##### edition rhced (gez)
=== incipit Introduction ===
በአኰቴቱ ፡ ለእግዚኣብሔር ፡ አብ ፡ አኃዜ ፡ ኵሉ ፤ ወበወልዱ ፡ ኢየሱስ ፡ ክርስቶስ ፡ ዘቦቱ ፡ ኵሉ ፡ ኮነ ፡ ወዘእንበሌሁሰ ፡ አልቦ ፡ ዘኮነ ፤ ወበመንፈስ ፡ ቅዱስ ፡ ጰራቅሊጦስ ፡ ዘይወፅእ ፡ እምአብ ፡ ወይነሥእ ፡ እምወልድ ፡ ፩ ፡ አምላክ ፡ አብ ፡ ወወልድ ፡ ወመንፈስ ፡ ቅዱስ ፡ ነአምን ፡ ወንገኒ ፡ ለሥሉስ ፨ ፨ ፨ ፨
=== chapter 1 ===
[፩ ፡ በእንተ፡ ክብረ፡ ነገሥት፡]
ፍካሬ ፡ ወዜና ፡ ዘ፫፻፲ወ፰ ፡ ርቱዓነ ፡ ሃይማኖት ፡ በእንተ ፡ ክብር ፡ ወዕበይ ፡ ወተድላ ፡ ዘከመ ፡ ወሀበ ፡ እግዚኣብሔር ፡ ለደቂቀ ፡ አዳም ፤ ወፈድፋደሰ ፡ ዘበእንተ ፡ ዕበያ ፡ ወክብራ ፡ ለጽዮን ፡ ታቦተ ፡ ሕጉ ፡ ለእግዚኣብሔር ፡ እንተ ፡ ገባሪሃ ፡ ወኬንያሃ ፡ ለሊሁ ፡ በውስተ ፡ ጽርሐ ፡ መቅደሱ ፡ እምቅድመ ፡ ኵሉ ፡ ፍጥረት ፡ መላእክት ፡ ወሰብእ ፡ እስመ ፡ በኅብረት ፡ ወበሥምረት ፡ ወበዕሪና ፡ ገብርዋ ፡ አብ ፡ ወወልድ ፡ ወመንፈስ ፡ ቅዱስ ፡ ለጽዮን ፡ ሰማያዊት ፡ ለማኅዳረ ፡ ስብሐቲሆሙ ፡ ወእምዝ ፡ ይቤ ፡ አብ ፡ ለወልድ ፡ ወለመንፈስ ፡ ቅዱስ ፡ ንግበር ፡ ሰብአ ፡ በአርአያነ ፡ ወበአምሳሊነ ፤ ወኀብሩ ፡ ወሠምሩ ፡ በዝ ፡ ምክር ፡ ወይቤ ፡ ወልድ ፡ አነ ፡ እለብስ ፡ ሥጋሁ ፡ ለአዳም ፤ ወይቤ ፡ መንፈስ ፡ ቅዱስ ፡ አነ ፡ አኀድር ፡ ውስተ ፡ ልበ ፡ ነቢያት ፡ ወጻድቃን ፡ ወዛቲ ፡ ኅብረት ፡ ወኪዳን ፡ ተገብረት ፡ በውስተ ፡ ጽዮን ፡ ማኅደረ ፡ ስብሐቲሆሙ ፡ ወዳዊትኒ ፡ ይቤ ፡ ተዘከር ፡ ማኅበረከ ፡ ዘአቅደምከ ፡ ፈጢረ ፡ ለመድኀኒተ ፡ በትረ ፡ ርስትከ ፡ በደብረ ፡ ጽዮን ፡ ዘኀደርከ ፡ ውስቴታ ፨ ፡ ወገብሮ ፡ ለአዳም ፡ በዘዚአሁ ፡ አርአያ ፡ ወአምሳል ፡ ከመ ፡ ይንሥቶ ፡ ለሳይጣን ፡ በእንተ ፡ ትዕቢቱ ፡ ምስለ ፡ ሰራዊቱ ፤ ወያቅሞ ፡ ለአዳም ፡ ተክለ ፡ ዚአሁ ፡ ምስለ ፡ ኀራን ፡ ደቂቁ ፡ ለስብሐቲሁ ፡ እስመ ፡ ኅሉቅ ፡ ወምቱር ፡ ምክረ ፡ እግዚኣብሔር ፡ እንተ ፡ ይቤ ፡ እከውን ፡ ሰብአ ፡ ወኣስተርኢ ፡ ለኵሉ ፡ ዘፈጠርኩ ፡ በሥጋ ፡ እትገሰስ ፤ ወበደኃሪ ፡ መዋዕል ፡ በሥምረቱ ፡ ተወልደ ፡ በሥጋ ፡ እምዳግማዊት ፡ ጽዮን ፡ ዳግማዊ ፡ አዳም ፡ ዝውእቱ ፡ መድኀኒነ ፡ ክርስቶስ ፡ ዛቲ ፡ ይእቲ ፡ ምክሕነ ፡ ወሃይማኖትነ ፡ ተስፋነ ፡ ወሕይወትነ ፡ ጽዮን ፡ ሳማያዊት ፨
=== chapter 2 ===
[፪ ፡ በእንተ ፡ ዕበየ ፡ ነገሥት ።]
ሀቡኬ ፡ ንግባእ ፡ ወነሐስብ ፡ ወንወጥን ፡ ዘናዐቢ ፡ ወናሐጽጽ ፡ እምነገሥተ ፡ ምድር ፡ በሕግ ፡ ወበሥርዐት ፡ በክብር ፡ ወበዕበይ ፡ እምቀዳሚ ፡ እስከ ፡ ደኃሪ ፨ ፡ ተንሥአ ፡ ጎርጎርዮስ ፡ ገባሬ ፡ መንክር ፡ ዘተወድየ ፡ ውስተ ፡ ግብ ፡ በእንተ ፡ ፍቅረ ፡ ስምዐ ፡ ክርስቶስ ፡ ፲ወ፭ ፡ ዓመተ ፡ ውስተ ፡ ምንዳቤ ፤ ውእቱ ፡ ይቤ ፤ እንዘ ፡ ሀለውኩ ፡ ውስተ ፡ ግብ ፡ ኀለይኩ ፡ በእንተዝ ፡ ነገር ፡ ወበእንተ ፡ እበዱ ፡ ለንጉሠ ፡ አርማንያ ፡ ወእቤ ፡ መጠነ ፡ ኅሊናየ ፡ ምንተ ፡ ዕበዮሙ ፡ በብዝኀ ፡ ሰራዊትኑ ፡ ወሚመ ፡ በክብረ ፡ ንዋየ ፡ ዓለም ፡ ወሚመ ፡ በብዝኀ ፡ ሢመተ ፡ አህጉር ፤ ወዘንተ ፡ ኀሊይየ ፡ ለለ ፡ ተረፈ ፡ ጸሎትየ ፡ የሀውከኒ ፡ ካዕበ ፡ ኅሊናየ ፡ ወእኄሊ ፡ በእንተ ፡ ዕበየ ፡ ነገሥት ፡ ወአኀዝኩ ፡ እወጥን ፨ ፨ ፨
=== chapter 3 ===
[፫ ፡ በእንተ ፡ መንግሥተ ፡ አዳም ።]
ወእምአዳም ፡ አልዐልኩ ፡ ወእቤ ፡ ንጉሥ ፡ እግዚአብሔር ፡ በአማን ፡ ዘሎቱ ፡ ይደሉ ፡ ስብሐት ፡ ወእምታሕቴሁ ፡ ሤሞ ፡ ለአዳም ፡ ንጉሠ ፡ ላዕለ ፡ ኵሉ ፡ ዘፈጠረ ፤ ወበዕልወቱ ፡ አውፅኦ ፡ እምገነት ፡ በኂጠተ ፡ ከይሲ ፡ በምክረ ፡ ዲያብሎስ ፡ ወበውእቱ ፡ ዜና ፡ ሐዘን ፡ ተወልደ ፡ ቃየን ፤ ወርእዮ ፡ አዳም ፡ ለቃየን ፡ እሱረ ፡ ገጽ ፡ ፀዋግ ፡ ራእዩ ፡ ሐዘነ ፡ ወካዕበ ፡ ተወልደ ፡ አቤል ፤ ወርእዮ ፡ አዳም ፡ ለአቤል ፡ ከመ ፡ ሠናይ ፡ ራእዩ ፡ ወፍሡሕ ፡ ገጹ ፡ ይቤ ፡ ዝንቱ ፡ ወልድየ ፡ ወራሴ ፡ መንግሥትየ ፨ ፨ ፨ ፨
=== chapter 4 ===
[፬ ፡ በእንተ ፡ ቅንአት ።]
ወሶበ ፡ ልህቁ ፡ ኅቡረ ፡ ቀንአ ፡ ላዕሌሁ ፡ ሰይጣን ፡ ወወደየ ፡ ይእተ ፡ ቅንአተ ፡ ውስተ ፡ ልበ ፡ ቃየን ፤ ቀዳሚ ፡ ቅንአቱ ፡ በእንተ ፡ ቃለ ፡ አቡነ ፡ አዳም ፡ ዘይቤ ፡ ዝውእቱ ፡ ብሩሀ ፡ ገጽ ፡ ይኩን ፡ ወራሴ ፡ መንግሥትየ ፤ ወበዳግምሳ ፡ ቅንአቱ ፡ በእንተ ፡ እኅቱ ፡ ሠናይ ፡ ራእያ ፡ እንተ ፡ ተወልደት ፡ ምስለ ፡ ቃየን ፡ ወተውህበት ፡ ለአቤል ፡ በከመ ፡ አዘዘ ፡ እግዚኣብሔር ፡ ይብዝኁ ፡ ወይምልእዋ ፡ ለምድር ፤ ወእንተ ፡ ተወልደትሰ ፡ ምስለ ፡ አቤል ፡ ትመስል ፡ ርእየተ ፡ ገጹ ፡ ለቃየን ፡ ወአስተኃለፈ ፡ አቡሆሙ ፡ ወወሀቦሙ ፤ ወሣልስ ፡ ቅንአቱ ፡ በእንተ ፡ ዘሦዑ ፡ ክልኤሆሙ ፡ ወተወክፈ ፡ እግዚኣብሔር ፡ መሥዋዕተ ፡ አቤል ፡ ወአስቆረረ ፡ መሥዋዕቶ ፡ ለቃየን ፡ ወበእንተዝ ፡ ቅንአት ፡ ቀተሎ ፤ እስመ ፡ ቀትለ ፡ አኀው ፡ እምቃዳሚ ፡ ተፈጥረ ፡ በቅንአተ ፡ ሳይጣን ፡ ላዕለ ፡ ደቂቀ ፡ አዳም ፡ ወሶበ ፡ ቀተለ ፡ እኁሁ ፡ ኮነ ፡ ርዑደ ፡ ወድንጉፀ ፡ ወምኑነ ፡ በኀበ ፡ አቡሁ ፡ ወበኀበ ፡ እግዚኡ ፡ ወተወልደ ፡ ሴት ፡ ወርእዮ ፡ አዳም ፡ ይቤ ፤ ይእዜኬ ፡ ተሣሀለኒ ፡ እግዚኣብሔር ፡ ወወሀበኒ ፡ ብርሃነ ፡ ገጽየ ፡ በንስሓ ፡ ኣቃርቦ ፡ ዋርስየ ፡ ዝንቱ ፡ ወውእቱሰ ፡ ቀታሌ ፡ ዋርስየ ፡ በ፱ ፡ ትውልዱ ፡ ትደመሰስ ፡ ስሙ ፨ ፨ ፨ ፨ ፨ ፨ ፨ ፨
=== chapter 5 ===
[፭ ፡ በእንተ ፡ መንግሥተ ፡ ሴት ።]
ወአዕረፈ ፡ አዳም ፡ ወነግሠ ፡ ሴት ፡ በጽድቅ ፤ ወአዕረፈ ፡ ሴት ፡ ወነግሠ ፡ ሄኖስ ፤ ወአእረፈ ፡ ሄኖስ ፡ ወነግሠ ፡ ቃይናን ፤ ወአእረፈ ፡ ቃይናን ፡ ወነግሠ ፡ መላልኤል ፤ ወአዕረፈ ፡ መላልኤል ፡ ወነግሠ ፡ ያሮድ ፤ ወአዕረፈ ፡ ያሮድ ፡ ወነግሠ ፡ ሄኖክ ፡ በጽድቅ ፡ ወፈርሆ ፡ ለእግዚኣብሔር ፡ ወኀብኦ ፡ ከመ ፡ ኢይርአዮ ፡ ለሞት ፡ ወሀሎ ፡ ንጉሥ ፡ በሥጋሁ ፡ ብሔረ ፡ ሕያዋን ፡ ወእምድኅረ ፡ ተከብተ ፡ ሄኖክ ፡ ነግሠ ፡ ማቱሳላ ፤ ወአዕረፈ ፡ ማቱሳላ ፡ ወነግሠ ፡ ላሜኅ ፤ ወአዕረፈ ፡ ላሜኅ ፡ ወነግሠ ፡ ኖሕ ፡ በጽድቅ ፡ ወአሥመሮ ፡ ለእግዚኣብሔር ፡ በኵሉ ፡ ግብሩ ፨ ፨ ፨ ፨ ፨
=== chapter 6 ===
[፮ ፡ በእንተ ፡ ኀጢአተ ፡ ቃየን ።]
ወውእቱሰ ፡ ርጉም ፡ ቀታሌ ፡ እኁሁ ፡ ቃየን ፡ አብዝኃ ፡ ለእከይ ፡ ወዘርኡኒ ፡ ከማሁ ፡ እለ ፡ አምዕዕዎ ፡ ለእግዚኣብሔር ፡ በእከዮሙ ፡ ወአልቦሙ ፡ ፍርሀተ ፡ እግዚኣብሔር ፡ ቅድመ ፡ አዕይንቲሆሙ ፡ ወኢኀለይዎ ፡ ከመ ፡ ፈጣሪሆሙ ፡ ወኢጸለዩ ፡ ኀቤሁ ፡ ወኢተጋነዩ ፡ ወኢሰአልዎ ፡ ወኢተቀንዩ ፡ ሎቱ ፡ በፍርሀት ፤ ዘእንበለ ፡ ዘይበልዑ ፡ ወይሰትዩ ፡ ወይዘፍኑ ፡ ወይትዋነዩ ፡ በመሰንቆ ፡ ወበማሕሌት ፡ ወበዝሙት ፡ ዘእንበለ ፡ ሕግ ፡ ወዘእንበለ ፡ መስፈርት ፡ ወዘእንበለ ፡ ሥርዐት ፡ ወበዝኀ ፡ እከዮሙ ፡ ለደቂቀ ፡ ቃየን ፡ እስከ ፡ በትዕቢተ ፡ ዝሙቶሙ ፡ አግብኡ ፡ ዘርአ ፡ አድግ ፡ ኀበ ፡ ፈረስ ፡ ወኮነ ፡ በቅለ ፡ ዘኢአዘዘ ፡ እግዚኣብሔር ፤ በከመ ፡ እለ ፡ ይሁቡ ፡ ውሉዶሙ ፡ መሀይምናን ፡ ለከሓድያን ፡ ወይከውኑ ፡ ውሉዶሙ ፡ ዘርአ ፡ ግሙራ ፡ ርኩሳን ፡ መንፈቆሙ ፡ ሠናይ ፡ ወመንፈቆሙ ፡ ዘርአ ፡ እኩያን ፤ ወእለ ፡ ገብርዋ ፡ ለእኪት ፡ ጽኑሕ ፡ ደይኖሙ ፡ ወንቡር ፡ ጌጋዮሙ ፨ ፨ ፨
=== chapter 7 ===
[፯ ፡ በእንተ ፡ ኖሕ ።]
ወኖሕሰ ፡ ጻድቅ ፡ ይፈርሆ ፡ ለእግዚኣብሔር ፡ ወየዐቅብ ፡ ጽድቀ ፡ ወዘነገርዎ ፡ አበዊሁ ፡ ሕገ ፡ እምአዳም ፡ ዓሥር ፡ ትውልድ ፡ ለሊሁ ፡ ኖሕ ፡ እንዘ ፡ ይዜከር ፡ ወይገብር ፡ ሠናየ ፡ ወየዐቅብ ፡ ሥጋሁ ፡ እምዝሙት ፡ ወይጌሥጽ ፡ ደቂቆ ፡ ከመ ፡ ኢይደመሩ ፡ ምስለ ፡ ደቂቀ ፡ ቃየን ፡ መማዕሊይ ፡ ዕቡይ ፡ ናፋቄ ፡ መንግሥት ፤ እስመ ፡ በምክረ ፡ ዲያብሎስ ፡ ዘአሥረጻ ፡ ለእከይ ፡ ሖረ ፡ ወመሀሮሙ ፡ ኵሎ ፡ ዘጸልኦ ፡ እግዚኣብሔር ፤ ትዕቢተ ፡ ትዝኅርተ ፡ ትዝውፍተ ፡ ሐሜተ ፡ ውዴተ ፡ ወማሕላ ፡ በሐሰት ፤ ወፈድፋደሰ ፡ በእከየ ፡ ዝሙቶሙ ፡ ዘእንበለ ፡ ሕግ ፡ ወሥርዐት ፡ ብእሲ ፡ ላዕለ ፡ ብእሲ ፡ ያረኴስ ፡ ቢጾ ፡ ወአንስት ፡ ላዕለ ፡ አንስት ፡ ይገብራ ፡ ኀሳረ ፨ ፨ ፨
=== chapter 8 ===
[፰ ፡ በእንተ ፡ አይኅ ።]
ወኮነ ፡ ዝግብር ፡ እኩየ ፡ በቅድመ ፡ እግዚኣብሔር ፤ ወውእቱኒ ፡ ደምሰሶሙ ፡ በማየ ፡ አይኅ ፡ ዘይቈርር ፡ እምነ ፡ አስሐቲያ ፡ አርኀወ ፡ ኀዋኅወ ፡ ሰማይ ፡ ወወረደ ፡ አስራበ ፡ አይኅ ፡ ወተርኅወ ፡ አንቅዕት ፡ ዘመትሕተ ፡ ምድር ፡ ወተከሥተ ፡ አንቅዕተ ፡ አይኅ ፡ ላዕለ ፡ ምድር ፤ ወጠፍኡ ፡ ኃጥኣን ፡ እስመ ፡ አረሩ ፡ ፍሬ ፡ መቅሠፍቶሙ ፤ ወኀልቀ ፡ ምስሌሆሙ ፡ ኵሉ ፡ እንስሳ ፡ ወአራዊት ፡ እስመ ፡ ኵሎሙ ፡ ተፈጥሩ ፡ በእንተ ፡ ፍሥሓ ፡ አዳም ፡ ወለክብሩ ፤ ወቦ ፡ በእንተ ፡ ጽጋቡ ፡ ወቦ ፡ በእንተ ፡ ፍሥሓሁ ፡ ወቦ ፡ ዘበእንተ ፡ አስማት ፡ ለሰብሖ ፡ ፈጣሪሁ ፡ ከመ ፡ ያእምሮሙ ፤ በከመ ፡ ይቤ ፡ ዳዊት ፡ ወኵሎ ፡ አግረርከ ፡ ታሕተ ፡ እገሪሁ ፤ በእንቲአሁ ፡ ተፈጥሩ ፡ ወበእንቲአሁ ፡ ኀልቁ ፡ ዘእንበለ ፡ ፷ ፡ ነፍስ ፡ ወእምነ ፡ ንጹሕ ፡ እንስሳ ፡ ወአራዊት ፡ በበ፯፯ ፡ ወእምነ ፡ ርኩስ ፡ እንስሳ ፡ ወአራዊት ፡ በበ፪፪ ፨ ፨ ፨ ፨ ፨ ፨ ፨ ፨
=== chapter 9 ===
[፱ ፡ በእንተ ፡ ኪዳነ ፡ ኖሕ ።]
ወእምዝ ፡ አዕረፈ ፡ ኖሕ ፡ ጻድቅ ፡ ወነግሠ ፡ ሴም ፡ በጥበብ ፡ ወበጽድቅ ፡ እስመ ፡ ተባረከ ፡ በኀበ ፡ ኖሕ ፡ እንዘ ፡ ይብል ፡ ኩን ፡ እግዚአ ፡ ለእኁከ ፤ ወለካምኒ ፡ ይቤሎ ፡ ኩን ፡ ገብረ ፡ ለእኁከ ፤ ወለያፌትኒ ፡ ይቤሎ ፡ ተገበር ፡ ወተአዛዜ ፡ ኩን ፡ ለሴም ፡ ዋርስየ ፡ ወካዕበ ፡ እምድኅረ ፡ አይኅኒ ፡ ኢኀደገ ፡ ተፃርሮቶሙ ፡ ዲያብሎስ ፡ ፀርነ ፡ ለደቂቀ ፡ ኖሕ ፡ አላ ፡ አንሥኦ ፡ ለከናኦን ፡ ወልደ ፡ ካም ፡ ወኮነ ፡ መማዕልይ ፡ ዘይነፍቅ ፡ መንግሥተ ፡ እምደቂቀ ፡ ሴም ፡ እስመ ፡ ተካፈሉ ፡ ምድረ ፤ ወአምሐሎሙ ፡ በስመ ፡ አምላኩ ፡ ከመ ፡ ኢይትዐደዉ ፡ ደወለ ፡ ቢጾሙ ፡ ወከመ ፡ ኢይብልዑ ፡ ማውታ ፡ ወብትከ ፡ ወከመ ፡ ኢይዘምዉ ፡ ዘእንበለ ፡ ሕግ ፡ ከመ ፡ ኢይትመዐዖሙ ፡ ዳግመ ፡ በአይኅ ፡ ወኖሕኒ ፡ ተጋነየ ፡ ወሦዐ ፡ ወጸውዐ ፡ ወገዐረ ፡ ወበከየ ፤ ወተናገሮ ፡ እግዚኣብሔር ፤ ወይቤ ፡ ኖሕ ፡ እመሰ ፡ ዳግመ ፡ ታማስና ፡ ለምድር ፡ በአይኅ ፡ ጥስየኒ ፡ ምስሌሆሙ ፡ ለእለ ፡ ኀልቁ ፡ ወይቤሎ ፡ እግዚኣብሔር ፡ አነ ፡ እትካየድ ፡ ምስሌከ ፡ ከመ ፡ ትንግሮሙ ፡ ለደቂቅከ ፡ ከመ ፡ ኢይብልዑ ፡ ማውታ ፡ ወብትከ ፡ ወከመ ፡ ኢይዘምዉ ፡ ዘእንበለ ፡ ሕግ ፡ ወአነሂ ፡ ከመ ፡ ኢያማስና ፡ ለምድር ፡ ዳግመ ፡ በአይኅ ፡ ወከመ ፡ እሁቦሙ ፡ ለደቂቅከ ፡ ክረምተ ፡ ወሐጋየ ፡ ዘርአ ፡ ወማእረረ ፡ ጸደየ ፡ ወመጸወ ፨ ፨ ፨ ፨
=== chapter 10 ===
[፲ ፡ በእንተ ፡ ጽዮን ።]
ወእምሕል ፡ በርእስየ ፡ ወበጽዮን ፡ ታቦተ ፡ ኪዳንየ ፡ እንተ ፡ ፈጠርክዋ ፡ ለምሥሃል ፡ ወለመድኀኒተ ፡ ሰብእ ፡ ወኣወርዳ ፡ በደኃሪ ፡ ለዘርእከ ፡ ወእሠምር ፡ መሥዋዕተ ፡ ደቂቅከ ፡ በዲበ ፡ ምድር ፡ ወትሄሉ ፡ ምስሌሆሙ ፡ ታቦተ ፡ ኪዳንየ ፡ ለዓለም ፡ ወሶበኒ ፡ መጽአ ፡ ደመና ፡ ከመ ፡ ኢይፍርሁ ፡ ወኢይምሰሎሙ ፡ አይኅ ፡ ኣወርድ ፡ እማኅደረ ፡ ጽዮን ፡ ቀስተ ፡ ኪዳንየ ፡ ዘይኬልላ ፡ ለታቦተ ፡ ሕግየ ፡ ዝውእቱ ፡ ቀስተ ፡ ደመና ፤ ወሶበኒ ፡ በዝኀ ፡ ኀጢአቶሙ ፡ ወፈቀድኩ ፡ እትመዐዖሙ ፡ እዜከራ ፡ ለታቦተ ፡ ኪዳንየ ፡ ወእሬስያ ፡ ለቀስተ ፡ ደመና ፡ ወኣአትት ፡ መዐትየ ፡ ወእፌኑ ፡ ሣህልየ ፤ ወአንሰ ፡ ኢይረስዕ ፡ ቃልየ ፡ ወኢይሔሱ ፡ ዘወፅአ ፡ እምአፉየ ፡ ወለእመኒ ፡ ኀለፈ ፡ ሰማይ ፡ ወምድር ፡ ወቃልየሰ ፡ ኢየኀልፍ ፨ ፡ አውሥእዎ ፡ ወይቤልዎ ፡ እለ ፡ ህየ ፡ ሊቃነ ፡ ጳጳሳት ፡ ለብፁዕ ፡ ጎርጎርዮስ ፤ ናሁኬ ፡ ይእዜ ፡ ለበውነ ፡ ጥዩቀ ፡ ከመ ፡ እምቅድመ ፡ ኵሉ ፡ ፍጥረት ፡ እመኒ ፡ መላእክት ፡ ወእምቅድመ ፡ ሰማያት ፡ ወምድር ፡ ወእምቅድመ ፡ ምጽናዓት ፡ ወልጐታተ ፡ ባሕር ፡ ዘፈጠራ ፡ ለታቦተ ፡ ኪዳን ፡ ዛቲ ፡ ይእቲ ፡ እንተ ፡ በሰማያት ፡ ታንሶሱ ፡ ዲበ ፡ ምድር ፨
=== chapter 11 ===
[፲፩ ፡ ኀበ ፡ ኀብሩ ፡ ፫፻፲ወ፷ ፡ ርቱዓነ ፡ ሃይማኖት ።]
ወአውሥእዎ ፡ ወይቤሉ ፡ እወ ፡ አማን ፡ ቀደመት ፡ ተፈጥሮ ፡ ታቦተ ፡ ኪዳን ፡ ወአልቦ ፡ ሐሰት ፡ ውስተ ፡ ቃልከ ፡ እሙን ፡ ወርቱዕ ፡ ወጽድቅ ፡ ውእቱ ፡ ወአልቦ ፡ ተውላጥ ፤ አቅዲሙሰ ፡ ለጽዮን ፡ ፈጠራ ፡ ለማኅደረ ፡ ስብሐቲሁ ፡ ወምክረ ፡ ኪዳኑሰ ፡ ዘይቤ ፡ እለብስ ፡ ሥጋ ፡ አዳም ፡ መሬታዊተ ፡ ወኣስተርኢ ፡ ለኵሉ ፡ ዘፈጠርኩ ፡ በእዴየ ፡ ወበቃልየ ፡ ወሶበሰ ፡ ኢወረደት ፡ ጽዮን ፡ ሰማያዊት ፡ ወሶበኒ ፡ ኢለብሰ ፡ ሥጋ ፡ አዳም ፡ እመ ፡ ኢተርእየ ፡ እግዚኣብሔር ፡ ቃል ፡ ወእመ ፡ ኢኮነ ፡ መድኀኒተነ ፤ ስምዑ ፡ በአምሳል ፤ ጽዮንሰ ፡ ሰማያዊት ፡ ተመሰለታ ፡ ለወላዲተ ፡ መድኅን ፡ ማርያም ፤ እስመ ፡ ሕንጽት ፡ ጽዮን ፡ ወንቡር ፡ ውስቴታ ፡ ፲ ፡ ቃላት ፡ ዘሕግ ፡ እለ ፡ ጽሑፋት ፡ በእደዊሁ ፡ ወውስተ ፡ ከርሠ ፡ ማርያም ፡ ኀደረ ፡ ለሊሁ ፡ ፈጣሪ ፡ ዘበእንቲአሁ ፡ ኵሉ ፡ ኮነ ፨
=== chapter 12 ===
[፲፪ ፡ በእንተ ፡ ከናኣን ።]
ወከናኣንሰ ፡ ዘነፈቀ ፡ መንግሥተ ፡ እምደቂቀ ፡ ሴም ፡ ተዐዲዎ ፡ ማሕላ ፡ ዘአበዊሁ ፡ ዘአምሐሎሙ ፡ ኖሕ ፤ ወደቂቀ ፡ ከናኣንሰ ፡ ፯ ፡ ጽኑዓን ፡ ወነሥአ ፡ እምድረ ፡ ሴም ፡ ፯ ፡ አህጉረ ፡ ዐበይተ ፡ ወሤሞሙ ፡ ህየ ፡ ለደቂቁ ፡ ወከማሁ ፡ ካዕበ ፡ ክፍሉኒ ፡ ለርእሱ ፡ ገብረ ፤ ወበደኃሪ ፡ ተበቀሎሙ ፡ እግዚኣብሔር ፡ ለደቂቀ ፡ ከናኣን ፡ ወአውረሰ ፡ ምድሮሙ ፡ ለደቂቀ ፡ ሴም ፤ ወእሉ ፡ እለ ፡ ተዋረሱ ፡ ከናኔዎን ፡ ወፌርዜዎን ፡ ወኤዌዎን ፡ ወኬጤዎን ፡ ወኣሞሬዎን ፡ ወኢያቡሴዎን ፡ ወጌርጌሴዎን ፤ እሉ ፡ እሙንቱ ፡ እለ ፡ ተኀየለ ፡ ከናኣን ፡ እምዘርአ ፡ ሴም ፤ እስመ ፡ ኢርቱዕ ፡ ተዐድዎ ፡ መንግሥት ፡ ወበሊዐ ፡ ማሕላ ፡ ወበእንተዝ ፡ ጠፍኡ ፡ ወዝክሮሙኒ ፡ ኀልቀ ፡ በተዐድዎ ፡ ትእዛዝ ፡ ወአምልኮ ፡ ጣዖት ፡ ወሰጊድ ፡ ለእለ ፡ ኢኮኑ ፡ አማልክተ ፨ ፡ ወእም ፡ ድኅረ ፡ ሞተ ፡ ሴም ፡ ነግሠ ፡ አልፋክስድ ፤ ወእምድኅረ ፡ ሞተ ፡ አልፋክስድ ፡ ነግሠ ፡ ቃይናን ፤ ወእምድኅረ ፡ ሞተ ፡ ቃይናን ፡ ነግሠ ፡ ሳላ ፤ ወእምድኅሬሁ ፡ ነግሠ ፡ እቤር ፡ ወእምድኅሬሁ ፡ ነግሠ ፡ ፋሌቅ ፡ ወእምድኅሬሁ ፡ ነግሠ ፡ ራጋው ፡ ወእምድኅሬሁ ፡ ነግሠ ፡ ሴሮሕ ፡ ወእምድኅሬሁ ፡ ነግሠ ፡ ናኮር ፡ ወእምድኅሬሁ ፡ ነግሠ ፡ ታራ ፡ ወእሉሰ ፡ እንዘ ፡ ያሰግሉ ፡ ጣዖታተ ፡ ወየሐውሩ ፡ ኀበ ፡ መቃብረ ፡ አበዊሆሙ ፡ ወይገብሩ ፡ ሥዕለ ፡ ዘወርቅ ፡ ወብሩር ፡ ወብርት ፤ ወይትናገሮሙ ፡ ጋኔን ፡ በውስተ ፡ ውእቱ ፡ ሥዕለ ፡ አበዊሆሙ ፡ ወይብሎሙ ፡ እገሌ ፡ ወልድየ ፡ ሡዕ ፡ ሊተ ፡ ወልድከ ፡ ዘታፈቅር ፤ ወይዘብሑ ፡ ደቂቆሙ ፡ ወአዋልዲሆሙ ፡ ለአጋንንት ፡ ወይክዕዉ ፡ ደመ ፡ ንጹሐ ፡ ለርኩሳን ፡ አጋንንት ፨ ፨ ፨ ፨ ፨ ፨ ፨
=== chapter 13 ===
[፲ወ፫ ፡ በእንተ ፡ አብርሃም ።]
ወወለደ ፡ ታራ ፡ ወልደ ፡ ወሰመዮ ፡ አብራም ፤ ወሶበ ፡ ኮነ ፡ ሎቱ ፡ ፲ወ፪ ፡ ዓመተ ፡ ለአኮ ፡ አቡሁ ፡ ታራ ፡ ከመ ፡ ይሢጥ ፡ ጣዖተ ፤ ወይቤ ፡ አብራም ፡ ዝሰ ፡ ኢኮነ ፡ አምላክ ፡ ዘያድኅን ፤ ወወሰደ ፡ ከመ ፡ ይሢጥ ፡ ጣዖተ ፡ በከመ ፡ አዘዞ ፡ አቡሁ ፤ ወይቤሎሙ ፡ ለእለ ፡ ይሠይጥ ፡ ሎሙ ፡ ቦኑ ፡ ዘትሣየጡ ፡ ዘኢያድኅን ፡ አምላክ ፡ ዕፅ ፡ ወእብን ፡ ወኀጺን ፡ ወብርት ፡ ዘገብሮ ፡ እደ ፡ ኬንያ ፤ ወአበይዎ ፡ ተሣይጦ ፡ ለአብራም ፡ እስመ ፡ ለሊሁ ፡ አርኰሶሙ ፡ ለግልፈዋተ ፡ አቡሁ ፡ ወእንዘ ፡ ያአትዎሙ ፡ ተግሕሠ ፡ እምፍኖት ፡ ወአንበሮሙ ፡ ወነጸሮሙ ፡ ወይቤሎሙ ፤ ቦኑ ፡ ዘትክሉ ፡ ገቢረ ፡ ዘእሴአለክሙ ፡ አነ ፡ ይእዜ ፡ እመ ፡ ትክሉ ፡ አብልዑኒ ፡ ኅብስተ ፡ አው ፡ አስትዩኒ ፡ ማየ ፤ ወአልቦ ፡ ዘአውሥእዎ ፡ እስመ ፡ አእባን ፡ ወዕፀው ፡ እሙንቱ ፤ ወጸዐሎሙ ፡ ወፀረፈ ፡ ላዕሌሆሙ ፡ ወኢነበብዎ ፤ ወቦ ፡ ለዘ ፡ ጸፍዖ ፡ ወቦ ፡ ለዘ ፡ ረገፆ ፡ ወቦ ፡ ለዘ ፡ ወገሮ ፡ ወሰበሮ ፡ በአእባን ፡ ወይቤሎሙ ፤ እመሰ ፡ ኢታድኅኑ ፡ ርእስክሙ ፡ እምዘ ፡ ገፍዐክሙ ፡ ወኢታሐሥሙ ፡ ለዘ ፡ አሕሠመ ፡ ለክሙ ፡ በአይቴ ፡ ትሰመዩ ፡ አማልክተ ፤ ወከንቱ ፡ እለ ፡ ያመልኩክሙ ፡ ወአንሰ ፡ አስተሐቀርኩክሙ ፡ ወኢትኩኑኒ ፡ አምላኪየ ፡ ወአርአየ ፡ ገጾ ፡ ለምሥራቅ ፡ ወሰፍሐ ፡ እደዊሁ ፡ ወይቤ ፤ አምላኪየሰ ፡ ኩነኒ ፡ አንተ ፡ እግዚኦ ፡ ፈጣሬ ፡ ሰማያት ፡ ወምድር ፡ ፈጣሬ ፡ ፀሐይ ፡ ወወርኅ ፡ ፈጣሬ ፡ ባሕር ፡ ወየብስ ፡ ገባሬ ፡ ሰርጐ ፡ ሰማይ ፡ ወምድር ፡ ዘያስተርኢ ፡ ወዘኢያስተርኢ ፡ ገባሬ ፡ ኵሉ ፡ ኩነኒ ፡ አምላኪየ ፡ ወኪያከ ፡ ተአመንኩ ፡ ወባዕደሰ ፡ አልብየ ፡ ዘእትአመን ፡ ዘእንበሌከ ፡ እምዮም ፡ ወእምዝ ፡ አስተርአዮ ፡ ሰረገላ ፡ ዘእሳት ፡ ዘይነድድ ፡ ወፈርሀ ፡ አብራም ፡ ወወድቀ ፡ በገጹ ፡ ውስተ ፡ ምድር ፤ ወአንሥኦ ፡ ወይቤሎ ፡ ኢትፍራህ ፡ ቁም ፡ ርቱዐ ፡ ወአእተተ ፡ እምኔሁ ፡ ፍርሀተ ፨ ፨ ፨ ፨
=== chapter 14 ===
[፲ወ፬ ፡ በእንተ ፡ ኪዳነ ፡ አብርሃም ።]
ወተናገሮ ፡ እግዚኣብሔር ፡ ወይቤሎ ፤ ኢትፍራህ ፡ እምዮም ፡ ገብርየ ፡ አንተ ፡ ወኣቀውም ፡ ኪዳንየ ፡ ምስሌከ ፡ ወምስለ ፡ ዘርእከ ፡ እምድኅሬከ ፡ ወኣበዝኅ ፡ ዘርአከ ፡ ወኣዐቢ ፡ ስምከ ፡ ፈድፋደ ፡ ወኣወርዳ ፡ ለታቦተ ፡ ኪዳንየ ፡ ዲበ ፡ ምድር ፡ በ፯ ፡ ትውልድ ፡ እምድኅሬከ ፡ ወታንሶሱ ፡ ምስለ ፡ ዘርእከ ፡ ወትከውን ፡ መድኀኒተ ፡ ለዘመድከ ፤ ወእምድኅሬሁ ፡ እፌኑ ፡ ቃልየ ፡ ለመድኀኒተ ፡ አዳም ፡ ወደቂቁ ፡ እስከ ፡ ለዓለም ፡ ወይእዜኒ ፡ እሉ ፡ አዝማዲከ ፡ ዐላዊያን ፡ ወአበዩ ፡ አምልኮትየ ፡ በርትዕ ፤ ወአንተሰ ፡ ዕለት ፡ እምዕለት ፡ ከመ ፡ ኢያስሕቱከ ፡ ነዓ ፡ ፃእ ፡ እምዛቲ ፡ ምድር ፡ ምድረ ፡ አበዊከ ፡ ውስተ ፡ ምድር ፡ ዘኣርእየከ ፡ አነ ፡ ወእሁቦሙ ፡ ለዘርእከ ፡ እምድኅሬከ ፡ ወሰገደ ፡ አብራም ፡ ለእግዚኣብሔር ፡ ወተአዘዘ ፡ ለአምላኩ ፤ ወይቤሎ ፡ ይኩን ፡ ስምከ ፡ አብርሃም ፡ ወወሀቦ ፡ ሰላመ ፡ ወዐርገ ፡ ውስተ ፡ ሰማያት ፨ ፡ ወአብርሃምኒ ፡ አተወ ፡ ውስተ ፡ ማኅደሩ ፡ ወነሥኣ ፡ ለሳራ ፡ ብእሲቱ ፡ ወወፅአ ፡ እንዘ ፡ ኢይትመየጥ ፡ አቡሁ ፡ ወእሞ ፡ ወቤቶ ፡ ወአዝማዲሁ ፡ ወመነነ ፡ በእንተ ፡ እግዚኣብሔር ፤ ወበጽሐ ፡ ውስተ ፡ ሀገረ ፡ ሳሌም ፡ ወኀደረ ፡ ህየ ፡ ወነግሠ ፡ በጽድቅ ፡ ወኢተዐደወ ፡ እምትእዛዙ ፡ ለእግዚኣብሔር ፤ ወእግዚኣብሔር ፡ ባረኮ ፡ ፈድፋደ ፡ እስከ ፡ አጥረየ ፡ ዐሠርተ ፡ ወሰመንተ ፡ አግብርቲሁ ፡ እለ ፡ ይቀውሙ ፡ ቅድሜሁ ፡ ጽኑዓን ፡ ወምሁራነ ፡ ፀብእ ፡ እለ ፡ ይገብሩ ፡ ፈቃዶ ፡ እለ ፡ ይለብሱ ፡ ዲባጋተ ፡ ዘወርቅ ፡ ወየዐንቁ ፡ በዝጋናተ ፡ ዘወርቅ ፡ ወይቀንቱ ፡ ቅናታተ ፡ ዘወርቅ ፡ ወይትቄጸሉ ፡ አክሊላተ ፡ ዘወርቅ ፤ ወቦሙ ፡ ይመውእ ፡ ፀሮ ፡ ወአዕረፈ ፡ በክብር ፡ በእግዚኣብሔር ፡ ወኀየሰ ፡ ወተሞገሰ ፡ እምእለ ፡ ቅድሜሁ ፤ ኀየሰ ፡ ወከብረ ፡ ወተለዐለ ፨ ፨ ፨ ፨ ፨ ፨
=== chapter 15 ===
[፲ወ፭ ፡ በእንተ ፡ ይስሐቅ ፡ ወያዕቆብ ።]
ወነግሠ ፡ ይስሐቅ ፡ ወልዱ ፡ ወውእቱኒ ፡ ኢተዐደወ ፡ እምትእዛዙ ፡ ለእግዚኣብሔር ፡ ወኮነ ፡ ንጹሕ ፡ በነፍሱ ፡ ወበሥጋሁ ፡ ወአዕረፈ ፡ በክብር ፡ ወነግሠ ፡ ያዕቆብ ፡ ወልዱ ፡ ወውእቱኒ ፡ ኢተዐደወ ፡ እምትእዛዙ ፡ ለእግዚኣብሔር ፤ ወኮነ ፡ ብዙኅ ፡ ንዋዩ ፡ ወደቂቁ ፡ ወባረኮ ፡ እግዚኣብሔር ፡ ወአዕረፈ ፡ በክብር ፨ ፨ ፨ ፨ ፨ ፨ ፨ ፨
=== chapter 16 ===
[፲ወ፮ ፡ በእንተ ፡ ሮቤል ።]
