# Dhammapada — Pali (Mahāsaṅgīti root) · SuttaCentral bilara-data (published) · seat EA-CORPORA-02/17

dhp1:0.1	Khuddakanikāya
dhp1:0.2	Dhammapada
dhp1:0.3	Yamakavagga
dhp1:0.4	Cakkhupālattheravatthu
dhp1:1	Manopubbaṅgamā dhammā,
dhp1:2	manoseṭṭhā manomayā;
dhp1:3	Manasā ce paduṭṭhena,
dhp1:4	bhāsati vā karoti vā;
dhp1:5	Tato naṁ dukkhamanveti,
dhp1:6	cakkaṁva vahato padaṁ.
dhp2:0	Maṭṭhakuṇḍalīvatthu
dhp2:1	Manopubbaṅgamā dhammā,
dhp2:2	manoseṭṭhā manomayā;
dhp2:3	Manasā ce pasannena,
dhp2:4	bhāsati vā karoti vā;
dhp2:5	Tato naṁ sukhamanveti,
dhp2:6	chāyāva anapāyinī.
dhp3:0	Tissattheravatthu
dhp3:1	Akkocchi maṁ avadhi maṁ,
dhp3:2	ajini maṁ ahāsi me;
dhp3:3	Ye ca taṁ upanayhanti,
dhp3:4	veraṁ tesaṁ na sammati.
dhp4:1	Akkocchi maṁ avadhi maṁ,
dhp4:2	ajini maṁ ahāsi me;
dhp4:3	Ye ca taṁ nupanayhanti,
dhp4:4	veraṁ tesūpasammati.
dhp5:0	Kāḷayakkhinīvatthu
dhp5:1	Na hi verena verāni,
dhp5:2	sammantīdha kudācanaṁ;
dhp5:3	Averena ca sammanti,
dhp5:4	esa dhammo sanantano.
dhp6:0	Kosambakavatthu
dhp6:1	Pare ca na vijānanti,
dhp6:2	mayamettha yamāmase;
dhp6:3	Ye ca tattha vijānanti,
dhp6:4	tato sammanti medhagā.
dhp7:0	Mahākāḷattheravatthu
dhp7:1	Subhānupassiṁ viharantaṁ,
dhp7:2	indriyesu asaṁvutaṁ;
dhp7:3	Bhojanamhi cāmattaññuṁ,
dhp7:4	kusītaṁ hīnavīriyaṁ;
dhp7:5	Taṁ ve pasahati māro,
dhp7:6	vāto rukkhaṁva dubbalaṁ.
dhp8:1	Asubhānupassiṁ viharantaṁ,
dhp8:2	Indriyesu susaṁvutaṁ;
dhp8:3	Bhojanamhi ca mattaññuṁ,
dhp8:4	Saddhaṁ āraddhavīriyaṁ;
dhp8:5	Taṁ ve nappasahati māro,
dhp8:6	Vāto selaṁva pabbataṁ.
dhp9:0	Devadattavatthu
dhp9:1	Anikkasāvo kāsāvaṁ,
dhp9:2	yo vatthaṁ paridahissati;
dhp9:3	Apeto damasaccena,
dhp9:4	na so kāsāvamarahati.
dhp10:1	Yo ca vantakasāvassa,
dhp10:2	sīlesu susamāhito;
dhp10:3	Upeto damasaccena,
dhp10:4	sa ve kāsāvamarahati.
dhp11:0	Sāriputtattheravatthu
dhp11:1	Asāre sāramatino,
dhp11:2	sāre cāsāradassino;
dhp11:3	Te sāraṁ nādhigacchanti,
dhp11:4	micchāsaṅkappagocarā.
dhp12:1	Sārañca sārato ñatvā,
dhp12:2	asārañca asārato;
dhp12:3	Te sāraṁ adhigacchanti,
dhp12:4	sammāsaṅkappagocarā.
dhp13:0	Nandattheravatthu
dhp13:1	Yathā agāraṁ ducchannaṁ,
dhp13:2	vuṭṭhī samativijjhati;
dhp13:3	Evaṁ abhāvitaṁ cittaṁ,
dhp13:4	rāgo samativijjhati.
dhp14:1	Yathā agāraṁ suchannaṁ,
dhp14:2	vuṭṭhī na samativijjhati;
dhp14:3	Evaṁ subhāvitaṁ cittaṁ,
dhp14:4	rāgo na samativijjhati.
dhp15:0	Cundasūkarikavatthu
dhp15:1	Idha socati pecca socati,
dhp15:2	Pāpakārī ubhayattha socati;
dhp15:3	So socati so vihaññati,
dhp15:4	Disvā kammakiliṭṭhamattano.
dhp16:0	Dhammikaupāsakavatthu
dhp16:1	Idha modati pecca modati,
dhp16:2	Katapuñño ubhayattha modati;
dhp16:3	So modati so pamodati,
dhp16:4	Disvā kammavisuddhimattano.
dhp17:0	Devadattavatthu
dhp17:1	Idha tappati pecca tappati,
dhp17:2	Pāpakārī ubhayattha tappati;
dhp17:3	“Pāpaṁ me katan”ti tappati,
dhp17:4	Bhiyyo tappati duggatiṁ gato.
dhp18:0	Sumanadevīvatthu
dhp18:1	Idha nandati pecca nandati,
dhp18:2	Katapuñño ubhayattha nandati;
dhp18:3	“Puññaṁ me katan”ti nandati,
dhp18:4	Bhiyyo nandati suggatiṁ gato.
dhp19:0	Dvesahāyakabhikkhuvatthu
dhp19:1	Bahumpi ce saṁhita bhāsamāno,
dhp19:2	Na takkaro hoti naro pamatto;
dhp19:3	Gopova gāvo gaṇayaṁ paresaṁ,
dhp19:4	Na bhāgavā sāmaññassa hoti.
dhp20:1	Appampi ce saṁhita bhāsamāno,
dhp20:2	Dhammassa hoti anudhammacārī;
dhp20:3	Rāgañca dosañca pahāya mohaṁ,
dhp20:4	Sammappajāno suvimuttacitto;
dhp20:5	Anupādiyāno idha vā huraṁ vā,
dhp20:6	Sa bhāgavā sāmaññassa hoti.
dhp20:7	Yamakavaggo paṭhamo.
dhp21:0.1	Khuddakanikāya
dhp21:0.2	Dhammapada
dhp21:0.3	Appamādavagga
dhp21:0.4	Sāmāvatīvatthu
dhp21:1	Appamādo amatapadaṁ,
dhp21:2	pamādo maccuno padaṁ;
dhp21:3	Appamattā na mīyanti,
dhp21:4	ye pamattā yathā matā.
dhp22:1	Evaṁ visesato ñatvā,
dhp22:2	appamādamhi paṇḍitā;
dhp22:3	Appamāde pamodanti,
dhp22:4	ariyānaṁ gocare ratā.
dhp23:1	Te jhāyino sātatikā,
dhp23:2	niccaṁ daḷhaparakkamā;
dhp23:3	Phusanti dhīrā nibbānaṁ,
dhp23:4	yogakkhemaṁ anuttaraṁ.
dhp24:0	Kumbaghosakaseṭṭhivatthu
dhp24:1	Uṭṭhānavato satīmato,
dhp24:2	Sucikammassa nisammakārino;
dhp24:3	Saññatassa dhammajīvino,
dhp24:4	Appamattassa yasobhivaḍḍhati.
dhp25:0	Cūḷapanthakavatthu
dhp25:1	Uṭṭhānenappamādena,
dhp25:2	saṁyamena damena ca;
dhp25:3	Dīpaṁ kayirātha medhāvī,
dhp25:4	yaṁ ogho nābhikīrati.
dhp26:0	Bālanakkhattasaṅghuṭṭhavatthu
dhp26:1	Pamādamanuyuñjanti,
dhp26:2	bālā dummedhino janā;
dhp26:3	Appamādañca medhāvī,
dhp26:4	dhanaṁ seṭṭhaṁva rakkhati.
dhp27:1	Mā pamādamanuyuñjetha,
dhp27:2	mā kāmaratisanthavaṁ;
dhp27:3	Appamatto hi jhāyanto,
dhp27:4	pappoti vipulaṁ sukhaṁ.
dhp28:0	Mahākassapattheravatthu
dhp28:1	Pamādaṁ appamādena,
dhp28:2	yadā nudati paṇḍito;
dhp28:3	Paññāpāsādamāruyha,
dhp28:4	asoko sokiniṁ pajaṁ;
dhp28:5	Pabbataṭṭhova bhūmaṭṭhe,
dhp28:6	dhīro bāle avekkhati.
dhp29:0	Pamattāpamattadvesahāyakabhikkhuvatthu
dhp29:1	Appamatto pamattesu,
dhp29:2	suttesu bahujāgaro;
dhp29:3	Abalassaṁva sīghasso,
dhp29:4	hitvā yāti sumedhaso.
dhp30:0	Maghavatthu
dhp30:1	Appamādena maghavā,
dhp30:2	devānaṁ seṭṭhataṁ gato;
dhp30:3	Appamādaṁ pasaṁsanti,
dhp30:4	pamādo garahito sadā.
dhp31:0	Aññatarabhikkhuvatthu
dhp31:1	Appamādarato bhikkhu,
dhp31:2	pamāde bhayadassi vā;
dhp31:3	Saṁyojanaṁ aṇuṁ thūlaṁ,
dhp31:4	ḍahaṁ aggīva gacchati.
dhp32:0	Nigamavāsitissattheravatthu
dhp32:1	Appamādarato bhikkhu,
dhp32:2	pamāde bhayadassi vā;
dhp32:3	Abhabbo parihānāya,
dhp32:4	nibbānasseva santike.
dhp32:5	Appamādavaggo dutiyo.
dhp33:0.1	Khuddakanikāya
dhp33:0.2	Dhammapada
dhp33:0.3	Cittavagga
dhp33:0.4	Meghiyattheravatthu
dhp33:1	Phandanaṁ capalaṁ cittaṁ,
dhp33:2	dūrakkhaṁ dunnivārayaṁ;
dhp33:3	Ujuṁ karoti medhāvī,
dhp33:4	usukārova tejanaṁ.
dhp34:1	Vārijova thale khitto,
dhp34:2	okamokataubbhato;
dhp34:3	Pariphandatidaṁ cittaṁ,
dhp34:4	māradheyyaṁ pahātave.
dhp35:0	Aññatarabhikkhuvatthu
dhp35:1	Dunniggahassa lahuno,
dhp35:2	yatthakāmanipātino;
dhp35:3	Cittassa damatho sādhu,
dhp35:4	cittaṁ dantaṁ sukhāvahaṁ.
dhp36:0	Aññataraukkaṇṭhitabhikkhuvatthu
dhp36:1	Sududdasaṁ sunipuṇaṁ,
dhp36:2	yatthakāmanipātinaṁ;
dhp36:3	Cittaṁ rakkhetha medhāvī,
dhp36:4	cittaṁ guttaṁ sukhāvahaṁ.
dhp37:0	Saṅgharakkhitabhāgineyyattheravatthu
dhp37:1	Dūraṅgamaṁ ekacaraṁ,
dhp37:2	asarīraṁ guhāsayaṁ;
dhp37:3	Ye cittaṁ saṁyamissanti,
dhp37:4	mokkhanti mārabandhanā.
dhp38:0	Cittahatthattheravatthu
dhp38:1	Anavaṭṭhitacittassa,
dhp38:2	saddhammaṁ avijānato;
dhp38:3	Pariplavapasādassa,
dhp38:4	paññā na paripūrati.
dhp39:1	Anavassutacittassa,
dhp39:2	ananvāhatacetaso;
dhp39:3	Puññapāpapahīnassa,
dhp39:4	natthi jāgarato bhayaṁ.
dhp40:0	Pañcasatabhikkhuvatthu
dhp40:1	Kumbhūpamaṁ kāyamimaṁ viditvā,
dhp40:2	Nagarūpamaṁ cittamidaṁ ṭhapetvā;
dhp40:3	Yodhetha māraṁ paññāvudhena,
dhp40:4	Jitañca rakkhe anivesano siyā.
dhp41:0	Pūtigattatissattheravatthu
dhp41:1	Aciraṁ vatayaṁ kāyo,
dhp41:2	pathaviṁ adhisessati;
dhp41:3	Chuddho apetaviññāṇo,
dhp41:4	niratthaṁva kaliṅgaraṁ.
dhp42:0	Nandagopālakavatthu
dhp42:1	Diso disaṁ yaṁ taṁ kayirā,
dhp42:2	verī vā pana verinaṁ;
dhp42:3	Micchāpaṇihitaṁ cittaṁ,
dhp42:4	pāpiyo naṁ tato kare.
dhp43:0	Soreyyavatthu
dhp43:1	Na taṁ mātā pitā kayirā,
dhp43:2	aññe vāpi ca ñātakā;
dhp43:3	Sammāpaṇihitaṁ cittaṁ,
dhp43:4	seyyaso naṁ tato kare.
dhp43:5	Cittavaggo tatiyo.
dhp44:0.1	Khuddakanikāya
dhp44:0.2	Dhammapada
dhp44:0.3	Pupphavagga
dhp44:0.4	Pathavikathāpasutapañcasatabhikkhuvatthu
dhp44:1	Ko imaṁ pathaviṁ vicessati,
dhp44:2	Yamalokañca imaṁ sadevakaṁ;
dhp44:3	Ko dhammapadaṁ sudesitaṁ,
dhp44:4	Kusalo pupphamiva pacessati.
dhp45:1	Sekho pathaviṁ vicessati,
dhp45:2	Yamalokañca imaṁ sadevakaṁ;
dhp45:3	Sekho dhammapadaṁ sudesitaṁ,
dhp45:4	Kusalo pupphamiva pacessati.
dhp46:0	Marīcikammaṭṭhānikabhikkhuvatthu
dhp46:1	Pheṇūpamaṁ kāyamimaṁ viditvā,
dhp46:2	Marīcidhammaṁ abhisambudhāno;
dhp46:3	Chetvāna mārassa papupphakāni,
dhp46:4	Adassanaṁ maccurājassa gacche.
dhp47:0	Viṭaṭūbhavatthu
dhp47:1	Pupphāni heva pacinantaṁ,
dhp47:2	byāsattamanasaṁ naraṁ;
dhp47:3	Suttaṁ gāmaṁ mahoghova,
dhp47:4	maccu ādāya gacchati.
dhp48:0	Patipūjikakumārivatthu
dhp48:1	Pupphāni heva pacinantaṁ,
dhp48:2	byāsattamanasaṁ naraṁ;
dhp48:3	Atittaññeva kāmesu,
dhp48:4	antako kurute vasaṁ.
dhp49:0	Macchariyakosiyaseṭṭhivatthu
dhp49:1	Yathāpi bhamaro pupphaṁ,
dhp49:2	vaṇṇagandhamaheṭhayaṁ;
dhp49:3	Paleti rasamādāya,
dhp49:4	evaṁ gāme munī care.
dhp50:0	Pāveyyaājīvakavatthu
dhp50:1	Na paresaṁ vilomāni,
dhp50:2	na paresaṁ katākataṁ;
dhp50:3	Attanova avekkheyya,
dhp50:4	katāni akatāni ca.
dhp51:0	Chattapāṇiupāsakavatthu
dhp51:1	Yathāpi ruciraṁ pupphaṁ,
dhp51:2	vaṇṇavantaṁ agandhakaṁ;
dhp51:3	Evaṁ subhāsitā vācā,
dhp51:4	aphalā hoti akubbato.
dhp52:1	Yathāpi ruciraṁ pupphaṁ,
dhp52:2	Vaṇṇavantaṁ sagandhakaṁ;
dhp52:3	Evaṁ subhāsitā vācā,
dhp52:4	Saphalā hoti kubbato.
dhp53:0	Visākhāvatthu
dhp53:1	Yathāpi puppharāsimhā,
dhp53:2	kayirā mālāguṇe bahū;
dhp53:3	Evaṁ jātena maccena,
dhp53:4	kattabbaṁ kusalaṁ bahuṁ.
dhp54:0	Ānandattherapañhavatthu
dhp54:1	Na pupphagandho paṭivātameti,
dhp54:2	Na candanaṁ tagaramallikā vā;
dhp54:3	Satañca gandho paṭivātameti,
dhp54:4	Sabbā disā sappuriso pavāyati.
