo dullabho lokasmin”ti.
an5.195:5.10	Pañcamaṁ.
an5.196:0.1	Aṅguttara Nikāya 5.196
an5.196:0.2	20. Brāhmaṇavagga
an5.196:0.3	Mahāsupinasutta
an5.196:1.1	“Tathāgatassa, bhikkhave, arahato sammāsambuddhassa pubbeva sambodhā anabhisambuddhassa bodhisattasseva sato pañca mahāsupinā pāturahesuṁ.
an5.196:1.2	Katame pañca?
an5.196:1.3	Tathāgatassa, bhikkhave, arahato sammāsambuddhassa pubbeva sambodhā anabhisambuddhassa bodhisattasseva sato ayaṁ mahāpathavī mahāsayanaṁ ahosi, himavā pabbatarājā bibbohanaṁ ahosi, puratthime samudde vāmo hattho ohito ahosi, pacchime samudde dakkhiṇo hattho ohito ahosi, dakkhiṇe samudde ubho pādā ohitā ahesuṁ.
an5.196:1.4	Tathāgatassa, bhikkhave, arahato sammāsambuddhassa pubbeva sambodhā anabhisambuddhassa bodhisattasseva sato ayaṁ paṭhamo mahāsupino pāturahosi.
an5.196:2.1	Puna caparaṁ, bhikkhave, tathāgatassa arahato sammāsambuddhassa pubbeva sambodhā anabhisambuddhassa bodhisattasseva sato tiriyā nāma tiṇajāti nābhiyā uggantvā nabhaṁ āhacca ṭhitā ahosi.
an5.196:2.2	Tathāgatassa, bhikkhave, arahato sammāsambuddhassa pubbeva sambodhā anabhisambuddhassa bodhisattasseva sato ayaṁ dutiyo mahāsupino pāturahosi.
an5.196:3.1	Puna caparaṁ, bhikkhave, tathāgatassa arahato sammāsambuddhassa pubbeva sambodhā anabhisambuddhassa bodhisattasseva sato setā kimī kaṇhasīsā pādehi ussakkitvā (…) yāva jāṇumaṇḍalā paṭicchādesuṁ.
an5.196:3.2	Tathāgatassa, bhikkhave, arahato sammāsambuddhassa pubbeva sambodhā anabhisambuddhassa bodhisattasseva sato ayaṁ tatiyo mahāsupino pāturahosi.
an5.196:4.1	Puna caparaṁ, bhikkhave, tathāgatassa arahato sammāsambuddhassa pubbeva sambodhā anabhisambuddhassa bodhisattasseva sato cattāro sakuṇā nānāvaṇṇā catūhi disāhi āgantvā pādamūle nipatitvā sabbasetā sampajjiṁsu.
an5.196:4.2	Tathāgatassa, bhikkhave, arahato sammāsambuddhassa pubbeva sambodhā anabhisambuddhassa bodhisattasseva sato ayaṁ catuttho mahāsupino pāturahosi.
an5.196:5.1	Puna caparaṁ, bhikkhave, tathāgato arahaṁ sammāsambuddho pubbeva sambodhā anabhisambuddho bodhisattova samāno mahato mīḷhapabbatassa uparūpari caṅkamati alippamāno mīḷhena.
an5.196:5.2	Tathāgatassa, bhikkhave, arahato sammāsambuddhassa pubbeva sambodhā anabhisambuddhassa bodhisattasseva sato ayaṁ pañcamo mahāsupino pāturahosi.
an5.196:6.1	Yampi, bhikkhave, tathāgatassa arahato sammāsambuddhassa pubbeva sambodhā anabhisambuddhassa bodhisattasseva sato ayaṁ mahāpathavī mahāsayanaṁ ahosi, himavā pabbatarājā bibbohanaṁ ahosi, puratthime samudde vāmo hattho ohito ahosi, pacchime samudde dakkhiṇo hattho ohito ahosi, dakkhiṇe samudde ubho pādā ohitā ahesuṁ;
an5.196:6.2	tathāgatena, bhikkhave, arahatā sammāsambuddhena anuttarā sammāsambodhi abhisambuddhā.
an5.196:6.3	Tassā abhisambodhāya ayaṁ paṭhamo mahāsupino pāturahosi.
an5.196:7.1	Yampi, bhikkhave, tathāgatassa arahato sammāsambuddhassa pubbeva sambodhā anabhisambuddhassa bodhisattasseva sato tiriyā nāma tiṇajāti nābhiyā uggantvā nabhaṁ āhacca ṭhitā ahosi;
an5.196:7.2	tathāgatena, bhikkhave, arahatā sammāsambuddhena ariyo aṭṭhaṅgiko maggo abhisambujjhitvā yāva devamanussehi suppakāsito.
an5.196:7.3	Tassa abhisambodhāya ayaṁ dutiyo mahāsupino pāturahosi.
an5.196:8.1	Yampi, bhikkhave, tathāgatassa arahato sammāsambuddhassa pubbeva sambodhā anabhisambuddhassa bodhisattasseva sato setā kimī kaṇhasīsā pādehi ussakkitvā yāva jāṇumaṇḍalā paṭicchādesuṁ;
an5.196:8.2	bahū, bhikkhave, gihī odātavasanā tathāgataṁ pāṇupetā saraṇaṁ gatā.
an5.196:8.3	Tassa abhisambodhāya ayaṁ tatiyo mahāsupino pāturahosi.
an5.196:9.1	Yampi, bhikkhave, tathāgatassa arahato sammāsambuddhassa pubbeva sambodhā anabhisambuddhassa bodhisattasseva sato cattāro sakuṇā nānāvaṇṇā catūhi disāhi āgantvā pādamūle nipatitvā sabbasetā sampajjiṁsu;
an5.196:9.2	cattārome, bhikkhave, vaṇṇā khattiyā brāhmaṇā vessā suddā te tathāgatappavedite dhammavinaye agārasmā anagāriyaṁ pabbajitvā anuttaraṁ vimuttiṁ sacchikaronti.
an5.196:9.3	Tassa abhisambodhāya ayaṁ catuttho mahāsupino pāturahosi.
an5.196:10.1	Yampi, bhikkhave, tathāgato arahaṁ sammāsambuddho pubbeva sambodhā anabhisambuddho bodhisattova samāno mahato mīḷhapabbatassa uparūpari caṅkamati alippamāno mīḷhena;
an5.196:10.2	lābhī, bhikkhave, tathāgato cīvarapiṇḍapātasenāsanagilānappaccayabhesajjaparikkhārānaṁ, taṁ tathāgato agathito amucchito anajjhosanno ādīnavadassāvī nissaraṇapañño paribhuñjati.
an5.196:10.3	Tassa abhisambodhāya ayaṁ pañcamo mahāsupino pāturahosi.
an5.196:11.1	Tathāgatassa, bhikkhave, arahato sammāsambuddhassa pubbeva sambodhā anabhisambuddhassa bodhisattasseva sato ime pañca mahāsupinā pāturahesun”ti.
an5.196:11.2	Chaṭṭhaṁ.
an5.197:0.1	Aṅguttara Nikāya 5.197
an5.197:0.2	20. Brāhmaṇavagga
an5.197:0.3	Vassasutta
an5.197:1.1	“Pañcime, bhikkhave, vassassa antarāyā, yaṁ nemittā na jānanti, yattha nemittānaṁ cakkhu na kamati.
an5.197:1.2	Katame pañca?
an5.197:1.3	Upari, bhikkhave, ākāse tejodhātu pakuppati.
an5.197:1.4	Tena uppannā meghā paṭivigacchanti.
an5.197:1.5	Ayaṁ, bhikkhave, paṭhamo vassassa antarāyo, yaṁ nemittā na jānanti, yattha nemittānaṁ cakkhu na kamati.
an5.197:2.1	Puna caparaṁ, bhikkhave, upari ākāse vāyodhātu pakuppati.
an5.197:2.2	Tena uppannā meghā paṭivigacchanti.
an5.197:2.3	Ayaṁ, bhikkhave, dutiyo vassassa antarāyo, yaṁ nemittā na jānanti, yattha nemittānaṁ cakkhu na kamati.
an5.197:3.1	Puna caparaṁ, bhikkhave, rāhu asurindo pāṇinā udakaṁ sampaṭicchitvā mahāsamudde chaḍḍeti.
an5.197:3.2	Ayaṁ, bhikkhave, tatiyo vassassa antarāyo, yaṁ nemittā na jānanti, yattha nemittānaṁ cakkhu na kamati.
an5.197:4.1	Puna caparaṁ, bhikkhave, vassavalāhakā devā pamattā honti.
an5.197:4.2	Ayaṁ, bhikkhave, catuttho vassassa antarāyo, yaṁ nemittā na jānanti, yattha nemittānaṁ cakkhu na kamati.
an5.197:5.1	Puna caparaṁ, bhikkhave, manussā adhammikā honti.
an5.197:5.2	Ayaṁ, bhikkhave, pañcamo vassassa antarāyo, yaṁ nemittā na jānanti, yattha nemittānaṁ cakkhu na kamati.
an5.197:5.3	Ime kho, bhikkhave, pañca vassassa antarāyā, yaṁ nemittā na jānanti, yattha nemittānaṁ cakkhu na kamatī”ti.
an5.197:5.4	Sattamaṁ.
an5.198:0.1	Aṅguttara Nikāya 5.198
an5.198:0.2	20. Brāhmaṇavagga
an5.198:0.3	Vācāsutta
an5.198:1.1	“Pañcahi, bhikkhave, aṅgehi samannāgatā vācā subhāsitā hoti, no dubbhāsitā, anavajjā ca ananuvajjā ca viññūnaṁ.
an5.198:1.2	Katamehi pañcahi?
an5.198:1.3	Kālena ca bhāsitā hoti, saccā ca bhāsitā hoti, saṇhā ca bhāsitā hoti, atthasaṁhitā ca bhāsitā hoti, mettacittena ca bhāsitā hoti.
an5.198:1.4	Imehi kho, bhikkhave, pañcahi aṅgehi samannāgatā vācā subhāsitā hoti, no dubbhāsitā, anavajjā ca ananuvajjā ca viññūnan”ti.
an5.198:1.5	Aṭṭhamaṁ.
an5.199:0.1	Aṅguttara Nikāya 5.199
an5.199:0.2	20. Brāhmaṇavagga
an5.199:0.3	Kulasutta
an5.199:1.1	“Yaṁ, bhikkhave, sīlavanto pabbajitā kulaṁ upasaṅkamanti, tattha manussā pañcahi ṭhānehi bahuṁ puññaṁ pasavanti.
an5.199:1.2	Katamehi pañcahi?
an5.199:1.3	Yasmiṁ, bhikkhave, samaye sīlavante pabbajite kulaṁ upasaṅkamante manussā disvā cittāni pasādenti, saggasaṁvattanikaṁ, bhikkhave, taṁ kulaṁ tasmiṁ samaye paṭipadaṁ paṭipannaṁ hoti.
an5.199:2.1	Yasmiṁ, bhikkhave, samaye sīlavante pabbajite kulaṁ upasaṅkamante manussā paccuṭṭhenti abhivādenti āsanaṁ denti, uccākulīnasaṁvattanikaṁ, bhikkhave, taṁ kulaṁ tasmiṁ samaye paṭipadaṁ paṭipannaṁ hoti.
an5.199:3.1	Yasmiṁ, bhikkhave, samaye sīlavante pabbajite kulaṁ upasaṅkamante manussā maccheramalaṁ paṭivinenti, mahesakkhasaṁvattanikaṁ, bhikkhave, taṁ kulaṁ tasmiṁ samaye paṭipadaṁ paṭipannaṁ hoti.
an5.199:4.1	Yasmiṁ, bhikkhave, samaye sīlavante pabbajite kulaṁ upasaṅkamante manussā yathāsatti yathābalaṁ saṁvibhajanti, mahābhogasaṁvattanikaṁ, bhikkhave, taṁ kulaṁ tasmiṁ samaye paṭipadaṁ paṭipannaṁ hoti.
an5.199:5.1	Yasmiṁ, bhikkhave, samaye sīlavante pabbajite kulaṁ upasaṅkamante manussā paripucchanti paripañhanti dhammaṁ suṇanti, mahāpaññāsaṁvattanikaṁ, bhikkhave, taṁ kulaṁ tasmiṁ samaye paṭipadaṁ paṭipannaṁ hoti.
an5.199:5.2	Yaṁ, bhikkhave, sīlavanto pabbajitā kulaṁ upasaṅkamanti, tattha manussā imehi pañcahi ṭhānehi bahuṁ puññaṁ pasavantī”ti.
an5.199:5.3	Navamaṁ.
an5.200:0.1	Aṅguttara Nikāya 5.200
an5.200:0.2	20. Brāhmaṇavagga
an5.200:0.3	Nissāraṇīyasutta
an5.200:1.1	“Pañcimā, bhikkhave, nissāraṇīyā dhātuyo.
an5.200:1.2	Katamā pañca?
an5.200:1.3	Idha, bhikkhave, bhikkhuno kāmaṁ manasikaroto kāmesu cittaṁ na pakkhandati nappasīdati na santiṭṭhati na vimuccati.
an5.200:1.4	Nekkhammaṁ kho panassa manasikaroto nekkhamme cittaṁ pakkhandati pasīdati santiṭṭhati vimuccati.
an5.200:1.5	Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ suvisaṁyuttaṁ kāmehi;
an5.200:1.6	ye ca kāmapaccayā uppajjanti āsavā vighātapariḷāhā, mutto so tehi, na so taṁ vedanaṁ vediyati.
an5.200:1.7	Idamakkhātaṁ kāmānaṁ nissaraṇaṁ.
an5.200:2.1	Puna caparaṁ, bhikkhave, bhikkhuno byāpādaṁ manasikaroto byāpāde cittaṁ na pakkhandati nappasīdati na santiṭṭhati na vimuccati.
an5.200:2.2	Abyāpādaṁ kho panassa manasikaroto abyāpāde cittaṁ pakkhandati pasīdati santiṭṭhati vimuccati.
an5.200:2.3	Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ suvisaṁyuttaṁ byāpādena;
an5.200:2.4	ye ca byāpādapaccayā uppajjanti āsavā vighātapariḷāhā, mutto so tehi, na so taṁ vedanaṁ vediyati.
an5.200:2.5	Idamakkhātaṁ byāpādassa nissaraṇaṁ.
an5.200:3.1	Puna caparaṁ, bhikkhave, bhikkhuno vihesaṁ manasikaroto vihesāya cittaṁ na pakkhandati nappasīdati na santiṭṭhati na vimuccati.
an5.200:3.2	Avihesaṁ kho panassa manasikaroto avihesāya cittaṁ pakkhandati pasīdati santiṭṭhati vimuccati.
an5.200:3.3	Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ suvisaṁyuttaṁ vihesāya;
an5.200:3.4	ye ca vihesāpaccayā uppajjanti āsavā vighātapariḷāhā, mutto so tehi, na so taṁ vedanaṁ vediyati.
an5.200:3.5	Idamakkhātaṁ vihesāya nissaraṇaṁ.
an5.200:4.1	Puna caparaṁ, bhikkhave, bhikkhuno rūpaṁ manasikaroto rūpe cittaṁ na pakkhandati nappasīdati na santiṭṭhati na vimuccati.
an5.200:4.2	Arūpaṁ kho panassa manasikaroto arūpe cittaṁ pakkhandati pasīdati santiṭṭhati vimuccati.
an5.200:4.3	Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ suvisaṁyuttaṁ rūpehi;
an5.200:4.4	ye ca rūpapaccayā uppajjanti āsavā vighātapariḷāhā, mutto so tehi, na so taṁ vedanaṁ vediyati.
an5.200:4.5	Idamakkhātaṁ rūpānaṁ nissaraṇaṁ.
an5.200:5.1	Puna caparaṁ, bhikkhave, bhikkhuno sakkāyaṁ manasikaroto sakkāye cittaṁ na pakkhandati nappasīdati na santiṭṭhati na vimuccati.
an5.200:5.2	Sakkāyanirodhaṁ kho panassa manasikaroto sakkāyanirodhe cittaṁ pakkhandati pasīdati santiṭṭhati vimuccati.
an5.200:5.3	Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ suvisaṁyuttaṁ sakkāyena;
an5.200:5.4	ye ca sakkāyapaccayā uppajjanti āsavā vighātapariḷāhā, mutto so tehi, na so taṁ vedanaṁ vediyati.
an5.200:5.5	Idamakkhātaṁ sakkāyassa nissaraṇaṁ.
an5.200:6.1	Tassa kāmanandīpi nānuseti, byāpādanandīpi nānuseti, vihesānandīpi nānuseti, rūpanandīpi nānuseti, sakkāyanandīpi nānuseti so kāmanandiyāpi ananusayā, byāpādanandiyāpi ananusayā, vihesānandiyāpi ananusayā, rūpanandiyāpi ananusayā, sakkāyanandiyāpi ananusayā.
an5.200:6.2	Ayaṁ vuccati, bhikkhave, bhikkhu niranusayo, acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassa.
an5.200:6.3	Imā kho, bhikkhave, pañca nissāraṇīyā dhātuyo”ti.
an5.200:6.4	Dasamaṁ.
an5.200:6.5	Brāhmaṇavaggo pañcamo.
an5.200:7.0	Tassuddānaṁ
an5.200:7.1	Soṇo doṇo saṅgāravo,
an5.200:7.2	Kāraṇapālī ca piṅgiyānī;
an5.200:7.3	Supinā ca vassā vācā,
an5.200:7.4	Kulaṁ nissāraṇīyena cāti.
an5.200:7.5	Catuttho paṇṇāsako samatto.
an5.201:0.1	Aṅguttara Nikāya 5.201
an5.201:0.2	21. Kimilavagga
an5.201:0.3	Kimilasutta
an5.201:1.1	Ekaṁ samayaṁ bhagavā kimilāyaṁ viharati veḷuvane.
an5.201:1.2	Atha kho āyasmā kimilo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā kimilo bhagavantaṁ etadavoca:
an5.201:1.3	“ko nu kho, bhante, hetu ko paccayo, yena tathāgate parinibbute saddhammo na ciraṭṭhitiko hotī”ti?
an5.201:1.4	“Idha, kimila, tathāgate parinibbute bhikkhū bhikkhuniyo upāsakā upāsikāyo satthari agāravā viharanti appatissā, dhamme agāravā viharanti appatissā, saṅghe agāravā viharanti appatissā, sikkhāya agāravā viharanti appatissā, aññamaññaṁ agāravā viharanti appatissā.
an5.201:1.5	Ayaṁ kho, kimila, hetu ayaṁ paccayo, yena tathāgate parinibbute saddhammo na ciraṭṭhitiko hotī”ti.
an5.201:2.1	“Ko pana, bhante, hetu ko paccayo, yena tathāgate parinibbute saddhammo ciraṭṭhitiko hotī”ti?
an5.201:2.2	“Idha, kimila, tathāgate parinibbute bhikkhū bhikkhuniyo upāsakā upāsikāyo satthari sagāravā viharanti sappatissā, dhamme sagāravā viharanti sappatissā, saṅghe sagāravā viharanti sappatissā, sikkhāya sagāravā viharanti sappatissā, aññamaññaṁ sagāravā viharanti sappatissā.
an5.201:2.3	Ayaṁ kho, kimila, hetu ayaṁ paccayo, yena tathāgate parinibbute saddhammo ciraṭṭhitiko hotī”ti.
an5.201:2.4	Paṭhamaṁ.
an5.202:0.1	Aṅguttara Nikāya 5.202
an5.202:0.2	21. Kimilavagga
an5.202:0.3	Dhammassavanasutta
an5.202:1.1	“Pañcime, bhikkhave, ānisaṁsā dhammassavane.
an5.202:1.2	Katame pañca?
an5.202:1.3	Assutaṁ suṇāti, sutaṁ pariyodāpeti, kaṅkhaṁ vitarati, diṭṭhiṁ ujuṁ karoti, cittamassa pasīdati.
an5.202:1.4	Ime kho, bhikkhave, pañca ānisaṁsā dhammassavane”ti.
an5.202:1.5	Dutiyaṁ.
an5.203:0.1	Aṅguttara Nikāya 5.203
an5.203:0.2	21. Kimilavagga
an5.203:0.3	Assājānīyasutta
an5.203:1.1	“Pañcahi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅgantveva saṅkhaṁ gacchati.
an5.203:2.1	Katamehi pañcahi?
an5.203:2.2	Ajjavena, javena, maddavena, khantiyā, soraccena—
an5.203:2.3	imehi kho, bhikkhave, pañcahi aṅgehi samannāgato rañño bhadro assājānīyo rājāraho hoti rājabhoggo, rañño aṅgantveva saṅkhaṁ gacchati.
an5.203:2.4	Evamevaṁ kho, bhikkhave, pañcahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an5.203:3.1	Katamehi pañcahi?
an5.203:3.2	Ajjavena, javena, maddavena, khantiyā, soraccena—
an5.203:3.3	imehi kho, bhikkhave, pañcahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā”ti.
an5.203:3.4	Tatiyaṁ.
an5.204:0.1	Aṅguttara Nikāya 5.204
an5.204:0.2	21. Kimilavagga
an5.204:0.3	Balasutta
an5.204:1.1	“Pañcimāni, bhikkhave, balāni.
an5.204:1.2	Katamāni pañca?
an5.204:1.3	Saddhābalaṁ, hiribalaṁ, ottappabalaṁ, vīriyabalaṁ, paññābalaṁ—
an5.204:1.4	imāni kho, bhikkhave, pañca balānī”ti.
an5.204:1.5	Catutthaṁ.
an5.205:0.1	Aṅguttara Nikāya 5.205
an5.205:0.2	21. Kimilavagga
an5.205:0.3	Cetokhilasutta
an5.205:1.1	“Pañcime, bhikkhave, cetokhilā.
an5.205:1.2	Katame pañca?
an5.205:1.3	Idha, bhikkhave, bhikkhu satthari kaṅkhati vicikicchati nādhimuccati na sampasīdati.
an5.205:1.4	Yo so, bhikkhave, bhikkhu satthari kaṅkhati vicikicchati nādhimuccati na sampasīdati, tassa cittaṁ na namati ātappāya anuyogāya sātaccāya padhānāya.
an5.205:1.5	Yassa cittaṁ na namati ātappāya anuyogāya sātaccāya padhānāya, ayaṁ paṭhamo cetokhilo.
an5.205:2.1	Puna caparaṁ, bhikkhave, bhikkhu dhamme kaṅkhati …pe…
an5.205:2.2	saṅghe kaṅkhati …pe…
an5.205:2.3	sikkhāya kaṅkhati …pe…
an5.205:2.4	sabrahmacārīsu kupito hoti anattamano āhatacitto khilajāto.
an5.205:2.5	Yo so, bhikkhave, bhikkhu sabrahmacārīsu kupito hoti anattamano āhatacitto khilajāto, tassa cittaṁ na namati ātappāya anuyogāya sātaccāya padhānāya.
an5.205:2.6	Yassa cittaṁ na namati ātappāya anuyogāya sātaccāya padhānāya, ayaṁ pañcamo cetokhilo.
an5.205:2.7	Ime kho, bhikkhave, pañca cetokhilā”ti.
an5.205:2.8	Pañcamaṁ.
an5.206:0.1	Aṅguttara Nikāya 5.206
an5.206:0.2	21. Kimilavagga
an5.206:0.3	Vinibandhasutta
an5.206:1.1	“Pañcime, bhikkhave, cetasovinibandhā.
an5.206:1.2	Katame pañca?
an5.206:1.3	Idha, bhikkhave, bhikkhu kāmesu avītarāgo hoti avigatacchando avigatapemo avigatapipāso avigatapariḷāho avigatataṇho.
an5.206:1.4	Yo so, bhikkhave, bhikkhu kāmesu avītarāgo hoti avigatacchando avigatapemo avigatapipāso avigatapariḷāho avigatataṇho, tassa cittaṁ na namati ātappāya anuyogāya sātaccāya padhānāya.
an5.206:1.5	Yassa cittaṁ na namati ātappāya anuyogāya sātaccāya padhānāya, ayaṁ paṭhamo cetasovinibandho.
an5.206:2.1	Puna caparaṁ, bhikkhave, bhikkhu kāye avītarāgo hoti …pe…
an5.206:2.2	rūpe avītarāgo hoti …pe…
an5.206:2.3	yāvadatthaṁ udarāvadehakaṁ bhuñjitvā seyyasukhaṁ passasukhaṁ middhasukhaṁ anuyutto viharati …pe…
an5.206:2.4	aññataraṁ devanikāyaṁ paṇidhāya brahmacariyaṁ carati: ‘imināhaṁ sīlena vā vatena vā tapena vā brahmacariyena vā devo vā bhavissāmi devaññataro vā’ti.
an5.206:2.5	Yo so, bhikkhave, bhikkhu aññataraṁ devanikāyaṁ paṇidhāya brahmacariyaṁ carati: ‘imināhaṁ sīlena vā vatena vā tapena vā brahmacariyena vā devo vā bhavissāmi devaññataro vā’ti, tassa cittaṁ na namati ātappāya anuyogāya sātaccāya padhānāya.
an5.206:2.6	Yassa cittaṁ na namati ātappāya anuyogāya sātaccāya padhānāya, ayaṁ pañcamo cetasovinibandho.
an5.206:2.7	Ime kho, bhikkhave, pañca cetasovinibandhā”ti.
an5.206:2.8	Chaṭṭhaṁ.
an5.207:0.1	Aṅguttara Nikāya 5.207
an5.207:0.2	21. Kimilavagga
an5.207:0.3	Yāgusutta
an5.207:1.1	“Pañcime, bhikkhave, ānisaṁsā yāguyā.
an5.207:1.2	Katame pañca?
an5.207:1.3	Khuddaṁ paṭihanati, pipāsaṁ paṭivineti, vātaṁ anulometi, vatthiṁ sodheti, āmāvasesaṁ pāceti.
an5.207:1.4	Ime kho, bhikkhave, pañca ānisaṁsā yāguyā”ti.
an5.207:1.5	Sattamaṁ.
an5.208:0.1	Aṅguttara Nikāya 5.208
an5.208:0.2	21. Kimilavagga
an5.208:0.3	Dantakaṭṭhasutta
an5.208:1.1	“Pañcime, bhikkhave, ādīnavā dantakaṭṭhassa akhādane.
an5.208:1.2	Katame pañca?
an5.208:1.3	Acakkhussaṁ, mukhaṁ duggandhaṁ hoti, rasaharaṇiyo na visujjhanti, pittaṁ semhaṁ bhattaṁ pariyonandhati, bhattamassa nacchādeti.
an5.208:1.4	Ime kho, bhikkhave, pañca ādīnavā dantakaṭṭhassa akhādane.
an5.208:2.1	Pañcime, bhikkhave, ānisaṁsā dantakaṭṭhassa khādane.
an5.208:2.2	Katame pañca?
an5.208:2.3	Cakkhussaṁ, mukhaṁ na duggandhaṁ hoti, rasaharaṇiyo visujjhanti, pittaṁ semhaṁ bhattaṁ na pariyonandhati, bhattamassa chādeti.
an5.208:2.4	Ime kho, bhikkhave, pañca ānisaṁsā dantakaṭṭhassa khādane”ti.
an5.208:2.5	Aṭṭhamaṁ.
an5.209:0.1	Aṅguttara Nikāya 5.209
an5.209:0.2	21. Kimilavagga
an5.209:0.3	Gītassarasutta
an5.209:1.1	“Pañcime, bhikkhave, ādīnavā āyatakena gītassarena dhammaṁ bhaṇantassa.
an5.209:1.2	Katame pañca?
an5.209:1.3	Attanāpi tasmiṁ sare sārajjati, parepi tasmiṁ sare sārajjanti, gahapatikāpi ujjhāyanti:
an5.209:1.4	‘yatheva mayaṁ gāyāma, evamevaṁ kho samaṇā sakyaputtiyā gāyantī’ti, sarakuttimpi nikāmayamānassa samādhissa bhaṅgo hoti, pacchimā janatā diṭṭhānugatiṁ āpajjati.
an5.209:1.5	Ime kho, bhikkhave, pañca ādīnavā āyatakena gītassarena dhammaṁ bhaṇantassā”ti.
an5.209:1.6	Navamaṁ.
an5.210:0.1	Aṅguttara Nikāya 5.210
an5.210:0.2	21. Kimilavagga
an5.210:0.3	Muṭṭhassatisutta
an5.210:1.1	“Pañcime, bhikkhave, ādīnavā muṭṭhassatissa asampajānassa niddaṁ okkamayato.
an5.210:1.2	Katame pañca?
an5.210:1.3	Dukkhaṁ supati, dukkhaṁ paṭibujjhati, pāpakaṁ supinaṁ passati, devatā na rakkhanti, asuci muccati.
an5.210:1.4	Ime kho, bhikkhave, pañca ādīnavā muṭṭhassatissa asampajānassa niddaṁ okkamayato.
an5.210:2.1	Pañcime, bhikkhave, ānisaṁsā upaṭṭhitassatissa sampajānassa niddaṁ okkamayato.
an5.210:2.2	Katame pañca?
an5.210:2.3	Sukhaṁ supati, sukhaṁ paṭibujjhati, na pāpakaṁ supinaṁ passati, devatā rakkhanti, asuci na muccati.
an5.210:2.4	Ime kho, bhikkhave, pañca ānisaṁsā upaṭṭhitassatissa sampajānassa niddaṁ okkamayato”ti.
an5.210:2.5	Dasamaṁ.
an5.210:2.6	Kimilavaggo paṭhamo.
an5.210:3.0	Tassuddānaṁ
an5.210:3.1	Kimilo dhammassavanaṁ,
an5.210:3.2	ājānīyo balaṁ khilaṁ;
an5.210:3.3	Vinibandhaṁ yāgu kaṭṭhaṁ,
an5.210:3.4	gītaṁ muṭṭhassatinā cāti.
an5.211:0.1	Aṅguttara Nikāya 5.211
an5.211:0.2	22. Akkosakavagga
an5.211:0.3	Akkosakasutta
an5.211:1.1	“Yo so, bhikkhave, bhikkhu akkosakaparibhāsako ariyūpavādī sabrahmacārīnaṁ, tassa pañca ādīnavā pāṭikaṅkhā.
an5.211:1.2	Katame pañca?
an5.211:1.3	Pārājiko vā hoti chinnaparipantho, aññataraṁ vā saṅkiliṭṭhaṁ āpattiṁ āpajjati, bāḷhaṁ vā rogātaṅkaṁ phusati, sammūḷho kālaṁ karoti, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an5.211:1.4	Yo so, bhikkhave, bhikkhu akkosakaparibhāsako ariyūpavādī sabrahmacārīnaṁ, tassa ime pañca ādīnavā pāṭikaṅkhā”ti.
an5.211:1.5	Paṭhamaṁ.
an5.212:0.1	Aṅguttara Nikāya 5.212
an5.212:0.2	22. Akkosakavagga
an5.212:0.3	Bhaṇḍanakārakasutta
an5.212:1.1	“Yo so, bhikkhave, bhikkhu bhaṇḍanakārako kalahakārako vivādakārako bhassakārako saṅghe adhikaraṇakārako, tassa pañca ādīnavā pāṭikaṅkhā.
an5.212:1.2	Katame pañca?
an5.212:1.3	Anadhigataṁ nādhigacchati, adhigatā parihāyati, pāpako kittisaddo abbhuggacchati, sammūḷho kālaṁ karoti, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an5.212:1.4	Yo so, bhikkhave, bhikkhu bhaṇḍanakārako kalahakārako vivādakārako bhassakārako saṅghe adhikaraṇakārako, tassa ime pañca ādīnavā pāṭikaṅkhā”ti.
an5.212:1.5	Dutiyaṁ.
an5.213:0.1	Aṅguttara Nikāya 5.213
an5.213:0.2	22. Akkosakavagga
an5.213:0.3	Sīlasutta
an5.213:1.1	“Pañcime, bhikkhave, ādīnavā dussīlassa sīlavipattiyā.
an5.213:1.2	Katame pañca?
an5.213:1.3	Idha, bhikkhave, dussīlo sīlavipanno pamādādhikaraṇaṁ mahatiṁ bhogajāniṁ nigacchati.
an5.213:1.4	Ayaṁ, bhikkhave, paṭhamo ādīnavo dussīlassa sīlavipattiyā.
an5.213:2.1	Puna caparaṁ, bhikkhave, dussīlassa sīlavipannassa pāpako kittisaddo abbhuggacchati.
an5.213:2.2	Ayaṁ, bhikkhave, dutiyo ādīnavo dussīlassa sīlavipattiyā.
an5.213:3.1	Puna caparaṁ, bhikkhave, dussīlo sīlavipanno yaññadeva parisaṁ upasaṅkamati—yadi khattiyaparisaṁ, yadi brāhmaṇaparisaṁ, yadi gahapatiparisaṁ, yadi samaṇaparisaṁ—avisārado upasaṅkamati maṅkubhūto.
an5.213:3.2	Ayaṁ, bhikkhave, tatiyo ādīnavo dussīlassa sīlavipattiyā.
an5.213:4.1	Puna caparaṁ, bhikkhave, dussīlo sīlavipanno sammūḷho kālaṁ karoti.
an5.213:4.2	Ayaṁ, bhikkhave, catuttho ādīnavo dussīlassa sīlavipattiyā.
an5.213:5.1	Puna caparaṁ, bhikkhave, dussīlo sīlavipanno kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an5.213:5.2	Ayaṁ, bhikkhave, pañcamo ādīnavo dussīlassa sīlavipattiyā.
an5.213:5.3	Ime kho, bhikkhave, pañca ādīnavā dussīlassa sīlavipattiyā.
an5.213:6.1	Pañcime, bhikkhave, ānisaṁsā sīlavato sīlasampadāya.
an5.213:6.2	Katame pañca?
an5.213:6.3	Idha, bhikkhave, sīlavā sīlasampanno appamādādhikaraṇaṁ mahantaṁ bhogakkhandhaṁ adhigacchati.
an5.213:6.4	Ayaṁ, bhikkhave, paṭhamo ānisaṁso sīlavato sīlasampadāya.
an5.213:7.1	Puna caparaṁ, bhikkhave, sīlavato sīlasampannassa kalyāṇo kittisaddo abbhuggacchati.
an5.213:7.2	Ayaṁ, bhikkhave, dutiyo ānisaṁso sīlavato sīlasampadāya.
an5.213:8.1	Puna caparaṁ, bhikkhave, sīlavā sīlasampanno yaññadeva parisaṁ upasaṅkamati—yadi khattiyaparisaṁ, yadi brāhmaṇaparisaṁ, yadi gahapatiparisaṁ, yadi samaṇaparisaṁ—visārado upasaṅkamati amaṅkubhūto.
an5.213:8.2	Ayaṁ bhikkhave, tatiyo ānisaṁso sīlavato sīlasampadāya.
an5.213:9.1	Puna caparaṁ, bhikkhave, sīlavā sīlasampanno asammūḷho kālaṁ karoti.
an5.213:9.2	Ayaṁ, bhikkhave, catuttho ānisaṁso sīlavato sīlasampadāya.
an5.213:10.1	Puna caparaṁ, bhikkhave, sīlavā sīlasampanno kāyassa bhedā paraṁ maraṇā sugatiṁ saggaṁ lokaṁ upapajjati.
an5.213:10.2	Ayaṁ, bhikkhave, pañcamo ānisaṁso sīlavato sīlasampadāya.
an5.213:10.3	Ime kho, bhikkhave, pañca ānisaṁsā sīlavato sīlasampadāyā”ti.
an5.213:10.4	Tatiyaṁ.
an5.214:0.1	Aṅguttara Nikāya 5.214
an5.214:0.2	22. Akkosakavagga
an5.214:0.3	Bahubhāṇisutta
an5.214:1.1	“Pañcime, bhikkhave, ādīnavā bahubhāṇismiṁ puggale.
an5.214:1.2	Katame pañca?
an5.214:1.3	Musā bhaṇati, pisuṇaṁ bhaṇati, pharusaṁ bhaṇati, samphappalāpaṁ bhaṇati, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an5.214:1.4	Ime kho, bhikkhave, pañca ādīnavā bahubhāṇismiṁ puggale.
an5.214:2.1	Pañcime, bhikkhave, ānisaṁsā mantabhāṇismiṁ puggale.
an5.214:2.2	Katame pañca?
an5.214:2.3	Na musā bhaṇati, na pisuṇaṁ bhaṇati, na pharusaṁ bhaṇati, na samphappalāpaṁ bhaṇati, kāyassa bhedā paraṁ maraṇā sugatiṁ saggaṁ lokaṁ upapajjati.
an5.214:2.4	Ime kho, bhikkhave, pañca ānisaṁsā mantabhāṇismiṁ puggale”ti.
an5.214:2.5	Catutthaṁ.
an5.215:0.1	Aṅguttara Nikāya 5.215
an5.215:0.2	22. Akkosakavagga
an5.215:0.3	Paṭhamaakkhantisutta
an5.215:1.1	“Pañcime, bhikkhave, ādīnavā akkhantiyā.
an5.215:1.2	Katame pañca?
an5.215:1.3	Bahuno janassa appiyo hoti amanāpo, verabahulo ca hoti, vajjabahulo ca, sammūḷho kālaṁ karoti, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an5.215:1.4	Ime kho, bhikkhave, pañca ādīnavā akkhantiyā.
an5.215:2.1	Pañcime, bhikkhave, ānisaṁsā khantiyā.
an5.215:2.2	Katame pañca?
an5.215:2.3	Bahuno janassa piyo hoti manāpo, na verabahulo hoti, na vajjabahulo, asammūḷho kālaṁ karoti, kāyassa bhedā paraṁ maraṇā sugatiṁ saggaṁ lokaṁ upapajjati.
an5.215:2.4	Ime kho, bhikkhave, pañca ānisaṁsā khantiyā”ti.
an5.215:2.5	Pañcamaṁ.
an5.216:0.1	Aṅguttara Nikāya 5.216
an5.216:0.2	22. Akkosakavagga
an5.216:0.3	Dutiyaakkhantisutta
an5.216:1.1	“Pañcime, bhikkhave, ādīnavā akkhantiyā.
an5.216:1.2	Katame pañca?
an5.216:1.3	Bahuno janassa appiyo hoti amanāpo, luddo ca hoti, vippaṭisārī ca, sammūḷho kālaṁ karoti, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an5.216:1.4	Ime kho, bhikkhave, pañca ādīnavā akkhantiyā.
an5.216:2.1	Pañcime, bhikkhave, ānisaṁsā khantiyā.
an5.216:2.2	Katame pañca?
an5.216:2.3	Bahuno janassa piyo hoti manāpo, aluddo ca hoti, avippaṭisārī ca, asammūḷho kālaṁ karoti, kāyassa bhedā paraṁ maraṇā sugatiṁ saggaṁ lokaṁ upapajjati.
an5.216:2.4	Ime kho, bhikkhave, pañca ānisaṁsā khantiyā”ti.
an5.216:2.5	Chaṭṭhaṁ.
an5.217:0.1	Aṅguttara Nikāya 5.217
an5.217:0.2	22. Akkosakavagga
an5.217:0.3	Paṭhamaapāsādikasutta
an5.217:1.1	“Pañcime, bhikkhave, ādīnavā apāsādike.
an5.217:1.2	Katame pañca?
an5.217:1.3	Attāpi attānaṁ upavadati,
an5.217:1.4	anuvicca viññū garahanti,
an5.217:1.5	pāpako kittisaddo abbhuggacchati,
an5.217:1.6	sammūḷho kālaṁ karoti,
an5.217:1.7	kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an5.217:1.8	Ime kho, bhikkhave, pañca ādīnavā apāsādike.
an5.217:2.1	Pañcime, bhikkhave, ānisaṁsā pāsādike.
an5.217:2.2	Katame pañca?
an5.217:2.3	Attāpi attānaṁ na upavadati,
an5.217:2.4	anuvicca viññū pasaṁsanti,
an5.217:2.5	kalyāṇo kittisaddo abbhuggacchati,
an5.217:2.6	asammūḷho kālaṁ karoti,
an5.217:2.7	kāyassa bhedā paraṁ maraṇā sugatiṁ saggaṁ lokaṁ upapajjati.
an5.217:2.8	Ime kho, bhikkhave, pañca ānisaṁsā pāsādike”ti.
an5.217:2.9	Sattamaṁ.
an5.218:0.1	Aṅguttara Nikāya 5.218
an5.218:0.2	22. Akkosakavagga
an5.218:0.3	Dutiyaapāsādikasutta
an5.218:1.1	“Pañcime, bhikkhave, ādīnavā apāsādike.
an5.218:1.2	Katame pañca?
an5.218:1.3	Appasannā nappasīdanti, pasannānañca ekaccānaṁ aññathattaṁ hoti, satthusāsanaṁ akataṁ hoti, pacchimā janatā diṭṭhānugatiṁ āpajjati, cittamassa nappasīdati.
an5.218:1.4	Ime kho, bhikkhave, pañca ādīnavā apāsādike.
an5.218:2.1	Pañcime, bhikkhave, ānisaṁsā pāsādike.
an5.218:2.2	Katame pañca?
an5.218:2.3	Appasannā pasīdanti, pasannānañca bhiyyobhāvo hoti, satthusāsanaṁ kataṁ hoti, pacchimā janatā diṭṭhānugatiṁ āpajjati, cittamassa pasīdati.
an5.218:2.4	Ime kho, bhikkhave, pañca ānisaṁsā pāsādike”ti.
an5.218:2.5	Aṭṭhamaṁ.
an5.219:0.1	Aṅguttara Nikāya 5.219
an5.219:0.2	22. Akkosakavagga
an5.219:0.3	Aggisutta
an5.219:1.1	“Pañcime, bhikkhave, ādīnavā aggismiṁ.
an5.219:1.2	Katame pañca?
an5.219:1.3	Acakkhusso, dubbaṇṇakaraṇo, dubbalakaraṇo, saṅgaṇikāpavaḍḍhano, tiracchānakathāpavattaniko hoti.
an5.219:1.4	Ime kho, bhikkhave, pañca ādīnavā aggismin”ti.
an5.219:1.5	Navamaṁ.
an5.220:0.1	Aṅguttara Nikāya 5.220
an5.220:0.2	22. Akkosakavagga
an5.220:0.3	Madhurāsutta
an5.220:1.1	“Pañcime, bhikkhave, ādīnavā madhurāyaṁ.
an5.220:1.2	Katame pañca?
an5.220:1.3	Visamā, bahurajā, caṇḍasunakhā, vāḷayakkhā, dullabhapiṇḍā.
an5.220:1.4	Ime kho, bhikkhave, pañca ādīnavā madhurāyan”ti.
an5.220:1.5	Dasamaṁ.
an5.220:1.6	Akkosakavaggo dutiyo.
an5.220:2.0	Tassuddānaṁ
an5.220:2.1	Akkosabhaṇḍanasīlaṁ,
an5.220:2.2	bahubhāṇī dve akhantiyo;
an5.220:2.3	Apāsādikā dve vuttā,
an5.220:2.4	aggismiṁ madhurena cāti.
an5.221:0.1	Aṅguttara Nikāya 5.221
an5.221:0.2	23. Dīghacārikavagga
an5.221:0.3	Paṭhamadīghacārikasutta
an5.221:1.1	“Pañcime, bhikkhave, ādīnavā dīghacārikaṁ anavatthacārikaṁ anuyuttassa viharato.
an5.221:1.2	Katame pañca?
an5.221:1.3	Assutaṁ na suṇāti, sutaṁ na pariyodāpeti, sutenekaccena avisārado hoti, gāḷhaṁ rogātaṅkaṁ phusati, na ca mittavā hoti.
an5.221:1.4	Ime kho, bhikkhave, pañca ādīnavā dīghacārikaṁ anavatthacārikaṁ anuyuttassa viharato.
an5.221:2.1	Pañcime, bhikkhave, ānisaṁsā samavatthacāre.
an5.221:2.2	Katame pañca?
an5.221:2.3	Assutaṁ suṇāti, sutaṁ pariyodāpeti, sutenekaccena visārado hoti, na gāḷhaṁ rogātaṅkaṁ phusati, mittavā ca hoti.
an5.221:2.4	Ime kho, bhikkhave, pañca ānisaṁsā samavatthacāre”ti.
an5.221:2.5	Paṭhamaṁ.
an5.222:0.1	Aṅguttara Nikāya 5.222
an5.222:0.2	23. Dīghacārikavagga
an5.222:0.3	Dutiyadīghacārikasutta
an5.222:1.1	“Pañcime, bhikkhave, ādīnavā dīghacārikaṁ anavatthacārikaṁ anuyuttassa viharato.
an5.222:1.2	Katame pañca?
an5.222:1.3	Anadhigataṁ nādhigacchati, adhigatā parihāyati, adhigatenekaccena avisārado hoti, gāḷhaṁ rogātaṅkaṁ phusati, na ca mittavā hoti.
an5.222:1.4	Ime kho, bhikkhave, pañca ādīnavā dīghacārikaṁ anavatthacārikaṁ anuyuttassa viharato.
an5.222:2.1	Pañcime, bhikkhave, ānisaṁsā samavatthacāre.
an5.222:2.2	Katame pañca?
an5.222:2.3	Anadhigataṁ adhigacchati, adhigatā na parihāyati, adhigatenekaccena visārado hoti, na gāḷhaṁ rogātaṅkaṁ phusati, mittavā ca hoti.
an5.222:2.4	Ime kho, bhikkhave, pañca ānisaṁsā samavatthacāre”ti.
an5.222:2.5	Dutiyaṁ.
an5.223:0.1	Aṅguttara Nikāya 5.223
an5.223:0.2	23. Dīghacārikavagga
an5.223:0.3	Atinivāsasutta
an5.223:1.1	“Pañcime, bhikkhave, ādīnavā atinivāse.
an5.223:1.2	Katame pañca?
an5.223:1.3	Bahubhaṇḍo hoti bahubhaṇḍasannicayo, bahubhesajjo hoti bahubhesajjasannicayo, bahukicco hoti bahukaraṇīyo byatto kiṅkaraṇīyesu, saṁsaṭṭho viharati gahaṭṭhapabbajitehi ananulomikena gihisaṁsaggena, tamhā ca āvāsā pakkamanto sāpekkho pakkamati.
an5.223:1.4	Ime kho, bhikkhave, pañca ādīnavā atinivāse.
an5.223:2.1	Pañcime, bhikkhave, ānisaṁsā samavatthavāse.
an5.223:2.2	Katame pañca?
an5.223:2.3	Na bahubhaṇḍo hoti na bahubhaṇḍasannicayo, na bahubhesajjo hoti na bahubhesajjasannicayo, na bahukicco hoti na bahukaraṇīyo na byatto kiṅkaraṇīyesu, asaṁsaṭṭho viharati gahaṭṭhapabbajitehi ananulomikena gihisaṁsaggena, tamhā ca āvāsā pakkamanto anapekkho pakkamati.
an5.223:2.4	Ime kho, bhikkhave, pañca ānisaṁsā samavatthavāse”ti.
an5.223:2.5	Tatiyaṁ.
an5.224:0.1	Aṅguttara Nikāya 5.224
an5.224:0.2	23. Dīghacārikavagga
an5.224:0.3	Maccharīsutta
an5.224:1.1	“Pañcime, bhikkhave, ādīnavā atinivāse.
an5.224:1.2	Katame pañca?
an5.224:1.3	Āvāsamaccharī hoti, kulamaccharī hoti, lābhamaccharī hoti, vaṇṇamaccharī hoti, dhammamaccharī hoti.
an5.224:1.4	Ime kho, bhikkhave, pañca ādīnavā atinivāse.
an5.224:2.1	Pañcime, bhikkhave, ānisaṁsā samavatthavāse.
an5.224:2.2	Katame pañca?
an5.224:2.3	Na āvāsamaccharī hoti, na kulamaccharī hoti, na lābhamaccharī hoti, na vaṇṇamaccharī hoti, na dhammamaccharī hoti.
an5.224:2.4	Ime kho, bhikkhave, pañca ānisaṁsā samavatthavāse”ti.
an5.224:2.5	Catutthaṁ.
an5.225:0.1	Aṅguttara Nikāya 5.225
an5.225:0.2	23. Dīghacārikavagga
an5.225:0.3	Paṭhamakulūpakasutta
an5.225:1.1	“Pañcime, bhikkhave, ādīnavā kulūpake.
an5.225:1.2	Katame pañca?
an5.225:1.3	Anāmantacāre āpajjati, raho nisajjāya āpajjati, paṭicchanne āsane āpajjati, mātugāmassa uttari chappañcavācāhi dhammaṁ desento āpajjati, kāmasaṅkappabahulo viharati.
an5.225:1.4	Ime kho, bhikkhave, pañca ādīnavā kulūpake”ti.
an5.225:1.5	Pañcamaṁ.
an5.226:0.1	Aṅguttara Nikāya 5.226
an5.226:0.2	23. Dīghacārikavagga
an5.226:0.3	Dutiyakulūpakasutta
an5.226:1.1	“Pañcime, bhikkhave, ādīnavā kulūpakassa bhikkhuno ativelaṁ kulesu saṁsaṭṭhassa viharato.
an5.226:1.2	Katame pañca?
an5.226:1.3	Mātugāmassa abhiṇhadassanaṁ,
an5.226:1.4	dassane sati saṁsaggo,
an5.226:1.5	saṁsagge sati vissāso,
an5.226:1.6	vissāse sati otāro,
an5.226:1.7	otiṇṇacittassetaṁ pāṭikaṅkhaṁ: ‘anabhirato vā brahmacariyaṁ carissati aññataraṁ vā saṅkiliṭṭhaṁ āpattiṁ āpajjissati sikkhaṁ vā paccakkhāya hīnāyāvattissati’.
an5.226:1.8	Ime kho, bhikkhave, pañca ādīnavā kulūpakassa bhikkhuno ativelaṁ kulesu saṁsaṭṭhassa viharato”ti.
an5.226:1.9	Chaṭṭhaṁ.
an5.227:0.1	Aṅguttara Nikāya 5.227
an5.227:0.2	23. Dīghacārikavagga
an5.227:0.3	Bhogasutta
an5.227:1.1	“Pañcime, bhikkhave, ādīnavā bhogesu.
an5.227:1.2	Katame pañca?
an5.227:1.3	Aggisādhāraṇā bhogā, udakasādhāraṇā bhogā, rājasādhāraṇā bhogā, corasādhāraṇā bhogā, appiyehi dāyādehi sādhāraṇā bhogā.
an5.227:1.4	Ime kho, bhikkhave, pañca ādīnavā bhogesu.
an5.227:2.1	Pañcime, bhikkhave, ānisaṁsā bhogesu.
an5.227:2.2	Katame pañca?
an5.227:2.3	Bhoge nissāya attānaṁ sukheti pīṇeti sammā sukhaṁ pariharati, mātāpitaro sukheti pīṇeti sammā sukhaṁ pariharati, puttadāradāsakammakaraporise sukheti pīṇeti sammā sukhaṁ pariharati, mittāmacce sukheti pīṇeti sammā sukhaṁ pariharati, samaṇabrāhmaṇesu uddhaggikaṁ dakkhiṇaṁ patiṭṭhāpeti sovaggikaṁ sukhavipākaṁ saggasaṁvattanikaṁ.
an5.227:2.4	Ime kho, bhikkhave, pañca ānisaṁsā bhogesū”ti.
an5.227:2.5	Sattamaṁ.
an5.228:0.1	Aṅguttara Nikāya 5.228
an5.228:0.2	23. Dīghacārikavagga
an5.228:0.3	Ussūrabhattasutta
an5.228:1.1	“Pañcime, bhikkhave, ādīnavā ussūrabhatte kule.
an5.228:1.2	Katame pañca?
an5.228:1.3	Ye te atithī pāhunā, te na kālena paṭipūjenti;
an5.228:1.4	yā tā balipaṭiggāhikā devatā, tā na kālena paṭipūjenti;
an5.228:1.5	ye te samaṇabrāhmaṇā ekabhattikā rattūparatā viratā vikālabhojanā, te na kālena paṭipūjenti;
an5.228:1.6	dāsakammakaraporisā vimukhā kammaṁ karonti;
an5.228:1.7	tāvatakaṁyeva asamayena bhuttaṁ anojavantaṁ hoti.
an5.228:1.8	Ime kho, bhikkhave, pañca ādīnavā ussūrabhatte kule.
an5.228:2.1	Pañcime, bhikkhave, ānisaṁsā samayabhatte kule.
an5.228:2.2	Katame pañca?
an5.228:2.3	Ye te atithī pāhunā, te kālena paṭipūjenti;
an5.228:2.4	yā tā balipaṭiggāhikā devatā, tā kālena paṭipūjenti;
an5.228:2.5	ye te samaṇabrāhmaṇā ekabhattikā rattūparatā viratā vikālabhojanā, te kālena paṭipūjenti;
an5.228:2.6	dāsakammakaraporisā avimukhā kammaṁ karonti;
an5.228:2.7	tāvatakaṁyeva samayena bhuttaṁ ojavantaṁ hoti.
an5.228:2.8	Ime kho, bhikkhave, pañca ānisaṁsā samayabhatte kule”ti.
an5.228:2.9	Aṭṭhamaṁ.
an5.229:0.1	Aṅguttara Nikāya 5.229
an5.229:0.2	23. Dīghacārikavagga
an5.229:0.3	Paṭhamakaṇhasappasutta
an5.229:1.1	“Pañcime, bhikkhave, ādīnavā kaṇhasappe.
an5.229:1.2	Katame pañca?
an5.229:1.3	Asuci, duggandho, sabhīru, sappaṭibhayo, mittadubbhī.
an5.229:1.4	Ime kho, bhikkhave, pañca ādīnavā kaṇhasappe.
an5.229:2.1	Evamevaṁ kho, bhikkhave, pañcime ādīnavā mātugāme.
an5.229:2.2	Katame pañca?
an5.229:2.3	Asuci, duggandho, sabhīru, sappaṭibhayo, mittadubbhī.
an5.229:2.4	Ime kho, bhikkhave, pañca ādīnavā mātugāme”ti.
an5.229:2.5	Navamaṁ.
an5.230:0.1	Aṅguttara Nikāya 5.230
an5.230:0.2	23. Dīghacārikavagga
an5.230:0.3	Dutiyakaṇhasappasutta
an5.230:1.1	“Pañcime, bhikkhave, ādīnavā kaṇhasappe.
an5.230:1.2	Katame pañca?
an5.230:1.3	Kodhano, upanāhī, ghoraviso, dujjivho, mittadubbhī.
an5.230:1.4	Ime kho, bhikkhave, pañca ādīnavā kaṇhasappe.
an5.230:2.1	Evamevaṁ kho, bhikkhave, pañcime ādīnavā mātugāme.
an5.230:2.2	Katame pañca?
an5.230:2.3	Kodhano, upanāhī, ghoraviso, dujjivho, mittadubbhī.
an5.230:2.4	Tatridaṁ, bhikkhave, mātugāmassa ghoravisatā—
an5.230:2.5	yebhuyyena, bhikkhave, mātugāmo tibbarāgo.
an5.230:2.6	Tatridaṁ, bhikkhave, mātugāmassa dujjivhatā—
an5.230:2.7	yebhuyyena, bhikkhave, mātugāmo pisuṇavāco.
an5.230:2.8	Tatridaṁ, bhikkhave, mātugāmassa mittadubbhitā—
an5.230:2.9	yebhuyyena, bhikkhave, mātugāmo aticārinī.
an5.230:2.10	Ime kho, bhikkhave, pañca ādīnavā mātugāme”ti.
an5.230:2.11	Dasamaṁ.
an5.230:2.12	Dīghacārikavaggo tatiyo.
an5.230:3.0	Tassuddānaṁ
an5.230:3.1	Dve dīghacārikā vuttā,
an5.230:3.2	atinivāsamaccharī;
an5.230:3.3	Dve ca kulūpakā bhogā,
an5.230:3.4	bhattaṁ sappāpare duveti.
an5.231:0.1	Aṅguttara Nikāya 5.231
an5.231:0.2	24. Āvāsikavagga
an5.231:0.3	Āvāsikasutta
an5.231:1.1	“Pañcahi, bhikkhave, dhammehi samannāgato āvāsiko bhikkhu abhāvanīyo hoti.
an5.231:1.2	Katamehi pañcahi?
an5.231:1.3	Na ākappasampanno hoti na vattasampanno;
an5.231:1.4	na bahussuto hoti na sutadharo;
an5.231:1.5	na paṭisallekhitā hoti na paṭisallānārāmo;
an5.231:1.6	na kalyāṇavāco hoti na kalyāṇavākkaraṇo;
an5.231:1.7	duppañño hoti jaḷo eḷamūgo.
an5.231:1.8	Imehi kho, bhikkhave, pañcahi dhammehi samannāgato āvāsiko bhikkhu abhāvanīyo hoti.
an5.231:2.1	Pañcahi, bhikkhave, dhammehi samannāgato āvāsiko bhikkhu bhāvanīyo hoti.
an5.231:2.2	Katamehi pañcahi?
an5.231:2.3	Ākappasampanno hoti vattasampanno;
an5.231:2.4	bahussuto hoti sutadharo;
an5.231:2.5	paṭisallekhitā hoti paṭisallānārāmo;
an5.231:2.6	kalyāṇavāco hoti kalyāṇavākkaraṇo;
an5.231:2.7	paññavā hoti ajaḷo aneḷamūgo.
an5.231:2.8	Imehi kho, bhikkhave, pañcahi dhammehi samannāgato āvāsiko bhikkhu bhāvanīyo hotī”ti.
an5.231:2.9	Paṭhamaṁ.
an5.232:0.1	Aṅguttara Nikāya 5.232
an5.232:0.2	24. Āvāsikavagga
an5.232:0.3	Piyasutta
an5.232:1.1	“Pañcahi, bhikkhave, dhammehi samannāgato āvāsiko bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an5.232:1.2	Katamehi pañcahi?
an5.232:1.3	Sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu;
an5.232:1.4	bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā;
an5.232:1.5	kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā;
an5.232:1.6	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;
an5.232:1.7	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an5.232:1.8	Imehi kho, bhikkhave, pañcahi dhammehi samannāgato āvāsiko bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an5.232:1.9	Dutiyaṁ.
an5.233:0.1	Aṅguttara Nikāya 5.233
an5.233:0.2	24. Āvāsikavagga
an5.233:0.3	Sobhanasutta
an5.233:1.1	“Pañcahi, bhikkhave, dhammehi samannāgato āvāsiko bhikkhu āvāsaṁ sobheti.
an5.233:1.2	Katamehi pañcahi?
an5.233:1.3	Sīlavā hoti …pe… samādāya sikkhati sikkhāpadesu;
an5.233:1.4	bahussuto hoti …pe… diṭṭhiyā suppaṭividdhā;
an5.233:1.5	kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā;
an5.233:1.6	paṭibalo hoti upasaṅkamante dhammiyā kathāya sandassetuṁ samādapetuṁ samuttejetuṁ sampahaṁsetuṁ;
an5.233:1.7	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an5.233:1.8	Imehi kho, bhikkhave, pañcahi dhammehi samannāgato āvāsiko bhikkhu āvāsaṁ sobhetī”ti.
an5.233:1.9	Tatiyaṁ.
an5.234:0.1	Aṅguttara Nikāya 5.234
an5.234:0.2	24. Āvāsikavagga
an5.234:0.3	Bahūpakārasutta
an5.234:1.1	“Pañcahi, bhikkhave, dhammehi samannāgato āvāsiko bhikkhu āvāsassa bahūpakāro hoti.
an5.234:1.2	Katamehi pañcahi?
an5.234:1.3	Sīlavā hoti …pe… samādāya sikkhati sikkhāpadesu;
an5.234:1.4	bahussuto hoti …pe… diṭṭhiyā suppaṭividdhā;
an5.234:1.5	khaṇḍaphullaṁ paṭisaṅkharoti;
an5.234:1.6	mahā kho pana bhikkhusaṅgho abhikkanto nānāverajjakā bhikkhū gihīnaṁ upasaṅkamitvā āroceti:
an5.234:1.7	‘mahā kho, āvuso, bhikkhusaṅgho abhikkanto nānāverajjakā bhikkhū, karotha puññāni, samayo puññāni kātun’ti;
an5.234:1.8	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an5.234:1.9	Imehi kho, bhikkhave, pañcahi dhammehi samannāgato āvāsiko bhikkhu āvāsassa bahūpakāro hotī”ti.
an5.234:1.10	Catutthaṁ.
an5.235:0.1	Aṅguttara Nikāya 5.235
an5.235:0.2	24. Āvāsikavagga
an5.235:0.3	Anukampasutta
an5.235:1.1	“Pañcahi, bhikkhave, dhammehi samannāgato āvāsiko bhikkhu gihīnaṁ anukampati.
an5.235:1.2	Katamehi pañcahi?
an5.235:1.3	Adhisīle samādapeti;
an5.235:1.4	dhammadassane niveseti;
an5.235:1.5	gilānake upasaṅkamitvā satiṁ uppādeti:
an5.235:1.6	‘arahaggataṁ āyasmanto satiṁ upaṭṭhāpethā’ti;
an5.235:1.7	mahā kho pana bhikkhusaṅgho abhikkanto nānāverajjakā bhikkhū gihīnaṁ upasaṅkamitvā āroceti:
an5.235:1.8	‘mahā kho, āvuso, bhikkhusaṅgho abhikkanto nānāverajjakā bhikkhū, karotha puññāni, samayo puññāni kātun’ti;
an5.235:1.9	yaṁ kho panassa bhojanaṁ denti lūkhaṁ vā paṇītaṁ vā taṁ attanā paribhuñjati, saddhādeyyaṁ na vinipāteti.
an5.235:1.10	Imehi kho, bhikkhave, pañcahi dhammehi samannāgato āvāsiko bhikkhu gihīnaṁ anukampatī”ti.
an5.235:1.11	Pañcamaṁ.
an5.236:0.1	Aṅguttara Nikāya 5.236
an5.236:0.2	24. Āvāsikavagga
an5.236:0.3	Paṭhamaavaṇṇārahasutta
an5.236:1.1	“Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ niraye.
an5.236:1.2	Katamehi pañcahi?
an5.236:1.3	Ananuvicca apariyogāhetvā avaṇṇārahassa vaṇṇaṁ bhāsati;
an5.236:1.4	ananuvicca apariyogāhetvā vaṇṇārahassa avaṇṇaṁ bhāsati;
an5.236:1.5	ananuvicca apariyogāhetvā appasādanīye ṭhāne pasādaṁ upadaṁseti;
an5.236:1.6	ananuvicca apariyogāhetvā pasādanīye ṭhāne appasādaṁ upadaṁseti;
an5.236:1.7	saddhādeyyaṁ vinipāteti.
an5.236:1.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ niraye.
an5.236:2.1	Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ sagge.
an5.236:2.2	Katamehi pañcahi?
an5.236:2.3	Anuvicca pariyogāhetvā avaṇṇārahassa avaṇṇaṁ bhāsati;
an5.236:2.4	anuvicca pariyogāhetvā vaṇṇārahassa vaṇṇaṁ bhāsati;
an5.236:2.5	anuvicca pariyogāhetvā appasādanīye ṭhāne appasādaṁ upadaṁseti;
an5.236:2.6	anuvicca pariyogāhetvā pasādanīye ṭhāne pasādaṁ upadaṁseti;
an5.236:2.7	saddhādeyyaṁ na vinipāteti.
an5.236:2.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ sagge”ti.
an5.236:2.9	Chaṭṭhaṁ.
an5.237:0.1	Aṅguttara Nikāya 5.237
an5.237:0.2	24. Āvāsikavagga
an5.237:0.3	Dutiyaavaṇṇārahasutta
an5.237:1.1	“Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ niraye.
an5.237:1.2	Katamehi pañcahi?
an5.237:1.3	Ananuvicca apariyogāhetvā avaṇṇārahassa vaṇṇaṁ bhāsati;
an5.237:1.4	ananuvicca apariyogāhetvā vaṇṇārahassa avaṇṇaṁ bhāsati;
an5.237:1.5	āvāsamaccharī hoti āvāsapaligedhī;
an5.237:1.6	kulamaccharī hoti kulapaligedhī;
an5.237:1.7	saddhādeyyaṁ vinipāteti.
an5.237:1.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ niraye.
an5.237:2.1	Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ sagge.
an5.237:2.2	Katamehi pañcahi?
an5.237:2.3	Anuvicca pariyogāhetvā avaṇṇārahassa avaṇṇaṁ bhāsati;
an5.237:2.4	anuvicca pariyogāhetvā vaṇṇārahassa vaṇṇaṁ bhāsati;
an5.237:2.5	na āvāsamaccharī hoti na āvāsapaligedhī;
an5.237:2.6	na kulamaccharī hoti na kulapaligedhī;
an5.237:2.7	saddhādeyyaṁ na vinipāteti.
an5.237:2.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ sagge”ti.
an5.237:2.9	Sattamaṁ.
an5.238:0.1	Aṅguttara Nikāya 5.238
an5.238:0.2	24. Āvāsikavagga
an5.238:0.3	Tatiyaavaṇṇārahasutta
an5.238:1.1	“Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ niraye.
an5.238:1.2	Katamehi pañcahi?
an5.238:1.3	Ananuvicca apariyogāhetvā avaṇṇārahassa vaṇṇaṁ bhāsati;
an5.238:1.4	ananuvicca apariyogāhetvā vaṇṇārahassa avaṇṇaṁ bhāsati;
an5.238:1.5	āvāsamaccharī hoti;
an5.238:1.6	kulamaccharī hoti;
an5.238:1.7	lābhamaccharī hoti.
an5.238:1.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ niraye.
an5.238:2.1	Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ sagge.
an5.238:2.2	Katamehi pañcahi?
an5.238:2.3	Anuvicca pariyogāhetvā avaṇṇārahassa avaṇṇaṁ bhāsati;
an5.238:2.4	anuvicca pariyogāhetvā vaṇṇārahassa vaṇṇaṁ bhāsati;
an5.238:2.5	na āvāsamaccharī hoti;
an5.238:2.6	na kulamaccharī hoti;
an5.238:2.7	na lābhamaccharī hoti.
an5.238:2.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ sagge”ti.
an5.238:2.9	Aṭṭhamaṁ.
an5.239:0.1	Aṅguttara Nikāya 5.239
an5.239:0.2	24. Āvāsikavagga
an5.239:0.3	Paṭhamamacchariyasutta
an5.239:1.1	“Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ niraye.
an5.239:1.2	Katamehi pañcahi?
an5.239:1.3	Āvāsamaccharī hoti;
an5.239:1.4	kulamaccharī hoti;
an5.239:1.5	lābhamaccharī hoti;
an5.239:1.6	vaṇṇamaccharī hoti;
an5.239:1.7	saddhādeyyaṁ vinipāteti.
an5.239:1.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ niraye.
an5.239:2.1	Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ sagge.
an5.239:2.2	Katamehi pañcahi?
an5.239:2.3	Na āvāsamaccharī hoti;
an5.239:2.4	na kulamaccharī hoti;
an5.239:2.5	na lābhamaccharī hoti;
an5.239:2.6	na vaṇṇamaccharī hoti;
an5.239:2.7	saddhādeyyaṁ na vinipāteti.
an5.239:2.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ sagge”ti.
an5.239:2.9	Navamaṁ.
an5.240:0.1	Aṅguttara Nikāya 5.240
an5.240:0.2	24. Āvāsikavagga
an5.240:0.3	Dutiyamacchariyasutta
an5.240:1.1	“Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ niraye.
an5.240:1.2	Katamehi pañcahi?
an5.240:1.3	Āvāsamaccharī hoti;
an5.240:1.4	kulamaccharī hoti;
an5.240:1.5	lābhamaccharī hoti;
an5.240:1.6	vaṇṇamaccharī hoti;
an5.240:1.7	dhammamaccharī hoti.
an5.240:1.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ niraye.
an5.240:2.1	Pañcahi, bhikkhave, dhammehi samannāgato āvāsiko bhikkhu yathābhataṁ nikkhitto evaṁ sagge.
an5.240:2.2	Katamehi pañcahi?
an5.240:2.3	Na āvāsamaccharī hoti;
an5.240:2.4	na kulamaccharī hoti;
an5.240:2.5	na lābhamaccharī hoti;
an5.240:2.6	na vaṇṇamaccharī hoti;
an5.240:2.7	na dhammamaccharī hoti.
an5.240:2.8	Imehi kho, bhikkhave, pañcahi dhammehi samannāgato āvāsiko bhikkhu yathābhataṁ nikkhitto evaṁ sagge”ti.
an5.240:2.9	Dasamaṁ.
an5.240:2.10	Āvāsikavaggo catuttho.
an5.240:3.0	Tassuddānaṁ
an5.240:3.1	Āvāsiko piyo ca sobhano,
an5.240:3.2	Bahūpakāro anukampako ca;
an5.240:3.3	Tayo avaṇṇārahā ceva,
an5.240:3.4	Macchariyā duvepi cāti.
an5.241:0.1	Aṅguttara Nikāya 5.241
an5.241:0.2	25. Duccaritavagga
an5.241:0.3	Paṭhamaduccaritasutta
an5.241:1.1	“Pañcime, bhikkhave, ādīnavā duccarite.
an5.241:1.2	Katame pañca?
an5.241:1.3	Attāpi attānaṁ upavadati;
an5.241:1.4	anuvicca viññū garahanti;
an5.241:1.5	pāpako kittisaddo abbhuggacchati;
an5.241:1.6	sammūḷho kālaṁ karoti;
an5.241:1.7	kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an5.241:1.8	Ime kho, bhikkhave, pañca ādīnavā duccarite.
an5.241:2.1	Pañcime, bhikkhave, ānisaṁsā sucarite.
an5.241:2.2	Katame pañca?
an5.241:2.3	Attāpi attānaṁ na upavadati;
an5.241:2.4	anuvicca viññū pasaṁsanti;
an5.241:2.5	kalyāṇo kittisaddo abbhuggacchati;
an5.241:2.6	asammūḷho kālaṁ karoti;
an5.241:2.7	kāyassa bhedā paraṁ maraṇā sugatiṁ saggaṁ lokaṁ upapajjati.
an5.241:2.8	Ime kho, bhikkhave, pañca ānisaṁsā sucarite”ti.
an5.241:2.9	Paṭhamaṁ.
an5.242:0.1	Aṅguttara Nikāya 5.242
an5.242:0.2	25. Duccaritavagga
an5.242:0.3	Paṭhamakāyaduccaritasutta
an5.242:1.1	“Pañcime, bhikkhave, ādīnavā kāyaduccarite …pe… ānisaṁsā kāyasucarite …pe….
an5.242:1.2	Dutiyaṁ.
an5.243:0.1	Aṅguttara Nikāya 5.243
an5.243:0.2	25. Duccaritavagga
an5.243:0.3	Paṭhamavacīduccaritasutta
an5.243:1.1	“Pañcime, bhikkhave, ādīnavā vacīduccarite …pe… ānisaṁsā vacīsucarite …pe….
an5.243:1.2	Tatiyaṁ.
an5.244:0.1	Aṅguttara Nikāya 5.244
an5.244:0.2	25. Duccaritavagga
an5.244:0.3	Paṭhamamanoduccaritasutta
an5.244:1.1	“Pañcime, bhikkhave, ādīnavā manoduccarite …pe… ānisaṁsā manosucarite.
an5.244:1.2	Katame pañca?
an5.244:1.3	Attāpi attānaṁ na upavadati;
an5.244:1.4	anuvicca viññū pasaṁsanti;
an5.244:1.5	kalyāṇo kittisaddo abbhuggacchati;
an5.244:1.6	asammūḷho kālaṁ karoti;
an5.244:1.7	kāyassa bhedā paraṁ maraṇā sugatiṁ saggaṁ lokaṁ upapajjati.
an5.244:1.8	Ime kho, bhikkhave, pañca ānisaṁsā manosucarite”ti.
an5.244:1.9	Catutthaṁ.
an5.245:0.1	Aṅguttara Nikāya 5.245
an5.245:0.2	25. Duccaritavagga
an5.245:0.3	Dutiyaduccaritasutta
an5.245:1.1	“Pañcime, bhikkhave, ādīnavā duccarite.
an5.245:1.2	Katame pañca?
an5.245:1.3	Attāpi attānaṁ upavadati;
an5.245:1.4	anuvicca viññū garahanti;
an5.245:1.5	pāpako kittisaddo abbhuggacchati;
an5.245:1.6	saddhammā vuṭṭhāti;
an5.245:1.7	asaddhamme patiṭṭhāti.
an5.245:1.8	Ime kho, bhikkhave, pañca ādīnavā duccarite.
an5.245:2.1	Pañcime, bhikkhave, ānisaṁsā sucarite.
an5.245:2.2	Katame pañca?
an5.245:2.3	Attāpi attānaṁ na upavadati;
an5.245:2.4	anuvicca viññū pasaṁsanti;
an5.245:2.5	kalyāṇo kittisaddo abbhuggacchati;
an5.245:2.6	asaddhammā vuṭṭhāti;
an5.245:2.7	saddhamme patiṭṭhāti.
an5.245:2.8	Ime kho, bhikkhave, pañca ānisaṁsā sucarite”ti.
an5.245:2.9	Pañcamaṁ.
an5.246:0.1	Aṅguttara Nikāya 5.246
an5.246:0.2	25. Duccaritavagga
an5.246:0.3	Dutiyakāyaduccaritasutta
an5.246:1.1	“Pañcime, bhikkhave, ādīnavā kāyaduccarite …pe… ānisaṁsā kāyasucarite …pe….
an5.246:1.2	Chaṭṭhaṁ.
an5.247:0.1	Aṅguttara Nikāya 5.247
an5.247:0.2	25. Duccaritavagga
an5.247:0.3	Dutiyavacīduccaritasutta
an5.247:1.1	“Pañcime, bhikkhave, ādīnavā vacīduccarite …pe… ānisaṁsā vacīsucarite …pe….
an5.247:1.2	Sattamaṁ.
an5.248:0.1	Aṅguttara Nikāya 5.248
an5.248:0.2	25. Duccaritavagga
an5.248:0.3	Dutiyamanoduccaritasutta
an5.248:1.1	“Pañcime, bhikkhave, ādīnavā manoduccarite …pe… ānisaṁsā manosucarite.
an5.248:1.2	Katame pañca?
an5.248:1.3	Attāpi attānaṁ na upavadati;
an5.248:1.4	anuvicca viññū pasaṁsanti;
an5.248:1.5	kalyāṇo kittisaddo abbhuggacchati;
an5.248:1.6	asaddhammā vuṭṭhāti;
an5.248:1.7	saddhamme patiṭṭhāti.
an5.248:1.8	Ime kho, bhikkhave, pañca ānisaṁsā manosucarite”ti.
an5.248:1.9	Aṭṭhamaṁ.
an5.249:0.1	Aṅguttara Nikāya 5.249
an5.249:0.2	25. Duccaritavagga
an5.249:0.3	Sivathikasutta
an5.249:1.1	“Pañcime, bhikkhave, ādīnavā sivathikāya.
an5.249:1.2	Katame pañca?
an5.249:1.3	Asuci, duggandhā, sappaṭibhayā, vāḷānaṁ amanussānaṁ āvāso, bahuno janassa ārodanā—
an5.249:1.4	ime kho, bhikkhave, pañca ādīnavā sivathikāya.
an5.249:2.1	Evamevaṁ kho, bhikkhave, pañcime ādīnavā sivathikūpame puggale.
an5.249:2.2	Katame pañca?
an5.249:2.3	Idha, bhikkhave, ekacco puggalo asucinā kāyakammena samannāgato hoti;
an5.249:2.4	asucinā vacīkammena samannāgato hoti;
an5.249:2.5	asucinā manokammena samannāgato hoti.
an5.249:2.6	Idamassa asucitāya vadāmi.
an5.249:2.7	Seyyathāpi sā, bhikkhave, sivathikā asuci;
an5.249:2.8	tathūpamāhaṁ, bhikkhave, imaṁ puggalaṁ vadāmi.
an5.249:3.1	Tassa asucinā kāyakammena samannāgatassa, asucinā vacīkammena samannāgatassa, asucinā manokammena samannāgatassa pāpako kittisaddo abbhuggacchati.
an5.249:3.2	Idamassa duggandhatāya vadāmi.
an5.249:3.3	Seyyathāpi sā, bhikkhave, sivathikā duggandhā;
an5.249:3.4	tathūpamāhaṁ, bhikkhave, imaṁ puggalaṁ vadāmi.
an5.249:4.1	Tamenaṁ asucinā kāyakammena samannāgataṁ, asucinā vacīkammena samannāgataṁ, asucinā manokammena samannāgataṁ pesalā sabrahmacārī ārakā parivajjanti.
an5.249:4.2	Idamassa sappaṭibhayasmiṁ vadāmi.
an5.249:4.3	Seyyathāpi sā, bhikkhave, sivathikā sappaṭibhayā;
an5.249:4.4	tathūpamāhaṁ, bhikkhave, imaṁ puggalaṁ vadāmi.
an5.249:5.1	So asucinā kāyakammena samannāgato, asucinā vacīkammena samannāgato, asucinā manokammena samannāgato sabhāgehi puggalehi saddhiṁ saṁvasati.
an5.249:5.2	Idamassa vāḷāvāsasmiṁ vadāmi.
an5.249:5.3	Seyyathāpi sā, bhikkhave, sivathikā vāḷānaṁ amanussānaṁ āvāso;
an5.249:5.4	tathūpamāhaṁ, bhikkhave, imaṁ puggalaṁ vadāmi.
an5.249:6.1	Tamenaṁ asucinā kāyakammena samannāgataṁ, asucinā vacīkammena samannāgataṁ, asucinā manokammena samannāgataṁ pesalā sabrahmacārī disvā khīyadhammaṁ āpajjanti:
an5.249:6.2	‘aho vata no dukkhaṁ ye mayaṁ evarūpehi puggalehi saddhiṁ saṁvasāmā’ti.
an5.249:6.3	Idamassa ārodanāya vadāmi.
an5.249:6.4	Seyyathāpi sā, bhikkhave, sivathikā bahuno janassa ārodanā;
an5.249:6.5	tathūpamāhaṁ, bhikkhave, imaṁ puggalaṁ vadāmi.
an5.249:6.6	Ime kho, bhikkhave, pañca ādīnavā sivathikūpame puggale”ti.
an5.249:6.7	Navamaṁ.
an5.250:0.1	Aṅguttara Nikāya 5.250
an5.250:0.2	25. Duccaritavagga
an5.250:0.3	Puggalappasādasutta
an5.250:1.1	“Pañcime, bhikkhave, ādīnavā puggalappasāde.
an5.250:1.2	Katame pañca?
an5.250:1.3	Yasmiṁ, bhikkhave, puggale puggalo abhippasanno hoti, so tathārūpaṁ āpattiṁ āpanno hoti yathārūpāya āpattiyā saṅgho ukkhipati.
an5.250:1.4	Tassa evaṁ hoti:
an5.250:1.5	‘yo kho myāyaṁ puggalo piyo manāpo so saṅghena ukkhitto’ti.
an5.250:1.6	Bhikkhūsu appasādabahulo hoti.
an5.250:1.7	Bhikkhūsu appasādabahulo samāno aññe bhikkhū na bhajati.
an5.250:1.8	Aññe bhikkhū abhajanto saddhammaṁ na suṇāti.
an5.250:1.9	Saddhammaṁ asuṇanto saddhammā parihāyati.
an5.250:1.10	Ayaṁ, bhikkhave, paṭhamo ādīnavo puggalappasāde.
an5.250:2.1	Puna caparaṁ, bhikkhave, yasmiṁ puggale puggalo abhippasanno hoti, so tathārūpaṁ āpattiṁ āpanno hoti yathārūpāya āpattiyā saṅgho ante nisīdāpeti.
an5.250:2.2	Tassa evaṁ hoti:
an5.250:2.3	‘yo kho myāyaṁ puggalo piyo manāpo so saṅghena ante nisīdāpito’ti.
an5.250:2.4	Bhikkhūsu appasādabahulo hoti.
an5.250:2.5	Bhikkhūsu appasādabahulo samāno aññe bhikkhū na bhajati.
an5.250:2.6	Aññe bhikkhū abhajanto saddhammaṁ na suṇāti.
an5.250:2.7	Saddhammaṁ asuṇanto saddhammā parihāyati.
an5.250:2.8	Ayaṁ, bhikkhave, dutiyo ādīnavo puggalappasāde.
an5.250:3.1	Puna caparaṁ, bhikkhave, yasmiṁ puggale puggalo abhippasanno hoti, so disāpakkanto hoti …pe… so vibbhanto hoti …pe… so kālaṅkato hoti.
an5.250:3.2	Tassa evaṁ hoti:
an5.250:3.3	‘yo kho myāyaṁ puggalo piyo manāpo so kālaṅkato’ti.
an5.250:3.4	Aññe bhikkhū na bhajati.
an5.250:3.5	Aññe bhikkhū abhajanto saddhammaṁ na suṇāti.
an5.250:3.6	Saddhammaṁ asuṇanto saddhammā parihāyati.
an5.250:3.7	Ayaṁ, bhikkhave, pañcamo ādīnavo puggalappasāde.
an5.250:3.8	Ime kho, bhikkhave, pañca ādīnavā puggalappasāde”ti.
an5.250:3.9	Dasamaṁ.
an5.250:3.10	Duccaritavaggo pañcamo.
an5.250:4.0	Tassuddānaṁ
an5.250:4.1	Duccaritaṁ kāyaduccaritaṁ,
an5.250:4.2	Vacīduccaritaṁ manoduccaritaṁ;
an5.250:4.3	Catūhi pare dve sivathikā,
an5.250:4.4	Puggalappasādena cāti.
an5.250:4.5	Pañcamo paṇṇāsako samatto.
an5.251:0.1	Aṅguttara Nikāya 5.251
an5.251:0.2	26. Upasampadāvagga
an5.251:0.3	Upasampādetabbasutta
an5.251:1.1	“Pañcahi, bhikkhave, dhammehi samannāgatena bhikkhunā upasampādetabbaṁ.
an5.251:1.2	Katamehi pañcahi?
an5.251:1.3	Idha, bhikkhave, bhikkhu asekhena sīlakkhandhena samannāgato hoti;
an5.251:1.4	asekhena samādhikkhandhena samannāgato hoti;
an5.251:1.5	asekhena paññākkhandhena samannāgato hoti;
an5.251:1.6	asekhena vimuttikkhandhena samannāgato hoti;
an5.251:1.7	asekhena vimuttiñāṇadassanakkhandhena samannāgato hoti.
an5.251:1.8	Imehi kho, bhikkhave, pañcahi dhammehi samannāgatena bhikkhunā upasampādetabban”ti.
an5.251:1.9	Paṭhamaṁ.
an5.252:0.1	Aṅguttara Nikāya 5.252
an5.252:0.2	26. Upasampadāvagga
an5.252:0.3	Nissayasutta
an5.252:1.1	“Pañcahi, bhikkhave, dhammehi samannāgatena bhikkhunā nissayo dātabbo.
an5.252:1.2	Katamehi pañcahi?
an5.252:1.3	Idha, bhikkhave, bhikkhu asekhena sīlakkhandhena samannāgato hoti …pe… asekhena vimuttiñāṇadassanakkhandhena samannāgato hoti.
an5.252:1.4	Imehi …pe… nissayo dātabbo”ti.
an5.252:1.5	Dutiyaṁ.
an5.253:0.1	Aṅguttara Nikāya 5.253
an5.253:0.2	26. Upasampadāvagga
an5.253:0.3	Sāmaṇerasutta
an5.253:1.1	“Pañcahi, bhikkhave, dhammehi samannāgatena bhikkhunā sāmaṇero upaṭṭhāpetabbo.
an5.253:1.2	Katamehi pañcahi?
an5.253:1.3	Idha, bhikkhave, bhikkhu asekhena sīlakkhandhena samannāgato hoti; asekhena samādhikkhandhena … asekhena paññākkhandhena … asekhena vimuttikkhandhena … asekhena vimuttiñāṇadassanakkhandhena samannāgato hoti.
an5.253:1.4	Imehi kho, bhikkhave, pañcahi dhammehi samannāgatena bhikkhunā sāmaṇero upaṭṭhāpetabbo”ti.
an5.253:1.5	Tatiyaṁ.
an5.254:0.1	Aṅguttara Nikāya 5.254
an5.254:0.2	26. Upasampadāvagga
an5.254:0.3	Pañcamacchariyasutta
an5.254:1.1	“Pañcimāni, bhikkhave, macchariyāni.
an5.254:1.2	Katamāni pañca?
an5.254:1.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ—
an5.254:1.4	imāni kho, bhikkhave, pañca macchariyāni.
an5.254:1.5	Imesaṁ kho, bhikkhave, pañcannaṁ macchariyānaṁ etaṁ paṭikuṭṭhaṁ, yadidaṁ dhammamacchariyan”ti.
an5.254:1.6	Catutthaṁ.
an5.255:0.1	Aṅguttara Nikāya 5.255
an5.255:0.2	26. Upasampadāvagga
an5.255:0.3	Macchariyappahānasutta
an5.255:1.1	“Pañcannaṁ, bhikkhave, macchariyānaṁ pahānāya samucchedāya brahmacariyaṁ vussati.
an5.255:1.2	Katamesaṁ pañcannaṁ?
an5.255:1.3	Āvāsamacchariyassa pahānāya samucchedāya brahmacariyaṁ vussati;
an5.255:1.4	kulamacchariyassa … lābhamacchariyassa … vaṇṇamacchariyassa … dhammamacchariyassa pahānāya samucchedāya brahmacariyaṁ vussati.
an5.255:1.5	Imesaṁ kho, bhikkhave, pañcannaṁ macchariyānaṁ pahānāya samucchedāya brahmacariyaṁ vussatī”ti.
an5.255:1.6	Pañcamaṁ.
an5.256:0.1	Aṅguttara Nikāya 5.256
an5.256:0.2	26. Upasampadāvagga
an5.256:0.3	Paṭhamajhānasutta
an5.256:1.1	“Pañcime, bhikkhave, dhamme appahāya abhabbo paṭhamaṁ jhānaṁ upasampajja viharituṁ.
an5.256:1.2	Katame pañca?
an5.256:1.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ.
an5.256:1.4	Ime kho, bhikkhave, pañca dhamme appahāya abhabbo paṭhamaṁ jhānaṁ upasampajja viharituṁ.
an5.256:2.1	Pañcime, bhikkhave, dhamme pahāya bhabbo paṭhamaṁ jhānaṁ upasampajja viharituṁ.
an5.256:2.2	Katame pañca?
an5.256:2.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ.
an5.256:2.4	Ime kho, bhikkhave, pañca dhamme pahāya bhabbo paṭhamaṁ jhānaṁ upasampajja viharitun”ti.
an5.256:2.5	Chaṭṭhaṁ.
an5.257-263:0.1	Aṅguttara Nikāya 5.257–263
an5.257-263:0.2	26. Upasampadāvagga
an5.257-263:0.3	Dutiyajhānasuttādisattaka
an5.257-263:1.1	“Pañcime, bhikkhave, dhamme appahāya abhabbo dutiyaṁ jhānaṁ …pe… abhabbo tatiyaṁ jhānaṁ … abhabbo catutthaṁ jhānaṁ … abhabbo sotāpattiphalaṁ … abhabbo sakadāgāmiphalaṁ … abhabbo anāgāmiphalaṁ … abhabbo arahattaṁ sacchikātuṁ.
an5.257-263:1.2	Katame pañca?
an5.257-263:1.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ.
an5.257-263:1.4	Ime kho, bhikkhave, pañca dhamme appahāya abhabbo arahattaṁ sacchikātuṁ.
an5.257-263:2.1	Pañcime, bhikkhave, dhamme pahāya bhabbo dutiyaṁ jhānaṁ …pe… bhabbo tatiyaṁ jhānaṁ … bhabbo catutthaṁ jhānaṁ … bhabbo sotāpattiphalaṁ … bhabbo sakadāgāmiphalaṁ … bhabbo anāgāmiphalaṁ … bhabbo arahattaṁ sacchikātuṁ.
an5.257-263:2.2	Katame pañca?
an5.257-263:2.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ.
an5.257-263:2.4	Ime kho, bhikkhave, pañca dhamme pahāya bhabbo arahattaṁ sacchikātun”ti.
an5.257-263:2.5	Terasamaṁ.
an5.264:0.1	Aṅguttara Nikāya 5.264
an5.264:0.2	26. Upasampadāvagga
an5.264:0.3	Aparapaṭhamajhānasutta
an5.264:1.1	“Pañcime, bhikkhave, dhamme appahāya abhabbo paṭhamaṁ jhānaṁ upasampajja viharituṁ.
an5.264:1.2	Katame pañca?
an5.264:1.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, akataññutaṁ akataveditaṁ.
an5.264:1.4	Ime kho, bhikkhave, pañca dhamme appahāya abhabbo paṭhamaṁ jhānaṁ upasampajja viharituṁ.
an5.264:2.1	Pañcime, bhikkhave, dhamme pahāya bhabbo paṭhamaṁ jhānaṁ upasampajja viharituṁ.
an5.264:2.2	Katame pañca?
an5.264:2.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, akataññutaṁ akataveditaṁ.
an5.264:2.4	Ime kho, bhikkhave, pañca dhamme pahāya bhabbo paṭhamaṁ jhānaṁ upasampajja viharitun”ti.
an5.264:2.5	Cuddasamaṁ.
an5.265-271:0.1	Aṅguttara Nikāya 5.265–271
an5.265-271:0.2	26. Upasampadāvagga
an5.265-271:0.3	Aparadutiyajhānasuttādi
an5.265-271:1.1	“Pañcime, bhikkhave, dhamme appahāya abhabbo dutiyaṁ jhānaṁ … tatiyaṁ jhānaṁ … catutthaṁ jhānaṁ … sotāpattiphalaṁ … sakadāgāmiphalaṁ … anāgāmiphalaṁ … arahattaṁ sacchikātuṁ.
an5.265-271:1.2	Katame pañca?
an5.265-271:1.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, akataññutaṁ akataveditaṁ.
an5.265-271:1.4	Ime kho, bhikkhave, pañca dhamme appahāya abhabbo arahattaṁ sacchikātuṁ.
an5.265-271:2.1	Pañcime, bhikkhave, dhamme pahāya bhabbo dutiyaṁ jhānaṁ … tatiyaṁ jhānaṁ … catutthaṁ jhānaṁ … sotāpattiphalaṁ … sakadāgāmiphalaṁ … anāgāmiphalaṁ … arahattaṁ sacchikātuṁ.
an5.265-271:2.2	Katame pañca?
an5.265-271:2.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, akataññutaṁ akataveditaṁ.
an5.265-271:2.4	Ime kho, bhikkhave, pañca dhamme pahāya bhabbo arahattaṁ sacchikātun”ti.
an5.265-271:2.5	Ekavīsatimaṁ.
an5.265-271:2.6	Upasampadāvaggo chaṭṭho.
an5.272:0.1	Aṅguttara Nikāya 5.272
an5.272:0.2	27. Sammutipeyyāla
an5.272:0.3	Bhattuddesakasutta
an5.272:1.1	“Pañcahi, bhikkhave, dhammehi samannāgato bhattuddesako na sammannitabbo.
an5.272:1.2	Katamehi pañcahi?
an5.272:1.3	Chandāgatiṁ gacchati, dosāgatiṁ gacchati, mohāgatiṁ gacchati, bhayāgatiṁ gacchati, uddiṭṭhānuddiṭṭhaṁ na jānāti.
an5.272:1.4	Imehi kho, bhikkhave, pañcahi dhammehi samannāgato bhattuddesako na sammannitabbo.
an5.272:2.1	Pañcahi, bhikkhave, dhammehi samannāgato bhattuddesako sammannitabbo.
an5.272:2.2	Katamehi pañcahi?
an5.272:2.3	Na chandāgatiṁ gacchati, na dosāgatiṁ gacchati, na mohāgatiṁ gacchati, na bhayāgatiṁ gacchati, uddiṭṭhānuddiṭṭhaṁ jānāti.
an5.272:2.4	Imehi kho, bhikkhave, pañcahi dhammehi samannāgato bhattuddesako sammannitabboti.
an5.272:3.1	Pañcahi, bhikkhave, dhammehi samannāgato bhattuddesako sammato na pesetabbo …pe… sammato pesetabbo … bālo veditabbo … paṇḍito veditabbo … khataṁ upahataṁ attānaṁ pariharati … akkhataṁ anupahataṁ attānaṁ pariharati … yathābhataṁ nikkhitto evaṁ niraye … yathābhataṁ nikkhitto evaṁ sagge.
an5.272:3.2	Katamehi pañcahi?
an5.272:3.3	Na chandāgatiṁ gacchati, na dosāgatiṁ gacchati, na mohāgatiṁ gacchati, na bhayāgatiṁ gacchati, uddiṭṭhānuddiṭṭhaṁ jānāti.
an5.272:3.4	Imehi kho, bhikkhave, pañcahi dhammehi samannāgato bhattuddesako yathābhataṁ nikkhitto evaṁ sagge”ti.
an5.272:3.5	Paṭhamaṁ.
an5.273-285:0.1	Aṅguttara Nikāya 5.273–285
an5.273-285:0.2	27. Sammutipeyyāla
an5.273-285:0.3	Senāsanapaññāpakasuttādi
an5.273-285:1.1	“Pañcahi, bhikkhave, dhammehi samannāgato senāsanapaññāpako na sammannitabbo …pe… paññattāpaññattaṁ na jānāti …pe… senāsanapaññāpako sammannitabbo …pe… paññattāpaññattaṁ jānāti …pe….
an5.273-285:2.1	Senāsanagāhāpako na sammannitabbo …pe… gahitāgahitaṁ na jānāti …pe… senāsanagāhāpako sammannitabbo …pe… gahitāgahitaṁ jānāti …pe….
an5.273-285:3.1	Bhaṇḍāgāriko na sammannitabbo …pe… guttāguttaṁ na jānāti … bhaṇḍāgāriko sammannitabbo …pe… guttāguttaṁ jānāti ….
an5.273-285:4.1	Cīvarapaṭiggāhako na sammannitabbo …pe… gahitāgahitaṁ na jānāti … cīvarapaṭiggāhako sammannitabbo …pe… gahitāgahitaṁ jānāti ….
an5.273-285:5.1	Cīvarabhājako na sammannitabbo …pe… bhājitābhājitaṁ na jānāti … cīvarabhājako sammannitabbo …pe… bhājitābhājitaṁ jānāti ….
an5.273-285:6.1	Yāgubhājako na sammannitabbo …pe… yāgubhājako sammannitabbo …pe….
an5.273-285:7.1	Phalabhājako na sammannitabbo …pe… phalabhājako sammannitabbo …pe….
an5.273-285:8.1	Khajjakabhājako na sammannitabbo …pe… bhājitābhājitaṁ na jānāti … khajjakabhājako sammannitabbo …pe… bhājitābhājitaṁ jānāti ….
an5.273-285:9.1	Appamattakavissajjako na sammannitabbo …pe… vissajjitāvissajjitaṁ na jānāti … appamattakavissajjako sammannitabbo …pe… vissajjitāvissajjitaṁ jānāti ….
an5.273-285:10.1	Sāṭiyaggāhāpako na sammannitabbo …pe… gahitāgahitaṁ na jānāti … sāṭiyaggāhāpako sammannitabbo …pe… gahitāgahitaṁ jānāti ….
an5.273-285:11.1	Pattaggāhāpako na sammannitabbo …pe… gahitāgahitaṁ na jānāti … pattaggāhāpako sammannitabbo …pe… gahitāgahitaṁ jānāti ….
an5.273-285:12.1	Ārāmikapesako na sammannitabbo …pe… ārāmikapesako sammannitabbo …pe….
an5.273-285:13.1	Sāmaṇerapesako na sammannitabbo …pe… sāmaṇerapesako sammannitabbo …pe….
an5.273-285:13.2	Sammato na pesetabbo …pe… sammato pesetabbo …pe….
an5.273-285:14.1	Sāmaṇerapesako bālo veditabbo …pe… paṇḍito veditabbo … khataṁ upahataṁ attānaṁ pariharati … akkhataṁ anupahataṁ attānaṁ pariharati … yathābhataṁ nikkhitto evaṁ niraye … yathābhataṁ nikkhitto evaṁ sagge.
an5.273-285:14.2	Katamehi pañcahi?
an5.273-285:14.3	Na chandāgatiṁ gacchati, na dosāgatiṁ gacchati, na mohāgatiṁ gacchati, na bhayāgatiṁ gacchati, pesitāpesitaṁ jānāti.
an5.273-285:14.4	Imehi kho, bhikkhave, pañcahi dhammehi samannāgato sāmaṇerapesako yathābhataṁ nikkhitto evaṁ sagge”ti.
an5.273-285:14.5	Cuddasamaṁ.
an5.273-285:14.6	Sammutipeyyālaṁ niṭṭhitaṁ.
an5.286:0.1	Aṅguttara Nikāya 5.286
an5.286:0.2	28. Sikkhāpadapeyyāla
an5.286:0.3	Bhikkhusutta
an5.286:1.1	“Pañcahi, bhikkhave, dhammehi samannāgato bhikkhu yathābhataṁ nikkhitto evaṁ niraye.
an5.286:1.2	Katamehi pañcahi?
an5.286:1.3	Pāṇātipātī hoti, adinnādāyī hoti, abrahmacārī hoti, musāvādī hoti, surāmerayamajjapamādaṭṭhāyī hoti.
an5.286:1.4	Imehi kho, bhikkhave, pañcahi dhammehi samannāgato bhikkhu yathābhataṁ nikkhitto evaṁ niraye.
an5.286:2.1	Pañcahi, bhikkhave, dhammehi samannāgato bhikkhu yathābhataṁ nikkhitto evaṁ sagge.
an5.286:2.2	Katamehi pañcahi?
an5.286:2.3	Pāṇātipātā paṭivirato hoti, adinnādānā paṭivirato hoti, abrahmacariyā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti.
an5.286:2.4	Imehi kho, bhikkhave, pañcahi dhammehi samannāgato bhikkhu yathābhataṁ nikkhitto evaṁ sagge”ti.
an5.286:2.5	Paṭhamaṁ.
an5.287-292:0.1	Aṅguttara Nikāya 5.287–292
an5.287-292:0.2	28. Sikkhāpadapeyyāla
an5.287-292:0.3	Bhikkhunīsuttādi
an5.287-292:1.1	“Pañcahi, bhikkhave, dhammehi samannāgatā bhikkhunī …pe… sikkhamānā … sāmaṇero … sāmaṇerī … upāsako … upāsikā yathābhataṁ nikkhittā evaṁ niraye.
an5.287-292:1.2	Katamehi pañcahi?
an5.287-292:1.3	Pāṇātipātinī hoti, adinnādāyinī hoti, kāmesumicchācārinī hoti, musāvādinī hoti, surāmerayamajjapamādaṭṭhāyinī hoti.
an5.287-292:1.4	Imehi kho, bhikkhave, pañcahi dhammehi samannāgatā upāsikā yathābhataṁ nikkhittā evaṁ niraye.
an5.287-292:2.1	Pañcahi, bhikkhave, dhammehi samannāgatā upāsikā yathābhataṁ nikkhittā evaṁ sagge.
an5.287-292:2.2	Katamehi pañcahi?
an5.287-292:2.3	Pāṇātipātā paṭiviratā hoti, adinnādānā paṭiviratā hoti, kāmesumicchācārā paṭiviratā hoti, musāvādā paṭiviratā hoti, surāmerayamajjapamādaṭṭhānā paṭiviratā hoti.
an5.287-292:2.4	Imehi kho, bhikkhave, pañcahi dhammehi samannāgatā upāsikā yathābhataṁ nikkhittā evaṁ sagge”ti.
an5.287-292:2.5	Sattamaṁ.
an5.293:0.1	Aṅguttara Nikāya 5.293
an5.293:0.2	28. Sikkhāpadapeyyāla
an5.293:0.3	Ājīvakasutta
an5.293:1.1	“Pañcahi, bhikkhave, dhammehi samannāgato ājīvako yathābhataṁ nikkhitto evaṁ niraye.
an5.293:1.2	Katamehi pañcahi?
an5.293:1.3	Pāṇātipātī hoti, adinnādāyī hoti, abrahmacārī hoti, musāvādī hoti, surāmerayamajjapamādaṭṭhāyī hoti.
an5.293:1.4	Imehi kho, bhikkhave, pañcahi dhammehi samannāgato ājīvako yathābhataṁ nikkhitto evaṁ niraye”ti.
an5.293:1.5	Aṭṭhamaṁ.
an5.294-302:0.1	Aṅguttara Nikāya 5.294–302
an5.294-302:0.2	28. Sikkhāpadapeyyāla
an5.294-302:0.3	Nigaṇṭhasuttādi
an5.294-302:1.1	“Pañcahi, bhikkhave, dhammehi samannāgato nigaṇṭho … muṇḍasāvako … jaṭilako … paribbājako … māgaṇḍiko … tedaṇḍiko … āruddhako … gotamako … devadhammiko yathābhataṁ nikkhitto evaṁ niraye.
an5.294-302:1.2	Katamehi pañcahi?
an5.294-302:1.3	Pāṇātipātī hoti, adinnādāyī hoti …pe… surāmerayamajjapamādaṭṭhāyī hoti.
an5.294-302:1.4	Imehi kho, bhikkhave, pañcahi dhammehi samannāgato devadhammiko yathābhataṁ nikkhitto evaṁ niraye”ti.
an5.294-302:1.5	Sattarasamaṁ.
an5.294-302:1.6	Sikkhāpadapeyyālaṁ niṭṭhitaṁ.
an5.303:0.1	Aṅguttara Nikāya 5
an5.303:0.2	29. Rāgapeyyāla
an5.303:0.3	~
an5.303:1.1	“Rāgassa, bhikkhave, abhiññāya pañca dhammā bhāvetabbā.
an5.303:1.2	Katame pañca?
an5.303:1.3	Asubhasaññā, maraṇasaññā, ādīnavasaññā, āhāre paṭikūlasaññā, sabbaloke anabhiratasaññā—
an5.303:1.4	rāgassa, bhikkhave, abhiññāya ime pañca dhammā bhāvetabbā”ti.
an5.304:0.1	Aṅguttara Nikāya 5
an5.304:0.2	29. Rāgapeyyāla
an5.304:0.3	~
an5.304:1.1	“Rāgassa, bhikkhave, abhiññāya pañca dhammā bhāvetabbā.
an5.304:1.2	Katame pañca?
an5.304:1.3	Aniccasaññā, anattasaññā, maraṇasaññā, āhāre paṭikūlasaññā, sabbaloke anabhiratasaññā—
an5.304:1.4	rāgassa, bhikkhave, abhiññāya ime pañca dhammā bhāvetabbā”ti.
an5.305:0.1	Aṅguttara Nikāya 5
an5.305:0.2	29. Rāgapeyyāla
an5.305:0.3	~
an5.305:1.1	“Rāgassa, bhikkhave, abhiññāya pañca dhammā bhāvetabbā.
an5.305:1.2	Katame pañca?
an5.305:1.3	Aniccasaññā, anicce dukkhasaññā, dukkhe anattasaññā, pahānasaññā, virāgasaññā—
an5.305:1.4	rāgassa, bhikkhave, abhiññāya ime pañca dhammā bhāvetabbā”ti.
an5.306:0.1	Aṅguttara Nikāya 5
an5.306:0.2	29. Rāgapeyyāla
an5.306:0.3	~
an5.306:1.1	“Rāgassa, bhikkhave, abhiññāya pañca dhammā bhāvetabbā.
an5.306:1.2	Katame pañca?
an5.306:1.3	Saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ—
an5.306:1.4	rāgassa, bhikkhave, abhiññāya ime pañca dhammā bhāvetabbā”ti.
an5.307:0.1	Aṅguttara Nikāya 5
an5.307:0.2	29. Rāgapeyyāla
an5.307:0.3	~
an5.307:1.1	“Rāgassa, bhikkhave, abhiññāya pañca dhammā bhāvetabbā.
an5.307:1.2	Katame pañca?
an5.307:1.3	Saddhābalaṁ, vīriyabalaṁ, satibalaṁ, samādhibalaṁ, paññābalaṁ—
an5.307:1.4	rāgassa, bhikkhave, abhiññāya ime pañca dhammā bhāvetabbā”ti.
an5.308-1152:0.1	Aṅguttara Nikāya 5
an5.308-1152:0.2	29. Rāgapeyyāla
an5.308-1152:0.3	~
an5.308-1152:1.1	“Rāgassa, bhikkhave, pariññāya … parikkhayāya … pahānāya … khayāya … vayāya … virāgāya … nirodhāya … cāgāya … paṭinissaggāya pañca dhammā bhāvetabbā.
an5.308-1152:1.2	Dosassa … mohassa … kodhassa … upanāhassa … makkhassa … paḷāsassa … issāya … macchariyassa … māyāya … sāṭheyyassa … thambhassa … sārambhassa … mānassa … atimānassa … madassa … pamādassa abhiññāya … pariññāya … parikkhayāya … pahānāya … khayāya … vayāya … virāgāya … nirodhāya … cāgāya … paṭinissaggāya pañca dhammā bhāvetabbā.
an5.308-1152:2.1	Katame pañca?
an5.308-1152:2.2	Saddhābalaṁ, vīriyabalaṁ, satibalaṁ, samādhibalaṁ, paññābalaṁ—
an5.308-1152:2.3	pamādassa, bhikkhave, paṭinissaggāya ime pañca dhammā bhāvetabbā”ti.
an5.308-1152:2.4	Rāgapeyyālaṁ niṭṭhitaṁ.
an5.308-1152:3.0	Tassuddānaṁ
an5.308-1152:3.1	Abhiññāya pariññāya parikkhayāya,
an5.308-1152:3.2	Pahānāya khayāya vayena ca;
an5.308-1152:3.3	Virāganirodhā cāgañca,
an5.308-1152:3.4	Paṭinissaggo ime dasāti.
an5.308-1152:3.5	Pañcakanipāto niṭṭhito.
an5.308-1152:4.0	Tatridaṁ vagguddānaṁ
an5.308-1152:4.1	Sekhabalaṁ balañceva,
an5.308-1152:4.2	Pañcaṅgikañca sumanaṁ;
an5.308-1152:4.3	Muṇḍanīvaraṇañca saññañca,
an5.308-1152:4.4	Yodhājīvañca aṭṭhamaṁ;
an5.308-1152:4.5	Theraṁ kakudhaphāsuñca,
an5.308-1152:4.6	Andhakavindadvādasaṁ;
an5.308-1152:4.7	Gilānarājatikaṇḍaṁ,
an5.308-1152:4.8	Saddhammāghātupāsakaṁ;
an5.308-1152:4.9	Araññabrāhmaṇañceva,
an5.308-1152:4.10	Kimilakkosakaṁ tathā;
an5.308-1152:4.11	Dīghācārāvāsikañca,
an5.308-1152:4.12	Duccaritūpasampadanti.
an5.308-1152:4.13	Pañcakanipātapāḷi niṭṭhitā.
an6.1:0.1	Aṅguttara Nikāya 6.1
an6.1:0.2	1. Āhuneyyavagga
an6.1:0.3	Paṭhamaāhuneyyasutta
an6.1:1.1	Evaṁ me sutaṁ—
an6.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an6.1:1.3	Tatra kho bhagavā bhikkhū āmantesi:
an6.1:1.4	“bhikkhavo”ti.
an6.1:1.5	“Bhadante”ti te bhikkhū bhagavato paccassosuṁ.
an6.1:1.6	Bhagavā etadavoca:
an6.1:2.1	“Chahi, bhikkhave, dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an6.1:2.2	Katamehi chahi?
an6.1:2.3	Idha, bhikkhave, bhikkhu cakkhunā rūpaṁ disvā neva sumano hoti na dummano, upekkhako viharati sato sampajāno.
an6.1:2.4	Sotena saddaṁ sutvā …
an6.1:2.5	ghānena gandhaṁ ghāyitvā …
an6.1:2.6	jivhāya rasaṁ sāyitvā …
an6.1:2.7	kāyena phoṭṭhabbaṁ phusitvā …
an6.1:2.8	manasā dhammaṁ viññāya neva sumano hoti na dummano, upekkhako viharati sato sampajāno.
an6.1:2.9	Imehi kho, bhikkhave, chahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā”ti.
an6.1:3.1	Idamavoca bhagavā.
an6.1:3.2	Attamanā te bhikkhū bhagavato bhāsitaṁ abhinandunti.
an6.1:3.3	Paṭhamaṁ.
an6.2:0.1	Aṅguttara Nikāya 6.2
an6.2:0.2	1. Āhuneyyavagga
an6.2:0.3	Dutiyaāhuneyyasutta
an6.2:1.1	“Chahi, bhikkhave, dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an6.2:1.2	Katamehi chahi?
an6.2:1.3	Idha, bhikkhave, bhikkhu anekavihitaṁ iddhividhaṁ paccanubhoti—ekopi hutvā bahudhā hoti, bahudhāpi hutvā eko hoti; āvibhāvaṁ tirobhāvaṁ; tirokuṭṭaṁ tiropākāraṁ tiropabbataṁ asajjamāno gacchati, seyyathāpi ākāse; pathaviyāpi ummujjanimujjaṁ karoti, seyyathāpi udake; udakepi abhijjamāne gacchati, seyyathāpi pathaviyaṁ; ākāsepi pallaṅkena kamati, seyyathāpi pakkhī sakuṇo; imepi candimasūriye evaṁmahiddhike evaṁmahānubhāve pāṇinā parimasati parimajjati; yāva brahmalokāpi kāyena vasaṁ vatteti.
an6.2:2.1	Dibbāya, sotadhātuyā visuddhāya atikkantamānusikāya ubho sadde suṇāti—dibbe ca mānuse ca, ye dūre santike ca.
an6.2:3.1	Parasattānaṁ parapuggalānaṁ cetasā ceto paricca pajānāti.
an6.2:3.2	Sarāgaṁ vā cittaṁ sarāgaṁ cittanti pajānāti,
an6.2:3.3	vītarāgaṁ vā cittaṁ …
an6.2:3.4	sadosaṁ vā cittaṁ …
an6.2:3.5	vītadosaṁ vā cittaṁ …
an6.2:3.6	samohaṁ vā cittaṁ …
an6.2:3.7	vītamohaṁ vā cittaṁ …
an6.2:3.8	saṅkhittaṁ vā cittaṁ …
an6.2:3.9	vikkhittaṁ vā cittaṁ …
an6.2:3.10	mahaggataṁ vā cittaṁ …
an6.2:3.11	amahaggataṁ vā cittaṁ …
an6.2:3.12	sauttaraṁ vā cittaṁ …
an6.2:3.13	anuttaraṁ vā cittaṁ …
an6.2:3.14	samāhitaṁ vā cittaṁ …
an6.2:3.15	asamāhitaṁ vā cittaṁ …
an6.2:3.16	vimuttaṁ vā cittaṁ …
an6.2:3.17	avimuttaṁ vā cittaṁ avimuttaṁ cittanti pajānāti.
an6.2:4.1	Anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe…. Iti sākāraṁ sauddesaṁ anekavihitaṁ pubbenivāsaṁ anussarati.
an6.2:5.1	Dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti: ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā, te kāyassa bhedā paraṁ maraṇā sugatiṁ saggaṁ lokaṁ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti.
an6.2:6.1	Āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an6.2:7.1	Imehi kho, bhikkhave, chahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an6.2:7.2	Dutiyaṁ.
an6.3:0.1	Aṅguttara Nikāya 6.3
an6.3:0.2	1. Āhuneyyavagga
an6.3:0.3	Indriyasutta
an6.3:1.1	“Chahi, bhikkhave, dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an6.3:1.2	Katamehi chahi?
an6.3:1.3	Saddhindriyena, vīriyindriyena, satindriyena, samādhindriyena, paññindriyena, āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an6.3:1.4	Imehi kho, bhikkhave, chahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā”ti.
an6.3:1.5	Tatiyaṁ.
an6.4:0.1	Aṅguttara Nikāya 6.4
an6.4:0.2	1. Āhuneyyavagga
an6.4:0.3	Balasutta
an6.4:1.1	“Chahi, bhikkhave, dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an6.4:1.2	Katamehi chahi?
an6.4:1.3	Saddhābalena, vīriyabalena, satibalena, samādhibalena, paññābalena, āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an6.4:1.4	Imehi kho, bhikkhave, chahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an6.4:1.5	Catutthaṁ.
an6.5:0.1	Aṅguttara Nikāya 6.5
an6.5:0.2	1. Āhuneyyavagga
an6.5:0.3	Paṭhamaājānīyasutta
an6.5:1.1	“Chahi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅgantveva saṅkhaṁ gacchati.
an6.5:2.1	Katamehi chahi?
an6.5:2.2	Idha, bhikkhave, rañño bhadro assājānīyo khamo hoti rūpānaṁ, khamo saddānaṁ, khamo gandhānaṁ, khamo rasānaṁ, khamo phoṭṭhabbānaṁ, vaṇṇasampanno ca hoti.
an6.5:2.3	Imehi kho, bhikkhave, chahi aṅgehi samannāgato rañño bhadro assājānīyo rājāraho hoti rājabhoggo, rañño aṅgantveva saṅkhaṁ gacchati.
an6.5:3.1	Evamevaṁ kho, bhikkhave, chahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an6.5:3.2	Katamehi chahi?
an6.5:3.3	Idha, bhikkhave, bhikkhu khamo hoti rūpānaṁ, khamo saddānaṁ, khamo gandhānaṁ, khamo rasānaṁ, khamo phoṭṭhabbānaṁ, khamo dhammānaṁ.
an6.5:3.4	Imehi kho, bhikkhave, chahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an6.5:3.5	Pañcamaṁ.
an6.6:0.1	Aṅguttara Nikāya 6.6
an6.6:0.2	1. Āhuneyyavagga
an6.6:0.3	Dutiyaājānīyasutta
an6.6:1.1	“Chahi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅgantveva saṅkhaṁ gacchati.
an6.6:1.2	Katamehi chahi?
an6.6:1.3	Idha, bhikkhave, rañño bhadro assājānīyo khamo hoti rūpānaṁ, khamo saddānaṁ, khamo gandhānaṁ, khamo rasānaṁ, khamo phoṭṭhabbānaṁ, balasampanno ca hoti.
an6.6:1.4	Imehi kho, bhikkhave, chahi aṅgehi samannāgato rañño bhadro assājānīyo rājāraho hoti rājabhoggo, rañño aṅgantveva saṅkhaṁ gacchati.
an6.6:2.1	Evamevaṁ kho, bhikkhave, chahi dhammehi samannāgato bhikkhu āhuneyyo …pe… anuttaraṁ puññakkhettaṁ lokassa.
an6.6:2.2	Katamehi chahi?
an6.6:2.3	Idha, bhikkhave, bhikkhu khamo hoti rūpānaṁ …pe… khamo dhammānaṁ.
an6.6:2.4	Imehi kho, bhikkhave, chahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an6.6:2.5	Chaṭṭhaṁ.
an6.7:0.1	Aṅguttara Nikāya 6.7
an6.7:0.2	1. Āhuneyyavagga
an6.7:0.3	Tatiyaājānīyasutta
an6.7:1.1	“Chahi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅgantveva saṅkhaṁ gacchati.
an6.7:1.2	Katamehi chahi?
an6.7:1.3	Idha, bhikkhave, rañño bhadro assājānīyo khamo hoti rūpānaṁ, khamo saddānaṁ, khamo gandhānaṁ, khamo rasānaṁ, khamo phoṭṭhabbānaṁ, javasampanno ca hoti.
an6.7:1.4	Imehi kho, bhikkhave, chahi aṅgehi samannāgato rañño bhadro assājānīyo rājāraho hoti rājabhoggo, rañño aṅgantveva saṅkhaṁ gacchati.
an6.7:2.1	Evamevaṁ kho, bhikkhave, chahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an6.7:2.2	Katamehi chahi?
an6.7:2.3	Idha, bhikkhave, bhikkhu khamo hoti rūpānaṁ …pe… khamo dhammānaṁ.
an6.7:2.4	Imehi kho, bhikkhave, chahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an6.7:2.5	Sattamaṁ.
an6.8:0.1	Aṅguttara Nikāya 6.8
an6.8:0.2	1. Āhuneyyavagga
an6.8:0.3	Anuttariyasutta
an6.8:1.1	“Chayimāni, bhikkhave, anuttariyāni.
an6.8:1.2	Katamāni cha?
an6.8:1.3	Dassanānuttariyaṁ, savanānuttariyaṁ, lābhānuttariyaṁ, sikkhānuttariyaṁ, pāricariyānuttariyaṁ, anussatānuttariyaṁ.
an6.8:1.4	Imāni kho, bhikkhave, cha anuttariyānī”ti.
an6.8:1.5	Aṭṭhamaṁ.
an6.9:0.1	Aṅguttara Nikāya 6.9
an6.9:0.2	1. Āhuneyyavagga
an6.9:0.3	Anussatiṭṭhānasutta
an6.9:1.1	“Chayimāni, bhikkhave, anussatiṭṭhānāni.
an6.9:1.2	Katamāni cha?
an6.9:1.3	Buddhānussati, dhammānussati, saṅghānussati, sīlānussati, cāgānussati, devatānussati.
an6.9:1.4	Imāni kho, bhikkhave, cha anussatiṭṭhānānī”ti.
an6.9:1.5	Navamaṁ.
an6.10:0.1	Aṅguttara Nikāya 6.10
an6.10:0.2	1. Āhuneyyavagga
an6.10:0.3	Mahānāmasutta
an6.10:1.1	Ekaṁ samayaṁ bhagavā sakkesu viharati kapilavatthusmiṁ nigrodhārāme.
an6.10:1.2	Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno, kho mahānāmo sakko bhagavantaṁ etadavoca:
an6.10:1.3	“yo so, bhante, ariyasāvako āgataphalo viññātasāsano, so katamena vihārena bahulaṁ viharatī”ti?
an6.10:2.1	“Yo so, mahānāma, ariyasāvako āgataphalo viññātasāsano, so iminā vihārena bahulaṁ viharati.
an6.10:2.2	Idha, mahānāma, ariyasāvako tathāgataṁ anussarati:
an6.10:2.3	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an6.10:2.4	Yasmiṁ, mahānāma, samaye ariyasāvako tathāgataṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.10:2.5	ujugatamevassa tasmiṁ samaye cittaṁ hoti tathāgataṁ ārabbha.
an6.10:2.6	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an6.10:2.7	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an6.10:2.8	Ayaṁ vuccati, mahānāma:
an6.10:2.9	‘ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotaṁ samāpanno buddhānussatiṁ bhāveti’.
an6.10:3.1	Puna caparaṁ, mahānāma, ariyasāvako dhammaṁ anussarati:
an6.10:3.2	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.
an6.10:3.3	Yasmiṁ, mahānāma, samaye ariyasāvako dhammaṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.10:3.4	ujugatamevassa tasmiṁ samaye cittaṁ hoti dhammaṁ ārabbha.
an6.10:3.5	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an6.10:3.6	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an6.10:3.7	Ayaṁ vuccati, mahānāma:
an6.10:3.8	‘ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotaṁ samāpanno dhammānussatiṁ bhāveti’.
an6.10:4.1	Puna caparaṁ, mahānāma, ariyasāvako saṅghaṁ anussarati:
an6.10:4.2	‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.
an6.10:4.3	Yasmiṁ, mahānāma, samaye ariyasāvako saṅghaṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.10:4.4	ujugatamevassa tasmiṁ samaye cittaṁ hoti saṅghaṁ ārabbha.
an6.10:4.5	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an6.10:4.6	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an6.10:4.7	Ayaṁ vuccati, mahānāma:
an6.10:4.8	‘ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotaṁ samāpanno saṅghānussatiṁ bhāveti’.
an6.10:5.1	Puna caparaṁ, mahānāma, ariyasāvako attano sīlāni anussarati akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni.
an6.10:5.2	Yasmiṁ, mahānāma, samaye ariyasāvako sīlaṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.10:5.3	ujugatamevassa tasmiṁ samaye cittaṁ hoti sīlaṁ ārabbha.
an6.10:5.4	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an6.10:5.5	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an6.10:5.6	Ayaṁ vuccati, mahānāma:
an6.10:5.7	‘ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotaṁ samāpanno sīlānussatiṁ bhāveti’.
an6.10:6.1	Puna caparaṁ, mahānāma, ariyasāvako attano cāgaṁ anussarati:
an6.10:6.2	‘lābhā vata me, suladdhaṁ vata me.
an6.10:6.3	Yohaṁ maccheramalapariyuṭṭhitāya pajāya vigatamalamaccherena cetasā agāraṁ ajjhāvasāmi muttacāgo payatapāṇi vosaggarato yācayogo dānasaṁvibhāgarato’ti.
an6.10:6.4	Yasmiṁ, mahānāma, samaye ariyasāvako cāgaṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.10:6.5	ujugatamevassa tasmiṁ samaye cittaṁ hoti cāgaṁ ārabbha.
an6.10:6.6	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an6.10:6.7	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an6.10:6.8	Ayaṁ vuccati, mahānāma:
an6.10:6.9	‘ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotaṁ samāpanno cāgānussatiṁ bhāveti’.
an6.10:7.1	Puna caparaṁ, mahānāma, ariyasāvako devatānussatiṁ bhāveti:
an6.10:7.2	‘santi devā cātumahārājikā, santi devā tāvatiṁsā, santi devā yāmā, santi devā tusitā, santi devā nimmānaratino, santi devā paranimmitavasavattino, santi devā brahmakāyikā, santi devā tatuttari.
an6.10:7.3	Yathārūpāya saddhāya samannāgatā tā devatā ito cutā tattha upapannā, mayhampi tathārūpā saddhā saṁvijjati.
an6.10:7.4	Yathārūpena sīlena samannāgatā tā devatā ito cutā tattha upapannā, mayhampi tathārūpaṁ sīlaṁ saṁvijjati.
an6.10:7.5	Yathārūpena sutena samannāgatā tā devatā ito cutā tattha upapannā, mayhampi tathārūpaṁ sutaṁ saṁvijjati.
an6.10:7.6	Yathārūpena cāgena samannāgatā tā devatā ito cutā tattha upapannā, mayhampi tathārūpo cāgo saṁvijjati.
an6.10:7.7	Yathārūpāya paññāya samannāgatā tā devatā ito cutā tattha upapannā, mayhampi tathārūpā paññā saṁvijjatī’ti.
an6.10:7.8	Yasmiṁ, mahānāma, samaye ariyasāvako attano ca tāsañca devatānaṁ saddhañca sīlañca sutañca cāgañca paññañca anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.10:7.9	ujugatamevassa tasmiṁ samaye cittaṁ hoti tā devatā ārabbha.
an6.10:7.10	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an6.10:7.11	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an6.10:7.12	Ayaṁ vuccati, mahānāma:
an6.10:7.13	‘ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotaṁ samāpanno devatānussatiṁ bhāveti’.
an6.10:8.1	Yo so, mahānāma, ariyasāvako āgataphalo viññātasāsano, so iminā vihārena bahulaṁ viharatī”ti.
an6.10:8.2	Dasamaṁ.
an6.10:8.3	Āhuneyyavaggo paṭhamo.
an6.10:9.0	Tassuddānaṁ
an6.10:9.1	Dve āhuneyyā indriya,
an6.10:9.2	balāni tayo ājānīyā;
an6.10:9.3	Anuttariya anussatī,
an6.10:9.4	mahānāmena te dasāti.
an6.11:0.1	Aṅguttara Nikāya 6.11
an6.11:0.2	2. Sāraṇīyavagga
an6.11:0.3	Paṭhamasāraṇīyasutta
an6.11:1.1	“Chayime, bhikkhave, dhammā sāraṇīyā.
an6.11:1.2	Katame cha?
an6.11:1.3	Idha, bhikkhave, bhikkhuno mettaṁ kāyakammaṁ paccupaṭṭhitaṁ hoti sabrahmacārīsu āvi ceva raho ca, ayampi dhammo sāraṇīyo.
an6.11:2.1	Puna caparaṁ, bhikkhave, bhikkhuno mettaṁ vacīkammaṁ paccupaṭṭhitaṁ hoti sabrahmacārīsu āvi ceva raho ca, ayampi dhammo sāraṇīyo.
an6.11:3.1	Puna caparaṁ, bhikkhave, bhikkhuno mettaṁ manokammaṁ paccupaṭṭhitaṁ hoti sabrahmacārīsu āvi ceva raho ca, ayampi dhammo sāraṇīyo.
an6.11:4.1	Puna caparaṁ, bhikkhave, bhikkhu ye te lābhā dhammikā dhammaladdhā antamaso pattapariyāpannamattampi tathārūpehi lābhehi appaṭivibhattabhogī hoti sīlavantehi sabrahmacārīhi sādhāraṇabhogī, ayampi dhammo sāraṇīyo.
an6.11:5.1	Puna caparaṁ, bhikkhave, bhikkhu yāni tāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni tathārūpehi sīlehi sīlasāmaññagato viharati sabrahmacārīhi āvi ceva raho ca, ayampi dhammo sāraṇīyo.
an6.11:6.1	Puna caparaṁ, bhikkhave, bhikkhu yāyaṁ diṭṭhi ariyā niyyānikā niyyāti takkarassa sammā dukkhakkhayāya tathārūpāya diṭṭhiyā diṭṭhisāmaññagato viharati sabrahmacārīhi āvi ceva raho ca, ayampi dhammo sāraṇīyo.
an6.11:7.1	Ime kho, bhikkhave, cha dhammā sāraṇīyā”ti.
an6.11:7.2	Paṭhamaṁ.
an6.12:0.1	Aṅguttara Nikāya 6.12
an6.12:0.2	2. Sāraṇīyavagga
an6.12:0.3	Dutiyasāraṇīyasutta
an6.12:1.1	“Chayime, bhikkhave, dhammā sāraṇīyā piyakaraṇā garukaraṇā saṅgahāya avivādāya sāmaggiyā ekībhāvāya saṁvattanti.
an6.12:1.2	Katame cha?
an6.12:1.3	Idha, bhikkhave, bhikkhuno mettaṁ kāyakammaṁ paccupaṭṭhitaṁ hoti sabrahmacārīsu āvi ceva raho ca,
an6.12:1.4	ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an6.12:2.1	Puna caparaṁ, bhikkhave, bhikkhuno mettaṁ vacīkammaṁ paccupaṭṭhitaṁ hoti …pe….
an6.12:3.1	Mettaṁ manokammaṁ paccupaṭṭhitaṁ hoti sabrahmacārīsu āvi ceva raho ca, ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an6.12:4.1	Puna caparaṁ, bhikkhave, bhikkhu ye te lābhā dhammikā dhammaladdhā antamaso pattapariyāpannamattampi tathārūpehi lābhehi appaṭivibhattabhogī hoti sīlavantehi sabrahmacārīhi sādhāraṇabhogī, ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an6.12:5.1	Puna caparaṁ, bhikkhave, bhikkhu yāni tāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni tathārūpehi sīlehi sīlasāmaññagato viharati sabrahmacārīhi āvi ceva raho ca, ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an6.12:6.1	Puna caparaṁ, bhikkhave, bhikkhu yāyaṁ diṭṭhi ariyā niyyānikā niyyāti takkarassa sammā dukkhakkhayāya tathārūpāya diṭṭhiyā diṭṭhisāmaññagato viharati sabrahmacārīhi āvi ceva raho ca,
an6.12:6.2	ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an6.12:7.1	Ime kho, bhikkhave, cha dhammā sāraṇīyā piyakaraṇā garukaraṇā saṅgahāya avivādāya sāmaggiyā ekībhāvāya saṁvattantī”ti.
an6.12:7.2	Dutiyaṁ.
an6.13:0.1	Aṅguttara Nikāya 6.13
an6.13:0.2	2. Sāraṇīyavagga
an6.13:0.3	Nissāraṇīyasutta
an6.13:1.1	“Chayimā, bhikkhave, nissāraṇīyā dhātuyo.
an6.13:1.2	Katamā cha?
an6.13:1.3	Idha, bhikkhave, bhikkhu evaṁ vadeyya:
an6.13:1.4	‘mettā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā;
an6.13:1.5	atha ca pana me byāpādo cittaṁ pariyādāya tiṭṭhatī’ti.
an6.13:1.6	So ‘mā hevan’tissa vacanīyo: ‘māyasmā evaṁ avaca; mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.
an6.13:1.7	Aṭṭhānametaṁ, āvuso, anavakāso yaṁ mettāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya;
an6.13:1.8	atha ca panassa byāpādo cittaṁ pariyādāya ṭhassati, netaṁ ṭhānaṁ vijjati.
an6.13:1.9	Nissaraṇañhetaṁ, āvuso, byāpādassa yadidaṁ mettācetovimuttī’ti.
an6.13:2.1	Idha pana, bhikkhave, bhikkhu evaṁ vadeyya:
an6.13:2.2	‘karuṇā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā;
an6.13:2.3	atha ca pana me vihesā cittaṁ pariyādāya tiṭṭhatī’ti.
an6.13:2.4	So ‘mā hevan’tissa vacanīyo: ‘māyasmā evaṁ avaca; mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.
an6.13:2.5	Aṭṭhānametaṁ, āvuso, anavakāso yaṁ karuṇāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya;
an6.13:2.6	atha ca panassa vihesā cittaṁ pariyādāya ṭhassati, netaṁ ṭhānaṁ vijjati.
an6.13:2.7	Nissaraṇañhetaṁ, āvuso, vihesāya yadidaṁ karuṇācetovimuttī’ti.
an6.13:3.1	Idha pana, bhikkhave, bhikkhu evaṁ vadeyya:
an6.13:3.2	‘muditā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā;
an6.13:3.3	atha ca pana me arati cittaṁ pariyādāya tiṭṭhatī’ti.
an6.13:3.4	So ‘mā hevan’tissa vacanīyo: ‘māyasmā evaṁ avaca; mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.
an6.13:3.5	Aṭṭhānametaṁ, āvuso, anavakāso yaṁ muditāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya;
an6.13:3.6	atha ca panassa arati cittaṁ pariyādāya ṭhassati, netaṁ ṭhānaṁ vijjati.
an6.13:3.7	Nissaraṇañhetaṁ, āvuso, aratiyā yadidaṁ muditācetovimuttī’ti.
an6.13:4.1	Idha pana, bhikkhave, bhikkhu evaṁ vadeyya:
an6.13:4.2	‘upekkhā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā;
an6.13:4.3	atha ca pana me rāgo cittaṁ pariyādāya tiṭṭhatī’ti.
an6.13:4.4	So ‘mā hevan’tissa vacanīyo: ‘māyasmā evaṁ avaca; mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.
an6.13:4.5	Aṭṭhānametaṁ, āvuso, anavakāso yaṁ upekkhāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya;
an6.13:4.6	atha ca panassa rāgo cittaṁ pariyādāya ṭhassati, netaṁ ṭhānaṁ vijjati.
an6.13:4.7	Nissaraṇañhetaṁ, āvuso, rāgassa yadidaṁ upekkhācetovimuttī’ti.
an6.13:5.1	Idha pana, bhikkhave, bhikkhu evaṁ vadeyya:
an6.13:5.2	‘animittā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā;
an6.13:5.3	atha ca pana me nimittānusāri viññāṇaṁ hotī’ti.
an6.13:5.4	So ‘mā hevan’tissa vacanīyo: ‘māyasmā evaṁ avaca; mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.
an6.13:5.5	Aṭṭhānametaṁ, āvuso, anavakāso yaṁ animittāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya;
an6.13:5.6	atha ca panassa nimittānusāri viññāṇaṁ bhavissati, netaṁ ṭhānaṁ vijjati.
an6.13:5.7	Nissaraṇañhetaṁ, āvuso, sabbanimittānaṁ yadidaṁ animittācetovimuttī’ti.
an6.13:6.1	Idha pana bhikkhave, bhikkhu evaṁ vadeyya:
an6.13:6.2	‘asmīti kho me vigataṁ, ayamahamasmīti ca na samanupassāmi;
an6.13:6.3	atha ca pana me vicikicchākathaṅkathāsallaṁ cittaṁ pariyādāya tiṭṭhatī’ti.
an6.13:6.4	So ‘mā hevan’tissa vacanīyo: ‘māyasmā evaṁ avaca; mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.
an6.13:6.5	Aṭṭhānametaṁ, āvuso, anavakāso yaṁ asmīti vigate ayamahamasmīti ca na samanupassato;
an6.13:6.6	atha ca panassa vicikicchākathaṅkathāsallaṁ cittaṁ pariyādāya ṭhassati, netaṁ ṭhānaṁ vijjati.
an6.13:6.7	Nissaraṇañhetaṁ, āvuso, vicikicchākathaṅkathāsallassa yadidaṁ asmīti mānasamugghāto’ti.
an6.13:7.1	Imā kho, bhikkhave, cha nissāraṇīyā dhātuyo”ti.
an6.13:7.2	Tatiyaṁ.
an6.14:0.1	Aṅguttara Nikāya 6.14
an6.14:0.2	2. Sāraṇīyavagga
an6.14:0.3	Bhaddakasutta
an6.14:1.1	Tatra kho āyasmā sāriputto bhikkhū āmantesi:
an6.14:1.2	“āvuso bhikkhave”ti.
an6.14:1.3	“Āvuso”ti kho te bhikkhū āyasmato sāriputtassa paccassosuṁ.
an6.14:1.4	Āyasmā sāriputto etadavoca:
an6.14:2.1	“Tathā tathā, āvuso, bhikkhu vihāraṁ kappeti yathā yathāssa vihāraṁ kappayato na bhaddakaṁ maraṇaṁ hoti, na bhaddikā kālakiriyā.
an6.14:2.2	Kathañcāvuso, bhikkhu tathā tathā vihāraṁ kappeti yathā yathāssa vihāraṁ kappayato na bhaddakaṁ maraṇaṁ hoti, na bhaddikā kālakiriyā?
an6.14:3.1	Idhāvuso, bhikkhu kammārāmo hoti kammarato kammārāmataṁ anuyutto, bhassārāmo hoti bhassarato bhassārāmataṁ anuyutto, niddārāmo hoti niddārato niddārāmataṁ anuyutto, saṅgaṇikārāmo hoti saṅgaṇikarato saṅgaṇikārāmataṁ anuyutto, saṁsaggārāmo hoti saṁsaggarato saṁsaggārāmataṁ anuyutto, papañcārāmo hoti papañcarato papañcārāmataṁ anuyutto.
an6.14:3.2	Evaṁ kho, āvuso, bhikkhu tathā tathā vihāraṁ kappeti yathā yathāssa vihāraṁ kappayato na bhaddakaṁ maraṇaṁ hoti, na bhaddikā kālakiriyā.
an6.14:3.3	Ayaṁ vuccatāvuso:
an6.14:3.4	‘bhikkhu sakkāyābhirato nappajahāsi sakkāyaṁ sammā dukkhassa antakiriyāya’.
an6.14:4.1	Tathā tathāvuso, bhikkhu vihāraṁ kappeti yathā yathāssa vihāraṁ kappayato bhaddakaṁ maraṇaṁ hoti, bhaddikā kālakiriyā.
an6.14:4.2	Kathañcāvuso, bhikkhu tathā tathā vihāraṁ kappeti yathā yathāssa vihāraṁ kappayato bhaddakaṁ maraṇaṁ hoti, bhaddikā kālakiriyā?
an6.14:5.1	Idhāvuso, bhikkhu na kammārāmo hoti na kammarato na kammārāmataṁ anuyutto, na bhassārāmo hoti na bhassarato na bhassārāmataṁ anuyutto, na niddārāmo hoti na niddārato na niddārāmataṁ anuyutto, na saṅgaṇikārāmo hoti na saṅgaṇikarato na saṅgaṇikārāmataṁ anuyutto, na saṁsaggārāmo hoti na saṁsaggarato na saṁsaggārāmataṁ anuyutto, na papañcārāmo hoti na papañcarato na papañcārāmataṁ anuyutto.
an6.14:5.2	Evaṁ kho, āvuso, bhikkhu tathā tathā vihāraṁ kappeti yathā yathāssa vihāraṁ kappayato bhaddakaṁ maraṇaṁ hoti, bhaddikā kālakiriyā.
an6.14:5.3	Ayaṁ vuccatāvuso:
an6.14:5.4	‘bhikkhu nibbānābhirato pajahāsi sakkāyaṁ sammā dukkhassa antakiriyāyā’ti.
an6.14:6.1	Yo papañcamanuyutto,
an6.14:6.2	papañcābhirato mago;
an6.14:6.3	Virādhayī so nibbānaṁ,
an6.14:6.4	yogakkhemaṁ anuttaraṁ.
an6.14:7.1	Yo ca papañcaṁ hitvāna,
an6.14:7.2	nippapañcapade rato;
an6.14:7.3	Ārādhayī so nibbānaṁ,
an6.14:7.4	yogakkhemaṁ anuttaran”ti.
an6.14:7.5	Catutthaṁ.
an6.15:0.1	Aṅguttara Nikāya 6.15
an6.15:0.2	2. Sāraṇīyavagga
an6.15:0.3	Anutappiyasutta
an6.15:1.1	Tatra kho āyasmā sāriputto bhikkhū āmantesi:
an6.15:1.2	“tathā tathāvuso, bhikkhu vihāraṁ kappeti yathā yathāssa vihāraṁ kappayato kālakiriyā anutappā hoti.
an6.15:1.3	Kathañcāvuso, bhikkhu tathā tathā vihāraṁ kappeti yathā yathāssa vihāraṁ kappayato kālakiriyā anutappā hoti?
an6.15:2.1	Idhāvuso, bhikkhu kammārāmo hoti kammarato kammārāmataṁ anuyutto, bhassārāmo hoti …
an6.15:2.2	niddārāmo hoti …
an6.15:2.3	saṅgaṇikārāmo hoti …
an6.15:2.4	saṁsaggārāmo hoti …
an6.15:2.5	papañcārāmo hoti papañcarato papañcārāmataṁ anuyutto.
an6.15:2.6	Evaṁ kho, āvuso, bhikkhu tathā tathā vihāraṁ kappeti yathā yathāssa vihāraṁ kappayato kālakiriyā anutappā hoti.
an6.15:2.7	Ayaṁ vuccatāvuso:
an6.15:2.8	‘bhikkhu sakkāyābhirato nappajahāsi sakkāyaṁ sammā dukkhassa antakiriyāya’.
an6.15:3.1	Tathā tathāvuso, bhikkhu vihāraṁ kappeti yathā yathāssa vihāraṁ kappayato kālakiriyā ananutappā hoti.
an6.15:3.2	Kathañcāvuso, bhikkhu tathā tathā vihāraṁ kappeti yathā yathāssa vihāraṁ kappayato kālakiriyā ananutappā hoti?
an6.15:4.1	Idhāvuso, bhikkhu na kammārāmo hoti na kammarato na kammārāmataṁ anuyutto, na bhassārāmo hoti …
an6.15:4.2	na niddārāmo hoti …
an6.15:4.3	na saṅgaṇikārāmo hoti …
an6.15:4.4	na saṁsaggārāmo hoti …
an6.15:4.5	na papañcārāmo hoti na papañcarato na papañcārāmataṁ anuyutto.
an6.15:4.6	Evaṁ kho, āvuso, bhikkhu tathā tathā vihāraṁ kappeti yathā yathāssa vihāraṁ kappayato kālakiriyā ananutappā hoti.
an6.15:4.7	Ayaṁ vuccatāvuso:
an6.15:4.8	‘bhikkhu nibbānābhirato pajahāsi sakkāyaṁ sammā dukkhassa antakiriyāyā’ti.
an6.15:5.1	Yo papañcamanuyutto,
an6.15:5.2	papañcābhirato mago;
an6.15:5.3	Virādhayī so nibbānaṁ,
an6.15:5.4	yogakkhemaṁ anuttaraṁ.
an6.15:6.1	Yo ca papañcaṁ hitvāna,
an6.15:6.2	nippapañcapade rato;
an6.15:6.3	Ārādhayī so nibbānaṁ,
an6.15:6.4	yogakkhemaṁ anuttaran”ti.
an6.15:6.5	Pañcamaṁ.
an6.16:0.1	Aṅguttara Nikāya 6.16
an6.16:0.2	2. Sāraṇīyavagga
an6.16:0.3	Nakulapitusutta
an6.16:1.1	Ekaṁ samayaṁ bhagavā bhaggesu viharati susumāragire bhesakaḷāvane migadāye.
an6.16:1.2	Tena kho pana samayena nakulapitā gahapati ābādhiko hoti dukkhito bāḷhagilāno.
an6.16:1.3	Atha kho nakulamātā gahapatānī nakulapitaraṁ gahapatiṁ etadavoca:
an6.16:2.1	“Mā kho tvaṁ, gahapati, sāpekkho kālamakāsi.
an6.16:2.2	Dukkhā, gahapati, sāpekkhassa kālakiriyā;
an6.16:2.3	garahitā ca bhagavatā sāpekkhassa kālakiriyā.
an6.16:2.4	Siyā kho pana te, gahapati, evamassa:
an6.16:2.5	‘na nakulamātā gahapatānī mamaccayena sakkhissati dārake posetuṁ, gharāvāsaṁ santharitun’ti.
an6.16:2.6	Na kho panetaṁ, gahapati, evaṁ daṭṭhabbaṁ.
an6.16:2.7	Kusalāhaṁ, gahapati, kappāsaṁ kantituṁ veṇiṁ olikhituṁ.
an6.16:2.8	Sakkomahaṁ, gahapati, tavaccayena dārake posetuṁ, gharāvāsaṁ santharituṁ.
an6.16:2.9	Tasmātiha tvaṁ, gahapati, mā sāpekkho kālamakāsi.
an6.16:2.10	Dukkhā, gahapati, sāpekkhassa kālakiriyā;
an6.16:2.11	garahitā ca bhagavatā sāpekkhassa kālakiriyā.
an6.16:3.1	Siyā kho pana te, gahapati, evamassa:
an6.16:3.2	‘nakulamātā gahapatānī mamaccayena aññaṁ gharaṁ gamissatī’ti.
an6.16:3.3	Na kho panetaṁ, gahapati, evaṁ daṭṭhabbaṁ.
an6.16:3.4	Tvañceva kho, gahapati, jānāsi ahañca, yaṁ no soḷasavassāni gahaṭṭhakaṁ brahmacariyaṁ samāciṇṇaṁ.
an6.16:3.5	Tasmātiha tvaṁ, gahapati, mā sāpekkho kālamakāsi.
an6.16:3.6	Dukkhā, gahapati, sāpekkhassa kālakiriyā;
an6.16:3.7	garahitā ca bhagavatā sāpekkhassa kālakiriyā.
an6.16:4.1	Siyā kho pana te, gahapati, evamassa:
an6.16:4.2	‘nakulamātā gahapatānī mamaccayena na dassanakāmā bhavissati bhagavato na dassanakāmā bhikkhusaṅghassā’ti.
an6.16:4.3	Na kho panetaṁ, gahapati, evaṁ daṭṭhabbaṁ.
an6.16:4.4	Ahañhi, gahapati, tavaccayena dassanakāmatarā ceva bhavissāmi bhagavato, dassanakāmatarā ca bhikkhusaṅghassa.
an6.16:4.5	Tasmātiha tvaṁ, gahapati, mā sāpekkho kālamakāsi.
an6.16:4.6	Dukkhā, gahapati, sāpekkhassa kālakiriyā;
an6.16:4.7	garahitā ca bhagavatā sāpekkhassa kālakiriyā.
an6.16:5.1	Siyā kho pana te, gahapati, evamassa:
an6.16:5.2	‘na nakulamātā gahapatānī mamaccayena sīlesu paripūrakārinī’ti.
an6.16:5.3	Na kho panetaṁ, gahapati, evaṁ daṭṭhabbaṁ.
an6.16:5.4	Yāvatā kho, gahapati, tassa bhagavato sāvikā gihī odātavasanā sīlesu paripūrakāriniyo, ahaṁ tāsaṁ aññatarā.
an6.16:5.5	Yassa kho panassa kaṅkhā vā vimati vā—ayaṁ so bhagavā arahaṁ sammāsambuddho bhaggesu viharati susumāragire bhesakaḷāvane migadāye—taṁ bhagavantaṁ upasaṅkamitvā pucchatu.
an6.16:5.6	Tasmātiha tvaṁ, gahapati, mā sāpekkho kālamakāsi.
an6.16:5.7	Dukkhā, gahapati, sāpekkhassa kālakiriyā;
an6.16:5.8	garahitā ca bhagavatā sāpekkhassa kālakiriyā.
an6.16:6.1	Siyā kho pana te, gahapati, evamassa:
an6.16:6.2	‘na nakulamātā gahapatānī lābhinī ajjhattaṁ cetosamathassā’ti.
an6.16:6.3	Na kho panetaṁ, gahapati, evaṁ daṭṭhabbaṁ.
an6.16:6.4	Yāvatā kho, gahapati, tassa bhagavato sāvikā gihī odātavasanā lābhiniyo ajjhattaṁ cetosamathassa, ahaṁ tāsaṁ aññatarā.
an6.16:6.5	Yassa kho panassa kaṅkhā vā vimati vā—ayaṁ so bhagavā arahaṁ sammāsambuddho bhaggesu viharati susumāragire bhesakaḷāvane migadāye—taṁ bhagavantaṁ upasaṅkamitvā pucchatu.
an6.16:6.6	Tasmātiha tvaṁ, gahapati, mā sāpekkho kālamakāsi.
an6.16:6.7	Dukkhā, gahapati, sāpekkhassa kālakiriyā;
an6.16:6.8	garahitā ca bhagavatā sāpekkhassa kālakiriyā.
an6.16:7.1	Siyā kho pana te, gahapati, evamassa:
an6.16:7.2	‘na nakulamātā gahapatānī imasmiṁ dhammavinaye ogādhappattā patigādhappattā assāsappattā tiṇṇavicikicchā vigatakathaṅkathā vesārajjappattā aparappaccayā satthusāsane viharatī’ti.
an6.16:7.3	Na kho panetaṁ, gahapati, evaṁ daṭṭhabbaṁ.
an6.16:7.4	Yāvatā kho, gahapati, tassa bhagavato sāvikā gihī odātavasanā imasmiṁ dhammavinaye ogādhappattā patigādhappattā assāsappattā tiṇṇavicikicchā vigatakathaṅkathā vesārajjappattā aparappaccayā satthusāsane viharanti, ahaṁ tāsaṁ aññatarā.
an6.16:7.5	Yassa kho panassa kaṅkhā vā vimati vā—ayaṁ so bhagavā arahaṁ sammāsambuddho bhaggesu viharati susumāragire bhesakaḷāvane migadāye—taṁ bhagavantaṁ upasaṅkamitvā pucchatu.
an6.16:7.6	Tasmātiha tvaṁ, gahapati, mā sāpekkho kālamakāsi.
an6.16:7.7	Dukkhā, gahapati, sāpekkhassa kālakiriyā;
an6.16:7.8	garahitā ca bhagavatā sāpekkhassa kālakiriyā”ti.
an6.16:8.1	Atha kho nakulapituno gahapatissa nakulamātarā gahapatāniyā iminā ovādena ovadiyamānassa so ābādho ṭhānaso paṭippassambhi.
an6.16:8.2	Vuṭṭhahi ca nakulapitā gahapati tamhā ābādhā;
an6.16:8.3	tathā pahīno ca pana nakulapituno gahapatissa so ābādho ahosi.
an6.16:8.4	Atha kho nakulapitā gahapati gilānā vuṭṭhito aciravuṭṭhito gelaññā daṇḍamolubbha yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho nakulapitaraṁ gahapatiṁ bhagavā etadavoca:
an6.16:9.1	“Lābhā te, gahapati, suladdhaṁ te, gahapati.
an6.16:9.2	Yassa te nakulamātā gahapatānī anukampikā atthakāmā ovādikā anusāsikā.
an6.16:9.3	Yāvatā kho, gahapati, mama sāvikā gihī odātavasanā sīlesu paripūrakāriniyo, nakulamātā gahapatānī tāsaṁ aññatarā.
an6.16:9.4	Yāvatā kho, gahapati, mama sāvikā gihī odātavasanā lābhiniyo ajjhattaṁ cetosamathassa, nakulamātā gahapatānī tāsaṁ aññatarā.
an6.16:9.5	Yāvatā kho, gahapati, mama sāvikā gihī odātavasanā imasmiṁ dhammavinaye ogādhappattā patigādhappattā assāsappattā tiṇṇavicikicchā vigatakathaṅkathā vesārajjappattā aparappaccayā satthusāsane viharanti, nakulamātā gahapatānī tāsaṁ aññatarā.
an6.16:9.6	Lābhā te, gahapati, suladdhaṁ te, gahapati.
an6.16:9.7	Yassa te nakulamātā gahapatānī anukampikā atthakāmā ovādikā anusāsikā”ti.
an6.16:9.8	Chaṭṭhaṁ.
an6.17:0.1	Aṅguttara Nikāya 6.17
an6.17:0.2	2. Sāraṇīyavagga
an6.17:0.3	Soppasutta
an6.17:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an6.17:1.2	Atha kho bhagavā sāyanhasamayaṁ paṭisallānā vuṭṭhito yenupaṭṭhānasālā tenupasaṅkami; upasaṅkamitvā paññatte āsane nisīdi.
an6.17:1.3	Āyasmāpi kho sāriputto sāyanhasamayaṁ paṭisallānā vuṭṭhito yenupaṭṭhānasālā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an6.17:1.4	Āyasmāpi kho mahāmoggallāno …
an6.17:1.5	āyasmāpi kho mahākassapo …
an6.17:1.6	āyasmāpi kho mahākaccāno …
an6.17:1.7	āyasmāpi kho mahākoṭṭhiko …
an6.17:1.8	āyasmāpi kho mahācundo …
an6.17:1.9	āyasmāpi kho mahākappino …
an6.17:1.10	āyasmāpi kho anuruddho …
an6.17:1.11	āyasmāpi kho revato …
an6.17:1.12	āyasmāpi kho ānando sāyanhasamayaṁ paṭisallānā vuṭṭhito yenupaṭṭhānasālā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an6.17:1.13	Atha kho bhagavā bahudeva rattiṁ nisajjāya vītināmetvā uṭṭhāyāsanā vihāraṁ pāvisi.
an6.17:1.14	Tepi kho āyasmanto acirapakkantassa bhagavato uṭṭhāyāsanā yathāvihāraṁ agamaṁsu.
an6.17:1.15	Ye pana tattha bhikkhū navā acirapabbajitā adhunāgatā imaṁ dhammavinayaṁ te yāva sūriyuggamanā kākacchamānā supiṁsu.
an6.17:1.16	Addasā kho bhagavā dibbena cakkhunā visuddhena atikkantamānusakena te bhikkhū yāva sūriyuggamanā kākacchamāne supante.
an6.17:1.17	Disvā yenupaṭṭhānasālā tenupasaṅkami; upasaṅkamitvā paññatte āsane nisīdi.
an6.17:1.18	Nisajja kho bhagavā bhikkhū āmantesi:
an6.17:2.1	“Kahaṁ nu kho, bhikkhave, sāriputto?
an6.17:2.2	Kahaṁ mahāmoggallāno?
an6.17:2.3	Kahaṁ mahākassapo?
an6.17:2.4	Kahaṁ mahākaccāno?
an6.17:2.5	Kahaṁ mahākoṭṭhiko?
an6.17:2.6	Kahaṁ mahācundo?
an6.17:2.7	Kahaṁ mahākappino?
an6.17:2.8	Kahaṁ anuruddho?
an6.17:2.9	Kahaṁ revato?
an6.17:2.10	Kahaṁ ānando?
an6.17:2.11	Kahaṁ nu kho te, bhikkhave, therā sāvakā gatā”ti?
an6.17:2.12	“Tepi kho, bhante, āyasmanto acirapakkantassa bhagavato uṭṭhāyāsanā yathāvihāraṁ agamaṁsū”ti.
an6.17:2.13	“Tena no tumhe, bhikkhave, therā bhikkhū nāgatāti yāva sūriyuggamanā kākacchamānā supatha?
an6.17:2.14	Taṁ kiṁ maññatha, bhikkhave,
an6.17:2.15	api nu tumhehi diṭṭhaṁ vā sutaṁ vā:
an6.17:2.16	‘rājā khattiyo muddhāvasitto yāvadatthaṁ seyyasukhaṁ passasukhaṁ middhasukhaṁ anuyutto viharanto yāvajīvaṁ rajjaṁ kārento janapadassa vā piyo manāpo’”ti?
an6.17:2.17	“No hetaṁ, bhante”.
an6.17:2.18	“Sādhu, bhikkhave.
an6.17:2.19	Mayāpi kho etaṁ, bhikkhave, neva diṭṭhaṁ na sutaṁ:
an6.17:2.20	‘rājā khattiyo muddhāvasitto yāvadatthaṁ seyyasukhaṁ passasukhaṁ middhasukhaṁ anuyutto viharanto yāvajīvaṁ rajjaṁ kārento janapadassa vā piyo manāpo’ti.
an6.17:3.1	Taṁ kiṁ maññatha, bhikkhave,
an6.17:3.2	api nu tumhehi diṭṭhaṁ vā sutaṁ vā:
an6.17:3.3	‘raṭṭhiko …pe…
an6.17:3.4	pettaṇiko …
an6.17:3.5	senāpatiko …
an6.17:3.6	gāmagāmaṇiko …
an6.17:3.7	pūgagāmaṇiko yāvadatthaṁ seyyasukhaṁ passasukhaṁ middhasukhaṁ anuyutto viharanto yāvajīvaṁ pūgagāmaṇikattaṁ kārento pūgassa vā piyo manāpo’”ti?
an6.17:3.8	“No hetaṁ, bhante”.
an6.17:3.9	“Sādhu, bhikkhave.
an6.17:3.10	Mayāpi kho etaṁ, bhikkhave, neva diṭṭhaṁ na sutaṁ:
an6.17:3.11	‘pūgagāmaṇiko yāvadatthaṁ seyyasukhaṁ passasukhaṁ middhasukhaṁ anuyutto viharanto yāvajīvaṁ pūgagāmaṇikattaṁ vā kārento pūgassa vā piyo manāpo’ti.
an6.17:4.1	Taṁ kiṁ maññatha, bhikkhave,
an6.17:4.2	api nu tumhehi diṭṭhaṁ vā sutaṁ vā:
an6.17:4.3	‘samaṇo vā brāhmaṇo vā yāvadatthaṁ seyyasukhaṁ passasukhaṁ middhasukhaṁ anuyutto indriyesu aguttadvāro bhojane amattaññū jāgariyaṁ ananuyutto avipassako kusalānaṁ dhammānaṁ pubbarattāpararattaṁ bodhipakkhiyānaṁ dhammānaṁ bhāvanānuyogaṁ ananuyutto āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharanto’”ti?
an6.17:4.4	“No hetaṁ, bhante”.
an6.17:4.5	“Sādhu, bhikkhave.
an6.17:4.6	Mayāpi kho etaṁ, bhikkhave, neva diṭṭhaṁ na sutaṁ:
an6.17:4.7	‘samaṇo vā brāhmaṇo vā yāvadatthaṁ seyyasukhaṁ passasukhaṁ middhasukhaṁ anuyutto indriyesu aguttadvāro bhojane amattaññū jāgariyaṁ ananuyutto avipassako kusalānaṁ dhammānaṁ pubbarattāpararattaṁ bodhipakkhiyānaṁ dhammānaṁ bhāvanānuyogaṁ ananuyutto āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharanto’ti.
an6.17:5.1	Tasmātiha, bhikkhave, evaṁ sikkhitabbaṁ:
an6.17:5.2	‘indriyesu guttadvārā bhavissāma, bhojane mattaññuno, jāgariyaṁ anuyuttā, vipassakā kusalānaṁ dhammānaṁ, pubbarattāpararattaṁ bodhipakkhiyānaṁ dhammānaṁ, bhāvanānuyogamanuyuttā viharissāmā’ti.
an6.17:5.3	Evañhi vo, bhikkhave, sikkhitabban”ti.
an6.17:5.4	Sattamaṁ.
an6.18:0.1	Aṅguttara Nikāya 6.18
an6.18:0.2	2. Sāraṇīyavagga
an6.18:0.3	Macchabandhasutta
an6.18:1.1	Ekaṁ samayaṁ bhagavā kosalesu cārikaṁ carati mahatā bhikkhusaṅghena saddhiṁ.
an6.18:1.2	Addasā kho bhagavā addhānamaggappaṭipanno aññatarasmiṁ padese macchikaṁ macchabandhaṁ macche vadhitvā vadhitvā vikkiṇamānaṁ.
an6.18:1.3	Disvā maggā okkamma aññatarasmiṁ rukkhamūle paññatte āsane nisīdi.
an6.18:1.4	Nisajja kho bhagavā bhikkhū āmantesi:
an6.18:1.5	“passatha no tumhe, bhikkhave, amuṁ macchikaṁ macchabandhaṁ macche vadhitvā vadhitvā vikkiṇamānan”ti?
an6.18:1.6	“Evaṁ, bhante”.
an6.18:2.1	“Taṁ kiṁ maññatha, bhikkhave,
an6.18:2.2	api nu tumhehi diṭṭhaṁ vā sutaṁ vā:
an6.18:2.3	‘macchiko macchabandho macche vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṁ vā bhogakkhandhaṁ ajjhāvasanto’”ti?
an6.18:2.4	“No hetaṁ, bhante”.
an6.18:2.5	“Sādhu, bhikkhave.
an6.18:2.6	Mayāpi kho etaṁ, bhikkhave, neva diṭṭhaṁ na sutaṁ:
an6.18:2.7	‘macchiko macchabandho macche vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṁ vā bhogakkhandhaṁ ajjhāvasanto’ti.
an6.18:2.8	Taṁ kissa hetu?
an6.18:2.9	Te hi so, bhikkhave, macche vajjhe vadhāyupanīte pāpakena manasānupekkhati, tasmā so neva hatthiyāyī hoti na assayāyī na rathayāyī na yānayāyī na bhogabhogī, na mahantaṁ bhogakkhandhaṁ ajjhāvasati.
an6.18:3.1	Taṁ kiṁ maññatha, bhikkhave,
an6.18:3.2	api nu tumhehi diṭṭhaṁ vā sutaṁ vā:
an6.18:3.3	‘goghātako gāvo vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṁ vā bhogakkhandhaṁ ajjhāvasanto’”ti?
an6.18:3.4	“No hetaṁ, bhante”.
an6.18:3.5	“Sādhu, bhikkhave.
an6.18:3.6	Mayāpi kho etaṁ, bhikkhave, neva diṭṭhaṁ na sutaṁ:
an6.18:3.7	‘goghātako gāvo vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṁ vā bhogakkhandhaṁ ajjhāvasanto’ti.
an6.18:3.8	Taṁ kissa hetu?
an6.18:3.9	Te hi so, bhikkhave, gāvo vajjhe vadhāyupanīte pāpakena manasānupekkhati, tasmā so neva hatthiyāyī hoti na assayāyī na rathayāyī na yānayāyī na bhogabhogī, na mahantaṁ bhogakkhandhaṁ ajjhāvasati.
an6.18:4.1	Taṁ kiṁ maññatha, bhikkhave,
an6.18:4.2	api nu tumhehi diṭṭhaṁ vā sutaṁ vā:
an6.18:4.3	‘orabbhiko …pe…
an6.18:4.4	sūkariko …pe…
an6.18:4.5	sākuṇiko …pe…
an6.18:4.6	māgaviko mage vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṁ vā bhogakkhandhaṁ ajjhāvasanto’”ti?
an6.18:4.7	“No hetaṁ, bhante”.
an6.18:4.8	“Sādhu, bhikkhave.
an6.18:4.9	Mayāpi kho etaṁ, bhikkhave, neva diṭṭhaṁ na sutaṁ:
an6.18:4.10	‘māgaviko mage vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṁ vā bhogakkhandhaṁ ajjhāvasanto’ti.
an6.18:4.11	Taṁ kissa hetu?
an6.18:4.12	Te hi so, bhikkhave, mage vajjhe vadhāyupanīte pāpakena manasānupekkhati, tasmā so neva hatthiyāyī hoti na assayāyī na rathayāyī na yānayāyī na bhogabhogī, na mahantaṁ bhogakkhandhaṁ ajjhāvasati.
an6.18:4.13	Te hi nāma so, bhikkhave, tiracchānagate pāṇe vajjhe vadhāyupanīte pāpakena manasānupekkhamāno neva hatthiyāyī bhavissati na assayāyī na rathayāyī na yānayāyī na bhogabhogī, na mahantaṁ bhogakkhandhaṁ ajjhāvasissati.
an6.18:4.14	Ko pana vādo yaṁ manussabhūtaṁ vajjhaṁ vadhāyupanītaṁ pāpakena manasānupekkhati.
an6.18:4.15	Tañhi tassa, bhikkhave, hoti dīgharattaṁ ahitāya dukkhāya.
an6.18:4.16	Kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjatī”ti.
an6.18:4.17	Aṭṭhamaṁ.
an6.19:0.1	Aṅguttara Nikāya 6.19
an6.19:0.2	2. Sāraṇīyavagga
an6.19:0.3	Paṭhamamaraṇassatisutta
an6.19:1.1	Ekaṁ samayaṁ bhagavā nātike viharati giñjakāvasathe.
an6.19:1.2	Tatra kho bhagavā bhikkhū āmantesi:
an6.19:1.3	“bhikkhavo”ti.
an6.19:1.4	“Bhadante”ti te bhikkhū bhagavato paccassosuṁ.
an6.19:1.5	Bhagavā etadavoca:
an6.19:1.6	“maraṇassati, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā.
an6.19:1.7	Bhāvetha no tumhe, bhikkhave, maraṇassatin”ti?
an6.19:2.1	Evaṁ vutte, aññataro bhikkhu bhagavantaṁ etadavoca:
an6.19:2.2	“ahaṁ kho, bhante, bhāvemi maraṇassatin”ti.
an6.19:2.3	“Yathā kathaṁ pana tvaṁ, bhikkhu, bhāvesi maraṇassatin”ti?
an6.19:2.4	“Idha mayhaṁ, bhante, evaṁ hoti:
an6.19:2.5	‘aho vatāhaṁ rattindivaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti.
an6.19:2.6	Evaṁ kho ahaṁ, bhante, bhāvemi maraṇassatin”ti.
an6.19:3.1	Aññataropi kho bhikkhu bhagavantaṁ etadavoca:
an6.19:3.2	“ahampi kho, bhante, bhāvemi maraṇassatin”ti.
an6.19:3.3	“Yathā kathaṁ pana tvaṁ, bhikkhu, bhāvesi maraṇassatin”ti?
an6.19:3.4	“Idha mayhaṁ, bhante, evaṁ hoti:
an6.19:3.5	‘aho vatāhaṁ divasaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti.
an6.19:3.6	Evaṁ kho ahaṁ, bhante, bhāvemi maraṇassatin”ti.
an6.19:4.1	Aññataropi kho bhikkhu bhagavantaṁ etadavoca:
an6.19:4.2	“ahampi kho, bhante, bhāvemi maraṇassatin”ti.
an6.19:4.3	“Yathā kathaṁ pana tvaṁ, bhikkhu, bhāvesi maraṇassatin”ti?
an6.19:4.4	“Idha mayhaṁ, bhante, evaṁ hoti:
an6.19:4.5	‘aho vatāhaṁ tadantaraṁ jīveyyaṁ yadantaraṁ ekapiṇḍapātaṁ bhuñjāmi, bhagavato sāsanaṁ manasi kareyyaṁ, bahu vata me kataṁ assā’ti.
an6.19:4.6	Evaṁ kho ahaṁ, bhante, bhāvemi maraṇassatin”ti.
an6.19:5.1	Aññataropi kho bhikkhu bhagavantaṁ etadavoca:
an6.19:5.2	“ahampi kho, bhante, bhāvemi maraṇassatin”ti.
an6.19:5.3	“Yathā kathaṁ pana tvaṁ, bhikkhu, bhāvesi maraṇassatin”ti?
an6.19:5.4	“Idha mayhaṁ, bhante, evaṁ hoti:
an6.19:5.5	‘aho vatāhaṁ tadantaraṁ jīveyyaṁ yadantaraṁ cattāro pañca ālope saṅkhāditvā ajjhoharāmi, bhagavato sāsanaṁ manasi kareyyaṁ, bahu vata me kataṁ assā’ti.
an6.19:5.6	Evaṁ kho ahaṁ, bhante, bhāvemi maraṇassatin”ti.
an6.19:6.1	Aññataropi kho bhikkhu bhagavantaṁ etadavoca:
an6.19:6.2	“ahampi kho, bhante, bhāvemi maraṇassatin”ti.
an6.19:6.3	“Yathā kathaṁ pana tvaṁ, bhikkhu, bhāvesi maraṇassatin”ti?
an6.19:6.4	“Idha mayhaṁ, bhante, evaṁ hoti:
an6.19:6.5	‘aho vatāhaṁ tadantaraṁ jīveyyaṁ yadantaraṁ ekaṁ ālopaṁ saṅkhāditvā ajjhoharāmi, bhagavato sāsanaṁ manasi kareyyaṁ, bahu vata me kataṁ assā’ti.
an6.19:6.6	Evaṁ kho ahaṁ, bhante, bhāvemi maraṇassatin”ti.
an6.19:7.1	Aññataropi kho bhikkhu bhagavantaṁ etadavoca:
an6.19:7.2	“ahampi kho, bhante, bhāvemi maraṇassatin”ti.
an6.19:7.3	“Yathā kathaṁ pana tvaṁ, bhikkhu, bhāvesi maraṇassatin”ti?
an6.19:7.4	“Idha mayhaṁ, bhante, evaṁ hoti:
an6.19:7.5	‘aho vatāhaṁ tadantaraṁ jīveyyaṁ yadantaraṁ assasitvā vā passasāmi passasitvā vā assasāmi, bhagavato sāsanaṁ manasi kareyyaṁ, bahu vata me kataṁ assā’ti.
an6.19:7.6	Evaṁ kho ahaṁ, bhante, bhāvemi maraṇassatin”ti.
an6.19:8.1	Evaṁ vutte, bhagavā te bhikkhū etadavoca:
an6.19:8.2	“yo cāyaṁ, bhikkhave, bhikkhu evaṁ maraṇassatiṁ bhāveti:
an6.19:8.3	‘aho vatāhaṁ rattindivaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti.
an6.19:9.1	Yo cāyaṁ, bhikkhave, bhikkhu evaṁ maraṇassatiṁ bhāveti:
an6.19:9.2	‘aho vatāhaṁ divasaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti.
an6.19:10.1	Yo cāyaṁ, bhikkhave, bhikkhu evaṁ maraṇassatiṁ bhāveti:
an6.19:10.2	‘aho vatāhaṁ tadantaraṁ jīveyyaṁ yadantaraṁ ekapiṇḍapātaṁ bhuñjāmi, bhagavato sāsanaṁ manasi kareyyaṁ, bahu vata me kataṁ assā’ti.
an6.19:11.1	Yo cāyaṁ, bhikkhave, bhikkhu evaṁ maraṇassatiṁ bhāveti:
an6.19:11.2	‘aho vatāhaṁ tadantaraṁ jīveyyaṁ yadantaraṁ cattāro pañca ālope saṅkhāditvā ajjhoharāmi, bhagavato sāsanaṁ manasi kareyyaṁ, bahu vata me kataṁ assā’ti.
an6.19:12.1	Ime vuccanti, bhikkhave, bhikkhū pamattā viharanti dandhaṁ maraṇassatiṁ bhāventi āsavānaṁ khayāya.
an6.19:13.1	Yo ca khvāyaṁ, bhikkhave, bhikkhu evaṁ maraṇassatiṁ bhāveti:
an6.19:13.2	‘aho vatāhaṁ tadantaraṁ jīveyyaṁ yadantaraṁ ekaṁ ālopaṁ saṅkhāditvā ajjhoharāmi, bhagavato sāsanaṁ manasi kareyyaṁ, bahu vata me kataṁ assā’ti.
an6.19:14.1	Yo cāyaṁ, bhikkhave, bhikkhu evaṁ maraṇassatiṁ bhāveti:
an6.19:14.2	‘aho vatāhaṁ tadantaraṁ jīveyyaṁ yadantaraṁ assasitvā vā passasāmi passasitvā vā assasāmi, bhagavato sāsanaṁ manasi kareyyaṁ, bahu vata me kataṁ assā’ti.
an6.19:15.1	Ime vuccanti, bhikkhave, bhikkhū appamattā viharanti tikkhaṁ maraṇassatiṁ bhāventi āsavānaṁ khayāya.
an6.19:16.1	Tasmātiha, bhikkhave, evaṁ sikkhitabbaṁ:
an6.19:16.2	‘appamattā viharissāma, tikkhaṁ maraṇassatiṁ bhāvessāma āsavānaṁ khayāyā’ti.
an6.19:16.3	Evañhi vo, bhikkhave, sikkhitabban”ti.
an6.19:16.4	Navamaṁ.
an6.20:0.1	Aṅguttara Nikāya 6.20
an6.20:0.2	2. Sāraṇīyavagga
an6.20:0.3	Dutiyamaraṇassatisutta
an6.20:1.1	Ekaṁ samayaṁ bhagavā nātike viharati giñjakāvasathe.
an6.20:1.2	Tatra kho bhagavā bhikkhū āmantesi:
an6.20:1.3	“maraṇassati, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā.
an6.20:1.4	Kathaṁ bhāvitā ca, bhikkhave, maraṇassati kathaṁ bahulīkatā mahapphalā hoti mahānisaṁsā amatogadhā amatapariyosānā?
an6.20:2.1	Idha, bhikkhave, bhikkhu divase nikkhante rattiyā patihitāya iti paṭisañcikkhati:
an6.20:2.2	‘bahukā kho me paccayā maraṇassa—
an6.20:2.3	ahi vā maṁ ḍaṁseyya, vicchiko vā maṁ ḍaṁseyya, satapadī vā maṁ ḍaṁseyya;
an6.20:2.4	tena me assa kālakiriyā, so mamassa antarāyo.
an6.20:2.5	Upakkhalitvā vā papateyyaṁ, bhattaṁ vā me bhuttaṁ byāpajjeyya, pittaṁ vā me kuppeyya, semhaṁ vā me kuppeyya, satthakā vā me vātā kuppeyyuṁ;
an6.20:2.6	tena me assa kālakiriyā, so mamassa antarāyo’ti.
an6.20:2.7	Tena, bhikkhave, bhikkhunā iti paṭisañcikkhitabbaṁ:
an6.20:2.8	‘atthi nu kho me pāpakā akusalā dhammā appahīnā, ye me assu rattiṁ kālaṁ karontassa antarāyāyā’ti.
an6.20:3.1	Sace, bhikkhave, bhikkhu paccavekkhamāno evaṁ jānāti:
an6.20:3.2	‘atthi me pāpakā akusalā dhammā appahīnā, ye me assu rattiṁ kālaṁ karontassa antarāyāyā’ti, tena, bhikkhave, bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an6.20:3.3	Seyyathāpi, bhikkhave, ādittacelo vā ādittasīso vā tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya;
an6.20:3.4	evamevaṁ kho, bhikkhave, tena bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an6.20:4.1	Sace pana, bhikkhave, bhikkhu paccavekkhamāno evaṁ jānāti:
an6.20:4.2	‘natthi me pāpakā akusalā dhammā appahīnā, ye me assu rattiṁ kālaṁ karontassa antarāyāyā’ti, tena, bhikkhave, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.
an6.20:5.1	Idha pana, bhikkhave, bhikkhu rattiyā nikkhantāya divase patihite iti paṭisañcikkhati:
an6.20:5.2	‘bahukā kho me paccayā maraṇassa—
an6.20:5.3	ahi vā maṁ ḍaṁseyya, vicchiko vā maṁ ḍaṁseyya, satapadī vā maṁ ḍaṁseyya;
an6.20:5.4	tena me assa kālakiriyā so mamassa antarāyo.
an6.20:5.5	Upakkhalitvā vā papateyyaṁ, bhattaṁ vā me bhuttaṁ byāpajjeyya, pittaṁ vā me kuppeyya, semhaṁ vā me kuppeyya, satthakā vā me vātā kuppeyyuṁ;
an6.20:5.6	tena me assa kālakiriyā so mamassa antarāyo’ti.
an6.20:5.7	Tena, bhikkhave, bhikkhunā iti paṭisañcikkhitabbaṁ:
an6.20:5.8	‘atthi nu kho me pāpakā akusalā dhammā appahīnā, ye me assu divā kālaṁ karontassa antarāyāyā’ti.
an6.20:6.1	Sace, bhikkhave, bhikkhu paccavekkhamāno evaṁ jānāti:
an6.20:6.2	‘atthi me pāpakā akusalā dhammā appahīnā, ye me assu divā kālaṁ karontassa antarāyāyā’ti, tena, bhikkhave, bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an6.20:6.3	Seyyathāpi, bhikkhave, ādittacelo vā ādittasīso vā tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya;
an6.20:6.4	evamevaṁ kho, bhikkhave, tena bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an6.20:7.1	Sace pana, bhikkhave, bhikkhu paccavekkhamāno evaṁ jānāti:
an6.20:7.2	‘natthi me pāpakā akusalā dhammā appahīnā, ye me assu divā kālaṁ karontassa antarāyāyā’ti, tena, bhikkhave, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.
an6.20:8.1	Evaṁ bhāvitā kho, bhikkhave, maraṇassati evaṁ bahulīkatā mahapphalā hoti mahānisaṁsā amatogadhā amatapariyosānā”ti.
an6.20:8.2	Dasamaṁ.
an6.20:8.3	Sāraṇīyavaggo dutiyo.
an6.20:9.0	Tassuddānaṁ
an6.20:9.1	Dve sāraṇī nisāraṇīyaṁ,
an6.20:9.2	bhaddakaṁ anutappiyaṁ;
an6.20:9.3	Nakulaṁ soppamacchā ca,
an6.20:9.4	dve honti maraṇassatīti.
an6.21:0.1	Aṅguttara Nikāya 6.21
an6.21:0.2	3. Anuttariyavagga
an6.21:0.3	Sāmakasutta
an6.21:1.1	Ekaṁ samayaṁ bhagavā sakkesu viharati sāmagāmake pokkharaṇiyāyaṁ.
an6.21:1.2	Atha kho aññatarā devatā abhikkantāya rattiyā abhikkantavaṇṇā kevalakappaṁ pokkharaṇiyaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitā kho sā devatā bhagavantaṁ etadavoca:
an6.21:2.1	“Tayome, bhante, dhammā bhikkhuno parihānāya saṁvattanti.
an6.21:2.2	Katame tayo?
an6.21:2.3	Kammārāmatā, bhassārāmatā, niddārāmatā—
an6.21:2.4	ime kho, bhante, tayo dhammā bhikkhuno parihānāya saṁvattantī”ti.
an6.21:2.5	Idamavoca sā devatā.
an6.21:2.6	Samanuñño satthā ahosi.
an6.21:2.7	Atha kho sā devatā “samanuñño me satthā”ti bhagavantaṁ abhivādetvā padakkhiṇaṁ katvā tatthevantaradhāyi.
an6.21:3.1	Atha kho bhagavā tassā rattiyā accayena bhikkhū āmantesi:
an6.21:3.2	“imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā kevalakappaṁ pokkharaṇiyaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, bhikkhave, sā devatā maṁ etadavoca:
an6.21:3.3	‘tayome, bhante, dhammā bhikkhuno parihānāya saṁvattanti.
an6.21:3.4	Katame tayo?
an6.21:3.5	Kammārāmatā, bhassārāmatā, niddārāmatā—
an6.21:3.6	ime kho, bhante, tayo dhammā bhikkhuno parihānāya saṁvattantī’ti.
an6.21:3.7	Idamavoca, bhikkhave, sā devatā.
an6.21:3.8	Idaṁ vatvā maṁ abhivādetvā padakkhiṇaṁ katvā tatthevantaradhāyi.
an6.21:3.9	Tesaṁ vo, bhikkhave, alābhā tesaṁ dulladdhaṁ, ye vo devatāpi jānanti kusalehi dhammehi parihāyamāne.
an6.21:4.1	Aparepi, bhikkhave, tayo parihāniye dhamme desessāmi.
an6.21:4.2	Taṁ suṇātha, sādhukaṁ manasi karotha, bhāsissāmī”ti.
an6.21:4.3	“Evaṁ, bhante”ti kho te bhikkhū bhagavato paccassosuṁ.
an6.21:4.4	Bhagavā etadavoca:
an6.21:4.5	“katame ca, bhikkhave, tayo parihāniyā dhammā?
an6.21:4.6	Saṅgaṇikārāmatā, dovacassatā, pāpamittatā—
an6.21:4.7	ime kho, bhikkhave, tayo parihāniyā dhammā.
an6.21:5.1	Ye hi keci, bhikkhave, atītamaddhānaṁ parihāyiṁsu kusalehi dhammehi, sabbete imeheva chahi dhammehi parihāyiṁsu kusalehi dhammehi.
an6.21:5.2	Yepi hi keci, bhikkhave, anāgatamaddhānaṁ parihāyissanti kusalehi dhammehi, sabbete imeheva chahi dhammehi parihāyissanti kusalehi dhammehi.
an6.21:5.3	Yepi hi keci, bhikkhave, etarahi parihāyanti kusalehi dhammehi, sabbete imeheva chahi dhammehi parihāyanti kusalehi dhammehī”ti.
an6.21:5.4	Paṭhamaṁ.
an6.22:0.1	Aṅguttara Nikāya 6.22
an6.22:0.2	3. Anuttariyavagga
an6.22:0.3	Aparihāniyasutta
an6.22:1.1	“Chayime, bhikkhave, aparihāniye dhamme desessāmi, taṁ suṇātha …pe…
an6.22:1.2	katame ca, bhikkhave, cha aparihāniyā dhammā?
an6.22:1.3	Na kammārāmatā, na bhassārāmatā, na niddārāmatā, na saṅgaṇikārāmatā, sovacassatā, kalyāṇamittatā—
an6.22:1.4	ime kho, bhikkhave, cha aparihāniyā dhammā.
an6.22:2.1	Ye hi keci, bhikkhave, atītamaddhānaṁ na parihāyiṁsu kusalehi dhammehi, sabbete imeheva chahi dhammehi na parihāyiṁsu kusalehi dhammehi.
an6.22:2.2	Yepi hi keci, bhikkhave, anāgatamaddhānaṁ na parihāyissanti kusalehi dhammehi, sabbete imeheva chahi dhammehi na parihāyissanti kusalehi dhammehi.
an6.22:2.3	Yepi hi keci, bhikkhave, etarahi na parihāyanti kusalehi dhammehi, sabbete imeheva chahi dhammehi na parihāyanti kusalehi dhammehī”ti.
an6.22:2.4	Dutiyaṁ.
an6.23:0.1	Aṅguttara Nikāya 6.23
an6.23:0.2	3. Anuttariyavagga
an6.23:0.3	Bhayasutta
an6.23:1.1	“‘Bhayan’ti, bhikkhave, kāmānametaṁ adhivacanaṁ;
an6.23:1.2	‘dukkhan’ti, bhikkhave, kāmānametaṁ adhivacanaṁ;
an6.23:1.3	‘rogo’ti, bhikkhave, kāmānametaṁ adhivacanaṁ;
an6.23:1.4	‘gaṇḍo’ti, bhikkhave, kāmānametaṁ adhivacanaṁ;
an6.23:1.5	‘saṅgo’ti, bhikkhave, kāmānametaṁ adhivacanaṁ;
an6.23:1.6	‘paṅko’ti, bhikkhave, kāmānametaṁ adhivacanaṁ.
an6.23:2.1	Kasmā ca, bhikkhave, ‘bhayan’ti kāmānametaṁ adhivacanaṁ?
an6.23:2.2	Kāmarāgarattāyaṁ, bhikkhave, chandarāgavinibaddho diṭṭhadhammikāpi bhayā na parimuccati, samparāyikāpi bhayā na parimuccati, tasmā ‘bhayan’ti kāmānametaṁ adhivacanaṁ.
an6.23:2.3	Kasmā ca, bhikkhave, dukkhanti …pe…
an6.23:2.4	rogoti …
an6.23:2.5	gaṇḍoti …
an6.23:2.6	saṅgoti …
an6.23:2.7	paṅkoti kāmānametaṁ adhivacanaṁ?
an6.23:2.8	Kāmarāgarattāyaṁ, bhikkhave, chandarāgavinibaddho diṭṭhadhammikāpi paṅkā na parimuccati, samparāyikāpi paṅkā na parimuccati, tasmā ‘paṅko’ti kāmānametaṁ adhivacananti.
an6.23:3.1	Bhayaṁ dukkhaṁ rogo gaṇḍo,
an6.23:3.2	saṅgo paṅko ca ubhayaṁ;
an6.23:3.3	Ete kāmā pavuccanti,
an6.23:3.4	yattha satto puthujjano.
an6.23:4.1	Upādāne bhayaṁ disvā,
an6.23:4.2	jātimaraṇasambhave;
an6.23:4.3	Anupādā vimuccanti,
an6.23:4.4	jātimaraṇasaṅkhaye.
an6.23:5.1	Te khemappattā sukhino,
an6.23:5.2	diṭṭhadhammābhinibbutā;
an6.23:5.3	Sabbaverabhayātītā,
an6.23:5.4	sabbadukkhaṁ upaccagun”ti.
an6.23:5.5	Tatiyaṁ.
an6.24:0.1	Aṅguttara Nikāya 6.24
an6.24:0.2	3. Anuttariyavagga
an6.24:0.3	Himavantasutta
an6.24:1.1	“Chahi, bhikkhave, dhammehi samannāgato bhikkhu himavantaṁ pabbatarājaṁ padāleyya, ko pana vādo chavāya avijjāya.
an6.24:1.2	Katamehi chahi?
an6.24:1.3	Idha, bhikkhave, bhikkhu samādhissa samāpattikusalo hoti, samādhissa ṭhitikusalo hoti, samādhissa vuṭṭhānakusalo hoti, samādhissa kallitakusalo hoti, samādhissa gocarakusalo hoti, samādhissa abhinīhārakusalo hoti.
an6.24:1.4	Imehi kho, bhikkhave, chahi dhammehi samannāgato bhikkhu himavantaṁ pabbatarājaṁ padāleyya, ko pana vādo chavāya avijjāyā”ti.
an6.24:1.5	Catutthaṁ.
an6.25:0.1	Aṅguttara Nikāya 6.25
an6.25:0.2	3. Anuttariyavagga
an6.25:0.3	Anussatiṭṭhānasutta
an6.25:1.1	“Chayimāni, bhikkhave, anussatiṭṭhānāni.
an6.25:1.2	Katamāni cha?
an6.25:1.3	Idha, bhikkhave, ariyasāvako tathāgataṁ anussarati:
an6.25:1.4	‘itipi so bhagavā …pe… satthā devamanussānaṁ buddho bhagavā’ti.
an6.25:1.5	Yasmiṁ, bhikkhave, samaye ariyasāvako tathāgataṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.25:1.6	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.25:1.7	‘Gedho’ti kho, bhikkhave, pañcannetaṁ kāmaguṇānaṁ adhivacanaṁ.
an6.25:1.8	Idampi kho, bhikkhave, ārammaṇaṁ karitvā evam’idhekacce sattā visujjhanti.
an6.25:2.1	Puna caparaṁ, bhikkhave, ariyasāvako dhammaṁ anussarati:
an6.25:2.2	‘svākkhāto bhagavatā dhammo …pe… paccattaṁ veditabbo viññūhī’ti.
an6.25:2.3	Yasmiṁ, bhikkhave, samaye ariyasāvako dhammaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.25:2.4	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.25:2.5	‘Gedho’ti kho, bhikkhave, pañcannetaṁ kāmaguṇānaṁ adhivacanaṁ.
an6.25:2.6	Idampi kho, bhikkhave, ārammaṇaṁ karitvā evam’idhekacce sattā visujjhanti.
an6.25:3.1	Puna caparaṁ, bhikkhave, ariyasāvako saṅghaṁ anussarati:
an6.25:3.2	‘suppaṭipanno bhagavato sāvakasaṅgho …pe… anuttaraṁ puññakkhettaṁ lokassā’ti.
an6.25:3.3	Yasmiṁ, bhikkhave, samaye ariyasāvako saṅghaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.25:3.4	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.25:3.5	‘Gedho’ti kho, bhikkhave, pañcannetaṁ kāmaguṇānaṁ adhivacanaṁ.
an6.25:3.6	Idampi kho, bhikkhave, ārammaṇaṁ karitvā evam’idhekacce sattā visujjhanti.
an6.25:4.1	Puna caparaṁ, bhikkhave, ariyasāvako attano sīlāni anussarati akhaṇḍāni …pe… samādhisaṁvattanikāni.
an6.25:4.2	Yasmiṁ, bhikkhave, samaye ariyasāvako sīlaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.25:4.3	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.25:4.4	‘Gedho’ti kho, bhikkhave, pañcannetaṁ kāmaguṇānaṁ adhivacanaṁ.
an6.25:4.5	Idampi kho, bhikkhave, ārammaṇaṁ karitvā evam’idhekacce sattā visujjhanti.
an6.25:5.1	Puna caparaṁ, bhikkhave, ariyasāvako attano cāgaṁ anussarati:
an6.25:5.2	‘lābhā vata me. Suladdhaṁ vata me …pe…
an6.25:5.3	yācayogo dānasaṁvibhāgarato’ti.
an6.25:5.4	…pe…
an6.25:5.5	Evam’idhekacce sattā visujjhanti.
an6.25:6.1	Puna caparaṁ, bhikkhave, ariyasāvako devatā anussarati:
an6.25:6.2	‘santi devā cātumahārājikā, santi devā tāvatiṁsā, santi devā yāmā, santi devā tusitā, santi devā nimmānaratino, santi devā paranimmitavasavattino, santi devā brahmakāyikā, santi devā tatuttari.
an6.25:6.3	Yathārūpāya saddhāya samannāgatā tā devatā ito cutā tattha upapannā; mayhampi tathārūpā saddhā saṁvijjati.
an6.25:6.4	Yathārūpena sīlena …
an6.25:6.5	sutena …
an6.25:6.6	cāgena …
an6.25:6.7	paññāya samannāgatā tā devatā ito cutā tattha upapannā; mayhampi tathārūpā paññā saṁvijjatī’ti.
an6.25:7.1	Yasmiṁ, bhikkhave, samaye ariyasāvako attano ca tāsañca devatānaṁ saddhañca sīlañca sutañca cāgañca paññañca anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.25:7.2	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.25:7.3	‘Gedho’ti kho, bhikkhave, pañcannetaṁ kāmaguṇānaṁ adhivacanaṁ.
an6.25:7.4	Idampi kho, bhikkhave, ārammaṇaṁ karitvā evam’idhekacce sattā visujjhanti.
an6.25:8.1	Imāni kho, bhikkhave, cha anussatiṭṭhānānī”ti.
an6.25:8.2	Pañcamaṁ.
an6.26:0.1	Aṅguttara Nikāya 6.26
an6.26:0.2	3. Anuttariyavagga
an6.26:0.3	Mahākaccānasutta
an6.26:1.1	Tatra kho āyasmā mahākaccāno bhikkhū āmantesi:
an6.26:1.2	“āvuso bhikkhave”ti.
an6.26:1.3	“Āvuso”ti kho te bhikkhū āyasmato mahākaccānassa paccassosuṁ.
an6.26:1.4	Āyasmā mahākaccāno etadavoca:
an6.26:1.5	“acchariyaṁ, āvuso;
an6.26:1.6	abbhutaṁ, āvuso.
an6.26:1.7	Yāvañcidaṁ tena bhagavatā jānatā passatā arahatā sammāsambuddhena sambādhe okāsādhigamo anubuddho sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya, yadidaṁ cha anussatiṭṭhānāni.
an6.26:2.1	Katamāni cha?
an6.26:2.2	Idhāvuso, ariyasāvako tathāgataṁ anussarati:
an6.26:2.3	‘itipi so bhagavā …pe… satthā devamanussānaṁ buddho bhagavā’ti.
an6.26:2.4	Yasmiṁ, āvuso, samaye ariyasāvako tathāgataṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.26:2.5	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.26:2.6	‘Gedho’ti kho, āvuso, pañcannetaṁ kāmaguṇānaṁ adhivacanaṁ.
an6.26:2.7	Sa kho so, āvuso, ariyasāvako sabbaso ākāsasamena cetasā viharati vipulena mahaggatena appamāṇena averena abyāpajjena.
an6.26:2.8	Idampi kho, āvuso, ārammaṇaṁ karitvā evam’idhekacce sattā visuddhidhammā bhavanti.
an6.26:3.1	Puna caparaṁ, āvuso, ariyasāvako dhammaṁ anussarati:
an6.26:3.2	‘svākkhāto bhagavatā dhammo …pe… paccattaṁ veditabbo viññūhī’ti.
an6.26:3.3	Yasmiṁ, āvuso, samaye ariyasāvako dhammaṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.26:3.4	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.26:3.5	‘Gedho’ti kho, āvuso, pañcannetaṁ kāmaguṇānaṁ adhivacanaṁ.
an6.26:3.6	Sa kho so, āvuso, ariyasāvako sabbaso ākāsasamena cetasā viharati vipulena mahaggatena appamāṇena averena abyāpajjena.
an6.26:3.7	Idampi kho, āvuso, ārammaṇaṁ karitvā evam’idhekacce sattā visuddhidhammā bhavanti.
an6.26:4.1	Puna caparaṁ, āvuso, ariyasāvako saṅghaṁ anussarati:
an6.26:4.2	‘suppaṭipanno bhagavato sāvakasaṅgho …pe… anuttaraṁ puññakkhettaṁ lokassā’ti.
an6.26:4.3	Yasmiṁ, āvuso, samaye ariyasāvako saṅghaṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.26:4.4	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.26:4.5	‘Gedho’ti kho, āvuso, pañcannetaṁ kāmaguṇānaṁ adhivacanaṁ.
an6.26:4.6	Sa kho so, āvuso, ariyasāvako sabbaso ākāsasamena cetasā viharati vipulena mahaggatena appamāṇena averena abyāpajjena.
an6.26:4.7	Idampi kho, āvuso, ārammaṇaṁ karitvā evam’idhekacce sattā visuddhidhammā bhavanti.
an6.26:5.1	Puna caparaṁ, āvuso, ariyasāvako attano sīlāni anussarati akhaṇḍāni …pe… samādhisaṁvattanikāni.
an6.26:5.2	Yasmiṁ, āvuso, samaye ariyasāvako attano sīlaṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.26:5.3	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.26:5.4	‘Gedho’ti kho, āvuso, pañcannetaṁ kāmaguṇānaṁ adhivacanaṁ.
an6.26:5.5	Sa kho so, āvuso, ariyasāvako sabbaso ākāsasamena cetasā viharati vipulena mahaggatena appamāṇena averena abyāpajjena.
an6.26:5.6	Idampi kho, āvuso, ārammaṇaṁ karitvā evam’idhekacce sattā visuddhidhammā bhavanti.
an6.26:6.1	Puna caparaṁ, āvuso, ariyasāvako attano cāgaṁ anussarati:
an6.26:6.2	‘lābhā vata me, suladdhaṁ vata me …pe…
an6.26:6.3	yācayogo dānasaṁvibhāgarato’ti.
an6.26:6.4	Yasmiṁ, āvuso, samaye ariyasāvako attano cāgaṁ anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.26:6.5	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.26:6.6	‘Gedho’ti kho, āvuso, pañcannetaṁ kāmaguṇānaṁ adhivacanaṁ.
an6.26:6.7	Sa kho so, āvuso, ariyasāvako sabbaso ākāsasamena cetasā viharati vipulena mahaggatena appamāṇena averena abyāpajjena.
an6.26:6.8	Idampi kho, āvuso, ārammaṇaṁ karitvā evam’idhekacce sattā visuddhidhammā bhavanti.
an6.26:7.1	Puna caparaṁ, āvuso, ariyasāvako devatā anussarati:
an6.26:7.2	‘santi devā cātumahārājikā, santi devā …pe… tatuttari.
an6.26:7.3	Yathārūpāya saddhāya samannāgatā tā devatā ito cutā tattha upapannā; mayhampi tathārūpā saddhā saṁvijjati.
an6.26:7.4	Yathārūpena sīlena …
an6.26:7.5	sutena …
an6.26:7.6	cāgena …
an6.26:7.7	paññāya samannāgatā tā devatā ito cutā tattha upapannā; mayhampi tathārūpā paññā saṁvijjatī’ti.
an6.26:7.8	Yasmiṁ, āvuso, samaye ariyasāvako attano ca tāsañca devatānaṁ saddhañca sīlañca sutañca cāgañca paññañca anussarati nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an6.26:7.9	ujugatamevassa tasmiṁ samaye cittaṁ hoti, nikkhantaṁ muttaṁ vuṭṭhitaṁ gedhamhā.
an6.26:7.10	‘Gedho’ti kho, āvuso, pañcannetaṁ kāmaguṇānaṁ adhivacanaṁ.
an6.26:7.11	Sa kho so, āvuso, ariyasāvako sabbaso ākāsasamena cetasā viharati vipulena mahaggatena appamāṇena averena abyāpajjena.
an6.26:7.12	Idampi kho, āvuso, ārammaṇaṁ karitvā evam’idhekacce sattā visuddhidhammā bhavanti.
an6.26:8.1	Acchariyaṁ, āvuso, abbhutaṁ, āvuso.
an6.26:8.2	Yāvañcidaṁ tena bhagavatā jānatā passatā arahatā sammāsambuddhena sambādhe okāsādhigamo anubuddho sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya, yadidaṁ cha anussatiṭṭhānānī”ti.
an6.26:8.3	Chaṭṭhaṁ.
an6.27:0.1	Aṅguttara Nikāya 6.27
an6.27:0.2	3. Anuttariyavagga
an6.27:0.3	Paṭhamasamayasutta
an6.27:1.1	Atha kho aññataro bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an6.27:1.2	“kati nu kho, bhante, samayā manobhāvanīyassa bhikkhuno dassanāya upasaṅkamitun”ti?
an6.27:1.3	“Chayime, bhikkhu, samayā manobhāvanīyassa bhikkhuno dassanāya upasaṅkamituṁ.
an6.27:2.1	Katame cha?
an6.27:2.2	Idha, bhikkhu, yasmiṁ samaye bhikkhu kāmarāgapariyuṭṭhitena cetasā viharati kāmarāgaparetena, uppannassa ca kāmarāgassa nissaraṇaṁ yathābhūtaṁ nappajānāti tasmiṁ samaye manobhāvanīyo bhikkhu upasaṅkamitvā evamassa vacanīyo:
an6.27:2.3	‘ahaṁ kho, āvuso, kāmarāgapariyuṭṭhitena cetasā viharāmi kāmarāgaparetena, uppannassa ca kāmarāgassa nissaraṇaṁ yathābhūtaṁ nappajānāmi.
an6.27:2.4	Sādhu vata me āyasmā kāmarāgassa pahānāya dhammaṁ desetū’ti.
an6.27:2.5	Tassa manobhāvanīyo bhikkhu kāmarāgassa pahānāya dhammaṁ deseti.
an6.27:2.6	Ayaṁ, bhikkhu, paṭhamo samayo manobhāvanīyassa bhikkhuno dassanāya upasaṅkamituṁ.
an6.27:3.1	Puna caparaṁ, bhikkhu, yasmiṁ samaye bhikkhu byāpādapariyuṭṭhitena cetasā viharati byāpādaparetena, uppannassa ca byāpādassa nissaraṇaṁ yathābhūtaṁ nappajānāti tasmiṁ samaye manobhāvanīyo bhikkhu upasaṅkamitvā evamassa vacanīyo:
an6.27:3.2	‘ahaṁ kho, āvuso, byāpādapariyuṭṭhitena cetasā viharāmi byāpādaparetena, uppannassa ca byāpādassa nissaraṇaṁ yathābhūtaṁ nappajānāmi.
an6.27:3.3	Sādhu vata me āyasmā byāpādassa pahānāya dhammaṁ desetū’ti.
an6.27:3.4	Tassa manobhāvanīyo bhikkhu byāpādassa pahānāya dhammaṁ deseti.
an6.27:3.5	Ayaṁ, bhikkhu, dutiyo samayo manobhāvanīyassa bhikkhuno dassanāya upasaṅkamituṁ.
an6.27:4.1	Puna caparaṁ, bhikkhu, yasmiṁ samaye bhikkhu thinamiddhapariyuṭṭhitena cetasā viharati thinamiddhaparetena, uppannassa ca thinamiddhassa nissaraṇaṁ yathābhūtaṁ nappajānāti tasmiṁ samaye manobhāvanīyo bhikkhu upasaṅkamitvā evamassa vacanīyo:
an6.27:4.2	‘ahaṁ kho, āvuso, thinamiddhapariyuṭṭhitena cetasā viharāmi thinamiddhaparetena, uppannassa ca thinamiddhassa nissaraṇaṁ yathābhūtaṁ nappajānāmi.
an6.27:4.3	Sādhu vata me āyasmā thinamiddhassa pahānāya dhammaṁ desetū’ti.
an6.27:4.4	Tassa manobhāvanīyo bhikkhu thinamiddhassa pahānāya dhammaṁ deseti.
an6.27:4.5	Ayaṁ, bhikkhu, tatiyo samayo manobhāvanīyassa bhikkhuno dassanāya upasaṅkamituṁ.
an6.27:5.1	Puna caparaṁ, bhikkhu, yasmiṁ samaye bhikkhu uddhaccakukkuccapariyuṭṭhitena cetasā viharati uddhaccakukkuccaparetena, uppannassa ca uddhaccakukkuccassa nissaraṇaṁ yathābhūtaṁ nappajānāti tasmiṁ samaye manobhāvanīyo bhikkhu upasaṅkamitvā evamassa vacanīyo:
an6.27:5.2	‘ahaṁ kho, āvuso, uddhaccakukkuccapariyuṭṭhitena cetasā viharāmi uddhaccakukkuccaparetena, uppannassa ca uddhaccakukkuccassa nissaraṇaṁ yathābhūtaṁ nappajānāmi.
an6.27:5.3	Sādhu vata me āyasmā uddhaccakukkuccassa pahānāya dhammaṁ desetū’ti.
an6.27:5.4	Tassa manobhāvanīyo bhikkhu uddhaccakukkuccassa pahānāya dhammaṁ deseti.
an6.27:5.5	Ayaṁ, bhikkhu, catuttho samayo manobhāvanīyassa bhikkhuno dassanāya upasaṅkamituṁ.
an6.27:6.1	Puna caparaṁ, bhikkhu, yasmiṁ samaye bhikkhu vicikicchāpariyuṭṭhitena cetasā viharati vicikicchāparetena, uppannāya ca vicikicchāya nissaraṇaṁ yathābhūtaṁ nappajānāti tasmiṁ samaye manobhāvanīyo bhikkhu upasaṅkamitvā evamassa vacanīyo:
an6.27:6.2	‘ahaṁ, āvuso, vicikicchāpariyuṭṭhitena cetasā viharāmi vicikicchāparetena, uppannāya ca vicikicchāya nissaraṇaṁ yathābhūtaṁ nappajānāmi.
an6.27:6.3	Sādhu vata me āyasmā vicikicchāya pahānāya dhammaṁ desetū’ti.
an6.27:6.4	Tassa manobhāvanīyo bhikkhu vicikicchāya pahānāya dhammaṁ deseti.
an6.27:6.5	Ayaṁ, bhikkhu, pañcamo samayo manobhāvanīyassa bhikkhuno dassanāya upasaṅkamituṁ.
an6.27:7.1	Puna caparaṁ, bhikkhu, yasmiṁ samaye bhikkhu yaṁ nimittaṁ āgamma yaṁ nimittaṁ manasikaroto anantarā āsavānaṁ khayo hoti taṁ nimittaṁ nappajānāti tasmiṁ samaye manobhāvanīyo bhikkhu upasaṅkamitvā evamassa vacanīyo:
an6.27:7.2	‘ahaṁ kho, āvuso, yaṁ nimittaṁ āgamma yaṁ nimittaṁ manasikaroto anantarā āsavānaṁ khayo hoti, taṁ nimittaṁ nappajānāmi.
an6.27:7.3	Sādhu vata me āyasmā āsavānaṁ khayāya dhammaṁ desetū’ti.
an6.27:7.4	Tassa manobhāvanīyo bhikkhu āsavānaṁ khayāya dhammaṁ deseti.
an6.27:7.5	Ayaṁ, bhikkhu, chaṭṭho samayo manobhāvanīyassa bhikkhuno dassanāya upasaṅkamituṁ.
an6.27:8.1	Ime kho, bhikkhu, cha samayā manobhāvanīyassa bhikkhuno dassanāya upasaṅkamitun”ti.
an6.27:8.2	Sattamaṁ.
an6.28:0.1	Aṅguttara Nikāya 6.28
an6.28:0.2	3. Anuttariyavagga
an6.28:0.3	Dutiyasamayasutta
an6.28:1.1	Ekaṁ samayaṁ sambahulā therā bhikkhū bārāṇasiyaṁ viharanti isipatane migadāye.
an6.28:1.2	Atha kho tesaṁ therānaṁ bhikkhūnaṁ pacchābhattaṁ piṇḍapātapaṭikkantānaṁ maṇḍalamāḷe sannisinnānaṁ sannipatitānaṁ ayamantarākathā udapādi:
an6.28:1.3	“ko nu kho, āvuso, samayo manobhāvanīyassa bhikkhuno dassanāya upasaṅkamitun”ti?
an6.28:2.1	Evaṁ vutte, aññataro bhikkhu there bhikkhū etadavoca:
an6.28:2.2	“yasmiṁ, āvuso, samaye manobhāvanīyo bhikkhu pacchābhattaṁ piṇḍapātapaṭikkanto pāde pakkhāletvā nisinno hoti pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā, so samayo manobhāvanīyassa bhikkhuno dassanāya upasaṅkamitun”ti.
an6.28:3.1	Evaṁ vutte, aññataro bhikkhu taṁ bhikkhuṁ etadavoca:
an6.28:3.2	“na kho, āvuso, so samayo manobhāvanīyassa bhikkhuno dassanāya upasaṅkamituṁ.
an6.28:3.3	Yasmiṁ, āvuso, samaye manobhāvanīyo bhikkhu pacchābhattaṁ piṇḍapātapaṭikkanto pāde pakkhāletvā nisinno hoti pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā, cārittakilamathopissa tasmiṁ samaye appaṭippassaddho hoti, bhattakilamathopissa tasmiṁ samaye appaṭippassaddho hoti.
an6.28:3.4	Tasmā so asamayo manobhāvanīyassa bhikkhuno dassanāya upasaṅkamituṁ.
an6.28:3.5	Yasmiṁ, āvuso, samaye manobhāvanīyo bhikkhu sāyanhasamayaṁ paṭisallānā vuṭṭhito vihārapacchāyāyaṁ nisinno hoti pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā, so samayo manobhāvanīyassa bhikkhuno dassanāya upasaṅkamitun”ti.
an6.28:4.1	Evaṁ vutte, aññataro bhikkhu taṁ bhikkhuṁ etadavoca:
an6.28:4.2	“na kho, āvuso, so samayo manobhāvanīyassa bhikkhuno dassanāya upasaṅkamituṁ.
an6.28:4.3	Yasmiṁ, āvuso, samaye manobhāvanīyo bhikkhu sāyanhasamayaṁ paṭisallānā vuṭṭhito vihārapacchāyāyaṁ nisinno hoti pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā, yadevassa divā samādhinimittaṁ manasikataṁ hoti tadevassa tasmiṁ samaye samudācarati.
an6.28:4.4	Tasmā so asamayo manobhāvanīyassa bhikkhuno dassanāya upasaṅkamituṁ.
an6.28:4.5	Yasmiṁ, āvuso, samaye manobhāvanīyo bhikkhu rattiyā paccūsasamayaṁ paccuṭṭhāya nisinno hoti pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā, so samayo manobhāvanīyassa bhikkhuno dassanāya upasaṅkamitun”ti.
an6.28:5.1	Evaṁ vutte, aññataro bhikkhu taṁ bhikkhuṁ etadavoca:
an6.28:5.2	“na kho, āvuso, so samayo manobhāvanīyassa bhikkhuno dassanāya upasaṅkamituṁ.
an6.28:5.3	Yasmiṁ, āvuso, samaye manobhāvanīyo bhikkhu rattiyā paccūsasamayaṁ paccuṭṭhāya nisinno hoti pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā, ojaṭṭhāyissa tasmiṁ samaye kāyo hoti phāsussa hoti buddhānaṁ sāsanaṁ manasi kātuṁ.
an6.28:5.4	Tasmā so asamayo manobhāvanīyassa bhikkhuno dassanāya upasaṅkamitun”ti.
an6.28:6.1	Evaṁ vutte āyasmā mahākaccāno there bhikkhū etadavoca:
an6.28:6.2	“sammukhā metaṁ, āvuso, bhagavato sutaṁ sammukhā paṭiggahitaṁ:
an6.28:6.3	‘chayime, bhikkhu, samayā manobhāvanīyassa bhikkhuno dassanāya upasaṅkamituṁ.
an6.28:7.1	Katame cha?
an6.28:7.2	Idha, bhikkhu, yasmiṁ samaye bhikkhu kāmarāgapariyuṭṭhitena cetasā viharati kāmarāgaparetena, uppannassa ca kāmarāgassa nissaraṇaṁ yathābhūtaṁ nappajānāti, tasmiṁ samaye manobhāvanīyo bhikkhu upasaṅkamitvā evamassa vacanīyo:
an6.28:7.3	“ahaṁ kho, āvuso, kāmarāgapariyuṭṭhitena cetasā viharāmi kāmarāgaparetena, uppannassa ca kāmarāgassa nissaraṇaṁ yathābhūtaṁ nappajānāmi.
an6.28:7.4	Sādhu vata me āyasmā kāmarāgassa pahānāya dhammaṁ desetū”ti.
an6.28:7.5	Tassa manobhāvanīyo bhikkhu kāmarāgassa pahānāya dhammaṁ deseti.
an6.28:7.6	Ayaṁ, bhikkhu, paṭhamo samayo manobhāvanīyassa bhikkhuno dassanāya upasaṅkamituṁ.
an6.28:8.1	Puna caparaṁ, bhikkhu, yasmiṁ samaye bhikkhu byāpādapariyuṭṭhitena cetasā viharati …pe….
an6.28:9.1	Thinamiddhapariyuṭṭhitena cetasā viharati ….
an6.28:10.1	Uddhaccakukkuccapariyuṭṭhitena cetasā viharati ….
an6.28:11.1	Vicikicchāpariyuṭṭhitena cetasā viharati ….
an6.28:12.1	Yaṁ nimittaṁ āgamma yaṁ nimittaṁ manasikaroto anantarā āsavānaṁ khayo hoti, taṁ nimittaṁ na jānāti na passati, tasmiṁ samaye manobhāvanīyo bhikkhu upasaṅkamitvā evamassa vacanīyo:
an6.28:12.2	“ahaṁ kho, āvuso, yaṁ nimittaṁ āgamma yaṁ nimittaṁ manasikaroto anantarā āsavānaṁ khayo hoti taṁ nimittaṁ na jānāmi na passāmi.
an6.28:12.3	Sādhu vata me āyasmā āsavānaṁ khayāya dhammaṁ desetū”ti.
an6.28:12.4	Tassa manobhāvanīyo bhikkhu āsavānaṁ khayāya dhammaṁ deseti.
an6.28:12.5	Ayaṁ, bhikkhu, chaṭṭho samayo manobhāvanīyassa bhikkhuno dassanāya upasaṅkamituṁ’.
an6.28:13.1	Sammukhā metaṁ, āvuso, bhagavato sutaṁ sammukhā paṭiggahitaṁ:
an6.28:13.2	‘ime kho, bhikkhu, cha samayā manobhāvanīyassa bhikkhuno dassanāya upasaṅkamitun’”ti.
an6.28:13.3	Aṭṭhamaṁ.
an6.29:0.1	Aṅguttara Nikāya 6.29
an6.29:0.2	3. Anuttariyavagga
an6.29:0.3	Udāyīsutta
an6.29:1.1	Atha kho bhagavā āyasmantaṁ udāyiṁ āmantesi:
an6.29:1.2	“kati nu kho, udāyi, anussatiṭṭhānānī”ti?
an6.29:1.3	Evaṁ vutte, āyasmā udāyī tuṇhī ahosi.
an6.29:1.4	Dutiyampi kho bhagavā āyasmantaṁ udāyiṁ āmantesi:
an6.29:1.5	“kati nu kho, udāyi, anussatiṭṭhānānī”ti?
an6.29:1.6	Dutiyampi kho āyasmā udāyī tuṇhī ahosi.
an6.29:1.7	Tatiyampi kho bhagavā āyasmantaṁ udāyiṁ āmantesi:
an6.29:1.8	“kati nu kho, udāyi, anussatiṭṭhānānī”ti?
an6.29:1.9	Tatiyampi kho āyasmā udāyī tuṇhī ahosi.
an6.29:2.1	Atha kho āyasmā ānando āyasmantaṁ udāyiṁ etadavoca:
an6.29:2.2	“satthā taṁ, āvuso udāyi, āmantesī”ti.
an6.29:2.3	“Suṇomahaṁ, āvuso ānanda, bhagavato.
an6.29:2.4	Idha, bhante, bhikkhu anekavihitaṁ pubbenivāsaṁ anussarati—Seyyathidaṁ—ekampi jātiṁ dvepi jātiyo …pe…. Iti sākāraṁ sauddesaṁ anekavihitaṁ pubbenivāsaṁ anussarati.
an6.29:2.5	Idaṁ, bhante, anussatiṭṭhānan”ti.
an6.29:3.1	Atha kho bhagavā āyasmantaṁ ānandaṁ āmantesi:
an6.29:3.2	“aññāsiṁ kho ahaṁ, ānanda:
an6.29:3.3	‘nevāyaṁ udāyī moghapuriso adhicittaṁ anuyutto viharatī’ti.
an6.29:3.4	Kati nu kho, ānanda, anussatiṭṭhānānī”ti?
an6.29:4.1	“Pañca, bhante, anussatiṭṭhānāni.
an6.29:4.2	Katamāni pañca?
an6.29:4.3	Idha, bhante, bhikkhu vivicceva kāmehi …pe… tatiyaṁ jhānaṁ upasampajja viharati.
an6.29:4.4	Idaṁ, bhante, anussatiṭṭhānaṁ evaṁ bhāvitaṁ evaṁ bahulīkataṁ diṭṭhadhammasukhavihārāya saṁvattati.
an6.29:5.1	“Puna caparaṁ, bhante, bhikkhu ālokasaññaṁ manasi karoti, divā saññaṁ adhiṭṭhāti, yathā divā tathā rattiṁ, yathā rattiṁ tathā divā;
an6.29:5.2	iti vivaṭena cetasā apariyonaddhena sappabhāsaṁ cittaṁ bhāveti.
an6.29:5.3	Idaṁ, bhante, anussatiṭṭhānaṁ evaṁ bhāvitaṁ evaṁ bahulīkataṁ ñāṇadassanappaṭilābhāya saṁvattati.
an6.29:6.1	Puna caparaṁ, bhante, bhikkhu imameva kāyaṁ uddhaṁ pādatalā adho kesamatthakā tacapariyantaṁ pūraṁ nānappakārassa asucino paccavekkhati:
an6.29:6.2	‘atthi imasmiṁ kāye kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ, pittaṁ semhaṁ pubbo lohitaṁ sedo medo, assu vasā kheḷo siṅghāṇikā lasikā muttan’ti.
an6.29:6.3	Idaṁ, bhante, anussatiṭṭhānaṁ evaṁ bhāvitaṁ evaṁ bahulīkataṁ kāmarāgappahānāya saṁvattati.
an6.29:7.1	Puna caparaṁ, bhante, bhikkhu seyyathāpi passeyya sarīraṁ sivathikāya chaṭṭitaṁ ekāhamataṁ vā dvīhamataṁ vā tīhamataṁ vā uddhumātakaṁ vinīlakaṁ vipubbakajātaṁ.
an6.29:7.2	So imameva kāyaṁ evaṁ upasaṁharati:
an6.29:7.3	‘ayampi kho kāyo evaṁdhammo evaṁbhāvī evaṁanatīto’ti.
an6.29:8.1	Seyyathāpi vā pana passeyya sarīraṁ sīvathikāya chaṭṭitaṁ kākehi vā khajjamānaṁ kulalehi vā khajjamānaṁ gijjhehi vā khajjamānaṁ sunakhehi vā khajjamānaṁ siṅgālehi vā khajjamānaṁ vividhehi vā pāṇakajātehi khajjamānaṁ.
an6.29:8.2	So imameva kāyaṁ evaṁ upasaṁharati:
an6.29:8.3	‘ayampi kho kāyo evaṁdhammo evaṁbhāvī evaṁanatīto’ti.
an6.29:9.1	Seyyathāpi vā pana passeyya sarīraṁ sīvathikāya chaṭṭitaṁ aṭṭhikasaṅkhalikaṁ samaṁsalohitaṁ nhārusambandhaṁ …pe…
an6.29:9.2	aṭṭhikasaṅkhalikaṁ nimmaṁsalohitamakkhitaṁ nhārusambandhaṁ …
an6.29:9.3	aṭṭhikasaṅkhalikaṁ apagatamaṁsalohitaṁ nhārusambandhaṁ.
an6.29:9.4	Aṭṭhikāni apagatasambandhāni disāvidisāvikkhittāni, aññena hatthaṭṭhikaṁ aññena pādaṭṭhikaṁ aññena jaṅghaṭṭhikaṁ aññena ūruṭṭhikaṁ aññena kaṭiṭṭhikaṁ aññena phāsukaṭṭhikaṁ aññena piṭṭhikaṇṭakaṭṭhikaṁ aññena khandhaṭṭhikaṁ aññena gīvaṭṭhikaṁ aññena hanukaṭṭhikaṁ aññena dantakaṭṭhikaṁ aññena sīsakaṭāhaṁ, aṭṭhikāni setāni saṅkhavaṇṇappaṭibhāgāni aṭṭhikāni puñjakitāni terovassikāni aṭṭhikāni pūtīni cuṇṇakajātāni.
an6.29:9.5	So imameva kāyaṁ evaṁ upasaṁharati:
an6.29:9.6	‘ayampi kho kāyo evaṁdhammo evaṁbhāvī evaṁanatīto’ti.
an6.29:9.7	Idaṁ, bhante, anussatiṭṭhānaṁ evaṁ bhāvitaṁ evaṁ bahulīkataṁ asmimānasamugghātāya saṁvattati.
an6.29:10.1	Puna caparaṁ, bhante, bhikkhu sukhassa ca pahānā …pe… catutthaṁ jhānaṁ upasampajja viharati.
an6.29:10.2	Idaṁ, bhante, anussatiṭṭhānaṁ evaṁ bhāvitaṁ evaṁ bahulīkataṁ anekadhātupaṭivedhāya saṁvattati.
an6.29:10.3	Imāni kho, bhante, pañca anussatiṭṭhānānī”ti.
an6.29:11.1	“Sādhu sādhu, ānanda.
an6.29:11.2	Tena hi tvaṁ, ānanda, idampi chaṭṭhaṁ anussatiṭṭhānaṁ dhārehi.
an6.29:11.3	Idhānanda, bhikkhu satova abhikkamati satova paṭikkamati satova tiṭṭhati satova nisīdati satova seyyaṁ kappeti satova kammaṁ adhiṭṭhāti.
an6.29:11.4	Idaṁ, ānanda, anussatiṭṭhānaṁ evaṁ bhāvitaṁ evaṁ bahulīkataṁ satisampajaññāya saṁvattatī”ti.
an6.29:11.5	Navamaṁ.
an6.30:0.1	Aṅguttara Nikāya 6.30
an6.30:0.2	3. Anuttariyavagga
an6.30:0.3	Anuttariyasutta
an6.30:1.1	“Chayimāni, bhikkhave, anuttariyāni.
an6.30:1.2	Katamāni cha?
an6.30:1.3	Dassanānuttariyaṁ, savanānuttariyaṁ, lābhānuttariyaṁ, sikkhānuttariyaṁ, pāricariyānuttariyaṁ, anussatānuttariyanti.
an6.30:2.1	Katamañca, bhikkhave, dassanānuttariyaṁ?
an6.30:2.2	Idha, bhikkhave, ekacco hatthiratanampi dassanāya gacchati, assaratanampi dassanāya gacchati, maṇiratanampi dassanāya gacchati, uccāvacaṁ vā pana dassanāya gacchati, samaṇaṁ vā brāhmaṇaṁ vā micchādiṭṭhikaṁ micchāpaṭipannaṁ dassanāya gacchati.
an6.30:2.3	Atthetaṁ, bhikkhave, dassanaṁ; netaṁ natthīti vadāmi.
an6.30:2.4	Tañca kho etaṁ, bhikkhave, dassanaṁ hīnaṁ gammaṁ pothujjanikaṁ anariyaṁ anatthasaṁhitaṁ, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattati.
an6.30:2.5	Yo ca kho, bhikkhave, tathāgataṁ vā tathāgatasāvakaṁ vā dassanāya gacchati niviṭṭhasaddho niviṭṭhapemo ekantagato abhippasanno, etadānuttariyaṁ, bhikkhave, dassanānaṁ sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya, yadidaṁ tathāgataṁ vā tathāgatasāvakaṁ vā dassanāya gacchati niviṭṭhasaddho niviṭṭhapemo ekantagato abhippasanno.
an6.30:2.6	Idaṁ vuccati, bhikkhave, dassanānuttariyaṁ.
an6.30:2.7	Iti dassanānuttariyaṁ.
an6.30:3.1	Savanānuttariyañca kathaṁ hoti?
an6.30:3.2	Idha, bhikkhave, ekacco bherisaddampi savanāya gacchati, vīṇāsaddampi savanāya gacchati, gītasaddampi savanāya gacchati, uccāvacaṁ vā pana savanāya gacchati, samaṇassa vā brāhmaṇassa vā micchādiṭṭhikassa micchāpaṭipannassa dhammassavanāya gacchati.
an6.30:3.3	Atthetaṁ, bhikkhave, savanaṁ; netaṁ natthīti vadāmi.
an6.30:3.4	Tañca kho etaṁ, bhikkhave, savanaṁ hīnaṁ gammaṁ pothujjanikaṁ anariyaṁ anatthasaṁhitaṁ, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattati.
an6.30:3.5	Yo ca kho, bhikkhave, tathāgatassa vā tathāgatasāvakassa vā dhammassavanāya gacchati niviṭṭhasaddho niviṭṭhapemo ekantagato abhippasanno, etadānuttariyaṁ, bhikkhave, savanānaṁ sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya, yadidaṁ tathāgatassa vā tathāgatasāvakassa vā dhammassavanāya gacchati niviṭṭhasaddho niviṭṭhapemo ekantagato abhippasanno.
an6.30:3.6	Idaṁ vuccati, bhikkhave, savanānuttariyaṁ.
an6.30:3.7	Iti dassanānuttariyaṁ, savanānuttariyaṁ.
an6.30:4.1	Lābhānuttariyañca kathaṁ hoti?
an6.30:4.2	Idha, bhikkhave, ekacco puttalābhampi labhati, dāralābhampi labhati, dhanalābhampi labhati, uccāvacaṁ vā pana lābhaṁ labhati, samaṇe vā brāhmaṇe vā micchādiṭṭhike micchāpaṭipanne saddhaṁ paṭilabhati.
an6.30:4.3	Attheso, bhikkhave, lābho; neso natthīti vadāmi.
an6.30:4.4	So ca kho eso, bhikkhave, lābho hīno gammo pothujjaniko anariyo anatthasaṁhito, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattati.
an6.30:4.5	Yo ca kho, bhikkhave, tathāgate vā tathāgatasāvake vā saddhaṁ paṭilabhati niviṭṭhasaddho niviṭṭhapemo ekantagato abhippasanno, etadānuttariyaṁ, bhikkhave, lābhānaṁ sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya, yadidaṁ tathāgate vā tathāgatasāvake vā saddhaṁ paṭilabhati niviṭṭhasaddho niviṭṭhapemo ekantagato abhippasanno.
an6.30:4.6	Idaṁ vuccati, bhikkhave, lābhānuttariyaṁ.
an6.30:4.7	Iti dassanānuttariyaṁ, savanānuttariyaṁ, lābhānuttariyaṁ.
an6.30:5.1	Sikkhānuttariyañca kathaṁ hoti?
an6.30:5.2	Idha, bhikkhave, ekacco hatthismimpi sikkhati, assasmimpi sikkhati, rathasmimpi sikkhati, dhanusmimpi sikkhati, tharusmimpi sikkhati, uccāvacaṁ vā pana sikkhati, samaṇassa vā brāhmaṇassa vā micchādiṭṭhikassa micchāpaṭipannassa sikkhati.
an6.30:5.3	Atthesā, bhikkhave, sikkhā; nesā natthīti vadāmi.
an6.30:5.4	Sā ca kho esā, bhikkhave, sikkhā hīnā gammā pothujjanikā anariyā anatthasaṁhitā, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattati.
an6.30:5.5	Yo ca kho, bhikkhave, tathāgatappavedite dhammavinaye adhisīlampi sikkhati, adhicittampi sikkhati, adhipaññampi sikkhati niviṭṭhasaddho niviṭṭhapemo ekantagato abhippasanno, etadānuttariyaṁ, bhikkhave, sikkhānaṁ sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya, yadidaṁ tathāgatappavedite dhammavinaye adhisīlampi sikkhati, adhicittampi sikkhati, adhipaññampi sikkhati, niviṭṭhasaddho niviṭṭhapemo ekantagato abhippasanno.
an6.30:5.6	Idaṁ vuccati, bhikkhave, sikkhānuttariyaṁ.
an6.30:5.7	Iti dassanānuttariyaṁ, savanānuttariyaṁ, lābhānuttariyaṁ, sikkhānuttariyaṁ.
an6.30:6.1	Pāricariyānuttariyañca kathaṁ hoti?
an6.30:6.2	Idha, bhikkhave, ekacco khattiyampi paricarati, brāhmaṇampi paricarati, gahapatimpi paricarati, uccāvacaṁ vā pana paricarati, samaṇaṁ vā brāhmaṇaṁ vā micchādiṭṭhikaṁ micchāpaṭipannaṁ paricarati.
an6.30:6.3	Atthesā, bhikkhave, pāricariyā; nesā natthīti vadāmi.
an6.30:6.4	Sā ca kho esā, bhikkhave, pāricariyā hīnā gammā pothujjanikā anariyā anatthasaṁhitā, na nibbidāya …pe… na nibbānāya saṁvattati.
an6.30:6.5	Yo ca kho, bhikkhave, tathāgataṁ vā tathāgatasāvakaṁ vā paricarati niviṭṭhasaddho niviṭṭhapemo ekantagato abhippasanno, etadānuttariyaṁ, bhikkhave, pāricariyānaṁ sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya, yadidaṁ tathāgataṁ vā tathāgatasāvakaṁ vā paricarati niviṭṭhasaddho niviṭṭhapemo ekantagato abhippasanno.
an6.30:6.6	Idaṁ vuccati, bhikkhave, pāricariyānuttariyaṁ.
an6.30:6.7	Iti dassanānuttariyaṁ, savanānuttariyaṁ, lābhānuttariyaṁ, sikkhānuttariyaṁ, pāricariyānuttariyaṁ.
an6.30:7.1	Anussatānuttariyañca kathaṁ hoti?
an6.30:7.2	Idha, bhikkhave, ekacco puttalābhampi anussarati, dāralābhampi anussarati, dhanalābhampi anussarati, uccāvacaṁ vā pana lābhaṁ anussarati, samaṇaṁ vā brāhmaṇaṁ vā micchādiṭṭhikaṁ micchāpaṭipannaṁ anussarati.
an6.30:7.3	Atthesā, bhikkhave, anussati; nesā natthīti vadāmi.
an6.30:7.4	Sā ca kho esā, bhikkhave, anussati hīnā gammā pothujjanikā anariyā anatthasaṁhitā, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattati.
an6.30:7.5	Yo ca kho, bhikkhave, tathāgataṁ vā tathāgatasāvakaṁ vā anussarati niviṭṭhasaddho niviṭṭhapemo ekantagato abhippasanno, etadānuttariyaṁ, bhikkhave, anussatīnaṁ sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya, yadidaṁ tathāgataṁ vā tathāgatasāvakaṁ vā anussarati niviṭṭhasaddho niviṭṭhapemo ekantagato abhippasanno.
an6.30:7.6	Idaṁ vuccati, bhikkhave, anussatānuttariyaṁ.
an6.30:8.1	Imāni kho, bhikkhave, cha anuttariyānīti.
an6.30:9.1	Ye dassanānuttaraṁ laddhā,
an6.30:9.2	savanañca anuttaraṁ;
an6.30:9.3	Lābhānuttariyaṁ laddhā,
an6.30:9.4	sikkhānuttariye ratā.
an6.30:10.1	Upaṭṭhitā pāricariyā,
an6.30:10.2	bhāvayanti anussatiṁ;
an6.30:10.3	Vivekappaṭisaṁyuttaṁ,
an6.30:10.4	khemaṁ amatagāminiṁ.
an6.30:11.1	Appamāde pamuditā,
an6.30:11.2	nipakā sīlasaṁvutā;
an6.30:11.3	Te ve kālena paccenti,
an6.30:11.4	yattha dukkhaṁ nirujjhatī”ti.
an6.30:11.5	Dasamaṁ.
an6.30:11.6	Anuttariyavaggo tatiyo.
an6.30:12.0	Tassuddānaṁ
an6.30:12.1	Sāmako aparihāniyo,
an6.30:12.2	Bhayaṁ himavānussati;
an6.30:12.3	Kaccāno dve ca samayā,
an6.30:12.4	Udāyī anuttariyenāti.
an6.31:0.1	Aṅguttara Nikāya 6.31
an6.31:0.2	4. Devatāvagga
an6.31:0.3	Sekhasutta
an6.31:1.1	“Chayime, bhikkhave, dhammā sekhassa bhikkhuno parihānāya saṁvattanti.
an6.31:1.2	Katame cha?
an6.31:1.3	Kammārāmatā, bhassārāmatā, niddārāmatā, saṅgaṇikārāmatā, indriyesu aguttadvāratā, bhojane amattaññutā—
an6.31:1.4	ime kho, bhikkhave, cha dhammā sekhassa bhikkhuno parihānāya saṁvattanti.
an6.31:2.1	Chayime, bhikkhave, dhammā sekhassa bhikkhuno aparihānāya saṁvattanti.
an6.31:2.2	Katame cha?
an6.31:2.3	Na kammārāmatā, na bhassārāmatā, na niddārāmatā, na saṅgaṇikārāmatā, indriyesu guttadvāratā, bhojane mattaññutā—
an6.31:2.4	ime kho, bhikkhave, cha dhammā sekhassa bhikkhuno aparihānāya saṁvattantī”ti.
an6.31:2.5	Paṭhamaṁ.
an6.32:0.1	Aṅguttara Nikāya 6.32
an6.32:0.2	4. Devatāvagga
an6.32:0.3	Paṭhamaaparihānasutta
an6.32:1.1	Atha kho aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitā kho sā devatā bhagavantaṁ etadavoca:
an6.32:2.1	“Chayime, bhante, dhammā bhikkhuno aparihānāya saṁvattanti.
an6.32:2.2	Katame cha?
an6.32:2.3	Satthugāravatā, dhammagāravatā, saṅghagāravatā, sikkhāgāravatā, appamādagāravatā, paṭisanthāragāravatā—
an6.32:2.4	ime kho, bhante, cha dhammā bhikkhuno aparihānāya saṁvattantī”ti.
an6.32:2.5	Idamavoca sā devatā.
an6.32:2.6	Samanuñño satthā ahosi.
an6.32:2.7	Atha kho sā devatā “samanuñño me satthā”ti bhagavantaṁ abhivādetvā padakkhiṇaṁ katvā tatthevantaradhāyi.
an6.32:3.1	Atha kho bhagavā tassā rattiyā accayena bhikkhū āmantesi:
an6.32:3.2	“imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, bhikkhave, sā devatā maṁ etadavoca:
an6.32:3.3	‘chayime, bhante, dhammā bhikkhuno aparihānāya saṁvattanti.
an6.32:3.4	Katame cha?
an6.32:3.5	Satthugāravatā, dhammagāravatā, saṅghagāravatā, sikkhāgāravatā, appamādagāravatā, paṭisanthāragāravatā—
an6.32:3.6	ime kho, bhante, cha dhammā bhikkhuno aparihānāya saṁvattantī’ti.
an6.32:3.7	Idamavoca, bhikkhave, sā devatā.
an6.32:3.8	Idaṁ vatvā maṁ abhivādetvā padakkhiṇaṁ katvā tatthevantaradhāyīti.
an6.32:4.1	Satthugaru dhammagaru,
an6.32:4.2	saṅghe ca tibbagāravo;
an6.32:4.3	Appamādagaru bhikkhu,
an6.32:4.4	paṭisanthāragāravo;
an6.32:4.5	Abhabbo parihānāya,
an6.32:4.6	nibbānasseva santike”ti.
an6.32:4.7	Dutiyaṁ.
an6.33:0.1	Aṅguttara Nikāya 6.33
an6.33:0.2	4. Devatāvagga
an6.33:0.3	Dutiyaaparihānasutta
an6.33:1.1	“Imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, bhikkhave, sā devatā maṁ etadavoca:
an6.33:1.2	‘chayime, bhante, dhammā bhikkhuno aparihānāya saṁvattanti.
an6.33:1.3	Katame cha?
an6.33:1.4	Satthugāravatā, dhammagāravatā, saṅghagāravatā, sikkhāgāravatā, hirigāravatā, ottappagāravatā—
an6.33:1.5	ime kho, bhante, cha dhammā bhikkhuno aparihānāya saṁvattantī’ti.
an6.33:1.6	Idamavoca, bhikkhave, sā devatā.
an6.33:1.7	Idaṁ vatvā maṁ abhivādetvā padakkhiṇaṁ katvā tatthevantaradhāyīti.
an6.33:2.1	Satthugaru dhammagaru,
an6.33:2.2	saṅghe ca tibbagāravo;
an6.33:2.3	Hiriottappasampanno,
an6.33:2.4	sappatisso sagāravo;
an6.33:2.5	Abhabbo parihānāya,
an6.33:2.6	nibbānasseva santike”ti.
an6.33:2.7	Tatiyaṁ.
an6.34:0.1	Aṅguttara Nikāya 6.34
an6.34:0.2	4. Devatāvagga
an6.34:0.3	Mahāmoggallānasutta
an6.34:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an6.34:1.2	Atha kho āyasmato mahāmoggallānassa rahogatassa paṭisallīnassa evaṁ cetaso parivitakko udapādi:
an6.34:1.3	“katamesānaṁ devānaṁ evaṁ ñāṇaṁ hoti:
an6.34:1.4	‘sotāpannā nāma avinipātadhammā niyatā sambodhiparāyaṇā’”ti?
an6.34:1.5	Tena kho pana samayena tisso nāma bhikkhu adhunākālaṅkato aññataraṁ brahmalokaṁ upapanno hoti.
an6.34:1.6	Tatrapi naṁ evaṁ jānanti:
an6.34:1.7	“tisso brahmā mahiddhiko mahānubhāvo”ti.
an6.34:2.1	Atha kho āyasmā mahāmoggallāno—seyyathāpi nāma balavā puriso samiñjitaṁ vā bāhaṁ pasāreyya pasāritaṁ vā bāhaṁ samiñjeyya; evamevaṁ—jetavane antarahito tasmiṁ brahmaloke pāturahosi.
an6.34:2.2	Addasā kho tisso brahmā āyasmantaṁ mahāmoggallānaṁ dūratova āgacchantaṁ.
an6.34:2.3	Disvāna āyasmantaṁ mahāmoggallānaṁ etadavoca:
an6.34:2.4	“ehi kho, mārisa moggallāna; svāgataṁ, mārisa moggallāna;
an6.34:2.5	cirassaṁ kho, mārisa moggallāna; imaṁ pariyāyamakāsi, yadidaṁ idhāgamanāya.
an6.34:2.6	Nisīda, mārisa moggallāna, idamāsanaṁ paññattan”ti.
an6.34:2.7	Nisīdi kho āyasmā mahāmoggallāno paññatte āsane.
an6.34:2.8	Tissopi kho brahmā āyasmantaṁ mahāmoggallānaṁ abhivādetvā ekamantaṁ nisīdi.
an6.34:2.9	Ekamantaṁ nisinnaṁ kho tissaṁ brahmānaṁ āyasmā mahāmoggallāno etadavoca:
an6.34:3.1	“Katamesānaṁ kho, tissa, devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’”ti?
an6.34:3.2	“Cātumahārājikānaṁ kho, mārisa moggallāna, devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’”ti.
an6.34:4.1	“Sabbesaññeva nu kho, tissa, cātumahārājikānaṁ devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’”ti?
an6.34:4.2	“Na kho, mārisa moggallāna, sabbesaṁ cātumahārājikānaṁ devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’ti.
an6.34:4.3	Ye kho te, mārisa moggallāna, cātumahārājikā devā buddhe aveccappasādena asamannāgatā dhamme aveccappasādena asamannāgatā saṅghe aveccappasādena asamannāgatā ariyakantehi sīlehi asamannāgatā na tesaṁ devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’ti.
an6.34:4.4	Ye ca kho te, mārisa moggallāna, cātumahārājikā devā buddhe aveccappasādena samannāgatā, dhamme aveccappasādena samannāgatā, saṅghe aveccappasādena samannāgatā ariyakantehi sīlehi samannāgatā, tesaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’”ti.
an6.34:5.1	“Cātumahārājikānaññeva nu kho, tissa, devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’ti udāhu tāvatiṁsānampi devānaṁ …pe…
an6.34:5.2	yāmānampi devānaṁ …
an6.34:5.3	tusitānampi devānaṁ …
an6.34:5.4	nimmānaratīnampi devānaṁ …
an6.34:5.5	paranimmitavasavattīnampi devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’”ti?
an6.34:5.6	“Paranimmitavasavattīnampi kho, mārisa moggallāna, devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’”ti.
an6.34:6.1	“Sabbesaññeva nu kho, tissa, paranimmitavasavattīnaṁ devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’”ti?
an6.34:6.2	“Na kho, mārisa moggallāna, sabbesaṁ paranimmitavasavattīnaṁ devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’ti.
an6.34:6.3	Ye kho te, mārisa moggallāna, paranimmitavasavattī devā buddhe aveccappasādena asamannāgatā, dhamme aveccappasādena asamannāgatā, saṅghe aveccappasādena asamannāgatā, ariyakantehi sīlehi asamannāgatā, na tesaṁ devānaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’ti.
an6.34:6.4	Ye ca kho te, mārisa moggallāna, paranimmitavasavattī devā buddhe aveccappasādena samannāgatā, dhamme aveccappasādena samannāgatā, saṅghe aveccappasādena samannāgatā, ariyakantehi sīlehi samannāgatā tesaṁ evaṁ ñāṇaṁ hoti: ‘sotāpannā nāma avinipātadhammā niyatā sambodhiparāyaṇā’”ti.
an6.34:7.1	Atha kho āyasmā mahāmoggallāno tissassa brahmuno bhāsitaṁ abhinanditvā anumoditvā: “seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ: ‘brahmaloke antarahito jetavane pāturahosī’”ti.
an6.34:7.2	Catutthaṁ.
an6.35:0.1	Aṅguttara Nikāya 6.35
an6.35:0.2	4. Devatāvagga
an6.35:0.3	Vijjābhāgiyasutta
an6.35:1.1	“Chayime, bhikkhave, dhammā vijjābhāgiyā.
an6.35:1.2	Katame cha?
an6.35:1.3	Aniccasaññā, anicce dukkhasaññā, dukkhe anattasaññā, pahānasaññā, virāgasaññā, nirodhasaññā—
an6.35:1.4	ime kho, bhikkhave, cha dhammā vijjābhāgiyā”ti.
an6.35:1.5	Pañcamaṁ.
an6.36:0.1	Aṅguttara Nikāya 6.36
an6.36:0.2	4. Devatāvagga
an6.36:0.3	Vivādamūlasutta
an6.36:1.1	“Chayimāni, bhikkhave, vivādamūlāni.
an6.36:1.2	Katamāni cha?
an6.36:1.3	Idha, bhikkhave, bhikkhu kodhano hoti upanāhī.
an6.36:1.4	Yo so, bhikkhave, bhikkhu kodhano hoti upanāhī so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti.
an6.36:1.5	Yo so, bhikkhave, bhikkhu satthari agāravo viharati appatisso, dhamme agāravo viharati appatisso, saṅghe agāravo viharati appatisso, sikkhāya na paripūrakārī so saṅghe vivādaṁ janeti, yo hoti vivādo bahujanāhitāya bahujanāsukhāya bahuno janassa anatthāya ahitāya dukkhāya devamanussānaṁ.
an6.36:1.6	Evarūpañce tumhe, bhikkhave, vivādamūlaṁ ajjhattaṁ vā bahiddhā vā samanupasseyyātha. Tatra tumhe, bhikkhave, tasseva pāpakassa vivādamūlassa pahānāya vāyameyyātha.
an6.36:1.7	Evarūpañce tumhe, bhikkhave, vivādamūlaṁ ajjhattaṁ vā bahiddhā vā na samanupasseyyātha, tatra tumhe, bhikkhave, tasseva pāpakassa vivādamūlassa āyatiṁ anavassavāya paṭipajjeyyātha.
an6.36:1.8	Evametassa pāpakassa vivādamūlassa pahānaṁ hoti. Evametassa pāpakassa vivādamūlassa āyatiṁ anavassavo hoti.
an6.36:2.1	Puna caparaṁ, bhikkhave, bhikkhu makkhī hoti paḷāsī …pe…
an6.36:2.2	issukī hoti maccharī …
an6.36:2.3	saṭho hoti māyāvī …
an6.36:2.4	pāpiccho hoti micchādiṭṭhi …
an6.36:2.5	sandiṭṭhiparāmāsī hoti ādhānaggāhī duppaṭinissaggī.
an6.36:2.6	Yo so, bhikkhave, bhikkhu sandiṭṭhiparāmāsī hoti ādhānaggāhī duppaṭinissaggī, so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti.
an6.36:2.7	Yo so, bhikkhave, bhikkhu satthari agāravo viharati appatisso, dhamme … saṅghe agāravo viharati appatisso, sikkhāya na paripūrakārī, so saṅghe vivādaṁ janeti, yo hoti vivādo bahujanāhitāya bahujanāsukhāya bahuno janassa anatthāya ahitāya dukkhāya devamanussānaṁ.
an6.36:2.8	Evarūpañce tumhe, bhikkhave, vivādamūlaṁ ajjhattaṁ vā bahiddhā vā samanupasseyyātha. Tatra tumhe, bhikkhave, tasseva pāpakassa vivādamūlassa pahānāya vāyameyyātha.
an6.36:2.9	Evarūpañce tumhe, bhikkhave, vivādamūlaṁ ajjhattaṁ vā bahiddhā vā na samanupasseyyātha. Tatra tumhe, bhikkhave, tasseva pāpakassa vivādamūlassa āyatiṁ anavassavāya paṭipajjeyyātha.
an6.36:2.10	Evametassa pāpakassa vivādamūlassa pahānaṁ hoti. Evametassa pāpakassa vivādamūlassa āyatiṁ anavassavo hoti.
an6.36:2.11	Imāni kho, bhikkhave, cha vivādamūlānī”ti.
an6.36:2.12	Chaṭṭhaṁ.
an6.37:0.1	Aṅguttara Nikāya 6.37
an6.37:0.2	4. Devatāvagga
an6.37:0.3	Chaḷaṅgadānasutta
an6.37:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an6.37:1.2	Tena kho pana samayena veḷukaṇḍakī nandamātā upāsikā sāriputtamoggallānappamukhe bhikkhusaṅghe chaḷaṅgasamannāgataṁ dakkhiṇaṁ patiṭṭhāpeti.
an6.37:1.3	Addasā kho bhagavā dibbena cakkhunā visuddhena atikkantamānusakena veḷukaṇḍakiṁ nandamātaraṁ upāsikaṁ sāriputtamoggallānappamukhe bhikkhusaṅghe chaḷaṅgasamannāgataṁ dakkhiṇaṁ patiṭṭhāpentiṁ.
an6.37:1.4	Disvā bhikkhū āmantesi:
an6.37:1.5	“esā, bhikkhave, veḷukaṇḍakī nandamātā upāsikā sāriputtamoggallānappamukhe bhikkhusaṅghe chaḷaṅgasamannāgataṁ dakkhiṇaṁ patiṭṭhāpeti.
an6.37:2.1	Kathañca, bhikkhave, chaḷaṅgasamannāgatā dakkhiṇā hoti?
an6.37:2.2	Idha, bhikkhave, dāyakassa tīṇaṅgāni honti, paṭiggāhakānaṁ tīṇaṅgāni.
an6.37:2.3	Katamāni dāyakassa tīṇaṅgāni?
an6.37:2.4	Idha, bhikkhave, dāyako pubbeva dānā sumano hoti, dadaṁ cittaṁ pasādeti, datvā attamano hoti.
an6.37:2.5	Imāni dāyakassa tīṇaṅgāni.
an6.37:3.1	Katamāni paṭiggāhakānaṁ tīṇaṅgāni?
an6.37:3.2	Idha, bhikkhave, paṭiggāhakā vītarāgā vā honti rāgavinayāya vā paṭipannā, vītadosā vā honti dosavinayāya vā paṭipannā, vītamohā vā honti mohavinayāya vā paṭipannā.
an6.37:3.3	Imāni paṭiggāhakānaṁ tīṇaṅgāni.
an6.37:3.4	Iti dāyakassa tīṇaṅgāni, paṭiggāhakānaṁ tīṇaṅgāni.
an6.37:3.5	Evaṁ kho, bhikkhave, chaḷaṅgasamannāgatā dakkhiṇā hoti.
an6.37:4.1	Evaṁ chaḷaṅgasamannāgatāya, bhikkhave, dakkhiṇāya na sukaraṁ puññassa pamāṇaṁ gahetuṁ:
an6.37:4.2	‘ettako puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattatī’ti.
an6.37:4.3	Atha kho asaṅkhyeyyo appameyyo mahāpuññakkhandhotveva saṅkhaṁ gacchati.
an6.37:5.1	Seyyathāpi, bhikkhave, mahāsamudde na sukaraṁ udakassa pamāṇaṁ gahetuṁ:
an6.37:5.2	‘ettakāni udakāḷhakānīti vā ettakāni udakāḷhakasatānīti vā ettakāni udakāḷhakasahassānīti vā ettakāni udakāḷhakasatasahassānī’ti vā.
an6.37:5.3	Atha kho asaṅkhyeyyo appameyyo mahāudakakkhandhotveva saṅkhaṁ gacchati.
an6.37:5.4	Evamevaṁ kho, bhikkhave, evaṁ chaḷaṅgasamannāgatāya dakkhiṇāya na sukaraṁ puññassa pamāṇaṁ gahetuṁ:
an6.37:5.5	‘ettako puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattatī’ti.
an6.37:5.6	Atha kho asaṅkhyeyyo appameyyo mahāpuññakkhandhotveva saṅkhaṁ gacchatī”ti.
an6.37:6.1	“Pubbeva dānā sumano,
an6.37:6.2	dadaṁ cittaṁ pasādaye;
an6.37:6.3	Datvā attamano hoti,
an6.37:6.4	esā yaññassa sampadā.
an6.37:7.1	Vītarāgā vītadosā,
an6.37:7.2	vītamohā anāsavā;
an6.37:7.3	Khettaṁ yaññassa sampannaṁ,
an6.37:7.4	saññatā brahmacārayo.
an6.37:8.1	Sayaṁ ācamayitvāna,
an6.37:8.2	datvā sakehi pāṇibhi;
an6.37:8.3	Attano parato ceso,
an6.37:8.4	yañño hoti mahapphalo.
an6.37:9.1	Evaṁ yajitvā medhāvī,
an6.37:9.2	saddho muttena cetasā;
an6.37:9.3	Abyāpajjaṁ sukhaṁ lokaṁ,
an6.37:9.4	paṇḍito upapajjatī”ti.
an6.37:9.5	Sattamaṁ.
an6.38:0.1	Aṅguttara Nikāya 6.38
an6.38:0.2	4. Devatāvagga
an6.38:0.3	Attakārīsutta
an6.38:1.1	Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an6.38:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho so brāhmaṇo bhagavantaṁ etadavoca:
an6.38:1.3	“ahañhi, bho gotama, evaṁvādī evaṁdiṭṭhi:
an6.38:1.4	‘natthi attakāro, natthi parakāro’”ti.
an6.38:1.5	“Māhaṁ, brāhmaṇa, evaṁvādiṁ evaṁdiṭṭhiṁ addasaṁ vā assosiṁ vā.
an6.38:1.6	Kathañhi nāma sayaṁ abhikkamanto, sayaṁ paṭikkamanto evaṁ vakkhati:
an6.38:1.7	‘natthi attakāro, natthi parakāro’ti.
an6.38:2.1	Taṁ kiṁ maññasi, brāhmaṇa, atthi ārabbhadhātū”ti?
an6.38:2.2	“Evaṁ, bho”.
an6.38:2.3	“Ārabbhadhātuyā sati ārabbhavanto sattā paññāyantī”ti?
an6.38:2.4	“Evaṁ, bho”.
an6.38:2.5	“Yaṁ kho, brāhmaṇa, ārabbhadhātuyā sati ārabbhavanto sattā paññāyanti, ayaṁ sattānaṁ attakāro ayaṁ parakāro.
an6.38:3.1	Taṁ kiṁ maññasi, brāhmaṇa, atthi nikkamadhātu …pe…
an6.38:3.2	atthi parakkamadhātu …
an6.38:3.3	atthi thāmadhātu …
an6.38:3.4	atthi ṭhitidhātu …
an6.38:3.5	atthi upakkamadhātū”ti?
an6.38:3.6	“Evaṁ, bho”.
an6.38:3.7	“Upakkamadhātuyā sati upakkamavanto sattā paññāyantī”ti?
an6.38:3.8	“Evaṁ, bho”.
an6.38:3.9	“Yaṁ kho, brāhmaṇa, upakkamadhātuyā sati upakkamavanto sattā paññāyanti, ayaṁ sattānaṁ attakāro ayaṁ parakāro.
an6.38:4.1	Māhaṁ, brāhmaṇa, evaṁvādiṁ evaṁdiṭṭhiṁ addasaṁ vā assosiṁ vā.
an6.38:4.2	Kathañhi nāma sayaṁ abhikkamanto sayaṁ paṭikkamanto evaṁ vakkhati:
an6.38:4.3	‘natthi attakāro natthi parakāro’”ti.
an6.38:5.1	“Abhikkantaṁ, bho gotama …pe…
an6.38:5.2	ajjatagge pāṇupetaṁ saraṇaṁ gatan”ti.
an6.38:5.3	Aṭṭhamaṁ.
an6.39:0.1	Aṅguttara Nikāya 6.39
an6.39:0.2	4. Devatāvagga
an6.39:0.3	Nidānasutta
an6.39:1.1	“Tīṇimāni, bhikkhave, nidānāni kammānaṁ samudayāya.
an6.39:1.2	Katamāni tīṇi?
an6.39:1.3	Lobho nidānaṁ kammānaṁ samudayāya, doso nidānaṁ kammānaṁ samudayāya, moho nidānaṁ kammānaṁ samudayāya.
an6.39:1.4	Na, bhikkhave, lobhā alobho samudeti;
an6.39:1.5	atha kho, bhikkhave, lobhā lobhova samudeti.
an6.39:1.6	Na, bhikkhave, dosā adoso samudeti;
an6.39:1.7	atha kho, bhikkhave, dosā dosova samudeti.
an6.39:1.8	Na, bhikkhave, mohā amoho samudeti;
an6.39:1.9	atha kho, bhikkhave, mohā mohova samudeti.
an6.39:1.10	Na, bhikkhave, lobhajena kammena dosajena kammena mohajena kammena devā paññāyanti, manussā paññāyanti, yā vā panaññāpi kāci sugatiyo.
an6.39:1.11	Atha kho, bhikkhave, lobhajena kammena dosajena kammena mohajena kammena nirayo paññāyati tiracchānayoni paññāyati pettivisayo paññāyati, yā vā panaññāpi kāci duggatiyo.
an6.39:1.12	Imāni kho, bhikkhave, tīṇi nidānāni kammānaṁ samudayāya.
an6.39:2.1	Tīṇimāni, bhikkhave, nidānāni kammānaṁ samudayāya.
an6.39:2.2	Katamāni tīṇi?
an6.39:2.3	Alobho nidānaṁ kammānaṁ samudayāya, adoso nidānaṁ kammānaṁ samudayāya, amoho nidānaṁ kammānaṁ samudayāya.
an6.39:2.4	Na, bhikkhave, alobhā lobho samudeti;
an6.39:2.5	atha kho, bhikkhave, alobhā alobhova samudeti.
an6.39:2.6	Na, bhikkhave, adosā doso samudeti;
an6.39:2.7	atha kho, bhikkhave, adosā adosova samudeti.
an6.39:2.8	Na, bhikkhave, amohā moho samudeti;
an6.39:2.9	atha kho, bhikkhave, amohā amohova samudeti.
an6.39:2.10	Na, bhikkhave, alobhajena kammena adosajena kammena amohajena kammena nirayo paññāyati tiracchānayoni paññāyati pettivisayo paññāyati, yā vā panaññāpi kāci duggatiyo.
an6.39:2.11	Atha kho, bhikkhave, alobhajena kammena adosajena kammena amohajena kammena devā paññāyanti, manussā paññāyanti, yā vā panaññāpi kāci sugatiyo.
an6.39:2.12	Imāni kho, bhikkhave, tīṇi nidānāni kammānaṁ samudayāyā”ti.
an6.39:2.13	Navamaṁ.
an6.40:0.1	Aṅguttara Nikāya 6.40
an6.40:0.2	4. Devatāvagga
an6.40:0.3	Kimilasutta
an6.40:1.1	Evaṁ me sutaṁ—
an6.40:1.2	ekaṁ samayaṁ bhagavā kimilāyaṁ viharati niculavane.
an6.40:1.3	Atha kho āyasmā kimilo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā kimilo bhagavantaṁ etadavoca:
an6.40:1.4	“ko nu kho, bhante, hetu ko paccayo yena tathāgate parinibbute saddhammo na ciraṭṭhitiko hotī”ti?
an6.40:1.5	“Idha, kimila, tathāgate parinibbute bhikkhū bhikkhuniyo upāsakā upāsikāyo satthari agāravā viharanti appatissā, dhamme agāravā viharanti appatissā, saṅghe agāravā viharanti appatissā, sikkhāya agāravā viharanti appatissā, appamāde agāravā viharanti appatissā, paṭisanthāre agāravā viharanti appatissā.
an6.40:1.6	Ayaṁ kho, kimila, hetu ayaṁ paccayo yena tathāgate parinibbute saddhammo na ciraṭṭhitiko hoti”.
an6.40:2.1	“Ko pana, bhante, hetu ko paccayo yena tathāgate parinibbute saddhammo ciraṭṭhitiko hotī”ti?
an6.40:2.2	“Idha, kimila, tathāgate parinibbute bhikkhū bhikkhuniyo upāsakā upāsikāyo satthari sagāravā viharanti sappatissā, dhamme sagāravā viharanti sappatissā, saṅghe sagāravā viharanti sappatissā, sikkhāya sagāravā viharanti sappatissā, appamāde sagāravā viharanti sappatissā, paṭisanthāre sagāravā viharanti sappatissā.
an6.40:2.3	Ayaṁ kho, kimila, hetu ayaṁ paccayo yena tathāgate parinibbute saddhammo ciraṭṭhitiko hotī”ti.
an6.40:2.4	Dasamaṁ.
an6.41:0.1	Aṅguttara Nikāya 6.41
an6.41:0.2	4. Devatāvagga
an6.41:0.3	Dārukkhandhasutta
an6.41:1.1	Evaṁ me sutaṁ—
an6.41:1.2	ekaṁ samayaṁ āyasmā sāriputto rājagahe viharati gijjhakūṭe pabbate.
an6.41:1.3	Atha kho āyasmā sāriputto pubbaṇhasamayaṁ nivāsetvā pattacīvaramādāya sambahulehi bhikkhūhi saddhiṁ gijjhakūṭā pabbatā orohanto addasa aññatarasmiṁ padese mahantaṁ dārukkhandhaṁ.
an6.41:1.4	Disvā bhikkhū āmantesi:
an6.41:1.5	“passatha no, āvuso, tumhe amuṁ mahantaṁ dārukkhandhan”ti?
an6.41:1.6	“Evamāvuso”ti.
an6.41:2.1	“Ākaṅkhamāno, āvuso, bhikkhu iddhimā cetovasippatto amuṁ dārukkhandhaṁ pathavītveva adhimucceyya.
an6.41:2.2	Taṁ kissa hetu?
an6.41:2.3	Atthi, āvuso, amumhi dārukkhandhe pathavīdhātu, yaṁ nissāya bhikkhu iddhimā cetovasippatto amuṁ dārukkhandhaṁ pathavītveva adhimucceyya.
an6.41:2.4	Ākaṅkhamāno, āvuso, bhikkhu iddhimā cetovasippatto amuṁ dārukkhandhaṁ āpotveva adhimucceyya …pe…
an6.41:2.5	tejotveva adhimucceyya …
an6.41:2.6	vāyotveva adhimucceyya …
an6.41:2.7	subhantveva adhimucceyya …
an6.41:2.8	asubhantveva adhimucceyya.
an6.41:2.9	Taṁ kissa hetu?
an6.41:2.10	Atthi, āvuso, amumhi dārukkhandhe asubhadhātu, yaṁ nissāya bhikkhu iddhimā cetovasippatto amuṁ dārukkhandhaṁ asubhantveva adhimucceyyā”ti.
an6.41:2.11	Ekādasamaṁ.
an6.42:0.1	Aṅguttara Nikāya 6.42
an6.42:0.2	4. Devatāvagga
an6.42:0.3	Nāgitasutta
an6.42:1.1	Evaṁ me sutaṁ—
an6.42:1.2	ekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena icchānaṅgalaṁ nāma kosalānaṁ brāhmaṇagāmo tadavasari.
an6.42:1.3	Tatra sudaṁ bhagavā icchānaṅgale viharati icchānaṅgalavanasaṇḍe.
an6.42:1.4	Assosuṁ kho icchānaṅgalakā brāhmaṇagahapatikā:
an6.42:1.5	“samaṇo khalu, bho, gotamo sakyaputto sakyakulā pabbajito icchānaṅgalaṁ anuppatto icchānaṅgale viharati icchānaṅgalavanasaṇḍe.
an6.42:1.6	Taṁ kho pana bhavantaṁ gotamaṁ evaṁ kalyāṇo kittisaddo abbhuggato:
an6.42:1.7	‘itipi so bhagavā arahaṁ sammāsambuddho vijjācaraṇasampanno …pe… buddho bhagavā’ti.
an6.42:1.8	So imaṁ lokaṁ sadevakaṁ …pe… arahataṁ dassanaṁ hotī”ti.
an6.42:1.9	Atha kho icchānaṅgalakā brāhmaṇagahapatikā tassā rattiyā accayena pahūtaṁ khādanīyaṁ bhojanīyaṁ ādāya yena icchānaṅgalavanasaṇḍo tenupasaṅkamiṁsu; upasaṅkamitvā bahidvārakoṭṭhake aṭṭhaṁsu uccāsaddā mahāsaddā.
an6.42:2.1	Tena kho pana samayena āyasmā nāgito bhagavato upaṭṭhāko hoti.
an6.42:2.2	Atha kho bhagavā āyasmantaṁ nāgitaṁ āmantesi:
an6.42:2.3	“ke pana te, nāgita, uccāsaddā mahāsaddā kevaṭṭā maññe macchavilope”ti?
an6.42:2.4	“Ete, bhante, icchānaṅgalakā brāhmaṇagahapatikā pahūtaṁ khādanīyaṁ bhojanīyaṁ ādāya bahidvārakoṭṭhake ṭhitā bhagavantaṁyeva uddissa bhikkhusaṅghañcā”ti.
an6.42:2.5	“Māhaṁ, nāgita, yasena samāgamaṁ, mā ca mayā yaso.
an6.42:2.6	Yo kho, nāgita, nayimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī, yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī,
an6.42:2.7	so taṁ mīḷhasukhaṁ middhasukhaṁ lābhasakkārasilokasukhaṁ sādiyeyyā”ti.
an6.42:3.1	“Adhivāsetu dāni, bhante, bhagavā; adhivāsetu, sugato;
an6.42:3.2	adhivāsanakālo dāni, bhante, bhagavato.
an6.42:3.3	Yena yeneva dāni, bhante, bhagavā gamissati, tanninnāva bhavissanti brāhmaṇagahapatikā negamā ceva jānapadā ca.
an6.42:3.4	Seyyathāpi, bhante, thullaphusitake deve vassante yathāninnaṁ udakāni pavattanti;
an6.42:3.5	evamevaṁ kho, bhante, yena yeneva dāni bhagavā gamissati, tanninnāva bhavissanti brāhmaṇagahapatikā negamā ceva jānapadā ca.
an6.42:3.6	Taṁ kissa hetu?
an6.42:3.7	Tathā hi, bhante, bhagavato sīlapaññāṇan”ti.
an6.42:4.1	“Māhaṁ, nāgita, yasena samāgamaṁ, mā ca mayā yaso.
an6.42:4.2	Yo kho, nāgita, nayimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī, yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī,
an6.42:4.3	so taṁ mīḷhasukhaṁ middhasukhaṁ lābhasakkārasilokasukhaṁ sādiyeyya.
an6.42:5.1	Idhāhaṁ, nāgita, bhikkhuṁ passāmi gāmantavihāriṁ samāhitaṁ nisinnaṁ.
an6.42:5.2	Tassa mayhaṁ, nāgita, evaṁ hoti:
an6.42:5.3	‘idānimaṁ āyasmantaṁ ārāmiko vā upaṭṭhahissati samaṇuddeso vā taṁ tamhā samādhimhā cāvessatī’ti.
an6.42:5.4	Tenāhaṁ, nāgita, tassa bhikkhuno na attamano homi gāmantavihārena.
an6.42:6.1	Idha panāhaṁ, nāgita, bhikkhuṁ passāmi āraññikaṁ araññe pacalāyamānaṁ nisinnaṁ.
an6.42:6.2	Tassa mayhaṁ, nāgita, evaṁ hoti:
an6.42:6.3	‘idāni ayamāyasmā imaṁ niddākilamathaṁ paṭivinodetvā araññasaññaṁyeva manasi karissati ekattan’ti.
an6.42:6.4	Tenāhaṁ, nāgita, tassa bhikkhuno attamano homi araññavihārena.
an6.42:7.1	Idha panāhaṁ, nāgita, bhikkhuṁ passāmi āraññikaṁ araññe asamāhitaṁ nisinnaṁ.
an6.42:7.2	Tassa mayhaṁ, nāgita, evaṁ hoti:
an6.42:7.3	‘idāni ayamāyasmā asamāhitaṁ vā cittaṁ samādahissati, samāhitaṁ vā cittaṁ anurakkhissatī’ti.
an6.42:7.4	Tenāhaṁ, nāgita, tassa bhikkhuno attamano homi araññavihārena.
an6.42:8.1	Idha panāhaṁ, nāgita, bhikkhuṁ passāmi āraññikaṁ araññe samāhitaṁ nisinnaṁ.
an6.42:8.2	Tassa mayhaṁ, nāgita, evaṁ hoti:
an6.42:8.3	‘idāni ayamāyasmā avimuttaṁ vā cittaṁ vimocessati, vimuttaṁ vā cittaṁ anurakkhissatī’ti.
an6.42:8.4	Tenāhaṁ, nāgita, tassa bhikkhuno attamano homi araññavihārena.
an6.42:9.1	Idha panāhaṁ, nāgita, bhikkhuṁ passāmi gāmantavihāriṁ lābhiṁ cīvarapiṇḍapātasenāsanagilānappaccayabhesajjaparikkhārānaṁ.
an6.42:9.2	So taṁ lābhasakkārasilokaṁ nikāmayamāno riñcati paṭisallānaṁ riñcati araññavanapatthāni pantāni senāsanāni;
an6.42:9.3	gāmanigamarājadhāniṁ osaritvā vāsaṁ kappeti.
an6.42:9.4	Tenāhaṁ, nāgita, tassa bhikkhuno na attamano homi gāmantavihārena.
an6.42:10.1	Idha panāhaṁ, nāgita, bhikkhuṁ passāmi āraññikaṁ lābhiṁ cīvarapiṇḍapātasenāsanagilānappaccayabhesajjaparikkhārānaṁ.
an6.42:10.2	So taṁ lābhasakkārasilokaṁ paṭipaṇāmetvā na riñcati paṭisallānaṁ na riñcati araññavanapatthāni pantāni senāsanāni.
an6.42:10.3	Tenāhaṁ, nāgita, tassa bhikkhuno attamano homi araññavihārena.
an6.42:11.1	Yasmāhaṁ, nāgita, samaye addhānamaggappaṭipanno na kañci passāmi purato vā pacchato vā, phāsu me, nāgita, tasmiṁ samaye hoti antamaso uccārapassāvakammāyā”ti.
an6.42:11.2	Dvādasamaṁ.
an6.42:11.3	Devatāvaggo catuttho.
an6.42:12.0	Tassuddānaṁ
an6.42:12.1	Sekhā dve aparihāni,
an6.42:12.2	Moggallāna vijjābhāgiyā;
an6.42:12.3	Vivādadānattakārī nidānaṁ,
an6.42:12.4	Kimiladārukkhandhena nāgitoti.
an6.43:0.1	Aṅguttara Nikāya 6.43
an6.43:0.2	5. Dhammikavagga
an6.43:0.3	Nāgasutta
an6.43:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an6.43:1.2	Atha kho bhagavā pubbaṇhasamayaṁ nivāsetvā pattacīvaramādāya sāvatthiyaṁ piṇḍāya pāvisi.
an6.43:1.3	Sāvatthiyaṁ piṇḍāya caritvā pacchābhattaṁ piṇḍapātapaṭikkanto āyasmantaṁ ānandaṁ āmantesi:
an6.43:1.4	“āyāmānanda, yena pubbārāmo migāramātupāsādo tenupasaṅkamissāma divāvihārāyā”ti.
an6.43:1.5	“Evaṁ, bhante”ti kho āyasmā ānando bhagavato paccassosi.
an6.43:2.1	Atha kho bhagavā āyasmatā ānandena saddhiṁ yena pubbārāmo migāramātupāsādo tenupasaṅkami.
an6.43:2.2	Atha kho bhagavā sāyanhasamayaṁ paṭisallānā vuṭṭhito āyasmantaṁ ānandaṁ āmantesi:
an6.43:2.3	“āyāmānanda, yena pubbakoṭṭhako tenupasaṅkamissāma gattāni parisiñcitun”ti.
an6.43:2.4	“Evaṁ, bhante”ti kho āyasmā ānando bhagavato paccassosi.
an6.43:2.5	Atha kho bhagavā āyasmatā ānandena saddhiṁ yena pubbakoṭṭhako tenupasaṅkami gattāni parisiñcituṁ.
an6.43:2.6	Pubbakoṭṭhake gattāni parisiñcitvā paccuttaritvā ekacīvaro aṭṭhāsi gattāni pubbāpayamāno.
an6.43:3.1	Tena kho pana samayena rañño pasenadissa kosalassa seto nāma nāgo mahātūriyatāḷitavāditena pubbakoṭṭhakā paccuttarati.
an6.43:3.2	Apissu taṁ jano disvā evamāha:
an6.43:3.3	“abhirūpo vata bho rañño nāgo; dassanīyo vata bho rañño nāgo; pāsādiko vata, bho, rañño nāgo, kāyupapanno vata bho rañño nāgo”ti.
an6.43:3.4	Evaṁ vutte, āyasmā udāyī bhagavantaṁ etadavoca:
an6.43:3.5	“hatthimeva nu kho, bhante, mahantaṁ brahantaṁ kāyupapannaṁ jano disvā evamāha:
an6.43:3.6	‘nāgo vata bho nāgo’ti, udāhu aññampi kañci mahantaṁ brahantaṁ kāyupapannaṁ jano disvā evamāha: ‘nāgo vata bho nāgo’”ti?
an6.43:3.7	“Hatthimpi kho, udāyi, mahantaṁ brahantaṁ kāyupapannaṁ jano disvā evamāha:
an6.43:3.8	‘nāgo vata bho nāgo’ti.
an6.43:3.9	Assampi kho, udāyi, mahantaṁ brahantaṁ …pe…
an6.43:3.10	goṇampi kho, udāyi, mahantaṁ brahantaṁ …pe…
an6.43:3.11	uragampi kho, udāyi, mahantaṁ brahantaṁ …pe…
an6.43:3.12	rukkhampi kho, udāyi, mahantaṁ brahantaṁ …pe…
an6.43:3.13	manussampi kho, udāyi, mahantaṁ brahantaṁ kāyupapannaṁ jano disvā evamāha:
an6.43:3.14	‘nāgo vata, bho, nāgo’ti.
an6.43:3.15	Api ca, udāyi, yo sadevake loke samārake sabrahmake sassamaṇabrāhmaṇiyā pajāya sadevamanussāya āguṁ na karoti kāyena vācāya manasā, tamahaṁ ‘nāgo’ti brūmī”ti.
an6.43:4.1	“Acchariyaṁ, bhante, abbhutaṁ, bhante.
an6.43:4.2	Yāva subhāsitañcidaṁ, bhante, bhagavatā—
an6.43:4.3	api ca, udāyi, yo sadevake loke samārake sabrahmake sassamaṇabrāhmaṇiyā pajāya sadevamanussāya āguṁ na karoti kāyena vācāya manasā, tamahaṁ ‘nāgo’ti brūmīti.
an6.43:4.4	Idañca panāhaṁ, bhante, bhagavatā subhāsitaṁ imāhi gāthāhi anumodāmi—
an6.43:5.1	Manussabhūtaṁ sambuddhaṁ,
an6.43:5.2	attadantaṁ samāhitaṁ;
an6.43:5.3	Iriyamānaṁ brahmapathe,
an6.43:5.4	cittassūpasame rataṁ.
an6.43:6.1	Yaṁ manussā namassanti,
an6.43:6.2	sabbadhammāna pāraguṁ;
an6.43:6.3	Devāpi taṁ namassanti,
an6.43:6.4	iti me arahato sutaṁ.
an6.43:7.1	Sabbasaṁyojanātītaṁ,
an6.43:7.2	vanā nibbanamāgataṁ;
an6.43:7.3	Kāmehi nekkhammarataṁ,
an6.43:7.4	muttaṁ selāva kañcanaṁ.
an6.43:8.1	Sabbe accarucī nāgo,
an6.43:8.2	himavāññe siluccaye;
an6.43:8.3	Sabbesaṁ nāganāmānaṁ,
an6.43:8.4	saccanāmo anuttaro.
an6.43:9.1	Nāgaṁ vo kittayissāmi,
an6.43:9.2	na hi āguṁ karoti so;
an6.43:9.3	Soraccaṁ avihiṁsā ca,
an6.43:9.4	pādā nāgassa te duve.
an6.43:10.1	Tapo ca brahmacariyaṁ,
an6.43:10.2	caraṇā nāgassa tyāpare;
an6.43:10.3	Saddhāhattho mahānāgo,
an6.43:10.4	upekkhāsetadantavā.
an6.43:11.1	Sati gīvā siro paññā,
an6.43:11.2	vīmaṁsā dhammacintanā;
an6.43:11.3	Dhammakucchisamātapo,
an6.43:11.4	viveko tassa vāladhi.
an6.43:12.1	So jhāyī assāsarato,
an6.43:12.2	ajjhattaṁ susamāhito;
an6.43:12.3	Gacchaṁ samāhito nāgo,
an6.43:12.4	ṭhito nāgo samāhito.
an6.43:13.1	Seyyaṁ samāhito nāgo,
an6.43:13.2	nisinnopi samāhito;
an6.43:13.3	Sabbattha saṁvuto nāgo,
an6.43:13.4	esā nāgassa sampadā.
an6.43:14.1	Bhuñjati anavajjāni,
an6.43:14.2	sāvajjāni na bhuñjati;
an6.43:14.3	Ghāsamacchādanaṁ laddhā,
an6.43:14.4	sannidhiṁ parivajjayaṁ.
an6.43:15.1	Saṁyojanaṁ aṇuṁ thūlaṁ,
an6.43:15.2	sabbaṁ chetvāna bandhanaṁ;
an6.43:15.3	Yena yeneva gacchati,
an6.43:15.4	anapekkhova gacchati.
an6.43:16.1	Yathāpi udake jātaṁ,
an6.43:16.2	puṇḍarīkaṁ pavaḍḍhati;
an6.43:16.3	Nupalippati toyena,
an6.43:16.4	sucigandhaṁ manoramaṁ.
an6.43:17.1	Tatheva loke sujāto,
an6.43:17.2	buddho loke viharati;
an6.43:17.3	Nupalippati lokena,
an6.43:17.4	toyena padumaṁ yathā.
an6.43:18.1	Mahāginīva jalito,
an6.43:18.2	anāhārūpasammati;
an6.43:18.3	Saṅkhāresūpasantesu,
an6.43:18.4	nibbutoti pavuccati.
an6.43:19.1	Atthassāyaṁ viññāpanī,
an6.43:19.2	upamā viññūhi desitā;
an6.43:19.3	Viññassanti mahānāgā,
an6.43:19.4	nāgaṁ nāgena desitaṁ.
an6.43:20.1	Vītarāgo vītadoso,
an6.43:20.2	Vītamoho anāsavo;
an6.43:20.3	Sarīraṁ vijahaṁ nāgo,
an6.43:20.4	Parinibbissati anāsavo”ti.
an6.43:20.5	Paṭhamaṁ.
an6.44:0.1	Aṅguttara Nikāya 6.44
an6.44:0.2	5. Dhammikavagga
an6.44:0.3	Migasālāsutta
an6.44:1.1	Atha kho āyasmā ānando pubbaṇhasamayaṁ nivāsetvā pattacīvaramādāya yena migasālāya upāsikāya nivesanaṁ tenupasaṅkami; upasaṅkamitvā paññatte āsane nisīdi.
an6.44:1.2	Atha kho migasālā upāsikā yenāyasmā ānando tenupasaṅkami; upasaṅkamitvā āyasmantaṁ ānandaṁ abhivādetvā ekamantaṁ nisīdi. Ekamantaṁ nisinnā kho migasālā upāsikā āyasmantaṁ ānandaṁ etadavoca:
an6.44:2.1	“Kathaṁ kathaṁ nāmāyaṁ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyaṁ?
an6.44:2.2	Pitā me, bhante, purāṇo brahmacārī ahosi ārācārī virato methunā gāmadhammā.
an6.44:2.3	So kālaṅkato bhagavatā byākato sakadāgāmī satto tusitaṁ kāyaṁ upapannoti.
an6.44:2.4	Petteyyopi me, bhante, isidatto abrahmacārī ahosi sadārasantuṭṭho.
an6.44:2.5	Sopi kālaṅkato bhagavatā byākato sakadāgāmipatto tusitaṁ kāyaṁ upapannoti.
an6.44:2.6	Kathaṁ kathaṁ nāmāyaṁ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyan”ti?
an6.44:2.7	“Evaṁ kho panetaṁ, bhagini, bhagavatā byākatan”ti.
an6.44:3.1	Atha kho āyasmā ānando migasālāya upāsikāya nivesane piṇḍapātaṁ gahetvā uṭṭhāyāsanā pakkāmi.
an6.44:3.2	Atha kho āyasmā ānando pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an6.44:4.1	“Idhāhaṁ, bhante, pubbaṇhasamayaṁ nivāsetvā pattacīvaramādāya yena migasālāya upāsikāya nivesanaṁ tenupasaṅkamiṁ; upasaṅkamitvā paññatte āsane nisīdiṁ.
an6.44:4.2	Atha kho, bhante, migasālā upāsikā yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi. Ekamantaṁ nisinnā kho, bhante, migasālā upāsikā maṁ etadavoca:
an6.44:4.3	‘kathaṁ kathaṁ nāmāyaṁ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyaṁ.
an6.44:4.4	Pitā me, bhante, purāṇo brahmacārī ahosi ārācārī virato methunā gāmadhammā.
an6.44:4.5	So kālaṅkato bhagavatā byākato sakadāgāmipatto tusitaṁ kāyaṁ upapannoti.
an6.44:4.6	Petteyyopi me, bhante, isidatto abrahmacārī ahosi sadārasantuṭṭho.
an6.44:4.7	Sopi kālaṅkato bhagavatā byākato sakadāgāmipatto tusitaṁ kāyaṁ upapannoti.
an6.44:4.8	Kathaṁ kathaṁ nāmāyaṁ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyan’ti?
an6.44:4.9	Evaṁ vutte, ahaṁ, bhante, migasālaṁ upāsikaṁ etadavocaṁ:
an6.44:4.10	‘evaṁ kho panetaṁ, bhagini, bhagavatā byākatan’”ti.
an6.44:5.1	“Kā cānanda, migasālā upāsikā bālā abyattā ammakā ammakapaññā, ke ca purisapuggalaparopariyañāṇe?
an6.44:5.2	Chayime, ānanda, puggalā santo saṁvijjamānā lokasmiṁ.
an6.44:6.1	Katame cha?
an6.44:6.2	Idhānanda, ekacco puggalo sorato hoti sukhasaṁvāso, abhinandanti sabrahmacārī ekattavāsena.
an6.44:6.3	Tassa savanenapi akataṁ hoti, bāhusaccenapi akataṁ hoti, diṭṭhiyāpi appaṭividdhaṁ hoti, sāmāyikampi vimuttiṁ na labhati.
an6.44:6.4	So kāyassa bhedā paraṁ maraṇā hānāya pareti no visesāya, hānagāmīyeva hoti no visesagāmī.
an6.44:7.1	Idha panānanda, ekacco puggalo sorato hoti sukhasaṁvāso, abhinandanti sabrahmacārī ekattavāsena.
an6.44:7.2	Tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an6.44:7.3	So kāyassa bhedā paraṁ maraṇā visesāya pareti no hānāya, visesagāmīyeva hoti no hānagāmī.
an6.44:8.1	Tatrānanda, pamāṇikā pamiṇanti:
an6.44:8.2	‘imassapi teva dhammā aparassapi teva dhammā, kasmā tesaṁ eko hīno eko paṇīto’ti.
an6.44:8.3	Tañhi tesaṁ, ānanda, hoti dīgharattaṁ ahitāya dukkhāya.
an6.44:9.1	Tatrānanda, yvāyaṁ puggalo sorato hoti sukhasaṁvāso, abhinandanti sabrahmacārī ekattavāsena, tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an6.44:9.2	Ayaṁ, ānanda, puggalo amunā purimena puggalena abhikkantataro ca paṇītataro ca.
an6.44:9.3	Taṁ kissa hetu?
an6.44:9.4	Imaṁ hānanda, puggalaṁ dhammasoto nibbahati,
an6.44:9.5	tadantaraṁ ko jāneyya aññatra tathāgatena.
an6.44:9.6	Tasmātihānanda, mā puggalesu pamāṇikā ahuvattha;
an6.44:9.7	mā puggalesu pamāṇaṁ gaṇhittha.
an6.44:9.8	Khaññati hānanda, puggalesu pamāṇaṁ gaṇhanto.
an6.44:9.9	Ahaṁ vā, ānanda, puggalesu pamāṇaṁ gaṇheyyaṁ, yo vā panassa mādiso.
an6.44:10.1	Idha panānanda, ekaccassa puggalassa kodhamāno adhigato hoti, samayena samayañcassa lobhadhammā uppajjanti.
an6.44:10.2	Tassa savanenapi akataṁ hoti, bāhusaccenapi akataṁ hoti, diṭṭhiyāpi appaṭividdhaṁ hoti, sāmāyikampi vimuttiṁ na labhati.
an6.44:10.3	So kāyassa bhedā paraṁ maraṇā hānāya pareti no visesāya, hānagāmīyeva hoti no visesagāmī.
an6.44:11.1	Idha panānanda, ekaccassa puggalassa kodhamāno adhigato hoti, samayena samayañcassa lobhadhammā uppajjanti.
an6.44:11.2	Tassa savanenapi kataṁ hoti …pe…
an6.44:11.3	no hānagāmī.
an6.44:12.1	Tatrānanda, pamāṇikā pamiṇanti …pe…
an6.44:12.2	yo vā panassa mādiso.
an6.44:13.1	Idha panānanda, ekaccassa puggalassa kodhamāno adhigato hoti, samayena samayañcassa vacīsaṅkhārā uppajjanti.
an6.44:13.2	Tassa savanenapi akataṁ hoti …pe… sāmāyikampi vimuttiṁ na labhati.
an6.44:13.3	So kāyassa bhedā paraṁ maraṇā hānāya pareti no visesāya, hānagāmīyeva hoti no visesagāmī.
an6.44:14.1	Idha panānanda, ekaccassa puggalassa kodhamāno adhigato hoti, samayena samayañcassa vacīsaṅkhārā uppajjanti.
an6.44:14.2	Tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an6.44:14.3	So kāyassa bhedā paraṁ maraṇā visesāya pareti no hānāya, visesagāmīyeva hoti no hānagāmī.
an6.44:15.1	Tatrānanda, pamāṇikā pamiṇanti:
an6.44:15.2	‘imassapi teva dhammā, aparassapi teva dhammā. Kasmā tesaṁ eko hīno, eko paṇīto’ti?
an6.44:15.3	Tañhi tesaṁ, ānanda, hoti dīgharattaṁ ahitāya dukkhāya.
an6.44:16.1	Tatrānanda, yassa puggalassa kodhamāno adhigato hoti, samayena samayañcassa vacīsaṅkhārā uppajjanti, tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an6.44:16.2	Ayaṁ, ānanda, puggalo amunā purimena puggalena abhikkantataro ca paṇītataro ca.
an6.44:16.3	Taṁ kissa hetu?
an6.44:16.4	Imaṁ hānanda, puggalaṁ dhammasoto nibbahati.
an6.44:16.5	Tadantaraṁ ko jāneyya aññatra tathāgatena.
an6.44:16.6	Tasmātihānanda, mā puggalesu pamāṇikā ahuvattha;
an6.44:16.7	mā puggalesu pamāṇaṁ gaṇhittha.
an6.44:16.8	Khaññati hānanda, puggalesu pamāṇaṁ gaṇhanto.
an6.44:16.9	Ahaṁ vā, ānanda, puggalesu pamāṇaṁ gaṇheyyaṁ, yo vā panassa mādiso.
an6.44:17.1	Kā cānanda, migasālā upāsikā bālā abyattā ammakā ammakapaññā, ke ca purisapuggalaparopariyañāṇe.
an6.44:17.2	Ime kho, ānanda, cha puggalā santo saṁvijjamānā lokasmiṁ.
an6.44:18.1	Yathārūpena, ānanda, sīlena purāṇo samannāgato ahosi, tathārūpena sīlena isidatto samannāgato abhavissa. Nayidha purāṇo isidattassa gatimpi aññassa.
an6.44:18.2	Yathārūpāya ca, ānanda, paññāya isidatto samannāgato ahosi, tathārūpāya paññāya purāṇo samannāgato abhavissa. Nayidha isidatto purāṇassa gatimpi aññassa.
an6.44:18.3	Iti kho, ānanda, ime puggalā ubho ekaṅgahīnā”ti.
an6.44:18.4	Dutiyaṁ.
an6.45:0.1	Aṅguttara Nikāya 6.45
an6.45:0.2	5. Dhammikavagga
an6.45:0.3	Iṇasutta
an6.45:1.1	“Dāliddiyaṁ, bhikkhave, dukkhaṁ lokasmiṁ kāmabhogino”ti?
an6.45:1.2	“Evaṁ, bhante”.
an6.45:2.1	“Yampi, bhikkhave, daliddo assako anāḷhiko iṇaṁ ādiyati, iṇādānampi, bhikkhave, dukkhaṁ lokasmiṁ kāmabhogino”ti?
an6.45:2.2	“Evaṁ, bhante”.
an6.45:3.1	“Yampi, bhikkhave, daliddo assako anāḷhiko iṇaṁ ādiyitvā vaḍḍhiṁ paṭissuṇāti, vaḍḍhipi, bhikkhave, dukkhā lokasmiṁ kāmabhogino”ti?
an6.45:3.2	“Evaṁ, bhante”.
an6.45:4.1	“Yampi, bhikkhave, daliddo assako anāḷhiko vaḍḍhiṁ paṭissuṇitvā kālābhataṁ vaḍḍhiṁ na deti, codentipi naṁ;
an6.45:4.2	codanāpi, bhikkhave, dukkhā lokasmiṁ kāmabhogino”ti?
an6.45:4.3	“Evaṁ, bhante”.
an6.45:5.1	“Yampi, bhikkhave, daliddo assako anāḷhiko codiyamāno na deti, anucarantipi naṁ;
an6.45:5.2	anucariyāpi, bhikkhave, dukkhā lokasmiṁ kāmabhogino”ti?
an6.45:5.3	“Evaṁ, bhante”.
an6.45:6.1	“Yampi, bhikkhave, daliddo assako anāḷhiko anucariyamāno na deti, bandhantipi naṁ;
an6.45:6.2	bandhanampi, bhikkhave, dukkhaṁ lokasmiṁ kāmabhogino”ti?
an6.45:6.3	“Evaṁ, bhante”.
an6.45:7.1	“Iti kho, bhikkhave, dāliddiyampi dukkhaṁ lokasmiṁ kāmabhogino, iṇādānampi dukkhaṁ lokasmiṁ kāmabhogino, vaḍḍhipi dukkhā lokasmiṁ kāmabhogino, codanāpi dukkhā lokasmiṁ kāmabhogino, anucariyāpi dukkhā lokasmiṁ kāmabhogino, bandhanampi dukkhaṁ lokasmiṁ kāmabhogino;
an6.45:7.2	evamevaṁ kho, bhikkhave, yassa kassaci saddhā natthi kusalesu dhammesu, hirī natthi kusalesu dhammesu, ottappaṁ natthi kusalesu dhammesu, vīriyaṁ natthi kusalesu dhammesu, paññā natthi kusalesu dhammesu—
an6.45:7.3	ayaṁ vuccati, bhikkhave, ariyassa vinaye daliddo assako anāḷhiko.
an6.45:8.1	Sa kho so, bhikkhave, daliddo assako anāḷhiko saddhāya asati kusalesu dhammesu, hiriyā asati kusalesu dhammesu, ottappe asati kusalesu dhammesu, vīriye asati kusalesu dhammesu, paññāya asati kusalesu dhammesu, kāyena duccaritaṁ carati, vācāya duccaritaṁ carati, manasā duccaritaṁ carati.
an6.45:8.2	Idamassa iṇādānasmiṁ vadāmi.
an6.45:9.1	So tassa kāyaduccaritassa paṭicchādanahetu pāpikaṁ icchaṁ paṇidahati.
an6.45:9.2	‘Mā maṁ jaññū’ti icchati, ‘mā maṁ jaññū’ti saṅkappati, ‘mā maṁ jaññū’ti vācaṁ bhāsati, ‘mā maṁ jaññū’ti kāyena parakkamati. So tassa vacīduccaritassa paṭicchādanahetu …pe… so tassa manoduccaritassa paṭicchādanahetu …pe… ‘mā maṁ jaññū’ti kāyena parakkamati.
an6.45:9.3	Idamassa vaḍḍhiyā vadāmi.
an6.45:10.1	Tamenaṁ pesalā sabrahmacārī evamāhaṁsu:
an6.45:10.2	‘ayañca so āyasmā evaṅkārī evaṁsamācāro’ti.
an6.45:10.3	Idamassa codanāya vadāmi.
an6.45:11.1	Tamenaṁ araññagataṁ vā rukkhamūlagataṁ vā suññāgāragataṁ vā vippaṭisārasahagatā pāpakā akusalavitakkā samudācaranti.
an6.45:11.2	Idamassa anucariyāya vadāmi.
an6.45:12.1	Sa kho so, bhikkhave, daliddo assako anāḷhiko kāyena duccaritaṁ caritvā vācāya duccaritaṁ caritvā manasā duccaritaṁ caritvā kāyassa bhedā paraṁ maraṇā nirayabandhane vā bajjhati tiracchānayonibandhane vā.
an6.45:12.2	Nāhaṁ, bhikkhave, aññaṁ ekabandhanampi samanupassāmi evaṁdāruṇaṁ evaṅkaṭukaṁ evaṁantarāyakaraṁ anuttarassa yogakkhemassa adhigamāya, yathayidaṁ, bhikkhave, nirayabandhanaṁ vā tiracchānayonibandhanaṁ vāti.
an6.45:13.1	Dāliddiyaṁ dukkhaṁ loke,
an6.45:13.2	iṇādānañca vuccati;
an6.45:13.3	Daliddo iṇamādāya,
an6.45:13.4	bhuñjamāno vihaññati.
an6.45:14.1	Tato anucaranti naṁ,
an6.45:14.2	bandhanampi nigacchati;
an6.45:14.3	Etañhi bandhanaṁ dukkhaṁ,
an6.45:14.4	kāmalābhābhijappinaṁ.
an6.45:15.1	Tatheva ariyavinaye,
an6.45:15.2	saddhā yassa na vijjati;
an6.45:15.3	Ahirīko anottappī,
an6.45:15.4	pāpakammavinibbayo.
an6.45:16.1	Kāyaduccaritaṁ katvā,
an6.45:16.2	vacīduccaritāni ca;
an6.45:16.3	Manoduccaritaṁ katvā,
an6.45:16.4	‘mā maṁ jaññū’ti icchati.
an6.45:17.1	So saṁsappati kāyena,
an6.45:17.2	vācāya uda cetasā;
an6.45:17.3	Pāpakammaṁ pavaḍḍhento,
an6.45:17.4	tattha tattha punappunaṁ.
an6.45:18.1	So pāpakammo dummedho,
an6.45:18.2	jānaṁ dukkaṭamattano;
an6.45:18.3	Daliddo iṇamādāya,
an6.45:18.4	bhuñjamāno vihaññati.
an6.45:19.1	Tato anucaranti naṁ,
an6.45:19.2	saṅkappā mānasā dukhā;
an6.45:19.3	Gāme vā yadi vāraññe,
an6.45:19.4	yassa vippaṭisārajā.
an6.45:20.1	So pāpakammo dummedho,
an6.45:20.2	jānaṁ dukkaṭamattano;
an6.45:20.3	Yonimaññataraṁ gantvā,
an6.45:20.4	niraye vāpi bajjhati.
an6.45:21.1	Etañhi bandhanaṁ dukkhaṁ,
an6.45:21.2	yamhā dhīro pamuccati;
an6.45:21.3	Dhammaladdhehi bhogehi,
an6.45:21.4	dadaṁ cittaṁ pasādayaṁ.
an6.45:22.1	Ubhayattha kaṭaggāho,
an6.45:22.2	saddhassa gharamesino;
an6.45:22.3	Diṭṭhadhammahitatthāya,
an6.45:22.4	samparāyasukhāya ca;
an6.45:22.5	Evametaṁ gahaṭṭhānaṁ,
an6.45:22.6	cāgo puññaṁ pavaḍḍhati.
an6.45:23.1	Tatheva ariyavinaye,
an6.45:23.2	saddhā yassa patiṭṭhitā;
an6.45:23.3	Hirīmano ca ottappī,
an6.45:23.4	paññavā sīlasaṁvuto.
an6.45:24.1	Eso kho ariyavinaye,
an6.45:24.2	‘sukhajīvī’ti vuccati;
an6.45:24.3	Nirāmisaṁ sukhaṁ laddhā,
an6.45:24.4	upekkhaṁ adhitiṭṭhati.
an6.45:25.1	Pañca nīvaraṇe hitvā,
an6.45:25.2	niccaṁ āraddhavīriyo;
an6.45:25.3	Jhānāni upasampajja,
an6.45:25.4	ekodi nipako sato.
an6.45:26.1	Evaṁ ñatvā yathābhūtaṁ,
an6.45:26.2	sabbasaṁyojanakkhaye;
an6.45:26.3	Sabbaso anupādāya,
an6.45:26.4	sammā cittaṁ vimuccati.
an6.45:27.1	Tassa sammā vimuttassa,
an6.45:27.2	ñāṇañce hoti tādino;
an6.45:27.3	‘Akuppā me vimuttī’ti,
an6.45:27.4	bhavasaṁyojanakkhaye.
an6.45:28.1	Etaṁ kho paramaṁ ñāṇaṁ,
an6.45:28.2	etaṁ sukhamanuttaraṁ;
an6.45:28.3	Asokaṁ virajaṁ khemaṁ,
an6.45:28.4	etaṁ ānaṇyamuttaman”ti.
an6.45:28.5	Tatiyaṁ.
an6.46:0.1	Aṅguttara Nikāya 6.46
an6.46:0.2	5. Dhammikavagga
an6.46:0.3	Mahācundasutta
an6.46:1.1	Evaṁ me sutaṁ—
an6.46:1.2	ekaṁ samayaṁ āyasmā mahācundo cetīsu viharati sayaṁjātiyaṁ.
an6.46:1.3	Tatra kho āyasmā mahācundo bhikkhū āmantesi:
an6.46:1.4	“āvuso bhikkhave”ti.
an6.46:1.5	“Āvuso”ti kho te bhikkhū āyasmato mahācundassa paccassosuṁ.
an6.46:1.6	Āyasmā mahācundo etadavoca:
an6.46:2.1	“Idhāvuso, dhammayogā bhikkhū jhāyī bhikkhū apasādenti:
an6.46:2.2	‘ime pana jhāyinomhā, jhāyinomhāti jhāyanti pajjhāyanti nijjhāyanti avajjhāyanti.
an6.46:2.3	Kimime jhāyanti, kintime jhāyanti, kathaṁ ime jhāyantī’ti?
an6.46:2.4	Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṁ.
an6.46:3.1	Idha panāvuso, jhāyī bhikkhū dhammayoge bhikkhū apasādenti:
an6.46:3.2	‘ime pana dhammayogamhā, dhammayogamhāti uddhatā unnaḷā capalā mukharā vikiṇṇavācā muṭṭhassatī asampajānā asamāhitā vibbhantacittā pākatindriyā.
an6.46:3.3	Kimime dhammayogā, kintime dhammayogā, kathaṁ ime dhammayogā’ti?
an6.46:3.4	Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṁ.
an6.46:4.1	Idha panāvuso, dhammayogā bhikkhū dhammayogānaññeva bhikkhūnaṁ vaṇṇaṁ bhāsanti, no jhāyīnaṁ bhikkhūnaṁ vaṇṇaṁ bhāsanti.
an6.46:4.2	Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṁ.
an6.46:5.1	Idha panāvuso, jhāyī bhikkhū jhāyīnaññeva bhikkhūnaṁ vaṇṇaṁ bhāsanti, no dhammayogānaṁ bhikkhūnaṁ vaṇṇaṁ bhāsanti.
an6.46:5.2	Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṁ.
an6.46:6.1	Tasmātihāvuso, evaṁ sikkhitabbaṁ:
an6.46:6.2	‘dhammayogā samānā jhāyīnaṁ bhikkhūnaṁ vaṇṇaṁ bhāsissāmā’ti.
an6.46:6.3	Evañhi vo, āvuso, sikkhitabbaṁ.
an6.46:6.4	Taṁ kissa hetu?
an6.46:6.5	Acchariyā hete, āvuso, puggalā dullabhā lokasmiṁ, ye amataṁ dhātuṁ kāyena phusitvā viharanti.
an6.46:7.1	Tasmātihāvuso, evaṁ sikkhitabbaṁ:
an6.46:7.2	‘jhāyī samānā dhammayogānaṁ bhikkhūnaṁ vaṇṇaṁ bhāsissāmā’ti.
an6.46:7.3	Evañhi vo, āvuso, sikkhitabbaṁ.
an6.46:7.4	Taṁ kissa hetu?
an6.46:7.5	Acchariyā hete, āvuso, puggalā dullabhā lokasmiṁ ye gambhīraṁ atthapadaṁ paññāya ativijjha passantī”ti.
an6.46:7.6	Catutthaṁ.
an6.47:0.1	Aṅguttara Nikāya 6.47
an6.47:0.2	5. Dhammikavagga
an6.47:0.3	Paṭhamasandiṭṭhikasutta
an6.47:1.1	Atha kho moḷiyasīvako paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
an6.47:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho moḷiyasīvako paribbājako bhagavantaṁ etadavoca:
an6.47:1.3	“‘sandiṭṭhiko dhammo, sandiṭṭhiko dhammo’ti, bhante, vuccati.
an6.47:1.4	Kittāvatā nu kho, bhante, sandiṭṭhiko dhammo hoti akāliko ehipassiko opaneyyiko paccattaṁ veditabbo viññūhī”ti?
an6.47:2.1	“Tena hi, sīvaka, taññevettha paṭipucchāmi. Yathā te khameyya tathā naṁ byākareyyāsi.
an6.47:2.2	Taṁ kiṁ maññasi, sīvaka,
an6.47:2.3	santaṁ vā ajjhattaṁ lobhaṁ ‘atthi me ajjhattaṁ lobho’ti pajānāsi, asantaṁ vā ajjhattaṁ lobhaṁ ‘natthi me ajjhattaṁ lobho’ti pajānāsī”ti?
an6.47:2.4	“Evaṁ, bhante”.
an6.47:2.5	“Yaṁ kho tvaṁ, sīvaka, santaṁ vā ajjhattaṁ lobhaṁ ‘atthi me ajjhattaṁ lobho’ti pajānāsi, asantaṁ vā ajjhattaṁ lobhaṁ ‘natthi me ajjhattaṁ lobho’ti pajānāsi—
an6.47:2.6	evampi kho, sīvaka, sandiṭṭhiko dhammo hoti …pe….
an6.47:3.1	Taṁ kiṁ maññasi, sīvaka,
an6.47:3.2	santaṁ vā ajjhattaṁ dosaṁ …pe…
an6.47:3.3	santaṁ vā ajjhattaṁ mohaṁ …pe…
an6.47:3.4	santaṁ vā ajjhattaṁ lobhadhammaṁ …pe…
an6.47:3.5	santaṁ vā ajjhattaṁ dosadhammaṁ …pe…
an6.47:3.6	santaṁ vā ajjhattaṁ mohadhammaṁ ‘atthi me ajjhattaṁ mohadhammo’ti pajānāsi, asantaṁ vā ajjhattaṁ mohadhammaṁ ‘natthi me ajjhattaṁ mohadhammo’ti pajānāsī”ti?
an6.47:3.7	“Evaṁ, bhante”.
an6.47:3.8	“Yaṁ kho tvaṁ, sīvaka, santaṁ vā ajjhattaṁ mohadhammaṁ ‘atthi me ajjhattaṁ mohadhammo’ti pajānāsi, asantaṁ vā ajjhattaṁ mohadhammaṁ ‘natthi me ajjhattaṁ mohadhammo’ti pajānāsi—
an6.47:3.9	evaṁ kho, sīvaka, sandiṭṭhiko dhammo hoti akāliko ehipassiko opaneyyiko paccattaṁ veditabbo viññūhī”ti.
an6.47:4.1	“Abhikkantaṁ, bhante, abhikkantaṁ, bhante …pe…
an6.47:4.2	upāsakaṁ maṁ, bhante, bhagavā dhāretu ajjatagge pāṇupetaṁ saraṇaṁ gatan”ti.
an6.47:4.3	Pañcamaṁ.
an6.48:0.1	Aṅguttara Nikāya 6.48
an6.48:0.2	5. Dhammikavagga
an6.48:0.3	Dutiyasandiṭṭhikasutta
an6.48:1.1	Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an6.48:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho so brāhmaṇo bhagavantaṁ etadavoca:
an6.48:1.3	“‘sandiṭṭhiko dhammo, sandiṭṭhiko dhammo’ti, bho gotama, vuccati.
an6.48:1.4	Kittāvatā nu kho, bho gotama, sandiṭṭhiko dhammo hoti akāliko ehipassiko opaneyyiko paccattaṁ veditabbo viññūhī”ti?
an6.48:2.1	“Tena hi, brāhmaṇa, taññevettha paṭipucchissāmi. Yathā te khameyya tathā naṁ byākareyyāsi.
an6.48:2.2	Taṁ kiṁ maññasi, brāhmaṇa,
an6.48:2.3	santaṁ vā ajjhattaṁ rāgaṁ ‘atthi me ajjhattaṁ rāgo’ti pajānāsi, asantaṁ vā ajjhattaṁ rāgaṁ ‘natthi me ajjhattaṁ rāgo’ti pajānāsī”ti?
an6.48:2.4	“Evaṁ, bho”.
an6.48:2.5	“Yaṁ kho tvaṁ, brāhmaṇa, santaṁ vā ajjhattaṁ rāgaṁ ‘atthi me ajjhattaṁ rāgo’ti pajānāsi, asantaṁ vā ajjhattaṁ rāgaṁ ‘natthi me ajjhattaṁ rāgo’ti pajānāsi—
an6.48:2.6	evampi kho, brāhmaṇa, sandiṭṭhiko dhammo hoti …pe….
an6.48:3.1	Taṁ kiṁ maññasi, brāhmaṇa,
an6.48:3.2	santaṁ vā ajjhattaṁ dosaṁ …pe…
an6.48:3.3	santaṁ vā ajjhattaṁ mohaṁ …pe…
an6.48:3.4	santaṁ vā ajjhattaṁ kāyasandosaṁ …pe…
an6.48:3.5	santaṁ vā ajjhattaṁ vacīsandosaṁ …pe…
an6.48:3.6	santaṁ vā ajjhattaṁ manosandosaṁ ‘atthi me ajjhattaṁ manosandoso’ti pajānāsi, asantaṁ vā ajjhattaṁ manosandosaṁ ‘natthi me ajjhattaṁ manosandoso’ti pajānāsī”ti?
an6.48:3.7	“Evaṁ, bho”.
an6.48:3.8	“Yaṁ kho tvaṁ, brāhmaṇa, santaṁ vā ajjhattaṁ manosandosaṁ ‘atthi me ajjhattaṁ manosandoso’ti pajānāsi, asantaṁ vā ajjhattaṁ manosandosaṁ ‘natthi me ajjhattaṁ manosandoso’ti pajānāsi—
an6.48:3.9	evaṁ kho, brāhmaṇa, sandiṭṭhiko dhammo hoti akāliko ehipassiko opaneyyiko paccattaṁ veditabbo viññūhī”ti.
an6.48:4.1	“Abhikkantaṁ, bho gotama, abhikkantaṁ, bho gotama …pe…
an6.48:4.2	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an6.48:4.3	Chaṭṭhaṁ.
an6.49:0.1	Aṅguttara Nikāya 6.49
an6.49:0.2	5. Dhammikavagga
an6.49:0.3	Khemasutta
an6.49:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an6.49:1.2	Tena kho pana samayena āyasmā ca khemo āyasmā ca sumano sāvatthiyaṁ viharanti andhavanasmiṁ.
an6.49:1.3	Atha kho āyasmā ca khemo āyasmā ca sumano yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinno kho āyasmā khemo bhagavantaṁ etadavoca:
an6.49:2.1	“Yo so, bhante, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto tassa na evaṁ hoti:
an6.49:2.2	‘atthi me seyyoti vā atthi me sadisoti vā atthi me hīnoti vā’”ti.
an6.49:2.3	Idamavocāyasmā khemo.
an6.49:2.4	Samanuñño satthā ahosi.
an6.49:2.5	Atha kho āyasmā khemo “samanuñño me satthā”ti uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an6.49:3.1	Atha kho āyasmā sumano acirapakkante āyasmante kheme bhagavantaṁ etadavoca:
an6.49:3.2	“yo so, bhante, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto tassa na evaṁ hoti:
an6.49:3.3	‘natthi me seyyoti vā natthi me sadisoti vā natthi me hīnoti vā’”ti.
an6.49:3.4	Idamavocāyasmā sumano.
an6.49:3.5	Samanuñño satthā ahosi.
an6.49:3.6	Atha kho āyasmā sumano “samanuñño me satthā”ti uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an6.49:4.1	Atha kho bhagavā acirapakkantesu āyasmante ca kheme āyasmante ca sumane bhikkhū āmantesi:
an6.49:4.2	“evaṁ kho, bhikkhave, kulaputtā aññaṁ byākaronti.
an6.49:4.3	Attho ca vutto attā ca anupanīto.
an6.49:4.4	Atha ca pana idhekacce moghapurisā hasamānakā maññe aññaṁ byākaronti.
an6.49:4.5	Te pacchā vighātaṁ āpajjantīti.
an6.49:5.1	Na ussesu na omesu,
an6.49:5.2	Samatte nopanīyare;
an6.49:5.3	Khīṇā jāti vusitaṁ brahmacariyaṁ,
an6.49:5.4	Caranti saṁyojanavippamuttā”ti.
an6.49:5.5	Sattamaṁ.
an6.50:0.1	Aṅguttara Nikāya 6.50
an6.50:0.2	5. Dhammikavagga
an6.50:0.3	Indriyasaṁvarasutta
an6.50:1.1	“Indriyasaṁvare, bhikkhave, asati indriyasaṁvaravipannassa hatūpanisaṁ hoti sīlaṁ;
an6.50:1.2	sīle asati sīlavipannassa hatūpaniso hoti sammāsamādhi;
an6.50:1.3	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ;
an6.50:1.4	yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo;
an6.50:1.5	nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an6.50:1.6	Seyyathāpi, bhikkhave, rukkho sākhāpalāsavipanno.
an6.50:1.7	Tassa papaṭikāpi na pāripūriṁ gacchati, tacopi na pāripūriṁ gacchati, pheggupi na pāripūriṁ gacchati, sāropi na pāripūriṁ gacchati.
an6.50:1.8	Evamevaṁ kho, bhikkhave, indriyasaṁvare asati indriyasaṁvaravipannassa hatūpanisaṁ hoti sīlaṁ …pe…
an6.50:1.9	vimuttiñāṇadassanaṁ.
an6.50:2.1	Indriyasaṁvare, bhikkhave, sati indriyasaṁvarasampannassa upanisasampannaṁ hoti sīlaṁ;
an6.50:2.2	sīle sati sīlasampannassa upanisasampanno hoti sammāsamādhi;
an6.50:2.3	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ;
an6.50:2.4	yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo;
an6.50:2.5	nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanaṁ.
an6.50:2.6	Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṁ gacchati, tacopi pāripūriṁ gacchati, pheggupi pāripūriṁ gacchati, sāropi pāripūriṁ gacchati.
an6.50:2.7	Evamevaṁ kho, bhikkhave, indriyasaṁvare sati indriyasaṁvarasampannassa upanisasampannaṁ hoti sīlaṁ …pe…
an6.50:2.8	vimuttiñāṇadassanan”ti.
an6.50:2.9	Aṭṭhamaṁ.
an6.51:0.1	Aṅguttara Nikāya 6.51
an6.51:0.2	5. Dhammikavagga
an6.51:0.3	Ānandasutta
an6.51:1.1	Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an6.51:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā ānando āyasmantaṁ sāriputtaṁ etadavoca:
an6.51:2.1	“Kittāvatā nu kho, āvuso sāriputta, bhikkhu assutañceva dhammaṁ suṇāti, sutā cassa dhammā na sammosaṁ gacchanti, ye cassa dhammā pubbe cetasā samphuṭṭhapubbā te ca samudācaranti, aviññātañca vijānātī”ti?
an6.51:2.2	“Āyasmā kho ānando bahussuto.
an6.51:2.3	Paṭibhātu āyasmantaṁyeva ānandan”ti.
an6.51:2.4	“Tenahāvuso sāriputta, suṇāhi, sādhukaṁ manasi karohi; bhāsissāmī”ti.
an6.51:2.5	“Evamāvuso”ti kho āyasmā sāriputto āyasmato ānandassa paccassosi.
an6.51:2.6	Āyasmā ānando etadavoca:
an6.51:3.1	“Idhāvuso sāriputta, bhikkhu dhammaṁ pariyāpuṇāti—
an6.51:3.2	suttaṁ geyyaṁ veyyākaraṇaṁ gāthaṁ udānaṁ itivuttakaṁ jātakaṁ abbhutadhammaṁ vedallaṁ.
an6.51:3.3	So yathāsutaṁ yathāpariyattaṁ dhammaṁ vitthārena paresaṁ deseti, yathāsutaṁ yathāpariyattaṁ dhammaṁ vitthārena paresaṁ vāceti, yathāsutaṁ yathāpariyattaṁ dhammaṁ vitthārena sajjhāyaṁ karoti, yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati.
an6.51:3.4	Yasmiṁ āvāse therā bhikkhū viharanti bahussutā āgatāgamā dhammadharā vinayadharā mātikādharā tasmiṁ āvāse vassaṁ upeti.
an6.51:3.5	Te kālena kālaṁ upasaṅkamitvā paripucchati paripañhati:
an6.51:3.6	‘idaṁ, bhante, kathaṁ; imassa kvattho’ti?
an6.51:3.7	Te tassa āyasmato avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṁ paṭivinodenti.
an6.51:3.8	Ettāvatā kho, āvuso sāriputta, bhikkhu assutañceva dhammaṁ suṇāti, sutā cassa dhammā na sammosaṁ gacchanti, ye cassa dhammā pubbe cetasā samphuṭṭhapubbā te ca samudācaranti, aviññātañca vijānātī”ti.
an6.51:4.1	“Acchariyaṁ, āvuso, abbhutaṁ, āvuso, yāva subhāsitañcidaṁ āyasmatā ānandena.
an6.51:4.2	Imehi ca mayaṁ chahi dhammehi samannāgataṁ āyasmantaṁ ānandaṁ dhārema.
an6.51:4.3	Āyasmā hi ānando dhammaṁ pariyāpuṇāti—
an6.51:4.4	suttaṁ geyyaṁ veyyākaraṇaṁ gāthaṁ udānaṁ itivuttakaṁ jātakaṁ abbhutadhammaṁ vedallaṁ.
an6.51:4.5	Āyasmā ānando yathāsutaṁ yathāpariyattaṁ dhammaṁ vitthārena paresaṁ deseti, āyasmā ānando yathāsutaṁ yathāpariyattaṁ dhammaṁ vitthārena paresaṁ vāceti, āyasmā ānando yathāsutaṁ yathāpariyattaṁ dhammaṁ vitthārena sajjhāyaṁ karoti, āyasmā ānando yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati.
an6.51:4.6	Āyasmā ānando yasmiṁ āvāse therā bhikkhū viharanti bahussutā āgatāgamā dhammadharā vinayadharā mātikādharā tasmiṁ āvāse vassaṁ upeti.
an6.51:4.7	Te āyasmā ānando kālena kālaṁ upasaṅkamitvā paripucchati paripañhati:
an6.51:4.8	‘idaṁ, bhante, kathaṁ; imassa kvattho’ti?
an6.51:4.9	Te āyasmato ānandassa avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṁ paṭivinodentī”ti.
an6.51:4.10	Navamaṁ.
an6.52:0.1	Aṅguttara Nikāya 6.52
an6.52:0.2	5. Dhammikavagga
an6.52:0.3	Khattiyasutta
an6.52:1.1	Atha kho jāṇussoṇi brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an6.52:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho jāṇussoṇi brāhmaṇo bhagavantaṁ etadavoca:
an6.52:2.1	“Khattiyā, bho gotama, kiṁadhippāyā, kiṁupavicārā, kiṁadhiṭṭhānā, kiṁabhinivesā, kiṁpariyosānā”ti?
an6.52:2.2	“Khattiyā kho, brāhmaṇa, bhogādhippāyā paññūpavicārā balādhiṭṭhānā pathavībhinivesā issariyapariyosānā”ti.
an6.52:3.1	“Brāhmaṇā pana, bho gotama, kiṁadhippāyā, kiṁupavicārā, kiṁadhiṭṭhānā, kiṁabhinivesā, kiṁpariyosānā”ti?
an6.52:3.2	“Brāhmaṇā kho, brāhmaṇa, bhogādhippāyā paññūpavicārā mantādhiṭṭhānā yaññābhinivesā brahmalokapariyosānā”ti.
an6.52:4.1	“Gahapatikā pana, bho gotama, kiṁadhippāyā, kiṁupavicārā, kiṁadhiṭṭhānā, kiṁabhinivesā, kiṁpariyosānā”ti?
an6.52:4.2	“Gahapatikā kho, brāhmaṇa, bhogādhippāyā paññūpavicārā sippādhiṭṭhānā kammantābhinivesā niṭṭhitakammantapariyosānā”ti.
an6.52:5.1	“Itthī pana, bho gotama, kiṁadhippāyā, kiṁupavicārā, kiṁadhiṭṭhānā, kiṁabhinivesā, kiṁpariyosānā”ti?
an6.52:5.2	“Itthī kho, brāhmaṇa, purisādhippāyā alaṅkārūpavicārā puttādhiṭṭhānā asapattībhinivesā issariyapariyosānā”ti.
an6.52:6.1	“Corā pana, bho gotama, kiṁadhippāyā, kiṁupavicārā, kiṁadhiṭṭhānā, kiṁabhinivesā, kiṁpariyosānā”ti?
an6.52:6.2	“Corā kho, brāhmaṇa, ādānādhippāyā gahanūpavicārā satthādhiṭṭhānā andhakārābhinivesā adassanapariyosānā”ti.
an6.52:7.1	“Samaṇā pana, bho gotama, kiṁadhippāyā, kiṁupavicārā, kiṁadhiṭṭhānā, kiṁabhinivesā, kiṁpariyosānā”ti?
an6.52:7.2	“Samaṇā kho, brāhmaṇa, khantisoraccādhippāyā paññūpavicārā sīlādhiṭṭhānā ākiñcaññābhinivesā nibbānapariyosānā”ti.
an6.52:8.1	“Acchariyaṁ, bho gotama, abbhutaṁ, bho gotama.
an6.52:8.2	Khattiyānampi bhavaṁ gotamo jānāti adhippāyañca upavicārañca adhiṭṭhānañca abhinivesañca pariyosānañca. Brāhmaṇānampi bhavaṁ gotamo jānāti …pe… gahapatīnampi bhavaṁ gotamo jānāti … itthīnampi bhavaṁ gotamo jānāti … corānampi bhavaṁ gotamo jānāti … samaṇānampi bhavaṁ gotamo jānāti adhippāyañca upavicārañca adhiṭṭhānañca abhinivesañca pariyosānañca.
an6.52:8.3	Abhikkantaṁ, bho gotama …pe…
an6.52:8.4	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an6.52:8.5	Dasamaṁ.
an6.53:0.1	Aṅguttara Nikāya 6.53
an6.53:0.2	5. Dhammikavagga
an6.53:0.3	Appamādasutta
an6.53:1.1	Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an6.53:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho so brāhmaṇo bhagavantaṁ etadavoca:
an6.53:2.1	“Atthi nu kho, bho gotama, eko dhammo bhāvito bahulīkato yo ubho atthe samadhiggayha tiṭṭhati—diṭṭhadhammikañceva atthaṁ, yo ca attho samparāyiko”ti?
an6.53:2.2	“Atthi kho, brāhmaṇa, eko dhammo bhāvito bahulīkato yo ubho atthe samadhiggayha tiṭṭhati—diṭṭhadhammikañceva atthaṁ, yo ca attho samparāyiko”ti.
an6.53:3.1	“Katamo pana, bho gotama, eko dhammo bhāvito bahulīkato yo ubho atthe samadhiggayha tiṭṭhati—diṭṭhadhammikañceva atthaṁ, yo ca attho samparāyiko”ti?
an6.53:3.2	“Appamādo kho, brāhmaṇa, eko dhammo bhāvito bahulīkato ubho atthe samadhiggayha tiṭṭhati—diṭṭhadhammikañceva atthaṁ, yo ca attho samparāyiko.
an6.53:4.1	Seyyathāpi, brāhmaṇa, yāni kānici jaṅgalānaṁ pāṇānaṁ padajātāni, sabbāni tāni hatthipade samodhānaṁ gacchanti; hatthipadaṁ tesaṁ aggamakkhāyati, yadidaṁ mahantattena.
an6.53:4.2	Evamevaṁ kho, brāhmaṇa, appamādo eko dhammo bhāvito bahulīkato ubho atthe samadhiggayha tiṭṭhati—diṭṭhadhammikañceva atthaṁ, yo ca attho samparāyiko.