ወእምድኅሬሁ ፡ ሮቤል ፡ በኰሩ ፡ ለያዕቆብ ፡ ተዐደወ ፡ ትእዛዘ ፡ እግዚኣብሔር ፡ ወፈለሰት ፡ መንግሥት ፡ እምኔሁ ፡ ወእምዘርኡ ፡ በእንተ ፡ ዘአርኰሰ ፡ ብእሲተ ፡ አቡሁ ፡ እስመ ፡ ኢርቱዕ ፡ ተዐድዎ ፡ ሕግ ፡ ዘአዘዘ ፡ እግዚኣብሔር ፤ ወረገሞ ፡ አቡሁ ፡ ወተምዖ ፡ እግዚአብሔር ፡ ወኮነ ፡ ሕጹጸ ፡ እምአኀዊሁ ፡ ወደቂቁ ፡ ኮኑ ፡ ዝልጉሳነ ፡ ወዕቡቃነ ፤ ወእንዘ ፡ ለሊሁ ፡ በኴር ፡ ተሀይደ ፡ መንግሥት ፡ እምኔሁ ፡ ወነግሠ ፡ ይሁዳ ፡ እኁሁ ፡ ዘይንእስ ፤ ወበእንተዝ ፡ ተሰምየ ፡ ይሁዳ ፤ ወተባረከ ፡ ዘርኡ ፡ ወሠነየ ፡ መንግሥቱ ፡ ወተባረኩ ፡ ደቂቁ ፡ ወእምድኅሬሁ ፡ ነግሠ ፡ ፋሬስ ፡ ወልዱ ፤ ውእቱኒ ፡ አዕረፈ ፡ ወነግሠ ፡ ኢሳሮም ፡ ወልዱ ፤ ወእምድኅሬሁ ፡ ነግሠ ፡ ኦርኒ ፡ ወልዱ ፤ ወእም ፡ ድኅሬሁ ፡ ነግሠ ፡ አራም ፡ ወልዱ ፤ ወእምድኅሬሁ ፡ ነግሠ ፡ አሚናዳብ ፡ ወልዱ ፤ ወእምድኅሬሁ ፡ ነግሠ ፡ ነአሶን ፡ ወልዱ ፤ ወእምድኅሬሁ ፡ ነግሠ ፡ ሳላ ፡ ወልዱ ፤ ወእምድኅሬሁ ፡ ነግሠ ፡ ባዖስ ፡ ወልዱ ፤ ወእምድኅሬሁ ፡ ነግሠ ፡ ኢዮቤድ ፡ ወልዱ ፤ ወእምድኅሬሁ ፡ ነግሠ ፡ እሴይ ፡ ወልዱ ፡ ወመንግሥተ ፡ ዘእቤ ፡ በረከተ ፡ አብ ፡ ላዕለ ፡ ወልድ ፡ ከመ ፡ ይትባረክ ፡ በሠናይ ፤ ወመንግሥትሰ ፡ ላዕለ ፡ እስራኤል ፡ እምድኅረ ፡ ሞተ ፡ እሴይ ፡ ነግሠ ፡ ዳዊት ፡ በጽድቅ ፡ ወበርትዕ ፡ ወበየውሀት ፨
=== chapter 17 ===
[፲ወ፯ ፡ በእንተ ፡ ክብራ ፡ ለጽዮን ።]
ወለጽዮንሰ ፡ ታቦተ ፡ ሕጉ ፡ ለእግዚኣብሔር ፡ አቅዲሙ ፡ ሰማየ ፡ ሣረረ ፡ ወሠምረ ፡ ትኩን ፡ በምድር ፡ ማኅደረ ፡ ስብሐቲሁ ፡ ፈቂዶ ፡ አውረዳ ፡ ለምድር ፡ ወወሀቦ ፡ ለሙሴ ፡ በአርአያ ፡ ይግበራ ፤ ወይቤሎ ፡ ግበር ፡ ታቦተ ፡ እምዕፅ ፡ ዘኢይነቅዝ ፡ ወትለብጦ ፡ በወርቅ ፡ ንጡፍ ፡ ወታነብር ፡ ውስቴታ ፡ ቃለ ፡ ሕግ ፡ ዘኪዳን ፡ ዘጸሐፍኩ ፡ በአጻብዕየ ፡ ከመ ፡ ይዕቀቡ ፡ ሕግየ ፡ ክልኤ ፡ ጽላተ ፡ ዘኪዳን ፡ ወሰማያዊትኒ ፡ መንፈሳዊት ፡ ውስቴታ ፡ ዘሕብራ ፡ ወግብራ ፡ ነኪር ፡ ትመስል ፡ ጥልማ ፡ ወወከይ ፡ ወወራውሬ ፡ ወዘውሀር ፡ ወብሉረ ፡ ወብርሃነ ፤ ወተሀይድ ፡ አዕይንተ ፡ ወትከብት ፡ ወትሰልብ ፡ ልበ ፤ እንተ ፡ በኅሊና ፡ እግዚኣብሔር ፡ ተገብረት ፡ ወአኮ ፡ በእደ ፡ ኬንያ ፡ ዘሰብእ ፡ አላ ፡ ለሊሁ ፡ ፈጠራ ፡ ለማኅደረ ፡ ስብሐቲሁ ፡ ወመንፈሳዊት ፡ ይእቲ ፡ ወምልእተ ፡ ምሕረት ፤ ሰማያዊት ፡ ይእቲ ፡ ወምልእተ ፡ ብርሃን ፤ አግዓዚት ፡ ይእቲ ፡ ወማኅደረ ፡ መለኮት ፡ ዘበሰማያት ፡ ማኅደራ ፡ ወበምድር ፡ ታንሶሱ ፡ ወምስለ ፡ ሰብእ ፡ ተኀድር ፡ ወምስለ ፡ መላእክት ፡ ሀገሪተ ፡ ሰብእ ፡ መድኀኒት ፡ ወለመንፈስ ፡ ቅዱስ ፡ ማኅደር ፡ ወውስቴታኒ ፡ ጎሞር ፡ ዘወርቅ ፡ ስፉር ፡ መና ፡ ዘወረደ ፡ እምሰማያት ፤ ወበትረ ፡ አሮን ፡ እንተ ፡ ጸገየት ፡ እምድኅረ ፡ የብሰት ፡ ዘእንበለ ፡ ይስቅይዋ ፡ ማየ ፤ ወውእቱኒ ፡ ሰበራ ፡ ክልኤተ ፡ ስብረተ ፡ ወኮነት ፡ ሠለስተ ፡ በትረ ፡ እንዘ ፡ አሐቲ ፡ ይእቲ ፨ ፡ ወቀፈላ ፡ በወርቅ ፡ ንጡፍ ፡ ወረሰየ ፡ ላቲ ፡ መጻውረ ፡ ወመማሥጠ ፡ ወመማስቀ ፤ ወይጸውርዋ ፡ ቅድመ ፡ ሕዝብ ፡ እስከ ፡ ያበውእዋ ፡ ምድረ ፡ ርስት ፡ እንተ ፡ ይእቲ ፡ ኢየሩሳሌም ፡ ሀገረ ፡ ጽዮን ፡ ወእንዘ ፡ ተዐዱ ፡ ዮርዳኖስ ፡ ወይጸውርዋ ፡ ካህናት ፡ ቆመ ፡ ማይ ፡ ከመ ፡ አረፍት ፡ እስከ ፡ የዐዱ ፡ ኵሉ ፡ ሕዝብ ፤ ወእምድኅረ ፡ ዐደዉ ፡ ኵሉ ፡ ሕዝብ ፡ ዐደዉ ፡ ካህናት ፡ ጸዊሮሙ ፡ ታቦተ ፡ ወአንበርዋ ፡ ውስተ ፡ ሀገረ ፡ ይሁዳ ፡ ምድረ ፡ ርስት ፡ ወተመልአኩ ፡ ነቢያት ፡ በውስተ ፡ ደብተራ ፡ ስምዕ ፡ ላዕሌሆሙ ፡ ለደቂቀ ፡ እስራኤል ፡ ወካህናትኒ ፡ ይጸውሩ ፡ ኤፉደ ፡ ከመ ፡ ይትለአኩ ፡ ለደብተራ ፡ መርጡል ፡ ወሊቃነ ፡ ካህናትኒ ፡ ያዐርጉ ፡ መሥዋዕተ ፡ ከመ ፡ ያስተስርዩ ፡ በእንተ ፡ ኀጢአቶሙ ፡ ወእምዝ ፡ በእንተ ፡ ኀጢአተ ፡ ሕዝብ ፨ ፡ ወአዘዞሙ ፡ እግዚኣብሔር ፡ ለሙሴ ፡ ወለአሮን ፡ ከመ ፡ ይግበሩ ፡ ንዋየ ፡ ቅድሳት ፡ ለደብተራ ፡ ስምዕ ፡ ዘይሠራዕ ፡ በውስተ ፡ ቅድስተ ፡ ቅዱሳን ፤ ንዋየ ፡ ወርቅ ፡ ጸሀራተ ፡ ወጽዋዓተ ፡ ኰሳኰሳተ ፡ ወጥርጴዛተ ፡ ሠቃሥቃተ ፡ ወአርእስተ ፡ አዕማዳት ፡ ቀናዲለ ፡ ወመሳቅየ ፡ መኃትወ ፡ ወመሳውረ ፡ መራናተ ፡ ወመማሥጠ ፡ አዕያገ ፡ ወአብሕርተ ፡ ዲባጋተ ፡ ወአልባሰ ፡ አክሊላተ ፡ ወአክሚማተ ፡ ደርከኖ ፡ ወምጺጺተ ፡ ብሳጣተ ፡ ወሕብረ ፡ ከብድ ፡ ዕፍረተ ፡ ዘቅብአ ፡ ክህነት ፡ ወመንግሥት ፡ ወያክንተ ፡ ወሜላተ ፡ ነተ ፡ ክዑበ ፡ ወቡሱስ ፡ ጸጐረ ፡ ጠሊ ፡ ወማእሰ ፡ በግዕ ፡ ሕሱይ ፡ ወእብነ ፡ ሰርድዮን ፡ ወከርከዴን ፡ ወዘሰንፔር ፡ ወመረግድ ፡ በውስተ ፡ ደብተራ ፡ ዘስምዕ ፡ ኀበ ፡ ትነብር ፡ ጽዮን ፡ ማኅደረ ፡ ስብሐቲሁ ፡ ወይግበሩ ፡ ላቲ ፡ ከርሠ ፡ ሐመር ፡ ምስለ ፡ ክልኤ ፡ ጽላት ፡ እለ ፡ ጽሑፋን ፡ በአጽባዕተ ፡ እግዚኣብሔር ፡ ወትነብር ፡ ጽዮን ፡ ላዕሌሆሙ ፤ ወትገብር ፡ ላቲ ፡ ታቦተ ፡ እምዕፅ ፡ ዘኢይነቅዝ ፡ ኀበ ፡ ትነብር ፡ ጽዮን ፡ ዘክልኤ ፡ እመት ፡ ወመንፈቀ ፡ እመት ፡ ኑኃ ፡ ወእመት ፡ ወመንፈቀ ፡ እመት ፡ ግድማ ፡ ወትለብጦ ፡ በወርቅ ፡ ንጡፍ ፡ እንተ ፡ አፍአሁ ፡ ወውስጡ ፤ ወትገብር ፡ መዓብልቲሃ ፡ ወመቃፍልቲሃ ፡ በወርቅ ፡ ጽሩይ ፡ ወኆጻዳትኒ ፡ ዐውዳ ፡ ወትገብር ፡ ውስተ ፡ ፬ ፡ መሳምክቲሃ ፡ ፬ ፡ ከበሎ ፡ መሳክሚሃ ፡ ወትገብር ፡ እምነ ፡ ዕፅ ፡ ዘኢይነቅዝ ፡ ወትለብጦ ፡ በወርቅ ፡ ንጡፍ ፡ ወቦቱ ፡ ትጸውርዋ ፡ ለታቦተ ፡ ሕግ ፨ ፡ ከመዝ ፡ አዘዞ ፡ እግዚኣብሔር ፡ ለሙሴ ፡ በደብረ ፡ ሲና ፡ ወአርአዮ ፡ ግብራ ፡ ወሥርዐታ ፡ ወሕብራ ፡ ለደብተራ ፡ ከመ ፡ ይግበር ፡ ወከብረት ፡ ወዐብየት ፡ ፈድፋደ ፡ በውስተ ፡ እስራኤል ፡ ወበኀበ ፡ እግዚኣብሔር ፡ ተአምነት ፡ ለማኅደረ ፡ ስብሐቲሁ ፤ ወይወርድ ፡ ለሊሁ ፡ ውስተ ፡ ደብረ ፡ መቅደሱ ፡ ወይትናገሮሙ ፡ ለኅሩያኒሁ ፡ ወይፈትሕ ፡ ሎሙ ፡ ለአድኅኖ ፡ ወያድኅኖሙ ፡ እምእደ ፡ ፀሮሙ ፤ ወይትናገሮሙ ፡ በዐምደ ፡ ደመና ፡ ከመ ፡ ይዕቀቡ ፡ ሕጎ ፡ ወሥርዐቶ ፡ ወይሖሩ ፡ በትእዛዙ ፡ ለእግዚኣብሔር ፨ ፨ ፨ ፨ ፨
=== chapter 18 ===
[፲ወ፰ ፡ ኀበ ፡ ኀብሩ ፡ አበው ፡ ጳጳሳት ።]
ካዕበ ፡ አውሥኡ ፡ ማኅበረ ፡ ፫፻፲ወ፰ ፡ ወ ፡ ይቤሉ ፡ አሜን ፤ ዛቲኬ ፡ ይእቲ ፡ መድኀኒቶሙ ፡ ለደቂቀ ፡ አዳም ፡ እስመ ፡ ታቦተ ፡ ሕጉ ፡ ለእግዚኣብሔር ፡ እምከመ ፡ ወረደት ፡ ተሰምዩ ፡ ሰብአ ፡ ቤቱ ፡ ለእግዚኣብሔር ፤ በከመ ፡ ይቤ ፡ ዳዊት ፡ ወማኅደሮሂ ፡ ውስተ ፡ ጽዮን ፤ ወካዕበ ፡ ይቤ ፡ በአፈ ፡ መንፈስ ፡ ቅዱስ ፡ ወማኅደርየ ፡ ዝየ ፡ እስመ ፡ ኀረይክዋ ፡ ወእባርኮሙ ፡ ለካህናቲሃ ፡ ወኣስተፈሥሖሙ ፡ ለነዳያኒሃ ፤ ወለዳዊትኒ ፡ እሁቦ ፡ ዘርአ ፡ በውስቴታ ፡ በዲበ ፡ ምድርኒ ፡ ዘይከውን ፡ ንጉሠ ፡ ወበሰማያትኒ ፡ ይነግሥ ፡ እምዘርኡ ፡ በሥጋ ፡ ዲበ ፡ መንበረ ፡ መለኮት ፤ ወጸላእቱኒ ፡ ይገብኡ ፡ ታሕተ ፡ መከይደ ፡ እገሪሁ ፡ ወይትኀተሙ ፡ በማኅተመ ፡ ዚአሁ ፨ ፨ ፨ ፨
=== chapter 19 ===
[፲፱ ፡ በእንተ ፡ ኀበ ፡ ተረከበት ፡ ዛቲ ፡ መጽሐፍ ።]
ወይቤ ፡ ሊቀ ፡ ጳጳሳት ፡ ዘሮሜ ፡ ድማትዮስ ፤ አንሰ ፡ ረከብኩ ፡ መጽሐፈ ፡ በውስተ ፡ ቤተ ፡ ሶፍያ ፡ እምውስተ ፡ መጻሕፍት ፡ ወመዛግብተ ፡ ንጉሥ ፡ ከመ ፡ ኵላ ፡ መንግሥተ ፡ ዓለም ፡ ለንጉሠ ፡ ሮሜ ፡ ወለንጉሠ ፡ ኢትዮጵያ ፨ ፨ ፨ ፨ ፨ ፨
=== chapter 20 ===
[፳ ፡ በእንተ ፡ ክፍለ ፡ ምድር ።]
እመንፈቃ ፡ ለኢየሩሳሌም ፡ ወእምደቡባ ፡ እስከ ፡ መስዕ ፡ ሠረቃዊ ፡ ክፍሉ ፡ ለንጉሠ ፡ ሮም ፤ ወእመንፈቃ ፡ ለኢየሩሳሌም ፡ እምደቡባ ፡ እስከ ፡ መስዕ ፡ ወህንድ ፡ ዐረባዊ ፡ ክፍሉ ፡ ለንጉሠ ፡ ኢትዮጵያ ፡ እስመ ፡ ክልኤሆሙ ፡ ዘርአ ፡ ሴም ፡ ወልደ ፡ ኖሕ ፡ ዘርአ ፡ አብርሃም ፡ ዘርአ ፡ ዳዊት ፡ ደቂቀ ፡ ሰሎሞን ፡ እሙንቱ ፤ እስመ ፡ እግዚኣብሔር ፡ ወሀቦሙ ፡ ክብረ ፡ ለዘርአ ፡ ሴም ፡ በእንተ ፡ በረከተ ፡ አቡሆሙ ፡ ኖሕ ፡ ንጉሠ ፡ ሮምሂ ፡ ወልደ ፡ ሰሎሞን ፡ ውእቱ ፡ ወንጉሠ ፡ ኢትዮጵያ ፡ ወልደ ፡ ሰሎሞን ፡ በኰሩ ፡ ውእቱ ፡ ዘይልህቅ ፨ ፨
=== chapter 21 ===
[፳፩ ፡ በእንተ ፡ ንግሥተ ፡ አዜብ ።]
ወዘከመ ፡ ተወልደሂ ፡ ውእቱ ፡ ረከብኩ ፡ ጽሑፍ ፡ ውስቴቱ ፡ ለውእቱ ፡ መጽሐፍ ፤ እስመ ፡ ከመዝ ፡ ዘከርዋ ፡ ወንጌላዊያን ፡ ለይእቲ ፡ ብእሲት ፤ ወእግዚእነሂ ፡ ኢየሱስ ፡ ክርስቶስ ፡ ይቤ ፡ እንዘ ፡ ይወቅሦሙ ፡ ለሕዝበ ፡ አይሁድ ፡ ሰቃልያን ፡ እለ ፡ አሜሃ ፡ ትውልድ ፡ እንዘ ፡ ይብል ፤ ንግሥተ ፡ አዜብ ፡ ትትነሣእ ፡ አመ ፡ ዕለተ ፡ ኰነኔ ፡ ወትትዋቀሦሙ ፡ ወትትፋትሖሙ ፡ ወትመውኦሙ ፡ ለዛቲ ፡ ትውልድ ፡ እለ ፡ ኢሰምዑ ፡ ስብከተ ፡ ቃልየ ፤ እስመ ፡ ለሊሃ ፡ መጽአት ፡ እምአጽናፈ ፡ ምድር ፡ ከመ ፡ ትስማዕ ፡ ጥበቢሁ ፡ ለሰሎሞን ፡ ወዘይቤ ፡ ንግሥተ ፡ አዜብ ፡ ንግሥተ ፡ ኢትዮጵያ ፡ ይእቲ ፤ ወአጽናፈ ፡ ምድርሰ ፡ ዘተብህለ ፡ በእንተ ፡ ድካመ ፡ ፍጥረት ፡ ዘአንስት ፡ ወበእንተ ፡ ርሕቀ ፡ ፍኖት ፡ ወላህበ ፡ ፀሐይ ፡ ወበእንተ ፡ ረኃበ ፡ ፍኖት ፡ ወጽምአ ፡ ማይ ፨ ፡ ወይእቲሰ ፡ ንግሥተ ፡ አዜብ ፡ ሠናይት ፡ ጥቀ ፡ በራእያኒ ፡ በላሕያኒ ፡ ወበአእምሮ ፡ ወልቡና ፡ ዘወሀባ ፡ እግዚኣብሔር ፡ ከመ ፡ ትሖር ፡ ኢየሩሳሌም ፡ ከመ ፡ ትስማዕ ፡ ጥበቢሁ ፡ ለሰሎሞን ፤ እስመ ፡ በፈቃደ ፡ እግዚኣብሔር ፡ ተገብረ ፡ ዝንቱ ፡ ወኮነ ፡ ሥምረቱ ፡ ወይእቲሰ ፡ ባዕልት ፡ ጥቀ ፡ በዘ ፡ ወህባ ፡ እግዚኣብሔር ፡ ክብረ ፡ ወብዕለ ፡ ወርቀ ፡ ወብሩረ ፡ ወአልባሰ ፡ ክቡረ ፡ ወአግማለ ፡ ወአግብርተ ፡ ወነጋድያነ ፡ ወይነግዱ ፡ ላቲ ፡ ባሕረ ፡ ወየብሰ ፡ ወህንደኬ ፡ ወአስዋነ ፨ ፨
=== chapter 22 ===
[፳፪ ፡ በእንተ ፡ ታምሪን ፡ ነጋዲ ።]
ወሀለወ ፡ ፩ ፡ ልብው ፡ ሊቀ ፡ ነጋድያን ፡ ዘስሙ ፡ ተምሪን ፡ ወይጽዕን ፡ ፭፻ ፡ ወ፳ ፡ አግማለ ፡ ወአሕማረኒ ፡ ቦቱ ፡ መጠነ ፡ ፸ወ፫ ፡ ወሰሎሞን ፡ ንጉሥ ፡ አሜሃ ፡ ፈቀደ ፡ ከመ ፡ ይሕንጽ ፡ ቤተ ፡ እግዚኣብሔር ፡ ወለአከ ፡ ውስተ ፡ ኵሉ ፡ ነጋድያን ፡ ለምሥራቅ ፡ ወለምዕራብ ፡ ለደቡብ ፡ ወለሰሜን ፡ ከመ ፡ ይምጽኡ ፡ ነጋድያን ፡ ወይንሥኡ ፡ በኀቤሁ ፡ ወርቀ ፡ ወብሩረ ፡ ወውእቱኒ ፡ ይንሣእ ፡ ዘይትፈቀድ ፡ ለግብር ፡ ወነገርዎ ፡ በእንተ ፡ ውእቱ ፡ ነጋዲ ፡ ኢትዮጵያዊ ፡ ባዕል ፡ ወለአከ ፡ ከመ ፡ ያምጽእ ፡ ሎቱ ፡ ዘይትፈቀድ ፡ እምብሔረ ፡ ዐረብ ፡ ወርቀ ፡ ቀዪሐ ፡ ወዕፀ ፡ ዘኢይነቅዝ ፡ ጸሊመ ፡ ወሰንፔረ ፡ ። ወሖረ ፡ ውእቱ ፡ ነጋዲ ፡ ዘስሙ ፡ ተምሪን ፡ ነጋዲሃ ፡ ለንግሥተ ፡ ኢትዮጵያ ፡ ኀበ ፡ ሰሎሞን ፡ ንጉሥ ፤ ወነሥአ ፡ ኵሎ ፡ ዘፈቀደ ፡ እምኔሁ ፡ ወወሀቦ ፡ ለነጋዲ ፡ ዘይፈቅድ ፡ አፈድፍዶ ፡ እምንዋዩ ፡ ወውእቱሰ ፡ ነጋዲ ፡ ልብው ፡ ፈድፋደ ፡ ወይሬኢ ፡ ጥበቢሁ ፡ ለሰሎሞን ፡ ወያነክር ፡ ወይትዐቀብ ፡ ከመ ፡ ይጠይቅ ፡ አውሥኦተ ፡ ቃሉ ፡ ወፍትሖ ፡ ወሣእሣአ ፡ አፉሁ ፡ ወጣዕመ ፡ ነገሩ ፡ ወሑረቶ ፡ ወንብረቶ ፡ ወተንሥኦቶ ፡ ወግብሮ ፡ ወፍቅሮ ፡ ወሥርዐቶ ፡ ወማእዶ ፡ ወሕጎ ፡ ወለእለኒ ፡ ይኤዝዞሙ ፡ ምስለ ፡ ትሕትና ፡ ወየውሀት ፤ ወሶበኒ ፡ አበሱ ፡ ይምሕሮሙ ፡ እስመ ፡ በጥበብ ፡ ወበፍርሀተ ፡ እግዚኣብሔር ፡ ይሠርዕ ፡ ቤቶ ፤ ወያክሞስሶሙ ፡ በየውሀት ፡ ለአብዳን ፡ ወይሤርሖን ፡ በየውሀት ፡ ለአእማት ፡ ወይከሥት ፡ አፉሁ ፡ በአምሳል ፤ ወይጥዕም ፡ ቃሉ ፡ እምጸቃውዐ ፡ መዓር ፡ ወኵሉ ፡ ግብሩ ፡ ፍትው ፡ ወኵሉ ፡ ርእየቱ ፡ አዳም ፤ እስመ ፡ ትትፈቀር ፡ ጥበብ ፡ በኀበ ፡ ማእምራን ፡ ወትትሜነን ፡ በኀበ ፡ አብዳን ፡ ወዘንተ ፡ ኵሎ ፡ ርኢዮ ፡ ያስተዐጽብ ፡ ውእቱ ፡ ነጋዲ ፡ ወያነክር ፡ ፈድፋደ ፡ እስመ ፡ ለእለ ፡ ይሬእይዎ ፡ ኵለንታሁ ፡ መፍትው ፡ ወመምህር ፡ ውእቱ ፤ ወእለኒ ፡ በጽሑ ፡ ኀቤሁ ፡ ኢይፈቅዱ ፡ ይእትቱ ፡ ወይትገሐሡ ፡ እምኔሁ ፡ በእንተ ፡ ጥበቡ ፡ ወላሕዩ ፤ ወጣዕመ ፡ ነገሩ ፡ ከመ ፡ ማይ ፡ ለጽሙእ ፡ ወከመ ፡ ኅብስት ፡ ለ ፡ ርኁብ ፡ ወከመ ፡ ፈውስ ፡ ለድዉይ ፡ ወከመ ፡ ልብስ ፡ ለዕሩቅ ፡ ወከመ ፡ አብ ፡ ለእጓለ ፡ ማውታ ፤ ወይፈትሕ ፡ በጽድቅ ፡ ወኢያደሉ ፡ ለገጽ ፤ ወቦቱ ፡ ክብረ ፡ ወብዕለ ፡ ዘወሀቦ ፡ እግዚኣብሔር ፡ ፈድፋደ ፡ ወርቀ ፡ ወብሩረ ፡ ወዕንቈ ፡ ወአልባሰ ፡ ክቡረ ፡ ወእንስሳ ፡ ወአራዊት ፡ ዘአልቦ ፡ ኆልቈ ፡ ወበመዋዕሊሁሰ ፡ ለሰሎሞን ፡ ንጉሥ ፡ ኮነ ፡ ወርቅ ፡ ከመ ፡ ብርት ፡ ወብሩር ፡ ከመ ፡ ዐረር ፡ ወብርትሰ ፡ ወዐረር ፡ ወኀጺን ፡ ኮነ ፡ ብዝኁ ፡ ከመ ፡ ዕፀ ፡ ባሕሩስ ፡ ወከመ ፡ ብርዐ ፡ ገዳም ፡ ወዕፀ ፡ ቄድሮስኒ ፡ ብዙኀ ፡ ኮነ ፤ በዘ ፡ ወሀቦ ፡ እግዚኣብሔር ፡ ክብረ ፡ ወብዕለ ፡ ወጥበበ ፡ ወሞገሰ ፡ ዘኢኮኑ ፡ ከማሁ ፡ እለ ፡ እምቅድሜሁ ፡ ወኢይከውኑ ፡ እምድኅሬሁ ፡ ዘከማሁ ፨ ፨ ፨ ፨ ፨ ፨ ፨ ፨ ፨ ፨
=== chapter 23 ===
[፳፫ ፡ ኀበ ፡ ገብአ ፡ ነጋዲ ፡ ኢትዮጵያ ።]
ወእምዝ ፡ ፈተወ ፡ ነጋዲ ፡ ተምሪን ፡ ከመ ፡ ይግባእ ፡ ብሔሮ ፡ ወሖረ ፡ ኀቤሁ ፡ ለሰሎሞን ፡ ወሰገደ ፡ ሎቱ ፡ ወአምኆ ፡ ወይቤሎ ፤ ሰላም ፡ ለዕበይከ ፡ ፈንወኒ ፡ እሖር ፡ ብሔርየ ፡ ኀበ ፡ እግዝእትየ ፡ እስመ ፡ ጐንደይኩ ፡ በርኢየ ፡ ክብርከ ፡ ወጥበብከ ፡ ወበብዙኅ ፡ መባልዕት ፡ ዘትጼግወኒ ፤ ወይእዜሰ ፡ አሐውር ፡ ኀበ ፡ እግዝእትየ ፤ እስመ ፡ እምፈተውኩ ፡ እንበር ፡ ምስሌከ ፡ ከመ ፡ ፩ ፡ እምአግብርቲከ ፡ እምእለ ፡ ይቴሐቱ ፤ ብፁዓንሰ ፡ እለ ፡ ይሰምዑ ፡ ቃለከ ፡ ወይገብሩ ፡ ትእዛዘከ ፤ እስመ ፡ እምፈተውኩ ፡ እንበር ፡ ዝየ ፡ ወኢይትፈለጥ ፡ እምኔከ ፤ አላ ፡ ባሕቱ ፡ ፈንወኒ ፡ ኀበ ፡ እግዝእትየ ፡ በእንተ ፡ ምዕቅብና ፡ ዘላዕሌየ ፡ ከመ ፡ አሀባ ፡ ንዋያ ፡ ወለሊየኒ ፡ ገብር ፡ ላቲ ፡ ወቦአ ፡ ሰሎሞን ፡ ቤቶ ፡ ወወሀቦ ፡ ኵሎ ፡ ዘይትፈቀድ ፡ ክብረ ፡ ለብሔረ ፡ ኢትዮጵያ ፡ ወፈነዎ ፡ በሰላም ፤ ወሰገደ ፡ ወወፅአ ፡ ወሖረ ፡ ፍኖቶ ፡ ወበጽሐ ፡ ኀበ ፡ እግዝእቱ ፡ ወአወፈያ ፡ ኴሎ ፡ ንዋየ ፡ ዘአእተወ ። ወነገራ ፡ ዘከመ ፡ በጽሐ ፡ ሀገረ ፡ ይሁዳ ፡ ኢየሩሳሌም ፡ ኀበ ፡ ሰሎሞን ፡ ንጉሥ ፡ ወኴሎ ፡ ዘሰምዐ ፡ ወዘርእየ ፡ ነገራ ፡ ዘከመ ፡ ይገብር ፡ ፍትሐ ፡ ወዘከመ ፡ ይትናገር ፡ ንጽሐ ፡ ወዘከመ ፡ ይኤዝዝ ፡ ርትዐ ፡ በኴሉ ፡ ዘሐተቶ ፡ ያወሥእ ፡ በየውሀት ፡ ወአልቦ ፡ ሐሰት ፡ በኀቤሁ ፡ ወዘከመኒ ፡ ሤመ ፡ ነዳእተ ፡ ገባር ፡ እለ ፡ ይጸውሩ ፡ ዕፀ ፡ ኣርሶን ፡ በበ፯፻ ፡ ወወቀርተ ፡ እብን ፡ ፰፻ ፡ እምነ ፡ ኴሉ ፡ ነጋድያን ፡ ወሠያጥያን ፡ ዘከመ ፡ የኀሥሥ ፡ ለኪነ ፡ ጥበብ ፡ ወምግባር ፡ ወዘከመ ፡ ይነሥእ ፡ ወይሁብ ፡ በካዕበት ፡ ወኴሉ ፡ ኪኑ ፡ ወግብሩ ፡ በጥበብ ። ወይነግራ ፡ ለለጸብሐት ፡ ኵሎ ፡ ጥበበ ፡ ሰሎሞን ፡ ከመ ፡ ይገብር ፡ ፍትሐ ፡ ወዘከመ ፡ ይገብር ፡ ርትዐ ፡ ወዘከመ ፡ ይሠርዕ ፡ ማእደ ፡ ወዘከመ ፡ ይገብር ፡ ምሳሐ ፡ ወዘከመ ፡ ይሜህር ፡ ጥበበ ፡ ወዘከመ ፡ ይኤዝዝ ፡ አግብርቲሁ ፡ ወኴሎ ፡ ሥሩዕ ፡ በምክር ፡ ወየሐውሩ ፡ በቃሉ ፡ ወአልቦ ፡ ዘይትዔገል ፡ ካልኡ ፡ ወአልቦ ፡ ዘይዔምፅ ፡ ንዋየ ፡ ቢጹ ፡ ወአልቦ ፡ ሀያዲ ፡ ወኢሰራቂ ፡ በመዋዕሊሁ ፤ እስመ ፡ በጥበብ ፡ ያአምር ፡ ለእለ ፡ ስሕቱ ፡ ወይቀሥፎሙ ፡ ወያፈርሆሙ ፡ ወኢይደግሙ ፡ እኩየ ፡ አላ ፡ በሰላም ፡ ይነብሩ ፡ ምስለ ፡ ፍርሀተ ፡ ንጉሥ ። ወዘንተ ፡ ኴሎ ፡ ይነግራ ፡ ወለለ ፡ ጸብሐት ፡ ይዜክር ፡ ዘርእየ ፡ በኀበ ፡ ንጉሥ ፡ ወይነግራ ፤ ወታስተደምም ፡ በዘ ፡ ሰምዐት ፡ እምኀበ ፡ ነጋዲ ፡ ገብራ ፡ ወትኄሊ ፡ በልባ ፡ ከመ ፡ ትሖር ፡ ኀቤሁ ፡ ወትበኪ ፡ እምብዝኀ ፡ ፍቅራ ፡ በዘ ፡ ነገራ ፡ ወታፈቅር ፡ ፈድፋደ ፡ ሐዊረ ፡ ኀቤሁ ፡ ወትኄሊ ፡ ኅሊና ፡ ሐዊረ ፡ ኀቤሁ ፡ ወታስተራሕቅ ፡ ወታስተዐጽብ ። ወካዕበ ፡ ተሐትት ፡ ወይነግራ ፡ ካዕበ ፡ ትፈቱ ፡ ወታስተአድም ፡ ሐዊረ ፡ ከመ ፡ ትስማዕ ፡ ጥበቢሁ ፡ ወትርአይ ፡ ገጾ ፡ ወተአምኅ ፡ ኪያሁ ፡ ወትግነይ ፡ ለመንግሥቱ ፤ ወአጥብዐት ፡ ልባ ፡ ከመ ፡ ትሖር ፡ ኀቤሁ ፡ ወእግዚኣብሔርኒ ፡ አጥብዐ ፡ ልባ ፡ ከመ ፡ ትሖር ፡ ወአፍተዋ ፨ ፡ ወእምዝ ፡ አኀዘት ፡ ትሥራዕ ፡ ቤታ ፡ ወተአዝዝ ፡ አግብርቲሃ ፡ ወትምዐድ ፡ ኢእማቲሃ ፡ ወታስተሣኒ ፡ ንዋያ ፤ ወተኀሥሥ ፡ ዘይትፈቀድ ፡ ለፍኖት ፡ ወለአምኃ ፡ ለንጉሥ ፡ ወለውሂብ ፡ ለመኳንንቲሃ ፡ ወለዕሴተ ፡ አእማቲሃ ። ወአስተጋብአት ፡ ራኩባተ ፡ ወአብቅልተ ፡ ወአፍራሰ ፡ ወአእዱገ ፡ ወአሕማረ ፡ ወአርማሰ ፡ ወመጻፍነ ፡ ወአሕስለ ፡ ወመሣንቀ ፡ ወመሳትየ ፡ ወመጻውረ ፤ ወተደለወትከ ፡ መትሖር ፡ ወአዘዘት ፡ ለኴሉ ፡ መኳንንቲሃ ፡ እለ ፡ እምታሕቴሃ ፡ ከመ ፡ ይደለዉ ፡ ለፍኖት ፡ እስከ ፡ ፮ ፡ አውራኅ ፡ ወይንሥኡ ፡ መሣንቀ ፡ ወይሥርዑ ፡ አብያቲሆሙ ፡ እስመ ፡ ርሑቅ ፡ ብሔር ፡ ኀበ ፡ የሐውሩ ፨ ፨
=== chapter 24 ===
[፳፬ ፡ ኀበ ፡ ተደለወት ፡ ለሐዊር ።]
ወትቤሎሙ ፡ ስምዑ ፡ ቃልየ ፡ እሊአየ ፡ ወአፅምኡኒ ፡ ነገርየ ፤ እስመ ፡ አንሰ ፡ እፈቅድ ፡ ጥበበ ፡ ወልብየኒ ፡ ተኀሥሣ ፡ ለአእምሮ ፤ እስመ ፡ ተነደፍኩ ፡ በፍቅረ ፡ ጥበብ ፡ ወተስሕብኩ ፡ በአሕባለ ፡ አእምሮ ፤ እስመ ፡ ትኄይስ ፡ ጥበብ ፡ እመዝገበ ፡ ወርቅ ፡ ወብሩር ፤ ጥበብሰ ፡ ትኄይስ ፡ እምነ ፡ ኴሉ ፡ ዘተፈጥረ ፡ ዲበ ፡ ምድር ። በምንትኬ ፡ ያስተማስልዋ ፡ ለጥበብ ፡ በታሕተ ፡ ሰማይ ፤ ትጥዕም ፡ እምነ ፡ መዓር ፡ ወታስተፌሥሕ ፡ እምነ ፡ ወይን ፡ ወታበርህ ፡ እምነ ፡ ፀሐይ ፡ ወትትፈቀር ፡ እምነ ፡ ዕንቌ ፡ ክቡር ፡ ወታጠልል ፡ እምነ ፡ ቅብእ ፡ ወታጸግብ ፡ እምነ ፡ መባልዕት ፡ ጥዑማት ፡ ወታከብር ፡ እምነ ፡ አእላፍ ፡ ወርቅ ፡ ወብሩር ፤ መስተፈሥሒት ፡ ለልብ ፡ ወመብርሂት ፡ ለአዕይንት ፡ ወከዋው ፡ ለእግር ፡ ወድርዕ ፡ ለእንግድኣ ፡ ወጌራ ፡ ለርእስ ፡ ወብዝጋና ፡ ለክሳድ ፡ ወመቀነቲ ፡ ለሐቌያት ፡ ወመስምዕ ፡ ለአእዛን ፡ ወመጥበቢ ፡ ለአልባብ ፡ ወትምህርት ፡ ለማእምራን ፡ ወመናዘዚ ፡ ለልቡባን ፡ ወወሃቤ ፡ ክብር ፡ ለኀሣሥያን ። ወመንግሥትኒ ፡ ኢይቀውም ፡ ዘእንበለ ፡ ጥበብ ፡ ወብዕልኒ ፡ ኢይትዐቀብ ፡ ዘእንበለ ፡ ጥበብ ፡ ወእግርኒ ፡ ኢይጸንዕ ፡ ኀበ ፡ ኬደ ፡ ዘእንበለ ፡ ጥበብ ፡ ወልሳንኒ ፡ ኢይትፈቀር ፡ ዘተናገረ ፡ ዘእንበለ ፡ ጥበብ ። ጥበብሰ ፡ ትኄይስ ፡ እምነ ፡ ኴሉ ፡ መዛግብት ፤ ዘዘገበ ፡ ወርቀ ፡ ወብሩረ ፡ ኢይበቈዕ ፡ ዘእንበለ ፡ ጥበብ ፤ ወዘዘገበ ፡ ጥበበ ፡ አልቦ ፡ ዘየሀይዶ ፡ እምነ ፡ ልቡ ፤ ወዘዘገኩ ፡ አብዳን ፡ ይበልዑ ፡ ጠቢባን ፡ ወበእንተ ፡ እከዮሙ ፡ ለዐማፅያን ፡ ይትዌደሱ ፡ ጻድቃን ፡ ወበእንተ ፡ ስሐተቶሙ ፡ ለአብዳን ፡ ይትፈቀሩ ፡ ጠቢባን ። ጥበብሰ ፡ ልዕልት ፡ ይእቲ ፡ ወብዕልት ፡ አነ ፡ ኣፈቅራ ፡ ከመ ፡ እም ፡ ወይእቲ ፡ ተሐቅፈኒ ፡ ከመ ፡ ሕፃና ፡ አነ ፡ እተሉ ፡ አሠራ ፡ ለጥበብ ፡ ወይእቲ ፡ ተዐቅበኒ ፡ እስከ ፡ ለዓለም ፡ አነ ፡ አኀሥሣ ፡ ለጥበብ ፡ ወይእቲ ፡ ትከውነኒ ፡ ለዝሉፉ ፡ እተሉ ፡ አሠራ ፡ ወኢይትገደፍ ፡ እምኔሃ ፡ ኣሰምክ ፡ ባቲ ፡ ወትከውነኒ ፡ ጥቅመ ፡ አድማስ ፡ እጸወን ፡ ባቲ ፡ ወትከውነኒ ፡ ኀይለ ፡ ወጽንዐ ፡ እትፌሣሕ ፡ ባቲ ፡ ወትከውነኒ ፡ ሞገሰ ፡ ብዙኀ ። እስመ ፡ ርቱዕ ፡ ንትሉ ፡ አሠራ ፡ ለጥበብ ፡ ወይልካእ ፡ ሰኰናነ ፡ ውስተ ፡ መድረከ ፡ ኆኃቲሃ ፡ ለጥበብ ፤ ንኅሥሣ ፡ ወንረክባ ፡ ናፍቅራ ፡ ወኢትርሕቅ ፡ እምኔነ ፡ ንዴግና ፡ ወንረክባ ፡ ንስአላ ፡ ወንነሥኣ ፤ ንሚጥ ፡ ልበነ ፡ ኀቤሃ ፡ ከመ ፡ ኢንርስዓ ፡ በኴሉ ፡ ጊዜ ፡ እስመ ፡ ለእመ ፡ ዘከርዋ ፡ ትዜክር ፡ ለሊሃ ፤ ወበኀበ ፡ አብዳንሰ ፡ ኢትዘክር ፡ ጥበበ ፡ እስመ ፡ ኢያከብርዋ ፡ ወኢታፈቅሮሙ ። ወክብራሰ ፡ ለጥበብ ፡ አክብሮ ፡ ጠቢብ ፡ ወፍቅራኒ ፡ ለጥበብ ፡ አፍቅሮቱ ፡ ለጠቢብ ፤ አፍቅሮ ፡ ለጠቢብ ፡ ወኢትርሐቅ ፡ እምኔሁ ፡ ወበራእየ ፡ ዚዓሁ ፡ ትከውን ፡ ጠቢብ ፤ ስማዕ ፡ መክሥተ ፡ አፉሁ ፡ ከመ ፡ ትኩን ፡ ከማሁ ፡ ወርኢ ፡ መከይደ ፡ እገሪሁ ፡ ከመ ፡ ታንብር ፡ ኀበ ፡ ኬደ ፡ ውእቱ ፡ ወኢትሰስል ፡ እምኔሁ ፡ ከመ ፡ ትንሣእ ፡ ተረፋተ ፡ ጥበቡ ። ወአንሰ ፡ በሰሚዕኒ ፡ አፍቀርክዎ ፡ ዘእንበለ ፡ እርአዮ ፤ እስመ ፡ ኴሉ ፡ ዜና ፡ ነገሩ ፡ በኀቤየ ፡ ኮነ ፡ ፍትወ ፡ ለልብየ ፡ ከመ ፡ ማይ ፡ ለጽሙእ ፨ ፡ አውሥኡ ፡ ወይቤልዋ ፡ መኳንንቲሃ ፡ ወአግብርቲሃ ፡ ወአእማቲሃ ፡ ወመማክርቲሃ ፡ እግዝእትነ ፡ ጥበብሰ ፡ ኢተኀጥአ ፡ እምኔኪ ፡ ወበጥበብኪ ፡ ዘታፈቅሪ ፡ ጥበበ ፤ ወንሕነሰ ፡ እመኒ ፡ ሖርኪ ፡ ነሐውር ፡ ምስሌኪ ፡ ወእመኒ ፡ ነበርኪ ፡ ንነብር ፡ ምስሌኪ ፡ ወትኩን ፡ ሞትነ ፡ ምስለ ፡ ሞትኪ ፡ ወሕይወትነ ፡ ምስለ ፡ ሕይወትኪ ፨ ፡ ወእምዝ ፡ ተደለወት ፡ ለሐዊር ፡ በብዙኅ ፡ ክብር ፡ ወግርማ ፡ በዐቢይ ፡ ሥንቅ ፡ ወተድላ ፤ እስመ ፡ ፈተወ ፡ ልባ ፡ በፈቃደ ፡ እግዚኣብሔር ፡ ከመ ፡ ትሖር ፡ ኢየሩሳሌም ፡ ከመ ፡ ትስማዕ ፡ ጥበቢሁ ፡ ለሰሎሞን ፤ እስመ ፡ ሰምዐት ፡ ወጽህቀት ። ተደለወት ፡ ለሐዊር ፤ ወተጽዕነ ፡ ራኩብ ፡ ፯፻ወ፺ ፡ ወ፯ ፡ ወበቅልሰ ፡ ወዓድግ ፡ ዘአልቦ ፡ ኆልቈ ፡ ተጽዕነ ፤ ወሖረት ፡ ወዓርትዐት ፡ ፍኖታ ፡ እንዘ ፡ ይትዌከል ፡ ልባበ ፡ እግዚኣብሔር ፨ ፨ ፨ ፨ ፨ ፨ ፨ ፨