dhp55:1	Candanaṁ tagaraṁ vāpi,
dhp55:2	uppalaṁ atha vassikī;
dhp55:3	Etesaṁ gandhajātānaṁ,
dhp55:4	sīlagandho anuttaro.
dhp56:0	Mahākassapattherapiṇḍapātadinnavatthu
dhp56:1	Appamatto ayaṁ gandho,
dhp56:2	yāyaṁ tagaracandanī;
dhp56:3	Yo ca sīlavataṁ gandho,
dhp56:4	vāti devesu uttamo.
dhp57:0	Godhikattheraparinibbānavatthu
dhp57:1	Tesaṁ sampannasīlānaṁ,
dhp57:2	appamādavihārinaṁ;
dhp57:3	Sammadaññāvimuttānaṁ,
dhp57:4	māro maggaṁ na vindati.
dhp58:0	Garahadinnavatthu
dhp58:1	Yathā saṅkāradhānasmiṁ,
dhp58:2	ujjhitasmiṁ mahāpathe;
dhp58:3	Padumaṁ tattha jāyetha,
dhp58:4	sucigandhaṁ manoramaṁ.
dhp59:1	Evaṁ saṅkārabhūtesu,
dhp59:2	andhabhūte puthujjane;
dhp59:3	Atirocati paññāya,
dhp59:4	sammāsambuddhasāvako.
dhp59:5	Pupphavaggo catuttho.
dhp60:0.1	Khuddakanikāya
dhp60:0.2	Dhammapada
dhp60:0.3	Bālavagga
dhp60:0.4	Aññatarapurisavatthu
dhp60:1	Dīghā jāgarato ratti,
dhp60:2	dīghaṁ santassa yojanaṁ;
dhp60:3	Dīgho bālāna saṁsāro,
dhp60:4	saddhammaṁ avijānataṁ.
dhp61:0	Mahākassapasaddhivihārikavatthu
dhp61:1	Carañce nādhigaccheyya,
dhp61:2	Seyyaṁ sadisamattano;
dhp61:3	Ekacariyaṁ daḷhaṁ kayirā,
dhp61:4	Natthi bāle sahāyatā.
dhp62:0	Ānandaseṭṭhivatthu
dhp62:1	Puttā matthi dhanaṁ matthi,
dhp62:2	iti bālo vihaññati;
dhp62:3	Attā hi attano natthi,
dhp62:4	kuto puttā kuto dhanaṁ.
dhp63:0	Gaṇṭhibhedakacoravatthu
dhp63:1	Yo bālo maññati bālyaṁ,
dhp63:2	paṇḍito vāpi tena so;
dhp63:3	Bālo ca paṇḍitamānī,
dhp63:4	sa ve “bālo”ti vuccati.
dhp64:0	Udāyittheravatthu
dhp64:1	Yāvajīvampi ce bālo,
dhp64:2	paṇḍitaṁ payirupāsati;
dhp64:3	Na so dhammaṁ vijānāti,
dhp64:4	dabbī sūparasaṁ yathā.
dhp65:0	Tiṁsapāveyyakabhikkhuvatthu
dhp65:1	Muhuttamapi ce viññū,
dhp65:2	paṇḍitaṁ payirupāsati;
dhp65:3	Khippaṁ dhammaṁ vijānāti,
dhp65:4	jivhā sūparasaṁ yathā.
dhp66:0	Suppabuddhakuṭṭhivatthu
dhp66:1	Caranti bālā dummedhā,
dhp66:2	amitteneva attanā;
dhp66:3	Karontā pāpakaṁ kammaṁ,
dhp66:4	yaṁ hoti kaṭukapphalaṁ.
dhp67:0	Kassakavatthu
dhp67:1	Na taṁ kammaṁ kataṁ sādhu,
dhp67:2	yaṁ katvā anutappati;
dhp67:3	Yassa assumukho rodaṁ,
dhp67:4	vipākaṁ paṭisevati.
dhp68:0	Sumanamālākāravatthu
dhp68:1	Tañca kammaṁ kataṁ sādhu,
dhp68:2	yaṁ katvā nānutappati;
dhp68:3	Yassa patīto sumano,
dhp68:4	vipākaṁ paṭisevati.
dhp69:0	Uppalavaṇṇattherīvatthu
dhp69:1	Madhuṁvā maññati bālo,
dhp69:2	yāva pāpaṁ na paccati;
dhp69:3	Yadā ca paccati pāpaṁ,
dhp69:4	atha dukkhaṁ nigacchati.
dhp70:0	Jambukattheravatthu
dhp70:1	Māse māse kusaggena,
dhp70:2	bālo bhuñjeyya bhojanaṁ;
dhp70:3	Na so saṅkhātadhammānaṁ,
dhp70:4	kalaṁ agghati soḷasiṁ.
dhp71:0	Ahipetavatthu
dhp71:1	Na hi pāpaṁ kataṁ kammaṁ,
dhp71:2	Sajjukhīraṁva muccati;
dhp71:3	Ḍahantaṁ bālamanveti,
dhp71:4	Bhasmacchannova pāvako.
dhp72:0	Saṭṭhikūṭapetavatthu
dhp72:1	Yāvadeva anatthāya,
dhp72:2	ñattaṁ bālassa jāyati;
dhp72:3	Hanti bālassa sukkaṁsaṁ,
dhp72:4	muddhamassa vipātayaṁ.
dhp73:0	Cittagahapativatthu
dhp73:1	Asantaṁ bhāvanamiccheyya,
dhp73:2	Purekkhārañca bhikkhusu;
dhp73:3	Āvāsesu ca issariyaṁ,
dhp73:4	Pūjaṁ parakulesu ca.
dhp74:1	Mameva kata maññantu,
dhp74:2	gihī pabbajitā ubho;
dhp74:3	Mamevātivasā assu,
dhp74:4	kiccākiccesu kismici;
dhp74:5	Iti bālassa saṅkappo,
dhp74:6	icchā māno ca vaḍḍhati.
dhp75:0	Vanavāsitissasāmaṇeravatthu
dhp75:1	Aññā hi lābhūpanisā,
dhp75:2	aññā nibbānagāminī;
dhp75:3	Evametaṁ abhiññāya,
dhp75:4	bhikkhu buddhassa sāvako;
dhp75:5	Sakkāraṁ nābhinandeyya,
dhp75:6	vivekamanubrūhaye.
dhp75:7	Bālavaggo pañcamo.
dhp76:0.1	Khuddakanikāya
dhp76:0.2	Dhammapada
dhp76:0.3	Paṇḍitavagga
dhp76:0.4	Rādhattheravatthu
dhp76:1	Nidhīnaṁva pavattāraṁ,
dhp76:2	yaṁ passe vajjadassinaṁ;
dhp76:3	Niggayhavādiṁ medhāviṁ,
dhp76:4	tādisaṁ paṇḍitaṁ bhaje;
dhp76:5	Tādisaṁ bhajamānassa,
dhp76:6	seyyo hoti na pāpiyo.
dhp77:0	Assajipunabbasukavatthu
dhp77:1	Ovadeyyānusāseyya,
dhp77:2	asabbhā ca nivāraye;
dhp77:3	Satañhi so piyo hoti,
dhp77:4	asataṁ hoti appiyo.
dhp78:0	Channattheravatthu
dhp78:1	Na bhaje pāpake mitte,
dhp78:2	na bhaje purisādhame;
dhp78:3	Bhajetha mitte kalyāṇe,
dhp78:4	bhajetha purisuttame.
dhp79:0	Mahākappinattheravatthu
dhp79:1	Dhammapīti sukhaṁ seti,
dhp79:2	vippasannena cetasā;
dhp79:3	Ariyappavedite dhamme,
dhp79:4	sadā ramati paṇḍito.
dhp80:0	Paṇḍitasāmaṇeravatthu
dhp80:1	Udakañhi nayanti nettikā,
dhp80:2	Usukārā namayanti tejanaṁ;
dhp80:3	Dāruṁ namayanti tacchakā,
dhp80:4	Attānaṁ damayanti paṇḍitā.
dhp81:0	Lakuṇḍakabhaddiyattheravatthu
dhp81:1	Selo yathā ekaghano,
dhp81:2	vātena na samīrati;
dhp81:3	Evaṁ nindāpasaṁsāsu,
dhp81:4	na samiñjanti paṇḍitā.
dhp82:0	Kāṇamātāvatthu
dhp82:1	Yathāpi rahado gambhīro,
dhp82:2	vippasanno anāvilo;
dhp82:3	Evaṁ dhammāni sutvāna,
dhp82:4	vippasīdanti paṇḍitā.
dhp83:0	Pañcasatabhikkhuvatthu
dhp83:1	Sabbattha ve sappurisā cajanti,
dhp83:2	Na kāmakāmā lapayanti santo;
dhp83:3	Sukhena phuṭṭhā atha vā dukhena,
dhp83:4	Na uccāvacaṁ paṇḍitā dassayanti.
dhp84:0	Dhammikattheravatthu
dhp84:1	Na attahetu na parassa hetu,
dhp84:2	Na puttamicche na dhanaṁ na raṭṭhaṁ;
dhp84:3	Na iccheyya adhammena samiddhimattano,
dhp84:4	Sa sīlavā paññavā dhammiko siyā.
dhp85:0	Dhammassavanattheravatthu
dhp85:1	Appakā te manussesu,
dhp85:2	ye janā pāragāmino;
dhp85:3	Athāyaṁ itarā pajā,
dhp85:4	tīramevānudhāvati.
dhp86:1	Ye ca kho sammadakkhāte,
dhp86:2	dhamme dhammānuvattino;
dhp86:3	Te janā pāramessanti,
dhp86:4	maccudheyyaṁ suduttaraṁ.
dhp87:0	Pañcasataāgantukabhikkhuvatthu
dhp87:1	Kaṇhaṁ dhammaṁ vippahāya,
dhp87:2	Sukkaṁ bhāvetha paṇḍito;
dhp87:3	Okā anokamāgamma,
dhp87:4	Viveke yattha dūramaṁ.
dhp88:1	Tatrābhiratimiccheyya,
dhp88:2	hitvā kāme akiñcano;
dhp88:3	Pariyodapeyya attānaṁ,
dhp88:4	cittaklesehi paṇḍito.
dhp89:1	Yesaṁ sambodhiyaṅgesu,
dhp89:2	sammā cittaṁ subhāvitaṁ;
dhp89:3	Ādānapaṭinissagge,
dhp89:4	anupādāya ye ratā;
dhp89:5	Khīṇāsavā jutimanto,
dhp89:6	te loke parinibbutā.
dhp89:7	Paṇḍitavaggo chaṭṭho.
dhp90:0.1	Khuddakanikāya
dhp90:0.2	Dhammapada
dhp90:0.3	Arahantavagga
dhp90:0.4	Jīvakapañhavatthu
dhp90:1	Gataddhino visokassa,
dhp90:2	vippamuttassa sabbadhi;
dhp90:3	Sabbaganthappahīnassa,
dhp90:4	pariḷāho na vijjati.
dhp91:0	Mahākassapattheravatthu
dhp91:1	Uyyuñjanti satīmanto,
dhp91:2	na nikete ramanti te;
dhp91:3	Haṁsāva pallalaṁ hitvā,
dhp91:4	okamokaṁ jahanti te.
dhp92:0	Belaṭṭhasīsattheravatthu
dhp92:1	Yesaṁ sannicayo natthi,
dhp92:2	ye pariññātabhojanā;
dhp92:3	Suññato animitto ca,
dhp92:4	vimokkho yesaṁ gocaro;
dhp92:5	Ākāseva sakuntānaṁ,
dhp92:6	gati tesaṁ durannayā.
dhp93:0	Anuruddhattheravatthu
dhp93:1	Yassāsavā parikkhīṇā,
dhp93:2	āhāre ca anissito;
dhp93:3	Suññato animitto ca,
dhp93:4	vimokkho yassa gocaro;
dhp93:5	Ākāseva sakuntānaṁ,
dhp93:6	padaṁ tassa durannayaṁ.
dhp94:0	Mahākaccāyanattheravatthu
dhp94:1	Yassindriyāni samathaṅgatāni,
dhp94:2	Assā yathā sārathinā sudantā;
dhp94:3	Pahīnamānassa anāsavassa,
dhp94:4	Devāpi tassa pihayanti tādino.
dhp95:0	Sāriputtattheravatthu
dhp95:1	Pathavisamo no virujjhati,
dhp95:2	Indakhilupamo tādi subbato;
dhp95:3	Rahadova apetakaddamo,
dhp95:4	Saṁsārā na bhavanti tādino.
dhp96:0	Kosambivāsitissattherasāmaṇeravatthu
dhp96:1	Santaṁ tassa manaṁ hoti,
dhp96:2	santā vācā ca kamma ca;
dhp96:3	Sammadaññāvimuttassa,
dhp96:4	upasantassa tādino.
dhp97:0	Sāriputtattheravatthu
dhp97:1	Assaddho akataññū ca,
dhp97:2	sandhicchedo ca yo naro;
dhp97:3	Hatāvakāso vantāso,
dhp97:4	sa ve uttamaporiso.
dhp98:0	Khadiravaniyarevatattheravatthu
dhp98:1	Gāme vā yadi vāraññe,
dhp98:2	Ninne vā yadi vā thale;
dhp98:3	Yattha arahanto viharanti,
dhp98:4	Taṁ bhūmirāmaṇeyyakaṁ.
dhp99:0	Aññataraitthivatthu
dhp99:1	Ramaṇīyāni araññāni,
dhp99:2	yattha na ramatī jano;
dhp99:3	Vītarāgā ramissanti,
dhp99:4	na te kāmagavesino.
dhp99:5	Arahantavaggo sattamo.
dhp100:0.1	Khuddakanikāya
dhp100:0.2	Dhammapada
dhp100:0.3	Sahassavagga
dhp100:0.4	Tambadāṭhikacoraghātakavatthu
dhp100:1	Sahassamapi ce vācā,
dhp100:2	anatthapadasaṁhitā;
dhp100:3	Ekaṁ atthapadaṁ seyyo,
dhp100:4	yaṁ sutvā upasammati.
dhp101:0	Bāhiyadārucīriyattheravatthu
dhp101:1	Sahassamapi ce gāthā,
dhp101:2	anatthapadasaṁhitā;
dhp101:3	Ekaṁ gāthāpadaṁ seyyo,
dhp101:4	yaṁ sutvā upasammati.
dhp102:0	Kuṇḍalakesitherīvatthu
dhp102:1	Yo ca gāthā sataṁ bhāse,
dhp102:2	anatthapadasaṁhitā;
dhp102:3	Ekaṁ dhammapadaṁ seyyo,
dhp102:4	yaṁ sutvā upasammati.
dhp103:1	Yo sahassaṁ sahassena,
dhp103:2	saṅgāme mānuse jine;
dhp103:3	Ekañca jeyyamattānaṁ,
dhp103:4	sa ve saṅgāmajuttamo.
dhp104:0	Anatthapucchakabrāhmaṇavatthu
dhp104:1	Attā have jitaṁ seyyo,
dhp104:2	yā cāyaṁ itarā pajā;
dhp104:3	Attadantassa posassa,
dhp104:4	niccaṁ saññatacārino.
dhp105:1	Neva devo na gandhabbo,
dhp105:2	na māro saha brahmunā;
dhp105:3	Jitaṁ apajitaṁ kayirā,
dhp105:4	tathārūpassa jantuno.
dhp106:0	Sāriputtattherassa mātulabrāhmaṇavatthu
dhp106:1	Māse māse sahassena,
dhp106:2	yo yajetha sataṁ samaṁ;
dhp106:3	Ekañca bhāvitattānaṁ,
dhp106:4	muhuttamapi pūjaye;
dhp106:5	Sāyeva pūjanā seyyo,
dhp106:6	yañce vassasataṁ hutaṁ.
dhp107:0	Sāriputtattherassa bhāgineyyavatthu
dhp107:1	Yo ca vassasataṁ jantu,
dhp107:2	aggiṁ paricare vane;
dhp107:3	Ekañca bhāvitattānaṁ,
dhp107:4	muhuttamapi pūjaye;
dhp107:5	Sāyeva pūjanā seyyo,
dhp107:6	yañce vassasataṁ hutaṁ.