an6.53:5.1	Seyyathāpi, brāhmaṇa, kūṭāgārassa yā kāci gopānasiyo sabbā tā kūṭaṅgamā kūṭaninnā kūṭasamosaraṇā, kūṭaṁ tāsaṁ aggamakkhāyati;
an6.53:5.2	evamevaṁ kho, brāhmaṇa …pe….
an6.53:6.1	Seyyathāpi, brāhmaṇa, pabbajalāyako pabbajaṁ lāyitvā agge gahetvā odhunāti nidhunāti nicchādeti;
an6.53:6.2	evamevaṁ kho, brāhmaṇa …pe….
an6.53:7.1	Seyyathāpi, brāhmaṇa, ambapiṇḍiyā vaṇṭacchinnāya yāni kānici ambāni vaṇṭūpanibandhanāni sabbāni tāni tadanvayāni bhavanti;
an6.53:7.2	evamevaṁ kho, brāhmaṇa …pe….
an6.53:8.1	Seyyathāpi, brāhmaṇa, ye keci khuddarājāno sabbete rañño cakkavattissa anuyantā bhavanti, rājā tesaṁ cakkavattī aggamakkhāyati;
an6.53:8.2	evamevaṁ kho, brāhmaṇa …pe….
an6.53:9.1	Seyyathāpi, brāhmaṇa, yā kāci tārakarūpānaṁ pabhā sabbā tā candassa pabhāya kalaṁ nāgghanti soḷasiṁ, candappabhā tāsaṁ aggamakkhāyati;
an6.53:9.2	evamevaṁ kho, brāhmaṇa, appamādo eko dhammo bhāvito bahulīkato ubho atthe samadhiggayha tiṭṭhati—diṭṭhadhammikañceva atthaṁ yo ca attho samparāyiko.
an6.53:10.1	Ayaṁ kho, brāhmaṇa, eko dhammo bhāvito bahulīkato ubho atthe samadhiggayha tiṭṭhati—diṭṭhadhammikañceva atthaṁ, yo ca attho samparāyiko”ti.
an6.53:11.1	“Abhikkantaṁ, bho gotama, abhikkantaṁ, bho gotama …pe…
an6.53:11.2	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an6.53:11.3	Ekādasamaṁ.
an6.54:0.1	Aṅguttara Nikāya 6.54
an6.54:0.2	5. Dhammikavagga
an6.54:0.3	Dhammikasutta
an6.54:1.1	Ekaṁ samayaṁ bhagavā rājagahe viharati gijjhakūṭe pabbate.
an6.54:1.2	Tena kho pana samayena āyasmā dhammiko jātibhūmiyaṁ āvāsiko hoti sabbaso jātibhūmiyaṁ sattasu āvāsesu.
an6.54:1.3	Tatra sudaṁ āyasmā dhammiko āgantuke bhikkhū akkosati paribhāsati vihiṁsati vitudati roseti vācāya.
an6.54:1.4	Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṁ.
an6.54:2.1	Atha kho jātibhūmakānaṁ upāsakānaṁ etadahosi:
an6.54:2.2	“mayaṁ kho bhikkhusaṅghaṁ paccupaṭṭhitā cīvarapiṇḍapātasenāsanagilānappaccayabhesajjaparikkhārena.
an6.54:2.3	Atha ca pana āgantukā bhikkhū pakkamanti, na saṇṭhanti, riñcanti āvāsaṁ.
an6.54:2.4	Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsan”ti?
an6.54:2.5	Atha kho jātibhūmakānaṁ upāsakānaṁ etadahosi:
an6.54:2.6	“ayaṁ kho āyasmā dhammiko āgantuke bhikkhū akkosati paribhāsati vihiṁsati vitudati roseti vācāya.
an6.54:2.7	Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṁ.
an6.54:2.8	Yannūna mayaṁ āyasmantaṁ dhammikaṁ pabbājeyyāmā”ti.
an6.54:3.1	Atha kho jātibhūmakā upāsakā yena āyasmā dhammiko tenupasaṅkamiṁsu; upasaṅkamitvā āyasmantaṁ dhammikaṁ etadavocuṁ:
an6.54:3.2	“pakkamatu, bhante, āyasmā dhammiko imamhā āvāsā;
an6.54:3.3	alaṁ te idha vāsenā”ti.
an6.54:3.4	Atha kho āyasmā dhammiko tamhā āvāsā aññaṁ āvāsaṁ agamāsi.
an6.54:3.5	Tatrapi sudaṁ āyasmā dhammiko āgantuke bhikkhū akkosati paribhāsati vihiṁsati vitudati roseti vācāya.
an6.54:3.6	Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṁ.
an6.54:4.1	Atha kho jātibhūmakānaṁ upāsakānaṁ etadahosi:
an6.54:4.2	“mayaṁ kho bhikkhusaṅghaṁ paccupaṭṭhitā cīvarapiṇḍapātasenāsanagilānappaccayabhesajjaparikkhārena.
an6.54:4.3	Atha ca pana āgantukā bhikkhū pakkamanti, na saṇṭhanti, riñcanti āvāsaṁ.
an6.54:4.4	Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsan”ti?
an6.54:4.5	Atha kho jātibhūmakānaṁ upāsakānaṁ etadahosi:
an6.54:4.6	“ayaṁ kho āyasmā dhammiko āgantuke bhikkhū akkosati paribhāsati vihiṁsati vitudati roseti vācāya.
an6.54:4.7	Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṁ.
an6.54:4.8	Yannūna mayaṁ āyasmantaṁ dhammikaṁ pabbājeyyāmā”ti.
an6.54:5.1	Atha kho jātibhūmakā upāsakā yenāyasmā dhammiko tenupasaṅkamiṁsu; upasaṅkamitvā āyasmantaṁ dhammikaṁ etadavocuṁ:
an6.54:5.2	“pakkamatu, bhante, āyasmā dhammiko imamhāpi āvāsā;
an6.54:5.3	alaṁ te idha vāsenā”ti.
an6.54:5.4	Atha kho āyasmā dhammiko tamhāpi āvāsā aññaṁ āvāsaṁ agamāsi.
an6.54:5.5	Tatrapi sudaṁ āyasmā dhammiko āgantuke bhikkhū akkosati paribhāsati vihiṁsati vitudati roseti vācāya.
an6.54:5.6	Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṁ.
an6.54:6.1	Atha kho jātibhūmakānaṁ upāsakānaṁ etadahosi:
an6.54:6.2	“mayaṁ kho bhikkhusaṅghaṁ paccupaṭṭhitā cīvarapiṇḍapātasenāsanagilānappaccayabhesajjaparikkhārena.
an6.54:6.3	Atha ca pana āgantukā bhikkhū pakkamanti, na saṇṭhanti, riñcanti āvāsaṁ.
an6.54:6.4	Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsan”ti?
an6.54:6.5	Atha kho jātibhūmakānaṁ upāsakānaṁ etadahosi: “ayaṁ kho āyasmā dhammiko āgantuke bhikkhū akkosati …pe….
an6.54:6.6	Yannūna mayaṁ āyasmantaṁ dhammikaṁ pabbājeyyāma sabbaso jātibhūmiyaṁ sattahi āvāsehī”ti.
an6.54:6.7	Atha kho jātibhūmakā upāsakā yenāyasmā dhammiko tenupasaṅkamiṁsu; upasaṅkamitvā āyasmantaṁ dhammikaṁ etadavocuṁ:
an6.54:6.8	“pakkamatu, bhante, āyasmā dhammiko sabbaso jātibhūmiyaṁ sattahi āvāsehī”ti.
an6.54:6.9	Atha kho āyasmato dhammikassa etadahosi:
an6.54:6.10	“pabbājito khomhi jātibhūmakehi upāsakehi sabbaso jātibhūmiyaṁ sattahi āvāsehi.
an6.54:6.11	Kahaṁ nu kho dāni gacchāmī”ti?
an6.54:6.12	Atha kho āyasmato dhammikassa etadahosi:
an6.54:6.13	“yannūnāhaṁ yena bhagavā tenupasaṅkameyyan”ti.
an6.54:7.1	Atha kho āyasmā dhammiko pattacīvaramādāya yena rājagahaṁ tena pakkāmi.
an6.54:7.2	Anupubbena yena rājagahaṁ gijjhakūṭo pabbato yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ dhammikaṁ bhagavā etadavoca:
an6.54:7.3	“handa kuto nu tvaṁ, brāhmaṇa dhammika, āgacchasī”ti?
an6.54:7.4	“Pabbājito ahaṁ, bhante, jātibhūmakehi upāsakehi sabbaso jātibhūmiyaṁ sattahi āvāsehī”ti.
an6.54:7.5	“Alaṁ, brāhmaṇa dhammika, kiṁ te iminā, yaṁ taṁ tato tato pabbājenti, so tvaṁ tato tato pabbājito mameva santike āgacchasi.
an6.54:8.1	Bhūtapubbaṁ, brāhmaṇa dhammika, sāmuddikā vāṇijā tīradassiṁ sakuṇaṁ gahetvā nāvāya samuddaṁ ajjhogāhanti.
an6.54:8.2	Te atīradakkhiṇiyā nāvāya tīradassiṁ sakuṇaṁ muñcanti.
an6.54:8.3	So gacchateva puratthimaṁ disaṁ, gacchati pacchimaṁ disaṁ, gacchati uttaraṁ disaṁ, gacchati dakkhiṇaṁ disaṁ, gacchati uddhaṁ, gacchati anudisaṁ.
an6.54:8.4	Sace so samantā tīraṁ passati, tathāgatakova hoti.
an6.54:8.5	Sace pana so samantā tīraṁ na passati tameva nāvaṁ paccāgacchati.
an6.54:8.6	Evamevaṁ kho, brāhmaṇa dhammika, yaṁ taṁ tato tato pabbājenti so tvaṁ tato tato pabbājito mameva santike āgacchasi.
an6.54:9.1	Bhūtapubbaṁ, brāhmaṇa dhammika, rañño korabyassa suppatiṭṭho nāma nigrodharājā ahosi pañcasākho sītacchāyo manoramo.
an6.54:9.2	Suppatiṭṭhassa kho pana, brāhmaṇa dhammika, nigrodharājassa dvādasayojanāni abhiniveso ahosi, pañca yojanāni mūlasantānakānaṁ.
an6.54:9.3	Suppatiṭṭhassa kho pana, brāhmaṇa dhammika, nigrodharājassa tāva mahantāni phalāni ahesuṁ;
an6.54:9.4	seyyathāpi nāma āḷhakathālikā.
an6.54:9.5	Evamassa sādūni phalāni ahesuṁ;
an6.54:9.6	seyyathāpi nāma khuddaṁ madhuṁ anelakaṁ.
an6.54:9.7	Suppatiṭṭhassa kho pana, brāhmaṇa dhammika, nigrodharājassa ekaṁ khandhaṁ rājā paribhuñjati saddhiṁ itthāgārena, ekaṁ khandhaṁ balakāyo paribhuñjati, ekaṁ khandhaṁ negamajānapadā paribhuñjanti, ekaṁ khandhaṁ samaṇabrāhmaṇā paribhuñjanti, ekaṁ khandhaṁ migā paribhuñjanti.
an6.54:9.8	Suppatiṭṭhassa kho pana, brāhmaṇa dhammika, nigrodharājassa na koci phalāni rakkhati, na ca sudaṁ aññamaññassa phalāni hiṁsanti.
an6.54:10.1	Atha kho, brāhmaṇa dhammika, aññataro puriso suppatiṭṭhassa nigrodharājassa yāvadatthaṁ phalāni bhakkhitvā sākhaṁ bhañjitvā pakkāmi.
an6.54:10.2	Atha kho, brāhmaṇa dhammika, suppatiṭṭhe nigrodharāje adhivatthāya devatāya etadahosi:
an6.54:10.3	‘acchariyaṁ vata bho, abbhutaṁ vata bho.
an6.54:10.4	Yāva pāpo manusso, yatra hi nāma suppatiṭṭhassa nigrodharājassa yāvadatthaṁ phalāni bhakkhitvā sākhaṁ bhañjitvā pakkamissati, yannūna suppatiṭṭho nigrodharājā āyatiṁ phalaṁ na dadeyyā’ti.
an6.54:10.5	Atha kho, brāhmaṇa dhammika, suppatiṭṭho nigrodharājā āyatiṁ phalaṁ na adāsi.
an6.54:11.1	Atha kho, brāhmaṇa dhammika, rājā korabyo yena sakko devānamindo tenupasaṅkami; upasaṅkamitvā sakkaṁ devānamindaṁ etadavoca:
an6.54:11.2	‘yagghe, mārisa, jāneyyāsi suppatiṭṭho nigrodharājā phalaṁ na detī’ti.
an6.54:11.3	Atha kho, brāhmaṇa dhammika, sakko devānamindo tathārūpaṁ iddhābhisaṅkhāraṁ abhisaṅkhāsi, yathā bhusā vātavuṭṭhi āgantvā suppatiṭṭhaṁ nigrodharājaṁ pavattesi ummūlamakāsi.
an6.54:11.4	Atha kho, brāhmaṇa dhammika, suppatiṭṭhe nigrodharāje adhivatthā devatā dukkhī dummanā assumukhī rudamānā ekamantaṁ aṭṭhāsi.
an6.54:12.1	Atha kho, brāhmaṇa dhammika, sakko devānamindo yena suppatiṭṭhe nigrodharāje adhivatthā devatā tenupasaṅkami; upasaṅkamitvā suppatiṭṭhe nigrodharāje adhivatthaṁ devataṁ etadavoca:
an6.54:12.2	‘kiṁ nu tvaṁ, devate, dukkhī dummanā assumukhī rudamānā ekamantaṁ ṭhitā’ti?
an6.54:12.3	‘Tathā hi pana me, mārisa, bhusā vātavuṭṭhi āgantvā bhavanaṁ pavattesi ummūlamakāsī’ti.
an6.54:12.4	‘Api nu tvaṁ, devate, rukkhadhamme ṭhitāya bhusā vātavuṭṭhi āgantvā bhavanaṁ pavattesi ummūlamakāsī’ti?
an6.54:12.5	‘Kathaṁ pana, mārisa, rukkho rukkhadhamme ṭhito hotī’ti?
an6.54:12.6	‘Idha, devate, rukkhassa mūlaṁ mūlatthikā haranti, tacaṁ tacatthikā haranti, pattaṁ pattatthikā haranti, pupphaṁ pupphatthikā haranti, phalaṁ phalatthikā haranti.
an6.54:12.7	Na ca tena devatāya anattamanatā vā anabhinandi vā karaṇīyā.
an6.54:12.8	Evaṁ kho, devate, rukkho rukkhadhamme ṭhito hotī’ti.
an6.54:12.9	‘Aṭṭhitāyeva kho me, mārisa, rukkhadhamme bhusā vātavuṭṭhi āgantvā bhavanaṁ pavattesi ummūlamakāsī’ti.
an6.54:12.10	‘Sace kho tvaṁ, devate, rukkhadhamme tiṭṭheyyāsi, siyā te bhavanaṁ yathāpure’ti.
an6.54:12.11	‘Ṭhassāmahaṁ, mārisa, rukkhadhamme, hotu me bhavanaṁ yathāpure’ti.
an6.54:13.1	Atha kho, brāhmaṇa dhammika, sakko devānamindo tathārūpaṁ iddhābhisaṅkhāraṁ abhisaṅkhāsi, yathā bhusā vātavuṭṭhi āgantvā suppatiṭṭhaṁ nigrodharājaṁ ussāpesi, sacchavīni mūlāni ahesuṁ.
an6.54:13.2	Evamevaṁ kho, brāhmaṇa dhammika, api nu taṁ samaṇadhamme ṭhitaṁ jātibhūmakā upāsakā pabbājesuṁ sabbaso jātibhūmiyaṁ sattahi āvāsehī”ti?
an6.54:13.3	“Kathaṁ pana, bhante, samaṇo samaṇadhamme ṭhito hotī”ti?
an6.54:13.4	“Idha, brāhmaṇa dhammika, samaṇo akkosantaṁ na paccakkosati, rosantaṁ na paṭirosati, bhaṇḍantaṁ na paṭibhaṇḍati.
an6.54:13.5	Evaṁ kho, brāhmaṇa dhammika, samaṇo samaṇadhamme ṭhito hotī”ti.
an6.54:13.6	“Aṭṭhitaṁyeva maṁ, bhante, samaṇadhamme jātibhūmakā upāsakā pabbājesuṁ sabbaso jātibhūmiyaṁ sattahi āvāsehī”ti.
an6.54:13.7	“Bhūtapubbaṁ, brāhmaṇa dhammika, sunetto nāma satthā ahosi titthakaro kāmesu vītarāgo.
an6.54:13.8	Sunettassa kho pana, brāhmaṇa dhammika, satthuno anekāni sāvakasatāni ahesuṁ.
an6.54:13.9	Sunetto satthā sāvakānaṁ brahmalokasahabyatāya dhammaṁ desesi.
an6.54:13.10	Ye kho pana, brāhmaṇa dhammika, sunettassa satthuno brahmalokasahabyatāya dhammaṁ desentassa cittāni na pasādesuṁ te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjiṁsu.
an6.54:13.11	Ye kho pana, brāhmaṇa dhammika, sunettassa satthuno brahmalokasahabyatāya dhammaṁ desentassa cittāni pasādesuṁ te kāyassa bhedā paraṁ maraṇā sugatiṁ saggaṁ lokaṁ upapajjiṁsu.
an6.54:14.1	Bhūtapubbaṁ, brāhmaṇa dhammika, mūgapakkho nāma satthā ahosi …pe…
an6.54:15.1	Aranemi nāma satthā ahosi …
an6.54:16.1	… Kuddālako nāma satthā ahosi …
an6.54:17.1	… Hatthipālo nāma satthā ahosi …
an6.54:18.1	… Jotipālo nāma satthā ahosi titthakaro kāmesu vītarāgo.
an6.54:18.2	Jotipālassa kho pana, brāhmaṇa dhammika, satthuno anekāni sāvakasatāni ahesuṁ.
an6.54:18.3	Jotipālo satthā sāvakānaṁ brahmalokasahabyatāya dhammaṁ desesi.
an6.54:18.4	Ye kho pana, brāhmaṇa dhammika, jotipālassa satthuno brahmalokasahabyatāya dhammaṁ desentassa cittāni na pasādesuṁ te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjiṁsu.
an6.54:18.5	Ye kho pana, brāhmaṇa dhammika, jotipālassa satthuno brahmalokasahabyatāya dhammaṁ desentassa cittāni pasādesuṁ te kāyassa bhedā paraṁ maraṇā sugatiṁ saggaṁ lokaṁ upapajjiṁsu.
an6.54:19.1	Taṁ kiṁ maññasi, brāhmaṇa dhammika,
an6.54:19.2	yo ime cha satthāre titthakare kāmesu vītarāge, anekasataparivāre sasāvakasaṅghe paduṭṭhacitto akkoseyya paribhāseyya, bahuṁ so apuññaṁ pasaveyyā”ti?
an6.54:19.3	“Evaṁ, bhante”.
an6.54:19.4	“Yo kho, brāhmaṇa dhammika, ime cha satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṁ so apuññaṁ pasaveyya.
an6.54:19.5	Yo ekaṁ diṭṭhisampannaṁ puggalaṁ paduṭṭhacitto akkosati paribhāsati, ayaṁ tato bahutaraṁ apuññaṁ pasavati.
an6.54:19.6	Taṁ kissa hetu?
an6.54:19.7	Nāhaṁ, brāhmaṇa dhammika, ito bahiddhā evarūpiṁ khantiṁ vadāmi, yathāmaṁ sabrahmacārīsu.
an6.54:19.8	Tasmātiha, brāhmaṇa dhammika, evaṁ sikkhitabbaṁ:
an6.54:19.9	‘na no samasabrahmacārīsu cittāni paduṭṭhāni bhavissantī’ti.
an6.54:19.10	Evañhi te, brāhmaṇa dhammika, sikkhitabbanti.
an6.54:20.1	Sunetto mūgapakkho ca,
an6.54:20.2	aranemi ca brāhmaṇo;
an6.54:20.3	Kuddālako ahu satthā,
an6.54:20.4	hatthipālo ca māṇavo.
an6.54:21.1	Jotipālo ca govindo,
an6.54:21.2	ahu sattapurohito;
an6.54:21.3	Ahiṁsakā atītaṁse,
an6.54:21.4	cha satthāro yasassino.
an6.54:22.1	Nirāmagandhā karuṇedhimuttā,
an6.54:22.2	Kāmasaṁyojanātigā;
an6.54:22.3	Kāmarāgaṁ virājetvā,
an6.54:22.4	Brahmalokūpagā ahuṁ.
an6.54:23.1	Ahesuṁ sāvakā tesaṁ,
an6.54:23.2	Anekāni satānipi;
an6.54:23.3	Nirāmagandhā karuṇedhimuttā,
an6.54:23.4	Kāmasaṁyojanātigā;
an6.54:23.5	Kāmarāgaṁ virājetvā,
an6.54:23.6	Brahmalokūpagā ahuṁ.
an6.54:24.1	Yete isī bāhirake,
an6.54:24.2	vītarāge samāhite;
an6.54:24.3	Paduṭṭhamanasaṅkappo,
an6.54:24.4	yo naro paribhāsati;
an6.54:24.5	Bahuñca so pasavati,
an6.54:24.6	apuññaṁ tādiso naro.
an6.54:25.1	Yo cekaṁ diṭṭhisampannaṁ,
an6.54:25.2	Bhikkhuṁ buddhassa sāvakaṁ;
an6.54:25.3	Paduṭṭhamanasaṅkappo,
an6.54:25.4	Yo naro paribhāsati;
an6.54:25.5	Ayaṁ tato bahutaraṁ,
an6.54:25.6	Apuññaṁ pasave naro.
an6.54:26.1	Na sādhurūpaṁ āsīde,
an6.54:26.2	diṭṭhiṭṭhānappahāyinaṁ;
an6.54:26.3	Sattamo puggalo eso,
an6.54:26.4	ariyasaṅghassa vuccati.
an6.54:27.1	Avītarāgo kāmesu,
an6.54:27.2	yassa pañcindriyā mudū;
an6.54:27.3	Saddhā sati ca vīriyaṁ,
an6.54:27.4	samatho ca vipassanā.
an6.54:28.1	Tādisaṁ bhikkhumāsajja,
an6.54:28.2	pubbeva upahaññati;
an6.54:28.3	Attānaṁ upahantvāna,
an6.54:28.4	pacchā aññaṁ vihiṁsati.
an6.54:29.1	Yo ca rakkhati attānaṁ,
an6.54:29.2	rakkhito tassa bāhiro;
an6.54:29.3	Tasmā rakkheyya attānaṁ,
an6.54:29.4	akkhato paṇḍito sadā”ti.
an6.54:29.5	Dvādasamaṁ.
an6.54:29.6	Dhammikavaggo pañcamo.
an6.54:30.0	Tassuddānaṁ
an6.54:30.1	Nāgamigasālā iṇaṁ,
an6.54:30.2	Cundaṁ dve sandiṭṭhikā duve;
an6.54:30.3	Khemaindriya ānanda,
an6.54:30.4	Khattiyā appamādena dhammikoti.
an6.54:30.5	Paṭhamo paṇṇāsako samatto.
an6.55:0.1	Aṅguttara Nikāya 6.55
an6.55:0.2	6. Mahāvagga
an6.55:0.3	Soṇasutta
an6.55:1.1	Evaṁ me sutaṁ—
an6.55:1.2	ekaṁ samayaṁ bhagavā rājagahe viharati gijjhakūṭe pabbate.
an6.55:1.3	Tena kho pana samayena āyasmā soṇo rājagahe viharati sītavanasmiṁ.
an6.55:1.4	Atha kho āyasmato soṇassa rahogatassa paṭisallīnassa evaṁ cetaso parivitakko udapādi:
an6.55:1.5	“ye kho keci bhagavato sāvakā āraddhavīriyā viharanti, ahaṁ tesaṁ aññataro.
an6.55:1.6	Atha ca pana me na anupādāya āsavehi cittaṁ vimuccati, saṁvijjanti kho pana me kule bhogā, sakkā bhogā ca bhuñjituṁ puññāni ca kātuṁ.
an6.55:1.7	Yannūnāhaṁ sikkhaṁ paccakkhāya hīnāyāvattitvā bhoge ca bhuñjeyyaṁ puññāni ca kareyyan”ti.
an6.55:2.1	Atha kho bhagavā āyasmato soṇassa cetasā cetoparivitakkamaññāya—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ kho—gijjhakūṭe pabbate antarahito sītavane āyasmato soṇassa sammukhe pāturahosi.
an6.55:2.2	Nisīdi bhagavā paññatte āsane.
an6.55:2.3	Āyasmāpi kho soṇo bhagavantaṁ abhivādetvā ekamantaṁ nisīdi.
an6.55:2.4	Ekamantaṁ nisinnaṁ kho āyasmantaṁ soṇaṁ bhagavā etadavoca:
an6.55:3.1	“Nanu te, soṇa, rahogatassa paṭisallīnassa evaṁ cetaso parivitakko udapādi:
an6.55:3.2	‘ye kho keci bhagavato sāvakā āraddhavīriyā viharanti, ahaṁ tesaṁ aññataro.
an6.55:3.3	Atha ca pana me na anupādāya āsavehi cittaṁ vimuccati, saṁvijjanti kho pana me kule bhogā, sakkā bhogā ca bhuñjituṁ puññāni ca kātuṁ.
an6.55:3.4	Yannūnāhaṁ sikkhaṁ paccakkhāya hīnāyāvattitvā bhoge ca bhuñjeyyaṁ puññāni ca kareyyan’”ti?
an6.55:3.5	“Evaṁ, bhante”.
an6.55:4.1	“Taṁ kiṁ maññasi, soṇa,
an6.55:4.2	kusalo tvaṁ pubbe agāriyabhūto vīṇāya tantissare”ti?
an6.55:4.3	“Evaṁ, bhante”.
an6.55:4.4	“Taṁ kiṁ maññasi, soṇa, yadā te vīṇāya tantiyo accāyatā honti, api nu te vīṇā tasmiṁ samaye saravatī vā hoti kammaññā vā”ti?
an6.55:4.5	“No hetaṁ, bhante”.
an6.55:5.1	“Taṁ kiṁ maññasi, soṇa, yadā te vīṇāya tantiyo atisithilā honti, api nu te vīṇā tasmiṁ samaye saravatī vā hoti kammaññā vā”ti?
an6.55:5.2	“No hetaṁ, bhante”.
an6.55:6.1	“Yadā pana te, soṇa, vīṇāya tantiyo na accāyatā honti nātisithilā same guṇe patiṭṭhitā, api nu te vīṇā tasmiṁ samaye saravatī vā hoti kammaññā vā”ti?
an6.55:6.2	“Evaṁ, bhante”.
an6.55:7.1	“Evamevaṁ kho, soṇa, accāraddhavīriyaṁ uddhaccāya saṁvattati, atisithilavīriyaṁ kosajjāya saṁvattati.
an6.55:7.2	Tasmātiha tvaṁ, soṇa, vīriyasamathaṁ adhiṭṭhaha, indriyānañca samataṁ paṭivijjha, tattha ca nimittaṁ gaṇhāhī”ti.
an6.55:7.3	“Evaṁ, bhante”ti kho āyasmā soṇo bhagavato paccassosi.
an6.55:7.4	Atha kho bhagavā āyasmantaṁ soṇaṁ iminā ovādena ovaditvā—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ kho—sītavane antarahito gijjhakūṭe pabbate pāturahosi.
an6.55:8.1	Atha kho āyasmā soṇo aparena samayena vīriyasamathaṁ adhiṭṭhāsi, indriyānañca samataṁ paṭivijjhi, tattha ca nimittaṁ aggahesi.
an6.55:8.2	Atha kho āyasmā soṇo eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anāgāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
an6.55:8.3	“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
an6.55:8.4	Aññataro ca panāyasmā soṇo arahataṁ ahosi.
an6.55:9.1	Atha kho āyasmato soṇassa arahattappattassa etadahosi:
an6.55:9.2	“yannūnāhaṁ yena bhagavā tenupasaṅkameyyaṁ; upasaṅkamitvā bhagavato santike aññaṁ byākareyyan”ti.
an6.55:9.3	Atha kho āyasmā soṇo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā soṇo bhagavantaṁ etadavoca:
an6.55:10.1	“Yo so, bhante, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, so cha ṭhānāni adhimutto hoti—
an6.55:10.2	nekkhammādhimutto hoti, pavivekādhimutto hoti, abyāpajjādhimutto hoti, taṇhākkhayādhimutto hoti, upādānakkhayādhimutto hoti, asammohādhimutto hoti.
an6.55:11.1	Siyā kho pana, bhante, idhekaccassa āyasmato evamassa:
an6.55:11.2	‘kevalaṁsaddhāmattakaṁ nūna ayamāyasmā nissāya nekkhammādhimutto’ti.
an6.55:11.3	Na kho panetaṁ, bhante, evaṁ daṭṭhabbaṁ.
an6.55:11.4	Khīṇāsavo, bhante, bhikkhu vusitavā katakaraṇīyo karaṇīyaṁ attano asamanupassanto katassa vā paṭicayaṁ khayā rāgassa vītarāgattā nekkhammādhimutto hoti, khayā dosassa vītadosattā nekkhammādhimutto hoti, khayā mohassa vītamohattā nekkhammādhimutto hoti.
an6.55:12.1	Siyā kho pana, bhante, idhekaccassa āyasmato evamassa:
an6.55:12.2	‘lābhasakkārasilokaṁ nūna ayamāyasmā nikāmayamāno pavivekādhimutto’ti.
an6.55:12.3	Na kho panetaṁ, bhante, evaṁ daṭṭhabbaṁ.
an6.55:12.4	Khīṇāsavo, bhante, bhikkhu vusitavā katakaraṇīyo karaṇīyaṁ attano asamanupassanto katassa vā paṭicayaṁ khayā rāgassa vītarāgattā pavivekādhimutto hoti, khayā dosassa vītadosattā pavivekādhimutto hoti, khayā mohassa vītamohattā pavivekādhimutto hoti.
an6.55:13.1	Siyā kho pana, bhante, idhekaccassa āyasmato evamassa:
an6.55:13.2	‘sīlabbataparāmāsaṁ nūna ayamāyasmā sārato paccāgacchanto abyāpajjādhimutto’ti.
an6.55:13.3	Na kho panetaṁ, bhante, evaṁ daṭṭhabbaṁ.
an6.55:13.4	Khīṇāsavo, bhante, bhikkhu vusitavā katakaraṇīyo karaṇīyaṁ attano asamanupassanto katassa vā paṭicayaṁ khayā rāgassa vītarāgattā abyāpajjādhimutto hoti, khayā dosassa vītadosattā abyāpajjādhimutto hoti, khayā mohassa vītamohattā abyāpajjādhimutto hoti.
an6.55:14.1	Khayā rāgassa vītarāgattā taṇhākkhayādhimutto hoti, khayā dosassa vītadosattā taṇhākkhayādhimutto hoti, khayā mohassa vītamohattā taṇhākkhayādhimutto hoti.
an6.55:15.1	Khayā rāgassa vītarāgattā upādānakkhayādhimutto hoti, khayā dosassa vītadosattā upādānakkhayādhimutto hoti, khayā mohassa vītamohattā upādānakkhayādhimutto hoti.
an6.55:16.1	Khayā rāgassa vītarāgattā asammohādhimutto hoti, khayā dosassa vītadosattā asammohādhimutto hoti, khayā mohassa vītamohattā asammohādhimutto hoti.
an6.55:17.1	Evaṁ sammā vimuttacittassa, bhante, bhikkhuno bhusā cepi cakkhuviññeyyā rūpā cakkhussa āpāthaṁ āgacchanti, nevassa cittaṁ pariyādiyanti.
an6.55:17.2	Amissīkatamevassa cittaṁ hoti ṭhitaṁ āneñjappattaṁ vayañcassānupassati.
an6.55:17.3	Bhusā cepi sotaviññeyyā saddā …
an6.55:17.4	ghānaviññeyyā gandhā …
an6.55:17.5	jivhāviññeyyā rasā …
an6.55:17.6	kāyaviññeyyā phoṭṭhabbā …
an6.55:17.7	manoviññeyyā dhammā manassa āpāthaṁ āgacchanti, nevassa cittaṁ pariyādiyanti.
an6.55:17.8	Amissīkatamevassa cittaṁ hoti ṭhitaṁ āneñjappattaṁ vayañcassānupassati.
an6.55:17.9	Seyyathāpi, bhante, selo pabbato acchiddo asusiro ekagghano.
an6.55:17.10	Atha puratthimāya cepi disāya āgaccheyya bhusā vātavuṭṭhi neva naṁ saṅkampeyya na sampakampeyya na sampavedheyya, atha pacchimāya cepi disāya āgaccheyya bhusā vātavuṭṭhi …
an6.55:17.11	atha uttarāya cepi disāya āgaccheyya bhusā vātavuṭṭhi …
an6.55:17.12	atha dakkhiṇāya cepi disāya āgaccheyya bhusā vātavuṭṭhi neva naṁ saṅkampeyya na sampakampeyya na sampavedheyya;
an6.55:17.13	evamevaṁ kho, bhante, evaṁ sammāvimuttacittassa bhikkhuno bhusā cepi cakkhuviññeyyā rūpā cakkhussa āpāthaṁ āgacchanti, nevassa cittaṁ pariyādiyanti.
an6.55:17.14	Amissīkatamevassa cittaṁ hoti, ṭhitaṁ āneñjappattaṁ vayañcassānupassati.
an6.55:17.15	Bhusā cepi sotaviññeyyā saddā …
an6.55:17.16	ghānaviññeyyā gandhā …
an6.55:17.17	jivhāviññeyyā rasā …
an6.55:17.18	kāyaviññeyyā phoṭṭhabbā …
an6.55:17.19	manoviññeyyā dhammā manassa āpāthaṁ āgacchanti, nevassa cittaṁ pariyādiyanti.
an6.55:17.20	Amissīkatamevassa cittaṁ hoti ṭhitaṁ āneñjappattaṁ vayañcassānupassatīti.
an6.55:18.1	Nekkhammaṁ adhimuttassa,
an6.55:18.2	pavivekañca cetaso;
an6.55:18.3	Abyāpajjādhimuttassa,
an6.55:18.4	upādānakkhayassa ca.
an6.55:19.1	Taṇhākkhayādhimuttassa,
an6.55:19.2	asammohañca cetaso;
an6.55:19.3	Disvā āyatanuppādaṁ,
an6.55:19.4	sammā cittaṁ vimuccati.
an6.55:20.1	Tassa sammā vimuttassa,
an6.55:20.2	santacittassa bhikkhuno;
an6.55:20.3	Katassa paṭicayo natthi,
an6.55:20.4	karaṇīyaṁ na vijjati.
an6.55:21.1	Selo yathā ekagghano,
an6.55:21.2	vātena na samīrati;
an6.55:21.3	Evaṁ rūpā rasā saddā,
an6.55:21.4	gandhā phassā ca kevalā.
an6.55:22.1	Iṭṭhā dhammā aniṭṭhā ca,
an6.55:22.2	nappavedhenti tādino;
an6.55:22.3	Ṭhitaṁ cittaṁ vippamuttaṁ,
an6.55:22.4	vayañcassānupassatī”ti.
an6.55:22.5	Paṭhamaṁ.
an6.56:0.1	Aṅguttara Nikāya 6.56
an6.56:0.2	6. Mahāvagga
an6.56:0.3	Phaggunasutta
an6.56:1.1	Tena kho pana samayena āyasmā phagguno ābādhiko hoti dukkhito bāḷhagilāno.
an6.56:1.2	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an6.56:1.3	“āyasmā, bhante, phagguno ābādhiko dukkhito bāḷhagilāno.
an6.56:1.4	Sādhu, bhante, bhagavā yenāyasmā phagguno tenupasaṅkamatu anukampaṁ upādāyā”ti.
an6.56:1.5	Adhivāsesi bhagavā tuṇhībhāvena.
an6.56:1.6	Atha kho bhagavā sāyanhasamayaṁ paṭisallānā vuṭṭhito yenāyasmā phagguno tenupasaṅkami.
an6.56:1.7	Addasā kho āyasmā phagguno bhagavantaṁ dūratova āgacchantaṁ.
an6.56:1.8	Disvāna mañcake samadhosi.
an6.56:1.9	Atha kho bhagavā āyasmantaṁ phaggunaṁ etadavoca:
an6.56:1.10	“alaṁ, phagguna, mā tvaṁ mañcake samadhosi.
an6.56:1.11	Santimāni āsanāni parehi paññattāni, tatthāhaṁ nisīdissāmī”ti.
an6.56:1.12	Nisīdi bhagavā paññatte āsane.
an6.56:1.13	Nisajja kho bhagavā āyasmantaṁ phaggunaṁ etadavoca:
an6.56:2.1	“Kacci te, phagguna, khamanīyaṁ kacci yāpanīyaṁ? Kacci te dukkhā vedanā paṭikkamanti, no abhikkamanti; paṭikkamosānaṁ paññāyati, no abhikkamo”ti?
an6.56:2.2	“Na me, bhante, khamanīyaṁ na yāpanīyaṁ. Bāḷhā me dukkhā vedanā abhikkamanti, no paṭikkamanti; abhikkamosānaṁ paññāyati, no paṭikkamo.
an6.56:3.1	Seyyathāpi, bhante, balavā puriso tiṇhena sikharena muddhani abhimattheyya; evamevaṁ kho me, bhante, adhimattā vātā muddhani ūhananti.
an6.56:3.2	Na me, bhante, khamanīyaṁ na yāpanīyaṁ. Bāḷhā me dukkhā vedanā abhikkamanti, no paṭikkamanti; abhikkamosānaṁ paññāyati, no paṭikkamo.
an6.56:4.1	Seyyathāpi, bhante, balavā puriso daḷhena varattakkhaṇḍena sīsaveṭhanaṁ dadeyya; evamevaṁ kho me, bhante, adhimattā sīse sīsavedanā.
an6.56:4.2	Na me, bhante, khamanīyaṁ na yāpanīyaṁ. Bāḷhā me dukkhā vedanā abhikkamanti, no paṭikkamanti; abhikkamosānaṁ paññāyati, no paṭikkamo.
an6.56:5.1	Seyyathāpi, bhante, dakkho goghātako vā goghātakantevāsī vā tiṇhena govikantanena kucchiṁ parikanteyya; evamevaṁ kho me, bhante, adhimattā vātā kucchiṁ parikantanti.
an6.56:5.2	Na me, bhante, khamanīyaṁ na yāpanīyaṁ. Bāḷhā me dukkhā vedanā abhikkamanti, no paṭikkamanti; abhikkamosānaṁ paññāyati, no paṭikkamo.
an6.56:6.1	Seyyathāpi, bhante, dve balavanto purisā dubbalataraṁ purisaṁ nānābāhāsu gahetvā aṅgārakāsuyā santāpeyyuṁ samparitāpeyyuṁ; evamevaṁ kho me, bhante, adhimatto kāyasmiṁ ḍāho.
an6.56:6.2	Na me, bhante, khamanīyaṁ na yāpanīyaṁ. Bāḷhā me dukkhā vedanā abhikkamanti, no paṭikkamanti; abhikkamosānaṁ paññāyati, no paṭikkamo”ti.
an6.56:6.3	Atha kho bhagavā āyasmantaṁ phaggunaṁ dhammiyā kathāya sandassetvā samādapetvā samuttejetvā sampahaṁsetvā uṭṭhāyāsanā pakkāmi.
an6.56:7.1	Atha kho āyasmā phagguno acirapakkantassa bhagavato kālamakāsi.
an6.56:7.2	Tamhi cassa samaye maraṇakāle indriyāni vippasīdiṁsu.
an6.56:7.3	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an6.56:7.4	“āyasmā, bhante, phagguno acirapakkantassa bhagavato kālamakāsi.
an6.56:7.5	Tamhi cassa samaye maraṇakāle indriyāni vippasīdiṁsū”ti.
an6.56:8.1	“Kiṁ hānanda, phaggunassa bhikkhuno indriyāni na vippasīdissanti.
an6.56:8.2	Phaggunassa, ānanda, bhikkhuno pañcahi orambhāgiyehi saṁyojanehi cittaṁ avimuttaṁ ahosi.
an6.56:8.3	Tassa taṁ dhammadesanaṁ sutvā pañcahi orambhāgiyehi saṁyojanehi cittaṁ vimuttaṁ.
an6.56:9.1	Chayime, ānanda, ānisaṁsā kālena dhammassavane kālena atthupaparikkhāya.
an6.56:9.2	Katame cha?
an6.56:9.3	Idhānanda, bhikkhuno pañcahi orambhāgiyehi saṁyojanehi cittaṁ avimuttaṁ hoti.
an6.56:9.4	So tamhi samaye maraṇakāle labhati tathāgataṁ dassanāya.
an6.56:9.5	Tassa tathāgato dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an6.56:9.6	Tassa taṁ dhammadesanaṁ sutvā pañcahi orambhāgiyehi saṁyojanehi cittaṁ vimuccati.
an6.56:9.7	Ayaṁ, ānanda, paṭhamo ānisaṁso kālena dhammassavane.
an6.56:10.1	Puna caparaṁ, ānanda, bhikkhuno pañcahi orambhāgiyehi saṁyojanehi cittaṁ avimuttaṁ hoti.
an6.56:10.2	So tamhi samaye maraṇakāle na heva kho labhati tathāgataṁ dassanāya, api ca kho tathāgatasāvakaṁ labhati dassanāya.
an6.56:10.3	Tassa tathāgatasāvako dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an6.56:10.4	Tassa taṁ dhammadesanaṁ sutvā pañcahi orambhāgiyehi saṁyojanehi cittaṁ vimuccati.
an6.56:10.5	Ayaṁ, ānanda, dutiyo ānisaṁso kālena dhammassavane.
an6.56:11.1	Puna caparaṁ, ānanda, bhikkhuno pañcahi orambhāgiyehi saṁyojanehi cittaṁ avimuttaṁ hoti.
an6.56:11.2	So tamhi samaye maraṇakāle na heva kho labhati tathāgataṁ dassanāya, napi tathāgatasāvakaṁ labhati dassanāya;
an6.56:11.3	api ca kho yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati.
an6.56:11.4	Tassa yathāsutaṁ yathāpariyattaṁ dhammaṁ cetasā anuvitakkayato anuvicārayato manasānupekkhato pañcahi orambhāgiyehi saṁyojanehi cittaṁ vimuccati.
an6.56:11.5	Ayaṁ, ānanda, tatiyo ānisaṁso kālena atthupaparikkhāya.
an6.56:12.1	Idhānanda, bhikkhuno pañcahi orambhāgiyehi saṁyojanehi cittaṁ vimuttaṁ hoti, anuttare ca kho upadhisaṅkhaye cittaṁ avimuttaṁ hoti.
an6.56:12.2	So tamhi samaye maraṇakāle labhati tathāgataṁ dassanāya.
an6.56:12.3	Tassa tathāgato dhammaṁ deseti ādikalyāṇaṁ majjhekalyāṇaṁ …pe… brahmacariyaṁ pakāseti.
an6.56:12.4	Tassa taṁ dhammadesanaṁ sutvā anuttare upadhisaṅkhaye cittaṁ vimuccati.
an6.56:12.5	Ayaṁ, ānanda, catuttho ānisaṁso kālena dhammassavane.
an6.56:13.1	Puna caparaṁ, ānanda, bhikkhuno pañcahi orambhāgiyehi saṁyojanehi cittaṁ vimuttaṁ hoti, anuttare ca kho upadhisaṅkhaye cittaṁ avimuttaṁ hoti.
an6.56:13.2	So tamhi samaye maraṇakāle na heva kho labhati tathāgataṁ dassanāya, api ca kho tathāgatasāvakaṁ labhati dassanāya.
an6.56:13.3	Tassa tathāgatasāvako dhammaṁ deseti ādikalyāṇaṁ …pe… parisuddhaṁ brahmacariyaṁ pakāseti.
an6.56:13.4	Tassa taṁ dhammadesanaṁ sutvā anuttare upadhisaṅkhaye cittaṁ vimuccati.
an6.56:13.5	Ayaṁ, ānanda, pañcamo ānisaṁso kālena dhammassavane.
an6.56:14.1	Puna caparaṁ, ānanda, bhikkhuno pañcahi orambhāgiyehi saṁyojanehi cittaṁ vimuttaṁ hoti, anuttare ca kho upadhisaṅkhaye cittaṁ avimuttaṁ hoti.
an6.56:14.2	So tamhi samaye maraṇakāle na heva kho labhati tathāgataṁ dassanāya, napi tathāgatasāvakaṁ labhati dassanāya;
an6.56:14.3	api ca kho yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati.
an6.56:14.4	Tassa yathāsutaṁ yathāpariyattaṁ dhammaṁ cetasā anuvitakkayato anuvicārayato manasānupekkhato anuttare upadhisaṅkhaye cittaṁ vimuccati.
an6.56:14.5	Ayaṁ, ānanda, chaṭṭho ānisaṁso kālena atthupaparikkhāya.
an6.56:15.1	Ime kho, ānanda, cha ānisaṁsā kālena dhammassavane kālena atthupaparikkhāyā”ti.
an6.56:15.2	Dutiyaṁ.
an6.57:0.1	Aṅguttara Nikāya 6.57
an6.57:0.2	6. Mahāvagga
an6.57:0.3	Chaḷabhijātisutta
an6.57:1.1	Ekaṁ samayaṁ bhagavā rājagahe viharati gijjhakūṭe pabbate.
an6.57:1.2	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an6.57:1.3	“pūraṇena, bhante, kassapena chaḷabhijātiyo paññattā—
an6.57:1.4	kaṇhābhijāti paññattā, nīlābhijāti paññattā, lohitābhijāti paññattā, haliddābhijāti paññattā, sukkābhijāti paññattā, paramasukkābhijāti paññattā.
an6.57:2.1	Tatridaṁ, bhante, pūraṇena kassapena kaṇhābhijāti paññattā, orabbhikā sūkarikā sākuṇikā māgavikā luddā macchaghātakā corā coraghātakā bandhanāgārikā ye vā panaññepi keci kurūrakammantā.
an6.57:3.1	Tatridaṁ, bhante, pūraṇena kassapena nīlābhijāti paññattā, bhikkhū kaṇṭakavuttikā ye vā panaññepi keci kammavādā kriyavādā.
an6.57:4.1	Tatridaṁ, bhante, pūraṇena kassapena lohitābhijāti paññattā, nigaṇṭhā ekasāṭakā.
an6.57:5.1	Tatridaṁ, bhante, pūraṇena kassapena haliddābhijāti paññattā, gihī odātavasanā acelakasāvakā.
an6.57:6.1	Tatridaṁ, bhante, pūraṇena kassapena sukkābhijāti paññattā, ājīvakā ājīvakiniyo.
an6.57:7.1	Tatridaṁ, bhante, pūraṇena kassapena paramasukkābhijāti paññattā, nando vaccho kiso saṅkicco makkhali gosālo.
an6.57:8.1	Pūraṇena, bhante, kassapena imā chaḷabhijātiyo paññattā”ti.
an6.57:9.1	“Kiṁ panānanda, pūraṇassa kassapassa sabbo loko etadabbhanujānāti imā chaḷabhijātiyo paññāpetun”ti?
an6.57:9.2	“No hetaṁ, bhante.
an6.57:9.3	Seyyathāpi, ānanda, puriso daliddo assako anāḷhiko, tassa akāmakassa bilaṁ olaggeyyuṁ: ‘idaṁ te, ambho purisa, maṁsañca khāditabbaṁ, mūlañca anuppadātabban’ti.
an6.57:9.4	Evamevaṁ kho, ānanda, pūraṇena kassapena appaṭiññāya etesaṁ samaṇabrāhmaṇānaṁ imā chaḷabhijātiyo paññattā, yathā taṁ bālena abyattena akhettaññunā akusalena.
an6.57:10.1	Ahaṁ kho panānanda, chaḷabhijātiyo paññāpemi.
an6.57:10.2	Taṁ suṇāhi, sādhukaṁ manasi karohi; bhāsissāmī”ti.
an6.57:10.3	“Evaṁ, bhante”ti kho āyasmā ānando bhagavato paccassosi.
an6.57:10.4	Bhagavā etadavoca:
an6.57:10.5	“katamā cānanda, chaḷabhijātiyo?
an6.57:10.6	Idhānanda, ekacco kaṇhābhijātiyo samāno kaṇhaṁ dhammaṁ abhijāyati.
an6.57:10.7	Idha panānanda, ekacco kaṇhābhijātiyo samāno sukkaṁ dhammaṁ abhijāyati.
an6.57:10.8	Idha panānanda, ekacco kaṇhābhijātiyo samāno akaṇhaṁ asukkaṁ nibbānaṁ abhijāyati.
an6.57:10.9	Idha panānanda, ekacco sukkābhijātiyo samāno kaṇhaṁ dhammaṁ abhijāyati.
an6.57:10.10	Idha panānanda, ekacco sukkābhijātiyo samāno sukkaṁ dhammaṁ abhijāyati.
an6.57:10.11	Idha panānanda, ekacco sukkābhijātiyo samāno akaṇhaṁ asukkaṁ nibbānaṁ abhijāyati.
an6.57:11.1	Kathañcānanda, kaṇhābhijātiyo samāno kaṇhaṁ dhammaṁ abhijāyati?
an6.57:11.2	Idhānanda, ekacco nīce kule paccājāto hoti—caṇḍālakule vā nesādakule vā venakule vā rathakārakule vā pukkusakule vā, dalidde appannapānabhojane kasiravuttike, yattha kasirena ghāsacchādo labbhati.
an6.57:11.3	So ca hoti dubbaṇṇo duddasiko okoṭimako bavhābādho kāṇo vā kuṇī vā khañjo vā pakkhahato vā, na lābhī annassa pānassa vatthassa yānassa mālāgandhavilepanassa seyyāvasathapadīpeyyassa.
an6.57:11.4	So kāyena duccaritaṁ carati, vācāya duccaritaṁ carati, manasā duccaritaṁ carati.
an6.57:11.5	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an6.57:11.6	Evaṁ kho, ānanda, kaṇhābhijātiyo samāno kaṇhaṁ dhammaṁ abhijāyati.
an6.57:12.1	Kathañcānanda, kaṇhābhijātiyo samāno sukkaṁ dhammaṁ abhijāyati?
an6.57:12.2	Idhānanda, ekacco nīce kule paccājāto hoti—caṇḍālakule vā …pe…
an6.57:12.3	seyyāvasathapadīpeyyassa.
an6.57:12.4	So kāyena sucaritaṁ carati, vācāya sucaritaṁ carati, manasā sucaritaṁ carati.
an6.57:12.5	So kāyena sucaritaṁ caritvā, vācāya sucaritaṁ caritvā, manasā sucaritaṁ caritvā kāyassa bhedā paraṁ maraṇā sugatiṁ saggaṁ lokaṁ upapajjati.
an6.57:12.6	Evaṁ kho, ānanda, kaṇhābhijātiyo samāno sukkaṁ dhammaṁ abhijāyati.
an6.57:13.1	Kathañcānanda, kaṇhābhijātiyo samāno akaṇhaṁ asukkaṁ nibbānaṁ abhijāyati?
an6.57:13.2	Idhānanda, ekacco nīce kule paccājāto hoti—caṇḍālakule vā …pe…
an6.57:13.3	so ca hoti dubbaṇṇo duddasiko okoṭimako.
an6.57:13.4	So kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajati.
an6.57:13.5	So evaṁ pabbajito samāno pañca nīvaraṇe pahāya cetaso upakkilese paññāya dubbalīkaraṇe, catūsu satipaṭṭhānesu suppatiṭṭhitacitto, satta bojjhaṅge yathābhūtaṁ bhāvetvā akaṇhaṁ asukkaṁ nibbānaṁ abhijāyati.
an6.57:13.6	Evaṁ kho, ānanda, kaṇhābhijātiyo samāno akaṇhaṁ asukkaṁ nibbānaṁ abhijāyati.
an6.57:14.1	Kathañcānanda, sukkābhijātiyo samāno kaṇhaṁ dhammaṁ abhijāyati?
an6.57:14.2	Idhānanda, ekacco ucce kule paccājāto hoti—khattiyamahāsālakule vā brāhmaṇamahāsālakule vā gahapatimahāsālakule vā, aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe.
an6.57:14.3	So ca hoti abhirūpo dassanīyo pāsādiko paramāya vaṇṇapokkharatāya samannāgato, lābhī annassa pānassa vatthassa yānassa mālāgandhavilepanassa seyyāvasathapadīpeyyassa.
an6.57:14.4	So kāyena duccaritaṁ carati, vācāya duccaritaṁ carati, manasā duccaritaṁ carati.
an6.57:14.5	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an6.57:14.6	Evaṁ kho, ānanda, sukkābhijātiyo samāno kaṇhaṁ dhammaṁ abhijāyati.
an6.57:15.1	Kathañcānanda, sukkābhijātiyo samāno sukkaṁ dhammaṁ abhijāyati?
an6.57:15.2	Idhānanda, ekacco ucce kule paccājāto hoti—khattiyamahāsālakule vā …pe…
an6.57:15.3	seyyāvasathapadīpeyyassa.
an6.57:15.4	So kāyena sucaritaṁ carati, vācāya sucaritaṁ carati, manasā sucaritaṁ carati.
an6.57:15.5	So kāyena sucaritaṁ caritvā, vācāya sucaritaṁ caritvā, manasā sucaritaṁ caritvā kāyassa bhedā paraṁ maraṇā sugatiṁ saggaṁ lokaṁ upapajjati.
an6.57:15.6	Evaṁ kho, ānanda, sukkābhijātiyo samāno sukkaṁ dhammaṁ abhijāyati.
an6.57:16.1	Kathañcānanda, sukkābhijātiyo samāno akaṇhaṁ asukkaṁ nibbānaṁ abhijāyati?
an6.57:16.2	Idhānanda, ekacco ucce kule paccājāto hoti—khattiyamahāsālakule vā brāhmaṇamahāsālakule vā gahapatimahāsālakule vā, aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe.
an6.57:16.3	So ca hoti abhirūpo dassanīyo pāsādiko paramāya vaṇṇapokkharatāya samannāgato, lābhī annassa pānassa vatthassa yānassa mālāgandhavilepanassa seyyāvasathapadīpeyyassa.
an6.57:16.4	So kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajati.
an6.57:16.5	So evaṁ pabbajito samāno pañca nīvaraṇe pahāya cetaso upakkilese paññāya dubbalīkaraṇe, catūsu satipaṭṭhānesu suppatiṭṭhitacitto, satta bojjhaṅge yathābhūtaṁ bhāvetvā akaṇhaṁ asukkaṁ nibbānaṁ abhijāyati.
an6.57:16.6	Evaṁ kho, ānanda, sukkābhijātiyo samāno akaṇhaṁ asukkaṁ nibbānaṁ abhijāyati.
an6.57:17.1	Imā kho, ānanda, chaḷabhijātiyo”ti.
an6.57:17.2	Tatiyaṁ.
an6.58:0.1	Aṅguttara Nikāya 6.58
an6.58:0.2	6. Mahāvagga
an6.58:0.3	Āsavasutta
an6.58:1.1	“Chahi, bhikkhave, dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an6.58:2.1	Katamehi chahi?
an6.58:2.2	Idha, bhikkhave, bhikkhuno ye āsavā saṁvarā pahātabbā te saṁvarena pahīnā honti,
an6.58:2.3	ye āsavā paṭisevanā pahātabbā te paṭisevanāya pahīnā honti,
an6.58:2.4	ye āsavā adhivāsanā pahātabbā te adhivāsanāya pahīnā honti,
an6.58:2.5	ye āsavā parivajjanā pahātabbā te parivajjanāya pahīnā honti,
an6.58:2.6	ye āsavā vinodanā pahātabbā te vinodanāya pahīnā honti,
an6.58:2.7	ye āsavā bhāvanā pahātabbā te bhāvanāya pahīnā honti.
an6.58:3.1	Katame ca, bhikkhave, āsavā saṁvarā pahātabbā ye saṁvarena pahīnā honti?
an6.58:3.2	Idha, bhikkhave, bhikkhu paṭisaṅkhā yoniso cakkhundriyasaṁvarasaṁvuto viharati.
an6.58:3.3	Yaṁ hissa, bhikkhave, cakkhundriyasaṁvaraṁ asaṁvutassa viharato uppajjeyyuṁ āsavā vighātapariḷāhā, cakkhundriyasaṁvaraṁ saṁvutassa viharato evaṁsa te āsavā vighātapariḷāhā na honti.
an6.58:3.4	Paṭisaṅkhā yoniso sotindriya …pe…
an6.58:3.5	ghānindriya …
an6.58:3.6	jivhindriya …
an6.58:3.7	kāyindriya …
an6.58:3.8	manindriyasaṁvarasaṁvuto viharati.
an6.58:3.9	Yaṁ hissa, bhikkhave, manindriyasaṁvaraṁ asaṁvutassa viharato uppajjeyyuṁ āsavā vighātapariḷāhā, manindriyasaṁvaraṁ saṁvutassa viharato evaṁsa te āsavā vighātapariḷāhā na honti.
an6.58:3.10	Ime vuccanti, bhikkhave, āsavā saṁvarā pahātabbā ye saṁvarena pahīnā honti.
an6.58:4.1	Katame ca, bhikkhave, āsavā paṭisevanā pahātabbā ye paṭisevanāya pahīnā honti?
an6.58:4.2	Idha, bhikkhave, bhikkhu paṭisaṅkhā yoniso cīvaraṁ paṭisevati:
an6.58:4.3	‘yāvadeva sītassa paṭighātāya, uṇhassa paṭighātāya, ḍaṁsamakasavātātapasarīsapasamphassānaṁ paṭighātāya, yāvadeva hirikopīnapaṭicchādanatthaṁ’.
an6.58:4.4	Paṭisaṅkhā yoniso piṇḍapātaṁ paṭisevati:
an6.58:4.5	‘neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya, vihiṁsūparatiyā brahmacariyānuggahāya, iti purāṇañca vedanaṁ paṭihaṅkhāmi, navañca vedanaṁ na uppādessāmi, yātrā ca me bhavissati anavajjatā ca phāsuvihāro ca’.
an6.58:4.6	Paṭisaṅkhā yoniso senāsanaṁ paṭisevati:
an6.58:4.7	‘yāvadeva sītassa paṭighātāya, uṇhassa paṭighātāya, ḍaṁsamakasavātātapasarīsapasamphassānaṁ paṭighātāya, yāvadeva utuparissayavinodanapaṭisallānārāmatthaṁ’.
an6.58:4.8	Paṭisaṅkhā yoniso gilānapaccayabhesajjaparikkhāraṁ paṭisevati:
an6.58:4.9	‘yāvadeva uppannānaṁ veyyābādhikānaṁ vedanānaṁ paṭighātāya, abyābajjhaparamatāyā’ti.
an6.58:4.10	Yaṁ hissa, bhikkhave, appaṭisevato uppajjeyyuṁ āsavā vighātapariḷāhā, paṭisevato evaṁsa te āsavā vighātapariḷāhā na honti.
an6.58:4.11	Ime vuccanti, bhikkhave, āsavā paṭisevanā pahātabbā ye paṭisevanāya pahīnā honti.
an6.58:5.1	Katame ca, bhikkhave, āsavā adhivāsanā pahātabbā ye adhivāsanāya pahīnā honti?
an6.58:5.2	Idha, bhikkhave, bhikkhu paṭisaṅkhā yoniso khamo hoti sītassa uṇhassa, jighacchāya, pipāsāya, ḍaṁsamakasavātātapasarīsapasamphassānaṁ, duruttānaṁ durāgatānaṁ vacanapathānaṁ, uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko hoti.
an6.58:5.3	Yaṁ hissa, bhikkhave, anadhivāsato uppajjeyyuṁ āsavā vighātapariḷāhā, adhivāsato evaṁsa te āsavā vighātapariḷāhā na honti.
an6.58:5.4	Ime vuccanti, bhikkhave, āsavā adhivāsanā pahātabbā ye adhivāsanāya pahīnā honti.
an6.58:6.1	Katame ca, bhikkhave, āsavā parivajjanā pahātabbā ye parivajjanāya pahīnā honti?
an6.58:6.2	Idha, bhikkhave, bhikkhu paṭisaṅkhā yoniso caṇḍaṁ hatthiṁ parivajjeti, caṇḍaṁ assaṁ parivajjeti, caṇḍaṁ goṇaṁ parivajjeti, caṇḍaṁ kukkuraṁ parivajjeti, ahiṁ khāṇuṁ kaṇṭakaṭṭhānaṁ sobbhaṁ papātaṁ candanikaṁ oḷigallaṁ, yathārūpe anāsane nisinnaṁ, yathārūpe agocare carantaṁ, yathārūpe pāpake mitte bhajantaṁ viññū sabrahmacārī pāpakesu ṭhānesu okappeyyuṁ, so tañca anāsanaṁ tañca agocaraṁ te ca pāpake mitte paṭisaṅkhā yoniso parivajjeti.
an6.58:6.3	Yaṁ hissa, bhikkhave, aparivajjayato uppajjeyyuṁ āsavā vighātapariḷāhā, parivajjayato evaṁsa te āsavā vighātapariḷāhā na honti.
an6.58:6.4	Ime vuccanti, bhikkhave, āsavā parivajjanā pahātabbā ye parivajjanāya pahīnā honti.
an6.58:7.1	Katame ca, bhikkhave, āsavā vinodanā pahātabbā ye vinodanāya pahīnā honti?
an6.58:7.2	Idha, bhikkhave, bhikkhu paṭisaṅkhā yoniso uppannaṁ kāmavitakkaṁ nādhivāseti pajahati vinodeti byantīkaroti anabhāvaṁ gameti,
an6.58:7.3	paṭisaṅkhā yoniso uppannaṁ byāpādavitakkaṁ …
an6.58:7.4	uppannaṁ vihiṁsāvitakkaṁ …
an6.58:7.5	uppannuppanne pāpake akusale dhamme nādhivāseti pajahati vinodeti byantīkaroti anabhāvaṁ gameti.
an6.58:7.6	Yaṁ hissa, bhikkhave, avinodayato uppajjeyyuṁ āsavā vighātapariḷāhā, vinodayato evaṁsa te āsavā vighātapariḷāhā na honti.
an6.58:7.7	Ime vuccanti, bhikkhave, āsavā vinodanā pahātabbā ye vinodanāya pahīnā honti.
an6.58:8.1	Katame ca, bhikkhave, āsavā bhāvanā pahātabbā ye bhāvanāya pahīnā honti?
an6.58:8.2	Idha, bhikkhave, bhikkhu paṭisaṅkhā yoniso satisambojjhaṅgaṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ,
an6.58:8.3	paṭisaṅkhā yoniso dhammavicayasambojjhaṅgaṁ bhāveti …
an6.58:8.4	vīriyasambojjhaṅgaṁ bhāveti …
an6.58:8.5	pītisambojjhaṅgaṁ bhāveti …
an6.58:8.6	passaddhisambojjhaṅgaṁ bhāveti …
an6.58:8.7	samādhisambojjhaṅgaṁ bhāveti …
an6.58:8.8	upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vosaggapariṇāmiṁ.
an6.58:8.9	Yaṁ hissa, bhikkhave, abhāvayato uppajjeyyuṁ āsavā vighātapariḷāhā, bhāvayato evaṁsa te āsavā vighātapariḷāhā na honti.
an6.58:8.10	Ime vuccanti, bhikkhave, āsavā bhāvanā pahātabbā ye bhāvanāya pahīnā honti.
an6.58:9.1	Imehi kho, bhikkhave, chahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā”ti.
an6.58:9.2	Catutthaṁ.
an6.59:0.1	Aṅguttara Nikāya 6.59
an6.59:0.2	6. Mahāvagga
an6.59:0.3	Dārukammikasutta
an6.59:1.1	Evaṁ me sutaṁ—
an6.59:1.2	ekaṁ samayaṁ bhagavā nātike viharati giñjakāvasathe.
an6.59:1.3	Atha kho dārukammiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho dārukammikaṁ gahapatiṁ bhagavā etadavoca:
an6.59:1.4	“api nu te, gahapati, kule dānaṁ dīyatī”ti?
an6.59:1.5	“Dīyati me, bhante, kule dānaṁ.
an6.59:1.6	Tañca kho ye te bhikkhū āraññikā piṇḍapātikā paṁsukūlikā arahanto vā arahattamaggaṁ vā samāpannā, tathārūpesu me, bhante, bhikkhūsu dānaṁ dīyatī”ti.
an6.59:2.1	“Dujjānaṁ kho etaṁ, gahapati, tayā gihinā kāmabhoginā puttasambādhasayanaṁ ajjhāvasantena, kāsikacandanaṁ paccanubhontena, mālāgandhavilepanaṁ dhārayantena, jātarūparajataṁ sādiyantena ime vā arahanto ime vā arahattamaggaṁ samāpannāti.
an6.59:3.1	Āraññiko cepi, gahapati, bhikkhu hoti uddhato unnaḷo capalo mukharo vikiṇṇavāco muṭṭhassati asampajāno asamāhito vibbhantacitto pākatindriyo.
an6.59:3.2	Evaṁ so tenaṅgena gārayho.
an6.59:3.3	Āraññiko cepi, gahapati, bhikkhu hoti anuddhato anunnaḷo acapalo amukharo avikiṇṇavāco upaṭṭhitassati sampajāno samāhito ekaggacitto saṁvutindriyo.
an6.59:3.4	Evaṁ so tenaṅgena pāsaṁso.
an6.59:4.1	Gāmantavihārī cepi, gahapati, bhikkhu hoti uddhato …pe…
an6.59:4.2	evaṁ so tenaṅgena gārayho.
an6.59:4.3	Gāmantavihārī cepi, gahapati, bhikkhu hoti anuddhato …pe…
an6.59:4.4	evaṁ so tenaṅgena pāsaṁso.
an6.59:5.1	Piṇḍapātiko cepi, gahapati, bhikkhu hoti uddhato …pe…
an6.59:5.2	evaṁ so tenaṅgena gārayho.
an6.59:5.3	Piṇḍapātiko cepi, gahapati, bhikkhu hoti anuddhato …pe…
an6.59:5.4	evaṁ so tenaṅgena pāsaṁso.
an6.59:6.1	Nemantaniko cepi, gahapati, bhikkhu hoti uddhato …pe…
an6.59:6.2	evaṁ so tenaṅgena gārayho.
an6.59:6.3	Nemantaniko cepi, gahapati, bhikkhu hoti anuddhato …pe…
an6.59:6.4	evaṁ so tenaṅgena pāsaṁso.
an6.59:7.1	Paṁsukūliko cepi, gahapati, bhikkhu hoti uddhato …pe…
an6.59:7.2	evaṁ so tenaṅgena gārayho.
an6.59:7.3	Paṁsukūliko cepi, gahapati, bhikkhu hoti anuddhato …pe…
an6.59:7.4	evaṁ so tenaṅgena pāsaṁso.
an6.59:8.1	Gahapaticīvaradharo cepi, gahapati, bhikkhu hoti uddhato unnaḷo capalo mukharo vikiṇṇavāco muṭṭhassati asampajāno asamāhito vibbhantacitto pākatindriyo.
an6.59:8.2	Evaṁ so tenaṅgena gārayho.
an6.59:8.3	Gahapaticīvaradharo cepi, gahapati, bhikkhu hoti anuddhato anunnaḷo acapalo amukharo avikiṇṇavāco upaṭṭhitassati sampajāno samāhito ekaggacitto saṁvutindriyo.
an6.59:8.4	Evaṁ so tenaṅgena pāsaṁso.
an6.59:9.1	Iṅgha tvaṁ, gahapati, saṅghe dānaṁ dehi.
an6.59:9.2	Saṅghe te dānaṁ dadato cittaṁ pasīdissati.
an6.59:9.3	So tvaṁ pasannacitto kāyassa bhedā paraṁ maraṇā sugatiṁ saggaṁ lokaṁ upapajjissasī”ti.
an6.59:9.4	“Esāhaṁ, bhante, ajjatagge saṅghe dānaṁ dassāmī”ti.
an6.59:9.5	Pañcamaṁ.
an6.60:0.1	Aṅguttara Nikāya 6.60
an6.60:0.2	6. Mahāvagga
an6.60:0.3	Hatthisāriputtasutta
an6.60:1.1	Evaṁ me sutaṁ—
an6.60:1.2	ekaṁ samayaṁ bhagavā bārāṇasiyaṁ viharati isipatane migadāye.
an6.60:1.3	Tena kho pana samayena sambahulā therā bhikkhū pacchābhattaṁ piṇḍapātapaṭikkantā maṇḍalamāḷe sannisinnā sannipatitā abhidhammakathaṁ kathenti.
an6.60:1.4	Tatra sudaṁ āyasmā citto hatthisāriputto therānaṁ bhikkhūnaṁ abhidhammakathaṁ kathentānaṁ antarantarā kathaṁ opāteti.
an6.60:1.5	Atha kho āyasmā mahākoṭṭhiko āyasmantaṁ cittaṁ hatthisāriputtaṁ etadavoca:
an6.60:1.6	“māyasmā citto hatthisāriputto therānaṁ bhikkhūnaṁ abhidhammakathaṁ kathentānaṁ antarantarā kathaṁ opātesi, yāva kathāpariyosānaṁ āyasmā citto āgametū”ti.
an6.60:1.7	Evaṁ vutte, āyasmato cittassa hatthisāriputtassa sahāyakā bhikkhū āyasmantaṁ mahākoṭṭhikaṁ etadavocuṁ:
an6.60:1.8	“māyasmā mahākoṭṭhiko āyasmantaṁ cittaṁ hatthisāriputtaṁ apasādesi, paṇḍito āyasmā citto hatthisāriputto.
an6.60:1.9	Pahoti cāyasmā citto hatthisāriputto therānaṁ bhikkhūnaṁ abhidhammakathaṁ kathetun”ti.
an6.60:2.1	“Dujjānaṁ kho etaṁ, āvuso, parassa cetopariyāyaṁ ajānantehi.
an6.60:2.2	Idhāvuso, ekacco puggalo tāvadeva soratasorato hoti, nivātanivāto hoti, upasantupasanto hoti, yāva satthāraṁ upanissāya viharati aññataraṁ vā garuṭṭhāniyaṁ sabrahmacāriṁ.
an6.60:2.3	Yato ca kho so vapakassateva satthārā, vapakassati garuṭṭhāniyehi sabrahmacārīhi, so saṁsaṭṭho viharati bhikkhūhi bhikkhunīhi upāsakehi upāsikāhi raññā rājamahāmattehi titthiyehi titthiyasāvakehi.
an6.60:2.4	Tassa saṁsaṭṭhassa vissatthassa pākatassa bhassamanuyuttassa viharato rāgo cittaṁ anuddhaṁseti.
an6.60:2.5	So rāgānuddhaṁsitena cittena sikkhaṁ paccakkhāya hīnāyāvattati.
an6.60:3.1	Seyyathāpi, āvuso, goṇo kiṭṭhādo dāmena vā baddho vaje vā oruddho.
an6.60:3.2	Yo nu kho, āvuso, evaṁ vadeyya: ‘na dānāyaṁ goṇo kiṭṭhādo punadeva kiṭṭhaṁ otarissatī’ti, sammā nu kho so, āvuso, vadamāno vadeyyā”ti?
an6.60:3.3	“No hidaṁ, āvuso”.
an6.60:3.4	“Ṭhānañhetaṁ, āvuso, vijjati, yaṁ so goṇo kiṭṭhādo dāmaṁ vā chetvā vajaṁ vā bhinditvā, atha punadeva kiṭṭhaṁ otareyyāti.
an6.60:3.5	Evamevaṁ kho, āvuso, idhekacco puggalo tāvadeva soratasorato hoti, nivātanivāto hoti, upasantupasanto hoti yāva satthāraṁ upanissāya viharati aññataraṁ vā garuṭṭhāniyaṁ sabrahmacāriṁ.
an6.60:3.6	Yato ca kho so vapakassateva satthārā, vapakassati garuṭṭhāniyehi sabrahmacārīhi, so saṁsaṭṭho viharati bhikkhūhi bhikkhunīhi upāsakehi upāsikāhi raññā rājamahāmattehi titthiyehi titthiyasāvakehi.
an6.60:3.7	Tassa saṁsaṭṭhassa vissatthassa pākatassa bhassamanuyuttassa viharato rāgo cittaṁ anuddhaṁseti.
an6.60:3.8	So rāgānuddhaṁsitena cittena sikkhaṁ paccakkhāya hīnāyāvattati.
an6.60:4.1	Idha panāvuso, ekacco puggalo vivicceva kāmehi …pe… paṭhamaṁ jhānaṁ upasampajja viharati.
an6.60:4.2	So ‘lābhimhi paṭhamassa jhānassā’ti saṁsaṭṭho viharati bhikkhūhi …pe…
an6.60:4.3	sikkhaṁ paccakkhāya hīnāyāvattati.
an6.60:4.4	Seyyathāpi, āvuso, cātumahāpathe thullaphusitako devo vassanto rajaṁ antaradhāpeyya, cikkhallaṁ pātukareyya.
an6.60:4.5	Yo nu kho, āvuso, evaṁ vadeyya: ‘na dāni amusmiṁ cātumahāpathe punadeva rajo pātubhavissatī’ti, sammā nu kho so, āvuso, vadamāno vadeyyā”ti?
an6.60:4.6	“No hidaṁ, āvuso”.
an6.60:4.7	“Ṭhānañhetaṁ, āvuso, vijjati, yaṁ amusmiṁ cātumahāpathe manussā vā atikkameyyuṁ, gopasū vā atikkameyyuṁ, vātātapo vā snehagataṁ pariyādiyeyya, atha punadeva rajo pātubhaveyyāti.
an6.60:4.8	Evamevaṁ kho, āvuso, idhekacco puggalo vivicceva kāmehi …pe… paṭhamaṁ jhānaṁ upasampajja viharati.
an6.60:4.9	So ‘lābhimhi paṭhamassa jhānassā’ti saṁsaṭṭho viharati bhikkhūhi …pe…
an6.60:4.10	sikkhaṁ paccakkhāya hīnāyāvattati.
an6.60:5.1	Idha panāvuso, ekacco puggalo vitakkavicārānaṁ vūpasamā …pe… dutiyaṁ jhānaṁ upasampajja viharati.
an6.60:5.2	So ‘lābhimhi dutiyassa jhānassā’ti saṁsaṭṭho viharati bhikkhūhi …pe…
an6.60:5.3	sikkhaṁ paccakkhāya hīnāyāvattati.
an6.60:5.4	Seyyathāpi, āvuso, gāmassa vā nigamassa vā avidūre mahantaṁ taḷākaṁ.
an6.60:5.5	Tattha thullaphusitako devo vuṭṭho sippisambukampi sakkharakaṭhalampi antaradhāpeyya.
an6.60:5.6	Yo nu kho, āvuso, evaṁ vadeyya: ‘na dāni amusmiṁ taḷāke punadeva sippisambukā vā sakkharakaṭhalā vā pātubhavissantī’ti, sammā nu kho so, āvuso, vadamāno vadeyyā”ti?
an6.60:5.7	“No hidaṁ, āvuso”.
an6.60:5.8	“Ṭhānañhetaṁ, āvuso, vijjati, yaṁ amusmiṁ taḷāke manussā vā piveyyuṁ, gopasū vā piveyyuṁ, vātātapo vā snehagataṁ pariyādiyeyya, atha punadeva sippisambukāpi sakkharakaṭhalāpi pātubhaveyyunti.
an6.60:5.9	Evamevaṁ kho, āvuso, idhekacco puggalo vitakkavicārānaṁ vūpasamā …pe… dutiyaṁ jhānaṁ upasampajja viharati.
an6.60:5.10	So ‘lābhimhi dutiyassa jhānassā’ti saṁsaṭṭho viharati bhikkhūhi …pe…
an6.60:5.11	sikkhaṁ paccakkhāya hīnāyāvattati.
an6.60:6.1	Idha panāvuso, ekacco puggalo pītiyā ca virāgā …pe… tatiyaṁ jhānaṁ upasampajja viharati.
an6.60:6.2	So ‘lābhimhi tatiyassa jhānassā’ti saṁsaṭṭho viharati bhikkhūhi …pe…
an6.60:6.3	sikkhaṁ paccakkhāya hīnāyāvattati.
an6.60:6.4	Seyyathāpi, āvuso, purisaṁ paṇītabhojanaṁ bhuttāviṁ ābhidosikaṁ bhojanaṁ nacchādeyya.
an6.60:6.5	Yo nu kho, āvuso, evaṁ vadeyya: ‘na dāni amuṁ purisaṁ punadeva bhojanaṁ chādessatī’ti, sammā nu kho so, āvuso, vadamāno vadeyyā”ti?
an6.60:6.6	“No hidaṁ, āvuso”.
an6.60:6.7	“Ṭhānañhetaṁ, āvuso, vijjati, amuṁ purisaṁ paṇītabhojanaṁ bhuttāviṁ yāvassa sā ojā kāye ṭhassati tāva na aññaṁ bhojanaṁ chādessati.
an6.60:6.8	Yato ca khvassa sā ojā antaradhāyissati, atha punadeva taṁ bhojanaṁ chādeyyāti.
an6.60:6.9	Evamevaṁ kho, āvuso, idhekacco puggalo pītiyā ca virāgā …pe… tatiyaṁ jhānaṁ upasampajja viharati.
an6.60:6.10	So ‘lābhimhi tatiyassa jhānassā’ti saṁsaṭṭho viharati bhikkhūhi …pe…
an6.60:6.11	sikkhaṁ paccakkhāya hīnāyāvattati.
an6.60:7.1	Idha, panāvuso, ekacco puggalo sukhassa ca pahānā dukkhassa ca pahānā …pe… catutthaṁ jhānaṁ upasampajja viharati.
an6.60:7.2	So ‘lābhimhi catutthassa jhānassā’ti saṁsaṭṭho viharati bhikkhūhi …pe…
an6.60:7.3	sikkhaṁ paccakkhāya hīnāyāvattati.
an6.60:7.4	Seyyathāpi, āvuso, pabbatasaṅkhepe udakarahado nivāto vigataūmiko.
an6.60:7.5	Yo nu kho, āvuso, evaṁ vadeyya: ‘na dāni amusmiṁ udakarahade punadeva ūmi pātubhavissatī’ti, sammā nu kho so, āvuso, vadamāno vadeyyā”ti?
an6.60:7.6	“No hidaṁ, āvuso”.
an6.60:7.7	“Ṭhānañhetaṁ, āvuso, vijjati, yā puratthimāya disāya āgaccheyya bhusā vātavuṭṭhi. Sā tasmiṁ udakarahade ūmiṁ janeyya. Yā pacchimāya disāya āgaccheyya …pe… yā uttarāya disāya āgaccheyya … yā dakkhiṇāya disāya āgaccheyya bhusā vātavuṭṭhi. Sā tasmiṁ udakarahade ūmiṁ janeyyāti.
an6.60:7.8	Evamevaṁ kho, āvuso, idhekacco puggalo sukhassa ca pahānā dukkhassa ca pahānā …pe… catutthaṁ jhānaṁ upasampajja viharati.
an6.60:7.9	So ‘lābhimhi catutthassa jhānassā’ti saṁsaṭṭho viharati bhikkhūhi …pe…
an6.60:7.10	sikkhaṁ paccakkhāya hīnāyāvattati.
an6.60:8.1	Idha, panāvuso, ekacco puggalo sabbanimittānaṁ amanasikārā animittaṁ cetosamādhiṁ upasampajja viharati.
an6.60:8.2	So ‘lābhimhi animittassa cetosamādhissā’ti saṁsaṭṭho viharati bhikkhūhi bhikkhunīhi upāsakehi upāsikāhi raññā rājamahāmattehi titthiyehi titthiyasāvakehi.
an6.60:8.3	Tassa saṁsaṭṭhassa vissatthassa pākatassa bhassamanuyuttassa viharato rāgo cittaṁ anuddhaṁseti.
an6.60:8.4	So rāgānuddhaṁsitena cittena sikkhaṁ paccakkhāya hīnāyāvattati.
an6.60:8.5	Seyyathāpi, āvuso, rājā vā rājamahāmatto vā caturaṅginiyā senāya addhānamaggappaṭipanno aññatarasmiṁ vanasaṇḍe ekarattiṁ vāsaṁ upagaccheyya.
an6.60:8.6	Tatra hatthisaddena assasaddena rathasaddena pattisaddena bheripaṇavasaṅkhatiṇavaninnādasaddena cīrikasaddo antaradhāyeyya.
an6.60:8.7	Yo nu kho, āvuso, evaṁ vadeyya: ‘na dāni amusmiṁ vanasaṇḍe punadeva cīrikasaddo pātubhavissatī’ti, sammā nu kho so, āvuso, vadamāno vadeyyā”ti?
an6.60:8.8	“No hidaṁ, āvuso”.
an6.60:8.9	“Ṭhānañhetaṁ, āvuso, vijjati, yaṁ so rājā vā rājamahāmatto vā tamhā vanasaṇḍā pakkameyya, atha punadeva cīrikasaddo pātubhaveyyāti.
an6.60:8.10	Evamevaṁ kho, āvuso, idhekacco puggalo sabbanimittānaṁ amanasikārā animittaṁ cetosamādhiṁ upasampajja viharati.
an6.60:8.11	So ‘lābhimhi animittassa cetosamādhissā’ti saṁsaṭṭho viharati bhikkhūhi bhikkhunīhi upāsakehi upāsikāhi raññā rājamahāmattehi titthiyehi titthiyasāvakehi.
an6.60:8.12	Tassa saṁsaṭṭhassa vissatthassa pākatassa bhassamanuyuttassa viharato rāgo cittaṁ anuddhaṁseti.
an6.60:8.13	So rāgānuddhaṁsitena cittena sikkhaṁ paccakkhāya hīnāyāvattatī”ti.
an6.60:9.1	Atha kho āyasmā citto hatthisāriputto aparena samayena sikkhaṁ paccakkhāya hīnāyāvattati.
an6.60:9.2	Atha kho cittassa hatthisāriputtassa sahāyakā bhikkhū yenāyasmā mahākoṭṭhiko tenupasaṅkamiṁsu; upasaṅkamitvā āyasmantaṁ mahākoṭṭhikaṁ etadavocuṁ:
an6.60:9.3	“kiṁ nu kho āyasmatā mahākoṭṭhikena citto hatthisāriputto cetasā ceto paricca vidito:
an6.60:9.4	‘imāsañca imāsañca vihārasamāpattīnaṁ citto hatthisāriputto lābhī, atha ca pana sikkhaṁ paccakkhāya hīnāyāvattissatī’ti;
an6.60:9.5	udāhu devatā etamatthaṁ ārocesuṁ:
an6.60:9.6	‘citto, bhante, hatthisāriputto imāsañca imāsañca vihārasamāpattīnaṁ lābhī, atha ca pana sikkhaṁ paccakkhāya hīnāyāvattissatī’”ti?
an6.60:9.7	“Cetasā ceto paricca vidito me, āvuso:
an6.60:9.8	‘citto hatthisāriputto imāsañca imāsañca vihārasamāpattīnaṁ lābhī, atha ca pana sikkhaṁ paccakkhāya hīnāyāvattissatī’ti.
an6.60:9.9	Devatāpi me etamatthaṁ ārocesuṁ:
an6.60:9.10	‘citto, bhante, hatthisāriputto imāsañca imāsañca vihārasamāpattīnaṁ lābhī, atha ca pana sikkhaṁ paccakkhāya hīnāyāvattissatī’”ti.
an6.60:10.1	Atha kho cittassa hatthisāriputtassa sahāyakā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
an6.60:10.2	“citto, bhante, hatthisāriputto imāsañca imāsañca vihārasamāpattīnaṁ lābhī, atha ca pana sikkhaṁ paccakkhāya hīnāyāvattatī”ti.
an6.60:10.3	“Na, bhikkhave, citto ciraṁ sarissati nekkhammassā”ti.
an6.60:11.1	Atha kho citto hatthisāriputto nacirasseva kesamassuṁ ohāretvā kāsāyāni vatthāni acchādetvā agārasmā anagāriyaṁ pabbaji.
an6.60:11.2	Atha kho āyasmā citto hatthisāriputto eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
an6.60:11.3	“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
an6.60:11.4	Aññataro ca panāyasmā citto hatthisāriputto arahataṁ ahosīti.
an6.60:11.5	Chaṭṭhaṁ.
an6.61:0.1	Aṅguttara Nikāya 6.61
an6.61:0.2	6. Mahāvagga
an6.61:0.3	Majjhesutta
an6.61:1.1	Evaṁ me sutaṁ—
an6.61:1.2	ekaṁ samayaṁ bhagavā bārāṇasiyaṁ viharati isipatane migadāye.
an6.61:1.3	Tena kho pana samayena sambahulānaṁ therānaṁ bhikkhūnaṁ pacchābhattaṁ piṇḍapātapaṭikkantānaṁ maṇḍalamāḷe sannisinnānaṁ sannipatitānaṁ ayamantarākathā udapādi:
an6.61:1.4	“vuttamidaṁ, āvuso, bhagavatā pārāyane metteyyapañhe:
an6.61:2.1	‘Yo ubhonte viditvāna,
an6.61:2.2	majjhe mantā na lippati;
an6.61:2.3	Taṁ brūmi mahāpurisoti,
an6.61:2.4	sodha sibbinimaccagā’”ti.
an6.61:3.1	“Katamo nu kho, āvuso, eko anto, katamo dutiyo anto, kiṁ majjhe, kā sibbinī”ti?
an6.61:3.2	Evaṁ vutte, aññataro bhikkhu there bhikkhū etadavoca:
an6.61:3.3	“phasso kho, āvuso, eko anto, phassasamudayo dutiyo anto, phassanirodho majjhe, taṇhā sibbinī;
an6.61:3.4	taṇhā hi naṁ sibbati tassa tasseva bhavassa abhinibbattiyā.
an6.61:3.5	Ettāvatā kho, āvuso, bhikkhu abhiññeyyaṁ abhijānāti, pariññeyyaṁ parijānāti, abhiññeyyaṁ abhijānanto pariññeyyaṁ parijānanto diṭṭheva dhamme dukkhassantakaro hotī”ti.
an6.61:4.1	Evaṁ vutte, aññataro bhikkhu there bhikkhū etadavoca:
an6.61:4.2	“atītaṁ kho, āvuso, eko anto, anāgataṁ dutiyo anto, paccuppannaṁ majjhe, taṇhā sibbinī;
an6.61:4.3	taṇhā hi naṁ sibbati tassa tasseva bhavassa abhinibbattiyā.
an6.61:4.4	Ettāvatā kho, āvuso, bhikkhu abhiññeyyaṁ abhijānāti, pariññeyyaṁ parijānāti, abhiññeyyaṁ abhijānanto, pariññeyyaṁ parijānanto diṭṭheva dhamme dukkhassantakaro hotī”ti.
an6.61:5.1	Evaṁ vutte, aññataro bhikkhu there bhikkhū etadavoca:
an6.61:5.2	“sukhā, āvuso, vedanā eko anto, dukkhā vedanā dutiyo anto, adukkhamasukhā vedanā majjhe, taṇhā sibbinī;
an6.61:5.3	taṇhā hi naṁ sibbati tassa tasseva bhavassa abhinibbattiyā.
an6.61:5.4	Ettāvatā kho, āvuso, bhikkhu abhiññeyyaṁ abhijānāti, pariññeyyaṁ parijānāti, abhiññeyyaṁ abhijānanto, pariññeyyaṁ parijānanto diṭṭheva dhamme dukkhassantakaro hotī”ti.
an6.61:6.1	Evaṁ vutte, aññataro bhikkhu there bhikkhū etadavoca:
an6.61:6.2	“nāmaṁ kho, āvuso, eko anto, rūpaṁ dutiyo anto, viññāṇaṁ majjhe, taṇhā sibbinī;
an6.61:6.3	taṇhā hi naṁ sibbati tassa tasseva bhavassa abhinibbattiyā.
an6.61:6.4	Ettāvatā kho, āvuso, bhikkhu abhiññeyyaṁ abhijānāti, pariññeyyaṁ parijānāti, abhiññeyyaṁ abhijānanto pariññeyyaṁ parijānanto diṭṭheva dhamme dukkhassantakaro hotī”ti.
an6.61:7.1	Evaṁ vutte aññataro bhikkhu there bhikkhū etadavoca:
an6.61:7.2	“cha kho, āvuso, ajjhattikāni āyatanāni eko anto, cha bāhirāni āyatanāni dutiyo anto, viññāṇaṁ majjhe, taṇhā sibbinī;
an6.61:7.3	taṇhā hi naṁ sibbati tassa tasseva bhavassa abhinibbattiyā.
an6.61:7.4	Ettāvatā kho, āvuso, bhikkhu abhiññeyyaṁ abhijānāti, pariññeyyaṁ parijānāti, abhiññeyyaṁ abhijānanto pariññeyyaṁ parijānanto diṭṭheva dhamme dukkhassantakaro hotī”ti.
an6.61:8.1	Evaṁ vutte aññataro bhikkhu there bhikkhū etadavoca:
an6.61:8.2	“sakkāyo kho, āvuso, eko anto, sakkāyasamudayo dutiyo anto, sakkāyanirodho majjhe, taṇhā sibbinī;
an6.61:8.3	taṇhā hi naṁ sibbati tassa tasseva bhavassa abhinibbattiyā.
an6.61:8.4	Ettāvatā kho, āvuso, bhikkhu abhiññeyyaṁ abhijānāti, pariññeyyaṁ parijānāti, abhiññeyyaṁ abhijānanto pariññeyyaṁ parijānanto diṭṭheva dhamme dukkhassantakaro hotī”ti.
an6.61:9.1	Evaṁ vutte, aññataro bhikkhu there bhikkhū etadavoca:
an6.61:9.2	“byākataṁ kho, āvuso, amhehi sabbeheva yathāsakaṁ paṭibhānaṁ.
an6.61:9.3	Āyāmāvuso, yena bhagavā tenupasaṅkamissāma; upasaṅkamitvā bhagavato etamatthaṁ ārocessāma.
an6.61:9.4	Yathā no bhagavā byākarissati tathā naṁ dhāressāmā”ti.
an6.61:10.1	“Evamāvuso”ti kho therā bhikkhū tassa bhikkhuno paccassosuṁ.
an6.61:10.2	Atha kho therā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.
an6.61:10.3	Ekamantaṁ nisinnā kho therā bhikkhū yāvatako ahosi sabbeheva saddhiṁ kathāsallāpo, taṁ sabbaṁ bhagavato ārocesuṁ.
an6.61:10.4	“Kassa nu kho, bhante, subhāsitan”ti?
an6.61:10.5	“Sabbesaṁ vo, bhikkhave, subhāsitaṁ pariyāyena, api ca yaṁ mayā sandhāya bhāsitaṁ pārāyane metteyyapañhe:
an6.61:11.1	‘Yo ubhonte viditvāna,
an6.61:11.2	majjhe mantā na lippati;
an6.61:11.3	Taṁ brūmi mahāpurisoti,
an6.61:11.4	sodha sibbinimaccagā’ti.
an6.61:12.1	Taṁ suṇātha, sādhukaṁ manasi karotha, bhāsissāmī”ti.
an6.61:12.2	“Evaṁ, bhante”ti kho therā bhikkhū bhagavato paccassosuṁ.
an6.61:12.3	Bhagavā etadavoca:
an6.61:12.4	“phasso kho, bhikkhave, eko anto, phassasamudayo dutiyo anto, phassanirodho majjhe, taṇhā sibbinī;
an6.61:12.5	taṇhā hi naṁ sibbati tassa tasseva bhavassa abhinibbattiyā.
an6.61:12.6	Ettāvatā kho, bhikkhave, bhikkhu abhiññeyyaṁ abhijānāti, pariññeyyaṁ parijānāti, abhiññeyyaṁ abhijānanto pariññeyyaṁ parijānanto diṭṭheva dhamme dukkhassantakaro hotī”ti.
an6.61:12.7	Sattamaṁ.
an6.62:0.1	Aṅguttara Nikāya 6.62
an6.62:0.2	6. Mahāvagga
an6.62:0.3	Purisindriyañāṇasutta
an6.62:1.1	Evaṁ me sutaṁ—
an6.62:1.2	ekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena daṇḍakappakaṁ nāma kosalānaṁ nigamo tadavasari.
an6.62:1.3	Atha kho bhagavā maggā okkamma aññatarasmiṁ rukkhamūle paññatte āsane nisīdi.
an6.62:1.4	Te ca bhikkhū daṇḍakappakaṁ pavisiṁsu āvasathaṁ pariyesituṁ.
an6.62:2.1	Atha kho āyasmā ānando sambahulehi bhikkhūhi saddhiṁ yena aciravatī nadī tenupasaṅkami gattāni parisiñcituṁ.
an6.62:2.2	Aciravatiyā nadiyā gattāni parisiñcitvā paccuttaritvā ekacīvaro aṭṭhāsi gattāni pubbāpayamāno.
an6.62:2.3	Atha kho aññataro bhikkhu yenāyasmā ānando tenupasaṅkami; upasaṅkamitvā āyasmantaṁ ānandaṁ etadavoca:
an6.62:2.4	“kiṁ nu kho, āvuso ānanda, sabbaṁ cetaso samannāharitvā nu kho devadatto bhagavatā byākato:
an6.62:2.5	‘āpāyiko devadatto nerayiko kappaṭṭho atekiccho’ti, udāhu kenacideva pariyāyenāti?
an6.62:2.6	Evaṁ kho panetaṁ, āvuso, bhagavatā byākatan”ti.
an6.62:3.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an6.62:3.2	“idhāhaṁ, bhante, sambahulehi bhikkhūhi saddhiṁ yena aciravatī nadī tenupasaṅkamiṁ gattāni parisiñcituṁ.
an6.62:3.3	Aciravatiyā nadiyā gattāni parisiñcitvā paccuttaritvā ekacīvaro aṭṭhāsiṁ gattāni pubbāpayamāno.
an6.62:3.4	Atha kho, bhante, aññataro bhikkhu yenāhaṁ tenupasaṅkami; upasaṅkamitvā maṁ etadavoca:
an6.62:3.5	‘kiṁ nu kho, āvuso ānanda, sabbaṁ cetaso samannāharitvā nu kho devadatto bhagavatā byākato—
an6.62:3.6	āpāyiko devadatto nerayiko kappaṭṭho atekicchoti, udāhu kenacideva pariyāyenā’ti?
an6.62:3.7	Evaṁ vutte, ahaṁ, bhante, taṁ bhikkhuṁ etadavocaṁ:
an6.62:3.8	‘evaṁ kho panetaṁ, āvuso, bhagavatā byākatan’”ti.
an6.62:4.1	“So vā kho, ānanda, bhikkhu navo bhavissati acirapabbajito, thero vā pana bālo abyatto.
an6.62:4.2	Kathañhi nāma yaṁ mayā ekaṁsena byākataṁ tattha dvejjhaṁ āpajjissati.
an6.62:4.3	Nāhaṁ, ānanda, aññaṁ ekapuggalampi samanupassāmi, yo evaṁ mayā sabbaṁ cetaso samannāharitvā byākato, yathayidaṁ devadatto.
an6.62:4.4	Yāvakīvañcāhaṁ, ānanda, devadattassa vālaggakoṭinittudanamattampi sukkadhammaṁ addasaṁ;
an6.62:4.5	neva tāvāhaṁ devadattaṁ byākāsiṁ:
an6.62:4.6	‘āpāyiko devadatto nerayiko kappaṭṭho atekiccho’ti.
an6.62:4.7	Yato ca kho ahaṁ, ānanda, devadattassa vālaggakoṭinittudanamattampi sukkadhammaṁ na addasaṁ;
an6.62:4.8	athāhaṁ devadattaṁ byākāsiṁ:
an6.62:4.9	‘āpāyiko devadatto nerayiko kappaṭṭho atekiccho’ti.
an6.62:5.1	Seyyathāpi, ānanda, gūthakūpo sādhikaporiso pūro gūthassa samatittiko.
an6.62:5.2	Tatra puriso sasīsako nimuggo assa.
an6.62:5.3	Tassa kocideva puriso uppajjeyya atthakāmo hitakāmo yogakkhemakāmo tamhā gūthakūpā uddharitukāmo.
an6.62:5.4	So taṁ gūthakūpaṁ samantānuparigacchanto neva passeyya tassa purisassa vālaggakoṭinittudanamattampi gūthena amakkhitaṁ, yattha taṁ gahetvā uddhareyya.
an6.62:5.5	Evamevaṁ kho ahaṁ, ānanda, yato devadattassa vālaggakoṭinittudanamattampi sukkadhammaṁ na addasaṁ;
an6.62:5.6	athāhaṁ devadattaṁ byākāsiṁ:
an6.62:5.7	‘āpāyiko devadatto nerayiko kappaṭṭho atekiccho’ti.
an6.62:5.8	Sace tumhe, ānanda, suṇeyyātha tathāgatassa purisindriyañāṇāni vibhajissāmī”ti?
an6.62:6.1	“Etassa, bhagavā, kālo; etassa, sugata, kālo
an6.62:6.2	yaṁ bhagavā purisindriyañāṇāni vibhajeyya. Bhagavato sutvā bhikkhū dhāressantī”ti.
an6.62:6.3	“Tenahānanda, suṇāhi, sādhukaṁ manasi karohi; bhāsissāmī”ti.
an6.62:6.4	“Evaṁ, bhante”ti kho āyasmā ānando bhagavato paccassosi.
an6.62:6.5	Bhagavā etadavoca:
an6.62:7.1	“Idhāhaṁ, ānanda, ekaccaṁ puggalaṁ evaṁ cetasā ceto paricca pajānāmi:
an6.62:7.2	‘imassa kho puggalassa vijjamānā kusalāpi dhammā akusalāpi dhammā’ti.
an6.62:7.3	Tamenaṁ aparena samayena evaṁ cetasā ceto paricca pajānāmi:
an6.62:7.4	‘imassa kho puggalassa kusalā dhammā antarahitā, akusalā dhammā sammukhībhūtā.
an6.62:7.5	Atthi ca khvassa kusalamūlaṁ asamucchinnaṁ, tamhā tassa kusalā kusalaṁ pātubhavissati.
an6.62:7.6	Evamayaṁ puggalo āyatiṁ aparihānadhammo bhavissatī’ti.
an6.62:7.7	Seyyathāpi, ānanda, bījāni akhaṇḍāni apūtīni avātātapahatāni sāradāni sukhasayitāni sukhette suparikammakatāya bhūmiyā nikkhittāni.
an6.62:7.8	Jāneyyāsi tvaṁ, ānanda, imāni bījāni vuddhiṁ virūḷhiṁ vepullaṁ āpajjissantī”ti?
an6.62:7.9	“Evaṁ, bhante”.
an6.62:7.10	“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:
an6.62:7.11	‘imassa kho puggalassa vijjamānā kusalāpi dhammā akusalāpi dhammā’ti.
an6.62:7.12	Tamenaṁ aparena samayena evaṁ cetasā ceto paricca pajānāmi:
an6.62:7.13	‘imassa kho puggalassa kusalā dhammā antarahitā, akusalā dhammā sammukhībhūtā.
an6.62:7.14	Atthi ca khvassa kusalamūlaṁ asamucchinnaṁ, tamhā tassa kusalā kusalaṁ pātubhavissati.
an6.62:7.15	Evamayaṁ puggalo āyatiṁ aparihānadhammo bhavissatī’ti.
an6.62:7.16	Evampi kho, ānanda, tathāgatassa purisapuggalo cetasā ceto paricca vidito hoti.
an6.62:7.17	Evampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.
an6.62:7.18	Evampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.
an6.62:8.1	Idha panāhaṁ, ānanda, ekaccaṁ puggalaṁ evaṁ cetasā ceto paricca pajānāmi:
an6.62:8.2	‘imassa kho puggalassa vijjamānā kusalāpi dhammā akusalāpi dhammā’ti.
an6.62:8.3	Tamenaṁ aparena samayena evaṁ cetasā ceto paricca pajānāmi:
an6.62:8.4	‘imassa kho puggalassa akusalā dhammā antarahitā, kusalā dhammā sammukhībhūtā.
an6.62:8.5	Atthi ca khvassa akusalamūlaṁ asamucchinnaṁ, tamhā tassa akusalā akusalaṁ pātubhavissati.
an6.62:8.6	Evamayaṁ puggalo āyatiṁ parihānadhammo bhavissatī’ti.
an6.62:8.7	Seyyathāpi, ānanda, bījāni akhaṇḍāni apūtīni avātātapahatāni sāradāni sukhasayitāni puthusilāya nikkhittāni.
an6.62:8.8	Jāneyyāsi tvaṁ, ānanda, nayimāni bījāni vuddhiṁ virūḷhiṁ vepullaṁ āpajjissantī”ti?
an6.62:8.9	“Evaṁ, bhante”.
an6.62:8.10	“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:
an6.62:8.11	‘imassa kho puggalassa vijjamānā kusalāpi dhammā akusalāpi dhammā’ti.
an6.62:8.12	Tamenaṁ aparena samayena evaṁ cetasā ceto paricca pajānāmi:
an6.62:8.13	‘imassa kho puggalassa akusalā dhammā antarahitā, kusalā dhammā sammukhībhūtā.
an6.62:8.14	Atthi ca khvassa akusalamūlaṁ asamucchinnaṁ, tamhā tassa akusalā akusalaṁ pātubhavissati.
an6.62:8.15	Evamayaṁ puggalo āyatiṁ parihānadhammo bhavissatī’ti.
an6.62:8.16	Evampi kho, ānanda, tathāgatassa purisapuggalo cetasā ceto paricca vidito hoti.
an6.62:8.17	Evampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.
an6.62:8.18	Evampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.
an6.62:9.1	Idha panāhaṁ, ānanda, ekaccaṁ puggalaṁ evaṁ cetasā ceto paricca pajānāmi:
an6.62:9.2	‘imassa kho puggalassa vijjamānā kusalāpi dhammā akusalāpi dhammā’ti.
an6.62:9.3	Tamenaṁ aparena samayena evaṁ cetasā ceto paricca pajānāmi:
an6.62:9.4	‘natthi imassa puggalassa vālaggakoṭinittudanamattopi sukko dhammo, samannāgatoyaṁ puggalo ekantakāḷakehi akusalehi dhammehi, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjissatī’ti.
an6.62:9.5	Seyyathāpi, ānanda, bījāni khaṇḍāni pūtīni vātātapahatāni sukhette suparikammakatāya bhūmiyā nikkhittāni.
an6.62:9.6	Jāneyyāsi tvaṁ, ānanda, nayimāni bījāni vuddhiṁ virūḷhiṁ vepullaṁ āpajjissantī”ti?
an6.62:9.7	“Evaṁ, bhante”.
an6.62:9.8	“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:
an6.62:9.9	‘imassa kho puggalassa vijjamānā kusalāpi dhammā akusalāpi dhammā’ti.
an6.62:9.10	Tamenaṁ aparena samayena evaṁ cetasā ceto paricca pajānāmi:
an6.62:9.11	‘natthi imassa puggalassa vālaggakoṭinittudanamattopi sukko dhammo, samannāgatoyaṁ puggalo ekantakāḷakehi akusalehi dhammehi, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjissatī’ti.
an6.62:9.12	Evampi kho, ānanda, tathāgatassa purisapuggalo cetasā ceto paricca vidito hoti.
an6.62:9.13	Evampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.
an6.62:9.14	Evampi kho, ānanda, tathāgatassa āyatiṁ dhammasamuppādo cetasā ceto paricca vidito hotī”ti.
an6.62:10.1	Evaṁ vutte, āyasmā ānando bhagavantaṁ etadavoca:
an6.62:10.2	“sakkā nu kho, bhante, imesaṁ tiṇṇaṁ puggalānaṁ aparepi tayo puggalā sappaṭibhāgā paññāpetun”ti?
an6.62:10.3	“Sakkā, ānandā”ti bhagavā avoca:
an6.62:10.4	“idhāhaṁ, ānanda, ekaccaṁ puggalaṁ evaṁ cetasā ceto paricca pajānāmi:
an6.62:10.5	‘imassa kho puggalassa vijjamānā kusalāpi dhammā akusalāpi dhammā’ti.
an6.62:10.6	Tamenaṁ aparena samayena evaṁ cetasā ceto paricca pajānāmi:
an6.62:10.7	‘imassa kho puggalassa kusalā dhammā antarahitā, akusalā dhammā sammukhībhūtā.
an6.62:10.8	Atthi ca khvassa kusalamūlaṁ asamucchinnaṁ, tampi sabbena sabbaṁ samugghātaṁ gacchati.
an6.62:10.9	Evamayaṁ puggalo āyatiṁ parihānadhammo bhavissatī’ti.
an6.62:10.10	Seyyathāpi, ānanda, aṅgārāni ādittāni sampajjalitāni sajotibhūtāni puthusilāya nikkhittāni.
an6.62:10.11	Jāneyyāsi tvaṁ, ānanda, nayimāni aṅgārāni vuddhiṁ virūḷhiṁ vepullaṁ āpajjissantī”ti?
an6.62:10.12	“Evaṁ, bhante”.
an6.62:10.13	“Seyyathāpi vā pana, ānanda, sāyanhasamayaṁ sūriye ogacchante, jāneyyāsi tvaṁ, ānanda, āloko antaradhāyissati andhakāro pātubhavissatī”ti?
an6.62:10.14	“Evaṁ, bhante”.
an6.62:10.15	“Seyyathāpi vā, panānanda, abhido addharattaṁ bhattakālasamaye, jāneyyāsi tvaṁ, ānanda, āloko antarahito andhakāro pātubhūto”ti?
an6.62:10.16	“Evaṁ, bhante”.
an6.62:10.17	“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:
an6.62:10.18	‘imassa kho puggalassa vijjamānā kusalāpi dhammā akusalāpi dhammā’ti.
an6.62:10.19	Tamenaṁ aparena samayena evaṁ cetasā ceto paricca pajānāmi:
an6.62:10.20	‘imassa kho puggalassa kusalā dhammā antarahitā, akusalā dhammā sammukhībhūtā.
an6.62:10.21	Atthi ca khvassa kusalamūlaṁ asamucchinnaṁ, tampi sabbena sabbaṁ samugghātaṁ gacchati.
an6.62:10.22	Evamayaṁ puggalo āyatiṁ parihānadhammo bhavissatī’ti.
an6.62:10.23	Evampi kho, ānanda, tathāgatassa purisapuggalo cetasā ceto paricca vidito hoti.
an6.62:10.24	Evampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.
an6.62:10.25	Evampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.
an6.62:11.1	Idha panāhaṁ, ānanda, ekaccaṁ puggalaṁ evaṁ cetasā ceto paricca pajānāmi:
an6.62:11.2	‘imassa kho puggalassa vijjamānā kusalāpi dhammā akusalāpi dhammā’ti.
an6.62:11.3	Tamenaṁ aparena samayena evaṁ cetasā ceto paricca pajānāmi:
an6.62:11.4	‘imassa kho puggalassa akusalā dhammā antarahitā, kusalā dhammā sammukhībhūtā.
an6.62:11.5	Atthi ca khvassa akusalamūlaṁ asamucchinnaṁ, tampi sabbena sabbaṁ samugghātaṁ gacchati.
an6.62:11.6	Evamayaṁ puggalo āyatiṁ aparihānadhammo bhavissatī’ti.
an6.62:11.7	Seyyathāpi, ānanda, aṅgārāni ādittāni sampajjalitāni sajotibhūtāni sukkhe tiṇapuñje vā kaṭṭhapuñje vā nikkhittāni.
an6.62:11.8	Jāneyyāsi tvaṁ, ānanda, imāni aṅgārāni vuḍḍhiṁ virūḷhiṁ vepullaṁ āpajjissantī”ti?
an6.62:11.9	“Evaṁ, bhante”.
an6.62:11.10	“Seyyathāpi vā panānanda, rattiyā paccūsasamayaṁ sūriye uggacchante, jāneyyāsi tvaṁ, ānanda, andhakāro antaradhāyissati, āloko pātubhavissatī”ti?
an6.62:11.11	“Evaṁ, bhante”.
an6.62:11.12	“Seyyathāpi vā panānanda, abhido majjhanhike bhattakālasamaye, jāneyyāsi tvaṁ, ānanda, andhakāro antarahito āloko pātubhūto”ti?
an6.62:11.13	“Evaṁ, bhante”.
an6.62:11.14	“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:
an6.62:11.15	‘imassa kho puggalassa vijjamānā kusalāpi dhammā akusalāpi dhammā’ti.
an6.62:11.16	Tamenaṁ aparena samayena evaṁ cetasā ceto paricca pajānāmi:
an6.62:11.17	‘imassa kho puggalassa akusalā dhammā antarahitā, kusalā dhammā sammukhībhūtā.
an6.62:11.18	Atthi ca khvassa akusalamūlaṁ asamucchinnaṁ, tampi sabbena sabbaṁ samugghātaṁ gacchati.
an6.62:11.19	Evamayaṁ puggalo āyatiṁ aparihānadhammo bhavissatī’ti.
an6.62:11.20	Evampi kho, ānanda, tathāgatassa purisapuggalo cetasā ceto paricca vidito hoti.
an6.62:11.21	Evampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.
an6.62:11.22	Evampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.
an6.62:12.1	Idha panāhaṁ, ānanda, ekaccaṁ puggalaṁ cetasā ceto paricca pajānāmi:
an6.62:12.2	‘imassa kho puggalassa vijjamānā kusalāpi dhammā akusalāpi dhammā’ti.
an6.62:12.3	Tamenaṁ aparena samayena evaṁ cetasā ceto paricca pajānāmi:
an6.62:12.4	‘natthi imassa puggalassa vālaggakoṭinittudanamattopi akusalo dhammo, samannāgatoyaṁ puggalo ekantasukkehi anavajjehi dhammehi, diṭṭheva dhamme parinibbāyissatī’ti.
an6.62:12.5	Seyyathāpi, ānanda, aṅgārāni sītāni nibbutāni sukkhe tiṇapuñje vā kaṭṭhapuñje vā nikkhittāni.
an6.62:12.6	Jāneyyāsi tvaṁ, ānanda, nayimāni aṅgārāni vuḍḍhiṁ virūḷhiṁ vepullaṁ āpajjissantī”ti?
an6.62:12.7	“Evaṁ, bhante”.
an6.62:12.8	“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:
an6.62:12.9	‘imassa kho puggalassa vijjamānā kusalāpi dhammā akusalāpi dhammā’ti.
an6.62:12.10	Tamenaṁ aparena samayena evaṁ cetasā ceto paricca pajānāmi:
an6.62:12.11	‘natthi imassa puggalassa vālaggakoṭinittudanamattopi akusalo dhammo, samannāgatoyaṁ puggalo ekantasukkehi anavajjehi dhammehi, diṭṭheva dhamme parinibbāyissatī’ti.
an6.62:12.12	Evampi kho, ānanda, tathāgatassa purisapuggalo cetasā ceto paricca vidito hoti.
an6.62:12.13	Evampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.
an6.62:12.14	Evampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.
an6.62:13.1	Tatrānanda, ye te purimā tayo puggalā tesaṁ tiṇṇaṁ puggalānaṁ eko aparihānadhammo, eko parihānadhammo, eko āpāyiko nerayiko.
an6.62:13.2	Tatrānanda, yeme pacchimā tayo puggalā imesaṁ tiṇṇaṁ puggalānaṁ eko parihānadhammo, eko aparihānadhammo, eko parinibbānadhammo”ti.
an6.62:13.3	Aṭṭhamaṁ.
an6.63:0.1	Aṅguttara Nikāya 6.63
an6.63:0.2	6. Mahāvagga
an6.63:0.3	Nibbedhikasutta
an6.63:1.1	“Nibbedhikapariyāyaṁ vo, bhikkhave, dhammapariyāyaṁ desessāmi.
an6.63:1.2	Taṁ suṇātha, sādhukaṁ manasi karotha, bhāsissāmī”ti.
an6.63:1.3	“Evaṁ, bhante”ti kho te bhikkhū bhagavato paccassosuṁ.
an6.63:1.4	Bhagavā etadavoca:
an6.63:2.1	“Katamo ca so, bhikkhave, nibbedhikapariyāyo dhammapariyāyo?
an6.63:2.2	Kāmā, bhikkhave, veditabbā, kāmānaṁ nidānasambhavo veditabbo, kāmānaṁ vemattatā veditabbā, kāmānaṁ vipāko veditabbo, kāmanirodho veditabbo, kāmanirodhagāminī paṭipadā veditabbā.
an6.63:3.1	Vedanā, bhikkhave, veditabbā, vedanānaṁ nidānasambhavo veditabbo, vedanānaṁ vemattatā veditabbā, vedanānaṁ vipāko veditabbo, vedanānirodho veditabbo, vedanānirodhagāminī paṭipadā veditabbā.
an6.63:4.1	Saññā, bhikkhave, veditabbā, saññānaṁ nidānasambhavo veditabbo, saññānaṁ vemattatā veditabbā, saññānaṁ vipāko veditabbo, saññānirodho veditabbo, saññānirodhagāminī paṭipadā veditabbā.
an6.63:5.1	Āsavā, bhikkhave, veditabbā, āsavānaṁ nidānasambhavo veditabbo, āsavānaṁ vemattatā veditabbā, āsavānaṁ vipāko veditabbo, āsavanirodho veditabbo, āsavanirodhagāminī paṭipadā veditabbā.
an6.63:6.1	Kammaṁ, bhikkhave, veditabbaṁ, kammānaṁ nidānasambhavo veditabbo, kammānaṁ vemattatā veditabbā, kammānaṁ vipāko veditabbo, kammanirodho veditabbo, kammanirodhagāminī paṭipadā veditabbā.
an6.63:7.1	Dukkhaṁ, bhikkhave, veditabbaṁ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbā.
an6.63:8.1	‘Kāmā, bhikkhave, veditabbā, kāmānaṁ nidānasambhavo veditabbo, kāmānaṁ vemattatā veditabbā, kāmānaṁ vipāko veditabbo, kāmanirodho veditabbo, kāmanirodhagāminī paṭipadā veditabbā’ti, iti kho panetaṁ vuttaṁ.
an6.63:8.2	Kiñcetaṁ paṭicca vuttaṁ?
an6.63:8.3	Pañcime, bhikkhave, kāmaguṇā—
an6.63:8.4	cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā,
an6.63:8.5	sotaviññeyyā saddā …
an6.63:8.6	ghānaviññeyyā gandhā …
an6.63:8.7	jivhāviññeyyā rasā …
an6.63:8.8	kāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā.
an6.63:8.9	Api ca kho, bhikkhave, nete kāmā kāmaguṇā nāmete ariyassa vinaye vuccanti—
an6.63:8.10	Saṅkapparāgo purisassa kāmo,
an6.63:8.11	Nete kāmā yāni citrāni loke;
an6.63:8.12	Saṅkapparāgo purisassa kāmo,
an6.63:8.13	Tiṭṭhanti citrāni tatheva loke;
an6.63:8.14	Athettha dhīrā vinayanti chandanti.
an6.63:9.1	Katamo ca, bhikkhave, kāmānaṁ nidānasambhavo?
an6.63:10.2	Phasso, bhikkhave, kāmānaṁ nidānasambhavo.
an6.63:11.1	Katamā ca, bhikkhave, kāmānaṁ vemattatā?
an6.63:11.2	Añño, bhikkhave, kāmo rūpesu, añño kāmo saddesu, añño kāmo gandhesu, añño kāmo rasesu, añño kāmo phoṭṭhabbesu.
an6.63:11.3	Ayaṁ vuccati, bhikkhave, kāmānaṁ vemattatā.
an6.63:12.1	Katamo ca, bhikkhave, kāmānaṁ vipāko?
an6.63:12.2	Yaṁ kho, bhikkhave, kāmayamāno tajjaṁ tajjaṁ attabhāvaṁ abhinibbatteti puññabhāgiyaṁ vā apuññabhāgiyaṁ vā, ayaṁ vuccati, bhikkhave, kāmānaṁ vipāko.
an6.63:13.1	Katamo ca, bhikkhave, kāmanirodho?
an6.63:13.2	Phassanirodho, bhikkhave, kāmanirodho.
an6.63:13.3	Ayameva ariyo aṭṭhaṅgiko maggo kāmanirodhagāminī paṭipadā, seyyathidaṁ—
an6.63:13.4	sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.
an6.63:14.1	Yato kho, bhikkhave, ariyasāvako evaṁ kāme pajānāti, evaṁ kāmānaṁ nidānasambhavaṁ pajānāti, evaṁ kāmānaṁ vemattataṁ pajānāti, evaṁ kāmānaṁ vipākaṁ pajānāti, evaṁ kāmanirodhaṁ pajānāti, evaṁ kāmanirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti kāmanirodhaṁ.
an6.63:14.2	Kāmā, bhikkhave, veditabbā …pe… kāmanirodhagāminī paṭipadā veditabbāti,
an6.63:14.3	iti yaṁ taṁ vuttaṁ idametaṁ paṭicca vuttaṁ.
an6.63:15.1	Vedanā, bhikkhave, veditabbā …pe… vedanānirodhagāminī paṭipadā veditabbāti,
an6.63:15.2	iti kho panetaṁ vuttaṁ. Kiñcetaṁ paṭicca vuttaṁ?
an6.63:15.3	Tisso imā, bhikkhave, vedanā—
an6.63:15.4	sukhā vedanā, dukkhā vedanā, adukkhamasukhā vedanā.
an6.63:16.1	Katamo ca, bhikkhave, vedanānaṁ nidānasambhavo?
an6.63:16.2	Phasso, bhikkhave, vedanānaṁ nidānasambhavo.
an6.63:17.1	Katamā ca, bhikkhave, vedanānaṁ vemattatā?
an6.63:17.2	Atthi, bhikkhave, sāmisā sukhā vedanā, atthi nirāmisā sukhā vedanā, atthi sāmisā dukkhā vedanā, atthi nirāmisā dukkhā vedanā, atthi sāmisā adukkhamasukhā vedanā, atthi nirāmisā adukkhamasukhā vedanā.
an6.63:17.3	Ayaṁ vuccati, bhikkhave, vedanānaṁ vemattatā.
an6.63:18.1	Katamo ca, bhikkhave, vedanānaṁ vipāko?
an6.63:18.2	Yaṁ kho, bhikkhave, vediyamāno tajjaṁ tajjaṁ attabhāvaṁ abhinibbatteti puññabhāgiyaṁ vā apuññabhāgiyaṁ vā,
an6.63:18.3	ayaṁ vuccati, bhikkhave, vedanānaṁ vipāko.
an6.63:19.1	Katamo ca, bhikkhave, vedanānirodho?
an6.63:19.2	Phassanirodho, bhikkhave, vedanānirodho.
an6.63:19.3	Ayameva ariyo aṭṭhaṅgiko maggo vedanānirodhagāminī paṭipadā, seyyathidaṁ—
an6.63:19.4	sammādiṭṭhi …pe… sammāsamādhi.
an6.63:20.1	Yato kho, bhikkhave, ariyasāvako evaṁ vedanaṁ pajānāti, evaṁ vedanānaṁ nidānasambhavaṁ pajānāti, evaṁ vedanānaṁ vemattataṁ pajānāti, evaṁ vedanānaṁ vipākaṁ pajānāti, evaṁ vedanānirodhaṁ pajānāti, evaṁ vedanānirodhagāminiṁ paṭipadaṁ pajānāti. So imaṁ nibbedhikaṁ brahmacariyaṁ pajānāti vedanānirodhaṁ.
an6.63:20.2	Vedanā, bhikkhave, veditabbā …pe… vedanānirodhagāminī paṭipadā veditabbāti,
an6.63:20.3	iti yaṁ taṁ vuttaṁ idametaṁ paṭicca vuttaṁ.
an6.63:21.1	Saññā, bhikkhave, veditabbā …pe… saññānirodhagāminī paṭipadā veditabbāti,
an6.63:21.2	iti kho panetaṁ vuttaṁ. Kiñcetaṁ paṭicca vuttaṁ?
an6.63:21.3	Chayimā, bhikkhave, saññā—
an6.63:21.4	rūpasaññā, saddasaññā, gandhasaññā, rasasaññā, phoṭṭhabbasaññā, dhammasaññā.
an6.63:22.1	Katamo ca, bhikkhave, saññānaṁ nidānasambhavo?
an6.63:22.2	Phasso, bhikkhave, saññānaṁ nidānasambhavo.
an6.63:23.1	Katamā ca, bhikkhave, saññānaṁ vemattatā?
an6.63:23.2	Aññā, bhikkhave, saññā rūpesu, aññā saññā saddesu, aññā saññā gandhesu, aññā saññā rasesu, aññā saññā phoṭṭhabbesu, aññā saññā dhammesu.
an6.63:23.3	Ayaṁ vuccati, bhikkhave, saññānaṁ vemattatā.
an6.63:24.1	Katamo ca, bhikkhave, saññānaṁ vipāko?
an6.63:24.2	Vohāravepakkaṁ, bhikkhave, saññaṁ vadāmi.
an6.63:24.3	Yathā yathā naṁ sañjānāti tathā tathā voharati, evaṁ saññī ahosinti.
an6.63:24.4	Ayaṁ vuccati, bhikkhave, saññānaṁ vipāko.
an6.63:25.1	Katamo ca, bhikkhave, saññānirodho?
an6.63:25.2	Phassanirodho, bhikkhave, saññānirodho.
an6.63:25.3	Ayameva ariyo aṭṭhaṅgiko maggo saññānirodhagāminī paṭipadā, seyyathidaṁ—
an6.63:25.4	sammādiṭṭhi …pe… sammāsamādhi.
an6.63:26.1	Yato kho, bhikkhave, ariyasāvako evaṁ saññaṁ pajānāti, evaṁ saññānaṁ nidānasambhavaṁ pajānāti, evaṁ saññānaṁ vemattataṁ pajānāti, evaṁ saññānaṁ vipākaṁ pajānāti, evaṁ saññānirodhaṁ pajānāti, evaṁ saññānirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti saññānirodhaṁ.
an6.63:26.2	Saññā, bhikkhave, veditabbā …pe… saññānirodhagāminī paṭipadā veditabbāti.
an6.63:26.3	Iti yaṁ taṁ vuttaṁ idametaṁ paṭicca vuttaṁ.
an6.63:27.1	Āsavā, bhikkhave, veditabbā …pe… āsavanirodhagāminī paṭipadā veditabbāti,
an6.63:27.2	iti kho panetaṁ vuttaṁ. Kiñcetaṁ paṭicca vuttaṁ?
an6.63:27.3	Tayome, bhikkhave, āsavā—
an6.63:27.4	kāmāsavo, bhavāsavo, avijjāsavo.
an6.63:28.1	Katamo ca, bhikkhave, āsavānaṁ nidānasambhavo?
an6.63:28.2	Avijjā, bhikkhave, āsavānaṁ nidānasambhavo.
an6.63:29.1	Katamā ca, bhikkhave, āsavānaṁ vemattatā?
an6.63:29.2	Atthi, bhikkhave, āsavā nirayagamanīyā, atthi āsavā tiracchānayonigamanīyā, atthi āsavā pettivisayagamanīyā, atthi āsavā manussalokagamanīyā, atthi āsavā devalokagamanīyā.
an6.63:29.3	Ayaṁ vuccati, bhikkhave, āsavānaṁ vemattatā.
an6.63:30.1	Katamo ca, bhikkhave, āsavānaṁ vipāko?
an6.63:30.2	Yaṁ kho, bhikkhave, avijjāgato tajjaṁ tajjaṁ attabhāvaṁ abhinibbatteti puññabhāgiyaṁ vā apuññabhāgiyaṁ vā, ayaṁ vuccati, bhikkhave, āsavānaṁ vipāko.
an6.63:31.1	Katamo ca, bhikkhave, āsavanirodho?
an6.63:31.2	Avijjānirodho, bhikkhave, āsavanirodho.
an6.63:31.3	Ayameva ariyo aṭṭhaṅgiko maggo āsavanirodhagāminī paṭipadā, seyyathidaṁ—
an6.63:31.4	sammādiṭṭhi …pe… sammāsamādhi.
an6.63:32.1	Yato kho, bhikkhave, ariyasāvako evaṁ āsave pajānāti, evaṁ āsavānaṁ nidānasambhavaṁ pajānāti, evaṁ āsavānaṁ vemattataṁ pajānāti, evaṁ āsavānaṁ vipākaṁ pajānāti, evaṁ āsavānaṁ nirodhaṁ pajānāti, evaṁ āsavānaṁ nirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti āsavanirodhaṁ.
an6.63:32.2	Āsavā, bhikkhave, veditabbā …pe… āsavanirodhagāminī paṭipadā veditabbāti.
an6.63:32.3	Iti yaṁ taṁ vuttaṁ idametaṁ paṭicca vuttaṁ.
an6.63:33.1	Kammaṁ, bhikkhave, veditabbaṁ …pe… kammanirodhagāminī paṭipadā veditabbāti, iti kho panetaṁ vuttaṁ.
an6.63:33.2	Kiñcetaṁ paṭicca vuttaṁ?
an6.63:33.3	Cetanāhaṁ, bhikkhave, kammaṁ vadāmi.
an6.63:33.4	Cetayitvā kammaṁ karoti—
an6.63:33.5	kāyena vācāya manasā.
an6.63:34.1	Katamo ca, bhikkhave, kammānaṁ nidānasambhavo?
an6.63:34.2	Phasso, bhikkhave, kammānaṁ nidānasambhavo.
an6.63:35.1	Katamā ca, bhikkhave, kammānaṁ vemattatā?
an6.63:35.2	Atthi, bhikkhave, kammaṁ nirayavedanīyaṁ, atthi kammaṁ tiracchānayonivedanīyaṁ, atthi kammaṁ pettivisayavedanīyaṁ, atthi kammaṁ manussalokavedanīyaṁ, atthi kammaṁ devalokavedanīyaṁ.
an6.63:35.3	Ayaṁ vuccati, bhikkhave, kammānaṁ vemattatā.
an6.63:36.1	Katamo ca, bhikkhave, kammānaṁ vipāko?
an6.63:36.2	Tividhāhaṁ, bhikkhave, kammānaṁ vipākaṁ vadāmi—
an6.63:36.3	diṭṭheva dhamme, upapajje vā, apare vā pariyāye.
an6.63:36.4	Ayaṁ vuccati, bhikkhave, kammānaṁ vipāko.
an6.63:37.1	Katamo ca, bhikkhave, kammanirodho?
an6.63:37.2	Phassanirodho, bhikkhave, kammanirodho.
an6.63:37.3	Ayameva ariyo aṭṭhaṅgiko maggo kammanirodhagāminī paṭipadā, seyyathidaṁ—
an6.63:37.4	sammādiṭṭhi …pe… sammāsamādhi.
an6.63:38.1	Yato kho, bhikkhave, ariyasāvako evaṁ kammaṁ pajānāti, evaṁ kammānaṁ nidānasambhavaṁ pajānāti, evaṁ kammānaṁ vemattataṁ pajānāti, evaṁ kammānaṁ vipākaṁ pajānāti, evaṁ kammanirodhaṁ pajānāti, evaṁ kammanirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti kammanirodhaṁ.
an6.63:38.2	Kammaṁ, bhikkhave, veditabbaṁ …pe… kammanirodhagāminī paṭipadā veditabbāti,
an6.63:38.3	iti yaṁ taṁ vuttaṁ idametaṁ paṭicca vuttaṁ.
an6.63:39.1	Dukkhaṁ, bhikkhave, veditabbaṁ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbāti.
an6.63:39.2	Iti kho panetaṁ vuttaṁ, kiñcetaṁ paṭicca vuttaṁ?
an6.63:39.3	Jātipi dukkhā, jarāpi dukkhā, byādhipi dukkho, maraṇampi dukkhaṁ, sokaparidevadukkhadomanassupāyāsāpi dukkhā, yampicchaṁ na labhati tampi dukkhaṁ, saṅkhittena pañcupādānakkhandhā dukkhā.
an6.63:40.1	Katamo ca, bhikkhave, dukkhassa nidānasambhavo?
an6.63:40.2	Taṇhā, bhikkhave, dukkhassa nidānasambhavo.
an6.63:41.1	Katamā ca, bhikkhave, dukkhassa vemattatā?
an6.63:41.2	Atthi, bhikkhave, dukkhaṁ adhimattaṁ, atthi parittaṁ, atthi dandhavirāgi, atthi khippavirāgi.
an6.63:41.3	Ayaṁ vuccati, bhikkhave, dukkhassa vemattatā.
an6.63:42.1	Katamo ca, bhikkhave, dukkhassa vipāko?
an6.63:42.2	Idha, bhikkhave, ekacco yena dukkhena abhibhūto pariyādinnacitto socati kilamati paridevati, urattāḷiṁ kandati, sammohaṁ āpajjati, yena vā pana dukkhena abhibhūto pariyādinnacitto bahiddhā pariyeṭṭhiṁ āpajjati:
an6.63:42.3	‘ko ekapadaṁ dvipadaṁ jānāti imassa dukkhassa nirodhāyā’ti?
an6.63:42.4	Sammohavepakkaṁ vāhaṁ, bhikkhave, dukkhaṁ vadāmi pariyeṭṭhivepakkaṁ vā.
an6.63:42.5	Ayaṁ vuccati, bhikkhave, dukkhassa vipāko.
an6.63:43.1	Katamo ca, bhikkhave, dukkhanirodho?
an6.63:43.2	Taṇhānirodho, bhikkhave, dukkhanirodho.
an6.63:43.3	Ayameva ariyo aṭṭhaṅgiko maggo dukkhassa nirodhagāminī paṭipadā, seyyathidaṁ—
an6.63:43.4	sammādiṭṭhi …pe… sammāsamādhi.
an6.63:44.1	Yato kho, bhikkhave, ariyasāvako evaṁ dukkhaṁ pajānāti, evaṁ dukkhassa nidānasambhavaṁ pajānāti, evaṁ dukkhassa vemattataṁ pajānāti, evaṁ dukkhassa vipākaṁ pajānāti, evaṁ dukkhanirodhaṁ pajānāti, evaṁ dukkhanirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti dukkhanirodhaṁ.
an6.63:44.2	Dukkhaṁ, bhikkhave, veditabbaṁ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbāti.
an6.63:44.3	Iti yaṁ taṁ vuttaṁ idametaṁ paṭicca vuttaṁ.
an6.63:45.1	Ayaṁ kho so, bhikkhave, nibbedhikapariyāyo dhammapariyāyo”ti.
an6.63:45.2	Navamaṁ.
an6.64:0.1	Aṅguttara Nikāya 6.64
an6.64:0.2	6. Mahāvagga
an6.64:0.3	Sīhanādasutta
an6.64:1.1	“Chayimāni, bhikkhave, tathāgatassa tathāgatabalāni, yehi balehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an6.64:1.2	Katamāni cha?
an6.64:1.3	Idha, bhikkhave, tathāgato ṭhānañca ṭhānato aṭṭhānañca aṭṭhānato yathābhūtaṁ pajānāti.
an6.64:1.4	Yampi, bhikkhave, tathāgato ṭhānañca ṭhānato aṭṭhānañca aṭṭhānato yathābhūtaṁ pajānāti, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an6.64:2.1	Puna caparaṁ, bhikkhave, tathāgato atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ pajānāti.
an6.64:2.2	Yampi, bhikkhave, tathāgato atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ pajānāti, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an6.64:3.1	Puna caparaṁ, bhikkhave, tathāgato jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ pajānāti.
an6.64:3.2	Yampi, bhikkhave, tathāgato …pe… idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an6.64:4.1	Puna caparaṁ, bhikkhave, tathāgato anekavihitaṁ pubbenivāsaṁ anussarati, seyyathidaṁ—ekampi jātiṁ, dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati.
an6.64:4.2	Yampi, bhikkhave, tathāgato anekavihitaṁ pubbenivāsaṁ anussarati, seyyathidaṁ—ekampi jātiṁ, dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an6.64:5.1	Puna caparaṁ, bhikkhave, tathāgato dibbena cakkhunā visuddhena atikkantamānusakena …pe… yathākammūpage satte pajānāti.
an6.64:5.2	Yampi, bhikkhave, tathāgato dibbena cakkhunā visuddhena atikkantamānusakena …pe… yathākammūpage satte pajānāti, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an6.64:6.1	Puna caparaṁ, bhikkhave, tathāgato āsavānaṁ khayā …pe… sacchikatvā upasampajja viharati.
an6.64:6.2	Yampi, bhikkhave, tathāgato āsavānaṁ khayā …pe… sacchikatvā upasampajja viharati, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an6.64:6.3	Imāni kho, bhikkhave, cha tathāgatassa tathāgatabalāni, yehi balehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an6.64:7.1	Tatra ce, bhikkhave, pare tathāgataṁ ṭhānañca ṭhānato aṭṭhānañca aṭṭhānato yathābhūtaṁ ñāṇena upasaṅkamitvā pañhaṁ pucchanti.
an6.64:7.2	Yathā yathā, bhikkhave, tathāgatassa ṭhānañca ṭhānato aṭṭhānañca aṭṭhānato yathābhūtaṁ ñāṇaṁ viditaṁ tathā tathā tesaṁ tathāgato ṭhānañca ṭhānato aṭṭhānañca aṭṭhānato yathābhūtaṁ ñāṇena pañhaṁ puṭṭho byākaroti.
an6.64:8.1	Tatra ce, bhikkhave, pare tathāgataṁ atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ ñāṇena upasaṅkamitvā pañhaṁ pucchanti.
an6.64:8.2	Yathā yathā, bhikkhave, tathāgatassa atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ ñāṇaṁ viditaṁ tathā tathā tesaṁ tathāgato atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ ñāṇena pañhaṁ puṭṭho byākaroti.
an6.64:9.1	Tatra ce, bhikkhave, pare tathāgataṁ jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ ñāṇena upasaṅkamitvā pañhaṁ pucchanti.
an6.64:9.2	Yathā yathā, bhikkhave, tathāgatassa jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ ñāṇaṁ viditaṁ tathā tathā tesaṁ tathāgato jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ ñāṇena pañhaṁ puṭṭho byākaroti.
an6.64:10.1	Tatra ce, bhikkhave, pare tathāgataṁ pubbenivāsānussatiṁ yathābhūtaṁ ñāṇena upasaṅkamitvā pañhaṁ pucchanti.
an6.64:10.2	Yathā yathā, bhikkhave, tathāgatassa pubbenivāsānussatiṁ yathābhūtaṁ ñāṇaṁ viditaṁ tathā tathā tesaṁ tathāgato pubbenivāsānussatiṁ yathābhūtaṁ ñāṇena pañhaṁ puṭṭho byākaroti.
an6.64:11.1	Tatra ce, bhikkhave, pare tathāgataṁ sattānaṁ cutūpapātaṁ yathābhūtaṁ ñāṇena upasaṅkamitvā pañhaṁ pucchanti.
an6.64:11.2	Yathā yathā, bhikkhave, tathāgatassa sattānaṁ cutūpapātaṁ yathābhūtaṁ ñāṇaṁ viditaṁ tathā tathā tesaṁ tathāgato sattānaṁ cutūpapātaṁ yathābhūtaṁ ñāṇena pañhaṁ puṭṭho byākaroti.
an6.64:12.1	Tatra ce, bhikkhave, pare tathāgataṁ āsavānaṁ khayā …pe… yathābhūtaṁ ñāṇena upasaṅkamitvā pañhaṁ pucchanti.
an6.64:12.2	Yathā yathā, bhikkhave, tathāgatassa āsavānaṁ khayā …pe… yathābhūtaṁ ñāṇaṁ viditaṁ tathā tathā tesaṁ tathāgato āsavānaṁ khayā …pe… yathābhūtaṁ ñāṇena pañhaṁ puṭṭho byākaroti.
an6.64:13.1	Tatra, bhikkhave, yampidaṁ ṭhānañca ṭhānato aṭṭhānañca aṭṭhānato yathābhūtaṁ ñāṇaṁ tampi samāhitassa vadāmi no asamāhitassa.
an6.64:13.2	Yampidaṁ atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ ñāṇaṁ tampi samāhitassa vadāmi no asamāhitassa.
an6.64:13.3	Yampidaṁ jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ ñāṇaṁ tampi samāhitassa vadāmi no asamāhitassa.
an6.64:13.4	Yampidaṁ pubbenivāsānussatiṁ yathābhūtaṁ ñāṇaṁ tampi samāhitassa vadāmi no asamāhitassa.
an6.64:13.5	Yampidaṁ sattānaṁ cutūpapātaṁ yathābhūtaṁ ñāṇaṁ tampi samāhitassa vadāmi no asamāhitassa.
an6.64:13.6	Yampidaṁ āsavānaṁ khayā …pe… yathābhūtaṁ ñāṇaṁ tampi samāhitassa vadāmi no asamāhitassa.
an6.64:13.7	Iti kho, bhikkhave, samādhi maggo, asamādhi kummaggo”ti.
an6.64:13.8	Dasamaṁ.
an6.64:13.9	Mahāvaggo chaṭṭho.
an6.64:14.0	Tassuddānaṁ
an6.64:14.1	Soṇo phagguno bhijāti,
an6.64:14.2	āsavā dāruhatthi ca;
an6.64:14.3	Majjhe ñāṇaṁ nibbedhikaṁ,
an6.64:14.4	sīhanādoti te dasāti.
an6.65:0.1	Aṅguttara Nikāya 6.65
an6.65:0.2	7. Devatāvagga
an6.65:0.3	Anāgāmiphalasutta
an6.65:1.1	“Cha, bhikkhave, dhamme appahāya abhabbo anāgāmiphalaṁ sacchikātuṁ.
an6.65:1.2	Katame cha?
an6.65:1.3	Assaddhiyaṁ, ahirikaṁ, anottappaṁ, kosajjaṁ, muṭṭhassaccaṁ, duppaññataṁ—
an6.65:1.4	ime kho, bhikkhave, cha dhamme appahāya abhabbo anāgāmiphalaṁ sacchikātuṁ.
an6.65:2.1	Cha, bhikkhave, dhamme pahāya bhabbo anāgāmiphalaṁ sacchikātuṁ.
an6.65:2.2	Katame cha?
an6.65:2.3	Assaddhiyaṁ, ahirikaṁ, anottappaṁ, kosajjaṁ, muṭṭhassaccaṁ, duppaññataṁ—
an6.65:2.4	ime kho, bhikkhave, cha dhamme pahāya bhabbo anāgāmiphalaṁ sacchikātun”ti.
an6.65:2.5	Paṭhamaṁ.
an6.66:0.1	Aṅguttara Nikāya 6.66
an6.66:0.2	7. Devatāvagga
an6.66:0.3	Arahattasutta
an6.66:1.1	“Cha, bhikkhave, dhamme appahāya abhabbo arahattaṁ sacchikātuṁ.
an6.66:1.2	Katame cha?
an6.66:1.3	Thinaṁ, middhaṁ, uddhaccaṁ, kukkuccaṁ, assaddhiyaṁ, pamādaṁ—
an6.66:1.4	ime kho, bhikkhave, cha dhamme appahāya abhabbo arahattaṁ sacchikātuṁ.
an6.66:2.1	Cha, bhikkhave, dhamme pahāya bhabbo arahattaṁ sacchikātuṁ.
an6.66:2.2	Katame cha?
an6.66:2.3	Thinaṁ, middhaṁ, uddhaccaṁ, kukkuccaṁ, assaddhiyaṁ, pamādaṁ—
an6.66:2.4	ime kho, bhikkhave, cha dhamme pahāya bhabbo arahattaṁ sacchikātun”ti.
an6.66:2.5	Dutiyaṁ.
an6.67:0.1	Aṅguttara Nikāya 6.67
an6.67:0.2	7. Devatāvagga
an6.67:0.3	Mittasutta
an6.67:1.1	“‘So vata, bhikkhave, bhikkhu pāpamitto pāpasahāyo pāpasampavaṅko, pāpamitte sevamāno bhajamāno payirupāsamāno, tesañca diṭṭhānugatiṁ āpajjamāno ābhisamācārikaṁ dhammaṁ paripūressatī’ti netaṁ ṭhānaṁ vijjati.
an6.67:1.2	‘Ābhisamācārikaṁ dhammaṁ aparipūretvā sekhaṁ dhammaṁ paripūressatī’ti netaṁ ṭhānaṁ vijjati.
an6.67:1.3	‘Sekhaṁ dhammaṁ aparipūretvā sīlāni paripūressatī’ti netaṁ ṭhānaṁ vijjati.
an6.67:1.4	‘Sīlāni aparipūretvā kāmarāgaṁ vā rūparāgaṁ vā arūparāgaṁ vā pajahissatī’ti netaṁ ṭhānaṁ vijjati.
an6.67:2.1	‘So vata, bhikkhave, bhikkhu kalyāṇamitto kalyāṇasahāyo kalyāṇasampavaṅko, kalyāṇamitte sevamāno bhajamāno payirupāsamāno, tesañca diṭṭhānugatiṁ āpajjamāno ābhisamācārikaṁ dhammaṁ paripūressatī’ti ṭhānametaṁ vijjati.
an6.67:2.2	‘Ābhisamācārikaṁ dhammaṁ paripūretvā sekhaṁ dhammaṁ paripūressatī’ti ṭhānametaṁ vijjati.
an6.67:2.3	‘Sekhaṁ dhammaṁ paripūretvā sīlāni paripūressatī’ti ṭhānametaṁ vijjati.
an6.67:2.4	‘Sīlāni paripūretvā kāmarāgaṁ vā rūparāgaṁ vā arūparāgaṁ vā pajahissatī’ti ṭhānametaṁ vijjatī”ti.
an6.67:2.5	Tatiyaṁ.
an6.68:0.1	Aṅguttara Nikāya 6.68
an6.68:0.2	7. Devatāvagga
an6.68:0.3	Saṅgaṇikārāmasutta
an6.68:1.1	“‘So vata, bhikkhave, bhikkhu saṅgaṇikārāmo saṅgaṇikarato saṅgaṇikārāmataṁ anuyutto, gaṇārāmo gaṇarato gaṇārāmataṁ anuyutto, eko paviveke abhiramissatī’ti netaṁ ṭhānaṁ vijjati.
an6.68:1.2	‘Eko paviveke anabhiramanto cittassa nimittaṁ gahessatī’ti netaṁ ṭhānaṁ vijjati.
an6.68:1.3	‘Cittassa nimittaṁ agaṇhanto sammādiṭṭhiṁ paripūressatī’ti netaṁ ṭhānaṁ vijjati.
an6.68:1.4	‘Sammādiṭṭhiṁ aparipūretvā sammāsamādhiṁ paripūressatī’ti netaṁ ṭhānaṁ vijjati.
an6.68:1.5	‘Sammāsamādhiṁ aparipūretvā saṁyojanāni pajahissatī’ti netaṁ ṭhānaṁ vijjati.
an6.68:1.6	‘Saṁyojanāni appahāya nibbānaṁ sacchikarissatī’ti netaṁ ṭhānaṁ vijjati.
an6.68:2.1	‘So vata, bhikkhave, bhikkhu na saṅgaṇikārāmo na saṅgaṇikarato na saṅgaṇikārāmataṁ anuyutto, na gaṇārāmo na gaṇarato na gaṇārāmataṁ anuyutto, eko paviveke abhiramissatī’ti ṭhānametaṁ vijjati.
an6.68:2.2	‘Eko paviveke abhiramanto cittassa nimittaṁ gahessatī’ti ṭhānametaṁ vijjati.
an6.68:2.3	‘Cittassa nimittaṁ gaṇhanto sammādiṭṭhiṁ paripūressatī’ti ṭhānametaṁ vijjati.
an6.68:2.4	‘Sammādiṭṭhiṁ paripūretvā sammāsamādhiṁ paripūressatī’ti ṭhānametaṁ vijjati.
an6.68:2.5	‘Sammāsamādhiṁ paripūretvā saṁyojanāni pajahissatī’ti ṭhānametaṁ vijjati.
an6.68:2.6	‘Saṁyojanāni pahāya nibbānaṁ sacchikarissatī’ti ṭhānametaṁ vijjatī”ti.
an6.68:2.7	Catutthaṁ.
an6.69:0.1	Aṅguttara Nikāya 6.69
an6.69:0.2	7. Devatāvagga
an6.69:0.3	Devatāsutta
an6.69:1.1	Atha kho aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitā kho sā devatā bhagavantaṁ etadavoca:
an6.69:1.2	“chayime, bhante, dhammā bhikkhuno aparihānāya saṁvattanti.
an6.69:1.3	Katame cha?
an6.69:1.4	Satthugāravatā, dhammagāravatā, saṅghagāravatā, sikkhāgāravatā, sovacassatā, kalyāṇamittatā—
an6.69:1.5	ime kho, bhante, cha dhammā bhikkhuno aparihānāya saṁvattantī”ti.
an6.69:1.6	Idamavoca sā devatā.
an6.69:1.7	Samanuñño satthā ahosi.
an6.69:1.8	Atha kho sā devatā “samanuñño me satthā”ti bhagavantaṁ abhivādetvā padakkhiṇaṁ katvā tatthevantaradhāyi.
an6.69:2.1	Atha kho bhagavā tassā rattiyā accayena bhikkhū āmantesi:
an6.69:2.2	“imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, bhikkhave, sā devatā maṁ etadavoca:
an6.69:2.3	‘chayime, bhante, dhammā bhikkhuno aparihānāya saṁvattanti.
an6.69:2.4	Katame cha?
an6.69:2.5	Satthugāravatā, dhammagāravatā, saṅghagāravatā, sikkhāgāravatā, sovacassatā, kalyāṇamittatā—
an6.69:2.6	ime kho, bhante, cha dhammā bhikkhuno aparihānāya saṁvattantī’ti.
an6.69:2.7	Idamavoca, bhikkhave, sā devatā.
an6.69:2.8	Idaṁ vatvā maṁ abhivādetvā padakkhiṇaṁ katvā tatthevantaradhāyī”ti.
an6.69:3.1	Evaṁ vutte āyasmā sāriputto bhagavantaṁ abhivādetvā etadavoca:
an6.69:3.2	“imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmi.
an6.69:3.3	Idha, bhante, bhikkhu attanā ca satthugāravo hoti satthugāravatāya ca vaṇṇavādī.
an6.69:3.4	Ye caññe bhikkhū na satthugāravā te ca satthugāravatāya samādapeti.
an6.69:3.5	Ye caññe bhikkhū satthugāravā tesañca vaṇṇaṁ bhaṇati bhūtaṁ tacchaṁ kālena.
an6.69:3.6	Attanā ca dhammagāravo hoti …
an6.69:3.7	saṅghagāravo hoti …
an6.69:3.8	sikkhāgāravo hoti …
an6.69:3.9	suvaco hoti …
an6.69:3.10	kalyāṇamitto hoti kalyāṇamittatāya ca vaṇṇavādī.
an6.69:3.11	Ye caññe bhikkhū na kalyāṇamittā te ca kalyāṇamittatāya samādapeti.
an6.69:3.12	Ye caññe bhikkhū kalyāṇamittā tesañca vaṇṇaṁ bhaṇati bhūtaṁ tacchaṁ kālena.
an6.69:3.13	Imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmī”ti.
an6.69:4.1	“Sādhu sādhu, sāriputta.
an6.69:4.2	Sādhu kho tvaṁ, sāriputta, imassa mayā saṅkhittena bhāsitassa evaṁ vitthārena atthaṁ ājānāsi.
an6.69:4.3	Idha, sāriputta, bhikkhu attanā ca satthugāravo hoti satthugāravatāya ca vaṇṇavādī.
an6.69:4.4	Ye caññe bhikkhū na satthugāravā te ca satthugāravatāya samādapeti.
an6.69:4.5	Ye caññe bhikkhū satthugāravā tesañca vaṇṇaṁ bhaṇati bhūtaṁ tacchaṁ kālena.
an6.69:4.6	Attanā ca dhammagāravo hoti …
an6.69:4.7	saṅghagāravo hoti …
an6.69:4.8	sikkhāgāravo hoti …
an6.69:4.9	suvaco hoti …
an6.69:4.10	kalyāṇamitto hoti kalyāṇamittatāya ca vaṇṇavādī.
an6.69:4.11	Ye caññe bhikkhū na kalyāṇamittā te ca kalyāṇamittatāya samādapeti.
an6.69:4.12	Ye caññe bhikkhū kalyāṇamittā tesañca vaṇṇaṁ bhaṇati bhūtaṁ tacchaṁ kālena.
an6.69:4.13	Imassa kho, sāriputta, mayā saṅkhittena bhāsitassa evaṁ vitthārena attho daṭṭhabbo”ti.
an6.69:4.14	Pañcamaṁ.
an6.70:0.1	Aṅguttara Nikāya 6.70
an6.70:0.2	7. Devatāvagga
an6.70:0.3	Samādhisutta
an6.70:1.1	“‘So vata, bhikkhave, bhikkhu na santena samādhinā na paṇītena na paṭippassaddhiladdhena na ekodibhāvādhigatena anekavihitaṁ iddhividhaṁ paccanubhavissati—ekopi hutvā bahudhā bhavissati, bahudhāpi hutvā eko bhavissati …pe… yāva brahmalokāpi kāyena vasaṁ vattessatī’ti netaṁ ṭhānaṁ vijjati.
an6.70:1.2	‘Dibbāya sotadhātuyā visuddhāya atikkantamānusikāya ubho sadde suṇissati—dibbe ca mānuse ca ye dūre santike cā’ti netaṁ ṭhānaṁ vijjati.
an6.70:1.3	‘Parasattānaṁ parapuggalānaṁ cetasā ceto paricca pajānissati—
an6.70:1.4	sarāgaṁ vā cittaṁ sarāgaṁ cittanti pajānissati …pe…
an6.70:1.5	vimuttaṁ vā cittaṁ vimuttaṁ cittanti pajānissatī’ti netaṁ ṭhānaṁ vijjati.
an6.70:1.6	‘Anekavihitaṁ pubbenivāsaṁ anussarissati, seyyathidaṁ—ekampi jātiṁ, dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarissatī’ti netaṁ ṭhānaṁ vijjati.
an6.70:1.7	‘Dibbena cakkhunā visuddhena atikkantamānusakena satte passissati …pe… yathākammūpage satte pajānissatī’ti netaṁ ṭhānaṁ vijjati.
an6.70:1.8	‘Āsavānaṁ khayā …pe… sacchikatvā upasampajja viharissatī’ti netaṁ ṭhānaṁ vijjati.
an6.70:2.1	‘So vata, bhikkhave, bhikkhu santena samādhinā paṇītena paṭippassaddhiladdhena ekodibhāvādhigatena anekavihitaṁ iddhividhaṁ paccanubhavissati …pe… yāva brahmalokāpi kāyena vasaṁ vattessatī’ti ṭhānametaṁ vijjati.
an6.70:2.2	‘Dibbāya sotadhātuyā visuddhāya atikkantamānusikāya ubho sadde suṇissati—dibbe ca mānuse ca ye dūre santike cā’ti ṭhānametaṁ vijjati.
an6.70:2.3	‘Parasattānaṁ parapuggalānaṁ cetasā ceto paricca pajānissati—
an6.70:2.4	sarāgaṁ vā cittaṁ sarāgaṁ cittanti pajānissati …pe…
an6.70:2.5	vimuttaṁ vā cittaṁ vimuttaṁ cittanti pajānissatī’ti ṭhānametaṁ vijjati.
an6.70:2.6	‘Anekavihitaṁ pubbenivāsaṁ anussarissati, seyyathidaṁ—ekampi jātiṁ, dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarissatī’ti ṭhānametaṁ vijjati.
an6.70:2.7	‘Dibbena cakkhunā visuddhena atikkantamānusakena satte passissati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānissatī’ti ṭhānametaṁ vijjati.
an6.70:2.8	‘Āsavānaṁ khayā anāsavaṁ cetovimuttiṁ …pe… sacchikatvā upasampajja viharissatī’ti ṭhānametaṁ vijjatī”ti.
an6.70:2.9	Chaṭṭhaṁ.
an6.71:0.1	Aṅguttara Nikāya 6.71
an6.71:0.2	7. Devatāvagga
an6.71:0.3	Sakkhibhabbasutta
an6.71:1.1	“Chahi, bhikkhave, dhammehi samannāgato bhikkhu abhabbo tatra tatreva sakkhibhabbataṁ pāpuṇituṁ sati sati āyatane.
an6.71:1.2	Katamehi chahi?
an6.71:1.3	Idha, bhikkhave, bhikkhu ‘ime hānabhāgiyā dhammā’ti yathābhūtaṁ nappajānāti, ‘ime ṭhitibhāgiyā dhammā’ti yathābhūtaṁ nappajānāti, ‘ime visesabhāgiyā dhammā’ti yathābhūtaṁ nappajānāti, ‘ime nibbedhabhāgiyā dhammā’ti yathābhūtaṁ nappajānāti, asakkaccakārī ca hoti, asappāyakārī ca.
an6.71:1.4	Imehi kho, bhikkhave, chahi dhammehi samannāgato bhikkhu abhabbo tatra tatreva sakkhibhabbataṁ pāpuṇituṁ sati sati āyatane.
an6.71:2.1	Chahi, bhikkhave, dhammehi samannāgato bhikkhu bhabbo tatra tatreva sakkhibhabbataṁ pāpuṇituṁ sati sati āyatane.
an6.71:2.2	Katamehi chahi?
an6.71:2.3	Idha, bhikkhave, bhikkhu ‘ime hānabhāgiyā dhammā’ti yathābhūtaṁ pajānāti, ‘ime ṭhitibhāgiyā dhammā’ti yathābhūtaṁ pajānāti, ‘ime visesabhāgiyā dhammā’ti yathābhūtaṁ pajānāti, ‘ime nibbedhabhāgiyā dhammā’ti yathābhūtaṁ pajānāti, sakkaccakārī ca hoti, sappāyakārī ca.
an6.71:2.4	Imehi kho, bhikkhave, chahi dhammehi samannāgato bhikkhu bhabbo tatra tatreva sakkhibhabbataṁ pāpuṇituṁ sati sati āyatane”ti.
an6.71:2.5	Sattamaṁ.
an6.72:0.1	Aṅguttara Nikāya 6.72
an6.72:0.2	7. Devatāvagga
an6.72:0.3	Balasutta
an6.72:1.1	“Chahi, bhikkhave, dhammehi samannāgato bhikkhu abhabbo samādhismiṁ balataṁ pāpuṇituṁ.
an6.72:1.2	Katamehi chahi?
an6.72:1.3	Idha, bhikkhave, bhikkhu na samādhissa samāpattikusalo hoti, na samādhissa ṭhitikusalo hoti, na samādhissa vuṭṭhānakusalo hoti, asakkaccakārī ca hoti, asātaccakārī ca, asappāyakārī ca.
an6.72:1.4	Imehi kho, bhikkhave, chahi dhammehi samannāgato bhikkhu abhabbo samādhismiṁ balataṁ pāpuṇituṁ.
an6.72:2.1	Chahi, bhikkhave, dhammehi samannāgato bhikkhu bhabbo samādhismiṁ balataṁ pāpuṇituṁ.
an6.72:2.2	Katamehi chahi?
an6.72:2.3	Idha, bhikkhave, bhikkhu samādhissa samāpattikusalo hoti, samādhissa ṭhitikusalo hoti, samādhissa vuṭṭhānakusalo hoti, sakkaccakārī ca hoti, sātaccakārī ca, sappāyakārī ca.
an6.72:2.4	Imehi kho, bhikkhave, chahi dhammehi samannāgato bhikkhu bhabbo samādhismiṁ balataṁ pāpuṇitun”ti.
an6.72:2.5	Aṭṭhamaṁ.
an6.73:0.1	Aṅguttara Nikāya 6.73
an6.73:0.2	7. Devatāvagga
an6.73:0.3	Paṭhamatajjhānasutta
an6.73:1.1	“Cha, bhikkhave, dhamme appahāya abhabbo paṭhamaṁ jhānaṁ upasampajja viharituṁ.
an6.73:1.2	Katame cha?
an6.73:1.3	Kāmacchandaṁ, byāpādaṁ, thinamiddhaṁ, uddhaccakukkuccaṁ, vicikicchaṁ.
an6.73:1.4	Kāmesu kho panassa ādīnavo na yathābhūtaṁ sammappaññāya sudiṭṭho hoti.
an6.73:1.5	Ime kho, bhikkhave, cha dhamme appahāya abhabbo paṭhamaṁ jhānaṁ upasampajja viharituṁ.
an6.73:2.1	Cha, bhikkhave, dhamme pahāya bhabbo paṭhamaṁ jhānaṁ upasampajja viharituṁ.
an6.73:2.2	Katame cha?
an6.73:2.3	Kāmacchandaṁ, byāpādaṁ, thinamiddhaṁ, uddhaccakukkuccaṁ, vicikicchaṁ,
an6.73:2.4	kāmesu kho panassa ādīnavo na yathābhūtaṁ sammappaññāya sudiṭṭho hoti.
an6.73:2.5	Ime kho, bhikkhave, cha dhamme pahāya bhabbo paṭhamaṁ jhānaṁ upasampajja viharitun”ti.
an6.73:2.6	Navamaṁ.
an6.74:0.1	Aṅguttara Nikāya 6.74
an6.74:0.2	7. Devatāvagga
an6.74:0.3	Dutiyatajjhānasutta
an6.74:1.1	“Cha, bhikkhave, dhamme appahāya abhabbo paṭhamaṁ jhānaṁ upasampajja viharituṁ.
an6.74:1.2	Katame cha?
an6.74:1.3	Kāmavitakkaṁ, byāpādavitakkaṁ, vihiṁsāvitakkaṁ, kāmasaññaṁ, byāpādasaññaṁ, vihiṁsāsaññaṁ—
an6.74:1.4	ime kho, bhikkhave, cha dhamme appahāya abhabbo paṭhamaṁ jhānaṁ upasampajja viharituṁ.
an6.74:2.1	Cha, bhikkhave, dhamme pahāya bhabbo paṭhamaṁ jhānaṁ upasampajja viharituṁ.
an6.74:2.2	Katame cha?
an6.74:2.3	Kāmavitakkaṁ, byāpādavitakkaṁ, vihiṁsāvitakkaṁ, kāmasaññaṁ, byāpādasaññaṁ, vihiṁsāsaññaṁ—
an6.74:2.4	ime kho, bhikkhave, cha dhamme pahāya bhabbo paṭhamaṁ jhānaṁ upasampajja viharitun”ti.
an6.74:2.5	Dasamaṁ.
an6.74:2.6	Devatāvaggo sattamo.
an6.74:3.0	Tassuddānaṁ
an6.74:3.1	Anāgāmi arahaṁ mittā,
an6.74:3.2	saṅgaṇikārāmadevatā;
an6.74:3.3	Samādhisakkhibhabbaṁ balaṁ,
an6.74:3.4	tajjhānā apare duveti.
an6.75:0.1	Aṅguttara Nikāya 6.75
an6.75:0.2	8. Arahattavagga
an6.75:0.3	Dukkhasutta
an6.75:1.1	“Chahi, bhikkhave, dhammehi samannāgato bhikkhu diṭṭheva dhamme dukkhaṁ viharati savighātaṁ saupāyāsaṁ sapariḷāhaṁ, kāyassa bhedā paraṁ maraṇā duggati pāṭikaṅkhā.
an6.75:1.2	Katamehi chahi?
an6.75:1.3	Kāmavitakkena, byāpādavitakkena, vihiṁsāvitakkena, kāmasaññāya, byāpādasaññāya, vihiṁsāsaññāya—
an6.75:1.4	imehi, kho, bhikkhave, chahi dhammehi samannāgato bhikkhu diṭṭheva dhamme dukkhaṁ viharati savighātaṁ saupāyāsaṁ sapariḷāhaṁ, kāyassa bhedā paraṁ maraṇā duggati pāṭikaṅkhā.
an6.75:2.1	Chahi, bhikkhave, dhammehi samannāgato bhikkhu diṭṭheva dhamme sukhaṁ viharati avighātaṁ anupāyāsaṁ apariḷāhaṁ, kāyassa bhedā paraṁ maraṇā sugati pāṭikaṅkhā.
an6.75:2.2	Katamehi chahi?
an6.75:2.3	Nekkhammavitakkena, abyāpādavitakkena, avihiṁsāvitakkena, nekkhammasaññāya, abyāpādasaññāya, avihiṁsāsaññāya—
an6.75:2.4	imehi, kho, bhikkhave, chahi dhammehi samannāgato bhikkhu diṭṭheva dhamme sukhaṁ viharati avighātaṁ anupāyāsaṁ apariḷāhaṁ, kāyassa bhedā paraṁ maraṇā sugati pāṭikaṅkhā”ti.
an6.75:2.5	Paṭhamaṁ.
an6.76:0.1	Aṅguttara Nikāya 6.76
an6.76:0.2	8. Arahattavagga
an6.76:0.3	Arahattasutta
an6.76:1.1	“Cha, bhikkhave, dhamme appahāya abhabbo arahattaṁ sacchikātuṁ.
an6.76:1.2	Katame cha?
an6.76:1.3	Mānaṁ, omānaṁ, atimānaṁ, adhimānaṁ, thambhaṁ, atinipātaṁ.
an6.76:1.4	Ime kho, bhikkhave, cha dhamme appahāya abhabbo arahattaṁ sacchikātuṁ.
an6.76:2.1	Cha, bhikkhave, dhamme pahāya bhabbo arahattaṁ sacchikātuṁ.
an6.76:2.2	Katame cha?
an6.76:2.3	Mānaṁ, omānaṁ, atimānaṁ, adhimānaṁ, thambhaṁ, atinipātaṁ.
an6.76:2.4	Ime kho, bhikkhave, cha dhamme pahāya bhabbo arahattaṁ sacchikātun”ti.
an6.76:2.5	Dutiyaṁ.
an6.77:0.1	Aṅguttara Nikāya 6.77
an6.77:0.2	8. Arahattavagga
an6.77:0.3	Uttarimanussadhammasutta
an6.77:1.1	“Cha, bhikkhave, dhamme appahāya abhabbo uttari manussadhammaṁ alamariyañāṇadassanavisesaṁ sacchikātuṁ.
an6.77:1.2	Katame cha?
an6.77:1.3	Muṭṭhassaccaṁ, asampajaññaṁ, indriyesu aguttadvārataṁ, bhojane amattaññutaṁ, kuhanaṁ, lapanaṁ.
an6.77:1.4	Ime kho, bhikkhave, cha dhamme appahāya abhabbo uttari manussadhammaṁ alamariyañāṇadassanavisesaṁ sacchikātuṁ.
an6.77:2.1	Cha, bhikkhave, dhamme pahāya bhabbo uttari manussadhammaṁ alamariyañāṇadassanavisesaṁ sacchikātuṁ.
an6.77:2.2	Katame cha?
an6.77:2.3	Muṭṭhassaccaṁ, asampajaññaṁ, indriyesu aguttadvārataṁ, bhojane amattaññutaṁ, kuhanaṁ, lapanaṁ.
an6.77:2.4	Ime kho, bhikkhave, cha dhamme pahāya bhabbo uttari manussadhammaṁ alamariyañāṇadassanavisesaṁ sacchikātun”ti.
an6.77:2.5	Tatiyaṁ.
an6.78:0.1	Aṅguttara Nikāya 6.78
an6.78:0.2	8. Arahattavagga
an6.78:0.3	Sukhasomanassasutta
an6.78:1.1	“Chahi, bhikkhave, dhammehi samannāgato bhikkhu diṭṭheva dhamme sukhasomanassabahulo viharati, yoni cassa āraddhā hoti āsavānaṁ khayāya.
an6.78:1.2	Katamehi chahi?
an6.78:1.3	Idha, bhikkhave, bhikkhu dhammārāmo hoti, bhāvanārāmo hoti, pahānārāmo hoti, pavivekārāmo hoti, abyāpajjhārāmo hoti, nippapañcārāmo hoti.
an6.78:1.4	Imehi kho, bhikkhave, chahi dhammehi samannāgato bhikkhu diṭṭheva dhamme sukhasomanassabahulo viharati, yoni cassa āraddhā hoti āsavānaṁ khayāyā”ti.
an6.78:1.5	Catutthaṁ.
an6.79:0.1	Aṅguttara Nikāya 6.79
an6.79:0.2	8. Arahattavagga
an6.79:0.3	Adhigamasutta
an6.79:1.1	“Chahi, bhikkhave, dhammehi samannāgato bhikkhu abhabbo anadhigataṁ vā kusalaṁ dhammaṁ adhigantuṁ, adhigataṁ vā kusalaṁ dhammaṁ phātiṁ kātuṁ.
an6.79:1.2	Katamehi chahi?
an6.79:1.3	Idha, bhikkhave, bhikkhu na āyakusalo ca hoti, na apāyakusalo ca hoti, na upāyakusalo ca hoti, anadhigatānaṁ kusalānaṁ dhammānaṁ adhigamāya na chandaṁ janeti, adhigate kusale dhamme na ārakkhati, sātaccakiriyāya na sampādeti.
an6.79:1.4	Imehi kho, bhikkhave, chahi dhammehi samannāgato bhikkhu abhabbo anadhigataṁ vā kusalaṁ dhammaṁ adhigantuṁ, adhigataṁ vā kusalaṁ dhammaṁ phātiṁ kātuṁ.
an6.79:2.1	Chahi, bhikkhave, dhammehi samannāgato bhikkhu bhabbo anadhigataṁ vā kusalaṁ dhammaṁ adhigantuṁ, adhigataṁ vā kusalaṁ dhammaṁ phātiṁ kātuṁ.
an6.79:2.2	Katamehi chahi?
an6.79:2.3	Idha, bhikkhave, bhikkhu āyakusalo ca hoti, apāyakusalo ca hoti, upāyakusalo ca hoti, anadhigatānaṁ kusalānaṁ dhammānaṁ adhigamāya chandaṁ janeti, adhigate kusale dhamme ārakkhati, sātaccakiriyāya sampādeti.
an6.79:2.4	Imehi kho, bhikkhave, chahi dhammehi samannāgato bhikkhu bhabbo anadhigataṁ vā kusalaṁ dhammaṁ adhigantuṁ, adhigataṁ vā kusalaṁ dhammaṁ phātiṁ kātun”ti.
an6.79:2.5	Pañcamaṁ.
an6.80:0.1	Aṅguttara Nikāya 6.80
an6.80:0.2	8. Arahattavagga
an6.80:0.3	Mahantattasutta
an6.80:1.1	“Chahi, bhikkhave, dhammehi samannāgato bhikkhu nacirasseva mahantattaṁ vepullattaṁ pāpuṇāti dhammesu.
an6.80:1.2	Katamehi chahi?
an6.80:1.3	Idha, bhikkhave, bhikkhu ālokabahulo ca hoti yogabahulo ca vedabahulo ca asantuṭṭhibahulo ca anikkhittadhuro ca kusalesu dhammesu uttari ca patāreti.
an6.80:1.4	Imehi kho, bhikkhave, chahi dhammehi samannāgato bhikkhu nacirasseva mahantattaṁ vepullattaṁ pāpuṇāti dhammesū”ti.
an6.80:1.5	Chaṭṭhaṁ.
an6.81:0.1	Aṅguttara Nikāya 6.81
an6.81:0.2	8. Arahattavagga
an6.81:0.3	Paṭhamanirayasutta
an6.81:1.1	“Chahi, bhikkhave, dhammehi samannāgato yathābhataṁ nikkhitto evaṁ niraye.
an6.81:1.2	Katamehi chahi?
an6.81:1.3	Pāṇātipātī hoti, adinnādāyī hoti, kāmesumicchācārī hoti, musāvādī hoti, pāpiccho ca, micchādiṭṭhi ca.
an6.81:1.4	Imehi kho, bhikkhave, chahi dhammehi samannāgato yathābhataṁ nikkhitto evaṁ niraye.
an6.81:2.1	Chahi, bhikkhave, dhammehi samannāgato yathābhataṁ nikkhitto evaṁ sagge.
an6.81:2.2	Katamehi chahi?
an6.81:2.3	Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, appiccho ca, sammādiṭṭhi ca.
an6.81:2.4	Imehi kho, bhikkhave, chahi dhammehi samannāgato yathābhataṁ nikkhitto evaṁ sagge”ti.
an6.81:2.5	Sattamaṁ.
an6.82:0.1	Aṅguttara Nikāya 6.82
an6.82:0.2	8. Arahattavagga
an6.82:0.3	Dutiyanirayasutta
an6.82:1.1	“Chahi, bhikkhave, dhammehi samannāgato yathābhataṁ nikkhitto evaṁ niraye.
an6.82:1.2	Katamehi chahi?
an6.82:1.3	Pāṇātipātī hoti, adinnādāyī hoti, kāmesumicchācārī hoti, musāvādī hoti, luddho ca, pagabbho ca.
an6.82:1.4	Imehi kho, bhikkhave, chahi dhammehi samannāgato yathābhataṁ nikkhitto evaṁ niraye.
an6.82:2.1	Chahi, bhikkhave, dhammehi samannāgato yathābhataṁ nikkhitto evaṁ sagge.
an6.82:2.2	Katamehi chahi?
an6.82:2.3	Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, aluddho ca, appagabbho ca.
an6.82:2.4	Imehi kho, bhikkhave, chahi dhammehi samannāgato yathābhataṁ nikkhitto evaṁ sagge”ti.
an6.82:2.5	Aṭṭhamaṁ.
an6.83:0.1	Aṅguttara Nikāya 6.83
an6.83:0.2	8. Arahattavagga
an6.83:0.3	Aggadhammasutta
an6.83:1.1	“Chahi, bhikkhave, dhammehi samannāgato bhikkhu abhabbo aggaṁ dhammaṁ arahattaṁ sacchikātuṁ.
an6.83:1.2	Katamehi chahi?
an6.83:1.3	Idha, bhikkhave, bhikkhu assaddho hoti, ahiriko hoti, anottappī hoti, kusīto hoti, duppañño hoti, kāye ca jīvite ca sāpekkho hoti.
an6.83:1.4	Imehi kho, bhikkhave, chahi dhammehi samannāgato bhikkhu abhabbo aggaṁ dhammaṁ arahattaṁ sacchikātuṁ.
an6.83:2.1	Chahi, bhikkhave, dhammehi samannāgato bhikkhu bhabbo aggaṁ dhammaṁ arahattaṁ sacchikātuṁ.
an6.83:2.2	Katamehi chahi?
an6.83:2.3	Idha, bhikkhave, bhikkhu saddho hoti, hirīmā hoti, ottappī hoti, āraddhavīriyo hoti, paññavā hoti, kāye ca jīvite ca anapekkho hoti.
an6.83:2.4	Imehi kho, bhikkhave, chahi dhammehi samannāgato bhikkhu bhabbo aggaṁ dhammaṁ arahattaṁ sacchikātun”ti.
an6.83:2.5	Navamaṁ.
an6.84:0.1	Aṅguttara Nikāya 6.84
an6.84:0.2	8. Arahattavagga
an6.84:0.3	Rattidivasasutta
an6.84:1.1	“Chahi, bhikkhave, dhammehi samannāgatassa bhikkhuno yā ratti vā divaso vā āgacchati hāniyeva pāṭikaṅkhā kusalesu dhammesu, no vuddhi.
an6.84:1.2	Katamehi chahi?
an6.84:1.3	Idha, bhikkhave, bhikkhu mahiccho hoti, vighātavā, asantuṭṭho, itarītaracīvarapiṇḍapātasenāsanagilānappaccayabhesajjaparikkhārena, assaddho hoti, dussīlo hoti, kusīto hoti, muṭṭhassati hoti, duppañño hoti.
an6.84:1.4	Imehi kho, bhikkhave, chahi dhammehi samannāgatassa bhikkhuno yā ratti vā divaso vā āgacchati hāniyeva pāṭikaṅkhā kusalesu dhammesu, no vuddhi.
an6.84:2.1	Chahi, bhikkhave, dhammehi samannāgatassa bhikkhuno yā ratti vā divaso vā āgacchati vuddhiyeva pāṭikaṅkhā kusalesu dhammesu, no parihāni.
an6.84:2.2	Katamehi chahi?
an6.84:2.3	Idha, bhikkhave, bhikkhu na mahiccho hoti, avighātavā, santuṭṭho, itarītaracīvarapiṇḍapātasenāsanagilānappaccayabhesajjaparikkhārena, saddho hoti, sīlavā hoti, āraddhavīriyo hoti, satimā hoti, paññavā hoti.
an6.84:2.4	Imehi kho, bhikkhave, chahi dhammehi samannāgatassa bhikkhuno yā ratti vā divaso vā āgacchati vuddhiyeva pāṭikaṅkhā, kusalesu dhammesu no parihānī”ti.
an6.84:2.5	Dasamaṁ.
an6.84:2.6	Arahattavaggo aṭṭhamo.
an6.84:3.0	Tassuddānaṁ
an6.84:3.1	Dukkhaṁ arahattaṁ uttari ca,
an6.84:3.2	Sukhaṁ adhigamena ca;
an6.84:3.3	Mahantattaṁ dvayaṁ niraye,
an6.84:3.4	Aggadhammañca rattiyoti.
an6.85:0.1	Aṅguttara Nikāya 6.85
an6.85:0.2	9. Sītivagga
an6.85:0.3	Sītibhāvasutta
an6.85:1.1	“Chahi, bhikkhave, dhammehi samannāgato bhikkhu abhabbo anuttaraṁ sītibhāvaṁ sacchikātuṁ.
an6.85:1.2	Katamehi chahi?
an6.85:1.3	Idha, bhikkhave, bhikkhu yasmiṁ samaye cittaṁ niggahetabbaṁ tasmiṁ samaye cittaṁ na niggaṇhāti, yasmiṁ samaye cittaṁ paggahetabbaṁ tasmiṁ samaye cittaṁ na paggaṇhāti, yasmiṁ samaye cittaṁ sampahaṁsitabbaṁ tasmiṁ samaye cittaṁ na sampahaṁseti, yasmiṁ samaye cittaṁ ajjhupekkhitabbaṁ tasmiṁ samaye cittaṁ na ajjhupekkhati, hīnādhimuttiko ca hoti, sakkāyābhirato ca.
an6.85:1.4	Imehi kho, bhikkhave, chahi dhammehi samannāgato bhikkhu abhabbo anuttaraṁ sītibhāvaṁ sacchikātuṁ.
an6.85:2.1	Chahi, bhikkhave, dhammehi samannāgato bhikkhu bhabbo anuttaraṁ sītibhāvaṁ sacchikātuṁ.
an6.85:2.2	Katamehi chahi?
an6.85:2.3	Idha, bhikkhave, bhikkhu yasmiṁ samaye cittaṁ niggahetabbaṁ tasmiṁ samaye cittaṁ niggaṇhāti, yasmiṁ samaye cittaṁ paggahetabbaṁ tasmiṁ samaye cittaṁ paggaṇhāti, yasmiṁ samaye cittaṁ sampahaṁsitabbaṁ tasmiṁ samaye cittaṁ sampahaṁseti, yasmiṁ samaye cittaṁ ajjhupekkhitabbaṁ tasmiṁ samaye cittaṁ ajjhupekkhati, paṇītādhimuttiko ca hoti nibbānābhirato ca.
an6.85:2.4	Imehi kho, bhikkhave, chahi dhammehi samannāgato bhikkhu bhabbo anuttaraṁ sītibhāvaṁ sacchikātun”ti.
an6.85:2.5	Paṭhamaṁ.
an6.86:0.1	Aṅguttara Nikāya 6.86
an6.86:0.2	9. Sītivagga
an6.86:0.3	Āvaraṇasutta
an6.86:1.1	“Chahi, bhikkhave, dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an6.86:1.2	Katamehi chahi?
an6.86:1.3	Kammāvaraṇatāya samannāgato hoti, kilesāvaraṇatāya samannāgato hoti, vipākāvaraṇatāya samannāgato hoti, assaddho ca hoti, acchandiko ca, duppañño ca.
an6.86:1.4	Imehi kho, bhikkhave, chahi dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an6.86:2.1	Chahi, bhikkhave, dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattaṁ.
an6.86:2.2	Katamehi chahi?
an6.86:2.3	Na kammāvaraṇatāya samannāgato hoti, na kilesāvaraṇatāya samannāgato hoti, na vipākāvaraṇatāya samannāgato hoti, saddho ca hoti, chandiko ca, paññavā ca.
an6.86:2.4	Imehi kho, bhikkhave, chahi dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattan”ti.
an6.86:2.5	Dutiyaṁ.
an6.87:0.1	Aṅguttara Nikāya 6.87
an6.87:0.2	9. Sītivagga
an6.87:0.3	Voropitasutta
an6.87:1.1	“Chahi, bhikkhave, dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an6.87:1.2	Katamehi chahi?
an6.87:1.3	Mātā jīvitā voropitā hoti, pitā jīvitā voropito hoti, arahaṁ jīvitā voropito hoti, tathāgatassa duṭṭhena cittena lohitaṁ uppāditaṁ hoti, saṅgho bhinno hoti, duppañño hoti jaḷo eḷamūgo.
an6.87:1.4	Imehi kho, bhikkhave, chahi dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an6.87:2.1	Chahi, bhikkhave, dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattaṁ.
an6.87:2.2	Katamehi chahi?
an6.87:2.3	Na mātā jīvitā voropitā hoti, na pitā jīvitā voropito hoti, na arahaṁ jīvitā voropito hoti, na tathāgatassa duṭṭhena cittena lohitaṁ uppāditaṁ hoti, na saṅgho bhinno hoti, paññavā hoti ajaḷo aneḷamūgo.
an6.87:2.4	Imehi kho, bhikkhave, chahi dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattan”ti.
an6.87:2.5	Tatiyaṁ.
an6.88:0.1	Aṅguttara Nikāya 6.88
an6.88:0.2	9. Sītivagga
an6.88:0.3	Sussūsatisutta
an6.88:1.1	“Chahi, bhikkhave, dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an6.88:1.2	Katamehi chahi?
an6.88:1.3	Tathāgatappavedite dhammavinaye desiyamāne na sussūsati, na sotaṁ odahati, na aññā cittaṁ upaṭṭhāpeti, anatthaṁ gaṇhāti, atthaṁ riñcati, ananulomikāya khantiyā samannāgato hoti.
an6.88:1.4	Imehi kho, bhikkhave, chahi dhammehi samannāgato suṇantopi saddhammaṁ abhabbo niyāmaṁ okkamituṁ kusalesu dhammesu sammattaṁ.
an6.88:2.1	Chahi, bhikkhave, dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattaṁ.
an6.88:2.2	Katamehi chahi?
an6.88:2.3	Tathāgatappavedite dhammavinaye desiyamāne sussūsati, sotaṁ odahati, aññā cittaṁ upaṭṭhāpeti, atthaṁ gaṇhāti, anatthaṁ riñcati, anulomikāya khantiyā samannāgato hoti.
an6.88:2.4	Imehi kho, bhikkhave, chahi dhammehi samannāgato suṇanto saddhammaṁ bhabbo niyāmaṁ okkamituṁ kusalesu dhammesu sammattan”ti.
an6.88:2.5	Catutthaṁ.
an6.89:0.1	Aṅguttara Nikāya 6.89
an6.89:0.2	9. Sītivagga
an6.89:0.3	Appahāyasutta
an6.89:1.1	“Cha, bhikkhave, dhamme appahāya abhabbo diṭṭhisampadaṁ sacchikātuṁ.
an6.89:1.2	Katame cha?
an6.89:1.3	Sakkāyadiṭṭhiṁ, vicikicchaṁ, sīlabbataparāmāsaṁ, apāyagamanīyaṁ rāgaṁ, apāyagamanīyaṁ dosaṁ, apāyagamanīyaṁ mohaṁ.
an6.89:1.4	Ime kho, bhikkhave, cha dhamme appahāya abhabbo diṭṭhisampadaṁ sacchikātuṁ.
an6.89:2.1	Cha, bhikkhave, dhamme pahāya bhabbo diṭṭhisampadaṁ sacchikātuṁ.
an6.89:2.2	Katame cha?
an6.89:2.3	Sakkāyadiṭṭhiṁ, vicikicchaṁ, sīlabbataparāmāsaṁ, apāyagamanīyaṁ rāgaṁ, apāyagamanīyaṁ dosaṁ, apāyagamanīyaṁ mohaṁ.
an6.89:2.4	Ime kho, bhikkhave, cha dhamme pahāya bhabbo diṭṭhisampadaṁ sacchikātun”ti.
an6.89:2.5	Pañcamaṁ.
an6.90:0.1	Aṅguttara Nikāya 6.90
an6.90:0.2	9. Sītivagga
an6.90:0.3	Pahīnasutta
an6.90:1.1	“Chayime, bhikkhave, dhammā diṭṭhisampannassa puggalassa pahīnā.
an6.90:1.2	Katame cha?
an6.90:1.3	Sakkāyadiṭṭhi, vicikicchā, sīlabbataparāmāso, apāyagamanīyo rāgo, apāyagamanīyo doso, apāyagamanīyo moho.
an6.90:1.4	Ime kho, bhikkhave, cha dhammā diṭṭhisampannassa puggalassa pahīnā”ti.
an6.90:1.5	Chaṭṭhaṁ.
an6.91:0.1	Aṅguttara Nikāya 6.91
an6.91:0.2	9. Sītivagga
an6.91:0.3	Abhabbasutta
an6.91:1.1	“Cha, bhikkhave, dhamme abhabbo diṭṭhisampanno puggalo uppādetuṁ.
an6.91:1.2	Katame cha?
an6.91:1.3	Sakkāyadiṭṭhiṁ, vicikicchaṁ, sīlabbataparāmāsaṁ, apāyagamanīyaṁ rāgaṁ, apāyagamanīyaṁ dosaṁ, apāyagamanīyaṁ mohaṁ.
an6.91:1.4	Ime kho, bhikkhave, cha dhamme abhabbo diṭṭhisampanno puggalo uppādetun”ti.
an6.91:1.5	Sattamaṁ.
an6.92:0.1	Aṅguttara Nikāya 6.92
an6.92:0.2	9. Sītivagga
an6.92:0.3	Paṭhamaabhabbaṭṭhānasutta
an6.92:1.1	“Chayimāni, bhikkhave, abhabbaṭṭhānāni.
an6.92:1.2	Katamāni cha?
an6.92:1.3	Abhabbo diṭṭhisampanno puggalo satthari agāravo viharituṁ appatisso, abhabbo diṭṭhisampanno puggalo dhamme agāravo viharituṁ appatisso, abhabbo diṭṭhisampanno puggalo saṅghe agāravo viharituṁ appatisso, abhabbo diṭṭhisampanno puggalo sikkhāya agāravo viharituṁ appatisso, abhabbo diṭṭhisampanno puggalo anāgamanīyaṁ vatthuṁ paccāgantuṁ, abhabbo diṭṭhisampanno puggalo aṭṭhamaṁ bhavaṁ nibbattetuṁ.
an6.92:1.4	Imāni kho, bhikkhave, cha abhabbaṭṭhānānī”ti.
an6.92:1.5	Aṭṭhamaṁ.
an6.93:0.1	Aṅguttara Nikāya 6.93
an6.93:0.2	9. Sītivagga
an6.93:0.3	Dutiyaabhabbaṭṭhānasutta
an6.93:1.1	“Chayimāni, bhikkhave, abhabbaṭṭhānāni.
an6.93:1.2	Katamāni cha?
an6.93:1.3	Abhabbo diṭṭhisampanno puggalo kañci saṅkhāraṁ niccato upagantuṁ, abhabbo diṭṭhisampanno puggalo kañci saṅkhāraṁ sukhato upagantuṁ, abhabbo diṭṭhisampanno puggalo kañci dhammaṁ attato upagantuṁ, abhabbo diṭṭhisampanno puggalo ānantariyaṁ kammaṁ kātuṁ, abhabbo diṭṭhisampanno puggalo kotūhalamaṅgalena suddhiṁ paccāgantuṁ, abhabbo diṭṭhisampanno puggalo ito bahiddhā dakkhiṇeyyaṁ gavesituṁ.
an6.93:1.4	Imāni kho, bhikkhave, cha abhabbaṭṭhānānī”ti.
an6.93:1.5	Navamaṁ.
an6.94:0.1	Aṅguttara Nikāya 6.94
an6.94:0.2	9. Sītivagga
an6.94:0.3	Tatiyaabhabbaṭṭhānasutta
an6.94:1.1	“Chayimāni, bhikkhave, abhabbaṭṭhānāni.
an6.94:1.2	Katamāni cha?
an6.94:1.3	Abhabbo diṭṭhisampanno puggalo mātaraṁ jīvitā voropetuṁ, abhabbo diṭṭhisampanno puggalo pitaraṁ jīvitā voropetuṁ, abhabbo diṭṭhisampanno puggalo arahantaṁ jīvitā voropetuṁ, abhabbo diṭṭhisampanno puggalo tathāgatassa duṭṭhena cittena lohitaṁ uppādetuṁ, abhabbo diṭṭhisampanno puggalo saṅghaṁ bhindituṁ, abhabbo diṭṭhisampanno puggalo aññaṁ satthāraṁ uddisituṁ.
an6.94:1.4	Imāni kho, bhikkhave, cha abhabbaṭṭhānānī”ti.
an6.94:1.5	Dasamaṁ.
an6.95:0.1	Aṅguttara Nikāya 6.95
an6.95:0.2	9. Sītivagga
an6.95:0.3	Catutthaabhabbaṭṭhānasutta
an6.95:1.1	“Chayimāni, bhikkhave, abhabbaṭṭhānāni.
an6.95:1.2	Katamāni cha?
an6.95:1.3	Abhabbo diṭṭhisampanno puggalo sayaṅkataṁ sukhadukkhaṁ paccāgantuṁ, abhabbo diṭṭhisampanno puggalo paraṅkataṁ sukhadukkhaṁ paccāgantuṁ, abhabbo diṭṭhisampanno puggalo sayaṅkatañca paraṅkatañca sukhadukkhaṁ paccāgantuṁ, abhabbo diṭṭhisampanno puggalo asayaṅkāraṁ adhiccasamuppannaṁ sukhadukkhaṁ paccāgantuṁ, abhabbo diṭṭhisampanno puggalo aparaṅkāraṁ adhiccasamuppannaṁ sukhadukkhaṁ paccāgantuṁ, abhabbo diṭṭhisampanno puggalo asayaṅkārañca aparaṅkārañca adhiccasamuppannaṁ sukhadukkhaṁ paccāgantuṁ.
an6.95:1.4	Taṁ kissa hetu?
an6.95:1.5	Tathā hissa, bhikkhave, diṭṭhisampannassa puggalassa hetu ca sudiṭṭho hetusamuppannā ca dhammā.
an6.95:1.6	Imāni kho, bhikkhave, cha abhabbaṭṭhānānī”ti.
an6.95:1.7	Ekādasamaṁ.
an6.95:1.8	Sītivaggo navamo.
an6.95:2.0	Tassuddānaṁ
an6.95:2.1	Sītibhāvaṁ āvaraṇaṁ,
an6.95:2.2	voropitā sussūsati;
an6.95:2.3	Appahāya pahīnābhabbo,
an6.95:2.4	taṭṭhānā caturopi cāti.
an6.96:0.1	Aṅguttara Nikāya 6.96
an6.96:0.2	10. Ānisaṁsavagga
an6.96:0.3	Pātubhāvasutta
an6.96:1.1	“Channaṁ, bhikkhave, pātubhāvo dullabho lokasmiṁ.
an6.96:1.2	Katamesaṁ channaṁ?
an6.96:1.3	Tathāgatassa arahato sammāsambuddhassa pātubhāvo dullabho lokasmiṁ, tathāgatappaveditassa dhammavinayassa desetā puggalo dullabho lokasmiṁ, ariyāyatane paccājāti dullabhā lokasmiṁ, indriyānaṁ avekallatā dullabhā lokasmiṁ, ajaḷatā aneḷamūgatā dullabhā lokasmiṁ, kusale dhamme chando dullabho lokasmiṁ.
an6.96:1.4	Imesaṁ kho, bhikkhave, channaṁ pātubhāvo dullabho lokasmin”ti.
an6.96:1.5	Paṭhamaṁ.
an6.97:0.1	Aṅguttara Nikāya 6.97
an6.97:0.2	10. Ānisaṁsavagga
an6.97:0.3	Ānisaṁsasutta
an6.97:1.1	“Chayime, bhikkhave, ānisaṁsā sotāpattiphalasacchikiriyāya.
an6.97:1.2	Katame cha?
an6.97:1.3	Saddhammaniyato hoti, aparihānadhammo hoti, pariyantakatassa dukkhaṁ hoti, asādhāraṇena ñāṇena samannāgato hoti, hetu cassa sudiṭṭho, hetusamuppannā ca dhammā.
an6.97:1.4	Ime kho, bhikkhave, cha ānisaṁsā sotāpattiphalasacchikiriyāyā”ti.
an6.97:1.5	Dutiyaṁ.
an6.98:0.1	Aṅguttara Nikāya 6.98
an6.98:0.2	10. Ānisaṁsavagga
an6.98:0.3	Aniccasutta
an6.98:1.1	“‘So vata, bhikkhave, bhikkhu kañci saṅkhāraṁ niccato samanupassanto anulomikāya khantiyā samannāgato bhavissatī’ti netaṁ ṭhānaṁ vijjati.
an6.98:1.2	‘Anulomikāya khantiyā asamannāgato sammattaniyāmaṁ okkamissatī’ti netaṁ ṭhānaṁ vijjati.
an6.98:1.3	‘Sammattaniyāmaṁ anokkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatī’ti netaṁ ṭhānaṁ vijjati.
an6.98:2.1	‘So vata, bhikkhave, bhikkhu sabbasaṅkhāre aniccato samanupassanto anulomikāya khantiyā samannāgato bhavissatī’ti ṭhānametaṁ vijjati.
an6.98:2.2	‘Anulomikāya khantiyā samannāgato sammattaniyāmaṁ okkamissatī’ti ṭhānametaṁ vijjati.
an6.98:2.3	‘Sammattaniyāmaṁ okkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatī’ti ṭhānametaṁ vijjatī”ti.
an6.98:2.4	Tatiyaṁ.
an6.99:0.1	Aṅguttara Nikāya 6.99
an6.99:0.2	10. Ānisaṁsavagga
an6.99:0.3	Dukkhasutta
an6.99:1.1	“So vata, bhikkhave, bhikkhu kañci saṅkhāraṁ sukhato samanupassanto …pe…
an6.99:1.2	sabbasaṅkhāre dukkhato samanupassanto …pe…
an6.99:1.3	ṭhānametaṁ vijjati”.
an6.99:1.4	Catutthaṁ.
an6.100:0.1	Aṅguttara Nikāya 6.100
an6.100:0.2	10. Ānisaṁsavagga
an6.100:0.3	Anattasutta
an6.100:1.1	“So vata, bhikkhave, bhikkhu kañci dhammaṁ attato samanupassanto …pe…
an6.100:1.2	sabbadhamme anattato samanupassanto …pe…
an6.100:1.3	ṭhānametaṁ vijjati”.
an6.100:1.4	Pañcamaṁ.
an6.101:0.1	Aṅguttara Nikāya 6.101
an6.101:0.2	10. Ānisaṁsavagga
an6.101:0.3	Nibbānasutta
an6.101:1.1	“‘So vata, bhikkhave, bhikkhu nibbānaṁ dukkhato samanupassanto anulomikāya khantiyā samannāgato bhavissatī’ti netaṁ ṭhānaṁ vijjati.
an6.101:1.2	‘Anulomikāya khantiyā asamannāgato sammattaniyāmaṁ okkamissatī’ti netaṁ ṭhānaṁ vijjati.
an6.101:1.3	‘Sammattaniyāmaṁ anokkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatī’ti netaṁ ṭhānaṁ vijjati.
an6.101:2.1	‘So vata, bhikkhave, bhikkhu nibbānaṁ sukhato samanupassanto anulomikāya khantiyā samannāgato bhavissatī’ti ṭhānametaṁ vijjati.
an6.101:2.2	‘Anulomikāya khantiyā samannāgato sammattaniyāmaṁ okkamissatī’ti ṭhānametaṁ vijjati.
an6.101:2.3	‘Sammattaniyāmaṁ okkamamāno sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā sacchikarissatī’ti ṭhānametaṁ vijjatī”ti.
an6.101:2.4	Chaṭṭhaṁ.
an6.102:0.1	Aṅguttara Nikāya 6.102
an6.102:0.2	10. Ānisaṁsavagga
an6.102:0.3	Anavatthitasutta
an6.102:1.1	“Cha, bhikkhave, ānisaṁse sampassamānena alameva bhikkhunā sabbasaṅkhāresu anodhiṁ karitvā aniccasaññaṁ upaṭṭhāpetuṁ.
an6.102:1.2	Katame cha?
an6.102:1.3	‘Sabbasaṅkhārā ca me anavatthitā khāyissanti, sabbaloke ca me mano nābhiramissati, sabbalokā ca me mano vuṭṭhahissati, nibbānapoṇañca me mānasaṁ bhavissati, saṁyojanā ca me pahānaṁ gacchissanti, paramena ca sāmaññena samannāgato bhavissāmī’ti.
an6.102:1.4	Ime kho, bhikkhave, cha ānisaṁse sampassamānena alameva bhikkhunā sabbasaṅkhāresu anodhiṁ karitvā aniccasaññaṁ upaṭṭhāpetun”ti.
an6.102:1.5	Sattamaṁ.
an6.103:0.1	Aṅguttara Nikāya 6.103
an6.103:0.2	10. Ānisaṁsavagga
an6.103:0.3	Ukkhittāsikasutta
an6.103:1.1	“Cha, bhikkhave, ānisaṁse sampassamānena alameva bhikkhunā sabbasaṅkhāresu anodhiṁ karitvā dukkhasaññaṁ upaṭṭhāpetuṁ.
an6.103:1.2	Katame cha?
an6.103:1.3	‘Sabbasaṅkhāresu ca me nibbidasaññā paccupaṭṭhitā bhavissati, seyyathāpi ukkhittāsike vadhake.
an6.103:1.4	Sabbalokā ca me mano vuṭṭhahissati, nibbāne ca santadassāvī bhavissāmi, anusayā ca me samugghātaṁ gacchissanti, kiccakārī ca bhavissāmi, satthā ca me pariciṇṇo bhavissati mettāvatāyā’ti.
an6.103:1.5	Ime kho, bhikkhave, cha ānisaṁse sampassamānena alameva bhikkhunā sabbasaṅkhāresu anodhiṁ karitvā dukkhasaññaṁ upaṭṭhāpetun”ti.
an6.103:1.6	Aṭṭhamaṁ.
an6.104:0.1	Aṅguttara Nikāya 6.104
an6.104:0.2	10. Ānisaṁsavagga
an6.104:0.3	Atammayasutta
an6.104:1.1	“Cha, bhikkhave, ānisaṁse sampassamānena alameva bhikkhunā sabbadhammesu anodhiṁ karitvā anattasaññaṁ upaṭṭhāpetuṁ.
an6.104:1.2	Katame cha?
an6.104:1.3	Sabbaloke ca atammayo bhavissāmi, ahaṅkārā ca me uparujjhissanti, mamaṅkārā ca me uparujjhissanti, asādhāraṇena ca ñāṇena samannāgato bhavissāmi, hetu ca me sudiṭṭho bhavissati, hetusamuppannā ca dhammā.
an6.104:1.4	Ime kho, bhikkhave, cha ānisaṁse sampassamānena alameva bhikkhunā sabbadhammesu anodhiṁ karitvā anattasaññaṁ upaṭṭhāpetun”ti.
an6.104:1.5	Navamaṁ.
an6.105:0.1	Aṅguttara Nikāya 6.105
an6.105:0.2	10. Ānisaṁsavagga
an6.105:0.3	Bhavasutta
an6.105:1.1	“Tayome, bhikkhave, bhavā pahātabbā, tīsu sikkhāsu sikkhitabbaṁ.
an6.105:1.2	Katame tayo bhavā pahātabbā?
an6.105:1.3	Kāmabhavo, rūpabhavo, arūpabhavo—
an6.105:1.4	ime tayo bhavā pahātabbā.
an6.105:1.5	Katamāsu tīsu sikkhāsu sikkhitabbaṁ?
an6.105:1.6	Adhisīlasikkhāya, adhicittasikkhāya, adhipaññāsikkhāya—
an6.105:1.7	imāsu tīsu sikkhāsu sikkhitabbaṁ.
an6.105:1.8	Yato kho, bhikkhave, bhikkhuno ime tayo bhavā pahīnā honti, imāsu ca tīsu sikkhāsu sikkhitasikkho hoti—
an6.105:1.9	ayaṁ vuccati, bhikkhave, bhikkhu acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā”ti.
an6.105:1.10	Dasamaṁ.
an6.106:0.1	Aṅguttara Nikāya 6.106
an6.106:0.2	10. Ānisaṁsavagga
an6.106:0.3	Taṇhāsutta
an6.106:1.1	“Tisso imā, bhikkhave, taṇhā pahātabbā, tayo ca mānā.
an6.106:1.2	Katamā tisso taṇhā pahātabbā?
an6.106:1.3	Kāmataṇhā, bhavataṇhā, vibhavataṇhā—
an6.106:1.4	imā tisso taṇhā pahātabbā.
an6.106:1.5	Katame tayo mānā pahātabbā?
an6.106:1.6	Māno, omāno, atimāno—
an6.106:1.7	ime tayo mānā pahātabbā.
an6.106:1.8	Yato kho, bhikkhave, bhikkhuno imā tisso taṇhā pahīnā honti, ime ca tayo mānā;
an6.106:1.9	ayaṁ vuccati, bhikkhave, bhikkhu acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā”ti.
an6.106:1.10	Ekādasamaṁ.
an6.106:1.11	Ānisaṁsavaggo dasamo.
an6.106:2.0	Tassuddānaṁ
an6.106:2.1	Pātubhāvo ānisaṁso,
an6.106:2.2	aniccadukkhaanattato;
an6.106:2.3	Nibbānaṁ anavatthi,
an6.106:2.4	ukkhittāsi atammayo;
an6.106:2.5	Bhavā taṇhāyekā dasāti.
an6.106:2.6	Dutiyo paṇṇāsako samatto.
an6.107:0.1	Aṅguttara Nikāya 6.107
an6.107:0.2	11. Tikavagga
an6.107:0.3	Rāgasutta
an6.107:1.1	“Tayome, bhikkhave, dhammā.
an6.107:1.2	Katame tayo?
an6.107:1.3	Rāgo, doso, moho.
an6.107:1.4	Ime kho, bhikkhave, tayo dhammā.
an6.107:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.107:1.6	Katame tayo?
an6.107:1.7	Rāgassa pahānāya asubhā bhāvetabbā, dosassa pahānāya mettā bhāvetabbā, mohassa pahānāya paññā bhāvetabbā.
an6.107:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.107:1.9	Paṭhamaṁ.
an6.108:0.1	Aṅguttara Nikāya 6.108
an6.108:0.2	11. Tikavagga
an6.108:0.3	Duccaritasutta
an6.108:1.1	“Tayome, bhikkhave, dhammā.
an6.108:1.2	Katame tayo?
an6.108:1.3	Kāyaduccaritaṁ, vacīduccaritaṁ, manoduccaritaṁ.
an6.108:1.4	Ime kho, bhikkhave, tayo dhammā.
an6.108:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.108:1.6	Katame tayo?
an6.108:1.7	Kāyaduccaritassa pahānāya kāyasucaritaṁ bhāvetabbaṁ, vacīduccaritassa pahānāya vacīsucaritaṁ bhāvetabbaṁ, manoduccaritassa pahānāya manosucaritaṁ bhāvetabbaṁ.
an6.108:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.108:1.9	Dutiyaṁ.
an6.109:0.1	Aṅguttara Nikāya 6.109
an6.109:0.2	11. Tikavagga
an6.109:0.3	Vitakkasutta
an6.109:1.1	“Tayome, bhikkhave, dhammā.
an6.109:1.2	Katame tayo?
an6.109:1.3	Kāmavitakko, byāpādavitakko, vihiṁsāvitakko.
an6.109:1.4	Ime kho, bhikkhave, tayo dhammā.
an6.109:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.109:1.6	Katame tayo?
an6.109:1.7	Kāmavitakkassa pahānāya nekkhammavitakko bhāvetabbo, byāpādavitakkassa pahānāya abyāpādavitakko bhāvetabbo, vihiṁsāvitakkassa pahānāya avihiṁsāvitakko bhāvetabbo.
an6.109:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.109:1.9	Tatiyaṁ.
an6.110:0.1	Aṅguttara Nikāya 6.110
an6.110:0.2	11. Tikavagga
an6.110:0.3	Saññāsutta
an6.110:1.1	“Tayome, bhikkhave, dhammā.
an6.110:1.2	Katame tayo?
an6.110:1.3	Kāmasaññā, byāpādasaññā, vihiṁsāsaññā.
an6.110:1.4	Ime kho, bhikkhave, tayo dhammā.
an6.110:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.110:1.6	Katame tayo?
an6.110:1.7	Kāmasaññāya pahānāya nekkhammasaññā bhāvetabbā, byāpādasaññāya pahānāya abyāpādasaññā bhāvetabbā, vihiṁsāsaññāya pahānāya avihiṁsāsaññā bhāvetabbā.
an6.110:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.110:1.9	Catutthaṁ.
an6.111:0.1	Aṅguttara Nikāya 6.111
an6.111:0.2	11. Tikavagga
an6.111:0.3	Dhātusutta
an6.111:1.1	“Tayome, bhikkhave, dhammā.
an6.111:1.2	Katame tayo?
an6.111:1.3	Kāmadhātu, byāpādadhātu, vihiṁsādhātu.
an6.111:1.4	Ime kho, bhikkhave, tayo dhammā.
an6.111:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.111:1.6	Katame tayo?
an6.111:1.7	Kāmadhātuyā pahānāya nekkhammadhātu bhāvetabbā, byāpādadhātuyā pahānāya abyāpādadhātu bhāvetabbā, vihiṁsādhātuyā pahānāya avihiṁsādhātu bhāvetabbā.
an6.111:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.111:1.9	Pañcamaṁ.
an6.112:0.1	Aṅguttara Nikāya 6.112
an6.112:0.2	11. Tikavagga
an6.112:0.3	Assādasutta
an6.112:1.1	“Tayome, bhikkhave, dhammā.
an6.112:1.2	Katame tayo?
an6.112:1.3	Assādadiṭṭhi, attānudiṭṭhi, micchādiṭṭhi.
an6.112:1.4	Ime kho, bhikkhave, tayo dhammā.
an6.112:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.112:1.6	Katame tayo?
an6.112:1.7	Assādadiṭṭhiyā pahānāya aniccasaññā bhāvetabbā, attānudiṭṭhiyā pahānāya anattasaññā bhāvetabbā, micchādiṭṭhiyā pahānāya sammādiṭṭhi bhāvetabbā.
an6.112:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.112:1.9	Chaṭṭhaṁ.
an6.113:0.1	Aṅguttara Nikāya 6.113
an6.113:0.2	11. Tikavagga
an6.113:0.3	Aratisutta
an6.113:1.1	“Tayome, bhikkhave, dhammā.
an6.113:1.2	Katame tayo?
an6.113:1.3	Arati, vihiṁsā, adhammacariyā.
an6.113:1.4	Ime kho, bhikkhave, tayo dhammā.
an6.113:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.113:1.6	Katame tayo?
an6.113:1.7	Aratiyā pahānāya muditā bhāvetabbā, vihiṁsāya pahānāya avihiṁsā bhāvetabbā, adhammacariyāya pahānāya dhammacariyā bhāvetabbā.
an6.113:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.113:1.9	Sattamaṁ.
an6.114:0.1	Aṅguttara Nikāya 6.114
an6.114:0.2	11. Tikavagga
an6.114:0.3	Santuṭṭhitāsutta
an6.114:1.1	“Tayome, bhikkhave, dhammā.
an6.114:1.2	Katame tayo?
an6.114:1.3	Asantuṭṭhitā, asampajaññaṁ, mahicchatā.
an6.114:1.4	Ime kho, bhikkhave, tayo dhammā.
an6.114:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.114:1.6	Katame tayo?
an6.114:1.7	Asantuṭṭhitāya pahānāya santuṭṭhitā bhāvetabbā, asampajaññassa pahānāya sampajaññaṁ bhāvetabbaṁ, mahicchatāya pahānāya appicchatā bhāvetabbā.
an6.114:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.114:1.9	Aṭṭhamaṁ.
an6.115:0.1	Aṅguttara Nikāya 6.115
an6.115:0.2	11. Tikavagga
an6.115:0.3	Dovacassatāsutta
an6.115:1.1	“Tayome, bhikkhave, dhammā.
an6.115:1.2	Katame tayo?
an6.115:1.3	Dovacassatā, pāpamittatā, cetaso vikkhepo.
an6.115:1.4	Ime kho, bhikkhave, tayo dhammā.
an6.115:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.115:1.6	Katame tayo?
an6.115:1.7	Dovacassatāya pahānāya sovacassatā bhāvetabbā, pāpamittatāya pahānāya kalyāṇamittatā bhāvetabbā, cetaso vikkhepassa pahānāya ānāpānassati bhāvetabbā.
an6.115:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.115:1.9	Navamaṁ.
an6.116:0.1	Aṅguttara Nikāya 6.116
an6.116:0.2	11. Tikavagga
an6.116:0.3	Uddhaccasutta
an6.116:1.1	“Tayome, bhikkhave, dhammā.
an6.116:1.2	Katame tayo?
an6.116:1.3	Uddhaccaṁ, asaṁvaro, pamādo.
an6.116:1.4	Ime kho, bhikkhave, tayo dhammā.
an6.116:1.5	Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.
an6.116:1.6	Katame tayo?
an6.116:1.7	Uddhaccassa pahānāya samatho bhāvetabbo, asaṁvarassa pahānāya saṁvaro bhāvetabbo, pamādassa pahānāya appamādo bhāvetabbo.
an6.116:1.8	Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.
an6.116:1.9	Dasamaṁ.
an6.116:1.10	Tikavaggo ekādasamo.
an6.116:2.0	Tassuddānaṁ
an6.116:2.1	Rāgaduccaritavitakka,
an6.116:2.2	Saññā dhātūti vuccati;
an6.116:2.3	Assādaaratituṭṭhi,
an6.116:2.4	Duve ca uddhaccena vaggoti.
an6.117:0.1	Aṅguttara Nikāya 6.117
an6.117:0.2	12. Sāmaññavagga
an6.117:0.3	Kāyānupassīsutta
an6.117:1.1	“Cha, bhikkhave, dhamme appahāya abhabbo kāye kāyānupassī viharituṁ.
an6.117:1.2	Katame cha?
an6.117:1.3	Kammārāmataṁ, bhassārāmataṁ, niddārāmataṁ, saṅgaṇikārāmataṁ, indriyesu aguttadvārataṁ, bhojane amattaññutaṁ.
an6.117:1.4	Ime kho, bhikkhave, cha dhamme appahāya abhabbo kāye kāyānupassī viharituṁ.
an6.117:2.1	Cha, bhikkhave, dhamme pahāya bhabbo kāye kāyānupassī viharituṁ.
an6.117:2.2	Katame cha?
an6.117:2.3	Kammārāmataṁ, bhassārāmataṁ, niddārāmataṁ, saṅgaṇikārāmataṁ, indriyesu aguttadvārataṁ, bhojane amattaññutaṁ.
an6.117:2.4	Ime kho, bhikkhave, cha dhamme pahāya bhabbo kāye kāyānupassī viharitun”ti.
an6.117:2.5	Paṭhamaṁ.
an6.118:0.1	Aṅguttara Nikāya 6.118
an6.118:0.2	12. Sāmaññavagga
an6.118:0.3	Dhammānupassīsutta
an6.118:1.1	“Cha, bhikkhave, dhamme appahāya abhabbo ajjhattaṁ kāye …pe…
an6.118:1.2	bahiddhā kāye …pe…
an6.118:1.3	ajjhattabahiddhā kāye …pe…
an6.118:1.4	ajjhattaṁ vedanāsu …pe…
an6.118:1.5	bahiddhā vedanāsu …pe…
an6.118:1.6	ajjhattabahiddhā vedanāsu …pe…
an6.118:1.7	ajjhattaṁ citte …pe…
an6.118:1.8	bahiddhā citte …pe…
an6.118:1.9	ajjhattabahiddhā citte …pe…
an6.118:1.10	ajjhattaṁ dhammesu …pe…
an6.118:1.11	bahiddhā dhammesu …pe…
an6.118:1.12	ajjhattabahiddhā dhammesu dhammānupassī viharituṁ.
an6.118:1.13	Katame cha?
an6.118:1.14	Kammārāmataṁ, bhassārāmataṁ, niddārāmataṁ, saṅgaṇikārāmataṁ, indriyesu aguttadvārataṁ, bhojane amattaññutaṁ.
an6.118:1.15	Ime kho, bhikkhave, cha dhamme pahāya bhabbo ajjhattabahiddhā dhammesu dhammānupassī viharitun”ti.
an6.118:1.16	Dutiyaṁ.
an6.119:0.1	Aṅguttara Nikāya 6.119
an6.119:0.2	12. Sāmaññavagga
an6.119:0.3	Tapussasutta
an6.119:1.1	“Chahi, bhikkhave, dhammehi samannāgato tapusso gahapati tathāgate niṭṭhaṅgato amataddaso amataṁ sacchikatvā iriyati.
an6.119:1.2	Katamehi chahi?
an6.119:1.3	Buddhe aveccappasādena, dhamme aveccappasādena, saṅghe aveccappasādena, ariyena sīlena, ariyena ñāṇena, ariyāya vimuttiyā.
an6.119:1.4	Imehi kho, bhikkhave, chahi dhammehi samannāgato tapusso gahapati tathāgate niṭṭhaṅgato amataddaso amataṁ sacchikatvā iriyatī”ti.
an6.119:1.5	Tatiyaṁ.
an6.120-139:0.1	Aṅguttara Nikāya 6.120–139
an6.120-139:0.2	12. Sāmaññavagga
an6.120-139:0.3	Bhallikādisutta
an6.120-139:1.1	“Chahi, bhikkhave, dhammehi samannāgato bhalliko gahapati …pe…
an6.120-139:1.2	sudatto gahapati anāthapiṇḍiko …
an6.120-139:1.3	citto gahapati macchikāsaṇḍiko …
an6.120-139:1.4	hatthako āḷavako …
an6.120-139:1.5	mahānāmo sakko …
an6.120-139:1.6	uggo gahapati vesāliko …
an6.120-139:1.7	uggato gahapati …
an6.120-139:1.8	sūrambaṭṭho …
an6.120-139:1.9	jīvako komārabhacco …
an6.120-139:1.10	nakulapitā gahapati …
an6.120-139:1.11	tavakaṇṇiko gahapati …
an6.120-139:1.12	pūraṇo gahapati …
an6.120-139:1.13	isidatto gahapati …
an6.120-139:1.14	sandhāno gahapati …
an6.120-139:1.15	vicayo gahapati …
an6.120-139:1.16	vijayamāhiko gahapati …
an6.120-139:1.17	meṇḍako gahapati …
an6.120-139:1.18	vāseṭṭho upāsako …
an6.120-139:1.19	ariṭṭho upāsako …
an6.120-139:1.20	sāraggo upāsako tathāgate niṭṭhaṅgato amataddaso amataṁ sacchikatvā iriyati.
an6.120-139:1.21	Katamehi chahi?
an6.120-139:1.22	Buddhe aveccappasādena, dhamme aveccappasādena, saṅghe aveccappasādena, ariyena sīlena, ariyena ñāṇena, ariyāya vimuttiyā.
an6.120-139:1.23	Imehi kho, bhikkhave, chahi dhammehi samannāgato sāraggo upāsako tathāgate niṭṭhaṅgato amataddaso amataṁ sacchikatvā iriyatī”ti.
an6.120-139:1.24	Tevīsatimaṁ.
an6.120-139:1.25	Sāmaññavaggo dvādasamo.
an6.140:0.1	Aṅguttara Nikāya 6
an6.140:0.2	13. Rāgapeyyāla
an6.140:0.3	~
an6.140:1.1	“Rāgassa, bhikkhave, abhiññāya cha dhammā bhāvetabbā.
an6.140:1.2	Katame cha?
an6.140:1.3	Dassanānuttariyaṁ, savanānuttariyaṁ, lābhānuttariyaṁ, sikkhānuttariyaṁ, pāricariyānuttariyaṁ, anussatānuttariyaṁ.
an6.140:1.4	Rāgassa, bhikkhave, abhiññāya ime cha dhammā bhāvetabbā”ti.
an6.141:0.1	Aṅguttara Nikāya 6
an6.141:0.2	13. Rāgapeyyāla
an6.141:0.3	~
an6.141:1.1	“Rāgassa, bhikkhave, abhiññāya cha dhammā bhāvetabbā.
an6.141:1.2	Katame cha?
an6.141:1.3	Buddhānussati, dhammānussati, saṅghānussati, sīlānussati, cāgānussati, devatānussati.
an6.141:1.4	Rāgassa, bhikkhave, abhiññāya ime cha dhammā bhāvetabbā”ti.
an6.142:0.1	Aṅguttara Nikāya 6
an6.142:0.2	13. Rāgapeyyāla
an6.142:0.3	~
an6.142:1.1	“Rāgassa, bhikkhave, abhiññāya cha dhammā bhāvetabbā.
an6.142:1.2	Katame cha?
an6.142:1.3	Aniccasaññā, anicce dukkhasaññā, dukkhe anattasaññā, pahānasaññā, virāgasaññā, nirodhasaññā.
an6.142:1.4	Rāgassa, bhikkhave, abhiññāya ime cha dhammā bhāvetabbā”ti.
an6.143-169:0.1	Aṅguttara Nikāya 6
an6.143-169:0.2	13. Rāgapeyyāla
an6.143-169:0.3	~
an6.143-169:1.1	“Rāgassa, bhikkhave, pariññāya …pe…
an6.143-169:1.2	parikkhayāya …
an6.143-169:1.3	pahānāya …
an6.143-169:1.4	khayāya …
an6.143-169:1.5	vayāya …
an6.143-169:1.6	virāgāya …
an6.143-169:1.7	nirodhāya …
an6.143-169:1.8	cāgāya …
an6.143-169:1.9	paṭinissaggāya cha dhammā bhāvetabbā”.
an6.170-649:0.1	Aṅguttara Nikāya 6
an6.170-649:0.2	13. Rāgapeyyāla
an6.170-649:0.3	~
an6.170-649:1.1	“Dosassa …pe…
an6.170-649:1.2	mohassa …
an6.170-649:1.3	kodhassa …
an6.170-649:1.4	upanāhassa …
an6.170-649:1.5	makkhassa …
an6.170-649:1.6	paḷāsassa …
an6.170-649:1.7	issāya …
an6.170-649:1.8	macchariyassa …
an6.170-649:1.9	māyāya …
an6.170-649:1.10	sāṭheyyassa …
an6.170-649:1.11	thambhassa …
an6.170-649:1.12	sārambhassa …
an6.170-649:1.13	mānassa …
an6.170-649:1.14	atimānassa …
an6.170-649:1.15	madassa …
an6.170-649:1.16	pamādassa abhiññāya …pe…
an6.170-649:1.17	pariññāya …
an6.170-649:1.18	parikkhayāya …
an6.170-649:1.19	pahānāya …
an6.170-649:1.20	khayāya …
an6.170-649:1.21	vayāya …
an6.170-649:1.22	virāgāya …
an6.170-649:1.23	nirodhāya …
an6.170-649:1.24	cāgāya …
an6.170-649:1.25	paṭinissaggāya …pe…
an6.170-649:1.26	ime cha dhammā bhāvetabbā”ti.
an6.170-649:1.27	Idamavoca bhagavā.
an6.170-649:1.28	Attamanā te bhikkhū bhagavato bhāsitaṁ abhinandunti.
an6.170-649:1.29	Rāgapeyyālaṁ niṭṭhitaṁ.
an6.170-649:1.30	Chakkanipātapāḷi niṭṭhitā.
an7.1:0.1	Aṅguttara Nikāya 7.1
an7.1:0.2	1. Dhanavagga
an7.1:0.3	Paṭhamapiyasutta
an7.1:1.1	Evaṁ me sutaṁ—
an7.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an7.1:1.3	Tatra kho bhagavā bhikkhū āmantesi:
an7.1:1.4	“bhikkhavo”ti.
an7.1:1.5	“Bhadante”ti te bhikkhū bhagavato paccassosuṁ.
an7.1:1.6	Bhagavā etadavoca:
an7.1:2.1	“Sattahi, bhikkhave, dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an7.1:2.2	Katamehi sattahi?
an7.1:2.3	Idha, bhikkhave, bhikkhu lābhakāmo ca hoti, sakkārakāmo ca hoti, anavaññattikāmo ca hoti, ahiriko ca hoti, anottappī ca, pāpiccho ca, micchādiṭṭhi ca.
an7.1:2.4	Imehi kho, bhikkhave, sattahi dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an7.1:3.1	Sattahi, bhikkhave, dhammehi samannāgato bhikkhu sabrahmacārīnaṁ piyo ca hoti, manāpo ca garu ca bhāvanīyo ca.
an7.1:3.2	Katamehi sattahi?
an7.1:3.3	Idha, bhikkhave, bhikkhu na lābhakāmo ca hoti, na sakkārakāmo ca hoti, na anavaññattikāmo ca hoti, hirīmā ca hoti, ottappī ca, appiccho ca, sammādiṭṭhi ca.
an7.1:3.4	Imehi kho, bhikkhave, sattahi dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an7.1:3.5	Paṭhamaṁ.
an7.2:0.1	Aṅguttara Nikāya 7.2
an7.2:0.2	1. Dhanavagga
an7.2:0.3	Dutiyapiyasutta
an7.2:1.1	“Sattahi, bhikkhave, dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an7.2:1.2	Katamehi sattahi?
an7.2:1.3	Idha, bhikkhave, bhikkhu lābhakāmo ca hoti, sakkārakāmo ca hoti, anavaññattikāmo ca hoti, ahiriko ca hoti, anottappī ca, issukī ca, maccharī ca.
an7.2:1.4	Imehi kho, bhikkhave, sattahi dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an7.2:2.1	Sattahi, bhikkhave, dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an7.2:2.2	Katamehi sattahi?
an7.2:2.3	Idha, bhikkhave, bhikkhu na lābhakāmo ca hoti, na sakkārakāmo ca hoti, na anavaññattikāmo ca hoti, hirīmā ca hoti, ottappī ca, anissukī ca, amaccharī ca.
an7.2:2.4	Imehi kho, bhikkhave, sattahi dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an7.2:2.5	Dutiyaṁ.
an7.3:0.1	Aṅguttara Nikāya 7.3
an7.3:0.2	1. Dhanavagga
an7.3:0.3	Saṅkhittabalasutta
an7.3:1.1	Evaṁ me sutaṁ—
an7.3:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme …pe…
an7.3:1.3	sattimāni, bhikkhave, balāni.
an7.3:1.4	Katamāni satta?
an7.3:1.5	Saddhābalaṁ, vīriyabalaṁ, hirībalaṁ, ottappabalaṁ, satibalaṁ, samādhibalaṁ, paññābalaṁ.
an7.3:1.6	Imāni kho, bhikkhave, satta balānīti.
an7.3:2.1	Saddhābalaṁ vīriyañca,
an7.3:2.2	hirī ottappiyaṁ balaṁ;
an7.3:2.3	Satibalaṁ samādhi ca,
an7.3:2.4	paññā ve sattamaṁ balaṁ;
an7.3:2.5	Etehi balavā bhikkhu,
an7.3:2.6	sukhaṁ jīvati paṇḍito.
an7.3:3.1	Yoniso vicine dhammaṁ,
an7.3:3.2	paññāyatthaṁ vipassati;
an7.3:3.3	Pajjotasseva nibbānaṁ,
an7.3:3.4	vimokkho hoti cetaso”ti.
an7.3:3.5	Tatiyaṁ.
an7.4:0.1	Aṅguttara Nikāya 7.4
an7.4:0.2	1. Dhanavagga
an7.4:0.3	Vitthatabalasutta
an7.4:1.1	“Sattimāni, bhikkhave, balāni.
an7.4:1.2	Katamāni satta?
an7.4:1.3	Saddhābalaṁ, vīriyabalaṁ, hirībalaṁ, ottappabalaṁ, satibalaṁ, samādhibalaṁ, paññābalaṁ.
an7.4:2.1	Katamañca, bhikkhave, saddhābalaṁ?
an7.4:2.2	Idha, bhikkhave, ariyasāvako saddho hoti, saddahati tathāgatassa bodhiṁ:
an7.4:2.3	‘itipi so bhagavā arahaṁ sammāsambuddho …pe… satthā devamanussānaṁ buddho bhagavā’ti.
an7.4:2.4	Idaṁ vuccati, bhikkhave, saddhābalaṁ.
an7.4:3.1	Katamañca, bhikkhave, vīriyabalaṁ?
an7.4:3.2	Idha, bhikkhave, ariyasāvako āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an7.4:3.3	Idaṁ vuccati, bhikkhave, vīriyabalaṁ.
an7.4:4.1	Katamañca, bhikkhave, hirībalaṁ?
an7.4:4.2	Idha, bhikkhave, ariyasāvako hirīmā hoti, hirīyati kāyaduccaritena vacīduccaritena manoduccaritena, hirīyati pāpakānaṁ akusalānaṁ dhammānaṁ samāpattiyā.
an7.4:4.3	Idaṁ vuccati, bhikkhave, hirībalaṁ.
an7.4:5.1	Katamañca, bhikkhave, ottappabalaṁ?
an7.4:5.2	Idha, bhikkhave, ariyasāvako ottappī hoti, ottappati kāyaduccaritena vacīduccaritena manoduccaritena, ottappati pāpakānaṁ akusalānaṁ dhammānaṁ samāpattiyā.
an7.4:5.3	Idaṁ vuccati, bhikkhave, ottappabalaṁ.
an7.4:6.1	Katamañca, bhikkhave, satibalaṁ?
an7.4:6.2	Idha, bhikkhave, ariyasāvako satimā hoti paramena satinepakkena samannāgato cirakatampi cirabhāsitampi saritā anussaritā.
an7.4:6.3	Idaṁ vuccati, bhikkhave, satibalaṁ.
an7.4:7.1	Katamañca, bhikkhave, samādhibalaṁ?
an7.4:7.2	Idha, bhikkhave, ariyasāvako vivicceva kāmehi
an7.4:7.3	…pe…
an7.4:7.4	catutthaṁ jhānaṁ upasampajja viharati.
an7.4:7.5	Idaṁ vuccati, bhikkhave, samādhibalaṁ.
an7.4:8.1	Katamañca, bhikkhave, paññābalaṁ?
an7.4:8.2	Idha, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an7.4:8.3	Idaṁ vuccati, bhikkhave, paññābalaṁ.
an7.4:9.1	Imāni kho, bhikkhave, satta balānīti.
an7.4:10.1	Saddhābalaṁ vīriyañca,
an7.4:10.2	hirī ottappiyaṁ balaṁ;
an7.4:10.3	Satibalaṁ samādhi ca,
an7.4:10.4	paññā ve sattamaṁ balaṁ;
an7.4:10.5	Etehi balavā bhikkhu,
an7.4:10.6	sukhaṁ jīvati paṇḍito.
an7.4:11.1	Yoniso vicine dhammaṁ,
an7.4:11.2	paññāyatthaṁ vipassati;
an7.4:11.3	Pajjotasseva nibbānaṁ,
an7.4:11.4	vimokkho hoti cetaso”ti.
an7.4:11.5	Catutthaṁ.
an7.5:0.1	Aṅguttara Nikāya 7.5
an7.5:0.2	1. Dhanavagga
an7.5:0.3	Saṅkhittadhanasutta
an7.5:1.1	“Sattimāni, bhikkhave, dhanāni.
an7.5:1.2	Katamāni satta?
an7.5:1.3	Saddhādhanaṁ, sīladhanaṁ, hirīdhanaṁ, ottappadhanaṁ, sutadhanaṁ, cāgadhanaṁ, paññādhanaṁ.
an7.5:1.4	Imāni kho, bhikkhave, satta dhanānīti.
an7.5:2.1	Saddhādhanaṁ sīladhanaṁ,
an7.5:2.2	hirī ottappiyaṁ dhanaṁ;
an7.5:2.3	Sutadhanañca cāgo ca,
an7.5:2.4	paññā ve sattamaṁ dhanaṁ.
an7.5:3.1	Yassa ete dhanā atthi,
an7.5:3.2	itthiyā purisassa vā;
an7.5:3.3	Adaliddoti taṁ āhu,
an7.5:3.4	amoghaṁ tassa jīvitaṁ.
an7.5:4.1	Tasmā saddhañca sīlañca,
an7.5:4.2	Pasādaṁ dhammadassanaṁ;
an7.5:4.3	Anuyuñjetha medhāvī,
an7.5:4.4	Saraṁ buddhāna sāsanan”ti.
an7.5:4.5	Pañcamaṁ.
an7.6:0.1	Aṅguttara Nikāya 7.6
an7.6:0.2	1. Dhanavagga
an7.6:0.3	Vitthatadhanasutta
an7.6:1.1	“Sattimāni, bhikkhave, dhanāni.
an7.6:1.2	Katamāni satta?
an7.6:1.3	Saddhādhanaṁ, sīladhanaṁ, hirīdhanaṁ, ottappadhanaṁ, sutadhanaṁ, cāgadhanaṁ, paññādhanaṁ.
an7.6:2.1	Katamañca, bhikkhave, saddhādhanaṁ?
an7.6:2.2	Idha, bhikkhave, ariyasāvako saddho hoti, saddahati tathāgatassa bodhiṁ:
an7.6:2.3	‘itipi so bhagavā arahaṁ sammāsambuddho …pe… buddho bhagavā’ti.
an7.6:2.4	Idaṁ vuccati, bhikkhave, saddhādhanaṁ.
an7.6:3.1	Katamañca, bhikkhave, sīladhanaṁ?
an7.6:3.2	Idha, bhikkhave, ariyasāvako pāṇātipātā paṭivirato hoti …pe… surāmerayamajjapamādaṭṭhānā paṭivirato hoti.
an7.6:3.3	Idaṁ vuccati, bhikkhave, sīladhanaṁ.
an7.6:4.1	Katamañca, bhikkhave, hirīdhanaṁ?
an7.6:4.2	Idha, bhikkhave, ariyasāvako hirīmā hoti, hirīyati kāyaduccaritena vacīduccaritena manoduccaritena, hirīyati pāpakānaṁ akusalānaṁ dhammānaṁ samāpattiyā.
an7.6:4.3	Idaṁ vuccati, bhikkhave, hirīdhanaṁ.
an7.6:5.1	Katamañca, bhikkhave, ottappadhanaṁ?
an7.6:5.2	Idha, bhikkhave, ariyasāvako ottappī hoti, ottappati kāyaduccaritena vacīduccaritena manoduccaritena, ottappati pāpakānaṁ akusalānaṁ dhammānaṁ samāpattiyā.
an7.6:5.3	Idaṁ vuccati, bhikkhave, ottappadhanaṁ.
an7.6:6.1	Katamañca, bhikkhave, sutadhanaṁ?
an7.6:6.2	Idha, bhikkhave, ariyasāvako bahussuto hoti sutadharo sutasannicayo. Ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti. Tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an7.6:6.3	Idaṁ vuccati, bhikkhave, sutadhanaṁ.
an7.6:7.1	Katamañca, bhikkhave, cāgadhanaṁ?
an7.6:7.2	Idha, bhikkhave, ariyasāvako vigatamalamaccherena cetasā agāraṁ ajjhāvasati muttacāgo payatapāṇi vosaggarato yācayogo dānasaṁvibhāgarato.
an7.6:7.3	Idaṁ vuccati, bhikkhave, cāgadhanaṁ.
an7.6:8.1	Katamañca, bhikkhave, paññādhanaṁ?
an7.6:8.2	Idha, bhikkhave, ariyasāvako paññavā hoti …pe… sammā dukkhakkhayagāminiyā.
an7.6:8.3	Idaṁ vuccati, bhikkhave, paññādhanaṁ.
an7.6:9.1	Imāni kho, bhikkhave, sattadhanānīti.
an7.6:10.1	Saddhādhanaṁ sīladhanaṁ,
an7.6:10.2	hirī ottappiyaṁ dhanaṁ;
an7.6:10.3	Sutadhanañca cāgo ca,
an7.6:10.4	paññā ve sattamaṁ dhanaṁ.
an7.6:11.1	Yassa ete dhanā atthi,
an7.6:11.2	itthiyā purisassa vā;
an7.6:11.3	Adaliddoti taṁ āhu,
an7.6:11.4	amoghaṁ tassa jīvitaṁ.
an7.6:12.1	Tasmā saddhañca sīlañca,
an7.6:12.2	pasādaṁ dhammadassanaṁ;
an7.6:12.3	Anuyuñjetha medhāvī,
an7.6:12.4	saraṁ buddhāna sāsanan”ti.
an7.6:12.5	Chaṭṭhaṁ.
an7.7:0.1	Aṅguttara Nikāya 7.7
an7.7:0.2	1. Dhanavagga
an7.7:0.3	Uggasutta
an7.7:1.1	Atha kho uggo rājamahāmatto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho uggo rājamahāmatto bhagavantaṁ etadavoca:
an7.7:2.1	“Acchariyaṁ, bhante, abbhutaṁ, bhante.
an7.7:2.2	Yāva aḍḍho cāyaṁ, bhante, migāro rohaṇeyyo yāva mahaddhano yāva mahābhogo”ti.
an7.7:2.3	“Kīva aḍḍho panugga, migāro rohaṇeyyo, kīva mahaddhano, kīva mahābhogo”ti?
an7.7:2.4	“Sataṁ, bhante, satasahassānaṁ hiraññassa, ko pana vādo rūpiyassā”ti.
an7.7:2.5	“Atthi kho etaṁ, ugga, dhanaṁ netaṁ ‘natthī’ti vadāmīti.
an7.7:2.6	Tañca kho etaṁ, ugga, dhanaṁ sādhāraṇaṁ agginā udakena rājūhi corehi appiyehi dāyādehi.
an7.7:2.7	Satta kho imāni, ugga, dhanāni asādhāraṇāni agginā udakena rājūhi corehi appiyehi dāyādehi.
an7.7:2.8	Katamāni satta?
an7.7:2.9	Saddhādhanaṁ, sīladhanaṁ, hirīdhanaṁ, ottappadhanaṁ, sutadhanaṁ, cāgadhanaṁ, paññādhanaṁ.
an7.7:2.10	Imāni kho, ugga, satta dhanāni asādhāraṇāni agginā udakena rājūhi corehi appiyehi dāyādehīti.
an7.7:3.1	Saddhādhanaṁ sīladhanaṁ,
an7.7:3.2	hirī ottappiyaṁ dhanaṁ;
an7.7:3.3	Sutadhanañca cāgo ca,
an7.7:3.4	paññā ve sattamaṁ dhanaṁ.
an7.7:4.1	Yassa ete dhanā atthi,
an7.7:4.2	itthiyā purisassa vā;
an7.7:4.3	Sa ve mahaddhano loke,
an7.7:4.4	ajeyyo devamānuse.
an7.7:5.1	Tasmā saddhañca sīlañca,
an7.7:5.2	pasādaṁ dhammadassanaṁ;
an7.7:5.3	Anuyuñjetha medhāvī,
an7.7:5.4	saraṁ buddhāna sāsanan”ti.
an7.7:5.5	Sattamaṁ.
an7.8:0.1	Aṅguttara Nikāya 7.8
an7.8:0.2	1. Dhanavagga
an7.8:0.3	Saṁyojanasutta
an7.8:1.1	“Sattimāni, bhikkhave, saṁyojanāni.
an7.8:1.2	Katamāni satta?
an7.8:1.3	Anunayasaṁyojanaṁ, paṭighasaṁyojanaṁ, diṭṭhisaṁyojanaṁ, vicikicchāsaṁyojanaṁ, mānasaṁyojanaṁ, bhavarāgasaṁyojanaṁ, avijjāsaṁyojanaṁ.
an7.8:1.4	Imāni kho, bhikkhave, satta saṁyojanānī”ti.
an7.8:1.5	Aṭṭhamaṁ.
an7.9:0.1	Aṅguttara Nikāya 7.9
an7.9:0.2	1. Dhanavagga
an7.9:0.3	Pahānasutta
an7.9:1.1	“Sattannaṁ, bhikkhave, saṁyojanānaṁ pahānāya samucchedāya brahmacariyaṁ vussati.
an7.9:1.2	Katamesaṁ sattannaṁ?
an7.9:1.3	Anunayasaṁyojanassa pahānāya samucchedāya brahmacariyaṁ vussati, paṭighasaṁyojanassa …pe…
an7.9:1.4	diṭṭhisaṁyojanassa …
an7.9:1.5	vicikicchāsaṁyojanassa …
an7.9:1.6	mānasaṁyojanassa …
an7.9:1.7	bhavarāgasaṁyojanassa …
an7.9:1.8	avijjāsaṁyojanassa pahānāya samucchedāya brahmacariyaṁ vussati.
an7.9:1.9	Imesaṁ kho, bhikkhave, sattannaṁ saṁyojanānaṁ pahānāya samucchedāya brahmacariyaṁ vussati.
an7.9:1.10	Yato ca kho, bhikkhave, bhikkhuno anunayasaṁyojanaṁ pahīnaṁ hoti ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ.
an7.9:1.11	Paṭighasaṁyojanaṁ …pe…
an7.9:1.12	diṭṭhisaṁyojanaṁ …
an7.9:1.13	vicikicchāsaṁyojanaṁ …
an7.9:1.14	mānasaṁyojanaṁ …
an7.9:1.15	bhavarāgasaṁyojanaṁ …
an7.9:1.16	avijjāsaṁyojanaṁ pahīnaṁ hoti ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ.
an7.9:1.17	Ayaṁ vuccati, bhikkhave, bhikkhu acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā”ti.
an7.9:1.18	Navamaṁ.
an7.10:0.1	Aṅguttara Nikāya 7.10
an7.10:0.2	1. Dhanavagga
an7.10:0.3	Macchariyasutta
an7.10:1.1	“Sattimāni, bhikkhave, saṁyojanāni.
an7.10:1.2	Katamāni satta?
an7.10:1.3	Anunayasaṁyojanaṁ, paṭighasaṁyojanaṁ, diṭṭhisaṁyojanaṁ, vicikicchāsaṁyojanaṁ, mānasaṁyojanaṁ, issāsaṁyojanaṁ, macchariyasaṁyojanaṁ.
an7.10:1.4	Imāni kho, bhikkhave, satta saṁyojanānī”ti.
an7.10:1.5	Dasamaṁ.
an7.10:1.6	Dhanavaggo paṭhamo.
an7.10:2.0	Tassuddānaṁ
an7.10:2.1	Dve piyāni balaṁ dhanaṁ,
an7.10:2.2	Saṅkhittañceva vitthataṁ;
an7.10:2.3	Uggaṁ saṁyojanañceva,
an7.10:2.4	Pahānaṁ macchariyena cāti.
an7.11:0.1	Aṅguttara Nikāya 7.11
an7.11:0.2	2. Anusayavagga
an7.11:0.3	Paṭhamaanusayasutta
an7.11:1.1	“Sattime, bhikkhave, anusayā.
an7.11:1.2	Katame satta?
an7.11:1.3	Kāmarāgānusayo, paṭighānusayo, diṭṭhānusayo, vicikicchānusayo, mānānusayo, bhavarāgānusayo, avijjānusayo.
an7.11:1.4	Ime kho, bhikkhave, satta anusayā”ti.
an7.11:1.5	Paṭhamaṁ.
an7.12:0.1	Aṅguttara Nikāya 7.12
an7.12:0.2	2. Anusayavagga
an7.12:0.3	Dutiyaanusayasutta
an7.12:1.1	“Sattannaṁ, bhikkhave, anusayānaṁ pahānāya samucchedāya brahmacariyaṁ vussati.
an7.12:1.2	Katamesaṁ sattannaṁ?
an7.12:1.3	Kāmarāgānusayassa pahānāya samucchedāya brahmacariyaṁ vussati, paṭighānusayassa …pe…
an7.12:1.4	diṭṭhānusayassa …
an7.12:1.5	vicikicchānusayassa …
an7.12:1.6	mānānusayassa …
an7.12:1.7	bhavarāgānusayassa …
an7.12:1.8	avijjānusayassa pahānāya samucchedāya brahmacariyaṁ vussati.
an7.12:1.9	Imesaṁ kho, bhikkhave, sattannaṁ anusayānaṁ pahānāya samucchedāya brahmacariyaṁ vussati.
an7.12:2.1	Yato ca kho, bhikkhave, bhikkhuno kāmarāgānusayo pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.
an7.12:2.2	Paṭighānusayo …pe…
an7.12:2.3	diṭṭhānusayo …
an7.12:2.4	vicikicchānusayo …
an7.12:2.5	mānānusayo …
an7.12:2.6	bhavarāgānusayo …
an7.12:2.7	avijjānusayo pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.
an7.12:2.8	Ayaṁ vuccati, bhikkhave, bhikkhu acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā”ti.
an7.12:2.9	Dutiyaṁ.
an7.13:0.1	Aṅguttara Nikāya 7.13
an7.13:0.2	2. Anusayavagga
an7.13:0.3	Kulasutta
an7.13:1.1	“Sattahi, bhikkhave, aṅgehi samannāgataṁ kulaṁ anupagantvā vā nālaṁ upagantuṁ, upagantvā vā nālaṁ upanisīdituṁ.
an7.13:1.2	Katamehi sattahi?
an7.13:1.3	Na manāpena paccuṭṭhenti, na manāpena abhivādenti, na manāpena āsanaṁ denti, santamassa pariguhanti, bahukampi thokaṁ denti, paṇītampi lūkhaṁ denti, asakkaccaṁ denti no sakkaccaṁ.
an7.13:1.4	Imehi kho, bhikkhave, sattahi aṅgehi samannāgataṁ kulaṁ anupagantvā vā nālaṁ upagantuṁ, upagantvā vā nālaṁ upanisīdituṁ.
an7.13:2.1	Sattahi, bhikkhave, aṅgehi samannāgataṁ kulaṁ anupagantvā vā alaṁ upagantuṁ, upagantvā vā alaṁ upanisīdituṁ.
an7.13:2.2	Katamehi sattahi?
an7.13:2.3	Manāpena paccuṭṭhenti, manāpena abhivādenti, manāpena āsanaṁ denti, santamassa na pariguhanti, bahukampi bahukaṁ denti, paṇītampi paṇītaṁ denti, sakkaccaṁ denti no asakkaccaṁ.
an7.13:2.4	Imehi kho, bhikkhave, sattahi aṅgehi samannāgataṁ kulaṁ anupagantvā vā alaṁ upagantuṁ, upagantvā vā alaṁ upanisīditun”ti.
an7.13:2.5	Tatiyaṁ.
an7.14:0.1	Aṅguttara Nikāya 7.14
an7.14:0.2	2. Anusayavagga
an7.14:0.3	Puggalasutta
an7.14:1.1	“Sattime, bhikkhave, puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassa.
an7.14:1.2	Katame satta?
an7.14:1.3	Ubhatobhāgavimutto, paññāvimutto, kāyasakkhī, diṭṭhippatto, saddhāvimutto, dhammānusārī, saddhānusārī.
an7.14:1.4	Ime kho, bhikkhave, satta puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassā”ti.
an7.14:1.5	Catutthaṁ.
an7.15:0.1	Aṅguttara Nikāya 7.15
an7.15:0.2	2. Anusayavagga
an7.15:0.3	Udakūpamāsutta
an7.15:1.1	“Sattime, bhikkhave, udakūpamā puggalā santo saṁvijjamānā lokasmiṁ.
an7.15:1.2	Katame satta?
an7.15:1.3	Idha, bhikkhave, ekacco puggalo sakiṁ nimuggo nimuggova hoti;
an7.15:1.4	idha pana, bhikkhave, ekacco puggalo ummujjitvā nimujjati;
an7.15:1.5	idha pana, bhikkhave, ekacco puggalo ummujjitvā ṭhito hoti;
an7.15:1.6	idha pana, bhikkhave, ekacco puggalo ummujjitvā vipassati viloketi;
an7.15:1.7	idha pana, bhikkhave, ekacco puggalo ummujjitvā patarati;
an7.15:1.8	idha pana, bhikkhave, ekacco puggalo ummujjitvā patigādhappatto hoti;
an7.15:1.9	idha pana, bhikkhave, ekacco puggalo ummujjitvā tiṇṇo hoti pāraṅgato thale tiṭṭhati brāhmaṇo.
an7.15:2.1	Kathañca, bhikkhave, puggalo sakiṁ nimuggo nimuggova hoti?
an7.15:2.2	Idha, bhikkhave, ekacco puggalo samannāgato hoti ekantakāḷakehi akusalehi dhammehi.
an7.15:2.3	Evaṁ kho, bhikkhave, puggalo sakiṁ nimuggo nimuggova hoti.
an7.15:3.1	Kathañca, bhikkhave, puggalo ummujjitvā nimujjati?
an7.15:3.2	Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe…
an7.15:3.3	sādhu ottappaṁ …
an7.15:3.4	sādhu vīriyaṁ …
an7.15:3.5	sādhu paññā kusalesu dhammesūti.
an7.15:3.6	Tassa sā saddhā neva tiṭṭhati no vaḍḍhati hāyatiyeva, tassa sā hirī …pe…
an7.15:3.7	tassa taṁ ottappaṁ …
an7.15:3.8	tassa taṁ vīriyaṁ …
an7.15:3.9	tassa sā paññā neva tiṭṭhati no vaḍḍhati hāyatiyeva.
an7.15:3.10	Evaṁ kho, bhikkhave, puggalo ummujjitvā nimujjati.
an7.15:4.1	Kathañca, bhikkhave, puggalo ummujjitvā ṭhito hoti?
an7.15:4.2	Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe…
an7.15:4.3	sādhu ottappaṁ …
an7.15:4.4	sādhu vīriyaṁ …
an7.15:4.5	sādhu paññā kusalesu dhammesūti.
an7.15:4.6	Tassa sā saddhā neva hāyati no vaḍḍhati ṭhitā hoti.
an7.15:4.7	Tassa sā hirī …pe…
an7.15:4.8	tassa taṁ ottappaṁ …
an7.15:4.9	tassa taṁ vīriyaṁ …
an7.15:4.10	tassa sā paññā neva hāyati no vaḍḍhati ṭhitā hoti.
an7.15:4.11	Evaṁ kho, bhikkhave, puggalo ummujjitvā ṭhito hoti.
an7.15:5.1	Kathañca, bhikkhave, puggalo ummujjitvā vipassati viloketi?
an7.15:5.2	Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe…
an7.15:5.3	sādhu ottappaṁ …
an7.15:5.4	sādhu vīriyaṁ …
an7.15:5.5	sādhu paññā kusalesu dhammesūti.
an7.15:5.6	So tiṇṇaṁ saṁyojanānaṁ parikkhayā sotāpanno hoti avinipātadhammo niyato sambodhiparāyaṇo.
an7.15:5.7	Evaṁ kho, bhikkhave, puggalo ummujjitvā vipassati viloketi.
an7.15:6.1	Kathañca, bhikkhave, puggalo ummujjitvā patarati?
an7.15:6.2	Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe…
an7.15:6.3	sādhu ottappaṁ …
an7.15:6.4	sādhu vīriyaṁ …
an7.15:6.5	sādhu paññā kusalesu dhammesūti.
an7.15:6.6	So tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti.
an7.15:6.7	Evaṁ kho, bhikkhave, puggalo ummujjitvā patarati.
an7.15:7.1	Kathañca, bhikkhave, puggalo ummujjitvā patigādhappatto hoti?
an7.15:7.2	Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe…
an7.15:7.3	sādhu ottappaṁ …
an7.15:7.4	sādhu vīriyaṁ …
an7.15:7.5	sādhu paññā kusalesu dhammesūti.
an7.15:7.6	So pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an7.15:7.7	Evaṁ kho, bhikkhave, puggalo ummujjitvā patigādhappatto hoti.
an7.15:8.1	Kathañca, bhikkhave, puggalo ummujjitvā tiṇṇo hoti pāraṅgato thale tiṭṭhati brāhmaṇo.
an7.15:8.2	Idha, bhikkhave, ekacco puggalo ummujjati sādhu saddhā kusalesu dhammesu, sādhu hirī …pe…
an7.15:8.3	sādhu ottappaṁ …
an7.15:8.4	sādhu vīriyaṁ …
an7.15:8.5	sādhu paññā kusalesu dhammesūti.
an7.15:8.6	So āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an7.15:8.7	Evaṁ kho, bhikkhave, puggalo ummujjitvā tiṇṇo hoti pāraṅgato thale tiṭṭhati brāhmaṇo.
an7.15:9.1	Ime kho, bhikkhave, satta udakūpamā puggalā santo saṁvijjamānā lokasmin”ti.
an7.15:9.2	Pañcamaṁ.
an7.16:0.1	Aṅguttara Nikāya 7.16
an7.16:0.2	2. Anusayavagga
an7.16:0.3	Aniccānupassīsutta
an7.16:1.1	“Sattime, bhikkhave, puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassa.
an7.16:1.2	Katame satta?
an7.16:1.3	Idha, bhikkhave, ekacco puggalo sabbasaṅkhāresu aniccānupassī viharati, aniccasaññī, aniccapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno.
an7.16:1.4	So āsavānaṁ khayā …pe… sacchikatvā upasampajja viharati.
an7.16:1.5	Ayaṁ, bhikkhave, paṭhamo puggalo āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an7.16:2.1	Puna caparaṁ, bhikkhave, idhekacco puggalo sabbasaṅkhāresu aniccānupassī viharati, aniccasaññī, aniccapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno.
an7.16:2.2	Tassa apubbaṁ acarimaṁ āsavapariyādānañca hoti jīvitapariyādānañca.
an7.16:2.3	Ayaṁ, bhikkhave, dutiyo puggalo āhuneyyo …pe… anuttaraṁ puññakkhettaṁ lokassa.
an7.16:3.1	Puna caparaṁ, bhikkhave, idhekacco puggalo sabbasaṅkhāresu aniccānupassī viharati, aniccasaññī, aniccapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno.
an7.16:3.2	So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti …pe…
an7.16:3.3	upahaccaparinibbāyī hoti …pe…
an7.16:3.4	asaṅkhāraparinibbāyī hoti …pe…
an7.16:3.5	sasaṅkhāraparinibbāyī hoti …pe…
an7.16:3.6	uddhaṁsoto hoti akaniṭṭhagāmī.
an7.16:3.7	Ayaṁ, bhikkhave, sattamo puggalo āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an7.16:3.8	Ime kho, bhikkhave, satta puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassā”ti.
an7.16:3.9	Chaṭṭhaṁ.
an7.17:0.1	Aṅguttara Nikāya 7.17
an7.17:0.2	2. Anusayavagga
an7.17:0.3	Dukkhānupassīsutta
an7.17:1.1	Sattime, bhikkhave, puggalā āhuneyyā …pe… anuttaraṁ puññakkhettaṁ lokassa.
an7.17:1.2	Katame satta?
an7.17:1.3	Idha, bhikkhave, ekacco puggalo sabbasaṅkhāresu dukkhānupassī viharati …pe….
an7.17:1.4	Sattamaṁ.
an7.18:0.1	Aṅguttara Nikāya 7.18
an7.18:0.2	2. Anusayavagga
an7.18:0.3	Anattānupassīsutta
an7.18:1.1	Sabbesu dhammesu anattānupassī viharati …pe….
an7.18:1.2	Aṭṭhamaṁ.
an7.19:0.1	Aṅguttara Nikāya 7.19
an7.19:0.2	2. Anusayavagga
an7.19:0.3	Nibbānasutta
an7.19:1.1	“Nibbāne sukhānupassī viharati sukhasaññī sukhapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno.
an7.19:1.2	So āsavānaṁ khayā …pe… sacchikatvā upasampajja viharati.
an7.19:1.3	Ayaṁ bhikkhave, paṭhamo puggalo āhuneyyo …pe… puññakkhettaṁ lokassa.
an7.19:2.1	Puna caparaṁ, bhikkhave, idhekacco puggalo nibbāne sukhānupassī viharati sukhasaññī sukhapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno.
an7.19:2.2	Tassa apubbaṁ acarimaṁ āsavapariyādānañca hoti jīvitapariyādānañca.
an7.19:2.3	Ayaṁ, bhikkhave, dutiyo puggalo āhuneyyo …pe… anuttaraṁ puññakkhettaṁ lokassa.
an7.19:3.1	Puna caparaṁ, bhikkhave, idhekacco puggalo nibbāne sukhānupassī viharati sukhasaññī sukhapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno.
an7.19:3.2	So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti …pe…
an7.19:3.3	upahaccaparinibbāyī hoti …pe…
an7.19:3.4	asaṅkhāraparinibbāyī hoti …pe…
an7.19:3.5	sasaṅkhāraparinibbāyī hoti …pe…
an7.19:3.6	uddhaṁsoto hoti akaniṭṭhagāmī.
an7.19:3.7	Ayaṁ, bhikkhave, sattamo puggalo āhuneyyo …pe… anuttaraṁ puññakkhettaṁ lokassa.
an7.19:3.8	Ime kho, bhikkhave, satta puggalā āhuneyyā …pe… anuttaraṁ puññakkhettaṁ lokassā”ti.
an7.19:3.9	Navamaṁ.
an7.20:0.1	Aṅguttara Nikāya 7.20
an7.20:0.2	2. Anusayavagga
an7.20:0.3	Niddasavatthusutta
an7.20:1.1	“Sattimāni, bhikkhave, niddasavatthūni.
an7.20:1.2	Katamāni satta?
an7.20:1.3	Idha, bhikkhave, bhikkhu sikkhāsamādāne tibbacchando hoti āyatiñca sikkhāsamādāne avigatapemo,
an7.20:1.4	dhammanisantiyā tibbacchando hoti āyatiñca dhammanisantiyā avigatapemo,
an7.20:1.5	icchāvinaye tibbacchando hoti āyatiñca icchāvinaye avigatapemo,
an7.20:1.6	paṭisallāne tibbacchando hoti āyatiñca paṭisallāne avigatapemo,
an7.20:1.7	vīriyārambhe tibbacchando hoti āyatiñca vīriyārambhe avigatapemo,
an7.20:1.8	satinepakke tibbacchando hoti āyatiñca satinepakke avigatapemo,
an7.20:1.9	diṭṭhipaṭivedhe tibbacchando hoti āyatiñca diṭṭhipaṭivedhe avigatapemo.
an7.20:1.10	Imāni kho, bhikkhave, satta niddasavatthūnī”ti.
an7.20:1.11	Dasamaṁ.
an7.20:1.12	Anusayavaggo dutiyo.
an7.20:2.0	Tassuddānaṁ
an7.20:2.1	Duve anusayā kulaṁ,
an7.20:2.2	Puggalaṁ udakūpamaṁ;
an7.20:2.3	Aniccaṁ dukkhaṁ anattā ca,
an7.20:2.4	Nibbānaṁ niddasavatthu cāti.
an7.21:0.1	Aṅguttara Nikāya 7.21
an7.21:0.2	3. Vajjisattakavagga
an7.21:0.3	Sārandadasutta
an7.21:1.1	Evaṁ me sutaṁ—
an7.21:1.2	ekaṁ samayaṁ bhagavā vesāliyaṁ viharati sārandade cetiye.
an7.21:1.3	Atha kho sambahulā licchavī yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinne kho te licchavī bhagavā etadavoca:
an7.21:1.4	“satta vo, licchavī, aparihāniye dhamme desessāmi.
an7.21:1.5	Taṁ suṇātha, sādhukaṁ manasi karotha, bhāsissāmī”ti.
an7.21:1.6	“Evaṁ, bhante”ti kho te licchavī bhagavato paccassosuṁ.
an7.21:1.7	Bhagavā etadavoca:
an7.21:2.1	“Katame ca, licchavī, satta aparihāniyā dhammā?
an7.21:2.2	Yāvakīvañca, licchavī, vajjī abhiṇhaṁ sannipātā bhavissanti sannipātabahulā;
an7.21:2.3	vuddhiyeva, licchavī, vajjīnaṁ pāṭikaṅkhā, no parihāni.
an7.21:3.1	Yāvakīvañca, licchavī, vajjī samaggā sannipatissanti, samaggā vuṭṭhahissanti, samaggā vajjikaraṇīyāni karissanti;
an7.21:3.2	vuddhiyeva, licchavī, vajjīnaṁ pāṭikaṅkhā, no parihāni.
an7.21:4.1	Yāvakīvañca, licchavī, vajjī apaññattaṁ na paññāpessanti, paññattaṁ na samucchindissanti, yathāpaññatte porāṇe vajjidhamme samādāya vattissanti;
an7.21:4.2	vuddhiyeva, licchavī, vajjīnaṁ pāṭikaṅkhā, no parihāni.
an7.21:5.1	Yāvakīvañca, licchavī, vajjī ye te vajjīnaṁ vajjimahallakā te sakkarissanti garuṁ karissanti mānessanti pūjessanti, tesañca sotabbaṁ maññissanti;
an7.21:5.2	vuddhiyeva, licchavī, vajjīnaṁ pāṭikaṅkhā, no parihāni.
an7.21:6.1	Yāvakīvañca, licchavī, vajjī yā tā kulitthiyo kulakumāriyo tā na okassa pasayha vāsessanti;
an7.21:6.2	vuddhiyeva, licchavī, vajjīnaṁ pāṭikaṅkhā, no parihāni.
an7.21:7.1	Yāvakīvañca, licchavī, vajjī yāni tāni vajjīnaṁ vajjicetiyāni abbhantarāni ceva bāhirāni ca tāni sakkarissanti garuṁ karissanti mānessanti pūjessanti, tesañca dinnapubbaṁ katapubbaṁ dhammikaṁ baliṁ no parihāpessanti;
an7.21:7.2	vuddhiyeva, licchavī, vajjīnaṁ pāṭikaṅkhā, no parihāni.
an7.21:8.1	Yāvakīvañca, licchavī, vajjīnaṁ arahantesu dhammikā rakkhāvaraṇagutti susaṁvihitā bhavissati:
an7.21:8.2	‘kinti anāgatā ca arahanto vijitaṁ āgaccheyyuṁ, āgatā ca arahanto vijite phāsuṁ vihareyyun’ti;
an7.21:8.3	vuddhiyeva, licchavī, vajjīnaṁ pāṭikaṅkhā, no parihāni.
an7.21:9.1	Yāvakīvañca, licchavī, ime satta aparihāniyā dhammā vajjīsu ṭhassanti, imesu ca sattasu aparihāniyesu dhammesu vajjī sandississanti;
an7.21:9.2	vuddhiyeva, licchavī, vajjīnaṁ pāṭikaṅkhā, no parihānī”ti.
an7.21:9.3	Paṭhamaṁ.
an7.22:0.1	Aṅguttara Nikāya 7.22
an7.22:0.2	3. Vajjisattakavagga
an7.22:0.3	Vassakārasutta
an7.22:1.1	Evaṁ me sutaṁ—
an7.22:1.2	ekaṁ samayaṁ bhagavā rājagahe viharati gijjhakūṭe pabbate.
an7.22:1.3	Tena kho pana samayena rājā māgadho ajātasattu vedehiputto vajjī abhiyātukāmo hoti.
an7.22:1.4	So evamāha:
an7.22:1.5	“ahaṁ hime vajjī evaṁmahiddhike evaṁmahānubhāve ucchecchāmi, vajjī vināsessāmi, vajjī anayabyasanaṁ āpādessāmī”ti.
an7.22:2.1	Atha kho rājā māgadho ajātasattu vedehiputto vassakāraṁ brāhmaṇaṁ māgadhamahāmattaṁ āmantesi:
an7.22:2.2	“ehi tvaṁ, brāhmaṇa, yena bhagavā tenupasaṅkama; upasaṅkamitvā mama vacanena bhagavato pāde sirasā vandāhi, appābādhaṁ appātaṅkaṁ lahuṭṭhānaṁ balaṁ phāsuvihāraṁ puccha:
an7.22:2.3	‘rājā, bhante, māgadho ajātasattu vedehiputto bhagavato pāde sirasā vandati, appābādhaṁ appātaṅkaṁ lahuṭṭhānaṁ balaṁ phāsuvihāraṁ pucchatī’ti.
an7.22:2.4	Evañca vadehi:
an7.22:2.5	‘rājā, bhante, māgadho ajātasattu vedehiputto vajjī abhiyātukāmo.
an7.22:2.6	So evamāha—
an7.22:2.7	ahaṁ hime vajjī evaṁmahiddhike evaṁmahānubhāve ucchecchāmi, vajjī vināsessāmi, vajjī anayabyasanaṁ āpādessāmī’ti.
an7.22:2.8	Yathā te bhagavā byākaroti, taṁ sādhukaṁ uggahetvā mama āroceyyāsi.
an7.22:2.9	Na hi tathāgatā vitathaṁ bhaṇantī”ti.
an7.22:3.1	“Evaṁ, bho”ti kho vassakāro brāhmaṇo māgadhamahāmatto rañño māgadhassa ajātasattussa vedehiputtassa paṭissutvā yena bhagavā tenupasaṅkami; upasaṅkamitvā bhagavatā saddhiṁ sammodi.
an7.22:3.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vassakāro brāhmaṇo māgadhamahāmatto bhagavantaṁ etadavoca:
an7.22:3.3	“rājā, bho gotama, māgadho ajātasattu vedehiputto bhoto gotamassa pāde sirasā vandati, appābādhaṁ appātaṅkaṁ lahuṭṭhānaṁ balaṁ phāsuvihāraṁ pucchati.
an7.22:3.4	Rājā, bho gotama, māgadho ajātasattu vedehiputto vajjī abhiyātukāmo.
an7.22:3.5	So evamāha:
an7.22:3.6	‘ahaṁ hime vajjī evaṁmahiddhike evaṁmahānubhāve ucchecchāmi, vajjī vināsessāmi, vajjī anayabyasanaṁ āpādessāmī’”ti.
an7.22:4.1	Tena kho pana samayena āyasmā ānando bhagavato piṭṭhito ṭhito hoti bhagavantaṁ bījayamāno.
an7.22:4.2	Atha kho bhagavā āyasmantaṁ ānandaṁ āmantesi:
an7.22:4.3	“kinti te, ānanda, sutaṁ: ‘vajjī abhiṇhaṁ sannipātā sannipātabahulā’”ti?
an7.22:4.4	“Sutaṁ metaṁ, bhante: ‘vajjī abhiṇhaṁ sannipātā sannipātabahulā’”ti.
an7.22:4.5	“Yāvakīvañca, ānanda, vajjī abhiṇhaṁ sannipātā bhavissanti sannipātabahulā; vuddhiyeva, ānanda, vajjīnaṁ pāṭikaṅkhā, no parihāni.
an7.22:5.1	Kinti te, ānanda, sutaṁ: ‘vajjī samaggā sannipatanti, samaggā vuṭṭhahanti, samaggā vajjikaraṇīyāni karontī’”ti?
an7.22:5.2	“Sutaṁ metaṁ, bhante: ‘vajjī samaggā sannipatanti, samaggā vuṭṭhahanti, samaggā vajjikaraṇīyāni karontī’”ti.
an7.22:5.3	“Yāvakīvañca, ānanda, vajjī samaggā sannipatissanti, samaggā vuṭṭhahissanti, samaggā vajjikaraṇīyāni karissanti; vuddhiyeva, ānanda, vajjīnaṁ pāṭikaṅkhā, no parihāni.
an7.22:6.1	Kinti te, ānanda, sutaṁ: ‘vajjī apaññattaṁ na paññāpenti, paññattaṁ na samucchindanti, yathāpaññatte porāṇe vajjidhamme samādāya vattantī’”ti?
an7.22:6.2	“Sutaṁ metaṁ, bhante: ‘vajjī apaññattaṁ na paññāpenti, paññattaṁ na samucchindanti, yathāpaññatte porāṇe vajjidhamme samādāya vattantī’”ti.
an7.22:6.3	“Yāvakīvañca, ānanda, vajjī apaññattaṁ na paññāpessanti, paññattaṁ na samucchindissanti, yathāpaññatte porāṇe vajjidhamme samādāya vattissanti; vuddhiyeva, ānanda, vajjīnaṁ pāṭikaṅkhā, no parihāni.
an7.22:7.1	Kinti te, ānanda, sutaṁ: ‘vajjī ye te vajjīnaṁ vajjimahallakā te sakkaronti garuṁ karonti mānenti pūjenti, tesañca sotabbaṁ maññantī’”ti?
an7.22:7.2	“Sutaṁ metaṁ, bhante: ‘vajjī ye te vajjīnaṁ vajjimahallakā te sakkaronti garuṁ karonti mānenti pūjenti, tesañca sotabbaṁ maññantī’”ti.
an7.22:7.3	“Yāvakīvañca, ānanda, vajjī ye te vajjīnaṁ vajjimahallakā te sakkarissanti garuṁ karissanti mānessanti pūjessanti, tesañca sotabbaṁ maññissanti; vuddhiyeva, ānanda, vajjīnaṁ pāṭikaṅkhā, no parihāni.
an7.22:8.1	Kinti te, ānanda, sutaṁ: ‘vajjī yā tā kulitthiyo kulakumāriyo tā na okassa pasayha vāsentī’”ti?
an7.22:8.2	“Sutaṁ metaṁ, bhante: ‘vajjī yā tā kulitthiyo kulakumāriyo tā na okassa pasayha vāsentī’”ti.
an7.22:8.3	“Yāvakīvañca, ānanda, vajjī yā tā kulitthiyo kulakumāriyo tā na okassa pasayha vāsessanti; vuddhiyeva, ānanda, vajjīnaṁ pāṭikaṅkhā, no parihāni.
an7.22:9.1	Kinti te, ānanda, sutaṁ: ‘vajjī yāni tāni vajjīnaṁ vajjicetiyāni abbhantarāni ceva bāhirāni ca tāni sakkaronti garuṁ karonti mānenti pūjenti, tesañca dinnapubbaṁ katapubbaṁ dhammikaṁ baliṁ no parihāpentī’”ti?
an7.22:9.2	“Sutaṁ metaṁ, bhante: ‘vajjī yāni tāni vajjīnaṁ vajjicetiyāni abbhantarāni ceva bāhirāni ca tāni sakkaronti garuṁ karonti mānenti pūjenti, tesañca dinnapubbaṁ katapubbaṁ dhammikaṁ baliṁ no parihāpentī’”ti.
an7.22:9.3	“Yāvakīvañca, ānanda, vajjī yāni tāni vajjīnaṁ vajjicetiyāni abbhantarāni ceva bāhirāni ca tāni sakkarissanti garuṁ karissanti mānessanti pūjessanti, tesañca dinnapubbaṁ katapubbaṁ dhammikaṁ baliṁ no parihāpessanti; vuddhiyeva, ānanda, vajjīnaṁ pāṭikaṅkhā, no parihāni.
an7.22:10.1	Kinti te, ānanda, sutaṁ: ‘vajjīnaṁ arahantesu dhammikā rakkhāvaraṇagutti susaṁvihitā—kinti anāgatā ca arahanto vijitaṁ āgaccheyyuṁ, āgatā ca arahanto vijite phāsuṁ vihareyyun’”ti?
an7.22:10.2	“Sutaṁ metaṁ, bhante: ‘vajjīnaṁ arahantesu dhammikā rakkhāvaraṇagutti susaṁvihitā bhavissati—kinti anāgatā ca arahanto vijitaṁ āgaccheyyuṁ, āgatā ca arahanto vijite phāsuṁ vihareyyun’”ti.
an7.22:10.3	“Yāvakīvañca, ānanda, vajjīnaṁ arahantesu dhammikā rakkhāvaraṇagutti susaṁvihitā bhavissati: ‘kinti anāgatā ca arahanto vijitaṁ āgaccheyyuṁ, āgatā ca arahanto vijite phāsuṁ vihareyyun’ti; vuddhiyeva, ānanda, vajjīnaṁ pāṭikaṅkhā, no parihānī”ti.
an7.22:11.1	Atha kho bhagavā vassakāraṁ brāhmaṇaṁ māgadhamahāmattaṁ āmantesi:
an7.22:11.2	“ekamidāhaṁ, brāhmaṇa, samayaṁ vesāliyaṁ viharāmi sārandade cetiye.
an7.22:11.3	Tatrāhaṁ, brāhmaṇa, vajjīnaṁ ime satta aparihāniye dhamme desesiṁ.
an7.22:11.4	Yāvakīvañca, brāhmaṇa, ime satta aparihāniyā dhammā vajjīsu ṭhassanti, imesu ca sattasu aparihāniyesu dhammesu vajjī sandississanti; vuddhiyeva, brāhmaṇa, vajjīnaṁ pāṭikaṅkhā, no parihānī”ti.
an7.22:12.1	“Ekamekenapi, bho gotama, aparihāniyena dhammena samannāgatānaṁ vajjīnaṁ vuddhiyeva pāṭikaṅkhā, no parihāni;
an7.22:12.2	ko pana vādo sattahi aparihāniyehi dhammehi.
an7.22:12.3	Akaraṇīyā ca, bho gotama, vajjī raññā māgadhena ajātasattunā vedehiputtena yadidaṁ yuddhassa, aññatra upalāpanāya, aññatra mithubhedā.
an7.22:12.4	Handa ca dāni mayaṁ, bho gotama, gacchāma, bahukiccā mayaṁ bahukaraṇīyā”ti.
an7.22:12.5	“Yassadāni tvaṁ, brāhmaṇa, kālaṁ maññasī”ti.
an7.22:12.6	Atha kho vassakāro brāhmaṇo māgadhamahāmatto bhagavato bhāsitaṁ abhinanditvā anumoditvā uṭṭhāyāsanā pakkāmīti.
an7.22:12.7	Dutiyaṁ.
an7.23:0.1	Aṅguttara Nikāya 7.23
an7.23:0.2	3. Vajjisattakavagga
an7.23:0.3	Paṭhamasattakasutta
an7.23:1.1	Evaṁ me sutaṁ—
an7.23:1.2	ekaṁ samayaṁ bhagavā rājagahe viharati gijjhakūṭe pabbate.
an7.23:1.3	Tatra kho bhagavā bhikkhū āmantesi:
an7.23:1.4	“satta vo, bhikkhave, aparihāniye dhamme desessāmi.
an7.23:1.5	Taṁ suṇātha, sādhukaṁ manasi karotha, bhāsissāmī”ti.
an7.23:1.6	“Evaṁ, bhante”ti kho te bhikkhū bhagavato paccassosuṁ.
an7.23:1.7	Bhagavā etadavoca:
an7.23:2.1	“Katame ca, bhikkhave, satta aparihāniyā dhammā?
an7.23:2.2	Yāvakīvañca, bhikkhave, bhikkhū abhiṇhaṁ sannipātā bhavissanti sannipātabahulā; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.23:3.1	Yāvakīvañca, bhikkhave, bhikkhū samaggā sannipatissanti, samaggā vuṭṭhahissanti, samaggā saṅghakaraṇīyāni karissanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.23:4.1	Yāvakīvañca, bhikkhave, bhikkhū apaññattaṁ na paññāpessanti, paññattaṁ na samucchindissanti, yathāpaññattesu sikkhāpadesu samādāya vattissanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.23:5.1	Yāvakīvañca, bhikkhave, bhikkhū ye te bhikkhū therā rattaññū cirapabbajitā saṅghapitaro saṅghapariṇāyakā te sakkarissanti garuṁ karissanti mānessanti pūjessanti, tesañca sotabbaṁ maññissanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.23:6.1	Yāvakīvañca, bhikkhave, bhikkhū uppannāya taṇhāya ponobhavikāya na vasaṁ gacchissanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.23:7.1	Yāvakīvañca, bhikkhave, bhikkhū āraññakesu senāsanesu sāpekkhā bhavissanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.23:8.1	Yāvakīvañca, bhikkhave, bhikkhū paccattaññeva satiṁ upaṭṭhāpessanti: ‘kinti anāgatā ca pesalā sabrahmacārī āgaccheyyuṁ, āgatā ca pesalā sabrahmacārī phāsuṁ vihareyyun’ti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.23:9.1	Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti.
an7.23:9.2	Tatiyaṁ.
an7.24:0.1	Aṅguttara Nikāya 7.24
an7.24:0.2	3. Vajjisattakavagga
an7.24:0.3	Dutiyasattakasutta
an7.24:1.1	“Satta vo, bhikkhave, aparihāniye dhamme desessāmi.
an7.24:1.2	Taṁ suṇātha, sādhukaṁ manasi karotha …pe…
an7.24:1.3	katame ca, bhikkhave, satta aparihāniyā dhammā?
an7.24:2.1	Yāvakīvañca, bhikkhave, bhikkhū na kammārāmā bhavissanti, na kammaratā, na kammārāmataṁ anuyuttā; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.24:3.1	Yāvakīvañca, bhikkhave, bhikkhū na bhassārāmā bhavissanti …pe…
an7.24:3.2	na niddārāmā bhavissanti …
an7.24:3.3	na saṅgaṇikārāmā bhavissanti …
an7.24:3.4	na pāpicchā bhavissanti na pāpikānaṁ icchānaṁ vasaṁ gatā …
an7.24:3.5	na pāpamittā bhavissanti na pāpasahāyā na pāpasampavaṅkā …
an7.24:3.6	na oramattakena visesādhigamena antarāvosānaṁ āpajjissanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.24:4.1	Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti.
an7.24:4.2	Catutthaṁ.
an7.25:0.1	Aṅguttara Nikāya 7.25
an7.25:0.2	3. Vajjisattakavagga
an7.25:0.3	Tatiyasattakasutta
an7.25:1.1	“Satta vo, bhikkhave, aparihāniye dhamme desessāmi.
an7.25:1.2	Taṁ suṇātha, sādhukaṁ manasi karotha …pe…
an7.25:1.3	katame ca, bhikkhave, satta aparihāniyā dhammā?
an7.25:1.4	Yāvakīvañca, bhikkhave, bhikkhū saddhā bhavissanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.25:2.1	Yāvakīvañca, bhikkhave, bhikkhū hirimanto bhavissanti …pe…
an7.25:2.2	ottappino bhavissanti …
an7.25:2.3	bahussutā bhavissanti …
an7.25:2.4	āraddhavīriyā bhavissanti …
an7.25:2.5	satimanto bhavissanti …
an7.25:2.6	paññavanto bhavissanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.25:3.1	Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti.
an7.25:3.2	Pañcamaṁ.
an7.26:0.1	Aṅguttara Nikāya 7.26
an7.26:0.2	3. Vajjisattakavagga
an7.26:0.3	Bojjhaṅgasutta
an7.26:1.1	“Satta vo, bhikkhave, aparihāniye dhamme desessāmi.
an7.26:1.2	Taṁ suṇātha, sādhukaṁ manasi karotha …pe…
an7.26:1.3	katame ca, bhikkhave, satta aparihāniyā dhammā?
an7.26:1.4	Yāvakīvañca, bhikkhave, bhikkhū satisambojjhaṅgaṁ bhāvessanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.26:2.1	Yāvakīvañca, bhikkhave, bhikkhū dhammavicayasambojjhaṅgaṁ bhāvessanti …pe…
an7.26:2.2	vīriyasambojjhaṅgaṁ bhāvessanti …
an7.26:2.3	pītisambojjhaṅgaṁ bhāvessanti …
an7.26:2.4	passaddhisambojjhaṅgaṁ bhāvessanti …
an7.26:2.5	samādhisambojjhaṅgaṁ bhāvessanti …
an7.26:2.6	upekkhāsambojjhaṅgaṁ bhāvessanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.26:3.1	Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti.
an7.26:3.2	Chaṭṭhaṁ.
an7.27:0.1	Aṅguttara Nikāya 7.27
an7.27:0.2	3. Vajjisattakavagga
an7.27:0.3	Saññāsutta
an7.27:1.1	“Satta vo, bhikkhave, aparihāniye dhamme desessāmi.
an7.27:1.2	Taṁ suṇātha, sādhukaṁ manasi karotha …pe….
an7.27:1.3	Katame ca, bhikkhave, satta aparihāniyā dhammā?
an7.27:1.4	Yāvakīvañca, bhikkhave, bhikkhū aniccasaññaṁ bhāvessanti; vuddhiyeva, bhikkhave, bhikkhūnaṁ pāṭikaṅkhā, no parihāni.
an7.27:2.1	Yāvakīvañca, bhikkhave, bhikkhū anattasaññaṁ bhāvessanti …pe…
an7.27:2.2	asubhasaññaṁ bhāvessanti …
an7.27:2.3	ādīnavasaññaṁ bhāvessanti …
an7.27:2.4	pahānasaññaṁ bhāvessanti …
an7.27:2.5	virāgasaññaṁ bhāvessanti …
an7.27:2.6	nirodhasaññaṁ bhāvessanti;
an7.27:3.1	vuddhiyeva, bhikkhave, bhikkhūnaṁ pāṭikaṅkhā, no parihāni. Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu, bhikkhū sandississanti; vuddhiyeva, bhikkhave, bhikkhūnaṁ pāṭikaṅkhā, no parihānī”ti.
an7.27:3.2	Sattamaṁ.
an7.28:0.1	Aṅguttara Nikāya 7.28
an7.28:0.2	3. Vajjisattakavagga
an7.28:0.3	Paṭhamaparihānisutta
an7.28:1.1	Evaṁ me sutaṁ—
an7.28:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an7.28:1.3	Tatra kho bhagavā bhikkhū āmantesi:
an7.28:1.4	“sattime, bhikkhave, dhammā sekhassa bhikkhuno parihānāya saṁvattanti.
an7.28:1.5	Katame satta?
an7.28:1.6	Kammārāmatā, bhassārāmatā, niddārāmatā, saṅgaṇikārāmatā, indriyesu aguttadvāratā, bhojane amattaññutā, santi kho pana saṅghe saṅghakaraṇīyāni; tatra sekho bhikkhu iti paṭisañcikkhati:
an7.28:1.7	‘santi kho pana saṅghe therā rattaññū cirapabbajitā bhāravāhino, te tena paññāyissantī’ti attanā tesu yogaṁ āpajjati.
an7.28:1.8	Ime kho, bhikkhave, satta dhammā sekhassa bhikkhuno parihānāya saṁvattanti.
an7.28:2.1	Sattime, bhikkhave, dhammā sekhassa bhikkhuno aparihānāya saṁvattanti.
an7.28:2.2	Katame satta?
an7.28:2.3	Na kammārāmatā, na bhassārāmatā, na niddārāmatā, na saṅgaṇikārāmatā, indriyesu guttadvāratā, bhojane mattaññutā, santi kho pana saṅghe saṅghakaraṇīyāni; tatra sekho bhikkhu iti paṭisañcikkhati:
an7.28:2.4	‘santi kho pana saṅghe therā rattaññū cirapabbajitā bhāravāhino, te tena paññāyissantī’ti attanā na tesu yogaṁ āpajjati.
an7.28:2.5	Ime kho, bhikkhave, satta dhammā sekhassa bhikkhuno aparihānāya saṁvattantī”ti.
an7.28:2.6	Aṭṭhamaṁ.
an7.29:0.1	Aṅguttara Nikāya 7.29
an7.29:0.2	3. Vajjisattakavagga
an7.29:0.3	Dutiyaparihānisutta
an7.29:1.1	“Sattime, bhikkhave, dhammā upāsakassa parihānāya saṁvattanti.
an7.29:1.2	Katame satta?
an7.29:1.3	Bhikkhudassanaṁ hāpeti,
an7.29:1.4	saddhammassavanaṁ pamajjati,
an7.29:1.5	adhisīle na sikkhati,
an7.29:1.6	appasādabahulo hoti,
an7.29:1.7	bhikkhūsu theresu ceva navesu ca majjhimesu ca upārambhacitto dhammaṁ suṇāti randhagavesī,
an7.29:1.8	ito bahiddhā dakkhiṇeyyaṁ gavesati,
an7.29:1.9	tattha ca pubbakāraṁ karoti.
an7.29:1.10	Ime kho, bhikkhave, satta dhammā upāsakassa parihānāya saṁvattanti.
an7.29:2.1	Sattime, bhikkhave, dhammā upāsakassa aparihānāya saṁvattanti.
an7.29:2.2	Katame satta?
an7.29:2.3	Bhikkhudassanaṁ na hāpeti,
an7.29:2.4	saddhammassavanaṁ nappamajjati,
an7.29:2.5	adhisīle sikkhati,
an7.29:2.6	pasādabahulo hoti,
an7.29:2.7	bhikkhūsu theresu ceva navesu ca majjhimesu ca anupārambhacitto dhammaṁ suṇāti na randhagavesī,
an7.29:2.8	na ito bahiddhā dakkhiṇeyyaṁ gavesati,
an7.29:2.9	idha ca pubbakāraṁ karoti.
an7.29:2.10	Ime kho, bhikkhave, satta dhammā upāsakassa aparihānāya saṁvattantī”ti.
an7.29:2.11	Idamavoca bhagavā.
an7.29:2.12	Idaṁ vatvāna sugato athāparaṁ etadavoca satthā:
an7.29:3.1	“Dassanaṁ bhāvitattānaṁ,
an7.29:3.2	Yo hāpeti upāsako;
an7.29:3.3	Savanañca ariyadhammānaṁ,
an7.29:3.4	Adhisīle na sikkhati.
an7.29:4.1	Appasādo ca bhikkhūsu,
an7.29:4.2	bhiyyo bhiyyo pavaḍḍhati;
an7.29:4.3	Upārambhakacitto ca,
an7.29:4.4	saddhammaṁ sotumicchati.
an7.29:5.1	Ito ca bahiddhā aññaṁ,
an7.29:5.2	dakkhiṇeyyaṁ gavesati;
an7.29:5.3	Tattheva ca pubbakāraṁ,
an7.29:5.4	yo karoti upāsako.
an7.29:6.1	Ete kho parihāniye,
an7.29:6.2	satta dhamme sudesite;
an7.29:6.3	Upāsako sevamāno,
an7.29:6.4	saddhammā parihāyati.
an7.29:7.1	Dassanaṁ bhāvitattānaṁ,
an7.29:7.2	Yo na hāpeti upāsako;
an7.29:7.3	Savanañca ariyadhammānaṁ,
an7.29:7.4	Adhisīle ca sikkhati.
an7.29:8.1	Pasādo cassa bhikkhūsu,
an7.29:8.2	bhiyyo bhiyyo pavaḍḍhati;
an7.29:8.3	Anupārambhacitto ca,
an7.29:8.4	saddhammaṁ sotumicchati.
an7.29:9.1	Na ito bahiddhā aññaṁ,
an7.29:9.2	dakkhiṇeyyaṁ gavesati;
an7.29:9.3	Idheva ca pubbakāraṁ,
an7.29:9.4	yo karoti upāsako.
an7.29:10.1	Ete kho aparihāniye,
an7.29:10.2	Satta dhamme sudesite;
an7.29:10.3	Upāsako sevamāno,
an7.29:10.4	Saddhammā na parihāyatī”ti.
an7.29:10.5	Navamaṁ.
an7.30:0.1	Aṅguttara Nikāya 7.30
an7.30:0.2	3. Vajjisattakavagga
an7.30:0.3	Vipattisutta
an7.30:1.1	Sattimā, bhikkhave, upāsakassa vipattiyo …pe…
an7.30:1.2	sattimā, bhikkhave, upāsakassa sampadā …pe….
an7.30:1.3	Dasamaṁ.
an7.31:0.1	Aṅguttara Nikāya 7.31
an7.31:0.2	3. Vajjisattakavagga
an7.31:0.3	Parābhavasutta
an7.31:1.1	“Sattime, bhikkhave, upāsakassa parābhavā …pe…
an7.31:1.2	sattime, bhikkhave, upāsakassa sambhavā.
an7.31:1.3	Katame satta?
an7.31:1.4	Bhikkhudassanaṁ na hāpeti,
an7.31:1.5	saddhammassavanaṁ nappamajjati,
an7.31:1.6	adhisīle sikkhati,
an7.31:1.7	pasādabahulo hoti,
an7.31:1.8	bhikkhūsu theresu ceva navesu ca majjhimesu ca anupārambhacitto dhammaṁ suṇāti na randhagavesī,
an7.31:1.9	na ito bahiddhā dakkhiṇeyyaṁ gavesati,
an7.31:1.10	idha ca pubbakāraṁ karoti.
an7.31:1.11	Ime kho, bhikkhave, satta upāsakassa sambhavāti.
an7.31:2.1	Dassanaṁ bhāvitattānaṁ,
an7.31:2.2	Yo hāpeti upāsako;
an7.31:2.3	Savanañca ariyadhammānaṁ,
an7.31:2.4	Adhisīle na sikkhati.
an7.31:3.1	Appasādo ca bhikkhūsu,
an7.31:3.2	bhiyyo bhiyyo pavaḍḍhati;
an7.31:3.3	Upārambhakacitto ca,
an7.31:3.4	saddhammaṁ sotumicchati.
an7.31:4.1	Ito ca bahiddhā aññaṁ,
an7.31:4.2	dakkhiṇeyyaṁ gavesati;
an7.31:4.3	Tattheva ca pubbakāraṁ,
an7.31:4.4	yo karoti upāsako.
an7.31:5.1	Ete kho parihāniye,
an7.31:5.2	satta dhamme sudesite;
an7.31:5.3	Upāsako sevamāno,
an7.31:5.4	saddhammā parihāyati.
an7.31:6.1	Dassanaṁ bhāvitattānaṁ,
an7.31:6.2	Yo na hāpeti upāsako;
an7.31:6.3	Savanañca ariyadhammānaṁ,
an7.31:6.4	Adhisīle ca sikkhati.
an7.31:7.1	Pasādo cassa bhikkhūsu,
an7.31:7.2	bhiyyo bhiyyo pavaḍḍhati;
an7.31:7.3	Anupārambhacitto ca,
an7.31:7.4	saddhammaṁ sotumicchati.
an7.31:8.1	Na ito bahiddhā aññaṁ,
an7.31:8.2	dakkhiṇeyyaṁ gavesati;
an7.31:8.3	Idheva ca pubbakāraṁ,
an7.31:8.4	yo karoti upāsako.
an7.31:9.1	Ete kho aparihāniye,
an7.31:9.2	Satta dhamme sudesite;
an7.31:9.3	Upāsako sevamāno,
an7.31:9.4	Saddhammā na parihāyatī”ti.
an7.31:9.5	Ekādasamaṁ.
an7.31:9.6	Vajjisattakavaggo tatiyo.
an7.31:10.0	Tassuddānaṁ
an7.31:10.1	Sāranda vassakāro ca,
an7.31:10.2	tisattakāni bhikkhukā;
an7.31:10.3	Bodhisaññā dve ca hāni,
an7.31:10.4	vipatti ca parābhavoti.
an7.32:0.1	Aṅguttara Nikāya 7.32
an7.32:0.2	4. Devatāvagga
an7.32:0.3	Appamādagāravasutta
an7.32:1.1	Atha kho aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitā kho sā devatā bhagavantaṁ etadavoca:
an7.32:2.1	“Sattime, bhante, dhammā bhikkhuno aparihānāya saṁvattanti.
an7.32:2.2	Katame satta?
an7.32:2.3	Satthugāravatā, dhammagāravatā, saṅghagāravatā, sikkhāgāravatā, samādhigāravatā, appamādagāravatā, paṭisanthāragāravatā.
an7.32:2.4	Ime kho, bhante, satta dhammā bhikkhuno aparihānāya saṁvattantī”ti.
an7.32:2.5	Idamavoca sā devatā.
an7.32:2.6	Samanuñño satthā ahosi.
an7.32:2.7	Atha kho sā devatā “samanuñño me satthā”ti bhagavantaṁ abhivādetvā padakkhiṇaṁ katvā tatthevantaradhāyi.
an7.32:3.1	Atha kho bhagavā tassā rattiyā accayena bhikkhū āmantesi:
an7.32:3.2	“imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, bhikkhave, sā devatā maṁ etadavoca:
an7.32:3.3	‘sattime, bhante, dhammā bhikkhuno aparihānāya saṁvattanti.
an7.32:3.4	Katame satta?
an7.32:3.5	Satthugāravatā, dhammagāravatā, saṅghagāravatā, sikkhāgāravatā, samādhigāravatā, appamādagāravatā, paṭisanthāragāravatā—
an7.32:3.6	ime kho, bhante, satta dhammā bhikkhuno aparihānāya saṁvattantī’ti.
an7.32:3.7	Idamavoca, bhikkhave, sā devatā.
an7.32:3.8	Idaṁ vatvā maṁ abhivādetvā padakkhiṇaṁ katvā tatthevantaradhāyīti.
an7.32:4.1	Satthugaru dhammagaru,
an7.32:4.2	saṅghe ca tibbagāravo;
an7.32:4.3	Samādhigaru ātāpī,
an7.32:4.4	sikkhāya tibbagāravo.
an7.32:5.1	Appamādagaru bhikkhu,
an7.32:5.2	paṭisanthāragāravo;
an7.32:5.3	Abhabbo parihānāya,
an7.32:5.4	nibbānasseva santike”ti.
an7.32:5.5	Paṭhamaṁ.
an7.33:0.1	Aṅguttara Nikāya 7.33
an7.33:0.2	4. Devatāvagga
an7.33:0.3	Hirigāravasutta
an7.33:1.1	“Imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, bhikkhave, sā devatā maṁ etadavoca:
an7.33:1.2	‘sattime, bhante, dhammā bhikkhuno aparihānāya saṁvattanti.
an7.33:1.3	Katame satta?
an7.33:1.4	Satthugāravatā, dhammagāravatā, saṅghagāravatā, sikkhāgāravatā, samādhigāravatā, hirigāravatā, ottappagāravatā.
an7.33:1.5	Ime kho, bhante, satta dhammā bhikkhuno aparihānāya saṁvattantī’ti.
an7.33:1.6	Idamavoca, bhikkhave, sā devatā.
an7.33:1.7	Idaṁ vatvā maṁ abhivādetvā padakkhiṇaṁ katvā tatthevantaradhāyīti.
an7.33:2.1	Satthugaru dhammagaru,
an7.33:2.2	saṅghe ca tibbagāravo;
an7.33:2.3	Samādhigaru ātāpī,
an7.33:2.4	sikkhāya tibbagāravo.
an7.33:3.1	Hiriottappasampanno,
an7.33:3.2	sappatisso sagāravo;
an7.33:3.3	Abhabbo parihānāya,
an7.33:3.4	nibbānasseva santike”ti.
an7.33:3.5	Dutiyaṁ.
an7.34:0.1	Aṅguttara Nikāya 7.34
an7.34:0.2	4. Devatāvagga
an7.34:0.3	Paṭhamasovacassatāsutta
an7.34:1.1	“Imaṁ, bhikkhave, rattiṁ aññatarā devatā …pe… maṁ etadavoca:
an7.34:1.2	‘sattime, bhante, dhammā bhikkhuno aparihānāya saṁvattanti.
an7.34:1.3	Katame satta?
an7.34:1.4	Satthugāravatā, dhammagāravatā, saṅghagāravatā, sikkhāgāravatā, samādhigāravatā, sovacassatā, kalyāṇamittatā.
an7.34:1.5	Ime kho, bhante, satta dhammā bhikkhuno aparihānāya saṁvattantī’ti.
an7.34:1.6	Idamavoca, bhikkhave, sā devatā.
an7.34:1.7	Idaṁ vatvā maṁ abhivādetvā padakkhiṇaṁ katvā tatthevantaradhāyīti.
an7.34:2.1	Satthugaru dhammagaru,
an7.34:2.2	saṅghe ca tibbagāravo;
an7.34:2.3	Samādhigaru ātāpī,
an7.34:2.4	sikkhāya tibbagāravo.
an7.34:3.1	Kalyāṇamitto suvaco,
an7.34:3.2	sappatisso sagāravo;
an7.34:3.3	Abhabbo parihānāya,
an7.34:3.4	nibbānasseva santike”ti.
an7.34:3.5	Tatiyaṁ.
an7.35:0.1	Aṅguttara Nikāya 7.35
an7.35:0.2	4. Devatāvagga
an7.35:0.3	Dutiyasovacassatāsutta
an7.35:1.1	“Imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā …pe…
an7.35:1.2	‘sattime, bhante, dhammā bhikkhuno aparihānāya saṁvattanti.
an7.35:1.3	Katame satta?
an7.35:1.4	Satthugāravatā, dhammagāravatā, saṅghagāravatā, sikkhāgāravatā, samādhigāravatā, sovacassatā, kalyāṇamittatā.
an7.35:1.5	Ime kho, bhante, satta dhammā bhikkhuno aparihānāya saṁvattantī’ti.
an7.35:1.6	Idamavoca, bhikkhave, sā devatā.
an7.35:1.7	Idaṁ vatvā maṁ abhivādetvā padakkhiṇaṁ katvā tatthevantaradhāyī”ti.
an7.35:2.1	Evaṁ vutte, āyasmā sāriputto bhagavantaṁ etadavoca:
an7.35:2.2	“imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmi.
an7.35:2.3	Idha, bhante, bhikkhu attanā ca satthugāravo hoti, satthugāravatāya ca vaṇṇavādī.
an7.35:2.4	Ye caññe bhikkhū na satthugāravā te ca satthugāravatāya samādapeti.
an7.35:2.5	Ye caññe bhikkhū satthugāravā tesañca vaṇṇaṁ bhaṇati bhūtaṁ tacchaṁ kālena.
an7.35:2.6	Attanā ca dhammagāravo hoti …pe…
an7.35:2.7	saṅghagāravo hoti …
an7.35:2.8	sikkhāgāravo hoti …
an7.35:2.9	samādhigāravo hoti …
an7.35:2.10	suvaco hoti …
an7.35:2.11	kalyāṇamitto hoti, kalyāṇamittatāya ca vaṇṇavādī.
an7.35:2.12	Ye caññe bhikkhū na kalyāṇamittā te ca kalyāṇamittatāya samādapeti.
an7.35:2.13	Ye caññe bhikkhū kalyāṇamittā tesañca vaṇṇaṁ bhaṇati bhūtaṁ tacchaṁ kālenāti.
an7.35:2.14	Imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmī”ti.
an7.35:3.1	“Sādhu sādhu, sāriputta.
an7.35:3.2	Sādhu kho tvaṁ, sāriputta, imassa mayā saṅkhittena bhāsitassa evaṁ vitthārena atthaṁ ājānāsi.
an7.35:3.3	Idha, sāriputta, bhikkhu attanā ca satthugāravo hoti, satthugāravatāya ca vaṇṇavādī.
an7.35:3.4	Ye caññe bhikkhū na satthugāravā te ca satthugāravatāya samādapeti.
an7.35:3.5	Ye caññe bhikkhū satthugāravā tesañca vaṇṇaṁ bhaṇati bhūtaṁ tacchaṁ kālena.
an7.35:3.6	Attanā ca dhammagāravo hoti …pe…
an7.35:3.7	saṅghagāravo hoti …
an7.35:3.8	sikkhāgāravo hoti …
an7.35:3.9	samādhigāravo hoti …
an7.35:3.10	suvaco hoti …
an7.35:3.11	kalyāṇamitto hoti, kalyāṇamittatāya ca vaṇṇavādī.
an7.35:3.12	Ye caññe bhikkhū na kalyāṇamittā te ca kalyāṇamittatāya samādapeti.
an7.35:3.13	Ye caññe bhikkhū kalyāṇamittā tesañca vaṇṇaṁ bhaṇati bhūtaṁ tacchaṁ kālenāti.
an7.35:3.14	Imassa kho, sāriputta, mayā saṅkhittena bhāsitassa evaṁ vitthārena attho daṭṭhabbo”ti.
an7.35:3.15	Catutthaṁ.
an7.36:0.1	Aṅguttara Nikāya 7.36
an7.36:0.2	4. Devatāvagga
an7.36:0.3	Paṭhamamittasutta
an7.36:1.1	“Sattahi, bhikkhave, aṅgehi samannāgato mitto sevitabbo.
an7.36:1.2	Katamehi sattahi?
an7.36:1.3	Duddadaṁ dadāti, dukkaraṁ karoti, dukkhamaṁ khamati, guyhamassa āvi karoti, guyhamassa pariguhati, āpadāsu na jahati, khīṇena nātimaññati.
an7.36:1.4	Imehi kho, bhikkhave, sattahi aṅgehi samannāgato mitto sevitabboti.
an7.36:2.1	Duddadaṁ dadāti mitto,
an7.36:2.2	dukkarañcāpi kubbati;
an7.36:2.3	Athopissa duruttāni,
an7.36:2.4	khamati dukkhamāni ca.
an7.36:3.1	Guyhañca tassa akkhāti,
an7.36:3.2	guyhassa parigūhati;
an7.36:3.3	Āpadāsu na jahāti,
an7.36:3.4	khīṇena nātimaññati.
an7.36:4.1	Yamhi etāni ṭhānāni,
an7.36:4.2	saṁvijjantīdha puggale;
an7.36:4.3	So mitto mittakāmena,
an7.36:4.4	bhajitabbo tathāvidho”ti.
an7.36:4.5	Pañcamaṁ.
an7.37:0.1	Aṅguttara Nikāya 7.37
an7.37:0.2	4. Devatāvagga
an7.37:0.3	Dutiyamittasutta
an7.37:1.1	“Sattahi, bhikkhave, dhammehi samannāgato bhikkhu mitto sevitabbo bhajitabbo payirupāsitabbo api panujjamānenapi.
an7.37:1.2	Katamehi sattahi?
an7.37:1.3	Piyo ca hoti manāpo ca garu ca bhāvanīyo ca vattā ca vacanakkhamo ca gambhīrañca kathaṁ kattā hoti, no ca aṭṭhāne niyojeti.
an7.37:1.4	Imehi kho, bhikkhave, sattahi dhammehi samannāgato bhikkhu mitto sevitabbo bhajitabbo payirupāsitabbo api panujjamānenapīti.
an7.37:2.1	Piyo garu bhāvanīyo,
an7.37:2.2	vattā ca vacanakkhamo;
an7.37:2.3	Gambhīrañca kathaṁ kattā,
an7.37:2.4	no caṭṭhāne niyojako.
an7.37:3.1	Yamhi etāni ṭhānāni,
an7.37:3.2	saṁvijjantīdha puggale;
an7.37:3.3	So mitto mittakāmena,
an7.37:3.4	atthakāmānukampato;
an7.37:3.5	Api nāsiyamānena,
an7.37:3.6	bhajitabbo tathāvidho”ti.
an7.37:3.7	Chaṭṭhaṁ.
an7.38:0.1	Aṅguttara Nikāya 7.38
an7.38:0.2	4. Devatāvagga
an7.38:0.3	Paṭhamapaṭisambhidāsutta
an7.38:1.1	“Sattahi, bhikkhave, dhammehi samannāgato bhikkhu nacirasseva catasso paṭisambhidā sayaṁ abhiññā sacchikatvā upasampajja vihareyya.
an7.38:1.2	Katamehi sattahi?
an7.38:1.3	Idha, bhikkhave, bhikkhu ‘idaṁ me cetaso līnattan’ti yathābhūtaṁ pajānāti;
an7.38:1.4	ajjhattaṁ saṅkhittaṁ vā cittaṁ ‘ajjhattaṁ me saṅkhittaṁ cittan’ti yathābhūtaṁ pajānāti;
an7.38:1.5	bahiddhā vikkhittaṁ vā cittaṁ ‘bahiddhā me vikkhittaṁ cittan’ti yathābhūtaṁ pajānāti;
an7.38:1.6	tassa viditā vedanā uppajjanti, viditā upaṭṭhahanti, viditā abbhatthaṁ gacchanti;
an7.38:1.7	viditā saññā uppajjanti, viditā upaṭṭhahanti, viditā abbhatthaṁ gacchanti;
an7.38:1.8	viditā vitakkā uppajjanti, viditā upaṭṭhahanti, viditā abbhatthaṁ gacchanti;
an7.38:1.9	sappāyāsappāyesu kho panassa dhammesu hīnappaṇītesu kaṇhasukkasappaṭibhāgesu nimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya.
an7.38:1.10	Imehi kho, bhikkhave, sattahi dhammehi samannāgato bhikkhu nacirasseva catasso paṭisambhidā sayaṁ abhiññā sacchikatvā upasampajja vihareyyā”ti.
an7.38:1.11	Sattamaṁ.
an7.39:0.1	Aṅguttara Nikāya 7.39
an7.39:0.2	4. Devatāvagga
an7.39:0.3	Dutiyapaṭisambhidāsutta
an7.39:1.1	“Sattahi, bhikkhave, dhammehi samannāgato sāriputto catasso paṭisambhidā sayaṁ abhiññā sacchikatvā upasampajja viharati.
an7.39:1.2	Katamehi sattahi?
an7.39:1.3	Idha, bhikkhave, sāriputto ‘idaṁ me cetaso līnattan’ti yathābhūtaṁ pajānāti;
an7.39:1.4	ajjhattaṁ saṅkhittaṁ vā cittaṁ ‘ajjhattaṁ me saṅkhittaṁ cittan’ti yathābhūtaṁ pajānāti;
an7.39:1.5	bahiddhā vikkhittaṁ vā cittaṁ ‘bahiddhā me vikkhittaṁ cittan’ti yathābhūtaṁ pajānāti;
an7.39:1.6	tassa viditā vedanā uppajjanti, viditā upaṭṭhahanti, viditā abbhatthaṁ gacchanti;
an7.39:1.7	viditā saññā …pe…
an7.39:1.8	vitakkā uppajjanti, viditā upaṭṭhahanti, viditā abbhatthaṁ gacchanti;
an7.39:1.9	sappāyāsappāyesu kho panassa dhammesu hīnappaṇītesu kaṇhasukkasappaṭibhāgesu nimittaṁ suggahitaṁ sumanasikataṁ sūpadhāritaṁ suppaṭividdhaṁ paññāya.
an7.39:1.10	Imehi kho, bhikkhave, sattahi dhammehi samannāgato sāriputto catasso paṭisambhidā sayaṁ abhiññā sacchikatvā upasampajja viharatī”ti.
an7.39:1.11	Aṭṭhamaṁ.
an7.40:0.1	Aṅguttara Nikāya 7.40
an7.40:0.2	4. Devatāvagga
an7.40:0.3	Paṭhamavasasutta
an7.40:1.1	“Sattahi, bhikkhave, dhammehi samannāgato bhikkhu cittaṁ vase vatteti, no ca bhikkhu cittassa vasena vattati.
an7.40:1.2	Katamehi sattahi?
an7.40:1.3	Idha, bhikkhave, bhikkhu samādhikusalo hoti, samādhissa samāpattikusalo hoti, samādhissa ṭhitikusalo hoti, samādhissa vuṭṭhānakusalo hoti, samādhissa kalyāṇakusalo hoti, samādhissa gocarakusalo hoti, samādhissa abhinīhārakusalo hoti.
an7.40:1.4	Imehi kho, bhikkhave, sattahi dhammehi samannāgato bhikkhu cittaṁ vase vatteti, no ca bhikkhu cittassa vasena vattatī”ti.
an7.40:1.5	Navamaṁ.
an7.41:0.1	Aṅguttara Nikāya 7.41
an7.41:0.2	4. Devatāvagga
an7.41:0.3	Dutiyavasasutta
an7.41:1.1	“Sattahi, bhikkhave, dhammehi samannāgato sāriputto cittaṁ vase vatteti, no ca sāriputto cittassa vasena vattati.
an7.41:1.2	Katamehi sattahi?
an7.41:1.3	Idha, bhikkhave, sāriputto samādhikusalo hoti, samādhissa samāpattikusalo, samādhissa ṭhitikusalo, samādhissa vuṭṭhānakusalo, samādhissa kalyāṇakusalo, samādhissa gocarakusalo, samādhissa abhinīhārakusalo hoti.
an7.41:1.4	Imehi kho, bhikkhave, sattahi dhammehi samannāgato sāriputto cittaṁ vase vatteti, no ca sāriputto cittassa vasena vattatī”ti.
an7.41:1.5	Dasamaṁ.
an7.42:0.1	Aṅguttara Nikāya 7.42
an7.42:0.2	4. Devatāvagga
an7.42:0.3	Paṭhamaniddasasutta
an7.42:1.1	Atha kho āyasmā sāriputto pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi.
an7.42:1.2	Atha kho āyasmato sāriputtassa etadahosi:
an7.42:1.3	“atippago kho tāva sāvatthiyaṁ piṇḍāya carituṁ.
an7.42:1.4	Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan”ti.
an7.42:1.5	Atha kho āyasmā sāriputto yena aññatitthiyānaṁ paribbājakānaṁ ārāmo tenupasaṅkami; upasaṅkamitvā tehi aññatitthiyehi paribbājakehi saddhiṁ sammodi.
an7.42:1.6	Sammodanīyaṁ kathaṁ sāraṇīyaṁ vītisāretvā ekamantaṁ nisīdi.
an7.42:1.7	Tena kho pana samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi:
an7.42:1.8	“yo hi koci, āvuso, dvādasavassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāyā”ti.
an7.42:2.1	Atha kho āyasmā sāriputto tesaṁ aññatitthiyānaṁ paribbājakānaṁ bhāsitaṁ neva abhinandi nappaṭikkosi.
an7.42:2.2	Anabhinanditvā appaṭikkositvā uṭṭhāyāsanā pakkāmi:
an7.42:2.3	“bhagavato santike etassa bhāsitassa atthaṁ ājānissāmī”ti.
an7.42:2.4	Atha kho āyasmā sāriputto sāvatthiyaṁ piṇḍāya caritvā pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā sāriputto bhagavantaṁ etadavoca:
an7.42:3.1	“Idhāhaṁ, bhante, pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisiṁ.
an7.42:3.2	Tassa mayhaṁ, bhante, etadahosi:
an7.42:3.3	‘atippago kho tāva sāvatthiyaṁ piṇḍāya carituṁ.
an7.42:3.4	Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan’ti.
an7.42:3.5	Atha khvāhaṁ, bhante, yena aññatitthiyānaṁ paribbājakānaṁ ārāmo tenupasaṅkamiṁ; upasaṅkamitvā tehi aññatitthiyehi paribbājakehi saddhiṁ sammodiṁ.
an7.42:3.6	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁ.
an7.42:3.7	Tena kho pana, bhante, samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi:
an7.42:3.8	‘yo hi koci, āvuso, dvādasavassāni paripuṇṇaṁ parisuddhaṁ brahmacariyaṁ carati, niddaso bhikkhūti alaṁvacanāyā’ti.
an7.42:3.9	Atha khvāhaṁ, bhante, tesaṁ aññatitthiyānaṁ paribbājakānaṁ bhāsitaṁ neva abhinandiṁ nappaṭikkosiṁ.
an7.42:3.10	Anabhinanditvā appaṭikkositvā uṭṭhāyāsanā pakkamiṁ:
an7.42:3.11	‘bhagavato santike etassa atthaṁ ājānissāmī’ti.
an7.42:3.12	Sakkā nu kho, bhante, imasmiṁ dhammavinaye kevalaṁ vassagaṇanamattena niddaso bhikkhu paññāpetun”ti?
an7.42:4.1	“Na kho, sāriputta, sakkā imasmiṁ dhammavinaye kevalaṁ vassagaṇanamattena niddaso bhikkhu paññāpetuṁ.
an7.42:4.2	Satta kho imāni, sāriputta, niddasavatthūni mayā sayaṁ abhiññā sacchikatvā paveditāni.
an7.42:5.1	Katamāni satta?
an7.42:5.2	Idha, sāriputta, bhikkhu sikkhāsamādāne tibbacchando hoti āyatiñca sikkhāsamādāne avigatapemo, dhammanisantiyā tibbacchando hoti āyatiñca dhammanisantiyā avigatapemo, icchāvinaye tibbacchando hoti āyatiñca icchāvinaye avigatapemo, paṭisallāne tibbacchando hoti āyatiñca paṭisallāne avigatapemo, vīriyārambhe tibbacchando hoti āyatiñca vīriyārambhe avigatapemo, satinepakke tibbacchando hoti āyatiñca satinepakke avigatapemo, diṭṭhipaṭivedhe tibbacchando hoti āyatiñca diṭṭhipaṭivedhe avigatapemo.
an7.42:5.3	Imāni kho, sāriputta, satta niddasavatthūni mayā sayaṁ abhiññā sacchikatvā paveditāni.
an7.42:5.4	Imehi kho, sāriputta, sattahi niddasavatthūhi samannāgato bhikkhu dvādasa cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya;
an7.42:5.5	catubbīsati cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya;
an7.42:5.6	chattiṁsati cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya, aṭṭhacattārīsañcepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāyā”ti.
an7.42:5.7	Ekādasamaṁ.
an7.43:0.1	Aṅguttara Nikāya 7.43
an7.43:0.2	4. Devatāvagga
an7.43:0.3	Dutiyaniddasasutta
an7.43:1.1	Evaṁ me sutaṁ—
an7.43:1.2	ekaṁ samayaṁ bhagavā kosambiyaṁ viharati ghositārāme.
an7.43:1.3	Atha kho āyasmā ānando pubbaṇhasamayaṁ nivāsetvā pattacīvaramādāya kosambiṁ piṇḍāya pāvisi.
an7.43:1.4	Atha kho āyasmato ānandassa etadahosi:
an7.43:1.5	“atippago kho tāva kosambiyaṁ piṇḍāya carituṁ.
an7.43:1.6	Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan”ti.
an7.43:1.7	Atha kho āyasmā ānando yena aññatitthiyānaṁ paribbājakānaṁ ārāmo tenupasaṅkami; upasaṅkamitvā tehi aññatitthiyehi paribbājakehi saddhiṁ sammodi.
an7.43:1.8	Sammodanīyaṁ kathaṁ sāraṇīyaṁ vītisāretvā ekamantaṁ nisīdi.
an7.43:2.1	Tena kho pana samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi:
an7.43:2.2	“yo hi koci, āvuso, dvādasavassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāyā”ti.
an7.43:3.1	Atha kho āyasmā ānando tesaṁ aññatitthiyānaṁ paribbājakānaṁ bhāsitaṁ neva abhinandi nappaṭikkosi.
an7.43:3.2	Anabhinanditvā appaṭikkositvā uṭṭhāyāsanā pakkāmi:
an7.43:3.3	“bhagavato santike etassa bhāsitassa atthaṁ ājānissāmī”ti.
an7.43:3.4	Atha kho āyasmā ānando kosambiyaṁ piṇḍāya caritvā pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an7.43:4.1	“Idhāhaṁ, bhante, pubbaṇhasamayaṁ nivāsetvā pattacīvaramādāya kosambiṁ piṇḍāya pāvisiṁ.
an7.43:4.2	Tassa mayhaṁ, bhante, etadahosi:
an7.43:4.3	‘atippago kho tāva kosambiyaṁ piṇḍāya carituṁ.
an7.43:4.4	Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan’ti …pe…
an7.43:4.5	tehi saddhiṁ sammodiṁ.
an7.43:4.6	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁ.
an7.43:5.1	Tena kho pana, bhante, samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi:
an7.43:5.2	‘yo hi koci, āvuso, dvādasavassāni paripuṇṇaṁ parisuddhaṁ brahmacariyaṁ carati, niddaso bhikkhūti alaṁvacanāyā’ti.
an7.43:5.3	Atha khvāhaṁ, bhante, tesaṁ aññatitthiyānaṁ paribbājakānaṁ bhāsitaṁ neva abhinandiṁ nappaṭikkosiṁ.
an7.43:5.4	Anabhinanditvā, appaṭikkositvā uṭṭhāyāsanā pakkamiṁ:
an7.43:5.5	‘bhagavato santike etassa bhāsitassa atthaṁ ājānissāmī’ti.
an7.43:5.6	Sakkā nu kho, bhante, imasmiṁ dhammavinaye kevalaṁ vassagaṇanamattena niddaso bhikkhu paññāpetun”ti?
an7.43:6.1	“Na kho, ānanda, sakkā imasmiṁ dhammavinaye kevalaṁ vassagaṇanamattena niddaso bhikkhu paññāpetuṁ.
an7.43:6.2	Satta kho imāni, ānanda, niddasavatthūni mayā sayaṁ abhiññā sacchikatvā paveditāni.
an7.43:7.1	Katamāni satta?
an7.43:7.2	Idhānanda, bhikkhu, saddho hoti, hirīmā hoti, ottappī hoti, bahussuto hoti, āraddhavīriyo hoti, satimā hoti, paññavā hoti.
an7.43:7.3	Imāni kho, ānanda, satta niddasavatthūni mayā sayaṁ abhiññā sacchikatvā paveditāni.
an7.43:7.4	Imehi kho, ānanda, sattahi niddasavatthūhi samannāgato bhikkhu dvādasa cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya;
an7.43:7.5	catubbīsati cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya;
an7.43:7.6	chattiṁsati cepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāya, aṭṭhacattārīsañcepi vassāni paripuṇṇaṁ parisuddhaṁ brahmacariyaṁ carati, ‘niddaso bhikkhū’ti alaṁvacanāyā”ti.
an7.43:7.7	Dvādasamaṁ.
an7.43:7.8	Devatāvaggo catuttho.
an7.43:8.0	Tassuddānaṁ
an7.43:8.1	Appamādo hirī ceva,
an7.43:8.2	dve suvacā duve mittā;
an7.43:8.3	Dve paṭisambhidā dve vasā,
an7.43:8.4	duve niddasavatthunāti.
an7.44:0.1	Aṅguttara Nikāya 7.44
an7.44:0.2	5. Mahāyaññavagga
an7.44:0.3	Sattaviññāṇaṭṭhitisutta
an7.44:1.1	“Sattimā, bhikkhave, viññāṇaṭṭhitiyo.
an7.44:1.2	Katamā satta?
an7.44:1.3	Santi, bhikkhave, sattā nānattakāyā nānattasaññino, seyyathāpi manussā, ekacce ca devā, ekacce ca vinipātikā.
an7.44:1.4	Ayaṁ paṭhamā viññāṇaṭṭhiti.
an7.44:2.1	Santi, bhikkhave, sattā nānattakāyā ekattasaññino, seyyathāpi devā brahmakāyikā paṭhamābhinibbattā.
an7.44:2.2	Ayaṁ dutiyā viññāṇaṭṭhiti.
an7.44:3.1	Santi, bhikkhave, sattā ekattakāyā nānattasaññino, seyyathāpi devā ābhassarā.
an7.44:3.2	Ayaṁ tatiyā viññāṇaṭṭhiti.
an7.44:4.1	Santi, bhikkhave, sattā ekattakāyā ekattasaññino, seyyathāpi devā subhakiṇhā.
an7.44:4.2	Ayaṁ catutthā viññāṇaṭṭhiti.
an7.44:5.1	Santi, bhikkhave, sattā sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanūpagā.
an7.44:5.2	Ayaṁ pañcamā viññāṇaṭṭhiti.
an7.44:6.1	Santi, bhikkhave, sattā sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanūpagā.
an7.44:6.2	Ayaṁ chaṭṭhā viññāṇaṭṭhiti.
an7.44:7.1	Santi, bhikkhave, sattā sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanūpagā.
an7.44:7.2	Ayaṁ sattamā viññāṇaṭṭhiti.
an7.44:8.1	Imā kho, bhikkhave, satta viññāṇaṭṭhitiyo”ti.
an7.44:8.2	Paṭhamaṁ.
an7.45:0.1	Aṅguttara Nikāya 7.45
an7.45:0.2	5. Mahāyaññavagga
an7.45:0.3	Samādhiparikkhārasutta
an7.45:1.1	“Sattime, bhikkhave, samādhiparikkhārā.
an7.45:1.2	Katame satta?
an7.45:1.3	Sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati.
an7.45:1.4	Yā kho, bhikkhave, imehi sattahaṅgehi cittassekaggatā parikkhatā, ayaṁ vuccati, bhikkhave, ariyo sammāsamādhi saupaniso itipi saparikkhāro itipī”ti.
an7.45:1.5	Dutiyaṁ.
an7.46:0.1	Aṅguttara Nikāya 7.46
an7.46:0.2	5. Mahāyaññavagga
an7.46:0.3	Paṭhamaaggisutta
an7.46:1.1	“Sattime, bhikkhave, aggī.
an7.46:1.2	Katame satta?
an7.46:1.3	Rāgaggi, dosaggi, mohaggi, āhuneyyaggi, gahapataggi, dakkhiṇeyyaggi, kaṭṭhaggi—
an7.46:1.4	ime kho, bhikkhave, satta aggī”ti.