=== chapter 25 ===
[፳፭ ፡ ዘከመ ፡ በጽሐት ፡ ኀበ ፡ ሰሎሞን ፡ ንጉሥ ።]
ወበጽሐት ፡ ኢየሩሳሌም ፡ ወአብአት ፡ አምኃ ፡ ለንጉሥ ፡ ብዙኀ ፡ ክብረ ፡ ዘይትፈቀድ ፡ ሎቱ ፤ ወውእቱኒ ፡ አክበራ ፡ ወተፈሥሐ ፡ ወወሀባ ፡ ማኅደረ ፡ በታዕካ ፡ መንግሥት ፡ ዘቅሩብ ፡ ኀቤሁ ። ወይፌኑ ፡ ላቲ ፡ ድራረ ፡ ወምሳሐ ፡ ለለ ፡ አሐቲ ፡ ጊዜ ፡ ፲ወ፭ ፡ በመስፈርተ ፡ ቆሪ ፡ ስንዳሌ ፡ ስሉቀ ፡ ብሱለ ፡ ምስለ ፡ ቅብእ ፡ ወመጣብቅ ፡ ብዙኅ ፡ ወ፴ ፡ በመስፈርተ ፡ ቆሪ ፡ ስንዳሌ ፡ ልቱመ ፡ በዘተገብረ ፡ ኅብስተ ፡ ፫፻ወ፶ ፡ ምስለ ፡ ጠቢቁ ፡ በዘባድው ፤ ወ፲ ፡ መግዝዓ ፡ ላህምወ ፡ ፭ ፡ ዓስዋር ፡ ወ፶ ፡ አባግዕ ፡ ዘእንበለ ፡ ወይጠል ፡ ወሀየል ፡ ወቶራ ፡ ወመግዝአ ፡ ዶርሆ ፡ ወጻሕበ ፡ ወይን ፡ ፰ ፡ መሳፍረ ፡ ግረት ፡ ወከራሚ ፡ ፴ ፡ ወእምነ ፡ መዛርያን ፡ ወመዛርያት ፡ በበ፳ወ፭ ፡ ወጸቃውዐ ፡ ወመዓንጠ ፡ ወእምነ ፡ ሲሳዩ ፡ ዘይበልዕ ፡ ወእምነ ፡ ስታይ ፡ ዘይሰቲ ። ወለለ ፡ ዕለት ፡ ያለብስ ፡ በበ ፡ ፲ወ፩ ፡ ዘየሀይድ ፡ አዕይንተ ፤ ወየሐውር ፡ ኀቤሃ ፡ ወይትናዘዝ ፡ ወይእቲኒ ፡ ተሐውር ፡ ኀቤሁ ፡ ወትትናዘዝ ፡ ወትሬኢ ፡ ጥበቦ ፡ ወፍትሖ ፡ ወክብሮ ፡ ወሞገሶ ፡ ወጣዕመ ፡ ነገሩ ፤ ወታነክር ፡ በልባ ፡ ወታስተአድም ፡ በኅሊናሃ ፡ ወትጤይቅ ፡ በአእምሮ ፡ ወታስተሓይጽ ፡ በአዕይንቲሃ ፡ ዘከመ ፡ መፍትው ፡ ወታስተዐጽብ ፡ ፈድፋደ ፡ በእንተ ፡ ዘርእየት ፡ ወሰምዐት ፡ በኀቤሁ ፤ ከመፍጹም ፡ በስንኣ ፡ ወጠቢብ ። በኅሊና ፡ ወፍሡሕ ፡ በጸጋ ፡ ወላሕይ ፡ በግርማ ፡ ወቃሉኒ ፡ በጥይቅና ፡ ከናፍረሁኒ ፡ በሥእሥእና ፡ ወትእዛዙኒ ፡ በግርማ ፡ ወዘበሰላም ፡ ምስለ ፡ ፍርሀተ ፡ እግዚኣብሐር ፡ አውሥኦቶ ። ወዘንተ ፡ ኵሎ ፡ ትሬኢ ፡ ወታስተዐጽብ ፡ እምብዝኀ ፡ ጥበቡ ፡ ወአልቦ ፡ ወኢምንትኒ ፡ ንቱገ ፡ እምቃሉ ፡ ወእምነገሩ ፡ አላ ፡ ፍጹም ፡ ኴሉ ፡ ዘተናገረ ፨ ፡ ወይትጌበር ፡ ለሕንጻ ፡ ቤተ ፡ እግዚኣብሔር ፡ ወይትነሣእ ፡ ወየሐውር ፡ ይምነ ፡ ወፅግመ ፡ ቅድመ ፡ ወድኅረ ፡ ወያርእዮሙ ፡ መሳፍረ ፡ ወመዳልወ ፡ ወመሳውረ ፤ ወለኬነተ ፡ ነሀብትኒ ፡ ይነግሮሙ ፡ መሳፍለ ፡ ወመዋቅረ ፡ ወመጓንጵት ፡ ወለወቀርተ ፡ እብንኒ ፡ ያርእዮሙ ፡ መኣዝነ ፡ ወመንኰራኵረ ፡ ወመሳፍሐ ። ወኴሉ ፡ ይትገበር ፡ በቃሉ ፡ ወአልቦ ፡ ዘይትዐደው ፡ እምቃሉ ፤ እስመ ፡ ከመ ፡ ማኅቶት ፡ በውስተ ፡ ጽልመት ፡ ብርሃነ ፡ ልቡ ፡ ወከመ ፡ ኆጻ ፡ ብዝኀ ፡ ጥበቡ ፡ ወአልቦ ፡ ዘይሰወሮ ፡ እምቃለ ፡ አራዊት ፡ ወአዕዋፍ ፡ ወለዓጋንንትኒ ፡ ቀነዮሙ ፡ በጥበቡ ። ወኵሎ ፡ ይገብር ፡ በኪን ፡ ዘወሀቦ ፡ እግዚኣብሔር ፡ ሶበ ፡ ሰአለ ፡ ኀቤሁ ፤ እስመ ፡ ኢሰአለ ፡ መዊአ ፡ ፀሩ ፡ ወኢሰአለ ፡ ብዕለ ፡ ወክብረ ፡ አላ ፡ ሰአለ ፡ ጥበበ ፡ ወአእምሮ ፡ ከመ ፡ የሀቦ ፡ በዘ ፡ ይኴንን ፡ ሕዝቦ ፡ ወበዘ ፡ የሐንጽ ፡ ቤቶ ፡ ወበዘ ፡ ያሤኒ ፡ ተግባሮ ፡ ለእግዚኣብሔር ፡ በኵሉ ፡ ዘወሀቦ ፡ ጥበበ ፡ ወአእምሮ ፨ ፨
=== chapter 26 ===
[፳፮ ፡ ኀበ ፡ ተናገረ ፡ ንጉሥ ፡ ምስለ ፡ ንግሥት ።]
ወትቤ ፡ ንግሥት ፡ ማክዳ ፡ ለንጉሥ ፡ ሰሎሞን ፡ ብፁዕ ፡ አንተ ፡ እግዚእየ ፡ ዘከመዝ ፡ ለከ ፡ ተውህበ ፡ ጥበብ ፡ ወአእምሮ ፤ አንሰ ፡ እምፈተውኩ ፡ እኩን ፡ ከመ ፡ አሐቲ ፡ እንተ ፡ ትንእስ ፡ እምአእማቲከ ፡ ከመእኅፅብ ፡ እገሪከ ፡ ወእስማዕ ፡ ጥበበከ ፡ ወእለቡ ፡ አእምሮተከ ፡ ወእግነይ ፡ ለመንግሥትከ ፡ ወእትሐሠይ ፡ በጥበብከ ። ሚመጠነ ፡ አደመኒ ፡ አውሥኦትከ ፡ ወጣዕመ ፡ ቃልከ ፡ ወሠናየ ፡ ሑረትከ ፡ ወአዳም ፡ ንባብከ ፡ ወሣእሣአ ፡ ጣዕመ ፡ ቃልከ ፡ ወያስተፈሥሕ ፡ ልበ ፡ ወያጠልል ፡ አዕፅምተ ፡ ወይሜግብ ፡ ዓልባበ ፡ ወያጠአጥእ ፡ ወያሞግስ ፡ ከናፍረ ፡ ወያጸንዕ ፡ መከይደ ። ወእሬእየከ ፡ ከመ ፡ ጥበብከ ፡ ዘእንበለ ፡ መስፈርት ፡ ወልቡናከ ፡ ዘእንበለ ፡ ሕጸት ፡ ከመ ፡ ማኅቶት ፡ በውስተ ፡ ጽልመት ፡ ወከመ ፡ ሮማን ፡ በውስተ ፡ ገነት ፡ ወከመ ፡ ባሕርይ ፡ በውስተ ፡ ባሕር ፡ ወከመ ፡ ኮከበ ፡ ጽባሕ ፡ በውስተ ፡ ከዋክብት ፡ ወከመ ፡ ብርሃነ ፡ ወርኅ ፡ በውስተ ፡ ጊሜ ፡ ወከመ ፡ ጎሐ ፡ ጽባሕ ፡ ወሠርቀ ፡ ፀሐይ ፡ በውስተ ፡ ሰማይ ። ወአንሰ ፡ ኣአኵቶ ፡ ለዘ ፡ አብጽሐኒ ፡ ወአርዓየኒ ፡ ኪያከ ፡ ወዘአኬደኒ ፡ ውስተ ፡ መድረከ ፡ ኆኃቲከ ፡ ወአስምዐኒ ፡ ቃለከ ፨ ፡ ዓውሥአ ፡ ንጉሥ ፡ ሰሎሞን ፡ ወይቤላ ፡ ጥበብሰ ፡ ወልቡና ፡ እምኔኪ ፡ ሠረጸት ፤ ሊተሰ ፡ በዘ ፡ ወሀበኒ ፡ አምላከ ፡ እስራኤል ፡ ዘሰአልኩ ፡ ወኀሠሥኩ ፡ በኀቤሁ ፡ ወአንቲሰ ፡ እንዘ ፡ ኢታአምሪ ፡ ዓምላከ ፡ እስራኤል ፡ ዘንተ ፡ ጥበበ ፡ ዘአሥረጽኪ ፡ እምልብኪ ፡ ከመ ፡ ትርዓዪ ፡ ኪያየ ፡ ትሑተ ፡ ገብሩ ፡ ለዓምላኪየ ፡ ወቀዋሚሃ ፡ ለደብተራሁ ፡ ዘእቀውም ፡ ወእትለአክ ፡ ወኣንሶሱ ፡ ለእግዝእትየ ፡ ታቦተ ፡ ሕጉ ፡ ለአምላከ ፡ እስራኤል ፡ ጽዮን ፡ ቅድስት ፡ ሰማያዊት ። አንሰ ፡ ገብሩ ፡ ለአምላኪየ ፡ ወኢኮንኩ ፡ አግዓዜ ፡ ወኢኮንኩ ፡ ዘእትለአክ ፡ በፈቃድየ ፡ አላ ፡ በፈቃዱ ፤ ወዓኮ ፡ ዘንተ ፡ ቃለ ፡ እምኀቤየ ፡ አላ ፡ ውእቱ ፡ ዘአንበበኒ ፡ እነብብ ፤ ውእቱ ፡ ዘአዘዘኒ ፡ እገብር ፤ ውእቱ ፡ ዘሠርሐኒ ፡ አሐውር ፤ ውእቱ ፡ ዘመሀረኒ ፡ እትናገር ፤ ውእቱ ፡ ዘአጥበበኒ ፡ እሌቡ ፤ እስመ ፡ እንዘ ፡ መሬት ፡ አነ ፡ ሥጋ ፡ ረሰየኒ ፡ ወእንዘ ፡ ማይ ፡ አነ ፡ ሰብዓ ፡ ርጉዐ ፡ ረሰየኒ ፡ ወእንዘ ፡ ነጠብጣብ ፡ ንስቲት ፡ ምራቅ ፡ እንተ ፡ ትተፋእ ፡ ዲበ ፡ ምድር ፡ ወትየብስ ፡ መልዕልተ ፡ ምድር ፡ በአርአያሁ ፡ ለሐኰኒ ፡ ወበአምሳሊሁ ፡ ገብረኒ ፨ ፨ ፨ ፨
=== chapter 27 ===
[፳፯ ፡ በእንተ ፡ ገባራዊ ።]
ወእንዘ ፡ ዘንተ ፡ ይትናገራ ፡ ለንግሥት ፡ ርእዮ ፡ ለ፩ ፡ ገባር ፡ እንዘ ፡ ይጸውር ፡ እብነ ፡ ዲበ ፡ ርእሱ ፡ ወሳእረ ፡ ማይ ፡ ዲበ ፡ ክሳዱ ፡ ወስንቁ ፡ ወዓሣእኒሁ ፡ ውስተ ፡ ሐቌሁ ፡ ወለዕፀውኒ ፡ ደመሮን ፡ ውስተ ፡ እደዊሁ ፡ ወብሉያት ፡ ወሥጡጣት ፡ አልባሲሁ ፡ ወሃፉ ፡ ያንጠበጥብ ፡ እምነ ፡ ገጹ ፡ ወማየ ፡ ሳእርኒ ፡ ይውኅዝ ፡ ውስተ ፡ ሰኰናሁ ። ወኀለፈ ፡ እንተ ፡ ቅድሜሁ ። ወእንዘ ፡ የሐውር ፡ ይቤሎ ፡ ቁም ፡ ወቆመ ፤ ወተመይጠ ፡ ኀበ ፡ ንግሥት ፡ ወይቤላ ፡ ርእዪ ፡ ዘንተ ፡ ምንት ፡ ፍድፍድናየ ፡ እምነ ፡ ዝንቱ ፡ ወምንት ፡ ኅይስናየ ፡ እምነዝ ፡ ወምንት ፡ ክብርየ ፡ እምነ ፡ ከመዝ ፤ እስመ ፡ አነሂ ፡ ሰብእ ፡ ወሐመድ ፡ ዘጌሠመ ፡ እከውን ፡ ዕፄ ፡ ወጺአት ፡ ወይእዜ ፡ እንከ ፡ ኣስተርኢ ፡ ከመ ፡ ዘኢይመውት ፡ ለዓለም ። መኑ ፡ እምአግአዞ ፡ ለእግዚኣብሔር ፡ እመ ፡ ወሀቦ ፡ ለዝንቱ ፡ ከማየ ፡ ወሊተኒ ፡ ሶበ ፡ አገበረኒ ፡ ከማሁ ፤ አኮኑ ፡ ክልኤነ ፡ ሰንቡእ ፤ ሰብእ ፡ ብሂል ፤ ወከመ ፡ ሞተዝ ፡ ሞትየ ፡ ወከመ ፡ ሕይወተዝ ፡ ሕይወትየ ፡ ወዝንቱ ፡ ይጸንዕ ፡ በግብር ፡ እምኔየ ፡ እስመ ፡ ይሁቦሙ ፡ ኀይለ ፡ ለድኩማን ፡ በከመ ፡ ፈቀደ ፡ ለሊሁ ፤ ወይቤሎ ፡ ሖር ፡ ኀበ ፡ ግብርከ ፨ ፡ ወካዕበ ፡ ይቤላ ፡ ለንግሥት ፡ ምንት ፡ በቊዔትነ ፡ ለእጓለ ፡ እመሕያው ፡ ለእመ ፡ ኢገበርነ ፡ ንስሐ ፡ ወምሕረተ ፡ በዲበ ፡ ምድር ፤ አኮኑ ፡ ኵልነ ፡ ከንቱ ፡ ሣዕረ ፡ ገዳም ፡ ዘበጊዜሃ ፡ ይየብስ ፡ ወያውዕዮ ፡ እሳት ፤ በዲበ ፡ ምድር ፡ ንትረሰይ ፡ በመባልዕት ፡ ጥዑማት ፡ ወበአልባስ ፡ ክቡራት ፤ እንዘ ፡ ሕያዋን ፡ ጽዩኣን ፤ ወንትረሰይ ፡ በመዐዛት ፡ ወበዕፍረታት ፤ እንዘ ፡ ሕያዋን ፡ ምዉታን ፡ በኀጢዓት ፡ ወበዓበሳት ፤ እንዘ ፡ ጠቢባን ፡ ኮነ ፡ አብዳነ ፡ በኢሰሚዕ ፡ ወበዕልወታት ፤ እንዘ ፡ ክቡራን ፡ ኮነ ፡ ኅሱራነ ፡ በተጠይሮ ፡ ወበሰጊድ ፡ ለጣዖት ። ሰብእሰ ፡ ክቡር ፡ ዘተፈጥረ ፡ በአምሳለ ፡ እግዚኣብሔር ፡ ወለእመኒ ፡ ገብረ ፡ ሠናየ ፡ ይከውን ፡ ከመ ፡ እግዚኣብሔር ፤ ሰብእሰ ፡ ከንቱ ፡ ወለእመኒ ፡ ገብረ ፡ ኀጢአተ ፡ ይከውን ፡ ከመ ፡ ዲያብሎስ ፤ ዲያብሎስሰ ፡ ዕቡይ ፡ ዘዓበየ ፡ ተአዝዞ ፡ ለፈጣሪሁ ፡ ወኵሎሙ ፡ ዕቡያን ፡ እምሰብእ ፡ የሐውሩ ፡ በፍኖቱ ፡ ወይትኴነኑ ፡ ምስሌሁ ፤ ወእግዚኣብሔር ፡ ያፈቅሮሙ ፡ ለትሑታን ፡ ወእለ ፡ ይገብሩ ፡ ትሕትና ፡ የሐውሩ ፡ በፍኖቱ ፡ ወይትፌሥሑ ፡ በውስተ ፡ መንግሥቱ ፤ ወብፁዕሰ ፡ ዘአእመረ ፡ ጥበበ ፡ ዝውእቱ ፡ ንስሐ ፡ ወፈሪሀ ፡ እግዚኣብሔር ፨ ፡ ወዘንተ ፡ ሰሚዓ ፡ ንግሥት ፡ ትቤ ፡ ምንተ ፡ ሠነየኒ ፡ ቃልከ ፡ ወእፎ ፡ ሐወዘኒ ፡ ነገርከ ፡ ወመክሥተ ፡ አፉከ ። ንግረኒኬ ፡ ለዘ ፡ ይረትዕ ፡ ለዘ ፡ እሰግድ ፡ ሎቱ ፤ ወንሕነሰ ፡ ንሰግድ ፡ ለፀሐይ ፡ በከመ ፡ መሀሩነ ፡ አበዊነ ፡ እስመ ፡ ንብል ፡ ውእቱ ፡ ፀሐይ ፡ ንጉሦሙ ፡ ለአማልክት ፤ ወባዕዳንሂ ፡ እለ ፡ እምታሕቴነ ፡ ቦእለ ፡ ይሰግዱ ፡ ለዓእባን ፡ ወቦ ፡ እለ ፡ ይሰግዱ ፡ ለአዕዋም ፡ ወቦእለ ፡ ይሰግዱ ፡ ለግልፈዋት ፡ ወቦ ፡ እለ ፡ ይሰግዱ ፡ ለአምሳለ ፡ ወርቅ ፡ ወብሩር ፤ ወንሕነሰ ፡ ንሰግድ ፡ ለፀሐይ ፡ እስመ ፡ ውእቱ ፡ ያበስል ፡ ሲሳየ ፡ ወካዕበ ፡ ውእቱ ፡ ያበርህ ፡ ጽልመተ ፡ ወያአትት ፡ ፍርሀተ ፤ ንብሎ ፡ ንጉሥነ ፡ ወንብሎ ፡ ፈጣሪነ ፡ ወንሰግድ ፡ ሎቱ ፡ ከመ ፡ አምላክነ ፤ እስመ ፡ አልቦ ፡ ዘነገረነ ፡ ባዕደ ፡ ዓምላከ ፡ ዘእንበሌሁ ። ወባሕቱ ፡ ሰማዕነ ፡ ከመ ፡ ብክሙአ ፡ ለእስራኤል ፡ ካልአ ፡ አምላከ ፡ ዘኢናአምሮ ፡ ንሕነ ፡ ወዜነዉነ ፡ ከመ ፡ አውረደ ፡ ለክሙ ፡ ታቦተ ፡ እምሰማያት ፡ ወወሀበክሙ ፡ ጽላተ ፡ ሥርዐተ ፡ መላእክት ፡ በእደ ፡ ሙሴ ፡ ነቢዩ ፡ ሰማዕነ ፡ ዘንተ ፤ ወይወርድ ፡ አ ፡ ኀቤክሙ ፡ ለሊሁ ፡ ወይትናገረክሙ ፡ ወይኤምረክሙ ፡ ፍትሖ ፡ ወትእዛዞ ፨ ፨ ፨ ፨ ፨ ፨ ፨ ፨ ፨ ፨
=== chapter 28 ===
[፳፰ ፡ በእንተ ፡ ዘከመ ፡ አዘዛ ፡ ለንግሥት ።]
ወዓውሥአ ፡ ንጉሥ ፡ ወይቤላ ፡ በአማን ፡ ርቱዕ ፡ ይሰግዱ ፡ ለእግዚኣብሔር ፡ ለዘ ፡ ገብረ ፡ ኵሎ ፤ ሰማየ ፡ ወምድረ ፤ ወባሕረ ፡ ወየብሰ ፤ ፀሐየ ፡ ወወርኀ ፤ ከዋክብተ ፡ ወጸዳላተ ፤ ዕፀወ ፡ ወአእባነ ፤ እንስሳ ፡ ወአዕዋፈ ፤ ዓራዊተ ፡ ወሐርገጻተ ፤ ዓሣተ ፡ ወዐናብርተ ፤ ቢሐተ ፡ ወዐንጐጓተ ፤ መባርቅተ ፡ ወፀዓዓተ ፤ ደመናተ ፡ ወነጐድጓደ ፤ ሠናያነ ፡ ወእኩያነ ። ሎቱ ፡ ለባሕቲቱ ፡ ንስግድ ፡ ይደሉ ፡ በፍርሀት ፡ ወበረዓድ ፡ በፍሥሓ ፡ ወበሐሤት ፤ እስመ ፡ ውእቱ ፡ እግዚአ ፡ ኵሉ ፡ ፈጣሬ ፡ መላእክት ፡ ወሰብእ ፡ ወውእቱ ፡ ይቀትል ፡ ወያሐዩ ፡ ወውእቱ ፡ ይቀሥፍ ፡ ወይሣሀል ፡ ዘያነሥኦ ፡ ለነዳይ ፡ እምድር ፡ ወያሌዕሎ ፡ እመሬት ፡ ለምስኪን ፡ ወያሐዝን ፡ ወያስተፌሥሕ ፡ ያዐርግ ፡ ወያወርድ ፤ ዓልቦ ፡ ዘይግእዞ ፡ እስመ ፡ እግዚእ ፡ ውእቱ ፡ ለኵሉ ፡ ወዓልቦ ፡ ዘይብሎ ፡ ምንተ ፡ ገበርከ ፤ ወሎቱ ፡ ይደሉ ፡ ስብሐት ፡ ወአኰቴት ፡ እምኀበ ፡ መላእክት ፡ ወሰብእ ። ወበእንተ ፡ ዘትብሊሰ ፡ ወሀበክሙ ፡ ታቦተ ፡ ሕግ ፡ በአማን ፡ ተውህበት ፡ ለነ ፡ ታቦተ ፡ አምላከ ፡ እስራኤል ፡ እንተ ፡ ተፈጥረት ፡ እምቅድመ ፡ ኵሉ ፡ ፍጥረት ፡ በምክረ ፡ ስብሐቲሁ ፤ ወትእዛዞሂ ፡ አውረደ ፡ ለነ ፡ ጽሒፎ ፡ ከመ ፡ ናእምር ፡ ፍትሖ ፡ ወኰነኔሁ ፡ ዘሠርዐ ፡ በደብረ ፡ መቅደሱ ፨ ፡ ወትቤ ፡ ንግሥት ፡ እምይእዜሰ ፡ ኢይሰግድ ፡ ለፀሐይ ፡ አላ ፡ እሰግድ ፡ ለፈጣሬ ፡ ፀሐይ ፡ አምላከ ፡ እስራኤል ፤ ወይእቲ ፡ ታቦተ ፡ አምላከ ፡ እስራኤል ፡ ትኩነኒ ፡ እግዝእትየ ፡ ሊተ ፡ ወለዘርእየ ፡ እምድኅሬየ ፡ ወለኵሉ ፡ መንግሥትየ ፡ እለ ፡ እምታሕቴየ ። ወበእንተዝ ፡ ኢነ ፡ ረከብኩ ፡ ሞገሰ ፡ በቅድሜከ ፡ ወበቅድመ ፡ አምላከ ፡ እስራኤል ፡ ፈጣሪየ ፡ ዘአብጽሐኒ ፡ ኀቤከ ፡ ወአስምዐኒ ፡ ቃልከ ፡ ወአርአየኒ ፡ ገጽከ ፡ ወአለበወኒ ፡ ትእዛዝከ ፨ ፡ ወአተወት ፡ ቤተ ፡ ወወትረ ፡ ተሐውር ፡ ወትገብእ ፡ ወትሰምዕ ፡ ጥበቢሁ ፡ ወተዐቅብ ፡ በልባ ፤ ወውእቱኒ ፡ የሐውር ፡ ኀቤሃ ፡ ወይነግራ ፡ ኵሎ ፡ ዘተስእለቶ ፡ ወይእቲኒ ፡ ተሐውር ፡ ኀቤሁ ፡ ወትሴአሎ ፡ ወያየድዓ ፡ ኵሎ ፡ ዘፈተወት ። ወእምድኅረ ፡ ነበረት ፡ ፮ ፡ አውራኀ ፡ ፈቀደት ፡ ገቢዓ ፡ ብሔራ ፡ ወለአከት ፡ ኀቤሁ ፡ እንዘ ፡ ትብል ፤ ወአንሰአ ፡ እምፈተውኩ ፡ እንበር ፡ ምስሌከ ፡ ወይእዘሰ ፡ በእንተ ፡ ኵሉ ፡ ሕዝብ ፡ እፈቅድ ፡ ገቢዓ ፡ ብሔርየ ፤ ወዘንተ ፡ ዘሰማዕኩ ፡ ይረስዮ ፡ እግዚኣብሔር ፡ ዘይፈሪ ፡ በውስተ ፡ ልብየ ፡ ወውስተ ፡ ልበ ፡ ኵሎሙ ፡ እለ ፡ ሰምዑ ፡ ምስሌየ ፤ እስመ ፡ ኢይመልእ ፡ እዝን ፡ በአፅምኦ ፡ ወኢይመልእ ፡ ዐይን ፡ በነጽሮ ፡ ጥበብከ ። ወአኮ ፡ ይእቲ ፡ ባሕቲታ ፡ ዘትመጽእ ፡ አላ ፡ ብዙኃን ፡ ይመጽኡ ፡ እምአህጉር ፡ ወበሓውርት ፡ እምቅሩብ ፡ ወእምርሑቅ ፡ እስመ ፡ አልቦ ፡ ዘተረክበ ፡ ከማሁ ፡ በጥበብ ፡ በውእቱ ፡ መዋዕል ፤ ወአኮ ፡ ሰብእ ፡ ባሕቲቶሙ ፡ ዘይመጽኡ ፡ ኀቤሁ ፡ ወዓዲ ፡ ዓራዊትኒ ፡ ወአዕዋፍ ፡ ይመጽኡ ፡ ኀቤሁ ፡ ወይሰምዑ ፡ ቃሎ ፡ ወያነክሩ ፡ ጥበቦ ፡ ወይትናገሩ ፡ ምስሌሁ ፡ ወይገብኡ ፡ ብሔሮሙ ፡ ወኵሉ ፡ ያነክር ፡ ጥበቢሁ ፡ ወያነክር ፡ በዘ ፡ ርእየ ፡ ወሰምዐ ፨ ፡ ወሶበ ፡ ለአከት ፡ ኀቤሁ ፡ ከመ ፡ ትሖር ፡ ብሔራ ፡ ኀለየ ፡ በልቡ ፡ ወይቤ ፡ ዘመጠነዝ ፡ ላሕይት ፡ ብእሲት ፡ መጽአት ፡ ኀቤየ ፡ እምአጽናፈ ፡ ምድር ፡ ምንተ ፡ ኣአምር ፡ እመ ፡ ይሁበኒ ፡ እግዚኣብሔር ፡ ዘርአ ፡ በውስቴታ ። በከመ ፡ ተብህለ ፡ ውስተ ፡ መጽሐፈ ፡ ነገሥት ፤ ወሰሎሞንሰ ፡ ንጉሥ ፡ መፍቀሬ ፡ አንስት ፡ ውእቱ ፡ ወአውሰበ ፡ እምነ ፡ ዕብራዊያን ፡ ወግብጻዊያን ፡ ወከነናዊያን ፡ ወኢዶማዊያን ፡ ወኢዮባዊያን ፤ ወእምሪፍ ፡ ወኰርጐ ፡ ወድሚሲቅ ፡ ወሱርስት ፤ ወእምእለ ፡ ነገርዎ ፡ እለ ፡ ሠናይ ፡ ላሕዮን ፤ ወኮና ፡ ንግሥታት ፡ ፬፻ ፡ ወዕቁባት ፡ ፮፻ ፡ ወዘንተሰ ፡ ዘገብረ ፡ አኮ ፡ በዘምዎ ፡ አላ ፡ በኀልዮ ፡ ጥበብ ፡ ዘወሀቦ ፡ እግዚኣብሔር ፡ ወተዘኪሮ ፡ ዘይቤሎ ፡ ለአብርሃም ፡ ኣበዝኅ ፡ ዘርእከ ፡ ከመ ፡ ኮከበ ፡ ሰማይ ፡ ወከመ ፡ ኆጻ ፡ ባሕር ። ወይቤ ፡ በልቡ ፡ ምንተ ፡ ኣአምር ፡ እመ ፡ ይሁበኒ ፡ እግዚኣብሔር ፡ ተባዕተ ፡ ውሉደ ፡ በበ ፡ ፩ ፡ ለለ ፡ አሐቲ ፡ እምኔሆን ፤ ወበእንተዝ ፡ ተጠቢቦ ፡ ገብረ ፡ ከመዝ ፡ እንዘ ፡ ይብል ፡ ደቂቅየ ፡ ይረሱ ፡ አህጉረ ፡ ፀር ፡ ወይሠርውዎሙ ፡ ለእለ ፡ ያመልኩ ፡ ጣዖተ ። ወእሙንቱሰ ፡ ቀዳሚ ፡ ሕዝብ ፡ ነበሩ ፡ በሕግ ፡ ዘሥጋ ፡ እስመ ፡ ኢተውህቦሙ ፡ ጸጋ ፡ ዘመንፈስ ፡ ቅዱስ ፤ ወለእለ ፡ እምድኅረ ፡ ክርስቶስሰ ፡ ተውህቦሙ ፡ ይንበሩ ፡ በአሐቲ ፡ ብእሲት ፡ በሕገ ፡ ሰብሳብ ፤ ወሠርዑ ፡ ሎሙ ፡ ሐዋርያት ፡ እንዘ ፡ ይብሉ ፡ እለ ፡ ነሥኡ ፡ ሥጋሁ ፡ ወደሞ ፡ ኵሎሙ ፡ አኀው ፡ እሙንቱ ፡ እሞሙ ፡ ቤተ ፡ ክርስቲያን ፡ ወአቡሆሙ ፡ እግዚኣብሔር ፤ ወይጸርኁ ፡ ምስለ ፡ ክርስቶስ ፡ ዘተመጠዉ ፡ እንዘ ፡ ይብሉ ፡ አቡነ ፡ ዘበሰማያት ። ወለሰሎሞንሰ ፡ ኢተሠርዐ ፡ ሎቱ ፡ በአንስት ፡ ወኢኮኖ ፡ ጌጋየ ፡ በአውስቦ ፤ ወለመሀይምናንሰ ፡ ተውህቦሙ ፡ ሕገ ፡ ወትእዛዘ ፡ ከመ ፡ ኢያብዝኁ ፡ አንስተ ፡ በከመ ፡ ይቤ ፡ ጳውሎስ ፡ እለሰ ፡ ብዙኀ ፡ አንስተ ፡ አውሰቡ ፡ መቅሠፍተ ፡ ኀሠሡ ፡ ለርእሶሙ ፡ ወዘሰ ፡ አውሰበ ፡ አሐተ ፡ ብእሲተ ፡ አልቦ ፡ ኀጢአተ ። ወሕገ ፡ እኅት ፡ ከላእነ ፡ ዘበእንተ ፡ ወሊድ ፡ ይቤሉ ፡ ሐዋርያት ፡ በውስተ ፡ ሲኖዶስ ፨ ፨ ፨ ፨ ፨ ፨ ፨
=== chapter 29 ===
[፳፱ ፡ በእንተ ፡ ፫፻፲ወ፰ ።]
ወንሕነኒ ፡ ሠራዕነ ፡ ምስሌሆሙ ፡ ጠዩቀነ ፡ ዘነበቡ ፡ እለ ፡ እምቅድሜነ ፡ ሐዋርያት ፤ ንሕነ ፡ ፫፻፲ወ፰ ፡ አርታዕነ ፡ ወዓስተራታዕነ ፡ ሃይማኖተ ፡ እንዘ ፡ እግዚእነ ፡ ኢየሱስ ፡ ክርስቶስ ፡ ምስሌነ ፤ ወውእቱ ፡ ሠርዐ ፡ ለነ ፡ ዘከመ ፡ ንሜህር ፡ ወዘከመ ፡ ንገብር ፡ ሃይማኖተ ፨ ፡ ወውእቱሰ ፡ ንጉሥ ፡ ሰሎሞን ፡ ለአከ ፡ ላቲ ፡ ለንግሥት ፡ እንዘ ፡ ይብል ፤ እምድኅረ ፡ መጻእኪሰ ፡ ዝየአ ፡ ለምንት ፡ ተሐውሪ ፡ ዘእንበለ ፡ ትርአዪ ፡ ሕገ ፡ መንግሥት ፤ ወዘከመ ፡ ይትገበር ፡ ድራር ፡ ለኅሩያነ ፡ መንግሥትነ ፡ በአምሳለ ፡ ጻድቃን ፡ ወዘከመ ፡ ይሰደዱ ፡ አሕዛብ ፡ በአምሳለ ፡ ኃጥኣን ፤ ወእምኔሁ ፡ ትረክቢ ፡ ጥበበ ። ኒዒ ፡ በድኅሬየ ፡ ወትነብሪ ፡ በጸዳልየ ፡ በደባትር ፡ ወእፌጽም ፡ ለኪ ፡ ወታአምሪ ፡ ሕገ ፡ መንግሥትኒ ፤ እስመ ፡ አፍቀርኪያ ፡ ለጥበብ ፡ ወትነብር ፡ ምስሌኪ ፡ እስከ ፡ ደኃሪትኪ ፡ ወለዓለምኒ ። እስመ ፡ ትንቢት ፡ ያስተርኢ ፡ በኀበ ፡ ልሳን ። ወካዕበ ፡ ይእቲኒ ፡ ለአከት ፡ እንዘ ፡ ትብል ፤ እንዘ ፡ ዓብድ ፡ አነ ፡ ኮንኩ ፡ ጠባበ ፡ በተሊወ ፡ ጥበብከ ፡ ወእንዘ ፡ ምንንት ፡ እምአምላከ ፡ እስራኤል ፡ ኮንኩ ፡ ኅሪት ፡ በእንተ ፡ ዛቲ ፡ አሚኖት ፡ እንተ ፡ ውስተ ፡ ልብየ ፡ ወእምይእዘሰ ፡ ኢያመልክ ፡ ባዕደ ፡ ዘእንበሌሁ ፤ ወበዝንቱሰ ፡ ዘትቤ ፡ ፈቀድከ ፡ ከመ ፡ ትወስከኒ ፡ ጥበበ ፡ ወክብረ ፡ ወእመጽእ ፡ በከመ ፡ ፈቀድከ ፨ ፡ ወተፈሥሐ ፡ ሰሎሞን ፡ በእንተዝ ፡ ወአልበሶሙ ፡ ለኅሩያኒሃ ፡ ወወሰከ ፡ ካዕበተ ፡ ዲበ ፡ ማእዱ ፡ ወአዘዘ ፡ በአስተጠአጥኦ ፡ ኵሎ ፡ ሥርዐተ ፡ ቤቱ ፡ ወኵሎ ፡ ዕለተ ፡ እንዘ ፡ ድሉት ፡ ቤቱ ፡ ለሰሎሞን ፡ ንጉሥ ፤ ወአሜሃ ፡ አስተዳለዋ ፡ በክብር ፡ ፈድፋደ ፡ በፍሥሓ ፡ ወበሰላም ፡ በጥበብ ፡ ወበምሕረት ፡ ምስለ ፡ ኵሉ ፡ ትሕትና ፡ ወየውሀት ። ወእምዝ ፡ ተሠርዐ ፡ ማእድ ፡ ዘንጉሥ ፡ በከመ ፡ ሕገ ፡ መንግሥት ፤ ወንግሥትኒ ፡ ቦአት ፡ እንተ ፡ መፍልስት ፡ በጸዳል ፡ ወበክብር ፡ ወነበረት ፡ አንጻረ ፡ ድኅሬሁ ፡ ኀበ ፡ ትሬኢ ፡ ወትትኤመር ፡ ወትጤይቅ ፡ ኵሎ ፤ ወታነክር ፡ ፈድፋደ ፡ በዘ ፡ ርእየት ፡ ወበዘ ፡ ሰምዐት ፡ ወትሴብሖ ፡ በልባ ፡ ለአምላከ ፡ እስራኤል ፡ ወታስተዐጽብ ፡ ክብረ ፡ ቤተ ፡ መንግሥት ፡ ዘርእየት ። እስመ ፡ ትሬኢ ፡ ለሊሃ ፡ ወላቲሰ ፡ አልቦ ፡ ዘይሬኢያ ፡ በከመ ፡ ገብረ ፡ ላቲ ፡ በጥበብ ፡ ዘአሠነየ ፡ ምንባራ ፡ ነጺፎ ፡ ሜላተ ፡ ወረቢቦ ፡ ቢሳጣተ ፡ ወገቢሮ ፡ ምስካተ ፡ ወአብላቀ ፡ ወአፍራጸ ፡ ነዚኆ ፡ ዕፍረታተ ፡ ወረቢቦ ፡ ሚዓተ ፡ ወሰሊካተ ፡ መሪጎ ፡ ቀንአተ ፡ ወስኂናተ ። ወሶበ ፡ ይበውእዎ ፡ ለውእቱ ፡ ማኅደር ፡ ፈድፋደ ፡ ሠናይ ፡ መዐዛሁ ፡ ወያጸግብ ፡ ዘእንበለ ፡ ይብልዑ ፡ መባልዕተ ፡ ጣዕመ ፡ ጼናሁ ። ወይፌኑ ፡ ላቲ ፡ መባልዐ ፡ መጻምአ ፡ በምክር ፡ ወበጥበብ ፡ ወመሳትየ ፡ መፂፃነ ፡ ሰመከ ፡ ወፍልፍለ ፡ ጠቢቃተ ፡ ወዘንተ ፡ ይገብር ፡ ወይሁባ ፡ ለንግሥት ፡ ከመ ፡ ትብላዕ ፡ እምኔሁ ፨ ፡ ወሶበ ፡ ተፈጸመ ፡ ሥልሰ ፡ ወስብዐ ፡ ማእደ ፡ ንጉሥ ፡ ወአተዉ ፡ መገብት ፡ ወመማክርት ፡ ወመሐዛት ፡ ወአግብርት ፡ ተንሥአ ፡ ንጉሥ ፡ ወሖረ ፡ ኀበ ፡ ንግሥት ፡ ወይቤላ ፡ በባሕቲቶሙ ፡ ተናዘዚ ፡ ዝየ ፡ በእንተ ፡ ፍቅር ፡ እስከ ፡ ነግህ ። ወትቤሎ ፡ መሐል ፡ ሊተ ፡ በአምላክከ ፡ አምላከ ፡ እስራኤል ፡ ከመ ፡ ኢትትኀየለኒ ፤ እመቦ ፡ ለእመ ፡ ተስሕትኩ ፡ ሕገ ፡ ሰብእ ፡ ነኣስ ፡ እወርድ ፡ ውስተ ፡ ጻማ ፡ ወሕማም ፡ ወምንዳቤ ፡ በፍኖት ፨ ፨ ፨ ፨ ፨ ፨ ፨ ፨ ፨
=== chapter 30 ===
[፴ ፡ በእንተ ፡ ዘመሐለ ፡ ላቲ ፡ ንጉሥ ፡ ሰሎሞን ።]