dhp108:0	Sāriputtatherassa sahāyakabrāhmaṇavatthu
dhp108:1	Yaṁ kiñci yiṭṭhaṁ va hutaṁ va loke,
dhp108:2	Saṁvaccharaṁ yajetha puññapekkho;
dhp108:3	Sabbampi taṁ na catubhāgameti,
dhp108:4	Abhivādanā ujjugatesu seyyo.
dhp109:0	Āyuvaḍḍhanakumāravatthu
dhp109:1	Abhivādanasīlissa,
dhp109:2	niccaṁ vuḍḍhāpacāyino;
dhp109:3	Cattāro dhammā vaḍḍhanti,
dhp109:4	āyu vaṇṇo sukhaṁ balaṁ.
dhp110:0	Saṅkiccasāmaṇeravatthu
dhp110:1	Yo ca vassasataṁ jīve,
dhp110:2	dussīlo asamāhito;
dhp110:3	Ekāhaṁ jīvitaṁ seyyo,
dhp110:4	sīlavantassa jhāyino.
dhp111:0	Khāṇukoṇḍaññattheravatthu
dhp111:1	Yo ca vassasataṁ jīve,
dhp111:2	duppañño asamāhito;
dhp111:3	Ekāhaṁ jīvitaṁ seyyo,
dhp111:4	paññavantassa jhāyino.
dhp112:0	Sabbadāsattheravatthu
dhp112:1	Yo ca vassasataṁ jīve,
dhp112:2	kusīto hīnavīriyo;
dhp112:3	Ekāhaṁ jīvitaṁ seyyo,
dhp112:4	vīriyamārabhato daḷhaṁ.
dhp113:0	Paṭācārātherīvatthu
dhp113:1	Yo ca vassasataṁ jīve,
dhp113:2	apassaṁ udayabbayaṁ;
dhp113:3	Ekāhaṁ jīvitaṁ seyyo,
dhp113:4	passato udayabbayaṁ.
dhp114:0	Kisāgotamīvatthu
dhp114:1	Yo ca vassasataṁ jīve,
dhp114:2	apassaṁ amataṁ padaṁ;
dhp114:3	Ekāhaṁ jīvitaṁ seyyo,
dhp114:4	passato amataṁ padaṁ.
dhp115:0	Bahuputtikattherīvatthu
dhp115:1	Yo ca vassasataṁ jīve,
dhp115:2	apassaṁ dhammamuttamaṁ;
dhp115:3	Ekāhaṁ jīvitaṁ seyyo,
dhp115:4	passato dhammamuttamaṁ.
dhp115:5	Sahassavaggo aṭṭhamo.
dhp116:0.1	Khuddakanikāya
dhp116:0.2	Dhammapada
dhp116:0.3	Pāpavagga
dhp116:0.4	Cūḷekasāṭakabrāhmaṇavatthu
dhp116:1	Abhittharetha kalyāṇe,
dhp116:2	pāpā cittaṁ nivāraye;
dhp116:3	Dandhañhi karoto puññaṁ,
dhp116:4	pāpasmiṁ ramatī mano.
dhp117:0	Seyyasakattheravatthu
dhp117:1	Pāpañce puriso kayirā,
dhp117:2	Na naṁ kayirā punappunaṁ;
dhp117:3	Na tamhi chandaṁ kayirātha,
dhp117:4	Dukkho pāpassa uccayo.
dhp118:0	Lājadevadhītāvatthu
dhp118:1	Puññañce puriso kayirā,
dhp118:2	kayirā naṁ punappunaṁ;
dhp118:3	Tamhi chandaṁ kayirātha,
dhp118:4	sukho puññassa uccayo.
dhp119:0	Anāthapiṇḍikaseṭṭhivatthu
dhp119:1	Pāpopi passati bhadraṁ,
dhp119:2	Yāva pāpaṁ na paccati;
dhp119:3	Yadā ca paccati pāpaṁ,
dhp119:4	Atha pāpo pāpāni passati.
dhp120:1	Bhadropi passati pāpaṁ,
dhp120:2	Yāva bhadraṁ na paccati;
dhp120:3	Yadā ca paccati bhadraṁ,
dhp120:4	Atha bhadro bhadrāni passati.
dhp121:0	Asaññataparikkhāravatthu
dhp121:1	Māvamaññetha pāpassa,
dhp121:2	na mantaṁ āgamissati;
dhp121:3	Udabindunipātena,
dhp121:4	udakumbhopi pūrati;
dhp121:5	Bālo pūrati pāpassa,
dhp121:6	thokaṁ thokampi ācinaṁ.
dhp122:0	Biḷālapādakaseṭṭhivatthu
dhp122:1	Māvamaññetha puññassa,
dhp122:2	na mandaṁ āgamissati;
dhp122:3	Udabindunipātena,
dhp122:4	udakumbhopi pūrati;
dhp122:5	Dhīro pūrati puññassa,
dhp122:6	thokaṁ thokampi ācinaṁ.
dhp123:0	Mahādhanavāṇijavatthu
dhp123:1	Vāṇijova bhayaṁ maggaṁ,
dhp123:2	appasattho mahaddhano;
dhp123:3	Visaṁ jīvitukāmova,
dhp123:4	pāpāni parivajjaye.
dhp124:0	Kukkuṭamittanesādavatthu
dhp124:1	Pāṇimhi ce vaṇo nāssa,
dhp124:2	hareyya pāṇinā visaṁ;
dhp124:3	Nābbaṇaṁ visamanveti,
dhp124:4	natthi pāpaṁ akubbato.
dhp125:0	Kokasunakhaluddakavatthu
dhp125:1	Yo appaduṭṭhassa narassa dussati,
dhp125:2	Suddhassa posassa anaṅgaṇassa;
dhp125:3	Tameva bālaṁ pacceti pāpaṁ,
dhp125:4	Sukhumo rajo paṭivātaṁva khitto.
dhp126:0	Maṇikārakulūpakatissattheravatthu
dhp126:1	Gabbhameke uppajjanti,
dhp126:2	nirayaṁ pāpakammino;
dhp126:3	Saggaṁ sugatino yanti,
dhp126:4	parinibbanti anāsavā.
dhp127:0	Tayojanavatthu
dhp127:1	Na antalikkhe na samuddamajjhe,
dhp127:2	Na pabbatānaṁ vivaraṁ pavissa;
dhp127:3	Na vijjatī so jagatippadeso,
dhp127:4	Yatthaṭṭhito mucceyya pāpakammā.
dhp128:0	Suppabuddhasakyavatthu
dhp128:1	Na antalikkhe na samuddamajjhe,
dhp128:2	Na pabbatānaṁ vivaraṁ pavissa;
dhp128:3	Na vijjatī so jagatippadeso,
dhp128:4	Yatthaṭṭhitaṁ nappasaheyya maccu.
dhp128:5	Pāpavaggo navamo.
dhp129:0.1	Khuddakanikāya
dhp129:0.2	Dhammapada
dhp129:0.3	Daṇḍavagga
dhp129:0.4	Chabbaggiyabhikkhuvatthu
dhp129:1	Sabbe tasanti daṇḍassa,
dhp129:2	sabbe bhāyanti maccuno;
dhp129:3	Attānaṁ upamaṁ katvā,
dhp129:4	na haneyya na ghātaye.
dhp130:0	Chabbaggiyavatthu
dhp130:1	Sabbe tasanti daṇḍassa,
dhp130:2	sabbesaṁ jīvitaṁ piyaṁ;
dhp130:3	Attānaṁ upamaṁ katvā,
dhp130:4	na haneyya na ghātaye.
dhp131:0	Sambahulakumārakavatthu
dhp131:1	Sukhakāmāni bhūtāni,
dhp131:2	yo daṇḍena vihiṁsati;
dhp131:3	Attano sukhamesāno,
dhp131:4	pecca so na labhate sukhaṁ.
dhp132:1	Sukhakāmāni bhūtāni,
dhp132:2	yo daṇḍena na hiṁsati;
dhp132:3	Attano sukhamesāno,
dhp132:4	pecca so labhate sukhaṁ.
dhp133:0	Koṇḍadhānattheravatthu
dhp133:1	Māvoca pharusaṁ kañci,
dhp133:2	vuttā paṭivadeyyu taṁ;
dhp133:3	Dukkhā hi sārambhakathā,
dhp133:4	paṭidaṇḍā phuseyyu taṁ.
dhp134:1	Sace neresi attānaṁ,
dhp134:2	kaṁso upahato yathā;
dhp134:3	Esa pattosi nibbānaṁ,
dhp134:4	sārambho te na vijjati.
dhp135:0	Uposathikaitthīnaṁvatthu
dhp135:1	Yathā daṇḍena gopālo,
dhp135:2	gāvo pājeti gocaraṁ;
dhp135:3	Evaṁ jarā ca maccu ca,
dhp135:4	āyuṁ pājenti pāṇinaṁ.
dhp136:0	Ajagarapetavatthu
dhp136:1	Atha pāpāni kammāni,
dhp136:2	karaṁ bālo na bujjhati;
dhp136:3	Sehi kammehi dummedho,
dhp136:4	aggidaḍḍhova tappati.
dhp137:0	Mahāmoggallānattheravatthu
dhp137:1	Yo daṇḍena adaṇḍesu,
dhp137:2	appaduṭṭhesu dussati;
dhp137:3	Dasannamaññataraṁ ṭhānaṁ,
dhp137:4	khippameva nigacchati.
dhp138:1	Vedanaṁ pharusaṁ jāniṁ,
dhp138:2	sarīrassa va bhedanaṁ;
dhp138:3	Garukaṁ vāpi ābādhaṁ,
dhp138:4	cittakkhepaṁ va pāpuṇe.
dhp139:1	Rājato vā upasaggaṁ,
dhp139:2	Abbhakkhānaṁ va dāruṇaṁ;
dhp139:3	Parikkhayaṁ va ñātīnaṁ,
dhp139:4	Bhogānaṁ va pabhaṅguraṁ.
dhp140:1	Atha vāssa agārāni,
dhp140:2	aggi ḍahati pāvako;
dhp140:3	Kāyassa bhedā duppañño,
dhp140:4	nirayaṁ sopapajjati.
dhp141:0	Bahubhaṇḍikabhikkhuvatthu
dhp141:1	Na naggacariyā na jaṭā na paṅkā,
dhp141:2	Nānāsakā thaṇḍilasāyikā vā;
dhp141:3	Rajojallaṁ ukkuṭikappadhānaṁ,
dhp141:4	Sodhenti maccaṁ avitiṇṇakaṅkhaṁ.
dhp142:0	Santatimahāmattavatthu
dhp142:1	Alaṅkato cepi samaṁ careyya,
dhp142:2	Santo danto niyato brahmacārī;
dhp142:3	Sabbesu bhūtesu nidhāya daṇḍaṁ,
dhp142:4	So brāhmaṇo so samaṇo sa bhikkhu.
dhp143:0	Pilotikatissattheravatthu
dhp143:1	Hirīnisedho puriso,
dhp143:2	koci lokasmi vijjati;
dhp143:3	Yo niddaṁ apabodheti,
dhp143:4	asso bhadro kasāmiva.
dhp144:1	Asso yathā bhadro kasāniviṭṭho,
dhp144:2	Ātāpino saṁvegino bhavātha;
dhp144:3	Saddhāya sīlena ca vīriyena ca,
dhp144:4	Samādhinā dhammavinicchayena ca;
dhp144:5	Sampannavijjācaraṇā patissatā,
dhp144:6	Jahissatha dukkhamidaṁ anappakaṁ.
dhp145:0	Sukhasāmaṇeravatthu
dhp145:1	Udakañhi nayanti nettikā,
dhp145:2	Usukārā namayanti tejanaṁ;
dhp145:3	Dāruṁ namayanti tacchakā,
dhp145:4	Attānaṁ damayanti subbatā.
dhp145:5	Daṇḍavaggo dasamo.
dhp146:0.1	Khuddakanikāya
dhp146:0.2	Dhammapada
dhp146:0.3	Jarāvagga
dhp146:0.4	Visākhāyasahāyikānaṁvatthu
dhp146:1	Ko nu hāso kimānando,
dhp146:2	niccaṁ pajjalite sati;
dhp146:3	Andhakārena onaddhā,
dhp146:4	padīpaṁ na gavesatha.
dhp147:0	Sirimāvatthu
dhp147:1	Passa cittakataṁ bimbaṁ,
dhp147:2	arukāyaṁ samussitaṁ;
dhp147:3	Āturaṁ bahusaṅkappaṁ,
dhp147:4	yassa natthi dhuvaṁ ṭhiti.
dhp148:0	Uttarātherīvatthu
dhp148:1	Parijiṇṇamidaṁ rūpaṁ,
dhp148:2	roganīḷaṁ pabhaṅguraṁ;
dhp148:3	Bhijjati pūtisandeho,
dhp148:4	maraṇantañhi jīvitaṁ.
dhp149:0	Sambahulaadhimānikabhikkhuvatthu
dhp149:1	Yānimāni apatthāni,
dhp149:2	alābūneva sārade;
dhp149:3	Kāpotakāni aṭṭhīni,
dhp149:4	tāni disvāna kā rati.
dhp150:0	Janapadakalyāṇīrūpanandātherīvatthu
dhp150:1	Aṭṭhīnaṁ nagaraṁ kataṁ,
dhp150:2	maṁsalohitalepanaṁ;
dhp150:3	Yattha jarā ca maccu ca,
dhp150:4	māno makkho ca ohito.
dhp151:0	Mallikādevīvatthu
dhp151:1	Jīranti ve rājarathā sucittā,
dhp151:2	Atho sarīrampi jaraṁ upeti;
dhp151:3	Satañca dhammo na jaraṁ upeti,
dhp151:4	Santo have sabbhi pavedayanti.
dhp152:0	Lāḷudāyītheravatthu
dhp152:1	Appassutāyaṁ puriso,
dhp152:2	balībaddhova jīrati;
dhp152:3	Maṁsāni tassa vaḍḍhanti,
dhp152:4	paññā tassa na vaḍḍhati.
dhp153:0	Udānavatthu
dhp153:1	Anekajātisaṁsāraṁ,
dhp153:2	sandhāvissaṁ anibbisaṁ;
dhp153:3	Gahakāraṁ gavesanto,
dhp153:4	dukkhā jāti punappunaṁ.
dhp154:1	Gahakāraka diṭṭhosi,
dhp154:2	puna gehaṁ na kāhasi;
dhp154:3	Sabbā te phāsukā bhaggā,
dhp154:4	gahakūṭaṁ visaṅkhataṁ;
dhp154:5	Visaṅkhāragataṁ cittaṁ,
dhp154:6	taṇhānaṁ khayamajjhagā.
dhp155:0	Mahādhanaseṭṭhiputtavatthu
dhp155:1	Acaritvā brahmacariyaṁ,
dhp155:2	aladdhā yobbane dhanaṁ;
dhp155:3	Jiṇṇakoñcāva jhāyanti,
dhp155:4	khīṇamaccheva pallale.
dhp156:1	Acaritvā brahmacariyaṁ,
dhp156:2	aladdhā yobbane dhanaṁ;
dhp156:3	Senti cāpātikhīṇāva,
dhp156:4	purāṇāni anutthunaṁ.
dhp156:5	Jarāvaggo ekādasamo.
dhp157:0.1	Khuddakanikāya
dhp157:0.2	Dhammapada
dhp157:0.3	Attavagga
dhp157:0.4	Bodhirājakumāravatthu
dhp157:1	Attānañce piyaṁ jaññā,
dhp157:2	rakkheyya naṁ surakkhitaṁ;
dhp157:3	Tiṇṇaṁ aññataraṁ yāmaṁ,
dhp157:4	paṭijaggeyya paṇḍito.
dhp158:0	Upanandasakyaputtattheravatthu
dhp158:1	Attānameva paṭhamaṁ,
dhp158:2	patirūpe nivesaye;
dhp158:3	Athaññamanusāseyya,
dhp158:4	na kilisseyya paṇḍito.
dhp159:0	Padhānikatissattheravatthu
dhp159:1	Attānañce tathā kayirā,
dhp159:2	yathāññamanusāsati;
dhp159:3	Sudanto vata dametha,
dhp159:4	attā hi kira duddamo.
dhp160:0	Kumārakassapamātuttherivatthu
dhp160:1	Attā hi attano nātho,
dhp160:2	ko hi nātho paro siyā;
dhp160:3	Attanā hi sudantena,
dhp160:4	nāthaṁ labhati dullabhaṁ.