an7.46:1.5	Tatiyaṁ.
an7.47:0.1	Aṅguttara Nikāya 7.47
an7.47:0.2	5. Mahāyaññavagga
an7.47:0.3	Dutiyaaggisutta
an7.47:1.1	Tena kho pana samayena uggatasarīrassa brāhmaṇassa mahāyañño upakkhaṭo hoti.
an7.47:1.2	Pañca usabhasatāni thūṇūpanītāni honti yaññatthāya, pañca vacchatarasatāni thūṇūpanītāni honti yaññatthāya, pañca vacchatarisatāni thūṇūpanītāni honti yaññatthāya, pañca ajasatāni thūṇūpanītāni honti yaññatthāya, pañca urabbhasatāni thūṇūpanītāni honti yaññatthāya.
an7.47:1.3	Atha kho uggatasarīro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an7.47:1.4	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho uggatasarīro brāhmaṇo bhagavantaṁ etadavoca:
an7.47:2.1	“Sutaṁ metaṁ, bho gotama, aggissa ādānaṁ yūpassa ussāpanaṁ mahapphalaṁ hoti mahānisaṁsan”ti.
an7.47:2.2	“Mayāpi kho etaṁ, brāhmaṇa, sutaṁ aggissa ādānaṁ yūpassa ussāpanaṁ mahapphalaṁ hoti mahānisaṁsan”ti.
an7.47:2.3	Dutiyampi kho uggatasarīro brāhmaṇo …pe…
an7.47:2.4	tatiyampi kho uggatasarīro brāhmaṇo bhagavantaṁ etadavoca:
an7.47:2.5	“sutaṁ metaṁ, bho gotama, aggissa ādānaṁ yūpassa ussāpanaṁ mahapphalaṁ hoti mahānisaṁsan”ti.
an7.47:2.6	“Mayāpi kho etaṁ, brāhmaṇa, sutaṁ aggissa ādānaṁ yūpassa ussāpanaṁ mahapphalaṁ hoti mahānisaṁsan”ti.
an7.47:2.7	“Tayidaṁ, bho gotama, sameti bhoto ceva gotamassa amhākañca, yadidaṁ sabbena sabbaṁ”.
an7.47:3.1	Evaṁ vutte āyasmā ānando uggatasarīraṁ brāhmaṇaṁ etadavoca:
an7.47:3.2	“na kho, brāhmaṇa, tathāgatā evaṁ pucchitabbā:
an7.47:3.3	‘sutaṁ metaṁ, bho gotama, aggissa ādānaṁ yūpassa ussāpanaṁ mahapphalaṁ hoti mahānisaṁsan’ti.
an7.47:3.4	Evaṁ kho, brāhmaṇa, tathāgatā pucchitabbā:
an7.47:3.5	‘ahañhi, bhante, aggiṁ ādātukāmo, yūpaṁ ussāpetukāmo.
an7.47:3.6	Ovadatu maṁ, bhante, bhagavā.
an7.47:3.7	Anusāsatu maṁ, bhante, bhagavā yaṁ mama assa dīgharattaṁ hitāya sukhāyā’”ti.
an7.47:4.1	Atha kho uggatasarīro brāhmaṇo bhagavantaṁ etadavoca:
an7.47:4.2	“ahañhi, bho gotama, aggiṁ ādātukāmo yūpaṁ ussāpetukāmo.
an7.47:4.3	Ovadatu maṁ bhavaṁ gotamo.
an7.47:4.4	Anusāsatu maṁ bhavaṁ gotamo yaṁ mama assa dīgharattaṁ hitāya sukhāyā”ti.
an7.47:5.1	“Aggiṁ, brāhmaṇa, ādento yūpaṁ ussāpento pubbeva yaññā tīṇi satthāni ussāpeti akusalāni dukkhudrayāni dukkhavipākāni.
an7.47:5.2	Katamāni tīṇi?
an7.47:5.3	Kāyasatthaṁ, vacīsatthaṁ, manosatthaṁ.
an7.47:5.4	Aggiṁ, brāhmaṇa, ādento yūpaṁ ussāpento pubbeva yaññā evaṁ cittaṁ uppādesi:
an7.47:5.5	‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti.
an7.47:5.6	So ‘puññaṁ karomī’ti apuññaṁ karoti, ‘kusalaṁ karomī’ti akusalaṁ karoti, ‘sugatiyā maggaṁ pariyesāmī’ti duggatiyā maggaṁ pariyesati.
an7.47:5.7	Aggiṁ, brāhmaṇa, ādento yūpaṁ ussāpento pubbeva yaññā idaṁ paṭhamaṁ manosatthaṁ ussāpeti akusalaṁ dukkhudrayaṁ dukkhavipākaṁ.
an7.47:6.1	Puna caparaṁ, brāhmaṇa, aggiṁ ādento yūpaṁ ussāpento pubbeva yaññā evaṁ vācaṁ bhāsati:
an7.47:6.2	‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti.
an7.47:6.3	So ‘puññaṁ karomī’ti apuññaṁ karoti, ‘kusalaṁ karomī’ti akusalaṁ karoti, ‘sugatiyā maggaṁ pariyesāmī’ti duggatiyā maggaṁ pariyesati.
an7.47:6.4	Aggiṁ, brāhmaṇa, ādento yūpaṁ ussāpento pubbeva yaññā idaṁ dutiyaṁ vacīsatthaṁ ussāpeti akusalaṁ dukkhudrayaṁ dukkhavipākaṁ.
an7.47:7.1	Puna caparaṁ, brāhmaṇa, aggiṁ ādento yūpaṁ ussāpento pubbeva yaññā sayaṁ paṭhamaṁ samārambhati usabhā hantuṁ yaññatthāya, sayaṁ paṭhamaṁ samārambhati vacchatarā hantuṁ yaññatthāya, sayaṁ paṭhamaṁ samārambhati vacchatariyo hantuṁ yaññatthāya, sayaṁ paṭhamaṁ samārambhati ajā hantuṁ yaññatthāya, sayaṁ paṭhamaṁ samārambhati urabbhā hantuṁ yaññatthāya.
an7.47:7.2	So ‘puññaṁ karomī’ti apuññaṁ karoti, ‘kusalaṁ karomī’ti akusalaṁ karoti, ‘sugatiyā maggaṁ pariyesāmī’ti duggatiyā maggaṁ pariyesati.
an7.47:7.3	Aggiṁ, brāhmaṇa, ādento yūpaṁ ussāpento pubbeva yaññā idaṁ tatiyaṁ kāyasatthaṁ ussāpeti akusalaṁ dukkhudrayaṁ dukkhavipākaṁ.
an7.47:7.4	Aggiṁ, brāhmaṇa, ādento yūpaṁ ussāpento pubbeva yaññā imāni tīṇi satthāni ussāpeti akusalāni dukkhudrayāni dukkhavipākāni.
an7.47:8.1	Tayome, brāhmaṇa, aggī pahātabbā parivajjetabbā, na sevitabbā.
an7.47:8.2	Katame tayo?
an7.47:8.3	Rāgaggi, dosaggi, mohaggi.
an7.47:9.1	Kasmā cāyaṁ, brāhmaṇa, rāgaggi pahātabbo parivajjetabbo, na sevitabbo?
an7.47:9.2	Ratto kho, brāhmaṇa, rāgena abhibhūto pariyādinnacitto kāyena duccaritaṁ carati, vācāya duccaritaṁ carati, manasā duccaritaṁ carati.
an7.47:9.3	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.47:9.4	Tasmāyaṁ rāgaggi pahātabbo parivajjetabbo, na sevitabbo.
an7.47:10.1	Kasmā cāyaṁ, brāhmaṇa, dosaggi pahātabbo parivajjetabbo, na sevitabbo?
an7.47:10.2	Duṭṭho kho, brāhmaṇa, dosena abhibhūto pariyādinnacitto kāyena duccaritaṁ carati, vācāya duccaritaṁ carati, manasā duccaritaṁ carati.
an7.47:10.3	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.47:10.4	Tasmāyaṁ dosaggi pahātabbo parivajjetabbo, na sevitabbo.
an7.47:11.1	Kasmā cāyaṁ, brāhmaṇa, mohaggi pahātabbo parivajjetabbo, na sevitabbo?
an7.47:11.2	Mūḷho kho, brāhmaṇa, mohena abhibhūto pariyādinnacitto kāyena duccaritaṁ carati, vācāya duccaritaṁ carati, manasā duccaritaṁ carati.
an7.47:11.3	So kāyena duccaritaṁ caritvā, vācāya duccaritaṁ caritvā, manasā duccaritaṁ caritvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.47:11.4	Tasmāyaṁ mohaggi pahātabbo parivajjetabbo, na sevitabbo.
an7.47:11.5	Ime kho tayo, brāhmaṇa, aggī pahātabbā parivajjetabbā, na sevitabbā.
an7.47:12.1	Tayo kho, brāhmaṇa, aggī sakkatvā garuṁ katvā mānetvā pūjetvā sammā sukhaṁ parihātabbā.
an7.47:12.2	Katame tayo?
an7.47:12.3	Āhuneyyaggi, gahapataggi, dakkhiṇeyyaggi.
an7.47:13.1	Katamo ca, brāhmaṇa, āhuneyyaggi?
an7.47:13.2	Idha, brāhmaṇa, yassa te honti mātāti vā pitāti vā, ayaṁ vuccati, brāhmaṇa, āhuneyyaggi.
an7.47:13.3	Taṁ kissa hetu?
an7.47:13.4	Atohayaṁ, brāhmaṇa, āhuto sambhūto, tasmāyaṁ āhuneyyaggi sakkatvā garuṁ katvā mānetvā pūjetvā sammā sukhaṁ parihātabbo.
an7.47:14.1	Katamo ca, brāhmaṇa, gahapataggi?
an7.47:14.2	Idha, brāhmaṇa, yassa te honti puttāti vā dārāti vā dāsāti vā pessāti vā kammakarāti vā, ayaṁ vuccati, brāhmaṇa, gahapataggi.
an7.47:14.3	Tasmāyaṁ gahapataggi sakkatvā garuṁ katvā mānetvā pūjetvā sammā sukhaṁ parihātabbo.
an7.47:15.1	Katamo ca, brāhmaṇa, dakkhiṇeyyaggi?
an7.47:15.2	Idha, brāhmaṇa, ye te samaṇabrāhmaṇā parappavādā paṭiviratā khantisoracce niviṭṭhā ekamattānaṁ damenti, ekamattānaṁ samenti, ekamattānaṁ parinibbāpenti, ayaṁ vuccati, brāhmaṇa, dakkhiṇeyyaggi.
an7.47:15.3	Tasmāyaṁ dakkhiṇeyyaggi sakkatvā garuṁ katvā mānetvā pūjetvā sammā sukhaṁ parihātabbo.
an7.47:15.4	Ime kho, brāhmaṇa, tayo aggī sakkatvā garuṁ katvā mānetvā pūjetvā sammā sukhaṁ parihātabbā.
an7.47:16.1	Ayaṁ kho pana, brāhmaṇa, kaṭṭhaggi kālena kālaṁ ujjaletabbo, kālena kālaṁ ajjhupekkhitabbo, kālena kālaṁ nibbāpetabbo, kālena kālaṁ nikkhipitabbo”ti.
an7.47:17.1	Evaṁ vutte, uggatasarīro brāhmaṇo bhagavantaṁ etadavoca:
an7.47:17.2	“abhikkantaṁ, bho gotama, abhikkantaṁ, bho gotama …pe…
an7.47:17.3	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatanti.
an7.47:17.4	Esāhaṁ, bho gotama, pañca usabhasatāni muñcāmi jīvitaṁ demi, pañca vacchatarasatāni muñcāmi jīvitaṁ demi, pañca vacchatarisatāni muñcāmi jīvitaṁ demi, pañca ajasatāni muñcāmi jīvitaṁ demi, pañca urabbhasatāni muñcāmi jīvitaṁ demi.
an7.47:17.5	Haritāni ceva tiṇāni khādantu, sītāni ca pānīyāni pivantu, sīto ca nesaṁ vāto upavāyatan”ti.
an7.47:17.6	Catutthaṁ.
an7.48:0.1	Aṅguttara Nikāya 7.48
an7.48:0.2	5. Mahāyaññavagga
an7.48:0.3	Paṭhamasaññāsutta
an7.48:1.1	“Sattimā, bhikkhave, saññā bhāvitā bahulīkatā mahapphalā honti mahānisaṁsā amatogadhā amatapariyosānā.
an7.48:2.1	Katamā satta?
an7.48:2.2	Asubhasaññā, maraṇasaññā, āhāre paṭikūlasaññā, sabbaloke anabhiratasaññā, aniccasaññā, anicce dukkhasaññā, dukkhe anattasaññā.
an7.48:2.3	Imā kho, bhikkhave, satta saññā bhāvitā bahulīkatā mahapphalā honti mahānisaṁsā amatogadhā amatapariyosānā”ti.
an7.48:2.4	Pañcamaṁ.
an7.49:0.1	Aṅguttara Nikāya 7.49
an7.49:0.2	5. Mahāyaññavagga
an7.49:0.3	Dutiyasaññāsutta
an7.49:1.1	“Sattimā, bhikkhave, saññā bhāvitā bahulīkatā mahapphalā honti mahānisaṁsā amatogadhā amatapariyosānā.
an7.49:1.2	Katamā satta?
an7.49:1.3	Asubhasaññā, maraṇasaññā, āhāre paṭikūlasaññā, sabbaloke anabhiratasaññā, aniccasaññā, anicce dukkhasaññā, dukkhe anattasaññā.
an7.49:1.4	Imā kho, bhikkhave, satta saññā bhāvitā bahulīkatā mahapphalā honti mahānisaṁsā amatogadhā amatapariyosānāti.
an7.49:2.1	‘Asubhasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti.
an7.49:2.2	iti kho panetaṁ vuttaṁ. Kiñcetaṁ paṭicca vuttaṁ?
an7.49:2.3	Asubhasaññāparicitena, bhikkhave, bhikkhuno cetasā bahulaṁ viharato methunadhammasamāpattiyā cittaṁ patilīyati patikuṭati pativattati, na sampasāriyati upekkhā vā pāṭikulyatā vā saṇṭhāti.
an7.49:2.4	Seyyathāpi, bhikkhave, kukkuṭapattaṁ vā nhārudaddulaṁ vā aggimhi pakkhittaṁ patilīyati patikuṭati pativattati, na sampasāriyati.
an7.49:2.5	Evamevaṁ kho, bhikkhave, bhikkhuno asubhasaññāparicitena cetasā bahulaṁ viharato methunadhammasamāpattiyā cittaṁ patilīyati patikuṭati pativattati, na sampasāriyati upekkhā vā pāṭikulyatā vā saṇṭhāti.
an7.49:3.1	Sace, bhikkhave, bhikkhuno asubhasaññāparicitena cetasā bahulaṁ viharato methunadhammasamāpattiyā cittaṁ anusandahati appaṭikulyatā saṇṭhāti;
an7.49:3.2	veditabbametaṁ, bhikkhave, bhikkhunā ‘abhāvitā me asubhasaññā, natthi me pubbenāparaṁ viseso, appattaṁ me bhāvanābalan’ti.
an7.49:3.3	Itiha tattha sampajāno hoti.
an7.49:3.4	Sace pana, bhikkhave, bhikkhuno asubhasaññāparicitena cetasā bahulaṁ viharato methunadhammasamāpattiyā cittaṁ patilīyati patikuṭati pativattati, na sampasāriyati upekkhā vā pāṭikulyatā vā saṇṭhāti;
an7.49:3.5	veditabbametaṁ, bhikkhave, bhikkhunā ‘subhāvitā me asubhasaññā, atthi me pubbenāparaṁ viseso, pattaṁ me bhāvanābalan’ti.
an7.49:3.6	Itiha tattha sampajāno hoti.
an7.49:3.7	‘Asubhasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti,
an7.49:3.8	iti yaṁ taṁ vuttaṁ idametaṁ paṭicca vuttaṁ.
an7.49:4.1	‘Maraṇasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti, iti kho panetaṁ vuttaṁ kiñcetaṁ paṭicca vuttaṁ?
an7.49:4.2	Maraṇasaññāparicitena, bhikkhave, bhikkhuno cetasā bahulaṁ viharato jīvitanikantiyā cittaṁ patilīyati patikuṭati pativattati, na sampasāriyati upekkhā vā pāṭikulyatā vā saṇṭhāti.
an7.49:4.3	Seyyathāpi, bhikkhave, kukkuṭapattaṁ vā nhārudaddulaṁ vā aggimhi pakkhittaṁ patilīyati patikuṭati pativattati, na sampasāriyati.
an7.49:4.4	Evamevaṁ kho, bhikkhave, bhikkhuno maraṇasaññāparicitena cetasā bahulaṁ viharato jīvitanikantiyā cittaṁ patilīyati patikuṭati pativattati, na sampasāriyati upekkhā vā pāṭikulyatā vā saṇṭhāti.
an7.49:5.1	Sace, bhikkhave, bhikkhuno maraṇasaññāparicitena cetasā bahulaṁ viharato jīvitanikantiyā cittaṁ anusandahati appaṭikulyatā saṇṭhāti;
an7.49:5.2	veditabbametaṁ, bhikkhave, bhikkhunā ‘abhāvitā me maraṇasaññā, natthi me pubbenāparaṁ viseso, appattaṁ me bhāvanābalan’ti.
an7.49:5.3	Itiha tattha sampajāno hoti.
an7.49:5.4	Sace pana, bhikkhave, bhikkhuno maraṇasaññāparicitena cetasā bahulaṁ viharato jīvitanikantiyā cittaṁ patilīyati patikuṭati pativattati, na sampasāriyati upekkhā vā pāṭikulyatā vā saṇṭhāti;
an7.49:5.5	veditabbametaṁ, bhikkhave, bhikkhunā ‘subhāvitā me maraṇasaññā, atthi me pubbenāparaṁ viseso, pattaṁ me bhāvanābalan’ti.
an7.49:5.6	Itiha tattha sampajāno hoti.
an7.49:5.7	‘Maraṇasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti,
an7.49:5.8	iti yaṁ taṁ vuttaṁ idametaṁ paṭicca vuttaṁ.
an7.49:6.1	‘Āhāre paṭikūlasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti, iti kho panetaṁ vuttaṁ, kiñcetaṁ paṭicca vuttaṁ?
an7.49:6.2	Āhāre paṭikūlasaññāparicitena, bhikkhave, bhikkhuno cetasā bahulaṁ viharato rasataṇhāya cittaṁ patilīyati …pe… upekkhā vā pāṭikulyatā vā saṇṭhāti.
an7.49:6.3	Seyyathāpi, bhikkhave, kukkuṭapattaṁ vā nhārudaddulaṁ vā aggimhi pakkhittaṁ patilīyati patikuṭati pativattati, na sampasāriyati.
an7.49:6.4	Evamevaṁ kho, bhikkhave, bhikkhuno āhāre paṭikūlasaññāparicitena cetasā bahulaṁ viharato rasataṇhāya cittaṁ patilīyati …pe… upekkhā vā pāṭikulyatā vā saṇṭhāti.
an7.49:7.1	Sace, bhikkhave, bhikkhuno āhāre paṭikūlasaññāparicitena cetasā bahulaṁ viharato rasataṇhāya cittaṁ anusandahati appaṭikulyatā saṇṭhāti;
an7.49:7.2	veditabbametaṁ, bhikkhave, bhikkhunā ‘abhāvitā me āhāre paṭikūlasaññā, natthi me pubbenāparaṁ viseso, appattaṁ me bhāvanābalan’ti.
an7.49:7.3	Itiha tattha sampajāno hoti.
an7.49:7.4	Sace pana, bhikkhave, bhikkhuno āhāre paṭikūlasaññāparicitena cetasā bahulaṁ viharato rasataṇhāya cittaṁ patilīyati …pe… upekkhā vā pāṭikulyatā vā saṇṭhāti;
an7.49:7.5	veditabbametaṁ, bhikkhave, bhikkhunā ‘subhāvitā me āhāre paṭikūlasaññā, atthi me pubbenāparaṁ viseso, pattaṁ me bhāvanābalan’ti.
an7.49:7.6	Itiha tattha sampajāno hoti.
an7.49:7.7	‘Āhāre paṭikūlasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti,
an7.49:7.8	iti yaṁ taṁ vuttaṁ idametaṁ paṭicca vuttaṁ.
an7.49:8.1	‘Sabbaloke anabhiratasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti, iti kho panetaṁ vuttaṁ.
an7.49:8.2	Kiñcetaṁ paṭicca vuttaṁ?
an7.49:8.3	Sabbaloke anabhiratasaññāparicitena, bhikkhave, bhikkhuno cetasā bahulaṁ viharato lokacitresu cittaṁ patilīyati …pe…
an7.49:8.4	seyyathāpi bhikkhave …pe… patilīyati patikuṭati pativattati, na sampasāriyati.
an7.49:8.5	Evamevaṁ kho, bhikkhave, bhikkhuno sabbaloke anabhiratasaññāparicitena cetasā bahulaṁ viharato lokacitresu cittaṁ patilīyati patikuṭati pativattati, na sampasāriyati upekkhā vā pāṭikulyatā vā saṇṭhāti.
an7.49:9.1	Sace, bhikkhave, bhikkhuno sabbaloke anabhiratasaññāparicitena cetasā bahulaṁ viharato lokacitresu cittaṁ anusandahati appaṭikulyatā saṇṭhāti;
an7.49:9.2	veditabbametaṁ, bhikkhave, bhikkhunā ‘abhāvitā me sabbaloke anabhiratasaññā, natthi me pubbenāparaṁ viseso, appattaṁ me bhāvanābalan’ti.
an7.49:9.3	Itiha tattha sampajāno hoti.
an7.49:9.4	Sace pana, bhikkhave, bhikkhuno sabbaloke anabhiratasaññāparicitena cetasā bahulaṁ viharato lokacitresu cittaṁ patilīyati …pe… upekkhā vā pāṭikulyatā vā saṇṭhāti;
an7.49:9.5	veditabbametaṁ, bhikkhave, bhikkhunā ‘subhāvitā me sabbaloke anabhiratasaññā, atthi me pubbenāparaṁ viseso, pattaṁ me bhāvanābalan’ti.
an7.49:9.6	Itiha tattha sampajāno hoti.
an7.49:9.7	‘Sabbaloke anabhiratasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti,
an7.49:9.8	iti yaṁ taṁ vuttaṁ idametaṁ paṭicca vuttaṁ.
an7.49:10.1	‘Aniccasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti, iti kho panetaṁ vuttaṁ.
an7.49:10.2	Kiñcetaṁ paṭicca vuttaṁ?
an7.49:10.3	Aniccasaññāparicitena, bhikkhave, bhikkhuno cetasā bahulaṁ viharato lābhasakkārasiloke cittaṁ patilīyati …pe… upekkhā vā pāṭikulyatā vā saṇṭhāti.
an7.49:10.4	Seyyathāpi, bhikkhave, kukkuṭapattaṁ vā nhārudaddulaṁ vā aggimhi pakkhittaṁ patilīyati patikuṭati pativattati na sampasāriyati.
an7.49:10.5	Evamevaṁ kho, bhikkhave, bhikkhuno aniccasaññāparicitena cetasā bahulaṁ viharato lābhasakkārasiloke cittaṁ patilīyati …pe… upekkhā vā pāṭikulyatā vā saṇṭhāti.
an7.49:11.1	Sace, bhikkhave, bhikkhuno aniccasaññāparicitena cetasā bahulaṁ viharato lābhasakkārasiloke cittaṁ anusandahati appaṭikulyatā saṇṭhāti;
an7.49:11.2	veditabbametaṁ, bhikkhave, bhikkhunā ‘abhāvitā me aniccasaññā, natthi me pubbenāparaṁ viseso, appattaṁ me bhāvanābalan’ti.
an7.49:11.3	Itiha tattha sampajāno hoti.
an7.49:11.4	Sace pana, bhikkhave, bhikkhuno aniccasaññāparicitena cetasā bahulaṁ viharato lābhasakkārasiloke cittaṁ patilīyati patikuṭati pativattati, na sampasāriyati upekkhā vā pāṭikulyatā vā saṇṭhāti;
an7.49:11.5	veditabbametaṁ, bhikkhave, bhikkhunā ‘subhāvitā me aniccasaññā, atthi me pubbenāparaṁ viseso, pattaṁ me bhāvanābalan’ti.
an7.49:11.6	Itiha tattha sampajāno hoti.
an7.49:11.7	‘Aniccasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti,
an7.49:11.8	iti yaṁ taṁ vuttaṁ idametaṁ paṭicca vuttaṁ.
an7.49:12.1	‘Anicce dukkhasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti, iti kho panetaṁ vuttaṁ.
an7.49:12.2	Kiñcetaṁ paṭicca vuttaṁ?
an7.49:12.3	Anicce dukkhasaññāparicitena, bhikkhave, bhikkhuno cetasā bahulaṁ viharato ālasye kosajje vissaṭṭhiye pamāde ananuyoge apaccavekkhaṇāya tibbā bhayasaññā paccupaṭṭhitā hoti, seyyathāpi, bhikkhave, ukkhittāsike vadhake.
an7.49:13.1	Sace, bhikkhave, bhikkhuno anicce dukkhasaññāparicitena cetasā bahulaṁ viharato ālasye kosajje vissaṭṭhiye pamāde ananuyoge apaccavekkhaṇāya tibbā bhayasaññā, na paccupaṭṭhitā hoti, seyyathāpi, bhikkhave, ukkhittāsike vadhake.
an7.49:13.2	Veditabbametaṁ, bhikkhave, bhikkhunā ‘abhāvitā me anicce dukkhasaññā, natthi me pubbenāparaṁ viseso, appattaṁ me bhāvanābalan’ti.
an7.49:13.3	Itiha tattha sampajāno hoti.
an7.49:13.4	Sace pana, bhikkhave, bhikkhuno anicce dukkhasaññāparicitena cetasā bahulaṁ viharato ālasye kosajje vissaṭṭhiye pamāde ananuyoge apaccavekkhaṇāya tibbā bhayasaññā paccupaṭṭhitā hoti, seyyathāpi, bhikkhave, ukkhittāsike vadhake.
an7.49:13.5	Veditabbametaṁ, bhikkhave, bhikkhunā ‘subhāvitā me anicce dukkhasaññā, atthi me pubbenāparaṁ viseso, pattaṁ me bhāvanābalan’ti.
an7.49:13.6	Itiha tattha sampajāno hoti.
an7.49:13.7	‘Anicce dukkhasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti,
an7.49:13.8	iti yaṁ taṁ vuttaṁ idametaṁ paṭicca vuttaṁ.
an7.49:14.1	‘Dukkhe anattasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti, iti kho panetaṁ vuttaṁ.
an7.49:14.2	Kiñcetaṁ paṭicca vuttaṁ?
an7.49:14.3	Dukkhe anattasaññāparicitena, bhikkhave, bhikkhuno cetasā bahulaṁ viharato imasmiñca saviññāṇake kāye bahiddhā ca sabbanimittesu ahaṅkāramamaṅkāramānāpagataṁ mānasaṁ hoti vidhāsamatikkantaṁ santaṁ suvimuttaṁ.
an7.49:15.1	Sace, bhikkhave, bhikkhuno dukkhe anattasaññāparicitena cetasā bahulaṁ viharato imasmiñca saviññāṇake kāye bahiddhā ca sabbanimittesu na ahaṅkāramamaṅkāramānāpagataṁ mānasaṁ hoti vidhāsamatikkantaṁ santaṁ suvimuttaṁ.
an7.49:15.2	Veditabbametaṁ, bhikkhave, bhikkhunā ‘abhāvitā me dukkhe anattasaññā, natthi me pubbenāparaṁ viseso, appattaṁ me bhāvanābalan’ti.
an7.49:15.3	Itiha tattha sampajāno hoti.
an7.49:16.1	Sace pana, bhikkhave, bhikkhuno dukkhe anattasaññāparicitena cetasā bahulaṁ viharato imasmiñca saviññāṇake kāye bahiddhā ca sabbanimittesu ahaṅkāramamaṅkāramānāpagataṁ mānasaṁ hoti vidhāsamatikkantaṁ santaṁ suvimuttaṁ.
an7.49:16.2	Veditabbametaṁ, bhikkhave, bhikkhunā ‘subhāvitā me dukkhe anattasaññā, atthi me pubbenāparaṁ viseso, pattaṁ me bhāvanābalan’ti.
an7.49:16.3	Itiha tattha sampajāno hoti.
an7.49:16.4	‘Dukkhe anattasaññā, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā’ti,
an7.49:16.5	iti yaṁ taṁ vuttaṁ idametaṁ paṭicca vuttaṁ.
an7.49:17.1	Imā kho, bhikkhave, satta saññā bhāvitā bahulīkatā mahapphalā honti mahānisaṁsā amatogadhā amatapariyosānā”ti.
an7.49:17.2	Chaṭṭhaṁ.
an7.50:0.1	Aṅguttara Nikāya 7.50
an7.50:0.2	5. Mahāyaññavagga
an7.50:0.3	Methunasutta
an7.50:1.1	Atha kho jāṇussoṇi brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an7.50:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho jāṇussoṇi brāhmaṇo bhagavantaṁ etadavoca:
an7.50:1.3	“bhavampi no gotamo brahmacārī paṭijānātī”ti?
an7.50:1.4	“Yañhi taṁ, brāhmaṇa, sammā vadamāno vadeyya:
an7.50:1.5	‘akhaṇḍaṁ acchiddaṁ asabalaṁ akammāsaṁ paripuṇṇaṁ parisuddhaṁ brahmacariyaṁ caratī’ti, mameva taṁ, brāhmaṇa, sammā vadamāno vadeyya:
an7.50:1.6	‘ahañhi, brāhmaṇa, akhaṇḍaṁ acchiddaṁ asabalaṁ akammāsaṁ paripuṇṇaṁ parisuddhaṁ brahmacariyaṁ carāmī’”ti.
an7.50:1.7	“Kiṁ pana, bho gotama, brahmacariyassa khaṇḍampi chiddampi sabalampi kammāsampī”ti?
an7.50:2.1	“Idha, brāhmaṇa, ekacco samaṇo vā brāhmaṇo vā sammā brahmacārī paṭijānamāno na heva kho mātugāmena saddhiṁ dvayaṁdvayasamāpattiṁ samāpajjati;
an7.50:2.2	api ca kho mātugāmassa ucchādanaparimaddananhāpanasambāhanaṁ sādiyati.
an7.50:2.3	So taṁ assādeti, taṁ nikāmeti, tena ca vittiṁ āpajjati.
an7.50:2.4	Idampi kho, brāhmaṇa, brahmacariyassa khaṇḍampi chiddampi sabalampi kammāsampi.
an7.50:2.5	Ayaṁ vuccati, brāhmaṇa, aparisuddhaṁ brahmacariyaṁ carati, saṁyutto methunena saṁyogena na parimuccati jātiyā jarāya maraṇena sokehi paridevehi dukkhehi domanassehi upāyāsehi. ‘Na parimuccati dukkhasmā’ti vadāmi.
an7.50:3.1	Puna caparaṁ, brāhmaṇa, idhekacco samaṇo vā brāhmaṇo vā sammā brahmacārī paṭijānamāno na heva kho mātugāmena saddhiṁ dvayaṁdvayasamāpattiṁ samāpajjati, napi mātugāmassa ucchādanaparimaddananhāpanasambāhanaṁ sādiyati;
an7.50:3.2	api ca kho mātugāmena saddhiṁ sañjagghati saṅkīḷati saṅkelāyati …pe….
an7.50:4.1	Napi mātugāmena saddhiṁ sañjagghati saṅkīḷati saṅkelāyati;
an7.50:4.2	api ca kho mātugāmassa cakkhunā cakkhuṁ upanijjhāyati pekkhati …pe….
an7.50:5.1	Napi mātugāmassa cakkhunā cakkhuṁ upanijjhāyati pekkhati;
an7.50:5.2	api ca kho mātugāmassa saddaṁ suṇāti tirokuṭṭaṁ vā tiropākāraṁ vā hasantiyā vā bhaṇantiyā vā gāyantiyā vā rodantiyā vā …pe….
an7.50:6.1	Napi mātugāmassa saddaṁ suṇāti tirokuṭṭaṁ vā tiropākāraṁ vā hasantiyā vā bhaṇantiyā vā gāyantiyā vā rodantiyā vā;
an7.50:6.2	api ca kho yānissa tāni pubbe mātugāmena saddhiṁ hasitalapitakīḷitāni tāni anussarati …pe….
an7.50:7.1	Napi yānissa tāni pubbe mātugāmena saddhiṁ hasitalapitakīḷitāni tāni anussarati;
an7.50:7.2	api ca kho passati gahapatiṁ vā gahapatiputtaṁ vā pañcahi kāmaguṇehi samappitaṁ samaṅgībhūtaṁ paricārayamānaṁ …pe….
an7.50:8.1	Napi passati gahapatiṁ vā gahapatiputtaṁ vā pañcahi kāmaguṇehi samappitaṁ samaṅgībhūtaṁ paricārayamānaṁ;
an7.50:8.2	api ca kho aññataraṁ devanikāyaṁ paṇidhāya brahmacariyaṁ carati imināhaṁ sīlena vā vatena vā tapena vā brahmacariyena vā devo vā bhavissāmi devaññataro vāti.
an7.50:8.3	So taṁ assādeti, taṁ nikāmeti, tena ca vittiṁ āpajjati.
an7.50:8.4	Idampi kho, brāhmaṇa, brahmacariyassa khaṇḍampi chiddampi sabalampi kammāsampi.
an7.50:8.5	Ayaṁ vuccati, brāhmaṇa, aparisuddhaṁ brahmacariyaṁ carati saṁyutto methunena saṁyogena, na parimuccati jātiyā jarāya maraṇena sokehi paridevehi dukkhehi domanassehi upāyāsehi. ‘Na parimuccati dukkhasmā’ti vadāmi.
an7.50:9.1	Yāvakīvañcāhaṁ, brāhmaṇa, imesaṁ sattannaṁ methunasaṁyogānaṁ aññataraññataramethunasaṁyogaṁ attani appahīnaṁ samanupassiṁ, neva tāvāhaṁ, brāhmaṇa, sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṁ sammāsambodhiṁ abhisambuddhoti paccaññāsiṁ.
an7.50:10.1	Yato ca khohaṁ, brāhmaṇa, imesaṁ sattannaṁ methunasaṁyogānaṁ aññataraññataramethunasaṁyogaṁ attani appahīnaṁ na samanupassiṁ, athāhaṁ, brāhmaṇa, sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṁ sammāsambodhiṁ abhisambuddhoti paccaññāsiṁ.
an7.50:10.2	‘Ñāṇañca pana me dassanaṁ udapādi,
an7.50:10.3	akuppā me vimutti, ayamantimā jāti, natthi dāni punabbhavo’”ti.
an7.50:11.1	Evaṁ vutte, jāṇussoṇi brāhmaṇo bhagavantaṁ etadavoca:
an7.50:11.2	“abhikkantaṁ, bho gotama, abhikkantaṁ, bho gotama …pe…
an7.50:11.3	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an7.50:11.4	Sattamaṁ.
an7.51:0.1	Aṅguttara Nikāya 7.51
an7.51:0.2	5. Mahāyaññavagga
an7.51:0.3	Saṁyogasutta
an7.51:1.1	“Saṁyogavisaṁyogaṁ vo, bhikkhave, dhammapariyāyaṁ desessāmi.
an7.51:1.2	Taṁ suṇātha …pe…
an7.51:1.3	katamo ca so, bhikkhave, saṁyogo visaṁyogo dhammapariyāyo?
an7.51:2.1	Itthī, bhikkhave, ajjhattaṁ itthindriyaṁ manasi karoti—
an7.51:2.2	itthikuttaṁ itthākappaṁ itthividhaṁ itthicchandaṁ itthissaraṁ itthālaṅkāraṁ.
an7.51:2.3	Sā tattha rajjati tatrābhiramati.
an7.51:2.4	Sā tattha rattā tatrābhiratā bahiddhā purisindriyaṁ manasi karoti—
an7.51:2.5	purisakuttaṁ purisākappaṁ purisavidhaṁ purisacchandaṁ purisassaraṁ purisālaṅkāraṁ.
an7.51:2.6	Sā tattha rajjati tatrābhiramati.
an7.51:2.7	Sā tattha rattā tatrābhiratā bahiddhā saṁyogaṁ ākaṅkhati.
an7.51:2.8	Yañcassā saṁyogapaccayā uppajjati sukhaṁ somanassaṁ tañca ākaṅkhati.
an7.51:2.9	Itthatte, bhikkhave, abhiratā sattā purisesu saṁyogaṁ gatā.
an7.51:2.10	Evaṁ kho, bhikkhave, itthī itthattaṁ nātivattati.
an7.51:3.1	Puriso, bhikkhave, ajjhattaṁ purisindriyaṁ manasi karoti—
an7.51:3.2	purisakuttaṁ purisākappaṁ purisavidhaṁ purisacchandaṁ purisassaraṁ purisālaṅkāraṁ.
an7.51:3.3	So tattha rajjati tatrābhiramati.
an7.51:3.4	So tattha ratto tatrābhirato bahiddhā itthindriyaṁ manasi karoti—
an7.51:3.5	itthikuttaṁ itthākappaṁ itthividhaṁ itthicchandaṁ itthissaraṁ itthālaṅkāraṁ.
an7.51:3.6	So tattha rajjati tatrābhiramati.
an7.51:3.7	So tattha ratto tatrābhirato bahiddhā saṁyogaṁ ākaṅkhati.
an7.51:3.8	Yañcassa saṁyogapaccayā uppajjati sukhaṁ somanassaṁ tañca ākaṅkhati.
an7.51:3.9	Purisatte, bhikkhave, abhiratā sattā itthīsu saṁyogaṁ gatā.
an7.51:3.10	Evaṁ kho, bhikkhave, puriso purisattaṁ nātivattati.
an7.51:3.11	Evaṁ kho, bhikkhave, saṁyogo hoti.
an7.51:4.1	Kathañca, bhikkhave, visaṁyogo hoti?
an7.51:4.2	Itthī, bhikkhave, ajjhattaṁ itthindriyaṁ na manasi karoti—
an7.51:4.3	itthikuttaṁ itthākappaṁ itthividhaṁ itthicchandaṁ itthissaraṁ itthālaṅkāraṁ.
an7.51:4.4	Sā tattha na rajjati, sā tatra nābhiramati.
an7.51:4.5	Sā tattha arattā tatra anabhiratā bahiddhā purisindriyaṁ na manasi karoti—
an7.51:4.6	purisakuttaṁ purisākappaṁ purisavidhaṁ purisacchandaṁ purisassaraṁ purisālaṅkāraṁ.
an7.51:4.7	Sā tattha na rajjati, tatra nābhiramati.
an7.51:4.8	Sā tattha arattā tatra anabhiratā bahiddhā saṁyogaṁ nākaṅkhati.
an7.51:4.9	Yañcassā saṁyogapaccayā uppajjati sukhaṁ somanassaṁ tañca nākaṅkhati.
an7.51:4.10	Itthatte, bhikkhave, anabhiratā sattā purisesu visaṁyogaṁ gatā.
an7.51:4.11	Evaṁ kho, bhikkhave, itthī itthattaṁ ativattati.
an7.51:5.1	Puriso, bhikkhave, ajjhattaṁ purisindriyaṁ na manasi karoti—
an7.51:5.2	purisakuttaṁ purisākappaṁ purisavidhaṁ purisacchandaṁ purisassaraṁ purisālaṅkāraṁ.
an7.51:5.3	So tattha na rajjati, so tatra nābhiramati.
an7.51:5.4	So tattha aratto tatra anabhirato bahiddhā itthindriyaṁ na manasi karoti—
an7.51:5.5	itthikuttaṁ itthākappaṁ itthividhaṁ itthicchandaṁ itthissaraṁ itthālaṅkāraṁ.
an7.51:5.6	So tattha na rajjati, tatra nābhiramati.
an7.51:5.7	So tattha aratto tatra anabhirato bahiddhā saṁyogaṁ nākaṅkhati.
an7.51:5.8	Yañcassa saṁyogapaccayā uppajjati sukhaṁ somanassaṁ tañca nākaṅkhati.
an7.51:5.9	Purisatte, bhikkhave, anabhiratā sattā itthīsu visaṁyogaṁ gatā.
an7.51:5.10	Evaṁ kho, bhikkhave, puriso purisattaṁ ativattati.
an7.51:5.11	Evaṁ kho, bhikkhave, visaṁyogo hoti.
an7.51:5.12	Ayaṁ kho, bhikkhave, saṁyogo visaṁyogo dhammapariyāyo”ti.
an7.51:5.13	Aṭṭhamaṁ.
an7.52:0.1	Aṅguttara Nikāya 7.52
an7.52:0.2	5. Mahāyaññavagga
an7.52:0.3	Dānamahapphalasutta
an7.52:1.1	Ekaṁ samayaṁ bhagavā campāyaṁ viharati gaggarāya pokkharaṇiyā tīre.
an7.52:1.2	Atha kho sambahulā campeyyakā upāsakā yena āyasmā sāriputto tenupasaṅkamiṁsu; upasaṅkamitvā āyasmantaṁ sāriputtaṁ abhivādetvā ekamantaṁ nisīdiṁsu. Ekamantaṁ nisinnā kho campeyyakā upāsakā āyasmantaṁ sāriputtaṁ etadavocuṁ:
an7.52:1.3	“cirassutā no, bhante, bhagavato sammukhā dhammīkathā.
an7.52:1.4	Sādhu mayaṁ, bhante, labheyyāma bhagavato sammukhā dhammiṁ kathaṁ savanāyā”ti.
an7.52:1.5	“Tenahāvuso, tadahuposathe āgaccheyyātha,
an7.52:1.6	appeva nāma labheyyātha bhagavato sammukhā dhammiṁ kathaṁ savanāyā”ti.
an7.52:1.7	“Evaṁ, bhante”ti kho campeyyakā upāsakā āyasmato sāriputtassa paṭissutvā uṭṭhāyāsanā āyasmantaṁ sāriputtaṁ abhivādetvā padakkhiṇaṁ katvā pakkamiṁsu.
an7.52:2.1	Atha kho campeyyakā upāsakā tadahuposathe yenāyasmā sāriputto tenupasaṅkamiṁsu; upasaṅkamitvā āyasmantaṁ sāriputtaṁ abhivādetvā ekamantaṁ aṭṭhaṁsu.
an7.52:2.2	Atha kho āyasmā sāriputto tehi campeyyakehi upāsakehi saddhiṁ yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā sāriputto bhagavantaṁ etadavoca:
an7.52:3.1	“Siyā nu kho, bhante, idhekaccassa tādisaṁyeva dānaṁ dinnaṁ na mahapphalaṁ hoti na mahānisaṁsaṁ;
an7.52:3.2	siyā pana, bhante, idhekaccassa tādisaṁyeva dānaṁ dinnaṁ mahapphalaṁ hoti mahānisaṁsan”ti?
an7.52:3.3	“Siyā, sāriputta, idhekaccassa tādisaṁyeva dānaṁ dinnaṁ na mahapphalaṁ hoti na mahānisaṁsaṁ;
an7.52:3.4	siyā pana, sāriputta, idhekaccassa tādisaṁyeva dānaṁ dinnaṁ mahapphalaṁ hoti mahānisaṁsan”ti.
an7.52:3.5	“Ko nu kho, bhante, hetu ko paccayo yena midhekaccassa tādisaṁyeva dānaṁ dinnaṁ na mahapphalaṁ hoti na mahānisaṁsaṁ;
an7.52:3.6	ko nu kho, bhante, hetu ko paccayo yena midhekaccassa tādisaṁyeva dānaṁ dinnaṁ mahapphalaṁ hoti mahānisaṁsan”ti?
an7.52:4.1	“Idha, sāriputta, ekacco sāpekho dānaṁ deti, patibaddhacitto dānaṁ deti, sannidhipekho dānaṁ deti, ‘imaṁ pecca paribhuñjissāmī’ti dānaṁ deti.
an7.52:4.2	So taṁ dānaṁ deti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an7.52:4.3	Taṁ kiṁ maññasi, sāriputta, dadeyya idhekacco evarūpaṁ dānan”ti?
an7.52:4.4	“Evaṁ, bhante”.
an7.52:5.1	“Tatra, sāriputta, yvāyaṁ sāpekho dānaṁ deti, patibaddhacitto dānaṁ deti, sannidhipekho dānaṁ deti, ‘imaṁ pecca paribhuñjissāmī’ti dānaṁ deti.
an7.52:5.2	So taṁ dānaṁ datvā kāyassa bhedā paraṁ maraṇā cātumahārājikānaṁ devānaṁ sahabyataṁ upapajjati.
an7.52:5.3	So taṁ kammaṁ khepetvā taṁ iddhiṁ taṁ yasaṁ taṁ ādhipaccaṁ āgāmī hoti āgantā itthattaṁ.
an7.52:6.1	Idha pana, sāriputta, ekacco na heva kho sāpekho dānaṁ deti, na patibaddhacitto dānaṁ deti, na sannidhipekho dānaṁ deti, na ‘imaṁ pecca paribhuñjissāmī’ti dānaṁ deti;
an7.52:6.2	api ca kho ‘sāhu dānan’ti dānaṁ deti …pe….
an7.52:7.1	Napi ‘sāhu dānan’ti dānaṁ deti;
an7.52:7.2	api ca kho ‘dinnapubbaṁ katapubbaṁ pitupitāmahehi na arahāmi porāṇaṁ kulavaṁsaṁ hāpetun’ti dānaṁ deti …pe….
an7.52:8.1	Napi ‘dinnapubbaṁ katapubbaṁ pitupitāmahehi na arahāmi porāṇaṁ kulavaṁsaṁ hāpetun’ti dānaṁ deti;
an7.52:8.2	api ca kho ‘ahaṁ pacāmi, ime na pacanti, nārahāmi pacanto apacantānaṁ dānaṁ adātun’ti dānaṁ deti …pe….
an7.52:9.1	Napi ‘ahaṁ pacāmi, ime na pacanti, nārahāmi pacanto apacantānaṁ dānaṁ adātun’ti dānaṁ deti;
an7.52:9.2	api ca kho ‘yathā tesaṁ pubbakānaṁ isīnaṁ tāni mahāyaññāni ahesuṁ, seyyathidaṁ—
an7.52:9.3	aṭṭhakassa vāmakassa vāmadevassa vessāmittassa yamadaggino aṅgīrasassa bhāradvājassa vāseṭṭhassa kassapassa bhaguno, evaṁ me ayaṁ dānasaṁvibhāgo bhavissatī’ti dānaṁ deti …pe….
an7.52:10.1	Napi ‘yathā tesaṁ pubbakānaṁ isīnaṁ tāni mahāyaññāni ahesuṁ, seyyathidaṁ—
an7.52:10.2	aṭṭhakassa vāmakassa vāmadevassa vessāmittassa yamadaggino aṅgīrasassa bhāradvājassa vāseṭṭhassa kassapassa bhaguno, evaṁ me ayaṁ dānasaṁvibhāgo bhavissatī’ti dānaṁ deti;
an7.52:10.3	api ca kho ‘imaṁ me dānaṁ dadato cittaṁ pasīdati, attamanatā somanassaṁ upajāyatī’ti dānaṁ deti …pe….
an7.52:11.1	Napi ‘imaṁ me dānaṁ dadato cittaṁ pasīdati, attamanatā somanassaṁ upajāyatī’ti dānaṁ deti;
an7.52:11.2	api ca kho cittālaṅkāracittaparikkhāraṁ dānaṁ deti.
an7.52:11.3	So taṁ dānaṁ deti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an7.52:11.4	Taṁ kiṁ maññasi, sāriputta, dadeyya idhekacco evarūpaṁ dānan”ti?
an7.52:11.5	“Evaṁ, bhante”.
an7.52:12.1	“Tatra, sāriputta, yvāyaṁ na heva sāpekho dānaṁ deti;
an7.52:12.2	na patibaddhacitto dānaṁ deti;
an7.52:12.3	na sannidhipekho dānaṁ deti;
an7.52:12.4	na ‘imaṁ pecca paribhuñjissāmī’ti dānaṁ deti;
an7.52:12.5	napi ‘sāhu dānan’ti dānaṁ deti;
an7.52:12.6	napi ‘dinnapubbaṁ katapubbaṁ pitupitāmahehi na arahāmi porāṇaṁ kulavaṁsaṁ hāpetun’ti dānaṁ deti;
an7.52:12.7	napi ‘ahaṁ pacāmi, ime na pacanti, nārahāmi pacanto apacantānaṁ dānaṁ adātun’ti dānaṁ deti;
an7.52:12.8	napi ‘yathā tesaṁ pubbakānaṁ isīnaṁ tāni mahāyaññāni ahesuṁ, seyyathidaṁ—
an7.52:12.9	aṭṭhakassa vāmakassa vāmadevassa vessāmittassa yamadaggino aṅgīrasassa bhāradvājassa vāseṭṭhassa kassapassa bhaguno, evaṁ me ayaṁ dānasaṁvibhāgo bhavissatī’ti dānaṁ deti;
an7.52:12.10	napi ‘imaṁ me dānaṁ dadato cittaṁ pasīdati, attamanatā somanassaṁ upajāyatī’ti dānaṁ deti;
an7.52:12.11	api ca kho cittālaṅkāracittaparikkhāraṁ dānaṁ deti.
an7.52:12.12	So taṁ dānaṁ datvā kāyassa bhedā paraṁ maraṇā brahmakāyikānaṁ devānaṁ sahabyataṁ upapajjati.
an7.52:12.13	So taṁ kammaṁ khepetvā taṁ iddhiṁ taṁ yasaṁ taṁ ādhipaccaṁ anāgāmī hoti anāgantā itthattaṁ.
an7.52:13.1	Ayaṁ kho, sāriputta, hetu ayaṁ paccayo yena midhekaccassa tādisaṁyeva dānaṁ dinnaṁ na mahapphalaṁ hoti na mahānisaṁsaṁ.
an7.52:13.2	Ayaṁ pana, sāriputta, hetu ayaṁ paccayo yena midhekaccassa tādisaṁyeva dānaṁ dinnaṁ mahapphalaṁ hoti mahānisaṁsan”ti.
an7.52:13.3	Navamaṁ.
an7.53:0.1	Aṅguttara Nikāya 7.53
an7.53:0.2	5. Mahāyaññavagga
an7.53:0.3	Nandamātāsutta
an7.53:1.1	Evaṁ me sutaṁ—
an7.53:1.2	ekaṁ samayaṁ āyasmā ca sāriputto āyasmā ca mahāmoggallāno dakkhiṇāgirismiṁ cārikaṁ caranti mahatā bhikkhusaṅghena saddhiṁ.
an7.53:1.3	Tena kho pana samayena veḷukaṇḍakī nandamātā upāsikā rattiyā paccūsasamayaṁ paccuṭṭhāya pārāyanaṁ sarena bhāsati.
an7.53:2.1	Tena kho pana samayena vessavaṇo mahārājā uttarāya disāya dakkhiṇaṁ disaṁ gacchati kenacideva karaṇīyena.
an7.53:2.2	Assosi kho vessavaṇo mahārājā nandamātāya upāsikāya pārāyanaṁ sarena bhāsantiyā, sutvā kathāpariyosānaṁ āgamayamāno aṭṭhāsi.
an7.53:3.1	Atha kho nandamātā upāsikā pārāyanaṁ sarena bhāsitvā tuṇhī ahosi.
an7.53:3.2	Atha kho vessavaṇo mahārājā nandamātāya upāsikāya kathāpariyosānaṁ viditvā abbhānumodi:
an7.53:3.3	“sādhu, bhagini, sādhu, bhaginī”ti.
an7.53:3.4	“Ko paneso, bhadramukhā”ti?
an7.53:3.5	“Ahaṁ te, bhagini, bhātā vessavaṇo, mahārājā”ti.
an7.53:3.6	“Sādhu, bhadramukha, tena hi yo me ayaṁ dhammapariyāyo bhaṇito idaṁ te hotu ātitheyyan”ti.
an7.53:3.7	“Sādhu, bhagini, etañceva me hotu ātitheyyaṁ.
an7.53:3.8	Sveva sāriputtamoggallānappamukho bhikkhusaṅgho akatapātarāso veḷukaṇḍakaṁ āgamissati, tañca bhikkhusaṅghaṁ parivisitvā mama dakkhiṇaṁ ādiseyyāsi.
an7.53:3.9	Etañceva me bhavissati ātitheyyan”ti.
an7.53:4.1	Atha kho nandamātā upāsikā tassā rattiyā accayena sake nivesane paṇītaṁ khādanīyaṁ bhojanīyaṁ paṭiyādāpesi.
an7.53:4.2	Atha kho sāriputtamoggallānappamukho bhikkhusaṅgho akatapātarāso yena veḷukaṇḍako tadavasari.
an7.53:4.3	Atha kho nandamātā upāsikā aññataraṁ purisaṁ āmantesi:
an7.53:4.4	“ehi tvaṁ, ambho purisa, ārāmaṁ gantvā bhikkhusaṅghassa kālaṁ ārocehi:
an7.53:4.5	‘kālo, bhante, ayyāya nandamātuyā nivesane niṭṭhitaṁ bhattan’”ti.
an7.53:4.6	“Evaṁ, ayye”ti kho so puriso nandamātāya upāsikāya paṭissutvā ārāmaṁ gantvā bhikkhusaṅghassa kālaṁ ārocesi:
an7.53:4.7	“kālo, bhante, ayyāya nandamātuyā nivesane niṭṭhitaṁ bhattan”ti.
an7.53:4.8	Atha kho sāriputtamoggallānappamukho bhikkhusaṅgho pubbaṇhasamayaṁ nivāsetvā pattacīvaramādāya yena nandamātāya upāsikāya nivesanaṁ tenupasaṅkami; upasaṅkamitvā paññatte āsane nisīdi.
an7.53:4.9	Atha kho nandamātā upāsikā sāriputtamoggallānappamukhaṁ bhikkhusaṅghaṁ paṇītena khādanīyena bhojanīyena sahatthā santappesi sampavāresi.
an7.53:5.1	Atha kho nandamātā upāsikā āyasmantaṁ sāriputtaṁ bhuttāviṁ onītapattapāṇiṁ ekamantaṁ nisīdi.
an7.53:5.2	Ekamantaṁ nisinnaṁ kho nandamātaraṁ upāsikaṁ āyasmā sāriputto etadavoca:
an7.53:5.3	“ko pana te, nandamāte, bhikkhusaṅghassa abbhāgamanaṁ ārocesī”ti?
an7.53:6.1	“Idhāhaṁ, bhante, rattiyā paccūsasamayaṁ paccuṭṭhāya pārāyanaṁ sarena bhāsitvā tuṇhī ahosiṁ.
an7.53:6.2	Atha kho, bhante, vessavaṇo mahārājā mama kathāpariyosānaṁ viditvā abbhānumodi:
an7.53:6.3	‘sādhu, bhagini, sādhu, bhaginī’ti.
an7.53:6.4	‘Ko paneso, bhadramukhā’ti?
an7.53:6.5	‘Ahaṁ te, bhagini, bhātā vessavaṇo, mahārājā’ti.
an7.53:6.6	‘Sādhu, bhadramukha, tena hi yo me ayaṁ dhammapariyāyo bhaṇito idaṁ te hotu ātitheyyan’ti.
an7.53:6.7	‘Sādhu, bhagini, etañceva me hotu ātitheyyaṁ.
an7.53:6.8	Sveva sāriputtamoggallānappamukho bhikkhusaṅgho akatapātarāso veḷukaṇḍakaṁ āgamissati, tañca bhikkhusaṅghaṁ parivisitvā mama dakkhiṇaṁ ādiseyyāsi.
an7.53:6.9	Etañceva me bhavissati ātitheyyan’ti.
an7.53:6.10	Yadidaṁ, bhante, dāne puññañca puññamahī ca taṁ vessavaṇassa mahārājassa sukhāya hotū”ti.
an7.53:7.1	“Acchariyaṁ, nandamāte, abbhutaṁ, nandamāte.
an7.53:7.2	Yatra hi nāma vessavaṇena mahārājena evaṁmahiddhikena evaṁmahesakkhena devaputtena sammukhā sallapissasī”ti.
an7.53:8.1	“Na kho me, bhante, eseva acchariyo abbhuto dhammo.
an7.53:8.2	Atthi me aññopi acchariyo abbhuto dhammo.
an7.53:8.3	Idha me, bhante, nando nāma ekaputtako piyo manāpo.
an7.53:8.4	Taṁ rājāno kismiñcideva pakaraṇe okassa pasayha jīvitā voropesuṁ.
an7.53:8.5	Tasmiṁ kho panāhaṁ, bhante, dārake gahite vā gayhamāne vā vadhe vā vajjhamāne vā hate vā haññamāne vā nābhijānāmi cittassa aññathattan”ti.
an7.53:8.6	“Acchariyaṁ, nandamāte, abbhutaṁ nandamāte.
an7.53:8.7	Yatra hi nāma cittuppādampi parisodhessasī”ti.
an7.53:9.1	“Na kho me, bhante, eseva acchariyo abbhuto dhammo.
an7.53:9.2	Atthi me aññopi acchariyo abbhuto dhammo.
an7.53:9.3	Idha me, bhante, sāmiko kālaṅkato aññataraṁ yakkhayoniṁ upapanno.
an7.53:9.4	So me teneva purimena attabhāvena uddassesi.
an7.53:9.5	Na kho panāhaṁ, bhante, abhijānāmi tatonidānaṁ cittassa aññathattan”ti.
an7.53:9.6	“Acchariyaṁ, nandamāte, abbhutaṁ, nandamāte.
an7.53:9.7	Yatra hi nāma cittuppādampi parisodhessasī”ti.
an7.53:10.1	“Na kho me, bhante, eseva acchariyo abbhuto dhammo.
an7.53:10.2	Atthi me aññopi acchariyo abbhuto dhammo.
an7.53:10.3	Yatohaṁ, bhante, sāmikassa daharasseva daharā ānītā nābhijānāmi sāmikaṁ manasāpi aticaritā, kuto pana kāyenā”ti.
an7.53:10.4	“Acchariyaṁ, nandamāte, abbhutaṁ, nandamāte.
an7.53:10.5	Yatra hi nāma cittuppādampi parisodhessasī”ti.
an7.53:11.1	“Na kho me, bhante, eseva acchariyo abbhuto dhammo.
an7.53:11.2	Atthi me aññopi acchariyo abbhuto dhammo.
an7.53:11.3	Yadāhaṁ, bhante, upāsikā paṭidesitā nābhijānāmi kiñci sikkhāpadaṁ sañcicca vītikkamitā”ti.
an7.53:11.4	“Acchariyaṁ, nandamāte, abbhutaṁ, nandamāte”ti.
an7.53:12.1	“Na kho me, bhante, eseva acchariyo abbhuto dhammo.
an7.53:12.2	Atthi me aññopi acchariyo abbhuto dhammo.
an7.53:12.3	Idhāhaṁ, bhante, yāvade ākaṅkhāmi vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharāmi.
an7.53:12.4	Vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ vivekajaṁ pītisukhaṁ dutiyaṁ jhānaṁ upasampajja viharāmi.
an7.53:12.5	Pītiyā ca virāgā upekkhikā ca viharāmi satā ca sampajānā sukhañca kāyena paṭisaṁvedemi, yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharāmi.
an7.53:12.6	Sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharāmī”ti.
an7.53:12.7	“Acchariyaṁ, nandamāte, abbhutaṁ, nandamāte”ti.
an7.53:13.1	“Na kho me, bhante, eseva acchariyo abbhuto dhammo.
an7.53:13.2	Atthi me aññopi acchariyo abbhuto dhammo.
an7.53:13.3	Yānimāni, bhante, bhagavatā desitāni pañcorambhāgiyāni saṁyojanāni nāhaṁ tesaṁ kiñci attani appahīnaṁ samanupassāmī”ti.
an7.53:13.4	“Acchariyaṁ, nandamāte, abbhutaṁ, nandamāte”ti.
an7.53:14.1	Atha kho āyasmā sāriputto nandamātaraṁ upāsikaṁ dhammiyā kathāya sandassetvā samādapetvā samuttejetvā sampahaṁsetvā uṭṭhāyāsanā pakkāmīti.
an7.53:14.2	Dasamaṁ.
an7.53:14.3	Mahāyaññavaggo pañcamo.
an7.53:15.0	Tassuddānaṁ
an7.53:15.1	Ṭhiti ca parikkhāraṁ dve,
an7.53:15.2	aggī saññā ca dve parā;
an7.53:15.3	Methunā saṁyogo dānaṁ,
an7.53:15.4	nandamātena te dasāti.
an7.53:15.5	Paṇṇāsako samatto.
an7.54:0.1	Aṅguttara Nikāya 7.54
an7.54:0.2	6. Abyākatavagga
an7.54:0.3	Abyākatasutta
an7.54:1.1	Atha kho aññataro bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an7.54:1.2	“ko nu kho, bhante, hetu ko paccayo yena sutavato ariyasāvakassa vicikicchā nuppajjati abyākatavatthūsū”ti?
an7.54:2.1	“Diṭṭhinirodhā kho, bhikkhu, sutavato ariyasāvakassa vicikicchā nuppajjati abyākatavatthūsu.
an7.54:2.2	‘Hoti tathāgato paraṁ maraṇā’ti kho, bhikkhu, diṭṭhigatametaṁ;
an7.54:2.3	‘na hoti tathāgato paraṁ maraṇā’ti kho, bhikkhu, diṭṭhigatametaṁ;
an7.54:2.4	‘hoti ca na ca hoti tathāgato paraṁ maraṇā’ti kho, bhikkhu, diṭṭhigatametaṁ;
an7.54:2.5	‘neva hoti na na hoti tathāgato paraṁ maraṇā’ti kho, bhikkhu, diṭṭhigatametaṁ.
an7.54:2.6	Assutavā, bhikkhu, puthujjano diṭṭhiṁ nappajānāti, diṭṭhisamudayaṁ nappajānāti, diṭṭhinirodhaṁ nappajānāti, diṭṭhinirodhagāminiṁ paṭipadaṁ nappajānāti.
an7.54:2.7	Tassa sā diṭṭhi pavaḍḍhati, so na parimuccati jātiyā jarāya maraṇena sokehi paridevehi dukkhehi domanassehi upāyāsehi. ‘Na parimuccati dukkhasmā’ti vadāmi.
an7.54:3.1	Sutavā ca kho, bhikkhu, ariyasāvako diṭṭhiṁ pajānāti, diṭṭhisamudayaṁ pajānāti, diṭṭhinirodhaṁ pajānāti, diṭṭhinirodhagāminiṁ paṭipadaṁ pajānāti.
an7.54:3.2	Tassa sā diṭṭhi nirujjhati, so parimuccati jātiyā jarāya maraṇena sokehi paridevehi dukkhehi domanassehi upāyāsehi. ‘Parimuccati dukkhasmā’ti vadāmi.
an7.54:3.3	Evaṁ jānaṁ kho, bhikkhu, sutavā ariyasāvako evaṁ passaṁ ‘hoti tathāgato paraṁ maraṇā’tipi na byākaroti;
an7.54:3.4	‘na hoti tathāgato paraṁ maraṇā’tipi na byākaroti;
an7.54:3.5	‘hoti ca na ca hoti tathāgato paraṁ maraṇā’tipi na byākaroti;
an7.54:3.6	‘neva hoti na na hoti tathāgato paraṁ maraṇā’tipi na byākaroti.
an7.54:3.7	Evaṁ jānaṁ kho, bhikkhu, sutavā ariyasāvako evaṁ passaṁ evaṁ abyākaraṇadhammo hoti abyākatavatthūsu.
an7.54:3.8	Evaṁ jānaṁ kho, bhikkhu, sutavā ariyasāvako evaṁ passaṁ na chambhati, na kampati, na vedhati, na santāsaṁ āpajjati abyākatavatthūsu.
an7.54:4.1	‘Hoti tathāgato paraṁ maraṇā’ti kho, bhikkhu, taṇhāgatametaṁ …pe…
an7.54:4.2	saññāgatametaṁ …pe…
an7.54:4.3	maññitametaṁ …pe…
an7.54:4.4	papañcitametaṁ …pe…
an7.54:4.5	upādānagatametaṁ …pe…
an7.54:4.6	‘hoti tathāgato paraṁ maraṇā’ti kho, bhikkhu, vippaṭisāro eso;
an7.54:4.7	‘na hoti tathāgato paraṁ maraṇā’ti kho, bhikkhu, vippaṭisāro eso;
an7.54:4.8	‘hoti ca na ca hoti tathāgato paraṁ maraṇā’ti kho, bhikkhu, vippaṭisāro eso;
an7.54:4.9	‘neva hoti na na hoti tathāgato paraṁ maraṇā’ti kho, bhikkhu, vippaṭisāro eso.
an7.54:4.10	Assutavā, bhikkhu, puthujjano vippaṭisāraṁ nappajānāti, vippaṭisārasamudayaṁ nappajānāti, vippaṭisāranirodhaṁ nappajānāti, vippaṭisāranirodhagāminiṁ paṭipadaṁ nappajānāti.
an7.54:4.11	Tassa so vippaṭisāro pavaḍḍhati, so na parimuccati jātiyā jarāya maraṇena sokehi paridevehi dukkhehi domanassehi upāyāsehi. ‘Na parimuccati dukkhasmā’ti vadāmi.
an7.54:5.1	Sutavā ca kho, bhikkhu, ariyasāvako vippaṭisāraṁ pajānāti, vippaṭisārasamudayaṁ pajānāti, vippaṭisāranirodhaṁ pajānāti, vippaṭisāranirodhagāminiṁ paṭipadaṁ pajānāti.
an7.54:5.2	Tassa so vippaṭisāro nirujjhati, so parimuccati jātiyā …pe… ‘… dukkhasmā’ti vadāmi.
an7.54:5.3	Evaṁ jānaṁ kho, bhikkhu, sutavā ariyasāvako evaṁ passaṁ ‘hoti tathāgato paraṁ maraṇā’tipi na byākaroti …pe…
an7.54:5.4	‘neva hoti na na hoti tathāgato paraṁ maraṇā’tipi na byākaroti.
an7.54:5.5	Evaṁ jānaṁ kho, bhikkhu, sutavā ariyasāvako evaṁ passaṁ evaṁ abyākaraṇadhammo hoti abyākatavatthūsu.
an7.54:5.6	Evaṁ jānaṁ kho, bhikkhu, sutavā ariyasāvako evaṁ passaṁ na chambhati, na kampati, na vedhati, na santāsaṁ āpajjati abyākatavatthūsu.
an7.54:5.7	Ayaṁ kho, bhikkhu, hetu ayaṁ paccayo yena sutavato ariyasāvakassa vicikicchā nuppajjati abyākatavatthūsū”ti.
an7.54:5.8	Paṭhamaṁ.
an7.55:0.1	Aṅguttara Nikāya 7.55
an7.55:0.2	6. Abyākatavagga
an7.55:0.3	Purisagatisutta
an7.55:1.1	“Satta ca, bhikkhave, purisagatiyo desessāmi anupādā ca parinibbānaṁ.
an7.55:1.2	Taṁ suṇātha, sādhukaṁ manasi karotha, bhāsissāmī”ti.
an7.55:1.3	“Evaṁ, bhante”ti kho te bhikkhū bhagavato paccassosuṁ.
an7.55:1.4	Bhagavā etadavoca:
an7.55:1.5	“katamā ca, bhikkhave, satta purisagatiyo?
an7.55:2.1	Idha, bhikkhave, bhikkhu evaṁ paṭipanno hoti:
an7.55:2.2	‘no cassa no ca me siyā, na bhavissati na me bhavissati, yadatthi yaṁ bhūtaṁ taṁ pajahāmī’ti upekkhaṁ paṭilabhati.
an7.55:2.3	So bhave na rajjati, sambhave na rajjati, atthuttari padaṁ santaṁ sammappaññāya passati.
an7.55:2.4	Tañca khvassa padaṁ na sabbena sabbaṁ sacchikataṁ hoti, tassa na sabbena sabbaṁ mānānusayo pahīno hoti, na sabbena sabbaṁ bhavarāgānusayo pahīno hoti, na sabbena sabbaṁ avijjānusayo pahīno hoti.
an7.55:2.5	So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.
an7.55:2.6	Seyyathāpi, bhikkhave, divasaṁsantatte ayokapāle haññamāne papaṭikā nibbattitvā nibbāyeyya.
an7.55:2.7	Evamevaṁ kho, bhikkhave, bhikkhu evaṁ paṭipanno hoti:
an7.55:2.8	‘no cassa no ca me siyā, na bhavissati na me bhavissati, yadatthi yaṁ bhūtaṁ taṁ pajahāmī’ti upekkhaṁ paṭilabhati.
an7.55:2.9	So bhave na rajjati, sambhave na rajjati, atthuttari padaṁ santaṁ sammappaññāya passati.
an7.55:2.10	Tañca khvassa padaṁ na sabbena sabbaṁ sacchikataṁ hoti, tassa na sabbena sabbaṁ mānānusayo pahīno hoti, na sabbena sabbaṁ bhavarāgānusayo pahīno hoti, na sabbena sabbaṁ avijjānusayo pahīno hoti.
an7.55:2.11	So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.
an7.55:3.1	Idha pana, bhikkhave, bhikkhu evaṁ paṭipanno hoti:
an7.55:3.2	‘no cassa no ca me siyā, na bhavissati na me bhavissati, yadatthi yaṁ bhūtaṁ taṁ pajahāmī’ti upekkhaṁ paṭilabhati.
an7.55:3.3	So bhave na rajjati, sambhave na rajjati, atthuttari padaṁ santaṁ sammappaññāya passati.
an7.55:3.4	Tañca khvassa padaṁ na sabbena sabbaṁ sacchikataṁ hoti, tassa na sabbena sabbaṁ mānānusayo pahīno hoti, na sabbena sabbaṁ bhavarāgānusayo pahīno hoti, na sabbena sabbaṁ avijjānusayo pahīno hoti.
an7.55:3.5	So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.
an7.55:3.6	Seyyathāpi, bhikkhave, divasaṁsantatte ayokapāle haññamāne papaṭikā nibbattitvā uppatitvā nibbāyeyya.
an7.55:3.7	Evamevaṁ kho, bhikkhave, bhikkhu evaṁ paṭipanno hoti:
an7.55:3.8	‘no cassa no ca me siyā …pe…
an7.55:3.9	so pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.
an7.55:4.1	Idha pana, bhikkhave, bhikkhu evaṁ paṭipanno hoti:
an7.55:4.2	‘no cassa no ca me siyā …pe…
an7.55:4.3	so pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.
an7.55:4.4	Seyyathāpi, bhikkhave, divasaṁsantatte ayokapāle haññamāne papaṭikā nibbattitvā uppatitvā anupahacca talaṁ nibbāyeyya.
an7.55:4.5	Evamevaṁ kho, bhikkhave, bhikkhu evaṁ paṭipanno hoti:
an7.55:4.6	‘no cassa no ca me siyā …pe…
an7.55:4.7	so pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.
an7.55:5.1	Idha pana, bhikkhave, bhikkhu evaṁ paṭipanno hoti:
an7.55:5.2	‘no cassa no ca me siyā …pe…
an7.55:5.3	so pañcannaṁ orambhāgiyānaṁ saṁyojanānaṁ parikkhayā upahaccaparinibbāyī hoti.
an7.55:5.4	Seyyathāpi, bhikkhave, divasaṁsantatte ayokapāle haññamāne papaṭikā nibbattitvā uppatitvā upahacca talaṁ nibbāyeyya.
an7.55:5.5	Evamevaṁ kho, bhikkhave, bhikkhu evaṁ paṭipanno hoti:
an7.55:5.6	‘no cassa no ca me siyā …pe…
an7.55:5.7	so pañcannaṁ orambhāgiyānaṁ saṁyojanānaṁ parikkhayā upahaccaparinibbāyī hoti.
an7.55:6.1	Idha pana, bhikkhave, bhikkhu evaṁ paṭipanno hoti:
an7.55:6.2	‘no cassa no ca me siyā …pe…
an7.55:6.3	so pañcannaṁ orambhāgiyānaṁ saṁyojanānaṁ parikkhayā asaṅkhāraparinibbāyī hoti.
an7.55:6.4	Seyyathāpi, bhikkhave, divasaṁsantatte ayokapāle haññamāne papaṭikā nibbattitvā uppatitvā paritte tiṇapuñje vā kaṭṭhapuñje vā nipateyya.
an7.55:6.5	Sā tattha aggimpi janeyya, dhūmampi janeyya, aggimpi janetvā dhūmampi janetvā tameva parittaṁ tiṇapuñjaṁ vā kaṭṭhapuñjaṁ vā pariyādiyitvā anāhārā nibbāyeyya.
an7.55:6.6	Evamevaṁ kho, bhikkhave, bhikkhu evaṁ paṭipanno hoti:
an7.55:6.7	‘no cassa no ca me siyā …pe…
an7.55:6.8	so pañcannaṁ orambhāgiyānaṁ saṁyojanānaṁ parikkhayā asaṅkhāraparinibbāyī hoti.
an7.55:7.1	Idha pana, bhikkhave, bhikkhu evaṁ paṭipanno hoti:
an7.55:7.2	‘no cassa no ca me siyā …pe…
an7.55:7.3	so pañcannaṁ orambhāgiyānaṁ saṁyojanānaṁ parikkhayā sasaṅkhāraparinibbāyī hoti.
an7.55:7.4	Seyyathāpi, bhikkhave, divasaṁsantatte ayokapāle haññamāne papaṭikā nibbattitvā uppatitvā vipule tiṇapuñje vā kaṭṭhapuñje vā nipateyya.
an7.55:7.5	Sā tattha aggimpi janeyya, dhūmampi janeyya, aggimpi janetvā dhūmampi janetvā tameva vipulaṁ tiṇapuñjaṁ vā kaṭṭhapuñjaṁ vā pariyādiyitvā anāhārā nibbāyeyya.
an7.55:7.6	Evamevaṁ kho, bhikkhave, bhikkhu evaṁ paṭipanno hoti:
an7.55:7.7	‘no cassa no ca me siyā …pe…
an7.55:7.8	so pañcannaṁ orambhāgiyānaṁ saṁyojanānaṁ parikkhayā sasaṅkhāraparinibbāyī hoti.
an7.55:8.1	Idha pana, bhikkhave, bhikkhu evaṁ paṭipanno hoti:
an7.55:8.2	‘no cassa no ca me siyā, na bhavissati na me bhavissati, yadatthi yaṁ bhūtaṁ taṁ pajahāmī’ti upekkhaṁ paṭilabhati.
an7.55:8.3	So bhave na rajjati, sambhave na rajjati, atthuttari padaṁ santaṁ sammappaññāya passati.
an7.55:8.4	Tañca khvassa padaṁ na sabbena sabbaṁ sacchikataṁ hoti, tassa na sabbena sabbaṁ mānānusayo pahīno hoti, na sabbena sabbaṁ bhavarāgānusayo pahīno hoti, na sabbena sabbaṁ avijjānusayo pahīno hoti.
an7.55:8.5	So pañcannaṁ orambhāgiyānaṁ saṁyojanānaṁ parikkhayā uddhaṁsoto hoti akaniṭṭhagāmī.
an7.55:8.6	Seyyathāpi, bhikkhave, divasaṁsantatte ayokapāle haññamāne papaṭikā nibbattitvā uppatitvā mahante tiṇapuñje vā kaṭṭhapuñje vā nipateyya.
an7.55:8.7	Sā tattha aggimpi janeyya, dhūmampi janeyya, aggimpi janetvā dhūmampi janetvā tameva mahantaṁ tiṇapuñjaṁ vā kaṭṭhapuñjaṁ vā pariyādiyitvā gacchampi daheyya, dāyampi daheyya, gacchampi dahitvā dāyampi dahitvā haritantaṁ vā pathantaṁ vā selantaṁ vā udakantaṁ vā ramaṇīyaṁ vā bhūmibhāgaṁ āgamma anāhārā nibbāyeyya.
an7.55:8.8	Evamevaṁ kho, bhikkhave, bhikkhu evaṁ paṭipanno hoti:
an7.55:8.9	‘no cassa no ca me siyā …pe…
an7.55:8.10	so pañcannaṁ orambhāgiyānaṁ saṁyojanānaṁ parikkhayā uddhaṁsoto hoti akaniṭṭhagāmī.
an7.55:8.11	Imā kho, bhikkhave, satta purisagatiyo.
an7.55:9.1	Katamañca, bhikkhave, anupādāparinibbānaṁ?
an7.55:9.2	Idha, bhikkhave, bhikkhu evaṁ paṭipanno hoti:
an7.55:9.3	‘no cassa no ca me siyā, na bhavissati na me bhavissati, yadatthi yaṁ bhūtaṁ taṁ pajahāmī’ti upekkhaṁ paṭilabhati.
an7.55:9.4	So bhave na rajjati, sambhave na rajjati, atthuttari padaṁ santaṁ sammappaññāya passati.
an7.55:9.5	Tañca khvassa padaṁ sabbena sabbaṁ sacchikataṁ hoti, tassa sabbena sabbaṁ mānānusayo pahīno hoti, sabbena sabbaṁ bhavarāgānusayo pahīno hoti, sabbena sabbaṁ avijjānusayo pahīno hoti.
an7.55:9.6	So āsavānaṁ khayā …pe… sacchikatvā upasampajja viharati.
an7.55:9.7	Idaṁ vuccati, bhikkhave, anupādāparinibbānaṁ.
an7.55:9.8	Imā kho, bhikkhave, satta purisagatiyo anupādā ca parinibbānan”ti.
an7.55:9.9	Dutiyaṁ.
an7.56:0.1	Aṅguttara Nikāya 7.56
an7.56:0.2	6. Abyākatavagga
an7.56:0.3	Tissabrahmāsutta
an7.56:1.1	Evaṁ me sutaṁ—
an7.56:1.2	ekaṁ samayaṁ bhagavā rājagahe viharati gijjhakūṭe pabbate.
an7.56:1.3	Atha kho dve devatā abhikkantāya rattiyā abhikkantavaṇṇā kevalakappaṁ gijjhakūṭaṁ obhāsetvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ aṭṭhaṁsu. Ekamantaṁ ṭhitā kho ekā devatā bhagavantaṁ etadavoca:
an7.56:1.4	“etā, bhante, bhikkhuniyo vimuttā”ti.
an7.56:1.5	Aparā devatā bhagavantaṁ etadavoca:
an7.56:1.6	“etā, bhante, bhikkhuniyo anupādisesā suvimuttā”ti.
an7.56:1.7	Idamavocuṁ tā devatā.
an7.56:1.8	Samanuñño satthā ahosi.
an7.56:1.9	Atha kho tā devatā “samanuñño satthā”ti bhagavantaṁ abhivādetvā padakkhiṇaṁ katvā tatthevantaradhāyiṁsu.
an7.56:2.1	Atha kho bhagavā tassā rattiyā accayena bhikkhū āmantesi:
an7.56:2.2	“imaṁ, bhikkhave, rattiṁ dve devatā abhikkantāya rattiyā abhikkantavaṇṇā kevalakappaṁ gijjhakūṭaṁ obhāsetvā yenāhaṁ tenupasaṅkamiṁsu; upasaṅkamitvā maṁ abhivādetvā ekamantaṁ aṭṭhaṁsu. Ekamantaṁ ṭhitā kho, bhikkhave, ekā devatā maṁ etadavoca:
an7.56:2.3	‘etā, bhante, bhikkhuniyo vimuttā’ti.
an7.56:2.4	Aparā devatā maṁ etadavoca:
an7.56:2.5	‘etā, bhante, bhikkhuniyo anupādisesā suvimuttā’ti.
an7.56:2.6	Idamavocuṁ, bhikkhave, tā devatā.
an7.56:2.7	Idaṁ vatvā maṁ abhivādetvā padakkhiṇaṁ katvā tatthevantaradhāyiṁsū”ti.
an7.56:3.1	Tena kho pana samayena āyasmā mahāmoggallāno bhagavato avidūre nisinno hoti.
an7.56:3.2	Atha kho āyasmato mahāmoggallānassa etadahosi:
an7.56:3.3	“katamesānaṁ kho devānaṁ evaṁ ñāṇaṁ hoti:
an7.56:3.4	‘saupādisese vā saupādisesoti, anupādisese vā anupādiseso’”ti?
an7.56:3.5	Tena kho pana samayena tisso nāma bhikkhu adhunākālaṅkato aññataraṁ brahmalokaṁ upapanno hoti.
an7.56:3.6	Tatrāpi naṁ evaṁ jānanti:
an7.56:3.7	“tisso brahmā mahiddhiko mahānubhāvo”ti.
an7.56:4.1	Atha kho āyasmā mahāmoggallāno—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—gijjhakūṭe pabbate antarahito tasmiṁ brahmaloke pāturahosi.
an7.56:4.2	Addasā kho tisso brahmā āyasmantaṁ mahāmoggallānaṁ dūratova āgacchantaṁ.
an7.56:4.3	Disvā āyasmantaṁ mahāmoggallānaṁ etadavoca:
an7.56:4.4	“ehi kho, mārisa moggallāna;
an7.56:4.5	svāgataṁ, mārisa moggallāna.
an7.56:4.6	Cirassaṁ kho, mārisa moggallāna, imaṁ pariyāyamakāsi, yadidaṁ idhāgamanāya.
an7.56:4.7	Nisīda, mārisa moggallāna, idamāsanaṁ paññattan”ti.
an7.56:4.8	Nisīdi kho āyasmā mahāmoggallāno paññatte āsane.
an7.56:4.9	Tissopi kho brahmā āyasmantaṁ mahāmoggallānaṁ abhivādetvā ekamantaṁ nisīdi.
an7.56:4.10	Ekamantaṁ nisinnaṁ kho tissaṁ brahmānaṁ āyasmā mahāmoggallāno etadavoca:
an7.56:4.11	“katamesānaṁ kho, tissa, devānaṁ evaṁ ñāṇaṁ hoti:
an7.56:4.12	‘saupādisese vā saupādisesoti, anupādisese vā anupādiseso’”ti?
an7.56:4.13	“Brahmakāyikānaṁ kho, mārisa moggallāna, devānaṁ evaṁ ñāṇaṁ hoti:
an7.56:4.14	‘saupādisese vā saupādisesoti, anupādisese vā anupādiseso’”ti.
an7.56:5.1	“Sabbesaññeva kho, tissa, brahmakāyikānaṁ devānaṁ evaṁ ñāṇaṁ hoti:
an7.56:5.2	‘saupādisese vā saupādisesoti, anupādisese vā anupādiseso’”ti?
an7.56:5.3	“Na kho, mārisa moggallāna, sabbesaṁ brahmakāyikānaṁ devānaṁ evaṁ ñāṇaṁ hoti:
an7.56:5.4	‘saupādisese vā saupādisesoti, anupādisese vā anupādiseso’ti.
an7.56:6.1	Ye kho te, mārisa moggallāna, brahmakāyikā devā brahmena āyunā santuṭṭhā brahmena vaṇṇena brahmena sukhena brahmena yasena brahmena ādhipateyyena santuṭṭhā, te uttari nissaraṇaṁ yathābhūtaṁ nappajānanti.
an7.56:6.2	Tesaṁ na evaṁ ñāṇaṁ hoti:
an7.56:6.3	‘saupādisese vā saupādisesoti, anupādisese vā anupādiseso’ti.
an7.56:6.4	Ye ca kho te, mārisa moggallāna, brahmakāyikā devā brahmena āyunā asantuṭṭhā, brahmena vaṇṇena brahmena sukhena brahmena yasena brahmena ādhipateyyena asantuṭṭhā, te ca uttari nissaraṇaṁ yathābhūtaṁ pajānanti.
an7.56:6.5	Tesaṁ evaṁ ñāṇaṁ hoti:
an7.56:6.6	‘saupādisese vā saupādisesoti, anupādisese vā anupādiseso’ti.
an7.56:7.1	Idha, mārisa moggallāna, bhikkhu ubhatobhāgavimutto hoti.
an7.56:7.2	Tamenaṁ te devā evaṁ jānanti:
an7.56:7.3	‘ayaṁ kho āyasmā ubhatobhāgavimutto.
an7.56:7.4	Yāvassa kāyo ṭhassati tāva naṁ dakkhanti devamanussā.
an7.56:7.5	Kāyassa bhedā na naṁ dakkhanti devamanussā’ti.
an7.56:7.6	Evampi kho, mārisa moggallāna, tesaṁ devānaṁ ñāṇaṁ hoti:
an7.56:7.7	‘saupādisese vā saupādisesoti, anupādisese vā anupādiseso’ti.
an7.56:8.1	Idha pana, mārisa moggallāna, bhikkhu paññāvimutto hoti.
an7.56:8.2	Tamenaṁ te devā evaṁ jānanti:
an7.56:8.3	‘ayaṁ kho āyasmā paññāvimutto.
an7.56:8.4	Yāvassa kāyo ṭhassati tāva naṁ dakkhanti devamanussā.
an7.56:8.5	Kāyassa bhedā na naṁ dakkhanti devamanussā’ti.
an7.56:8.6	Evampi kho, mārisa moggallāna, tesaṁ devānaṁ ñāṇaṁ hoti:
an7.56:8.7	‘saupādisese vā saupādisesoti, anupādisese vā anupādiseso’ti.
an7.56:9.1	Idha pana, mārisa moggallāna, bhikkhu kāyasakkhī hoti.
an7.56:9.2	Tamenaṁ devā evaṁ jānanti:
an7.56:9.3	‘ayaṁ kho āyasmā kāyasakkhī.
an7.56:9.4	Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno—
an7.56:9.5	yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihareyyā’ti.
an7.56:9.6	Evampi kho, mārisa moggallāna, tesaṁ devānaṁ ñāṇaṁ hoti:
an7.56:9.7	‘saupādisese vā saupādisesoti, anupādisese vā anupādiseso’ti.
an7.56:10.1	Idha pana, mārisa moggallāna, bhikkhu diṭṭhippatto hoti …pe…
an7.56:10.2	saddhāvimutto hoti …pe…
an7.56:10.3	dhammānusārī hoti.
an7.56:10.4	Tamenaṁ te devā evaṁ jānanti:
an7.56:10.5	‘ayaṁ kho āyasmā dhammānusārī.
an7.56:10.6	Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno—
an7.56:10.7	yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihareyyā’ti.
an7.56:10.8	Evampi kho, mārisa moggallāna, tesaṁ devānaṁ ñāṇaṁ hoti:
an7.56:10.9	‘saupādisese vā saupādisesoti, anupādisese vā anupādiseso’”ti.
an7.56:11.1	Atha kho āyasmā mahāmoggallāno tissassa brahmuno bhāsitaṁ abhinanditvā anumoditvā—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—brahmaloke antarahito gijjhakūṭe pabbate pāturahosi.
an7.56:11.2	Atha kho āyasmā mahāmoggallāno yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an7.56:11.3	Ekamantaṁ nisinno kho āyasmā mahāmoggallāno yāvatako ahosi tissena brahmunā saddhiṁ kathāsallāpo taṁ sabbaṁ bhagavato ārocesi.
an7.56:12.1	“Na hi pana te, moggallāna, tisso brahmā sattamaṁ animittavihāriṁ puggalaṁ deseti”.
an7.56:12.2	“Etassa, bhagavā, kālo, etassa, sugata, kālo.
an7.56:12.3	Yaṁ bhagavā sattamaṁ animittavihāriṁ puggalaṁ deseyya. Bhagavato sutvā bhikkhū dhāressantī”ti.
an7.56:12.4	“Tena hi, moggallāna, suṇāhi, sādhukaṁ manasi karohi; bhāsissāmī”ti.
an7.56:12.5	“Evaṁ, bhante”ti kho āyasmā mahāmoggallāno bhagavato paccassosi.
an7.56:12.6	Bhagavā etadavoca:
an7.56:13.1	“Idha, moggallāna, bhikkhu sabbanimittānaṁ amanasikārā animittaṁ cetosamādhiṁ upasampajja viharati.
an7.56:13.2	Tamenaṁ te devā evaṁ jānanti:
an7.56:13.3	‘ayaṁ kho āyasmā sabbanimittānaṁ amanasikārā animittaṁ cetosamādhiṁ upasampajja viharati.
an7.56:13.4	Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno—
an7.56:13.5	yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihareyyā’ti.
an7.56:13.6	Evaṁ kho, moggallāna, tesaṁ devānaṁ ñāṇaṁ hoti:
an7.56:13.7	‘saupādisese vā saupādisesoti, anupādisese vā anupādiseso’”ti.
an7.56:13.8	Tatiyaṁ.
an7.57:0.1	Aṅguttara Nikāya 7.57
an7.57:0.2	6. Abyākatavagga
an7.57:0.3	Sīhasenāpatisutta
an7.57:1.1	Evaṁ me sutaṁ—
an7.57:1.2	ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an7.57:1.3	Atha kho sīho senāpati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho sīho senāpati bhagavantaṁ etadavoca:
an7.57:1.4	“sakkā nu kho, bhante, sandiṭṭhikaṁ dānaphalaṁ paññāpetun”ti?
an7.57:2.1	“Tena hi, sīha, taññevettha paṭipucchissāmi, yathā te khameyya tathā naṁ byākareyyāsi.
an7.57:2.2	Taṁ kiṁ maññasi, sīha,
an7.57:2.3	idha dve purisā—
an7.57:2.4	eko puriso assaddho maccharī kadariyo paribhāsako, eko puriso saddho dānapati anuppadānarato.
an7.57:2.5	Taṁ kiṁ maññasi, sīha, kaṁ nu kho arahanto paṭhamaṁ anukampantā anukampeyyuṁ:
an7.57:2.6	‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti?
an7.57:3.1	“Yo so, bhante, puriso assaddho maccharī kadariyo paribhāsako, kintaṁ arahanto paṭhamaṁ anukampantā anukampissanti.
an7.57:3.2	Yo ca kho so, bhante, puriso saddho dānapati anuppadānarato taṁyeva arahanto paṭhamaṁ anukampantā anukampeyyuṁ”.
an7.57:4.1	“Taṁ kiṁ maññasi, sīha, kaṁ nu kho arahanto paṭhamaṁ upasaṅkamantā upasaṅkameyyuṁ:
an7.57:4.2	‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti?
an7.57:4.3	“Yo so, bhante, puriso assaddho maccharī kadariyo paribhāsako, kintaṁ arahanto paṭhamaṁ upasaṅkamantā upasaṅkamissanti.
an7.57:4.4	Yo ca kho so, bhante, puriso saddho dānapati anuppadānarato taṁyeva arahanto paṭhamaṁ upasaṅkamantā upasaṅkameyyuṁ”.
an7.57:5.1	“Taṁ kiṁ maññasi, sīha, kassa nu kho arahanto paṭhamaṁ paṭiggaṇhantā paṭiggaṇheyyuṁ:
an7.57:5.2	‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti?
an7.57:5.3	“Yo so, bhante, puriso assaddho maccharī kadariyo paribhāsako, kintaṁ tassa arahanto paṭhamaṁ paṭiggaṇhantā paṭiggaṇhissanti.
an7.57:5.4	Yo ca kho so, bhante, puriso saddho dānapati anuppadānarato tasseva arahanto paṭhamaṁ paṭiggaṇhantā paṭiggaṇheyyuṁ”.
an7.57:6.1	“Taṁ kiṁ maññasi, sīha, kassa nu kho arahanto paṭhamaṁ dhammaṁ desentā deseyyuṁ:
an7.57:6.2	‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti?
an7.57:6.3	“Yo so, bhante, puriso assaddho maccharī kadariyo paribhāsako, kintaṁ tassa arahanto paṭhamaṁ dhammaṁ desentā desessanti.
an7.57:6.4	Yo ca kho so, bhante, puriso saddho dānapati anuppadānarato tasseva arahanto paṭhamaṁ dhammaṁ desentā deseyyuṁ”.
an7.57:7.1	“Taṁ kiṁ maññasi, sīha, kassa nu kho kalyāṇo kittisaddo abbhuggaccheyya:
an7.57:7.2	‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti?
an7.57:7.3	“Yo so, bhante, puriso assaddho maccharī kadariyo paribhāsako, kintaṁ tassa kalyāṇo kittisaddo abbhuggacchissati.
an7.57:7.4	Yo ca kho so, bhante, puriso saddho dānapati anuppadānarato tasseva kalyāṇo kittisaddo abbhuggaccheyya”.
an7.57:8.1	“Taṁ kiṁ maññasi, sīha, ko nu kho yaṁyadeva parisaṁ upasaṅkameyya, yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ visārado upasaṅkameyya amaṅkubhūto:
an7.57:8.2	‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti?
an7.57:8.3	“Yo so, bhante, puriso assaddho maccharī kadariyo paribhāsako, kiṁ so yaṁyadeva parisaṁ upasaṅkamissati, yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ visārado upasaṅkamissati amaṅkubhūto.
an7.57:8.4	Yo ca kho so, bhante, puriso saddho dānapati anuppadānarato so yaṁyadeva parisaṁ upasaṅkameyya, yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ visārado upasaṅkameyya amaṅkubhūto”.
an7.57:9.1	“Taṁ kiṁ maññasi, sīha, ko nu kho kāyassa bhedā paraṁ maraṇā sugatiṁ saggaṁ lokaṁ upapajjeyya:
an7.57:9.2	‘yo vā so puriso assaddho maccharī kadariyo paribhāsako, yo vā so puriso saddho dānapati anuppadānarato’”ti?
an7.57:9.3	“Yo so, bhante, puriso assaddho maccharī kadariyo paribhāsako, kiṁ so kāyassa bhedā paraṁ maraṇā sugatiṁ saggaṁ lokaṁ upapajjissati.
an7.57:9.4	Yo ca kho so, bhante, puriso saddho dānapati anuppadānarato so kāyassa bhedā paraṁ maraṇā sugatiṁ saggaṁ lokaṁ upapajjeyya.
an7.57:10.1	Yānimāni, bhante, bhagavatā sandiṭṭhikāni dānaphalāni akkhātāni, nāhaṁ ettha bhagavato saddhāya gacchāmi.
an7.57:10.2	Ahampi etāni jānāmi.
an7.57:10.3	Ahaṁ, bhante, dāyako dānapati, maṁ arahanto paṭhamaṁ anukampantā anukampanti.
an7.57:10.4	Ahaṁ, bhante, dāyako dānapati, maṁ arahanto paṭhamaṁ upasaṅkamantā upasaṅkamanti.
an7.57:10.5	Ahaṁ, bhante, dāyako dānapati, mayhaṁ arahanto paṭhamaṁ paṭiggaṇhantā paṭiggaṇhanti.
an7.57:10.6	Ahaṁ, bhante, dāyako dānapati, mayhaṁ arahanto paṭhamaṁ dhammaṁ desentā desenti.
an7.57:10.7	Ahaṁ, bhante, dāyako dānapati, mayhaṁ kalyāṇo kittisaddo abbhuggato:
an7.57:10.8	‘sīho senāpati dāyako kārako saṅghupaṭṭhāko’ti.
an7.57:10.9	Ahaṁ, bhante, dāyako dānapati yaṁyadeva parisaṁ upasaṅkamāmi, yadi khattiyaparisaṁ …pe… yadi samaṇaparisaṁ visārado upasaṅkamāmi amaṅkubhūto.
an7.57:10.10	Yānimāni, bhante, bhagavatā sandiṭṭhikāni dānaphalāni akkhātāni, nāhaṁ ettha bhagavato saddhāya gacchāmi.
an7.57:10.11	Ahampi etāni jānāmi.
an7.57:10.12	Yañca kho maṁ, bhante, bhagavā evamāha:
an7.57:10.13	‘dāyako, sīha, dānapati kāyassa bhedā paraṁ maraṇā sugatiṁ saggaṁ lokaṁ upapajjatī’ti.
an7.57:10.14	Etāhaṁ na jānāmi, ettha ca panāhaṁ, bhagavato saddhāya gacchāmī”ti.
an7.57:10.15	“Evametaṁ, sīha, evametaṁ, sīha.
an7.57:10.16	Dāyako, sīha, dānapati kāyassa bhedā paraṁ maraṇā sugatiṁ saggaṁ lokaṁ upapajjatī”ti.
an7.57:10.17	Catutthaṁ.
an7.58:0.1	Aṅguttara Nikāya 7.58
an7.58:0.2	6. Abyākatavagga
an7.58:0.3	Arakkheyyasutta
an7.58:1.1	“Cattārimāni, bhikkhave, tathāgatassa arakkheyyāni, tīhi ca anupavajjo.
an7.58:1.2	Katamāni cattāri tathāgatassa arakkheyyāni?
an7.58:1.3	Parisuddhakāyasamācāro, bhikkhave, tathāgato;
an7.58:1.4	natthi tathāgatassa kāyaduccaritaṁ yaṁ tathāgato rakkheyya:
an7.58:1.5	‘mā me idaṁ paro aññāsī’ti.
an7.58:2.1	Parisuddhavacīsamācāro, bhikkhave, tathāgato;
an7.58:2.2	natthi tathāgatassa vacīduccaritaṁ yaṁ tathāgato rakkheyya:
an7.58:2.3	‘mā me idaṁ paro aññāsī’ti.
an7.58:3.1	Parisuddhamanosamācāro, bhikkhave, tathāgato;
an7.58:3.2	natthi tathāgatassa manoduccaritaṁ yaṁ tathāgato rakkheyya:
an7.58:3.3	‘mā me idaṁ paro aññāsī’ti.
an7.58:4.1	Parisuddhājīvo, bhikkhave, tathāgato;
an7.58:4.2	natthi tathāgatassa micchāājīvo yaṁ tathāgato rakkheyya:
an7.58:4.3	‘mā me idaṁ paro aññāsī’ti.
an7.58:5.1	Imāni cattāri tathāgatassa arakkheyyāni.
an7.58:6.1	Katamehi tīhi anupavajjo?
an7.58:6.2	Svākkhātadhammo, bhikkhave, tathāgato.
an7.58:6.3	Tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessati:
an7.58:6.4	‘itipi tvaṁ na svākkhātadhammo’ti.
an7.58:6.5	Nimittametaṁ, bhikkhave, na samanupassāmi.
an7.58:6.6	Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi.
an7.58:7.1	Supaññattā kho pana me, bhikkhave, sāvakānaṁ nibbānagāminī paṭipadā.
an7.58:7.2	Yathāpaṭipannā mama sāvakā āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharanti.
an7.58:7.3	Tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessati:
an7.58:7.4	‘itipi te na supaññattā sāvakānaṁ nibbānagāminī paṭipadā. Yathāpaṭipannā tava sāvakā āsavānaṁ khayā …pe… sacchikatvā upasampajja viharantī’ti.
an7.58:7.5	Nimittametaṁ, bhikkhave, na samanupassāmi.
an7.58:7.6	Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi.
an7.58:8.1	Anekasatā kho pana me, bhikkhave, sāvakaparisā āsavānaṁ khayā …pe… sacchikatvā upasampajja viharanti.
an7.58:8.2	Tatra vata maṁ samaṇo vā brāhmaṇo vā devo vā māro vā brahmā vā koci vā lokasmiṁ sahadhammena paṭicodessati:
an7.58:8.3	‘itipi te na anekasatā sāvakaparisā āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharantī’ti.
an7.58:8.4	Nimittametaṁ, bhikkhave, na samanupassāmi.
an7.58:8.5	Etamahaṁ, bhikkhave, nimittaṁ asamanupassanto khemappatto abhayappatto vesārajjappatto viharāmi.
an7.58:9.1	Imehi tīhi anupavajjo.
an7.58:10.1	Imāni kho, bhikkhave, cattāri tathāgatassa arakkheyyāni, imehi ca tīhi anupavajjo”ti.
an7.58:10.2	Pañcamaṁ.
an7.59:0.1	Aṅguttara Nikāya 7.59
an7.59:0.2	6. Abyākatavagga
an7.59:0.3	Kimilasutta
an7.59:1.1	Evaṁ me sutaṁ—
an7.59:1.2	ekaṁ samayaṁ bhagavā kimilāyaṁ viharati niculavane.
an7.59:1.3	Atha kho āyasmā kimilo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā kimilo bhagavantaṁ etadavoca:
an7.59:1.4	“ko nu kho, bhante, hetu ko paccayo yena tathāgate parinibbute saddhammo na ciraṭṭhitiko hotī”ti?
an7.59:2.1	“Idha, kimila, tathāgate parinibbute bhikkhū bhikkhuniyo upāsakā upāsikāyo satthari agāravā viharanti appatissā, dhamme agāravā viharanti appatissā, saṅghe agāravā viharanti appatissā, sikkhāya agāravā viharanti appatissā, samādhismiṁ agāravā viharanti appatissā, appamāde agāravā viharanti appatissā, paṭisanthāre agāravā viharanti appatissā.
an7.59:2.2	Ayaṁ kho, kimila, hetu ayaṁ paccayo yena tathāgate parinibbute saddhammo na ciraṭṭhitiko hotī”ti.
an7.59:3.1	“Ko pana, bhante, hetu ko paccayo yena tathāgate parinibbute saddhammo ciraṭṭhitiko hotī”ti?
an7.59:3.2	“Idha, kimila, tathāgate parinibbute bhikkhū bhikkhuniyo upāsakā upāsikāyo satthari sagāravā viharanti sappatissā, dhamme sagāravā viharanti sappatissā, saṅghe sagāravā viharanti sappatissā, sikkhāya sagāravā viharanti sappatissā, samādhismiṁ sagāravā viharanti sappatissā, appamāde sagāravā viharanti sappatissā, paṭisanthāre sagāravā viharanti sappatissā.
an7.59:3.3	Ayaṁ kho, kimila, hetu ayaṁ paccayo yena tathāgate parinibbute saddhammo ciraṭṭhitiko hotī”ti.
an7.59:3.4	Chaṭṭhaṁ.
an7.60:0.1	Aṅguttara Nikāya 7.60
an7.60:0.2	6. Abyākatavagga
an7.60:0.3	Sattadhammasutta
an7.60:1.1	“Sattahi, bhikkhave, dhammehi samannāgato bhikkhu nacirasseva āsavānaṁ khayā …pe… sacchikatvā upasampajja vihareyya.
an7.60:1.2	Katamehi sattahi?
an7.60:1.3	Idha, bhikkhave, bhikkhu saddho hoti, sīlavā hoti, bahussuto hoti, paṭisallīno hoti, āraddhavīriyo hoti, satimā hoti, paññavā hoti.
an7.60:1.4	Imehi kho, bhikkhave, sattahi dhammehi samannāgato bhikkhu nacirasseva āsavānaṁ khayā …pe… sacchikatvā upasampajja vihareyyā”ti.
an7.60:1.5	Sattamaṁ.
an7.61:0.1	Aṅguttara Nikāya 7.61
an7.61:0.2	6. Abyākatavagga
an7.61:0.3	Pacalāyamānasutta
an7.61:1.1	Evaṁ me sutaṁ—
an7.61:1.2	ekaṁ samayaṁ bhagavā bhaggesu viharati susumāragire bhesakaḷāvane migadāye.
an7.61:1.3	Tena kho pana samayena āyasmā mahāmoggallāno magadhesu kallavāḷaputtagāme pacalāyamāno nisinno hoti.
an7.61:1.4	Addasā kho bhagavā dibbena cakkhunā visuddhena atikkantamānusakena āyasmantaṁ mahāmoggallānaṁ magadhesu kallavāḷaputtagāme pacalāyamānaṁ nisinnaṁ.
an7.61:1.5	Disvā—
an7.61:1.6	seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—bhaggesu susumāragire bhesakaḷāvane migadāye antarahito magadhesu kallavāḷaputtagāme āyasmato mahāmoggallānassa sammukhe pāturahosi.
an7.61:1.7	Nisīdi bhagavā paññatte āsane.
an7.61:1.8	Nisajja kho bhagavā āyasmantaṁ mahāmoggallānaṁ etadavoca:
an7.61:2.1	“Pacalāyasi no tvaṁ, moggallāna, pacalāyasi no tvaṁ, moggallānā”ti?
an7.61:2.2	“Evaṁ, bhante”.
an7.61:2.3	“Tasmātiha, moggallāna, yathāsaññissa te viharato taṁ middhaṁ okkamati, taṁ saññaṁ mā manasākāsi, taṁ saññaṁ mā bahulamakāsi.
an7.61:2.4	Ṭhānaṁ kho panetaṁ, moggallāna, vijjati yaṁ te evaṁ viharato taṁ middhaṁ pahīyetha.
an7.61:3.1	No ce te evaṁ viharato taṁ middhaṁ pahīyetha, tato tvaṁ, moggallāna, yathāsutaṁ yathāpariyattaṁ dhammaṁ cetasā anuvitakkeyyāsi anuvicāreyyāsi, manasā anupekkheyyāsi.
an7.61:3.2	Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha.
an7.61:4.1	No ce te evaṁ viharato taṁ middhaṁ pahīyetha, tato tvaṁ, moggallāna, yathāsutaṁ yathāpariyattaṁ dhammaṁ vitthārena sajjhāyaṁ kareyyāsi.
an7.61:4.2	Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha.
an7.61:5.1	No ce te evaṁ viharato taṁ middhaṁ pahīyetha, tato tvaṁ, moggallāna, ubho kaṇṇasotāni āviñcheyyāsi, pāṇinā gattāni anumajjeyyāsi.
an7.61:5.2	Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha.
an7.61:6.1	No ce te evaṁ viharato taṁ middhaṁ pahīyetha, tato tvaṁ, moggallāna, uṭṭhāyāsanā udakena akkhīni anumajjitvā disā anuvilokeyyāsi, nakkhattāni tārakarūpāni ullokeyyāsi.
an7.61:6.2	Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha.
an7.61:7.1	No ce te evaṁ viharato taṁ middhaṁ pahīyetha, tato tvaṁ, moggallāna, ālokasaññaṁ manasi kareyyāsi, divāsaññaṁ adhiṭṭhaheyyāsi—
an7.61:7.2	yathā divā tathā rattiṁ yathā rattiṁ tathā divā.
an7.61:7.3	Iti vivaṭena cetasā apariyonaddhena sappabhāsaṁ cittaṁ bhāveyyāsi.
an7.61:7.4	Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha.
an7.61:8.1	No ce te evaṁ viharato taṁ middhaṁ pahīyetha, tato tvaṁ, moggallāna, pacchāpuresaññī caṅkamaṁ adhiṭṭhaheyyāsi antogatehi indriyehi abahigatena mānasena.
an7.61:8.2	Ṭhānaṁ kho panetaṁ vijjati yaṁ te evaṁ viharato taṁ middhaṁ pahīyetha.
an7.61:9.1	No ce te evaṁ viharato taṁ middhaṁ pahīyetha, tato tvaṁ, moggallāna, dakkhiṇena passena sīhaseyyaṁ kappeyyāsi pāde pādaṁ accādhāya sato sampajāno uṭṭhānasaññaṁ manasi karitvā.
an7.61:9.2	Paṭibuddhena ca te, moggallāna, khippaññeva paccuṭṭhātabbaṁ:
an7.61:9.3	‘na seyyasukhaṁ na passasukhaṁ na middhasukhaṁ anuyutto viharissāmī’ti.
an7.61:9.4	Evañhi te, moggallāna, sikkhitabbaṁ.
an7.61:10.1	Tasmātiha, moggallāna, evaṁ sikkhitabbaṁ:
an7.61:10.2	‘na uccāsoṇḍaṁ paggahetvā kulāni upasaṅkamissāmī’ti.
an7.61:10.3	Evañhi te, moggallāna, sikkhitabbaṁ.
an7.61:10.4	Sace, moggallāna, bhikkhu uccāsoṇḍaṁ paggahetvā kulāni upasaṅkamati, santi hi, moggallāna, kulesu kiccakaraṇīyāni.
an7.61:10.5	Yehi manussā āgataṁ bhikkhuṁ na manasi karonti, tatra bhikkhussa evaṁ hoti:
an7.61:10.6	‘kosu nāma idāni maṁ imasmiṁ kule paribhindi, virattarūpā dānime mayi manussā’ti.
an7.61:10.7	Itissa alābhena maṅkubhāvo, maṅkubhūtassa uddhaccaṁ, uddhatassa asaṁvaro, asaṁvutassa ārā cittaṁ samādhimhā.
an7.61:11.1	Tasmātiha, moggallāna, evaṁ sikkhitabbaṁ:
an7.61:11.2	‘na viggāhikakathaṁ kathessāmī’ti.
an7.61:11.3	Evañhi te, moggallāna, sikkhitabbaṁ.
an7.61:11.4	Viggāhikāya, moggallāna, kathāya sati kathābāhullaṁ pāṭikaṅkhaṁ, kathābāhulle sati uddhaccaṁ, uddhatassa asaṁvaro, asaṁvutassa ārā cittaṁ samādhimhā.
an7.61:11.5	Nāhaṁ, moggallāna, sabbeheva saṁsaggaṁ vaṇṇayāmi.
an7.61:11.6	Na panāhaṁ, moggallāna, sabbeheva saṁsaggaṁ na vaṇṇayāmi.
an7.61:11.7	Sagahaṭṭhapabbajitehi kho ahaṁ, moggallāna, saṁsaggaṁ na vaṇṇayāmi.
an7.61:11.8	Yāni ca kho tāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppāni tathārūpehi senāsanehi saṁsaggaṁ vaṇṇayāmī”ti.
an7.61:12.1	Evaṁ vutte, āyasmā mahāmoggallāno bhagavantaṁ etadavoca:
an7.61:12.2	“kittāvatā nu kho, bhante, bhikkhu saṅkhittena taṇhāsaṅkhayavimutto hoti accantaniṭṭho accantayogakkhemī accantabrahmacārī accantapariyosāno seṭṭho devamanussānan”ti?
an7.61:13.1	“Idha, moggallāna, bhikkhuno sutaṁ hoti:
an7.61:13.2	‘sabbe dhammā nālaṁ abhinivesāyā’ti;
an7.61:13.3	evañcetaṁ, moggallāna, bhikkhuno sutaṁ hoti:
an7.61:13.4	‘sabbe dhammā nālaṁ abhinivesāyā’ti.
an7.61:13.5	So sabbaṁ dhammaṁ abhijānāti, sabbaṁ dhammaṁ abhiññāya sabbaṁ dhammaṁ parijānāti. Sabbaṁ dhammaṁ pariññāya yaṁ kiñci vedanaṁ vediyati sukhaṁ vā dukkhaṁ vā adukkhamasukhaṁ vā.
an7.61:13.6	So tāsu vedanāsu aniccānupassī viharati, virāgānupassī viharati, nirodhānupassī viharati, paṭinissaggānupassī viharati.
an7.61:13.7	So tāsu vedanāsu aniccānupassī viharanto virāgānupassī viharanto nirodhānupassī viharanto paṭinissaggānupassī viharanto na kiñci loke upādiyati,
an7.61:13.8	anupādiyaṁ na paritassati, aparitassaṁ paccattaṁyeva parinibbāyati.
an7.61:13.9	‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.
an7.61:13.10	Ettāvatā kho, moggallāna, bhikkhu saṅkhittena taṇhāsaṅkhayavimutto hoti accantaniṭṭho accantayogakkhemī accantabrahmacārī accantapariyosāno seṭṭho devamanussānan”ti.
an7.61:13.11	Aṭṭhamaṁ.
an7.62:0.1	Aṅguttara Nikāya 7.62
an7.62:0.2	6. Abyākatavagga
an7.62:0.3	Mettasutta
an7.62:1.1	“Mā, bhikkhave, puññānaṁ bhāyittha.
an7.62:1.2	Sukhassetaṁ, bhikkhave, adhivacanaṁ yadidaṁ puññāni.
an7.62:1.3	Abhijānāmi kho panāhaṁ, bhikkhave, dīgharattaṁ katānaṁ puññānaṁ dīgharattaṁ iṭṭhaṁ kantaṁ manāpaṁ vipākaṁ paccanubhūtaṁ.
an7.62:1.4	Satta vassāni mettacittaṁ bhāvesiṁ.
an7.62:1.5	Satta vassāni mettacittaṁ bhāvetvā satta saṁvaṭṭavivaṭṭakappe nayimaṁ lokaṁ punāgamāsiṁ.
an7.62:1.6	Saṁvaṭṭamāne sudāhaṁ, bhikkhave, loke ābhassarūpago homi,
an7.62:1.7	vivaṭṭamāne loke suññaṁ brahmavimānaṁ upapajjāmi.
an7.62:2.1	Tatra sudaṁ, bhikkhave, brahmā homi mahābrahmā abhibhū anabhibhūto aññadatthudaso vasavattī.
an7.62:2.2	Chattiṁsakkhattuṁ kho panāhaṁ, bhikkhave, sakko ahosiṁ devānamindo;
an7.62:2.3	anekasatakkhattuṁ rājā ahosiṁ cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato.
an7.62:2.4	Tassa mayhaṁ, bhikkhave, imāni satta ratanāni ahesuṁ, seyyathidaṁ—
an7.62:2.5	cakkaratanaṁ, hatthiratanaṁ, assaratanaṁ, maṇiratanaṁ, itthiratanaṁ, gahapatiratanaṁ, pariṇāyakaratanameva sattamaṁ.
an7.62:2.6	Parosahassaṁ kho pana me, bhikkhave, puttā ahesuṁ sūrā vīraṅgarūpā parasenappamaddanā.
an7.62:2.7	So imaṁ pathaviṁ sāgarapariyantaṁ adaṇḍena asatthena dhammena abhivijiya ajjhāvasinti.
an7.62:3.1	Passa puññānaṁ vipākaṁ,
an7.62:3.2	Kusalānaṁ sukhesino;
an7.62:3.3	Mettaṁ cittaṁ vibhāvetvā,
an7.62:3.4	Satta vassāni bhikkhavo;
an7.62:3.5	Sattasaṁvaṭṭavivaṭṭakappe,
an7.62:3.6	Nayimaṁ lokaṁ punāgamiṁ.
an7.62:4.1	Saṁvaṭṭamāne lokamhi,
an7.62:4.2	homi ābhassarūpago;
an7.62:4.3	Vivaṭṭamāne lokasmiṁ,
an7.62:4.4	suññabrahmūpago ahuṁ.
an7.62:5.1	Sattakkhattuṁ mahābrahmā,
an7.62:5.2	vasavattī tadā ahuṁ;
an7.62:5.3	Chattiṁsakkhattuṁ devindo,
an7.62:5.4	devarajjamakārayiṁ.
an7.62:6.1	Cakkavattī ahuṁ rājā,
an7.62:6.2	jambumaṇḍassa issaro;
an7.62:6.3	Muddhāvasitto khattiyo,
an7.62:6.4	manussādhipatī ahuṁ.
an7.62:7.1	Adaṇḍena asatthena,
an7.62:7.2	vijeyya pathaviṁ imaṁ;
an7.62:7.3	Asāhasena kammena,
an7.62:7.4	samena manusāsi taṁ.
an7.62:8.1	Dhammena rajjaṁ kāretvā,
an7.62:8.2	asmiṁ pathavimaṇḍale;
an7.62:8.3	Mahaddhane mahābhoge,
an7.62:8.4	aḍḍhe ajāyihaṁ kule.
an7.62:9.1	Sabbakāmehi sampanne,
an7.62:9.2	ratanehi ca sattahi;
an7.62:9.3	Buddhā saṅgāhakā loke,
an7.62:9.4	tehi etaṁ sudesitaṁ.
an7.62:10.1	Eso hetu mahantassa,
an7.62:10.2	pathabyo me na vipajjati;
an7.62:10.3	Pahūtavittūpakaraṇo,
an7.62:10.4	rājā hoti patāpavā.
an7.62:11.1	Iddhimā yasavā hoti,
an7.62:11.2	jambumaṇḍassa issaro;
an7.62:11.3	Ko sutvā nappasīdeyya,
an7.62:11.4	api kaṇhābhijātiyo.
an7.62:12.1	Tasmā hi attakāmena,
an7.62:12.2	mahattamabhikaṅkhatā;
an7.62:12.3	Saddhammo garukātabbo,
an7.62:12.4	saraṁ buddhānasāsanan”ti.
an7.62:12.5	Navamaṁ.
an7.63:0.1	Aṅguttara Nikāya 7.63
an7.63:0.2	6. Abyākatavagga
an7.63:0.3	Bhariyāsutta
an7.63:1.1	Atha kho bhagavā pubbaṇhasamayaṁ nivāsetvā pattacīvaramādāya yena anāthapiṇḍikassa gahapatissa nivesanaṁ tenupasaṅkami; upasaṅkamitvā paññatte āsane nisīdi.
an7.63:1.2	Tena kho pana samayena anāthapiṇḍikassa gahapatissa nivesane manussā uccāsaddā mahāsaddā honti.
an7.63:1.3	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an7.63:2.1	“Kiṁ nu te, gahapati, nivesane manussā uccāsaddā mahāsaddā kevaṭṭā maññe macchavilope”ti?
an7.63:2.2	“Ayaṁ, bhante, sujātā gharasuṇhā aḍḍhakulā ānītā.
an7.63:2.3	Sā neva sassuṁ ādiyati, na sasuraṁ ādiyati, na sāmikaṁ ādiyati, bhagavantampi na sakkaroti na garuṁ karoti na māneti na pūjetī”ti.
an7.63:3.1	Atha kho bhagavā sujātaṁ gharasuṇhaṁ āmantesi:
an7.63:3.2	“ehi, sujāte”ti.
an7.63:3.3	“Evaṁ, bhante”ti kho sujātā gharasuṇhā bhagavato paṭissutvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho sujātaṁ gharasuṇhaṁ bhagavā etadavoca:
an7.63:4.1	“Satta kho imā, sujāte, purisassa bhariyāyo.
an7.63:4.2	Katamā satta?
an7.63:4.3	Vadhakasamā, corīsamā, ayyasamā, mātāsamā, bhaginīsamā, sakhīsamā, dāsīsamā.
an7.63:4.4	Imā kho, sujāte, satta purisassa bhariyāyo.
an7.63:4.5	Tāsaṁ tvaṁ katamā”ti?
an7.63:4.6	“Na kho ahaṁ, bhante, imassa bhagavatā saṅkhittena bhāsitassa vitthārena atthaṁ ājānāmi.
an7.63:4.7	Sādhu me, bhante, bhagavā tathā dhammaṁ desetu yathāhaṁ imassa bhagavatā saṅkhittena bhāsitassa vitthārena atthaṁ jāneyyan”ti.
an7.63:4.8	“Tena hi, sujāte, suṇāhi, sādhukaṁ manasi karohi; bhāsissāmī”ti.
an7.63:4.9	“Evaṁ, bhante”ti kho sujātā gharasuṇhā bhagavato paccassosi.
an7.63:4.10	Bhagavā etadavoca:
an7.63:5.1	“Paduṭṭhacittā ahitānukampinī,
an7.63:5.2	Aññesu rattā atimaññate patiṁ;
an7.63:5.3	Dhanena kītassa vadhāya ussukā,
an7.63:5.4	Yā evarūpā purisassa bhariyā;
an7.63:5.5	‘Vadhā ca bhariyā’ti ca sā pavuccati.
an7.63:6.1	Yaṁ itthiyā vindati sāmiko dhanaṁ,
an7.63:6.2	Sippaṁ vaṇijjañca kasiṁ adhiṭṭhahaṁ;
an7.63:6.3	Appampi tassa apahātumicchati,
an7.63:6.4	Yā evarūpā purisassa bhariyā;
an7.63:6.5	‘Corī ca bhariyā’ti ca sā pavuccati.
an7.63:7.1	Akammakāmā alasā mahagghasā,
an7.63:7.2	Pharusā ca caṇḍī duruttavādinī;
an7.63:7.3	Uṭṭhāyakānaṁ abhibhuyya vattati,
an7.63:7.4	Yā evarūpā purisassa bhariyā;
an7.63:7.5	‘Ayyā ca bhariyā’ti ca sā pavuccati.
an7.63:8.1	Yā sabbadā hoti hitānukampinī,
an7.63:8.2	Mātāva puttaṁ anurakkhate patiṁ;
an7.63:8.3	Tato dhanaṁ sambhatamassa rakkhati,
an7.63:8.4	Yā evarūpā purisassa bhariyā;
an7.63:8.5	‘Mātā ca bhariyā’ti ca sā pavuccati.
an7.63:9.1	Yathāpi jeṭṭhā bhaginī kaniṭṭhakā,
an7.63:9.2	Sagāravā hoti sakamhi sāmike;
an7.63:9.3	Hirīmanā bhattuvasānuvattinī,
an7.63:9.4	Yā evarūpā purisassa bhariyā;
an7.63:9.5	‘Bhaginī ca bhariyā’ti ca sā pavuccati.
an7.63:10.1	Yācīdha disvāna patiṁ pamodati,
an7.63:10.2	Sakhī sakhāraṁva cirassamāgataṁ;
an7.63:10.3	Koleyyakā sīlavatī patibbatā,
an7.63:10.4	Yā evarūpā purisassa bhariyā;
an7.63:10.5	‘Sakhī ca bhariyā’ti ca sā pavuccati.
an7.63:11.1	Akkuddhasantā vadhadaṇḍatajjitā,
an7.63:11.2	Aduṭṭhacittā patino titikkhati;
an7.63:11.3	Akkodhanā bhattuvasānuvattinī,
an7.63:11.4	Yā evarūpā purisassa bhariyā;
an7.63:11.5	‘Dāsī ca bhariyā’ti ca sā pavuccati.
an7.63:12.1	Yācīdha bhariyā vadhakāti vuccati,
an7.63:12.2	‘Corī ca ayyā’ti ca yā pavuccati;
an7.63:12.3	Dussīlarūpā pharusā anādarā,
an7.63:12.4	Kāyassa bhedā nirayaṁ vajanti tā.
an7.63:13.1	Yācīdha mātā bhaginī sakhīti ca,
an7.63:13.2	‘Dāsī ca bhariyā’ti ca sā pavuccati;
an7.63:13.3	Sīle ṭhitattā cirarattasaṁvutā,
an7.63:13.4	Kāyassa bhedā sugatiṁ vajanti tāti.
an7.63:14.1	Imā kho, sujāte, satta purisassa bhariyāyo.
an7.63:14.2	Tāsaṁ tvaṁ katamā”ti?
an7.63:14.3	“Ajjatagge maṁ, bhante, bhagavā dāsīsamaṁ sāmikassa bhariyaṁ dhāretū”ti.
an7.63:14.4	Dasamaṁ.
an7.64:0.1	Aṅguttara Nikāya 7.64
an7.64:0.2	6. Abyākatavagga
an7.64:0.3	Kodhanasutta
an7.64:1.1	“Sattime, bhikkhave, dhammā sapattakantā sapattakaraṇā kodhanaṁ āgacchanti itthiṁ vā purisaṁ vā.
an7.64:1.2	Katame satta?
an7.64:1.3	Idha, bhikkhave, sapatto sapattassa evaṁ icchati:
an7.64:1.4	‘aho vatāyaṁ dubbaṇṇo assā’ti.
an7.64:1.5	Taṁ kissa hetu?
an7.64:1.6	Na, bhikkhave, sapatto sapattassa vaṇṇavatāya nandati.
an7.64:1.7	Kodhanoyaṁ, bhikkhave, purisapuggalo kodhābhibhūto kodhapareto, kiñcāpi so hoti sunhāto suvilitto kappitakesamassu odātavatthavasano;
an7.64:1.8	atha kho so dubbaṇṇova hoti kodhābhibhūto.
an7.64:1.9	Ayaṁ, bhikkhave, paṭhamo dhammo sapattakanto sapattakaraṇo kodhanaṁ āgacchati itthiṁ vā purisaṁ vā.
an7.64:2.1	Puna caparaṁ, bhikkhave, sapatto sapattassa evaṁ icchati:
an7.64:2.2	‘aho vatāyaṁ dukkhaṁ sayeyyā’ti.
an7.64:2.3	Taṁ kissa hetu?
an7.64:2.4	Na, bhikkhave, sapatto sapattassa sukhaseyyāya nandati.
an7.64:2.5	Kodhanoyaṁ, bhikkhave, purisapuggalo kodhābhibhūto kodhapareto, kiñcāpi so pallaṅke seti gonakatthate paṭalikatthate kadalimigapavarapaccattharaṇe sauttaracchade ubhatolohitakūpadhāne;
an7.64:2.6	atha kho so dukkhaññeva seti kodhābhibhūto.
an7.64:2.7	Ayaṁ, bhikkhave, dutiyo dhammo sapattakanto sapattakaraṇo kodhanaṁ āgacchati itthiṁ vā purisaṁ vā.
an7.64:3.1	Puna caparaṁ, bhikkhave, sapatto sapattassa evaṁ icchati:
an7.64:3.2	‘aho vatāyaṁ na pacurattho assā’ti.
an7.64:3.3	Taṁ kissa hetu?
an7.64:3.4	Na, bhikkhave, sapatto sapattassa pacuratthatāya nandati.
an7.64:3.5	Kodhanoyaṁ, bhikkhave, purisapuggalo kodhābhibhūto kodhapareto, anatthampi gahetvā ‘attho me gahito’ti maññati, atthampi gahetvā ‘anattho me gahito’ti maññati.
an7.64:3.6	Tassime dhammā aññamaññaṁ vipaccanīkā gahitā dīgharattaṁ ahitāya dukkhāya saṁvattanti kodhābhibhūtassa.
an7.64:3.7	Ayaṁ, bhikkhave, tatiyo dhammo sapattakanto sapattakaraṇo kodhanaṁ āgacchati itthiṁ vā purisaṁ vā.
an7.64:4.1	Puna caparaṁ, bhikkhave, sapatto sapattassa evaṁ icchati:
an7.64:4.2	‘aho vatāyaṁ na bhogavā assā’ti.
an7.64:4.3	Taṁ kissa hetu?
an7.64:4.4	Na, bhikkhave, sapatto sapattassa bhogavatāya nandati.
an7.64:4.5	Kodhanassa, bhikkhave, purisapuggalassa kodhābhibhūtassa kodhaparetassa, yepissa te honti bhogā uṭṭhānavīriyādhigatā bāhābalaparicitā sedāvakkhittā dhammikā dhammaladdhā, tepi rājāno rājakosaṁ pavesenti kodhābhibhūtassa.
an7.64:4.6	Ayaṁ, bhikkhave, catuttho dhammo sapattakanto sapattakaraṇo kodhanaṁ āgacchati itthiṁ vā purisaṁ vā.
an7.64:5.1	Puna caparaṁ, bhikkhave, sapatto sapattassa evaṁ icchati:
an7.64:5.2	‘aho vatāyaṁ na yasavā assā’ti.
an7.64:5.3	Taṁ kissa hetu?
an7.64:5.4	Na, bhikkhave, sapatto sapattassa yasavatāya nandati.
an7.64:5.5	Kodhanoyaṁ, bhikkhave, purisapuggalo kodhābhibhūto kodhapareto, yopissa so hoti yaso appamādādhigato, tamhāpi dhaṁsati kodhābhibhūto.
an7.64:5.6	Ayaṁ, bhikkhave, pañcamo dhammo sapattakanto sapattakaraṇo kodhanaṁ āgacchati itthiṁ vā purisaṁ vā.
an7.64:6.1	Puna caparaṁ, bhikkhave, sapatto sapattassa evaṁ icchati:
an7.64:6.2	‘aho vatāyaṁ na mittavā assā’ti.
an7.64:6.3	Taṁ kissa hetu?
an7.64:6.4	Na, bhikkhave, sapatto sapattassa mittavatāya nandati.
an7.64:6.5	Kodhanaṁ, bhikkhave, purisapuggalaṁ kodhābhibhūtaṁ kodhaparetaṁ, yepissa te honti mittāmaccā ñātisālohitā, tepi ārakā parivajjanti kodhābhibhūtaṁ.
an7.64:6.6	Ayaṁ, bhikkhave, chaṭṭho dhammo sapattakanto sapattakaraṇo kodhanaṁ āgacchati itthiṁ vā purisaṁ vā.
an7.64:7.1	Puna caparaṁ, bhikkhave, sapatto sapattassa evaṁ icchati:
an7.64:7.2	‘aho vatāyaṁ kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyyā’ti.
an7.64:7.3	Taṁ kissa hetu?
an7.64:7.4	Na, bhikkhave, sapatto sapattassa sugatigamane nandati.
an7.64:7.5	Kodhanoyaṁ, bhikkhave, purisapuggalo kodhābhibhūto kodhapareto kāyena duccaritaṁ carati, vācāya duccaritaṁ carati, manasā duccaritaṁ carati.
an7.64:7.6	So kāyena duccaritaṁ caritvā vācāya …pe…
an7.64:7.7	kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati kodhābhibhūto.
an7.64:7.8	Ayaṁ, bhikkhave, sattamo dhammo sapattakanto sapattakaraṇo kodhanaṁ āgacchati itthiṁ vā purisaṁ vā.
an7.64:8.1	Ime kho, bhikkhave, satta dhammā sapattakantā sapattakaraṇā kodhanaṁ āgacchanti itthiṁ vā purisaṁ vāti.
an7.64:9.1	Kodhano dubbaṇṇo hoti,
an7.64:9.2	atho dukkhampi seti so;
an7.64:9.3	Atho atthaṁ gahetvāna,
an7.64:9.4	anatthaṁ adhipajjati.
an7.64:10.1	Tato kāyena vācāya,
an7.64:10.2	vadhaṁ katvāna kodhano;
an7.64:10.3	Kodhābhibhūto puriso,
an7.64:10.4	dhanajāniṁ nigacchati.
an7.64:11.1	Kodhasammadasammatto,
an7.64:11.2	āyasakyaṁ nigacchati;
an7.64:11.3	Ñātimittā suhajjā ca,
an7.64:11.4	parivajjanti kodhanaṁ.
an7.64:12.1	Anatthajanano kodho,
an7.64:12.2	kodho cittappakopano;
an7.64:12.3	Bhayamantarato jātaṁ,
an7.64:12.4	taṁ jano nāvabujjhati.
an7.64:13.1	Kuddho atthaṁ na jānāti,
an7.64:13.2	kuddho dhammaṁ na passati;
an7.64:13.3	Andhatamaṁ tadā hoti,
an7.64:13.4	yaṁ kodho sahate naraṁ.
an7.64:14.1	Yaṁ kuddho uparodheti,
an7.64:14.2	sukaraṁ viya dukkaraṁ;
an7.64:14.3	Pacchā so vigate kodhe,
an7.64:14.4	aggidaḍḍhova tappati.
an7.64:15.1	Dummaṅkuyaṁ padasseti,
an7.64:15.2	dhūmaṁ dhūmīva pāvako;
an7.64:15.3	Yato patāyati kodho,
an7.64:15.4	yena kujjhanti mānavā.
an7.64:16.1	Nāssa hirī na ottappaṁ,
an7.64:16.2	na vāco hoti gāravo;
an7.64:16.3	Kodhena abhibhūtassa,
an7.64:16.4	na dīpaṁ hoti kiñcanaṁ.
an7.64:17.1	Tapanīyāni kammāni,
an7.64:17.2	yāni dhammehi ārakā;
an7.64:17.3	Tāni ārocayissāmi,
an7.64:17.4	taṁ suṇātha yathā tathaṁ.
an7.64:18.1	Kuddho hi pitaraṁ hanti,
an7.64:18.2	hanti kuddho samātaraṁ;
an7.64:18.3	Kuddho hi brāhmaṇaṁ hanti,
an7.64:18.4	hanti kuddho puthujjanaṁ.
an7.64:19.1	Yāya mātu bhato poso,
an7.64:19.2	imaṁ lokaṁ avekkhati;
an7.64:19.3	Tampi pāṇadadiṁ santiṁ,
an7.64:19.4	hanti kuddho puthujjano.
an7.64:20.1	Attūpamā hi te sattā,
an7.64:20.2	attā hi paramo piyo;
an7.64:20.3	Hanti kuddho puthuttānaṁ,
an7.64:20.4	nānārūpesu mucchito.
an7.64:21.1	Asinā hanti attānaṁ,
an7.64:21.2	visaṁ khādanti mucchitā;
an7.64:21.3	Rajjuyā bajjha mīyanti,
an7.64:21.4	pabbatāmapi kandare.
an7.64:22.1	Bhūnahaccāni kammāni,
an7.64:22.2	attamāraṇiyāni ca;
an7.64:22.3	Karontā nāvabujjhanti,
an7.64:22.4	kodhajāto parābhavo.
an7.64:23.1	Itāyaṁ kodharūpena,
an7.64:23.2	maccupāso guhāsayo;
an7.64:23.3	Taṁ damena samucchinde,
an7.64:23.4	paññāvīriyena diṭṭhiyā.
an7.64:24.1	Yathā metaṁ akusalaṁ,
an7.64:24.2	samucchindetha paṇḍito;
an7.64:24.3	Tatheva dhamme sikkhetha,
an7.64:24.4	mā no dummaṅkuyaṁ ahu.
an7.64:25.1	Vītakodhā anāyāsā,
an7.64:25.2	Vītalobhā anussukā;
an7.64:25.3	Dantā kodhaṁ pahantvāna,
an7.64:25.4	Parinibbanti anāsavā”ti.
an7.64:25.5	Ekādasamaṁ.
an7.64:25.6	Abyākatavaggo chaṭṭho.
an7.64:26.0	Tassuddānaṁ
an7.64:26.1	Abyākato purisagati,
an7.64:26.2	Tissa sīha arakkhiyaṁ;
an7.64:26.3	Kimilaṁ satta pacalā,
an7.64:26.4	Mettā bhariyā kodhekādasāti.
an7.65:0.1	Aṅguttara Nikāya 7.65
an7.65:0.2	7. Mahāvagga
an7.65:0.3	Hirīottappasutta
an7.65:1.1	“Hirottappe, bhikkhave, asati hirottappavipannassa hatūpaniso hoti indriyasaṁvaro;
an7.65:1.2	indriyasaṁvare asati indriyasaṁvaravipannassa hatūpanisaṁ hoti sīlaṁ;
an7.65:1.3	sīle asati sīlavipannassa hatūpaniso hoti sammāsamādhi;
an7.65:1.4	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ;
an7.65:1.5	yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo;
an7.65:1.6	nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an7.65:1.7	Seyyathāpi, bhikkhave, rukkho sākhāpalāsavipanno.
an7.65:1.8	Tassa papaṭikāpi na pāripūriṁ gacchati, tacopi pheggupi sāropi na pāripūriṁ gacchati.
an7.65:1.9	Evamevaṁ kho, bhikkhave, hirottappe asati hirottappavipannassa hatūpaniso hoti indriyasaṁvaro;
an7.65:1.10	indriyasaṁvare asati indriyasaṁvaravipannassa hatūpanisaṁ hoti sīlaṁ;
an7.65:1.11	sīle asati sīlavipannassa hatūpaniso hoti sammāsamādhi;
an7.65:1.12	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ;
an7.65:1.13	yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo;
an7.65:1.14	nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an7.65:2.1	Hirottappe, bhikkhave, sati hirottappasampannassa upanisasampanno hoti indriyasaṁvaro;
an7.65:2.2	indriyasaṁvare sati indriyasaṁvarasampannassa upanisasampannaṁ hoti sīlaṁ;
an7.65:2.3	sīle sati sīlasampannassa upanisasampanno hoti sammāsamādhi;
an7.65:2.4	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ;
an7.65:2.5	yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo;
an7.65:2.6	nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanaṁ.
an7.65:2.7	Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṁ gacchati, tacopi pheggupi sāropi pāripūriṁ gacchati.
an7.65:2.8	Evamevaṁ kho, bhikkhave, hirottappe sati hirottappasampannassa upanisasampanno hoti …pe…
an7.65:2.9	vimuttiñāṇadassanan”ti.
an7.65:2.10	Paṭhamaṁ.
an7.66:0.1	Aṅguttara Nikāya 7.66
an7.66:0.2	7. Mahāvagga
an7.66:0.3	Sattasūriyasutta
an7.66:1.1	Evaṁ me sutaṁ—
an7.66:1.2	ekaṁ samayaṁ bhagavā vesāliyaṁ viharati ambapālivane.
an7.66:1.3	Tatra kho bhagavā bhikkhū āmantesi:
an7.66:1.4	“bhikkhavo”ti.
an7.66:1.5	“Bhadante”ti te bhikkhū bhagavato paccassosuṁ.
an7.66:1.6	Bhagavā etadavoca:
an7.66:2.1	“Aniccā, bhikkhave, saṅkhārā;
an7.66:2.2	adhuvā, bhikkhave, saṅkhārā;
an7.66:2.3	anassāsikā, bhikkhave, saṅkhārā.
an7.66:2.4	Yāvañcidaṁ, bhikkhave, alameva sabbasaṅkhāresu nibbindituṁ alaṁ virajjituṁ alaṁ vimuccituṁ.
an7.66:3.1	Sineru, bhikkhave, pabbatarājā caturāsītiyojanasahassāni āyāmena, caturāsītiyojanasahassāni vitthārena, caturāsītiyojanasahassāni mahāsamudde ajjhogāḷho, caturāsītiyojanasahassāni mahāsamuddā accuggato.
an7.66:3.2	Hoti kho so, bhikkhave, samayo yaṁ kadāci karahaci dīghassa addhuno accayena bahūni vassāni bahūni vassasatāni bahūni vassasahassāni bahūni vassasatasahassāni devo na vassati.
an7.66:3.3	Deve kho pana, bhikkhave, avassante ye kecime bījagāmabhūtagāmā osadhitiṇavanappatayo te ussussanti visussanti, na bhavanti.
an7.66:3.4	Evaṁ aniccā, bhikkhave, saṅkhārā;
an7.66:3.5	evaṁ adhuvā, bhikkhave, saṅkhārā …pe…
an7.66:3.6	alaṁ vimuccituṁ.
an7.66:4.1	Hoti kho so, bhikkhave, samayo yaṁ kadāci karahaci dīghassa addhuno accayena dutiyo sūriyo pātubhavati.
an7.66:4.2	Dutiyassa, bhikkhave, sūriyassa pātubhāvā yā kāci kunnadiyo kusobbhā tā ussussanti visussanti, na bhavanti.
an7.66:4.3	Evaṁ aniccā, bhikkhave, saṅkhārā …pe…
an7.66:4.4	alaṁ vimuccituṁ.
an7.66:5.1	Hoti kho so, bhikkhave, samayo yaṁ kadāci karahaci dīghassa addhuno accayena tatiyo sūriyo pātubhavati.
an7.66:5.2	Tatiyassa, bhikkhave, sūriyassa pātubhāvā yā kāci mahānadiyo, seyyathidaṁ—
an7.66:5.3	gaṅgā, yamunā, aciravatī, sarabhū, mahī, tā ussussanti visussanti, na bhavanti.
an7.66:5.4	Evaṁ aniccā, bhikkhave, saṅkhārā …pe…
an7.66:5.5	alaṁ vimuccituṁ.
an7.66:6.1	Hoti kho so, bhikkhave, samayo yaṁ kadāci karahaci dīghassa addhuno accayena catuttho sūriyo pātubhavati.
an7.66:6.2	Catutthassa, bhikkhave, sūriyassa pātubhāvā ye te mahāsarā yato imā mahānadiyo pavattanti, seyyathidaṁ—
an7.66:6.3	anotattā, sīhapapātā, rathakārā, kaṇṇamuṇḍā, kuṇālā, chaddantā, mandākiniyā, tā ussussanti visussanti, na bhavanti.
an7.66:6.4	Evaṁ aniccā, bhikkhave, saṅkhārā …pe…
an7.66:6.5	alaṁ vimuccituṁ.
an7.66:7.1	Hoti kho so, bhikkhave, samayo yaṁ kadāci karahaci dīghassa addhuno accayena pañcamo sūriyo pātubhavati.
an7.66:7.2	Pañcamassa, bhikkhave, sūriyassa pātubhāvā yojanasatikānipi mahāsamudde udakāni ogacchanti, dviyojanasatikānipi mahāsamudde udakāni ogacchanti, tiyojanasatikānipi, catuyojanasatikānipi, pañcayojanasatikānipi, chayojanasatikānipi, sattayojanasatikānipi mahāsamudde udakāni ogacchanti;
an7.66:7.3	sattatālampi mahāsamudde udakaṁ saṇṭhāti, chatālampi, pañcatālampi, catutālampi, titālampi, dvitālampi, tālamattampi mahāsamudde udakaṁ saṇṭhāti;
an7.66:7.4	sattaporisampi mahāsamudde udakaṁ saṇṭhāti, chaporisampi, pañcaporisampi, catuporisampi, tiporisampi, dviporisampi, porisampi, aḍḍhaporisampi, kaṭimattampi, jaṇṇukāmattampi, gopphakamattampi mahāsamudde udakaṁ saṇṭhāti.
an7.66:7.5	Seyyathāpi, bhikkhave, saradasamaye thullaphusitake deve vassante tattha tattha gopadesu udakāni ṭhitāni honti;
an7.66:7.6	evamevaṁ kho, bhikkhave, tattha tattha gopphakamattāni mahāsamudde udakāni ṭhitāni honti.
an7.66:7.7	Pañcamassa, bhikkhave, sūriyassa pātubhāvā aṅgulipabbamattampi mahāsamudde udakaṁ na hoti.
an7.66:7.8	Evaṁ aniccā, bhikkhave, saṅkhārā …pe…
an7.66:7.9	alaṁ vimuccituṁ.
an7.66:8.1	Hoti kho so, bhikkhave, samayo yaṁ kadāci karahaci dīghassa addhuno accayena chaṭṭho sūriyo pātubhavati.
an7.66:8.2	Chaṭṭhassa, bhikkhave, sūriyassa pātubhāvā ayañca mahāpathavī sineru ca pabbatarājā dhūmāyanti sandhūmāyanti sampadhūmāyanti.
an7.66:8.3	Seyyathāpi, bhikkhave, kumbhakārapāko ālepito paṭhamaṁ dhūmeti sandhūmeti sampadhūmeti;
an7.66:8.4	evamevaṁ kho, bhikkhave, chaṭṭhassa sūriyassa pātubhāvā ayañca mahāpathavī sineru ca pabbatarājā dhūmāyanti sandhūmāyanti sampadhūmāyanti.
an7.66:8.5	Evaṁ aniccā, bhikkhave, saṅkhārā …pe…
an7.66:8.6	alaṁ vimuccituṁ.
an7.66:9.1	Hoti kho so, bhikkhave, samayo yaṁ kadāci karahaci dīghassa addhuno accayena sattamo sūriyo pātubhavati.
an7.66:9.2	Sattamassa, bhikkhave, sūriyassa pātubhāvā ayañca mahāpathavī sineru ca pabbatarājā ādippanti pajjalanti ekajālā bhavanti.
an7.66:9.3	Imissā ca, bhikkhave, mahāpathaviyā sinerussa ca pabbatarājassa jhāyamānānaṁ dayhamānānaṁ acci vātena khittā yāva brahmalokāpi gacchati.
an7.66:9.4	Sinerussa, bhikkhave, pabbatarājassa jhāyamānassa dayhamānassa vinassamānassa mahatā tejokhandhena abhibhūtassa yojanasatikānipi kūṭāni palujjanti dviyojanasatikānipi, tiyojanasatikānipi, catuyojanasatikānipi, pañcayojanasatikānipi kūṭāni palujjanti.
an7.66:9.5	Imissā ca, bhikkhave, mahāpathaviyā sinerussa ca pabbatarājassa jhāyamānānaṁ dayhamānānaṁ neva chārikā paññāyati na masi.
an7.66:9.6	Seyyathāpi, bhikkhave, sappissa vā telassa vā jhāyamānassa dayhamānassa neva chārikā paññāyati na masi;
an7.66:9.7	evamevaṁ kho, bhikkhave, imissā ca mahāpathaviyā sinerussa ca pabbatarājassa jhāyamānānaṁ dayhamānānaṁ neva chārikā paññāyati na masi.
an7.66:9.8	Evaṁ aniccā, bhikkhave, saṅkhārā;
an7.66:9.9	evaṁ adhuvā, bhikkhave, saṅkhārā;
an7.66:9.10	evaṁ anassāsikā, bhikkhave, saṅkhārā.
an7.66:9.11	Yāvañcidaṁ, bhikkhave, alameva sabbasaṅkhāresu nibbindituṁ alaṁ virajjituṁ alaṁ vimuccituṁ.
an7.66:10.1	Tatra, bhikkhave, ko mantā ko saddhātā:
an7.66:10.2	‘ayañca pathavī sineru ca pabbatarājā dayhissanti vinassissanti, na bhavissantī’ti aññatra diṭṭhapadehi?
an7.66:11.1	Bhūtapubbaṁ, bhikkhave, sunetto nāma satthā ahosi titthakaro kāmesu vītarāgo.
an7.66:11.2	Sunettassa kho pana, bhikkhave, satthuno anekāni sāvakasatāni ahesuṁ.
an7.66:11.3	Sunetto, bhikkhave, satthā sāvakānaṁ brahmalokasahabyatāya dhammaṁ desesi.
an7.66:11.4	Ye kho pana, bhikkhave, sunettassa satthuno brahmalokasahabyatāya dhammaṁ desentassa sabbena sabbaṁ sāsanaṁ ājāniṁsu te kāyassa bhedā paraṁ maraṇā sugatiṁ brahmalokaṁ upapajjiṁsu.
an7.66:11.5	Ye na sabbena sabbaṁ sāsanaṁ ājāniṁsu te kāyassa bhedā paraṁ maraṇā appekacce paranimmitavasavattīnaṁ devānaṁ sahabyataṁ upapajjiṁsu, appekacce nimmānaratīnaṁ devānaṁ sahabyataṁ upapajjiṁsu, appekacce tusitānaṁ devānaṁ sahabyataṁ upapajjiṁsu, appekacce yāmānaṁ devānaṁ sahabyataṁ upapajjiṁsu, appekacce tāvatiṁsānaṁ devānaṁ sahabyataṁ upapajjiṁsu, appekacce cātumahārājikānaṁ devānaṁ sahabyataṁ upapajjiṁsu, appekacce khattiyamahāsālānaṁ sahabyataṁ upapajjiṁsu, appekacce brāhmaṇamahāsālānaṁ sahabyataṁ upapajjiṁsu, appekacce gahapatimahāsālānaṁ sahabyataṁ upapajjiṁsu.
an7.66:12.1	Atha kho, bhikkhave, sunettassa satthuno etadahosi:
an7.66:12.2	‘na kho metaṁ patirūpaṁ yohaṁ sāvakānaṁ samasamagatiyo assaṁ abhisamparāyaṁ, yannūnāhaṁ uttari mettaṁ bhāveyyan’ti.
an7.66:13.1	Atha kho, bhikkhave, sunetto satthā satta vassāni mettaṁ cittaṁ bhāvesi.
an7.66:13.2	Satta vassāni mettaṁ cittaṁ bhāvetvā satta saṁvaṭṭavivaṭṭakappe nayimaṁ lokaṁ punarāgamāsi.
an7.66:13.3	Saṁvaṭṭamāne sudaṁ, bhikkhave, loke ābhassarūpago hoti.
an7.66:13.4	Vivaṭṭamāne loke suññaṁ brahmavimānaṁ upapajjati.
an7.66:13.5	Tatra sudaṁ, bhikkhave, brahmā hoti mahābrahmā abhibhū anabhibhūto aññadatthudaso vasavattī.
an7.66:13.6	Chattiṁsakkhattuṁ kho pana, bhikkhave, sakko ahosi devānamindo.
an7.66:13.7	Anekasatakkhattuṁ rājā ahosi cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato.
an7.66:13.8	Parosahassaṁ kho panassa puttā ahesuṁ sūrā vīraṅgarūpā parasenappamaddanā.
an7.66:13.9	So imaṁ pathaviṁ sāgarapariyantaṁ adaṇḍena asatthena dhammena abhivijiya ajjhāvasi.
an7.66:13.10	So hi nāma, bhikkhave, sunetto satthā evaṁ dīghāyuko samāno evaṁ ciraṭṭhitiko aparimutto ahosi:
an7.66:13.11	jātiyā jarāya maraṇena sokehi paridevehi dukkhehi domanassehi upāyāsehi, ‘aparimutto dukkhasmā’ti vadāmi.
an7.66:14.1	Taṁ kissa hetu?
an7.66:14.2	Catunnaṁ dhammānaṁ ananubodhā appaṭivedhā.
an7.66:14.3	Katamesaṁ catunnaṁ?
an7.66:14.4	Ariyassa, bhikkhave, sīlassa ananubodhā appaṭivedhā, ariyassa samādhissa ananubodhā appaṭivedhā, ariyāya paññāya ananubodhā appaṭivedhā, ariyāya vimuttiyā ananubodhā appaṭivedhā.
an7.66:14.5	Tayidaṁ, bhikkhave, ariyaṁ sīlaṁ anubuddhaṁ paṭividdhaṁ, ariyo samādhi anubodho paṭividdho, ariyā paññā anubodhā paṭividdhā, ariyā vimutti anubodhā paṭividdhā, ucchinnā bhavataṇhā, khīṇā bhavanetti, natthi dāni punabbhavo”ti.
an7.66:14.6	Idamavoca bhagavā.
an7.66:14.7	Idaṁ vatvāna sugato athāparaṁ etadavoca satthā:
an7.66:15.1	“Sīlaṁ samādhi paññā ca,
an7.66:15.2	vimutti ca anuttarā;
an7.66:15.3	Anubuddhā ime dhammā,
an7.66:15.4	gotamena yasassinā.
an7.66:16.1	Iti buddho abhiññāya,
an7.66:16.2	dhammamakkhāsi bhikkhunaṁ;
an7.66:16.3	Dukkhassantakaro satthā,
an7.66:16.4	cakkhumā parinibbuto”ti.
an7.66:16.5	Dutiyaṁ.
an7.67:0.1	Aṅguttara Nikāya 7.67
an7.67:0.2	7. Mahāvagga
an7.67:0.3	Nagaropamasutta
an7.67:1.1	“Yato kho, bhikkhave, rañño paccantimaṁ nagaraṁ sattahi nagaraparikkhārehi suparikkhataṁ hoti, catunnañca āhārānaṁ nikāmalābhī hoti akicchalābhī akasiralābhī.
an7.67:1.2	Idaṁ vuccati, bhikkhave, rañño paccantimaṁ nagaraṁ akaraṇīyaṁ bāhirehi paccatthikehi paccāmittehi.
an7.67:2.1	Katamehi sattahi nagaraparikkhārehi suparikkhataṁ hoti?
an7.67:2.2	Idha, bhikkhave, rañño paccantime nagare esikā hoti gambhīranemā sunikhātā acalā asampavedhī.
an7.67:2.3	Iminā paṭhamena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya.
an7.67:3.1	Puna caparaṁ, bhikkhave, rañño paccantime nagare parikkhā hoti gambhīrā ceva vitthatā ca.
an7.67:3.2	Iminā dutiyena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya.
an7.67:4.1	Puna caparaṁ, bhikkhave, rañño paccantime nagare anupariyāyapatho hoti ucco ceva vitthato ca.
an7.67:4.2	Iminā tatiyena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya.
an7.67:5.1	Puna caparaṁ, bhikkhave, rañño paccantime nagare bahuṁ āvudhaṁ sannicitaṁ hoti salākañceva jevanikañca.
an7.67:5.2	Iminā catutthena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya.
an7.67:6.1	Puna caparaṁ, bhikkhave, rañño paccantime nagare bahubalakāyo paṭivasati, seyyathidaṁ—
an7.67:6.2	hatthārohā assārohā rathikā dhanuggahā celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsakaputtā.
an7.67:6.3	Iminā pañcamena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya.
an7.67:7.1	Puna caparaṁ, bhikkhave, rañño paccantime nagare dovāriko hoti paṇḍito byatto medhāvī aññātānaṁ nivāretā ñātānaṁ pavesetā.
an7.67:7.2	Iminā chaṭṭhena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya.
an7.67:8.1	Puna caparaṁ, bhikkhave, rañño paccantime nagare pākāro hoti ucco ceva vitthato ca vāsanalepanasampanno ca.
an7.67:8.2	Iminā sattamena nagaraparikkhārena suparikkhataṁ hoti rañño paccantimaṁ nagaraṁ abbhantarānaṁ guttiyā bāhirānaṁ paṭighātāya.
an7.67:8.3	Imehi sattahi nagaraparikkhārehi suparikkhataṁ hoti.
an7.67:9.1	Katamesaṁ catunnaṁ āhārānaṁ nikāmalābhī hoti akicchalābhī akasiralābhī?
an7.67:9.2	Idha, bhikkhave, rañño paccantime nagare bahuṁ tiṇakaṭṭhodakaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya.
an7.67:10.1	Puna caparaṁ, bhikkhave, rañño paccantime nagare bahuṁ sāliyavakaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya.
an7.67:11.1	Puna caparaṁ, bhikkhave, rañño paccantime nagare bahuṁ tilamuggamāsāparaṇṇaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya.
an7.67:12.1	Puna caparaṁ, bhikkhave, rañño paccantime nagare bahuṁ bhesajjaṁ sannicitaṁ hoti, seyyathidaṁ—
an7.67:12.2	sappi navanītaṁ telaṁ madhu phāṇitaṁ loṇaṁ abbhantarānaṁ ratiyā aparitassāya phāsuvihārāya bāhirānaṁ paṭighātāya.
an7.67:12.3	Imesaṁ kho, bhikkhave, catunnaṁ āhārānaṁ nikāmalābhī hoti akicchalābhī akasiralābhī.
an7.67:13.1	Yato kho, bhikkhave, rañño paccantimaṁ nagaraṁ imehi sattahi nagaraparikkhārehi suparikkhataṁ hoti, imesañca catunnaṁ āhārānaṁ nikāmalābhī hoti akicchalābhī akasiralābhī.
an7.67:13.2	Idaṁ vuccati, bhikkhave, rañño paccantimaṁ nagaraṁ akaraṇīyaṁ bāhirehi paccatthikehi paccāmittehi.
an7.67:13.3	Evamevaṁ kho, bhikkhave, yato ariyasāvako sattahi saddhammehi samannāgato hoti, catunnañca jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an7.67:13.4	Ayaṁ vuccati, bhikkhave, ariyasāvako akaraṇīyo mārassa akaraṇīyo pāpimato.
an7.67:13.5	Katamehi sattahi saddhammehi samannāgato hoti?
an7.67:14.1	Seyyathāpi, bhikkhave, rañño paccantime nagare esikā hoti gambhīranemā sunikhātā acalā asampavedhī abbhantarānaṁ guttiyā bāhirānaṁ paṭighātāya.
an7.67:14.2	Evamevaṁ kho, bhikkhave, ariyasāvako saddho hoti, saddahati tathāgatassa bodhiṁ
an7.67:14.3	‘itipi so …pe… buddho bhagavā’ti.
an7.67:14.4	Saddhesiko, bhikkhave, ariyasāvako akusalaṁ pajahati, kusalaṁ bhāveti;
an7.67:14.5	sāvajjaṁ pajahati, anavajjaṁ bhāveti;
an7.67:14.6	suddhaṁ attānaṁ pariharati.
an7.67:14.7	Iminā paṭhamena saddhammena samannāgato hoti.
an7.67:15.1	Seyyathāpi, bhikkhave, rañño paccantime nagare parikkhā hoti gambhīrā ceva vitthatā ca abbhantarānaṁ guttiyā bāhirānaṁ paṭighātāya.
an7.67:15.2	Evamevaṁ kho, bhikkhave, ariyasāvako hirīmā hoti, hirīyati kāyaduccaritena vacīduccaritena manoduccaritena, hirīyati pāpakānaṁ akusalānaṁ dhammānaṁ samāpattiyā.
an7.67:15.3	Hirīparikkho kho, bhikkhave, ariyasāvako akusalaṁ pajahati, kusalaṁ bhāveti;
an7.67:15.4	sāvajjaṁ pajahati, anavajjaṁ bhāveti;
an7.67:15.5	suddhaṁ attānaṁ pariharati.
an7.67:15.6	Iminā dutiyena saddhammena samannāgato hoti.
an7.67:16.1	Seyyathāpi, bhikkhave, rañño paccantime nagare anupariyāyapatho hoti ucco ceva vitthato ca abbhantarānaṁ guttiyā bāhirānaṁ paṭighātāya.
an7.67:16.2	Evamevaṁ, kho, bhikkhave, ariyasāvako ottappī hoti, ottappati kāyaduccaritena vacīduccaritena manoduccaritena, ottappati pāpakānaṁ akusalānaṁ dhammānaṁ samāpattiyā.
an7.67:16.3	Ottappapariyāyapatho, bhikkhave, ariyasāvako akusalaṁ pajahati, kusalaṁ bhāveti;
an7.67:16.4	sāvajjaṁ pajahati, anavajjaṁ bhāveti;
an7.67:16.5	suddhaṁ attānaṁ pariharati.
an7.67:16.6	Iminā tatiyena saddhammena samannāgato hoti.
an7.67:17.1	Seyyathāpi, bhikkhave, rañño paccantime nagare bahuṁ āvudhaṁ sannicitaṁ hoti salākañceva jevanikañca abbhantarānaṁ guttiyā bāhirānaṁ paṭighātāya.
an7.67:17.2	Evamevaṁ kho, bhikkhave, ariyasāvako bahussuto hoti …pe… diṭṭhiyā suppaṭividdhā.
an7.67:17.3	Sutāvudho, bhikkhave, ariyasāvako akusalaṁ pajahati, kusalaṁ bhāveti;
an7.67:17.4	sāvajjaṁ pajahati, anavajjaṁ bhāveti;
an7.67:17.5	suddhaṁ attānaṁ pariharati.
an7.67:17.6	Iminā catutthena saddhammena samannāgato hoti.
an7.67:18.1	Seyyathāpi, bhikkhave, rañño paccantime nagare bahubalakāyo paṭivasati, seyyathidaṁ—
an7.67:18.2	hatthārohā assārohā rathikā dhanuggahā celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsakaputtā abbhantarānaṁ guttiyā bāhirānaṁ paṭighātāya.
an7.67:18.3	Evamevaṁ kho, bhikkhave, ariyasāvako āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an7.67:18.4	Vīriyabalakāyo, bhikkhave, ariyasāvako akusalaṁ pajahati, kusalaṁ bhāveti;
an7.67:18.5	sāvajjaṁ pajahati, anavajjaṁ bhāveti;
an7.67:18.6	suddhaṁ attānaṁ pariharati.
an7.67:18.7	Iminā pañcamena saddhammena samannāgato hoti.
an7.67:19.1	Seyyathāpi, bhikkhave, rañño paccantime nagare dovāriko hoti paṇḍito byatto medhāvī aññātānaṁ nivāretā ñātānaṁ pavesetā abbhantarānaṁ guttiyā bāhirānaṁ paṭighātāya.
an7.67:19.2	Evamevaṁ kho, bhikkhave, ariyasāvako satimā hoti paramena satinepakkena samannāgato cirakatampi cirabhāsitampi saritā anussaritā.
an7.67:19.3	Satidovāriko, bhikkhave, ariyasāvako akusalaṁ pajahati, kusalaṁ bhāveti;
an7.67:19.4	sāvajjaṁ pajahati, anavajjaṁ bhāveti;
an7.67:19.5	suddhaṁ attānaṁ pariharati.
an7.67:19.6	Iminā chaṭṭhena saddhammena samannāgato hoti.
an7.67:20.1	Seyyathāpi, bhikkhave, rañño paccantime nagare pākāro hoti ucco ceva vitthato ca vāsanalepanasampanno ca abbhantarānaṁ guttiyā bāhirānaṁ paṭighātāya.
an7.67:20.2	Evamevaṁ kho, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an7.67:20.3	Paññāvāsanalepanasampanno, bhikkhave, ariyasāvako akusalaṁ pajahati, kusalaṁ bhāveti;
an7.67:20.4	sāvajjaṁ pajahati, anavajjaṁ bhāveti;
an7.67:20.5	suddhaṁ attānaṁ pariharati.
an7.67:20.6	Iminā sattamena saddhammena samannāgato hoti.
an7.67:20.7	Imehi sattahi saddhammehi samannāgato hoti.
an7.67:21.1	Katamesaṁ catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī?
an7.67:21.2	Seyyathāpi, bhikkhave, rañño paccantime nagare bahuṁ tiṇakaṭṭhodakaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya.
an7.67:21.3	Evamevaṁ kho, bhikkhave, ariyasāvako vivicceva kāmehi …pe… paṭhamaṁ jhānaṁ upasampajja viharati
an7.67:21.4	attano ratiyā aparitassāya phāsuvihārāya okkamanāya nibbānassa.
an7.67:22.1	Seyyathāpi, bhikkhave, rañño paccantime nagare bahuṁ sāliyavakaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya.
an7.67:22.2	Evamevaṁ kho, bhikkhave, ariyasāvako vitakkavicārānaṁ vūpasamā …pe… dutiyaṁ jhānaṁ upasampajja viharati
an7.67:22.3	attano ratiyā aparitassāya phāsuvihārāya okkamanāya nibbānassa.
an7.67:23.1	Seyyathāpi, bhikkhave, rañño paccantime nagare bahuṁ tilamuggamāsāparaṇṇaṁ sannicitaṁ hoti abbhantarānaṁ ratiyā aparitassāya phāsuvihārāya bāhirānaṁ paṭighātāya.
an7.67:23.2	Evamevaṁ kho, bhikkhave, ariyasāvako pītiyā ca virāgā …pe… tatiyaṁ jhānaṁ upasampajja viharati
an7.67:23.3	attano ratiyā aparitassāya phāsuvihārāya okkamanāya nibbānassa.
an7.67:24.1	Seyyathāpi, bhikkhave, rañño paccantime nagare bahuṁ bhesajjaṁ sannicitaṁ hoti, seyyathidaṁ—
an7.67:24.2	sappi navanītaṁ telaṁ madhu phāṇitaṁ loṇaṁ abbhantarānaṁ ratiyā aparitassāya phāsuvihārāya bāhirānaṁ paṭighātāya.
an7.67:24.3	Evamevaṁ kho, bhikkhave, ariyasāvako sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati
an7.67:24.4	attano ratiyā aparitassāya phāsuvihārāya okkamanāya nibbānassa.
an7.67:24.5	Imesaṁ catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an7.67:25.1	Yato kho, bhikkhave, ariyasāvako imehi sattahi saddhammehi samannāgato hoti, imesañca catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an7.67:25.2	Ayaṁ vuccati, bhikkhave, ariyasāvako akaraṇīyo mārassa akaraṇīyo pāpimato”ti.
an7.67:25.3	Tatiyaṁ.
an7.68:0.1	Aṅguttara Nikāya 7.68
an7.68:0.2	7. Mahāvagga
an7.68:0.3	Dhammaññūsutta
an7.68:1.1	“Sattahi, bhikkhave, dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an7.68:1.2	Katamehi sattahi?
an7.68:1.3	Idha, bhikkhave, bhikkhu dhammaññū ca hoti atthaññū ca attaññū ca mattaññū ca kālaññū ca parisaññū ca puggalaparoparaññū ca.
an7.68:2.1	Kathañca, bhikkhave, bhikkhu dhammaññū hoti?
an7.68:2.2	Idha, bhikkhave, bhikkhu dhammaṁ jānāti—
an7.68:2.3	suttaṁ geyyaṁ veyyākaraṇaṁ gāthaṁ udānaṁ itivuttakaṁ jātakaṁ abbhutadhammaṁ vedallaṁ.
an7.68:2.4	No ce, bhikkhave, bhikkhu dhammaṁ jāneyya—
an7.68:2.5	suttaṁ geyyaṁ …pe… abbhutadhammaṁ vedallaṁ, nayidha ‘dhammaññū’ti vucceyya.
an7.68:2.6	Yasmā ca kho, bhikkhave, bhikkhu dhammaṁ jānāti—
an7.68:2.7	suttaṁ geyyaṁ …pe… abbhutadhammaṁ vedallaṁ, tasmā ‘dhammaññū’ti vuccati.
an7.68:2.8	Iti dhammaññū.
an7.68:3.1	Atthaññū ca kathaṁ hoti?
an7.68:3.2	Idha, bhikkhave, bhikkhu tassa tasseva bhāsitassa atthaṁ jānāti:
an7.68:3.3	‘ayaṁ imassa bhāsitassa attho, ayaṁ imassa bhāsitassa attho’ti.
an7.68:3.4	No ce, bhikkhave, bhikkhu tassa tasseva bhāsitassa atthaṁ jāneyya:
an7.68:3.5	‘ayaṁ imassa bhāsitassa attho, ayaṁ imassa bhāsitassa attho’ti, nayidha ‘atthaññū’ti vucceyya.
an7.68:3.6	Yasmā ca kho, bhikkhave, bhikkhu tassa tasseva bhāsitassa atthaṁ jānāti:
an7.68:3.7	‘ayaṁ imassa bhāsitassa attho, ayaṁ imassa bhāsitassa attho’ti, tasmā ‘atthaññū’ti vuccati.
an7.68:3.8	Iti dhammaññū, atthaññū.
an7.68:4.1	Attaññū ca kathaṁ hoti?
an7.68:4.2	Idha, bhikkhave, bhikkhu attānaṁ jānāti:
an7.68:4.3	‘ettakomhi saddhāya sīlena sutena cāgena paññāya paṭibhānenā’ti.
an7.68:4.4	No ce, bhikkhave, bhikkhu attānaṁ jāneyya:
an7.68:4.5	‘ettakomhi saddhāya sīlena sutena cāgena paññāya paṭibhānenā’ti, nayidha ‘attaññū’ti vucceyya.
an7.68:4.6	Yasmā ca, bhikkhave, bhikkhu attānaṁ jānāti:
an7.68:4.7	‘ettakomhi saddhāya sīlena sutena cāgena paññāya paṭibhānenā’ti, tasmā ‘attaññū’ti vuccati.
an7.68:4.8	Iti dhammaññū, atthaññū, attaññū.
an7.68:5.1	Mattaññū ca kathaṁ hoti?
an7.68:5.2	Idha, bhikkhave, bhikkhu mattaṁ jānāti cīvarapiṇḍapātasenāsanagilānappaccayabhesajjaparikkhārānaṁ paṭiggahaṇāya.
an7.68:5.3	No ce, bhikkhave, bhikkhu mattaṁ jāneyya cīvarapiṇḍapātasenāsanagilānappaccayabhesajjaparikkhārānaṁ paṭiggahaṇāya, nayidha ‘mattaññū’ti vucceyya.
an7.68:5.4	Yasmā ca kho, bhikkhave, bhikkhu mattaṁ jānāti cīvarapiṇḍapātasenāsanagilānappaccayabhesajjaparikkhārānaṁ paṭiggahaṇāya, tasmā ‘mattaññū’ti vuccati.
an7.68:5.5	Iti dhammaññū, atthaññū, attaññū, mattaññū.
an7.68:6.1	Kālaññū ca kathaṁ hoti?
an7.68:6.2	Idha, bhikkhave, bhikkhu kālaṁ jānāti:
an7.68:6.3	‘ayaṁ kālo uddesassa, ayaṁ kālo paripucchāya, ayaṁ kālo yogassa, ayaṁ kālo paṭisallānassā’ti.
an7.68:6.4	No ce, bhikkhave, bhikkhu kālaṁ jāneyya:
an7.68:6.5	‘ayaṁ kālo uddesassa, ayaṁ kālo paripucchāya, ayaṁ kālo yogassa, ayaṁ kālo paṭisallānassā’ti, nayidha ‘kālaññū’ti vucceyya.
an7.68:6.6	Yasmā ca kho, bhikkhave, bhikkhu kālaṁ jānāti:
an7.68:6.7	‘ayaṁ kālo uddesassa, ayaṁ kālo paripucchāya, ayaṁ kālo yogassa, ayaṁ kālo paṭisallānassā’ti, tasmā ‘kālaññū’ti vuccati.
an7.68:6.8	Iti dhammaññū, atthaññū, attaññū, mattaññū, kālaññū.
an7.68:7.1	Parisaññū ca kathaṁ hoti?
an7.68:7.2	Idha, bhikkhave, bhikkhu parisaṁ jānāti:
an7.68:7.3	‘ayaṁ khattiyaparisā, ayaṁ brāhmaṇaparisā, ayaṁ gahapatiparisā, ayaṁ samaṇaparisā.
an7.68:7.4	Tattha evaṁ upasaṅkamitabbaṁ, evaṁ ṭhātabbaṁ, evaṁ kattabbaṁ, evaṁ nisīditabbaṁ, evaṁ bhāsitabbaṁ, evaṁ tuṇhī bhavitabban’ti.
an7.68:7.5	No ce, bhikkhave, bhikkhu parisaṁ jāneyya:
an7.68:7.6	‘ayaṁ khattiyaparisā …pe…
an7.68:7.7	evaṁ tuṇhī bhavitabban’ti, nayidha ‘parisaññū’ti vucceyya.
an7.68:7.8	Yasmā ca kho, bhikkhave, bhikkhu parisaṁ jānāti:
an7.68:7.9	‘ayaṁ khattiyaparisā, ayaṁ brāhmaṇaparisā, ayaṁ gahapatiparisā, ayaṁ samaṇaparisā.
an7.68:7.10	Tattha evaṁ upasaṅkamitabbaṁ, evaṁ ṭhātabbaṁ, evaṁ kattabbaṁ, evaṁ nisīditabbaṁ, evaṁ bhāsitabbaṁ, evaṁ tuṇhī bhavitabban’ti, tasmā ‘parisaññū’ti vuccati.
an7.68:7.11	Iti dhammaññū, atthaññū, attaññū, mattaññū, kālaññū, parisaññū.
an7.68:8.1	Puggalaparoparaññū ca kathaṁ hoti?
an7.68:8.2	Idha, bhikkhave, bhikkhuno dvayena puggalā viditā honti.
an7.68:8.3	Dve puggalā—
an7.68:8.4	eko ariyānaṁ dassanakāmo, eko ariyānaṁ na dassanakāmo.
an7.68:8.5	Yvāyaṁ puggalo ariyānaṁ na dassanakāmo,
an7.68:8.6	evaṁ so tenaṅgena gārayho.
an7.68:8.7	Yvāyaṁ puggalo ariyānaṁ dassanakāmo,
an7.68:8.8	evaṁ so tenaṅgena pāsaṁso.
an7.68:9.1	Dve puggalā ariyānaṁ dassanakāmā—
an7.68:9.2	eko saddhammaṁ sotukāmo, eko saddhammaṁ na sotukāmo.
an7.68:9.3	Yvāyaṁ puggalo saddhammaṁ na sotukāmo,
an7.68:9.4	evaṁ so tenaṅgena gārayho.
an7.68:9.5	Yvāyaṁ puggalo saddhammaṁ sotukāmo,
an7.68:9.6	evaṁ so tenaṅgena pāsaṁso.
an7.68:10.1	Dve puggalā saddhammaṁ sotukāmā—
an7.68:10.2	eko ohitasoto dhammaṁ suṇāti, eko anohitasoto dhammaṁ suṇāti.
an7.68:10.3	Yvāyaṁ puggalo anohitasoto dhammaṁ suṇāti,
an7.68:10.4	evaṁ so tenaṅgena gārayho.
an7.68:10.5	Yvāyaṁ puggalo ohitasoto dhammaṁ suṇāti,
an7.68:10.6	evaṁ so tenaṅgena pāsaṁso.
an7.68:11.1	Dve puggalā ohitasotā dhammaṁ suṇanti—
an7.68:11.2	eko sutvā dhammaṁ dhāreti, eko sutvā dhammaṁ na dhāreti.
an7.68:11.3	Yvāyaṁ puggalo sutvā na dhammaṁ dhāreti,
an7.68:11.4	evaṁ so tenaṅgena gārayho.
an7.68:11.5	Yvāyaṁ puggalo sutvā dhammaṁ dhāreti,
an7.68:11.6	evaṁ so tenaṅgena pāsaṁso.
an7.68:12.1	Dve puggalā sutvā dhammaṁ dhārenti—
an7.68:12.2	eko dhātānaṁ dhammānaṁ atthaṁ upaparikkhati, eko dhātānaṁ dhammānaṁ atthaṁ na upaparikkhati.
an7.68:12.3	Yvāyaṁ puggalo dhātānaṁ dhammānaṁ atthaṁ na upaparikkhati,
an7.68:12.4	evaṁ so tenaṅgena gārayho.
an7.68:12.5	Yvāyaṁ puggalo dhātānaṁ dhammānaṁ atthaṁ upaparikkhati,
an7.68:12.6	evaṁ so tenaṅgena pāsaṁso.
an7.68:13.1	Dve puggalā dhātānaṁ dhammānaṁ atthaṁ upaparikkhanti—
an7.68:13.2	eko atthamaññāya dhammamaññāya dhammānudhammappaṭipanno, eko atthamaññāya dhammamaññāya na dhammānudhammappaṭipanno.
an7.68:13.3	Yvāyaṁ puggalo atthamaññāya dhammamaññāya na dhammānudhammappaṭipanno,
an7.68:13.4	evaṁ so tenaṅgena gārayho.
an7.68:13.5	Yvāyaṁ puggalo atthamaññāya dhammamaññāya dhammānudhammappaṭipanno,
an7.68:13.6	evaṁ so tenaṅgena pāsaṁso.
an7.68:14.1	Dve puggalā atthamaññāya dhammamaññāya dhammānudhammappaṭipannā—
an7.68:14.2	eko attahitāya paṭipanno no parahitāya, eko attahitāya ca paṭipanno parahitāya ca.
an7.68:14.3	Yvāyaṁ puggalo attahitāya paṭipanno no parahitāya,
an7.68:14.4	evaṁ so tenaṅgena gārayho.
an7.68:14.5	Yvāyaṁ puggalo attahitāya ca paṭipanno parahitāya ca,
an7.68:14.6	evaṁ so tenaṅgena pāsaṁso.
an7.68:15.1	Evaṁ kho, bhikkhave, bhikkhuno dvayena puggalā viditā honti.
an7.68:16.1	Evaṁ, bhikkhave, bhikkhu puggalaparoparaññū hoti.
an7.68:16.2	Imehi kho, bhikkhave, sattahi dhammehi samannāgato bhikkhu āhuneyyo hoti pāhuneyyo …pe… anuttaraṁ puññakkhettaṁ lokassā”ti.
an7.68:16.3	Catutthaṁ.
an7.69:0.1	Aṅguttara Nikāya 7.69
an7.69:0.2	7. Mahāvagga
an7.69:0.3	Pāricchattakasutta
an7.69:1.1	“Yasmiṁ, bhikkhave, samaye devānaṁ tāvatiṁsānaṁ pāricchattako koviḷāro paṇḍupalāso hoti, attamanā, bhikkhave, devā tāvatiṁsā tasmiṁ samaye honti:
an7.69:1.2	‘paṇḍupalāso dāni pāricchattako koviḷāro nacirasseva dāni pannapalāso bhavissatī’ti.
an7.69:2.1	Yasmiṁ, bhikkhave, samaye devānaṁ tāvatiṁsānaṁ pāricchattako koviḷāro pannapalāso hoti, attamanā, bhikkhave, devā tāvatiṁsā tasmiṁ samaye honti:
an7.69:2.2	‘pannapalāso dāni pāricchattako koviḷāro nacirasseva dāni jālakajāto bhavissatī’ti.
an7.69:3.1	Yasmiṁ, bhikkhave, samaye devānaṁ tāvatiṁsānaṁ pāricchattako koviḷāro jālakajāto hoti, attamanā, bhikkhave, devā tāvatiṁsā tasmiṁ samaye honti:
an7.69:3.2	‘jālakajāto dāni pāricchattako koviḷāro nacirasseva dāni khārakajāto bhavissatī’ti.
an7.69:4.1	Yasmiṁ, bhikkhave, samaye devānaṁ tāvatiṁsānaṁ pāricchattako koviḷāro khārakajāto hoti, attamanā, bhikkhave, devā tāvatiṁsā tasmiṁ samaye honti:
an7.69:4.2	‘khārakajāto dāni pāricchattako koviḷāro nacirasseva dāni kuṭumalakajāto bhavissatī’ti.
an7.69:5.1	Yasmiṁ, bhikkhave, samaye devānaṁ tāvatiṁsānaṁ pāricchattako koviḷāro kuṭumalakajāto hoti, attamanā, bhikkhave, devā tāvatiṁsā tasmiṁ samaye honti:
an7.69:5.2	‘kuṭumalakajāto dāni pāricchattako koviḷāro nacirasseva dāni korakajāto bhavissatī’ti.
an7.69:6.1	Yasmiṁ, bhikkhave, samaye devānaṁ tāvatiṁsānaṁ pāricchattako koviḷāro korakajāto hoti, attamanā, bhikkhave, devā tāvatiṁsā tasmiṁ samaye honti:
an7.69:6.2	‘korakajāto dāni pāricchattako koviḷāro nacirasseva dāni sabbaphāliphullo bhavissatī’ti.
an7.69:7.1	Yasmiṁ, bhikkhave, samaye devānaṁ tāvatiṁsānaṁ pāricchattako koviḷāro sabbaphāliphullo hoti, attamanā, bhikkhave, devā tāvatiṁsā pāricchattakassa koviḷārassa mūle dibbe cattāro māse pañcahi kāmaguṇehi samappitā samaṅgībhūtā paricārenti. Sabbaphāliphullassa kho pana, bhikkhave, pāricchattakassa koviḷārassa samantā paññāsayojanāni ābhāya phuṭaṁ hoti, anuvātaṁ yojanasataṁ gandho gacchati,
an7.69:7.2	ayamānubhāvo pāricchattakassa koviḷārassa.
an7.69:8.1	Evamevaṁ kho, bhikkhave, yasmiṁ samaye ariyasāvako agārasmā anagāriyaṁ pabbajjāya ceteti, paṇḍupalāso, bhikkhave, ariyasāvako tasmiṁ samaye hoti devānaṁva tāvatiṁsānaṁ pāricchattako koviḷāro.
an7.69:9.1	Yasmiṁ, bhikkhave, samaye ariyasāvako kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajito hoti, pannapalāso, bhikkhave, ariyasāvako tasmiṁ samaye hoti devānaṁva tāvatiṁsānaṁ pāricchattako koviḷāro.
an7.69:10.1	Yasmiṁ, bhikkhave, samaye ariyasāvako vivicceva kāmehi …pe… paṭhamaṁ jhānaṁ upasampajja viharati,
an7.69:10.2	jālakajāto, bhikkhave, ariyasāvako tasmiṁ samaye hoti devānaṁva tāvatiṁsānaṁ pāricchattako koviḷāro.
an7.69:11.1	Yasmiṁ, bhikkhave, samaye ariyasāvako vitakkavicārānaṁ vūpasamā …pe… dutiyaṁ jhānaṁ upasampajja viharati,
an7.69:11.2	khārakajāto, bhikkhave, ariyasāvako tasmiṁ samaye hoti devānaṁva tāvatiṁsānaṁ pāricchattako koviḷāro.
an7.69:12.1	Yasmiṁ, bhikkhave, samaye ariyasāvako pītiyā ca virāgā …pe… tatiyaṁ jhānaṁ upasampajja viharati,
an7.69:12.2	kuṭumalakajāto, bhikkhave, ariyasāvako tasmiṁ samaye hoti devānaṁva tāvatiṁsānaṁ pāricchattako koviḷāro.
an7.69:13.1	Yasmiṁ, bhikkhave, samaye ariyasāvako sukhassa ca pahānā dukkhassa ca pahānā …pe… catutthaṁ jhānaṁ upasampajja viharati,
an7.69:13.2	korakajāto, bhikkhave, ariyasāvako tasmiṁ samaye hoti devānaṁva tāvatiṁsānaṁ pāricchattako koviḷāro.
an7.69:14.1	Yasmiṁ, bhikkhave, samaye ariyasāvako āsavānaṁ khayā …pe… sacchikatvā upasampajja viharati,
an7.69:14.2	sabbaphāliphullo, bhikkhave, ariyasāvako tasmiṁ samaye hoti devānaṁva tāvatiṁsānaṁ pāricchattako koviḷāro.
an7.69:15.1	Tasmiṁ, bhikkhave, samaye bhummā devā saddamanussāventi:
an7.69:15.2	‘eso itthannāmo āyasmā itthannāmassa āyasmato saddhivihāriko amukamhā gāmā vā nigamā vā agārasmā anagāriyaṁ pabbajito āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.
an7.69:16.1	Bhummānaṁ devānaṁ saddaṁ sutvā cātumahārājikā devā …pe…
an7.69:16.2	tāvatiṁsā devā …
an7.69:16.3	yāmā devā …
an7.69:16.4	tusitā devā …
an7.69:16.5	nimmānaratī devā …
an7.69:16.6	paranimmitavasavattī devā …
an7.69:16.7	brahmakāyikā devā saddamanussāventi:
an7.69:16.8	‘eso itthannāmo āyasmā itthannāmassa āyasmato saddhivihāriko amukamhā gāmā vā nigamā vā agārasmā anagāriyaṁ pabbajito āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’ti.
an7.69:16.9	Itiha tena khaṇena tena muhuttena yāva brahmalokā saddo abbhuggacchati,
an7.69:16.10	ayamānubhāvo khīṇāsavassa bhikkhuno”ti.
an7.69:16.11	Pañcamaṁ.
an7.70:0.1	Aṅguttara Nikāya 7.70
an7.70:0.2	7. Mahāvagga
an7.70:0.3	Sakkaccasutta
an7.70:1.1	Atha kho āyasmato sāriputtassa rahogatassa paṭisallīnassa evaṁ cetaso parivitakko udapādi:
an7.70:1.2	“kiṁ nu kho, bhikkhu, sakkatvā garuṁ katvā upanissāya viharanto akusalaṁ pajaheyya, kusalaṁ bhāveyyā”ti?
an7.70:1.3	Atha kho āyasmato sāriputtassa etadahosi:
an7.70:1.4	“satthāraṁ kho, bhikkhu, sakkatvā garuṁ katvā upanissāya viharanto akusalaṁ pajaheyya, kusalaṁ bhāveyya.
an7.70:1.5	Dhammaṁ kho, bhikkhu …pe…
an7.70:1.6	saṅghaṁ kho, bhikkhu …pe…
an7.70:1.7	sikkhaṁ kho, bhikkhu …pe…
an7.70:1.8	samādhiṁ kho, bhikkhu …pe…
an7.70:1.9	appamādaṁ kho, bhikkhu …pe…
an7.70:1.10	paṭisanthāraṁ kho, bhikkhu sakkatvā garuṁ katvā upanissāya viharanto akusalaṁ pajaheyya, kusalaṁ bhāveyyā”ti.
an7.70:2.1	Atha kho āyasmato sāriputtassa etadahosi:
an7.70:2.2	“ime kho me dhammā parisuddhā pariyodātā, yannūnāhaṁ ime dhamme gantvā bhagavato āroceyyaṁ.
an7.70:2.3	Evaṁ me ime dhammā parisuddhā ceva bhavissanti parisuddhasaṅkhātatarā ca.
an7.70:2.4	Seyyathāpi nāma puriso suvaṇṇanikkhaṁ adhigaccheyya parisuddhaṁ pariyodātaṁ.
an7.70:2.5	Tassa evamassa:
an7.70:2.6	‘ayaṁ kho me suvaṇṇanikkho parisuddho pariyodāto, yannūnāhaṁ imaṁ suvaṇṇanikkhaṁ gantvā kammārānaṁ dasseyyaṁ.
an7.70:2.7	Evaṁ me ayaṁ suvaṇṇanikkho sakammāragato parisuddho ceva bhavissati parisuddhasaṅkhātataro ca.
an7.70:2.8	Evamevaṁ me ime dhammā parisuddhā pariyodātā, yannūnāhaṁ ime dhamme gantvā bhagavato āroceyyaṁ.
an7.70:2.9	Evaṁ me ime dhammā parisuddhā ceva bhavissanti parisuddhasaṅkhātatarā cā’”ti.
an7.70:3.1	Atha kho āyasmā sāriputto sāyanhasamayaṁ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā sāriputto bhagavantaṁ etadavoca:
an7.70:4.1	“Idha mayhaṁ, bhante, rahogatassa paṭisallīnassa evaṁ cetaso parivitakko udapādi:
an7.70:4.2	‘kiṁ nu kho bhikkhu sakkatvā garuṁ katvā upanissāya viharanto akusalaṁ pajaheyya, kusalaṁ bhāveyyā’ti?
an7.70:4.3	Atha kho tassa mayhaṁ, bhante, etadahosi:
an7.70:4.4	‘satthāraṁ kho bhikkhu sakkatvā garuṁ katvā upanissāya viharanto akusalaṁ pajaheyya, kusalaṁ bhāveyya.
an7.70:4.5	Dhammaṁ kho bhikkhu …pe…
an7.70:4.6	paṭisanthāraṁ kho bhikkhu sakkatvā …pe…
an7.70:4.7	kusalaṁ bhāveyyā’ti.
an7.70:4.8	Atha kho tassa mayhaṁ, bhante, etadahosi:
an7.70:4.9	‘ime kho me dhammā parisuddhā pariyodātā, yannūnāhaṁ ime dhamme gantvā bhagavato āroceyyaṁ.
an7.70:4.10	Evaṁ me ime dhammā parisuddhā ceva bhavissanti parisuddhasaṅkhātatarā ca.
an7.70:4.11	Seyyathāpi nāma puriso suvaṇṇanikkhaṁ adhigaccheyya parisuddhaṁ pariyodātaṁ.
an7.70:4.12	Tassa evamassa—
an7.70:4.13	ayaṁ kho me suvaṇṇanikkho parisuddho pariyodāto, yannūnāhaṁ imaṁ suvaṇṇanikkhaṁ gantvā kammārānaṁ dasseyyaṁ.
an7.70:4.14	Evaṁ me ayaṁ suvaṇṇanikkho sakammāragato parisuddho ceva bhavissati parisuddhasaṅkhātataro ca.
an7.70:4.15	Evamevaṁ me ime dhammā parisuddhā pariyodātā, yannūnāhaṁ ime dhamme gantvā bhagavato āroceyyaṁ.
an7.70:4.16	Evaṁ me ime dhammā parisuddhā ceva bhavissanti parisuddhasaṅkhātatarā cā’”ti.
an7.70:5.1	“Sādhu sādhu, sāriputta.
an7.70:5.2	Satthāraṁ kho, sāriputta, bhikkhu sakkatvā garuṁ katvā upanissāya viharanto akusalaṁ pajaheyya, kusalaṁ bhāveyya.
an7.70:5.3	Dhammaṁ kho, sāriputta, bhikkhu sakkatvā garuṁ katvā upanissāya viharanto akusalaṁ pajaheyya, kusalaṁ bhāveyya.
an7.70:5.4	Saṅghaṁ kho …pe…
an7.70:5.5	sikkhaṁ kho …
an7.70:5.6	samādhiṁ kho …
an7.70:5.7	appamādaṁ kho …
an7.70:5.8	paṭisanthāraṁ kho, sāriputta, bhikkhu sakkatvā garuṁ katvā upanissāya viharanto akusalaṁ pajaheyya, kusalaṁ bhāveyyā”ti.
an7.70:6.1	Evaṁ vutte, āyasmā sāriputto bhagavantaṁ etadavoca:
an7.70:6.2	“imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmi.
an7.70:6.3	So vata, bhante, bhikkhu satthari agāravo dhamme sagāravo bhavissatīti netaṁ ṭhānaṁ vijjati.
an7.70:6.4	Yo so, bhante, bhikkhu satthari agāravo dhammepi so agāravo.
an7.70:7.1	So vata, bhante, bhikkhu satthari agāravo dhamme agāravo saṅghe sagāravo bhavissatīti netaṁ ṭhānaṁ vijjati.
an7.70:7.2	Yo so, bhante, bhikkhu satthari agāravo dhamme agāravo saṅghepi so agāravo.
an7.70:8.1	So vata, bhante, bhikkhu satthari agāravo dhamme agāravo saṅghe agāravo sikkhāya sagāravo bhavissatīti netaṁ ṭhānaṁ vijjati.
an7.70:8.2	Yo so, bhante, bhikkhu satthari agāravo dhamme agāravo saṅghe agāravo sikkhāyapi so agāravo.
an7.70:9.1	So vata, bhante, bhikkhu satthari agāravo dhamme agāravo saṅghe agāravo sikkhāya agāravo samādhismiṁ sagāravo bhavissatīti netaṁ ṭhānaṁ vijjati.
an7.70:9.2	Yo so, bhante, bhikkhu satthari agāravo dhamme agāravo saṅghe agāravo sikkhāya agāravo samādhismimpi so agāravo.
an7.70:10.1	So vata, bhante, bhikkhu satthari agāravo dhamme agāravo saṅghe agāravo sikkhāya agāravo samādhismiṁ agāravo appamāde sagāravo bhavissatīti netaṁ ṭhānaṁ vijjati.
an7.70:10.2	Yo so, bhante, bhikkhu satthari agāravo dhamme agāravo saṅghe agāravo sikkhāya agāravo samādhismiṁ agāravo appamādepi so agāravo.
an7.70:11.1	So vata, bhante, bhikkhu satthari agāravo dhamme agāravo saṅghe agāravo sikkhāya agāravo samādhismiṁ agāravo appamāde agāravo paṭisanthāre sagāravo bhavissatīti netaṁ ṭhānaṁ vijjati.
an7.70:11.2	Yo so, bhante, bhikkhu satthari agāravo …pe… appamāde agāravo paṭisanthārepi so agāravo.
an7.70:12.1	So vata, bhante, bhikkhu satthari sagāravo dhamme agāravo bhavissatīti netaṁ ṭhānaṁ vijjati. Yo so, bhante, bhikkhu satthari sagāravo dhammepi so sagāravo …pe….
an7.70:13.1	So vata, bhante, bhikkhu satthari sagāravo …pe… appamāde sagāravo paṭisanthāre agāravo bhavissatīti netaṁ ṭhānaṁ vijjati.
an7.70:13.2	Yo so, bhante, bhikkhu satthari sagāravo …pe… appamāde sagāravo paṭisanthārepi so sagāravo.
an7.70:14.1	So vata, bhante, bhikkhu satthari sagāravo dhammepi sagāravo bhavissatīti ṭhānametaṁ vijjati. Yo so, bhante, bhikkhu satthari sagāravo dhammepi so sagāravo …pe….
an7.70:15.1	So vata, bhante, bhikkhu satthari sagāravo …pe… appamāde sagāravo paṭisanthārepi sagāravo bhavissatīti ṭhānametaṁ vijjati.
an7.70:15.2	Yo so, bhante, bhikkhu satthari sagāravo dhamme sagāravo saṅghe sagāravo sikkhāya sagāravo samādhismiṁ sagāravo appamāde sagāravo paṭisanthārepi so sagāravoti.
an7.70:16.1	Imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmī”ti.
an7.70:17.1	“Sādhu sādhu, sāriputta.
an7.70:17.2	Sādhu kho tvaṁ, sāriputta, imassa mayā saṅkhittena bhāsitassa evaṁ vitthārena atthaṁ ājānāsi.
an7.70:17.3	So vata, sāriputta, bhikkhu satthari agāravo dhamme sagāravo bhavissatīti netaṁ ṭhānaṁ vijjati …pe…
an7.70:17.4	yo so, sāriputta, bhikkhu satthari agāravo dhamme agāravo saṅghe agāravo sikkhāya agāravo samādhismiṁ agāravo appamādepi so agāravo.
an7.70:18.1	So vata, sāriputta, bhikkhu satthari agāravo dhamme agāravo saṅghe agāravo sikkhāya agāravo samādhismiṁ agāravo appamāde agāravo paṭisanthāre sagāravo bhavissatīti netaṁ ṭhānaṁ vijjati.
an7.70:18.2	Yo so, sāriputta, bhikkhu satthari agāravo dhamme agāravo saṅghe agāravo sikkhāya agāravo samādhismiṁ agāravo appamāde agāravo paṭisanthārepi so agāravo.
an7.70:19.1	So vata, sāriputta, bhikkhu satthari sagāravo dhamme agāravo bhavissatīti netaṁ ṭhānaṁ vijjati …pe… yo so, sāriputta, bhikkhu satthari sagāravo dhammepi so sagāravo …pe….
an7.70:20.1	So vata, sāriputta, bhikkhu satthari sagāravo dhamme sagāravo …pe… appamāde sagāravo paṭisanthāre agāravo bhavissatīti netaṁ ṭhānaṁ vijjati.
an7.70:20.2	Yo so, sāriputta, bhikkhu satthari sagāravo …pe… appamāde sagāravo paṭisanthārepi so sagāravo.
an7.70:21.1	So vata, sāriputta, bhikkhu satthari sagāravo dhammepi sagāravo bhavissatīti ṭhānametaṁ vijjati. Yo so, sāriputta, bhikkhu satthari sagāravo dhammepi so sagāravo …pe….
an7.70:22.1	So vata, sāriputta, bhikkhu satthari sagāravo …pe… appamāde sagāravo paṭisanthārepi so sagāravo bhavissatīti ṭhānametaṁ vijjati.
an7.70:22.2	Yo so, sāriputta, bhikkhu satthari sagāravo …pe… appamāde sagāravo paṭisanthārepi so sagāravoti.
an7.70:23.1	Imassa kho, sāriputta, mayā saṅkhittena bhāsitassa evaṁ vitthārena attho daṭṭhabbo”ti.
an7.70:23.2	Chaṭṭhaṁ.
an7.71:0.1	Aṅguttara Nikāya 7.71
an7.71:0.2	7. Mahāvagga
an7.71:0.3	Bhāvanāsutta
an7.71:1.1	“Bhāvanaṁ ananuyuttassa, bhikkhave, bhikkhuno viharato kiñcāpi evaṁ icchā uppajjeyya:
an7.71:1.2	‘aho vata me anupādāya āsavehi cittaṁ vimucceyyā’ti,
an7.71:1.3	atha khvassa neva anupādāya āsavehi cittaṁ vimuccati.
an7.71:1.4	Taṁ kissa hetu?
an7.71:1.5	‘Abhāvitattā’tissa vacanīyaṁ.
an7.71:1.6	Kissa abhāvitattā?
an7.71:1.7	Catunnaṁ satipaṭṭhānānaṁ, catunnaṁ sammappadhānānaṁ, catunnaṁ iddhipādānaṁ, pañcannaṁ indriyānaṁ, pañcannaṁ balānaṁ, sattannaṁ bojjhaṅgānaṁ, ariyassa aṭṭhaṅgikassa maggassa.
an7.71:2.1	Seyyathāpi, bhikkhave, kukkuṭiyā aṇḍāni aṭṭha vā dasa vā dvādasa vā.
an7.71:2.2	Tānassu kukkuṭiyā na sammā adhisayitāni, na sammā pariseditāni, na sammā paribhāvitāni.
an7.71:2.3	Kiñcāpi tassā kukkuṭiyā evaṁ icchā uppajjeyya:
an7.71:2.4	‘aho vata me kukkuṭapotakā pādanakhasikhāya vā mukhatuṇḍakena vā aṇḍakosaṁ padāletvā sotthinā abhinibbhijjeyyun’ti,
an7.71:2.5	atha kho abhabbāva te kukkuṭapotakā pādanakhasikhāya vā mukhatuṇḍakena vā aṇḍakosaṁ padāletvā sotthinā abhinibbhijjituṁ.
an7.71:2.6	Taṁ kissa hetu?
an7.71:2.7	Tathā hi, bhikkhave, kukkuṭiyā aṇḍāni na sammā adhisayitāni, na sammā pariseditāni, na sammā paribhāvitāni.
an7.71:2.8	Evamevaṁ kho, bhikkhave, bhāvanaṁ ananuyuttassa bhikkhuno viharato kiñcāpi evaṁ icchā uppajjeyya:
an7.71:2.9	‘aho vata me anupādāya āsavehi cittaṁ vimucceyyā’ti,
an7.71:2.10	atha khvassa neva anupādāya āsavehi cittaṁ vimuccati.
an7.71:2.11	Taṁ kissa hetu?
an7.71:2.12	‘Abhāvitattā’tissa vacanīyaṁ.
an7.71:2.13	Kissa abhāvitattā?
an7.71:2.14	Catunnaṁ satipaṭṭhānānaṁ, catunnaṁ sammappadhānānaṁ, catunnaṁ iddhipādānaṁ, pañcannaṁ indriyānaṁ, pañcannaṁ balānaṁ, sattannaṁ bojjhaṅgānaṁ, ariyassa aṭṭhaṅgikassa maggassa.
an7.71:3.1	Bhāvanaṁ anuyuttassa, bhikkhave, bhikkhuno viharato kiñcāpi na evaṁ icchā uppajjeyya:
an7.71:3.2	‘aho vata me anupādāya āsavehi cittaṁ vimucceyyā’ti,
an7.71:3.3	atha khvassa anupādāya āsavehi cittaṁ vimuccati.
an7.71:3.4	Taṁ kissa hetu?
an7.71:3.5	‘Bhāvitattā’tissa vacanīyaṁ.
an7.71:3.6	Kissa bhāvitattā?
an7.71:3.7	Catunnaṁ satipaṭṭhānānaṁ, catunnaṁ sammappadhānānaṁ, catunnaṁ iddhipādānaṁ, pañcannaṁ indriyānaṁ, pañcannaṁ balānaṁ, sattannaṁ bojjhaṅgānaṁ, ariyassa aṭṭhaṅgikassa maggassa.
an7.71:4.1	Seyyathāpi, bhikkhave, kukkuṭiyā aṇḍāni aṭṭha vā dasa vā dvādasa vā.
an7.71:4.2	Tānassu kukkuṭiyā sammā adhisayitāni, sammā pariseditāni, sammā paribhāvitāni.
an7.71:4.3	Kiñcāpi tassā kukkuṭiyā na evaṁ icchā uppajjeyya:
an7.71:4.4	‘aho vata me kukkuṭapotakā pādanakhasikhāya vā mukhatuṇḍakena vā aṇḍakosaṁ padāletvā sotthinā abhinibbhijjeyyun’ti,
an7.71:4.5	atha kho bhabbāva te kukkuṭapotakā pādanakhasikhāya vā mukhatuṇḍakena vā aṇḍakosaṁ padāletvā sotthinā abhinibbhijjituṁ.
an7.71:4.6	Taṁ kissa hetu?
an7.71:4.7	Tathā hi, bhikkhave, kukkuṭiyā aṇḍāni sammā adhisayitāni, sammā pariseditāni, sammā paribhāvitāni.
an7.71:4.8	Evamevaṁ kho, bhikkhave, bhāvanaṁ anuyuttassa bhikkhuno viharato kiñcāpi na evaṁ icchā uppajjeyya:
an7.71:4.9	‘aho vata me anupādāya āsavehi cittaṁ vimucceyyā’ti,
an7.71:4.10	atha khvassa anupādāya āsavehi cittaṁ vimuccati.
an7.71:4.11	Taṁ kissa hetu?
an7.71:4.12	‘Bhāvitattā’tissa vacanīyaṁ.
an7.71:4.13	Kissa bhāvitattā?
an7.71:4.14	Catunnaṁ satipaṭṭhānānaṁ …pe… ariyassa aṭṭhaṅgikassa maggassa.
an7.71:5.1	Seyyathāpi, bhikkhave, phalagaṇḍassa vā phalagaṇḍantevāsikassa vā dissanteva vāsijaṭe aṅgulipadāni dissati aṅguṭṭhapadaṁ. No ca khvassa evaṁ ñāṇaṁ hoti: ‘ettakaṁ me ajja vāsijaṭassa khīṇaṁ, ettakaṁ hiyyo, ettakaṁ pare’ti, atha khvassa khīṇe ‘khīṇan’teva ñāṇaṁ hoti.
an7.71:5.2	Evamevaṁ kho, bhikkhave, bhāvanaṁ anuyuttassa bhikkhuno viharato kiñcāpi na evaṁ ñāṇaṁ hoti: ‘ettakaṁ me ajja āsavānaṁ khīṇaṁ, ettakaṁ hiyyo, ettakaṁ pare’ti, atha khvassa khīṇe ‘khīṇan’teva ñāṇaṁ hoti.
an7.71:6.1	Seyyathāpi, bhikkhave, sāmuddikāya nāvāya vettabandhanabaddhāya cha māsāni udake pariyādāya hemantikena thale ukkhittāya vātātapaparetāni bandhanāni, tāni pāvussakena meghena abhippavuṭṭhāni appakasireneva parihāyanti, pūtikāni bhavanti.
an7.71:6.2	Evamevaṁ kho, bhikkhave, bhāvanaṁ anuyuttassa bhikkhuno viharato appakasireneva saṁyojanāni paṭippassambhanti, pūtikāni bhavantī”ti.
an7.71:6.3	Sattamaṁ.
an7.72:0.1	Aṅguttara Nikāya 7.72
an7.72:0.2	7. Mahāvagga
an7.72:0.3	Aggikkhandhopamasutta
an7.72:1.1	Evaṁ me sutaṁ—
an7.72:1.2	ekaṁ samayaṁ bhagavā kosalesu cārikaṁ carati mahatā bhikkhusaṅghena saddhiṁ.
an7.72:1.3	Addasā kho bhagavā addhānamaggappaṭipanno aññatarasmiṁ padese mahantaṁ aggikkhandhaṁ ādittaṁ sampajjalitaṁ sajotibhūtaṁ.
an7.72:1.4	Disvāna maggā okkamma aññatarasmiṁ rukkhamūle paññatte āsane nisīdi.
an7.72:1.5	Nisajja kho bhagavā bhikkhū āmantesi:
an7.72:1.6	“passatha no tumhe, bhikkhave, amuṁ mahantaṁ aggikkhandhaṁ ādittaṁ sampajjalitaṁ sajotibhūtan”ti?
an7.72:1.7	“Evaṁ, bhante”ti.
an7.72:2.1	“Taṁ kiṁ maññatha, bhikkhave?
an7.72:2.2	katamaṁ nu kho varaṁ—yaṁ amuṁ mahantaṁ aggikkhandhaṁ ādittaṁ sampajjalitaṁ sajotibhūtaṁ āliṅgetvā upanisīdeyya vā upanipajjeyya vā, yaṁ vā khattiyakaññaṁ vā brāhmaṇakaññaṁ vā gahapatikaññaṁ vā mudutalunahatthapādaṁ āliṅgetvā upanisīdeyya vā upanipajjeyya vā”ti?
an7.72:2.3	“Etadeva, bhante, varaṁ—yaṁ khattiyakaññaṁ vā brāhmaṇakaññaṁ vā gahapatikaññaṁ vā mudutalunahatthapādaṁ āliṅgetvā upanisīdeyya vā upanipajjeyya vā, dukkhañhetaṁ, bhante, yaṁ amuṁ mahantaṁ aggikkhandhaṁ ādittaṁ sampajjalitaṁ sajotibhūtaṁ āliṅgetvā upanisīdeyya vā upanipajjeyya vā”ti.
an7.72:3.1	“Ārocayāmi vo, bhikkhave, paṭivedayāmi vo, bhikkhave, yathā etadeva tassa varaṁ dussīlassa pāpadhammassa asucisaṅkassarasamācārassa paṭicchannakammantassa assamaṇassa samaṇapaṭiññassa abrahmacārissa brahmacāripaṭiññassa antopūtikassa avassutassa kasambujātassa yaṁ amuṁ mahantaṁ aggikkhandhaṁ ādittaṁ sampajjalitaṁ sajotibhūtaṁ āliṅgetvā upanisīdeyya vā upanipajjeyya vā.
an7.72:3.2	Taṁ kissa hetu?
an7.72:3.3	Tatonidānañhi so, bhikkhave, maraṇaṁ vā nigaccheyya maraṇamattaṁ vā dukkhaṁ, na tveva tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya.
an7.72:4.1	Yañca kho so, bhikkhave, dussīlo pāpadhammo asucisaṅkassarasamācāro …pe… kasambujāto khattiyakaññaṁ vā brāhmaṇakaññaṁ vā gahapatikaññaṁ vā mudutalunahatthapādaṁ āliṅgetvā upanisīdati vā upanipajjati vā, tañhi tassa, bhikkhave, hoti dīgharattaṁ ahitāya dukkhāya kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.72:5.1	Taṁ kiṁ maññatha, bhikkhave,
an7.72:5.2	katamaṁ nu kho varaṁ—yaṁ balavā puriso daḷhāya vālarajjuyā ubho jaṅghā veṭhetvā ghaṁseyya—sā chaviṁ chindeyya chaviṁ chetvā cammaṁ chindeyya cammaṁ chetvā maṁsaṁ chindeyya maṁsaṁ chetvā nhāruṁ chindeyya nhāruṁ chetvā aṭṭhiṁ chindeyya aṭṭhiṁ chetvā aṭṭhimiñjaṁ āhacca tiṭṭheyya, yaṁ vā khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā abhivādanaṁ sādiyeyyā”ti?
an7.72:5.3	“Etadeva, bhante, varaṁ—yaṁ khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā abhivādanaṁ sādiyeyya, dukkhañhetaṁ, bhante, yaṁ balavā puriso daḷhāya vālarajjuyā …pe… aṭṭhimiñjaṁ āhacca tiṭṭheyyā”ti.
an7.72:6.1	Ārocayāmi vo, bhikkhave, paṭivedayāmi vo, bhikkhave, yathā etadeva tassa varaṁ dussīlassa …pe… kasambujātassa yaṁ balavā puriso daḷhāya vālarajjuyā ubho jaṅghā veṭhetvā …pe… aṭṭhimiñjaṁ āhacca tiṭṭheyya.
an7.72:6.2	Taṁ kissa hetu?
an7.72:6.3	Tatonidānañhi so, bhikkhave, maraṇaṁ vā nigaccheyya maraṇamattaṁ vā dukkhaṁ, na tveva tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya.
an7.72:6.4	Yañca kho so, bhikkhave, dussīlo …pe… kasambujāto khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā abhivādanaṁ sādiyati, tañhi tassa, bhikkhave, hoti dīgharattaṁ ahitāya dukkhāya kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.72:7.1	“Taṁ kiṁ maññatha, bhikkhave,
an7.72:7.2	katamaṁ nu kho varaṁ—yaṁ balavā puriso tiṇhāya sattiyā teladhotāya paccorasmiṁ pahareyya, yaṁ vā khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā añjalikammaṁ sādiyeyyā”ti?
an7.72:7.3	“Etadeva, bhante, varaṁ—yaṁ khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā añjalikammaṁ sādiyeyya, dukkhañhetaṁ, bhante, yaṁ balavā puriso tiṇhāya sattiyā teladhotāya paccorasmiṁ pahareyyā”ti.
an7.72:8.1	“Ārocayāmi vo, bhikkhave, paṭivedayāmi vo, bhikkhave, yathā etadeva tassa varaṁ dussīlassa …pe… kasambujātassa yaṁ balavā puriso tiṇhāya sattiyā teladhotāya paccorasmiṁ pahareyya.
an7.72:8.2	Taṁ kissa hetu?
an7.72:8.3	Tatonidānañhi so, bhikkhave, maraṇaṁ vā nigaccheyya maraṇamattaṁ vā dukkhaṁ, na tveva tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya.
an7.72:8.4	Yañca kho so, bhikkhave, dussīlo pāpadhammo …pe… kasambujāto khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā añjalikammaṁ sādiyati, tañhi tassa, bhikkhave, hoti dīgharattaṁ ahitāya dukkhāya kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.72:9.1	Taṁ kiṁ maññatha, bhikkhave,
an7.72:9.2	katamaṁ nu kho varaṁ—yaṁ balavā puriso tattena ayopaṭṭena ādittena sampajjalitena sajotibhūtena kāyaṁ sampaliveṭheyya, yaṁ vā khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ cīvaraṁ paribhuñjeyyā”ti?
an7.72:9.3	“Etadeva, bhante, varaṁ—yaṁ khattiyamahāsālānaṁ vā …pe…
an7.72:9.4	saddhādeyyaṁ cīvaraṁ paribhuñjeyya, dukkhañhetaṁ, bhante, yaṁ balavā puriso tattena ayopaṭṭena ādittena sampajjalitena sajotibhūtena kāyaṁ sampaliveṭheyyā”ti.
an7.72:10.1	“Ārocayāmi vo, bhikkhave, paṭivedayāmi vo, bhikkhave, yathā etadeva tassa varaṁ dussīlassa …pe… kasambujātassa yaṁ balavā puriso tattena ayopaṭṭena ādittena sampajjalitena sajotibhūtena kāyaṁ sampaliveṭheyya.
an7.72:10.2	Taṁ kissa hetu?
an7.72:10.3	Tatonidānañhi so, bhikkhave, maraṇaṁ vā nigaccheyya maraṇamattaṁ vā dukkhaṁ, na tveva tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya.
an7.72:10.4	Yañca kho so, bhikkhave, dussīlo …pe… kasambujāto khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ cīvaraṁ paribhuñjati, tañhi tassa, bhikkhave, hoti dīgharattaṁ ahitāya dukkhāya kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.72:11.1	Taṁ kiṁ maññatha, bhikkhave,
an7.72:11.2	katamaṁ nu kho varaṁ—yaṁ balavā puriso tattena ayosaṅkunā mukhaṁ vivaritvā tattaṁ lohaguḷaṁ ādittaṁ sampajjalitaṁ sajotibhūtaṁ mukhe pakkhipeyya—taṁ tassa oṭṭhampi daheyya mukhampi daheyya jivhampi daheyya kaṇṭhampi daheyya urampi daheyya antampi antaguṇampi ādāya adhobhāgā nikkhameyya, yaṁ vā khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ piṇḍapātaṁ paribhuñjeyyā”ti?
an7.72:11.3	“Etadeva, bhante, varaṁ—yaṁ khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ piṇḍapātaṁ paribhuñjeyya, dukkhañhetaṁ, bhante, yaṁ balavā puriso tattena ayosaṅkunā mukhaṁ vivaritvā tattaṁ lohaguḷaṁ ādittaṁ sampajjalitaṁ sajotibhūtaṁ mukhe pakkhipeyya—taṁ tassa oṭṭhampi daheyya mukhampi daheyya jivhampi daheyya kaṇṭhampi daheyya urampi daheyya antampi antaguṇampi ādāya adhobhāgaṁ nikkhameyyā”ti.
an7.72:12.1	“Ārocayāmi vo, bhikkhave, paṭivedayāmi vo, bhikkhave, yathā etadeva tassa varaṁ dussīlassa …pe… kasambujātassa yaṁ balavā puriso tattena ayosaṅkunā mukhaṁ vivaritvā tattaṁ lohaguḷaṁ ādittaṁ sampajjalitaṁ sajotibhūtaṁ mukhe pakkhipeyya—taṁ tassa oṭṭhampi daheyya mukhampi daheyya jivhampi daheyya kaṇṭhampi daheyya urampi daheyya antampi antaguṇampi ādāya adhobhāgaṁ nikkhameyya.
an7.72:12.2	Taṁ kissa hetu?
an7.72:12.3	Tatonidānañhi so, bhikkhave, maraṇaṁ vā nigaccheyya maraṇamattaṁ vā dukkhaṁ, na tveva tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya.
an7.72:12.4	Yañca kho so, bhikkhave, dussīlo pāpadhammo …pe… kasambujāto khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ piṇḍapātaṁ paribhuñjati, tañhi tassa hoti dīgharattaṁ ahitāya dukkhāya kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.72:13.1	Taṁ kiṁ maññatha, bhikkhave,
an7.72:13.2	katamaṁ nu kho varaṁ—yaṁ balavā puriso sīse vā gahetvā khandhe vā gahetvā tattaṁ ayomañcaṁ vā ayopīṭhaṁ vā abhinisīdāpeyya vā abhinipajjāpeyya vā, yaṁ vā khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ mañcapīṭhaṁ paribhuñjeyyā”ti?
an7.72:13.3	“Etadeva, bhante, varaṁ—yaṁ khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ mañcapīṭhaṁ paribhuñjeyya, dukkhañhetaṁ, bhante, yaṁ balavā puriso sīse vā gahetvā khandhe vā gahetvā tattaṁ ayomañcaṁ vā ayopīṭhaṁ vā abhinisīdāpeyya vā abhinipajjāpeyya vā”ti.
an7.72:14.1	“Ārocayāmi vo, bhikkhave, paṭivedayāmi vo, bhikkhave, yathā etadeva tassa varaṁ dussīlassa …pe… kasambujātassa yaṁ balavā puriso sīse vā gahetvā khandhe vā gahetvā tattaṁ ayomañcaṁ vā ayopīṭhaṁ vā abhinisīdāpeyya vā abhinipajjāpeyya vā.
an7.72:14.2	Taṁ kissa hetu?
an7.72:14.3	Tatonidānañhi so, bhikkhave, maraṇaṁ vā nigaccheyya maraṇamattaṁ vā dukkhaṁ, na tveva tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya.
an7.72:14.4	Yañca kho so, bhikkhave, dussīlo pāpadhammo …pe… kasambujāto khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ mañcapīṭhaṁ paribhuñjati. Tañhi tassa, bhikkhave, hoti dīgharattaṁ ahitāya dukkhāya kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.72:15.1	Taṁ kiṁ maññatha, bhikkhave,
an7.72:15.2	katamaṁ nu kho varaṁ—yaṁ balavā puriso uddhampādaṁ adhosiraṁ gahetvā tattāya lohakumbhiyā pakkhipeyya ādittāya sampajjalitāya sajotibhūtāya—so tattha pheṇuddehakaṁ paccamāno sakimpi uddhaṁ gaccheyya sakimpi adho gaccheyya sakimpi tiriyaṁ gaccheyya, yaṁ vā khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ vihāraṁ paribhuñjeyyā”ti?
an7.72:15.3	“Etadeva, bhante, varaṁ—yaṁ khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ vihāraṁ paribhuñjeyya, dukkhañhetaṁ, bhante, yaṁ balavā puriso uddhampādaṁ adhosiraṁ gahetvā tattāya lohakumbhiyā pakkhipeyya ādittāya sampajjalitāya sajotibhūtāya—so tattha pheṇuddehakaṁ paccamāno sakimpi uddhaṁ gaccheyya sakimpi adho gaccheyya sakimpi tiriyaṁ gaccheyyā”ti.
an7.72:16.1	“Ārocayāmi vo, bhikkhave, paṭivedayāmi vo, bhikkhave, yathā etadeva tassa varaṁ dussīlassa pāpadhammassa …pe… kasambujātassa yaṁ balavā puriso uddhampādaṁ adhosiraṁ gahetvā …pe… sakimpi tiriyaṁ gaccheyya.
an7.72:16.2	Taṁ kissa hetu?
an7.72:16.3	Tatonidānañhi so, bhikkhave, maraṇaṁ vā nigaccheyya maraṇamattaṁ vā dukkhaṁ, na tveva tappaccayā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya.
an7.72:16.4	Yañca kho so, bhikkhave, dussīlo pāpadhammo …pe… kasambujāto khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā saddhādeyyaṁ vihāraṁ paribhuñjati. Tañhi tassa, bhikkhave, hoti dīgharattaṁ ahitāya dukkhāya kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an7.72:17.1	Tasmātiha, bhikkhave, evaṁ sikkhitabbaṁ:
an7.72:17.2	‘yesañca mayaṁ paribhuñjāma cīvarapiṇḍapātasenāsanagilānappaccayabhesajjaparikkhāraṁ tesaṁ te kārā mahapphalā bhavissanti mahānisaṁsā, amhākañcevāyaṁ pabbajjā avañjhā bhavissati saphalā saudrayā’ti.
an7.72:17.3	Evañhi vo, bhikkhave, sikkhitabbaṁ:
an7.72:17.4	‘attatthaṁ vā, bhikkhave, sampassamānena alameva appamādena sampādetuṁ;
an7.72:17.5	paratthaṁ vā, bhikkhave, sampassamānena alameva appamādena sampādetuṁ;
an7.72:17.6	ubhayatthaṁ vā, bhikkhave, sampassamānena alameva appamādena sampādetun’”ti.
an7.72:18.1	Idamavoca bhagavā.
an7.72:18.2	Imasmiñca pana veyyākaraṇasmiṁ bhaññamāne saṭṭhimattānaṁ bhikkhūnaṁ uṇhaṁ lohitaṁ mukhato uggañchi.
an7.72:18.3	Saṭṭhimattā bhikkhū sikkhaṁ paccakkhāya hīnāyāvattiṁsu:
an7.72:18.4	“sudukkaraṁ bhagavā, sudukkaraṁ bhagavā”ti.
an7.72:18.5	Saṭṭhimattānaṁ bhikkhūnaṁ anupādāya āsavehi cittāni vimucciṁsūti.
an7.72:18.6	Aṭṭhamaṁ.
an7.73:0.1	Aṅguttara Nikāya 7.73
an7.73:0.2	7. Mahāvagga
an7.73:0.3	Sunettasutta
an7.73:1.1	“Bhūtapubbaṁ, bhikkhave, sunetto nāma satthā ahosi titthakaro kāmesu vītarāgo.
an7.73:1.2	Sunettassa kho pana, bhikkhave, satthuno anekāni sāvakasatāni ahesuṁ.
an7.73:1.3	Sunetto satthā sāvakānaṁ brahmalokasahabyatāya dhammaṁ desesi.
an7.73:1.4	Ye kho pana, bhikkhave, sunettassa satthuno brahmalokasahabyatāya dhammaṁ desentassa cittāni nappasādesuṁ te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjiṁsu.
an7.73:1.5	Ye kho pana, bhikkhave, sunettassa satthuno brahmalokasahabyatāya dhammaṁ desentassa cittāni pasādesuṁ te kāyassa bhedā paraṁ maraṇā sugatiṁ saggaṁ lokaṁ upapajjiṁsu.
an7.73:2.1	Bhūtapubbaṁ, bhikkhave, mūgapakkho nāma satthā ahosi …pe…
an7.73:2.2	aranemi nāma satthā ahosi …pe…
an7.73:2.3	kuddālako nāma satthā ahosi …pe…
an7.73:2.4	hatthipālo nāma satthā ahosi …pe…
an7.73:2.5	jotipālo nāma satthā ahosi …pe…
an7.73:2.6	arako nāma satthā ahosi titthakaro kāmesu vītarāgo.
an7.73:2.7	Arakassa kho pana, bhikkhave, satthuno anekāni sāvakasatāni ahesuṁ.
an7.73:2.8	Arako nāma satthā sāvakānaṁ brahmalokasahabyatāya dhammaṁ desesi.
an7.73:2.9	Ye kho pana, bhikkhave, arakassa satthuno brahmalokasahabyatāya dhammaṁ desentassa cittāni nappasādesuṁ, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjiṁsu.
an7.73:2.10	Ye kho pana, bhikkhave, arakassa satthuno brahmalokasahabyatāya dhammaṁ desentassa cittāni pasādesuṁ, te kāyassa bhedā paraṁ maraṇā sugatiṁ saggaṁ lokaṁ upapajjiṁsu.
an7.73:3.1	Taṁ kiṁ maññatha, bhikkhave,
an7.73:3.2	yo ime satta satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṁ so apuññaṁ pasaveyyā”ti?
an7.73:3.3	“Evaṁ, bhante”.
an7.73:3.4	“Yo, bhikkhave, ime satta satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṁ so apuññaṁ pasaveyya.
an7.73:3.5	Yo ekaṁ diṭṭhisampannaṁ puggalaṁ paduṭṭhacitto akkosati paribhāsati, ayaṁ tato bahutaraṁ apuññaṁ pasavati.
an7.73:3.6	Taṁ kissa hetu?
an7.73:3.7	Nāhaṁ, bhikkhave, ito bahiddhā evarūpiṁ khantiṁ vadāmi yathāmaṁ sabrahmacārīsu.
an7.73:4.1	Tasmātiha, bhikkhave, evaṁ sikkhitabbaṁ:
an7.73:4.2	‘na no sabrahmacārīsu cittāni paduṭṭhāni bhavissantī’ti.
an7.73:4.3	Evañhi vo, bhikkhave, sikkhitabban”ti.
an7.73:4.4	Navamaṁ.
an7.74:0.1	Aṅguttara Nikāya 7.74
an7.74:0.2	7. Mahāvagga
an7.74:0.3	Arakasutta
an7.74:1.1	“Bhūtapubbaṁ, bhikkhave, arako nāma satthā ahosi titthakaro kāmesu vītarāgo.
an7.74:1.2	Arakassa kho pana, bhikkhave, satthuno anekāni sāvakasatāni ahesuṁ.
an7.74:1.3	Arako satthā sāvakānaṁ evaṁ dhammaṁ deseti:
an7.74:1.4	‘appakaṁ, brāhmaṇa, jīvitaṁ manussānaṁ parittaṁ lahukaṁ bahudukkhaṁ bahupāyāsaṁ mantāyaṁ boddhabbaṁ, kattabbaṁ kusalaṁ, caritabbaṁ brahmacariyaṁ, natthi jātassa amaraṇaṁ.
an7.74:2.1	Seyyathāpi, brāhmaṇa, tiṇagge ussāvabindu sūriye uggacchante khippaṁyeva paṭivigacchati, na ciraṭṭhitikaṁ hoti;
an7.74:2.2	evamevaṁ kho, brāhmaṇa, ussāvabindūpamaṁ jīvitaṁ manussānaṁ parittaṁ lahukaṁ bahudukkhaṁ bahupāyāsaṁ mantāyaṁ boddhabbaṁ, kattabbaṁ kusalaṁ, caritabbaṁ brahmacariyaṁ, natthi jātassa amaraṇaṁ.
an7.74:3.1	Seyyathāpi, brāhmaṇa, thullaphusitake deve vassante udakabubbuḷaṁ khippaṁyeva paṭivigacchati, na ciraṭṭhitikaṁ hoti;
an7.74:3.2	evamevaṁ kho, brāhmaṇa, udakabubbuḷūpamaṁ jīvitaṁ manussānaṁ parittaṁ lahukaṁ bahudukkhaṁ bahupāyāsaṁ mantāyaṁ boddhabbaṁ, kattabbaṁ kusalaṁ, caritabbaṁ brahmacariyaṁ, natthi jātassa amaraṇaṁ.
an7.74:4.1	Seyyathāpi, brāhmaṇa, udake daṇḍarāji khippaṁyeva paṭivigacchati, na ciraṭṭhitikā hoti;
an7.74:4.2	evamevaṁ kho, brāhmaṇa, udake daṇḍarājūpamaṁ jīvitaṁ manussānaṁ parittaṁ …pe…
an7.74:4.3	natthi jātassa amaraṇaṁ.
an7.74:5.1	Seyyathāpi, brāhmaṇa, nadī pabbateyyā dūraṅgamā sīghasotā hārahārinī, natthi so khaṇo vā layo vā muhutto vā yaṁ sā āvattati, atha kho sā gacchateva vattateva sandateva;
an7.74:5.2	evamevaṁ kho, brāhmaṇa, nadīpabbateyyūpamaṁ jīvitaṁ manussānaṁ parittaṁ lahukaṁ …pe…
an7.74:5.3	natthi jātassa amaraṇaṁ.
an7.74:6.1	Seyyathāpi, brāhmaṇa, balavā puriso jivhagge kheḷapiṇḍaṁ saṁyūhitvā akasireneva vameyya;
an7.74:6.2	evamevaṁ kho, brāhmaṇa, kheḷapiṇḍūpamaṁ jīvitaṁ manussānaṁ parittaṁ …pe…
an7.74:6.3	natthi jātassa amaraṇaṁ.
an7.74:7.1	Seyyathāpi, brāhmaṇa, divasaṁsantatte ayokaṭāhe maṁsapesi pakkhittā khippaṁyeva paṭivigacchati, na ciraṭṭhitikā hoti;
an7.74:7.2	evamevaṁ kho, brāhmaṇa, maṁsapesūpamaṁ jīvitaṁ manussānaṁ parittaṁ …pe…
an7.74:7.3	natthi jātassa amaraṇaṁ.
an7.74:8.1	Seyyathāpi, brāhmaṇa, gāvī vajjhā āghātanaṁ nīyamānā yaṁ yadeva pādaṁ uddharati, santikeva hoti vadhassa santikeva maraṇassa;
an7.74:8.2	evamevaṁ kho, brāhmaṇa, govajjhūpamaṁ jīvitaṁ manussānaṁ parittaṁ lahukaṁ bahudukkhaṁ bahupāyāsaṁ mantāyaṁ boddhabbaṁ, kattabbaṁ kusalaṁ, caritabbaṁ brahmacariyaṁ, natthi jātassa amaraṇan’ti.
an7.74:9.1	Tena kho pana, bhikkhave, samayena manussānaṁ saṭṭhivassasahassāni āyuppamāṇaṁ ahosi, pañcavassasatikā kumārikā alaṁpateyyā ahosi.
an7.74:9.2	Tena kho pana, bhikkhave, samayena manussānaṁ chaḷeva ābādhā ahesuṁ—
an7.74:9.3	sītaṁ, uṇhaṁ, jighacchā, pipāsā, uccāro, passāvo.
an7.74:9.4	So hi nāma, bhikkhave, arako satthā evaṁ dīghāyukesu manussesu evaṁ ciraṭṭhitikesu evaṁ appābādhesu sāvakānaṁ evaṁ dhammaṁ desessati:
an7.74:9.5	‘appakaṁ, brāhmaṇa, jīvitaṁ manussānaṁ parittaṁ lahukaṁ bahudukkhaṁ bahupāyāsaṁ mantāyaṁ boddhabbaṁ, kattabbaṁ kusalaṁ, caritabbaṁ brahmacariyaṁ, natthi jātassa amaraṇan’ti.
an7.74:10.1	Etarahi taṁ, bhikkhave, sammā vadamāno vadeyya:
an7.74:10.2	‘appakaṁ jīvitaṁ manussānaṁ parittaṁ lahukaṁ bahudukkhaṁ bahupāyāsaṁ mantāyaṁ boddhabbaṁ, kattabbaṁ kusalaṁ, caritabbaṁ brahmacariyaṁ, natthi jātassa amaraṇan’ti.
an7.74:10.3	Etarahi, bhikkhave, yo ciraṁ jīvati so vassasataṁ appaṁ vā bhiyyo.
an7.74:10.4	Vassasataṁ kho pana, bhikkhave, jīvanto tīṇiyeva utusatāni jīvati—
an7.74:10.5	utusataṁ hemantānaṁ, utusataṁ gimhānaṁ, utusataṁ vassānaṁ.
an7.74:10.6	Tīṇi kho pana, bhikkhave, utusatāni jīvanto dvādasayeva māsasatāni jīvati—
an7.74:10.7	cattāri māsasatāni hemantānaṁ, cattāri māsasatāni gimhānaṁ, cattāri māsasatāni vassānaṁ.
an7.74:10.8	Dvādasa kho pana, bhikkhave, māsasatāni jīvanto catuvīsatiyeva addhamāsasatāni jīvati—
an7.74:10.9	aṭṭhaddhamāsasatāni hemantānaṁ, aṭṭhaddhamāsasatāni gimhānaṁ, aṭṭhaddhamāsasatāni vassānaṁ.
an7.74:10.10	Catuvīsati kho pana, bhikkhave, addhamāsasatāni jīvanto chattiṁsaṁyeva rattisahassāni jīvati—
an7.74:10.11	dvādasa rattisahassāni hemantānaṁ, dvādasa rattisahassāni gimhānaṁ, dvādasa rattisahassāni vassānaṁ.
an7.74:10.12	Chattiṁsaṁ kho pana, bhikkhave, rattisahassāni jīvanto dvesattatiyeva bhattasahassāni bhuñjati—
an7.74:10.13	catuvīsati bhattasahassāni hemantānaṁ, catuvīsati bhattasahassāni gimhānaṁ, catuvīsati bhattasahassāni vassānaṁ saddhiṁ mātuthaññāya saddhiṁ bhattantarāyena.
an7.74:11.1	Tatrime bhattantarāyā kapimiddhopi bhattaṁ na bhuñjati, dukkhitopi bhattaṁ na bhuñjati, byādhitopi bhattaṁ na bhuñjati, uposathikopi bhattaṁ na bhuñjati, alābhakenapi bhattaṁ na bhuñjati.
an7.74:11.2	Iti kho, bhikkhave, mayā vassasatāyukassa manussassa āyupi saṅkhāto, āyuppamāṇampi saṅkhātaṁ, utūpi saṅkhātā, saṁvaccharāpi saṅkhātā, māsāpi saṅkhātā, addhamāsāpi saṅkhātā, rattipi saṅkhātā, divāpi saṅkhātā, bhattāpi saṅkhātā, bhattantarāyāpi saṅkhātā.
an7.74:11.3	Yaṁ, bhikkhave, satthārā karaṇīyaṁ sāvakānaṁ hitesinā anukampakena anukampaṁ upādāya;
an7.74:11.4	kataṁ vo taṁ mayā etāni, bhikkhave, rukkhamūlāni etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṁ vo amhākaṁ anusāsanī”ti.
an7.74:11.5	Dasamaṁ.
an7.74:11.6	Mahāvaggo sattamo.
an7.74:12.0	Tassuddānaṁ
an7.74:12.1	Hirīsūriyaṁ upamā,
an7.74:12.2	dhammaññū pārichattakaṁ;
an7.74:12.3	Sakkaccaṁ bhāvanā aggi,
an7.74:12.4	sunettaarakena cāti.
an7.75:0.1	Aṅguttara Nikāya 7.75
an7.75:0.2	8. Vinayavagga
an7.75:0.3	Paṭhamavinayadharasutta
an7.75:1.1	“Sattahi, bhikkhave, dhammehi samannāgato bhikkhu vinayadharo hoti.
an7.75:1.2	Katamehi sattahi?
an7.75:1.3	Āpattiṁ jānāti,
an7.75:1.4	anāpattiṁ jānāti,
an7.75:1.5	lahukaṁ āpattiṁ jānāti,
an7.75:1.6	garukaṁ āpattiṁ jānāti,
an7.75:1.7	sīlavā hoti pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī samādāya sikkhati sikkhāpadesu,
an7.75:1.8	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī,
an7.75:1.9	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an7.75:1.10	Imehi kho, bhikkhave, sattahi dhammehi samannāgato bhikkhu vinayadharo hotī”ti.
an7.75:1.11	Paṭhamaṁ.
an7.76:0.1	Aṅguttara Nikāya 7.76
an7.76:0.2	8. Vinayavagga
an7.76:0.3	Dutiyavinayadharasutta
an7.76:1.1	“Sattahi, bhikkhave, dhammehi samannāgato bhikkhu vinayadharo hoti.
an7.76:1.2	Katamehi sattahi?
an7.76:1.3	Āpattiṁ jānāti,
an7.76:1.4	anāpattiṁ jānāti,
an7.76:1.5	lahukaṁ āpattiṁ jānāti,
an7.76:1.6	garukaṁ āpattiṁ jānāti,
an7.76:1.7	ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso,
an7.76:1.8	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī,
an7.76:1.9	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an7.76:1.10	Imehi kho, bhikkhave, sattahi dhammehi samannāgato bhikkhu vinayadharo hotī”ti.
an7.76:1.11	Dutiyaṁ.
an7.77:0.1	Aṅguttara Nikāya 7.77
an7.77:0.2	8. Vinayavagga
an7.77:0.3	Tatiyavinayadharasutta
an7.77:1.1	“Sattahi, bhikkhave, dhammehi samannāgato bhikkhu vinayadharo hoti.
an7.77:1.2	Katamehi sattahi?
an7.77:1.3	Āpattiṁ jānāti,
an7.77:1.4	anāpattiṁ jānāti,
an7.77:1.5	lahukaṁ āpattiṁ jānāti,
an7.77:1.6	garukaṁ āpattiṁ jānāti,
an7.77:1.7	vinaye kho pana ṭhito hoti asaṁhīro,
an7.77:1.8	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī,
an7.77:1.9	āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an7.77:1.10	Imehi kho, bhikkhave, sattahi dhammehi samannāgato bhikkhu vinayadharo hotī”ti.
an7.77:1.11	Tatiyaṁ.
an7.78:0.1	Aṅguttara Nikāya 7.78
an7.78:0.2	8. Vinayavagga
an7.78:0.3	Catutthavinayadharasutta
an7.78:1.1	“Sattahi, bhikkhave, dhammehi samannāgato bhikkhu vinayadharo hoti.
an7.78:1.2	Katamehi sattahi?
an7.78:1.3	Āpattiṁ jānāti,
an7.78:1.4	anāpattiṁ jānāti,
an7.78:1.5	lahukaṁ āpattiṁ jānāti,
an7.78:1.6	garukaṁ āpattiṁ jānāti,
an7.78:1.7	anekavihitaṁ pubbenivāsaṁ anussarati, seyyathidaṁ—ekampi jātiṁ, dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati.
an7.78:1.8	Dibbena cakkhunā visuddhena atikkantamānusakena yathākammūpage satte pajānāti.
an7.78:1.9	Āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an7.78:1.10	Imehi kho, bhikkhave, sattahi dhammehi samannāgato bhikkhu vinayadharo hotī”ti.
an7.78:1.11	Catutthaṁ.
an7.79:0.1	Aṅguttara Nikāya 7.79
an7.79:0.2	8. Vinayavagga
an7.79:0.3	Paṭhamavinayadharasobhanasutta
an7.79:1.1	“Sattahi, bhikkhave, dhammehi samannāgato vinayadharo sobhati.
an7.79:1.2	Katamehi sattahi?
an7.79:1.3	Āpattiṁ jānāti,
an7.79:1.4	anāpattiṁ jānāti,
an7.79:1.5	lahukaṁ āpattiṁ jānāti,
an7.79:1.6	garukaṁ āpattiṁ jānāti,
an7.79:1.7	sīlavā hoti …pe… samādāya sikkhati sikkhāpadesu,
an7.79:1.8	catunnaṁ jhānānaṁ ābhicetasikānaṁ nikāmalābhī hoti akicchalābhī akasiralābhī,
an7.79:1.9	āsavānaṁ khayā …pe… sacchikatvā upasampajja viharati.
an7.79:1.10	Imehi kho, bhikkhave, sattahi dhammehi samannāgato vinayadharo sobhatī”ti.
an7.79:1.11	Pañcamaṁ.
an7.80:0.1	Aṅguttara Nikāya 7.80
an7.80:0.2	8. Vinayavagga
an7.80:0.3	Dutiyavinayadharasobhanasutta
an7.80:1.1	“Sattahi, bhikkhave, dhammehi samannāgato vinayadharo sobhati.
an7.80:1.2	Katamehi sattahi?
an7.80:1.3	Āpattiṁ jānāti,
an7.80:1.4	anāpattiṁ jānāti,
an7.80:1.5	lahukaṁ āpattiṁ jānāti,
an7.80:1.6	garukaṁ āpattiṁ jānāti,
an7.80:1.7	ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso,
an7.80:1.8	catunnaṁ jhānānaṁ …pe… akasiralābhī,
an7.80:1.9	āsavānaṁ khayā …pe… sacchikatvā upasampajja viharati.
an7.80:1.10	Imehi kho, bhikkhave, sattahi dhammehi samannāgato vinayadharo sobhatī”ti.
an7.80:1.11	Chaṭṭhaṁ.
an7.81:0.1	Aṅguttara Nikāya 7.81
an7.81:0.2	8. Vinayavagga
an7.81:0.3	Tatiyavinayadharasobhanasutta
an7.81:1.1	“Sattahi, bhikkhave, dhammehi samannāgato vinayadharo sobhati.
an7.81:1.2	Katamehi sattahi?
an7.81:1.3	Āpattiṁ jānāti,
an7.81:1.4	anāpattiṁ jānāti,
an7.81:1.5	lahukaṁ āpattiṁ jānāti,
an7.81:1.6	garukaṁ āpattiṁ jānāti,
an7.81:1.7	vinaye kho pana ṭhito hoti asaṁhīro,
an7.81:1.8	catunnaṁ jhānānaṁ …pe… akasiralābhī,
an7.81:1.9	āsavānaṁ khayā …pe… sacchikatvā upasampajja viharati.
an7.81:1.10	Imehi kho, bhikkhave, sattahi dhammehi samannāgato vinayadharo sobhatī”ti.
an7.81:1.11	Sattamaṁ.
an7.82:0.1	Aṅguttara Nikāya 7.82
an7.82:0.2	8. Vinayavagga
an7.82:0.3	Catutthavinayadharasobhanasutta
an7.82:1.1	“Sattahi, bhikkhave, dhammehi samannāgato vinayadharo sobhati.
an7.82:1.2	Katamehi sattahi?
an7.82:1.3	Āpattiṁ jānāti,
an7.82:1.4	anāpattiṁ jānāti,
an7.82:1.5	lahukaṁ āpattiṁ jānāti,
an7.82:1.6	garukaṁ āpattiṁ jānāti,
an7.82:1.7	anekavihitaṁ pubbenivāsaṁ anussarati, seyyathidaṁ—ekampi jātiṁ, dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati,
an7.82:1.8	dibbena cakkhunā visuddhena atikkantamānusakena …pe…
an7.82:1.9	āsavānaṁ khayā …pe… sacchikatvā upasampajja viharati.
an7.82:1.10	Imehi kho, bhikkhave, sattahi dhammehi samannāgato vinayadharo sobhatī”ti.
an7.82:1.11	Aṭṭhamaṁ.
an7.83:0.1	Aṅguttara Nikāya 7.83
an7.83:0.2	8. Vinayavagga
an7.83:0.3	Satthusāsanasutta
an7.83:1.1	Atha kho āyasmā upāli yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā upāli bhagavantaṁ etadavoca:
an7.83:2.1	“Sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.
an7.83:2.2	“Ye kho tvaṁ, upāli, dhamme jāneyyāsi:
an7.83:2.3	‘ime dhammā na ekantanibbidāya virāgāya nirodhāya upasamāya abhiññāya sambodhāya nibbānāya saṁvattantī’ti;
an7.83:2.4	ekaṁsena, upāli, dhāreyyāsi:
an7.83:2.5	‘neso dhammo neso vinayo netaṁ satthusāsanan’ti.
an7.83:2.6	Ye ca kho tvaṁ, upāli, dhamme jāneyyāsi:
an7.83:2.7	‘ime dhammā ekantanibbidāya virāgāya nirodhāya upasamāya abhiññāya sambodhāya nibbānāya saṁvattantī’ti;
an7.83:2.8	ekaṁsena, upāli, dhāreyyāsi:
an7.83:2.9	‘eso dhammo eso vinayo etaṁ satthusāsanan’”ti.
an7.83:2.10	Navamaṁ.
an7.84:0.1	Aṅguttara Nikāya 7.84
an7.84:0.2	8. Vinayavagga
an7.84:0.3	Adhikaraṇasamathasutta
an7.84:1.1	“Sattime, bhikkhave, adhikaraṇasamathā dhammā uppannuppannānaṁ adhikaraṇānaṁ samathāya vūpasamāya.
an7.84:1.2	Katame satta?
an7.84:1.3	Sammukhāvinayo dātabbo, sativinayo dātabbo, amūḷhavinayo dātabbo, paṭiññātakaraṇaṁ dātabbaṁ, yebhuyyasikā dātabbā, tassapāpiyasikā dātabbā, tiṇavatthārako dātabbo.
an7.84:1.4	Ime kho, bhikkhave, satta adhikaraṇasamathā dhammā uppannuppannānaṁ adhikaraṇānaṁ samathāya vūpasamāyā”ti.
an7.84:1.5	Dasamaṁ.
an7.84:1.6	Vinayavaggo aṭṭhamo.
an7.84:2.0	Tassuddānaṁ
an7.84:2.1	Caturo vinayadharā,
an7.84:2.2	caturo ceva sobhanā;
an7.84:2.3	Sāsanaṁ adhikaraṇa—
an7.84:2.4	samathenaṭṭhame dasāti.
an7.85:0.1	Aṅguttara Nikāya 7.85
an7.85:0.2	9. Samaṇavagga
an7.85:0.3	Bhikkhusutta
an7.85:1.1	“Sattannaṁ, bhikkhave, dhammānaṁ bhinnattā bhikkhu hoti.
an7.85:1.2	Katamesaṁ sattannaṁ?
an7.85:1.3	Sakkāyadiṭṭhi bhinnā hoti, vicikicchā bhinnā hoti, sīlabbataparāmāso bhinno hoti, rāgo bhinno hoti, doso bhinno hoti, moho bhinno hoti, māno bhinno hoti.
an7.85:1.4	Imesaṁ kho, bhikkhave, sattannaṁ dhammānaṁ bhinnattā bhikkhu hotī”ti.
an7.85:1.5	Paṭhamaṁ.
an7.86:0.1	Aṅguttara Nikāya 7.86
an7.86:0.2	9. Samaṇavagga
an7.86:0.3	Samaṇasutta
an7.86:1.1	“Sattannaṁ, bhikkhave, dhammānaṁ samitattā samaṇo hoti …pe….
an7.86:1.2	Dutiyaṁ.
an7.87:0.1	Aṅguttara Nikāya 7.87
an7.87:0.2	9. Samaṇavagga
an7.87:0.3	Brāhmaṇasutta
an7.87:1.1	“… Bāhitattā brāhmaṇo hoti …pe….
an7.87:1.2	Tatiyaṁ.
an7.88:0.1	Aṅguttara Nikāya 7.88
an7.88:0.2	9. Samaṇavagga
an7.88:0.3	Sottiyasutta
an7.88:1.1	“… Nissutattā sottiyo hoti …pe….
an7.88:1.2	Catutthaṁ.
an7.89:0.1	Aṅguttara Nikāya 7.89
an7.89:0.2	9. Samaṇavagga
an7.89:0.3	Nhātakasutta
an7.89:1.1	“… Nhātattā nhātako hoti …pe….
an7.89:1.2	Pañcamaṁ.
an7.90:0.1	Aṅguttara Nikāya 7.90
an7.90:0.2	9. Samaṇavagga
an7.90:0.3	Vedagūsutta
an7.90:1.1	“… Viditattā vedagū hoti …pe….
an7.90:1.2	Chaṭṭhaṁ.
an7.91:0.1	Aṅguttara Nikāya 7.91
an7.91:0.2	9. Samaṇavagga
an7.91:0.3	Ariyasutta
an7.91:1.1	“… Ārakattā ariyo hoti …pe….
an7.91:1.2	Sattamaṁ.
an7.92:0.1	Aṅguttara Nikāya 7.92
an7.92:0.2	9. Samaṇavagga
an7.92:0.3	Arahāsutta
an7.92:1.1	“Ārakattā arahā hoti.
an7.92:1.2	Katamesaṁ sattannaṁ?
an7.92:1.3	Sakkāyadiṭṭhi ārakā hoti, vicikicchā ārakā hoti, sīlabbataparāmāso ārako hoti, rāgo ārako hoti, doso ārako hoti, moho ārako hoti, māno ārako hoti.
an7.92:1.4	Imesaṁ kho, bhikkhave, sattannaṁ dhammānaṁ ārakattā arahā hotī”ti.
an7.92:1.5	Aṭṭhamaṁ.
an7.93:0.1	Aṅguttara Nikāya 7.93
an7.93:0.2	9. Samaṇavagga
an7.93:0.3	Asaddhammasutta
an7.93:1.1	“Sattime, bhikkhave, asaddhammā.
an7.93:1.2	Katame satta?
an7.93:1.3	Assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti.
an7.93:1.4	Ime kho, bhikkhave, satta asaddhammā”ti.
an7.93:1.5	Navamaṁ.
an7.94:0.1	Aṅguttara Nikāya 7.94
an7.94:0.2	9. Samaṇavagga
an7.94:0.3	Saddhammasutta
an7.94:1.1	“Sattime, bhikkhave, saddhammā.
an7.94:1.2	Katame satta?
an7.94:1.3	Saddho hoti, hirīmā hoti, ottappī hoti, bahussuto hoti, āraddhavīriyo hoti, satimā hoti, paññavā hoti.
an7.94:1.4	Ime kho, bhikkhave, satta saddhammā”ti.
an7.94:1.5	Dasamaṁ.
an7.94:1.6	Samaṇavaggo navamo.
an7.94:2.0	Tassuddānaṁ
an7.94:2.1	Bhikkhuṁ samaṇo brāhmaṇo,
an7.94:2.2	sottiyo ceva nhātako;
an7.94:2.3	Vedagū ariyo arahā,
an7.94:2.4	asaddhammā ca saddhammāti.
an7.95:0.1	Aṅguttara Nikāya 7
an7.95:0.2	10. Āhuneyyavagga
an7.95:0.3	~
an7.95:1.1	“Sattime, bhikkhave, puggalā āhuneyyā …pe… dakkhiṇeyyā añjalikaraṇīyā anuttaraṁ puññakkhettaṁ lokassa.
an7.95:1.2	Katame satta?
an7.95:1.3	Idha, bhikkhave, ekacco puggalo cakkhusmiṁ aniccānupassī viharati aniccasaññī aniccapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno.
an7.95:1.4	So āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an7.95:1.5	Ayaṁ kho, bhikkhave, paṭhamo puggalo āhuneyyo pāhuneyyo …pe… anuttaraṁ puññakkhettaṁ lokassa.
an7.95:2.1	Puna caparaṁ, bhikkhave, idhekacco puggalo cakkhusmiṁ aniccānupassī viharati aniccasaññī aniccapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno.
an7.95:2.2	Tassa apubbaṁ acarimaṁ āsavapariyādānañca hoti jīvitapariyādānañca.
an7.95:2.3	Ayaṁ, bhikkhave, dutiyo puggalo āhuneyyo …pe… anuttaraṁ puññakkhettaṁ lokassa.
an7.95:3.1	Puna caparaṁ, bhikkhave, idhekacco puggalo cakkhusmiṁ aniccānupassī viharati aniccasaññī aniccapaṭisaṁvedī satataṁ samitaṁ abbokiṇṇaṁ cetasā adhimuccamāno paññāya pariyogāhamāno.
an7.95:3.2	So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti …pe…
an7.95:3.3	upahaccaparinibbāyī hoti …pe…
an7.95:3.4	asaṅkhāraparinibbāyī hoti …pe…
an7.95:3.5	sasaṅkhāraparinibbāyī hoti …pe…
an7.95:3.6	uddhaṁsoto hoti akaniṭṭhagāmī.
an7.95:3.7	Ayaṁ, bhikkhave, sattamo puggalo āhuneyyo …pe… anuttaraṁ puññakkhettaṁ lokassa.
an7.95:3.8	Ime kho, bhikkhave, satta puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassā”ti.
an7.96-614:0.1	Aṅguttara Nikāya 7
an7.96-614:0.2	10. Āhuneyyavagga
an7.96-614:0.3	~
an7.96-614:1.1	“Sattime, bhikkhave, puggalā āhuneyyā pāhuneyyā …pe… anuttaraṁ puññakkhettaṁ lokassa.
an7.96-614:1.2	Katame satta?
an7.96-614:1.3	Idha, bhikkhave, ekacco puggalo cakkhusmiṁ dukkhānupassī viharati …pe…
an7.96-614:1.4	cakkhusmiṁ anattānupassī viharati …pe…
an7.96-614:1.5	cakkhusmiṁ khayānupassī viharati …pe…
an7.96-614:1.6	cakkhusmiṁ vayānupassī viharati …pe…
an7.96-614:1.7	cakkhusmiṁ virāgānupassī viharati …pe…
an7.96-614:1.8	cakkhusmiṁ nirodhānupassī viharati …pe…
an7.96-614:1.9	cakkhusmiṁ paṭinissaggānupassī viharati …pe….
an7.96-614:2.1	Sotasmiṁ …pe…
an7.96-614:2.2	ghānasmiṁ …
an7.96-614:2.3	jivhāya …
an7.96-614:2.4	kāyasmiṁ …
an7.96-614:2.5	manasmiṁ …pe….
an7.96-614:3.1	Rūpesu …pe…
an7.96-614:3.2	saddesu …
an7.96-614:3.3	gandhesu …
an7.96-614:3.4	rasesu …
an7.96-614:3.5	phoṭṭhabbesu …
an7.96-614:3.6	dhammesu …pe….
an7.96-614:4.1	Cakkhuviññāṇe …pe…
an7.96-614:4.2	sotaviññāṇe …
an7.96-614:4.3	ghānaviññāṇe …
an7.96-614:4.4	jivhāviññāṇe …
an7.96-614:4.5	kāyaviññāṇe …
an7.96-614:4.6	manoviññāṇe …pe….
an7.96-614:5.1	Cakkhusamphasse …pe…
an7.96-614:5.2	sotasamphasse …
an7.96-614:5.3	ghānasamphasse …
an7.96-614:5.4	jivhāsamphasse …
an7.96-614:5.5	kāyasamphasse …
an7.96-614:5.6	manosamphasse …pe….
an7.96-614:6.1	Cakkhusamphassajāya vedanāya …pe…
an7.96-614:6.2	sotasamphassajāya vedanāya …
an7.96-614:6.3	ghānasamphassajāya vedanāya …
an7.96-614:6.4	jivhāsamphassajāya vedanāya …
an7.96-614:6.5	kāyasamphassajāya vedanāya …
an7.96-614:6.6	manosamphassajāya vedanāya …pe….
an7.96-614:7.1	Rūpasaññāya …pe…
an7.96-614:7.2	saddasaññāya …
an7.96-614:7.3	gandhasaññāya …
an7.96-614:7.4	rasasaññāya …
an7.96-614:7.5	phoṭṭhabbasaññāya …
an7.96-614:7.6	dhammasaññāya …pe….
an7.96-614:8.1	Rūpasañcetanāya …pe…
an7.96-614:8.2	saddasañcetanāya …
an7.96-614:8.3	gandhasañcetanāya …
an7.96-614:8.4	rasasañcetanāya …
an7.96-614:8.5	phoṭṭhabbasañcetanāya …
an7.96-614:8.6	dhammasañcetanāya …pe….
an7.96-614:9.1	Rūpataṇhāya …pe…
an7.96-614:9.2	saddataṇhāya …
an7.96-614:9.3	gandhataṇhāya …
an7.96-614:9.4	rasataṇhāya …
an7.96-614:9.5	phoṭṭhabbataṇhāya …
an7.96-614:9.6	dhammataṇhāya …pe….
an7.96-614:10.1	Rūpavitakke …pe…
an7.96-614:10.2	saddavitakke …
an7.96-614:10.3	gandhavitakke …
an7.96-614:10.4	rasavitakke …
an7.96-614:10.5	phoṭṭhabbavitakke …
an7.96-614:10.6	dhammavitakke …pe….
an7.96-614:11.1	Rūpavicāre …pe…
an7.96-614:11.2	saddavicāre …
an7.96-614:11.3	gandhavicāre …
an7.96-614:11.4	rasavicāre …
an7.96-614:11.5	phoṭṭhabbavicāre …
an7.96-614:11.6	dhammavicāre …pe….
an7.96-614:12.1	Pañcakkhandhe …pe…
an7.96-614:12.2	rūpakkhandhe …
an7.96-614:12.3	vedanākkhandhe …
an7.96-614:12.4	saññākkhandhe …
an7.96-614:12.5	saṅkhārakkhandhe …
an7.96-614:12.6	viññāṇakkhandhe aniccānupassī viharati …pe…
an7.96-614:12.7	dukkhānupassī viharati …
an7.96-614:12.8	anattānupassī viharati …
an7.96-614:12.9	khayānupassī viharati …
an7.96-614:12.10	vayānupassī viharati …
an7.96-614:12.11	virāgānupassī viharati …
an7.96-614:12.12	nirodhānupassī viharati …
an7.96-614:12.13	paṭinissaggānupassī viharati …pe…
an7.96-614:12.14	lokassā”ti.
an7.96-614:13.1	“Chadvārārammaṇesvettha,
an7.96-614:13.2	viññāṇesu ca phassesu;
an7.96-614:13.3	Vedanāsu ca dvārassa,
an7.96-614:13.4	suttā honti visuṁ aṭṭha.
an7.96-614:14.1	Saññā sañcetanā taṇhā,
an7.96-614:14.2	vitakkesu vicāre ca;
an7.96-614:14.3	Gocarassa visuṁ aṭṭha,
an7.96-614:14.4	pañcakkhandhe ca pacceke.
an7.96-614:15.1	Soḷasasvettha mūlesu,
an7.96-614:15.2	aniccaṁ dukkhamanattā;
an7.96-614:15.3	Khayā vayā virāgā ca,
an7.96-614:15.4	nirodhā paṭinissaggā.
an7.96-614:16.1	Kamaṁ aṭṭhānupassanā,
an7.96-614:16.2	yojetvāna visuṁ visuṁ;
an7.96-614:16.3	Sampiṇḍitesu sabbesu,
an7.96-614:16.4	honti pañca satāni ca;
an7.96-614:16.5	Aṭṭhavīsati suttāni,
an7.96-614:16.6	āhuneyye ca vaggike”.
an7.96-614:16.7	Āhuneyyavaggo dasamo.
an7.615:0.1	Aṅguttara Nikāya 7
an7.615:0.2	11. Rāgapeyyāla
an7.615:0.3	~
an7.615:1.1	“Rāgassa, bhikkhave, abhiññāya satta dhammā bhāvetabbā.
an7.615:1.2	Katame satta?
an7.615:1.3	Satisambojjhaṅgo …pe…
an7.615:1.4	upekkhāsambojjhaṅgo—
an7.615:1.5	rāgassa, bhikkhave, abhiññāya ime satta dhammā bhāvetabbā”ti.
an7.616:0.1	Aṅguttara Nikāya 7
an7.616:0.2	11. Rāgapeyyāla
an7.616:0.3	~
an7.616:1.1	“Rāgassa, bhikkhave, abhiññāya satta dhammā bhāvetabbā.
an7.616:1.2	Katame satta?
an7.616:1.3	Aniccasaññā, anattasaññā, asubhasaññā, ādīnavasaññā, pahānasaññā, virāgasaññā, nirodhasaññā—
an7.616:1.4	rāgassa, bhikkhave, abhiññāya ime satta dhammā bhāvetabbā”ti.
an7.617:0.1	Aṅguttara Nikāya 7
an7.617:0.2	11. Rāgapeyyāla
an7.617:0.3	~
an7.617:1.1	“Rāgassa, bhikkhave, abhiññāya satta dhammā bhāvetabbā.
an7.617:1.2	Katame satta?
an7.617:1.3	Asubhasaññā, maraṇasaññā, āhāre paṭikūlasaññā, sabbaloke anabhiratasaññā, aniccasaññā, anicce dukkhasaññā, dukkhe anattasaññā—
an7.617:1.4	rāgassa, bhikkhave, abhiññāya ime satta dhammā bhāvetabbā”ti.
an7.618-644:0.1	Aṅguttara Nikāya 7
an7.618-644:0.2	11. Rāgapeyyāla
an7.618-644:0.3	~
an7.618-644:1.1	“Rāgassa, bhikkhave, pariññāya …pe…
an7.618-644:1.2	parikkhayāya …
an7.618-644:1.3	pahānāya …
an7.618-644:1.4	khayāya …
an7.618-644:1.5	vayāya …
an7.618-644:1.6	virāgāya …
an7.618-644:1.7	nirodhāya …
an7.618-644:1.8	cāgāya …pe…
an7.618-644:1.9	paṭinissaggāya ime satta dhammā bhāvetabbā”ti.
an7.645-1124:0.1	Aṅguttara Nikāya 7
an7.645-1124:0.2	11. Rāgapeyyāla
an7.645-1124:0.3	~
an7.645-1124:1.1	“Dosassa …pe…
an7.645-1124:1.2	mohassa …
an7.645-1124:1.3	kodhassa …
an7.645-1124:1.4	upanāhassa …
an7.645-1124:1.5	makkhassa …
an7.645-1124:1.6	paḷāsassa …
an7.645-1124:1.7	issāya …
an7.645-1124:1.8	macchariyassa …
an7.645-1124:1.9	māyāya …
an7.645-1124:1.10	sāṭheyyassa …
an7.645-1124:1.11	thambhassa …
an7.645-1124:1.12	sārambhassa …
an7.645-1124:1.13	mānassa …
an7.645-1124:1.14	atimānassa …
an7.645-1124:1.15	madassa …
an7.645-1124:1.16	pamādassa abhiññāya …pe…
an7.645-1124:1.17	pariññāya …
an7.645-1124:1.18	parikkhayāya …
an7.645-1124:1.19	pahānāya …
an7.645-1124:1.20	khayāya …
an7.645-1124:1.21	vayāya …
an7.645-1124:1.22	virāgāya …
an7.645-1124:1.23	nirodhāya …
an7.645-1124:1.24	cāgāya …
an7.645-1124:1.25	paṭinissaggāya …pe…
an7.645-1124:1.26	ime satta dhammā bhāvetabbā”ti.
an7.645-1124:2.1	Idamavoca bhagavā.
an7.645-1124:2.2	Attamanā te bhikkhū bhagavato bhāsitaṁ abhinandunti.
an7.645-1124:2.3	Rāgapeyyālaṁ niṭṭhitaṁ.
an7.645-1124:2.4	Sattakanipātapāḷi niṭṭhitā.
an8.1:0.1	Aṅguttara Nikāya 8.1
an8.1:0.2	1. Mettāvagga
an8.1:0.3	Mettāsutta
an8.1:1.1	Evaṁ me sutaṁ—
an8.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an8.1:1.3	Tatra kho bhagavā bhikkhū āmantesi:
an8.1:1.4	“bhikkhavo”ti.
an8.1:1.5	“Bhadante”ti te bhikkhū bhagavato paccassosuṁ.
an8.1:1.6	Bhagavā etadavoca:
an8.1:2.1	“Mettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya aṭṭhānisaṁsā pāṭikaṅkhā.
an8.1:2.2	Katame aṭṭha?
an8.1:2.3	Sukhaṁ supati, sukhaṁ paṭibujjhati, na pāpakaṁ supinaṁ passati, manussānaṁ piyo hoti, amanussānaṁ piyo hoti, devatā rakkhanti, nāssa aggi vā visaṁ vā satthaṁ vā kamati, uttariṁ appaṭivijjhanto brahmalokūpago hoti.
an8.1:2.4	Mettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime aṭṭhānisaṁsā pāṭikaṅkhāti.
an8.1:3.1	Yo ca mettaṁ bhāvayati,
an8.1:3.2	appamāṇaṁ paṭissato;
an8.1:3.3	Tanū saṁyojanā honti,
an8.1:3.4	passato upadhikkhayaṁ.
an8.1:4.1	Ekampi ce pāṇamaduṭṭhacitto,
an8.1:4.2	Mettāyati kusalī tena hoti;
an8.1:4.3	Sabbe ca pāṇe manasānukampī,
an8.1:4.4	Pahūtamariyo pakaroti puññaṁ.
an8.1:5.1	Ye sattasaṇḍaṁ pathaviṁ vijetvā,
an8.1:5.2	Rājisayo yajamānā anupariyagā;
an8.1:5.3	Assamedhaṁ purisamedhaṁ,
an8.1:5.4	Sammāpāsaṁ vājapeyyaṁ niraggaḷaṁ.
an8.1:6.1	Mettassa cittassa subhāvitassa,
an8.1:6.2	Kalampi te nānubhavanti soḷasiṁ;
an8.1:6.3	Candappabhā tāragaṇāva sabbe,
an8.1:6.4	Yathā na agghanti kalampi soḷasiṁ.
an8.1:7.1	Yo na hanti na ghāteti,
an8.1:7.2	na jināti na jāpaye;
an8.1:7.3	Mettaṁso sabbabhūtānaṁ,
an8.1:7.4	veraṁ tassa na kenacī”ti.
an8.1:7.5	Paṭhamaṁ.
an8.2:0.1	Aṅguttara Nikāya 8.2
an8.2:0.2	1. Mettāvagga
an8.2:0.3	Paññāsutta
an8.2:1.1	“Aṭṭhime, bhikkhave, hetū aṭṭha paccayā ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattanti.
an8.2:1.2	Katame aṭṭha?
an8.2:1.3	Idha, bhikkhave, bhikkhu satthāraṁ upanissāya viharati aññataraṁ vā garuṭṭhāniyaṁ sabrahmacāriṁ, yatthassa tibbaṁ hirottappaṁ paccupaṭṭhitaṁ hoti pemañca gāravo ca.
an8.2:1.4	Ayaṁ, bhikkhave, paṭhamo hetu paṭhamo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
an8.2:2.1	So taṁ satthāraṁ upanissāya viharanto aññataraṁ vā garuṭṭhāniyaṁ sabrahmacāriṁ, yatthassa tibbaṁ hirottappaṁ paccupaṭṭhitaṁ hoti pemañca gāravo ca, te kālena kālaṁ upasaṅkamitvā paripucchati paripañhati:
an8.2:2.2	‘idaṁ, bhante, kathaṁ; imassa ko attho’ti?
an8.2:2.3	Tassa te āyasmanto avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṁ paṭivinodenti.
an8.2:2.4	Ayaṁ, bhikkhave, dutiyo hetu dutiyo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
an8.2:3.1	So taṁ dhammaṁ sutvā dvayena vūpakāsena sampādeti—kāyavūpakāsena ca cittavūpakāsena ca.
an8.2:3.2	Ayaṁ, bhikkhave, tatiyo hetu tatiyo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
an8.2:4.1	Sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an8.2:4.2	Ayaṁ, bhikkhave, catuttho hetu catuttho paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
an8.2:5.1	Bahussuto hoti sutadharo sutasannicayo. Ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an8.2:5.2	Ayaṁ, bhikkhave, pañcamo hetu pañcamo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
an8.2:6.1	Āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an8.2:6.2	Ayaṁ, bhikkhave, chaṭṭho hetu chaṭṭho paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
an8.2:7.1	Saṅghagato kho pana anānākathiko hoti atiracchānakathiko.
an8.2:7.2	Sāmaṁ vā dhammaṁ bhāsati paraṁ vā ajjhesati ariyaṁ vā tuṇhībhāvaṁ nātimaññati.
an8.2:7.3	Ayaṁ, bhikkhave, sattamo hetu sattamo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
an8.2:8.1	Pañcasu kho pana upādānakkhandhesu udayabbayānupassī viharati:
an8.2:8.2	‘iti rūpaṁ, iti rūpassa samudayo, iti rūpassa atthaṅgamo;
an8.2:8.3	iti vedanā, iti vedanāya samudayo, iti vedanāya atthaṅgamo;
an8.2:8.4	iti saññā …pe…
an8.2:8.5	iti saṅkhārā …
an8.2:8.6	iti viññāṇaṁ, iti viññāṇassa samudayo, iti viññāṇassa atthaṅgamo’ti.
an8.2:8.7	Ayaṁ, bhikkhave, aṭṭhamo hetu aṭṭhamo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
an8.2:9.1	Tamenaṁ sabrahmacārī evaṁ sambhāventi:
an8.2:9.2	‘ayaṁ kho āyasmā satthāraṁ upanissāya viharati aññataraṁ vā garuṭṭhāniyaṁ sabrahmacāriṁ, yatthassa tibbaṁ hirottappaṁ paccupaṭṭhitaṁ hoti pemañca gāravo ca.
an8.2:9.3	Addhā ayamāyasmā jānaṁ jānāti passaṁ passatī’ti.
an8.2:9.4	Ayampi dhammo piyattāya garuttāya bhāvanāya sāmaññāya ekībhāvāya saṁvattati.
an8.2:10.1	‘Taṁ kho panāyamāyasmā satthāraṁ upanissāya viharanto aññataraṁ vā garuṭṭhāniyaṁ sabrahmacāriṁ, yatthassa tibbaṁ hirottappaṁ paccupaṭṭhitaṁ hoti pemañca gāravo ca, te kālena kālaṁ upasaṅkamitvā paripucchati paripañhati:
an8.2:10.2	“idaṁ, bhante, kathaṁ; imassa ko attho”ti?
an8.2:10.3	Tassa te āyasmanto avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṁ paṭivinodenti.
an8.2:10.4	Addhā ayamāyasmā jānaṁ jānāti passaṁ passatī’ti.
an8.2:10.5	Ayampi dhammo piyattāya garuttāya bhāvanāya sāmaññāya ekībhāvāya saṁvattati.
an8.2:11.1	‘Taṁ kho panāyamāyasmā dhammaṁ sutvā dvayena vūpakāsena sampādeti—kāyavūpakāsena ca cittavūpakāsena ca.
an8.2:11.2	Addhā ayamāyasmā jānaṁ jānāti passaṁ passatī’ti.
an8.2:11.3	Ayampi dhammo piyattāya garuttāya bhāvanāya sāmaññāya ekībhāvāya saṁvattati.
an8.2:12.1	‘Sīlavā kho panāyamāyasmā pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an8.2:12.2	Addhā ayamāyasmā jānaṁ jānāti passaṁ passatī’ti.
an8.2:12.3	Ayampi dhammo piyattāya garuttāya bhāvanāya sāmaññāya ekībhāvāya saṁvattati.
an8.2:13.1	‘Bahussuto kho panāyamāyasmā sutadharo sutasannicayo. Ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an8.2:13.2	Addhā ayamāyasmā jānaṁ jānāti passaṁ passatī’ti.
an8.2:13.3	Ayampi dhammo piyattāya garuttāya bhāvanāya sāmaññāya ekībhāvāya saṁvattati.
an8.2:14.1	‘Āraddhavīriyo kho panāyamāyasmā viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an8.2:14.2	Addhā ayamāyasmā jānaṁ jānāti passaṁ passatī’ti.
an8.2:14.3	Ayampi dhammo piyattāya garuttāya bhāvanāya sāmaññāya ekībhāvāya saṁvattati.
an8.2:15.1	‘Saṅghagato kho panāyamāyasmā anānākathiko hoti atiracchānakathiko.
an8.2:15.2	Sāmaṁ vā dhammaṁ bhāsati paraṁ vā ajjhesati ariyaṁ vā tuṇhībhāvaṁ nātimaññati.
an8.2:15.3	Addhā ayamāyasmā jānaṁ jānāti passaṁ passatī’ti.
an8.2:15.4	Ayampi dhammo piyattāya garuttāya bhāvanāya sāmaññāya ekībhāvāya saṁvattati.
an8.2:16.1	‘Pañcasu kho panāyamāyasmā upādānakkhandhesu udayabbayānupassī viharati—
an8.2:16.2	iti rūpaṁ, iti rūpassa samudayo, iti rūpassa atthaṅgamo;
an8.2:16.3	iti vedanā …pe…
an8.2:16.4	iti saññā …
an8.2:16.5	iti saṅkhārā …
an8.2:16.6	iti viññāṇaṁ, iti viññāṇassa samudayo, iti viññāṇassa atthaṅgamoti.
an8.2:16.7	Addhā ayamāyasmā jānaṁ jānāti passaṁ passatī’ti.
an8.2:16.8	Ayampi dhammo piyattāya garuttāya bhāvanāya sāmaññāya ekībhāvāya saṁvattati.
an8.2:17.1	Ime kho, bhikkhave, aṭṭha hetū aṭṭha paccayā ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattantī”ti.
an8.2:17.2	Dutiyaṁ.
an8.3:0.1	Aṅguttara Nikāya 8.3
an8.3:0.2	1. Mettāvagga
an8.3:0.3	Paṭhamaappiyasutta
an8.3:1.1	“Aṭṭhahi, bhikkhave, dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an8.3:1.2	Katamehi aṭṭhahi?
an8.3:1.3	Idha, bhikkhave, bhikkhu appiyapasaṁsī ca hoti, piyagarahī ca, lābhakāmo ca, sakkārakāmo ca, ahiriko ca, anottappī ca, pāpiccho ca, micchādiṭṭhi ca.
an8.3:1.4	Imehi kho, bhikkhave, aṭṭhahi dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an8.3:2.1	Aṭṭhahi, bhikkhave, dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an8.3:2.2	Katamehi aṭṭhahi?
an8.3:2.3	Idha, bhikkhave, bhikkhu na appiyapasaṁsī ca hoti, na piyagarahī ca, na lābhakāmo ca, na sakkārakāmo ca, hirīmā ca hoti, ottappī ca, appiccho ca, sammādiṭṭhi ca.
an8.3:2.4	Imehi kho, bhikkhave, aṭṭhahi dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an8.3:2.5	Tatiyaṁ.
an8.4:0.1	Aṅguttara Nikāya 8.4
an8.4:0.2	1. Mettāvagga
an8.4:0.3	Dutiyaappiyasutta
an8.4:1.1	“Aṭṭhahi, bhikkhave, dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an8.4:1.2	Katamehi aṭṭhahi?
an8.4:1.3	Idha, bhikkhave, bhikkhu lābhakāmo ca hoti, sakkārakāmo ca, anavaññattikāmo ca, akālaññū ca, amattaññū ca, asuci ca, bahubhāṇī ca, akkosakaparibhāsako ca sabrahmacārīnaṁ.
an8.4:1.4	Imehi kho, bhikkhave, aṭṭhahi dhammehi samannāgato bhikkhu sabrahmacārīnaṁ appiyo ca hoti amanāpo ca agaru ca abhāvanīyo ca.
an8.4:2.1	Aṭṭhahi, bhikkhave, dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo ca.
an8.4:2.2	Katamehi aṭṭhahi?
an8.4:2.3	Idha, bhikkhave, bhikkhu na lābhakāmo ca hoti, na sakkārakāmo ca, na anavaññattikāmo ca, kālaññū ca, mattaññū ca, suci ca, na bahubhāṇī ca, anakkosakaparibhāsako ca sabrahmacārīnaṁ.
an8.4:2.4	Imehi kho, bhikkhave, aṭṭhahi dhammehi samannāgato bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.
an8.4:2.5	Catutthaṁ.
an8.5:0.1	Aṅguttara Nikāya 8.5
an8.5:0.2	1. Mettāvagga
an8.5:0.3	Paṭhamalokadhammasutta
an8.5:1.1	“Aṭṭhime, bhikkhave, lokadhammā lokaṁ anuparivattanti, loko ca aṭṭha lokadhamme anuparivattati.
an8.5:1.2	Katame aṭṭha?
an8.5:1.3	Lābho ca, alābho ca, yaso ca, ayaso ca, nindā ca, pasaṁsā ca, sukhañca, dukkhañca.
an8.5:1.4	Ime kho, bhikkhave, aṭṭha lokadhammā lokaṁ anuparivattanti, loko ca ime aṭṭha lokadhamme anuparivattatīti.
an8.5:2.1	Lābho alābho ca yasāyaso ca,
an8.5:2.2	Nindā pasaṁsā ca sukhaṁ dukhañca;
an8.5:2.3	Ete aniccā manujesu dhammā,
an8.5:2.4	Asassatā vipariṇāmadhammā.
an8.5:3.1	Ete ca ñatvā satimā sumedho,
an8.5:3.2	Avekkhati vipariṇāmadhamme;
an8.5:3.3	Iṭṭhassa dhammā na mathenti cittaṁ,
an8.5:3.4	Aniṭṭhato no paṭighātameti.
an8.5:4.1	Tassānurodhā atha vā virodhā,
an8.5:4.2	Vidhūpitā atthaṅgatā na santi;
an8.5:4.3	Padañca ñatvā virajaṁ asokaṁ,
an8.5:4.4	Sammappajānāti bhavassa pāragū”ti.
an8.5:4.5	Pañcamaṁ.
an8.6:0.1	Aṅguttara Nikāya 8.6
an8.6:0.2	1. Mettāvagga
an8.6:0.3	Dutiyalokadhammasutta
an8.6:1.1	“Aṭṭhime, bhikkhave, lokadhammā lokaṁ anuparivattanti, loko ca aṭṭha lokadhamme anuparivattati.
an8.6:1.2	Katame aṭṭha?
an8.6:1.3	Lābho ca, alābho ca, yaso ca, ayaso ca, nindā ca, pasaṁsā ca, sukhañca, dukkhañca.
an8.6:1.4	Ime kho, bhikkhave, aṭṭha lokadhammā lokaṁ anuparivattanti, loko ca ime aṭṭha lokadhamme anuparivattati.
an8.6:2.1	Assutavato, bhikkhave, puthujjanassa uppajjati lābhopi alābhopi yasopi ayasopi nindāpi pasaṁsāpi sukhampi dukkhampi.
an8.6:2.2	Sutavatopi, bhikkhave, ariyasāvakassa uppajjati lābhopi alābhopi yasopi ayasopi nindāpi pasaṁsāpi sukhampi dukkhampi.
an8.6:2.3	Tatra, bhikkhave, ko viseso ko adhippayāso kiṁ nānākaraṇaṁ sutavato ariyasāvakassa assutavatā puthujjanenā”ti?
an8.6:2.4	“Bhagavaṁmūlakā no, bhante, dhammā bhagavaṁnettikā bhagavaṁpaṭisaraṇā. Sādhu vata, bhante, bhagavantaṁyeva paṭibhātu etassa bhāsitassa attho. Bhagavato sutvā bhikkhū dhāressantī”ti.
an8.6:3.1	“Tena hi, bhikkhave, suṇātha, sādhukaṁ manasi karotha, bhāsissāmī”ti.
an8.6:3.2	“Evaṁ, bhante”ti kho te bhikkhū bhagavato paccassosuṁ.
an8.6:3.3	Bhagavā etadavoca:
an8.6:3.4	“assutavato, bhikkhave, puthujjanassa uppajjati lābho.
an8.6:3.5	So na iti paṭisañcikkhati:
an8.6:3.6	‘uppanno kho me ayaṁ lābho;
an8.6:3.7	so ca kho anicco dukkho vipariṇāmadhammo’ti yathābhūtaṁ nappajānāti.
an8.6:3.8	Uppajjati alābho …pe…
an8.6:3.9	uppajjati yaso …
an8.6:3.10	uppajjati ayaso …
an8.6:3.11	uppajjati nindā …
an8.6:3.12	uppajjati pasaṁsā …
an8.6:3.13	uppajjati sukhaṁ …
an8.6:3.14	uppajjati dukkhaṁ.
an8.6:3.15	So na iti paṭisañcikkhati:
an8.6:3.16	‘uppannaṁ kho me idaṁ dukkhaṁ;
an8.6:3.17	tañca kho aniccaṁ dukkhaṁ vipariṇāmadhamman’ti yathābhūtaṁ nappajānāti.
an8.6:4.1	Tassa lābhopi cittaṁ pariyādāya tiṭṭhati, alābhopi cittaṁ pariyādāya tiṭṭhati, yasopi cittaṁ pariyādāya tiṭṭhati, ayasopi cittaṁ pariyādāya tiṭṭhati, nindāpi cittaṁ pariyādāya tiṭṭhati, pasaṁsāpi cittaṁ pariyādāya tiṭṭhati, sukhampi cittaṁ pariyādāya tiṭṭhati, dukkhampi cittaṁ pariyādāya tiṭṭhati.
an8.6:4.2	So uppannaṁ lābhaṁ anurujjhati, alābhe paṭivirujjhati;
an8.6:4.3	uppannaṁ yasaṁ anurujjhati, ayase paṭivirujjhati;
an8.6:4.4	uppannaṁ pasaṁsaṁ anurujjhati, nindāya paṭivirujjhati;
an8.6:4.5	uppannaṁ sukhaṁ anurujjhati, dukkhe paṭivirujjhati.
an8.6:4.6	So evaṁ anurodhavirodhasamāpanno na parimuccati jātiyā jarāya maraṇena sokehi paridevehi dukkhehi domanassehi upāyāsehi.
an8.6:4.7	‘Na parimuccati dukkhasmā’ti vadāmi.
an8.6:5.1	Sutavato ca kho, bhikkhave, ariyasāvakassa uppajjati lābho.
an8.6:5.2	So iti paṭisañcikkhati:
an8.6:5.3	‘uppanno kho me ayaṁ lābho;
an8.6:5.4	so ca kho anicco dukkho vipariṇāmadhammo’ti yathābhūtaṁ pajānāti.
an8.6:5.5	Uppajjati alābho …pe…
an8.6:5.6	uppajjati yaso …
an8.6:5.7	uppajjati ayaso …
an8.6:5.8	uppajjati nindā …
an8.6:5.9	uppajjati pasaṁsā …
an8.6:5.10	uppajjati sukhaṁ …
an8.6:5.11	uppajjati dukkhaṁ.
an8.6:5.12	So iti paṭisañcikkhati:
an8.6:5.13	‘uppannaṁ kho me idaṁ dukkhaṁ;
an8.6:5.14	tañca kho aniccaṁ dukkhaṁ vipariṇāmadhamman’ti yathābhūtaṁ pajānāti.
an8.6:6.1	Tassa lābhopi cittaṁ na pariyādāya tiṭṭhati, alābhopi cittaṁ na pariyādāya tiṭṭhati, yasopi cittaṁ na pariyādāya tiṭṭhati, ayasopi cittaṁ na pariyādāya tiṭṭhati, nindāpi cittaṁ na pariyādāya tiṭṭhati, pasaṁsāpi cittaṁ na pariyādāya tiṭṭhati, sukhampi cittaṁ na pariyādāya tiṭṭhati, dukkhampi cittaṁ na pariyādāya tiṭṭhati.
an8.6:6.2	So uppannaṁ lābhaṁ nānurujjhati, alābhe nappaṭivirujjhati;
an8.6:6.3	uppannaṁ yasaṁ nānurujjhati, ayase nappaṭivirujjhati;
an8.6:6.4	uppannaṁ pasaṁsaṁ nānurujjhati, nindāya nappaṭivirujjhati;
an8.6:6.5	uppannaṁ sukhaṁ nānurujjhati, dukkhe nappaṭivirujjhati.
an8.6:6.6	So evaṁ anurodhavirodhavippahīno parimuccati jātiyā jarāya maraṇena sokehi paridevehi dukkhehi domanassehi upāyāsehi.
an8.6:6.7	‘Parimuccati dukkhasmā’ti vadāmi.
an8.6:6.8	Ayaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanenāti.
an8.6:7.1	Lābho alābho ca yasāyaso ca,
an8.6:7.2	Nindā pasaṁsā ca sukhaṁ dukhañca;
an8.6:7.3	Ete aniccā manujesu dhammā,
an8.6:7.4	Asassatā vipariṇāmadhammā.
an8.6:8.1	Ete ca ñatvā satimā sumedho,
an8.6:8.2	Avekkhati vipariṇāmadhamme;
an8.6:8.3	Iṭṭhassa dhammā na mathenti cittaṁ,
an8.6:8.4	Aniṭṭhato no paṭighātameti.
an8.6:9.1	Tassānurodhā atha vā virodhā,
an8.6:9.2	Vidhūpitā atthaṅgatā na santi;
an8.6:9.3	Padañca ñatvā virajaṁ asokaṁ,
an8.6:9.4	Sammappajānāti bhavassa pāragū”ti.
an8.6:9.5	Chaṭṭhaṁ.
an8.7:0.1	Aṅguttara Nikāya 8.7
an8.7:0.2	1. Mettāvagga
an8.7:0.3	Devadattavipattisutta
an8.7:1.1	Ekaṁ samayaṁ bhagavā rājagahe viharati gijjhakūṭe pabbate acirapakkante devadatte.
an8.7:1.2	Tatra bhagavā devadattaṁ ārabbha bhikkhū āmantesi:
an8.7:1.3	“sādhu, bhikkhave, bhikkhu kālena kālaṁ attavipattiṁ paccavekkhitā hoti.
an8.7:1.4	Sādhu, bhikkhave, bhikkhu kālena kālaṁ paravipattiṁ paccavekkhitā hoti.
an8.7:1.5	Sādhu, bhikkhave, bhikkhu kālena kālaṁ attasampattiṁ paccavekkhitā hoti.
an8.7:1.6	Sādhu, bhikkhave, bhikkhu kālena kālaṁ parasampattiṁ paccavekkhitā hoti.
an8.7:1.7	Aṭṭhahi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
an8.7:2.1	Katamehi aṭṭhahi?
an8.7:2.2	Lābhena hi, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho.
an8.7:2.3	Alābhena, bhikkhave …pe…
an8.7:2.4	yasena, bhikkhave …
an8.7:2.5	ayasena, bhikkhave …
an8.7:2.6	sakkārena, bhikkhave …
an8.7:2.7	asakkārena, bhikkhave …
an8.7:2.8	pāpicchatāya, bhikkhave …
an8.7:2.9	pāpamittatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho.
an8.7:2.10	Imehi kho, bhikkhave, aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
an8.7:3.1	Sādhu, bhikkhave, bhikkhu uppannaṁ lābhaṁ abhibhuyya abhibhuyya vihareyya,
an8.7:3.2	uppannaṁ alābhaṁ …pe…
an8.7:3.3	uppannaṁ yasaṁ …
an8.7:3.4	uppannaṁ ayasaṁ …
an8.7:3.5	uppannaṁ sakkāraṁ …
an8.7:3.6	uppannaṁ asakkāraṁ …
an8.7:3.7	uppannaṁ pāpicchataṁ …
an8.7:3.8	uppannaṁ pāpamittataṁ abhibhuyya abhibhuyya vihareyya.
an8.7:4.1	Kiñca, bhikkhave, bhikkhu atthavasaṁ paṭicca uppannaṁ lābhaṁ abhibhuyya abhibhuyya vihareyya,
an8.7:4.2	uppannaṁ alābhaṁ …pe…
an8.7:4.3	uppannaṁ yasaṁ …
an8.7:4.4	uppannaṁ ayasaṁ …
an8.7:4.5	uppannaṁ sakkāraṁ …
an8.7:4.6	uppannaṁ asakkāraṁ …
an8.7:4.7	uppannaṁ pāpicchataṁ …
an8.7:4.8	uppannaṁ pāpamittataṁ abhibhuyya abhibhuyya vihareyya?
an8.7:5.1	Yaṁ hissa, bhikkhave, uppannaṁ lābhaṁ anabhibhuyya viharato uppajjeyyuṁ āsavā vighātapariḷāhā, uppannaṁ lābhaṁ abhibhuyya viharato evaṁsa te āsavā vighātapariḷāhā na honti.
an8.7:5.2	Yaṁ hissa, bhikkhave, uppannaṁ alābhaṁ …pe…
an8.7:5.3	uppannaṁ yasaṁ …
an8.7:5.4	uppannaṁ ayasaṁ …
an8.7:5.5	uppannaṁ sakkāraṁ …
an8.7:5.6	uppannaṁ asakkāraṁ …
an8.7:5.7	uppannaṁ pāpicchataṁ …
an8.7:5.8	uppannaṁ pāpamittataṁ anabhibhuyya viharato uppajjeyyuṁ āsavā vighātapariḷāhā, uppannaṁ pāpamittataṁ abhibhuyya viharato evaṁsa te āsavā vighātapariḷāhā na honti.
an8.7:5.9	Idaṁ kho, bhikkhave, bhikkhu atthavasaṁ paṭicca uppannaṁ lābhaṁ abhibhuyya abhibhuyya vihareyya,
an8.7:5.10	uppannaṁ alābhaṁ …pe…
an8.7:5.11	uppannaṁ yasaṁ …
an8.7:5.12	uppannaṁ ayasaṁ …
an8.7:5.13	uppannaṁ sakkāraṁ …
an8.7:5.14	uppannaṁ asakkāraṁ …
an8.7:5.15	uppannaṁ pāpicchataṁ …
an8.7:5.16	uppannaṁ pāpamittataṁ abhibhuyya abhibhuyya vihareyya.
an8.7:6.1	Tasmātiha, bhikkhave, evaṁ sikkhitabbaṁ:
an8.7:6.2	‘uppannaṁ lābhaṁ abhibhuyya abhibhuyya viharissāma,
an8.7:6.3	uppannaṁ alābhaṁ …pe…
an8.7:6.4	uppannaṁ yasaṁ …
an8.7:6.5	uppannaṁ ayasaṁ …
an8.7:6.6	uppannaṁ sakkāraṁ …
an8.7:6.7	uppannaṁ asakkāraṁ …
an8.7:6.8	uppannaṁ pāpicchataṁ …
an8.7:6.9	uppannaṁ pāpamittataṁ abhibhuyya abhibhuyya viharissāmā’ti.
an8.7:6.10	Evañhi vo, bhikkhave, sikkhitabban”ti.
an8.7:6.11	Sattamaṁ.
an8.8:0.1	Aṅguttara Nikāya 8.8
an8.8:0.2	1. Mettāvagga
an8.8:0.3	Uttaravipattisutta
an8.8:1.1	Ekaṁ samayaṁ āyasmā uttaro mahisavatthusmiṁ viharati saṅkheyyake pabbate vaṭajālikāyaṁ.
an8.8:1.2	Tatra kho āyasmā uttaro bhikkhū āmantesi:
an8.8:1.3	“sādhāvuso, bhikkhu kālena kālaṁ attavipattiṁ paccavekkhitā hoti.
an8.8:1.4	Sādhāvuso, bhikkhu kālena kālaṁ paravipattiṁ paccavekkhitā hoti.
an8.8:1.5	Sādhāvuso, bhikkhu kālena kālaṁ attasampattiṁ paccavekkhitā hoti.
an8.8:1.6	Sādhāvuso, bhikkhu kālena kālaṁ parasampattiṁ paccavekkhitā hotī”ti.
an8.8:2.1	Tena kho pana samayena vessavaṇo mahārājā uttarāya disāya dakkhiṇaṁ disaṁ gacchati kenacideva karaṇīyena.
an8.8:2.2	Assosi kho vessavaṇo mahārājā āyasmato uttarassa mahisavatthusmiṁ saṅkheyyake pabbate vaṭajālikāyaṁ bhikkhūnaṁ evaṁ dhammaṁ desentassa:
an8.8:2.3	“sādhāvuso, bhikkhu kālena kālaṁ attavipattiṁ paccavekkhitā hoti.
an8.8:2.4	Sādhāvuso, bhikkhu kālena kālaṁ paravipattiṁ paccavekkhitā hoti.
an8.8:2.5	Sādhāvuso, bhikkhu kālena kālaṁ attasampattiṁ paccavekkhitā hoti.
an8.8:2.6	Sādhāvuso, bhikkhu kālena kālaṁ parasampattiṁ paccavekkhitā hotī”ti.
an8.8:3.1	Atha kho vessavaṇo mahārājā—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ mahisavatthusmiṁ saṅkheyyake pabbate vaṭajālikāyaṁ antarahito devesu tāvatiṁsesu pāturahosi.
an8.8:3.2	Atha kho vessavaṇo mahārājā yena sakko devānamindo tenupasaṅkami; upasaṅkamitvā sakkaṁ devānamindaṁ etadavoca:
an8.8:3.3	“yagghe, mārisa, jāneyyāsi.
an8.8:3.4	Eso āyasmā uttaro mahisavatthusmiṁ saṅkheyyake pabbate vaṭajālikāyaṁ bhikkhūnaṁ evaṁ dhammaṁ deseti:
an8.8:3.5	‘sādhāvuso, bhikkhu kālena kālaṁ attavipattiṁ paccavekkhitā hoti.
an8.8:3.6	Sādhāvuso, bhikkhu kālena kālaṁ paravipattiṁ …pe…
an8.8:3.7	attasampattiṁ …
an8.8:3.8	parasampattiṁ paccavekkhitā hotī’”ti.
an8.8:4.1	Atha kho sakko devānamindo seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ devesu tāvatiṁsesu antarahito mahisavatthusmiṁ saṅkheyyake pabbate vaṭajālikāyaṁ āyasmato uttarassa sammukhe pāturahosi.
an8.8:4.2	Atha kho sakko devānamindo yenāyasmā uttaro tenupasaṅkami; upasaṅkamitvā āyasmantaṁ uttaraṁ abhivādetvā ekamantaṁ aṭṭhāsi. Ekamantaṁ ṭhito kho sakko devānamindo āyasmantaṁ uttaraṁ etadavoca:
an8.8:5.1	“Saccaṁ kira, bhante, āyasmā uttaro bhikkhūnaṁ evaṁ dhammaṁ desesi:
an8.8:5.2	‘sādhāvuso, bhikkhu kālena kālaṁ attavipattiṁ paccavekkhitā hoti,
an8.8:5.3	sādhāvuso, bhikkhu kālena kālaṁ paravipattiṁ …pe…
an8.8:5.4	attasampattiṁ …
an8.8:5.5	parasampattiṁ paccavekkhitā hotī’”ti?
an8.8:5.6	“Evaṁ, devānamindā”ti.
an8.8:5.7	“Kiṁ panidaṁ, bhante, āyasmato uttarassa sakaṁ paṭibhānaṁ, udāhu tassa bhagavato vacanaṁ arahato sammāsambuddhassā”ti?
an8.8:5.8	“Tena hi, devānaminda, upamaṁ te karissāmi.
an8.8:5.9	Upamāya m’idhekacce viññū purisā bhāsitassa atthaṁ ājānanti.
an8.8:6.1	Seyyathāpi, devānaminda, gāmassa vā nigamassa vā avidūre mahādhaññarāsi.
an8.8:6.2	Tato mahājanakāyo dhaññaṁ āhareyya—
an8.8:6.3	kājehipi piṭakehipi ucchaṅgehipi añjalīhipi.
an8.8:6.4	Yo nu kho, devānaminda, taṁ mahājanakāyaṁ upasaṅkamitvā evaṁ puccheyya:
an8.8:6.5	‘kuto imaṁ dhaññaṁ āharathā’ti, kathaṁ byākaramāno nu kho, devānaminda, so mahājanakāyo sammā byākaramāno byākareyyā”ti?
an8.8:6.6	“‘Amumhā mahādhaññarāsimhā āharāmā’ti kho, bhante, so mahājanakāyo sammā byākaramāno byākareyyā”ti.
an8.8:6.7	“Evamevaṁ kho, devānaminda, yaṁ kiñci subhāsitaṁ sabbaṁ taṁ tassa bhagavato vacanaṁ arahato sammāsambuddhassa.
an8.8:6.8	Tato upādāyupādāya mayaṁ caññe ca bhaṇāmā”ti.
an8.8:7.1	“Acchariyaṁ, bhante, abbhutaṁ bhante.
an8.8:7.2	Yāva subhāsitañcidaṁ āyasmatā uttarena:
an8.8:7.3	‘yaṁ kiñci subhāsitaṁ sabbaṁ taṁ tassa bhagavato vacanaṁ arahato sammāsambuddhassa.
an8.8:7.4	Tato upādāyupādāya mayañcaññe ca bhaṇāmā’ti.
an8.8:7.5	Ekamidaṁ, bhante uttara, samayaṁ bhagavā rājagahe viharati gijjhakūṭe pabbate acirapakkante devadatte.
an8.8:7.6	Tatra kho bhagavā devadattaṁ ārabbha bhikkhū āmantesi:
an8.8:8.1	‘Sādhu, bhikkhave, bhikkhu kālena kālaṁ attavipattiṁ paccavekkhitā hoti.
an8.8:8.2	Sādhu, bhikkhave, bhikkhu kālena kālaṁ paravipattiṁ …pe…
an8.8:8.3	attasampattiṁ …
an8.8:8.4	parasampattiṁ paccavekkhitā hoti.
an8.8:8.5	Aṭṭhahi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
an8.8:8.6	Katamehi aṭṭhahi?
an8.8:8.7	Lābhena hi, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho;
an8.8:8.8	alābhena, bhikkhave …pe…
an8.8:8.9	yasena, bhikkhave …
an8.8:8.10	ayasena, bhikkhave …
an8.8:8.11	sakkārena, bhikkhave …
an8.8:8.12	asakkārena, bhikkhave …
an8.8:8.13	pāpicchatāya, bhikkhave …
an8.8:8.14	pāpamittatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho.
an8.8:8.15	Imehi kho, bhikkhave, aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
an8.8:9.1	Sādhu, bhikkhave, bhikkhu uppannaṁ lābhaṁ abhibhuyya abhibhuyya vihareyya;
an8.8:9.2	uppannaṁ alābhaṁ …pe…
an8.8:9.3	uppannaṁ yasaṁ …
an8.8:9.4	uppannaṁ ayasaṁ …
an8.8:9.5	uppannaṁ sakkāraṁ …
an8.8:9.6	uppannaṁ asakkāraṁ …
an8.8:9.7	uppannaṁ pāpicchataṁ …
an8.8:9.8	uppannaṁ pāpamittataṁ abhibhuyya abhibhuyya vihareyya.
an8.8:10.1	Kiñca, bhikkhave, bhikkhu atthavasaṁ paṭicca uppannaṁ lābhaṁ abhibhuyya abhibhuyya vihareyya;
an8.8:10.2	uppannaṁ alābhaṁ …pe…
an8.8:10.3	uppannaṁ yasaṁ …
an8.8:10.4	uppannaṁ ayasaṁ …
an8.8:10.5	uppannaṁ sakkāraṁ …
an8.8:10.6	uppannaṁ asakkāraṁ …
an8.8:10.7	uppannaṁ pāpicchataṁ …
an8.8:10.8	uppannaṁ pāpamittataṁ abhibhuyya abhibhuyya vihareyya?
an8.8:11.1	Yaṁ hissa, bhikkhave, uppannaṁ lābhaṁ anabhibhuyya viharato uppajjeyyuṁ āsavā vighātapariḷāhā, uppannaṁ lābhaṁ abhibhuyya viharato evaṁsa te āsavā vighātapariḷāhā na honti.
an8.8:11.2	Yaṁ hissa, bhikkhave, uppannaṁ alābhaṁ …pe…
an8.8:11.3	uppannaṁ yasaṁ …
an8.8:11.4	uppannaṁ ayasaṁ …
an8.8:11.5	uppannaṁ sakkāraṁ …
an8.8:11.6	uppannaṁ asakkāraṁ …
an8.8:11.7	uppannaṁ pāpicchataṁ …
an8.8:11.8	uppannaṁ pāpamittataṁ anabhibhuyya viharato uppajjeyyuṁ āsavā vighātapariḷāhā, uppannaṁ pāpamittataṁ abhibhuyya viharato evaṁsa te āsavā vighātapariḷāhā na honti.
an8.8:11.9	Idaṁ kho, bhikkhave, bhikkhu atthavasaṁ paṭicca uppannaṁ lābhaṁ abhibhuyya abhibhuyya vihareyya;
an8.8:11.10	uppannaṁ alābhaṁ …pe…
an8.8:11.11	uppannaṁ yasaṁ …
an8.8:11.12	uppannaṁ ayasaṁ …
an8.8:11.13	uppannaṁ sakkāraṁ …
an8.8:11.14	uppannaṁ asakkāraṁ …
an8.8:11.15	uppannaṁ pāpicchataṁ …
an8.8:11.16	uppannaṁ pāpamittataṁ abhibhuyya abhibhuyya vihareyya.
an8.8:12.1	Tasmātiha, bhikkhave, evaṁ sikkhitabbaṁ:
an8.8:12.2	“uppannaṁ lābhaṁ abhibhuyya abhibhuyya viharissāma,
an8.8:12.3	uppannaṁ alābhaṁ …pe…
an8.8:12.4	uppannaṁ yasaṁ …
an8.8:12.5	uppannaṁ ayasaṁ …
an8.8:12.6	uppannaṁ sakkāraṁ …
an8.8:12.7	uppannaṁ asakkāraṁ …
an8.8:12.8	uppannaṁ pāpicchataṁ …
an8.8:12.9	uppannaṁ pāpamittataṁ abhibhuyya abhibhuyya viharissāmā”ti.
an8.8:12.10	Evañhi vo, bhikkhave, sikkhitabban’ti.
an8.8:13.1	Ettāvatā, bhante uttara, manussesu catasso parisā—
an8.8:13.2	bhikkhū, bhikkhuniyo, upāsakā, upāsikāyo.
an8.8:13.3	Nāyaṁ dhammapariyāyo kismiñci upaṭṭhito.
an8.8:13.4	Uggaṇhatu, bhante, āyasmā uttaro imaṁ dhammapariyāyaṁ.
an8.8:13.5	Pariyāpuṇātu, bhante, āyasmā uttaro imaṁ dhammapariyāyaṁ.
an8.8:13.6	Dhāretu, bhante, āyasmā uttaro imaṁ dhammapariyāyaṁ.
an8.8:13.7	Atthasaṁhito ayaṁ, bhante, dhammapariyāyo ādibrahmacariyako”ti.
an8.8:13.8	Aṭṭhamaṁ.
an8.9:0.1	Aṅguttara Nikāya 8.9
an8.9:0.2	1. Mettāvagga
an8.9:0.3	Nandasutta
an8.9:1.1	“‘kulaputto’ti, bhikkhave, nandaṁ sammā vadamāno vadeyya.
an8.9:1.2	‘Balavā’ti, bhikkhave, nandaṁ sammā vadamāno vadeyya.
an8.9:1.3	‘Pāsādiko’ti, bhikkhave, nandaṁ sammā vadamāno vadeyya.
an8.9:1.4	‘Tibbarāgo’ti, bhikkhave, nandaṁ sammā vadamāno vadeyya.
an8.9:1.5	Kimaññatra, bhikkhave, nando indriyesu guttadvāro, bhojane mattaññū, jāgariyaṁ anuyutto, satisampajaññena samannāgato, yehi nando sakkoti paripuṇṇaṁ parisuddhaṁ brahmacariyaṁ carituṁ.
an8.9:1.6	Tatridaṁ, bhikkhave, nandassa indriyesu guttadvāratāya hoti.
an8.9:1.7	Sace, bhikkhave, nandassa puratthimā disā āloketabbā hoti, sabbaṁ cetasā samannāharitvā nando puratthimaṁ disaṁ āloketi:
an8.9:1.8	‘evaṁ me puratthimaṁ disaṁ ālokayato nābhijjhādomanassā pāpakā akusalā dhammā anvāssavissantī’ti.
an8.9:1.9	Itiha tattha sampajāno hoti.
an8.9:2.1	Sace, bhikkhave, nandassa pacchimā disā āloketabbā hoti …pe…
an8.9:2.2	uttarā disā āloketabbā hoti …
an8.9:2.3	dakkhiṇā disā āloketabbā hoti …
an8.9:2.4	uddhaṁ ulloketabbā hoti …
an8.9:2.5	adho oloketabbā hoti …
an8.9:2.6	anudisā anuviloketabbā hoti, sabbaṁ cetasā samannāharitvā nando anudisaṁ anuviloketi:
an8.9:2.7	‘evaṁ me anudisaṁ anuvilokayato nābhijjhādomanassā pāpakā akusalā dhammā anvāssavissantī’ti.
an8.9:2.8	Itiha tattha sampajāno hoti.
an8.9:2.9	Idaṁ kho, bhikkhave, nandassa indriyesu guttadvāratāya hoti.
an8.9:3.1	Tatridaṁ, bhikkhave, nandassa bhojane mattaññutāya hoti.
an8.9:3.2	Idha, bhikkhave, nando paṭisaṅkhā yoniso āhāraṁ āhāreti:
an8.9:3.3	‘neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṁsūparatiyā brahmacariyānuggahāya iti purāṇañca vedanaṁ paṭihaṅkhāmi, navañca vedanaṁ na uppādessāmi, yātrā ca me bhavissati anavajjatā ca phāsuvihāro cā’ti.
an8.9:3.4	Idaṁ kho, bhikkhave, nandassa bhojane mattaññutāya hoti.
an8.9:4.1	Tatridaṁ, bhikkhave, nandassa jāgariyānuyogasmiṁ hoti.
an8.9:4.2	Idha, bhikkhave, nando divasaṁ caṅkamena nisajjāya āvaraṇīyehi dhammehi cittaṁ parisodheti;
an8.9:4.3	rattiyā paṭhamaṁ yāmaṁ caṅkamena nisajjāya āvaraṇīyehi dhammehi cittaṁ parisodheti;
an8.9:4.4	rattiyā majjhimaṁ yāmaṁ dakkhiṇena passena sīhaseyyaṁ kappeti pāde pādaṁ accādhāya sato sampajāno uṭṭhānasaññaṁ manasi karitvā;
an8.9:4.5	rattiyā pacchimaṁ yāmaṁ paccuṭṭhāya caṅkamena nisajjāya āvaraṇīyehi dhammehi cittaṁ parisodheti.
an8.9:4.6	Idaṁ kho, bhikkhave, nandassa jāgariyānuyogasmiṁ hoti.
an8.9:5.1	Tatridaṁ, bhikkhave, nandassa satisampajaññasmiṁ hoti.
an8.9:5.2	Idha, bhikkhave, nandassa viditā vedanā uppajjanti, viditā upaṭṭhahanti, viditā abbhatthaṁ gacchanti;
an8.9:5.3	viditā saññā …pe…
an8.9:5.4	viditā vitakkā …pe… abbhatthaṁ gacchanti.
an8.9:5.5	Idaṁ kho, bhikkhave, nandassa satisampajaññasmiṁ hoti.
an8.9:6.1	Kimaññatra, bhikkhave, nando indriyesu guttadvāro, bhojane mattaññū, jāgariyaṁ anuyutto, satisampajaññena samannāgato, yehi nando sakkoti paripuṇṇaṁ parisuddhaṁ brahmacariyaṁ caritun”ti.
an8.9:6.2	Navamaṁ.
an8.10:0.1	Aṅguttara Nikāya 8.10
an8.10:0.2	1. Mettāvagga
an8.10:0.3	Kāraṇḍavasutta
an8.10:1.1	Ekaṁ samayaṁ bhagavā campāyaṁ viharati gaggarāya pokkharaṇiyā tīre.
an8.10:1.2	Tena kho pana samayena bhikkhū bhikkhuṁ āpattiyā codenti.
an8.10:1.3	So bhikkhu bhikkhūhi āpattiyā codiyamāno aññenāññaṁ paṭicarati, bahiddhā kathaṁ apanāmeti, kopañca dosañca appaccayañca pātukaroti.
an8.10:2.1	Atha kho bhagavā bhikkhū āmantesi:
an8.10:2.2	“niddhamathetaṁ, bhikkhave, puggalaṁ;
an8.10:2.3	niddhamathetaṁ, bhikkhave, puggalaṁ.
an8.10:2.4	Apaneyyeso, bhikkhave, puggalo.
an8.10:2.5	Kiṁ vo tena paraputtena visodhitena.
an8.10:2.6	Idha, bhikkhave, ekaccassa puggalassa tādisaṁyeva hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ, seyyathāpi aññesaṁ bhaddakānaṁ bhikkhūnaṁ—
an8.10:2.7	yāvassa bhikkhū āpattiṁ na passanti.
an8.10:2.8	Yato ca khvassa bhikkhū āpattiṁ passanti, tamenaṁ evaṁ jānanti:
an8.10:2.9	‘samaṇadūsīvāyaṁ samaṇapalāpo samaṇakāraṇḍavo’ti.
an8.10:2.10	Tamenaṁ iti viditvā bahiddhā nāsenti.
an8.10:2.11	Taṁ kissa hetu?
an8.10:2.12	Mā aññe bhaddake bhikkhū dūsesīti.
an8.10:3.1	Seyyathāpi, bhikkhave, sampanne yavakaraṇe yavadūsī jāyetha yavapalāpo yavakāraṇḍavoti.
an8.10:3.2	Tassa tādisaṁyeva mūlaṁ hoti, seyyathāpi aññesaṁ bhaddakānaṁ yavānaṁ;
an8.10:3.3	tādisaṁyeva nāḷaṁ hoti, seyyathāpi aññesaṁ bhaddakānaṁ yavānaṁ;
an8.10:3.4	tādisaṁyeva pattaṁ hoti, seyyathāpi aññesaṁ bhaddakānaṁ yavānaṁ—
an8.10:3.5	yāvassa sīsaṁ na nibbattati.
an8.10:3.6	Yato ca khvassa sīsaṁ nibbattati, tamenaṁ evaṁ jānanti:
an8.10:3.7	‘yavadūsīvāyaṁ yavapalāpo yavakāraṇḍavo’ti.
an8.10:3.8	Tamenaṁ iti viditvā samūlaṁ uppāṭetvā bahiddhā yavakaraṇassa chaḍḍenti.
an8.10:3.9	Taṁ kissa hetu?
an8.10:3.10	Mā aññe bhaddake yave dūsesīti.
an8.10:4.1	Evamevaṁ kho, bhikkhave, idhekaccassa puggalassa tādisaṁyeva hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ, seyyathāpi aññesaṁ bhaddakānaṁ bhikkhūnaṁ—
an8.10:4.2	yāvassa bhikkhū āpattiṁ na passanti.
an8.10:4.3	Yato ca khvassa bhikkhū āpattiṁ passanti, tamenaṁ evaṁ jānanti:
an8.10:4.4	‘samaṇadūsīvāyaṁ samaṇapalāpo samaṇakāraṇḍavo’ti.
an8.10:4.5	Tamenaṁ iti viditvā bahiddhā nāsenti.
an8.10:4.6	Taṁ kissa hetu?
an8.10:4.7	Mā aññe bhaddake bhikkhū dūsesīti.
an8.10:5.1	Seyyathāpi, bhikkhave, mahato dhaññarāsissa phuṇamānassa tattha yāni tāni dhaññāni daḷhāni sāravantāni tāni ekamantaṁ puñjaṁ hoti, yāni pana tāni dhaññāni dubbalāni palāpāni tāni vāto ekamantaṁ apavahati.
an8.10:5.2	Tamenaṁ sāmikā sammajjaniṁ gahetvā bhiyyoso mattāya apasammajjanti.
an8.10:5.3	Taṁ kissa hetu?
an8.10:5.4	Mā aññe bhaddake dhaññe dūsesīti.
an8.10:5.5	Evamevaṁ kho, bhikkhave, idhekaccassa puggalassa tādisaṁyeva hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ, seyyathāpi aññesaṁ bhaddakānaṁ bhikkhūnaṁ—
an8.10:5.6	yāvassa bhikkhū āpattiṁ na passanti.
an8.10:5.7	Yato ca khvassa bhikkhū āpattiṁ passanti, tamenaṁ evaṁ jānanti:
an8.10:5.8	‘samaṇadūsīvāyaṁ samaṇapalāpo samaṇakāraṇḍavo’ti.
an8.10:5.9	Tamenaṁ iti viditvā bahiddhā nāsenti.
an8.10:5.10	Taṁ kissa hetu?
an8.10:5.11	Mā aññe bhaddake bhikkhū dūsesīti.
an8.10:6.1	Seyyathāpi, bhikkhave, puriso udapānapanāḷiyatthiko tiṇhaṁ kuṭhāriṁ ādāya vanaṁ paviseyya.
an8.10:6.2	So yaṁ yadeva rukkhaṁ kuṭhāripāsena ākoṭeyya tattha yāni tāni rukkhāni daḷhāni sāravantāni tāni kuṭhāripāsena ākoṭitāni kakkhaḷaṁ paṭinadanti;
an8.10:6.3	yāni pana tāni rukkhāni antopūtīni avassutāni kasambujātāni tāni kuṭhāripāsena ākoṭitāni daddaraṁ paṭinadanti.
an8.10:6.4	Tamenaṁ mūle chindati, mūle chinditvā agge chindati, agge chinditvā anto suvisodhitaṁ visodheti, anto suvisodhitaṁ visodhetvā udapānapanāḷiṁ yojeti.
an8.10:6.5	Evamevaṁ kho, bhikkhave, idhekaccassa puggalassa tādisaṁyeva hoti abhikkantaṁ paṭikkantaṁ ālokitaṁ vilokitaṁ samiñjitaṁ pasāritaṁ saṅghāṭipattacīvaradhāraṇaṁ, seyyathāpi aññesaṁ bhaddakānaṁ bhikkhūnaṁ—
an8.10:6.6	yāvassa bhikkhū āpattiṁ na passanti.
an8.10:6.7	Yato ca khvassa bhikkhū āpattiṁ passanti, tamenaṁ evaṁ jānanti:
an8.10:6.8	‘samaṇadūsīvāyaṁ samaṇapalāpo samaṇakāraṇḍavo’ti.
an8.10:6.9	Tamenaṁ iti viditvā bahiddhā nāsenti.
an8.10:6.10	Taṁ kissa hetu?
an8.10:6.11	Mā aññe bhaddake bhikkhū dūsesīti.
an8.10:7.1	Saṁvāsāyaṁ vijānātha,
an8.10:7.2	pāpiccho kodhano iti;
an8.10:7.3	Makkhī thambhī paḷāsī ca,
an8.10:7.4	issukī maccharī saṭho.
an8.10:8.1	Santavāco janavati,
an8.10:8.2	samaṇo viya bhāsati;
an8.10:8.3	Raho karoti karaṇaṁ,
an8.10:8.4	pāpadiṭṭhi anādaro.
an8.10:9.1	Saṁsappī ca musāvādī,
an8.10:9.2	taṁ viditvā yathātathaṁ;
an8.10:9.3	Sabbe samaggā hutvāna,
an8.10:9.4	abhinibbajjayātha naṁ.
an8.10:10.1	Kāraṇḍavaṁ niddhamatha,
an8.10:10.2	Kasambuṁ apakassatha;
an8.10:10.3	Tato palāpe vāhetha,
an8.10:10.4	Assamaṇe samaṇamānine.
an8.10:11.1	Niddhamitvāna pāpicche,
an8.10:11.2	pāpaācāragocare;
an8.10:11.3	Suddhāsuddhehi saṁvāsaṁ,
an8.10:11.4	kappayavho patissatā;
an8.10:11.5	Tato samaggā nipakā,
an8.10:11.6	dukkhassantaṁ karissathā”ti.
an8.10:11.7	Dasamaṁ.
an8.10:11.8	Mettāvaggo paṭhamo.
an8.10:12.0	Tassuddānaṁ
an8.10:12.1	Mettaṁ paññā ca dve piyā,
an8.10:12.2	dve lokā dve vipattiyo;
an8.10:12.3	Devadatto ca uttaro,
an8.10:12.4	nando kāraṇḍavena cāti.
an8.11:0.1	Aṅguttara Nikāya 8.11
an8.11:0.2	2. Mahāvagga
an8.11:0.3	Verañjasutta
an8.11:1.1	Evaṁ me sutaṁ—
an8.11:1.2	ekaṁ samayaṁ bhagavā verañjāyaṁ viharati naḷerupucimandamūle.
an8.11:1.3	Atha kho verañjo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an8.11:1.4	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho verañjo brāhmaṇo bhagavantaṁ etadavoca:
an8.11:2.1	“Sutaṁ metaṁ, bho gotama:
an8.11:2.2	‘na samaṇo gotamo brāhmaṇe jiṇṇe vuḍḍhe mahallake addhagate vayoanuppatte abhivādeti vā paccuṭṭheti vā āsanena vā nimantetī’ti.
an8.11:2.3	Tayidaṁ, bho gotama, tatheva.
an8.11:2.4	Na hi bhavaṁ gotamo brāhmaṇe jiṇṇe vuḍḍhe mahallake addhagate vayoanuppatte abhivādeti vā paccuṭṭheti vā āsanena vā nimanteti.
an8.11:2.5	Tayidaṁ, bho gotama, na sampannamevā”ti.
an8.11:2.6	“Nāhaṁ taṁ, brāhmaṇa, passāmi sadevake loke samārake sabrahmake sassamaṇabrāhmaṇiyā pajāya sadevamanussāya yamahaṁ abhivādeyyaṁ vā paccuṭṭheyyaṁ vā āsanena vā nimanteyyaṁ.
an8.11:2.7	Yañhi, brāhmaṇa, tathāgato abhivādeyya vā paccuṭṭheyya vā āsanena vā nimanteyya, muddhāpi tassa vipateyyā”ti.
an8.11:3.1	“Arasarūpo bhavaṁ gotamo”ti.
an8.11:3.2	“Atthi khvesa, brāhmaṇa, pariyāyo, yena maṁ pariyāyena sammā vadamāno vadeyya:
an8.11:3.3	‘arasarūpo samaṇo gotamo’ti.
an8.11:3.4	Ye te, brāhmaṇa, rūparasā saddarasā gandharasā rasarasā phoṭṭhabbarasā, te tathāgatassa pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an8.11:3.5	Ayaṁ kho, brāhmaṇa, pariyāyo, yena maṁ pariyāyena sammā vadamāno vadeyya:
an8.11:3.6	‘arasarūpo samaṇo gotamo’ti, no ca kho yaṁ tvaṁ sandhāya vadesī”ti.
an8.11:4.1	“Nibbhogo bhavaṁ gotamo”ti.
an8.11:4.2	“Atthi khvesa, brāhmaṇa, pariyāyo, yena maṁ pariyāyena sammā vadamāno vadeyya:
an8.11:4.3	‘nibbhogo samaṇo gotamo’ti.
an8.11:4.4	Ye te, brāhmaṇa, rūpabhogā saddabhogā gandhabhogā rasabhogā phoṭṭhabbabhogā, te tathāgatassa pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an8.11:4.5	Ayaṁ kho, brāhmaṇa, pariyāyo, yena maṁ pariyāyena sammā vadamāno vadeyya:
an8.11:4.6	‘nibbhogo samaṇo gotamo’ti, no ca kho yaṁ tvaṁ sandhāya vadesī”ti.
an8.11:5.1	“Akiriyavādo bhavaṁ gotamo”ti.