አውሥኣ ፡ ወይቤላ ፡ እምሕል ፡ ለኪ ፡ ከመ ፡ ኢይትኀየልኪ ፡ ወባሕቱ ፡ አንቲኒ ፡ መሐሊ ፡ ከመ ፡ ኢትትኀየሊ ፡ ኵሎ ፡ ዘውስተ ፡ ቤትየ ፤ ወሰሐቀት ፡ ንግሥት ፡ ወትቤሎ ፡ እንዘ ፡ ጠቢብ ፡ አንተ ፡ ለምንት ፡ ከመ ፡ አብድ ፡ ትትናገር ፤ እሰርቅኑ ፡ ወሚመ ፡ አሀይድ ፡ ቤተ ፡ ንጉሥ ፡ ዘኢወሀበኒ ፡ ንጉሥ ፤ ኢይምሰልከ ፡ እግዚእየ ፡ በፍቅረ ፡ ንዋይ ፡ ዘመጻእኩ ፡ ዝየ ፡ ወመንግሥትየኒ ፡ ብዕልት ፡ በጸጋከ ፡ ወአልቦ ፡ ዘይትኀጥአኒ ፡ እምዘ ፡ ፈቀድኩ ፤ አላ ፡ ዳእሙ ፡ መጻእኩ ፡ በኀሢሠ ፡ ጥበብከ ። ወይቤላ ፡ ለእመ ፡ አንቲ ፡ አምሐልክኒ ፡ መሐሊ ፡ ሊተ ፡ ወማሕላሰ ፡ ይደሉ ፡ ለ፪ ፡ ከመ ፡ ኢይትዓመፁ ፤ ወለእመ ፡ ኢያምሐልክኒ ፡ ኢያምሕለኪ ፡ አነሂ ። ወትቤሎ ፡ መሐል ፡ ሊተ ፡ ከመ ፡ ኢትትኀየለኒ ፡ ወአነሂ ፡ እምሕል ፡ ከመ ፡ ኢይትኀየል ፡ ንዋየከ ፤ ወመሐለ ፡ ላቲ ፡ ወአምሐላ ፨ ፡ ወዐርገ ፡ ንጉሥ ፡ ዲበ ፡ ምስካቡ ፡ በ፩ ፡ ገጽ ፡ ወላቲኒ ፡ አስተዳለዉ ፡ ላቲ ፡ ምስካበ ፡ በ፩ ፡ ገጽ ። ወይቤሎ ፡ ለሕፃን ፡ ገብር ፡ ኅፅብ ፡ መቃልደ ፡ ወደይ ፡ ጻሕበ ፡ ማይ ፡ እንዘ ፡ ትሬኢ ፡ ንግሥት ፡ ወዕጸው ፡ ኀዋኅወ ፡ ወኑም ፤ ወዘንተ ፡ ዘይቤሎ ፡ በካልእ ፡ ልሳን ፡ ዘኢታአምር ፡ ንግሥት ፤ ወገብረ ፡ ከማሁ ፡ ወኖመ ። ወንጉሥሰ ፡ ዓዲሁ ፡ ኢኖመ ፡ ወይሬሲ ፡ ርእሶ ፡ ከመ ፡ ንዉም ፡ ወያስተሓይጽ ፤ ወቤቱሰ ፡ ለሰሎሞን ፡ ንጉሥ ፡ ሌሊተኒ ፡ ብርህት ፡ ከመ ፡ መዐልት ፡ እስመ ፡ ገብረ ፡ በጥበብ ፡ ባሕርያተ ፡ ብሩሃተ ፡ አምሳለ ፡ ፀሐይ ፡ ወወርኅ ፡ ወከዋክብት ፡ ውስተ ፡ ጠፈረ ፡ ቤቱ ፨ ፡ ወንግሥትኒ ፡ ኖመት ፡ ንስቲተ ፡ ወሶበ ፡ ነቅሀት ፡ የብሰ ፡ አፉሃ ፡ በጽምእ ፡ እስመ ፡ በጥበቡ ፡ ዘወሀባ ፡ መጻምአ ፡ ወፈድፋደ ፡ ጸምአት ፡ ወየብሰ ፡ አፉሃ ፡ ወአርመስመሰት ፡ አፉሃ ፡ ወኢረከበት ፡ ጠለ ፤ ወኀለየት ፡ ሰቲየ ፡ ማይ ፡ ዘርእየት ፡ ወአስተሓየጸት ፡ ወነጸረት ፡ ኀበ ፡ ንጉሥ ፡ ሰሎሞን ፡ ወመሰላ ፡ ዘኖመ ፡ ጽኑዐ ፡ ንዋመ ፤ ወውእቱሰ ፡ ኢኖመ ፡ አላ ፡ ይጸንሕ ፡ እስከ ፡ ትትነሣእ ፡ ከመ ፡ ትስርቅ ፡ ማየ ፡ ለጽምአ ። ወተንሥአት ፡ እንዘ ፡ ኢታደምፅ ፡ በእገሪሃ ፡ ወሖረት ፡ ኀበ ፡ ውእቱ ፡ ማየ ፡ መቅለድ ፡ ወአንሥአት ፡ ከመ ፡ ትስተይ ፡ ማየ ፤ ወአኀዛ ፡ እዴሃ ፡ ዘእንበለ ፡ ትስተይ ፡ ማየ ፡ ወይቤላ ፡ ለምንት ፡ ተዐደውኪ ፡ ማሕላ ፡ ዘመሐልኪ ፡ ከመ ፡ ኢትትኀየሊ ፡ ኵሎ ፡ ዘውስተ ፡ ቤትየ ። ወአውሥአት ፡ በፍርሀት ፡ ወትበ ፡ ቦኑ ፡ ተዐድዎ ፡ ማሕላ ፡ በሰቲየ ፡ ማይ ፤ ወይቤላ ፡ ንጉሥ ፡ ቦኑ ፡ ዘርኢኪ ፡ ዘይኄይስ ፡ እምነ ፡ ማይ ፡ በታሕተ ፡ ሰማይ ፤ ወትበ ፡ አበስኩ ፡ ለርእስየ ፡ ወአንተሰ ፡ ንጹሕ ፡ እምነ ፡ ማሕላ ፡ ወኅድገኒ ፡ እስተይ ፡ ማየ ፡ ለጽምእየ ፤ ወይቤላ ፡ ዮጊኬ ፡ ኮንኩኑ ፡ ንጹሐ ፡ እማሕላኪ ፡ ዘአምሐልክኒ ፤ ወትበሎ ፡ ንግሥት ፡ ኩን ፡ ንጹሐ ፡ እማሕላ ፡ ወባሕቱ ፡ ኅድገኒ ፡ እስተይ ፡ ማየ ። ወኀደጋ ፡ ትስተይ ፡ ማየ ፡ ወእምድኅረ ፡ ሰትየት ፡ ማየ ፡ ገብረ ፡ ፈቃዶ ፡ ወኖሙ ፡ ኅቡረ ፨ ፡ ወእምድኅረ ፡ ኖመ ፡ አስተርአዮ ፡ ለሰሎሞን ፡ ንጉሥ ፡ ፀሐይ ፡ ብሩህ ፡ ወረደት ፡ እምሰማያት ፡ ወአብርሀት ፡ ላዕለ ፡ እስራኤል ፡ ፈድፋደ ፤ ወእምዝ ፡ ጐንዲያ ፡ ግብተ ፡ ተመሥጠት ፡ ወሰረረት ፡ እስከ ፡ ብሔረ ፡ ኢትዮጵያ ፡ ወአብርሀት ፡ በህየኒ ፡ ፈድፋደ ፡ እስከ ፡ ለዓለም ፡ እስመ ፡ አፍቀረት ፡ ነቢረ ፡ ህየ ፤ ወጐንደይኩ ፡ እመ ፡ ትገብእ ፡ ውስተ ፡ እስራኤል ፡ ወኢገብአት ፤ ወካዕበ ፡ ጐንዲዮ ፡ ሠረቀ ፡ ብርሃን ፡ ወወረደ ፡ ፀሐይ ፡ እምሰማያት ፡ ውስተ ፡ ብሔረ ፡ ይሁዳ ፡ ወአብርሀ ፡ ፈድፋደ ፡ እምቀዲሙ ፤ ወእስራኤልሰ ፡ አስተአከይዎ ፡ ለፀሐይ ፡ እምላህቡ ፡ ወኢሖሩ ፡ በብርሃኑ ፡ ወውእቱኒ ፡ ፀሐይ ፡ ተሀየዮሙ ፡ ለእስራኤል ፡ ወእሙንቱሂ ፡ ቀንኡ ፡ ላዕሌሁ ፡ ወተስእነ ፡ ሰላም ፡ ማእከሌሆሙ ፡ ወማእከለ ፡ ፀሐይ ፤ ወአንሥኡ ፡ እደዊሆሙ ፡ ላዕሌሁ ፡ ምስለ ፡ አብትር ፡ ወመጣብሕ ፡ ወፈቀዱ ፡ ከመ ፡ ያጥፍእዎ ፡ ለፀሐይ ፡ ወአጽለምዋ ፡ ለኵሉ ፡ ዓለም ፡ በድልቅልቅ ፡ ወጊሜ ፡ ወመሰሎሙ ፡ ዘኢይሠርቅ ፡ ሎሙ ፡ ዳግመ ፤ ወአማሰኑ ፡ ብርሃኖ ፡ ወደበይዎ ፡ ወዐቀቡ ፡ ዝኅሮ ፡ ኀበ ፡ ወደይዎ ፤ ወወፅአ ፡ እምኀበ ፡ ኢተሐዘብዎ ፡ ወአብርሀ ፡ ኵሎ ፡ ዓለመ ፡ ወፈድፋድሰ ፡ በቀዳሚ ፡ ባሕር ፡ ወ ፡ በደኃሪ ፡ ባሕር ፡ ለኢትዮጵያ ፡ ወለሮም ፤ ወለእስራኤልሰ ፡ ተሀየዮሙ ፡ ፈድፋደ ፡ ወዐርገ ፡ ዲበ ፡ መንበሩ ፡ ዘትካት ። ወዘንተ ፡ ራእየ ፡ ሶበ ፡ ርእየ ፡ እንዘ ፡ ንዉም ፡ ሰሎሞን ፡ ንጉሥ ፡ ደንገፀት ፡ ነፍሱ ፡ ወተመሥጠት ፡ ኅሊናሁ ፡ ከመ ፡ መብረቅ ፡ ወነቅሀ ፡ ድንጉፁ ፨ ፡ ወካዕበ ፡ አንከረ ፡ በእንተ ፡ ንግሥት ፡ እስመ ፡ ጽኑዕ ፡ ኀይላ ፡ ወሠናይ ፡ ላሕያ ፡ ወንጽሕት ፡ በድንግልናሃ ፤ ወነግሠት ፡ ፮ ፡ ዓመተ ፡ በብሔራ ፡ ወእንዘ ፡ ከመዝ ፡ ተድላሃ ፡ ወክብራ ፡ አንጽሐት ፡ ሥጋሃ ። ወትበሎ ፡ ፈንወኒ ፡ እሖር ፡ ብሔርየ ፤ ወቦአ ፡ ኀበ ፡ ማኅደሩ ፡ ወወሀባ ፡ ኵሎ ፡ ዘይትፈቀድ ፡ ክብረ ፡ ወብዕለ ፡ ወሠናያነ ፡ አልባሰ ፡ ዘየሀይድ ፡ አዕይንተ ፡ ወኵሎ ፡ ዘይትፈቀድ ፡ ክብረ ፡ ለብሔረ ፡ ኢትዮጵያ ፡ ወራኩባተ ፡ ወሰረገላተ ፡ መጠነ ፡ ፮ ፡ ሲሕ ፡ ዘጽዑን ፡ ምስለ ፡ ንዋየ ፡ ክብር ፡ ዘይትፈቀድ ፡ ወሰረገላተ ፡ እለ ፡ ይጼዐኑ ፡ ዲበ ፡ ኆጻ ፡ ወሰረገላ ፡ ዘየሐውር ፡ ዲበ ፡ ባሕር ፡ ወሰረገላ ፡ ዘይረውጽ ፡ በነፋሳት ፡ ዘገብረ ፡ በከመ ፡ ጥበብ ፡ ዘወሀቦ ፡ እግዚአብሔር ፨
=== chapter 31 ===
[፴፩ ፡ በእንተ ፡ ዘወሀባ ፡ ትእምርተ ፡ ለንግሥት ።]
ወተፈሥሐት ፡ ወወፅአት ፡ ከመ ፡ ትሖር ፡ ወአስተፋነዋ ፡ በብዙኅ ፡ ግርማ ። ወአግሐሣ ፡ እንተ ፡ ባሕቲቶሙ ፡ ወአውፅአ ፡ ሕልቀተ ፡ እምአጽባዕቱ ፡ እንተ ፡ ትንእስ ፡ ወወሀባ ፡ ለንግሥት ፡ ወይበላ ፡ ንሥኢ ፡ ከመ ፡ ኢትርስዕኒ ፡ ወለእመቦ ፡ ዘረከብኩ ፡ እምውስቴትኪ ፡ ዘርአ ፡ ዝንቱ ፡ ይኩኖ ፡ ትእምርተ ፤ ወለእመ ፡ ኮነ ፡ ተባዕተ ፡ ይምጻእ ፡ ኀቤየ ፤ ወሰላመ ፡ እግዚኣብሔር ፡ የሀሉ ፡ ምስሌኪ ፡ ወእንዘ ፡ እነውም ፡ ምስሌኪ ፡ ርኢኩ ፡ ራእየ ፡ ብዙኀ ፡ በሕልም ፡ ከመ ፡ ሠሪቃ ፡ ፀሐይ ፡ በውስተ ፡ እስራኤል ፡ ተመሥጠት ፡ ወሰረረት ፡ ወአብርሀት ፡ ለብሔረ ፡ ኢትዮጵያ ፤ እንዳዒ ፡ ለእመ ፡ ብኪ ፡ ትትባረክ ፡ ሀግርኪ ፡ እግዚኣብሔር ፡ ያአምር ። ወአንቲሰ ፡ ዕቀቢ ፡ ዘነገርኩኪ ፡ ከመ ፡ ታምልኪዮ ፡ ለእግዚኣብሔር ፡ በኵሉ ፡ ልብኪ ፡ ወትግበሪ ፡ ፈቃዶ ፤ እስመ ፡ ውእቱ ፡ ይቀሥፎሙ ፡ ለዕቡያን ፡ ወይሣሀሎሙ ፡ ለትሑታን ፡ ወይነሥት ፡ መናብርቲሆሙ ፡ ለኀያላን ፡ ወያከብሮሙ ፡ ለነዳያን ፤ እስመ ፡ ሞት ፡ ወሕይወት ፡ እምኀበሁ ፡ ወብዕል ፡ ወንዴት ፡ በፈቃዱ ፡ ይትወሀብ ፡ እስመ ፡ ኵሉ ፡ ሎቱ ፡ ወአልቦ ፡ ዘየአቢዮ ፡ ለትእዛዙ ፡ ወለኰነኔሁ ፡ በሰማይ ፡ ወበምድር ፡ በባሕር ፡ ወበቀላያት ፤ ወእግዚኣብሔር ፡ የሀሉ ፡ ምስሌኪ ፡ ወሖሪ ፡ በሰላም ። ወተፋነው ፨ ፨ ፨ ፨ ፨ ፨
=== chapter 32 ===
[፴፪ ፡ ዘከመ ፡ ወለደት ፡ ወበጽሐት ፡ ብሔራ ።]
ወሖረት ፡ ወበጽሐት ፡ ውስተ ፡ ሀገረ ፡ ባላ ፡ ዘዲሳርያ ፡ በ፱ ፡ አውራኅ ፡ ወበ፭ ፡ ዕለታት ፡ እምዘ ፡ ተፈነወት ፡ በኀቤሁ ፤ ወአኀዛ ፡ ማሕምም ፡ ወወለደት ፡ ሕፃነ ፡ ተባዕተ ፡ ወወሀበቶ ፡ ለሐፃኒት ፡ በብዙኅ ፡ ክብር ፡ ወተድላ ፤ ወይእቲሰ ፡ ነበረት ፡ እስከ ፡ ይትፌጸም ፡ መዋዕለ ፡ ንጽሓ ፡ ወእምዝ ፡ አተወት ፡ ሀገራ ፡ በብዙኅ ፡ ግርማ ። አብኡ ፡ መኳንንቲሃ ፡ አምኃ ፡ ለእግዝእቶሙ ፡ እለ ፡ ነበሩ ፡ ህየ ፡ ወሰገዱ ፡ ወገነዩ ፡ ላቲ ፡ ወተፈሥሑ ፡ በእትወታ ፡ ኵሉ ፡ አድያም ፤ ወአልበስቶሙ ፡ ሥናየ ፡ አልባሰ ፡ ለክቡራኒሆሙ ፡ ወቦ ፡ ለዘ ፡ ወሀበት ፡ ወርቀ ፡ ወብሩረ ፡ ወያክንተ ፡ ወሜላተ ፡ ወኵሎ ፡ ንዋየ ፡ ወሀበት ፡ ዘይትፈቀድ ። ወአርትዐት ፡ መንግሥታ ፤ ወአልቦ ፡ ዘተዐደወ ፡ እምቃላ ፡ እስመ ፡ አፍቀረታ ፡ ለጥበብ ፡ ወእግዚኣብሔር ፡ አጽንዐ ፡ መንግሥታ ፨ ፡ ወልህቀ ፡ ውእቱ ፡ ሕፃን ፡ ወሰመየቶ ፡ ስሞ ፡ በይነ ፡ ልሕክም ። ወጽነ ፡ ሎቱ ፡ ፲ወ፪ ፡ ዓመት ፡ ወየሐትቶሙ ፡ ለመሐዛሁ ፡ ሐፃንያኒሁ ፡ ወይብሎሙ ፡ መኑ ፡ አቡየ ፤ ወይብልዎ ፡ ሰሎሞን ፡ ንጉሥ ፤ ወሖረ ፡ ኀበ ፡ እሙ ፡ ንግሥት ፡ ወይቤላ ፡ ኦንግሥት ፡ አይድዕኒ ፡ መኑ ፡ አቡየ ፡ ወትቤሎ ፡ ንግሥት ፡ በቊጥዓ ፡ እንዘ ፡ ትጌርሞ ፡ ከመ ፡ ኢይፍቅድ ፡ ሐዊረ ፤ ለምንት ፡ ትሴአለኒ ፡ በእንተ ፡ አብ ፤ አነ ፡ ይእቲ ፡ አቡከ ፡ ወእምከ ፡ ወባዕደ ፡ ኢትኅሥሥ ። ወወፅአ ፡ እምኔሃ ፡ ወነበረ ፡ ወካዕበ ፡ ወሥልስ ፡ ይሴአላ ፡ ወያጽሕባ ፡ ከመ ፡ ትንግሮ ። ወአሐተ ፡ ዕለተ ፡ ነገረቶ ፡ እንዘ ፡ ትብል ፡ ርሑቅ ፡ ብሔሩ ፡ ወዕፁብ ፡ ፍኖቱ ፡ ወኢትፍቅድ ፡ ህየ ። ወውእቱሰ ፡ ወልድ ፡ በይነ ፡ ልሕክም ፡ ኮነ ፡ ላሕየ ፡ ወኵሉ ፡ ማኅፈዱ ፡ ወአባሉ ፡ ወንብረተ ፡ ክሳዱ ፡ ይመስል ፡ ስሎሞን ፡ ንጉሠ ፡ አቡሁ ፡ ወአዕይንቲሁ ፡ ወአቊያጺሁ ፡ ወኵሉ ፡ ፍኖቱ ፡ ይመስል ፡ ስሎሞን ፡ ንጉሠ ፨ ፡ ወሶበ ፡ ኮነ ፡ ሎቱ ፡ ፳ወ፪ ፡ ዓመተ ፡ ተምህረ ፡ ኵሎ ፡ ፀብአ ፡ ወፈረሰ ፡ ወንዕወ ፡ አራዊት ፡ ወኵሎ ፡ ዘበሕገ ፡ ውርዙት ። ወይበላ ፡ ለንግሥት ፡ አሐውር ፡ እነጽር ፡ ገጸ ፡ አቡየ ፡ ወእገብእ ፡ ዝየ ፡ በፈቃደ ፡ እግዚኣብሔር ፡ አምላከ ፡ እስራኤል ፨ ፨ ፨ ፨ ፨ ፨ ፨ ፨ ፨ ፨
=== chapter 33 ===
[፴ወ፫ ፡ ዘከመ ፡ ወረደ ፡ ንጉሠ ፡ ኢትዮጵያ ።]
ወጸውዐቶ ፡ ለተምሪን ፡ ሊቀ ፡ ነጋድያኒሃ ፡ ወትበሎ ፡ ተደለው ፡ ለመንግድከ ፡ ወውስዶ ፡ ለዝንቱ ፡ ወልድ ፡ እስመ ፡ አጽሐበኒ ፡ ሌሊተ ፡ ወመዐልተ ፡ ፈድፋደ ፡ በሕቁ ፤ ወታበጽሖ ፡ ኀበ ፡ ንጉሥ ፡ ወታገብኦ ፡ በዳኅን ፡ ዝየ ፡ ለእመ ፡ ሠምረ ፡ እግዚኣብሔር ፡ አምላከ ፡ እስራኤል ። ወተደለወት ፡ ሥንቀ ፡ በከመ ፡ ብዕሎሙ ፡ ወክብሮሙ ፡ ወኵሎ ፡ ንዋየ ፡ ዘይትፈቀድ ፡ ለፍኖት ፡ ወዘይትወሀብ ፡ አምኃ ፡ ለንጉሥ ፡ ወዘይከውን ፡ ዕረፍተ ፡ ለፍኖት ፤ ወአስተዳለወት ፡ ኵሎ ፡ ከመ ፡ ትፈንዎ ፡ ወወሀበት ፡ ለመኳንንትኒ ፡ እለ ፡ የሐውሩ ፡ ምስሌሁ ፡ ወወሀበቶሙ ፡ ብዙኀ ፡ ንዋየ ፡ ዘይትፈቀድ ፡ ለፍኖት ። ወአዘዘቶሙ ፡ ከመ ፡ ኢይኅድግዎ ፡ ህየ ፡ ለወልዳ ፡ አላ ፡ ባሕቱ ፡ ያገብርዎ ፡ ለንጉሥ ፡ ወያግብእዎ ፡ ኀቤሃ ፡ ወከመ ፡ ይሢም ፡ መንግሥተኒ ፡ ለብሔራ ፨ ፡ እስመ ፡ ኮነ ፡ ሥርዐታ ፡ ለብሔረ ፡ ኢትዮጵያ ፡ ትነግሥ ፡ ብእሲት ፡ ድንግል ፡ እንተ ፡ ኢያውሰበት ፡ ብእሴ ፤ ወትቤ ፡ እምይእዘሰአ ፡ ይንገሥአ ፡ ተባዕትአ ፡ እምዘመድከአ ፡ ወኢትንገሥአ ፡ ብእሲትአ ፡ ለዓለምአ ፡ ዘእንበለ ፡ ዝንቱ ፡ ዘመድከአ ፡ ወዘርኡ ፡ ለትውልደ ፡ ትውልድ ፤ ወትልክኣ ፡ ኀበ ፡ መጽሐፈ ፡ ጦማር ፡ ውስተ ፡ መጽሐፈ ፡ ነቢያቲሆሙ ፡ ዘብርት ፡ ወታነብራ ፡ ውስተ ፡ ቤተ ፡ እግዚኣብሔር ፡ ዘተሐንጽ ፡ ለተዝካር ፡ ወለትንቢት ፡ ለደኃሪ ፡ መዋዕል ፤ ወከመ ፡ ኢይስግዱ ፡ ለፀሐይ ፡ ወለሰርጐ ፡ ሰማይ ፡ ወኢለአድባር ፡ ወአዕዋም ፡ ወኢለአእባን ፡ ወለዕፀወ ፡ ገዳም ፡ ወኢለቀላያት ፡ ወለዘ ፡ ውስተ ፡ ማይ ፡ ወኢለግልፈዋት ፡ ወአምሳለ ፡ ወርቅ ፡ ወኢለአዕዋፍ ፡ ዘይሰርር ፡ ወኢይጠየሩ ፡ ቦሙ ፡ ወኢያምልክዎሙ ፤ ወትንበርአ ፡ ዛቲ ፡ ሥርዐት ፡ ለዓለም ፡ ወለእመቦ ፡ ዘተዐደወ ፡ እምዛቲ ፡ ሥርዐት ፡ ለይኰንኖ ፡ ዘርእከ ፡ ለዝሉፉ ። ወባሕቱ ፡ ሀበነ ፡ እምዘፈረ ፡ ልብሳ ፡ ዘንኤምኃ ፡ ለጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፤ ሰላም ፡ ለጽንዐ ፡ መንግሣትከ ፡ ወለጥበብከ ፡ ብርህት ፡ ዘወሀበከ ፡ እግዚኣብሔር ፡ አምላከ ፡ እስራኤል ፡ ፈጣሪነ ፨ ፡ ወአግሐሠቶ ፡ እንተ ፡ ባሕቲቱ ፡ ወወሀበቶ ፡ ይእቲ ፡ ትእምርተ ፡ ዘወሀባ ፡ ሰሎሞን ፡ ዘውስተ ፡ አጽባዕቱ ፡ ሕልቀተ ፡ ከመ ፡ ያእምሮ ፡ ለወልዲ ፡ ወከመ ፡ ይዘከር ፡ ነገራ ፡ ወኪዳና ፡ ዘተካየደት ፡ በኵሉ ፡ መዋዕለ ፡ ሕይወታ ፡ ከመ ፡ ታምልኮ ፡ ለእግዚኣብሔር ፡ ይእቲ ፡ ወእለ ፡ እምታሕተ ፡ መንግሣታ ፡ በኵሉ ፡ ዘወሀባ ፡ እግዚኣብሔር ። ወእምዝ ፡ ፈነወቶ ፡ በሰላም ፤ ወአርትዑ ፡ ፍኖተ ፡ ወሖሩ ፡ ወበጽሑ ፡ ውስተ ፡ ብሔረ ፡ ደወለ ፡ ጋዛ ፤ ወይእቲ ፡ ሀገር ፡ ዘወሀባ ፡ ሰሎሞን ፡ ንጉሥ ፡ ለንግሣተ ፡ ኢትዮጵያ ፤ ወበውስተ ፡ ግብረ ፡ ሐዋርያትሂ ፡ ጸሐፈ ፡ ሉቃስ ፡ ወንጌላዊ ፡ እንዘ ፡ ይብል ፡ መጋቢሃ ፡ ውእቱ ፡ ለኵሉ ፡ ብሔረ ፡ ጋዛ ፡ ኅጽዋ ፡ ለንግሥተ ፡ ህንደኬ ፡ ውእቱ ፡ ዘአምነ ፡ በቃለ ፡ ሉቃስ ፡ ሐዋርያ ፨ ፨ ፨ ፨ ፨ ፨ ፨
=== chapter 34 ===
[፴፬ ፡ ዘከመ ፡ በጽሐ ፡ ብሔረ ፡ እሙ ።]
ወሶበ ፡ በጽሐ ፡ ሀገረ ፡ እሙ ፡ ተፈሥሐ ፡ በህየ ፡ በክብር ፡ ወበአምኃ ፤ ወሶበ ፡ ርእይዎ ፡ መሰሎሙ ፡ ፍጹመ ፡ ሰሎሞን ፡ ንጉሥ ፡ ወሰገዲ ፡ ሎቱ ፡ ወይቤልዎ ፡ ባሕ ፡ ሕየው ፡ አበ ፡ ነጋሢ ፡ ወያበውኡ ፡ ሎቱ ፡ አምኃ ፡ ወጋዳ ፡ ወመጋዝአ ፡ ወምሳሓተ ፡ ከመ ፡ ንጉሦሙ ፤ ወተሀውከት ፡ ኵላ ፡ ብሔረ ፡ ጋዛ ፡ እስከ ፡ ደወለ ፡ ይሁዳ ፡ እንዘ ፡ ይብሉ ፡ ዝንቱ ፡ ውእቱ ፡ ንጉሥ ፡ ሰሎሞን ። ወቦ ፡ ዘይቤ ፡ ንጉሥሰ ፡ ሀለወ ፡ በኢየሩሳሌም ፡ የሐንጽ ፡ ቤቶ ፤ እስመ ፡ ፈጸመ ፡ ሐኒጸ ፡ ቤተ ፡ እግዚኣብሔር ፤ ወቦ ፡ እለ ፡ ይቤሉ ፡ ዝንቱ ፡ ውእቱ ፡ ሰሎሞን ፡ ንጉሥ ፡ ወልደ ፡ ዳዊት ። ወተሀውኩ ፡ ወተጋአዙ ፡ ወፈነዉ ፡ መባርዲን ፤ ሰብአ ፡ አፍራስ ፤ እለ ፡ የኀሥሥዎ ፡ ለንጉሥ ፡ ሰሎሞን ፡ እመ ፡ ጥዩቀ ፡ ህየ ፡ ሀሎ ፡ ወእመ ፡ ሀሎ ፡ ምስሌሆሙ ። ወበጽሑ ፡ መባርዲን ፡ ዐቀብተ ፡ ሀገረ ፡ ኢየሩሳሌም ፡ ወረከብዎ ፡ ለሰሎሞን ፡ ንጉሥ ፡ ህየ ፡ ወሰገዲ ፡ ሎቱ ፡ ወይቤልዎ ፤ ባሕ ፡ ሕየው ፡ አበ ፡ ነጋሢ ፡ ሀገርሰ ፡ ተሀውከት ፡ በእንተ ፡ ዘመጽአ ፡ ፩ ፡ ነጋዲ ፡ ዘይመስል ፡ አርአያከ ፡ ወአምሳሊከ ፡ ዘእንበለ ፡ ሕፀት ፡ ወብዕድና ፤ ኪያከ ፡ ይመስል ፡ በጸዳል ፡ ወበሥን ፡ በቆም ፡ ወበኅይስና ፡ ዘእንበለ ፡ ጥልቀት ፡ ወተባዕዶ ፤ አዕይንቲሁ ፡ ፍሡሓት ፡ ከመዘ ፡ ሰክረ ፡ ወይነ ፡ ወአቊያጺሁኒ ፡ ቈጢጣን ፡ ወማኅፈደ ፡ ክሳዲኒ ፡ ከመ ፡ ማኅፈደ ፡ ዳዊት ፡ አቡከ ፡ ወኪያከ ፡ ይመስል ፡ በኵሉ ፡ ፍጹም ፡ አባል ፡ ዘይትማሰለከ ፨ ፡ አውሥአ ፡ ንጉሥ ፡ ወይቤሎሙ ፡ አይቴኬ ፡ ውእቱ ፡ ይፈቅድ ፡ ሐዊረ ። አውሥኡ ፡ ወይቤልዎ ፡ ለሊሁሰ ፡ ኢሐተትናሁ ፡ እስመ ፡ ግሩም ፡ ከማከ ፤ ወእሊአሁሰ ፡ ይቤሉ ፡ ሶበ ፡ ተስእልናሆሙ ፡ ወንቤሎሙ ፡ እምአይቴ ፡ መጻእክሙ ፡ ወአይቴ ፡ ተሐውሩ ፡ ወይቤሉነ ፡ መጻእነ ፡ እምአድያመ ፡ ህንደኬ ፡ ወኢትዮጵያ ፡ ወነሐውር ፡ ብሔረ ፡ ይሁዳ ፡ ኀበ ፡ ሰሎሞን ፡ ንጉሥ ። ወሶበ ፡ ሰምዐ ፡ ዘንተ ፡ ንጉሥ ፡ ሰሎሞን ፡ ተሀውከ ፡ ልቡ ፡ ወተሐሠየ ፡ በመንፈሱ ፡ እስመ ፡ አልቦ ፡ ውሉደ ፡ በውእቱ ፡ መዋዕል ፡ ዘእንበለ ፡ ሕፃን ፡ ዘ፯ ፡ ዓም ፡ ዘስሙ ፡ ኢዮርብዓም ፤ በከመ ፡ ዘከረ ፡ ጳውሎስ ፡ ወይቤ ፡ እስመ ፡ አእበዳ ፡ እግዚኣብሔር ፡ ለጥበበ ፡ ዝዓለም ፡ ዘመከረ ፡ በጥበቡ ። ወይቤ ፡ እም፲፻ ፡ አንስት ፡ እወልድ ፡ ፲፻ ፡ ተባዕተ ፡ ወእወርስ ፡ አህጉረ ፡ ፀር ፡ ወኣመዘብር ፡ ጣዖታተ ፤ ወኢወሀቦ ፡ ዘእንበለ ፡ ፫ ፡ ደቂቅ ፤ ዘይልህቅ ፡ ወልዱ ፡ ንጉሠ ፡ ኢትዮጵያ ፡ ወልዳ ፡ ለንግሥተ ፡ ኢትዮጵያ ፡ በኵር ፡ ውእቱ ፡ ዘይቤ ፡ በትንቢት ፡ መሐለ ፡ እግዚኣብሔር ፡ ለዳዊት ፡ በጽድቅ ፡ ወኢይኔስሕ ፡ ከመ ፡ እምፍሬ ፡ ከርሥከ ፡ ኣነብር ፡ ዲበ ፡ መንበርከ ፤ ወወሀቦ ፡ እግዚኣብሔር ፡ ሞገሰ ፡ በቅድሜሁ ፡ ለዳዊት ፡ ገብሩ ፡ ወወሀቦ ፡ ዘይነብር ፡ ዲበ ፡ መንበረመለኮት ፡ እምዘርኡ ፡ በሥጋ ፡ እምድንግል ፡ ወይኴንን ፡ ሕያዋነ ፡ ወሙታነ ፡ ወይፈድዮ ፡ ለኵሉ ፡ በከመ ፡ ምግባሩ ፡ ዘሎቱ ፡ ይደሉ ፡ ስብሐት ፡ ለእግዚእነ ፡ ኢየሱስ ፡ ክርስቶስ ፡ ለዓለመ ፡ ዓለም ፡ አሜን ፤ ወበምድርኒ ፡ ወሀቦ ፡ ዘይከውን ፡ ንጉሠ ፡ ዲበ ፡ ታቦተ ፡ ሕጉ ፡ ጽዮን ፡ ቅድስት ፡ ሰማያዊት ፡ ዘውእቱ ፡ ንጉሠ ፡ ኢትዮጵያ ፤ ወእለሰ ፡ ይነግሡ ፡ እለ ፡ ኢኮኑ ፡ እስራኤል ፡ ተዐድዎ ፡ ሕግ ፡ ወትእዛዝ ፡ ዘኢሠምረ ፡ እግዚኣብሔር ፨ ፨ ፨ ፨
=== chapter 35 ===
[፴ወ፭ ፡ በእንተ ፡ ዘለአከ ፡ ንጉሥ ፡ ሰሎሞን ፡ መልአከ ፡ ኀይሉ ፡ ኀበ ፡ ወልዱ ።]
ወለአከ ፡ ሰሎሞን ፡ ንጉሥ ፡ መልአከ ፡ ኀይሉ ፡ ዘያሰምክ ፡ ዲበ ፡ እዴሁ ፡ ምስለ ፡ አምኃ ፡ ወመባልዕት ፡ ወመስቴ ፡ ከመ ፡ ይትቀበሎ ፡ ለውእቱ ፡ ነጋዲ ። ወሖረ ፡ ምስለ ፡ ብዙኅ ፡ ሰረገላት ፡ ወበጽሐ ፡ ኀቤሁ ፡ ወአምኆ ፡ ወወሀቦ ፡ ኵሎ ፡ ዘለአከ ፡ ሎቱ ፡ ሰሎሞን ፡ ንጉሥ ፡ ወይቤሎ ፤ አፍጥን ፡ መጺአ ፡ ኀቤየ ፡ እስመ ፡ ነደደ ፡ ልቡ ፡ ለንጉሥ ፡ በፍቅረ ፡ ዚአከ ፡ እንዳዒ ፡ ዘያአምር ፡ ለሊሁ ፡ እመ ፡ ወልዱ ፡ አንተ ፡ ወኢእመ ፡ እኁሁ ፡ አንተ ፡ ኢኮንከ ፡ ባዕደ ፡ እምኔሁ ፡ በኵሉ ፡ ራእይከ ፡ ወፍኖትከ ፤ ወይእዘኒ ፡ ተንሥእ ፡ ፍጡነ ፡ እስመ ፡ ይቤለኒ ፡ እግዚእየ ፡ ንጉሥ ፡ አፍጥን ፡ ወአምጽኦ ፡ ኀቤየ ፡ በክብር ፡ ወበዕረፍት ፡ ወበተድላ ፡ በፍሥሓ ፡ ወበሐሤት ። አውሥአውእቱ ፡ ወልድ ፡ ወይቤሎ ፡ ኣአኵቶ ፡ ለእግዚኣብሔር ፡ አምላከ ፡ እስራኤል ፡ እስመ ፡ ረከብኩ ፡ ሞገሰ ፡ እምእግዚእየ ፡ ንጉሥ ፡ ዘእንበለ ፡ እርአይ ፡ ገጾ ፡ አስተፈሥሐኒ ፡ ቃሉ ፤ ወይእዘኒ ፡ እሴፈዎ ፡ ለአምላከ ፡ እስራኤል ፡ ከመ ፡ ያርእየኒ ፡ ኪያሁ ፡ ወያግብአኒ ፡ በዳኅን ፡ ኀበ ፡ እምየ ፡ ንግሥት ፡ ወብሔርየ ፡ ኢትዮጵያ ፨ ፡ አውሥአ ፡ ኢዮአስ ፡ ወልደ ፡ ዮዳሔ ፡ መልአከ ፡ ኀይሉ ፡ ለንጉሥ ፡ ሰሎሞን ፡ ወይቤሎ ፡ ለበይነ ፡ ልሕክም ፡ እግዚእየ ፡ ዝሰ ፡ ኅዳጥ ፡ ወትረክብ ፡ ዘየዐቢ ፡ እምዝ ፡ ፍሥሓ ፡ ወተድላ ፡ እምኀበ ፡ እግዚእየ ፡ ንጉሥ ፤ ወበእንተሰ ፡ ዘትብል ፡ እምየ ፡ ወብሔርየ ፡ እምነ ፡ እምከ ፡ ይኄይስ ፡ ሰሎሞን ፡ ንጉሥ ፡ ወእምነ ፡ ሀገርከ ፡ ትኄይስ ፡ ሀገርነ ፡ ዛቲ ፤ ወሀገርከሰ ፡ ሰማዕነ ፡ ከመ ፡ ምድረ ፡ በረድ ፡ ወጊሜ ፡ ከመ ፡ ምድረ ፡ ጸዳል ፡ ወመርቄ ፡ ከመ ፡ ምድረ ፡ ደደክ ፡ ወአስሐትያ ፤ እስመ ፡ ደቂቀ ፡ ኖሕ ፡ አመ ፡ ይትካፈሉ ፡ ምድረ ፡ ሴም ፡ ወካም ፡ ወያፌት ፡ ነጸርዋ ፡ በጥበብ ፡ ለሀገርከ ፡ ከመ ፡ ስፍሕት ፡ ወረሓብ ፡ ወምድረ ፡ ዐውሎ ፡ ወመርቄ ፡ ይእቲ ፡ ወወሀብዎ ፡ ለከናኦን ፡ ወልደ ፡ ካም ፡ ክፍሎ ፡ ሎቱ ፡ ወለዘርኡ ፡ እስከ ፡ ለዓለም ። ወምድርሰ ፡ እንቲአነ ፡ ምድረ ፡ ርስት ፡ ይእቲ ፡ ዘወሀበነ ፡ እግዚኣብሔር ፡ በከመ ፡ መሐለ ፡ ለአበዊነ ፡ ምደር ፡ እንተ ፡ ትውሕዝ ፡ ሐሊበ ፡ ወመዓረ ፡ እንተ ፡ ትከውን ፡ ሲሳየ ፡ ዘእንበለ ፡ ሐዘን ፡ እንተ ፡ ትሁብ ፡ ፍሬሃ ፡ በበ ፡ ጊዜሃ ፡ ዘእንበለ ፡ ምንዳቤ ፤ እንተ ፡ ዘልፈ ፡ ይሔውጻ ፡ እግዚኣብሔር ፡ እምዓመት ፡ እስከ ፡ ርእሰ ፡ ዐውደ ፡ ዓመት ፤ ኵላ ፡ ይእቲ ፡ ለከ ፡ ወንሕነኒ ፡ ለከ ፡ ወንከውነከ ፡ ርስተ ፡ ወትነብር ፡ ውስተ ፡ ብሔርነ ፡ እስመ ፡ አንተ ፡ ዘርኡ ፡ ለዳዊት ፡ እግዚኡ ፡ ለእግዚእየ ፡ ወለከ ፡ ይእቲ ፡ ዛቲ ፡ መንበር ፡ እንተ ፡ እስራኤል ፨ ፡ አውሥኡ ፡ መኳንንቲሁ ፡ ለነጋዲ ፡ ወይቤልዎ ፡ ትኄይስ ፡ ምድርነ ፡ እስመ ፡ ሠናይ ፡ ነፋሰ ፡ ብሔርነ ፡ ዘአልቦ ፡ ላህበ ፡ ወሐሩረ ፡ ወሠናይ ፡ ማየ ፡ ብሔርነ ፡ ወጥዑም ፡ ወይውሕዝ ፡ አፍላገ ፡ ወዓዲ ፡ አርእስተ ፡ አድባሪነኒ ፡ ይውሕዙ ፡ ማየ ፤ ወአኮ ፡ ከመ ፡ በሀገርክሙ ፡ ዘንከሪ ፡ ዐዘቅተ ፡ ነዋኅተ ፡ ለማይ ፡ ወአኮ ፡ ዘንመውት ፡ በሐሩረ ፡ ፀሐይ ፡ አላ ፡ ቀትረኒ ፡ ንንዑ ፡ አራዊተ ፡ ቶራተ ፡ ወሀየላተ ፡ ወአዕዋፈ ፡ ወእንስሳ ፡ ወክረምተኒቦ ፡ ዘይሔውጸነ ፡ እግዚኣብሔር ፡ እምዓመት ፡ እስከ ፡ ርእሰ ፡ ዐውደ ፡ ዓመት ፤ ወቦ ፡ በሐጋይኒ ፡ ዘይበልዑ ፡ እክለ ፡ ከይዶሙ ፡ በእግር ፡ ከመ ፡ ምድረ ፡ ግብጽ ፡ ወዕፀውኒ ፡ ይፈርዩ ፡ ሠናየ ፡ ወሥርናየኒ ፡ ወሰገመ ፡ ወኵሉ ፡ ፍረያቲነ ፡ ወእንስሳነ ፡ ሠናይ ፡ ወመንክር ፤ ወባሕቱ ፡ አሐተ ፡ ብክሙ ፡ ጥበበ ፡ እንተ ፡ ትኄይሱነ ፡ እምኔነ ፡ ወባቲ ፡ ንነግድ ፡ ኀቤክሙ ። ወአውሥአ ፡ ኢዮአስ ፡ መልአከ ፡ ኀይሉ ፡ ለንጉሥ ፡ ምንት ፡ ትኄይስ ፡ እምጥበብ ፡ እስመ ፡ ጥበብ ፡ ሣረረታ ፡ ለምድር ፡ ወአጽንዐቶ ፡ ለሰማይ ፡ ወዐጸወት ፡ ልጐታተ ፡ ባሕር ፡ ከመ ፡ ኢትክድና ፡ ለምድር ፤ ወባሕቱ ፡ ተንሥኡ ፡ ንሖር ፡ ኀበ ፡ እግዚእየ ፡ እስመ ፡ ተነድፈት ፡ ልቡ ፡ በፍቅረ ፡ ዚአከ ፡ ወሊተሰ ፡ ፈነወኒ ፡ ከመ ፡ ኣምጽእከ ፡ አስተፋጢንየ ፨ ፡ ወተንሥአ ፡ ወልደ ፡ ንግሥት ፡ ወአልበሶ ፡ ለኢዮአስ ፡ ወልደ ፡ ዮዳሔ ፡ ሠናየ ፡ አልባሰ ፡ ወለእሊአሁ ፡ ፶ ፡ ዕደው ፤ ወተንሥኡ ፡ ከመ ፡ ይሖሩ ፡ ኢየሩሳሌም ፡ ኀበ ፡ ንጉሥ ፡ ሰሎሞን ። ወሶበ ፡ አልጸቁ ፡ ቀሪበ ፡ በኀበ ፡ ምርዋጸ ፡ አፍራስ ፡ ቀደመ ፡ ኢዮአስ ፡ ወልደ ፡ ዮዳሔ ፡ ወቦአ ፡ ኀበ ፡ ንጉሥ ፡ ሰሎሞን ፡ ወነገሮ ፡ ከመ ፡ ሠናይ ፡ ራእዩ ፡ ወአዳም ፡ ቃሉ ፡ ወይመስል ፡ ኪያሁ ፡ ወፈድፋደ ፡ ሠናይ ፡ በኵሉ ፡ ፍኖቱ ። ወይቤሎ ፡ ንጉሥ ፡ አይቴ ፡ ሀሎ ፡ አኮኑ ፡ ከመ ፡ ታምጽእ ፡ ኪያሁ ፡ ፍጡነ ፡ ፈነውኩከ ፤ ወይቤ ፡ ኢዮአስ ፡ ነየ ፡ አነ ፡ ኣመጽኦ ፡ ዝየ ፡ ፍጡነ ። ወሖረ ፡ ወይቤ ፡ ተንሥእ ፡ ኦሊቅየ ፡ ወነዓ ፤ ወእንዘ ፡ ያፈጥንዎ ፡ ሐዊረ ፡ አብጽሕዎ ፡ ኀበ ፡ አንቀጸ ፡ ንጉሥ ። ወሶበ ፡ ርእይዎ ፡ ኵሉ ፡ ተዓይን ፡ ሰገዱ ፡ ሎቱ ፡ ወይቤሉ ፡ ነዋ ፡ ንጉሥ ፡ ሰሎሞን ፡ ወፅአ ፡ እማኅደሩ ፤ ወእለሂ ፡ ውስጠ ፡ ሶበ ፡ ይወፅኡ ፡ ያነክሩ ፡ ወይገብኡ ፡ ድኅሬሆሙ ፡ ወካዕበ ፡ ይሬእይዎ ፡ ለንጉሥ ፡ ዲበ ፡ መንበሩ ፡ ወካዕበ ፡ ያነክሩ ፡ ይወፅኡ ፡ ወይሬእይዎ ፡ በህየኒ ፡ ወየኀጥኡ ፡ ዘይብሉ ፡ ወዘይትናገሩ ። ወሶበ ፡ ቦአ ፡ ካዕበ ፡ ኢዮአስ ፡ ወልደ ፡ ዮዳሔ ፡ ከመ ፡ ይንግሮ ፡ ለንጉሥ ፡ ምጽአተ ፡ ዚአሁ ፡ አልቦ ፡ ዘቆመ ፡ ቅድመ ፡ ንጉሥ ፡ አላ ፡ ኵሎሙ ፡ እስራኤል ፡ ይጸዐቁ ፡ ከመ ፡ ይርአዩ ፡ ኪያሁ ፨ ፨ ፨ ፨ ፨ ፨ ፨ ፨