dhp161:0	Mahākālaupāsakavatthu
dhp161:1	Attanā hi kataṁ pāpaṁ,
dhp161:2	Attajaṁ attasambhavaṁ;
dhp161:3	Abhimatthati dummedhaṁ,
dhp161:4	Vajiraṁvasmamayaṁ maṇiṁ.
dhp162:0	Devadattavatthu
dhp162:1	Yassa accantadussilyaṁ,
dhp162:2	māluvā sālamivotthataṁ;
dhp162:3	Karoti so tathattānaṁ,
dhp162:4	yathā naṁ icchatī diso.
dhp163:0	Saṅghabhedaparisakkanavatthu
dhp163:1	Sukarāni asādhūni,
dhp163:2	attano ahitāni ca;
dhp163:3	Yaṁ ve hitañca sādhuñca,
dhp163:4	taṁ ve paramadukkaraṁ.
dhp164:0	Kālattheravatthu
dhp164:1	Yo sāsanaṁ arahataṁ,
dhp164:2	ariyānaṁ dhammajīvinaṁ;
dhp164:3	Paṭikkosati dummedho,
dhp164:4	diṭṭhiṁ nissāya pāpikaṁ;
dhp164:5	Phalāni kaṭṭhakasseva,
dhp164:6	attaghātāya phallati.
dhp165:0	Cūḷakālaupāsakavatthu
dhp165:1	Attanā hi kataṁ pāpaṁ,
dhp165:2	attanā saṅkilissati;
dhp165:3	Attanā akataṁ pāpaṁ,
dhp165:4	attanāva visujjhati;
dhp165:5	Suddhī asuddhi paccattaṁ,
dhp165:6	nāñño aññaṁ visodhaye.
dhp166:0	Attadatthattheravatthu
dhp166:1	Attadatthaṁ paratthena,
dhp166:2	bahunāpi na hāpaye;
dhp166:3	Attadatthamabhiññāya,
dhp166:4	sadatthapasuto siyā.
dhp166:5	Attavaggo dvādasamo.
dhp167:0.1	Khuddakanikāya
dhp167:0.2	Dhammapada
dhp167:0.3	Lokavagga
dhp167:0.4	Daharabhikkhuvatthu
dhp167:1	Hīnaṁ dhammaṁ na seveyya,
dhp167:2	pamādena na saṁvase;
dhp167:3	Micchādiṭṭhiṁ na seveyya,
dhp167:4	na siyā lokavaḍḍhano.
dhp168:0	Suddhodanavatthu
dhp168:1	Uttiṭṭhe nappamajjeyya,
dhp168:2	dhammaṁ sucaritaṁ care;
dhp168:3	Dhammacārī sukhaṁ seti,
dhp168:4	asmiṁ loke paramhi ca.
dhp169:1	Dhammaṁ care sucaritaṁ,
dhp169:2	na naṁ duccaritaṁ care;
dhp169:3	Dhammacārī sukhaṁ seti,
dhp169:4	asmiṁ loke paramhi ca.
dhp170:0	Pañcasatavipassakabhikkhuvatthu
dhp170:1	Yathā pubbuḷakaṁ passe,
dhp170:2	yathā passe marīcikaṁ;
dhp170:3	Evaṁ lokaṁ avekkhantaṁ,
dhp170:4	maccurājā na passati.
dhp171:0	Abhayarājakumāravatthu
dhp171:1	Etha passathimaṁ lokaṁ,
dhp171:2	cittaṁ rājarathūpamaṁ;
dhp171:3	Yattha bālā visīdanti,
dhp171:4	natthi saṅgo vijānataṁ.
dhp172:0	Sammajjanattheravatthu
dhp172:1	Yo ca pubbe pamajjitvā,
dhp172:2	pacchā so nappamajjati;
dhp172:3	Somaṁ lokaṁ pabhāseti,
dhp172:4	abbhā muttova candimā.
dhp173:0	Aṅgulimālattheravatthu
dhp173:1	Yassa pāpaṁ kataṁ kammaṁ,
dhp173:2	kusalena pidhīyati;
dhp173:3	Somaṁ lokaṁ pabhāseti,
dhp173:4	abbhā muttova candimā.
dhp174:0	Pesakāradhītāvatthu
dhp174:1	Andhabhūto ayaṁ loko,
dhp174:2	tanukettha vipassati;
dhp174:3	Sakuṇo jālamuttova,
dhp174:4	appo saggāya gacchati.
dhp175:0	Tiṁsabhikkhuvatthu
dhp175:1	Haṁsādiccapathe yanti,
dhp175:2	ākāse yanti iddhiyā;
dhp175:3	Nīyanti dhīrā lokamhā,
dhp175:4	jetvā māraṁ savāhiniṁ.
dhp176:0	Ciñcamāṇavikāvatthu
dhp176:1	Ekaṁ dhammaṁ atītassa,
dhp176:2	musāvādissa jantuno;
dhp176:3	Vitiṇṇaparalokassa,
dhp176:4	natthi pāpaṁ akāriyaṁ.
dhp177:0	Asadisadānavatthu
dhp177:1	Na ve kadariyā devalokaṁ vajanti,
dhp177:2	Bālā have nappasaṁsanti dānaṁ;
dhp177:3	Dhīro ca dānaṁ anumodamāno,
dhp177:4	Teneva so hoti sukhī parattha.
dhp178:0	Anāthapiṇḍikaputtakālavatthu
dhp178:1	Pathabyā ekarajjena,
dhp178:2	saggassa gamanena vā;
dhp178:3	Sabbalokādhipaccena,
dhp178:4	sotāpattiphalaṁ varaṁ.
dhp178:5	Lokavaggo terasamo.
dhp179:0.1	Khuddakanikāya
dhp179:0.2	Dhammapada
dhp179:0.3	Buddhavagga
dhp179:0.4	Māradhītaravatthu
dhp179:1	Yassa jitaṁ nāvajīyati,
dhp179:2	Jitaṁ yassa noyāti koci loke;
dhp179:3	Taṁ buddhamanantagocaraṁ,
dhp179:4	Apadaṁ kena padena nessatha.
dhp180:1	Yassa jālinī visattikā,
dhp180:2	Taṇhā natthi kuhiñci netave;
dhp180:3	Taṁ buddhamanantagocaraṁ,
dhp180:4	Apadaṁ kena padena nessatha.
dhp181:0	Devorohaṇavatthu
dhp181:1	Ye jhānapasutā dhīrā,
dhp181:2	nekkhammūpasame ratā;
dhp181:3	Devāpi tesaṁ pihayanti,
dhp181:4	sambuddhānaṁ satīmataṁ.
dhp182:0	Erakapattanāgarājavatthu
dhp182:1	Kiccho manussapaṭilābho,
dhp182:2	kicchaṁ maccāna jīvitaṁ;
dhp182:3	Kicchaṁ saddhammassavanaṁ,
dhp182:4	kiccho buddhānamuppādo.
dhp183:0	Ānandattherapañhavatthu
dhp183:1	Sabbapāpassa akaraṇaṁ,
dhp183:2	kusalassa upasampadā;
dhp183:3	Sacittapariyodapanaṁ,
dhp183:4	etaṁ buddhāna sāsanaṁ.
dhp184:1	Khantī paramaṁ tapo titikkhā,
dhp184:2	Nibbānaṁ paramaṁ vadanti buddhā;
dhp184:3	Na hi pabbajito parūpaghātī,
dhp184:4	Na samaṇo hoti paraṁ viheṭhayanto.
dhp185:1	Anūpavādo anūpaghāto,
dhp185:2	Pātimokkhe ca saṁvaro;
dhp185:3	Mattaññutā ca bhattasmiṁ,
dhp185:4	Pantañca sayanāsanaṁ;
dhp185:5	Adhicitte ca āyogo,
dhp185:6	Etaṁ buddhāna sāsanaṁ.
dhp186:0	Anabhiratabhikkhuvatthu
dhp186:1	Na kahāpaṇavassena,
dhp186:2	titti kāmesu vijjati;
dhp186:3	Appassādā dukhā kāmā,
dhp186:4	iti viññāya paṇḍito.
dhp187:1	Api dibbesu kāmesu,
dhp187:2	ratiṁ so nādhigacchati;
dhp187:3	Taṇhakkhayarato hoti,
dhp187:4	sammāsambuddhasāvako.
dhp188:0	Aggidattabrāhmaṇavatthu
dhp188:1	Bahuṁ ve saraṇaṁ yanti,
dhp188:2	pabbatāni vanāni ca;
dhp188:3	Ārāmarukkhacetyāni,
dhp188:4	manussā bhayatajjitā.
dhp189:1	Netaṁ kho saraṇaṁ khemaṁ,
dhp189:2	netaṁ saraṇamuttamaṁ;
dhp189:3	Netaṁ saraṇamāgamma,
dhp189:4	sabbadukkhā pamuccati.
dhp190:1	Yo ca buddhañca dhammañca,
dhp190:2	saṅghañca saraṇaṁ gato;
dhp190:3	Cattāri ariyasaccāni,
dhp190:4	sammappaññāya passati.
dhp191:1	Dukkhaṁ dukkhasamuppādaṁ,
dhp191:2	dukkhassa ca atikkamaṁ;
dhp191:3	Ariyaṁ caṭṭhaṅgikaṁ maggaṁ,
dhp191:4	dukkhūpasamagāminaṁ.
dhp192:1	Etaṁ kho saraṇaṁ khemaṁ,
dhp192:2	etaṁ saraṇamuttamaṁ;
dhp192:3	Etaṁ saraṇamāgamma,
dhp192:4	sabbadukkhā pamuccati.
dhp193:0	Ānandattherapañhavatthu
dhp193:1	Dullabho purisājañño,
dhp193:2	na so sabbattha jāyati;
dhp193:3	Yattha so jāyati dhīro,
dhp193:4	taṁ kulaṁ sukhamedhati.
dhp194:0	Sambahulabhikkhuvatthu
dhp194:1	Sukho buddhānamuppādo,
dhp194:2	sukhā saddhammadesanā;
dhp194:3	Sukhā saṅghassa sāmaggī,
dhp194:4	samaggānaṁ tapo sukho.
dhp195:0	Kassapadasabalassasuvaṇṇacetiyavatthu
dhp195:1	Pūjārahe pūjayato,
dhp195:2	buddhe yadi va sāvake;
dhp195:3	Papañcasamatikkante,
dhp195:4	tiṇṇasokapariddave.
dhp196:1	Te tādise pūjayato,
dhp196:2	nibbute akutobhaye;
dhp196:3	Na sakkā puññaṁ saṅkhātuṁ,
dhp196:4	imettamapi kenaci.
dhp196:5	Buddhavaggo cuddasamo.
dhp196:6	Paṭhamabhāṇavāraṁ.
dhp197:0.1	Khuddakanikāya
dhp197:0.2	Dhammapada
dhp197:0.3	Sukhavagga
dhp197:0.4	Ñātikalahavūpasamanavatthu
dhp197:1	Susukhaṁ vata jīvāma,
dhp197:2	verinesu averino;
dhp197:3	Verinesu manussesu,
dhp197:4	viharāma averino.
dhp198:1	Susukhaṁ vata jīvāma,
dhp198:2	āturesu anāturā;
dhp198:3	Āturesu manussesu,
dhp198:4	viharāma anāturā.
dhp199:1	Susukhaṁ vata jīvāma,
dhp199:2	ussukesu anussukā;
dhp199:3	Ussukesu manussesu,
dhp199:4	viharāma anussukā.
dhp200:0	Māravatthu
dhp200:1	Susukhaṁ vata jīvāma,
dhp200:2	yesaṁ no natthi kiñcanaṁ;
dhp200:3	Pītibhakkhā bhavissāma,
dhp200:4	devā ābhassarā yathā.
dhp201:0	Kosalaraññoparājayavatthu
dhp201:1	Jayaṁ veraṁ pasavati,
dhp201:2	dukkhaṁ seti parājito;
dhp201:3	Upasanto sukhaṁ seti,
dhp201:4	hitvā jayaparājayaṁ.
dhp202:0	Aññatarakuladārikāvatthu
dhp202:1	Natthi rāgasamo aggi,
dhp202:2	Natthi dosasamo kali;
dhp202:3	Natthi khandhasamā dukkhā,
dhp202:4	Natthi santiparaṁ sukhaṁ.
dhp203:0	Ekaupāsakavatthu
dhp203:1	Jighacchāparamā rogā,
dhp203:2	saṅkhāraparamā dukhā;
dhp203:3	Etaṁ ñatvā yathābhūtaṁ,
dhp203:4	nibbānaṁ paramaṁ sukhaṁ.
dhp204:0	Pasenadikosalavatthu
dhp204:1	Ārogyaparamā lābhā,
dhp204:2	Santuṭṭhiparamaṁ dhanaṁ;
dhp204:3	Vissāsaparamā ñāti,
dhp204:4	Nibbānaṁ paramaṁ sukhaṁ.
dhp205:0	Tissattheravatthu
dhp205:1	Pavivekarasaṁ pitvā,
dhp205:2	rasaṁ upasamassa ca;
dhp205:3	Niddaro hoti nippāpo,
dhp205:4	dhammapītirasaṁ pivaṁ.
dhp206:0	Sakkavatthu
dhp206:1	Sāhu dassanamariyānaṁ,
dhp206:2	sannivāso sadā sukho;
dhp206:3	Adassanena bālānaṁ,
dhp206:4	niccameva sukhī siyā.
dhp207:1	Bālasaṅgatacārī hi,
dhp207:2	dīghamaddhāna socati;
dhp207:3	Dukkho bālehi saṁvāso,
dhp207:4	amitteneva sabbadā;
dhp207:5	Dhīro ca sukhasaṁvāso,
dhp207:6	ñātīnaṁva samāgamo.
dhp208:1	Tasmā hi—
dhp208:2	Dhīrañca paññañca bahussutañca,
dhp208:3	Dhorayhasīlaṁ vatavantamariyaṁ;
dhp208:4	Taṁ tādisaṁ sappurisaṁ sumedhaṁ,
dhp208:5	Bhajetha nakkhattapathaṁva candimā.
dhp208:6	Sukhavaggo pannarasamo.
dhp209:0.1	Khuddakanikāya
dhp209:0.2	Dhammapada
dhp209:0.3	Piyavagga
dhp209:0.4	Tayojanapabbajitavatthu
dhp209:1	Ayoge yuñjamattānaṁ,
dhp209:2	yogasmiñca ayojayaṁ;
dhp209:3	Atthaṁ hitvā piyaggāhī,
dhp209:4	pihetattānuyoginaṁ.
dhp210:1	Mā piyehi samāgañchi,
dhp210:2	appiyehi kudācanaṁ;
dhp210:3	Piyānaṁ adassanaṁ dukkhaṁ,
dhp210:4	appiyānañca dassanaṁ.
dhp211:1	Tasmā piyaṁ na kayirātha,
dhp211:2	piyāpāyo hi pāpako;
dhp211:3	Ganthā tesaṁ na vijjanti,
dhp211:4	yesaṁ natthi piyāppiyaṁ.
dhp212:0	Aññatarakuṭumbikavatthu
dhp212:1	Piyato jāyatī soko,
dhp212:2	piyato jāyatī bhayaṁ;
dhp212:3	Piyato vippamuttassa,
dhp212:4	natthi soko kuto bhayaṁ.
dhp213:0	Visākhāvatthu
dhp213:1	Pemato jāyatī soko,
dhp213:2	pemato jāyatī bhayaṁ;
dhp213:3	Pemato vippamuttassa,
dhp213:4	natthi soko kuto bhayaṁ.
dhp214:0	Licchavīvatthu
dhp214:1	Ratiyā jāyatī soko,
dhp214:2	ratiyā jāyatī bhayaṁ;
dhp214:3	Ratiyā vippamuttassa,
dhp214:4	natthi soko kuto bhayaṁ.
dhp215:0	Anitthigandhakumāravatthu
dhp215:1	Kāmato jāyatī soko,
dhp215:2	kāmato jāyatī bhayaṁ;
dhp215:3	Kāmato vippamuttassa,
dhp215:4	natthi soko kuto bhayaṁ.