an8.11:5.2	“Atthi khvesa, brāhmaṇa, pariyāyo, yena maṁ pariyāyena sammā vadamāno vadeyya:
an8.11:5.3	‘akiriyavādo samaṇo gotamo’ti.
an8.11:5.4	Ahañhi, brāhmaṇa, akiriyaṁ vadāmi kāyaduccaritassa vacīduccaritassa manoduccaritassa; anekavihitānaṁ pāpakānaṁ akusalānaṁ dhammānaṁ akiriyaṁ vadāmi.
an8.11:5.5	Ayaṁ kho, brāhmaṇa, pariyāyo, yena maṁ pariyāyena sammā vadamāno vadeyya:
an8.11:5.6	‘akiriyavādo samaṇo gotamo’ti, no ca kho yaṁ tvaṁ sandhāya vadesī”ti.
an8.11:6.1	“Ucchedavādo bhavaṁ gotamo”ti.
an8.11:6.2	“Atthi khvesa, brāhmaṇa, pariyāyo, yena maṁ pariyāyena sammā vadamāno vadeyya:
an8.11:6.3	‘ucchedavādo samaṇo gotamo’ti.
an8.11:6.4	Ahañhi, brāhmaṇa, ucchedaṁ vadāmi rāgassa dosassa mohassa; anekavihitānaṁ pāpakānaṁ akusalānaṁ dhammānaṁ ucchedaṁ vadāmi.
an8.11:6.5	Ayaṁ kho, brāhmaṇa, pariyāyo, yena maṁ pariyāyena sammā vadamāno vadeyya:
an8.11:6.6	‘ucchedavādo samaṇo gotamo’ti, no ca kho yaṁ tvaṁ sandhāya vadesī”ti.
an8.11:7.1	“Jegucchī bhavaṁ gotamo”ti.
an8.11:7.2	“Atthi khvesa, brāhmaṇa, pariyāyo, yena maṁ pariyāyena sammā vadamāno vadeyya:
an8.11:7.3	‘jegucchī samaṇo gotamo’ti.
an8.11:7.4	Ahañhi, brāhmaṇa, jigucchāmi kāyaduccaritena vacīduccaritena manoduccaritena; jigucchāmi anekavihitānaṁ pāpakānaṁ akusalānaṁ dhammānaṁ samāpattiyā.
an8.11:7.5	Ayaṁ kho, brāhmaṇa, pariyāyo, yena maṁ pariyāyena sammā vadamāno vadeyya:
an8.11:7.6	‘jegucchī samaṇo gotamo’ti, no ca kho yaṁ tvaṁ sandhāya vadesī”ti.
an8.11:8.1	“Venayiko bhavaṁ gotamo”ti.
an8.11:8.2	“Atthi khvesa, brāhmaṇa, pariyāyo, yena maṁ pariyāyena sammā vadamāno vadeyya:
an8.11:8.3	‘venayiko samaṇo gotamo’ti.
an8.11:8.4	Ahañhi, brāhmaṇa, vinayāya dhammaṁ desemi rāgassa dosassa mohassa; anekavihitānaṁ pāpakānaṁ akusalānaṁ dhammānaṁ vinayāya dhammaṁ desemi.
an8.11:8.5	Ayaṁ kho, brāhmaṇa, pariyāyo, yena maṁ pariyāyena sammā vadamāno vadeyya:
an8.11:8.6	‘venayiko samaṇo gotamo’ti, no ca kho yaṁ tvaṁ sandhāya vadesī”ti.
an8.11:9.1	“Tapassī bhavaṁ gotamo”ti.
an8.11:9.2	“Atthi khvesa, brāhmaṇa, pariyāyo, yena maṁ pariyāyena sammā vadamāno vadeyya:
an8.11:9.3	‘tapassī samaṇo gotamo’ti.
an8.11:9.4	Tapanīyāhaṁ, brāhmaṇa, pāpake akusale dhamme vadāmi kāyaduccaritaṁ vacīduccaritaṁ manoduccaritaṁ.
an8.11:9.5	Yassa kho, brāhmaṇa, tapanīyā pāpakā akusalā dhammā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā, tamahaṁ ‘tapassī’ti vadāmi.
an8.11:9.6	Tathāgatassa kho, brāhmaṇa, tapanīyā pāpakā akusalā dhammā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an8.11:9.7	Ayaṁ kho, brāhmaṇa, pariyāyo, yena maṁ pariyāyena sammā vadamāno vadeyya:
an8.11:9.8	‘tapassī samaṇo gotamo’ti, no ca kho yaṁ tvaṁ sandhāya vadesī”ti.
an8.11:10.1	“Apagabbho bhavaṁ gotamo”ti.
an8.11:10.2	“Atthi khvesa, brāhmaṇa, pariyāyo, yena maṁ pariyāyena sammā vadamāno vadeyya:
an8.11:10.3	‘apagabbho samaṇo gotamo’ti.
an8.11:10.4	Yassa kho, brāhmaṇa, āyatiṁ gabbhaseyyā punabbhavābhinibbatti pahīnā ucchinnamūlā tālāvatthukatā anabhāvaṅkatā āyatiṁ anuppādadhammā, tamahaṁ ‘apagabbho’ti vadāmi.
an8.11:10.5	Tathāgatassa kho, brāhmaṇa, āyatiṁ gabbhaseyyā punabbhavābhinibbatti pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an8.11:10.6	Ayaṁ kho, brāhmaṇa, pariyāyo, yena maṁ pariyāyena sammā vadamāno vadeyya:
an8.11:10.7	‘apagabbho samaṇo gotamo’ti, no ca kho yaṁ tvaṁ sandhāya vadesi.
an8.11:11.1	Seyyathāpi, brāhmaṇa, kukkuṭiyā aṇḍāni aṭṭha vā dasa vā dvādasa vā.
an8.11:11.2	Tānāssu kukkuṭiyā sammā adhisayitāni sammā pariseditāni sammā paribhāvitāni.
an8.11:11.3	Yo nu kho tesaṁ kukkuṭacchāpakānaṁ paṭhamataraṁ pādanakhasikhāya vā mukhatuṇḍakena vā aṇḍakosaṁ padāletvā sotthinā abhinibbhijjeyya, kinti svāssa vacanīyo: ‘jeṭṭho vā kaniṭṭho vā’”ti?
an8.11:11.4	“Jeṭṭho tissa, bho gotama, vacanīyo. So hi nesaṁ, bho gotama, jeṭṭho hotī”ti.
an8.11:12.1	“Evamevaṁ kho ahaṁ, brāhmaṇa, avijjāgatāya pajāya aṇḍabhūtāya pariyonaddhāya avijjaṇḍakosaṁ padāletvā ekova loke anuttaraṁ sammāsambodhiṁ abhisambuddho.
an8.11:12.2	Ahañhi, brāhmaṇa, jeṭṭho seṭṭho lokassa.
an8.11:13.1	Āraddhaṁ kho pana me, brāhmaṇa, vīriyaṁ ahosi asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ.
an8.11:13.2	So kho ahaṁ, brāhmaṇa, vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharāmi;
an8.11:13.3	vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharāmi;
an8.11:13.4	pītiyā ca virāgā upekkhako ca viharāmi sato ca sampajāno sukhañca kāyena paṭisaṁvedemi yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharāmi;
an8.11:13.5	sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharāmi.
an8.11:14.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṁ abhininnāmesiṁ.
an8.11:14.2	So anekavihitaṁ pubbenivāsaṁ anussarāmi, seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe: ‘amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto. So tato cuto amutra udapādiṁ; tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto. So tato cuto idhūpapanno’ti. Iti sākāraṁ sauddesaṁ anekavihitaṁ pubbenivāsaṁ anussarāmi.
an8.11:15.1	Ayaṁ kho me, brāhmaṇa, rattiyā paṭhame yāme paṭhamā vijjā adhigatā;
an8.11:15.2	avijjā vihatā vijjā uppannā; tamo vihato āloko uppanno, yathā taṁ appamattassa ātāpino pahitattassa viharato.
an8.11:15.3	Ayaṁ kho me, brāhmaṇa, paṭhamā abhinibbhidā ahosi kukkuṭacchāpakasseva aṇḍakosamhā.
an8.11:16.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṁ cutūpapātañāṇāya cittaṁ abhininnāmesiṁ.
an8.11:16.2	So dibbena cakkhunā visuddhena atikkantamānusakena satte passāmi cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāmi: ‘ime vata bhonto sattā kāyaduccaritena samannāgatā, vacīduccaritena samannāgatā, manoduccaritena samannāgatā, ariyānaṁ upavādakā, micchādiṭṭhikā, micchādiṭṭhikammasamādānā. Te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannāti. Ime vā pana bhonto sattā kāyasucaritena samannāgatā, vacīsucaritena samannāgatā, manosucaritena samannāgatā, ariyānaṁ anupavādakā, sammādiṭṭhikā, sammādiṭṭhikammasamādānā. Te kāyassa bhedā paraṁ maraṇā sugatiṁ saggaṁ lokaṁ upapannā’ti. Iti dibbena cakkhunā visuddhena atikkantamānusakena satte passāmi cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāmi.
an8.11:17.1	Ayaṁ kho me, brāhmaṇa, rattiyā majjhime yāme dutiyā vijjā adhigatā;
an8.11:17.2	avijjā vihatā vijjā uppannā; tamo vihato āloko uppanno, yathā taṁ appamattassa ātāpino pahitattassa viharato.
an8.11:17.3	Ayaṁ kho me, brāhmaṇa, dutiyā abhinibbhidā ahosi kukkuṭacchāpakasseva aṇḍakosamhā.
an8.11:18.1	So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṁ khayañāṇāya cittaṁ abhininnāmesiṁ.
an8.11:18.2	So ‘idaṁ dukkhan’ti yathābhūtaṁ abbhaññāsiṁ, ‘ayaṁ dukkhasamudayo’ti yathābhūtaṁ abbhaññāsiṁ, ‘ayaṁ dukkhanirodho’ti yathābhūtaṁ abbhaññāsiṁ, ‘ayaṁ dukkhanirodhagāminī paṭipadā’ti yathābhūtaṁ abbhaññāsiṁ;
an8.11:18.3	‘ime āsavā’ti yathābhūtaṁ abbhaññāsiṁ, ‘ayaṁ āsavasamudayo’ti yathābhūtaṁ abbhaññāsiṁ, ‘ayaṁ āsavanirodho’ti yathābhūtaṁ abbhaññāsiṁ, ‘ayaṁ āsavanirodhagāminī paṭipadā’ti yathābhūtaṁ abbhaññāsiṁ.
an8.11:18.4	Tassa me evaṁ jānato evaṁ passato kāmāsavāpi cittaṁ vimuccittha, bhavāsavāpi cittaṁ vimuccittha, avijjāsavāpi cittaṁ vimuccittha.
an8.11:18.5	Vimuttasmiṁ vimuttamiti ñāṇaṁ ahosi.
an8.11:18.6	‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti abbhaññāsiṁ.
an8.11:19.1	Ayaṁ kho me, brāhmaṇa, rattiyā pacchime yāme tatiyā vijjā adhigatā;
an8.11:19.2	avijjā vihatā vijjā uppannā; tamo vihato āloko uppanno, yathā taṁ appamattassa ātāpino pahitattassa viharato.
an8.11:19.3	Ayaṁ kho me, brāhmaṇa, tatiyā abhinibbhidā ahosi kukkuṭacchāpakasseva aṇḍakosamhā”ti.
an8.11:20.1	Evaṁ vutte, verañjo brāhmaṇo bhagavantaṁ etadavoca:
an8.11:20.2	“jeṭṭho bhavaṁ gotamo, seṭṭho bhavaṁ gotamo.
an8.11:20.3	Abhikkantaṁ, bho gotama, abhikkantaṁ, bho gotama.
an8.11:20.4	Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.
an8.11:20.5	Esāhaṁ bhavantaṁ gotamaṁ saraṇaṁ gacchāmi dhammañca bhikkhusaṅghañca.
an8.11:20.6	Upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an8.11:20.7	Paṭhamaṁ.
an8.12:0.1	Aṅguttara Nikāya 8.12
an8.12:0.2	2. Mahāvagga
an8.12:0.3	Sīhasutta
an8.12:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an8.12:1.2	Tena kho pana samayena sambahulā abhiññātā abhiññātā licchavī santhāgāre sannisinnā sannipatitā anekapariyāyena buddhassa vaṇṇaṁ bhāsanti, dhammassa vaṇṇaṁ bhāsanti, saṅghassa vaṇṇaṁ bhāsanti.
an8.12:2.1	Tena kho pana samayena sīho senāpati nigaṇṭhasāvako tassaṁ parisāyaṁ nisinno hoti.
an8.12:2.2	Atha kho sīhassa senāpatissa etadahosi:
an8.12:2.3	“nissaṁsayaṁ kho so bhagavā arahaṁ sammāsambuddho bhavissati, tathā hime sambahulā abhiññātā abhiññātā licchavī santhāgāre sannisinnā sannipatitā anekapariyāyena buddhassa vaṇṇaṁ bhāsanti, dhammassa vaṇṇaṁ bhāsanti, saṅghassa vaṇṇaṁ bhāsanti.
an8.12:2.4	Yannūnāhaṁ taṁ bhagavantaṁ dassanāya upasaṅkameyyaṁ arahantaṁ sammāsambuddhan”ti.
an8.12:2.5	Atha kho sīho senāpati yena nigaṇṭho nāṭaputto tenupasaṅkami; upasaṅkamitvā nigaṇṭhaṁ nāṭaputtaṁ etadavoca:
an8.12:2.6	“icchāmahaṁ, bhante, samaṇaṁ gotamaṁ dassanāya upasaṅkamitun”ti.
an8.12:3.1	“Kiṁ pana tvaṁ, sīha, kiriyavādo samāno akiriyavādaṁ samaṇaṁ gotamaṁ dassanāya upasaṅkamissasi?
an8.12:3.2	Samaṇo hi, sīha, gotamo akiriyavādo, akiriyāya dhammaṁ deseti, tena ca sāvake vinetī”ti.
an8.12:3.3	Atha kho sīhassa senāpatissa yo ahosi gamiyābhisaṅkhāro bhagavantaṁ dassanāya, so paṭippassambhi.
an8.12:4.1	Dutiyampi kho sambahulā abhiññātā abhiññātā licchavī santhāgāre sannisinnā sannipatitā anekapariyāyena buddhassa …pe… dhammassa …pe… saṅghassa vaṇṇaṁ bhāsanti.
an8.12:4.2	Dutiyampi kho sīhassa senāpatissa etadahosi:
an8.12:4.3	“nissaṁsayaṁ kho so bhagavā arahaṁ sammāsambuddho bhavissati, tathā hime sambahulā abhiññātā abhiññātā licchavī santhāgāre sannisinnā sannipatitā anekapariyāyena buddhassa vaṇṇaṁ bhāsanti, dhammassa …pe… saṅghassa vaṇṇaṁ bhāsanti.
an8.12:4.4	Yannūnāhaṁ taṁ bhagavantaṁ dassanāya upasaṅkameyyaṁ arahantaṁ sammāsambuddhan”ti.
an8.12:4.5	Atha kho sīho senāpati yena nigaṇṭho nāṭaputto tenupasaṅkami; upasaṅkamitvā nigaṇṭhaṁ nāṭaputtaṁ etadavoca:
an8.12:4.6	“icchāmahaṁ, bhante, samaṇaṁ gotamaṁ dassanāya upasaṅkamitun”ti.
an8.12:5.1	“Kiṁ pana tvaṁ, sīha, kiriyavādo samāno akiriyavādaṁ samaṇaṁ gotamaṁ dassanāya upasaṅkamissasi?
an8.12:5.2	Samaṇo hi, sīha, gotamo akiriyavādo akiriyāya dhammaṁ deseti, tena ca sāvake vinetī”ti.
an8.12:5.3	Dutiyampi kho sīhassa senāpatissa yo ahosi gamiyābhisaṅkhāro bhagavantaṁ dassanāya, so paṭippassambhi.
an8.12:6.1	Tatiyampi kho sambahulā abhiññātā abhiññātā licchavī santhāgāre sannisinnā sannipatitā anekapariyāyena buddhassa …pe… dhammassa …pe… saṅghassa vaṇṇaṁ bhāsanti.
an8.12:6.2	Tatiyampi kho sīhassa senāpatissa etadahosi:
an8.12:6.3	“nissaṁsayaṁ kho so bhagavā arahaṁ sammāsambuddho bhavissati, tathā hime sambahulā abhiññātā abhiññātā licchavī santhāgāre sannisinnā sannipatitā anekapariyāyena buddhassa vaṇṇaṁ bhāsanti, dhammassa vaṇṇaṁ bhāsanti, saṅghassa vaṇṇaṁ bhāsanti.
an8.12:6.4	Kiṁ hime karissanti nigaṇṭhā apalokitā vā anapalokitā vā?
an8.12:6.5	Yannūnāhaṁ anapaloketvāva nigaṇṭhe taṁ bhagavantaṁ dassanāya upasaṅkameyyaṁ arahantaṁ sammāsambuddhan”ti.
an8.12:7.1	Atha kho sīho senāpati pañcamattehi rathasatehi divādivassa vesāliyā niyyāsi bhagavantaṁ dassanāya.
an8.12:7.2	Yāvatikā yānassa bhūmi, yānena gantvā yānā paccorohitvā pattikova agamāsi.
an8.12:7.3	Atha kho sīho senāpati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho sīho senāpati bhagavantaṁ etadavoca:
an8.12:8.1	“Sutaṁ metaṁ, bhante:
an8.12:8.2	‘akiriyavādo samaṇo gotamo, akiriyāya dhammaṁ deseti, tena ca sāvake vinetī’ti.
an8.12:8.3	Ye te, bhante, evamāhaṁsu: ‘akiriyavādo samaṇo gotamo, akiriyāya dhammaṁ deseti, tena ca sāvake vinetī’ti, kacci te, bhante, bhagavato vuttavādino na ca bhagavantaṁ abhūtena abbhācikkhanti dhammassa cānudhammaṁ byākaronti na ca koci sahadhammiko vādānuvādo gārayhaṁ ṭhānaṁ āgacchati?
an8.12:8.4	Anabbhakkhātukāmā hi mayaṁ, bhante, bhagavantan”ti.
an8.12:9.1	“Atthi, sīha, pariyāyo, yena maṁ pariyāyena sammā vadamāno vadeyya:
an8.12:9.2	‘akiriyavādo samaṇo gotamo, akiriyāya dhammaṁ deseti, tena ca sāvake vinetī’ti.
an8.12:10.1	Atthi, sīha, pariyāyo, yena maṁ pariyāyena sammā vadamāno vadeyya:
an8.12:10.2	‘kiriyavādo samaṇo gotamo, kiriyāya dhammaṁ deseti, tena ca sāvake vinetī’ti.
an8.12:11.1	Atthi, sīha, pariyāyo, yena maṁ pariyāyena sammā vadamāno vadeyya:
an8.12:11.2	‘ucchedavādo samaṇo gotamo, ucchedāya dhammaṁ deseti, tena ca sāvake vinetī’ti.
an8.12:12.1	Atthi, sīha, pariyāyo, yena maṁ pariyāyena sammā vadamāno vadeyya:
an8.12:12.2	‘jegucchī samaṇo gotamo, jegucchitāya dhammaṁ deseti, tena ca sāvake vinetī’ti.
an8.12:13.1	Atthi, sīha, pariyāyo, yena maṁ pariyāyena sammā vadamāno vadeyya:
an8.12:13.2	‘venayiko samaṇo gotamo, vinayāya dhammaṁ deseti, tena ca sāvake vinetī’ti.
an8.12:14.1	Atthi, sīha, pariyāyo, yena maṁ pariyāyena sammā vadamāno vadeyya:
an8.12:14.2	‘tapassī samaṇo gotamo, tapassitāya dhammaṁ deseti, tena ca sāvake vinetī’ti.
an8.12:15.1	Atthi, sīha, pariyāyo, yena maṁ pariyāyena sammā vadamāno vadeyya:
an8.12:15.2	‘apagabbho samaṇo gotamo, apagabbhatāya dhammaṁ deseti, tena ca sāvake vinetī’ti.
an8.12:16.1	Atthi, sīha, pariyāyo, yena maṁ pariyāyena sammā vadamāno vadeyya:
an8.12:16.2	‘assāsako samaṇo gotamo, assāsāya dhammaṁ deseti, tena ca sāvake vinetī’ti.
an8.12:17.1	Katamo ca, sīha, pariyāyo, yena maṁ pariyāyena sammā vadamāno vadeyya:
an8.12:17.2	‘akiriyavādo samaṇo gotamo, akiriyāya dhammaṁ deseti, tena ca sāvake vinetī’ti?
an8.12:17.3	Ahañhi, sīha, akiriyaṁ vadāmi kāyaduccaritassa vacīduccaritassa manoduccaritassa;
an8.12:17.4	anekavihitānaṁ pāpakānaṁ akusalānaṁ dhammānaṁ akiriyaṁ vadāmi.
an8.12:17.5	Ayaṁ kho, sīha, pariyāyo, yena maṁ pariyāyena sammā vadamāno vadeyya:
an8.12:17.6	‘akiriyavādo samaṇo gotamo, akiriyāya dhammaṁ deseti, tena ca sāvake vinetī’ti.
an8.12:18.1	Katamo ca, sīha, pariyāyo, yena maṁ pariyāyena sammā vadamāno vadeyya:
an8.12:18.2	‘kiriyavādo samaṇo gotamo, kiriyāya dhammaṁ deseti, tena ca sāvake vinetī’ti?
an8.12:18.3	Ahañhi, sīha, kiriyaṁ vadāmi kāyasucaritassa vacīsucaritassa manosucaritassa;
an8.12:18.4	anekavihitānaṁ kusalānaṁ dhammānaṁ kiriyaṁ vadāmi.
an8.12:18.5	Ayaṁ kho, sīha, pariyāyo, yena maṁ pariyāyena sammā vadamāno vadeyya:
an8.12:18.6	‘kiriyavādo samaṇo gotamo, kiriyāya dhammaṁ deseti, tena ca sāvake vinetī’ti.
an8.12:19.1	Katamo ca, sīha, pariyāyo, yena maṁ pariyāyena sammā vadamāno vadeyya:
an8.12:19.2	‘ucchedavādo samaṇo gotamo, ucchedāya dhammaṁ deseti, tena ca sāvake vinetī’ti?
an8.12:19.3	Ahañhi, sīha, ucchedaṁ vadāmi rāgassa dosassa mohassa;
an8.12:19.4	anekavihitānaṁ pāpakānaṁ akusalānaṁ dhammānaṁ ucchedaṁ vadāmi.
an8.12:19.5	Ayaṁ kho, sīha, pariyāyo, yena maṁ pariyāyena sammā vadamāno vadeyya:
an8.12:19.6	‘ucchedavādo samaṇo gotamo, ucchedāya dhammaṁ deseti, tena ca sāvake vinetī’ti.
an8.12:20.1	Katamo ca, sīha, pariyāyo, yena maṁ pariyāyena sammā vadamāno vadeyya:
an8.12:20.2	‘jegucchī samaṇo gotamo, jegucchitāya dhammaṁ deseti, tena ca sāvake vinetī’ti?
an8.12:20.3	Ahañhi, sīha, jigucchāmi kāyaduccaritena vacīduccaritena manoduccaritena;
an8.12:20.4	jigucchāmi anekavihitānaṁ pāpakānaṁ akusalānaṁ dhammānaṁ samāpattiyā.
an8.12:20.5	Ayaṁ kho, sīha, pariyāyo, yena maṁ pariyāyena sammā vadamāno vadeyya:
an8.12:20.6	‘jegucchī samaṇo gotamo, jegucchitāya dhammaṁ deseti, tena ca sāvake vinetī’ti.
an8.12:21.1	Katamo ca, sīha, pariyāyo, yena maṁ pariyāyena sammā vadamāno vadeyya:
an8.12:21.2	‘venayiko samaṇo gotamo, vinayāya dhammaṁ deseti, tena ca sāvake vinetī’ti?
an8.12:21.3	Ahañhi, sīha, vinayāya dhammaṁ desemi rāgassa dosassa mohassa;
an8.12:21.4	anekavihitānaṁ pāpakānaṁ akusalānaṁ dhammānaṁ vinayāya dhammaṁ desemi.
an8.12:21.5	Ayaṁ kho, sīha, pariyāyo, yena maṁ pariyāyena sammā vadamāno vadeyya:
an8.12:21.6	‘venayiko samaṇo gotamo, vinayāya dhammaṁ deseti, tena ca sāvake vinetī’ti.
an8.12:22.1	Katamo ca, sīha, pariyāyo, yena maṁ pariyāyena sammā vadamāno vadeyya:
an8.12:22.2	‘tapassī samaṇo gotamo, tapassitāya dhammaṁ deseti, tena ca sāvake vinetī’ti?
an8.12:22.3	Tapanīyāhaṁ, sīha, pāpake akusale dhamme vadāmi kāyaduccaritaṁ vacīduccaritaṁ manoduccaritaṁ.
an8.12:22.4	Yassa kho, sīha, tapanīyā pāpakā akusalā dhammā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā, tamahaṁ ‘tapassī’ti vadāmi.
an8.12:22.5	Tathāgatassa kho, sīha, tapanīyā pāpakā akusalā dhammā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an8.12:22.6	Ayaṁ kho, sīha, pariyāyo, yena maṁ pariyāyena sammā vadamāno vadeyya:
an8.12:22.7	‘tapassī samaṇo gotamo, tapassitāya dhammaṁ deseti, tena ca sāvake vinetī’ti.
an8.12:23.1	Katamo ca, sīha, pariyāyo, yena maṁ pariyāyena sammā vadamāno vadeyya:
an8.12:23.2	‘apagabbho samaṇo gotamo, apagabbhatāya dhammaṁ deseti, tena ca sāvake vinetī’ti?
an8.12:23.3	Yassa kho, sīha, āyatiṁ gabbhaseyyā punabbhavābhinibbatti pahīnā ucchinnamūlā tālāvatthukatā anabhāvaṅkatā āyatiṁ anuppādadhammā, tamahaṁ ‘apagabbho’ti vadāmi.
an8.12:23.4	Tathāgatassa kho, sīha, āyatiṁ gabbhaseyyā punabbhavābhinibbatti pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
an8.12:23.5	Ayaṁ kho, sīha, pariyāyo, yena maṁ pariyāyena sammā vadamāno vadeyya:
an8.12:23.6	‘apagabbho samaṇo gotamo, apagabbhatāya dhammaṁ deseti, tena ca sāvake vinetī’ti.
an8.12:24.1	Katamo ca, sīha, pariyāyo, yena maṁ pariyāyena sammā vadamāno vadeyya:
an8.12:24.2	‘assāsako samaṇo gotamo, assāsāya dhammaṁ deseti, tena ca sāvake vinetī’ti?
an8.12:24.3	Ahañhi, sīha, assāsako paramena assāsena, assāsāya dhammaṁ desemi, tena ca sāvake vinemi.
an8.12:24.4	Ayaṁ kho, sīha, pariyāyo, yena maṁ pariyāyena sammā vadamāno vadeyya:
an8.12:24.5	‘assāsako samaṇo gotamo, assāsāya dhammaṁ deseti, tena ca sāvake vinetī’”ti.
an8.12:25.1	Evaṁ vutte, sīho senāpati bhagavantaṁ etadavoca:
an8.12:25.2	“abhikkantaṁ, bhante, abhikkantaṁ, bhante …pe…
an8.12:25.3	upāsakaṁ maṁ, bhante, bhagavā dhāretu ajjatagge pāṇupetaṁ saraṇaṁ gatan”ti.
an8.12:26.1	“Anuviccakāraṁ kho, sīha, karohi. Anuviccakāro tumhādisānaṁ ñātamanussānaṁ sādhu hotī”ti.
an8.12:26.2	“Imināpāhaṁ, bhante, bhagavato bhiyyoso mattāya attamano abhiraddho, yaṁ maṁ bhagavā evamāha: ‘anuviccakāraṁ kho, sīha, karohi. Anuviccakāro tumhādisānaṁ ñātamanussānaṁ sādhu hotī’ti.
an8.12:26.3	Mañhi, bhante, aññatitthiyā sāvakaṁ labhitvā kevalakappaṁ vesāliṁ paṭākaṁ parihareyyuṁ:
an8.12:26.4	‘sīho amhākaṁ senāpati sāvakattaṁ upagato’ti.
an8.12:26.5	Atha ca pana bhagavā evamāha: ‘anuviccakāraṁ, sīha, karohi. Anuviccakāro tumhādisānaṁ ñātamanussānaṁ sādhu hotī’ti.
an8.12:26.6	Esāhaṁ, bhante, dutiyampi bhagavantaṁ saraṇaṁ gacchāmi dhammañca bhikkhusaṅghañca.
an8.12:26.7	Upāsakaṁ maṁ bhagavā dhāretu ajjatagge pāṇupetaṁ saraṇaṁ gatan”ti.
an8.12:27.1	“Dīgharattaṁ kho te, sīha, nigaṇṭhānaṁ opānabhūtaṁ kulaṁ, yena nesaṁ upagatānaṁ piṇḍakaṁ dātabbaṁ maññeyyāsī”ti.
an8.12:27.2	“Imināpāhaṁ, bhante, bhagavato bhiyyoso mattāya attamano abhiraddho, yaṁ maṁ bhagavā evamāha:
an8.12:27.3	‘dīgharattaṁ kho te, sīha, nigaṇṭhānaṁ opānabhūtaṁ kulaṁ, yena nesaṁ upagatānaṁ piṇḍakaṁ dātabbaṁ maññeyyāsī’ti.
an8.12:27.4	Sutaṁ metaṁ, bhante:
an8.12:27.5	‘samaṇo gotamo evamāha—
an8.12:27.6	mayhameva dānaṁ dātabbaṁ, mayhameva sāvakānaṁ dātabbaṁ;
an8.12:27.7	mayhameva dinnaṁ mahapphalaṁ, na aññesaṁ dinnaṁ mahapphalaṁ;
an8.12:27.8	mayhameva sāvakānaṁ dinnaṁ mahapphalaṁ, na aññesaṁ sāvakānaṁ dinnaṁ mahapphalan’ti,
an8.12:27.9	atha ca pana maṁ bhagavā nigaṇṭhesupi dāne samādapeti.
an8.12:27.10	Api ca, bhante, mayamettha kālaṁ jānissāma.
an8.12:27.11	Esāhaṁ, bhante, tatiyampi bhagavantaṁ saraṇaṁ gacchāmi dhammañca bhikkhusaṅghañca.
an8.12:27.12	Upāsakaṁ maṁ, bhante, bhagavā dhāretu ajjatagge pāṇupetaṁ saraṇaṁ gatan”ti.
an8.12:28.1	Atha kho bhagavā sīhassa senāpatissa anupubbiṁ kathaṁ kathesi, seyyathidaṁ—
an8.12:28.2	dānakathaṁ sīlakathaṁ saggakathaṁ, kāmānaṁ ādīnavaṁ okāraṁ saṅkilesaṁ nekkhamme ānisaṁsaṁ pakāsesi.
an8.12:28.3	Yadā bhagavā aññāsi sīhaṁ senāpatiṁ kallacittaṁ muducittaṁ vinīvaraṇacittaṁ udaggacittaṁ pasannacittaṁ, atha yā buddhānaṁ sāmukkaṁsikā dhammadesanā taṁ pakāsesi—
an8.12:28.4	dukkhaṁ samudayaṁ nirodhaṁ maggaṁ.
an8.12:28.5	Seyyathāpi nāma suddhaṁ vatthaṁ apagatakāḷakaṁ sammadeva rajanaṁ paṭiggaṇheyya;
an8.12:28.6	evamevaṁ sīhassa senāpatissa tasmiṁyeva āsane virajaṁ vītamalaṁ dhammacakkhuṁ udapādi:
an8.12:28.7	“yaṁ kiñci samudayadhammaṁ sabbaṁ taṁ nirodhadhamman”ti.
an8.12:29.1	Atha kho sīho senāpati diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaṅkatho vesārajjappatto aparappaccayo satthusāsane bhagavantaṁ etadavoca:
an8.12:29.2	“adhivāsetu me, bhante, bhagavā svātanāya bhattaṁ saddhiṁ bhikkhusaṅghenā”ti.
an8.12:29.3	Adhivāsesi bhagavā tuṇhībhāvena.
an8.12:29.4	Atha kho sīho senāpati bhagavato adhivāsanaṁ viditvā uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an8.12:30.1	Atha kho sīho senāpati aññataraṁ purisaṁ āmantesi:
an8.12:30.2	“gaccha tvaṁ, ambho purisa, pavattamaṁsaṁ jānāhī”ti.
an8.12:30.3	Atha kho sīho senāpati tassā rattiyā accayena sake nivesane paṇītaṁ khādanīyaṁ bhojanīyaṁ paṭiyādāpetvā bhagavato kālaṁ ārocāpesi:
an8.12:30.4	“kālo, bhante, niṭṭhitaṁ bhattan”ti.
an8.12:31.1	Atha kho bhagavā pubbaṇhasamayaṁ nivāsetvā pattacīvaramādāya yena sīhassa senāpatissa nivesanaṁ tenupasaṅkami; upasaṅkamitvā paññatte āsane nisīdi saddhiṁ bhikkhusaṅghena.
an8.12:31.2	Tena kho pana samayena sambahulā nigaṇṭhā vesāliyaṁ rathikāya rathikaṁ siṅghāṭakena siṅghāṭakaṁ bāhā paggayha kandanti:
an8.12:31.3	“ajja sīhena senāpatinā thūlaṁ pasuṁ vadhitvā samaṇassa gotamassa bhattaṁ kataṁ.
an8.12:31.4	Taṁ samaṇo gotamo jānaṁ uddissakataṁ maṁsaṁ paribhuñjati paṭiccakamman”ti.
an8.12:32.1	Atha kho aññataro puriso yena sīho senāpati tenupasaṅkami; upasaṅkamitvā sīhassa senāpatissa upakaṇṇake ārocesi:
an8.12:32.2	“yagghe, bhante, jāneyyāsi.
an8.12:32.3	Ete sambahulā nigaṇṭhā vesāliyaṁ rathikāya rathikaṁ siṅghāṭakena siṅghāṭakaṁ bāhā paggayha kandanti:
an8.12:32.4	‘ajja sīhena senāpatinā thūlaṁ pasuṁ vadhitvā samaṇassa gotamassa bhattaṁ kataṁ.
an8.12:32.5	Taṁ samaṇo gotamo jānaṁ uddissakataṁ maṁsaṁ paribhuñjati paṭiccakamman’ti.
an8.12:32.6	Alaṁ ayyo dīgharattañhi te āyasmanto avaṇṇakāmā buddhassa avaṇṇakāmā dhammassa avaṇṇakāmā saṅghassa.
an8.12:32.7	Na ca panete āyasmanto jiridanti taṁ bhagavantaṁ asatā tucchā musā abhūtena abbhācikkhituṁ;
an8.12:32.8	na ca mayaṁ jīvitahetupi sañcicca pāṇaṁ jīvitā voropeyyāmā”ti.
an8.12:33.1	Atha kho sīho senāpati buddhappamukhaṁ bhikkhusaṅghaṁ paṇītena khādanīyena bhojanīyena sahatthā santappesi sampavāresi.
an8.12:33.2	Atha kho sīho senāpati bhagavantaṁ bhuttāviṁ onītapattapāṇiṁ ekamantaṁ nisīdi.
an8.12:33.3	Ekamantaṁ nisinnaṁ kho sīhaṁ senāpatiṁ bhagavā dhammiyā kathāya sandassetvā samādapetvā samuttejetvā sampahaṁsetvā uṭṭhāyāsanā pakkāmīti.
an8.12:33.4	Dutiyaṁ.
an8.13:0.1	Aṅguttara Nikāya 8.13
an8.13:0.2	2. Mahāvagga
an8.13:0.3	Assājānīyasutta
an8.13:1.1	“Aṭṭhahi, bhikkhave, aṅgehi samannāgato rañño bhaddo assājānīyo rājāraho hoti rājabhoggo, rañño aṅganteva saṅkhaṁ gacchati.
an8.13:1.2	Katamehi aṭṭhahi?
an8.13:1.3	Idha, bhikkhave, rañño bhaddo assājānīyo ubhato sujāto hoti—
an8.13:1.4	mātito ca pitito ca.
an8.13:1.5	Yassaṁ disāyaṁ aññepi bhaddā assājānīyā jāyanti, tassaṁ disāyaṁ jāto hoti.
an8.13:1.6	Yaṁ kho panassa bhojanaṁ denti—
an8.13:1.7	allaṁ vā sukkhaṁ vā—
an8.13:1.8	taṁ sakkaccaṁyeva paribhuñjati avikiranto.
an8.13:1.9	Jegucchī hoti uccāraṁ vā passāvaṁ vā abhinisīdituṁ vā abhinipajjituṁ vā.
an8.13:1.10	Sorato hoti sukhasaṁvāso, na ca aññe asse ubbejetā.
an8.13:1.11	Yāni kho panassa honti sāṭheyyāni kūṭeyyāni jimheyyāni vaṅkeyyāni, tāni yathābhūtaṁ sārathissa āvikattā hoti.
an8.13:1.12	Tesamassa sārathi abhinimmadanāya vāyamati.
an8.13:1.13	Vāhī kho pana hoti.
an8.13:1.14	‘Kāmaññe assā vahantu vā mā vā, ahamettha vahissāmī’ti cittaṁ uppādeti.
an8.13:1.15	Gacchanto kho pana ujumaggeneva gacchati.
an8.13:1.16	Thāmavā hoti yāva jīvitamaraṇapariyādānā thāmaṁ upadaṁsetā.
an8.13:1.17	Imehi kho, bhikkhave, aṭṭhahi aṅgehi samannāgato rañño bhaddo assājānīyo rājāraho hoti rājabhoggo, rañño aṅganteva saṅkhaṁ gacchati.
an8.13:2.1	Evamevaṁ kho, bhikkhave, aṭṭhahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an8.13:2.2	Katamehi aṭṭhahi?
an8.13:2.3	Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an8.13:2.4	Yaṁ kho panassa bhojanaṁ denti—
an8.13:2.5	lūkhaṁ vā paṇītaṁ vā—
an8.13:2.6	taṁ sakkaccaṁyeva paribhuñjati avihaññamāno.
an8.13:2.7	Jegucchī hoti kāyaduccaritena vacīduccaritena manoduccaritena;
an8.13:2.8	jegucchī hoti anekavihitānaṁ pāpakānaṁ akusalānaṁ dhammānaṁ samāpattiyā.
an8.13:2.9	Sorato hoti sukhasaṁvāso, na aññe bhikkhū ubbejetā.
an8.13:2.10	Yāni kho panassa honti sāṭheyyāni kūṭeyyāni jimheyyāni vaṅkeyyāni, tāni yathābhūtaṁ āvikattā hoti satthari vā viññūsu vā sabrahmacārīsu.
an8.13:2.11	Tesamassa satthā vā viññū vā sabrahmacārī abhinimmadanāya vāyamati.
an8.13:2.12	Sikkhitā kho pana hoti.
an8.13:2.13	‘Kāmaññe bhikkhū sikkhantu vā mā vā, ahamettha sikkhissāmī’ti cittaṁ uppādeti.
an8.13:2.14	Gacchanto kho pana ujumaggeneva gacchati;
an8.13:2.15	tatrāyaṁ ujumaggo, seyyathidaṁ—
an8.13:2.16	sammādiṭṭhi …pe… sammāsamādhi.
an8.13:2.17	Āraddhavīriyo viharati:
an8.13:2.18	‘kāmaṁ taco ca nhāru ca aṭṭhi ca avasissatu, sarīre upassussatu maṁsalohitaṁ; yaṁ taṁ purisathāmena purisavīriyena purisaparakkamena pattabbaṁ, na taṁ apāpuṇitvā vīriyassa saṇṭhānaṁ bhavissatī’ti.
an8.13:2.19	Imehi kho, bhikkhave, aṭṭhahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an8.13:2.20	Tatiyaṁ.
an8.14:0.1	Aṅguttara Nikāya 8.14
an8.14:0.2	2. Mahāvagga
an8.14:0.3	Assakhaḷuṅkasutta
an8.14:1.1	“Aṭṭha ca, bhikkhave, assakhaḷuṅke desessāmi aṭṭha ca assadose, aṭṭha ca purisakhaḷuṅke aṭṭha ca purisadose.
an8.14:1.2	Taṁ suṇātha, sādhukaṁ manasi karotha, bhāsissāmī”ti.
an8.14:1.3	“Evaṁ, bhante”ti kho te bhikkhū bhagavato paccassosuṁ.
an8.14:1.4	Bhagavā etadavoca:
an8.14:2.1	“Katame ca, bhikkhave, aṭṭha assakhaḷuṅkā aṭṭha ca assadosā?
an8.14:2.2	Idha, bhikkhave, ekacco assakhaḷuṅko ‘pehī’ti vutto, viddho samāno codito sārathinā pacchato paṭikkamati, piṭṭhito rathaṁ pavatteti.
an8.14:2.3	Evarūpopi, bhikkhave, idhekacco assakhaḷuṅko hoti.
an8.14:2.4	Ayaṁ, bhikkhave, paṭhamo assadoso.
an8.14:3.1	Puna caparaṁ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā pacchā laṅghati, kubbaraṁ hanati, tidaṇḍaṁ bhañjati.
an8.14:3.2	Evarūpopi, bhikkhave, idhekacco assakhaḷuṅko hoti.
an8.14:3.3	Ayaṁ, bhikkhave, dutiyo assadoso.
an8.14:4.1	Puna caparaṁ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā rathīsāya satthiṁ ussajjitvā rathīsaṁyeva ajjhomaddati.
an8.14:4.2	Evarūpopi, bhikkhave, idhekacco assakhaḷuṅko hoti.
an8.14:4.3	Ayaṁ, bhikkhave, tatiyo assadoso.
an8.14:5.1	Puna caparaṁ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā ummaggaṁ gaṇhati, ubbaṭumaṁ rathaṁ karoti.
an8.14:5.2	Evarūpopi, bhikkhave, idhekacco assakhaḷuṅko hoti.
an8.14:5.3	Ayaṁ, bhikkhave, catuttho assadoso.
an8.14:6.1	Puna caparaṁ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā laṅghati purimakāyaṁ paggaṇhati purime pāde.
an8.14:6.2	Evarūpopi, bhikkhave, idhekacco assakhaḷuṅko hoti.
an8.14:6.3	Ayaṁ, bhikkhave, pañcamo assadoso.
an8.14:7.1	Puna caparaṁ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā anādiyitvā sārathiṁ anādiyitvā patodalaṭṭhiṁ dantehi mukhādhānaṁ vidhaṁsitvā yena kāmaṁ pakkamati.
an8.14:7.2	Evarūpopi, bhikkhave, idhekacco assakhaḷuṅko hoti.
an8.14:7.3	Ayaṁ, bhikkhave, chaṭṭho assadoso.
an8.14:8.1	Puna caparaṁ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā neva abhikkamati no paṭikkamati tattheva khīlaṭṭhāyī ṭhito hoti.
an8.14:8.2	Evarūpopi, bhikkhave, idhekacco assakhaḷuṅko hoti.
an8.14:8.3	Ayaṁ, bhikkhave, sattamo assadoso.
an8.14:9.1	Puna caparaṁ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā purime ca pāde saṁharitvā pacchime ca pāde saṁharitvā tattheva cattāro pāde abhinisīdati.
an8.14:9.2	Evarūpopi, bhikkhave, idhekacco assakhaḷuṅko hoti.
an8.14:9.3	Ayaṁ, bhikkhave, aṭṭhamo assadoso.
an8.14:9.4	Ime kho, bhikkhave, aṭṭha assakhaḷuṅkā aṭṭha ca assadosā.
an8.14:10.1	Katame ca, bhikkhave, aṭṭha purisakhaḷuṅkā aṭṭha ca purisadosā?
an8.14:10.2	Idha, bhikkhave, bhikkhū bhikkhuṁ āpattiyā codenti.
an8.14:10.3	So bhikkhu bhikkhūhi āpattiyā codiyamāno ‘na sarāmī’ti asatiyā nibbeṭheti.
an8.14:10.4	Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā pacchato paṭikkamati, piṭṭhito rathaṁ vatteti;
an8.14:10.5	tathūpamāhaṁ, bhikkhave, imaṁ puggalaṁ vadāmi.
an8.14:10.6	Evarūpopi, bhikkhave, idhekacco purisakhaḷuṅko hoti.
an8.14:10.7	Ayaṁ, bhikkhave, paṭhamo purisadoso.
an8.14:11.1	Puna caparaṁ, bhikkhave, bhikkhū bhikkhuṁ āpattiyā codenti.
an8.14:11.2	So bhikkhu bhikkhūhi āpattiyā codiyamāno codakaṁyeva paṭippharati:
an8.14:11.3	‘kiṁ nu kho tuyhaṁ bālassa abyattassa bhaṇitena.
an8.14:11.4	Tvampi nāma bhaṇitabbaṁ maññasī’ti.
an8.14:11.5	Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā pacchā laṅghati, kubbaraṁ hanati, tidaṇḍaṁ bhañjati;
an8.14:11.6	tathūpamāhaṁ, bhikkhave, imaṁ puggalaṁ vadāmi.
an8.14:11.7	Evarūpopi, bhikkhave, idhekacco purisakhaḷuṅko hoti.
an8.14:11.8	Ayaṁ, bhikkhave, dutiyo purisadoso.
an8.14:12.1	Puna caparaṁ, bhikkhave, bhikkhū bhikkhuṁ āpattiyā codenti.
an8.14:12.2	So bhikkhu bhikkhūhi āpattiyā codiyamāno codakasseva paccāropeti:
an8.14:12.3	‘tvaṁ khosi itthannāmaṁ āpattiṁ āpanno, tvaṁ tāva paṭhamaṁ paṭikarohī’ti.
an8.14:12.4	Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā rathīsāya satthiṁ ussajjitvā rathīsaṁyeva ajjhomaddati;
an8.14:12.5	tathūpamāhaṁ, bhikkhave, imaṁ puggalaṁ vadāmi.
an8.14:12.6	Evarūpopi, bhikkhave, idhekacco purisakhaḷuṅko hoti.
an8.14:12.7	Ayaṁ, bhikkhave, tatiyo purisadoso.
an8.14:13.1	Puna caparaṁ, bhikkhave, bhikkhū bhikkhuṁ āpattiyā codenti.
an8.14:13.2	So bhikkhu bhikkhūhi āpattiyā codiyamāno aññenāññaṁ paṭicarati, bahiddhā kathaṁ apanāmeti, kopañca dosañca appaccayañca pātukaroti.
an8.14:13.3	Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā ummaggaṁ gaṇhati, ubbaṭumaṁ rathaṁ karoti;
an8.14:13.4	tathūpamāhaṁ, bhikkhave, imaṁ puggalaṁ vadāmi.
an8.14:13.5	Evarūpopi, bhikkhave, idhekacco purisakhaḷuṅko hoti.
an8.14:13.6	Ayaṁ, bhikkhave, catuttho purisadoso.
an8.14:14.1	Puna caparaṁ, bhikkhave, bhikkhū bhikkhuṁ āpattiyā codenti.
an8.14:14.2	So bhikkhu bhikkhūhi āpattiyā codiyamāno saṅghamajjhe bāhuvikkhepaṁ karoti.
an8.14:14.3	Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā laṅghati, purimakāyaṁ paggaṇhati purime pāde;
an8.14:14.4	tathūpamāhaṁ, bhikkhave, imaṁ puggalaṁ vadāmi.
an8.14:14.5	Evarūpopi, bhikkhave, idhekacco purisakhaḷuṅko hoti.
an8.14:14.6	Ayaṁ, bhikkhave, pañcamo purisadoso.
an8.14:15.1	Puna caparaṁ, bhikkhave, bhikkhū bhikkhuṁ āpattiyā codenti.
an8.14:15.2	So bhikkhu bhikkhūhi āpattiyā codiyamāno anādiyitvā saṅghaṁ anādiyitvā codakaṁ sāpattikova yena kāmaṁ pakkamati.
an8.14:15.3	Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā anādiyitvā sārathiṁ anādiyitvā patodalaṭṭhiṁ dantehi mukhādhānaṁ vidhaṁsitvā yena kāmaṁ pakkamati;
an8.14:15.4	tathūpamāhaṁ, bhikkhave, imaṁ puggalaṁ vadāmi.
an8.14:15.5	Evarūpopi, bhikkhave, idhekacco purisakhaḷuṅko hoti.
an8.14:15.6	Ayaṁ, bhikkhave, chaṭṭho purisadoso.
an8.14:16.1	Puna caparaṁ, bhikkhave, bhikkhū bhikkhuṁ āpattiyā codenti.
an8.14:16.2	So bhikkhu bhikkhūhi āpattiyā codiyamāno ‘nevāhaṁ āpannomhi, na panāhaṁ āpannomhī’ti so tuṇhībhāvena saṅghaṁ viheṭheti.
an8.14:16.3	Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā neva abhikkamati no paṭikkamati tattheva khīlaṭṭhāyī ṭhito hoti;
an8.14:16.4	tathūpamāhaṁ, bhikkhave, imaṁ puggalaṁ vadāmi.
an8.14:16.5	Evarūpopi, bhikkhave, idhekacco purisakhaḷuṅko hoti.
an8.14:16.6	Ayaṁ, bhikkhave, sattamo purisadoso.
an8.14:17.1	Puna caparaṁ, bhikkhave, bhikkhū bhikkhuṁ āpattiyā codenti.
an8.14:17.2	So bhikkhu bhikkhūhi āpattiyā codiyamāno evamāha:
an8.14:17.3	‘kiṁ nu kho tumhe āyasmanto atibāḷhaṁ mayi byāvaṭā yāva idānāhaṁ sikkhaṁ paccakkhāya hīnāyāvattissāmī’ti.
an8.14:17.4	So sikkhaṁ paccakkhāya hīnāyāvattitvā evamāha:
an8.14:17.5	‘idāni kho tumhe āyasmanto attamanā hothā’ti?
an8.14:17.6	Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā purime ca pāde saṁharitvā pacchime ca pāde saṁharitvā tattheva cattāro pāde abhinisīdati;
an8.14:17.7	tathūpamāhaṁ, bhikkhave, imaṁ puggalaṁ vadāmi.
an8.14:17.8	Evarūpopi, bhikkhave, idhekacco purisakhaḷuṅko hoti.
an8.14:17.9	Ayaṁ, bhikkhave, aṭṭhamo purisadoso.
an8.14:17.10	Ime kho, bhikkhave, aṭṭha purisakhaḷuṅkā aṭṭha ca purisadosā”ti.
an8.14:17.11	Catutthaṁ.
an8.15:0.1	Aṅguttara Nikāya 8.15
an8.15:0.2	2. Mahāvagga
an8.15:0.3	Malasutta
an8.15:1.1	“Aṭṭhimāni, bhikkhave, malāni.
an8.15:1.2	Katamāni aṭṭha?
an8.15:1.3	Asajjhāyamalā, bhikkhave, mantā;
an8.15:1.4	anuṭṭhānamalā, bhikkhave, gharā;
an8.15:1.5	malaṁ, bhikkhave, vaṇṇassa kosajjaṁ;
an8.15:1.6	pamādo, bhikkhave, rakkhato malaṁ;
an8.15:1.7	malaṁ, bhikkhave, itthiyā duccaritaṁ;
an8.15:1.8	maccheraṁ, bhikkhave, dadato malaṁ;
an8.15:1.9	malā, bhikkhave, pāpakā akusalā dhammā asmiṁ loke paramhi ca;
an8.15:1.10	tato, bhikkhave, malā malataraṁ avijjā paramaṁ malaṁ.
an8.15:1.11	Imāni kho, bhikkhave, aṭṭha malānīti.
an8.15:2.1	Asajjhāyamalā mantā,
an8.15:2.2	anuṭṭhānamalā gharā;
an8.15:2.3	Malaṁ vaṇṇassa kosajjaṁ,
an8.15:2.4	pamādo rakkhato malaṁ.
an8.15:3.1	Malitthiyā duccaritaṁ,
an8.15:3.2	maccheraṁ dadato malaṁ;
an8.15:3.3	Malā ve pāpakā dhammā,
an8.15:3.4	asmiṁ loke paramhi ca;
an8.15:3.5	Tato malā malataraṁ,
an8.15:3.6	avijjā paramaṁ malan”ti.
an8.15:3.7	Pañcamaṁ.
an8.16:0.1	Aṅguttara Nikāya 8.16
an8.16:0.2	2. Mahāvagga
an8.16:0.3	Dūteyyasutta
an8.16:1.1	“Aṭṭhahi, bhikkhave, dhammehi samannāgato bhikkhu dūteyyaṁ gantumarahati.
an8.16:1.2	Katamehi aṭṭhahi?
an8.16:1.3	Idha, bhikkhave, bhikkhu sotā ca hoti, sāvetā ca, uggahetā ca, dhāretā ca, viññātā ca, viññāpetā ca, kusalo ca sahitāsahitassa, no ca kalahakārako—
an8.16:1.4	imehi kho, bhikkhave, aṭṭhahi dhammehi samannāgato bhikkhu dūteyyaṁ gantumarahati.
an8.16:1.5	Aṭṭhahi, bhikkhave, dhammehi samannāgato sāriputto dūteyyaṁ gantumarahati.
an8.16:1.6	Katamehi aṭṭhahi?
an8.16:1.7	Idha, bhikkhave, sāriputto sotā ca hoti, sāvetā ca, uggahetā ca, dhāretā ca, viññātā ca, viññāpetā ca, kusalo ca sahitāsahitassa, no ca kalahakārako.
an8.16:1.8	Imehi kho, bhikkhave, aṭṭhahi dhammehi samannāgato sāriputto dūteyyaṁ gantumarahatīti.
an8.16:2.1	Yo ve na byathati patvā,
an8.16:2.2	parisaṁ uggavādiniṁ;
an8.16:2.3	Na ca hāpeti vacanaṁ,
an8.16:2.4	na ca chādeti sāsanaṁ.
an8.16:3.1	Asandiddhañca bhaṇati,
an8.16:3.2	Pucchito na ca kuppati;
an8.16:3.3	Sa ve tādisako bhikkhu,
an8.16:3.4	Dūteyyaṁ gantumarahatī”ti.
an8.16:3.5	Chaṭṭhaṁ.
an8.17:0.1	Aṅguttara Nikāya 8.17
an8.17:0.2	2. Mahāvagga
an8.17:0.3	Paṭhamabandhanasutta
an8.17:1.1	“Aṭṭhahi, bhikkhave, ākārehi itthī purisaṁ bandhati.
an8.17:1.2	Katamehi aṭṭhahi?
an8.17:1.3	Ruṇṇena, bhikkhave, itthī purisaṁ bandhati;
an8.17:1.4	hasitena, bhikkhave, itthī purisaṁ bandhati;
an8.17:1.5	bhaṇitena, bhikkhave, itthī purisaṁ bandhati;
an8.17:1.6	ākappena, bhikkhave, itthī purisaṁ bandhati;
an8.17:1.7	vanabhaṅgena, bhikkhave, itthī purisaṁ bandhati;
an8.17:1.8	gandhena, bhikkhave, itthī purisaṁ bandhati;
an8.17:1.9	rasena, bhikkhave, itthī purisaṁ bandhati;
an8.17:1.10	phassena, bhikkhave, itthī purisaṁ bandhati.
an8.17:1.11	Imehi kho, bhikkhave, aṭṭhahākārehi itthī purisaṁ bandhati.
an8.17:1.12	Te, bhikkhave, sattā subaddhā, ye phassena baddhā”ti.
an8.17:1.13	Sattamaṁ.
an8.18:0.1	Aṅguttara Nikāya 8.18
an8.18:0.2	2. Mahāvagga
an8.18:0.3	Dutiyabandhanasutta
an8.18:1.1	“Aṭṭhahi, bhikkhave, ākārehi puriso itthiṁ bandhati.
an8.18:1.2	Katamehi aṭṭhahi?
an8.18:1.3	Ruṇṇena, bhikkhave, puriso itthiṁ bandhati;
an8.18:1.4	hasitena, bhikkhave, puriso itthiṁ bandhati;
an8.18:1.5	bhaṇitena, bhikkhave, puriso itthiṁ bandhati;
an8.18:1.6	ākappena, bhikkhave, puriso itthiṁ bandhati;
an8.18:1.7	vanabhaṅgena, bhikkhave, puriso itthiṁ bandhati;
an8.18:1.8	gandhena, bhikkhave, puriso itthiṁ bandhati;
an8.18:1.9	rasena, bhikkhave, puriso itthiṁ bandhati;
an8.18:1.10	phassena, bhikkhave, puriso itthiṁ bandhati.
an8.18:1.11	Imehi kho, bhikkhave, aṭṭhahākārehi puriso itthiṁ bandhati.
an8.18:1.12	Te, bhikkhave, sattā subaddhā, ye phassena baddhā”ti.
an8.18:1.13	Aṭṭhamaṁ.
an8.19:0.1	Aṅguttara Nikāya 8.19
an8.19:0.2	2. Mahāvagga
an8.19:0.3	Pahārādasutta
an8.19:1.1	Ekaṁ samayaṁ bhagavā verañjāyaṁ viharati naḷerupucimandamūle.
an8.19:1.2	Atha kho pahārādo asurindo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitaṁ kho pahārādaṁ asurindaṁ bhagavā etadavoca:
an8.19:2.1	“Api pana, pahārāda, asurā mahāsamudde abhiramantī”ti?
an8.19:2.2	“Abhiramanti, bhante, asurā mahāsamudde”ti.
an8.19:2.3	“Kati pana, pahārāda, mahāsamudde acchariyā abbhutā dhammā, ye disvā disvā asurā mahāsamudde abhiramantī”ti?
an8.19:2.4	“Aṭṭha, bhante, mahāsamudde acchariyā abbhutā dhammā, ye disvā disvā asurā mahāsamudde abhiramanti.
an8.19:2.5	Katame aṭṭha?
an8.19:2.6	Mahāsamuddo, bhante, anupubbaninno anupubbapoṇo anupubbapabbhāro, na āyatakeneva papāto.
an8.19:2.7	Yampi, bhante, mahāsamuddo anupubbaninno anupubbapoṇo anupubbapabbhāro, na āyatakeneva papāto;
an8.19:2.8	ayaṁ, bhante, mahāsamudde paṭhamo acchariyo abbhuto dhammo, yaṁ disvā disvā asurā mahāsamudde abhiramanti.
an8.19:3.1	Puna caparaṁ, bhante, mahāsamuddo ṭhitadhammo velaṁ nātivattati.
an8.19:3.2	Yampi, bhante, mahāsamuddo ṭhitadhammo velaṁ nātivattati;
an8.19:3.3	ayaṁ, bhante, mahāsamudde dutiyo acchariyo abbhuto dhammo yaṁ disvā disvā asurā mahāsamudde abhiramanti.
an8.19:4.1	Puna caparaṁ, bhante, mahāsamuddo na matena kuṇapena saṁvasati. Yaṁ hoti mahāsamudde mataṁ kuṇapaṁ, taṁ khippameva tīraṁ vāheti, thalaṁ ussāreti.
an8.19:4.2	Yampi, bhante, mahāsamuddo na matena kuṇapena saṁvasati, yaṁ hoti mahāsamudde mataṁ kuṇapaṁ, taṁ khippameva tīraṁ vāheti, thalaṁ ussāreti;
an8.19:4.3	ayaṁ, bhante, mahāsamudde tatiyo acchariyo abbhuto dhammo, yaṁ disvā disvā asurā mahāsamudde abhiramanti.
an8.19:5.1	Puna caparaṁ, bhante, yā kāci mahānadiyo, seyyathidaṁ—
an8.19:5.2	gaṅgā yamunā aciravatī sarabhū mahī, tā mahāsamuddaṁ patvā jahanti purimāni nāmagottāni, ‘mahāsamuddo’ tveva saṅkhaṁ gacchanti.
an8.19:5.3	Yampi, bhante, yā kāci mahānadiyo, seyyathidaṁ—gaṅgā yamunā aciravatī sarabhū mahī, tā mahāsamuddaṁ patvā jahanti purimāni nāmagottāni, ‘mahāsamuddo’ tveva saṅkhaṁ gacchanti;
an8.19:5.4	ayaṁ, bhante, mahāsamudde catuttho acchariyo abbhuto dhammo, yaṁ disvā disvā asurā mahāsamudde abhiramanti.
an8.19:6.1	Puna caparaṁ, bhante, yā ca loke savantiyo mahāsamuddaṁ appenti yā ca antalikkhā dhārā papatanti, na tena mahāsamuddassa ūnattaṁ vā pūrattaṁ vā paññāyati.
an8.19:6.2	Yampi, bhante, yā ca loke savantiyo mahāsamuddaṁ appenti yā ca antalikkhā dhārā papatanti, na tena mahāsamuddassa ūnattaṁ vā pūrattaṁ vā paññāyati;
an8.19:6.3	ayaṁ, bhante, mahāsamudde pañcamo acchariyo abbhuto dhammo, yaṁ disvā disvā asurā mahāsamudde abhiramanti.
an8.19:7.1	Puna caparaṁ, bhante, mahāsamuddo ekaraso loṇaraso.
an8.19:7.2	Yampi, bhante, mahāsamuddo ekaraso loṇaraso;
an8.19:7.3	ayaṁ, bhante, mahāsamudde chaṭṭho acchariyo abbhuto dhammo, yaṁ disvā disvā asurā mahāsamudde abhiramanti.
an8.19:8.1	Puna caparaṁ, bhante, mahāsamuddo bahuratano anekaratano. Tatrimāni ratanāni, seyyathidaṁ—muttā maṇi veḷuriyo saṅkho silā pavāḷaṁ rajataṁ jātarūpaṁ lohitako masāragallaṁ.
an8.19:8.2	Yampi, bhante, mahāsamuddo bahuratano anekaratano; tatrimāni ratanāni, seyyathidaṁ—muttā maṇi veḷuriyo saṅkho silā pavāḷaṁ rajataṁ jātarūpaṁ lohitako masāragallaṁ;
an8.19:8.3	ayaṁ, bhante, mahāsamudde sattamo acchariyo abbhuto dhammo, yaṁ disvā disvā asurā mahāsamudde abhiramanti.
an8.19:9.1	Puna caparaṁ, bhante, mahāsamuddo mahataṁ bhūtānaṁ āvāso. Tatrime bhūtā—timi timiṅgalo timirapiṅgalo asurā nāgā gandhabbā. Santi mahāsamudde yojanasatikāpi attabhāvā, dviyojanasatikāpi attabhāvā, tiyojanasatikāpi attabhāvā, catuyojanasatikāpi attabhāvā, pañcayojanasatikāpi attabhāvā.
an8.19:9.2	Yampi, bhante, mahāsamuddo mahataṁ bhūtānaṁ āvāso; tatrime bhūtā—timi timiṅgalo timirapiṅgalo asurā nāgā gandhabbā; santi mahāsamudde yojanasatikāpi attabhāvā …pe… tiyojana … catuyojana … pañcayojanasatikāpi attabhāvā;
an8.19:9.3	ayaṁ, bhante, mahāsamudde aṭṭhamo acchariyo abbhuto dhammo, yaṁ disvā disvā asurā mahāsamudde abhiramanti.
an8.19:9.4	Ime kho, bhante, mahāsamudde aṭṭha acchariyā abbhutā dhammā, ye disvā disvā asurā mahāsamudde abhiramantīti.
an8.19:10.1	Api pana, bhante, bhikkhū imasmiṁ dhammavinaye abhiramantī”ti?
an8.19:10.2	“Abhiramanti, pahārāda, bhikkhū imasmiṁ dhammavinaye”ti.
an8.19:10.3	“Kati pana, bhante, imasmiṁ dhammavinaye acchariyā abbhutā dhammā, ye disvā disvā bhikkhū imasmiṁ dhammavinaye abhiramantī”ti?
an8.19:10.4	“Aṭṭha, pahārāda, imasmiṁ dhammavinaye acchariyā abbhutā dhammā, ye disvā disvā bhikkhū imasmiṁ dhammavinaye abhiramanti.
an8.19:10.5	Katame aṭṭha?
an8.19:10.6	Seyyathāpi, pahārāda, mahāsamuddo anupubbaninno anupubbapoṇo anupubbapabbhāro, na āyatakeneva papāto;
an8.19:10.7	evamevaṁ kho, pahārāda, imasmiṁ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho.
an8.19:10.8	Yampi, pahārāda, imasmiṁ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho;
an8.19:10.9	ayaṁ, pahārāda, imasmiṁ dhammavinaye paṭhamo acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti.
an8.19:11.1	Seyyathāpi, pahārāda, mahāsamuddo ṭhitadhammo velaṁ nātivattati;
an8.19:11.2	evamevaṁ kho, pahārāda, yaṁ mayā sāvakānaṁ sikkhāpadaṁ paññattaṁ taṁ mama sāvakā jīvitahetupi nātikkamanti.
an8.19:11.3	Yampi, pahārāda, mayā sāvakānaṁ sikkhāpadaṁ paññattaṁ taṁ mama sāvakā jīvitahetupi nātikkamanti;
an8.19:11.4	ayaṁ, pahārāda, imasmiṁ dhammavinaye dutiyo acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti.
an8.19:12.1	Seyyathāpi, pahārāda, mahāsamuddo na matena kuṇapena saṁvasati. Yaṁ hoti mahāsamudde mataṁ kuṇapaṁ, taṁ khippameva tīraṁ vāheti thalaṁ ussāreti;
an8.19:13.1	evamevaṁ kho, pahārāda, yo so puggalo dussīlo pāpadhammo asucisaṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto, na tena saṅgho saṁvasati; khippameva naṁ sannipatitvā ukkhipati. Kiñcāpi so hoti majjhe bhikkhusaṅghassa sannisinno, atha kho so ārakāva saṅghamhā saṅgho ca tena.
an8.19:13.2	Yampi, pahārāda, yo so puggalo dussīlo pāpadhammo asucisaṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto, na tena saṅgho saṁvasati; khippameva naṁ sannipatitvā ukkhipati; kiñcāpi so hoti majjhe bhikkhusaṅghassa sannisinno, atha kho so ārakāva saṅghamhā saṅgho ca tena;
an8.19:13.3	ayaṁ, pahārāda, imasmiṁ dhammavinaye tatiyo acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti.
an8.19:14.1	Seyyathāpi, pahārāda, yā kāci mahānadiyo, seyyathidaṁ—gaṅgā yamunā aciravatī sarabhū mahī, tā mahāsamuddaṁ patvā jahanti purimāni nāmagottāni, ‘mahāsamuddo’ tveva saṅkhaṁ gacchanti;
an8.19:14.2	evamevaṁ kho, pahārāda, cattārome vaṇṇā—khattiyā, brāhmaṇā, vessā, suddā, te tathāgatappavedite dhammavinaye agārasmā anagāriyaṁ pabbajitvā jahanti purimāni nāmagottāni, ‘samaṇā sakyaputtiyā’ tveva saṅkhaṁ gacchanti.
an8.19:14.3	Yampi, pahārāda, cattārome vaṇṇā—khattiyā, brāhmaṇā, vessā, suddā, te tathāgatappavedite dhammavinaye agārasmā anagāriyaṁ pabbajitvā jahanti purimāni nāmagottāni, ‘samaṇā sakyaputtiyā’ tveva saṅkhaṁ gacchanti;
an8.19:14.4	ayaṁ, pahārāda, imasmiṁ dhammavinaye catuttho acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti.
an8.19:15.1	Seyyathāpi, pahārāda, yā ca loke savantiyo mahāsamuddaṁ appenti yā ca antalikkhā dhārā papatanti, na tena mahāsamuddassa ūnattaṁ vā pūrattaṁ vā paññāyati;
an8.19:15.2	evamevaṁ kho, pahārāda, bahū cepi bhikkhū anupādisesāya nibbānadhātuyā parinibbāyanti, na tena nibbānadhātuyā ūnattaṁ vā pūrattaṁ vā paññāyati.
an8.19:15.3	Yampi, pahārāda, bahū cepi bhikkhū anupādisesāya nibbānadhātuyā parinibbāyanti, na tena nibbānadhātuyā ūnattaṁ vā pūrattaṁ vā paññāyati;
an8.19:15.4	ayaṁ, pahārāda, imasmiṁ dhammavinaye pañcamo acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti.
an8.19:16.1	Seyyathāpi, pahārāda, mahāsamuddo ekaraso loṇaraso;
an8.19:16.2	evamevaṁ kho, pahārāda, ayaṁ dhammavinayo ekaraso, vimuttiraso.
an8.19:16.3	Yampi, pahārāda, ayaṁ dhammavinayo ekaraso, vimuttiraso;
an8.19:16.4	ayaṁ, pahārāda, imasmiṁ dhammavinaye chaṭṭho acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti.
an8.19:17.1	Seyyathāpi, pahārāda, mahāsamuddo bahuratano anekaratano; tatrimāni ratanāni, seyyathidaṁ—muttā maṇi veḷuriyo saṅkho silā pavāḷaṁ rajataṁ jātarūpaṁ lohitako masāragallaṁ;
an8.19:17.2	evamevaṁ kho, pahārāda, ayaṁ dhammavinayo bahuratano anekaratano. Tatrimāni ratanāni, seyyathidaṁ—cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo.
an8.19:17.3	Yampi, pahārāda, ayaṁ dhammavinayo bahuratano anekaratano; tatrimāni ratanāni, seyyathidaṁ—cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo;
an8.19:17.4	ayaṁ, pahārāda, imasmiṁ dhammavinaye sattamo acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti.
an8.19:18.1	Seyyathāpi, pahārāda, mahāsamuddo mahataṁ bhūtānaṁ āvāso; tatrime bhūtā—timi timiṅgalo timirapiṅgalo asurā nāgā gandhabbā; santi mahāsamudde yojanasatikāpi attabhāvā, dviyojanasatikāpi attabhāvā, tiyojanasatikāpi attabhāvā, catuyojanasatikāpi attabhāvā, pañcayojanasatikāpi attabhāvā;
an8.19:18.2	evamevaṁ kho, pahārāda, ayaṁ dhammavinayo mahataṁ bhūtānaṁ āvāso; tatrime bhūtā—sotāpanno sotāpattiphalasacchikiriyāya paṭipanno, sakadāgāmī sakadāgāmiphalasacchikiriyāya paṭipanno, anāgāmī anāgāmiphalasacchikiriyāya paṭipanno, arahā arahattāya paṭipanno.
an8.19:18.3	Yampi, pahārāda, ayaṁ dhammavinayo mahataṁ bhūtānaṁ āvāso; tatrime bhūtā—sotāpanno sotāpattiphalasacchikiriyāya paṭipanno, sakadāgāmī sakadāgāmiphalasacchikiriyāya paṭipanno, anāgāmī anāgāmiphalasacchikiriyāya paṭipanno, arahā arahattāya paṭipanno;
an8.19:18.4	ayaṁ, pahārāda, imasmiṁ dhammavinaye aṭṭhamo acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti.
an8.19:19.1	Ime kho, pahārāda, imasmiṁ dhammavinaye aṭṭha acchariyā abbhutā dhammā, ye disvā disvā bhikkhū imasmiṁ dhammavinaye abhiramantī”ti.
an8.19:19.2	Navamaṁ.
an8.20:0.1	Aṅguttara Nikāya 8.20
an8.20:0.2	2. Mahāvagga
an8.20:0.3	Uposathasutta
an8.20:1.1	Ekaṁ samayaṁ bhagavā sāvatthiyaṁ viharati pubbārāme migāramātupāsāde.
an8.20:1.2	Tena kho pana samayena bhagavā tadahuposathe bhikkhusaṅghaparivuto nisinno hoti.
an8.20:1.3	Atha kho āyasmā ānando abhikkantāya rattiyā, nikkhante paṭhame yāme, uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca:
an8.20:1.4	“abhikkantā, bhante, ratti, nikkhanto paṭhamo yāmo, ciranisinno bhikkhusaṅgho.
an8.20:1.5	Uddisatu, bhante, bhagavā bhikkhūnaṁ pātimokkhan”ti.
an8.20:2.1	Evaṁ vutte, bhagavā tuṇhī ahosi.
an8.20:2.2	Dutiyampi kho āyasmā ānando abhikkantāya rattiyā, nikkhante majjhime yāme, uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca:
an8.20:2.3	“abhikkantā, bhante, ratti, nikkhanto majjhimo yāmo, ciranisinno bhikkhusaṅgho.
an8.20:2.4	Uddisatu, bhante, bhagavā bhikkhūnaṁ pātimokkhan”ti.
an8.20:2.5	Dutiyampi kho bhagavā tuṇhī ahosi.
an8.20:2.6	Tatiyampi kho āyasmā ānando abhikkantāya rattiyā, nikkhante pacchime yāme, uddhaste aruṇe, nandimukhiyā rattiyā uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca:
an8.20:2.7	“abhikkantā, bhante, ratti, nikkhanto pacchimo yāmo, uddhastaṁ aruṇaṁ, nandimukhī ratti;
an8.20:2.8	ciranisinno bhikkhusaṅgho.
an8.20:2.9	Uddisatu, bhante, bhagavā bhikkhūnaṁ pātimokkhan”ti.
an8.20:2.10	“Aparisuddhā, ānanda, parisā”ti.
an8.20:3.1	Atha kho āyasmato mahāmoggallānassa etadahosi:
an8.20:3.2	“kaṁ nu kho bhagavā puggalaṁ sandhāya evamāha:
an8.20:3.3	‘aparisuddhā, ānanda, parisā’”ti?
an8.20:3.4	Atha kho āyasmā mahāmoggallāno sabbāvantaṁ bhikkhusaṅghaṁ cetasā ceto paricca manasākāsi.
an8.20:3.5	Addasā kho āyasmā mahāmoggallāno taṁ puggalaṁ dussīlaṁ pāpadhammaṁ asuciṁ saṅkassarasamācāraṁ paṭicchannakammantaṁ assamaṇaṁ samaṇapaṭiññaṁ abrahmacāriṁ brahmacāripaṭiññaṁ antopūtiṁ avassutaṁ kasambujātaṁ majjhe bhikkhusaṅghassa nisinnaṁ;
an8.20:3.6	disvāna uṭṭhāyāsanā yena so puggalo tenupasaṅkami; upasaṅkamitvā taṁ puggalaṁ etadavoca:
an8.20:3.7	“uṭṭhehāvuso, diṭṭhosi bhagavatā.
an8.20:3.8	Natthi te bhikkhūhi saddhiṁ saṁvāso”ti.
an8.20:4.1	Evaṁ vutte, so puggalo tuṇhī ahosi.
an8.20:4.2	Dutiyampi kho āyasmā mahāmoggallāno taṁ puggalaṁ etadavoca:
an8.20:4.3	“uṭṭhehāvuso, diṭṭhosi bhagavatā.
an8.20:4.4	Natthi te bhikkhūhi saddhiṁ saṁvāso”ti.
an8.20:4.5	Dutiyampi kho so puggalo tuṇhī ahosi.
an8.20:4.6	Tatiyampi kho āyasmā mahāmoggallāno taṁ puggalaṁ etadavoca:
an8.20:4.7	“uṭṭhehāvuso, diṭṭhosi bhagavatā.
an8.20:4.8	Natthi te bhikkhūhi saddhiṁ saṁvāso”ti.
an8.20:4.9	Tatiyampi kho so puggalo tuṇhī ahosi.
an8.20:5.1	Atha kho āyasmā mahāmoggallāno taṁ puggalaṁ bāhāyaṁ gahetvā bahidvārakoṭṭhakā nikkhāmetvā sūcighaṭikaṁ datvā yena bhagavā tenupasaṅkami; upasaṅkamitvā bhagavantaṁ etadavoca:
an8.20:5.2	“nikkhāmito so, bhante, puggalo mayā.
an8.20:5.3	Parisuddhā parisā.
an8.20:5.4	Uddisatu, bhante, bhagavā bhikkhūnaṁ pātimokkhan”ti.
an8.20:5.5	“Acchariyaṁ, moggallāna, abbhutaṁ, moggallāna.
an8.20:5.6	Yāva bāhā gahaṇāpi nāma so moghapuriso āgamissatī”ti.
an8.20:6.1	Atha kho bhagavā bhikkhū āmantesi:
an8.20:6.2	“tumheva dāni, bhikkhave, uposathaṁ kareyyātha, pātimokkhaṁ uddiseyyātha.
an8.20:6.3	Na dānāhaṁ, bhikkhave, ajjatagge uposathaṁ karissāmi, pātimokkhaṁ uddisissāmi.
an8.20:6.4	Aṭṭhānametaṁ, bhikkhave, anavakāso yaṁ tathāgato aparisuddhāya parisāya pātimokkhaṁ uddiseyya.
an8.20:7.1	Aṭṭhime, bhikkhave, mahāsamudde acchariyā abbhutā dhammā, ye disvā disvā asurā mahāsamudde abhiramanti.
an8.20:7.2	Katame aṭṭha?
an8.20:7.3	Mahāsamuddo, bhikkhave, anupubbaninno anupubbapoṇo anupubbapabbhāro, na āyatakeneva papāto.
an8.20:7.4	Yampi, bhikkhave, mahāsamuddo anupubbaninno anupubbapoṇo anupubbapabbhāro, na āyatakeneva papāto;
an8.20:7.5	ayaṁ, bhikkhave, mahāsamudde paṭhamo acchariyo abbhuto dhammo, yaṁ disvā disvā asurā mahāsamudde abhiramanti (yathā purime tathā vitthāro.)
an8.20:7.6	…pe…
an8.20:8.1	Puna caparaṁ, bhikkhave, mahāsamuddo mahataṁ bhūtānaṁ āvāso. Tatrime bhūtā—timi timiṅgalo timirapiṅgalo asurā nāgā gandhabbā. Vasanti mahāsamudde yojanasatikāpi attabhāvā …pe… pañcayojanasatikāpi attabhāvā.
an8.20:8.2	Yampi, bhikkhave, mahāsamuddo mahataṁ bhūtānaṁ āvāso; tatrime bhūtā—timi timiṅgalo timirapiṅgalo asurā nāgā gandhabbā; vasanti mahāsamudde yojanasatikāpi attabhāvā …pe… pañcayojanasatikāpi attabhāvā;
an8.20:8.3	ayaṁ, bhikkhave, mahāsamudde aṭṭhamo acchariyo abbhuto dhammo, yaṁ disvā disvā asurā mahāsamudde abhiramanti.
an8.20:8.4	Ime kho, bhikkhave, mahāsamudde aṭṭha acchariyā abbhutā dhammā, yaṁ disvā disvā asurā mahāsamudde abhiramanti.
an8.20:9.1	Evamevaṁ kho, bhikkhave, aṭṭha imasmiṁ dhammavinaye acchariyā abbhutā dhammā, ye disvā disvā bhikkhū imasmiṁ dhammavinaye abhiramanti.
an8.20:9.2	Katame aṭṭha?
an8.20:9.3	Seyyathāpi, bhikkhave, mahāsamuddo anupubbaninno anupubbapoṇo anupubbapabbhāro, na āyatakeneva papāto;
an8.20:9.4	evamevaṁ kho, bhikkhave, imasmiṁ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho.
an8.20:9.5	Yampi, bhikkhave, imasmiṁ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho;
an8.20:9.6	ayaṁ, bhikkhave, imasmiṁ dhammavinaye paṭhamo acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti …pe…
an8.20:9.7	seyyathāpi, bhikkhave, mahāsamuddo mahataṁ bhūtānaṁ āvāso; tatrime bhūtā—timi timiṅgalo timirapiṅgalo asurā nāgā gandhabbā, vasanti mahāsamudde yojanasatikāpi attabhāvā …pe… pañcayojanasatikāpi attabhāvā;
an8.20:9.8	evamevaṁ kho, bhikkhave, ayaṁ dhammavinayo mahataṁ bhūtānaṁ āvāso. Tatrime bhūtā—sotāpanno sotāpattiphalasacchikiriyāya paṭipanno …pe… arahā arahattāya paṭipanno.
an8.20:9.9	Yampi, bhikkhave, ayaṁ dhammavinayo mahataṁ bhūtānaṁ āvāso; tatrime bhūtā—sotāpanno sotāpattiphalasacchikiriyāya paṭipanno …pe… arahā arahattāya paṭipanno;
an8.20:9.10	ayaṁ, bhikkhave, imasmiṁ dhammavinaye aṭṭhamo acchariyo abbhuto dhammo, yaṁ disvā disvā bhikkhū imasmiṁ dhammavinaye abhiramanti.
an8.20:9.11	Ime kho, bhikkhave, imasmiṁ dhammavinaye aṭṭha acchariyā abbhutā dhammā, ye disvā disvā bhikkhū imasmiṁ dhammavinaye abhiramantī”ti.
an8.20:9.12	Dasamaṁ.
an8.20:9.13	Mahāvaggo dutiyo.
an8.20:10.0	Tassuddānaṁ
an8.20:10.1	Verañjo sīho ājaññaṁ,
an8.20:10.2	khaḷuṅkena malāni ca;
an8.20:10.3	Dūteyyaṁ dve ca bandhanā,
an8.20:10.4	pahārādo uposathoti.
an8.21:0.1	Aṅguttara Nikāya 8.21
an8.21:0.2	3. Gahapativagga
an8.21:0.3	Paṭhamauggasutta
an8.21:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an8.21:1.2	Tatra kho bhagavā bhikkhū āmantesi:
an8.21:1.3	“aṭṭhahi, bhikkhave, acchariyehi abbhutehi dhammehi samannāgataṁ uggaṁ gahapatiṁ vesālikaṁ dhārethā”ti.
an8.21:1.4	Idamavoca bhagavā.
an8.21:1.5	Idaṁ vatvāna sugato uṭṭhāyāsanā vihāraṁ pāvisi.
an8.21:2.1	Atha kho aññataro bhikkhu pubbaṇhasamayaṁ nivāsetvā pattacīvaramādāya yena uggassa gahapatino vesālikassa nivesanaṁ tenupasaṅkami; upasaṅkamitvā paññatte āsane nisīdi.
an8.21:2.2	Atha kho uggo gahapati vesāliko yena so bhikkhu tenupasaṅkami; upasaṅkamitvā taṁ bhikkhuṁ abhivādetvā ekamantaṁ nisīdi. Ekamantaṁ nisinnaṁ kho uggaṁ gahapatiṁ vesālikaṁ so bhikkhu etadavoca:
an8.21:3.1	“Aṭṭhahi kho tvaṁ, gahapati, acchariyehi abbhutehi dhammehi samannāgato bhagavatā byākato.
an8.21:3.2	Katame te, gahapati, aṭṭha acchariyā abbhutā dhammā, yehi tvaṁ samannāgato bhagavatā byākato”ti?
an8.21:3.3	“Na kho ahaṁ, bhante, jānāmi:
an8.21:3.4	‘katamehi aṭṭhahi acchariyehi abbhutehi dhammehi samannāgato bhagavatā byākato’ti.
an8.21:3.5	Api ca, bhante, ye me aṭṭha acchariyā abbhutā dhammā saṁvijjanti,;
an8.21:3.6	taṁ suṇohi, sādhukaṁ manasi karohi, bhāsissāmī”ti.
an8.21:3.7	“Evaṁ, gahapatī”ti kho so bhikkhu uggassa gahapatino vesālikassa paccassosi.
an8.21:3.8	Uggo gahapati vesāliko etadavoca:
an8.21:3.9	“yadāhaṁ, bhante, bhagavantaṁ paṭhamaṁ dūratova addasaṁ;
an8.21:3.10	saha dassaneneva me, bhante, bhagavato cittaṁ pasīdi.
an8.21:3.11	Ayaṁ kho me, bhante, paṭhamo acchariyo abbhuto dhammo saṁvijjati.
an8.21:4.1	So kho ahaṁ, bhante, pasannacitto bhagavantaṁ payirupāsiṁ.
an8.21:4.2	Tassa me bhagavā anupubbiṁ kathaṁ kathesi, seyyathidaṁ—
an8.21:4.3	dānakathaṁ sīlakathaṁ saggakathaṁ; kāmānaṁ ādīnavaṁ okāraṁ saṅkilesaṁ, nekkhamme ānisaṁsaṁ pakāsesi.
an8.21:4.4	Yadā maṁ bhagavā aññāsi kallacittaṁ muducittaṁ vinīvaraṇacittaṁ udaggacittaṁ pasannacittaṁ, atha yā buddhānaṁ sāmukkaṁsikā dhammadesanā taṁ pakāsesi—
an8.21:4.5	dukkhaṁ, samudayaṁ, nirodhaṁ, maggaṁ.
an8.21:4.6	Seyyathāpi nāma suddhaṁ vatthaṁ apagatakāḷakaṁ sammadeva rajanaṁ paṭiggaṇheyya;
an8.21:4.7	evamevaṁ kho me tasmiṁyeva āsane virajaṁ vītamalaṁ dhammacakkhuṁ udapādi:
an8.21:4.8	‘yaṁ kiñci samudayadhammaṁ sabbaṁ taṁ nirodhadhamman’ti.
an8.21:4.9	So kho ahaṁ, bhante, diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaṅkatho vesārajjappatto aparappaccayo satthusāsane
an8.21:4.10	tattheva buddhañca dhammañca saṅghañca saraṇaṁ agamāsiṁ, brahmacariyapañcamāni ca sikkhāpadāni samādiyiṁ.
an8.21:4.11	Ayaṁ kho me, bhante, dutiyo acchariyo abbhuto dhammo saṁvijjati.
an8.21:5.1	Tassa mayhaṁ, bhante, catasso komāriyo pajāpatiyo ahesuṁ.
an8.21:5.2	Atha khvāhaṁ, bhante, yena tā pajāpatiyo tenupasaṅkamiṁ; upasaṅkamitvā tā pajāpatiyo etadavacaṁ:
an8.21:5.3	‘mayā kho, bhaginiyo, brahmacariyapañcamāni sikkhāpadāni samādinnāni.
an8.21:5.4	Yā icchati sā idheva bhoge ca bhuñjatu puññāni ca karotu, sakāni vā ñātikulāni gacchatu.
an8.21:5.5	Hoti vā pana purisādhippāyo, kassa vo dammī’ti?
an8.21:5.6	Evaṁ vutte, sā, bhante, jeṭṭhā pajāpati maṁ etadavoca:
an8.21:5.7	‘itthannāmassa maṁ, ayyaputta, purisassa dehī’ti.
an8.21:5.8	Atha kho ahaṁ, bhante, taṁ purisaṁ pakkosāpetvā vāmena hatthena pajāpatiṁ gahetvā dakkhiṇena hatthena bhiṅgāraṁ gahetvā tassa purisassa oṇojesiṁ.
an8.21:5.9	Komāriṁ kho panāhaṁ, bhante, dāraṁ pariccajanto nābhijānāmi cittassa aññathattaṁ.
an8.21:5.10	Ayaṁ kho me, bhante, tatiyo acchariyo abbhuto dhammo saṁvijjati.
an8.21:6.1	Saṁvijjanti kho pana me, bhante, kule bhogā.
an8.21:6.2	Te ca kho appaṭivibhattā sīlavantehi kalyāṇadhammehi.
an8.21:6.3	Ayaṁ kho me, bhante, catuttho acchariyo abbhuto dhammo saṁvijjati.
an8.21:7.1	Yaṁ kho panāhaṁ, bhante, bhikkhuṁ payirupāsāmi;
an8.21:7.2	sakkaccaṁyeva payirupāsāmi, no asakkaccaṁ.
an8.21:7.3	Ayaṁ kho me, bhante, pañcamo acchariyo abbhuto dhammo saṁvijjati.
an8.21:8.1	So ce, bhante, me āyasmā dhammaṁ deseti;
an8.21:8.2	sakkaccaṁyeva suṇomi, no asakkaccaṁ.
an8.21:8.3	No ce me so āyasmā dhammaṁ deseti, ahamassa dhammaṁ desemi.
an8.21:8.4	Ayaṁ kho me, bhante, chaṭṭho acchariyo abbhuto dhammo saṁvijjati.
an8.21:9.1	Anacchariyaṁ kho pana maṁ, bhante, devatā upasaṅkamitvā ārocenti:
an8.21:9.2	‘svākkhāto, gahapati, bhagavatā dhammo’ti.
an8.21:9.3	Evaṁ vutte, ahaṁ, bhante, tā devatā evaṁ vadāmi:
an8.21:9.4	‘vadeyyātha vā evaṁ kho tumhe devatā no vā vadeyyātha, atha kho svākkhāto bhagavatā dhammo’ti.
an8.21:9.5	Na kho panāhaṁ, bhante, abhijānāmi tatonidānaṁ cittassa unnatiṁ:
an8.21:9.6	‘maṁ vā devatā upasaṅkamanti, ahaṁ vā devatāhi saddhiṁ sallapāmī’ti.
an8.21:9.7	Ayaṁ kho me, bhante, sattamo acchariyo abbhuto dhammo saṁvijjati.
an8.21:10.1	Yānimāni, bhante, bhagavatā desitāni pañcorambhāgiyāni saṁyojanāni, nāhaṁ tesaṁ kiñci attani appahīnaṁ samanupassāmi.
an8.21:10.2	Ayaṁ kho me, bhante, aṭṭhamo acchariyo abbhuto dhammo saṁvijjati.
an8.21:11.1	Ime kho me, bhante, aṭṭha acchariyā abbhutā dhammā saṁvijjanti.
an8.21:11.2	Na ca kho ahaṁ jānāmi—
an8.21:11.3	katamehi cāhaṁ aṭṭhahi acchariyehi abbhutehi dhammehi samannāgato bhagavatā byākato”ti.
an8.21:12.1	Atha kho so bhikkhu uggassa gahapatino vesālikassa nivesane piṇḍapātaṁ gahetvā uṭṭhāyāsanā pakkāmi.
an8.21:12.2	Atha kho so bhikkhu pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an8.21:12.3	Ekamantaṁ nisinno kho so bhikkhu yāvatako ahosi uggena gahapatinā vesālikena saddhiṁ kathāsallāpo, taṁ sabbaṁ bhagavato ārocesi.
an8.21:13.1	“Sādhu sādhu, bhikkhu.
an8.21:13.2	Yathā taṁ uggo gahapati vesāliko sammā byākaramāno byākareyya, imeheva kho, bhikkhu, aṭṭhahi acchariyehi abbhutehi dhammehi samannāgato uggo gahapati vesāliko mayā byākato.
an8.21:13.3	Imehi ca pana, bhikkhu, aṭṭhahi acchariyehi abbhutehi dhammehi samannāgataṁ uggaṁ gahapatiṁ vesālikaṁ dhārehī”ti.
an8.21:13.4	Paṭhamaṁ.
an8.22:0.1	Aṅguttara Nikāya 8.22
an8.22:0.2	3. Gahapativagga
an8.22:0.3	Dutiyauggasutta
an8.22:1.1	Ekaṁ samayaṁ bhagavā vajjīsu viharati hatthigāme.
an8.22:1.2	Tatra kho bhagavā bhikkhū āmantesi:
an8.22:1.3	“aṭṭhahi, bhikkhave, acchariyehi abbhutehi dhammehi samannāgataṁ uggaṁ gahapatiṁ hatthigāmakaṁ dhārethā”ti.
an8.22:1.4	Idamavoca bhagavā.
an8.22:1.5	Idaṁ vatvāna sugato uṭṭhāyāsanā vihāraṁ pāvisi.
an8.22:2.1	Atha kho aññataro bhikkhu pubbaṇhasamayaṁ nivāsetvā pattacīvaramādāya yena uggassa gahapatino hatthigāmakassa nivesanaṁ tenupasaṅkami; upasaṅkamitvā paññatte āsane nisīdi.
an8.22:2.2	Atha kho uggo gahapati hatthigāmako yena so bhikkhu tenupasaṅkami; upasaṅkamitvā taṁ bhikkhuṁ abhivādetvā ekamantaṁ nisīdi. Ekamantaṁ nisinnaṁ kho uggaṁ gahapatiṁ hatthigāmakaṁ so bhikkhu etadavoca:
an8.22:2.3	“aṭṭhahi kho tvaṁ, gahapati, acchariyehi abbhutehi dhammehi samannāgato bhagavatā byākato.
an8.22:2.4	Katame te, gahapati, aṭṭha acchariyā abbhutā dhammā, yehi tvaṁ samannāgato bhagavatā byākato”ti?
an8.22:3.1	“Na kho ahaṁ, bhante, jānāmi:
an8.22:3.2	‘katamehi aṭṭhahi acchariyehi abbhutehi dhammehi samannāgato bhagavatā byākato’ti.
an8.22:3.3	Api ca, bhante, ye me aṭṭha acchariyā abbhutā dhammā saṁvijjanti,
an8.22:3.4	taṁ suṇāhi, sādhukaṁ manasi karohi; bhāsissāmī”ti.
an8.22:3.5	“Evaṁ, gahapatī”ti kho so bhikkhu uggassa gahapatino hatthigāmakassa paccassosi.
an8.22:3.6	Uggo gahapati hatthigāmako etadavoca:
an8.22:3.7	“yadāhaṁ, bhante, nāgavane paricaranto bhagavantaṁ paṭhamaṁ dūratova addasaṁ;
an8.22:3.8	saha dassaneneva me, bhante, bhagavato cittaṁ pasīdi, surāmado ca pahīyi.
an8.22:3.9	Ayaṁ kho me, bhante, paṭhamo acchariyo abbhuto dhammo saṁvijjati.
an8.22:4.1	So kho ahaṁ, bhante, pasannacitto bhagavantaṁ payirupāsiṁ.
an8.22:4.2	Tassa me bhagavā anupubbiṁ kathaṁ kathesi, seyyathidaṁ—
an8.22:4.3	dānakathaṁ sīlakathaṁ saggakathaṁ; kāmānaṁ ādīnavaṁ okāraṁ saṅkilesaṁ, nekkhamme ānisaṁsaṁ pakāsesi.
an8.22:4.4	Yadā maṁ bhagavā aññāsi kallacittaṁ muducittaṁ vinīvaraṇacittaṁ udaggacittaṁ pasannacittaṁ, atha yā buddhānaṁ sāmukkaṁsikā dhammadesanā taṁ pakāsesi—
an8.22:4.5	dukkhaṁ, samudayaṁ, nirodhaṁ, maggaṁ.
an8.22:4.6	Seyyathāpi nāma suddhaṁ vatthaṁ apagatakāḷakaṁ sammadeva rajanaṁ paṭiggaṇheyya;
an8.22:4.7	evamevaṁ kho me tasmiṁyeva āsane virajaṁ vītamalaṁ dhammacakkhuṁ udapādi:
an8.22:4.8	‘yaṁ kiñci samudayadhammaṁ sabbaṁ taṁ nirodhadhamman’ti.
an8.22:4.9	So kho ahaṁ, bhante, diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaṅkatho vesārajjappatto aparappaccayo satthusāsane tattheva buddhañca dhammañca saṅghañca saraṇaṁ agamāsiṁ, brahmacariyapañcamāni ca sikkhāpadāni samādiyiṁ.
an8.22:4.10	Ayaṁ kho me, bhante, dutiyo acchariyo abbhuto dhammo saṁvijjati.
an8.22:5.1	Tassa mayhaṁ, bhante, catasso komāriyo pajāpatiyo ahesuṁ.
an8.22:5.2	Atha khvāhaṁ, bhante, yena tā pajāpatiyo tenupasaṅkamiṁ; upasaṅkamitvā tā pajāpatiyo etadavacaṁ:
an8.22:5.3	‘mayā kho, bhaginiyo, brahmacariyapañcamāni sikkhāpadāni samādinnāni.
an8.22:5.4	Yā icchati sā idheva bhoge ca bhuñjatu puññāni ca karotu, sakāni vā ñātikulāni gacchatu.
an8.22:5.5	Hoti vā pana purisādhippāyo, kassa vo dammī’ti?
an8.22:5.6	Evaṁ vutte, sā, bhante, jeṭṭhā pajāpati maṁ etadavoca:
an8.22:5.7	‘itthannāmassa maṁ, ayyaputta, purisassa dehī’ti.
an8.22:5.8	Atha kho ahaṁ, bhante, taṁ purisaṁ pakkosāpetvā vāmena hatthena pajāpatiṁ gahetvā dakkhiṇena hatthena bhiṅgāraṁ gahetvā tassa purisassa oṇojesiṁ.
an8.22:5.9	Komāriṁ kho panāhaṁ, bhante, dāraṁ pariccajanto nābhijānāmi cittassa aññathattaṁ.
an8.22:5.10	Ayaṁ kho me, bhante, tatiyo acchariyo abbhuto dhammo saṁvijjati.
an8.22:6.1	Saṁvijjanti kho pana me, bhante, kule bhogā.
an8.22:6.2	Te ca kho appaṭivibhattā sīlavantehi kalyāṇadhammehi.
an8.22:6.3	Ayaṁ kho me, bhante, catuttho acchariyo abbhuto dhammo saṁvijjati.
an8.22:7.1	Yaṁ kho panāhaṁ, bhante, bhikkhuṁ payirupāsāmi;
an8.22:7.2	sakkaccaṁyeva payirupāsāmi, no asakkaccaṁ.
an8.22:7.3	So ce me āyasmā dhammaṁ deseti;
an8.22:7.4	sakkaccaṁyeva suṇomi, no asakkaccaṁ.
an8.22:7.5	No ce me so āyasmā dhammaṁ deseti, ahamassa dhammaṁ desemi.
an8.22:7.6	Ayaṁ kho me, bhante, pañcamo acchariyo abbhuto dhammo saṁvijjati.
an8.22:8.1	Anacchariyaṁ kho pana, bhante, saṅghe nimantite devatā upasaṅkamitvā ārocenti:
an8.22:8.2	‘asuko, gahapati, bhikkhu ubhatobhāgavimutto asuko paññāvimutto asuko kāyasakkhī asuko diṭṭhippatto asuko saddhāvimutto asuko dhammānusārī asuko saddhānusārī asuko sīlavā kalyāṇadhammo asuko dussīlo pāpadhammo’ti.
an8.22:8.3	Saṅghaṁ kho panāhaṁ, bhante, parivisanto nābhijānāmi evaṁ cittaṁ uppādento:
an8.22:8.4	‘imassa vā thokaṁ demi imassa vā bahukan’ti.
an8.22:8.5	Atha khvāhaṁ, bhante, samacittova demi.
an8.22:8.6	Ayaṁ kho me, bhante, chaṭṭho acchariyo abbhuto dhammo saṁvijjati.
an8.22:9.1	Anacchariyaṁ kho pana maṁ, bhante, devatā upasaṅkamitvā ārocenti:
an8.22:9.2	‘svākkhāto, gahapati, bhagavatā dhammo’ti.
an8.22:9.3	Evaṁ vutte, ahaṁ, bhante, tā devatā evaṁ vademi:
an8.22:9.4	‘vadeyyātha vā evaṁ kho tumhe devatā no vā vadeyyātha, atha kho svākkhāto bhagavatā dhammo’ti.
an8.22:9.5	Na kho panāhaṁ, bhante, abhijānāmi tatonidānaṁ cittassa unnatiṁ:
an8.22:9.6	‘maṁ tā devatā upasaṅkamanti, ahaṁ vā devatāhi saddhiṁ sallapāmī’ti.
an8.22:9.7	Ayaṁ kho me, bhante, sattamo acchariyo abbhuto dhammo saṁvijjati.
an8.22:10.1	Sace kho panāhaṁ, bhante, bhagavato paṭhamataraṁ kālaṁ kareyyaṁ, anacchariyaṁ kho panetaṁ yaṁ maṁ bhagavā evaṁ byākareyya:
an8.22:10.2	‘natthi taṁ saṁyojanaṁ yena saṁyutto uggo gahapati hatthigāmako puna imaṁ lokaṁ āgaccheyyā’ti.
an8.22:10.3	Ayaṁ kho me, bhante, aṭṭhamo acchariyo abbhuto dhammo saṁvijjati.
an8.22:11.1	Ime kho me, bhante, aṭṭha acchariyā abbhutā dhammā saṁvijjanti.
an8.22:11.2	Na ca kho ahaṁ jānāmi:
an8.22:11.3	‘katamehi cāhaṁ aṭṭhahi acchariyehi abbhutehi dhammehi samannāgato bhagavatā byākato’”ti.
an8.22:12.1	Atha kho so bhikkhu uggassa gahapatino hatthigāmakassa nivesane piṇḍapātaṁ gahetvā uṭṭhāyāsanā pakkāmi.
an8.22:12.2	Atha kho so bhikkhu pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an8.22:12.3	Ekamantaṁ nisinno kho so bhikkhu yāvatako ahosi uggena gahapatinā hatthigāmakena saddhiṁ kathāsallāpo, taṁ sabbaṁ bhagavato ārocesi.
an8.22:13.1	“Sādhu sādhu, bhikkhu.
an8.22:13.2	Yathā taṁ uggo gahapati hatthigāmako sammā byākaramāno byākareyya, imeheva kho, bhikkhu, aṭṭhahi acchariyehi abbhutehi dhammehi samannāgato uggo gahapati hatthigāmako mayā byākato.
an8.22:13.3	Imehi ca pana, bhikkhu, aṭṭhahi acchariyehi abbhutehi dhammehi samannāgataṁ uggaṁ gahapatiṁ hatthigāmakaṁ dhārehī”ti.
an8.22:13.4	Dutiyaṁ.
an8.23:0.1	Aṅguttara Nikāya 8.23
an8.23:0.2	3. Gahapativagga
an8.23:0.3	Paṭhamahatthakasutta
an8.23:1.1	Ekaṁ samayaṁ bhagavā āḷaviyaṁ viharati aggāḷave cetiye.
an8.23:1.2	Tatra kho bhagavā bhikkhū āmantesi:
an8.23:1.3	“sattahi, bhikkhave, acchariyehi abbhutehi dhammehi samannāgataṁ hatthakaṁ āḷavakaṁ dhāretha.
an8.23:1.4	Katamehi sattahi?
an8.23:1.5	Saddho hi, bhikkhave, hatthako āḷavako;
an8.23:1.6	sīlavā, bhikkhave, hatthako āḷavako;
an8.23:1.7	hirīmā, bhikkhave, hatthako āḷavako;
an8.23:1.8	ottappī, bhikkhave, hatthako āḷavako;
an8.23:1.9	bahussuto, bhikkhave, hatthako āḷavako;
an8.23:1.10	cāgavā, bhikkhave, hatthako āḷavako;
an8.23:1.11	paññavā, bhikkhave, hatthako āḷavako—
an8.23:1.12	imehi kho, bhikkhave, sattahi acchariyehi abbhutehi dhammehi samannāgataṁ hatthakaṁ āḷavakaṁ dhārethā”ti.
an8.23:1.13	Idamavoca bhagavā.
an8.23:1.14	Idaṁ vatvāna sugato uṭṭhāyāsanā vihāraṁ pāvisi.
an8.23:2.1	Atha kho aññataro bhikkhu pubbaṇhasamayaṁ nivāsetvā pattacīvaramādāya yena hatthakassa āḷavakassa nivesanaṁ tenupasaṅkami; upasaṅkamitvā paññatte āsane nisīdi.
an8.23:2.2	Atha kho hatthako āḷavako yena so bhikkhu tenupasaṅkami; upasaṅkamitvā taṁ bhikkhuṁ abhivādetvā ekamantaṁ nisīdi. Ekamantaṁ nisinnaṁ kho hatthakaṁ āḷavakaṁ so bhikkhu etadavoca:
an8.23:3.1	“Sattahi kho tvaṁ, āvuso, acchariyehi abbhutehi dhammehi samannāgato bhagavatā byākato.
an8.23:3.2	Katamehi sattahi?
an8.23:3.3	‘Saddho, bhikkhave, hatthako āḷavako;
an8.23:3.4	sīlavā …pe…
an8.23:3.5	hirīmā …
an8.23:3.6	ottappī …
an8.23:3.7	bahussuto …
an8.23:3.8	cāgavā …
an8.23:3.9	paññavā, bhikkhave, hatthako āḷavako’ti.
an8.23:3.10	Imehi kho tvaṁ, āvuso, sattahi acchariyehi abbhutehi dhammehi samannāgato bhagavatā byākato”ti.
an8.23:3.11	“Kaccittha, bhante, na koci gihī ahosi odātavasano”ti?
an8.23:3.12	“Na hettha, āvuso, koci gihī ahosi odātavasano”ti.
an8.23:3.13	“Sādhu, bhante, yadettha na koci gihī ahosi odātavasano”ti.
an8.23:4.1	Atha kho so bhikkhu hatthakassa āḷavakassa nivesane piṇḍapātaṁ gahetvā uṭṭhāyāsanā pakkāmi.
an8.23:4.2	Atha kho so bhikkhu pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an8.23:5.1	“Idhāhaṁ, bhante, pubbaṇhasamayaṁ nivāsetvā pattacīvaramādāya yena hatthakassa āḷavakassa nivesanaṁ tenupasaṅkamiṁ; upasaṅkamitvā paññatte āsane nisīdiṁ.
an8.23:5.2	Atha kho, bhante, hatthako āḷavako yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi.
an8.23:5.3	Ekamantaṁ nisinnaṁ kho ahaṁ, bhante, hatthakaṁ āḷavakaṁ etadavacaṁ:
an8.23:5.4	‘sattahi kho tvaṁ, āvuso, acchariyehi abbhutehi dhammehi samannāgato bhagavatā byākato.
an8.23:5.5	Katamehi sattahi?
an8.23:5.6	Saddho, bhikkhave, hatthako āḷavako;
an8.23:5.7	sīlavā …pe…
an8.23:5.8	hirīmā …
an8.23:5.9	ottappī …
an8.23:5.10	bahussuto …
an8.23:5.11	cāgavā …
an8.23:5.12	paññavā, bhikkhave, hatthako āḷavakoti.
an8.23:5.13	Imehi kho tvaṁ, āvuso, sattahi acchariyehi abbhutehi dhammehi samannāgato bhagavatā byākato’ti.
an8.23:6.1	Evaṁ vutte, bhante, hatthako maṁ etadavoca:
an8.23:6.2	‘kaccittha, bhante, na koci gihī ahosi odātavasano’ti?
an8.23:6.3	‘Na hettha, āvuso, koci gihī ahosi odātavasano’ti.
an8.23:6.4	‘Sādhu, bhante, yadettha na koci gihī ahosi odātavasano’”ti.
an8.23:7.1	“Sādhu sādhu, bhikkhu.
an8.23:7.2	Appiccho so, bhikkhu, kulaputto.
an8.23:7.3	Santeyeva attani kusaladhamme na icchati parehi ñāyamāne.
an8.23:7.4	Tena hi tvaṁ, bhikkhu, imināpi aṭṭhamena acchariyena abbhutena dhammena samannāgataṁ hatthakaṁ āḷavakaṁ dhārehi, yadidaṁ appicchatāyā”ti.
an8.23:7.5	Tatiyaṁ.
an8.24:0.1	Aṅguttara Nikāya 8.24
an8.24:0.2	3. Gahapativagga
an8.24:0.3	Dutiyahatthakasutta
an8.24:1.1	Ekaṁ samayaṁ bhagavā āḷaviyaṁ viharati aggāḷave cetiye.
an8.24:1.2	Atha kho hatthako āḷavako pañcamattehi upāsakasatehi parivuto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho hatthakaṁ āḷavakaṁ bhagavā etadavoca:
an8.24:1.3	“mahatī kho tyāyaṁ, hatthaka, parisā.
an8.24:1.4	Kathaṁ pana tvaṁ, hatthaka, imaṁ mahatiṁ parisaṁ saṅgaṇhāsī”ti?
an8.24:1.5	“Yānimāni, bhante, bhagavatā desitāni cattāri saṅgahavatthūni, tehāhaṁ imaṁ mahatiṁ parisaṁ saṅgaṇhāmi.
an8.24:1.6	Ahaṁ, bhante, yaṁ jānāmi:
an8.24:1.7	‘ayaṁ dānena saṅgahetabbo’ti, taṁ dānena saṅgaṇhāmi;
an8.24:1.8	yaṁ jānāmi:
an8.24:1.9	‘ayaṁ peyyavajjena saṅgahetabbo’ti, taṁ peyyavajjena saṅgaṇhāmi;
an8.24:1.10	yaṁ jānāmi:
an8.24:1.11	‘ayaṁ atthacariyāya saṅgahetabbo’ti, taṁ atthacariyāya saṅgaṇhāmi;
an8.24:1.12	yaṁ jānāmi:
an8.24:1.13	‘ayaṁ samānattatāya saṅgahetabbo’ti, taṁ samānattatāya saṅgaṇhāmi.
an8.24:1.14	Saṁvijjanti kho pana me, bhante, kule bhogā.
an8.24:1.15	Daliddassa kho no tathā sotabbaṁ maññantī”ti.
an8.24:1.16	“Sādhu sādhu, hatthaka.
an8.24:1.17	Yoni kho tyāyaṁ, hatthaka, mahatiṁ parisaṁ saṅgahetuṁ.
an8.24:1.18	Ye hi keci, hatthaka, atītamaddhānaṁ mahatiṁ parisaṁ saṅgahesuṁ, sabbe te imeheva catūhi saṅgahavatthūhi mahatiṁ parisaṁ saṅgahesuṁ.
an8.24:1.19	Yepi hi keci, hatthaka, anāgatamaddhānaṁ mahatiṁ parisaṁ saṅgaṇhissanti, sabbe te imeheva catūhi saṅgahavatthūhi mahatiṁ parisaṁ saṅgaṇhissanti.
an8.24:1.20	Yepi hi keci, hatthaka, etarahi mahatiṁ parisaṁ saṅgaṇhanti, sabbe te imeheva catūhi saṅgahavatthūhi mahatiṁ parisaṁ saṅgaṇhantī”ti.
an8.24:2.1	Atha kho hatthako āḷavako bhagavatā dhammiyā kathāya sandassito samādapito samuttejito sampahaṁsito uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an8.24:2.2	Atha kho bhagavā acirapakkante hatthake āḷavake bhikkhū āmantesi:
an8.24:2.3	“aṭṭhahi, bhikkhave, acchariyehi abbhutehi dhammehi samannāgataṁ hatthakaṁ āḷavakaṁ dhāretha.
an8.24:2.4	Katamehi aṭṭhahi?
an8.24:2.5	Saddho, bhikkhave, hatthako āḷavako;
an8.24:2.6	sīlavā, bhikkhave …pe…
an8.24:2.7	hirīmā …
an8.24:2.8	ottappī …
an8.24:2.9	bahussuto …
an8.24:2.10	cāgavā …
an8.24:2.11	paññavā, bhikkhave, hatthako āḷavako;
an8.24:2.12	appiccho, bhikkhave, hatthako āḷavako.
an8.24:2.13	Imehi kho, bhikkhave, aṭṭhahi acchariyehi abbhutehi dhammehi samannāgataṁ hatthakaṁ āḷavakaṁ dhārethā”ti.
an8.24:2.14	Catutthaṁ.
an8.25:0.1	Aṅguttara Nikāya 8.25
an8.25:0.2	3. Gahapativagga
an8.25:0.3	Mahānāmasutta
an8.25:1.1	Ekaṁ samayaṁ bhagavā sakkesu viharati kapilavatthusmiṁ nigrodhārāme.
an8.25:1.2	Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho mahānāmo sakko bhagavantaṁ etadavoca:
an8.25:1.3	“kittāvatā nu kho, bhante, upāsako hotī”ti?
an8.25:1.4	“Yato kho, mahānāma, buddhaṁ saraṇaṁ gato hoti, dhammaṁ saraṇaṁ gato hoti, saṅghaṁ saraṇaṁ gato hoti;
an8.25:1.5	ettāvatā kho, mahānāma, upāsako hotī”ti.
an8.25:2.1	“Kittāvatā pana, bhante, upāsako sīlavā hotī”ti?
an8.25:2.2	“Yato kho, mahānāma, upāsako pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti;
an8.25:2.3	ettāvatā kho, mahānāma, upāsako sīlavā hotī”ti.
an8.25:3.1	“Kittāvatā pana, bhante, upāsako attahitāya paṭipanno hoti, no parahitāyā”ti?
an8.25:3.2	“Yato kho, mahānāma, upāsako attanāva saddhāsampanno hoti, no paraṁ saddhāsampadāya samādapeti;
an8.25:3.3	attanāva sīlasampanno hoti, no paraṁ sīlasampadāya samādapeti;
an8.25:3.4	attanāva cāgasampanno hoti, no paraṁ cāgasampadāya samādapeti;
an8.25:3.5	attanāva bhikkhūnaṁ dassanakāmo hoti, no paraṁ bhikkhūnaṁ dassane samādapeti;
an8.25:3.6	attanāva saddhammaṁ sotukāmo hoti, no paraṁ saddhammassavane samādapeti;
an8.25:3.7	attanāva sutānaṁ dhammānaṁ dhāraṇajātiko hoti, no paraṁ dhammadhāraṇāya samādapeti;
an8.25:3.8	attanāva sutānaṁ dhammānaṁ atthūpaparikkhitā hoti, no paraṁ atthūpaparikkhāya samādapeti;
an8.25:3.9	attanāva atthamaññāya dhammamaññāya dhammānudhammappaṭipanno hoti, no paraṁ dhammānudhammappaṭipattiyā samādapeti.
an8.25:3.10	Ettāvatā kho, mahānāma, upāsako attahitāya paṭipanno hoti, no parahitāyā”ti.
an8.25:4.1	“Kittāvatā pana, bhante, upāsako attahitāya ca paṭipanno hoti parahitāya cā”ti?
an8.25:4.2	“Yato kho, mahānāma, upāsako attanā ca saddhāsampanno hoti, parañca saddhāsampadāya samādapeti;
an8.25:4.3	attanā ca sīlasampanno hoti, parañca sīlasampadāya samādapeti;
an8.25:4.4	attanā ca cāgasampanno hoti, parañca cāgasampadāya samādapeti;
an8.25:4.5	attanā ca bhikkhūnaṁ dassanakāmo hoti, parañca bhikkhūnaṁ dassane samādapeti;
an8.25:4.6	attanā ca saddhammaṁ sotukāmo hoti, parañca saddhammassavane samādapeti;
an8.25:4.7	attanā ca sutānaṁ dhammānaṁ dhāraṇajātiko hoti, parañca dhammadhāraṇāya samādapeti;
an8.25:4.8	attanā ca sutānaṁ dhammānaṁ atthūpaparikkhitā hoti, parañca atthūpaparikkhāya samādapeti,
an8.25:4.9	attanā ca atthamaññāya dhammamaññāya dhammānudhammappaṭipanno hoti, parañca dhammānudhammappaṭipattiyā samādapeti.
an8.25:4.10	Ettāvatā kho, mahānāma, upāsako attahitāya ca paṭipanno hoti parahitāya cā”ti.
an8.25:4.11	Pañcamaṁ.
an8.26:0.1	Aṅguttara Nikāya 8.26
an8.26:0.2	3. Gahapativagga
an8.26:0.3	Jīvakasutta
an8.26:1.1	Ekaṁ samayaṁ bhagavā rājagahe viharati jīvakambavane.
an8.26:1.2	Atha kho jīvako komārabhacco yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho jīvako komārabhacco bhagavantaṁ etadavoca:
an8.26:1.3	“kittāvatā nu kho, bhante, upāsako hotī”ti?
an8.26:1.4	“Yato kho, jīvaka, buddhaṁ saraṇaṁ gato hoti, dhammaṁ saraṇaṁ gato hoti, saṅghaṁ saraṇaṁ gato hoti;
an8.26:1.5	ettāvatā kho, jīvaka, upāsako hotī”ti.
an8.26:2.1	“Kittāvatā pana, bhante, upāsako sīlavā hotī”ti?
an8.26:2.2	“Yato kho, jīvaka, upāsako pāṇātipātā paṭivirato hoti …pe… surāmerayamajjapamādaṭṭhānā paṭivirato hoti;
an8.26:2.3	ettāvatā kho, jīvaka, upāsako sīlavā hotī”ti.
an8.26:3.1	“Kittāvatā pana, bhante, upāsako attahitāya paṭipanno hoti, no parahitāyā”ti?
an8.26:3.2	“Yato kho, jīvaka, upāsako attanāva saddhāsampanno hoti, no paraṁ saddhāsampadāya samādapeti …pe…
an8.26:3.3	attanāva atthamaññāya dhammamaññāya dhammānudhammappaṭipanno hoti, no paraṁ dhammānudhammappaṭipattiyā samādapeti.
an8.26:3.4	Ettāvatā kho, jīvaka, upāsako attahitāya paṭipanno hoti, no parahitāyā”ti.
an8.26:4.1	“Kittāvatā pana, bhante, upāsako attahitāya ca paṭipanno hoti parahitāya cā”ti?
an8.26:4.2	“Yato kho, jīvaka, upāsako attanā ca saddhāsampanno hoti, parañca saddhāsampadāya samādapeti;
an8.26:4.3	attanā ca sīlasampanno hoti, parañca sīlasampadāya samādapeti;
an8.26:4.4	attanā ca cāgasampanno hoti, parañca cāgasampadāya samādapeti;
an8.26:4.5	attanā ca bhikkhūnaṁ dassanakāmo hoti, parañca bhikkhūnaṁ dassane samādapeti;
an8.26:4.6	attanā ca saddhammaṁ sotukāmo hoti, parañca saddhammassavane samādapeti;
an8.26:4.7	attanā ca sutānaṁ dhammānaṁ dhāraṇajātiko hoti, parañca dhammadhāraṇāya samādapeti;
an8.26:4.8	attanā ca sutānaṁ dhammānaṁ atthūpaparikkhitā hoti, parañca atthūpaparikkhāya samādapeti;
an8.26:4.9	attanā ca atthamaññāya dhammamaññāya dhammānudhammappaṭipanno hoti, parañca dhammānudhammappaṭipattiyā samādapeti.
an8.26:4.10	Ettāvatā kho, jīvaka, upāsako attahitāya ca paṭipanno hoti parahitāya cā”ti.
an8.26:4.11	Chaṭṭhaṁ.
an8.27:0.1	Aṅguttara Nikāya 8.27
an8.27:0.2	3. Gahapativagga
an8.27:0.3	Paṭhamabalasutta
an8.27:1.1	“Aṭṭhimāni, bhikkhave, balāni.
an8.27:1.2	Katamāni aṭṭha?
an8.27:1.3	Ruṇṇabalā, bhikkhave, dārakā, kodhabalā mātugāmā, āvudhabalā corā, issariyabalā rājāno, ujjhattibalā bālā, nijjhattibalā paṇḍitā, paṭisaṅkhānabalā bahussutā, khantibalā samaṇabrāhmaṇā—
an8.27:1.4	imāni kho, bhikkhave, aṭṭha balānī”ti.
an8.27:1.5	Sattamaṁ.
an8.28:0.1	Aṅguttara Nikāya 8.28
an8.28:0.2	3. Gahapativagga
an8.28:0.3	Dutiyabalasutta
an8.28:1.1	Atha kho āyasmā sāriputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ sāriputtaṁ bhagavā etadavoca:
an8.28:1.2	“kati nu kho, sāriputta, khīṇāsavassa bhikkhuno balāni, yehi balehi samannāgato khīṇāsavo bhikkhu āsavānaṁ khayaṁ paṭijānāti:
an8.28:1.3	‘khīṇā me āsavā’”ti?
an8.28:1.4	“Aṭṭha, bhante, khīṇāsavassa bhikkhuno balāni, yehi balehi samannāgato khīṇāsavo bhikkhu āsavānaṁ khayaṁ paṭijānāti:
an8.28:1.5	‘khīṇā me āsavā’ti.
an8.28:2.1	Katamāni aṭṭha?
an8.28:2.2	Idha, bhante, khīṇāsavassa bhikkhuno aniccato sabbe saṅkhārā yathābhūtaṁ sammappaññāya sudiṭṭhā honti.
an8.28:2.3	Yampi, bhante, khīṇāsavassa bhikkhuno aniccato sabbe saṅkhārā yathābhūtaṁ sammappaññāya sudiṭṭhā honti, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an8.28:2.4	‘khīṇā me āsavā’ti.
an8.28:3.1	Puna caparaṁ, bhante, khīṇāsavassa bhikkhuno aṅgārakāsūpamā kāmā yathābhūtaṁ sammappaññāya sudiṭṭhā honti.
an8.28:3.2	Yampi, bhante, khīṇāsavassa bhikkhuno aṅgārakāsūpamā kāmā yathābhūtaṁ sammappaññāya sudiṭṭhā honti, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an8.28:3.3	‘khīṇā me āsavā’ti.
an8.28:4.1	Puna caparaṁ, bhante, khīṇāsavassa bhikkhuno vivekaninnaṁ cittaṁ hoti vivekapoṇaṁ vivekapabbhāraṁ vivekaṭṭhaṁ nekkhammābhirataṁ byantibhūtaṁ sabbaso āsavaṭṭhāniyehi dhammehi.
an8.28:4.2	Yampi, bhante, khīṇāsavassa bhikkhuno vivekaninnaṁ cittaṁ hoti vivekapoṇaṁ vivekapabbhāraṁ vivekaṭṭhaṁ nekkhammābhirataṁ byantibhūtaṁ sabbaso āsavaṭṭhāniyehi dhammehi, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an8.28:4.3	‘khīṇā me āsavā’ti.
an8.28:5.1	Puna caparaṁ, bhante, khīṇāsavassa bhikkhuno cattāro satipaṭṭhānā bhāvitā honti subhāvitā.
an8.28:5.2	Yampi, bhante, khīṇāsavassa bhikkhuno cattāro satipaṭṭhānā bhāvitā honti subhāvitā, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an8.28:5.3	‘khīṇā me āsavā’ti.
an8.28:6.1	Puna caparaṁ, bhante, khīṇāsavassa bhikkhuno cattāro iddhipādā bhāvitā honti subhāvitā …pe…
an8.28:6.2	pañcindriyāni bhāvitāni honti subhāvitāni …pe…
an8.28:6.3	satta bojjhaṅgā bhāvitā honti subhāvitā …pe…
an8.28:6.4	ariyo aṭṭhaṅgiko maggo bhāvito hoti subhāvito.
an8.28:6.5	Yampi, bhante, khīṇāsavassa bhikkhuno ariyo aṭṭhaṅgiko maggo bhāvito hoti subhāvito, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an8.28:6.6	‘khīṇā me āsavā’ti.
an8.28:7.1	Imāni kho, bhante, aṭṭha khīṇāsavassa bhikkhuno balāni, yehi balehi samannāgato khīṇāsavo bhikkhu āsavānaṁ khayaṁ paṭijānāti:
an8.28:7.2	‘khīṇā me āsavā’”ti.
an8.28:7.3	Aṭṭhamaṁ.
an8.29:0.1	Aṅguttara Nikāya 8.29
an8.29:0.2	3. Gahapativagga
an8.29:0.3	Akkhaṇasutta
an8.29:1.1	“‘Khaṇakicco loko, khaṇakicco loko’ti, bhikkhave, assutavā puthujjano bhāsati, no ca kho so jānāti khaṇaṁ vā akkhaṇaṁ vā.
an8.29:1.2	Aṭṭhime, bhikkhave, akkhaṇā asamayā brahmacariyavāsāya.
an8.29:1.3	Katame aṭṭha?
an8.29:1.4	Idha, bhikkhave, tathāgato ca loke uppanno hoti arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā, dhammo ca desiyati opasamiko parinibbāniko sambodhagāmī sugatappavedito;
an8.29:1.5	ayañca puggalo nirayaṁ upapanno hoti.
an8.29:1.6	Ayaṁ, bhikkhave, paṭhamo akkhaṇo asamayo brahmacariyavāsāya.
an8.29:2.1	Puna caparaṁ, bhikkhave, tathāgato ca loke uppanno hoti …pe… satthā devamanussānaṁ buddho bhagavā, dhammo ca desiyati opasamiko parinibbāniko sambodhagāmī sugatappavedito;
an8.29:2.2	ayañca puggalo tiracchānayoniṁ upapanno hoti …pe….
an8.29:3.1	Puna caparaṁ, bhikkhave …pe…
an8.29:3.2	ayañca puggalo pettivisayaṁ upapanno hoti …pe….
an8.29:4.1	Puna caparaṁ, bhikkhave …pe…
an8.29:4.2	ayañca puggalo aññataraṁ dīghāyukaṁ devanikāyaṁ upapanno hoti …pe….
an8.29:5.1	Puna caparaṁ, bhikkhave …pe…
an8.29:5.2	ayañca puggalo paccantimesu janapadesu paccājāto hoti, so ca hoti aviññātāresu milakkhesu, yattha natthi gati bhikkhūnaṁ bhikkhunīnaṁ upāsakānaṁ upāsikānaṁ …pe….
an8.29:6.1	Puna caparaṁ, bhikkhave …pe… ayañca puggalo majjhimesu janapadesu paccājāto hoti, so ca hoti micchādiṭṭhiko viparītadassano:
an8.29:6.2	‘natthi dinnaṁ, natthi yiṭṭhaṁ, natthi hutaṁ, natthi sukatadukkaṭānaṁ kammānaṁ phalaṁ vipāko, natthi ayaṁ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā sammā paṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti …pe….
an8.29:7.1	Puna caparaṁ, bhikkhave …pe…
an8.29:7.2	ayañca puggalo majjhimesu janapadesu paccājāto hoti, so ca hoti duppañño jaḷo eḷamūgo appaṭibalo subhāsitadubbhāsitassa atthamaññātuṁ.
an8.29:7.3	Ayaṁ, bhikkhave, sattamo akkhaṇo asamayo brahmacariyavāsāya.
an8.29:8.1	Puna caparaṁ, bhikkhave, tathāgato ca loke anuppanno hoti arahaṁ sammāsambuddho …pe… satthā devamanussānaṁ buddho bhagavā.
an8.29:8.2	Dhammo ca na desiyati opasamiko parinibbāniko sambodhagāmī sugatappavedito. Ayañca puggalo majjhimesu janapadesu paccājāto hoti, so ca hoti paññavā ajaḷo aneḷamūgo paṭibalo subhāsitadubbhāsitassa atthamaññātuṁ.
an8.29:8.3	Ayaṁ, bhikkhave, aṭṭhamo akkhaṇo asamayo brahmacariyavāsāya.
an8.29:9.1	Ime kho, bhikkhave, aṭṭha akkhaṇā asamayā brahmacariyavāsāya.
an8.29:10.1	Ekova kho, bhikkhave, khaṇo ca samayo ca brahmacariyavāsāya.
an8.29:10.2	Katamo eko?
an8.29:10.3	Idha, bhikkhave, tathāgato ca loke uppanno hoti arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā.
an8.29:10.4	Dhammo ca desiyati opasamiko parinibbāniko sambodhagāmī sugatappavedito. Ayañca puggalo majjhimesu janapadesu paccājāto hoti, so ca hoti paññavā ajaḷo aneḷamūgo paṭibalo subhāsitadubbhāsitassa atthamaññātuṁ.
an8.29:10.5	Ayaṁ, bhikkhave, ekova khaṇo ca samayo ca brahmacariyavāsāyāti.
an8.29:11.1	Manussalābhaṁ laddhāna,
an8.29:11.2	saddhamme suppavedite;
an8.29:11.3	Ye khaṇaṁ nādhigacchanti,
an8.29:11.4	atināmenti te khaṇaṁ.
an8.29:12.1	Bahū hi akkhaṇā vuttā,
an8.29:12.2	maggassa antarāyikā;
an8.29:12.3	Kadāci karahaci loke,
an8.29:12.4	uppajjanti tathāgatā.
an8.29:13.1	Tayidaṁ sammukhībhūtaṁ,
an8.29:13.2	yaṁ lokasmiṁ sudullabhaṁ;
an8.29:13.3	Manussapaṭilābho ca,
an8.29:13.4	saddhammassa ca desanā;
an8.29:13.5	Alaṁ vāyamituṁ tattha,
an8.29:13.6	attakāmena jantunā.
an8.29:14.1	Kathaṁ vijaññā saddhammaṁ,
an8.29:14.2	khaṇo ve mā upaccagā;
an8.29:14.3	Khaṇātītā hi socanti,
an8.29:14.4	nirayamhi samappitā.
an8.29:15.1	Idha ce naṁ virādheti,
an8.29:15.2	saddhammassa niyāmataṁ;
an8.29:15.3	Vāṇijova atītattho,
an8.29:15.4	cirattaṁ anutapissati.
an8.29:16.1	Avijjānivuto poso,
an8.29:16.2	saddhammaṁ aparādhiko;
an8.29:16.3	Jātimaraṇasaṁsāraṁ,
an8.29:16.4	ciraṁ paccanubhossati.
an8.29:17.1	Ye ca laddhā manussattaṁ,
an8.29:17.2	saddhamme suppavedite;
an8.29:17.3	Akaṁsu satthu vacanaṁ,
an8.29:17.4	karissanti karonti vā.
an8.29:18.1	Khaṇaṁ paccaviduṁ loke,
an8.29:18.2	brahmacariyaṁ anuttaraṁ;
an8.29:18.3	Ye maggaṁ paṭipajjiṁsu,
an8.29:18.4	tathāgatappaveditaṁ.
an8.29:19.1	Ye saṁvarā cakkhumatā,
an8.29:19.2	desitādiccabandhunā;
an8.29:19.3	Tesu gutto sadā sato,
an8.29:19.4	vihare anavassuto.
an8.29:20.1	Sabbe anusaye chetvā,
an8.29:20.2	māradheyyaparānuge;
an8.29:20.3	Te ve pāraṅgatā loke,
an8.29:20.4	ye pattā āsavakkhayan”ti.
an8.29:20.5	Navamaṁ.
an8.30:0.1	Aṅguttara Nikāya 8.30
an8.30:0.2	3. Gahapativagga
an8.30:0.3	Anuruddhamahāvitakkasutta
an8.30:1.1	Ekaṁ samayaṁ bhagavā bhaggesu viharati suṁsumāragire bhesakaḷāvane migadāye.
an8.30:1.2	Tena kho pana samayena āyasmā anuruddho cetīsu viharati pācīnavaṁsadāye.
an8.30:1.3	Atha kho āyasmato anuruddhassa rahogatassa paṭisallīnassa evaṁ cetaso parivitakko udapādi:
an8.30:1.4	“appicchassāyaṁ dhammo, nāyaṁ dhammo mahicchassa;
an8.30:1.5	santuṭṭhassāyaṁ dhammo, nāyaṁ dhammo asantuṭṭhassa;
an8.30:1.6	pavivittassāyaṁ dhammo, nāyaṁ dhammo saṅgaṇikārāmassa;
an8.30:1.7	āraddhavīriyassāyaṁ dhammo, nāyaṁ dhammo kusītassa;
an8.30:1.8	upaṭṭhitassatissāyaṁ dhammo, nāyaṁ dhammo muṭṭhassatissa;
an8.30:1.9	samāhitassāyaṁ dhammo, nāyaṁ dhammo asamāhitassa;
an8.30:1.10	paññavato ayaṁ dhammo, nāyaṁ dhammo duppaññassā”ti.
an8.30:2.1	Atha kho bhagavā āyasmato anuruddhassa cetasā cetoparivitakkamaññāya—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—bhaggesu susumāragire bhesakaḷāvane migadāye antarahito cetīsu pācīnavaṁsadāye āyasmato anuruddhassa sammukhe pāturahosi.
an8.30:2.2	Nisīdi bhagavā paññatte āsane.
an8.30:2.3	Āyasmāpi kho anuruddho bhagavantaṁ abhivādetvā ekamantaṁ nisīdi.
an8.30:2.4	Ekamantaṁ nisinnaṁ kho āyasmantaṁ anuruddhaṁ bhagavā etadavoca:
an8.30:3.1	“Sādhu sādhu, anuruddha.
an8.30:3.2	Sādhu kho tvaṁ, anuruddha, yaṁ taṁ mahāpurisavitakkaṁ vitakkesi:
an8.30:3.3	‘appicchassāyaṁ dhammo, nāyaṁ dhammo mahicchassa;
an8.30:3.4	santuṭṭhassāyaṁ dhammo, nāyaṁ dhammo asantuṭṭhassa;
an8.30:3.5	pavivittassāyaṁ dhammo, nāyaṁ dhammo saṅgaṇikārāmassa;
an8.30:3.6	āraddhavīriyassāyaṁ dhammo, nāyaṁ dhammo kusītassa;
an8.30:3.7	upaṭṭhitassatissāyaṁ dhammo, nāyaṁ dhammo muṭṭhassatissa;
an8.30:3.8	samāhitassāyaṁ dhammo, nāyaṁ dhammo asamāhitassa;
an8.30:3.9	paññavato ayaṁ dhammo, nāyaṁ dhammo duppaññassā’ti.
an8.30:3.10	Tena hi tvaṁ, anuruddha, imampi aṭṭhamaṁ mahāpurisavitakkaṁ vitakkehi:
an8.30:3.11	‘nippapañcārāmassāyaṁ dhammo nippapañcaratino, nāyaṁ dhammo papañcārāmassa papañcaratino’ti.
an8.30:4.1	Yato kho tvaṁ, anuruddha, ime aṭṭha mahāpurisavitakke vitakkessasi, tato tvaṁ, anuruddha, yāvadeva ākaṅkhissasi, vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharissasi.
an8.30:5.1	Yato kho tvaṁ, anuruddha, ime aṭṭha mahāpurisavitakke vitakkessasi, tato tvaṁ, anuruddha, yāvadeva ākaṅkhissasi, vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharissasi.
an8.30:6.1	Yato kho tvaṁ, anuruddha, ime aṭṭha mahāpurisavitakke vitakkessasi, tato tvaṁ, anuruddha, yāvadeva ākaṅkhissasi, pītiyā ca virāgā upekkhako ca viharissasi sato ca sampajāno sukhañca kāyena paṭisaṁvedissasi yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharissasi.
an8.30:7.1	Yato kho tvaṁ, anuruddha, ime aṭṭha mahāpurisavitakke vitakkessasi, tato tvaṁ, anuruddha, yāvadeva ākaṅkhissasi, sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharissasi.
an8.30:8.1	Yato kho tvaṁ, anuruddha, ime ca aṭṭha mahāpurisavitakke vitakkessasi, imesañca catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī bhavissasi akicchalābhī akasiralābhī, tato tuyhaṁ, anuruddha, seyyathāpi nāma gahapatissa vā gahapatiputtassa vā nānārattānaṁ dussānaṁ dussakaraṇḍako pūro;
an8.30:8.2	evamevaṁ te paṁsukūlacīvaraṁ khāyissati santuṭṭhassa viharato ratiyā aparitassāya phāsuvihārāya okkamanāya nibbānassa.
an8.30:9.1	Yato kho tvaṁ, anuruddha, ime ca aṭṭha mahāpurisavitakke vitakkessasi, imesañca catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī bhavissasi akicchalābhī akasiralābhī, tato tuyhaṁ, anuruddha, seyyathāpi nāma gahapatissa vā gahapatiputtassa vā sālīnaṁ odano vicitakāḷako anekasūpo anekabyañjano;
an8.30:9.2	evamevaṁ te piṇḍiyālopabhojanaṁ khāyissati santuṭṭhassa viharato ratiyā aparitassāya phāsuvihārāya okkamanāya nibbānassa.
an8.30:10.1	Yato kho tvaṁ, anuruddha, ime ca aṭṭha mahāpurisavitakke vitakkessasi, imesañca catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī bhavissasi akicchalābhī akasiralābhī, tato tuyhaṁ, anuruddha, seyyathāpi nāma gahapatissa vā gahapatiputtassa vā kūṭāgāraṁ ullittāvalittaṁ nivātaṁ phusitaggaḷaṁ pihitavātapānaṁ;
an8.30:10.2	evamevaṁ te rukkhamūlasenāsanaṁ khāyissati santuṭṭhassa viharato ratiyā aparitassāya phāsuvihārāya okkamanāya nibbānassa.
an8.30:11.1	Yato kho tvaṁ, anuruddha, ime ca aṭṭha mahāpurisavitakke vitakkessasi, imesañca catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī bhavissasi akicchalābhī akasiralābhī, tato tuyhaṁ, anuruddha, seyyathāpi nāma gahapatissa vā gahapatiputtassa vā pallaṅko gonakatthato paṭikatthato paṭalikatthato kadalimigapavarapaccattharaṇo sauttaracchado ubhatolohitakūpadhāno;
an8.30:11.2	evamevaṁ te tiṇasanthārakasayanāsanaṁ khāyissati santuṭṭhassa viharato ratiyā aparitassāya phāsuvihārāya okkamanāya nibbānassa.
an8.30:12.1	Yato kho tvaṁ, anuruddha, ime ca aṭṭha mahāpurisavitakke vitakkessasi, imesañca catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī bhavissasi akicchalābhī akasiralābhī, tato tuyhaṁ, anuruddha, seyyathāpi nāma gahapatissa vā gahapatiputtassa vā nānābhesajjāni, seyyathidaṁ—sappi navanītaṁ telaṁ madhu phāṇitaṁ;
an8.30:12.2	evamevaṁ te pūtimuttabhesajjaṁ khāyissati santuṭṭhassa viharato ratiyā aparitassāya phāsuvihārāya okkamanāya nibbānassa.
an8.30:12.3	Tena hi tvaṁ, anuruddha, āyatikampi vassāvāsaṁ idheva cetīsu pācīnavaṁsadāye vihareyyāsī”ti.
an8.30:12.4	“Evaṁ, bhante”ti kho āyasmā anuruddho bhagavato paccassosi.
an8.30:13.1	Atha kho bhagavā āyasmantaṁ anuruddhaṁ iminā ovādena ovaditvā—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evamevaṁ—cetīsu pācīnavaṁsadāye antarahito bhaggesu susumāragire bhesakaḷāvane migadāye pāturahosīti.
an8.30:13.2	Nisīdi bhagavā paññatte āsane.
an8.30:13.3	Nisajja kho bhagavā bhikkhū āmantesi:
an8.30:13.4	“aṭṭha kho, bhikkhave, mahāpurisavitakke desessāmi, taṁ suṇātha …pe…
an8.30:13.5	katame ca, bhikkhave, aṭṭha mahāpurisavitakkā?
an8.30:13.6	Appicchassāyaṁ, bhikkhave, dhammo, nāyaṁ dhammo mahicchassa;
an8.30:13.7	santuṭṭhassāyaṁ, bhikkhave, dhammo, nāyaṁ dhammo asantuṭṭhassa;
an8.30:13.8	pavivittassāyaṁ, bhikkhave, dhammo, nāyaṁ dhammo saṅgaṇikārāmassa;
an8.30:13.9	āraddhavīriyassāyaṁ, bhikkhave, dhammo, nāyaṁ dhammo kusītassa;
an8.30:13.10	upaṭṭhitassatissāyaṁ, bhikkhave, dhammo, nāyaṁ dhammo muṭṭhassatissa;
an8.30:13.11	samāhitassāyaṁ, bhikkhave, dhammo, nāyaṁ dhammo asamāhitassa;
an8.30:13.12	paññavato ayaṁ, bhikkhave, dhammo, nāyaṁ dhammo duppaññassa;
an8.30:13.13	nippapañcārāmassāyaṁ, bhikkhave, dhammo nippapañcaratino, nāyaṁ dhammo papañcārāmassa papañcaratino.
an8.30:14.1	‘Appicchassāyaṁ, bhikkhave, dhammo, nāyaṁ dhammo mahicchassā’ti,
an8.30:14.2	iti kho panetaṁ vuttaṁ. Kiñcetaṁ paṭicca vuttaṁ?
an8.30:14.3	Idha, bhikkhave, bhikkhu appiccho samāno ‘appicchoti maṁ jāneyyun’ti na icchati, santuṭṭho samāno ‘santuṭṭhoti maṁ jāneyyun’ti na icchati, pavivitto samāno ‘pavivittoti maṁ jāneyyun’ti na icchati, āraddhavīriyo samāno ‘āraddhavīriyoti maṁ jāneyyun’ti na icchati, upaṭṭhitassati samāno ‘upaṭṭhitassatīti maṁ jāneyyun’ti na icchati, samāhito samāno ‘samāhitoti maṁ jāneyyun’ti na icchati, paññavā samāno ‘paññavāti maṁ jāneyyun’ti na icchati, nippapañcārāmo samāno ‘nippapañcārāmoti maṁ jāneyyun’ti na icchati.
an8.30:14.4	‘Appicchassāyaṁ, bhikkhave, dhammo, nāyaṁ dhammo mahicchassā’ti,
an8.30:14.5	iti yaṁ taṁ vuttaṁ idametaṁ paṭicca vuttaṁ.
an8.30:15.1	‘Santuṭṭhassāyaṁ, bhikkhave, dhammo, nāyaṁ dhammo asantuṭṭhassā’ti, iti kho panetaṁ vuttaṁ, kiñcetaṁ paṭicca vuttaṁ?
an8.30:15.2	Idha, bhikkhave, bhikkhu santuṭṭho hoti itarītaracīvarapiṇḍapātasenāsanagilānapaccayabhesajjaparikkhārena.
an8.30:15.3	‘Santuṭṭhassāyaṁ, bhikkhave, dhammo, nāyaṁ dhammo asantuṭṭhassā’ti,
an8.30:15.4	iti yaṁ taṁ vuttaṁ idametaṁ paṭicca vuttaṁ.
an8.30:16.1	‘Pavivittassāyaṁ, bhikkhave, dhammo, nāyaṁ dhammo saṅgaṇikārāmassā’ti, iti kho panetaṁ vuttaṁ, kiñcetaṁ paṭicca vuttaṁ?
an8.30:16.2	Idha, bhikkhave, bhikkhuno pavivittassa viharato bhavanti upasaṅkamitāro bhikkhū bhikkhuniyo upāsakā upāsikāyo rājāno rājamahāmattā titthiyā titthiyasāvakā.
an8.30:16.3	Tatra bhikkhu vivekaninnena cittena vivekapoṇena vivekapabbhārena vivekaṭṭhena nekkhammābhiratena aññadatthu uyyojanikapaṭisaṁyuttaṁyeva kathaṁ kattā hoti.
an8.30:16.4	‘Pavivittassāyaṁ, bhikkhave, dhammo, nāyaṁ dhammo saṅgaṇikārāmassā’ti,
an8.30:16.5	iti yaṁ taṁ vuttaṁ idametaṁ paṭicca vuttaṁ.
an8.30:17.1	‘Āraddhavīriyassāyaṁ, bhikkhave, dhammo, nāyaṁ dhammo kusītassā’ti, iti kho panetaṁ vuttaṁ, kiñcetaṁ paṭicca vuttaṁ?
an8.30:17.2	Idha, bhikkhave, bhikkhu āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya thāmavā daḷhaparakkamo anikkhittadhuro kusalesu dhammesu.
an8.30:17.3	‘Āraddhavīriyassāyaṁ, bhikkhave, dhammo, nāyaṁ dhammo kusītassā’ti,
an8.30:17.4	iti yaṁ taṁ vuttaṁ idametaṁ paṭicca vuttaṁ.
an8.30:18.1	‘Upaṭṭhitassatissāyaṁ, bhikkhave, dhammo, nāyaṁ dhammo muṭṭhassatissā’ti,
an8.30:18.2	iti kho panetaṁ vuttaṁ. Kiñcetaṁ paṭicca vuttaṁ?
an8.30:18.3	Idha, bhikkhave, bhikkhu satimā hoti paramena satinepakkena samannāgato, cirakatampi cirabhāsitampi saritā anussaritā.
an8.30:18.4	‘Upaṭṭhitassatissāyaṁ, bhikkhave, dhammo, nāyaṁ dhammo, muṭṭhassatissā’ti,
an8.30:18.5	iti yaṁ taṁ vuttaṁ idametaṁ paṭicca vuttaṁ.
an8.30:19.1	‘Samāhitassāyaṁ, bhikkhave, dhammo, nāyaṁ dhammo asamāhitassā’ti,
an8.30:19.2	iti kho panetaṁ vuttaṁ. Kiñcetaṁ paṭicca vuttaṁ?
an8.30:19.3	Idha, bhikkhave, bhikkhu vivicceva kāmehi …pe… catutthaṁ jhānaṁ upasampajja viharati.
an8.30:19.4	‘Samāhitassāyaṁ, bhikkhave, dhammo, nāyaṁ dhammo asamāhitassā’ti,
an8.30:19.5	iti yaṁ taṁ vuttaṁ idametaṁ paṭicca vuttaṁ.
an8.30:20.1	‘Paññavato ayaṁ, bhikkhave, dhammo, nāyaṁ dhammo duppaññassā’ti,
an8.30:20.2	iti kho panetaṁ vuttaṁ. Kiñcetaṁ paṭicca vuttaṁ?
an8.30:20.3	Idha, bhikkhave, bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an8.30:20.4	‘Paññavato ayaṁ, bhikkhave, dhammo, nāyaṁ dhammo duppaññassā’ti,
an8.30:20.5	iti yaṁ taṁ vuttaṁ idametaṁ paṭicca vuttaṁ.
an8.30:21.1	‘Nippapañcārāmassāyaṁ, bhikkhave, dhammo nippapañcaratino, nāyaṁ dhammo papañcārāmassa papañcaratino’ti,
an8.30:21.2	iti kho panetaṁ vuttaṁ. Kiñcetaṁ paṭicca vuttaṁ?
an8.30:21.3	Idha, bhikkhave, bhikkhuno papañcanirodhe cittaṁ pakkhandati pasīdati santiṭṭhati vimuccati.
an8.30:21.4	‘Nippapañcārāmassāyaṁ, bhikkhave, dhammo, nippapañcaratino, nāyaṁ dhammo papañcārāmassa papañcaratino’ti,
an8.30:21.5	iti yaṁ taṁ vuttaṁ idametaṁ paṭicca vuttan”ti.
an8.30:22.1	Atha kho āyasmā anuruddho āyatikampi vassāvāsaṁ tattheva cetīsu pācīnavaṁsadāye vihāsi.
an8.30:22.2	Atha kho āyasmā anuruddho eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
an8.30:22.3	“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
an8.30:22.4	Aññataro ca panāyasmā anuruddho arahataṁ ahosīti.
an8.30:22.5	Atha kho āyasmā anuruddho arahattappatto tāyaṁ velāyaṁ imā gāthāyo abhāsi:
an8.30:23.1	“Mama saṅkappamaññāya,
an8.30:23.2	satthā loke anuttaro;
an8.30:23.3	Manomayena kāyena,
an8.30:23.4	iddhiyā upasaṅkami.
an8.30:24.1	Yathā me ahu saṅkappo,
an8.30:24.2	tato uttari desayi;
an8.30:24.3	Nippapañcarato buddho,
an8.30:24.4	nippapañcaṁ adesayi.
an8.30:25.1	Tassāhaṁ dhammamaññāya,
an8.30:25.2	vihāsiṁ sāsane rato;
an8.30:25.3	Tisso vijjā anuppattā,
an8.30:25.4	kataṁ buddhassa sāsanan”ti.
an8.30:25.5	Dasamaṁ.
an8.30:25.6	Gahapativaggo tatiyo.
an8.30:26.0	Tassuddānaṁ
an8.30:26.1	Dve uggā dve ca hatthakā,
an8.30:26.2	mahānāmena jīvako;
an8.30:26.3	Dve balā akkhaṇā vuttā,
an8.30:26.4	anuruddhena te dasāti.
an8.31:0.1	Aṅguttara Nikāya 8.31
an8.31:0.2	4. Dānavagga
an8.31:0.3	Paṭhamadānasutta
an8.31:1.1	“Aṭṭhimāni, bhikkhave, dānāni.
an8.31:1.2	Katamāni aṭṭha?
an8.31:1.3	Āsajja dānaṁ deti,
an8.31:1.4	bhayā dānaṁ deti,
an8.31:1.5	‘adāsi me’ti dānaṁ deti,
an8.31:1.6	‘dassati me’ti dānaṁ deti,
an8.31:1.7	‘sāhu dānan’ti dānaṁ deti,
an8.31:1.8	‘ahaṁ pacāmi, ime na pacanti; nārahāmi pacanto apacantānaṁ dānaṁ adātun’ti dānaṁ deti,
an8.31:1.9	‘imaṁ me dānaṁ dadato kalyāṇo kittisaddo abbhuggacchatī’ti dānaṁ deti,
an8.31:1.10	cittālaṅkāracittaparikkhāratthaṁ dānaṁ deti.
an8.31:1.11	Imāni kho, bhikkhave, aṭṭha dānānī”ti.
an8.31:1.12	Paṭhamaṁ.
an8.32:0.1	Aṅguttara Nikāya 8.32
an8.32:0.2	4. Dānavagga
an8.32:0.3	Dutiyadānasutta
an8.32:1.1	“Saddhā hiriyaṁ kusalañca dānaṁ,
an8.32:1.2	Dhammā ete sappurisānuyātā;
an8.32:1.3	Etañhi maggaṁ diviyaṁ vadanti,
an8.32:1.4	Etena hi gacchati devalokan”ti.
an8.32:1.5	Dutiyaṁ.
an8.33:0.1	Aṅguttara Nikāya 8.33
an8.33:0.2	4. Dānavagga
an8.33:0.3	Dānavatthusutta
an8.33:1.1	“Aṭṭhimāni, bhikkhave, dānavatthūni.
an8.33:1.2	Katamāni aṭṭha?
an8.33:1.3	Chandā dānaṁ deti, dosā dānaṁ deti, mohā dānaṁ deti, bhayā dānaṁ deti, ‘dinnapubbaṁ katapubbaṁ pitupitāmahehi, nārahāmi porāṇaṁ kulavaṁsaṁ hāpetun’ti dānaṁ deti, ‘imāhaṁ dānaṁ datvā kāyassa bhedā paraṁ maraṇā sugatiṁ saggaṁ lokaṁ upapajjissāmī’ti dānaṁ deti, ‘imaṁ me dānaṁ dadato cittaṁ pasīdati, attamanatā somanassaṁ upajāyatī’ti dānaṁ deti, cittālaṅkāracittaparikkhāratthaṁ dānaṁ deti.
an8.33:1.4	Imāni kho, bhikkhave, aṭṭha dānavatthūnī”ti.
an8.33:1.5	Tatiyaṁ.
an8.34:0.1	Aṅguttara Nikāya 8.34
an8.34:0.2	4. Dānavagga
an8.34:0.3	Khettasutta
an8.34:1.1	“Aṭṭhaṅgasamannāgate, bhikkhave, khette bījaṁ vuttaṁ na mahapphalaṁ hoti na mahassādaṁ na phātiseyyaṁ.
an8.34:1.2	Kathaṁ aṭṭhaṅgasamannāgate?
an8.34:1.3	Idha, bhikkhave, khettaṁ unnāmaninnāmi ca hoti, pāsāṇasakkharikañca hoti, ūsarañca hoti, na ca gambhīrasitaṁ hoti, na āyasampannaṁ hoti, na apāyasampannaṁ hoti, na mātikāsampannaṁ hoti, na mariyādasampannaṁ hoti.
an8.34:1.4	Evaṁ aṭṭhaṅgasamannāgate, bhikkhave, khette bījaṁ vuttaṁ na mahapphalaṁ hoti na mahassādaṁ na phātiseyyaṁ.
an8.34:2.1	Evamevaṁ kho, bhikkhave, aṭṭhaṅgasamannāgatesu samaṇabrāhmaṇesu dānaṁ dinnaṁ na mahapphalaṁ hoti na mahānisaṁsaṁ na mahājutikaṁ na mahāvipphāraṁ.
an8.34:2.2	Kathaṁ aṭṭhaṅgasamannāgatesu?
an8.34:2.3	Idha, bhikkhave, samaṇabrāhmaṇā micchādiṭṭhikā honti, micchāsaṅkappā, micchāvācā, micchākammantā, micchāājīvā, micchāvāyāmā, micchāsatino, micchāsamādhino.
an8.34:2.4	Evaṁ aṭṭhaṅgasamannāgatesu, bhikkhave, samaṇabrāhmaṇesu dānaṁ dinnaṁ na mahapphalaṁ hoti na mahānisaṁsaṁ na mahājutikaṁ na mahāvipphāraṁ.
an8.34:3.1	Aṭṭhaṅgasamannāgate, bhikkhave, khette bījaṁ vuttaṁ mahapphalaṁ hoti mahassādaṁ phātiseyyaṁ.
an8.34:3.2	Kathaṁ aṭṭhaṅgasamannāgate?
an8.34:3.3	Idha, bhikkhave, khettaṁ anunnāmāninnāmi ca hoti, apāsāṇasakkharikañca hoti, anūsarañca hoti, gambhīrasitaṁ hoti, āyasampannaṁ hoti, apāyasampannaṁ hoti, mātikāsampannaṁ hoti, mariyādasampannaṁ hoti.
an8.34:3.4	Evaṁ aṭṭhaṅgasamannāgate, bhikkhave, khette bījaṁ vuttaṁ mahapphalaṁ hoti mahassādaṁ phātiseyyaṁ.
an8.34:4.1	Evamevaṁ kho, bhikkhave, aṭṭhaṅgasamannāgatesu samaṇabrāhmaṇesu dānaṁ dinnaṁ mahapphalaṁ hoti mahānisaṁsaṁ mahājutikaṁ mahāvipphāraṁ.
an8.34:4.2	Kathaṁ aṭṭhaṅgasamannāgatesu?
an8.34:4.3	Idha, bhikkhave, samaṇabrāhmaṇā sammādiṭṭhikā honti, sammāsaṅkappā, sammāvācā, sammākammantā, sammāājīvā, sammāvāyāmā, sammāsatino, sammāsamādhino.
an8.34:4.4	Evaṁ aṭṭhaṅgasamannāgatesu, bhikkhave, samaṇabrāhmaṇesu dānaṁ dinnaṁ mahapphalaṁ hoti mahānisaṁsaṁ mahājutikaṁ mahāvipphāranti.
an8.34:5.1	Yathāpi khette sampanne,
an8.34:5.2	pavuttā bījasampadā;
an8.34:5.3	Deve sampādayantamhi,
an8.34:5.4	hoti dhaññassa sampadā.
an8.34:6.1	Anītisampadā hoti,
an8.34:6.2	virūḷhī bhavati sampadā;
an8.34:6.3	Vepullasampadā hoti,
an8.34:6.4	phalaṁ ve hoti sampadā.
an8.34:7.1	Evaṁ sampannasīlesu,
an8.34:7.2	dinnā bhojanasampadā;
an8.34:7.3	Sampadānaṁ upaneti,
an8.34:7.4	sampannaṁ hissa taṁ kataṁ.
an8.34:8.1	Tasmā sampadamākaṅkhī,
an8.34:8.2	sampannatthūdha puggalo;
an8.34:8.3	Sampannapaññe sevetha,
an8.34:8.4	evaṁ ijjhanti sampadā.
an8.34:9.1	Vijjācaraṇasampanne,
an8.34:9.2	laddhā cittassa sampadaṁ;
an8.34:9.3	Karoti kammasampadaṁ,
an8.34:9.4	labhati catthasampadaṁ.
an8.34:10.1	Lokaṁ ñatvā yathābhūtaṁ,
an8.34:10.2	pappuyya diṭṭhisampadaṁ;
an8.34:10.3	Maggasampadamāgamma,
an8.34:10.4	yāti sampannamānaso.
an8.34:11.1	Odhunitvā malaṁ sabbaṁ,
an8.34:11.2	patvā nibbānasampadaṁ;
an8.34:11.3	Muccati sabbadukkhehi,
an8.34:11.4	sā hoti sabbasampadā”ti.
an8.34:11.5	Catutthaṁ.
an8.35:0.1	Aṅguttara Nikāya 8.35
an8.35:0.2	4. Dānavagga
an8.35:0.3	Dānūpapattisutta
an8.35:1.1	“Aṭṭhimā, bhikkhave, dānūpapattiyo.
an8.35:1.2	Katamā aṭṭha?
an8.35:1.3	Idha, bhikkhave, ekacco dānaṁ deti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an8.35:1.4	So yaṁ deti taṁ paccāsīsati.
an8.35:1.5	So passati khattiyamahāsāle vā brāhmaṇamahāsāle vā gahapatimahāsāle vā pañcahi kāmaguṇehi samappite samaṅgībhūte paricārayamāne.
an8.35:1.6	Tassa evaṁ hoti:
an8.35:1.7	‘aho vatāhaṁ kāyassa bhedā paraṁ maraṇā khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā sahabyataṁ upapajjeyyan’ti.
an8.35:1.8	So taṁ cittaṁ dahati, taṁ cittaṁ adhiṭṭhāti, taṁ cittaṁ bhāveti.
an8.35:1.9	Tassa taṁ cittaṁ hīne vimuttaṁ, uttari abhāvitaṁ, tatrūpapattiyā saṁvattati.
an8.35:1.10	Kāyassa bhedā paraṁ maraṇā khattiyamahāsālānaṁ vā brāhmaṇamahāsālānaṁ vā gahapatimahāsālānaṁ vā sahabyataṁ upapajjati.
an8.35:1.11	Tañca kho sīlavato vadāmi, no dussīlassa.
an8.35:1.12	Ijjhati, bhikkhave, sīlavato cetopaṇidhi visuddhattā.
an8.35:2.1	Idha pana, bhikkhave, ekacco dānaṁ deti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an8.35:2.2	So yaṁ deti taṁ paccāsīsati.
an8.35:2.3	Tassa sutaṁ hoti:
an8.35:2.4	‘cātumahārājikā devā dīghāyukā vaṇṇavanto sukhabahulā’ti.
an8.35:2.5	Tassa evaṁ hoti:
an8.35:2.6	‘aho vatāhaṁ kāyassa bhedā paraṁ maraṇā cātumahārājikānaṁ devānaṁ sahabyataṁ upapajjeyyan’ti.
an8.35:2.7	So taṁ cittaṁ dahati, taṁ cittaṁ adhiṭṭhāti, taṁ cittaṁ bhāveti.
an8.35:2.8	Tassa taṁ cittaṁ hīne vimuttaṁ, uttari abhāvitaṁ, tatrūpapattiyā saṁvattati.
an8.35:2.9	Kāyassa bhedā paraṁ maraṇā cātumahārājikānaṁ devānaṁ sahabyataṁ upapajjati.
an8.35:2.10	Tañca kho sīlavato vadāmi, no dussīlassa.
an8.35:2.11	Ijjhati, bhikkhave, sīlavato cetopaṇidhi visuddhattā.
an8.35:3.1	Idha pana, bhikkhave, ekacco dānaṁ deti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an8.35:3.2	So yaṁ deti taṁ paccāsīsati.
an8.35:3.3	Tassa sutaṁ hoti—
an8.35:3.4	tāvatiṁsā devā …pe…
an8.35:3.5	yāmā devā …
an8.35:3.6	tusitā devā …
an8.35:3.7	nimmānaratī devā …
an8.35:3.8	paranimmitavasavattī devā dīghāyukā vaṇṇavanto sukhabahulāti.
an8.35:3.9	Tassa evaṁ hoti:
an8.35:3.10	‘aho vatāhaṁ kāyassa bhedā paraṁ maraṇā paranimmitavasavattīnaṁ devānaṁ sahabyataṁ upapajjeyyan’ti.
an8.35:3.11	So taṁ cittaṁ dahati, taṁ cittaṁ adhiṭṭhāti, taṁ cittaṁ bhāveti.
an8.35:3.12	Tassa taṁ cittaṁ hīne vimuttaṁ, uttari abhāvitaṁ, tatrūpapattiyā saṁvattati.
an8.35:3.13	Kāyassa bhedā paraṁ maraṇā paranimmitavasavattīnaṁ devānaṁ sahabyataṁ upapajjati.
an8.35:3.14	Tañca kho sīlavato vadāmi, no dussīlassa.
an8.35:3.15	Ijjhati, bhikkhave, sīlavato cetopaṇidhi visuddhattā.
an8.35:4.1	Idha pana, bhikkhave, ekacco dānaṁ deti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an8.35:4.2	So yaṁ deti taṁ paccāsīsati.
an8.35:4.3	Tassa sutaṁ hoti:
an8.35:4.4	‘brahmakāyikā devā dīghāyukā vaṇṇavanto sukhabahulā’ti.
an8.35:4.5	Tassa evaṁ hoti:
an8.35:4.6	‘aho vatāhaṁ kāyassa bhedā paraṁ maraṇā brahmakāyikānaṁ devānaṁ sahabyataṁ upapajjeyyan’ti.
an8.35:4.7	So taṁ cittaṁ dahati, taṁ cittaṁ adhiṭṭhāti, taṁ cittaṁ bhāveti.
an8.35:4.8	Tassa taṁ cittaṁ hīne vimuttaṁ, uttari abhāvitaṁ, tatrūpapattiyā saṁvattati.
an8.35:4.9	Kāyassa bhedā paraṁ maraṇā brahmakāyikānaṁ devānaṁ sahabyataṁ upapajjati.
an8.35:4.10	Tañca kho sīlavato vadāmi, no dussīlassa;
an8.35:4.11	vītarāgassa, no sarāgassa.
an8.35:4.12	Ijjhati, bhikkhave, sīlavato cetopaṇidhi vītarāgattā.
an8.35:4.13	Imā kho, bhikkhave, aṭṭha dānūpapattiyo”ti.
an8.35:4.14	Pañcamaṁ.
an8.36:0.1	Aṅguttara Nikāya 8.36
an8.36:0.2	4. Dānavagga
an8.36:0.3	Puññakiriyavatthusutta
an8.36:1.1	“Tīṇimāni, bhikkhave, puññakiriyavatthūni.
an8.36:1.2	Katamāni tīṇi?
an8.36:1.3	Dānamayaṁ puññakiriyavatthu, sīlamayaṁ puññakiriyavatthu, bhāvanāmayaṁ puññakiriyavatthu.
an8.36:2.1	Idha, bhikkhave, ekaccassa dānamayaṁ puññakiriyavatthu parittaṁ kataṁ hoti, sīlamayaṁ puññakiriyavatthu parittaṁ kataṁ hoti, bhāvanāmayaṁ puññakiriyavatthuṁ nābhisambhoti.
an8.36:2.2	So kāyassa bhedā paraṁ maraṇā manussadobhagyaṁ upapajjati.
an8.36:3.1	Idha pana, bhikkhave, ekaccassa dānamayaṁ puññakiriyavatthu mattaso kataṁ hoti, sīlamayaṁ puññakiriyavatthu mattaso kataṁ hoti, bhāvanāmayaṁ puññakiriyavatthuṁ nābhisambhoti.
an8.36:3.2	So kāyassa bhedā paraṁ maraṇā manussasobhagyaṁ upapajjati.
an8.36:4.1	Idha pana, bhikkhave, ekaccassa dānamayaṁ puññakiriyavatthu adhimattaṁ kataṁ hoti, sīlamayaṁ puññakiriyavatthu adhimattaṁ kataṁ hoti, bhāvanāmayaṁ puññakiriyavatthuṁ nābhisambhoti.
an8.36:4.2	So kāyassa bhedā paraṁ maraṇā cātumahārājikānaṁ devānaṁ sahabyataṁ upapajjati.
an8.36:4.3	Tatra, bhikkhave, cattāro mahārājāno dānamayaṁ puññakiriyavatthuṁ atirekaṁ karitvā, sīlamayaṁ puññakiriyavatthuṁ atirekaṁ karitvā, cātumahārājike deve dasahi ṭhānehi adhigaṇhanti—
an8.36:4.4	dibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehi.
an8.36:5.1	Idha pana, bhikkhave, ekaccassa dānamayaṁ puññakiriyavatthu adhimattaṁ kataṁ hoti, sīlamayaṁ puññakiriyavatthu adhimattaṁ kataṁ hoti, bhāvanāmayaṁ puññakiriyavatthuṁ nābhisambhoti.
an8.36:5.2	So kāyassa bhedā paraṁ maraṇā tāvatiṁsānaṁ devānaṁ sahabyataṁ upapajjati.
an8.36:5.3	Tatra, bhikkhave, sakko devānamindo dānamayaṁ puññakiriyavatthuṁ atirekaṁ karitvā sīlamayaṁ puññakiriyavatthuṁ atirekaṁ karitvā tāvatiṁse deve dasahi ṭhānehi adhigaṇhāti—
an8.36:5.4	dibbena āyunā …pe…
an8.36:5.5	dibbehi phoṭṭhabbehi.
an8.36:6.1	Idha pana, bhikkhave, ekaccassa dānamayaṁ puññakiriyavatthu adhimattaṁ kataṁ hoti, sīlamayaṁ puññakiriyavatthu adhimattaṁ kataṁ hoti, bhāvanāmayaṁ puññakiriyavatthuṁ nābhisambhoti.
an8.36:6.2	So kāyassa bhedā paraṁ maraṇā yāmānaṁ devānaṁ sahabyataṁ upapajjati.
an8.36:6.3	Tatra, bhikkhave, suyāmo devaputto dānamayaṁ puññakiriyavatthuṁ atirekaṁ karitvā, sīlamayaṁ puññakiriyavatthuṁ atirekaṁ karitvā, yāme deve dasahi ṭhānehi adhigaṇhāti—
an8.36:6.4	dibbena āyunā …pe…
an8.36:6.5	dibbehi phoṭṭhabbehi.
an8.36:7.1	Idha pana, bhikkhave, ekaccassa dānamayaṁ puññakiriyavatthu adhimattaṁ kataṁ hoti, sīlamayaṁ puññakiriyavatthu adhimattaṁ kataṁ hoti, bhāvanāmayaṁ puññakiriyavatthuṁ nābhisambhoti.
an8.36:7.2	So kāyassa bhedā paraṁ maraṇā tusitānaṁ devānaṁ sahabyataṁ upapajjati.
an8.36:7.3	Tatra, bhikkhave, santusito devaputto dānamayaṁ puññakiriyavatthuṁ atirekaṁ karitvā, sīlamayaṁ puññakiriyavatthuṁ atirekaṁ karitvā, tusite deve dasahi ṭhānehi adhigaṇhāti—
an8.36:7.4	dibbena āyunā …pe…
an8.36:7.5	dibbehi phoṭṭhabbehi.
an8.36:8.1	Idha pana, bhikkhave, ekaccassa dānamayaṁ puññakiriyavatthu adhimattaṁ kataṁ hoti, sīlamayaṁ puññakiriyavatthu adhimattaṁ kataṁ hoti, bhāvanāmayaṁ puññakiriyavatthuṁ nābhisambhoti.
an8.36:8.2	So kāyassa bhedā paraṁ maraṇā nimmānaratīnaṁ devānaṁ sahabyataṁ upapajjati.
an8.36:8.3	Tatra, bhikkhave, sunimmito devaputto dānamayaṁ puññakiriyavatthuṁ atirekaṁ karitvā, sīlamayaṁ puññakiriyavatthuṁ atirekaṁ karitvā, nimmānaratīdeve dasahi ṭhānehi adhigaṇhāti—
an8.36:8.4	dibbena āyunā …pe…
an8.36:8.5	dibbehi phoṭṭhabbehi.
an8.36:9.1	Idha pana, bhikkhave, ekaccassa dānamayaṁ puññakiriyavatthu adhimattaṁ kataṁ hoti, sīlamayaṁ puññakiriyavatthu adhimattaṁ kataṁ hoti, bhāvanāmayaṁ puññakiriyavatthuṁ nābhisambhoti.
an8.36:9.2	So kāyassa bhedā paraṁ maraṇā paranimmitavasavattīnaṁ devānaṁ sahabyataṁ upapajjati.
an8.36:9.3	Tatra, bhikkhave, vasavattī devaputto dānamayaṁ puññakiriyavatthuṁ atirekaṁ karitvā, sīlamayaṁ puññakiriyavatthuṁ atirekaṁ karitvā, paranimmitavasavattīdeve dasahi ṭhānehi adhigaṇhāti—
an8.36:9.4	dibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehi.
an8.36:9.5	Imāni kho, bhikkhave, tīṇi puññakiriyavatthūnī”ti.
an8.36:9.6	Chaṭṭhaṁ.
an8.37:0.1	Aṅguttara Nikāya 8.37
an8.37:0.2	4. Dānavagga
an8.37:0.3	Sappurisadānasutta
an8.37:1.1	“Aṭṭhimāni, bhikkhave, sappurisadānāni.
an8.37:1.2	Katamāni aṭṭha?
an8.37:1.3	Suciṁ deti, paṇītaṁ deti, kālena deti, kappiyaṁ deti, viceyya deti, abhiṇhaṁ deti, dadaṁ cittaṁ pasādeti, datvā attamano hoti.
an8.37:1.4	Imāni kho, bhikkhave, aṭṭha sappurisadānānīti.
an8.37:2.1	Suciṁ paṇītaṁ kālena,
an8.37:2.2	kappiyaṁ pānabhojanaṁ;
an8.37:2.3	Abhiṇhaṁ dadāti dānaṁ,
an8.37:2.4	sukhettesu brahmacārisu.
an8.37:3.1	Neva vippaṭisārissa,
an8.37:3.2	cajitvā āmisaṁ bahuṁ;
an8.37:3.3	Evaṁ dinnāni dānāni,
an8.37:3.4	vaṇṇayanti vipassino.
an8.37:4.1	Evaṁ yajitvā medhāvī,
an8.37:4.2	saddho muttena cetasā;
an8.37:4.3	Abyābajjhaṁ sukhaṁ lokaṁ,
an8.37:4.4	paṇḍito upapajjatī”ti.
an8.37:4.5	Sattamaṁ.
an8.38:0.1	Aṅguttara Nikāya 8.38
an8.38:0.2	4. Dānavagga
an8.38:0.3	Sappurisasutta
an8.38:1.1	“Sappuriso, bhikkhave, kule jāyamāno bahuno janassa atthāya hitāya sukhāya hoti—
an8.38:1.2	mātāpitūnaṁ atthāya hitāya sukhāya hoti, puttadārassa atthāya hitāya sukhāya hoti, dāsakammakaraporisassa atthāya hitāya sukhāya hoti, mittāmaccānaṁ atthāya hitāya sukhāya hoti, pubbapetānaṁ atthāya hitāya sukhāya hoti, rañño atthāya hitāya sukhāya hoti, devatānaṁ atthāya hitāya sukhāya hoti, samaṇabrāhmaṇānaṁ atthāya hitāya sukhāya hoti.
an8.38:2.1	Seyyathāpi, bhikkhave, mahāmegho sabbasassāni sampādento bahuno janassa atthāya hitāya sukhāya hoti;
an8.38:2.2	evamevaṁ kho, bhikkhave, sappuriso kule jāyamāno bahuno janassa atthāya hitāya sukhāya hoti—
an8.38:2.3	mātāpitūnaṁ atthāya hitāya sukhāya hoti, puttadārassa atthāya hitāya sukhāya hoti, dāsakammakaraporisassa atthāya hitāya sukhāya hoti, mittāmaccānaṁ atthāya hitāya sukhāya hoti, pubbapetānaṁ atthāya hitāya sukhāya hoti, rañño atthāya hitāya sukhāya hoti, devatānaṁ atthāya hitāya sukhāya hoti, samaṇabrāhmaṇānaṁ atthāya hitāya sukhāya hotīti.
an8.38:3.1	Bahūnaṁ vata atthāya,
an8.38:3.2	sappañño gharamāvasaṁ;
an8.38:3.3	Mātaraṁ pitaraṁ pubbe,
an8.38:3.4	rattindivamatandito.
an8.38:4.1	Pūjeti sahadhammena,
an8.38:4.2	pubbekatamanussaraṁ;
an8.38:4.3	Anāgāre pabbajite,
an8.38:4.4	apace brahmacārayo.
an8.38:5.1	Niviṭṭhasaddho pūjeti,
an8.38:5.2	ñatvā dhamme ca pesalo;
an8.38:5.3	Rañño hito devahito,
an8.38:5.4	ñātīnaṁ sakhinaṁ hito.
an8.38:6.1	Sabbesaṁ so hito hoti,
an8.38:6.2	saddhamme suppatiṭṭhito;
an8.38:6.3	Vineyya maccheramalaṁ,
an8.38:6.4	sa lokaṁ bhajate sivan”ti.
an8.38:6.5	Aṭṭhamaṁ.
an8.39:0.1	Aṅguttara Nikāya 8.39
an8.39:0.2	4. Dānavagga
an8.39:0.3	Abhisandasutta
an8.39:1.1	“Aṭṭhime, bhikkhave, puññābhisandā kusalābhisandā sukhassāhārā sovaggikā sukhavipākā saggasaṁvattanikā, iṭṭhāya kantāya manāpāya hitāya sukhāya saṁvattanti.
an8.39:1.2	Katame aṭṭha?
an8.39:1.3	Idha, bhikkhave, ariyasāvako buddhaṁ saraṇaṁ gato hoti.
an8.39:1.4	Ayaṁ, bhikkhave, paṭhamo puññābhisando kusalābhisando sukhassāhāro sovaggiko sukhavipāko saggasaṁvattaniko, iṭṭhāya kantāya manāpāya hitāya sukhāya saṁvattati.
an8.39:2.1	Puna caparaṁ, bhikkhave, ariyasāvako dhammaṁ saraṇaṁ gato hoti.
an8.39:2.2	Ayaṁ, bhikkhave, dutiyo puññābhisando …pe… saṁvattati.
an8.39:3.1	Puna caparaṁ, bhikkhave, ariyasāvako saṅghaṁ saraṇaṁ gato hoti.
an8.39:3.2	Ayaṁ, bhikkhave, tatiyo puññābhisando kusalābhisando sukhassāhāro sovaggiko sukhavipāko saggasaṁvattaniko, iṭṭhāya kantāya manāpāya hitāya sukhāya saṁvattati.
an8.39:3.3	Pañcimāni, bhikkhave, dānāni mahādānāni aggaññāni rattaññāni vaṁsaññāni porāṇāni asaṅkiṇṇāni asaṅkiṇṇapubbāni, na saṅkiyanti na saṅkiyissanti, appaṭikuṭṭhāni samaṇehi brāhmaṇehi viññūhi.
an8.39:3.4	Katamāni pañca?
an8.39:3.5	Idha, bhikkhave, ariyasāvako pāṇātipātaṁ pahāya pāṇātipātā paṭivirato hoti.
an8.39:3.6	Pāṇātipātā paṭivirato, bhikkhave, ariyasāvako aparimāṇānaṁ sattānaṁ abhayaṁ deti, averaṁ deti, abyābajjhaṁ deti.
an8.39:3.7	Aparimāṇānaṁ sattānaṁ abhayaṁ datvā averaṁ datvā abyābajjhaṁ datvā aparimāṇassa abhayassa averassa abyābajjhassa bhāgī hoti.
an8.39:3.8	Idaṁ, bhikkhave, paṭhamaṁ dānaṁ mahādānaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkiyati na saṅkiyissati, appaṭikuṭṭhaṁ samaṇehi brāhmaṇehi viññūhi.
an8.39:3.9	Ayaṁ, bhikkhave, catuttho puññābhisando kusalābhisando sukhassāhāro sovaggiko sukhavipāko saggasaṁvattaniko, iṭṭhāya kantāya manāpāya hitāya sukhāya saṁvattati.
an8.39:4.1	Puna caparaṁ, bhikkhave, ariyasāvako adinnādānaṁ pahāya adinnādānā paṭivirato hoti
an8.39:4.2	…pe…
an8.39:5.1	kāmesumicchācāraṁ pahāya kāmesumicchācārā paṭivirato hoti
an8.39:5.2	…pe…
an8.39:6.1	musāvādaṁ pahāya musāvādā paṭivirato hoti
an8.39:6.2	…pe…
an8.39:7.1	surāmerayamajjapamādaṭṭhānaṁ pahāya surāmerayamajjapamādaṭṭhānā paṭivirato hoti.
an8.39:7.2	Surāmerayamajjapamādaṭṭhānā paṭivirato, bhikkhave, ariyasāvako aparimāṇānaṁ sattānaṁ abhayaṁ deti averaṁ deti abyābajjhaṁ deti.
an8.39:7.3	Aparimāṇānaṁ sattānaṁ abhayaṁ datvā averaṁ datvā abyābajjhaṁ datvā, aparimāṇassa abhayassa averassa abyābajjhassa bhāgī hoti.
an8.39:7.4	Idaṁ, bhikkhave, pañcamaṁ dānaṁ mahādānaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkiyati na saṅkiyissati, appaṭikuṭṭhaṁ samaṇehi brāhmaṇehi viññūhi.
an8.39:7.5	Ayaṁ kho, bhikkhave, aṭṭhamo puññābhisando kusalābhisando sukhassāhāro sovaggiko sukhavipāko saggasaṁvattaniko, iṭṭhāya kantāya manāpāya hitāya sukhāya saṁvattati.
an8.39:8.1	Ime kho, bhikkhave, aṭṭha puññābhisandā kusalābhisandā sukhassāhārā sovaggikā sukhavipākā saggasaṁvattanikā, iṭṭhāya kantāya manāpāya hitāya sukhāya saṁvattantī”ti.
an8.39:8.2	Navamaṁ.
an8.40:0.1	Aṅguttara Nikāya 8.40
an8.40:0.2	4. Dānavagga
an8.40:0.3	Duccaritavipākasutta
an8.40:1.1	“Pāṇātipāto, bhikkhave, āsevito bhāvito bahulīkato nirayasaṁvattaniko tiracchānayonisaṁvattaniko pettivisayasaṁvattaniko.
an8.40:1.2	Yo sabbalahuso pāṇātipātassa vipāko, manussabhūtassa appāyukasaṁvattaniko hoti.
an8.40:2.1	Adinnādānaṁ, bhikkhave, āsevitaṁ bhāvitaṁ bahulīkataṁ nirayasaṁvattanikaṁ tiracchānayonisaṁvattanikaṁ pettivisayasaṁvattanikaṁ.
an8.40:2.2	Yo sabbalahuso adinnādānassa vipāko, manussabhūtassa bhogabyasanasaṁvattaniko hoti.
an8.40:3.1	Kāmesumicchācāro, bhikkhave, āsevito bhāvito bahulīkato nirayasaṁvattaniko tiracchānayonisaṁvattaniko pettivisayasaṁvattaniko.
an8.40:3.2	Yo sabbalahuso kāmesumicchācārassa vipāko, manussabhūtassa sapattaverasaṁvattaniko hoti.
an8.40:4.1	Musāvādo, bhikkhave, āsevito bhāvito bahulīkato nirayasaṁvattaniko tiracchānayonisaṁvattaniko pettivisayasaṁvattaniko.
an8.40:4.2	Yo sabbalahuso musāvādassa vipāko, manussabhūtassa abhūtabbhakkhānasaṁvattaniko hoti.
an8.40:5.1	Pisuṇā, bhikkhave, vācā āsevitā bhāvitā bahulīkatā nirayasaṁvattanikā tiracchānayonisaṁvattanikā pettivisayasaṁvattanikā.
an8.40:5.2	Yo sabbalahuso pisuṇāya vācāya vipāko, manussabhūtassa mittehi bhedanasaṁvattaniko hoti.
an8.40:6.1	Pharusā, bhikkhave, vācā āsevitā bhāvitā bahulīkatā nirayasaṁvattanikā tiracchānayonisaṁvattanikā pettivisayasaṁvattanikā.
an8.40:6.2	Yo sabbalahuso pharusāya vācāya vipāko, manussabhūtassa amanāpasaddasaṁvattaniko hoti.
an8.40:7.1	Samphappalāpo, bhikkhave, āsevito bhāvito bahulīkato nirayasaṁvattaniko tiracchānayonisaṁvattaniko pettivisayasaṁvattaniko.
an8.40:7.2	Yo sabbalahuso samphappalāpassa vipāko, manussabhūtassa anādeyyavācāsaṁvattaniko hoti.
an8.40:8.1	Surāmerayapānaṁ, bhikkhave, āsevitaṁ bhāvitaṁ bahulīkataṁ nirayasaṁvattanikaṁ tiracchānayonisaṁvattanikaṁ pettivisayasaṁvattanikaṁ.
an8.40:8.2	Yo sabbalahuso surāmerayapānassa vipāko, manussabhūtassa ummattakasaṁvattaniko hotī”ti.
an8.40:8.3	Dasamaṁ.
an8.40:8.4	Dānavaggo catuttho.
an8.40:9.0	Tassuddānaṁ
an8.40:9.1	Dve dānāni vatthuñca,
an8.40:9.2	khettaṁ dānūpapattiyo;
an8.40:9.3	Kiriyaṁ dve sappurisā,
an8.40:9.4	abhisando vipāko cāti.
an8.41:0.1	Aṅguttara Nikāya 8.41
an8.41:0.2	5. Uposathavagga
an8.41:0.3	Saṅkhittūposathasutta
an8.41:1.1	Evaṁ me sutaṁ—
an8.41:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an8.41:1.3	Tatra kho bhagavā bhikkhū āmantesi:
an8.41:1.4	“bhikkhavo”ti.
an8.41:1.5	“Bhadante”ti te bhikkhū bhagavato paccassosuṁ.
an8.41:1.6	Bhagavā etadavoca:
an8.41:2.1	“Aṭṭhaṅgasamannāgato, bhikkhave, uposatho upavuttho mahapphalo hoti mahānisaṁso mahājutiko mahāvipphāro.
an8.41:2.2	Kathaṁ upavuttho ca, bhikkhave, aṭṭhaṅgasamannāgato uposatho mahapphalo hoti mahānisaṁso mahājutiko mahāvipphāro?
an8.41:2.3	Idha, bhikkhave, ariyasāvako iti paṭisañcikkhati:
an8.41:2.4	‘yāvajīvaṁ arahanto pāṇātipātaṁ pahāya pāṇātipātā paṭiviratā nihitadaṇḍā nihitasatthā lajjī dayāpannā, sabbapāṇabhūtahitānukampino viharanti.
an8.41:2.5	Ahampajja imañca rattiṁ imañca divasaṁ pāṇātipātaṁ pahāya pāṇātipātā paṭivirato nihitadaṇḍo nihitasattho lajjī dayāpanno, sabbapāṇabhūtahitānukampī viharāmi.
an8.41:2.6	Imināpaṅgena arahataṁ anukaromi, uposatho ca me upavuttho bhavissatī’ti.
an8.41:2.7	Iminā paṭhamena aṅgena samannāgato hoti.
an8.41:3.1	‘Yāvajīvaṁ arahanto adinnādānaṁ pahāya adinnādānā paṭiviratā dinnādāyī dinnapāṭikaṅkhī, athenena sucibhūtena attanā viharanti.
an8.41:3.2	Ahampajja imañca rattiṁ imañca divasaṁ adinnādānaṁ pahāya adinnādānā paṭivirato dinnādāyī dinnapāṭikaṅkhī, athenena sucibhūtena attanā viharāmi.
an8.41:3.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.41:3.4	Iminā dutiyena aṅgena samannāgato hoti.
an8.41:4.1	‘Yāvajīvaṁ arahanto abrahmacariyaṁ pahāya brahmacārino ārācārino viratā methunā gāmadhammā.
an8.41:4.2	Ahampajja imañca rattiṁ imañca divasaṁ abrahmacariyaṁ pahāya brahmacārī ārācārī virato methunā gāmadhammā.
an8.41:4.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.41:4.4	Iminā tatiyena aṅgena samannāgato hoti.
an8.41:5.1	‘Yāvajīvaṁ arahanto musāvādaṁ pahāya musāvādā paṭiviratā saccavādino saccasandhā thetā paccayikā avisaṁvādako lokassa.
an8.41:5.2	Ahampajja imañca rattiṁ imañca divasaṁ musāvādaṁ pahāya musāvādā paṭivirato saccavādī saccasandho theto paccayiko avisaṁvādako lokassa.
an8.41:5.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.41:5.4	Iminā catutthena aṅgena samannāgato hoti.
an8.41:6.1	‘Yāvajīvaṁ arahanto surāmerayamajjapamādaṭṭhānaṁ pahāya surāmerayamajjapamādaṭṭhānā paṭiviratā.
an8.41:6.2	Ahampajja imañca rattiṁ imañca divasaṁ surāmerayamajjapamādaṭṭhānaṁ pahāya surāmerayamajjapamādaṭṭhānā paṭivirato.
an8.41:6.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.41:6.4	Iminā pañcamena aṅgena samannāgato hoti.
an8.41:7.1	‘Yāvajīvaṁ arahanto ekabhattikā rattūparatā viratā vikālabhojanā.
an8.41:7.2	Ahampajja imañca rattiṁ imañca divasaṁ ekabhattiko rattūparato virato vikālabhojanā.
an8.41:7.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.41:7.4	Iminā chaṭṭhena aṅgena samannāgato hoti.
an8.41:8.1	‘Yāvajīvaṁ arahanto naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānaṁ pahāya naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānā paṭiviratā.
an8.41:8.2	Ahampajja imañca rattiṁ imañca divasaṁ naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānaṁ pahāya naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānā paṭivirato.
an8.41:8.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.41:8.4	Iminā sattamena aṅgena samannāgato hoti.
an8.41:9.1	‘Yāvajīvaṁ arahanto uccāsayanamahāsayanaṁ pahāya uccāsayanamahāsayanā paṭiviratā nīcaseyyaṁ kappenti—mañcake vā tiṇasanthārake vā.
an8.41:9.2	Ahampajja imañca rattiṁ imañca divasaṁ uccāsayanamahāsayanaṁ pahāya uccāsayanamahāsayanā paṭivirato nīcaseyyaṁ kappemi—mañcake vā tiṇasanthārake vā.
an8.41:9.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.41:9.4	Iminā aṭṭhamena aṅgena samannāgato hoti.
an8.41:10.1	Evaṁ upavuttho kho, bhikkhave, aṭṭhaṅgasamannāgato uposatho mahapphalo hoti mahānisaṁso mahājutiko mahāvipphāro”ti.
an8.41:10.2	Paṭhamaṁ.
an8.42:0.1	Aṅguttara Nikāya 8.42
an8.42:0.2	5. Uposathavagga
an8.42:0.3	Vitthatūposathasutta
an8.42:1.1	“Aṭṭhaṅgasamannāgato, bhikkhave, uposatho upavuttho mahapphalo hoti mahānisaṁso mahājutiko mahāvipphāro.
an8.42:1.2	Kathaṁ upavuttho ca, bhikkhave, aṭṭhaṅgasamannāgato uposatho mahapphalo hoti mahānisaṁso mahājutiko mahāvipphāro?
an8.42:1.3	Idha, bhikkhave, ariyasāvako iti paṭisañcikkhati:
an8.42:1.4	‘yāvajīvaṁ arahanto pāṇātipātaṁ pahāya pāṇātipātā paṭiviratā nihitadaṇḍā nihitasatthā lajjī dayāpannā, sabbapāṇabhūtahitānukampino viharanti.
an8.42:1.5	Ahampajja imañca rattiṁ imañca divasaṁ pāṇātipātaṁ pahāya pāṇātipātā paṭivirato nihitadaṇḍo nihitasattho lajjī dayāpanno, sabbapāṇabhūtahitānukampī viharāmi.
an8.42:1.6	Imināpaṅgena arahataṁ anukaromi, uposatho ca me upavuttho bhavissatī’ti.
an8.42:1.7	Iminā paṭhamena aṅgena samannāgato hoti …pe….
an8.42:2.1	‘Yāvajīvaṁ arahanto uccāsayanamahāsayanaṁ pahāya uccāsayanamahāsayanā paṭiviratā nīcaseyyaṁ kappenti—mañcake vā tiṇasanthārake vā.
an8.42:2.2	Ahampajja imañca rattiṁ imañca divasaṁ uccāsayanamahāsayanaṁ pahāya uccāsayanamahāsayanā paṭivirato nīcaseyyaṁ kappemi—mañcake vā tiṇasanthārake vā.
an8.42:2.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.42:2.4	Iminā aṭṭhamena aṅgena samannāgato hoti.
an8.42:2.5	Evaṁ upavuttho kho, bhikkhave, aṭṭhaṅgasamannāgato uposatho mahapphalo hoti mahānisaṁso mahājutiko mahāvipphāro.
an8.42:3.1	Kīvamahapphalo hoti kīvamahānisaṁso kīvamahājutiko kīvamahāvipphāro?
an8.42:3.2	Seyyathāpi, bhikkhave, yo imesaṁ soḷasannaṁ mahājanapadānaṁ pahūtarattaratanānaṁ issariyādhipaccaṁ rajjaṁ kāreyya, seyyathidaṁ—
an8.42:3.3	aṅgānaṁ magadhānaṁ kāsīnaṁ kosalānaṁ vajjīnaṁ mallānaṁ cetīnaṁ vaṅgānaṁ kurūnaṁ pañcālānaṁ macchānaṁ sūrasenānaṁ assakānaṁ avantīnaṁ gandhārānaṁ kambojānaṁ, aṭṭhaṅgasamannāgatassa uposathassa etaṁ kalaṁ nāgghati soḷasiṁ.
an8.42:3.4	Taṁ kissa hetu?
an8.42:3.5	Kapaṇaṁ, bhikkhave, mānusakaṁ rajjaṁ dibbaṁ sukhaṁ upanidhāya.
an8.42:4.1	Yāni, bhikkhave, mānusakāni paññāsa vassāni, cātumahārājikānaṁ devānaṁ eso eko rattindivo.
an8.42:4.2	Tāya rattiyā tiṁsarattiyo māso.
an8.42:4.3	Tena māsena dvādasamāsiyo saṁvaccharo.
an8.42:4.4	Tena saṁvaccharena dibbāni pañca vassasatāni cātumahārājikānaṁ devānaṁ āyuppamāṇaṁ.
an8.42:4.5	Ṭhānaṁ kho panetaṁ, bhikkhave, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā cātumahārājikānaṁ devānaṁ sahabyataṁ upapajjeyya.
an8.42:4.6	Idaṁ kho panetaṁ, bhikkhave, sandhāya bhāsitaṁ:
an8.42:4.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an8.42:5.1	Yāni, bhikkhave, mānusakāni vassasatāni, tāvatiṁsānaṁ devānaṁ eso eko rattindivo.
an8.42:5.2	Tāya rattiyā tiṁsarattiyo māso.
an8.42:5.3	Tena māsena dvādasamāsiyo saṁvaccharo.
an8.42:5.4	Tena saṁvaccharena dibbaṁ vassasahassaṁ tāvatiṁsānaṁ devānaṁ āyuppamāṇaṁ.
an8.42:5.5	Ṭhānaṁ kho panetaṁ, bhikkhave, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā tāvatiṁsānaṁ devānaṁ sahabyataṁ upapajjeyya.
an8.42:5.6	Idaṁ kho panetaṁ, bhikkhave, sandhāya bhāsitaṁ:
an8.42:5.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an8.42:6.1	Yāni, bhikkhave, mānusakāni dve vassasatāni, yāmānaṁ devānaṁ eso eko rattindivo.
an8.42:6.2	Tāya rattiyā tiṁsarattiyo māso.
an8.42:6.3	Tena māsena dvādasamāsiyo saṁvaccharo.
an8.42:6.4	Tena saṁvaccharena dibbāni dve vassasahassāni yāmānaṁ devānaṁ āyuppamāṇaṁ.
an8.42:6.5	Ṭhānaṁ kho panetaṁ, bhikkhave, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā yāmānaṁ devānaṁ sahabyataṁ upapajjeyya.
an8.42:6.6	Idaṁ kho panetaṁ, bhikkhave, sandhāya bhāsitaṁ:
an8.42:6.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an8.42:7.1	Yāni, bhikkhave, mānusakāni cattāri vassasatāni, tusitānaṁ devānaṁ eso eko rattindivo.
an8.42:7.2	Tāya rattiyā tiṁsarattiyo māso.
an8.42:7.3	Tena māsena dvādasamāsiyo saṁvaccharo.
an8.42:7.4	Tena saṁvaccharena dibbāni cattāri vassasahassāni tusitānaṁ devānaṁ āyuppamāṇaṁ.
an8.42:7.5	Ṭhānaṁ kho panetaṁ, bhikkhave, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā tusitānaṁ devānaṁ sahabyataṁ upapajjeyya.
an8.42:7.6	Idaṁ kho panetaṁ, bhikkhave, sandhāya bhāsitaṁ:
an8.42:7.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an8.42:8.1	Yāni, bhikkhave, mānusakāni aṭṭha vassasatāni, nimmānaratīnaṁ devānaṁ eso eko rattindivo.
an8.42:8.2	Tāya rattiyā tiṁsarattiyo māso.
an8.42:8.3	Tena māsena dvādasamāsiyo saṁvaccharo.
an8.42:8.4	Tena saṁvaccharena dibbāni aṭṭha vassasahassāni nimmānaratīnaṁ devānaṁ āyuppamāṇaṁ.
an8.42:8.5	Ṭhānaṁ kho panetaṁ, bhikkhave, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā nimmānaratīnaṁ devānaṁ sahabyataṁ upapajjeyya.
an8.42:8.6	Idaṁ kho panetaṁ, bhikkhave, sandhāya bhāsitaṁ:
an8.42:8.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an8.42:9.1	Yāni, bhikkhave, mānusakāni soḷasa vassasatāni, paranimmitavasavattīnaṁ devānaṁ eso eko rattindivo.
an8.42:9.2	Tāya rattiyā tiṁsarattiyo māso.
an8.42:9.3	Tena māsena dvādasamāsiyo saṁvaccharo.
an8.42:9.4	Tena saṁvaccharena dibbāni soḷasa vassasahassāni paranimmitavasavattīnaṁ devānaṁ āyuppamāṇaṁ.
an8.42:9.5	Ṭhānaṁ kho panetaṁ, bhikkhave, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā paranimmitavasavattīnaṁ devānaṁ sahabyataṁ upapajjeyya.
an8.42:9.6	Idaṁ kho panetaṁ, bhikkhave, sandhāya bhāsitaṁ:
an8.42:9.7	‘kapaṇaṁ mānusakaṁ rajjaṁ dibbaṁ sukhaṁ upanidhāyā’ti.
an8.42:10.1	Pāṇaṁ na haññe na cadinnamādiye,
an8.42:10.2	Musā na bhāse na ca majjapo siyā;
an8.42:10.3	Abrahmacariyā virameyya methunā,
an8.42:10.4	Rattiṁ na bhuñjeyya vikālabhojanaṁ.
an8.42:11.1	Mālaṁ na dhāre na ca gandhamācare,
an8.42:11.2	Mañce chamāyaṁ va sayetha santhate;
an8.42:11.3	Etañhi aṭṭhaṅgikamāhuposathaṁ,
an8.42:11.4	Buddhena dukkhantagunā pakāsitaṁ.
an8.42:12.1	Cando ca suriyo ca ubho sudassanā,
an8.42:12.2	Obhāsayaṁ anupariyanti yāvatā;
an8.42:12.3	Tamonudā te pana antalikkhagā,
an8.42:12.4	Nabhe pabhāsanti disāvirocanā.
an8.42:13.1	Etasmiṁ yaṁ vijjati antare dhanaṁ,
an8.42:13.2	Muttā maṇi veḷuriyañca bhaddakaṁ;
an8.42:13.3	Siṅgīsuvaṇṇaṁ atha vāpi kañcanaṁ,
an8.42:13.4	Yaṁ jātarūpaṁ haṭakanti vuccati.
an8.42:14.1	Aṭṭhaṅgupetassa uposathassa,
an8.42:14.2	Kalampi te nānubhavanti soḷasiṁ;
an8.42:14.3	Candappabhā tāragaṇā ca sabbe.
an8.42:15.1	Tasmā hi nārī ca naro ca sīlavā,
an8.42:15.2	Aṭṭhaṅgupetaṁ upavassuposathaṁ;
an8.42:15.3	Puññāni katvāna sukhudrayāni,
an8.42:15.4	Aninditā saggamupenti ṭhānan”ti.
an8.42:15.5	Dutiyaṁ.
an8.43:0.1	Aṅguttara Nikāya 8.43
an8.43:0.2	5. Uposathavagga
an8.43:0.3	Visākhāsutta
an8.43:1.1	Ekaṁ samayaṁ bhagavā sāvatthiyaṁ viharati pubbārāme migāramātupāsāde.
an8.43:1.2	Atha kho visākhā migāramātā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho visākhaṁ migāramātaraṁ bhagavā etadavoca:
an8.43:1.3	“aṭṭhaṅgasamannāgato kho, visākhe, uposatho upavuttho mahapphalo hoti mahānisaṁso mahājutiko mahāvipphāro.
an8.43:1.4	Kathaṁ upavuttho ca, visākhe, aṭṭhaṅgasamannāgato uposatho mahapphalo hoti mahānisaṁso mahājutiko mahāvipphāro?
an8.43:1.5	Idha, visākhe, ariyasāvako iti paṭisañcikkhati:
an8.43:1.6	‘yāvajīvaṁ arahanto pāṇātipātaṁ pahāya pāṇātipātā paṭiviratā nihitadaṇḍā nihitasatthā lajjī dayāpannā, sabbapāṇabhūtahitānukampino viharanti.
an8.43:1.7	Ahampajja imañca rattiṁ imañca divasaṁ pāṇātipātaṁ pahāya pāṇātipātā paṭivirato nihitadaṇḍo nihitasattho lajjī dayāpanno, sabbapāṇabhūtahitānukampī viharāmi.
an8.43:1.8	Imināpaṅgena arahataṁ anukaromi, uposatho ca me upavuttho bhavissatī’ti.
an8.43:1.9	Iminā paṭhamena aṅgena samannāgato hoti …pe….
an8.43:2.1	‘Yāvajīvaṁ arahanto uccāsayanamahāsayanaṁ pahāya uccāsayanamahāsayanā paṭiviratā nīcaseyyaṁ kappenti—mañcake vā tiṇasanthārake vā.
an8.43:2.2	Ahampajja imañca rattiṁ imañca divasaṁ uccāsayanamahāsayanaṁ pahāya uccāsayanamahāsayanā paṭivirato nīcaseyyaṁ kappemi—mañcake vā tiṇasanthārake vā.
an8.43:2.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.43:2.4	Iminā aṭṭhamena aṅgena samannāgato hoti.
an8.43:2.5	Evaṁ upavuttho kho, visākhe, aṭṭhaṅgasamannāgato uposatho mahapphalo hoti mahānisaṁso mahājutiko mahāvipphāro.
an8.43:3.1	Kīvamahapphalo hoti, kīvamahānisaṁso, kīvamahājutiko, kīvamahāvipphāro?
an8.43:3.2	Seyyathāpi, visākhe, yo imesaṁ soḷasannaṁ mahājanapadānaṁ pahūtarattaratanānaṁ issariyādhipaccaṁ rajjaṁ kāreyya, seyyathidaṁ—
an8.43:3.3	aṅgānaṁ magadhānaṁ kāsīnaṁ kosalānaṁ vajjīnaṁ mallānaṁ cetīnaṁ vaṅgānaṁ kurūnaṁ pañcālānaṁ macchānaṁ sūrasenānaṁ assakānaṁ avantīnaṁ gandhārānaṁ kambojānaṁ, aṭṭhaṅgasamannāgatassa uposathassa etaṁ kalaṁ nāgghati soḷasiṁ.
an8.43:3.4	Taṁ kissa hetu?
an8.43:3.5	Kapaṇaṁ, visākhe, mānusakaṁ rajjaṁ dibbaṁ sukhaṁ upanidhāya.
an8.43:4.1	Yāni, visākhe, mānusakāni paññāsa vassāni, cātumahārājikānaṁ devānaṁ eso eko rattindivo.
an8.43:4.2	Tāya rattiyā tiṁsarattiyo māso.
an8.43:4.3	Tena māsena dvādasamāsiyo saṁvaccharo.
an8.43:4.4	Tena saṁvaccharena dibbāni pañca vassasatāni cātumahārājikānaṁ devānaṁ āyuppamāṇaṁ.
an8.43:4.5	Ṭhānaṁ kho panetaṁ, visākhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā cātumahārājikānaṁ devānaṁ sahabyataṁ upapajjeyya.
an8.43:4.6	Idaṁ kho panetaṁ, visākhe, sandhāya bhāsitaṁ:
an8.43:4.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an8.43:5.1	Yaṁ, visākhe, mānusakaṁ vassasataṁ, tāvatiṁsānaṁ devānaṁ eso eko rattindivo.
an8.43:5.2	Tāya rattiyā tiṁsarattiyo māso.
an8.43:5.3	Tena māsena dvādasamāsiyo saṁvaccharo.
an8.43:5.4	Tena saṁvaccharena vassasahassaṁ tāvatiṁsānaṁ devānaṁ āyuppamāṇaṁ.
an8.43:5.5	Ṭhānaṁ kho panetaṁ, visākhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā tāvatiṁsānaṁ devānaṁ sahabyataṁ upapajjeyya.
an8.43:5.6	Idaṁ kho panetaṁ, visākhe, sandhāya bhāsitaṁ:
an8.43:5.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an8.43:6.1	Yāni, visākhe, mānusakāni dve vassasatāni …pe…
an8.43:6.2	cattāri vassasatāni …pe…
an8.43:6.3	aṭṭha vassasatāni …pe…
an8.43:6.4	soḷasa vassasatāni paranimmitavasavattīnaṁ devānaṁ eso eko rattindivo.
an8.43:6.5	Tāya rattiyā tiṁsarattiyo māso.
an8.43:6.6	Tena māsena dvādasamāsiyo saṁvaccharo.
an8.43:6.7	Tena saṁvaccharena dibbāni soḷasa vassasahassāni paranimmitavasavattīnaṁ devānaṁ āyuppamāṇaṁ.
an8.43:6.8	Ṭhānaṁ kho panetaṁ, visākhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā paranimmitavasavattīnaṁ devānaṁ sahabyataṁ upapajjeyya.
an8.43:6.9	Idaṁ kho panetaṁ, visākhe, sandhāya bhāsitaṁ:
an8.43:6.10	‘kapaṇaṁ mānusakaṁ rajjaṁ dibbaṁ sukhaṁ upanidhāyā’ti.
an8.43:7.1	Pāṇaṁ na haññe na cadinnamādiye,
an8.43:7.2	Musā na bhāse na ca majjapo siyā;
an8.43:7.3	Abrahmacariyā virameyya methunā,
an8.43:7.4	Rattiṁ na bhuñjeyya vikālabhojanaṁ.
an8.43:8.1	Mālaṁ na dhāre na ca gandhamācare,
an8.43:8.2	Mañce chamāyaṁ va sayetha santhate;
an8.43:8.3	Etañhi aṭṭhaṅgikamāhuposathaṁ,
an8.43:8.4	Buddhena dukkhantagunā pakāsitaṁ.
an8.43:9.1	Cando ca suriyo ca ubho sudassanā,
an8.43:9.2	Obhāsayaṁ anupariyanti yāvatā;
an8.43:9.3	Tamonudā te pana antalikkhagā,
an8.43:9.4	Nabhe pabhāsanti disāvirocanā.
an8.43:10.1	Etasmiṁ yaṁ vijjati antare dhanaṁ,
an8.43:10.2	Muttā maṇi veḷuriyañca bhaddakaṁ;
an8.43:10.3	Siṅgīsuvaṇṇaṁ atha vāpi kañcanaṁ,
an8.43:10.4	Yaṁ jātarūpaṁ haṭakanti vuccati.
an8.43:11.1	Aṭṭhaṅgupetassa uposathassa,
an8.43:11.2	Kalampi te nānubhavanti soḷasiṁ;
an8.43:11.3	Candappabhā tāragaṇā ca sabbe.
an8.43:12.1	Tasmā hi nārī ca naro ca sīlavā,
an8.43:12.2	Aṭṭhaṅgupetaṁ upavassuposathaṁ;
an8.43:12.3	Puññāni katvāna sukhudrayāni,
an8.43:12.4	Aninditā saggamupenti ṭhānan”ti.
an8.43:12.5	Tatiyaṁ.
an8.44:0.1	Aṅguttara Nikāya 8.44
an8.44:0.2	5. Uposathavagga
an8.44:0.3	Vāseṭṭhasutta
an8.44:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an8.44:1.2	Atha kho vāseṭṭho upāsako yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho vāseṭṭhaṁ upāsakaṁ bhagavā etadavoca:
an8.44:1.3	“aṭṭhaṅgasamannāgato, vāseṭṭha, uposatho upavuttho mahapphalo hoti …pe…
an8.44:1.4	aninditā saggamupenti ṭhānan”ti.
an8.44:2.1	Evaṁ vutte, vāseṭṭho upāsako bhagavantaṁ etadavoca:
an8.44:2.2	“piyā me, bhante, ñātisālohitā aṭṭhaṅgasamannāgataṁ uposathaṁ upavaseyyuṁ, piyānampi me assa ñātisālohitānaṁ dīgharattaṁ hitāya sukhāya.
an8.44:2.3	Sabbe cepi, bhante, khattiyā aṭṭhaṅgasamannāgataṁ uposathaṁ upavaseyyuṁ, sabbesampissa khattiyānaṁ dīgharattaṁ hitāya sukhāya. Sabbe cepi, bhante, brāhmaṇā …pe… vessā … suddā aṭṭhaṅgasamannāgataṁ uposathaṁ upavaseyyuṁ, sabbesampissa suddānaṁ dīgharattaṁ hitāya sukhāyā”ti.
an8.44:3.1	“Evametaṁ, vāseṭṭha, evametaṁ, vāseṭṭha.
an8.44:3.2	Sabbe cepi, vāseṭṭha, khattiyā aṭṭhaṅgasamannāgataṁ uposathaṁ upavaseyyuṁ, sabbesampissa khattiyānaṁ dīgharattaṁ hitāya sukhāya. Sabbe cepi, vāseṭṭha, brāhmaṇā …pe… vessā … suddā aṭṭhaṅgasamannāgataṁ uposathaṁ upavaseyyuṁ, sabbesampissa suddānaṁ dīgharattaṁ hitāya sukhāya.
an8.44:3.3	Sadevako cepi, vāseṭṭha, loko samārako sabrahmako sassamaṇabrāhmaṇī pajā sadevamanussā aṭṭhaṅgasamannāgataṁ uposathaṁ upavaseyyuṁ, sadevakassapissa lokassa samārakassa sabrahmakassa sassamaṇabrāhmaṇiyā pajāya sadevamanussāya dīgharattaṁ hitāya sukhāya.
an8.44:3.4	Ime cepi, vāseṭṭha, mahāsālā aṭṭhaṅgasamannāgataṁ uposathaṁ upavaseyyuṁ, imesampissa mahāsālānaṁ dīgharattaṁ hitāya sukhāya (…).
an8.44:3.5	Ko pana vādo manussabhūtassā”ti.
an8.44:3.6	Catutthaṁ.
an8.45:0.1	Aṅguttara Nikāya 8.45
an8.45:0.2	5. Uposathavagga
an8.45:0.3	Bojjhasutta
an8.45:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an8.45:1.2	Atha kho bojjhā upāsikā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho bojjhaṁ upāsikaṁ bhagavā etadavoca:
an8.45:2.1	“Aṭṭhaṅgasamannāgato, bojjhe, uposatho upavuttho mahapphalo hoti mahānisaṁso mahājutiko mahāvipphāro.
an8.45:2.2	Kathaṁ upavuttho ca, bojjhe, aṭṭhaṅgasamannāgato uposatho mahapphalo hoti mahānisaṁso mahājutiko mahāvipphāro?
an8.45:2.3	Idha, bojjhe, ariyasāvako iti paṭisañcikkhati:
an8.45:2.4	‘yāvajīvaṁ arahanto pāṇātipātaṁ pahāya pāṇātipātā paṭiviratā nihitadaṇḍā nihitasatthā lajjī dayāpannā sabbapāṇabhūtahitānukampino viharanti.
an8.45:2.5	Ahampajja imañca rattiṁ imañca divasaṁ pāṇātipātaṁ pahāya pāṇātipātā paṭivirato nihitadaṇḍo nihitasattho lajjī dayāpanno, sabbapāṇabhūtahitānukampī viharāmi.
an8.45:2.6	Imināpaṅgena arahataṁ anukaromi, uposatho ca me upavuttho bhavissatī’ti.
an8.45:2.7	Iminā paṭhamena aṅgena samannāgato hoti …pe….
an8.45:3.1	‘Yāvajīvaṁ arahanto uccāsayanamahāsayanaṁ pahāya uccāsayanamahāsayanā paṭiviratā nīcaseyyaṁ kappenti—mañcake vā tiṇasanthārake vā.
an8.45:3.2	Ahampajja imañca rattiṁ imañca divasaṁ uccāsayanamahāsayanaṁ pahāya uccāsayanamahāsayanā paṭivirato nīcaseyyaṁ kappemi—mañcake vā tiṇasanthārake vā.
an8.45:3.3	Imināpaṅgena arahataṁ anukaromi, uposatho ca me upavuttho bhavissatī’ti.
an8.45:3.4	Iminā aṭṭhamena aṅgena samannāgato hoti.
an8.45:3.5	Evaṁ upavuttho kho, bojjhe, aṭṭhaṅgasamannāgato uposatho mahapphalo hoti mahānisaṁso mahājutiko mahāvipphāro.
an8.45:4.1	Kīvamahapphalo hoti, kīvamahānisaṁso, kīvamahājutiko, kīvamahāvipphāro?
an8.45:4.2	Seyyathāpi, bojjhe, yo imesaṁ soḷasannaṁ mahājanapadānaṁ pahūtarattaratanānaṁ issariyādhipaccaṁ rajjaṁ kāreyya, seyyathidaṁ—
an8.45:4.3	aṅgānaṁ magadhānaṁ kāsīnaṁ kosalānaṁ vajjīnaṁ mallānaṁ cetīnaṁ vaṅgānaṁ kurūnaṁ pañcālānaṁ macchānaṁ sūrasenānaṁ assakānaṁ avantīnaṁ gandhārānaṁ kambojānaṁ, aṭṭhaṅgasamannāgatassa uposathassa etaṁ kalaṁ nāgghati soḷasiṁ.
an8.45:4.4	Taṁ kissa hetu?
an8.45:4.5	Kapaṇaṁ, bojjhe, mānusakaṁ rajjaṁ dibbaṁ sukhaṁ upanidhāya.
an8.45:5.1	Yāni, bojjhe, mānusakāni paññāsa vassāni, cātumahārājikānaṁ devānaṁ eso eko rattindivo.
an8.45:5.2	Tāya rattiyā tiṁsarattiyo māso.
an8.45:5.3	Tena māsena dvādasamāsiyo saṁvaccharo.
an8.45:5.4	Tena saṁvaccharena dibbāni pañca vassasatāni cātumahārājikānaṁ devānaṁ āyuppamāṇaṁ.
an8.45:5.5	Ṭhānaṁ kho panetaṁ, bojjhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā cātumahārājikānaṁ devānaṁ sahabyataṁ upapajjeyya.
an8.45:5.6	Idaṁ kho panetaṁ, bojjhe, sandhāya bhāsitaṁ:
an8.45:5.7	‘kapaṇaṁ mānusakaṁ rajjaṁ dibbaṁ sukhaṁ upanidhāya’.
an8.45:6.1	Yaṁ, bojjhe, mānusakaṁ vassasataṁ …pe…
an8.45:6.2	tāni, bojjhe, mānusakāni dve vassasatāni …pe…
an8.45:6.3	cattāri vassasatāni …pe…
an8.45:6.4	aṭṭha vassasatāni …pe…
an8.45:6.5	soḷasa vassasatāni paranimmitavasavattīnaṁ devānaṁ eso eko rattindivo.
an8.45:6.6	Tāya rattiyā tiṁsarattiyo māso.
an8.45:6.7	Tena māsena dvādasamāsiyo saṁvaccharo.
an8.45:6.8	Tena saṁvaccharena dibbāni soḷasa vassasahassāni paranimmitavasavattīnaṁ devānaṁ āyuppamāṇaṁ.
an8.45:6.9	Ṭhānaṁ kho panetaṁ, bojjhe, vijjati yaṁ idhekacco itthī vā puriso vā aṭṭhaṅgasamannāgataṁ uposathaṁ upavasitvā kāyassa bhedā paraṁ maraṇā paranimmitavasavattīnaṁ devānaṁ sahabyataṁ upapajjeyya.
an8.45:6.10	Idaṁ kho panetaṁ, bojjhe, sandhāya bhāsitaṁ:
an8.45:6.11	‘kapaṇaṁ mānusakaṁ rajjaṁ dibbaṁ sukhaṁ upanidhāyā’ti.
an8.45:7.1	Pāṇaṁ na haññe na cadinnamādiye,
an8.45:7.2	Musā na bhāse na ca majjapo siyā;
an8.45:7.3	Abrahmacariyā virameyya methunā,
an8.45:7.4	Rattiṁ na bhuñjeyya vikālabhojanaṁ.
an8.45:8.1	Mālaṁ na dhāre na ca gandhamācare,
an8.45:8.2	Mañce chamāyaṁ va sayetha santhate;
an8.45:8.3	Etañhi aṭṭhaṅgikamāhuposathaṁ,
an8.45:8.4	Buddhena dukkhantagunā pakāsitaṁ.
an8.45:9.1	Cando ca suriyo ca ubho sudassanā,
an8.45:9.2	Obhāsayaṁ anupariyanti yāvatā;
an8.45:9.3	Tamonudā te pana antalikkhagā,
an8.45:9.4	Nabhe pabhāsanti disāvirocanā.
an8.45:10.1	Etasmiṁ yaṁ vijjati antare dhanaṁ,
an8.45:10.2	Muttā maṇi veḷuriyañca bhaddakaṁ;
an8.45:10.3	Siṅgīsuvaṇṇaṁ atha vāpi kañcanaṁ,
an8.45:10.4	Yaṁ jātarūpaṁ haṭakanti vuccati.
an8.45:11.1	Aṭṭhaṅgupetassa uposathassa,
an8.45:11.2	Kalampi te nānubhavanti soḷasiṁ;
an8.45:11.3	Candappabhā tāragaṇā ca sabbe.
an8.45:12.1	Tasmā hi nārī ca naro ca sīlavā,
an8.45:12.2	Aṭṭhaṅgupetaṁ upavassuposathaṁ;
an8.45:12.3	Puññāni katvāna sukhudrayāni,
an8.45:12.4	Aninditā saggamupenti ṭhānan”ti.
an8.45:12.5	Pañcamaṁ.
an8.46:0.1	Aṅguttara Nikāya 8.46
an8.46:0.2	5. Uposathavagga
an8.46:0.3	Anuruddhasutta
an8.46:1.1	Ekaṁ samayaṁ bhagavā kosambiyaṁ viharati ghositārāme.
an8.46:1.2	Tena kho pana samayena āyasmā anuruddho divāvihāraṁ gato hoti paṭisallīno.
an8.46:1.3	Atha kho sambahulā manāpakāyikā devatā yenāyasmā anuruddho tenupasaṅkamiṁsu; upasaṅkamitvā āyasmantaṁ anuruddhaṁ abhivādetvā ekamantaṁ aṭṭhaṁsu. Ekamantaṁ ṭhitā kho tā devatā āyasmantaṁ anuruddhaṁ etadavocuṁ:
an8.46:1.4	“mayaṁ, bhante anuruddha, manāpakāyikā nāma devatā tīsu ṭhānesu issariyaṁ kārema vasaṁ vattema.
an8.46:1.5	Mayaṁ, bhante anuruddha, yādisakaṁ vaṇṇaṁ ākaṅkhāma tādisakaṁ vaṇṇaṁ ṭhānaso paṭilabhāma;
an8.46:1.6	yādisakaṁ saraṁ ākaṅkhāma tādisakaṁ saraṁ ṭhānaso paṭilabhāma;
an8.46:1.7	yādisakaṁ sukhaṁ ākaṅkhāma tādisakaṁ sukhaṁ ṭhānaso paṭilabhāma.
an8.46:1.8	Mayaṁ, bhante anuruddha, manāpakāyikā nāma devatā imesu tīsu ṭhānesu issariyaṁ kārema vasaṁ vattemā”ti.
an8.46:2.1	Atha kho āyasmato anuruddhassa etadahosi:
an8.46:2.2	“aho vatimā devatā sabbāva nīlā assu nīlavaṇṇā nīlavatthā nīlālaṅkārā”ti.
an8.46:2.3	Atha kho tā devatā āyasmato anuruddhassa cittamaññāya sabbāva nīlā ahesuṁ nīlavaṇṇā nīlavatthā nīlālaṅkārā.
an8.46:3.1	Atha kho āyasmato anuruddhassa etadahosi:
an8.46:3.2	“aho vatimā devatā sabbāva pītā assu …pe…
an8.46:3.3	sabbāva lohitakā assu …
an8.46:3.4	sabbāva odātā assu odātavaṇṇā odātavatthā odātālaṅkārā”ti.
an8.46:3.5	Atha kho tā devatā āyasmato anuruddhassa cittamaññāya sabbāva odātā ahesuṁ odātavaṇṇā odātavatthā odātālaṅkārā.
an8.46:4.1	Atha kho tā devatā ekā ca gāyi ekā ca nacci ekā ca accharaṁ vādesi.
an8.46:4.2	Seyyathāpi nāma pañcaṅgikassa tūriyassa suvinītassa suppaṭipatāḷitassa kusalehi susamannāhatassa saddo hoti vaggu ca rajanīyo ca kamanīyo ca pemanīyo ca madanīyo ca;
an8.46:4.3	evamevaṁ tāsaṁ devatānaṁ alaṅkārānaṁ saddo hoti vaggu ca rajanīyo ca kamanīyo ca pemanīyo ca madanīyo ca.
an8.46:4.4	Atha kho āyasmā anuruddho indriyāni okkhipi.
an8.46:5.1	Atha kho tā devatā “na khvayyo anuruddho sādiyatī”ti tatthevantaradhāyiṁsu.
an8.46:5.2	Atha kho āyasmā anuruddho sāyanhasamayaṁ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā anuruddho bhagavantaṁ etadavoca:
an8.46:6.1	“Idhāhaṁ, bhante, divāvihāraṁ gato homi paṭisallīno.
an8.46:6.2	Atha kho, bhante, sambahulā manāpakāyikā devatā yenāhaṁ tenupasaṅkamiṁsu; upasaṅkamitvā maṁ abhivādetvā ekamantaṁ aṭṭhaṁsu. Ekamantaṁ ṭhitā kho, bhante, tā devatā maṁ etadavocuṁ:
an8.46:6.3	‘mayaṁ, bhante anuruddha, manāpakāyikā nāma devatā tīsu ṭhānesu issariyaṁ kārema vasaṁ vattema.
an8.46:6.4	Mayaṁ, bhante anuruddha, yādisakaṁ vaṇṇaṁ ākaṅkhāma tādisakaṁ vaṇṇaṁ ṭhānaso paṭilabhāma;
an8.46:6.5	yādisakaṁ saraṁ ākaṅkhāma tādisakaṁ saraṁ ṭhānaso paṭilabhāma;
an8.46:6.6	yādisakaṁ sukhaṁ ākaṅkhāma tādisakaṁ sukhaṁ ṭhānaso paṭilabhāma.
an8.46:6.7	Mayaṁ, bhante anuruddha, manāpakāyikā nāma devatā imesu tīsu ṭhānesu issariyaṁ kārema vasaṁ vattemā’ti.
an8.46:6.8	Tassa mayhaṁ, bhante, etadahosi:
an8.46:6.9	‘aho vatimā devatā sabbāva nīlā assu nīlavaṇṇā nīlavatthā nīlālaṅkārā’ti.
an8.46:6.10	Atha kho, bhante, tā devatā mama cittamaññāya sabbāva nīlā ahesuṁ nīlavaṇṇā nīlavatthā nīlālaṅkārā.
an8.46:7.1	Tassa mayhaṁ, bhante, etadahosi:
an8.46:7.2	‘aho vatimā devatā sabbāva pītā assu …pe…
an8.46:7.3	sabbāva lohitakā assu …pe…
an8.46:7.4	sabbāva odātā assu odātavaṇṇā odātavatthā odātālaṅkārā’ti.
an8.46:7.5	Atha kho, bhante, tā devatā mama cittamaññāya sabbāva odātā ahesuṁ odātavaṇṇā odātavatthā odātālaṅkārā.
an8.46:8.1	Atha kho, bhante, tā devatā ekā ca gāyi ekā ca nacci ekā ca accharaṁ vādesi.
an8.46:8.2	Seyyathāpi nāma pañcaṅgikassa tūriyassa suvinītassa suppaṭipatāḷitassa kusalehi susamannāhatassa saddo hoti vaggu ca rajanīyo ca kamanīyo ca pemanīyo ca madanīyo ca;
an8.46:8.3	evamevaṁ tāsaṁ devatānaṁ alaṅkārānaṁ saddo hoti vaggu ca rajanīyo ca kamanīyo ca pemanīyo ca madanīyo ca.
an8.46:8.4	Atha khvāhaṁ, bhante, indriyāni okkhipi.
an8.46:9.1	Atha kho, bhante, tā devatā ‘na khvayyo anuruddho sādiyatī’ti tatthevantaradhāyiṁsu.
an8.46:9.2	Katihi nu kho, bhante, dhammehi samannāgato mātugāmo kāyassa bhedā paraṁ maraṇā manāpakāyikānaṁ devānaṁ sahabyataṁ upapajjatī”ti?
an8.46:10.1	“Aṭṭhahi kho, anuruddha, dhammehi samannāgato mātugāmo kāyassa bhedā paraṁ maraṇā manāpakāyikānaṁ devānaṁ sahabyataṁ upapajjati.
an8.46:10.2	Katamehi aṭṭhahi?
an8.46:10.3	Idha, anuruddha, mātugāmo yassa mātāpitaro bhattuno denti atthakāmā hitesino anukampakā anukampaṁ upādāya tassa hoti pubbuṭṭhāyinī pacchānipātinī kiṅkārapaṭissāvinī manāpacārinī piyavādinī.
an8.46:11.1	Ye te bhattu garuno honti—
an8.46:11.2	mātāti vā pitāti vā samaṇabrāhmaṇāti vā—
an8.46:11.3	te sakkaroti, garuṁ karoti, māneti, pūjeti, abbhāgate ca āsanodakena paṭipūjeti.
an8.46:12.1	Ye te bhattu abbhantarā kammantā—uṇṇāti vā kappāsāti vā—tattha dakkhā hoti analasā tatrupāyāya vīmaṁsāya samannāgatā alaṁ kātuṁ alaṁ saṁvidhātuṁ.
an8.46:13.1	Yo so bhattu abbhantaro antojano—dāsāti vā pessāti vā kammakarāti vā—
an8.46:13.2	tesaṁ katañca katato jānāti akatañca akatato jānāti, gilānakānañca balābalaṁ jānāti khādanīyaṁ bhojanīyañcassa paccaṁsena saṁvibhajati.
an8.46:14.1	Yaṁ bhattu āharati dhanaṁ vā dhaññaṁ vā jātarūpaṁ vā taṁ ārakkhena guttiyā sampādeti, tattha ca hoti adhuttī athenī asoṇḍī avināsikā.
an8.46:15.1	Upāsikā kho pana hoti buddhaṁ saraṇaṁ gatā dhammaṁ saraṇaṁ gatā saṅghaṁ saraṇaṁ gatā.
an8.46:16.1	Sīlavatī kho pana hoti—
an8.46:16.2	pāṇātipātā paṭiviratā, adinnādānā paṭiviratā, kāmesumicchācārā paṭiviratā, musāvādā paṭiviratā, surāmerayamajjapamādaṭṭhānā paṭiviratā.
an8.46:17.1	Cāgavatī kho pana hoti.
an8.46:17.2	Vigatamalamaccherena cetasā agāraṁ ajjhāvasati muttacāgā payatapāṇinī vossaggaratā yācayogā dānasaṁvibhāgaratā.
an8.46:18.1	Imehi kho, anuruddha, aṭṭhahi dhammehi samannāgato mātugāmo kāyassa bhedā paraṁ maraṇā manāpakāyikānaṁ devānaṁ sahabyataṁ upapajjatīti.
an8.46:19.1	Yo naṁ bharati sabbadā,
an8.46:19.2	niccaṁ ātāpi ussuko;
an8.46:19.3	Taṁ sabbakāmadaṁ posaṁ,
an8.46:19.4	bhattāraṁ nātimaññati.
an8.46:20.1	Na cāpi sotthi bhattāraṁ,
an8.46:20.2	issāvādena rosaye;
an8.46:20.3	Bhattu ca garuno sabbe,
an8.46:20.4	paṭipūjeti paṇḍitā.
an8.46:21.1	Uṭṭhāhikā analasā,
an8.46:21.2	saṅgahitaparijjanā;
an8.46:21.3	Bhattu manāpaṁ carati,
an8.46:21.4	sambhataṁ anurakkhati.
an8.46:22.1	Yā evaṁ vattati nārī,
an8.46:22.2	bhattu chandavasānugā;
an8.46:22.3	Manāpā nāma te devā,
an8.46:22.4	yattha sā upapajjatī”ti.
an8.46:22.5	Chaṭṭhaṁ.
an8.47:0.1	Aṅguttara Nikāya 8.47
an8.47:0.2	5. Uposathavagga
an8.47:0.3	Dutiyavisākhāsutta
an8.47:1.1	Ekaṁ samayaṁ bhagavā sāvatthiyaṁ viharati pubbārāme migāramātupāsāde.
an8.47:1.2	Atha kho visākhā migāramātā …pe…
an8.47:1.3	ekamantaṁ nisinnaṁ kho visākhaṁ migāramātaraṁ bhagavā etadavoca:
an8.47:2.1	“Aṭṭhahi kho, visākhe, dhammehi samannāgato mātugāmo kāyassa bhedā paraṁ maraṇā manāpakāyikānaṁ devānaṁ sahabyataṁ upapajjati.
an8.47:2.2	Katamehi aṭṭhahi?
an8.47:2.3	Idha, visākhe, mātugāmo yassa mātāpitaro bhattuno denti atthakāmā hitesino anukampakā anukampaṁ upādāya tassa hoti pubbuṭṭhāyinī pacchānipātinī kiṅkārapaṭissāvinī manāpacārinī piyavādinī …pe….
an8.47:3.1	Cāgavatī kho pana hoti.
an8.47:3.2	Vigatamalamaccherena cetasā agāraṁ ajjhāvasati muttacāgā payatapāṇinī vossaggaratā yācayogā dānasaṁvibhāgaratā.
an8.47:3.3	Imehi kho, visākhe, aṭṭhahi dhammehi samannāgato mātugāmo kāyassa bhedā paraṁ maraṇā manāpakāyikānaṁ devānaṁ sahabyataṁ upapajjatīti.
an8.47:4.1	Yo naṁ bharati sabbadā,
an8.47:4.2	niccaṁ ātāpi ussuko;
an8.47:4.3	Taṁ sabbakāmadaṁ posaṁ,
an8.47:4.4	bhattāraṁ nātimaññati.
an8.47:5.1	Na cāpi sotthi bhattāraṁ,
an8.47:5.2	issāvādena rosaye;
an8.47:5.3	Bhattu ca garuno sabbe,
an8.47:5.4	paṭipūjeti paṇḍitā.
an8.47:6.1	Uṭṭhāhikā analasā,
an8.47:6.2	saṅgahitaparijjanā;
an8.47:6.3	Bhattu manāpaṁ carati,
an8.47:6.4	sambhataṁ anurakkhati.
an8.47:7.1	Yā evaṁ vattati nārī,
an8.47:7.2	bhattu chandavasānugā;
an8.47:7.3	Manāpā nāma te devā,
an8.47:7.4	yattha sā upapajjatī”ti.
an8.47:7.5	Sattamaṁ.
an8.48:0.1	Aṅguttara Nikāya 8.48
an8.48:0.2	5. Uposathavagga
an8.48:0.3	Nakulamātāsutta
an8.48:1.1	Ekaṁ samayaṁ bhagavā bhaggesu viharati susumāragire bhesakaḷāvane migadāye.
an8.48:1.2	Atha kho nakulamātā gahapatānī yena bhagavā tenupasaṅkami; upasaṅkamitvā …pe…. Ekamantaṁ nisinnaṁ kho nakulamātaraṁ gahapatāniṁ bhagavā etadavoca:
an8.48:2.1	“Aṭṭhahi kho, nakulamāte, dhammehi samannāgato mātugāmo kāyassa bhedā paraṁ maraṇā manāpakāyikānaṁ devānaṁ sahabyataṁ upapajjati.
an8.48:2.2	Katamehi aṭṭhahi?
an8.48:2.3	Idha, nakulamāte, mātugāmo yassa mātāpitaro bhattuno denti atthakāmā hitesino anukampakā anukampaṁ upādāya tassa hoti pubbuṭṭhāyinī pacchānipātinī kiṅkārapaṭissāvinī manāpacārinī piyavādinī.
an8.48:3.1	Ye te bhattu garuno honti—
an8.48:3.2	mātāti vā pitāti vā samaṇabrāhmaṇāti vā—
an8.48:3.3	te sakkaroti garuṁ karoti māneti pūjeti, abbhāgate ca āsanodakena paṭipūjeti.
an8.48:4.1	Ye te bhattu abbhantarā kammantā—uṇṇāti vā kappāsāti vā—tattha dakkhā hoti analasā tatrupāyāya vīmaṁsāya samannāgatā alaṁ kātuṁ alaṁ saṁvidhātuṁ.
an8.48:5.1	Yo so bhattu abbhantaro antojano—dāsāti vā pessāti vā kammakarāti vā—
an8.48:5.2	tesaṁ katañca katato jānāti akatañca akatato jānāti, gilānakānañca balābalaṁ jānāti khādanīyaṁ bhojanīyañcassa paccaṁsena saṁvibhajati.
an8.48:6.1	Yaṁ bhattā āharati dhanaṁ vā dhaññaṁ vā rajataṁ vā jātarūpaṁ vā taṁ ārakkhena guttiyā sampādeti, tattha ca hoti adhuttī athenī asoṇḍī avināsikā.
an8.48:7.1	Upāsikā kho pana hoti buddhaṁ saraṇaṁ gatā dhammaṁ saraṇaṁ gatā saṅghaṁ saraṇaṁ gatā.
an8.48:8.1	Sīlavatī kho pana hoti—
an8.48:8.2	pāṇātipātā paṭiviratā …pe… surāmerayamajjapamādaṭṭhānā paṭiviratā …pe….
an8.48:9.1	Cāgavatī kho pana hoti vigatamalamaccherena cetasā agāraṁ ajjhāvasati muttacāgā payatapāṇinī vossaggaratā yācayogā dānasaṁvibhāgaratā.
an8.48:10.1	Imehi kho, nakulamāte, aṭṭhahi dhammehi samannāgato mātugāmo kāyassa bhedā paraṁ maraṇā manāpakāyikānaṁ devānaṁ sahabyataṁ upapajjatīti.
an8.48:11.1	Yo naṁ bharati sabbadā,
an8.48:11.2	niccaṁ ātāpi ussuko;
an8.48:11.3	Taṁ sabbakāmadaṁ posaṁ,
an8.48:11.4	bhattāraṁ nātimaññati.
an8.48:12.1	Na cāpi sotthi bhattāraṁ,
an8.48:12.2	issāvādena rosaye;
an8.48:12.3	Bhattu ca garuno sabbe,
an8.48:12.4	paṭipūjeti paṇḍitā.
an8.48:13.1	Uṭṭhāhikā analasā,
an8.48:13.2	saṅgahitaparijjanā;
an8.48:13.3	Bhattu manāpaṁ carati,
an8.48:13.4	sambhataṁ anurakkhati.
an8.48:14.1	Yā evaṁ vattati nārī,
an8.48:14.2	bhattu chandavasānugā;
an8.48:14.3	Manāpā nāma te devā,
an8.48:14.4	yattha sā upapajjatī”ti.
an8.48:14.5	Aṭṭhamaṁ.
an8.49:0.1	Aṅguttara Nikāya 8.49
an8.49:0.2	5. Uposathavagga
an8.49:0.3	Paṭhamaidhalokikasutta
an8.49:1.1	Ekaṁ samayaṁ bhagavā sāvatthiyaṁ viharati pubbārāme migāramātupāsāde.
an8.49:1.2	Atha kho visākhā migāramātā yena bhagavā tenupasaṅkami …pe….
an8.49:1.3	Ekamantaṁ nisinnaṁ kho visākhaṁ migāramātaraṁ bhagavā etadavoca:
an8.49:2.1	“Catūhi kho, visākhe, dhammehi samannāgato mātugāmo idhalokavijayāya paṭipanno hoti, ayaṁsa loko āraddho hoti.
an8.49:2.2	Katamehi catūhi?
an8.49:2.3	Idha, visākhe, mātugāmo susaṁvihitakammanto hoti, saṅgahitaparijano, bhattu manāpaṁ carati, sambhataṁ anurakkhati.
an8.49:3.1	Kathañca, visākhe, mātugāmo susaṁvihitakammanto hoti?
an8.49:3.2	Idha, visākhe, mātugāmo ye te bhattu abbhantarā kammantā—uṇṇāti vā kappāsāti vā—tattha dakkhā hoti analasā tatrupāyāya vīmaṁsāya samannāgatā alaṁ kātuṁ alaṁ saṁvidhātuṁ.
an8.49:3.3	Evaṁ kho, visākhe, mātugāmo susaṁvihitakammanto hoti.
an8.49:4.1	Kathañca, visākhe, mātugāmo saṅgahitaparijano hoti?
an8.49:4.2	Idha, visākhe, mātugāmo yo so bhattu abbhantaro antojano—dāsāti vā pessāti vā kammakarāti vā—
an8.49:4.3	tesaṁ katañca katato jānāti akatañca akatato jānāti, gilānakānañca balābalaṁ jānāti khādanīyaṁ bhojanīyañcassa paccaṁsena saṁvibhajati.
an8.49:4.4	Evaṁ kho, visākhe, mātugāmo saṅgahitaparijano hoti.
an8.49:5.1	Kathañca, visākhe, mātugāmo bhattu manāpaṁ carati?
an8.49:5.2	Idha, visākhe, mātugāmo yaṁ bhattu amanāpasaṅkhātaṁ taṁ jīvitahetupi na ajjhācarati.
an8.49:5.3	Evaṁ kho, visākhe, mātugāmo bhattu manāpaṁ carati.
an8.49:6.1	Kathañca, visākhe, mātugāmo sambhataṁ anurakkhati?
an8.49:6.2	Idha, visākhe, mātugāmo yaṁ bhattā āharati dhanaṁ vā dhaññaṁ vā rajataṁ vā jātarūpaṁ vā taṁ ārakkhena guttiyā sampādeti, tattha ca hoti adhuttī athenī asoṇḍī avināsikā.
an8.49:6.3	Evaṁ kho, visākhe, mātugāmo sambhataṁ anurakkhati.
an8.49:6.4	Imehi kho, visākhe, catūhi dhammehi samannāgato mātugāmo idhalokavijayāya paṭipanno hoti, ayaṁsa loko āraddho hoti.
an8.49:7.1	Catūhi kho, visākhe, dhammehi samannāgato mātugāmo paralokavijayāya paṭipanno hoti, paraloko āraddho hoti.
an8.49:7.2	Katamehi catūhi?
an8.49:7.3	Idha, visākhe, mātugāmo saddhāsampanno hoti, sīlasampanno hoti, cāgasampanno hoti, paññāsampanno hoti.
an8.49:8.1	Kathañca, visākhe, mātugāmo saddhāsampanno hoti?
an8.49:8.2	Idha, visākhe, mātugāmo saddho hoti, saddahati tathāgatassa bodhiṁ:
an8.49:8.3	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an8.49:8.4	Evaṁ kho, visākhe, mātugāmo saddhāsampanno hoti.
an8.49:9.1	Kathañca, visākhe, mātugāmo sīlasampanno hoti?
an8.49:9.2	Idha, visākhe, mātugāmo pāṇātipātā paṭivirato hoti …pe… surāmerayamajjapamādaṭṭhānā paṭivirato hoti.
an8.49:9.3	Evaṁ kho, visākhe, mātugāmo sīlasampanno hoti.
an8.49:10.1	Kathañca, visākhe, mātugāmo cāgasampanno hoti?
an8.49:10.2	Idha, visākhe, mātugāmo vigatamalamaccherena cetasā agāraṁ ajjhāvasati muttacāgā payatapāṇinī vossaggaratā yācayogā dānasaṁvibhāgaratā.
an8.49:10.3	Evaṁ kho, visākhe, mātugāmo cāgasampanno hoti.
an8.49:11.1	Kathañca, visākhe, mātugāmo paññāsampanno hoti?
an8.49:11.2	Idha, visākhe, mātugāmo paññavā hoti …pe…
an8.49:11.3	evaṁ kho, visākhe, mātugāmo paññāsampanno hoti.
an8.49:12.1	Imehi kho, visākhe, catūhi dhammehi samannāgato mātugāmo paralokavijayāya paṭipanno hoti, paraloko āraddho hotīti.
an8.49:13.1	Susaṁvihitakammantā,
an8.49:13.2	saṅgahitaparijjanā;
an8.49:13.3	Bhattu manāpaṁ carati,
an8.49:13.4	sambhataṁ anurakkhati.
an8.49:14.1	Saddhā sīlena sampannā,
an8.49:14.2	vadaññū vītamaccharā;
an8.49:14.3	Niccaṁ maggaṁ visodheti,
an8.49:14.4	sotthānaṁ samparāyikaṁ.
an8.49:15.1	Iccete aṭṭha dhammā ca,
an8.49:15.2	yassā vijjanti nāriyā;
an8.49:15.3	Tampi sīlavatiṁ āhu,
an8.49:15.4	dhammaṭṭhaṁ saccavādiniṁ.
an8.49:16.1	Soḷasākārasampannā,
an8.49:16.2	Aṭṭhaṅgasusamāgatā;
an8.49:16.3	Tādisī sīlavatī upāsikā,
an8.49:16.4	Upapajjati devalokaṁ manāpan”ti.
an8.49:16.5	Navamaṁ.
an8.50:0.1	Aṅguttara Nikāya 8.50
an8.50:0.2	5. Uposathavagga
an8.50:0.3	Dutiyaidhalokikasutta
an8.50:1.1	“Catūhi, bhikkhave, dhammehi samannāgato mātugāmo idhalokavijayāya paṭipanno hoti, ayaṁsa loko āraddho hoti.
an8.50:1.2	Katamehi catūhi?
an8.50:1.3	Idha, bhikkhave, mātugāmo susaṁvihitakammanto hoti, saṅgahitaparijano, bhattu manāpaṁ carati, sambhataṁ anurakkhati.
an8.50:2.1	Kathañca, bhikkhave, mātugāmo susaṁvihitakammanto hoti?
an8.50:2.2	Idha, bhikkhave, mātugāmo ye te bhattu abbhantarā kammantā …pe…
an8.50:2.3	evaṁ kho, bhikkhave, mātugāmo susaṁvihitakammanto hoti.
an8.50:3.1	Kathañca, bhikkhave, mātugāmo saṅgahitaparijano hoti?
an8.50:3.2	Idha, bhikkhave, mātugāmo yo so bhattu abbhantaro antojano …pe…
an8.50:3.3	evaṁ kho, bhikkhave, mātugāmo saṅgahitaparijano hoti.
an8.50:4.1	Kathañca, bhikkhave, mātugāmo bhattu manāpaṁ carati?
an8.50:4.2	Idha, bhikkhave, mātugāmo yaṁ bhattu amanāpasaṅkhātaṁ taṁ jīvitahetupi na ajjhācarati.
an8.50:4.3	Evaṁ kho, bhikkhave, mātugāmo bhattu manāpaṁ carati.
an8.50:5.1	Kathañca, bhikkhave, mātugāmo sambhataṁ anurakkhati?
an8.50:5.2	Idha, bhikkhave, mātugāmo yaṁ bhattā āharati …pe…
an8.50:5.3	evaṁ kho, bhikkhave, mātugāmo sambhataṁ anurakkhati.
an8.50:5.4	Imehi kho, bhikkhave, catūhi dhammehi samannāgato mātugāmo idhalokavijayāya paṭipanno hoti, ayaṁsa loko āraddho hoti.
an8.50:6.1	Catūhi, bhikkhave, dhammehi samannāgato mātugāmo paralokavijayāya paṭipanno hoti, paraloko āraddho hoti.
an8.50:6.2	Katamehi catūhi?
an8.50:6.3	Idha, bhikkhave, mātugāmo saddhāsampanno hoti, sīlasampanno hoti, cāgasampanno hoti, paññāsampanno hoti.
an8.50:7.1	Kathañca, bhikkhave, mātugāmo saddhāsampanno hoti?
an8.50:7.2	Idha, bhikkhave, mātugāmo saddho hoti …pe…
an8.50:7.3	evaṁ kho, bhikkhave, mātugāmo saddhāsampanno hoti.
an8.50:8.1	Kathañca, bhikkhave, mātugāmo sīlasampanno hoti?
an8.50:8.2	Idha, bhikkhave, mātugāmo pāṇātipātā paṭivirato hoti …pe…
an8.50:8.3	surāmerayamajjapamādaṭṭhānā paṭivirato hoti.
an8.50:8.4	Evaṁ kho, bhikkhave, mātugāmo sīlasampanno hoti.
an8.50:9.1	Kathañca, bhikkhave, mātugāmo cāgasampanno hoti?
an8.50:9.2	Idha, bhikkhave, mātugāmo vigatamalamaccherena cetasā agāraṁ ajjhāvasati …pe…
an8.50:9.3	evaṁ kho, bhikkhave, mātugāmo cāgasampanno hoti.
an8.50:10.1	Kathañca, bhikkhave, mātugāmo paññāsampanno hoti?
an8.50:10.2	Idha, bhikkhave, mātugāmo paññavā hoti …pe…
an8.50:10.3	evaṁ kho, bhikkhave, mātugāmo paññāsampanno hoti.
an8.50:10.4	Imehi kho, bhikkhave, catūhi dhammehi samannāgato mātugāmo paralokavijayāya paṭipanno hoti, paraloko āraddho hotīti.
an8.50:11.1	Susaṁvihitakammantā,
an8.50:11.2	saṅgahitaparijjanā;
an8.50:11.3	Bhattu manāpaṁ carati,
an8.50:11.4	sambhataṁ anurakkhati.
an8.50:12.1	Saddhā sīlena sampannā,
an8.50:12.2	vadaññū vītamaccharā;
an8.50:12.3	Niccaṁ maggaṁ visodheti,
an8.50:12.4	sotthānaṁ samparāyikaṁ.
an8.50:13.1	Iccete aṭṭha dhammā ca,
an8.50:13.2	yassā vijjanti nāriyā;
an8.50:13.3	Tampi sīlavatiṁ āhu,
an8.50:13.4	dhammaṭṭhaṁ saccavādiniṁ.
an8.50:14.1	Soḷasākārasampannā,
an8.50:14.2	Aṭṭhaṅgasusamāgatā;
an8.50:14.3	Tādisī sīlavatī upāsikā,
an8.50:14.4	Upapajjati devalokaṁ manāpan”ti.
an8.50:14.5	Dasamaṁ.
an8.50:14.6	Uposathavaggo pañcamo.
an8.50:15.0	Tassuddānaṁ
an8.50:15.1	Saṅkhitte vitthate visākhe,
an8.50:15.2	Vāseṭṭho bojjhāya pañcamaṁ;
an8.50:15.3	Anuruddhaṁ puna visākhe,
an8.50:15.4	Nakulā idhalokikā dveti.
an8.50:15.5	Paṭhamo paṇṇāsako samatto.
an8.51:0.1	Aṅguttara Nikāya 8.51
an8.51:0.2	6. Gotamīvagga
an8.51:0.3	Gotamīsutta
an8.51:1.1	Ekaṁ samayaṁ bhagavā sakkesu viharati kapilavatthusmiṁ nigrodhārāme.
an8.51:1.2	Atha kho mahāpajāpatī gotamī yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitā kho mahāpajāpatī gotamī bhagavantaṁ etadavoca:
an8.51:1.3	“sādhu, bhante, labheyya mātugāmo tathāgatappavedite dhammavinaye agārasmā anagāriyaṁ pabbajjan”ti.
an8.51:1.4	“Alaṁ, gotami.
an8.51:1.5	Mā te rucci mātugāmassa tathāgatappavedite dhammavinaye agārasmā anagāriyaṁ pabbajjā”ti.
an8.51:2.1	Dutiyampi kho mahāpajāpatī gotamī bhagavantaṁ etadavoca:
an8.51:2.2	“sādhu, bhante, labheyya mātugāmo tathāgatappavedite dhammavinaye agārasmā anagāriyaṁ pabbajjan”ti.
an8.51:2.3	“Alaṁ, gotami.
an8.51:2.4	Mā te rucci mātugāmassa tathāgatappavedite dhammavinaye agārasmā anagāriyaṁ pabbajjā”ti.
an8.51:3.1	Tatiyampi kho mahāpajāpatī gotamī bhagavantaṁ etadavoca:
an8.51:3.2	“sādhu, bhante, labheyya mātugāmo tathāgatappavedite dhammavinaye agārasmā anagāriyaṁ pabbajjan”ti.
an8.51:3.3	“Alaṁ, gotami.
an8.51:3.4	Mā te rucci mātugāmassa tathāgatappavedite dhammavinaye agārasmā anagāriyaṁ pabbajjā”ti.
an8.51:4.1	Atha kho mahāpajāpatī gotamī “na bhagavā anujānāti mātugāmassa tathāgatappavedite dhammavinaye agārasmā anagāriyaṁ pabbajjan”ti dukkhī dummanā assumukhī rudamānā bhagavantaṁ abhivādetvā padakkhiṇaṁ katvā pakkāmi.
an8.51:5.1	Atha kho bhagavā kapilavatthusmiṁ yathābhirantaṁ viharitvā yena vesālī tena cārikaṁ pakkāmi.
an8.51:5.2	Anupubbena cārikaṁ caramāno yena vesālī tadavasari.
an8.51:5.3	Tatra sudaṁ bhagavā vesāliyaṁ viharati mahāvane kūṭāgārasālāyaṁ.
an8.51:5.4	Atha kho mahāpajāpatī gotamī kese chedāpetvā kāsāyāni vatthāni acchādetvā sambahulāhi sākiyānīhi saddhiṁ yena vesālī tena pakkāmi.
an8.51:5.5	Anupubbena yena vesālī mahāvanaṁ kūṭāgārasālā tenupasaṅkami.
an8.51:5.6	Atha kho mahāpajāpatī gotamī sūnehi pādehi rajokiṇṇena gattena dukkhī dummanā assumukhī rudamānā bahidvārakoṭṭhake aṭṭhāsi.
an8.51:6.1	Addasā kho āyasmā ānando mahāpajāpatiṁ gotamiṁ sūnehi pādehi rajokiṇṇena gattena dukkhiṁ dummanaṁ assumukhiṁ rudamānaṁ bahidvārakoṭṭhake ṭhitaṁ.
an8.51:6.2	Disvāna mahāpajāpatiṁ gotamiṁ etadavoca:
an8.51:6.3	“kiṁ nu tvaṁ, gotami, sūnehi pādehi rajokiṇṇena gattena dukkhī dummanā assumukhī rudamānā bahidvārakoṭṭhake ṭhitā”ti?
an8.51:6.4	“Tathā hi pana, bhante ānanda, na bhagavā anujānāti mātugāmassa tathāgatappavedite dhammavinaye agārasmā anagāriyaṁ pabbajjan”ti.
an8.51:6.5	“Tena hi tvaṁ, gotami, muhuttaṁ idheva tāva hohi, yāvāhaṁ bhagavantaṁ yācāmi mātugāmassa tathāgatappavedite dhammavinaye agārasmā anagāriyaṁ pabbajjan”ti.
an8.51:7.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an8.51:7.2	“esā, bhante, mahāpajāpatī gotamī sūnehi pādehi rajokiṇṇena gattena dukkhī dummanā assumukhī rudamānā bahidvārakoṭṭhake ṭhitā:
an8.51:7.3	‘na bhagavā anujānāti mātugāmassa tathāgatappavedite dhammavinaye agārasmā anagāriyaṁ pabbajjan’ti.
an8.51:7.4	Sādhu, bhante, labheyya mātugāmo tathāgatappavedite dhammavinaye agārasmā anagāriyaṁ pabbajjan”ti.
an8.51:7.5	“Alaṁ, ānanda.
an8.51:7.6	Mā te rucci mātugāmassa tathāgatappavedite dhammavinaye agārasmā anagāriyaṁ pabbajjā”ti.
an8.51:8.1	Dutiyampi kho …pe…
an8.51:8.2	tatiyampi kho āyasmā ānando bhagavantaṁ etadavoca:
an8.51:8.3	“sādhu, bhante, labheyya mātugāmo tathāgatappavedite dhammavinaye agārasmā anagāriyaṁ pabbajjan”ti.
an8.51:8.4	“Alaṁ, ānanda.
an8.51:8.5	Mā te rucci mātugāmassa tathāgatappavedite dhammavinaye agārasmā anagāriyaṁ pabbajjā”ti.
an8.51:9.1	Atha kho āyasmato ānandassa etadahosi:
an8.51:9.2	“na bhagavā anujānāti mātugāmassa tathāgatappavedite dhammavinaye agārasmā anagāriyaṁ pabbajjaṁ.
an8.51:9.3	Yannūnāhaṁ aññenapi pariyāyena bhagavantaṁ yāceyyaṁ mātugāmassa tathāgatappavedite dhammavinaye agārasmā anagāriyaṁ pabbajjan”ti.
an8.51:9.4	Atha kho āyasmā ānando bhagavantaṁ etadavoca:
an8.51:9.5	“bhabbo nu kho, bhante, mātugāmo tathāgatappavedite dhammavinaye agārasmā anagāriyaṁ pabbajitvā sotāpattiphalaṁ vā sakadāgāmiphalaṁ vā anāgāmiphalaṁ vā arahattaphalaṁ vā sacchikātun”ti?
an8.51:9.6	“Bhabbo, ānanda, mātugāmo tathāgatappavedite dhammavinaye agārasmā anagāriyaṁ pabbajitvā sotāpattiphalampi sakadāgāmiphalampi anāgāmiphalampi arahattaphalampi sacchikātun”ti.
an8.51:9.7	“Sace, bhante, bhabbo mātugāmo tathāgatappavedite dhammavinaye agārasmā anagāriyaṁ pabbajitvā sotāpattiphalampi …pe… arahattaphalampi sacchikātuṁ;
an8.51:9.8	bahukārā, bhante, mahāpajāpatī gotamī bhagavato mātucchā āpādikā posikā khīrassa dāyikā;
an8.51:9.9	bhagavantaṁ janettiyā kālaṅkatāya thaññaṁ pāyesi.
an8.51:9.10	Sādhu, bhante, labheyya mātugāmo tathāgatappavedite dhammavinaye agārasmā anagāriyaṁ pabbajjan”ti.
an8.51:10.1	“Sace, ānanda, mahāpajāpatī gotamī aṭṭha garudhamme paṭiggaṇhāti, sāvassā hotu upasampadā—
an8.51:11.1	Vassasatūpasampannāya bhikkhuniyā tadahūpasampannassa bhikkhuno abhivādanaṁ paccuṭṭhānaṁ añjalikammaṁ sāmīcikammaṁ kattabbaṁ.
an8.51:11.2	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo.
an8.51:12.1	Na bhikkhuniyā abhikkhuke āvāse vassaṁ upagantabbaṁ.
an8.51:12.2	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo.
an8.51:13.1	Anvaḍḍhamāsaṁ bhikkhuniyā bhikkhusaṅghato dve dhammā paccāsīsitabbā—
an8.51:13.2	uposathapucchakañca, ovādūpasaṅkamanañca.
an8.51:13.3	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo.
an8.51:14.1	Vassaṁvuṭṭhāya bhikkhuniyā ubhatosaṅghe tīhi ṭhānehi pavāretabbaṁ—
an8.51:14.2	diṭṭhena vā sutena vā parisaṅkāya vā.
an8.51:14.3	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo.
an8.51:15.1	Garudhammaṁ ajjhāpannāya bhikkhuniyā ubhatosaṅghe pakkhamānattaṁ caritabbaṁ.
an8.51:15.2	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo.
an8.51:16.1	Dve vassāni chasu dhammesu sikkhitasikkhāya sikkhamānāya ubhatosaṅghe upasampadā pariyesitabbā.
an8.51:16.2	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo.
an8.51:17.1	Na kenaci pariyāyena bhikkhuniyā bhikkhu akkositabbo paribhāsitabbo.
an8.51:17.2	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo.
an8.51:18.1	Ajjatagge ovaṭo bhikkhunīnaṁ bhikkhūsu vacanapatho, anovaṭo bhikkhūnaṁ bhikkhunīsu vacanapatho.
an8.51:18.2	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo.
an8.51:19.1	Sace, ānanda, mahāpajāpatī gotamī ime aṭṭha garudhamme paṭiggaṇhāti, sāvassā hotu upasampadā”ti.
an8.51:20.1	Atha kho āyasmā ānando bhagavato santike ime aṭṭha garudhamme uggahetvā yena mahāpajāpatī gotamī tenupasaṅkami; upasaṅkamitvā mahāpajāpatiṁ gotamiṁ etadavoca:
an8.51:21.1	“Sace kho tvaṁ, gotami, aṭṭha garudhamme paṭiggaṇheyyāsi, sāva te bhavissati upasampadā—
an8.51:22.1	Vassasatūpasampannāya bhikkhuniyā tadahūpasampannassa bhikkhuno abhivādanaṁ paccuṭṭhānaṁ añjalikammaṁ sāmīcikammaṁ kattabbaṁ.
an8.51:22.2	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo …pe….
an8.51:23.1	Ajjatagge ovaṭo bhikkhunīnaṁ bhikkhūsu vacanapatho, anovaṭo bhikkhūnaṁ bhikkhunīsu vacanapatho.
an8.51:23.2	Ayampi dhammo sakkatvā garuṁ katvā mānetvā pūjetvā yāvajīvaṁ anatikkamanīyo.
an8.51:23.3	Sace kho tvaṁ, gotami, ime aṭṭha garudhamme paṭiggaṇheyyāsi, sāva te bhavissati upasampadā”ti.
an8.51:24.1	“Seyyathāpi, bhante ānanda, itthī vā puriso vā daharo yuvā maṇḍanakajātiko sīsaṁnhāto uppalamālaṁ vā vassikamālaṁ vā adhimuttakamālaṁ vā labhitvā ubhohi hatthehi paṭiggahetvā uttamaṅge sirasmiṁ patiṭṭhāpeyya;
an8.51:24.2	evamevaṁ kho ahaṁ, bhante ānanda, ime aṭṭha garudhamme paṭiggaṇhāmi yāvajīvaṁ anatikkamanīye”ti.
an8.51:25.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an8.51:25.2	“paṭiggahitā, bhante, mahāpajāpatiyā gotamiyā aṭṭha garudhammā yāvajīvaṁ anatikkamanīyā”ti.
an8.51:26.1	“Sace, ānanda, nālabhissa mātugāmo tathāgatappavedite dhammavinaye agārasmā anagāriyaṁ pabbajjaṁ, ciraṭṭhitikaṁ, ānanda, brahmacariyaṁ abhavissa, vassasahassameva saddhammo tiṭṭheyya.
an8.51:26.2	Yato ca kho, ānanda, mātugāmo tathāgatappavedite dhammavinaye agārasmā anagāriyaṁ pabbajito, na dāni, ānanda, brahmacariyaṁ ciraṭṭhitikaṁ bhavissati.
an8.51:26.3	Pañceva dāni, ānanda, vassasatāni saddhammo ṭhassati.
an8.51:27.1	Seyyathāpi, ānanda, yāni kānici kulāni bahutthikāni appapurisakāni, tāni suppadhaṁsiyāni honti corehi kumbhatthenakehi;
an8.51:27.2	evamevaṁ kho, ānanda, yasmiṁ dhammavinaye labhati mātugāmo agārasmā anagāriyaṁ pabbajjaṁ, na taṁ brahmacariyaṁ ciraṭṭhitikaṁ hoti.
an8.51:28.1	Seyyathāpi, ānanda, sampanne sālikkhette setaṭṭhikā nāma rogajāti nipatati, evaṁ taṁ sālikkhettaṁ na ciraṭṭhitikaṁ hoti;
an8.51:28.2	evamevaṁ kho, ānanda, yasmiṁ dhammavinaye labhati mātugāmo agārasmā anagāriyaṁ pabbajjaṁ, na taṁ brahmacariyaṁ ciraṭṭhitikaṁ hoti.
an8.51:29.1	Seyyathāpi, ānanda, sampanne ucchukkhette mañjiṭṭhikā nāma rogajāti nipatati, evaṁ taṁ ucchukkhettaṁ na ciraṭṭhitikaṁ hoti;
an8.51:29.2	evamevaṁ kho, ānanda, yasmiṁ dhammavinaye labhati mātugāmo agārasmā anagāriyaṁ pabbajjaṁ, na taṁ brahmacariyaṁ ciraṭṭhitikaṁ hoti.
an8.51:30.1	Seyyathāpi, ānanda, puriso mahato taḷākassa paṭikacceva āḷiṁ bandheyya yāvadeva udakassa anatikkamanāya;
an8.51:30.2	evamevaṁ kho, ānanda, mayā paṭikacceva bhikkhunīnaṁ aṭṭha garudhammā paññattā yāvajīvaṁ anatikkamanīyā”ti.
an8.51:30.3	Paṭhamaṁ.
an8.52:0.1	Aṅguttara Nikāya 8.52
an8.52:0.2	6. Gotamīvagga
an8.52:0.3	Ovādasutta
an8.52:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an8.52:1.2	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an8.52:1.3	“katihi nu kho, bhante, dhammehi samannāgato bhikkhu bhikkhunovādako sammannitabbo”ti?
an8.52:2.1	“Aṭṭhahi kho, ānanda, dhammehi samannāgato bhikkhu bhikkhunovādako sammannitabbo.
an8.52:2.2	Katamehi aṭṭhahi?
an8.52:2.3	Idhānanda, bhikkhu sīlavā hoti …pe… samādāya sikkhati sikkhāpadesu;
an8.52:2.4	bahussuto hoti …pe… diṭṭhiyā suppaṭividdhā;
an8.52:2.5	ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso;
an8.52:2.6	kalyāṇavāco hoti kalyāṇavākkaraṇo, poriyā vācāya samannāgato vissaṭṭhāya anelagaḷāya atthassa viññāpaniyā;
an8.52:2.7	paṭibalo hoti bhikkhunisaṅghassa dhammiyā kathāya sandassetuṁ samādapetuṁ samuttejetuṁ sampahaṁsetuṁ;
an8.52:2.8	yebhuyyena bhikkhunīnaṁ piyo hoti manāpo;
an8.52:2.9	na kho panetaṁ bhagavantaṁ uddissa pabbajitāya kāsāyavatthavasanāya garudhammaṁ ajjhāpannapubbo hoti;
an8.52:2.10	vīsativasso vā hoti atirekavīsativasso vā.
an8.52:2.11	Imehi kho, ānanda, aṭṭhahi dhammehi samannāgato bhikkhu bhikkhunovādako sammannitabbo”ti.
an8.52:2.12	Dutiyaṁ.
an8.53:0.1	Aṅguttara Nikāya 8.53
an8.53:0.2	6. Gotamīvagga
an8.53:0.3	Saṅkhittasutta
an8.53:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an8.53:1.2	Atha kho mahāpajāpatī gotamī yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitā kho sā mahāpajāpatī gotamī bhagavantaṁ etadavoca:
an8.53:2.1	“Sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā ekā vūpakaṭṭhā appamattā ātāpinī pahitattā vihareyyan”ti.
an8.53:2.2	“Ye kho tvaṁ, gotami, dhamme jāneyyāsi:
an8.53:2.3	‘ime dhammā sarāgāya saṁvattanti, no virāgāya;
an8.53:2.4	saṁyogāya saṁvattanti, no visaṁyogāya;
an8.53:2.5	ācayāya saṁvattanti, no apacayāya;
an8.53:2.6	mahicchatāya saṁvattanti, no appicchatāya;
an8.53:2.7	asantuṭṭhiyā saṁvattanti, no santuṭṭhiyā;
an8.53:2.8	saṅgaṇikāya saṁvattanti, no pavivekāya;
an8.53:2.9	kosajjāya saṁvattanti, no vīriyārambhāya;
an8.53:2.10	dubbharatāya saṁvattanti, no subharatāyā’ti,
an8.53:2.11	ekaṁsena, gotami, dhāreyyāsi:
an8.53:2.12	‘neso dhammo, neso vinayo, netaṁ satthusāsanan’ti.
an8.53:3.1	Ye ca kho tvaṁ, gotami, dhamme jāneyyāsi:
an8.53:3.2	‘ime dhammā virāgāya saṁvattanti, no sarāgāya;
an8.53:3.3	visaṁyogāya saṁvattanti, no saṁyogāya;
an8.53:3.4	apacayāya saṁvattanti, no ācayāya;
an8.53:3.5	appicchatāya saṁvattanti, no mahicchatāya;
an8.53:3.6	santuṭṭhiyā saṁvattanti, no asantuṭṭhiyā;
an8.53:3.7	pavivekāya saṁvattanti, no saṅgaṇikāya;
an8.53:3.8	vīriyārambhāya saṁvattanti, no kosajjāya;
an8.53:3.9	subharatāya saṁvattanti, no dubbharatāyā’ti,
an8.53:3.10	ekaṁsena, gotami, dhāreyyāsi:
an8.53:3.11	‘eso dhammo, eso vinayo, etaṁ satthusāsanan’”ti.
an8.53:3.12	Tatiyaṁ.
an8.54:0.1	Aṅguttara Nikāya 8.54
an8.54:0.2	6. Gotamīvagga
an8.54:0.3	Dīghajāṇusutta
an8.54:1.1	Ekaṁ samayaṁ bhagavā koliyesu viharati kakkarapattaṁ nāma koliyānaṁ nigamo.
an8.54:1.2	Atha kho dīghajāṇu koliyaputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho dīghajāṇu koliyaputto bhagavantaṁ etadavoca:
an8.54:1.3	“mayaṁ, bhante, gihī kāmabhogino puttasambādhasayanaṁ ajjhāvasāma, kāsikacandanaṁ paccanubhoma, mālāgandhavilepanaṁ dhārayāma, jātarūparajataṁ sādayāma.
an8.54:1.4	Tesaṁ no, bhante, bhagavā amhākaṁ tathā dhammaṁ desetu ye amhākaṁ assu dhammā diṭṭhadhammahitāya diṭṭhadhammasukhāya, samparāyahitāya samparāyasukhāyā”ti.
an8.54:2.1	“Cattārome, byagghapajja, dhammā kulaputtassa diṭṭhadhammahitāya saṁvattanti diṭṭhadhammasukhāya.
an8.54:2.2	Katame cattāro?
an8.54:2.3	Uṭṭhānasampadā, ārakkhasampadā, kalyāṇamittatā, samajīvitā.
an8.54:2.4	Katamā ca, byagghapajja, uṭṭhānasampadā?
an8.54:2.5	Idha, byagghapajja, kulaputto yena kammaṭṭhānena jīvikaṁ kappeti—
an8.54:2.6	yadi kasiyā, yadi vaṇijjāya, yadi gorakkhena, yadi issattena, yadi rājaporisena, yadi sippaññatarena—
an8.54:2.7	tattha dakkho hoti analaso, tatrupāyāya vīmaṁsāya samannāgato, alaṁ kātuṁ alaṁ saṁvidhātuṁ.
an8.54:2.8	Ayaṁ vuccati, byagghapajja, uṭṭhānasampadā.
an8.54:3.1	Katamā ca, byagghapajja, ārakkhasampadā?
an8.54:3.2	Idha, byagghapajja, kulaputtassa bhogā honti uṭṭhānavīriyādhigatā bāhābalaparicitā, sedāvakkhittā, dhammikā dhammaladdhā.
an8.54:3.3	Te ārakkhena guttiyā sampādeti:
an8.54:3.4	‘kinti me ime bhoge neva rājāno hareyyuṁ, na corā hareyyuṁ, na aggi ḍaheyya, na udakaṁ vaheyya, na appiyā dāyādā hareyyun’ti.
an8.54:3.5	Ayaṁ vuccati, byagghapajja, ārakkhasampadā.
an8.54:4.1	Katamā ca, byagghapajja, kalyāṇamittatā?
an8.54:4.2	Idha, byagghapajja, kulaputto yasmiṁ gāme vā nigame vā paṭivasati, tattha ye te honti—gahapatī vā gahapatiputtā vā daharā vā vuddhasīlino, vuddhā vā vuddhasīlino, saddhāsampannā, sīlasampannā, cāgasampannā, paññāsampannā—tehi saddhiṁ santiṭṭhati sallapati sākacchaṁ samāpajjati; yathārūpānaṁ saddhāsampannānaṁ saddhāsampadaṁ anusikkhati, yathārūpānaṁ sīlasampannānaṁ sīlasampadaṁ anusikkhati, yathārūpānaṁ cāgasampannānaṁ cāgasampadaṁ anusikkhati, yathārūpānaṁ paññāsampannānaṁ paññāsampadaṁ anusikkhati.
an8.54:4.3	Ayaṁ vuccati, byagghapajja, kalyāṇamittatā.
an8.54:5.1	Katamā ca, byagghapajja, samajīvitā?
an8.54:5.2	Idha, byagghapajja, kulaputto āyañca bhogānaṁ viditvā, vayañca bhogānaṁ viditvā, samaṁ jīvikaṁ kappeti nāccogāḷhaṁ nātihīnaṁ: ‘evaṁ me āyo vayaṁ pariyādāya ṭhassati, na ca me vayo āyaṁ pariyādāya ṭhassatī’ti.
an8.54:5.3	Seyyathāpi, byagghapajja, tulādhāro vā tulādhārantevāsī vā tulaṁ paggahetvā jānāti: ‘ettakena vā onataṁ, ettakena vā unnatan’ti;
an8.54:5.4	evamevaṁ kho, byagghapajja, kulaputto āyañca bhogānaṁ viditvā, vayañca bhogānaṁ viditvā, samaṁ jīvikaṁ kappeti nāccogāḷhaṁ nātihīnaṁ: ‘evaṁ me āyo vayaṁ pariyādāya ṭhassati, na ca me vayo āyaṁ pariyādāya ṭhassatī’ti.
an8.54:5.5	Sacāyaṁ, byagghapajja, kulaputto appāyo samāno uḷāraṁ jīvikaṁ kappeti, tassa bhavanti vattāro: ‘udumbarakhādīvāyaṁ kulaputto bhoge khādatī’ti.
an8.54:5.6	Sace panāyaṁ, byagghapajja, kulaputto mahāyo samāno kasiraṁ jīvikaṁ kappeti, tassa bhavanti vattāro: ‘ajeṭṭhamaraṇaṁvāyaṁ kulaputto marissatī’ti.
an8.54:5.7	Yato ca khoyaṁ, byagghapajja, kulaputto āyañca bhogānaṁ viditvā, vayañca bhogānaṁ viditvā, samaṁ jīvikaṁ kappeti nāccogāḷhaṁ nātihīnaṁ: ‘evaṁ me āyo vayaṁ pariyādāya ṭhassati, na ca me vayo āyaṁ pariyādāya ṭhassatī’ti.
an8.54:5.8	Ayaṁ vuccati, byagghapajja, samajīvitā.
an8.54:6.1	Evaṁ samuppannānaṁ, byagghapajja, bhogānaṁ cattāri apāyamukhāni honti—
an8.54:6.2	itthidhutto, surādhutto, akkhadhutto, pāpamitto pāpasahāyo pāpasampavaṅko.
an8.54:6.3	Seyyathāpi, byagghapajja, mahato taḷākassa cattāri ceva āyamukhāni, cattāri ca apāyamukhāni.
an8.54:6.4	Tassa puriso yāni ceva āyamukhāni tāni pidaheyya, yāni ca apāyamukhāni tāni vivareyya;
an8.54:6.5	devo ca na sammā dhāraṁ anuppaveccheyya.
an8.54:6.6	Evañhi tassa, byagghapajja, mahato taḷākassa parihāniyeva pāṭikaṅkhā, no vuddhi;
an8.54:6.7	evamevaṁ, byagghapajja, evaṁ samuppannānaṁ bhogānaṁ cattāri apāyamukhāni honti—
an8.54:6.8	itthidhutto, surādhutto, akkhadhutto, pāpamitto pāpasahāyo pāpasampavaṅko.
an8.54:7.1	Evaṁ samuppannānaṁ, byagghapajja, bhogānaṁ cattāri āyamukhāni honti—
an8.54:7.2	na itthidhutto, na surādhutto, na akkhadhutto, kalyāṇamitto kalyāṇasahāyo kalyāṇasampavaṅko.
an8.54:7.3	Seyyathāpi, byagghapajja, mahato taḷākassa cattāri ceva āyamukhāni, cattāri ca apāyamukhāni.
an8.54:7.4	Tassa puriso yāni ceva āyamukhāni tāni vivareyya, yāni ca apāyamukhāni tāni pidaheyya;
an8.54:7.5	devo ca sammā dhāraṁ anuppaveccheyya.
an8.54:7.6	Evañhi tassa, byagghapajja, mahato taḷākassa vuddhiyeva pāṭikaṅkhā, no parihāni;
an8.54:7.7	evamevaṁ kho, byagghapajja, evaṁ samuppannānaṁ bhogānaṁ cattāri āyamukhāni honti—
an8.54:7.8	na itthidhutto, na surādhutto, na akkhadhutto, kalyāṇamitto kalyāṇasahāyo kalyāṇasampavaṅko.
an8.54:8.1	Ime kho, byagghapajja, cattāro dhammā kulaputtassa diṭṭhadhammahitāya saṁvattanti diṭṭhadhammasukhāya.
an8.54:9.1	Cattārome, byagghapajja, dhammā kulaputtassa samparāyahitāya saṁvattanti samparāyasukhāya.
an8.54:9.2	Katame cattāro?
an8.54:9.3	Saddhāsampadā, sīlasampadā, cāgasampadā, paññāsampadā.
an8.54:10.1	Katamā ca, byagghapajja, saddhāsampadā?
an8.54:10.2	Idha, byagghapajja, kulaputto saddho hoti, saddahati tathāgatassa bodhiṁ:
an8.54:10.3	‘itipi so bhagavā …pe… satthā devamanussānaṁ buddho bhagavā’ti.
an8.54:10.4	Ayaṁ vuccati, byagghapajja, saddhāsampadā.
an8.54:11.1	Katamā ca, byagghapajja, sīlasampadā?
an8.54:11.2	Idha, byagghapajja, kulaputto pāṇātipātā paṭivirato hoti …pe… surāmerayamajjapamādaṭṭhānā paṭivirato hoti.
an8.54:11.3	Ayaṁ vuccati, byagghapajja, sīlasampadā.
an8.54:12.1	Katamā ca, byagghapajja, cāgasampadā?
an8.54:12.2	Idha, byagghapajja, kulaputto vigatamalamaccherena cetasā agāraṁ ajjhāvasati muttacāgo payatapāṇi vossaggarato yācayogo dānasaṁvibhāgarato.
an8.54:12.3	Ayaṁ vuccati, byagghapajja, cāgasampadā.
an8.54:13.1	Katamā ca, byagghapajja, paññāsampadā?
an8.54:13.2	Idha, byagghapajja, kulaputto paññavā hoti, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an8.54:13.3	Ayaṁ vuccati, byagghapajja, paññāsampadā.
an8.54:14.1	Ime kho, byagghapajja, cattāro dhammā kulaputtassa samparāyahitāya saṁvattanti samparāyasukhāyāti.
an8.54:15.1	Uṭṭhātā kammadheyyesu,
an8.54:15.2	appamatto vidhānavā;
an8.54:15.3	Samaṁ kappeti jīvikaṁ,
an8.54:15.4	sambhataṁ anurakkhati.
an8.54:16.1	Saddho sīlena sampanno,
an8.54:16.2	vadaññū vītamaccharo;
an8.54:16.3	Niccaṁ maggaṁ visodheti,
an8.54:16.4	sotthānaṁ samparāyikaṁ.
an8.54:17.1	Iccete aṭṭha dhammā ca,
an8.54:17.2	saddhassa gharamesino;
an8.54:17.3	Akkhātā saccanāmena,
an8.54:17.4	ubhayattha sukhāvahā.
an8.54:18.1	Diṭṭhadhammahitatthāya,
an8.54:18.2	samparāyasukhāya ca;
an8.54:18.3	Evametaṁ gahaṭṭhānaṁ,
an8.54:18.4	cāgo puññaṁ pavaḍḍhatī”ti.
an8.54:18.5	Catutthaṁ.
an8.55:0.1	Aṅguttara Nikāya 8.55
an8.55:0.2	6. Gotamīvagga
an8.55:0.3	Ujjayasutta
an8.55:1.1	Atha kho ujjayo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an8.55:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho ujjayo brāhmaṇo bhagavantaṁ etadavoca:
an8.55:1.3	“mayaṁ, bho gotama, pavāsaṁ gantukāmā.
an8.55:1.4	Tesaṁ no bhavaṁ gotamo amhākaṁ tathā dhammaṁ desetu—ye amhākaṁ assu dhammā diṭṭhadhammahitāya, diṭṭhadhammasukhāya, samparāyahitāya, samparāyasukhāyā”ti.
an8.55:2.1	“Cattārome, brāhmaṇa, dhammā kulaputtassa diṭṭhadhammahitāya saṁvattanti, diṭṭhadhammasukhāya.
an8.55:2.2	Katame cattāro?
an8.55:2.3	Uṭṭhānasampadā, ārakkhasampadā, kalyāṇamittatā, samajīvitā.
an8.55:3.1	Katamā ca, brāhmaṇa, uṭṭhānasampadā?
an8.55:3.2	Idha, brāhmaṇa, kulaputto yena kammaṭṭhānena jīvikaṁ kappeti—
an8.55:3.3	yadi kasiyā, yadi vaṇijjāya, yadi gorakkhena, yadi issattena, yadi rājaporisena, yadi sippaññatarena—
an8.55:3.4	tattha dakkho hoti analaso, tatrupāyāya vīmaṁsāya samannāgato, alaṁ kātuṁ alaṁ saṁvidhātuṁ.
an8.55:3.5	Ayaṁ vuccati, brāhmaṇa, uṭṭhānasampadā.
an8.55:4.1	Katamā ca, brāhmaṇa, ārakkhasampadā?
an8.55:4.2	Idha, brāhmaṇa, kulaputtassa bhogā honti uṭṭhānavīriyādhigatā, bāhābalaparicitā, sedāvakkhittā, dhammikā dhammaladdhā.
an8.55:4.3	Te ārakkhena guttiyā sampādeti:
an8.55:4.4	‘kinti me ime bhoge neva rājāno hareyyuṁ, na corā hareyyuṁ, na aggi ḍaheyya, na udakaṁ vaheyya, na appiyā dāyādā hareyyun’ti.
an8.55:4.5	Ayaṁ vuccati, brāhmaṇa, ārakkhasampadā.
an8.55:5.1	Katamā ca, brāhmaṇa, kalyāṇamittatā?
an8.55:5.2	Idha, brāhmaṇa, kulaputto yasmiṁ gāme vā nigame vā paṭivasati tatra ye te honti—gahapatī vā gahapatiputtā vā daharā vā vuddhasīlino, vuddhā vā vuddhasīlino, saddhāsampannā, sīlasampannā, cāgasampannā, paññāsampannā—tehi saddhiṁ santiṭṭhati sallapati sākacchaṁ samāpajjati; yathārūpānaṁ saddhāsampannānaṁ saddhāsampadaṁ anusikkhati, yathārūpānaṁ sīlasampannānaṁ sīlasampadaṁ anusikkhati, yathārūpānaṁ cāgasampannānaṁ cāgasampadaṁ anusikkhati, yathārūpānaṁ paññāsampannānaṁ paññāsampadaṁ anusikkhati.
an8.55:5.3	Ayaṁ vuccati, brāhmaṇa, kalyāṇamittatā.
an8.55:6.1	Katamā ca, brāhmaṇa, samajīvitā?
an8.55:6.2	Idha, brāhmaṇa, kulaputto āyañca bhogānaṁ viditvā vayañca bhogānaṁ viditvā samaṁ jīvikaṁ kappeti nāccogāḷhaṁ nātihīnaṁ: ‘evaṁ me āyo vayaṁ pariyādāya ṭhassati, na ca me vayo āyaṁ pariyādāya ṭhassatī’ti.
an8.55:6.3	Seyyathāpi, brāhmaṇa, tulādhāro vā tulādhārantevāsī vā tulaṁ paggahetvā jānāti: ‘ettakena vā onataṁ, ettakena vā unnatan’ti;
an8.55:6.4	evamevaṁ kho, brāhmaṇa, kulaputto āyañca bhogānaṁ viditvā vayañca bhogānaṁ viditvā samaṁ jīvikaṁ kappeti nāccogāḷhaṁ nātihīnaṁ: ‘evaṁ me āyo vayaṁ pariyādāya ṭhassati, na ca me vayo āyaṁ pariyādāya ṭhassatī’ti.
an8.55:6.5	Sacāyaṁ, brāhmaṇa, kulaputto appāyo samāno uḷāraṁ jīvikaṁ kappeti, tassa bhavanti vattāro: ‘udumbarakhādīvāyaṁ kulaputto bhoge khādatī’ti.
an8.55:6.6	Sace panāyaṁ, brāhmaṇa, kulaputto mahāyo samāno kasiraṁ jīvikaṁ kappeti, tassa bhavanti vattāro: ‘ajeṭṭhamaraṇaṁvāyaṁ kulaputto marissatī’ti.
an8.55:6.7	Yato ca khoyaṁ, brāhmaṇa, kulaputto āyañca bhogānaṁ viditvā vayañca bhogānaṁ viditvā samaṁ jīvikaṁ kappeti nāccogāḷhaṁ nātihīnaṁ: ‘evaṁ me āyo vayaṁ pariyādāya ṭhassati, na ca me vayo āyaṁ pariyādāya ṭhassatī’ti,
an8.55:6.8	ayaṁ vuccati, brāhmaṇa, samajīvitā.
an8.55:7.1	Evaṁ samuppannānaṁ, brāhmaṇa, bhogānaṁ cattāri apāyamukhāni honti—
an8.55:7.2	itthidhutto, surādhutto, akkhadhutto, pāpamitto pāpasahāyo pāpasampavaṅko.
an8.55:7.3	Seyyathāpi, brāhmaṇa, mahato taḷākassa cattāri ceva āyamukhāni, cattāri ca apāyamukhāni. Tassa puriso yāni ceva āyamukhāni tāni pidaheyya, yāni ca apāyamukhāni tāni vivareyya; devo ca na sammā dhāraṁ anuppaveccheyya. Evañhi tassa, brāhmaṇa, mahato taḷākassa parihāniyeva pāṭikaṅkhā, no vuddhi;
an8.55:7.4	evamevaṁ kho, brāhmaṇa, evaṁ samuppannānaṁ bhogānaṁ cattāri apāyamukhāni honti—
an8.55:7.5	itthidhutto, surādhutto, akkhadhutto, pāpamitto pāpasahāyo pāpasampavaṅko.
an8.55:8.1	Evaṁ samuppannānaṁ, brāhmaṇa, bhogānaṁ cattāri āyamukhāni honti—
an8.55:8.2	na itthidhutto, na surādhutto, na akkhadhutto, kalyāṇamitto kalyāṇasahāyo kalyāṇasampavaṅko.
an8.55:8.3	Seyyathāpi, brāhmaṇa, mahato taḷākassa cattāri ceva āyamukhāni cattāri ca apāyamukhāni. Tassa puriso yāni ceva āyamukhāni tāni vivareyya, yāni ca apāyamukhāni tāni pidaheyya; devo ca sammā dhāraṁ anuppaveccheyya. Evañhi tassa, brāhmaṇa, mahato taḷākassa vuddhiyeva pāṭikaṅkhā, no parihāni;
an8.55:8.4	evamevaṁ kho, brāhmaṇa, evaṁ samuppannānaṁ bhogānaṁ cattāri āyamukhāni honti—
an8.55:8.5	na itthidhutto …pe… kalyāṇasampavaṅko.
an8.55:9.1	Ime kho, brāhmaṇa, cattāro dhammā kulaputtassa diṭṭhadhammahitāya saṁvattanti diṭṭhadhammasukhāya.
an8.55:10.1	Cattārome, brāhmaṇa, kulaputtassa dhammā samparāyahitāya saṁvattanti samparāyasukhāya.
an8.55:10.2	Katame cattāro?
an8.55:10.3	Saddhāsampadā, sīlasampadā, cāgasampadā, paññāsampadā.
an8.55:10.4	Katamā ca, brāhmaṇa, saddhāsampadā?
an8.55:10.5	Idha, brāhmaṇa, kulaputto saddho hoti, saddahati tathāgatassa bodhiṁ:
an8.55:10.6	‘itipi so bhagavā …pe… satthā devamanussānaṁ buddho bhagavā’ti.
an8.55:10.7	Ayaṁ vuccati, brāhmaṇa, saddhāsampadā.
an8.55:11.1	Katamā ca, brāhmaṇa, sīlasampadā?
an8.55:11.2	Idha, brāhmaṇa, kulaputto pāṇātipātā paṭivirato hoti …pe… surāmerayamajjapamādaṭṭhānā paṭivirato hoti.
an8.55:11.3	Ayaṁ vuccati, brāhmaṇa, sīlasampadā.
an8.55:12.1	Katamā ca, brāhmaṇa, cāgasampadā?
an8.55:12.2	Idha, brāhmaṇa, kulaputto vigatamalamaccherena cetasā agāraṁ ajjhāvasati muttacāgo payatapāṇi vosaggarato yācayogo dānasaṁvibhāgarato.
an8.55:12.3	Ayaṁ vuccati, brāhmaṇa, cāgasampadā.
an8.55:13.1	Katamā ca, brāhmaṇa, paññāsampadā?
an8.55:13.2	Idha, brāhmaṇa, kulaputto paññavā hoti …pe… sammā dukkhakkhayagāminiyā.
an8.55:13.3	Ayaṁ vuccati, brāhmaṇa, paññāsampadā.
an8.55:14.1	“Ime kho, brāhmaṇa, cattāro dhammā kulaputtassa samparāyahitāya saṁvattanti samparāyasukhāyāti.
an8.55:15.1	Uṭṭhātā kammadheyyesu,
an8.55:15.2	appamatto vidhānavā;
an8.55:15.3	Samaṁ kappeti jīvikaṁ,
an8.55:15.4	sambhataṁ anurakkhati.
an8.55:16.1	Saddho sīlena sampanno,
an8.55:16.2	vadaññū vītamaccharo;
an8.55:16.3	Niccaṁ maggaṁ visodheti,
an8.55:16.4	sotthānaṁ samparāyikaṁ.
an8.55:17.1	Iccete aṭṭha dhammā ca,
an8.55:17.2	saddhassa gharamesino;
an8.55:17.3	Akkhātā saccanāmena,
an8.55:17.4	ubhayattha sukhāvahā.
an8.55:18.1	Diṭṭhadhammahitatthāya,
an8.55:18.2	samparāyasukhāya ca;
an8.55:18.3	Evametaṁ gahaṭṭhānaṁ,
an8.55:18.4	cāgo puññaṁ pavaḍḍhatī”ti.
an8.55:18.5	Pañcamaṁ.
an8.56:0.1	Aṅguttara Nikāya 8.56
an8.56:0.2	6. Gotamīvagga
an8.56:0.3	Bhayasutta
an8.56:1.1	“‘Bhayan’ti, bhikkhave, kāmānametaṁ adhivacanaṁ.
an8.56:1.2	‘Dukkhan’ti, bhikkhave, kāmānametaṁ adhivacanaṁ.
an8.56:1.3	‘Rogo’ti, bhikkhave, kāmānametaṁ adhivacanaṁ.
an8.56:1.4	‘Gaṇḍo’ti, bhikkhave, kāmānametaṁ adhivacanaṁ.
an8.56:1.5	‘Sallan’ti, bhikkhave, kāmānametaṁ adhivacanaṁ.
an8.56:1.6	‘Saṅgo’ti, bhikkhave, kāmānametaṁ adhivacanaṁ.
an8.56:1.7	‘Paṅko’ti, bhikkhave, kāmānametaṁ adhivacanaṁ.
an8.56:1.8	‘Gabbho’ti, bhikkhave, kāmānametaṁ adhivacanaṁ.
an8.56:1.9	Kasmā ca, bhikkhave, ‘bhayan’ti kāmānametaṁ adhivacanaṁ?
an8.56:1.10	Yasmā ca kāmarāgarattāyaṁ, bhikkhave, chandarāgavinibaddho diṭṭhadhammikāpi bhayā na parimuccati, samparāyikāpi bhayā na parimuccati, tasmā ‘bhayan’ti kāmānametaṁ adhivacanaṁ.
an8.56:1.11	Kasmā ca, bhikkhave, ‘dukkhan’ti …pe…
an8.56:1.12	‘rogo’ti …
an8.56:1.13	‘gaṇḍo’ti …
an8.56:1.14	‘sallan’ti …
an8.56:1.15	‘saṅgo’ti …
an8.56:1.16	‘paṅko’ti …
an8.56:1.17	‘gabbho’ti kāmānametaṁ adhivacanaṁ?
an8.56:1.18	Yasmā ca kāmarāgarattāyaṁ, bhikkhave, chandarāgavinibaddho diṭṭhadhammikāpi gabbhā na parimuccati, samparāyikāpi gabbhā na parimuccati, tasmā ‘gabbho’ti kāmānametaṁ adhivacanaṁ.
an8.56:2.1	Bhayaṁ dukkhañca rogo ca,
an8.56:2.2	gaṇḍo sallañca saṅgo ca;
an8.56:2.3	Paṅko gabbho ca ubhayaṁ,
an8.56:2.4	ete kāmā pavuccanti;
an8.56:2.5	Yattha satto puthujjano.
an8.56:3.1	Otiṇṇo sātarūpena,
an8.56:3.2	puna gabbhāya gacchati;
an8.56:3.3	Yato ca bhikkhu ātāpī,
an8.56:3.4	sampajaññaṁ na riccati.
an8.56:4.1	So imaṁ palipathaṁ duggaṁ,
an8.56:4.2	atikkamma tathāvidho;
an8.56:4.3	Pajaṁ jātijarūpetaṁ,
an8.56:4.4	phandamānaṁ avekkhatī”ti.
an8.56:4.5	Chaṭṭhaṁ.
an8.57:0.1	Aṅguttara Nikāya 8.57
an8.57:0.2	6. Gotamīvagga
an8.57:0.3	Paṭhamaāhuneyyasutta
an8.57:1.1	“Aṭṭhahi, bhikkhave, dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an8.57:1.2	Katamehi aṭṭhahi?
an8.57:1.3	Idha, bhikkhave, bhikkhu sīlavā hoti …pe… samādāya sikkhati sikkhāpadesu;
an8.57:1.4	bahussuto hoti …pe… diṭṭhiyā suppaṭividdhā;
an8.57:1.5	kalyāṇamitto hoti kalyāṇasahāyo kalyāṇasampavaṅko;
an8.57:1.6	sammādiṭṭhiko hoti, sammādassanena samannāgato;
an8.57:1.7	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;
an8.57:1.8	anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati;
an8.57:1.9	dibbena cakkhunā visuddhena atikkantamānusakena …pe… yathākammūpage satte pajānāti;
an8.57:1.10	āsavānaṁ khayā …pe… sacchikatvā upasampajja viharati.
an8.57:1.11	Imehi kho, bhikkhave, aṭṭhahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.
an8.57:1.12	Sattamaṁ.
an8.58:0.1	Aṅguttara Nikāya 8.58
an8.58:0.2	6. Gotamīvagga
an8.58:0.3	Dutiyaāhuneyyasutta
an8.58:1.1	“Aṭṭhahi, bhikkhave, dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.
an8.58:1.2	Katamehi aṭṭhahi?
an8.58:1.3	Idha, bhikkhave, bhikkhu sīlavā hoti …pe… samādāya sikkhati sikkhāpadesu;
an8.58:1.4	bahussuto hoti …pe… diṭṭhiyā suppaṭividdhā;
an8.58:1.5	āraddhavīriyo viharati thāmavā daḷhaparakkamo anikkhittadhuro kusalesu dhammesu;
an8.58:1.6	āraññiko hoti pantasenāsano;
an8.58:1.7	aratiratisaho hoti, uppannaṁ aratiṁ abhibhuyya abhibhuyya viharati;
an8.58:1.8	bhayabheravasaho hoti, uppannaṁ bhayabheravaṁ abhibhuyya abhibhuyya viharati;
an8.58:1.9	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;
an8.58:1.10	āsavānaṁ khayā …pe… sacchikatvā upasampajja viharati.
an8.58:1.11	Imehi kho, bhikkhave, aṭṭhahi dhammehi samannāgato bhikkhu āhuneyyo …pe… anuttaraṁ puññakkhettaṁ lokassā”ti.
an8.58:1.12	Aṭṭhamaṁ.
an8.59:0.1	Aṅguttara Nikāya 8.59
an8.59:0.2	6. Gotamīvagga
an8.59:0.3	Paṭhamapuggalasutta
an8.59:1.1	“Aṭṭhime, bhikkhave, puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassa?
an8.59:1.2	Katame aṭṭha?
an8.59:1.3	Sotāpanno, sotāpattiphalasacchikiriyāya paṭipanno, sakadāgāmī, sakadāgāmiphalasacchikiriyāya paṭipanno, anāgāmī, anāgāmiphalasacchikiriyāya paṭipanno, arahā, arahattāya paṭipanno.
an8.59:1.4	Ime kho, bhikkhave, aṭṭha puggalā āhuneyyā …pe… anuttaraṁ puññakkhettaṁ lokassāti.
an8.59:2.1	Cattāro ca paṭipannā,
an8.59:2.2	cattāro ca phale ṭhitā;
an8.59:2.3	Esa saṅgho ujubhūto,
an8.59:2.4	paññāsīlasamāhito.
an8.59:3.1	Yajamānānaṁ manussānaṁ,
an8.59:3.2	Puññapekkhāna pāṇinaṁ;
an8.59:3.3	Karotaṁ opadhikaṁ puññaṁ,
an8.59:3.4	Saṅghe dinnaṁ mahapphalan”ti.
an8.59:3.5	Navamaṁ.
an8.60:0.1	Aṅguttara Nikāya 8.60
an8.60:0.2	6. Gotamīvagga
an8.60:0.3	Dutiyapuggalasutta
an8.60:1.1	“Aṭṭhime, bhikkhave, puggalā āhuneyyā …pe… anuttaraṁ puññakkhettaṁ lokassa.
an8.60:1.2	Katame aṭṭha?
an8.60:1.3	Sotāpanno, sotāpattiphalasacchikiriyāya paṭipanno …pe… arahā, arahattāya paṭipanno.
an8.60:1.4	Ime kho, bhikkhave, aṭṭha puggalā āhuneyyā …pe… anuttaraṁ puññakkhettaṁ lokassāti.
an8.60:2.1	Cattāro ca paṭipannā,
an8.60:2.2	cattāro ca phale ṭhitā;
an8.60:2.3	Esa saṅgho samukkaṭṭho,
an8.60:2.4	sattānaṁ aṭṭha puggalā.
an8.60:3.1	Yajamānānaṁ manussānaṁ,
an8.60:3.2	puññapekkhāna pāṇinaṁ;
an8.60:3.3	Karotaṁ opadhikaṁ puññaṁ,
an8.60:3.4	ettha dinnaṁ mahapphalan”ti.
an8.60:3.5	Dasamaṁ.
an8.60:3.6	Gotamīvaggo paṭhamo.
an8.60:4.0	Tassuddānaṁ
an8.60:4.1	Gotamī ovādaṁ saṅkhittaṁ,
an8.60:4.2	dīghajāṇu ca ujjayo;
an8.60:4.3	Bhayā dve āhuneyyā ca,
an8.60:4.4	dve ca aṭṭha puggalāti.
an8.61:0.1	Aṅguttara Nikāya 8.61
an8.61:0.2	7. Bhūmicālavagga
an8.61:0.3	Icchāsutta
an8.61:1.1	“Aṭṭhime, bhikkhave, puggalā santo saṁvijjamānā lokasmiṁ.
an8.61:1.2	Katame aṭṭha?
an8.61:1.3	Idha, bhikkhave, bhikkhuno pavivittassa viharato nirāyattavuttino icchā uppajjati lābhāya.
an8.61:1.4	So uṭṭhahati ghaṭati vāyamati lābhāya.
an8.61:1.5	Tassa uṭṭhahato ghaṭato vāyamato lābhāya lābho nuppajjati.
an8.61:1.6	So tena alābhena socati kilamati paridevati, urattāḷiṁ kandati, sammohaṁ āpajjati.
an8.61:1.7	Ayaṁ vuccati, bhikkhave:
an8.61:1.8	‘bhikkhu iccho viharati lābhāya, uṭṭhahati ghaṭati vāyamati lābhāya, na ca lābhī, socī ca paridevī ca, cuto ca saddhammā’.
an8.61:2.1	Idha pana, bhikkhave, bhikkhuno pavivittassa viharato nirāyattavuttino icchā uppajjati lābhāya.
an8.61:2.2	So uṭṭhahati ghaṭati vāyamati lābhāya.
an8.61:2.3	Tassa uṭṭhahato ghaṭato vāyamato lābhāya lābho uppajjati.
an8.61:2.4	So tena lābhena majjati pamajjati pamādamāpajjati.
an8.61:2.5	Ayaṁ vuccati, bhikkhave:
an8.61:2.6	‘bhikkhu iccho viharati lābhāya, uṭṭhahati ghaṭati vāyamati lābhāya, lābhī ca madī ca pamādī ca, cuto ca saddhammā’.
an8.61:3.1	Idha pana, bhikkhave, bhikkhuno pavivittassa viharato nirāyattavuttino icchā uppajjati lābhāya.
an8.61:3.2	So na uṭṭhahati na ghaṭati na vāyamati lābhāya.
an8.61:3.3	Tassa anuṭṭhahato aghaṭato avāyamato lābhāya lābho nuppajjati.
an8.61:3.4	So tena alābhena socati, kilamati, paridevati, urattāḷiṁ kandati, sammohaṁ āpajjati.
an8.61:3.5	Ayaṁ vuccati, bhikkhave:
an8.61:3.6	‘bhikkhu iccho viharati lābhāya, na uṭṭhahati na ghaṭati na vāyamati lābhāya, na ca lābhī, socī ca paridevī ca, cuto ca saddhammā’.
an8.61:4.1	Idha pana, bhikkhave, bhikkhuno pavivittassa viharato nirāyattavuttino icchā uppajjati lābhāya.
an8.61:4.2	So na uṭṭhahati, na ghaṭati, na vāyamati lābhāya.
an8.61:4.3	Tassa anuṭṭhahato, aghaṭato, avāyamato lābhāya lābho uppajjati.
an8.61:4.4	So tena lābhena majjati, pamajjati, pamādamāpajjati.
an8.61:4.5	Ayaṁ vuccati, bhikkhave:
an8.61:4.6	‘bhikkhu iccho viharati lābhāya, na uṭṭhahati na ghaṭati na vāyamati lābhāya, lābhī ca madī ca, pamādī ca, cuto ca saddhammā’.
an8.61:5.1	Idha pana, bhikkhave, bhikkhuno pavivittassa viharato nirāyattavuttino icchā uppajjati lābhāya.
an8.61:5.2	So uṭṭhahati ghaṭati vāyamati lābhāya.
an8.61:5.3	Tassa uṭṭhahato ghaṭato vāyamato lābhāya lābho nuppajjati.
an8.61:5.4	So tena alābhena na socati na kilamati na paridevati, na urattāḷiṁ kandati, na sammohaṁ āpajjati.
an8.61:5.5	Ayaṁ vuccati, bhikkhave:
an8.61:5.6	‘bhikkhu iccho viharati lābhāya, uṭṭhahati ghaṭati vāyamati lābhāya, na ca lābhī, na ca socī na ca paridevī, accuto ca saddhammā’.
an8.61:6.1	Idha pana, bhikkhave, bhikkhuno pavivittassa viharato nirāyattavuttino icchā uppajjati lābhāya.
an8.61:6.2	So uṭṭhahati ghaṭati vāyamati lābhāya.
an8.61:6.3	Tassa uṭṭhahato ghaṭato vāyamato lābhāya lābho uppajjati.
an8.61:6.4	So tena lābhena na majjati, na pamajjati, na pamādamāpajjati.
an8.61:6.5	Ayaṁ vuccati, bhikkhave:
an8.61:6.6	‘bhikkhu iccho viharati lābhāya, uṭṭhahati ghaṭati vāyamati lābhāya, lābhī ca, na ca madī na ca pamādī, accuto ca saddhammā’.
an8.61:7.1	Idha pana, bhikkhave, bhikkhuno pavivittassa viharato nirāyattavuttino icchā uppajjati lābhāya.
an8.61:7.2	So na uṭṭhahati, na ghaṭati, na vāyamati lābhāya.
an8.61:7.3	Tassa anuṭṭhahato, aghaṭato, avāyamato lābhāya lābho nuppajjati.
an8.61:7.4	So tena alābhena na socati, na kilamati, na paridevati, na urattāḷiṁ kandati, na sammohaṁ āpajjati.
an8.61:7.5	Ayaṁ vuccati, bhikkhave:
an8.61:7.6	‘bhikkhu iccho viharati lābhāya, na uṭṭhahati, na ghaṭati, na vāyamati lābhāya, na ca lābhī, na ca socī na ca paridevī, accuto ca saddhammā’.
an8.61:8.1	Idha pana, bhikkhave, bhikkhuno pavivittassa viharato nirāyattavuttino icchā uppajjati lābhāya.
an8.61:8.2	So na uṭṭhahati, na ghaṭati, na vāyamati lābhāya.
an8.61:8.3	Tassa anuṭṭhahato aghaṭato avāyamato lābhāya lābho uppajjati.
an8.61:8.4	So tena lābhena na majjati, na pamajjati, na pamādamāpajjati.
an8.61:8.5	Ayaṁ vuccati, bhikkhave:
an8.61:8.6	‘bhikkhu iccho viharati lābhāya, na uṭṭhahati, na ghaṭati, na vāyamati lābhāya, lābhī ca, na ca madī na ca pamādī, accuto ca saddhammā’.
an8.61:9.1	Ime kho, bhikkhave, aṭṭha puggalā santo saṁvijjamānā lokasmin”ti.
an8.61:9.2	Paṭhamaṁ.
an8.62:0.1	Aṅguttara Nikāya 8.62
an8.62:0.2	7. Bhūmicālavagga
an8.62:0.3	Alaṁsutta
an8.62:1.1	“Chahi, bhikkhave, dhammehi samannāgato bhikkhu alaṁ attano alaṁ paresaṁ.
an8.62:1.2	Katamehi chahi?
an8.62:1.3	Idha, bhikkhave, bhikkhu khippanisanti ca hoti kusalesu dhammesu;
an8.62:1.4	sutānañca dhammānaṁ dhāraṇajātiko hoti;
an8.62:1.5	dhātānañca dhammānaṁ atthūpaparikkhitā hoti;
an8.62:1.6	atthamaññāya dhammamaññāya dhammānudhammappaṭipanno ca hoti;
an8.62:1.7	kalyāṇavāco ca hoti kalyāṇavākkaraṇo, poriyā vācāya samannāgato vissaṭṭhāya anelagaḷāya atthassa viññāpaniyā;
an8.62:1.8	sandassako ca hoti samādapako samuttejako sampahaṁsako sabrahmacārīnaṁ.
an8.62:1.9	Imehi kho, bhikkhave, chahi dhammehi samannāgato bhikkhu alaṁ attano alaṁ paresaṁ.
an8.62:2.1	Pañcahi, bhikkhave, dhammehi samannāgato bhikkhu alaṁ attano alaṁ paresaṁ.
an8.62:2.2	Katamehi pañcahi?
an8.62:2.3	Idha, bhikkhave, bhikkhu na heva kho khippanisanti ca hoti kusalesu dhammesu;
an8.62:2.4	sutānañca dhammānaṁ dhāraṇajātiko hoti;
an8.62:2.5	dhātānañca dhammānaṁ atthūpaparikkhitā hoti;
an8.62:2.6	atthamaññāya dhammamaññāya dhammānudhammappaṭipanno ca hoti;
an8.62:2.7	kalyāṇavāco ca hoti …pe… atthassa viññāpaniyā;
an8.62:2.8	sandassako ca hoti samādapako samuttejako sampahaṁsako sabrahmacārīnaṁ.
an8.62:2.9	Imehi kho, bhikkhave, pañcahi dhammehi samannāgato bhikkhu alaṁ attano alaṁ paresaṁ.
an8.62:3.1	Catūhi, bhikkhave, dhammehi samannāgato bhikkhu alaṁ attano nālaṁ paresaṁ.
an8.62:3.2	Katamehi catūhi?
an8.62:3.3	Idha, bhikkhave, bhikkhu khippanisanti ca hoti kusalesu dhammesu;
an8.62:3.4	sutānañca dhammānaṁ dhāraṇajātiko hoti;
an8.62:3.5	dhātānañca dhammānaṁ atthūpaparikkhitā hoti;
an8.62:3.6	atthamaññāya dhammamaññāya dhammānudhammappaṭipanno ca hoti;
an8.62:3.7	no ca kalyāṇavāco hoti kalyāṇavākkaraṇo, poriyā vācāya samannāgato vissaṭṭhāya anelagaḷāya atthassa viññāpaniyā;
an8.62:3.8	no ca sandassako hoti samādapako samuttejako sampahaṁsako sabrahmacārīnaṁ.
an8.62:3.9	Imehi kho, bhikkhave, catūhi dhammehi samannāgato bhikkhu alaṁ attano nālaṁ paresaṁ.
an8.62:4.1	Catūhi, bhikkhave, dhammehi samannāgato bhikkhu alaṁ paresaṁ nālaṁ attano.
an8.62:4.2	Katamehi catūhi?
an8.62:4.3	Idha, bhikkhave, bhikkhu khippanisanti ca hoti kusalesu dhammesu;
an8.62:4.4	sutānañca dhammānaṁ dhāraṇajātiko hoti;
an8.62:4.5	no ca dhātānaṁ dhammānaṁ atthūpaparikkhitā hoti;
an8.62:4.6	na ca atthamaññāya dhammamaññāya dhammānudhammappaṭipanno hoti;
an8.62:4.7	kalyāṇavāco ca hoti kalyāṇavākkaraṇo …pe… atthassa viññāpaniyā;
an8.62:4.8	sandassako ca hoti …pe… sabrahmacārīnaṁ.
an8.62:4.9	Imehi kho, bhikkhave, catūhi dhammehi samannāgato bhikkhu alaṁ paresaṁ, nālaṁ attano.
an8.62:5.1	Tīhi, bhikkhave, dhammehi samannāgato bhikkhu alaṁ attano nālaṁ paresaṁ.
an8.62:5.2	Katamehi tīhi?
an8.62:5.3	Idha, bhikkhave, bhikkhu na heva kho khippanisanti ca hoti kusalesu dhammesu;
an8.62:5.4	sutānañca dhammānaṁ dhāraṇajātiko hoti;
an8.62:5.5	dhātānañca dhammānaṁ atthūpaparikkhitā hoti;
an8.62:5.6	atthamaññāya dhammamaññāya dhammānudhammappaṭipanno ca hoti;
an8.62:5.7	no ca kalyāṇavāco hoti kalyāṇavākkaraṇo, poriyā vācāya samannāgato vissaṭṭhāya anelagaḷāya atthassa viññāpaniyā;
an8.62:5.8	no ca sandassako hoti samādapako samuttejako sampahaṁsako sabrahmacārīnaṁ.
an8.62:5.9	Imehi kho, bhikkhave, tīhi dhammehi samannāgato bhikkhu alaṁ attano, nālaṁ paresaṁ.
an8.62:6.1	Tīhi, bhikkhave, dhammehi samannāgato bhikkhu alaṁ paresaṁ, nālaṁ attano.
an8.62:6.2	Katamehi tīhi?
an8.62:6.3	Idha, bhikkhave, bhikkhu na heva kho khippanisanti ca hoti kusalesu dhammesu;
an8.62:6.4	sutānañca dhammānaṁ dhāraṇajātiko hoti;
an8.62:6.5	no ca dhātānaṁ dhammānaṁ atthūpaparikkhitā hoti;
an8.62:6.6	no ca atthamaññāya dhammamaññāya dhammānudhammappaṭipanno hoti;
an8.62:6.7	kalyāṇavāco ca hoti …pe… atthassa viññāpaniyā;
an8.62:6.8	sandassako ca hoti samādapako samuttejako sampahaṁsako sabrahmacārīnaṁ.
an8.62:6.9	Imehi kho, bhikkhave, tīhi dhammehi samannāgato bhikkhu alaṁ paresaṁ, nālaṁ attano.
an8.62:7.1	Dvīhi, bhikkhave, dhammehi samannāgato bhikkhu alaṁ attano, nālaṁ paresaṁ.
an8.62:7.2	Katamehi dvīhi?
an8.62:7.3	Idha, bhikkhave, bhikkhu na heva kho khippanisanti ca hoti kusalesu dhammesu;
an8.62:7.4	no ca sutānaṁ dhammānaṁ dhāraṇajātiko hoti;
an8.62:7.5	dhātānañca dhammānaṁ atthūpaparikkhitā hoti;
an8.62:7.6	atthamaññāya dhammamaññāya dhammānudhammappaṭipanno ca hoti;
an8.62:7.7	no ca kalyāṇavāco hoti …pe… atthassa viññāpaniyā;
an8.62:7.8	no ca sandassako hoti …pe… sabrahmacārīnaṁ.
an8.62:7.9	Imehi kho, bhikkhave, dvīhi dhammehi samannāgato bhikkhu alaṁ attano, nālaṁ paresaṁ.
an8.62:8.1	Dvīhi, bhikkhave, dhammehi samannāgato bhikkhu alaṁ paresaṁ, nālaṁ attano.
an8.62:8.2	Katamehi dvīhi?
an8.62:8.3	Idha, bhikkhave, bhikkhu na heva kho khippanisanti ca hoti kusalesu dhammesu;
an8.62:8.4	no ca sutānaṁ dhammānaṁ dhāraṇajātiko hoti;
an8.62:8.5	no ca dhātānaṁ dhammānaṁ atthūpaparikkhitā hoti;
an8.62:8.6	no ca atthamaññāya dhammamaññāya dhammānudhammappaṭipanno hoti;
an8.62:8.7	kalyāṇavāco ca hoti kalyāṇavākkaraṇo, poriyā vācāya samannāgato vissaṭṭhāya anelagaḷāya atthassa viññāpaniyā;
an8.62:8.8	sandassako ca hoti samādapako samuttejako sampahaṁsako sabrahmacārīnaṁ.
an8.62:8.9	Imehi kho, bhikkhave, dvīhi dhammehi samannāgato bhikkhu alaṁ paresaṁ, nālaṁ attano”ti.
an8.62:8.10	Dutiyaṁ.
an8.63:0.1	Aṅguttara Nikāya 8.63
an8.63:0.2	7. Bhūmicālavagga
an8.63:0.3	Saṅkhittasutta
an8.63:1.1	Atha kho aññataro bhikkhu yena bhagavā tenupasaṅkami …pe… ekamantaṁ nisinno kho so bhikkhu bhagavantaṁ etadavoca:
an8.63:1.2	“sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.
an8.63:1.3	“Evamevaṁ panidhekacce moghapurisā mamaññeva ajjhesanti.
an8.63:1.4	Dhamme ca bhāsite mamaññeva anubandhitabbaṁ maññantī”ti.
an8.63:1.5	“Desetu me, bhante, bhagavā saṅkhittena dhammaṁ, desetu sugato saṅkhittena dhammaṁ. Appeva nāmāhaṁ bhagavato bhāsitassa atthaṁ ājāneyyaṁ, appeva nāmāhaṁ bhagavato bhāsitassa dāyādo assan”ti.
an8.63:1.6	“Tasmātiha te, bhikkhu, evaṁ sikkhitabbaṁ:
an8.63:1.7	‘ajjhattaṁ me cittaṁ ṭhitaṁ bhavissati susaṇṭhitaṁ, na ca uppannā pāpakā akusalā dhammā cittaṁ pariyādāya ṭhassantī’ti.
an8.63:1.8	Evañhi te, bhikkhu, sikkhitabbaṁ.
an8.63:2.1	Yato kho te, bhikkhu, ajjhattaṁ cittaṁ ṭhitaṁ hoti susaṇṭhitaṁ, na ca uppannā pāpakā akusalā dhammā cittaṁ pariyādāya tiṭṭhanti, tato te, bhikkhu, evaṁ sikkhitabbaṁ:
an8.63:2.2	‘mettā me cetovimutti bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā’ti.
an8.63:2.3	Evañhi te, bhikkhu, sikkhitabbaṁ.
an8.63:3.1	Yato kho te, bhikkhu, ayaṁ samādhi evaṁ bhāvito hoti bahulīkato, tato tvaṁ, bhikkhu, imaṁ samādhiṁ savitakkampi savicāraṁ bhāveyyāsi, avitakkampi vicāramattaṁ bhāveyyāsi, avitakkampi avicāraṁ bhāveyyāsi, sappītikampi bhāveyyāsi, nippītikampi bhāveyyāsi, sātasahagatampi bhāveyyāsi, upekkhāsahagatampi bhāveyyāsi.
an8.63:4.1	Yato kho, te bhikkhu, ayaṁ samādhi evaṁ bhāvito hoti subhāvito, tato te, bhikkhu, evaṁ sikkhitabbaṁ:
an8.63:4.2	‘karuṇā me cetovimutti …
an8.63:4.3	muditā me cetovimutti …
an8.63:4.4	upekkhā me cetovimutti bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā’ti.
an8.63:4.5	Evañhi te, bhikkhu, sikkhitabbaṁ.
an8.63:5.1	Yato kho te, bhikkhu, ayaṁ samādhi evaṁ bhāvito hoti subhāvito, tato tvaṁ, bhikkhu, imaṁ samādhiṁ savitakkasavicārampi bhāveyyāsi, avitakkavicāramattampi bhāveyyāsi, avitakkaavicārampi bhāveyyāsi, sappītikampi bhāveyyāsi, nippītikampi bhāveyyāsi, sātasahagatampi bhāveyyāsi, upekkhāsahagatampi bhāveyyāsi.
an8.63:6.1	Yato kho te, bhikkhu, ayaṁ samādhi evaṁ bhāvito hoti subhāvito, tato te, bhikkhu, evaṁ sikkhitabbaṁ:
an8.63:6.2	‘kāye kāyānupassī viharissāmi ātāpī sampajāno satimā, vineyya loke abhijjhādomanassan’ti.
an8.63:6.3	Evañhi te, bhikkhu, sikkhitabbaṁ.
an8.63:7.1	Yato kho te, bhikkhu, ayaṁ samādhi evaṁ bhāvito hoti bahulīkato, tato tvaṁ, bhikkhu, imaṁ samādhiṁ savitakkasavicārampi bhāveyyāsi, avitakkavicāramattampi bhāveyyāsi, avitakkaavicārampi bhāveyyāsi, sappītikampi bhāveyyāsi, nippītikampi bhāveyyāsi, sātasahagatampi bhāveyyāsi, upekkhāsahagatampi bhāveyyāsi.
an8.63:8.1	Yato kho te, bhikkhu, ayaṁ samādhi evaṁ bhāvito hoti subhāvito, tato te, bhikkhu, evaṁ sikkhitabbaṁ:
an8.63:8.2	‘vedanāsu …
an8.63:8.3	citte …
an8.63:8.4	dhammesu dhammānupassī viharissāmi ātāpī sampajāno satimā, vineyya loke abhijjhādomanassan’ti.
an8.63:8.5	Evañhi te, bhikkhu, sikkhitabbaṁ.
an8.63:9.1	Yato kho te, bhikkhu, ayaṁ samādhi evaṁ bhāvito hoti bahulīkato, tato tvaṁ, bhikkhu, imaṁ samādhiṁ savitakkasavicārampi bhāveyyāsi, avitakkavicāramattampi bhāveyyāsi, avitakkaavicārampi bhāveyyāsi, sappītikampi bhāveyyāsi, nippītikampi bhāveyyāsi, sātasahagatampi bhāveyyāsi, upekkhāsahagatampi bhāveyyāsi.
an8.63:10.1	Yato kho te, bhikkhu, ayaṁ samādhi evaṁ bhāvito hoti subhāvito, tato tvaṁ, bhikkhu, yena yeneva gagghasi phāsuṁyeva gagghasi, yattha yattha ṭhassasi phāsuṁyeva ṭhassasi, yattha yattha nisīdissasi phāsuṁyeva nisīdissasi, yattha yattha seyyaṁ kappessasi phāsuṁyeva seyyaṁ kappessasī”ti.