=== chapter 36 ===
[፴፮ ፡ ኀበ ፡ ተራከበ ፡ ምስለ ፡ ወልዱ ፡ ንጉሥ ፡ ሰሎሞን ። ወወፅአ ፡ ኢዮአስ ፡ ወልደ ፡ ዮዳሔ ፡ ወአብኦ ።]
ወሶበ ፡ ርእዮ ፡ ንጉሥ ፡ ሰሎሞን ፡ ተንሥአ ፡ ወተቀበሎ ፡ ወፈትሐ ፡ መዝግሐ ፡ ልብሱ ፡ እመትከፍቱ ፡ ወሐቀፎ ፡ በእደዊሁ ፡ ዲበ ፡ እንግድዓሁ ፡ ወሰዐሞ ፡ አፉሁ ፡ ወፍጽሞ ፡ ወአዕይንቲሁ ፡ ወይቤሎ ፡ ናሁ ፡ አቡየ ፡ ዳዊት ፡ ተሐዲሶ ፡ በውርዙቱ ፡ ተንሥአ ፡ እምነ ፡ ሙታን ፤ ወተመይጠ ፡ ኀበ ፡ እለ ፡ ዘነውዎ ፡ ወይቤሎሙ ፡ ትቤሉኒ ፡ ይመስል ፡ ኪያከ ፡ ወዝንቱ ፡ አኮ ፡ ማኅፈድየ ፡ አላ ፡ ማኅፈደ ፡ ዳዊት ፡ አቡየ ፡ አመ ፡ መዋዕለ ፡ ውርዙቱ ፡ ወፈድፋደ ፡ ይሤኒ ፡ እምኔየ ። ወተንሥአ ፡ ሶቤሃ ፡ ወቦአ ፡ ውስተ ፡ ማኅደሩ ፡ ወአልበሶ ፡ ዲባጋተ ፡ ዘወርቅ ፡ ወቅናተ ፡ ዘወርቅ ፡ ወአክሊለ ፡ ዲበ ፡ ርእሱ ፡ ወሕልቀተ ፡ ውስተ ፡ አጽባዕቱ ፡ ወአልበሶ ፡ አልባሰ ፡ ክብር ፡ ዘየሀይድ ፡ አዕይንተ ፡ ወአንበሮ ፡ ዲበ ፡ መንበሩ ፡ ዘይትዐረይ ፡ ምስሌሁ ፤ ወይቤሎሙ ፡ ለመኳንንተ ፡ እስራኤል ፡ ዘትትሐመዩ ፡ በበይናቲክሙ ፡ ወትብሉኒ ፡ ከመ ፡ አልብየ ፡ ውሉደ ፡ ርእዩ ፡ ዝንቱ ፡ ውሉድየ ፡ ፍሬ ፡ ዘወፅአ ፡ እምከርሥየ ፡ ዘወሀበኒ ፡ እግዚኣብሔር ፡ አምላከ ፡ እስራኤል ፡ እምዘ ፡ ኢተሐዘብኩ ። አውሥእዎመኳንንቲሁ ፡ ወይብልዎ ፡ ትኩን ፡ ቡርክት ፡ እም ፡ እንተ ፡ ወለደቶ ፡ ለዝንቱ ፡ ወሬዛ ፡ ወትኩን ፡ ቡርክት ፡ ዕለት ፡ እንተ ፡ ተደመርከ ፡ ምስሌሃ ፡ ለእመ ፡ ዝንቱ ፡ ወሬዛ ፤ እስመ ፡ ሠረቀ ፡ ላዕሌነ ፡ እምሥርወ ፡ እሴይ ፡ ብእሲ ፡ ብሩህ ፡ ዘይከውን ፡ ንጉሠ ፡ ለዘመደ ፡ ዘመድነ ፤ እምዘርኡ ፡ ዘኢየሐትቱ ፡ አቡሁ ፡ ወኢይብሉ ፡ እምአይቴ ፡ ምጽአቱ ፡ ዘበአማን ፡ እስራኤላዊ ፡ እምዘርአ ፡ ዳዊት ፡ በአምሳለ ፡ መልክአ ፡ ራእዩ ፡ ለአቡሁ ፡ ተልሕኰ ፡ ፍጹመ ፤ ወንሕነኒ ፡ አግብርቲሁ ፡ ይኩነነ ፡ ንጉሠ ፤ ወአብኡ ፡ ሎቱ ፡ አምኃ ፡ በበ ፡ ዕበዮሙ ። ወወሰደ ፡ ለአቡሁ ፡ ይእተ ፡ ሕልቀተ ፡ እንተ ፡ ወሀበቶ ፡ እሙ ፡ በባሕቲቶሙ ፡ ወይቤሎ ፡ ለአቡሁ ፡ ንሣእአ ፡ ዘንተ ፡ ሕልቀተ ፡ ወተዘከር ፡ ዘንተነገረ ፡ ዘተናገርከ ፡ ምስለ ፡ ንግሥት ፤ ወሀበነአ ፡ እምዘፈረ ፡ ልብሳ ፡ ለታቦተ ፡ ሕጉ ፡ ለእግዚኣብሔር ፡ ከመ ፡ ንስግድ ፡ ላቲ ፡ በኵሉ ፡ መዋዕሊነ ፡ ወኵሎሙ ፡ እለ ፡ እምታሕቴነ ፡ ወእለ ፡ እምውስተ ፡ መንግሥተ ፡ ንግሥት ። አውሥኦ ፡ ንጉሥ ፡ ወይቤሎ ፡ ለምንት ፡ ትሁበኒ ፡ ሕልቀተ ፡ ትእምርተ ፤ ዘእንበለ ፡ ተሀበኒ ፡ ትእምርተ ፡ ረከብኩ ፡ አምሳልየ ፡ መልክእከ ፡ እስመ ፡ አንተ ፡ ወልድየ ፡ በአማን ፨ ፡ ወካዕበ ፡ ይቤሎ ፡ ነጋዲ ፡ ተምሪን ፡ ስማዕ ፡ ኦንጉሥ ፡ ዘለአከተኒ ፡ አመትከ ፡ ንግሥት ፡ እግዝእትየ ፡ ለዝንቱ ፡ ሕፃን ፡ ቅብኦ ፡ ወቀድሶ ፡ ወባርኮ ፡ ወአንግሦአ ፡ ለብሔርነ ፡ ወአዝዝአ ፡ ከመ ፡ ኢትንገሥ ፡ ብእሲት ፡ ለዓለመ ፡ ዓለም ፡ ወፈንዎአ ፡ በሰላም ፤ ወሰላም ፡ ለዕዘዘ ፡ መንግሥትከ ፡ ወለጥበብከ ፡ ብርህት ፤ ወአንሰአ ፡ ኢፈቀድኩ ፡ ከመ ፡ ይምጻእ ፡ ዝየ ፡ አላ ፡ አጽሐበኒ ፡ ፈድፋደ ፡ ከመ ፡ ይምጻእ ፡ ኀቤከ ፤ ወአንሰ ፡ ፈራህኩ ፡ ሎቱ ፡ ከመ ፡ እመቦ ፡ ኢይድወይ ፡ በፍኖት ፡ አው ፡ በጽምአ ፡ ማይ ፡ አው ፡ በሐሩረ ፡ ፀሐይ ፡ ወኢያውርድ ፡ ርሥኣንየ ፡ ውስተ ፡ መቃብር ፡ በሐዘን ፤ ወተማሕፀንኩ ፡ በጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ከመ ፡ ኢትክልኦ ፡ በጥበብከ ፤ እስመ ፡ መኳንንቲከ ፡ ኢይክሉ ፡ አቲወ ፡ ቤቶሙ ፡ ወነጽሮ ፡ ውሉዶሙ ፡ እምብዝኀጥበብ ፡ ወመባልዕት ፡ ዘትሁቦሙ ፡ መፍቅዶሙ ፡ እንዘ ፡ ይብሉ ፡ ይኄይሰነ ፡ ማእደ ፡ ሰሎሞን ፡ እምንትፈሣሕ ፡ ወንደለው ፡ በውስተ ፡ አብያቲነ ፡ ወበእንተዝ ፡ አነ ፡ ፈሪህየ ፡ ተማሕፀንኩ ፡ ከመ ፡ ኢታቅሞ ፡ ኀቤከ ፡ አላ ፡ ከመ ፡ ትፈንዎ ፡ ኀቤየ ፡ በሰላም ፡ ዘእንበለ ፡ ደዌ ፡ ወሕማም ፡ በፍቅር ፡ ወበሰላምከመ ፡ ይትፈሣሕ ፡ ልብየ ፡ በረኪቦትከ ፨ ፡ አውሥአ ፡ ንጉሥ ፡ ወይቤሎ ፡ ምንተ ፡ ባቲላዕለ ፡ ወልድ ፡ ለብእሲት ፡ ዘእንበለ ፡ ዘተሐምም ፡ ወተሐፅን ፡ ወለት ፡ ለእም ፡ ወወልድ ፡ ለአብ ፤ ወእግዚኣብሔር ፡ ረገማ ፡ ለሔዋን ፡ እንዘ ፡ ይብል ፡ ለዲ ፡ በጻዕር ፡ ወበሐዘነ ፡ ልብ ፡ ወወሊደኪ ፡ ምግባኢኪ ፡ ኀበ ፡ ምትኪ ፤ በማሕላ ፡ ለዲ ፡ ወምሒለኪ ፡ ምግባኢኪ ፡ ኀበ ፡ ምትኪ ፤ ወዝንቱሰ ፡ ወልድየ ፡ ኢይሁባ ፡ ለንግሥት ፡ አላ ፡ ኣነግሦ ፡ ላዕለ ፡ እስራኤል ፡ እስመ ፡ ዝንቱ ፡ በኵርየ ፡ ቀዳሜ ፡ በትርየ ፡ ዘወሀበኒ ፡ እግዚኣብሔር ። ወእምዝ ፡ ይልእክ ፡ ሎቱ ፡ ሰርከ ፡ ወነግሀ ፡ ሠናየ ፡ መባልዕተ ፡ ወአልባሰ ፡ ክቡረ ፡ ወርቀ ፡ ወብሩረ ፡ ወይብሎ ፡ እስመ ፡ ይኄይስ ፡ ዝየ ፡ ንብረት ፡ ውስተ ፡ ብሔርነ ፡ ኀበ ፡ ሀለወ ፡ ቤተ ፡ እግዚኣብሔር ፡ ወኀበሀለወት ፡ ታቦተ ፡ ሕጉ ፡ ለእግዚኣብሔር ፡ ወኀበ ፡ የኀድር ፡ እግዚኣብሔር ፡ ምስሌነ ፤ ወውእቱኒይልእክ ፡ ወልዱ ፡ እንዘ ፡ ይብል ፡ ወርቅሰአ ፡ ወብሩር ፡ ወአልባስ ፡ ኢተኀጥአ ፡ እምብሔርነ ፡ ወባሕቱ ፡ አነ ፡ መጻእኩ ፡ ከመ ፡ እስማዕ ፡ ጥበብከ ፡ ወእርአይ ፡ ገጸከ ፡ ወአአምኅ ፡ ኪያከ ፡ ወእግነይ ፡ ለመንግሥትከ ፡ ወእስግድ ፡ ለከ ፡ ወሊተኒ ፡ ትፈንወኒ ፡ ኀበ ፡ እምየ ፡ ወብሔርየ ፤ እስመ ፡ አልቦ ፡ ዘይጸልእ ፡ ኀበ ፡ ተወልደ ፡ ወነገረ ፡ ብሔሩ ፡ ያፈቅር ፡ ኵሉ ፤ ወአንሰዓ ፡ ለእመኒ ፡ ወሀብከኒ ፡ ጥዑመ ፡ መባልዕተ ፡ ኢያፈቅር ፡ ወኢይኤድሞ ፡ ለሥጋየ ፡ አላ ፡ ይኤድመኒ ፡ በዘ ፡ ተመሀርኩ ፡ ወልህቁ ፡ መባልዕት ፤ ወእመኒ ፡ አደመኒ ፡ ብሔር ፡ በአምሳለ ፡ ገነት ፡ ኢይኤድሞ ፡ ለልብየ ፡ ይኄይሰኒ ፡ አድባረ ፡ ምድራ ፡ ለእምየ ፡ ኀበ ፡ ተወለድኩ ፤ ወታቦተ ፡ አምላከ ፡ እስራኤልሂ ፡ ለእመ ፡ ገነይኩ ፡ ላቲ ፡ በኀበ ፡ ሀለውኩ ፡ ታከብረኒ ፡ ወቤተ ፡ እግዚኣብሔር ፡ ዘሐነጽከ ፡ ኣነጽር ፡ ላቲ ፡ ወእሠውዕ ፡ ወእትጋነይ ፡ በኀበ ፡ ሀለውኩ ፤ ወለጽዮንሂ ፡ ታቦተ ፡ ሕጉ ፡ ለእግዚኣብሔር ፡ ሀበኒ ፡ ዘፈረ ፡ ልብሳ ፡ ወእሰግድ ፡ ላቲ ፡ ምስለ ፡ እምየወኵሉ ፡ ዘእምታሕተ ፡ መንግሥትነ ። እስመ ፡ ቀዲሙኒ ፡ እግዝእትየ ፡ ንግሥት ፡ ሠረወቶሙ ፡ ለኵሎሙ ፡ እለ ፡ ያመልኩ ፡ ጣዖታተ ፡ ወእለ ፡ ይሰግዱ ፡ ለባዕድ ፡ ወለአእባን ፡ ወለአዕዋም ፡ ወሠረወቶሙ ፡ ወአግብአቶሙ ፡ ኀበ ፡ ጽዮን ፡ ታቦተ ፡ ሕጉ ፡ ለእግዚኣብሔር ፤ እስመ ፡ ሰምዐት ፡ በኀቤከ ፡ ወተምህረት ፡ ወገብረት ፡ በከመ ፡ ነገርከ ፡ ወአምላክናሁ ፡ ለእግዚኣብሔር ። ወበዝ ፡ ኵሉ ፡ ስእነ ፡ ኦሆ ፡ አብሎቶ ፡ ለወልዱ ፨ ፨ ፨ ፨ ፨ ፨ ፨ ፨ ፨
=== chapter 37 ===
[፴፯ ፡ ኀበ ፡ ተስእሎ ፡ ሰሎሞን ፡ ለወልዱ ።]
ወካዕበ ፡ ነገሮ ፡ እንተ ፡ ባሕቲቱ ፡ ሰሎሞን ፡ ወይቤሎ ፡ ለወልዱ ፡ ለምንት ፡ ትፈቅድ ፡ ከመ ፡ ትርሐቅ ፡ እምኔየ ፡ ምንተ ፡ ኀጣእከ ፡ ከመ ፡ ትሖርብሔረ ፡ አረሚ ፡ ወምንት ፡ አጽሀቀከ ፡ ከመ ፡ ትኅድግ ፡ መንግሥተ ፡ እስራኤል ። አውሥዓወልዱ ፡ ወይቤሎ ፡ ኢይከውነኒ ፡ እንበር ፡ ዝየ ፡ አላ ፡ እሖር ፡ ኀበ ፡ እምየእንዘ ፡ አንተ ፡ ትድኅረኒ ፤ እስመ ፡ ብከ ፡ ወልደ ፡ ዘይኄይስ ፡ እምኔየ ፡ ኢዮርብዓም ፡ ዘተወልደ ፡ በሕግ ፡ እምብእሲትከ ፡ ወእምየሰ ፡ ኢኮነት ፡ እንቲአከ ፡ ብእሲተ ፡ ዘበሕግ ። አውሥኦ ፡ ንጉሥ ፡ ወይቤሎ ፡ ወለእመትቤ ፡ ከመዝ ፡ አነሂ ፡ ኢኮንኩ ፡ ዘበሕግ ፡ ውሉዶ ፡ ለአቡየ ፡ ዳዊት ፡ እስመ ፡ ነሥአ ፡ ብእሲተ ፡ ባዕድ ፡ ወአቅተሎ ፡ ኪያሁኒ ፡ በውስተ ፡ ፀብእ ፡ ወወለደኒ ፡ ኪያየ ፡ እምኔሃ ፡ እስመ ፡ እግዚኣብሔር ፡ መሓሪ ፡ ሰረየ ፡ ሎቱ ፤ ወመኑ ፡ ዘየአኪ ፡ ወየአብድ ፡ እምነ ፡ እጓለ ፡ እመሕያው ፡ ወመኑ ፡ ዘይምሕር ፡ ወይጠብብ ፡ ከመ ፡ እግዚኣብሔር ፤ ሊተኒ ፡ እምአቡየ ፡ ወለከኒ ፡ እምኔየ ፡ ገብረ ፡ እግዚኣብሔር ፡ በከመ ፡ ፈቀደ ። ወአንተሰ ፡ ኦወልድየ ፡ ፍርሆ ፡ ለእግዚኣብሔር ፡ አምላክነ ፡ ኢትግፋዕ ፡ ገጸ ፡ አቡከ ፡ ከመ ፡ ኢትርከብከ ፡ በደኃሪ ፡ ግፍዕ ፡ እምነ ፡ ዘይወፅእ ፡ እምነ ፡ ሐቌከ ፡ ወከመ ፡ ይሠኒ ፡ ዘርእከ ፡ በዲበ ፡ ምድር ። ወውእቱሰ ፡ ኢዮርብዓም ፡ ሕፃን ፡ ዘ፮ ፡ ዓም ፡ ወአንተ ፡ ቀዳሜ ፡ በኵርየ ፡ ወበጻሕከ ፡ ለነጊሥ ፡ ወአንሥኦ ፡ ኵናቶ ፡ ለዘ ፡ ወለደከ ። ወአንሰ ፡ ነዋ ፡ ፳ወ፱ ፡ ዓመት ፡ እምዘ ፡ ነገሥኩ ፡ ወበሳብዕ ፡ ዓመተ ፡ መንግሥትየ ፡ መጽአት ፡ እምከ ፡ ኀቤየ ፡ ወለእመ ፡ ፈቀደ ፡ እግዚኣብሔር ፡ ያበጽሐኒ ፡ ኀበ ፡ አምጣነ ፡ መዋዕለ ፡ ዓቡየ ፤ ወእምከመ ፡ ተወሰኩ ፡ ኀበ ፡ አበዊየ ፡ ወትነብር ፡ አንተ ፡ ዲበ ፡ መንበርየ ፡ ወትነግሥ ፡ አንተ ፡ ህየንቴየ ፡ ወሊቃውንተ ፡ እስራኤልኒ ፡ ፈድፋደ ፡ ያፈቅሩከ ፤ ወእገብር ፡ ለከ ፡ ከብካበ ፡ ወእሁበከ ፡ ንግሥታተ ፡ ወዕቁባተ ፡ መጠነ ፡ ፈቀድከ ፤ ወትትባረክ ፡ በዛቲ ፡ ምድረ ፡ ርስት ፡ ቡርክት ፡ እንተ ፡ ወሀበ ፡ እግዚኣብሔር ፡ ለአበዊነ ፡ በከመ ፡ ተካየደ ፡ ምስለ ፡ ኖሕ ፡ ገብሩ ፡ ወምስለ ፡ አብርሃም ፡ ፍቁሩ ፡ ወጻድቃን ፡ ደቂቆሙ ፡ እምድኅሬሆሙ ፡ እስከ ፡ ዳዊት ፡ አቡየ ፤ ወትሬእየኒ ፡ አነ ፡ ድኩም ፡ ዲበ ፡ መንበሮሙ ፡ ለአበዊየ ፡ ወትከውን ፡ ከማየ ፡ እምድኅሬየ ፡ ወትኴንን ፡ አሕዛበ ፡ ዘአልቦ ፡ ኆልቈ ፡ ወአንጋደ ፡ ዘአልቦ ፡ መስፈርተ ፤ ወታቦተ ፡ አምላከ ፡ እስራኤልኒ ፡ ለከ ፡ ወለዘርእከ ፡ ውእቱ ፡ ኀበ ፡ ትገብር ፡ ምሥዋዐወታዐርግጸሎተ ፡ ወእግዚኣብሔር ፡ የኀድር ፡ ውስቴታለዝሉፉ ፡ ወይሰምዕ ፡ ጸሎትከ ፡ በውስቴታወትገብር ፡ ሥምረቶ ፡ ለእግዚኣብሔር ፡ በውስቴታ ፡ ወዝክርከኒ ፡ ለትውልደ ፡ ትውልድ ፡ በማእከላ ፨ ፡ ወአውሥአ ፡ ወልዱ ፡ ወይቤሎ ፡ ኦእግዚእየ ፡ ኢይከውነኒ ፡ እኅድግ ፡ ብሔርየ ፡ ወእምየ ፡ እስመ ፡ አምሕሎ ፡ አምሐለተኒ ፡ እምየ ፡ በአጥባቲሃ ፡ ከመ ፡ ኢይቁም ፡ ዝየ ፡ አላ ፡ እግባእ ፡ ኀቤሃ ፡ ፍጡነ ፡ ወበዝየኒ ፡ ኢያውስብ ፡ ብእሲተ ፤ ወታቦተ ፡ አምላከ ፡ እስራኤልሂ ፡ ትባርከኒ ፡ በኀበ ፡ ሀለውኩ ፡ ወጸሎትከኒ ፡ ትትልወኒ ፡ በኀበ ፡ ሖርኩእስመ ፡ ፈተውኩ ፡ እርአይ ፡ ገጸከ ፡ ወእስማዕ ፡ ቃለከ ፡ ወእንሣእ ፡ በረከትከ ፡ ወእሖር ፡ ኀበ ፡ እምየ ፡ በዳኅን ፨ ፨ ፨ ፨ ፨ ፨ ፨ ፨ ፨ ፨ ፨
=== chapter 38 ===
[፴፰ ፡ ኀበ ፡ መከረ ፡ ንጉሥ ፡ ይፈኑ ፡ ወልዶ ፡ ምስለ ፡ ደቂቆሙ ።]
ወእምዝ ፡ ገብአውስተ ፡ ቤቱ ፡ ሰሎሞን ፡ ንጉሥ ፡ ወአስተጋብኦሙ ፡ ለመማክርቲሁ ፡ ወለመገብቱ ፡ ወለመላህቅተ ፡ ቤተ ፡ መንግሥቱ ፡ ወይቤሎሙ ፡ ስእንኩ ፡ ኦሆ ፡ አብሎቶ ፡ ለዝንቱ ፡ ወልድ ፤ ወይእዜኒስምዑኒ ፡ ዘእነግረክሙ ፡ ሀቡ ፡ ናንግሦ ፡ ለብሔረ ፡ ኢትዮጵያ ፡ ምስለ ፡ ደቂቅክሙ ፡ እለ ፡ ትነብሩ ፡ በየማንየ ፡ ወበፀጋምየ ፡ ከማሁ ፡ ይንበሩ ፡ ደቂቅክሙ ፡ መላህቅት ፡ በየማኑ ፡ ወበፀጋሙ ፤ ወኵልክሙ ፡ መማክርት ፡ ወመኳንንት ፡ ሀቡ ፡ ነሀብ ፡ ደቂቅክሙ ፡ በኵረ ፡ ወይከውን ፡ ለነ ፡ ክልኤ ፡ መንግሥት ፡ ወአንሰ ፡ ምስሌክሙ ፡ በዝየ ፡ እትለአክ ፡ ወደቂቅነሂ ፡ ይነግሡ ፡ በሂየ ፤ ወሣልሰኒ ፡ እሴፈዎ ፡ ለእግዚኣብሔር ፡ ከመ ፡ የሀበኒ ፡ ዘርአ ፡ ወይከውን ፡ ሊተ ፡ ሣልሰ ፡ ንጉሠ ። እስመ ፡ የኀሥሥ ፡ በልጣሶር ፡ ንጉሠ ፡ ሮሜ ፡ ከመ ፡ አሀቦ ፡ ወልድየ ፡ ለወለቱ ፡ ወያንግሦ ፡ ሊተ ፡ ምስለ ፡ ወለቱላዕለ ፡ ኵሉ ፡ ሀገረሮሜ ፤ እስመ ፡ አልቦውሉደ ፡ ዘርአ ፡ ዘእንበሌሃ ፡ ወመሐለ ፡ ከመ ፡ ኢያንግሥ ፡ ዘእንበለ ፡ እምዘርአ ፡ ዳዊት ፡ አቡየ ፤ ወለእመ ፡ አንገሥነ ፡ ህየኒ ፡ ንከውን ፡ ሠለስተ ፡ ንጉሠ ፤ ወኢዮርብዓምኒ ፡ ይነግሥ ፡ ዝየ ፡ ለእስራኤል ፡ እስመ ፡ ከመዝ ፡ ትንቢቱ ፡ ለዳዊት ፡ አቡየ ፡ ይከውን ፡ ዘርኡ ፡ ለሰሎሞን ፡ ፫ ፡ አርእስተ ፡ መንግሥት ፡ በዲበ ፡ ምድር ። ወንፌኑ ፡ ሎሙ ፡ ካህናተ ፡ ወንሥራዕ ፡ ሎሙ ፡ ሕገጋተ ፡ ወያምልኩ ፡ ወይግነዩ ፡ ለአምላከ ፡ እስራኤል ፡ ውስተ ፡ አርእስተ ፡ መንግሥት ፡ ወይሴባሕ ፡ እግዚኣብሔር ፡ በዘመደ ፡ ሕዝቡ ፡ እስራኤል ፡ ወይትሌዐል ፡ በኵሉ ፡ ምድር ። በከመ ፡ ጸሐፈ ፡ አቡየ ፡ ውስተ ፡ መጽሐፉ ፡ እንዘ ፡ ይብል ፡ በልዎሙ ፡ ለአሕዛብ ፡ ከመ ፡ እግዚኣብሔር ፡ ነግሠ ፤ ወካዕበ ፡ ይቤ ፡ ወንግርዎሙ ፡ ለአሕዛብ ፡ ምግባሮ ፡ ሰብሕዎ ፡ ወዘምሩ ፡ ሎቱ ፤ ወካዕበ ፡ ይቤ ፡ ሰብሕዎ ፡ ለእግዚኣብሔር ፡ ስብሐተ ፡ ሐዲሰ ፤ ስብሐቲሁ ፡ በማኅበረ ፡ ጻድቃኑ ፡ ይትፌሣሕ ፡ እስራኤል ፡ በፈጣሪሁ ፡ ለነ ፡ ይእቲ ፡ ክብረመንግሥት ፡ ወንሴብሕ ፡ ለፈጣሪነ ፡ ወይርአዩ ፡ ኪያነ ፡ አሕዛብ ፡ እለ ፡ ያመልኩ ፡ ጣዖተ ፡ ወይፍርሁነ ፡ ወያንግሡነ ፡ ወይሴብሕዎ ፡ ለእግዚኣብሔር ፡ ወይፍርህዎ ። ወይእዜኒ ፡ ሀቡ ፡ ናንግሦ ፡ ወንፈንዎ ፡ ምስለ ፡ ደቂቅክሙ ፡ እለ ፡ ብክሙ ፡ ምርካበ ፡ ወሢመተ ፤ በከመ ፡ ሢመትክሙ ፡ ወምርካብክሙ ፡ በዝየ ፡ ይኩን ፡ ከማሁ ፡ ለደቂቅክሙ ፡ በህየ ፤ ወይርአዩ ፡ ሕገ ፡ መንግሥት ፡ ወንረስዮሙ ፡ በከመ ፡ ሕግነ ፡ ወነአዝዞሙ ፡ ሕገ ፡ ወትእዛዛተ ፡ ወንፈንዎሙ ፡ ይንገሡ ፡ በህየ ፨ ፡ ወአውሥኡ ፡ ወይቤሉ ፡ ካህናት ፡ ወመኳንንት ፡ ወመማክርት ፡ ለንጉሥአንተ ፡ ትፌንዎ ፡ ለበኵርከ ፡ ወንሕነ ፡ ንፌኑ ፡ ደቂቅነ ፡ እለ ፡ ብነ ፡ በከመ ፡ ፈቀድከ ፤ መኑ ፡ የአቢ ፡ ትእዛዞ ፡ ለእግዚኣብሔር ፡ ወለንጉሥ ፤ እስመ ፡ አግብርቲከ ፡ እሙንቱ ፡ ለከ ፡ ወለዘርእከ ፡ በከመ ፡ ነበብከ ፤ ለእመ ፡ ፈቀድከ ፡ እምሤጥኮሙ ፡ ከመ ፡ ይኩኑ ፡ አግብርተ ፡ ምስለ ፡ እማቲሆሙ ፤ ወአልቦ ፡ ዘንትዐደው ፡ እምትእዛዝከ ፡ ወእምትእዛዘ ፡ እግዚኣብሔር ፡ አምላክከ ። ወእምዝ ፡ አስተዳለዉ ፡ ከመ ፡ ይግበሩ ፡ ሎሙ ፡ ዘበሕግ ፡ ወይፈንውዎሙ ፡ ውስተ ፡ ብሔረ ፡ ኢትዮጵያ ፡ ወይንገሡ ፡ በህየ ፡ ወይንበሩ ፡ እስከ ፡ ለዓለም ፤ እሙንቱ ፡ ወዘርኦሙ ፡ ለትውልደ ፡ ትውልድ ፨ ፨ ፨
=== chapter 39 ===
[፴፱ ፡ ኀበ ፡ አንገሥዎ ፡ ለወልደ ፡ ሰሎሞን ።]
ወአስተዳለዉ ፡ ዕፍረተ ፡ ቅብአ ፡ መንግሥት ፡ ወተነፍኀ ፡ ቃለ ፡ ቀርን ፡ ወብዕዛ ፡ ወዕንዚራ ፡ ወመሰንቆ ፡ ወከበሮ ፡ ወጸርኀት ፡ ሀገር ፡ በውውዓ ፡ በትፍሥሕት ፡ ወበይባቤ ፤ ወአብእዎ ፡ ውስተ ፡ ቅድስተ ፡ ቅዱሳን ፡ ወተእኅዘ ፡ በአቅርንተ ፡ ምሥዋዕ ፡ ወተውህቦ ፡ መንግሥት ፡ በአፈ ፡ ሳዶቅ ፡ ካህንወበአፈ ፡ ኢዮአስ ፡ ካህን ፡ መልአከ ፡ ኀይሉ ፡ ለንጉሥ ፡ ሰሎሞን ፡ ወቀብኦእምነ ፡ ቅዱስ ፡ ቅብአ ፡ ዕፍረት ፡ ለመንግሥት ፤ ወወፅአ ፡ እምነ ፡ ቤተ ፡ እግዚኣብሔር ፡ ወሰመይዎ ፡ ስሞ ፡ ዳዊት ፡ እስመ ፡ በሕግ ፡ ረከቦ ፡ ስመ ፡ ንጉሥ ፤ ወአጽዐንዎ ፡ ዲበ ፡ በቅለ ፡ ንጉሥ ፡ ሰሎሞን ፡ ወአዖድዎ ፡ ሀገረ ፡ እንዘ ፡ ይብሉ ፡ ሤምናከ ፡ እምዝየ ፤ ወእምዝ ፡ ይቤልዎ ፡ ባሕ ፡ ሕየው ፡ አበ ፡ ነጋሢ ፤ ወቦ ፡ እለ ፡ ይብሉ ፡ ርቱዕ ፡ ይደልዎ ፡ እምፈለገ ፡ ግብጽ ፡ እስከ ፡ ምዕራበ ፡ ፀሐይ ፡ ይኩን ፡ ሢመትከ ፡ ኢትዮጵያ ፡ ቡሩክ ፡ ዘርእከ ፡ በዲበ ፡ ምድር ፡ ወእምሴዋ ፡ ደቡባዊ ፡ እስከ ፡ ሠረቀ ፡ ህንድ ፡ ዘታሠምሮን ፤ ወእግዚኣብሔር ፡ አምላከ ፡ እስራኤል ፡ ይኩንከ ፡ መርሐ ፡ ወታቦተ ፡ ሕጉ ፡ ለእግዚኣብሔር ፡ ኀበ ፡ ኵሉ ፡ ዘአንጸርከ ፤ ወይኩኑከግሩራነ ፡ ኵሎሙ ፡ ፀርከ ፡ ወጸላእትከ ፡ በቅድሜከ ፡ ወይኩንከ ፡ ፍጽመ ፡ ወኳላለከ ፡ ወ ፡ ለዘርእከ ፡ እምድኅሬከ ፡ ወትኴንን ፡ ብዙኃነ ፡ አሕዛበ ፡ ወለከሰ ፡ አልቦ ፡ ዘይኴንነከ ። ወካዕበ ፡ ባረኮ ፡ አቡሁወይቤሎ ፡ በረከተ ፡ ሰማይ ፡ ወምድር ፡ ይኩን ፡ በረከትከ ፤ ወይቤሉ ፡ ማኅበረ ፡ እስራኤል ፡ አሜን ፨ ፡ ወካዕበ ፡ አቡሁኒ ፡ ይቤሎ ፡ ለሰዶቅ ፡ ካህን ፡ አይድኦኬ ፡ ወንግሮ ፡ ፍትሖ ፡ ወኵነኔሁ ፡ ለእግዚኣብሔር ፡ ከመ ፡ ይዕቀብ ፡ በህየ ፨ ፨ ፨
=== chapter 40 ===
[፵ ፡ ኀበ ፡ አዘዞ ፡ ሳዶቅ ፡ ካህን ፡ ለዳዊት ፡ ንጉሥ ።]
ወአውሥአ ፡ ሰዶቅ ፡ ካህን ፡ ወይቤሎ ፡ ስማዕ ፡ ዘእነግረከ ፤ ወለእመ ፡ ገበርከ ፡ ተሐዩ ፡ ለእግዚኣብሔር ፡ ወለእመሰ ፡ ኢገበርከ ፡ ይቀሥፈከ ፡ እግዚኣብሔር ፡ ወትከውን ፡ ሕጹጸ ፡ እምነ ፡ ኵሉ ፡ አሕዛብ ፡ ወትትመዋእ ፡ በፀርከ ፡ ወይመይጥ ፡ ገጾ ፡ እምኔከ ፡ ወትከውን ፡ ድንጉፀ ፡ ወሕዙነ ፡ ወሕሙመ ፡ በልብከ ፡ ወንዋምከኒ ፡ ዘእንበለ ፡ ህድአት ፡ ወጥዒና ፤ ወስማዕ ፡ ቃለ ፡ እግዚኣብሔር ፡ ወግበር ፡ ወኢትትገሐሥ ፡ ኢለየማን ፡ ወኢለፀጋም ፡ እምዘ ፡ ንኤዝዘከ ፡ ዮም ፡ ወኢታምልክ ፡ አማልክተ ፡ ባዕድ ። ወለእመ ፡ ኢሰማዕከ ፡ ቃለ ፡ እግዚኣብሔር ፡ ስማዕ ፡ ዘይረክበከዝንቱ ፡ ኵሉ ፡ መርገም ፤ ርጉመ ፡ ትከውን ፡ በሐቅል ፡ ርጉመ ፡ ትከውን ፡ በሀገር ፤ ርጉመ ፡ ይከውን ፡ ፍሬምድርከ ፡ ርጉመ ፡ ይከውን ፡ ፍሬ ፡ ከርሥከ ፡ ወዓዕጻደ ፡ ላህምከ ፡ ወመራዕየ ፡ አባግዒከ ፤ ወይፌኑ ፡ ላዕሌከ ፡ እግዚኣብሔር ፡ ረኃበ ፡ ወብድብደ ፡ ወይጠፍእ ፡ ኵሉ ፡ ዘወደይከ ፡ እዴከ ፡ እስከ ፡ ያጠፍአከ ፡ እስመ ፡ ኢሰማዕከ ፡ ቃሎ ። ወይከውነከ ፡ ሰማይ ፡ በመልዕልተ ፡ ርእስከ ፡ ብርተ ፡ ወምድር ፡ በታሕቴከ ፡ ኀጺነ ፤ ወይሬስዮ ፡ እግዚኣብሔር ፡ ለዝናመ ፡ ምድርከ ፡ ቆባረወመሬት ፡ ይወርድ ፡ እምሰማይላዕሌከ ፡ እስከ ፡ ይደፍነከ ፡ ወእስከ ፡ ያጠፍአከ ፤ ወትትቀተል ፡ በቅድመ ፡ ፀርከ ፡ በአሐቲ ፡ ፍናውትወፅእ ፡ ኀቤሆሙ ፡ ወበስብዕ ፡ ፍናው ፡ ትነትዕ ፡ እምቅድመ ፡ ገጾሙ ፡ ወትከውን ፡ ዝርወ ፡ ወአብድንቲከኒ ፡ መብልዐ ፡ ለአዕዋፈ ፡ ሰማይ ፡ ወዓልቦ ፡ ዘይቀብረከ ፤ ወይቀሥፈከ ፡ በዐበቅ ፡ በደዌ ፡ ሲሕ ፡ ወበፈፀንት ፡ ወበመቅሠፍተ ፡ ግብጽ ፡ ወበዐዊር ፡ ወበድንጋፄ ፡ ልብ ፡ ወታረመስስ ፡ መዐልተ ፡ ከመ ፡ ዕዉር ፡ በውስተ ፡ ጽልመት ፡ ወኢትረክብ ፡ ዘይረድአከ ፡ በግፍዕ ፤ ወታወስብ ፡ ብእሲተወየሀይደካሃ ፡ ካልእ ፡ ብእሲ ፤ ወትነድቅ ፡ ቤተ ፡ ወኢትነብር ፡ ውስቴቱ ፤ ወትተክል ፡ ወይነ ፡ ወኢትቀሥም ፡ አስካሎ ፤ ወይጠብሑ ፡ ላህመከ ፡ ሥቡሐ ፡ በቅድሜከ ፡ ወኢትበልዕ ፡ እምኔሁ ፤ ወየሀይዱ ፡ አድገከ ፡ ወኢያገብኡ ፡ ለከ ፤ ወይገብእ ፡ አባግዒከ ፡ ለአግብርት ፡ ወለፀርከ ፡ ወኢትረክብ ፡ ዘይረድአከ ፤ ወይገብኡ ፡ ደቂቅከ ፡ ወአዋልዲከ ፡ ለካልእ ፡ ሕዝብ ፡ ትሬኢ ፡ በአዕይንቲከ ፡ እንዘ ፡ ይኰርዕዎሙ ፡ ወአልቦ ፡ ዘትክል ፡ ገቢረ ፤ ወይበልዕ ፡ ፀር ፡ እለ ፡ ኢታአምር ፡ እክለ ፡ ምድርከ ፡ ወጻማከ ፡ ወኢትክል ፡ ከሊአ ፡ ወትከውን ፡ ጽዑረ ፡ ወድንጉፀ ፤ ሶበ ፡ ጸብሐ ፡ ትብል ፡ እፎ ፡ ይመሲ ፡ ወሶበ ፡ መስየ ፡ ትብል ፡ እፎ ፡ ይጸብሕ ፡ እምብዝኀተ ፡ ፍርሀት ፤ ለእመ ፡ ኢሰማዕከ ፡ ቃለ ፡ እግዚኣብሔር ። ወለእመ ፡ ሰሚዐ ፡ ሰማዕከ ፡ ቃለ ፡ እግዚአብሔርስማዕ ፡ ዘይረክበከ ፡ ሠናይ ፡ እምኀበ ፡ እግዚኣብሔር ፤ ወትኴንን ፡ አህጉረ ፡ ፀር ፡ ወትወርስ ፡ ክብረ ፡ ዘለዓለም ፡ እምኀበ ፡ እግዚኣብሔር ፡ አምላከ ፡ እስራኤል ፡ ዘኵሎ ፡ ይመልክ ፤ እስመ ፡ ያከብሮ ፡ ለዘ ፡ አክበሮ ፡ ወያፈቅሮ ፡ ለዘ ፡ አፍቀሮ ፤ እስመ ፡ መላኬ ፡ ሞት ፡ ወሕይወት ፡ ውእቱ ፤ ይኤዝዝ ፡ ወይመልክ ፡ ኵሎ ፡ ዓለመ ፡ በጥበቡ ፡ ወበክሂሎቱ ፡ ወበመዝራዕቱ ፨ ፨ ፨ ፨ ፨ ፨