dhp216:0	Aññatarabrāhmaṇavatthu
dhp216:1	Taṇhāya jāyatī soko,
dhp216:2	taṇhāya jāyatī bhayaṁ;
dhp216:3	Taṇhāya vippamuttassa,
dhp216:4	natthi soko kuto bhayaṁ.
dhp217:0	Pañcasatadārakavatthu
dhp217:1	Sīladassanasampannaṁ,
dhp217:2	dhammaṭṭhaṁ saccavedinaṁ;
dhp217:3	Attano kamma kubbānaṁ,
dhp217:4	taṁ jano kurute piyaṁ.
dhp218:0	Ekaanāgāmittheravatthu
dhp218:1	Chandajāto anakkhāte,
dhp218:2	Manasā ca phuṭo siyā;
dhp218:3	Kāmesu ca appaṭibaddhacitto,
dhp218:4	Uddhaṁsototi vuccati.
dhp219:0	Nandiyavatthu
dhp219:1	Cirappavāsiṁ purisaṁ,
dhp219:2	dūrato sotthimāgataṁ;
dhp219:3	Ñātimittā suhajjā ca,
dhp219:4	abhinandanti āgataṁ.
dhp220:1	Tatheva katapuññampi,
dhp220:2	asmā lokā paraṁ gataṁ;
dhp220:3	Puññāni paṭigaṇhanti,
dhp220:4	piyaṁ ñātīva āgataṁ.
dhp220:5	Piyavaggo soḷasamo.
dhp221:0.1	Khuddakanikāya
dhp221:0.2	Dhammapada
dhp221:0.3	Kodhavagga
dhp221:0.4	Rohinīkhattiyakaññāvatthu
dhp221:1	Kodhaṁ jahe vippajaheyya mānaṁ,
dhp221:2	Saṁyojanaṁ sabbamatikkameyya;
dhp221:3	Taṁ nāmarūpasmimasajjamānaṁ,
dhp221:4	Akiñcanaṁ nānupatanti dukkhā.
dhp222:0	Aññatarabhikkhuvatthu
dhp222:1	Yo ve uppatitaṁ kodhaṁ,
dhp222:2	rathaṁ bhantaṁva vāraye;
dhp222:3	Tamahaṁ sārathiṁ brūmi,
dhp222:4	rasmiggāho itaro jano.
dhp223:0	Uttarāupāsikavatthu
dhp223:1	Akkodhena jine kodhaṁ,
dhp223:2	asādhuṁ sādhunā jine;
dhp223:3	Jine kadariyaṁ dānena,
dhp223:4	saccenālikavādinaṁ.
dhp224:0	Mahāmoggallānapañhavatthu
dhp224:1	Saccaṁ bhaṇe na kujjheyya,
dhp224:2	dajjā appampi yācito;
dhp224:3	Etehi tīhi ṭhānehi,
dhp224:4	gacche devāna santike.
dhp225:0	Buddhapitubrāhmaṇavatthu
dhp225:1	Ahiṁsakā ye munayo,
dhp225:2	niccaṁ kāyena saṁvutā;
dhp225:3	Te yanti accutaṁ ṭhānaṁ,
dhp225:4	yattha gantvā na socare.
dhp226:0	Puṇṇadāsīvatthu
dhp226:1	Sadā jāgaramānānaṁ,
dhp226:2	ahorattānusikkhinaṁ;
dhp226:3	Nibbānaṁ adhimuttānaṁ,
dhp226:4	atthaṁ gacchanti āsavā.
dhp227:0	Atulaupāsakavatthu
dhp227:1	Porāṇametaṁ atula,
dhp227:2	netaṁ ajjatanāmiva;
dhp227:3	Nindanti tuṇhimāsīnaṁ,
dhp227:4	nindanti bahubhāṇinaṁ;
dhp227:5	Mitabhāṇimpi nindanti,
dhp227:6	natthi loke anindito.
dhp228:1	Na cāhu na ca bhavissati,
dhp228:2	na cetarahi vijjati;
dhp228:3	Ekantaṁ nindito poso,
dhp228:4	ekantaṁ vā pasaṁsito.
dhp229:1	Yañce viññū pasaṁsanti,
dhp229:2	anuvicca suve suve;
dhp229:3	Acchiddavuttiṁ medhāviṁ,
dhp229:4	paññāsīlasamāhitaṁ.
dhp230:1	Nikkhaṁ jambonadasseva,
dhp230:2	ko taṁ ninditumarahati;
dhp230:3	Devāpi naṁ pasaṁsanti,
dhp230:4	brahmunāpi pasaṁsito.
dhp231:0	Chabbaggiyavatthu
dhp231:1	Kāyappakopaṁ rakkheyya,
dhp231:2	kāyena saṁvuto siyā;
dhp231:3	Kāyaduccaritaṁ hitvā,
dhp231:4	kāyena sucaritaṁ care.
dhp232:1	Vacīpakopaṁ rakkheyya,
dhp232:2	vācāya saṁvuto siyā;
dhp232:3	Vacīduccaritaṁ hitvā,
dhp232:4	vācāya sucaritaṁ care.
dhp233:1	Manopakopaṁ rakkheyya,
dhp233:2	manasā saṁvuto siyā;
dhp233:3	Manoduccaritaṁ hitvā,
dhp233:4	manasā sucaritaṁ care.
dhp234:1	Kāyena saṁvutā dhīrā,
dhp234:2	atho vācāya saṁvutā;
dhp234:3	Manasā saṁvutā dhīrā,
dhp234:4	te ve suparisaṁvutā.
dhp234:5	Kodhavaggo sattarasamo.
dhp235:0.1	Khuddakanikāya
dhp235:0.2	Dhammapada
dhp235:0.3	Malavagga
dhp235:0.4	Goghātakaputtavatthu
dhp235:1	Paṇḍupalāsova dānisi,
dhp235:2	Yamapurisāpi ca te upaṭṭhitā;
dhp235:3	Uyyogamukhe ca tiṭṭhasi,
dhp235:4	Pātheyyampi ca te na vijjati.
dhp236:1	So karohi dīpamattano,
dhp236:2	Khippaṁ vāyama paṇḍito bhava;
dhp236:3	Niddhantamalo anaṅgaṇo,
dhp236:4	Dibbaṁ ariyabhūmiṁ upehisi.
dhp237:1	Upanītavayo ca dānisi,
dhp237:2	Sampayātosi yamassa santikaṁ;
dhp237:3	Vāso te natthi antarā,
dhp237:4	Pātheyyampi ca te na vijjati.
dhp238:1	So karohi dīpamattano,
dhp238:2	Khippaṁ vāyama paṇḍito bhava;
dhp238:3	Niddhantamalo anaṅgaṇo,
dhp238:4	Na punaṁ jātijaraṁ upehisi.
dhp239:0	Aññatarabrāhmaṇavatthu
dhp239:1	Anupubbena medhāvī,
dhp239:2	thokaṁ thokaṁ khaṇe khaṇe;
dhp239:3	Kammāro rajatasseva,
dhp239:4	niddhame malamattano.
dhp240:0	Tissattheravatthu
dhp240:1	Ayasāva malaṁ samuṭṭhitaṁ,
dhp240:2	Tatuṭṭhāya tameva khādati;
dhp240:3	Evaṁ atidhonacārinaṁ,
dhp240:4	Sāni kammāni nayanti duggatiṁ.
dhp241:0	Lāḷudāyīvatthu
dhp241:1	Asajjhāyamalā mantā,
dhp241:2	anuṭṭhānamalā gharā;
dhp241:3	Malaṁ vaṇṇassa kosajjaṁ,
dhp241:4	pamādo rakkhato malaṁ.
dhp242:0	Aññatarakulaputtavatthu
dhp242:1	Malitthiyā duccaritaṁ,
dhp242:2	maccheraṁ dadato malaṁ;
dhp242:3	Malā ve pāpakā dhammā,
dhp242:4	asmiṁ loke paramhi ca.
dhp243:1	Tato malā malataraṁ,
dhp243:2	avijjā paramaṁ malaṁ;
dhp243:3	Etaṁ malaṁ pahantvāna,
dhp243:4	nimmalā hotha bhikkhavo.
dhp244:0	Cūḷasāribhikkhuvatthu
dhp244:1	Sujīvaṁ ahirikena,
dhp244:2	kākasūrena dhaṁsinā;
dhp244:3	Pakkhandinā pagabbhena,
dhp244:4	saṅkiliṭṭhena jīvitaṁ.
dhp245:1	Hirīmatā ca dujjīvaṁ,
dhp245:2	niccaṁ sucigavesinā;
dhp245:3	Alīnenāppagabbhena,
dhp245:4	suddhājīvena passatā.
dhp246:0	Pañcaupāsakavatthu
dhp246:1	Yo pāṇamatipāteti,
dhp246:2	musāvādañca bhāsati;
dhp246:3	Loke adinnamādiyati,
dhp246:4	paradārañca gacchati.
dhp247:1	Surāmerayapānañca,
dhp247:2	yo naro anuyuñjati;
dhp247:3	Idheva meso lokasmiṁ,
dhp247:4	mūlaṁ khaṇati attano.
dhp248:1	Evaṁ bho purisa jānāhi,
dhp248:2	pāpadhammā asaññatā;
dhp248:3	Mā taṁ lobho adhammo ca,
dhp248:4	ciraṁ dukkhāya randhayuṁ.
dhp249:0	Tissadaharavatthu
dhp249:1	Dadāti ve yathāsaddhaṁ,
dhp249:2	yathāpasādanaṁ jano;
dhp249:3	Tattha yo ca maṅku bhavati,
dhp249:4	paresaṁ pānabhojane;
dhp249:5	Na so divā vā rattiṁ vā,
dhp249:6	samādhimadhigacchati.
dhp250:1	Yassa cetaṁ samucchinnaṁ,
dhp250:2	mūlaghaccaṁ samūhataṁ;
dhp250:3	Sa ve divā vā rattiṁ vā,
dhp250:4	samādhimadhigacchati.
dhp251:0	Pañcaupāsakavatthu
dhp251:1	Natthi rāgasamo aggi,
dhp251:2	natthi dosasamo gaho;
dhp251:3	Natthi mohasamaṁ jālaṁ,
dhp251:4	natthi taṇhāsamā nadī.
dhp252:0	Meṇḍakaseṭṭhivatthu
dhp252:1	Sudassaṁ vajjamaññesaṁ,
dhp252:2	attano pana duddasaṁ;
dhp252:3	Paresaṁ hi so vajjāni,
dhp252:4	opunāti yathā bhusaṁ;
dhp252:5	Attano pana chādeti,
dhp252:6	kaliṁva kitavā saṭho.
dhp253:0	Ujjhānasaññittheravatthu
dhp253:1	Paravajjānupassissa,
dhp253:2	niccaṁ ujjhānasaññino;
dhp253:3	Āsavā tassa vaḍḍhanti,
dhp253:4	ārā so āsavakkhayā.
dhp254:0	Subhaddaparibbājakavatthu
dhp254:1	Ākāseva padaṁ natthi,
dhp254:2	samaṇo natthi bāhire;
dhp254:3	Papañcābhiratā pajā,
dhp254:4	nippapañcā tathāgatā.
dhp255:1	Ākāseva padaṁ natthi,
dhp255:2	samaṇo natthi bāhire;
dhp255:3	Saṅkhārā sassatā natthi,
dhp255:4	natthi buddhānamiñjitaṁ.
dhp255:5	Malavaggo aṭṭhārasamo.
dhp256:0.1	Khuddakanikāya
dhp256:0.2	Dhammapada
dhp256:0.3	Dhammaṭṭhavagga
dhp256:0.4	Vinicchayamahāmattavatthu
dhp256:1	Na tena hoti dhammaṭṭho,
dhp256:2	yenatthaṁ sāhasā naye;
dhp256:3	Yo ca atthaṁ anatthañca,
dhp256:4	ubho niccheyya paṇḍito.
dhp257:1	Asāhasena dhammena,
dhp257:2	samena nayatī pare;
dhp257:3	Dhammassa gutto medhāvī,
dhp257:4	“dhammaṭṭho”ti pavuccati.
dhp258:0	Chabbaggiyavatthu
dhp258:1	Na tena paṇḍito hoti,
dhp258:2	yāvatā bahu bhāsati;
dhp258:3	Khemī averī abhayo,
dhp258:4	“paṇḍito”ti pavuccati.
dhp259:0	Ekudānakhīṇāsavavatthu
dhp259:1	Na tāvatā dhammadharo,
dhp259:2	yāvatā bahu bhāsati;
dhp259:3	Yo ca appampi sutvāna,
dhp259:4	dhammaṁ kāyena passati;
dhp259:5	Sa ve dhammadharo hoti,
dhp259:6	yo dhammaṁ nappamajjati.
dhp260:0	Lakuṇḍakabhaddiyattheravatthu
dhp260:1	Na tena thero so hoti,
dhp260:2	yenassa palitaṁ siro;
dhp260:3	Paripakko vayo tassa,
dhp260:4	“moghajiṇṇo”ti vuccati.
dhp261:1	Yamhi saccañca dhammo ca,
dhp261:2	ahiṁsā saṁyamo damo;
dhp261:3	Sa ve vantamalo dhīro,
dhp261:4	“thero” iti pavuccati.
dhp262:0	Sambahulabhikkhuvatthu
dhp262:1	Na vākkaraṇamattena,
dhp262:2	vaṇṇapokkharatāya vā;
dhp262:3	Sādhurūpo naro hoti,
dhp262:4	issukī maccharī saṭho.
dhp263:1	Yassa cetaṁ samucchinnaṁ,
dhp263:2	mūlaghaccaṁ samūhataṁ;
dhp263:3	Sa vantadoso medhāvī,
dhp263:4	“sādhurūpo”ti vuccati.
dhp264:0	Hatthakavatthu
dhp264:1	Na muṇḍakena samaṇo,
dhp264:2	abbato alikaṁ bhaṇaṁ;
dhp264:3	Icchālobhasamāpanno,
dhp264:4	samaṇo kiṁ bhavissati.
dhp265:1	Yo ca sameti pāpāni,
dhp265:2	aṇuṁthūlāni sabbaso;
dhp265:3	Samitattā hi pāpānaṁ,
dhp265:4	“samaṇo”ti pavuccati.
dhp266:0	Aññatarabrāhmaṇavatthu
dhp266:1	Na tena bhikkhu so hoti,
dhp266:2	yāvatā bhikkhate pare;
dhp266:3	Vissaṁ dhammaṁ samādāya,
dhp266:4	bhikkhu hoti na tāvatā.
dhp267:1	Yodha puññañca pāpañca,
dhp267:2	bāhetvā brahmacariyavā;
dhp267:3	Saṅkhāya loke carati,
dhp267:4	sa ve “bhikkhū”ti vuccati.
dhp268:0	Titthiyavatthu
dhp268:1	Na monena munī hoti,
dhp268:2	mūḷharūpo aviddasu;
dhp268:3	Yo ca tulaṁva paggayha,
dhp268:4	varamādāya paṇḍito.
dhp269:1	Pāpāni parivajjeti,
dhp269:2	sa munī tena so muni;
dhp269:3	Yo munāti ubho loke,
dhp269:4	“muni” tena pavuccati.
dhp270:0	Bālisikavatthu
dhp270:1	Na tena ariyo hoti,
dhp270:2	yena pāṇāni hiṁsati;
dhp270:3	Ahiṁsā sabbapāṇānaṁ,
dhp270:4	“ariyo”ti pavuccati.
dhp271:0	Sambahulasīlādisampannabhikkhuvatthu
dhp271:1	Na sīlabbatamattena,
dhp271:2	bāhusaccena vā pana;
dhp271:3	Atha vā samādhilābhena,
dhp271:4	vivittasayanena vā.
dhp272:1	Phusāmi nekkhammasukhaṁ,
dhp272:2	aputhujjanasevitaṁ;
dhp272:3	Bhikkhu vissāsamāpādi,
dhp272:4	appatto āsavakkhayaṁ.
dhp272:5	Dhammaṭṭhavaggo ekūnavīsatimo.
dhp273:0.1	Khuddakanikāya
dhp273:0.2	Dhammapada
dhp273:0.3	Maggavagga
dhp273:0.4	Pañcasatabhikkhuvatthu
dhp273:1	Maggānaṭṭhaṅgiko seṭṭho,
dhp273:2	saccānaṁ caturo padā;
dhp273:3	Virāgo seṭṭho dhammānaṁ,
dhp273:4	dvipadānañca cakkhumā.