an8.63:11.1	Atha kho so bhikkhu bhagavatā iminā ovādena ovadito uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an8.63:11.2	Atha kho so bhikkhu eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
an8.63:11.3	“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
an8.63:11.4	Aññataro ca pana so bhikkhu arahataṁ ahosīti.
an8.63:11.5	Tatiyaṁ.
an8.64:0.1	Aṅguttara Nikāya 8.64
an8.64:0.2	7. Bhūmicālavagga
an8.64:0.3	Gayāsīsasutta
an8.64:1.1	Ekaṁ samayaṁ bhagavā gayāyaṁ viharati gayāsīse.
an8.64:1.2	Tatra kho bhagavā bhikkhū āmantesi …pe…
an8.64:1.3	“pubbāhaṁ, bhikkhave, sambodhā anabhisambuddho bodhisattova samāno obhāsaññeva kho sañjānāmi, no ca rūpāni passāmi.
an8.64:2.1	Tassa mayhaṁ, bhikkhave, etadahosi:
an8.64:2.2	‘sace kho ahaṁ obhāsañceva sañjāneyyaṁ rūpāni ca passeyyaṁ;
an8.64:2.3	evaṁ me idaṁ ñāṇadassanaṁ parisuddhataraṁ assā’ti.
an8.64:3.1	So kho ahaṁ, bhikkhave, aparena samayena appamatto ātāpī pahitatto viharanto obhāsañceva sañjānāmi, rūpāni ca passāmi;
an8.64:3.2	no ca kho tāhi devatāhi saddhiṁ santiṭṭhāmi sallapāmi sākacchaṁ samāpajjāmi.
an8.64:4.1	Tassa mayhaṁ, bhikkhave, etadahosi:
an8.64:4.2	‘sace kho ahaṁ obhāsañceva sañjāneyyaṁ, rūpāni ca passeyyaṁ, tāhi ca devatāhi saddhiṁ santiṭṭheyyaṁ sallapeyyaṁ sākacchaṁ samāpajjeyyaṁ;
an8.64:4.3	evaṁ me idaṁ ñāṇadassanaṁ parisuddhataraṁ assā’ti.
an8.64:5.1	So kho ahaṁ, bhikkhave, aparena samayena appamatto ātāpī pahitatto viharanto obhāsañceva sañjānāmi, rūpāni ca passāmi, tāhi ca devatāhi saddhiṁ santiṭṭhāmi sallapāmi sākacchaṁ samāpajjāmi;
an8.64:5.2	no ca kho tā devatā jānāmi—
an8.64:5.3	imā devatā amukamhā vā amukamhā vā devanikāyāti.
an8.64:6.1	Tassa mayhaṁ, bhikkhave, etadahosi:
an8.64:6.2	‘sace kho ahaṁ obhāsañceva sañjāneyyaṁ, rūpāni ca passeyyaṁ, tāhi ca devatāhi saddhiṁ santiṭṭheyyaṁ sallapeyyaṁ sākacchaṁ samāpajjeyyaṁ, tā ca devatā jāneyyaṁ:
an8.64:6.3	“imā devatā amukamhā vā amukamhā vā devanikāyā”ti;
an8.64:6.4	evaṁ me idaṁ ñāṇadassanaṁ parisuddhataraṁ assā’ti.
an8.64:7.1	So kho ahaṁ, bhikkhave, aparena samayena appamatto ātāpī pahitatto viharanto obhāsañceva sañjānāmi, rūpāni ca passāmi, tāhi ca devatāhi saddhiṁ santiṭṭhāmi sallapāmi sākacchaṁ samāpajjāmi, tā ca devatā jānāmi:
an8.64:7.2	‘imā devatā amukamhā vā amukamhā vā devanikāyā’ti;
an8.64:7.3	no ca kho tā devatā jānāmi:
an8.64:7.4	‘imā devatā imassa kammassa vipākena ito cutā tattha upapannā’ti …pe…
an8.64:7.5	tā ca devatā jānāmi:
an8.64:7.6	‘imā devatā imassa kammassa vipākena ito cutā tattha upapannā’ti;
an8.64:7.7	no ca kho tā devatā jānāmi:
an8.64:7.8	‘imā devatā imassa kammassa vipākena evamāhārā evaṁsukhadukkhappaṭisaṁvediniyo’ti …pe…
an8.64:7.9	tā ca devatā jānāmi:
an8.64:7.10	‘imā devatā imassa kammassa vipākena evamāhārā evaṁsukhadukkhappaṭisaṁvediniyo’ti;
an8.64:7.11	no ca kho tā devatā jānāmi:
an8.64:7.12	‘imā devatā evaṁdīghāyukā evaṁciraṭṭhitikā’ti …pe…
an8.64:7.13	tā ca devatā jānāmi:
an8.64:7.14	‘imā devatā evaṁdīghāyukā evaṁciraṭṭhitikā’ti;
an8.64:7.15	no ca kho tā devatā jānāmi yadi vā me imāhi devatāhi saddhiṁ sannivutthapubbaṁ yadi vā na sannivutthapubbanti.
an8.64:8.1	Tassa mayhaṁ, bhikkhave, etadahosi:
an8.64:8.2	‘sace kho ahaṁ obhāsañceva sañjāneyyaṁ, rūpāni ca passeyyaṁ, tāhi ca devatāhi saddhiṁ santiṭṭheyyaṁ sallapeyyaṁ sākacchaṁ samāpajjeyyaṁ, tā ca devatā jāneyyaṁ:
an8.64:8.3	“imā devatā amukamhā vā amukamhā vā devanikāyā”ti, tā ca devatā jāneyyaṁ:
an8.64:8.4	“imā devatā imassa kammassa vipākena ito cutā tattha upapannā”ti, tā ca devatā jāneyyaṁ:
an8.64:8.5	“imā devatā evamāhārā evaṁsukhadukkhappaṭisaṁvediniyo”ti, tā ca devatā jāneyyaṁ:
an8.64:8.6	“imā devatā evaṁdīghāyukā evaṁciraṭṭhitikā”ti, tā ca devatā jāneyyaṁ yadi vā me imāhi devatāhi saddhiṁ sannivutthapubbaṁ yadi vā na sannivutthapubbanti;
an8.64:8.7	evaṁ me idaṁ ñāṇadassanaṁ parisuddhataraṁ assā’ti.
an8.64:9.1	So kho ahaṁ, bhikkhave, aparena samayena appamatto ātāpī pahitatto viharanto obhāsañceva sañjānāmi, rūpāni ca passāmi, tāhi ca devatāhi saddhiṁ santiṭṭhāmi sallapāmi sākacchaṁ samāpajjāmi, tā ca devatā jānāmi:
an8.64:9.2	‘imā devatā amukamhā vā amukamhā vā devanikāyā’ti, tā ca devatā jānāmi:
an8.64:9.3	‘imā devatā imassa kammassa vipākena ito cutā tattha upapannā’ti, tā ca devatā jānāmi:
an8.64:9.4	‘imā devatā evamāhārā evaṁsukhadukkhappaṭisaṁvediniyo’ti, tā ca devatā jānāmi:
an8.64:9.5	‘imā devatā evaṁdīghāyukā evaṁciraṭṭhitikā’ti, tā ca devatā jānāmi yadi vā me devatāhi saddhiṁ sannivutthapubbaṁ yadi vā na sannivutthapubbanti.
an8.64:10.1	Yāvakīvañca me, bhikkhave, evaṁ aṭṭhaparivaṭṭaṁ adhidevañāṇadassanaṁ na suvisuddhaṁ ahosi, neva tāvāhaṁ, bhikkhave, ‘sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṁ sammāsambodhiṁ abhisambuddho’ti paccaññāsiṁ.
an8.64:10.2	Yato ca kho me, bhikkhave, evaṁ aṭṭhaparivaṭṭaṁ adhidevañāṇadassanaṁ suvisuddhaṁ ahosi, athāhaṁ, bhikkhave, ‘sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṁ sammāsambodhiṁ abhisambuddho’ti paccaññāsiṁ;
an8.64:10.3	ñāṇañca pana me dassanaṁ udapādi;
an8.64:10.4	akuppā me cetovimutti; ayamantimā jāti natthi dāni punabbhavo”ti.
an8.64:10.5	Catutthaṁ.
an8.65:0.1	Aṅguttara Nikāya 8.65
an8.65:0.2	7. Bhūmicālavagga
an8.65:0.3	Abhibhāyatanasutta
an8.65:1.1	“Aṭṭhimāni, bhikkhave, abhibhāyatanāni.
an8.65:1.2	Katamāni aṭṭha?
an8.65:1.3	Ajjhattaṁ rūpasaññī eko bahiddhā rūpāni passati parittāni suvaṇṇadubbaṇṇāni.
an8.65:1.4	‘Tāni abhibhuyya jānāmi passāmī’ti, evaṁsaññī hoti.
an8.65:1.5	Idaṁ paṭhamaṁ abhibhāyatanaṁ.
an8.65:2.1	Ajjhattaṁ rūpasaññī eko bahiddhā rūpāni passati appamāṇāni suvaṇṇadubbaṇṇāni.
an8.65:2.2	‘Tāni abhibhuyya jānāmi passāmī’ti, evaṁsaññī hoti.
an8.65:2.3	Idaṁ dutiyaṁ abhibhāyatanaṁ.
an8.65:3.1	Ajjhattaṁ arūpasaññī eko bahiddhā rūpāni passati parittāni suvaṇṇadubbaṇṇāni.
an8.65:3.2	‘Tāni abhibhuyya jānāmi passāmī’ti, evaṁsaññī hoti.
an8.65:3.3	Idaṁ tatiyaṁ abhibhāyatanaṁ.
an8.65:4.1	Ajjhattaṁ arūpasaññī eko bahiddhā rūpāni passati appamāṇāni suvaṇṇadubbaṇṇāni.
an8.65:4.2	‘Tāni abhibhuyya jānāmi passāmī’ti, evaṁsaññī hoti.
an8.65:4.3	Idaṁ catutthaṁ abhibhāyatanaṁ.
an8.65:5.1	Ajjhattaṁ arūpasaññī eko bahiddhā rūpāni passati nīlāni nīlavaṇṇāni nīlanidassanāni nīlanibhāsāni.
an8.65:5.2	‘Tāni abhibhuyya jānāmi passāmī’ti, evaṁsaññī hoti.
an8.65:5.3	Idaṁ pañcamaṁ abhibhāyatanaṁ.
an8.65:6.1	Ajjhattaṁ arūpasaññī eko bahiddhā rūpāni passati pītāni pītavaṇṇāni pītanidassanāni pītanibhāsāni.
an8.65:6.2	‘Tāni abhibhuyya jānāmi passāmī’ti, evaṁsaññī hoti.
an8.65:6.3	Idaṁ chaṭṭhaṁ abhibhāyatanaṁ.
an8.65:7.1	Ajjhattaṁ arūpasaññī eko bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni.
an8.65:7.2	‘Tāni abhibhuyya jānāmi passāmī’ti, evaṁsaññī hoti.
an8.65:7.3	Idaṁ sattamaṁ abhibhāyatanaṁ.
an8.65:8.1	Ajjhattaṁ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni.
an8.65:8.2	‘Tāni abhibhuyya jānāmi passāmī’ti, evaṁsaññī hoti.
an8.65:8.3	Idaṁ aṭṭhamaṁ abhibhāyatanaṁ.
an8.65:8.4	Imāni kho, bhikkhave, aṭṭha abhibhāyatanānī”ti.
an8.65:8.5	Pañcamaṁ.
an8.66:0.1	Aṅguttara Nikāya 8.66
an8.66:0.2	7. Bhūmicālavagga
an8.66:0.3	Vimokkhasutta
an8.66:1.1	“Aṭṭhime, bhikkhave, vimokkhā.
an8.66:1.2	Katame aṭṭha?
an8.66:1.3	Rūpī rūpāni passati.
an8.66:1.4	Ayaṁ paṭhamo vimokkho.
an8.66:2.1	Ajjhattaṁ arūpasaññī, bahiddhā rūpāni passati.
an8.66:2.2	Ayaṁ dutiyo vimokkho.
an8.66:3.1	Subhanteva adhimutto hoti.
an8.66:3.2	Ayaṁ tatiyo vimokkho.
an8.66:4.1	Sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an8.66:4.2	Ayaṁ catuttho vimokkho.
an8.66:5.1	Sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.
an8.66:5.2	Ayaṁ pañcamo vimokkho.
an8.66:6.1	Sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
an8.66:6.2	Ayaṁ chaṭṭho vimokkho.
an8.66:7.1	Sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
an8.66:7.2	Ayaṁ sattamo vimokkho.
an8.66:8.1	Sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati.
an8.66:8.2	Ayaṁ aṭṭhamo vimokkho.
an8.66:8.3	Ime kho, bhikkhave, aṭṭha vimokkhā”ti.
an8.66:8.4	Chaṭṭhaṁ.
an8.67:0.1	Aṅguttara Nikāya 8.67
an8.67:0.2	7. Bhūmicālavagga
an8.67:0.3	Anariyavohārasutta
an8.67:1.1	“Aṭṭhime, bhikkhave, anariyavohārā.
an8.67:1.2	Katame aṭṭha?
an8.67:1.3	Adiṭṭhe diṭṭhavāditā, asute sutavāditā, amute mutavāditā, aviññāte viññātavāditā, diṭṭhe adiṭṭhavāditā, sute asutavāditā, mute amutavāditā, viññāte aviññātavāditā.
an8.67:1.4	Ime kho, bhikkhave, aṭṭha anariyavohārā”ti.
an8.67:1.5	Sattamaṁ.
an8.68:0.1	Aṅguttara Nikāya 8.68
an8.68:0.2	7. Bhūmicālavagga
an8.68:0.3	Ariyavohārasutta
an8.68:1.1	“Aṭṭhime, bhikkhave, ariyavohārā.
an8.68:1.2	Katame aṭṭha?
an8.68:1.3	Adiṭṭhe adiṭṭhavāditā, asute asutavāditā, amute amutavāditā, aviññāte aviññātavāditā, diṭṭhe diṭṭhavāditā, sute sutavāditā, mute mutavāditā, viññāte viññātavāditā.
an8.68:1.4	Ime kho, bhikkhave, aṭṭha ariyavohārā”ti.
an8.68:1.5	Aṭṭhamaṁ.
an8.69:0.1	Aṅguttara Nikāya 8.69
an8.69:0.2	7. Bhūmicālavagga
an8.69:0.3	Parisāsutta
an8.69:1.1	“Aṭṭhimā, bhikkhave, parisā.
an8.69:1.2	Katamā aṭṭha?
an8.69:1.3	Khattiyaparisā, brāhmaṇaparisā, gahapatiparisā, samaṇaparisā, cātumahārājikaparisā, tāvatiṁsaparisā, māraparisā, brahmaparisā.
an8.69:1.4	Abhijānāmi kho panāhaṁ, bhikkhave, anekasataṁ khattiyaparisaṁ upasaṅkamitā.
an8.69:1.5	Tatrapi mayā sannisinnapubbañceva sallapitapubbañca sākacchā ca samāpannapubbā.
an8.69:1.6	Tattha yādisako tesaṁ vaṇṇo hoti tādisako mayhaṁ vaṇṇo hoti, yādisako tesaṁ saro hoti tādisako mayhaṁ saro hoti.
an8.69:1.7	Dhammiyā ca kathāya sandassemi samādapemi samuttejemi sampahaṁsemi.
an8.69:1.8	Bhāsamānañca maṁ na jānanti:
an8.69:1.9	‘ko nu kho ayaṁ bhāsati devo vā manusso vā’ti.
an8.69:1.10	Dhammiyā kathāya sandassetvā samādapetvā samuttejetvā sampahaṁsetvā antaradhāyāmi.
an8.69:1.11	Antarahitañca maṁ na jānanti:
an8.69:1.12	‘ko nu kho ayaṁ antarahito devo vā manusso vā’ti.
an8.69:2.1	Abhijānāmi kho panāhaṁ, bhikkhave, anekasataṁ brāhmaṇaparisaṁ …pe…
an8.69:2.2	gahapatiparisaṁ …
an8.69:2.3	samaṇaparisaṁ …
an8.69:2.4	cātumahārājikaparisaṁ …
an8.69:2.5	tāvatiṁsaparisaṁ …
an8.69:2.6	māraparisaṁ …
an8.69:2.7	brahmaparisaṁ upasaṅkamitā.
an8.69:2.8	Tatrapi mayā sannisinnapubbañceva sallapitapubbañca sākacchā ca samāpannapubbā.
an8.69:2.9	Tattha yādisako tesaṁ vaṇṇo hoti tādisako mayhaṁ vaṇṇo hoti, yādisako tesaṁ saro hoti tādisako mayhaṁ saro hoti.
an8.69:2.10	Dhammiyā ca kathāya sandassemi samādapemi samuttejemi sampahaṁsemi.
an8.69:2.11	Bhāsamānañca maṁ na jānanti:
an8.69:2.12	‘ko nu kho ayaṁ bhāsati devo vā manusso vā’ti.
an8.69:2.13	Dhammiyā kathāya sandassetvā samādapetvā samuttejetvā sampahaṁsetvā antaradhāyāmi.
an8.69:2.14	Antarahitañca maṁ na jānanti:
an8.69:2.15	‘ko nu kho ayaṁ antarahito devo vā manusso vā’ti.
an8.69:2.16	Imā kho, bhikkhave, aṭṭha parisā”ti.
an8.69:2.17	Navamaṁ.
an8.70:0.1	Aṅguttara Nikāya 8.70
an8.70:0.2	7. Bhūmicālavagga
an8.70:0.3	Bhūmicālasutta
an8.70:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an8.70:1.2	Atha kho bhagavā pubbaṇhasamayaṁ nivāsetvā pattacīvaramādāya vesāliṁ piṇḍāya pāvisi.
an8.70:1.3	Vesāliyaṁ piṇḍāya caritvā pacchābhattaṁ piṇḍapātapaṭikkanto āyasmantaṁ ānandaṁ āmantesi:
an8.70:1.4	“gaṇhāhi, ānanda, nisīdanaṁ.
an8.70:1.5	Yena cāpālaṁ cetiyaṁ tenupasaṅkamissāma divāvihārāyā”ti.
an8.70:1.6	“Evaṁ, bhante”ti kho āyasmā ānando bhagavato paṭissutvā nisīdanaṁ ādāya bhagavantaṁ piṭṭhito piṭṭhito anubandhi.
an8.70:2.1	Atha kho bhagavā yena cāpālaṁ cetiyaṁ tenupasaṅkami; upasaṅkamitvā paññatte āsane nisīdi.
an8.70:2.2	Nisajja kho bhagavā āyasmantaṁ ānandaṁ āmantesi:
an8.70:3.1	“Ramaṇīyā, ānanda, vesālī, ramaṇīyaṁ udenaṁ cetiyaṁ, ramaṇīyaṁ gotamakaṁ cetiyaṁ, ramaṇīyaṁ sattambaṁ cetiyaṁ, ramaṇīyaṁ bahuputtakaṁ cetiyaṁ; ramaṇīyaṁ sārandadaṁ cetiyaṁ, ramaṇīyaṁ cāpālaṁ cetiyaṁ.
an8.70:3.2	Yassa kassaci, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, ākaṅkhamāno so, ānanda, kappaṁ vā tiṭṭheyya kappāvasesaṁ vā.
an8.70:3.3	Tathāgatassa kho, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā. Ākaṅkhamāno, ānanda, tathāgato kappaṁ vā tiṭṭheyya kappāvasesaṁ vā”ti.
an8.70:3.4	Evampi kho āyasmā ānando bhagavatā oḷārike nimitte kayiramāne oḷārike obhāse kayiramāne nāsakkhi paṭivijjhituṁ;
an8.70:3.5	na bhagavantaṁ yāci:
an8.70:3.6	“tiṭṭhatu, bhante, bhagavā kappaṁ, tiṭṭhatu sugato kappaṁ bahujanahitāya bahujanasukhāya lokānukampāya atthāya hitāya sukhāya devamanussānan”ti, yathā taṁ mārena pariyuṭṭhitacitto.
an8.70:4.1	Dutiyampi kho bhagavā …pe…
an8.70:4.2	tatiyampi kho bhagavā āyasmantaṁ ānandaṁ āmantesi:
an8.70:4.3	“ramaṇīyā, ānanda, vesālī, ramaṇīyaṁ udenaṁ cetiyaṁ, ramaṇīyaṁ gotamakaṁ cetiyaṁ, ramaṇīyaṁ sattambaṁ cetiyaṁ, ramaṇīyaṁ bahuputtakaṁ cetiyaṁ, ramaṇīyaṁ sārandadaṁ cetiyaṁ, ramaṇīyaṁ cāpālaṁ cetiyaṁ.
an8.70:4.4	Yassa kassaci, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, ākaṅkhamāno so, ānanda, kappaṁ vā tiṭṭheyya kappāvasesaṁ vā.
an8.70:4.5	Tathāgatassa kho, ānanda, cattāro iddhipādā bhāvitā …pe… ākaṅkhamāno, ānanda, tathāgato kappaṁ vā tiṭṭheyya kappāvasesaṁ vā”ti.
an8.70:4.6	Evampi kho āyasmā ānando bhagavatā oḷārike nimitte kayiramāne oḷārike obhāse kayiramāne nāsakkhi paṭivijjhituṁ;
an8.70:4.7	na bhagavantaṁ yāci:
an8.70:4.8	“tiṭṭhatu, bhante, bhagavā kappaṁ, tiṭṭhatu sugato kappaṁ bahujanahitāya bahujanasukhāya lokānukampāya atthāya hitāya sukhāya devamanussānan”ti, yathā taṁ mārena pariyuṭṭhitacitto.
an8.70:5.1	Atha kho bhagavā āyasmantaṁ ānandaṁ āmantesi:
an8.70:5.2	“gaccha tvaṁ, ānanda, yassadāni kālaṁ maññasī”ti.
an8.70:5.3	“Evaṁ, bhante”ti kho āyasmā ānando bhagavato paṭissutvā uṭṭhāyāsanā bhagavantaṁ abhivādetvā padakkhiṇaṁ katvā bhagavato avidūre aññatarasmiṁ rukkhamūle nisīdi.
an8.70:5.4	Atha kho māro pāpimā acirapakkante āyasmante ānande bhagavantaṁ etadavoca:
an8.70:6.1	“Parinibbātu dāni, bhante, bhagavā, parinibbātu sugato. Parinibbānakālo dāni, bhante, bhagavato.
an8.70:6.2	Bhāsitā kho panesā, bhante, bhagavatā vācā:
an8.70:6.3	‘na tāvāhaṁ, pāpima, parinibbāyissāmi yāva me bhikkhū na sāvakā bhavissanti viyattā vinītā visāradā pattayogakkhemā bahussutā dhammadharā dhammānudhammappaṭipannā sāmīcippaṭipannā anudhammacārino, sakaṁ ācariyakaṁ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānīkarissanti uppannaṁ parappavādaṁ sahadhammena suniggahitaṁ niggahetvā sappāṭihāriyaṁ dhammaṁ desessantī’ti.
an8.70:6.4	Etarahi, bhante, bhikkhū bhagavato sāvakā viyattā vinītā visāradā pattayogakkhemā bahussutā dhammadharā dhammānudhammappaṭipannā sāmīcippaṭipannā anudhammacārino, sakaṁ ācariyakaṁ uggahetvā ācikkhanti desenti paññapenti paṭṭhapenti vivaranti vibhajanti uttānīkaronti uppannaṁ parappavādaṁ sahadhammena suniggahitaṁ niggahetvā sappāṭihāriyaṁ dhammaṁ desenti.
an8.70:7.1	Parinibbātu dāni, bhante, bhagavā, parinibbātu sugato. Parinibbānakālo dāni, bhante, bhagavato.
an8.70:7.2	Bhāsitā kho panesā, bhante, bhagavatā vācā:
an8.70:7.3	‘na tāvāhaṁ, pāpima, parinibbāyissāmi yāva me bhikkhuniyo na sāvikā bhavissanti …pe…
an8.70:7.4	yāva me upāsakā na sāvakā bhavissanti …pe…
an8.70:7.5	yāva me upāsikā na sāvikā bhavissanti viyattā vinītā visāradā pattayogakkhemā bahussutā dhammadharā dhammānudhammappaṭipannā sāmīcippaṭipannā anudhammacāriniyo, sakaṁ ācariyakaṁ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānīkarissanti, uppannaṁ parappavādaṁ sahadhammena suniggahitaṁ niggahetvā sappāṭihāriyaṁ dhammaṁ desessantī’ti.
an8.70:7.6	Etarahi, bhante, upāsikā bhagavato sāvikā viyattā vinītā visāradā pattayogakkhemā bahussutā dhammadharā dhammānudhammappaṭipannā sāmīcippaṭipannā anudhammacāriniyo, sakaṁ ācariyakaṁ uggahetvā ācikkhanti desenti paññapenti paṭṭhapenti vivaranti vibhajanti uttānīkaronti, uppannaṁ parappavādaṁ sahadhammena suniggahitaṁ niggahetvā sappāṭihāriyaṁ dhammaṁ desenti.
an8.70:8.1	Parinibbātu dāni, bhante, bhagavā, parinibbātu sugato. Parinibbānakālo dāni, bhante, bhagavato.
an8.70:8.2	Bhāsitā kho panesā, bhante, bhagavatā vācā:
an8.70:8.3	‘na tāvāhaṁ, pāpima, parinibbāyissāmi yāva me idaṁ brahmacariyaṁ na iddhañceva bhavissati phītañca vitthārikaṁ bāhujaññaṁ puthubhūtaṁ, yāva devamanussehi suppakāsitan’ti.
an8.70:8.4	Etarahi, bhante, bhagavato brahmacariyaṁ iddhañceva phītañca vitthārikaṁ bāhujaññaṁ puthubhūtaṁ, yāva devamanussehi suppakāsitaṁ.
an8.70:9.1	Parinibbātu dāni, bhante, bhagavā, parinibbātu sugato. Parinibbānakālo dāni, bhante, bhagavato”ti.
an8.70:9.2	“Appossukko tvaṁ, pāpima, hohi. Naciraṁ tathāgatassa parinibbānaṁ bhavissati.
an8.70:9.3	Ito tiṇṇaṁ māsānaṁ accayena tathāgato parinibbāyissatī”ti.
an8.70:10.1	Atha kho bhagavā cāpāle cetiye sato sampajāno āyusaṅkhāraṁ ossaji.
an8.70:10.2	Ossaṭṭhe ca bhagavatā āyusaṅkhāre mahābhūmicālo ahosi bhiṁsanako salomahaṁso, devadundubhiyo ca phaliṁsu.
an8.70:10.3	Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
an8.70:10.4	“Tulamatulañca sambhavaṁ,
an8.70:10.5	Bhavasaṅkhāramavassaji muni;
an8.70:10.6	Ajjhattarato samāhito,
an8.70:10.7	Abhindi kavacamivattasambhavan”ti.
an8.70:11.1	Atha kho āyasmato ānandassa etadahosi:
an8.70:12.2	“mahā vatāyaṁ bhūmicālo;
an8.70:12.3	sumahā vatāyaṁ bhūmicālo bhiṁsanako salomahaṁso, devadundubhiyo ca phaliṁsu.
an8.70:12.4	Ko nu kho hetu, ko paccayo mahato bhūmicālassa pātubhāvāyā”ti?
an8.70:13.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an8.70:13.2	“mahā vatāyaṁ, bhante, bhūmicālo;
an8.70:13.3	sumahā vatāyaṁ, bhante, bhūmicālo bhiṁsanako salomahaṁso, devadundubhiyo ca phaliṁsu.
an8.70:13.4	Ko nu kho, bhante, hetu, ko paccayo mahato bhūmicālassa pātubhāvāyā”ti?
an8.70:14.1	“Aṭṭhime, ānanda, hetū, aṭṭha paccayā mahato bhūmicālassa pātubhāvāya.
an8.70:14.2	Katame aṭṭha?
an8.70:14.3	Ayaṁ, ānanda, mahāpathavī udake patiṭṭhitā; udakaṁ vāte patiṭṭhitaṁ; vāto ākāsaṭṭho hoti. So, ānanda, samayo yaṁ mahāvātā vāyanti; mahāvātā vāyantā udakaṁ kampenti; udakaṁ kampitaṁ pathaviṁ kampeti.
an8.70:14.4	Ayaṁ, ānanda, paṭhamo hetu, paṭhamo paccayo mahato bhūmicālassa pātubhāvāya.
an8.70:15.1	Puna caparaṁ, ānanda, samaṇo vā brāhmaṇo vā iddhimā cetovasippatto devatā vā mahiddhikā mahānubhāvā. Tassa parittā pathavīsaññā bhāvitā hoti, appamāṇā āposaññā. So imaṁ pathaviṁ kampeti saṅkampeti sampakampeti sampavedheti.
an8.70:15.2	Ayaṁ, ānanda, dutiyo hetu, dutiyo paccayo mahato bhūmicālassa pātubhāvāya.
an8.70:16.1	Puna caparaṁ, ānanda, yadā bodhisatto tusitā kāyā cavitvā sato sampajāno mātukucchiṁ okkamati, tadāyaṁ pathavī kampati saṅkampati sampakampati sampavedhati.
an8.70:16.2	Ayaṁ, ānanda, tatiyo hetu, tatiyo paccayo mahato bhūmicālassa pātubhāvāya.
an8.70:17.1	Puna caparaṁ, ānanda, yadā bodhisatto sato sampajāno mātukucchismā nikkhamati, tadāyaṁ pathavī kampati saṅkampati sampakampati sampavedhati.
an8.70:17.2	Ayaṁ, ānanda, catuttho hetu, catuttho paccayo mahato bhūmicālassa pātubhāvāya.
an8.70:18.1	Puna caparaṁ, ānanda, yadā tathāgato anuttaraṁ sammāsambodhiṁ abhisambujjhati, tadāyaṁ pathavī kampati saṅkampati sampakampati sampavedhati.
an8.70:18.2	Ayaṁ, ānanda, pañcamo hetu, pañcamo paccayo mahato bhūmicālassa pātubhāvāya.
an8.70:19.1	Puna caparaṁ, ānanda, yadā tathāgato anuttaraṁ dhammacakkaṁ pavatteti, tadāyaṁ pathavī kampati saṅkampati sampakampati sampavedhati.
an8.70:19.2	Ayaṁ, ānanda, chaṭṭho hetu, chaṭṭho paccayo mahato bhūmicālassa pātubhāvāya.
an8.70:20.1	Puna caparaṁ, ānanda, yadā tathāgato sato sampajāno āyusaṅkhāraṁ ossajjati, tadāyaṁ pathavī kampati saṅkampati sampakampati sampavedhati.
an8.70:20.2	Ayaṁ, ānanda, sattamo hetu, sattamo paccayo mahato bhūmicālassa pātubhāvāya.
an8.70:21.1	Puna caparaṁ, ānanda, yadā tathāgato anupādisesāya nibbānadhātuyā parinibbāyati, tadāyaṁ pathavī kampati saṅkampati sampakampati sampavedhati.
an8.70:21.2	Ayaṁ, ānanda, aṭṭhamo hetu, aṭṭhamo paccayo mahato bhūmicālassa pātubhāvāya.
an8.70:21.3	Ime kho, ānanda, aṭṭha hetū, aṭṭha paccayā mahato bhūmicālassa pātubhāvāyā”ti.
an8.70:21.4	Dasamaṁ.
an8.70:21.5	Bhūmicālavaggo dutiyo.
an8.70:22.0	Tassuddānaṁ
an8.70:22.1	Icchā alañca saṅkhittaṁ,
an8.70:22.2	gayā abhibhunā saha;
an8.70:22.3	Vimokkho dve ca vohārā,
an8.70:22.4	parisā bhūmicālenāti.
an8.71:0.1	Aṅguttara Nikāya 8.71
an8.71:0.2	8. Yamakavagga
an8.71:0.3	Paṭhamasaddhāsutta
an8.71:1.1	“Saddho ca, bhikkhave, bhikkhu hoti, no ca sīlavā.
an8.71:1.2	Evaṁ so tenaṅgena aparipūro hoti.
an8.71:1.3	Tena taṁ aṅgaṁ paripūretabbaṁ:
an8.71:1.4	‘kintāhaṁ saddho ca assaṁ sīlavā cā’ti.
an8.71:1.5	Yato ca kho, bhikkhave, bhikkhu saddho ca hoti sīlavā ca,
an8.71:1.6	evaṁ so tenaṅgena paripūro hoti.
an8.71:2.1	Saddho ca, bhikkhave, bhikkhu hoti sīlavā ca, no ca bahussuto.
an8.71:2.2	Evaṁ so tenaṅgena aparipūro hoti.
an8.71:2.3	Tena taṁ aṅgaṁ paripūretabbaṁ:
an8.71:2.4	‘kintāhaṁ saddho ca assaṁ, sīlavā ca, bahussuto cā’ti.
an8.71:2.5	Yato ca kho, bhikkhave, bhikkhu saddho ca hoti sīlavā ca bahussuto ca,
an8.71:2.6	evaṁ so tenaṅgena paripūro hoti.
an8.71:3.1	Saddho ca, bhikkhave, bhikkhu hoti sīlavā ca bahussuto ca, no ca dhammakathiko …pe…
an8.71:3.2	dhammakathiko ca, no ca parisāvacaro …pe…
an8.71:3.3	parisāvacaro ca, no ca visārado parisāya dhammaṁ deseti …pe…
an8.71:3.4	visārado ca parisāya dhammaṁ deseti, no ca catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī …pe…
an8.71:3.5	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, no ca āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati;
an8.71:3.6	evaṁ so tenaṅgena aparipūro hoti.
an8.71:3.7	Tena taṁ aṅgaṁ paripūretabbaṁ:
an8.71:3.8	‘kintāhaṁ saddho ca assaṁ, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseyyaṁ, catunnañca jhānānaṁ ābhicetasikānaṁ diṭṭhadhammasukhavihārānaṁ nikāmalābhī assaṁ akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti.
an8.71:4.1	Yato ca kho, bhikkhave, bhikkhu saddho ca hoti, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseti, catunnañca jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati;
an8.71:4.2	evaṁ so tenaṅgena paripūro hoti.
an8.71:4.3	Imehi kho, bhikkhave, aṭṭhahi dhammehi samannāgato bhikkhu samantapāsādiko ca hoti sabbākāraparipūro cā”ti.
an8.71:4.4	Paṭhamaṁ.
an8.72:0.1	Aṅguttara Nikāya 8.72
an8.72:0.2	8. Yamakavagga
an8.72:0.3	Dutiyasaddhāsutta
an8.72:1.1	“Saddho ca, bhikkhave, bhikkhu hoti, no ca sīlavā.
an8.72:1.2	Evaṁ so tenaṅgena aparipūro hoti.
an8.72:1.3	Tena taṁ aṅgaṁ paripūretabbaṁ:
an8.72:1.4	‘kintāhaṁ saddho ca assaṁ sīlavā cā’ti.
an8.72:1.5	Yato ca kho, bhikkhave, bhikkhu saddho ca hoti sīlavā ca,
an8.72:1.6	evaṁ so tenaṅgena paripūro hoti.
an8.72:2.1	Saddho ca, bhikkhave, bhikkhu hoti sīlavā ca, no ca bahussuto …pe…
an8.72:2.2	bahussuto ca, no ca dhammakathiko …pe…
an8.72:2.3	dhammakathiko ca, no ca parisāvacaro …pe…
an8.72:2.4	parisāvacaro ca, no ca visārado parisāya dhammaṁ deseti …pe…
an8.72:2.5	visārado ca parisāya dhammaṁ deseti, no ca ye te santā vimokkhā atikkamma rūpe āruppā te kāyena phusitvā viharati …pe…
an8.72:2.6	ye te santā vimokkhā atikkamma rūpe āruppā te kāyena phusitvā viharati, no ca āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati;
an8.72:2.7	evaṁ so tenaṅgena aparipūro hoti.
an8.72:2.8	Tena taṁ aṅgaṁ paripūretabbaṁ:
an8.72:2.9	‘kintāhaṁ saddho ca assaṁ, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseyyaṁ, ye te santā vimokkhā atikkamma rūpe āruppā te kāyena phusitvā vihareyyaṁ, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti.
an8.72:3.1	Yato ca kho, bhikkhave, bhikkhu saddho ca hoti, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseti. Ye te santā vimokkhā atikkamma rūpe āruppā te ca kāyena phusitvā viharati, āsavānañca khayā …pe… sacchikatvā upasampajja viharati;
an8.72:3.2	evaṁ so tenaṅgena paripūro hoti.
an8.72:3.3	Imehi kho, bhikkhave, aṭṭhahi dhammehi samannāgato bhikkhu samantapāsādiko ca hoti sabbākāraparipūro cā”ti.
an8.72:3.4	Dutiyaṁ.
an8.73:0.1	Aṅguttara Nikāya 8.73
an8.73:0.2	8. Yamakavagga
an8.73:0.3	Paṭhamamaraṇassatisutta
an8.73:1.1	Ekaṁ samayaṁ bhagavā nātike viharati giñjakāvasathe.
an8.73:1.2	Tatra kho bhagavā bhikkhū āmantesi:
an8.73:1.3	“bhikkhavo”ti.
an8.73:1.4	“Bhadante”ti te bhikkhū bhagavato paccassosuṁ.
an8.73:1.5	Bhagavā etadavoca:
an8.73:1.6	“maraṇassati, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā.
an8.73:1.7	Bhāvetha no tumhe, bhikkhave, maraṇassatin”ti.
an8.73:2.1	Evaṁ vutte, aññataro bhikkhu bhagavantaṁ etadavoca:
an8.73:2.2	“ahaṁ kho, bhante, bhāvemi maraṇassatin”ti.
an8.73:2.3	“Yathā kathaṁ pana tvaṁ, bhikkhu, bhāvesi maraṇassatin”ti?
an8.73:2.4	“Idha mayhaṁ, bhante, evaṁ hoti:
an8.73:2.5	‘aho vatāhaṁ rattindivaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti.
an8.73:2.6	Evaṁ kho ahaṁ, bhante, bhāvemi maraṇassatin”ti.
an8.73:3.1	Aññataropi kho bhikkhu bhagavantaṁ etadavoca:
an8.73:3.2	“ahampi kho, bhante, bhāvemi maraṇassatin”ti.
an8.73:3.3	“Yathā kathaṁ pana tvaṁ, bhikkhu, bhāvesi maraṇassatin”ti?
an8.73:3.4	“Idha mayhaṁ, bhante, evaṁ hoti:
an8.73:3.5	‘aho vatāhaṁ divasaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti.
an8.73:3.6	Evaṁ kho ahaṁ, bhante, bhāvemi maraṇassatin”ti.
an8.73:4.1	Aññataropi kho bhikkhu bhagavantaṁ etadavoca:
an8.73:4.2	“ahampi kho, bhante, bhāvemi maraṇassatin”ti.
an8.73:4.3	“Yathā kathaṁ pana tvaṁ, bhikkhu, bhāvesi maraṇassatin”ti?
an8.73:4.4	“Idha mayhaṁ, bhante, evaṁ hoti:
an8.73:4.5	‘aho vatāhaṁ upaḍḍhadivasaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti.
an8.73:4.6	Evaṁ kho ahaṁ, bhante, bhāvemi maraṇassatin”ti.
an8.73:5.1	Aññataropi kho bhikkhu bhagavantaṁ etadavoca:
an8.73:5.2	“ahampi kho, bhante, bhāvemi maraṇassatin”ti.
an8.73:5.3	“Yathā kathaṁ pana tvaṁ, bhikkhu, bhāvesi maraṇassatin”ti?
an8.73:5.4	“Idha mayhaṁ, bhante, evaṁ hoti:
an8.73:5.5	‘aho vatāhaṁ tadantaraṁ jīveyyaṁ yadantaraṁ ekapiṇḍapātaṁ bhuñjāmi, bhagavato sāsanaṁ manasi kareyyaṁ, bahu vata me kataṁ assā’ti.
an8.73:5.6	Evaṁ kho ahaṁ, bhante, bhāvemi maraṇassatin”ti.
an8.73:6.1	Aññataropi kho bhikkhu bhagavantaṁ etadavoca:
an8.73:6.2	“ahampi kho, bhante, bhāvemi maraṇassatin”ti.
an8.73:6.3	“Yathā kathaṁ pana tvaṁ, bhikkhu, bhāvesi maraṇassatin”ti?
an8.73:6.4	“Idha mayhaṁ, bhante, evaṁ hoti:
an8.73:6.5	‘aho vatāhaṁ tadantaraṁ jīveyyaṁ yadantaraṁ upaḍḍhapiṇḍapātaṁ bhuñjāmi, bhagavato sāsanaṁ manasi kareyyaṁ, bahu vata me kataṁ assā’ti.
an8.73:6.6	Evaṁ kho ahaṁ, bhante, bhāvemi maraṇassatin”ti.
an8.73:7.1	Aññataropi kho bhikkhu bhagavantaṁ etadavoca:
an8.73:7.2	“ahampi kho, bhante, bhāvemi maraṇassatin”ti.
an8.73:7.3	“Yathā kathaṁ pana tvaṁ, bhikkhu, bhāvesi maraṇassatin”ti?
an8.73:7.4	“Idha mayhaṁ, bhante, evaṁ hoti:
an8.73:7.5	‘aho vatāhaṁ tadantaraṁ jīveyyaṁ yadantaraṁ cattāro pañca ālope saṅkhāditvā ajjhoharāmi, bhagavato sāsanaṁ manasi kareyyaṁ, bahu vata me kataṁ assā’ti.
an8.73:7.6	Evaṁ kho ahaṁ, bhante, bhāvemi maraṇassatin”ti.
an8.73:8.1	Aññataropi kho bhikkhu bhagavantaṁ etadavoca:
an8.73:8.2	“ahampi kho, bhante, bhāvemi maraṇassatin”ti.
an8.73:8.3	“Yathā kathaṁ pana tvaṁ, bhikkhu, bhāvesi maraṇassatin”ti?
an8.73:8.4	“Idha mayhaṁ, bhante, evaṁ hoti:
an8.73:8.5	‘aho vatāhaṁ tadantaraṁ jīveyyaṁ yadantaraṁ ekaṁ ālopaṁ saṅkhāditvā ajjhoharāmi, bhagavato sāsanaṁ manasi kareyyaṁ, bahu vata me kataṁ assā’ti.
an8.73:8.6	Evaṁ kho ahaṁ, bhante, bhāvemi maraṇassatin”ti.
an8.73:9.1	Aññataropi kho bhikkhu bhagavantaṁ etadavoca:
an8.73:9.2	“ahampi kho, bhante, bhāvemi maraṇassatin”ti.
an8.73:9.3	“Yathā kathaṁ pana tvaṁ, bhikkhu, bhāvesi maraṇassatin”ti?
an8.73:9.4	“Idha mayhaṁ, bhante, evaṁ hoti:
an8.73:9.5	‘aho vatāhaṁ tadantaraṁ jīveyyaṁ yadantaraṁ assasitvā vā passasāmi, passasitvā vā assasāmi, bhagavato sāsanaṁ manasi kareyyaṁ, bahu vata me kataṁ assā’ti.
an8.73:9.6	Evaṁ kho ahaṁ, bhante, bhāvemi maraṇassatin”ti.
an8.73:10.1	Evaṁ vutte, bhagavā te bhikkhū etadavoca:
an8.73:10.2	“yvāyaṁ, bhikkhave, bhikkhu evaṁ maraṇassatiṁ bhāveti:
an8.73:10.3	‘aho vatāhaṁ rattindivaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti.
an8.73:10.4	Yo cāyaṁ, bhikkhave, bhikkhu evaṁ maraṇassatiṁ bhāveti:
an8.73:10.5	‘aho vatāhaṁ divasaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti;
an8.73:10.6	yo cāyaṁ, bhikkhave, bhikkhu evaṁ maraṇassatiṁ bhāveti:
an8.73:10.7	‘aho vatāhaṁ upaḍḍhadivasaṁ jīveyyaṁ, bhagavato sāsanaṁ manasi kareyyaṁ, bahu vata me kataṁ assā’ti.
an8.73:10.8	Yo cāyaṁ, bhikkhave, bhikkhu evaṁ maraṇassatiṁ bhāveti:
an8.73:10.9	‘aho vatāhaṁ tadantaraṁ jīveyyaṁ yadantaraṁ ekapiṇḍapātaṁ bhuñjāmi, bhagavato sāsanaṁ manasi kareyyaṁ, bahu vata me kataṁ assā’ti;
an8.73:10.10	yo cāyaṁ, bhikkhave, bhikkhu evaṁ maraṇassatiṁ bhāveti:
an8.73:10.11	‘aho vatāhaṁ tadantaraṁ jīveyyaṁ yadantaraṁ upaḍḍhapiṇḍapātaṁ bhuñjāmi, bhagavato sāsanaṁ manasi kareyyaṁ, bahu vata me kataṁ assā’ti.
an8.73:10.12	Yo cāyaṁ, bhikkhave, bhikkhu evaṁ maraṇassatiṁ bhāveti:
an8.73:10.13	‘aho vatāhaṁ tadantaraṁ jīveyyaṁ yadantaraṁ cattāro pañca ālope saṅkhāditvā ajjhoharāmi, bhagavato sāsanaṁ manasi kareyyaṁ, bahu vata me kataṁ assā’ti—
an8.73:10.14	ime vuccanti, bhikkhave, ‘bhikkhū pamattā viharanti, dandhaṁ maraṇassatiṁ bhāventi āsavānaṁ khayāya’.
an8.73:11.1	Yo ca khvāyaṁ, bhikkhave, bhikkhu evaṁ maraṇassatiṁ bhāveti:
an8.73:11.2	‘aho vatāhaṁ tadantaraṁ jīveyyaṁ yadantaraṁ ekaṁ ālopaṁ saṅkhāditvā ajjhoharāmi, bhagavato sāsanaṁ manasi kareyyaṁ, bahu vata me kataṁ assā’ti.
an8.73:11.3	Yo cāyaṁ, bhikkhave, bhikkhu evaṁ maraṇassatiṁ bhāveti:
an8.73:11.4	‘aho vatāhaṁ tadantaraṁ jīveyyaṁ yadantaraṁ assasitvā vā passasāmi, passasitvā vā assasāmi, bhagavato sāsanaṁ manasi kareyyaṁ, bahu vata me kataṁ assā’ti—
an8.73:11.5	ime vuccanti, bhikkhave, ‘bhikkhū appamattā viharanti, tikkhaṁ maraṇassatiṁ bhāventi āsavānaṁ khayāya’.
an8.73:12.1	Tasmātiha, bhikkhave, evaṁ sikkhitabbaṁ:
an8.73:12.2	‘appamattā viharissāma, tikkhaṁ maraṇassatiṁ bhāvayissāma āsavānaṁ khayāyā’ti.
an8.73:12.3	Evañhi vo, bhikkhave, sikkhitabban”ti.
an8.73:12.4	Tatiyaṁ.
an8.74:0.1	Aṅguttara Nikāya 8.74
an8.74:0.2	8. Yamakavagga
an8.74:0.3	Dutiyamaraṇassatisutta
an8.74:1.1	Ekaṁ samayaṁ bhagavā nātike viharati giñjakāvasathe.
an8.74:1.2	Tatra kho bhagavā bhikkhū āmantesi …pe…
an8.74:1.3	maraṇassati, bhikkhave, bhāvitā bahulīkatā mahapphalā hoti mahānisaṁsā amatogadhā amatapariyosānā.
an8.74:2.1	Kathaṁ bhāvitā ca, bhikkhave, maraṇassati kathaṁ bahulīkatā mahapphalā hoti mahānisaṁsā amatogadhā amatapariyosānā?
an8.74:2.2	Idha, bhikkhave, bhikkhu divase nikkhante rattiyā patihitāya iti paṭisañcikkhati:
an8.74:2.3	‘bahukā kho me paccayā maraṇassa—
an8.74:2.4	ahi vā maṁ ḍaṁseyya, vicchiko vā maṁ ḍaṁseyya, satapadī vā maṁ ḍaṁseyya;
an8.74:2.5	tena me assa kālakiriyā. So mama assa antarāyo.
an8.74:2.6	Upakkhalitvā vā papateyyaṁ, bhattaṁ vā me bhuttaṁ byāpajjeyya, pittaṁ vā me kuppeyya, semhaṁ vā me kuppeyya, satthakā vā me vātā kuppeyyuṁ, manussā vā maṁ upakkameyyuṁ, amanussā vā maṁ upakkameyyuṁ;
an8.74:2.7	tena me assa kālakiriyā. So mama assa antarāyo’ti.
an8.74:2.8	Tena, bhikkhave, bhikkhunā iti paṭisañcikkhitabbaṁ:
an8.74:2.9	‘atthi nu kho me pāpakā akusalā dhammā appahīnā ye me assu rattiṁ kālaṁ karontassa antarāyāyā’ti.
an8.74:3.1	Sace, bhikkhave, bhikkhu paccavekkhamāno evaṁ jānāti:
an8.74:3.2	‘atthi me pāpakā akusalā dhammā appahīnā ye me assu rattiṁ kālaṁ karontassa antarāyāyā’ti, tena, bhikkhave, bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an8.74:4.1	Seyyathāpi, bhikkhave, ādittacelo vā ādittasīso vā tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya;
an8.74:4.2	evamevaṁ kho, bhikkhave, tena bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an8.74:5.1	Sace pana, bhikkhave, bhikkhu paccavekkhamāno evaṁ jānāti:
an8.74:5.2	‘natthi me pāpakā akusalā dhammā appahīnā ye me assu rattiṁ kālaṁ karontassa antarāyāyā’ti, tena, bhikkhave, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.
an8.74:6.1	Idha pana, bhikkhave, bhikkhu rattiyā nikkhantāya divase patihite iti paṭisañcikkhati:
an8.74:6.2	‘bahukā kho me paccayā maraṇassa—
an8.74:6.3	ahi vā maṁ ḍaṁseyya, vicchiko vā maṁ ḍaṁseyya, satapadī vā maṁ ḍaṁseyya;
an8.74:6.4	tena me assa kālakiriyā. So mama assa antarāyo.
an8.74:6.5	Upakkhalitvā vā papateyyaṁ, bhattaṁ vā me bhuttaṁ byāpajjeyya, pittaṁ vā me kuppeyya, semhaṁ vā me kuppeyya, satthakā vā me vātā kuppeyyuṁ, manussā vā maṁ upakkameyyuṁ, amanussā vā maṁ upakkameyyuṁ;
an8.74:6.6	tena me assa kālakiriyā. So mama assa antarāyo’ti.
an8.74:6.7	Tena, bhikkhave, bhikkhunā iti paṭisañcikkhitabbaṁ:
an8.74:6.8	‘atthi nu kho me pāpakā akusalā dhammā appahīnā ye me assu divā kālaṁ karontassa antarāyāyā’ti.
an8.74:7.1	Sace, bhikkhave, bhikkhu paccavekkhamāno evaṁ jānāti:
an8.74:7.2	‘atthi me pāpakā akusalā dhammā appahīnā ye me assu divā kālaṁ karontassa antarāyāyā’ti, tena, bhikkhave, bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an8.74:8.1	Seyyathāpi, bhikkhave, ādittacelo vā ādittasīso vā tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya;
an8.74:8.2	evamevaṁ kho, bhikkhave, tena bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an8.74:9.1	Sace pana, bhikkhave, bhikkhu paccavekkhamāno evaṁ jānāti:
an8.74:9.2	‘natthi me pāpakā akusalā dhammā appahīnā ye me assu divā kālaṁ karontassa antarāyāyā’ti, tena, bhikkhave, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.
an8.74:9.3	Evaṁ bhāvitā kho, bhikkhave, maraṇassati evaṁ bahulīkatā mahapphalā hoti mahānisaṁsā amatogadhā amatapariyosānā”ti.
an8.74:9.4	Catutthaṁ.
an8.75:0.1	Aṅguttara Nikāya 8.75
an8.75:0.2	8. Yamakavagga
an8.75:0.3	Paṭhamasampadāsutta
an8.75:1.1	“Aṭṭhimā, bhikkhave, sampadā.
an8.75:1.2	Katamā aṭṭha?
an8.75:1.3	Uṭṭhānasampadā, ārakkhasampadā, kalyāṇamittatā, samajīvitā, saddhāsampadā, sīlasampadā, cāgasampadā, paññāsampadā—
an8.75:1.4	imā kho, bhikkhave, aṭṭha sampadāti.
an8.75:2.1	Uṭṭhātā kammadheyyesu,
an8.75:2.2	appamatto vidhānavā;
an8.75:2.3	Samaṁ kappeti jīvikaṁ,
an8.75:2.4	sambhataṁ anurakkhati.
an8.75:3.1	Saddho sīlena sampanno,
an8.75:3.2	vadaññū vītamaccharo;
an8.75:3.3	Niccaṁ maggaṁ visodheti,
an8.75:3.4	sotthānaṁ samparāyikaṁ.
an8.75:4.1	Iccete aṭṭha dhammā ca,
an8.75:4.2	saddhassa gharamesino;
an8.75:4.3	Akkhātā saccanāmena,
an8.75:4.4	ubhayattha sukhāvahā.
an8.75:5.1	Diṭṭhadhammahitatthāya,
an8.75:5.2	samparāyasukhāya ca;
an8.75:5.3	Evametaṁ gahaṭṭhānaṁ,
an8.75:5.4	cāgo puññaṁ pavaḍḍhatī”ti.
an8.75:5.5	Pañcamaṁ.
an8.76:0.1	Aṅguttara Nikāya 8.76
an8.76:0.2	8. Yamakavagga
an8.76:0.3	Dutiyasampadāsutta
an8.76:1.1	“Aṭṭhimā, bhikkhave, sampadā.
an8.76:1.2	Katamā aṭṭha?
an8.76:1.3	Uṭṭhānasampadā, ārakkhasampadā, kalyāṇamittatā, samajīvitā, saddhāsampadā, sīlasampadā, cāgasampadā, paññāsampadā.
an8.76:1.4	Katamā ca, bhikkhave, uṭṭhānasampadā?
an8.76:1.5	Idha, bhikkhave, kulaputto yena kammaṭṭhānena jīvitaṁ kappeti—
an8.76:1.6	yadi kasiyā yadi vaṇijjāya yadi gorakkhena yadi issattena yadi rājaporisena yadi sippaññatarena—
an8.76:1.7	tattha dakkho hoti analaso, tatrupāyāya vīmaṁsāya samannāgato, alaṁ kātuṁ alaṁ saṁvidhātunti.
an8.76:1.8	Ayaṁ vuccati, bhikkhave, uṭṭhānasampadā.
an8.76:2.1	Katamā ca, bhikkhave, ārakkhasampadā?
an8.76:2.2	Idha, bhikkhave, kulaputtassa bhogā honti uṭṭhānavīriyādhigatā bāhābalaparicitā sedāvakkhittā dhammikā dhammaladdhā te ārakkhena guttiyā sampādeti:
an8.76:2.3	‘kinti me bhoge neva rājāno hareyyuṁ, na corā hareyyuṁ, na aggi ḍaheyya, na udakaṁ vaheyya, na appiyā dāyādā hareyyun’ti.
an8.76:2.4	Ayaṁ vuccati, bhikkhave, ārakkhasampadā.
an8.76:3.1	Katamā ca, bhikkhave, kalyāṇamittatā?
an8.76:3.2	Idha, bhikkhave, kulaputto yasmiṁ gāme vā nigame vā paṭivasati, tattha ye te honti gahapatī vā gahapatiputtā vā daharā vā vuddhasīlino vuddhā vā vuddhasīlino saddhāsampannā sīlasampannā cāgasampannā paññāsampannā, tehi saddhiṁ santiṭṭhati sallapati sākacchaṁ samāpajjati; yathārūpānaṁ saddhāsampannānaṁ saddhāsampadaṁ anusikkhati, yathārūpānaṁ sīlasampannānaṁ sīlasampadaṁ anusikkhati, yathārūpānaṁ cāgasampannānaṁ cāgasampadaṁ anusikkhati, yathārūpānaṁ paññāsampannānaṁ paññāsampadaṁ anusikkhati.
an8.76:3.3	Ayaṁ vuccati, bhikkhave, kalyāṇamittatā.
an8.76:4.1	Katamā ca, bhikkhave, samajīvitā?
an8.76:4.2	Idha, bhikkhave, kulaputto āyañca bhogānaṁ viditvā vayañca bhogānaṁ viditvā samaṁ jīvikaṁ kappeti nāccogāḷhaṁ nātihīnaṁ: ‘evaṁ me āyo vayaṁ pariyādāya ṭhassati, na ca me vayo āyaṁ pariyādāya ṭhassatī’ti.
an8.76:4.3	Seyyathāpi, bhikkhave, tulādhāro vā tulādhārantevāsī vā tulaṁ paggahetvā jānāti: ‘ettakena vā onataṁ, ettakena vā unnatan’ti;
an8.76:4.4	evamevaṁ kho, bhikkhave, kulaputto āyañca bhogānaṁ viditvā vayañca bhogānaṁ viditvā samaṁ jīvikaṁ kappeti nāccogāḷhaṁ nātihīnaṁ: ‘evaṁ me āyo vayaṁ pariyādāya ṭhassati, na ca me vayo āyaṁ pariyādāya ṭhassatī’ti.
an8.76:4.5	Sacāyaṁ, bhikkhave, kulaputto appāyo samāno uḷāraṁ jīvikaṁ kappeti, tassa bhavanti vattāro ‘udumbarakhādī vāyaṁ kulaputto bhoge khādatī’ti.
an8.76:4.6	Sace panāyaṁ, bhikkhave, kulaputto mahāyo samāno kasiraṁ jīvikaṁ kappeti, tassa bhavanti vattāro: ‘ajeṭṭhamaraṇaṁ vāyaṁ kulaputto marissatī’ti.
an8.76:4.7	Yato ca khoyaṁ, bhikkhave, kulaputto āyañca bhogānaṁ viditvā vayañca bhogānaṁ viditvā samaṁ jīvikaṁ kappeti nāccogāḷhaṁ nātihīnaṁ: ‘evaṁ me āyo vayaṁ pariyādāya ṭhassati, na ca me vayo āyaṁ pariyādāya ṭhassatī’ti.
an8.76:4.8	Ayaṁ vuccati, bhikkhave, samajīvitā.
an8.76:5.1	Katamā ca, bhikkhave, saddhāsampadā?
an8.76:5.2	Idha, bhikkhave, kulaputto saddho hoti, saddahati tathāgatassa bodhiṁ:
an8.76:5.3	‘itipi so bhagavā …pe… satthā devamanussānaṁ buddho bhagavā’ti.
an8.76:5.4	Ayaṁ vuccati, bhikkhave, saddhāsampadā.
an8.76:6.1	Katamā ca, bhikkhave, sīlasampadā?
an8.76:6.2	Idha, bhikkhave, kulaputto pāṇātipātā paṭivirato hoti …pe… surāmerayamajjapamādaṭṭhānā paṭivirato hoti.
an8.76:6.3	Ayaṁ vuccati, bhikkhave, sīlasampadā.
an8.76:7.1	Katamā ca, bhikkhave, cāgasampadā?
an8.76:7.2	Idha, bhikkhave, kulaputto vigatamalamaccherena cetasā agāraṁ ajjhāvasati …pe… yācayogo dānasaṁvibhāgarato.
an8.76:7.3	Ayaṁ vuccati, bhikkhave, cāgasampadā.
an8.76:8.1	Katamā ca, bhikkhave, paññāsampadā?
an8.76:8.2	Idha, bhikkhave, kulaputto paññavā hoti …pe… sammā dukkhakkhayagāminiyā.
an8.76:8.3	Ayaṁ vuccati, bhikkhave, paññāsampadā.
an8.76:9.1	Imā kho, bhikkhave, aṭṭha sampadāti.
an8.76:10.1	Uṭṭhātā kammadheyyesu,
an8.76:10.2	appamatto vidhānavā;
an8.76:10.3	Samaṁ kappeti jīvikaṁ,
an8.76:10.4	sambhataṁ anurakkhati.
an8.76:11.1	Saddho sīlena sampanno,
an8.76:11.2	vadaññū vītamaccharo;
an8.76:11.3	Niccaṁ maggaṁ visodheti,
an8.76:11.4	sotthānaṁ samparāyikaṁ.
an8.76:12.1	Iccete aṭṭha dhammā ca,
an8.76:12.2	saddhassa gharamesino;
an8.76:12.3	Akkhātā saccanāmena,
an8.76:12.4	ubhayattha sukhāvahā.
an8.76:13.1	Diṭṭhadhammahitatthāya,
an8.76:13.2	samparāyasukhāya ca;
an8.76:13.3	Evametaṁ gahaṭṭhānaṁ,
an8.76:13.4	cāgo puññaṁ pavaḍḍhatī”ti.
an8.76:13.5	Chaṭṭhaṁ.
an8.77:0.1	Aṅguttara Nikāya 8.77
an8.77:0.2	8. Yamakavagga
an8.77:0.3	Icchāsutta
an8.77:1.1	Tatra kho āyasmā sāriputto bhikkhū āmantesi:
an8.77:1.2	“āvuso bhikkhavo”ti.
an8.77:1.3	“Āvuso”ti kho te bhikkhū āyasmato sāriputtassa paccassosuṁ.
an8.77:1.4	Āyasmā sāriputto etadavoca:
an8.77:2.1	“Aṭṭhime, āvuso, puggalā santo saṁvijjamānā lokasmiṁ.
an8.77:2.2	Katame aṭṭha?
an8.77:2.3	Idhāvuso, bhikkhuno pavivittassa viharato nirāyattavuttino icchā uppajjati lābhāya.
an8.77:2.4	So uṭṭhahati, ghaṭati, vāyamati lābhāya.
an8.77:2.5	Tassa uṭṭhahato, ghaṭato, vāyamato lābhāya lābho nuppajjati.
an8.77:2.6	So tena alābhena socati kilamati paridevati, urattāḷiṁ kandati, sammohaṁ āpajjati.
an8.77:2.7	Ayaṁ vuccatāvuso, ‘bhikkhu iccho viharati lābhāya, uṭṭhahati, ghaṭati, vāyamati lābhāya, na ca lābhī, socī ca paridevī ca, cuto ca saddhammā’.
an8.77:3.1	Idha panāvuso, bhikkhuno pavivittassa viharato nirāyattavuttino icchā uppajjati lābhāya.
an8.77:3.2	So uṭṭhahati, ghaṭati, vāyamati lābhāya.
an8.77:3.3	Tassa uṭṭhahato ghaṭato vāyamato lābhāya lābho uppajjati.
an8.77:3.4	So tena lābhena majjati pamajjati pamādamāpajjati.
an8.77:3.5	Ayaṁ vuccatāvuso, ‘bhikkhu iccho viharati lābhāya, uṭṭhahati ghaṭati vāyamati lābhāya, lābhī ca, madī ca pamādī ca, cuto ca saddhammā’.
an8.77:4.1	Idha panāvuso, bhikkhuno pavivittassa viharato nirāyattavuttino icchā uppajjati lābhāya.
an8.77:4.2	So na uṭṭhahati, na ghaṭati, na vāyamati lābhāya.
an8.77:4.3	Tassa anuṭṭhahato, aghaṭato, avāyamato lābhāya lābho nuppajjati.
an8.77:4.4	So tena alābhena socati kilamati paridevati, urattāḷiṁ kandati, sammohaṁ āpajjati.
an8.77:4.5	Ayaṁ vuccatāvuso, ‘bhikkhu iccho viharati lābhāya, na uṭṭhahati, na ghaṭati, na vāyamati lābhāya, na ca lābhī, socī ca paridevī ca, cuto ca saddhammā’.
an8.77:5.1	Idha panāvuso, bhikkhuno pavivittassa viharato nirāyattavuttino icchā uppajjati lābhāya.
an8.77:5.2	So na uṭṭhahati, na ghaṭati, na vāyamati lābhāya.
an8.77:5.3	Tassa anuṭṭhahato, aghaṭato, avāyamato lābhāya lābho uppajjati.
an8.77:5.4	So tena lābhena majjati pamajjati pamādamāpajjati.
an8.77:5.5	Ayaṁ vuccatāvuso, ‘bhikkhu iccho viharati lābhāya, na uṭṭhahati na ghaṭati na vāyamati lābhāya, lābhī ca, madī ca pamādī ca, cuto ca saddhammā’.
an8.77:6.1	Idha panāvuso, bhikkhuno pavivittassa viharato nirāyattavuttino icchā uppajjati lābhāya.
an8.77:6.2	So uṭṭhahati, ghaṭati, vāyamati lābhāya.
an8.77:6.3	Tassa uṭṭhahato, ghaṭato, vāyamato lābhāya, lābho nuppajjati.
an8.77:6.4	So tena alābhena na socati na kilamati na paridevati, na urattāḷiṁ kandati, na sammohaṁ āpajjati.
an8.77:6.5	Ayaṁ vuccatāvuso, ‘bhikkhu iccho viharati lābhāya, uṭṭhahati ghaṭati vāyamati lābhāya, na ca lābhī, na ca socī na ca paridevī, accuto ca saddhammā’.
an8.77:7.1	Idha panāvuso, bhikkhuno pavivittassa viharato nirāyattavuttino icchā uppajjati lābhāya.
an8.77:7.2	So uṭṭhahati, ghaṭati, vāyamati lābhāya.
an8.77:7.3	Tassa uṭṭhahato, ghaṭato, vāyamato lābhāya, lābho uppajjati.
an8.77:7.4	So tena lābhena na majjati na pamajjati na pamādamāpajjati.
an8.77:7.5	Ayaṁ vuccatāvuso, ‘bhikkhu iccho viharati lābhāya, uṭṭhahati, ghaṭati, vāyamati lābhāya, lābhī ca, na ca madī na ca pamādī, accuto ca saddhammā’.
an8.77:8.1	Idha panāvuso, bhikkhuno pavivittassa viharato nirāyattavuttino icchā uppajjati lābhāya.
an8.77:8.2	So na uṭṭhahati, na ghaṭati, na vāyamati lābhāya.
an8.77:8.3	Tassa anuṭṭhahato, aghaṭato, avāyamato lābhāya, lābho nuppajjati.
an8.77:8.4	So tena alābhena na socati na kilamati na paridevati, na urattāḷiṁ kandati, na sammohaṁ āpajjati.
an8.77:8.5	Ayaṁ vuccatāvuso, ‘bhikkhu iccho viharati lābhāya, na uṭṭhahati, na ghaṭati, na vāyamati lābhāya, na ca lābhī, na ca socī na ca paridevī, accuto ca saddhammā’.
an8.77:9.1	Idha panāvuso, bhikkhuno pavivittassa viharato nirāyattavuttino icchā uppajjati lābhāya.
an8.77:9.2	So na uṭṭhahati, na ghaṭati, na vāyamati lābhāya.
an8.77:9.3	Tassa anuṭṭhahato, aghaṭato, avāyamato lābhāya, lābho uppajjati.
an8.77:9.4	So tena lābhena na majjati na pamajjati na pamādamāpajjati.
an8.77:9.5	Ayaṁ vuccatāvuso, ‘bhikkhu iccho viharati lābhāya, na uṭṭhahati, na ghaṭati, na vāyamati lābhāya, lābhī ca, na ca madī na ca pamādī, accuto ca saddhammā’.
an8.77:9.6	Ime kho, āvuso, aṭṭha puggalā santo saṁvijjamānā lokasmin”ti.
an8.77:9.7	Sattamaṁ.
an8.78:0.1	Aṅguttara Nikāya 8.78
an8.78:0.2	8. Yamakavagga
an8.78:0.3	Alaṁsutta
an8.78:1.1	Tatra kho āyasmā sāriputto bhikkhū āmantesi …pe…
an8.78:1.2	chahāvuso, dhammehi samannāgato bhikkhu alaṁ attano, alaṁ paresaṁ.
an8.78:1.3	Katamehi chahi?
an8.78:1.4	Idhāvuso, bhikkhu khippanisanti ca hoti kusalesu dhammesu;
an8.78:1.5	sutānañca dhammānaṁ dhāraṇajātiko hoti;
an8.78:1.6	dhātānañca dhammānaṁ atthūpaparikkhitā hoti;
an8.78:1.7	atthamaññāya dhammamaññāya dhammānudhammappaṭipanno ca hoti;
an8.78:1.8	kalyāṇavāco ca hoti kalyāṇavākkaraṇo, poriyā vācāya samannāgato vissaṭṭhāya anelagaḷāya atthassa viññāpaniyā;
an8.78:1.9	sandassako ca hoti samādapako samuttejako sampahaṁsako sabrahmacārīnaṁ.
an8.78:1.10	Imehi kho, āvuso, chahi dhammehi samannāgato bhikkhu alaṁ attano, alaṁ paresaṁ.
an8.78:2.1	Pañcahāvuso, dhammehi samannāgato bhikkhu alaṁ attano, alaṁ paresaṁ.
an8.78:2.2	Katamehi pañcahi?
an8.78:2.3	Idhāvuso, bhikkhu na heva kho khippanisanti ca hoti kusalesu dhammesu;
an8.78:2.4	sutānañca dhammānaṁ dhāraṇajātiko hoti;
an8.78:2.5	dhātānañca dhammānaṁ atthūpaparikkhitā hoti;
an8.78:2.6	atthamaññāya dhammamaññāya dhammānudhammappaṭipanno ca hoti;
an8.78:2.7	kalyāṇavāco ca hoti …pe…
an8.78:2.8	sandassako ca hoti …pe… sabrahmacārīnaṁ.
an8.78:2.9	Imehi kho, āvuso, pañcahi dhammehi samannāgato bhikkhu alaṁ attano, alaṁ paresaṁ.
an8.78:3.1	Catūhāvuso, dhammehi samannāgato bhikkhu alaṁ attano, nālaṁ paresaṁ.
an8.78:3.2	Katamehi catūhi?
an8.78:3.3	Idhāvuso, bhikkhu khippanisanti ca hoti kusalesu dhammesu;
an8.78:3.4	sutānañca dhammānaṁ dhāraṇajātiko hoti;
an8.78:3.5	dhātānañca dhammānaṁ atthūpaparikkhitā hoti;
an8.78:3.6	atthamaññāya dhammamaññāya dhammānudhammappaṭipanno ca hoti;
an8.78:3.7	no ca kalyāṇavāco hoti …pe…
an8.78:3.8	no ca sandassako hoti …pe… sabrahmacārīnaṁ.
an8.78:3.9	Imehi kho, āvuso, catūhi dhammehi samannāgato bhikkhu alaṁ attano, nālaṁ paresaṁ.
an8.78:4.1	Catūhāvuso, dhammehi samannāgato bhikkhu alaṁ paresaṁ, nālaṁ attano.
an8.78:4.2	Katamehi catūhi?
an8.78:4.3	Idhāvuso, bhikkhu khippanisanti ca hoti kusalesu dhammesu;
an8.78:4.4	sutānañca dhammānaṁ dhāraṇajātiko hoti;
an8.78:4.5	no ca dhātānaṁ dhammānaṁ atthūpaparikkhitā hoti;
an8.78:4.6	no ca atthamaññāya dhammamaññāya dhammānudhammappaṭipanno hoti;
an8.78:4.7	kalyāṇavāco ca hoti …pe…
an8.78:4.8	sandassako ca hoti …pe… sabrahmacārīnaṁ.
an8.78:4.9	Imehi kho, āvuso, catūhi dhammehi samannāgato bhikkhu alaṁ paresaṁ, nālaṁ attano.
an8.78:5.1	Tīhāvuso, dhammehi samannāgato bhikkhu alaṁ attano, nālaṁ paresaṁ.
an8.78:5.2	Katamehi tīhi?
an8.78:5.3	Idhāvuso, bhikkhu na heva kho khippanisanti ca hoti kusalesu dhammesu;
an8.78:5.4	sutānañca dhammānaṁ dhāraṇajātiko hoti;
an8.78:5.5	dhātānañca dhammānaṁ atthūpaparikkhitā hoti;
an8.78:5.6	atthamaññāya dhammamaññāya dhammānudhammappaṭipanno ca hoti;
an8.78:5.7	no ca kalyāṇavāco hoti …pe…
an8.78:5.8	no ca sandassako hoti …pe… sabrahmacārīnaṁ.
an8.78:5.9	Imehi kho, āvuso, tīhi dhammehi samannāgato bhikkhu alaṁ attano, nālaṁ paresaṁ.
an8.78:6.1	Tīhāvuso, dhammehi samannāgato bhikkhu alaṁ paresaṁ, nālaṁ attano.
an8.78:6.2	Katamehi tīhi?
an8.78:6.3	Idhāvuso, bhikkhu na heva kho khippanisanti ca hoti kusalesu dhammesu;
an8.78:6.4	sutānañca dhammānaṁ dhāraṇajātiko hoti;
an8.78:6.5	no ca dhātānaṁ dhammānaṁ atthūpaparikkhitā hoti;
an8.78:6.6	no ca atthamaññāya dhammamaññāya dhammānudhammappaṭipanno hoti;
an8.78:6.7	kalyāṇavāco ca hoti …pe… atthassa viññāpaniyā,
an8.78:6.8	sandassako ca hoti …pe… sabrahmacārīnaṁ.
an8.78:6.9	Imehi kho, āvuso, tīhi dhammehi samannāgato bhikkhu alaṁ paresaṁ, nālaṁ attano.
an8.78:7.1	Dvīhāvuso, dhammehi samannāgato bhikkhu alaṁ attano, nālaṁ paresaṁ.
an8.78:7.2	Katamehi dvīhi?
an8.78:7.3	Idhāvuso, bhikkhu na heva kho khippanisanti ca hoti kusalesu dhammesu;
an8.78:7.4	no ca sutānaṁ dhammānaṁ dhāraṇajātiko hoti;
an8.78:7.5	dhātānañca dhammānaṁ atthūpaparikkhitā hoti;
an8.78:7.6	atthamaññāya dhammamaññāya dhammānudhammappaṭipanno ca hoti;
an8.78:7.7	no ca kalyāṇavāco hoti …pe…
an8.78:7.8	no ca sandassako hoti …pe… sabrahmacārīnaṁ.
an8.78:7.9	Imehi kho, āvuso, dvīhi dhammehi samannāgato bhikkhu alaṁ attano, nālaṁ paresaṁ.
an8.78:8.1	Dvīhāvuso, dhammehi samannāgato bhikkhu alaṁ paresaṁ, nālaṁ attano.
an8.78:8.2	Katamehi dvīhi?
an8.78:8.3	Idhāvuso, bhikkhu na heva kho khippanisanti ca hoti kusalesu dhammesu;
an8.78:8.4	no ca sutānaṁ dhammānaṁ dhāraṇajātiko hoti;
an8.78:8.5	no ca dhātānaṁ dhammānaṁ atthūpaparikkhitā hoti;
an8.78:8.6	no ca atthamaññāya dhammamaññāya dhammānudhammappaṭipanno hoti;
an8.78:8.7	kalyāṇavāco ca hoti kalyāṇavākkaraṇo, poriyā vācāya samannāgato vissaṭṭhāya anelagaḷāya atthassa viññāpaniyā;
an8.78:8.8	sandassako ca hoti samādapako samuttejako sampahaṁsako sabrahmacārīnaṁ.
an8.78:8.9	Imehi kho, āvuso, dvīhi dhammehi samannāgato bhikkhu alaṁ paresaṁ, nālaṁ attano”ti.
an8.78:8.10	Aṭṭhamaṁ.
an8.79:0.1	Aṅguttara Nikāya 8.79
an8.79:0.2	8. Yamakavagga
an8.79:0.3	Parihānasutta
an8.79:1.1	“Aṭṭhime, bhikkhave, dhammā sekhassa bhikkhuno parihānāya saṁvattanti.
an8.79:1.2	Katame aṭṭha?
an8.79:1.3	Kammārāmatā, bhassārāmatā, niddārāmatā, saṅgaṇikārāmatā, indriyesu aguttadvāratā, bhojane amattaññutā, saṁsaggārāmatā, papañcārāmatā—
an8.79:1.4	ime kho, bhikkhave, aṭṭha dhammā sekhassa bhikkhuno parihānāya saṁvattanti.
an8.79:2.1	Aṭṭhime, bhikkhave, dhammā sekhassa bhikkhuno aparihānāya saṁvattanti.
an8.79:2.2	Katame aṭṭha?
an8.79:2.3	Na kammārāmatā, na bhassārāmatā, na niddārāmatā, na saṅgaṇikārāmatā, indriyesu guttadvāratā, bhojane mattaññutā, asaṁsaggārāmatā, nippapañcārāmatā—
an8.79:2.4	ime kho, bhikkhave, aṭṭha dhammā sekhassa bhikkhuno aparihānāya saṁvattantī”ti.
an8.79:2.5	Navamaṁ.
an8.80:0.1	Aṅguttara Nikāya 8.80
an8.80:0.2	8. Yamakavagga
an8.80:0.3	Kusītārambhavatthusutta
an8.80:1.1	“Aṭṭhimāni, bhikkhave, kusītavatthūni.
an8.80:1.2	Katamāni aṭṭha?
an8.80:1.3	Idha, bhikkhave, bhikkhunā kammaṁ kattabbaṁ hoti.
an8.80:1.4	Tassa evaṁ hoti:
an8.80:1.5	‘kammaṁ kho me kattabbaṁ bhavissati. Kammaṁ kho pana me karontassa kāyo kilamissati. Handāhaṁ nipajjāmī’ti.
an8.80:1.6	So nipajjati, na vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an8.80:1.7	Idaṁ, bhikkhave, paṭhamaṁ kusītavatthu.
an8.80:2.1	Puna caparaṁ, bhikkhave, bhikkhunā kammaṁ kataṁ hoti.
an8.80:2.2	Tassa evaṁ hoti:
an8.80:2.3	‘ahaṁ kho kammaṁ akāsiṁ. Kammaṁ kho pana me karontassa kāyo kilanto. Handāhaṁ nipajjāmī’ti.
an8.80:2.4	So nipajjati, na vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an8.80:2.5	Idaṁ, bhikkhave, dutiyaṁ kusītavatthu.
an8.80:3.1	Puna caparaṁ, bhikkhave, bhikkhunā maggo gantabbo hoti.
an8.80:3.2	Tassa evaṁ hoti:
an8.80:3.3	‘maggo me gantabbo bhavissati. Maggaṁ kho pana me gacchantassa kāyo kilamissati. Handāhaṁ nipajjāmī’ti.
an8.80:3.4	So nipajjati, na vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an8.80:3.5	Idaṁ, bhikkhave, tatiyaṁ kusītavatthu.
an8.80:4.1	Puna caparaṁ, bhikkhave, bhikkhunā maggo gato hoti.
an8.80:4.2	Tassa evaṁ hoti:
an8.80:4.3	‘ahaṁ kho maggaṁ agamāsiṁ. Maggaṁ kho pana me gacchantassa kāyo kilanto. Handāhaṁ nipajjāmī’ti.
an8.80:4.4	So nipajjati, na vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an8.80:4.5	Idaṁ, bhikkhave, catutthaṁ kusītavatthu.
an8.80:5.1	Puna caparaṁ, bhikkhave, bhikkhu gāmaṁ vā nigamaṁ vā piṇḍāya caranto na labhati lūkhassa vā paṇītassa vā bhojanassa yāvadatthaṁ pāripūriṁ.
an8.80:5.2	Tassa evaṁ hoti:
an8.80:5.3	‘ahaṁ kho gāmaṁ vā nigamaṁ vā piṇḍāya caranto nālatthaṁ lūkhassa vā paṇītassa vā bhojanassa yāvadatthaṁ pāripūriṁ. Tassa me kāyo kilanto akammañño. Handāhaṁ nipajjāmī’ti.
an8.80:5.4	So nipajjati, na vīriyaṁ ārabhati …pe…
an8.80:5.5	idaṁ, bhikkhave, pañcamaṁ kusītavatthu.
an8.80:6.1	Puna caparaṁ, bhikkhave, bhikkhu gāmaṁ vā nigamaṁ vā piṇḍāya caranto labhati lūkhassa vā paṇītassa vā bhojanassa yāvadatthaṁ pāripūriṁ.
an8.80:6.2	Tassa evaṁ hoti:
an8.80:6.3	‘ahaṁ kho gāmaṁ vā nigamaṁ vā piṇḍāya caranto alatthaṁ lūkhassa vā paṇītassa vā bhojanassa yāvadatthaṁ pāripūriṁ. Tassa me kāyo garuko akammañño māsācitaṁ maññe. Handāhaṁ nipajjāmī’ti.
an8.80:6.4	So nipajjati, na vīriyaṁ ārabhati …pe…
an8.80:6.5	idaṁ, bhikkhave, chaṭṭhaṁ kusītavatthu.
an8.80:7.1	Puna caparaṁ, bhikkhave, bhikkhuno uppanno hoti appamattako ābādho.
an8.80:7.2	Tassa evaṁ hoti:
an8.80:7.3	‘uppanno kho me ayaṁ appamattako ābādho atthi kappo nipajjituṁ. Handāhaṁ nipajjāmī’ti.
an8.80:7.4	So nipajjati, na vīriyaṁ ārabhati …pe…
an8.80:7.5	idaṁ, bhikkhave, sattamaṁ kusītavatthu.
an8.80:8.1	Puna caparaṁ, bhikkhave, bhikkhu gilānā vuṭṭhito hoti aciravuṭṭhito gelaññā.
an8.80:8.2	Tassa evaṁ hoti:
an8.80:8.3	‘ahaṁ kho gilānā vuṭṭhito aciravuṭṭhito gelaññā. Tassa me kāyo dubbalo akammañño. Handāhaṁ nipajjāmī’ti.
an8.80:8.4	So nipajjati, na vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an8.80:8.5	Idaṁ, bhikkhave, aṭṭhamaṁ kusītavatthu.
an8.80:8.6	Imāni kho, bhikkhave, aṭṭha kusītavatthūni.
an8.80:9.1	Aṭṭhimāni, bhikkhave, ārambhavatthūni.
an8.80:9.2	Katamāni aṭṭha?
an8.80:9.3	Idha, bhikkhave, bhikkhunā kammaṁ kattabbaṁ hoti.
an8.80:9.4	Tassa evaṁ hoti:
an8.80:9.5	‘kammaṁ kho me kattabbaṁ bhavissati. Kammaṁ kho mayā karontena na sukaraṁ buddhānaṁ sāsanaṁ manasi kātuṁ. Handāhaṁ paṭikacceva vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
an8.80:9.6	So vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an8.80:9.7	Idaṁ, bhikkhave, paṭhamaṁ ārambhavatthu.
an8.80:10.1	Puna caparaṁ, bhikkhave, bhikkhunā kammaṁ kataṁ hoti.
an8.80:10.2	Tassa evaṁ hoti:
an8.80:10.3	‘ahaṁ kho kammaṁ akāsiṁ. Kammaṁ kho panāhaṁ karonto nāsakkhiṁ buddhānaṁ sāsanaṁ manasi kātuṁ. Handāhaṁ vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
an8.80:10.4	So vīriyaṁ ārabhati.
an8.80:10.5	Idaṁ, bhikkhave, dutiyaṁ ārambhavatthu.
an8.80:11.1	Puna caparaṁ, bhikkhave, bhikkhunā maggo gantabbo hoti.
an8.80:11.2	Tassa evaṁ hoti—
an8.80:11.3	maggo kho me gantabbo bhavissati. Maggaṁ kho pana me gacchantena na sukaraṁ buddhānaṁ sāsanaṁ manasi kātuṁ. Handāhaṁ vīriyaṁ …pe…
an8.80:11.4	idaṁ, bhikkhave, tatiyaṁ ārambhavatthu.
an8.80:12.1	Puna caparaṁ, bhikkhave, bhikkhunā maggo gato hoti.
an8.80:12.2	Tassa evaṁ hoti—
an8.80:12.3	ahaṁ kho maggaṁ agamāsiṁ. Maggaṁ kho panāhaṁ gacchanto nāsakkhiṁ buddhānaṁ sāsanaṁ manasi kātuṁ. Handāhaṁ vīriyaṁ ārabhāmi …pe…
an8.80:12.4	idaṁ, bhikkhave, catutthaṁ ārambhavatthu.
an8.80:13.1	Puna caparaṁ, bhikkhave, bhikkhu gāmaṁ vā nigamaṁ vā piṇḍāya caranto na labhati lūkhassa vā paṇītassa vā bhojanassa yāvadatthaṁ pāripūriṁ.
an8.80:13.2	Tassa evaṁ hoti—
an8.80:13.3	ahaṁ kho gāmaṁ vā nigamaṁ vā piṇḍāya caranto nālatthaṁ lūkhassa vā paṇītassa vā bhojanassa yāvadatthaṁ pāripūriṁ. Tassa me kāyo lahuko kammañño. Handāhaṁ vīriyaṁ ārabhāmi …pe…
an8.80:13.4	idaṁ, bhikkhave, pañcamaṁ ārambhavatthu.
an8.80:14.1	Puna caparaṁ, bhikkhave, bhikkhu gāmaṁ vā nigamaṁ vā piṇḍāya caranto labhati lūkhassa vā paṇītassa vā bhojanassa yāvadatthaṁ pāripūriṁ.
an8.80:14.2	Tassa evaṁ hoti—
an8.80:14.3	ahaṁ kho gāmaṁ vā nigamaṁ vā piṇḍāya caranto alatthaṁ lūkhassa vā paṇītassa vā bhojanassa yāvadatthaṁ pāripūriṁ. Tassa me kāyo balavā kammañño. Handāhaṁ vīriyaṁ ārabhāmi …pe…
an8.80:14.4	idaṁ, bhikkhave, chaṭṭhaṁ ārambhavatthu.
an8.80:15.1	Puna caparaṁ, bhikkhave, bhikkhuno uppanno hoti appamattako ābādho.
an8.80:15.2	Tassa evaṁ hoti—
an8.80:15.3	uppanno kho me ayaṁ appamattako ābādho. Ṭhānaṁ kho panetaṁ vijjati yaṁ me ābādho pavaḍḍheyya. Handāhaṁ paṭikacceva vīriyaṁ ārabhāmi …pe…
an8.80:15.4	idaṁ, bhikkhave, sattamaṁ ārambhavatthu.
an8.80:16.1	Puna caparaṁ, bhikkhave, bhikkhu gilānā vuṭṭhito hoti aciravuṭṭhito gelaññā.
an8.80:16.2	Tassa evaṁ hoti:
an8.80:16.3	‘ahaṁ kho gilānā vuṭṭhito aciravuṭṭhito gelaññā. Ṭhānaṁ kho panetaṁ vijjati yaṁ me ābādho paccudāvatteyya. Handāhaṁ paṭikacceva vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
an8.80:16.4	So vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
an8.80:16.5	Idaṁ, bhikkhave, aṭṭhamaṁ ārambhavatthu.
an8.80:17.1	Imāni kho, bhikkhave, aṭṭha ārambhavatthūnī”ti.
an8.80:17.2	Dasamaṁ.
an8.80:17.3	Yamakavaggo tatiyo.
an8.80:18.0	Tassuddānaṁ
an8.80:18.1	Dve saddhā dve maraṇassatī,
an8.80:18.2	dve sampadā athāpare;
an8.80:18.3	Icchā alaṁ parihānaṁ,
an8.80:18.4	kusītārambhavatthūnīti.
an8.81:0.1	Aṅguttara Nikāya 8.81
an8.81:0.2	9. Sativagga
an8.81:0.3	Satisampajaññasutta
an8.81:1.1	“Satisampajaññe, bhikkhave, asati satisampajaññavipannassa hatūpanisaṁ hoti hirottappaṁ.
an8.81:1.2	Hirottappe asati hirottappavipannassa hatūpaniso hoti indriyasaṁvaro.
an8.81:1.3	Indriyasaṁvare asati indriyasaṁvaravipannassa hatūpanisaṁ hoti sīlaṁ.
an8.81:1.4	Sīle asati sīlavipannassa hatūpaniso hoti sammāsamādhi.
an8.81:1.5	Sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ.
an8.81:1.6	Yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo.
an8.81:1.7	Nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an8.81:1.8	Seyyathāpi, bhikkhave, rukkho sākhāpalāsavipanno. Tassa papaṭikāpi na pāripūriṁ gacchati, tacopi … pheggupi … sāropi na pāripūriṁ gacchati.
an8.81:1.9	Evamevaṁ kho, bhikkhave, satisampajaññe asati satisampajaññavipannassa hatūpanisaṁ hoti hirottappaṁ;
an8.81:1.10	hirottappe asati hirottappavipannassa hatūpaniso hoti …pe…
an8.81:1.11	vimuttiñāṇadassanaṁ.
an8.81:2.1	Satisampajaññe, bhikkhave, sati satisampajaññasampannassa upanisasampannaṁ hoti hirottappaṁ.
an8.81:2.2	Hirottappe sati hirottappasampannassa upanisasampanno hoti indriyasaṁvaro.
an8.81:2.3	Indriyasaṁvare sati indriyasaṁvarasampannassa upanisasampannaṁ hoti sīlaṁ.
an8.81:2.4	Sīle sati sīlasampannassa upanisasampanno hoti sammāsamādhi.
an8.81:2.5	Sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ.
an8.81:2.6	Yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo.
an8.81:2.7	Nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanaṁ.
an8.81:2.8	Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṁ gacchati, tacopi … pheggupi … sāropi pāripūriṁ gacchati.
an8.81:2.9	Evamevaṁ kho, bhikkhave, satisampajaññe sati satisampajaññasampannassa upanisasampannaṁ hoti hirottappaṁ;
an8.81:2.10	hirottappe sati hirottappasampannassa upanisasampanno hoti …pe…
an8.81:2.11	vimuttiñāṇadassanan”ti.
an8.81:2.12	Paṭhamaṁ.
an8.82:0.1	Aṅguttara Nikāya 8.82
an8.82:0.2	9. Sativagga
an8.82:0.3	Puṇṇiyasutta
an8.82:1.1	Atha kho āyasmā puṇṇiyo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā puṇṇiyo bhagavantaṁ etadavoca:
an8.82:1.2	“ko nu kho, bhante, hetu ko paccayo yena appekadā tathāgataṁ dhammadesanā paṭibhāti, appekadā na paṭibhātī”ti?
an8.82:1.3	“Saddho ca, puṇṇiya, bhikkhu hoti, no cupasaṅkamitā;
an8.82:1.4	neva tathāgataṁ dhammadesanā paṭibhāti.
an8.82:1.5	Yato ca kho, puṇṇiya, bhikkhu saddho ca hoti, upasaṅkamitā ca;
an8.82:1.6	evaṁ tathāgataṁ dhammadesanā paṭibhāti.
an8.82:1.7	Saddho ca, puṇṇiya, bhikkhu hoti, upasaṅkamitā ca, no ca payirupāsitā …pe…
an8.82:1.8	payirupāsitā ca, no ca paripucchitā …
an8.82:1.9	paripucchitā ca, no ca ohitasoto dhammaṁ suṇāti …
an8.82:1.10	ohitasoto ca dhammaṁ suṇāti, no ca sutvā dhammaṁ dhāreti …
an8.82:1.11	sutvā ca dhammaṁ dhāreti, no ca dhātānaṁ dhammānaṁ atthaṁ upaparikkhati …
an8.82:1.12	dhātānañca dhammānaṁ atthaṁ upaparikkhati, no ca atthamaññāya dhammamaññāya dhammānudhammappaṭipanno hoti.
an8.82:1.13	Neva tāva tathāgataṁ dhammadesanā paṭibhāti.
an8.82:2.1	Yato ca kho, puṇṇiya, bhikkhu saddho ca hoti, upasaṅkamitā ca, payirupāsitā ca, paripucchitā ca, ohitasoto ca dhammaṁ suṇāti, sutvā ca dhammaṁ dhāreti, dhātānañca dhammānaṁ atthaṁ upaparikkhati, atthamaññāya dhammamaññāya dhammānudhammappaṭipanno ca hoti;
an8.82:2.2	evaṁ tathāgataṁ dhammadesanā paṭibhāti.
an8.82:2.3	Imehi kho, puṇṇiya, aṭṭhahi dhammehi samannāgatā ekantapaṭibhānā tathāgataṁ dhammadesanā hotī”ti.
an8.82:2.4	Dutiyaṁ.
an8.83:0.1	Aṅguttara Nikāya 8.83
an8.83:0.2	9. Sativagga
an8.83:0.3	Mūlakasutta
an8.83:1.1	“Sace, bhikkhave, aññatitthiyā paribbājakā evaṁ puccheyyuṁ:
an8.83:1.2	‘kiṁmūlakā, āvuso, sabbe dhammā, kiṁsambhavā sabbe dhammā, kiṁsamudayā sabbe dhammā, kiṁsamosaraṇā sabbe dhammā, kiṁpamukhā sabbe dhammā, kiṁadhipateyyā sabbe dhammā, kiṁuttarā sabbe dhammā, kiṁsārā sabbe dhammā’ti, evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ kinti byākareyyāthā”ti?
an8.83:1.3	“Bhagavaṁmūlakā no, bhante, dhammā, bhagavaṁnettikā bhagavaṁpaṭisaraṇā. Sādhu, bhante, bhagavantaṁyeva paṭibhātu etassa bhāsitassa attho. Bhagavato sutvā bhikkhū dhāressantī”ti.
an8.83:2.1	“Tena hi, bhikkhave, desessāmi.
an8.83:2.2	Taṁ suṇātha, sādhukaṁ manasi karotha, bhāsissāmī”ti.
an8.83:2.3	“Evaṁ, bhante”ti kho te bhikkhū bhagavato paccassosuṁ.
an8.83:2.4	Bhagavā etadavoca:
an8.83:2.5	“sace, bhikkhave, aññatitthiyā paribbājakā evaṁ puccheyyuṁ:
an8.83:2.6	‘kiṁmūlakā, āvuso, sabbe dhammā, kiṁsambhavā sabbe dhammā, kiṁsamudayā sabbe dhammā, kiṁsamosaraṇā sabbe dhammā, kiṁpamukhā sabbe dhammā, kiṁadhipateyyā sabbe dhammā, kiṁuttarā sabbe dhammā, kiṁsārā sabbe dhammā’ti,
an8.83:2.7	evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:
an8.83:2.8	‘chandamūlakā, āvuso, sabbe dhammā, manasikārasambhavā sabbe dhammā, phassasamudayā sabbe dhammā, vedanāsamosaraṇā sabbe dhammā, samādhippamukhā sabbe dhammā, satādhipateyyā sabbe dhammā, paññuttarā sabbe dhammā, vimuttisārā sabbe dhammā’ti,
an8.83:2.9	evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyāthā”ti.
an8.83:2.10	Tatiyaṁ.
an8.84:0.1	Aṅguttara Nikāya 8.84
an8.84:0.2	9. Sativagga
an8.84:0.3	Corasutta
an8.84:1.1	“Aṭṭhahi, bhikkhave, aṅgehi samannāgato mahācoro khippaṁ pariyāpajjati, na ciraṭṭhitiko hoti.
an8.84:1.2	Katamehi aṭṭhahi?
an8.84:1.3	Appaharantassa paharati, anavasesaṁ ādiyati, itthiṁ hanati, kumāriṁ dūseti, pabbajitaṁ vilumpati, rājakosaṁ vilumpati, accāsanne kammaṁ karoti, na ca nidhānakusalo hoti.
an8.84:1.4	Imehi kho, bhikkhave, aṭṭhahaṅgehi samannāgato mahācoro khippaṁ pariyāpajjati, na ciraṭṭhitiko hoti.
an8.84:2.1	Aṭṭhahi, bhikkhave, aṅgehi samannāgato mahācoro na khippaṁ pariyāpajjati, ciraṭṭhitiko hoti.
an8.84:2.2	Katamehi aṭṭhahi?
an8.84:2.3	Na appaharantassa paharati, na anavasesaṁ ādiyati, na itthiṁ hanati, na kumāriṁ dūseti, na pabbajitaṁ vilumpati, na rājakosaṁ vilumpati, na accāsanne kammaṁ karoti, nidhānakusalo ca hoti.
an8.84:2.4	Imehi kho, bhikkhave, aṭṭhahaṅgehi samannāgato mahācoro na khippaṁ pariyāpajjati, ciraṭṭhitiko hotī”ti.
an8.84:2.5	Catutthaṁ.
an8.85:0.1	Aṅguttara Nikāya 8.85
an8.85:0.2	9. Sativagga
an8.85:0.3	Samaṇasutta
an8.85:1.1	“‘Samaṇo’ti, bhikkhave, tathāgatassetaṁ adhivacanaṁ arahato sammāsambuddhassa.
an8.85:1.2	‘Brāhmaṇo’ti, bhikkhave, tathāgatassetaṁ adhivacanaṁ arahato sammāsambuddhassa.
an8.85:1.3	‘Vedagū’ti, bhikkhave, tathāgatassetaṁ adhivacanaṁ arahato sammāsambuddhassa.
an8.85:1.4	‘Bhisakko’ti, bhikkhave, tathāgatassetaṁ adhivacanaṁ arahato sammāsambuddhassa.
an8.85:1.5	‘Nimmalo’ti, bhikkhave, tathāgatassetaṁ adhivacanaṁ arahato sammāsambuddhassa.
an8.85:1.6	‘Vimalo’ti, bhikkhave, tathāgatassetaṁ adhivacanaṁ arahato sammāsambuddhassa.
an8.85:1.7	‘Ñāṇī’ti, bhikkhave, tathāgatassetaṁ adhivacanaṁ arahato sammāsambuddhassa.
an8.85:1.8	‘Vimutto’ti, bhikkhave, tathāgatassetaṁ adhivacanaṁ arahato sammāsambuddhassāti.
an8.85:2.1	Yaṁ samaṇena pattabbaṁ,
an8.85:2.2	brāhmaṇena vusīmatā;
an8.85:2.3	Yaṁ vedagunā pattabbaṁ,
an8.85:2.4	bhisakkena anuttaraṁ.
an8.85:3.1	Yaṁ nimmalena pattabbaṁ,
an8.85:3.2	vimalena sucīmatā;
an8.85:3.3	Yaṁ ñāṇinā ca pattabbaṁ,
an8.85:3.4	vimuttena anuttaraṁ.
an8.85:4.1	Sohaṁ vijitasaṅgāmo,
an8.85:4.2	mutto mocemi bandhanā;
an8.85:4.3	Nāgomhi paramadanto,
an8.85:4.4	asekho parinibbuto”ti.
an8.85:4.5	Pañcamaṁ.
an8.86:0.1	Aṅguttara Nikāya 8.86
an8.86:0.2	9. Sativagga
an8.86:0.3	Yasasutta
an8.86:1.1	Ekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena icchānaṅgalaṁ nāma kosalānaṁ brāhmaṇagāmo tadavasari.
an8.86:1.2	Tatra sudaṁ bhagavā icchānaṅgale viharati icchānaṅgalavanasaṇḍe.
an8.86:1.3	Assosuṁ kho icchānaṅgalakā brāhmaṇagahapatikā:
an8.86:1.4	“samaṇo khalu bho gotamo sakyaputto sakyakulā pabbajito icchānaṅgalaṁ anuppatto icchānaṅgale viharati icchānaṅgalavanasaṇḍe.
an8.86:1.5	Taṁ kho pana bhavantaṁ gotamaṁ evaṁ kalyāṇo kittisaddo abbhuggato:
an8.86:1.6	‘itipi so bhagavā arahaṁ sammāsambuddho …pe…
an8.86:1.7	sādhu kho pana tathārūpānaṁ arahataṁ dassanaṁ hotī’”ti.
an8.86:2.1	Atha kho icchānaṅgalakā brāhmaṇagahapatikā tassā rattiyā accayena pahutaṁ khādanīyaṁ bhojanīyaṁ ādāya yena icchānaṅgalavanasaṇḍo tenupasaṅkamiṁsu; upasaṅkamitvā bahidvārakoṭṭhake aṭṭhaṁsu uccāsaddā mahāsaddā.
an8.86:2.2	Tena kho pana samayena āyasmā nāgito bhagavato upaṭṭhāko hoti.
an8.86:2.3	Atha kho bhagavā āyasmantaṁ nāgitaṁ āmantesi:
an8.86:2.4	“ke pana te, nāgita, uccāsaddā mahāsaddā kevaṭṭā maññe macchavilope”ti?
an8.86:2.5	“Ete, bhante, icchānaṅgalakā brāhmaṇagahapatikā pahutaṁ khādanīyaṁ bhojanīyaṁ ādāya bahidvārakoṭṭhake ṭhitā bhagavantaṁyeva uddissa bhikkhusaṅghañcā”ti.
an8.86:2.6	“Māhaṁ, nāgita, yasena samāgamaṁ, mā ca mayā yaso.
an8.86:2.7	Yo kho, nāgita, nayimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī. Yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī,
an8.86:2.8	so taṁ mīḷhasukhaṁ middhasukhaṁ lābhasakkārasilokasukhaṁ sādiyeyyā”ti.
an8.86:3.1	“Adhivāsetu dāni, bhante, bhagavā. Adhivāsetu sugato.
an8.86:3.2	Adhivāsanakālo dāni, bhante, bhagavato.
an8.86:3.3	Yena yeneva dāni, bhante, bhagavā gamissati tanninnāva bhavissanti brāhmaṇagahapatikā negamā ceva jānapadā ca.
an8.86:3.4	Seyyathāpi, bhante, thullaphusitake deve vassante yathāninnaṁ udakāni pavattanti;
an8.86:3.5	evamevaṁ kho, bhante, yena yeneva dāni bhagavā gamissati tanninnāva bhavissanti brāhmaṇagahapatikā negamā ceva jānapadā ca.
an8.86:3.6	Taṁ kissa hetu?
an8.86:3.7	Tathā hi, bhante, bhagavato sīlapaññāṇan”ti.
an8.86:4.1	“Māhaṁ, nāgita, yasena samāgamaṁ, mā ca mayā yaso.
an8.86:4.2	Yo kho, nāgita, nayimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī. Yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī,
an8.86:4.3	so taṁ mīḷhasukhaṁ middhasukhaṁ lābhasakkārasilokasukhaṁ sādiyeyya.
an8.86:5.1	devatāpi kho, nāgita, ekaccā nayimassa nekkhammasukhassa pavivekasukhassa upasamasukhassa sambodhasukhassa nikāmalābhiniyo assu akicchalābhiniyo akasiralābhiniyo, yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī.
an8.86:5.2	Tumhākampi kho, nāgita, saṅgamma samāgamma saṅgaṇikavihāraṁ anuyuttānaṁ viharataṁ evaṁ hoti:
an8.86:5.3	‘na hi nūname āyasmanto imassa nekkhammasukhassa pavivekasukhassa upasamasukhassa sambodhasukhassa nikāmalābhino assu akicchalābhino akasiralābhino. Yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī.
an8.86:5.4	Tathā hi paname āyasmanto saṅgamma samāgamma saṅgaṇikavihāraṁ anuyuttā viharanti’.
an8.86:6.1	Idhāhaṁ, nāgita, bhikkhū passāmi aññamaññaṁ aṅgulipatodakena sañjagghante saṅkīḷante.
an8.86:6.2	Tassa mayhaṁ, nāgita, evaṁ hoti:
an8.86:6.3	‘na hi nūname āyasmanto imassa nekkhammasukhassa pavivekasukhassa upasamasukhassa sambodhasukhassa nikāmalābhino assu akicchalābhino akasiralābhino. Yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī.
an8.86:6.4	Tathā hi paname āyasmanto aññamaññaṁ aṅgulipatodakena sañjagghanti saṅkīḷanti’.
an8.86:7.1	Idha panāhaṁ, nāgita, bhikkhū passāmi yāvadatthaṁ udarāvadehakaṁ bhuñjitvā seyyasukhaṁ passasukhaṁ middhasukhaṁ anuyutte viharante.
an8.86:7.2	Tassa mayhaṁ, nāgita, evaṁ hoti:
an8.86:7.3	‘na hi nūname āyasmanto imassa nekkhammasukhassa pavivekasukhassa upasamasukhassa sambodhasukhassa nikāmalābhino assu akicchalābhino akasiralābhino. Yassāhaṁ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī.
an8.86:7.4	Tathā hi paname āyasmanto yāvadatthaṁ udarāvadehakaṁ bhuñjitvā seyyasukhaṁ passasukhaṁ middhasukhaṁ anuyuttā viharanti’.
an8.86:8.1	Idhāhaṁ, nāgita, bhikkhuṁ passāmi gāmantavihāriṁ samāhitaṁ nisinnaṁ.
an8.86:8.2	Tassa mayhaṁ, nāgita, evaṁ hoti:
an8.86:8.3	‘idāni imaṁ āyasmantaṁ ārāmiko vā upaṭṭhahissati samaṇuddeso vā. Taṁ tamhā samādhimhā cāvessatī’ti.
an8.86:8.4	Tenāhaṁ, nāgita, tassa bhikkhuno na attamano homi gāmantavihārena.
an8.86:9.1	Idha panāhaṁ, nāgita, bhikkhuṁ passāmi āraññikaṁ araññe pacalāyamānaṁ nisinnaṁ.
an8.86:9.2	Tassa mayhaṁ, nāgita, evaṁ hoti:
an8.86:9.3	‘idāni ayamāyasmā imaṁ niddākilamathaṁ paṭivinodetvā araññasaññaṁyeva manasi karissati ekattan’ti.
an8.86:9.4	Tenāhaṁ, nāgita, tassa bhikkhuno attamano homi araññavihārena.
an8.86:10.1	Idha panāhaṁ, nāgita, bhikkhuṁ passāmi āraññikaṁ araññe asamāhitaṁ nisinnaṁ.
an8.86:10.2	Tassa mayhaṁ, nāgita, evaṁ hoti:
an8.86:10.3	‘idāni ayamāyasmā asamāhitaṁ vā cittaṁ samādahissati, samāhitaṁ vā cittaṁ anurakkhissatī’ti.
an8.86:10.4	Tenāhaṁ, nāgita, tassa bhikkhuno attamano homi araññavihārena.
an8.86:11.1	Idha panāhaṁ, nāgita, bhikkhuṁ passāmi āraññikaṁ araññe samāhitaṁ nisinnaṁ.
an8.86:11.2	Tassa mayhaṁ, nāgita, evaṁ hoti:
an8.86:11.3	‘idāni ayamāyasmā avimuttaṁ vā cittaṁ vimuccissati, vimuttaṁ vā cittaṁ anurakkhissatī’ti.
an8.86:11.4	Tenāhaṁ, nāgita, tassa bhikkhuno attamano homi araññavihārena.
an8.86:12.1	Idha panāhaṁ, nāgita, bhikkhuṁ passāmi gāmantavihāriṁ lābhiṁ cīvarapiṇḍapātasenāsanagilānapaccayabhesajjaparikkhārānaṁ.
an8.86:12.2	So taṁ lābhasakkārasilokaṁ nikāmayamāno riñcati paṭisallānaṁ, riñcati araññavanapatthāni pantāni senāsanāni;
an8.86:12.3	gāmanigamarājadhāniṁ osaritvā vāsaṁ kappeti.
an8.86:12.4	Tenāhaṁ, nāgita, tassa bhikkhuno na attamano homi gāmantavihārena.
an8.86:13.1	Idha panāhaṁ, nāgita, bhikkhuṁ passāmi āraññikaṁ lābhiṁ cīvarapiṇḍapātasenāsanagilānapaccayabhesajjaparikkhārānaṁ.
an8.86:13.2	So taṁ lābhasakkārasilokaṁ paṭipaṇāmetvā na riñcati paṭisallānaṁ, na riñcati araññavanapatthāni pantāni senāsanāni.
an8.86:13.3	Tenāhaṁ, nāgita, tassa bhikkhuno attamano homi araññavihārena.
an8.86:14.1	Yasmāhaṁ, nāgita, samaye addhānamaggappaṭipanno na kañci passāmi purato vā pacchato vā, phāsu me, nāgita, tasmiṁ samaye hoti antamaso uccārapassāvakammāyā”ti.
an8.86:14.2	Chaṭṭhaṁ.
an8.87:0.1	Aṅguttara Nikāya 8.87
an8.87:0.2	9. Sativagga
an8.87:0.3	Pattanikujjanasutta
an8.87:1.1	“Aṭṭhahi, bhikkhave, aṅgehi samannāgatassa upāsakassa ākaṅkhamāno saṅgho pattaṁ nikkujjeyya.
an8.87:1.2	Katamehi aṭṭhahi?
an8.87:1.3	Bhikkhūnaṁ alābhāya parisakkati, bhikkhūnaṁ anatthāya parisakkati, bhikkhūnaṁ avāsāya parisakkati, bhikkhū akkosati paribhāsati, bhikkhū bhikkhūhi bhedeti, buddhassa avaṇṇaṁ bhāsati, dhammassa avaṇṇaṁ bhāsati, saṅghassa avaṇṇaṁ bhāsati.
an8.87:1.4	Imehi kho, bhikkhave, aṭṭhahaṅgehi samannāgatassa upāsakassa ākaṅkhamāno saṅgho pattaṁ nikkujjeyya.
an8.87:2.1	Aṭṭhahi, bhikkhave, aṅgehi samannāgatassa upāsakassa ākaṅkhamāno saṅgho pattaṁ ukkujjeyya.
an8.87:2.2	Katamehi aṭṭhahi?
an8.87:2.3	Na bhikkhūnaṁ alābhāya parisakkati, na bhikkhūnaṁ anatthāya parisakkati, na bhikkhūnaṁ avāsāya parisakkati, na bhikkhū akkosati paribhāsati, na bhikkhū bhikkhūhi bhedeti, buddhassa vaṇṇaṁ bhāsati, dhammassa vaṇṇaṁ bhāsati, saṅghassa vaṇṇaṁ bhāsati.
an8.87:2.4	Imehi kho, bhikkhave, aṭṭhahaṅgehi samannāgatassa upāsakassa ākaṅkhamāno saṅgho pattaṁ ukkujjeyyā”ti.
an8.87:2.5	Sattamaṁ.
an8.88:0.1	Aṅguttara Nikāya 8.88
an8.88:0.2	9. Sativagga
an8.88:0.3	Appasādapavedanīyasutta
an8.88:1.1	“Aṭṭhahi, bhikkhave, dhammehi samannāgatassa bhikkhuno ākaṅkhamānā upāsakā appasādaṁ pavedeyyuṁ.
an8.88:1.2	Katamehi aṭṭhahi?
an8.88:1.3	Gihīnaṁ alābhāya parisakkati, gihīnaṁ anatthāya parisakkati, gihī akkosati paribhāsati, gihī gihīhi bhedeti, buddhassa avaṇṇaṁ bhāsati, dhammassa avaṇṇaṁ bhāsati, saṅghassa avaṇṇaṁ bhāsati, agocare ca naṁ passanti.
an8.88:1.4	Imehi kho, bhikkhave, aṭṭhahi dhammehi samannāgatassa bhikkhuno ākaṅkhamānā upāsakā appasādaṁ pavedeyyuṁ.
an8.88:2.1	Aṭṭhahi, bhikkhave, dhammehi samannāgatassa bhikkhuno ākaṅkhamānā upāsakā pasādaṁ pavedeyyuṁ.
an8.88:2.2	Katamehi aṭṭhahi?
an8.88:2.3	Na gihīnaṁ alābhāya parisakkati, na gihīnaṁ anatthāya parisakkati, na gihī akkosati paribhāsati, na gihī gihīhi bhedeti, buddhassa vaṇṇaṁ bhāsati, dhammassa vaṇṇaṁ bhāsati, saṅghassa vaṇṇaṁ bhāsati, gocare ca naṁ passanti.
an8.88:2.4	Imehi kho, bhikkhave, aṭṭhahi dhammehi samannāgatassa bhikkhuno ākaṅkhamānā upāsakā pasādaṁ pavedeyyun”ti.
an8.88:2.5	Aṭṭhamaṁ.
an8.89:0.1	Aṅguttara Nikāya 8.89
an8.89:0.2	9. Sativagga
an8.89:0.3	Paṭisāraṇīyasutta
an8.89:1.1	“Aṭṭhahi, bhikkhave, dhammehi samannāgatassa bhikkhuno ākaṅkhamāno saṅgho paṭisāraṇīyakammaṁ kareyya.
an8.89:1.2	Katamehi aṭṭhahi?
an8.89:1.3	Gihīnaṁ alābhāya parisakkati, gihīnaṁ anatthāya parisakkati, gihī akkosati paribhāsati, gihī gihīhi bhedeti, buddhassa avaṇṇaṁ bhāsati, dhammassa avaṇṇaṁ bhāsati, saṅghassa avaṇṇaṁ bhāsati, dhammikañca gihipaṭissavaṁ na saccāpeti.
an8.89:1.4	Imehi kho, bhikkhave, aṭṭhahi dhammehi samannāgatassa bhikkhuno ākaṅkhamāno saṅgho paṭisāraṇīyaṁ kammaṁ kareyya.
an8.89:2.1	Aṭṭhahi, bhikkhave, dhammehi samannāgatassa bhikkhuno ākaṅkhamāno saṅgho paṭisāraṇīyakammaṁ paṭippassambheyya.
an8.89:2.2	Katamehi aṭṭhahi?
an8.89:2.3	Na gihīnaṁ alābhāya parisakkati, na gihīnaṁ anatthāya parisakkati, na gihī akkosati paribhāsati, na gihī gihīhi bhedeti, buddhassa vaṇṇaṁ bhāsati, dhammassa vaṇṇaṁ bhāsati, saṅghassa vaṇṇaṁ bhāsati, dhammikañca gihipaṭissavaṁ saccāpeti.
an8.89:2.4	Imehi kho, bhikkhave, aṭṭhahi dhammehi samannāgatassa bhikkhuno ākaṅkhamāno saṅgho paṭisāraṇīyakammaṁ paṭippassambheyyā”ti.
an8.89:2.5	Navamaṁ.
an8.90:0.1	Aṅguttara Nikāya 8.90
an8.90:0.2	9. Sativagga
an8.90:0.3	Sammāvattanasutta
an8.90:1.1	“Tassapāpiyasikakammakatena, bhikkhave, bhikkhunā aṭṭhasu dhammesu sammā vattitabbaṁ—
an8.90:1.2	na upasampādetabbo, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatenapi bhikkhuniyo na ovaditabbā, na kāci saṅghasammuti sāditabbā, na kismiñci paccekaṭṭhāne ṭhapetabbo, na ca tena mūlena vuṭṭhāpetabbo.
an8.90:1.3	Tassapāpiyasikakammakatena, bhikkhave, bhikkhunā imesu aṭṭhasu dhammesu sammā vattitabban”ti.
an8.90:1.4	Dasamaṁ.
an8.90:1.5	Sativaggo catuttho.
an8.90:2.0	Tassuddānaṁ
an8.90:2.1	Satipuṇṇiyamūlena,
an8.90:2.2	Corasamaṇena pañcamaṁ;
an8.90:2.3	Yaso pattappasādena,
an8.90:2.4	Paṭisāraṇīyañca vattananti.
an8.91-117:0.1	Aṅguttara Nikāya 8
an8.91-117:0.2	10. Sāmaññavagga
an8.91-117:0.3	~
an8.91-117:1.1	Atha kho bojjhā upāsikā, sirīmā, padumā, sutanā, manujā, uttarā, muttā, khemā, rucī, cundī, bimbī, sumanā, mallikā, tissā, tissamātā, soṇā, soṇāya mātā, kāṇā, kāṇamātā, uttarā nandamātā, visākhā migāramātā, khujjuttarā upāsikā, sāmāvatī upāsikā, suppavāsā koliyadhītā, suppiyā upāsikā, nakulamātā gahapatānī.
an8.91-117:1.2	Sāmaññavaggo pañcamo.
an8.91-117:1.3	Dutiyo paṇṇāsako samatto.
an8.118:0.1	Aṅguttara Nikāya 8
an8.118:0.2	11. Rāgapeyyāla
an8.118:0.3	~
an8.118:1.1	“Rāgassa, bhikkhave, abhiññāya aṭṭha dhammā bhāvetabbā.
an8.118:1.2	Katame aṭṭha?
an8.118:1.3	Sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi—
an8.118:1.4	rāgassa, bhikkhave, abhiññāya ime aṭṭha dhammā bhāvetabbā”ti.
an8.119:0.1	Aṅguttara Nikāya 8
an8.119:0.2	11. Rāgapeyyāla
an8.119:0.3	~
an8.119:1.1	“Rāgassa, bhikkhave, abhiññāya aṭṭha dhammā bhāvetabbā.
an8.119:1.2	Katame aṭṭha?
an8.119:1.3	Ajjhattaṁ rūpasaññī bahiddhā rūpāni passati parittāni suvaṇṇadubbaṇṇāni,
an8.119:1.4	tāni abhibhuyya ‘jānāmi passāmī’ti evaṁsaññī hoti.
an8.119:1.5	Ajjhattaṁ rūpasaññī bahiddhā rūpāni passati appamāṇāni suvaṇṇadubbaṇṇāni, tāni abhibhuyya ‘jānāmi passāmī’ti evaṁsaññī hoti.
an8.119:1.6	Ajjhattaṁ arūpasaññī bahiddhā rūpāni passati parittāni suvaṇṇadubbaṇṇāni, tāni abhibhuyya ‘jānāmi passāmī’ti evaṁsaññī hoti.
an8.119:1.7	Ajjhattaṁ arūpasaññī bahiddhā rūpāni passati appamāṇāni suvaṇṇadubbaṇṇāni, tāni abhibhuyya ‘jānāmi passāmī’ti evaṁsaññī hoti.
an8.119:1.8	Ajjhattaṁ arūpasaññī bahiddhā rūpāni passati nīlāni nīlavaṇṇāni nīlanidassanāni nīlanibhāsāni
an8.119:1.9	pītāni pītavaṇṇāni …pe…
an8.119:1.10	lohitakāni lohitakavaṇṇāni …pe…
an8.119:1.11	odātāni odātavaṇṇāni …pe… odātanibhāsāni,
an8.119:1.12	tāni abhibhuyya ‘jānāmi passāmī’ti evaṁsaññī hoti—
an8.119:1.13	rāgassa, bhikkhave, abhiññāya ime aṭṭha dhammā bhāvetabbā”.
an8.120:0.1	Aṅguttara Nikāya 8
an8.120:0.2	11. Rāgapeyyāla
an8.120:0.3	~
an8.120:1.1	“Rāgassa, bhikkhave, abhiññāya aṭṭha dhammā bhāvetabbā.
an8.120:1.2	Katame aṭṭha?
an8.120:1.3	Rūpī rūpāni passati, ajjhattaṁ arūpasaññī bahiddhā rūpāni passati, subhanteva adhimutto hoti, sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati, sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati, sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati, sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati, sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati—
an8.120:1.4	rāgassa, bhikkhave, abhiññāya ime aṭṭha dhammā bhāvetabbā”.
an8.121-147:0.1	Aṅguttara Nikāya 8
an8.121-147:0.2	11. Rāgapeyyāla
an8.121-147:0.3	~
an8.121-147:1.1	“Rāgassa, bhikkhave, pariññāya …pe…
an8.121-147:1.2	parikkhayāya …
an8.121-147:1.3	pahānāya …
an8.121-147:1.4	khayāya …
an8.121-147:1.5	vayāya …
an8.121-147:1.6	virāgāya …
an8.121-147:1.7	nirodhāya …
an8.121-147:1.8	cāgāya …
an8.121-147:1.9	paṭinissaggāya …pe…
an8.121-147:1.10	ime aṭṭha dhammā bhāvetabbā”.
an8.148-627:0.1	Aṅguttara Nikāya 8
an8.148-627:0.2	11. Rāgapeyyāla
an8.148-627:0.3	~
an8.148-627:1.1	“Dosassa …pe…
an8.148-627:1.2	mohassa …
an8.148-627:1.3	kodhassa …
an8.148-627:1.4	upanāhassa …
an8.148-627:1.5	makkhassa …
an8.148-627:1.6	paḷāsassa …
an8.148-627:1.7	issāya …
an8.148-627:1.8	macchariyassa …
an8.148-627:1.9	māyāya …
an8.148-627:1.10	sāṭheyyassa …
an8.148-627:1.11	thambhassa …
an8.148-627:1.12	sārambhassa …
an8.148-627:1.13	mānassa …
an8.148-627:1.14	atimānassa …
an8.148-627:1.15	madassa …
an8.148-627:1.16	pamādassa abhiññāya …pe…
an8.148-627:1.17	pariññāya …
an8.148-627:1.18	parikkhayāya …
an8.148-627:1.19	pahānāya …
an8.148-627:1.20	khayāya …
an8.148-627:1.21	vayāya …
an8.148-627:1.22	virāgāya …
an8.148-627:1.23	nirodhāya …
an8.148-627:1.24	cāgāya …
an8.148-627:1.25	paṭinissaggāya …pe…
an8.148-627:1.26	ime aṭṭha dhammā bhāvetabbā”ti.
an8.148-627:1.27	Rāgapeyyālaṁ niṭṭhitaṁ.
an8.148-627:1.28	Aṭṭhakanipātapāḷi niṭṭhitā.
an9.1:0.1	Aṅguttara Nikāya 9.1
an9.1:0.2	1. Sambodhivagga
an9.1:0.3	Sambodhisutta
an9.1:1.1	Evaṁ me sutaṁ—
an9.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an9.1:1.3	Tatra kho bhagavā bhikkhū āmantesi:
an9.1:2.1	“Sace, bhikkhave, aññatitthiyā paribbājakā evaṁ puccheyyuṁ:
an9.1:2.2	‘sambodhipakkhikānaṁ, āvuso, dhammānaṁ kā upanisā bhāvanāyā’ti, evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ kinti byākareyyāthā”ti?
an9.1:2.3	“Bhagavaṁmūlakā no, bhante, dhammā …pe… bhagavato sutvā bhikkhū dhāressantī”ti.
an9.1:3.1	“Tena hi, bhikkhave, suṇātha, sādhukaṁ manasi karotha; bhāsissāmī”ti.
an9.1:3.2	“Evaṁ, bhante”ti kho te bhikkhū bhagavato paccassosuṁ.
an9.1:3.3	Bhagavā etadavoca:
an9.1:4.1	“Sace, bhikkhave, aññatitthiyā paribbājakā evaṁ puccheyyuṁ:
an9.1:4.2	‘sambodhipakkhikānaṁ, āvuso, dhammānaṁ kā upanisā bhāvanāyā’ti, evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:
an9.1:5.1	‘Idhāvuso, bhikkhu kalyāṇamitto hoti kalyāṇasahāyo kalyāṇasampavaṅko.
an9.1:5.2	Sambodhipakkhikānaṁ, āvuso, dhammānaṁ ayaṁ paṭhamā upanisā bhāvanāya.
an9.1:6.1	Puna caparaṁ, āvuso, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an9.1:6.2	Sambodhipakkhikānaṁ, āvuso, dhammānaṁ ayaṁ dutiyā upanisā bhāvanāya.
an9.1:7.1	Puna caparaṁ, āvuso, bhikkhu yāyaṁ kathā abhisallekhikā cetovivaraṇasappāyā, seyyathidaṁ—appicchakathā santuṭṭhikathā pavivekakathā asaṁsaggakathā vīriyārambhakathā sīlakathā samādhikathā paññākathā vimuttikathā vimuttiñāṇadassanakathā, evarūpiyā kathāya nikāmalābhī hoti akicchalābhī akasiralābhī.
an9.1:7.2	Sambodhipakkhikānaṁ, āvuso, dhammānaṁ ayaṁ tatiyā upanisā bhāvanāya.
an9.1:8.1	Puna caparaṁ, āvuso, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an9.1:8.2	Sambodhipakkhikānaṁ, āvuso, dhammānaṁ ayaṁ catutthī upanisā bhāvanāya.
an9.1:9.1	Puna caparaṁ, āvuso, bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an9.1:9.2	Sambodhipakkhikānaṁ, āvuso, dhammānaṁ ayaṁ pañcamī upanisā bhāvanāya’.
an9.1:10.1	Kalyāṇamittassetaṁ, bhikkhave, bhikkhuno pāṭikaṅkhaṁ kalyāṇasahāyassa kalyāṇasampavaṅkassa—
an9.1:10.2	sīlavā bhavissati, pātimokkhasaṁvarasaṁvuto viharissati ācāragocarasampanno aṇumattesu vajjesu bhayadassāvī, samādāya sikkhissati sikkhāpadesu.
an9.1:11.1	Kalyāṇamittassetaṁ, bhikkhave, bhikkhuno pāṭikaṅkhaṁ kalyāṇasahāyassa kalyāṇasampavaṅkassa—
an9.1:11.2	yāyaṁ kathā abhisallekhikā cetovivaraṇasappāyā, seyyathidaṁ—appicchakathā santuṭṭhikathā pavivekakathā asaṁsaggakathā vīriyārambhakathā sīlakathā samādhikathā paññākathā vimuttikathā vimuttiñāṇadassanakathā, evarūpiyā kathāya nikāmalābhī bhavissati akicchalābhī akasiralābhī.
an9.1:12.1	Kalyāṇamittassetaṁ, bhikkhave, bhikkhuno pāṭikaṅkhaṁ kalyāṇasahāyassa kalyāṇasampavaṅkassa—
an9.1:12.2	āraddhavīriyo viharissati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an9.1:13.1	Kalyāṇamittassetaṁ, bhikkhave, bhikkhuno pāṭikaṅkhaṁ kalyāṇasahāyassa kalyāṇasampavaṅkassa—
an9.1:13.2	paññavā bhavissati udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an9.1:14.1	Tena ca pana, bhikkhave, bhikkhunā imesu pañcasu dhammesu patiṭṭhāya cattāro dhammā uttari bhāvetabbā—
an9.1:14.2	asubhā bhāvetabbā rāgassa pahānāya, mettā bhāvetabbā byāpādassa pahānāya, ānāpānassati bhāvetabbā vitakkupacchedāya, aniccasaññā bhāvetabbā asmimānasamugghātāya.
an9.1:14.3	Aniccasaññino, bhikkhave, anattasaññā saṇṭhāti.
an9.1:14.4	Anattasaññī asmimānasamugghātaṁ pāpuṇāti diṭṭheva dhamme nibbānan”ti.
an9.1:14.5	Paṭhamaṁ.
an9.2:0.1	Aṅguttara Nikāya 9.2
an9.2:0.2	1. Sambodhivagga
an9.2:0.3	Nissayasutta
an9.2:1.1	Atha kho aññataro bhikkhu yena bhagavā tenupasaṅkami; upasaṅkamitvā bhagavantaṁ …pe… ekamantaṁ nisinno kho so bhikkhu bhagavantaṁ etadavoca:
an9.2:1.2	“‘nissayasampanno nissayasampanno’ti, bhante, vuccati.
an9.2:1.3	Kittāvatā nu kho, bhante, bhikkhu nissayasampanno hotī”ti?
an9.2:1.4	“Saddhañce, bhikkhu, bhikkhu nissāya akusalaṁ pajahati kusalaṁ bhāveti, pahīnamevassa taṁ akusalaṁ hoti.
an9.2:1.5	Hiriñce, bhikkhu, bhikkhu nissāya …pe…
an9.2:1.6	ottappañce, bhikkhu, bhikkhu nissāya …pe…
an9.2:1.7	vīriyañce, bhikkhu, bhikkhu nissāya …pe…
an9.2:1.8	paññañce, bhikkhu, bhikkhu nissāya akusalaṁ pajahati kusalaṁ bhāveti, pahīnamevassa taṁ akusalaṁ hoti.
an9.2:1.9	Taṁ hissa bhikkhuno akusalaṁ pahīnaṁ hoti suppahīnaṁ, yaṁsa ariyāya paññāya disvā pahīnaṁ.
an9.2:2.1	Tena ca pana, bhikkhu, bhikkhunā imesu pañcasu dhammesu patiṭṭhāya cattāro upanissāya vihātabbā.
an9.2:2.2	Katame cattāro?
an9.2:2.3	Idha, bhikkhu, bhikkhu saṅkhāyekaṁ paṭisevati, saṅkhāyekaṁ adhivāseti, saṅkhāyekaṁ parivajjeti, saṅkhāyekaṁ vinodeti.
an9.2:2.4	Evaṁ kho, bhikkhu, bhikkhu nissayasampanno hotī”ti.
an9.2:2.5	Dutiyaṁ.
an9.3:0.1	Aṅguttara Nikāya 9.3
an9.3:0.2	1. Sambodhivagga
an9.3:0.3	Meghiyasutta
an9.3:1.1	Ekaṁ samayaṁ bhagavā cālikāyaṁ viharati cālikāpabbate.
an9.3:1.2	Tena kho pana samayena āyasmā meghiyo bhagavato upaṭṭhāko hoti.
an9.3:1.3	Atha kho āyasmā meghiyo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho āyasmā meghiyo bhagavantaṁ etadavoca:
an9.3:1.4	“icchāmahaṁ, bhante, jantugāmaṁ piṇḍāya pavisitun”ti.
an9.3:1.5	“Yassadāni tvaṁ, meghiya, kālaṁ maññasī”ti.
an9.3:2.1	Atha kho āyasmā meghiyo pubbaṇhasamayaṁ nivāsetvā pattacīvaramādāya jantugāmaṁ piṇḍāya pāvisi.
an9.3:2.2	Jantugāme piṇḍāya caritvā pacchābhattaṁ piṇḍapātapaṭikkanto yena kimikāḷāya nadiyā tīraṁ tenupasaṅkami.
an9.3:2.3	Addasā kho āyasmā meghiyo kimikāḷāya nadiyā tīre jaṅghāvihāraṁ anucaṅkamamāno anuvicaramāno ambavanaṁ pāsādikaṁ ramaṇīyaṁ.
an9.3:2.4	Disvānassa etadahosi:
an9.3:2.5	“pāsādikaṁ vatidaṁ ambavanaṁ ramaṇīyaṁ, alaṁ vatidaṁ kulaputtassa padhānatthikassa padhānāya.
an9.3:2.6	Sace maṁ bhagavā anujāneyya, āgaccheyyāhaṁ imaṁ ambavanaṁ padhānāyā”ti.
an9.3:3.1	Atha kho āyasmā meghiyo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā meghiyo bhagavantaṁ etadavoca:
an9.3:4.1	“Idhāhaṁ, bhante, pubbaṇhasamayaṁ nivāsetvā pattacīvaramādāya jantugāmaṁ piṇḍāya pāvisiṁ.
an9.3:4.2	Jantugāme piṇḍāya caritvā pacchābhattaṁ piṇḍapātapaṭikkanto yena kimikāḷāya nadiyā tīraṁ tenupasaṅkamiṁ.
an9.3:4.3	Addasaṁ kho ahaṁ, bhante, kimikāḷāya nadiyā tīre jaṅghāvihāraṁ anucaṅkamamāno anuvicaramāno ambavanaṁ pāsādikaṁ ramaṇīyaṁ.
an9.3:4.4	Disvāna me etadahosi:
an9.3:4.5	‘pāsādikaṁ vatidaṁ ambavanaṁ ramaṇīyaṁ.
an9.3:4.6	Alaṁ vatidaṁ kulaputtassa padhānatthikassa padhānāya.
an9.3:4.7	Sace maṁ bhagavā anujāneyya, āgaccheyyāhaṁ imaṁ ambavanaṁ padhānāyā’ti.
an9.3:4.8	Sace maṁ bhagavā anujāneyya, gaccheyyāhaṁ taṁ ambavanaṁ padhānāyā”ti.
an9.3:4.9	“Āgamehi tāva, meghiya. Ekakamhi tāva yāva aññopi koci bhikkhu āgacchatī”ti.
an9.3:5.1	Dutiyampi kho āyasmā meghiyo bhagavantaṁ etadavoca:
an9.3:5.2	“bhagavato, bhante, natthi kiñci uttari karaṇīyaṁ, natthi katassa paṭicayo.
an9.3:5.3	Mayhaṁ kho pana, bhante, atthi uttari karaṇīyaṁ, atthi katassa paṭicayo.
an9.3:5.4	Sace maṁ bhagavā anujāneyya, gaccheyyāhaṁ taṁ ambavanaṁ padhānāyā”ti.
an9.3:5.5	“Āgamehi tāva, meghiya, ekakamhi tāva yāva aññopi koci bhikkhu āgacchatī”ti.
an9.3:6.1	Tatiyampi kho āyasmā meghiyo bhagavantaṁ etadavoca:
an9.3:6.2	“bhagavato, bhante, natthi kiñci uttari karaṇīyaṁ, natthi katassa paṭicayo.
an9.3:6.3	Mayhaṁ kho pana, bhante, atthi uttari karaṇīyaṁ, atthi katassa paṭicayo.
an9.3:6.4	Sace maṁ bhagavā anujāneyya, gaccheyyāhaṁ taṁ ambavanaṁ padhānāyā”ti.
an9.3:6.5	“Padhānanti kho, meghiya, vadamānaṁ kinti vadeyyāma.
an9.3:6.6	Yassadāni tvaṁ, meghiya, kālaṁ maññasī”ti.
an9.3:7.1	Atha kho āyasmā meghiyo uṭṭhāyāsanā bhagavantaṁ abhivādetvā padakkhiṇaṁ katvā yena taṁ ambavanaṁ tenupasaṅkami; upasaṅkamitvā taṁ ambavanaṁ ajjhogāhetvā aññatarasmiṁ rukkhamūle divāvihāraṁ nisīdi.
an9.3:7.2	Atha kho āyasmato meghiyassa tasmiṁ ambavane viharantassa yebhuyyena tayo pāpakā akusalā vitakkā samudācaranti, seyyathidaṁ—
an9.3:7.3	kāmavitakko, byāpādavitakko, vihiṁsāvitakko.
an9.3:7.4	Atha kho āyasmato meghiyassa etadahosi:
an9.3:7.5	“acchariyaṁ vata bho, abbhutaṁ vata bho.
an9.3:7.6	Saddhāya ca vatamhā agārasmā anagāriyaṁ pabbajitā;
an9.3:7.7	atha ca panimehi tīhi pāpakehi akusalehi vitakkehi anvāsattā—
an9.3:7.8	kāmavitakkena, byāpādavitakkena, vihiṁsāvitakkenā”ti.
an9.3:8.1	Atha kho āyasmā meghiyo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā meghiyo bhagavantaṁ etadavoca:
an9.3:9.1	“Idha mayhaṁ, bhante, tasmiṁ ambavane viharantassa yebhuyyena tayo pāpakā akusalā vitakkā samudācaranti, seyyathidaṁ—
an9.3:9.2	kāmavitakko, byāpādavitakko, vihiṁsāvitakko.
an9.3:9.3	Tassa mayhaṁ, bhante, etadahosi:
an9.3:9.4	‘acchariyaṁ vata bho, abbhutaṁ vata bho.
an9.3:9.5	Saddhāya ca vatamhā agārasmā anagāriyaṁ pabbajitā;
an9.3:9.6	atha ca panimehi tīhi pāpakehi akusalehi vitakkehi anvāsattā—
an9.3:9.7	kāmavitakkena, byāpādavitakkena, vihiṁsāvitakkenā’”ti.
an9.3:10.1	“Aparipakkāya, meghiya, cetovimuttiyā pañca dhammā paripakkāya saṁvattanti.
an9.3:10.2	Katame pañca?
an9.3:10.3	Idha, meghiya, bhikkhu kalyāṇamitto hoti kalyāṇasahāyo kalyāṇasampavaṅko.
an9.3:10.4	Aparipakkāya, meghiya, cetovimuttiyā ayaṁ paṭhamo dhammo paripakkāya saṁvattati.
an9.3:11.1	Puna caparaṁ, meghiya, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an9.3:11.2	Aparipakkāya, meghiya, cetovimuttiyā ayaṁ dutiyo dhammo paripakkāya saṁvattati.
an9.3:12.1	Puna caparaṁ, meghiya, yāyaṁ kathā abhisallekhikā cetovivaraṇasappāyā, seyyathidaṁ—appicchakathā santuṭṭhikathā pavivekakathā asaṁsaggakathā vīriyārambhakathā sīlakathā samādhikathā paññākathā vimuttikathā vimuttiñāṇadassanakathā, evarūpiyā kathāya nikāmalābhī hoti akicchalābhī akasiralābhī.
an9.3:12.2	Aparipakkāya, meghiya, cetovimuttiyā ayaṁ tatiyo dhammo paripakkāya saṁvattati.
an9.3:13.1	Puna caparaṁ, meghiya, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an9.3:13.2	Aparipakkāya, meghiya, cetovimuttiyā ayaṁ catuttho dhammo paripakkāya saṁvattati.
an9.3:14.1	Puna caparaṁ, meghiya, bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an9.3:14.2	Aparipakkāya, meghiya, cetovimuttiyā ayaṁ pañcamo dhammo paripakkāya saṁvattati.
an9.3:15.1	Kalyāṇamittassetaṁ, meghiya, bhikkhuno pāṭikaṅkhaṁ kalyāṇasahāyassa kalyāṇasampavaṅkassa:
an9.3:15.2	‘sīlavā bhavissati …pe… samādāya sikkhissati sikkhāpadesu’.
an9.3:16.1	Kalyāṇamittassetaṁ, meghiya, bhikkhuno pāṭikaṅkhaṁ kalyāṇasahāyassa kalyāṇasampavaṅkassa:
an9.3:16.2	‘yāyaṁ kathā abhisallekhikā cetovivaraṇasappāyā, seyyathidaṁ—appicchakathā …pe… vimuttiñāṇadassanakathā, evarūpiyā kathāya nikāmalābhī bhavissati akicchalābhī akasiralābhī’.
an9.3:17.1	Kalyāṇamittassetaṁ, meghiya, bhikkhuno pāṭikaṅkhaṁ kalyāṇasahāyassa kalyāṇasampavaṅkassa: ‘āraddhavīriyo viharissati …pe… anikkhittadhuro kusalesu dhammesu’.
an9.3:18.1	Kalyāṇamittassetaṁ, meghiya, bhikkhuno pāṭikaṅkhaṁ kalyāṇasahāyassa kalyāṇasampavaṅkassa: ‘paññavā bhavissati …pe… sammādukkhakkhayagāminiyā’.
an9.3:19.1	Tena ca pana, meghiya, bhikkhunā imesu pañcasu dhammesu patiṭṭhāya cattāro dhammā uttari bhāvetabbā—
an9.3:19.2	asubhā bhāvetabbā rāgassa pahānāya, mettā bhāvetabbā byāpādassa pahānāya, ānāpānassati bhāvetabbā vitakkupacchedāya, aniccasaññā bhāvetabbā asmimānasamugghātāya.
an9.3:19.3	Aniccasaññino, meghiya, anattasaññā saṇṭhāti.
an9.3:19.4	Anattasaññī asmimānasamugghātaṁ pāpuṇāti diṭṭheva dhamme nibbānan”ti.
an9.3:19.5	Tatiyaṁ.
an9.4:0.1	Aṅguttara Nikāya 9.4
an9.4:0.2	1. Sambodhivagga
an9.4:0.3	Nandakasutta
an9.4:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an9.4:1.2	Tena kho pana samayena āyasmā nandako upaṭṭhānasālāyaṁ bhikkhū dhammiyā kathāya sandasseti samādapeti samuttejeti sampahaṁseti.
an9.4:1.3	Atha kho bhagavā sāyanhasamayaṁ paṭisallānā vuṭṭhito yenupaṭṭhānasālā tenupasaṅkami; upasaṅkamitvā bahidvārakoṭṭhake aṭṭhāsi kathāpariyosānaṁ āgamayamāno.
an9.4:1.4	Atha kho bhagavā kathāpariyosānaṁ viditvā ukkāsetvā aggaḷaṁ ākoṭesi.
an9.4:1.5	Vivariṁsu kho te bhikkhū bhagavato dvāraṁ.
an9.4:2.1	Atha kho bhagavā upaṭṭhānasālaṁ pavisitvā paññattāsane nisīdi.
an9.4:2.2	Nisajja kho bhagavā āyasmantaṁ nandakaṁ etadavoca:
an9.4:2.3	“dīgho kho tyāyaṁ, nandaka, dhammapariyāyo bhikkhūnaṁ paṭibhāsi.
an9.4:2.4	Api me piṭṭhi āgilāyati bahidvārakoṭṭhake ṭhitassa kathāpariyosānaṁ āgamayamānassā”ti.
an9.4:3.1	Evaṁ vutte, āyasmā nandako sārajjamānarūpo bhagavantaṁ etadavoca:
an9.4:3.2	“na kho pana mayaṁ, bhante, jānāma ‘bhagavā bahidvārakoṭṭhake ṭhito’ti.
an9.4:3.3	Sace hi mayaṁ, bhante, jāneyyāma ‘bhagavā bahidvārakoṭṭhake ṭhito’ti, ettakampi (…) no nappaṭibhāseyyā”ti.
an9.4:4.1	Atha kho bhagavā āyasmantaṁ nandakaṁ sārajjamānarūpaṁ viditvā āyasmantaṁ nandakaṁ etadavoca:
an9.4:4.2	“sādhu sādhu, nandaka.
an9.4:4.3	Etaṁ kho, nandaka, tumhākaṁ patirūpaṁ kulaputtānaṁ saddhāya agārasmā anagāriyaṁ pabbajitānaṁ, yaṁ tumhe dhammiyā kathāya sannisīdeyyātha.
an9.4:4.4	Sannipatitānaṁ vo, nandaka, dvayaṁ karaṇīyaṁ—
an9.4:4.5	dhammī vā kathā ariyo vā tuṇhībhāvo.
an9.4:4.6	Saddho ca, nandaka, bhikkhu hoti, no ca sīlavā.
an9.4:4.7	Evaṁ so tenaṅgena aparipūro hoti.
an9.4:4.8	Tena taṁ aṅgaṁ paripūretabbaṁ:
an9.4:4.9	‘kintāhaṁ saddho ca assaṁ sīlavā cā’ti.
an9.4:4.10	Yato ca kho, nandaka, bhikkhu saddho ca hoti sīlavā ca, evaṁ so tenaṅgena paripūro hoti.
an9.4:5.1	Saddho ca, nandaka, bhikkhu hoti sīlavā ca, no ca lābhī ajjhattaṁ cetosamādhissa.
an9.4:5.2	Evaṁ so tenaṅgena aparipūro hoti.
an9.4:5.3	Tena taṁ aṅgaṁ paripūretabbaṁ:
an9.4:5.4	‘kintāhaṁ saddho ca assaṁ sīlavā ca lābhī ca ajjhattaṁ cetosamādhissā’ti.
an9.4:5.5	Yato ca kho, nandaka, bhikkhu saddho ca hoti sīlavā ca lābhī ca ajjhattaṁ cetosamādhissa, evaṁ so tenaṅgena paripūro hoti.
an9.4:6.1	Saddho ca, nandaka, bhikkhu hoti sīlavā ca lābhī ca ajjhattaṁ cetosamādhissa, na lābhī adhipaññādhammavipassanāya.
an9.4:6.2	Evaṁ so tenaṅgena aparipūro hoti.
an9.4:6.3	Seyyathāpi, nandaka, pāṇako catuppādako assa.
an9.4:6.4	Tassa eko pādo omako lāmako.
an9.4:6.5	Evaṁ so tenaṅgena aparipūro assa.
an9.4:6.6	Evamevaṁ kho, nandaka, bhikkhu saddho ca hoti sīlavā ca lābhī ca ajjhattaṁ cetosamādhissa, na lābhī adhipaññādhammavipassanāya.
an9.4:6.7	Evaṁ so tenaṅgena aparipūro hoti.
an9.4:6.8	Tena taṁ aṅgaṁ paripūretabbaṁ:
an9.4:6.9	‘kintāhaṁ saddho ca assaṁ sīlavā ca lābhī ca ajjhattaṁ cetosamādhissa lābhī ca adhipaññādhammavipassanāyā’ti.
an9.4:7.1	Yato ca kho, nandaka, bhikkhu saddho ca hoti sīlavā ca lābhī ca ajjhattaṁ cetosamādhissa lābhī ca adhipaññādhammavipassanāya, evaṁ so tenaṅgena paripūro hotī”ti.
an9.4:7.2	Idamavoca bhagavā.
an9.4:7.3	Idaṁ vatvāna sugato uṭṭhāyāsanā vihāraṁ pāvisi.
an9.4:8.1	Atha kho āyasmā nandako acirapakkantassa bhagavato bhikkhū āmantesi:
an9.4:8.2	“idāni, āvuso, bhagavā catūhi padehi kevalaparipuṇṇaṁ parisuddhaṁ brahmacariyaṁ pakāsetvā uṭṭhāyāsanā vihāraṁ paviṭṭho:
an9.4:8.3	‘saddho ca, nandaka, bhikkhu hoti, no ca sīlavā.
an9.4:8.4	Evaṁ so tenaṅgena aparipūro hoti.
an9.4:8.5	Tena taṁ aṅgaṁ paripūretabbaṁ—
an9.4:8.6	kintāhaṁ saddho ca assaṁ sīlavā cā’ti.
an9.4:8.7	Yato ca kho, nandaka, bhikkhu saddho ca hoti sīlavā ca, evaṁ so tenaṅgena paripūro hoti.
an9.4:8.8	Saddho ca, nandaka, bhikkhu hoti sīlavā ca, no ca lābhī ajjhattaṁ cetosamādhissa …pe…
an9.4:8.9	lābhī ca ajjhattaṁ cetosamādhissa, na lābhī adhipaññādhammavipassanāya,
an9.4:8.10	evaṁ so tenaṅgena aparipūro hoti.
an9.4:8.11	Seyyathāpi, nandaka, pāṇako catuppādako assa, tassa eko pādo omako lāmako,
an9.4:8.12	evaṁ so tenaṅgena aparipūro assa.
an9.4:8.13	Evamevaṁ kho, nandaka, bhikkhu saddho ca hoti sīlavā ca, lābhī ca ajjhattaṁ cetosamādhissa, na lābhī adhipaññādhammavipassanāya,
an9.4:8.14	evaṁ so tenaṅgena aparipūro hoti,
an9.4:8.15	tena taṁ aṅgaṁ paripūretabbaṁ
an9.4:8.16	‘kintāhaṁ saddho ca assaṁ sīlavā ca, lābhī ca ajjhattaṁ cetosamādhissa, lābhī ca adhipaññādhammavipassanāyā’ti.
an9.4:8.17	Yato ca kho, nandaka, bhikkhu saddho ca hoti sīlavā ca lābhī ca ajjhattaṁ cetosamādhissa lābhī ca adhipaññādhammavipassanāya,
an9.4:8.18	evaṁ so tenaṅgena paripūro hotīti.
an9.4:9.1	Pañcime, āvuso, ānisaṁsā kālena dhammassavane kālena dhammasākacchāya.
an9.4:9.2	Katame pañca?
an9.4:9.3	Idhāvuso, bhikkhu bhikkhūnaṁ dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an9.4:9.4	Yathā yathā, āvuso, bhikkhu bhikkhūnaṁ dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti tathā tathā so satthu piyo ca hoti manāpo ca garu ca bhāvanīyo ca.
an9.4:9.5	Ayaṁ, āvuso, paṭhamo ānisaṁso kālena dhammassavane kālena dhammasākacchāya.
an9.4:10.1	Puna caparaṁ, āvuso, bhikkhu bhikkhūnaṁ dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti. Yathā yathā, āvuso, bhikkhu bhikkhūnaṁ dhammaṁ deseti ādikalyāṇaṁ …pe…
an9.4:10.2	brahmacariyaṁ pakāseti tathā tathā so tasmiṁ dhamme atthappaṭisaṁvedī ca hoti dhammappaṭisaṁvedī ca.
an9.4:10.3	Ayaṁ, āvuso, dutiyo ānisaṁso kālena dhammassavane kālena dhammasākacchāya.
an9.4:11.1	Puna caparaṁ, āvuso, bhikkhu bhikkhūnaṁ dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an9.4:11.2	Yathā yathā, āvuso, bhikkhu bhikkhūnaṁ dhammaṁ deseti ādikalyāṇaṁ …pe… brahmacariyaṁ pakāseti tathā tathā so tasmiṁ dhamme gambhīraṁ atthapadaṁ paññāya ativijjha passati.
an9.4:11.3	Ayaṁ, āvuso, tatiyo ānisaṁso kālena dhammassavane kālena dhammasākacchāya.
an9.4:12.1	Puna caparaṁ, āvuso, bhikkhu bhikkhūnaṁ dhammaṁ deseti ādikalyāṇaṁ …pe… brahmacariyaṁ pakāseti.
an9.4:12.2	Yathā yathā, āvuso, bhikkhu bhikkhūnaṁ dhammaṁ deseti ādikalyāṇaṁ …pe… brahmacariyaṁ pakāseti tathā tathā naṁ sabrahmacārī uttari sambhāventi:
an9.4:12.3	‘addhā ayamāyasmā patto vā pajjati vā’.
an9.4:12.4	Ayaṁ, āvuso, catuttho ānisaṁso kālena dhammassavane kālena dhammasākacchāya.
an9.4:13.1	Puna caparaṁ, āvuso, bhikkhu bhikkhūnaṁ dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an9.4:13.2	Yathā yathā, āvuso, bhikkhu bhikkhūnaṁ dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti, tattha ye kho bhikkhū sekhā appattamānasā anuttaraṁ yogakkhemaṁ patthayamānā viharanti, te taṁ dhammaṁ sutvā vīriyaṁ ārabhanti appattassa pattiyā anadhigatassa adhigamāya asacchikatassa sacchikiriyāya.
an9.4:13.3	Ye pana tattha bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṁyojanā sammadaññāvimuttā, te taṁ dhammaṁ sutvā diṭṭhadhammasukhavihāraṁyeva anuyuttā viharanti.
an9.4:13.4	Ayaṁ, āvuso, pañcamo ānisaṁso kālena dhammassavane kālena dhammasākacchāya.
an9.4:13.5	Ime kho, āvuso, pañca ānisaṁsā kālena dhammassavane kālena dhammasākacchāyā”ti.
an9.4:13.6	Catutthaṁ.
an9.5:0.1	Aṅguttara Nikāya 9.5
an9.5:0.2	1. Sambodhivagga
an9.5:0.3	Balasutta
an9.5:1.1	“Cattārimāni, bhikkhave, balāni.
an9.5:1.2	Katamāni cattāri?
an9.5:1.3	Paññābalaṁ, vīriyabalaṁ, anavajjabalaṁ, saṅgāhabalaṁ.
an9.5:1.4	Katamañca, bhikkhave, paññābalaṁ?
an9.5:1.5	Ye dhammā kusalā kusalasaṅkhātā ye dhammā akusalā akusalasaṅkhātā ye dhammā sāvajjā sāvajjasaṅkhātā ye dhammā anavajjā anavajjasaṅkhātā ye dhammā kaṇhā kaṇhasaṅkhātā ye dhammā sukkā sukkasaṅkhātā ye dhammā sevitabbā sevitabbasaṅkhātā ye dhammā asevitabbā asevitabbasaṅkhātā ye dhammā nālamariyā nālamariyasaṅkhātā ye dhammā alamariyā alamariyasaṅkhātā, tyassa dhammā paññāya vodiṭṭhā honti vocaritā.
an9.5:1.6	Idaṁ vuccati, bhikkhave, paññābalaṁ.
an9.5:2.1	Katamañca, bhikkhave, vīriyabalaṁ?
an9.5:2.2	Ye dhammā akusalā akusalasaṅkhātā ye dhammā sāvajjā sāvajjasaṅkhātā ye dhammā kaṇhā kaṇhasaṅkhātā ye dhammā asevitabbā asevitabbasaṅkhātā ye dhammā nālamariyā nālamariyasaṅkhātā, tesaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati.
an9.5:2.3	Ye dhammā kusalā kusalasaṅkhātā ye dhammā anavajjā anavajjasaṅkhātā ye dhammā sukkā sukkasaṅkhātā ye dhammā sevitabbā sevitabbasaṅkhātā ye dhammā alamariyā alamariyasaṅkhātā, tesaṁ dhammānaṁ paṭilābhāya chandaṁ janeti vāyamati vīriyaṁ ārabhati cittaṁ paggaṇhāti padahati.
an9.5:2.4	Idaṁ vuccati, bhikkhave, vīriyabalaṁ.
an9.5:3.1	Katamañca, bhikkhave, anavajjabalaṁ?
an9.5:3.2	Idha, bhikkhave, ariyasāvako anavajjena kāyakammena samannāgato hoti, anavajjena vacīkammena samannāgato hoti, anavajjena manokammena samannāgato hoti.
an9.5:3.3	Idaṁ vuccati, bhikkhave, anavajjabalaṁ.
an9.5:4.1	Katamañca, bhikkhave, saṅgāhabalaṁ?
an9.5:4.2	Cattārimāni, bhikkhave, saṅgahavatthūni—
an9.5:4.3	dānaṁ, peyyavajjaṁ, atthacariyā, samānattatā.
an9.5:4.4	Etadaggaṁ, bhikkhave, dānānaṁ yadidaṁ dhammadānaṁ.
an9.5:4.5	Etadaggaṁ, bhikkhave, peyyavajjānaṁ yadidaṁ atthikassa ohitasotassa punappunaṁ dhammaṁ deseti.
an9.5:4.6	Etadaggaṁ, bhikkhave, atthacariyānaṁ yadidaṁ assaddhaṁ saddhāsampadāya samādapeti niveseti patiṭṭhāpeti, dussīlaṁ sīlasampadāya … macchariṁ cāgasampadāya … duppaññaṁ paññāsampadāya samādapeti niveseti patiṭṭhāpeti.
an9.5:4.7	Etadaggaṁ, bhikkhave, samānattatānaṁ yadidaṁ sotāpanno sotāpannassa samānatto, sakadāgāmī sakadāgāmissa samānatto, anāgāmī anāgāmissa samānatto, arahā arahato samānatto.
an9.5:4.8	Idaṁ vuccati, bhikkhave, saṅgāhabalaṁ.
an9.5:4.9	Imāni kho, bhikkhave, cattāri balāni.
an9.5:5.1	Imehi kho, bhikkhave, catūhi balehi samannāgato ariyasāvako pañca bhayāni samatikkanto hoti.
an9.5:5.2	Katamāni pañca?
an9.5:5.3	Ājīvikabhayaṁ, asilokabhayaṁ, parisasārajjabhayaṁ, maraṇabhayaṁ, duggatibhayaṁ.
an9.5:5.4	Sa kho so, bhikkhave, ariyasāvako iti paṭisañcikkhati:
an9.5:5.5	‘nāhaṁ ājīvikabhayassa bhāyāmi.
an9.5:5.6	Kissāhaṁ ājīvikabhayassa bhāyissāmi?
an9.5:5.7	Atthi me cattāri balāni—
an9.5:5.8	paññābalaṁ, vīriyabalaṁ, anavajjabalaṁ, saṅgāhabalaṁ.
an9.5:5.9	Duppañño kho ājīvikabhayassa bhāyeyya.
an9.5:5.10	Kusīto ājīvikabhayassa bhāyeyya.
an9.5:5.11	Sāvajjakāyakammantavacīkammantamanokammanto ājīvikabhayassa bhāyeyya.
an9.5:5.12	Asaṅgāhako ājīvikabhayassa bhāyeyya.
an9.5:5.13	Nāhaṁ asilokabhayassa bhāyāmi …pe…
an9.5:5.14	nāhaṁ parisasārajjabhayassa bhāyāmi …pe…
an9.5:5.15	nāhaṁ maraṇabhayassa bhāyāmi …pe…
an9.5:5.16	nāhaṁ duggatibhayassa bhāyāmi.
an9.5:5.17	Kissāhaṁ duggatibhayassa bhāyissāmi?
an9.5:5.18	Atthi me cattāri balāni—
an9.5:5.19	paññābalaṁ, vīriyabalaṁ, anavajjabalaṁ, saṅgāhabalaṁ.
an9.5:5.20	Duppañño kho duggatibhayassa bhāyeyya.
an9.5:5.21	Kusīto duggatibhayassa bhāyeyya.
an9.5:5.22	Sāvajjakāyakammantavacīkammantamanokammanto duggatibhayassa bhāyeyya.
an9.5:5.23	Asaṅgāhako duggatibhayassa bhāyeyya’.
an9.5:5.24	Imehi kho, bhikkhave, catūhi balehi samannāgato ariyasāvako imāni pañca bhayāni samatikkanto hotī”ti.
an9.5:5.25	Pañcamaṁ.
an9.6:0.1	Aṅguttara Nikāya 9.6
an9.6:0.2	1. Sambodhivagga
an9.6:0.3	Sevanāsutta
an9.6:1.1	Tatra kho āyasmā sāriputto bhikkhū āmantesi …pe… āyasmā sāriputto etadavoca:
an9.6:2.1	“Puggalopi, āvuso, duvidhena veditabbo—
an9.6:2.2	sevitabbopi asevitabbopi.
an9.6:2.3	Cīvarampi, āvuso, duvidhena veditabbaṁ—
an9.6:2.4	sevitabbampi asevitabbampi.
an9.6:2.5	Piṇḍapātopi, āvuso, duvidhena veditabbo—
an9.6:2.6	sevitabbopi asevitabbopi.
an9.6:2.7	Senāsanampi, āvuso, duvidhena veditabbaṁ—
an9.6:2.8	sevitabbampi asevitabbampi.
an9.6:2.9	Gāmanigamopi, āvuso, duvidhena veditabbo—
an9.6:2.10	sevitabbopi asevitabbopi.
an9.6:2.11	Janapadapadesopi, āvuso, duvidhena veditabbo—
an9.6:2.12	sevitabbopi asevitabbopi.
an9.6:3.1	‘Puggalopi, āvuso, duvidhena veditabbo—
an9.6:3.2	sevitabbopi asevitabbopī’ti,
an9.6:3.3	iti kho panetaṁ vuttaṁ. Kiñcetaṁ paṭicca vuttaṁ?
an9.6:3.4	Tattha yaṁ jaññā puggalaṁ:
an9.6:3.5	‘imaṁ kho me puggalaṁ sevato akusalā dhammā abhivaḍḍhanti, kusalā dhammā parihāyanti;
an9.6:3.6	ye ca kho me pabbajitena jīvitaparikkhārā samudānetabbā cīvarapiṇḍapātasenāsanagilānapaccayabhesajjaparikkhārā te ca kasirena samudāgacchanti;
an9.6:3.7	yassa camhi atthāya agārasmā anagāriyaṁ pabbajito so ca me sāmaññattho na bhāvanāpāripūriṁ gacchatī’ti, tenāvuso, puggalena so puggalo rattibhāgaṁ vā divasabhāgaṁ vā saṅkhāpi anāpucchā pakkamitabbaṁ nānubandhitabbo.
an9.6:4.1	Tattha yaṁ jaññā puggalaṁ:
an9.6:4.2	‘imaṁ kho me puggalaṁ sevato akusalā dhammā abhivaḍḍhanti, kusalā dhammā parihāyanti;
an9.6:4.3	ye ca kho me pabbajitena jīvitaparikkhārā samudānetabbā cīvarapiṇḍapātasenāsanagilānapaccayabhesajjaparikkhārā te ca appakasirena samudāgacchanti;
an9.6:4.4	yassa camhi atthāya agārasmā anagāriyaṁ pabbajito so ca me sāmaññattho na bhāvanāpāripūriṁ gacchatī’ti, tenāvuso, puggalena so puggalo saṅkhāpi anāpucchā pakkamitabbaṁ nānubandhitabbo.
an9.6:5.1	Tattha yaṁ jaññā puggalaṁ:
an9.6:5.2	‘imaṁ kho me puggalaṁ sevato akusalā dhammā parihāyanti, kusalā dhammā abhivaḍḍhanti;
an9.6:5.3	ye ca kho me pabbajitena jīvitaparikkhārā samudānetabbā cīvarapiṇḍapātasenāsanagilānapaccayabhesajjaparikkhārā te ca kasirena samudāgacchanti;
an9.6:5.4	yassa camhi atthāya agārasmā anagāriyaṁ pabbajito so ca me sāmaññattho bhāvanāpāripūriṁ gacchatī’ti, tenāvuso, puggalena so puggalo saṅkhāpi anubandhitabbo na pakkamitabbaṁ.
an9.6:6.1	Tattha yaṁ jaññā puggalaṁ:
an9.6:6.2	‘imaṁ kho me puggalaṁ sevato akusalā dhammā parihāyanti, kusalā dhammā abhivaḍḍhanti;
an9.6:6.3	ye ca kho me pabbajitena jīvitaparikkhārā samudānetabbā cīvarapiṇḍapātasenāsanagilānapaccayabhesajjaparikkhārā te ca appakasirena samudāgacchanti;
an9.6:6.4	yassa camhi atthāya agārasmā anagāriyaṁ pabbajito so ca me sāmaññattho bhāvanāpāripūriṁ gacchatī’ti, tenāvuso, puggalena so puggalo yāvajīvaṁ anubandhitabbo na pakkamitabbaṁ api panujjamānena.
an9.6:6.5	‘Puggalopi, āvuso, duvidhena veditabbo—
an9.6:6.6	sevitabbopi asevitabbopī’ti,
an9.6:6.7	iti yaṁ taṁ vuttaṁ, idametaṁ paṭicca vuttaṁ.
an9.6:7.1	‘Cīvarampi, āvuso, duvidhena veditabbaṁ—
an9.6:7.2	sevitabbampi asevitabbampī’ti,
an9.6:7.3	iti kho panetaṁ vuttaṁ. Kiñcetaṁ paṭicca vuttaṁ?
an9.6:7.4	Tattha yaṁ jaññā cīvaraṁ:
an9.6:7.5	‘idaṁ kho me cīvaraṁ sevato akusalā dhammā abhivaḍḍhanti, kusalā dhammā parihāyantī’ti, evarūpaṁ cīvaraṁ na sevitabbaṁ.
an9.6:7.6	Tattha yaṁ jaññā cīvaraṁ:
an9.6:7.7	‘idaṁ kho me cīvaraṁ sevato akusalā dhammā parihāyanti, kusalā dhammā abhivaḍḍhantī’ti, evarūpaṁ cīvaraṁ sevitabbaṁ.
an9.6:7.8	‘Cīvarampi, āvuso, duvidhena veditabbaṁ—
an9.6:7.9	sevitabbampi asevitabbampī’ti,
an9.6:7.10	iti yaṁ taṁ vuttaṁ, idametaṁ paṭicca vuttaṁ.
an9.6:8.1	‘Piṇḍapātopi, āvuso, duvidhena veditabbo—
an9.6:8.2	sevitabbopi asevitabbopī’ti,
an9.6:8.3	iti kho panetaṁ vuttaṁ. Kiñcetaṁ paṭicca vuttaṁ?
an9.6:8.4	Tattha yaṁ jaññā piṇḍapātaṁ:
an9.6:8.5	‘imaṁ kho me piṇḍapātaṁ sevato akusalā dhammā abhivaḍḍhanti, kusalā dhammā parihāyantī’ti, evarūpo piṇḍapāto na sevitabbo.
an9.6:8.6	Tattha yaṁ jaññā piṇḍapātaṁ:
an9.6:8.7	‘imaṁ kho me piṇḍapātaṁ sevato akusalā dhammā parihāyanti, kusalā dhammā abhivaḍḍhantī’ti, evarūpo piṇḍapāto sevitabbo.
an9.6:8.8	‘Piṇḍapātopi, āvuso, duvidhena veditabbo—
an9.6:8.9	sevitabbopi asevitabbopī’ti,
an9.6:8.10	iti yaṁ taṁ vuttaṁ, idametaṁ paṭicca vuttaṁ.
an9.6:9.1	‘Senāsanampi, āvuso, duvidhena veditabbaṁ—
an9.6:9.2	sevitabbampi asevitabbampī’ti,
an9.6:9.3	iti kho panetaṁ vuttaṁ. Kiñcetaṁ paṭicca vuttaṁ?
an9.6:9.4	Tattha yaṁ jaññā senāsanaṁ:
an9.6:9.5	‘idaṁ kho me senāsanaṁ sevato akusalā dhammā abhivaḍḍhanti, kusalā dhammā parihāyantī’ti, evarūpaṁ senāsanaṁ na sevitabbaṁ.
an9.6:9.6	Tattha yaṁ jaññā senāsanaṁ:
an9.6:9.7	‘idaṁ kho me senāsanaṁ sevato akusalā dhammā parihāyanti, kusalā dhammā abhivaḍḍhantī’ti, evarūpaṁ senāsanaṁ sevitabbaṁ.
an9.6:9.8	‘Senāsanampi, āvuso, duvidhena veditabbaṁ—
an9.6:9.9	sevitabbampi asevitabbampī’ti,
an9.6:9.10	iti yaṁ taṁ vuttaṁ, idametaṁ paṭicca vuttaṁ.
an9.6:10.1	‘Gāmanigamopi, āvuso, duvidhena veditabbo—
an9.6:10.2	sevitabbopi asevitabbopī’ti,
an9.6:10.3	iti kho panetaṁ vuttaṁ. Kiñcetaṁ paṭicca vuttaṁ?
an9.6:10.4	Tattha yaṁ jaññā gāmanigamaṁ:
an9.6:10.5	‘imaṁ kho me gāmanigamaṁ sevato akusalā dhammā abhivaḍḍhanti, kusalā dhammā parihāyantī’ti, evarūpo gāmanigamo na sevitabbo.
an9.6:10.6	Tattha yaṁ jaññā gāmanigamaṁ:
an9.6:10.7	‘imaṁ kho me gāmanigamaṁ sevato akusalā dhammā parihāyanti, kusalā dhammā abhivaḍḍhantī’ti, evarūpo gāmanigamo sevitabbo.
an9.6:10.8	‘Gāmanigamopi, āvuso, duvidhena veditabbo—
an9.6:10.9	sevitabbopi asevitabbopī’ti,
an9.6:10.10	iti yaṁ taṁ vuttaṁ, idametaṁ paṭicca vuttaṁ.
an9.6:11.1	‘Janapadapadesopi, āvuso, duvidhena veditabbo—
an9.6:11.2	sevitabbopi asevitabbopī’ti,
an9.6:11.3	iti kho panetaṁ vuttaṁ. Kiñcetaṁ paṭicca vuttaṁ?
an9.6:11.4	Tattha yaṁ jaññā janapadapadesaṁ:
an9.6:11.5	‘imaṁ kho me janapadapadesaṁ sevato akusalā dhammā abhivaḍḍhanti, kusalā dhammā parihāyantī’ti, evarūpo janapadapadeso na sevitabbo.
an9.6:11.6	Tattha yaṁ jaññā janapadapadesaṁ:
an9.6:11.7	‘imaṁ kho me janapadapadesaṁ sevato akusalā dhammā parihāyanti, kusalā dhammā abhivaḍḍhantī’ti, evarūpo janapadapadeso sevitabbo.
an9.6:11.8	‘Janapadapadesopi, āvuso, duvidhena veditabbo—
an9.6:11.9	sevitabbopi asevitabbopī’ti,
an9.6:11.10	iti yaṁ taṁ vuttaṁ, idametaṁ paṭicca vuttan”ti.
an9.6:11.11	Chaṭṭhaṁ.
an9.7:0.1	Aṅguttara Nikāya 9.7
an9.7:0.2	1. Sambodhivagga
an9.7:0.3	Sutavāsutta
an9.7:1.1	Ekaṁ samayaṁ bhagavā rājagahe viharati gijjhakūṭe pabbate.
an9.7:1.2	Atha kho sutavā paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
an9.7:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho sutavā paribbājako bhagavantaṁ etadavoca:
an9.7:2.1	“Ekamidāhaṁ, bhante, samayaṁ bhagavā idheva rājagahe viharāmi giribbaje.
an9.7:2.2	Tatra me, bhante, bhagavato sammukhā sutaṁ sammukhā paṭiggahitaṁ:
an9.7:2.3	‘yo so, sutavā, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, abhabbo so pañca ṭhānāni ajjhācarituṁ—
an9.7:2.4	abhabbo khīṇāsavo bhikkhu sañcicca pāṇaṁ jīvitā voropetuṁ, abhabbo khīṇāsavo bhikkhu adinnaṁ theyyasaṅkhātaṁ ādātuṁ, abhabbo khīṇāsavo bhikkhu methunaṁ dhammaṁ paṭisevituṁ, abhabbo khīṇāsavo bhikkhu sampajānamusā bhāsituṁ, abhabbo khīṇāsavo bhikkhu sannidhikārakaṁ kāme paribhuñjituṁ seyyathāpi pubbe agāriyabhūto’ti.
an9.7:2.5	Kacci metaṁ, bhante, bhagavato sussutaṁ suggahitaṁ sumanasikataṁ sūpadhāritan”ti?
an9.7:3.1	“Taggha te etaṁ, sutavā, sussutaṁ suggahitaṁ sumanasikataṁ sūpadhāritaṁ.
an9.7:3.2	Pubbe cāhaṁ, sutavā, etarahi ca evaṁ vadāmi:
an9.7:3.3	‘yo so bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, abhabbo so nava ṭhānāni ajjhācarituṁ—
an9.7:3.4	abhabbo khīṇāsavo bhikkhu sañcicca pāṇaṁ jīvitā voropetuṁ, abhabbo khīṇāsavo bhikkhu adinnaṁ theyyasaṅkhātaṁ ādātuṁ, abhabbo khīṇāsavo bhikkhu methunaṁ dhammaṁ paṭisevituṁ, abhabbo khīṇāsavo bhikkhu sampajānamusā bhāsituṁ, abhabbo khīṇāsavo bhikkhu sannidhikārakaṁ kāme paribhuñjituṁ seyyathāpi pubbe agāriyabhūto, abhabbo khīṇāsavo bhikkhu chandāgatiṁ gantuṁ, abhabbo khīṇāsavo bhikkhu dosāgatiṁ gantuṁ, abhabbo khīṇāsavo bhikkhu mohāgatiṁ gantuṁ, abhabbo khīṇāsavo bhikkhu bhayāgatiṁ gantuṁ’.
an9.7:3.5	Pubbe cāhaṁ, sutavā, etarahi ca evaṁ vadāmi:
an9.7:3.6	‘yo so bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, abhabbo so imāni nava ṭhānāni ajjhācaritun’”ti.
an9.7:3.7	Sattamaṁ.
an9.8:0.1	Aṅguttara Nikāya 9.8
an9.8:0.2	1. Sambodhivagga
an9.8:0.3	Sajjhasutta
an9.8:1.1	Ekaṁ samayaṁ bhagavā rājagahe viharati gijjhakūṭe pabbate.
an9.8:1.2	Atha kho sajjho paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
an9.8:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho sajjho paribbājako bhagavantaṁ etadavoca:
an9.8:2.1	“Ekamidāhaṁ, bhante, samayaṁ bhagavā idheva rājagahe viharāmi giribbaje.
an9.8:2.2	Tatra me, bhante, bhagavato sammukhā sutaṁ sammukhā paṭiggahitaṁ:
an9.8:2.3	‘yo so, sajjha, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, abhabbo so pañca ṭhānāni ajjhācarituṁ—
an9.8:2.4	abhabbo khīṇāsavo bhikkhu sañcicca pāṇaṁ jīvitā voropetuṁ, abhabbo khīṇāsavo bhikkhu adinnaṁ theyyasaṅkhātaṁ ādātuṁ, abhabbo khīṇāsavo bhikkhu methunaṁ dhammaṁ paṭisevituṁ, abhabbo khīṇāsavo bhikkhu sampajānamusā bhāsituṁ, abhabbo khīṇāsavo bhikkhu sannidhikārakaṁ kāme paribhuñjituṁ seyyathāpi pubbe agāriyabhūto’ti.
an9.8:2.5	Kacci metaṁ, bhante, bhagavato sussutaṁ suggahitaṁ sumanasikataṁ sūpadhāritan”ti?
an9.8:3.1	“Taggha te etaṁ, sajjha, sussutaṁ suggahitaṁ sumanasikataṁ sūpadhāritaṁ.
an9.8:3.2	Pubbe cāhaṁ, sajjha, etarahi ca evaṁ vadāmi:
an9.8:3.3	‘yo so bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, abhabbo so nava ṭhānāni ajjhācarituṁ—
an9.8:3.4	abhabbo khīṇāsavo bhikkhu sañcicca pāṇaṁ jīvitā voropetuṁ …pe… abhabbo khīṇāsavo bhikkhu sannidhikārakaṁ kāme paribhuñjituṁ seyyathāpi pubbe agāriyabhūto, abhabbo khīṇāsavo bhikkhu buddhaṁ paccakkhātuṁ, abhabbo khīṇāsavo bhikkhu dhammaṁ paccakkhātuṁ, abhabbo khīṇāsavo bhikkhu saṅghaṁ paccakkhātuṁ, abhabbo khīṇāsavo bhikkhu sikkhaṁ paccakkhātuṁ’.
an9.8:3.5	Pubbe cāhaṁ, sajjha, etarahi ca evaṁ vadāmi:
an9.8:3.6	‘yo so bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, abhabbo so imāni nava ṭhānāni ajjhācaritun’”ti.
an9.8:3.7	Aṭṭhamaṁ.
an9.9:0.1	Aṅguttara Nikāya 9.9
an9.9:0.2	1. Sambodhivagga
an9.9:0.3	Puggalasutta
an9.9:1.1	“Navayime, bhikkhave, puggalā santo saṁvijjamānā lokasmiṁ.
an9.9:1.2	Katame nava?
an9.9:1.3	Arahā, arahattāya paṭipanno, anāgāmī, anāgāmiphalasacchikiriyāya paṭipanno, sakadāgāmī, sakadāgāmiphalasacchikiriyāya paṭipanno, sotāpanno, sotāpattiphalasacchikiriyāya paṭipanno, puthujjano—
an9.9:1.4	ime kho, bhikkhave, nava puggalā santo saṁvijjamānā lokasmin”ti.
an9.9:1.5	Navamaṁ.
an9.10:0.1	Aṅguttara Nikāya 9.10
an9.10:0.2	1. Sambodhivagga
an9.10:0.3	Āhuneyyasutta
an9.10:1.1	“Navayime, bhikkhave, puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassa.
an9.10:1.2	Katame nava?
an9.10:1.3	Arahā, arahattāya paṭipanno, anāgāmī, anāgāmiphalasacchikiriyāya paṭipanno, sakadāgāmī, sakadāgāmiphalasacchikiriyāya paṭipanno, sotāpanno, sotāpattiphalasacchikiriyāya paṭipanno, gotrabhū—
an9.10:1.4	ime kho, bhikkhave, nava puggalā āhuneyyā …pe… anuttaraṁ puññakkhettaṁ lokassā”ti.
an9.10:1.5	Dasamaṁ.
an9.10:1.6	Sambodhivaggo paṭhamo.
an9.10:2.0	Tassuddānaṁ
an9.10:2.1	Sambodhi nissayo ceva,
an9.10:2.2	Meghiya nandakaṁ balaṁ;
an9.10:2.3	Sevanā sutavā sajjho,
an9.10:2.4	Puggalo āhuneyyena cāti.
an9.11:0.1	Aṅguttara Nikāya 9.11
an9.11:0.2	2. Sīhanādavagga
an9.11:0.3	Sīhanādasutta
an9.11:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an9.11:1.2	Atha kho āyasmā sāriputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā sāriputto bhagavantaṁ etadavoca:
an9.11:1.3	“vuttho me, bhante, sāvatthiyaṁ vassāvāso.
an9.11:1.4	Icchāmahaṁ, bhante, janapadacārikaṁ pakkamitun”ti.
an9.11:1.5	“Yassadāni tvaṁ, sāriputta, kālaṁ maññasī”ti.
an9.11:1.6	Atha kho āyasmā sāriputto uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an9.11:1.7	Atha kho aññataro bhikkhu acirapakkante āyasmante sāriputte bhagavantaṁ etadavoca:
an9.11:1.8	“āyasmā maṁ, bhante, sāriputto āsajja appaṭinissajja cārikaṁ pakkanto”ti.
an9.11:1.9	Atha kho bhagavā aññataraṁ bhikkhuṁ āmantesi:
an9.11:1.10	“ehi tvaṁ, bhikkhu, mama vacanena sāriputtaṁ āmantehi:
an9.11:1.11	‘satthā taṁ, āvuso sāriputta, āmantetī’”ti.
an9.11:1.12	“Evaṁ, bhante”ti kho so bhikkhu bhagavato paṭissutvā yenāyasmā sāriputto tenupasaṅkami; upasaṅkamitvā āyasmantaṁ sāriputtaṁ etadavoca:
an9.11:1.13	“satthā taṁ, āvuso sāriputta, āmantetī”ti.
an9.11:1.14	“Evamāvuso”ti kho āyasmā sāriputto tassa bhikkhuno paccassosi.
an9.11:2.1	Tena kho pana samayena āyasmā ca mahāmoggallāno āyasmā ca ānando avāpuraṇaṁ ādāya vihāre āhiṇḍanti:
an9.11:2.2	“abhikkamathāyasmanto, abhikkamathāyasmanto.
an9.11:2.3	Idānāyasmā sāriputto bhagavato sammukhā sīhanādaṁ nadissatī”ti.
an9.11:2.4	Atha kho āyasmā sāriputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ sāriputtaṁ bhagavā etadavoca:
an9.11:2.5	“idha te, sāriputta, aññataro sabrahmacārī khīyanadhammaṁ āpanno:
an9.11:2.6	‘āyasmā maṁ, bhante, sāriputto āsajja appaṭinissajjacārikaṁ pakkanto’”ti.
an9.11:3.1	“Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyya.
an9.11:4.1	Seyyathāpi, bhante, pathaviyaṁ sucimpi nikkhipanti asucimpi nikkhipanti gūthagatampi nikkhipanti muttagatampi nikkhipanti kheḷagatampi nikkhipanti pubbagatampi nikkhipanti lohitagatampi nikkhipanti, na ca tena pathavī aṭṭīyati vā harāyati vā jigucchati vā;
an9.11:4.2	evamevaṁ kho ahaṁ, bhante, pathavīsamena cetasā viharāmi vipulena mahaggatena appamāṇena averena abyāpajjena.
an9.11:4.3	Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyya.
an9.11:5.1	Seyyathāpi, bhante, āpasmiṁ sucimpi dhovanti asucimpi dhovanti gūthagatampi … muttagatampi … kheḷagatampi … pubbagatampi … lohitagatampi dhovanti, na ca tena āpo aṭṭīyati vā harāyati vā jigucchati vā;
an9.11:5.2	evamevaṁ kho ahaṁ, bhante, āposamena cetasā viharāmi vipulena mahaggatena appamāṇena averena abyāpajjena.
an9.11:5.3	Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyya.
an9.11:6.1	Seyyathāpi, bhante, tejo sucimpi ḍahati asucimpi ḍahati gūthagatampi … muttagatampi … kheḷagatampi … pubbagatampi … lohitagatampi ḍahati, na ca tena tejo aṭṭīyati vā harāyati vā jigucchati vā;
an9.11:6.2	evamevaṁ kho ahaṁ, bhante, tejosamena cetasā viharāmi vipulena mahaggatena appamāṇena averena abyāpajjena.
an9.11:6.3	Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyya.
an9.11:7.1	Seyyathāpi, bhante, vāyo sucimpi upavāyati asucimpi upavāyati gūthagatampi … muttagatampi … kheḷagatampi … pubbagatampi … lohitagatampi upavāyati, na ca tena vāyo aṭṭīyati vā harāyati vā jigucchati vā;
an9.11:7.2	evamevaṁ kho ahaṁ, bhante, vāyosamena cetasā viharāmi vipulena mahaggatena appamāṇena averena abyāpajjena.
an9.11:7.3	Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyya.
an9.11:8.1	Seyyathāpi, bhante, rajoharaṇaṁ sucimpi puñchati asucimpi puñchati gūthagatampi … muttagatampi … kheḷagatampi … pubbagatampi … lohitagatampi puñchati, na ca tena rajoharaṇaṁ aṭṭīyati vā harāyati vā jigucchati vā;
an9.11:8.2	evamevaṁ kho ahaṁ, bhante, rajoharaṇasamena cetasā viharāmi vipulena mahaggatena appamāṇena averena abyāpajjena.
an9.11:8.3	Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyya.
an9.11:9.1	Seyyathāpi, bhante, caṇḍālakumārako vā caṇḍālakumārikā vā kaḷopihattho nantakavāsī gāmaṁ vā nigamaṁ vā pavisanto nīcacittaṁyeva upaṭṭhapetvā pavisati;
an9.11:9.2	evamevaṁ kho ahaṁ, bhante, caṇḍālakumārakacaṇḍālakumārikāsamena cetasā viharāmi vipulena mahaggatena appamāṇena averena abyāpajjena.
an9.11:9.3	Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyya.
an9.11:10.1	Seyyathāpi, bhante, usabho chinnavisāṇo sūrato sudanto suvinīto rathiyāya rathiyaṁ siṅghāṭakena siṅghāṭakaṁ anvāhiṇḍanto na kiñci hiṁsati pādena vā visāṇena vā;
an9.11:10.2	evamevaṁ kho ahaṁ, bhante, usabhachinnavisāṇasamena cetasā viharāmi vipulena mahaggatena appamāṇena averena abyāpajjena.
an9.11:10.3	Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyya.
an9.11:11.1	Seyyathāpi, bhante, itthī vā puriso vā daharo yuvā maṇḍanakajātiko sīsaṁnhāto ahikuṇapena vā kukkurakuṇapena vā manussakuṇapena vā kaṇṭhe āsattena aṭṭīyeyya harāyeyya jiguccheyya;
an9.11:11.2	evamevaṁ kho ahaṁ, bhante, iminā pūtikāyena aṭṭīyāmi harāyāmi jigucchāmi.
an9.11:11.3	Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyya.
an9.11:12.1	Seyyathāpi, bhante, puriso medakathālikaṁ parihareyya chiddāvachiddaṁ uggharantaṁ paggharantaṁ;
an9.11:12.2	evamevaṁ kho ahaṁ, bhante, imaṁ kāyaṁ pariharāmi chiddāvachiddaṁ uggharantaṁ paggharantaṁ.
an9.11:12.3	Yassa nūna, bhante, kāye kāyagatāsati anupaṭṭhitā assa, so idha aññataraṁ sabrahmacāriṁ āsajja appaṭinissajja cārikaṁ pakkameyyā”ti.
an9.11:13.1	Atha kho so bhikkhu uṭṭhāyāsanā ekaṁsaṁ uttarāsaṅgaṁ karitvā bhagavato pādesu sirasā nipatitvā bhagavantaṁ etadavoca:
an9.11:13.2	“accayo maṁ, bhante, accagamā yathābālaṁ yathāmūḷhaṁ yathāakusalaṁ, yo ahaṁ āyasmantaṁ sāriputtaṁ asatā tucchā musā abhūtena abbhācikkhiṁ.
an9.11:13.3	Tassa me, bhante, bhagavā accayaṁ accayato paṭiggaṇhatu āyatiṁ saṁvarāyā”ti.
an9.11:13.4	“Taggha taṁ, bhikkhu, accayo accagamā yathābālaṁ yathāmūḷhaṁ yathāakusalaṁ, yo tvaṁ sāriputtaṁ asatā tucchā musā abhūtena abbhācikkhi.
an9.11:13.5	Yato ca kho tvaṁ, bhikkhu, accayaṁ accayato disvā yathādhammaṁ paṭikarosi, taṁ te mayaṁ paṭiggaṇhāma.
an9.11:13.6	Vuḍḍhihesā, bhikkhu, ariyassa vinaye yo accayaṁ accayato disvā yathādhammaṁ paṭikaroti āyatiṁ saṁvaraṁ āpajjatī”ti.
an9.11:14.1	Atha kho bhagavā āyasmantaṁ sāriputtaṁ āmantesi:
an9.11:14.2	“khama, sāriputta, imassa moghapurisassa, purā tassa tattheva sattadhā muddhā phalatī”ti.
an9.11:14.3	“Khamāmahaṁ, bhante, tassa āyasmato sace maṁ so āyasmā evamāha:
an9.11:14.4	‘khamatu ca me so āyasmā’”ti.
an9.11:14.5	Paṭhamaṁ.
an9.12:0.1	Aṅguttara Nikāya 9.12
an9.12:0.2	2. Sīhanādavagga
an9.12:0.3	Saupādisesasutta
an9.12:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an9.12:1.2	Atha kho āyasmā sāriputto pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi.
an9.12:1.3	Atha kho āyasmato sāriputtassa etadahosi:
an9.12:1.4	“atippago kho tāva sāvatthiyaṁ piṇḍāya carituṁ,
an9.12:1.5	yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan”ti.
an9.12:1.6	Atha kho āyasmā sāriputto yena aññatitthiyānaṁ paribbājakānaṁ ārāmo tenupasaṅkami; upasaṅkamitvā tehi aññatitthiyehi paribbājakehi saddhiṁ sammodi.
an9.12:1.7	Sammodanīyaṁ kathaṁ sāraṇīyaṁ vītisāretvā ekamantaṁ nisīdi.
an9.12:2.1	Tena kho pana samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi:
an9.12:2.2	“yo hi koci, āvuso, saupādiseso kālaṁ karoti, sabbo so aparimutto nirayā aparimutto tiracchānayoniyā aparimutto pettivisayā aparimutto apāyaduggativinipātā”ti.
an9.12:2.3	Atha kho āyasmā sāriputto tesaṁ aññatitthiyānaṁ paribbājakānaṁ bhāsitaṁ neva abhinandi nappaṭikkosi.
an9.12:2.4	Anabhinanditvā appaṭikkositvā uṭṭhāyāsanā pakkāmi:
an9.12:2.5	“bhagavato santike etassa bhāsitassa atthaṁ ājānissāmī”ti.
an9.12:2.6	Atha kho āyasmā sāriputto sāvatthiyaṁ piṇḍāya caritvā pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā sāriputto bhagavantaṁ etadavoca:
an9.12:3.1	“Idhāhaṁ, bhante, pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisiṁ.
an9.12:3.2	Tassa mayhaṁ, bhante, etadahosi:
an9.12:3.3	‘atippago kho tāva sāvatthiyaṁ piṇḍāya carituṁ;
an9.12:3.4	yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan’ti.
an9.12:3.5	Atha kho ahaṁ, bhante, yena aññatitthiyānaṁ paribbājakānaṁ ārāmo tenupasaṅkamiṁ; upasaṅkamitvā tehi aññatitthiyehi paribbājakehi saddhiṁ sammodiṁ.
an9.12:3.6	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁ.
an9.12:3.7	Tena kho pana samayena tesaṁ aññatitthiyānaṁ paribbājakānaṁ sannisinnānaṁ sannipatitānaṁ ayamantarākathā udapādi:
an9.12:3.8	‘yo hi koci, āvuso, saupādiseso kālaṁ karoti, sabbo so aparimutto nirayā aparimutto tiracchānayoniyā aparimutto pettivisayā aparimutto apāyaduggativinipātā’ti.
an9.12:3.9	Atha kho ahaṁ, bhante, tesaṁ aññatitthiyānaṁ paribbājakānaṁ bhāsitaṁ neva abhinandiṁ nappaṭikkosiṁ.
an9.12:3.10	Anabhinanditvā appaṭikkositvā uṭṭhāyāsanā pakkamiṁ:
an9.12:3.11	‘bhagavato santike etassa bhāsitassa atthaṁ ājānissāmī’”ti.
an9.12:4.1	“Ke ca, sāriputta, aññatitthiyā paribbājakā bālā abyattā, ke ca saupādisesaṁ vā ‘saupādiseso’ti jānissanti, anupādisesaṁ vā ‘anupādiseso’ti jānissanti.
an9.12:5.1	Navayime, sāriputta, puggalā saupādisesā kālaṁ kurumānā parimuttā nirayā parimuttā tiracchānayoniyā parimuttā pettivisayā parimuttā apāyaduggativinipātā.
an9.12:5.2	Katame nava?
an9.12:5.3	Idha, sāriputta, ekacco puggalo sīlesu paripūrakārī hoti, samādhismiṁ paripūrakārī, paññāya mattaso kārī.
an9.12:5.4	So pañcannaṁ orambhāgiyānaṁ saṁyojanānaṁ parikkhayā antarāparinibbāyī hoti.
an9.12:5.5	Ayaṁ, sāriputta, paṭhamo puggalo saupādiseso kālaṁ kurumāno parimutto nirayā parimutto tiracchānayoniyā parimutto pettivisayā parimutto apāyaduggativinipātā.
an9.12:6.1	Puna caparaṁ, sāriputta, idhekacco puggalo sīlesu paripūrakārī hoti, samādhismiṁ paripūrakārī, paññāya mattaso kārī.
an9.12:6.2	So pañcannaṁ orambhāgiyānaṁ saṁyojanānaṁ parikkhayā upahaccaparinibbāyī hoti …pe…
an9.12:6.3	asaṅkhāraparinibbāyī hoti …pe…
an9.12:6.4	
an9.12:6.5	sasaṅkhāraparinibbāyī hoti …pe…
an9.12:6.6	
an9.12:6.7	uddhaṁsoto hoti akaniṭṭhagāmī.
an9.12:6.8	Ayaṁ, sāriputta, pañcamo puggalo saupādiseso kālaṁ kurumāno parimutto nirayā parimutto tiracchānayoniyā parimutto pettivisayā parimutto apāyaduggativinipātā.
an9.12:7.1	Puna caparaṁ, sāriputta, idhekacco puggalo sīlesu paripūrakārī hoti, samādhismiṁ mattaso kārī, paññāya mattaso kārī.
an9.12:7.2	So tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti.
an9.12:7.3	Ayaṁ, sāriputta, chaṭṭho puggalo saupādiseso kālaṁ kurumāno parimutto nirayā …pe… parimutto apāyaduggativinipātā.
an9.12:8.1	Puna caparaṁ, sāriputta, idhekacco puggalo sīlesu paripūrakārī hoti, samādhismiṁ mattaso kārī, paññāya mattaso kārī.
an9.12:8.2	So tiṇṇaṁ saṁyojanānaṁ parikkhayā ekabījī hoti, ekaṁyeva mānusakaṁ bhavaṁ nibbattetvā dukkhassantaṁ karoti.
an9.12:8.3	Ayaṁ, sāriputta, sattamo puggalo saupādiseso kālaṁ kurumāno parimutto nirayā …pe… parimutto apāyaduggativinipātā.
an9.12:9.1	Puna caparaṁ, sāriputta, idhekacco puggalo sīlesu paripūrakārī hoti, samādhismiṁ mattaso kārī, paññāya mattaso kārī.
an9.12:9.2	So tiṇṇaṁ saṁyojanānaṁ parikkhayā kolaṅkolo hoti, dve vā tīṇi vā kulāni sandhāvitvā saṁsaritvā dukkhassantaṁ karoti.
an9.12:9.3	Ayaṁ, sāriputta, aṭṭhamo puggalo saupādiseso kālaṁ kurumāno parimutto nirayā …pe… parimutto apāyaduggativinipātā.
an9.12:10.1	Puna caparaṁ, sāriputta, idhekacco puggalo sīlesu paripūrakārī hoti, samādhismiṁ mattaso kārī, paññāya mattaso kārī.
an9.12:10.2	So tiṇṇaṁ saṁyojanānaṁ parikkhayā sattakkhattuparamo hoti, sattakkhattuparamaṁ deve ca manusse ca sandhāvitvā saṁsaritvā dukkhassantaṁ karoti.
an9.12:10.3	Ayaṁ, sāriputta, navamo puggalo saupādiseso kālaṁ kurumāno parimutto nirayā parimutto tiracchānayoniyā parimutto pettivisayā parimutto apāyaduggativinipātā.
an9.12:11.1	Ke ca, sāriputta, aññatitthiyā paribbājakā bālā abyattā, ke ca saupādisesaṁ vā ‘saupādiseso’ti jānissanti, anupādisesaṁ vā ‘anupādiseso’ti jānissanti.
an9.12:11.2	Ime kho, sāriputta, nava puggalā saupādisesā kālaṁ kurumānā parimuttā nirayā parimuttā tiracchānayoniyā parimuttā pettivisayā parimuttā apāyaduggativinipātā.
an9.12:11.3	Na tāvāyaṁ, sāriputta, dhammapariyāyo paṭibhāsi bhikkhūnaṁ bhikkhunīnaṁ upāsakānaṁ upāsikānaṁ.
an9.12:11.4	Taṁ kissa hetu?
an9.12:11.5	Māyimaṁ dhammapariyāyaṁ sutvā pamādaṁ āhariṁsūti.
an9.12:11.6	Api ca mayā, sāriputta, dhammapariyāyo pañhādhippāyena bhāsito”ti.
an9.12:11.7	Dutiyaṁ.
an9.13:0.1	Aṅguttara Nikāya 9.13
an9.13:0.2	2. Sīhanādavagga
an9.13:0.3	Koṭṭhikasutta
an9.13:1.1	Atha kho āyasmā mahākoṭṭhiko yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an9.13:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā mahākoṭṭhiko āyasmantaṁ sāriputtaṁ etadavoca:
an9.13:1.3	“kiṁ nu kho, āvuso sāriputta, ‘yaṁ kammaṁ diṭṭhadhammavedanīyaṁ, taṁ me kammaṁ samparāyavedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:1.4	“No hidaṁ, āvuso”.
an9.13:2.1	“Kiṁ panāvuso sāriputta, ‘yaṁ kammaṁ samparāyavedanīyaṁ taṁ me kammaṁ diṭṭhadhammavedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:2.2	“No hidaṁ, āvuso”.
an9.13:3.1	“Kiṁ nu kho, āvuso sāriputta, ‘yaṁ kammaṁ sukhavedanīyaṁ, taṁ me kammaṁ dukkhavedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:3.2	“No hidaṁ, āvuso”.
an9.13:4.1	“Kiṁ panāvuso, sāriputta, ‘yaṁ kammaṁ dukkhavedanīyaṁ, taṁ me kammaṁ sukhavedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:4.2	“No hidaṁ, āvuso”.
an9.13:5.1	“Kiṁ nu kho, āvuso sāriputta, ‘yaṁ kammaṁ paripakkavedanīyaṁ, taṁ me kammaṁ aparipakkavedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:5.2	“No hidaṁ, āvuso”.
an9.13:6.1	“Kiṁ panāvuso sāriputta, ‘yaṁ kammaṁ aparipakkavedanīyaṁ, taṁ me kammaṁ paripakkavedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:6.2	“No hidaṁ, āvuso”.
an9.13:7.1	“Kiṁ nu kho, āvuso sāriputta, ‘yaṁ kammaṁ bahuvedanīyaṁ, taṁ me kammaṁ appavedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:7.2	“No hidaṁ, āvuso”.
an9.13:8.1	“Kiṁ panāvuso sāriputta, ‘yaṁ kammaṁ appavedanīyaṁ, taṁ me kammaṁ bahuvedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:8.2	“No hidaṁ, āvuso”.
an9.13:9.1	“Kiṁ nu kho, āvuso sāriputta, ‘yaṁ kammaṁ vedanīyaṁ, taṁ me kammaṁ avedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:9.2	“No hidaṁ, āvuso”.
an9.13:10.1	“Kiṁ panāvuso sāriputta, ‘yaṁ kammaṁ avedanīyaṁ, taṁ me kammaṁ vedanīyaṁ hotū’ti, etassa atthāya bhagavati brahmacariyaṁ vussatī”ti?
an9.13:10.2	“No hidaṁ, āvuso”.
an9.13:11.1	“‘Kiṁ nu kho, āvuso sāriputta, yaṁ kammaṁ diṭṭhadhammavedanīyaṁ taṁ me kammaṁ samparāyavedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:12.1	‘Kiṁ panāvuso sāriputta, yaṁ kammaṁ samparāyavedanīyaṁ taṁ me kammaṁ diṭṭhadhammavedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:13.1	‘Kiṁ nu kho, āvuso sāriputta, yaṁ kammaṁ sukhavedanīyaṁ taṁ me kammaṁ dukkhavedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:14.1	‘Kiṁ panāvuso sāriputta, yaṁ kammaṁ dukkhavedanīyaṁ taṁ me kammaṁ sukhavedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:15.1	‘Kiṁ nu kho, āvuso sāriputta, yaṁ kammaṁ paripakkavedanīyaṁ taṁ me kammaṁ aparipakkavedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:16.1	‘Kiṁ panāvuso sāriputta, yaṁ kammaṁ aparipakkavedanīyaṁ taṁ me kammaṁ paripakkavedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:17.1	‘Kiṁ nu kho, āvuso sāriputta, yaṁ kammaṁ bahuvedanīyaṁ taṁ me kammaṁ appavedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:18.1	‘Kiṁ panāvuso sāriputta, yaṁ kammaṁ appavedanīyaṁ taṁ me kammaṁ bahuvedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:19.1	‘Kiṁ nu kho, āvuso sāriputta, yaṁ kammaṁ vedanīyaṁ taṁ me kammaṁ avedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:20.1	‘Kiṁ panāvuso sāriputta, yaṁ kammaṁ avedanīyaṁ taṁ me kammaṁ vedanīyaṁ hotūti, etassa atthāya bhagavati brahmacariyaṁ vussatī’ti, iti puṭṭho samāno ‘no hidaṁ, āvuso’ti vadesi.
an9.13:20.2	Atha kimatthaṁ carahāvuso, bhagavati brahmacariyaṁ vussatī”ti?
an9.13:21.1	“Yaṁ khvassa, āvuso, aññātaṁ adiṭṭhaṁ appattaṁ asacchikataṁ anabhisametaṁ, tassa ñāṇāya dassanāya pattiyā sacchikiriyāya abhisamayāya bhagavati brahmacariyaṁ vussatīti.
an9.13:21.2	Kiṁ panassāvuso, aññātaṁ adiṭṭhaṁ appattaṁ asacchikataṁ anabhisametaṁ, yassa ñāṇāya dassanāya pattiyā sacchikiriyāya abhisamayāya bhagavati brahmacariyaṁ vussatīti?
an9.13:21.3	‘Idaṁ dukkhan’ti khvassa, āvuso, aññātaṁ adiṭṭhaṁ appattaṁ asacchikataṁ anabhisametaṁ.
an9.13:21.4	Tassa ñāṇāya dassanāya pattiyā sacchikiriyāya abhisamayāya bhagavati brahmacariyaṁ vussati.
an9.13:21.5	‘Ayaṁ dukkhasamudayo’ti khvassa, āvuso …pe… ‘ayaṁ dukkhanirodho’ti khvassa, āvuso …pe…
an9.13:21.6	‘ayaṁ dukkhanirodhagāminī paṭipadā’ti khvassa, āvuso, aññātaṁ adiṭṭhaṁ appattaṁ asacchikataṁ anabhisametaṁ.
an9.13:21.7	Tassa ñāṇāya dassanāya pattiyā sacchikiriyāya abhisamayāya bhagavati brahmacariyaṁ vussati.
an9.13:21.8	Idaṁ khvassa, āvuso, aññātaṁ adiṭṭhaṁ appattaṁ asacchikataṁ anabhisametaṁ.
an9.13:21.9	Tassa ñāṇāya dassanāya pattiyā sacchikiriyāya abhisamayāya bhagavati brahmacariyaṁ vussatī”ti.
an9.13:21.10	Tatiyaṁ.
an9.14:0.1	Aṅguttara Nikāya 9.14
an9.14:0.2	2. Sīhanādavagga
an9.14:0.3	Samiddhisutta
an9.14:1.1	Atha kho āyasmā samiddhi yenāyasmā sāriputto tenupasaṅkami; upasaṅkamitvā āyasmantaṁ sāriputtaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ samiddhiṁ āyasmā sāriputto etadavoca:
an9.14:2.1	“Kimārammaṇā, samiddhi, purisassa saṅkappavitakkā uppajjantī”ti?
an9.14:2.2	“Nāmarūpārammaṇā, bhante”ti.
an9.14:3.1	“Te pana, samiddhi, kva nānattaṁ gacchantī”ti?
an9.14:3.2	“Dhātūsu, bhante”ti.
an9.14:4.1	“Te pana, samiddhi, kiṁsamudayā”ti?
an9.14:4.2	“Phassasamudayā, bhante”ti.
an9.14:5.1	“Te pana, samiddhi, kiṁsamosaraṇā”ti?
an9.14:5.2	“Vedanāsamosaraṇā, bhante”ti.
an9.14:6.1	“Te pana, samiddhi, kiṁpamukhā”ti?
an9.14:6.2	“Samādhippamukhā, bhante”ti.
an9.14:7.1	“Te pana, samiddhi, kiṁadhipateyyā”ti?
an9.14:7.2	“Satādhipateyyā, bhante”ti.
an9.14:8.1	“Te pana, samiddhi, kiṁuttarā”ti?
an9.14:8.2	“Paññuttarā, bhante”ti.
an9.14:9.1	“Te pana, samiddhi, kiṁsārā”ti?
an9.14:9.2	“Vimuttisārā, bhante”ti.
an9.14:10.1	“Te pana, samiddhi, kiṁogadhā”ti?
an9.14:10.2	“Amatogadhā, bhante”ti.
an9.14:11.1	“‘Kimārammaṇā, samiddhi, purisassa saṅkappavitakkā uppajjantī’ti, iti puṭṭho samāno ‘nāmarūpārammaṇā, bhante’ti vadesi.
an9.14:11.2	‘Te pana, samiddhi, kva nānattaṁ gacchantī’ti, iti puṭṭho samāno ‘dhātūsu, bhante’ti vadesi.
an9.14:11.3	‘Te pana, samiddhi, kiṁsamudayā’ti, iti puṭṭho samāno ‘phassasamudayā, bhante’ti vadesi.
an9.14:11.4	‘Te pana, samiddhi, kiṁsamosaraṇā’ti, iti puṭṭho samāno ‘vedanāsamosaraṇā, bhante’ti vadesi.
an9.14:11.5	‘Te pana, samiddhi, kiṁpamukhā’ti, iti puṭṭho samāno ‘samādhippamukhā, bhante’ti vadesi.
an9.14:11.6	‘Te pana, samiddhi, kiṁadhipateyyā’ti, iti puṭṭho samāno ‘satādhipateyyā, bhante’ti vadesi.
an9.14:11.7	‘Te pana, samiddhi, kiṁuttarā’ti, iti puṭṭho samāno ‘paññuttarā, bhante’ti vadesi.
an9.14:11.8	‘Te pana, samiddhi, kiṁsārā’ti, iti puṭṭho samāno ‘vimuttisārā, bhante’ti vadesi.
an9.14:11.9	‘Te pana, samiddhi, kiṁogadhā’ti, iti puṭṭho samāno ‘amatogadhā, bhante’ti vadesi.
an9.14:11.10	Sādhu sādhu, samiddhi.
an9.14:11.11	Sādhu kho tvaṁ, samiddhi, puṭṭho puṭṭho vissajjesi, tena ca mā maññī”ti.
an9.14:11.12	Catutthaṁ.
an9.15:0.1	Aṅguttara Nikāya 9.15
an9.15:0.2	2. Sīhanādavagga
an9.15:0.3	Gaṇḍasutta
an9.15:1.1	“Seyyathāpi, bhikkhave, gaṇḍo anekavassagaṇiko.
an9.15:1.2	Tassassu gaṇḍassa nava vaṇamukhāni nava abhedanamukhāni.
an9.15:1.3	Tato yaṁ kiñci pagghareyya—
an9.15:1.4	asuciyeva pagghareyya, duggandhaṁyeva pagghareyya, jegucchiyaṁyeva pagghareyya;
an9.15:1.5	yaṁ kiñci pasaveyya—
an9.15:1.6	asuciyeva pasaveyya, duggandhaṁyeva pasaveyya, jegucchiyaṁyeva pasaveyya.
an9.15:2.1	Gaṇḍoti kho, bhikkhave, imassetaṁ cātumahābhūtikassa kāyassa adhivacanaṁ mātāpettikasambhavassa odanakummāsūpacayassa aniccucchādanaparimaddanabhedanaviddhaṁsanadhammassa.
an9.15:2.2	Tassassu gaṇḍassa nava vaṇamukhāni nava abhedanamukhāni.
an9.15:2.3	Tato yaṁ kiñci paggharati—
an9.15:2.4	asuciyeva paggharati, duggandhaṁyeva paggharati, jegucchiyaṁyeva paggharati;
an9.15:2.5	yaṁ kiñci pasavati—
an9.15:2.6	asuciyeva pasavati, duggandhaṁyeva pasavati, jegucchiyaṁyeva pasavati.
an9.15:2.7	Tasmātiha, bhikkhave, imasmiṁ kāye nibbindathā”ti.
an9.15:2.8	Pañcamaṁ.
an9.16:0.1	Aṅguttara Nikāya 9.16
an9.16:0.2	2. Sīhanādavagga
an9.16:0.3	Saññāsutta
an9.16:1.1	“Navayimā, bhikkhave, saññā bhāvitā bahulīkatā mahapphalā honti mahānisaṁsā amatogadhā amatapariyosānā.
an9.16:1.2	Katamā nava?
an9.16:1.3	Asubhasaññā, maraṇasaññā, āhāre paṭikūlasaññā, sabbaloke anabhiratasaññā, aniccasaññā, anicce dukkhasaññā, dukkhe anattasaññā, pahānasaññā, virāgasaññā—
an9.16:1.4	imā kho, bhikkhave, nava saññā, bhāvitā bahulīkatā mahapphalā honti mahānisaṁsā amatogadhā amatapariyosānā”ti.
an9.16:1.5	Chaṭṭhaṁ.
an9.17:0.1	Aṅguttara Nikāya 9.17
an9.17:0.2	2. Sīhanādavagga
an9.17:0.3	Kulasutta
an9.17:1.1	“Navahi, bhikkhave, aṅgehi samannāgataṁ kulaṁ anupagantvā vā nālaṁ upagantuṁ, upagantvā vā nālaṁ nisīdituṁ.
an9.17:1.2	Katamehi navahi?
an9.17:1.3	Na manāpena paccuṭṭhenti, na manāpena abhivādenti, na manāpena āsanaṁ denti, santamassa pariguhanti, bahukampi thokaṁ denti, paṇītampi lūkhaṁ denti, asakkaccaṁ denti no sakkaccaṁ, na upanisīdanti dhammassavanāya, bhāsitamassa na sussūsanti.
an9.17:1.4	Imehi kho, bhikkhave, navahaṅgehi samannāgataṁ kulaṁ anupagantvā vā nālaṁ upagantuṁ upagantvā vā nālaṁ nisīdituṁ.
an9.17:2.1	Navahi, bhikkhave, aṅgehi samannāgataṁ kulaṁ anupagantvā vā alaṁ upagantuṁ, upagantvā vā alaṁ nisīdituṁ.
an9.17:2.2	Katamehi navahi?
an9.17:2.3	Manāpena paccuṭṭhenti, manāpena abhivādenti, manāpena āsanaṁ denti, santamassa na pariguhanti, bahukampi bahukaṁ denti, paṇītampi paṇītaṁ denti, sakkaccaṁ denti no asakkaccaṁ, upanisīdanti dhammassavanāya, bhāsitamassa sussūsanti.
an9.17:2.4	Imehi kho, bhikkhave, navahaṅgehi samannāgataṁ kulaṁ anupagantvā vā alaṁ upagantuṁ, upagantvā vā alaṁ nisīditun”ti.
an9.17:2.5	Sattamaṁ.
an9.18:0.1	Aṅguttara Nikāya 9.18
an9.18:0.2	2. Sīhanādavagga
an9.18:0.3	Navaṅguposathasutta
an9.18:1.1	“Navahi, bhikkhave, aṅgehi samannāgato uposatho upavuttho mahapphalo hoti mahānisaṁso mahājutiko mahāvipphāro.
an9.18:1.2	Kathaṁ upavuttho ca, bhikkhave, navahaṅgehi samannāgato uposatho mahapphalo hoti mahānisaṁso mahājutiko mahāvipphāro?
an9.18:1.3	Idha, bhikkhave, ariyasāvako iti paṭisañcikkhati:
an9.18:1.4	‘yāvajīvaṁ arahanto pāṇātipātaṁ pahāya pāṇātipātā paṭiviratā nihitadaṇḍā nihitasatthā lajjī dayāpannā sabbapāṇabhūtahitānukampino viharanti;
an9.18:1.5	ahampajja imañca rattiṁ imañca divasaṁ pāṇātipātaṁ pahāya pāṇātipātā paṭivirato nihitadaṇḍo nihitasattho lajjī dayāpanno sabbapāṇabhūtahitānukampī viharāmi.
an9.18:1.6	Imināpaṅgena arahataṁ anukaromi; uposatho ca me upavuttho bhavissatī’ti.
an9.18:1.7	Iminā paṭhamena aṅgena samannāgato hoti …pe….
an9.18:2.1	‘Yāvajīvaṁ arahanto uccāsayanamahāsayanaṁ pahāya uccāsayanamahāsayanā paṭiviratā nīcaseyyaṁ kappenti—mañcake vā tiṇasanthārake vā;
an9.18:2.2	ahampajja imañca rattiṁ imañca divasaṁ uccāsayanamahāsayanaṁ pahāya uccāsayanamahāsayanā paṭivirato nīcaseyyaṁ kappemi—mañcake vā tiṇasanthārake vā.
an9.18:2.3	Imināpaṅgena arahataṁ anukaromi; uposatho ca me upavuttho bhavissatī’ti.
an9.18:2.4	Iminā aṭṭhamena aṅgena samannāgato hoti.
an9.18:3.1	Mettāsahagatena cetasā ekaṁ disaṁ pharitvā viharati, tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati.
an9.18:3.2	Iminā navamena aṅgena samannāgato hoti.
an9.18:4.1	Evaṁ upavuttho kho, bhikkhave, navahaṅgehi samannāgato uposatho mahapphalo hoti mahānisaṁso mahājutiko mahāvipphāro”ti.
an9.18:4.2	Aṭṭhamaṁ.
an9.19:0.1	Aṅguttara Nikāya 9.19
an9.19:0.2	2. Sīhanādavagga
an9.19:0.3	Devatāsutta
an9.19:1.1	“Imañca, bhikkhave, rattiṁ sambahulā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yenāhaṁ tenupasaṅkamiṁsu; upasaṅkamitvā maṁ abhivādetvā ekamantaṁ aṭṭhaṁsu. Ekamantaṁ ṭhitā kho, bhikkhave, tā devatā maṁ etadavocuṁ:
an9.19:1.2	‘upasaṅkamiṁsu no, bhante, pubbe manussabhūtānaṁ pabbajitā agārāni.
an9.19:1.3	Te mayaṁ, bhante, paccuṭṭhimha, no ca kho abhivādimha.
an9.19:1.4	Tā mayaṁ, bhante, aparipuṇṇakammantā vippaṭisāriniyo paccānutāpiniyo hīnaṁ kāyaṁ upapannā’ti.
an9.19:2.1	Aparāpi maṁ, bhikkhave, sambahulā devatā upasaṅkamitvā etadavocuṁ:
an9.19:2.2	‘upasaṅkamiṁsu no, bhante, pubbe manussabhūtānaṁ pabbajitā agārāni.
an9.19:2.3	Te mayaṁ, bhante, paccuṭṭhimha abhivādimha, no ca tesaṁ āsanaṁ adamha.
an9.19:2.4	Tā mayaṁ, bhante, aparipuṇṇakammantā vippaṭisāriniyo paccānutāpiniyo hīnaṁ kāyaṁ upapannā’ti.
an9.19:3.1	Aparāpi maṁ, bhikkhave, sambahulā devatā upasaṅkamitvā etadavocuṁ:
an9.19:3.2	‘upasaṅkamiṁsu no, bhante, pubbe manussabhūtānaṁ pabbajitā agārāni.
an9.19:3.3	Te mayaṁ, bhante, paccuṭṭhimha abhivādimha āsanaṁ adamha, no ca kho yathāsatti yathābalaṁ saṁvibhajimha …pe…
an9.19:3.4	yathāsatti yathābalaṁ saṁvibhajimha, no ca kho upanisīdimha dhammassavanāya …pe…
an9.19:3.5	upanisīdimha dhammassavanāya, no ca kho ohitasotā dhammaṁ suṇimha …pe…
an9.19:3.6	ohitasotā ca dhammaṁ suṇimha, no ca kho sutvā dhammaṁ dhārayimha …pe…
an9.19:3.7	sutvā ca dhammaṁ dhārayimha, no ca kho dhātānaṁ dhammānaṁ atthaṁ upaparikkhimha …pe…
an9.19:3.8	dhātānañca dhammānaṁ atthaṁ upaparikkhimha, no ca kho atthamaññāya dhammamaññāya dhammānudhammaṁ paṭipajjimha.
an9.19:3.9	Tā mayaṁ, bhante, aparipuṇṇakammantā vippaṭisāriniyo paccānutāpiniyo hīnaṁ kāyaṁ upapannā’ti.
an9.19:4.1	Aparāpi maṁ, bhikkhave, sambahulā devatā upasaṅkamitvā etadavocuṁ:
an9.19:4.2	‘upasaṅkamiṁsu no, bhante, pubbe manussabhūtānaṁ pabbajitā agārāni.
an9.19:4.3	Te mayaṁ, bhante, paccuṭṭhimha abhivādimha, āsanaṁ adamha, yathāsatti yathābalaṁ saṁvibhajimha, upanisīdimha dhammassavanāya, ohitasotā ca dhammaṁ suṇimha, sutvā ca dhammaṁ dhārayimha, dhātānañca dhammānaṁ atthaṁ upaparikkhimha, atthamaññāya dhammamaññāya dhammānudhammaṁ paṭipajjimha.
an9.19:4.4	Tā mayaṁ, bhante, paripuṇṇakammantā avippaṭisāriniyo apaccānutāpiniyo paṇītaṁ kāyaṁ upapannā’ti.
an9.19:4.5	Etāni, bhikkhave, rukkhamūlāni etāni suññāgārāni. Jhāyatha, bhikkhave, mā pamādattha, mā pacchā vippaṭisārino ahuvattha seyyathāpi tā purimikā devatā”ti.
an9.19:4.6	Navamaṁ.
an9.20:0.1	Aṅguttara Nikāya 9.20
an9.20:0.2	2. Sīhanādavagga
an9.20:0.3	Velāmasutta
an9.20:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an9.20:1.2	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an9.20:2.1	“Api nu te, gahapati, kule dānaṁ dīyatī”ti?
an9.20:2.2	“Dīyati me, bhante, kule dānaṁ;
an9.20:2.3	tañca kho lūkhaṁ kaṇājakaṁ biḷaṅgadutiyan”ti.
an9.20:2.4	“Lūkhañcepi, gahapati, dānaṁ deti paṇītaṁ vā;
an9.20:2.5	tañca asakkaccaṁ deti, acittīkatvā deti, asahatthā deti, apaviddhaṁ deti, anāgamanadiṭṭhiko deti.
an9.20:2.6	Yattha yattha tassa tassa dānassa vipāko nibbattati, na uḷārāya bhattabhogāya cittaṁ namati, na uḷārāya vatthabhogāya cittaṁ namati, na uḷārāya yānabhogāya cittaṁ namati, na uḷāresu pañcasu kāmaguṇesu bhogāya cittaṁ namati.
an9.20:2.7	Yepissa te honti puttāti vā dārāti vā dāsāti vā pessāti vā kammakarāti vā, tepi na sussūsanti na sotaṁ odahanti na aññā cittaṁ upaṭṭhapenti.
an9.20:2.8	Taṁ kissa hetu?
an9.20:2.9	Evañhetaṁ, gahapati, hoti asakkaccaṁ katānaṁ kammānaṁ vipāko.
an9.20:3.1	Lūkhañcepi, gahapati, dānaṁ deti paṇītaṁ vā;
an9.20:3.2	tañca sakkaccaṁ deti, cittīkatvā deti, sahatthā deti, anapaviddhaṁ deti, āgamanadiṭṭhiko deti.
an9.20:3.3	Yattha yattha tassa tassa dānassa vipāko nibbattati, uḷārāya bhattabhogāya cittaṁ namati, uḷārāya vatthabhogāya cittaṁ namati, uḷārāya yānabhogāya cittaṁ namati, uḷāresu pañcasu kāmaguṇesu bhogāya cittaṁ namati.
an9.20:3.4	Yepissa te honti puttāti vā dārāti vā dāsāti vā pessāti vā kammakarāti vā, tepi sussūsanti sotaṁ odahanti aññā cittaṁ upaṭṭhapenti.
an9.20:3.5	Taṁ kissa hetu?
an9.20:3.6	Evañhetaṁ, gahapati, hoti sakkaccaṁ katānaṁ kammānaṁ vipāko.
an9.20:4.1	Bhūtapubbaṁ, gahapati, velāmo nāma brāhmaṇo ahosi.
an9.20:4.2	So evarūpaṁ dānaṁ adāsi mahādānaṁ.
an9.20:4.3	Caturāsīti suvaṇṇapātisahassāni adāsi rūpiyapūrāni, caturāsīti rūpiyapātisahassāni adāsi suvaṇṇapūrāni, caturāsīti kaṁsapātisahassāni adāsi hiraññapūrāni, caturāsīti hatthisahassāni adāsi sovaṇṇālaṅkārāni sovaṇṇadhajāni hemajālappaṭicchannāni, caturāsīti rathasahassāni adāsi sīhacammaparivārāni byagghacammaparivārāni dīpicammaparivārāni paṇḍukambalaparivārāni sovaṇṇālaṅkārāni sovaṇṇadhajāni hemajālappaṭicchannāni, caturāsīti dhenusahassāni adāsi dukūlasandhanāni kaṁsūpadhāraṇāni, caturāsīti kaññāsahassāni adāsi āmuttamaṇikuṇḍalāyo, caturāsīti pallaṅkasahassāni adāsi gonakatthatāni paṭikatthatāni paṭalikatthatāni kadalimigapavarapaccattharaṇāni sauttaracchadāni ubhatolohitakūpadhānāni, caturāsīti vatthakoṭisahassāni adāsi khomasukhumānaṁ koseyyasukhumānaṁ kambalasukhumānaṁ kappāsikasukhumānaṁ, ko pana vādo annassa pānassa khajjassa bhojjassa leyyassa peyyassa, najjo maññe vissandanti.
an9.20:5.1	Siyā kho pana te, gahapati, evamassa:
an9.20:5.2	‘añño nūna tena samayena velāmo brāhmaṇo ahosi, so taṁ dānaṁ adāsi mahādānan’ti.
an9.20:5.3	Na kho panetaṁ, gahapati, evaṁ daṭṭhabbaṁ.
an9.20:5.4	Ahaṁ tena samayena velāmo brāhmaṇo ahosiṁ.
an9.20:5.5	Ahaṁ taṁ dānaṁ adāsiṁ mahādānaṁ.
an9.20:5.6	Tasmiṁ kho pana, gahapati, dāne na koci dakkhiṇeyyo ahosi, na taṁ koci dakkhiṇaṁ visodheti.
an9.20:6.1	Yaṁ, gahapati, velāmo brāhmaṇo dānaṁ adāsi mahādānaṁ, yo cekaṁ diṭṭhisampannaṁ bhojeyya, idaṁ tato mahapphalataraṁ.
an9.20:7.1	(…) Yo ca sataṁ diṭṭhisampannānaṁ bhojeyya, yo cekaṁ sakadāgāmiṁ bhojeyya, idaṁ tato mahapphalataraṁ.
an9.20:8.1	(…) Yo ca sataṁ sakadāgāmīnaṁ bhojeyya, yo cekaṁ anāgāmiṁ bhojeyya …pe…
an9.20:8.2	yo ca sataṁ anāgāmīnaṁ bhojeyya, yo cekaṁ arahantaṁ bhojeyya …pe…
an9.20:8.3	yo ca sataṁ arahantānaṁ bhojeyya, yo cekaṁ paccekabuddhaṁ bhojeyya …pe…
an9.20:8.4	yo ca sataṁ paccekabuddhānaṁ bhojeyya, yo ca tathāgataṁ arahantaṁ sammāsambuddhaṁ bhojeyya …pe…
an9.20:8.5	yo ca buddhappamukhaṁ bhikkhusaṅghaṁ bhojeyya …pe…
an9.20:8.6	yo ca cātuddisaṁ saṅghaṁ uddissa vihāraṁ kārāpeyya …pe…
an9.20:8.7	yo ca pasannacitto buddhañca dhammañca saṅghañca saraṇaṁ gaccheyya …pe…
an9.20:8.8	yo ca pasannacitto sikkhāpadāni samādiyeyya—
an9.20:8.9	pāṇātipātā veramaṇiṁ, adinnādānā veramaṇiṁ, kāmesumicchācārā veramaṇiṁ, musāvādā veramaṇiṁ, surāmerayamajjapamādaṭṭhānā veramaṇiṁ, yo ca antamaso gandhohanamattampi mettacittaṁ bhāveyya, (…) idaṁ tato mahapphalataraṁ.
an9.20:9.1	Yañca, gahapati, velāmo brāhmaṇo dānaṁ adāsi mahādānaṁ, yo cekaṁ diṭṭhisampannaṁ bhojeyya …
an9.20:9.2	yo ca sataṁ diṭṭhisampannānaṁ bhojeyya, yo cekaṁ sakadāgāmiṁ bhojeyya …
an9.20:9.3	yo ca sataṁ sakadāgāmīnaṁ bhojeyya, yo cekaṁ anāgāmiṁ bhojeyya …
an9.20:9.4	yo ca sataṁ anāgāmīnaṁ bhojeyya, yo cekaṁ arahantaṁ bhojeyya …
an9.20:9.5	yo ca sataṁ arahantānaṁ bhojeyya, yo cekaṁ paccekabuddhaṁ bhojeyya …
an9.20:9.6	yo ca sataṁ paccekabuddhānaṁ bhojeyya, yo ca tathāgataṁ arahantaṁ sammāsambuddhaṁ bhojeyya …
an9.20:9.7	yo ca buddhappamukhaṁ bhikkhusaṅghaṁ bhojeyya, yo ca cātuddisaṁ saṅghaṁ uddissa vihāraṁ kārāpeyya …
an9.20:9.8	yo ca pasannacitto buddhañca dhammañca saṅghañca saraṇaṁ gaccheyya, yo ca pasannacitto sikkhāpadāni samādiyeyya—
an9.20:9.9	pāṇātipātā veramaṇiṁ …pe… surāmerayamajjapamādaṭṭhānā veramaṇiṁ, yo ca antamaso gandhohanamattampi mettacittaṁ bhāveyya, yo ca accharāsaṅghātamattampi aniccasaññaṁ bhāveyya, idaṁ tato mahapphalataran”ti.
an9.20:9.10	Dasamaṁ.
an9.20:9.11	Sīhanādavaggo dutiyo.
an9.20:10.0	Tassuddānaṁ
an9.20:10.1	Nādo saupādiseso ca,
an9.20:10.2	koṭṭhikena samiddhinā;
an9.20:10.3	Gaṇḍasaññā kulaṁ mettā,
an9.20:10.4	devatā velāmena cāti.
an9.21:0.1	Aṅguttara Nikāya 9.21
an9.21:0.2	3. Sattāvāsavagga
an9.21:0.3	Tiṭhānasutta
an9.21:1.1	“Tīhi, bhikkhave, ṭhānehi uttarakurukā manussā deve ca tāvatiṁse adhiggaṇhanti jambudīpake ca manusse.
an9.21:1.2	Katamehi tīhi?
an9.21:1.3	Amamā, apariggahā, niyatāyukā, visesaguṇā—
an9.21:1.4	imehi kho, bhikkhave, tīhi ṭhānehi uttarakurukā manussā deve ca tāvatiṁse adhiggaṇhanti jambudīpake ca manusse.
an9.21:2.1	Tīhi, bhikkhave, ṭhānehi devā tāvatiṁsā uttarakuruke ca manusse adhiggaṇhanti jambudīpake ca manusse.
an9.21:2.2	Katamehi tīhi?
an9.21:2.3	Dibbena āyunā, dibbena vaṇṇena, dibbena sukhena—
an9.21:2.4	imehi kho, bhikkhave, tīhi ṭhānehi devā tāvatiṁsā uttarakuruke ca manusse adhiggaṇhanti jambudīpake ca manusse.
an9.21:3.1	Tīhi, bhikkhave, ṭhānehi jambudīpakā manussā uttarakuruke ca manusse adhiggaṇhanti deve ca tāvatiṁse.
an9.21:3.2	Katamehi tīhi?
an9.21:3.3	Sūrā, satimanto, idha brahmacariyavāso—
an9.21:3.4	imehi kho, bhikkhave, tīhi ṭhānehi jambudīpakā manussā uttarakuruke ca manusse adhiggaṇhanti deve ca tāvatiṁse”ti.
an9.21:3.5	Paṭhamaṁ.
an9.22:0.1	Aṅguttara Nikāya 9.22
an9.22:0.2	3. Sattāvāsavagga
an9.22:0.3	Assakhaḷuṅkasutta
an9.22:1.1	“Tayo ca, bhikkhave, assakhaḷuṅke desessāmi tayo ca purisakhaḷuṅke tayo ca assaparasse tayo ca purisaparasse tayo ca bhadde assājānīye tayo ca bhadde purisājānīye.
an9.22:1.2	Taṁ suṇātha. (…)
an9.22:2.1	Katame ca, bhikkhave, tayo assakhaḷuṅkā?
an9.22:2.2	Idha, bhikkhave, ekacco assakhaḷuṅko javasampanno hoti, na vaṇṇasampanno, na ārohapariṇāhasampanno.
an9.22:2.3	Idha pana, bhikkhave, ekacco assakhaḷuṅko javasampanno ca hoti vaṇṇasampanno ca, na ārohapariṇāhasampanno.
an9.22:2.4	Idha pana, bhikkhave, ekacco assakhaḷuṅko javasampanno ca hoti vaṇṇasampanno ca ārohapariṇāhasampanno ca.
an9.22:2.5	Ime kho, bhikkhave, tayo assakhaḷuṅkā.
an9.22:3.1	Katame ca, bhikkhave, tayo purisakhaḷuṅkā?
an9.22:3.2	Idha, bhikkhave, ekacco purisakhaḷuṅko javasampanno hoti, na vaṇṇasampanno, na ārohapariṇāhasampanno.
an9.22:3.3	Idha pana, bhikkhave, ekacco purisakhaḷuṅko javasampanno ca hoti vaṇṇasampanno ca, na ārohapariṇāhasampanno.
an9.22:3.4	Idha pana, bhikkhave, ekacco purisakhaḷuṅko javasampanno ca hoti vaṇṇasampanno ca ārohapariṇāhasampanno ca.
an9.22:4.1	Kathañca, bhikkhave, purisakhaḷuṅko javasampanno hoti, na vaṇṇasampanno na ārohapariṇāhasampanno?
an9.22:4.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti, ‘ayaṁ dukkhasamudayo’ti yathābhūtaṁ pajānāti, ‘ayaṁ dukkhanirodho’ti yathābhūtaṁ pajānāti, ‘ayaṁ dukkhanirodhagāminī paṭipadā’ti yathābhūtaṁ pajānāti.
an9.22:4.3	Idamassa javasmiṁ vadāmi.
an9.22:4.4	Abhidhamme kho pana abhivinaye pañhaṁ puṭṭho saṁsādeti, no vissajjeti.
an9.22:4.5	Idamassa na vaṇṇasmiṁ vadāmi.
an9.22:4.6	Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṁ.
an9.22:4.7	Idamassa na ārohapariṇāhasmiṁ vadāmi.
an9.22:4.8	Evaṁ kho, bhikkhave, purisakhaḷuṅko javasampanno hoti, na vaṇṇasampanno na ārohapariṇāhasampanno.
an9.22:5.1	Kathañca, bhikkhave, purisakhaḷuṅko javasampanno ca hoti vaṇṇasampanno ca, na ārohapariṇāhasampanno?
an9.22:5.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an9.22:5.3	Idamassa javasmiṁ vadāmi.
an9.22:5.4	Abhidhamme kho pana abhivinaye pañhaṁ puṭṭho vissajjeti, no saṁsādeti.
an9.22:5.5	Idamassa vaṇṇasmiṁ vadāmi.
an9.22:5.6	Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṁ.
an9.22:5.7	Idamassa na ārohapariṇāhasmiṁ vadāmi.
an9.22:5.8	Evaṁ kho, bhikkhave, purisakhaḷuṅko javasampanno ca hoti vaṇṇasampanno ca, na ārohapariṇāhasampanno.
an9.22:6.1	Kathañca, bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca?
an9.22:6.2	Idha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.
an9.22:6.3	Idamassa javasmiṁ vadāmi.
an9.22:6.4	Abhidhamme kho pana abhivinaye pañhaṁ puṭṭho vissajjeti, no saṁsādeti.
an9.22:6.5	Idamassa vaṇṇasmiṁ vadāmi.
an9.22:6.6	Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṁ.
an9.22:6.7	Idamassa ārohapariṇāhasmiṁ vadāmi.
an9.22:6.8	Evaṁ kho, bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca.
an9.22:6.9	Ime kho, bhikkhave, tayo purisakhaḷuṅkā.
an9.22:7.1	Katame ca, bhikkhave, tayo assaparassā?
an9.22:7.2	Idha, bhikkhave, ekacco assaparasso …pe…
an9.22:7.3	javasampanno ca hoti vaṇṇasampanno ca ārohapariṇāhasampanno ca.
an9.22:7.4	Ime kho, bhikkhave, tayo assaparassā.
an9.22:8.1	Katame ca, bhikkhave, tayo purisaparassā?
an9.22:8.2	Idha, bhikkhave, ekacco purisaparasso …pe…
an9.22:8.3	javasampanno ca hoti vaṇṇasampanno ca ārohapariṇāhasampanno ca.
an9.22:9.1	Kathañca, bhikkhave, purisaparasso …pe…
an9.22:9.2	javasampanno ca hoti vaṇṇasampanno ca ārohapariṇāhasampanno ca?
an9.22:9.3	Idha, bhikkhave, bhikkhu pañcannaṁ orambhāgiyānaṁ saṁyojanānaṁ parikkhayā opapātiko hoti, tattha parinibbāyī anāvattidhammo tasmā lokā.
an9.22:9.4	Idamassa javasmiṁ vadāmi.
an9.22:9.5	Abhidhamme kho pana abhivinaye pañhaṁ puṭṭho vissajjeti, no saṁsādeti.
an9.22:9.6	Idamassa vaṇṇasmiṁ vadāmi.
an9.22:9.7	Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṁ.
an9.22:9.8	Idamassa ārohapariṇāhasmiṁ vadāmi.
an9.22:9.9	Evaṁ kho, bhikkhave, purisaparasso javasampanno ca hoti vaṇṇasampanno ca ārohapariṇāhasampanno ca.
an9.22:9.10	Ime kho, bhikkhave, tayo purisaparassā.
an9.22:10.1	Katame ca, bhikkhave, tayo bhaddā assājānīyā?
an9.22:10.2	Idha, bhikkhave, ekacco bhaddo assājānīyo …pe…
an9.22:10.3	javasampanno ca hoti vaṇṇasampanno ca ārohapariṇāhasampanno ca.
an9.22:10.4	Ime kho, bhikkhave, tayo bhaddā assājānīyā.
an9.22:11.1	Katame ca, bhikkhave, tayo bhaddā purisājānīyā?
an9.22:11.2	Idha, bhikkhave, ekacco bhaddo purisājānīyo …pe…
an9.22:11.3	javasampanno ca hoti vaṇṇasampanno ca ārohapariṇāhasampanno ca.
an9.22:12.1	Kathañca, bhikkhave, bhaddo purisājānīyo …pe…
an9.22:12.2	javasampanno ca hoti vaṇṇasampanno ca ārohapariṇāhasampanno ca?
an9.22:12.3	Idha, bhikkhave, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an9.22:12.4	Idamassa javasmiṁ vadāmi.
an9.22:12.5	Abhidhamme kho pana abhivinaye pañhaṁ puṭṭho vissajjeti, no saṁsādeti.
an9.22:12.6	Idamassa vaṇṇasmiṁ vadāmi.
an9.22:12.7	Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṁ.
an9.22:12.8	Idamassa ārohapariṇāhasmiṁ vadāmi.
an9.22:12.9	Evaṁ kho, bhikkhave, bhaddo purisājānīyo javasampanno ca hoti vaṇṇasampanno ca ārohapariṇāhasampanno ca.
an9.22:12.10	Ime kho, bhikkhave, tayo bhaddā purisājānīyā”ti.
an9.22:12.11	Dutiyaṁ.
an9.23:0.1	Aṅguttara Nikāya 9.23
an9.23:0.2	3. Sattāvāsavagga
an9.23:0.3	Taṇhāmūlakasutta
an9.23:1.1	“Nava, bhikkhave, taṇhāmūlake dhamme desessāmi, taṁ suṇātha.
an9.23:1.2	Katame ca, bhikkhave, nava taṇhāmūlakā dhammā?
an9.23:1.3	Taṇhaṁ paṭicca pariyesanā, pariyesanaṁ paṭicca lābho, lābhaṁ paṭicca vinicchayo, vinicchayaṁ paṭicca chandarāgo, chandarāgaṁ paṭicca ajjhosānaṁ, ajjhosānaṁ paṭicca pariggaho, pariggahaṁ paṭicca macchariyaṁ, macchariyaṁ paṭicca ārakkho, ārakkhādhikaraṇaṁ daṇḍādānaṁ satthādānaṁ kalahaviggahavivādatuvaṁtuvaṁpesuññamusāvādā aneke pāpakā akusalā dhammā sambhavanti.
an9.23:1.4	Ime kho, bhikkhave, nava taṇhāmūlakā dhammā”ti.
an9.23:1.5	Tatiyaṁ.
an9.24:0.1	Aṅguttara Nikāya 9.24
an9.24:0.2	3. Sattāvāsavagga
an9.24:0.3	Sattāvāsasutta
an9.24:1.1	“Navayime, bhikkhave, sattāvāsā.
an9.24:1.2	Katame nava?
an9.24:1.3	Santi, bhikkhave, sattā nānattakāyā nānattasaññino, seyyathāpi manussā, ekacce ca devā, ekacce ca vinipātikā.
an9.24:1.4	Ayaṁ paṭhamo sattāvāso.
an9.24:2.1	Santi, bhikkhave, sattā nānattakāyā ekattasaññino, seyyathāpi devā brahmakāyikā paṭhamābhinibbattā.
an9.24:2.2	Ayaṁ dutiyo sattāvāso.
an9.24:3.1	Santi, bhikkhave, sattā ekattakāyā nānattasaññino, seyyathāpi devā ābhassarā.
an9.24:3.2	Ayaṁ tatiyo sattāvāso.
an9.24:4.1	Santi, bhikkhave, sattā ekattakāyā ekattasaññino, seyyathāpi devā subhakiṇhā.
an9.24:4.2	Ayaṁ catuttho sattāvāso.
an9.24:5.1	Santi, bhikkhave, sattā asaññino appaṭisaṁvedino, seyyathāpi devā asaññasattā.
an9.24:5.2	Ayaṁ pañcamo sattāvāso.
an9.24:6.1	Santi, bhikkhave, sattā sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanūpagā.
an9.24:6.2	Ayaṁ chaṭṭho sattāvāso.
an9.24:7.1	Santi, bhikkhave, sattā sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanūpagā.
an9.24:7.2	Ayaṁ sattamo sattāvāso.
an9.24:8.1	Santi, bhikkhave, sattā sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanūpagā.
an9.24:8.2	Ayaṁ aṭṭhamo sattāvāso.
an9.24:9.1	Santi, bhikkhave, sattā sabbaso ākiñcaññāyatanaṁ samatikkamma nevasaññānāsaññāyatanūpagā.
an9.24:9.2	Ayaṁ navamo sattāvāso.
an9.24:10.1	Ime kho, bhikkhave, nava sattāvāsā”ti.
an9.24:10.2	Catutthaṁ.
an9.25:0.1	Aṅguttara Nikāya 9.25
an9.25:0.2	3. Sattāvāsavagga
an9.25:0.3	Paññāsutta
an9.25:1.1	“Yato kho, bhikkhave, bhikkhuno paññāya cittaṁ suparicitaṁ hoti, tassetaṁ, bhikkhave, bhikkhuno kallaṁ vacanāya:
an9.25:1.2	‘khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an9.25:2.1	Kathañca, bhikkhave, bhikkhuno paññāya cittaṁ suparicitaṁ hoti?
an9.25:2.2	‘Vītarāgaṁ me cittan’ti paññāya cittaṁ suparicitaṁ hoti;
an9.25:2.3	‘vītadosaṁ me cittan’ti paññāya cittaṁ suparicitaṁ hoti;
an9.25:2.4	‘vītamohaṁ me cittan’ti paññāya cittaṁ suparicitaṁ hoti;
an9.25:2.5	‘asarāgadhammaṁ me cittan’ti paññāya cittaṁ suparicitaṁ hoti;
an9.25:2.6	‘asadosadhammaṁ me cittan’ti paññāya cittaṁ suparicitaṁ hoti;
an9.25:2.7	‘asamohadhammaṁ me cittan’ti paññāya cittaṁ suparicitaṁ hoti;
an9.25:2.8	‘anāvattidhammaṁ me cittaṁ kāmabhavāyā’ti paññāya cittaṁ suparicitaṁ hoti;
an9.25:2.9	‘anāvattidhammaṁ me cittaṁ rūpabhavāyā’ti paññāya cittaṁ suparicitaṁ hoti;
an9.25:2.10	‘anāvattidhammaṁ me cittaṁ arūpabhavāyā’ti paññāya cittaṁ suparicitaṁ hoti.
an9.25:2.11	Yato kho, bhikkhave, bhikkhuno paññāya cittaṁ suparicitaṁ hoti, tassetaṁ, bhikkhave, bhikkhuno kallaṁ vacanāya:
an9.25:2.12	‘khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’”ti.
an9.25:2.13	Pañcamaṁ.
an9.26:0.1	Aṅguttara Nikāya 9.26
an9.26:0.2	3. Sattāvāsavagga
an9.26:0.3	Silāyūpasutta
an9.26:1.1	(…)
an9.26:1.2	Ekaṁ samayaṁ āyasmā ca sāriputto āyasmā ca candikāputto rājagahe viharanti veḷuvane kalandakanivāpe.
an9.26:1.3	Tatra kho āyasmā candikāputto bhikkhū āmantesi (…):
an9.26:1.4	“devadatto, āvuso, bhikkhūnaṁ evaṁ dhammaṁ deseti:
an9.26:1.5	‘yato kho, āvuso, bhikkhuno cetasā citaṁ hoti, tassetaṁ bhikkhuno kallaṁ veyyākaraṇāya—
an9.26:1.6	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’”ti.
an9.26:2.1	Evaṁ vutte, āyasmā sāriputto āyasmantaṁ candikāputtaṁ etadavoca:
an9.26:2.2	“na kho, āvuso candikāputta, devadatto bhikkhūnaṁ evaṁ dhammaṁ deseti:
an9.26:2.3	‘yato kho, āvuso, bhikkhuno cetasā citaṁ hoti, tassetaṁ bhikkhuno kallaṁ veyyākaraṇāya—
an9.26:2.4	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an9.26:2.5	Evañca kho, āvuso, candikāputta, devadatto bhikkhūnaṁ dhammaṁ deseti:
an9.26:2.6	‘yato kho, āvuso, bhikkhuno cetasā cittaṁ suparicitaṁ hoti, tassetaṁ bhikkhuno kallaṁ veyyākaraṇāya—
an9.26:2.7	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’”ti.
an9.26:3.1	Dutiyampi kho āyasmā candikāputto bhikkhū āmantesi:
an9.26:3.2	“devadatto, āvuso, bhikkhūnaṁ evaṁ dhammaṁ deseti:
an9.26:3.3	‘yato kho, āvuso, bhikkhuno cetasā citaṁ hoti, tassetaṁ bhikkhuno kallaṁ veyyākaraṇāya—
an9.26:3.4	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’”ti.
an9.26:3.5	Dutiyampi kho āyasmā sāriputto āyasmantaṁ candikāputtaṁ etadavoca:
an9.26:3.6	“na kho, āvuso candikāputta, devadatto bhikkhūnaṁ evaṁ dhammaṁ deseti:
an9.26:3.7	‘yato kho, āvuso, bhikkhuno cetasā citaṁ hoti, tassetaṁ bhikkhuno kallaṁ veyyākaraṇāya—
an9.26:3.8	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an9.26:3.9	Evañca kho, āvuso candikāputta, devadatto bhikkhūnaṁ dhammaṁ deseti:
an9.26:3.10	‘yato kho, āvuso, bhikkhuno cetasā cittaṁ suparicitaṁ hoti, tassetaṁ bhikkhuno kallaṁ veyyākaraṇāya—
an9.26:3.11	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’”ti.
an9.26:4.1	Tatiyampi kho āyasmā candikāputto bhikkhū āmantesi:
an9.26:4.2	“devadatto, āvuso, bhikkhūnaṁ evaṁ dhammaṁ deseti:
an9.26:4.3	‘yato kho, āvuso, bhikkhuno cetasā citaṁ hoti, tassetaṁ bhikkhuno kallaṁ veyyākaraṇāya—
an9.26:4.4	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’”ti.
an9.26:4.5	Tatiyampi kho āyasmā sāriputto āyasmantaṁ candikāputtaṁ etadavoca:
an9.26:4.6	“na kho, āvuso candikāputta, devadatto bhikkhūnaṁ evaṁ dhammaṁ deseti:
an9.26:4.7	‘yato kho, āvuso, bhikkhuno cetasā citaṁ hoti, tassetaṁ bhikkhuno kallaṁ veyyākaraṇāya—
an9.26:4.8	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an9.26:4.9	Evañca kho, āvuso candikāputta, devadatto bhikkhūnaṁ dhammaṁ deseti:
an9.26:4.10	‘yato kho, āvuso, bhikkhuno cetasā cittaṁ suparicitaṁ hoti, tassetaṁ bhikkhuno kallaṁ veyyākaraṇāya—
an9.26:4.11	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an9.26:5.1	Kathañca, āvuso, bhikkhuno cetasā cittaṁ suparicitaṁ hoti?
an9.26:5.2	‘Vītarāgaṁ me cittan’ti cetasā cittaṁ suparicitaṁ hoti;
an9.26:5.3	‘vītadosaṁ me cittan’ti cetasā cittaṁ suparicitaṁ hoti;
an9.26:5.4	‘vītamohaṁ me cittan’ti cetasā cittaṁ suparicitaṁ hoti;
an9.26:5.5	‘asarāgadhammaṁ me cittan’ti cetasā cittaṁ suparicitaṁ hoti;
an9.26:5.6	‘asadosadhammaṁ me cittan’ti cetasā cittaṁ suparicitaṁ hoti;
an9.26:5.7	‘asamohadhammaṁ me cittan’ti cetasā cittaṁ suparicitaṁ hoti;
an9.26:5.8	‘anāvattidhammaṁ me cittaṁ kāmabhavāyā’ti cetasā cittaṁ suparicitaṁ hoti;
an9.26:5.9	‘anāvattidhammaṁ me cittaṁ rūpabhavāyā’ti cetasā cittaṁ suparicitaṁ hoti;
an9.26:5.10	‘anāvattidhammaṁ me cittaṁ arūpabhavāyā’ti cetasā cittaṁ suparicitaṁ hoti.
an9.26:5.11	Evaṁ sammā vimuttacittassa kho, āvuso, bhikkhuno bhusā cepi cakkhuviññeyyā rūpā cakkhussa āpāthaṁ āgacchanti, nevassa cittaṁ pariyādiyanti;
an9.26:5.12	amissīkatamevassa cittaṁ hoti ṭhitaṁ āneñjappattaṁ, vayaṁ cassānupassati.
an9.26:6.1	Seyyathāpi, āvuso, silāyūpo soḷasakukkuko.
an9.26:6.2	Tassassu aṭṭha kukkū heṭṭhā nemaṅgamā, aṭṭha kukkū upari nemassa.
an9.26:6.3	Atha puratthimāya cepi disāya āgaccheyya bhusā vātavuṭṭhi, neva naṁ saṅkampeyya na sampavedheyya;
an9.26:6.4	atha pacchimāya …
an9.26:6.5	atha uttarāya …
an9.26:6.6	atha dakkhiṇāya cepi disāya āgaccheyya bhusā vātavuṭṭhi, neva naṁ saṅkampeyya na sampavedheyya.
an9.26:6.7	Taṁ kissa hetu?
an9.26:6.8	Gambhīrattā, āvuso, nemassa, sunikhātattā silāyūpassa.
an9.26:6.9	Evamevaṁ kho, āvuso, sammā vimuttacittassa bhikkhuno bhusā cepi cakkhuviññeyyā rūpā cakkhussa āpāthaṁ āgacchanti, nevassa cittaṁ pariyādiyanti;
an9.26:6.10	amissīkatamevassa cittaṁ hoti ṭhitaṁ āneñjappattaṁ, vayaṁ cassānupassati.
an9.26:7.1	Bhusā cepi sotaviññeyyā saddā …
an9.26:7.2	ghānaviññeyyā gandhā …
an9.26:7.3	jivhāviññeyyā rasā …
an9.26:7.4	kāyaviññeyyā phoṭṭhabbā …
an9.26:7.5	manoviññeyyā dhammā manassa āpāthaṁ āgacchanti, nevassa cittaṁ pariyādiyanti;
an9.26:7.6	amissīkatamevassa cittaṁ hoti ṭhitaṁ āneñjappattaṁ, vayaṁ cassānupassatī”ti.
an9.26:7.7	Chaṭṭhaṁ.
an9.27:0.1	Aṅguttara Nikāya 9.27
an9.27:0.2	3. Sattāvāsavagga
an9.27:0.3	Paṭhamaverasutta
an9.27:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an9.27:2.1	“Yato kho, gahapati, ariyasāvakassa pañca bhayāni verāni vūpasantāni honti, catūhi ca sotāpattiyaṅgehi samannāgato hoti, so ākaṅkhamāno attanāva attānaṁ byākareyya:
an9.27:2.2	‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo’ti.
an9.27:3.1	Katamāni pañca bhayāni verāni vūpasantāni honti?
an9.27:3.2	Yaṁ, gahapati, pāṇātipātī pāṇātipātapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedeti, pāṇātipātā paṭivirato neva diṭṭhadhammikampi bhayaṁ veraṁ pasavati, na samparāyikampi bhayaṁ veraṁ pasavati, na cetasikampi dukkhaṁ domanassaṁ paṭisaṁvedeti.
an9.27:3.3	Pāṇātipātā paṭiviratassa evaṁ taṁ bhayaṁ veraṁ vūpasantaṁ hoti.
an9.27:4.1	Yaṁ, gahapati, adinnādāyī …pe…
an9.27:4.2	kāmesumicchācārī …
an9.27:4.3	musāvādī …
an9.27:4.4	surāmerayamajjapamādaṭṭhāyī surāmerayamajjapamādaṭṭhānapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedeti, surāmerayamajjapamādaṭṭhānā paṭivirato neva diṭṭhadhammikampi bhayaṁ veraṁ pasavati, na samparāyikampi bhayaṁ veraṁ pasavati, na cetasikampi dukkhaṁ domanassaṁ paṭisaṁvedeti.
an9.27:4.5	Surāmerayamajjapamādaṭṭhānā paṭiviratassa evaṁ taṁ bhayaṁ veraṁ vūpasantaṁ hoti.
an9.27:5.1	Imāni pañca bhayāni verāni vūpasantāni honti.
an9.27:6.1	“Katamehi catūhi sotāpattiyaṅgehi samannāgato hoti?
an9.27:6.2	Idha, gahapati, ariyasāvako buddhe aveccappasādena samannāgato hoti:
an9.27:6.3	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an9.27:7.1	Dhamme aveccappasādena samannāgato hoti:
an9.27:7.2	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.
an9.27:8.1	Saṅghe aveccappasādena samannāgato hoti:
an9.27:8.2	‘suppaṭipanno bhagavato sāvakasaṅgho ujuppaṭipanno bhagavato sāvakasaṅgho ñāyappaṭipanno bhagavato sāvakasaṅgho sāmīcippaṭipanno bhagavato sāvakasaṅgho; yadidaṁ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.
an9.27:9.1	Ariyakantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṁvattanikehi.
an9.27:9.2	Imehi catūhi sotāpattiyaṅgehi samannāgato hoti.
an9.27:10.1	Yato kho, gahapati, ariyasāvakassa imāni pañca bhayāni verāni vūpasantāni honti, imehi ca catūhi sotāpattiyaṅgehi samannāgato hoti, so ākaṅkhamāno attanāva attānaṁ byākareyya:
an9.27:10.2	‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto; sotāpannohamasmi avinipātadhammo niyato sambodhiparāyaṇo’”ti.
an9.27:10.3	Sattamaṁ.
an9.28:0.1	Aṅguttara Nikāya 9.28
an9.28:0.2	3. Sattāvāsavagga
an9.28:0.3	Dutiyaverasutta
an9.28:1.1	“Yato kho, bhikkhave, ariyasāvakassa pañca bhayāni verāni vūpasantāni honti, catūhi ca sotāpattiyaṅgehi samannāgato hoti, so ākaṅkhamāno attanāva attānaṁ byākareyya:
an9.28:1.2	‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto; sotāpannohamasmi avinipātadhammo niyato sambodhiparāyaṇo’”ti.
an9.28:2.1	Katamāni pañca bhayāni verāni vūpasantāni honti?
an9.28:2.2	Yaṁ, bhikkhave, pāṇātipātī pāṇātipātapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedeti, pāṇātipātā paṭivirato …pe…
an9.28:2.3	evaṁ taṁ bhayaṁ veraṁ vūpasantaṁ hoti.
an9.28:3.1	Yaṁ, bhikkhave, adinnādāyī …pe…
an9.28:3.2	surāmerayamajjapamādaṭṭhāyī surāmerayamajjapamādaṭṭhānapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedeti, surāmerayamajjapamādaṭṭhānā paṭivirato neva diṭṭhadhammikampi bhayaṁ veraṁ pasavati, na samparāyikampi bhayaṁ veraṁ pasavati, na cetasikampi dukkhaṁ domanassaṁ paṭisaṁvedeti.
an9.28:3.3	Surāmerayamajjapamādaṭṭhānā paṭiviratassa evaṁ taṁ bhayaṁ veraṁ vūpasantaṁ hoti.
an9.28:3.4	Imāni pañca bhayāni verāni vūpasantāni honti.
an9.28:4.1	Katamehi catūhi sotāpattiyaṅgehi samannāgato hoti?
an9.28:4.2	Idha, bhikkhave, ariyasāvako buddhe aveccappasādena samannāgato hoti:
an9.28:4.3	‘itipi so bhagavā …pe… satthā devamanussānaṁ buddho bhagavā’ti.
an9.28:4.4	Dhamme …pe…
an9.28:4.5	saṅghe …
an9.28:4.6	ariyakantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṁvattanikehi.
an9.28:4.7	Imehi catūhi sotāpattiyaṅgehi samannāgato hoti.
an9.28:5.1	Yato kho, bhikkhave, ariyasāvakassa imāni pañca bhayāni verāni vūpasantāni honti, imehi ca catūhi sotāpattiyaṅgehi samannāgato hoti, so ākaṅkhamāno attanāva attānaṁ byākareyya:
an9.28:5.2	‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto; sotāpannohamasmi avinipātadhammo niyato sambodhiparāyaṇo’”ti.
an9.28:5.3	Aṭṭhamaṁ.
an9.29:0.1	Aṅguttara Nikāya 9.29
an9.29:0.2	3. Sattāvāsavagga
an9.29:0.3	Āghātavatthusutta
an9.29:1.1	“Navayimāni, bhikkhave, āghātavatthūni.
an9.29:1.2	Katamāni nava?
an9.29:1.3	‘Anatthaṁ me acarī’ti āghātaṁ bandhati;
an9.29:1.4	‘anatthaṁ me caratī’ti āghātaṁ bandhati;
an9.29:1.5	‘anatthaṁ me carissatī’ti āghātaṁ bandhati;
an9.29:1.6	‘piyassa me manāpassa anatthaṁ acarī’ti …pe…
an9.29:1.7	‘anatthaṁ caratī’ti …pe…
an9.29:1.8	‘anatthaṁ carissatī’ti āghātaṁ bandhati;
an9.29:1.9	‘appiyassa me amanāpassa atthaṁ acarī’ti …pe…
an9.29:1.10	‘atthaṁ caratī’ti …pe…
an9.29:1.11	‘atthaṁ carissatī’ti āghātaṁ bandhati.
an9.29:1.12	Imāni kho, bhikkhave, nava āghātavatthūnī”ti.
an9.29:1.13	Navamaṁ.
an9.30:0.1	Aṅguttara Nikāya 9.30
an9.30:0.2	3. Sattāvāsavagga
an9.30:0.3	Āghātapaṭivinayasutta
an9.30:1.1	“Navayime, bhikkhave, āghātapaṭivinayā.
an9.30:1.2	Katame nava?
an9.30:1.3	‘Anatthaṁ me acari, taṁ kutettha labbhā’ti āghātaṁ paṭivineti;
an9.30:1.4	‘anatthaṁ me carati, taṁ kutettha labbhā’ti āghātaṁ paṭivineti;
an9.30:1.5	‘anatthaṁ me carissati, taṁ kutettha labbhā’ti āghātaṁ paṭivineti;
an9.30:1.6	piyassa me manāpassa anatthaṁ acari …pe…
an9.30:1.7	anatthaṁ carati …pe…
an9.30:1.8	‘anatthaṁ carissati, taṁ kutettha labbhā’ti āghātaṁ paṭivineti;
an9.30:1.9	appiyassa me amanāpassa atthaṁ acari …pe…
an9.30:1.10	atthaṁ carati …pe…
an9.30:1.11	‘atthaṁ carissati, taṁ kutettha labbhā’ti āghātaṁ paṭivineti.
an9.30:1.12	Ime kho, bhikkhave, nava āghātapaṭivinayā”ti.
an9.30:1.13	Dasamaṁ.
an9.31:0.1	Aṅguttara Nikāya 9.31
an9.31:0.2	3. Sattāvāsavagga
an9.31:0.3	Anupubbanirodhasutta
an9.31:1.1	“Navayime, bhikkhave, anupubbanirodhā.
an9.31:1.2	Katame nava?
an9.31:1.3	Paṭhamaṁ jhānaṁ samāpannassa kāmasaññā niruddhā hoti;
an9.31:1.4	dutiyaṁ jhānaṁ samāpannassa vitakkavicārā niruddhā honti;
an9.31:1.5	tatiyaṁ jhānaṁ samāpannassa pīti niruddhā hoti;
an9.31:1.6	catutthaṁ jhānaṁ samāpannassa assāsapassāsā niruddhā honti;
an9.31:1.7	ākāsānañcāyatanaṁ samāpannassa rūpasaññā niruddhā hoti;
an9.31:1.8	viññāṇañcāyatanaṁ samāpannassa ākāsānañcāyatanasaññā niruddhā hoti;
an9.31:1.9	ākiñcaññāyatanaṁ samāpannassa viññāṇañcāyatanasaññā niruddhā hoti;
an9.31:1.10	nevasaññānāsaññāyatanaṁ samāpannassa ākiñcaññāyatanasaññā niruddhā hoti;
an9.31:1.11	saññāvedayitanirodhaṁ samāpannassa saññā ca vedanā ca niruddhā honti.
an9.31:1.12	Ime kho, bhikkhave, nava anupubbanirodhā”ti.
an9.31:1.13	Ekādasamaṁ.
an9.31:1.14	Sattāvāsavaggo tatiyo.
an9.31:2.0	Tassuddānaṁ
an9.31:2.1	Tiṭhānaṁ khaḷuṅko taṇhā,
an9.31:2.2	Sattapaññā silāyupo;
an9.31:2.3	Dve verā dve āghātāni,
an9.31:2.4	Anupubbanirodhena cāti.
an9.32:0.1	Aṅguttara Nikāya 9.32
an9.32:0.2	4. Mahāvagga
an9.32:0.3	Anupubbavihārasutta
an9.32:1.1	“Navayime, bhikkhave, anupubbavihārā.
an9.32:1.2	Katame nava?
an9.32:1.3	Paṭhamaṁ jhānaṁ, dutiyaṁ jhānaṁ, tatiyaṁ jhānaṁ, catutthaṁ jhānaṁ, ākāsānañcāyatanaṁ, viññāṇañcāyatanaṁ, ākiñcaññāyatanaṁ, nevasaññānāsaññāyatanaṁ, saññāvedayitanirodho—
an9.32:1.4	ime kho, bhikkhave, nava anupubbavihārā”ti.
an9.32:1.5	Paṭhamaṁ.
an9.33:0.1	Aṅguttara Nikāya 9.33
an9.33:0.2	4. Mahāvagga
an9.33:0.3	Anupubbavihārasamāpattisutta
an9.33:1.1	“Navayimā, bhikkhave, anupubbavihārasamāpattiyo desessāmi, taṁ suṇātha …pe…
an9.33:1.2	katamā ca, bhikkhave, nava anupubbavihārasamāpattiyo?
an9.33:1.3	Yattha kāmā nirujjhanti, ye ca kāme nirodhetvā nirodhetvā viharanti, ‘addhā te āyasmanto nicchātā nibbutā tiṇṇā pāraṅgatā tadaṅgenā’ti vadāmi.
an9.33:1.4	‘Kattha kāmā nirujjhanti, ke ca kāme nirodhetvā nirodhetvā viharanti—
an9.33:1.5	ahametaṁ na jānāmi ahametaṁ na passāmī’ti, iti yo evaṁ vadeyya, so evamassa vacanīyo:
an9.33:1.6	‘idhāvuso, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an9.33:1.7	Ettha kāmā nirujjhanti, te ca kāme nirodhetvā nirodhetvā viharantī’ti.
an9.33:1.8	Addhā, bhikkhave, asaṭho amāyāvī ‘sādhū’ti bhāsitaṁ abhinandeyya anumodeyya;
an9.33:1.9	‘sādhū’ti bhāsitaṁ abhinanditvā anumoditvā namassamāno pañjaliko payirupāseyya.
an9.33:2.1	Yattha vitakkavicārā nirujjhanti, ye ca vitakkavicāre nirodhetvā nirodhetvā viharanti, ‘addhā te āyasmanto nicchātā nibbutā tiṇṇā pāraṅgatā tadaṅgenā’ti vadāmi.
an9.33:2.2	‘Kattha vitakkavicārā nirujjhanti, ke ca vitakkavicāre nirodhetvā nirodhetvā viharanti—
an9.33:2.3	ahametaṁ na jānāmi ahametaṁ na passāmī’ti, iti yo evaṁ vadeyya, so evamassa vacanīyo:
an9.33:2.4	‘idhāvuso, bhikkhu vitakkavicārānaṁ vūpasamā …pe… dutiyaṁ jhānaṁ upasampajja viharati;
an9.33:2.5	ettha vitakkavicārā nirujjhanti, te ca vitakkavicāre nirodhetvā nirodhetvā viharantī’ti.
an9.33:2.6	Addhā, bhikkhave, asaṭho amāyāvī ‘sādhū’ti bhāsitaṁ abhinandeyya anumodeyya;
an9.33:2.7	‘sādhū’ti bhāsitaṁ abhinanditvā anumoditvā namassamāno pañjaliko payirupāseyya.
an9.33:3.1	Yattha pīti nirujjhati, ye ca pītiṁ nirodhetvā nirodhetvā viharanti, ‘addhā te āyasmanto nicchātā nibbutā tiṇṇā pāraṅgatā tadaṅgenā’ti vadāmi.
an9.33:3.2	‘Kattha pīti nirujjhati, ke ca pītiṁ nirodhetvā nirodhetvā viharanti—
an9.33:3.3	ahametaṁ na jānāmi ahametaṁ na passāmī’ti, iti yo evaṁ vadeyya, so evamassa vacanīyo:
an9.33:3.4	‘idhāvuso, bhikkhu pītiyā ca virāgā …pe… tatiyaṁ jhānaṁ upasampajja viharati;
an9.33:3.5	ettha pīti nirujjhati, te ca pītiṁ nirodhetvā nirodhetvā viharantī’ti.
an9.33:3.6	Addhā, bhikkhave, asaṭho amāyāvī ‘sādhū’ti bhāsitaṁ abhinandeyya anumodeyya;
an9.33:3.7	‘sādhū’ti bhāsitaṁ abhinanditvā anumoditvā namassamāno pañjaliko payirupāseyya.
an9.33:4.1	Yattha upekkhāsukhaṁ nirujjhati, ye ca upekkhāsukhaṁ nirodhetvā nirodhetvā viharanti, ‘addhā te āyasmanto nicchātā nibbutā tiṇṇā pāraṅgatā tadaṅgenā’ti vadāmi.
an9.33:4.2	‘Kattha upekkhāsukhaṁ nirujjhati, ke ca upekkhāsukhaṁ nirodhetvā nirodhetvā viharanti—
an9.33:4.3	ahametaṁ na jānāmi ahametaṁ na passāmī’ti, iti yo evaṁ vadeyya, so evamassa vacanīyo:
an9.33:4.4	‘idhāvuso, bhikkhu sukhassa ca pahānā …pe… catutthaṁ jhānaṁ upasampajja viharati;
an9.33:4.5	ettha upekkhāsukhaṁ nirujjhati, te ca upekkhāsukhaṁ nirodhetvā nirodhetvā viharantī’ti.
an9.33:4.6	Addhā, bhikkhave, asaṭho amāyāvī ‘sādhū’ti bhāsitaṁ abhinandeyya anumodeyya;
an9.33:4.7	‘sādhū’ti bhāsitaṁ abhinanditvā anumoditvā namassamāno pañjaliko payirupāseyya.
an9.33:5.1	Yattha rūpasaññā nirujjhati, ye ca rūpasaññaṁ nirodhetvā nirodhetvā viharanti, ‘addhā te āyasmanto nicchātā nibbutā tiṇṇā pāraṅgatā tadaṅgenā’ti vadāmi.
an9.33:5.2	‘Kattha rūpasaññā nirujjhati, ke ca rūpasaññaṁ nirodhetvā nirodhetvā viharanti—
an9.33:5.3	ahametaṁ na jānāmi ahametaṁ na passāmī’ti, iti yo evaṁ vadeyya, so evamassa vacanīyo:
an9.33:5.4	‘idhāvuso, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ananto ākāsoti ākāsānañcāyatanaṁ upasampajja viharati.
an9.33:5.5	Ettha rūpasaññā nirujjhati, te ca rūpasaññaṁ nirodhetvā nirodhetvā viharantī’ti.
an9.33:5.6	Addhā, bhikkhave, asaṭho amāyāvī ‘sādhū’ti bhāsitaṁ abhinandeyya anumodeyya;
an9.33:5.7	‘sādhū’ti bhāsitaṁ abhinanditvā anumoditvā namassamāno pañjaliko payirupāseyya.
an9.33:6.1	Yattha ākāsānañcāyatanasaññā nirujjhati, ye ca ākāsānañcāyatanasaññaṁ nirodhetvā nirodhetvā viharanti, ‘addhā te āyasmanto nicchātā nibbutā tiṇṇā pāraṅgatā tadaṅgenā’ti vadāmi.
an9.33:6.2	‘Kattha ākāsānañcāyatanasaññā nirujjhati, ke ca ākāsānañcāyatanasaññaṁ nirodhetvā nirodhetvā viharanti—
an9.33:6.3	ahametaṁ na jānāmi ahametaṁ na passāmī’ti, iti yo evaṁ vadeyya, so evamassa vacanīyo:
an9.33:6.4	‘idhāvuso, bhikkhu sabbaso ākāsānañcāyatanaṁ samatikkamma anantaṁ viññāṇanti viññāṇañcāyatanaṁ upasampajja viharati.
an9.33:6.5	Ettha ākāsānañcāyatanasaññā nirujjhati, te ca ākāsānañcāyatanasaññaṁ nirodhetvā nirodhetvā viharantī’ti.
an9.33:6.6	Addhā, bhikkhave, asaṭho amāyāvī ‘sādhū’ti bhāsitaṁ abhinandeyya anumodeyya;
an9.33:6.7	‘sādhū’ti bhāsitaṁ abhinanditvā anumoditvā namassamāno pañjaliko payirupāseyya.
an9.33:7.1	Yattha viññāṇañcāyatanasaññā nirujjhati, ye ca viññāṇañcāyatanasaññaṁ nirodhetvā nirodhetvā viharanti, ‘addhā te āyasmanto nicchātā nibbutā tiṇṇā pāraṅgatā tadaṅgenā’ti vadāmi.
an9.33:7.2	‘Kattha viññāṇañcāyatanasaññā nirujjhati, ke ca viññāṇañcāyatanasaññaṁ nirodhetvā nirodhetvā viharanti—
an9.33:7.3	ahametaṁ na jānāmi ahametaṁ na passāmī’ti, iti yo evaṁ vadeyya, so evamassa vacanīyo:
an9.33:7.4	‘idhāvuso, bhikkhu sabbaso viññāṇañcāyatanaṁ samatikkamma natthi kiñcīti ākiñcaññāyatanaṁ upasampajja viharati.
an9.33:7.5	Ettha viññāṇañcāyatanasaññā nirujjhati, te ca viññāṇañcāyatanasaññaṁ nirodhetvā nirodhetvā viharantī’ti.
an9.33:7.6	Addhā, bhikkhave, asaṭho amāyāvī ‘sādhū’ti bhāsitaṁ abhinandeyya anumodeyya;
an9.33:7.7	‘sādhū’ti bhāsitaṁ abhinanditvā anumoditvā namassamāno pañjaliko payirupāseyya.
an9.33:8.1	Yattha ākiñcaññāyatanasaññā nirujjhati, ye ca ākiñcaññāyatanasaññaṁ nirodhetvā nirodhetvā viharanti, ‘addhā te āyasmanto nicchātā nibbutā tiṇṇā pāraṅgatā tadaṅgenā’ti vadāmi.
an9.33:8.2	‘Kattha ākiñcaññāyatanasaññā nirujjhati, ke ca ākiñcaññāyatanasaññaṁ nirodhetvā nirodhetvā viharanti—
an9.33:8.3	ahametaṁ na jānāmi ahametaṁ na passāmī’ti, iti yo evaṁ vadeyya, so evamassa vacanīyo:
an9.33:8.4	‘idhāvuso, bhikkhu sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
an9.33:8.5	Ettha ākiñcaññāyatanasaññā nirujjhati, te ca ākiñcaññāyatanasaññaṁ nirodhetvā nirodhetvā viharantī’ti.
an9.33:8.6	Addhā, bhikkhave, asaṭho amāyāvī ‘sādhū’ti bhāsitaṁ abhinandeyya anumodeyya;
an9.33:8.7	‘sādhū’ti bhāsitaṁ abhinanditvā anumoditvā namassamāno pañjaliko payirupāseyya.
an9.33:9.1	Yattha nevasaññānāsaññāyatanasaññā nirujjhati, ye ca nevasaññānāsaññāyatanasaññaṁ nirodhetvā nirodhetvā viharanti, ‘addhā te āyasmanto nicchātā nibbutā tiṇṇā pāraṅgatā tadaṅgenā’ti vadāmi.
an9.33:9.2	‘Kattha nevasaññānāsaññāyatanasaññā nirujjhati, ke ca nevasaññānāsaññāyatanasaññaṁ nirodhetvā nirodhetvā viharanti—
an9.33:9.3	ahametaṁ na jānāmi ahametaṁ na passāmī’ti, iti yo evaṁ vadeyya, so evamassa vacanīyo:
an9.33:9.4	‘idhāvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati.
an9.33:9.5	Ettha nevasaññānāsaññāyatanasaññā nirujjhati, te ca nevasaññānāsaññāyatanasaññaṁ nirodhetvā nirodhetvā viharantī’ti.
an9.33:9.6	Addhā, bhikkhave, asaṭho amāyāvī ‘sādhū’ti bhāsitaṁ abhinandeyya anumodeyya;
an9.33:9.7	‘sādhū’ti bhāsitaṁ abhinanditvā anumoditvā namassamāno pañjaliko payirupāseyya.
an9.33:10.1	Imā kho, bhikkhave, nava anupubbavihārasamāpattiyo”ti.
an9.33:10.2	Dutiyaṁ.
an9.34:0.1	Aṅguttara Nikāya 9.34
an9.34:0.2	4. Mahāvagga
an9.34:0.3	Nibbānasukhasutta
an9.34:1.1	Ekaṁ samayaṁ āyasmā sāriputto rājagahe viharati veḷuvane kalandakanivāpe.
an9.34:1.2	Tatra kho āyasmā sāriputto bhikkhū āmantesi:
an9.34:1.3	“sukhamidaṁ, āvuso, nibbānaṁ.
an9.34:1.4	Sukhamidaṁ, āvuso, nibbānan”ti.
an9.34:1.5	Evaṁ vutte, āyasmā udāyī āyasmantaṁ sāriputtaṁ etadavoca:
an9.34:1.6	“kiṁ panettha, āvuso sāriputta, sukhaṁ yadettha natthi vedayitan”ti?
an9.34:1.7	“Etadeva khvettha, āvuso, sukhaṁ yadettha natthi vedayitaṁ.
an9.34:1.8	Pañcime, āvuso, kāmaguṇā.
an9.34:1.9	Katame pañca?
an9.34:1.10	Cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā,
an9.34:1.11	sotaviññeyyā saddā …pe…
an9.34:1.12	ghānaviññeyyā gandhā …
an9.34:1.13	jivhāviññeyyā rasā …
an9.34:1.14	kāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā—
an9.34:1.15	ime kho, āvuso, pañca kāmaguṇā.
an9.34:1.16	Yaṁ kho, āvuso, ime pañca kāmaguṇe paṭicca uppajjati sukhaṁ somanassaṁ, idaṁ vuccatāvuso, kāmasukhaṁ.
an9.34:2.1	Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.34:2.2	Tassa ce, āvuso, bhikkhuno iminā vihārena viharato kāmasahagatā saññāmanasikārā samudācaranti, svassa hoti ābādho.
an9.34:2.3	Seyyathāpi, āvuso, sukhino dukkhaṁ uppajjeyya yāvadeva ābādhāya;
an9.34:2.4	evamevassa te kāmasahagatā saññāmanasikārā samudācaranti. Svassa hoti ābādho.
an9.34:2.5	Yo kho panāvuso, ābādho dukkhametaṁ vuttaṁ bhagavatā.
an9.34:2.6	Imināpi kho etaṁ, āvuso, pariyāyena veditabbaṁ yathā sukhaṁ nibbānaṁ.
an9.34:3.1	Puna caparaṁ, āvuso, bhikkhu vitakkavicārānaṁ vūpasamā …pe… dutiyaṁ jhānaṁ upasampajja viharati.
an9.34:3.2	Tassa ce, āvuso, bhikkhuno iminā vihārena viharato vitakkasahagatā saññāmanasikārā samudācaranti, svassa hoti ābādho.
an9.34:3.3	Seyyathāpi, āvuso, sukhino dukkhaṁ uppajjeyya yāvadeva ābādhāya;
an9.34:3.4	evamevassa te vitakkasahagatā saññāmanasikārā samudācaranti. Svassa hoti ābādho.
an9.34:3.5	Yo kho panāvuso, ābādho dukkhametaṁ vuttaṁ bhagavatā.
an9.34:3.6	Imināpi kho etaṁ, āvuso, pariyāyena veditabbaṁ yathā sukhaṁ nibbānaṁ.
an9.34:4.1	Puna caparaṁ, āvuso, bhikkhu pītiyā ca virāgā …pe… tatiyaṁ jhānaṁ upasampajja viharati.
an9.34:4.2	Tassa ce, āvuso, bhikkhuno iminā vihārena viharato pītisahagatā saññāmanasikārā samudācaranti, svassa hoti ābādho.
an9.34:4.3	Seyyathāpi, āvuso, sukhino dukkhaṁ uppajjeyya yāvadeva ābādhāya;
an9.34:4.4	evamevassa te pītisahagatā saññāmanasikārā samudācaranti. Svassa hoti ābādho.
an9.34:4.5	Yo kho panāvuso, ābādho dukkhametaṁ vuttaṁ bhagavatā.
an9.34:4.6	Imināpi kho etaṁ, āvuso, pariyāyena veditabbaṁ yathā sukhaṁ nibbānaṁ.
an9.34:5.1	Puna caparaṁ, āvuso, bhikkhu sukhassa ca pahānā …pe… catutthaṁ jhānaṁ upasampajja viharati.
an9.34:5.2	Tassa ce, āvuso, bhikkhuno iminā vihārena viharato upekkhāsahagatā saññāmanasikārā samudācaranti, svassa hoti ābādho.
an9.34:5.3	Seyyathāpi, āvuso, sukhino dukkhaṁ uppajjeyya yāvadeva ābādhāya;
an9.34:5.4	evamevassa te upekkhāsahagatā saññāmanasikārā samudācaranti. Svassa hoti ābādho.
an9.34:5.5	Yo kho panāvuso, ābādho dukkhametaṁ vuttaṁ bhagavatā.
an9.34:5.6	Imināpi kho etaṁ, āvuso, pariyāyena veditabbaṁ yathā sukhaṁ nibbānaṁ.
an9.34:6.1	Puna caparaṁ, āvuso, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ananto ākāsoti ākāsānañcāyatanaṁ upasampajja viharati.
an9.34:6.2	Tassa ce, āvuso, bhikkhuno iminā vihārena viharato rūpasahagatā saññāmanasikārā samudācaranti, svassa hoti ābādho.
an9.34:6.3	Seyyathāpi, āvuso, sukhino dukkhaṁ uppajjeyya yāvadeva ābādhāya;
an9.34:6.4	evamevassa te rūpasahagatā saññāmanasikārā samudācaranti. Svassa hoti ābādho.
an9.34:6.5	Yo kho panāvuso, ābādho dukkhametaṁ vuttaṁ bhagavatā.
an9.34:6.6	Imināpi kho etaṁ, āvuso, pariyāyena veditabbaṁ yathā sukhaṁ nibbānaṁ.
an9.34:7.1	Puna caparaṁ, āvuso, bhikkhu sabbaso ākāsānañcāyatanaṁ samatikkamma anantaṁ viññāṇanti viññāṇañcāyatanaṁ upasampajja viharati.
an9.34:7.2	Tassa ce, āvuso, bhikkhuno iminā vihārena viharato ākāsānañcāyatanasahagatā saññāmanasikārā samudācaranti, svassa hoti ābādho.
an9.34:7.3	Seyyathāpi, āvuso, sukhino dukkhaṁ uppajjeyya yāvadeva ābādhāya;
an9.34:7.4	evamevassa te ākāsānañcāyatanasahagatā saññāmanasikārā samudācaranti. Svassa hoti ābādho.
an9.34:7.5	Yo kho panāvuso, ābādho dukkhametaṁ vuttaṁ bhagavatā.
an9.34:7.6	Imināpi kho etaṁ, āvuso, pariyāyena veditabbaṁ yathā sukhaṁ nibbānaṁ.
an9.34:8.1	Puna caparaṁ, āvuso, bhikkhu sabbaso viññāṇañcāyatanaṁ samatikkamma, natthi kiñcīti ākiñcaññāyatanaṁ upasampajja viharati.
an9.34:8.2	Tassa ce, āvuso, bhikkhuno iminā vihārena viharato viññāṇañcāyatanasahagatā saññāmanasikārā samudācaranti, svassa hoti ābādho.
an9.34:8.3	Seyyathāpi, āvuso, sukhino dukkhaṁ uppajjeyya yāvadeva ābādhāya;
an9.34:8.4	evamevassa te viññāṇañcāyatanasahagatā saññāmanasikārā samudācaranti. Svassa hoti ābādho.
an9.34:8.5	Yo kho panāvuso, ābādho dukkhametaṁ vuttaṁ bhagavatā.
an9.34:8.6	Imināpi kho etaṁ, āvuso, pariyāyena veditabbaṁ yathā sukhaṁ nibbānaṁ.
an9.34:9.1	Puna caparaṁ, āvuso, bhikkhu sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
an9.34:9.2	Tassa ce, āvuso, bhikkhuno iminā vihārena viharato ākiñcaññāyatanasahagatā saññāmanasikārā samudācaranti, svassa hoti ābādho.
an9.34:9.3	Seyyathāpi, āvuso, sukhino dukkhaṁ uppajjeyya yāvadeva ābādhāya;
an9.34:9.4	evamevassa te ākiñcaññāyatanasahagatā saññāmanasikārā samudācaranti. Svassa hoti ābādho.
an9.34:9.5	Yo kho panāvuso, ābādho dukkhametaṁ vuttaṁ bhagavatā.
an9.34:9.6	Imināpi kho etaṁ, āvuso, pariyāyena veditabbaṁ yathā sukhaṁ nibbānaṁ.
an9.34:10.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.34:11.1	Imināpi kho etaṁ, āvuso, pariyāyena veditabbaṁ yathā sukhaṁ nibbānan”ti.
an9.34:11.2	Tatiyaṁ.
an9.35:0.1	Aṅguttara Nikāya 9.35
an9.35:0.2	4. Mahāvagga
an9.35:0.3	Gāvīupamāsutta
an9.35:1.1	“Seyyathāpi, bhikkhave, gāvī pabbateyyā bālā abyattā akhettaññū akusalā visame pabbate carituṁ.
an9.35:1.2	Tassā evamassa:
an9.35:1.3	‘yannūnāhaṁ agatapubbañceva disaṁ gaccheyyaṁ, akhāditapubbāni ca tiṇāni khādeyyaṁ, apītapubbāni ca pānīyāni piveyyan’ti.
an9.35:1.4	Sā purimaṁ pādaṁ na suppatiṭṭhitaṁ patiṭṭhāpetvā pacchimaṁ pādaṁ uddhareyya.
an9.35:1.5	Sā na ceva agatapubbaṁ disaṁ gaccheyya, na ca akhāditapubbāni tiṇāni khādeyya, na ca apītapubbāni pānīyāni piveyya;
an9.35:1.6	yasmiṁ cassā padese ṭhitāya evamassa:
an9.35:1.7	‘yannūnāhaṁ agatapubbañceva disaṁ gaccheyyaṁ, akhāditapubbāni ca tiṇāni khādeyyaṁ, apītapubbāni ca pānīyāni piveyyan’ti tañca padesaṁ na sotthinā paccāgaccheyya.
an9.35:1.8	Taṁ kissa hetu?
an9.35:1.9	Tathā hi sā, bhikkhave, gāvī pabbateyyā bālā abyattā akhettaññū akusalā visame pabbate carituṁ.
an9.35:1.10	Evamevaṁ kho, bhikkhave, idhekacco bhikkhu bālo abyatto akhettaññū akusalo vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati;
an9.35:1.11	so taṁ nimittaṁ na āsevati na bhāveti na bahulīkaroti na svādhiṭṭhitaṁ adhiṭṭhāti.
an9.35:2.1	Tassa evaṁ hoti:
an9.35:2.2	‘yannūnāhaṁ vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja vihareyyan’ti.
an9.35:2.3	So na sakkoti vitakkavicārānaṁ vūpasamā …pe… dutiyaṁ jhānaṁ upasampajja viharituṁ.
an9.35:2.4	Tassa evaṁ hoti:
an9.35:2.5	‘yannūnāhaṁ vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja vihareyyan’ti.
an9.35:2.6	So na sakkoti vivicceva kāmehi …pe… paṭhamaṁ jhānaṁ upasampajja viharituṁ.
an9.35:2.7	Ayaṁ vuccati, bhikkhave, ‘bhikkhu ubhato bhaṭṭho ubhato parihīno, seyyathāpi sā gāvī pabbateyyā bālā abyattā akhettaññū akusalā visame pabbate carituṁ’.
an9.35:3.1	Seyyathāpi, bhikkhave, gāvī pabbateyyā paṇḍitā byattā khettaññū kusalā visame pabbate carituṁ.
an9.35:3.2	Tassā evamassa:
an9.35:3.3	‘yannūnāhaṁ agatapubbañceva disaṁ gaccheyyaṁ, akhāditapubbāni ca tiṇāni khādeyyaṁ, apītapubbāni ca pānīyāni piveyyan’ti.
an9.35:3.4	Sā purimaṁ pādaṁ suppatiṭṭhitaṁ patiṭṭhāpetvā pacchimaṁ pādaṁ uddhareyya.
an9.35:3.5	Sā agatapubbañceva disaṁ gaccheyya, akhāditapubbāni ca tiṇāni khādeyya, apītapubbāni ca pānīyāni piveyya.
an9.35:3.6	Yasmiṁ cassā padese ṭhitāya evamassa:
an9.35:3.7	‘yannūnāhaṁ agatapubbañceva disaṁ gaccheyyaṁ, akhāditapubbāni ca tiṇāni khādeyyaṁ, apītapubbāni ca pānīyāni piveyyan’ti tañca padesaṁ sotthinā paccāgaccheyya.
an9.35:3.8	Taṁ kissa hetu?
an9.35:3.9	Tathā hi sā, bhikkhave, gāvī pabbateyyā paṇḍitā byattā khettaññū kusalā visame pabbate carituṁ.
an9.35:3.10	Evamevaṁ kho, bhikkhave, idhekacco bhikkhu paṇḍito byatto khettaññū kusalo vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an9.35:3.11	So taṁ nimittaṁ āsevati bhāveti bahulīkaroti svādhiṭṭhitaṁ adhiṭṭhāti.
an9.35:4.1	Tassa evaṁ hoti:
an9.35:4.2	‘yannūnāhaṁ vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja vihareyyan’ti.
an9.35:4.3	So dutiyaṁ jhānaṁ anabhihiṁsamāno vitakkavicārānaṁ vūpasamā … dutiyaṁ jhānaṁ upasampajja viharati.
an9.35:4.4	So taṁ nimittaṁ āsevati bhāveti bahulīkaroti svādhiṭṭhitaṁ adhiṭṭhāti.
an9.35:5.1	Tassa evaṁ hoti:
an9.35:5.2	‘yannūnāhaṁ pītiyā ca virāgā upekkhako ca vihareyyaṁ sato ca sampajāno, sukhañca kāyena paṭisaṁvedeyyaṁ yaṁ taṁ ariyā ācikkhanti—upekkhako satimā sukhavihārīti tatiyaṁ jhānaṁ upasampajja vihareyyan’ti.
an9.35:5.3	So tatiyaṁ jhānaṁ anabhihiṁsamāno pītiyā ca virāgā … tatiyaṁ jhānaṁ upasampajja viharati.
an9.35:5.4	So taṁ nimittaṁ āsevati bhāveti bahulīkaroti svādhiṭṭhitaṁ adhiṭṭhāti.
an9.35:6.1	Tassa evaṁ hoti:
an9.35:6.2	‘yannūnāhaṁ sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja vihareyyan’ti.
an9.35:6.3	So catutthaṁ jhānaṁ anabhihiṁsamāno sukhassa ca pahānā …pe… catutthaṁ jhānaṁ upasampajja viharati.
an9.35:6.4	So taṁ nimittaṁ āsevati bhāveti bahulīkaroti svādhiṭṭhitaṁ adhiṭṭhāti.
an9.35:7.1	Tassa evaṁ hoti:
an9.35:7.2	‘yannūnāhaṁ sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ananto ākāsoti ākāsānañcāyatanaṁ upasampajja vihareyyan’ti.
an9.35:7.3	So ākāsānañcāyatanaṁ anabhihiṁsamāno sabbaso rūpasaññānaṁ samatikkamā …pe… ākāsānañcāyatanaṁ upasampajja viharati.
an9.35:7.4	So taṁ nimittaṁ āsevati bhāveti bahulīkaroti svādhiṭṭhitaṁ adhiṭṭhāti.
an9.35:8.1	Tassa evaṁ hoti:
an9.35:8.2	‘yannūnāhaṁ sabbaso ākāsānañcāyatanaṁ samatikkamma anantaṁ viññāṇanti viññāṇañcāyatanaṁ upasampajja vihareyyan’ti.
an9.35:8.3	So viññāṇañcāyatanaṁ anabhihiṁsamāno sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.
an9.35:8.4	So taṁ nimittaṁ āsevati bhāveti bahulīkaroti svādhiṭṭhitaṁ adhiṭṭhāti.
an9.35:9.1	Tassa evaṁ hoti:
an9.35:9.2	‘yannūnāhaṁ sabbaso viññāṇañcāyatanaṁ samatikkamma natthi kiñcīti ākiñcaññāyatanaṁ upasampajja vihareyyan’ti.
an9.35:9.3	So ākiñcaññāyatanaṁ anabhihiṁsamāno sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
an9.35:9.4	So taṁ nimittaṁ āsevati bhāveti bahulīkaroti svādhiṭṭhitaṁ adhiṭṭhāti.
an9.35:10.1	Tassa evaṁ hoti:
an9.35:10.2	‘yannūnāhaṁ sabbaso ākiñcaññāyatanaṁ samatikkamma nevasaññānāsaññāyatanaṁ upasampajja vihareyyan’ti.
an9.35:10.3	So nevasaññānāsaññāyatanaṁ anabhihiṁsamāno sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
an9.35:10.4	So taṁ nimittaṁ āsevati bhāveti bahulīkaroti svādhiṭṭhitaṁ adhiṭṭhāti.
an9.35:11.1	Tassa evaṁ hoti:
an9.35:11.2	‘yannūnāhaṁ sabbaso nevasaññānāsaññāyatanaṁ samatikkamma saññāvedayitanirodhaṁ upasampajja vihareyyan’ti.
an9.35:11.3	So saññāvedayitanirodhaṁ anabhihiṁsamāno sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati.
an9.35:12.1	Yato kho, bhikkhave, bhikkhu taṁ tadeva samāpattiṁ samāpajjatipi vuṭṭhātipi, tassa mudu cittaṁ hoti kammaññaṁ.
an9.35:12.2	Mudunā kammaññena cittena appamāṇo samādhi hoti subhāvito.
an9.35:12.3	So appamāṇena samādhinā subhāvitena yassa yassa abhiññāsacchikaraṇīyassa dhammassa cittaṁ abhininnāmeti abhiññāsacchikiriyāya tatra tatreva sakkhibhabbataṁ pāpuṇāti sati sati āyatane.
an9.35:13.1	So sace ākaṅkhati: ‘anekavihitaṁ iddhividhaṁ paccanubhaveyyaṁ—ekopi hutvā bahudhā assaṁ, bahudhāpi hutvā eko assaṁ …pe… yāva brahmalokāpi kāyena vasaṁ vatteyyan’ti,
an9.35:13.2	tatra tatreva sakkhibhabbataṁ pāpuṇāti sati sati āyatane.
an9.35:14.1	So sace ākaṅkhati: ‘dibbāya sotadhātuyā …pe…
an9.35:14.2	sati sati āyatane.
an9.35:15.1	So sace ākaṅkhati: ‘parasattānaṁ parapuggalānaṁ cetasā ceto paricca pajāneyyaṁ,
an9.35:15.2	sarāgaṁ vā cittaṁ sarāgaṁ cittanti pajāneyyaṁ,
an9.35:15.3	vītarāgaṁ vā cittaṁ vītarāgaṁ cittanti pajāneyyaṁ,
an9.35:15.4	sadosaṁ vā cittaṁ sadosaṁ cittanti pajāneyyaṁ,
an9.35:15.5	vītadosaṁ vā cittaṁ vītadosaṁ cittanti pajāneyyaṁ,
an9.35:15.6	samohaṁ vā cittaṁ samohaṁ cittanti pajāneyyaṁ,
an9.35:15.7	vītamohaṁ vā cittaṁ …
an9.35:15.8	saṅkhittaṁ vā cittaṁ …
an9.35:15.9	vikkhittaṁ vā cittaṁ …
an9.35:15.10	mahaggataṁ vā cittaṁ …
an9.35:15.11	amahaggataṁ vā cittaṁ …
an9.35:15.12	sauttaraṁ vā cittaṁ …
an9.35:15.13	anuttaraṁ vā cittaṁ …
an9.35:15.14	samāhitaṁ vā cittaṁ …
an9.35:15.15	asamāhitaṁ vā cittaṁ …
an9.35:15.16	vimuttaṁ vā cittaṁ …
an9.35:15.17	avimuttaṁ vā cittaṁ avimuttaṁ cittanti pajāneyyan’ti,
an9.35:15.18	tatra tatreva sakkhibhabbataṁ pāpuṇāti sati sati āyatane.
an9.35:16.1	So sace ākaṅkhati: ‘anekavihitaṁ pubbenivāsaṁ anussareyyaṁ, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussareyyan’ti,
an9.35:16.2	tatra tatreva sakkhibhabbataṁ pāpuṇāti sati sati āyatane.
an9.35:17.1	So sace ākaṅkhati: ‘dibbena cakkhunā visuddhena atikkantamānusakena …pe… yathākammūpage satte pajāneyyan’ti
an9.35:17.2	tatra tatreva sakkhibhabbataṁ pāpuṇāti sati sati āyatane.
an9.35:18.1	So sace ākaṅkhati: ‘āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti,
an9.35:18.2	tatra tatreva sakkhibhabbataṁ pāpuṇāti sati sati āyatane”ti.
an9.35:18.3	Catutthaṁ.
an9.36:0.1	Aṅguttara Nikāya 9.36
an9.36:0.2	4. Mahāvagga
an9.36:0.3	Jhānasutta
an9.36:1.1	“Paṭhamampāhaṁ, bhikkhave, jhānaṁ nissāya āsavānaṁ khayaṁ vadāmi;
an9.36:1.2	dutiyampāhaṁ, bhikkhave, jhānaṁ nissāya āsavānaṁ khayaṁ vadāmi;
an9.36:1.3	tatiyampāhaṁ, bhikkhave, jhānaṁ nissāya āsavānaṁ khayaṁ vadāmi;
an9.36:1.4	catutthampāhaṁ, bhikkhave, jhānaṁ nissāya āsavānaṁ khayaṁ vadāmi;
an9.36:1.5	ākāsānañcāyatanampāhaṁ, bhikkhave, nissāya āsavānaṁ khayaṁ vadāmi;
an9.36:1.6	viññāṇañcāyatanampāhaṁ, bhikkhave, nissāya āsavānaṁ khayaṁ vadāmi;
an9.36:1.7	ākiñcaññāyatanampāhaṁ, bhikkhave, nissāya āsavānaṁ khayaṁ vadāmi;
an9.36:1.8	nevasaññānāsaññāyatanampāhaṁ, bhikkhave, nissāya āsavānaṁ khayaṁ vadāmi;
an9.36:1.9	saññāvedayitanirodhampāhaṁ, bhikkhave, nissāya āsavānaṁ khayaṁ vadāmi.
an9.36:2.1	‘Paṭhamampāhaṁ, bhikkhave, jhānaṁ nissāya āsavānaṁ khayaṁ vadāmī’ti, iti kho panetaṁ vuttaṁ.
an9.36:2.2	Kiñcetaṁ paṭicca vuttaṁ?
an9.36:2.3	Idha, bhikkhave, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.36:2.4	So yadeva tattha hoti rūpagataṁ vedanāgataṁ saññāgataṁ saṅkhāragataṁ viññāṇagataṁ, te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an9.36:2.5	So tehi dhammehi cittaṁ paṭivāpeti.
an9.36:2.6	So tehi dhammehi cittaṁ paṭivāpetvā amatāya dhātuyā cittaṁ upasaṁharati:
an9.36:2.7	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an9.36:2.8	So tattha ṭhito āsavānaṁ khayaṁ pāpuṇāti.
an9.36:2.9	No ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an9.36:3.1	Seyyathāpi, bhikkhave, issāso vā issāsantevāsī vā tiṇapurisarūpake vā mattikāpuñje vā yoggaṁ karitvā, so aparena samayena dūrepātī ca hoti akkhaṇavedhī ca mahato ca kāyassa padāletā;
an9.36:3.2	evamevaṁ kho, bhikkhave, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.36:3.3	So yadeva tattha hoti rūpagataṁ vedanāgataṁ saññāgataṁ saṅkhāragataṁ viññāṇagataṁ, te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an9.36:3.4	So tehi dhammehi cittaṁ paṭivāpeti.
an9.36:3.5	So tehi dhammehi cittaṁ paṭivāpetvā amatāya dhātuyā cittaṁ upasaṁharati:
an9.36:3.6	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an9.36:3.7	So tattha ṭhito āsavānaṁ khayaṁ pāpuṇāti.
an9.36:3.8	No ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an9.36:3.9	‘Paṭhamampāhaṁ, bhikkhave, jhānaṁ nissāya āsavānaṁ khayaṁ vadāmī’ti,
an9.36:3.10	iti yaṁ taṁ vuttaṁ, idametaṁ paṭicca vuttaṁ.
an9.36:4.1	Dutiyampāhaṁ, bhikkhave, jhānaṁ nissāya …pe…
an9.36:4.2	tatiyampāhaṁ, bhikkhave, jhānaṁ nissāya …pe…
an9.36:4.3	‘catutthampāhaṁ, bhikkhave, jhānaṁ nissāya āsavānaṁ khayaṁ vadāmī’ti, iti kho panetaṁ vuttaṁ.
an9.36:4.4	Kiñcetaṁ paṭicca vuttaṁ?
an9.36:4.5	Idha, bhikkhave, bhikkhu sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
an9.36:4.6	So yadeva tattha hoti rūpagataṁ vedanāgataṁ saññāgataṁ saṅkhāragataṁ viññāṇagataṁ, te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an9.36:4.7	So tehi dhammehi cittaṁ paṭivāpeti.
an9.36:4.8	So tehi dhammehi cittaṁ paṭivāpetvā amatāya dhātuyā cittaṁ upasaṁharati:
an9.36:4.9	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an9.36:4.10	So tattha ṭhito āsavānaṁ khayaṁ pāpuṇāti.
an9.36:4.11	No ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an9.36:5.1	Seyyathāpi, bhikkhave, issāso vā issāsantevāsī vā tiṇapurisarūpake vā mattikāpuñje vā yoggaṁ karitvā, so aparena samayena dūrepātī ca hoti akkhaṇavedhī ca mahato ca kāyassa padāletā;
an9.36:5.2	evamevaṁ kho, bhikkhave, bhikkhu sukhassa ca pahānā …pe… catutthaṁ jhānaṁ upasampajja viharati.
an9.36:5.3	So yadeva tattha hoti rūpagataṁ vedanāgataṁ …pe…
an9.36:5.4	anāvattidhammo tasmā lokā.
an9.36:5.5	‘Catutthampāhaṁ, bhikkhave, jhānaṁ nissāya āsavānaṁ khayaṁ vadāmī’ti, iti yaṁ taṁ vuttaṁ, idametaṁ paṭicca vuttaṁ.
an9.36:6.1	‘Ākāsānañcāyatanampāhaṁ, bhikkhave, jhānaṁ nissāya āsavānaṁ khayaṁ vadāmī’ti, iti kho panetaṁ vuttaṁ.
an9.36:6.2	Kiñcetaṁ paṭicca vuttaṁ?
an9.36:6.3	Idha, bhikkhave, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an9.36:6.4	So yadeva tattha hoti vedanāgataṁ saññāgataṁ saṅkhāragataṁ viññāṇagataṁ, te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an9.36:6.5	So tehi dhammehi cittaṁ paṭivāpeti.
an9.36:6.6	So tehi dhammehi cittaṁ paṭivāpetvā amatāya dhātuyā cittaṁ upasaṁharati:
an9.36:6.7	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an9.36:6.8	So tattha ṭhito āsavānaṁ khayaṁ pāpuṇāti.
an9.36:6.9	No ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an9.36:7.1	Seyyathāpi, bhikkhave, issāso vā issāsantevāsī vā tiṇapurisarūpake vā mattikāpuñje vā yoggaṁ karitvā, so aparena samayena dūrepātī ca hoti akkhaṇavedhī ca mahato ca kāyassa padāletā;
an9.36:7.2	evamevaṁ kho, bhikkhave, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an9.36:7.3	So yadeva tattha hoti vedanāgataṁ saññāgataṁ …pe…
an9.36:7.4	anāvattidhammo tasmā lokā.
an9.36:7.5	‘Ākāsānañcāyatanampāhaṁ, bhikkhave, nissāya āsavānaṁ khayaṁ vadāmī’ti,
an9.36:7.6	iti yaṁ taṁ vuttaṁ, idametaṁ paṭicca vuttaṁ.
an9.36:8.1	‘Viññāṇañcāyatanampāhaṁ, bhikkhave, nissāya …pe…
an9.36:8.2	ākiñcaññāyatanampāhaṁ, bhikkhave, nissāya āsavānaṁ khayaṁ vadāmī’ti, iti kho panetaṁ vuttaṁ.
an9.36:8.3	Kiñcetaṁ paṭicca vuttaṁ?
an9.36:8.4	Idha, bhikkhave, bhikkhu sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
an9.36:8.5	So yadeva tattha hoti vedanāgataṁ saññāgataṁ saṅkhāragataṁ viññāṇagataṁ, te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an9.36:8.6	So tehi dhammehi cittaṁ paṭivāpeti.
an9.36:8.7	So tehi dhammehi cittaṁ paṭivāpetvā amatāya dhātuyā cittaṁ upasaṁharati:
an9.36:8.8	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an9.36:8.9	So tattha ṭhito āsavānaṁ khayaṁ pāpuṇāti.
an9.36:8.10	No ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an9.36:9.1	Seyyathāpi, bhikkhave, issāso vā issāsantevāsī vā tiṇapurisarūpake vā mattikāpuñje vā yoggaṁ karitvā, so aparena samayena dūrepātī ca hoti akkhaṇavedhī ca mahato ca kāyassa padāletā;
an9.36:9.2	evamevaṁ kho, bhikkhave, bhikkhu sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
an9.36:9.3	So yadeva tattha hoti vedanāgataṁ saññāgataṁ saṅkhāragataṁ viññāṇagataṁ, te dhamme aniccato dukkhato rogato gaṇḍato sallato aghato ābādhato parato palokato suññato anattato samanupassati.
an9.36:9.4	So tehi dhammehi cittaṁ paṭivāpeti.
an9.36:9.5	So tehi dhammehi cittaṁ paṭivāpetvā amatāya dhātuyā cittaṁ upasaṁharati:
an9.36:9.6	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an9.36:9.7	So tattha ṭhito āsavānaṁ khayaṁ pāpuṇāti.
an9.36:9.8	No ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an9.36:9.9	‘Ākiñcaññāyatanampāhaṁ, nissāya āsavānaṁ khayaṁ vadāmī’ti,
an9.36:9.10	iti yaṁ taṁ vuttaṁ, idametaṁ paṭicca vuttaṁ.
an9.36:10.1	Iti kho, bhikkhave, yāvatā saññāsamāpatti tāvatā aññāpaṭivedho.
an9.36:10.2	Yāni ca kho imāni, bhikkhave, nissāya dve āyatanāni—
an9.36:10.3	nevasaññānāsaññāyatanasamāpatti ca saññāvedayitanirodho ca, jhāyīhete, bhikkhave, samāpattikusalehi samāpattivuṭṭhānakusalehi samāpajjitvā vuṭṭhahitvā sammā akkhātabbānīti vadāmī”ti.
an9.36:10.4	Pañcamaṁ.
an9.37:0.1	Aṅguttara Nikāya 9.37
an9.37:0.2	4. Mahāvagga
an9.37:0.3	Ānandasutta
an9.37:1.1	Ekaṁ samayaṁ āyasmā ānando kosambiyaṁ viharati ghositārāme.
an9.37:1.2	Tatra kho āyasmā ānando bhikkhū āmantesi:
an9.37:1.3	“āvuso bhikkhave”ti.
an9.37:1.4	“Āvuso”ti kho te bhikkhū āyasmato ānandassa paccassosuṁ.
an9.37:1.5	Āyasmā ānando etadavoca:
an9.37:2.1	“Acchariyaṁ, āvuso, abbhutaṁ, āvuso.
an9.37:2.2	Yāvañcidaṁ tena bhagavatā jānatā passatā arahatā sammāsambuddhena sambādhe okāsādhigamo anubuddho sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya.
an9.37:2.3	Tadeva nāma cakkhuṁ bhavissati te rūpā tañcāyatanaṁ no paṭisaṁvedissati.
an9.37:2.4	Tadeva nāma sotaṁ bhavissati te saddā tañcāyatanaṁ no paṭisaṁvedissati.
an9.37:2.5	Tadeva nāma ghānaṁ bhavissati te gandhā tañcāyatanaṁ no paṭisaṁvedissati.
an9.37:2.6	Sāva nāma jivhā bhavissati te rasā tañcāyatanaṁ no paṭisaṁvedissati.
an9.37:2.7	Sova nāma kāyo bhavissati te phoṭṭhabbā tañcāyatanaṁ no paṭisaṁvedissatī”ti.
an9.37:3.1	Evaṁ vutte, āyasmā udāyī āyasmantaṁ ānandaṁ etadavoca:
an9.37:3.2	“saññīmeva nu kho, āvuso ānanda, tadāyatanaṁ no paṭisaṁvedeti udāhu asaññī”ti?
an9.37:3.3	“Saññīmeva kho, āvuso, tadāyatanaṁ no paṭisaṁvedeti, no asaññī”ti.
an9.37:4.1	“Kiṁsaññī panāvuso, tadāyatanaṁ no paṭisaṁvedetī”ti?
an9.37:4.2	“Idhāvuso, bhikkhu, sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an9.37:4.3	Evaṁsaññīpi kho, āvuso, tadāyatanaṁ no paṭisaṁvedeti.
an9.37:5.1	Puna caparaṁ, āvuso, bhikkhu sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.
an9.37:5.2	Evaṁsaññīpi kho, āvuso, tadāyatanaṁ no paṭisaṁvedeti.
an9.37:6.1	Puna caparaṁ, āvuso, bhikkhu sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
an9.37:6.2	Evaṁsaññīpi kho, āvuso, tadāyatanaṁ no paṭisaṁvedetīti.
an9.37:7.1	Ekamidāhaṁ, āvuso, samayaṁ sākete viharāmi añjanavane migadāye.
an9.37:7.2	Atha kho, āvuso, jaṭilavāsikā bhikkhunī yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, āvuso, jaṭilavāsikā bhikkhunī maṁ etadavoca:
an9.37:7.3	‘yāyaṁ, bhante ānanda, samādhi na cābhinato na cāpanato na ca sasaṅkhāraniggayhavāritagato,
an9.37:7.4	vimuttattā ṭhito, ṭhitattā santusito, santusitattā no paritassati.
an9.37:7.5	Ayaṁ, bhante ānanda, samādhi kiṁphalo vutto bhagavatā’ti?
an9.37:8.1	Evaṁ vutte, sohaṁ, āvuso, jaṭilavāsikaṁ bhikkhuniṁ etadavocaṁ:
an9.37:8.2	‘yāyaṁ, bhagini, samādhi na cābhinato na cāpanato na ca sasaṅkhāraniggayhavāritagato,
an9.37:8.3	vimuttattā ṭhito, ṭhitattā santusito, santusitattā no paritassati.
an9.37:8.4	Ayaṁ, bhagini, samādhi aññāphalo vutto bhagavatā’ti.
an9.37:8.5	Evaṁsaññīpi kho, āvuso, tadāyatanaṁ no paṭisaṁvedetī”ti.
an9.37:8.6	Chaṭṭhaṁ.
an9.38:0.1	Aṅguttara Nikāya 9.38
an9.38:0.2	4. Mahāvagga
an9.38:0.3	Lokāyatikasutta
an9.38:1.1	Atha kho dve lokāyatikā brāhmaṇā yena bhagavā tenupasaṅkamiṁsu; upasaṅkamitvā bhagavatā saddhiṁ sammodiṁsu.
an9.38:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te brāhmaṇā bhagavantaṁ etadavocuṁ:
an9.38:2.1	“Pūraṇo, bho gotama, kassapo sabbaññū sabbadassāvī aparisesaṁ ñāṇadassanaṁ paṭijānāti:
an9.38:2.2	‘carato ca me tiṭṭhato ca suttassa ca jāgarassa ca satataṁ samitaṁ ñāṇadassanaṁ paccupaṭṭhitan’ti.
an9.38:2.3	So evamāha:
an9.38:2.4	‘ahaṁ anantena ñāṇena anantaṁ lokaṁ jānaṁ passaṁ viharāmī’ti.
an9.38:2.5	Ayampi, bho gotama, nigaṇṭho nāṭaputto sabbaññū sabbadassāvī aparisesaṁ ñāṇadassanaṁ paṭijānāti:
an9.38:2.6	‘carato ca me tiṭṭhato ca suttassa ca jāgarassa ca satataṁ samitaṁ ñāṇadassanaṁ paccupaṭṭhitan’ti.
an9.38:2.7	So evamāha:
an9.38:2.8	‘ahaṁ anantena ñāṇena anantaṁ lokaṁ jānaṁ passaṁ viharāmī’ti.
an9.38:2.9	Imesaṁ, bho gotama, ubhinnaṁ ñāṇavādānaṁ ubhinnaṁ aññamaññaṁ vipaccanīkavādānaṁ ko saccaṁ āha ko musā”ti?
an9.38:3.1	“Alaṁ, brāhmaṇā.
an9.38:3.2	Tiṭṭhatetaṁ:
an9.38:3.3	‘imesaṁ ubhinnaṁ ñāṇavādānaṁ ubhinnaṁ aññamaññaṁ vipaccanīkavādānaṁ ko saccaṁ āha ko musā’ti.
an9.38:3.4	Dhammaṁ vo, brāhmaṇā, desessāmi,
an9.38:3.5	taṁ suṇātha, sādhukaṁ manasi karotha, bhāsissāmī”ti.
an9.38:3.6	“Evaṁ, bho”ti kho te brāhmaṇā bhagavato paccassosuṁ.
an9.38:3.7	Bhagavā etadavoca:
an9.38:4.1	“Seyyathāpi, brāhmaṇā, cattāro purisā catuddisā ṭhitā paramena javena ca samannāgatā paramena ca padavītihārena.
an9.38:4.2	Te evarūpena javena samannāgatā assu, seyyathāpi nāma daḷhadhammā dhanuggaho sikkhito katahattho katūpāsano lahukena asanena appakasirena tiriyaṁ tālacchāyaṁ atipāteyya;
an9.38:4.3	evarūpena ca padavītihārena, seyyathāpi nāma puratthimā samuddā pacchimo samuddo
an9.38:4.4	atha puratthimāya disāya ṭhito puriso evaṁ vadeyya:
an9.38:4.5	‘ahaṁ gamanena lokassa antaṁ pāpuṇissāmī’ti.
an9.38:4.6	So aññatreva asitapītakhāyitasāyitā aññatra uccārapassāvakammā aññatra niddākilamathapaṭivinodanā vassasatāyuko vassasatajīvī vassasataṁ gantvā appatvāva lokassa antaṁ antarā kālaṁ kareyya.
an9.38:4.7	Atha pacchimāya disāya …pe…
an9.38:4.8	atha uttarāya disāya …
an9.38:4.9	atha dakkhiṇāya disāya ṭhito puriso evaṁ vadeyya:
an9.38:4.10	‘ahaṁ gamanena lokassa antaṁ pāpuṇissāmī’ti.
an9.38:4.11	So aññatreva asitapītakhāyitasāyitā aññatra uccārapassāvakammā aññatra niddākilamathapaṭivinodanā vassasatāyuko vassasatajīvī vassasataṁ gantvā appatvāva lokassa antaṁ antarā kālaṁ kareyya.
an9.38:4.12	Taṁ kissa hetu?
an9.38:4.13	Nāhaṁ, brāhmaṇā, evarūpāya sandhāvanikāya lokassa antaṁ ñāteyyaṁ daṭṭheyyaṁ patteyyanti vadāmi.
an9.38:4.14	Na cāhaṁ, brāhmaṇā, appatvāva lokassa antaṁ dukkhassa antakiriyaṁ vadāmi.
an9.38:5.1	Pañcime, brāhmaṇā, kāmaguṇā ariyassa vinaye lokoti vuccati.
an9.38:5.2	Katame pañca?
an9.38:5.3	Cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā;
an9.38:5.4	sotaviññeyyā saddā …pe…
an9.38:5.5	ghānaviññeyyā gandhā …
an9.38:5.6	jivhāviññeyyā rasā …
an9.38:5.7	kāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā;
an9.38:5.8	ime kho, brāhmaṇā, pañca kāmaguṇā ariyassa vinaye lokoti vuccati.
an9.38:6.1	Idha, brāhmaṇā, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an9.38:6.2	Ayaṁ vuccati, brāhmaṇā, ‘bhikkhu lokassa antamāgamma, lokassa ante viharati’.
an9.38:6.3	Tamaññe evamāhaṁsu:
an9.38:6.4	‘ayampi lokapariyāpanno, ayampi anissaṭo lokamhā’ti.
an9.38:6.5	Ahampi hi, brāhmaṇā, evaṁ vadāmi:
an9.38:6.6	‘ayampi lokapariyāpanno, ayampi anissaṭo lokamhā’ti.
an9.38:7.1	Puna caparaṁ, brāhmaṇā, bhikkhu vitakkavicārānaṁ vūpasamā …pe… dutiyaṁ jhānaṁ …
an9.38:7.2	tatiyaṁ jhānaṁ …
an9.38:7.3	catutthaṁ jhānaṁ upasampajja viharati.
an9.38:7.4	Ayaṁ vuccati, brāhmaṇā, ‘bhikkhu lokassa antamāgamma lokassa ante viharati’.
an9.38:7.5	Tamaññe evamāhaṁsu:
an9.38:7.6	‘ayampi lokapariyāpanno, ayampi anissaṭo lokamhā’ti.
an9.38:7.7	Ahampi hi, brāhmaṇā, evaṁ vadāmi:
an9.38:7.8	‘ayampi lokapariyāpanno, ayampi anissaṭo lokamhā’ti.
an9.38:8.1	Puna caparaṁ, brāhmaṇā, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an9.38:8.2	Ayaṁ vuccati, brāhmaṇā, ‘bhikkhu lokassa antamāgamma lokassa ante viharati’.
an9.38:8.3	Tamaññe evamāhaṁsu:
an9.38:8.4	‘ayampi lokapariyāpanno, ayampi anissaṭo lokamhā’ti.
an9.38:8.5	Ahampi hi, brāhmaṇā, evaṁ vadāmi:
an9.38:8.6	‘ayampi lokapariyāpanno, ayampi anissaṭo lokamhā’ti.
an9.38:9.1	Puna caparaṁ, brāhmaṇā, bhikkhu sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati …pe…
an9.38:9.2	sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati …pe…
an9.38:9.3	sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
an9.38:9.4	Ayaṁ vuccati, brāhmaṇā, ‘bhikkhu lokassa antamāgamma lokassa ante viharati’.
an9.38:9.5	Tamaññe evamāhaṁsu:
an9.38:9.6	‘ayampi lokapariyāpanno, ayampi anissaṭo lokamhā’ti.
an9.38:9.7	Ahampi hi, brāhmaṇā, evaṁ vadāmi:
an9.38:9.8	‘ayampi lokapariyāpanno, ayampi anissaṭo lokamhā’ti.
an9.38:10.1	Puna caparaṁ, brāhmaṇā, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.38:10.2	Ayaṁ vuccati, brāhmaṇā, ‘bhikkhu lokassa antamāgamma lokassa ante viharati tiṇṇo loke visattikan’”ti.
an9.38:10.3	Sattamaṁ.
an9.39:0.1	Aṅguttara Nikāya 9.39
an9.39:0.2	4. Mahāvagga
an9.39:0.3	Devāsurasaṅgāmasutta
an9.39:1.1	“Bhūtapubbaṁ, bhikkhave, devāsurasaṅgāmo samupabyūḷho ahosi.
an9.39:1.2	Tasmiṁ kho pana, bhikkhave, saṅgāme asurā jiniṁsu, devā parājayiṁsu.
an9.39:1.3	Parājitā ca, bhikkhave, devā apayiṁsuyeva uttarenābhimukhā, abhiyiṁsu asurā.
an9.39:1.4	Atha kho, bhikkhave, devānaṁ etadahosi:
an9.39:1.5	‘abhiyanteva kho asurā.
an9.39:1.6	Yannūna mayaṁ dutiyampi asurehi saṅgāmeyyāmā’ti.
an9.39:1.7	Dutiyampi kho, bhikkhave, devā asurehi saṅgāmesuṁ.
an9.39:1.8	Dutiyampi kho, bhikkhave, asurāva jiniṁsu, devā parājayiṁsu.
an9.39:1.9	Parājitā ca, bhikkhave, devā apayiṁsuyeva uttarenābhimukhā, abhiyiṁsu asurā.
an9.39:2.1	Atha kho, bhikkhave, devānaṁ etadahosi:
an9.39:2.2	‘abhiyanteva kho asurā.
an9.39:2.3	Yannūna mayaṁ tatiyampi asurehi saṅgāmeyyāmā’ti.
an9.39:2.4	Tatiyampi kho, bhikkhave, devā asurehi saṅgāmesuṁ.
an9.39:2.5	Tatiyampi kho, bhikkhave, asurāva jiniṁsu, devā parājayiṁsu.
an9.39:2.6	Parājitā ca, bhikkhave, devā bhītā devapuraṁyeva pavisiṁsu.