=== chapter 41 ===
[፵፩ ፡ በእንተ ፡ በረከተ ፡ ነገሥት ። ወስማዕሂ ፡ ዘይረክበከ ፡ ቡራኬ ፡ ለእመ ፡ ገበርከ ፡ ፈቃዶ ፡ ለእግዚኣብሔር ።]
ቡሩከ ፡ ትከውንበኵሉ ፡ ፍናዊከ ፡ ቡሩከ ፡ ትከውን ፡ በሀገር ፡ ቡሩከ ፡ ትከውን ፡ በሐቅል ፤ ቡሩከ ፡ ትከውን ፡ በቤትከ ፡ ቡሩከ ፡ ትከውን ፡ በአፍአከ ፤ ቡሩከ ፡ ይከውን ፡ ፍሬ ፡ ከርሥከ ። ይቤሉ ፡ ጉቡኣን ፡ አሜን ። ቡሩከ ፡ ይከውን ፡ ፍሬ ፡ ምድርከ ። አሜን ። ቡሩከ ፡ ይከውን ፡ አንቅዕተ ፡ ማያቲከ ። አሜን ። ቡሩከ ፡ ይከውንፍሬ ፡ አትክልቲከ ። አሜን ። ቡሩከ ፡ ይከውንዐጸደ ፡ ላህምከ ፡ ወመራዕየ ፡ አባግዒከ ። አሜን ። ቡሩከ ፡ ይከውን ፡ መዛግብቲከ ፡ ወተረፋቲከ ። አሜን ። ቡሩከ ፡ ትከውን ፡ በበአትከ ። አሜን ። ቡሩከ ፡ ትከውን ፡ በፀአትከ ። አሜን ። ወያገብኦሙ ፡ እግዚኣብሔር ፡ ለፀርከ ፡ ለእለ ፡ ይትቃወሙከ ፡ ይትቀጥቀጡ ፡ በታሕተ ፡ እገሪከ ። አሜን ። ወይፌኑ ፡ እግዚኣብሔርውስተ ፡ አብያቲከ ፡ በረከቶ ፡ ወውስተ ፡ ኵሉዘወደይከ ፡ እዴከ ። አሜን ። ወያበዝኀከ ፡ እግዚኣብሔር ፡ ውስተ ፡ ሠናይት ፡ በውሉደ ፡ ከርሥከ ፡ ወበእክለ ፡ ምድርከ ፡ ወበተዋልዶ ፡ እንስሳከ ። አሜን ። ወበምድር ፡ እንተ ፡ መሐለ ፡ ለአበዊከ ፡ ይሁበከ ፡ ከመ ፡ መዋዕለ ፡ ሰማይ ። አሜን ። ወይፈትሕ ፡ ለከእግዚኣብሔር ፡ መዝገበ ፡ በረከተ ፡ ሰማያት ፡ ወይሁበከ ፡ ዝናመ ፡ ቡሩከ ፡ ወይባርክ ፡ ለከ ፡ ፍሬ ፡ ተግባርከ ። አሜን ። ወትሌቅሕ ፡ አንተ ፡ ለብዙኃንአሕዛብ ፡ ወአንተሰ ፡ ኢትትሌቃሕ ። አሜን ። ወትኴንን ፡ አንተ ፡ ለብዙኃን ፡ አሕዛብ ፡ ወለከሰ ፡ ኢይኴንኑከ ። አሜን ። ወይሠይመከ ፡ እግዚኣብሔር ፡ ውስተ ፡ ርእስ ፡ ወአኮ ፡ ውስተ ፡ ዘነብወትከውን ፡ መልዕልተ ፡ ወአኮ ፡ መትሕተ ። አሜን ። ወታስተጋብእ ፡ እምነ ፡ ኵሉ ፡ በረከተ ፡ ምድር ፡ ለእንስሳከ ፤ ወትነሥእ ፡ በርባረ ፡ አሕዛብ ፡ ለትዕይንትከ ፡ ወይሰግዱ ፡ ለከ ፡ ውስተ ፡ ገጸ ፡ ምድር ፡ ለመንግሥትከ ፡ በእንተ ፡ ዕበየ ፡ ክብርከ ፤ ወይትሌዐል ፡ ክብርከ ፡ ከመ ፡ አርዝ ፡ ወከመ ፡ ኮከበ ፡ ጽባሕ ፡ ብርሃነ ፡ ክብርከ ፡ በቅድመ ፡ ኵሉ ፡ አሕዛበ ፡ ምድር ፡ ወበቅድመ ፡ ኵሉ ፡ ነገደ ፡ ሕዝብከ ፡ እስራኤል ፤ እስመ ፡ እግዚኣብሔርኒ ፡ ይሄሉ ፡ ምስሌከ ፡ በኵሉ ፡ ፍኖትከ ፡ ወይገብር ፡ ፈቃደከ ፡ በኵሉ ፡ ዘኀለይከ ። ወትወርስ ፡ አህጉረ ፡ ፀርከ ፡ ወይትዌደስ ፡ ዕበየ ፡ ሕዝብከ ፡ በብዝኀ ፡ ግርማከ ፡ ወበብዝኀ ፡ ሰራዊትከ ፤ ወይፈርሁከ ፡ ኵሉ ፡ እለ ፡ ኢይገብሩ ፡ ፈቃዶ ፡ ለእግዚኣብሔርእስመ ፡ አንተ ፡ ትገብር ፡ ፈቃዶ ፡ ወትትለአክ ፡ ሎቱ ፡ ወበእንተዝ ፡ ይሁበከ ፡ ግርማ ፡ ዐቢየ ፡ በቅድመ ፡ እለ ፡ ይሬእዩከ ፤ በአልጒሞ ፡ አፍራሲከወበምጒንጳ ፡ ቀስትከ ፡ ወበአንጸብርቆ ፡ ወልታከ ፡ ይርዕድ ፡ ልቦሙ ፡ ወይሰግዱ ፡ ለከ ፡ ውስተ ፡ ገጸ ፡ ምድር ፡ እስመ ፡ ይደነግፅ ፡ ልቦሙ ፡ በርእየ ፡ ግርማከ ። ወሶበ ፡ ይሬእዩከ ፡ እምርሑቅ ፡ እለ ፡ ውስተ ፡ አድባር ፡ ይወርዱ ፡ ምድረ ፡ ወእለ ፡ ውስተ ፡ አብሕርት ፡ ወቈላት ፡ ይወፅኡ ፡ አፍአ ፡ ከመ ፡ ያግብኦሙ ፡ እግዚኣብሔር ፡ ውስተ ፡ እዴከ ፡ በእንተ ፡ ዘዐለዉትእዛዘ ፡ እግዚኣብሔር ። ወአንተሰ ፡ ሶበ ፡ ትገብር ፡ ፈቃዶ ፡ ኵሎ ፡ ዘሰአልከ ፡ ትነሥእ ፡ በኀቤሁ ፤ እስመ ፡ ለእመ ፡ አፍቀርኮ ፡ ያፈቅረከ ፡ ወለእመ ፡ ዐቀብከ ፡ ትእዛዞ ፡ ይሁበከ ፡ ስእለተ ፡ ልብከ ፡ ወኵሎ ፡ ዘኀሠሥከ ፡ ትነሥእ ፡ በኀቤሁ ። እስመ ፡ ኄር ፡ ለኄራንወየዋህ ፡ ለየዋሃን ፡ ውእቱ ፡ ወይገብር ፡ ፈቃዶሙ ፡ ለእለ ፡ ይፈርህዎ ፡ ወይሁቦሙ ፡ ዐስበ ፡ ለእለ ፡ ይትዔገሥዎ ፤ ተዐገሳ ፡ ለመዐት ፡ ወድኅረ ፡ ታስተፌሥሐከ ፡ ወአፍቅራ ፡ ለጽድቅ ፡ ወትፈሪ ፡ ለከ ፡ ሕይወት ፤ ኩንኄረ ፡ ለኄራን ፡ ወመገሥጸ ፡ ለመአብሳን ፡ ወአኅድጎ ፡ እኪተ ፡ ለእኩይ ፡ በገሥጾ ፡ ወበአርትዖ ፡ ወበአርስሖ ፡ ወበአኅስሮ ፡ ለዘ ፡ ይዔምፅ ፡ ቢጾ ፡ በእኩይ ፡ በውስተ ፡ ዐውደ ፡ ቅሥት ፤ ወፍታሕ ፡ ለነዳይ ፡ ወለእጓለ ፡ ማውታ ፡ ወአንግፎ ፡ እምእደ ፡ ዘይዔምፆ ፤ ወአድኅን ፡ ባሕታዌ ፡ ወጽኑሰ ፡ ወአንግፎ ፡ እምእደ ፡ ዘይትዔገሎ ። ወኢትፍታሕ ፡ በአድልዎ ፡ ወበነሢአ ፡ ገጽ ፡ አላ ፡ በጽድቅ ፡ ፍታሕ ፤ ወኢታፍቅር ፡ ሕልያነ ፡ በነሢአ ፡ ፍትሕ ፡ በአድልዎ ፡ ለገጽ ፤ ወለመኳንንቲከኒ ፡ ገሥጾሙ ፡ ከመይኩኑ ፡ ንጹሓነ ፡ እምሕልያን ፡ ወኢያድልዉ ፡ ፍትሐ ፡ ለገጸ ፡ ፍቁራኒሆሙ ፡ ወኢለጸላኢሆሙ ፤ ወኢለአብዕልቲሆሙ ፡ ወኢለነዳያኒሆሙ ፤ አላ ፡ በጽድቅ ፡ ኵነኔ ፡ ይኴንኑ ፡ ቢጾሙ ፡ በርቱዕ ፡ ፍትሕ ፨
=== chapter 42 ===
[፵፪ ፡ በእንተ ፡ ፲ ፡ ቃላት ። ወስምዑ ፡ እስራኤል ፡ ዘተአዘዘ ፡ እምእግዚኣብሔር ፡ ከመ ፡ ትዕቀቡ ፡ ኪያሁ ።]
ወይቤ ፡ አነ ፡ ውእቱ ፡ እግዚኣብሔር ፡ አምላክከ ፡ ዘአውፃእኩከ ፡ እምነ ፡ ምድረ ፡ ግብጽ ፡ ወእምነ ፡ ቤተ ፡ ቅኔ ፤ ወኢይኩን ፡ ባዕደ ፡ አማልክተ ፡ ዘእንበሌየ ፡ ወኢትግበር ፡ አምላከ ፡ ዘግልፎ ፡ ወኢበኵሉ ፡ አምሳል ፡ ዘውስተ ፡ ሰማይ ፡ ዘላዕሉ ፡ ወኢበኵሉ ፡ ዘበ ፡ ምድር ፡ በታሕቱ ፡ ወኢዘውስተ ፡ ማይ ፡ ዘመትሕተ ፡ ምድር ፤ ወኢትስግድ ፡ ሎሙ ፡ ወኢታምልኮሙ ፤ እስመ ፡ አነ ፡ እግዚኣብሔር ፡ አምላክከ ፡ አምላክ ፡ ቀናኢ ፡ ዘእትፈደይ ፡ ኀጢአተ ፡ ወላዲ ፡ ላዕለ ፡ ውሉድ ፡ እስከ ፡ ሣልስ ፡ ወራብዕ ፡ ትውልድ ፡ ለእለ ፡ ይጸልኡኒ ፤ ወእገብር ፡ ምሕረተ ፡ እስከ ፡ ፼ ፡ ትውልድ ፡ ለእለ ፡ ያፈቅሩኒ ፡ ወየዐቅቡ ፡ ትእዛዝየ ። ወኢትምሐል ፡ ስመ ፡ እግዚኣብሔር ፡ አምላክከ ፡ በሐሰት ፡ እስመ ፡ ኢያነጽሕ ፡ እግዚኣብሔር ፡ ለዘ ፡ ይምሕል ፡ ስሞ ፡ በሐሰት ። ወዕቀብ ፡ ዕለተ ፡ ሰንበት ፡ ከመ ፡ ትቀድሳ ፡ በከመ ፡ አዘዘ ፡ እግዚኣብሔር ፡ አምላክከ ፤ ሰዱሰ ፡ መዋዕለ ፡ ትገብር ፡ ግብረከ ፡ ወበሳብዕት ፡ ዕለት ፡ ሰንበቱ ፡ ለእግዚኣብሔር ፡ አምላክከ ፡ ኢትግበር ፡ ባቲ ፡ ግብረ ፡ ቅኔ ፡ ኢአንተ ፡ ወኢወልድከ ፡ ወኢወለትከ ፡ ወኢገብርከ ፡ ወኢአድግከ ፡ ወኢኵሉ ፡ እንስሳከ ፡ ወኢፈላሲ ፡ ዘይነብር ፡ ኀቤከ ፤ እስመ ፡ በሰዱስ ፡ መዋዕል ፡ ገብረ ፡ እግዚኣብሔር ፡ ሰማየ ፡ ወምድረ ፡ ወባሕረ ፡ ወኵሎዘውስቴታ ፡ ወአዕረፈ ፡ አመ ፡ ዕለተ ፡ ሳብዕት ፡ ወበበይነዝ ፡ ባረካ ፡ እግዚኣብሔር ፡ ለሳብዕት ፡ ዕለት ፡ ወአጽደቃ ። አክብር ፡ አባከ ፡ ወእምከ ፡ ከመ ፡ ይኩንከ ፡ ጽድቀ ፡ ብዙኀ ፡ ዕለተ ፡ ትረክብ ፡ በውስተ ፡ ምድር ፡ ዘወሀበከ ፡ እግዚኣብሔር ፡ አምላክከ ። ኢትሖር ፡ ብእሲተ ፡ ብእሲ ። ኢትቅትል ፡ ነፍሰ ። ኢትዘሙ ። ኢትስርቅ ። ስምዐ ፡ በሐሰት ፡ ኢትስማዕ ፡ ላዕለ ፡ ቢጽከ ። ወኢትፍትው ፡ ብእሲተ ፡ ካልእከ ፡ ኢቤቶ ፡ ወኢገራህቶ ፡ ወኢገብሮ ፡ ወኢአመቶ ፡ ወኢላህሞ ፡ ወኢብዕራዮ ፡ ወኢአድጎ ፡ ወኢእምኵሉ ፡ እንስሳሁ ፡ ዘአጥረየ ፡ አጥርዮ ፡ ካልእከ ፤ ዝነገር ፡ ዘነገረ ፡ እግዚኣብሔርሕጎ ፡ ወሥርዐቶ ፡ ወለእለኒ ፡ ይኤብሱ ፡ ገሥጾሙ ፡ ከመ ፡ ኢይጽንዑ ፡ ውስተስሒት ፡ ወይትዐገሱ ፡ እምርኵስ ፡ ዘኢሠምረ ፡ እግዚኣብሔር ፤ ወዝንቱ ፡ ውእቱ ፡ ነገር ፡ ዘኢሠምረ ፡ እግዚኣብሔር ፡ ወርቱዕ ፡ ይትገሐሱ ፡ እምኔሁ ፡ ብእሲ ፡ ብእሲ ፡ ኀበ ፡ ይከውኖ ፡ ዘመዱ ፡ ኢይባእ ፡ ይክሥት ፡ ኀፍረቶ ፤ እስመ ፡ አነ ፡ ውእቱ ፡ እግዚኣብሔር ፡ አምላክክሙ ። ኀፍረተ ፡ አቡከ ፡ ወእምከ ፡ ኢትክሥት ፡ እስመ ፡ እምከ ፡ ይእቲ ፤ ኢትክሥት ፡ ኀፍረተ ፡ ብእሲተ ፡ አቡከ ፡ እስመ ፡ ኀፍረተ ፡ እምከ ፡ ይእቲ ፤ ኀፍረተ ፡ እኅትከ ፡ እንተ ፡ እምነ ፡ አቡከ ፡ አው ፡ እንተ ፡ እምነ ፡ እምከ ፡ ኢትክሥት ፤ እመኒ ፡ እንተ ፡ እምነ ፡ አፍአ ፡ ተወልደት ፡ ሎቱ ፡ ወእመኒ ፡ እንተ ፡ እምአዝማዲከ ፡ ይእቲ ፡ ኢትክሥት ፡ ኀፍረታ ፤ ኀፍረተ ፡ ወለተ ፡ ወልድከ ፡ ኢትክሥት ፡ አው ፡ ኀፍረተ ፡ ወለተ ፡ ወለትከ ፡ ኢትክሥት ፡ እስመ ፡ ኀፍረትከ ፡ ይእቲ ፤ ኀፍረተ ፡ ወለተ ፡ ብእሲተ ፡ አቡከ ፡ ኢትክሥት ፡ እስመ ፡ እኅትከ ፡ ወለተ ፡ እምከ ፡ ይእቲ ፡ ወኢትክሥት ፡ ኀፍረታ ፤ ኀፍረተ ፡ እኅተ ፡ አቡከ ፡ ኢትክሥት ፡ እስመ ፡ ቤተ ፡ አቡከ ፡ ይእቲ ፤ ኀፍረተ ፡ እኅተ ፡ እምከ ፡ ኢትክሥት ፡ እስመ ፡ ቤተ ፡ እምከ ፡ ይእቲ ፤ ኀፍረተ ፡ ብእሲተ ፡ እኁሁ ፡ ለአቡከ ፡ ኢትክሥት ፡ እስመ ፡ ዘመድከ ፡ ይእቲ ፤ ኀፍረተ ፡ ብእሲተ ፡ ወልድከ ፡ ኢትክሥት ፡ እስመ ፡ ብእሲተ ፡ ወልድከ ፡ ይእቲ ፤ ኀፍረተ ፡ ወለትከ ፡ ወብእሲተ ፡ ወልደ ፡ እኁከ ፡ ኢትክሥት ፡ እስመ ፡ ኀፍረትከ ፡ ውእቱ ፤ ኀፍረተ ፡ ብእሲተ ፡ እኁከ ፡ ኢትክሥት ፡ እስመ ፡ ኀፍረተ ፡ እኁከ ፡ ይእቲ ፡ አምጣነ ፡ ሀሎ ፡ ሕያው ፡ እኁከ ፤ ኀፍረተ ፡ ብእሲት ፡ ምስለ ፡ ወለታ ፡ ኢትክሥት ፡ ወኢዘወለተ ፡ ወልዳ ፡ ወኢዘወለተ ፡ ወለታ ፡ ኢትግበር ፡ ከመ ፡ ትክሥት ፡ ኀፍረቶን ፡ ቤትከ ፡ ውእቱ ፡ ወኀጢአት ፡ ውእቱ ፤ ወብእሲተ ፡ ምስለ ፡ እኅታ ፡ ኢታውስብ ፡ ከመ ፡ ታስተቃንዖን ፡ ወከመ ፡ ትክሥትኀፍረቶን ፡ ለዛቲኒ ፡ ወዘእንታክቲኒ ፡ እንዘ ፡ ዓዲሃ ፡ ቀዳሚት ፡ ሕያውት ፡ ይእቲ ፤ ወኀበ ፡ ብእሲት ፡ ትክት ፡ ኢትባእ ፡ እንበለ ፡ ትንጻሕ ፡ ከመ ፡ ትክሥት ፡ ኀፍረታ ፡ እንዘ ፡ ዓዲ ፡ ርኵስት ፡ ይእቲ ፤ ወኢትባእ ፡ ኀበ ፡ ብእሲተ ፡ ካልእከ ፡ ከመ ፡ ትስክብ ፡ ምስሌሃ ፡ ወኢትዝራእ ፡ ዘርእከ ፡ ውስቴታ ፤ ወኢታስተፃምድ ፡ ኀበ ፡ መልአከ ፡ ውሉድከ ፡ ከመ ፡ ኢታርኵስ ፡ ስሞ ፡ ለቅዱስ ፡ ስመ ፡ እግዚኣብሔር ፤ ወምስለ ፡ ተባዕት ፡ ኢትስክብ ፡ ከመ ፡ ምስለ ፡ አንስት ፡ እስመ ፡ ርኩስ ፡ ውእቱ ፤ ወኢትሖር ፡ ኀበ ፡ እንስሳ ፡ ወኢትስክብ ፡ ከመ ፡ ታ ፡ ውፅእ ፡ ዘርአከ ፡ ላዕሌሁ ፡ ከመ ፡ ኢትርኰስ ፡ ቦቱ ፡ ወብእሲትኒ ፡ ኢትሖር ፡ ኀበ ፡ እንስሳ ፡ ከመ ፡ ይስክባ ፡ እስመ ፡ ርኵስ ፡ ውእቱ ። ወኢታርኵሱ ፡ ርእሰክሙ ፡ በኵሉ ፡ ዝንቱ ፡ እስመ ፡ ቦቱ ፡ ረኵሱ ፡ አሕዛብ ፡ እለ ፡ አነ ፡ አውፃእክዎሙ ፡ እምቅድሜክሙ ፡ ወበዝንቱ ፡ ኢታርኵሱ ፡ ሥጋክሙ ፤ ወቀድሱ ፡ ነፍሰክሙ ፡ ወሥጋክሙ ፡ ለእግዚኣብሔር ፡ እስመ ፡ ቅዱስ ፡ ውእቱ ፡ ወያፈቅሮሙ ፡ ለእለ ፡ ይቄድሱ ፡ ነፍሶሙ ፡ ወሥጋሆሙ ፡ ሎቱ ፤ እስመ ፡ ቅዱስ ፡ ወግሩም ፡ ወልዑል ፡ ውእቱ ፡ ወመሓሪ ፡ ወመስተሣህል ፡ ውእቱ ፡ ወሎቱ ፡ ይደሉ ፡ ስብሐት ፡ ለዓለመ ፡ ዓለም ፡ አሜን ፨ ፨ ፨ ፨ ፨ ፨ ፨ ፨
=== chapter 43 ===
[፵፫ ፡ ኀበ ፡ ተአዘዙ ፡ ደቂቀ ፡ ኀይለ ፡ እስራኤል ።]
ሀገርሰ ፡ ተፈሥሐት ፡ በእንተ ፡ ዘአንገሠ ፡ ወልዶ ፡ ንጉሥ ፡ ወረሰዮ ፡ ንጉሠ ፡ እምደወሉ ፡ እስከ ፡ ደወለ ፡ ባዕድ ፤ ወዓዲ ፡ ሐዘነት ፡ ሀገር ፡ እስመ ፡ አዘዘ ፡ ንጉሥ ፡ ከመ ፡ የሀቡ ፡ ደቂቆሙ ፡ እለ ፡ ተሰምዩ ፡ በኵረ ፤ ወእለኒ ፡ እምየማን ፡ ከማሁ ፡ ይንበሩ ፡ በከመ ፡ አበዊሆሙ ፡ ይነብሩ ፡ ምስለ ፡ ንጉሥ ፡ ሰሎሞን ፡ ከማሁ ፡ ይንበሩ ፡ በየማነ ፡ ወልዱ ፡ ዳዊት ፡ ንጉሠ ፡ ኢትዮጵያ ፡ ወእለኒ ፡ እምፀጋም ፡ ከማሁ ፡ ይንበሩ ፡ በከመ ፡ አበዊሆሙ ፡ ይነብሩ ፡ ምስለ ፡ ንጉሥ ፡ ሰሎሞን ፡ ከማሁ ፡ ይንበሩ ፡ በፀጋሙ ፡ ለወልዱ ፡ ዳዊት ፡ ንጉሠ ፡ ኢትዮጵያ ፤ ወሢመቶሙኒ ፡ በከመ ፡ አበዊሆሙ ፡ ወአስማቲሆሙኒ ፡ በከመ ፡ አበዊሆሙ ፤ ፤ ወኵሉ ፡ በከመ ፡ በበሥርዐቱ ፡ ወበበ ፡ በከመ ፡ ዕበዩ ፡ ወበበ ፡ በከመ ፡ ምልክናሁ ፡ ወበበ ፡ በከመ ፡ ምርካቡ ፡ ወበበ ፡ በከመ ፡ ምኵናኑ ፤ ከማሁ ፡ ይኩኑ ፡ በከመ ፡ ገብረ ፡ ሰሎሞን ፡ ለመኳንንቲሁ ፡ ከማሁ ፡ ይግበር ፡ ሎሙ ፡ ዳዊትሂ ፡ ለመኳንንቲሁ ፡ ወበከመ ፡ ሠርዖሙ ፡ ሰሎሞን ፡ ለመገብቱ ፡ ወከማሁ ፡ ዳዊትሂ ፡ ይሥራዕ ፡ ሥርዐተ ፡ ቤቱ ፨ ፡ ወከመ ፡ ዝ ፡ አስማቲሆሙ ፡ ለእለ ፡ ተሠይሙ ፡ ይትፈነዉ ። አዛርያስ ፡ ወልደ ፡ ሳዶቅ ፡ ካህን ፡ ዝውእቱ ፡ ሊቀ ፡ ካህናት ፤ ወኤልያስ ፡ ወልደ ፡ አርኒ ፡ ሊቀ ፡ ዲያቆናት ፡ ወአቡሁሰ ፡ ለአርኒ ፡ ሊቀ ፡ ዲያቆናት ፡ ናታን ፡ ነቢይ ፤ ወአድራም ፡ ወልደ ፡ አርድሮንስ ፡ መልአከ ፡ አሕዛብ ፤ ወፈንቄራ ፡ ወልደ ፡ ሶባ ፡ ጸሓፌ ፡ ላህም ፤ ወአኮንሔል ፡ ወልደ ፡ ጦፌል ፡ እንዘ ፡ ሕፃን ፤ ወሳምንያስ ፡ ወልደ ፡ አኪታለም ፡ መዘክር ፤ ወፈቃሮስ ፡ ወልደ ፡ ንያ ፡ መልአከ ፡ ሰርዌ ፡ ዝውእቱ ፡ ሊቀ ፡ ሐራ ፤ ወሌዋንዶስ ፡ ወልደ ፡ አኪሬ ፡ መልአከ ፡ አንገቦት ፤ ወፋቁጤን ፡ ወልደ ፡ አድራይ ፡ መልአካዊ ፡ ለባሕር ፤ ወማታን ፡ ወልደ ፡ ብንያስ ፡ መልህቀ ፡ ቤት ፤ ወአድዐረዝ ፡ ወልደ ፡ ኪሬም ፡ ደቀ ፡ ሰርጒ ፤ ወደለክም ፡ ወልደ ፡ ማትሬም ፡ ሊቀ ፡ ሐራ ፡ ለአፍራስ ፤ ወአደርዮስ ፡ ወልደ ፡ ኔድሮስ ፡ ሊቀ ፡ ሐራ ፡ ለአጋር ፤ ወአውስጥራን ፡ ወልደ ፡ ዮዳድ ፡ ጸዋሬ ፡ ክብር ፤ ወአስተርአዮን ፡ ወልደ ፡ አሳ ፡ ቃለ ፡ ታዕካ ፤ ወኢሚ ፡ ወልደ ፡ መታትያስ ፡ ሊቀ ፡ መጽብእት ፤ ወማክሪ ፡ ወልደ ፡ አቢሳ ፡ ፈታሔ ፡ ታዕካ ፤ ወአቢስ ፡ ወልደ ፡ ካርዮስ ፡ መአስሪ ፤ ሊቀ ፡ ውንድዮስ ፡ ወልደ ፡ ኔልንት ፡ ዮስ ፡ መስፍነ ፡ ዐውድ ፤ ወካርሚ ፡ ወልደ ፡ ሐፃንያስ ፡ ሊቀ ፡ ገባር ፡ ዘቤተ ፡ ንጉሥ ፤ ወስራንያስ ፡ ወልደ ፡ አካዝኤል ፡ መጋቢ ፡ ዘቤተ ፡ ንጉሥ ፤ እሉ ፡ ኵሎሙ ፡ እለ ፡ ተውህቡ ፡ ለዳዊት ፡ ንጉሠ ፡ ኢትዮጵያ ፡ ወልደ ፡ ሰሎሞን ፡ ንጉሠ ፡ እስራኤል ፨ ፡ ወዓዲ ፡ ወሀቦ ፡ አፍራሰ ፡ ወሰረገላተ ፡ ራኵባተ ፡ ወአብቅልተ ፡ ወጽዑነ ፡ ሰረገላተወርቀ ፡ ወብሩረ ፡ ወአልባሰ ፡ ክቡረ ፡ ቢሶሰ ፡ ወሜላተ ፡ ዕንቈ ፡ ባሕርያተ ፡ ወአፍራጸ ፡ ወኵሎ ፡ ዘይትፈቀድ ፡ ለብሔረ ፡ ኢትዮጵያ ፡ ወሀቦ ፡ ለወልዱ ፨ ፡ ወእምዝ ፡ ተደለዉ ፡ ከመ ፡ ይሖሩ ፤ ወኮነ ፡ ፍሥሓ ፡ ለመኳንንተ ፡ ንጉሠ ፡ ኢትዮጵያ ። ወኮነ ፡ ሐዘነ ፡ ለመኳንንተ ፡ ንጉሠ ፡ እስራኤል ፤ እስመ ፡ በእንተ ፡ በኵሩ ፡ ለሰሎሞን ፡ ንጉሠ ፡ እስራኤል ፡ ዝውእቱ ፡ ንጉሠ ፡ ኢትዮጵያ ፡ ተውህበ ፡ በኵሮሙ ፡ ለመኳንንተ ፡ እስራኤል ፡ ከመ ፡ ይንግሡ ፡ ለብሔረ ፡ ኢትዮጵያ ፡ ምስለ ፡ ወልደ ፡ ሰሎሞን ፡ ንጉሥ ። ወእምዝ ፡ ተጋብኡ ፡ ወበከዩ ፡ ምስለ ፡ አበዊሆሙ ፡ ወእማቲሆሙ ፡ ወአዝማዲሆሙ ፡ ወአንጋዲሆሙ ፡ ምስለ ፡ ሕዘቢሆሙ ፡ ወበሓውርቲሆሙ ፡ ወይረግምዎ ፡ በኅቡእ ፡ ለንጉሥ ፡ ወየሐምይዎ ፡ በእንተ ፡ ዘሄደ ፡ ደቂቆሙ ፡ ዘእ ፡ ንበለ ፡ ፈቃዶሙ ፤ ወለንጉሥሰ ፡ ይብልዎ ፡ ሠናየ ፡ ገበርከ ፡ በእንተዝ ፡ እስመ ፡ ኀየሰ ፡ ጥበብከ ፡ ከመ ፡ መንግሥተ ፡ እስራኤል ፡ ኮነት ፡ ለብሔረ ፡ ኢትዮጵያ ፡ በፈቃደ ፡ እግዚኣብሔር ፡ ወበጥበበ ፡ ዚአከ ፡ ወካልኣንኒ ፡ መንግሥታት ፡ ያገብኦን ፡ እግዚኣብሔር ፡ ውስተ ፡ እዴከ ፡ እስመ ፡ ሠናየ ፡ ትኄሊ ፡ ለእግዚኣብሔር ፡ ወትፈቅድ ፡ ከመ ፡ ያምልክዎ ፡ ለአምላከ ፡ እስራኤል ፡ ወከመ ፡ ይሠረዉ ፡ ጣዖታት ፡ እምዓለም ። ወይዌድስዎ ፡ ወይብልዎ ፡ ይእዜ ፡ አእመርነ ፡ ከመ ፡ በእንቲአከ ፡ ይቤሎ ፡ እግዚኣብሔር ፡ ለአቡነ ፡ አብርሃም ፡ በዘርእከ ፡ ይትባረኩ ፡ ኵሎሙ ፡ አሕዛበ ፡ ምድር ፤ ወያሤንዩ ፡ ገጾሙ ፡ ወይስሕቁ ፡ በቅድሜሁ ፡ ወይዌድስዎ ፡ ፈድፋደ ፡ በእንተ ፡ ጥበቡ ፤ ወሶበ ፡ ዘንተ ፡ ይብልዎያአምሮሙ ፡ በጥበብ ፡ ወይትዔገሶሙ ፤ እስመ ፡ እግዚኣብሔር ፡ ይትዔገሰነ ፡ እንዘ ፡ ያአምር ፡ ኵሎ ፡ ኀጢአተነ ፤ መንግሥትሰ ፡ ለእግዚኣብሔር ፡ ኵላ ፡ ምድር ፡ ወሰማያትኒ ፡ ወአጽናፈ ፡ ዓለም ፡ ወባሕር ፡ ወየብስ ፡ ውእቱ ፡ ይኴንን ፤ ወለንጉሠ ፡ ምድርሂ ፡ ወሀቦ ፡ እምታሕቴሁ ፡ ከመ ፡ ይኴንን ፡ ከማሁ ፡ ለእለ ፡ ይገብርዋ ፡ ለእኪት ፡ ከመ ፡ ይፍድዮሙ ፡ እኩየ ፡ ወለእለ ፡ ይገብርዋ ፡ ለሠናይት ፡ ከመ ፡ ይዕስዮሙ ፡ ሠና ፡ የ ፤ እስመ ፡ መንፈሰ ፡ እግዚኣብሔር ፡ ያዐርፍ ፡ ውስተ ፡ ልቡ ፡ ለንጉሥ ፡ ወእደዊሁ ፡ ውስተ ፡ ኅሊናሁ ፡ ወአእምሮቱ ፡ ውስተ ፡ ልቡናሁ ፨ ፨ ፨ ፨ ፨ ፨ ፨ ፨
=== chapter 44 ===
[፵፬ ፡ ከመ ፡ ኢመፍትው ፡ ሐምየ ፡ ንጉሥ ።]
ወኢመፍትው ፡ ይሕምይዎ ፡ ለንጉሥ ፡ እስመ ፡ መሲሑ ፡ ለእግዚኣብሔር ፡ ውእቱ ። ኢመፍትው ፡ ወኢኮነ ፡ ሠናየ ፡ ሐሚዮቱ ፡ ለንጉሥ ፤ ለእመ ፡ ገብረ ፡ ሠናየ ፡ ኢያሀጒል ፡ እም፫ ፡ መንግሥት ፡ ፩ ፡ ያገርር ፡ ሎቱ ፡ ፀሮ ፡ ወኢያገብኦ ፡ ውስተ ፡ እደ ፡ ጸላኢሁ ፤ ፪ ፡ ወበሰማያትኒ ፡ ያነግሦ ፡ ምስሌሁ ፡ ምስለ ፡ ጻድቃኒሁ ፡ ወያነብሮ ፡ በየማኑ ፤ ፫ ፡ በዲበ ፡ ምድርኒ ፡ ያነግሦ ፡ በክብር ፡ ወበፍሥሓ ፡ ወያረትዕ ፡ ሎቱ ፡ መንግሥቶ ፡ ወያገርር ፡ አሕዛበ ፡ ታሕተ ፡ እገሪሁ ። ወእመሰ ፡ ተዐወሮ ፡ ለእግዚኣብሔር ፡ ወኢገብረ ፡ ሠናየ ፡ ወኢ ፡ ሖረ ፡ በፍኖት ፡ ርትዕት ፡ ለሊሁ ፡ እግዚኣብሔር ፡ ይገብር ፡ በከመ ፡ ፈቀደ ፡ ላዕሌሁ ፡ ወበዲበ ፡ ምድርኒ ፡ ያሐጽጽ ፡ መዋዕሊሁ ፡ ወበሰማያትኒ ፡ ውስተ ፡ ማኅደረ ፡ ሲኦል ፡ ምስለ ፡ ዲያብሎስ ፡ ማኅደሩ ፤ ወበዲበ ፡ ምድርኒ ፡ ዘእንበለ ፡ ጥዕና ፡ ወፍሥሓ ፡ ልብ ፡ ምስለ ፡ ድንጋፄ ፡ ወፍርሀት ፡ ዘእንበለ ፡ ሰላም ፡ በሁከት ፨ ፡ ኢኮነ ፡ ሠናየ ፡ ሐሚዮቱ ፡ ለንጉሥ ፡ እምሕዝብ ፡ እለ ፡ እምታሕቴሁ ፡ እስመ ፡ ፍዳ ፡ ለእግዚኣብሔር ፡ ውእቱ ፤ ወባሕቱ ፡ ካህናትሰ ፡ አምሳለ ፡ ነቢያት ፡ እሙንቱ ፡ ወባሕቱ ፡ ፈድፋደ ፡ ይኄይሱ ፡ እምነቢያት ፡ እስመ ፡ ተውህቦሙ ፡ ምሥጢራት ፡ ከመ ፡ ይእኅዙ ፡ ፀሐየ ፡ ጽድቅ ፤ ሱራፌል ፡ እለ ፡ ተፈጥሩ ፡ እምእሳት ፡ ዘኢይክሉ ፡ እኂዘ ፡ ምሥጢራት ፡ ዘእንበለ ፡ በጕጠታት ። ለካህናትሰ ፡ ሰመዮሙ ፡ ፄወ ፤ ወዓዲ ፡ ለካህናት ፡ ሰመዮሙ ፡ ማኅቶተ ፤ ካዕበ ፡ ሰመዮሙ ፡ ብርሃኖ ፡ ለዓለም ፤ ወካዕበ ፡ ሰመዮሙ ፡ ፀሐየ ፡ ዘያበርህ ፡ ጽልመተ ፡ እንዘ ፡ ክርስቶስ ፡ ፀሐየ ፡ ጽድቅ ፡ ውስተ ፡ አልባቢሆሙ ። ወካህንሰ ፡ ዘቦቱ ፡ ልቡና ፡ ይገሥጾ ፡ ለንጉሥ ፡ በእንተ ፡ ምግባራተ ፡ ዘርእየ ፤ ወዘኢርእየሰ ፡ እግዚኣብሔር ፡ ይፈትን ፡ ወአልቦ ፡ ዘይወቅሶ ። ወዓዲ ፡ ኢይሕምይዎሙ ፡ አሕዛብ ፡ ለጳጳሳት ፡ ወለካህናት ፤ እስመ ፡ ደቂቀ ፡ እግዚኣብሔር ፡ ወሰብአ ፡ ቤቱ ፡ እሙንቱ ፤ በእንተ ፡ ዘገሠጽዎሙ ፡ በእንተ ፡ ኀጢአቶሙ ፡ ወጌጋዮሙ ። ወአንተኒ ፡ ኦካህን ፡ ለእመ ፡ ርኢከ ፡ ዕዉቀ ፡ ኀጢአቶ ፡ ለብእሲ ፡ ኢትኅፈር ፡ ገሥጾቶ ፡ ኢያፍርህከ ፡ ሰይፍ ፡ ወኢስደት ፤ ወስማዕ ፡ ዘከመ ፡ ተምዕዖ ፡ እግዚኣብሔር ፡ ለኢሳይያስ ፡ በእንተ ፡ ዖዝያንንጉሥ ፡ እስመ ፡ ኢገሠጾ ፤ ወካዕበ ፡ ስማዕ ፡ በእንተ ፡ ሳሙኤል ፡ ነቢይ ፡ ዘከመ ፡ ገሠጾ ፡ ለሳኦል ፡ ንጉሥ ፡ እንዘ ፡ ኢየኀፍሮ ፡ ወሠጠጠ ፡ መንግሥቶ ፡ በነገሩ ፤ ወኤልያስኒ ፡ ለአከአብ ፤ ወአንተኒ ፡ ኢትኅፈር ፡ ገሥጾ ፡ ወመሀሮ ፡ ለዘ ፡ ይኤብስ ። ወእስራኤልሰ ፡ እምትካት ፡ የሐምዩ ፡ ንጉሦሙ ፡ ወያምዕዑ ፡ ነቢያቲሆሙ ፡ ወድኅረሰ ፡ ሰቀሉ ፡ መድኀኒሆሙ ፤ ወሕዝበ ፡ ክርስቲያንሰ ፡ መሀይምናን ፡ ይነብሩ ፡ በሰላም ፡ ዘእንበለ ፡ ደዌ ፡ ወሕማም ፡ ዘእንበለ ፡ ጽልእ ፡ ወማዕቀፍ ፡ ምስለ ፡ ንጉሥነ ፡ እገሌ ፡ መፍቀሬ ፡ እግዚኣብሔር ፡ እንዘ ፡ ኢያአትት ፡ እምልቡ ፡ ነገረ ፡ ጽድቅ ፡ ወሃይማኖት ፡ በእንተ ፡ አብያተ ፡ ክርስቲያናት ፡ ወመሀይምናን ፡ ወፀሩኒ ፡ ግሩራን ፡ በኀይለ ፡ መስቀሉ ፡ ለኢየሱስ ፡ ክርስቶስ ፨ ፨ ፨ ፨ ፨ ፨ ፨ ፨ ፨
=== chapter 45 ===
[፵፭ ፡ በእንተ ፡ ዘበከዩ ፡ ወመከሩ ፡ እለ ፡ ተፈነዉ ።]