dhp274:1	Eseva maggo natthañño,
dhp274:2	Dassanassa visuddhiyā;
dhp274:3	Etañhi tumhe paṭipajjatha,
dhp274:4	Mārassetaṁ pamohanaṁ.
dhp275:1	Etañhi tumhe paṭipannā,
dhp275:2	dukkhassantaṁ karissatha;
dhp275:3	Akkhāto vo mayā maggo,
dhp275:4	aññāya sallakantanaṁ.
dhp276:1	Tumhehi kiccamātappaṁ,
dhp276:2	akkhātāro tathāgatā;
dhp276:3	Paṭipannā pamokkhanti,
dhp276:4	jhāyino mārabandhanā.
dhp277:0	Aniccalakkhaṇavatthu
dhp277:1	“Sabbe saṅkhārā aniccā”ti,
dhp277:2	yadā paññāya passati;
dhp277:3	Atha nibbindati dukkhe,
dhp277:4	esa maggo visuddhiyā.
dhp278:0	Dukkhalakkhaṇavatthu
dhp278:1	“Sabbe saṅkhārā dukkhā”ti,
dhp278:2	yadā paññāya passati;
dhp278:3	Atha nibbindati dukkhe,
dhp278:4	esa maggo visuddhiyā.
dhp279:0	Anattalakkhaṇavatthu
dhp279:1	“Sabbe dhammā anattā”ti,
dhp279:2	yadā paññāya passati;
dhp279:3	Atha nibbindati dukkhe,
dhp279:4	esa maggo visuddhiyā.
dhp280:0	Padhānakammikatissattheravatthu
dhp280:1	Uṭṭhānakālamhi anuṭṭhahāno,
dhp280:2	Yuvā balī ālasiyaṁ upeto;
dhp280:3	Saṁsannasaṅkappamano kusīto,
dhp280:4	Paññāya maggaṁ alaso na vindati.
dhp281:0	Sūkarapetavatthu
dhp281:1	Vācānurakkhī manasā susaṁvuto,
dhp281:2	Kāyena ca nākusalaṁ kayirā;
dhp281:3	Ete tayo kammapathe visodhaye,
dhp281:4	Ārādhaye maggamisippaveditaṁ.
dhp282:0	Poṭṭhilattheravatthu
dhp282:1	Yogā ve jāyatī bhūri,
dhp282:2	ayogā bhūrisaṅkhayo;
dhp282:3	Etaṁ dvedhāpathaṁ ñatvā,
dhp282:4	bhavāya vibhavāya ca;
dhp282:5	Tathāttānaṁ niveseyya,
dhp282:6	yathā bhūri pavaḍḍhati.
dhp283:0	Pañcamahallakabhikkhuvatthu
dhp283:1	Vanaṁ chindatha mā rukkhaṁ,
dhp283:2	vanato jāyate bhayaṁ;
dhp283:3	Chetvā vanañca vanathañca,
dhp283:4	nibbanā hotha bhikkhavo.
dhp284:1	Yāva hi vanatho na chijjati,
dhp284:2	Aṇumattopi narassa nārisu;
dhp284:3	Paṭibaddhamanova tāva so,
dhp284:4	Vaccho khīrapakova mātari.
dhp285:0	Suvaṇṇakārattheravatthu
dhp285:1	Ucchinda sinehamattano,
dhp285:2	Kumudaṁ sāradikaṁva pāṇinā;
dhp285:3	Santimaggameva brūhaya,
dhp285:4	Nibbānaṁ sugatena desitaṁ.
dhp286:0	Mahādhanavāṇijavatthu
dhp286:1	Idha vassaṁ vasissāmi,
dhp286:2	idha hemantagimhisu;
dhp286:3	Iti bālo vicinteti,
dhp286:4	antarāyaṁ na bujjhati.
dhp287:0	Kisāgotamīvatthu
dhp287:1	Taṁ puttapasusammattaṁ,
dhp287:2	byāsattamanasaṁ naraṁ;
dhp287:3	Suttaṁ gāmaṁ mahoghova,
dhp287:4	maccu ādāya gacchati.
dhp288:0	Paṭācārāvatthu
dhp288:1	Na santi puttā tāṇāya,
dhp288:2	na pitā nāpi bandhavā;
dhp288:3	Antakenādhipannassa,
dhp288:4	natthi ñātīsu tāṇatā.
dhp289:1	Etamatthavasaṁ ñatvā,
dhp289:2	paṇḍito sīlasaṁvuto;
dhp289:3	Nibbānagamanaṁ maggaṁ,
dhp289:4	khippameva visodhaye.
dhp289:5	Maggavaggo vīsatimo.
dhp290:0.1	Khuddakanikāya
dhp290:0.2	Dhammapada
dhp290:0.3	Pakiṇṇakavagga
dhp290:0.4	Attanopubbakammavatthu
dhp290:1	Mattāsukhapariccāgā,
dhp290:2	passe ce vipulaṁ sukhaṁ;
dhp290:3	Caje mattāsukhaṁ dhīro,
dhp290:4	sampassaṁ vipulaṁ sukhaṁ.
dhp291:0	Kukkuṭaṇḍakhādikāvatthu
dhp291:1	Paradukkhūpadhānena,
dhp291:2	attano sukhamicchati;
dhp291:3	Verasaṁsaggasaṁsaṭṭho,
dhp291:4	verā so na parimuccati.
dhp292:0	Bhaddiyānaṁbhikkhūnaṁvatthu
dhp292:1	Yañhi kiccaṁ apaviddhaṁ,
dhp292:2	akiccaṁ pana karīyati;
dhp292:3	Unnaḷānaṁ pamattānaṁ,
dhp292:4	tesaṁ vaḍḍhanti āsavā.
dhp293:1	Yesañca susamāraddhā,
dhp293:2	niccaṁ kāyagatā sati;
dhp293:3	Akiccaṁ te na sevanti,
dhp293:4	kicce sātaccakārino;
dhp293:5	Satānaṁ sampajānānaṁ,
dhp293:6	atthaṁ gacchanti āsavā.
dhp294:0	Lakuṇḍakabhaddiyavatthu
dhp294:1	Mātaraṁ pitaraṁ hantvā,
dhp294:2	rājāno dve ca khattiye;
dhp294:3	Raṭṭhaṁ sānucaraṁ hantvā,
dhp294:4	anīgho yāti brāhmaṇo.
dhp295:1	Mātaraṁ pitaraṁ hantvā,
dhp295:2	rājāno dve ca sotthiye;
dhp295:3	Veyagghapañcamaṁ hantvā,
dhp295:4	anīgho yāti brāhmaṇo.
dhp296:0	Dārusākaṭikaputtavatthu
dhp296:1	Suppabuddhaṁ pabujjhanti,
dhp296:2	sadā gotamasāvakā;
dhp296:3	Yesaṁ divā ca ratto ca,
dhp296:4	niccaṁ buddhagatā sati.
dhp297:1	Suppabuddhaṁ pabujjhanti,
dhp297:2	sadā gotamasāvakā;
dhp297:3	Yesaṁ divā ca ratto ca,
dhp297:4	niccaṁ dhammagatā sati.
dhp298:1	Suppabuddhaṁ pabujjhanti,
dhp298:2	sadā gotamasāvakā;
dhp298:3	Yesaṁ divā ca ratto ca,
dhp298:4	niccaṁ saṅghagatā sati.
dhp299:1	Suppabuddhaṁ pabujjhanti,
dhp299:2	sadā gotamasāvakā;
dhp299:3	Yesaṁ divā ca ratto ca,
dhp299:4	niccaṁ kāyagatā sati.
dhp300:1	Suppabuddhaṁ pabujjhanti,
dhp300:2	sadā gotamasāvakā;
dhp300:3	Yesaṁ divā ca ratto ca,
dhp300:4	ahiṁsāya rato mano.
dhp301:1	Suppabuddhaṁ pabujjhanti,
dhp301:2	sadā gotamasāvakā;
dhp301:3	Yesaṁ divā ca ratto ca,
dhp301:4	bhāvanāya rato mano.
dhp302:0	Vajjiputtakabhikkhuvatthu
dhp302:1	Duppabbajjaṁ durabhiramaṁ,
dhp302:2	Durāvāsā gharā dukhā;
dhp302:3	Dukkhosamānasaṁvāso,
dhp302:4	Dukkhānupatitaddhagū;
dhp302:5	Tasmā na caddhagū siyā,
dhp302:6	Na ca dukkhānupatito siyā.
dhp303:0	Cittagahapativatthu
dhp303:1	Saddho sīlena sampanno,
dhp303:2	yasobhogasamappito;
dhp303:3	Yaṁ yaṁ padesaṁ bhajati,
dhp303:4	tattha tattheva pūjito.
dhp304:0	Cūḷasubhaddāvatthu
dhp304:1	Dūre santo pakāsenti,
dhp304:2	himavantova pabbato;
dhp304:3	Asantettha na dissanti,
dhp304:4	rattiṁ khittā yathā sarā.
dhp305:0	Ekavihārittheravatthu
dhp305:1	Ekāsanaṁ ekaseyyaṁ,
dhp305:2	eko caramatandito;
dhp305:3	Eko damayamattānaṁ,
dhp305:4	vanante ramito siyā.
dhp305:5	Pakiṇṇakavaggo ekavīsatimo.
dhp306:0.1	Khuddakanikāya
dhp306:0.2	Dhammapada
dhp306:0.3	Nirayavagga
dhp306:0.4	Sundarīparibbājikāvatthu
dhp306:1	Abhūtavādī nirayaṁ upeti,
dhp306:2	Yo vāpi katvā na karomi cāha;
dhp306:3	Ubhopi te pecca samā bhavanti,
dhp306:4	Nihīnakammā manujā parattha.
dhp307:0	Duccaritaphalapīḷitavatthu
dhp307:1	Kāsāvakaṇṭhā bahavo,
dhp307:2	pāpadhammā asaññatā;
dhp307:3	Pāpā pāpehi kammehi,
dhp307:4	nirayaṁ te upapajjare.
dhp308:0	Vaggumudātīriyabhikkhuvatthu
dhp308:1	Seyyo ayoguḷo bhutto,
dhp308:2	tatto aggisikhūpamo;
dhp308:3	Yañce bhuñjeyya dussīlo,
dhp308:4	raṭṭhapiṇḍamasaññato.
dhp309:0	Khemakaseṭṭhiputtavatthu
dhp309:1	Cattāri ṭhānāni naro pamatto,
dhp309:2	Āpajjati paradārūpasevī;
dhp309:3	Apuññalābhaṁ na nikāmaseyyaṁ,
dhp309:4	Nindaṁ tatīyaṁ nirayaṁ catutthaṁ.
dhp310:1	Apuññalābho ca gatī ca pāpikā,
dhp310:2	Bhītassa bhītāya ratī ca thokikā;
dhp310:3	Rājā ca daṇḍaṁ garukaṁ paṇeti,
dhp310:4	Tasmā naro paradāraṁ na seve.
dhp311:0	Dubbacabhikkhuvatthu
dhp311:1	Kuso yathā duggahito,
dhp311:2	hatthamevānukantati;
dhp311:3	Sāmaññaṁ dupparāmaṭṭhaṁ,
dhp311:4	nirayāyupakaḍḍhati.
dhp312:1	Yaṁ kiñci sithilaṁ kammaṁ,
dhp312:2	saṅkiliṭṭhañca yaṁ vataṁ;
dhp312:3	Saṅkassaraṁ brahmacariyaṁ,
dhp312:4	na taṁ hoti mahapphalaṁ.
dhp313:1	Kayirā ce kayirāthenaṁ,
dhp313:2	daḷhamenaṁ parakkame;
dhp313:3	Sithilo hi paribbājo,
dhp313:4	bhiyyo ākirate rajaṁ.
dhp314:0	Issāpakataitthivatthu
dhp314:1	Akataṁ dukkaṭaṁ seyyo,
dhp314:2	pacchā tappati dukkaṭaṁ;
dhp314:3	Katañca sukataṁ seyyo,
dhp314:4	yaṁ katvā nānutappati.
dhp315:0	Sambahulabhikkhuvatthu
dhp315:1	Nagaraṁ yathā paccantaṁ,
dhp315:2	guttaṁ santarabāhiraṁ;
dhp315:3	Evaṁ gopetha attānaṁ,
dhp315:4	khaṇo vo mā upaccagā;
dhp315:5	Khaṇātītā hi socanti,
dhp315:6	nirayamhi samappitā.
dhp316:0	Nigaṇṭhavatthu
dhp316:1	Alajjitāye lajjanti,
dhp316:2	lajjitāye na lajjare;
dhp316:3	Micchādiṭṭhisamādānā,
dhp316:4	sattā gacchanti duggatiṁ.
dhp317:1	Abhaye bhayadassino,
dhp317:2	bhaye cābhayadassino;
dhp317:3	Micchādiṭṭhisamādānā,
dhp317:4	sattā gacchanti duggatiṁ.
dhp318:0	Titthiyasāvakavatthu
dhp318:1	Avajje vajjamatino,
dhp318:2	vajje cāvajjadassino;
dhp318:3	Micchādiṭṭhisamādānā,
dhp318:4	sattā gacchanti duggatiṁ.
dhp319:1	Vajjañca vajjato ñatvā,
dhp319:2	avajjañca avajjato;
dhp319:3	Sammādiṭṭhisamādānā,
dhp319:4	sattā gacchanti suggatiṁ.
dhp319:5	Nirayavaggo dvāvīsatimo.
dhp320:0.1	Khuddakanikāya
dhp320:0.2	Dhammapada
dhp320:0.3	Nāgavagga
dhp320:0.4	Attadantavatthu
dhp320:1	Ahaṁ nāgova saṅgāme,
dhp320:2	cāpato patitaṁ saraṁ;
dhp320:3	Ativākyaṁ titikkhissaṁ,
dhp320:4	dussīlo hi bahujjano.
dhp321:1	Dantaṁ nayanti samitiṁ,
dhp321:2	dantaṁ rājābhirūhati;
dhp321:3	Danto seṭṭho manussesu,
dhp321:4	yotivākyaṁ titikkhati.
dhp322:1	Varamassatarā dantā,
dhp322:2	ājānīyā ca sindhavā;
dhp322:3	Kuñjarā ca mahānāgā,
dhp322:4	attadanto tato varaṁ.
dhp323:0	Hatthācariyapubbakabhikkhuvatthu
dhp323:1	Na hi etehi yānehi,
dhp323:2	gaccheyya agataṁ disaṁ;
dhp323:3	Yathāttanā sudantena,
dhp323:4	danto dantena gacchati.
dhp324:0	Parijiṇṇabrāhmaṇaputtavatthu
dhp324:1	Dhanapālo nāma kuñjaro,
dhp324:2	Kaṭukabhedano dunnivārayo;
dhp324:3	Baddho kabaḷaṁ na bhuñjati,
dhp324:4	Sumarati nāgavanassa kuñjaro.
dhp325:0	Pasenadikosalavatthu
dhp325:1	Middhī yadā hoti mahagghaso ca,
dhp325:2	Niddāyitā samparivattasāyī;
dhp325:3	Mahāvarāhova nivāpapuṭṭho,
dhp325:4	Punappunaṁ gabbhamupeti mando.
dhp326:0	Sānusāmaṇeravatthu
dhp326:1	Idaṁ pure cittamacāri cārikaṁ,
dhp326:2	Yenicchakaṁ yatthakāmaṁ yathāsukhaṁ;
dhp326:3	Tadajjahaṁ niggahessāmi yoniso,
dhp326:4	Hatthippabhinnaṁ viya aṅkusaggaho.
dhp327:0	Pāveyyakahatthivatthu
dhp327:1	Appamādaratā hotha,
dhp327:2	sacittamanurakkhatha;
dhp327:3	Duggā uddharathattānaṁ,
dhp327:4	paṅke sannova kuñjaro.
dhp328:0	Sambahulabhikkhuvatthu
dhp328:1	Sace labhetha nipakaṁ sahāyaṁ,
dhp328:2	Saddhiṁ caraṁ sādhuvihāridhīraṁ;
dhp328:3	Abhibhuyya sabbāni parissayāni,
dhp328:4	Careyya tenattamano satīmā.