an9.39:2.7	Devapuragatānañca pana, bhikkhave, devānaṁ etadahosi:
an9.39:2.8	‘bhīruttānagatena kho dāni mayaṁ etarahi attanā viharāma akaraṇīyā asurehī’ti.
an9.39:2.9	Asurānampi, bhikkhave, etadahosi:
an9.39:2.10	‘bhīruttānagatena kho dāni devā etarahi attanā viharanti akaraṇīyā amhehī’ti.
an9.39:3.1	Bhūtapubbaṁ, bhikkhave, devāsurasaṅgāmo samupabyūḷho ahosi.
an9.39:3.2	Tasmiṁ kho pana, bhikkhave, saṅgāme devā jiniṁsu, asurā parājayiṁsu.
an9.39:3.3	Parājitā ca, bhikkhave, asurā apayiṁsuyeva dakkhiṇenābhimukhā, abhiyiṁsu devā.
an9.39:3.4	Atha kho, bhikkhave, asurānaṁ etadahosi:
an9.39:3.5	‘abhiyanteva kho devā.
an9.39:3.6	Yannūna mayaṁ dutiyampi devehi saṅgāmeyyāmā’ti.
an9.39:3.7	Dutiyampi kho, bhikkhave, asurā devehi saṅgāmesuṁ.
an9.39:3.8	Dutiyampi kho, bhikkhave, devā jiniṁsu, asurā parājayiṁsu.
an9.39:3.9	Parājitā ca, bhikkhave, asurā apayiṁsuyeva dakkhiṇenābhimukhā, abhiyiṁsu devā.
an9.39:4.1	Atha kho, bhikkhave, asurānaṁ etadahosi:
an9.39:4.2	‘abhiyanteva kho devā.
an9.39:4.3	Yannūna mayaṁ tatiyampi devehi saṅgāmeyyāmā’ti.
an9.39:4.4	Tatiyampi kho, bhikkhave, asurā devehi saṅgāmesuṁ.
an9.39:4.5	Tatiyampi kho, bhikkhave, devā jiniṁsu, asurā parājayiṁsu.
an9.39:4.6	Parājitā ca, bhikkhave, asurā bhītā asurapuraṁyeva pavisiṁsu.
an9.39:4.7	Asurapuragatānañca pana, bhikkhave, asurānaṁ etadahosi:
an9.39:4.8	‘bhīruttānagatena kho dāni mayaṁ etarahi attanā viharāma akaraṇīyā devehī’ti.
an9.39:4.9	Devānampi, bhikkhave, etadahosi:
an9.39:4.10	‘bhīruttānagatena kho dāni asurā etarahi attanā viharanti akaraṇīyā amhehī’ti.
an9.39:5.1	Evamevaṁ kho, bhikkhave, yasmiṁ samaye bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati,
an9.39:5.2	tasmiṁ, bhikkhave, samaye bhikkhussa evaṁ hoti:
an9.39:5.3	‘bhīruttānagatena kho dānāhaṁ etarahi attanā viharāmi akaraṇīyo mārassā’ti.
an9.39:5.4	Mārassāpi, bhikkhave, pāpimato evaṁ hoti:
an9.39:5.5	‘bhīruttānagatena kho dāni bhikkhu etarahi attanā viharati akaraṇīyo mayhan’ti.
an9.39:6.1	Yasmiṁ, bhikkhave, samaye bhikkhu vitakkavicārānaṁ vūpasamā …pe… dutiyaṁ jhānaṁ …
an9.39:6.2	tatiyaṁ jhānaṁ …
an9.39:6.3	catutthaṁ jhānaṁ upasampajja viharati,
an9.39:6.4	tasmiṁ, bhikkhave, samaye bhikkhussa evaṁ hoti:
an9.39:6.5	‘bhīruttānagatena kho dānāhaṁ etarahi attanā viharāmi akaraṇīyo mārassā’ti.
an9.39:6.6	Mārassāpi, bhikkhave, pāpimato evaṁ hoti:
an9.39:6.7	‘bhīruttānagatena kho dāni bhikkhu etarahi attanā viharati, akaraṇīyo mayhan’ti.
an9.39:7.1	Yasmiṁ, bhikkhave, samaye bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an9.39:7.2	Ayaṁ vuccati, bhikkhave, ‘bhikkhu antamakāsi māraṁ, apadaṁ vadhitvā māracakkhuṁ adassanaṁ gato pāpimato tiṇṇo loke visattikan’ti.
an9.39:8.1	Yasmiṁ, bhikkhave, samaye bhikkhu sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati …
an9.39:8.2	sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati …
an9.39:8.3	sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati …
an9.39:8.4	sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.39:8.5	Ayaṁ vuccati, bhikkhave, ‘bhikkhu antamakāsi māraṁ, apadaṁ vadhitvā māracakkhuṁ adassanaṁ gato pāpimato tiṇṇo loke visattikan’”ti.
an9.39:8.6	Aṭṭhamaṁ.
an9.40:0.1	Aṅguttara Nikāya 9.40
an9.40:0.2	4. Mahāvagga
an9.40:0.3	Nāgasutta
an9.40:1.1	“Yasmiṁ, bhikkhave, samaye āraññikassa nāgassa gocarapasutassa hatthīpi hatthiniyopi hatthikalabhāpi hatthicchāpāpi purato purato gantvā tiṇaggāni chindanti, tena, bhikkhave, āraññiko nāgo aṭṭīyati harāyati jigucchati.
an9.40:1.2	Yasmiṁ, bhikkhave, samaye āraññikassa nāgassa gocarapasutassa hatthīpi hatthiniyopi hatthikalabhāpi hatthicchāpāpi obhaggobhaggaṁ sākhābhaṅgaṁ khādanti, tena, bhikkhave, āraññiko nāgo aṭṭīyati harāyati jigucchati.
an9.40:1.3	Yasmiṁ, bhikkhave, samaye āraññikassa nāgassa ogāhaṁ otiṇṇassa hatthīpi hatthiniyopi hatthikalabhāpi hatthicchāpāpi purato purato gantvā soṇḍāya udakaṁ āloḷenti, tena, bhikkhave, āraññiko nāgo aṭṭīyati harāyati jigucchati.
an9.40:1.4	Yasmiṁ, bhikkhave, samaye āraññikassa nāgassa ogāhā uttiṇṇassa hatthiniyo kāyaṁ upanighaṁsantiyo gacchanti, tena, bhikkhave, āraññiko nāgo aṭṭīyati harāyati jigucchati.
an9.40:2.1	Tasmiṁ, bhikkhave, samaye āraññikassa nāgassa evaṁ hoti:
an9.40:2.2	‘ahaṁ kho etarahi ākiṇṇo viharāmi hatthīhi hatthinīhi hatthikalabhehi hatthicchāpehi.
an9.40:2.3	Chinnaggāni ceva tiṇāni khādāmi, obhaggobhaggañca me sākhābhaṅgaṁ khādanti, āvilāni ca pānīyāni pivāmi, ogāhā ca me uttiṇṇassa hatthiniyo kāyaṁ upanighaṁsantiyo gacchanti.
an9.40:2.4	Yannūnāhaṁ eko gaṇasmā vūpakaṭṭho vihareyyan’ti.
an9.40:2.5	So aparena samayena eko gaṇasmā vūpakaṭṭho viharati, acchinnaggāni ceva tiṇāni khādati, obhaggobhaggañcassa sākhābhaṅgaṁ na khādanti, anāvilāni ca pānīyāni pivati, ogāhā cassa uttiṇṇassa na hatthiniyo kāyaṁ upanighaṁsantiyo gacchanti.
an9.40:3.1	Tasmiṁ, bhikkhave, samaye āraññikassa nāgassa evaṁ hoti:
an9.40:3.2	‘ahaṁ kho pubbe ākiṇṇo vihāsiṁ hatthīhi hatthinīhi hatthikalabhehi hatthicchāpehi, chinnaggāni ceva tiṇāni khādiṁ, obhaggobhaggañca me sākhābhaṅgaṁ khādiṁsu, āvilāni ca pānīyāni apāyiṁ, ogāhā ca me uttiṇṇassa hatthiniyo kāyaṁ upanighaṁsantiyo agamaṁsu. Sohaṁ etarahi eko gaṇasmā vūpakaṭṭho viharāmi, acchinnaggāni ceva tiṇāni khādāmi, obhaggobhaggañca me sākhābhaṅgaṁ na khādanti, anāvilāni ca pānīyāni pivāmi, ogāhā ca me uttiṇṇassa na hatthiniyo kāyaṁ upanighaṁsantiyo gacchantī’ti. So soṇḍāya sākhābhaṅgaṁ bhañjitvā sākhābhaṅgena kāyaṁ parimajjitvā attamano soṇḍaṁ saṁharati.
an9.40:4.1	Evamevaṁ kho, bhikkhave, yasmiṁ samaye bhikkhu ākiṇṇo viharati bhikkhūhi bhikkhunīhi upāsakehi upāsikāhi raññā rājamahāmattehi titthiyehi titthiyasāvakehi, tasmiṁ, bhikkhave, samaye bhikkhussa evaṁ hoti:
an9.40:4.2	‘ahaṁ kho etarahi ākiṇṇo viharāmi bhikkhūhi bhikkhunīhi upāsakehi upāsikāhi raññā rājamahāmattehi titthiyehi titthiyasāvakehi.
an9.40:4.3	Yannūnāhaṁ eko gaṇasmā vūpakaṭṭho vihareyyan’ti.
an9.40:4.4	So vivittaṁ senāsanaṁ bhajati araññaṁ rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ palālapuñjaṁ.
an9.40:4.5	So araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an9.40:5.1	So abhijjhaṁ loke pahāya vigatābhijjhena cetasā viharati, abhijjhāya cittaṁ parisodheti;
an9.40:5.2	byāpādapadosaṁ pahāya abyāpannacitto viharati sabbapāṇabhūtahitānukampī, byāpādapadosā cittaṁ parisodheti;
an9.40:5.3	thinamiddhaṁ pahāya vigatathinamiddho viharati ālokasaññī sato sampajāno, thinamiddhā cittaṁ parisodheti;
an9.40:5.4	uddhaccakukkuccaṁ pahāya anuddhato viharati ajjhattaṁ vūpasantacitto, uddhaccakukkuccā cittaṁ parisodheti;
an9.40:5.5	vicikicchaṁ pahāya tiṇṇavicikiccho viharati akathaṅkathī kusalesu dhammesu, vicikicchāya cittaṁ parisodheti.
an9.40:5.6	So ime pañca nīvaraṇe pahāya cetaso upakkilese paññāya dubbalīkaraṇe
an9.40:5.7	vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an9.40:5.8	So attamano soṇḍaṁ saṁharati.
an9.40:5.9	Vitakkavicārānaṁ vūpasamā …pe… dutiyaṁ jhānaṁ …
an9.40:5.10	tatiyaṁ jhānaṁ …
an9.40:5.11	catutthaṁ jhānaṁ upasampajja viharati.
an9.40:5.12	So attamano soṇḍaṁ saṁharati.
an9.40:6.1	Sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an9.40:6.2	So attamano soṇḍaṁ saṁharati.
an9.40:6.3	Sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati …
an9.40:6.4	sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati …
an9.40:6.5	sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati …
an9.40:6.6	sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.40:6.7	So attamano soṇḍaṁ saṁharatī”ti.
an9.40:6.8	Navamaṁ.
an9.41:0.1	Aṅguttara Nikāya 9.41
an9.41:0.2	4. Mahāvagga
an9.41:0.3	Tapussasutta
an9.41:1.1	Ekaṁ samayaṁ bhagavā mallesu viharati uruvelakappaṁ nāma mallānaṁ nigamo.
an9.41:1.2	Atha kho bhagavā pubbaṇhasamayaṁ nivāsetvā pattacīvaramādāya uruvelakappaṁ piṇḍāya pāvisi.
an9.41:1.3	Uruvelakappe piṇḍāya caritvā pacchābhattaṁ piṇḍapātapaṭikkanto āyasmantaṁ ānandaṁ āmantesi:
an9.41:1.4	“idheva tāva tvaṁ, ānanda, hohi, yāvāhaṁ mahāvanaṁ ajjhogāhāmi divāvihārāyā”ti.
an9.41:1.5	“Evaṁ, bhante”ti kho āyasmā ānando bhagavato paccassosi.
an9.41:1.6	Atha kho bhagavā mahāvanaṁ ajjhogāhetvā aññatarasmiṁ rukkhamūle divāvihāraṁ nisīdi.
an9.41:2.1	Atha kho tapusso gahapati yenāyasmā ānando tenupasaṅkami; upasaṅkamitvā āyasmantaṁ ānandaṁ abhivādetvā ekamantaṁ nisīdi. Ekamantaṁ nisinno kho tapusso gahapati āyasmantaṁ ānandaṁ etadavoca:
an9.41:3.1	“Mayaṁ, bhante ānanda, gihī kāmabhogino kāmārāmā kāmaratā kāmasammuditā.
an9.41:3.2	Tesaṁ no, bhante, amhākaṁ gihīnaṁ kāmabhogīnaṁ kāmārāmānaṁ kāmaratānaṁ kāmasammuditānaṁ papāto viya khāyati, yadidaṁ nekkhammaṁ.
an9.41:3.3	Sutaṁ metaṁ, bhante, ‘imasmiṁ dhammavinaye daharānaṁ daharānaṁ bhikkhūnaṁ nekkhamme cittaṁ pakkhandati pasīdati santiṭṭhati vimuccati etaṁ santanti passato’.
an9.41:3.4	Tayidaṁ, bhante, imasmiṁ dhammavinaye bhikkhūnaṁ bahunā janena visabhāgo, yadidaṁ nekkhamman”ti.
an9.41:4.1	“Atthi kho etaṁ, gahapati, kathāpābhataṁ bhagavantaṁ dassanāya.
an9.41:4.2	Āyāma, gahapati, yena bhagavā tenupasaṅkamissāma; upasaṅkamitvā bhagavato etamatthaṁ ārocessāma.
an9.41:4.3	Yathā no bhagavā byākarissati tathā naṁ dhāressāmā”ti.
an9.41:5.1	“Evaṁ, bhante”ti kho tapusso gahapati āyasmato ānandassa paccassosi.
an9.41:5.2	Atha kho āyasmā ānando tapussena gahapatinā saddhiṁ yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an9.41:6.1	“Ayaṁ, bhante, tapusso gahapati evamāha:
an9.41:6.2	‘mayaṁ, bhante ānanda, gihī kāmabhogino kāmārāmā kāmaratā kāmasammuditā, tesaṁ no, bhante, amhākaṁ gihīnaṁ kāmabhogīnaṁ kāmārāmānaṁ kāmaratānaṁ kāmasammuditānaṁ papāto viya khāyati, yadidaṁ nekkhammaṁ’.
an9.41:6.3	Sutaṁ metaṁ, bhante, ‘imasmiṁ dhammavinaye daharānaṁ daharānaṁ bhikkhūnaṁ nekkhamme cittaṁ pakkhandati pasīdati santiṭṭhati vimuccati etaṁ santanti passato.
an9.41:6.4	Tayidaṁ, bhante, imasmiṁ dhammavinaye bhikkhūnaṁ bahunā janena visabhāgo yadidaṁ nekkhamman’”ti.
an9.41:7.1	“Evametaṁ, ānanda, evametaṁ, ānanda.
an9.41:7.2	Mayhampi kho, ānanda, pubbeva sambodhā anabhisambuddhassa bodhisattasseva sato etadahosi:
an9.41:7.3	‘sādhu nekkhammaṁ, sādhu paviveko’ti.
an9.41:7.4	Tassa mayhaṁ, ānanda, nekkhamme cittaṁ na pakkhandati nappasīdati na santiṭṭhati na vimuccati etaṁ santanti passato.
an9.41:7.5	Tassa mayhaṁ, ānanda, etadahosi:
an9.41:7.6	‘ko nu kho hetu ko paccayo, yena me nekkhamme cittaṁ na pakkhandati nappasīdati na santiṭṭhati na vimuccati etaṁ santanti passato’?
an9.41:7.7	Tassa mayhaṁ, ānanda, etadahosi:
an9.41:7.8	‘kāmesu kho me ādīnavo adiṭṭho, so ca me abahulīkato, nekkhamme ca ānisaṁso anadhigato, so ca me anāsevito.
an9.41:7.9	Tasmā me nekkhamme cittaṁ na pakkhandati nappasīdati na santiṭṭhati na vimuccati etaṁ santanti passato’.
an9.41:7.10	Tassa mayhaṁ, ānanda, etadahosi:
an9.41:7.11	‘sace kho ahaṁ kāmesu ādīnavaṁ disvā taṁ bahulaṁ kareyyaṁ, nekkhamme ānisaṁsaṁ adhigamma tamāseveyyaṁ,
an9.41:7.12	ṭhānaṁ kho panetaṁ vijjati yaṁ me nekkhamme cittaṁ pakkhandeyya pasīdeyya santiṭṭheyya vimucceyya etaṁ santanti passato’.
an9.41:7.13	So kho ahaṁ, ānanda, aparena samayena kāmesu ādīnavaṁ disvā taṁ bahulamakāsiṁ, nekkhamme ānisaṁsaṁ adhigamma tamāseviṁ.
an9.41:7.14	Tassa mayhaṁ, ānanda, nekkhamme cittaṁ pakkhandati pasīdati santiṭṭhati vimuccati etaṁ santanti passato.
an9.41:7.15	So kho ahaṁ, ānanda, vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharāmi.
an9.41:7.16	Tassa mayhaṁ, ānanda, iminā vihārena viharato kāmasahagatā saññāmanasikārā samudācaranti. Svassa me hoti ābādho.
an9.41:7.17	Seyyathāpi, ānanda, sukhino dukkhaṁ uppajjeyya yāvadeva ābādhāya;
an9.41:7.18	evamevassa me kāmasahagatā saññāmanasikārā samudācaranti. Svassa me hoti ābādho.
an9.41:8.1	Tassa mayhaṁ, ānanda, etadahosi:
an9.41:8.2	‘yannūnāhaṁ vitakkavicārānaṁ vūpasamā …pe… dutiyaṁ jhānaṁ upasampajja vihareyyan’ti.
an9.41:8.3	Tassa mayhaṁ, ānanda, avitakke cittaṁ na pakkhandati nappasīdati na santiṭṭhati na vimuccati etaṁ santanti passato.
an9.41:8.4	Tassa mayhaṁ, ānanda, etadahosi:
an9.41:8.5	‘ko nu kho hetu ko paccayo, yena me avitakke cittaṁ na pakkhandati nappasīdati na santiṭṭhati na vimuccati etaṁ santanti passato’?
an9.41:8.6	Tassa mayhaṁ, ānanda, etadahosi:
an9.41:8.7	‘vitakkesu kho me ādīnavo adiṭṭho, so ca me abahulīkato, avitakke ca ānisaṁso anadhigato, so ca me anāsevito.
an9.41:8.8	Tasmā me avitakke cittaṁ na pakkhandati nappasīdati na santiṭṭhati na vimuccati etaṁ santanti passato’.
an9.41:8.9	Tassa mayhaṁ, ānanda, etadahosi:
an9.41:8.10	‘sace kho ahaṁ vitakkesu ādīnavaṁ disvā taṁ bahulaṁ kareyyaṁ, avitakke ānisaṁsaṁ adhigamma tamāseveyyaṁ, ṭhānaṁ kho panetaṁ vijjati yaṁ me avitakke cittaṁ pakkhandeyya pasīdeyya santiṭṭheyya vimucceyya etaṁ santanti passato’.
an9.41:8.11	So kho ahaṁ, ānanda, aparena samayena vitakkesu ādīnavaṁ disvā taṁ bahulamakāsiṁ, avitakke ānisaṁsaṁ adhigamma tamāseviṁ.
an9.41:8.12	Tassa mayhaṁ, ānanda, avitakke cittaṁ pakkhandati pasīdati santiṭṭhati vimuccati etaṁ santanti passato.
an9.41:8.13	So kho ahaṁ, ānanda, vitakkavicārānaṁ vūpasamā …pe… dutiyaṁ jhānaṁ upasampajja viharāmi.
an9.41:8.14	Tassa mayhaṁ, ānanda, iminā vihārena viharato vitakkasahagatā saññāmanasikārā samudācaranti. Svassa me hoti ābādho.
an9.41:8.15	Seyyathāpi, ānanda, sukhino dukkhaṁ uppajjeyya yāvadeva ābādhāya;
an9.41:8.16	evamevassa me vitakkasahagatā saññāmanasikārā samudācaranti. Svassa me hoti ābādho.
an9.41:9.1	Tassa mayhaṁ, ānanda, etadahosi:
an9.41:9.2	‘yannūnāhaṁ pītiyā ca virāgā upekkhako ca vihareyyaṁ sato ca sampajāno sukhañca kāyena paṭisaṁvedeyyaṁ yaṁ taṁ ariyā ācikkhanti—upekkhako satimā sukhavihārīti tatiyaṁ jhānaṁ upasampajja vihareyyan’ti.
an9.41:9.3	Tassa mayhaṁ, ānanda, nippītike cittaṁ na pakkhandati nappasīdati na santiṭṭhati na vimuccati etaṁ santanti passato.
an9.41:9.4	Tassa mayhaṁ, ānanda, etadahosi:
an9.41:9.5	‘ko nu kho hetu ko paccayo, yena me nippītike cittaṁ na pakkhandati nappasīdati na santiṭṭhati na vimuccati etaṁ santanti passato’?
an9.41:9.6	Tassa mayhaṁ, ānanda, etadahosi:
an9.41:9.7	‘pītiyā kho me ādīnavo adiṭṭho, so ca me abahulīkato, nippītike ca ānisaṁso anadhigato, so ca me anāsevito.
an9.41:9.8	Tasmā me nippītike cittaṁ na pakkhandati nappasīdati na santiṭṭhati na vimuccati etaṁ santanti passato’.
an9.41:9.9	Tassa mayhaṁ, ānanda, etadahosi:
an9.41:9.10	‘sace kho ahaṁ pītiyā ādīnavaṁ disvā taṁ bahulaṁ kareyyaṁ, nippītike ānisaṁsaṁ adhigamma tamāseveyyaṁ, ṭhānaṁ kho panetaṁ vijjati yaṁ me nippītike cittaṁ pakkhandeyya pasīdeyya santiṭṭheyya vimucceyya etaṁ santanti passato’.
an9.41:9.11	So kho ahaṁ, ānanda, aparena samayena pītiyā ādīnavaṁ disvā taṁ bahulamakāsiṁ, nippītike ānisaṁsaṁ adhigamma tamāseviṁ.
an9.41:9.12	Tassa mayhaṁ, ānanda, nippītike cittaṁ pakkhandati pasīdati santiṭṭhati vimuccati etaṁ santanti passato.
an9.41:9.13	So kho ahaṁ, ānanda, pītiyā ca virāgā …pe… tatiyaṁ jhānaṁ upasampajja viharāmi.
an9.41:9.14	Tassa mayhaṁ, ānanda, iminā vihārena viharato pītisahagatā saññāmanasikārā samudācaranti. Svassa me hoti ābādho.
an9.41:9.15	Seyyathāpi, ānanda, sukhino dukkhaṁ uppajjeyya yāvadeva ābādhāya;
an9.41:9.16	evamevassa me pītisahagatā saññāmanasikārā samudācaranti. Svassa me hoti ābādho.
an9.41:10.1	Tassa mayhaṁ, ānanda, etadahosi:
an9.41:10.2	‘yannūnāhaṁ sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja vihareyyan’ti.
an9.41:10.3	Tassa mayhaṁ, ānanda, adukkhamasukhe cittaṁ na pakkhandati nappasīdati na santiṭṭhati na vimuccati etaṁ santanti passato.
an9.41:10.4	Tassa mayhaṁ, ānanda, etadahosi:
an9.41:10.5	‘ko nu kho hetu ko paccayo, yena me adukkhamasukhe cittaṁ na pakkhandati nappasīdati na santiṭṭhati na vimuccati etaṁ santanti passato’?
an9.41:10.6	Tassa mayhaṁ, ānanda, etadahosi:
an9.41:10.7	‘upekkhāsukhe kho me ādīnavo adiṭṭho, so ca me abahulīkato, adukkhamasukhe ca ānisaṁso anadhigato, so ca me anāsevito.
an9.41:10.8	Tasmā me adukkhamasukhe cittaṁ na pakkhandati nappasīdati na santiṭṭhati na vimuccati etaṁ santanti passato’.
an9.41:10.9	Tassa mayhaṁ, ānanda, etadahosi:
an9.41:10.10	‘sace kho ahaṁ upekkhāsukhe ādīnavaṁ disvā taṁ bahulaṁ kareyyaṁ, adukkhamasukhe ānisaṁsaṁ adhigamma tamāseveyyaṁ, ṭhānaṁ kho panetaṁ vijjati yaṁ me adukkhamasukhe cittaṁ pakkhandeyya pasīdeyya santiṭṭheyya vimucceyya etaṁ santanti passato’.
an9.41:10.11	So kho ahaṁ, ānanda, aparena samayena upekkhāsukhe ādīnavaṁ disvā taṁ bahulamakāsiṁ adukkhamasukhe ānisaṁsaṁ adhigamma tamāseviṁ.
an9.41:10.12	Tassa mayhaṁ, ānanda, adukkhamasukhe cittaṁ pakkhandati pasīdati santiṭṭhati vimuccati etaṁ santanti passato.
an9.41:10.13	So kho ahaṁ, ānanda, sukhassa ca pahānā …pe… catutthaṁ jhānaṁ upasampajja viharāmi.
an9.41:10.14	Tassa mayhaṁ, ānanda, iminā vihārena viharato upekkhāsahagatā saññāmanasikārā samudācaranti. Svassa me hoti ābādho.
an9.41:10.15	Seyyathāpi, ānanda, sukhino dukkhaṁ uppajjeyya yāvadeva ābādhāya;
an9.41:10.16	evamevassa me upekkhāsahagatā saññāmanasikārā samudācaranti. Svassa me hoti ābādho.
an9.41:11.1	Tassa mayhaṁ, ānanda, etadahosi:
an9.41:11.2	‘yannūnāhaṁ sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā “ananto ākāso”ti ākāsānañcāyatanaṁ upasampajja vihareyyan’ti.
an9.41:11.3	Tassa mayhaṁ, ānanda, ākāsānañcāyatane cittaṁ na pakkhandati nappasīdati na santiṭṭhati na vimuccati etaṁ santanti passato.
an9.41:11.4	Tassa mayhaṁ, ānanda, etadahosi:
an9.41:11.5	‘ko nu kho hetu ko paccayo, yena me ākāsānañcāyatane cittaṁ na pakkhandati nappasīdati na santiṭṭhati na vimuccati etaṁ santanti passato’?
an9.41:11.6	Tassa mayhaṁ, ānanda, etadahosi:
an9.41:11.7	‘rūpesu kho me ādīnavo adiṭṭho, so ca abahulīkato, ākāsānañcāyatane ca ānisaṁso anadhigato, so ca me anāsevito.
an9.41:11.8	Tasmā me ākāsānañcāyatane cittaṁ na pakkhandati nappasīdati na santiṭṭhati na vimuccati etaṁ santanti passato’.
an9.41:11.9	Tassa mayhaṁ, ānanda, etadahosi:
an9.41:11.10	‘sace kho ahaṁ rūpesu ādīnavaṁ disvā taṁ bahulaṁ kareyyaṁ, ākāsānañcāyatane ānisaṁsaṁ adhigamma tamāseveyyaṁ, ṭhānaṁ kho panetaṁ vijjati yaṁ me ākāsānañcāyatane cittaṁ pakkhandeyya pasīdeyya santiṭṭheyya vimucceyya etaṁ santanti passato’.
an9.41:11.11	So kho ahaṁ, ānanda, aparena samayena rūpesu ādīnavaṁ disvā taṁ bahulamakāsiṁ, ākāsānañcāyatane ānisaṁsaṁ adhigamma tamāseviṁ.
an9.41:11.12	Tassa mayhaṁ, ānanda, ākāsānañcāyatane cittaṁ pakkhandati pasīdati santiṭṭhati vimuccati etaṁ santanti passato.
an9.41:11.13	So kho ahaṁ, ānanda, sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharāmi.
an9.41:11.14	Tassa mayhaṁ, ānanda, iminā vihārena viharato rūpasahagatā saññāmanasikārā samudācaranti. Svassa me hoti ābādho.
an9.41:11.15	Seyyathāpi, ānanda, sukhino dukkhaṁ uppajjeyya yāvadeva ābādhāya;
an9.41:11.16	evamevassa me rūpasahagatā saññāmanasikārā samudācaranti. Svassa me hoti ābādho.
an9.41:12.1	Tassa mayhaṁ, ānanda, etadahosi:
an9.41:12.2	‘yannūnāhaṁ sabbaso ākāsānañcāyatanaṁ samatikkamma “anantaṁ viññāṇan”ti viññāṇañcāyatanaṁ upasampajja vihareyyan’ti.
an9.41:12.3	Tassa mayhaṁ, ānanda, viññāṇañcāyatane cittaṁ na pakkhandati nappasīdati na santiṭṭhati na vimuccati etaṁ santanti passato.
an9.41:12.4	Tassa mayhaṁ, ānanda, etadahosi:
an9.41:12.5	‘ko nu kho hetu ko paccayo, yena me viññāṇañcāyatane cittaṁ na pakkhandati nappasīdati na santiṭṭhati na vimuccati etaṁ santanti passato’?
an9.41:12.6	Tassa mayhaṁ, ānanda, etadahosi:
an9.41:12.7	‘ākāsānañcāyatane kho me ādīnavo adiṭṭho, so ca abahulīkato, viññāṇañcāyatane ca ānisaṁso anadhigato, so ca me anāsevito.
an9.41:12.8	Tasmā me viññāṇañcāyatane cittaṁ na pakkhandati nappasīdati na santiṭṭhati na vimuccati etaṁ santanti passato’.
an9.41:12.9	Tassa mayhaṁ, ānanda, etadahosi:
an9.41:12.10	‘sace kho ahaṁ ākāsānañcāyatane ādīnavaṁ disvā taṁ bahulaṁ kareyyaṁ, viññāṇañcāyatane ānisaṁsaṁ adhigamma tamāseveyyaṁ, ṭhānaṁ kho panetaṁ vijjati yaṁ me viññāṇañcāyatane cittaṁ pakkhandeyya pasīdeyya santiṭṭheyya vimucceyya etaṁ santanti passato’.
an9.41:12.11	So kho ahaṁ, ānanda, aparena samayena ākāsānañcāyatane ādīnavaṁ disvā taṁ bahulamakāsiṁ, viññāṇañcāyatane ānisaṁsaṁ adhigamma tamāseviṁ.
an9.41:12.12	Tassa mayhaṁ, ānanda, viññāṇañcāyatane cittaṁ pakkhandati pasīdati santiṭṭhati vimuccati etaṁ santanti passato.
an9.41:12.13	So kho ahaṁ, ānanda, sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharāmi.
an9.41:12.14	Tassa mayhaṁ, ānanda, iminā vihārena viharato ākāsānañcāyatanasahagatā saññāmanasikārā samudācaranti. Svassa me hoti ābādho.
an9.41:12.15	Seyyathāpi, ānanda, sukhino dukkhaṁ uppajjeyya yāvadeva ābādhāya;
an9.41:12.16	evamevassa me ākāsānañcāyatanasahagatā saññāmanasikārā samudācaranti. Svassa me hoti ābādho.
an9.41:13.1	Tassa mayhaṁ, ānanda, etadahosi:
an9.41:13.2	‘yannūnāhaṁ sabbaso viññāṇañcāyatanaṁ samatikkamma “natthi kiñcī”ti ākiñcaññāyatanaṁ upasampajja vihareyyan’ti.
an9.41:13.3	Tassa mayhaṁ, ānanda, ākiñcaññāyatane cittaṁ na pakkhandati nappasīdati na santiṭṭhati na vimuccati etaṁ santanti passato.
an9.41:13.4	Tassa mayhaṁ, ānanda, etadahosi:
an9.41:13.5	‘ko nu kho hetu ko paccayo, yena me ākiñcaññāyatane cittaṁ na pakkhandati nappasīdati na santiṭṭhati na vimuccati etaṁ santanti passato’?
an9.41:13.6	Tassa mayhaṁ, ānanda, etadahosi:
an9.41:13.7	‘viññāṇañcāyatane kho me ādīnavo adiṭṭho, so ca me abahulīkato, ākiñcaññāyatane ca ānisaṁso anadhigato, so ca me anāsevito.
an9.41:13.8	Tasmā me ākiñcaññāyatane cittaṁ na pakkhandati nappasīdati na santiṭṭhati na vimuccati etaṁ santanti passato’.
an9.41:13.9	Tassa mayhaṁ, ānanda, etadahosi:
an9.41:13.10	‘sace kho ahaṁ viññāṇañcāyatane ādīnavaṁ disvā taṁ bahulaṁ kareyyaṁ, ākiñcaññāyatane ānisaṁsaṁ adhigamma tamāseveyyaṁ, ṭhānaṁ kho panetaṁ vijjati yaṁ me ākiñcaññāyatane cittaṁ pakkhandeyya pasīdeyya santiṭṭheyya vimucceyya etaṁ santanti passato’.
an9.41:13.11	So kho ahaṁ, ānanda, aparena samayena viññāṇañcāyatane ādīnavaṁ disvā taṁ bahulamakāsiṁ, ākiñcaññāyatane ānisaṁsaṁ adhigamma tamāseviṁ.
an9.41:13.12	Tassa mayhaṁ, ānanda, ākiñcaññāyatane cittaṁ pakkhandati pasīdati santiṭṭhati vimuccati etaṁ santanti passato.
an9.41:13.13	So kho ahaṁ, ānanda, sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharāmi.
an9.41:13.14	Tassa mayhaṁ, ānanda, iminā vihārena viharato viññāṇañcāyatanasahagatā saññāmanasikārā samudācaranti. Svassa me hoti ābādho.
an9.41:13.15	Seyyathāpi, ānanda, sukhino dukkhaṁ uppajjeyya yāvadeva ābādhāya;
an9.41:13.16	evamevassa me viññāṇañcāyatanasahagatā saññāmanasikārā samudācaranti. Svassa me hoti ābādho.
an9.41:14.1	Tassa mayhaṁ, ānanda, etadahosi:
an9.41:14.2	‘yannūnāhaṁ sabbaso ākiñcaññāyatanaṁ samatikkamma nevasaññānāsaññāyatanaṁ upasampajja vihareyyan’ti.
an9.41:14.3	Tassa mayhaṁ, ānanda, nevasaññānāsaññāyatane cittaṁ na pakkhandati nappasīdati na santiṭṭhati na vimuccati etaṁ santanti passato.
an9.41:14.4	Tassa mayhaṁ, ānanda, etadahosi:
an9.41:14.5	‘ko nu kho hetu ko paccayo, yena me nevasaññānāsaññāyatane cittaṁ na pakkhandati nappasīdati na santiṭṭhati na vimuccati etaṁ santanti passato’?
an9.41:14.6	Tassa mayhaṁ, ānanda, etadahosi:
an9.41:14.7	‘ākiñcaññāyatane kho me ādīnavo adiṭṭho, so ca me abahulīkato, nevasaññānāsaññāyatane ca ānisaṁso anadhigato, so ca me anāsevito.
an9.41:14.8	Tasmā me nevasaññānāsaññāyatane cittaṁ na pakkhandati nappasīdati na santiṭṭhati na vimuccati etaṁ santanti passato’.
an9.41:14.9	Tassa mayhaṁ, ānanda, etadahosi:
an9.41:14.10	‘sace kho ahaṁ ākiñcaññāyatane ādīnavaṁ disvā taṁ bahulaṁ kareyyaṁ, nevasaññānāsaññāyatane ānisaṁsaṁ adhigamma tamāseveyyaṁ, ṭhānaṁ kho panetaṁ vijjati yaṁ me nevasaññānāsaññāyatane cittaṁ pakkhandeyya pasīdeyya santiṭṭheyya vimucceyya etaṁ santanti passato’.
an9.41:14.11	So kho ahaṁ, ānanda, aparena samayena ākiñcaññāyatane ādīnavaṁ disvā taṁ bahulamakāsiṁ, nevasaññānāsaññāyatane ānisaṁsaṁ adhigamma tamāseviṁ.
an9.41:14.12	Tassa mayhaṁ, ānanda, nevasaññānāsaññāyatane cittaṁ pakkhandati pasīdati santiṭṭhati vimuccati etaṁ santanti passato.
an9.41:14.13	So kho ahaṁ, ānanda, sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharāmi.
an9.41:14.14	Tassa mayhaṁ, ānanda, iminā vihārena viharato ākiñcaññāyatanasahagatā saññāmanasikārā samudācaranti. Svassa me hoti ābādho.
an9.41:14.15	Seyyathāpi, ānanda, sukhino dukkhaṁ uppajjeyya yāvadeva ābādhāya;
an9.41:14.16	evamevassa me ākiñcaññāyatanasahagatā saññāmanasikārā samudācaranti. Svassa me hoti ābādho.
an9.41:15.1	Tassa mayhaṁ, ānanda, etadahosi:
an9.41:15.2	‘yannūnāhaṁ nevasaññānāsaññāyatanaṁ samatikkamma saññāvedayitanirodhaṁ upasampajja vihareyyan’ti.
an9.41:15.3	Tassa mayhaṁ, ānanda, saññāvedayitanirodhe cittaṁ na pakkhandati nappasīdati na santiṭṭhati na vimuccati etaṁ santanti passato.
an9.41:15.4	Tassa mayhaṁ, ānanda, etadahosi:
an9.41:15.5	‘ko nu kho hetu, ko paccayo, yena me saññāvedayitanirodhe cittaṁ na pakkhandati nappasīdati na santiṭṭhati na vimuccati etaṁ santanti passato’?
an9.41:15.6	Tassa mayhaṁ, ānanda, etadahosi:
an9.41:15.7	‘nevasaññānāsaññāyatane kho me ādīnavo adiṭṭho, so ca me abahulīkato, saññāvedayitanirodhe ca ānisaṁso anadhigato, so ca me anāsevito.
an9.41:15.8	Tasmā me saññāvedayitanirodhe cittaṁ na pakkhandati nappasīdati na santiṭṭhati na vimuccati etaṁ santanti passato’.
an9.41:15.9	Tassa mayhaṁ, ānanda, etadahosi:
an9.41:15.10	‘sace kho ahaṁ nevasaññānāsaññāyatane ādīnavaṁ disvā taṁ bahulaṁ kareyyaṁ, saññāvedayitanirodhe ānisaṁsaṁ adhigamma tamāseveyyaṁ, ṭhānaṁ kho panetaṁ vijjati yaṁ me saññāvedayitanirodhe cittaṁ pakkhandeyya pasīdeyya santiṭṭheyya vimucceyya etaṁ santanti passato’.
an9.41:15.11	So kho ahaṁ, ānanda, aparena samayena nevasaññānāsaññāyatane ādīnavaṁ disvā taṁ bahulamakāsiṁ, saññāvedayitanirodhe ānisaṁsaṁ adhigamma tamāseviṁ.
an9.41:15.12	Tassa mayhaṁ, ānanda, saññāvedayitanirodhe cittaṁ pakkhandati pasīdati santiṭṭhati vimuccati etaṁ santanti passato.
an9.41:15.13	So kho ahaṁ, ānanda, sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharāmi, paññāya ca me disvā āsavā parikkhayaṁ agamaṁsu.
an9.41:16.1	Yāvakīvañcāhaṁ, ānanda, imā nava anupubbavihārasamāpattiyo na evaṁ anulomapaṭilomaṁ samāpajjimpi vuṭṭhahimpi, neva tāvāhaṁ, ānanda, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.
an9.41:16.2	Yato ca kho ahaṁ, ānanda, imā nava anupubbavihārasamāpattiyo evaṁ anulomapaṭilomaṁ samāpajjimpi vuṭṭhahimpi, athāhaṁ, ānanda, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṁ sammāsambodhiṁ abhisambuddho’ti paccaññāsiṁ.
an9.41:16.3	Ñāṇañca pana me dassanaṁ udapādi:
an9.41:16.4	‘akuppā me cetovimutti, ayamantimā jāti, natthi dāni punabbhavo’”ti.
an9.41:16.5	Dasamaṁ.
an9.41:16.6	Mahāvaggo catuttho.
an9.41:17.0	Tassuddānaṁ
an9.41:17.1	Dve vihārā ca nibbānaṁ,
an9.41:17.2	gāvī jhānena pañcamaṁ;
an9.41:17.3	Ānando brāhmaṇā devo,
an9.41:17.4	nāgena tapussena cāti.
an9.42:0.1	Aṅguttara Nikāya 9.42
an9.42:0.2	5. Sāmaññavagga
an9.42:0.3	Sambādhasutta
an9.42:1.1	Ekaṁ samayaṁ āyasmā ānando kosambiyaṁ viharati ghositārāme.
an9.42:1.2	Atha kho āyasmā udāyī yenāyasmā ānando tenupasaṅkami; upasaṅkamitvā āyasmatā ānandena saddhiṁ sammodi.
an9.42:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā udāyī āyasmantaṁ ānandaṁ etadavoca:
an9.42:1.4	“vuttamidaṁ, āvuso, pañcālacaṇḍena devaputtena:
an9.42:2.1	‘Sambādhe gataṁ okāsaṁ,
an9.42:2.2	Avidvā bhūrimedhaso;
an9.42:2.3	Yo jhānamabujjhi buddho,
an9.42:2.4	Paṭilīnanisabho munī’ti.
an9.42:3.1	Katamo, āvuso, sambādho, katamo sambādhe okāsādhigamo vutto bhagavatā”ti?
an9.42:3.2	“Pañcime, āvuso, kāmaguṇā sambādho vutto bhagavatā.
an9.42:3.3	Katame pañca?
an9.42:3.4	Cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā,
an9.42:3.5	sotaviññeyyā saddā …pe…
an9.42:3.6	ghānaviññeyyā gandhā …
an9.42:3.7	jivhāviññeyyā rasā …
an9.42:3.8	kāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā.
an9.42:3.9	Ime kho, āvuso, pañca kāmaguṇā sambādho vutto bhagavatā.
an9.42:4.1	Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.42:4.2	Ettāvatāpi kho, āvuso, sambādhe okāsādhigamo vutto bhagavatā pariyāyena.
an9.42:4.3	Tatrāpatthi sambādho.
an9.42:4.4	Kiñca tattha sambādho?
an9.42:4.5	Yadeva tattha vitakkavicārā aniruddhā honti, ayamettha sambādho.
an9.42:5.1	Puna caparaṁ, āvuso, bhikkhu vitakkavicārānaṁ vūpasamā …pe… dutiyaṁ jhānaṁ upasampajja viharati.
an9.42:5.2	Ettāvatāpi kho, āvuso, sambādhe okāsādhigamo vutto bhagavatā pariyāyena.
an9.42:5.3	Tatrāpatthi sambādho.
an9.42:5.4	Kiñca tattha sambādho?
an9.42:5.5	Yadeva tattha pīti aniruddhā hoti, ayamettha sambādho.
an9.42:6.1	Puna caparaṁ, āvuso, bhikkhu pītiyā ca virāgā …pe… tatiyaṁ jhānaṁ upasampajja viharati.
an9.42:6.2	Ettāvatāpi kho, āvuso, sambādhe okāsādhigamo vutto bhagavatā pariyāyena.
an9.42:6.3	Tatrāpatthi sambādho.
an9.42:6.4	Kiñca tattha sambādho?
an9.42:6.5	Yadeva tattha upekkhāsukhaṁ aniruddhaṁ hoti, ayamettha sambādho.
an9.42:7.1	Puna caparaṁ, āvuso, bhikkhu sukhassa ca pahānā …pe… catutthaṁ jhānaṁ upasampajja viharati.
an9.42:7.2	Ettāvatāpi kho, āvuso, sambādhe okāsādhigamo vutto bhagavatā pariyāyena.
an9.42:7.3	Tatrāpatthi sambādho.
an9.42:7.4	Kiñca tattha sambādho?
an9.42:7.5	Yadeva tattha rūpasaññā aniruddhā hoti, ayamettha sambādho.
an9.42:8.1	Puna caparaṁ, āvuso, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an9.42:8.2	Ettāvatāpi kho, āvuso, sambādhe okāsādhigamo vutto bhagavatā pariyāyena.
an9.42:8.3	Tatrāpatthi sambādho.
an9.42:8.4	Kiñca tattha sambādho?
an9.42:8.5	Yadeva tattha ākāsānañcāyatanasaññā aniruddhā hoti, ayamettha sambādho.
an9.42:9.1	Puna caparaṁ, āvuso, bhikkhu sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.
an9.42:9.2	Ettāvatāpi kho, āvuso, sambādhe okāsādhigamo vutto bhagavatā pariyāyena.
an9.42:9.3	Tatrāpatthi sambādho.
an9.42:9.4	Kiñca tattha sambādho?
an9.42:9.5	Yadeva tattha viññāṇañcāyatanasaññā aniruddhā hoti, ayamettha sambādho.
an9.42:10.1	Puna caparaṁ, āvuso, bhikkhu sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
an9.42:10.2	Ettāvatāpi kho, āvuso, sambādhe okāsādhigamo vutto bhagavatā pariyāyena.
an9.42:10.3	Tatrāpatthi sambādho.
an9.42:10.4	Kiñca tattha sambādho?
an9.42:10.5	Yadeva tattha ākiñcaññāyatanasaññā aniruddhā hoti, ayamettha sambādho.
an9.42:11.1	Puna caparaṁ, āvuso, bhikkhu sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
an9.42:11.2	Ettāvatāpi kho, āvuso, sambādhe okāsādhigamo vutto bhagavatā pariyāyena.
an9.42:11.3	Tatrāpatthi sambādho.
an9.42:11.4	Kiñca tattha sambādho?
an9.42:11.5	Yadeva tattha nevasaññānāsaññāyatanasaññā aniruddhā hoti, ayamettha sambādho.
an9.42:12.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.42:12.2	Ettāvatāpi kho, āvuso, sambādhe okāsādhigamo vutto bhagavatā nippariyāyenā”ti.
an9.42:12.3	Paṭhamaṁ.
an9.43:0.1	Aṅguttara Nikāya 9.43
an9.43:0.2	5. Sāmaññavagga
an9.43:0.3	Kāyasakkhīsutta
an9.43:1.1	“‘Kāyasakkhī, kāyasakkhī’ti, āvuso, vuccati.
an9.43:1.2	Kittāvatā nu kho, āvuso, kāyasakkhī vutto bhagavatā”ti?
an9.43:2.1	Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.43:2.2	Yathā yathā ca tadāyatanaṁ tathā tathā naṁ kāyena phusitvā viharati.
an9.43:2.3	Ettāvatāpi kho, āvuso, kāyasakkhī vutto bhagavatā pariyāyena.
an9.43:3.1	Puna caparaṁ, āvuso, bhikkhu vitakkavicārānaṁ vūpasamā …pe… dutiyaṁ jhānaṁ …
an9.43:3.2	tatiyaṁ jhānaṁ …
an9.43:3.3	catutthaṁ jhānaṁ upasampajja viharati.
an9.43:3.4	Yathā yathā ca tadāyatanaṁ tathā tathā naṁ kāyena phusitvā viharati.
an9.43:3.5	Ettāvatāpi kho, āvuso, kāyasakkhī vutto bhagavatā pariyāyena.
an9.43:4.1	Puna caparaṁ, āvuso, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an9.43:4.2	Yathā yathā ca tadāyatanaṁ tathā tathā naṁ kāyena phusitvā viharati.
an9.43:4.3	Ettāvatāpi kho, āvuso, kāyasakkhī vutto bhagavatā pariyāyena …pe….
an9.43:5.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.43:5.2	Yathā yathā ca tadāyatanaṁ tathā tathā naṁ kāyena phusitvā viharati.
an9.43:5.3	Ettāvatāpi kho, āvuso, kāyasakkhī vutto bhagavatā nippariyāyenā”ti.
an9.43:5.4	Dutiyaṁ.
an9.44:0.1	Aṅguttara Nikāya 9.44
an9.44:0.2	5. Sāmaññavagga
an9.44:0.3	Paññāvimuttasutta
an9.44:1.1	“‘Paññāvimutto, paññāvimutto’ti, āvuso, vuccati.
an9.44:1.2	Kittāvatā nu kho, āvuso, paññāvimutto vutto bhagavatā”ti?
an9.44:2.1	“Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati,
an9.44:2.2	paññāya ca naṁ pajānāti.
an9.44:2.3	Ettāvatāpi kho, āvuso, paññāvimutto vutto bhagavatā pariyāyena …pe….
an9.44:3.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti,
an9.44:3.2	paññāya ca naṁ pajānāti.
an9.44:3.3	Ettāvatāpi kho, āvuso, paññāvimutto vutto bhagavatā nippariyāyenā”ti.
an9.44:3.4	Tatiyaṁ.
an9.45:0.1	Aṅguttara Nikāya 9.45
an9.45:0.2	5. Sāmaññavagga
an9.45:0.3	Ubhatobhāgavimuttasutta
an9.45:1.1	“‘Ubhatobhāgavimutto, ubhatobhāgavimutto’ti, āvuso, vuccati.
an9.45:1.2	Kittāvatā nu kho, āvuso, ubhatobhāgavimutto vutto bhagavatā”ti?
an9.45:2.1	“Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.45:2.2	Yathā yathā ca tadāyatanaṁ tathā tathā naṁ kāyena phusitvā viharati, paññāya ca naṁ pajānāti.
an9.45:2.3	Ettāvatāpi kho, āvuso, ubhatobhāgavimutto vutto bhagavatā pariyāyena …pe….
an9.45:3.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.45:3.2	Yathā yathā ca tadāyatanaṁ tathā tathā naṁ kāyena phusitvā viharati, paññāya ca naṁ pajānāti.
an9.45:3.3	Ettāvatāpi kho, āvuso, ubhatobhāgavimutto vutto bhagavatā nippariyāyenā”ti.
an9.45:3.4	Catutthaṁ.
an9.46:0.1	Aṅguttara Nikāya 9.46
an9.46:0.2	5. Sāmaññavagga
an9.46:0.3	Sandiṭṭhikadhammasutta
an9.46:1.1	“‘Sandiṭṭhiko dhammo, sandiṭṭhiko dhammo’ti, āvuso, vuccati.
an9.46:1.2	Kittāvatā nu kho, āvuso, sandiṭṭhiko dhammo vutto bhagavatā”ti?
an9.46:2.1	“Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.46:2.2	Ettāvatāpi kho, āvuso, sandiṭṭhiko dhammo vutto bhagavatā pariyāyena …pe….
an9.46:3.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.46:3.2	Ettāvatāpi kho, āvuso, sandiṭṭhiko dhammo vutto bhagavatā nippariyāyenā”ti.
an9.46:3.3	Pañcamaṁ.
an9.47:0.1	Aṅguttara Nikāya 9.47
an9.47:0.2	5. Sāmaññavagga
an9.47:0.3	Sandiṭṭhikanibbānasutta
an9.47:1.1	“‘Sandiṭṭhikaṁ nibbānaṁ, sandiṭṭhikaṁ nibbānan’ti, āvuso, vuccati.
an9.47:1.2	Kittāvatā nu kho, āvuso, sandiṭṭhikaṁ nibbānaṁ vuttaṁ bhagavatā”ti?
an9.47:2.1	“Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.47:2.2	Ettāvatāpi kho, āvuso, sandiṭṭhikaṁ nibbānaṁ vuttaṁ bhagavatā pariyāyena …pe….
an9.47:3.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.47:3.2	Ettāvatāpi kho, āvuso, sandiṭṭhikaṁ nibbānaṁ vuttaṁ bhagavatā nippariyāyenā”ti.
an9.47:3.3	Chaṭṭhaṁ.
an9.48:0.1	Aṅguttara Nikāya 9.48
an9.48:0.2	5. Sāmaññavagga
an9.48:0.3	Nibbānasutta
an9.48:1.1	“‘Nibbānaṁ, nibbānan’ti, āvuso, vuccati …pe….
an9.48:1.2	Sattamaṁ.
an9.49:0.1	Aṅguttara Nikāya 9.49
an9.49:0.2	5. Sāmaññavagga
an9.49:0.3	Parinibbānasutta
an9.49:1.1	“‘Parinibbānaṁ, parinibbānan’ti …pe….
an9.49:1.2	Aṭṭhamaṁ.
an9.50:0.1	Aṅguttara Nikāya 9.50
an9.50:0.2	5. Sāmaññavagga
an9.50:0.3	Tadaṅganibbānasutta
an9.50:1.1	“‘Tadaṅganibbānaṁ, tadaṅganibbānan’ti, āvuso, vuccati …pe….
an9.50:1.2	Navamaṁ.
an9.51:0.1	Aṅguttara Nikāya 9.51
an9.51:0.2	5. Sāmaññavagga
an9.51:0.3	Diṭṭhadhammanibbānasutta
an9.51:1.1	“‘Diṭṭhadhammanibbānaṁ diṭṭhadhammanibbānan’ti, āvuso, vuccati.
an9.51:1.2	Kittāvatā nu kho, āvuso, diṭṭhadhammanibbānaṁ vuttaṁ bhagavatā”ti?
an9.51:2.1	“Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.51:2.2	Ettāvatāpi kho, āvuso, diṭṭhadhammanibbānaṁ vuttaṁ bhagavatā pariyāyena …pe….
an9.51:3.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.51:3.2	Ettāvatāpi kho, āvuso, diṭṭhadhammanibbānaṁ vuttaṁ bhagavatā nippariyāyenā”ti.
an9.51:3.3	Dasamaṁ.
an9.51:3.4	Sāmaññavaggo pañcamo.
an9.51:4.0	Tassuddānaṁ
an9.51:4.1	Sambādho kāyasakkhī paññā,
an9.51:4.2	Ubhatobhāgo sandiṭṭhikā dve;
an9.51:4.3	Nibbānaṁ parinibbānaṁ,
an9.51:4.4	Tadaṅgadiṭṭhadhammikena cāti.
an9.51:4.5	Paṭhamo paṇṇāsako samatto.
an9.52:0.1	Aṅguttara Nikāya 9.52
an9.52:0.2	6. Khemavagga
an9.52:0.3	Khemasutta
an9.52:1.1	“‘Khemaṁ, kheman’ti, āvuso, vuccati.
an9.52:1.2	Kittāvatā nu kho, āvuso, khemaṁ vuttaṁ bhagavatā”ti?
an9.52:2.1	“Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.52:2.2	Ettāvatāpi kho, āvuso, khemaṁ vuttaṁ bhagavatā pariyāyena …pe….
an9.52:3.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.52:3.2	Ettāvatāpi kho, āvuso, khemaṁ vuttaṁ bhagavatā nippariyāyenā”ti.
an9.52:3.3	Paṭhamaṁ.
an9.53:0.1	Aṅguttara Nikāya 9.53
an9.53:0.2	6. Khemavagga
an9.53:0.3	Khemappattasutta
an9.53:1.1	“‘Khemappatto, khemappatto’ti, āvuso, vuccati ….
an9.53:1.2	Dutiyaṁ.
an9.54:0.1	Aṅguttara Nikāya 9.54
an9.54:0.2	6. Khemavagga
an9.54:0.3	Amatasutta
an9.54:1.1	“‘Amataṁ, amatan’ti, āvuso, vuccati ….
an9.54:1.2	Tatiyaṁ.
an9.55:0.1	Aṅguttara Nikāya 9.55
an9.55:0.2	6. Khemavagga
an9.55:0.3	Amatappattasutta
an9.55:1.1	“‘Amatappatto, amatappatto’ti, āvuso, vuccati ….
an9.55:1.2	Catutthaṁ.
an9.56:0.1	Aṅguttara Nikāya 9.56
an9.56:0.2	6. Khemavagga
an9.56:0.3	Abhayasutta
an9.56:1.1	“‘Abhayaṁ, abhayan’ti, āvuso, vuccati ….
an9.56:1.2	Pañcamaṁ.
an9.57:0.1	Aṅguttara Nikāya 9.57
an9.57:0.2	6. Khemavagga
an9.57:0.3	Abhayappattasutta
an9.57:1.1	“‘Abhayappatto, abhayappatto’ti, āvuso, vuccati ….
an9.57:1.2	Chaṭṭhaṁ.
an9.58:0.1	Aṅguttara Nikāya 9.58
an9.58:0.2	6. Khemavagga
an9.58:0.3	Passaddhisutta
an9.58:1.1	“‘Passaddhi, passaddhī’ti, āvuso, vuccati ….
an9.58:1.2	Sattamaṁ.
an9.59:0.1	Aṅguttara Nikāya 9.59
an9.59:0.2	6. Khemavagga
an9.59:0.3	Anupubbapassaddhisutta
an9.59:1.1	“‘Anupubbapassaddhi, anupubbapassaddhī’ti, āvuso, vuccati ….
an9.59:1.2	Aṭṭhamaṁ.
an9.60:0.1	Aṅguttara Nikāya 9.60
an9.60:0.2	6. Khemavagga
an9.60:0.3	Nirodhasutta
an9.60:1.1	“‘Nirodho, nirodho’ti, āvuso, vuccati ….
an9.60:1.2	Navamaṁ.
an9.61:0.1	Aṅguttara Nikāya 9.61
an9.61:0.2	6. Khemavagga
an9.61:0.3	Anupubbanirodhasutta
an9.61:1.1	“‘Anupubbanirodho, anupubbanirodho’ti, āvuso, vuccati.
an9.61:1.2	Kittāvatā nu kho, āvuso, anupubbanirodho vutto bhagavatā”ti?
an9.61:2.1	“Idhāvuso, bhikkhu vivicceva kāmehi …pe… paṭhamaṁ jhānaṁ upasampajja viharati.
an9.61:2.2	Ettāvatāpi kho, āvuso, anupubbanirodho vutto bhagavatā pariyāyena …pe….
an9.61:3.1	Puna caparaṁ, āvuso, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
an9.61:3.2	Ettāvatāpi kho, āvuso, anupubbanirodho vutto bhagavatā nippariyāyenā”ti.
an9.61:3.3	Dasamaṁ.
an9.62:0.1	Aṅguttara Nikāya 9.62
an9.62:0.2	6. Khemavagga
an9.62:0.3	Abhabbasutta
an9.62:1.1	“Nava, bhikkhave, dhamme appahāya abhabbo arahattaṁ sacchikātuṁ.
an9.62:1.2	Katame nava?
an9.62:1.3	Rāgaṁ, dosaṁ, mohaṁ, kodhaṁ, upanāhaṁ, makkhaṁ, paḷāsaṁ, issaṁ, macchariyaṁ—
an9.62:1.4	ime kho, bhikkhave, nava dhamme appahāya abhabbo arahattaṁ sacchikātuṁ.
an9.62:2.1	Nava, bhikkhave, dhamme pahāya bhabbo arahattaṁ sacchikātuṁ.
an9.62:2.2	Katame nava?
an9.62:2.3	Rāgaṁ, dosaṁ, mohaṁ, kodhaṁ, upanāhaṁ, makkhaṁ, paḷāsaṁ, issaṁ, macchariyaṁ—
an9.62:2.4	ime kho, bhikkhave, nava dhamme pahāya bhabbo arahattaṁ sacchikātun”ti.
an9.62:2.5	Ekādasamaṁ.
an9.62:2.6	Khemavaggo paṭhamo.
an9.62:3.0	Tassuddānaṁ
an9.62:3.1	Khemo ca amatañceva,
an9.62:3.2	Abhayaṁ passaddhiyena ca;
an9.62:3.3	Nirodho anupubbo ca,
an9.62:3.4	Dhammaṁ pahāya bhabbena cāti.
an9.63:0.1	Aṅguttara Nikāya 9.63
an9.63:0.2	7. Satipaṭṭhānavagga
an9.63:0.3	Sikkhādubbalyasutta
an9.63:1.1	“Pañcimāni, bhikkhave, sikkhādubbalyāni.
an9.63:1.2	Katamāni pañca?
an9.63:1.3	Pāṇātipāto, adinnādānaṁ, kāmesumicchācāro, musāvādo, surāmerayamajjapamādaṭṭhānaṁ—
an9.63:1.4	imāni kho, bhikkhave, pañca sikkhādubbalyāni.
an9.63:2.1	Imesaṁ kho, bhikkhave, pañcannaṁ sikkhādubbalyānaṁ pahānāya cattāro satipaṭṭhānā bhāvetabbā.
an9.63:2.2	Katame cattāro?
an9.63:2.3	Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ;
an9.63:2.4	vedanāsu …pe…
an9.63:2.5	citte …
an9.63:2.6	dhammesu dhammānupassī viharati ātāpī sampajāno satimā vineyya loke abhijjhādomanassaṁ.
an9.63:2.7	Imesaṁ kho, bhikkhave, pañcannaṁ sikkhādubbalyānaṁ pahānāya ime cattāro satipaṭṭhānā bhāvetabbā”ti.
an9.63:2.8	Paṭhamaṁ.
an9.64:0.1	Aṅguttara Nikāya 9.64
an9.64:0.2	7. Satipaṭṭhānavagga
an9.64:0.3	Nīvaraṇasutta
an9.64:1.1	“Pañcimāni, bhikkhave, nīvaraṇāni.
an9.64:1.2	Katamāni pañca?
an9.64:1.3	Kāmacchandanīvaraṇaṁ, byāpādanīvaraṇaṁ, thinamiddhanīvaraṇaṁ, uddhaccakukkuccanīvaraṇaṁ, vicikicchānīvaraṇaṁ—
an9.64:1.4	imāni kho, bhikkhave, pañca nīvaraṇāni.
an9.64:2.1	Imesaṁ kho, bhikkhave, pañcannaṁ nīvaraṇānaṁ pahānāya cattāro satipaṭṭhānā bhāvetabbā.
an9.64:2.2	Katame cattāro?
an9.64:2.3	Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ;
an9.64:2.4	vedanāsu …pe…
an9.64:2.5	citte …
an9.64:2.6	dhammesu dhammānupassī viharati ātāpī sampajāno satimā vineyya loke abhijjhādomanassaṁ.
an9.64:2.7	Imesaṁ kho, bhikkhave, pañcannaṁ nīvaraṇānaṁ pahānāya ime cattāro satipaṭṭhānā bhāvetabbā”ti.
an9.64:2.8	Dutiyaṁ.
an9.65:0.1	Aṅguttara Nikāya 9.65
an9.65:0.2	7. Satipaṭṭhānavagga
an9.65:0.3	Kāmaguṇasutta
an9.65:1.1	“Pañcime, bhikkhave, kāmaguṇā.
an9.65:1.2	Katame pañca?
an9.65:1.3	Cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā,
an9.65:1.4	sotaviññeyyā saddā …pe…
an9.65:1.5	ghānaviññeyyā gandhā …
an9.65:1.6	jivhāviññeyyā rasā …
an9.65:1.7	kāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā.
an9.65:1.8	Ime kho, bhikkhave, pañca kāmaguṇā.
an9.65:2.1	Imesaṁ kho, bhikkhave, pañcannaṁ kāmaguṇānaṁ pahānāya …pe… ime cattāro satipaṭṭhānā bhāvetabbā”ti.
an9.65:2.2	Tatiyaṁ.
an9.66:0.1	Aṅguttara Nikāya 9.66
an9.66:0.2	7. Satipaṭṭhānavagga
an9.66:0.3	Upādānakkhandhasutta
an9.66:1.1	“Pañcime, bhikkhave, upādānakkhandhā.
an9.66:1.2	Katame pañca?
an9.66:1.3	Rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho—
an9.66:1.4	ime kho, bhikkhave, pañcupādānakkhandhā.
an9.66:2.1	Imesaṁ kho, bhikkhave, pañcannaṁ upādānakkhandhānaṁ pahānāya …pe… ime cattāro satipaṭṭhānā bhāvetabbā”ti.
an9.66:2.2	Catutthaṁ.
an9.67:0.1	Aṅguttara Nikāya 9.67
an9.67:0.2	7. Satipaṭṭhānavagga
an9.67:0.3	Orambhāgiyasutta
an9.67:1.1	“Pañcimāni, bhikkhave, orambhāgiyāni saṁyojanāni.
an9.67:1.2	Katamāni pañca?
an9.67:1.3	Sakkāyadiṭṭhi, vicikicchā, sīlabbataparāmāso, kāmacchando, byāpādo—
an9.67:1.4	imāni kho, bhikkhave, pañcorambhāgiyāni saṁyojanāni.
an9.67:2.1	Imesaṁ kho, bhikkhave, pañcannaṁ orambhāgiyānaṁ saṁyojanānaṁ pahānāya …pe… ime cattāro satipaṭṭhānā bhāvetabbā”ti.
an9.67:2.2	Pañcamaṁ.
an9.68:0.1	Aṅguttara Nikāya 9.68
an9.68:0.2	7. Satipaṭṭhānavagga
an9.68:0.3	Gatisutta
an9.68:1.1	“Pañcimā, bhikkhave, gatiyo.
an9.68:1.2	Katamā pañca?
an9.68:1.3	Nirayo, tiracchānayoni, pettivisayo, manussā, devā—
an9.68:1.4	imā kho, bhikkhave, pañca gatiyo.
an9.68:2.1	Imāsaṁ kho, bhikkhave, pañcannaṁ gatīnaṁ pahānāya …pe… ime cattāro satipaṭṭhānā bhāvetabbā”ti.
an9.68:2.2	Chaṭṭhaṁ.
an9.69:0.1	Aṅguttara Nikāya 9.69
an9.69:0.2	7. Satipaṭṭhānavagga
an9.69:0.3	Macchariyasutta
an9.69:1.1	“Pañcimāni, bhikkhave, macchariyāni.
an9.69:1.2	Katamāni pañca?
an9.69:1.3	Āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ—
an9.69:1.4	imāni kho, bhikkhave, pañca macchariyāni.
an9.69:2.1	Imesaṁ kho, bhikkhave, pañcannaṁ macchariyānaṁ pahānāya …pe… ime cattāro satipaṭṭhānā bhāvetabbā”ti.
an9.69:2.2	Sattamaṁ.
an9.70:0.1	Aṅguttara Nikāya 9.70
an9.70:0.2	7. Satipaṭṭhānavagga
an9.70:0.3	Uddhambhāgiyasutta
an9.70:1.1	“Pañcimāni, bhikkhave, uddhambhāgiyāni saṁyojanāni.
an9.70:1.2	Katamāni pañca?
an9.70:1.3	Rūparāgo, arūparāgo, māno, uddhaccaṁ, avijjā—
an9.70:1.4	imāni kho, bhikkhave, pañcuddhambhāgiyāni saṁyojanāni.
an9.70:2.1	Imesaṁ kho, bhikkhave, pañcannaṁ uddhambhāgiyānaṁ saṁyojanānaṁ pahānāya …pe… ime cattāro satipaṭṭhānā bhāvetabbā”ti.
an9.70:2.2	Aṭṭhamaṁ.
an9.71:0.1	Aṅguttara Nikāya 9.71
an9.71:0.2	7. Satipaṭṭhānavagga
an9.71:0.3	Cetokhilasutta
an9.71:1.1	“Pañcime, bhikkhave, cetokhilā.
an9.71:1.2	Katame pañca?
an9.71:1.3	Idha, bhikkhave, bhikkhu satthari kaṅkhati vicikicchati nādhimuccati na sampasīdati.
an9.71:1.4	Yo so, bhikkhave, bhikkhu satthari kaṅkhati vicikicchati nādhimuccati na sampasīdati, tassa cittaṁ na namati ātappāya anuyogāya sātaccāya padhānāya.
an9.71:1.5	Yassa cittaṁ na namati ātappāya anuyogāya sātaccāya padhānāya, ayaṁ paṭhamo cetokhilo.
an9.71:2.1	Puna caparaṁ, bhikkhave, bhikkhu dhamme kaṅkhati …pe…
an9.71:2.2	saṅghe kaṅkhati …
an9.71:2.3	sikkhāya kaṅkhati …
an9.71:2.4	sabrahmacārīsu kupito hoti anattamano āhatacitto khilajāto.
an9.71:2.5	Yo so, bhikkhave, bhikkhu sabrahmacārīsu kupito hoti anattamano āhatacitto khilajāto, tassa cittaṁ na namati ātappāya anuyogāya sātaccāya padhānāya.
an9.71:2.6	Yassa cittaṁ na namati ātappāya anuyogāya sātaccāya padhānāya, ayaṁ pañcamo cetokhilo.
an9.71:3.1	Imesaṁ kho, bhikkhave, pañcannaṁ cetokhilānaṁ pahānāya …pe… ime cattāro satipaṭṭhānā bhāvetabbā”ti.
an9.71:3.2	Navamaṁ.
an9.72:0.1	Aṅguttara Nikāya 9.72
an9.72:0.2	7. Satipaṭṭhānavagga
an9.72:0.3	Cetasovinibandhasutta
an9.72:1.1	“Pañcime, bhikkhave, cetasovinibandhā.
an9.72:1.2	Katame pañca?
an9.72:1.3	Idha, bhikkhave, bhikkhu kāmesu avītarāgo hoti avigatacchando avigatapemo avigatapipāso avigatapariḷāho avigatataṇho.
an9.72:1.4	Yo so, bhikkhave, bhikkhu kāmesu avītarāgo hoti avigatacchando avigatapemo avigatapipāso avigatapariḷāho avigatataṇho, tassa cittaṁ na namati ātappāya anuyogāya sātaccāya padhānāya.
an9.72:1.5	Yassa cittaṁ na namati ātappāya anuyogāya sātaccāya padhānāya, ayaṁ paṭhamo cetasovinibandho.
an9.72:2.1	Puna caparaṁ, bhikkhave, bhikkhu kāye avītarāgo hoti …pe…
an9.72:2.2	rūpe avītarāgo hoti …
an9.72:2.3	yāvadatthaṁ udarāvadehakaṁ bhuñjitvā seyyasukhaṁ passasukhaṁ middhasukhaṁ anuyutto viharati …
an9.72:2.4	aññataraṁ devanikāyaṁ paṇidhāya brahmacariyaṁ carati: ‘imināhaṁ sīlena vā vatena vā tapena vā brahmacariyena vā devo vā bhavissāmi devaññataro vā’ti.
an9.72:2.5	Yo so, bhikkhave, bhikkhu aññataraṁ devanikāyaṁ paṇidhāya brahmacariyaṁ carati: ‘imināhaṁ sīlena vā vatena vā tapena vā brahmacariyena vā devo vā bhavissāmi devaññataro vā’ti, tassa cittaṁ na namati ātappāya anuyogāya sātaccāya padhānāya.
an9.72:2.6	Yassa cittaṁ na namati ātappāya anuyogāya sātaccāya padhānāya, ayaṁ pañcamo cetasovinibandho.
an9.72:2.7	Ime kho, bhikkhave, pañca cetasovinibandhā.
an9.72:3.1	Imesaṁ kho, bhikkhave, pañcannaṁ cetasovinibandhānaṁ pahānāya cattāro satipaṭṭhānā bhāvetabbā.
an9.72:3.2	Katame cattāro?
an9.72:3.3	Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ;
an9.72:3.4	vedanāsu …pe…
an9.72:3.5	citte …
an9.72:3.6	dhammesu dhammānupassī viharati ātāpī sampajāno satimā vineyya loke abhijjhādomanassaṁ.
an9.72:3.7	Imesaṁ kho, bhikkhave, pañcannaṁ cetasovinibandhānaṁ pahānāya ime cattāro satipaṭṭhānā bhāvetabbā”ti.
an9.72:3.8	Dasamaṁ.
an9.72:3.9	Satipaṭṭhānavaggo dutiyo.
an9.72:4.0	Tassuddānaṁ
an9.72:4.1	Sikkhā nīvaraṇākāmā,
an9.72:4.2	Khandhā ca orambhāgiyā gati;
an9.72:4.3	Maccheraṁ uddhambhāgiyā aṭṭhamaṁ,
an9.72:4.4	Cetokhilā vinibandhāti.
an9.73:0.1	Aṅguttara Nikāya 9.73
an9.73:0.2	8. Sammappadhānavagga
an9.73:0.3	Sikkhasutta
an9.73:1.1	“Pañcimāni, bhikkhave, sikkhādubbalyāni.
an9.73:1.2	Katamāni pañca?
an9.73:1.3	Pāṇātipāto …pe… surāmerayamajjapamādaṭṭhānaṁ—
an9.73:1.4	imāni kho, bhikkhave, pañca sikkhādubbalyāni.
an9.73:2.1	Imesaṁ kho, bhikkhave, pañcannaṁ sikkhādubbalyānaṁ pahānāya cattāro sammappadhānā bhāvetabbā.
an9.73:2.2	Katame cattāro?
an9.73:2.3	Idha, bhikkhave, bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an9.73:2.4	uppannānaṁ pāpakānaṁ akusalānaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati;
an9.73:2.5	anuppannānaṁ kusalānaṁ dhammānaṁ uppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an9.73:2.6	uppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati.
an9.73:2.7	Imesaṁ kho, bhikkhave, pañcannaṁ sikkhādubbalyānaṁ pahānāya ime cattāro sammappadhānā bhāvetabbā”ti.
an9.73:2.8	Paṭhamaṁ.
an9.74-81:0.1	Aṅguttara Nikāya 9.74–81
an9.74-81:0.2	8. Sammappadhānavagga
an9.74-81:0.3	Nīvaraṇasuttādi
an9.74-81:1.1	(Yathā satipaṭṭhānavagge tathā sammappadhānavasena vitthāretabbā.)
an9.82:0.1	Aṅguttara Nikāya 9.82
an9.82:0.2	8. Sammappadhānavagga
an9.82:0.3	Cetasovinibandhasutta
an9.82:1.1	“Pañcime, bhikkhave, cetasovinibandhā.
an9.82:1.2	Katame pañca?
an9.82:1.3	Idha, bhikkhave, bhikkhu kāmesu avītarāgo hoti …pe…
an9.82:1.4	ime kho, bhikkhave, pañca cetasovinibandhā.
an9.82:2.1	Imesaṁ kho, bhikkhave, pañcannaṁ cetasovinibandhānaṁ pahānāya cattāro sammappadhānā bhāvetabbā.
an9.82:2.2	Katame cattāro?
an9.82:2.3	Idha, bhikkhave, bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
an9.82:2.4	uppannānaṁ pāpakānaṁ akusalānaṁ dhammānaṁ pahānāya …
an9.82:2.5	anuppannānaṁ kusalānaṁ dhammānaṁ uppādāya …
an9.82:2.6	uppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati.
an9.82:2.7	Imesaṁ kho, bhikkhave, pañcannaṁ cetasovinibandhānaṁ pahānāya ime cattāro sammappadhānā bhāvetabbā”ti.
an9.82:2.8	Dasamaṁ.
an9.82:2.9	Sammappadhānavaggo tatiyo.
an9.83:0.1	Aṅguttara Nikāya 9.83
an9.83:0.2	9. Iddhipādavagga
an9.83:0.3	Sikkhasutta
an9.83:1.1	“Pañcimāni, bhikkhave, sikkhādubbalyāni.
an9.83:1.2	Katamāni pañca?
an9.83:1.3	Pāṇātipāto …pe… surāmerayamajjapamādaṭṭhānaṁ—
an9.83:1.4	imāni kho, bhikkhave, pañca sikkhādubbalyāni.
an9.83:2.1	Imesaṁ kho, bhikkhave, pañcannaṁ sikkhādubbalyānaṁ pahānāya cattāro iddhipādā bhāvetabbā.
an9.83:2.2	Katame cattāro?
an9.83:2.3	Idha, bhikkhave, bhikkhu chandasamādhipadhānasaṅkhārasamannāgataṁ iddhipādaṁ bhāveti,
an9.83:2.4	vīriyasamādhi …
an9.83:2.5	cittasamādhi …
an9.83:2.6	vīmaṁsāsamādhipadhānasaṅkhārasamannāgataṁ iddhipādaṁ bhāveti.
an9.83:2.7	Imesaṁ kho, bhikkhave, pañcannaṁ sikkhādubbalyānaṁ pahānāya ime cattāro iddhipādā bhāvetabbā”ti.
an9.83:2.8	Paṭhamaṁ.
an9.84-91:0.1	Aṅguttara Nikāya 9.84–91
an9.84-91:0.2	9. Iddhipādavagga
an9.84-91:0.3	Nīvaraṇasuttādi
an9.84-91:1.1	(Yathā satipaṭṭhānavagge tathā iddhipādavasena vitthāretabbā.)
an9.92:0.1	Aṅguttara Nikāya 9.92
an9.92:0.2	9. Iddhipādavagga
an9.92:0.3	Cetasovinibandhasutta
an9.92:1.1	“Pañcime, bhikkhave, cetasovinibandhā.
an9.92:1.2	Katame pañca?
an9.92:1.3	Idha, bhikkhave, bhikkhu kāmesu avītarāgo hoti …pe…
an9.92:1.4	ime kho, bhikkhave, pañca cetasovinibandhā.
an9.92:2.1	Imesaṁ kho, bhikkhave, pañcannaṁ cetasovinibandhānaṁ pahānāya ime cattāro iddhipādā bhāvetabbā.
an9.92:2.2	Katame cattāro?
an9.92:2.3	Idha, bhikkhave, bhikkhu chandasamādhipadhānasaṅkhārasamannāgataṁ iddhipādaṁ bhāveti,
an9.92:2.4	vīriyasamādhi …
an9.92:2.5	cittasamādhi …
an9.92:2.6	vīmaṁsāsamādhipadhānasaṅkhārasamannāgataṁ iddhipādaṁ bhāveti.
an9.92:2.7	Imesaṁ kho, bhikkhave, pañcannaṁ cetasovinibandhānaṁ pahānāya ime cattāro iddhipādā bhāvetabbā”ti.
an9.92:2.8	Dasamaṁ.
an9.92:2.9	Iddhipādavaggo catuttho.
an9.92:3.1	Yatheva satipaṭṭhānā,
an9.92:3.2	padhānā caturopi ca;
an9.92:3.3	Cattāro iddhipādā ca,
an9.92:3.4	tatheva sampayojayeti.
an9.93:0.1	Aṅguttara Nikāya 9
an9.93:0.2	10. Rāgapeyyāla
an9.93:0.3	~
an9.93:1.1	“Rāgassa, bhikkhave, abhiññāya nava dhammā bhāvetabbā.
an9.93:1.2	Katame nava?
an9.93:1.3	Asubhasaññā, maraṇasaññā, āhāre paṭikūlasaññā, sabbaloke anabhiratasaññā, aniccasaññā, anicce dukkhasaññā, dukkhe anattasaññā, pahānasaññā, virāgasaññā—
an9.93:1.4	rāgassa, bhikkhave, abhiññāya ime nava dhammā bhāvetabbā”ti.
an9.94:0.1	Aṅguttara Nikāya 9
an9.94:0.2	10. Rāgapeyyāla
an9.94:0.3	~
an9.94:1.1	“Rāgassa, bhikkhave, abhiññāya nava dhammā bhāvetabbā.
an9.94:1.2	Katame nava?
an9.94:1.3	Paṭhamaṁ jhānaṁ, dutiyaṁ jhānaṁ, tatiyaṁ jhānaṁ, catutthaṁ jhānaṁ, ākāsānañcāyatanaṁ, viññāṇañcāyatanaṁ, ākiñcaññāyatanaṁ, nevasaññānāsaññāyatanaṁ, saññāvedayitanirodho—
an9.94:1.4	rāgassa, bhikkhave, abhiññāya ime nava dhammā bhāvetabbā”ti.
an9.95-112:0.1	Aṅguttara Nikāya 9
an9.95-112:0.2	10. Rāgapeyyāla
an9.95-112:0.3	~
an9.95-112:1.1	“Rāgassa, bhikkhave, pariññāya …pe…
an9.95-112:1.2	parikkhayāya …pe…
an9.95-112:1.3	pahānāya …pe…
an9.95-112:1.4	khayāya …pe…
an9.95-112:1.5	vayāya …pe…
an9.95-112:1.6	virāgāya …pe…
an9.95-112:1.7	nirodhāya …pe…
an9.95-112:1.8	cāgāya …pe…
an9.95-112:1.9	paṭinissaggāya …pe…
an9.95-112:1.10	ime nava dhammā bhāvetabbā”.
an9.113-432:0.1	Aṅguttara Nikāya 9
an9.113-432:0.2	10. Rāgapeyyāla
an9.113-432:0.3	~
an9.113-432:1.1	“Dosassa …pe…
an9.113-432:1.2	mohassa …
an9.113-432:1.3	kodhassa …
an9.113-432:1.4	upanāhassa …
an9.113-432:1.5	makkhassa …
an9.113-432:1.6	paḷāsassa …
an9.113-432:1.7	issāya …
an9.113-432:1.8	macchariyassa …
an9.113-432:1.9	māyāya …
an9.113-432:1.10	sāṭheyyassa …
an9.113-432:1.11	thambhassa …
an9.113-432:1.12	sārambhassa …
an9.113-432:1.13	mānassa …
an9.113-432:1.14	atimānassa …
an9.113-432:1.15	madassa …
an9.113-432:1.16	pamādassa abhiññāya …pe…
an9.113-432:1.17	pariññāya …
an9.113-432:1.18	parikkhayāya …
an9.113-432:1.19	pahānāya …
an9.113-432:1.20	khayāya …
an9.113-432:1.21	vayāya …
an9.113-432:1.22	virāgāya …
an9.113-432:1.23	nirodhāya …
an9.113-432:1.24	cāgāya …
an9.113-432:1.25	paṭinissaggāya …pe…
an9.113-432:1.26	ime nava dhammā bhāvetabbā”ti.
an9.113-432:1.27	Rāgapeyyālaṁ niṭṭhitaṁ.
an9.113-432:1.28	Navakanipātapāḷi niṭṭhitā.
an10.1:0.1	Aṅguttara Nikāya 10.1
an10.1:0.2	1. Ānisaṁsavagga
an10.1:0.3	Kimatthiyasutta
an10.1:1.1	Evaṁ me sutaṁ—
an10.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.1:1.3	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an10.1:2.1	“Kimatthiyāni, bhante, kusalāni sīlāni kimānisaṁsānī”ti?
an10.1:2.2	“Avippaṭisāratthāni kho, ānanda, kusalāni sīlāni avippaṭisārānisaṁsānī”ti.
an10.1:3.1	“Avippaṭisāro pana, bhante, kimatthiyo kimānisaṁso”ti?
an10.1:3.2	“Avippaṭisāro kho, ānanda, pāmojjattho pāmojjānisaṁso”ti.
an10.1:4.1	“Pāmojjaṁ pana, bhante, kimatthiyaṁ kimānisaṁsan”ti?
an10.1:4.2	“Pāmojjaṁ kho, ānanda, pītatthaṁ pītānisaṁsan”ti.
an10.1:5.1	“Pīti pana, bhante, kimatthiyā kimānisaṁsā”ti?
an10.1:5.2	“Pīti kho, ānanda, passaddhatthā passaddhānisaṁsā”ti.
an10.1:6.1	“Passaddhi pana, bhante, kimatthiyā kimānisaṁsā”ti?
an10.1:6.2	“Passaddhi kho, ānanda, sukhatthā sukhānisaṁsā”ti.
an10.1:7.1	“Sukhaṁ pana, bhante, kimatthiyaṁ kimānisaṁsan”ti?
an10.1:7.2	“Sukhaṁ kho, ānanda, samādhatthaṁ samādhānisaṁsan”ti.
an10.1:8.1	“Samādhi pana, bhante, kimatthiyo kimānisaṁso”ti?
an10.1:8.2	“Samādhi kho, ānanda, yathābhūtañāṇadassanattho yathābhūtañāṇadassanānisaṁso”ti.
an10.1:9.1	“Yathābhūtañāṇadassanaṁ pana, bhante, kimatthiyaṁ kimānisaṁsan”ti?
an10.1:9.2	“Yathābhūtañāṇadassanaṁ kho, ānanda, nibbidāvirāgatthaṁ nibbidāvirāgānisaṁsan”ti.
an10.1:10.1	“Nibbidāvirāgo pana, bhante, kimatthiyo kimānisaṁso”ti?
an10.1:10.2	“Nibbidāvirāgo kho, ānanda, vimuttiñāṇadassanattho vimuttiñāṇadassanānisaṁso.
an10.1:11.1	Iti kho, ānanda, kusalāni sīlāni avippaṭisāratthāni avippaṭisārānisaṁsāni;
an10.1:11.2	avippaṭisāro pāmojjattho pāmojjānisaṁso;
an10.1:11.3	pāmojjaṁ pītatthaṁ pītānisaṁsaṁ;
an10.1:11.4	pīti passaddhatthā passaddhānisaṁsā;
an10.1:11.5	passaddhi sukhatthā sukhānisaṁsā;
an10.1:11.6	sukhaṁ samādhatthaṁ samādhānisaṁsaṁ;
an10.1:11.7	samādhi yathābhūtañāṇadassanattho yathābhūtañāṇadassanānisaṁso;
an10.1:11.8	yathābhūtañāṇadassanaṁ nibbidāvirāgatthaṁ nibbidāvirāgānisaṁsaṁ;
an10.1:11.9	nibbidāvirāgo vimuttiñāṇadassanattho vimuttiñāṇadassanānisaṁso.
an10.1:11.10	Iti kho, ānanda, kusalāni sīlāni anupubbena aggāya parentī”ti.
an10.1:11.11	Paṭhamaṁ.
an10.2:0.1	Aṅguttara Nikāya 10.2
an10.2:0.2	1. Ānisaṁsavagga
an10.2:0.3	Cetanākaraṇīyasutta
an10.2:1.1	“Sīlavato, bhikkhave, sīlasampannassa na cetanāya karaṇīyaṁ:
an10.2:1.2	‘avippaṭisāro me uppajjatū’ti.
an10.2:1.3	Dhammatā esā, bhikkhave, yaṁ sīlavato sīlasampannassa avippaṭisāro uppajjati.
an10.2:1.4	Avippaṭisārissa, bhikkhave, na cetanāya karaṇīyaṁ:
an10.2:1.5	‘pāmojjaṁ me uppajjatū’ti.
an10.2:1.6	Dhammatā esā, bhikkhave, yaṁ avippaṭisārissa pāmojjaṁ jāyati.
an10.2:1.7	Pamuditassa, bhikkhave, na cetanāya karaṇīyaṁ:
an10.2:1.8	‘pīti me uppajjatū’ti.
an10.2:1.9	Dhammatā esā, bhikkhave, yaṁ pamuditassa pīti uppajjati.
an10.2:1.10	Pītimanassa, bhikkhave, na cetanāya karaṇīyaṁ:
an10.2:1.11	‘kāyo me passambhatū’ti.
an10.2:1.12	Dhammatā esā, bhikkhave, yaṁ pītimanassa kāyo passambhati.
an10.2:1.13	Passaddhakāyassa, bhikkhave, na cetanāya karaṇīyaṁ:
an10.2:1.14	‘sukhaṁ vediyāmī’ti.
an10.2:1.15	Dhammatā esā, bhikkhave, yaṁ passaddhakāyo sukhaṁ vediyati.
an10.2:1.16	Sukhino, bhikkhave, na cetanāya karaṇīyaṁ:
an10.2:1.17	‘cittaṁ me samādhiyatū’ti.
an10.2:1.18	Dhammatā esā, bhikkhave, yaṁ sukhino cittaṁ samādhiyati.
an10.2:1.19	Samāhitassa, bhikkhave, na cetanāya karaṇīyaṁ:
an10.2:1.20	‘yathābhūtaṁ jānāmi passāmī’ti.
an10.2:1.21	Dhammatā esā, bhikkhave, yaṁ samāhito yathābhūtaṁ jānāti passati.
an10.2:1.22	Yathābhūtaṁ, bhikkhave, jānato passato na cetanāya karaṇīyaṁ:
an10.2:1.23	‘nibbindāmi virajjāmī’ti.
an10.2:1.24	Dhammatā esā, bhikkhave, yaṁ yathābhūtaṁ jānaṁ passaṁ nibbindati virajjati.
an10.2:1.25	Nibbinnassa, bhikkhave, virattassa na cetanāya karaṇīyaṁ:
an10.2:1.26	‘vimuttiñāṇadassanaṁ sacchikaromī’ti.
an10.2:1.27	Dhammatā esā, bhikkhave, yaṁ nibbinno viratto vimuttiñāṇadassanaṁ sacchikaroti.
an10.2:2.1	Iti kho, bhikkhave, nibbidāvirāgo vimuttiñāṇadassanattho vimuttiñāṇadassanānisaṁso;
an10.2:2.2	yathābhūtañāṇadassanaṁ nibbidāvirāgatthaṁ nibbidāvirāgānisaṁsaṁ;
an10.2:2.3	samādhi yathābhūtañāṇadassanattho yathābhūtañāṇadassanānisaṁso;
an10.2:2.4	sukhaṁ samādhatthaṁ samādhānisaṁsaṁ;
an10.2:2.5	passaddhi sukhatthā sukhānisaṁsā;
an10.2:2.6	pīti passaddhatthā passaddhānisaṁsā;
an10.2:2.7	pāmojjaṁ pītatthaṁ pītānisaṁsaṁ;
an10.2:2.8	avippaṭisāro pāmojjattho pāmojjānisaṁso;
an10.2:2.9	kusalāni sīlāni avippaṭisāratthāni avippaṭisārānisaṁsāni.
an10.2:2.10	Iti kho, bhikkhave, dhammā dhamme abhisandenti, dhammā dhamme paripūrenti apārā pāraṁ gamanāyā”ti.
an10.2:2.11	Dutiyaṁ.
an10.3:0.1	Aṅguttara Nikāya 10.3
an10.3:0.2	1. Ānisaṁsavagga
an10.3:0.3	Paṭhamaupanisasutta
an10.3:1.1	“Dussīlassa, bhikkhave, sīlavipannassa hatūpaniso hoti avippaṭisāro;
an10.3:1.2	avippaṭisāre asati avippaṭisāravipannassa hatūpanisaṁ hoti pāmojjaṁ;
an10.3:1.3	pāmojje asati pāmojjavipannassa hatūpanisā hoti pīti;
an10.3:1.4	pītiyā asati pītivipannassa hatūpanisā hoti passaddhi;
an10.3:1.5	passaddhiyā asati passaddhivipannassa hatūpanisaṁ hoti sukhaṁ;
an10.3:1.6	sukhe asati sukhavipannassa hatūpaniso hoti sammāsamādhi;
an10.3:1.7	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ;
an10.3:1.8	yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo;
an10.3:1.9	nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an10.3:1.10	Seyyathāpi, bhikkhave, rukkho sākhāpalāsavipanno. Tassa papaṭikāpi na pāripūriṁ gacchati, tacopi … pheggupi … sāropi na pāripūriṁ gacchati.
an10.3:1.11	Evamevaṁ kho, bhikkhave, dussīlassa sīlavipannassa hatūpaniso hoti avippaṭisāro;
an10.3:1.12	avippaṭisāre asati avippaṭisāravipannassa hatūpanisaṁ hoti …pe…
an10.3:1.13	vimuttiñāṇadassanaṁ.
an10.3:2.1	Sīlavato, bhikkhave, sīlasampannassa upanisasampanno hoti avippaṭisāro;
an10.3:2.2	avippaṭisāre sati avippaṭisārasampannassa upanisasampannaṁ hoti pāmojjaṁ;
an10.3:2.3	pāmojje sati pāmojjasampannassa upanisasampannā hoti pīti;
an10.3:2.4	pītiyā sati pītisampannassa upanisasampannā hoti passaddhi;
an10.3:2.5	passaddhiyā sati passaddhisampannassa upanisasampannaṁ hoti sukhaṁ;
an10.3:2.6	sukhe sati sukhasampannassa upanisasampanno hoti sammāsamādhi;
an10.3:2.7	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ;
an10.3:2.8	yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo;
an10.3:2.9	nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanaṁ.
an10.3:2.10	Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṁ gacchati, tacopi … pheggupi … sāropi pāripūriṁ gacchati.
an10.3:2.11	Evamevaṁ kho, bhikkhave, sīlavato sīlasampannassa upanisasampanno hoti avippaṭisāro;
an10.3:2.12	avippaṭisāre sati avippaṭisārasampannassa upanisasampannaṁ hoti …pe…
an10.3:2.13	vimuttiñāṇadassanan”ti.
an10.3:2.14	Tatiyaṁ.
an10.4:0.1	Aṅguttara Nikāya 10.4
an10.4:0.2	1. Ānisaṁsavagga
an10.4:0.3	Dutiyaupanisasutta
an10.4:1.1	Tatra kho āyasmā sāriputto bhikkhū āmantesi …pe…
an10.4:1.2	“dussīlassa, āvuso, sīlavipannassa hatūpaniso hoti avippaṭisāro;
an10.4:1.3	avippaṭisāre asati avippaṭisāravipannassa hatūpanisaṁ hoti …pe…
an10.4:1.4	vimuttiñāṇadassanaṁ.
an10.4:1.5	Seyyathāpi, āvuso, rukkho sākhāpalāsavipanno. Tassa papaṭikāpi na pāripūriṁ gacchati, tacopi … pheggupi … sāropi na pāripūriṁ gacchati.
an10.4:1.6	Evamevaṁ kho, āvuso, dussīlassa sīlavipannassa hatūpaniso hoti avippaṭisāro;
an10.4:1.7	avippaṭisāre asati avippaṭisāravipannassa hatūpanisaṁ hoti …pe…
an10.4:1.8	vimuttiñāṇadassanaṁ.
an10.4:2.1	Sīlavato, āvuso, sīlasampannassa upanisasampanno hoti avippaṭisāro;
an10.4:2.2	avippaṭisāre sati avippaṭisārasampannassa upanisasampannaṁ hoti …pe…
an10.4:2.3	vimuttiñāṇadassanaṁ.
an10.4:2.4	Seyyathāpi, āvuso, rukkho sākhāpalāsasampanno. Tassa papaṭikāpi pāripūriṁ gacchati, tacopi … pheggupi … sāropi pāripūriṁ gacchati.
an10.4:2.5	Evamevaṁ kho, āvuso, sīlavato sīlasampannassa upanisasampanno hoti avippaṭisāro;
an10.4:2.6	avippaṭisāre sati avippaṭisārasampannassa upanisasampannaṁ hoti …pe…
an10.4:2.7	vimuttiñāṇadassanan”ti.
an10.4:2.8	Catutthaṁ.
an10.5:0.1	Aṅguttara Nikāya 10.5
an10.5:0.2	1. Ānisaṁsavagga
an10.5:0.3	Tatiyaupanisasutta
an10.5:1.1	Tatra kho āyasmā ānando bhikkhū āmantesi …pe…
an10.5:1.2	“dussīlassa, āvuso, sīlavipannassa hatūpaniso hoti avippaṭisāro;
an10.5:1.3	avippaṭisāre asati avippaṭisāravipannassa hatūpanisaṁ hoti pāmojjaṁ;
an10.5:1.4	pāmojje asati pāmojjavipannassa hatūpanisā hoti pīti;
an10.5:1.5	pītiyā asati pītivipannassa hatūpanisā hoti passaddhi;
an10.5:1.6	passaddhiyā asati passaddhivipannassa hatūpanisaṁ hoti sukhaṁ;
an10.5:1.7	sukhe asati sukhavipannassa hatūpaniso hoti sammāsamādhi;
an10.5:1.8	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ;
an10.5:1.9	yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo;
an10.5:1.10	nibbidāvirāge asati nibbidāvirāgavipannassa hatūpanisaṁ hoti vimuttiñāṇadassanaṁ.
an10.5:1.11	Seyyathāpi, āvuso, rukkho sākhāpalāsavipanno. Tassa papaṭikāpi na pāripūriṁ gacchati, tacopi … pheggupi … sāropi na pāripūriṁ gacchati.
an10.5:1.12	Evamevaṁ kho, āvuso, dussīlassa sīlavipannassa hatūpaniso hoti avippaṭisāro;
an10.5:1.13	avippaṭisāre asati avippaṭisāravipannassa hatūpanisaṁ hoti …pe…
an10.5:1.14	vimuttiñāṇadassanaṁ.
an10.5:2.1	Sīlavato, āvuso, sīlasampannassa upanisasampanno hoti avippaṭisāro;
an10.5:2.2	avippaṭisāre sati avippaṭisārasampannassa upanisasampannaṁ hoti pāmojjaṁ;
an10.5:2.3	pāmojje sati pāmojjasampannassa upanisasampannā hoti pīti;
an10.5:2.4	pītiyā sati pītisampannassa upanisasampannā hoti passaddhi;
an10.5:2.5	passaddhiyā sati passaddhisampannassa upanisasampannaṁ hoti sukhaṁ;
an10.5:2.6	sukhe sati sukhasampannassa upanisasampanno hoti sammāsamādhi;
an10.5:2.7	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ;
an10.5:2.8	yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo;
an10.5:2.9	nibbidāvirāge sati nibbidāvirāgasampannassa upanisasampannaṁ hoti vimuttiñāṇadassanaṁ.
an10.5:2.10	Seyyathāpi, āvuso, rukkho sākhāpalāsasampanno. Tassa papaṭikāpi pāripūriṁ gacchati, tacopi … pheggupi … sāropi pāripūriṁ gacchati.
an10.5:2.11	Evamevaṁ kho, āvuso, sīlavato sīlasampannassa upanisasampanno hoti avippaṭisāro;
an10.5:2.12	avippaṭisāre sati avippaṭisārasampannassa upanisasampannaṁ hoti …pe…
an10.5:2.13	vimuttiñāṇadassanan”ti.
an10.5:2.14	Pañcamaṁ.
an10.6:0.1	Aṅguttara Nikāya 10.6
an10.6:0.2	1. Ānisaṁsavagga
an10.6:0.3	Samādhisutta
an10.6:1.1	Atha kho āyasmā ānando yena bhagavā tenupasaṅkami …pe… ekamantaṁ nisinno kho āyasmā ānando bhagavantaṁ etadavoca:
an10.6:1.2	“siyā nu kho, bhante, bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa; saññī ca pana assā”ti?
an10.6:1.3	“Siyā, ānanda, bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa; saññī ca pana assā”ti.
an10.6:2.1	“Yathā kathaṁ pana, bhante, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa; saññī ca pana assā”ti?
an10.6:3.1	“Idhānanda, bhikkhu evaṁsaññī hoti:
an10.6:3.2	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an10.6:3.3	Evaṁ kho, ānanda, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa; saññī ca pana assā”ti.
an10.6:3.4	Chaṭṭhaṁ.
an10.7:0.1	Aṅguttara Nikāya 10.7
an10.7:0.2	1. Ānisaṁsavagga
an10.7:0.3	Sāriputtasutta
an10.7:1.1	Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an10.7:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā ānando āyasmantaṁ sāriputtaṁ etadavoca:
an10.7:2.1	“Siyā nu kho, āvuso sāriputta, bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa; saññī ca pana assā”ti?
an10.7:3.1	“Siyā, āvuso ānanda, bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… na paraloke paralokasaññī assa; saññī ca pana assā”ti.
an10.7:4.1	“Yathā kathaṁ pana, āvuso sāriputta, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… saññī ca pana assā”ti?
an10.7:4.2	“Ekamidāhaṁ, āvuso ānanda, samayaṁ idheva sāvatthiyaṁ viharāmi andhavanasmiṁ.
an10.7:4.3	Tatthāhaṁ tathārūpaṁ samādhiṁ samāpajjiṁ yathā neva pathaviyaṁ pathavisaññī ahosiṁ, na āpasmiṁ āposaññī ahosiṁ, na tejasmiṁ tejosaññī ahosiṁ, na vāyasmiṁ vāyosaññī ahosiṁ, na ākāsānañcāyatane ākāsānañcāyatanasaññī ahosiṁ, na viññāṇañcāyatane viññāṇañcāyatanasaññī ahosiṁ, na ākiñcaññāyatane ākiñcaññāyatanasaññī ahosiṁ, na nevasaññānāsaññāyatane nevasaññānāsaññāyatanasaññī ahosiṁ, na idhaloke idhalokasaññī ahosiṁ, na paraloke paralokasaññī ahosiṁ; saññī ca pana ahosin”ti.
an10.7:5.1	“Kiṁsaññī panāyasmā sāriputto tasmiṁ samaye ahosī”ti?
an10.7:5.2	“‘Bhavanirodho nibbānaṁ bhavanirodho nibbānan’ti kho me, āvuso, aññāva saññā uppajjati aññāva saññā nirujjhati.
an10.7:5.3	Seyyathāpi, āvuso, sakalikaggissa jhāyamānassa aññāva acci uppajjati aññāva acci nirujjhati;
an10.7:5.4	evamevaṁ kho, āvuso, ‘bhavanirodho nibbānaṁ bhavanirodho nibbānan’ti aññāva saññā uppajjati aññāva saññā nirujjhati.
an10.7:5.5	‘Bhavanirodho nibbānan’ti saññī ca panāhaṁ, āvuso, tasmiṁ samaye ahosin”ti.
an10.7:5.6	Sattamaṁ.
an10.8:0.1	Aṅguttara Nikāya 10.8
an10.8:0.2	1. Ānisaṁsavagga
an10.8:0.3	Jhānasutta
an10.8:1.1	“Saddho ca, bhikkhave, bhikkhu hoti, no ca sīlavā;
an10.8:1.2	evaṁ so tenaṅgena aparipūro hoti.
an10.8:1.3	Tena taṁ aṅgaṁ paripūretabbaṁ:
an10.8:1.4	‘kintāhaṁ saddho ca assaṁ, sīlavā cā’ti.
an10.8:1.5	Yato ca kho, bhikkhave, bhikkhu saddho ca hoti sīlavā ca, evaṁ so tenaṅgena paripūro hoti.
an10.8:2.1	Saddho ca, bhikkhave, bhikkhu hoti sīlavā ca, no ca bahussuto …pe…
an10.8:2.2	bahussuto ca, no ca dhammakathiko …
an10.8:2.3	dhammakathiko ca, no ca parisāvacaro …
an10.8:2.4	parisāvacaro ca, no ca visārado parisāya dhammaṁ deseti …
an10.8:2.5	visārado ca parisāya dhammaṁ deseti, no ca vinayadharo …
an10.8:2.6	vinayadharo ca, no ca āraññiko pantasenāsano …
an10.8:2.7	āraññiko ca pantasenāsano, no ca catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī …
an10.8:2.8	catunnañca jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, no ca āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an10.8:2.9	Evaṁ so tenaṅgena aparipūro hoti.
an10.8:2.10	Tena taṁ aṅgaṁ paripūretabbaṁ:
an10.8:2.11	‘kintāhaṁ saddho ca assaṁ, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseyyaṁ, vinayadharo ca, āraññiko ca pantasenāsano, catunnañca jhānānaṁ ābhicetasikānaṁ diṭṭhadhammasukhavihārānaṁ nikāmalābhī assaṁ akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti.
an10.8:3.1	Yato ca kho, bhikkhave, bhikkhu saddho ca hoti, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseti, vinayadharo ca, āraññiko ca pantasenāsano, catunnañca jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati;
an10.8:3.2	evaṁ so tenaṅgena paripūro hoti.
an10.8:3.3	Imehi kho, bhikkhave, dasahi dhammehi samannāgato bhikkhu samantapāsādiko ca hoti sabbākāraparipūro cā”ti.
an10.8:3.4	Aṭṭhamaṁ.
an10.9:0.1	Aṅguttara Nikāya 10.9
an10.9:0.2	1. Ānisaṁsavagga
an10.9:0.3	Santavimokkhasutta
an10.9:1.1	“Saddho ca, bhikkhave, bhikkhu hoti, no ca sīlavā …pe…
an10.9:1.2	sīlavā ca, no ca bahussuto …
an10.9:1.3	bahussuto ca, no ca dhammakathiko …
an10.9:1.4	dhammakathiko ca, no ca parisāvacaro …
an10.9:1.5	parisāvacaro ca, no ca visārado parisāya dhammaṁ deseti …
an10.9:1.6	visārado ca parisāya dhammaṁ deseti, no ca vinayadharo …
an10.9:1.7	vinayadharo ca, no ca āraññiko pantasenāsano …
an10.9:1.8	āraññiko ca pantasenāsano, no ca ye te santā vimokkhā atikkamma rūpe āruppā te kāyena phusitvā viharati …
an10.9:1.9	ye te santā vimokkhā atikkamma rūpe āruppā te ca kāyena phusitvā viharati, no ca āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an10.9:1.10	Evaṁ so tenaṅgena aparipūro hoti.
an10.9:1.11	Tena taṁ aṅgaṁ paripūretabbaṁ:
an10.9:1.12	‘kintāhaṁ saddho ca assaṁ, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseyyaṁ, vinayadharo ca, āraññiko ca pantasenāsano, ye te santā vimokkhā atikkamma rūpe āruppā te ca kāyena phusitvā vihareyyaṁ, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti.
an10.9:2.1	Yato ca kho, bhikkhave, bhikkhu saddho ca hoti, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseti, vinayadharo ca, āraññiko ca pantasenāsano, ye te santā vimokkhā atikkamma rūpe āruppā te ca kāyena phusitvā viharati, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati;
an10.9:2.2	evaṁ so tenaṅgena paripūro hoti.
an10.9:2.3	Imehi kho, bhikkhave, dasahi dhammehi samannāgato bhikkhu samantapāsādiko ca hoti sabbākāraparipūro cā”ti.
an10.9:2.4	Navamaṁ.
an10.10:0.1	Aṅguttara Nikāya 10.10
an10.10:0.2	1. Ānisaṁsavagga
an10.10:0.3	Vijjāsutta
an10.10:1.1	“Saddho ca, bhikkhave, bhikkhu hoti, no ca sīlavā.
an10.10:1.2	Evaṁ so tenaṅgena aparipūro hoti.
an10.10:1.3	Tena taṁ aṅgaṁ paripūretabbaṁ:
an10.10:1.4	‘kintāhaṁ saddho ca assaṁ sīlavā cā’ti.
an10.10:1.5	Yato ca kho, bhikkhave, bhikkhu saddho ca hoti, sīlavā ca, evaṁ so tenaṅgena paripūro hoti.
an10.10:2.1	Saddho ca, bhikkhave, bhikkhu hoti sīlavā ca, no ca bahussuto bahussuto ca,
an10.10:2.2	no ca dhammakathiko …pe…
an10.10:2.3	dhammakathiko ca, no ca parisāvacaro parisāvacaro ca,
an10.10:2.4	no ca visārado parisāya dhammaṁ deseti visārado ca parisāya dhammaṁ deseti,
an10.10:2.5	no ca vinayadharo vinayadharo ca,
an10.10:2.6	no ca anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati. Anekavihitañca …pe… pubbenivāsaṁ anussarati,
an10.10:2.7	no ca dibbena cakkhunā visuddhena atikkantamānusakena …pe… yathākammūpage satte pajānāti dibbena ca cakkhunā visuddhena atikkantamānusakena …pe…
an10.10:2.8	yathākammūpage satte pajānāti, no ca āsavānaṁ khayā …pe… sacchikatvā upasampajja viharati.
an10.10:2.9	Evaṁ so tenaṅgena aparipūro hoti.
an10.10:2.10	Tena taṁ aṅgaṁ paripūretabbaṁ:
an10.10:2.11	‘kintāhaṁ saddho ca assaṁ, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseyyaṁ, vinayadharo ca, anekavihitañca pubbenivāsaṁ anussareyyaṁ, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussareyyaṁ, dibbena ca cakkhunā visuddhena atikkantamānusakena …pe… yathākammūpage satte pajāneyyaṁ, āsavānañca khayā …pe… sacchikatvā upasampajja vihareyyan’ti.
an10.10:3.1	Yato ca kho, bhikkhave, bhikkhu saddho ca hoti, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseti, vinayadharo ca, anekavihitañca pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati, dibbena ca cakkhunā visuddhena atikkantamānusakena …pe… yathākammūpage satte pajānāti, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an10.10:3.2	Evaṁ so tenaṅgena paripūro hoti.
an10.10:3.3	Imehi kho, bhikkhave, dasahi dhammehi samannāgato bhikkhu samantapāsādiko ca hoti sabbākāraparipūro cā”ti.
an10.10:3.4	Dasamaṁ.
an10.10:3.5	Ānisaṁsavaggo paṭhamo.
an10.10:4.0	Tassuddānaṁ
an10.10:4.1	Kimatthiyaṁ cetanā ca,
an10.10:4.2	tayo upanisāpi ca;
an10.10:4.3	Samādhi sāriputto ca,
an10.10:4.4	jhānaṁ santena vijjayāti.
an10.11:0.1	Aṅguttara Nikāya 10.11
an10.11:0.2	2. Nāthavagga
an10.11:0.3	Senāsanasutta
an10.11:1.1	“Pañcaṅgasamannāgato, bhikkhave, bhikkhu pañcaṅgasamannāgataṁ senāsanaṁ sevamāno bhajamāno nacirasseva āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyya.
an10.11:2.1	Kathañca, bhikkhave, bhikkhu pañcaṅgasamannāgato hoti?
an10.11:2.2	Idha, bhikkhave, bhikkhu saddho hoti; saddahati tathāgatassa bodhiṁ:
an10.11:2.3	‘itipi so bhagavā …pe… bhagavā’ti;
an10.11:2.4	appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya;
an10.11:2.5	asaṭho hoti amāyāvī, yathābhūtaṁ attānaṁ āvikattā satthari vā viññūsu vā sabrahmacārīsu;
an10.11:2.6	āraddhavīriyo viharati, akusalānaṁ dhammānaṁ pahānāya, kusalānaṁ dhammānaṁ upasampadāya; thāmavā daḷhaparakkamo anikkhittadhuro kusalesu dhammesu;
an10.11:2.7	paññavā hoti, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an10.11:2.8	Evaṁ kho, bhikkhave, bhikkhu pañcaṅgasamannāgato hoti.
an10.11:3.1	Kathañca, bhikkhave, senāsanaṁ pañcaṅgasamannāgataṁ hoti?
an10.11:3.2	Idha, bhikkhave, senāsanaṁ nātidūraṁ hoti nāccāsannaṁ gamanāgamanasampannaṁ
an10.11:3.3	divā appākiṇṇaṁ rattiṁ appasaddaṁ appanigghosaṁ
an10.11:3.4	appaḍaṁsamakasavātātapasarīsapasamphassaṁ;
an10.11:3.5	tasmiṁ kho pana senāsane viharantassa appakasirena uppajjanti cīvarapiṇḍapātasenāsanagilānapaccayabhesajjaparikkhārā;
an10.11:3.6	tasmiṁ kho pana senāsane therā bhikkhū viharanti bahussutā āgatāgamā dhammadharā vinayadharā mātikādharā;
an10.11:3.7	te kālena kālaṁ upasaṅkamitvā paripucchati paripañhati:
an10.11:3.8	‘idaṁ, bhante, kathaṁ, imassa ko attho’ti;
an10.11:3.9	tassa te āyasmanto avivaṭañceva vivaranti anuttānīkatañca uttāniṁ karonti anekavihitesu ca kaṅkhāṭhāniyesu dhammesu kaṅkhaṁ paṭivinodenti.
an10.11:3.10	Evaṁ kho, bhikkhave, senāsanaṁ pañcaṅgasamannāgataṁ hoti.
an10.11:3.11	Pañcaṅgasamannāgato kho, bhikkhave, bhikkhu pañcaṅgasamannāgataṁ senāsanaṁ sevamāno bhajamāno nacirasseva āsavānaṁ khayā …pe… sacchikatvā upasampajja vihareyyā”ti.
an10.11:3.12	Paṭhamaṁ.
an10.12:0.1	Aṅguttara Nikāya 10.12
an10.12:0.2	2. Nāthavagga
an10.12:0.3	Pañcaṅgasutta
an10.12:1.1	“Pañcaṅgavippahīno, bhikkhave, bhikkhu pañcaṅgasamannāgato imasmiṁ dhammavinaye ‘kevalī vusitavā uttamapuriso’ti vuccati.
an10.12:1.2	Kathañca, bhikkhave, bhikkhu pañcaṅgavippahīno hoti?
an10.12:1.3	Idha, bhikkhave, bhikkhuno kāmacchando pahīno hoti, byāpādo pahīno hoti, thinamiddhaṁ pahīnaṁ hoti, uddhaccakukkuccaṁ pahīnaṁ hoti, vicikicchā pahīnā hoti.
an10.12:1.4	Evaṁ kho, bhikkhave, bhikkhu pañcaṅgavippahīno hoti.
an10.12:2.1	Kathañca, bhikkhave, bhikkhu pañcaṅgasamannāgato hoti?
an10.12:2.2	Idha, bhikkhave, bhikkhu asekhena sīlakkhandhena samannāgato hoti, asekhena samādhikkhandhena samannāgato hoti, asekhena paññākkhandhena samannāgato hoti, asekhena vimuttikkhandhena samannāgato hoti, asekhena vimuttiñāṇadassanakkhandhena samannāgato hoti.
an10.12:2.3	Evaṁ kho, bhikkhave, bhikkhu pañcaṅgasamannāgato hoti.
an10.12:3.1	Pañcaṅgavippahīno kho, bhikkhave, bhikkhu pañcaṅgasamannāgato imasmiṁ dhammavinaye ‘kevalī vusitavā uttamapuriso’ti vuccati.
an10.12:4.1	Kāmacchando ca byāpādo,
an10.12:4.2	thinamiddhañca bhikkhuno;
an10.12:4.3	Uddhaccaṁ vicikicchā ca,
an10.12:4.4	sabbasova na vijjati.
an10.12:5.1	Asekhena ca sīlena,
an10.12:5.2	asekhena samādhinā;
an10.12:5.3	Vimuttiyā ca sampanno,
an10.12:5.4	ñāṇena ca tathāvidho.
an10.12:6.1	Sa ve pañcaṅgasampanno,
an10.12:6.2	pañca aṅge vivajjayaṁ;
an10.12:6.3	Imasmiṁ dhammavinaye,
an10.12:6.4	kevalī iti vuccatī”ti.
an10.12:6.5	Dutiyaṁ.
an10.13:0.1	Aṅguttara Nikāya 10.13
an10.13:0.2	2. Nāthavagga
an10.13:0.3	Saṁyojanasutta
an10.13:1.1	“Dasayimāni, bhikkhave, saṁyojanāni.
an10.13:1.2	Katamāni dasa?
an10.13:1.3	Pañcorambhāgiyāni saṁyojanāni, pañcuddhambhāgiyāni saṁyojanāni.
an10.13:1.4	Katamāni pañcorambhāgiyāni saṁyojanāni?
an10.13:1.5	Sakkāyadiṭṭhi, vicikicchā, sīlabbataparāmāso, kāmacchando, byāpādo—
an10.13:1.6	imāni pañcorambhāgiyāni saṁyojanāni.
an10.13:2.1	Katamāni pañcuddhambhāgiyāni saṁyojanāni?
an10.13:2.2	Rūparāgo, arūparāgo, māno, uddhaccaṁ, avijjā—
an10.13:2.3	imāni pañcuddhambhāgiyāni saṁyojanāni.
an10.13:2.4	Imāni kho, bhikkhave, dasa saṁyojanānī”ti.
an10.13:2.5	Tatiyaṁ.
an10.14:0.1	Aṅguttara Nikāya 10.14
an10.14:0.2	2. Nāthavagga
an10.14:0.3	Cetokhilasutta
an10.14:1.1	“Yassa kassaci, bhikkhave, bhikkhussa vā bhikkhuniyā vā pañca cetokhilā appahīnā pañca cetasovinibandhā asamucchinnā, tassa yā ratti vā divaso vā āgacchati hāniyeva pāṭikaṅkhā kusalesu dhammesu no vuddhi.
an10.14:2.1	Katamassa pañca cetokhilā appahīnā honti?
an10.14:2.2	Idha, bhikkhave, bhikkhu satthari kaṅkhati vicikicchati nādhimuccati na sampasīdati.
an10.14:2.3	Yo so, bhikkhave, bhikkhu satthari kaṅkhati vicikicchati nādhimuccati na sampasīdati, tassa cittaṁ na namati ātappāya anuyogāya sātaccāya padhānāya.
an10.14:2.4	Yassa cittaṁ na namati ātappāya anuyogāya sātaccāya padhānāya, evamassāyaṁ paṭhamo cetokhilo appahīno hoti.
an10.14:3.1	Puna caparaṁ, bhikkhave, bhikkhu dhamme kaṅkhati …pe…
an10.14:3.2	saṅghe kaṅkhati …
an10.14:3.3	sikkhāya kaṅkhati …
an10.14:3.4	sabrahmacārīsu kupito hoti anattamano āhatacitto khilajāto.
an10.14:3.5	Yo so, bhikkhave, bhikkhu sabrahmacārīsu kupito hoti anattamano āhatacitto khilajāto, tassa cittaṁ na namati ātappāya anuyogāya sātaccāya padhānāya.
an10.14:3.6	Yassa cittaṁ na namati ātappāya anuyogāya sātaccāya padhānāya, evamassāyaṁ pañcamo cetokhilo appahīno hoti.
an10.14:3.7	Imassa pañca cetokhilā appahīnā honti.
an10.14:4.1	Katamassa pañca cetasovinibandhā asamucchinnā honti?
an10.14:4.2	Idha, bhikkhave, bhikkhu kāmesu avītarāgo hoti avigatacchando avigatapemo avigatapipāso avigatapariḷāho avigatataṇho.
an10.14:4.3	Yo so, bhikkhave, bhikkhu kāmesu avītarāgo hoti avigatacchando avigatapemo avigatapipāso avigatapariḷāho avigatataṇho, tassa cittaṁ na namati ātappāya anuyogāya sātaccāya padhānāya.
an10.14:4.4	Yassa cittaṁ na namati ātappāya anuyogāya sātaccāya padhānāya, evamassāyaṁ paṭhamo cetasovinibandho asamucchinno hoti.
an10.14:5.1	Puna caparaṁ, bhikkhave, bhikkhu kāye avītarāgo hoti …pe…
an10.14:5.2	rūpe avītarāgo hoti …pe…
an10.14:5.3	yāvadatthaṁ udarāvadehakaṁ bhuñjitvā seyyasukhaṁ passasukhaṁ middhasukhaṁ anuyutto viharati …
an10.14:5.4	aññataraṁ devanikāyaṁ paṇidhāya brahmacariyaṁ carati: ‘imināhaṁ sīlena vā vatena vā tapena vā brahmacariyena vā devo vā bhavissāmi devaññataro vā’ti.
an10.14:5.5	Yo so, bhikkhave, bhikkhu aññataraṁ devanikāyaṁ paṇidhāya brahmacariyaṁ carati: ‘imināhaṁ sīlena vā vatena vā tapena vā brahmacariyena vā devo vā bhavissāmi devaññataro vā’ti, tassa cittaṁ na namati ātappāya anuyogāya sātaccāya padhānāya.
an10.14:5.6	Yassa cittaṁ na namati ātappāya anuyogāya sātaccāya padhānāya, evamassāyaṁ pañcamo cetasovinibandho asamucchinno hoti.
an10.14:5.7	Imassa pañca cetasovinibandhā asamucchinnā honti.
an10.14:6.1	Yassa kassaci, bhikkhave, bhikkhussa vā bhikkhuniyā vā ime pañca cetokhilā appahīnā ime pañca cetasovinibandhā asamucchinnā, tassa yā ratti vā divaso vā āgacchati hāniyeva pāṭikaṅkhā kusalesu dhammesu no vuddhi.
an10.14:7.1	Seyyathāpi, bhikkhave, kāḷapakkhe candassa yā ratti vā divaso vā āgacchati, hāyateva vaṇṇena hāyati maṇḍalena hāyati ābhāya hāyati ārohapariṇāhena;
an10.14:7.2	evamevaṁ kho, bhikkhave, yassa kassaci bhikkhussa vā bhikkhuniyā vā ime pañca cetokhilā appahīnā ime pañca cetasovinibandhā asamucchinnā, tassa yā ratti vā divaso vā āgacchati hāniyeva pāṭikaṅkhā kusalesu dhammesu no vuddhi.
an10.14:8.1	Yassa kassaci, bhikkhave, bhikkhussa vā bhikkhuniyā vā pañca cetokhilā pahīnā pañca cetasovinibandhā susamucchinnā, tassa yā ratti vā divaso vā āgacchati vuddhiyeva pāṭikaṅkhā kusalesu dhammesu no parihāni.
an10.14:9.1	Katamassa pañca cetokhilā pahīnā honti?
an10.14:9.2	Idha, bhikkhave, bhikkhu satthari na kaṅkhati na vicikicchati, adhimuccati sampasīdati.
an10.14:9.3	Yo so, bhikkhave, bhikkhu satthari na kaṅkhati na vicikicchati adhimuccati sampasīdati, tassa cittaṁ namati ātappāya anuyogāya sātaccāya padhānāya.
an10.14:9.4	Yassa cittaṁ namati ātappāya anuyogāya sātaccāya padhānāya, evamassāyaṁ paṭhamo cetokhilo pahīno hoti.
an10.14:10.1	Puna caparaṁ, bhikkhave, bhikkhu dhamme na kaṅkhati …pe…
an10.14:10.2	saṅghe na kaṅkhati …
an10.14:10.3	sikkhāya na kaṅkhati …
an10.14:10.4	sabrahmacārīsu na kupito hoti attamano na āhatacitto na khilajāto.
an10.14:10.5	Yo so, bhikkhave, bhikkhu sabrahmacārīsu na kupito hoti attamano na āhatacitto na khilajāto, tassa cittaṁ namati ātappāya anuyogāya sātaccāya padhānāya.
an10.14:10.6	Yassa cittaṁ namati ātappāya anuyogāya sātaccāya padhānāya, evamassāyaṁ pañcamo cetokhilo pahīno hoti.
an10.14:10.7	Imassa pañca cetokhilā pahīnā honti.
an10.14:11.1	Katamassa pañca cetasovinibandhā susamucchinnā honti?
an10.14:11.2	Idha, bhikkhave, bhikkhu kāmesu vītarāgo hoti vigatacchando vigatapemo vigatapipāso vigatapariḷāho vigatataṇho.
an10.14:11.3	Yo so, bhikkhave, bhikkhu kāmesu vītarāgo hoti vigatacchando vigatapemo vigatapipāso vigatapariḷāho vigatataṇho, tassa cittaṁ namati ātappāya anuyogāya sātaccāya padhānāya.
an10.14:11.4	Yassa cittaṁ namati ātappāya anuyogāya sātaccāya padhānāya, evamassāyaṁ paṭhamo cetasovinibandho susamucchinno hoti.
an10.14:12.1	Puna caparaṁ, bhikkhave, bhikkhu kāye vītarāgo hoti …pe…
an10.14:12.2	rūpe vītarāgo hoti …pe…
an10.14:12.3	na yāvadatthaṁ udarāvadehakaṁ bhuñjitvā seyyasukhaṁ passasukhaṁ middhasukhaṁ anuyutto viharati,
an10.14:12.4	na aññataraṁ devanikāyaṁ paṇidhāya brahmacariyaṁ carati: ‘imināhaṁ sīlena vā vatena vā tapena vā brahmacariyena vā devo vā bhavissāmi devaññataro vā’ti.
an10.14:12.5	Yo so, bhikkhave, bhikkhu na aññataraṁ devanikāyaṁ paṇidhāya …pe… devaññataro vāti, tassa cittaṁ namati ātappāya anuyogāya sātaccāya padhānāya.
an10.14:12.6	Yassa cittaṁ namati ātappāya anuyogāya sātaccāya padhānāya, evamassāyaṁ pañcamo cetasovinibandho susamucchinno hoti.
an10.14:12.7	Imassa pañca cetasovinibandhā susamucchinnā honti.
an10.14:13.1	Yassa kassaci, bhikkhave, bhikkhussa vā bhikkhuniyā vā ime pañca cetokhilā pahīnā ime pañca cetasovinibandhā susamucchinnā, tassa yā ratti vā divaso vā āgacchati vuddhiyeva pāṭikaṅkhā kusalesu dhammesu no parihāni.
an10.14:14.1	Seyyathāpi, bhikkhave, juṇhapakkhe candassa yā ratti vā divaso vā āgacchati, vaḍḍhateva vaṇṇena vaḍḍhati maṇḍalena vaḍḍhati ābhāya vaḍḍhati ārohapariṇāhena;
an10.14:14.2	evamevaṁ kho, bhikkhave, yassa kassaci bhikkhussa vā bhikkhuniyā vā ime pañca cetokhilā pahīnā ime pañca cetasovinibandhā susamucchinnā, tassa yā ratti vā divaso vā āgacchati vuddhiyeva pāṭikaṅkhā kusalesu dhammesu no parihānī”ti.
an10.14:14.3	Catutthaṁ.
an10.15:0.1	Aṅguttara Nikāya 10.15
an10.15:0.2	2. Nāthavagga
an10.15:0.3	Appamādasutta
an10.15:1.1	“Yāvatā, bhikkhave, sattā apadā vā dvipadā vā catuppadā vā bahuppadā vā rūpino vā arūpino vā saññino vā asaññino vā nevasaññināsaññino vā, tathāgato tesaṁ aggamakkhāyati arahaṁ sammāsambuddho;
an10.15:1.2	evamevaṁ kho, bhikkhave, ye keci kusalā dhammā, sabbe te appamādamūlakā appamādasamosaraṇā. Appamādo tesaṁ aggamakkhāyati.
an10.15:2.1	Seyyathāpi, bhikkhave, yāni kānici jaṅgalānaṁ pāṇānaṁ padajātāni, sabbāni tāni hatthipade samodhānaṁ gacchanti, hatthipadaṁ tesaṁ aggamakkhāyati, yadidaṁ mahantattena;
an10.15:2.2	evamevaṁ kho, bhikkhave, ye keci kusalā dhammā, sabbe te appamādamūlakā appamādasamosaraṇā. Appamādo tesaṁ aggamakkhāyati.
an10.15:3.1	Seyyathāpi, bhikkhave, kūṭāgārassa yā kāci gopānasiyo sabbā tā kūṭaṅgamā kūṭaninnā kūṭasamosaraṇā, kūṭo tāsaṁ aggamakkhāyati;
an10.15:3.2	evamevaṁ kho, bhikkhave, ye keci kusalā dhammā, sabbe te appamādamūlakā appamādasamosaraṇā. Appamādo tesaṁ aggamakkhāyati.
an10.15:4.1	Seyyathāpi, bhikkhave, ye keci mūlagandhā, kāḷānusāriyaṁ tesaṁ aggamakkhāyati;
an10.15:4.2	evamevaṁ kho, bhikkhave …pe….
an10.15:5.1	Seyyathāpi, bhikkhave, ye keci sāragandhā, lohitacandanaṁ tesaṁ aggamakkhāyati;
an10.15:5.2	evamevaṁ kho, bhikkhave …pe….
an10.15:6.1	Seyyathāpi, bhikkhave, ye keci pupphagandhā, vassikaṁ tesaṁ aggamakkhāyati;
an10.15:6.2	evamevaṁ kho, bhikkhave …pe….
an10.15:7.1	Seyyathāpi, bhikkhave, ye keci khuddarājāno, sabbe te rañño cakkavattissa anuyantā bhavanti, rājā tesaṁ cakkavattī aggamakkhāyati;
an10.15:7.2	evamevaṁ kho, bhikkhave …pe….
an10.15:8.1	Seyyathāpi, bhikkhave, yā kāci tārakarūpānaṁ pabhā, sabbā tā candappabhāya kalaṁ nāgghanti soḷasiṁ, candappabhā tāsaṁ aggamakkhāyati;
an10.15:8.2	evamevaṁ kho, bhikkhave …pe….
an10.15:9.1	Seyyathāpi, bhikkhave, saradasamaye viddhe vigatavalāhake deve ādicco nabhaṁ abbhussakkamāno sabbaṁ ākāsagataṁ tamagataṁ abhivihacca bhāsate ca tapate ca virocati ca;
an10.15:9.2	evamevaṁ kho, bhikkhave …pe….
an10.15:10.1	Seyyathāpi, bhikkhave, yā kāci mahānadiyo, seyyathidaṁ—gaṅgā, yamunā, aciravatī, sarabhū, mahī, sabbā tā samuddaṅgamā samuddaninnā samuddapoṇā samuddapabbhārā, mahāsamuddo tāsaṁ aggamakkhāyati;
an10.15:10.2	evamevaṁ kho, bhikkhave, ye keci kusalā dhammā, sabbe te appamādamūlakā appamādasamosaraṇā. Appamādo tesaṁ aggamakkhāyatī”ti.
an10.15:10.3	Pañcamaṁ.
an10.16:0.1	Aṅguttara Nikāya 10.16
an10.16:0.2	2. Nāthavagga
an10.16:0.3	Āhuneyyasutta
an10.16:1.1	“Dasayime, bhikkhave, puggalā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassa.
an10.16:1.2	Katame dasa?
an10.16:1.3	Tathāgato arahaṁ sammāsambuddho, paccekabuddho, ubhatobhāgavimutto, paññāvimutto, kāyasakkhī, diṭṭhippatto, saddhāvimutto, saddhānusārī, dhammānusārī, gotrabhū—
an10.16:1.4	ime kho, bhikkhave, dasa puggalā āhuneyyā …pe… anuttaraṁ puññakkhettaṁ lokassā”ti.
an10.16:1.5	Chaṭṭhaṁ.
an10.17:0.1	Aṅguttara Nikāya 10.17
an10.17:0.2	2. Nāthavagga
an10.17:0.3	Paṭhamanāthasutta
an10.17:1.1	“Sanāthā, bhikkhave, viharatha, mā anāthā.
an10.17:1.2	Dukkhaṁ, bhikkhave, anātho viharati.
an10.17:1.3	Dasayime, bhikkhave, nāthakaraṇā dhammā.
an10.17:1.4	Katame dasa?
an10.17:1.5	Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an10.17:1.6	Yampi, bhikkhave, bhikkhu sīlavā hoti …pe… samādāya sikkhati sikkhāpadesu,
an10.17:1.7	ayampi dhammo nāthakaraṇo.
an10.17:2.1	Puna caparaṁ, bhikkhave, bhikkhu bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an10.17:2.2	Yampi, bhikkhave, bhikkhu bahussuto hoti …pe… diṭṭhiyā suppaṭividdhā,
an10.17:2.3	ayampi dhammo nāthakaraṇo.
an10.17:3.1	Puna caparaṁ, bhikkhave, bhikkhu kalyāṇamitto hoti kalyāṇasahāyo kalyāṇasampavaṅko.
an10.17:3.2	Yampi, bhikkhave, bhikkhu kalyāṇamitto hoti kalyāṇasahāyo kalyāṇasampavaṅko,
an10.17:3.3	ayampi dhammo nāthakaraṇo.
an10.17:4.1	Puna caparaṁ, bhikkhave, bhikkhu suvaco hoti sovacassakaraṇehi dhammehi samannāgato, khamo padakkhiṇaggāhī anusāsaniṁ.
an10.17:4.2	Yampi, bhikkhave, bhikkhu suvaco hoti …pe… anusāsaniṁ,
an10.17:4.3	ayampi dhammo nāthakaraṇo.
an10.17:5.1	Puna caparaṁ, bhikkhave, bhikkhu yāni tāni sabrahmacārīnaṁ uccāvacāni kiṅkaraṇīyāni, tattha dakkho hoti analaso tatrūpāyāya vīmaṁsāya samannāgato, alaṁ kātuṁ alaṁ saṁvidhātuṁ.
an10.17:5.2	Yampi, bhikkhave, bhikkhu yāni tāni sabrahmacārīnaṁ …pe… alaṁ kātuṁ alaṁ saṁvidhātuṁ,
an10.17:5.3	ayampi dhammo nāthakaraṇo.
an10.17:6.1	Puna caparaṁ, bhikkhave, bhikkhu dhammakāmo hoti piyasamudāhāro, abhidhamme abhivinaye uḷārapāmojjo.
an10.17:6.2	Yampi, bhikkhave, bhikkhu dhammakāmo hoti piyasamudāhāro, abhidhamme abhivinaye uḷārapāmojjo,
an10.17:6.3	ayampi dhammo nāthakaraṇo.
an10.17:7.1	Puna caparaṁ, bhikkhave, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an10.17:7.2	Yampi, bhikkhave, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu,
an10.17:7.3	ayampi dhammo nāthakaraṇo.
an10.17:8.1	Puna caparaṁ, bhikkhave, bhikkhu santuṭṭho hoti itarītaracīvarapiṇḍapātasenāsanagilānapaccayabhesajjaparikkhārena.
an10.17:8.2	Yampi, bhikkhave, bhikkhu santuṭṭho hoti itarītaracīvarapiṇḍapātasenāsanagilānapaccayabhesajjaparikkhārena,
an10.17:8.3	ayampi dhammo nāthakaraṇo.
an10.17:9.1	Puna caparaṁ, bhikkhave, bhikkhu satimā hoti paramena satinepakkena samannāgato cirakatampi cirabhāsitampi saritā anussaritā.
an10.17:9.2	Yampi, bhikkhave, bhikkhu satimā hoti paramena satinepakkena samannāgato cirakatampi cirabhāsitampi saritā anussaritā,
an10.17:9.3	ayampi dhammo nāthakaraṇo.
an10.17:10.1	Puna caparaṁ, bhikkhave, bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an10.17:10.2	Yampi, bhikkhave, bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā,
an10.17:10.3	ayampi dhammo nāthakaraṇo.
an10.17:11.1	Sanāthā, bhikkhave, viharatha, mā anāthā.
an10.17:11.2	Dukkhaṁ, bhikkhave, anātho viharati.
an10.17:11.3	Ime kho, bhikkhave, dasa nāthakaraṇā dhammā”ti.
an10.17:11.4	Sattamaṁ.
an10.18:0.1	Aṅguttara Nikāya 10.18
an10.18:0.2	2. Nāthavagga
an10.18:0.3	Dutiyanāthasutta
an10.18:1.1	Evaṁ me sutaṁ—
an10.18:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.18:1.3	Tatra kho bhagavā bhikkhū āmantesi:
an10.18:1.4	“bhikkhavo”ti.
an10.18:1.5	“Bhadante”ti te bhikkhū bhagavato paccassosuṁ.
an10.18:1.6	Bhagavā etadavoca:
an10.18:2.1	“Sanāthā, bhikkhave, viharatha, mā anāthā.
an10.18:2.2	Dukkhaṁ, bhikkhave, anātho viharati.
an10.18:2.3	Dasayime, bhikkhave, nāthakaraṇā dhammā.
an10.18:2.4	Katame dasa?
an10.18:2.5	Idha, bhikkhave, bhikkhu sīlavā hoti …pe… samādāya sikkhati sikkhāpadesu.
an10.18:2.6	‘Sīlavā vatāyaṁ bhikkhu pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesū’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū … navāpi bhikkhū vattabbaṁ anusāsitabbaṁ maññanti.
an10.18:2.7	Tassa therānukampitassa majjhimānukampitassa navānukampitassa vuddhiyeva pāṭikaṅkhā kusalesu dhammesu, no parihāni.
an10.18:2.8	Ayampi dhammo nāthakaraṇo.
an10.18:3.1	Puna caparaṁ, bhikkhave, bhikkhu bahussuto hoti …pe… diṭṭhiyā suppaṭividdhā.
an10.18:3.2	‘Bahussuto vatāyaṁ bhikkhu sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū … navāpi bhikkhū vattabbaṁ anusāsitabbaṁ maññanti.
an10.18:3.3	Tassa therānukampitassa majjhimānukampitassa navānukampitassa vuddhiyeva pāṭikaṅkhā kusalesu dhammesu, no parihāni.
an10.18:3.4	Ayampi dhammo nāthakaraṇo.
an10.18:4.1	Puna caparaṁ, bhikkhave, bhikkhu kalyāṇamitto hoti kalyāṇasahāyo kalyāṇasampavaṅko.
an10.18:4.2	‘Kalyāṇamitto vatāyaṁ bhikkhu kalyāṇasahāyo kalyāṇasampavaṅko’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū … navāpi bhikkhū vattabbaṁ anusāsitabbaṁ maññanti.
an10.18:4.3	Tassa therānukampitassa majjhimānukampitassa navānukampitassa vuddhiyeva pāṭikaṅkhā kusalesu dhammesu, no parihāni.
an10.18:4.4	Ayampi dhammo nāthakaraṇo.
an10.18:5.1	Puna caparaṁ, bhikkhave, bhikkhu suvaco hoti sovacassakaraṇehi dhammehi samannāgato, khamo padakkhiṇaggāhī anusāsaniṁ.
an10.18:5.2	‘Suvaco vatāyaṁ bhikkhu sovacassakaraṇehi dhammehi samannāgato, khamo padakkhiṇaggāhī anusāsanin’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū … navāpi bhikkhū vattabbaṁ anusāsitabbaṁ maññanti.
an10.18:5.3	Tassa therānukampitassa majjhimānukampitassa navānukampitassa vuddhiyeva pāṭikaṅkhā kusalesu dhammesu, no parihāni.
an10.18:5.4	Ayampi dhammo nāthakaraṇo.
an10.18:6.1	Puna caparaṁ, bhikkhave, bhikkhu yāni tāni sabrahmacārīnaṁ uccāvacāni kiṅkaraṇīyāni, tattha dakkho hoti analaso, tatrūpāyāya vīmaṁsāya samannāgato, alaṁ kātuṁ alaṁ saṁvidhātuṁ.
an10.18:6.2	‘Yāni tāni sabrahmacārīnaṁ uccāvacāni kiṅkaraṇīyāni, tattha dakkho vatāyaṁ bhikkhu analaso, tatrūpāyāya vīmaṁsāya samannāgato, alaṁ kātuṁ alaṁ saṁvidhātun’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū … navāpi bhikkhū vattabbaṁ anusāsitabbaṁ maññanti.
an10.18:6.3	Tassa therānukampitassa majjhimānukampitassa navānukampitassa vuddhiyeva pāṭikaṅkhā kusalesu dhammesu, no parihāni.
an10.18:6.4	Ayampi dhammo nāthakaraṇo.
an10.18:7.1	Puna caparaṁ, bhikkhave, bhikkhu dhammakāmo hoti piyasamudāhāro, abhidhamme abhivinaye uḷārapāmojjo.
an10.18:7.2	‘Dhammakāmo vatāyaṁ bhikkhu piyasamudāhāro, abhidhamme abhivinaye uḷārapāmojjo’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū … navāpi bhikkhū vattabbaṁ anusāsitabbaṁ maññanti.
an10.18:7.3	Tassa therānukampitassa majjhimānukampitassa navānukampitassa vuddhiyeva pāṭikaṅkhā kusalesu dhammesu, no parihāni.
an10.18:7.4	Ayampi dhammo nāthakaraṇo.
an10.18:8.1	Puna caparaṁ, bhikkhave, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu ‘āraddhavīriyo vatāyaṁ bhikkhu viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesū’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū …
an10.18:8.2	navāpi bhikkhū vattabbaṁ anusāsitabbaṁ maññanti.
an10.18:8.3	Tassa therānukampitassa majjhimānukampitassa navānukampitassa vuddhiyeva pāṭikaṅkhā kusalesu dhammesu, no parihāni.
an10.18:8.4	Ayampi dhammo nāthakaraṇo.
an10.18:9.1	Puna caparaṁ, bhikkhave, bhikkhu santuṭṭho hoti itarītaracīvarapiṇḍapātasenāsanagilānapaccayabhesajjaparikkhārena.
an10.18:9.2	‘Santuṭṭho vatāyaṁ bhikkhu itarītaracīvarapiṇḍapātasenāsanagilānapaccayabhesajjaparikkhārenā’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū … navāpi bhikkhū vattabbaṁ anusāsitabbaṁ maññanti.
an10.18:9.3	Tassa therānukampitassa majjhimānukampitassa navānukampitassa vuddhiyeva pāṭikaṅkhā kusalesu dhammesu, no parihāni.
an10.18:9.4	Ayampi dhammo nāthakaraṇo.
an10.18:10.1	Puna caparaṁ, bhikkhave, bhikkhu satimā hoti paramena satinepakkena samannāgato, cirakatampi cirabhāsitampi saritā anussaritā.
an10.18:10.2	‘Satimā vatāyaṁ bhikkhu paramena satinepakkena samannāgato, cirakatampi cirabhāsitampi saritā anussaritā’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū … navāpi bhikkhū vattabbaṁ anusāsitabbaṁ maññanti.
an10.18:10.3	Tassa therānukampitassa majjhimānukampitassa navānukampitassa vuddhiyeva pāṭikaṅkhā kusalesu dhammesu, no parihāni.
an10.18:10.4	Ayampi dhammo nāthakaraṇo.
an10.18:11.1	Puna caparaṁ, bhikkhave, bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an10.18:11.2	‘Paññavā vatāyaṁ bhikkhu udayatthagāminiyā paññāya samannāgato ariyāya nibbedhikāya sammā dukkhakkhayagāminiyā’ti therāpi naṁ bhikkhū vattabbaṁ anusāsitabbaṁ maññanti, majjhimāpi bhikkhū … navāpi bhikkhū vattabbaṁ anusāsitabbaṁ maññanti.
an10.18:11.3	Tassa therānukampitassa …pe… no parihāni.
an10.18:11.4	Ayampi dhammo nāthakaraṇo.
an10.18:12.1	Sanāthā, bhikkhave, viharatha, mā anāthā.
an10.18:12.2	Dukkhaṁ, bhikkhave, anātho viharati.
an10.18:12.3	Ime kho, bhikkhave, dasa nāthakaraṇā dhammā”ti.
an10.18:12.4	Idamavoca bhagavā.
an10.18:12.5	Attamanā te bhikkhū bhagavato bhāsitaṁ abhinandunti.
an10.18:12.6	Aṭṭhamaṁ.
an10.19:0.1	Aṅguttara Nikāya 10.19
an10.19:0.2	2. Nāthavagga
an10.19:0.3	Paṭhamaariyāvāsasutta
an10.19:1.1	“Dasayime, bhikkhave, ariyāvāsā, ye ariyā āvasiṁsu vā āvasanti vā āvasissanti vā.
an10.19:1.2	Katame dasa?
an10.19:1.3	Idha, bhikkhave, bhikkhu pañcaṅgavippahīno hoti, chaḷaṅgasamannāgato, ekārakkho, caturāpasseno, paṇunnapaccekasacco, samavayasaṭṭhesano, anāvilasaṅkappo, passaddhakāyasaṅkhāro, suvimuttacitto, suvimuttapañño.
an10.19:1.4	Ime kho, bhikkhave, dasa ariyāvāsā, ye ariyā āvasiṁsu vā āvasanti vā āvasissanti vā”ti.
an10.19:1.5	Navamaṁ.
an10.20:0.1	Aṅguttara Nikāya 10.20
an10.20:0.2	2. Nāthavagga
an10.20:0.3	Dutiyaariyāvāsasutta
an10.20:1.1	Ekaṁ samayaṁ bhagavā kurūsu viharati kammāsadhammaṁ nāma kurūnaṁ nigamo.
an10.20:1.2	Tatra kho bhagavā bhikkhū āmantesi …pe….
an10.20:2.1	“Dasayime, bhikkhave, ariyāvāsā, ye ariyā āvasiṁsu vā āvasanti vā āvasissanti vā.
an10.20:2.2	Katame dasa?
an10.20:2.3	Idha, bhikkhave, bhikkhu pañcaṅgavippahīno hoti, chaḷaṅgasamannāgato, ekārakkho, caturāpasseno, paṇunnapaccekasacco, samavayasaṭṭhesano, anāvilasaṅkappo, passaddhakāyasaṅkhāro, suvimuttacitto, suvimuttapañño.
an10.20:3.1	Kathañca, bhikkhave, bhikkhu pañcaṅgavippahīno hoti?
an10.20:3.2	Idha, bhikkhave, bhikkhuno kāmacchando pahīno hoti, byāpādo pahīno hoti, thinamiddhaṁ pahīnaṁ hoti, uddhaccakukkuccaṁ pahīnaṁ hoti, vicikicchā pahīnā hoti.
an10.20:3.3	Evaṁ kho, bhikkhave, bhikkhu pañcaṅgavippahīno hoti.
an10.20:4.1	Kathañca, bhikkhave, bhikkhu chaḷaṅgasamannāgato hoti?
an10.20:4.2	Idha, bhikkhave, bhikkhu cakkhunā rūpaṁ disvā neva sumano hoti na dummano, upekkhako viharati sato sampajāno.
an10.20:4.3	Sotena saddaṁ sutvā …
an10.20:4.4	ghānena gandhaṁ ghāyitvā …
an10.20:4.5	jivhāya rasaṁ sāyitvā …
an10.20:4.6	kāyena phoṭṭhabbaṁ phusitvā …
an10.20:4.7	manasā dhammaṁ viññāya neva sumano hoti na dummano, upekkhako viharati sato sampajāno.
an10.20:4.8	Evaṁ kho, bhikkhave, bhikkhu chaḷaṅgasamannāgato hoti.
an10.20:5.1	Kathañca, bhikkhave, bhikkhu ekārakkho hoti?
an10.20:5.2	Idha, bhikkhave, bhikkhu satārakkhena cetasā samannāgato hoti.
an10.20:5.3	Evaṁ kho, bhikkhave, bhikkhu ekārakkho hoti.
an10.20:6.1	Kathañca, bhikkhave, bhikkhu caturāpasseno hoti?
an10.20:6.2	Idha, bhikkhave, bhikkhu saṅkhāyekaṁ paṭisevati, saṅkhāyekaṁ adhivāseti, saṅkhāyekaṁ parivajjeti, saṅkhāyekaṁ vinodeti.
an10.20:6.3	Evaṁ kho, bhikkhave, bhikkhu caturāpasseno hoti.
an10.20:7.1	Kathañca, bhikkhave, bhikkhu paṇunnapaccekasacco hoti?
an10.20:7.2	Idha, bhikkhave, bhikkhuno yāni tāni puthusamaṇabrāhmaṇānaṁ puthupaccekasaccāni, seyyathidaṁ:
an10.20:7.3	‘sassato loko’ti vā, ‘asassato loko’ti vā, ‘antavā loko’ti vā, ‘anantavā loko’ti vā, ‘taṁ jīvaṁ taṁ sarīran’ti vā, ‘aññaṁ jīvaṁ aññaṁ sarīran’ti vā, ‘hoti tathāgato paraṁ maraṇā’ti vā, ‘na hoti tathāgato paraṁ maraṇā’ti vā, ‘hoti ca na ca hoti tathāgato paraṁ maraṇā’ti vā, ‘neva hoti na na hoti tathāgato paraṁ maraṇā’ti vā,
an10.20:7.4	sabbāni tāni nunnāni honti paṇunnāni cattāni vantāni muttāni pahīnāni paṭinissaṭṭhāni.
an10.20:7.5	Evaṁ kho, bhikkhave, bhikkhu paṇunnapaccekasacco hoti.
an10.20:8.1	Kathañca, bhikkhave, bhikkhu samavayasaṭṭhesano hoti?
an10.20:8.2	Idha, bhikkhave, bhikkhuno kāmesanā pahīnā hoti, bhavesanā pahīnā hoti, brahmacariyesanā paṭippassaddhā.
an10.20:8.3	Evaṁ kho, bhikkhave, bhikkhu samavayasaṭṭhesano hoti.
an10.20:9.1	Kathañca, bhikkhave, bhikkhu anāvilasaṅkappo hoti?
an10.20:9.2	Idha, bhikkhave, bhikkhuno kāmasaṅkappo pahīno hoti, byāpādasaṅkappo pahīno hoti, vihiṁsāsaṅkappo pahīno hoti.
an10.20:9.3	Evaṁ kho, bhikkhave, bhikkhu anāvilasaṅkappo hoti.
an10.20:10.1	Kathañca, bhikkhave, bhikkhu passaddhakāyasaṅkhāro hoti?
an10.20:10.2	Idha, bhikkhave, bhikkhu sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
an10.20:10.3	Evaṁ kho, bhikkhave, bhikkhu passaddhakāyasaṅkhāro hoti.
an10.20:11.1	Kathañca, bhikkhave, bhikkhu suvimuttacitto hoti?
an10.20:11.2	Idha, bhikkhave, bhikkhuno rāgā cittaṁ vimuttaṁ hoti, dosā cittaṁ vimuttaṁ hoti, mohā cittaṁ vimuttaṁ hoti.
an10.20:11.3	Evaṁ kho, bhikkhave, bhikkhu suvimuttacitto hoti.
an10.20:12.1	Kathañca, bhikkhave, bhikkhu suvimuttapañño hoti?
an10.20:12.2	Idha, bhikkhave, bhikkhu ‘rāgo me pahīno ucchinnamūlo tālāvatthukato anabhāvaṅkato āyatiṁ anuppādadhammo’ti pajānāti, doso me pahīno …pe… ‘moho me pahīno ucchinnamūlo tālāvatthukato anabhāvaṅkato āyatiṁ anuppādadhammo’ti pajānāti.
an10.20:12.3	Evaṁ kho, bhikkhave, bhikkhu suvimuttapañño hoti.
an10.20:13.1	Ye hi keci, bhikkhave, atītamaddhānaṁ ariyā ariyāvāse āvasiṁsu, sabbe te imeva dasa ariyāvāse āvasiṁsu;
an10.20:13.2	ye hi keci, bhikkhave, anāgatamaddhānaṁ ariyā ariyāvāse āvasissanti, sabbe te imeva dasa ariyāvāse āvasissanti;
an10.20:13.3	ye hi keci, bhikkhave, etarahi ariyā ariyāvāse āvasanti, sabbe te imeva dasa ariyāvāse āvasanti.
an10.20:13.4	Ime kho, bhikkhave, dasa ariyāvāsā, ye ariyā āvasiṁsu vā āvasanti vā āvasissanti vā”ti.
an10.20:13.5	Dasamaṁ.
an10.20:13.6	Nāthavaggo dutiyo.
an10.20:14.0	Tassuddānaṁ
an10.20:14.1	Senāsanañca pañcaṅgaṁ,
an10.20:14.2	Saṁyojanākhilena ca;
an10.20:14.3	Appamādo āhuneyyo,
an10.20:14.4	Dve nāthā dve ariyāvāsāti.
an10.21:0.1	Aṅguttara Nikāya 10.21
an10.21:0.2	3. Mahāvagga
an10.21:0.3	Sīhanādasutta
an10.21:1.1	“Sīho, bhikkhave, migarājā sāyanhasamayaṁ āsayā nikkhamati.
an10.21:1.2	Āsayā nikkhamitvā vijambhati.
an10.21:1.3	Vijambhitvā samantā catuddisaṁ anuviloketi.
an10.21:1.4	Samantā catuddisaṁ anuviloketvā tikkhattuṁ sīhanādaṁ nadati.
an10.21:1.5	Tikkhattuṁ sīhanādaṁ naditvā gocarāya pakkamati.
an10.21:1.6	Taṁ kissa hetu?
an10.21:1.7	‘Māhaṁ khuddake pāṇe visamagate saṅghātaṁ āpādesin’ti.
an10.21:2.1	‘Sīho’ti kho, bhikkhave, tathāgatassetaṁ adhivacanaṁ arahato sammāsambuddhassa.
an10.21:2.2	Yaṁ kho, bhikkhave, tathāgato parisāya dhammaṁ deseti, idamassa hoti sīhanādasmiṁ.
an10.21:3.1	Dasayimāni, bhikkhave, tathāgatassa tathāgatabalāni, yehi balehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.21:3.2	Katamāni dasa?
an10.21:3.3	Idha, bhikkhave, tathāgato ṭhānañca ṭhānato aṭṭhānañca aṭṭhānato yathābhūtaṁ pajānāti.
an10.21:3.4	Yampi, bhikkhave, tathāgato ṭhānañca ṭhānato aṭṭhānañca aṭṭhānato yathābhūtaṁ pajānāti, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.21:4.1	Puna caparaṁ, bhikkhave, tathāgato atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ pajānāti.
an10.21:4.2	Yampi, bhikkhave, tathāgato atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ pajānāti, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.21:5.1	Puna caparaṁ, bhikkhave, tathāgato sabbatthagāminiṁ paṭipadaṁ yathābhūtaṁ pajānāti.
an10.21:5.2	Yampi, bhikkhave, tathāgato sabbatthagāminiṁ paṭipadaṁ yathābhūtaṁ pajānāti, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.21:6.1	Puna caparaṁ, bhikkhave, tathāgato anekadhātuṁ nānādhātuṁ lokaṁ yathābhūtaṁ pajānāti.
an10.21:6.2	Yampi, bhikkhave, tathāgato anekadhātuṁ nānādhātuṁ lokaṁ yathābhūtaṁ pajānāti, idampi, bhikkhave, tathāgatassa tathāgatabalaṁ hoti …pe… brahmacakkaṁ pavatteti.
an10.21:7.1	Puna caparaṁ, bhikkhave, tathāgato sattānaṁ nānādhimuttikataṁ yathābhūtaṁ pajānāti.
an10.21:7.2	Yampi, bhikkhave, tathāgato sattānaṁ nānādhimuttikataṁ yathābhūtaṁ pajānāti, idampi, bhikkhave, tathāgatassa tathāgatabalaṁ hoti …pe… brahmacakkaṁ pavatteti.
an10.21:8.1	Puna caparaṁ, bhikkhave, tathāgato parasattānaṁ parapuggalānaṁ indriyaparopariyattaṁ yathābhūtaṁ pajānāti.
an10.21:8.2	Yampi, bhikkhave, tathāgato parasattānaṁ parapuggalānaṁ indriyaparopariyattaṁ yathābhūtaṁ pajānāti, idampi, bhikkhave, tathāgatassa tathāgatabalaṁ hoti …pe… brahmacakkaṁ pavatteti.
an10.21:9.1	Puna caparaṁ, bhikkhave, tathāgato jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ pajānāti.
an10.21:9.2	Yampi …pe… pajānāti, idampi, bhikkhave, tathāgatassa tathāgatabalaṁ hoti …pe… brahmacakkaṁ pavatteti.
an10.21:10.1	Puna caparaṁ, bhikkhave, tathāgato anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe, ‘amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto amutra udapādiṁ; tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto idhūpapanno’ti, iti sākāraṁ sauddesaṁ anekavihitaṁ pubbenivāsaṁ anussarati.
an10.21:10.2	Yampi, bhikkhave, tathāgato anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.21:11.1	Puna caparaṁ, bhikkhave, tathāgato dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti: ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā; ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā, te kāyassa bhedā paraṁ maraṇā sugatiṁ saggaṁ lokaṁ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti.
an10.21:11.2	Yampi, bhikkhave, tathāgato dibbena cakkhunā visuddhena atikkantamānusakena …pe… yathākammūpage satte pajānāti, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.21:12.1	Puna caparaṁ, bhikkhave, tathāgato āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an10.21:12.2	Yampi, bhikkhave, tathāgato āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati, idampi, bhikkhave, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.21:13.1	Imāni kho, bhikkhave, dasa tathāgatassa tathāgatabalāni, yehi balehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavattetī”ti.
an10.21:13.2	Paṭhamaṁ.
an10.22:0.1	Aṅguttara Nikāya 10.22
an10.22:0.2	3. Mahāvagga
an10.22:0.3	Adhivuttipadasutta
an10.22:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ ānandaṁ bhagavā etadavoca:
an10.22:2.1	“Ye te, ānanda, dhammā tesaṁ tesaṁ adhivuttipadānaṁ abhiññā sacchikiriyāya saṁvattanti, visārado ahaṁ, ānanda, tattha paṭijānāmi.
an10.22:2.2	‘Tesaṁ tesaṁ tathā tathā dhammaṁ desetuṁ yathā yathā paṭipanno santaṁ vā atthīti ñassati, asantaṁ vā natthīti ñassati, hīnaṁ vā hīnanti ñassati, paṇītaṁ vā paṇītanti ñassati, sauttaraṁ vā sauttaranti ñassati, anuttaraṁ vā anuttaranti ñassati;
an10.22:2.3	yathā yathā vā pana taṁ ñāteyyaṁ vā daṭṭheyyaṁ vā sacchikareyyaṁ vā tathā tathā ñassati vā dakkhati vā sacchikarissati vā’ti ṭhānametaṁ vijjati.
an10.22:2.4	Etadānuttariyaṁ, ānanda, ñāṇānaṁ yadidaṁ tattha tattha yathābhūtañāṇaṁ.
an10.22:2.5	Etasmā cāhaṁ, ānanda, ñāṇā aññaṁ ñāṇaṁ uttaritaraṁ vā paṇītataraṁ vā natthīti vadāmi.
an10.22:3.1	Dasayimāni, ānanda, tathāgatassa tathāgatabalāni, yehi balehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.22:3.2	Katamāni dasa?
an10.22:3.3	Idhānanda, tathāgato ṭhānañca ṭhānato aṭṭhānañca aṭṭhānato yathābhūtaṁ pajānāti.
an10.22:3.4	Yampānanda, tathāgato ṭhānañca ṭhānato aṭṭhānañca aṭṭhānato yathābhūtaṁ pajānāti, idampānanda, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.22:4.1	Puna caparaṁ, ānanda, tathāgato atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ pajānāti.
an10.22:4.2	Yampānanda …pe… idampānanda …pe….
an10.22:5.1	Puna caparaṁ, ānanda, tathāgato sabbatthagāminiṁ paṭipadaṁ yathābhūtaṁ pajānāti.
an10.22:5.2	Yampānanda …pe… idampānanda …pe….
an10.22:6.1	Puna caparaṁ, ānanda, tathāgato anekadhātuṁ nānādhātuṁ lokaṁ yathābhūtaṁ pajānāti.
an10.22:6.2	Yampānanda …pe… idampānanda …pe….
an10.22:7.1	Puna caparaṁ, ānanda, tathāgato sattānaṁ nānādhimuttikataṁ yathābhūtaṁ pajānāti.
an10.22:7.2	Yampānanda …pe… idampānanda …pe….
an10.22:8.1	Puna caparaṁ, ānanda, tathāgato parasattānaṁ parapuggalānaṁ indriyaparopariyattaṁ yathābhūtaṁ pajānāti.
an10.22:8.2	Yampānanda …pe… idampānanda …pe….
an10.22:9.1	Puna caparaṁ, ānanda, tathāgato jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ pajānāti.
an10.22:9.2	Yampānanda …pe… idampānanda …pe….
an10.22:10.1	Puna caparaṁ, ānanda, tathāgato anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati.
an10.22:10.2	Yampānanda …pe… idampānanda …pe….
an10.22:11.1	Puna caparaṁ, ānanda, tathāgato dibbena cakkhunā visuddhena atikkantamānusakena …pe… yathākammūpage satte pajānāti.
an10.22:11.2	Yampānanda …pe… idampānanda …pe….
an10.22:12.1	Puna caparaṁ, ānanda, tathāgato āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an10.22:12.2	Yampānanda, tathāgato āsavānaṁ khayā anāsavaṁ cetovimuttiṁ …pe… sacchikatvā upasampajja viharati. Idampānanda, tathāgatassa tathāgatabalaṁ hoti, yaṁ balaṁ āgamma tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
an10.22:13.1	Imāni kho, ānanda, dasa tathāgatassa tathāgatabalāni, yehi balehi samannāgato tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavattetī”ti.
an10.22:13.2	Dutiyaṁ.
an10.23:0.1	Aṅguttara Nikāya 10.23
an10.23:0.2	3. Mahāvagga
an10.23:0.3	Kāyasutta
an10.23:1.1	“Atthi, bhikkhave, dhammā kāyena pahātabbā, no vācāya.
an10.23:1.2	Atthi, bhikkhave, dhammā vācāya pahātabbā, no kāyena.
an10.23:1.3	Atthi, bhikkhave, dhammā neva kāyena pahātabbā no vācāya, paññāya disvā pahātabbā.
an10.23:2.1	Katame ca, bhikkhave, dhammā kāyena pahātabbā, no vācāya?
an10.23:2.2	Idha, bhikkhave, bhikkhu akusalaṁ āpanno hoti kiñci desaṁ kāyena.
an10.23:2.3	Tamenaṁ anuvicca viññū sabrahmacārī evamāhaṁsu:
an10.23:2.4	‘āyasmā kho akusalaṁ āpanno kiñci desaṁ kāyena.
an10.23:2.5	Sādhu vatāyasmā kāyaduccaritaṁ pahāya kāyasucaritaṁ bhāvetū’ti.
an10.23:2.6	So anuvicca viññūhi sabrahmacārīhi vuccamāno kāyaduccaritaṁ pahāya kāyasucaritaṁ bhāveti.
an10.23:2.7	Ime vuccanti, bhikkhave, dhammā kāyena pahātabbā, no vācāya.
an10.23:3.1	Katame ca, bhikkhave, dhammā vācāya pahātabbā, no kāyena?
an10.23:3.2	Idha, bhikkhave, bhikkhu akusalaṁ āpanno hoti kiñci desaṁ vācāya.
an10.23:3.3	Tamenaṁ anuvicca viññū sabrahmacārī evamāhaṁsu:
an10.23:3.4	‘āyasmā kho akusalaṁ āpanno kiñci desaṁ vācāya.
an10.23:3.5	Sādhu vatāyasmā vacīduccaritaṁ pahāya vacīsucaritaṁ bhāvetū’ti.
an10.23:3.6	So anuvicca viññūhi sabrahmacārīhi vuccamāno vacīduccaritaṁ pahāya vacīsucaritaṁ bhāveti.
an10.23:3.7	Ime vuccanti, bhikkhave, dhammā vācāya pahātabbā, no kāyena.
an10.23:4.1	Katame ca, bhikkhave, dhammā neva kāyena pahātabbā no vācāya, paññāya disvā pahātabbā?
an10.23:4.2	Lobho, bhikkhave, neva kāyena pahātabbo no vācāya, paññāya disvā pahātabbo.
an10.23:4.3	Doso, bhikkhave …pe…
an10.23:4.4	moho …
an10.23:4.5	kodho …
an10.23:4.6	upanāho …
an10.23:4.7	makkho …
an10.23:4.8	paḷāso …
an10.23:4.9	macchariyaṁ, bhikkhave, neva kāyena pahātabbaṁ no vācāya, paññāya disvā pahātabbaṁ.
an10.23:5.1	Pāpikā, bhikkhave, issā neva kāyena pahātabbā no vācāya, paññāya disvā pahātabbā.
an10.23:5.2	Katamā ca, bhikkhave, pāpikā issā?
an10.23:5.3	Idha, bhikkhave, ijjhati gahapatissa vā gahapatiputtassa vā dhanena vā dhaññena vā rajatena vā jātarūpena vā.
an10.23:5.4	Tatrāññatarassa dāsassa vā upavāsassa vā evaṁ hoti:
an10.23:5.5	‘aho vatimassa gahapatissa vā gahapatiputtassa vā na ijjheyya dhanena vā dhaññena vā rajatena vā jātarūpena vā’ti.
an10.23:5.6	Samaṇo vā pana brāhmaṇo vā lābhī hoti cīvarapiṇḍapātasenāsanagilānapaccayabhesajjaparikkhārānaṁ.
an10.23:5.7	Tatrāññatarassa samaṇassa vā brāhmaṇassa vā evaṁ hoti:
an10.23:5.8	‘aho vata ayamāyasmā na lābhī assa cīvarapiṇḍapātasenāsanagilānapaccayabhesajjaparikkhārānan’ti.
an10.23:5.9	Ayaṁ vuccati, bhikkhave, pāpikā issā.
an10.23:6.1	Pāpikā, bhikkhave, icchā neva kāyena pahātabbā no vācāya, paññāya disvā pahātabbā.
an10.23:6.2	Katamā ca, bhikkhave, pāpikā icchā?
an10.23:6.3	Idha, bhikkhave, ekacco assaddho samāno ‘saddhoti maṁ jāneyyun’ti icchati;
an10.23:6.4	dussīlo samāno ‘sīlavāti maṁ jāneyyun’ti icchati;
an10.23:6.5	appassuto samāno ‘bahussutoti maṁ jāneyyun’ti icchati;
an10.23:6.6	saṅgaṇikārāmo samāno ‘pavivittoti maṁ jāneyyun’ti icchati;
an10.23:6.7	kusīto samāno ‘āraddhavīriyoti maṁ jāneyyun’ti icchati;
an10.23:6.8	muṭṭhassati samāno ‘upaṭṭhitassatīti maṁ jāneyyun’ti icchati;
an10.23:6.9	asamāhito samāno ‘samāhitoti maṁ jāneyyun’ti icchati;
an10.23:6.10	duppañño samāno ‘paññavāti maṁ jāneyyun’ti icchati;
an10.23:6.11	akhīṇāsavo samāno ‘khīṇāsavoti maṁ jāneyyun’ti icchati.
an10.23:6.12	Ayaṁ vuccati, bhikkhave, pāpikā icchā.
an10.23:6.13	Ime vuccanti, bhikkhave, dhammā neva kāyena pahātabbā no vācāya, paññāya disvā pahātabbā.
an10.23:7.1	Tañce, bhikkhave, bhikkhuṁ lobho abhibhuyya iriyati,
an10.23:7.2	doso …
an10.23:7.3	moho …
an10.23:7.4	kodho …
an10.23:7.5	upanāho …
an10.23:7.6	makkho …
an10.23:7.7	paḷāso …
an10.23:7.8	macchariyaṁ …
an10.23:7.9	pāpikā issā …
an10.23:7.10	pāpikā icchā abhibhuyya iriyati.
an10.23:7.11	So evamassa veditabbo:
an10.23:7.12	‘nāyamāyasmā tathā pajānāti yathā pajānato lobho na hoti, tathāhimaṁ āyasmantaṁ lobho abhibhuyya iriyati;
an10.23:7.13	nāyamāyasmā tathā pajānāti yathā pajānato doso na hoti …
an10.23:7.14	moho …
an10.23:7.15	kodho …
an10.23:7.16	upanāho …
an10.23:7.17	makkho …
an10.23:7.18	paḷāso …
an10.23:7.19	macchariyaṁ …
an10.23:7.20	pāpikā issā …
an10.23:7.21	pāpikā icchā na hoti, tathāhimaṁ āyasmantaṁ pāpikā icchā abhibhuyya iriyatī’ti.
an10.23:8.1	Tañce, bhikkhave, bhikkhuṁ lobho nābhibhuyya iriyati,
an10.23:8.2	doso …
an10.23:8.3	moho …
an10.23:8.4	kodho …
an10.23:8.5	upanāho …
an10.23:8.6	makkho …
an10.23:8.7	paḷāso …
an10.23:8.8	macchariyaṁ …
an10.23:8.9	pāpikā issā …
an10.23:8.10	pāpikā icchā nābhibhuyya iriyati,
an10.23:8.11	so evamassa veditabbo:
an10.23:8.12	‘tathā ayamāyasmā pajānāti yathā pajānato lobho na hoti, tathāhimaṁ āyasmantaṁ lobho nābhibhuyya iriyati;
an10.23:8.13	tathā ayamāyasmā pajānāti yathā pajānato doso na hoti …
an10.23:8.14	moho …
an10.23:8.15	kodho …
an10.23:8.16	upanāho …
an10.23:8.17	makkho …
an10.23:8.18	paḷāso …
an10.23:8.19	macchariyaṁ …
an10.23:8.20	pāpikā issā …
an10.23:8.21	pāpikā icchā na hoti, tathāhimaṁ āyasmantaṁ pāpikā icchā nābhibhuyya iriyatī’”ti.
an10.23:8.22	Tatiyaṁ.
an10.24:0.1	Aṅguttara Nikāya 10.24
an10.24:0.2	3. Mahāvagga
an10.24:0.3	Mahācundasutta
an10.24:1.1	Ekaṁ samayaṁ āyasmā mahācundo cetīsu viharati sahajātiyaṁ.
an10.24:1.2	Tatra kho āyasmā mahācundo bhikkhū āmantesi:
an10.24:1.3	“āvuso bhikkhave”ti.
an10.24:1.4	“Āvuso”ti kho te bhikkhū āyasmato mahācundassa paccassosuṁ.
an10.24:1.5	Āyasmā mahācundo etadavoca:
an10.24:2.1	“Ñāṇavādaṁ, āvuso, bhikkhu vadamāno:
an10.24:2.2	‘jānāmimaṁ dhammaṁ, passāmimaṁ dhamman’ti.
an10.24:2.3	Tañce, āvuso, bhikkhuṁ lobho abhibhuyya tiṭṭhati,
an10.24:2.4	doso …
an10.24:2.5	moho …
an10.24:2.6	kodho …
an10.24:2.7	upanāho …
an10.24:2.8	makkho …
an10.24:2.9	paḷāso …
an10.24:2.10	macchariyaṁ …
an10.24:2.11	pāpikā issā …
an10.24:2.12	pāpikā icchā abhibhuyya tiṭṭhati, so evamassa veditabbo:
an10.24:2.13	‘nāyamāyasmā tathā pajānāti yathā pajānato lobho na hoti, tathāhimaṁ āyasmantaṁ lobho abhibhuyya tiṭṭhati;
an10.24:2.14	nāyamāyasmā tathā pajānāti yathā pajānato doso na hoti …
an10.24:2.15	moho …
an10.24:2.16	kodho …
an10.24:2.17	upanāho …
an10.24:2.18	makkho …
an10.24:2.19	paḷāso …
an10.24:2.20	macchariyaṁ …
an10.24:2.21	pāpikā issā …
an10.24:2.22	pāpikā icchā na hoti, tathāhimaṁ āyasmantaṁ pāpikā icchā abhibhuyya tiṭṭhatī’ti.
an10.24:3.1	Bhāvanāvādaṁ, āvuso, bhikkhu vadamāno:
an10.24:3.2	‘bhāvitakāyomhi bhāvitasīlo bhāvitacitto bhāvitapañño’ti.
an10.24:3.3	Tañce, āvuso, bhikkhuṁ lobho abhibhuyya tiṭṭhati,
an10.24:3.4	doso …
an10.24:3.5	moho …
an10.24:3.6	kodho …
an10.24:3.7	upanāho …
an10.24:3.8	makkho …
an10.24:3.9	paḷāso …
an10.24:3.10	macchariyaṁ …
an10.24:3.11	pāpikā issā …
an10.24:3.12	pāpikā icchā abhibhuyya tiṭṭhati, so evamassa veditabbo:
an10.24:3.13	‘nāyamāyasmā tathā pajānāti yathā pajānato lobho na hoti, tathāhimaṁ āyasmantaṁ lobho abhibhuyya tiṭṭhati;
an10.24:3.14	nāyamāyasmā tathā pajānāti yathā pajānato doso na hoti …
an10.24:3.15	moho …
an10.24:3.16	kodho …
an10.24:3.17	upanāho …
an10.24:3.18	makkho …
an10.24:3.19	paḷāso …
an10.24:3.20	macchariyaṁ …
an10.24:3.21	pāpikā issā …
an10.24:3.22	pāpikā icchā na hoti, tathāhimaṁ āyasmantaṁ pāpikā icchā abhibhuyya tiṭṭhatī’ti.
an10.24:4.1	Ñāṇavādañca, āvuso, bhikkhu vadamāno bhāvanāvādañca:
an10.24:4.2	‘jānāmimaṁ dhammaṁ, passāmimaṁ dhammaṁ, bhāvitakāyomhi bhāvitasīlo bhāvitacitto bhāvitapañño’ti.
an10.24:4.3	Tañce, āvuso, bhikkhuṁ lobho abhibhuyya tiṭṭhati,
an10.24:4.4	doso …
an10.24:4.5	moho …
an10.24:4.6	kodho …
an10.24:4.7	upanāho …
an10.24:4.8	makkho …
an10.24:4.9	paḷāso …
an10.24:4.10	macchariyaṁ …
an10.24:4.11	pāpikā issā …
an10.24:4.12	pāpikā icchā abhibhuyya tiṭṭhati, so evamassa veditabbo:
an10.24:4.13	‘nāyamāyasmā tathā pajānāti yathā pajānato lobho na hoti, tathāhimaṁ āyasmantaṁ lobho abhibhuyya tiṭṭhati;
an10.24:4.14	nāyamāyasmā tathā pajānāti yathā pajānato doso na hoti …
an10.24:4.15	moho …
an10.24:4.16	kodho …
an10.24:4.17	upanāho …
an10.24:4.18	makkho …
an10.24:4.19	paḷāso …
an10.24:4.20	macchariyaṁ …
an10.24:4.21	pāpikā issā …
an10.24:4.22	pāpikā icchā na hoti, tathāhimaṁ āyasmantaṁ pāpikā icchā abhibhuyya tiṭṭhatī’ti.
an10.24:5.1	Seyyathāpi, āvuso, puriso daliddova samāno aḍḍhavādaṁ vadeyya, adhanova samāno dhanavāvādaṁ vadeyya, abhogova samāno bhogavāvādaṁ vadeyya.
an10.24:5.2	So kismiñcideva dhanakaraṇīye samuppanne na sakkuṇeyya upanīhātuṁ dhanaṁ vā dhaññaṁ vā rajataṁ vā jātarūpaṁ vā.
an10.24:5.3	Tamenaṁ evaṁ jāneyyuṁ:
an10.24:5.4	‘daliddova ayamāyasmā samāno aḍḍhavādaṁ vadeti, adhanova ayamāyasmā samāno dhanavāvādaṁ vadeti, abhogavāva ayamāyasmā samāno bhogavāvādaṁ vadeti.
an10.24:5.5	Taṁ kissa hetu?
an10.24:5.6	Tathā hi ayamāyasmā kismiñcideva dhanakaraṇīye samuppanne na sakkoti upanīhātuṁ dhanaṁ vā dhaññaṁ vā rajataṁ vā jātarūpaṁ vā’ti.
an10.24:6.1	Evamevaṁ kho, āvuso, ñāṇavādañca bhikkhu vadamāno bhāvanāvādañca:
an10.24:6.2	‘jānāmimaṁ dhammaṁ, passāmimaṁ dhammaṁ, bhāvitakāyomhi bhāvitasīlo bhāvitacitto bhāvitapañño’ti.
an10.24:6.3	Tañce, āvuso, bhikkhuṁ lobho abhibhuyya tiṭṭhati,
an10.24:6.4	doso …
an10.24:6.5	moho …
an10.24:6.6	kodho …
an10.24:6.7	upanāho …
an10.24:6.8	makkho …
an10.24:6.9	paḷāso …
an10.24:6.10	macchariyaṁ …
an10.24:6.11	pāpikā issā …
an10.24:6.12	pāpikā icchā abhibhuyya tiṭṭhati, so evamassa veditabbo:
an10.24:6.13	‘nāyamāyasmā tathā pajānāti yathā pajānato lobho na hoti, tathāhimaṁ āyasmantaṁ lobho abhibhuyya tiṭṭhati;
an10.24:6.14	nāyamāyasmā tathā pajānāti yathā pajānato doso na hoti …
an10.24:6.15	moho …
an10.24:6.16	kodho …
an10.24:6.17	upanāho …
an10.24:6.18	makkho …
an10.24:6.19	paḷāso …
an10.24:6.20	macchariyaṁ …
an10.24:6.21	pāpikā issā …
an10.24:6.22	pāpikā icchā na hoti, tathāhimaṁ āyasmantaṁ pāpikā icchā abhibhuyya tiṭṭhatī’ti.
an10.24:7.1	Ñāṇavādaṁ, āvuso, bhikkhu vadamāno:
an10.24:7.2	‘jānāmimaṁ dhammaṁ, passāmimaṁ dhamman’ti.
an10.24:7.3	Tañce, āvuso, bhikkhuṁ lobho nābhibhuyya tiṭṭhati,
an10.24:7.4	doso …
an10.24:7.5	moho …
an10.24:7.6	kodho …
an10.24:7.7	upanāho …
an10.24:7.8	makkho …
an10.24:7.9	paḷāso …
an10.24:7.10	macchariyaṁ …
an10.24:7.11	pāpikā issā …
an10.24:7.12	pāpikā icchā nābhibhuyya tiṭṭhati, so evamassa veditabbo:
an10.24:7.13	‘ayamāyasmā tathā pajānāti yathā pajānato lobho na hoti, tathāhimaṁ āyasmantaṁ lobho nābhibhuyya tiṭṭhati;
an10.24:7.14	tathā ayamāyasmā pajānāti yathā pajānato doso na hoti …
an10.24:7.15	moho …
an10.24:7.16	kodho …
an10.24:7.17	upanāho …
an10.24:7.18	makkho …
an10.24:7.19	paḷāso …
an10.24:7.20	macchariyaṁ …
an10.24:7.21	pāpikā issā …
an10.24:7.22	pāpikā icchā na hoti, tathāhimaṁ āyasmantaṁ pāpikā icchā nābhibhuyya tiṭṭhatī’ti.
an10.24:8.1	Bhāvanāvādaṁ, āvuso, bhikkhu vadamāno:
an10.24:8.2	‘bhāvitakāyomhi bhāvitasīlo bhāvitacitto bhāvitapañño’ti.
an10.24:8.3	Tañce, āvuso, bhikkhuṁ lobho nābhibhuyya tiṭṭhati,
an10.24:8.4	doso …
an10.24:8.5	moho …
an10.24:8.6	kodho …
an10.24:8.7	upanāho …
an10.24:8.8	makkho …
an10.24:8.9	paḷāso …
an10.24:8.10	macchariyaṁ …
an10.24:8.11	pāpikā issā …
an10.24:8.12	pāpikā icchā nābhibhuyya tiṭṭhati, so evamassa veditabbo:
an10.24:8.13	‘tathā ayamāyasmā pajānāti yathā pajānato lobho na hoti, tathāhimaṁ āyasmantaṁ lobho nābhibhuyya tiṭṭhati;
an10.24:8.14	tathā ayamāyasmā pajānāti yathā pajānato doso na hoti …
an10.24:8.15	moho …
an10.24:8.16	kodho …
an10.24:8.17	upanāho …
an10.24:8.18	makkho …
an10.24:8.19	paḷāso …
an10.24:8.20	macchariyaṁ …
an10.24:8.21	pāpikā issā …
an10.24:8.22	pāpikā icchā na hoti, tathāhimaṁ āyasmantaṁ pāpikā icchā nābhibhuyya tiṭṭhatī’ti.
an10.24:9.1	Ñāṇavādañca, āvuso, bhikkhu vadamāno bhāvanāvādañca:
an10.24:9.2	‘jānāmimaṁ dhammaṁ, passāmimaṁ dhammaṁ, bhāvitakāyomhi bhāvitasīlo bhāvitacitto bhāvitapañño’ti.
an10.24:9.3	Tañce, āvuso, bhikkhuṁ lobho nābhibhuyya tiṭṭhati,
an10.24:9.4	doso …
an10.24:9.5	moho …
an10.24:9.6	kodho …
an10.24:9.7	upanāho …
an10.24:9.8	makkho …
an10.24:9.9	paḷāso …
an10.24:9.10	macchariyaṁ …
an10.24:9.11	pāpikā issā …
an10.24:9.12	pāpikā icchā nābhibhuyya tiṭṭhati, so evamassa veditabbo:
an10.24:9.13	‘tathā ayamāyasmā pajānāti yathā pajānato lobho na hoti, tathāhimaṁ āyasmantaṁ lobho nābhibhuyya tiṭṭhati;
an10.24:9.14	tathā ayamāyasmā pajānāti yathā pajānato doso na hoti …
an10.24:9.15	moho …
an10.24:9.16	kodho …
an10.24:9.17	upanāho …
an10.24:9.18	makkho …
an10.24:9.19	paḷāso …
an10.24:9.20	macchariyaṁ …
an10.24:9.21	pāpikā issā …
an10.24:9.22	pāpikā icchā na hoti, tathāhimaṁ āyasmantaṁ pāpikā icchā nābhibhuyya tiṭṭhatī’ti.
an10.24:10.1	Seyyathāpi, āvuso, puriso aḍḍhova samāno aḍḍhavādaṁ vadeyya, dhanavāva samāno dhanavāvādaṁ vadeyya, bhogavāva samāno bhogavāvādaṁ vadeyya.
an10.24:10.2	So kismiñcideva dhanakaraṇīye samuppanne sakkuṇeyya upanīhātuṁ dhanaṁ vā dhaññaṁ vā rajataṁ vā jātarūpaṁ vā.
an10.24:10.3	Tamenaṁ evaṁ jāneyyuṁ:
an10.24:10.4	‘aḍḍhova ayamāyasmā samāno aḍḍhavādaṁ vadeti, dhanavāva ayamāyasmā samāno dhanavāvādaṁ vadeti, bhogavāva ayamāyasmā samāno bhogavāvādaṁ vadeti.
an10.24:10.5	Taṁ kissa hetu?
an10.24:10.6	Tathā hi ayamāyasmā kismiñcideva dhanakaraṇīye samuppanne sakkoti upanīhātuṁ dhanaṁ vā dhaññaṁ vā rajataṁ vā jātarūpaṁ vā’ti.
an10.24:11.1	Evamevaṁ kho, āvuso, ñāṇavādañca bhikkhu vadamāno bhāvanāvādañca:
an10.24:11.2	‘jānāmimaṁ dhammaṁ, passāmimaṁ dhammaṁ, bhāvitakāyomhi bhāvitasīlo bhāvitacitto bhāvitapañño’ti.
an10.24:11.3	Tañce, āvuso, bhikkhuṁ lobho nābhibhuyya tiṭṭhati,
an10.24:11.4	doso …
an10.24:11.5	moho …
an10.24:11.6	kodho …
an10.24:11.7	upanāho …
an10.24:11.8	makkho …
an10.24:11.9	paḷāso …
an10.24:11.10	macchariyaṁ …
an10.24:11.11	pāpikā issā …
an10.24:11.12	pāpikā icchā nābhibhuyya tiṭṭhati, so evamassa veditabbo:
an10.24:11.13	‘tathā ayamāyasmā pajānāti yathā pajānato lobho na hoti, tathāhimaṁ āyasmantaṁ lobho nābhibhuyya tiṭṭhati;
an10.24:11.14	tathā ayamāyasmā pajānāti yathā pajānato doso na hoti …
an10.24:11.15	moho …
an10.24:11.16	kodho …
an10.24:11.17	upanāho …
an10.24:11.18	makkho …
an10.24:11.19	paḷāso …
an10.24:11.20	macchariyaṁ …
an10.24:11.21	pāpikā issā …
an10.24:11.22	pāpikā icchā na hoti, tathāhimaṁ āyasmantaṁ pāpikā icchā nābhibhuyya tiṭṭhatī’”ti.
an10.24:11.23	Catutthaṁ.
an10.25:0.1	Aṅguttara Nikāya 10.25
an10.25:0.2	3. Mahāvagga
an10.25:0.3	Kasiṇasutta
an10.25:1.1	“Dasayimāni, bhikkhave, kasiṇāyatanāni.
an10.25:1.2	Katamāni dasa?
an10.25:1.3	Pathavīkasiṇameko sañjānāti uddhaṁ adho tiriyaṁ advayaṁ appamāṇaṁ;
an10.25:1.4	āpokasiṇameko sañjānāti …pe…
an10.25:1.5	tejokasiṇameko sañjānāti …
an10.25:1.6	vāyokasiṇameko sañjānāti …
an10.25:1.7	nīlakasiṇameko sañjānāti …
an10.25:1.8	pītakasiṇameko sañjānāti …
an10.25:1.9	lohitakasiṇameko sañjānāti …
an10.25:1.10	odātakasiṇameko sañjānāti …
an10.25:1.11	ākāsakasiṇameko sañjānāti …
an10.25:1.12	viññāṇakasiṇameko sañjānāti uddhaṁ adho tiriyaṁ advayaṁ appamāṇaṁ.
an10.25:1.13	Imāni kho, bhikkhave, dasa kasiṇāyatanānī”ti.
an10.25:1.14	Pañcamaṁ.
an10.26:0.1	Aṅguttara Nikāya 10.26
an10.26:0.2	3. Mahāvagga
an10.26:0.3	Kāḷīsutta
an10.26:1.1	Ekaṁ samayaṁ āyasmā mahākaccāno avantīsu viharati kuraraghare pavatte pabbate.
an10.26:1.2	Atha kho kāḷī upāsikā kuraragharikā yenāyasmā mahākaccāno tenupasaṅkami; upasaṅkamitvā āyasmantaṁ mahākaccānaṁ abhivādetvā ekamantaṁ nisīdi. Ekamantaṁ nisinnā kho kāḷī upāsikā kuraragharikā āyasmantaṁ mahākaccānaṁ etadavoca:
an10.26:1.3	“vuttamidaṁ, bhante, bhagavatā kumāripañhesu:
an10.26:2.1	‘Atthassa pattiṁ hadayassa santiṁ,
an10.26:2.2	Jetvāna senaṁ piyasātarūpaṁ;
an10.26:2.3	Ekohaṁ jhāyaṁ sukhamanubodhiṁ,
an10.26:2.4	Tasmā janena na karomi sakkhiṁ;
an10.26:2.5	Sakkhī na sampajjati kenaci me’ti.
an10.26:3.1	Imassa kho, bhante, bhagavatā saṅkhittena bhāsitassa kathaṁ vitthārena attho daṭṭhabbo”ti?
an10.26:4.1	“Pathavīkasiṇasamāpattiparamā kho, bhagini, eke samaṇabrāhmaṇā ‘attho’ti abhinibbattesuṁ.
an10.26:4.2	Yāvatā kho, bhagini, pathavīkasiṇasamāpattiparamatā, tadabhiññāsi bhagavā.
an10.26:4.3	Tadabhiññāya bhagavā assādamaddasa ādīnavamaddasa nissaraṇamaddasa maggāmaggañāṇadassanamaddasa.
an10.26:4.4	Tassa assādadassanahetu ādīnavadassanahetu nissaraṇadassanahetu maggāmaggañāṇadassanahetu atthassa patti hadayassa santi viditā hoti.
an10.26:5.1	Āpokasiṇasamāpattiparamā kho, bhagini …pe…
an10.26:5.2	tejokasiṇasamāpattiparamā kho, bhagini …
an10.26:5.3	vāyokasiṇasamāpattiparamā kho, bhagini …
an10.26:5.4	nīlakasiṇasamāpattiparamā kho, bhagini …
an10.26:5.5	pītakasiṇasamāpattiparamā kho, bhagini …
an10.26:5.6	lohitakasiṇasamāpattiparamā kho, bhagini …
an10.26:5.7	odātakasiṇasamāpattiparamā kho, bhagini …
an10.26:5.8	ākāsakasiṇasamāpattiparamā kho, bhagini …
an10.26:5.9	viññāṇakasiṇasamāpattiparamā kho, bhagini, eke samaṇabrāhmaṇā ‘attho’ti abhinibbattesuṁ.
an10.26:5.10	Yāvatā kho, bhagini, viññāṇakasiṇasamāpattiparamatā, tadabhiññāsi bhagavā.
an10.26:5.11	Tadabhiññāya bhagavā assādamaddasa … ādīnavamaddasa … nissaraṇamaddasa … maggāmaggañāṇadassanamaddasa …
an10.26:5.12	tassa assādadassanahetu ādīnavadassanahetu nissaraṇadassanahetu maggāmaggañāṇadassanahetu atthassa patti hadayassa santi viditā hoti.
an10.26:5.13	Iti kho, bhagini, yaṁ taṁ vuttaṁ bhagavatā kumāripañhesu:
an10.26:6.1	‘Atthassa pattiṁ hadayassa santiṁ,
an10.26:6.2	Jetvāna senaṁ piyasātarūpaṁ;
an10.26:6.3	Ekohaṁ jhāyaṁ sukhamanubodhiṁ,
an10.26:6.4	Tasmā janena na karomi sakkhiṁ;
an10.26:6.5	Sakkhī na sampajjati kenaci me’ti.
an10.26:7.1	Imassa kho, bhagini, bhagavatā saṅkhittena bhāsitassa evaṁ vitthārena attho daṭṭhabbo”ti.
an10.26:7.2	Chaṭṭhaṁ.
an10.27:0.1	Aṅguttara Nikāya 10.27
an10.27:0.2	3. Mahāvagga
an10.27:0.3	Paṭhamamahāpañhāsutta
an10.27:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.27:1.2	Atha kho sambahulā bhikkhū pubbaṇhasamayaṁ nivāsetvā pattacīvaramādāya sāvatthiṁ piṇḍāya pavisiṁsu.
an10.27:1.3	Atha kho tesaṁ bhikkhūnaṁ etadahosi:
an10.27:1.4	“atippago kho tāva sāvatthiyaṁ piṇḍāya carituṁ;
an10.27:1.5	yannūna mayaṁ yena aññatitthiyānaṁ paribbājakānaṁ ārāmo tenupasaṅkameyyāmā”ti.
an10.27:2.1	Atha kho te bhikkhū yena aññatitthiyānaṁ paribbājakānaṁ ārāmo tenupasaṅkamiṁsu; upasaṅkamitvā tehi aññatitthiyehi paribbājakehi saddhiṁ sammodiṁsu.
an10.27:2.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinne kho te bhikkhū te aññatitthiyā paribbājakā etadavocuṁ:
an10.27:3.1	“Samaṇo, āvuso, gotamo sāvakānaṁ evaṁ dhammaṁ deseti:
an10.27:3.2	‘etha tumhe, bhikkhave, sabbaṁ dhammaṁ abhijānātha, sabbaṁ dhammaṁ abhiññāya viharathā’ti;
an10.27:3.3	mayampi kho, āvuso, sāvakānaṁ evaṁ dhammaṁ desema:
an10.27:3.4	‘etha tumhe, āvuso, sabbaṁ dhammaṁ abhijānātha, sabbaṁ dhammaṁ abhiññāya viharathā’ti.
an10.27:3.5	Idha no, āvuso, ko viseso ko adhippayāso kiṁ nānākaraṇaṁ samaṇassa vā gotamassa amhākaṁ vā, yadidaṁ dhammadesanāya vā dhammadesanaṁ anusāsaniyā vā anusāsanin”ti?
an10.27:4.1	Atha kho te bhikkhū tesaṁ aññatitthiyānaṁ paribbājakānaṁ bhāsitaṁ neva abhinandiṁsu nappaṭikkosiṁsu.
an10.27:4.2	Anabhinanditvā appaṭikkositvā uṭṭhāyāsanā pakkamiṁsu:
an10.27:4.3	“bhagavato santike etassa bhāsitassa atthaṁ ājānissāmā”ti.
an10.27:5.1	Atha kho te bhikkhū sāvatthiyaṁ piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
an10.27:6.1	“Idha mayaṁ, bhante, pubbaṇhasamayaṁ nivāsetvā pattacīvaramādāya sāvatthiṁ piṇḍāya pavisimhā.
an10.27:6.2	Tesaṁ no, bhante, amhākaṁ etadahosi:
an10.27:6.3	‘atippago kho tāva sāvatthiyaṁ piṇḍāya carituṁ;
an10.27:6.4	yannūna mayaṁ yena aññatitthiyānaṁ paribbājakānaṁ ārāmo tenupasaṅkameyyāmā’ti.
an10.27:6.5	Atha kho mayaṁ, bhante, yena aññatitthiyānaṁ paribbājakānaṁ ārāmo tenupasaṅkamimhā; upasaṅkamitvā tehi aññatitthiyehi paribbājakehi saddhiṁ sammodimhā.
an10.27:6.6	Sammodanīyaṁ kathaṁ sāraṇīyaṁ vītisāretvā ekamantaṁ nisīdimhā. Ekamantaṁ nisinne kho, bhante, aññatitthiyā paribbājakā amhe etadavocuṁ:
an10.27:7.1	‘Samaṇo, āvuso, gotamo sāvakānaṁ evaṁ dhammaṁ deseti—
an10.27:7.2	etha tumhe, bhikkhave, sabbaṁ dhammaṁ abhijānātha, sabbaṁ dhammaṁ abhiññāya viharathāti;
an10.27:7.3	mayampi kho, āvuso, sāvakānaṁ evaṁ dhammaṁ desema—
an10.27:7.4	etha tumhe, āvuso, sabbaṁ dhammaṁ abhijānātha, sabbaṁ dhammaṁ abhiññāya viharathāti.
an10.27:7.5	Idha no, āvuso, ko viseso ko adhippayāso kiṁ nānākaraṇaṁ samaṇassa vā gotamassa amhākaṁ vā, yadidaṁ dhammadesanāya vā dhammadesanaṁ anusāsaniyā vā anusāsanin’ti?
an10.27:8.1	Atha kho mayaṁ, bhante, tesaṁ aññatitthiyānaṁ paribbājakānaṁ bhāsitaṁ neva abhinandimhā nappaṭikkosimhā.
an10.27:8.2	Anabhinanditvā appaṭikkositvā uṭṭhāyāsanā pakkamimhā:
an10.27:8.3	‘bhagavato santike etassa bhāsitassa atthaṁ ājānissāmā’”ti.
an10.27:9.1	“Evaṁvādino, bhikkhave, aññatitthiyā paribbājakā evamassu vacanīyā:
an10.27:9.2	‘eko, āvuso, pañho eko uddeso ekaṁ veyyākaraṇaṁ, dve pañhā dve uddesā dve veyyākaraṇāni, tayo pañhā tayo uddesā tīṇi veyyākaraṇāni, cattāro pañhā cattāro uddesā cattāri veyyākaraṇāni, pañca pañhā pañcuddesā pañca veyyākaraṇāni, cha pañhā cha uddesā cha veyyākaraṇāni, satta pañhā sattuddesā satta veyyākaraṇāni, aṭṭha pañhā aṭṭhuddesā aṭṭha veyyākaraṇāni, nava pañhā navuddesā nava veyyākaraṇāni, dasa pañhā dasuddesā dasa veyyākaraṇānī’ti.
an10.27:9.3	Evaṁ puṭṭhā, bhikkhave, aññatitthiyā paribbājakā na ceva sampāyissanti, uttari ca vighātaṁ āpajjissanti.
an10.27:9.4	Taṁ kissa hetu?
an10.27:9.5	Yathā taṁ, bhikkhave, avisayasmiṁ.
an10.27:9.6	Nāhaṁ taṁ, bhikkhave, passāmi sadevake loke samārake sabrahmake sassamaṇabrāhmaṇiyā pajāya sadevamanussāya yo imesaṁ pañhānaṁ veyyākaraṇena cittaṁ ārādheyya, aññatra tathāgatena vā tathāgatasāvakena vā ito vā pana sutvā.
an10.27:10.1	‘Eko pañho eko uddeso ekaṁ veyyākaraṇan’ti,
an10.27:10.2	iti kho panetaṁ vuttaṁ. Kiñcetaṁ paṭicca vuttaṁ?
an10.27:10.3	Ekadhamme, bhikkhave, bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:10.4	Katamasmiṁ ekadhamme?
an10.27:10.5	‘Sabbe sattā āhāraṭṭhitikā’—
an10.27:10.6	imasmiṁ kho, bhikkhave, ekadhamme bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:10.7	‘Eko pañho eko uddeso ekaṁ veyyākaraṇan’ti,
an10.27:10.8	iti yaṁ taṁ vuttaṁ idametaṁ paṭicca vuttaṁ.
an10.27:11.1	‘Dve pañhā dve uddesā dve veyyākaraṇānī’ti, iti kho panetaṁ vuttaṁ.
an10.27:11.2	Kiñcetaṁ paṭicca vuttaṁ?
an10.27:11.3	Dvīsu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:11.4	Katamesu dvīsu?
an10.27:11.5	Nāme ca rūpe ca—
an10.27:11.6	imesu kho, bhikkhave, dvīsu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:11.7	‘Dve pañhā dve uddesā dve veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.
an10.27:12.1	‘Tayo pañhā tayo uddesā tīṇi veyyākaraṇānī’ti, iti kho panetaṁ vuttaṁ.
an10.27:12.2	Kiñcetaṁ paṭicca vuttaṁ?
an10.27:12.3	Tīsu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:12.4	Katamesu tīsu?
an10.27:12.5	Tīsu vedanāsu—
an10.27:12.6	imesu kho, bhikkhave, tīsu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:12.7	‘Tayo pañhā tayo uddesā tīṇi veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.
an10.27:13.1	‘Cattāro pañhā cattāro uddesā cattāri veyyākaraṇānī’ti, iti kho panetaṁ vuttaṁ.
an10.27:13.2	Kiñcetaṁ paṭicca vuttaṁ?
an10.27:13.3	Catūsu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:13.4	Katamesu catūsu?
an10.27:13.5	Catūsu āhāresu—
an10.27:13.6	imesu kho, bhikkhave, catūsu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:13.7	‘Cattāro pañhā cattāro uddesā cattāri veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.
an10.27:14.1	‘Pañca pañhā pañcuddesā pañca veyyākaraṇānī’ti, iti kho panetaṁ vuttaṁ.
an10.27:14.2	Kiñcetaṁ paṭicca vuttaṁ?
an10.27:14.3	Pañcasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:14.4	Katamesu pañcasu?
an10.27:14.5	Pañcasu upādānakkhandhesu—
an10.27:14.6	imesu kho, bhikkhave, pañcasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:14.7	‘Pañca pañhā pañcuddesā pañca veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.
an10.27:15.1	‘Cha pañhā cha uddesā cha veyyākaraṇānī’ti, iti kho panetaṁ vuttaṁ.
an10.27:15.2	Kiñcetaṁ paṭicca vuttaṁ?
an10.27:15.3	Chasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:15.4	Katamesu chasu?
an10.27:15.5	Chasu ajjhattikesu āyatanesu—
an10.27:15.6	imesu kho, bhikkhave, chasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:15.7	‘Cha pañhā cha uddesā cha veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.
an10.27:16.1	‘Satta pañhā sattuddesā satta veyyākaraṇānī’ti, iti kho panetaṁ vuttaṁ.
an10.27:16.2	Kiñcetaṁ paṭicca vuttaṁ?
an10.27:16.3	Sattasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:16.4	Katamesu sattasu?
an10.27:16.5	Sattasu viññāṇaṭṭhitīsu—
an10.27:16.6	imesu kho, bhikkhave, sattasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:16.7	‘Satta pañhā sattuddesā satta veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.
an10.27:17.1	‘Aṭṭha pañhā aṭṭhuddesā aṭṭha veyyākaraṇānī’ti, iti kho panetaṁ vuttaṁ.
an10.27:17.2	Kiñcetaṁ paṭicca vuttaṁ?
an10.27:17.3	Aṭṭhasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:17.4	Katamesu aṭṭhasu?
an10.27:17.5	Aṭṭhasu lokadhammesu—
an10.27:17.6	imesu kho, bhikkhave, aṭṭhasu dhammesu bhikkhu sammā nibbindamāno …pe… dukkhassantakaro hoti.
an10.27:17.7	‘Aṭṭha pañhā aṭṭhuddesā aṭṭha veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.
an10.27:18.1	‘Nava pañhā navuddesā nava veyyākaraṇānī’ti, iti kho panetaṁ vuttaṁ.
an10.27:18.2	Kiñcetaṁ paṭicca vuttaṁ?
an10.27:18.3	Navasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:18.4	Katamesu navasu?
an10.27:18.5	Navasu sattāvāsesu—
an10.27:18.6	imesu kho, bhikkhave, navasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:18.7	‘Nava pañhā navuddesā nava veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.
an10.27:19.1	‘Dasa pañhā dasuddesā dasa veyyākaraṇānī’ti,
an10.27:19.2	iti kho panetaṁ vuttaṁ. Kiñcetaṁ paṭicca vuttaṁ?
an10.27:19.3	Dasasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:19.4	Katamesu dasasu?
an10.27:19.5	Dasasu akusalesu kammapathesu—
an10.27:19.6	imesu kho, bhikkhave, dasasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.27:19.7	‘Dasa pañhā dasuddesā dasa veyyākaraṇānī’ti,
an10.27:19.8	iti yaṁ taṁ vuttaṁ idametaṁ paṭicca vuttan”ti.
an10.27:19.9	Sattamaṁ.
an10.28:0.1	Aṅguttara Nikāya 10.28
an10.28:0.2	3. Mahāvagga
an10.28:0.3	Dutiyamahāpañhāsutta
an10.28:1.1	Ekaṁ samayaṁ bhagavā kajaṅgalāyaṁ viharati veḷuvane.
an10.28:1.2	Atha kho sambahulā kajaṅgalakā upāsakā yena kajaṅgalikā bhikkhunī tenupasaṅkamiṁsu; upasaṅkamitvā kajaṅgalikaṁ bhikkhuniṁ abhivādetvā ekamantaṁ nisīdiṁsu. Ekamantaṁ nisinnā kho kajaṅgalakā upāsakā kajaṅgalikaṁ bhikkhuniṁ etadavocuṁ:
an10.28:2.1	“Vuttamidaṁ, ayye, bhagavatā mahāpañhesu:
an10.28:2.2	‘eko pañho eko uddeso ekaṁ veyyākaraṇaṁ, dve pañhā dve uddesā dve veyyākaraṇāni, tayo pañhā tayo uddesā tīṇi veyyākaraṇāni, cattāro pañhā cattāro uddesā cattāri veyyākaraṇāni, pañca pañhā pañcuddesā pañca veyyākaraṇāni, cha pañhā cha uddesā cha veyyākaraṇāni, satta pañhā sattuddesā satta veyyākaraṇāni, aṭṭha pañhā aṭṭhuddesā aṭṭha veyyākaraṇāni, nava pañhā navuddesā nava veyyākaraṇāni, dasa pañhā dasuddesā dasa veyyākaraṇānī’ti.
an10.28:2.3	Imassa nu kho, ayye, bhagavatā saṅkhittena bhāsitassa kathaṁ vitthārena attho daṭṭhabbo”ti?
an10.28:3.1	“Na kho panetaṁ, āvuso, bhagavato sammukhā sutaṁ sammukhā paṭiggahitaṁ, napi manobhāvanīyānaṁ bhikkhūnaṁ sammukhā sutaṁ sammukhā paṭiggahitaṁ;
an10.28:3.2	api ca yathā mettha khāyati
an10.28:3.3	taṁ suṇātha, sādhukaṁ manasi karotha, bhāsissāmī”ti.
an10.28:3.4	“Evaṁ, ayye”ti, kho kajaṅgalakā upāsakā kajaṅgalikāya bhikkhuniyā paccassosuṁ.
an10.28:3.5	Kajaṅgalikā bhikkhunī etadavoca:
an10.28:4.1	“‘Eko pañho eko uddeso ekaṁ veyyākaraṇan’ti, iti kho panetaṁ vuttaṁ bhagavatā.
an10.28:4.2	Kiñcetaṁ paṭicca vuttaṁ?
an10.28:4.3	Ekadhamme, āvuso, bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:4.4	Katamasmiṁ ekadhamme?
an10.28:4.5	Sabbe sattā āhāraṭṭhitikā—
an10.28:4.6	imasmiṁ kho, āvuso, ekadhamme bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:4.7	‘Eko pañho eko uddeso ekaṁ veyyākaraṇan’ti, iti yaṁ taṁ vuttaṁ bhagavatā idametaṁ paṭicca vuttaṁ.
an10.28:5.1	‘Dve pañhā dve uddesā dve veyyākaraṇānī’ti iti, kho panetaṁ vuttaṁ bhagavatā.
an10.28:5.2	Kiñcetaṁ paṭicca vuttaṁ?
an10.28:5.3	Dvīsu, āvuso, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:5.4	Katamesu dvīsu?
an10.28:5.5	Nāme ca rūpe ca …pe…
an10.28:5.6	katamesu tīsu?
an10.28:5.7	Tīsu vedanāsu—
an10.28:5.8	imesu kho, āvuso, tīsu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:5.9	‘Tayo pañhā tayo uddesā tīṇi veyyākaraṇānī’ti, iti yaṁ taṁ vuttaṁ bhagavatā idametaṁ paṭicca vuttaṁ.
an10.28:6.1	‘Cattāro pañhā cattāro uddesā cattāri veyyākaraṇānī’ti, iti kho panetaṁ vuttaṁ bhagavatā.
an10.28:6.2	Kiñcetaṁ paṭicca vuttaṁ?
an10.28:6.3	Catūsu, āvuso, dhammesu bhikkhu sammā subhāvitacitto sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:6.4	Katamesu catūsu?
an10.28:6.5	Catūsu satipaṭṭhānesu—
an10.28:6.6	imesu kho, āvuso, catūsu dhammesu bhikkhu sammā subhāvitacitto sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:6.7	‘Cattāro pañhā cattāro uddesā cattāri veyyākaraṇānī’ti, iti yaṁ taṁ vuttaṁ bhagavatā idametaṁ paṭicca vuttaṁ.
an10.28:7.1	‘Pañca pañhā pañcuddesā pañca veyyākaraṇānī’ti, iti kho panetaṁ vuttaṁ bhagavatā.
an10.28:7.2	Kiñcetaṁ paṭicca vuttaṁ?
an10.28:7.3	Pañcasu, āvuso, dhammesu bhikkhu sammā subhāvitacitto sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:7.4	Katamesu pañcasu?
an10.28:7.5	Pañcasu indriyesu …pe…
an10.28:7.6	katamesu chasu?
an10.28:7.7	Chasu nissaraṇīyāsu dhātūsu …pe…
an10.28:7.8	katamesu sattasu?
an10.28:7.9	Sattasu bojjhaṅgesu …pe…
an10.28:7.10	katamesu aṭṭhasu?
an10.28:7.11	Aṭṭhasu ariyaaṭṭhaṅgikamaggesu—
an10.28:7.12	imesu kho, āvuso, aṭṭhasu dhammesu bhikkhu sammā subhāvitacitto sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:7.13	‘Aṭṭha pañhā aṭṭhuddesā aṭṭha veyyākaraṇānī’ti, iti yaṁ taṁ vuttaṁ bhagavatā idametaṁ paṭicca vuttaṁ.
an10.28:8.1	‘Nava pañhā navuddesā nava veyyākaraṇānī’ti, iti kho panetaṁ vuttaṁ bhagavatā.
an10.28:8.2	Kiñcetaṁ paṭicca vuttaṁ?
an10.28:8.3	Navasu, āvuso, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:8.4	Katamesu navasu?
an10.28:8.5	Navasu sattāvāsesu—
an10.28:8.6	imesu kho, āvuso, navasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:8.7	‘Nava pañhā navuddesā nava veyyākaraṇānī’ti, iti yaṁ taṁ vuttaṁ bhagavatā idametaṁ paṭicca vuttaṁ.
an10.28:9.1	‘Dasa pañhā dasuddesā dasa veyyākaraṇānī’ti, iti kho panetaṁ vuttaṁ bhagavatā.
an10.28:9.2	Kiñcetaṁ paṭicca vuttaṁ?
an10.28:9.3	Dasasu, āvuso, dhammesu bhikkhu sammā subhāvitacitto sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:9.4	Katamesu dasasu?
an10.28:9.5	Dasasu kusalesu kammapathesu—
an10.28:9.6	imesu kho, āvuso, dasasu dhammesu bhikkhu sammā subhāvitacitto sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.
an10.28:9.7	‘Dasa pañhā dasuddesā dasa veyyākaraṇānī’ti, iti yaṁ taṁ vuttaṁ bhagavatā idametaṁ paṭicca vuttaṁ.
an10.28:10.1	Iti kho, āvuso, yaṁ taṁ vuttaṁ bhagavatā saṅkhittena bhāsitāsu mahāpañhāsu:
an10.28:10.2	‘eko pañho eko uddeso ekaṁ veyyākaraṇaṁ …pe…
an10.28:10.3	dasa pañhā dasuddesā dasa veyyākaraṇānī’ti, imassa kho ahaṁ, āvuso, bhagavatā saṅkhittena bhāsitassa evaṁ vitthārena atthaṁ ājānāmi.
an10.28:10.4	Ākaṅkhamānā ca pana tumhe, āvuso, bhagavantaññeva upasaṅkamitvā etamatthaṁ paṭipuccheyyātha.
an10.28:10.5	Yathā vo bhagavā byākaroti tathā naṁ dhāreyyāthā”ti.
an10.28:10.6	“Evaṁ, ayye”ti kho kajaṅgalakā upāsakā kajaṅgalikāya kho bhikkhuniyā bhāsitaṁ abhinanditvā anumoditvā uṭṭhāyāsanā kajaṅgalikaṁ bhikkhuniṁ abhivādetvā padakkhiṇaṁ katvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.
an10.28:10.7	Ekamantaṁ nisinnā kho kajaṅgalakā upāsakā yāvatako ahosi kajaṅgalikāya bhikkhuniyā saddhiṁ kathāsallāpo, taṁ sabbaṁ bhagavato ārocesuṁ.
an10.28:11.1	“Sādhu sādhu, gahapatayo.
an10.28:11.2	Paṇḍitā, gahapatayo, kajaṅgalikā bhikkhunī. Mahāpaññā, gahapatayo, kajaṅgalikā bhikkhunī.
an10.28:11.3	Mañcepi tumhe, gahapatayo, upasaṅkamitvā etamatthaṁ paṭipuccheyyātha, ahampi cetaṁ evamevaṁ byākareyyaṁ yathā taṁ kajaṅgalikāya bhikkhuniyā byākataṁ.
an10.28:11.4	Eso ceva tassa attho. Evañca naṁ dhāreyyāthā”ti.
an10.28:11.5	Aṭṭhamaṁ.
an10.29:0.1	Aṅguttara Nikāya 10.29
an10.29:0.2	3. Mahāvagga
an10.29:0.3	Paṭhamakosalasutta
an10.29:1.1	“Yāvatā, bhikkhave, kāsikosalā, yāvatā rañño pasenadissa kosalassa vijitaṁ, rājā tattha pasenadi kosalo aggamakkhāyati.
an10.29:1.2	Raññopi kho, bhikkhave, pasenadissa kosalassa attheva aññathattaṁ atthi vipariṇāmo.
an10.29:1.3	Evaṁ passaṁ, bhikkhave, sutavā ariyasāvako tasmimpi nibbindati.
an10.29:1.4	Tasmiṁ nibbindanto agge virajjati, pageva hīnasmiṁ.
an10.29:2.1	Yāvatā, bhikkhave, candimasūriyā pariharanti disā bhanti virocamānā, tāva sahassadhā loko.
an10.29:2.2	Tasmiṁ sahassadhā loke sahassaṁ candānaṁ sahassaṁ sūriyānaṁ sahassaṁ sinerupabbatarājānaṁ sahassaṁ jambudīpānaṁ sahassaṁ aparagoyānānaṁ sahassaṁ uttarakurūnaṁ sahassaṁ pubbavidehānaṁ cattāri mahāsamuddasahassāni cattāri mahārājasahassāni sahassaṁ cātumahārājikānaṁ sahassaṁ tāvatiṁsānaṁ sahassaṁ yāmānaṁ sahassaṁ tusitānaṁ sahassaṁ nimmānaratīnaṁ sahassaṁ paranimmitavasavattīnaṁ sahassaṁ brahmalokānaṁ.
an10.29:2.3	Yāvatā, bhikkhave, sahassī lokadhātu, mahābrahmā tattha aggamakkhāyati.
an10.29:2.4	Mahābrahmunopi kho, bhikkhave, attheva aññathattaṁ atthi vipariṇāmo.
an10.29:2.5	Evaṁ passaṁ, bhikkhave, sutavā ariyasāvako tasmimpi nibbindati.
an10.29:2.6	Tasmiṁ nibbindanto agge virajjati, pageva hīnasmiṁ.
an10.29:3.1	Hoti so, bhikkhave, samayo yaṁ ayaṁ loko saṁvaṭṭati.
an10.29:3.2	Saṁvaṭṭamāne, bhikkhave, loke yebhuyyena sattā ābhassarasaṁvattanikā bhavanti.
an10.29:3.3	Te tattha honti manomayā pītibhakkhā sayaṁpabhā antalikkhecarā subhaṭṭhāyino ciraṁ dīghamaddhānaṁ tiṭṭhanti.
an10.29:3.4	Saṁvaṭṭamāne, bhikkhave, loke ābhassarā devā aggamakkhāyanti.
an10.29:3.5	Ābhassarānampi kho, bhikkhave, devānaṁ attheva aññathattaṁ atthi vipariṇāmo.
an10.29:3.6	Evaṁ passaṁ, bhikkhave, sutavā ariyasāvako tasmimpi nibbindati.
an10.29:3.7	Tasmiṁ nibbindanto agge virajjati, pageva hīnasmiṁ.
an10.29:4.1	Dasayimāni, bhikkhave, kasiṇāyatanāni.
an10.29:4.2	Katamāni dasa?
an10.29:4.3	Pathavīkasiṇameko sañjānāti uddhaṁ adho tiriyaṁ advayaṁ appamāṇaṁ;
an10.29:4.4	āpokasiṇameko sañjānāti …pe…
an10.29:4.5	tejokasiṇameko sañjānāti …
an10.29:4.6	vāyokasiṇameko sañjānāti …
an10.29:4.7	nīlakasiṇameko sañjānāti …
an10.29:4.8	pītakasiṇameko sañjānāti …
an10.29:4.9	lohitakasiṇameko sañjānāti …
an10.29:4.10	odātakasiṇameko sañjānāti …
an10.29:4.11	ākāsakasiṇameko sañjānāti …
an10.29:4.12	viññāṇakasiṇameko sañjānāti uddhaṁ adho tiriyaṁ advayaṁ appamāṇaṁ.
an10.29:4.13	Imāni kho, bhikkhave, dasa kasiṇāyatanāni.
an10.29:5.1	Etadaggaṁ, bhikkhave, imesaṁ dasannaṁ kasiṇāyatanānaṁ yadidaṁ viññāṇakasiṇaṁ eko sañjānāti uddhaṁ adho tiriyaṁ advayaṁ appamāṇaṁ.
an10.29:5.2	Evaṁsaññinopi kho, bhikkhave, santi sattā.
an10.29:5.3	Evaṁsaññīnampi kho, bhikkhave, sattānaṁ attheva aññathattaṁ atthi vipariṇāmo.
an10.29:5.4	Evaṁ passaṁ, bhikkhave, sutavā ariyasāvako tasmimpi nibbindati.
an10.29:5.5	Tasmiṁ nibbindanto agge virajjati, pageva hīnasmiṁ.
an10.29:6.1	Aṭṭhimāni, bhikkhave, abhibhāyatanāni.
an10.29:6.2	Katamāni aṭṭha?
an10.29:6.3	Ajjhattaṁ rūpasaññī eko bahiddhā rūpāni passati parittāni suvaṇṇadubbaṇṇāni;
an10.29:6.4	‘tāni abhibhuyya jānāmi passāmī’ti, evaṁsaññī hoti.
an10.29:6.5	Idaṁ paṭhamaṁ abhibhāyatanaṁ.
an10.29:7.1	Ajjhattaṁ rūpasaññī eko bahiddhā rūpāni passati appamāṇāni suvaṇṇadubbaṇṇāni;
an10.29:7.2	‘tāni abhibhuyya jānāmi passāmī’ti, evaṁsaññī hoti.
an10.29:7.3	Idaṁ dutiyaṁ abhibhāyatanaṁ.
an10.29:8.1	Ajjhattaṁ arūpasaññī eko bahiddhā rūpāni passati parittāni suvaṇṇadubbaṇṇāni;
an10.29:8.2	‘tāni abhibhuyya jānāmi passāmī’ti, evaṁsaññī hoti.
an10.29:8.3	Idaṁ tatiyaṁ abhibhāyatanaṁ.
an10.29:9.1	Ajjhattaṁ arūpasaññī eko bahiddhā rūpāni passati appamāṇāni suvaṇṇadubbaṇṇāni;
an10.29:9.2	‘tāni abhibhuyya jānāmi passāmī’ti, evaṁsaññī hoti.
an10.29:9.3	Idaṁ catutthaṁ abhibhāyatanaṁ.
an10.29:10.1	Ajjhattaṁ arūpasaññī eko bahiddhā rūpāni passati nīlāni nīlavaṇṇāni nīlanidassanāni nīlanibhāsāni.
an10.29:10.2	Seyyathāpi nāma umāpupphaṁ nīlaṁ nīlavaṇṇaṁ nīlanidassanaṁ nīlanibhāsaṁ, seyyathā vā pana taṁ vatthaṁ bārāṇaseyyakaṁ ubhatobhāgavimaṭṭhaṁ nīlaṁ nīlavaṇṇaṁ nīlanidassanaṁ nīlanibhāsaṁ;
an10.29:10.3	evamevaṁ ajjhattaṁ arūpasaññī eko bahiddhā rūpāni passati nīlāni nīlavaṇṇāni nīlanidassanāni nīlanibhāsāni;
an10.29:10.4	‘tāni abhibhuyya jānāmi passāmī’ti, evaṁsaññī hoti.
an10.29:10.5	Idaṁ pañcamaṁ abhibhāyatanaṁ.
an10.29:11.1	Ajjhattaṁ arūpasaññī eko bahiddhā rūpāni passati pītāni pītavaṇṇāni pītanidassanāni pītanibhāsāni.
an10.29:11.2	Seyyathāpi nāma kaṇikārapupphaṁ pītaṁ pītavaṇṇaṁ pītanidassanaṁ pītanibhāsaṁ, seyyathā vā pana taṁ vatthaṁ bārāṇaseyyakaṁ ubhatobhāgavimaṭṭhaṁ pītaṁ pītavaṇṇaṁ pītanidassanaṁ pītanibhāsaṁ;
an10.29:11.3	evamevaṁ ajjhattaṁ arūpasaññī eko bahiddhā rūpāni passati pītāni pītavaṇṇāni pītanidassanāni pītanibhāsāni;
an10.29:11.4	‘tāni abhibhuyya jānāmi passāmī’ti, evaṁsaññī hoti.
an10.29:11.5	Idaṁ chaṭṭhaṁ abhibhāyatanaṁ.
an10.29:12.1	Ajjhattaṁ arūpasaññī eko bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni.
an10.29:12.2	Seyyathāpi nāma bandhujīvakapupphaṁ lohitakaṁ lohitakavaṇṇaṁ lohitakanidassanaṁ lohitakanibhāsaṁ, seyyathā vā pana taṁ vatthaṁ bārāṇaseyyakaṁ ubhatobhāgavimaṭṭhaṁ lohitakaṁ lohitakavaṇṇaṁ lohitakanidassanaṁ lohitakanibhāsaṁ;
an10.29:12.3	evamevaṁ ajjhattaṁ arūpasaññī eko bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni;
an10.29:12.4	‘tāni abhibhuyya jānāmi passāmī’ti, evaṁsaññī hoti.
an10.29:12.5	Idaṁ sattamaṁ abhibhāyatanaṁ.
an10.29:13.1	Ajjhattaṁ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni.
an10.29:13.2	Seyyathāpi nāma osadhitārakā odātā odātavaṇṇā odātanidassanā odātanibhāsā, seyyathā vā pana taṁ vatthaṁ bārāṇaseyyakaṁ ubhatobhāgavimaṭṭhaṁ odātaṁ odātavaṇṇaṁ odātanidassanaṁ odātanibhāsaṁ;
an10.29:13.3	evamevaṁ ajjhattaṁ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni;
an10.29:13.4	‘tāni abhibhuyya jānāmi passāmī’ti, evaṁsaññī hoti.
an10.29:13.5	Idaṁ aṭṭhamaṁ abhibhāyatanaṁ.
an10.29:13.6	Imāni kho, bhikkhave, aṭṭha abhibhāyatanāni.
an10.29:14.1	Etadaggaṁ, bhikkhave, imesaṁ aṭṭhannaṁ abhibhāyatanānaṁ yadidaṁ ajjhattaṁ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni;
an10.29:14.2	‘tāni abhibhuyya jānāmi passāmī’ti, evaṁsaññī hoti.
an10.29:14.3	Evaṁsaññinopi kho, bhikkhave, santi sattā.
an10.29:14.4	Evaṁsaññīnampi kho, bhikkhave, sattānaṁ attheva aññathattaṁ atthi vipariṇāmo.
an10.29:14.5	Evaṁ passaṁ, bhikkhave, sutavā ariyasāvako tasmimpi nibbindati.
an10.29:14.6	Tasmiṁ nibbindanto agge virajjati, pageva hīnasmiṁ.
an10.29:15.1	Catasso imā, bhikkhave, paṭipadā.
an10.29:15.2	Katamā catasso?
an10.29:15.3	Dukkhā paṭipadā dandhābhiññā,
an10.29:15.4	dukkhā paṭipadā khippābhiññā,
an10.29:15.5	sukhā paṭipadā dandhābhiññā,
an10.29:15.6	sukhā paṭipadā khippābhiññā—
an10.29:15.7	imā kho, bhikkhave, catasso paṭipadā.
an10.29:16.1	Etadaggaṁ, bhikkhave, imāsaṁ catunnaṁ paṭipadānaṁ yadidaṁ sukhā paṭipadā khippābhiññā.
an10.29:16.2	Evaṁpaṭipannāpi kho, bhikkhave, santi sattā.
an10.29:16.3	Evaṁpaṭipannānampi kho, bhikkhave, sattānaṁ attheva aññathattaṁ atthi vipariṇāmo.
an10.29:16.4	Evaṁ passaṁ, bhikkhave, sutavā ariyasāvako tasmimpi nibbindati.
an10.29:16.5	Tasmiṁ nibbindanto agge virajjati, pageva hīnasmiṁ.
an10.29:17.1	Catasso imā, bhikkhave, saññā.
an10.29:17.2	Katamā catasso?
an10.29:17.3	Parittameko sañjānāti,
an10.29:17.4	mahaggatameko sañjānāti,
an10.29:17.5	appamāṇameko sañjānāti,
an10.29:17.6	‘natthi kiñcī’ti ākiñcaññāyatanameko sañjānāti—
an10.29:17.7	imā kho, bhikkhave, catasso saññā.
an10.29:18.1	Etadaggaṁ, bhikkhave, imāsaṁ catunnaṁ saññānaṁ yadidaṁ ‘natthi kiñcī’ti ākiñcaññāyatanameko sañjānāti.
an10.29:18.2	Evaṁsaññinopi kho, bhikkhave, santi sattā.
an10.29:18.3	Evaṁsaññīnampi kho, bhikkhave, sattānaṁ attheva aññathattaṁ atthi vipariṇāmo.
an10.29:18.4	Evaṁ passaṁ, bhikkhave, sutavā ariyasāvako tasmimpi nibbindati.
an10.29:18.5	Tasmiṁ nibbindanto agge virajjati, pageva hīnasmiṁ.
an10.29:19.1	Etadaggaṁ, bhikkhave, bāhirakānaṁ diṭṭhigatānaṁ yadidaṁ ‘no cassaṁ, no ca me siyā, na bhavissāmi, na me bhavissatī’ti.
an10.29:19.2	Evaṁdiṭṭhino, bhikkhave, etaṁ pāṭikaṅkhaṁ:
an10.29:19.3	‘yā cāyaṁ bhave appaṭikulyatā, sā cassa na bhavissati;
an10.29:19.4	yā cāyaṁ bhavanirodhe pāṭikulyatā, sā cassa na bhavissatī’ti.
an10.29:19.5	Evaṁdiṭṭhinopi kho, bhikkhave, santi sattā.
an10.29:19.6	Evaṁdiṭṭhīnampi kho, bhikkhave, sattānaṁ attheva aññathattaṁ atthi vipariṇāmo.
an10.29:19.7	Evaṁ passaṁ, bhikkhave, sutavā ariyasāvako tasmimpi nibbindati.
an10.29:19.8	Tasmiṁ nibbindanto agge virajjati, pageva hīnasmiṁ.
an10.29:20.1	Santi, bhikkhave, eke samaṇabrāhmaṇā paramatthavisuddhiṁ paññāpenti.
an10.29:20.2	Etadaggaṁ, bhikkhave, paramatthavisuddhiṁ paññapentānaṁ yadidaṁ sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
an10.29:20.3	Te tadabhiññāya tassa sacchikiriyāya dhammaṁ desenti.
an10.29:20.4	Evaṁvādinopi kho, bhikkhave, santi sattā.
an10.29:20.5	Evaṁvādīnampi kho, bhikkhave, sattānaṁ attheva aññathattaṁ atthi vipariṇāmo.
an10.29:20.6	Evaṁ passaṁ, bhikkhave, sutavā ariyasāvako tasmimpi nibbindati.
an10.29:20.7	Tasmiṁ nibbindanto agge virajjati, pageva hīnasmiṁ.
an10.29:21.1	Santi, bhikkhave, eke samaṇabrāhmaṇā paramadiṭṭhadhammanibbānaṁ paññāpenti.
an10.29:21.2	Etadaggaṁ, bhikkhave, paramadiṭṭhadhammanibbānaṁ paññapentānaṁ yadidaṁ channaṁ phassāyatanānaṁ samudayañca atthaṅgamañca assādañca ādīnavañca nissaraṇañca yathābhūtaṁ viditvā anupādā vimokkho.
an10.29:21.3	Evaṁvādiṁ kho maṁ, bhikkhave, evamakkhāyiṁ eke samaṇabrāhmaṇā asatā tucchā musā abhūtena abbhācikkhanti:
an10.29:21.4	‘samaṇo gotamo na kāmānaṁ pariññaṁ paññāpeti, na rūpānaṁ pariññaṁ paññāpeti, na vedanānaṁ pariññaṁ paññāpetī’ti.
an10.29:21.5	Kāmānañcāhaṁ, bhikkhave, pariññaṁ paññāpemi, rūpānañca pariññaṁ paññāpemi, vedanānañca pariññaṁ paññāpemi, diṭṭheva dhamme nicchāto nibbuto sītibhūto anupādā parinibbānaṁ paññāpemī”ti.
an10.29:21.6	Navamaṁ.
an10.30:0.1	Aṅguttara Nikāya 10.30
an10.30:0.2	3. Mahāvagga
an10.30:0.3	Dutiyakosalasutta
an10.30:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.30:1.2	Tena kho pana samayena rājā pasenadi kosalo uyyodhikā nivatto hoti vijitasaṅgāmo laddhādhippāyo.
an10.30:1.3	Atha kho rājā pasenadi kosalo yena ārāmo tena pāyāsi.
an10.30:1.4	Yāvatikā yānassa bhūmi, yānena gantvā yānā paccorohitvā pattikova ārāmaṁ pāvisi.
an10.30:1.5	Tena kho pana samayena sambahulā bhikkhū abbhokāse caṅkamanti.
an10.30:1.6	Atha kho rājā pasenadi kosalo yena te bhikkhū tenupasaṅkami; upasaṅkamitvā te bhikkhū etadavoca:
an10.30:1.7	“kahaṁ nu kho, bhante, bhagavā etarahi viharati arahaṁ sammāsambuddho.
an10.30:1.8	Dassanakāmā hi mayaṁ, bhante, taṁ bhagavantaṁ arahantaṁ sammāsambuddhan”ti.
an10.30:1.9	“Eso, mahārāja, vihāro saṁvutadvāro. Tena appasaddo upasaṅkamitvā ataramāno ālindaṁ pavisitvā ukkāsitvā aggaḷaṁ ākoṭehi; vivarissati te bhagavā dvāran”ti.
an10.30:2.1	Atha kho rājā pasenadi kosalo yena so vihāro saṁvutadvāro, tena appasaddo upasaṅkamitvā ataramāno ālindaṁ pavisitvā ukkāsitvā aggaḷaṁ ākoṭesi. Vivari bhagavā dvāraṁ.
an10.30:2.2	Atha kho rājā pasenadi kosalo vihāraṁ pavisitvā bhagavato pādesu sirasā nipatitvā bhagavato pādāni mukhena ca paricumbati pāṇīhi ca parisambāhati nāmañca sāveti:
an10.30:2.3	“rājāhaṁ, bhante, pasenadi kosalo;
an10.30:2.4	rājāhaṁ, bhante, pasenadi kosalo”ti.
an10.30:3.1	“Kaṁ pana tvaṁ, mahārāja, atthavasaṁ sampassamāno imasmiṁ sarīre evarūpaṁ paramanipaccakāraṁ karosi, mettūpahāraṁ upadaṁsesī”ti?
an10.30:3.2	“Kataññutaṁ kho ahaṁ, bhante, kataveditaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:4.1	Bhagavā hi, bhante, bahujanahitāya paṭipanno bahujanasukhāya bahuno janassa ariye ñāye patiṭṭhāpitā yadidaṁ kalyāṇadhammatāya kusaladhammatāya.
an10.30:4.2	Yampi, bhante, bhagavā bahujanahitāya paṭipanno bahujanasukhāya bahuno janassa ariye ñāye patiṭṭhāpitā yadidaṁ kalyāṇadhammatāya kusaladhammatāya, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:5.1	Puna caparaṁ, bhante, bhagavā sīlavā vuddhasīlo ariyasīlo kusalasīlo kusalasīlena samannāgato.
an10.30:5.2	Yampi, bhante, bhagavā sīlavā vuddhasīlo ariyasīlo kusalasīlo kusalasīlena samannāgato, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:6.1	Puna caparaṁ, bhante, bhagavā dīgharattaṁ āraññiko, araññavanapatthāni pantāni senāsanāni paṭisevati.
an10.30:6.2	Yampi, bhante, bhagavā dīgharattaṁ āraññiko, araññavanapatthāni pantāni senāsanāni paṭisevati, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:7.1	Puna caparaṁ, bhante, bhagavā santuṭṭho itarītaracīvarapiṇḍapātasenāsanagilānapaccayabhesajjaparikkhārena.
an10.30:7.2	Yampi, bhante, bhagavā santuṭṭho itarītaracīvarapiṇḍapātasenāsanagilānapaccayabhesajjaparikkhārena, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:8.1	Puna caparaṁ, bhante, bhagavā āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an10.30:8.2	Yampi, bhante, bhagavā āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:9.1	Puna caparaṁ, bhante, bhagavā yāyaṁ kathā abhisallekhikā cetovivaraṇasappāyā, seyyathidaṁ—appicchakathā santuṭṭhikathā pavivekakathā asaṁsaggakathā vīriyārambhakathā sīlakathā samādhikathā paññākathā vimuttikathā vimuttiñāṇadassanakathā, evarūpāya kathāya nikāmalābhī akicchalābhī akasiralābhī.
an10.30:9.2	Yampi, bhante, bhagavā yāyaṁ kathā abhisallekhikā cetovivaraṇasappāyā, seyyathidaṁ—appicchakathā …pe… vimuttiñāṇadassanakathā, evarūpāya kathāya nikāmalābhī akicchalābhī akasiralābhī, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:10.1	Puna caparaṁ, bhante, bhagavā catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī akicchalābhī akasiralābhī.
an10.30:10.2	Yampi, bhante, bhagavā catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī akicchalābhī akasiralābhī, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:11.1	Puna caparaṁ, bhante, bhagavā anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe: ‘amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto amutra udapādiṁ; tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto idhūpapanno’ti. Iti sākāraṁ sauddesaṁ anekavihitaṁ pubbenivāsaṁ anussarati.
an10.30:11.2	Yampi, bhante, bhagavā anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:12.1	Puna caparaṁ, bhante, bhagavā dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti: ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā; ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā, te kāyassa bhedā paraṁ maraṇā sugatiṁ saggaṁ lokaṁ upapannā’ti, iti dibbena cakkhunā visuddhena atikkantamānusakena satte passati …pe… yathākammūpage satte pajānāti.
an10.30:12.2	Yampi, bhante, bhagavā dibbena cakkhunā visuddhena atikkantamānusakena …pe… yathākammūpage satte pajānāti, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:13.1	Puna caparaṁ, bhante, bhagavā āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an10.30:13.2	Yampi, bhante, bhagavā āsavānaṁ khayā anāsavaṁ cetovimuttiṁ …pe… sacchikatvā upasampajja viharati, idampi kho ahaṁ, bhante, atthavasaṁ sampassamāno bhagavati evarūpaṁ paramanipaccakāraṁ karomi, mettūpahāraṁ upadaṁsemi.
an10.30:14.1	Handa ca dāni mayaṁ, bhante, gacchāma.
an10.30:14.2	Bahukiccā mayaṁ bahukaraṇīyā”ti.
an10.30:14.3	“Yassadāni tvaṁ, mahārāja, kālaṁ maññasī”ti.
an10.30:14.4	Atha kho rājā pasenadi kosalo uṭṭhāyāsanā bhagavantaṁ abhivādetvā padakkhiṇaṁ katvā pakkāmīti.
an10.30:14.5	Dasamaṁ.
an10.30:14.6	Mahāvaggo tatiyo.
an10.30:15.0	Tassuddānaṁ
an10.30:15.1	Sīhādhivutti kāyena,
an10.30:15.2	cundena kasiṇena ca;
an10.30:15.3	Kāḷī ca dve mahāpañhā,
an10.30:15.4	kosalehi pare duveti.
an10.31:0.1	Aṅguttara Nikāya 10.31
an10.31:0.2	4. Upālivagga
an10.31:0.3	Upālisutta
an10.31:1.1	Atha kho āyasmā upāli yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā upāli bhagavantaṁ etadavoca:
an10.31:1.2	“kati nu kho, bhante, atthavase paṭicca tathāgatena sāvakānaṁ sikkhāpadaṁ paññattaṁ, pātimokkhaṁ uddiṭṭhan”ti?
an10.31:2.1	“Dasa kho, upāli, atthavase paṭicca tathāgatena sāvakānaṁ sikkhāpadaṁ paññattaṁ, pātimokkhaṁ uddiṭṭhaṁ.
an10.31:2.2	Katame dasa?
an10.31:2.3	Saṅghasuṭṭhutāya, saṅghaphāsutāya, dummaṅkūnaṁ puggalānaṁ niggahāya, pesalānaṁ bhikkhūnaṁ phāsuvihārāya, diṭṭhadhammikānaṁ āsavānaṁ saṁvarāya, samparāyikānaṁ āsavānaṁ paṭighātāya, appasannānaṁ pasādāya, pasannānaṁ bhiyyobhāvāya, saddhammaṭṭhitiyā, vinayānuggahāya—
an10.31:2.4	ime kho, upāli, dasa atthavase paṭicca tathāgatena sāvakānaṁ sikkhāpadaṁ paññattaṁ, pātimokkhaṁ uddiṭṭhan”ti.
an10.31:2.5	Paṭhamaṁ.
an10.32:0.1	Aṅguttara Nikāya 10.32
an10.32:0.2	4. Upālivagga
an10.32:0.3	Pātimokkhaṭṭhapanāsutta
an10.32:1.1	“Kati nu kho, bhante, pātimokkhaṭṭhapanā”ti?
an10.32:1.2	“Dasa kho, upāli, pātimokkhaṭṭhapanā.
an10.32:1.3	Katame dasa?
an10.32:1.4	Pārājiko tassaṁ parisāyaṁ nisinno hoti, pārājikakathā vippakatā hoti, anupasampanno tassaṁ parisāyaṁ nisinno hoti, anupasampannakathā vippakatā hoti, sikkhaṁ paccakkhātako tassaṁ parisāyaṁ nisinno hoti, sikkhaṁ paccakkhātakakathā vippakatā hoti, paṇḍako tassaṁ parisāyaṁ nisinno hoti, paṇḍakakathā vippakatā hoti, bhikkhunidūsako tassaṁ parisāyaṁ nisinno hoti, bhikkhunidūsakakathā vippakatā hoti—
an10.32:1.5	ime kho, upāli, dasa pātimokkhaṭṭhapanā”ti.
an10.32:1.6	Dutiyaṁ.
an10.33:0.1	Aṅguttara Nikāya 10.33
an10.33:0.2	4. Upālivagga
an10.33:0.3	Ubbāhikāsutta
an10.33:1.1	“Katihi nu kho, bhante, dhammehi samannāgato bhikkhu ubbāhikāya sammannitabbo”ti?
an10.33:1.2	“Dasahi kho, upāli, dhammehi samannāgato bhikkhu ubbāhikāya sammannitabbo.
an10.33:1.3	Katamehi dasahi?
an10.33:1.4	Idhupāli, bhikkhu sīlavā hoti; pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu;
an10.33:1.5	bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā;
an10.33:1.6	ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso;
an10.33:1.7	vinaye kho pana ṭhito hoti asaṁhīro;
an10.33:1.8	paṭibalo hoti ubho atthapaccatthike saññāpetuṁ paññāpetuṁ nijjhāpetuṁ pekkhetuṁ pasādetuṁ;
an10.33:1.9	adhikaraṇasamuppādavūpasamakusalo hoti—
an10.33:1.10	adhikaraṇaṁ jānāti;
an10.33:1.11	adhikaraṇasamudayaṁ jānāti;
an10.33:1.12	adhikaraṇanirodhaṁ jānāti;
an10.33:1.13	adhikaraṇanirodhagāminiṁ paṭipadaṁ jānāti.
an10.33:1.14	Imehi kho, upāli, dasahi dhammehi samannāgato bhikkhu ubbāhikāya sammannitabbo”ti.
an10.33:1.15	Tatiyaṁ.
an10.34:0.1	Aṅguttara Nikāya 10.34
an10.34:0.2	4. Upālivagga
an10.34:0.3	Upasampadāsutta
an10.34:1.1	“Katihi nu kho, bhante, dhammehi samannāgatena bhikkhunā upasampādetabban”ti?
an10.34:1.2	“Dasahi kho, upāli, dhammehi samannāgatena bhikkhunā upasampādetabbaṁ.
an10.34:1.3	Katamehi dasahi?
an10.34:1.4	Idhupāli, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu;
an10.34:1.5	bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā;
an10.34:1.6	pātimokkhaṁ kho panassa vitthārena svāgataṁ hoti suvibhattaṁ suppavattaṁ suvinicchitaṁ suttaso anubyañjanaso;
an10.34:1.7	paṭibalo hoti gilānaṁ upaṭṭhātuṁ vā upaṭṭhāpetuṁ vā;
an10.34:1.8	paṭibalo hoti anabhiratiṁ vūpakāsetuṁ vā vūpakāsāpetuṁ vā;
an10.34:1.9	paṭibalo hoti uppannaṁ kukkuccaṁ dhammato vinodetuṁ;
an10.34:1.10	paṭibalo hoti uppannaṁ diṭṭhigataṁ dhammato vivecetuṁ;
an10.34:1.11	paṭibalo hoti adhisīle samādapetuṁ;
an10.34:1.12	paṭibalo hoti adhicitte samādapetuṁ;
an10.34:1.13	paṭibalo hoti adhipaññāya samādapetuṁ.
an10.34:1.14	Imehi kho, upāli, dasahi dhammehi samannāgatena bhikkhunā upasampādetabban”ti.
an10.34:1.15	Catutthaṁ.
an10.35:0.1	Aṅguttara Nikāya 10.35
an10.35:0.2	4. Upālivagga
an10.35:0.3	Nissayasutta
an10.35:1.1	“Katihi nu kho, bhante, dhammehi samannāgatena bhikkhunā nissayo dātabbo”ti?
an10.35:1.2	“Dasahi kho, upāli, dhammehi samannāgatena bhikkhunā nissayo dātabbo.
an10.35:1.3	Katamehi dasahi?
an10.35:1.4	Idhupāli, bhikkhu sīlavā hoti …pe… samādāya sikkhati sikkhāpadesu;
an10.35:1.5	bahussuto hoti …pe… diṭṭhiyā suppaṭividdhā;
an10.35:1.6	pātimokkhaṁ kho panassa vitthārena svāgataṁ hoti suvibhattaṁ suppavattaṁ suvinicchitaṁ suttaso anubyañjanaso;
an10.35:1.7	paṭibalo hoti gilānaṁ upaṭṭhātuṁ vā upaṭṭhāpetuṁ vā;
an10.35:1.8	paṭibalo hoti anabhiratiṁ vūpakāsetuṁ vā vūpakāsāpetuṁ vā;
an10.35:1.9	paṭibalo hoti uppannaṁ kukkuccaṁ dhammato vinodetuṁ;
an10.35:1.10	paṭibalo hoti uppannaṁ diṭṭhigataṁ dhammato vivecetuṁ;
an10.35:1.11	paṭibalo hoti adhisīle …pe…
an10.35:1.12	adhicitte …
an10.35:1.13	adhipaññāya samādapetuṁ.
an10.35:1.14	Imehi kho, upāli, dasahi dhammehi samannāgatena bhikkhunā nissayo dātabbo”ti.
an10.35:1.15	Pañcamaṁ.
an10.36:0.1	Aṅguttara Nikāya 10.36
an10.36:0.2	4. Upālivagga
an10.36:0.3	Sāmaṇerasutta
an10.36:1.1	“Katihi nu kho, bhante, dhammehi samannāgatena bhikkhunā sāmaṇero upaṭṭhāpetabbo”ti?
an10.36:1.2	“Dasahi kho, upāli, dhammehi samannāgatena bhikkhunā sāmaṇero upaṭṭhāpetabbo.
an10.36:1.3	Katamehi dasahi?
an10.36:1.4	Idhupāli, bhikkhu sīlavā hoti …pe… samādāya sikkhati sikkhāpadesu;
an10.36:1.5	bahussuto hoti …pe… diṭṭhiyā suppaṭividdhā;
an10.36:1.6	pātimokkhaṁ kho panassa vitthārena svāgataṁ hoti suvibhattaṁ suppavattaṁ suvinicchitaṁ suttaso anubyañjanaso;
an10.36:1.7	paṭibalo hoti gilānaṁ upaṭṭhātuṁ vā upaṭṭhāpetuṁ vā;
an10.36:1.8	paṭibalo hoti anabhiratiṁ vūpakāsetuṁ vā vūpakāsāpetuṁ vā;
an10.36:1.9	paṭibalo hoti uppannaṁ kukkuccaṁ dhammato vinodetuṁ;
an10.36:1.10	paṭibalo hoti uppannaṁ diṭṭhigataṁ dhammato vivecetuṁ;
an10.36:1.11	paṭibalo hoti adhisīle samādapetuṁ;
an10.36:1.12	paṭibalo hoti adhicitte samādapetuṁ;
an10.36:1.13	paṭibalo hoti adhipaññāya samādapetuṁ.
an10.36:1.14	Imehi kho, upāli, dasahi dhammehi samannāgatena bhikkhunā sāmaṇero upaṭṭhāpetabbo”ti.
an10.36:1.15	Chaṭṭhaṁ.
an10.37:0.1	Aṅguttara Nikāya 10.37
an10.37:0.2	4. Upālivagga
an10.37:0.3	Saṅghabhedasutta
an10.37:1.1	“‘Saṅghabhedo, saṅghabhedo’ti, bhante, vuccati.
an10.37:1.2	Kittāvatā nu kho, bhante, saṅgho bhinno hotī”ti?
an10.37:1.3	“Idhupāli, bhikkhū adhammaṁ dhammoti dīpenti, dhammaṁ adhammoti dīpenti, avinayaṁ vinayoti dīpenti, vinayaṁ avinayoti dīpenti, abhāsitaṁ alapitaṁ tathāgatena bhāsitaṁ lapitaṁ tathāgatenāti dīpenti, bhāsitaṁ lapitaṁ tathāgatena abhāsitaṁ alapitaṁ tathāgatenāti dīpenti, anāciṇṇaṁ tathāgatena āciṇṇaṁ tathāgatenāti dīpenti, āciṇṇaṁ tathāgatena anāciṇṇaṁ tathāgatenāti dīpenti, apaññattaṁ tathāgatena paññattaṁ tathāgatenāti dīpenti, paññattaṁ tathāgatena apaññattaṁ tathāgatenāti dīpenti.
an10.37:1.4	Te imehi dasahi vatthūhi avakassanti apakassanti āveni kammāni karonti āveni pātimokkhaṁ uddisanti.
an10.37:1.5	Ettāvatā kho, upāli, saṅgho bhinno hotī”ti.
an10.37:1.6	Sattamaṁ.
an10.38:0.1	Aṅguttara Nikāya 10.38
an10.38:0.2	4. Upālivagga
an10.38:0.3	Saṅghasāmaggīsutta
an10.38:1.1	“‘Saṅghasāmaggī, saṅghasāmaggī’ti, bhante, vuccati.
an10.38:1.2	Kittāvatā nu kho, bhante, saṅgho samaggo hotī”ti?
an10.38:1.3	“Idhupāli, bhikkhū adhammaṁ adhammoti dīpenti, dhammaṁ dhammoti dīpenti, avinayaṁ avinayoti dīpenti, vinayaṁ vinayoti dīpenti, abhāsitaṁ alapitaṁ tathāgatena abhāsitaṁ alapitaṁ tathāgatenāti dīpenti, bhāsitaṁ lapitaṁ tathāgatena bhāsitaṁ lapitaṁ tathāgatenāti dīpenti, anāciṇṇaṁ tathāgatena anāciṇṇaṁ tathāgatenāti dīpenti, āciṇṇaṁ tathāgatena āciṇṇaṁ tathāgatenāti dīpenti, apaññattaṁ tathāgatena apaññattaṁ tathāgatenāti dīpenti, paññattaṁ tathāgatena paññattaṁ tathāgatenāti dīpenti.
an10.38:1.4	Te imehi dasahi vatthūhi na avakassanti na apakassanti na āveni kammāni karonti na āveni pātimokkhaṁ uddisanti.
an10.38:1.5	Ettāvatā kho, upāli, saṅgho samaggo hotī”ti.
an10.38:1.6	Aṭṭhamaṁ.
an10.39:0.1	Aṅguttara Nikāya 10.39
an10.39:0.2	4. Upālivagga
an10.39:0.3	Paṭhamaānandasutta
an10.39:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an10.39:1.2	“‘saṅghabhedo saṅghabhedo’ti, bhante, vuccati.
an10.39:1.3	Kittāvatā nu kho, bhante, saṅgho bhinno hotī”ti?
an10.39:1.4	“Idhānanda, bhikkhū adhammaṁ dhammoti dīpenti, dhammaṁ adhammoti dīpenti, avinayaṁ vinayoti dīpenti …pe…
an10.39:1.5	paññattaṁ tathāgatena apaññattaṁ tathāgatenāti dīpenti.
an10.39:1.6	Te imehi dasahi vatthūhi avakassanti apakassanti āveni kammāni karonti āveni pātimokkhaṁ uddisanti.
an10.39:1.7	Ettāvatā kho, ānanda, saṅgho bhinno hotī”ti.
an10.39:2.1	“Samaggaṁ pana, bhante, saṅghaṁ bhinditvā kiṁ so pasavatī”ti?
an10.39:2.2	“Kappaṭṭhikaṁ, ānanda, kibbisaṁ pasavatī”ti.
an10.39:2.3	“Kiṁ pana, bhante, kappaṭṭhikaṁ kibbisan”ti?
an10.39:2.4	“Kappaṁ, ānanda, nirayamhi paccatīti—
an10.39:3.1	Āpāyiko nerayiko,
an10.39:3.2	Kappaṭṭho saṅghabhedako;
an10.39:3.3	Vaggarato adhammaṭṭho,
an10.39:3.4	Yogakkhemā padhaṁsati;
an10.39:3.5	Saṅghaṁ samaggaṁ bhinditvā,
an10.39:3.6	Kappaṁ nirayamhi paccatī”ti.
an10.39:3.7	Navamaṁ.
an10.40:0.1	Aṅguttara Nikāya 10.40
an10.40:0.2	4. Upālivagga
an10.40:0.3	Dutiyaānandasutta
an10.40:1.1	“‘Saṅghasāmaggī, saṅghasāmaggī’ti, bhante, vuccati.
an10.40:1.2	Kittāvatā nu kho, bhante, saṅgho samaggo hotī”ti?
an10.40:1.3	“Idhānanda, bhikkhū adhammaṁ adhammoti dīpenti, dhammaṁ dhammoti dīpenti, avinayaṁ avinayoti dīpenti, vinayaṁ vinayoti dīpenti, abhāsitaṁ alapitaṁ tathāgatena abhāsitaṁ alapitaṁ tathāgatenāti dīpenti, bhāsitaṁ lapitaṁ tathāgatena bhāsitaṁ lapitaṁ tathāgatenāti dīpenti, anāciṇṇaṁ tathāgatena anāciṇṇaṁ tathāgatenāti dīpenti, āciṇṇaṁ tathāgatena āciṇṇaṁ tathāgatenāti dīpenti, apaññattaṁ tathāgatena apaññattaṁ tathāgatenāti dīpenti, paññattaṁ tathāgatena paññattaṁ tathāgatenāti dīpenti.
an10.40:1.4	Te imehi dasahi vatthūhi na avakassanti na apakassanti na āveni kammāni karonti na āveni pātimokkhaṁ uddisanti.
an10.40:1.5	Ettāvatā kho, ānanda, saṅgho samaggo hotī”ti.
an10.40:2.1	“Bhinnaṁ pana, bhante, saṅghaṁ samaggaṁ katvā kiṁ so pasavatī”ti?
an10.40:2.2	“Brahmaṁ, ānanda, puññaṁ pasavatī”ti.
an10.40:2.3	“Kiṁ pana, bhante, brahmaṁ puññan”ti?
an10.40:2.4	“Kappaṁ, ānanda, saggamhi modatīti—
an10.40:3.1	Sukhā saṅghassa sāmaggī,
an10.40:3.2	samaggānañca anuggaho;
an10.40:3.3	Samaggarato dhammaṭṭho,
an10.40:3.4	yogakkhemā na dhaṁsati;
an10.40:3.5	Saṅghaṁ samaggaṁ katvāna,
an10.40:3.6	kappaṁ saggamhi modatī”ti.
an10.40:3.7	Dasamaṁ.
an10.40:3.8	Upālivaggo catuttho.
an10.40:4.0	Tassuddānaṁ
an10.40:4.1	Upāli ṭhapanā ubbāho,
an10.40:4.2	upasampadanissayā;
an10.40:4.3	Sāmaṇero ca dve bhedā,
an10.40:4.4	ānandehi pare duveti.
an10.41:0.1	Aṅguttara Nikāya 10.41
an10.41:0.2	5. Akkosavagga
an10.41:0.3	Vivādasutta
an10.41:1.1	Atha kho āyasmā upāli yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā upāli bhagavantaṁ etadavoca:
an10.41:1.2	“ko nu kho, bhante, hetu ko paccayo, yena saṅghe bhaṇḍanakalahaviggahavivādā uppajjanti, bhikkhū ca na phāsu viharantī”ti?
an10.41:1.3	“Idhupāli, bhikkhū adhammaṁ dhammoti dīpenti, dhammaṁ adhammoti dīpenti, avinayaṁ vinayoti dīpenti, vinayaṁ avinayoti dīpenti, abhāsitaṁ alapitaṁ tathāgatena bhāsitaṁ lapitaṁ tathāgatenāti dīpenti, bhāsitaṁ lapitaṁ tathāgatena abhāsitaṁ alapitaṁ tathāgatenāti dīpenti, anāciṇṇaṁ tathāgatena āciṇṇaṁ tathāgatenāti dīpenti, āciṇṇaṁ tathāgatena anāciṇṇaṁ tathāgatenāti dīpenti, apaññattaṁ tathāgatena paññattaṁ tathāgatenāti dīpenti, paññattaṁ tathāgatena apaññattaṁ tathāgatenāti dīpenti.
an10.41:1.4	Ayaṁ kho, upāli, hetu ayaṁ paccayo, yena saṅghe bhaṇḍanakalahaviggahavivādā uppajjanti, bhikkhū ca na phāsu viharantī”ti.
an10.41:1.5	Paṭhamaṁ.
an10.42:0.1	Aṅguttara Nikāya 10.42
an10.42:0.2	5. Akkosavagga
an10.42:0.3	Paṭhamavivādamūlasutta
an10.42:1.1	“Kati nu kho, bhante, vivādamūlānī”ti?
an10.42:1.2	“Dasa kho, upāli, vivādamūlāni.
an10.42:1.3	Katamāni dasa?
an10.42:1.4	Idhupāli, bhikkhū adhammaṁ dhammoti dīpenti, dhammaṁ adhammoti dīpenti, avinayaṁ vinayoti dīpenti, vinayaṁ avinayoti dīpenti, abhāsitaṁ alapitaṁ tathāgatena bhāsitaṁ lapitaṁ tathāgatenāti dīpenti, bhāsitaṁ lapitaṁ tathāgatena abhāsitaṁ alapitaṁ tathāgatenāti dīpenti, anāciṇṇaṁ tathāgatena āciṇṇaṁ tathāgatenāti dīpenti, āciṇṇaṁ tathāgatena anāciṇṇaṁ tathāgatenāti dīpenti, apaññattaṁ tathāgatena paññattaṁ tathāgatenāti dīpenti, paññattaṁ tathāgatena apaññattaṁ tathāgatenāti dīpenti.
an10.42:1.5	Imāni kho, upāli, dasa vivādamūlānī”ti.
an10.42:1.6	Dutiyaṁ.
an10.43:0.1	Aṅguttara Nikāya 10.43
an10.43:0.2	5. Akkosavagga
an10.43:0.3	Dutiyavivādamūlasutta
an10.43:1.1	“Kati nu kho, bhante, vivādamūlānī”ti?
an10.43:1.2	“Dasa kho, upāli, vivādamūlāni.
an10.43:1.3	Katamāni dasa?
an10.43:1.4	Idhupāli, bhikkhū anāpattiṁ āpattīti dīpenti, āpattiṁ anāpattīti dīpenti, lahukaṁ āpattiṁ garukāpattīti dīpenti, garukaṁ āpattiṁ lahukāpattīti dīpenti, duṭṭhullaṁ āpattiṁ aduṭṭhullāpattīti dīpenti, aduṭṭhullaṁ āpattiṁ duṭṭhullāpattīti dīpenti, sāvasesaṁ āpattiṁ anavasesāpattīti dīpenti, anavasesaṁ āpattiṁ sāvasesāpattīti dīpenti, sappaṭikammaṁ āpattiṁ appaṭikammāpattīti dīpenti, appaṭikammaṁ āpattiṁ sappaṭikammāpattīti dīpenti.
an10.43:1.5	Imāni kho, upāli, dasa vivādamūlānī”ti.
an10.43:1.6	Tatiyaṁ.
an10.44:0.1	Aṅguttara Nikāya 10.44
an10.44:0.2	5. Akkosavagga
an10.44:0.3	Kusinārasutta
an10.44:1.1	Ekaṁ samayaṁ bhagavā kusinārāyaṁ viharati baliharaṇe vanasaṇḍe.
an10.44:1.2	Tatra kho bhagavā bhikkhū āmantesi:
an10.44:1.3	“bhikkhavo”ti.
an10.44:1.4	“Bhadante”ti te bhikkhū bhagavato paccassosuṁ.
an10.44:1.5	Bhagavā etadavoca:
an10.44:2.1	“Codakena, bhikkhave, bhikkhunā paraṁ codetukāmena pañca dhamme ajjhattaṁ paccavekkhitvā pañca dhamme ajjhattaṁ upaṭṭhāpetvā paro codetabbo.
an10.44:2.2	Katame pañca dhammā ajjhattaṁ paccavekkhitabbā?
an10.44:2.3	Codakena, bhikkhave, bhikkhunā paraṁ codetukāmena evaṁ paccavekkhitabbaṁ:
an10.44:2.4	‘parisuddhakāyasamācāro nu khomhi, parisuddhenamhi kāyasamācārena samannāgato acchiddena appaṭimaṁsena.
an10.44:2.5	Saṁvijjati nu kho me eso dhammo udāhu no’ti?
an10.44:2.6	No ce, bhikkhave, bhikkhu parisuddhakāyasamācāro hoti parisuddhena kāyasamācārena samannāgato acchiddena appaṭimaṁsena, tassa bhavanti vattāro:
an10.44:2.7	‘iṅgha tāva āyasmā kāyikaṁ sikkhassū’ti, itissa bhavanti vattāro.
an10.44:3.1	Puna caparaṁ, bhikkhave, codakena bhikkhunā paraṁ codetukāmena evaṁ paccavekkhitabbaṁ:
an10.44:3.2	‘parisuddhavacīsamācāro nu khomhi, parisuddhenamhi vacīsamācārena samannāgato acchiddena appaṭimaṁsena.
an10.44:3.3	Saṁvijjati nu kho me eso dhammo udāhu no’ti?
an10.44:3.4	No ce, bhikkhave, bhikkhu parisuddhavacīsamācāro hoti parisuddhena vacīsamācārena samannāgato acchiddena appaṭimaṁsena, tassa bhavanti vattāro:
an10.44:3.5	‘iṅgha tāva āyasmā vācasikaṁ sikkhassū’ti, itissa bhavanti vattāro.
an10.44:4.1	Puna caparaṁ, bhikkhave, codakena bhikkhunā paraṁ codetukāmena evaṁ paccavekkhitabbaṁ:
an10.44:4.2	‘mettaṁ nu kho me cittaṁ paccupaṭṭhitaṁ sabrahmacārīsu anāghātaṁ.
an10.44:4.3	Saṁvijjati nu kho me eso dhammo udāhu no’ti?
an10.44:4.4	No ce, bhikkhave, bhikkhuno mettaṁ cittaṁ paccupaṭṭhitaṁ hoti sabrahmacārīsu anāghātaṁ, tassa bhavanti vattāro:
an10.44:4.5	‘iṅgha tāva āyasmā sabrahmacārīsu mettaṁ cittaṁ upaṭṭhāpehī’ti, itissa bhavanti vattāro.
an10.44:5.1	Puna caparaṁ, bhikkhave, codakena bhikkhunā paraṁ codetukāmena evaṁ paccavekkhitabbaṁ:
an10.44:5.2	‘bahussuto nu khomhi sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpā me dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an10.44:5.3	Saṁvijjati nu kho me eso dhammo udāhu no’ti?
an10.44:5.4	No ce, bhikkhave, bhikkhu bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā, tassa bhavanti vattāro:
an10.44:5.5	‘iṅgha tāva āyasmā āgamaṁ pariyāpuṇassū’ti, itissa bhavanti vattāro.
an10.44:6.1	Puna caparaṁ, bhikkhave, codakena bhikkhunā paraṁ codetukāmena evaṁ paccavekkhitabbaṁ:
an10.44:6.2	‘ubhayāni kho pana me pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso.
an10.44:6.3	Saṁvijjati nu kho me eso dhammo udāhu no’ti?
an10.44:6.4	No ce, bhikkhave, bhikkhuno ubhayāni pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso, ‘idaṁ panāyasmā, kattha vuttaṁ bhagavatā’ti, iti puṭṭho na sampāyissati.
an10.44:6.5	Tassa bhavanti vattāro:
an10.44:6.6	‘iṅgha tāva āyasmā vinayaṁ sikkhassū’ti, itissa bhavanti vattāro.
an10.44:6.7	Ime pañca dhammā ajjhattaṁ paccavekkhitabbā.
an10.44:7.1	Katame pañca dhammā ajjhattaṁ upaṭṭhāpetabbā?
an10.44:7.2	‘Kālena vakkhāmi, no akālena;
an10.44:7.3	bhūtena vakkhāmi, no abhūtena;
an10.44:7.4	saṇhena vakkhāmi, no pharusena;
an10.44:7.5	atthasaṁhitena vakkhāmi, no anatthasaṁhitena;
an10.44:7.6	mettacitto vakkhāmi, no dosantaro’ti—
an10.44:7.7	ime pañca dhammā ajjhattaṁ upaṭṭhāpetabbā.
an10.44:7.8	Codakena, bhikkhave, bhikkhunā paraṁ codetukāmena ime pañca dhamme ajjhattaṁ paccavekkhitvā ime pañca dhamme ajjhattaṁ upaṭṭhāpetvā paro codetabbo”ti.
an10.44:7.9	Catutthaṁ.
an10.45:0.1	Aṅguttara Nikāya 10.45
an10.45:0.2	5. Akkosavagga
an10.45:0.3	Rājantepurappavesanasutta
an10.45:1.1	“Dasayime, bhikkhave, ādīnavā rājantepurappavesane.
an10.45:1.2	Katame dasa?
an10.45:1.3	Idha, bhikkhave, rājā mahesiyā saddhiṁ nisinno hoti.
an10.45:1.4	Tatra bhikkhu pavisati.
an10.45:1.5	Mahesī vā bhikkhuṁ disvā sitaṁ pātukaroti, bhikkhu vā mahesiṁ disvā sitaṁ pātukaroti.
an10.45:1.6	Tattha rañño evaṁ hoti:
an10.45:1.7	‘addhā imesaṁ kataṁ vā karissanti vā’ti.
an10.45:1.8	Ayaṁ, bhikkhave, paṭhamo ādīnavo rājantepurappavesane.
an10.45:2.1	Puna caparaṁ, bhikkhave, rājā bahukicco bahukaraṇīyo aññataraṁ itthiṁ gantvā na sarati:
an10.45:2.2	‘sā tena gabbhaṁ gaṇhāti’.
an10.45:2.3	Tattha rañño evaṁ hoti:
an10.45:2.4	‘na kho idha añño koci pavisati, aññatra pabbajitena.
an10.45:2.5	Siyā nu kho pabbajitassa kamman’ti.
an10.45:2.6	Ayaṁ, bhikkhave, dutiyo ādīnavo rājantepurappavesane.
an10.45:3.1	Puna caparaṁ, bhikkhave, rañño antepure aññataraṁ ratanaṁ nassati.
an10.45:3.2	Tattha rañño evaṁ hoti:
an10.45:3.3	‘na kho idha añño koci pavisati, aññatra pabbajitena.
an10.45:3.4	Siyā nu kho pabbajitassa kamman’ti.
an10.45:3.5	Ayaṁ, bhikkhave, tatiyo ādīnavo rājantepurappavesane.
an10.45:4.1	Puna caparaṁ, bhikkhave, rañño antepure abbhantarā guyhamantā bahiddhā sambhedaṁ gacchanti.
an10.45:4.2	Tattha rañño evaṁ hoti:
an10.45:4.3	‘na kho idha añño koci pavisati, aññatra pabbajitena.
an10.45:4.4	Siyā nu kho pabbajitassa kamman’ti.
an10.45:4.5	Ayaṁ, bhikkhave, catuttho ādīnavo rājantepurappavesane.
an10.45:5.1	Puna caparaṁ, bhikkhave, rañño antepure pitā vā puttaṁ pattheti putto vā pitaraṁ pattheti.
an10.45:5.2	Tesaṁ evaṁ hoti:
an10.45:5.3	‘na kho idha añño koci pavisati, aññatra pabbajitena.
an10.45:5.4	Siyā nu kho pabbajitassa kamman’ti.
an10.45:5.5	Ayaṁ, bhikkhave, pañcamo ādīnavo rājantepurappavesane.
an10.45:6.1	Puna caparaṁ, bhikkhave, rājā nīcaṭṭhāniyaṁ ucce ṭhāne ṭhapeti.
an10.45:6.2	Yesaṁ taṁ amanāpaṁ tesaṁ evaṁ hoti:
an10.45:6.3	‘rājā kho pabbajitena saṁsaṭṭho.
an10.45:6.4	Siyā nu kho pabbajitassa kamman’ti.
an10.45:6.5	Ayaṁ, bhikkhave, chaṭṭho ādīnavo rājantepurappavesane.
an10.45:7.1	Puna caparaṁ, bhikkhave, rājā uccaṭṭhāniyaṁ nīce ṭhāne ṭhapeti.
an10.45:7.2	Yesaṁ taṁ amanāpaṁ tesaṁ evaṁ hoti:
an10.45:7.3	‘rājā kho pabbajitena saṁsaṭṭho.
an10.45:7.4	Siyā nu kho pabbajitassa kamman’ti.
an10.45:7.5	Ayaṁ, bhikkhave, sattamo ādīnavo rājantepurappavesane.
an10.45:8.1	Puna caparaṁ, bhikkhave, rājā akāle senaṁ uyyojeti.
an10.45:8.2	Yesaṁ taṁ amanāpaṁ tesaṁ evaṁ hoti:
an10.45:8.3	‘rājā kho pabbajitena saṁsaṭṭho.
an10.45:8.4	Siyā nu kho pabbajitassa kamman’ti.
an10.45:8.5	Ayaṁ, bhikkhave, aṭṭhamo ādīnavo rājantepurappavesane.
an10.45:9.1	Puna caparaṁ, bhikkhave, rājā kāle senaṁ uyyojetvā antarāmaggato nivattāpeti.
an10.45:9.2	Yesaṁ taṁ amanāpaṁ tesaṁ evaṁ hoti:
an10.45:9.3	‘rājā kho pabbajitena saṁsaṭṭho.
an10.45:9.4	Siyā nu kho pabbajitassa kamman’ti.
an10.45:9.5	Ayaṁ, bhikkhave, navamo ādīnavo rājantepurappavesane.
an10.45:10.1	Puna caparaṁ, bhikkhave, rañño antepuraṁ hatthisammaddaṁ assasammaddaṁ rathasammaddaṁ rajanīyāni rūpasaddagandharasaphoṭṭhabbāni, yāni na pabbajitassa sāruppāni.
an10.45:10.2	Ayaṁ, bhikkhave, dasamo ādīnavo rājantepurappavesane.
an10.45:10.3	Ime kho, bhikkhave, dasa ādīnavā rājantepurappavesane”ti.
an10.45:10.4	Pañcamaṁ.
an10.46:0.1	Aṅguttara Nikāya 10.46
an10.46:0.2	5. Akkosavagga
an10.46:0.3	Sakkasutta
an10.46:1.1	Ekaṁ samayaṁ bhagavā sakkesu viharati kapilavatthusmiṁ nigrodhārāme.
an10.46:1.2	Atha kho sambahulā sakkā upāsakā tadahuposathe yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinne kho sakke upāsake bhagavā etadavoca:
an10.46:1.3	“api nu tumhe, sakkā, aṭṭhaṅgasamannāgataṁ uposathaṁ upavasathā”ti?
an10.46:1.4	“Appekadā mayaṁ, bhante, aṭṭhaṅgasamannāgataṁ uposathaṁ upavasāma, appekadā na upavasāmā”ti.
an10.46:1.5	“Tesaṁ vo, sakkā, alābhā tesaṁ dulladdhaṁ, ye tumhe evaṁ sokasabhaye jīvite maraṇasabhaye jīvite appekadā aṭṭhaṅgasamannāgataṁ uposathaṁ upavasatha, appekadā na upavasatha.
an10.46:2.1	Taṁ kiṁ maññatha, sakkā,
an10.46:2.2	idha puriso yena kenaci kammaṭṭhānena anāpajja akusalaṁ divasaṁ aḍḍhakahāpaṇaṁ nibbiseyya.
an10.46:2.3	Dakkho puriso uṭṭhānasampannoti alaṁvacanāyā”ti?
an10.46:2.4	“Evaṁ, bhante”.
an10.46:3.1	“Taṁ kiṁ maññatha, sakkā,
an10.46:3.2	idha puriso yena kenaci kammaṭṭhānena anāpajja akusalaṁ divasaṁ kahāpaṇaṁ nibbiseyya.
an10.46:3.3	Dakkho puriso uṭṭhānasampannoti alaṁvacanāyā”ti?
an10.46:3.4	“Evaṁ, bhante”.
an10.46:4.1	“Taṁ kiṁ maññatha, sakkā,
an10.46:4.2	idha puriso yena kenaci kammaṭṭhānena anāpajja akusalaṁ divasaṁ dve kahāpaṇe nibbiseyya …
an10.46:4.3	tayo kahāpaṇe nibbiseyya …
an10.46:4.4	cattāro kahāpaṇe nibbiseyya …
an10.46:4.5	pañca kahāpaṇe nibbiseyya …
an10.46:4.6	cha kahāpaṇe nibbiseyya …
an10.46:4.7	satta kahāpaṇe nibbiseyya …
an10.46:4.8	aṭṭha kahāpaṇe nibbiseyya …
an10.46:4.9	nava kahāpaṇe nibbiseyya …
an10.46:4.10	dasa kahāpaṇe nibbiseyya …
an10.46:4.11	vīsa kahāpaṇe nibbiseyya …
an10.46:4.12	tiṁsa kahāpaṇe nibbiseyya …
an10.46:4.13	cattārīsaṁ kahāpaṇe nibbiseyya …
an10.46:4.14	paññāsaṁ kahāpaṇe nibbiseyya …
an10.46:4.15	kahāpaṇasataṁ nibbiseyya.
an10.46:4.16	Dakkho puriso uṭṭhānasampannoti alaṁvacanāyā”ti?
an10.46:4.17	“Evaṁ, bhante”.
an10.46:5.1	“Taṁ kiṁ maññatha, sakkā,
an10.46:5.2	api nu so puriso divase divase kahāpaṇasataṁ kahāpaṇasahassaṁ nibbisamāno laddhaṁ laddhaṁ nikkhipanto vassasatāyuko vassasatajīvī mahantaṁ bhogakkhandhaṁ adhigaccheyyā”ti?
an10.46:5.3	“Evaṁ, bhante”.
an10.46:6.1	“Taṁ kiṁ maññatha, sakkā,
an10.46:6.2	api nu so puriso bhogahetu bhoganidānaṁ bhogādhikaraṇaṁ ekaṁ vā rattiṁ ekaṁ vā divasaṁ upaḍḍhaṁ vā rattiṁ upaḍḍhaṁ vā divasaṁ ekantasukhappaṭisaṁvedī vihareyyā”ti?
an10.46:6.3	“No hetaṁ, bhante”.
an10.46:6.4	“Taṁ kissa hetu”?
an10.46:6.5	“Kāmā hi, bhante, aniccā tucchā musā mosadhammā”ti.
an10.46:7.1	“Idha pana vo, sakkā, mama sāvako dasa vassāni appamatto ātāpī pahitatto viharanto yathā mayānusiṭṭhaṁ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṁvedī vihareyya.
an10.46:7.2	So ca khvassa sakadāgāmī vā anāgāmī vā apaṇṇakaṁ vā sotāpanno.
an10.46:7.3	Tiṭṭhantu, sakkā, dasa vassāni.
an10.46:8.1	Idha mama sāvako nava vassāni …
an10.46:8.2	aṭṭha vassāni …
an10.46:8.3	satta vassāni …
an10.46:8.4	cha vassāni …
an10.46:8.5	pañca vassāni …
an10.46:8.6	cattāri vassāni …
an10.46:8.7	tīṇi vassāni …
an10.46:8.8	dve vassāni …
an10.46:8.9	ekaṁ vassaṁ appamatto ātāpī pahitatto viharanto yathā mayānusiṭṭhaṁ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṁvedī vihareyya, so ca khvassa sakadāgāmī vā anāgāmī vā apaṇṇakaṁ vā sotāpanno.
an10.46:8.10	Tiṭṭhatu, sakkā, ekaṁ vassaṁ.
an10.46:9.1	Idha mama sāvako dasa māse appamatto ātāpī pahitatto viharanto yathā mayānusiṭṭhaṁ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṁvedī vihareyya, so ca khvassa sakadāgāmī vā anāgāmī vā apaṇṇakaṁ vā sotāpanno.
an10.46:9.2	Tiṭṭhantu, sakkā, dasa māsā.
an10.46:10.1	Idha mama sāvako nava māse …
an10.46:10.2	aṭṭha māse …
an10.46:10.3	satta māse …
an10.46:10.4	cha māse …
an10.46:10.5	pañca māse …
an10.46:10.6	cattāro māse …
an10.46:10.7	tayo māse …
an10.46:10.8	dve māse …
an10.46:10.9	ekaṁ māsaṁ …
an10.46:10.10	aḍḍhamāsaṁ appamatto ātāpī pahitatto viharanto yathā mayānusiṭṭhaṁ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṁvedī vihareyya, so ca khvassa sakadāgāmī vā anāgāmī vā apaṇṇakaṁ vā sotāpanno.
an10.46:10.11	Tiṭṭhatu, sakkā, aḍḍhamāso.
an10.46:11.1	Idha mama sāvako dasa rattindive appamatto ātāpī pahitatto viharanto yathā mayānusiṭṭhaṁ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṁvedī vihareyya, so ca khvassa sakadāgāmī vā anāgāmī vā apaṇṇakaṁ vā sotāpanno.
an10.46:11.2	Tiṭṭhantu, sakkā, dasa rattindivā.
an10.46:12.1	Idha mama sāvako nava rattindive …
an10.46:12.2	aṭṭha rattindive …
an10.46:12.3	satta rattindive …
an10.46:12.4	cha rattindive …
an10.46:12.5	pañca rattindive …
an10.46:12.6	cattāro rattindive …
an10.46:12.7	tayo rattindive …
an10.46:12.8	dve rattindive …
an10.46:12.9	ekaṁ rattindivaṁ appamatto ātāpī pahitatto viharanto yathā mayānusiṭṭhaṁ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṁvedī vihareyya, so ca khvassa sakadāgāmī vā anāgāmī vā apaṇṇakaṁ vā sotāpanno.
an10.46:12.10	Tesaṁ vo, sakkā, alābhā tesaṁ dulladdhaṁ, ye tumhe evaṁ sokasabhaye jīvite maraṇasabhaye jīvite appekadā aṭṭhaṅgasamannāgataṁ uposathaṁ upavasatha, appekadā na upavasathā”ti.
an10.46:12.11	“Ete mayaṁ, bhante, ajjatagge aṭṭhaṅgasamannāgataṁ uposathaṁ upavasissāmā”ti.
an10.46:12.12	Chaṭṭhaṁ.
an10.47:0.1	Aṅguttara Nikāya 10.47
an10.47:0.2	5. Akkosavagga
an10.47:0.3	Mahālisutta
an10.47:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
an10.47:1.2	Atha kho mahāli licchavi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho mahāli licchavi bhagavantaṁ etadavoca:
an10.47:1.3	“ko nu kho, bhante, hetu, ko paccayo pāpassa kammassa kiriyāya pāpassa kammassa pavattiyā”ti?
an10.47:1.4	“Lobho kho, mahāli, hetu, lobho paccayo pāpassa kammassa kiriyāya pāpassa kammassa pavattiyā.
an10.47:1.5	Doso kho, mahāli, hetu, doso paccayo pāpassa kammassa kiriyāya pāpassa kammassa pavattiyā.
an10.47:1.6	Moho kho, mahāli, hetu, moho paccayo pāpassa kammassa kiriyāya pāpassa kammassa pavattiyā.
an10.47:1.7	Ayoniso manasikāro kho, mahāli, hetu, ayoniso manasikāro paccayo pāpassa kammassa kiriyāya pāpassa kammassa pavattiyā.
an10.47:1.8	Micchāpaṇihitaṁ kho, mahāli, cittaṁ hetu, micchāpaṇihitaṁ cittaṁ paccayo pāpassa kammassa kiriyāya pāpassa kammassa pavattiyāti.
an10.47:1.9	Ayaṁ kho, mahāli, hetu, ayaṁ paccayo pāpassa kammassa kiriyāya pāpassa kammassa pavattiyā”ti.
an10.47:2.1	“Ko pana, bhante, hetu ko paccayo kalyāṇassa kammassa kiriyāya kalyāṇassa kammassa pavattiyā”ti?
an10.47:2.2	“Alobho kho, mahāli, hetu, alobho paccayo kalyāṇassa kammassa kiriyāya kalyāṇassa kammassa pavattiyā.
an10.47:2.3	Adoso kho, mahāli, hetu, adoso paccayo kalyāṇassa kammassa kiriyāya kalyāṇassa kammassa pavattiyā.
an10.47:2.4	Amoho kho, mahāli, hetu, amoho paccayo kalyāṇassa kammassa kiriyāya kalyāṇassa kammassa pavattiyā.
an10.47:2.5	Yoniso manasikāro kho, mahāli, hetu, yoniso manasikāro paccayo kalyāṇassa kammassa kiriyāya kalyāṇassa kammassa pavattiyā.
an10.47:2.6	Sammāpaṇihitaṁ kho, mahāli, cittaṁ hetu, sammāpaṇihitaṁ cittaṁ paccayo kalyāṇassa kammassa kiriyāya kalyāṇassa kammassa pavattiyā.
an10.47:2.7	Ayaṁ kho, mahāli, hetu, ayaṁ paccayo kalyāṇassa kammassa kiriyāya kalyāṇassa kammassa pavattiyā.
an10.47:2.8	Ime ca, mahāli, dasa dhammā loke na saṁvijjeyyuṁ, nayidha paññāyetha adhammacariyāvisamacariyāti vā dhammacariyāsamacariyāti vā.
an10.47:2.9	Yasmā ca kho, mahāli, ime dasa dhammā loke saṁvijjanti, tasmā paññāyati adhammacariyāvisamacariyāti vā dhammacariyāsamacariyāti vā”ti.
an10.47:2.10	Sattamaṁ.
an10.48:0.1	Aṅguttara Nikāya 10.48
an10.48:0.2	5. Akkosavagga
an10.48:0.3	Pabbajitaabhiṇhasutta
an10.48:1.1	“Dasayime, bhikkhave, dhammā pabbajitena abhiṇhaṁ paccavekkhitabbā.
an10.48:1.2	Katame dasa?
an10.48:2.1	‘Vevaṇṇiyamhi ajjhupagato’ti pabbajitena abhiṇhaṁ paccavekkhitabbaṁ.
an10.48:3.1	‘Parapaṭibaddhā me jīvikā’ti pabbajitena abhiṇhaṁ paccavekkhitabbaṁ.
an10.48:4.1	‘Añño me ākappo karaṇīyo’ti pabbajitena abhiṇhaṁ paccavekkhitabbaṁ.
an10.48:5.1	‘Kacci nu kho me attā sīlato na upavadatī’ti pabbajitena abhiṇhaṁ paccavekkhitabbaṁ.
an10.48:6.1	‘Kacci nu kho maṁ anuvicca viññū sabrahmacārī sīlato na upavadantī’ti pabbajitena abhiṇhaṁ paccavekkhitabbaṁ.
an10.48:7.1	‘Sabbehi me piyehi manāpehi nānābhāvo vinābhāvo’ti pabbajitena abhiṇhaṁ paccavekkhitabbaṁ.
an10.48:8.1	‘Kammassakomhi kammadāyādo kammayoni kammabandhu kammapaṭisaraṇo,
an10.48:9.1	yaṁ kammaṁ karissāmi kalyāṇaṁ vā pāpakaṁ vā tassa dāyādo bhavissāmī’ti pabbajitena abhiṇhaṁ paccavekkhitabbaṁ.
an10.48:10.1	‘Kathaṁbhūtassa me rattindivā vītivattantī’ti pabbajitena abhiṇhaṁ paccavekkhitabbaṁ.
an10.48:11.1	‘Kacci nu kho ahaṁ suññāgāre abhiramāmī’ti pabbajitena abhiṇhaṁ paccavekkhitabbaṁ.
an10.48:12.1	‘Atthi nu kho me uttari manussadhammo alamariyañāṇadassanaviseso adhigato, yenāhaṁ pacchime kāle sabrahmacārīhi puṭṭho na maṅku bhavissāmī’ti pabbajitena abhiṇhaṁ paccavekkhitabbaṁ.
an10.48:13.1	Ime kho, bhikkhave, dasa dhammā pabbajitena abhiṇhaṁ paccavekkhitabbā”ti.
an10.48:13.2	Aṭṭhamaṁ.
an10.49:0.1	Aṅguttara Nikāya 10.49
an10.49:0.2	5. Akkosavagga
an10.49:0.3	Sarīraṭṭhadhammasutta
an10.49:1.1	“Dasayime, bhikkhave, dhammā sarīraṭṭhā.
an10.49:1.2	Katame dasa?
an10.49:1.3	Sītaṁ, uṇhaṁ, jighacchā, pipāsā, uccāro, passāvo, kāyasaṁvaro, vacīsaṁvaro, ājīvasaṁvaro, ponobhaviko bhavasaṅkhāro—
an10.49:1.4	ime kho, bhikkhave, dasa dhammā sarīraṭṭhā”ti.
an10.49:1.5	Navamaṁ.
an10.50:0.1	Aṅguttara Nikāya 10.50
an10.50:0.2	5. Akkosavagga
an10.50:0.3	Bhaṇḍanasutta
an10.50:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.50:1.2	Tena kho pana samayena sambahulā bhikkhū pacchābhattaṁ piṇḍapātapaṭikkantā upaṭṭhānasālāyaṁ sannisinnā sannipatitā bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti.
an10.50:2.1	Atha kho bhagavā sāyanhasamayaṁ paṭisallānā vuṭṭhito yena upaṭṭhānasālā tenupasaṅkami; upasaṅkamitvā paññatte āsane nisīdi.
an10.50:2.2	Nisajja kho bhagavā bhikkhū āmantesi:
an10.50:2.3	“kāya nuttha, bhikkhave, etarahi kathāya sannisinnā sannipatitā, kā ca pana vo antarākathā vippakatā”ti?
an10.50:3.1	“Idha mayaṁ, bhante, pacchābhattaṁ piṇḍapātapaṭikkantā upaṭṭhānasālāyaṁ sannisinnā sannipatitā bhaṇḍanajātā kalahajātā vivādāpannā aññamaññaṁ mukhasattīhi vitudantā viharāmā”ti.
an10.50:3.2	“Na kho panetaṁ, bhikkhave, tumhākaṁ patirūpaṁ kulaputtānaṁ saddhāya agārasmā anagāriyaṁ pabbajitānaṁ, yaṁ tumhe bhaṇḍanajātā kalahajātā vivādāpannā aññamaññaṁ mukhasattīhi vitudantā vihareyyātha.
an10.50:4.1	Dasayime, bhikkhave, dhammā sāraṇīyā piyakaraṇā garukaraṇā saṅgahāya avivādāya sāmaggiyā ekībhāvāya saṁvattanti.
an10.50:4.2	Katame dasa?
an10.50:4.3	Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an10.50:4.4	Yampi, bhikkhave, bhikkhu sīlavā hoti …pe… samādāya sikkhati sikkhāpadesu,
an10.50:4.5	ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an10.50:5.1	Puna caparaṁ, bhikkhave, bhikkhu bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an10.50:5.2	Yampi, bhikkhave, bhikkhu bahussuto hoti …pe… diṭṭhiyā suppaṭividdhā,
an10.50:5.3	ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an10.50:6.1	Puna caparaṁ, bhikkhave, bhikkhu kalyāṇamitto hoti kalyāṇasahāyo kalyāṇasampavaṅko.
an10.50:6.2	Yampi, bhikkhave, bhikkhu kalyāṇamitto hoti kalyāṇasahāyo kalyāṇasampavaṅko,
an10.50:6.3	ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an10.50:7.1	Puna caparaṁ, bhikkhave, bhikkhu suvaco hoti sovacassakaraṇehi dhammehi samannāgato khamo padakkhiṇaggāhī anusāsaniṁ.
an10.50:7.2	Yampi, bhikkhave, bhikkhu suvaco hoti sovacassakaraṇehi dhammehi samannāgato khamo padakkhiṇaggāhī anusāsaniṁ,
an10.50:7.3	ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an10.50:8.1	Puna caparaṁ, bhikkhave, bhikkhu yāni tāni sabrahmacārīnaṁ uccāvacāni kiṅkaraṇīyāni—tattha dakkho hoti analaso, tatrūpāyāya vīmaṁsāya samannāgato alaṁ kātuṁ alaṁ saṁvidhātuṁ.
an10.50:8.2	Yampi, bhikkhave, bhikkhu yāni tāni sabrahmacārīnaṁ uccāvacāni kiṅkaraṇīyāni—tattha dakkho hoti analaso tatrūpāyāya vīmaṁsāya samannāgato alaṁ kātuṁ alaṁ saṁvidhātuṁ,
an10.50:8.3	ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an10.50:9.1	Puna caparaṁ, bhikkhave, bhikkhu dhammakāmo hoti piyasamudāhāro, abhidhamme abhivinaye uḷārapāmojjo.
an10.50:9.2	Yampi, bhikkhave, bhikkhu dhammakāmo hoti piyasamudāhāro, abhidhamme abhivinaye uḷārapāmojjo,
an10.50:9.3	ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an10.50:10.1	Puna caparaṁ, bhikkhave, bhikkhu āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an10.50:10.2	Yampi, bhikkhave, bhikkhu āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu,
an10.50:10.3	ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
an10.50:11.1	Puna caparaṁ, bhikkhave, bhikkhu santuṭṭho hoti itarītaracīvarapiṇḍapātasenāsanagilānapaccayabhesajjaparikkhārena.
an10.50:11.2	Yampi, bhikkhave, bhikkhu santuṭṭho hoti itarītaracīvarapiṇḍapātasenāsanagilānapaccayabhesajjaparikkhārena,
an10.50:11.3	ayampi dhammo sāraṇīyo …pe… saṁvattati.
an10.50:12.1	Puna caparaṁ, bhikkhave, bhikkhu satimā hoti, paramena satinepakkena samannāgato, cirakatampi cirabhāsitampi saritā anussaritā.
an10.50:12.2	Yampi, bhikkhave, bhikkhu satimā hoti, paramena satinepakkena samannāgato, cirakatampi cirabhāsitampi saritā anussaritā,
an10.50:12.3	ayampi dhammo sāraṇīyo …pe… saṁvattati.
an10.50:13.1	Puna caparaṁ, bhikkhave, bhikkhu paññavā hoti, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
an10.50:13.2	Yampi, bhikkhave, bhikkhu paññavā hoti, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā,
an10.50:13.3	ayampi dhammo sāraṇīyo …pe… saṁvattati.
an10.50:14.1	Ime kho, bhikkhave, dasa dhammā sāraṇīyā piyakaraṇā garukaraṇā saṅgahāya avivādāya sāmaggiyā ekībhāvāya saṁvattantī”ti.
an10.50:14.2	Dasamaṁ.
an10.50:14.3	Akkosavaggo pañcamo.
an10.50:15.0	Tassuddānaṁ
an10.50:15.1	Vivādā dve ca mūlāni,
an10.50:15.2	kusinārapavesane;
an10.50:15.3	Sakko mahāli abhiṇhaṁ,
an10.50:15.4	sarīraṭṭhā ca bhaṇḍanāti.
an10.50:15.5	Paṭhamo paṇṇāsako samatto.
an10.51:0.1	Aṅguttara Nikāya 10.51
an10.51:0.2	6. Sacittavagga
an10.51:0.3	Sacittasutta
an10.51:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.51:1.2	Tatra kho bhagavā bhikkhū āmantesi:
an10.51:1.3	“bhikkhavo”ti.
an10.51:1.4	“Bhadante”ti te bhikkhū bhagavato paccassosuṁ.
an10.51:1.5	Bhagavā etadavoca:
an10.51:2.1	“No ce, bhikkhave, bhikkhu paracittapariyāyakusalo hoti, atha ‘sacittapariyāyakusalo bhavissāmī’ti—
an10.51:2.2	evañhi vo, bhikkhave, sikkhitabbaṁ.
an10.51:3.1	Kathañca, bhikkhave, bhikkhu sacittapariyāyakusalo hoti?
an10.51:3.2	Seyyathāpi, bhikkhave, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udakapatte sakaṁ mukhanimittaṁ paccavekkhamāno sace tattha passati rajaṁ vā aṅgaṇaṁ vā, tasseva rajassa vā aṅgaṇassa vā pahānāya vāyamati.
an10.51:3.3	No ce tattha passati rajaṁ vā aṅgaṇaṁ vā, tenevattamano hoti paripuṇṇasaṅkappo:
an10.51:3.4	‘lābhā vata me, parisuddhaṁ vata me’ti.
an10.51:3.5	Evamevaṁ kho, bhikkhave, bhikkhuno paccavekkhaṇā bahukārā hoti kusalesu dhammesu:
an10.51:3.6	‘abhijjhālu nu kho bahulaṁ viharāmi, anabhijjhālu nu kho bahulaṁ viharāmi, byāpannacitto nu kho bahulaṁ viharāmi, abyāpannacitto nu kho bahulaṁ viharāmi, thinamiddhapariyuṭṭhito nu kho bahulaṁ viharāmi, vigatathinamiddho nu kho bahulaṁ viharāmi, uddhato nu kho bahulaṁ viharāmi, anuddhato nu kho bahulaṁ viharāmi, vicikiccho nu kho bahulaṁ viharāmi, tiṇṇavicikiccho nu kho bahulaṁ viharāmi, kodhano nu kho bahulaṁ viharāmi, akkodhano nu kho bahulaṁ viharāmi, saṅkiliṭṭhacitto nu kho bahulaṁ viharāmi, asaṅkiliṭṭhacitto nu kho bahulaṁ viharāmi, sāraddhakāyo nu kho bahulaṁ viharāmi, asāraddhakāyo nu kho bahulaṁ viharāmi, kusīto nu kho bahulaṁ viharāmi, āraddhavīriyo nu kho bahulaṁ viharāmi, asamāhito nu kho bahulaṁ viharāmi, samāhito nu kho bahulaṁ viharāmī’ti.
an10.51:4.1	Sace, bhikkhave, bhikkhu paccavekkhamāno evaṁ jānāti:
an10.51:4.2	‘abhijjhālu bahulaṁ viharāmi, byāpannacitto bahulaṁ viharāmi, thinamiddhapariyuṭṭhito bahulaṁ viharāmi, uddhato bahulaṁ viharāmi, vicikiccho bahulaṁ viharāmi, kodhano bahulaṁ viharāmi, saṅkiliṭṭhacitto bahulaṁ viharāmi, sāraddhakāyo bahulaṁ viharāmi, kusīto bahulaṁ viharāmi, asamāhito bahulaṁ viharāmī’ti, tena, bhikkhave, bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.51:4.3	Seyyathāpi, bhikkhave, ādittacelo vā ādittasīso vā. Tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya.
an10.51:4.4	Evamevaṁ kho tena, bhikkhave, bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.51:5.1	Sace pana, bhikkhave, bhikkhu paccavekkhamāno evaṁ jānāti:
an10.51:5.2	‘anabhijjhālu bahulaṁ viharāmi, abyāpannacitto bahulaṁ viharāmi, vigatathinamiddho bahulaṁ viharāmi, anuddhato bahulaṁ viharāmi, tiṇṇavicikiccho bahulaṁ viharāmi, akkodhano bahulaṁ viharāmi, asaṅkiliṭṭhacitto bahulaṁ viharāmi, asāraddhakāyo bahulaṁ viharāmi, āraddhavīriyo bahulaṁ viharāmi, samāhito bahulaṁ viharāmī’ti, tena, bhikkhave, bhikkhunā tesuyeva kusalesu dhammesu patiṭṭhāya uttari āsavānaṁ khayāya yogo karaṇīyo”ti.
an10.51:5.3	Paṭhamaṁ.
an10.52:0.1	Aṅguttara Nikāya 10.52
an10.52:0.2	6. Sacittavagga
an10.52:0.3	Sāriputtasutta
an10.52:1.1	Tatra kho āyasmā sāriputto bhikkhū āmantesi:
an10.52:1.2	“āvuso bhikkhave”ti.
an10.52:1.3	“Āvuso”ti kho te bhikkhū āyasmato sāriputtassa paccassosuṁ.
an10.52:1.4	Āyasmā sāriputto etadavoca:
an10.52:2.1	“No ce, āvuso, bhikkhu paracittapariyāyakusalo hoti, atha ‘sacittapariyāyakusalo bhavissāmī’ti—
an10.52:2.2	evañhi vo, āvuso, sikkhitabbaṁ.
an10.52:3.1	Kathañcāvuso, bhikkhu sacittapariyāyakusalo hoti?
an10.52:3.2	Seyyathāpi, āvuso, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udapatte sakaṁ mukhanimittaṁ paccavekkhamāno sace tattha passati rajaṁ vā aṅgaṇaṁ vā, tasseva rajassa vā aṅgaṇassa vā pahānāya vāyamati.
an10.52:3.3	No ce tattha passati rajaṁ vā aṅgaṇaṁ vā, tenevattamano hoti paripuṇṇasaṅkappo:
an10.52:3.4	‘lābhā vata me, parisuddhaṁ vata me’ti.
an10.52:4.1	Evamevaṁ kho, āvuso, bhikkhuno paccavekkhaṇā bahukārā hoti kusalesu dhammesu:
an10.52:4.2	‘abhijjhālu nu kho bahulaṁ viharāmi, anabhijjhālu nu kho bahulaṁ viharāmi, byāpannacitto nu kho bahulaṁ viharāmi, abyāpannacitto nu kho bahulaṁ viharāmi, thinamiddhapariyuṭṭhito nu kho bahulaṁ viharāmi, vigatathinamiddho nu kho bahulaṁ viharāmi, uddhato nu kho bahulaṁ viharāmi, anuddhato nu kho bahulaṁ viharāmi, vicikiccho nu kho bahulaṁ viharāmi, tiṇṇavicikiccho nu kho bahulaṁ viharāmi, kodhano nu kho bahulaṁ viharāmi, akkodhano nu kho bahulaṁ viharāmi, saṅkiliṭṭhacitto nu kho bahulaṁ viharāmi, asaṅkiliṭṭhacitto nu kho bahulaṁ viharāmi, sāraddhakāyo nu kho bahulaṁ viharāmi, asāraddhakāyo nu kho bahulaṁ viharāmi, kusīto nu kho bahulaṁ viharāmi, āraddhavīriyo nu kho bahulaṁ viharāmi, samāhito nu kho bahulaṁ viharāmi, asamāhito nu kho bahulaṁ viharāmī’ti.
an10.52:5.1	Sace, āvuso, bhikkhu paccavekkhamāno evaṁ jānāti:
an10.52:5.2	‘abhijjhālu bahulaṁ viharāmi …pe… asamāhito bahulaṁ viharāmī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.52:5.3	Seyyathāpi, āvuso, ādittacelo vā ādittasīso vā. Tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya.
an10.52:5.4	Evamevaṁ kho, āvuso, tena bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.52:6.1	Sace panāvuso, bhikkhu paccavekkhamāno evaṁ jānāti:
an10.52:6.2	‘anabhijjhālu bahulaṁ viharāmi …pe… samāhito bahulaṁ viharāmī’ti, tenāvuso, bhikkhunā tesuyeva kusalesu dhammesu patiṭṭhāya uttari āsavānaṁ khayāya yogo karaṇīyo”ti.
an10.52:6.3	Dutiyaṁ.
an10.53:0.1	Aṅguttara Nikāya 10.53
an10.53:0.2	6. Sacittavagga
an10.53:0.3	Ṭhitisutta
an10.53:1.1	“Ṭhitimpāhaṁ, bhikkhave, na vaṇṇayāmi kusalesu dhammesu, pageva parihāniṁ.
an10.53:1.2	Vuḍḍhiñca kho ahaṁ, bhikkhave, vaṇṇayāmi kusalesu dhammesu, no ṭhitiṁ no hāniṁ.
an10.53:2.1	Kathañca, bhikkhave, hāni hoti kusalesu dhammesu, no ṭhiti no vuḍḍhi?
an10.53:2.2	Idha, bhikkhave, bhikkhu yattako hoti saddhāya sīlena sutena cāgena paññāya paṭibhānena, tassa te dhammā neva tiṭṭhanti no vaḍḍhanti.
an10.53:2.3	Hānimetaṁ, bhikkhave, vadāmi kusalesu dhammesu, no ṭhitiṁ no vuḍḍhiṁ.
an10.53:2.4	Evaṁ kho, bhikkhave, hāni hoti kusalesu dhammesu, no ṭhiti no vuḍḍhi.
an10.53:3.1	Kathañca, bhikkhave ṭhiti hoti kusalesu dhammesu, no hāni no vuḍḍhi?
an10.53:3.2	Idha, bhikkhave, bhikkhu yattako hoti saddhāya sīlena sutena cāgena paññāya paṭibhānena, tassa te dhammā neva hāyanti no vaḍḍhanti.
an10.53:3.3	Ṭhitimetaṁ, bhikkhave, vadāmi kusalesu dhammesu, no hāniṁ no vuḍḍhiṁ.
an10.53:3.4	Evaṁ kho, bhikkhave, ṭhiti hoti kusalesu dhammesu, no vuḍḍhi no hāni.
an10.53:4.1	Kathañca, bhikkhave, vuḍḍhi hoti kusalesu dhammesu, no ṭhiti no hāni?
an10.53:4.2	Idha, bhikkhave, bhikkhu yattako hoti saddhāya sīlena sutena cāgena paññāya paṭibhānena, tassa te dhammā neva tiṭṭhanti no hāyanti.
an10.53:4.3	Vuḍḍhimetaṁ, bhikkhave, vadāmi kusalesu dhammesu, no ṭhitiṁ no hāniṁ.
an10.53:4.4	Evaṁ kho, bhikkhave, vuḍḍhi hoti kusalesu dhammesu, no ṭhiti no hāni.
an10.53:5.1	No ce, bhikkhave, bhikkhu paracittapariyāyakusalo hoti, atha ‘sacittapariyāyakusalo bhavissāmī’ti—
an10.53:5.2	evañhi vo, bhikkhave, sikkhitabbaṁ.
an10.53:6.1	Kathañca, bhikkhave, bhikkhu sacittapariyāyakusalo hoti?
an10.53:6.2	Seyyathāpi, bhikkhave, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udapatte sakaṁ mukhanimittaṁ paccavekkhamāno sace tattha passati rajaṁ vā aṅgaṇaṁ vā, tasseva rajassa vā aṅgaṇassa vā pahānāya vāyamati.
an10.53:6.3	No ce tattha passati rajaṁ vā aṅgaṇaṁ vā, tenevattamano hoti paripuṇṇasaṅkappo:
an10.53:6.4	‘lābhā vata me, parisuddhaṁ vata me’ti.
an10.53:6.5	Evamevaṁ kho, bhikkhave, bhikkhuno paccavekkhaṇā bahukārā hoti kusalesu dhammesu:
an10.53:6.6	‘abhijjhālu nu kho bahulaṁ viharāmi, anabhijjhālu nu kho bahulaṁ viharāmi, byāpannacitto nu kho bahulaṁ viharāmi, abyāpannacitto nu kho bahulaṁ viharāmi, thinamiddhapariyuṭṭhito nu kho bahulaṁ viharāmi, vigatathinamiddho nu kho bahulaṁ viharāmi, uddhato nu kho bahulaṁ viharāmi, anuddhato nu kho bahulaṁ viharāmi, vicikiccho nu kho bahulaṁ viharāmi, tiṇṇavicikiccho nu kho bahulaṁ viharāmi, kodhano nu kho bahulaṁ viharāmi, akkodhano nu kho bahulaṁ viharāmi, saṅkiliṭṭhacitto nu kho bahulaṁ viharāmi, asaṅkiliṭṭhacitto nu kho bahulaṁ viharāmi, sāraddhakāyo nu kho bahulaṁ viharāmi, asāraddhakāyo nu kho bahulaṁ viharāmi, kusīto nu kho bahulaṁ viharāmi, āraddhavīriyo nu kho bahulaṁ viharāmi, samāhito nu kho bahulaṁ viharāmi, asamāhito nu kho bahulaṁ viharāmī’ti.
an10.53:7.1	Sace, bhikkhave, bhikkhu paccavekkhamāno evaṁ jānāti:
an10.53:7.2	‘abhijjhālu bahulaṁ viharāmi, byāpannacitto bahulaṁ viharāmi, thinamiddhapariyuṭṭhito bahulaṁ viharāmi, uddhato bahulaṁ viharāmi, vicikiccho bahulaṁ viharāmi, kodhano bahulaṁ viharāmi, saṅkiliṭṭhacitto bahulaṁ viharāmi, sāraddhakāyo bahulaṁ viharāmi, kusīto bahulaṁ viharāmi, asamāhito bahulaṁ viharāmī’ti, tena, bhikkhave, bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.53:7.3	Seyyathāpi, bhikkhave, ādittacelo vā ādittasīso vā.
an10.53:7.4	Tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya;
an10.53:7.5	evamevaṁ kho, bhikkhave, tena bhikkhunā tesaṁyeva pāpakānaṁ akusalānaṁ dhammānaṁ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.53:8.1	Sace pana, bhikkhave, bhikkhu paccavekkhamāno evaṁ jānāti:
an10.53:8.2	‘anabhijjhālu bahulaṁ viharāmi, abyāpannacitto bahulaṁ viharāmi, vigatathinamiddho bahulaṁ viharāmi, anuddhato bahulaṁ viharāmi, tiṇṇavicikiccho bahulaṁ viharāmi, akkodhano bahulaṁ viharāmi, asaṅkiliṭṭhacitto bahulaṁ viharāmi, asāraddhakāyo bahulaṁ viharāmi, āraddhavīriyo bahulaṁ viharāmi, samāhito bahulaṁ viharāmī’ti, tena, bhikkhave, bhikkhunā tesuyeva kusalesu dhammesu patiṭṭhāya uttari āsavānaṁ khayāya yogo karaṇīyo”ti.
an10.53:8.3	Tatiyaṁ.
an10.54:0.1	Aṅguttara Nikāya 10.54
an10.54:0.2	6. Sacittavagga
an10.54:0.3	Samathasutta
an10.54:1.1	“No ce, bhikkhave, bhikkhu paracittapariyāyakusalo hoti, atha ‘sacittapariyāyakusalo bhavissāmī’ti—
an10.54:1.2	evañhi vo, bhikkhave, sikkhitabbaṁ.
an10.54:2.1	Kathañca, bhikkhave, bhikkhu sacittapariyāyakusalo hoti?
an10.54:2.2	Seyyathāpi, bhikkhave, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udapatte sakaṁ mukhanimittaṁ paccavekkhamāno sace tattha passati rajaṁ vā aṅgaṇaṁ vā, tasseva rajassa vā aṅgaṇassa vā pahānāya vāyamati.
an10.54:2.3	No ce tattha passati rajaṁ vā aṅgaṇaṁ vā, tenevattamano hoti paripuṇṇasaṅkappo:
an10.54:2.4	‘lābhā vata me, parisuddhaṁ vata me’ti.
an10.54:2.5	Evamevaṁ kho, bhikkhave, bhikkhuno paccavekkhaṇā bahukārā hoti kusalesu dhammesu:
an10.54:2.6	‘lābhī nu khomhi ajjhattaṁ cetosamathassa, na nu khomhi lābhī ajjhattaṁ cetosamathassa, lābhī nu khomhi adhipaññādhammavipassanāya, na nu khomhi lābhī adhipaññādhammavipassanāyā’ti.
an10.54:3.1	Sace, bhikkhave, bhikkhu paccavekkhamāno evaṁ jānāti:
an10.54:3.2	‘lābhīmhi ajjhattaṁ cetosamathassa, na lābhī adhipaññādhammavipassanāyā’ti, tena, bhikkhave, bhikkhunā ajjhattaṁ cetosamathe patiṭṭhāya adhipaññādhammavipassanāya yogo karaṇīyo.
an10.54:3.3	So aparena samayena lābhī ceva hoti ajjhattaṁ cetosamathassa lābhī ca adhipaññādhammavipassanāya.
an10.54:4.1	Sace pana, bhikkhave, bhikkhu paccavekkhamāno evaṁ jānāti:
an10.54:4.2	‘lābhīmhi adhipaññādhammavipassanāya, na lābhī ajjhattaṁ cetosamathassā’ti, tena, bhikkhave, bhikkhunā adhipaññādhammavipassanāya patiṭṭhāya ajjhattaṁ cetosamathe yogo karaṇīyo.
an10.54:4.3	So aparena samayena lābhī ceva hoti adhipaññādhammavipassanāya lābhī ca ajjhattaṁ cetosamathassa.
an10.54:5.1	Sace pana, bhikkhave, bhikkhu paccavekkhamāno evaṁ jānāti:
an10.54:5.2	‘na lābhī ajjhattaṁ cetosamathassa, na lābhī adhipaññādhammavipassanāyā’ti, tena, bhikkhave, bhikkhunā tesaṁyeva kusalānaṁ dhammānaṁ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.54:5.3	Seyyathāpi, bhikkhave, ādittacelo vā ādittasīso vā.
an10.54:5.4	Tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya.
an10.54:5.5	Evamevaṁ kho, bhikkhave, tena bhikkhunā tesaṁyeva kusalānaṁ dhammānaṁ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.54:5.6	So aparena samayena lābhī ceva hoti ajjhattaṁ cetosamathassa lābhī ca adhipaññādhammavipassanāya.
an10.54:6.1	Sace pana, bhikkhave, bhikkhu paccavekkhamāno evaṁ jānāti:
an10.54:6.2	‘lābhīmhi ajjhattaṁ cetosamathassa, lābhī adhipaññādhammavipassanāyā’ti, tena, bhikkhave, bhikkhunā tesuyeva kusalesu dhammesu patiṭṭhāya uttari āsavānaṁ khayāya yogo karaṇīyo.
an10.54:7.1	Cīvarampāhaṁ, bhikkhave, duvidhena vadāmi—
an10.54:7.2	sevitabbampi asevitabbampi.
an10.54:7.3	Piṇḍapātampāhaṁ, bhikkhave, duvidhena vadāmi—
an10.54:7.4	sevitabbampi asevitabbampi.
an10.54:7.5	Senāsanampāhaṁ, bhikkhave, duvidhena vadāmi—
an10.54:7.6	sevitabbampi asevitabbampi.
an10.54:7.7	Gāmanigamampāhaṁ, bhikkhave, duvidhena vadāmi—
an10.54:7.8	sevitabbampi asevitabbampi.
an10.54:7.9	Janapadapadesampāhaṁ, bhikkhave, duvidhena vadāmi—
an10.54:7.10	sevitabbampi asevitabbampi.
an10.54:7.11	Puggalampāhaṁ, bhikkhave, duvidhena vadāmi—
an10.54:7.12	sevitabbampi asevitabbampi.
an10.54:8.1	‘Cīvarampāhaṁ, bhikkhave, duvidhena vadāmi—
an10.54:8.2	sevitabbampi asevitabbampī’ti,
an10.54:8.3	iti kho panetaṁ vuttaṁ. Kiñcetaṁ paṭicca vuttaṁ?
an10.54:8.4	Tattha yaṁ jaññā cīvaraṁ:
an10.54:8.5	‘idaṁ kho me cīvaraṁ sevato akusalā dhammā abhivaḍḍhanti, kusalā dhammā parihāyantī’ti, evarūpaṁ cīvaraṁ na sevitabbaṁ.
an10.54:8.6	Tattha yaṁ jaññā cīvaraṁ:
an10.54:8.7	‘idaṁ kho me cīvaraṁ sevato akusalā dhammā parihāyanti, kusalā dhammā abhivaḍḍhantī’ti, evarūpaṁ cīvaraṁ sevitabbaṁ.
an10.54:8.8	‘Cīvarampāhaṁ, bhikkhave, duvidhena vadāmi—
an10.54:8.9	sevitabbampi asevitabbampī’ti,
an10.54:8.10	iti yaṁ taṁ vuttaṁ, idametaṁ paṭicca vuttaṁ.
an10.54:9.1	‘Piṇḍapātampāhaṁ, bhikkhave, duvidhena vadāmi—
an10.54:9.2	sevitabbampi asevitabbampī’ti,
an10.54:9.3	iti kho panetaṁ vuttaṁ. Kiñcetaṁ paṭicca vuttaṁ?
an10.54:9.4	Tattha yaṁ jaññā piṇḍapātaṁ:
an10.54:9.5	‘imaṁ kho me piṇḍapātaṁ sevato akusalā dhammā abhivaḍḍhanti, kusalā dhammā parihāyantī’ti, evarūpo piṇḍapāto na sevitabbo.
an10.54:9.6	Tattha yaṁ jaññā piṇḍapātaṁ:
an10.54:9.7	‘imaṁ kho me piṇḍapātaṁ sevato akusalā dhammā parihāyanti, kusalā dhammā abhivaḍḍhantī’ti, evarūpo piṇḍapāto sevitabbo.
an10.54:9.8	‘Piṇḍapātampāhaṁ, bhikkhave, duvidhena vadāmi—
an10.54:9.9	sevitabbampi asevitabbampī’ti,
an10.54:9.10	iti yaṁ taṁ vuttaṁ, idametaṁ paṭicca vuttaṁ.
an10.54:10.1	‘Senāsanampāhaṁ, bhikkhave, duvidhena vadāmi—
an10.54:10.2	sevitabbampi asevitabbampī’ti,
an10.54:10.3	iti kho panetaṁ vuttaṁ. Kiñcetaṁ paṭicca vuttaṁ?
an10.54:10.4	Tattha yaṁ jaññā senāsanaṁ:
an10.54:10.5	‘idaṁ kho me senāsanaṁ sevato akusalā dhammā abhivaḍḍhanti, kusalā dhammā parihāyantī’ti, evarūpaṁ senāsanaṁ na sevitabbaṁ.
an10.54:10.6	Tattha yaṁ jaññā senāsanaṁ:
an10.54:10.7	‘idaṁ kho me senāsanaṁ sevato akusalā dhammā parihāyanti, kusalā dhammā abhivaḍḍhantī’ti, evarūpaṁ senāsanaṁ sevitabbaṁ.
an10.54:10.8	‘Senāsanampāhaṁ, bhikkhave, duvidhena vadāmi—
an10.54:10.9	sevitabbampi asevitabbampī’ti,
an10.54:10.10	iti yaṁ taṁ vuttaṁ, idametaṁ paṭicca vuttaṁ.
an10.54:11.1	‘Gāmanigamampāhaṁ, bhikkhave, duvidhena vadāmi—
an10.54:11.2	sevitabbampi asevitabbampī’ti,
an10.54:11.3	iti kho panetaṁ vuttaṁ. Kiñcetaṁ paṭicca vuttaṁ?
an10.54:11.4	Tattha yaṁ jaññā gāmanigamaṁ:
an10.54:11.5	‘imaṁ kho me gāmanigamaṁ sevato akusalā dhammā abhivaḍḍhanti, kusalā dhammā parihāyantī’ti, evarūpo gāmanigamo na sevitabbo.
an10.54:11.6	Tattha yaṁ jaññā gāmanigamaṁ:
an10.54:11.7	‘imaṁ kho me gāmanigamaṁ sevato akusalā dhammā parihāyanti, kusalā dhammā abhivaḍḍhantī’ti, evarūpo gāmanigamo sevitabbo.
an10.54:11.8	‘Gāmanigamampāhaṁ, bhikkhave, duvidhena vadāmi—
an10.54:11.9	sevitabbampi asevitabbampī’ti,
an10.54:11.10	iti yaṁ taṁ vuttaṁ, idametaṁ paṭicca vuttaṁ.
an10.54:12.1	‘Janapadapadesampāhaṁ, bhikkhave, duvidhena vadāmi—
an10.54:12.2	sevitabbampi asevitabbampī’ti,
an10.54:12.3	iti kho panetaṁ vuttaṁ. Kiñcetaṁ paṭicca vuttaṁ?
an10.54:12.4	Tattha yaṁ jaññā janapadapadesaṁ:
an10.54:12.5	‘imaṁ kho me janapadapadesaṁ sevato akusalā dhammā abhivaḍḍhanti, kusalā dhammā parihāyantī’ti, evarūpo janapadapadeso na sevitabbo.
an10.54:12.6	Tattha yaṁ jaññā janapadapadesaṁ:
an10.54:12.7	‘imaṁ kho me janapadapadesaṁ sevato akusalā dhammā parihāyanti, kusalā dhammā abhivaḍḍhantī’ti, evarūpo janapadapadeso sevitabbo.
an10.54:12.8	‘Janapadapadesampāhaṁ, bhikkhave, duvidhena vadāmi—
an10.54:12.9	sevitabbampi asevitabbampī’ti,
an10.54:12.10	iti yaṁ taṁ vuttaṁ, idametaṁ paṭicca vuttaṁ.
an10.54:13.1	‘Puggalampāhaṁ, bhikkhave, duvidhena vadāmi—
an10.54:13.2	sevitabbampi asevitabbampī’ti,
an10.54:13.3	iti kho panetaṁ vuttaṁ. Kiñcetaṁ paṭicca vuttaṁ?
an10.54:13.4	Tattha yaṁ jaññā puggalaṁ:
an10.54:13.5	‘imaṁ kho me puggalaṁ sevato akusalā dhammā abhivaḍḍhanti, kusalā dhammā parihāyantī’ti, evarūpo puggalo na sevitabbo.
an10.54:13.6	Tattha yaṁ jaññā puggalaṁ:
an10.54:13.7	‘imaṁ kho me puggalaṁ sevato akusalā dhammā parihāyanti, kusalā dhammā abhivaḍḍhantī’ti, evarūpo puggalo sevitabbo.
an10.54:13.8	‘Puggalampāhaṁ, bhikkhave, duvidhena vadāmi—
an10.54:13.9	sevitabbampi asevitabbampī’ti,
an10.54:13.10	iti yaṁ taṁ vuttaṁ, idametaṁ paṭicca vuttan”ti.
an10.54:13.11	Catutthaṁ.
an10.55:0.1	Aṅguttara Nikāya 10.55
an10.55:0.2	6. Sacittavagga
an10.55:0.3	Parihānasutta
an10.55:1.1	Tatra kho āyasmā sāriputto bhikkhū āmantesi:
an10.55:1.2	“āvuso bhikkhave”ti.
an10.55:1.3	“Āvuso”ti kho te bhikkhū āyasmato sāriputtassa paccassosuṁ.
an10.55:1.4	Āyasmā sāriputto etadavoca:
an10.55:2.1	“‘Parihānadhammo puggalo, parihānadhammo puggalo’ti, āvuso, vuccati.
an10.55:2.2	‘Aparihānadhammo puggalo, aparihānadhammo puggalo’ti, āvuso, vuccati.
an10.55:2.3	Kittāvatā nu kho, āvuso, parihānadhammo puggalo vutto bhagavatā, kittāvatā ca pana aparihānadhammo puggalo vutto bhagavatā”ti?