ወደቂቀ ፡ መኳንንተ ፡ እስራኤልሰ ፡ እለ ፡ ተአዘዙ ፡ ከመ ፡ ይሖሩ ፡ ምስለ ፡ ወልደ ፡ ንጉሥ ፡ መከሩ ፡ ኅቡረ ፡ እንዘ ፡ ይብሉ ፡ ምንተ ፡ ንሬሲ ፤ እስመ ፡ ኀደግነ ፡ ብሔረነ ፡ ወሙላደነ ፡ ወአዝማዲነ ፡ ወሰብአ ፡ ሀገርነ ። ወይእዜኒ ፡ ሀቡ ፡ ከመ ፡ ናቅም ፡ ኪዳነ ፡ በባሕቲትነ ፡ ዘኢያአምሩ ፡ አዝማዲነ ፡ ከመ ፡ ንትፋቀር ፡ በህየ ፤ ወአልቦ ፡ ዘይጔጒእ ፡ ወይጐነዲ ፡ በዝየ ፡ ወኢንፍራህ ፡ ወኢንናፍቅ ፤ እስመ ፡ ብዝየኒ ፡ እግዚኣብሔር ፡ ወበህየኒ ፡ እግዚኣብሔር ፡ ወይኩን ፡ ሥምረቱ ፡ ለእግዚኣብሔር ፡ ወሎቱ ፡ ስብሐት ፡ እስከ ፡ ለዓለመ ፡ ዓለም ፡ አሜን ፨ ፡ አውሥኡ ፡ አዛርያስ ፡ ወኤልሚያስ ፡ ደቂቀ ፡ ካህናት ፡ ባዕድሰ ፡ ኢያሐዝነነ ፡ በእንተ ፡ ዘጸልኡነ ፡ አዝማዲነ ፡ ወባሕቱ ፡ ነሐዝን ፡ በእንተ ፡ ጽዮን ፡ እግዝእትነ ፡ እስመ ፡ ያኀድጉነኪያሃ ፤ እስመ ፡ ባቲ ፡ አወፈዩነ ፡ ለእግዚኣብሔር ፡ ወተልእክነ ፡ ላቲ ፡ እስከ ፡ ዮም ፡ ወባሕቱ ፡ ነሐዝን ፡ በእንቲአሃ ፡ እስመ ፡ ያኀድጉነ ፡ ኪያሃ ፡ በእንተዝኬ ፡ ፈድፋደ ፡ ያበክየነ ፡ በእንቲአሃ ። ወአውሥኡ ፡ እሙንቱ ፡ ባዕዳን ፡ ወይቤልዎሙ ፡ በአማን ፡ ዛቲ ፡ ይእቲ ፡ እግዝእትነ ፡ ተስፋነ ፡ ወምክሕ ፡ ነ ፡ ወልህቅነ ፡ በብፅዓቲሃ ፡ ወበአይቴ ፡ ንክል ፡ ኀዲጎታ ፡ ለጽዮን ፡ እግዝእትነ ፤ እስመ ፡ ላቲ ፡ ተውህብነ ፡ ወምንተ ፡ ንሬሲ ፤ ሶበ ፡ አበይነ ፡ ትእዛዞ ፡ ይቀትለነ ፡ ንጉሥ ፡ ወኢንክል ፡ ተዐድዎ ፡ እምቃለ ፡ አበዊነ ፡ ወእምትእዛዘ ፡ ንጉሥ ፤ ወምንተ ፡ ንገብር ፡ በእንተ ፡ ጽዮን ፡ እግዝእትነ ፨ ፡ ወአውሥአ ፡ አዛርያስ ፡ ወልደ ፡ ሳዶቅ ፡ ካህን ፡ ወይቤ ፡ አነ ፡ እመክረክሙ ፡ ዘንገብር ፡ ወሀቡኒ ፡ ኪዳነ ፡ እስከ ፡ ፀአተ ፡ ነፍስክሙ ፡ ወመሐሉ ፡ ሊተ ፡ ከመ ፡ ኢትንግሩ ፡ እመሂ ፡ ሞትነ ፡ ወእመሂ ፡ ሐየውነ ፡ ወእመሂ ፡ ተእኅዝነ ፡ ወእመሂ ፡ ወፃእነ ። ወመሐሉ ፡ ሎቱ ፡ በስመ ፡ እግዚኣብሔር ፡ አምላከ ፡ እስራኤል ፡ ወበጽዮን ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ወበዘአሰፈዎ ፡ ለአብርሃም ፡ ወበንጽሑ ፡ ወበኂሩቱ ፡ ለይስሐቅ ፡ ወበዘአስተባዝኆ ፡ ለያዕቆብ ፡ ወአውረሶ ፡ ምድረ ፡ ነኪረ ፡ ሎቱ ፡ ወለዘርኡ ፡ እምድኅሬሁ ። ወዘንተ ፡ ሶበ ፡ መሐሉ ፡ ሎቱ ፡ አውሥኦሙ ፡ ወይቤሎሙ ፡ ሀቡኬ ፡ ንንሥኣ ፡ ለጽዮን ፡ እግዝእትነ ፡ ወዘከመሂ ፡ ንነሥኣ ፡ አየድዐክሙ ፤ ወግበሩ ፡ ምክርየ ፡ ለእመ ፡ እግዚኣብሔር ፡ ፈቀደ ፡ ንክል ፡ ነሢኦታ ፡ ለእግዝእትነ ፡ ምስሌነ ፡ ወለእመኒ ፡ አእመሩነ ፡ ወቀተሉነ ፡ ኢያሐዝነነ ፡ እስመ ፡ በእንተ ፡ እግዝእትነ ፡ ጽዮን ፡ ንመውት ። ወተንሥኡ ፡ ኵሎሙ ፡ ወሰዐምዎ ፡ ርእሶ ፡ ወገጾ ፡ ወዐይኖ ፡ ወይቤልዎ ፡ ንገብር ፡ ኵሎ ፡ ዘአምከርከነ ፡ ንመውትሂ ፡ ወነሐዩሂ ፡ ምስሌከ ፡ በእንተ ፡ እግዝእትነ ፡ ጽዮን ፤ እመኒ ፡ ሞትነ ፡ ኢያሐዝነነ ፡ ወለእመ ፡ ሐየውነ ፡ ዘፈቀደ ፡ እግዚኣብሔር ፡ ይከውን ። ወይቤ ፡ ፩ ፡ እምኔሆሙ ፡ ወልደ ፡ ዮአስ ፡ ዘስሙ ፡ ዘካርያስ ፡ አንሰ ፡ ስእንኩ ፡ ነቢረ ፡ እምብዝኀ ፡ ፍሥሓ ፡ ዘውስተ ፡ ልብየ ፤ ንግረኒኬ ፡ አንተሰ ፡ ትክል ፡ ነሢኦታ ፡ በአማን ፡ ወኢኮነ ፡ ሐሰት ፡ እስመ ፡ አንተ ፡ ታንሶሱ ፡ ውስተ ፡ ቤተ ፡ እግዚኣብሔር ፡ ህየንተ ፡ አቡከ ፡ ወመራኁትኒ ፡ ውስተ ፡ እዴከ ፡ ኵሎ ፡ ጊዜ ፤ ወዘእንበለ ፡ ይንሥኡ ፡ መራኁተ ፡ እምእዴከ ፡ ጠይቅ ፡ በዘ ፡ ንመክር ፡ ወመሳክዋተኒ ፡ ኅቡኣተ ፡ ዘገብረ ፡ ንጉሥ ፡ ሰሎሞን ፡ አንተ ፡ ታአምር ፤ ወካህናትኒ ፡ አልቦሙ ፡ ዘይበውኡ ፡ ህየ ፡ ዘእንበለ ፡ አቡከ ፡ ምዕረ ፡ በበ ፡ ዓመት ፡ ከመ ፡ ይሡዕ ፡ ውስተ ፡ ቅድስተ ፡ ቅዱሳን ፡ በእንተ ፡ ርእሱ ፡ ወበእንተ ፡ ሕዝብ ፤ ፍቅድ ፡ ወኀሊወኢትኑም ፡ በእንተዝ ፡ ግብር ፡ ከመ ፡ ትፍቅድ ፡ ነሢኦታ ፡ ወንሖር ፡ ምስሌሃ ፡ በከመ ፡ አወፈዩነ ፡ ወትኩን ፡ ለነ ፡ ፍሥሓ ፡ ወለአበዊነ ፡ ሐዘን ፡ በምጽአተ ፡ ዚአሃ ፡ ምስሌነ ፡ ውስተ ፡ ሀገረ ፡ ኢትዮጵያ ። ወእምዝ ፡ ይቤሎሙ ፡ አዛርያስ ፡ ግበሩ ፡ ዘአነ ፡ እቤለክሙ ፡ ወንረክብ ፡ ሀቡኒ ፡ በበ ፡ ፲ ፡ ዲድረክም ፡ ወእሁቦ ፡ ለፀራቢ ፡ ከመ ፡ ያፍጥን ፡ ሊተ ፡ ገቢረ ፡ አልዋሐ ፡ ሠናያነ ፡ ወያስተጣግዖን ፡ ሊተ ፡ ፍጡነ ፡ በእንተ ፡ ፍቅረ ፡ ብሩር ፡ በቆማ ፡ ወግድማ ፡ ወኑኃ ፡ ወስፍራ ፡ ለእግዝእትየ ፤ ወእሁቦ ፡ ሰፊርየ ፡ ላቲ ፡ ወእብሎ ፡ ረሲ ፡ ሊተ ፡ ምስማከ ፡ ከመ ፡ እግበር ፡ አርማሰ ፤ እስመ ፡ ነሐውር ፡ ዲበ ፡ ባሕር ፤ እመቦ ፡ ለእመ ፡ ተጐድአት ፡ ሐመር ፡ ከመ ፡ እዕርግ ፡ ውስተ ፡ ረመስ ፡ ወንድኀን ፡ እምባሕር ፤ ወአነ ፡ እወስዳ ፡ በበ ፡ ፭ ፡ ዘእንበለ ፡ አስተጣግዖ ፡ ወበህየ ፡ ኣስተላጽቆን ፡ ለእሙንቱ ፡ ዕፀው ፡ ወኣነብሮን ፡ ውስተ ፡ ምንባሪሃ ፡ ለጽዮን ፡ ወኣለብሶን ፡ አልባሲሃ ፡ ለጽዮን ፡ ወእነሥኣ ፡ ለጽዮን ፡ ወእከሪ ፡ ምድረ ፡ ወኣነብራ ፡ ህየ ፡ እስከ ፡ ነሐውር ፡ ወንነሥኣ ፡ ምስሌነ ፤ ወለእግዚእየሰ ፡ ንጉሥ ፡ ኢይነግሮ ፡ እስከ ፡ ነሐውር ፡ ርሑቀ ። ወወሀብዎ ፡ ኵሎሙ ፡ በበ ፡ ፲ ፡ ዲድርክም ፡ ወገብሩ ፡ ፻ወ፵ ፡ ዲድርክም ፡ ወነሥኦ ፡ ወወሀቦ ፡ ለጸራቢ ፡ ወአሠነየ ፡ ሎቱ ፡ በአሐቲ ፡ ጊዜ ፡ እምነ ፡ ተረፋተ ፡ ዕፀው ፡ ዘቤተ ፡ መቅደስ ፤ ወተፈሥሐ ፡ ወአርአዮሙ ፡ ለአኀዊሁ ፨ ፨ ፨ ፨ ፨ ፨ ፨ ፨
=== chapter 46 ===
[፵፮ ፡ ዘከመ ፡ መከሩ ፡ በእንተ ፡ ጽዮን ።]
ወእንዘ ፡ ይነውም ፡ በሌሊት ፡ አስተርአዮ ፡ መልአከ ፡ እግዚኣብሔር ፡ ለአዛርያስ ፡ ወይቤሎ ፡ ንሣእ ፡ ለከ ፡ ፬ ፡ ጠሊተ ፡ ዘዘዓመት ፡ ዘበእንተ ፡ ኀጢአትክሙ ፡ ወለከ ፡ ወለኤልምያስ ፡ ወለአቢስ ፡ ወለማክሪ ፡ ወአርባዕተ ፡ በግዐ ፡ ንጹሐ ፡ ዘዘዓመት ፡ ወአሐተ ፡ ላህመ ፡ እንተ ፡ ኢሰሐበት ፡ አርዑተ ፡ ወትሠውዓ ፡ እምሥራቃ ፡ ወአባግዐኒወአጣሌ ፡ በየማና ፡ ወበፀጋማ ፡ ወበዐረቢሃ ፡ እንተ ፡ ኀበ ፡ ሙፃኣ ፤ ወይንግሮ ፡ እግዚእክሙ ፡ ዳዊት ፡ ለሰሎሞን ፡ ንጉሥ ፡ ወይበሎ ፡ አሐተ ፡ እስእል ፡ በኀቤከ ፡ ኦአባ ፡ ከመ ፡ እሡዕ ፡ ለቅድስት ፡ ሀገር ፡ ኢየሩሳሌም ፡ ወለእግዝእትየ ፡ ጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፤ ወይቤሎግበር ፤ ወካዕበ ፡ ይበሎ ፡ ይሡዕ ፡ ሊተ ፡ ወልደ ፡ ካህን ፡ በከመ ፡ ያአምር ፡ ወይኤዝዘከ ፡ ለከ ፡ ወአንተ ፡ ትሠውዕ ፤ ወታወፅኣ ፡ ለታቦተ ፡ ሕጉ ፡ ለእግዚኣብሔር ፡ እምድኅረ ፡ ሦዕከ ፡ ወካዕበ ፡ ኣስተርእየከ ፡ ዘከመ ፡ ትገብር ፡ ላቲ ፡ እንዘ ፡ ታወፅኣ ፡ እስመ ፡ እምኀበ ፡ እግዚኣብሔር ፡ ኮነት ፡ ዛቲ ፤ እስመ ፡ አምዕዕዎ ፡ እስራኤል ፡ ለእግዚኣብሔር ፡ ወበእንተዝ ፡ ያፈልሳ ፡ ለታቦተ ፡ ሕጉ ፡ ለእግዚኣብሔር ፡ እምኔሆሙ ፨ ፡ ወሶበ ፡ ነቅሀ ፡ እምንዋሙ ፡ አዛርያስ ፡ ተፈሥሐ ፡ ፈድፋደ ፡ ወበርሀ ፡ ልቡ ፡ ወኅሊናሁ ፡ ወተዘከረ ፡ ኵሎ ፡ ዘአስተርአዮ ፡ በሌሊት ፡ መልአከ ፡ እግዚኣብሔር ፡ ወዘከመ ፡ ዐተቦ ፡ ወአጽንዖ ፡ ወአለበዎ ። ወሖረ ፡ ኀበ ፡ እሙንቱ ፡ አኀዊሁ ፡ ወተጋብኡ ፡ አሐተኔ ፡ ወነገሮሙ ፡ ኵሎ ፡ ዘከመ ፡ አስተርአዮ ፡ መልአከ ፡ እግዚኣብሔር ፡ ወዘከመ ፡ ተውህበት ፡ ሎሙ ፡ ታቦተ ፡ ሕጉ ፡ ለእግዚኣብሔር ፡ ወዘከመ ፡ ይትዔወራ ፡ እግዚኣብሔር ፡ ለመንግሥተ ፡ እስራኤል ፡ ወዘከመ ፡ ይሁባ ፡ ለባዕዳን ፡ ለክብሮሙ ፤ ወዘከመ ፡ ንነሥኣ ፡ ንሕነ ፡ ለታቦተ ፡ ሕጉ ፡ ለእግዚኣብሔር ፡ ወዘከመ ፡ ተሀይደት ፡ ኀቤነ ፡ መንግሥተ ፡ ሰሎሞን ፡ ወኢተርፈት ፡ ኀበ ፡ ኢዮርብዓም ፡ ወልዱ ፡ ዘእንበለ ፡ ፪ ፡ በትር ፡ ወዘከመ ፡ ትትከፈል ፡ መንግሥተ ፡ እስራኤል ፤ ወይእዜኒ ፡ ተፈሥሑ ፡ ሊተ ፡ እስመ ፡ አንሰ ፡ እትፌሣሕ ፡ በእንተ ፡ ዘአስተርአየኒ ፡ ከመዝ ፤ እስመ ፡ ምስሌነ ፡ ትፈልስ ፡ ጸጋ ፡ ክህነቶሙ ፡ ወመንግሥቶሙ ፡ እስመ ፡ በፈቃደ ፡ እግዚኣብሔር ፡ ይከውን ፡ ከመዝ ፡ ይቤለኒ ። ወይእዜኒ ፡ ንዑ ፡ ንሖር ፡ ወንንግሮ ፡ ለዳዊት ፡ እግዚእነ ፡ ከመ ፡ ይበሎ ፡ ለአቡሁ ፡ እሠውዕ ፨ ፡ ወሖሩ ፡ ወነገርዎ ፡ ወውእቱ ፡ ተፈሥሐ ፡ ወለአከ ፡ ኀበ ፡ ኢዮአስ ፡ ወልደ ፡ ዮዳሔ ፡ ከመ ፡ ይምጻእ ፡ ኀቤሁ ፡ ወይልአኮ ፡ ኀበ ፡ አቡሁ ፤ ወመጽአ ፡ ወለአኮ ፡ ዳዊት ፡ ኀበ ፡ አቡሁ ፡ ሰሎሞን ፡ ወይቤሎ ፡ ፈንወኒአ ፡ እሖር ፡ ውስተ ፡ ብሔርየ ፡ በኵሉ ፡ ዘአሠነይከ ፡ ሊተ ፡ ወጸሎትከ ፡ ትትልወኒ ፡ ኀበ ፡ ሖርኩ ፡ በኵሉ ፡ ጊዜ ። ወባሕቱአ ፡ ይእዜኒአ ፡ እስእልአ ፡ በኀቤከአ ፡ ስእለተአ ፡ አሐተአ ፡ ለእመአ ፡ ረከብኩአ ፡ ሞገሰአ ፡ በኀቤከአ ፡ ወኢትሚጥአ ፡ ገጸከአ ፡ እምኔየአ ፤ እስመ ፡ አነአ ፡ ገብርከአ ፡ አሐውርአ ፡ ወእፈቅድአ ፡ እሡዕአ ፡ መሥዋዕተአ ፡ መድኀኒትአበእንተ ፡ ኀጢአትየአ ፡ ውስተ ፡ ዛቲ ፡ ሀገርአ ፡ ቅድስትአ ፡ ኢየሩሳሌምአ ፡ ወጽዮንአ ፡ ታቦተ ፡ ሕጉአ ፡ ለእግዚኣብሔርአ ፤ ወሰላም ፡ ለዕዘዝከ ፨ ፨ ፨ ፨ ፨ ፨ ፨ ፨ ፨
=== chapter 47 ===
[፵፯ ፡ በእንተ ፡ መሥዋዕተ ፡ አዛርያስ ፡ ወንጉሥ ።]
ወሖረ ፡ ኢዮአስ ፡ ወልደ ፡ ዮዳሔ ፡ ወነገሮ ፡ ለንጉሥ ፡ ሰሎሞን ፡ ወተፈሥሐ ፡ ንጉሥ ፡ በእንተዝ ፡ ወአዘዘ ፡ ከመ ፡ ያስተዳልዉ ፡ መሣውዐ ፡ መሥዋዕተ ፡ ከመ ፡ ይሡዕ ፡ ወልዱ ፤ ወአምጽአ ፡ ወወሀቦ ፡ ዘይበፅዕ ፡ ለእግዚኣብሔር ፡ ፻ ፡ አስዋረ ፡ ወ፻ ፡ መግዝአ ፡ ላህም ፡ ወ፼ ፡ አባግዕ ፡ ወ፼ ፡ አጣሊ ፡ ወእምነ ፡ ዘይትበላዕ ፡ አራዊት ፡ በበ፲ ፡ ወእምነ ፡ አዕዋፍ ፡ ዘንጹሕ ፡ በበ ፡ ፲ ፡ በዘያወጽሕ ፡ ወይሠውዕ ፡ ለአምላከ ፡ እስራኤል ፤ ወመሥዋዕተ ፡ ስንዳሌኒ ፡ ፳ ፡ ጻሕለ ፡ ዘብሩር ፡ ለለ ፡ አሐቲ ፡ ዘበበ ፡ ፲ወ፪ ፡ ድልወተ ፡ ሰቅሎን ፡ ወ፵ ፡ መዛርአ ፡ ኀባውዝ ፤ ወዘንተ ፡ ኵሎ ፡ ወሀቦ ፡ ለዳዊት ፡ ወልዱ ፡ ሰሎሞን ፡ ንጉሥ ። ወካዕበ ፡ ለአከ ፡ እንዘ ፡ ይብል ፡ ይሡዕአ ፡ ሊተ ፡ አዛርያስ ፡ ወልደ ፡ ካህን ፡ ህየንቴየ ፤ ወይቤሎ ፡ ግበርአ ፡ ዘፈቀድከ ። ወተፈሥሐ ፡ አዛርያስ ፡ በእንተዝ ፡ ነገር ፡ ወሖረ ፡ ወአምጽአ ፡ እመራዕየ ፡ አቡሁ ፡ አሐተ ፡ ላህመ ፡ እንተ ፡ ኢሰሐበት ፡ አርዑተ ፡ ወ፬ ፡ ጠሊተ ፡ ዘዘ ፡ ዓመት ፡ ወ፬ ፡ በግዐ ፡ ንጹሓን ፡ ዘዘ ፡ ዓመት ። ወሖረ ፡ ንጉሥ ፡ ከመ ፡ ይሡዕ ፡ ወተደለዉ ፡ ካህናት ፡ ወተጋብኡ ፡ ነዳያን ፡ ወተፈሥሐ ፡ አዕዋፈ ፡ ሰማይ ፡ ወኀብሩ ፡ ፍሥሓ ፡ ዐቢየ ፡ በይእቲ ፡ ዕለት ። ወአዛርያስኒ ፡ ደመረ ፡ ምስለ ፡ መሥዋዕተ ፡ ንጉሥ ፡ ወሦዐ ፡ ንዋዮ ፡ በከመ ፡ አዘዞ ፡ መልአከ ፡ እግዚኣብሔር ፡ ለአዛርያስ ፡ በሌሊት ። ወእምዝ ፡ እምድኅረ ፡ ሦዑ ፡ ገብኡ ፡ ውስተ ፡ አብያቲሆሙ ፡ ወኖሙ ፨ ፨
=== chapter 48 ===
[፵፰ ፡ ኀበ ፡ አንሥእዋ ፡ ለጽዮን ።]
ወናሁ ፡ ካዕበ ፡ አስተርአዮ ፡ መልአከ ፡ እግዚኣብሔር ፡ ለአዛርያስ ፡ ወሠረቀ ፡ ላዕሌሁ ፡ ከመ ፡ ዐምደ ፡ እሳት ፡ ወመልአ ፡ ቤት ፡ በብርሃኑ ፡ ወአንሥኦ ፡ ለአዛርያስ ፡ ወይቤሎ ፤ ቁም ፡ ወጽናዕ ፡ ወአንቅሆ ፡ ለኤልምያኖስ ፡ እኁከ ፡ ለአብሳ ፡ ወለማከሪ ፡ ወንሥኡ ፡ እሙንቱ ፡ ዕፀወ ፡ አልዋሕ ፡ ወአነ ፡ አርኁ ፡ ለከ ፡ አናቅጺሃ ፡ ለቤተ ፡ መቅደስ ፡ ወንሥኣ ፡ ለታቦተ ፡ ሕጉ ፡ ለእግዚኣብሔር ፡ ወትወስዳ ፡ ዘእንበለ ፡ ደዌ ፡ ወሕማም ፡ ወአነሂ ፡ እስመ ፡ ተአዘዝኩ ፡ እምኀበ ፡ እግዚኣብሔር ፡ ከመ ፡ አሀሉ ፡ ዘልፈ ፡ ምስሌሃ ፡ ወእኩንከ ፡ መርሐ ፡ በነሢኦታ ። ወተንሥአ ፡ ሶቤሃ ፡ ወአንቅሆሙ ፡ ለሠለስቲሆሙ ፡ አኀዊሁ ፡ ወነሥኡ ፡ እሙንቱ ፡ አልዋሐ ፡ ወሖሩ ፡ ውስተ ፡ ቤተ ፡ እግዚኣብሔር ፤ ወረከቡ ፡ ርኅወ ፡ ኵሎ ፡ አናቅጸ ፡ እምአፍአ ፡ እስከ ፡ ውሥጥ ፡ ርኅዋተ ፡ አናቅጸ ፡ እስከ ፡ ውእደ ፡ ይበጽሕ ፡ ኀበ ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ ወተንሥአት ፡ ሶቤሃ ፡ ከመ ፡ ቅጽበተ ፡ ዐይን ፡ እስመ ፡ መልአከ ፡ እግዚኣብሔር ፡ ይሜግባ ፤ ወሶበሰ ፡ ኢፈቀደ ፡ እግዚኣብሔር ፡ እመ ፡ ኢተንሥአት ፡ ሶቤሃ ። ወነሥእዋ ፡ አርባዕቲሆሙ ፡ ወአእተውዋ ፡ ውስተ ፡ ቤተ ፡ አዛርያስ ፡ ወገብኡ ፡ ውስተ ፡ ቤተ ፡ እግዚኣብሔር ፡ ወአስተላጸቁ ፡ ውስተ ፡ ምንባሪሃ ፡ ለጽዮን ፡ ወከደንዎን ፡ ለዕፀው ፡ በአልባሲሃ ፡ ለጽዮን ፡ ወዐጸዉ ፡ አናቅጸ ፤ ወገብኡ ፡ ውስተ ፡ ቤቶሙ ፡ ወነሥኡ ፡ መኃትወ ፡ ወአንበርዋ ፡ ውስተ ፡ ምኅባኢሃ ፡ ወሦዑ ፡ ላቲ ፡ በግዐ ፡ ወአጸንሕሑ ፡ ስኂነ ፡ ወነጸፉ ፡ ላቲ ፡ ሜላተ ፡ ወአንበርዋ ፡ ውስተ ፡ ምስዋር ፡ ፯ ፡ ዕለተ ፡ ወ፯ ፡ ሌሊተ ፨ ፨ ፨ ፨ ፨ ፨
=== chapter 49 ===
[፵፱ ፡ ኀበ ፡ ባረኮ ፡ አቡሁ ፡ ለወልዱ ።]
ወእምዝ ፡ ተንሥአ ፡ ንጉሠ ፡ ኢትዮጵያ ፡ ከመ ፡ ይሖር ፡ ብሔሮ ፡ ወቦአ ፡ ኀበ ፡ አቡሁ ፡ ከመ ፡ ይጸሊ ፡ ሎቱ ፡ ወይቤሎ ፡ ባርከኒ ፡ አባ ፡ ወሰገደ ፡ ሎቱ ። ወአንሥኦ ፡ ወባረኮ ፡ ወአኀዞ ፡ ርእሶ ፡ ወይቤ ፤ ቡሩክ ፡ እግዚኣብሔር ፡ አምላኪየ ፡ ዘባረኮ ፡ ለአቡየ ፡ ዳዊት ፡ ወዘባረኮ ፡ ለአቡነ ፡ አብርሃም ፡ የሀሉ ፡ ምስሌከ ፡ በኵሉ ፡ ጊዜ ፡ ወይባርክ ፡ ዘርእከ ፡ በከመ ፡ ባረኮ ፡ ለያዕቆብ ፡ ወአብዝኀ ፡ ዘርኦ ፡ ከመ ፡ ኮከበ ፡ ሰማይ ፡ ወከመ ፡ ኆጻ ፡ ባሕር ፤ ወበከመ ፡ ባረኮ ፡ አብርሃም ፡ ለይስሐቅ ፡ አቡየ ፡ ከማሁ ፡ ይኩን ፡ በረከትከ ፡ እምጠለ ፡ ሰማይ ፡ ወእምስፍሓ ፡ ለምድር ፡ ወይትአዘዝ ፡ ለከ ፡ ኵሉ ፡ እንስሳ ፡ ወአዕዋፈ ፡ ሰማይ ፡ ወአራዊተ ፡ ገዳም ፡ ወዓሣተ ፡ ባሕር ፤ ኩን ፡ ምሉአ ፡ ወአኮ ፡ ንቱገ ፡ ኩን ፡ ፍጹመ ፡ ወአኮ ፡ ሕጹጸ ፡ ኩን ፡ የዋሀ ፡ ወአኮ ፡ ነቢረ ፡ ኩን ፡ ጥዑየ ፡ ወአኮ ፡ ሕሙመ ፡ ኩን ፡ ኄረ ፡ ወአኮ ፡ መስተቀይመ ፡ ኩን ፡ ንጹሐ ፡ ወአኮ ፡ ርሱሐ ፡ ኩን ፡ ጻድቀ ፡ ወአኮ ፡ ኃጥአ ፡ ኩን ፡ መሓሬ ፡ ወአኮ ፡ ዐማፄ ፡ ኩን ፡ ብሩሀ ፡ ወአኮ ፡ ፀዋገ ፡ ኩን ፡ መስተዐግሰ ፡ ወአኮ ፡ ምዑዐ ፤ ወይፍርሁከ ፡ ፀር ፡ ወይግረሩ ፡ ለከ ፡ ጸላእትከ ፡ ታሕተ ፡ መከይደ ፡ እገሪከ ፤ ወትኩን ፡ ለከ ፡ መርሐ ፡ እግዝእትየ ፡ ጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ በኵሉ ፡ ጊዜ ፡ ኀበ ፡ ኀለይከ ፡ በልብከ ፡ ወአንጸርከ ፡ በአጻብዒከ ፡ ዘርሑቅ ፡ ወዘቅሩብ ፡ ለከ ፡ ኀበ ፡ ዘትሑት ፡ ወዘልዑልለከ ፡ ኀበ ፡ ዘጽኑዕ ፡ ወዘድኩም ፡ ለከ ፡ ኀበ ፡ ዘአፍአ ፡ ወዘውስጥ ፡ ለከ ፡ ኀበ ፡ ዘቤት ፡ ወዘገዳም ፡ ለከ ፡ ኀበ ፡ ዘያስተርኢ ፡ ወዘኢያስተርኢ ፡ ለከ ፡ ኀበ ፡ ዘእቱት ፡ ወልጹቅ ፡ ለከ ፡ ኀበ ፡ ዘኅቡእ ፡ ወክሡት ፡ ለከ ፡ ኀበ ፡ ዘክቡት ፡ ወግሁድ ፡ ለከ ፡ ትኩንከ ፡ መርሐ ፡ እግዝእትነ ፡ ጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ንጽሕት ። ወተባረከ ፡ ወሰገደ ፡ ወሖረ ፨ ፨ ፨ ፨ ፨ ፨ ፨ ፨ ፨ ፨
=== chapter 50 ===
[፶ ፡ ኀበ ፡ ተፋነዉ ፡ ምስለ ፡ አቡሁ ፡ ወላሐወት ፡ ሀገር ።]
ወተፋነዉ ፡ ወሖሩ ፤ ወአቅደሙ ፡ ጽዒኖታ ፡ ለጽዮን ፡ በሌሊት ፡ ውስተ ፡ ሰረገላ ፡ በኅሱራት ፡ ንዋያት ፡ ወርሱሓት ፡ አልባስ ፡ ምስለ ፡ ንዋይ ፡ ቊስቋሳት ፡ ወተጽዕኑ ፡ ኵሉ ፡ ሰረገላት ። ወተንሡ ፡ ሊቃናት ፡ ወተነፍሐ ፡ ቀርን ፡ ወደምፀት ፡ ሀገር ፡ ወወውዑ ፡ መሐዛት ፡ ወከለላ ፡ ግርማ ፡ ወዖዳ ፡ ጸጋ ፤ አውየዉ ፡ ርሡኣን ፡ ወከልሑ ፡ ሕፃናት ፡ ወበከያ ፡ አቤራት ፡ ወላሐዋ ፡ ደናግል ፡ በእንተ ፡ ዘተንሥኡ ፡ ደቂቀ ፡ መኳንን ፡ ቲሆሙ ፡ ለኀያላነ ፡ እስራኤል ። ወአኮ ፡ ባሕቲቶሙ ፡ በእንቲአሆሙ ፡ ዘትበኪ ፡ ሀገር ፡ አላ ፡ እስመ ፡ ተሀይደ ፡ ግርማሃ ፡ ለሀገር ፡ ምስሌሆሙ ፤ ወሶበኒ ፡ ኢያእመሩ ፡ ገሃደ ፡ ከመ ፡ ተነሥአት ፡ ጽዮን ፡ እምኔሆሙ ፡ በልቦሙሰ ፡ ኢስሕቱ ፡ ወይበክዩ ፡ መሪረ ፡ ከመ ፡ አመ ፡ ቀተለ ፡ እግዚኣብሔር ፡ በኵሮሙ ፡ ለግብጽ ፡ ከማሁ ፡ ኮኑ ፡ ወአልቦ ፡ ቤተ ፡ ኀበ ፡ አልቦ ፡ አውያተ ፡ እምሰብእ ፡ እስከ ፡ እንስሳ ፡ ከለባትኒ ፡ የአውይዉ ፡ ወአእዱግኒ ፡ ይንህቁ ፡ ወኵሎሙ ፡ ኅቡረ ፡ ያውሕዙ ፡ አንብዖሙ ፡ እለ ፡ ተረፉ ፡ ህየ ፤ ከመ ፡ ዘዐገትዋ ፡ መላእክተ ፡ ፀር ፡ ጽኑዓን ፡ ለዐባይ ፡ ሀገር ፡ ወሮድዋ ፡ ወማህረክዋ ፡ ወፄወውዋ ፡ ወቀተልዋ ፡ በአፈ ፡ ኀጺን ፡ ከማሁ ፡ ኮነት ፡ ሀገር ፡ ጽዮን ፡ ይእቲ ፡ እየሩሳሌም ፨ ፡ ወደንገፀ ፡ ንጉሥኒ ፡ ሰሎሞን ፡ በእንተ ፡ ብካይ ፡ ወጽራኀ ፡ ሀገር ፡ ወሐወጸ ፡ እንተ ፡ ታዕካ ፡ ቤተ ፡ መንግሥት ፡ ቀልዐ ፡ ዘቤተ ፡ ንጉሥ ፡ ወርእየ ፡ ኵላ ፡ ሀገር ፡ እንዘ ፡ ትበኪ ፡ ተትልዎሙ ፤ ከመ ፡ ሕፃን ፡ ዘ ፡ አኅደገቶ ፡ ጥበ ፡ እሙ ፡ ወጐየት ፡ እምኔሁ ፡ ወይተሉ ፡ አሠረ ፡ እሙ ፡ እንዘ ፡ ይጸርኅ ፡ ወይበኪ ፡ ከማሁ ፡ ኮኑ ፡ ይጸርኁ ፡ ወይበክዩ ፡ ወይወድዩ ፡ ሐመደ ፡ ዲበ ፡ ርእሶሙ ፡ ወያስሕዙ ፡ አንብዐ ፡ እምአዕይንቲሆሙ ። ወሰሎሞንሂ ፡ ተሀውከ ፡ ወርዕደ ፡ ሶበ ፡ ርእየ ፡ ግርማሆሙ ፡ ሰእለ ፡ ሖሩ ፡ ወተሀውከ ፡ አማዕዋቲሁ ፡ ወአንብዑ ፡ ታንጠበጥብ ፡ ዲበ ፡ ልብሱ ፤ ወይቤ ፡ ሴልየ ፡ እስመ ፡ ኀለፈት ፡ ክብርየ ፡ ወወድቀት ፡ አክሊለ ፡ ምክሕየ ፡ ወውዕየት ፡ ከርሥየ ፡ በእንተ ፡ ዘሖረ ፡ ዝንቱ ፡ ወልድየ ፡ ወነሠተ ፡ ግርማሃ ፡ ለህገርየ ፡ ወግዕዙ ፡ ደቂቀ ፡ ኀይልየ ፤ ወእምይእዜሰ ፡ ኀለፈት ፡ ክብርነ ፡ ወተሀይደት ፡ መንግሥትነ ፡ ውስተ ፡ ሕዝብ ፡ ነቢር ፡ እለ ፡ ኢያአምርዎ ፡ ለእግዚኣብሔር ፤ በከመ ፡ ይቤ ፡ ነቢይ ፡ ሕዝብ ፡ እለ ፡ ኢኀሠሡኒ ፡ ረከቡኒ ፡ እምይእዜሰ ፡ ይትወሀቦሙ ፡ ሕግ ፡ ወጥበብ ፡ ወአእምሮ ፤ ወአቡየኒ ፡ ተነበየ ፡ በእንቲአሆሙ ፡ እንዘ ፡ ይብል ፡ ይገንዩ ፡ ቅድሜሁ ፡ ኢትዮጵያ ፡ ወጸላእቱሂ ፡ ሐመደ ፡ ይቀምሑ ፤ ወበካልእኒ ፡ ይብል ፡ ኢትዮጵያ ፡ ትሜጥዎ ፡ እደዊሃ ፡ ለእግዚኣብሔር ፡ ወውእቱኒ ፡ ይትሜጠዋ ፡ በክብር ፡ ወነገሥተ ፡ ምድርኒ ፡ ይሴብሕዎ ፡ ለእግዚኣብሔር ፤ ወበሣልስኒ ፡ ይቤ ፡ ናሁ ፡ ኢሎፍሊ ፡ ወጢሮስ ፡ ወሕዝበ ፡ ኢትዮጵያ ፡ እለ ፡ ተወልዱ ፡ ዘእንበለ ፡ ሕግ ፡ ይትወሀቦሙ ፡ ሕግ ፡ ወይብልዋ ፡ ለጽዮን ፡ እምነ ፡ በእንተ ፡ ብእሲ ፡ ዘተወልደ ፤ በእንተ ፡ ዝንቱኑ ፡ ወልድየ ፡ እንጋ ፡ ዘተወልደ ፡ እምኔየ ፨ ፨
=== chapter 51 ===
[፶፩ ፡ ኀበ ፡ ዘይቤሎ ፡ ለሳዶቅ ፡ ካህን ፡ ሑር ፡ ወአምጽእ ፡ ውእተ ፡ ልብሰ ፡ ዘላዕሌሃ ።]
ወይቤሎ ፡ ለሳዶቅ ፡ ካህን ፡ ሖር ፡ አምጽእ ፡ ውእተ ፡ ልብሰ ፡ ዘላዕሌሃ ፡ ለጽዮን ፡ ወንሣእ ፡ ለከ ፡ ዘንተ ፡ ልብሰዘይኄይስ ፡ እምኔሁ ፡ ወአልብሳ ፡ መልዕልተ ፡ ፪ ፡ ዘታሕቴሃ ፤ ወውእቱ ፡ ልብስ ፡ ዘዐሥቅ ፡ ወርቀ ፡ ቄፋዝ ፡ ዝብጦ ፡ ወእኑም ፡ በስህቦ ፡ ወአኮ ፡ ዘፍትሎ ፡ ዘሜላት ፤ ወ፭ ፡ እሞጻሃ ፡ ለጽዮን ፡ አናጹት ፡ ወ፲ ፡ አምሳለ ፡ ነፍስቶሙ ፡ ዘገብሩ ፡ ቤዛሆሙ ፡ መኳንንተ ፡ ኢሎፍሊ ፤ ወእምጸናጽል ፡ አምሳለ ፡ ወርቅ ፡ ዘወፅአ ፡ እምደረ ፡ ቃዴስ ፡ ዘተአዘዞ ፡ ለሙሴ ፡ በሲና ፡ ከመ ፡ ይግበር ፡ ጸናጽለ ፡ ውስተ ፡ ልብሰ ፡ አሮን ፡ እኁሁ ። ወአስተጋብኦን ፡ ውስተ ፡ ልብሳ ፡ ለጽዮን ፡ ወሰድ ፡ ሎቱ ፡ ለወልድየ ፡ ዳዊት ፤ እስመ ፡ ትቤ ፡ እሙ ፡ በመልእክተ ፡ ተምሪን ፡ ገብራ ፡ ሀበነአእምዘፈረ ፡ ልብሳ ፡ ለጽዮን ፡ ከመ ፡ ናምልካ ፡ ኪያሃ ፡ ንሕነ ፡ ወእለ ፡ እምታሕቴነ ፡ ወኵሉ ፡ መንግሥትነ ፤ ወይእዜኒ ፡ ሀቦ ፡ ወበሎ ፡ ንሥኣአ ፡ አምልካ ፡ ለዛቲ ፡ ልብሰ ፡ ጽዮን ፡ እስመ ፡ ለአከት ፡ እምከ ፡ በእንተዝ ፡ ወለሊከኒ ፡ ትቤ ፡ ሀበነ ፡ ዘናመልክ ፡ እምዘፈረ ፡ ልብሳ ፡ ከመ ፡ ኢናምልክ ፡ ባዕደ ፡ ከመ ፡ አሕዛብ ። ወጽዮንሂ ፡ ታቦተ ፡ ሕጉ ፡ ለእግዚኣብሔር ፡ ትኩንከ ፡ መርሐ ፡ በኀበ ፡ ሀለውከ ፤ ወለነሰ ፡ ሀለወት ፡ ወትረ ፡ ኀቤነ ፡ ወኢናስተጠናቅቅ ፡ አክብሮታ ፡ ወአንትሙሰ ፡ እንዘ ፡ ኢሀለወት ፡ ኀቤክሙ ፡ ታከብርዋ ፡ በአስተጠናቅቆ ፤ እስመ ፡ ይቤሎ ፡ እግዚኣብሔር ፡ ለኤሊ ፡ ካህን ፡ በአፈ ፡ ሳሙኤል ፡ ነቢይ ፡ አነ ፡ ፈቀድኩ ፡ ከመ ፡ ትንበሩ ፡ አንተ ፡ ወቤተ ፡ አቡከ ፡ ከመ ፡ ትዕጥኑ ፡ ታቦተ ፡ ሕግየ ፡ ወትንበሩ ፡ ቅድሜየ ፡ እስከ ፡ ለዓለም ፡ ወይእዜሰ ፡ ተነሳሕኩ ፡ እመይጥ ፡ ገጽየ ፡ እምኔከ ፡ እስመ ፡ ተዐውሮ ፡ ተዐወርከ ፡ ላዕለ ፡ መሥዋዕትየ ፡ ወአፍቀርከ ፡ ደቂቅከ ፡ እምኔየ ፤ ወይእዜሰ ፡ ለዘ ፡ አክበረኒ ፡ ኣከብሮ ፡ ወለዘ ፡ አስተሐቀረኒ ፡ ኣስተሐቅሮ ፡ ወእስዕር ፡ ኵሎ ፡ ዘርእከ ፤ ወዘንተ ፡ ዘይቤ ፡ በእንተ ፡ ዘአስተሐቀርዎ ፡ ሌዋውያን ። ወበሎ ፡ ንሣእአ ፡ ዘንተ ፡ ልብሳ ፡ ለጽዮን ፡ ወዘንተኒ ፡ ሞጻ ፡ ይኩኖ ፡ ህየንቴሃ ፡ ለጽዮን ፡ ወአንብሮ ፡ ውስተ ፡ ደብተራከ ፤ ወሶበኒ ፡ ትምሕል ፡ ወታምሕል ፡ መሐል ፡ ወአምሕል ፡ ባቲ ፡ ከመ ፡ ኢትዝክር ፡ አስማተ ፡ ባዕድ ፡ አማልክተ ፡ አሕዛብ ፤ ወሶበኒ ፡ ትሠውዕ ፡ አንጺረከ ፡ ለኀቤነ ፡ ሡዕ ፡ ለኢየሩሳሌም ፡ ወለጽዮን ፡ ቅድስት ፡ ወሶበኒ ፡ ትጼሊ ፡ አንጺረከ ፡ ለኢየሩሳሌም ፡ ለኀቤነ ፡ ጸሊ ፨ ፨ ፨ ፨ ፨ ፨ ፨ ፨ ፨