dhp329:1	No ce labhetha nipakaṁ sahāyaṁ,
dhp329:2	Saddhiṁ caraṁ sādhuvihāridhīraṁ;
dhp329:3	Rājāva raṭṭhaṁ vijitaṁ pahāya,
dhp329:4	Eko care mātaṅgaraññeva nāgo.
dhp330:1	Ekassa caritaṁ seyyo,
dhp330:2	Natthi bāle sahāyatā;
dhp330:3	Eko care na ca pāpāni kayirā,
dhp330:4	Appossukko mātaṅgaraññeva nāgo.
dhp331:0	Māravatthu
dhp331:1	Atthamhi jātamhi sukhā sahāyā,
dhp331:2	Tuṭṭhī sukhā yā itarītarena;
dhp331:3	Puññaṁ sukhaṁ jīvitasaṅkhayamhi,
dhp331:4	Sabbassa dukkhassa sukhaṁ pahānaṁ.
dhp332:1	Sukhā matteyyatā loke,
dhp332:2	atho petteyyatā sukhā;
dhp332:3	Sukhā sāmaññatā loke,
dhp332:4	atho brahmaññatā sukhā.
dhp333:1	Sukhaṁ yāva jarā sīlaṁ,
dhp333:2	sukhā saddhā patiṭṭhitā;
dhp333:3	Sukho paññāya paṭilābho,
dhp333:4	pāpānaṁ akaraṇaṁ sukhaṁ.
dhp333:5	Nāgavaggo tevīsatimo.
dhp334:0.1	Khuddakanikāya
dhp334:0.2	Dhammapada
dhp334:0.3	Taṇhāvagga
dhp334:0.4	Kapilamacchavatthu
dhp334:1	Manujassa pamattacārino,
dhp334:2	Taṇhā vaḍḍhati māluvā viya;
dhp334:3	So plavatī hurā huraṁ,
dhp334:4	Phalamicchaṁva vanasmi vānaro.
dhp335:1	Yaṁ esā sahate jammī,
dhp335:2	taṇhā loke visattikā;
dhp335:3	Sokā tassa pavaḍḍhanti,
dhp335:4	abhivaṭṭhaṁva bīraṇaṁ.
dhp336:1	Yo cetaṁ sahate jammiṁ,
dhp336:2	taṇhaṁ loke duraccayaṁ;
dhp336:3	Sokā tamhā papatanti,
dhp336:4	udabinduva pokkharā.
dhp337:1	Taṁ vo vadāmi bhaddaṁ vo,
dhp337:2	yāvantettha samāgatā;
dhp337:3	Taṇhāya mūlaṁ khaṇatha,
dhp337:4	usīratthova bīraṇaṁ;
dhp337:5	Mā vo naḷaṁva sotova,
dhp337:6	māro bhañji punappunaṁ.
dhp338:0	Sūkarapotikāvatthu
dhp338:1	Yathāpi mūle anupaddave daḷhe,
dhp338:2	Chinnopi rukkho punareva rūhati;
dhp338:3	Evampi taṇhānusaye anūhate,
dhp338:4	Nibbattatī dukkhamidaṁ punappunaṁ.
dhp339:1	Yassa chattiṁsati sotā,
dhp339:2	manāpasavanā bhusā;
dhp339:3	Mahāvahanti duddiṭṭhiṁ,
dhp339:4	saṅkappā rāganissitā.
dhp340:1	Savanti sabbadhi sotā,
dhp340:2	latā uppajja tiṭṭhati;
dhp340:3	Tañca disvā lataṁ jātaṁ,
dhp340:4	mūlaṁ paññāya chindatha.
dhp341:1	Saritāni sinehitāni ca,
dhp341:2	Somanassāni bhavanti jantuno;
dhp341:3	Te sātasitā sukhesino,
dhp341:4	Te ve jātijarūpagā narā.
dhp342:1	Tasiṇāya purakkhatā pajā,
dhp342:2	Parisappanti sasova bandhito;
dhp342:3	Saṁyojanasaṅgasattakā,
dhp342:4	Dukkhamupenti punappunaṁ cirāya.
dhp343:1	Tasiṇāya purakkhatā pajā,
dhp343:2	Parisappanti sasova bandhito;
dhp343:3	Tasmā tasiṇaṁ vinodaye,
dhp343:4	Ākaṅkhanta virāgamattano.
dhp344:0	Vibbhantabhikkhuvatthu
dhp344:1	Yo nibbanatho vanādhimutto,
dhp344:2	Vanamutto vanameva dhāvati;
dhp344:3	Taṁ puggalametha passatha,
dhp344:4	Mutto bandhanameva dhāvati.
dhp345:0	Bandhanāgāravatthu
dhp345:1	Na taṁ daḷhaṁ bandhanamāhu dhīrā,
dhp345:2	Yadāyasaṁ dārujapabbajañca;
dhp345:3	Sārattarattā maṇikuṇḍalesu,
dhp345:4	Puttesu dāresu ca yā apekkhā.
dhp346:1	Etaṁ daḷhaṁ bandhanamāhu dhīrā,
dhp346:2	Ohārinaṁ sithilaṁ duppamuñcaṁ;
dhp346:3	Etampi chetvāna paribbajanti,
dhp346:4	Anapekkhino kāmasukhaṁ pahāya.
dhp347:0	Khemātherīvatthu
dhp347:1	Ye rāgarattānupatanti sotaṁ,
dhp347:2	Sayaṅkataṁ makkaṭakova jālaṁ;
dhp347:3	Etampi chetvāna vajanti dhīrā,
dhp347:4	Anapekkhino sabbadukkhaṁ pahāya.
dhp348:0	Uggasenavatthu
dhp348:1	Muñca pure muñca pacchato,
dhp348:2	Majjhe muñca bhavassa pāragū;
dhp348:3	Sabbattha vimuttamānaso,
dhp348:4	Na punaṁ jātijaraṁ upehisi.
dhp349:0	Cūḷadhanuggahapaṇḍitavatthu
dhp349:1	Vitakkamathitassa jantuno,
dhp349:2	Tibbarāgassa subhānupassino;
dhp349:3	Bhiyyo taṇhā pavaḍḍhati,
dhp349:4	Esa kho daḷhaṁ karoti bandhanaṁ.
dhp350:1	Vitakkūpasame ca yo rato,
dhp350:2	Asubhaṁ bhāvayate sadā sato;
dhp350:3	Esa kho byanti kāhiti,
dhp350:4	Esa checchati mārabandhanaṁ.
dhp351:0	Māravatthu
dhp351:1	Niṭṭhaṅgato asantāsī,
dhp351:2	vītataṇho anaṅgaṇo;
dhp351:3	Acchindi bhavasallāni,
dhp351:4	antimoyaṁ samussayo.
dhp352:1	Vītataṇho anādāno,
dhp352:2	Niruttipadakovido;
dhp352:3	Akkharānaṁ sannipātaṁ,
dhp352:4	Jaññā pubbāparāni ca;
dhp352:5	Sa ve “antimasārīro,
dhp352:6	Mahāpañño mahāpuriso”ti vuccati.
dhp353:0	Upakājīvakavatthu
dhp353:1	Sabbābhibhū sabbavidūhamasmi,
dhp353:2	Sabbesu dhammesu anūpalitto;
dhp353:3	Sabbañjaho taṇhakkhaye vimutto,
dhp353:4	Sayaṁ abhiññāya kamuddiseyyaṁ.
dhp354:0	Sakkapañhavatthu
dhp354:1	Sabbadānaṁ dhammadānaṁ jināti,
dhp354:2	Sabbarasaṁ dhammaraso jināti;
dhp354:3	Sabbaratiṁ dhammarati jināti,
dhp354:4	Taṇhakkhayo sabbadukkhaṁ jināti.
dhp355:0	Aputtakaseṭṭhivatthu
dhp355:1	Hananti bhogā dummedhaṁ,
dhp355:2	no ca pāragavesino;
dhp355:3	Bhogataṇhāya dummedho,
dhp355:4	hanti aññeva attanaṁ.
dhp356:0	Aṅkuravatthu
dhp356:1	Tiṇadosāni khettāni,
dhp356:2	rāgadosā ayaṁ pajā;
dhp356:3	Tasmā hi vītarāgesu,
dhp356:4	dinnaṁ hoti mahapphalaṁ.
dhp357:1	Tiṇadosāni khettāni,
dhp357:2	dosadosā ayaṁ pajā;
dhp357:3	Tasmā hi vītadosesu,
dhp357:4	dinnaṁ hoti mahapphalaṁ.
dhp358:1	Tiṇadosāni khettāni,
dhp358:2	mohadosā ayaṁ pajā;
dhp358:3	Tasmā hi vītamohesu,
dhp358:4	dinnaṁ hoti mahapphalaṁ.
dhp359:1	Tiṇadosāni khettāni,
dhp359:2	icchādosā ayaṁ pajā;
dhp359:3	Tasmā hi vigaticchesu,
dhp359:4	dinnaṁ hoti mahapphalaṁ.
dhp359:5	Taṇhāvaggo catuvīsatimo.
dhp360:0.1	Khuddakanikāya
dhp360:0.2	Dhammapada
dhp360:0.3	Bhikkhuvagga
dhp360:0.4	Pañcabhikkhuvatthu
dhp360:1	Cakkhunā saṁvaro sādhu,
dhp360:2	sādhu sotena saṁvaro;
dhp360:3	Ghānena saṁvaro sādhu,
dhp360:4	sādhu jivhāya saṁvaro.
dhp361:1	Kāyena saṁvaro sādhu,
dhp361:2	sādhu vācāya saṁvaro;
dhp361:3	Manasā saṁvaro sādhu,
dhp361:4	sādhu sabbattha saṁvaro;
dhp361:5	Sabbattha saṁvuto bhikkhu,
dhp361:6	sabbadukkhā pamuccati.
dhp362:0	Haṁsaghātakabhikkhuvatthu
dhp362:1	Hatthasaṁyato pādasaṁyato,
dhp362:2	Vācāsaṁyato saṁyatuttamo;
dhp362:3	Ajjhattarato samāhito,
dhp362:4	Eko santusito tamāhu bhikkhuṁ.
dhp363:0	Kokālikavatthu
dhp363:1	Yo mukhasaṁyato bhikkhu,
dhp363:2	mantabhāṇī anuddhato;
dhp363:3	Atthaṁ dhammañca dīpeti,
dhp363:4	madhuraṁ tassa bhāsitaṁ.
dhp364:0	Dhammārāmattheravatthu
dhp364:1	Dhammārāmo dhammarato,
dhp364:2	dhammaṁ anuvicintayaṁ;
dhp364:3	Dhammaṁ anussaraṁ bhikkhu,
dhp364:4	saddhammā na parihāyati.
dhp365:0	Vipakkhasevakabhikkhuvatthu
dhp365:1	Salābhaṁ nātimaññeyya,
dhp365:2	nāññesaṁ pihayaṁ care;
dhp365:3	Aññesaṁ pihayaṁ bhikkhu,
dhp365:4	samādhiṁ nādhigacchati.
dhp366:1	Appalābhopi ce bhikkhu,
dhp366:2	salābhaṁ nātimaññati;
dhp366:3	Taṁ ve devā pasaṁsanti,
dhp366:4	suddhājīviṁ atanditaṁ.
dhp367:0	Pañcaggadāyakabrāhmaṇavatthu
dhp367:1	Sabbaso nāmarūpasmiṁ,
dhp367:2	yassa natthi mamāyitaṁ;
dhp367:3	Asatā ca na socati,
dhp367:4	sa ve “bhikkhū”ti vuccati.
dhp368:0	Sambahulabhikkhuvatthu
dhp368:1	Mettāvihārī yo bhikkhu,
dhp368:2	pasanno buddhasāsane;
dhp368:3	Adhigacche padaṁ santaṁ,
dhp368:4	saṅkhārūpasamaṁ sukhaṁ.
dhp369:1	Siñca bhikkhu imaṁ nāvaṁ,
dhp369:2	sittā te lahumessati;
dhp369:3	Chetvā rāgañca dosañca,
dhp369:4	tato nibbānamehisi.
dhp370:1	Pañca chinde pañca jahe,
dhp370:2	pañca cuttari bhāvaye;
dhp370:3	Pañca saṅgātigo bhikkhu,
dhp370:4	“oghatiṇṇo”ti vuccati.
dhp371:1	Jhāya bhikkhu mā pamādo,
dhp371:2	Mā te kāmaguṇe ramessu cittaṁ;
dhp371:3	Mā lohaguḷaṁ gilī pamatto,
dhp371:4	Mā kandi “dukkhamidan”ti dayhamāno.
dhp372:1	Natthi jhānaṁ apaññassa,
dhp372:2	paññā natthi ajhāyato;
dhp372:3	Yamhi jhānañca paññā ca,
dhp372:4	sa ve nibbānasantike.
dhp373:1	Suññāgāraṁ paviṭṭhassa,
dhp373:2	santacittassa bhikkhuno;
dhp373:3	Amānusī rati hoti,
dhp373:4	sammā dhammaṁ vipassato.
dhp374:1	Yato yato sammasati,
dhp374:2	khandhānaṁ udayabbayaṁ;
dhp374:3	Labhatī pītipāmojjaṁ,
dhp374:4	amataṁ taṁ vijānataṁ.
dhp375:1	Tatrāyamādi bhavati,
dhp375:2	idha paññassa bhikkhuno;
dhp375:3	Indriyagutti santuṭṭhi,
dhp375:4	pātimokkhe ca saṁvaro.
dhp376:1	Mitte bhajassu kalyāṇe,
dhp376:2	suddhājīve atandite;
dhp376:3	Paṭisanthāravutyassa,
dhp376:4	ācārakusalo siyā;
dhp376:5	Tato pāmojjabahulo,
dhp376:6	dukkhassantaṁ karissati.
dhp377:0	Pañcasatabhikkhuvatthu
dhp377:1	Vassikā viya pupphāni,
dhp377:2	maddavāni pamuñcati;
dhp377:3	Evaṁ rāgañca dosañca,
dhp377:4	vippamuñcetha bhikkhavo.
dhp378:0	Santakāyattheravatthu
dhp378:1	Santakāyo santavāco,
dhp378:2	santavā susamāhito;
dhp378:3	Vantalokāmiso bhikkhu,
dhp378:4	“upasanto”ti vuccati.
dhp379:0	Naṅgalakulattheravatthu
dhp379:1	Attanā codayattānaṁ,
dhp379:2	paṭimaṁsetha attanā;
dhp379:3	So attagutto satimā,
dhp379:4	sukhaṁ bhikkhu vihāhisi.
dhp380:1	Attā hi attano nātho,
dhp380:2	ko hi nātho paro siyā;
dhp380:3	Attā hi attano gati,
dhp380:4	tasmā saṁyamamattānaṁ;
dhp380:5	Assaṁ bhadraṁva vāṇijo.
dhp381:0	Vakkalittheravatthu
dhp381:1	Pāmojjabahulo bhikkhu,
dhp381:2	pasanno buddhasāsane;
dhp381:3	Adhigacche padaṁ santaṁ,
dhp381:4	saṅkhārūpasamaṁ sukhaṁ.
dhp382:0	Sumanasāmaṇeravatthu
dhp382:1	Yo have daharo bhikkhu,
dhp382:2	yuñjati buddhasāsane;
dhp382:3	Somaṁ lokaṁ pabhāseti,
dhp382:4	abbhā muttova candimā.
dhp382:5	Bhikkhuvaggo pañcavīsatimo.
dhp383:0.1	Khuddakanikāya
dhp383:0.2	Dhammapada
dhp383:0.3	Brāhmaṇavagga
dhp383:0.4	Pasādabahulabrāhmaṇavatthu
dhp383:1	Chinda sotaṁ parakkamma,
dhp383:2	kāme panuda brāhmaṇa;
dhp383:3	Saṅkhārānaṁ khayaṁ ñatvā,
dhp383:4	akataññūsi brāhmaṇa.
dhp384:0	Sambahulabhikkhuvatthu
dhp384:1	Yadā dvayesu dhammesu,
dhp384:2	pāragū hoti brāhmaṇo;
dhp384:3	Athassa sabbe saṁyogā,
dhp384:4	atthaṁ gacchanti jānato.