an10.55:2.4	“Dūratopi kho mayaṁ, āvuso, āgacchāma āyasmato sāriputtassa santike etassa bhāsitassa atthamaññātuṁ.
an10.55:2.5	Sādhu vatāyasmantaṁyeva sāriputtaṁ paṭibhātu etassa bhāsitassa attho.
an10.55:2.6	Āyasmato sāriputtassa sutvā bhikkhū dhāressantī”ti.
an10.55:3.1	“Tenahāvuso, suṇātha, sādhukaṁ manasi karotha, bhāsissāmī”ti.
an10.55:3.2	“Evamāvuso”ti kho te bhikkhū āyasmato sāriputtassa paccassosuṁ.
an10.55:3.3	Āyasmā sāriputto etadavoca:
an10.55:4.1	“Kittāvatā nu kho, āvuso, parihānadhammo puggalo vutto bhagavatā?
an10.55:4.2	Idhāvuso, bhikkhu assutañceva dhammaṁ na suṇāti, sutā cassa dhammā sammosaṁ gacchanti, ye cassa dhammā pubbe cetaso asamphuṭṭhapubbā te cassa na samudācaranti, aviññātañceva na vijānāti.
an10.55:4.3	Ettāvatā kho, āvuso, parihānadhammo puggalo vutto bhagavatā.
an10.55:5.1	Kittāvatā ca panāvuso, aparihānadhammo puggalo vutto bhagavatā?
an10.55:5.2	Idhāvuso, bhikkhu assutañceva dhammaṁ suṇāti, sutā cassa dhammā na sammosaṁ gacchanti, ye cassa dhammā pubbe cetaso asamphuṭṭhapubbā te cassa samudācaranti, aviññātañceva vijānāti.
an10.55:5.3	Ettāvatā kho, āvuso, aparihānadhammo puggalo vutto bhagavatā.
an10.55:6.1	No ce, āvuso, bhikkhu paracittapariyāyakusalo hoti, atha ‘sacittapariyāyakusalo bhavissāmī’ti—
an10.55:6.2	evañhi vo, āvuso, sikkhitabbaṁ.
an10.55:7.1	Kathañcāvuso, bhikkhu sacittapariyāyakusalo hoti?
an10.55:7.2	Seyyathāpi, āvuso, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udapatte sakaṁ mukhanimittaṁ paccavekkhamāno sace tattha passati rajaṁ vā aṅgaṇaṁ vā, tasseva rajassa vā aṅgaṇassa vā pahānāya vāyamati.
an10.55:7.3	No ce tattha passati rajaṁ vā aṅgaṇaṁ vā, tenevattamano hoti paripuṇṇasaṅkappo:
an10.55:7.4	‘lābhā vata me, parisuddhaṁ vata me’ti.
an10.55:7.5	Evameva kho, āvuso, bhikkhuno paccavekkhaṇā bahukārā hoti kusalesu dhammesu:
an10.55:7.6	‘anabhijjhālu nu kho bahulaṁ viharāmi, saṁvijjati nu kho me eso dhammo udāhu no, abyāpannacitto nu kho bahulaṁ viharāmi, saṁvijjati nu kho me eso dhammo udāhu no, vigatathinamiddho nu kho bahulaṁ viharāmi, saṁvijjati nu kho me eso dhammo udāhu no, anuddhato nu kho bahulaṁ viharāmi, saṁvijjati nu kho me eso dhammo udāhu no, tiṇṇavicikiccho nu kho bahulaṁ viharāmi, saṁvijjati nu kho me eso dhammo udāhu no, akkodhano nu kho bahulaṁ viharāmi, saṁvijjati nu kho me eso dhammo udāhu no, asaṅkiliṭṭhacitto nu kho bahulaṁ viharāmi, saṁvijjati nu kho me eso dhammo udāhu no, lābhī nu khomhi ajjhattaṁ dhammapāmojjassa, saṁvijjati nu kho me eso dhammo udāhu no, lābhī nu khomhi ajjhattaṁ cetosamathassa, saṁvijjati nu kho me eso dhammo udāhu no, lābhī nu khomhi adhipaññādhammavipassanāya, saṁvijjati nu kho me eso dhammo udāhu no’ti.
an10.55:8.1	Sace pana, āvuso, bhikkhu paccavekkhamāno sabbepime kusale dhamme attani na samanupassati, tenāvuso, bhikkhunā sabbesaṁyeva imesaṁ kusalānaṁ dhammānaṁ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.55:8.2	Seyyathāpi, āvuso, ādittacelo vā ādittasīso vā.
an10.55:8.3	Tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya.
an10.55:8.4	Evamevaṁ kho, āvuso, tena bhikkhunā sabbesaṁyeva kusalānaṁ dhammānaṁ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.55:9.1	Sace panāvuso, bhikkhu paccavekkhamāno ekacce kusale dhamme attani samanupassati, ekacce kusale dhamme attani na samanupassati, tenāvuso, bhikkhunā ye kusale dhamme attani samanupassati tesu kusalesu dhammesu patiṭṭhāya, ye kusale dhamme attani na samanupassati tesaṁ kusalānaṁ dhammānaṁ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.55:9.2	Seyyathāpi, āvuso, ādittacelo vā ādittasīso vā.
an10.55:9.3	Tasseva celassa vā sīsassa vā nibbāpanāya adhimattaṁ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya.
an10.55:9.4	Evamevaṁ kho, āvuso, tena bhikkhunā ye kusale dhamme attani samanupassati tesu kusalesu dhammesu patiṭṭhāya, ye kusale dhamme attani na samanupassati tesaṁ kusalānaṁ dhammānaṁ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṁ.
an10.55:10.1	Sace panāvuso, bhikkhu paccavekkhamāno sabbepime kusale dhamme attani samanupassati, tenāvuso, bhikkhunā sabbesveva imesu kusalesu dhammesu patiṭṭhāya uttari āsavānaṁ khayāya yogo karaṇīyo”ti.
an10.55:10.2	Pañcamaṁ.
an10.56:0.1	Aṅguttara Nikāya 10.56
an10.56:0.2	6. Sacittavagga
an10.56:0.3	Paṭhamasaññāsutta
an10.56:1.1	“Dasayimā, bhikkhave, saññā bhāvitā bahulīkatā mahapphalā honti mahānisaṁsā amatogadhā amatapariyosānā.
an10.56:1.2	Katamā dasa?
an10.56:1.3	Asubhasaññā, maraṇasaññā, āhāre paṭikūlasaññā, sabbaloke anabhiratasaññā, aniccasaññā, anicce dukkhasaññā, dukkhe anattasaññā, pahānasaññā, virāgasaññā, nirodhasaññā—
an10.56:1.4	imā kho, bhikkhave, dasa saññā bhāvitā bahulīkatā mahapphalā honti mahānisaṁsā amatogadhā amatapariyosānā”ti.
an10.56:1.5	Chaṭṭhaṁ.
an10.57:0.1	Aṅguttara Nikāya 10.57
an10.57:0.2	6. Sacittavagga
an10.57:0.3	Dutiyasaññāsutta
an10.57:1.1	“Dasayimā, bhikkhave, saññā bhāvitā bahulīkatā mahapphalā honti mahānisaṁsā amatogadhā amatapariyosānā.
an10.57:1.2	Katamā dasa?
an10.57:1.3	Aniccasaññā, anattasaññā, maraṇasaññā, āhāre paṭikūlasaññā, sabbaloke anabhiratasaññā, aṭṭhikasaññā, puḷavakasaññā, vinīlakasaññā, vicchiddakasaññā, uddhumātakasaññā—
an10.57:1.4	imā kho, bhikkhave, dasa saññā bhāvitā bahulīkatā mahapphalā honti mahānisaṁsā amatogadhā amatapariyosānā”ti.
an10.57:1.5	Sattamaṁ.
an10.58:0.1	Aṅguttara Nikāya 10.58
an10.58:0.2	6. Sacittavagga
an10.58:0.3	Mūlakasutta
an10.58:1.1	“Sace, bhikkhave, aññatitthiyā paribbājakā evaṁ puccheyyuṁ:
an10.58:1.2	‘kiṁmūlakā, āvuso, sabbe dhammā, kiṁsambhavā sabbe dhammā, kiṁsamudayā sabbe dhammā, kiṁsamosaraṇā sabbe dhammā, kiṁpamukhā sabbe dhammā, kiṁadhipateyyā sabbe dhammā, kiṁuttarā sabbe dhammā, kiṁsārā sabbe dhammā, kiṁogadhā sabbe dhammā, kiṁpariyosānā sabbe dhammā’ti, evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ kinti byākareyyāthā”ti?
an10.58:1.3	“Bhagavaṁmūlakā no, bhante, dhammā bhagavaṁnettikā bhagavaṁpaṭisaraṇā. Sādhu vata, bhante, bhagavantaṁyeva paṭibhātu etassa bhāsitassa attho. Bhagavato sutvā bhikkhū dhāressantī”ti.
an10.58:2.1	“Tena hi, bhikkhave, suṇātha, sādhukaṁ manasi karotha, bhāsissāmī”ti.
an10.58:2.2	“Evaṁ, bhante”ti kho te bhikkhū bhagavato paccassosuṁ.
an10.58:2.3	Bhagavā etadavoca:
an10.58:3.1	“Sace, bhikkhave, aññatitthiyā paribbājakā evaṁ puccheyyuṁ:
an10.58:3.2	‘kiṁmūlakā, āvuso, sabbe dhammā, kiṁsambhavā sabbe dhammā, kiṁsamudayā sabbe dhammā, kiṁsamosaraṇā sabbe dhammā, kiṁpamukhā sabbe dhammā, kiṁ adhipateyyā sabbe dhammā, kiṁuttarā sabbe dhammā, kiṁsārā sabbe dhammā, kiṁogadhā sabbe dhammā, kiṁpariyosānā sabbe dhammā’ti,
an10.58:3.3	evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:
an10.58:3.4	‘chandamūlakā, āvuso, sabbe dhammā, manasikārasambhavā sabbe dhammā, phassasamudayā sabbe dhammā, vedanāsamosaraṇā sabbe dhammā, samādhippamukhā sabbe dhammā, satādhipateyyā sabbe dhammā, paññuttarā sabbe dhammā, vimuttisārā sabbe dhammā, amatogadhā sabbe dhammā, nibbānapariyosānā sabbe dhammā’ti.
an10.58:3.5	Evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyāthā”ti.
an10.58:3.6	Aṭṭhamaṁ.
an10.59:0.1	Aṅguttara Nikāya 10.59
an10.59:0.2	6. Sacittavagga
an10.59:0.3	Pabbajjāsutta
an10.59:1.1	“Tasmātiha, bhikkhave, evaṁ sikkhitabbaṁ:
an10.59:1.2	‘yathāpabbajjāparicitañca no cittaṁ bhavissati, na cuppannā pāpakā akusalā dhammā cittaṁ pariyādāya ṭhassanti;
an10.59:1.3	aniccasaññāparicitañca no cittaṁ bhavissati, anattasaññāparicitañca no cittaṁ bhavissati, asubhasaññāparicitañca no cittaṁ bhavissati, ādīnavasaññāparicitañca no cittaṁ bhavissati, lokassa samañca visamañca ñatvā taṁsaññāparicitañca no cittaṁ bhavissati, lokassa bhavañca vibhavañca ñatvā taṁsaññāparicitañca no cittaṁ bhavissati, lokassa samudayañca atthaṅgamañca ñatvā taṁsaññāparicitañca no cittaṁ bhavissati, pahānasaññāparicitañca no cittaṁ bhavissati, virāgasaññāparicitañca no cittaṁ bhavissati, nirodhasaññāparicitañca no cittaṁ bhavissatī’ti—
an10.59:1.4	evañhi vo, bhikkhave, sikkhitabbaṁ.
an10.59:2.1	Yato kho, bhikkhave, bhikkhuno yathāpabbajjāparicitañca cittaṁ hoti na cuppannā pāpakā akusalā dhammā cittaṁ pariyādāya tiṭṭhanti, aniccasaññāparicitañca cittaṁ hoti, anattasaññāparicitañca cittaṁ hoti, asubhasaññāparicitañca cittaṁ hoti, ādīnavasaññāparicitañca cittaṁ hoti, lokassa samañca visamañca ñatvā taṁsaññāparicitañca cittaṁ hoti, lokassa bhavañca vibhavañca ñatvā taṁsaññāparicitañca cittaṁ hoti, lokassa samudayañca atthaṅgamañca ñatvā taṁsaññāparicitañca cittaṁ hoti, pahānasaññāparicitañca cittaṁ hoti, virāgasaññāparicitañca cittaṁ hoti, nirodhasaññāparicitañca cittaṁ hoti, tassa dvinnaṁ phalānaṁ aññataraṁ phalaṁ pāṭikaṅkhaṁ—
an10.59:2.2	diṭṭheva dhamme aññā, sati vā upādisese anāgāmitā”ti.
an10.59:2.3	Navamaṁ.
an10.60:0.1	Aṅguttara Nikāya 10.60
an10.60:0.2	6. Sacittavagga
an10.60:0.3	Girimānandasutta
an10.60:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.60:1.2	Tena kho pana samayena āyasmā girimānando ābādhiko hoti dukkhito bāḷhagilāno.
an10.60:1.3	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an10.60:2.1	“Āyasmā, bhante, girimānando ābādhiko hoti dukkhito bāḷhagilāno.
an10.60:2.2	Sādhu, bhante, bhagavā yenāyasmā girimānando tenupasaṅkamatu anukampaṁ upādāyā”ti.
an10.60:2.3	“Sace kho tvaṁ, ānanda, girimānandassa bhikkhuno dasa saññā bhāseyyāsi, ṭhānaṁ kho panetaṁ vijjati yaṁ girimānandassa bhikkhuno dasa saññā sutvā so ābādho ṭhānaso paṭippassambheyya.
an10.60:3.1	Katamā dasa?
an10.60:3.2	Aniccasaññā, anattasaññā, asubhasaññā, ādīnavasaññā, pahānasaññā, virāgasaññā, nirodhasaññā, sabbaloke anabhiratasaññā, sabbasaṅkhāresu anicchāsaññā, ānāpānassati.
an10.60:4.1	Katamā cānanda, aniccasaññā?
an10.60:4.2	Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati:
an10.60:4.3	‘rūpaṁ aniccaṁ, vedanā aniccā, saññā aniccā, saṅkhārā aniccā, viññāṇaṁ aniccan’ti.
an10.60:4.4	Iti imesu pañcasu upādānakkhandhesu aniccānupassī viharati.
an10.60:4.5	Ayaṁ vuccatānanda, aniccasaññā.
an10.60:5.1	Katamā cānanda, anattasaññā?
an10.60:5.2	Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati:
an10.60:5.3	‘cakkhu anattā, rūpā anattā, sotaṁ anattā, saddā anattā, ghānaṁ anattā, gandhā anattā, jivhā anattā, rasā anattā, kāyā anattā, phoṭṭhabbā anattā, mano anattā, dhammā anattā’ti.
an10.60:5.4	Iti imesu chasu ajjhattikabāhiresu āyatanesu anattānupassī viharati.
an10.60:5.5	Ayaṁ vuccatānanda, anattasaññā.
an10.60:6.1	Katamā cānanda, asubhasaññā?
an10.60:6.2	Idhānanda, bhikkhu imameva kāyaṁ uddhaṁ pādatalā adho kesamatthakā tacapariyantaṁ pūraṁ nānāppakārassa asucino paccavekkhati:
an10.60:6.3	‘atthi imasmiṁ kāye kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ, pittaṁ semhaṁ pubbo lohitaṁ sedo medo, assu vasā kheḷo siṅghāṇikā lasikā muttan’ti.
an10.60:6.4	Iti imasmiṁ kāye asubhānupassī viharati.
an10.60:6.5	Ayaṁ vuccatānanda, asubhasaññā.
an10.60:7.1	Katamā cānanda, ādīnavasaññā?
an10.60:7.2	Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati:
an10.60:7.3	‘bahudukkho kho ayaṁ kāyo bahuādīnavo. Iti imasmiṁ kāye vividhā ābādhā uppajjanti, seyyathidaṁ—
an10.60:7.4	cakkhurogo sotarogo ghānarogo jivhārogo kāyarogo sīsarogo kaṇṇarogo mukharogo dantarogo oṭṭharogo kāso sāso pināso ḍāho jaro kucchirogo mucchā pakkhandikā sūlā visūcikā kuṭṭhaṁ gaṇḍo kilāso soso apamāro daddu kaṇḍu kacchu nakhasā vitacchikā lohitaṁ pittaṁ madhumeho aṁsā piḷakā bhagandalā pittasamuṭṭhānā ābādhā semhasamuṭṭhānā ābādhā vātasamuṭṭhānā ābādhā sannipātikā ābādhā utupariṇāmajā ābādhā visamaparihārajā ābādhā opakkamikā ābādhā kammavipākajā ābādhā sītaṁ uṇhaṁ jighacchā pipāsā uccāro passāvo’ti.
an10.60:7.5	Iti imasmiṁ kāye ādīnavānupassī viharati.
an10.60:7.6	Ayaṁ vuccatānanda, ādīnavasaññā.
an10.60:8.1	Katamā cānanda, pahānasaññā?
an10.60:8.2	Idhānanda, bhikkhu uppannaṁ kāmavitakkaṁ nādhivāseti, pajahati, vinodeti, byantīkaroti, anabhāvaṁ gameti. Uppannaṁ byāpādavitakkaṁ nādhivāseti, pajahati, vinodeti, byantīkaroti, anabhāvaṁ gameti. Uppannaṁ vihiṁsāvitakkaṁ nādhivāseti, pajahati, vinodeti, byantīkaroti, anabhāvaṁ gameti. Uppannuppanne pāpake akusale dhamme nādhivāseti, pajahati, vinodeti, byantīkaroti, anabhāvaṁ gameti.
an10.60:8.3	Ayaṁ vuccatānanda, pahānasaññā.
an10.60:9.1	Katamā cānanda, virāgasaññā?
an10.60:9.2	Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati:
an10.60:9.3	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhippaṭinissaggo taṇhākkhayo virāgo nibbānan’ti.
an10.60:9.4	Ayaṁ vuccatānanda, virāgasaññā.
an10.60:10.1	Katamā cānanda, nirodhasaññā?
an10.60:10.2	Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati:
an10.60:10.3	‘etaṁ santaṁ etaṁ paṇītaṁ yadidaṁ sabbasaṅkhārasamatho sabbūpadhippaṭinissaggo taṇhākkhayo nirodho nibbānan’ti.
an10.60:10.4	Ayaṁ vuccatānanda, nirodhasaññā.
an10.60:11.1	Katamā cānanda, sabbaloke anabhiratasaññā?
an10.60:11.2	Idhānanda, bhikkhu ye loke upādānā cetaso adhiṭṭhānābhinivesānusayā, te pajahanto viharati anupādiyanto.
an10.60:11.3	Ayaṁ vuccatānanda, sabbaloke anabhiratasaññā.
an10.60:12.1	Katamā cānanda, sabbasaṅkhāresu anicchāsaññā?
an10.60:12.2	Idhānanda, bhikkhu sabbasaṅkhāresu aṭṭīyati harāyati jigucchati.
an10.60:12.3	Ayaṁ vuccatānanda, sabbasaṅkhāresu anicchāsaññā.
an10.60:13.1	Katamā cānanda, ānāpānassati?
an10.60:13.2	Idhānanda, bhikkhu araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an10.60:13.3	So satova assasati satova passasati.
an10.60:13.4	Dīghaṁ vā assasanto ‘dīghaṁ assasāmī’ti pajānāti. Dīghaṁ vā passasanto ‘dīghaṁ passasāmī’ti pajānāti.
an10.60:13.5	Rassaṁ vā assasanto ‘rassaṁ assasāmī’ti pajānāti. Rassaṁ vā passasanto ‘rassaṁ passasāmī’ti pajānāti.
an10.60:13.6	‘Sabbakāyapaṭisaṁvedī assasissāmī’ti sikkhati. ‘Sabbakāyapaṭisaṁvedī passasissāmī’ti sikkhati.
an10.60:13.7	‘Passambhayaṁ kāyasaṅkhāraṁ assasissāmī’ti sikkhati. ‘Passambhayaṁ kāyasaṅkhāraṁ passasissāmī’ti sikkhati.
an10.60:13.8	‘Pītipaṭisaṁvedī assasissāmī’ti sikkhati. ‘Pītipaṭisaṁvedī passasissāmī’ti sikkhati.
an10.60:13.9	‘Sukhapaṭisaṁvedī assasissāmī’ti sikkhati. ‘Sukhapaṭisaṁvedī passasissāmī’ti sikkhati.
an10.60:13.10	‘Cittasaṅkhārapaṭisaṁvedī assasissāmī’ti sikkhati. ‘Cittasaṅkhārapaṭisaṁvedī passasissāmī’ti sikkhati.
an10.60:13.11	‘Passambhayaṁ cittasaṅkhāraṁ assasissāmī’ti sikkhati. ‘Passambhayaṁ cittasaṅkhāraṁ passasissāmī’ti sikkhati.
an10.60:13.12	‘Cittapaṭisaṁvedī assasissāmī’ti sikkhati. ‘Cittapaṭisaṁvedī passasissāmī’ti sikkhati.
an10.60:13.13	Abhippamodayaṁ cittaṁ …pe…
an10.60:13.14	samādahaṁ cittaṁ …pe…
an10.60:13.15	vimocayaṁ cittaṁ …pe…
an10.60:13.16	aniccānupassī …pe…
an10.60:13.17	virāgānupassī …pe…
an10.60:13.18	nirodhānupassī …pe…
an10.60:13.19	‘paṭinissaggānupassī assasissāmī’ti sikkhati. ‘Paṭinissaggānupassī passasissāmī’ti sikkhati.
an10.60:13.20	Ayaṁ vuccatānanda, ānāpānassati.
an10.60:14.1	Sace kho tvaṁ, ānanda, girimānandassa bhikkhuno imā dasa saññā bhāseyyāsi, ṭhānaṁ kho panetaṁ vijjati yaṁ girimānandassa bhikkhuno imā dasa saññā sutvā so ābādho ṭhānaso paṭippassambheyyā”ti.
an10.60:15.1	Atha kho āyasmā ānando bhagavato santike imā dasa saññā uggahetvā yenāyasmā girimānando tenupasaṅkami; upasaṅkamitvā āyasmato girimānandassa imā dasa saññā abhāsi.
an10.60:15.2	Atha kho āyasmato girimānandassa dasa saññā sutvā so ābādho ṭhānaso paṭippassambhi.
an10.60:15.3	Vuṭṭhahi cāyasmā girimānando tamhā ābādhā. Tathā pahīno ca panāyasmato girimānandassa so ābādho ahosīti.
an10.60:15.4	Dasamaṁ.
an10.60:15.5	Sacittavaggo paṭhamo.
an10.60:16.0	Tassuddānaṁ
an10.60:16.1	Sacittañca sāriputta,
an10.60:16.2	ṭhiti ca samathena ca;
an10.60:16.3	Parihāno ca dve saññā,
an10.60:16.4	mūlā pabbajitaṁ girīti.
an10.61:0.1	Aṅguttara Nikāya 10.61
an10.61:0.2	7. Yamakavagga
an10.61:0.3	Avijjāsutta
an10.61:1.1	“Purimā, bhikkhave, koṭi na paññāyati avijjāya: ‘ito pubbe avijjā nāhosi, atha pacchā samabhavī’ti.
an10.61:1.2	Evañcetaṁ, bhikkhave, vuccati, atha ca pana paññāyati: ‘idappaccayā avijjā’ti.
an10.61:2.1	Avijjampāhaṁ, bhikkhave, sāhāraṁ vadāmi, no anāhāraṁ.
an10.61:2.2	Ko cāhāro avijjāya?
an10.61:2.3	‘Pañca nīvaraṇā’tissa vacanīyaṁ.
an10.61:2.4	Pañcapāhaṁ, bhikkhave, nīvaraṇe sāhāre vadāmi, no anāhāre.
an10.61:2.5	Ko cāhāro pañcannaṁ nīvaraṇānaṁ?
an10.61:2.6	‘Tīṇi duccaritānī’tissa vacanīyaṁ.
an10.61:2.7	Tīṇipāhaṁ, bhikkhave, duccaritāni sāhārāni vadāmi, no anāhārāni.
an10.61:2.8	Ko cāhāro tiṇṇaṁ duccaritānaṁ?
an10.61:2.9	‘Indriyaasaṁvaro’tissa vacanīyaṁ.
an10.61:2.10	Indriyaasaṁvarampāhaṁ, bhikkhave, sāhāraṁ vadāmi, no anāhāraṁ.
an10.61:2.11	Ko cāhāro indriyaasaṁvarassa?
an10.61:2.12	‘Asatāsampajaññan’tissa vacanīyaṁ.
an10.61:2.13	Asatāsampajaññampāhaṁ, bhikkhave, sāhāraṁ vadāmi, no anāhāraṁ.
an10.61:2.14	Ko cāhāro asatāsampajaññassa?
an10.61:2.15	‘Ayonisomanasikāro’tissa vacanīyaṁ.
an10.61:2.16	Ayonisomanasikārampāhaṁ, bhikkhave, sāhāraṁ vadāmi, no anāhāraṁ.
an10.61:2.17	Ko cāhāro ayonisomanasikārassa?
an10.61:2.18	‘Assaddhiyan’tissa vacanīyaṁ.
an10.61:2.19	Assaddhiyampāhaṁ, bhikkhave, sāhāraṁ vadāmi, no anāhāraṁ.
an10.61:2.20	Ko cāhāro assaddhiyassa?
an10.61:2.21	‘Asaddhammassavanan’tissa vacanīyaṁ.
an10.61:2.22	Asaddhammassavanampāhaṁ, bhikkhave, sāhāraṁ vadāmi, no anāhāraṁ.
an10.61:2.23	Ko cāhāro asaddhammassavanassa?
an10.61:2.24	‘Asappurisasaṁsevo’tissa vacanīyaṁ.
an10.61:3.1	Iti kho, bhikkhave, asappurisasaṁsevo paripūro asaddhammassavanaṁ paripūreti, asaddhammassavanaṁ paripūraṁ assaddhiyaṁ paripūreti, assaddhiyaṁ paripūraṁ ayonisomanasikāraṁ paripūreti, ayonisomanasikāro paripūro asatāsampajaññaṁ paripūreti, asatāsampajaññaṁ paripūraṁ indriyaasaṁvaraṁ paripūreti, indriyaasaṁvaro paripūro tīṇi duccaritāni paripūreti, tīṇi duccaritāni paripūrāni pañca nīvaraṇe paripūrenti, pañca nīvaraṇā paripūrā avijjaṁ paripūrenti;
an10.61:3.2	evametissā avijjāya āhāro hoti, evañca pāripūri.
an10.61:4.1	Seyyathāpi, bhikkhave, uparipabbate thullaphusitake deve vassante (…) taṁ udakaṁ yathāninnaṁ pavattamānaṁ pabbatakandarapadarasākhā paripūreti, pabbatakandarapadarasākhā paripūrā kusobbhe paripūrenti. Kusobbhā paripūrā mahāsobbhe paripūrenti, mahāsobbhā paripūrā kunnadiyo paripūrenti, kunnadiyo paripūrā mahānadiyo paripūrenti, mahānadiyo paripūrā mahāsamuddaṁ sāgaraṁ paripūrenti;
an10.61:4.2	evametassa mahāsamuddassa sāgarassa āhāro hoti, evañca pāripūri.
an10.61:5.1	Evamevaṁ kho, bhikkhave, asappurisasaṁsevo paripūro asaddhammassavanaṁ paripūreti, asaddhammassavanaṁ paripūraṁ assaddhiyaṁ paripūreti, assaddhiyaṁ paripūraṁ ayonisomanasikāraṁ paripūreti, ayonisomanasikāro paripūro asatāsampajaññaṁ paripūreti, asatāsampajaññaṁ paripūraṁ indriyaasaṁvaraṁ paripūreti, indriyaasaṁvaro paripūro tīṇi duccaritāni paripūreti, tīṇi duccaritāni paripūrāni pañca nīvaraṇe paripūrenti, pañca nīvaraṇā paripūrā avijjaṁ paripūrenti;
an10.61:5.2	evametissā avijjāya āhāro hoti, evañca pāripūri.
an10.61:6.1	Vijjāvimuttimpāhaṁ, bhikkhave, sāhāraṁ vadāmi, no anāhāraṁ.
an10.61:6.2	Ko cāhāro vijjāvimuttiyā?
an10.61:6.3	‘Satta bojjhaṅgā’tissa vacanīyaṁ.
an10.61:6.4	Sattapāhaṁ, bhikkhave, bojjhaṅge sāhāre vadāmi, no anāhāre.
an10.61:6.5	Ko cāhāro sattannaṁ bojjhaṅgānaṁ?
an10.61:6.6	‘Cattāro satipaṭṭhānā’tissa vacanīyaṁ.
an10.61:6.7	Cattāropāhaṁ, bhikkhave, satipaṭṭhāne sāhāre vadāmi, no anāhāre.
an10.61:6.8	Ko cāhāro catunnaṁ satipaṭṭhānānaṁ?
an10.61:6.9	‘Tīṇi sucaritānī’tissa vacanīyaṁ.
an10.61:6.10	Tīṇipāhaṁ, bhikkhave, sucaritāni sāhārāni vadāmi, no anāhārāni.
an10.61:6.11	Ko cāhāro tiṇṇaṁ sucaritānaṁ?
an10.61:6.12	‘Indriyasaṁvaro’tissa vacanīyaṁ.
an10.61:6.13	Indriyasaṁvarampāhaṁ, bhikkhave, sāhāraṁ vadāmi, no anāhāraṁ.
an10.61:6.14	Ko cāhāro indriyasaṁvarassa?
an10.61:6.15	‘Satisampajaññan’tissa vacanīyaṁ.
an10.61:6.16	Satisampajaññampāhaṁ, bhikkhave, sāhāraṁ vadāmi, no anāhāraṁ.
an10.61:6.17	Ko cāhāro satisampajaññassa?
an10.61:6.18	‘Yonisomanasikāro’tissa vacanīyaṁ.
an10.61:6.19	Yonisomanasikārampāhaṁ, bhikkhave, sāhāraṁ vadāmi, no anāhāraṁ.
an10.61:6.20	Ko cāhāro yonisomanasikārassa?
an10.61:6.21	‘Saddhā’tissa vacanīyaṁ.
an10.61:6.22	Saddhampāhaṁ, bhikkhave, sāhāraṁ vadāmi, no anāhāraṁ.
an10.61:6.23	Ko cāhāro saddhāya?
an10.61:6.24	‘Saddhammassavanan’tissa vacanīyaṁ.
an10.61:6.25	Saddhammassavanampāhaṁ, bhikkhave, sāhāraṁ vadāmi, no anāhāraṁ.
an10.61:6.26	Ko cāhāro saddhammassavanassa?
an10.61:6.27	‘Sappurisasaṁsevo’tissa vacanīyaṁ.
an10.61:7.1	Iti kho, bhikkhave, sappurisasaṁsevo paripūro saddhammassavanaṁ paripūreti, saddhammassavanaṁ paripūraṁ saddhaṁ paripūreti, saddhā paripūrā yonisomanasikāraṁ paripūreti, yonisomanasikāro paripūro satisampajaññaṁ paripūreti, satisampajaññaṁ paripūraṁ indriyasaṁvaraṁ paripūreti, indriyasaṁvaro paripūro tīṇi sucaritāni paripūreti, tīṇi sucaritāni paripūrāni cattāro satipaṭṭhāne paripūrenti, cattāro satipaṭṭhānā paripūrā satta bojjhaṅge paripūrenti, satta bojjhaṅgā paripūrā vijjāvimuttiṁ paripūrenti;
an10.61:7.2	evametissā vijjāvimuttiyā āhāro hoti, evañca pāripūri.
an10.61:8.1	Seyyathāpi, bhikkhave, uparipabbate thullaphusitake deve vassante taṁ udakaṁ yathāninnaṁ pavattamānaṁ pabbatakandarapadarasākhā paripūreti, pabbatakandarapadarasākhā paripūrā kusobbhe paripūrenti, kusobbhā paripūrā mahāsobbhe paripūrenti, mahāsobbhā paripūrā kunnadiyo paripūrenti, kunnadiyo paripūrā mahānadiyo paripūrenti, mahānadiyo paripūrā mahāsamuddaṁ sāgaraṁ paripūrenti;
an10.61:8.2	evametassa mahāsamuddassa sāgarassa āhāro hoti, evañca pāripūri.
an10.61:9.1	Evamevaṁ kho, bhikkhave, sappurisasaṁsevo paripūro saddhammassavanaṁ paripūreti, saddhammassavanaṁ paripūraṁ saddhaṁ paripūreti, saddhā paripūrā yonisomanasikāraṁ paripūreti, yonisomanasikāro paripūro satisampajaññaṁ paripūreti, satisampajaññaṁ paripūraṁ indriyasaṁvaraṁ paripūreti, indriyasaṁvaro paripūro tīṇi sucaritāni paripūreti, tīṇi sucaritāni paripūrāni cattāro satipaṭṭhāne paripūrenti, cattāro satipaṭṭhānā paripūrā satta bojjhaṅge paripūrenti, satta bojjhaṅgā paripūrā vijjāvimuttiṁ paripūrenti;
an10.61:9.2	evametissā vijjāvimuttiyā āhāro hoti, evañca pāripūrī”ti.
an10.61:9.3	Paṭhamaṁ.
an10.62:0.1	Aṅguttara Nikāya 10.62
an10.62:0.2	7. Yamakavagga
an10.62:0.3	Taṇhāsutta
an10.62:1.1	“Purimā, bhikkhave, koṭi na paññāyati bhavataṇhāya: ‘ito pubbe bhavataṇhā nāhosi, atha pacchā samabhavī’ti.
an10.62:1.2	Evañcetaṁ, bhikkhave, vuccati, atha ca pana paññāyati: ‘idappaccayā bhavataṇhā’ti.
an10.62:2.1	Bhavataṇhampāhaṁ, bhikkhave, sāhāraṁ vadāmi, no anāhāraṁ.
an10.62:2.2	Ko cāhāro bhavataṇhāya?
an10.62:2.3	‘Avijjā’tissa vacanīyaṁ.
an10.62:2.4	Avijjampāhaṁ, bhikkhave, sāhāraṁ vadāmi, no anāhāraṁ.
an10.62:2.5	Ko cāhāro avijjāya?
an10.62:2.6	‘Pañca nīvaraṇā’tissa vacanīyaṁ.
an10.62:2.7	Pañca nīvaraṇepāhaṁ, bhikkhave, sāhāre vadāmi, no anāhāre.
an10.62:2.8	Ko cāhāro pañcannaṁ nīvaraṇānaṁ?
an10.62:2.9	‘Tīṇi duccaritānī’tissa vacanīyaṁ.
an10.62:2.10	Tīṇipāhaṁ, bhikkhave, duccaritāni sāhārāni vadāmi, no anāhārāni.
an10.62:2.11	Ko cāhāro tiṇṇannaṁ duccaritānaṁ?
an10.62:2.12	‘Indriyaasaṁvaro’tissa vacanīyaṁ.
an10.62:2.13	Indriyaasaṁvarampāhaṁ, bhikkhave, sāhāraṁ vadāmi, no anāhāraṁ.
an10.62:2.14	Ko cāhāro indriyaasaṁvarassa?
an10.62:2.15	‘Asatāsampajaññan’tissa vacanīyaṁ.
an10.62:2.16	Asatāsampajaññampāhaṁ, bhikkhave, sāhāraṁ vadāmi, no anāhāraṁ.
an10.62:2.17	Ko cāhāro asatā sampajaññassa?
an10.62:2.18	‘Ayonisomanasikāro’tissa vacanīyaṁ.
an10.62:2.19	Ayonisomanasikārampāhaṁ, bhikkhave, sāhāraṁ vadāmi, no anāhāraṁ.
an10.62:2.20	Ko cāhāro ayonisomanasikārassa?
an10.62:2.21	‘Assaddhiyan’tissa vacanīyaṁ.
an10.62:2.22	Assaddhiyampāhaṁ, bhikkhave, sāhāraṁ vadāmi, no anāhāraṁ.
an10.62:2.23	Ko cāhāro assaddhiyassa?
an10.62:2.24	‘Assaddhammassavanan’tissa vacanīyaṁ.
an10.62:2.25	Assaddhammassavanampāhaṁ, bhikkhave, sāhāraṁ vadāmi, no anāhāraṁ.
an10.62:2.26	Ko cāhāro assaddhammassavanassa?
an10.62:2.27	‘Asappurisasaṁsevo’tissa vacanīyaṁ.
an10.62:3.1	Iti kho, bhikkhave, asappurisasaṁsevo paripūro assaddhammassavanaṁ paripūreti, assaddhammassavanaṁ paripūraṁ assaddhiyaṁ paripūreti, assaddhiyaṁ paripūraṁ ayonisomanasikāraṁ paripūreti, ayonisomanasikāro paripūro asatāsampajaññaṁ paripūreti, asatāsampajaññaṁ paripūraṁ indriyaasaṁvaraṁ paripūreti, indriyaasaṁvaro paripūro tīṇi duccaritāni paripūreti, tīṇi duccaritāni paripūrāni pañca nīvaraṇe paripūrenti, pañca nīvaraṇā paripūrā avijjaṁ paripūrenti, avijjā paripūrā bhavataṇhaṁ paripūreti;
an10.62:3.2	evametissā bhavataṇhāya āhāro hoti, evañca pāripūri.
an10.62:4.1	Seyyathāpi, bhikkhave, uparipabbate thullaphusitake deve vassante taṁ udakaṁ yathāninnaṁ pavattamānaṁ pabbatakandarapadarasākhā paripūreti, pabbatakandarapadarasākhā paripūrā kusobbhe paripūrenti, kusobbhā paripūrā mahāsobbhe paripūrenti, mahāsobbhā paripūrā kunnadiyo paripūrenti, kunnadiyo paripūrā mahānadiyo paripūrenti, mahānadiyo paripūrā mahāsamuddaṁ sāgaraṁ paripūrenti;
an10.62:4.2	evametassa mahāsamuddassa sāgarassa āhāro hoti, evañca pāripūri.
an10.62:5.1	Evamevaṁ kho, bhikkhave, asappurisasaṁsevo paripūro assaddhammassavanaṁ paripūreti, assaddhammassavanaṁ paripūraṁ assaddhiyaṁ paripūreti, assaddhiyaṁ paripūraṁ ayonisomanasikāraṁ paripūreti, ayonisomanasikāro paripūro asatāsampajaññaṁ paripūreti, asatāsampajaññaṁ paripūraṁ indriyaasaṁvaraṁ paripūreti, indriyaasaṁvaro paripūro tīṇi duccaritāni paripūreti, tīṇi duccaritāni paripūrāni pañca nīvaraṇe paripūrenti, pañca nīvaraṇā paripūrā avijjaṁ paripūrenti, avijjā paripūrā bhavataṇhaṁ paripūreti;
an10.62:5.2	evametissā bhavataṇhāya āhāro hoti, evañca pāripūri.
an10.62:6.1	Vijjāvimuttimpāhaṁ, bhikkhave, sāhāraṁ vadāmi, no anāhāraṁ.
an10.62:6.2	Ko cāhāro vijjāvimuttiyā?
an10.62:6.3	‘Satta bojjhaṅgā’tissa vacanīyaṁ.
an10.62:6.4	Sattapāhaṁ, bhikkhave, bojjhaṅge sāhāre vadāmi, no anāhāre.
an10.62:6.5	Ko cāhāro sattannaṁ bojjhaṅgānaṁ?
an10.62:6.6	‘Cattāro satipaṭṭhānā’tissa vacanīyaṁ.
an10.62:6.7	Cattāropāhaṁ, bhikkhave, satipaṭṭhāne sāhāre vadāmi, no anāhāre.
an10.62:6.8	Ko cāhāro catunnaṁ satipaṭṭhānānaṁ?
an10.62:6.9	‘Tīṇi sucaritānī’tissa vacanīyaṁ.
an10.62:6.10	Tīṇipāhaṁ, bhikkhave, sucaritāni sāhārāni vadāmi, no anāhārāni.
an10.62:6.11	Ko cāhāro tiṇṇannaṁ sucaritānaṁ?
an10.62:6.12	‘Indriyasaṁvaro’tissa vacanīyaṁ.
an10.62:6.13	Indriyasaṁvarampāhaṁ, bhikkhave, sāhāraṁ vadāmi, no anāhāraṁ.
an10.62:6.14	Ko cāhāro indriyasaṁvarassa?
an10.62:6.15	‘Satisampajaññan’tissa vacanīyaṁ.
an10.62:6.16	Satisampajaññampāhaṁ, bhikkhave, sāhāraṁ vadāmi, no anāhāraṁ.
an10.62:6.17	Ko cāhāro satisampajaññassa?
an10.62:6.18	‘Yonisomanasikāro’tissa vacanīyaṁ.
an10.62:6.19	Yonisomanasikārampāhaṁ, bhikkhave, sāhāraṁ vadāmi, no anāhāraṁ.
an10.62:6.20	Ko cāhāro yonisomanasikārassa?
an10.62:6.21	‘Saddhā’tissa vacanīyaṁ.
an10.62:6.22	Saddhampāhaṁ, bhikkhave, sāhāraṁ vadāmi, no anāhāraṁ.
an10.62:6.23	Ko cāhāro saddhāya?
an10.62:6.24	‘Saddhammassavanan’tissa vacanīyaṁ.
an10.62:6.25	Saddhammassavanampāhaṁ, bhikkhave, sāhāraṁ vadāmi, no anāhāraṁ.
an10.62:6.26	Ko cāhāro saddhammassavanassa?
an10.62:6.27	‘Sappurisasaṁsevo’tissa vacanīyaṁ.
an10.62:7.1	Iti kho, bhikkhave, sappurisasaṁsevo paripūro saddhammassavanaṁ paripūreti, saddhammassavanaṁ paripūraṁ saddhaṁ paripūreti, saddhā paripūrā yonisomanasikāraṁ paripūreti, yonisomanasikāro paripūro satisampajaññaṁ paripūreti, satisampajaññaṁ paripūraṁ indriyasaṁvaraṁ paripūreti, indriyasaṁvaro paripūro tīṇi sucaritāni paripūreti, tīṇi sucaritāni paripūrāni cattāro satipaṭṭhāne paripūrenti, cattāro satipaṭṭhānā paripūrā satta bojjhaṅge paripūrenti, satta bojjhaṅgā paripūrā vijjāvimuttiṁ paripūrenti;
an10.62:7.2	evametissā vijjāvimuttiyā āhāro hoti, evañca pāripūri.
an10.62:8.1	Seyyathāpi, bhikkhave, uparipabbate thullaphusitake deve vassante taṁ udakaṁ yathāninnaṁ pavattamānaṁ …pe…
an10.62:8.2	evametassa mahāsamuddassa sāgarassa āhāro hoti, evañca pāripūri.
an10.62:8.3	Evamevaṁ kho, bhikkhave, sappurisasaṁsevo paripūro saddhammassavanaṁ paripūreti …pe…
an10.62:8.4	evametissā vijjāvimuttiyā āhāro hoti, evañca pāripūrī”ti.
an10.62:8.5	Dutiyaṁ.
an10.63:0.1	Aṅguttara Nikāya 10.63
an10.63:0.2	7. Yamakavagga
an10.63:0.3	Niṭṭhaṅgatasutta
an10.63:1.1	“Ye keci, bhikkhave, mayi niṭṭhaṁ gatā sabbe te diṭṭhisampannā.
an10.63:1.2	Tesaṁ diṭṭhisampannānaṁ pañcannaṁ idha niṭṭhā, pañcannaṁ idha vihāya niṭṭhā.
an10.63:1.3	Katamesaṁ pañcannaṁ idha niṭṭhā?
an10.63:1.4	Sattakkhattuparamassa, kolaṅkolassa, ekabījissa, sakadāgāmissa, yo ca diṭṭheva dhamme arahā—
an10.63:1.5	imesaṁ pañcannaṁ idha niṭṭhā.
an10.63:1.6	Katamesaṁ pañcannaṁ idha vihāya niṭṭhā?
an10.63:1.7	Antarāparinibbāyissa, upahaccaparinibbāyissa, asaṅkhāraparinibbāyissa, sasaṅkhāraparinibbāyissa, uddhaṁsotassa akaniṭṭhagāmino—
an10.63:1.8	imesaṁ pañcannaṁ idha vihāya niṭṭhā.
an10.63:1.9	Ye keci, bhikkhave, mayi niṭṭhaṁ gatā, sabbe te diṭṭhisampannā.
an10.63:1.10	Tesaṁ diṭṭhisampannānaṁ imesaṁ pañcannaṁ idha niṭṭhā, imesaṁ pañcannaṁ idha vihāya niṭṭhā”ti.
an10.63:1.11	Tatiyaṁ.
an10.64:0.1	Aṅguttara Nikāya 10.64
an10.64:0.2	7. Yamakavagga
an10.64:0.3	Aveccappasannasutta
an10.64:1.1	“Ye keci, bhikkhave, mayi aveccappasannā, sabbe te sotāpannā.
an10.64:1.2	Tesaṁ sotāpannānaṁ pañcannaṁ idha niṭṭhā, pañcannaṁ idha vihāya niṭṭhā.
an10.64:1.3	Katamesaṁ pañcannaṁ idha niṭṭhā?
an10.64:1.4	Sattakkhattuparamassa, kolaṅkolassa, ekabījissa, sakadāgāmissa, yo ca diṭṭheva dhamme arahā—
an10.64:1.5	imesaṁ pañcannaṁ idha niṭṭhā.
an10.64:1.6	Katamesaṁ pañcannaṁ idha vihāya niṭṭhā?
an10.64:1.7	Antarāparinibbāyissa, upahaccaparinibbāyissa, asaṅkhāraparinibbāyissa, sasaṅkhāraparinibbāyissa, uddhaṁsotassa akaniṭṭhagāmino—
an10.64:1.8	imesaṁ pañcannaṁ idha vihāya niṭṭhā.
an10.64:1.9	Ye keci, bhikkhave, mayi aveccappasannā sabbe te sotāpannā.
an10.64:1.10	Tesaṁ sotāpannānaṁ imesaṁ pañcannaṁ idha niṭṭhā, imesaṁ pañcannaṁ idha vihāya niṭṭhā”ti.
an10.64:1.11	Catutthaṁ.
an10.65:0.1	Aṅguttara Nikāya 10.65
an10.65:0.2	7. Yamakavagga
an10.65:0.3	Paṭhamasukhasutta
an10.65:1.1	Ekaṁ samayaṁ āyasmā sāriputto magadhesu viharati nālakagāmake.
an10.65:1.2	Atha kho sāmaṇḍakāni paribbājako yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an10.65:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho sāmaṇḍakāni paribbājako āyasmantaṁ sāriputtaṁ etadavoca:
an10.65:2.1	“Kiṁ nu kho, āvuso sāriputta, sukhaṁ, kiṁ dukkhan”ti?
an10.65:2.2	“Abhinibbatti kho, āvuso, dukkhā, anabhinibbatti sukhā.
an10.65:2.3	Abhinibbattiyā, āvuso, sati idaṁ dukkhaṁ pāṭikaṅkhaṁ—
an10.65:2.4	sītaṁ uṇhaṁ jighacchā pipāsā uccāro passāvo aggisamphasso daṇḍasamphasso satthasamphasso ñātīpi mittāpi saṅgamma samāgamma rosenti.
an10.65:2.5	Abhinibbattiyā, āvuso, sati idaṁ dukkhaṁ pāṭikaṅkhaṁ.
an10.65:2.6	Anabhinibbattiyā, āvuso, sati idaṁ sukhaṁ pāṭikaṅkhaṁ—
an10.65:2.7	na sītaṁ na uṇhaṁ na jighacchā na pipāsā na uccāro na passāvo na aggisamphasso na daṇḍasamphasso na satthasamphasso ñātīpi mittāpi saṅgamma samāgamma na rosenti.
an10.65:2.8	Anabhinibbattiyā, āvuso, sati idaṁ sukhaṁ pāṭikaṅkhan”ti.
an10.65:2.9	Pañcamaṁ.
an10.66:0.1	Aṅguttara Nikāya 10.66
an10.66:0.2	7. Yamakavagga
an10.66:0.3	Dutiyasukhasutta
an10.66:1.1	Ekaṁ samayaṁ āyasmā sāriputto magadhesu viharati nālakagāmake.
an10.66:1.2	Atha kho sāmaṇḍakāni paribbājako yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an10.66:1.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho sāmaṇḍakāni paribbājako āyasmantaṁ sāriputtaṁ etadavoca:
an10.66:2.1	“Kiṁ nu kho, āvuso, sāriputta, imasmiṁ dhammavinaye sukhaṁ, kiṁ dukkhan”ti?
an10.66:2.2	“Anabhirati kho, āvuso, imasmiṁ dhammavinaye dukkhā, abhirati sukhā.
an10.66:2.3	Anabhiratiyā, āvuso, sati idaṁ dukkhaṁ pāṭikaṅkhaṁ—
an10.66:2.4	gacchantopi sukhaṁ sātaṁ nādhigacchati,
an10.66:2.5	ṭhitopi …
an10.66:2.6	nisinnopi …
an10.66:2.7	sayānopi …
an10.66:2.8	gāmagatopi …
an10.66:2.9	araññagatopi …
an10.66:2.10	rukkhamūlagatopi …
an10.66:2.11	suññāgāragatopi …
an10.66:2.12	abbhokāsagatopi …
an10.66:2.13	bhikkhumajjhagatopi sukhaṁ sātaṁ nādhigacchati.
an10.66:2.14	Anabhiratiyā, āvuso, sati idaṁ dukkhaṁ pāṭikaṅkhaṁ.
an10.66:3.1	Abhiratiyā, āvuso, sati idaṁ sukhaṁ pāṭikaṅkhaṁ—
an10.66:3.2	gacchantopi sukhaṁ sātaṁ adhigacchati,
an10.66:3.3	ṭhitopi …
an10.66:3.4	nisinnopi …
an10.66:3.5	sayānopi …
an10.66:3.6	gāmagatopi …
an10.66:3.7	araññagatopi …
an10.66:3.8	rukkhamūlagatopi …
an10.66:3.9	suññāgāragatopi …
an10.66:3.10	abbhokāsagatopi …
an10.66:3.11	bhikkhumajjhagatopi sukhaṁ sātaṁ adhigacchati.
an10.66:3.12	Abhiratiyā, āvuso, sati idaṁ sukhaṁ pāṭikaṅkhan”ti.
an10.66:3.13	Chaṭṭhaṁ.
an10.67:0.1	Aṅguttara Nikāya 10.67
an10.67:0.2	7. Yamakavagga
an10.67:0.3	Paṭhamanaḷakapānasutta
an10.67:1.1	Ekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena naḷakapānaṁ nāma kosalānaṁ nigamo tadavasari.
an10.67:1.2	Tatra sudaṁ bhagavā naḷakapāne viharati palāsavane.
an10.67:1.3	Tena kho pana samayena bhagavā tadahuposathe bhikkhusaṅghaparivuto nisinno hoti.
an10.67:1.4	Atha kho bhagavā bahudeva rattiṁ bhikkhūnaṁ dhammiyā kathāya sandassetvā samādapetvā samuttejetvā sampahaṁsetvā tuṇhībhūtaṁ tuṇhībhūtaṁ bhikkhusaṅghaṁ anuviloketvā āyasmantaṁ sāriputtaṁ āmantesi:
an10.67:2.1	“Vigatathinamiddho kho, sāriputta, bhikkhusaṅgho.
an10.67:2.2	Paṭibhātu taṁ, sāriputta, bhikkhūnaṁ dhammī kathā.
an10.67:2.3	Piṭṭhi me āgilāyati;
an10.67:2.4	tamahaṁ āyamissāmī”ti.
an10.67:2.5	“Evaṁ, bhante”ti kho āyasmā sāriputto bhagavato paccassosi.
an10.67:3.1	Atha kho bhagavā catugguṇaṁ saṅghāṭiṁ paññāpetvā dakkhiṇena passena sīhaseyyaṁ kappesi pāde pādaṁ accādhāya sato sampajāno uṭṭhānasaññaṁ manasi karitvā.
an10.67:3.2	Tatra kho āyasmā sāriputto bhikkhū āmantesi:
an10.67:3.3	“āvuso bhikkhave”ti.
an10.67:3.4	“Āvuso”ti kho te bhikkhū āyasmato sāriputtassa paccassosuṁ.
an10.67:3.5	Āyasmā sāriputto etadavoca:
an10.67:4.1	“Yassa kassaci, āvuso, saddhā natthi kusalesu dhammesu, hirī natthi …
an10.67:4.2	ottappaṁ natthi …
an10.67:4.3	vīriyaṁ natthi …
an10.67:4.4	paññā natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi.
an10.67:4.5	Seyyathāpi, āvuso, kāḷapakkhe candassa yā ratti vā divaso vā āgacchati, hāyateva vaṇṇena hāyati maṇḍalena hāyati ābhāya hāyati ārohapariṇāhena;
an10.67:4.6	evamevaṁ kho, āvuso, yassa kassaci saddhā natthi kusalesu dhammesu, hirī natthi …
an10.67:4.7	ottappaṁ natthi …
an10.67:4.8	vīriyaṁ natthi …
an10.67:4.9	paññā natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi.
an10.67:5.1	‘Assaddho purisapuggalo’ti, āvuso, parihānametaṁ;
an10.67:5.2	‘ahiriko purisapuggalo’ti, āvuso, parihānametaṁ;
an10.67:5.3	‘anottappī purisapuggalo’ti, āvuso, parihānametaṁ;
an10.67:5.4	‘kusīto purisapuggalo’ti, āvuso, parihānametaṁ;
an10.67:5.5	‘duppañño purisapuggalo’ti, āvuso, parihānametaṁ;
an10.67:5.6	‘kodhano purisapuggalo’ti, āvuso, parihānametaṁ;
an10.67:5.7	‘upanāhī purisapuggalo’ti, āvuso, parihānametaṁ;
an10.67:5.8	‘pāpiccho purisapuggalo’ti, āvuso, parihānametaṁ;
an10.67:5.9	‘pāpamitto purisapuggalo’ti, āvuso, parihānametaṁ;
an10.67:5.10	‘micchādiṭṭhiko purisapuggalo’ti, āvuso, parihānametaṁ.
an10.67:6.1	Yassa kassaci, āvuso, saddhā atthi kusalesu dhammesu, hirī atthi …
an10.67:6.2	ottappaṁ atthi …
an10.67:6.3	paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni.
an10.67:6.4	Seyyathāpi, āvuso, juṇhapakkhe candassa yā ratti vā divaso vā āgacchati, vaḍḍhateva vaṇṇena vaḍḍhati maṇḍalena vaḍḍhati ābhāya vaḍḍhati ārohapariṇāhena;
an10.67:6.5	evamevaṁ kho, āvuso, yassa kassaci saddhā atthi kusalesu dhammesu, hirī atthi …
an10.67:6.6	ottappaṁ atthi …
an10.67:6.7	vīriyaṁ atthi …
an10.67:6.8	paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni.
an10.67:7.1	‘Saddho purisapuggalo’ti, āvuso, aparihānametaṁ;
an10.67:7.2	‘hirīmā purisapuggalo’ti, āvuso, aparihānametaṁ;
an10.67:7.3	‘ottappī purisapuggalo’ti, āvuso, aparihānametaṁ;
an10.67:7.4	‘āraddhavīriyo purisapuggalo’ti, āvuso, aparihānametaṁ;
an10.67:7.5	‘paññavā purisapuggalo’ti, āvuso, aparihānametaṁ;
an10.67:7.6	‘akkodhano purisapuggalo’ti, āvuso, aparihānametaṁ;
an10.67:7.7	‘anupanāhī purisapuggalo’ti, āvuso, aparihānametaṁ;
an10.67:7.8	‘appiccho purisapuggalo’ti, āvuso, aparihānametaṁ;
an10.67:7.9	‘kalyāṇamitto purisapuggalo’ti, āvuso, aparihānametaṁ;
an10.67:7.10	‘sammādiṭṭhiko purisapuggalo’ti, āvuso, aparihānametan”ti.
an10.67:8.1	Atha kho bhagavā paccuṭṭhāya āyasmantaṁ sāriputtaṁ āmantesi:
an10.67:8.2	“sādhu sādhu, sāriputta.
an10.67:8.3	Yassa kassaci, sāriputta, saddhā natthi kusalesu dhammesu, hirī natthi …
an10.67:8.4	ottappaṁ natthi …
an10.67:8.5	vīriyaṁ natthi …
an10.67:8.6	paññā natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi.
an10.67:8.7	Seyyathāpi, sāriputta, kāḷapakkhe candassa yā ratti vā divaso vā āgacchati, hāyateva vaṇṇena hāyati maṇḍalena hāyati ābhāya hāyati ārohapariṇāhena;
an10.67:8.8	evamevaṁ kho, sāriputta, yassa kassaci saddhā natthi kusalesu dhammesu …pe…
an10.67:8.9	paññā natthi kusalesu dhammesu, tassa yā ratti vā divaso vā …pe… no vuddhi.
an10.67:9.1	‘Assaddho purisapuggalo’ti, sāriputta, parihānametaṁ;
an10.67:9.2	ahiriko …
an10.67:9.3	anottappī …
an10.67:9.4	kusīto …
an10.67:9.5	duppañño …
an10.67:9.6	kodhano …
an10.67:9.7	upanāhī …
an10.67:9.8	pāpiccho …
an10.67:9.9	pāpamitto …
an10.67:9.10	‘micchādiṭṭhiko purisapuggalo’ti, sāriputta, parihānametaṁ.
an10.67:10.1	Yassa kassaci, sāriputta, saddhā atthi kusalesu dhammesu, hirī atthi …
an10.67:10.2	ottappaṁ atthi …
an10.67:10.3	vīriyaṁ atthi …
an10.67:10.4	paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni.
an10.67:10.5	Seyyathāpi, sāriputta, juṇhapakkhe candassa yā ratti vā divaso vā āgacchati, vaḍḍhateva vaṇṇena vaḍḍhati maṇḍalena vaḍḍhati ābhāya vaḍḍhati ārohapariṇāhena;
an10.67:10.6	evamevaṁ kho, sāriputta, yassa kassaci saddhā atthi kusalesu dhammesu, hirī atthi …
an10.67:10.7	ottappaṁ atthi …
an10.67:10.8	vīriyaṁ atthi …
an10.67:10.9	paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni.
an10.67:11.1	‘Saddho purisapuggalo’ti, sāriputta, aparihānametaṁ;
an10.67:11.2	hirīmā …
an10.67:11.3	ottappī …
an10.67:11.4	āraddhavīriyo …
an10.67:11.5	paññavā …
an10.67:11.6	akkodhano …
an10.67:11.7	anupanāhī …
an10.67:11.8	appiccho …
an10.67:11.9	kalyāṇamitto …
an10.67:11.10	‘sammādiṭṭhiko purisapuggalo’ti, sāriputta, aparihānametan”ti.
an10.67:11.11	Sattamaṁ.
an10.68:0.1	Aṅguttara Nikāya 10.68
an10.68:0.2	7. Yamakavagga
an10.68:0.3	Dutiyanaḷakapānasutta
an10.68:1.1	Ekaṁ samayaṁ bhagavā naḷakapāne viharati palāsavane.
an10.68:1.2	Tena kho pana samayena bhagavā tadahuposathe bhikkhusaṅghaparivuto nisinno hoti.
an10.68:1.3	Atha kho bhagavā bahudeva rattiṁ bhikkhūnaṁ dhammiyā kathāya sandassetvā samādapetvā samuttejetvā sampahaṁsetvā tuṇhībhūtaṁ tuṇhībhūtaṁ bhikkhusaṅghaṁ anuviloketvā āyasmantaṁ sāriputtaṁ āmantesi:
an10.68:2.1	“Vigatathinamiddho kho, sāriputta, bhikkhusaṅgho.
an10.68:2.2	Paṭibhātu taṁ, sāriputta, bhikkhūnaṁ dhammī kathā.
an10.68:2.3	Piṭṭhi me āgilāyati;
an10.68:2.4	tamahaṁ āyamissāmī”ti.
an10.68:2.5	“Evaṁ, bhante”ti kho āyasmā sāriputto bhagavato paccassosi.
an10.68:3.1	Atha kho bhagavā catugguṇaṁ saṅghāṭiṁ paññāpetvā dakkhiṇena passena sīhaseyyaṁ kappesi pāde pādaṁ accādhāya sato sampajāno uṭṭhānasaññaṁ manasi karitvā.
an10.68:3.2	Tatra kho āyasmā sāriputto bhikkhū āmantesi:
an10.68:3.3	“āvuso bhikkhave”ti.
an10.68:3.4	“Āvuso”ti kho te bhikkhū āyasmato sāriputtassa paccassosuṁ.
an10.68:3.5	Āyasmā sāriputto etadavoca:
an10.68:4.1	“Yassa kassaci, āvuso, saddhā natthi kusalesu dhammesu, hirī natthi …
an10.68:4.2	ottappaṁ natthi …
an10.68:4.3	vīriyaṁ natthi …
an10.68:4.4	paññā natthi …
an10.68:4.5	sotāvadhānaṁ natthi …
an10.68:4.6	dhammadhāraṇā natthi …
an10.68:4.7	atthūpaparikkhā natthi …
an10.68:4.8	dhammānudhammappaṭipatti natthi …
an10.68:4.9	appamādo natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi.
an10.68:4.10	Seyyathāpi, āvuso, kāḷapakkhe candassa yā ratti vā divaso vā āgacchati, hāyateva vaṇṇena hāyati maṇḍalena hāyati ābhāya hāyati ārohapariṇāhena;
an10.68:4.11	evamevaṁ kho, āvuso, yassa kassaci saddhā natthi kusalesu dhammesu, hirī natthi …
an10.68:4.12	ottappaṁ natthi …
an10.68:4.13	vīriyaṁ natthi …
an10.68:4.14	paññā natthi …
an10.68:4.15	sotāvadhānaṁ natthi …
an10.68:4.16	dhammadhāraṇā natthi …
an10.68:4.17	atthūpaparikkhā natthi …
an10.68:4.18	dhammānudhammappaṭipatti natthi …
an10.68:4.19	appamādo natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi.
an10.68:5.1	Yassa kassaci, āvuso, saddhā atthi kusalesu dhammesu, hirī atthi …
an10.68:5.2	ottappaṁ atthi …
an10.68:5.3	vīriyaṁ atthi …
an10.68:5.4	paññā atthi …
an10.68:5.5	sotāvadhānaṁ atthi …
an10.68:5.6	dhammadhāraṇā atthi …
an10.68:5.7	atthūpaparikkhā atthi …
an10.68:5.8	dhammānudhammappaṭipatti atthi …
an10.68:5.9	appamādo atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni.
an10.68:5.10	Seyyathāpi, āvuso, juṇhapakkhe candassa yā ratti vā divaso vā āgacchati, vaḍḍhateva vaṇṇena vaḍḍhati maṇḍalena vaḍḍhati ābhāya vaḍḍhati ārohapariṇāhena;
an10.68:5.11	evamevaṁ kho, āvuso, yassa kassaci saddhā atthi kusalesu dhammesu …pe…
an10.68:5.12	appamādo atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihānī”ti.
an10.68:6.1	Atha kho bhagavā paccuṭṭhāya āyasmantaṁ sāriputtaṁ āmantesi:
an10.68:6.2	“sādhu sādhu, sāriputta.
an10.68:6.3	Yassa kassaci, sāriputta, saddhā natthi kusalesu dhammesu hirī natthi …
an10.68:6.4	ottappaṁ natthi …
an10.68:6.5	paññā natthi …
an10.68:6.6	vīriyaṁ natthi …
an10.68:6.7	sotāvadhānaṁ natthi …
an10.68:6.8	dhammadhāraṇā natthi …
an10.68:6.9	atthūpaparikkhā natthi …
an10.68:6.10	dhammānudhammappaṭipatti natthi …
an10.68:6.11	appamādo natthi kusalesu dhammesu tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi.
an10.68:6.12	Seyyathāpi, sāriputta, kāḷapakkhe candassa yā ratti vā divaso vā āgacchati, hāyateva vaṇṇena hāyati maṇḍalena hāyati ābhāya hāyati ārohapariṇāhena;
an10.68:6.13	evamevaṁ kho, sāriputta, yassa kassaci saddhā natthi kusalesu dhammesu …pe…
an10.68:6.14	appamādo natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi.
an10.68:7.1	Yassa kassaci, sāriputta, saddhā atthi kusalesu dhammesu hirī atthi …
an10.68:7.2	ottappaṁ atthi …
an10.68:7.3	vīriyaṁ atthi …
an10.68:7.4	paññā atthi …
an10.68:7.5	sotāvadhānaṁ atthi …
an10.68:7.6	dhammadhāraṇā atthi …
an10.68:7.7	atthūpaparikkhā atthi …
an10.68:7.8	dhammānudhammappaṭipatti atthi …
an10.68:7.9	appamādo atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni.
an10.68:7.10	Seyyathāpi, sāriputta, juṇhapakkhe candassa yā ratti vā divaso vā āgacchati, vaḍḍhateva vaṇṇena vaḍḍhati maṇḍalena vaḍḍhati ābhāya vaḍḍhati ārohapariṇāhena;
an10.68:7.11	evamevaṁ kho, sāriputta, yassa kassaci saddhā atthi kusalesu dhammesu …pe…
an10.68:7.12	appamādo atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihānī”ti.
an10.68:7.13	Aṭṭhamaṁ.
an10.69:0.1	Aṅguttara Nikāya 10.69
an10.69:0.2	7. Yamakavagga
an10.69:0.3	Paṭhamakathāvatthusutta
an10.69:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.69:1.2	Tena kho pana samayena sambahulā bhikkhū pacchābhattaṁ piṇḍapātapaṭikkantā upaṭṭhānasālāyaṁ sannisinnā sannipatitā anekavihitaṁ tiracchānakathaṁ anuyuttā viharanti, seyyathidaṁ—
an10.69:1.3	rājakathaṁ corakathaṁ mahāmattakathaṁ senākathaṁ bhayakathaṁ yuddhakathaṁ annakathaṁ pānakathaṁ vatthakathaṁ sayanakathaṁ mālākathaṁ gandhakathaṁ ñātikathaṁ yānakathaṁ gāmakathaṁ nigamakathaṁ nagarakathaṁ janapadakathaṁ itthikathaṁ sūrakathaṁ visikhākathaṁ kumbhaṭṭhānakathaṁ pubbapetakathaṁ nānattakathaṁ lokakkhāyikaṁ samuddakkhāyikaṁ itibhavābhavakathaṁ iti vāti.
an10.69:2.1	Atha kho bhagavā sāyanhasamayaṁ paṭisallānā vuṭṭhito yena upaṭṭhānasālā tenupasaṅkami; upasaṅkamitvā paññatte āsane nisīdi.
an10.69:2.2	Nisajja kho bhagavā bhikkhū āmantesi:
an10.69:2.3	“kāya nuttha, bhikkhave, etarahi kathāya sannisinnā sannipatitā, kā ca pana vo antarākathā vippakatā”ti?
an10.69:3.1	“Idha mayaṁ, bhante, pacchābhattaṁ piṇḍapātapaṭikkantā upaṭṭhānasālāyaṁ sannisinnā sannipatitā anekavihitaṁ tiracchānakathaṁ anuyuttā viharāma, seyyathidaṁ—
an10.69:3.2	rājakathaṁ corakathaṁ …pe… itibhavābhavakathaṁ iti vā”ti.
an10.69:3.3	“Na kho panetaṁ, bhikkhave, tumhākaṁ patirūpaṁ kulaputtānaṁ saddhāya agārasmā anagāriyaṁ pabbajitānaṁ, yaṁ tumhe anekavihitaṁ tiracchānakathaṁ anuyuttā vihareyyātha, seyyathidaṁ—
an10.69:3.4	rājakathaṁ corakathaṁ mahāmattakathaṁ senākathaṁ bhayakathaṁ yuddhakathaṁ annakathaṁ pānakathaṁ vatthakathaṁ sayanakathaṁ mālākathaṁ gandhakathaṁ ñātikathaṁ yānakathaṁ gāmakathaṁ nigamakathaṁ nagarakathaṁ janapadakathaṁ itthikathaṁ sūrakathaṁ visikhākathaṁ kumbhaṭṭhānakathaṁ pubbapetakathaṁ nānattakathaṁ lokakkhāyikaṁ samuddakkhāyikaṁ itibhavābhavakathaṁ iti vāti.
an10.69:4.1	Dasayimāni, bhikkhave, kathāvatthūni.
an10.69:4.2	Katamāni dasa?
an10.69:4.3	Appicchakathā, santuṭṭhikathā, pavivekakathā, asaṁsaggakathā, vīriyārambhakathā, sīlakathā, samādhikathā, paññākathā, vimuttikathā, vimuttiñāṇadassanakathāti—
an10.69:4.4	imāni kho, bhikkhave, dasa kathāvatthūni.
an10.69:5.1	Imesañce tumhe, bhikkhave, dasannaṁ kathāvatthūnaṁ upādāyupādāya kathaṁ katheyyātha, imesampi candimasūriyānaṁ evaṁmahiddhikānaṁ evaṁmahānubhāvānaṁ tejasā tejaṁ pariyādiyeyyātha, ko pana vādo aññatitthiyānaṁ paribbājakānan”ti.
an10.69:5.2	Navamaṁ.
an10.70:0.1	Aṅguttara Nikāya 10.70
an10.70:0.2	7. Yamakavagga
an10.70:0.3	Dutiyakathāvatthusutta
an10.70:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.70:1.2	Tena kho pana samayena sambahulā bhikkhū pacchābhattaṁ piṇḍapātapaṭikkantā upaṭṭhānasālāyaṁ sannisinnā sannipatitā anekavihitaṁ tiracchānakathaṁ anuyuttā viharanti, seyyathidaṁ—
an10.70:1.3	rājakathaṁ corakathaṁ mahāmattakathaṁ …pe… itibhavābhavakathaṁ iti vāti.
an10.70:2.1	“Dasayimāni, bhikkhave, pāsaṁsāni ṭhānāni.
an10.70:2.2	Katamāni dasa?
an10.70:2.3	Idha, bhikkhave, bhikkhu attanā ca appiccho hoti, appicchakathañca bhikkhūnaṁ kattā hoti.
an10.70:2.4	‘Appiccho bhikkhu appicchakathañca bhikkhūnaṁ kattā’ti pāsaṁsametaṁ ṭhānaṁ.
an10.70:3.1	Attanā ca santuṭṭho hoti, santuṭṭhikathañca bhikkhūnaṁ kattā hoti.
an10.70:3.2	‘Santuṭṭho bhikkhu santuṭṭhikathañca bhikkhūnaṁ kattā’ti pāsaṁsametaṁ ṭhānaṁ.
an10.70:4.1	Attanā ca pavivitto hoti, pavivekakathañca bhikkhūnaṁ kattā hoti.
an10.70:4.2	‘Pavivitto bhikkhu pavivekakathañca bhikkhūnaṁ kattā’ti pāsaṁsametaṁ ṭhānaṁ.
an10.70:5.1	Attanā ca asaṁsaṭṭho hoti, asaṁsaṭṭhakathañca bhikkhūnaṁ kattā hoti.
an10.70:5.2	‘Asaṁsaṭṭho bhikkhu asaṁsaṭṭhakathañca bhikkhūnaṁ kattā’ti pāsaṁsametaṁ ṭhānaṁ.
an10.70:6.1	Attanā ca āraddhavīriyo hoti, vīriyārambhakathañca bhikkhūnaṁ kattā hoti.
an10.70:6.2	‘Āraddhavīriyo bhikkhu vīriyārambhakathañca bhikkhūnaṁ kattā’ti pāsaṁsametaṁ ṭhānaṁ.
an10.70:7.1	Attanā ca sīlasampanno hoti, sīlasampadākathañca bhikkhūnaṁ kattā hoti.
an10.70:7.2	‘Sīlasampanno bhikkhu sīlasampadākathañca bhikkhūnaṁ kattā’ti pāsaṁsametaṁ ṭhānaṁ.
an10.70:8.1	Attanā ca samādhisampanno hoti, samādhisampadākathañca bhikkhūnaṁ kattā hoti.
an10.70:8.2	‘Samādhisampanno bhikkhu samādhisampadākathañca bhikkhūnaṁ kattā’ti pāsaṁsametaṁ ṭhānaṁ.
an10.70:9.1	Attanā ca paññāsampanno hoti, paññāsampadākathañca bhikkhūnaṁ kattā hoti.
an10.70:9.2	‘Paññāsampanno bhikkhu paññāsampadākathañca bhikkhūnaṁ kattā’ti pāsaṁsametaṁ ṭhānaṁ.
an10.70:10.1	Attanā ca vimuttisampanno hoti, vimuttisampadākathañca bhikkhūnaṁ kattā hoti.
an10.70:10.2	‘Vimuttisampanno bhikkhu vimuttisampadākathañca bhikkhūnaṁ kattā’ti pāsaṁsametaṁ ṭhānaṁ.
an10.70:11.1	Attanā ca vimuttiñāṇadassanasampanno hoti, vimuttiñāṇadassanasampadākathañca bhikkhūnaṁ kattā hoti.
an10.70:11.2	‘Vimuttiñāṇadassanasampanno bhikkhu vimuttiñāṇadassanasampadākathañca bhikkhūnaṁ kattā’ti pāsaṁsametaṁ ṭhānaṁ.
an10.70:12.1	Imāni kho, bhikkhave, dasa pāsaṁsāni ṭhānānī”ti.
an10.70:12.2	Dasamaṁ.
an10.70:12.3	Yamakavaggo dutiyo.
an10.70:13.0	Tassuddānaṁ
an10.70:13.1	Avijjā taṇhā niṭṭhā ca,
an10.70:13.2	avecca dve sukhāni ca;
an10.70:13.3	Naḷakapāne dve vuttā,
an10.70:13.4	kathāvatthūpare duveti.
an10.71:0.1	Aṅguttara Nikāya 10.71
an10.71:0.2	8. Ākaṅkhavagga
an10.71:0.3	Ākaṅkhasutta
an10.71:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.71:1.2	Tatra kho bhagavā bhikkhū āmantesi:
an10.71:1.3	“bhikkhavo”ti.
an10.71:1.4	“Bhadante”ti te bhikkhū bhagavato paccassosuṁ.
an10.71:1.5	Bhagavā etadavoca:
an10.71:2.1	“Sampannasīlā, bhikkhave, viharatha sampannapātimokkhā, pātimokkhasaṁvarasaṁvutā viharatha ācāragocarasampannā aṇumattesu vajjesu bhayadassāvino, samādāya sikkhatha sikkhāpadesu.
an10.71:3.1	Ākaṅkheyya ce, bhikkhave, bhikkhu ‘sabrahmacārīnaṁ piyo cassaṁ manāpo ca garu ca bhāvanīyo cā’ti, sīlesvevassa paripūrakārī ajjhattaṁ cetosamathamanuyutto anirākatajjhāno vipassanāya samannāgato brūhetā suññāgārānaṁ.
an10.71:4.1	Ākaṅkheyya ce, bhikkhave, bhikkhu ‘lābhī assaṁ cīvarapiṇḍapātasenāsanagilānapaccayabhesajjaparikkhārānan’ti, sīlesvevassa paripūrakārī ajjhattaṁ cetosamathamanuyutto anirākatajjhāno vipassanāya samannāgato brūhetā suññāgārānaṁ.
an10.71:5.1	Ākaṅkheyya ce, bhikkhave, bhikkhu ‘yesāhaṁ paribhuñjāmi cīvarapiṇḍapātasenāsanagilānapaccayabhesajjaparikkhārānaṁ tesaṁ te kārā mahapphalā assu mahānisaṁsā’ti, sīlesvevassa …pe… brūhetā suññāgārānaṁ.
an10.71:6.1	Ākaṅkheyya ce, bhikkhave, bhikkhu ‘ye me petā ñātī sālohitā kālaṅkatā pasannacittā anussaranti tesaṁ taṁ mahapphalaṁ assa mahānisaṁsan’ti, sīlesvevassa …pe… brūhetā suññāgārānaṁ.
an10.71:7.1	Ākaṅkheyya ce, bhikkhave, bhikkhu ‘santuṭṭho assaṁ itarītaracīvarapiṇḍapātasenāsanagilānapaccayabhesajjaparikkhārenā’ti, sīlesvevassa …pe… brūhetā suññāgārānaṁ.
an10.71:8.1	Ākaṅkheyya ce, bhikkhave, bhikkhu ‘khamo assaṁ sītassa uṇhassa jighacchāya pipāsāya ḍaṁsamakasavātātapasarīsapasamphassānaṁ, duruttānaṁ durāgatānaṁ vacanapathānaṁ uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko assan’ti, sīlesvevassa …pe… brūhetā suññāgārānaṁ.
an10.71:9.1	Ākaṅkheyya ce, bhikkhave, bhikkhu ‘aratiratisaho assaṁ, na ca maṁ aratirati saheyya, uppannaṁ aratiratiṁ abhibhuyya abhibhuyya vihareyyan’ti, sīlesvevassa …pe… brūhetā suññāgārānaṁ.
an10.71:10.1	Ākaṅkheyya ce, bhikkhave, bhikkhu ‘bhayabheravasaho assaṁ, na ca maṁ bhayabheravo saheyya, uppannaṁ bhayabheravaṁ abhibhuyya abhibhuyya vihareyyan’ti, sīlesvevassa …pe… brūhetā suññāgārānaṁ.
an10.71:11.1	Ākaṅkheyya ce, bhikkhave, bhikkhu ‘catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī assaṁ akicchalābhī akasiralābhī’ti, sīlesvevassa …pe… brūhetā suññāgārānaṁ.
an10.71:12.1	Ākaṅkheyya ce, bhikkhave, bhikkhu ‘āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti, sīlesvevassa paripūrakārī ajjhattaṁ cetosamathamanuyutto anirākatajjhāno vipassanāya samannāgato brūhetā suññāgārānaṁ.
an10.71:13.1	‘Sampannasīlā, bhikkhave, viharatha sampannapātimokkhā, pātimokkhasaṁvarasaṁvutā viharatha ācāragocarasampannā aṇumattesu vajjesu bhayadassāvino, samādāya sikkhatha sikkhāpadesū’ti,
an10.71:13.2	iti yaṁ taṁ vuttaṁ, idametaṁ paṭicca vuttan”ti.
an10.71:13.3	Paṭhamaṁ.
an10.72:0.1	Aṅguttara Nikāya 10.72
an10.72:0.2	8. Ākaṅkhavagga
an10.72:0.3	Kaṇṭakasutta
an10.72:1.1	Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ sambahulehi abhiññātehi abhiññātehi therehi sāvakehi saddhiṁ—
an10.72:1.2	āyasmatā ca cālena, āyasmatā ca upacālena, āyasmatā ca kukkuṭena, āyasmatā ca kaḷimbhena, āyasmatā ca nikaṭena, āyasmatā ca kaṭissahena;
an10.72:1.3	aññehi ca abhiññātehi abhiññātehi therehi sāvakehi saddhiṁ.
an10.72:2.1	Tena kho pana samayena sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṁ ajjhogāhanti bhagavantaṁ dassanāya.
an10.72:2.2	Atha kho tesaṁ āyasmantānaṁ etadahosi:
an10.72:2.3	“ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṁ ajjhogāhanti bhagavantaṁ dassanāya.
an10.72:2.4	Saddakaṇṭakā kho pana jhānā vuttā bhagavatā.
an10.72:2.5	Yannūna mayaṁ yena gosiṅgasālavanadāyo tenupasaṅkameyyāma.
an10.72:2.6	Tattha mayaṁ appasaddā appākiṇṇā phāsuṁ vihareyyāmā”ti.
an10.72:2.7	Atha kho te āyasmanto yena gosiṅgasālavanadāyo tenupasaṅkamiṁsu;
an10.72:2.8	tattha te āyasmanto appasaddā appākiṇṇā phāsuṁ viharanti.
an10.72:3.1	Atha kho bhagavā bhikkhū āmantesi:
an10.72:3.2	“kahaṁ nu kho, bhikkhave, cālo, kahaṁ upacālo, kahaṁ kukkuṭo, kahaṁ kaḷimbho, kahaṁ nikaṭo, kahaṁ kaṭissaho;
an10.72:3.3	kahaṁ nu kho te, bhikkhave, therā sāvakā gatā”ti?
an10.72:4.1	“Idha, bhante, tesaṁ āyasmantānaṁ etadahosi:
an10.72:4.2	‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṁ ajjhogāhanti bhagavantaṁ dassanāya saddakaṇṭakā kho pana jhānā vuttā bhagavatā yannūna mayaṁ yena gosiṅgasālavanadāyo tenupasaṅkameyyāma tattha mayaṁ appasaddā appākiṇṇā phāsuṁ vihareyyāmā’ti.
an10.72:4.3	Atha kho te, bhante, āyasmanto yena gosiṅgasālavanadāyo tenupasaṅkamiṁsu.
an10.72:4.4	Tattha te āyasmanto appasaddā appākiṇṇā phāsuṁ viharantī”ti.
an10.72:5.1	“Sādhu sādhu, bhikkhave, yathā te mahāsāvakā sammā byākaramānā byākareyyuṁ, saddakaṇṭakā hi, bhikkhave, jhānā vuttā mayā.
an10.72:6.1	Dasayime, bhikkhave, kaṇṭakā.
an10.72:6.2	Katame dasa?
an10.72:6.3	Pavivekārāmassa saṅgaṇikārāmatā kaṇṭako, asubhanimittānuyogaṁ anuyuttassa subhanimittānuyogo kaṇṭako, indriyesu guttadvārassa visūkadassanaṁ kaṇṭako, brahmacariyassa mātugāmūpacāro kaṇṭako, paṭhamassa jhānassa saddo kaṇṭako, dutiyassa jhānassa vitakkavicārā kaṇṭakā, tatiyassa jhānassa pīti kaṇṭako, catutthassa jhānassa assāsapassāso kaṇṭako, saññāvedayitanirodhasamāpattiyā saññā ca vedanā ca kaṇṭako rāgo kaṇṭako doso kaṇṭako moho kaṇṭako.
an10.72:7.1	Akaṇṭakā, bhikkhave, viharatha.
an10.72:7.2	Nikkaṇṭakā, bhikkhave, viharatha.
an10.72:7.3	Akaṇṭakanikkaṇṭakā, bhikkhave, viharatha.
an10.72:7.4	Akaṇṭakā, bhikkhave, arahanto;
an10.72:7.5	nikkaṇṭakā, bhikkhave, arahanto;
an10.72:7.6	akaṇṭakanikkaṇṭakā, bhikkhave, arahanto”ti.
an10.72:7.7	Dutiyaṁ.
an10.73:0.1	Aṅguttara Nikāya 10.73
an10.73:0.2	8. Ākaṅkhavagga
an10.73:0.3	Iṭṭhadhammasutta
an10.73:1.1	“Dasayime, bhikkhave, dhammā iṭṭhā kantā manāpā dullabhā lokasmiṁ.
an10.73:1.2	Katame dasa?
an10.73:1.3	Bhogā iṭṭhā kantā manāpā dullabhā lokasmiṁ;
an10.73:1.4	vaṇṇo iṭṭho kanto manāpo dullabho lokasmiṁ;
an10.73:1.5	ārogyaṁ iṭṭhaṁ kantaṁ manāpaṁ dullabhaṁ lokasmiṁ;
an10.73:1.6	sīlaṁ iṭṭhaṁ kantaṁ manāpaṁ dullabhaṁ lokasmiṁ;
an10.73:1.7	brahmacariyaṁ iṭṭhaṁ kantaṁ manāpaṁ dullabhaṁ lokasmiṁ;
an10.73:1.8	mittā iṭṭhā kantā manāpā dullabhā lokasmiṁ;
an10.73:1.9	bāhusaccaṁ iṭṭhaṁ kantaṁ manāpaṁ dullabhaṁ lokasmiṁ;
an10.73:1.10	paññā iṭṭhā kantā manāpā dullabhā lokasmiṁ;
an10.73:1.11	dhammā iṭṭhā kantā manāpā dullabhā lokasmiṁ;
an10.73:1.12	saggā iṭṭhā kantā manāpā dullabhā lokasmiṁ.
an10.73:2.1	Imesaṁ kho, bhikkhave, dasannaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ dasa dhammā paripanthā—
an10.73:2.2	ālasyaṁ anuṭṭhānaṁ bhogānaṁ paripantho, amaṇḍanā avibhūsanā vaṇṇassa paripantho, asappāyakiriyā ārogyassa paripantho, pāpamittatā sīlānaṁ paripantho, indriyaasaṁvaro brahmacariyassa paripantho, visaṁvādanā mittānaṁ paripantho, asajjhāyakiriyā bāhusaccassa paripantho, asussūsā aparipucchā paññāya paripantho, ananuyogo apaccavekkhaṇā dhammānaṁ paripantho, micchāpaṭipatti saggānaṁ paripantho.
an10.73:2.3	Imesaṁ kho, bhikkhave, dasannaṁ iṭṭhānaṁ kantānaṁ manāpānaṁ dullabhānaṁ lokasmiṁ ime dasa dhammā paripanthā.
an10.73:3.1	Imesaṁ kho, bhikkhave, dasannaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ dasa dhammā āhārā—
an10.73:3.2	uṭṭhānaṁ anālasyaṁ bhogānaṁ āhāro, maṇḍanā vibhūsanā vaṇṇassa āhāro, sappāyakiriyā ārogyassa āhāro, kalyāṇamittatā sīlānaṁ āhāro, indriyasaṁvaro brahmacariyassa āhāro, avisaṁvādanā mittānaṁ āhāro, sajjhāyakiriyā bāhusaccassa āhāro, sussūsā paripucchā paññāya āhāro, anuyogo paccavekkhaṇā dhammānaṁ āhāro, sammāpaṭipatti saggānaṁ āhāro.
an10.73:3.3	Imesaṁ kho, bhikkhave, dasannaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ ime dasa dhammā āhārā”ti.
an10.73:3.4	Tatiyaṁ.
an10.74:0.1	Aṅguttara Nikāya 10.74
an10.74:0.2	8. Ākaṅkhavagga
an10.74:0.3	Vaḍḍhisutta
an10.74:1.1	“Dasahi, bhikkhave, vaḍḍhīhi vaḍḍhamāno ariyasāvako ariyāya vaḍḍhiyā vaḍḍhati, sārādāyī ca hoti varādāyī kāyassa.
an10.74:1.2	Katamehi dasahi?
an10.74:1.3	Khettavatthūhi vaḍḍhati, dhanadhaññena vaḍḍhati, puttadārehi vaḍḍhati, dāsakammakaraporisehi vaḍḍhati, catuppadehi vaḍḍhati, saddhāya vaḍḍhati, sīlena vaḍḍhati, sutena vaḍḍhati, cāgena vaḍḍhati, paññāya vaḍḍhati—
an10.74:1.4	imehi kho, bhikkhave, dasahi vaḍḍhīhi vaḍḍhamāno ariyasāvako ariyāya vaḍḍhiyā vaḍḍhati, sārādāyī ca hoti varādāyī kāyassāti.
an10.74:2.1	Dhanena dhaññena ca yodha vaḍḍhati,
an10.74:2.2	Puttehi dārehi catuppadehi ca;
an10.74:2.3	Sa bhogavā hoti yasassi pūjito,
an10.74:2.4	Ñātīhi mittehi athopi rājubhi.
an10.74:3.1	Saddhāya sīlena ca yodha vaḍḍhati,
an10.74:3.2	Paññāya cāgena sutena cūbhayaṁ;
an10.74:3.3	So tādiso sappuriso vicakkhaṇo,
an10.74:3.4	Diṭṭheva dhamme ubhayena vaḍḍhatī”ti.
an10.74:3.5	Catutthaṁ.
an10.75:0.1	Aṅguttara Nikāya 10.75
an10.75:0.2	8. Ākaṅkhavagga
an10.75:0.3	Migasālāsutta
an10.75:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.75:1.2	Atha kho āyasmā ānando pubbaṇhasamayaṁ nivāsetvā pattacīvaramādāya yena migasālāya upāsikāya nivesanaṁ tenupasaṅkami; upasaṅkamitvā paññatte āsane nisīdi.
an10.75:1.3	Atha kho migasālā upāsikā yenāyasmā ānando tenupasaṅkami; upasaṅkamitvā āyasmantaṁ ānandaṁ abhivādetvā ekamantaṁ nisīdi. Ekamantaṁ nisinnā kho migasālā upāsikā āyasmantaṁ ānandaṁ etadavoca:
an10.75:2.1	“Kathaṁ kathaṁ nāmāyaṁ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyaṁ.
an10.75:2.2	Pitā me, bhante, purāṇo brahmacārī hoti ārācārī virato methunā gāmadhammā.
an10.75:2.3	So kālaṅkato bhagavatā byākato: ‘sakadāgāmī satto tusitaṁ kāyaṁ upapanno’ti.
an10.75:2.4	Pitāmaho me, bhante, isidatto abrahmacārī ahosi sadārasantuṭṭho.
an10.75:2.5	Sopi kālaṅkato bhagavatā byākato: ‘sakadāgāmī satto tusitaṁ kāyaṁ upapanno’ti.
an10.75:3.1	Kathaṁ kathaṁ nāmāyaṁ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyan”ti?
an10.75:3.2	“Evaṁ kho panetaṁ, bhagini, bhagavatā byākatan”ti.
an10.75:4.1	Atha kho āyasmā ānando migasālāya upāsikāya nivesane piṇḍapātaṁ gahetvā uṭṭhāyāsanā pakkāmi.
an10.75:4.2	Atha kho āyasmā ānando pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an10.75:5.1	“Idhāhaṁ, bhante, pubbaṇhasamayaṁ nivāsetvā pattacīvaramādāya yena migasālāya upāsikāya nivesanaṁ tenupasaṅkami; upasaṅkamitvā paññatte āsane nisīdiṁ.
an10.75:5.2	Atha kho, bhante, migasālā upāsikā yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi. Ekamantaṁ nisinnā kho, bhante, migasālā upāsikā maṁ etadavoca:
an10.75:6.1	‘Kathaṁ kathaṁ nāmāyaṁ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyaṁ.
an10.75:6.2	Pitā me, bhante, purāṇo brahmacārī ahosi ārācārī virato methunā gāmadhammā.
an10.75:6.3	So kālaṅkato bhagavatā byākato sakadāgāmī satto tusitaṁ kāyaṁ upapannoti.
an10.75:6.4	Pitāmaho me, bhante, isidatto abrahmacārī ahosi sadārasantuṭṭho.
an10.75:6.5	Sopi kālaṅkato bhagavatā byākato—sakadāgāmī satto tusitaṁ kāyaṁ upapannoti.
an10.75:7.1	Kathaṁ kathaṁ nāmāyaṁ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyan’ti?
an10.75:7.2	Evaṁ vutte, ahaṁ, bhante, migasālaṁ upāsikaṁ etadavocaṁ:
an10.75:7.3	‘evaṁ kho panetaṁ, bhagini, bhagavatā byākatan’”ti.
an10.75:8.1	“Kā cānanda, migasālā upāsikā bālā abyattā ammakā ammakapaññā, ke ca purisapuggalaparopariye ñāṇe?
an10.75:9.1	Dasayime, ānanda, puggalā santo saṁvijjamānā lokasmiṁ.
an10.75:9.2	Katame dasa?
an10.75:9.3	Idhānanda, ekacco puggalo dussīlo hoti.
an10.75:9.4	Tañca cetovimuttiṁ paññāvimuttiṁ yathābhūtaṁ nappajānāti, yatthassa taṁ dussilyaṁ aparisesaṁ nirujjhati.
an10.75:9.5	Tassa savanenapi akataṁ hoti, bāhusaccenapi akataṁ hoti, diṭṭhiyāpi appaṭividdhaṁ hoti, sāmāyikampi vimuttiṁ na labhati.
an10.75:9.6	So kāyassa bhedā paraṁ maraṇā hānāya pareti, no visesāya;
an10.75:9.7	hānagāmīyeva hoti, no visesagāmī.
an10.75:10.1	Idha panānanda, ekacco puggalo dussīlo hoti.
an10.75:10.2	Tañca cetovimuttiṁ paññāvimuttiṁ yathābhūtaṁ pajānāti yatthassa taṁ dussilyaṁ aparisesaṁ nirujjhati.
an10.75:10.3	Tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an10.75:10.4	So kāyassa bhedā paraṁ maraṇā visesāya pareti, no hānāya;
an10.75:10.5	visesagāmīyeva hoti, no hānagāmī.
an10.75:11.1	Tatrānanda, pamāṇikā pamiṇanti:
an10.75:11.2	‘imassapi teva dhammā, aparassapi teva dhammā. Kasmā nesaṁ eko hīno eko paṇīto’ti?
an10.75:11.3	Tañhi tesaṁ, ānanda, hoti dīgharattaṁ ahitāya dukkhāya.
an10.75:12.1	Tatrānanda, yvāyaṁ puggalo dussīlo hoti.
an10.75:12.2	Tañca cetovimuttiṁ paññāvimuttiṁ yathābhūtaṁ pajānāti yatthassa taṁ dussilyaṁ aparisesaṁ nirujjhati.
an10.75:12.3	Tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an10.75:12.4	Ayaṁ, ānanda, puggalo amunā purimena puggalena abhikkantataro ca paṇītataro ca.
an10.75:12.5	Taṁ kissa hetu?
an10.75:12.6	Imaṁ hānanda, puggalaṁ dhammasoto nibbahati.
an10.75:12.7	Tadantaraṁ ko jāneyya, aññatra tathāgatena.
an10.75:12.8	Tasmātihānanda, mā puggalesu pamāṇikā ahuvattha,
an10.75:12.9	mā puggalesu pamāṇaṁ gaṇhittha.
an10.75:12.10	Khaññati hānanda, puggalesu pamāṇaṁ gaṇhanto.
an10.75:12.11	Ahaṁ vā, ānanda, puggalesu pamāṇaṁ gaṇheyyaṁ yo vā panassa mādiso.
an10.75:13.1	Idha panānanda, ekacco puggalo sīlavā hoti.
an10.75:13.2	Tañca cetovimuttiṁ paññāvimuttiṁ yathābhūtaṁ nappajānāti yatthassa taṁ sīlaṁ aparisesaṁ nirujjhati.
an10.75:13.3	Tassa savanenapi akataṁ hoti, bāhusaccenapi akataṁ hoti, diṭṭhiyāpi appaṭividdhaṁ hoti, sāmāyikampi vimuttiṁ na labhati.
an10.75:13.4	So kāyassa bhedā paraṁ maraṇā hānāya pareti, no visesāya;
an10.75:13.5	hānagāmīyeva hoti, no visesagāmī.
an10.75:14.1	Idha panānanda, ekacco puggalo sīlavā hoti.
an10.75:14.2	Tañca cetovimuttiṁ paññāvimuttiṁ yathābhūtaṁ pajānāti yatthassa taṁ sīlaṁ aparisesaṁ nirujjhati.
an10.75:14.3	Tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an10.75:14.4	So kāyassa bhedā paraṁ maraṇā visesāya pareti, no hānāya;
an10.75:14.5	visesagāmīyeva hoti, no hānagāmī.
an10.75:15.1	Tatrānanda, pamāṇikā pamiṇanti …pe…
an10.75:15.2	ahaṁ vā, ānanda, puggalesu pamāṇaṁ gaṇheyyaṁ yo vā panassa mādiso.
an10.75:16.1	Idha panānanda, ekacco puggalo tibbarāgo hoti.
an10.75:16.2	Tañca cetovimuttiṁ paññāvimuttiṁ yathābhūtaṁ nappajānāti yatthassa so rāgo apariseso nirujjhati.
an10.75:16.3	Tassa savanenapi akataṁ hoti, bāhusaccenapi akataṁ hoti, diṭṭhiyāpi appaṭividdhaṁ hoti, sāmāyikampi vimuttiṁ na labhati.
an10.75:16.4	So kāyassa bhedā paraṁ maraṇā hānāya pareti, no visesāya;
an10.75:16.5	hānagāmīyeva hoti, no visesagāmī.
an10.75:17.1	Idha panānanda, ekacco puggalo tibbarāgo hoti.
an10.75:17.2	Tañca cetovimuttiṁ paññāvimuttiṁ yathābhūtaṁ pajānāti yatthassa so rāgo apariseso nirujjhati.
an10.75:17.3	Tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an10.75:17.4	So kāyassa bhedā paraṁ maraṇā visesāya pareti, no hānāya;
an10.75:17.5	visesagāmīyeva hoti, no hānagāmī.
an10.75:18.1	Tatrānanda, pamāṇikā pamiṇanti …pe…
an10.75:18.2	ahaṁ vā, ānanda, puggalesu pamāṇaṁ gaṇheyyaṁ yo vā panassa mādiso.
an10.75:19.1	Idha panānanda, ekacco puggalo kodhano hoti.
an10.75:19.2	Tañca cetovimuttiṁ paññāvimuttiṁ yathābhūtaṁ nappajānāti yatthassa so kodho apariseso nirujjhati.
an10.75:19.3	Tassa savanenapi akataṁ hoti, bāhusaccenapi akataṁ hoti, diṭṭhiyāpi appaṭividdhaṁ hoti, sāmāyikampi vimuttiṁ na labhati.
an10.75:19.4	So kāyassa bhedā paraṁ maraṇā hānāya pareti, no visesāya;
an10.75:19.5	hānagāmīyeva hoti, no visesagāmī.
an10.75:20.1	Idha panānanda, ekacco puggalo kodhano hoti.
an10.75:20.2	Tañca cetovimuttiṁ paññāvimuttiṁ yathābhūtaṁ pajānāti yatthassa so kodho apariseso nirujjhati.
an10.75:20.3	Tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an10.75:20.4	So kāyassa bhedā paraṁ maraṇā visesāya pareti, no hānāya;
an10.75:20.5	visesagāmīyeva hoti, no hānagāmī.
an10.75:21.1	Tatrānanda, pamāṇikā pamiṇanti …pe…
an10.75:21.2	ahaṁ vā, ānanda, puggalesu pamāṇaṁ gaṇheyyaṁ yo vā panassa mādiso.
an10.75:22.1	Idha panānanda, ekacco puggalo uddhato hoti.
an10.75:22.2	Tañca cetovimuttiṁ paññāvimuttiṁ yathābhūtaṁ nappajānāti yatthassa taṁ uddhaccaṁ aparisesaṁ nirujjhati.
an10.75:22.3	Tassa savanenapi akataṁ hoti, bāhusaccenapi akataṁ hoti, diṭṭhiyāpi appaṭividdhaṁ hoti, sāmāyikampi vimuttiṁ na labhati.
an10.75:22.4	So kāyassa bhedā paraṁ maraṇā hānāya pareti, no visesāya;
an10.75:22.5	hānagāmīyeva hoti, no visesagāmī.
an10.75:23.1	Idha panānanda, ekacco puggalo uddhato hoti.
an10.75:23.2	Tañca cetovimuttiṁ paññāvimuttiṁ yathābhūtaṁ pajānāti yatthassa taṁ uddhaccaṁ aparisesaṁ nirujjhati.
an10.75:23.3	Tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an10.75:23.4	So kāyassa bhedā paraṁ maraṇā visesāya pareti, no hānāya;
an10.75:23.5	visesagāmīyeva hoti, no hānagāmī.
an10.75:24.1	Tatrānanda, pamāṇikā pamiṇanti:
an10.75:24.2	‘imassapi teva dhammā, aparassapi teva dhammā. Kasmā nesaṁ eko hīno eko paṇīto’ti?
an10.75:24.3	Tañhi tesaṁ, ānanda, hoti dīgharattaṁ ahitāya dukkhāya.
an10.75:25.1	Tatrānanda, yvāyaṁ puggalo uddhato hoti tañca cetovimuttiṁ paññāvimuttiṁ yathābhūtaṁ pajānāti yatthassa taṁ uddhaccaṁ aparisesaṁ nirujjhati,
an10.75:25.2	tassa savanenapi kataṁ hoti, bāhusaccenapi kataṁ hoti, diṭṭhiyāpi paṭividdhaṁ hoti, sāmāyikampi vimuttiṁ labhati.
an10.75:25.3	Ayaṁ, ānanda, puggalo amunā purimena puggalena abhikkantataro ca paṇītataro ca.
an10.75:25.4	Taṁ kissa hetu?
an10.75:25.5	Imaṁ hānanda, puggalaṁ dhammasoto nibbahati.
an10.75:25.6	Tadantaraṁ ko jāneyya aññatra tathāgatena.
an10.75:25.7	Tasmātihānanda, mā puggalesu pamāṇikā ahuvattha;
an10.75:25.8	mā puggalesu pamāṇaṁ gaṇhittha.
an10.75:25.9	Khaññati hānanda, puggalesu pamāṇaṁ gaṇhanto.
an10.75:25.10	Ahaṁ vā, ānanda, puggalesu pamāṇaṁ gaṇheyyaṁ yo vā panassa mādiso.
an10.75:26.1	Kā cānanda, migasālā upāsikā bālā abyattā ammakā ammakapaññā, ke ca purisapuggalaparopariye ñāṇe.
an10.75:26.2	Ime kho, ānanda, dasa puggalā santo saṁvijjamānā lokasmiṁ.
an10.75:27.1	Yathārūpena, ānanda, sīlena purāṇo samannāgato ahosi tathārūpena sīlena isidatto samannāgato abhavissa, nayidha purāṇo isidattassa gatimpi aññassa.
an10.75:27.2	Yathārūpāya cānanda, paññāya isidatto samannāgato ahosi tathārūpāya paññāya purāṇo samannāgato abhavissa, nayidha isidatto purāṇassa gatimpi aññassa.
an10.75:27.3	Iti kho, ānanda, ime puggalā ubho ekaṅgahīnā”ti.
an10.75:27.4	Pañcamaṁ.
an10.76:0.1	Aṅguttara Nikāya 10.76
an10.76:0.2	8. Ākaṅkhavagga
an10.76:0.3	Tayodhammasutta
an10.76:1.1	“Tayome, bhikkhave, dhammā loke na saṁvijjeyyuṁ, na tathāgato loke uppajjeyya arahaṁ sammāsambuddho, na tathāgatappavedito dhammavinayo loke dibbeyya.
an10.76:1.2	Katame tayo?
an10.76:1.3	Jāti ca, jarā ca, maraṇañca—
an10.76:1.4	ime kho, bhikkhave, tayo dhammā loke na saṁvijjeyyuṁ, na tathāgato loke uppajjeyya arahaṁ sammāsambuddho, na tathāgatappavedito dhammavinayo loke dibbeyya.
an10.76:1.5	Yasmā ca kho, bhikkhave, ime tayo dhammā loke saṁvijjanti tasmā tathāgato loke uppajjati arahaṁ sammāsambuddho, tasmā tathāgatappavedito dhammavinayo loke dibbati.
an10.76:2.1	Tayome, bhikkhave, dhamme appahāya abhabbo jātiṁ pahātuṁ jaraṁ pahātuṁ maraṇaṁ pahātuṁ.
an10.76:2.2	Katame tayo?
an10.76:2.3	Rāgaṁ appahāya, dosaṁ appahāya, mohaṁ appahāya—
an10.76:2.4	ime kho, bhikkhave, tayo dhamme appahāya abhabbo jātiṁ pahātuṁ jaraṁ pahātuṁ maraṇaṁ pahātuṁ.
an10.76:3.1	Tayome, bhikkhave, dhamme appahāya abhabbo rāgaṁ pahātuṁ dosaṁ pahātuṁ mohaṁ pahātuṁ.
an10.76:3.2	Katame tayo?
an10.76:3.3	Sakkāyadiṭṭhiṁ appahāya, vicikicchaṁ appahāya, sīlabbataparāmāsaṁ appahāya—
an10.76:3.4	ime kho, bhikkhave, tayo dhamme appahāya abhabbo rāgaṁ pahātuṁ dosaṁ pahātuṁ mohaṁ pahātuṁ.
an10.76:4.1	Tayome, bhikkhave, dhamme appahāya abhabbo sakkāyadiṭṭhiṁ pahātuṁ vicikicchaṁ pahātuṁ sīlabbataparāmāsaṁ pahātuṁ.
an10.76:4.2	Katame tayo?
an10.76:4.3	Ayonisomanasikāraṁ appahāya, kummaggasevanaṁ appahāya, cetaso līnattaṁ appahāya—
an10.76:4.4	ime kho, bhikkhave, tayo dhamme appahāya abhabbo sakkāyadiṭṭhiṁ pahātuṁ vicikicchaṁ pahātuṁ sīlabbataparāmāsaṁ pahātuṁ.
an10.76:5.1	Tayome, bhikkhave, dhamme appahāya abhabbo ayoniso manasikāraṁ pahātuṁ kummaggasevanaṁ pahātuṁ cetaso līnattaṁ pahātuṁ.
an10.76:5.2	Katame tayo?
an10.76:5.3	Muṭṭhassaccaṁ appahāya, asampajaññaṁ appahāya, cetaso vikkhepaṁ appahāya—
an10.76:5.4	ime kho, bhikkhave, tayo dhamme appahāya abhabbo ayonisomanasikāraṁ pahātuṁ kummaggasevanaṁ pahātuṁ cetaso līnattaṁ pahātuṁ.
an10.76:6.1	Tayome, bhikkhave, dhamme appahāya abhabbo muṭṭhassaccaṁ pahātuṁ asampajaññaṁ pahātuṁ cetaso vikkhepaṁ pahātuṁ.
an10.76:6.2	Katame tayo?
an10.76:6.3	Ariyānaṁ adassanakamyataṁ appahāya, ariyadhammassa asotukamyataṁ appahāya, upārambhacittataṁ appahāya—
an10.76:6.4	ime kho, bhikkhave, tayo dhamme appahāya abhabbo muṭṭhassaccaṁ pahātuṁ asampajaññaṁ pahātuṁ cetaso vikkhepaṁ pahātuṁ.
an10.76:7.1	Tayome, bhikkhave, dhamme appahāya abhabbo ariyānaṁ adassanakamyataṁ pahātuṁ ariyadhammassa asotukamyataṁ pahātuṁ upārambhacittataṁ pahātuṁ.
an10.76:7.2	Katame tayo?
an10.76:7.3	Uddhaccaṁ appahāya, asaṁvaraṁ appahāya, dussilyaṁ appahāya—
an10.76:7.4	ime kho, bhikkhave, tayo dhamme appahāya abhabbo ariyānaṁ adassanakamyataṁ pahātuṁ ariyadhammassa asotukamyataṁ pahātuṁ upārambhacittataṁ pahātuṁ.
an10.76:8.1	Tayome, bhikkhave, dhamme appahāya abhabbo uddhaccaṁ pahātuṁ asaṁvaraṁ pahātuṁ dussilyaṁ pahātuṁ.
an10.76:8.2	Katame tayo?
an10.76:8.3	Assaddhiyaṁ appahāya, avadaññutaṁ appahāya, kosajjaṁ appahāya—
an10.76:8.4	ime kho, bhikkhave, tayo dhamme appahāya abhabbo uddhaccaṁ pahātuṁ asaṁvaraṁ pahātuṁ dussilyaṁ pahātuṁ.
an10.76:9.1	Tayome, bhikkhave, dhamme appahāya abhabbo assaddhiyaṁ pahātuṁ avadaññutaṁ pahātuṁ kosajjaṁ pahātuṁ.
an10.76:9.2	Katame tayo?
an10.76:9.3	Anādariyaṁ appahāya, dovacassataṁ appahāya, pāpamittataṁ appahāya—
an10.76:9.4	ime kho, bhikkhave, tayo dhamme appahāya abhabbo assaddhiyaṁ pahātuṁ avadaññutaṁ pahātuṁ kosajjaṁ pahātuṁ.
an10.76:10.1	Tayome, bhikkhave, dhamme appahāya abhabbo anādariyaṁ pahātuṁ dovacassataṁ pahātuṁ pāpamittataṁ pahātuṁ.
an10.76:10.2	Katame tayo?
an10.76:10.3	Ahirikaṁ appahāya, anottappaṁ appahāya, pamādaṁ appahāya—
an10.76:10.4	ime kho, bhikkhave, tayo dhamme appahāya abhabbo anādariyaṁ pahātuṁ dovacassataṁ pahātuṁ pāpamittataṁ pahātuṁ.
an10.76:11.1	Ahirikoyaṁ, bhikkhave, anottāpī pamatto hoti.
an10.76:11.2	So pamatto samāno abhabbo anādariyaṁ pahātuṁ dovacassataṁ pahātuṁ pāpamittataṁ pahātuṁ.
an10.76:11.3	So pāpamitto samāno abhabbo assaddhiyaṁ pahātuṁ avadaññutaṁ pahātuṁ kosajjaṁ pahātuṁ.
an10.76:11.4	So kusīto samāno abhabbo uddhaccaṁ pahātuṁ asaṁvaraṁ pahātuṁ dussilyaṁ pahātuṁ.
an10.76:11.5	So dussīlo samāno abhabbo ariyānaṁ adassanakamyataṁ pahātuṁ ariyadhammassa asotukamyataṁ pahātuṁ upārambhacittataṁ pahātuṁ.
an10.76:11.6	So upārambhacitto samāno abhabbo muṭṭhassaccaṁ pahātuṁ asampajaññaṁ pahātuṁ cetaso vikkhepaṁ pahātuṁ.
an10.76:11.7	So vikkhittacitto samāno abhabbo ayonisomanasikāraṁ pahātuṁ kummaggasevanaṁ pahātuṁ cetaso līnattaṁ pahātuṁ.
an10.76:11.8	So līnacitto samāno abhabbo sakkāyadiṭṭhiṁ pahātuṁ vicikicchaṁ pahātuṁ sīlabbataparāmāsaṁ pahātuṁ.
an10.76:11.9	So vicikiccho samāno abhabbo rāgaṁ pahātuṁ dosaṁ pahātuṁ mohaṁ pahātuṁ.
an10.76:11.10	So rāgaṁ appahāya dosaṁ appahāya mohaṁ appahāya abhabbo jātiṁ pahātuṁ jaraṁ pahātuṁ maraṇaṁ pahātuṁ.
an10.76:12.1	Tayome, bhikkhave, dhamme pahāya bhabbo jātiṁ pahātuṁ jaraṁ pahātuṁ maraṇaṁ pahātuṁ.
an10.76:12.2	Katame tayo?
an10.76:12.3	Rāgaṁ pahāya, dosaṁ pahāya, mohaṁ pahāya—
an10.76:12.4	ime kho, bhikkhave, tayo dhamme pahāya bhabbo jātiṁ pahātuṁ jaraṁ pahātuṁ maraṇaṁ pahātuṁ.
an10.76:13.1	Tayome, bhikkhave, dhamme pahāya bhabbo rāgaṁ pahātuṁ dosaṁ pahātuṁ mohaṁ pahātuṁ.
an10.76:13.2	Katame tayo?
an10.76:13.3	Sakkāyadiṭṭhiṁ pahāya, vicikicchaṁ pahāya, sīlabbataparāmāsaṁ pahāya—
an10.76:13.4	ime kho, bhikkhave, tayo dhamme pahāya bhabbo rāgaṁ pahātuṁ dosaṁ pahātuṁ mohaṁ pahātuṁ.
an10.76:14.1	Tayome, bhikkhave, dhamme pahāya bhabbo sakkāyadiṭṭhiṁ pahātuṁ vicikicchaṁ pahātuṁ sīlabbataparāmāsaṁ pahātuṁ.
an10.76:14.2	Katame tayo?
an10.76:14.3	Ayonisomanasikāraṁ pahāya, kummaggasevanaṁ pahāya, cetaso līnattaṁ pahāya—
an10.76:14.4	ime kho, bhikkhave, tayo dhamme pahāya bhabbo sakkāyadiṭṭhiṁ pahātuṁ vicikicchaṁ pahātuṁ sīlabbataparāmāsaṁ pahātuṁ.
an10.76:15.1	Tayome, bhikkhave, dhamme pahāya bhabbo ayonisomanasikāraṁ pahātuṁ kummaggasevanaṁ pahātuṁ cetaso līnattaṁ pahātuṁ.
an10.76:15.2	Katame tayo?
an10.76:15.3	Muṭṭhassaccaṁ pahāya, asampajaññaṁ pahāya, cetaso vikkhepaṁ pahāya—
an10.76:15.4	ime kho, bhikkhave, tayo dhamme pahāya bhabbo ayonisomanasikāraṁ pahātuṁ kummaggasevanaṁ pahātuṁ cetaso līnattaṁ pahātuṁ.
an10.76:16.1	Tayome, bhikkhave, dhamme pahāya bhabbo muṭṭhassaccaṁ pahātuṁ asampajaññaṁ pahātuṁ cetaso vikkhepaṁ pahātuṁ.
an10.76:16.2	Katame tayo?
an10.76:16.3	Ariyānaṁ adassanakamyataṁ pahāya, ariyadhammassa asotukamyataṁ pahāya, upārambhacittataṁ pahāya—
an10.76:16.4	ime kho, bhikkhave, tayo dhamme pahāya bhabbo muṭṭhassaccaṁ pahātuṁ asampajaññaṁ pahātuṁ cetaso vikkhepaṁ pahātuṁ.
an10.76:17.1	Tayome, bhikkhave, dhamme pahāya bhabbo ariyānaṁ adassanakamyataṁ pahātuṁ ariyadhammassa asotukamyataṁ pahātuṁ upārambhacittataṁ pahātuṁ.
an10.76:17.2	Katame tayo?
an10.76:17.3	Uddhaccaṁ pahāya, asaṁvaraṁ pahāya, dussilyaṁ pahāya—
an10.76:17.4	ime kho, bhikkhave, tayo dhamme pahāya bhabbo ariyānaṁ adassanakamyataṁ pahātuṁ ariyadhammassa asotukamyataṁ pahātuṁ upārambhacittataṁ pahātuṁ.
an10.76:18.1	Tayome, bhikkhave, dhamme pahāya bhabbo uddhaccaṁ pahātuṁ asaṁvaraṁ pahātuṁ dussilyaṁ pahātuṁ.
an10.76:18.2	Katame tayo?
an10.76:18.3	Assaddhiyaṁ pahāya, avadaññutaṁ pahāya, kosajjaṁ pahāya—
an10.76:18.4	ime kho, bhikkhave, tayo dhamme pahāya bhabbo uddhaccaṁ pahātuṁ asaṁvaraṁ pahātuṁ dussilyaṁ pahātuṁ.
an10.76:19.1	Tayome, bhikkhave, dhamme pahāya bhabbo assaddhiyaṁ pahātuṁ avadaññutaṁ pahātuṁ kosajjaṁ pahātuṁ.
an10.76:19.2	Katame tayo?
an10.76:19.3	Anādariyaṁ pahāya, dovacassataṁ pahāya, pāpamittataṁ pahāya—
an10.76:19.4	ime kho, bhikkhave, tayo dhamme pahāya bhabbo assaddhiyaṁ pahātuṁ avadaññutaṁ pahātuṁ kosajjaṁ pahātuṁ.
an10.76:20.1	Tayome, bhikkhave, dhamme pahāya bhabbo anādariyaṁ pahātuṁ dovacassataṁ pahātuṁ pāpamittataṁ pahātuṁ.
an10.76:20.2	Katame tayo?
an10.76:20.3	Ahirikaṁ pahāya, anottappaṁ pahāya, pamādaṁ pahāya—
an10.76:20.4	ime kho, bhikkhave, tayo dhamme pahāya bhabbo anādariyaṁ pahātuṁ dovacassataṁ pahātuṁ pāpamittataṁ pahātuṁ.
an10.76:21.1	Hirīmāyaṁ, bhikkhave, ottāpī appamatto hoti.
an10.76:21.2	So appamatto samāno bhabbo anādariyaṁ pahātuṁ dovacassataṁ pahātuṁ pāpamittataṁ pahātuṁ.
an10.76:21.3	So kalyāṇamitto samāno bhabbo assaddhiyaṁ pahātuṁ avadaññutaṁ pahātuṁ kosajjaṁ pahātuṁ.
an10.76:21.4	So āraddhavīriyo samāno bhabbo uddhaccaṁ pahātuṁ asaṁvaraṁ pahātuṁ dussilyaṁ pahātuṁ.
an10.76:21.5	So sīlavā samāno bhabbo ariyānaṁ adassanakamyataṁ pahātuṁ ariyadhammassa asotukamyataṁ pahātuṁ upārambhacittataṁ pahātuṁ.
an10.76:21.6	So anupārambhacitto samāno bhabbo muṭṭhassaccaṁ pahātuṁ asampajaññaṁ pahātuṁ cetaso vikkhepaṁ pahātuṁ.
an10.76:21.7	So avikkhittacitto samāno bhabbo ayonisomanasikāraṁ pahātuṁ kummaggasevanaṁ pahātuṁ cetaso līnattaṁ pahātuṁ.
an10.76:21.8	So alīnacitto samāno bhabbo sakkāyadiṭṭhiṁ pahātuṁ vicikicchaṁ pahātuṁ sīlabbataparāmāsaṁ pahātuṁ.
an10.76:21.9	So avicikiccho samāno bhabbo rāgaṁ pahātuṁ dosaṁ pahātuṁ mohaṁ pahātuṁ.
an10.76:21.10	So rāgaṁ pahāya dosaṁ pahāya mohaṁ pahāya bhabbo jātiṁ pahātuṁ jaraṁ pahātuṁ maraṇaṁ pahātun”ti.
an10.76:21.11	Chaṭṭhaṁ.
an10.77:0.1	Aṅguttara Nikāya 10.77
an10.77:0.2	8. Ākaṅkhavagga
an10.77:0.3	Kākasutta
an10.77:1.1	“Dasahi, bhikkhave, asaddhammehi samannāgato kāko.
an10.77:1.2	Katamehi dasahi?
an10.77:1.3	Dhaṁsī ca, pagabbho ca, tintiṇo ca, mahagghaso ca, luddo ca, akāruṇiko ca, dubbalo ca, oravitā ca, muṭṭhassati ca, necayiko ca—
an10.77:1.4	imehi kho, bhikkhave, dasahi asaddhammehi samannāgato kāko.
an10.77:1.5	Evamevaṁ kho, bhikkhave, dasahi asaddhammehi samannāgato pāpabhikkhu.
an10.77:1.6	Katamehi dasahi?
an10.77:1.7	Dhaṁsī ca, pagabbho ca, tintiṇo ca, mahagghaso ca, luddo ca, akāruṇiko ca, dubbalo ca, oravitā ca, muṭṭhassati ca, necayiko ca—
an10.77:1.8	imehi kho, bhikkhave, dasahi asaddhammehi samannāgato pāpabhikkhū”ti.
an10.77:1.9	Sattamaṁ.
an10.78:0.1	Aṅguttara Nikāya 10.78
an10.78:0.2	8. Ākaṅkhavagga
an10.78:0.3	Nigaṇṭhasutta
an10.78:1.1	“Dasahi, bhikkhave, asaddhammehi samannāgatā nigaṇṭhā.
an10.78:1.2	Katamehi dasahi?
an10.78:1.3	Assaddhā, bhikkhave, nigaṇṭhā;
an10.78:1.4	dussīlā, bhikkhave, nigaṇṭhā;
an10.78:1.5	ahirikā, bhikkhave, nigaṇṭhā;
an10.78:1.6	anottappino, bhikkhave, nigaṇṭhā;
an10.78:1.7	asappurisasambhattino, bhikkhave, nigaṇṭhā;
an10.78:1.8	attukkaṁsakaparavambhakā, bhikkhave, nigaṇṭhā;
an10.78:1.9	sandiṭṭhiparāmāsā ādhānaggāhī duppaṭinissaggino, bhikkhave, nigaṇṭhā;
an10.78:1.10	kuhakā, bhikkhave, nigaṇṭhā;
an10.78:1.11	pāpicchā, bhikkhave, nigaṇṭhā;
an10.78:1.12	pāpamittā, bhikkhave, nigaṇṭhā—
an10.78:1.13	imehi kho, bhikkhave, dasahi asaddhammehi samannāgatā nigaṇṭhā”ti.
an10.78:1.14	Aṭṭhamaṁ.
an10.79:0.1	Aṅguttara Nikāya 10.79
an10.79:0.2	8. Ākaṅkhavagga
an10.79:0.3	Āghātavatthusutta
an10.79:1.1	“Dasayimāni, bhikkhave, āghātavatthūni.
an10.79:1.2	Katamāni dasa?
an10.79:1.3	‘Anatthaṁ me acarī’ti āghātaṁ bandhati;
an10.79:1.4	‘anatthaṁ me caratī’ti āghātaṁ bandhati;
an10.79:1.5	‘anatthaṁ me carissatī’ti āghātaṁ bandhati;
an10.79:1.6	‘piyassa me manāpassa anatthaṁ acarī’ti …pe…
an10.79:1.7	‘anatthaṁ caratī’ti …pe…
an10.79:1.8	‘anatthaṁ carissatī’ti āghātaṁ bandhati,
an10.79:1.9	‘appiyassa me amanāpassa atthaṁ acarī’ti …pe…
an10.79:1.10	‘atthaṁ caratī’ti …pe…
an10.79:1.11	‘atthaṁ carissatī’ti āghātaṁ bandhati;
an10.79:1.12	aṭṭhāne ca kuppati—
an10.79:1.13	imāni kho, bhikkhave, dasa āghātavatthūnī”ti.
an10.79:1.14	Navamaṁ.
an10.80:0.1	Aṅguttara Nikāya 10.80
an10.80:0.2	8. Ākaṅkhavagga
an10.80:0.3	Āghātapaṭivinayasutta
an10.80:1.1	“Dasayime, bhikkhave, āghātapaṭivinayā.
an10.80:1.2	Katame dasa?
an10.80:1.3	‘Anatthaṁ me acari, taṁ kutettha labbhā’ti āghātaṁ paṭivineti,
an10.80:1.4	‘anatthaṁ me carati, taṁ kutettha labbhā’ti āghātaṁ paṭivineti,
an10.80:1.5	‘anatthaṁ me carissati, taṁ kutettha labbhā’ti āghātaṁ paṭivineti,
an10.80:1.6	piyassa me manāpassa anatthaṁ acari …pe…
an10.80:1.7	carati …pe…
an10.80:1.8	carissati, taṁ kutettha labbhāti āghātaṁ paṭivineti, appiyassa me amanāpassa atthaṁ acari …pe…
an10.80:1.9	atthaṁ carati …pe…
an10.80:1.10	atthaṁ carissati, taṁ kutettha labbhāti āghātaṁ paṭivineti,
an10.80:1.11	aṭṭhāne ca na kuppati—
an10.80:1.12	ime kho, bhikkhave, dasa āghātapaṭivinayā”ti.
an10.80:1.13	Dasamaṁ.
an10.80:1.14	Ākaṅkhavaggo tatiyo.
an10.80:2.0	Tassuddānaṁ
an10.80:2.1	Ākaṅkho kaṇṭako iṭṭhā,
an10.80:2.2	vaḍḍhi ca migasālāya;
an10.80:2.3	Tayo dhammā ca kāko ca,
an10.80:2.4	nigaṇṭhā dve ca āghātāti.
an10.81:0.1	Aṅguttara Nikāya 10.81
an10.81:0.2	9. Theravagga
an10.81:0.3	Vāhanasutta
an10.81:1.1	Ekaṁ samayaṁ bhagavā campāyaṁ viharati gaggarāya pokkharaṇiyā tīre.
an10.81:1.2	Atha kho āyasmā vāhano yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā vāhano bhagavantaṁ etadavoca:
an10.81:1.3	“katihi nu kho, bhante, dhammehi tathāgato nissaṭo visaṁyutto vippamutto vimariyādīkatena cetasā viharatī”ti?
an10.81:2.1	“Dasahi kho, vāhana, dhammehi tathāgato nissaṭo visaṁyutto vippamutto vimariyādīkatena cetasā viharati.
an10.81:2.2	Katamehi dasahi?
an10.81:2.3	Rūpena kho, vāhana, tathāgato nissaṭo visaṁyutto vippamutto vimariyādīkatena cetasā viharati,
an10.81:2.4	vedanāya kho, vāhana …pe…
an10.81:2.5	saññāya kho, vāhana …
an10.81:2.6	saṅkhārehi kho, vāhana …
an10.81:2.7	viññāṇena kho, vāhana …
an10.81:2.8	jātiyā kho, vāhana …
an10.81:2.9	jarāya kho, vāhana …
an10.81:2.10	maraṇena kho, vāhana …
an10.81:2.11	dukkhehi kho, vāhana …
an10.81:2.12	kilesehi kho, vāhana, tathāgato nissaṭo visaṁyutto vippamutto vimariyādīkatena cetasā viharati.
an10.81:2.13	Seyyathāpi, vāhana, uppalaṁ vā padumaṁ vā puṇḍarīkaṁ vā udake jātaṁ udake saṁvaḍḍhaṁ udakā paccuggamma ṭhitaṁ anupalittaṁ udakena;
an10.81:2.14	evamevaṁ kho, vāhana, imehi dasahi dhammehi tathāgato nissaṭo visaṁyutto vippamutto vimariyādīkatena cetasā viharatī”ti.
an10.81:2.15	Paṭhamaṁ.
an10.82:0.1	Aṅguttara Nikāya 10.82
an10.82:0.2	9. Theravagga
an10.82:0.3	Ānandasutta
an10.82:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ ānandaṁ bhagavā etadavoca:
an10.82:2.1	“So vatānanda, bhikkhu ‘assaddho samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:3.1	So vatānanda, bhikkhu ‘dussīlo samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:4.1	So vatānanda, bhikkhu ‘appassuto samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:5.1	So vatānanda, bhikkhu ‘dubbaco samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:6.1	So vatānanda, bhikkhu ‘pāpamitto samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:7.1	So vatānanda, bhikkhu ‘kusīto samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:8.1	So vatānanda, bhikkhu ‘muṭṭhassati samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:9.1	So vatānanda, bhikkhu ‘asantuṭṭho samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:10.1	So vatānanda, bhikkhu ‘pāpiccho samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:11.1	So vatānanda, bhikkhu ‘micchādiṭṭhiko samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:12.1	So vatānanda, bhikkhu ‘imehi dasahi dhammehi samannāgato imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.82:13.1	So vatānanda, bhikkhu ‘saddho samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:14.1	So vatānanda, bhikkhu ‘sīlavā samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:15.1	So vatānanda, bhikkhu ‘bahussuto sutadharo samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:16.1	So vatānanda, bhikkhu ‘suvaco samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:17.1	So vatānanda, bhikkhu ‘kalyāṇamitto samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:18.1	So vatānanda, bhikkhu ‘āraddhavīriyo samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:19.1	So vatānanda, bhikkhu ‘upaṭṭhitassati samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:20.1	So vatānanda, bhikkhu ‘santuṭṭho samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:21.1	So vatānanda, bhikkhu ‘appiccho samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:22.1	So vatānanda, bhikkhu ‘sammādiṭṭhiko samāno imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjati.
an10.82:23.1	So vatānanda, bhikkhu ‘imehi dasahi dhammehi samannāgato imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjatī”ti.
an10.82:23.2	Dutiyaṁ.
an10.83:0.1	Aṅguttara Nikāya 10.83
an10.83:0.2	9. Theravagga
an10.83:0.3	Puṇṇiyasutta
an10.83:1.1	Atha kho āyasmā puṇṇiyo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā puṇṇiyo bhagavantaṁ etadavoca:
an10.83:1.2	“ko nu kho, bhante, hetu ko paccayo yena appekadā tathāgataṁ dhammadesanā paṭibhāti appekadā nappaṭibhātī”ti?
an10.83:2.1	“Saddho ca, puṇṇiya, bhikkhu hoti, no ca upasaṅkamitā; neva tāva tathāgataṁ dhammadesanā paṭibhāti.
an10.83:2.2	Yato ca kho, puṇṇiya, bhikkhu saddho ca hoti upasaṅkamitā ca, evaṁ tathāgataṁ dhammadesanā paṭibhāti.
an10.83:3.1	Saddho ca, puṇṇiya, bhikkhu hoti upasaṅkamitā ca, no ca payirupāsitā …pe…
an10.83:3.2	payirupāsitā ca, no ca paripucchitā …
an10.83:3.3	paripucchitā ca, no ca ohitasoto dhammaṁ suṇāti …
an10.83:3.4	ohitasoto ca dhammaṁ suṇāti, no ca sutvā dhammaṁ dhāreti …
an10.83:3.5	sutvā ca dhammaṁ dhāreti, no ca dhātānaṁ dhammānaṁ atthaṁ upaparikkhati …
an10.83:3.6	dhātānañca dhammānaṁ atthaṁ upaparikkhati no ca atthamaññāya dhammamaññāya dhammānudhammappaṭipanno hoti …
an10.83:3.7	atthamaññāya dhammamaññāya dhammānudhammappaṭipanno ca hoti, no ca kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā …
an10.83:3.8	kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā, no ca sandassako hoti samādapako samuttejako sampahaṁsako sabrahmacārīnaṁ, neva tāva tathāgataṁ dhammadesanā paṭibhāti.
an10.83:4.1	Yato ca kho, puṇṇiya, bhikkhu saddho ca hoti, upasaṅkamitā ca, payirupāsitā ca, paripucchitā ca, ohitasoto ca dhammaṁ suṇāti, sutvā ca dhammaṁ dhāreti, dhātānañca dhammānaṁ atthaṁ upaparikkhati, atthamaññāya dhammamaññāya dhammānudhammappaṭipanno ca hoti, kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā, sandassako ca hoti samādapako samuttejako sampahaṁsako sabrahmacārīnaṁ—
an10.83:4.2	evaṁ tathāgataṁ dhammadesanā paṭibhāti.
an10.83:4.3	Imehi kho, puṇṇiya, dasahi dhammehi samannāgatā ekantapaṭibhānā tathāgataṁ dhammadesanā hotī”ti.
an10.83:4.4	Tatiyaṁ.
an10.84:0.1	Aṅguttara Nikāya 10.84
an10.84:0.2	9. Theravagga
an10.84:0.3	Byākaraṇasutta
an10.84:1.1	Tatra kho āyasmā mahāmoggallāno bhikkhū āmantesi:
an10.84:1.2	“āvuso bhikkhave”ti.
an10.84:1.3	“Āvuso”ti kho te bhikkhū āyasmato mahāmoggallānassa paccassosuṁ.
an10.84:1.4	Āyasmā mahāmoggallāno etadavoca:
an10.84:2.1	“Idhāvuso, bhikkhu aññaṁ byākaroti:
an10.84:2.2	‘khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an10.84:2.3	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo samanuyuñjati samanuggāhati samanubhāsati.
an10.84:2.4	So tathāgatena vā tathāgatasāvakena vā jhāyinā samāpattikusalena paracittakusalena paracittapariyāyakusalena samanuyuñjiyamāno samanuggāhiyamāno samanubhāsiyamāno irīṇaṁ āpajjati vicinaṁ āpajjati anayaṁ āpajjati byasanaṁ āpajjati anayabyasanaṁ āpajjati.
an10.84:3.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca manasi karoti:
an10.84:3.2	‘kiṁ nu kho ayamāyasmā aññaṁ byākaroti—
an10.84:3.3	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti?
an10.84:4.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca pajānāti:
an10.84:5.1	‘Kodhano kho ayamāyasmā;
an10.84:5.2	kodhapariyuṭṭhitena cetasā bahulaṁ viharati.
an10.84:5.3	Kodhapariyuṭṭhānaṁ kho pana tathāgatappavedite dhammavinaye parihānametaṁ.
an10.84:6.1	Upanāhī kho pana ayamāyasmā;
an10.84:6.2	upanāhapariyuṭṭhitena cetasā bahulaṁ viharati.
an10.84:6.3	Upanāhapariyuṭṭhānaṁ kho pana tathāgatappavedite dhammavinaye parihānametaṁ.
an10.84:7.1	Makkhī kho pana ayamāyasmā;
an10.84:7.2	makkhapariyuṭṭhitena cetasā bahulaṁ viharati.
an10.84:7.3	Makkhapariyuṭṭhānaṁ kho pana tathāgatappavedite dhammavinaye parihānametaṁ.
an10.84:8.1	Paḷāsī kho pana ayamāyasmā;
an10.84:8.2	paḷāsapariyuṭṭhitena cetasā bahulaṁ viharati.
an10.84:8.3	Paḷāsapariyuṭṭhānaṁ kho pana tathāgatappavedite dhammavinaye parihānametaṁ.
an10.84:9.1	Issukī kho pana ayamāyasmā;
an10.84:9.2	issāpariyuṭṭhitena cetasā bahulaṁ viharati.
an10.84:9.3	Issāpariyuṭṭhānaṁ kho pana tathāgatappavedite dhammavinaye parihānametaṁ.
an10.84:10.1	Maccharī kho pana ayamāyasmā;
an10.84:10.2	maccherapariyuṭṭhitena cetasā bahulaṁ viharati.
an10.84:10.3	Maccherapariyuṭṭhānaṁ kho pana tathāgatappavedite dhammavinaye parihānametaṁ.
an10.84:11.1	Saṭho kho pana ayamāyasmā;
an10.84:11.2	sāṭheyyapariyuṭṭhitena cetasā bahulaṁ viharati.
an10.84:11.3	Sāṭheyyapariyuṭṭhānaṁ kho pana tathāgatappavedite dhammavinaye parihānametaṁ.
an10.84:12.1	Māyāvī kho pana ayamāyasmā;
an10.84:12.2	māyāpariyuṭṭhitena cetasā bahulaṁ viharati.
an10.84:12.3	Māyāpariyuṭṭhānaṁ kho pana tathāgatappavedite dhammavinaye parihānametaṁ.
an10.84:13.1	Pāpiccho kho pana ayamāyasmā;
an10.84:13.2	icchāpariyuṭṭhitena cetasā bahulaṁ viharati.
an10.84:13.3	Icchāpariyuṭṭhānaṁ kho pana tathāgatappavedite dhammavinaye parihānametaṁ.
an10.84:14.1	Sati kho pana ayamāyasmā uttari karaṇīye oramattakena visesādhigamena antarā vosānaṁ āpanno.
an10.84:14.2	Antarā vosānagamanaṁ kho pana tathāgatappavedite dhammavinaye parihānametaṁ’.
an10.84:15.1	So vatāvuso, bhikkhu ‘ime dasa dhamme appahāya imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.84:15.2	So vatāvuso, bhikkhu ‘ime dasa dhamme pahāya imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjatī”ti.
an10.84:15.3	Catutthaṁ.
an10.85:0.1	Aṅguttara Nikāya 10.85
an10.85:0.2	9. Theravagga
an10.85:0.3	Katthīsutta
an10.85:1.1	Ekaṁ samayaṁ āyasmā mahācundo cetīsu viharati sahajātiyaṁ.
an10.85:1.2	Tatra kho āyasmā mahācundo bhikkhū āmantesi:
an10.85:1.3	“āvuso bhikkhave”ti.
an10.85:1.4	“Āvuso”ti kho te bhikkhū āyasmato mahācundassa paccassosuṁ.
an10.85:1.5	Āyasmā mahācundo etadavoca:
an10.85:2.1	“Idhāvuso, bhikkhu katthī hoti vikatthī adhigamesu:
an10.85:2.2	‘ahaṁ paṭhamaṁ jhānaṁ samāpajjāmipi vuṭṭhahāmipi, ahaṁ dutiyaṁ jhānaṁ samāpajjāmipi vuṭṭhahāmipi, ahaṁ tatiyaṁ jhānaṁ samāpajjāmipi vuṭṭhahāmipi, ahaṁ catutthaṁ jhānaṁ samāpajjāmipi vuṭṭhahāmipi, ahaṁ ākāsānañcāyatanaṁ samāpajjāmipi vuṭṭhahāmipi, ahaṁ viññāṇañcāyatanaṁ samāpajjāmipi vuṭṭhahāmipi, ahaṁ ākiñcaññāyatanaṁ samāpajjāmipi vuṭṭhahāmipi, ahaṁ nevasaññānāsaññāyatanaṁ samāpajjāmipi vuṭṭhahāmipi, ahaṁ saññāvedayitanirodhaṁ samāpajjāmipi vuṭṭhahāmipī’ti.
an10.85:3.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo samanuyuñjati samanuggāhati samanubhāsati.
an10.85:3.2	So tathāgatena vā tathāgatasāvakena vā jhāyinā samāpattikusalena paracittakusalena paracittapariyāyakusalena samanuyuñjiyamāno samanuggāhiyamāno samanubhāsiyamāno irīṇaṁ āpajjati vicinaṁ āpajjati anayaṁ āpajjati byasanaṁ āpajjati anayabyasanaṁ āpajjati.
an10.85:4.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca manasi karoti:
an10.85:4.2	‘kiṁ nu kho ayamāyasmā katthī hoti vikatthī adhigamesu—
an10.85:4.3	ahaṁ paṭhamaṁ jhānaṁ samāpajjāmipi vuṭṭhahāmipi …pe…
an10.85:4.4	ahaṁ saññāvedayitanirodhaṁ samāpajjāmipi vuṭṭhahāmipī’ti.
an10.85:5.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca pajānāti:
an10.85:6.1	‘Dīgharattaṁ kho ayamāyasmā khaṇḍakārī chiddakārī sabalakārī kammāsakārī na santatakārī na santatavutti sīlesu.
an10.85:6.2	Dussīlo kho ayamāyasmā.
an10.85:6.3	Dussilyaṁ kho pana tathāgatappavedite dhammavinaye parihānametaṁ.
an10.85:7.1	Assaddho kho pana ayamāyasmā;
an10.85:7.2	assaddhiyaṁ kho pana tathāgatappavedite dhammavinaye parihānametaṁ.
an10.85:8.1	Appassuto kho pana ayamāyasmā anācāro;
an10.85:8.2	appasaccaṁ kho pana tathāgatappavedite dhammavinaye parihānametaṁ.
an10.85:9.1	Dubbaco kho pana ayamāyasmā;
an10.85:9.2	dovacassatā kho pana tathāgatappavedite dhammavinaye parihānametaṁ.
an10.85:10.1	Pāpamitto kho pana ayamāyasmā;
an10.85:10.2	pāpamittatā kho pana tathāgatappavedite dhammavinaye parihānametaṁ.
an10.85:11.1	Kusīto kho pana ayamāyasmā;
an10.85:11.2	kosajjaṁ kho pana tathāgatappavedite dhammavinaye parihānametaṁ.
an10.85:12.1	Muṭṭhassati kho pana ayamāyasmā;
an10.85:12.2	muṭṭhassaccaṁ kho pana tathāgatappavedite dhammavinaye parihānametaṁ.
an10.85:13.1	Kuhako kho pana ayamāyasmā;
an10.85:13.2	kohaññaṁ kho pana tathāgatappavedite dhammavinaye parihānametaṁ.
an10.85:14.1	Dubbharo kho pana ayamāyasmā;
an10.85:14.2	dubbharatā kho pana tathāgatappavedite dhammavinaye parihānametaṁ.
an10.85:15.1	Duppañño kho pana ayamāyasmā;
an10.85:15.2	duppaññatā kho pana tathāgatappavedite dhammavinaye parihānametaṁ’.
an10.85:16.1	Seyyathāpi, āvuso, sahāyako sahāyakaṁ evaṁ vadeyya:
an10.85:16.2	‘yadā te, samma, dhanena dhanakaraṇīyaṁ assa, yāceyyāsi maṁ dhanaṁ. Dassāmi te dhanan’ti.
an10.85:16.3	So kiñcideva dhanakaraṇīye samuppanne sahāyako sahāyakaṁ evaṁ vadeyya: ‘attho me, samma, dhanena. Dehi me dhanan’ti.
an10.85:16.4	So evaṁ vadeyya:
an10.85:16.5	‘tena hi, samma, idha khanāhī’ti. So tatra khananto nādhigaccheyya.
an10.85:16.6	So evaṁ vadeyya:
an10.85:16.7	‘alikaṁ maṁ, samma, avaca; tucchakaṁ maṁ, samma, avaca—idha khanāhī’ti.
an10.85:16.8	So evaṁ vadeyya:
an10.85:16.9	‘nāhaṁ taṁ, samma, alikaṁ avacaṁ, tucchakaṁ avacaṁ. Tena hi, samma, idha khanāhī’ti.
an10.85:16.10	So tatrapi khananto nādhigaccheyya.
an10.85:16.11	So evaṁ vadeyya:
an10.85:16.12	‘alikaṁ maṁ, samma, avaca, tucchakaṁ maṁ, samma, avaca—idha khanāhī’ti.
an10.85:16.13	So evaṁ vadeyya:
an10.85:16.14	‘nāhaṁ taṁ, samma, alikaṁ avacaṁ, tucchakaṁ avacaṁ. Tena hi, samma, idha khanāhī’ti.
an10.85:16.15	So tatrapi khananto nādhigaccheyya.
an10.85:16.16	So evaṁ vadeyya:
an10.85:16.17	‘alikaṁ maṁ, samma, avaca, tucchakaṁ maṁ, samma, avaca—idha khanāhī’ti.
an10.85:16.18	So evaṁ vadeyya:
an10.85:16.19	‘nāhaṁ taṁ, samma, alikaṁ avacaṁ, tucchakaṁ avacaṁ. Api ca ahameva ummādaṁ pāpuṇiṁ cetaso vipariyāyan’ti.
an10.85:17.1	Evamevaṁ kho, āvuso, bhikkhu katthī hoti vikatthī adhigamesu:
an10.85:17.2	‘ahaṁ paṭhamaṁ jhānaṁ samāpajjāmipi vuṭṭhahāmipi, ahaṁ dutiyaṁ jhānaṁ samāpajjāmipi vuṭṭhahāmipi, ahaṁ tatiyaṁ jhānaṁ samāpajjāmipi vuṭṭhahāmipi, ahaṁ catutthaṁ jhānaṁ samāpajjāmipi vuṭṭhahāmipi, ahaṁ ākāsānañcāyatanaṁ samāpajjāmipi vuṭṭhahāmipi, ahaṁ viññāṇañcāyatanaṁ samāpajjāmipi vuṭṭhahāmipi, ahaṁ ākiñcaññāyatanaṁ samāpajjāmipi vuṭṭhahāmipi, ahaṁ nevasaññānāsaññāyatanaṁ samāpajjāmipi vuṭṭhahāmipi, ahaṁ saññāvedayitanirodhaṁ samāpajjāmipi vuṭṭhahāmipī’ti.
an10.85:18.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo samanuyuñjati samanuggāhati samanubhāsati.
an10.85:18.2	So tathāgatena vā tathāgatasāvakena vā jhāyinā samāpattikusalena paracittakusalena paracittapariyāyakusalena samanuyuñjiyamāno samanuggāhiyamāno samanubhāsiyamāno irīṇaṁ āpajjati vicinaṁ āpajjati anayaṁ āpajjati byasanaṁ āpajjati anayabyasanaṁ āpajjati.
an10.85:19.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca manasi karoti:
an10.85:19.2	‘kiṁ nu kho ayamāyasmā katthī hoti vikatthī adhigamesu—
an10.85:19.3	ahaṁ paṭhamaṁ jhānaṁ samāpajjāmipi …pe…
an10.85:19.4	ahaṁ saññāvedayitanirodhaṁ samāpajjāmipi vuṭṭhahāmipī’ti.
an10.85:20.1	Tamenaṁ tathāgato vā tathāgatasāvako vā jhāyī samāpattikusalo paracittapariyāyakusalo cetasā ceto paricca pajānāti:
an10.85:21.1	‘Dīgharattaṁ kho ayamāyasmā khaṇḍakārī chiddakārī sabalakārī kammāsakārī, na santatakārī na santatavutti sīlesu.
an10.85:21.2	Dussīlo kho ayamāyasmā;
an10.85:21.3	dussilyaṁ kho pana tathāgatappavedite dhammavinaye parihānametaṁ.
an10.85:22.1	Assaddho kho pana ayamāyasmā;
an10.85:22.2	assaddhiyaṁ kho pana tathāgatappavedite dhammavinaye parihānametaṁ.
an10.85:23.1	Appassuto kho pana ayamāyasmā anācāro;
an10.85:23.2	appasaccaṁ kho pana tathāgatappavedite dhammavinaye parihānametaṁ.
an10.85:24.1	Dubbaco kho pana ayamāyasmā;
an10.85:24.2	dovacassatā kho pana tathāgatappavedite dhammavinaye parihānametaṁ.
an10.85:25.1	Pāpamitto kho pana ayamāyasmā;
an10.85:25.2	pāpamittatā kho pana tathāgatappavedite dhammavinaye parihānametaṁ.
an10.85:26.1	Kusīto kho pana ayamāyasmā;
an10.85:26.2	kosajjaṁ kho pana tathāgatappavedite dhammavinaye parihānametaṁ.
an10.85:27.1	Muṭṭhassati kho pana ayamāyasmā;
an10.85:27.2	muṭṭhassaccaṁ kho pana tathāgatappavedite dhammavinaye parihānametaṁ.
an10.85:28.1	Kuhako kho pana ayamāyasmā;
an10.85:28.2	kohaññaṁ kho pana tathāgatappavedite dhammavinaye parihānametaṁ.
an10.85:29.1	Dubbharo kho pana ayamāyasmā;
an10.85:29.2	dubbharatā kho pana tathāgatappavedite dhammavinaye parihānametaṁ.
an10.85:30.1	Duppañño kho pana ayamāyasmā;
an10.85:30.2	duppaññatā kho pana tathāgatappavedite dhammavinaye parihānametaṁ’.
an10.85:31.1	So vatāvuso, bhikkhu ‘ime dasa dhamme appahāya imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.85:31.2	So vatāvuso, bhikkhu ‘ime dasa dhamme pahāya imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjatī”ti.
an10.85:31.3	Pañcamaṁ.
an10.86:0.1	Aṅguttara Nikāya 10.86
an10.86:0.2	9. Theravagga
an10.86:0.3	Adhimānasutta
an10.86:1.1	Ekaṁ samayaṁ āyasmā mahākassapo rājagahe viharati veḷuvane kalandakanivāpe.
an10.86:1.2	Tatra kho āyasmā mahākassapo bhikkhū āmantesi:
an10.86:1.3	“āvuso bhikkhave”ti.
an10.86:1.4	“Āvuso”ti kho te bhikkhū āyasmato mahākassapassa paccassosuṁ.
an10.86:1.5	Āyasmā mahākassapo etadavoca:
an10.86:2.1	“Idhāvuso, bhikkhu aññaṁ byākaroti:
an10.86:2.2	‘khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an10.86:2.3	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo samanuyuñjati samanuggāhati samanubhāsati.
an10.86:2.4	So tathāgatena vā tathāgatasāvakena vā jhāyinā samāpattikusalena paracittakusalena paracittapariyāyakusalena samanuyuñjiyamāno samanuggāhiyamāno samanubhāsiyamāno irīṇaṁ āpajjati vicinaṁ āpajjati anayaṁ āpajjati byasanaṁ āpajjati anayabyasanaṁ āpajjati.
an10.86:3.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca manasi karoti:
an10.86:3.2	‘kiṁ nu kho ayamāyasmā aññaṁ byākaroti—
an10.86:3.3	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an10.86:4.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca pajānāti:
an10.86:5.1	‘Adhimāniko kho ayamāyasmā adhimānasacco, appatte pattasaññī, akate katasaññī, anadhigate adhigatasaññī.
an10.86:5.2	Adhimānena aññaṁ byākaroti—
an10.86:5.3	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an10.86:6.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca manasi karoti:
an10.86:6.2	‘kiṁ nu kho ayamāyasmā nissāya adhimāniko adhimānasacco, appatte pattasaññī, akate katasaññī, anadhigate adhigatasaññī.
an10.86:6.3	Adhimānena aññaṁ byākaroti—
an10.86:6.4	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an10.86:7.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca pajānāti:
an10.86:8.1	‘Bahussuto kho pana ayamāyasmā sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an10.86:8.2	Tasmā ayamāyasmā adhimāniko adhimānasacco, appatte pattasaññī, akate katasaññī, anadhigate adhigatasaññī.
an10.86:8.3	Adhimānena aññaṁ byākaroti—
an10.86:8.4	khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmī’ti.
an10.86:9.1	Tamenaṁ tathāgato vā tathāgatasāvako vā jhāyī samāpattikusalo paracittakusalo paracittapariyāyakusalo evaṁ cetasā ceto paricca pajānāti:
an10.86:10.1	‘Abhijjhālu kho pana ayamāyasmā;
an10.86:10.2	abhijjhāpariyuṭṭhitena cetasā bahulaṁ viharati.
an10.86:10.3	Abhijjhāpariyuṭṭhānaṁ kho pana tathāgatappavedite dhammavinaye parihānametaṁ.
an10.86:11.1	Byāpanno kho pana ayamāyasmā;
an10.86:11.2	byāpādapariyuṭṭhitena cetasā bahulaṁ viharati.
an10.86:11.3	Byāpādapariyuṭṭhānaṁ kho pana tathāgatappavedite dhammavinaye parihānametaṁ.
an10.86:12.1	Thinamiddho kho pana ayamāyasmā;
an10.86:12.2	thinamiddhapariyuṭṭhitena cetasā bahulaṁ viharati.
an10.86:12.3	Thinamiddhapariyuṭṭhānaṁ kho pana tathāgatappavedite dhammavinaye parihānametaṁ.
an10.86:13.1	Uddhato kho pana ayamāyasmā;
an10.86:13.2	uddhaccapariyuṭṭhitena cetasā bahulaṁ viharati.
an10.86:13.3	Uddhaccapariyuṭṭhānaṁ kho pana tathāgatappavedite dhammavinaye parihānametaṁ.
an10.86:14.1	Vicikiccho kho pana ayamāyasmā;
an10.86:14.2	vicikicchāpariyuṭṭhitena cetasā bahulaṁ viharati.
an10.86:14.3	Vicikicchāpariyuṭṭhānaṁ kho pana tathāgatappavedite dhammavinaye parihānametaṁ.
an10.86:15.1	Kammārāmo kho pana ayamāyasmā kammarato kammārāmataṁ anuyutto.
an10.86:15.2	Kammārāmatā kho pana tathāgatappavedite dhammavinaye parihānametaṁ.
an10.86:16.1	Bhassārāmo kho pana ayamāyasmā bhassarato bhassārāmataṁ anuyutto.
an10.86:16.2	Bhassārāmatā kho pana tathāgatappavedite dhammavinaye parihānametaṁ.
an10.86:17.1	Niddārāmo kho pana ayamāyasmā niddārato niddārāmataṁ anuyutto.
an10.86:17.2	Niddārāmatā kho pana tathāgatappavedite dhammavinaye parihānametaṁ.
an10.86:18.1	Saṅgaṇikārāmo kho pana ayamāyasmā saṅgaṇikarato saṅgaṇikārāmataṁ anuyutto.
an10.86:18.2	Saṅgaṇikārāmatā kho pana tathāgatappavedite dhammavinaye parihānametaṁ.
an10.86:19.1	Sati kho pana ayamāyasmā uttari karaṇīye oramattakena visesādhigamena antarā vosānaṁ āpanno.
an10.86:19.2	Antarā vosānagamanaṁ kho pana tathāgatappavedite dhammavinaye parihānametaṁ’.
an10.86:20.1	So vatāvuso, bhikkhu ‘ime dasa dhamme appahāya imasmiṁ dhammavinaye vuddhiṁ virūḷhiṁ vepullaṁ āpajjissatī’ti netaṁ ṭhānaṁ vijjati.
an10.86:20.2	So vatāvuso, bhikkhu ‘ime dasa dhamme pahāya imasmiṁ dhammavinaye vuddhiṁ virūḷhiṁ vepullaṁ āpajjissatī’ti ṭhānametaṁ vijjatī”ti.
an10.86:20.3	Chaṭṭhaṁ.
an10.87:0.1	Aṅguttara Nikāya 10.87
an10.87:0.2	9. Theravagga
an10.87:0.3	Nappiyasutta
an10.87:1.1	Tatra kho bhagavā kālaṅkataṁ bhikkhuṁ ārabbha bhikkhū āmantesi:
an10.87:1.2	“bhikkhavo”ti.
an10.87:1.3	“Bhadante”ti te bhikkhū bhagavato paccassosuṁ.
an10.87:1.4	Bhagavā etadavoca:
an10.87:2.1	“Idha, bhikkhave, bhikkhu adhikaraṇiko hoti, adhikaraṇasamathassa na vaṇṇavādī.
an10.87:2.2	Yampi, bhikkhave, bhikkhu adhikaraṇiko hoti adhikaraṇasamathassa na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:3.1	Puna caparaṁ, bhikkhave, bhikkhu na sikkhākāmo hoti, sikkhāsamādānassa na vaṇṇavādī.
an10.87:3.2	Yampi, bhikkhave, bhikkhu na sikkhākāmo hoti sikkhāsamādānassa na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:4.1	Puna caparaṁ, bhikkhave, bhikkhu pāpiccho hoti, icchāvinayassa na vaṇṇavādī.
an10.87:4.2	Yampi, bhikkhave, bhikkhu pāpiccho hoti icchāvinayassa na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:5.1	Puna caparaṁ, bhikkhave, bhikkhu kodhano hoti, kodhavinayassa na vaṇṇavādī.
an10.87:5.2	Yampi, bhikkhave, bhikkhu kodhano hoti kodhavinayassa na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:6.1	Puna caparaṁ, bhikkhave, bhikkhu makkhī hoti, makkhavinayassa na vaṇṇavādī.
an10.87:6.2	Yampi, bhikkhave, bhikkhu makkhī hoti makkhavinayassa na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:7.1	Puna caparaṁ, bhikkhave, bhikkhu saṭho hoti, sāṭheyyavinayassa na vaṇṇavādī.
an10.87:7.2	Yampi, bhikkhave, bhikkhu saṭho hoti sāṭheyyavinayassa na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:8.1	Puna caparaṁ, bhikkhave, bhikkhu māyāvī hoti, māyāvinayassa na vaṇṇavādī.
an10.87:8.2	Yampi, bhikkhave, bhikkhu māyāvī hoti māyāvinayassa na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:9.1	Puna caparaṁ, bhikkhave, bhikkhu dhammānaṁ na nisāmakajātiko hoti, dhammanisantiyā na vaṇṇavādī.
an10.87:9.2	Yampi, bhikkhave, bhikkhu dhammānaṁ na nisāmakajātiko hoti dhammanisantiyā na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:10.1	Puna caparaṁ, bhikkhave, bhikkhu na paṭisallīno hoti, paṭisallānassa na vaṇṇavādī.
an10.87:10.2	Yampi, bhikkhave, bhikkhu na paṭisallīno hoti paṭisallānassa na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:11.1	Puna caparaṁ, bhikkhave, bhikkhu sabrahmacārīnaṁ na paṭisanthārako hoti, paṭisanthārakassa na vaṇṇavādī.
an10.87:11.2	Yampi, bhikkhave, bhikkhu sabrahmacārīnaṁ na paṭisanthārako hoti paṭisanthārakassa na vaṇṇavādī, ayampi dhammo na piyatāya na garutāya na bhāvanāya na sāmaññāya na ekībhāvāya saṁvattati.
an10.87:12.1	Evarūpassa, bhikkhave, bhikkhuno kiñcāpi evaṁ icchā uppajjeyya:
an10.87:12.2	‘aho vata maṁ sabrahmacārī sakkareyyuṁ garuṁ kareyyuṁ māneyyuṁ pūjeyyun’ti, atha kho naṁ sabrahmacārī na ceva sakkaronti na garuṁ karonti na mānenti na pūjenti.
an10.87:12.3	Taṁ kissa hetu?
an10.87:12.4	Tathāhissa, bhikkhave, viññū sabrahmacārī te pāpake akusale dhamme appahīne samanupassanti.
an10.87:13.1	Seyyathāpi, bhikkhave, assakhaḷuṅkassa kiñcāpi evaṁ icchā uppajjeyya:
an10.87:13.2	‘aho vata maṁ manussā ājānīyaṭṭhāne ṭhapeyyuṁ, ājānīyabhojanañca bhojeyyuṁ, ājānīyaparimajjanañca parimajjeyyun’ti, atha kho naṁ manussā na ceva ājānīyaṭṭhāne ṭhapenti na ca ājānīyabhojanaṁ bhojenti na ca ājānīyaparimajjanaṁ parimajjanti.
an10.87:13.3	Taṁ kissa hetu?
an10.87:13.4	Tathāhissa, bhikkhave, viññū manussā tāni sāṭheyyāni kūṭeyyāni jimheyyāni vaṅkeyyāni appahīnāni samanupassanti.
an10.87:13.5	Evamevaṁ kho, bhikkhave, evarūpassa bhikkhuno kiñcāpi evaṁ icchā uppajjeyya:
an10.87:13.6	‘aho vata maṁ sabrahmacārī sakkareyyuṁ garuṁ kareyyuṁ māneyyuṁ pūjeyyun’ti, atha kho naṁ sabrahmacārī na ceva sakkaronti na garuṁ karonti na mānenti na pūjenti.
an10.87:13.7	Taṁ kissa hetu?
an10.87:13.8	Tathāhissa, bhikkhave, viññū sabrahmacārī te pāpake akusale dhamme appahīne samanupassanti.
an10.87:14.1	Idha pana, bhikkhave, bhikkhu na adhikaraṇiko hoti, adhikaraṇasamathassa vaṇṇavādī.
an10.87:14.2	Yampi, bhikkhave, bhikkhu na adhikaraṇiko hoti adhikaraṇasamathassa vaṇṇavādī, ayampi dhammo piyatāya garutāya bhāvanāya sāmaññāya ekībhāvāya saṁvattati.
an10.87:15.1	Puna caparaṁ, bhikkhave, bhikkhu sikkhākāmo hoti, sikkhāsamādānassa vaṇṇavādī.
an10.87:15.2	Yampi, bhikkhave, bhikkhu sikkhākāmo hoti sikkhāsamādānassa vaṇṇavādī, ayampi dhammo piyatāya garutāya bhāvanāya sāmaññāya ekībhāvāya saṁvattati.
an10.87:16.1	Puna caparaṁ, bhikkhave, bhikkhu appiccho hoti, icchāvinayassa vaṇṇavādī.
an10.87:16.2	Yampi, bhikkhave, bhikkhu appiccho hoti icchāvinayassa vaṇṇavādī, ayampi dhammo …pe… ekībhāvāya saṁvattati.
an10.87:17.1	Puna caparaṁ, bhikkhave, bhikkhu akkodhano hoti, kodhavinayassa vaṇṇavādī.
an10.87:17.2	Yampi, bhikkhave, bhikkhu akkodhano hoti kodhavinayassa vaṇṇavādī, ayampi dhammo …pe… ekībhāvāya saṁvattati.
an10.87:18.1	Puna caparaṁ, bhikkhave, bhikkhu amakkhī hoti, makkhavinayassa vaṇṇavādī.
an10.87:18.2	Yampi, bhikkhave, bhikkhu amakkhī hoti makkhavinayassa vaṇṇavādī, ayampi dhammo …pe… ekībhāvāya saṁvattati.
an10.87:19.1	Puna caparaṁ, bhikkhave, bhikkhu asaṭho hoti, sāṭheyyavinayassa vaṇṇavādī.
an10.87:19.2	Yampi, bhikkhave, bhikkhu asaṭho hoti sāṭheyyavinayassa vaṇṇavādī, ayampi dhammo …pe… ekībhāvāya saṁvattati.
an10.87:20.1	Puna caparaṁ, bhikkhave, bhikkhu amāyāvī hoti, māyāvinayassa vaṇṇavādī.
an10.87:20.2	Yampi, bhikkhave, bhikkhu amāyāvī hoti māyāvinayassa vaṇṇavādī, ayampi dhammo …pe… ekībhāvāya saṁvattati.
an10.87:21.1	Puna caparaṁ, bhikkhave, bhikkhu dhammānaṁ nisāmakajātiko hoti, dhammanisantiyā vaṇṇavādī.
an10.87:21.2	Yampi, bhikkhave, bhikkhu dhammānaṁ nisāmakajātiko hoti dhammanisantiyā vaṇṇavādī, ayampi dhammo …pe… ekībhāvāya saṁvattati.
an10.87:22.1	Puna caparaṁ, bhikkhave, bhikkhu paṭisallīno hoti, paṭisallānassa vaṇṇavādī.
an10.87:22.2	Yampi, bhikkhave, bhikkhu paṭisallīno hoti paṭisallānassa vaṇṇavādī, ayampi dhammo …pe… ekībhāvāya saṁvattati.
an10.87:23.1	Puna caparaṁ, bhikkhave, bhikkhu sabrahmacārīnaṁ paṭisanthārako hoti, paṭisanthārakassa vaṇṇavādī.
an10.87:23.2	Yampi, bhikkhave, bhikkhu sabrahmacārīnaṁ paṭisanthārako hoti paṭisanthārakassa vaṇṇavādī, ayampi dhammo piyatāya garutāya bhāvanāya sāmaññāya ekībhāvāya saṁvattati.
an10.87:24.1	Evarūpassa, bhikkhave, bhikkhuno kiñcāpi na evaṁ icchā uppajjeyya:
an10.87:24.2	‘aho vata maṁ sabrahmacārī sakkareyyuṁ garuṁ kareyyuṁ māneyyuṁ pūjeyyun’ti, atha kho naṁ sabrahmacārī sakkaronti garuṁ karonti mānenti pūjenti.
an10.87:24.3	Taṁ kissa hetu?
an10.87:24.4	Tathāhissa, bhikkhave, viññū sabrahmacārī te pāpake akusale dhamme pahīne samanupassanti.
an10.87:25.1	Seyyathāpi, bhikkhave, bhaddassa assājānīyassa kiñcāpi na evaṁ icchā uppajjeyya:
an10.87:25.2	‘aho vata maṁ manussā ājānīyaṭṭhāne ṭhapeyyuṁ, ājānīyabhojanañca bhojeyyuṁ, ājānīyaparimajjanañca parimajjeyyun’ti, atha kho naṁ manussā ājānīyaṭṭhāne ca ṭhapenti ājānīyabhojanañca bhojenti ājānīyaparimajjanañca parimajjanti.
an10.87:25.3	Taṁ kissa hetu?
an10.87:25.4	Tathāhissa, bhikkhave, viññū manussā tāni sāṭheyyāni kūṭeyyāni jimheyyāni vaṅkeyyāni pahīnāni samanupassanti.
an10.87:26.1	Evamevaṁ kho, bhikkhave, evarūpassa bhikkhuno kiñcāpi na evaṁ icchā uppajjeyya:
an10.87:26.2	‘aho vata maṁ sabrahmacārī sakkareyyuṁ garuṁ kareyyuṁ māneyyuṁ pūjeyyun’ti, atha kho naṁ sabrahmacārī sakkaronti garuṁ karonti mānenti pūjenti.
an10.87:26.3	Taṁ kissa hetu?
an10.87:26.4	Tathāhissa, bhikkhave, viññū sabrahmacārī te pāpake akusale dhamme pahīne samanupassantī”ti.
an10.87:26.5	Sattamaṁ.
an10.88:0.1	Aṅguttara Nikāya 10.88
an10.88:0.2	9. Theravagga
an10.88:0.3	Akkosakasutta
an10.88:1.1	“Yo so, bhikkhave, bhikkhu akkosakaparibhāsako ariyūpavādī sabrahmacārīnaṁ ṭhānametaṁ avakāso yaṁ so dasannaṁ byasanānaṁ aññataraṁ byasanaṁ nigaccheyya.
an10.88:1.2	Katamesaṁ dasannaṁ?
an10.88:1.3	Anadhigataṁ nādhigacchati, adhigatā parihāyati, saddhammassa na vodāyanti, saddhammesu vā adhimāniko hoti anabhirato vā brahmacariyaṁ carati, aññataraṁ vā saṅkiliṭṭhaṁ āpattiṁ āpajjati, gāḷhaṁ vā rogātaṅkaṁ phusati, ummādaṁ vā pāpuṇāti cittakkhepaṁ, sammūḷho kālaṁ karoti, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
an10.88:1.4	Yo so, bhikkhave, bhikkhu akkosakaparibhāsako ariyūpavādī sabrahmacārīnaṁ, ṭhānametaṁ avakāso yaṁ so imesaṁ dasannaṁ byasanānaṁ aññataraṁ byasanaṁ nigaccheyyā”ti.
an10.88:1.5	Aṭṭhamaṁ.
an10.89:0.1	Aṅguttara Nikāya 10.89
an10.89:0.2	9. Theravagga
an10.89:0.3	Kokālikasutta
an10.89:1.1	Atha kho kokāliko bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho kokāliko bhikkhu bhagavantaṁ etadavoca:
an10.89:1.2	“pāpicchā, bhante, sāriputtamoggallānā, pāpikānaṁ icchānaṁ vasaṁ gatā”ti.
an10.89:1.3	“Mā hevaṁ, kokālika, mā hevaṁ, kokālika.
an10.89:1.4	Pasādehi, kokālika, sāriputtamoggallānesu cittaṁ.
an10.89:1.5	Pesalā sāriputtamoggallānā”ti.
an10.89:2.1	Dutiyampi kho kokāliko bhikkhu bhagavantaṁ etadavoca:
an10.89:2.2	“kiñcāpi me, bhante, bhagavā saddhāyiko paccayiko, atha kho pāpicchāva sāriputtamoggallānā, pāpikānaṁ icchānaṁ vasaṁ gatā”ti.
an10.89:2.3	“Mā hevaṁ, kokālika, mā hevaṁ, kokālika.
an10.89:2.4	Pasādehi, kokālika, sāriputtamoggallānesu cittaṁ.
an10.89:2.5	Pesalā sāriputtamoggallānā”ti.
an10.89:3.1	Tatiyampi kho kokāliko bhikkhu bhagavantaṁ etadavoca:
an10.89:3.2	“kiñcāpi me, bhante, bhagavā saddhāyiko paccayiko, atha kho pāpicchāva sāriputtamoggallānā, pāpikānaṁ icchānaṁ vasaṁ gatā”ti.
an10.89:3.3	“Mā hevaṁ, kokālika, mā hevaṁ, kokālika.
an10.89:3.4	Pasādehi, kokālika, sāriputtamoggallānesu cittaṁ.
an10.89:3.5	Pesalā sāriputtamoggallānā”ti.
an10.89:4.1	Atha kho kokāliko bhikkhu uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an10.89:4.2	Acirapakkantassa ca kokālikassa bhikkhuno sāsapamattīhi pīḷakāhi sabbo kāyo phuṭo ahosi.
an10.89:4.3	Sāsapamattiyo hutvā muggamattiyo ahesuṁ, muggamattiyo hutvā kalāyamattiyo ahesuṁ, kalāyamattiyo hutvā kolaṭṭhimattiyo ahesuṁ, kolaṭṭhimattiyo hutvā kolamattiyo ahesuṁ, kolamattiyo hutvā āmalakamattiyo ahesuṁ, āmalakamattiyo hutvā tiṇḍukamattiyo ahesuṁ, tiṇḍukamattiyo hutvā, beḷuvasalāṭukamattiyo ahesuṁ, beḷuvasalāṭukamattiyo hutvā billamattiyo ahesuṁ, billamattiyo hutvā pabhijjiṁsu, pubbañca lohitañca pagghariṁsu.
an10.89:4.4	So sudaṁ kadalipattesu seti macchova visagilito.
an10.89:5.1	Atha kho turū paccekabrahmā yena kokāliko bhikkhu tenupasaṅkami; upasaṅkamitvā vehāse ṭhatvā kokālikaṁ bhikkhuṁ etadavoca:
an10.89:5.2	“pasādehi, kokālika, sāriputtamoggallānesu cittaṁ.
an10.89:5.3	Pesalā sāriputtamoggallānā”ti.
an10.89:5.4	“Kosi tvaṁ, āvuso”ti?
an10.89:5.5	“Ahaṁ turū paccekabrahmā”ti.
an10.89:5.6	“Nanu tvaṁ, āvuso, bhagavatā anāgāmī byākato, atha kiñcarahi idhāgato?
an10.89:5.7	Passa yāvañca te idaṁ aparaddhan”ti.
an10.89:6.1	Atha kho turū paccekabrahmā kokālikaṁ bhikkhuṁ gāthāhi ajjhabhāsi:
an10.89:7.1	“Purisassa hi jātassa,
an10.89:7.2	kuṭhārī jāyate mukhe;
an10.89:7.3	Yāya chindati attānaṁ,
an10.89:7.4	bālo dubbhāsitaṁ bhaṇaṁ.
an10.89:8.1	Yo nindiyaṁ pasaṁsati,
an10.89:8.2	Taṁ vā nindati yo pasaṁsiyo;
an10.89:8.3	Vicināti mukhena so kaliṁ,
an10.89:8.4	Kalinā tena sukhaṁ na vindati.
an10.89:9.1	Appamattako ayaṁ kali,
an10.89:9.2	Yo akkhesu dhanaparājayo;
an10.89:9.3	Sabbassāpi sahāpi attanā,
an10.89:9.4	Ayameva mahattaro kali;
an10.89:9.5	Yo sugatesu manaṁ padūsaye.
an10.89:10.1	Sataṁ sahassānaṁ nirabbudānaṁ,
an10.89:10.2	Chattiṁsati pañca ca abbudāni;
an10.89:10.3	Yamariyagarahī nirayaṁ upeti,
an10.89:10.4	Vācaṁ manañca paṇidhāya pāpakan”ti.
an10.89:11.1	Atha kho kokāliko bhikkhu teneva ābādhena kālamakāsi.
an10.89:11.2	Kālaṅkato ca kokāliko bhikkhu padumaṁ nirayaṁ upapajjati sāriputtamoggallānesu cittaṁ āghātetvā.
an10.89:12.1	Atha kho brahmā sahampati abhikkantāya rattiyā abhikkantavaṇṇo kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho brahmā sahampati bhagavantaṁ etadavoca:
an10.89:12.2	“kokāliko, bhante, bhikkhu kālaṅkato.
an10.89:12.3	Kālaṅkato ca, bhante, kokāliko bhikkhu padumaṁ nirayaṁ upapanno sāriputtamoggallānesu cittaṁ āghātetvā”ti.
an10.89:12.4	Idamavoca brahmā sahampati.
an10.89:12.5	Idaṁ vatvā bhagavantaṁ abhivādetvā padakkhiṇaṁ katvā tatthevantaradhāyi.
an10.89:13.1	Atha kho bhagavā tassā rattiyā accayena bhikkhū āmantesi:
an10.89:13.2	“imaṁ, bhikkhave, rattiṁ brahmā sahampati abhikkantāya rattiyā abhikkantavaṇṇo kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhito kho, bhikkhave, brahmā sahampati maṁ etadavoca:
an10.89:13.3	‘kokāliko, bhante, bhikkhu kālaṅkato;
an10.89:13.4	kālaṅkato ca, bhante, kokāliko bhikkhu padumaṁ nirayaṁ upapanno sāriputtamoggallānesu cittaṁ āghātetvā’ti.
an10.89:13.5	Idamavoca, bhikkhave, brahmā sahampati.
an10.89:13.6	Idaṁ vatvā maṁ abhivādetvā padakkhiṇaṁ katvā tatthevantaradhāyī”ti.
an10.89:14.1	Evaṁ vutte, aññataro bhikkhu bhagavantaṁ etadavoca:
an10.89:14.2	“kīva dīghaṁ nu kho, bhante, padume niraye āyuppamāṇan”ti?
an10.89:14.3	“Dīghaṁ kho, bhikkhu, padume niraye āyuppamāṇaṁ.
an10.89:14.4	Na taṁ sukaraṁ saṅkhātuṁ:
an10.89:14.5	‘ettakāni vassānīti vā ettakāni vassasatānīti vā ettakāni vassasahassānīti vā ettakāni vassasatasahassānīti vā’”ti.
an10.89:15.1	“Sakkā pana, bhante, upamaṁ kātun”ti?
an10.89:15.2	“Sakkā, bhikkhū”ti bhagavā avoca:
an10.89:15.3	“seyyathāpi, bhikkhu, vīsatikhāriko kosalako tilavāho tato puriso vassasatassa vassasatassa accayena ekamekaṁ tilaṁ uddhareyya.
an10.89:15.4	Khippataraṁ kho so, bhikkhu, vīsatikhāriko kosalako tilavāho iminā upakkamena parikkhayaṁ pariyādānaṁ gaccheyya, na tveva eko abbudo nirayo.
an10.89:15.5	Seyyathāpi, bhikkhu, vīsati abbudā nirayā; evameko nirabbudo nirayo.
an10.89:15.6	Seyyathāpi, bhikkhu, vīsati nirabbudā nirayā; evameko ababo nirayo.
an10.89:15.7	Seyyathāpi, bhikkhu, vīsati ababā nirayā; evameko aṭaṭo nirayo.
an10.89:15.8	Seyyathāpi, bhikkhu, vīsati aṭaṭā nirayā; evameko ahaho nirayo.
an10.89:15.9	Seyyathāpi, bhikkhu, vīsati ahahā nirayā; evameko kumudo nirayo.
an10.89:15.10	Seyyathāpi, bhikkhu, vīsati kumudā nirayā; evameko sogandhiko nirayo.
an10.89:15.11	Seyyathāpi, bhikkhu, vīsati sogandhikā nirayā; evameko uppalako nirayo.
an10.89:15.12	Seyyathāpi, bhikkhu, vīsati uppalakā nirayā; evameko puṇḍarīko nirayo.
an10.89:15.13	Seyyathāpi, bhikkhu, vīsati puṇḍarīkā nirayā; evameko padumo nirayo.
an10.89:15.14	Padumaṁ kho pana, bhikkhu, nirayaṁ kokāliko bhikkhu upapanno sāriputtamoggallānesu cittaṁ āghātetvā”ti.
an10.89:15.15	Idamavoca bhagavā.
an10.89:15.16	Idaṁ vatvāna sugato athāparaṁ etadavoca satthā:
an10.89:16.1	“Purisassa hi jātassa,
an10.89:16.2	kuṭhārī jāyate mukhe;
an10.89:16.3	Yāya chindati attānaṁ,
an10.89:16.4	bālo dubbhāsitaṁ bhaṇaṁ.
an10.89:17.1	Yo nindiyaṁ pasaṁsati,
an10.89:17.2	Taṁ vā nindati yo pasaṁsiyo;
an10.89:17.3	Vicināti mukhena so kaliṁ,
an10.89:17.4	Kalinā tena sukhaṁ na vindati.
an10.89:18.1	Appamattako ayaṁ kali,
an10.89:18.2	Yo akkhesu dhanaparājayo;
an10.89:18.3	Sabbassāpi sahāpi attanā,
an10.89:18.4	Ayameva mahattaro kali;
an10.89:18.5	Yo sugatesu manaṁ padūsaye.
an10.89:19.1	Sataṁ sahassānaṁ nirabbudānaṁ,
an10.89:19.2	Chattiṁsati pañca ca abbudāni;
an10.89:19.3	Yamariyagarahī nirayaṁ upeti,
an10.89:19.4	Vācaṁ manañca paṇidhāya pāpakan”ti.
an10.89:19.5	Navamaṁ.
an10.90:0.1	Aṅguttara Nikāya 10.90
an10.90:0.2	9. Theravagga
an10.90:0.3	Khīṇāsavabalasutta
an10.90:1.1	Atha kho āyasmā sāriputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ sāriputtaṁ bhagavā etadavoca:
an10.90:1.2	“kati nu kho, sāriputta, khīṇāsavassa bhikkhuno balāni, yehi balehi samannāgato khīṇāsavo bhikkhu āsavānaṁ khayaṁ paṭijānāti:
an10.90:1.3	‘khīṇā me āsavā’”ti?
an10.90:2.1	“Dasa, bhante, khīṇāsavassa bhikkhuno balāni, yehi balehi samannāgato khīṇāsavo bhikkhu āsavānaṁ khayaṁ paṭijānāti:
an10.90:2.2	‘khīṇā me āsavā’ti.
an10.90:2.3	Katamāni dasa?
an10.90:2.4	Idha, bhante, khīṇāsavassa bhikkhuno aniccato sabbe saṅkhārā yathābhūtaṁ sammappaññāya sudiṭṭhā honti.
an10.90:2.5	Yampi, bhante, khīṇāsavassa bhikkhuno aniccato sabbe saṅkhārā yathābhūtaṁ sammappaññāya sudiṭṭhā honti, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an10.90:2.6	‘khīṇā me āsavā’ti.
an10.90:3.1	Puna caparaṁ, bhante, khīṇāsavassa bhikkhuno aṅgārakāsūpamā kāmā yathābhūtaṁ sammappaññāya sudiṭṭhā honti.
an10.90:3.2	Yampi, bhante, khīṇāsavassa bhikkhuno aṅgārakāsūpamā kāmā yathābhūtaṁ sammappaññāya sudiṭṭhā honti, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an10.90:3.3	‘khīṇā me āsavā’ti.
an10.90:4.1	Puna caparaṁ, bhante, khīṇāsavassa bhikkhuno vivekaninnaṁ cittaṁ hoti vivekapoṇaṁ vivekapabbhāraṁ vivekaṭṭhaṁ nekkhammābhirataṁ byantībhūtaṁ sabbaso āsavaṭṭhāniyehi dhammehi.
an10.90:4.2	Yampi, bhante, khīṇāsavassa bhikkhuno vivekaninnaṁ cittaṁ hoti vivekapoṇaṁ vivekapabbhāraṁ vivekaṭṭhaṁ nekkhammābhirataṁ byantībhūtaṁ sabbaso āsavaṭṭhāniyehi dhammehi, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an10.90:4.3	‘khīṇā me āsavā’ti.
an10.90:5.1	Puna caparaṁ, bhante, khīṇāsavassa bhikkhuno cattāro satipaṭṭhānā bhāvitā honti subhāvitā.
an10.90:5.2	Yampi, bhante, khīṇāsavassa bhikkhuno cattāro satipaṭṭhānā bhāvitā honti subhāvitā, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an10.90:5.3	‘khīṇā me āsavā’ti.
an10.90:6.1	Puna caparaṁ, bhante, khīṇāsavassa bhikkhuno cattāro sammappadhānā bhāvitā honti subhāvitā …pe…
an10.90:6.2	cattāro iddhipādā bhāvitā honti subhāvitā …pe…
an10.90:6.3	pañcindriyāni …
an10.90:6.4	pañca balāni bhāvitāni honti subhāvitāni …
an10.90:6.5	satta bojjhaṅgā bhāvitā honti subhāvitā …
an10.90:6.6	ariyo aṭṭhaṅgiko maggo bhāvito hoti subhāvito.
an10.90:6.7	Yampi, bhante, khīṇāsavassa bhikkhuno ariyo aṭṭhaṅgiko maggo bhāvito hoti subhāvito, idampi, bhante, khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
an10.90:6.8	‘khīṇā me āsavā’ti.
an10.90:7.1	Imāni kho, bhante, dasa khīṇāsavassa bhikkhuno balāni, yehi balehi samannāgato khīṇāsavo bhikkhu āsavānaṁ khayaṁ paṭijānāti:
an10.90:7.2	‘khīṇā me āsavā’”ti.
an10.90:7.3	Dasamaṁ.
an10.90:7.4	Theravaggo catuttho.
an10.90:8.0	Tassuddānaṁ
an10.90:8.1	Vāhanānando puṇṇiyo,
an10.90:8.2	byākaraṁ katthimāniko;
an10.90:8.3	Napiyakkosakokāli,
an10.90:8.4	khīṇāsavabalena cāti.
an10.91:0.1	Aṅguttara Nikāya 10.91
an10.91:0.2	10. Upālivagga
an10.91:0.3	Kāmabhogīsutta
an10.91:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.91:1.2	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an10.91:2.1	“Dasayime, gahapati, kāmabhogī santo saṁvijjamānā lokasmiṁ.
an10.91:2.2	Katame dasa?
an10.91:2.3	Idha, gahapati, ekacco kāmabhogī adhammena bhoge pariyesati sāhasena;
an10.91:2.4	adhammena bhoge pariyesitvā sāhasena na attānaṁ sukheti na pīṇeti na saṁvibhajati na puññāni karoti.
an10.91:3.1	Idha pana, gahapati, ekacco kāmabhogī adhammena bhoge pariyesati sāhasena;
an10.91:3.2	adhammena bhoge pariyesitvā sāhasena attānaṁ sukheti pīṇeti, na saṁvibhajati na puññāni karoti.
an10.91:4.1	Idha pana, gahapati, ekacco kāmabhogī adhammena bhoge pariyesati sāhasena;
an10.91:4.2	adhammena bhoge pariyesitvā sāhasena attānaṁ sukheti pīṇeti saṁvibhajati puññāni karoti.
an10.91:5.1	Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi;
an10.91:5.2	dhammādhammena bhoge pariyesitvā sāhasenapi asāhasenapi na attānaṁ sukheti na pīṇeti na saṁvibhajati na puññāni karoti.
an10.91:6.1	Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi;
an10.91:6.2	dhammādhammena bhoge pariyesitvā sāhasenapi asāhasenapi attānaṁ sukheti pīṇeti, na saṁvibhajati na puññāni karoti.
an10.91:7.1	Idha pana, gahapati, ekacco kāmabhogī dhammādhammena bhoge pariyesati sāhasenapi asāhasenapi;
an10.91:7.2	dhammādhammena bhoge pariyesitvā sāhasenapi asāhasenapi attānaṁ sukheti pīṇeti saṁvibhajati puññāni karoti.
an10.91:8.1	Idha pana, gahapati, ekacco kāmabhogī dhammena bhoge pariyesati asāhasena;
an10.91:8.2	dhammena bhoge pariyesitvā asāhasena na attānaṁ sukheti na pīṇeti na saṁvibhajati na puññāni karoti.
an10.91:9.1	Idha pana, gahapati, ekacco kāmabhogī dhammena bhoge pariyesati asāhasena;
an10.91:9.2	dhammena bhoge pariyesitvā asāhasena attānaṁ sukheti pīṇeti, na saṁvibhajati na puññāni karoti.
an10.91:10.1	Idha pana, gahapati, ekacco kāmabhogī dhammena bhoge pariyesati asāhasena;
an10.91:10.2	dhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti.
an10.91:10.3	Te ca bhoge gathito mucchito ajjhosanno anādīnavadassāvī anissaraṇapañño paribhuñjati.
an10.91:11.1	Idha pana, gahapati, ekacco kāmabhogī dhammena bhoge pariyesati asāhasena;
an10.91:11.2	dhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti.
an10.91:11.3	Te ca bhoge agathito amucchito anajjhosanno ādīnavadassāvī nissaraṇapañño paribhuñjati.
an10.91:12.1	Tatra, gahapati, yvāyaṁ kāmabhogī adhammena bhoge pariyesati sāhasena, adhammena bhoge pariyesitvā sāhasena na attānaṁ sukheti na pīṇeti na saṁvibhajati na puññāni karoti, ayaṁ, gahapati, kāmabhogī tīhi ṭhānehi gārayho.
an10.91:12.2	‘Adhammena bhoge pariyesati sāhasenā’ti, iminā paṭhamena ṭhānena gārayho.
an10.91:12.3	‘Na attānaṁ sukheti na pīṇetī’ti, iminā dutiyena ṭhānena gārayho.
an10.91:12.4	‘Na saṁvibhajati na puññāni karotī’ti, iminā tatiyena ṭhānena gārayho.
an10.91:12.5	Ayaṁ, gahapati, kāmabhogī imehi tīhi ṭhānehi gārayho.
an10.91:13.1	Tatra, gahapati, yvāyaṁ kāmabhogī adhammena bhoge pariyesati sāhasena, adhammena bhoge pariyesitvā sāhasena attānaṁ sukheti pīṇeti na saṁvibhajati na puññāni karoti, ayaṁ, gahapati, kāmabhogī dvīhi ṭhānehi gārayho ekena ṭhānena pāsaṁso.
an10.91:13.2	‘Adhammena bhoge pariyesati sāhasenā’ti, iminā paṭhamena ṭhānena gārayho.
an10.91:13.3	‘Attānaṁ sukheti pīṇetī’ti, iminā ekena ṭhānena pāsaṁso.
an10.91:13.4	‘Na saṁvibhajati na puññāni karotī’ti iminā dutiyena ṭhānena gārayho.
an10.91:13.5	Ayaṁ, gahapati, kāmabhogī imehi dvīhi ṭhānehi gārayho iminā ekena ṭhānena pāsaṁso.
an10.91:14.1	Tatra, gahapati, yvāyaṁ kāmabhogī adhammena bhoge pariyesati sāhasena, adhammena bhoge pariyesitvā sāhasena attānaṁ sukheti pīṇeti saṁvibhajati puññāni karoti, ayaṁ, gahapati, kāmabhogī ekena ṭhānena gārayho dvīhi ṭhānehi pāsaṁso.
an10.91:14.2	‘Adhammena bhoge pariyesati sāhasenā’ti, iminā ekena ṭhānena gārayho.
an10.91:14.3	‘Attānaṁ sukheti pīṇetī’ti, iminā paṭhamena ṭhānena pāsaṁso.
an10.91:14.4	‘Saṁvibhajati puññāni karotī’ti, iminā dutiyena ṭhānena pāsaṁso.
an10.91:14.5	Ayaṁ, gahapati, kāmabhogī iminā ekena ṭhānena gārayho, imehi dvīhi ṭhānehi pāsaṁso.
an10.91:15.1	Tatra, gahapati, yvāyaṁ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi na attānaṁ sukheti na pīṇeti na saṁvibhajati na puññāni karoti, ayaṁ, gahapati, kāmabhogī ekena ṭhānena pāsaṁso tīhi ṭhānehi gārayho.
an10.91:15.2	‘Dhammena bhoge pariyesati asāhasenā’ti, iminā ekena ṭhānena pāsaṁso.
an10.91:15.3	‘Adhammena bhoge pariyesati sāhasenā’ti, iminā paṭhamena ṭhānena gārayho.
an10.91:15.4	‘Na attānaṁ sukheti na pīṇetī’ti, iminā dutiyena ṭhānena gārayho.
an10.91:15.5	‘Na saṁvibhajati na puññāni karotī’ti, iminā tatiyena ṭhānena gārayho.
an10.91:15.6	Ayaṁ, gahapati, kāmabhogī iminā ekena ṭhānena pāsaṁso imehi tīhi ṭhānehi gārayho.
an10.91:16.1	Tatra, gahapati, yvāyaṁ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṁ sukheti pīṇeti na saṁvibhajati na puññāni karoti, ayaṁ, gahapati, kāmabhogī dvīhi ṭhānehi pāsaṁso dvīhi ṭhānehi gārayho.
an10.91:16.2	‘Dhammena bhoge pariyesati asāhasenā’ti, iminā paṭhamena ṭhānena pāsaṁso.
an10.91:16.3	‘Adhammena bhoge pariyesati sāhasenā’ti, iminā paṭhamena ṭhānena gārayho.
an10.91:16.4	‘Attānaṁ sukheti pīṇetī’ti, iminā dutiyena ṭhānena pāsaṁso.
an10.91:16.5	‘Na saṁvibhajati na puññāni karotī’ti, iminā dutiyena ṭhānena gārayho.
an10.91:16.6	Ayaṁ, gahapati, kāmabhogī imehi dvīhi ṭhānehi pāsaṁso imehi dvīhi ṭhānehi gārayho.
an10.91:17.1	Tatra, gahapati, yvāyaṁ kāmabhogī dhammādhammena bhoge pariyesati sāhasenapi asāhasenapi, dhammādhammena bhoge pariyesitvā sāhasenapi asāhasenapi attānaṁ sukheti pīṇeti saṁvibhajati puññāni karoti, ayaṁ, gahapati, kāmabhogī tīhi ṭhānehi pāsaṁso ekena ṭhānena gārayho.
an10.91:17.2	‘Dhammena bhoge pariyesati asāhasenā’ti, iminā paṭhamena ṭhānena pāsaṁso.
an10.91:17.3	‘Adhammena bhoge pariyesati sāhasenā’ti, iminā ekena ṭhānena gārayho.
an10.91:17.4	‘Attānaṁ sukheti pīṇetī’ti, iminā dutiyena ṭhānena pāsaṁso.
an10.91:17.5	‘Saṁvibhajati puññāni karotī’ti, iminā tatiyena ṭhānena pāsaṁso.
an10.91:17.6	Ayaṁ, gahapati, kāmabhogī imehi tīhi ṭhānehi pāsaṁso iminā ekena ṭhānena gārayho.
an10.91:18.1	Tatra, gahapati, yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena na attānaṁ sukheti na pīṇeti na saṁvibhajati na puññāni karoti, ayaṁ, gahapati, kāmabhogī ekena ṭhānena pāsaṁso dvīhi ṭhānehi gārayho.
an10.91:18.2	‘Dhammena bhoge pariyesati asāhasenā’ti, iminā ekena ṭhānena pāsaṁso.
an10.91:18.3	‘Na attānaṁ sukheti na pīṇetī’ti, iminā paṭhamena ṭhānena gārayho.
an10.91:18.4	‘Na saṁvibhajati na puññāni karotī’ti, iminā dutiyena ṭhānena gārayho.
an10.91:18.5	Ayaṁ, gahapati, kāmabhogī iminā ekena ṭhānena pāsaṁso imehi dvīhi ṭhānehi gārayho.
an10.91:19.1	Tatra, gahapati, yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṁ sukheti pīṇeti na saṁvibhajati na puññāni karoti, ayaṁ, gahapati, kāmabhogī dvīhi ṭhānehi pāsaṁso ekena ṭhānena gārayho.
an10.91:19.2	‘Dhammena bhoge pariyesati asāhasenā’ti, iminā paṭhamena ṭhānena pāsaṁso.
an10.91:19.3	‘Attānaṁ sukheti pīṇetī’ti, iminā dutiyena ṭhānena pāsaṁso.
an10.91:19.4	‘Na saṁvibhajati na puññāni karotī’ti iminā ekena ṭhānena gārayho.
an10.91:19.5	Ayaṁ, gahapati, kāmabhogī imehi dvīhi ṭhānehi pāsaṁso iminā ekena ṭhānena gārayho.
an10.91:20.1	Tatra, gahapati yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti, te ca bhoge gathito mucchito ajjhosanno anādīnavadassāvī anissaraṇapañño paribhuñjati, ayaṁ, gahapati, kāmabhogī tīhi ṭhānehi pāsaṁso ekena ṭhānena gārayho.
an10.91:20.2	‘Dhammena bhoge pariyesati asāhasenā’ti, iminā paṭhamena ṭhānena pāsaṁso.
an10.91:20.3	‘Attānaṁ sukheti pīṇetī’ti, iminā dutiyena ṭhānena pāsaṁso.
an10.91:20.4	‘Saṁvibhajati puññāni karotī’ti, iminā tatiyena ṭhānena pāsaṁso.
an10.91:20.5	‘Te ca bhoge gathito mucchito ajjhosanno anādīnavadassāvī anissaraṇapañño paribhuñjatī’ti, iminā ekena ṭhānena gārayho.
an10.91:20.6	Ayaṁ, gahapati, kāmabhogī imehi tīhi ṭhānehi pāsaṁso iminā ekena ṭhānena gārayho.
an10.91:21.1	Tatra, gahapati, yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṁ, gahapati, kāmabhogī catūhi ṭhānehi pāsaṁso.
an10.91:21.2	‘Dhammena bhoge pariyesati asāhasenā’ti, iminā paṭhamena ṭhānena pāsaṁso.
an10.91:21.3	‘Attānaṁ sukheti pīṇetī’ti, iminā dutiyena ṭhānena pāsaṁso.
an10.91:21.4	‘Saṁvibhajati puññāni karotī’ti, iminā tatiyena ṭhānena pāsaṁso.
an10.91:21.5	‘Te ca bhoge agathito amucchito anajjhosanno ādīnavadassāvī nissaraṇapañño paribhuñjatī’ti, iminā catutthena ṭhānena pāsaṁso.
an10.91:21.6	Ayaṁ, gahapati, kāmabhogī imehi catūhi ṭhānehi pāsaṁso.
an10.91:22.1	Ime kho, gahapati, dasa kāmabhogī santo saṁvijjamānā lokasmiṁ.
an10.91:22.2	Imesaṁ kho, gahapati, dasannaṁ kāmabhogīnaṁ yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṁ imesaṁ dasannaṁ kāmabhogīnaṁ aggo ca seṭṭho ca pāmokkho ca uttamo ca pavaro ca.
an10.91:22.3	Seyyathāpi, gahapati, gavā khīraṁ, khīramhā dadhi, dadhimhā navanītaṁ, navanītamhā sappi, sappimhā sappimaṇḍo. Sappimaṇḍo tattha aggamakkhāyati.
an10.91:23.1	Evamevaṁ kho, gahapati, imesaṁ dasannaṁ kāmabhogīnaṁ yvāyaṁ kāmabhogī dhammena bhoge pariyesati asāhasena, dhammena bhoge pariyesitvā asāhasena attānaṁ sukheti pīṇeti saṁvibhajati puññāni karoti, te ca bhoge agathito amucchito anajjhosanno ādīnavadassāvī nissaraṇapañño paribhuñjati, ayaṁ imesaṁ dasannaṁ kāmabhogīnaṁ aggo ca seṭṭho ca pāmokkho ca uttamo ca pavaro cā”ti.
an10.91:23.2	Paṭhamaṁ.
an10.92:0.1	Aṅguttara Nikāya 10.92
an10.92:0.2	10. Upālivagga
an10.92:0.3	Bhayasutta
an10.92:1.1	Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:
an10.92:2.1	“Yato, kho, gahapati, ariyasāvakassa pañca bhayāni verāni vūpasantāni honti, catūhi ca sotāpattiyaṅgehi samannāgato hoti, ariyo cassa ñāyo paññāya sudiṭṭho hoti suppaṭividdho, so ākaṅkhamāno attanāva attānaṁ byākareyya:
an10.92:2.2	‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto. Sotāpannohamasmi avinipātadhammo niyato sambodhiparāyaṇo’ti.
an10.92:3.1	Katamāni pañca bhayāni verāni vūpasantāni honti?
an10.92:3.2	Yaṁ, gahapati, pāṇātipātī pāṇātipātapaccayā diṭṭhadhammikampi bhayaṁ veraṁ pasavati samparāyikampi bhayaṁ veraṁ pasavati cetasikampi dukkhaṁ domanassaṁ paṭisaṁvedeti, pāṇātipātā paṭivirato neva diṭṭhadhammikampi bhayaṁ veraṁ pasavati na samparāyikampi bhayaṁ veraṁ pasavati na cetasikampi dukkhaṁ domanassaṁ paṭisaṁvedeti.
an10.92:3.3	Pāṇātipātā paṭiviratassa evaṁ taṁ bhayaṁ veraṁ vūpasantaṁ hoti.
an10.92:4.1	Yaṁ, gahapati, adinnādāyī …pe…
an10.92:4.2	kāmesumicchācārī …
an10.92:4.3	musāvādī …
an10.92:4.4	surāmerayamajjapamādaṭṭhāyī surāmerayamajjapamādaṭṭhānapaccayā diṭṭhadhammikampi bhayaṁ veraṁ pasavati samparāyikampi bhayaṁ veraṁ pasavati cetasikampi dukkhaṁ domanassaṁ paṭisaṁvedeti, surāmerayamajjapamādaṭṭhānā paṭivirato neva diṭṭhadhammikampi bhayaṁ veraṁ pasavati na samparāyikampi bhayaṁ veraṁ pasavati na cetasikampi dukkhaṁ domanassaṁ paṭisaṁvedeti.
an10.92:4.5	Surāmerayamajjapamādaṭṭhānā paṭiviratassa evaṁ taṁ bhayaṁ veraṁ vūpasantaṁ hoti.
an10.92:4.6	Imāni pañca bhayāni verāni vūpasantāni honti.
an10.92:5.1	Katamehi catūhi sotāpattiyaṅgehi samannāgato hoti?
an10.92:5.2	Idha, gahapati, ariyasāvako buddhe aveccappasādena samannāgato hoti:
an10.92:5.3	‘itipi so bhagavā …pe… buddho bhagavā’ti;
an10.92:5.4	dhamme aveccappasādena samannāgato hoti:
an10.92:5.5	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti;
an10.92:5.6	saṅghe aveccappasādena samannāgato hoti:
an10.92:5.7	‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti;
an10.92:5.8	ariyakantehi sīlehi samannāgato hoti ‘akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṁvattanikehi’.
an10.92:5.9	Imehi catūhi sotāpattiyaṅgehi samannāgato hoti.
an10.92:6.1	Katamo cassa ariyo ñāyo paññāya sudiṭṭho hoti suppaṭividdho?
an10.92:6.2	Idha, gahapati, ariyasāvako iti paṭisañcikkhati:
an10.92:6.3	‘iti imasmiṁ sati idaṁ hoti; imassuppādā idaṁ uppajjati;
an10.92:6.4	imasmiṁ asati idaṁ na hoti; imassa nirodhā idaṁ nirujjhati, yadidaṁ—
an10.92:6.5	avijjāpaccayā saṅkhārā,
an10.92:6.6	saṅkhārapaccayā viññāṇaṁ,
an10.92:6.7	viññāṇapaccayā nāmarūpaṁ,
an10.92:6.8	nāmarūpapaccayā saḷāyatanaṁ,
an10.92:6.9	saḷāyatanapaccayā phasso,
an10.92:6.10	phassapaccayā vedanā,
an10.92:6.11	vedanāpaccayā taṇhā,
an10.92:6.12	taṇhāpaccayā upādānaṁ,
an10.92:6.13	upādānapaccayā bhavo,
an10.92:6.14	bhavapaccayā jāti,
an10.92:6.15	jātipaccayā jarāmaraṇaṁ sokaparidevadukkhadomanassupāyāsā sambhavanti,
an10.92:6.16	evametassa kevalassa dukkhakkhandhassa samudayo hoti;
an10.92:6.17	avijjāya tveva asesavirāganirodhā saṅkhāranirodho …pe…
an10.92:6.18	evametassa kevalassa dukkhakkhandhassa nirodho hotī’ti.
an10.92:6.19	Ayañcassa ariyo ñāyo paññāya sudiṭṭho hoti suppaṭividdho.
an10.92:7.1	Yato kho, gahapati, ariyasāvakassa imāni pañca bhayāni verāni vūpasantāni honti, imehi ca catūhi sotāpattiyaṅgehi samannāgato hoti, ayañcassa ariyo ñāyo paññāya sudiṭṭho hoti suppaṭividdho, so ākaṅkhamāno attanāva attānaṁ byākareyya:
an10.92:7.2	‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto; sotāpannohamasmi avinipātadhammo niyato sambodhiparāyaṇo’”ti.
an10.92:7.3	Dutiyaṁ.
an10.93:0.1	Aṅguttara Nikāya 10.93
an10.93:0.2	10. Upālivagga
an10.93:0.3	Kiṁdiṭṭhikasutta
an10.93:1.1	Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an10.93:1.2	Atha kho anāthapiṇḍiko gahapati divā divassa sāvatthiyā nikkhami bhagavantaṁ dassanāya.
an10.93:1.3	Atha kho anāthapiṇḍikassa gahapatissa etadahosi:
an10.93:1.4	“akālo kho tāva bhagavantaṁ dassanāya.
an10.93:1.5	Paṭisallīno bhagavā.
an10.93:1.6	Manobhāvanīyānampi bhikkhūnaṁ akālo dassanāya.
an10.93:1.7	Paṭisallīnā manobhāvanīyā bhikkhū.
an10.93:1.8	Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan”ti.
an10.93:2.1	Atha kho anāthapiṇḍiko gahapati yena aññatitthiyānaṁ paribbājakānaṁ ārāmo tenupasaṅkami.
an10.93:2.2	Tena kho pana samayena aññatitthiyā paribbājakā saṅgamma samāgamma unnādino uccāsaddamahāsaddā anekavihitaṁ tiracchānakathaṁ kathentā nisinnā honti.
an10.93:2.3	Addasaṁsu kho te aññatitthiyā paribbājakā anāthapiṇḍikaṁ gahapatiṁ dūratova āgacchantaṁ.
an10.93:2.4	Disvāna aññamaññaṁ saṇṭhāpesuṁ:
an10.93:2.5	“appasaddā bhonto hontu, mā bhonto saddamakattha.
an10.93:2.6	Ayaṁ anāthapiṇḍiko gahapati ārāmaṁ āgacchati samaṇassa gotamassa sāvako.
an10.93:2.7	Yāvatā kho pana samaṇassa gotamassa sāvakā gihī odātavasanā sāvatthiyaṁ paṭivasanti, ayaṁ tesaṁ aññataro anāthapiṇḍiko gahapati.
an10.93:2.8	Appasaddakāmā kho pana te āyasmanto appasaddavinītā appasaddassa vaṇṇavādino.
an10.93:2.9	Appeva nāma appasaddaṁ parisaṁ viditvā upasaṅkamitabbaṁ maññeyyā”ti.
an10.93:3.1	Atha kho te aññatitthiyā paribbājakā tuṇhī ahesuṁ.
an10.93:3.2	Atha kho anāthapiṇḍiko gahapati yena te aññatitthiyā paribbājakā tenupasaṅkami; upasaṅkamitvā tehi aññatitthiyehi paribbājakehi saddhiṁ sammodi.
an10.93:3.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ te aññatitthiyā paribbājakā etadavocuṁ:
an10.93:3.4	“vadehi, gahapati, kiṁdiṭṭhiko samaṇo gotamo”ti?
an10.93:3.5	“Na kho ahaṁ, bhante, bhagavato sabbaṁ diṭṭhiṁ jānāmī”ti.
an10.93:4.1	“Iti kira tvaṁ, gahapati, na samaṇassa gotamassa sabbaṁ diṭṭhiṁ jānāsi;
an10.93:4.2	vadehi, gahapati, kiṁdiṭṭhikā bhikkhū”ti?
an10.93:4.3	“Bhikkhūnampi kho ahaṁ, bhante, na sabbaṁ diṭṭhiṁ jānāmī”ti.
an10.93:5.1	“Iti kira tvaṁ, gahapati, na samaṇassa gotamassa sabbaṁ diṭṭhiṁ jānāsi napi bhikkhūnaṁ sabbaṁ diṭṭhiṁ jānāsi;
an10.93:5.2	vadehi, gahapati, kiṁdiṭṭhikosi tuvan”ti?
an10.93:5.3	“Etaṁ kho, bhante, amhehi na dukkaraṁ byākātuṁ yaṁdiṭṭhikā mayaṁ.
an10.93:5.4	Iṅgha tāva āyasmanto yathāsakāni diṭṭhigatāni byākarontu, pacchāpetaṁ amhehi na dukkaraṁ bhavissati byākātuṁ yaṁdiṭṭhikā mayan”ti.
an10.93:6.1	Evaṁ vutte, aññataro paribbājako anāthapiṇḍikaṁ gahapatiṁ etadavoca:
an10.93:6.2	“sassato loko, idameva saccaṁ moghamaññanti—
an10.93:6.3	evaṁdiṭṭhiko ahaṁ, gahapatī”ti.
an10.93:7.1	Aññataropi kho paribbājako anāthapiṇḍikaṁ gahapatiṁ etadavoca:
an10.93:7.2	“asassato loko, idameva saccaṁ moghamaññanti—
an10.93:7.3	evaṁdiṭṭhiko ahaṁ, gahapatī”ti.
an10.93:8.1	Aññataropi kho paribbājako anāthapiṇḍikaṁ gahapatiṁ etadavoca:
an10.93:8.2	“antavā loko …pe…
an10.93:8.3	anantavā loko …
an10.93:8.4	taṁ jīvaṁ taṁ sarīraṁ …
an10.93:8.5	aññaṁ jīvaṁ aññaṁ sarīraṁ …
an10.93:8.6	hoti tathāgato paraṁ maraṇā …
an10.93:8.7	na hoti tathāgato paraṁ maraṇā …
an10.93:8.8	hoti ca na ca hoti tathāgato paraṁ maraṇā …
an10.93:8.9	neva hoti na na hoti tathāgato paraṁ maraṇā, idameva saccaṁ moghamaññanti—
an10.93:8.10	evaṁdiṭṭhiko ahaṁ, gahapatī”ti.
an10.93:9.1	Evaṁ vutte, anāthapiṇḍiko gahapati te paribbājake etadavoca:
an10.93:9.2	“yvāyaṁ, bhante, āyasmā evamāha:
an10.93:9.3	‘sassato loko, idameva saccaṁ moghamaññanti—
an10.93:9.4	evaṁdiṭṭhiko ahaṁ, gahapatī’ti,
an10.93:9.5	imassa ayamāyasmato diṭṭhi attano vā ayonisomanasikārahetu uppannā paratoghosapaccayā vā.
an10.93:9.6	Sā kho panesā diṭṭhi bhūtā saṅkhatā cetayitā paṭiccasamuppannā.
an10.93:9.7	Yaṁ kho pana kiñci bhūtaṁ saṅkhataṁ cetayitaṁ paṭiccasamuppannaṁ tadaniccaṁ.
an10.93:9.8	Yadaniccaṁ taṁ dukkhaṁ.
an10.93:9.9	Yaṁ dukkhaṁ tadeveso āyasmā allīno, tadeveso āyasmā ajjhupagato.
an10.93:10.1	Yopāyaṁ, bhante, āyasmā evamāha:
an10.93:10.2	‘asassato loko, idameva saccaṁ moghamaññanti—
an10.93:10.3	evaṁdiṭṭhiko ahaṁ, gahapatī’ti,
an10.93:10.4	imassāpi ayamāyasmato diṭṭhi attano vā ayonisomanasikārahetu uppannā paratoghosapaccayā vā.
an10.93:10.5	Sā kho panesā diṭṭhi bhūtā saṅkhatā cetayitā paṭiccasamuppannā.
an10.93:10.6	Yaṁ kho pana kiñci bhūtaṁ saṅkhataṁ cetayitaṁ paṭiccasamuppannaṁ tadaniccaṁ.
an10.93:10.7	Yadaniccaṁ taṁ dukkhaṁ.
an10.93:10.8	Yaṁ dukkhaṁ tadeveso āyasmā allīno, tadeveso āyasmā ajjhupagato.
an10.93:11.1	Yopāyaṁ, bhante, āyasmā evamāha:
an10.93:11.2	‘antavā loko …pe…
an10.93:11.3	anantavā loko …
an10.93:11.4	taṁ jīvaṁ taṁ sarīraṁ …
an10.93:11.5	aññaṁ jīvaṁ aññaṁ sarīraṁ …
an10.93:11.6	hoti tathāgato paraṁ maraṇā …
an10.93:11.7	na hoti tathāgato paraṁ maraṇā …
an10.93:11.8	hoti ca na ca hoti tathāgato paraṁ maraṇā …
an10.93:11.9	neva hoti na na hoti tathāgato paraṁ maraṇā, idameva saccaṁ moghamaññanti—
an10.93:11.10	evaṁdiṭṭhiko ahaṁ, gahapatī’ti,
an10.93:11.11	imassāpi ayamāyasmato diṭṭhi attano vā ayonisomanasikārahetu uppannā paratoghosapaccayā vā.
an10.93:11.12	Sā kho panesā diṭṭhi bhūtā saṅkhatā cetayitā paṭiccasamuppannā.
an10.93:11.13	Yaṁ kho pana kiñci bhūtaṁ saṅkhataṁ cetayitaṁ paṭiccasamuppannaṁ tadaniccaṁ.
an10.93:11.14	Yadaniccaṁ taṁ dukkhaṁ.
an10.93:11.15	Yaṁ dukkhaṁ tadeveso āyasmā allīno, tadeveso āyasmā ajjhupagato”ti.
an10.93:12.1	Evaṁ vutte te paribbājakā anāthapiṇḍikaṁ gahapatiṁ etadavocuṁ:
an10.93:12.2	“byākatāni kho, gahapati, amhehi sabbeheva yathāsakāni diṭṭhigatāni.
an10.93:12.3	Vadehi, gahapati, kiṁdiṭṭhikosi tuvan”ti?
an10.93:12.4	“Yaṁ kho, bhante, kiñci bhūtaṁ saṅkhataṁ cetayitaṁ paṭiccasamuppannaṁ tadaniccaṁ.
an10.93:12.5	Yadaniccaṁ taṁ dukkhaṁ.
an10.93:12.6	‘Yaṁ dukkhaṁ taṁ netaṁ mama, nesohamasmi, na meso attā’ti—
an10.93:12.7	evaṁdiṭṭhiko ahaṁ, bhante”ti.
an10.93:13.1	“Yaṁ kho, gahapati, kiñci bhūtaṁ saṅkhataṁ cetayitaṁ paṭiccasamuppannaṁ tadaniccaṁ.
an10.93:13.2	Yadaniccaṁ taṁ dukkhaṁ.
an10.93:13.3	Yaṁ dukkhaṁ tadeva tvaṁ, gahapati, allīno, tadeva tvaṁ, gahapati, ajjhupagato”ti.
an10.93:14.1	“Yaṁ kho, bhante, kiñci bhūtaṁ saṅkhataṁ cetayitaṁ paṭiccasamuppannaṁ tadaniccaṁ.
an10.93:14.2	Yadaniccaṁ taṁ dukkhaṁ.
an10.93:14.3	‘Yaṁ dukkhaṁ taṁ netaṁ mama, nesohamasmi, nameso attā’ti—evametaṁ yathābhūtaṁ sammappaññāya sudiṭṭhaṁ.
an10.93:14.4	Tassa ca uttari nissaraṇaṁ yathābhūtaṁ pajānāmī”ti.
an10.93:15.1	Evaṁ vutte te paribbājakā tuṇhībhūtā maṅkubhūtā pattakkhandhā adhomukhā pajjhāyantā appaṭibhānā nisīdiṁsu.
an10.93:15.2	Atha kho anāthapiṇḍiko gahapati te paribbājake tuṇhībhūte maṅkubhūte pattakkhandhe adhomukhe pajjhāyante appaṭibhāne viditvā uṭṭhāyāsanā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho anāthapiṇḍiko gahapati yāvatako ahosi tehi aññatitthiyehi paribbājakehi saddhiṁ kathāsallāpo taṁ sabbaṁ bhagavato ārocesi.
an10.93:15.3	“Sādhu sādhu, gahapati.
an10.93:15.4	Evaṁ kho te, gahapati, moghapurisā kālena kālaṁ sahadhammena suniggahitaṁ niggahetabbā”ti.
an10.93:16.1	Atha kho bhagavā anāthapiṇḍikaṁ gahapatiṁ dhammiyā kathāya sandassesi samādapesi samuttejesi sampahaṁsesi.
an10.93:16.2	Atha kho anāthapiṇḍiko gahapati bhagavatā dhammiyā kathāya sandassito samādapito samuttejito sampahaṁsito uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an10.93:17.1	Atha kho bhagavā acirapakkante anāthapiṇḍike gahapatimhi bhikkhū āmantesi:
an10.93:17.2	“yopi so, bhikkhave, bhikkhu vassasatupasampanno imasmiṁ dhammavinaye, sopi evamevaṁ aññatitthiye paribbājake sahadhammena suniggahitaṁ niggaṇheyya yathā taṁ anāthapiṇḍikena gahapatinā niggahitā”ti.
an10.93:17.3	Tatiyaṁ.
an10.94:0.1	Aṅguttara Nikāya 10.94
an10.94:0.2	10. Upālivagga
an10.94:0.3	Vajjiyamāhitasutta
an10.94:1.1	Ekaṁ samayaṁ bhagavā campāyaṁ viharati gaggarāya pokkharaṇiyā tīre.
an10.94:1.2	Atha kho vajjiyamāhito gahapati divā divassa campāya nikkhami bhagavantaṁ dassanāya.
an10.94:1.3	Atha kho vajjiyamāhitassa gahapatissa etadahosi:
an10.94:1.4	“akālo kho tāva bhagavantaṁ dassanāya.
an10.94:1.5	Paṭisallīno bhagavā.
an10.94:1.6	Manobhāvanīyānampi bhikkhūnaṁ akālo dassanāya.
an10.94:1.7	Paṭisallīnā manobhāvanīyāpi bhikkhū.
an10.94:1.8	Yannūnāhaṁ yena aññatitthiyānaṁ paribbājakānaṁ ārāmo tenupasaṅkameyyan”ti.
an10.94:2.1	Atha kho vajjiyamāhito gahapati yena aññatitthiyānaṁ paribbājakānaṁ ārāmo tenupasaṅkami.
an10.94:2.2	Tena kho pana samayena te aññatitthiyā paribbājakā saṅgamma samāgamma unnādino uccāsaddamahāsaddā anekavihitaṁ tiracchānakathaṁ kathentā nisinnā honti.
an10.94:3.1	Addasaṁsu kho te aññatitthiyā paribbājakā vajjiyamāhitaṁ gahapatiṁ dūratova āgacchantaṁ. Disvāna aññamaññaṁ saṇṭhāpesuṁ:
an10.94:3.2	“appasaddā bhonto hontu. Mā bhonto saddamakattha.
an10.94:3.3	Ayaṁ vajjiyamāhito gahapati āgacchati samaṇassa gotamassa sāvako.
an10.94:3.4	Yāvatā kho pana samaṇassa gotamassa sāvakā gihī odātavasanā campāyaṁ paṭivasanti, ayaṁ tesaṁ aññataro vajjiyamāhito gahapati.
an10.94:3.5	Appasaddakāmā kho pana te āyasmanto appasaddavinītā appasaddassa vaṇṇavādino.
an10.94:3.6	Appeva nāma appasaddaṁ parisaṁ viditvā upasaṅkamitabbaṁ maññeyyā”ti.
an10.94:4.1	Atha kho te aññatitthiyā paribbājakā tuṇhī ahesuṁ.
an10.94:4.2	Atha kho vajjiyamāhito gahapati yena te aññatitthiyā paribbājakā tenupasaṅkami; upasaṅkamitvā tehi aññatitthiyehi paribbājakehi saddhiṁ sammodi.
an10.94:4.3	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinnaṁ kho vajjiyamāhitaṁ gahapatiṁ te aññatitthiyā paribbājakā etadavocuṁ:
an10.94:4.4	“saccaṁ kira, gahapati, samaṇo gotamo sabbaṁ tapaṁ garahati, sabbaṁ tapassiṁ lūkhājīviṁ ekaṁsena upakkosati upavadatī”ti?
an10.94:4.5	“Na kho, bhante, bhagavā sabbaṁ tapaṁ garahati napi sabbaṁ tapassiṁ lūkhājīviṁ ekaṁsena upakkosati upavadati.
an10.94:4.6	Gārayhaṁ kho, bhante, bhagavā garahati, pasaṁsitabbaṁ pasaṁsati.
an10.94:4.7	Gārayhaṁ kho pana, bhante, bhagavā garahanto pasaṁsitabbaṁ pasaṁsanto vibhajjavādo bhagavā.
an10.94:4.8	Na so bhagavā ettha ekaṁsavādo”ti.
an10.94:5.1	Evaṁ vutte, aññataro paribbājako vajjiyamāhitaṁ gahapatiṁ etadavoca:
an10.94:5.2	“āgamehi tvaṁ, gahapati, yassa tvaṁ samaṇassa gotamassa vaṇṇaṁ bhāsati, samaṇo gotamo venayiko appaññattiko”ti?
an10.94:5.3	“Etthapāhaṁ, bhante, āyasmante vakkhāmi sahadhammena:
an10.94:5.4	‘idaṁ kusalan’ti, bhante, bhagavatā paññattaṁ;
an10.94:5.5	‘idaṁ akusalan’ti, bhante, bhagavatā paññattaṁ.
an10.94:5.6	Iti kusalākusalaṁ bhagavā paññāpayamāno sapaññattiko bhagavā;
an10.94:5.7	na so bhagavā venayiko appaññattiko”ti.
an10.94:6.1	Evaṁ vutte te paribbājakā tuṇhībhūtā maṅkubhūtā pattakkhandhā adhomukhā pajjhāyantā appaṭibhānā nisīdiṁsu.
an10.94:6.2	Atha kho vajjiyamāhito gahapati te paribbājake tuṇhībhūte maṅkubhūte pattakkhandhe adhomukhe pajjhāyante appaṭibhāne viditvā uṭṭhāyāsanā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
an10.94:6.3	Ekamantaṁ nisinno kho vajjiyamāhito gahapati yāvatako ahosi tehi aññatitthiyehi paribbājakehi saddhiṁ kathāsallāpo taṁ sabbaṁ bhagavato ārocesi.
an10.94:7.1	“Sādhu sādhu, gahapati.
an10.94:7.2	Evaṁ kho te, gahapati, moghapurisā kālena kālaṁ sahadhammena suniggahitaṁ niggahetabbā.
an10.94:7.3	Nāhaṁ, gahapati, sabbaṁ tapaṁ tapitabbanti vadāmi;
an10.94:7.4	na ca panāhaṁ, gahapati, sabbaṁ tapaṁ na tapitabbanti vadāmi;
an10.94:7.5	nāhaṁ, gahapati, sabbaṁ samādānaṁ samāditabbanti vadāmi;
an10.94:7.6	na panāhaṁ, gahapati, sabbaṁ samādānaṁ na samāditabbanti vadāmi;
an10.94:7.7	nāhaṁ, gahapati, sabbaṁ padhānaṁ padahitabbanti vadāmi;
an10.94:7.8	na panāhaṁ, gahapati, sabbaṁ padhānaṁ na padahitabbanti vadāmi;
an10.94:7.9	nāhaṁ, gahapati, sabbo paṭinissaggo paṭinissajjitabboti vadāmi.
an10.94:7.10	Na panāhaṁ, gahapati, sabbo paṭinissaggo na paṭinissajjitabboti vadāmi;
an10.94:7.11	nāhaṁ, gahapati, sabbā vimutti vimuccitabbāti vadāmi;
an10.94:7.12	na panāhaṁ, gahapati, sabbā vimutti na vimuccitabbāti vadāmi.
an10.94:8.1	Yañhi, gahapati, tapaṁ tapato akusalā dhammā abhivaḍḍhanti, kusalā dhammā parihāyanti, evarūpaṁ tapaṁ na tapitabbanti vadāmi.
an10.94:8.2	Yañca khvassa, gahapati, tapaṁ tapato akusalā dhammā parihāyanti, kusalā dhammā abhivaḍḍhanti, evarūpaṁ tapaṁ tapitabbanti vadāmi.
an10.94:9.1	Yañhi, gahapati, samādānaṁ samādiyato akusalā dhammā abhivaḍḍhanti, kusalā dhammā parihāyanti, evarūpaṁ samādānaṁ na samāditabbanti vadāmi.
an10.94:9.2	Yañca khvassa, gahapati, samādānaṁ samādiyato akusalā dhammā parihāyanti, kusalā dhammā abhivaḍḍhanti, evarūpaṁ samādānaṁ samāditabbanti vadāmi.
an10.94:10.1	Yañhi, gahapati, padhānaṁ padahato akusalā dhammā abhivaḍḍhanti, kusalā dhammā parihāyanti, evarūpaṁ padhānaṁ na padahitabbanti vadāmi.
an10.94:10.2	Yañca khvassa, gahapati, padhānaṁ padahato akusalā dhammā parihāyanti kusalā dhammā abhivaḍḍhanti, evarūpaṁ padhānaṁ padahitabbanti vadāmi.
an10.94:11.1	Yañhi, gahapati, paṭinissaggaṁ paṭinissajjato akusalā dhammā abhivaḍḍhanti, kusalā dhammā parihāyanti, evarūpo paṭinissaggo na paṭinissajjitabboti vadāmi.
an10.94:11.2	Yañca khvassa, gahapati, paṭinissaggaṁ paṭinissajjato akusalā dhammā parihāyanti, kusalā dhammā abhivaḍḍhanti, evarūpo paṭinissaggo paṭinissajjitabboti vadāmi.
an10.94:12.1	Yañhi, gahapati, vimuttiṁ vimuccato akusalā dhammā abhivaḍḍhanti, kusalā dhammā parihāyanti, evarūpā vimutti na vimuccitabbāti vadāmi.
an10.94:12.2	Yañca khvassa, gahapati, vimuttiṁ vimuccato akusalā dhammā parihāyanti, kusalā dhammā abhivaḍḍhanti, evarūpā vimutti vimuccitabbāti vadāmī”ti.
an10.94:13.1	Atha kho vajjiyamāhito gahapati bhagavatā dhammiyā kathāya sandassito samādapito samuttejito sampahaṁsito uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
an10.94:14.1	Atha kho bhagavā acirapakkante vajjiyamāhite gahapatimhi bhikkhū āmantesi:
an10.94:14.2	“yopi so, bhikkhave, bhikkhu dīgharattaṁ apparajakkho imasmiṁ dhammavinaye, sopi evamevaṁ aññatitthiye paribbājake sahadhammena suniggahitaṁ niggaṇheyya yathā taṁ vajjiyamāhitena gahapatinā niggahitā”ti.
an10.94:14.3	Catutthaṁ.
an10.95:0.1	Aṅguttara Nikāya 10.95
an10.95:0.2	10. Upālivagga
an10.95:0.3	Uttiyasutta
an10.95:1.1	Atha kho uttiyo paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
an10.95:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho uttiyo paribbājako bhagavantaṁ etadavoca:
an10.95:1.3	“kiṁ nu kho, bho gotama, sassato loko, idameva saccaṁ moghamaññan”ti?
an10.95:1.4	“Abyākataṁ kho etaṁ, uttiya, mayā:
an10.95:1.5	‘sassato loko, idameva saccaṁ moghamaññan’”ti.
an10.95:2.1	“Kiṁ pana, bho gotama, asassato loko, idameva saccaṁ moghamaññan”ti?
an10.95:2.2	“Etampi kho, uttiya, abyākataṁ mayā:
an10.95:2.3	‘asassato loko, idameva saccaṁ moghamaññan’”ti.
an10.95:3.1	“Kiṁ nu kho, bho gotama, antavā loko …pe…
an10.95:3.2	anantavā loko …
an10.95:3.3	taṁ jīvaṁ taṁ sarīraṁ …
an10.95:3.4	aññaṁ jīvaṁ aññaṁ sarīraṁ …
an10.95:3.5	hoti tathāgato paraṁ maraṇā …
an10.95:3.6	na hoti tathāgato paraṁ maraṇā …
an10.95:3.7	hoti ca na ca hoti tathāgato paraṁ maraṇā …
an10.95:3.8	neva hoti na na hoti tathāgato paraṁ maraṇā, idameva saccaṁ moghamaññan”ti?
an10.95:3.9	“Etampi kho, uttiya, abyākataṁ mayā:
an10.95:3.10	‘neva hoti na na hoti tathāgato paraṁ maraṇā, idameva saccaṁ moghamaññan’”ti.
an10.95:4.1	“‘Kiṁ nu kho, bho gotama, sassato loko, idameva saccaṁ moghamaññan’ti, iti puṭṭho samāno ‘abyākataṁ kho etaṁ, uttiya, mayā—
an10.95:4.2	sassato loko, idameva saccaṁ moghamaññan’ti vadesi.
an10.95:5.1	‘Kiṁ pana, bho gotama, asassato loko, idameva saccaṁ moghamaññan’ti, iti puṭṭho samāno:
an10.95:5.2	‘etampi kho, uttiya, abyākataṁ mayā asassato loko, idameva saccaṁ moghamaññan’ti vadesi.
an10.95:6.1	‘Kiṁ nu kho, bho gotama, antavā loko …pe…
an10.95:6.2	anantavā loko …
an10.95:6.3	taṁ jīvaṁ taṁ sarīraṁ …
an10.95:6.4	aññaṁ jīvaṁ aññaṁ sarīraṁ …
an10.95:6.5	hoti tathāgato paraṁ maraṇā …
an10.95:6.6	na hoti tathāgato paraṁ maraṇā …
an10.95:6.7	hoti ca na ca hoti tathāgato paraṁ maraṇā …
an10.95:6.8	neva hoti na na hoti tathāgato paraṁ maraṇā, idameva saccaṁ moghamaññan’ti, iti puṭṭho samāno:
an10.95:6.9	‘etampi kho, uttiya, abyākataṁ mayā—
an10.95:6.10	neva hoti na na hoti tathāgato paraṁ maraṇā, idameva saccaṁ moghamaññan’ti vadesi.
an10.95:6.11	Atha kiñcarahi bhotā gotamena byākatan”ti?
an10.95:7.1	“Abhiññāya kho ahaṁ, uttiya, sāvakānaṁ dhammaṁ desemi sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāyā”ti.
an10.95:8.1	“Yaṁ panetaṁ bhavaṁ gotamo abhiññāya sāvakānaṁ dhammaṁ desesi sattānaṁ visuddhiyā sokaparidevānaṁ samatikkamāya dukkhadomanassānaṁ atthaṅgamāya ñāyassa adhigamāya nibbānassa sacchikiriyāya, sabbo vā tena loko nīyati upaḍḍho vā tibhāgo vā”ti?
an10.95:8.2	Evaṁ vutte, bhagavā tuṇhī ahosi.
an10.95:9.1	Atha kho āyasmato ānandassa etadahosi:
an10.95:9.2	“mā hevaṁ kho uttiyo paribbājako pāpakaṁ diṭṭhigataṁ paṭilabhi:
an10.95:9.3	‘sabbasāmukkaṁsikaṁ vata me samaṇo gotamo pañhaṁ puṭṭho saṁsādeti, no vissajjeti, na nūna visahatī’ti.
an10.95:9.4	Tadassa uttiyassa paribbājakassa dīgharattaṁ ahitāya dukkhāyā”ti.
an10.95:10.1	Atha kho āyasmā ānando uttiyaṁ paribbājakaṁ etadavoca:
an10.95:10.2	“tenahāvuso uttiya, upamaṁ te karissāmi.
an10.95:10.3	Upamāya m’idhekacce viññū purisā bhāsitassa atthaṁ ājānanti.
an10.95:10.4	Seyyathāpi, āvuso uttiya, rañño paccantimaṁ nagaraṁ daḷhuddhāpaṁ daḷhapākāratoraṇaṁ ekadvāraṁ.
an10.95:10.5	Tatrassa dovāriko paṇḍito byatto medhāvī aññātānaṁ nivāretā ñātānaṁ pavesetā.
an10.95:10.6	So tassa nagarassa samantā anupariyāyapathaṁ anukkamati. Anupariyāyapathaṁ anukkamamāno na passeyya pākārasandhiṁ vā pākāravivaraṁ vā, antamaso biḷāranikkhamanamattampi.
an10.95:10.7	No ca khvassa evaṁ ñāṇaṁ hoti: ‘ettakā pāṇā imaṁ nagaraṁ pavisanti vā nikkhamanti vā’ti.
an10.95:10.8	Atha khvassa evamettha hoti: ‘ye kho keci oḷārikā pāṇā imaṁ nagaraṁ pavisanti vā nikkhamanti vā, sabbe te iminā dvārena pavisanti vā nikkhamanti vā’ti.
an10.95:11.1	Evamevaṁ kho, āvuso uttiya, na tathāgatassa evaṁ ussukkaṁ hoti: ‘sabbo vā tena loko nīyati, upaḍḍho vā, tibhāgo vā’ti.
an10.95:11.2	Atha kho evamettha tathāgatassa hoti: ‘ye kho keci lokamhā nīyiṁsu vā nīyanti vā nīyissanti vā, sabbe te pañca nīvaraṇe pahāya cetaso upakkilese paññāya dubbalīkaraṇe, catūsu satipaṭṭhānesu suppatiṭṭhitacittā, satta bojjhaṅge yathābhūtaṁ bhāvetvā.
an10.95:11.3	Evamete lokamhā nīyiṁsu vā nīyanti vā nīyissanti vā’ti.
an10.95:11.4	Yadeva kho tvaṁ, āvuso uttiya, bhagavantaṁ pañhaṁ apucchi tadevetaṁ pañhaṁ bhagavantaṁ aññena pariyāyena apucchi.
an10.95:11.5	Tasmā te taṁ bhagavā na byākāsī”ti.
an10.95:11.6	Pañcamaṁ.
an10.96:0.1	Aṅguttara Nikāya 10.96
an10.96:0.2	10. Upālivagga
an10.96:0.3	Kokanudasutta
an10.96:1.1	Ekaṁ samayaṁ āyasmā ānando rājagahe viharati tapodārāme.
an10.96:1.2	Atha kho āyasmā ānando rattiyā paccūsasamayaṁ paccuṭṭhāya yena tapodā tenupasaṅkami gattāni parisiñcituṁ.
an10.96:1.3	Tapodāya gattāni parisiñcitvā paccuttaritvā ekacīvaro aṭṭhāsi gattāni pubbāpayamāno.
an10.96:1.4	Kokanudopi kho paribbājako rattiyā paccūsasamayaṁ paccuṭṭhāya yena tapodā tenupasaṅkami gattāni parisiñcituṁ.
an10.96:2.1	Addasā kho kokanudo paribbājako āyasmantaṁ ānandaṁ dūratova āgacchantaṁ.
an10.96:2.2	Disvāna āyasmantaṁ ānandaṁ etadavoca:
an10.96:2.3	“kvettha, āvuso”ti?
an10.96:2.4	“Ahamāvuso, bhikkhū”ti.
an10.96:3.1	“Katamesaṁ, āvuso, bhikkhūnan”ti?
an10.96:3.2	“Samaṇānaṁ, āvuso, sakyaputtiyānan”ti.
an10.96:4.1	“Puccheyyāma mayaṁ āyasmantaṁ kiñcideva desaṁ, sace āyasmā okāsaṁ karoti pañhassa veyyākaraṇāyā”ti.
an10.96:4.2	“Pucchāvuso, sutvā vedissāmā”ti.
an10.96:5.1	“Kiṁ nu kho, bho, ‘sassato loko, idameva saccaṁ moghamaññan’ti—evaṁdiṭṭhi bhavan”ti?
an10.96:5.2	“Na kho ahaṁ, āvuso, evaṁdiṭṭhi:
an10.96:5.3	‘sassato loko, idameva saccaṁ moghamaññan’”ti.
an10.96:6.1	“Kiṁ pana, bho, ‘asassato loko, idameva saccaṁ moghamaññan’ti—evaṁdiṭṭhi bhavan”ti?
an10.96:6.2	“Na kho ahaṁ, āvuso, evaṁdiṭṭhi:
an10.96:6.3	‘asassato loko, idameva saccaṁ moghamaññan’”ti.
an10.96:7.1	“Kiṁ nu kho, bho, antavā loko …pe…
an10.96:7.2	anantavā loko …
an10.96:7.3	taṁ jīvaṁ taṁ sarīraṁ …
an10.96:7.4	aññaṁ jīvaṁ aññaṁ sarīraṁ …
an10.96:7.5	hoti tathāgato paraṁ maraṇā …
an10.96:7.6	na hoti tathāgato paraṁ maraṇā …
an10.96:7.7	hoti ca na ca hoti tathāgato paraṁ maraṇā …
an10.96:7.8	neva hoti na na hoti tathāgato paraṁ maraṇā, idameva saccaṁ moghamaññanti—evaṁdiṭṭhi bhavan”ti?
an10.96:7.9	“Na kho ahaṁ, āvuso, evaṁdiṭṭhi:
an10.96:7.10	‘neva hoti na na hoti tathāgato paraṁ maraṇā, idameva saccaṁ moghamaññan’”ti.
an10.96:8.1	“Tena hi bhavaṁ na jānāti, na passatī”ti?
an10.96:8.2	“Na kho ahaṁ, āvuso, na jānāmi na passāmi.
an10.96:8.3	Jānāmahaṁ, āvuso, passāmī”ti.
an10.96:9.1	“‘Kiṁ nu kho, bho, sassato loko, idameva saccaṁ moghamaññanti—
an10.96:9.2	evaṁdiṭṭhi bhavan’ti, iti puṭṭho samāno:
an10.96:9.3	‘na kho ahaṁ, āvuso, evaṁdiṭṭhi—
an10.96:9.4	sassato loko, idameva saccaṁ moghamaññan’ti vadesi.
an10.96:10.1	‘Kiṁ pana, bho, asassato loko, idameva saccaṁ moghamaññanti—
an10.96:10.2	evaṁdiṭṭhi bhavan’ti, iti puṭṭho samāno:
an10.96:10.3	‘na kho ahaṁ, āvuso, evaṁdiṭṭhi—
an10.96:10.4	asassato loko, idameva saccaṁ moghamaññan’ti vadesi.
an10.96:11.1	Kiṁ nu kho, bho, antavā loko …pe…
an10.96:11.2	anantavā loko …
an10.96:11.3	taṁ jīvaṁ taṁ sarīraṁ …
an10.96:11.4	aññaṁ jīvaṁ aññaṁ sarīraṁ …
an10.96:11.5	hoti tathāgato paraṁ maraṇā …
an10.96:11.6	na hoti tathāgato paraṁ maraṇā …
an10.96:11.7	hoti ca na ca hoti tathāgato paraṁ maraṇā …
an10.96:11.8	neva hoti na na hoti tathāgato paraṁ maraṇā, idameva saccaṁ moghamaññanti—
an10.96:11.9	evaṁdiṭṭhi bhavanti, iti puṭṭho samāno:
an10.96:11.10	‘na kho ahaṁ, āvuso, evaṁdiṭṭhi—
an10.96:11.11	neva hoti na na hoti tathāgato paraṁ maraṇā, idameva saccaṁ moghamaññan’ti vadesi.
an10.96:12.1	‘Tena hi bhavaṁ na jānāti na passatī’ti, iti puṭṭho samāno:
an10.96:12.2	‘na kho ahaṁ, āvuso, na jānāmi na passāmi.
an10.96:12.3	Jānāmahaṁ, āvuso, passāmī’ti vadesi.
an10.96:12.4	Yathā kathaṁ panāvuso, imassa bhāsitassa attho daṭṭhabbo”ti?
an10.96:13.1	“‘Sassato loko, idameva saccaṁ moghamaññan’ti kho, āvuso, diṭṭhigatametaṁ.
an10.96:13.2	‘Asassato loko, idameva saccaṁ moghamaññan’ti kho, āvuso, diṭṭhigatametaṁ.
an10.96:13.3	Antavā loko …pe…
an10.96:13.4	anantavā loko …
an10.96:13.5	taṁ jīvaṁ taṁ sarīraṁ …
an10.96:13.6	aññaṁ jīvaṁ aññaṁ sarīraṁ …
an10.96:13.7	hoti tathāgato paraṁ maraṇā …
an10.96:13.8	na hoti tathāgato paraṁ maraṇā …
an10.96:13.9	hoti ca na ca hoti tathāgato paraṁ maraṇā …
an10.96:13.10	‘neva hoti na na hoti tathāgato paraṁ maraṇā, idameva saccaṁ moghamaññan’ti kho, āvuso, diṭṭhigatametaṁ.
an10.96:14.1	Yāvatā, āvuso, diṭṭhi yāvatā diṭṭhiṭṭhānaṁ diṭṭhiadhiṭṭhānaṁ diṭṭhipariyuṭṭhānaṁ diṭṭhisamuṭṭhānaṁ diṭṭhisamugghāto, tamahaṁ jānāmi tamahaṁ passāmi.
an10.96:14.2	Tamahaṁ jānanto tamahaṁ passanto kyāhaṁ vakkhāmi:
an10.96:14.3	‘na jānāmi na passāmī’ti?
an10.96:14.4	Jānāmahaṁ, āvuso, passāmī”ti.
an10.96:15.1	“Ko nāmo āyasmā, kathañca panāyasmantaṁ sabrahmacārī jānantī”ti?
an10.96:15.2	“‘Ānando’ti kho me, āvuso, nāmaṁ.
an10.96:15.3	‘Ānando’ti ca pana maṁ sabrahmacārī jānantī”ti.
an10.96:15.4	“Mahācariyena vata kira, bho, saddhiṁ mantayamānā na jānimha:
an10.96:15.5	‘āyasmā ānando’ti.
an10.96:15.6	Sace hi mayaṁ jāneyyāma:
an10.96:15.7	‘ayaṁ āyasmā ānando’ti, ettakampi no nappaṭibhāyeyya.
an10.96:15.8	Khamatu ca me āyasmā ānando”ti.
an10.96:15.9	Chaṭṭhaṁ.
an10.97:0.1	Aṅguttara Nikāya 10.97
an10.97:0.2	10. Upālivagga
an10.97:0.3	Āhuneyyasutta
an10.97:1.1	“Dasahi, bhikkhave, dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa.
an10.97:2.1	Katamehi dasahi?
an10.97:2.2	Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an10.97:3.1	Bahussuto hoti sutadharo sutasannicayo. Ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an10.97:4.1	Kalyāṇamitto hoti kalyāṇasahāyo kalyāṇasampavaṅko.
an10.97:5.1	Sammādiṭṭhiko hoti sammādassanena samannāgato.
an10.97:6.1	Anekavihitaṁ iddhividhaṁ paccanubhoti—ekopi hutvā bahudhā hoti; bahudhāpi hutvā eko hoti; āvibhāvaṁ, tirobhāvaṁ; tirokuṭṭaṁ tiropākāraṁ tiropabbataṁ asajjamāno gacchati, seyyathāpi ākāse; pathaviyāpi ummujjanimujjaṁ karoti, seyyathāpi udake; udakepi abhijjamāne gacchati, seyyathāpi pathaviyaṁ; ākāsepi pallaṅkena kamati, seyyathāpi pakkhī sakuṇo; imepi candimasūriye evaṁmahiddhike evaṁmahānubhāve pāṇinā parāmasati parimajjati, yāva brahmalokāpi kāyena vasaṁ vatteti.
an10.97:7.1	Dibbāya sotadhātuyā visuddhāya atikkantamānusikāya ubho sadde suṇāti dibbe ca mānuse ca ye dūre santike ca.
an10.97:8.1	Parasattānaṁ parapuggalānaṁ cetasā ceto paricca pajānāti.
an10.97:8.2	Sarāgaṁ vā cittaṁ ‘sarāgaṁ cittan’ti pajānāti;
an10.97:8.3	vītarāgaṁ vā cittaṁ ‘vītarāgaṁ cittan’ti pajānāti;
an10.97:8.4	sadosaṁ vā cittaṁ …
an10.97:8.5	vītadosaṁ vā cittaṁ …
an10.97:8.6	samohaṁ vā cittaṁ …
an10.97:8.7	vītamohaṁ vā cittaṁ …
an10.97:8.8	saṅkhittaṁ vā cittaṁ …
an10.97:8.9	vikkhittaṁ vā cittaṁ …
an10.97:8.10	mahaggataṁ vā cittaṁ …
an10.97:8.11	amahaggataṁ vā cittaṁ …
an10.97:8.12	sauttaraṁ vā cittaṁ …
an10.97:8.13	anuttaraṁ vā cittaṁ …
an10.97:8.14	samāhitaṁ vā cittaṁ …
an10.97:8.15	asamāhitaṁ vā cittaṁ …
an10.97:8.16	vimuttaṁ vā cittaṁ …
an10.97:8.17	avimuttaṁ vā cittaṁ ‘avimuttaṁ cittan’ti pajānāti.
an10.97:9.1	Anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe: ‘amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhapaṭisaṁvedī evamāyupariyanto, so tato cuto amutra udapādiṁ; tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhapaṭisaṁvedī evamāyupariyanto, so tato cuto idhūpapanno’ti, iti sākāraṁ sauddesaṁ anekavihitaṁ pubbenivāsaṁ anussarati.
an10.97:10.1	Dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti: ‘ime vata kho bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā; ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā, te kāyassa bhedā paraṁ maraṇā sugatiṁ saggaṁ lokaṁ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti.
an10.97:11.1	Āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an10.97:12.1	Imehi kho, bhikkhave, dasahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā”ti.
an10.97:12.2	Sattamaṁ.
an10.98:0.1	Aṅguttara Nikāya 10.98
an10.98:0.2	10. Upālivagga
an10.98:0.3	Therasutta
an10.98:1.1	“Dasahi, bhikkhave, dhammehi samannāgato thero bhikkhu yassaṁ yassaṁ disāyaṁ viharati, phāsuyeva viharati.
an10.98:1.2	Katamehi dasahi?
an10.98:1.3	Thero hoti rattaññū cirapabbajito,
an10.98:1.4	sīlavā hoti …pe…
an10.98:1.5	samādāya sikkhati sikkhāpadesu, bahussuto hoti …pe…
an10.98:1.6	diṭṭhiyā suppaṭividdho, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso,
an10.98:1.7	adhikaraṇasamuppādavūpasamakusalo hoti,
an10.98:1.8	dhammakāmo hoti piyasamudāhāro abhidhamme abhivinaye uḷārapāmojjo,
an10.98:1.9	santuṭṭho hoti itarītaracīvarapiṇḍapātasenāsanagilānappaccayabhesajjaparikkhārena,
an10.98:1.10	pāsādiko hoti abhikkantapaṭikkante susaṁvuto antaraghare nisajjāya,
an10.98:1.11	catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī,
an10.98:1.12	āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an10.98:1.13	Imehi kho, bhikkhave, dasahi dhammehi samannāgato thero bhikkhu yassaṁ yassaṁ disāyaṁ viharati, phāsuyeva viharatī”ti.
an10.98:1.14	Aṭṭhamaṁ.
an10.99:0.1	Aṅguttara Nikāya 10.99
an10.99:0.2	10. Upālivagga
an10.99:0.3	Upālisutta
an10.99:1.1	Atha kho āyasmā upāli yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā upāli bhagavantaṁ etadavoca:
an10.99:1.2	“icchāmahaṁ, bhante, araññavanapatthāni pantāni senāsanāni paṭisevitun”ti.
an10.99:2.1	“Durabhisambhavāni hi kho, upāli, araññavanapatthāni pantāni senāsanāni.
an10.99:2.2	Dukkaraṁ pavivekaṁ durabhiramaṁ.
an10.99:2.3	Ekatte haranti maññe mano vanāni samādhiṁ alabhamānassa bhikkhuno.
an10.99:2.4	Yo kho, upāli, evaṁ vadeyya:
an10.99:2.5	‘ahaṁ samādhiṁ alabhamāno araññavanapatthāni pantāni senāsanāni paṭisevissāmī’ti, tassetaṁ pāṭikaṅkhaṁ:
an10.99:2.6	‘saṁsīdissati vā uplavissati vā’ti.
an10.99:3.1	Seyyathāpi, upāli, mahāudakarahado.
an10.99:3.2	Atha āgaccheyya hatthināgo sattaratano vā aḍḍhaṭṭharatano vā.
an10.99:3.3	Tassa evamassa:
an10.99:3.4	‘yannūnāhaṁ imaṁ udakarahadaṁ ogāhetvā kaṇṇasandhovikampi khiḍḍaṁ kīḷeyyaṁ piṭṭhisandhovikampi khiḍḍaṁ kīḷeyyaṁ.
an10.99:3.5	Kaṇṇasandhovikampi khiḍḍaṁ kīḷitvā piṭṭhisandhovikampi khiḍḍaṁ kīḷitvā nhatvā ca pivitvā ca paccuttaritvā yena kāmaṁ pakkameyyan’ti.
an10.99:3.6	So taṁ udakarahadaṁ ogāhetvā kaṇṇasandhovikampi khiḍḍaṁ kīḷeyya piṭṭhisandhovikampi khiḍḍaṁ kīḷeyya;
an10.99:3.7	kaṇṇasandhovikampi khiḍḍaṁ kīḷitvā piṭṭhisandhovikampi khiḍḍaṁ kīḷitvā nhatvā ca pivitvā ca paccuttaritvā yena kāmaṁ pakkameyya.
an10.99:3.8	Taṁ kissa hetu?
an10.99:3.9	Mahā, upāli, attabhāvo gambhīre gādhaṁ vindati.
an10.99:4.1	Atha āgaccheyya saso vā biḷāro vā.
an10.99:4.2	Tassa evamassa:
an10.99:4.3	‘ko cāhaṁ, ko ca hatthināgo.
an10.99:4.4	Yannūnāhaṁ imaṁ udakarahadaṁ ogāhetvā kaṇṇasandhovikampi khiḍḍaṁ kīḷeyyaṁ piṭṭhisandhovikampi khiḍḍaṁ kīḷeyyaṁ;
an10.99:4.5	kaṇṇasandhovikampi khiḍḍaṁ kīḷitvā piṭṭhisandhovikampi khiḍḍaṁ kīḷitvā nhatvā ca pivitvā ca paccuttaritvā yena kāmaṁ pakkameyyan’ti.
an10.99:4.6	So taṁ udakarahadaṁ sahasā appaṭisaṅkhā pakkhandeyya.
an10.99:4.7	Tassetaṁ pāṭikaṅkhaṁ:
an10.99:4.8	‘saṁsīdissati vā uplavissati vā’ti.
an10.99:4.9	Taṁ kissa hetu?
an10.99:4.10	Paritto, upāli, attabhāvo gambhīre gādhaṁ na vindati.
an10.99:4.11	Evamevaṁ kho, upāli, yo evaṁ vadeyya:
an10.99:4.12	‘ahaṁ samādhiṁ alabhamāno araññavanapatthāni pantāni senāsanāni paṭisevissāmī’ti, tassetaṁ pāṭikaṅkhaṁ:
an10.99:4.13	‘saṁsīdissati vā uplavissati vā’ti.
an10.99:5.1	Seyyathāpi, upāli, daharo kumāro mando uttānaseyyako sakena muttakarīsena kīḷati.
an10.99:5.2	Taṁ kiṁ maññasi, upāli,
an10.99:5.3	nanvāyaṁ kevalā paripūrā bālakhiḍḍā”ti?
an10.99:5.4	“Evaṁ, bhante”.
an10.99:6.1	“Sa kho so, upāli, kumāro aparena samayena vuddhimanvāya indriyānaṁ paripākamanvāya
an10.99:6.2	yāni kānici kumārakānaṁ kīḷāpanakāni bhavanti, seyyathidaṁ—vaṅkakaṁ ghaṭikaṁ mokkhacikaṁ ciṅgulakaṁ pattāḷhakaṁ rathakaṁ dhanukaṁ, tehi kīḷati.
an10.99:6.3	Taṁ kiṁ maññasi, upāli,
an10.99:6.4	nanvāyaṁ khiḍḍā purimāya khiḍḍāya abhikkantatarā ca paṇītatarā cā”ti?
an10.99:6.5	“Evaṁ, bhante”.
an10.99:7.1	“Sa kho so, upāli, kumāro aparena samayena vuddhimanvāya indriyānaṁ paripākamanvāya
an10.99:7.2	pañcahi kāmaguṇehi samappito samaṅgibhūto paricāreti
an10.99:7.3	cakkhuviññeyyehi rūpehi iṭṭhehi kantehi manāpehi piyarūpehi kāmūpasaṁhitehi rajanīyehi,
an10.99:7.4	sotaviññeyyehi saddehi …
an10.99:7.5	ghānaviññeyyehi gandhehi …
an10.99:7.6	jivhāviññeyyehi rasehi …
an10.99:7.7	kāyaviññeyyehi phoṭṭhabbehi iṭṭhehi kantehi manāpehi piyarūpehi kāmūpasaṁhitehi rajanīyehi.
an10.99:7.8	Taṁ kiṁ maññasi, upāli,
an10.99:7.9	nanvāyaṁ khiḍḍā purimāhi khiḍḍāhi abhikkantatarā ca paṇītatarā cā”ti?
an10.99:7.10	“Evaṁ, bhante”.
an10.99:8.1	“Idha kho pana vo, upāli, tathāgato loke uppajjati arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā.
an10.99:8.2	So imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti.
an10.99:8.3	So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
an10.99:9.1	Taṁ dhammaṁ suṇāti gahapati vā gahapatiputto vā aññatarasmiṁ vā kule paccājāto.
an10.99:9.2	So taṁ dhammaṁ sutvā tathāgate saddhaṁ paṭilabhati.
an10.99:9.3	So tena saddhāpaṭilābhena samannāgato iti paṭisañcikkhati:
an10.99:9.4	‘sambādho gharāvāso rajāpatho, abbhokāso pabbajjā.
an10.99:9.5	Nayidaṁ sukaraṁ agāraṁ ajjhāvasatā ekantaparipuṇṇaṁ ekantaparisuddhaṁ saṅkhalikhitaṁ brahmacariyaṁ carituṁ.
an10.99:9.6	Yannūnāhaṁ kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajeyyan’ti.
an10.99:10.1	So aparena samayena appaṁ vā bhogakkhandhaṁ pahāya mahantaṁ vā bhogakkhandhaṁ pahāya appaṁ vā ñātiparivaṭṭaṁ pahāya mahantaṁ vā ñātiparivaṭṭaṁ pahāya kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajati.
an10.99:11.1	So evaṁ pabbajito samāno bhikkhūnaṁ sikkhāsājīvasamāpanno pāṇātipātaṁ pahāya pāṇātipātā paṭivirato hoti nihitadaṇḍo nihitasattho lajjī dayāpanno sabbapāṇabhūtahitānukampī viharati.
an10.99:12.1	Adinnādānaṁ pahāya adinnādānā paṭivirato hoti dinnādāyī dinnapāṭikaṅkhī; athenena sucibhūtena attanā viharati.
an10.99:13.1	Abrahmacariyaṁ pahāya brahmacārī hoti ārācārī virato methunā gāmadhammā.
an10.99:14.1	Musāvādaṁ pahāya musāvādā paṭivirato hoti saccavādī saccasandho theto paccayiko avisaṁvādako lokassa.
an10.99:15.1	Pisuṇaṁ vācaṁ pahāya pisuṇāya vācāya paṭivirato hoti, ito sutvā na amutra akkhātā imesaṁ bhedāya, amutra vā sutvā na imesaṁ akkhātā amūsaṁ bhedāya. Iti bhinnānaṁ vā sandhātā sahitānaṁ vā anuppadātā, samaggārāmo samaggarato samagganandī; samaggakaraṇiṁ vācaṁ bhāsitā hoti.
an10.99:16.1	Pharusaṁ vācaṁ pahāya pharusāya vācāya paṭivirato hoti. Yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā, tathārūpiṁ vācaṁ bhāsitā hoti.
an10.99:17.1	Samphappalāpaṁ pahāya samphappalāpā paṭivirato hoti kālavādī bhūtavādī atthavādī dhammavādī vinayavādī, nidhānavatiṁ vācaṁ bhāsitā hoti kālena sāpadesaṁ pariyantavatiṁ atthasaṁhitaṁ.
an10.99:18.1	So bījagāmabhūtagāmasamārambhā paṭivirato hoti.
an10.99:18.2	Ekabhattiko hoti rattūparato, virato vikālabhojanā.
an10.99:18.3	Naccagītavāditavisūkadassanā paṭivirato hoti,
an10.99:18.4	mālāgandhavilepanadhāraṇamaṇḍanavibhūsanaṭṭhānā paṭivirato hoti,
an10.99:18.5	uccāsayanamahāsayanā paṭivirato hoti,
an10.99:18.6	jātarūparajatapaṭiggahaṇā paṭivirato hoti,
an10.99:18.7	āmakadhaññapaṭiggahaṇā paṭivirato hoti,
an10.99:18.8	āmakamaṁsapaṭiggahaṇā paṭivirato hoti,
an10.99:18.9	itthikumārikapaṭiggahaṇā paṭivirato hoti,
an10.99:18.10	dāsidāsapaṭiggahaṇā paṭivirato hoti,
an10.99:18.11	ajeḷakapaṭiggahaṇā paṭivirato hoti,
an10.99:18.12	kukkuṭasūkarapaṭiggahaṇā paṭivirato hoti,
an10.99:18.13	hatthigavassavaḷavapaṭiggahaṇā paṭivirato hoti,
an10.99:18.14	khettavatthupaṭiggahaṇā paṭivirato hoti,
an10.99:18.15	dūteyyapahiṇagamanānuyogā paṭivirato hoti,
an10.99:18.16	kayavikkayā paṭivirato hoti,
an10.99:18.17	tulākūṭakaṁsakūṭamānakūṭā paṭivirato hoti,
an10.99:18.18	ukkoṭanavañcananikatisāciyogā paṭivirato hoti,
an10.99:18.19	chedanavadhabandhanaviparāmosaālopasahasākārā paṭivirato hoti.
an10.99:19.1	So santuṭṭho hoti kāyaparihārikena cīvarena kucchiparihārikena piṇḍapātena.
an10.99:19.2	Yena yeneva pakkamati samādāyeva pakkamati,
an10.99:19.3	seyyathāpi nāma pakkhī sakuṇo yena yeneva ḍeti sapattabhārova ḍeti.
an10.99:19.4	Evamevaṁ bhikkhu santuṭṭho hoti kāyaparihārikena cīvarena kucchiparihārikena piṇḍapātena. Yena yeneva pakkamati samādāyeva pakkamati.
an10.99:19.5	So iminā ariyena sīlakkhandhena samannāgato ajjhattaṁ anavajjasukhaṁ paṭisaṁvedeti.
an10.99:20.1	So cakkhunā rūpaṁ disvā na nimittaggāhī hoti nānubyañjanaggāhī.
an10.99:20.2	Yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati cakkhundriyaṁ, cakkhundriye saṁvaraṁ āpajjati.
an10.99:20.3	Sotena saddaṁ sutvā …
an10.99:20.4	ghānena gandhaṁ ghāyitvā …
an10.99:20.5	jivhāya rasaṁ sāyitvā …
an10.99:20.6	kāyena phoṭṭhabbaṁ phusitvā …
an10.99:20.7	manasā dhammaṁ viññāya na nimittaggāhī hoti nānubyañjanaggāhī.
an10.99:20.8	Yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ, manindriye saṁvaraṁ āpajjati.
an10.99:20.9	So iminā ariyena indriyasaṁvarena samannāgato ajjhattaṁ abyāsekasukhaṁ paṭisaṁvedeti.
an10.99:21.1	So abhikkante paṭikkante sampajānakārī hoti, ālokite vilokite sampajānakārī hoti, samiñjite pasārite sampajānakārī hoti, saṅghāṭipattacīvaradhāraṇe sampajānakārī hoti, asite pīte khāyite sāyite sampajānakārī hoti, uccārapassāvakamme sampajānakārī hoti, gate ṭhite nisinne sutte jāgarite bhāsite tuṇhībhāve sampajānakārī hoti.
an10.99:22.1	So iminā ca ariyena sīlakkhandhena samannāgato, iminā ca ariyena indriyasaṁvarena samannāgato, iminā ca ariyena satisampajaññena samannāgato
an10.99:22.2	vivittaṁ senāsanaṁ bhajati araññaṁ rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ palālapuñjaṁ.
an10.99:22.3	So araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.
an10.99:23.1	So abhijjhaṁ loke pahāya vigatābhijjhena cetasā viharati, abhijjhāya cittaṁ parisodheti.
an10.99:23.2	Byāpādapadosaṁ pahāya abyāpannacitto viharati sabbapāṇabhūtahitānukampī, byāpādapadosā cittaṁ parisodheti.
an10.99:23.3	Thinamiddhaṁ pahāya vigatathinamiddho viharati ālokasaññī sato sampajāno, thinamiddhā cittaṁ parisodheti.
an10.99:23.4	Uddhaccakukkuccaṁ pahāya anuddhato viharati ajjhattaṁ vūpasantacitto, uddhaccakukkuccā cittaṁ parisodheti.
an10.99:23.5	Vicikicchaṁ pahāya tiṇṇavicikiccho viharati akathaṅkathī kusalesu dhammesu, vicikicchāya cittaṁ parisodheti.
an10.99:24.1	So ime pañca nīvaraṇe pahāya cetaso upakkilese paññāya dubbalīkaraṇe,
an10.99:24.2	vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an10.99:24.3	Taṁ kiṁ maññasi, upāli,
an10.99:24.4	‘nanvāyaṁ vihāro purimehi vihārehi abhikkantataro ca paṇītataro cā’”ti?
an10.99:24.5	“Evaṁ, bhante”.
an10.99:25.1	“Imampi kho, upāli, mama sāvakā attani dhammaṁ sampassamānā araññavanapatthāni pantāni senāsanāni paṭisevanti, no ca kho tāva anuppattasadatthā viharanti.
an10.99:26.1	Puna caparaṁ, upāli, bhikkhu vitakkavicārānaṁ vūpasamā …pe… dutiyaṁ jhānaṁ upasampajja viharati.
an10.99:26.2	Taṁ kiṁ maññasi, upāli,
an10.99:26.3	‘nanvāyaṁ vihāro purimehi vihārehi abhikkantataro ca paṇītataro cā’”ti?
an10.99:26.4	“Evaṁ, bhante”.
an10.99:27.1	“Imampi kho, upāli, mama sāvakā attani dhammaṁ sampassamānā araññavanapatthāni pantāni senāsanāni paṭisevanti, no ca kho tāva anuppattasadatthā viharanti.
an10.99:28.1	Puna caparaṁ, upāli, bhikkhu pītiyā ca virāgā …pe… tatiyaṁ jhānaṁ upasampajja viharati.
an10.99:28.2	Taṁ kiṁ maññasi, upāli,
an10.99:28.3	‘nanvāyaṁ vihāro purimehi vihārehi abhikkantataro ca paṇītataro cā’”ti?
an10.99:28.4	“Evaṁ, bhante”.
an10.99:29.1	“Imampi kho, upāli, mama sāvakā attani dhammaṁ sampassamānā araññavanapatthāni pantāni senāsanāni paṭisevanti, no ca kho tāva anuppattasadatthā viharanti.
an10.99:30.1	Puna caparaṁ, upāli, bhikkhu sukhassa ca pahānā …pe… catutthaṁ jhānaṁ …pe….
an10.99:31.1	Puna caparaṁ, upāli, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an10.99:31.2	Taṁ kiṁ maññasi, upāli,
an10.99:31.3	‘nanvāyaṁ vihāro purimehi vihārehi abhikkantataro ca paṇītataro cā’”ti?
an10.99:31.4	“Evaṁ, bhante”.
an10.99:32.1	“Imampi kho, upāli, mama sāvakā attani dhammaṁ sampassamānā araññavanapatthāni pantāni senāsanāni paṭisevanti, no ca kho tāva anuppattasadatthā viharanti.
an10.99:33.1	Puna caparaṁ, upāli, bhikkhu sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati …pe….
an10.99:34.1	Sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati …pe….
an10.99:35.1	Sabbaso ākiñcaññāyatanaṁ samatikkamma ‘santametaṁ paṇītametan’ti nevasaññānāsaññāyatanaṁ upasampajja viharati.
an10.99:35.2	Taṁ kiṁ maññasi, upāli,
an10.99:35.3	‘nanvāyaṁ vihāro purimehi vihārehi abhikkantataro ca paṇītataro cā’”ti?
an10.99:35.4	“Evaṁ, bhante”.
an10.99:36.1	“Imampi kho, upāli, mama sāvakā attani dhammaṁ sampassamānā araññavanapatthāni pantāni senāsanāni paṭisevanti, no ca kho tāva anuppattasadatthā viharanti.
an10.99:37.1	Puna caparaṁ, upāli, bhikkhu sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati; paññāya cassa disvā āsavā parikkhīṇā honti.
an10.99:37.2	Taṁ kiṁ maññasi, upāli,
an10.99:37.3	‘nanvāyaṁ vihāro purimehi vihārehi abhikkantataro ca paṇītataro cā’”ti?
an10.99:37.4	“Evaṁ, bhante”.
an10.99:38.1	“Imampi kho, upāli, mama sāvakā attani dhammaṁ sampassamānā araññavanapatthāni pantāni senāsanāni paṭisevanti, anuppattasadatthā ca viharanti.
an10.99:38.2	Iṅgha tvaṁ, upāli, saṅghe viharāhi.
an10.99:38.3	Saṅghe te viharato phāsu bhavissatī”ti.
an10.99:38.4	Navamaṁ.
an10.100:0.1	Aṅguttara Nikāya 10.100
an10.100:0.2	10. Upālivagga
an10.100:0.3	Abhabbasutta
an10.100:1.1	“Dasayime, bhikkhave, dhamme appahāya abhabbo arahattaṁ sacchikātuṁ.
an10.100:1.2	Katame dasa?
an10.100:1.3	Rāgaṁ, dosaṁ, mohaṁ, kodhaṁ, upanāhaṁ, makkhaṁ, paḷāsaṁ, issaṁ, macchariyaṁ, mānaṁ—
an10.100:1.4	ime kho, bhikkhave, dasa dhamme appahāya abhabbo arahattaṁ sacchikātuṁ.
an10.100:2.1	Dasayime, bhikkhave, dhamme pahāya bhabbo arahattaṁ sacchikātuṁ.
an10.100:2.2	Katame dasa?
an10.100:2.3	Rāgaṁ, dosaṁ, mohaṁ, kodhaṁ, upanāhaṁ, makkhaṁ, paḷāsaṁ, issaṁ, macchariyaṁ, mānaṁ—
an10.100:2.4	ime kho, bhikkhave, dasa dhamme pahāya bhabbo arahattaṁ sacchikātun”ti.
an10.100:2.5	Dasamaṁ.
an10.100:2.6	Upālivaggo pañcamo.
an10.100:3.0	Tassuddānaṁ
an10.100:3.1	Kāmabhogī bhayaṁ diṭṭhi,
an10.100:3.2	vajjiyamāhituttiyā;
an10.100:3.3	Kokanudo āhuneyyo,
an10.100:3.4	thero upāli abhabboti.
an10.100:3.5	Dutiyo paṇṇāsako samatto.
an10.101:0.1	Aṅguttara Nikāya 10.101
an10.101:0.2	11. Samaṇasaññāvagga
an10.101:0.3	Samaṇasaññāsutta
an10.101:1.1	“Tisso imā, bhikkhave, samaṇasaññā bhāvitā bahulīkatā satta dhamme paripūrenti.
an10.101:1.2	Katamā tisso?
an10.101:1.3	Vevaṇṇiyamhi ajjhupagato, parapaṭibaddhā me jīvikā, añño me ākappo karaṇīyoti—
an10.101:1.4	imā kho, bhikkhave, tisso samaṇasaññā bhāvitā bahulīkatā satta dhamme paripūrenti.
an10.101:2.1	Katame satta?
an10.101:2.2	Santatakārī hoti santatavutti sīlesu, anabhijjhālu hoti, abyāpajjo hoti, anatimānī hoti, sikkhākāmo hoti, “idamatthan”tissa hoti jīvitaparikkhāresu, āraddhavīriyo ca viharati.
an10.101:2.3	Imā kho, bhikkhave, tisso samaṇasaññā bhāvitā bahulīkatā ime satta dhamme paripūrentī”ti.
an10.101:2.4	Paṭhamaṁ.
an10.102:0.1	Aṅguttara Nikāya 10.102
an10.102:0.2	11. Samaṇasaññāvagga
an10.102:0.3	Bojjhaṅgasutta
an10.102:1.1	“Sattime, bhikkhave, bojjhaṅgā bhāvitā bahulīkatā tisso vijjā paripūrenti.
an10.102:1.2	Katame satta?
an10.102:1.3	Satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo—
an10.102:1.4	ime kho, bhikkhave, satta bojjhaṅgā bhāvitā bahulīkatā tisso vijjā paripūrenti.
an10.102:1.5	Katamā tisso?
an10.102:1.6	Idha, bhikkhave, bhikkhu anekavihitaṁ pubbenivāsaṁ anussarati,
an10.102:1.7	seyyathidaṁ—ekampi jātiṁ dvepi jātiyo tissopi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati.
an10.102:1.8	Dibbena cakkhunā visuddhena atikkantamānusakena …pe… yathākammūpage satte pajānāti.
an10.102:1.9	Āsavānaṁ khayā …pe… sacchikatvā upasampajja viharati.
an10.102:1.10	Ime kho, bhikkhave, satta bojjhaṅgā bhāvitā bahulīkatā imā tisso vijjā paripūrentī”ti.
an10.102:1.11	Dutiyaṁ.
an10.103:0.1	Aṅguttara Nikāya 10.103
an10.103:0.2	11. Samaṇasaññāvagga
an10.103:0.3	Micchattasutta
an10.103:1.1	“Micchattaṁ, bhikkhave, āgamma virādhanā hoti, no ārādhanā.
an10.103:1.2	Kathañca, bhikkhave, micchattaṁ āgamma virādhanā hoti, no ārādhanā?
an10.103:1.3	Micchādiṭṭhikassa, bhikkhave, micchāsaṅkappo pahoti, micchāsaṅkappassa micchāvācā pahoti, micchāvācassa micchākammanto pahoti, micchākammantassa micchāājīvo pahoti, micchāājīvassa micchāvāyāmo pahoti, micchāvāyāmassa micchāsati pahoti, micchāsatissa micchāsamādhi pahoti, micchāsamādhissa micchāñāṇaṁ pahoti, micchāñāṇissa micchāvimutti pahoti.
an10.103:1.4	Evaṁ kho, bhikkhave, micchattaṁ āgamma virādhanā hoti, no ārādhanā.
an10.103:2.1	Sammattaṁ, bhikkhave, āgamma ārādhanā hoti, no virādhanā.
an10.103:2.2	Kathañca, bhikkhave, sammattaṁ āgamma ārādhanā hoti, no virādhanā?
an10.103:2.3	Sammādiṭṭhikassa, bhikkhave, sammāsaṅkappo pahoti, sammāsaṅkappassa sammāvācā pahoti, sammāvācassa sammākammanto pahoti, sammākammantassa sammāājīvo pahoti, sammāājīvassa sammāvāyāmo pahoti, sammāvāyāmassa sammāsati pahoti, sammāsatissa sammāsamādhi pahoti, sammāsamādhissa sammāñāṇaṁ pahoti, sammāñāṇissa sammāvimutti pahoti.
an10.103:2.4	Evaṁ kho, bhikkhave, sammattaṁ āgamma ārādhanā hoti, no virādhanā”ti.
an10.103:2.5	Tatiyaṁ.
an10.104:0.1	Aṅguttara Nikāya 10.104
an10.104:0.2	11. Samaṇasaññāvagga
an10.104:0.3	Bījasutta
an10.104:1.1	“Micchādiṭṭhikassa, bhikkhave, purisapuggalassa micchāsaṅkappassa micchāvācassa micchākammantassa micchāājīvassa micchāvāyāmassa micchāsatissa micchāsamādhissa micchāñāṇissa micchāvimuttissa
an10.104:1.2	yañca kāyakammaṁ yathādiṭṭhi samattaṁ samādinnaṁ yañca vacīkammaṁ yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṁvattanti.
an10.104:1.3	Taṁ kissa hetu?
an10.104:1.4	Diṭṭhi hissa, bhikkhave, pāpikā.
an10.104:2.1	Seyyathāpi, bhikkhave, nimbabījaṁ vā kosātakibījaṁ vā tittakālābubījaṁ vā allāya pathaviyā nikkhittaṁ yañceva pathavirasaṁ upādiyati yañca āporasaṁ upādiyati, sabbaṁ taṁ tittakattāya kaṭukattāya asātattāya saṁvattati.
an10.104:2.2	Taṁ kissa hetu?
an10.104:2.3	Bījañhi, bhikkhave, pāpakaṁ.
an10.104:2.4	Evamevaṁ kho, bhikkhave, micchādiṭṭhikassa purisapuggalassa micchāsaṅkappassa micchāvācassa micchākammantassa micchāājīvassa micchāvāyāmassa micchāsatissa micchāsamādhissa micchāñāṇissa micchāvimuttissa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …
an10.104:2.5	yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṁvattanti.
an10.104:2.6	Taṁ kissa hetu?
an10.104:2.7	Diṭṭhi hissa, bhikkhave, pāpikā.
an10.104:3.1	Sammādiṭṭhikassa, bhikkhave, purisapuggalassa sammāsaṅkappassa sammāvācassa sammākammantassa sammāājīvassa sammāvāyāmassa sammāsatissa sammāsamādhissa sammāñāṇissa sammāvimuttissa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ yathādiṭṭhi samattaṁ samādinnaṁ yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā, sabbe te dhammā iṭṭhāya kantāya manāpāya hitāya sukhāya saṁvattanti.
an10.104:3.2	Taṁ kissa hetu?
an10.104:3.3	Diṭṭhi hissa, bhikkhave, bhaddikā.
an10.104:4.1	Seyyathāpi, bhikkhave, ucchubījaṁ vā sālibījaṁ vā muddikābījaṁ vā allāya pathaviyā nikkhittaṁ yañca pathavirasaṁ upādiyati yañca āporasaṁ upādiyati sabbaṁ taṁ sātattāya madhurattāya asecanakattāya saṁvattati.
an10.104:4.2	Taṁ kissa hetu?
an10.104:4.3	Bījañhi, bhikkhave, bhaddakaṁ.
an10.104:4.4	Evamevaṁ kho, bhikkhave, sammādiṭṭhikassa …pe… sammāvimuttissa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …
an10.104:4.5	yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā, sabbe te dhammā iṭṭhāya kantāya manāpāya hitāya sukhāya saṁvattanti.
an10.104:4.6	Taṁ kissa hetu?
an10.104:4.7	Diṭṭhi hissa, bhikkhave, bhaddikā”ti.
an10.104:4.8	Catutthaṁ.
an10.105:0.1	Aṅguttara Nikāya 10.105
an10.105:0.2	11. Samaṇasaññāvagga
an10.105:0.3	Vijjāsutta
an10.105:1.1	“Avijjā, bhikkhave, pubbaṅgamā akusalānaṁ dhammānaṁ samāpattiyā, anvadeva ahirikaṁ anottappaṁ.
an10.105:1.2	Avijjāgatassa, bhikkhave, aviddasuno micchādiṭṭhi pahoti, micchādiṭṭhikassa micchāsaṅkappo pahoti, micchāsaṅkappassa micchāvācā pahoti, micchāvācassa micchākammanto pahoti, micchākammantassa micchāājīvo pahoti, micchāājīvassa micchāvāyāmo pahoti, micchāvāyāmassa micchāsati pahoti, micchāsatissa micchāsamādhi pahoti, micchāsamādhissa micchāñāṇaṁ pahoti, micchāñāṇissa micchāvimutti pahoti.
an10.105:2.1	Vijjā, bhikkhave, pubbaṅgamā kusalānaṁ dhammānaṁ samāpattiyā, anvadeva hirottappaṁ.
an10.105:2.2	Vijjāgatassa, bhikkhave, viddasuno sammādiṭṭhi pahoti, sammādiṭṭhikassa sammāsaṅkappo pahoti, sammāsaṅkappassa sammāvācā pahoti, sammāvācassa sammākammanto pahoti, sammākammantassa sammāājīvo pahoti, sammāājīvassa sammāvāyāmo pahoti, sammāvāyāmassa sammāsati pahoti, sammāsatissa sammāsamādhi pahoti, sammāsamādhissa sammāñāṇaṁ pahoti, sammāñāṇissa sammāvimutti pahotī”ti.
an10.105:2.3	Pañcamaṁ.
an10.106:0.1	Aṅguttara Nikāya 10.106
an10.106:0.2	11. Samaṇasaññāvagga
an10.106:0.3	Nijjarasutta
an10.106:1.1	“Dasayimāni, bhikkhave, nijjaravatthūni.
an10.106:1.2	Katamāni dasa?
an10.106:1.3	Sammādiṭṭhikassa, bhikkhave, micchādiṭṭhi nijjiṇṇā hoti;
an10.106:1.4	ye ca micchādiṭṭhipaccayā aneke pāpakā akusalā dhammā sambhavanti te cassa nijjiṇṇā honti;
an10.106:1.5	sammādiṭṭhipaccayā ca aneke kusalā dhammā bhāvanāpāripūriṁ gacchanti.
an10.106:2.1	Sammāsaṅkappassa, bhikkhave, micchāsaṅkappo nijjiṇṇo hoti;
an10.106:2.2	ye ca micchāsaṅkappapaccayā aneke pāpakā akusalā dhammā sambhavanti te cassa nijjiṇṇā honti;
an10.106:2.3	sammāsaṅkappapaccayā ca aneke kusalā dhammā bhāvanāpāripūriṁ gacchanti.
an10.106:3.1	Sammāvācassa, bhikkhave, micchāvācā nijjiṇṇā hoti;
an10.106:3.2	ye ca micchāvācāpaccayā aneke pāpakā akusalā dhammā sambhavanti te cassa nijjiṇṇā honti;
an10.106:3.3	sammāvācāpaccayā ca aneke kusalā dhammā bhāvanāpāripūriṁ gacchanti.
an10.106:4.1	Sammākammantassa, bhikkhave, micchākammanto nijjiṇṇo hoti;
an10.106:4.2	ye ca micchākammantapaccayā aneke pāpakā akusalā dhammā sambhavanti te cassa nijjiṇṇā honti;
an10.106:4.3	sammākammantapaccayā ca aneke kusalā dhammā bhāvanāpāripūriṁ gacchanti.
an10.106:5.1	Sammāājīvassa, bhikkhave, micchāājīvo nijjiṇṇo hoti;
an10.106:5.2	ye ca micchāājīvapaccayā aneke pāpakā akusalā dhammā sambhavanti te cassa nijjiṇṇā honti;
an10.106:5.3	sammāājīvapaccayā ca aneke kusalā dhammā bhāvanāpāripūriṁ gacchanti.
an10.106:6.1	Sammāvāyāmassa, bhikkhave, micchāvāyāmo nijjiṇṇo hoti;
an10.106:6.2	ye ca micchāvāyāmapaccayā aneke pāpakā akusalā dhammā sambhavanti te cassa nijjiṇṇā honti;
an10.106:6.3	sammāvāyāmapaccayā ca aneke kusalā dhammā bhāvanāpāripūriṁ gacchanti.
an10.106:7.1	Sammāsatissa, bhikkhave, micchāsati nijjiṇṇā hoti;
an10.106:7.2	ye ca micchāsatipaccayā aneke pāpakā akusalā dhammā sambhavanti te cassa nijjiṇṇā honti;
an10.106:7.3	sammāsatipaccayā ca aneke kusalā dhammā bhāvanāpāripūriṁ gacchanti.
an10.106:8.1	Sammāsamādhissa, bhikkhave, micchāsamādhi nijjiṇṇo hoti;
an10.106:8.2	ye ca micchāsamādhipaccayā aneke pāpakā akusalā dhammā sambhavanti te cassa nijjiṇṇā honti;
an10.106:8.3	sammāsamādhipaccayā ca aneke kusalā dhammā bhāvanāpāripūriṁ gacchanti.
an10.106:9.1	Sammāñāṇissa, bhikkhave, micchāñāṇaṁ nijjiṇṇaṁ hoti;
an10.106:9.2	ye ca micchāñāṇapaccayā aneke pāpakā akusalā dhammā sambhavanti te cassa nijjiṇṇā honti;
an10.106:9.3	sammāñāṇapaccayā ca aneke kusalā dhammā bhāvanāpāripūriṁ gacchanti.
an10.106:10.1	Sammāvimuttissa, bhikkhave, micchāvimutti nijjiṇṇā hoti;
an10.106:10.2	ye ca micchāvimuttipaccayā aneke pāpakā akusalā dhammā sambhavanti te cassa nijjiṇṇā honti;
an10.106:10.3	sammāvimuttipaccayā ca aneke kusalā dhammā bhāvanāpāripūriṁ gacchanti.
an10.106:11.1	Imāni kho, bhikkhave, dasa nijjaravatthūnī”ti.
an10.106:11.2	Chaṭṭhaṁ.
an10.107:0.1	Aṅguttara Nikāya 10.107
an10.107:0.2	11. Samaṇasaññāvagga
an10.107:0.3	Dhovanasutta
an10.107:1.1	“Atthi, bhikkhave, dakkhiṇesu janapadesu dhovanaṁ nāma.
an10.107:1.2	Tattha hoti annampi pānampi khajjampi bhojjampi leyyampi peyyampi naccampi gītampi vāditampi.
an10.107:1.3	Atthetaṁ, bhikkhave, dhovanaṁ; ‘netaṁ natthī’ti vadāmi.
an10.107:1.4	Tañca kho etaṁ, bhikkhave, dhovanaṁ hīnaṁ gammaṁ pothujjanikaṁ anariyaṁ anatthasaṁhitaṁ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattati.
an10.107:2.1	Ahañca kho, bhikkhave, ariyaṁ dhovanaṁ desessāmi, yaṁ dhovanaṁ ekantanibbidāya virāgāya nirodhāya upasamāya abhiññāya sambodhāya nibbānāya saṁvattati, yaṁ dhovanaṁ āgamma jātidhammā sattā jātiyā parimuccanti, jarādhammā sattā jarāya parimuccanti, maraṇadhammā sattā maraṇena parimuccanti, sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti.
an10.107:2.2	Taṁ suṇātha, sādhukaṁ manasi karotha, bhāsissāmī”ti.
an10.107:2.3	“Evaṁ, bhante”ti kho te bhikkhū bhagavato paccassosuṁ.
an10.107:2.4	Bhagavā etadavoca:
an10.107:3.1	“Katamañca taṁ, bhikkhave, ariyaṁ dhovanaṁ, yaṁ dhovanaṁ ekantanibbidāya virāgāya nirodhāya upasamāya abhiññāya sambodhāya nibbānāya saṁvattati, yaṁ dhovanaṁ āgamma jātidhammā sattā jātiyā parimuccanti, jarādhammā sattā jarāya parimuccanti, maraṇadhammā sattā maraṇena parimuccanti, sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti?
an10.107:4.1	Sammādiṭṭhikassa, bhikkhave, micchādiṭṭhi niddhotā hoti;
an10.107:4.2	ye ca micchādiṭṭhipaccayā aneke pāpakā akusalā dhammā sambhavanti te cassa niddhotā honti;
an10.107:4.3	sammādiṭṭhipaccayā ca aneke kusalā dhammā bhāvanāpāripūriṁ gacchanti.
an10.107:5.1	Sammāsaṅkappassa, bhikkhave, micchāsaṅkappo niddhoto hoti …pe…
an10.107:5.2	sammāvācassa, bhikkhave, micchāvācā niddhotā hoti …
an10.107:5.3	sammākammantassa, bhikkhave, micchākammanto niddhoto hoti …
an10.107:5.4	sammāājīvassa, bhikkhave, micchāājīvo niddhoto hoti …
an10.107:5.5	sammāvāyāmassa, bhikkhave, micchāvāyāmo niddhoto hoti …
an10.107:5.6	sammāsatissa, bhikkhave, micchāsati niddhotā hoti …
an10.107:5.7	sammāsamādhissa, bhikkhave, micchāsamādhi niddhoto hoti …
an10.107:5.8	sammāñāṇissa, bhikkhave, micchāñāṇaṁ niddhotaṁ hoti …pe….
an10.107:6.1	Sammāvimuttissa, bhikkhave, micchāvimutti niddhotā hoti;
an10.107:6.2	ye ca micchāvimuttipaccayā aneke pāpakā akusalā dhammā sambhavanti te cassa niddhotā honti;
an10.107:6.3	sammāvimuttipaccayā ca aneke kusalā dhammā bhāvanāpāripūriṁ gacchanti.
an10.107:6.4	Idaṁ kho taṁ, bhikkhave, ariyaṁ dhovanaṁ ekantanibbidāya virāgāya nirodhāya upasamāya abhiññāya sambodhāya nibbānāya saṁvattati, yaṁ dhovanaṁ āgamma jātidhammā sattā jātiyā parimuccanti, jarādhammā sattā jarāya parimuccanti, maraṇadhammā sattā maraṇena parimuccanti, sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccantī”ti.
an10.107:6.5	Sattamaṁ.
an10.108:0.1	Aṅguttara Nikāya 10.108
an10.108:0.2	11. Samaṇasaññāvagga
an10.108:0.3	Tikicchakasutta
an10.108:1.1	“Tikicchakā, bhikkhave, virecanaṁ denti pittasamuṭṭhānānampi ābādhānaṁ paṭighātāya, semhasamuṭṭhānānampi ābādhānaṁ paṭighātāya, vātasamuṭṭhānānampi ābādhānaṁ paṭighātāya.
an10.108:1.2	Atthetaṁ, bhikkhave, virecanaṁ; ‘netaṁ natthī’ti vadāmi.
an10.108:1.3	Tañca kho etaṁ, bhikkhave, virecanaṁ sampajjatipi vipajjatipi.
an10.108:2.1	Ahañca kho, bhikkhave, ariyaṁ virecanaṁ desessāmi, yaṁ virecanaṁ sampajjatiyeva no vipajjati, yaṁ virecanaṁ āgamma jātidhammā sattā jātiyā parimuccanti, jarādhammā sattā jarāya parimuccanti, maraṇadhammā sattā maraṇena parimuccanti, sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti.
an10.108:2.2	Taṁ suṇātha, sādhukaṁ manasi karotha, bhāsissāmī”ti.
an10.108:2.3	“Evaṁ, bhante”ti kho te bhikkhū bhagavato paccassosuṁ.
an10.108:2.4	Bhagavā etadavoca:
an10.108:3.1	“Katamañca taṁ, bhikkhave, ariyaṁ virecanaṁ, yaṁ virecanaṁ sampajjatiyeva no vipajjati, yaṁ virecanaṁ āgamma jātidhammā sattā jātiyā parimuccanti, jarādhammā sattā jarāya parimuccanti, maraṇadhammā sattā maraṇena parimuccanti, sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti?
an10.108:4.1	Sammādiṭṭhikassa, bhikkhave, micchādiṭṭhi virittā hoti;
an10.108:4.2	ye ca micchādiṭṭhipaccayā aneke pāpakā akusalā dhammā sambhavanti te cassa virittā honti;
an10.108:4.3	sammādiṭṭhipaccayā ca aneke kusalā dhammā bhāvanāpāripūriṁ gacchanti.
an10.108:5.1	Sammāsaṅkappassa, bhikkhave, micchāsaṅkappo viritto hoti …pe…
an10.108:5.2	sammāvācassa, bhikkhave, micchāvācā virittā hoti …
an10.108:5.3	sammākammantassa, bhikkhave, micchākammanto viritto hoti …
an10.108:5.4	sammāājīvassa, bhikkhave, micchāājīvo viritto hoti …
an10.108:5.5	sammāvāyāmassa, bhikkhave, micchāvāyāmo viritto hoti …
an10.108:5.6	sammāsatissa, bhikkhave, micchāsati virittā hoti …
an10.108:5.7	sammāsamādhissa, bhikkhave, micchāsamādhi viritto hoti …
an10.108:5.8	sammāñāṇissa, bhikkhave, micchāñāṇaṁ virittaṁ hoti …pe….
an10.108:6.1	Sammāvimuttissa, bhikkhave, micchāvimutti virittā hoti;
an10.108:6.2	ye ca micchāvimuttipaccayā aneke pāpakā akusalā dhammā sambhavanti te cassa virittā honti;
an10.108:6.3	sammāvimuttipaccayā ca aneke kusalā dhammā bhāvanāpāripūriṁ gacchanti.
an10.108:6.4	Idaṁ kho taṁ, bhikkhave, ariyaṁ virecanaṁ yaṁ virecanaṁ sampajjatiyeva no vipajjati, yaṁ virecanaṁ āgamma jātidhammā sattā jātiyā parimuccanti …pe… sokaparidevadukkhadomanassupāyāsehi parimuccantī”ti.
an10.108:6.5	Aṭṭhamaṁ.
an10.109:0.1	Aṅguttara Nikāya 10.109
an10.109:0.2	11. Samaṇasaññāvagga
an10.109:0.3	Vamanasutta
an10.109:1.1	“Tikicchakā, bhikkhave, vamanaṁ denti pittasamuṭṭhānānampi ābādhānaṁ paṭighātāya, semhasamuṭṭhānānampi ābādhānaṁ paṭighātāya, vātasamuṭṭhānānampi ābādhānaṁ paṭighātāya.
an10.109:1.2	Atthetaṁ, bhikkhave, vamanaṁ; ‘netaṁ natthī’ti vadāmi.
an10.109:1.3	Tañca kho etaṁ, bhikkhave, vamanaṁ sampajjatipi vipajjatipi.
an10.109:2.1	Ahañca kho, bhikkhave, ariyaṁ vamanaṁ desessāmi, yaṁ vamanaṁ sampajjatiyeva no vipajjati, yaṁ vamanaṁ āgamma jātidhammā sattā jātiyā parimuccanti, jarādhammā sattā jarāya parimuccanti, maraṇadhammā sattā maraṇena parimuccanti, sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti.
an10.109:2.2	Taṁ suṇātha …pe….
an10.109:3.1	Katamañca taṁ, bhikkhave, ariyaṁ vamanaṁ, yaṁ vamanaṁ sampajjatiyeva no vipajjati, yaṁ vamanaṁ āgamma jātidhammā sattā jātiyā parimuccanti …pe… sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti?
an10.109:4.1	Sammādiṭṭhikassa, bhikkhave, micchādiṭṭhi vantā hoti;
an10.109:4.2	ye ca micchādiṭṭhipaccayā aneke pāpakā akusalā dhammā sambhavanti te cassa vantā honti;
an10.109:4.3	sammādiṭṭhipaccayā ca aneke kusalā dhammā bhāvanāpāripūriṁ gacchanti.
an10.109:5.1	Sammāsaṅkappassa, bhikkhave, micchāsaṅkappo vanto hoti …pe…
an10.109:5.2	sammāvācassa, bhikkhave, micchāvācā vantā hoti …
an10.109:5.3	sammākammantassa, bhikkhave, micchākammanto vanto hoti …
an10.109:5.4	sammāājīvassa, bhikkhave, micchāājīvo vanto hoti …
an10.109:5.5	sammāvāyāmassa, bhikkhave, micchāvāyāmo vanto hoti …
an10.109:5.6	sammāsatissa, bhikkhave, micchāsati vantā hoti …
an10.109:5.7	sammāsamādhissa, bhikkhave, micchāsamādhi vanto hoti …
an10.109:5.8	sammāñāṇissa, bhikkhave, micchāñāṇaṁ vantaṁ hoti …pe….
an10.109:6.1	Sammāvimuttissa, bhikkhave, micchāvimutti vantā hoti;
an10.109:6.2	ye ca micchāvimuttipaccayā aneke pāpakā akusalā dhammā sambhavanti te cassa vantā honti;
an10.109:6.3	sammāvimuttipaccayā ca aneke kusalā dhammā bhāvanāpāripūriṁ gacchanti.
an10.109:6.4	Idaṁ kho taṁ, bhikkhave, ariyaṁ vamanaṁ yaṁ vamanaṁ sampajjatiyeva no vipajjati, yaṁ vamanaṁ āgamma jātidhammā sattā jātiyā parimuccanti …pe… sokaparidevadukkhadomanassupāyāsehi parimuccantī”ti.
an10.109:6.5	Navamaṁ.
an10.110:0.1	Aṅguttara Nikāya 10.110
an10.110:0.2	11. Samaṇasaññāvagga
an10.110:0.3	Niddhamanīyasutta
an10.110:1.1	“Dasayime, bhikkhave, niddhamanīyā dhammā.
an10.110:1.2	Katame dasa?
an10.110:1.3	Sammādiṭṭhikassa, bhikkhave, micchādiṭṭhi niddhantā hoti;
an10.110:1.4	ye ca micchādiṭṭhipaccayā aneke pāpakā akusalā dhammā sambhavanti te cassa niddhantā honti;
an10.110:1.5	sammādiṭṭhipaccayā ca aneke kusalā dhammā bhāvanāpāripūriṁ gacchanti.
an10.110:2.1	Sammāsaṅkappassa, bhikkhave, micchāsaṅkappo niddhanto hoti …pe…
an10.110:2.2	sammāvācassa bhikkhave, micchāvācā niddhantā hoti …
an10.110:2.3	sammākammantassa, bhikkhave, micchākammanto niddhanto hoti …
an10.110:2.4	sammāājīvassa, bhikkhave, micchāājīvo niddhanto hoti …
an10.110:2.5	sammāvāyāmassa, bhikkhave, micchāvāyāmo niddhanto hoti …
an10.110:2.6	sammāsatissa, bhikkhave, micchāsati niddhantā hoti …
an10.110:2.7	sammāsamādhissa, bhikkhave, micchāsamādhi niddhanto hoti …
an10.110:2.8	sammāñāṇissa, bhikkhave, micchāñāṇaṁ niddhantaṁ hoti ….
an10.110:3.1	Sammāvimuttissa, bhikkhave, micchāvimutti niddhantā hoti;
an10.110:3.2	ye ca micchāvimuttipaccayā aneke pāpakā akusalā dhammā sambhavanti te cassa niddhantā honti;
an10.110:3.3	sammāvimuttipaccayā ca aneke kusalā dhammā bhāvanāpāripūriṁ gacchanti.
an10.110:3.4	Ime kho, bhikkhave, dasa niddhamanīyā dhammā”ti.
an10.110:3.5	Dasamaṁ.
an10.111:0.1	Aṅguttara Nikāya 10.111
an10.111:0.2	11. Samaṇasaññāvagga
an10.111:0.3	Paṭhamaasekhasutta
an10.111:1.1	Atha kho aññataro bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:
an10.111:2.1	“‘Asekho asekho’ti, bhante, vuccati.
an10.111:2.2	Kittāvatā bhante, bhikkhu asekho hotī”ti?
an10.111:2.3	“Idha, bhikkhu, bhikkhu asekhāya sammādiṭṭhiyā samannāgato hoti, asekhena sammāsaṅkappena samannāgato hoti, asekhāya sammāvācāya samannāgato hoti, asekhena sammākammantena samannāgato hoti, asekhena sammāājīvena samannāgato hoti, asekhena sammāvāyāmena samannāgato hoti, asekhāya sammāsatiyā samannāgato hoti, asekhena sammāsamādhinā samannāgato hoti, asekhena sammāñāṇena samannāgato hoti, asekhāya sammāvimuttiyā samannāgato hoti.
an10.111:2.4	Evaṁ kho, bhikkhu, bhikkhu asekho hotī”ti.
an10.111:2.5	Ekādasamaṁ.
an10.112:0.1	Aṅguttara Nikāya 10.112
an10.112:0.2	11. Samaṇasaññāvagga
an10.112:0.3	Dutiyaasekhasutta
an10.112:1.1	“Dasayime, bhikkhave, asekhiyā dhammā.
an10.112:1.2	Katame dasa?
an10.112:1.3	Asekhā sammādiṭṭhi, asekho sammāsaṅkappo, asekhā sammāvācā, asekho sammākammanto, asekho sammāājīvo, asekho sammāvāyāmo, asekhā sammāsati, asekho sammāsamādhi, asekhaṁ sammāñāṇaṁ, asekhā sammāvimutti—
an10.112:1.4	ime kho, bhikkhave, dasa asekhiyā dhammā”ti.
an10.112:1.5	Dvādasamaṁ.
an10.112:1.6	Samaṇasaññāvaggo paṭhamo.
an10.112:2.0	Tassuddānaṁ
an10.112:2.1	Saññā bojjhaṅgā micchattaṁ,
an10.112:2.2	bījaṁ vijjāya nijjaraṁ;
an10.112:2.3	Dhovanaṁ tikicchā vamanaṁ,
an10.112:2.4	niddhamanaṁ dve asekhāti.
an10.113:0.1	Aṅguttara Nikāya 10.113
an10.113:0.2	12. Paccorohaṇivagga
an10.113:0.3	Paṭhamaadhammasutta
an10.113:1.1	“Adhammo ca, bhikkhave, veditabbo anattho ca;
an10.113:1.2	dhammo ca veditabbo attho ca.
an10.113:1.3	Adhammañca viditvā anatthañca, dhammañca viditvā atthañca yathā dhammo yathā attho tathā paṭipajjitabbaṁ.
an10.113:2.1	Katamo ca, bhikkhave, adhammo ca anattho ca?
an10.113:2.2	Micchādiṭṭhi, micchāsaṅkappo, micchāvācā, micchākammanto, micchāājīvo, micchāvāyāmo, micchāsati, micchāsamādhi, micchāñāṇaṁ, micchāvimutti—
an10.113:2.3	ayaṁ vuccati, bhikkhave, adhammo ca anattho ca.
an10.113:3.1	Katamo ca, bhikkhave, dhammo ca attho ca?
an10.113:3.2	Sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi, sammāñāṇaṁ, sammāvimutti—
an10.113:3.3	ayaṁ vuccati, bhikkhave, dhammo ca attho ca.
an10.113:4.1	‘Adhammo ca, bhikkhave, veditabbo anattho ca;
an10.113:4.2	dhammo ca veditabbo attho ca.
an10.113:4.3	Adhammañca viditvā anatthañca, dhammañca viditvā atthañca yathā dhammo yathā attho tathā paṭipajjitabban’ti,
an10.113:4.4	iti yaṁ taṁ vuttaṁ, idametaṁ paṭicca vuttan”ti.
an10.113:4.5	Paṭhamaṁ.
an10.114:0.1	Aṅguttara Nikāya 10.114
an10.114:0.2	12. Paccorohaṇivagga
an10.114:0.3	Dutiyaadhammasutta
an10.114:1.1	“Adhammo ca, bhikkhave, veditabbo dhammo ca;
an10.114:1.2	anattho ca veditabbo attho ca.
an10.114:1.3	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabbaṁ.
an10.114:2.1	Katamo ca, bhikkhave, adhammo, katamo ca dhammo, katamo ca anattho, katamo ca attho?
an10.114:3.1	Micchādiṭṭhi, bhikkhave, adhammo;
an10.114:3.2	sammādiṭṭhi dhammo;
an10.114:3.3	ye ca micchādiṭṭhipaccayā aneke pāpakā akusalā dhammā sambhavanti, ayaṁ anattho;
an10.114:3.4	sammādiṭṭhipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:4.1	Micchāsaṅkappo, bhikkhave, adhammo;
an10.114:4.2	sammāsaṅkappo dhammo;
an10.114:4.3	ye ca micchāsaṅkappapaccayā aneke pāpakā akusalā dhammā sambhavanti, ayaṁ anattho;
an10.114:4.4	sammāsaṅkappapaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:5.1	Micchāvācā, bhikkhave, adhammo;
an10.114:5.2	sammāvācā dhammo;
an10.114:5.3	ye ca micchāvācāpaccayā aneke pāpakā akusalā dhammā sambhavanti, ayaṁ anattho;
an10.114:5.4	sammāvācāpaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:6.1	Micchākammanto, bhikkhave, adhammo;
an10.114:6.2	sammākammanto dhammo;
an10.114:6.3	ye ca micchākammantapaccayā aneke pāpakā akusalā dhammā sambhavanti, ayaṁ anattho;
an10.114:6.4	sammākammantapaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:7.1	Micchāājīvo, bhikkhave, adhammo;
an10.114:7.2	sammāājīvo dhammo;
an10.114:7.3	ye ca micchāājīvapaccayā aneke pāpakā akusalā dhammā sambhavanti, ayaṁ anattho;
an10.114:7.4	sammāājīvapaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:8.1	Micchāvāyāmo, bhikkhave, adhammo;
an10.114:8.2	sammāvāyāmo dhammo;
an10.114:8.3	ye ca micchāvāyāmapaccayā aneke pāpakā akusalā dhammā sambhavanti, ayaṁ anattho;
an10.114:8.4	sammāvāyāmapaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:9.1	Micchāsati, bhikkhave, adhammo;
an10.114:9.2	sammāsati dhammo;
an10.114:9.3	ye ca micchāsatipaccayā aneke pāpakā akusalā dhammā sambhavanti, ayaṁ anattho;
an10.114:9.4	sammāsatipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:10.1	Micchāsamādhi, bhikkhave, adhammo;
an10.114:10.2	sammāsamādhi dhammo;
an10.114:10.3	ye ca micchāsamādhipaccayā aneke pāpakā akusalā dhammā sambhavanti, ayaṁ anattho;
an10.114:10.4	sammāsamādhipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:11.1	Micchāñāṇaṁ, bhikkhave, adhammo;
an10.114:11.2	sammāñāṇaṁ dhammo;
an10.114:11.3	ye ca micchāñāṇapaccayā aneke pāpakā akusalā dhammā sambhavanti, ayaṁ anattho;
an10.114:11.4	sammāñāṇapaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:12.1	Micchāvimutti, bhikkhave, adhammo;
an10.114:12.2	sammāvimutti dhammo;
an10.114:12.3	ye ca micchāvimuttipaccayā aneke pāpakā akusalā dhammā sambhavanti, ayaṁ anattho;
an10.114:12.4	sammāvimuttipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.114:13.1	‘Adhammo ca, bhikkhave, veditabbo dhammo ca;
an10.114:13.2	anattho ca veditabbo attho ca.
an10.114:13.3	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabban’ti,
an10.114:13.4	iti yaṁ taṁ vuttaṁ, idametaṁ paṭicca vuttan”ti.
an10.114:13.5	Dutiyaṁ.
an10.115:0.1	Aṅguttara Nikāya 10.115
an10.115:0.2	12. Paccorohaṇivagga
an10.115:0.3	Tatiyaadhammasutta
an10.115:1.1	“Adhammo ca, bhikkhave, veditabbo dhammo ca;
an10.115:1.2	anattho ca veditabbo attho ca.
an10.115:1.3	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabban”ti.
an10.115:1.4	Idamavoca bhagavā.
an10.115:1.5	Idaṁ vatvāna sugato uṭṭhāyāsanā vihāraṁ pāvisi.
an10.115:2.1	Atha kho tesaṁ bhikkhūnaṁ acirapakkantassa bhagavato etadahosi:
an10.115:2.2	“idaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.115:2.3	‘adhammo ca, bhikkhave, veditabbo dhammo ca;
an10.115:2.4	anattho ca veditabbo attho ca.
an10.115:2.5	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabban’ti.
an10.115:2.6	Ko nu kho imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajeyyā”ti?
an10.115:3.1	Atha kho tesaṁ bhikkhūnaṁ etadahosi:
an10.115:3.2	“ayaṁ kho āyasmā ānando satthu ceva saṁvaṇṇito sambhāvito ca viññūnaṁ sabrahmacārīnaṁ.
an10.115:3.3	Pahoti cāyasmā ānando imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.
an10.115:3.4	Yannūna mayaṁ yenāyasmā ānando tenupasaṅkameyyāma; upasaṅkamitvā āyasmantaṁ ānandaṁ etamatthaṁ paṭipuccheyyāma.
an10.115:3.5	Yathā no āyasmā ānando byākarissati tathā naṁ dhāressāmā”ti.
an10.115:4.1	Atha kho te bhikkhū yenāyasmā ānando tenupasaṅkamiṁsu; upasaṅkamitvā āyasmatā ānandena saddhiṁ sammodiṁsu.
an10.115:4.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te bhikkhū āyasmantaṁ ānandaṁ etadavocuṁ:
an10.115:5.1	“Idaṁ kho no, āvuso ānanda, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.115:5.2	‘adhammo ca …pe…
an10.115:5.3	tathā paṭipajjitabban’ti.
an10.115:6.1	Tesaṁ no, āvuso, amhākaṁ acirapakkantassa bhagavato etadahosi:
an10.115:6.2	‘idaṁ kho no, āvuso, bhagavatā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho—
an10.115:6.3	adhammo ca …pe…
an10.115:6.4	tathā paṭipajjitabbanti.
an10.115:6.5	Ko nu kho imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajeyyā’ti?
an10.115:7.1	Tesaṁ no, āvuso, amhākaṁ etadahosi:
an10.115:7.2	‘ayaṁ kho āyasmā ānando satthu ceva saṁvaṇṇito sambhāvito ca viññūnaṁ sabrahmacārīnaṁ.
an10.115:7.3	Pahoti cāyasmā ānando imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.
an10.115:7.4	Yannūna mayaṁ yenāyasmā ānando tenupasaṅkameyyāma; upasaṅkamitvā āyasmantaṁ ānandaṁ etamatthaṁ paṭipuccheyyāma.
an10.115:7.5	Yathā no āyasmā ānando byākarissati tathā naṁ dhāressāmā’ti.
an10.115:7.6	Vibhajatu āyasmā ānando”ti.
an10.115:8.1	“Seyyathāpi, āvuso, puriso sāratthiko sāragavesī sārapariyesanaṁ caramāno mahato rukkhassa tiṭṭhato sāravato atikkammeva mūlaṁ atikkamma khandhaṁ sākhāpalāse sāraṁ pariyesitabbaṁ maññeyya;
an10.115:8.2	evaṁsampadamidaṁ āyasmantānaṁ satthari sammukhībhūte taṁ bhagavantaṁ atisitvā amhe etamatthaṁ paṭipucchitabbaṁ maññatha.
an10.115:8.3	So hāvuso, bhagavā jānaṁ jānāti passaṁ passati, cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato.
an10.115:8.4	So ceva panetassa kālo ahosi yaṁ tumhe bhagavantaṁyeva upasaṅkamitvā etamatthaṁ paṭipuccheyyātha.
an10.115:8.5	Yathā vo bhagavā byākareyya tathā naṁ dhāreyyāthā”ti.
an10.115:9.1	“Addhāvuso ānanda, bhagavā jānaṁ jānāti passaṁ passati cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato.
an10.115:9.2	So ceva panetassa kālo ahosi yaṁ mayaṁ bhagavantaṁyeva upasaṅkamitvā etamatthaṁ paṭipuccheyyāma,
an10.115:9.3	yathā no bhagavā byākareyya tathā naṁ dhāreyyāma.
an10.115:9.4	Api cāyasmā ānando satthu ceva saṁvaṇṇito sambhāvito ca viññūnaṁ sabrahmacārīnaṁ.
an10.115:9.5	Pahoti cāyasmā ānando imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.
an10.115:9.6	Vibhajatāyasmā ānando agaruṁ katvā”ti.
an10.115:10.1	“Tenahāvuso, suṇātha, sādhukaṁ manasi karotha, bhāsissāmī”ti.
an10.115:10.2	“Evamāvuso”ti kho te bhikkhū āyasmato ānandassa paccassosuṁ.
an10.115:10.3	Athāyasmā ānando etadavoca:
an10.115:11.1	“Yaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.115:11.2	‘adhammo ca, bhikkhave, veditabbo dhammo ca;
an10.115:11.3	anattho ca veditabbo attho ca.
an10.115:11.4	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabban’ti.
an10.115:12.1	Katamo cāvuso, adhammo, katamo ca dhammo, katamo ca anattho, katamo ca attho?
an10.115:13.1	Micchādiṭṭhi, āvuso, adhammo;
an10.115:13.2	sammādiṭṭhi dhammo;
an10.115:13.3	ye ca micchādiṭṭhipaccayā aneke pāpakā akusalā dhammā sambhavanti, ayaṁ anattho;
an10.115:13.4	sammādiṭṭhipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.115:14.1	Micchāsaṅkappo, āvuso, adhammo;
an10.115:14.2	sammāsaṅkappo dhammo …
an10.115:14.3	micchāvācā, āvuso, adhammo;
an10.115:14.4	sammāvācā dhammo …
an10.115:14.5	micchākammanto, āvuso, adhammo;
an10.115:14.6	sammākammanto dhammo …
an10.115:14.7	micchāājīvo, āvuso, adhammo;
an10.115:14.8	sammāājīvo dhammo …
an10.115:14.9	micchāvāyāmo, āvuso, adhammo;
an10.115:14.10	sammāvāyāmo dhammo …
an10.115:14.11	micchāsati, āvuso, adhammo;
an10.115:14.12	sammāsati dhammo …
an10.115:14.13	micchāsamādhi, āvuso, adhammo;
an10.115:14.14	sammāsamādhi dhammo …
an10.115:14.15	micchāñāṇaṁ, āvuso, adhammo;
an10.115:14.16	sammāñāṇaṁ dhammo ….
an10.115:15.1	Micchāvimutti, āvuso, adhammo;
an10.115:15.2	sammāvimutti dhammo;
an10.115:15.3	ye ca micchāvimuttipaccayā aneke pāpakā akusalā dhammā sambhavanti, ayaṁ anattho;
an10.115:15.4	sammāvimuttipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.115:16.1	Ayaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.115:16.2	‘adhammo ca, bhikkhave, veditabbo dhammo ca …pe…
an10.115:16.3	tathā paṭipajjitabban’ti, imassa kho ahaṁ, āvuso, bhagavatā saṅkhittena uddesassa uddiṭṭhassa vitthārena atthaṁ avibhattassa evaṁ vitthārena atthaṁ ājānāmi.
an10.115:16.4	Ākaṅkhamānā ca pana tumhe, āvuso, bhagavantaṁyeva upasaṅkamitvā etamatthaṁ paṭipuccheyyātha.
an10.115:16.5	Yathā vo bhagavā byākaroti tathā naṁ dhāreyyāthā”ti.
an10.115:17.1	“Evamāvuso”ti kho te bhikkhū āyasmato ānandassa bhāsitaṁ abhinanditvā anumoditvā uṭṭhāyāsanā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
an10.115:18.1	“Yaṁ kho no bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.115:18.2	‘adhammo ca, bhikkhave, veditabbo …pe…
an10.115:18.3	tathā paṭipajjitabban’ti.
an10.115:19.1	Tesaṁ no, bhante, amhākaṁ acirapakkantassa bhagavato etadahosi:
an10.115:19.2	‘idaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho—
an10.115:19.3	adhammo ca, bhikkhave, veditabbo …pe…
an10.115:19.4	tathā paṭipajjitabbanti.
an10.115:19.5	Ko nu kho imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajeyyā’ti?
an10.115:20.1	Tesaṁ no, bhante, amhākaṁ etadahosi:
an10.115:20.2	‘ayaṁ kho āyasmā ānando satthu ceva saṁvaṇṇito sambhāvito ca viññūnaṁ sabrahmacārīnaṁ.
an10.115:20.3	Pahoti cāyasmā ānando imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.
an10.115:20.4	Yannūna mayaṁ yenāyasmā ānando tenupasaṅkameyyāma; upasaṅkamitvā āyasmantaṁ ānandaṁ etamatthaṁ paṭipuccheyyāma.
an10.115:20.5	Yathā no āyasmā ānando byākarissati tathā naṁ dhāressāmā’ti.
an10.115:21.1	Atha kho mayaṁ, bhante, yenāyasmā ānando tenupasaṅkamimhā; upasaṅkamitvā āyasmantaṁ ānandaṁ etamatthaṁ apucchimhā.
an10.115:21.2	Tesaṁ no, bhante, āyasmatā ānandena imehi ākārehi imehi padehi imehi byañjanehi attho suvibhatto”ti.
an10.115:22.1	“Sādhu sādhu, bhikkhave.
an10.115:22.2	Paṇḍito, bhikkhave, ānando.
an10.115:22.3	Mahāpañño, bhikkhave, ānando.
an10.115:22.4	Mañcepi tumhe, bhikkhave, upasaṅkamitvā etamatthaṁ paṭipuccheyyātha, ahampi cetaṁ evamevaṁ byākareyyaṁ yathā taṁ ānandena byākataṁ.
an10.115:22.5	Eso ceva tassa attho evañca naṁ dhāreyyāthā”ti.
an10.115:22.6	Tatiyaṁ.
an10.116:0.1	Aṅguttara Nikāya 10.116
an10.116:0.2	12. Paccorohaṇivagga
an10.116:0.3	Ajitasutta
an10.116:1.1	Atha kho ajito paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
an10.116:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho ajito paribbājako bhagavantaṁ etadavoca:
an10.116:2.1	“Amhākaṁ, bho gotama, paṇḍito nāma sabrahmacārī.
an10.116:2.2	Tena pañcamattāni cittaṭṭhānasatāni cintitāni, yehi aññatitthiyā upāraddhāva jānanti upāraddhasmā”ti.
an10.116:3.1	Atha kho bhagavā bhikkhū āmantesi:
an10.116:3.2	“dhāretha no tumhe, bhikkhave, paṇḍitavatthūnī”ti?
an10.116:3.3	“Etassa, bhagavā, kālo etassa, sugata, kālo
an10.116:3.4	yaṁ bhagavā bhāseyya, bhagavato sutvā bhikkhū dhāressantī”ti.
an10.116:4.1	“Tena hi, bhikkhave, suṇātha, sādhukaṁ manasi karotha, bhāsissāmī”ti.
an10.116:4.2	“Evaṁ, bhante”ti kho te bhikkhū bhagavato paccassosuṁ.
an10.116:4.3	Bhagavā etadavoca:
an10.116:5.1	“Idha, bhikkhave, ekacco adhammikena vādena adhammikaṁ vādaṁ abhiniggaṇhāti abhinippīḷeti, tena ca adhammikaṁ parisaṁ rañjeti.
an10.116:5.2	Tena sā adhammikā parisā uccāsaddamahāsaddā hoti:
an10.116:5.3	‘paṇḍito vata bho, paṇḍito vata bho’ti.
an10.116:6.1	Idha pana, bhikkhave, ekacco adhammikena vādena dhammikaṁ vādaṁ abhiniggaṇhāti abhinippīḷeti, tena ca adhammikaṁ parisaṁ rañjeti.
an10.116:6.2	Tena sā adhammikā parisā uccāsaddamahāsaddā hoti:
an10.116:6.3	‘paṇḍito vata bho, paṇḍito vata bho’ti.
an10.116:7.1	Idha pana, bhikkhave, ekacco adhammikena vādena dhammikañca vādaṁ adhammikañca vādaṁ abhiniggaṇhāti abhinippīḷeti, tena ca adhammikaṁ parisaṁ rañjeti.
an10.116:7.2	Tena sā adhammikā parisā uccāsaddamahāsaddā hoti:
an10.116:7.3	‘paṇḍito vata bho, paṇḍito vata bho’ti.
an10.116:8.1	Adhammo ca, bhikkhave, veditabbo dhammo ca;
an10.116:8.2	anattho ca veditabbo attho ca.
an10.116:8.3	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabbaṁ.
an10.116:9.1	Katamo ca, bhikkhave, adhammo, katamo ca dhammo, katamo ca anattho, katamo ca attho?
an10.116:9.2	Micchādiṭṭhi, bhikkhave, adhammo;
an10.116:9.3	sammādiṭṭhi dhammo;
an10.116:9.4	ye ca micchādiṭṭhipaccayā aneke pāpakā akusalā dhammā sambhavanti, ayaṁ anattho;
an10.116:9.5	sammādiṭṭhipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.116:10.1	Micchāsaṅkappo, bhikkhave, adhammo;
an10.116:10.2	sammāsaṅkappo dhammo …
an10.116:10.3	micchāvācā, bhikkhave, adhammo;
an10.116:10.4	sammāvācā dhammo …
an10.116:10.5	micchākammanto, bhikkhave, adhammo;
an10.116:10.6	sammākammanto dhammo …
an10.116:10.7	micchāājīvo, bhikkhave, adhammo;
an10.116:10.8	sammāājīvo dhammo …
an10.116:10.9	micchāvāyāmo, bhikkhave, adhammo;
an10.116:10.10	sammāvāyāmo dhammo …
an10.116:10.11	micchāsati, bhikkhave, adhammo;
an10.116:10.12	sammāsati dhammo …
an10.116:10.13	micchāsamādhi, bhikkhave adhammo;
an10.116:10.14	sammāsamādhi dhammo …
an10.116:10.15	micchāñāṇaṁ, bhikkhave, adhammo;
an10.116:10.16	sammāñāṇaṁ dhammo.
an10.116:11.1	Micchāvimutti, bhikkhave, adhammo;
an10.116:11.2	sammāvimutti dhammo;
an10.116:11.3	ye ca micchāvimuttipaccayā aneke pāpakā akusalā dhammā sambhavanti, ayaṁ anattho;
an10.116:11.4	sammāvimuttipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.116:12.1	‘Adhammo ca, bhikkhave, veditabbo dhammo ca;
an10.116:12.2	anattho ca veditabbo attho ca.
an10.116:12.3	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabban’ti,
an10.116:12.4	iti yaṁ taṁ vuttaṁ, idametaṁ paṭicca vuttan”ti.
an10.116:12.5	Catutthaṁ.
an10.117:0.1	Aṅguttara Nikāya 10.117
an10.117:0.2	12. Paccorohaṇivagga
an10.117:0.3	Saṅgāravasutta
an10.117:1.1	Atha kho saṅgāravo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an10.117:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho saṅgāravo brāhmaṇo bhagavantaṁ etadavoca:
an10.117:1.3	“kiṁ nu kho, bho gotama, orimaṁ tīraṁ, kiṁ pārimaṁ tīran”ti?
an10.117:1.4	“Micchādiṭṭhi kho, brāhmaṇa, orimaṁ tīraṁ, sammādiṭṭhi pārimaṁ tīraṁ;
an10.117:1.5	micchāsaṅkappo orimaṁ tīraṁ, sammāsaṅkappo pārimaṁ tīraṁ;
an10.117:1.6	micchāvācā orimaṁ tīraṁ, sammāvācā pārimaṁ tīraṁ;
an10.117:1.7	micchākammanto orimaṁ tīraṁ, sammākammanto pārimaṁ tīraṁ;
an10.117:1.8	micchāājīvo orimaṁ tīraṁ, sammāājīvo pārimaṁ tīraṁ;
an10.117:1.9	micchāvāyāmo orimaṁ tīraṁ, sammāvāyāmo pārimaṁ tīraṁ;
an10.117:1.10	micchāsati orimaṁ tīraṁ, sammāsati pārimaṁ tīraṁ;
an10.117:1.11	micchāsamādhi orimaṁ tīraṁ, sammāsamādhi pārimaṁ tīraṁ;
an10.117:1.12	micchāñāṇaṁ orimaṁ tīraṁ, sammāñāṇaṁ pārimaṁ tīraṁ;
an10.117:1.13	micchāvimutti orimaṁ tīraṁ, sammāvimutti pārimaṁ tīranti.
an10.117:1.14	Idaṁ kho, brāhmaṇa, orimaṁ tīraṁ, idaṁ pārimaṁ tīranti.
an10.117:2.1	Appakā te manussesu,
an10.117:2.2	ye janā pāragāmino;
an10.117:2.3	Athāyaṁ itarā pajā,
an10.117:2.4	tīramevānudhāvati.
an10.117:3.1	Ye ca kho sammadakkhāte,
an10.117:3.2	dhamme dhammānuvattino;
an10.117:3.3	Te janā pāramessanti,
an10.117:3.4	maccudheyyaṁ suduttaraṁ.
an10.117:4.1	Kaṇhaṁ dhammaṁ vippahāya,
an10.117:4.2	Sukkaṁ bhāvetha paṇḍito;
an10.117:4.3	Okā anokamāgamma,
an10.117:4.4	Viveke yattha dūramaṁ.
an10.117:5.1	Tatrābhiratimiccheyya,
an10.117:5.2	hitvā kāme akiñcano;
an10.117:5.3	Pariyodapeyya attānaṁ,
an10.117:5.4	cittaklesehi paṇḍito.
an10.117:6.1	Yesaṁ sambodhiyaṅgesu,
an10.117:6.2	sammā cittaṁ subhāvitaṁ;
an10.117:6.3	Ādānapaṭinissagge,
an10.117:6.4	anupādāya ye ratā;
an10.117:6.5	Khīṇāsavā jutimanto,
an10.117:6.6	te loke parinibbutā”ti.
an10.117:6.7	Pañcamaṁ.
an10.118:0.1	Aṅguttara Nikāya 10.118
an10.118:0.2	12. Paccorohaṇivagga
an10.118:0.3	Orimatīrasutta
an10.118:1.1	“Orimañca, bhikkhave, tīraṁ desessāmi pārimañca tīraṁ.
an10.118:1.2	Taṁ suṇātha, sādhukaṁ manasi karotha, bhāsissāmī”ti.
an10.118:1.3	“Evaṁ, bhante”ti kho te bhikkhū bhagavato paccassosuṁ.
an10.118:1.4	Bhagavā etadavoca:
an10.118:2.1	“Katamañca, bhikkhave, orimaṁ tīraṁ, katamañca pārimaṁ tīraṁ?
an10.118:2.2	Micchādiṭṭhi orimaṁ tīraṁ, sammādiṭṭhi pārimaṁ tīraṁ …pe…
an10.118:2.3	micchāvimutti orimaṁ tīraṁ, sammāvimutti pārimaṁ tīraṁ.
an10.118:2.4	Idaṁ kho, bhikkhave, orimaṁ tīraṁ, idaṁ pārimaṁ tīranti.
an10.118:3.1	Appakā te manussesu,
an10.118:3.2	ye janā pāragāmino;
an10.118:3.3	Athāyaṁ itarā pajā,
an10.118:3.4	tīramevānudhāvati.
an10.118:4.1	Ye ca kho sammadakkhāte,
an10.118:4.2	dhamme dhammānuvattino;
an10.118:4.3	Te janā pāramessanti,
an10.118:4.4	maccudheyyaṁ suduttaraṁ.
an10.118:5.1	Kaṇhaṁ dhammaṁ vippahāya,
an10.118:5.2	sukkaṁ bhāvetha paṇḍito;
an10.118:5.3	Okā anokamāgamma,
an10.118:5.4	viveke yattha dūramaṁ.
an10.118:6.1	Tatrābhiratimiccheyya,
an10.118:6.2	hitvā kāme akiñcano;
an10.118:6.3	Pariyodapeyya attānaṁ,
an10.118:6.4	cittaklesehi paṇḍito.
an10.118:7.1	Yesaṁ sambodhiyaṅgesu,
an10.118:7.2	sammā cittaṁ subhāvitaṁ;
an10.118:7.3	Ādānapaṭinissagge,
an10.118:7.4	anupādāya ye ratā;
an10.118:7.5	Khīṇāsavā jutimanto,
an10.118:7.6	te loke parinibbutā”ti.
an10.118:7.7	Chaṭṭhaṁ.
an10.119:0.1	Aṅguttara Nikāya 10.119
an10.119:0.2	12. Paccorohaṇivagga
an10.119:0.3	Paṭhamapaccorohaṇīsutta
an10.119:1.1	Tena kho pana samayena jāṇussoṇi brāhmaṇo tadahuposathe sīsaṁnhāto navaṁ khomayugaṁ nivattho allakusamuṭṭhiṁ ādāya bhagavato avidūre ekamantaṁ ṭhito hoti.
an10.119:2.1	Addasā kho bhagavā jāṇussoṇiṁ brāhmaṇaṁ tadahuposathe sīsaṁnhātaṁ navaṁ khomayugaṁ nivatthaṁ allakusamuṭṭhiṁ ādāya ekamantaṁ ṭhitaṁ.
an10.119:2.2	Disvāna jāṇussoṇiṁ brāhmaṇaṁ etadavoca:
an10.119:2.3	“kiṁ nu tvaṁ, brāhmaṇa, tadahuposathe sīsaṁnhāto navaṁ khomayugaṁ nivattho allakusamuṭṭhiṁ ādāya ekamantaṁ ṭhito?
an10.119:2.4	Kiṁ nvajja brāhmaṇakulassā”ti?
an10.119:2.5	“Paccorohaṇī, bho gotama, ajja brāhmaṇakulassā”ti.
an10.119:3.1	“Yathā kathaṁ pana, brāhmaṇa, brāhmaṇānaṁ paccorohaṇī hotī”ti?
an10.119:3.2	“Idha, bho gotama, brāhmaṇā tadahuposathe sīsaṁnhātā navaṁ khomayugaṁ nivatthā allena gomayena pathaviṁ opuñjitvā haritehi kusehi pattharitvā antarā ca velaṁ antarā ca agyāgāraṁ seyyaṁ kappenti.
an10.119:3.3	Te taṁ rattiṁ tikkhattuṁ paccuṭṭhāya pañjalikā aggiṁ namassanti:
an10.119:3.4	‘paccorohāma bhavantaṁ, paccorohāma bhavantan’ti.
an10.119:3.5	Bahukena ca sappitelanavanītena aggiṁ santappenti.
an10.119:3.6	Tassā ca rattiyā accayena paṇītena khādanīyena bhojanīyena brāhmaṇe santappenti.
an10.119:3.7	Evaṁ, bho gotama, brāhmaṇānaṁ paccorohaṇī hotī”ti.
an10.119:4.1	“Aññathā kho, brāhmaṇa, brāhmaṇānaṁ paccorohaṇī hoti, aññathā ca pana ariyassa vinaye paccorohaṇī hotī”ti.
an10.119:4.2	“Yathā kathaṁ pana, bho gotama, ariyassa vinaye paccorohaṇī hoti?
an10.119:4.3	Sādhu me bhavaṁ gotamo tathā dhammaṁ desetu yathā ariyassa vinaye paccorohaṇī hotī”ti.
an10.119:5.1	“Tena hi, brāhmaṇa, suṇāhi, sādhukaṁ manasi karohi; bhāsissāmī”ti.
an10.119:5.2	“Evaṁ, bho”ti kho jāṇussoṇi brāhmaṇo bhagavato paccassosi.
an10.119:5.3	Bhagavā etadavoca:
an10.119:6.1	“Idha, brāhmaṇa, ariyasāvako iti paṭisañcikkhati:
an10.119:6.2	‘micchādiṭṭhiyā kho pāpako vipāko
an10.119:6.3	diṭṭhe ceva dhamme abhisamparāyañcā’ti.
an10.119:6.4	So iti paṭisaṅkhāya micchādiṭṭhiṁ pajahati;
an10.119:6.5	micchādiṭṭhiyā paccorohati.
an10.119:7.1	… ‘Micchāsaṅkappassa kho pāpako vipāko—
an10.119:7.2	diṭṭhe ceva dhamme abhisamparāyañcā’ti.
an10.119:7.3	So iti paṭisaṅkhāya micchāsaṅkappaṁ pajahati;
an10.119:7.4	micchāsaṅkappā paccorohati.
an10.119:8.1	… ‘Micchāvācāya kho pāpako vipāko—
an10.119:8.2	diṭṭhe ceva dhamme abhisamparāyañcā’ti.
an10.119:8.3	So iti paṭisaṅkhāya micchāvācaṁ pajahati;
an10.119:8.4	micchāvācāya paccorohati.
an10.119:9.1	… ‘Micchākammantassa kho pāpako vipāko—
an10.119:9.2	diṭṭhe ceva dhamme abhisamparāyañcā’ti.
an10.119:9.3	So iti paṭisaṅkhāya micchākammantaṁ pajahati;
an10.119:9.4	micchākammantā paccorohati.
an10.119:10.1	… ‘Micchāājīvassa kho pāpako vipāko—
an10.119:10.2	diṭṭhe ceva dhamme abhisamparāyañcā’ti.
an10.119:10.3	So iti paṭisaṅkhāya micchāājīvaṁ pajahati;
an10.119:10.4	micchāājīvā paccorohati.
an10.119:11.1	… ‘Micchāvāyāmassa kho pāpako vipāko—
an10.119:11.2	diṭṭhe ceva dhamme abhisamparāyañcā’ti.
an10.119:11.3	So iti paṭisaṅkhāya micchāvāyāmaṁ pajahati;
an10.119:11.4	micchāvāyāmā paccorohati.
an10.119:12.1	… ‘Micchāsatiyā kho pāpako vipāko—
an10.119:12.2	diṭṭhe ceva dhamme abhisamparāyañcā’ti.
an10.119:12.3	So iti paṭisaṅkhāya micchāsatiṁ pajahati;
an10.119:12.4	micchāsatiyā paccorohati.
an10.119:13.1	… ‘Micchāsamādhissa kho pāpako vipāko—
an10.119:13.2	diṭṭhe ceva dhamme abhisamparāyañcā’ti.
an10.119:13.3	So iti paṭisaṅkhāya micchāsamādhiṁ pajahati;
an10.119:13.4	micchāsamādhimhā paccorohati.
an10.119:14.1	… ‘Micchāñāṇassa kho pāpako vipāko—
an10.119:14.2	diṭṭhe ceva dhamme abhisamparāyañcā’ti.
an10.119:14.3	So iti paṭisaṅkhāya micchāñāṇaṁ pajahati;
an10.119:14.4	micchāñāṇamhā paccorohati.
an10.119:15.1	… ‘Micchāvimuttiyā kho pāpako vipāko—
an10.119:15.2	diṭṭhe ceva dhamme abhisamparāyañcā’ti.
an10.119:15.3	So iti paṭisaṅkhāya micchāvimuttiṁ pajahati;
an10.119:15.4	micchāvimuttiyā paccorohati.
an10.119:15.5	Evaṁ kho, brāhmaṇa, ariyassa vinaye paccorohaṇī hotī”ti.
an10.119:16.1	“Aññathā, bho gotama, brāhmaṇānaṁ paccorohaṇī, aññathā ca pana ariyassa vinaye paccorohaṇī hoti.
an10.119:16.2	Imissā ca, bho gotama, ariyassa vinaye paccorohaṇiyā brāhmaṇānaṁ paccorohaṇī kalaṁ nāgghati soḷasiṁ.
an10.119:16.3	Abhikkantaṁ, bho gotama …pe…
an10.119:16.4	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an10.119:16.5	Sattamaṁ.
an10.120:0.1	Aṅguttara Nikāya 10.120
an10.120:0.2	12. Paccorohaṇivagga
an10.120:0.3	Dutiyapaccorohaṇīsutta
an10.120:1.1	“Ariyaṁ vo, bhikkhave, paccorohaṇiṁ desessāmi.
an10.120:1.2	Taṁ suṇātha …
an10.120:1.3	katamā ca, bhikkhave, ariyā paccorohaṇī?
an10.120:1.4	Idha, bhikkhave, ariyasāvako iti paṭisañcikkhati:
an10.120:1.5	‘micchādiṭṭhiyā kho pāpako vipāko—
an10.120:1.6	diṭṭhe ceva dhamme abhisamparāyañcā’ti.
an10.120:1.7	So iti paṭisaṅkhāya micchādiṭṭhiṁ pajahati;
an10.120:1.8	micchādiṭṭhiyā paccorohati.
an10.120:1.9	Micchāsaṅkappassa kho pāpako vipāko …
an10.120:1.10	micchāvācāya kho …
an10.120:1.11	micchākammantassa kho …
an10.120:1.12	micchāājīvassa kho …
an10.120:1.13	micchāvāyāmassa kho …
an10.120:1.14	micchāsatiyā kho …
an10.120:1.15	micchāsamādhissa kho …
an10.120:1.16	micchāñāṇassa kho …
an10.120:1.17	micchāvimuttiyā kho pāpako vipāko—
an10.120:1.18	diṭṭhe ceva dhamme abhisamparāyañcāti.
an10.120:1.19	So iti paṭisaṅkhāya micchāvimuttiṁ pajahati;
an10.120:1.20	micchāvimuttiyā paccorohati.
an10.120:1.21	Ayaṁ vuccati, bhikkhave, ariyā paccorohaṇī”ti.
an10.120:1.22	Aṭṭhamaṁ.
an10.121:0.1	Aṅguttara Nikāya 10.121
an10.121:0.2	12. Paccorohaṇivagga
an10.121:0.3	Pubbaṅgamasutta
an10.121:1.1	“Sūriyassa, bhikkhave, udayato etaṁ pubbaṅgamaṁ etaṁ pubbanimittaṁ, yadidaṁ—aruṇuggaṁ.
an10.121:1.2	Evamevaṁ kho, bhikkhave, kusalānaṁ dhammānaṁ etaṁ pubbaṅgamaṁ etaṁ pubbanimittaṁ, yadidaṁ—sammādiṭṭhi.
an10.121:1.3	Sammādiṭṭhikassa, bhikkhave, sammāsaṅkappo pahoti, sammāsaṅkappassa sammāvācā pahoti, sammāvācassa sammākammanto pahoti, sammākammantassa sammāājīvo pahoti, sammāājīvassa sammāvāyāmo pahoti, sammāvāyāmassa sammāsati pahoti, sammāsatissa sammāsamādhi pahoti, sammāsamādhissa sammāñāṇaṁ pahoti, sammāñāṇissa sammāvimutti pahotī”ti.
an10.121:1.4	Navamaṁ.
an10.122:0.1	Aṅguttara Nikāya 10.122
an10.122:0.2	12. Paccorohaṇivagga
an10.122:0.3	Āsavakkhayasutta
an10.122:1.1	“Dasayime, bhikkhave, dhammā bhāvitā bahulīkatā āsavānaṁ khayāya saṁvattanti.
an10.122:1.2	Katame dasa?
an10.122:1.3	Sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi, sammāñāṇaṁ, sammāvimutti—
an10.122:1.4	ime kho, bhikkhave, dasa dhammā bhāvitā bahulīkatā āsavānaṁ khayāya saṁvattantī”ti.
an10.122:1.5	Dasamaṁ.
an10.122:1.6	Paccorohaṇivaggo dutiyo.
an10.122:2.0	Tassuddānaṁ
an10.122:2.1	Tayo adhammā ajito,
an10.122:2.2	Saṅgāravo ca orimaṁ;
an10.122:2.3	Dve ceva paccorohaṇī,
an10.122:2.4	Pubbaṅgamaṁ āsavakkhayoti.
an10.123:0.1	Aṅguttara Nikāya 10.123
an10.123:0.2	13. Parisuddhavagga
an10.123:0.3	Paṭhamasutta
an10.123:1.1	“Dasayime, bhikkhave, dhammā parisuddhā pariyodātā, nāññatra sugatavinayā.
an10.123:1.2	Katame dasa?
an10.123:1.3	Sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi, sammāñāṇaṁ, sammāvimutti—
an10.123:1.4	ime kho, bhikkhave, dasa dhammā parisuddhā pariyodātā, nāññatra sugatavinayā”ti.
an10.123:1.5	Paṭhamaṁ.
an10.124:0.1	Aṅguttara Nikāya 10.124
an10.124:0.2	13. Parisuddhavagga
an10.124:0.3	Dutiyasutta
an10.124:1.1	“Dasayime, bhikkhave, dhammā anuppannā uppajjanti, nāññatra sugatavinayā.
an10.124:1.2	Katame dasa?
an10.124:1.3	Sammādiṭṭhi …pe… sammāvimutti—
an10.124:1.4	ime kho, bhikkhave, dasa dhammā anuppannā uppajjanti, nāññatra sugatavinayā”ti.
an10.124:1.5	Dutiyaṁ.
an10.125:0.1	Aṅguttara Nikāya 10.125
an10.125:0.2	13. Parisuddhavagga
an10.125:0.3	Tatiyasutta
an10.125:1.1	“Dasayime, bhikkhave, dhammā mahapphalā mahānisaṁsā, nāññatra sugatavinayā.
an10.125:1.2	Katame dasa?
an10.125:1.3	Sammādiṭṭhi …pe… sammāvimutti—
an10.125:1.4	ime kho, bhikkhave, dasa dhammā mahapphalā mahānisaṁsā, nāññatra sugatavinayā”ti.
an10.125:1.5	Tatiyaṁ.
an10.126:0.1	Aṅguttara Nikāya 10.126
an10.126:0.2	13. Parisuddhavagga
an10.126:0.3	Catutthasutta
an10.126:1.1	“Dasayime, bhikkhave, dhammā rāgavinayapariyosānā honti dosavinayapariyosānā honti mohavinayapariyosānā honti, nāññatra sugatavinayā.
an10.126:1.2	Katame dasa?
an10.126:1.3	Sammādiṭṭhi …pe… sammāvimutti—
an10.126:1.4	ime kho, bhikkhave, dasa dhammā rāgavinayapariyosānā honti dosavinayapariyosānā honti mohavinayapariyosānā honti, nāññatra sugatavinayā”ti.
an10.126:1.5	Catutthaṁ.
an10.127:0.1	Aṅguttara Nikāya 10.127
an10.127:0.2	13. Parisuddhavagga
an10.127:0.3	Pañcamasutta
an10.127:1.1	“Dasayime, bhikkhave, dhammā ekantanibbidāya virāgāya nirodhāya upasamāya abhiññāya sambodhāya nibbānāya saṁvattanti, nāññatra sugatavinayā.
an10.127:1.2	Katame dasa?
an10.127:1.3	Sammādiṭṭhi …pe… sammāvimutti—
an10.127:1.4	ime kho, bhikkhave, dasa dhammā ekantanibbidāya virāgāya nirodhāya upasamāya abhiññāya sambodhāya nibbānāya saṁvattanti, nāññatra sugatavinayā”ti.
an10.127:1.5	Pañcamaṁ.
an10.128:0.1	Aṅguttara Nikāya 10.128
an10.128:0.2	13. Parisuddhavagga
an10.128:0.3	Chaṭṭhasutta
an10.128:1.1	“Dasayime, bhikkhave, dhammā bhāvitā bahulīkatā anuppannā uppajjanti, nāññatra sugatavinayā.
an10.128:1.2	Katame dasa?
an10.128:1.3	Sammādiṭṭhi …pe… sammāvimutti—
an10.128:1.4	ime kho, bhikkhave, dasa dhammā bhāvitā bahulīkatā anuppannā uppajjanti, nāññatra sugatavinayā”ti.
an10.128:1.5	Chaṭṭhaṁ.
an10.129:0.1	Aṅguttara Nikāya 10.129
an10.129:0.2	13. Parisuddhavagga
an10.129:0.3	Sattamasutta
an10.129:1.1	“Dasayime, bhikkhave, dhammā bhāvitā bahulīkatā mahapphalā honti mahānisaṁsā, nāññatra sugatavinayā.
an10.129:1.2	Katame dasa?
an10.129:1.3	Sammādiṭṭhi …pe… sammāvimutti—
an10.129:1.4	ime kho, bhikkhave, dasa dhammā bhāvitā bahulīkatā mahapphalā honti mahānisaṁsā, nāññatra sugatavinayā”ti.
an10.129:1.5	Sattamaṁ.
an10.130:0.1	Aṅguttara Nikāya 10.130
an10.130:0.2	13. Parisuddhavagga
an10.130:0.3	Aṭṭhamasutta
an10.130:1.1	“Dasayime, bhikkhave, dhammā bhāvitā bahulīkatā rāgavinayapariyosānā honti dosavinayapariyosānā honti mohavinayapariyosānā honti, nāññatra sugatavinayā.
an10.130:1.2	Katame dasa?
an10.130:1.3	Sammādiṭṭhi …pe… sammāvimutti—
an10.130:1.4	ime kho, bhikkhave, dasa dhammā bhāvitā bahulīkatā rāgavinayapariyosānā honti dosavinayapariyosānā honti mohavinayapariyosānā honti, nāññatra sugatavinayā”ti.
an10.130:1.5	Aṭṭhamaṁ.
an10.131:0.1	Aṅguttara Nikāya 10.131
an10.131:0.2	13. Parisuddhavagga
an10.131:0.3	Navamasutta
an10.131:1.1	“Dasayime, bhikkhave, dhammā bhāvitā bahulīkatā ekantanibbidāya virāgāya nirodhāya upasamāya abhiññāya sambodhāya nibbānāya saṁvattanti, nāññatra sugatavinayā.
an10.131:1.2	Katame dasa?
an10.131:1.3	Sammādiṭṭhi …pe… sammāvimutti—
an10.131:1.4	ime kho, bhikkhave, dasa dhammā bhāvitā bahulīkatā ekantanibbidāya virāgāya nirodhāya upasamāya abhiññāya sambodhāya nibbānāya saṁvattanti, nāññatra sugatavinayā”ti.
an10.131:1.5	Navamaṁ.
an10.132:0.1	Aṅguttara Nikāya 10.132
an10.132:0.2	13. Parisuddhavagga
an10.132:0.3	Dasamasutta
an10.132:1.1	“Dasayime, bhikkhave, micchattā.
an10.132:1.2	Katame dasa?
an10.132:1.3	Micchādiṭṭhi, micchāsaṅkappo, micchāvācā, micchākammanto, micchāājīvo, micchāvāyāmo, micchāsati, micchāsamādhi, micchāñāṇaṁ, micchāvimutti—
an10.132:1.4	ime kho, bhikkhave, dasa micchattā”ti.
an10.132:1.5	Dasamaṁ.
an10.133:0.1	Aṅguttara Nikāya 10.133
an10.133:0.2	13. Parisuddhavagga
an10.133:0.3	Ekādasamasutta
an10.133:1.1	“Dasayime, bhikkhave, sammattā.
an10.133:1.2	Katame dasa?
an10.133:1.3	Sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi, sammāñāṇaṁ, sammāvimutti—
an10.133:1.4	ime kho, bhikkhave, dasa sammattā”ti.
an10.133:1.5	Ekādasamaṁ.
an10.133:1.6	Parisuddhavaggo tatiyo.
an10.134:0.1	Aṅguttara Nikāya 10.134
an10.134:0.2	14. Sādhuvagga
an10.134:0.3	Sādhusutta
an10.134:1.1	“Sādhuñca vo, bhikkhave, desessāmi asādhuñca.
an10.134:1.2	Taṁ suṇātha, sādhukaṁ manasi karotha, bhāsissāmī”ti.
an10.134:1.3	“Evaṁ, bhante”ti kho te bhikkhū bhagavato paccassosuṁ.
an10.134:1.4	Bhagavā etadavoca:
an10.134:2.1	“Katamañca, bhikkhave, asādhu?
an10.134:2.2	Micchādiṭṭhi, micchāsaṅkappo, micchāvācā, micchākammanto, micchāājīvo, micchāvāyāmo, micchāsati, micchāsamādhi, micchāñāṇaṁ, micchāvimutti—
an10.134:2.3	idaṁ vuccati, bhikkhave, asādhu.
an10.134:2.4	Katamañca, bhikkhave, sādhu?
an10.134:2.5	Sammādiṭṭhi, sammāsaṅkappo, sammāvācā sammākammanto, sammāājīvo, sammāvāyāmo, sammāsati, sammāsamādhi, sammāñāṇaṁ, sammāvimutti—
an10.134:2.6	idaṁ vuccati, bhikkhave, sādhū”ti.
an10.134:2.7	Paṭhamaṁ.
an10.135:0.1	Aṅguttara Nikāya 10.135
an10.135:0.2	14. Sādhuvagga
an10.135:0.3	Ariyadhammasutta
an10.135:1.1	“Ariyadhammañca vo, bhikkhave, desessāmi anariyadhammañca.
an10.135:1.2	Taṁ suṇātha …pe…
an10.135:1.3	katamo ca, bhikkhave, anariyo dhammo?
an10.135:1.4	Micchādiṭṭhi …pe… micchāvimutti—
an10.135:1.5	ayaṁ vuccati, bhikkhave, anariyo dhammo.
an10.135:1.6	Katamo ca, bhikkhave, ariyo dhammo?
an10.135:1.7	Sammādiṭṭhi …pe… sammāvimutti—
an10.135:1.8	ayaṁ vuccati, bhikkhave, ariyo dhammo”ti.
an10.135:1.9	Dutiyaṁ.
an10.136:0.1	Aṅguttara Nikāya 10.136
an10.136:0.2	14. Sādhuvagga
an10.136:0.3	Akusalasutta
an10.136:1.1	“Akusalañca vo, bhikkhave, desessāmi kusalañca.
an10.136:1.2	Taṁ suṇātha …pe…
an10.136:1.3	katamañca, bhikkhave, akusalaṁ?
an10.136:1.4	Micchādiṭṭhi …pe… micchāvimutti—
an10.136:1.5	idaṁ vuccati, bhikkhave, akusalaṁ.
an10.136:1.6	Katamañca, bhikkhave, kusalaṁ?
an10.136:1.7	Sammādiṭṭhi …pe… sammāvimutti—
an10.136:1.8	idaṁ vuccati, bhikkhave, kusalan”ti.
an10.136:1.9	Tatiyaṁ.
an10.137:0.1	Aṅguttara Nikāya 10.137
an10.137:0.2	14. Sādhuvagga
an10.137:0.3	Atthasutta
an10.137:1.1	“Atthañca vo, bhikkhave, desessāmi anatthañca.
an10.137:1.2	Taṁ suṇātha …pe…
an10.137:1.3	katamo ca, bhikkhave, anattho?
an10.137:1.4	Micchādiṭṭhi …pe… micchāvimutti—
an10.137:1.5	ayaṁ vuccati, bhikkhave, anattho.
an10.137:1.6	Katamo ca, bhikkhave, attho?
an10.137:1.7	Sammādiṭṭhi …pe… sammāvimutti—
an10.137:1.8	ayaṁ vuccati, bhikkhave, attho”ti.
an10.137:1.9	Catutthaṁ.
an10.138:0.1	Aṅguttara Nikāya 10.138
an10.138:0.2	14. Sādhuvagga
an10.138:0.3	Dhammasutta
an10.138:1.1	“Dhammañca vo, bhikkhave, desessāmi adhammañca.
an10.138:1.2	Taṁ suṇātha …pe…
an10.138:1.3	katamo ca, bhikkhave, adhammo?
an10.138:1.4	Micchādiṭṭhi …pe… micchāvimutti—
an10.138:1.5	ayaṁ vuccati, bhikkhave, adhammo.
an10.138:1.6	Katamo ca, bhikkhave, dhammo?
an10.138:1.7	Sammādiṭṭhi …pe… sammāvimutti—
an10.138:1.8	ayaṁ vuccati, bhikkhave, dhammo”ti.
an10.138:1.9	Pañcamaṁ.
an10.139:0.1	Aṅguttara Nikāya 10.139
an10.139:0.2	14. Sādhuvagga
an10.139:0.3	Sāsavasutta
an10.139:1.1	“Sāsavañca vo, bhikkhave, dhammaṁ desessāmi anāsavañca.
an10.139:1.2	Taṁ suṇātha …pe…
an10.139:1.3	katamo ca, bhikkhave, sāsavo dhammo?
an10.139:1.4	Micchādiṭṭhi …pe… micchāvimutti—
an10.139:1.5	ayaṁ vuccati, bhikkhave, sāsavo dhammo.
an10.139:1.6	Katamo ca, bhikkhave, anāsavo dhammo?
an10.139:1.7	Sammādiṭṭhi …pe… sammāvimutti—
an10.139:1.8	ayaṁ vuccati, bhikkhave, anāsavo dhammo”ti.
an10.139:1.9	Chaṭṭhaṁ.
an10.140:0.1	Aṅguttara Nikāya 10.140
an10.140:0.2	14. Sādhuvagga
an10.140:0.3	Sāvajjasutta
an10.140:1.1	“Sāvajjañca vo, bhikkhave, dhammaṁ desessāmi anavajjañca.
an10.140:1.2	Taṁ suṇātha …pe…
an10.140:1.3	katamo ca, bhikkhave, sāvajjo dhammo?
an10.140:1.4	Micchādiṭṭhi …pe… micchāvimutti—
an10.140:1.5	ayaṁ vuccati, bhikkhave, sāvajjo dhammo.
an10.140:1.6	Katamo ca, bhikkhave, anavajjo dhammo?
an10.140:1.7	Sammādiṭṭhi …pe… sammāvimutti—
an10.140:1.8	ayaṁ vuccati, bhikkhave, anavajjo dhammo”ti.
an10.140:1.9	Sattamaṁ.
an10.141:0.1	Aṅguttara Nikāya 10.141
an10.141:0.2	14. Sādhuvagga
an10.141:0.3	Tapanīyasutta
an10.141:1.1	“Tapanīyañca vo, bhikkhave, dhammaṁ desessāmi atapanīyañca.
an10.141:1.2	Taṁ suṇātha …pe…
an10.141:1.3	katamo ca, bhikkhave, tapanīyo dhammo?
an10.141:1.4	Micchādiṭṭhi …pe… micchāvimutti—
an10.141:1.5	ayaṁ vuccati, bhikkhave, tapanīyo dhammo.
an10.141:1.6	Katamo ca, bhikkhave, atapanīyo dhammo?
an10.141:1.7	Sammādiṭṭhi …pe… sammāvimutti—
an10.141:1.8	ayaṁ vuccati, bhikkhave, atapanīyo dhammo”ti.
an10.141:1.9	Aṭṭhamaṁ.
an10.142:0.1	Aṅguttara Nikāya 10.142
an10.142:0.2	14. Sādhuvagga
an10.142:0.3	Ācayagāmisutta
an10.142:1.1	“Ācayagāmiñca vo, bhikkhave, dhammaṁ desessāmi apacayagāmiñca.
an10.142:1.2	Taṁ suṇātha …pe…
an10.142:1.3	katamo ca, bhikkhave, ācayagāmī dhammo?
an10.142:1.4	Micchādiṭṭhi …pe… micchāvimutti—
an10.142:1.5	ayaṁ vuccati, bhikkhave, ācayagāmī dhammo.
an10.142:1.6	Katamo ca, bhikkhave, apacayagāmī dhammo?
an10.142:1.7	Sammādiṭṭhi …pe… sammāvimutti—
an10.142:1.8	ayaṁ vuccati, bhikkhave, apacayagāmī dhammo”ti.
an10.142:1.9	Navamaṁ.
an10.143:0.1	Aṅguttara Nikāya 10.143
an10.143:0.2	14. Sādhuvagga
an10.143:0.3	Dukkhudrayasutta
an10.143:1.1	“Dukkhudrayañca vo, bhikkhave, dhammaṁ desessāmi sukhudrayañca.
an10.143:1.2	Taṁ suṇātha …pe…
an10.143:1.3	katamo ca, bhikkhave, dukkhudrayo dhammo?
an10.143:1.4	Micchādiṭṭhi …pe… micchāvimutti—
an10.143:1.5	ayaṁ vuccati, bhikkhave, dukkhudrayo dhammo.
an10.143:1.6	Katamo ca, bhikkhave, sukhudrayo dhammo?
an10.143:1.7	Sammādiṭṭhi …pe… sammāvimutti—
an10.143:1.8	ayaṁ vuccati, bhikkhave, sukhudrayo dhammo”ti.
an10.143:1.9	Dasamaṁ.
an10.144:0.1	Aṅguttara Nikāya 10.144
an10.144:0.2	14. Sādhuvagga
an10.144:0.3	Dukkhavipākasutta
an10.144:1.1	“Dukkhavipākañca vo, bhikkhave, dhammaṁ desessāmi sukhavipākañca.
an10.144:1.2	Taṁ suṇātha …pe…
an10.144:1.3	katamo ca, bhikkhave, dukkhavipāko dhammo?
an10.144:1.4	Micchādiṭṭhi …pe… micchāvimutti—
an10.144:1.5	ayaṁ vuccati, bhikkhave, dukkhavipāko dhammo.
an10.144:1.6	Katamo ca, bhikkhave, sukhavipāko dhammo?
an10.144:1.7	Sammādiṭṭhi …pe… sammāvimutti—
an10.144:1.8	ayaṁ vuccati, bhikkhave, sukhavipāko dhammo”ti.
an10.144:1.9	Ekādasamaṁ.
an10.144:1.10	Sādhuvaggo catuttho.
an10.145:0.1	Aṅguttara Nikāya 10.145
an10.145:0.2	15. Ariyavagga
an10.145:0.3	Ariyamaggasutta
an10.145:1.1	“Ariyamaggañca vo, bhikkhave, dhammaṁ desessāmi anariyamaggañca.
an10.145:1.2	Taṁ suṇātha …pe…
an10.145:1.3	katamo ca, bhikkhave, anariyo maggo?
an10.145:1.4	Micchādiṭṭhi …pe… micchāvimutti—
an10.145:1.5	ayaṁ vuccati, bhikkhave, anariyo maggo.
an10.145:1.6	Katamo ca, bhikkhave, ariyo maggo?
an10.145:1.7	Sammādiṭṭhi …pe… sammāvimutti—
an10.145:1.8	ayaṁ vuccati, bhikkhave, ariyo maggo”ti.
an10.145:1.9	Paṭhamaṁ.
an10.146:0.1	Aṅguttara Nikāya 10.146
an10.146:0.2	15. Ariyavagga
an10.146:0.3	Kaṇhamaggasutta
an10.146:1.1	“Kaṇhamaggañca vo, bhikkhave, dhammaṁ desessāmi sukkamaggañca.
an10.146:1.2	Taṁ suṇātha …pe…
an10.146:1.3	katamo ca, bhikkhave, kaṇhamaggo?
an10.146:1.4	Micchādiṭṭhi …pe… micchāvimutti—
an10.146:1.5	ayaṁ vuccati, bhikkhave, kaṇhamaggo.
an10.146:1.6	Katamo ca, bhikkhave, sukkamaggo?
an10.146:1.7	Sammādiṭṭhi …pe… sammāvimutti—
an10.146:1.8	ayaṁ vuccati, bhikkhave, sukkamaggo”ti.
an10.146:1.9	Dutiyaṁ.
an10.147:0.1	Aṅguttara Nikāya 10.147
an10.147:0.2	15. Ariyavagga
an10.147:0.3	Saddhammasutta
an10.147:1.1	“Saddhammañca vo, bhikkhave, dhammaṁ desessāmi asaddhammañca.
an10.147:1.2	Taṁ suṇātha …pe…
an10.147:1.3	katamo ca, bhikkhave, asaddhammo?
an10.147:1.4	Micchādiṭṭhi …pe… micchāvimutti—
an10.147:1.5	ayaṁ vuccati, bhikkhave, asaddhammo.
an10.147:1.6	Katamo ca, bhikkhave, saddhammo?
an10.147:1.7	Sammādiṭṭhi …pe… sammāvimutti—
an10.147:1.8	ayaṁ vuccati, bhikkhave, saddhammo”ti.
an10.147:1.9	Tatiyaṁ.
an10.148:0.1	Aṅguttara Nikāya 10.148
an10.148:0.2	15. Ariyavagga
an10.148:0.3	Sappurisadhammasutta
an10.148:1.1	“Sappurisadhammañca vo, bhikkhave, desessāmi asappurisadhammañca.
an10.148:1.2	Taṁ suṇātha …pe…
an10.148:1.3	katamo ca, bhikkhave, asappurisadhammo?
an10.148:1.4	Micchādiṭṭhi …pe… micchāvimutti—
an10.148:1.5	ayaṁ vuccati, bhikkhave, asappurisadhammo.
an10.148:1.6	Katamo ca, bhikkhave, sappurisadhammo?
an10.148:1.7	Sammādiṭṭhi …pe… sammāvimutti—
an10.148:1.8	ayaṁ vuccati, bhikkhave, sappurisadhammo”ti.
an10.148:1.9	Catutthaṁ.
an10.149:0.1	Aṅguttara Nikāya 10.149
an10.149:0.2	15. Ariyavagga
an10.149:0.3	Uppādetabbasutta
an10.149:1.1	“Uppādetabbañca vo, bhikkhave, dhammaṁ desessāmi na uppādetabbañca.
an10.149:1.2	Taṁ suṇātha …pe…
an10.149:1.3	katamo ca, bhikkhave, na uppādetabbo dhammo?
an10.149:1.4	Micchādiṭṭhi …pe… micchāvimutti—
an10.149:1.5	ayaṁ vuccati, bhikkhave, na uppādetabbo dhammo.
an10.149:1.6	Katamo ca, bhikkhave, uppādetabbo dhammo?
an10.149:1.7	Sammādiṭṭhi …pe… sammāvimutti—
an10.149:1.8	ayaṁ vuccati, bhikkhave, uppādetabbo dhammo”ti.
an10.149:1.9	Pañcamaṁ.
an10.150:0.1	Aṅguttara Nikāya 10.150
an10.150:0.2	15. Ariyavagga
an10.150:0.3	Āsevitabbasutta
an10.150:1.1	“Āsevitabbañca vo, bhikkhave, dhammaṁ desessāmi na āsevitabbañca.
an10.150:1.2	Taṁ suṇātha …pe…
an10.150:1.3	katamo ca, bhikkhave, na āsevitabbo dhammo?
an10.150:1.4	Micchādiṭṭhi …pe… micchāvimutti—
an10.150:1.5	ayaṁ vuccati, bhikkhave, na āsevitabbo dhammo.
an10.150:1.6	Katamo ca, bhikkhave, āsevitabbo dhammo?
an10.150:1.7	Sammādiṭṭhi …pe… sammāvimutti—
an10.150:1.8	ayaṁ vuccati, bhikkhave, āsevitabbo dhammo”ti.
an10.150:1.9	Chaṭṭhaṁ.
an10.151:0.1	Aṅguttara Nikāya 10.151
an10.151:0.2	15. Ariyavagga
an10.151:0.3	Bhāvetabbasutta
an10.151:1.1	“Bhāvetabbañca vo, bhikkhave, dhammaṁ desessāmi na bhāvetabbañca.
an10.151:1.2	Taṁ suṇātha …pe…
an10.151:1.3	katamo ca, bhikkhave, na bhāvetabbo dhammo?
an10.151:1.4	Micchādiṭṭhi …pe… micchāvimutti—
an10.151:1.5	ayaṁ vuccati, bhikkhave, na bhāvetabbo dhammo.
an10.151:1.6	Katamo ca, bhikkhave, bhāvetabbo dhammo?
an10.151:1.7	Sammādiṭṭhi …pe… sammāvimutti—
an10.151:1.8	ayaṁ vuccati, bhikkhave, bhāvetabbo dhammo”ti.
an10.151:1.9	Sattamaṁ.
an10.152:0.1	Aṅguttara Nikāya 10.152
an10.152:0.2	15. Ariyavagga
an10.152:0.3	Bahulīkātabbasutta
an10.152:1.1	“Bahulīkātabbañca vo, bhikkhave, dhammaṁ desessāmi na bahulīkātabbañca.
an10.152:1.2	Taṁ suṇātha …pe…
an10.152:1.3	katamo ca, bhikkhave, na bahulīkātabbo dhammo?
an10.152:1.4	Micchādiṭṭhi …pe… micchāvimutti—
an10.152:1.5	ayaṁ vuccati, bhikkhave, na bahulīkātabbo dhammo.
an10.152:1.6	Katamo ca, bhikkhave, bahulīkātabbo dhammo?
an10.152:1.7	Sammādiṭṭhi …pe… sammāvimutti—
an10.152:1.8	ayaṁ vuccati, bhikkhave, bahulīkātabbo dhammo”ti.
an10.152:1.9	Aṭṭhamaṁ.
an10.153:0.1	Aṅguttara Nikāya 10.153
an10.153:0.2	15. Ariyavagga
an10.153:0.3	Anussaritabbasutta
an10.153:1.1	“Anussaritabbañca vo, bhikkhave, dhammaṁ desessāmi na anussaritabbañca.
an10.153:1.2	Taṁ suṇātha …pe…
an10.153:1.3	katamo ca, bhikkhave, na anussaritabbo dhammo?
an10.153:1.4	Micchādiṭṭhi …pe… micchāvimutti—
an10.153:1.5	ayaṁ vuccati, bhikkhave, na anussaritabbo dhammo.
an10.153:1.6	Katamo ca, bhikkhave, anussaritabbo dhammo?
an10.153:1.7	Sammādiṭṭhi …pe… sammāvimutti—
an10.153:1.8	ayaṁ vuccati, bhikkhave, anussaritabbo dhammo”ti.
an10.153:1.9	Navamaṁ.
an10.154:0.1	Aṅguttara Nikāya 10.154
an10.154:0.2	15. Ariyavagga
an10.154:0.3	Sacchikātabbasutta
an10.154:1.1	“Sacchikātabbañca vo, bhikkhave, dhammaṁ desessāmi na sacchikātabbañca.
an10.154:1.2	Taṁ suṇātha …pe…
an10.154:1.3	katamo ca, bhikkhave, na sacchikātabbo dhammo?
an10.154:1.4	Micchādiṭṭhi …pe… micchāvimutti—
an10.154:1.5	ayaṁ vuccati, bhikkhave, na sacchikātabbo dhammo.
an10.154:1.6	Katamo ca, bhikkhave, sacchikātabbo dhammo?
an10.154:1.7	Sammādiṭṭhi …pe… sammāvimutti—
an10.154:1.8	ayaṁ vuccati, bhikkhave, sacchikātabbo dhammo”ti.
an10.154:1.9	Dasamaṁ.
an10.154:1.10	Ariyavaggo pañcamo.
an10.154:1.11	Tatiyo paṇṇāsako samatto.
an10.155:0.1	Aṅguttara Nikāya 10.155
an10.155:0.2	16. Puggalavagga
an10.155:0.3	Sevitabbasutta
an10.155:1.1	“Dasahi, bhikkhave, dhammehi samannāgato puggalo na sevitabbo.
an10.155:1.2	Katamehi dasahi?
an10.155:1.3	Micchādiṭṭhiko hoti, micchāsaṅkappo hoti, micchāvāco hoti, micchākammanto hoti, micchāājīvo hoti, micchāvāyāmo hoti, micchāsati hoti, micchāsamādhi hoti, micchāñāṇī hoti, micchāvimutti hoti—
an10.155:1.4	imehi kho, bhikkhave, dasahi dhammehi samannāgato puggalo na sevitabbo.
an10.155:2.1	Dasahi, bhikkhave, dhammehi samannāgato puggalo sevitabbo.
an10.155:2.2	Katamehi dasahi?
an10.155:2.3	Sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti, sammāñāṇī hoti, sammāvimutti hoti—
an10.155:2.4	imehi kho, bhikkhave, dasahi dhammehi samannāgato puggalo sevitabbo”ti.
an10.156-166:0.1	Aṅguttara Nikāya 10.156–166
an10.156-166:0.2	16. Puggalavagga
an10.156-166:0.3	Bhajitabbādisutta
an10.156-166:1.1	“Dasahi, bhikkhave, dhammehi samannāgato puggalo na bhajitabbo …pe…
an10.156-166:1.2	bhajitabbo …pe…
an10.156-166:1.3	na payirupāsitabbo …
an10.156-166:1.4	payirupāsitabbo …pe…
an10.156-166:1.5	na pujjo hoti …
an10.156-166:1.6	pujjo hoti …pe…
an10.156-166:1.7	na pāsaṁso hoti …
an10.156-166:1.8	pāsaṁso hoti …pe…
an10.156-166:1.9	agāravo hoti …
an10.156-166:1.10	sagāravo hoti …pe…
an10.156-166:1.11	appatisso hoti …
an10.156-166:1.12	sappatisso hoti …pe…
an10.156-166:1.13	na ārādhako hoti …
an10.156-166:1.14	ārādhako hoti …pe…
an10.156-166:1.15	na visujjhati …
an10.156-166:1.16	visujjhati …pe…
an10.156-166:1.17	mānaṁ nādhibhoti …
an10.156-166:1.18	mānaṁ adhibhoti …pe…
an10.156-166:1.19	paññāya na vaḍḍhati …
an10.156-166:1.20	paññāya vaḍḍhati …pe….
an10.156-166:2.1	Bahuṁ apuññaṁ pasavati …
an10.156-166:2.2	bahuṁ puññaṁ pasavati.
an10.156-166:2.3	Katamehi dasahi?
an10.156-166:2.4	Sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti, sammāñāṇī hoti, sammāvimutti hoti—
an10.156-166:2.5	imehi kho, bhikkhave, dasahi dhammehi samannāgato puggalo bahuṁ puññaṁ pasavatī”ti.
an10.156-166:2.6	Puggalavaggo paṭhamo.
an10.167:0.1	Aṅguttara Nikāya 10.167
an10.167:0.2	17. Jāṇussoṇivagga
an10.167:0.3	Brāhmaṇapaccorohaṇīsutta
an10.167:1.1	Tena kho pana samayena jāṇussoṇi brāhmaṇo tadahuposathe sīsaṁnhāto navaṁ khomayugaṁ nivattho allakusamuṭṭhiṁ ādāya bhagavato avidūre ekamantaṁ ṭhito hoti.
an10.167:2.1	Addasā kho bhagavā jāṇussoṇiṁ brāhmaṇaṁ tadahuposathe sīsaṁnhātaṁ navaṁ khomayugaṁ nivatthaṁ allakusamuṭṭhiṁ ādāya ekamantaṁ ṭhitaṁ.
an10.167:2.2	Disvāna jāṇussoṇiṁ brāhmaṇaṁ etadavoca:
an10.167:2.3	“kiṁ nu tvaṁ, brāhmaṇa, tadahuposathe sīsaṁnhāto navaṁ khomayugaṁ nivattho allakusamuṭṭhiṁ ādāya ekamantaṁ ṭhito?
an10.167:2.4	Kiṁ nvajja brāhmaṇakulassā”ti?
an10.167:2.5	“Paccorohaṇī, bho gotama, ajja brāhmaṇakulassā”ti.
an10.167:3.1	“Yathā kathaṁ pana, brāhmaṇa, brāhmaṇānaṁ paccorohaṇī hotī”ti?
an10.167:3.2	“Idha, bho gotama, brāhmaṇā tadahuposathe sīsaṁnhātā navaṁ khomayugaṁ nivatthā allena gomayena pathaviṁ opuñjitvā haritehi kusehi pattharitvā antarā ca velaṁ antarā ca agyāgāraṁ seyyaṁ kappenti.
an10.167:3.3	Te taṁ rattiṁ tikkhattuṁ paccuṭṭhāya pañjalikā aggiṁ namassanti:
an10.167:3.4	‘paccorohāma bhavantaṁ, paccorohāma bhavantan’ti.
an10.167:3.5	Bahukena ca sappitelanavanītena aggiṁ santappenti.
an10.167:3.6	Tassā ca rattiyā accayena paṇītena khādanīyena bhojanīyena brāhmaṇe santappenti.
an10.167:3.7	Evaṁ, bho gotama, brāhmaṇānaṁ paccorohaṇī hotī”ti.
an10.167:4.1	“Aññathā kho, brāhmaṇa, brāhmaṇānaṁ paccorohaṇī hoti, aññathā ca pana ariyassa vinaye paccorohaṇī hotī”ti.
an10.167:4.2	“Yathā kathaṁ pana, bho gotama, ariyassa vinaye paccorohaṇī hoti?
an10.167:4.3	Sādhu me bhavaṁ gotamo tathā dhammaṁ desetu yathā ariyassa vinaye paccorohaṇī hotī”ti.
an10.167:5.1	“Tena hi, brāhmaṇa, suṇāhi, sādhukaṁ manasi karohi; bhāsissāmī”ti.
an10.167:5.2	“Evaṁ, bho”ti kho jāṇussoṇi brāhmaṇo bhagavato paccassosi.
an10.167:5.3	Bhagavā etadavoca:
an10.167:6.1	“Idha, brāhmaṇa, ariyasāvako iti paṭisañcikkhati:
an10.167:6.2	‘pāṇātipātassa kho pāpako vipāko diṭṭhe ceva dhamme abhisamparāyañcā’ti.
an10.167:6.3	So iti paṭisaṅkhāya pāṇātipātaṁ pajahati;
an10.167:6.4	pāṇātipātā paccorohati.
an10.167:7.1	… ‘Adinnādānassa kho pāpako vipāko—
an10.167:7.2	diṭṭhe ceva dhamme abhisamparāyañcā’ti.
an10.167:7.3	So iti paṭisaṅkhāya adinnādānaṁ pajahati;
an10.167:7.4	adinnādānā paccorohati.
an10.167:8.1	… ‘Kāmesumicchācārassa kho pāpako vipāko—
an10.167:8.2	diṭṭhe ceva dhamme abhisamparāyañcā’ti.
an10.167:8.3	So iti paṭisaṅkhāya kāmesumicchācāraṁ pajahati;
an10.167:8.4	kāmesumicchācārā paccorohati.
an10.167:9.1	… ‘Musāvādassa kho pāpako vipāko—
an10.167:9.2	diṭṭhe ceva dhamme abhisamparāyañcā’ti.
an10.167:9.3	So iti paṭisaṅkhāya musāvādaṁ pajahati;
an10.167:9.4	musāvādā paccorohati.
an10.167:10.1	… ‘Pisuṇāya vācāya kho pāpako vipāko—
an10.167:10.2	diṭṭhe ceva dhamme abhisamparāyañcā’ti.
an10.167:10.3	So iti paṭisaṅkhāya pisuṇaṁ vācaṁ pajahati;
an10.167:10.4	pisuṇāya vācāya paccorohati.
an10.167:11.1	… ‘Pharusāya vācāya kho pāpako vipāko—
an10.167:11.2	diṭṭhe ceva dhamme abhisamparāyañcā’ti.
an10.167:11.3	So iti paṭisaṅkhāya pharusaṁ vācaṁ pajahati;
an10.167:11.4	pharusāya vācāya paccorohati.
an10.167:12.1	… ‘Samphappalāpassa kho pāpako vipāko—
an10.167:12.2	diṭṭhe ceva dhamme abhisamparāyañcā’ti.
an10.167:12.3	So iti paṭisaṅkhāya samphappalāpaṁ pajahati;
an10.167:12.4	samphappalāpā paccorohati.
an10.167:13.1	… ‘Abhijjhāya kho pāpako vipāko—
an10.167:13.2	diṭṭhe ceva dhamme abhisamparāyañcā’ti.
an10.167:13.3	So iti paṭisaṅkhāya abhijjhaṁ pajahati;
an10.167:13.4	abhijjhāya paccorohati.
an10.167:14.1	… ‘Byāpādassa kho pāpako vipāko—
an10.167:14.2	diṭṭhe ceva dhamme abhisamparāyañcā’ti.
an10.167:14.3	So iti paṭisaṅkhāya byāpādaṁ pajahati;
an10.167:14.4	byāpādā paccorohati.
an10.167:15.1	… ‘Micchādiṭṭhiyā kho pāpako vipāko—
an10.167:15.2	diṭṭhe ceva dhamme abhisamparāyañcā’ti.
an10.167:15.3	So iti paṭisaṅkhāya micchādiṭṭhiṁ pajahati;
an10.167:15.4	micchādiṭṭhiyā paccorohati.
an10.167:15.5	Evaṁ kho, brāhmaṇa, ariyassa vinaye paccorohaṇī hotī”ti.
an10.167:16.1	“Aññathā kho, bho gotama, brāhmaṇānaṁ paccorohaṇī hoti, aññathā ca pana ariyassa vinaye paccorohaṇī hoti.
an10.167:16.2	Imissā, bho gotama, ariyassa vinaye paccorohaṇiyā brāhmaṇānaṁ paccorohaṇī kalaṁ nāgghati soḷasiṁ.
an10.167:16.3	Abhikkantaṁ, bho gotama …pe…
an10.167:16.4	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an10.167:16.5	Paṭhamaṁ.
an10.168:0.1	Aṅguttara Nikāya 10.168
an10.168:0.2	17. Jāṇussoṇivagga
an10.168:0.3	Ariyapaccorohaṇīsutta
an10.168:1.1	“Ariyaṁ vo, bhikkhave, paccorohaṇiṁ desessāmi.
an10.168:1.2	Taṁ suṇātha, sādhukaṁ manasi karotha, bhāsissāmī”ti.
an10.168:1.3	“Evaṁ, bhante”ti kho te bhikkhū bhagavato paccassosuṁ.
an10.168:1.4	Bhagavā etadavoca:
an10.168:2.1	“Katamā ca, bhikkhave, ariyā paccorohaṇī?
an10.168:2.2	Idha, bhikkhave, ariyasāvako iti paṭisañcikkhati:
an10.168:2.3	‘pāṇātipātassa kho pāpako vipāko—
an10.168:2.4	diṭṭhe ceva dhamme abhisamparāyañcā’ti.
an10.168:2.5	So iti paṭisaṅkhāya pāṇātipātaṁ pajahati;
an10.168:2.6	pāṇātipātā paccorohati.
an10.168:3.1	… ‘Adinnādānassa kho pāpako vipāko—
an10.168:3.2	diṭṭhe ceva dhamme abhisamparāyañcā’ti.
an10.168:3.3	So iti paṭisaṅkhāya adinnādānaṁ pajahati;
an10.168:3.4	adinnādānā paccorohati.
an10.168:4.1	… ‘Kāmesumicchācārassa kho pāpako vipāko …pe…
an10.168:4.2	kāmesumicchācārā paccorohati.
an10.168:5.1	… ‘Musāvādassa kho pāpako vipāko …pe…
an10.168:5.2	musāvādā paccorohati.
an10.168:6.1	… ‘Pisuṇāya vācāya kho pāpako vipāko …pe…
an10.168:6.2	pisuṇāya vācāya paccorohati.
an10.168:7.1	… ‘Pharusāya vācāya kho pāpako vipāko …pe…
an10.168:7.2	pharusāya vācāya paccorohati.
an10.168:8.1	… ‘Samphappalāpassa kho pāpako vipāko …pe…
an10.168:8.2	samphappalāpā paccorohati.
an10.168:9.1	… ‘Abhijjhāya kho pāpako vipāko …pe…
an10.168:9.2	abhijjhāya paccorohati.
an10.168:10.1	… ‘Byāpādassa kho pāpako vipāko …pe…
an10.168:10.2	byāpādā paccorohati.
an10.168:11.1	… ‘Micchādiṭṭhiyā kho pāpako vipāko diṭṭhe ceva dhamme abhisamparāyañcā’ti.
an10.168:11.2	So iti paṭisaṅkhāya micchādiṭṭhiṁ pajahati;
an10.168:11.3	micchādiṭṭhiyā paccorohati.
an10.168:11.4	Ayaṁ vuccati, bhikkhave, ariyā paccorohaṇī”ti.
an10.168:11.5	Dutiyaṁ.
an10.169:0.1	Aṅguttara Nikāya 10.169
an10.169:0.2	17. Jāṇussoṇivagga
an10.169:0.3	Saṅgāravasutta
an10.169:1.1	Atha kho saṅgāravo brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an10.169:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho saṅgāravo brāhmaṇo bhagavantaṁ etadavoca:
an10.169:2.1	“Kiṁ nu kho, bho gotama, orimaṁ tīraṁ, kiṁ pārimaṁ tīran”ti?
an10.169:2.2	“Pāṇātipāto kho, brāhmaṇa, orimaṁ tīraṁ, pāṇātipātā veramaṇī pārimaṁ tīraṁ.
an10.169:2.3	Adinnādānaṁ kho, brāhmaṇa, orimaṁ tīraṁ, adinnādānā veramaṇī pārimaṁ tīraṁ.
an10.169:2.4	Kāmesumicchācāro orimaṁ tīraṁ, kāmesumicchācārā veramaṇī pārimaṁ tīraṁ.
an10.169:2.5	Musāvādo orimaṁ tīraṁ, musāvādā veramaṇī pārimaṁ tīraṁ.
an10.169:2.6	Pisuṇā vācā orimaṁ tīraṁ, pisuṇāya vācāya veramaṇī pārimaṁ tīraṁ.
an10.169:2.7	Pharusā vācā orimaṁ tīraṁ, pharusāya vācāya veramaṇī pārimaṁ tīraṁ.
an10.169:2.8	Samphappalāpo orimaṁ tīraṁ, samphappalāpā veramaṇī pārimaṁ tīraṁ.
an10.169:2.9	Abhijjhā orimaṁ tīraṁ, anabhijjhā pārimaṁ tīraṁ.
an10.169:2.10	Byāpādo orimaṁ tīraṁ, abyāpādo pārimaṁ tīraṁ.
an10.169:2.11	Micchādiṭṭhi orimaṁ tīraṁ, sammādiṭṭhi pārimaṁ tīraṁ.
an10.169:2.12	Idaṁ kho, brāhmaṇa, orimaṁ tīraṁ, idaṁ pārimaṁ tīranti.
an10.169:3.1	Appakā te manussesu,
an10.169:3.2	ye janā pāragāmino;
an10.169:3.3	Athāyaṁ itarā pajā,
an10.169:3.4	tīramevānudhāvati.
an10.169:4.1	Ye ca kho sammadakkhāte,
an10.169:4.2	dhamme dhammānuvattino;
an10.169:4.3	Te janā pāramessanti,
an10.169:4.4	maccudheyyaṁ suduttaraṁ.
an10.169:5.1	Kaṇhaṁ dhammaṁ vippahāya,
an10.169:5.2	Sukkaṁ bhāvetha paṇḍito;
an10.169:5.3	Okā anokamāgamma,
an10.169:5.4	Viveke yattha dūramaṁ.
an10.169:6.1	Tatrābhiratimiccheyya,
an10.169:6.2	hitvā kāme akiñcano;
an10.169:6.3	Pariyodapeyya attānaṁ,
an10.169:6.4	cittaklesehi paṇḍito.
an10.169:7.1	Yesaṁ sambodhiyaṅgesu,
an10.169:7.2	sammā cittaṁ subhāvitaṁ;
an10.169:7.3	Ādānapaṭinissagge,
an10.169:7.4	anupādāya ye ratā;
an10.169:7.5	Khīṇāsavā jutimanto,
an10.169:7.6	te loke parinibbutā”ti.
an10.169:7.7	Tatiyaṁ.
an10.170:0.1	Aṅguttara Nikāya 10.170
an10.170:0.2	17. Jāṇussoṇivagga
an10.170:0.3	Orimasutta
an10.170:1.1	“Orimañca, bhikkhave, tīraṁ desessāmi pārimañca tīraṁ.
an10.170:1.2	Taṁ suṇātha …pe…
an10.170:1.3	katamañca, bhikkhave, orimaṁ tīraṁ, katamañca pārimaṁ tīraṁ?
an10.170:1.4	Pāṇātipāto, bhikkhave, orimaṁ tīraṁ, pāṇātipātā veramaṇī pārimaṁ tīraṁ.
an10.170:1.5	Adinnādānaṁ orimaṁ tīraṁ, adinnādānā veramaṇī pārimaṁ tīraṁ.
an10.170:1.6	Kāmesumicchācāro orimaṁ tīraṁ, kāmesumicchācārā veramaṇī pārimaṁ tīraṁ.
an10.170:1.7	Musāvādo orimaṁ tīraṁ, musāvādā veramaṇī pārimaṁ tīraṁ.
an10.170:1.8	Pisuṇā vācā orimaṁ tīraṁ, pisuṇāya vācāya veramaṇī pārimaṁ tīraṁ.
an10.170:1.9	Pharusā vācā orimaṁ tīraṁ, pharusāya vācāya veramaṇī pārimaṁ tīraṁ.
an10.170:1.10	Samphappalāpo orimaṁ tīraṁ, samphappalāpā veramaṇī pārimaṁ tīraṁ.
an10.170:1.11	Abhijjhā orimaṁ tīraṁ, anabhijjhā pārimaṁ tīraṁ.
an10.170:1.12	Byāpādo orimaṁ tīraṁ, abyāpādo pārimaṁ tīraṁ.
an10.170:1.13	Micchādiṭṭhi orimaṁ tīraṁ, sammādiṭṭhi pārimaṁ tīraṁ.
an10.170:1.14	Idaṁ kho, bhikkhave, orimaṁ tīraṁ, idaṁ pārimaṁ tīranti.
an10.170:2.1	Appakā te manussesu,
an10.170:2.2	ye janā pāragāmino;
an10.170:2.3	Athāyaṁ itarā pajā,
an10.170:2.4	tīramevānudhāvati.
an10.170:3.1	Ye ca kho sammadakkhāte,
an10.170:3.2	dhamme dhammānuvattino;
an10.170:3.3	Te janā pāramessanti,
an10.170:3.4	maccudheyyaṁ suduttaraṁ.
an10.170:4.1	Kaṇhaṁ dhammaṁ vippahāya,
an10.170:4.2	sukkaṁ bhāvetha paṇḍito;
an10.170:4.3	Okā anokamāgamma,
an10.170:4.4	viveke yattha dūramaṁ.
an10.170:5.1	Tatrābhiratimiccheyya,
an10.170:5.2	hitvā kāme akiñcano;
an10.170:5.3	Pariyodapeyya attānaṁ,
an10.170:5.4	cittaklesehi paṇḍito.
an10.170:6.1	Yesaṁ sambodhiyaṅgesu,
an10.170:6.2	sammā cittaṁ subhāvitaṁ;
an10.170:6.3	Ādānapaṭinissagge,
an10.170:6.4	anupādāya ye ratā;
an10.170:6.5	Khīṇāsavā jutimanto,
an10.170:6.6	te loke parinibbutā”ti.
an10.170:6.7	Catutthaṁ.
an10.171:0.1	Aṅguttara Nikāya 10.171
an10.171:0.2	17. Jāṇussoṇivagga
an10.171:0.3	Paṭhamaadhammasutta
an10.171:1.1	“Adhammo ca, bhikkhave, veditabbo anattho ca;
an10.171:1.2	dhammo ca veditabbo attho ca.
an10.171:1.3	Adhammañca viditvā anatthañca, dhammañca viditvā atthañca yathā dhammo yathā attho tathā paṭipajjitabbaṁ.
an10.171:2.1	Katamo ca, bhikkhave, adhammo ca anattho ca?
an10.171:2.2	Pāṇātipāto, adinnādānaṁ, kāmesumicchācāro, musāvādo, pisuṇā vācā, pharusā vācā, samphappalāpo, abhijjhā, byāpādo, micchādiṭṭhi—
an10.171:2.3	ayaṁ vuccati, bhikkhave, adhammo ca anattho ca.
an10.171:3.1	Katamo ca, bhikkhave, dhammo ca attho ca?
an10.171:3.2	Pāṇātipātā veramaṇī, adinnādānā veramaṇī, kāmesumicchācārā veramaṇī, musāvādā veramaṇī, pisuṇāya vācāya veramaṇī, pharusāya vācāya veramaṇī, samphappalāpā veramaṇī, anabhijjhā, abyāpādo, sammādiṭṭhi—
an10.171:3.3	ayaṁ vuccati, bhikkhave, dhammo ca attho ca.
an10.171:4.1	‘Adhammo ca, bhikkhave, veditabbo anattho ca;
an10.171:4.2	dhammo ca veditabbo attho ca.
an10.171:4.3	Adhammañca viditvā anatthañca, dhammañca viditvā atthañca yathā dhammo yathā attho tathā paṭipajjitabban’ti,
an10.171:4.4	iti yaṁ taṁ vuttaṁ, idametaṁ paṭicca vuttan”ti.
an10.171:4.5	Pañcamaṁ.
an10.172:0.1	Aṅguttara Nikāya 10.172
an10.172:0.2	17. Jāṇussoṇivagga
an10.172:0.3	Dutiyaadhammasutta
an10.172:1.1	“Adhammo ca, bhikkhave, veditabbo dhammo ca;
an10.172:1.2	anattho ca veditabbo attho ca.
an10.172:1.3	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabban”ti.
an10.172:1.4	Idamavoca bhagavā.
an10.172:1.5	Idaṁ vatvāna sugato uṭṭhāyāsanā vihāraṁ pāvisi.
an10.172:2.1	Atha kho tesaṁ bhikkhūnaṁ acirapakkantassa bhagavato etadahosi:
an10.172:2.2	“idaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.172:2.3	‘adhammo ca, bhikkhave, veditabbo dhammo ca;
an10.172:2.4	anattho ca veditabbo attho ca.
an10.172:2.5	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabban’ti.
an10.172:2.6	Ko nu kho imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajeyyā”ti?
an10.172:3.1	Atha kho tesaṁ bhikkhūnaṁ etadahosi:
an10.172:3.2	“ayaṁ kho āyasmā mahākaccāno satthu ceva saṁvaṇṇito, sambhāvito ca viññūnaṁ sabrahmacārīnaṁ.
an10.172:3.3	Pahoti cāyasmā mahākaccāno imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.
an10.172:3.4	Yannūna mayaṁ yenāyasmā mahākaccāno tenupasaṅkameyyāma; upasaṅkamitvā āyasmantaṁ mahākaccānaṁ etamatthaṁ puccheyyāma.
an10.172:3.5	Yathā no āyasmā mahākaccāno byākarissati tathā naṁ dhāressāmā”ti.
an10.172:4.1	Atha kho te bhikkhū yenāyasmā mahākaccāno tenupasaṅkamiṁsu; upasaṅkamitvā āyasmatā mahākaccānena saddhiṁ sammodiṁsu.
an10.172:4.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te bhikkhū āyasmantaṁ mahākaccānaṁ etadavocuṁ:
an10.172:5.1	“Idaṁ kho no, āvuso kaccāna, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.172:5.2	‘adhammo ca, bhikkhave, veditabbo dhammo ca;
an10.172:5.3	anattho ca veditabbo attho ca.
an10.172:5.4	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabban’ti.
an10.172:6.1	Tesaṁ no, āvuso, amhākaṁ acirapakkantassa bhagavato etadahosi:
an10.172:6.2	‘idaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho—
an10.172:6.3	adhammo ca, bhikkhave …pe…
an10.172:6.4	tathā paṭipajjitabbanti.
an10.172:6.5	Ko nu kho imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajeyyā’ti?
an10.172:7.1	Tesaṁ no, āvuso, amhākaṁ etadahosi:
an10.172:7.2	‘ayaṁ kho āyasmā mahākaccāno satthu ceva saṁvaṇṇito, sambhāvito ca viññūnaṁ sabrahmacārīnaṁ.
an10.172:7.3	Pahoti cāyasmā mahākaccāno imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.
an10.172:7.4	Yannūna mayaṁ yenāyasmā mahākaccāno tenupasaṅkameyyāma; upasaṅkamitvā āyasmantaṁ mahākaccānaṁ etamatthaṁ paṭipuccheyyāma.
an10.172:7.5	Yathā no āyasmā mahākaccāno byākarissati tathā naṁ dhāressāmā’ti.
an10.172:7.6	Vibhajatu āyasmā mahākaccāno”ti.
an10.172:8.1	“Seyyathāpi, āvuso, puriso sāratthiko sāraṁ gavesī sārapariyesanaṁ caramāno mahato rukkhassa tiṭṭhato sāravato atikkammeva mūlaṁ atikkamma khandhaṁ sākhāpalāse sāraṁ pariyesitabbaṁ maññeyya.
an10.172:8.2	Evaṁsampadamidaṁ āyasmantānaṁ satthari sammukhībhūte taṁ bhagavantaṁ atisitvā amhe etamatthaṁ paṭipucchitabbaṁ maññatha.
an10.172:8.3	So hāvuso, bhagavā jānaṁ jānāti passaṁ passati cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato.
an10.172:8.4	So ceva panetassa kālo ahosi yaṁ tumhe bhagavantaṁyeva upasaṅkamitvā etamatthaṁ paṭipuccheyyātha.
an10.172:8.5	Yathā vo bhagavā byākareyya tathā naṁ dhāreyyāthā”ti.
an10.172:9.1	“Addhā, āvuso kaccāna, bhagavā jānaṁ jānāti passaṁ passati cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato.
an10.172:9.2	So ceva panetassa kālo ahosi yaṁ mayaṁ bhagavantaṁyeva upasaṅkamitvā etamatthaṁ paṭipuccheyyāma.
an10.172:9.3	Yathā no bhagavā byākareyya tathā naṁ dhāreyyāma.
an10.172:9.4	Api cāyasmā mahākaccāno satthu ceva saṁvaṇṇito, sambhāvito ca viññūnaṁ sabrahmacārīnaṁ.
an10.172:9.5	Pahoti cāyasmā mahākaccāno imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.
an10.172:9.6	Vibhajatāyasmā mahākaccāno agaruṁ karitvā”ti.
an10.172:10.1	“Tena hāvuso, suṇātha, sādhukaṁ manasi karotha, bhāsissāmī”ti.
an10.172:10.2	“Evaṁ, āvuso”ti kho te bhikkhū āyasmato mahākaccānassa paccassosuṁ.
an10.172:10.3	Athāyasmā mahākaccāno etadavoca:
an10.172:11.1	“Yaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.172:11.2	‘adhammo ca, bhikkhave, veditabbo …pe…
an10.172:11.3	tathā paṭipajjitabban’ti.
an10.172:12.1	Katamo cāvuso, adhammo; katamo ca dhammo?
an10.172:12.2	Katamo ca anattho, katamo ca attho?
an10.172:12.3	Pāṇātipāto, āvuso, adhammo;
an10.172:12.4	pāṇātipātā veramaṇī dhammo;
an10.172:12.5	ye ca pāṇātipātapaccayā aneke pāpakā akusalā dhammā sambhavanti, ayaṁ anattho;
an10.172:12.6	pāṇātipātā veramaṇipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:13.1	Adinnādānaṁ, āvuso, adhammo;
an10.172:13.2	adinnādānā veramaṇī dhammo;
an10.172:13.3	ye ca adinnādānapaccayā aneke pāpakā akusalā dhammā sambhavanti, ayaṁ anattho;
an10.172:13.4	adinnādānā veramaṇipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:14.1	Kāmesumicchācāro, āvuso, adhammo;
an10.172:14.2	kāmesumicchācārā veramaṇī dhammo;
an10.172:14.3	ye ca kāmesumicchācārapaccayā aneke pāpakā akusalā dhammā sambhavanti, ayaṁ anattho;
an10.172:14.4	kāmesumicchācārā veramaṇipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:15.1	Musāvādo, āvuso, adhammo;
an10.172:15.2	musāvādā veramaṇī dhammo;
an10.172:15.3	ye ca musāvādapaccayā aneke pāpakā akusalā dhammā sambhavanti, ayaṁ anattho;
an10.172:15.4	musāvādā veramaṇipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:16.1	Pisuṇā vācā, āvuso, adhammo;
an10.172:16.2	pisuṇāya vācāya veramaṇī dhammo;
an10.172:16.3	ye ca pisuṇāvācāpaccayā aneke pāpakā akusalā dhammā sambhavanti, ayaṁ anattho;
an10.172:16.4	pisuṇāya vācāya veramaṇipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:17.1	Pharusā vācā, āvuso, adhammo;
an10.172:17.2	pharusāya vācāya veramaṇī dhammo;
an10.172:17.3	ye ca pharusāvācāpaccayā aneke pāpakā akusalā dhammā sambhavanti, ayaṁ anattho;
an10.172:17.4	pharusāya vācāya veramaṇipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:18.1	Samphappalāpo, āvuso, adhammo;
an10.172:18.2	samphappalāpā veramaṇī dhammo;
an10.172:18.3	ye ca samphappalāpapaccayā aneke pāpakā akusalā dhammā sambhavanti, ayaṁ anattho;
an10.172:18.4	samphappalāpā veramaṇipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:19.1	Abhijjhā, āvuso, adhammo;
an10.172:19.2	anabhijjhā dhammo;
an10.172:19.3	ye ca abhijjhāpaccayā aneke pāpakā akusalā dhammā sambhavanti, ayaṁ anattho;
an10.172:19.4	anabhijjhāpaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:20.1	Byāpādo, āvuso, adhammo;
an10.172:20.2	abyāpādo dhammo;
an10.172:20.3	ye ca byāpādapaccayā aneke pāpakā akusalā dhammā sambhavanti, ayaṁ anattho;
an10.172:20.4	abyāpādapaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:21.1	Micchādiṭṭhi, āvuso, adhammo;
an10.172:21.2	sammādiṭṭhi dhammo;
an10.172:21.3	ye ca micchādiṭṭhipaccayā aneke pāpakā akusalā dhammā sambhavanti, ayaṁ anattho;
an10.172:21.4	sammādiṭṭhipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.172:22.1	‘Yaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho—
an10.172:22.2	adhammo ca, bhikkhave, veditabbo …pe…
an10.172:22.3	tathā paṭipajjitabban’ti.
an10.172:22.4	Imassa kho ahaṁ, āvuso, bhagavatā saṅkhittena uddesassa uddiṭṭhassa vitthārena atthaṁ avibhattassa evaṁ vitthārena atthaṁ ājānāmi.
an10.172:22.5	Ākaṅkhamānā ca pana tumhe, āvuso, bhagavantaṁyeva upasaṅkamitvā etamatthaṁ paṭipuccheyyātha.
an10.172:22.6	Yathā no bhagavā byākaroti tathā naṁ dhāreyyāthā”ti.
an10.172:23.1	“Evamāvuso”ti kho te bhikkhū āyasmato mahākaccānassa bhāsitaṁ abhinanditvā anumoditvā uṭṭhāyāsanā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
an10.172:24.1	“Yaṁ kho no, bhante, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.172:24.2	‘adhammo ca, bhikkhave, veditabbo …pe…
an10.172:24.3	tathā paṭipajjitabban’ti.
an10.172:25.1	Tesaṁ no, bhante, amhākaṁ acirapakkantassa bhagavato etadahosi:
an10.172:25.2	‘idaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:
an10.172:25.3	“adhammo ca, bhikkhave, veditabbo …pe…
an10.172:25.4	tathā paṭipajjitabban”ti.
an10.172:25.5	Ko nu kho imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajeyyā’ti?
an10.172:26.1	Tesaṁ no, bhante, amhākaṁ etadahosi:
an10.172:26.2	‘ayaṁ kho āyasmā mahākaccāno satthu ceva saṁvaṇṇito, sambhāvito ca viññūnaṁ sabrahmacārīnaṁ.
an10.172:26.3	Pahoti cāyasmā mahākaccāno imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.
an10.172:26.4	Yannūna mayaṁ yenāyasmā mahākaccāno tenupasaṅkameyyāma; upasaṅkamitvā āyasmantaṁ mahākaccānaṁ etamatthaṁ paṭipuccheyyāma.
an10.172:26.5	Yathā no āyasmā mahākaccāno byākarissati tathā naṁ dhāressāmā’ti.
an10.172:27.1	Atha kho mayaṁ, bhante, yenāyasmā mahākaccāno tenupasaṅkamimhā; upasaṅkamitvā āyasmantaṁ mahākaccānaṁ etamatthaṁ apucchimhā.
an10.172:27.2	Tesaṁ no, bhante, āyasmatā mahākaccānena imehi akkharehi imehi padehi imehi byañjanehi attho suvibhatto”ti.
an10.172:28.1	“Sādhu sādhu, bhikkhave.
an10.172:28.2	Paṇḍito, bhikkhave, mahākaccāno. Mahāpañño, bhikkhave, mahākaccāno.
an10.172:28.3	Mañcepi tumhe, bhikkhave, upasaṅkamitvā etamatthaṁ paṭipuccheyyātha, ahampi cetaṁ evamevaṁ byākareyyaṁ yathā taṁ mahākaccānena byākataṁ.
an10.172:28.4	Eso ceva tassa attho. Evañca naṁ dhāreyyāthā”ti.
an10.172:28.5	Chaṭṭhaṁ.
an10.173:0.1	Aṅguttara Nikāya 10.173
an10.173:0.2	17. Jāṇussoṇivagga
an10.173:0.3	Tatiyaadhammasutta
an10.173:1.1	“Adhammo ca, bhikkhave, veditabbo dhammo ca;
an10.173:1.2	anattho ca veditabbo attho ca.
an10.173:1.3	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabbaṁ.
an10.173:2.1	Katamo ca, bhikkhave, adhammo, katamo ca dhammo;
an10.173:2.2	katamo ca anattho, katamo ca attho?
an10.173:2.3	Pāṇātipāto, bhikkhave, adhammo;
an10.173:2.4	pāṇātipātā veramaṇī dhammo;
an10.173:2.5	ye ca pāṇātipātapaccayā aneke pāpakā akusalā dhammā sambhavanti, ayaṁ anattho;
an10.173:2.6	pāṇātipātā veramaṇipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.173:3.1	Adinnādānaṁ, bhikkhave, adhammo;
an10.173:3.2	adinnādānā veramaṇī dhammo …
an10.173:3.3	kāmesumicchācāro, bhikkhave, adhammo;
an10.173:3.4	kāmesumicchācārā veramaṇī dhammo …
an10.173:3.5	musāvādo, bhikkhave, adhammo;
an10.173:3.6	musāvādā veramaṇī dhammo …
an10.173:3.7	pisuṇā vācā, bhikkhave, adhammo;
an10.173:3.8	pisuṇāya vācāya veramaṇī dhammo …
an10.173:3.9	pharusā vācā, bhikkhave, adhammo;
an10.173:3.10	pharusāya vācāya veramaṇī dhammo …
an10.173:3.11	samphappalāpo, bhikkhave, adhammo;
an10.173:3.12	samphappalāpā veramaṇī dhammo …
an10.173:3.13	abhijjhā, bhikkhave, adhammo;
an10.173:3.14	anabhijjhā dhammo …
an10.173:3.15	byāpādo, bhikkhave, adhammo;
an10.173:3.16	abyāpādo dhammo ….
an10.173:4.1	Micchādiṭṭhi, bhikkhave, adhammo;
an10.173:4.2	sammādiṭṭhi dhammo;
an10.173:4.3	ye ca micchādiṭṭhipaccayā aneke pāpakā akusalā dhammā sambhavanti, ayaṁ anattho;
an10.173:4.4	sammādiṭṭhipaccayā ca aneke kusalā dhammā bhāvanāpāripūriṁ gacchanti, ayaṁ attho.
an10.173:5.1	‘Adhammo ca, bhikkhave, veditabbo dhammo ca;
an10.173:5.2	anattho ca veditabbo attho ca.
an10.173:5.3	Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabban’ti,
an10.173:5.4	iti yaṁ taṁ vuttaṁ, idametaṁ paṭicca vuttan”ti.
an10.173:5.5	Sattamaṁ.
an10.174:0.1	Aṅguttara Nikāya 10.174
an10.174:0.2	17. Jāṇussoṇivagga
an10.174:0.3	Kammanidānasutta
an10.174:1.1	“Pāṇātipātampāhaṁ, bhikkhave, tividhaṁ vadāmi—
an10.174:1.2	lobhahetukampi, dosahetukampi, mohahetukampi.
an10.174:2.1	Adinnādānampāhaṁ, bhikkhave, tividhaṁ vadāmi—
an10.174:2.2	lobhahetukampi, dosahetukampi, mohahetukampi.
an10.174:3.1	Kāmesumicchācārampāhaṁ, bhikkhave, tividhaṁ vadāmi—
an10.174:3.2	lobhahetukampi, dosahetukampi, mohahetukampi.
an10.174:4.1	Musāvādampāhaṁ, bhikkhave, tividhaṁ vadāmi—
an10.174:4.2	lobhahetukampi, dosahetukampi, mohahetukampi.
an10.174:5.1	Pisuṇavācampāhaṁ, bhikkhave, tividhaṁ vadāmi—
an10.174:5.2	lobhahetukampi, dosahetukampi, mohahetukampi.
an10.174:6.1	Pharusavācampāhaṁ, bhikkhave, tividhaṁ vadāmi—
an10.174:6.2	lobhahetukampi, dosahetukampi, mohahetukampi.
an10.174:7.1	Samphappalāpampāhaṁ, bhikkhave, tividhaṁ vadāmi—
an10.174:7.2	lobhahetukampi, dosahetukampi, mohahetukampi.
an10.174:8.1	Abhijjhampāhaṁ, bhikkhave, tividhaṁ vadāmi—
an10.174:8.2	lobhahetukampi, dosahetukampi, mohahetukampi.
an10.174:9.1	Byāpādampāhaṁ, bhikkhave, tividhaṁ vadāmi—
an10.174:9.2	lobhahetukampi, dosahetukampi, mohahetukampi.
an10.174:10.1	Micchādiṭṭhimpāhaṁ, bhikkhave, tividhaṁ vadāmi—
an10.174:10.2	lobhahetukampi, dosahetukampi, mohahetukampi.
an10.174:10.3	Iti kho, bhikkhave, lobho kammanidānasambhavo, doso kammanidānasambhavo, moho kammanidānasambhavo.
an10.174:10.4	Lobhakkhayā kammanidānasaṅkhayo, dosakkhayā kammanidānasaṅkhayo, mohakkhayā kammanidānasaṅkhayo”ti.
an10.174:10.5	Aṭṭhamaṁ.
an10.175:0.1	Aṅguttara Nikāya 10.175
an10.175:0.2	17. Jāṇussoṇivagga
an10.175:0.3	Parikkamanasutta
an10.175:1.1	“Saparikkamano ayaṁ, bhikkhave, dhammo, nāyaṁ dhammo aparikkamano.
an10.175:1.2	Kathañca, bhikkhave, saparikkamano ayaṁ dhammo, nāyaṁ dhammo aparikkamano?
an10.175:1.3	Pāṇātipātissa, bhikkhave, pāṇātipātā veramaṇī parikkamanaṁ hoti.
an10.175:1.4	Adinnādāyissa, bhikkhave, adinnādānā veramaṇī parikkamanaṁ hoti.
an10.175:1.5	Kāmesumicchācārissa, bhikkhave, kāmesumicchācārā veramaṇī parikkamanaṁ hoti.
an10.175:1.6	Musāvādissa, bhikkhave, musāvādā veramaṇī parikkamanaṁ hoti.
an10.175:1.7	Pisuṇavācassa, bhikkhave, pisuṇāya vācāya veramaṇī parikkamanaṁ hoti.
an10.175:1.8	Pharusavācassa, bhikkhave, pharusāya vācāya veramaṇī parikkamanaṁ hoti.
an10.175:1.9	Samphappalāpissa, bhikkhave, samphappalāpā veramaṇī parikkamanaṁ hoti.
an10.175:1.10	Abhijjhālussa, bhikkhave, anabhijjhā parikkamanaṁ hoti.
an10.175:1.11	Byāpannacittassa, bhikkhave, abyāpādo parikkamanaṁ hoti.
an10.175:1.12	Micchādiṭṭhissa, bhikkhave, sammādiṭṭhi parikkamanaṁ hoti.
an10.175:1.13	Evaṁ kho, bhikkhave, saparikkamano ayaṁ dhammo, nāyaṁ dhammo aparikkamano”ti.
an10.175:1.14	Navamaṁ.
an10.176:0.1	Aṅguttara Nikāya 10.176
an10.176:0.2	17. Jāṇussoṇivagga
an10.176:0.3	Cundasutta
an10.176:1.1	Evaṁ me sutaṁ—
an10.176:1.2	ekaṁ samayaṁ bhagavā pāvāyaṁ viharati cundassa kammāraputtassa ambavane.
an10.176:1.3	Atha kho cundo kammāraputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho cundaṁ kammāraputtaṁ bhagavā etadavoca:
an10.176:1.4	“kassa no tvaṁ, cunda, soceyyāni rocesī”ti?
an10.176:1.5	“Brāhmaṇā, bhante, pacchābhūmakā kamaṇḍalukā sevālamālikā aggiparicārikā udakorohakā soceyyāni paññapenti; tesāhaṁ soceyyāni rocemī”ti.
an10.176:2.1	“Yathā kathaṁ pana, cunda, brāhmaṇā pacchābhūmakā kamaṇḍalukā sevālamālikā aggiparicārikā udakorohakā soceyyāni paññapentī”ti?
an10.176:2.2	“Idha, bhante, brāhmaṇā pacchābhūmakā kamaṇḍalukā sevālamālikā aggiparicārikā udakorohakā. Te sāvakaṁ evaṁ samādapenti:
an10.176:2.3	‘ehi tvaṁ, ambho purisa, kālasseva uṭṭhahantova sayanamhā pathaviṁ āmaseyyāsi;
an10.176:2.4	no ce pathaviṁ āmaseyyāsi, allāni gomayāni āmaseyyāsi;
an10.176:2.5	no ce allāni gomayāni āmaseyyāsi, haritāni tiṇāni āmaseyyāsi;
an10.176:2.6	no ce haritāni tiṇāni āmaseyyāsi, aggiṁ paricareyyāsi;
an10.176:2.7	no ce aggiṁ paricareyyāsi, pañjaliko ādiccaṁ namasseyyāsi;
an10.176:2.8	no ce pañjaliko ādiccaṁ namasseyyāsi, sāyatatiyakaṁ udakaṁ oroheyyāsī’ti.
an10.176:2.9	Evaṁ kho, bhante, brāhmaṇā pacchābhūmakā kamaṇḍalukā sevālamālikā aggiparicārikā udakorohakā soceyyāni paññapenti; tesāhaṁ soceyyāni rocemī”ti.
an10.176:3.1	“Aññathā kho, cunda, brāhmaṇā pacchābhūmakā kamaṇḍalukā sevālamālikā aggiparicārikā udakorohakā soceyyāni paññapenti, aññathā ca pana ariyassa vinaye soceyyaṁ hotī”ti.
an10.176:3.2	“Yathā kathaṁ pana, bhante, ariyassa vinaye soceyyaṁ hoti?
an10.176:3.3	Sādhu me, bhante, bhagavā tathā dhammaṁ desetu yathā ariyassa vinaye soceyyaṁ hotī”ti.
an10.176:4.1	“Tena hi, cunda, suṇāhi, sādhukaṁ manasi karohi; bhāsissāmī”ti.
an10.176:4.2	“Evaṁ, bhante”ti kho cundo kammāraputto bhagavato paccassosi.
an10.176:4.3	Bhagavā etadavoca:
an10.176:5.1	“Tividhaṁ kho, cunda, kāyena asoceyyaṁ hoti;
an10.176:5.2	catubbidhaṁ vācāya asoceyyaṁ hoti;
an10.176:5.3	tividhaṁ manasā asoceyyaṁ hoti.
an10.176:6.1	Kathañca, cunda, tividhaṁ kāyena asoceyyaṁ hoti?
an10.176:6.2	Idha, cunda, ekacco pāṇātipātī hoti luddo lohitapāṇi hatapahate niviṭṭho adayāpanno sabbapāṇabhūtesu.
an10.176:7.1	Adinnādāyī hoti. Yaṁ taṁ parassa paravittūpakaraṇaṁ gāmagataṁ vā araññagataṁ vā taṁ adinnaṁ theyyasaṅkhātaṁ ādātā hoti.
an10.176:8.1	Kāmesumicchācārī hoti. Yā tā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sasāmikā saparidaṇḍā antamaso mālāguḷaparikkhittāpi, tathārūpāsu cārittaṁ āpajjitā hoti.
an10.176:9.1	Evaṁ kho, cunda, tividhaṁ kāyena asoceyyaṁ hoti.
an10.176:10.1	Kathañca, cunda, catubbidhaṁ vācāya asoceyyaṁ hoti?
an10.176:10.2	Idha, cunda, ekacco musāvādī hoti. Sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho: ‘ehambho purisa, yaṁ jānāsi taṁ vadehī’ti, so ajānaṁ vā āha: ‘jānāmī’ti, jānaṁ vā āha: ‘na jānāmī’ti; apassaṁ vā āha: ‘passāmī’ti, passaṁ vā āha: ‘na passāmī’ti. Iti attahetu vā parahetu vā āmisakiñcikkhahetu vā sampajānamusā bhāsitā hoti.
an10.176:11.1	Pisuṇavāco hoti. Ito sutvā amutra akkhātā imesaṁ bhedāya, amutra vā sutvā imesaṁ akkhātā amūsaṁ bhedāya. Iti samaggānaṁ vā bhettā, bhinnānaṁ vā anuppadātā, vaggārāmo vaggarato vagganandī vaggakaraṇiṁ vācaṁ bhāsitā hoti.
an10.176:12.1	Pharusavāco hoti. Yā sā vācā aṇḍakā kakkasā parakaṭukā parābhisajjanī kodhasāmantā asamādhisaṁvattanikā, tathārūpiṁ vācaṁ bhāsitā hoti.
an10.176:13.1	Samphappalāpī hoti akālavādī abhūtavādī anatthavādī adhammavādī avinayavādī; anidhānavatiṁ vācaṁ bhāsitā hoti akālena anapadesaṁ apariyantavatiṁ anatthasaṁhitaṁ.
an10.176:13.2	Evaṁ kho, cunda, catubbidhaṁ vācāya asoceyyaṁ hoti.
an10.176:14.1	Kathañca, cunda, tividhaṁ manasā asoceyyaṁ hoti?
an10.176:14.2	Idha, cunda, ekacco abhijjhālu hoti. Yaṁ taṁ parassa paravittūpakaraṇaṁ taṁ abhijjhātā hoti: ‘aho vata yaṁ parassa taṁ mamassā’ti.
an10.176:15.1	Byāpannacitto hoti paduṭṭhamanasaṅkappo: ‘ime sattā haññantu vā bajjhantu vā ucchijjantu vā vinassantu vā mā vā ahesun’ti.
an10.176:16.1	Micchādiṭṭhiko hoti viparītadassano:
an10.176:16.2	‘natthi dinnaṁ, natthi yiṭṭhaṁ, natthi hutaṁ, natthi sukaṭadukkaṭānaṁ kammānaṁ phalaṁ vipāko, natthi ayaṁ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.
an10.176:16.3	Evaṁ kho, cunda, manasā tividhaṁ asoceyyaṁ hoti.
an10.176:17.1	Ime kho, cunda, dasa akusalakammapathā.
an10.176:17.2	Imehi kho, cunda, dasahi akusalehi kammapathehi samannāgato kālasseva uṭṭhahantova sayanamhā pathaviñcepi āmasati, asuciyeva hoti; no cepi pathaviṁ āmasati, asuciyeva hoti.
an10.176:18.1	Allāni cepi gomayāni āmasati, asuciyeva hoti; no cepi allāni gomayāni āmasati, asuciyeva hoti.
an10.176:19.1	Haritāni cepi tiṇāni āmasati, asuciyeva hoti; no cepi haritāni tiṇāni āmasati, asuciyeva hoti.
an10.176:20.1	Aggiñcepi paricarati, asuciyeva hoti, no cepi aggiṁ paricarati, asuciyeva hoti.
an10.176:21.1	Pañjaliko cepi ādiccaṁ namassati, asuciyeva hoti; no cepi pañjaliko ādiccaṁ namassati, asuciyeva hoti.
an10.176:22.1	Sāyatatiyakañcepi udakaṁ orohati, asuciyeva hoti; no cepi sāyatatiyakaṁ udakaṁ orohati, asuciyeva hoti.
an10.176:22.2	Taṁ kissa hetu?
an10.176:22.3	Ime, cunda, dasa akusalakammapathā asucīyeva honti asucikaraṇā ca.
an10.176:23.1	Imesaṁ pana, cunda, dasannaṁ akusalānaṁ kammapathānaṁ samannāgamanahetu nirayo paññāyati, tiracchānayoni paññāyati, pettivisayo paññāyati, yā vā panaññāpi kāci duggatiyo.
an10.176:24.1	Tividhaṁ kho, cunda, kāyena soceyyaṁ hoti;
an10.176:24.2	catubbidhaṁ vācāya soceyyaṁ hoti;
an10.176:24.3	tividhaṁ manasā soceyyaṁ hoti.
an10.176:25.1	Kathaṁ, cunda, tividhaṁ kāyena soceyyaṁ hoti?
an10.176:25.2	Idha, cunda, ekacco pāṇātipātaṁ pahāya pāṇātipātā paṭivirato hoti nihitadaṇḍo nihitasattho, lajjī dayāpanno, sabbapāṇabhūtahitānukampī viharati.
an10.176:26.1	Adinnādānaṁ pahāya, adinnādānā paṭivirato hoti. Yaṁ taṁ parassa paravittūpakaraṇaṁ gāmagataṁ vā araññagataṁ vā, na taṁ adinnaṁ theyyasaṅkhātaṁ ādātā hoti.
an10.176:27.1	Kāmesumicchācāraṁ pahāya, kāmesumicchācārā paṭivirato hoti yā tā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sasāmikā saparidaṇḍā antamaso mālāguḷaparikkhittāpi, tathārūpāsu na cārittaṁ āpajjitā hoti.
an10.176:28.1	Evaṁ kho, cunda, tividhaṁ kāyena soceyyaṁ hoti.
an10.176:29.1	Kathañca, cunda, catubbidhaṁ vācāya soceyyaṁ hoti?
an10.176:29.2	Idha, cunda, ekacco musāvādaṁ pahāya musāvādā paṭivirato hoti. Sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho: ‘ehambho purisa, yaṁ jānāsi taṁ vadehī’ti, so ajānaṁ vā āha: ‘na jānāmī’ti, jānaṁ vā āha: ‘jānāmī’ti, apassaṁ vā āha: ‘na passāmī’ti, passaṁ vā āha: ‘passāmī’ti. Iti attahetu vā parahetu vā āmisakiñcikkhahetu vā na sampajānamusā bhāsitā hoti.
an10.176:30.1	Pisuṇaṁ vācaṁ pahāya, pisuṇāya vācāya paṭivirato hoti—na ito sutvā amutra akkhātā imesaṁ bhedāya, na amutra vā sutvā imesaṁ akkhātā amūsaṁ bhedāya. Iti bhinnānaṁ vā sandhātā sahitānaṁ vā anuppadātā samaggārāmo samaggarato samagganandī samaggakaraṇiṁ vācaṁ bhāsitā hoti.
an10.176:31.1	Pharusaṁ vācaṁ pahāya, pharusāya vācāya paṭivirato hoti. Yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā, tathārūpiṁ vācaṁ bhāsitā hoti.
an10.176:32.1	Samphappalāpaṁ pahāya, samphappalāpā paṭivirato hoti kālavādī bhūtavādī atthavādī dhammavādī vinayavādī;
an10.176:32.2	nidhānavatiṁ vācaṁ bhāsitā hoti kālena sāpadesaṁ pariyantavatiṁ atthasaṁhitaṁ.
an10.176:33.1	Evaṁ kho, cunda, catubbidhaṁ vācāya soceyyaṁ hoti.
an10.176:34.1	Kathañca, cunda, tividhaṁ manasā soceyyaṁ hoti?
an10.176:34.2	Idha, cunda, ekacco anabhijjhālu hoti. Yaṁ taṁ parassa paravittūpakaraṇaṁ taṁ anabhijjhitā hoti: ‘aho vata yaṁ parassa taṁ mamassā’ti.
an10.176:35.1	Abyāpannacitto hoti appaduṭṭhamanasaṅkappo: ‘ime sattā averā hontu abyāpajjā, anīghā sukhī attānaṁ pariharantū’ti.
an10.176:36.1	Sammādiṭṭhiko hoti aviparītadassano:
an10.176:36.2	‘atthi dinnaṁ, atthi yiṭṭhaṁ, atthi hutaṁ, atthi sukaṭadukkaṭānaṁ kammānaṁ phalaṁ vipāko, atthi ayaṁ loko, atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.
an10.176:37.1	Evaṁ kho, cunda, tividhaṁ manasā soceyyaṁ hoti.
an10.176:38.1	Ime kho, cunda, dasa kusalakammapathā.
an10.176:38.2	Imehi kho, cunda, dasahi kusalehi kammapathehi samannāgato kālasseva uṭṭhahantova sayanamhā pathaviñcepi āmasati, suciyeva hoti; no cepi pathaviṁ āmasati, suciyeva hoti.
an10.176:39.1	Allāni cepi gomayāni āmasati, suciyeva hoti; no cepi allāni gomayāni āmasati, suciyeva hoti.
an10.176:40.1	Haritāni cepi tiṇāni āmasati, suciyeva hoti; no cepi haritāni tiṇāni āmasati, suciyeva hoti.
an10.176:41.1	Aggiñcepi paricarati, suciyeva hoti; no cepi aggiṁ paricarati, suciyeva hoti.
an10.176:42.1	Pañjaliko cepi ādiccaṁ namassati, suciyeva hoti; no cepi pañjaliko ādiccaṁ namassati, suciyeva hoti.
an10.176:43.1	Sāyatatiyakañcepi udakaṁ orohati, suciyeva hoti; no cepi sāyatatiyakaṁ udakaṁ orohati, suciyeva hoti.
an10.176:43.2	Taṁ kissa hetu?
an10.176:43.3	Ime, cunda, dasa kusalakammapathā sucīyeva honti sucikaraṇā ca.
an10.176:44.1	Imesaṁ pana, cunda, dasannaṁ kusalānaṁ kammapathānaṁ samannāgamanahetu devā paññāyanti, manussā paññāyanti, yā vā panaññāpi kāci sugatiyo”ti.
an10.176:45.1	Evaṁ vutte, cundo kammāraputto bhagavantaṁ etadavoca:
an10.176:45.2	“abhikkantaṁ, bhante …pe…
an10.176:45.3	upāsakaṁ maṁ, bhante, bhagavā dhāretu ajjatagge pāṇupetaṁ saraṇaṁ gatan”ti.
an10.176:45.4	Dasamaṁ.
an10.177:0.1	Aṅguttara Nikāya 10.177
an10.177:0.2	17. Jāṇussoṇivagga
an10.177:0.3	Jāṇussoṇisutta
an10.177:1.1	Atha kho jāṇussoṇi brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an10.177:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho jāṇussoṇi brāhmaṇo bhagavantaṁ etadavoca:
an10.177:2.1	“Mayamassu, bho gotama, brāhmaṇā nāma.
an10.177:2.2	Dānāni dema, saddhāni karoma:
an10.177:2.3	‘idaṁ dānaṁ petānaṁ ñātisālohitānaṁ upakappatu, idaṁ dānaṁ petā ñātisālohitā paribhuñjantū’ti.
an10.177:2.4	Kacci taṁ, bho gotama, dānaṁ petānaṁ ñātisālohitānaṁ upakappati;
an10.177:2.5	kacci te petā ñātisālohitā taṁ dānaṁ paribhuñjantī”ti?
an10.177:2.6	“Ṭhāne kho, brāhmaṇa, upakappati, no aṭṭhāne”ti.
an10.177:3.1	“Katamaṁ pana, bho gotama, ṭhānaṁ, katamaṁ aṭṭhānan”ti?
an10.177:3.2	“Idha, brāhmaṇa, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhiko hoti.
an10.177:3.3	So kāyassa bhedā paraṁ maraṇā nirayaṁ upapajjati.
an10.177:3.4	Yo nerayikānaṁ sattānaṁ āhāro, tena so tattha yāpeti, tena so tattha tiṭṭhati.
an10.177:3.5	Idampi kho, brāhmaṇa, aṭṭhānaṁ yattha ṭhitassa taṁ dānaṁ na upakappati.
an10.177:4.1	Idha pana, brāhmaṇa, ekacco pāṇātipātī …pe… micchādiṭṭhiko hoti.
an10.177:4.2	So kāyassa bhedā paraṁ maraṇā tiracchānayoniṁ upapajjati.
an10.177:4.3	Yo tiracchānayonikānaṁ sattānaṁ āhāro, tena so tattha yāpeti, tena so tattha tiṭṭhati.
an10.177:4.4	Idampi kho, brāhmaṇa, aṭṭhānaṁ yattha ṭhitassa taṁ dānaṁ na upakappati.
an10.177:5.1	Idha pana, brāhmaṇa, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhiko hoti.
an10.177:5.2	So kāyassa bhedā paraṁ maraṇā manussānaṁ sahabyataṁ upapajjati.
an10.177:5.3	Yo manussānaṁ āhāro, tena so tattha yāpeti, tena so tattha tiṭṭhati.
an10.177:5.4	Idampi kho, brāhmaṇa, aṭṭhānaṁ yattha ṭhitassa taṁ dānaṁ na upakappati.
an10.177:6.1	Idha pana, brāhmaṇa, ekacco pāṇātipātā paṭivirato hoti …pe… sammādiṭṭhiko hoti.
an10.177:6.2	So kāyassa bhedā paraṁ maraṇā devānaṁ sahabyataṁ upapajjati.
an10.177:6.3	Yo devānaṁ āhāro, tena so tattha yāpeti, tena so tattha tiṭṭhati.
an10.177:6.4	Idampi, brāhmaṇa, aṭṭhānaṁ yattha ṭhitassa taṁ dānaṁ upakappati.
an10.177:7.1	Idha pana, brāhmaṇa, ekacco pāṇātipātī hoti …pe… micchādiṭṭhiko hoti.
an10.177:7.2	So kāyassa bhedā paraṁ maraṇā pettivisayaṁ upapajjati.
an10.177:7.3	Yo pettivesayikānaṁ sattānaṁ āhāro, tena so tattha yāpeti, tena so tattha tiṭṭhati, yaṁ vā panassa ito anuppavecchanti mittāmaccā vā ñātisālohitā vā, tena so tattha yāpeti, tena so tattha tiṭṭhati.
an10.177:7.4	Idaṁ kho, brāhmaṇa, ṭhānaṁ yattha ṭhitassa taṁ dānaṁ upakappatī”ti.
an10.177:8.1	“Sace pana, bho gotama, so peto ñātisālohito taṁ ṭhānaṁ anupapanno hoti, ko taṁ dānaṁ paribhuñjatī”ti?
an10.177:8.2	“Aññepissa, brāhmaṇa, petā ñātisālohitā taṁ ṭhānaṁ upapannā honti, te taṁ dānaṁ paribhuñjantī”ti.
an10.177:9.1	“Sace pana, bho gotama, so ceva peto ñātisālohito taṁ ṭhānaṁ anupapanno hoti aññepissa ñātisālohitā petā taṁ ṭhānaṁ anupapannā honti, ko taṁ dānaṁ paribhuñjatī”ti?
an10.177:9.2	“Aṭṭhānaṁ kho etaṁ, brāhmaṇa, anavakāso yaṁ taṁ ṭhānaṁ vivittaṁ assa iminā dīghena addhunā yadidaṁ petehi ñātisālohitehi.
an10.177:9.3	Api ca, brāhmaṇa, dāyakopi anipphalo”ti.
an10.177:10.1	“Aṭṭhānepi bhavaṁ gotamo parikappaṁ vadatī”ti?
an10.177:10.2	“Aṭṭhānepi kho ahaṁ, brāhmaṇa, parikappaṁ vadāmi.
an10.177:10.3	Idha, brāhmaṇa, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhiko hoti;
an10.177:10.4	so dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an10.177:10.5	So kāyassa bhedā paraṁ maraṇā hatthīnaṁ sahabyataṁ upapajjati.
an10.177:10.6	So tattha lābhī hoti annassa pānassa mālānānālaṅkārassa.
an10.177:11.1	Yaṁ kho, brāhmaṇa, idha pāṇātipātī adinnādāyī kāmesumicchācārī musāvādī pisuṇavāco pharusavāco samphappalāpī abhijjhālu byāpannacitto micchādiṭṭhiko, tena so kāyassa bhedā paraṁ maraṇā hatthīnaṁ sahabyataṁ upapajjati.
an10.177:11.2	Yañca kho so dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ, tena so tattha lābhī hoti annassa pānassa mālānānālaṅkārassa.
an10.177:12.1	Idha pana, brāhmaṇa, ekacco pāṇātipātī hoti …pe… micchādiṭṭhiko hoti.
an10.177:12.2	So dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an10.177:12.3	So kāyassa bhedā paraṁ maraṇā assānaṁ sahabyataṁ upapajjati …pe…
an10.177:12.4	gunnaṁ sahabyataṁ upapajjati …pe…
an10.177:12.5	kukkurānaṁ sahabyataṁ upapajjati.
an10.177:12.6	So tattha lābhī hoti annassa pānassa mālānānālaṅkārassa.
an10.177:13.1	Yaṁ kho, brāhmaṇa, idha pāṇātipātī …pe… micchādiṭṭhiko, tena so kāyassa bhedā paraṁ maraṇā kukkurānaṁ sahabyataṁ upapajjati.
an10.177:13.2	Yañca kho so dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ, tena so tattha lābhī hoti annassa pānassa mālānānālaṅkārassa.
an10.177:14.1	Idha pana, brāhmaṇa, ekacco pāṇātipātā paṭivirato hoti …pe… sammādiṭṭhiko hoti.
an10.177:14.2	So dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an10.177:14.3	So kāyassa bhedā paraṁ maraṇā manussānaṁ sahabyataṁ upapajjati.
an10.177:14.4	So tattha lābhī hoti mānusakānaṁ pañcannaṁ kāmaguṇānaṁ.
an10.177:15.1	Yaṁ kho, brāhmaṇa, idha pāṇātipātā paṭivirato hoti …pe… sammādiṭṭhiko, tena so kāyassa bhedā paraṁ maraṇā manussānaṁ sahabyataṁ upapajjati.
an10.177:15.2	Yañca kho so dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ, tena so tattha lābhī hoti mānusakānaṁ pañcannaṁ kāmaguṇānaṁ.
an10.177:16.1	Idha pana, brāhmaṇa, ekacco pāṇātipātā paṭivirato hoti …pe… sammādiṭṭhiko hoti.
an10.177:16.2	So dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.
an10.177:16.3	So kāyassa bhedā paraṁ maraṇā devānaṁ sahabyataṁ upapajjati.
an10.177:16.4	So tattha lābhī hoti dibbānaṁ pañcannaṁ kāmaguṇānaṁ.
an10.177:17.1	Yaṁ kho, brāhmaṇa, idha pāṇātipātā paṭivirato hoti …pe… sammādiṭṭhiko, tena so kāyassa bhedā paraṁ maraṇā devānaṁ sahabyataṁ upapajjati.
an10.177:17.2	Yañca kho so dātā hoti samaṇassa vā brāhmaṇassa vā annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ, tena so tattha lābhī hoti dibbānaṁ pañcannaṁ kāmaguṇānaṁ.
an10.177:17.3	Api ca, brāhmaṇa, dāyakopi anipphalo”ti.
an10.177:18.1	“Acchariyaṁ, bho gotama, abbhutaṁ, bho gotama.
an10.177:18.2	Yāvañcidaṁ, bho gotama, alameva dānāni dātuṁ, alaṁ saddhāni kātuṁ, yatra hi nāma dāyakopi anipphalo”ti.
an10.177:18.3	“Evametaṁ, brāhmaṇa, dāyakopi hi, brāhmaṇa, anipphalo”ti.
an10.177:19.1	“Abhikkantaṁ, bho gotama, abhikkantaṁ, bho gotama …pe…
an10.177:19.2	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an10.177:19.3	Ekādasamaṁ.
an10.177:19.4	Jāṇussoṇivaggo dutiyo.
an10.178:0.1	Aṅguttara Nikāya 10.178
an10.178:0.2	18. Sādhuvagga
an10.178:0.3	Sādhusutta
an10.178:1.1	“Sādhuñca vo, bhikkhave, desessāmi asādhuñca.
an10.178:1.2	Taṁ suṇātha, sādhukaṁ manasi karotha, bhāsissāmī”ti.
an10.178:1.3	“Evaṁ, bhante”ti kho te bhikkhū bhagavato paccassosuṁ.
an10.178:1.4	Bhagavā etadavoca:
an10.178:2.1	“Katamañca, bhikkhave, asādhu?
an10.178:2.2	Pāṇātipāto, adinnādānaṁ, kāmesumicchācāro, musāvādo, pisuṇā vācā, pharusā vācā, samphappalāpo, abhijjhā, byāpādo, micchādiṭṭhi—
an10.178:2.3	idaṁ vuccati, bhikkhave, asādhu.
an10.178:3.1	Katamañca, bhikkhave, sādhu?
an10.178:3.2	Pāṇātipātā veramaṇī, adinnādānā veramaṇī, kāmesumicchācārā veramaṇī, musāvādā veramaṇī, pisuṇāya vācāya veramaṇī, pharusāya vācāya veramaṇī, samphappalāpā veramaṇī, anabhijjhā, abyāpādo, sammādiṭṭhi—
an10.178:3.3	idaṁ vuccati, bhikkhave, sādhū”ti.
an10.178:3.4	Paṭhamaṁ.
an10.179:0.1	Aṅguttara Nikāya 10.179
an10.179:0.2	18. Sādhuvagga
an10.179:0.3	Ariyadhammasutta
an10.179:1.1	“Ariyadhammañca vo, bhikkhave, desessāmi anariyadhammañca.
an10.179:1.2	Taṁ suṇātha …pe…
an10.179:1.3	katamo ca, bhikkhave, anariyo dhammo?
an10.179:1.4	Pāṇātipāto …pe…
an10.179:1.5	micchādiṭṭhi—
an10.179:1.6	ayaṁ vuccati, bhikkhave, anariyo dhammo.
an10.179:2.1	Katamo ca, bhikkhave, ariyo dhammo?
an10.179:2.2	Pāṇātipātā veramaṇī …pe…
an10.179:2.3	sammādiṭṭhi—
an10.179:2.4	ayaṁ vuccati, bhikkhave, ariyo dhammo”ti.
an10.179:2.5	Dutiyaṁ.
an10.180:0.1	Aṅguttara Nikāya 10.180
an10.180:0.2	18. Sādhuvagga
an10.180:0.3	Kusalasutta
an10.180:1.1	“Kusalañca vo, bhikkhave, desessāmi akusalañca.
an10.180:1.2	Taṁ suṇātha …pe…
an10.180:1.3	katamañca, bhikkhave, akusalaṁ?
an10.180:1.4	Pāṇātipāto …pe…
an10.180:1.5	micchādiṭṭhi—
an10.180:1.6	idaṁ vuccati, bhikkhave, akusalaṁ.
an10.180:2.1	Katamañca, bhikkhave, kusalaṁ?
an10.180:2.2	Pāṇātipātā veramaṇī …pe…
an10.180:2.3	sammādiṭṭhi—
an10.180:2.4	idaṁ vuccati, bhikkhave, kusalan”ti.
an10.180:2.5	Tatiyaṁ.
an10.181:0.1	Aṅguttara Nikāya 10.181
an10.181:0.2	18. Sādhuvagga
an10.181:0.3	Atthasutta
an10.181:1.1	“Atthañca vo, bhikkhave, desessāmi anatthañca.
an10.181:1.2	Taṁ suṇātha …pe…
an10.181:1.3	katamo ca, bhikkhave, anattho?
an10.181:1.4	Pāṇātipāto …pe…
an10.181:1.5	micchādiṭṭhi—
an10.181:1.6	ayaṁ vuccati, bhikkhave, anattho.
an10.181:2.1	Katamo ca, bhikkhave, attho?
an10.181:2.2	Pāṇātipātā veramaṇī …pe…
an10.181:2.3	sammādiṭṭhi—
an10.181:2.4	ayaṁ vuccati, bhikkhave, attho”ti.
an10.181:2.5	Catutthaṁ.
an10.182:0.1	Aṅguttara Nikāya 10.182
an10.182:0.2	18. Sādhuvagga
an10.182:0.3	Dhammasutta
an10.182:1.1	“Dhammañca vo, bhikkhave, desessāmi adhammañca.
an10.182:1.2	Taṁ suṇātha …pe…
an10.182:1.3	katamo ca, bhikkhave, adhammo?
an10.182:1.4	Pāṇātipāto …pe…
an10.182:1.5	micchādiṭṭhi—
an10.182:1.6	ayaṁ vuccati, bhikkhave, adhammo.
an10.182:2.1	Katamo ca, bhikkhave, dhammo?
an10.182:2.2	Pāṇātipātā veramaṇī …pe…
an10.182:2.3	sammādiṭṭhi—
an10.182:2.4	ayaṁ vuccati, bhikkhave, dhammo”ti.
an10.182:2.5	Pañcamaṁ.
an10.183:0.1	Aṅguttara Nikāya 10.183
an10.183:0.2	18. Sādhuvagga
an10.183:0.3	Āsavasutta
an10.183:1.1	“Sāsavañca vo, bhikkhave, dhammaṁ desessāmi anāsavañca.
an10.183:1.2	Taṁ suṇātha …pe…
an10.183:1.3	katamo ca, bhikkhave, sāsavo dhammo?
an10.183:1.4	Pāṇātipāto …pe…
an10.183:1.5	micchādiṭṭhi—
an10.183:1.6	ayaṁ vuccati, bhikkhave, sāsavo dhammo.
an10.183:2.1	Katamo ca, bhikkhave, anāsavo dhammo?
an10.183:2.2	Pāṇātipātā veramaṇī …pe…
an10.183:2.3	sammādiṭṭhi—
an10.183:2.4	ayaṁ vuccati, bhikkhave, anāsavo dhammo”ti.
an10.183:2.5	Chaṭṭhaṁ.
an10.184:0.1	Aṅguttara Nikāya 10.184
an10.184:0.2	18. Sādhuvagga
an10.184:0.3	Vajjasutta
an10.184:1.1	“Sāvajjañca vo, bhikkhave, dhammaṁ desessāmi anavajjañca.
an10.184:1.2	Taṁ suṇātha …pe…
an10.184:1.3	katamo ca, bhikkhave, sāvajjo dhammo?
an10.184:1.4	Pāṇātipāto …pe…
an10.184:1.5	micchādiṭṭhi—
an10.184:1.6	ayaṁ vuccati, bhikkhave, sāvajjo dhammo.
an10.184:2.1	Katamo ca, bhikkhave, anavajjo dhammo?
an10.184:2.2	Pāṇātipātā veramaṇī …pe…
an10.184:2.3	sammādiṭṭhi—
an10.184:2.4	ayaṁ vuccati, bhikkhave, anavajjo dhammo”ti.
an10.184:2.5	Sattamaṁ.
an10.185:0.1	Aṅguttara Nikāya 10.185
an10.185:0.2	18. Sādhuvagga
an10.185:0.3	Tapanīyasutta
an10.185:1.1	“Tapanīyañca vo, bhikkhave, dhammaṁ desessāmi atapanīyañca.
an10.185:1.2	Taṁ suṇātha …pe…
an10.185:1.3	katamo ca, bhikkhave, tapanīyo dhammo?
an10.185:1.4	Pāṇātipāto …pe…
an10.185:1.5	micchādiṭṭhi—
an10.185:1.6	ayaṁ vuccati, bhikkhave, tapanīyo dhammo.
an10.185:2.1	Katamo ca, bhikkhave, atapanīyo dhammo?
an10.185:2.2	Pāṇātipātā veramaṇī …pe…
an10.185:2.3	sammādiṭṭhi—
an10.185:2.4	ayaṁ vuccati, bhikkhave, atapanīyo dhammo”ti.
an10.185:2.5	Aṭṭhamaṁ.
an10.186:0.1	Aṅguttara Nikāya 10.186
an10.186:0.2	18. Sādhuvagga
an10.186:0.3	Ācayagāmisutta
an10.186:1.1	“Ācayagāmiñca vo, bhikkhave, dhammaṁ desessāmi apacayagāmiñca.
an10.186:1.2	Taṁ suṇātha …pe…
an10.186:1.3	katamo ca, bhikkhave, ācayagāmī dhammo?
an10.186:1.4	Pāṇātipāto …pe…
an10.186:1.5	micchādiṭṭhi—
an10.186:1.6	ayaṁ vuccati, bhikkhave, ācayagāmī dhammo.
an10.186:2.1	Katamo ca, bhikkhave, apacayagāmī dhammo?
an10.186:2.2	Pāṇātipātā veramaṇī …pe…
an10.186:2.3	sammādiṭṭhi—
an10.186:2.4	ayaṁ vuccati, bhikkhave, apacayagāmī dhammo”ti.
an10.186:2.5	Navamaṁ.
an10.187:0.1	Aṅguttara Nikāya 10.187
an10.187:0.2	18. Sādhuvagga
an10.187:0.3	Dukkhudrayasutta
an10.187:1.1	“Dukkhudrayañca vo, bhikkhave, dhammaṁ desessāmi sukhudrayañca.
an10.187:1.2	Taṁ suṇātha …pe…
an10.187:1.3	katamo ca, bhikkhave, dukkhudrayo dhammo?
an10.187:1.4	Pāṇātipāto …pe…
an10.187:1.5	micchādiṭṭhi—
an10.187:1.6	ayaṁ vuccati, bhikkhave, dukkhudrayo dhammo.
an10.187:2.1	Katamo ca, bhikkhave, sukhudrayo dhammo?
an10.187:2.2	Pāṇātipātā veramaṇī …pe…
an10.187:2.3	sammādiṭṭhi—
an10.187:2.4	ayaṁ vuccati, bhikkhave, sukhudrayo dhammo”ti.
an10.187:2.5	Dasamaṁ.
an10.188:0.1	Aṅguttara Nikāya 10.188
an10.188:0.2	18. Sādhuvagga
an10.188:0.3	Vipākasutta
an10.188:1.1	“Dukkhavipākañca vo, bhikkhave, dhammaṁ desessāmi sukhavipākañca.
an10.188:1.2	Taṁ suṇātha …pe…
an10.188:1.3	katamo ca, bhikkhave, dukkhavipāko dhammo?
an10.188:1.4	Pāṇātipāto …pe…
an10.188:1.5	micchādiṭṭhi—
an10.188:1.6	ayaṁ vuccati, bhikkhave, dukkhavipāko dhammo.
an10.188:2.1	Katamo ca, bhikkhave, sukhavipāko dhammo?
an10.188:2.2	Pāṇātipātā veramaṇī …pe…
an10.188:2.3	sammādiṭṭhi—
an10.188:2.4	ayaṁ vuccati, bhikkhave, sukhavipāko dhammo”ti.
an10.188:2.5	Ekādasamaṁ.
an10.188:2.6	Sādhuvaggo tatiyo.
an10.189:0.1	Aṅguttara Nikāya 10.189
an10.189:0.2	19. Ariyamaggavagga
an10.189:0.3	Ariyamaggasutta
an10.189:1.1	“Ariyamaggañca vo, bhikkhave, desessāmi anariyamaggañca.
an10.189:1.2	Taṁ suṇātha …pe…
an10.189:1.3	katamo ca, bhikkhave, anariyo maggo?
an10.189:1.4	Pāṇātipāto …pe…
an10.189:1.5	micchādiṭṭhi—
an10.189:1.6	ayaṁ vuccati, bhikkhave, anariyo maggo.
an10.189:2.1	Katamo ca, bhikkhave, ariyo maggo?
an10.189:2.2	Pāṇātipātā veramaṇī …pe…
an10.189:2.3	sammādiṭṭhi—
an10.189:2.4	ayaṁ vuccati, bhikkhave, ariyo maggo”ti.
an10.189:2.5	Paṭhamaṁ.
an10.190:0.1	Aṅguttara Nikāya 10.190
an10.190:0.2	19. Ariyamaggavagga
an10.190:0.3	Kaṇhamaggasutta
an10.190:1.1	“Kaṇhamaggañca vo, bhikkhave, desessāmi sukkamaggañca.
an10.190:1.2	Taṁ suṇātha …pe…
an10.190:1.3	katamo ca, bhikkhave, kaṇho maggo?
an10.190:1.4	Pāṇātipāto …pe…
an10.190:1.5	micchādiṭṭhi—
an10.190:1.6	ayaṁ vuccati, bhikkhave, kaṇho maggo.
an10.190:2.1	Katamo ca, bhikkhave, sukko maggo?
an10.190:2.2	Pāṇātipātā veramaṇī …pe…
an10.190:2.3	sammādiṭṭhi—
an10.190:2.4	ayaṁ vuccati, bhikkhave, sukko maggo”ti.
an10.190:2.5	Dutiyaṁ.
an10.191:0.1	Aṅguttara Nikāya 10.191
an10.191:0.2	19. Ariyamaggavagga
an10.191:0.3	Saddhammasutta
an10.191:1.1	“Saddhammañca vo, bhikkhave, desessāmi asaddhammañca.
an10.191:1.2	Taṁ suṇātha …pe…
an10.191:1.3	katamo ca, bhikkhave, asaddhammo?
an10.191:1.4	Pāṇātipāto …pe…
an10.191:1.5	micchādiṭṭhi—
an10.191:1.6	ayaṁ vuccati, bhikkhave, asaddhammo.
an10.191:2.1	Katamo ca, bhikkhave, saddhammo?
an10.191:2.2	Pāṇātipātā veramaṇī …pe…
an10.191:2.3	sammādiṭṭhi—
an10.191:2.4	ayaṁ vuccati, bhikkhave, saddhammo”ti.
an10.191:2.5	Tatiyaṁ.
an10.192:0.1	Aṅguttara Nikāya 10.192
an10.192:0.2	19. Ariyamaggavagga
an10.192:0.3	Sappurisadhammasutta
an10.192:1.1	“Sappurisadhammañca vo, bhikkhave, desessāmi asappurisadhammañca.
an10.192:1.2	Taṁ suṇātha …pe…
an10.192:1.3	katamo ca, bhikkhave, asappurisadhammo?
an10.192:1.4	Pāṇātipāto …pe…
an10.192:1.5	micchādiṭṭhi—
an10.192:1.6	ayaṁ vuccati, bhikkhave, asappurisadhammo.
an10.192:2.1	Katamo ca, bhikkhave, sappurisadhammo?
an10.192:2.2	Pāṇātipātā veramaṇī …pe…
an10.192:2.3	sammādiṭṭhi—
an10.192:2.4	ayaṁ vuccati, bhikkhave, sappurisadhammo”ti.
an10.192:2.5	Catutthaṁ.
an10.193:0.1	Aṅguttara Nikāya 10.193
an10.193:0.2	19. Ariyamaggavagga
an10.193:0.3	Uppādetabbadhammasutta
an10.193:1.1	“Uppādetabbañca vo, bhikkhave, dhammaṁ desessāmi na uppādetabbañca.
an10.193:1.2	Taṁ suṇātha …pe…
an10.193:1.3	katamo ca, bhikkhave, na uppādetabbo dhammo?
an10.193:1.4	Pāṇātipāto …pe…
an10.193:1.5	micchādiṭṭhi—
an10.193:1.6	ayaṁ vuccati, bhikkhave, na uppādetabbo dhammo.
an10.193:2.1	Katamo ca, bhikkhave, uppādetabbo dhammo?
an10.193:2.2	Pāṇātipātā veramaṇī …pe…
an10.193:2.3	sammādiṭṭhi—
an10.193:2.4	ayaṁ vuccati, bhikkhave, uppādetabbo dhammo”ti.
an10.193:2.5	Pañcamaṁ.
an10.194:0.1	Aṅguttara Nikāya 10.194
an10.194:0.2	19. Ariyamaggavagga
an10.194:0.3	Āsevitabbadhammasutta
an10.194:1.1	“Āsevitabbañca vo, bhikkhave, dhammaṁ desessāmi nāsevitabbañca.
an10.194:1.2	Taṁ suṇātha …pe…
an10.194:1.3	katamo ca, bhikkhave, nāsevitabbo dhammo?
an10.194:1.4	Pāṇātipāto …pe…
an10.194:1.5	micchādiṭṭhi—
an10.194:1.6	ayaṁ vuccati, bhikkhave, nāsevitabbo dhammo.
an10.194:2.1	Katamo ca, bhikkhave, āsevitabbo dhammo?
an10.194:2.2	Pāṇātipātā veramaṇī …pe…
an10.194:2.3	sammādiṭṭhi—
an10.194:2.4	ayaṁ vuccati, bhikkhave, āsevitabbo dhammo”ti.
an10.194:2.5	Chaṭṭhaṁ.
an10.195:0.1	Aṅguttara Nikāya 10.195
an10.195:0.2	19. Ariyamaggavagga
an10.195:0.3	Bhāvetabbadhammasutta
an10.195:1.1	“Bhāvetabbañca vo, bhikkhave, dhammaṁ desessāmi na bhāvetabbañca.
an10.195:1.2	Taṁ suṇātha …pe…
an10.195:1.3	katamo ca, bhikkhave, na bhāvetabbo dhammo?
an10.195:1.4	Pāṇātipāto …pe…
an10.195:1.5	micchādiṭṭhi—
an10.195:1.6	ayaṁ vuccati, bhikkhave, na bhāvetabbo dhammo.
an10.195:2.1	Katamo ca, bhikkhave, bhāvetabbo dhammo?
an10.195:2.2	Pāṇātipātā veramaṇī …pe…
an10.195:2.3	sammādiṭṭhi—
an10.195:2.4	ayaṁ vuccati, bhikkhave, bhāvetabbo dhammo”ti.
an10.195:2.5	Sattamaṁ.
an10.196:0.1	Aṅguttara Nikāya 10.196
an10.196:0.2	19. Ariyamaggavagga
an10.196:0.3	Bahulīkātabbasutta
an10.196:1.1	“Bahulīkātabbañca vo, bhikkhave, dhammaṁ desessāmi na bahulīkātabbañca.
an10.196:1.2	Taṁ suṇātha …pe…
an10.196:1.3	katamo ca, bhikkhave, na bahulīkātabbo dhammo?
an10.196:1.4	Pāṇātipāto …pe…
an10.196:1.5	micchādiṭṭhi—
an10.196:1.6	ayaṁ vuccati, bhikkhave, na bahulīkātabbo dhammo.
an10.196:2.1	Katamo ca, bhikkhave, bahulīkātabbo dhammo?
an10.196:2.2	Pāṇātipātā veramaṇī …pe…
an10.196:2.3	sammādiṭṭhi—
an10.196:2.4	ayaṁ vuccati, bhikkhave, bahulīkātabbo dhammo”ti.
an10.196:2.5	Aṭṭhamaṁ.
an10.197:0.1	Aṅguttara Nikāya 10.197
an10.197:0.2	19. Ariyamaggavagga
an10.197:0.3	Anussaritabbasutta
an10.197:1.1	“Anussaritabbañca vo, bhikkhave, dhammaṁ desessāmi nānussaritabbañca.
an10.197:1.2	Taṁ suṇātha …pe…
an10.197:1.3	katamo ca, bhikkhave, nānussaritabbo dhammo?
an10.197:1.4	Pāṇātipāto …pe…
an10.197:1.5	micchādiṭṭhi—
an10.197:1.6	ayaṁ vuccati, bhikkhave, nānussaritabbo dhammo.
an10.197:2.1	Katamo ca, bhikkhave, anussaritabbo dhammo?
an10.197:2.2	Pāṇātipātā veramaṇī …pe…
an10.197:2.3	sammādiṭṭhi—
an10.197:2.4	ayaṁ vuccati, bhikkhave, anussaritabbo dhammo”ti.
an10.197:2.5	Navamaṁ.
an10.198:0.1	Aṅguttara Nikāya 10.198
an10.198:0.2	19. Ariyamaggavagga
an10.198:0.3	Sacchikātabbasutta
an10.198:1.1	“Sacchikātabbañca vo, bhikkhave, dhammaṁ desessāmi na sacchikātabbañca.
an10.198:1.2	Taṁ suṇātha …pe…
an10.198:1.3	katamo ca, bhikkhave, na sacchikātabbo dhammo?
an10.198:1.4	Pāṇātipāto …pe…
an10.198:1.5	micchādiṭṭhi—
an10.198:1.6	ayaṁ vuccati, bhikkhave, na sacchikātabbo dhammo.
an10.198:2.1	Katamo ca, bhikkhave, sacchikātabbo dhammo?
an10.198:2.2	Pāṇātipātā veramaṇī …pe…
an10.198:2.3	sammādiṭṭhi—
an10.198:2.4	ayaṁ vuccati, bhikkhave, sacchikātabbo dhammo”ti.
an10.198:2.5	Dasamaṁ.
an10.198:2.6	Ariyamaggavaggo catuttho.
an10.199-210:0.1	Aṅguttara Nikāya 10.199–210
an10.199-210:0.2	20. Aparapuggalavagga
an10.199-210:0.3	Nasevitabbādisutta
an10.199-210:1.1	“Dasahi, bhikkhave, dhammehi samannāgato puggalo na sevitabbo.
an10.199-210:1.2	Katamehi dasahi?
an10.199-210:1.3	Pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhiko hoti—
an10.199-210:1.4	imehi kho, bhikkhave, dasahi dhammehi samannāgato puggalo na sevitabbo.
an10.199-210:2.1	Dasahi, bhikkhave, dhammehi samannāgato puggalo sevitabbo.
an10.199-210:2.2	Katamehi dasahi?
an10.199-210:2.3	Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhiko hoti—
an10.199-210:2.4	imehi kho, bhikkhave, dasahi dhammehi samannāgato puggalo sevitabbo.
an10.199-210:3.1	Dasahi, bhikkhave, dhammehi samannāgato puggalo na bhajitabbo …pe…
an10.199-210:3.2	bhajitabbo …
an10.199-210:3.3	na payirupāsitabbo …
an10.199-210:3.4	payirupāsitabbo …
an10.199-210:3.5	na pujjo hoti …
an10.199-210:3.6	pujjo hoti …
an10.199-210:3.7	na pāsaṁso hoti …
an10.199-210:3.8	pāsaṁso hoti …
an10.199-210:3.9	agāravo hoti …
an10.199-210:3.10	gāravo hoti …
an10.199-210:3.11	appatisso hoti …
an10.199-210:3.12	sappatisso hoti …
an10.199-210:3.13	na ārādhako hoti …
an10.199-210:3.14	ārādhako hoti …
an10.199-210:3.15	na visujjhati …
an10.199-210:3.16	visujjhati …
an10.199-210:3.17	mānaṁ nādhibhoti …
an10.199-210:3.18	mānaṁ adhibhoti …
an10.199-210:3.19	paññāya na vaḍḍhati …
an10.199-210:3.20	paññāya vaḍḍhati …pe….
an10.199-210:4.1	Dasahi, bhikkhave, dhammehi samannāgato puggalo bahuṁ apuññaṁ pasavati …
an10.199-210:4.2	bahuṁ puññaṁ pasavati.
an10.199-210:4.3	Katamehi dasahi?
an10.199-210:4.4	Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhiko hoti—
an10.199-210:4.5	imehi kho, bhikkhave, dasahi dhammehi samannāgato puggalo bahuṁ puññaṁ pasavatī”ti.
an10.199-210:4.6	Aparapuggalavaggo pañcamo.
an10.199-210:4.7	Catuttho paṇṇāsako samatto.
an10.211:0.1	Aṅguttara Nikāya 10.211
an10.211:0.2	21. Karajakāyavagga
an10.211:0.3	Paṭhamanirayasaggasutta
an10.211:1.1	“Dasahi, bhikkhave, dhammehi samannāgato yathābhataṁ nikkhitto evaṁ niraye.
an10.211:1.2	Katamehi dasahi?
an10.211:1.3	Idha, bhikkhave, ekacco pāṇātipātī hoti, luddo lohitapāṇi hatapahate niviṭṭho adayāpanno sabbapāṇabhūtesu.
an10.211:2.1	Adinnādāyī hoti, yaṁ taṁ parassa paravittūpakaraṇaṁ gāmagataṁ vā araññagataṁ vā, taṁ adinnaṁ theyyasaṅkhātaṁ ādātā hoti.
an10.211:3.1	Kāmesu micchācārī hoti, yā tā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sasāmikā saparidaṇḍā antamaso mālāguḷaparikkhittāpi, tathārūpāsu cārittaṁ āpajjitā hoti.
an10.211:4.1	Musāvādī hoti, sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho: ‘ehambho purisa, yaṁ jānāsi taṁ vadehī’ti, so ajānaṁ vā āha: ‘jānāmī’ti, jānaṁ vā āha: ‘na jānāmī’ti, apassaṁ vā āha: ‘passāmī’ti, passaṁ vā āha: ‘na passāmī’ti. Iti attahetu vā parahetu vā āmisakiñcikkhahetu vā sampajānamusā bhāsitā hoti.
an10.211:5.1	Pisuṇavāco hoti, ito sutvā amutra akkhātā imesaṁ bhedāya, amutra vā sutvā imesaṁ akkhātā amūsaṁ bhedāya. Iti samaggānaṁ vā bhettā bhinnānaṁ vā anuppadātā vaggārāmo vaggarato vagganandī, vaggakaraṇiṁ vācaṁ bhāsitā hoti.
an10.211:6.1	Pharusavāco hoti, yā sā vācā aṇḍakā kakkasā parakaṭukā parābhisajjanī kodhasāmantā asamādhisaṁvattanikā, tathārūpiṁ vācaṁ bhāsitā hoti.
an10.211:7.1	Samphappalāpī hoti, akālavādī abhūtavādī anatthavādī adhammavādī avinayavādī, anidhānavatiṁ vācaṁ bhāsitā hoti akālena anapadesaṁ apariyantavatiṁ anatthasaṁhitaṁ.
an10.211:8.1	Abhijjhālu hoti, yaṁ taṁ parassa paravittūpakaraṇaṁ taṁ abhijjhātā hoti: ‘aho vata yaṁ parassa taṁ mama assā’ti.
an10.211:9.1	Byāpannacitto hoti, paduṭṭhamanasaṅkappo: ‘ime sattā haññantu vā bajjhantu vā ucchijjantu vā vinassantu vā mā vā ahesun’ti.
an10.211:10.1	Micchādiṭṭhiko hoti, viparītadassano:
an10.211:11.1	‘natthi dinnaṁ, natthi yiṭṭhaṁ, natthi hutaṁ, natthi sukatadukkaṭānaṁ kammānaṁ phalaṁ vipāko, natthi ayaṁ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.
an10.211:11.2	Imehi kho, bhikkhave, dasahi dhammehi samannāgato yathābhataṁ nikkhitto evaṁ niraye.
an10.211:12.1	Dasahi, bhikkhave, dhammehi samannāgato yathābhataṁ nikkhitto evaṁ sagge.
an10.211:12.2	Katamehi dasahi?
an10.211:12.3	Idha, bhikkhave, ekacco pāṇātipātaṁ pahāya pāṇātipātā paṭivirato hoti nihitadaṇḍo nihitasattho lajjī dayāpanno, sabbapāṇabhūtahitānukampī viharati.
an10.211:13.1	Adinnādānaṁ pahāya adinnādānā paṭivirato hoti. Yaṁ taṁ parassa paravittūpakaraṇaṁ gāmagataṁ vā araññagataṁ vā, na taṁ adinnaṁ theyyasaṅkhātaṁ ādātā hoti.
an10.211:14.1	Kāmesumicchācāraṁ pahāya kāmesumicchācārā paṭivirato hoti. Yā tā māturakkhitā …pe… antamaso mālāguḷaparikkhittāpi, tathārūpāsu na cārittaṁ āpajjitā hoti.
an10.211:15.1	Musāvādaṁ pahāya musāvādā paṭivirato hoti. Sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho: ‘ehambho purisa, yaṁ jānāsi taṁ vadehī’ti, so ajānaṁ vā āha: ‘na jānāmī’ti, jānaṁ vā āha: ‘jānāmī’ti, apassaṁ vā āha: ‘na passāmī’ti, passaṁ vā āha: ‘passāmī’ti. Iti attahetu vā parahetu vā āmisakiñcikkhahetu vā na sampajānamusā bhāsitā hoti.
an10.211:16.1	Pisuṇavācaṁ pahāya pisuṇāya vācāya paṭivirato hoti—na ito sutvā amutra akkhātā imesaṁ bhedāya, amutra vā sutvā imesaṁ akkhātā amūsaṁ bhedāya. Iti bhinnānaṁ vā sandhātā sahitānaṁ vā anuppadātā samaggārāmo samaggarato samagganandī, samaggakaraṇiṁ vācaṁ bhāsitā hoti.
an10.211:17.1	Pharusavācaṁ pahāya pharusāya vācāya paṭivirato hoti. Yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā, tathārūpiṁ vācaṁ bhāsitā hoti.
an10.211:18.1	Samphappalāpaṁ pahāya samphappalāpā paṭivirato hoti kālavādī bhūtavādī, atthavādī dhammavādī vinayavādī, nidhānavatiṁ vācaṁ bhāsitā hoti kālena sāpadesaṁ pariyantavatiṁ atthasaṁhitaṁ.
an10.211:19.1	Anabhijjhālu hoti. Yaṁ taṁ parassa paravittūpakaraṇaṁ taṁ anabhijjhātā hoti: ‘aho vata yaṁ parassa taṁ mama assā’ti.
an10.211:20.1	Abyāpannacitto hoti appaduṭṭhamanasaṅkappo: ‘ime sattā averā hontu abyāpajjā anīghā, sukhī attānaṁ pariharantū’ti.
an10.211:21.1	Sammādiṭṭhiko hoti aviparītadassano:
an10.211:21.2	‘atthi dinnaṁ, atthi yiṭṭhaṁ, atthi hutaṁ, atthi sukaṭadukkaṭānaṁ kammānaṁ phalaṁ vipāko, atthi ayaṁ loko, atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.
an10.211:22.1	Imehi kho, bhikkhave, dasahi dhammehi samannāgato yathābhataṁ nikkhitto evaṁ sagge”ti.
an10.211:22.2	Paṭhamaṁ.
an10.212:0.1	Aṅguttara Nikāya 10.212
an10.212:0.2	21. Karajakāyavagga
an10.212:0.3	Dutiyanirayasaggasutta
an10.212:1.1	“Dasahi, bhikkhave, dhammehi samannāgato yathābhataṁ nikkhitto evaṁ niraye.
an10.212:1.2	Katamehi dasahi?
an10.212:1.3	Idha, bhikkhave, ekacco pāṇātipātī hoti luddo lohitapāṇi hatapahate niviṭṭho adayāpanno sabbapāṇabhūtesu.
an10.212:2.1	Adinnādāyī hoti …
an10.212:2.2	kāmesumicchācārī hoti …
an10.212:2.3	musāvādī hoti …
an10.212:2.4	pisuṇavāco hoti …
an10.212:2.5	pharusavāco hoti …
an10.212:2.6	samphappalāpī hoti …
an10.212:2.7	abhijjhālu hoti …
an10.212:2.8	byāpannacitto hoti …
an10.212:2.9	micchādiṭṭhiko hoti viparītadassano:
an10.212:2.10	‘natthi dinnaṁ …pe…
an10.212:2.11	sayaṁ abhiññā sacchikatvā pavedentī’ti.
an10.212:2.12	Imehi kho, bhikkhave, dasahi dhammehi samannāgato yathābhataṁ nikkhitto evaṁ niraye.
an10.212:3.1	Dasahi, bhikkhave, dhammehi samannāgato yathābhataṁ nikkhitto evaṁ sagge.
an10.212:3.2	Katamehi dasahi?
an10.212:3.3	Idha, bhikkhave, ekacco pāṇātipātaṁ pahāya pāṇātipātā paṭivirato hoti nihitadaṇḍo nihitasattho lajjī dayāpanno, sabbapāṇabhūtahitānukampī viharati.
an10.212:4.1	Adinnādānaṁ pahāya adinnādānā paṭivirato hoti …
an10.212:4.2	kāmesumicchācāraṁ pahāya kāmesumicchācārā paṭivirato hoti …
an10.212:4.3	musāvādaṁ pahāya musāvādā paṭivirato hoti …
an10.212:4.4	pisuṇaṁ vācaṁ pahāya pisuṇāya vācāya paṭivirato hoti …
an10.212:4.5	pharusaṁ vācaṁ pahāya pharusāya vācāya paṭivirato hoti …
an10.212:4.6	samphappalāpaṁ pahāya samphappalāpā paṭivirato hoti …
an10.212:4.7	anabhijjhālu hoti …
an10.212:4.8	abyāpannacitto hoti …
an10.212:4.9	sammādiṭṭhiko hoti aviparītadassano:
an10.212:4.10	‘atthi dinnaṁ …pe… ye imañca lokaṁ parañca lokaṁ sayaṁ abhiññā sacchikatvā pavedentī’ti.
an10.212:4.11	Imehi kho, bhikkhave, dasahi dhammehi samannāgato yathābhataṁ nikkhitto evaṁ sagge”ti.
an10.212:4.12	Dutiyaṁ.
an10.213:0.1	Aṅguttara Nikāya 10.213
an10.213:0.2	21. Karajakāyavagga
an10.213:0.3	Mātugāmasutta
an10.213:1.1	“Dasahi, bhikkhave, dhammehi samannāgato mātugāmo yathābhataṁ nikkhitto evaṁ niraye.
an10.213:1.2	Katamehi dasahi?
an10.213:1.3	Pāṇātipātī hoti …pe…
an10.213:1.4	adinnādāyī hoti …
an10.213:1.5	kāmesumicchācārī hoti …
an10.213:1.6	musāvādī hoti …
an10.213:1.7	pisuṇavāco hoti …
an10.213:1.8	pharusavāco hoti …
an10.213:1.9	samphappalāpī hoti …
an10.213:1.10	abhijjhālu hoti …
an10.213:1.11	byāpannacitto hoti …
an10.213:1.12	micchādiṭṭhiko hoti ….
an10.213:1.13	Imehi kho, bhikkhave, dasahi dhammehi samannāgato mātugāmo yathābhataṁ nikkhitto evaṁ niraye.
an10.213:2.1	Dasahi, bhikkhave, dhammehi samannāgato mātugāmo yathābhataṁ nikkhitto evaṁ sagge.
an10.213:2.2	Katamehi dasahi?
an10.213:2.3	Pāṇātipātā paṭivirato hoti …pe…
an10.213:2.4	adinnādānā paṭivirato hoti …
an10.213:2.5	kāmesumicchācārā paṭivirato hoti …
an10.213:2.6	musāvādā paṭivirato hoti …
an10.213:2.7	pisuṇāya vācāya paṭivirato hoti …
an10.213:2.8	pharusāya vācāya paṭivirato hoti …
an10.213:2.9	samphappalāpā paṭivirato hoti …
an10.213:2.10	anabhijjhālu hoti …
an10.213:2.11	abyāpannacitto hoti …
an10.213:2.12	sammādiṭṭhiko hoti ….
an10.213:2.13	Imehi kho, bhikkhave, dasahi dhammehi samannāgato mātugāmo yathābhataṁ nikkhitto evaṁ sagge”ti.
an10.213:2.14	Tatiyaṁ.
an10.214:0.1	Aṅguttara Nikāya 10.214
an10.214:0.2	21. Karajakāyavagga
an10.214:0.3	Upāsikāsutta
an10.214:1.1	“Dasahi, bhikkhave, dhammehi samannāgatā upāsikā yathābhataṁ nikkhittā evaṁ niraye.
an10.214:1.2	Katamehi dasahi?
an10.214:1.3	Pāṇātipātinī hoti …pe…
an10.214:1.4	micchādiṭṭhikā hoti ….
an10.214:1.5	Imehi kho, bhikkhave, dasahi dhammehi samannāgatā upāsikā yathābhataṁ nikkhittā evaṁ niraye.
an10.214:2.1	Dasahi, bhikkhave, dhammehi samannāgatā upāsikā yathābhataṁ nikkhittā evaṁ sagge.
an10.214:2.2	Katamehi dasahi?
an10.214:2.3	Pāṇātipātā paṭiviratā hoti …pe…
an10.214:2.4	sammādiṭṭhikā hoti ….
an10.214:2.5	Imehi kho, bhikkhave, dasahi dhammehi samannāgatā upāsikā yathābhataṁ nikkhittā evaṁ sagge”.
an10.214:2.6	Catutthaṁ.
an10.215:0.1	Aṅguttara Nikāya 10.215
an10.215:0.2	21. Karajakāyavagga
an10.215:0.3	Visāradasutta
an10.215:1.1	“Dasahi, bhikkhave, dhammehi samannāgatā upāsikā avisāradā agāraṁ ajjhāvasati.
an10.215:1.2	Katamehi dasahi?
an10.215:1.3	Pāṇātipātinī hoti …
an10.215:1.4	adinnādāyinī hoti …
an10.215:1.5	kāmesumicchācārinī hoti …
an10.215:1.6	musāvādinī hoti …
an10.215:1.7	pisuṇavācā hoti …
an10.215:1.8	pharusavācā hoti …
an10.215:1.9	samphappalāpinī hoti …
an10.215:1.10	abhijjhālunī hoti …
an10.215:1.11	byāpannacittā hoti …
an10.215:1.12	micchādiṭṭhikā hoti ….
an10.215:1.13	Imehi kho, bhikkhave, dasahi dhammehi samannāgatā upāsikā avisāradā agāraṁ ajjhāvasati.
an10.215:2.1	Dasahi, bhikkhave, dhammehi samannāgatā upāsikā visāradā agāraṁ ajjhāvasati.
an10.215:2.2	Katamehi dasahi?
an10.215:2.3	Pāṇātipātā paṭiviratā hoti …
an10.215:2.4	adinnādānā paṭiviratā hoti …
an10.215:2.5	kāmesumicchācārā paṭiviratā hoti …
an10.215:2.6	musāvādā paṭiviratā hoti …
an10.215:2.7	pisuṇāya vācāya paṭiviratā hoti …
an10.215:2.8	pharusāya vācāya paṭiviratā hoti …
an10.215:2.9	samphappalāpā paṭiviratā hoti …
an10.215:2.10	anabhijjhālunī hoti …
an10.215:2.11	abyāpannacittā hoti …
an10.215:2.12	sammādiṭṭhikā hoti ….
an10.215:2.13	Imehi kho, bhikkhave, dasahi dhammehi samannāgatā upāsikā visāradā agāraṁ ajjhāvasatī”ti.
an10.215:2.14	Pañcamaṁ.
an10.216:0.1	Aṅguttara Nikāya 10.216
an10.216:0.2	21. Karajakāyavagga
an10.216:0.3	Saṁsappanīyasutta
an10.216:1.1	“Saṁsappanīyapariyāyaṁ vo, bhikkhave, dhammapariyāyaṁ desessāmi.
an10.216:1.2	Taṁ suṇātha, sādhukaṁ manasi karotha, bhāsissāmī”ti.
an10.216:1.3	“Evaṁ, bhante”ti kho te bhikkhū bhagavato paccassosuṁ.
an10.216:1.4	Bhagavā etadavoca:
an10.216:2.1	“Katamo ca, bhikkhave, saṁsappanīyapariyāyo dhammapariyāyo?
an10.216:2.2	Kammassakā, bhikkhave, sattā kammadāyādā kammayonī kammabandhū kammapaṭisaraṇā, yaṁ kammaṁ karonti—
an10.216:2.3	kalyāṇaṁ vā pāpakaṁ vā—tassa dāyādā bhavanti.
an10.216:3.1	Idha, bhikkhave, ekacco pāṇātipātī hoti luddo lohitapāṇi hatapahate niviṭṭho, adayāpanno sabbapāṇabhūtesu.
an10.216:3.2	So saṁsappati kāyena, saṁsappati vācāya, saṁsappati manasā.
an10.216:3.3	Tassa jimhaṁ kāyakammaṁ hoti, jimhaṁ vacīkammaṁ, jimhaṁ manokammaṁ, jimhā gati, jimhupapatti.
an10.216:4.1	Jimhagatikassa kho panāhaṁ, bhikkhave, jimhupapattikassa dvinnaṁ gatīnaṁ aññataraṁ gatiṁ vadāmi—
an10.216:4.2	ye vā ekantadukkhā nirayā yā vā saṁsappajātikā tiracchānayoni.
an10.216:4.3	Katamā ca sā, bhikkhave, saṁsappajātikā tiracchānayoni?
an10.216:4.4	Ahi vicchikā satapadī nakulā biḷārā mūsikā ulūkā, ye vā panaññepi keci tiracchānayonikā sattā manusse disvā saṁsappanti.
an10.216:4.5	Iti kho, bhikkhave, bhūtā bhūtassa upapatti hoti.
an10.216:4.6	Yaṁ karoti tena upapajjati.
an10.216:4.7	Upapannamenaṁ phassā phusanti.
an10.216:4.8	Evamahaṁ, bhikkhave, ‘kammadāyādā sattā’ti vadāmi.
an10.216:5.1	Idha pana, bhikkhave, ekacco adinnādāyī hoti …pe…
an10.216:5.2	kāmesumicchācārī hoti …
an10.216:5.3	musāvādī hoti …
an10.216:5.4	pisuṇavāco hoti …
an10.216:5.5	pharusavāco hoti …
an10.216:5.6	samphappalāpī hoti …
an10.216:5.7	abhijjhālu hoti …
an10.216:5.8	byāpannacitto hoti …
an10.216:5.9	micchādiṭṭhiko hoti viparītadassano:
an10.216:5.10	‘natthi dinnaṁ …pe…
an10.216:5.11	sayaṁ abhiññā sacchikatvā pavedentī’ti.
an10.216:5.12	So saṁsappati kāyena, saṁsappati vācāya, saṁsappati manasā.
an10.216:5.13	Tassa jimhaṁ kāyakammaṁ hoti, jimhaṁ vacīkammaṁ, jimhaṁ manokammaṁ, jimhā gati, jimhupapatti.
an10.216:6.1	Jimhagatikassa kho panāhaṁ, bhikkhave, jimhupapattikassa dvinnaṁ gatīnaṁ aññataraṁ gatiṁ vadāmi—
an10.216:6.2	ye vā ekantadukkhā nirayā yā vā saṁsappajātikā tiracchānayoni.
an10.216:6.3	Katamā ca sā, bhikkhave, saṁsappajātikā tiracchānayoni?
an10.216:6.4	Ahi vicchikā satapadī nakulā biḷārā mūsikā ulūkā, ye vā panaññepi keci tiracchānayonikā sattā manusse disvā saṁsappanti.
an10.216:6.5	Iti kho, bhikkhave, bhūtā bhūtassa upapatti hoti,
an10.216:6.6	yaṁ karoti tena upapajjati.
an10.216:6.7	Upapannamenaṁ phassā phusanti.
an10.216:6.8	Evamahaṁ, bhikkhave, ‘kammadāyādā sattā’ti vadāmi.
an10.216:6.9	Kammassakā, bhikkhave, sattā kammadāyādā kammayonī kammabandhū kammapaṭisaraṇā, yaṁ kammaṁ karonti—
an10.216:6.10	kalyāṇaṁ vā pāpakaṁ vā—tassa dāyādā bhavanti.
an10.216:7.1	Idha, bhikkhave, ekacco pāṇātipātaṁ pahāya pāṇātipātā paṭivirato hoti nihitadaṇḍo nihitasattho, lajjī dayāpanno sabbapāṇabhūtahitānukampī viharati.
an10.216:7.2	So na saṁsappati kāyena, na saṁsappati vācāya, na saṁsappati manasā.
an10.216:7.3	Tassa uju kāyakammaṁ hoti, uju vacīkammaṁ, uju manokammaṁ, uju gati, ujupapatti.
an10.216:8.1	Ujugatikassa kho panāhaṁ, bhikkhave, ujupapattikassa dvinnaṁ gatīnaṁ aññataraṁ gatiṁ vadāmi—
an10.216:8.2	ye vā ekantasukhā saggā yāni vā pana tāni uccākulāni khattiyamahāsālakulāni vā brāhmaṇamahāsālakulāni vā gahapatimahāsālakulāni vā aḍḍhāni mahaddhanāni mahābhogāni pahūtajātarūparajatāni pahūtavittūpakaraṇāni pahūtadhanadhaññāni.
an10.216:8.3	Iti kho, bhikkhave, bhūtā bhūtassa upapatti hoti.
an10.216:8.4	Yaṁ karoti tena upapajjati.
an10.216:8.5	Upapannamenaṁ phassā phusanti.
an10.216:8.6	Evamahaṁ, bhikkhave, ‘kammadāyādā sattā’ti vadāmi.
an10.216:9.1	Idha pana, bhikkhave, ekacco adinnādānaṁ pahāya adinnādānā paṭivirato hoti …pe…
an10.216:9.2	kāmesumicchācārā paṭivirato hoti …
an10.216:9.3	musāvādaṁ pahāya musāvādā paṭivirato hoti …
an10.216:9.4	pisuṇaṁ vācaṁ pahāya pisuṇāya vācāya paṭivirato hoti …
an10.216:9.5	pharusaṁ vācaṁ pahāya pharusāya vācāya paṭivirato hoti …
an10.216:9.6	samphappalāpaṁ pahāya samphappalāpā paṭivirato hoti …
an10.216:9.7	anabhijjhālu hoti …
an10.216:9.8	abyāpannacitto hoti …
an10.216:9.9	sammādiṭṭhiko hoti aviparītadassano:
an10.216:9.10	‘atthi dinnaṁ …pe…
an10.216:9.11	ye imañca lokaṁ parañca lokaṁ sayaṁ abhiññā sacchikatvā pavedentī’ti.
an10.216:9.12	So na saṁsappati kāyena, na saṁsappati vācāya, na saṁsappati manasā.
an10.216:9.13	Tassa uju kāyakammaṁ hoti, uju vacīkammaṁ, uju manokammaṁ, uju gati, ujupapatti.
an10.216:10.1	Ujugatikassa kho pana ahaṁ, bhikkhave, ujupapattikassa dvinnaṁ gatīnaṁ aññataraṁ gatiṁ vadāmi—
an10.216:10.2	ye vā ekantasukhā saggā yāni vā pana tāni uccākulāni khattiyamahāsālakulāni vā brāhmaṇamahāsālakulāni vā gahapatimahāsālakulāni vā aḍḍhāni mahaddhanāni mahābhogāni pahūtajātarūparajatāni pahūtavittūpakaraṇāni pahūtadhanadhaññāni.
an10.216:10.3	Iti kho, bhikkhave, bhūtā bhūtassa upapatti hoti.
an10.216:10.4	Yaṁ karoti tena upapajjati.
an10.216:10.5	Upapannamenaṁ phassā phusanti.
an10.216:10.6	Evamahaṁ, bhikkhave, ‘kammadāyādā sattā’ti vadāmi.
an10.216:11.1	Kammassakā, bhikkhave, sattā kammadāyādā kammayonī kammabandhū kammapaṭisaraṇā, yaṁ kammaṁ karonti—
an10.216:11.2	kalyāṇaṁ vā pāpakaṁ vā—tassa dāyādā bhavanti.
an10.216:11.3	Ayaṁ kho so, bhikkhave, saṁsappanīyapariyāyo dhammapariyāyo”ti.
an10.216:11.4	Chaṭṭhaṁ.
an10.217:0.1	Aṅguttara Nikāya 10.217
an10.217:0.2	21. Karajakāyavagga
an10.217:0.3	Paṭhamasañcetanikasutta
an10.217:1.1	“Nāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā byantībhāvaṁ vadāmi.
an10.217:1.2	Tañca kho diṭṭheva dhamme upapajje vā apare vā pariyāye.
an10.217:1.3	Na tvevāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā dukkhassantakiriyaṁ vadāmi.
an10.217:2.1	Tatra, bhikkhave, tividhā kāyakammantasandosabyāpatti akusalasañcetanikā dukkhudrayā dukkhavipākā hoti;
an10.217:2.2	catubbidhā vacīkammantasandosabyāpatti akusalasañcetanikā dukkhudrayā dukkhavipākā hoti;
an10.217:2.3	tividhā manokammantasandosabyāpatti akusalasañcetanikā dukkhudrayā dukkhavipākā hoti.
an10.217:3.1	Kathañca, bhikkhave, tividhā kāyakammantasandosabyāpatti akusalasañcetanikā dukkhudrayā dukkhavipākā hoti?
an10.217:3.2	Idha, bhikkhave, ekacco pāṇātipātī hoti, luddo lohitapāṇi hatapahate niviṭṭho adayāpanno sabbapāṇabhūtesu.
an10.217:4.1	Adinnādāyī hoti, yaṁ taṁ parassa paravittūpakaraṇaṁ gāmagataṁ vā araññagataṁ vā, taṁ adinnaṁ theyyasaṅkhātaṁ ādātā hoti.
an10.217:5.1	Kāmesumicchācārī hoti, yā tā māturakkhitā …pe… antamaso mālāguḷaparikkhittāpi, tathārūpāsu cārittaṁ āpajjitā hoti.
an10.217:6.1	Evaṁ kho, bhikkhave, tividhā kāyakammantasandosabyāpatti akusalasañcetanikā dukkhudrayā dukkhavipākā hoti.
an10.217:7.1	Kathañca, bhikkhave, catubbidhā vacīkammantasandosabyāpatti akusalasañcetanikā dukkhudrayā dukkhavipākā hoti?
an10.217:7.2	Idha, bhikkhave, ekacco musāvādī hoti. Sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho
an10.217:7.3	‘ehambho purisa, yaṁ jānāsi taṁ vadehī’ti, so ajānaṁ vā āha: ‘jānāmī’ti, jānaṁ vā āha: ‘na jānāmī’ti, apassaṁ vā āha: ‘passāmī’ti, passaṁ vā āha: ‘na passāmī’ti, iti attahetu vā parahetu vā āmisakiñcikkhahetu vā sampajānamusā bhāsitā hoti.
an10.217:8.1	Pisuṇavāco hoti, ito sutvā amutra akkhātā imesaṁ bhedāya, amutra vā sutvā imesaṁ akkhātā amūsaṁ bhedāya. Iti samaggānaṁ vā bhettā bhinnānaṁ vā anuppadātā vaggārāmo vaggarato vagganandī, vaggakaraṇiṁ vācaṁ bhāsitā hoti.
an10.217:9.1	Pharusavāco hoti, yā sā vācā aṇḍakā kakkasā parakaṭukā parābhisajjanī kodhasāmantā. Asamādhisaṁvattanikā, tathārūpiṁ vācaṁ bhāsitā hoti.
an10.217:10.1	Samphappalāpī hoti, akālavādī abhūtavādī anatthavādī adhammavādī avinayavādī, anidhānavatiṁ vācaṁ bhāsitā hoti akālena anapadesaṁ apariyantavatiṁ anatthasaṁhitaṁ.
an10.217:11.1	Evaṁ kho, bhikkhave, catubbidhā vacīkammantasandosabyāpatti akusalasañcetanikā dukkhudrayā dukkhavipākā hoti.
an10.217:12.1	Kathañca, bhikkhave, tividhā manokammantasandosabyāpatti akusalasañcetanikā dukkhudrayā dukkhavipākā hoti?
an10.217:12.2	Idha, bhikkhave, ekacco abhijjhālu hoti. Yaṁ taṁ parassa paravittūpakaraṇaṁ, taṁ abhijjhātā hoti: ‘aho vata, yaṁ parassa taṁ mama assā’ti.
an10.217:13.1	Byāpannacitto hoti, paduṭṭhamanasaṅkappo: ‘ime sattā haññantu vā bajjhantu vā ucchijjantu vā vinassantu vā mā vā ahesun’ti.
an10.217:14.1	Micchādiṭṭhiko hoti, viparītadassano:
an10.217:14.2	‘natthi dinnaṁ …pe… ye imañca lokaṁ parañca lokaṁ sayaṁ abhiññā sacchikatvā pavedentī’ti.
an10.217:15.1	Evaṁ kho, bhikkhave, tividhā manokammantasandosabyāpatti akusalasañcetanikā dukkhudrayā dukkhavipākā hoti.
an10.217:16.1	Tividhakāyakammantasandosabyāpattiakusalasañcetanikāhetu vā, bhikkhave, sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti; catubbidhavacīkammantasandosabyāpattiakusalasañcetanikāhetu vā, bhikkhave, sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti; tividhamanokammantasandosabyāpatti akusalasañcetanikāhetu vā, bhikkhave, sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.
an10.217:17.1	Seyyathāpi, bhikkhave, apaṇṇako maṇi uddhaṅkhitto yena yeneva patiṭṭhāti suppatiṭṭhitaṁyeva patiṭṭhāti;
an10.217:17.2	evamevaṁ kho, bhikkhave, tividhakāyakammantasandosabyāpattiakusalasañcetanikāhetu vā sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti; catubbidhavacīkammantasandosabyāpattiakusalasañcetanikāhetu vā sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti; tividhamanokammantasandosabyāpattiakusalasañcetanikāhetu vā sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjantīti.
an10.217:18.1	Nāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā byantībhāvaṁ vadāmi,
an10.217:18.2	tañca kho diṭṭheva dhamme upapajje vā apare vā pariyāye.
an10.217:18.3	Na tvevāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā dukkhassantakiriyaṁ vadāmi.
an10.217:19.1	Tatra, bhikkhave, tividhā kāyakammantasampatti kusalasañcetanikā sukhudrayā sukhavipākā hoti;
an10.217:19.2	catubbidhā vacīkammantasampatti kusalasañcetanikā sukhudrayā sukhavipākā hoti;
an10.217:19.3	tividhā manokammantasampatti kusalasañcetanikā sukhudrayā sukhavipākā hoti.
an10.217:20.1	Kathañca, bhikkhave, tividhā kāyakammantasampatti kusalasañcetanikā sukhudrayā sukhavipākā hoti?
an10.217:20.2	Idha, bhikkhave, ekacco pāṇātipātā paṭivirato hoti nihitadaṇḍo nihitasattho lajjī dayāpanno, sabbapāṇabhūtahitānukampī viharati …pe….
an10.217:21.1	Adinnādānā paṭivirato hoti, yaṁ taṁ parassa paravittūpakaraṇaṁ gāmagataṁ vā araññagataṁ vā, na taṁ adinnaṁ theyyasaṅkhātaṁ ādātā hoti.
an10.217:22.1	Kāmesumicchācāraṁ pahāya, kāmesumicchācārā paṭivirato hoti. Yā tā māturakkhitā …pe… antamaso mālāguḷaparikkhittāpi, tathārūpāsu na cārittaṁ āpajjitā hoti.
an10.217:23.1	Evaṁ kho, bhikkhave, tividhā kāyakammantasampatti kusalasañcetanikā sukhudrayā sukhavipākā hoti.
an10.217:24.1	Kathañca, bhikkhave, catubbidhā vacīkammantasampatti kusalasañcetanikā sukhudrayā sukhavipākā hoti?
an10.217:24.2	Idha, bhikkhave, ekacco musāvādaṁ pahāya musāvādā paṭivirato hoti. Sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho ‘ehambho purisa, yaṁ jānāsi taṁ vadehī’ti, so ajānaṁ vā āha: ‘na jānāmī’ti, jānaṁ vā āha: ‘jānāmī’ti, apassaṁ vā āha: ‘na passāmī’ti, passaṁ vā āha: ‘passāmī’ti, iti attahetu vā parahetu vā āmisakiñcikkhahetu vā na sampajānamusā bhāsitā hoti.
an10.217:25.1	Pisuṇaṁ vācaṁ pahāya, pisuṇāya vācāya paṭivirato hoti—na ito sutvā amutra akkhātā imesaṁ bhedāya, amutra vā sutvā na imesaṁ akkhātā amūsaṁ bhedāya. Iti bhinnānaṁ vā sandhātā sahitānaṁ vā anuppadātā samaggārāmo samaggarato samagganandiṁ, samaggakaraṇiṁ vācaṁ bhāsitā hoti.
an10.217:26.1	Pharusaṁ vācaṁ pahāya, pharusāya vācāya paṭivirato hoti. Yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā, tathārūpiṁ vācaṁ bhāsitā hoti.
an10.217:27.1	Samphappalāpaṁ pahāya, samphappalāpā paṭivirato hoti kālavādī bhūtavādī atthavādī dhammavādī vinayavādī, nidhānavatiṁ vācaṁ bhāsitā hoti kālena sāpadesaṁ pariyantavatiṁ atthasaṁhitaṁ.
an10.217:28.1	Evaṁ kho, bhikkhave, catubbidhā vacīkammantasampatti kusalasañcetanikā sukhudrayā sukhavipākā hoti.
an10.217:29.1	Kathañca, bhikkhave, tividhā manokammantasampatti kusalasañcetanikā sukhudrayā sukhavipākā hoti?
an10.217:29.2	Idha, bhikkhave, ekacco anabhijjhālu hoti. Yaṁ taṁ parassa paravittūpakaraṇaṁ taṁ anabhijjhātā hoti: ‘aho vata, yaṁ parassa taṁ mamassā’ti.
an10.217:30.1	Abyāpannacitto hoti appaduṭṭhamanasaṅkappo: ‘ime sattā averā hontu abyāpajjā anīghā, sukhī attānaṁ pariharantū’ti.
an10.217:31.1	Sammādiṭṭhiko hoti aviparītadassano:
an10.217:31.2	‘atthi dinnaṁ, atthi yiṭṭhaṁ …pe… ye imañca lokaṁ parañca lokaṁ sayaṁ abhiññā sacchikatvā pavedentī’ti.
an10.217:32.1	Evaṁ kho, bhikkhave, tividhā manokammantasampatti kusalasañcetanikā sukhudrayā sukhavipākā hoti.
an10.217:33.1	Tividhakāyakammantasampattikusalasañcetanikāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti; catubbidhavacīkammantasampattikusalasañcetanikāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti; tividhamanokammantasampattikusalasañcetanikāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti.
an10.217:34.1	Seyyathāpi, bhikkhave, apaṇṇako maṇi uddhaṅkhitto yena yeneva patiṭṭhāti suppatiṭṭhitaṁyeva patiṭṭhāti;
an10.217:34.2	evamevaṁ kho, bhikkhave, tividhakāyakammantasampattikusalasañcetanikāhetu vā sattā kāyassa bhedā paraṁ maraṇā sugatiṁ saggaṁ lokaṁ upapajjanti; catubbidhavacīkammantasampattikusalasañcetanikāhetu vā sattā kāyassa bhedā paraṁ maraṇā sugatiṁ saggaṁ lokaṁ upapajjanti; tividhamanokammantasampattikusalasañcetanikāhetu vā sattā kāyassa bhedā paraṁ maraṇā sugatiṁ saggaṁ lokaṁ upapajjanti.
an10.217:34.3	Nāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā byantībhāvaṁ vadāmi.
an10.217:34.4	Tañca kho diṭṭheva dhamme upapajje vā apare vā pariyāye.
an10.217:34.5	Na tvevāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā dukkhassantakiriyaṁ vadāmī”ti.
an10.217:34.6	Sattamaṁ.
an10.218:0.1	Aṅguttara Nikāya 10.218
an10.218:0.2	21. Karajakāyavagga
an10.218:0.3	Dutiyasañcetanikasutta
an10.218:1.1	“Nāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā byantībhāvaṁ vadāmi,
an10.218:1.2	tañca kho diṭṭheva dhamme upapajje vā apare vā pariyāye.
an10.218:1.3	Na tvevāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā dukkhassantakiriyaṁ vadāmi.
an10.218:2.1	Tatra, bhikkhave, tividhā kāyakammantasandosabyāpatti akusalasañcetanikā dukkhudrayā dukkhavipākā hoti;
an10.218:2.2	catubbidhā vacīkammantasandosabyāpatti akusalasañcetanikā dukkhudrayā dukkhavipākā hoti;
an10.218:2.3	tividhā manokammantasandosabyāpatti akusalasañcetanikā dukkhudrayā dukkhavipākā hoti.
an10.218:3.1	Kathañca, bhikkhave, tividhā kāyakammantasandosabyāpatti akusalasañcetanikā dukkhudrayā dukkhavipākā hoti …pe…
an10.218:3.2	evaṁ kho, bhikkhave, tividhā kāyakammantasandosabyāpatti akusalasañcetanikā dukkhudrayā dukkhavipākā hoti.
an10.218:4.1	Kathañca, bhikkhave, catubbidhā vacīkammantasandosabyāpatti akusalasañcetanikā dukkhudrayā dukkhavipākā hoti …pe…
an10.218:4.2	evaṁ kho, bhikkhave, catubbidhā vacīkammantasandosabyāpatti akusalasañcetanikā dukkhudrayā dukkhavipākā hoti.
an10.218:5.1	Kathañca, bhikkhave, tividhā manokammantasandosabyāpatti akusalasañcetanikā dukkhudrayā dukkhavipākā hoti …pe…
an10.218:5.2	evaṁ kho, bhikkhave, tividhā manokammantasandosabyāpatti akusalasañcetanikā dukkhudrayā dukkhavipākā hoti.
an10.218:6.1	Tividhakāyakammantasandosabyāpattiakusalasañcetanikāhetu vā, bhikkhave, sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti, catubbidhavacīkammanta …pe… tividhamanokammantasandosabyāpattiakusalasañcetanikāhetu vā, bhikkhave, sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.
an10.218:7.1	Nāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā byantībhāvaṁ vadāmi,
an10.218:7.2	tañca kho diṭṭheva dhamme upapajje vā apare vā pariyāye.
an10.218:7.3	Na tvevāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā dukkhassantakiriyaṁ vadāmi.
an10.218:8.1	Tatra kho, bhikkhave, tividhā kāyakammantasampatti kusalasañcetanikā sukhudrayā sukhavipākā hoti;
an10.218:8.2	catubbidhā vacīkammantasampatti kusalasañcetanikā sukhudrayā sukhavipākā hoti;
an10.218:8.3	tividhā manokammantasampatti kusalasañcetanikā sukhudrayā sukhavipākā hoti.
an10.218:9.1	Kathañca, bhikkhave, tividhā kāyakammantasampatti kusalasañcetanikā sukhudrayā sukhavipākā hoti …pe…
an10.218:9.2	evaṁ kho, bhikkhave, tividhā kāyakammantasampatti kusalasañcetanikā sukhudrayā sukhavipākā hoti.
an10.218:10.1	Kathañca, bhikkhave, catubbidhā vacīkammantasampatti kusalasañcetanikā sukhudrayā sukhavipākā hoti …pe…
an10.218:10.2	evaṁ kho, bhikkhave, catubbidhā vacīkammantasampatti kusalasañcetanikā sukhudrayā sukhavipākā hoti.
an10.218:11.1	Kathañca, bhikkhave, tividhā manokammantasampatti kusalasañcetanikā sukhudrayā sukhavipākā hoti …pe…
an10.218:11.2	evaṁ kho, bhikkhave, tividhā manokammantasampatti kusalasañcetanikā sukhudrayā sukhavipākā hoti.
an10.218:12.1	Tividhakāyakammantasampattikusalasañcetanikāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti; catubbidhavacīkammantasampatti …pe… tividhamanokammantasampattikusalasañcetanikāhetu vā, bhikkhave, sattā kāyassa bhedā paraṁ maraṇā sugatiṁ saggaṁ lokaṁ upapajjanti …pe…
an10.218:12.2	Aṭṭhamaṁ.
an10.219:0.1	Aṅguttara Nikāya 10.219
an10.219:0.2	21. Karajakāyavagga
an10.219:0.3	Karajakāyasutta
an10.219:1.1	“Nāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā byantībhāvaṁ vadāmi,
an10.219:1.2	tañca kho diṭṭheva dhamme upapajje vā apare vā pariyāye.
an10.219:1.3	Na tvevāhaṁ, bhikkhave, sañcetanikānaṁ kammānaṁ katānaṁ upacitānaṁ appaṭisaṁveditvā dukkhassantakiriyaṁ vadāmi.
an10.219:2.1	Sa kho so, bhikkhave, ariyasāvako evaṁ vigatābhijjho vigatabyāpādo asammūḷho sampajāno paṭissato mettāsahagatena cetasā ekaṁ disaṁ pharitvā viharati tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati.
an10.219:3.1	So evaṁ pajānāti:
an10.219:3.2	‘pubbe kho me idaṁ cittaṁ parittaṁ ahosi abhāvitaṁ, etarahi pana me idaṁ cittaṁ appamāṇaṁ subhāvitaṁ. Yaṁ kho pana kiñci pamāṇakataṁ kammaṁ, na taṁ tatrāvasissati na taṁ tatrāvatiṭṭhatī’ti.
an10.219:4.1	Taṁ kiṁ maññatha, bhikkhave,
an10.219:4.2	daharatagge ce so ayaṁ kumāro mettaṁ cetovimuttiṁ bhāveyya, api nu kho pāpakammaṁ kareyyā”ti?
an10.219:4.3	“No hetaṁ, bhante”.
an10.219:5.1	“Akarontaṁ kho pana pāpakammaṁ api nu kho dukkhaṁ phuseyyā”ti?
an10.219:5.2	“No hetaṁ, bhante.
an10.219:5.3	Akarontañhi, bhante, pāpakammaṁ kuto dukkhaṁ phusissatī”ti.
an10.219:6.1	“Bhāvetabbā kho panāyaṁ, bhikkhave, mettācetovimutti itthiyā vā purisena vā.
an10.219:6.2	Itthiyā vā, bhikkhave, purisassa vā nāyaṁ kāyo ādāya gamanīyo.
an10.219:6.3	Cittantaro ayaṁ, bhikkhave, macco.
an10.219:6.4	So evaṁ pajānāti:
an10.219:6.5	‘yaṁ kho me idaṁ kiñci pubbe iminā karajakāyena pāpakammaṁ kataṁ, sabbaṁ taṁ idha vedanīyaṁ;
an10.219:6.6	na taṁ anugaṁ bhavissatī’ti.
an10.219:6.7	Evaṁ bhāvitā kho, bhikkhave, mettā cetovimutti anāgāmitāya saṁvattati, idha paññassa bhikkhuno uttari vimuttiṁ appaṭivijjhato.
an10.219:7.1	Karuṇāsahagatena cetasā …
an10.219:7.2	muditāsahagatena cetasā …
an10.219:7.3	upekkhāsahagatena cetasā ekaṁ disaṁ pharitvā viharati tathā dutiyaṁ tathā tatiyaṁ tathā catutthaṁ.
an10.219:7.4	Iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
an10.219:8.1	So evaṁ pajānāti:
an10.219:8.2	‘pubbe kho me idaṁ cittaṁ parittaṁ ahosi abhāvitaṁ, etarahi pana me idaṁ cittaṁ appamāṇaṁ subhāvitaṁ. Yaṁ kho pana kiñci pamāṇakataṁ kammaṁ, na taṁ tatrāvasissati na taṁ tatrāvatiṭṭhatī’ti.
an10.219:9.1	Taṁ kiṁ maññatha, bhikkhave,
an10.219:9.2	daharatagge ce so ayaṁ kumāro upekkhaṁ cetovimuttiṁ bhāveyya, api nu kho pāpakammaṁ kareyyā”ti?
an10.219:9.3	“No hetaṁ, bhante”.
an10.219:10.1	“Akarontaṁ kho pana pāpakammaṁ api nu kho dukkhaṁ phuseyyā”ti?
an10.219:10.2	“No hetaṁ, bhante.
an10.219:10.3	Akarontañhi, bhante, pāpakammaṁ kuto dukkhaṁ phusissatī”ti.
an10.219:11.1	“Bhāvetabbā kho panāyaṁ, bhikkhave, upekkhā cetovimutti itthiyā vā purisena vā.
an10.219:11.2	Itthiyā vā, bhikkhave, purisassa vā nāyaṁ kāyo ādāya gamanīyo.
an10.219:11.3	Cittantaro ayaṁ, bhikkhave, macco.
an10.219:11.4	So evaṁ pajānāti:
an10.219:11.5	‘yaṁ kho me idaṁ kiñci pubbe iminā karajakāyena pāpakammaṁ kataṁ, sabbaṁ taṁ idha vedanīyaṁ;
an10.219:11.6	na taṁ anugaṁ bhavissatī’ti.
an10.219:11.7	Evaṁ bhāvitā kho, bhikkhave, upekkhā cetovimutti anāgāmitāya saṁvattati, idha paññassa bhikkhuno uttari vimuttiṁ appaṭivijjhato”ti.
an10.219:11.8	Navamaṁ.
an10.220:0.1	Aṅguttara Nikāya 10.220
an10.220:0.2	21. Karajakāyavagga
an10.220:0.3	Adhammacariyāsutta
an10.220:1.1	Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.
an10.220:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho so brāhmaṇo bhagavantaṁ etadavoca:
an10.220:1.3	“ko nu kho, bho gotama, hetu ko paccayo yena m’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjantī”ti?
an10.220:1.4	“Adhammacariyāvisamacariyāhetu kho, brāhmaṇa, evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjantī”ti.
an10.220:2.1	“Ko pana, bho gotama, hetu ko paccayo yena m’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti?
an10.220:2.2	“Dhammacariyāsamacariyāhetu kho, brāhmaṇa, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.
an10.220:3.1	“Na kho ahaṁ imassa bhoto gotamassa saṅkhittena bhāsitassa vitthārena atthaṁ ājānāmi.
an10.220:3.2	Sādhu me bhavaṁ gotamo tathā dhammaṁ desetu yathāhaṁ imassa bhoto gotamassa saṅkhittena bhāsitassa vitthārena atthaṁ ājāneyyan”ti.
an10.220:3.3	“Tena hi, brāhmaṇa, suṇāhi, sādhukaṁ manasi karohi; bhāsissāmī”ti.
an10.220:3.4	“Evaṁ, bho”ti kho so brāhmaṇo bhagavato paccassosi.
an10.220:3.5	Bhagavā etadavoca:
an10.220:4.1	“Tividhā kho, brāhmaṇa, kāyena adhammacariyāvisamacariyā hoti;
an10.220:4.2	catubbidhā vācāya adhammacariyāvisamacariyā hoti;
an10.220:4.3	tividhā manasā adhammacariyāvisamacariyā hoti.
an10.220:5.1	Kathañca, brāhmaṇa, tividhā kāyena adhammacariyāvisamacariyā hoti …pe…
an10.220:5.2	evaṁ kho, brāhmaṇa, tividhā kāyena adhammacariyā visamacariyā hoti.
an10.220:6.1	Kathañca, brāhmaṇa, catubbidhā vācāya adhammacariyāvisamacariyā hoti …pe…
an10.220:6.2	evaṁ kho, brāhmaṇa, catubbidhā vācāya adhammacariyāvisamacariyā hoti.
an10.220:7.1	Kathañca, brāhmaṇa, tividhā manasā adhammacariyāvisamacariyā hoti …pe…
an10.220:7.2	evaṁ kho, brāhmaṇa, tividhā manasā adhammacariyāvisamacariyā hoti.
an10.220:7.3	Evaṁ adhammacariyāvisamacariyāhetu kho, brāhmaṇa, evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.
an10.220:8.1	Tividhā, brāhmaṇa, kāyena dhammacariyāsamacariyā hoti;
an10.220:8.2	catubbidhā vācāya dhammacariyāsamacariyā hoti;
an10.220:8.3	tividhā manasā dhammacariyāsamacariyā hoti.
an10.220:9.1	Kathañca, brāhmaṇa, tividhā kāyena dhammacariyāsamacariyā hoti …pe…
an10.220:9.2	evaṁ kho, brāhmaṇa, tividhā kāyena dhammacariyāsamacariyā hoti.
an10.220:10.1	Kathañca, brāhmaṇa, catubbidhā vācāya dhammacariyāsamacariyā hoti …pe…
an10.220:10.2	evaṁ kho, brāhmaṇa, catubbidhā vācāya dhammacariyāsamacariyā hoti.
an10.220:11.1	Kathañca, brāhmaṇa, tividhā manasā dhammacariyāsamacariyā hoti …pe…
an10.220:11.2	evaṁ kho, brāhmaṇa, tividhā manasā dhammacariyāsamacariyā hoti.
an10.220:11.3	Evaṁ dhammacariyāsamacariyāhetu kho, brāhmaṇa, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.
an10.220:12.1	“Abhikkantaṁ, bho gotama, abhikkantaṁ, bho gotama …pe…
an10.220:12.2	upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.
an10.220:12.3	Dasamaṁ.
an10.220:12.4	Karajakāyavaggo paṭhamo.
an10.221:0.1	Aṅguttara Nikāya 10
an10.221:0.2	22. Sāmaññavagga
an10.221:0.3	~
an10.221:1.1	“Dasahi, bhikkhave, dhammehi samannāgato yathābhataṁ nikkhitto evaṁ niraye.
an10.221:1.2	Katamehi dasahi?
an10.221:1.3	Pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhiko hoti—
an10.221:1.4	imehi kho, bhikkhave, dasahi dhammehi samannāgato yathābhataṁ nikkhitto evaṁ niraye.
an10.221:2.1	Dasahi, bhikkhave, dhammehi samannāgato yathābhataṁ nikkhitto evaṁ sagge.
an10.221:2.2	Katamehi dasahi?
an10.221:2.3	Pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhiko hoti—
an10.221:2.4	imehi kho, bhikkhave, dasahi dhammehi samannāgato yathābhataṁ nikkhitto evaṁ sagge”ti.
an10.222:0.1	Aṅguttara Nikāya 10
an10.222:0.2	22. Sāmaññavagga
an10.222:0.3	~
an10.222:1.1	“Vīsatiyā, bhikkhave, dhammehi samannāgato yathābhataṁ nikkhitto evaṁ niraye.
an10.222:1.2	Katamehi vīsatiyā?
an10.222:1.3	Attanā ca pāṇātipātī hoti, parañca pāṇātipāte samādapeti;
an10.222:1.4	attanā ca adinnādāyī hoti, parañca adinnādāne samādapeti;
an10.222:1.5	attanā ca kāmesumicchācārī hoti, parañca kāmesumicchācāre samādapeti;
an10.222:1.6	attanā ca musāvādī hoti, parañca musāvāde samādapeti;
an10.222:1.7	attanā ca pisuṇavāco hoti, parañca pisuṇāya vācāya samādapeti;
an10.222:1.8	attanā ca pharusavāco hoti, parañca pharusāya vācāya samādapeti;
an10.222:1.9	attanā ca samphappalāpī hoti, parañca samphappalāpe samādapeti;
an10.222:1.10	attanā ca abhijjhālu hoti, parañca abhijjhāya samādapeti;
an10.222:1.11	attanā ca byāpannacitto hoti, parañca byāpāde samādapeti;
an10.222:1.12	attanā ca micchādiṭṭhiko hoti, parañca micchādiṭṭhiyā samādapeti—
an10.222:1.13	imehi kho, bhikkhave, vīsatiyā dhammehi samannāgato yathābhataṁ nikkhitto evaṁ niraye.
an10.222:2.1	Vīsatiyā, bhikkhave, dhammehi samannāgato yathābhataṁ nikkhitto evaṁ sagge.
an10.222:2.2	Katamehi vīsatiyā?
an10.222:2.3	Attanā ca pāṇātipātā paṭivirato hoti, parañca pāṇātipātā veramaṇiyā samādapeti;
an10.222:2.4	attanā ca adinnādānā paṭivirato hoti, parañca adinnādānā veramaṇiyā samādapeti;
an10.222:2.5	attanā ca kāmesumicchācārā paṭivirato hoti, parañca kāmesumicchācārā veramaṇiyā samādapeti;
an10.222:2.6	attanā ca musāvādā paṭivirato hoti, parañca musāvādā veramaṇiyā samādapeti;
an10.222:2.7	attanā ca pisuṇāya vācāya paṭivirato hoti, parañca pisuṇāya vācāya veramaṇiyā samādapeti;
an10.222:2.8	attanā ca pharusāya vācāya paṭivirato hoti, parañca pharusāya vācāya veramaṇiyā samādapeti;
an10.222:2.9	attanā ca samphappalāpā paṭivirato hoti, parañca samphappalāpā veramaṇiyā samādapeti;
an10.222:2.10	attanā ca anabhijjhālu hoti, parañca anabhijjhāya samādapeti;
an10.222:2.11	attanā ca abyāpannacitto hoti, parañca abyāpāde samādapeti;
an10.222:2.12	attanā ca sammādiṭṭhiko hoti, parañca sammādiṭṭhiyā samādapeti—
an10.222:2.13	imehi kho, bhikkhave, vīsatiyā dhammehi samannāgato yathābhataṁ nikkhitto evaṁ sagge”ti.
an10.223:0.1	Aṅguttara Nikāya 10
an10.223:0.2	22. Sāmaññavagga
an10.223:0.3	~
an10.223:1.1	“Tiṁsāya, bhikkhave, dhammehi samannāgato yathābhataṁ nikkhitto evaṁ niraye.
an10.223:1.2	Katamehi tiṁsāya?
an10.223:1.3	Attanā ca pāṇātipātī hoti, parañca pāṇātipāte samādapeti, pāṇātipāte ca samanuñño hoti;
an10.223:1.4	attanā ca adinnādāyī hoti, parañca adinnādāne samādapeti, adinnādāne ca samanuñño hoti;
an10.223:1.5	attanā ca kāmesumicchācārī hoti, parañca kāmesumicchācāre samādapeti, kāmesumicchācāre ca samanuñño hoti;
an10.223:1.6	attanā ca musāvādī hoti, parañca musāvāde samādapeti, musāvāde ca samanuñño hoti;
an10.223:1.7	attanā ca pisuṇavāco hoti, parañca pisuṇāya vācāya samādapeti, pisuṇāya vācāya ca samanuñño hoti;
an10.223:1.8	attanā ca pharusavāco hoti, parañca pharusāya vācāya samādapeti, pharusāya vācāya ca samanuñño hoti;
an10.223:1.9	attanā ca samphappalāpī hoti, parañca samphappalāpe samādapeti, samphappalāpe ca samanuñño hoti;
an10.223:1.10	attanā ca abhijjhālu hoti, parañca abhijjhāya samādapeti, abhijjhāya ca samanuñño hoti;
an10.223:1.11	attanā ca byāpannacitto hoti, parañca byāpāde samādapeti, byāpāde ca samanuñño hoti;
an10.223:1.12	attanā ca micchādiṭṭhiko hoti, parañca micchādiṭṭhiyā samādapeti, micchādiṭṭhiyā ca samanuñño hoti—
an10.223:1.13	imehi kho, bhikkhave, tiṁsāya dhammehi samannāgato yathābhataṁ nikkhitto evaṁ niraye.
an10.223:2.1	Tiṁsāya, bhikkhave, dhammehi samannāgato yathābhataṁ nikkhitto evaṁ sagge.
an10.223:2.2	Katamehi tiṁsāya?
an10.223:2.3	Attanā ca pāṇātipātā paṭivirato hoti, parañca pāṇātipātā veramaṇiyā samādapeti, pāṇātipātā veramaṇiyā ca samanuñño hoti;
an10.223:2.4	attanā ca adinnādānā paṭivirato hoti, parañca adinnādānā veramaṇiyā samādapeti, adinnādānā veramaṇiyā ca samanuñño hoti;
an10.223:2.5	attanā ca kāmesumicchācārā paṭivirato hoti, parañca kāmesumicchācārā veramaṇiyā samādapeti, kāmesumicchācārā veramaṇiyā ca samanuñño hoti;
an10.223:2.6	attanā ca musāvādā paṭivirato hoti, parañca musāvādā veramaṇiyā samādapeti, musāvādā veramaṇiyā ca samanuñño hoti;
an10.223:2.7	attanā ca pisuṇāya vācāya paṭivirato hoti, parañca pisuṇāya vācāya veramaṇiyā samādapeti, pisuṇāya vācāya veramaṇiyā ca samanuñño hoti;
an10.223:2.8	attanā ca pharusāya vācāya paṭivirato hoti, parañca pharusāya vācāya veramaṇiyā samādapeti, pharusāya vācāya veramaṇiyā ca samanuñño hoti;
an10.223:2.9	attanā ca samphappalāpā paṭivirato hoti, parañca samphappalāpā veramaṇiyā samādapeti, samphappalāpā veramaṇiyā ca samanuñño hoti;
an10.223:2.10	attanā ca anabhijjhālu hoti, parañca anabhijjhāya samādapeti, anabhijjhāya ca samanuñño hoti;
an10.223:2.11	attanā ca abyāpannacitto hoti, parañca abyāpāde samādapeti, abyāpāde ca samanuñño hoti;
an10.223:2.12	attanā ca sammādiṭṭhiko hoti, parañca sammādiṭṭhiyā samādapeti, sammādiṭṭhiyā ca samanuñño hoti—
an10.223:2.13	imehi kho, bhikkhave, tiṁsāya dhammehi samannāgato yathābhataṁ nikkhitto evaṁ sagge”ti.
an10.224:0.1	Aṅguttara Nikāya 10
an10.224:0.2	22. Sāmaññavagga
an10.224:0.3	~
an10.224:1.1	“Cattārīsāya, bhikkhave, dhammehi samannāgato yathābhataṁ nikkhitto evaṁ niraye.
an10.224:1.2	Katamehi cattārīsāya?
an10.224:1.3	Attanā ca pāṇātipātī hoti, parañca pāṇātipāte samādapeti, pāṇātipāte ca samanuñño hoti, pāṇātipātassa ca vaṇṇaṁ bhāsati;
an10.224:1.4	attanā ca adinnādāyī hoti, parañca adinnādāne samādapeti, adinnādāne ca samanuñño hoti, adinnādānassa ca vaṇṇaṁ bhāsati;
an10.224:1.5	attanā ca kāmesumicchācārī hoti, parañca kāmesumicchācāre samādapeti, kāmesumicchācāre ca samanuñño hoti, kāmesumicchācārassa ca vaṇṇaṁ bhāsati;
an10.224:1.6	attanā ca musāvādī hoti, parañca musāvāde samādapeti, musāvāde ca samanuñño hoti, musāvādassa ca vaṇṇaṁ bhāsati;
an10.224:1.7	attanā ca pisuṇavāco hoti, parañca pisuṇāya vācāya samādapeti, pisuṇāya vācāya ca samanuñño hoti, pisuṇāya vācāya ca vaṇṇaṁ bhāsati;
an10.224:1.8	attanā ca pharusavāco hoti, parañca pharusāya vācāya samādapeti, pharusāya vācāya ca samanuñño hoti, pharusāya vācāya ca vaṇṇaṁ bhāsati;
an10.224:1.9	attanā ca samphappalāpī hoti, parañca samphappalāpe samādapeti, samphappalāpe ca samanuñño hoti, samphappalāpassa ca vaṇṇaṁ bhāsati;
an10.224:1.10	attanā ca abhijjhālu hoti, parañca abhijjhāya samādapeti, abhijjhāya ca samanuñño hoti, abhijjhāya ca vaṇṇaṁ bhāsati;
an10.224:1.11	attanā ca byāpannacitto hoti, parañca byāpāde samādapeti, byāpāde ca samanuñño hoti, byāpādassa ca vaṇṇaṁ bhāsati;
an10.224:1.12	attanā ca micchādiṭṭhiko hoti, parañca micchādiṭṭhiyā samādapeti, micchādiṭṭhiyā ca samanuñño hoti, micchādiṭṭhiyā ca vaṇṇaṁ bhāsati—
an10.224:1.13	imehi kho, bhikkhave, cattārīsāya dhammehi samannāgato yathābhataṁ nikkhitto evaṁ niraye.
an10.224:2.1	Cattārīsāya, bhikkhave, dhammehi samannāgato yathābhataṁ nikkhitto evaṁ sagge.
an10.224:2.2	Katamehi cattārīsāya?
an10.224:2.3	Attanā ca pāṇātipātā paṭivirato hoti, parañca pāṇātipātā veramaṇiyā samādapeti, pāṇātipātā veramaṇiyā ca samanuñño hoti, pāṇātipātā veramaṇiyā ca vaṇṇaṁ bhāsati;
an10.224:2.4	attanā ca adinnādānā paṭivirato hoti, parañca adinnādānā veramaṇiyā samādapeti, adinnādānā veramaṇiyā ca samanuñño hoti, adinnādānā veramaṇiyā ca vaṇṇaṁ bhāsati;
an10.224:2.5	attanā ca kāmesumicchācārā paṭivirato hoti, parañca kāmesumicchācārā veramaṇiyā samādapeti, kāmesumicchācārā veramaṇiyā ca samanuñño hoti, kāmesumicchācārā veramaṇiyā ca vaṇṇaṁ bhāsati;
an10.224:2.6	attanā ca musāvādā paṭivirato hoti, parañca musāvādā veramaṇiyā samādapeti, musāvādā veramaṇiyā ca samanuñño hoti, musāvādā veramaṇiyā ca vaṇṇaṁ bhāsati;
an10.224:2.7	attanā ca pisuṇāya vācāya paṭivirato hoti, parañca pisuṇāya vācāya veramaṇiyā samādapeti, pisuṇāya vācāya veramaṇiyā ca samanuñño hoti, pisuṇāya vācāya veramaṇiyā ca vaṇṇaṁ bhāsati;
an10.224:2.8	attanā ca pharusāya vācāya paṭivirato hoti, parañca pharusāya vācāya veramaṇiyā ca samādapeti, pharusāya vācāya veramaṇiyā ca samanuñño hoti, pharusāya vācāya veramaṇiyā ca vaṇṇaṁ bhāsati;
an10.224:2.9	attanā ca samphappalāpā paṭivirato hoti, parañca samphappalāpā veramaṇiyā samādapeti, samphappalāpā veramaṇiyā ca samanuñño hoti, samphappalāpā veramaṇiyā ca vaṇṇaṁ bhāsati;
an10.224:2.10	attanā ca anabhijjhālu hoti, parañca anabhijjhāya samādapeti, anabhijjhāya ca samanuñño hoti, anabhijjhāya ca vaṇṇaṁ bhāsati;
an10.224:2.11	attanā ca abyāpannacitto hoti, parañca abyāpāde samādapeti, abyāpāde ca samanuñño hoti, abyāpādassa ca vaṇṇaṁ bhāsati;
an10.224:2.12	attanā ca sammādiṭṭhiko hoti, parañca sammādiṭṭhiyā samādapeti, sammādiṭṭhiyā ca samanuñño hoti, sammādiṭṭhiyā ca vaṇṇaṁ bhāsati—
an10.224:2.13	imehi kho, bhikkhave, cattārīsāya dhammehi samannāgato yathābhataṁ nikkhitto evaṁ sagge”ti.
an10.225-228:0.1	Aṅguttara Nikāya 10
an10.225-228:0.2	22. Sāmaññavagga
an10.225-228:0.3	~
an10.225-228:1.1	“Dasahi, bhikkhave, dhammehi samannāgato khataṁ upahataṁ attānaṁ pariharati …pe…
an10.225-228:1.2	akkhataṁ anupahataṁ attānaṁ pariharati …pe…
an10.225-228:1.3	vīsatiyā, bhikkhave …pe…
an10.225-228:1.4	tiṁsāya, bhikkhave …pe…
an10.225-228:1.5	cattārīsāya, bhikkhave, dhammehi samannāgato khataṁ upahataṁ attānaṁ pariharati …pe….
an10.225-228:1.6	(…)
an10.229-232:0.1	Aṅguttara Nikāya 10
an10.229-232:0.2	22. Sāmaññavagga
an10.229-232:0.3	~
an10.229-232:1.1	“Dasahi, bhikkhave, dhammehi samannāgato idhekacco kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati …pe…
an10.229-232:1.2	idhekacco kāyassa bhedā paraṁ maraṇā sugatiṁ saggaṁ lokaṁ upapajjati.
an10.229-232:1.3	Vīsatiyā, bhikkhave …pe…
an10.229-232:1.4	tiṁsāya, bhikkhave …pe…
an10.229-232:1.5	cattārīsāya, bhikkhave, dhammehi samannāgato idhekacco kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati …pe…
an10.229-232:1.6	idhekacco kāyassa bhedā paraṁ maraṇā sugatiṁ saggaṁ lokaṁ upapajjati”.
an10.233-236:0.1	Aṅguttara Nikāya 10
an10.233-236:0.2	22. Sāmaññavagga
an10.233-236:0.3	~
an10.233-236:1.1	“Dasahi, bhikkhave, dhammehi samannāgato bālo veditabbo …pe…
an10.233-236:1.2	paṇḍito veditabbo …pe…
an10.233-236:1.3	vīsatiyā, bhikkhave …pe…
an10.233-236:1.4	tiṁsāya, bhikkhave …pe…
an10.233-236:1.5	cattārīsāya, bhikkhave, dhammehi samannāgato bālo veditabbo …pe…
an10.233-236:1.6	paṇḍito veditabbo …pe…
an10.233-236:1.7	imehi kho, bhikkhave, cattārīsāya dhammehi samannāgato paṇḍito veditabbo”ti.
an10.233-236:1.8	Sāmaññavaggo dutiyo.
an10.237:0.1	Aṅguttara Nikāya 10
an10.237:0.2	23. Rāgapeyyāla
an10.237:0.3	~
an10.237:1.1	“Rāgassa, bhikkhave, abhiññāya dasa dhammā bhāvetabbā.
an10.237:1.2	Katame dasa?
an10.237:1.3	Asubhasaññā, maraṇasaññā, āhāre paṭikūlasaññā, sabbaloke anabhiratasaññā, aniccasaññā, anicce dukkhasaññā, dukkhe anattasaññā, pahānasaññā, virāgasaññā, nirodhasaññā—
an10.237:1.4	rāgassa, bhikkhave, abhiññāya ime dasa dhammā bhāvetabbā”ti.
an10.238:0.1	Aṅguttara Nikāya 10
an10.238:0.2	23. Rāgapeyyāla
an10.238:0.3	~
an10.238:1.1	“Rāgassa, bhikkhave, abhiññāya dasa dhammā bhāvetabbā.
an10.238:1.2	Katame dasa?
an10.238:1.3	Aniccasaññā, anattasaññā, āhāre paṭikūlasaññā, sabbaloke anabhiratasaññā, aṭṭhikasaññā, puḷavakasaññā, vinīlakasaññā, vipubbakasaññā, vicchiddakasaññā, uddhumātakasaññā—
an10.238:1.4	rāgassa, bhikkhave, abhiññāya ime dasa dhammā bhāvetabbā”ti.
an10.239:0.1	Aṅguttara Nikāya 10
an10.239:0.2	23. Rāgapeyyāla
an10.239:0.3	~
an10.239:1.1	“Rāgassa, bhikkhave, abhiññāya dasa dhammā bhāvetabbā.
an10.239:1.2	Katame dasa?
an10.239:1.3	Sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi, sammāñāṇaṁ, sammāvimutti—
an10.239:1.4	rāgassa, bhikkhave, abhiññāya ime dasa dhammā bhāvetabbā”ti.
an10.240-266:0.1	Aṅguttara Nikāya 10
an10.240-266:0.2	23. Rāgapeyyāla
an10.240-266:0.3	~
an10.240-266:1.1	“Rāgassa, bhikkhave, pariññāya …pe…
an10.240-266:1.2	parikkhayāya …
an10.240-266:1.3	pahānāya …
an10.240-266:1.4	khayāya …
an10.240-266:1.5	vayāya …
an10.240-266:1.6	virāgāya …
an10.240-266:1.7	nirodhāya …
an10.240-266:1.8	(…) cāgāya …
an10.240-266:1.9	paṭinissaggāya …pe…
an10.240-266:1.10	ime dasa dhammā bhāvetabbā”.
an10.267-746:0.1	Aṅguttara Nikāya 10
an10.267-746:0.2	23. Rāgapeyyāla
an10.267-746:0.3	~
an10.267-746:1.1	“Dosassa …pe…
an10.267-746:1.2	mohassa …
an10.267-746:1.3	kodhassa …
an10.267-746:1.4	upanāhassa …
an10.267-746:1.5	makkhassa …
an10.267-746:1.6	paḷāsassa …
an10.267-746:1.7	issāya …
an10.267-746:1.8	macchariyassa …
an10.267-746:1.9	māyāya …
an10.267-746:1.10	sāṭheyyassa …
an10.267-746:1.11	thambhassa …
an10.267-746:1.12	sārambhassa …
an10.267-746:1.13	mānassa …
an10.267-746:1.14	atimānassa …
an10.267-746:1.15	madassa …
an10.267-746:1.16	pamādassa pariññāya …pe…
an10.267-746:1.17	parikkhayāya …
an10.267-746:1.18	pahānāya …
an10.267-746:1.19	khayāya …
an10.267-746:1.20	vayāya …
an10.267-746:1.21	virāgāya …
an10.267-746:1.22	nirodhāya …
an10.267-746:1.23	(…) cāgāya …
an10.267-746:1.24	paṭinissaggāya …pe…
an10.267-746:1.25	ime dasa dhammā bhāvetabbā”ti.
an10.267-746:1.26	Rāgapeyyālaṁ niṭṭhitaṁ.
an10.267-746:1.27	Pañcamo paṇṇāsako samatto.
an10.267-746:1.28	Dasakanipātapāḷi niṭṭhitā.
an11.1:0.1	Aṅguttara Nikāya 11.1
an11.1:0.2	1. Nissayavagga
an11.1:0.3	Kimatthiyasutta
an11.1:1.1	Evaṁ me sutaṁ—
an11.1:1.2	ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
an11.1:1.3	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an11.1:1.4	“kimatthiyāni, bhante, kusalāni sīlāni kimānisaṁsānī”ti?
an11.1:1.5	“Avippaṭisāratthāni kho, ānanda, kusalāni sīlāni avippaṭisārānisaṁsānī”ti.
an11.1:2.1	“Avippaṭisāro pana, bhante, kimatthiyo kimānisaṁso”?
an11.1:2.2	“Avippaṭisāro kho, ānanda, pāmojjattho pāmojjānisaṁso”.
an11.1:3.1	“Pāmojjaṁ pana, bhante, kimatthiyaṁ kimānisaṁsaṁ”?
an11.1:3.2	“Pāmojjaṁ kho, ānanda, pītatthaṁ pītānisaṁsaṁ”.
an11.1:4.1	“Pīti pana, bhante, kimatthiyā kimānisaṁsā”?
an11.1:4.2	“Pīti kho, ānanda, passaddhatthā passaddhānisaṁsā”.
an11.1:5.1	“Passaddhi pana, bhante, kimatthiyā kimānisaṁsā”?
an11.1:5.2	“Passaddhi kho, ānanda, sukhatthā sukhānisaṁsā”.
an11.1:6.1	“Sukhaṁ pana, bhante, kimatthiyaṁ kimānisaṁsaṁ”?
an11.1:6.2	“Sukhaṁ kho, ānanda, samādhatthaṁ samādhānisaṁsaṁ”.
an11.1:7.1	“Samādhi pana, bhante, kimatthiyo kimānisaṁso”?
an11.1:7.2	“Samādhi kho, ānanda, yathābhūtañāṇadassanattho yathābhūtañāṇadassanānisaṁso”.
an11.1:8.1	“Yathābhūtañāṇadassanaṁ pana, bhante, kimatthiyaṁ kimānisaṁsaṁ”?
an11.1:8.2	“Yathābhūtañāṇadassanaṁ kho, ānanda, nibbidatthaṁ nibbidānisaṁsaṁ”.
an11.1:9.1	“Nibbidā pana, bhante, kimatthiyā kimānisaṁsā”?
an11.1:9.2	“Nibbidā kho, ānanda, virāgatthā virāgānisaṁsā”.
an11.1:10.1	“Virāgo pana, bhante, kimatthiyo kimānisaṁso”?
an11.1:10.2	“Virāgo kho, ānanda, vimuttiñāṇadassanattho vimuttiñāṇadassanānisaṁso.
an11.1:11.1	Iti kho, ānanda, kusalāni sīlāni avippaṭisāratthāni avippaṭisārānisaṁsāni,
an11.1:11.2	avippaṭisāro pāmojjattho pāmojjānisaṁso,
an11.1:11.3	pāmojjaṁ pītatthaṁ pītānisaṁsaṁ,
an11.1:11.4	pīti passaddhatthā passaddhānisaṁsā,
an11.1:11.5	passaddhi sukhatthā sukhānisaṁsā,
an11.1:11.6	sukhaṁ samādhatthaṁ samādhānisaṁsaṁ,
an11.1:11.7	samādhi yathābhūtañāṇadassanattho yathābhūtañāṇadassanānisaṁso,
an11.1:11.8	yathābhūtañāṇadassanaṁ nibbidatthaṁ nibbidānisaṁsaṁ,
an11.1:11.9	nibbidā virāgatthā virāgānisaṁsā,
an11.1:11.10	virāgo vimuttiñāṇadassanattho vimuttiñāṇadassanānisaṁso.
an11.1:11.11	Iti kho, ānanda, kusalāni sīlāni anupubbena aggāya parentī”ti.
an11.1:11.12	Paṭhamaṁ.
an11.2:0.1	Aṅguttara Nikāya 11.2
an11.2:0.2	1. Nissayavagga
an11.2:0.3	Cetanākaraṇīyasutta
an11.2:1.1	“Sīlavato, bhikkhave, sīlasampannassa na cetanāya karaṇīyaṁ:
an11.2:1.2	‘avippaṭisāro me uppajjatū’ti.
an11.2:1.3	Dhammatā esā, bhikkhave, yaṁ sīlavato sīlasampannassa avippaṭisāro uppajjati.
an11.2:2.1	Avippaṭisārissa, bhikkhave, na cetanāya karaṇīyaṁ:
an11.2:2.2	‘pāmojjaṁ me uppajjatū’ti.
an11.2:2.3	Dhammatā esā, bhikkhave, yaṁ avippaṭisārissa pāmojjaṁ uppajjati.
an11.2:3.1	Pamuditassa, bhikkhave, na cetanāya karaṇīyaṁ:
an11.2:3.2	‘pīti me uppajjatū’ti.
an11.2:3.3	Dhammatā esā, bhikkhave, yaṁ pamuditassa pīti uppajjati.
an11.2:4.1	Pītimanassa, bhikkhave, na cetanāya karaṇīyaṁ:
an11.2:4.2	‘kāyo me passambhatū’ti.
an11.2:4.3	Dhammatā esā, bhikkhave, yaṁ pītimanassa kāyo passambhati.
an11.2:5.1	Passaddhakāyassa, bhikkhave, na cetanāya karaṇīyaṁ:
an11.2:5.2	‘sukhaṁ vediyāmī’ti.
an11.2:5.3	Dhammatā esā, bhikkhave, yaṁ passaddhakāyo sukhaṁ vediyati.
an11.2:6.1	Sukhino, bhikkhave, na cetanāya karaṇīyaṁ:
an11.2:6.2	‘cittaṁ me samādhiyatū’ti.
an11.2:6.3	Dhammatā esā, bhikkhave, yaṁ sukhino cittaṁ samādhiyati.
an11.2:7.1	Samāhitassa, bhikkhave, na cetanāya karaṇīyaṁ:
an11.2:7.2	‘yathābhūtaṁ jānāmi passāmī’ti.
an11.2:7.3	Dhammatā esā, bhikkhave, yaṁ samāhito yathābhūtaṁ jānāti passati.
an11.2:8.1	Yathābhūtaṁ, bhikkhave, jānato passato na cetanāya karaṇīyaṁ:
an11.2:8.2	‘nibbindāmī’ti.
an11.2:8.3	Dhammatā esā, bhikkhave, yaṁ yathābhūtaṁ jānaṁ passaṁ nibbindati.
an11.2:9.1	Nibbinnassa, bhikkhave, na cetanāya karaṇīyaṁ:
an11.2:9.2	‘virajjāmī’ti.
an11.2:9.3	Dhammatā esā, bhikkhave, yaṁ nibbinno virajjati.
an11.2:10.1	Virattassa, bhikkhave, na cetanāya karaṇīyaṁ:
an11.2:10.2	‘vimuttiñāṇadassanaṁ sacchikaromī’ti.
an11.2:10.3	Dhammatā esā, bhikkhave, yaṁ viratto vimuttiñāṇadassanaṁ sacchikaroti.
an11.2:11.1	Iti kho, bhikkhave, virāgo vimuttiñāṇadassanattho vimuttiñāṇadassanānisaṁso, nibbidā virāgatthā virāgānisaṁsā, yathābhūtañāṇadassanaṁ nibbidatthaṁ nibbidānisaṁsaṁ, samādhi yathābhūtañāṇadassanattho yathābhūtañāṇadassanānisaṁso, sukhaṁ samādhatthaṁ samādhānisaṁsaṁ, passaddhi sukhatthā sukhānisaṁsā, pīti passaddhatthā passaddhānisaṁsā, pāmojjaṁ pītatthaṁ pītānisaṁsaṁ, avippaṭisāro pāmojjattho pāmojjānisaṁso, kusalāni sīlāni avippaṭisāratthāni avippaṭisārānisaṁsāni.
an11.2:11.2	Iti kho, bhikkhave, dhammā dhamme abhisandenti, dhammā dhamme paripūrenti apārā pāraṁ gamanāyā”ti.
an11.2:11.3	Dutiyaṁ.
an11.3:0.1	Aṅguttara Nikāya 11.3
an11.3:0.2	1. Nissayavagga
an11.3:0.3	Paṭhamaupanisāsutta
an11.3:1.1	“Dussīlassa, bhikkhave, sīlavipannassa hatūpaniso hoti avippaṭisāro.
an11.3:1.2	Avippaṭisāre asati avippaṭisāravipannassa hatūpanisaṁ hoti pāmojjaṁ.
an11.3:1.3	Pāmojje asati pāmojjavipannassa hatūpanisā hoti pīti.
an11.3:1.4	Pītiyā asati pītivipannassa hatūpanisā hoti passaddhi.
an11.3:1.5	Passaddhiyā asati passaddhivipannassa hatūpanisaṁ hoti sukhaṁ.
an11.3:1.6	Sukhe asati sukhavipannassa hatūpaniso hoti sammāsamādhi.
an11.3:1.7	Sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ.
an11.3:1.8	Yathābhūtañāṇadassane asati yathābhūtañāṇadassanavipannassa hatūpanisā hoti nibbidā.
an11.3:1.9	Nibbidāya asati nibbidāvipannassa hatūpaniso hoti virāgo.
an11.3:1.10	Virāge asati virāgavipannassa hatūpanisaṁ hoti vimuttiñāṇadassanaṁ.
an11.3:2.1	Seyyathāpi, bhikkhave, rukkho sākhāpalāsavipanno. Tassa papaṭikāpi na pāripūriṁ gacchati, tacopi … pheggupi … sāropi na pāripūriṁ gacchati.
an11.3:2.2	Evamevaṁ kho, bhikkhave, dussīlassa sīlavipannassa hatūpaniso hoti avippaṭisāro,
an11.3:2.3	avippaṭisāre asati avippaṭisāravipannassa hatūpanisaṁ hoti pāmojjaṁ …pe…
an11.3:2.4	vimuttiñāṇadassanaṁ.
an11.3:3.1	Sīlavato, bhikkhave, sīlasampannassa upanisasampanno hoti avippaṭisāro,
an11.3:3.2	avippaṭisāre sati avippaṭisārasampannassa upanisasampannaṁ hoti pāmojjaṁ,
an11.3:3.3	pāmojje sati pāmojjasampannassa upanisasampannā hoti pīti,
an11.3:3.4	pītiyā sati pītisampannassa upanisasampannā hoti passaddhi,
an11.3:3.5	passaddhiyā sati passaddhisampannassa upanisasampannaṁ hoti sukhaṁ,
an11.3:3.6	sukhe sati sukhasampannassa upanisasampanno hoti sammāsamādhi,
an11.3:3.7	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ,
an11.3:3.8	yathābhūtañāṇadassane sati yathābhūtañāṇadassanasampannassa upanisasampannā hoti nibbidā,
an11.3:3.9	nibbidāya sati nibbidāsampannassa upanisasampanno hoti virāgo,
an11.3:3.10	virāge sati virāgasampannassa upanisasampannaṁ hoti vimuttiñāṇadassanaṁ.
an11.3:4.1	Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṁ gacchati, tacopi … pheggupi … sāropi pāripūriṁ gacchati.
an11.3:4.2	Evamevaṁ kho, bhikkhave, sīlavato sīlasampannassa upanisasampanno hoti avippaṭisāro,
an11.3:4.3	avippaṭisāre sati avippaṭisārasampannassa upanisasampannaṁ hoti …pe…
an11.3:4.4	vimuttiñāṇadassanan”ti.
an11.3:4.5	Tatiyaṁ.
an11.4:0.1	Aṅguttara Nikāya 11.4
an11.4:0.2	1. Nissayavagga
an11.4:0.3	Dutiyaupanisāsutta
an11.4:1.1	Tatra kho āyasmā sāriputto bhikkhū āmantesi:
an11.4:1.2	“āvuso bhikkhave”ti.
an11.4:1.3	“Āvuso”ti kho te bhikkhū āyasmato sāriputtassa paccassosuṁ.
an11.4:1.4	Āyasmā sāriputto etadavoca:
an11.4:2.1	“Dussīlassa, āvuso, sīlavipannassa hatūpaniso hoti avippaṭisāro,
an11.4:2.2	avippaṭisāre asati avippaṭisāravipannassa hatūpanisaṁ hoti pāmojjaṁ,
an11.4:2.3	pāmojje asati pāmojjavipannassa hatūpanisā hoti pīti,
an11.4:2.4	pītiyā asati pītivipannassa hatūpanisā hoti passaddhi,
an11.4:2.5	passaddhiyā asati passaddhivipannassa hatūpanisaṁ hoti sukhaṁ,
an11.4:2.6	sukhe asati sukhavipannassa hatūpaniso hoti sammāsamādhi,
an11.4:2.7	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ,
an11.4:2.8	yathābhūtañāṇadassane asati yathābhūtañāṇadassanavipannassa hatūpanisā hoti nibbidā,
an11.4:2.9	nibbidāya asati nibbidāvipannassa hatūpaniso hoti virāgo,
an11.4:2.10	virāge asati virāgavipannassa hatūpanisaṁ hoti vimuttiñāṇadassanaṁ.
an11.4:3.1	Seyyathāpi, āvuso, rukkho sākhāpalāsavipanno. Tassa papaṭikāpi na pāripūriṁ gacchati, tacopi … pheggupi … sāropi na pāripūriṁ gacchati.
an11.4:3.2	Evamevaṁ kho, āvuso, dussīlassa sīlavipannassa hatūpaniso hoti avippaṭisāro,
an11.4:3.3	avippaṭisāre asati avippaṭisāravipannassa hatūpanisaṁ hoti pāmojjaṁ …pe…
an11.4:3.4	vimuttiñāṇadassanaṁ.
an11.4:4.1	Sīlavato, āvuso, sīlasampannassa upanisasampanno hoti avippaṭisāro,
an11.4:4.2	avippaṭisāre sati avippaṭisārasampannassa upanisasampannaṁ hoti pāmojjaṁ,
an11.4:4.3	pāmojje sati pāmojjasampannassa upanisasampannā hoti pīti,
an11.4:4.4	pītiyā sati pītisampannassa upanisasampannā hoti passaddhi,
an11.4:4.5	passaddhiyā sati passaddhisampannassa upanisasampannaṁ hoti sukhaṁ,
an11.4:4.6	sukhe sati sukhasampannassa upanisasampanno hoti sammāsamādhi,
an11.4:4.7	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ,
an11.4:4.8	yathābhūtañāṇadassane sati yathābhūtañāṇadassanasampannassa upanisasampannā hoti nibbidā,
an11.4:4.9	nibbidāya sati nibbidāsampannassa upanisasampanno hoti virāgo,
an11.4:4.10	virāge sati virāgasampannassa upanisasampannaṁ hoti vimuttiñāṇadassanaṁ.
an11.4:5.1	Seyyathāpi, āvuso, rukkho sākhāpalāsasampanno. Tassa papaṭikāpi pāripūriṁ gacchati, tacopi … pheggupi … sāropi pāripūriṁ gacchati.
an11.4:5.2	Evamevaṁ kho, āvuso, sīlavato sīlasampannassa upanisasampanno hoti avippaṭisāro,
an11.4:5.3	avippaṭisāre sati avippaṭisārasampannassa upanisasampannaṁ hoti pāmojjaṁ …pe…
an11.4:5.4	vimuttiñāṇadassanan”ti. …pe…
an11.4:5.5	Catutthaṁ.
an11.5:0.1	Aṅguttara Nikāya 11.5
an11.5:0.2	1. Nissayavagga
an11.5:0.3	Tatiyaupanisāsutta
an11.5:1.1	Tatra kho āyasmā ānando bhikkhū āmantesi …pe…
an11.5:1.2	“dussīlassa, āvuso, sīlavipannassa hatūpaniso hoti avippaṭisāro,
an11.5:1.3	avippaṭisāre asati avippaṭisāravipannassa hatūpanisaṁ hoti pāmojjaṁ,
an11.5:1.4	pāmojje asati pāmojjavipannassa hatūpanisā hoti pīti,
an11.5:1.5	pītiyā asati pītivipannassa hatūpanisā hoti passaddhi,
an11.5:1.6	passaddhiyā asati passaddhivipannassa hatūpanisaṁ hoti sukhaṁ,
an11.5:1.7	sukhe asati sukhavipannassa hatūpaniso hoti sammāsamādhi,
an11.5:1.8	sammāsamādhimhi asati sammāsamādhivipannassa hatūpanisaṁ hoti yathābhūtañāṇadassanaṁ,
an11.5:1.9	yathābhūtañāṇadassane asati yathābhūtañāṇadassanavipannassa hatūpanisā hoti nibbidā,
an11.5:1.10	nibbidāya asati nibbidāvipannassa hatūpaniso hoti virāgo,
an11.5:1.11	virāge asati virāgavipannassa hatūpanisaṁ hoti vimuttiñāṇadassanaṁ.
an11.5:2.1	Seyyathāpi, āvuso, rukkho sākhāpalāsavipanno. Tassa papaṭikāpi na pāripūriṁ gacchati, tacopi … pheggupi … sāropi na pāripūriṁ gacchati.
an11.5:2.2	Evamevaṁ kho, āvuso, dussīlassa sīlavipannassa hatūpaniso hoti avippaṭisāro,
an11.5:2.3	avippaṭisāre asati avippaṭisāravipannassa hatūpanisaṁ hoti pāmojjaṁ …pe…
an11.5:2.4	vimuttiñāṇadassanaṁ.
an11.5:3.1	Sīlavato, āvuso, sīlasampannassa upanisasampanno hoti avippaṭisāro,
an11.5:3.2	avippaṭisāre sati avippaṭisārasampannassa upanisasampannaṁ hoti pāmojjaṁ,
an11.5:3.3	pāmojje sati pāmojjasampannassa upanisasampannā hoti pīti,
an11.5:3.4	pītiyā sati pītisampannassa upanisasampannā hoti passaddhi,
an11.5:3.5	passaddhiyā sati passaddhisampannassa upanisasampannaṁ hoti sukhaṁ,
an11.5:3.6	sukhe sati sukhasampannassa upanisasampanno hoti sammāsamādhi,
an11.5:3.7	sammāsamādhimhi sati sammāsamādhisampannassa upanisasampannaṁ hoti yathābhūtañāṇadassanaṁ,
an11.5:3.8	yathābhūtañāṇadassane sati yathābhūtañāṇadassanasampannassa upanisasampannā hoti nibbidā,
an11.5:3.9	nibbidāya sati nibbidāsampannassa upanisasampanno hoti virāgo,
an11.5:3.10	virāge sati virāgasampannassa upanisasampannaṁ hoti vimuttiñāṇadassanaṁ.
an11.5:4.1	Seyyathāpi, āvuso, rukkho sākhāpalāsasampanno. Tassa papaṭikāpi pāripūriṁ gacchati, tacopi … pheggupi … sāropi pāripūriṁ gacchati.
an11.5:4.2	Evamevaṁ kho, āvuso, sīlavato sīlasampannassa upanisasampanno hoti avippaṭisāro,
an11.5:4.3	avippaṭisāre sati avippaṭisārasampannassa upanisasampannaṁ hoti pāmojjaṁ …pe…
an11.5:4.4	vimuttiñāṇadassanan”ti.
an11.5:4.5	Pañcamaṁ.
an11.6:0.1	Aṅguttara Nikāya 11.6
an11.6:0.2	1. Nissayavagga
an11.6:0.3	Byasanasutta
an11.6:1.1	“Yo so, bhikkhave, bhikkhu akkosako paribhāsako ariyūpavādo sabrahmacārīnaṁ, ṭhānametaṁ avakāso yaṁ so ekādasannaṁ byasanānaṁ aññataraṁ byasanaṁ nigaccheyya.
an11.6:2.1	Katamesaṁ ekādasannaṁ?
an11.6:2.2	Anadhigataṁ nādhigacchati,
an11.6:2.3	adhigatā parihāyati,
an11.6:2.4	saddhammassa na vodāyanti,
an11.6:2.5	saddhammesu vā adhimāniko hoti,
an11.6:2.6	anabhirato vā brahmacariyaṁ carati,
an11.6:2.7	aññataraṁ vā saṅkiliṭṭhaṁ āpattiṁ āpajjati,
an11.6:2.8	sikkhaṁ vā paccakkhāya hīnāyāvattati,
an11.6:2.9	gāḷhaṁ vā rogātaṅkaṁ phusati,
an11.6:2.10	ummādaṁ vā pāpuṇāti cittakkhepaṁ vā,
an11.6:2.11	sammūḷho kālaṁ karoti,
an11.6:2.12	kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati—
an11.6:2.13	yo so, bhikkhave, bhikkhu akkosako paribhāsako ariyūpavādo sabrahmacārīnaṁ, ṭhānametaṁ avakāso yaṁ so imesaṁ ekādasannaṁ byasanānaṁ aññataraṁ byasanaṁ nigaccheyya.
an11.6:3.1	Yo so, bhikkhave, bhikkhu akkosako paribhāsako ariyūpavādo sabrahmacārīnaṁ, aṭṭhānametaṁ anavakāso yaṁ so ekādasannaṁ byasanānaṁ aññataraṁ byasanaṁ na nigaccheyya.
an11.6:4.1	Katamesaṁ ekādasannaṁ?
an11.6:4.2	Anadhigataṁ nādhigacchati,
an11.6:4.3	adhigatā parihāyati,
an11.6:4.4	saddhammassa na vodāyanti,
an11.6:4.5	saddhammesu vā adhimāniko hoti,
an11.6:4.6	anabhirato vā brahmacariyaṁ carati,
an11.6:4.7	aññataraṁ vā saṅkiliṭṭhaṁ āpattiṁ āpajjati,
an11.6:4.8	sikkhaṁ vā paccakkhāya hīnāyāvattati,
an11.6:4.9	gāḷhaṁ vā rogātaṅkaṁ phusati,
an11.6:4.10	ummādaṁ vā pāpuṇāti cittakkhepaṁ vā,
an11.6:4.11	sammūḷho kālaṁ karoti,
an11.6:4.12	kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati—
an11.6:4.13	yo so, bhikkhave, bhikkhu akkosako paribhāsako ariyūpavādo sabrahmacārīnaṁ, aṭṭhānametaṁ anavakāso yaṁ so imesaṁ ekādasannaṁ byasanānaṁ aññataraṁ byasanaṁ na nigaccheyyā”ti.
an11.6:4.14	Chaṭṭhaṁ.
an11.7:0.1	Aṅguttara Nikāya 11.7
an11.7:0.2	1. Nissayavagga
an11.7:0.3	Saññāsutta
an11.7:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an11.7:2.1	“Siyā nu kho, bhante, bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tatrāpi na saññī assa; saññī ca pana assā”ti?
an11.7:3.1	“Siyā, ānanda, bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tatrāpi na saññī assa; saññī ca pana assā”ti.
an11.7:4.1	“Yathā kathaṁ pana, bhante, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tatrāpi na saññī assa, saññī ca pana assā”ti.
an11.7:5.1	“Idhānanda, bhikkhu evaṁsaññī hoti:
an11.7:5.2	‘etaṁ santaṁ etaṁ paṇītaṁ, yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an11.7:5.3	Evaṁ kho, ānanda, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tatrāpi na saññī assa, saññī ca pana assā”ti.
an11.7:6.1	Atha kho āyasmā ānando bhagavato bhāsitaṁ abhinanditvā anumoditvā uṭṭhāyāsanā bhagavantaṁ abhivādetvā padakkhiṇaṁ katvā yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
an11.7:6.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā ānando āyasmantaṁ sāriputtaṁ etadavoca:
an11.7:7.1	“Siyā nu kho, āvuso sāriputta, bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tatrāpi na saññī assa, saññī pana assā”ti.
an11.7:7.2	“Siyā, āvuso ānanda, bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tatrāpi na saññī assa, saññī ca pana assā”ti.
an11.7:8.1	“Yathā kathaṁ panāvuso sāriputta, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tatrāpi na saññī assa, saññī ca pana assā”ti?
an11.7:9.1	“Idha, āvuso ānanda, bhikkhu evaṁsaññī hoti:
an11.7:9.2	‘etaṁ santaṁ etaṁ paṇītaṁ, yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an11.7:9.3	Evaṁ kho, āvuso ānanda, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tatrāpi na saññī assa, saññī ca pana assā”ti.
an11.7:10.1	“Acchariyaṁ, āvuso, abbhutaṁ, āvuso.
an11.7:10.2	Yatra hi nāma satthu ceva sāvakassa ca atthena attho byañjanena byañjanaṁ saṁsandissati samessati na viggayhissati, yadidaṁ aggapadasmiṁ.
an11.7:10.3	Idānāhaṁ, āvuso, bhagavantaṁ upasaṅkamitvā etamatthaṁ apucchiṁ.
an11.7:10.4	Bhagavāpi me etehi akkharehi etehi padehi etehi byañjanehi etamatthaṁ byākāsi, seyyathāpi āyasmā sāriputto.
an11.7:10.5	Acchariyaṁ, āvuso, abbhutaṁ, āvuso.
an11.7:10.6	Yatra hi nāma satthu ceva sāvakassa ca atthena attho byañjanena byañjanaṁ saṁsandissati samessati na viggayhissati, yadidaṁ aggapadasmin”ti.
an11.7:10.7	Sattamaṁ.
an11.8:0.1	Aṅguttara Nikāya 11.8
an11.8:0.2	1. Nissayavagga
an11.8:0.3	Manasikārasutta
an11.8:1.1	Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
an11.8:2.1	“Siyā nu kho, bhante, bhikkhuno tathārūpo samādhipaṭilābho yathā na cakkhuṁ manasi kareyya, na rūpaṁ manasi kareyya, na sotaṁ manasi kareyya, na saddaṁ manasi kareyya, na ghānaṁ manasi kareyya, na gandhaṁ manasi kareyya, na jivhaṁ manasi kareyya, na rasaṁ manasi kareyya, na kāyaṁ manasi kareyya, na phoṭṭhabbaṁ manasi kareyya, na pathaviṁ manasi kareyya, na āpaṁ manasi kareyya, na tejaṁ manasi kareyya, na vāyaṁ manasi kareyya, na ākāsānañcāyatanaṁ manasi kareyya, na viññāṇañcāyatanaṁ manasi kareyya, na ākiñcaññāyatanaṁ manasi kareyya, na nevasaññānāsaññāyatanaṁ manasi kareyya, na idhalokaṁ manasi kareyya, na paralokaṁ manasi kareyya, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tampi na manasi kareyya;
an11.8:2.2	manasi ca pana kareyyā”ti?
an11.8:3.1	“Siyā, ānanda, bhikkhuno tathārūpo samādhipaṭilābho yathā na cakkhuṁ manasi kareyya, na rūpaṁ manasi kareyya, na sotaṁ manasi kareyya, na saddaṁ manasi kareyya, na ghānaṁ manasi kareyya, na gandhaṁ manasi kareyya, na jivhaṁ manasi kareyya, na rasaṁ manasi kareyya, na kāyaṁ manasi kareyya, na phoṭṭhabbaṁ manasi kareyya, na pathaviṁ manasi kareyya, na āpaṁ manasi kareyya, na tejaṁ manasi kareyya, na vāyaṁ manasi kareyya, na ākāsānañcāyatanaṁ manasi kareyya, na viññāṇañcāyatanaṁ manasi kareyya, na ākiñcaññāyatanaṁ manasi kareyya, na nevasaññānāsaññāyatanaṁ manasi kareyya, na idhalokaṁ manasi kareyya, na paralokaṁ manasi kareyya, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tampi na manasi kareyya;
an11.8:3.2	manasi ca pana kareyyā”ti.
an11.8:4.1	“Yathā kathaṁ pana, bhante, siyā bhikkhuno tathārūpo samādhipaṭilābho yathā na cakkhuṁ manasi kareyya, na rūpaṁ manasi kareyya …pe…
an11.8:4.2	yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tampi na manasi kareyya;
an11.8:4.3	manasi ca pana kareyyā”ti?
an11.8:5.1	“Idhānanda, bhikkhu evaṁ manasi karoti:
an11.8:5.2	‘etaṁ santaṁ etaṁ paṇītaṁ, yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an11.8:5.3	Evaṁ kho, ānanda, siyā bhikkhuno tathārūpo samādhipaṭilābho yathā na cakkhuṁ manasi kareyya, na rūpaṁ manasi kareyya …pe…
an11.8:5.4	yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tampi na manasi kareyya;
an11.8:5.5	manasi ca pana kareyyā”ti.
an11.8:5.6	Aṭṭhamaṁ.
an11.9:0.1	Aṅguttara Nikāya 11.9
an11.9:0.2	1. Nissayavagga
an11.9:0.3	Saddhasutta
an11.9:1.1	Ekaṁ samayaṁ bhagavā nātike viharati giñjakāvasathe.
an11.9:1.2	Atha kho āyasmā saddho yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ saddhaṁ bhagavā etadavoca:
an11.9:2.1	“Ājānīyajhāyitaṁ kho, saddha, jhāya;
an11.9:2.2	mā khaḷuṅkajhāyitaṁ.
an11.9:2.3	Kathañca, khaḷuṅkajhāyitaṁ hoti?
an11.9:2.4	Assakhaḷuṅko hi, saddha, doṇiyā baddho ‘yavasaṁ yavasan’ti jhāyati.
an11.9:2.5	Taṁ kissa hetu?
an11.9:2.6	Na hi, saddha, assakhaḷuṅkassa doṇiyā baddhassa evaṁ hoti:
an11.9:2.7	‘kiṁ nu kho maṁ ajja assadammasārathi kāraṇaṁ kāressati, kimassāhaṁ paṭikaromī’ti.
an11.9:2.8	So doṇiyā baddho ‘yavasaṁ yavasan’ti jhāyati.
an11.9:2.9	Evamevaṁ kho, saddha, idhekacco purisakhaḷuṅko araññagatopi rukkhamūlagatopi suññāgāragatopi kāmarāgapariyuṭṭhitena cetasā viharati kāmarāgaparetena uppannassa ca kāmarāgassa nissaraṇaṁ yathābhūtaṁ nappajānāti.
an11.9:2.10	So kāmarāgaṁyeva antaraṁ katvā jhāyati pajjhāyati nijjhāyati avajjhāyati,
an11.9:2.11	byāpādapariyuṭṭhitena cetasā viharati …
an11.9:2.12	thinamiddhapariyuṭṭhitena cetasā viharati …
an11.9:2.13	uddhaccakukkuccapariyuṭṭhitena cetasā viharati …
an11.9:2.14	vicikicchāpariyuṭṭhitena cetasā viharati vicikicchāparetena, uppannāya ca vicikicchāya nissaraṇaṁ yathābhūtaṁ nappajānāti.
an11.9:2.15	So vicikicchaṁyeva antaraṁ katvā jhāyati pajjhāyati nijjhāyati avajjhāyati.
an11.9:2.16	So pathavimpi nissāya jhāyati, āpampi nissāya jhāyati, tejampi nissāya jhāyati, vāyampi nissāya jhāyati, ākāsānañcāyatanampi nissāya jhāyati, viññāṇañcāyatanampi nissāya jhāyati, ākiñcaññāyatanampi nissāya jhāyati, nevasaññānāsaññāyatanampi nissāya jhāyati, idhalokampi nissāya jhāyati, paralokampi nissāya jhāyati, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tampi nissāya jhāyati.
an11.9:2.17	Evaṁ kho, saddha, purisakhaḷuṅkajhāyitaṁ hoti.
an11.9:3.1	Kathañca, saddha, ājānīyajhāyitaṁ hoti?
an11.9:3.2	Bhadro hi, saddha, assājānīyo doṇiyā baddho na ‘yavasaṁ yavasan’ti jhāyati.
an11.9:3.3	Taṁ kissa hetu?
an11.9:3.4	Bhadrassa hi, saddha, assājānīyassa doṇiyā baddhassa evaṁ hoti:
an11.9:3.5	‘kiṁ nu kho maṁ ajja assadammasārathi kāraṇaṁ kāressati, kimassāhaṁ paṭikaromī’ti.
an11.9:3.6	So doṇiyā baddho na ‘yavasaṁ yavasan’ti jhāyati.
an11.9:3.7	Bhadro hi, saddha, assājānīyo yathā iṇaṁ yathā bandhaṁ yathā jāniṁ yathā kaliṁ evaṁ patodassa ajjhoharaṇaṁ samanupassati.
an11.9:3.8	Evamevaṁ kho, saddha, bhadro purisājānīyo araññagatopi rukkhamūlagatopi suññāgāragatopi na kāmarāgapariyuṭṭhitena cetasā viharati na kāmarāgaparetena, uppannassa ca kāmarāgassa nissaraṇaṁ yathābhūtaṁ pajānāti,
an11.9:3.9	na byāpādapariyuṭṭhitena cetasā viharati …
an11.9:3.10	na thinamiddhapariyuṭṭhitena cetasā viharati …
an11.9:3.11	na uddhaccakukkuccapariyuṭṭhitena cetasā viharati …
an11.9:3.12	na vicikicchāpariyuṭṭhitena cetasā viharati na vicikicchāparetena, uppannāya ca vicikicchāya nissaraṇaṁ yathābhūtaṁ pajānāti.
an11.9:3.13	So neva pathaviṁ nissāya jhāyati, na āpaṁ nissāya jhāyati, na tejaṁ nissāya jhāyati, na vāyaṁ nissāya jhāyati, na ākāsānañcāyatanaṁ nissāya jhāyati, na viññāṇañcāyatanaṁ nissāya jhāyati, na ākiñcaññāyatanaṁ nissāya jhāyati, na nevasaññānāsaññāyatanaṁ nissāya jhāyati, na idhalokaṁ nissāya jhāyati, na paralokaṁ nissāya jhāyati, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tampi nissāya na jhāyati;
an11.9:3.14	jhāyati ca pana.
an11.9:3.15	Evaṁ jhāyiñca pana, saddha, bhadraṁ purisājānīyaṁ saindā devā sabrahmakā sapajāpatikā ārakāva namassanti:
an11.9:4.1	‘Namo te purisājañña,
an11.9:4.2	namo te purisuttama;
an11.9:4.3	Yassa te nābhijānāma,
an11.9:4.4	yampi nissāya jhāyasī’”ti.
an11.9:5.1	Evaṁ vutte, āyasmā saddho bhagavantaṁ etadavoca:
an11.9:5.2	“kathaṁ jhāyī pana, bhante, bhadro purisājānīyo neva pathaviṁ nissāya jhāyati, na āpaṁ nissāya jhāyati, na tejaṁ nissāya jhāyati, na vāyaṁ nissāya jhāyati, na ākāsānañcāyatanaṁ nissāya jhāyati, na viññāṇañcāyatanaṁ nissāya jhāyati, na ākiñcaññāyatanaṁ nissāya jhāyati, na nevasaññānāsaññāyatanaṁ nissāya jhāyati, na idhalokaṁ nissāya jhāyati, na paralokaṁ nissāya jhāyati, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tampi nissāya na jhāyati;
an11.9:5.3	jhāyati ca pana?
an11.9:5.4	Kathaṁ jhāyiñca pana, bhante, bhadraṁ purisājānīyaṁ saindā devā sabrahmakā sapajāpatikā ārakāva namassanti:
an11.9:6.1	‘Namo te purisājañña,
an11.9:6.2	namo te purisuttama;
an11.9:6.3	Yassa te nābhijānāma,
an11.9:6.4	yampi nissāya jhāyasī’”ti.
an11.9:7.1	“Idha, saddha, bhadrassa purisājānīyassa pathaviyaṁ pathavisaññā vibhūtā hoti, āpasmiṁ āposaññā vibhūtā hoti, tejasmiṁ tejosaññā vibhūtā hoti, vāyasmiṁ vāyosaññā vibhūtā hoti, ākāsānañcāyatane ākāsānañcāyatanasaññā vibhūtā hoti, viññāṇañcāyatane viññāṇañcāyatanasaññā vibhūtā hoti, ākiñcaññāyatane ākiñcaññāyatanasaññā vibhūtā hoti, nevasaññānāsaññāyatane nevasaññānāsaññāyatanasaññā vibhūtā hoti, idhaloke idhalokasaññā vibhūtā hoti, paraloke paralokasaññā vibhūtā hoti, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tatrāpi saññā vibhūtā hoti.
an11.9:7.2	Evaṁ jhāyī kho, saddha, bhadro purisājānīyo neva pathaviṁ nissāya jhāyati …pe…
an11.9:7.3	yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, tampi nissāya na jhāyati;
an11.9:7.4	jhāyati ca pana.
an11.9:7.5	Evaṁ jhāyiñca pana, saddha, bhadraṁ purisājānīyaṁ saindā devā sabrahmakā sapajāpatikā ārakāva namassanti:
an11.9:8.1	‘Namo te purisājañña,
an11.9:8.2	namo te purisuttama;
an11.9:8.3	Yassa te nābhijānāma,
an11.9:8.4	yampi nissāya jhāyasī’”ti.
an11.9:8.5	Navamaṁ.
an11.10:0.1	Aṅguttara Nikāya 11.10
an11.10:0.2	1. Nissayavagga
an11.10:0.3	Moranivāpasutta
an11.10:1.1	Ekaṁ samayaṁ bhagavā rājagahe viharati moranivāpe paribbājakārāme.
an11.10:1.2	Tatra kho bhagavā bhikkhū āmantesi:
an11.10:1.3	“bhikkhavo”ti.
an11.10:1.4	“Bhadante”ti te bhikkhū bhagavato paccassosuṁ.
an11.10:1.5	Bhagavā etadavoca:
an11.10:2.1	“Tīhi, bhikkhave, dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an11.10:2.2	Katamehi tīhi?
an11.10:2.3	Asekhena sīlakkhandhena, asekhena samādhikkhandhena, asekhena paññākkhandhena—
an11.10:2.4	imehi, kho, bhikkhave, tīhi dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an11.10:3.1	Aparehipi, bhikkhave, tīhi dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an11.10:3.2	Katamehi tīhi?
an11.10:3.3	Iddhipāṭihāriyena, ādesanāpāṭihāriyena, anusāsanīpāṭihāriyena—
an11.10:3.4	imehi kho, bhikkhave, tīhi dhammehi samannāgato bhikkhu accantaniṭṭho hoti, accantayogakkhemī accantabrahmacārī accantapariyosāno seṭṭho devamanussānaṁ.
an11.10:4.1	Aparehipi, bhikkhave, tīhi dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an11.10:4.2	Katamehi tīhi?
an11.10:4.3	Sammādiṭṭhiyā, sammāñāṇena, sammāvimuttiyā—
an11.10:4.4	imehi kho, bhikkhave, tīhi dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an11.10:5.1	Dvīhi, bhikkhave, dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an11.10:5.2	Katamehi dvīhi?
an11.10:5.3	Vijjāya, caraṇena—
an11.10:5.4	imehi kho, bhikkhave, dvīhi dhammehi samannāgato bhikkhu accantaniṭṭho hoti accantayogakkhemī accantabrahmacārī accantapariyosāno seṭṭho devamanussānaṁ.
an11.10:5.5	Brahmunā pesā, bhikkhave, sanaṅkumārena gāthā bhāsitā:
an11.10:6.1	‘Khattiyo seṭṭho janetasmiṁ,
an11.10:6.2	ye gottapaṭisārino;
an11.10:6.3	Vijjācaraṇasampanno,
an11.10:6.4	so seṭṭho devamānuse’ti.
an11.10:7.1	Sā kho panesā, bhikkhave, sanaṅkumārena gāthā bhāsitā subhāsitā, no dubbhāsitā; atthasaṁhitā, no anatthasaṁhitā; anumatā mayā.
an11.10:7.2	Ahampi, bhikkhave, evaṁ vadāmi:
an11.10:8.1	‘Khattiyo seṭṭho janetasmiṁ,
an11.10:8.2	ye gottapaṭisārino;
an11.10:8.3	Vijjācaraṇasampanno,
an11.10:8.4	so seṭṭho devamānuse’”ti.
an11.10:8.5	Dasamaṁ.
an11.10:8.6	Nissayavaggo paṭhamo.
an11.10:9.0	Tassuddānaṁ
an11.10:9.1	Kimatthiyā cetanā tayo,
an11.10:9.2	upanisā byasanena ca;
an11.10:9.3	Dve saññā manasikāro,
an11.10:9.4	saddho moranivāpakanti.
an11.11:0.1	Aṅguttara Nikāya 11.11
an11.11:0.2	2. Anussativagga
an11.11:0.3	Paṭhamamahānāmasutta
an11.11:1.1	Ekaṁ samayaṁ bhagavā sakkesu viharati kapilavatthusmiṁ nigrodhārāme.
an11.11:1.2	Tena kho pana samayena sambahulā bhikkhū bhagavato cīvarakammaṁ karonti:
an11.11:1.3	“niṭṭhitacīvaro bhagavā temāsaccayena cārikaṁ pakkamissatī”ti.
an11.11:1.4	Assosi kho mahānāmo sakko:
an11.11:1.5	“sambahulā kira bhikkhū bhagavato cīvarakammaṁ karonti:
an11.11:1.6	‘niṭṭhitacīvaro bhagavā temāsaccayena cārikaṁ pakkamissatī’”ti.
an11.11:2.1	Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho mahānāmo sakko bhagavantaṁ etadavoca:
an11.11:2.2	“sutaṁ metaṁ, bhante:
an11.11:2.3	‘sambahulā kira bhikkhū bhagavato cīvarakammaṁ karonti—
an11.11:2.4	niṭṭhitacīvaro bhagavā temāsaccayena cārikaṁ pakkamissatī’ti.
an11.11:2.5	Tesaṁ no, bhante, nānāvihārehi viharataṁ kenassa vihārena vihātabban”ti?
an11.11:3.1	“Sādhu sādhu, mahānāma.
an11.11:3.2	Etaṁ kho, mahānāma, tumhākaṁ patirūpaṁ kulaputtānaṁ, yaṁ tumhe tathāgataṁ upasaṅkamitvā puccheyyātha:
an11.11:3.3	‘tesaṁ no, bhante, nānāvihārehi viharataṁ kenassa vihārena vihātabban’ti?
an11.11:3.4	Saddho kho, mahānāma, ārādhako hoti, no assaddho;
an11.11:3.5	āraddhavīriyo ārādhako hoti, no kusīto;
an11.11:3.6	upaṭṭhitassati ārādhako hoti, no muṭṭhassati;
an11.11:3.7	samāhito ārādhako hoti, no asamāhito;
an11.11:3.8	paññavā ārādhako hoti, no duppañño.
an11.11:3.9	Imesu kho tvaṁ, mahānāma, pañcasu dhammesu patiṭṭhāya cha dhamme uttari bhāveyyāsi.
an11.11:3.10	Idha tvaṁ, mahānāma, tathāgataṁ anussareyyāsi:
an11.11:3.11	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
an11.11:3.12	Yasmiṁ, mahānāma, samaye ariyasāvako tathāgataṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an11.11:3.13	ujugatamevassa tasmiṁ samaye cittaṁ hoti tathāgataṁ ārabbha.
an11.11:3.14	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an11.11:3.15	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an11.11:3.16	Ayaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno buddhānussatiṁ bhāveti.
an11.11:4.1	Puna caparaṁ tvaṁ, mahānāma, dhammaṁ anussareyyāsi:
an11.11:4.2	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.
an11.11:4.3	Yasmiṁ, mahānāma, samaye ariyasāvako dhammaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an11.11:4.4	ujugatamevassa tasmiṁ samaye cittaṁ hoti dhammaṁ ārabbha.
an11.11:4.5	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an11.11:4.6	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an11.11:4.7	Ayaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno dhammānussatiṁ bhāveti.
an11.11:5.1	Puna caparaṁ tvaṁ, mahānāma, saṅghaṁ anussareyyāsi:
an11.11:5.2	‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.
an11.11:5.3	Yasmiṁ, mahānāma, samaye ariyasāvako saṅghaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an11.11:5.4	ujugatamevassa tasmiṁ samaye cittaṁ hoti saṅghaṁ ārabbha.
an11.11:5.5	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an11.11:5.6	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an11.11:5.7	Ayaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno saṅghānussatiṁ bhāveti.
an11.11:6.1	Puna caparaṁ tvaṁ, mahānāma, attano sīlāni anussareyyāsi akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni.
an11.11:6.2	Yasmiṁ, mahānāma, samaye ariyasāvako sīlaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an11.11:6.3	ujugatamevassa tasmiṁ samaye cittaṁ hoti sīlaṁ ārabbha.
an11.11:6.4	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an11.11:6.5	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an11.11:6.6	Ayaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno sīlānussatiṁ bhāveti.
an11.11:7.1	Puna caparaṁ tvaṁ, mahānāma, attano cāgaṁ anussareyyāsi:
an11.11:7.2	‘lābhā vata me, suladdhaṁ vata me,
an11.11:7.3	yohaṁ maccheramalapariyuṭṭhitāya pajāya vigatamalamaccherena cetasā agāraṁ ajjhāvasāmi muttacāgo payatapāṇi vossaggarato yācayogo dānasaṁvibhāgarato’ti.
an11.11:7.4	Yasmiṁ, mahānāma, samaye ariyasāvako cāgaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an11.11:7.5	ujugatamevassa tasmiṁ samaye cittaṁ hoti cāgaṁ ārabbha.
an11.11:7.6	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an11.11:7.7	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an11.11:7.8	Ayaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno cāgānussatiṁ bhāveti.
an11.11:8.1	Puna caparaṁ tvaṁ, mahānāma, devatā anussareyyāsi:
an11.11:8.2	‘santi devā cātumahārājikā, santi devā tāvatiṁsā, santi devā yāmā, santi devā tusitā, santi devā nimmānaratino, santi devā paranimmitavasavattino, santi devā brahmakāyikā, santi devā tatuttari.
an11.11:8.3	Yathārūpāya saddhāya samannāgatā tā devatā ito cutā tatthūpapannā, mayhampi tathārūpā saddhā saṁvijjati.
an11.11:8.4	Yathārūpena sīlena samannāgatā tā devatā ito cutā tatthūpapannā, mayhampi tathārūpaṁ sīlaṁ saṁvijjati.
an11.11:8.5	Yathārūpena sutena samannāgatā tā devatā ito cutā tatthūpapannā, mayhampi tathārūpaṁ sutaṁ saṁvijjati.
an11.11:8.6	Yathārūpena cāgena samannāgatā tā devatā ito cutā tatthūpapannā, mayhampi tathārūpo cāgo saṁvijjati.
an11.11:8.7	Yathārūpāya paññāya samannāgatā tā devatā ito cutā tatthūpapannā, mayhampi tathārūpā paññā saṁvijjatī’ti.
an11.11:8.8	Yasmiṁ, mahānāma, samaye ariyasāvako attano ca tāsañca devatānaṁ saddhañca sīlañca sutañca cāgañca paññañca anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an11.11:8.9	ujugatamevassa tasmiṁ samaye cittaṁ hoti devatā ārabbha.
an11.11:8.10	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an11.11:8.11	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an11.11:8.12	Ayaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno devatānussatiṁ bhāvetī”ti.
an11.11:8.13	Paṭhamaṁ.
an11.12:0.1	Aṅguttara Nikāya 11.12
an11.12:0.2	2. Anussativagga
an11.12:0.3	Dutiyamahānāmasutta
an11.12:1.1	Ekaṁ samayaṁ bhagavā sakkesu viharati kapilavatthusmiṁ nigrodhārāme.
an11.12:1.2	Tena kho pana samayena mahānāmo sakko gilānā vuṭṭhito hoti aciravuṭṭhito gelaññā.
an11.12:1.3	Tena kho pana samayena sambahulā bhikkhū bhagavato cīvarakammaṁ karonti:
an11.12:1.4	“niṭṭhitacīvaro bhagavā temāsaccayena cārikaṁ pakkamissatī”ti.
an11.12:2.1	Assosi kho mahānāmo sakko:
an11.12:2.2	“sambahulā kira bhikkhū bhagavato cīvarakammaṁ karonti:
an11.12:2.3	‘niṭṭhitacīvaro bhagavā temāsaccayena cārikaṁ pakkamissatī’”ti.
an11.12:2.4	Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho mahānāmo sakko bhagavantaṁ etadavoca:
an11.12:2.5	“sutaṁ metaṁ, bhante:
an11.12:2.6	‘sambahulā kira bhikkhū bhagavato cīvarakammaṁ karonti—
an11.12:2.7	niṭṭhitacīvaro bhagavā temāsaccayena cārikaṁ pakkamissatī’ti.
an11.12:2.8	Tesaṁ no, bhante, nānāvihārehi viharataṁ kenassa vihārena vihātabban”ti?
an11.12:3.1	“Sādhu sādhu, mahānāma.
an11.12:3.2	Etaṁ kho, mahānāma, tumhākaṁ patirūpaṁ kulaputtānaṁ yaṁ tumhe tathāgataṁ upasaṅkamitvā puccheyyātha:
an11.12:3.3	‘tesaṁ no, bhante, nānāvihārehi viharataṁ kenassa vihārena vihātabban’ti?
an11.12:3.4	Saddho kho, mahānāma, ārādhako hoti, no assaddho;
an11.12:3.5	āraddhavīriyo ārādhako hoti, no kusīto;
an11.12:3.6	upaṭṭhitassati ārādhako hoti, no muṭṭhassati;
an11.12:3.7	samāhito ārādhako hoti, no asamāhito;
an11.12:3.8	paññavā ārādhako hoti, no duppañño.
an11.12:3.9	Imesu kho tvaṁ, mahānāma, pañcasu dhammesu patiṭṭhāya cha dhamme uttari bhāveyyāsi.
an11.12:4.1	Idha tvaṁ, mahānāma, tathāgataṁ anussareyyāsi:
an11.12:4.2	‘itipi so bhagavā …pe… satthā devamanussānaṁ buddho bhagavā’ti.
an11.12:4.3	Yasmiṁ, mahānāma, samaye ariyasāvako tathāgataṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an11.12:4.4	ujugatamevassa tasmiṁ samaye cittaṁ hoti tathāgataṁ ārabbha.
an11.12:4.5	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an11.12:4.6	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an11.12:4.7	Imaṁ kho tvaṁ, mahānāma, buddhānussatiṁ gacchantopi bhāveyyāsi, ṭhitopi bhāveyyāsi, nisinnopi bhāveyyāsi, sayānopi bhāveyyāsi, kammantaṁ adhiṭṭhahantopi bhāveyyāsi, puttasambādhasayanaṁ ajjhāvasantopi bhāveyyāsi.
an11.12:5.1	Puna caparaṁ tvaṁ, mahānāma, dhammaṁ anussareyyāsi …pe…
an11.12:5.2	saṅghaṁ anussareyyāsi …pe…
an11.12:5.3	attano sīlaṁ anussareyyāsi …pe…
an11.12:5.4	attano cāgaṁ anussareyyāsi …pe…
an11.12:5.5	devatā anussareyyāsi:
an11.12:5.6	‘santi devā cātumahārājikā …pe… santi devā tatuttari.
an11.12:5.7	Yathārūpāya saddhāya samannāgatā tā devatā ito cutā tatthūpapannā, mayhampi tathārūpā saddhā saṁvijjati.
an11.12:5.8	Yathārūpena sīlena …
an11.12:5.9	sutena …
an11.12:5.10	cāgena …
an11.12:5.11	paññāya samannāgatā tā devatā ito cutā tatthūpapannā, mayhampi tathārūpā paññā saṁvijjatī’ti.
an11.12:5.12	Yasmiṁ, mahānāma, samaye ariyasāvako attano ca tāsañca devatānaṁ saddhañca sīlañca sutañca cāgañca paññañca anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;
an11.12:5.13	ujugatamevassa tasmiṁ samaye cittaṁ hoti devatā ārabbha.
an11.12:5.14	Ujugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an11.12:5.15	Pamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.
an11.12:5.16	Imaṁ kho tvaṁ, mahānāma, devatānussatiṁ gacchantopi bhāveyyāsi, ṭhitopi bhāveyyāsi, nisinnopi bhāveyyāsi, sayānopi bhāveyyāsi, kammantaṁ adhiṭṭhahantopi bhāveyyāsi, puttasambādhasayanaṁ ajjhāvasantopi bhāveyyāsī”ti.
an11.12:5.17	Dutiyaṁ.
an11.13:0.1	Aṅguttara Nikāya 11.13
an11.13:0.2	2. Anussativagga
an11.13:0.3	Nandiyasutta
an11.13:1.1	Ekaṁ samayaṁ bhagavā sakkesu viharati kapilavatthusmiṁ nigrodhārāme.
an11.13:1.2	Tena kho pana samayena bhagavā sāvatthiyaṁ vassāvāsaṁ upagantukāmo hoti.
an11.13:2.1	Assosi kho nandiyo sakko:
an11.13:2.2	“bhagavā kira sāvatthiyaṁ vassāvāsaṁ upagantukāmo”ti.
an11.13:2.3	Atha kho nandiyassa sakkassa etadahosi:
an11.13:2.4	“yannūnāhampi sāvatthiyaṁ vassāvāsaṁ upagaccheyyaṁ.
an11.13:2.5	Tattha kammantañceva adhiṭṭhahissāmi, bhagavantañca lacchāmi kālena kālaṁ dassanāyā”ti.
an11.13:3.1	Atha kho bhagavā sāvatthiyaṁ vassāvāsaṁ upagacchi.
an11.13:3.2	Nandiyopi kho sakko sāvatthiyaṁ vassāvāsaṁ upagacchi.
an11.13:3.3	Tattha kammantañceva adhiṭṭhāsi, bhagavantañca labhi kālena kālaṁ dassanāya.
an11.13:3.4	Tena kho pana samayena sambahulā bhikkhū bhagavato cīvarakammaṁ karonti:
an11.13:3.5	“niṭṭhitacīvaro bhagavā temāsaccayena cārikaṁ pakkamissatī”ti.
an11.13:4.1	Assosi kho nandiyo sakko:
an11.13:4.2	“sambahulā kira bhikkhū bhagavato cīvarakammaṁ karonti:
an11.13:4.3	‘niṭṭhitacīvaro bhagavā temāsaccayena cārikaṁ pakkamissatī’”ti.
an11.13:4.4	Atha kho nandiyo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho nandiyo sakko bhagavantaṁ etadavoca:
an11.13:4.5	“sutaṁ metaṁ, bhante:
an11.13:4.6	‘sambahulā kira bhikkhū bhagavato cīvarakammaṁ karonti—
an11.13:4.7	niṭṭhitacīvaro bhagavā temāsaccayena cārikaṁ pakkamissatī’ti.
an11.13:4.8	Tesaṁ no, bhante, nānāvihārehi viharataṁ kenassa vihārena vihātabban”ti?
an11.13:5.1	“Sādhu sādhu, nandiya.
an11.13:5.2	Etaṁ kho, nandiya, tumhākaṁ patirūpaṁ kulaputtānaṁ, yaṁ tumhe tathāgataṁ upasaṅkamitvā puccheyyātha:
an11.13:5.3	‘tesaṁ no, bhante, nānāvihārehi viharataṁ kenassa vihārena vihātabban’ti?
an11.13:5.4	Saddho kho, nandiya, ārādhako hoti, no assaddho;
an11.13:5.5	sīlavā ārādhako hoti, no dussīlo;
an11.13:5.6	āraddhavīriyo ārādhako hoti, no kusīto;
an11.13:5.7	upaṭṭhitassati ārādhako hoti, no muṭṭhassati;
an11.13:5.8	samāhito ārādhako hoti, no asamāhito;
an11.13:5.9	paññavā ārādhako hoti, no duppañño.
an11.13:5.10	Imesu kho te, nandiya, chasu dhammesu patiṭṭhāya pañcasu dhammesu ajjhattaṁ sati upaṭṭhāpetabbā.
an11.13:6.1	Idha tvaṁ, nandiya, tathāgataṁ anussareyyāsi:
an11.13:6.2	‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi, satthā devamanussānaṁ buddho bhagavā’ti.
an11.13:6.3	Iti kho te, nandiya, tathāgataṁ ārabbha ajjhattaṁ sati upaṭṭhāpetabbā.
an11.13:7.1	Puna caparaṁ tvaṁ, nandiya, dhammaṁ anussareyyāsi:
an11.13:7.2	‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.
an11.13:7.3	Iti kho te, nandiya, dhammaṁ ārabbha ajjhattaṁ sati upaṭṭhāpetabbā.
an11.13:8.1	Puna caparaṁ tvaṁ, nandiya, kalyāṇamitte anussareyyāsi:
an11.13:8.2	‘lābhā vata me, suladdhaṁ vata me,
an11.13:8.3	yassa me kalyāṇamittā anukampakā atthakāmā ovādakā anusāsakā’ti.
an11.13:8.4	Iti kho te, nandiya, kalyāṇamitte ārabbha ajjhattaṁ sati upaṭṭhāpetabbā.
an11.13:9.1	Puna caparaṁ tvaṁ, nandiya, attano cāgaṁ anussareyyāsi:
an11.13:9.2	‘lābhā vata me, suladdhaṁ vata me,
an11.13:9.3	yohaṁ maccheramalapariyuṭṭhitāya pajāya vigatamalamaccherena cetasā agāraṁ ajjhāvasāmi muttacāgo payatapāṇi vossaggarato yācayogo dānasaṁvibhāgarato’ti.
an11.13:9.4	Iti kho te, nandiya, cāgaṁ ārabbha ajjhattaṁ sati upaṭṭhāpetabbā.
an11.13:10.1	Puna caparaṁ tvaṁ, nandiya, devatā anussareyyāsi:
an11.13:10.2	‘yā devatā atikkammeva kabaḷīkārāhārabhakkhānaṁ devatānaṁ sahabyataṁ aññataraṁ manomayaṁ kāyaṁ upapannā, tā karaṇīyaṁ attano na samanupassanti katassa vā paticayaṁ’.
an11.13:10.3	Seyyathāpi, nandiya, bhikkhu asamayavimutto karaṇīyaṁ attano na samanupassati katassa vā paticayaṁ;
an11.13:10.4	evamevaṁ kho, nandiya, yā tā devatā atikkammeva kabaḷīkārāhārabhakkhānaṁ devatānaṁ sahabyataṁ aññataraṁ manomayaṁ kāyaṁ upapannā, tā karaṇīyaṁ attano na samanupassanti katassa vā paticayaṁ.
an11.13:10.5	Iti kho te, nandiya, devatā ārabbha ajjhattaṁ sati upaṭṭhāpetabbā.
an11.13:11.1	Imehi kho, nandiya, ekādasahi dhammehi samannāgato ariyasāvako pajahateva pāpake akusale dhamme, na upādiyati.
an11.13:11.2	Seyyathāpi, nandiya, kumbho nikkujjo vamateva udakaṁ, no vantaṁ paccāvamati;
an11.13:11.3	seyyathāpi vā pana, nandiya, sukkhe tiṇadāye aggi mutto ḍahaññeva gacchati, no daḍḍhaṁ paccudāvattati;
an11.13:11.4	evamevaṁ kho, nandiya, imehi ekādasahi dhammehi samannāgato ariyasāvako pajahateva pāpake akusale dhamme, na upādiyatī”ti.
an11.13:11.5	Tatiyaṁ.
an11.14:0.1	Aṅguttara Nikāya 11.14
an11.14:0.2	2. Anussativagga
an11.14:0.3	Subhūtisutta
an11.14:1.1	Atha kho āyasmā subhūti saddhena bhikkhunā saddhiṁ yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ subhūtiṁ bhagavā etadavoca:
an11.14:1.2	“ko nāmāyaṁ, subhūti, bhikkhū”ti?
an11.14:1.3	“Saddho nāmāyaṁ, bhante, bhikkhu, sudattassa upāsakassa putto, saddhā agārasmā anagāriyaṁ pabbajito”ti.
an11.14:2.1	“Kacci panāyaṁ, subhūti, saddho bhikkhu sudattassa upāsakassa putto saddhā agārasmā anagāriyaṁ pabbajito sandissati saddhāpadānesū”ti?
an11.14:2.2	“Etassa, bhagavā, kālo; etassa, sugata, kālo,
an11.14:2.3	yaṁ bhagavā saddhassa saddhāpadānāni bhāseyya.
an11.14:2.4	Idānāhaṁ jānissāmi yadi vā ayaṁ bhikkhu sandissati saddhāpadānesu yadi vā no”ti.
an11.14:3.1	“Tena hi, subhūti, suṇāhi, sādhukaṁ manasi karohi; bhāsissāmī”ti.
an11.14:3.2	“Evaṁ, bhante”ti kho āyasmā subhūti bhagavato paccassosi.
an11.14:3.3	Bhagavā etadavoca:
an11.14:4.1	“Idha, subhūti, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an11.14:4.2	Yampi, subhūti, bhikkhu sīlavā hoti …pe… samādāya sikkhati sikkhāpadesu, idampi, subhūti, saddhassa saddhāpadānaṁ hoti.
an11.14:5.1	Puna caparaṁ, subhūti, bhikkhu bahussuto hoti sutadharo sutasannicayo; ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an11.14:5.2	Yampi, subhūti, bhikkhu bahussuto hoti …pe… diṭṭhiyā suppaṭividdhā, idampi, subhūti, saddhassa saddhāpadānaṁ hoti.
an11.14:6.1	Puna caparaṁ, subhūti, bhikkhu kalyāṇamitto hoti kalyāṇasahāyo kalyāṇasampavaṅko.
an11.14:6.2	Yampi, subhūti, bhikkhu kalyāṇamitto hoti kalyāṇasahāyo kalyāṇasampavaṅko, idampi, subhūti, saddhassa saddhāpadānaṁ hoti.
an11.14:7.1	Puna caparaṁ, subhūti, bhikkhu suvaco hoti sovacassakaraṇehi dhammehi samannāgato khamo padakkhiṇaggāhī anusāsaniṁ.
an11.14:7.2	Yampi, subhūti, bhikkhu suvaco hoti sovacassakaraṇehi dhammehi samannāgato khamo padakkhiṇaggāhī anusāsaniṁ, idampi, subhūti, saddhassa saddhāpadānaṁ hoti.
an11.14:8.1	Puna caparaṁ, subhūti, bhikkhu yāni tāni sabrahmacārīnaṁ uccāvacāni kiṅkaraṇīyāni tatra dakkho hoti analaso tatrupāyāya vīmaṁsāya samannāgato alaṁ kātuṁ alaṁ saṁvidhātuṁ.
an11.14:8.2	Yampi, subhūti, bhikkhu yāni tāni sabrahmacārīnaṁ uccāvacāni kiṅkaraṇīyāni tatra dakkho hoti analaso tatrupāyāya vīmaṁsāya samannāgato alaṁ kātuṁ alaṁ saṁvidhātuṁ, idampi, subhūti, saddhassa saddhāpadānaṁ hoti.
an11.14:9.1	Puna caparaṁ, subhūti, bhikkhu dhammakāmo hoti piyasamudāhāro abhidhamme abhivinaye uḷārapāmojjo.
an11.14:9.2	Yampi, subhūti, bhikkhu dhammakāmo hoti piyasamudāhāro abhidhamme abhivinaye uḷārapāmojjo, idampi, subhūti, saddhassa saddhāpadānaṁ hoti.
an11.14:10.1	Puna caparaṁ, subhūti, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
an11.14:10.2	Yampi, subhūti, bhikkhu āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya thāmavā daḷhaparakkamo anikkhittadhuro kusalesu dhammesu, idampi, subhūti, saddhassa saddhāpadānaṁ hoti.
an11.14:11.1	Puna caparaṁ, subhūti, bhikkhu catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an11.14:11.2	Yampi, subhūti, bhikkhu catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī, idampi, subhūti, saddhassa saddhāpadānaṁ hoti.
an11.14:12.1	Puna caparaṁ, subhūti, bhikkhu anekavihitaṁ pubbenivāsaṁ anussarati,
an11.14:12.2	seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṁsampi jātiyo cattārīsampi jātiyo paññāsampi jātiyo jātisatampi jātisahassampi jātisatasahassampi anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe: ‘amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto amutra udapādiṁ; tatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto idhūpapanno’ti. Iti sākāraṁ sauddesaṁ anekavihitaṁ pubbenivāsaṁ anussarati.
an11.14:12.3	Yampi, subhūti, bhikkhu anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati. Idampi, subhūti, saddhassa saddhāpadānaṁ hoti.
an11.14:13.1	Puna caparaṁ, subhūti, bhikkhu dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti: ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā, te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā, te kāyassa bhedā paraṁ maraṇā sugatiṁ saggaṁ lokaṁ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti.
an11.14:13.2	Yampi, subhūti, bhikkhu dibbena cakkhunā visuddhena …pe… yathākammūpage satte pajānāti, idampi, subhūti, saddhassa saddhāpadānaṁ hoti.
an11.14:14.1	Puna caparaṁ, subhūti, bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
an11.14:14.2	Yampi, subhūti, bhikkhu āsavānaṁ khayā …pe… sacchikatvā upasampajja viharati, idampi, subhūti, saddhassa saddhāpadānaṁ hotī”ti.
an11.14:15.1	Evaṁ vutte āyasmā subhūti bhagavantaṁ etadavoca:
an11.14:15.2	“yānimāni, bhante, bhagavatā saddhassa saddhāpadānāni bhāsitāni, saṁvijjanti tāni imassa bhikkhuno, ayañca bhikkhu etesu sandissati.
an11.14:16.1	Ayaṁ, bhante, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.
an11.14:17.1	Ayaṁ, bhante, bhikkhu bahussuto hoti sutadharo sutasannicayo; ye te dhammā ādikalyāṇā majjhekalyāṇā pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
an11.14:18.1	Ayaṁ, bhante, bhikkhu kalyāṇamitto hoti kalyāṇasahāyo kalyāṇasampavaṅko.
an11.14:19.1	Ayaṁ, bhante, bhikkhu suvaco hoti …pe… anusāsaniṁ.
an11.14:20.1	Ayaṁ, bhante, bhikkhu yāni tāni sabrahmacārīnaṁ uccāvacāni kiṅkaraṇīyāni tattha dakkho hoti analaso tatrupāyāya vīmaṁsāya samannāgato alaṁ kātuṁ alaṁ saṁvidhātuṁ.
an11.14:21.1	Ayaṁ, bhante, bhikkhu dhammakāmo hoti piyasamudāhāro abhidhamme abhivinaye uḷārapāmojjo.
an11.14:22.1	Ayaṁ, bhante, bhikkhu āraddhavīriyo viharati …pe… thāmavā daḷhaparakkamo anikkhittadhuro kusalesu dhammesu.
an11.14:23.1	Ayaṁ, bhante, bhikkhu catunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī.
an11.14:24.1	Ayaṁ, bhante, bhikkhu anekavihitaṁ pubbenivāsaṁ anussarati, seyyathidaṁ—ekampi jātiṁ dvepi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati.
an11.14:25.1	Ayaṁ, bhante, bhikkhu dibbena cakkhunā visuddhena atikkantamānusakena …pe… yathākammūpage satte pajānāti.
an11.14:26.1	Ayaṁ, bhante, bhikkhu āsavānaṁ khayā …pe… sacchikatvā upasampajja viharati.
an11.14:26.2	Yānimāni, bhante, bhagavatā saddhassa saddhāpadānāni bhāsitāni, saṁvijjanti tāni imassa bhikkhuno, ayañca bhikkhu etesu sandissatī”ti.
an11.14:27.1	“Sādhu sādhu, subhūti.
an11.14:27.2	Tena hi tvaṁ, subhūti, iminā ca saddhena bhikkhunā saddhiṁ vihareyyāsi.
an11.14:27.3	Yadā ca tvaṁ, subhūti, ākaṅkheyyāsi tathāgataṁ dassanāya, iminā saddhena bhikkhunā saddhiṁ upasaṅkameyyāsi tathāgataṁ dassanāyā”ti.
an11.14:27.4	Catutthaṁ.
an11.15:0.1	Aṅguttara Nikāya 11.15
an11.15:0.2	2. Anussativagga
an11.15:0.3	Mettāsutta
an11.15:1.1	“Mettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṁsā pāṭikaṅkhā.
an11.15:2.1	Katame ekādasa?
an11.15:2.2	Sukhaṁ supati, sukhaṁ paṭibujjhati, na pāpakaṁ supinaṁ passati, manussānaṁ piyo hoti, amanussānaṁ piyo hoti, devatā rakkhanti, nāssa aggi vā visaṁ vā satthaṁ vā kamati, tuvaṭaṁ cittaṁ samādhiyati, mukhavaṇṇo vippasīdati, asammūḷho kālaṁ karoti, uttari appaṭivijjhanto brahmalokūpago hoti.
an11.15:2.3	Mettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṁsā pāṭikaṅkhā”ti.
an11.15:2.4	Pañcamaṁ.
an11.16:0.1	Aṅguttara Nikāya 11.16
an11.16:0.2	2. Anussativagga
an11.16:0.3	Aṭṭhakanāgarasutta
an11.16:1.1	Ekaṁ samayaṁ āyasmā ānando vesāliyaṁ viharati beluvagāmake.
an11.16:1.2	Tena kho pana samayena dasamo gahapati aṭṭhakanāgaro pāṭaliputtaṁ anuppatto hoti kenacideva karaṇīyena.
an11.16:2.1	Atha kho dasamo gahapati aṭṭhakanāgaro yena kukkuṭārāmo yena aññataro bhikkhu tenupasaṅkami; upasaṅkamitvā taṁ bhikkhuṁ etadavoca:
an11.16:2.2	“kahaṁ nu kho, bhante, āyasmā ānando etarahi viharati?
an11.16:2.3	Dassanakāmā hi mayaṁ, bhante, āyasmantaṁ ānandan”ti.
an11.16:2.4	“Eso, gahapati, āyasmā ānando vesāliyaṁ viharati beluvagāmake”ti.
an11.16:3.1	Atha kho dasamo gahapati aṭṭhakanāgaro pāṭaliputte taṁ karaṇīyaṁ tīretvā yena vesālī beluvagāmako yenāyasmā ānando tenupasaṅkami; upasaṅkamitvā āyasmantaṁ ānandaṁ abhivādetvā ekamantaṁ nisīdi. Ekamantaṁ nisinno kho dasamo gahapati aṭṭhakanāgaro āyasmantaṁ ānandaṁ etadavoca:
an11.16:3.2	“atthi nu kho, bhante ānanda, tena bhagavatā jānatā passatā arahatā sammāsambuddhena ekadhammo sammadakkhāto, yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇātī”ti?
an11.16:3.3	“Atthi kho, gahapati, tena bhagavatā jānatā passatā arahatā sammāsambuddhena ekadhammo sammadakkhāto, yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇātī”ti.
an11.16:4.1	“Katamo pana, bhante ānanda, tena bhagavatā jānatā passatā arahatā sammāsambuddhena ekadhammo sammadakkhāto, yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇātī”ti?
an11.16:4.2	“Idha, gahapati, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
an11.16:4.3	So iti paṭisañcikkhati:
an11.16:4.4	‘idampi kho paṭhamaṁ jhānaṁ abhisaṅkhataṁ abhisañcetayitaṁ’.
an11.16:4.5	‘Yaṁ kho pana kiñci abhisaṅkhataṁ abhisañcetayitaṁ, tadaniccaṁ nirodhadhamman’ti pajānāti.
an11.16:4.6	So tattha ṭhito āsavānaṁ khayaṁ pāpuṇāti;
an11.16:4.7	no ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an11.16:4.8	Ayampi kho, gahapati, tena bhagavatā jānatā passatā arahatā sammāsambuddhena ekadhammo sammadakkhāto, yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati, aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇāti.
an11.16:5.1	Puna caparaṁ, gahapati, bhikkhu vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ …pe…
an11.16:5.2	tatiyaṁ jhānaṁ …pe…
an11.16:5.3	catutthaṁ jhānaṁ upasampajja viharati.
an11.16:5.4	So iti paṭisañcikkhati:
an11.16:5.5	‘idampi kho catutthaṁ jhānaṁ abhisaṅkhataṁ abhisañcetayitaṁ’.
an11.16:5.6	‘Yaṁ kho pana kiñci abhisaṅkhataṁ abhisañcetayitaṁ tadaniccaṁ nirodhadhamman’ti pajānāti.
an11.16:5.7	So tattha ṭhito āsavānaṁ khayaṁ pāpuṇāti;
an11.16:5.8	no ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an11.16:5.9	Ayampi kho, gahapati, tena bhagavatā jānatā passatā arahatā sammāsambuddhena ekadhammo sammadakkhāto, yattha bhikkhuno appamattassa ātāpino pahitattassa viharato avimuttaṁ vā cittaṁ vimuccati aparikkhīṇā vā āsavā parikkhayaṁ gacchanti, ananuppattaṁ vā anuttaraṁ yogakkhemaṁ anupāpuṇāti.
an11.16:6.1	Puna caparaṁ, gahapati, bhikkhu mettāsahagatena cetasā ekaṁ disaṁ pharitvā viharati tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā ekaṁ disaṁ pharitvā viharati vipulena mahaggatena appamāṇena averena abyāpajjena pharitvā viharati.
an11.16:6.2	So iti paṭisañcikkhati:
an11.16:6.3	‘ayampi kho mettā cetovimutti abhisaṅkhatā abhisañcetayitā’.
an11.16:6.4	‘Yaṁ kho pana kiñci abhisaṅkhataṁ abhisañcetayitaṁ tadaniccaṁ nirodhadhamman’ti pajānāti.
an11.16:6.5	So tattha ṭhito āsavānaṁ khayaṁ pāpuṇāti;
an11.16:6.6	no ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an11.16:6.7	Ayampi kho, gahapati, tena bhagavatā jānatā …pe… ananuppattaṁ vā anuttaraṁ yogakkhemaṁ anupāpuṇāti.
an11.16:7.1	Puna caparaṁ, gahapati, bhikkhu karuṇāsahagatena cetasā …pe…
an11.16:7.2	muditāsahagatena cetasā …pe…
an11.16:7.3	upekkhāsahagatena cetasā ekaṁ disaṁ pharitvā viharati tathā dutiyaṁ tathā tatiyaṁ tathā catutthaṁ.
an11.16:7.4	Iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
an11.16:7.5	So iti paṭisañcikkhati:
an11.16:7.6	‘ayampi kho upekkhācetovimutti abhisaṅkhatā abhisañcetayitā’.
an11.16:7.7	‘Yaṁ kho pana kiñci abhisaṅkhataṁ abhisañcetayitaṁ tadaniccaṁ nirodhadhamman’ti pajānāti.
an11.16:7.8	So tattha ṭhito āsavānaṁ khayaṁ pāpuṇāti;
an11.16:7.9	no ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an11.16:7.10	Ayampi kho, gahapati, tena bhagavatā jānatā …pe… ananuppattaṁ vā anuttaraṁ yogakkhemaṁ anupāpuṇāti.
an11.16:8.1	Puna caparaṁ, gahapati, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
an11.16:8.2	So iti paṭisañcikkhati:
an11.16:8.3	‘ayampi kho ākāsānañcāyatanasamāpatti abhisaṅkhatā abhisañcetayitā’.
an11.16:8.4	‘Yaṁ kho pana kiñci abhisaṅkhataṁ abhisañcetayitaṁ tadaniccaṁ nirodhadhamman’ti pajānāti.
an11.16:8.5	So tattha ṭhito āsavānaṁ khayaṁ pāpuṇāti;
an11.16:8.6	no ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an11.16:8.7	Ayampi kho, gahapati, tena bhagavatā jānatā …pe… ananuppattaṁ vā anuttaraṁ yogakkhemaṁ anupāpuṇāti.
an11.16:9.1	Puna caparaṁ, gahapati, bhikkhu sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati …pe…
an11.16:9.2	sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
an11.16:9.3	So iti paṭisañcikkhati:
an11.16:9.4	‘ayampi kho ākiñcaññāyatanasamāpatti abhisaṅkhatā abhisañcetayitā’.
an11.16:9.5	‘Yaṁ kho pana kiñci abhisaṅkhataṁ abhisañcetayitaṁ tadaniccaṁ nirodhadhamman’ti pajānāti.
an11.16:9.6	So tattha ṭhito āsavānaṁ khayaṁ pāpuṇāti;
an11.16:9.7	no ce āsavānaṁ khayaṁ pāpuṇāti, teneva dhammarāgena tāya dhammanandiyā pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
an11.16:9.8	Ayampi kho, gahapati, tena bhagavatā jānatā …pe… ananuppattaṁ vā anuttaraṁ yogakkhemaṁ anupāpuṇātī”ti.
an11.16:10.1	Evaṁ vutte dasamo gahapati aṭṭhakanāgaro āyasmantaṁ ānandaṁ etadavoca:
an11.16:10.2	“seyyathāpi, bhante ānanda, puriso ekaṁ nidhimukhaṁ gavesanto sakideva ekādasa nidhimukhāni adhigaccheyya;
an11.16:10.3	evamevaṁ kho ahaṁ, bhante, ekaṁ amatadvāraṁ gavesanto sakideva ekādasa amatadvārāni alatthaṁ sevanāya.
an11.16:10.4	Seyyathāpi, bhante, purisassa agāraṁ ekādasa dvāraṁ. So tasmiṁ agāre āditte ekamekenapi dvārena sakkuṇeyya attānaṁ sotthiṁ kātuṁ;
an11.16:10.5	evamevaṁ kho ahaṁ, bhante, imesaṁ ekādasannaṁ amatadvārānaṁ ekamekenapi amatadvārena sakkuṇissāmi attānaṁ sotthiṁ kātuṁ.
an11.16:10.6	Ime hi nāma, bhante, aññatitthiyā ācariyassa ācariyadhanaṁ pariyesissanti.
an11.16:10.7	Kiṁ panāhaṁ āyasmato ānandassa pūjaṁ na karissāmī”ti.
an11.16:11.1	Atha kho dasamo gahapati aṭṭhakanāgaro vesālikañca pāṭaliputtakañca bhikkhusaṅghaṁ sannipātāpetvā paṇītena khādanīyena bhojanīyena sahatthā santappesi sampavāresi.
an11.16:11.2	Ekamekañca bhikkhuṁ paccekaṁ dussayugena acchādesi, āyasmantañca ānandaṁ ticīvarena.
an11.16:11.3	Āyasmato ānandassa pañcasataṁ vihāraṁ kārāpesīti.
an11.16:11.4	Chaṭṭhaṁ.
an11.17:0.1	Aṅguttara Nikāya 11.17
an11.17:0.2	2. Anussativagga
an11.17:0.3	Gopālasutta
an11.17:1.1	“Ekādasahi, bhikkhave, aṅgehi samannāgato gopālako abhabbo gogaṇaṁ pariharituṁ phātiṁ kātuṁ.
an11.17:1.2	Katamehi ekādasahi?
an11.17:1.3	Idha, bhikkhave, gopālako na rūpaññū hoti, na lakkhaṇakusalo hoti, na āsāṭikaṁ hāretā hoti, na vaṇaṁ paṭicchādetā hoti, na dhūmaṁ kattā hoti, na titthaṁ jānāti, na pītaṁ jānāti, na vīthiṁ jānāti, na gocarakusalo hoti, anavasesadohī ca hoti, ye te usabhā gopitaro gopariṇāyakā te na atirekapūjāya pūjetā hoti.
an11.17:1.4	Imehi kho, bhikkhave, ekādasahi aṅgehi samannāgato gopālako abhabbo gogaṇaṁ pariharituṁ phātiṁ kātuṁ.
an11.17:2.1	Evamevaṁ kho, bhikkhave, ekādasahi dhammehi samannāgato bhikkhu abhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an11.17:2.2	Katamehi ekādasahi?
an11.17:2.3	Idha, bhikkhave, bhikkhu na rūpaññū hoti, na lakkhaṇakusalo hoti, na āsāṭikaṁ hāretā hoti, na vaṇaṁ paṭicchādetā hoti, na dhūmaṁ kattā hoti, na titthaṁ jānāti, na pītaṁ jānāti, na vīthiṁ jānāti, na gocarakusalo hoti, anavasesadohī ca hoti, ye te bhikkhū therā rattaññū cirapabbajitā saṅghapitaro saṅghapariṇāyakā te na atirekapūjāya pūjetā hoti.
an11.17:3.1	Kathañca, bhikkhave, bhikkhu na rūpaññū hoti?
an11.17:3.2	Idha, bhikkhave, bhikkhu yaṁ kiñci rūpaṁ (…) ‘cattāri mahābhūtāni, catunnañca mahābhūtānaṁ upādāyarūpan’ti yathābhūtaṁ nappajānāti.
an11.17:3.3	Evaṁ kho, bhikkhave, bhikkhu na rūpaññū hoti.
an11.17:4.1	Kathañca, bhikkhave, bhikkhu na lakkhaṇakusalo hoti?
an11.17:4.2	Idha, bhikkhave, bhikkhu ‘kammalakkhaṇo bālo, kammalakkhaṇo paṇḍito’ti yathābhūtaṁ nappajānāti.
an11.17:4.3	Evaṁ kho, bhikkhave, bhikkhu na lakkhaṇakusalo hoti.
an11.17:5.1	Kathañca, bhikkhave, bhikkhu na āsāṭikaṁ hāretā hoti?
an11.17:5.2	Idha, bhikkhave, bhikkhu uppannaṁ kāmavitakkaṁ adhivāseti nappajahati na vinodeti na byantīkaroti na anabhāvaṁ gameti, uppannaṁ byāpādavitakkaṁ … uppannaṁ vihiṁsāvitakkaṁ …
an11.17:5.3	uppannuppanne pāpake akusale dhamme adhivāseti nappajahati na vinodeti na byantīkaroti na anabhāvaṁ gameti.
an11.17:5.4	Evaṁ kho, bhikkhave, bhikkhu na āsāṭikaṁ hāretā hoti.
an11.17:6.1	Kathañca, bhikkhave, bhikkhu na vaṇaṁ paṭicchādetā hoti?
an11.17:6.2	Idha, bhikkhave, bhikkhu cakkhunā rūpaṁ disvā nimittaggāhī hoti anubyañjanaggāhī;
an11.17:6.3	yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya na paṭipajjati; na rakkhati cakkhundriyaṁ, cakkhundriye saṁvaraṁ nāpajjati.
an11.17:6.4	Sotena saddaṁ sutvā …
an11.17:6.5	ghānena gandhaṁ ghāyitvā …
an11.17:6.6	jivhāya rasaṁ sāyitvā …
an11.17:6.7	kāyena phoṭṭhabbaṁ phusitvā …
an11.17:6.8	manasā dhammaṁ viññāya nimittaggāhī hoti anubyañjanaggāhī;
an11.17:6.9	yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya na paṭipajjati; na rakkhati manindriyaṁ, manindriye saṁvaraṁ nāpajjati.
an11.17:6.10	Evaṁ kho, bhikkhave, bhikkhu na vaṇaṁ paṭicchādetā hoti.
an11.17:7.1	Kathañca, bhikkhave, bhikkhu na dhūmaṁ kattā hoti?
an11.17:7.2	Idha, bhikkhave, bhikkhu na yathāsutaṁ yathāpariyattaṁ dhammaṁ vitthārena paresaṁ desetā hoti.
an11.17:7.3	Evaṁ kho, bhikkhave, bhikkhu na dhūmaṁ kattā hoti.
an11.17:8.1	Kathañca, bhikkhave, bhikkhu na titthaṁ jānāti?
an11.17:8.2	Idha, bhikkhave, bhikkhu ye te bhikkhū bahussutā āgatāgamā dhammadharā vinayadharā mātikādharā, te kālena kālaṁ upasaṅkamitvā na paripucchati na paripañhati:
an11.17:8.3	‘idaṁ, bhante, kathaṁ, imassa ko attho’ti?
an11.17:8.4	Tassa te āyasmanto avivaṭañceva na vivaranti, anuttānīkatañca na uttānīkaronti, anekavihitesu ca kaṅkhāṭhāniyesu dhammesu kaṅkhaṁ na paṭivinodenti.
an11.17:8.5	Evaṁ kho, bhikkhave, bhikkhu na titthaṁ jānāti.
an11.17:9.1	Kathañca, bhikkhave, bhikkhu na pītaṁ jānāti?
an11.17:9.2	Idha, bhikkhave, bhikkhu tathāgatappavedite dhammavinaye desiyamāne na labhati atthavedaṁ, na labhati dhammavedaṁ, na labhati dhammūpasaṁhitaṁ pāmojjaṁ.
an11.17:9.3	Evaṁ kho, bhikkhave, bhikkhu na pītaṁ jānāti.
an11.17:10.1	Kathañca, bhikkhave, bhikkhu na vīthiṁ jānāti?
an11.17:10.2	Idha, bhikkhave, bhikkhu ariyaṁ aṭṭhaṅgikaṁ maggaṁ yathābhūtaṁ nappajānāti.
an11.17:10.3	Evaṁ kho, bhikkhave, bhikkhu na vīthiṁ jānāti.
an11.17:11.1	Kathañca, bhikkhave, bhikkhu na gocarakusalo hoti?
an11.17:11.2	Idha, bhikkhave, bhikkhu cattāro satipaṭṭhāne yathābhūtaṁ nappajānāti.
an11.17:11.3	Evaṁ kho, bhikkhave, bhikkhu na gocarakusalo hoti.
an11.17:12.1	Kathañca, bhikkhave, bhikkhu anavasesadohī hoti?
an11.17:12.2	Idha, bhikkhave, bhikkhuṁ saddhā gahapatikā abhihaṭṭhuṁ pavārenti cīvarapiṇḍapātasenāsanagilānapaccayabhesajjaparikkhārehi. Tatra bhikkhu mattaṁ na jānāti paṭiggahaṇāya.
an11.17:12.3	Evaṁ kho, bhikkhave, bhikkhu anavasesadohī hoti.
an11.17:13.1	Kathañca, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā, te na atirekapūjāya pūjetā hoti?
an11.17:13.2	Idha, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā, tesu na mettaṁ kāyakammaṁ paccupaṭṭhāpeti āvi ceva raho ca, na mettaṁ vacīkammaṁ … na mettaṁ manokammaṁ paccupaṭṭhāpeti āvi ceva raho ca.
an11.17:13.3	Evaṁ kho, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā, na te atirekapūjāya pūjetā hoti.
an11.17:14.1	Imehi kho, bhikkhave, ekādasahi dhammehi samannāgato bhikkhu abhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an11.17:15.1	Ekādasahi, bhikkhave, aṅgehi samannāgato gopālako bhabbo gogaṇaṁ pariharituṁ phātiṁ kātuṁ.
an11.17:15.2	Katamehi ekādasahi?
an11.17:15.3	Idha, bhikkhave, gopālako rūpaññū hoti, lakkhaṇakusalo hoti, āsāṭikaṁ hāretā hoti, vaṇaṁ paṭicchādetā hoti, dhūmaṁ kattā hoti, titthaṁ jānāti, pītaṁ jānāti, vīthiṁ jānāti, gocarakusalo hoti, sāvasesadohī ca hoti, ye te usabhā gopitaro gopariṇāyakā te atirekapūjāya pūjetā hoti—
an11.17:15.4	imehi kho, bhikkhave, ekādasahi aṅgehi samannāgato gopālako bhabbo gogaṇaṁ pariharituṁ phātiṁ kātuṁ.
an11.17:16.1	Evamevaṁ kho, bhikkhave, ekādasahi dhammehi samannāgato bhikkhu bhabbo imasmiṁ dhammavinaye vuddhiṁ virūḷhiṁ vepullaṁ āpajjituṁ.
an11.17:16.2	Katamehi ekādasahi?
an11.17:16.3	Idha, bhikkhave, bhikkhu rūpaññū hoti, lakkhaṇakusalo hoti, āsāṭikaṁ hāretā hoti, vaṇaṁ paṭicchādetā hoti, dhūmaṁ kattā hoti, titthaṁ jānāti, pītaṁ jānāti, vīthiṁ jānāti, gocarakusalo hoti, sāvasesadohī ca hoti, ye te bhikkhū therā rattaññū cirapabbajitā saṅghapitaro saṅghapariṇāyakā te atirekapūjāya pūjetā hoti.
an11.17:17.1	Kathañca, bhikkhave, bhikkhu rūpaññū hoti?
an11.17:17.2	Idha, bhikkhave, bhikkhu yaṁ kiñci rūpaṁ ‘cattāri mahābhūtāni, catunnañca mahābhūtānaṁ upādāyarūpan’ti yathābhūtaṁ pajānāti.
an11.17:17.3	Evaṁ kho, bhikkhave, bhikkhu rūpaññū hoti.
an11.17:18.1	Kathañca, bhikkhave, bhikkhu lakkhaṇakusalo hoti?
an11.17:18.2	Idha, bhikkhave, bhikkhu ‘kammalakkhaṇo bālo, kammalakkhaṇo paṇḍito’ti yathābhūtaṁ pajānāti.
an11.17:18.3	Evaṁ kho, bhikkhave, bhikkhu lakkhaṇakusalo hoti.
an11.17:19.1	Kathañca, bhikkhave, bhikkhu āsāṭikaṁ hāretā hoti?
an11.17:19.2	Idha, bhikkhave, bhikkhu uppannaṁ kāmavitakkaṁ nādhivāseti pajahati vinodeti byantīkaroti anabhāvaṁ gameti, uppannaṁ byāpādavitakkaṁ … uppannaṁ vihiṁsāvitakkaṁ … uppannuppanne pāpake akusale dhamme nādhivāseti pajahati vinodeti byantīkaroti anabhāvaṁ gameti.
an11.17:19.3	Evaṁ kho, bhikkhave, bhikkhu āsāṭikaṁ hāretā hoti.
an11.17:20.1	Kathañca, bhikkhave, bhikkhu vaṇaṁ paṭicchādetā hoti?
an11.17:20.2	Idha, bhikkhave, bhikkhu cakkhunā rūpaṁ disvā na nimittaggāhī hoti nānubyañjanaggāhī;
an11.17:20.3	yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati cakkhundriyaṁ, cakkhundriye saṁvaraṁ āpajjati.
an11.17:20.4	Sotena saddaṁ sutvā …
an11.17:20.5	ghānena gandhaṁ ghāyitvā …
an11.17:20.6	jivhāya rasaṁ sāyitvā …
an11.17:20.7	kāyena phoṭṭhabbaṁ phusitvā …
an11.17:20.8	manasā dhammaṁ viññāya na nimittaggāhī hoti nānubyañjanaggāhī;
an11.17:20.9	yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ, manindriye saṁvaraṁ āpajjati.
an11.17:20.10	Evaṁ kho, bhikkhave, bhikkhu vaṇaṁ paṭicchādetā hoti.
an11.17:21.1	Kathañca, bhikkhave, bhikkhu dhūmaṁ kattā hoti?
an11.17:21.2	Idha, bhikkhave, bhikkhu yathāsutaṁ yathāpariyattaṁ dhammaṁ vitthārena paresaṁ desetā hoti.
an11.17:21.3	Evaṁ kho, bhikkhave, bhikkhu dhūmaṁ kattā hoti.
an11.17:22.1	Kathañca, bhikkhave, bhikkhu titthaṁ jānāti?
an11.17:22.2	Idha, bhikkhave, bhikkhu ye te bhikkhū bahussutā āgatāgamā dhammadharā vinayadharā mātikādharā, te kālena kālaṁ upasaṅkamitvā paripucchati paripañhati:
an11.17:22.3	‘idaṁ, bhante, kathaṁ, imassa ko attho’ti?
an11.17:22.4	Tassa te āyasmanto avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṁ paṭivinodenti.
an11.17:22.5	Evaṁ kho, bhikkhave, bhikkhu titthaṁ jānāti.
an11.17:23.1	Kathañca, bhikkhave, bhikkhu pītaṁ jānāti?
an11.17:23.2	Idha, bhikkhave, bhikkhu tathāgatappavedite dhammavinaye desiyamāne labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.
an11.17:23.3	Evaṁ kho, bhikkhave, bhikkhu pītaṁ jānāti.
an11.17:24.1	Kathañca, bhikkhave, bhikkhu vīthiṁ jānāti?
an11.17:24.2	Idha, bhikkhave, bhikkhu ariyaṁ aṭṭhaṅgikaṁ maggaṁ yathābhūtaṁ pajānāti.
an11.17:24.3	Evaṁ kho, bhikkhave, bhikkhu vīthiṁ jānāti.
an11.17:25.1	Kathañca, bhikkhave, bhikkhu gocarakusalo hoti?
an11.17:25.2	Idha, bhikkhave, bhikkhu cattāro satipaṭṭhāne yathābhūtaṁ pajānāti.
an11.17:25.3	Evaṁ kho, bhikkhave, bhikkhu gocarakusalo hoti.
an11.17:26.1	Kathañca, bhikkhave, bhikkhu sāvasesadohī hoti?
an11.17:26.2	Idha, bhikkhave, bhikkhu saddhā gahapatikā abhihaṭṭhuṁ pavārenti cīvarapiṇḍapātasenāsanagilānapaccayabhesajjaparikkhārehi.
an11.17:26.3	Tatra bhikkhu mattaṁ jānāti paṭiggahaṇāya.
an11.17:26.4	Evaṁ kho, bhikkhave, bhikkhu sāvasesadohī hoti.
an11.17:27.1	Kathañca, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā, te atirekapūjāya pūjetā hoti?
an11.17:27.2	Idha, bhikkhave, bhikkhu ye te therā rattaññū cirapabbajitā saṅghapitaro saṅghapariṇāyakā, tesu mettaṁ kāyakammaṁ paccupaṭṭhāpeti āvi ceva raho ca, mettaṁ vacīkammaṁ … mettaṁ manokammaṁ paccupaṭṭhāpeti āvi ceva raho ca.
an11.17:27.3	Evaṁ kho, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā, te atirekapūjāya pūjetā hoti.
an11.17:28.1	Imehi kho, bhikkhave, ekādasahi dhammehi samannāgato bhikkhu bhabbo imasmiṁ dhammavinaye vuddhiṁ virūḷhiṁ vepullaṁ āpajjitun”ti.
an11.17:28.2	Sattamaṁ.
an11.18:0.1	Aṅguttara Nikāya 11.18
an11.18:0.2	2. Anussativagga
an11.18:0.3	Paṭhamasamādhisutta
an11.18:1.1	Atha kho sambahulā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
an11.18:2.1	“Siyā nu kho, bhante, bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti?
an11.18:3.1	“Siyā, bhikkhave, bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti.
an11.18:4.1	“Yathā kathaṁ pana, bhante, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti?
an11.18:5.1	“Idha, bhikkhave, bhikkhu evaṁsaññī hoti:
an11.18:5.2	‘etaṁ santaṁ etaṁ paṇītaṁ, yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an11.18:5.3	Evaṁ kho, bhikkhave, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti.
an11.18:5.4	Aṭṭhamaṁ.
an11.19:0.1	Aṅguttara Nikāya 11.19
an11.19:0.2	2. Anussativagga
an11.19:0.3	Dutiyasamādhisutta
an11.19:1.1	Tatra kho bhagavā bhikkhū āmantesi:
an11.19:1.2	“bhikkhavo”ti.
an11.19:1.3	“Bhadante”ti te bhikkhū bhagavato paccassosuṁ.
an11.19:1.4	Bhagavā etadavoca:
an11.19:2.1	“Siyā nu kho, bhikkhave, bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa …pe… na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti?
an11.19:2.2	“Bhagavaṁmūlakā no, bhante, dhammā bhagavaṁnettikā bhagavaṁpaṭisaraṇā. Sādhu vata, bhante, bhagavantaṁyeva paṭibhātu etassa bhāsitassa attho. Bhagavato sutvā bhikkhū dhāressantī”ti.
an11.19:3.1	“Tena hi, bhikkhave, suṇātha, sādhukaṁ manasi karotha, bhāsissāmī”ti.
an11.19:3.2	“Evaṁ, bhante”ti kho te bhikkhū bhagavato paccassosuṁ.
an11.19:3.3	Bhagavā etadavoca:
an11.19:4.1	“Siyā, bhikkhave, bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti.
an11.19:5.1	“Yathā kathaṁ pana, bhante, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti?
an11.19:6.1	“Idha, bhikkhave, bhikkhu evaṁsaññī hoti:
an11.19:6.2	‘etaṁ santaṁ etaṁ paṇītaṁ, yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an11.19:6.3	Evaṁ kho, bhikkhave, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti.
an11.19:6.4	Navamaṁ.
an11.20:0.1	Aṅguttara Nikāya 11.20
an11.20:0.2	2. Anussativagga
an11.20:0.3	Tatiyasamādhisutta
an11.20:1.1	Atha kho sambahulā bhikkhū yenāyasmā sāriputto tenupasaṅkamiṁsu; upasaṅkamitvā āyasmatā sāriputtena saddhiṁ sammodiṁsu.
an11.20:1.2	Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te bhikkhū āyasmantaṁ sāriputtaṁ etadavocuṁ:
an11.20:2.1	“Siyā nu kho, āvuso sāriputta, bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti?
an11.20:2.2	“Siyā, āvuso, bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti.
an11.20:3.1	“Yathā kathaṁ pana, āvuso sāriputta, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti?
an11.20:4.1	“Idha, āvuso, bhikkhu evaṁsaññī hoti:
an11.20:4.2	‘etaṁ santaṁ etaṁ paṇītaṁ, yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an11.20:4.3	Evaṁ kho, āvuso, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti.
an11.20:4.4	Dasamaṁ.
an11.21:0.1	Aṅguttara Nikāya 11.21
an11.21:0.2	2. Anussativagga
an11.21:0.3	Catutthasamādhisutta
an11.21:1.1	Tatra kho āyasmā sāriputto bhikkhū āmantesi:
an11.21:1.2	“siyā nu kho, āvuso, bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti?
an11.21:2.1	“Dūratopi kho mayaṁ, āvuso, āgaccheyyāma āyasmato sāriputtassa santike etassa bhāsitassa atthamaññātuṁ.
an11.21:2.2	Sādhu vatāyasmantaṁyeva sāriputtaṁ paṭibhātu etassa bhāsitassa attho.
an11.21:2.3	Āyasmato sāriputtassa sutvā bhikkhū dhāressantī”ti.
an11.21:3.1	“Tenahāvuso, suṇātha, sādhukaṁ manasi karotha; bhāsissāmī”ti.
an11.21:3.2	“Evamāvuso”ti kho te bhikkhū āyasmato sāriputtassa paccassosuṁ.
an11.21:3.3	Āyasmā sāriputto etadavoca:
an11.21:4.1	“Siyā, āvuso, bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti.
an11.21:5.1	“Yathā kathaṁ panāvuso, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa …pe… yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti?
an11.21:6.1	“Idha, āvuso, bhikkhu evaṁsaññī hoti:
an11.21:6.2	‘etaṁ santaṁ etaṁ paṇītaṁ, yadidaṁ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānan’ti.
an11.21:6.3	Evaṁ kho, āvuso, siyā bhikkhuno tathārūpo samādhipaṭilābho yathā neva pathaviyaṁ pathavisaññī assa, na āpasmiṁ āposaññī assa, na tejasmiṁ tejosaññī assa, na vāyasmiṁ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tatrāpi na saññī assa; saññī ca pana assā”ti.
an11.21:6.4	Ekādasamaṁ.
an11.21:6.5	Anussativaggo dutiyo.
an11.21:7.0	Tassuddānaṁ
an11.21:7.1	Dve vuttā mahānāmena,
an11.21:7.2	nandiyena subhūtinā;
an11.21:7.3	Mettā aṭṭhako gopālo,
an11.21:7.4	cattāro ca samādhināti.
an11.22:0.1	Aṅguttara Nikāya 11
an11.22:0.2	Paṭhamapaṇṇāsaka
an11.22:0.3	Sāmaññavagga
an11.22:0.4	~
an11.22:1.1	“Ekādasahi, bhikkhave, aṅgehi samannāgato gopālako abhabbo gogaṇaṁ pariharituṁ phātiṁ kātuṁ.
an11.22:1.2	Katamehi ekādasahi?
an11.22:1.3	Idha, bhikkhave, gopālako na rūpaññū hoti, na lakkhaṇakusalo hoti, na āsāṭikaṁ hāretā hoti, na vaṇaṁ paṭicchādetā hoti, na dhūmaṁ kattā hoti, na titthaṁ jānāti, na pītaṁ jānāti, na vīthiṁ jānāti, na gocarakusalo hoti, anavasesadohī ca hoti, ye te usabhā gopitaro gopariṇāyakā te na atirekapūjāya pūjetā hoti—
an11.22:1.4	imehi kho, bhikkhave, ekādasahi aṅgehi samannāgato gopālako abhabbo gogaṇaṁ pariharituṁ phātiṁ kātuṁ.
an11.22:2.1	Evamevaṁ kho, bhikkhave, ekādasahi dhammehi samannāgato bhikkhu abhabbo cakkhusmiṁ aniccānupassī viharituṁ…
an11.22:3.1	pe…
an11.23:1.1	abhabbo cakkhusmiṁ dukkhānupassī viharituṁ…
an11.24:1.1	abhabbo cakkhusmiṁ anattānupassī viharituṁ…
an11.25:1.1	abhabbo cakkhusmiṁ khayānupassī viharituṁ…
an11.26:1.1	abhabbo cakkhusmiṁ vayānupassī viharituṁ…
an11.27:1.1	abhabbo cakkhusmiṁ virāgānupassī viharituṁ…
an11.28:1.1	abhabbo cakkhusmiṁ nirodhānupassī viharituṁ…
an11.29:1.1	abhabbo cakkhusmiṁ paṭinissaggānupassī viharituṁ”.
an11.30-69:0.1	Aṅguttara Nikāya 11
an11.30-69:0.2	Paṭhamapaṇṇāsaka
an11.30-69:0.3	Sāmaññavagga
an11.30-69:0.4	~
an11.30-69:1.1	…
an11.30-69:1.2	Sotasmiṁ…
an11.30-69:1.3	ghānasmiṁ…
an11.30-69:1.4	jivhāya…
an11.30-69:1.5	kāyasmiṁ…
an11.30-69:1.6	manasmiṁ…
an11.70-117:0.1	Aṅguttara Nikāya 11
an11.70-117:0.2	Paṭhamapaṇṇāsaka
an11.70-117:0.3	Sāmaññavagga
an11.70-117:0.4	~
an11.70-117:1.1	…
an11.70-117:1.2	Rūpesu…
an11.70-117:1.3	saddesu…
an11.70-117:1.4	gandhesu…
an11.70-117:1.5	rasesu…
an11.70-117:1.6	phoṭṭhabbesu…
an11.70-117:1.7	dhammesu…
an11.118-165:0.1	Aṅguttara Nikāya 11
an11.118-165:0.2	Paṭhamapaṇṇāsaka
an11.118-165:0.3	Sāmaññavagga
an11.118-165:0.4	~
an11.118-165:1.1	…
an11.118-165:1.2	Cakkhuviññāṇe…
an11.118-165:1.3	sotaviññāṇe…
an11.118-165:1.4	ghānaviññāṇe…
an11.118-165:1.5	jivhāviññāṇe…
an11.118-165:1.6	kāyaviññāṇe…
an11.118-165:1.7	manoviññāṇe…
an11.166-213:0.1	Aṅguttara Nikāya 11
an11.166-213:0.2	Paṭhamapaṇṇāsaka
an11.166-213:0.3	Sāmaññavagga
an11.166-213:0.4	~
an11.166-213:1.1	…
an11.166-213:1.2	Cakkhusamphasse…
an11.166-213:1.3	sotasamphasse…
an11.166-213:1.4	ghānasamphasse…
an11.166-213:1.5	jivhāsamphasse…
an11.166-213:1.6	kāyasamphasse…
an11.166-213:1.7	manosamphasse…
an11.214-261:0.1	Aṅguttara Nikāya 11
an11.214-261:0.2	Paṭhamapaṇṇāsaka
an11.214-261:0.3	Sāmaññavagga
an11.214-261:0.4	~
an11.214-261:1.1	…
an11.214-261:1.2	Cakkhusamphassajāya vedanāya…
an11.214-261:1.3	sotasamphassajāya vedanāya…
an11.214-261:1.4	ghānasamphassajāya vedanāya…
an11.214-261:1.5	jivhāsamphassajāya vedanāya…
an11.214-261:1.6	kāyasamphassajāya vedanāya…
an11.214-261:1.7	manosamphassajāya vedanāya…
an11.262-309:0.1	Aṅguttara Nikāya 11
an11.262-309:0.2	Paṭhamapaṇṇāsaka
an11.262-309:0.3	Sāmaññavagga
an11.262-309:0.4	~
an11.262-309:1.1	…
an11.262-309:1.2	Rūpasaññāya…
an11.262-309:1.3	saddasaññāya…
an11.262-309:1.4	gandhasaññāya…
an11.262-309:1.5	rasasaññāya…
an11.262-309:1.6	phoṭṭhabbasaññāya…
an11.262-309:1.7	dhammasaññāya…
an11.310-357:0.1	Aṅguttara Nikāya 11
an11.310-357:0.2	Paṭhamapaṇṇāsaka
an11.310-357:0.3	Sāmaññavagga
an11.310-357:0.4	~
an11.310-357:1.1	…
an11.310-357:1.2	Rūpasañcetanāya…
an11.310-357:1.3	saddasañcetanāya…
an11.310-357:1.4	gandhasañcetanāya…
an11.310-357:1.5	rasasañcetanāya…
an11.310-357:1.6	phoṭṭhabbasañcetanāya…
an11.310-357:1.7	dhammasañcetanāya…
an11.358-405:0.1	Aṅguttara Nikāya 11
an11.358-405:0.2	Paṭhamapaṇṇāsaka
an11.358-405:0.3	Sāmaññavagga
an11.358-405:0.4	~
an11.358-405:1.1	…
an11.358-405:1.2	Rūpataṇhāya…
an11.358-405:1.3	saddataṇhāya…
an11.358-405:1.4	gandhataṇhāya…
an11.358-405:1.5	rasataṇhāya…
an11.358-405:1.6	phoṭṭhabbataṇhāya…
an11.358-405:1.7	dhammataṇhāya…
an11.406-453:0.1	Aṅguttara Nikāya 11
an11.406-453:0.2	Paṭhamapaṇṇāsaka
an11.406-453:0.3	Sāmaññavagga
an11.406-453:0.4	~
an11.406-453:1.1	…
an11.406-453:1.2	Rūpavitakke…
an11.406-453:1.3	saddavitakke…
an11.406-453:1.4	gandhavitakke…
an11.406-453:1.5	rasavitakke…
an11.406-453:1.6	phoṭṭhabbavitakke…
an11.406-453:1.7	dhammavitakke…
an11.454-501:0.1	Aṅguttara Nikāya 11
an11.454-501:0.2	Paṭhamapaṇṇāsaka
an11.454-501:0.3	Sāmaññavagga
an11.454-501:0.4	~
an11.454-501:1.1	…
an11.454-501:1.2	Rūpavicāre…
an11.454-501:1.3	saddavicāre…
an11.454-501:1.4	gandhavicāre…
an11.454-501:1.5	rasavicāre…
an11.454-501:1.6	phoṭṭhabbavicāre…
an11.454-501:1.7	dhammavicāre aniccānupassī viharituṁ…
an11.454-501:1.8	dukkhānupassī viharituṁ…
an11.454-501:1.9	anattānupassī viharituṁ…
an11.454-501:1.10	khayānupassī viharituṁ…
an11.454-501:1.11	vayānupassī viharituṁ…
an11.454-501:1.12	virāgānupassī viharituṁ…
an11.454-501:1.13	nirodhānupassī viharituṁ…
an11.454-501:1.14	paṭinissaggānupassī viharituṁ… pe…
an11.502-981:0.1	Aṅguttara Nikāya 11
an11.502-981:0.2	Paṭhamapaṇṇāsaka
an11.502-981:0.3	Sāmaññavagga
an11.502-981:0.4	~
an11.502-981:1.1	Ekādasahi, bhikkhave, aṅgehi samannāgato gopālako bhabbo gogaṇaṁ pariharituṁ phātikātuṁ.
an11.502-981:1.2	Katamehi ekādasahi?
an11.502-981:1.3	Idha, bhikkhave, gopālako rūpaññū hoti… pe…
an11.502-981:2.1	Evameva kho, bhikkhave, ekādasahi dhammehi samannāgato bhikkhu bhabbo cakkhusmiṁ aniccānupassī viharituṁ…
an11.502-981:2.2	pe…
an11.502-981:2.3	paṭinissaggānupassī viharitunti.
an11.982:0.1	Aṅguttara Nikāya 11
an11.982:0.2	Paṭhamapaṇṇāsaka
an11.982:0.3	Rāgapeyyāla
an11.982:0.4	~
an11.982:1.1	“Rāgassa, bhikkhave, abhiññāya ekādasa dhammā bhāvetabbā.
an11.982:1.2	Katame ekādasa?
an11.982:1.3	Paṭhamaṁ jhānaṁ, dutiyaṁ jhānaṁ, tatiyaṁ jhānaṁ, catutthaṁ jhānaṁ, mettācetovimutti, karuṇācetovimutti, muditācetovimutti, upekkhācetovimutti, ākāsānañcāyatanaṁ, viññāṇañcāyatanaṁ, ākiñcaññāyatanaṁ—
an11.982:1.4	rāgassa, bhikkhave, abhiññāya ime ekādasa dhammā bhāvetabbā”.
an11.983-991:0.1	Aṅguttara Nikāya 11
an11.983-991:0.2	Paṭhamapaṇṇāsaka
an11.983-991:0.3	Rāgapeyyāla
an11.983-991:0.4	~
an11.983-991:1.1	“Rāgassa, bhikkhave, pariññāya…
an11.983-991:1.2	parikkhayāya…
an11.983-991:1.3	pahānāya…
an11.983-991:1.4	khayāya…
an11.983-991:1.5	vayāya…
an11.983-991:1.6	virāgāya…
an11.983-991:1.7	nirodhāya…
an11.983-991:1.8	cāgāya…
an11.983-991:1.9	paṭinissaggāya…
an11.983-991:1.10	ime ekādasa dhammā bhāvetabbā”.
an11.992-1151:0.1	Aṅguttara Nikāya 11
an11.992-1151:0.2	Paṭhamapaṇṇāsaka
an11.992-1151:0.3	Rāgapeyyāla
an11.992-1151:0.4	~
an11.992-1151:1.1	“Dosassa… pe…
an11.992-1151:1.2	mohassa…
an11.992-1151:1.3	kodhassa…
an11.992-1151:1.4	upanāhassa…
an11.992-1151:1.5	makkhassa…
an11.992-1151:1.6	paḷāsassa…
an11.992-1151:1.7	issāya…
an11.992-1151:1.8	macchariyassa…
an11.992-1151:1.9	māyāya…
an11.992-1151:1.10	sāṭheyyassa…
an11.992-1151:1.11	thambhassa…
an11.992-1151:1.12	sārambhassa…
an11.992-1151:1.13	mānassa…
an11.992-1151:1.14	atimānassa…
an11.992-1151:1.15	madassa…
an11.992-1151:1.16	pamādassa abhiññāya…pe…
an11.992-1151:1.17	pariññāya…
an11.992-1151:1.18	parikkhayāya…
an11.992-1151:1.19	pahānāya…
an11.992-1151:1.20	khayāya…
an11.992-1151:1.21	vayāya…
an11.992-1151:1.22	virāgāya…
an11.992-1151:1.23	nirodhāya…
an11.992-1151:1.24	cāgāya…
an11.992-1151:1.25	paṭinissaggāya ime ekādasa dhammā bhāvetabbā”ti.
an11.992-1151:2.1	Idamavoca bhagavā.
an11.992-1151:2.2	Attamanā te bhikkhū bhagavato bhāsitaṁ abhinandunti.
an11.992-1151:2.3	Rāgapeyyālaṁ niṭṭhitaṁ.
an11.992-1151:3.1	Nava suttasahassāni,
an11.992-1151:3.2	bhiyyo pañcasatāni ca;
an11.992-1151:3.3	Sattapaññāsa suttantā,
an11.992-1151:3.4	aṅguttarasamāyutāti.
an11.992-1151:3.5	Ekādasakanipātapāḷi niṭṭhitā.
an11.992-1151:3.6	Aṅguttaranikāyo samatto.