dhp385:0	Māravatthu
dhp385:1	Yassa pāraṁ apāraṁ vā,
dhp385:2	pārāpāraṁ na vijjati;
dhp385:3	Vītaddaraṁ visaṁyuttaṁ,
dhp385:4	tamahaṁ brūmi brāhmaṇaṁ.
dhp386:0	Aññatarabrāhmaṇavatthu
dhp386:1	Jhāyiṁ virajamāsīnaṁ,
dhp386:2	katakiccamanāsavaṁ;
dhp386:3	Uttamatthamanuppattaṁ,
dhp386:4	tamahaṁ brūmi brāhmaṇaṁ.
dhp387:0	Ānandattheravatthu
dhp387:1	Divā tapati ādicco,
dhp387:2	rattimābhāti candimā;
dhp387:3	Sannaddho khattiyo tapati,
dhp387:4	jhāyī tapati brāhmaṇo;
dhp387:5	Atha sabbamahorattiṁ,
dhp387:6	buddho tapati tejasā.
dhp388:0	Aññatarabrāhmaṇapabbajitavatthu
dhp388:1	Bāhitapāpoti brāhmaṇo,
dhp388:2	Samacariyā samaṇoti vuccati;
dhp388:3	Pabbājayamattano malaṁ,
dhp388:4	Tasmā “pabbajito”ti vuccati.
dhp389:0	Sāriputtattheravatthu
dhp389:1	Na brāhmaṇassa pahareyya,
dhp389:2	nāssa muñcetha brāhmaṇo;
dhp389:3	Dhī brāhmaṇassa hantāraṁ,
dhp389:4	tato dhī yassa muñcati.
dhp390:1	Na brāhmaṇassetadakiñci seyyo,
dhp390:2	Yadā nisedho manaso piyehi;
dhp390:3	Yato yato hiṁsamano nivattati,
dhp390:4	Tato tato sammatimeva dukkhaṁ.
dhp391:0	Mahāpajāpatigotamīvatthu
dhp391:1	Yassa kāyena vācāya,
dhp391:2	manasā natthi dukkaṭaṁ;
dhp391:3	Saṁvutaṁ tīhi ṭhānehi,
dhp391:4	tamahaṁ brūmi brāhmaṇaṁ.
dhp392:0	Sāriputtattheravatthu
dhp392:1	Yamhā dhammaṁ vijāneyya,
dhp392:2	sammāsambuddhadesitaṁ;
dhp392:3	Sakkaccaṁ taṁ namasseyya,
dhp392:4	aggihuttaṁva brāhmaṇo.
dhp393:0	Jaṭilabrāhmaṇavatthu
dhp393:1	Na jaṭāhi na gottena,
dhp393:2	na jaccā hoti brāhmaṇo;
dhp393:3	Yamhi saccañca dhammo ca,
dhp393:4	so sucī so ca brāhmaṇo.
dhp394:0	Kuhakabrāhmaṇavatthu
dhp394:1	Kiṁ te jaṭāhi dummedha,
dhp394:2	kiṁ te ajinasāṭiyā;
dhp394:3	Abbhantaraṁ te gahanaṁ,
dhp394:4	bāhiraṁ parimajjasi.
dhp395:0	Kisāgotamīvatthu
dhp395:1	Paṁsukūladharaṁ jantuṁ,
dhp395:2	kisaṁ dhamanisanthataṁ;
dhp395:3	Ekaṁ vanasmiṁ jhāyantaṁ,
dhp395:4	tamahaṁ brūmi brāhmaṇaṁ.
dhp396:0	Ekabrāhmaṇavatthu
dhp396:1	Na cāhaṁ brāhmaṇaṁ brūmi,
dhp396:2	yonijaṁ mattisambhavaṁ;
dhp396:3	Bhovādi nāma so hoti,
dhp396:4	sace hoti sakiñcano;
dhp396:5	Akiñcanaṁ anādānaṁ,
dhp396:6	tamahaṁ brūmi brāhmaṇaṁ.
dhp397:0	Uggasenaseṭṭhiputtavatthu
dhp397:1	Sabbasaṁyojanaṁ chetvā,
dhp397:2	yo ve na paritassati;
dhp397:3	Saṅgātigaṁ visaṁyuttaṁ,
dhp397:4	tamahaṁ brūmi brāhmaṇaṁ.
dhp398:0	Dvebrāhmaṇavatthu
dhp398:1	Chetvā naddhiṁ varattañca,
dhp398:2	sandānaṁ sahanukkamaṁ;
dhp398:3	Ukkhittapalighaṁ buddhaṁ,
dhp398:4	tamahaṁ brūmi brāhmaṇaṁ.
dhp399:0	Akkosakabhāradvājavatthu
dhp399:1	Akkosaṁ vadhabandhañca,
dhp399:2	aduṭṭho yo titikkhati;
dhp399:3	Khantībalaṁ balānīkaṁ,
dhp399:4	tamahaṁ brūmi brāhmaṇaṁ.
dhp400:0	Sāriputtattheravatthu
dhp400:1	Akkodhanaṁ vatavantaṁ,
dhp400:2	sīlavantaṁ anussadaṁ;
dhp400:3	Dantaṁ antimasārīraṁ,
dhp400:4	tamahaṁ brūmi brāhmaṇaṁ.
dhp401:0	Uppalavaṇṇāttherīvatthu
dhp401:1	Vāri pokkharapatteva,
dhp401:2	āraggeriva sāsapo;
dhp401:3	Yo na limpati kāmesu,
dhp401:4	tamahaṁ brūmi brāhmaṇaṁ.
dhp402:0	Aññatarabrāhmaṇavatthu
dhp402:1	Yo dukkhassa pajānāti,
dhp402:2	idheva khayamattano;
dhp402:3	Pannabhāraṁ visaṁyuttaṁ,
dhp402:4	tamahaṁ brūmi brāhmaṇaṁ.
dhp403:0	Khemābhikkhunīvatthu
dhp403:1	Gambhīrapaññaṁ medhāviṁ,
dhp403:2	maggāmaggassa kovidaṁ;
dhp403:3	Uttamatthamanuppattaṁ,
dhp403:4	tamahaṁ brūmi brāhmaṇaṁ.
dhp404:0	Pabbhāravāsitissattheravatthu
dhp404:1	Asaṁsaṭṭhaṁ gahaṭṭhehi,
dhp404:2	anāgārehi cūbhayaṁ;
dhp404:3	Anokasārimappicchaṁ,
dhp404:4	tamahaṁ brūmi brāhmaṇaṁ.
dhp405:0	Aññatarabhikkhuvatthu
dhp405:1	Nidhāya daṇḍaṁ bhūtesu,
dhp405:2	tasesu thāvaresu ca;
dhp405:3	Yo na hanti na ghāteti,
dhp405:4	tamahaṁ brūmi brāhmaṇaṁ.
dhp406:0	Sāmaṇerānaṁvatthu
dhp406:1	Aviruddhaṁ viruddhesu,
dhp406:2	attadaṇḍesu nibbutaṁ;
dhp406:3	Sādānesu anādānaṁ,
dhp406:4	tamahaṁ brūmi brāhmaṇaṁ.
dhp407:0	Mahāpanthakattheravatthu
dhp407:1	Yassa rāgo ca doso ca,
dhp407:2	māno makkho ca pātito;
dhp407:3	Sāsaporiva āraggā,
dhp407:4	tamahaṁ brūmi brāhmaṇaṁ.
dhp408:0	Pilindavacchattheravatthu
dhp408:1	Akakkasaṁ viññāpaniṁ,
dhp408:2	giraṁ saccamudīraye;
dhp408:3	Yāya nābhisaje kañci,
dhp408:4	tamahaṁ brūmi brāhmaṇaṁ.
dhp409:0	Aññatarattheravatthu
dhp409:1	Yodha dīghaṁ va rassaṁ vā,
dhp409:2	aṇuṁ thūlaṁ subhāsubhaṁ;
dhp409:3	Loke adinnaṁ nādiyati,
dhp409:4	tamahaṁ brūmi brāhmaṇaṁ.
dhp410:0	Sāriputtattheravatthu
dhp410:1	Āsā yassa na vijjanti,
dhp410:2	asmiṁ loke paramhi ca;
dhp410:3	Nirāsāsaṁ visaṁyuttaṁ,
dhp410:4	tamahaṁ brūmi brāhmaṇaṁ.
dhp411:0	Mahāmoggallānattheravatthu
dhp411:1	Yassālayā na vijjanti,
dhp411:2	aññāya akathaṅkathī;
dhp411:3	Amatogadhamanuppattaṁ,
dhp411:4	tamahaṁ brūmi brāhmaṇaṁ.
dhp412:0	Revatattheravatthu
dhp412:1	Yodha puññañca pāpañca,
dhp412:2	ubho saṅgamupaccagā;
dhp412:3	Asokaṁ virajaṁ suddhaṁ,
dhp412:4	tamahaṁ brūmi brāhmaṇaṁ.
dhp413:0	Candābhattheravatthu
dhp413:1	Candaṁva vimalaṁ suddhaṁ,
dhp413:2	vippasannamanāvilaṁ;
dhp413:3	Nandībhavaparikkhīṇaṁ,
dhp413:4	tamahaṁ brūmi brāhmaṇaṁ.
dhp414:0	Sīvalittheravatthu
dhp414:1	Yomaṁ palipathaṁ duggaṁ,
dhp414:2	saṁsāraṁ mohamaccagā;
dhp414:3	Tiṇṇo pāraṅgato jhāyī,
dhp414:4	anejo akathaṅkathī;
dhp414:5	Anupādāya nibbuto,
dhp414:6	tamahaṁ brūmi brāhmaṇaṁ.
dhp415:0	Sundarasamuddattheravatthu
dhp415:1	Yodha kāme pahantvāna,
dhp415:2	anāgāro paribbaje;
dhp415:3	Kāmabhavaparikkhīṇaṁ,
dhp415:4	tamahaṁ brūmi brāhmaṇaṁ.
dhp416:0	Jaṭilattheravatthu
dhp416:1	Yodha taṇhaṁ pahantvāna,
dhp416:2	anāgāro paribbaje;
dhp416:3	Taṇhābhavaparikkhīṇaṁ,
dhp416:4	tamahaṁ brūmi brāhmaṇaṁ.
dhp416:5.0	Jotikattheravatthu
dhp416:5.1	Yodha taṇhaṁ pahantvāna,
dhp416:6	anāgāro paribbaje;
dhp416:7	Taṇhābhavaparikkhīṇaṁ,
dhp416:8	tamahaṁ brūmi brāhmaṇaṁ.
dhp417:0	Naṭaputtakattheravatthu
dhp417:1	Hitvā mānusakaṁ yogaṁ,
dhp417:2	dibbaṁ yogaṁ upaccagā;
dhp417:3	Sabbayogavisaṁyuttaṁ,
dhp417:4	tamahaṁ brūmi brāhmaṇaṁ.
dhp418:0	Naṭaputtakattheravatthu
dhp418:1	Hitvā ratiñca aratiñca,
dhp418:2	sītibhūtaṁ nirūpadhiṁ;
dhp418:3	Sabbalokābhibhuṁ vīraṁ,
dhp418:4	tamahaṁ brūmi brāhmaṇaṁ.
dhp419:0	Vaṅgīsattheravatthu
dhp419:1	Cutiṁ yo vedi sattānaṁ,
dhp419:2	upapattiñca sabbaso;
dhp419:3	Asattaṁ sugataṁ buddhaṁ,
dhp419:4	tamahaṁ brūmi brāhmaṇaṁ.
dhp420:1	Yassa gatiṁ na jānanti,
dhp420:2	devā gandhabbamānusā;
dhp420:3	Khīṇāsavaṁ arahantaṁ,
dhp420:4	tamahaṁ brūmi brāhmaṇaṁ.
dhp421:0	Dhammadinnāttherīvatthu
dhp421:1	Yassa pure ca pacchā ca,
dhp421:2	majjhe ca natthi kiñcanaṁ;
dhp421:3	Akiñcanaṁ anādānaṁ,
dhp421:4	tamahaṁ brūmi brāhmaṇaṁ.
dhp422:0	Aṅgulimālattheravatthu
dhp422:1	Usabhaṁ pavaraṁ vīraṁ,
dhp422:2	mahesiṁ vijitāvinaṁ;
dhp422:3	Anejaṁ nhātakaṁ buddhaṁ,
dhp422:4	tamahaṁ brūmi brāhmaṇaṁ.
dhp423:0	Devahitabrāhmaṇavatthu
dhp423:1	Pubbenivāsaṁ yo vedi,
dhp423:10	catusaccavibhāvinā;
dhp423:11	Satattayañca vatthūnaṁ,
dhp423:12	pañcādhikaṁ samuṭṭhitāti.
dhp423:13	Dhammapade vaggānamuddānaṁ
dhp423:14	Yamakappamādo cittaṁ,
dhp423:15	pupphaṁ bālena paṇḍito;
dhp423:16	Arahanto sahassañca,
dhp423:17	pāpaṁ daṇḍena te dasa.
dhp423:18	Jarā attā ca loko ca,
dhp423:19	buddho sukhaṁ piyena ca;
dhp423:2	saggāpāyañca passati;
dhp423:20	Kodho malañca dhammaṭṭho,
dhp423:21	maggavaggena vīsati.
dhp423:22	Pakiṇṇaṁ nirayo nāgo,
dhp423:23	taṇhā bhikkhu ca brāhmaṇo;
dhp423:24	Ete chabbīsati vaggā,
dhp423:25	desitādiccabandhunā.
dhp423:26	Gāthānamuddānaṁ
dhp423:27	Yamake vīsati gāthā,
dhp423:28	appamādamhi dvādasa;
dhp423:29	Ekādasa cittavagge,
dhp423:3	Atho jātikkhayaṁ patto,
dhp423:30	pupphavaggamhi soḷasa.
dhp423:31	Bāle ca soḷasa gāthā,
dhp423:32	paṇḍitamhi catuddasa;
dhp423:33	Arahante dasa gāthā,
dhp423:34	sahasse honti soḷasa.
dhp423:35	Terasa pāpavaggamhi,
dhp423:36	daṇḍamhi dasa satta ca;
dhp423:37	Ekādasa jarā vagge,
dhp423:38	attavaggamhi tā dasa.
dhp423:39	Dvādasa lokavaggamhi,
dhp423:4	abhiññāvosito muni;
dhp423:40	buddhavaggamhi ṭhārasa;
dhp423:41	Sukhe ca piyavagge ca,
dhp423:42	gāthāyo honti dvādasa.
dhp423:43	Cuddasa kodhavaggamhi,
dhp423:44	malavaggekavīsati;
dhp423:45	Sattarasa ca dhammaṭṭhe,
dhp423:46	maggavagge sattarasa.
dhp423:47	Pakiṇṇe soḷasa gāthā,
dhp423:48	niraye nāge ca cuddasa;
dhp423:49	Chabbīsa taṇhāvaggamhi,
dhp423:5	Sabbavositavosānaṁ,
dhp423:50	tevīsa bhikkhuvaggikā.
dhp423:51	Ekatālīsagāthāyo,
dhp423:52	brāhmaṇe vaggamuttame;
dhp423:53	Gāthāsatāni cattāri,
dhp423:54	tevīsa ca punāpare;
dhp423:55	Dhammapade nipātamhi,
dhp423:56	desitādiccabandhunāti.
dhp423:57	Dhammapadapāḷi samattā.
dhp423:6	tamahaṁ brūmi brāhmaṇaṁ.
dhp423:7	Brāhmaṇavaggo chabbīsatimo.
dhp423:8	Ettāvatā sabbapaṭhame yamakavagge cuddasa vatthūni, appamādavagge nava, cittavagge nava, pupphavagge dvādasa, bālavagge pannarasa, paṇḍitavagge ekādasa, arahantavagge dasa, sahassavagge cuddasa, pāpavagge dvādasa, daṇḍavagge ekādasa, jarāvagge nava, attavagge dasa, lokavagge ekādasa, buddhavagge nava, sukhavagge aṭṭha, piyavagge nava, kodhavagge aṭṭha, malavagge dvādasa, dhammaṭṭhavagge dasa, maggavagge dvādasa, pakiṇṇakavagge nava, nirayavagge nava, nāgavagge aṭṭha, taṇhāvagge dvādasa, bhikkhuvagge dvādasa, brāhmaṇavagge cattālīsāti pañcādhikāni tīṇi vatthusatāni.
dhp423:9	Satevīsacatussatā,