=== chapter 52 ===
[፶፪ ፡ ኀበ ፡ ዘሖረ ፡ ሳዶቅ ፡ ካህን ።]
ወሖረ ፡ ሳዶቅካህን ፡ ወወሀቦ ፡ ልብሳ ፡ ለጽዮን ፡ ወአዘዘ ፡ ኵሎ ፡ ዘነገሮ ፡ ሰሎሞን ። ወተፈሥሐ ፡ ዳዊት ፡ ወልደ ፡ ሰሎሞን ፡ በእንተዝ ፡ ወአንከረ ፡ ወአስተብፅዐ ፡ ፈድፋደ ፡ ወይቤ ፡ ዛቲ ፡ ትኩነኒ ፡ እግዝእትየ ፡ በተአምኖታ ፡ ለታቦተ ፡ ሕጉ ፡ ለእግዚኣብሔር ። ወአውሥአ ፡ አዛርያስ ፡ ወይቤ ፡ በቅድመ ፡ አቡሁ ፡ ተፈሣሕከ ፡ በልብስ ፡ ወእፎ ፡ ፈድፋደ ፡ እምተፈሣሕከ ፡ በእግዝእተ ፡ ልብስ ። ወይቤሎ ፡ አቡሁ ፡ በአማን ፡ እምተፈሥሐ ፡ በእግዝእተ ፡ ልብስ ፡ ወእምቀነየነ ፡ ለኵልነ ፡ ሶበ ፡ ኢየሐውር ፡ ብሔሮ ። ወይቤሎ ፡ ለንጉሥ ፡ ሀበኒኬ ፡ ኪዳነ ፡ ከመ ፡ ተሀቦ ፡ ለዝንቱ ፡ ወልድየ ፡ ዘንተ ፡ ንዋየ ፡ እግዝእቱ ፡ ለትሕቢቱወምዕቅብናሁ ፡ ከመ ፡ ይትመሐፀን ፡ ኵሎ ፡ መዋዕለ ፡ ሕይወቱ ፡ ሎቱ ፡ ወለዘርኡ ፡ እምድኅሬሁ ፤ ወዓሥራትኒ ፡ ከመ ፡ ተሀቦ ፡ ወሀገረ ፡ ምስካይኒ ፡ ከመ ፡ የሀቦ ፡ በውስተ ፡ መንግሥትከ ፡ ወለዐሥራተ ፡ አህጉርኒ ፡ በኵሉ ፡ መንግሥቱ ፤ ወውእቱኒ ፡ ከመ ፡ ይኩንከ ፡ ካህነ ፡ ወራእየ ፡ ወነቢየ ፡ ወመሃሬ ፡ ለከ ፡ ወለዘርእከ ፡ እምድኅሬከ ፡ ወቀባኤ ፡ ቅብአ ፡ መንግሥትኒ ፡ ለደቂቅከ ፡ ወለደቂቀ ፡ ደቂቅከ ። ወይቤ ፡ ኦሆ ። ወተካየዱ ፡ ወነሥአ ፡ እምኀበ ፡ አቡሁ ፡ ሞጻ ፡ ወልብሳ ፡ ለጽዮን ፡ ወቃማ ፡ ዘወርቅ ፨ ፡ ወጸዐኑ ፡ ከመ ፡ ይሖሩ ፡ ሰረገላተ ፡ ወአፍራሰ ፡ ወአብቅልተ ፡ ወተሠርሐ ፡ ፍኖቶሙ ። ወእምዝ ፡ አርትዑ ፡ ሐዊረ ፡ እንዘ ፡ ሚካኤል ፡ መልአክ ፡ የሐውር ፡ ቅድመ ፤ በባሕርኒ ፡ ስፊሖ ፡ አኬዶሙ ፡ ከመ ፡ የብስ ፡ ወበየብስኒ ፡ ሠጢቆ ፡ ደመና ፡ አንጦሊዖ ፡ ሰወሮሙ ፡ ላህበ ፡ ፀሐይ ፤ ሰረገላቲሆሙኒ ፡ አልቦ ፡ ዘይስሕቦ ፡ አላ ፡ የሐውር ፡ ለሊሁ ፡ በሰረገላ ፡ ተልዒሎ ፡ እምድር ፡ መጠነ ፡ እመት ፡ እመሂ ፡ ሰብእ ፡ ወእመሂ ፡ አፍራስ ፡ ወእመሂ ፡ አብቅልት ፡ ወእመሂ ፡ ራኵባት ፡ ወኵሎሙ ፡ እለ ፡ ጽዑናን ፡ ይትሌዐል ፡ እምዘባናቲሆሙ ፡ መጠነ ፡ ስዝረ ፡ ብእሲ ፤ ኵሉንዋየ ፡ ቊስቋሶሙዘጽዑንወእለ ፡ ይጼዐኑ ፡ ይትሌዐሉ ፡ መጠነ ፡ ስዝረ ፡ ብእሲ ፡ ወእንስሳኒ ፡ ይትሌዐሉ ፡ መጠነ ፡ ስዝረ ፡ ብእሲ ፤ ወኵሉ ፡ ይረውጽ ፡ በሰረገላ ፡ ከመ ፡ ሐመር ፡ በውስተ ፡ ባሕር ፡ ሶበ ፡ ያነውኃ ፡ ነፋስ ፡ ወከመ ፡ ጽግነት ፡ በውስተ ፡ አየር ፡ ሶበ ፡ ያሰርሖ ፡ ፍትወተ ፡ ከርሡለበሊዕ ፡ እምአብያጺሁ ፡ ወከመ ፡ ንስር ፡ ሶበ ፡ ያቀልልሥጋሁ ፡ በመልዕልተ ፡ ነፉስ ፤ ከማሁ ፡ ይረውጹ ፡ በሰረገላ ፡ ዘአልቦ ፡ ቅድመ ፡ ወድኅረ ፡ ዘእንበለ ፡ ተሀውኮ ፡ ይምነ ፡ ወፅግመ ፨ ፨ ፨ ፨ ፨ ፨ ፨ ፨
=== chapter 53 ===
[፶፫ ፡ ኀበ ፡ ተውህበ ፡ ሰረገላ ፡ ለኢትዮጵያ ።]
ወበኀበ ፡ ኀደሩሰ ፡ ጋዛ ፡ ይእቲ ፡ ሀገረ ፡ እሙ ፡ ለንጉሥ ፡ ዘወሀባ ፡ ሶበ ፡ ትመጽእ ፡ ኀቤሁ ፡ ንጉሥ ፡ ሰሎሞን ፡ ለንግሥተ ፡ ኢትዮጽያ ። ወእምህየ ፡ በጽሑ ፡ በአሐቲ ፡ ዕለት ፡ ውስተ ፡ ደወለ ፡ ግብጽ ፡ እንተ ፡ ስማ ፡ ምስሪን ፤ ወሶበ ፡ ርእዩ ፡ ደቂቀ ፡ ኀያላነ ፡ እስራኤል ፡ ከመ ፡ በአሐቲ ፡ ዕለት ፡ በጽሑ ፡ ምሕዋረ ፡ ፲ወ፫ ፡ ዕለት ፡ ወኢደክሙ ፡ ወኢርኅቡ ፡ ወኢጸምኡ ፡ ኢሰብእ ፡ ወኢእንስሳ ፡ ወኵሎሙ ፡ ከመ ፡ ዘሶቤ ፡ ጸግቡ ፡ ወሰትዩ ፡ አእመሩ ፡ ወአምኑ ፡ እሙንቱ ፡ ደቂቀ ፡ ኀይል ፡ ከመ ፡ እምኀበ ፡ እግዚኣብሔር ፡ ኮነት ፡ ዛቲ ፤ ወይቤልዎ ፡ ለንጉሦሙ ፡ ናውርድ ፡ ሰረገላተ ፡ እስመ ፡ በጻሕነ ፡ ማየ ፡ ኢትዮጵያ ፡ ዛቲ ፡ ይእቲ ፡ ተከዚ ፡ እንተ ፡ ትወርድ ፡ እምኢትዮጵያ ፡ ወትሰቂ ፡ ፈለገ ፡ ግብጽ ፤ ወአውረዱ ፡ ሰረገላቲሆሙ ፡ ህየ ፡ ወተከሉ ፡ ደባትሪሆሙ ፨ ፡ ወሖሩ ፡ ኅቡረ ፡ ደቂቀ ፡ ኀይል ፡ ወሰደዱ ፡ ኵሎ ፡ አሕዛበ ፡ ወይቤልዎ ፡ ለንጉሦሙ ፡ ንንግርከኑ ፡ ነገረ ፡ ለእመ ፡ ትክል ፡ ተዐግሦ ፤ ወይቤሎሙ ፡ እወ ፡ እክል ፡ ወለእመ ፡ ትቤሉኒ ፡ እስከ ፡ ዕለተ ፡ ሞትየ ፡ ኢያወፅእ ፡ ወኢያወሥእ ። ወይቤልዎ ፡ ወረደት ፡ ፀሐይ ፡ እምሰማይ ፡ ወተውህበት ፡ በሲና ፡ ለእስራኤል ፡ ወኮነት ፡ መድኀኒተ ፡ ለዘመደ ፡ አዳም ፡ እምነ ፡ ሙሴ ፡ እስከ ፡ ዘርአ ፡ እሴይ ፡ ወነዋ ፡ ኀቤከ ፡ በፈቃደ ፡ እግዚኣብሔር ፤ ወአኮ ፡ እምኀቤነ ፡ ዘተገብረ ፡ ዝንቱ ፡ አላ ፡ በፈቃደ ፡ እግዚኣብሔር ፡ ወአኮ ፡ እምኀቤነ ፡ ዘተገብረ ፡ ዝንቱ ፡ አላ ፡ በፈቃደ ፡ ኬንያሃ ፡ ወገባሪሃ ፡ ኮነ ፡ ከመዝ ፤ ንሕነ ፡ ፈቀድነ ፡ ወእግዚኣብሔር ፡ ፈጸመ ፡ ንሕነ ፡ ተሰናአውነ ፡ ወእግዚኣብሔር ፡ አሠነየ ፡ ንሕነ ፡ ተናገርነ ፡ ወእግዚኣብሔር ፡ ገብረ ፡ ንሕነ ፡ ኀለይነ ፡ ወእግዚኣብሔር ፡ መከረ ፡ ንሕነ ፡ ንቤ ፡ ወእግዚኣብሔር ፡ ሠምረ ፡ ንሕነ ፡ አንጸርነ ፡ ወእግዚኣብሔር ፡ አርትዐ ፡ ንሕነ ፡ ኀለይነ ፡ ወእግዚኣብሔር ፡ አጽደቀ ፤ ወይእዜኒ ፡ ኪያከ ፡ ኀረየ ፡ እግዚኣብሔር ፡ ወሀገርከ ፡ ሠምረ ፡ ከመ ፡ ትኩን ፡ ላእከ ፡ ለጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ወይእቲ ፡ ትኩንከ ፡ መርሐ ፡ እስከ ፡ ለዓለም ፡ ለከ ፡ ወለዘርእከ ፡ እምድኅሬከ ፡ ለእመ ፡ ዐቀብከ ፡ ትእዛዞ ፡ ወገበርከ ፡ ፈቃዶ ፡ ለእግዚኣብሔር ፡ አምላክከ ፤ እስመ ፡ ኢትክል ፡ አንተ ፡ አግብኦታ ፡ ለእመ ፡ ፈቀድከ ፡ ወአቡከ ፡ ነሢኦታ ፡ ለእመ ፡ ፈቀደ ፡ እስመ ፡ ለሊሃ ፡ ተሐውር ፡ ኀበ ፡ ፈቀደት ፡ ወኢትትነሣእ ፡ እመንበራ ፡ ለእመ ፡ ኢፈቀደት ፡ ለሊሃ ፤ ወነያ ፡ ይእቲእግዝእትነ ፡ እምነወመድኀኒትነ ፡ ጸወንነ ፡ ወምስካይነ ፡ ክብርነ ፡ ወመርሶ ፡ መድኀኒትነ ፡ ለእለ ፡ ናሰምክ ፡ ባቲ ። ወቀጸቦ ፡ አዛርያስ ፡ ለኤልምያኖስ ፡ ወይቤሎ ፡ ሖር ፡ አሠንያ ፡ ወአልብሳ ፡ ለእግዝእትነ ፡ ከመ ፡ ይርአያ ፡ ንጉሥነ ። ወዘንተ ፡ ሶበ ፡ ተናገረ ፡ አዛርያስ ፡ ደንገፀ ፡ ንጉሥ ፡ ዳዊት ፡ ወአንበረ ፡ ክልኤሆን ፡ እደዊሁ ፡ ውስተ ፡ ልቡ ፡ ወአስተንፈሰ ፡ ሠለስተ ፡ እስትንፋሰ ፡ ወይቤ ፡ አማንኑ ፡ እግዚኦ ፡ ትዜከረነ ፡ በሣህልከ ፡ ለግዱፋን ፡ እለ ፡ መነንከ ፡ ሕዝብ ፡ ከመ ፡ እርአያ ፡ ለማኅደርከ ፡ ንጽሕት ፡ እንተ ፡ በሰማያት ፡ ጽዮን ፡ ቅድስት ፡ ሰማያዊት ፤ ወምንተኑ ፡ ነዐስዮ ፡ ለእግዚኣብሔር ፡ በእንተ ፡ ኵሉ ፡ ዘገብረ ፡ ለነ ፡ ሠናያተ ፡ እንዘወኢምንትኒበኀቤሁ ፡ ክብረ ፡ ወስብሐተ ፤ ከለለነ ፡ በጸጋሁ ፡ ከመ ፡ ናእምር ፡ በምድር ፡ ስብሐቲሁ ፡ ወንግነይ ፡ ኵልነ ፡ ለዕበየ ፡ ዚአሁ ፤ እስመ ፡ ኄር ፡ ውእቱ ፡ ለኅሩያኒሁ ፡ ወሎቱ ፡ ስብሐት ፡ እስከ ፡ ለዓለ ፡ ም ። ወተንሥአ ፡ ንጉሥ ፡ እንዘ ፡ ያንፈርዕፅ ፡ ከመ ፡ ማሕስአ ፡ በግዕ ፡ ወከመ ፡ ሐርጌ ፡ ጽጉበ ፡ ሐሊበ ፡ እሙ ፤ በከመ ፡ ፍሥሓ ፡ ዳዊት ፡ አበ ፡ አቡሁ ፡ በቅድመ ፡ ታቦተ ፡ ሕጉ ፡ ለእግዚኣብሔር ፤ አጽሐሰ ፡ በእገሪሁ ፡ ወተሐሠየ ፡ በልቡ ፡ ወተሀለለ ፡ በአፉሁ ። ወምንተ ፡ እብል ፡ ሚመጠነ ፡ ፍሥሓ ፡ ወሐሤት ፡ በውስተ ፡ ትዕይንተ ፡ ንጉሠ ፡ ኢትዮጵያ ፤ ይነግሮ ፡ ፩ ፡ ለካልኡ ፡ ወያንፈርዕፁ ፡ ኵሎሙ ፡ ከመ ፡ ጣዕዋ ፡ ላህም ፡ ወይጠፍሑ ፡ እደዊሆሙ ፡ ወያነክሩ ፡ ወይሰፍሑ ፡ እደዊሆሙ ፡ ውስተ ፡ ሰማይ ፡ ወይሰግዱ ፡ በገጾሙ ፡ ውስተ ፡ ምድር ፡ ወያአኵትዎ ፡ ለእግዚኣብሔር ፡ በአልባቢሆሙ ፨ ፨ ፨ ፨ ፨
=== chapter 54 ===
[፶፬ ፡ ኀበ ፡ ተነበየ ፡ ዳዊት ፡ ወተሰለማ ፡ ለጽዮን ።]
ወቦአ ፡ ንጉሥ ፡ ወቆመ ፡ ቅድሜሃ ፡ ወተሰለማ ፡ ወሰገደ ፡ ላቲ ፡ ወይቤ ፤ እግዚኦ ፡ አምላከ ፡ እስራኤል ፡ ለከ ፡ ስብሐት ፡ እስመ ፡ ትገብር ፡ ፈቃደከ ፡ ወአኮ ፡ ፈቃደ ፡ ሰብእ ፤ ታረስዖ ፡ ጥበቦ ፡ ለጠቢብ ፡ ወታአብዶ ፡ ምክረ ፡ ለመካሪ ፡ ወትሜጥቆ ፡ ለነዳይ ፡ እምነ ፡ ሠርም ፡ ወታቀውሞን ፡ ውስተ ፡ ኰኵሕ ፡ ጽኑዕ ፡ ለሰኰናሁ ፤ እስመ ፡ ጽዋዐ ፡ ክብር ፡ ምሉእ ፡ ውስተ ፡ እዴከ ፡ ለእለ ፡ ያፈቅሩከ ፡ ወጽዋዐ ፡ ኀሳርኒ ፡ ምሉእ ፡ ለእለ ፡ ይጸልኡ ፡ ኪያከ ፤ ወለነሰ ፡ መድኀኒትነ ፡ ይወፅእ ፡ እምጽዮን ፡ ወያአትት ፡ ኀጢአተ ፡ እምሕዝቡ ፡ ወይትከዐው ፡ ሠናይት ፡ ወምሕረት ፡ ውስተ ፡ ኵሉ ፡ ዓለም ፤ እስመ ፡ ንሕነሂ ፡ ተግባረ ፡ እደዊሁንሕነ ፡ መኑ ፡ ይትዔየሮ ፡ ለእመ ፡ አፍቀረነ ፡ ከመ ፡ እስረኤል ፡ ሕዝቦ ፡ ወመኑ ፡ ይግእዞ ፡ ለእመ ፡ አዕረገነ ፡ ውስተ ፡ ሰማያት ፡ መንበሩ ፤ እስመ ፡ ሞት ፡ ወሕይወት ፡ እምኀቤሁ ፡ ክብር ፡ ወኀሳር ፡ ውስተ ፡ እዴሁ ፤ ይክል ፡ ቀሢፈ ፡ ወያበዝኅ ፡ ተሣህሎ ፡ ይትመዐዕ ፡ ወያበዝኅ ፡ ምሕረቶ ፡ እስመ ፡ ፈታኔ ፡ ልብ ፡ ወኵልያት ፡ ውእቱ ፤ ይሁብ ፡ ወይነሥእ ፡ ይተክል ፡ ወይምሑ ፡ የሐንጽ ፡ ወይነሥት ፡ ያሤኒ ፡ ወይመቊስ ፤ እስመ ፡ ኵሉ ፡ ሎቱ ፡ ወኵሉ ፡ እምኀቤሁ ፡ ወኵሉ ፡ ቦቱ ፡ ኮነ ። ወአንቲኒ ፡ ታቦተ ፡ ሕጉ ፡ ለእግዚኣብሔር ፡ መድኀኒተ ፡ ኩኒ ፡ ኀበ ፡ ተሐውሪ ፡ ወእምኀበኒ ፡ ወፃእኪ ፤ መድኀኒተ ፡ ኩኒ ፡ በቤትኒ ፡ ወበገዳምኒ ፤ መድኀኒተ ፡ ኩኒ ፡ በዝየኒ ፡ ወበከሐክኒ ፤ መድኀኒተ ፡ ኩኒ ፡ በታዕካኒ ፡ ወበፅሙናኒ ፤ መድኀኒተ ፡ ኩኒ ፡ በባሕርኒ ፡ ወበየብስኒ ፤ መድኀኒተ ፡ ኩኒ ፡ በአድባርኒ ፡ ወበአውግርኒ ፤ መድኀኒተ ፡ ኩኒ ፡ በሰማያትኒወበምድርኒ ፤ መድኀኒተ ፡ ኩኒ ፡ በምጽናዓትኒ ፡ ወበቀላያት ፤ መድኀኒተ ፡ ኩኒ ፡ በሞትኒ ፡ ወበሕይወትኒ ፤ መድ ፡ ኀኒተ ፡ ኩኒ ፡ በበአትኪ ፡ ወበፀአትኪ ፤ መድኀኒተ ፡ ኩኒ ፡ ለደቂቅነሂ ፡ ወለነገደ ፡ ሕዝብኪ ፤ መድኀኒተ ፡ ኩኒ ፡ ለበሓውርትኒ ፡ ወለአህጉርኒ ፤ መድኀኒተ ፡ ኩኒ ፡ ለነገሥት ፡ ወለመኳንንት ፤ መድኀኒተ ፡ ኩኒ ፡ ለአትክልት ፡ ወለፍረያት ፤ መድኀኒተ ፡ ኩኒ ፡ ለሰብእኒ ፡ ወለእንስሳ ፤ መድኀኒተ ፡ ኩኒ ፡ ለአዕዋፍኒ ፡ ወለአራዊት ፤ መድኀኒተ ፡ ኩኒ ፡ ለሐመልማልኒ ፡ ወለጽገያት ፤ መድኀኒተ ፡ ኩኒ ፡ ጸልዪ ፡ ወመሐሪ ፡ መሐኪ ፡ ሕዝበኪ ። ኩንነ ፡ ጥቅመ ፡ ወንከውነኪ ፡ ሐጹረ ፤ ንገሢ ፡ ለነ ፡ ወንከውነኪ ፡ ሕዝበ ፤ ኩንነ ፡ መርሐ ፡ ወንተሉ ፡ ድኅሬኪ ፤ ኢትትአንተሊ ፡ ወኢትትሀየዪ ፡ ወኢትትቈጥዒ ፡ በብዝኀ ፡ አበሳነ ፡ እስመ ፡ ንሕነ ፡ ሕዝብ ፡ ዘአልቦ ፡ ሕገ ፡ ዘኢተምህረ ፡ ሰብሖተኪ ፤ ወእምይእዜሰ ፡ ምርሐነ ፡ ወመሀረነ ፡ ወአለብወነ ፡ ወአጥብበነ ፡ ከመ ፡ ንትመሀር ፡ ሰብሖተኪ ፡ ወከመ ፡ ይሰባሕ ፡ ስምኪ ፡ በላዕሌነ ፡ በኵሉ ፡ ጊዜ ፡ ወበኵሉ ፡ መዋዕል ፡ በኵሉ ፡ መዐልት ፡ ወበኵሉ ፡ ሌሊት ፡ በኵሉ ፡ ሰዐት ፡ ወበኵሉ ፡ ኑኀ ፡ አዝማን ፤ ሀብነ ፡ ኀይለ ፡ ንትቀነይ ፡ ለኪ ፤ ተንሥኢ ፡ ጽዮን ፡ ወልበሲ ፡ ኀይለኪ ፡ ወሙኢዮሙ ፡ ለጸላእትኪ ፡ ወ ፡ ሀብነ ፡ ጽንዐ ፡ ለነገሥትኪ ፡ ወአስተኀፍርዮሙ ፡ ለእለ ፡ ይጸልኡ ፡ ኪያኪ ፡ ወአስተፈሥሒዮሙ ፡ ለእለ ፡ ያፈቅሩኪ ፨ ፡ ወእምዝ ፡ ዖዳ ፡ ወይቤ ፡ ነያ ፡ ጽዮን ፡ ነያ ፡ መድኀኒት ፡ ነያ ፡ መስተፈሥሒት ፡ ነያ ፡ ብርህት ፡ ከመ ፡ ፀሐይ ፡ ነያ ፡ ስርጉት ፡ በስብሐት ፡ ነያ ፡ ስርጉት ፡ ከመ ፡ መርዓት ፡ አኮ ፡ በአልባሰ ፡ ክብር ፡ ኀላፊ ፡ አላ ፡ ስርጉት ፡ በክብር ፡ ወበስብሐት ፡ እምኀበ ፡ እግዚኣብሔር ፤ እንተ ፡ ይኔጽሩ ፡ መፍትው ፡ ወአኮ ፡ እንተ ፡ የኀድጉ ፡ እንተ ፡ ያበድሩ ፡ መፍትው ፡ ወአኮ ፡ እንተ ፡ ይሜንኑ ፡ እንተ ፡ ያፈቅሩ ፡ መፍትው ፡ ወአኮ ፡ እንተ ፡ ይጸልኡ ፡ እንተይቀርቡ ፡ መፍትው ፡ ወአኮ ፡ እንተ ፡ ይርሕቁ ፤ ንቀርበኪ ፡ ወኢትርሐቅነ ፡ ንትመረጐዘኪ ፡ ወኢታድኅፅነ ፡ ንስእለኪ ፡ ወኢትጸመምነ ፡ ንጸርኅ ፡ ኀቤኪ ፡ ወስምዒ ፡ ገዓረነ ፡ በኵሉ ፡ ዘሰአልነ ፡ ኀቤኪ ፡ ወኢትፍቅዲ ፡ ተግሕሦ ፡ እምኔነ ፡ እስከ ፡ ይመጽእ ፡ እግዚእኪ ፡ ወይነግሥ ፡ ላዕሌኪ ፤ እስመ ፡ ማኅደሩ ፡ አንቲ ፡ ለአምላከ ፡ ሰማይ ። ዘንተ ፡ ተናገረ ፡ ዳዊት ፡ ንጉሥ ፡ ወልደ ፡ ሰሎሞን ፡ ንጉሠ ፡ እስራኤል ፡ እስመ ፡ ወረደ ፡ ላዕሌሁ ፡ መንፈሰ ፡ ትንቢት ፡ በእንተ ፡ ፍሥሓሁ ፡ ወኢያአምር ፡ ዘይነብብ ፡ በከመ ፡ ጴጥሮስ ፡ ወዮሐንስ ፡ በርእሰ ፡ ደብረ ፡ ታቦር ፤ ወአንከርዎ ፡ ኵሎሙ ፡ ወይቤሉ ፡ ዝንቱ ፡ ወልደ ፡ ነቢይ ፡ ውስተ ፡ ነቢያትኑ ፡ ኍሉቅ ፨ ፨
=== chapter 55 ===
[፶፭ ፡ በእንተ ፡ ዘተፈሥሑ ፡ ሰብአ ፡ ኢትዮጵያ ።]
ወአኀዙ ፡ ዕንዚራተ ፡ ወነፍኁ ፡ ቀርነ ፡ ወከበሮ ፡ ወብዕዛ ፡ ወበቃለ ፡ ማሕሌቶሙ ፡ ወፍሥሓሆሙ ፡ ተሀውከት ፡ ወደምፀት ፡ ፈለገ ፡ ግብጽ ፡ ወኀብሩ ፡ ምስሌሆሙ ፡ ውውዓ ፡ ወማሕሌት ፤ ወወድቁ ፡ ጣዖታቲሆሙ ፡ ዘገብሩ ፡ በእደዊሆሙ ፡ አምሳለ ፡ ሰብእ ፡ ወከልብ ፡ ወድመት ፡ ወዓዲ ፡ ማኅፈደ ፡ ነዋኃት ፡ ወእለ ፡ ምስሌሆሙ ፡ አምሳለ ፡ አንስርት ፡ ዘወርቅ ፡ ወብሩር ፡ ወድቁ ፡ ወተቀጥቀጡ ፤ እስመ ፡ ከመ ፡ ፀሐይ ፡ ታበርህ ፡ ወእምግርማሃ ፡ ይደነግፁ ፤ ወአልበስዋ ፡ አልባሲሃ ፡ ወጾሩ ፡ ሞጻሃ ፡ ቅድሜሃ ፡ ወአንበርዋ ፡ ዲበ ፡ ሰረገላ ፡ ነጺፎሙ ፡ ሜላተ ፡ ታሕቴሃ ፡ ወፀፊሮሙ ፡ ሜላተ ፡ በመልዕልቴሃ ፡ ወይሔልዩ ፡ ማሕሌተ ፡ በቅድሜሃ ፡ ወበድኅሬሃ ። ወተንሥኡ ፡ ሰረገላትኒ ፡ ከመ ፡ ቀዲሙ ፡ ወጌሡ ፡ በጽባሕ ፡ እንዘ ፡ ይሔልዩ ፡ ላቲ ፡ ወተላዐሉ ፡ ኵሎሙ ፡ መጠነ ፡ እመት ፤ እንዘ ፡ ያስተፉንውዎሙ ፡ ሰብአ ፡ ብሔረ ፡ ግብጽ ፡ ኀለፉ ፡ በቅድሜሆሙ ፡ ከመ ፡ ጽላሎት ፡ ወሰገዱ ፡ ሎሙ ፡ ሰብአ ፡ ብሔረ ፡ ግብጽ ፡ እስመ ፡ ርእይዋ ፡ እንዘ ፡ ትረውጽ ፡ ከመ ፡ ፀሐይ ፡ በውስተ ፡ ሰማይ ፤ ወኵሎሙ ፡ ይረውጹ ፡ በሰረገላ ፡ እንዘይረውጹ ፡ በቅድሜሃ ፡ ወበድኅሬሃ ። ወበጽሑ ፡ ባሕረ ፡ አልአሕመር ፡ እንተ ፡ ይእቲ ፡ ባሕረ ፡ ኢርትራ ፡ እንተ ፡ ተሠጥቀት ፡ በእደ ፡ ሙሴ ፡ ወኬዱ ፡ ደቂቀ ፡ እስራኤል ፡ ውስተ ፡ መዓምቅቲሃ ፡ ዐቀበ ፡ ወቊልቊለ ፡ እስመ ፡ ኢተውህበት ፡ አሜሃ ፡ ለሙሴ ፡ ታቦተ ፡ ሕጉ ፡ ለእግዚኣብሔር ፡ ወበእንተዝ ፡ ጠግዐ ፡ ማይ ፡ አረፍትበይምን ፡ ወአረፍት ፡ በፅግም ፡ ወአኅለፎሙ ፡ ለእስራኤል ፡ ምስለ ፡ እንስሳሆሙ ፡ ወደቂቆሙ ፡ ወአንስቲያሆሙ ፤ ወእምድኅረ ፡ ዐደዉ ፡ ባሕረ ፡ ተናገሮ ፡ እግዚኣብሔር ፡ ወወሀቦ ፡ ታቦተ ፡ ኪዳን ፡ ምስለ ፡ መጽሐፈ ፡ ሕግ ። ወሶበ ፡ ተዐዱ ፡ ጽዮን ፡ ቅድስት ፡ ምስለ ፡ እሊአሃ ፡ አሜሃ ፡ እንተ ፡ ኀቤሃ ፡ እንዘ ፡ ይሔልዩ ፡ ማሕሌተ ፡ በመሰንቆ ፡ ወበዕንዚራት ፡ ባሕርኒ ፡ ተቀበለቶሙ ፡ እንዘ ፡ ታንፈርዕጽ ፡ መዋግዲሃ ፡ ከመ ፡ ሶበ ፡ ይትበተኩ ፡ አድባር ፡ ነዋኃት ፡ ወከመ ፡ ድምፀ ፡ አንበሳ ፡ ዘይጥሕር ፡ ከማሁ ፡ በገንሕ ፡ ትደምፅ ፡ ወከመ ፡ ነጐድጓደ ፡ ክረምተ ፡ ደማስቆ ፡ ወኢትዮጵያ ፡ ሶበ ፡ ይዘብጦን ፡ መብረቅ ፡ ለደመናት ፡ ከማሁ ፡ ታንጐደጒድ ፡ ወኀብረ ፡ ነጐድጓድ ፡ ምስለ ፡ ዕንዚራት ፡ ወሰገደት ፡ ላቲ ፡ ባሕርኒ ፤ ወእንዘ ፡ ይትሀወክ ፡ መዋግዲሃ ፡ ከመ ፡ አድባር ፡ ተለዐለ ፡ ሰረገላቲሆሙ ፡ መልዕልተ ፡ መዋግድ ፡ መጠነ ፡ ፫ ፡ እመት ፡ ወበዜማ ፡ ማሕሌቶሙ ፡ መንክር ፡ ተላህያ ፡ ለባሕር ፤ ግሩም ፡ ፈድፋደ ፡ ወመድምም ፡ ተላህያ ፡ ለባሕር ፡ ዐዚዝ ፡ ጥቀ ፡ ወዕፁብ ፡ ተላህያ ፡ ለባሕር ፡ ወእለ ፡ ውስቴታሂ ፡ አራዊት ፡ እለ ፡ ይትዐወቁ ፡ ወእለ ፡ ኢያስተርእዩ ፡ ይወፅኡ ፡ ወይሰግዱ ፡ ላቲ ፡ ወአዕዋፍኒ ፡ እለ ፡ ውስቴታ ፡ ይጠፍሑ ፡ በክነፊሆሙ ፡ ወይጼልልዋ ፤ ወኮነ ፡ ፍሥሓ ፡ ለባሕረ ፡ ኢርትራ ፡ ወለሰብአ ፡ ኢትዮጵያ ፡ ወወፅኡ ፡ ባሕረ ፡ ወተፈሥሑ ፡ ፈድፋደ ፡ እምነ ፡ እስራኤል ፡ ሶበ ፡ ይወፅኡ ፡ እምግብጽ ፡ ወበጽሑ ፡ አንጻረ ፡ ደብረ ፡ ሲና ፡ ወኀደሩ ፡ ውስተ ፡ ቃዴስ ፡ ወበህየኒ ፡ እንዘ ፡ ይሴብሑ ፡ መላእክት ፡ ወያኀብሩ ፡ ስብሐቶሙ ፡ መንፈሳዊያን ፡ ምስለ ፡ ደቂቀ ፡ መሬታዊያን ፡ በማሕሌት ፡ ወበመዝሙር ፡ በከበሮ ፡ ወበትፍሥሕት ። ወእምሂየ ፡ ጸዐኑ ፡ ሰረገላቲሆሙ ፡ ወተንሥኡ ፡ ወሖሩ ፡ ወኀለፍዋ ፡ ለብሔረምድያም ፡ ወበጽሑ ፡ ሀገረ ፡ ቤሎንቶስ ፡ እንተ ፡ ሀገረ ፡ ኢትዮጵያ ፤ ወተፈሥሑ ፡ በህየኒ ፡ ወአዕረፉ ፡ እስመ ፡ ደወለ ፡ ብሔሮሙ ፡ በጽሑ ፡ በክብር ፡ ወበፍሥሓ ፡ ዘእንበለ ፡ ፃማ ፡ በፍኖት ፡ በሰረገላ ፡ ነፉስ ፡ ምስለ ፡ ኀይለ ፡ ሰማይ ፡ ወሚካኤል ፡ ሊቀ ፡ መላእክት ፤ ወተፈሥሑ ፡ ኵሎሙ ፡ አድያመ ፡ ኢትዮጵያ ፡ እስመ ፡ ታበርህ ፡ ጽዮን ፡ ኀበ ፡ በጽሐት ፡ ከመ ፡ ፀሐይ ፡ በውስተ ፡ ጽልመት ፨ ፨ ፨ ፨ ፨ ፨ ፨ ፨
=== chapter 56 ===
[፶፮ ፡ በእንተ ፡ ግብአተ ፡ ሳዶቅ ፡ ካህን ፡ ውሂቦ ፡ ሞፃ ።]
ወሶበ ፡ ገብአ ፡ ሳዶቅ ፡ ካህን ፡ ኀበ ፡ ሰሎሞን ፡ ንጉሥ ፡ ወረከቦ ፡ እንዘ ፡ ይቴክዝ ፡ አውሥኦ ፡ ንጉሥ ፡ ለሳዶቅ ፡ ካህን ፡ ወይቤሎ ፡ አመ ፡ ትመጽእ ፡ ንግሥት ፡ አስተርአየኒ ፡ ከመዝ ፡ በሌሊት ፡ ከመ ፡ ዘእቀውም ፡ ውስተ ፡ ቀመራ ፡ ለኢየሩሳሌም ፡ ወረደ ፡ ፀሐይ ፡ እምሰማይ ፡ ውስተ ፡ ብሔረ ፡ ይሁዳ ፡ ወአብርሃ ፡ ፈድፋደ ፡ ወጐንዲያ ፡ ዐረበት ፡ ወአብርሀት ፡ ለብሔረ ፡ ኢትዮጵያ ፡ ወኢገብአት ፡ ዳግመ ፡ ውስተ ፡ ብሔረ ፡ ይሁዳ ፤ ወካዕበ ፡ ወረደ ፡ ፀሐይ ፡ እምሰማይ ፡ ውስተ ፡ ብሔረ ፡ ይሁዳ ፡ ወአብርሃ ፡ ፈድፋደ ፡ እምቀዲሙ ፡ ወተሀየይዎ ፡ እስራኤል ፡ ወፈቀዱ ፡ ይድፍኑ ፡ ብርሃኖ ፡ ወሠረቀ ፡ እንተ ፡ መትሕተ ፡ ምድር ፡ እንተ ፡ እምኀበ ፡ ኢተሐዘብዎ ፡ ወአብርሃ ፡ ለብሔረ ፡ ሮሜ ፡ ወለብሔረ ፡ ኢትዮጵያ ፡ ወእምድኅሬሁ ፡ ለኵሎሙ ፡ እለ ፡ አምኑ ፡ ቦቱ ። ወአውሥአ ፡ ሳዶቅ ፡ ካህን ፡ ወይቤ ፡ እግዚእየ ፡ ለምንት ፡ ዘኢነገርከኒ ፡ ቀዲሙ ፡ ዘከመዝ ፡ አርአያ ፡ ዘርኢከ ፤ አርዐድከኒ ፡ ለብረክየ ፤ አሌለነ ፡ ደቂቅነ ፡ ለእመ ፡ ነሥእዋ ፡ ለእግዝእትነ ፡ ጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ። ወአውሥአ ፡ ንጉሥ ፡ ወይቤሎ ፡ ተረስዐ ፡ ጥበብነ ፡ ወተደፍነ ፡ ኅሊናነ ፤ በአማን ፡ አምሳሊሃ ፡ ለፀሐይ ፡ ጽዮን ፡ ቅድስት ፡ ዘአስተርአየኒ ፡ አሜሃ ፡ እንዘ ፡ ሀሎኩ ፡ ንዉምየ ፡ ምስለ ፡ ንግሥተ ፡ ኢትዮጵያ ፤ ወባሕቱ ፡ ንግረኒ ፡ እስኩ ፡ ትማልም ፡ ሶበ ፡ ትነሥእ ፡ ልብሳ ፡ ተውንያ ፡ ዘቃማ ፡ እምላዕሌሃ ፡ ለጽዮን ፡ ኢጠየቀኑ ፡ ህላዌሃ ። አውሥአ ፡ ሰዶቅ ፡ ወይቤ ፡ አልቦ ፡ እግዚኦ ፡ እስመ ፡ ፫ ፡ ልብስ ፡ በኀቤሃ ፡ ነሣእኩ ፡ እንተ ፡ ላዕሌሃ ፡ ወአልበስክዋ ፡ እንተ ፡ ወሀብከኒ ፡ ወአምጻእኩ ፡ ኀቤከ ። ወይቤሎ ፡ ሖርኬ ፡ አፍጥን ፡ ነጽሮታ ፡ ለእግዝእትነ ፡ ወርእያ ፡ ጥዩቀ ። ወነሥአ ፡ መራኁተ ፡ ሰዶቅ ፡ ካህን ፡ ወሖረ ፡ ወፈትሐ ፡ ኀዋኅወ ፡ ቤተ ፡ መቅደስ ፡ ወአፍጠነ ፡ ነጽሮ ፡ ወኀሢሠ ፡ ወአልቦ ፡ ዘረከበ ፡ ዘእንበለ ፡ ዕፀወ ፡ ለውሕ ፡ ጥጉዓን ፡ በአረፍተ ፡ ምንባሪሃ ፡ ለጽዮን ፡ ዘአስተማሰለ ፡ አዛርያስ ፨ ፨ ፨ ፨ ፨
=== chapter 57 ===
[፶፯ ፡ በእንተ ፡ ውድቀተ ፡ ሳዶቅ ፡ ካህን ።]
ወርእዮ ፡ ዘንተ ፡ ወድቀ ፡ በገጹ ፡ ውስተ ፡ ምድር ፡ ወተክዕወት ፡ ነፍሱ ፡ በላዕሌሁ ፡ እስመ ፡ ደንገፀ ፡ ወኮነ ፡ ከመ ፡ በድን ፤ ወሶበ ፡ ጐንደየ ፡ ወፂአ ፡ ለአከ ፡ ሎቱ ፡ ኢዮአስ ፡ ወልደ ፡ ዮዳሔ ፡ ወረከቦ ፡ ውዱቀ ፡ ከመ ፡ በድን ፡ ወአንሥኦ ፡ ርእሶ ፡ ወገሰሶ ፡ ልቦ ፡ ወአንፎ ፡ እመ ፡ ይረክብ ፡ ምዉቀ ፡ እስትንፋስ ፡ በላዕሌሁ ፡ ወነፍሖ ፡ ወአንሥኦ ፡ ወነገፎ ፡ ወአፅግዖ ፡ ውስተ ፡ ጠረጲዛ ፡ ወተንሥአ ፡ ወነጸረ ፡ ውስተ ፡ ምንባሪሃ ፡ ለጽዮን ፡ ወኢረከባ ፤ ወወድቀ ፡ ወወደየ ፡ ሐመደ ፡ ውስተ ፡ ርእሱ ፡ ወተንሥአ ፡ ወሖረ ፡ ወከልሐ ፡ በአናቅጺሃ ፡ ለቤተ ፡ እግዚኣብሔር ፤ ወተሰምዐ ፡ ድምፅ ፡ እስከ ፡ ቤተ ፡ ንጉሥ ። ወተንሥአ ፡ ንጉሥ ፡ ወአዘዘ ፡ ይዑዱ ፡ ዐዋዲ ፡ ወይንፍሑ ፡ ቀርነ ፡ ፀባኢት ፡ ከመ ፡ ይሖሩ ፡ ወይስድድዎ ፡ ለሰብአ ፡ ብሔረ ፡ ኢትዮጵያ ፡ ወለእመ ፡ ረከቦሙ ፡ ከመ ፡ የአኀዞ ፡ ለወልዱ ፡ ወያግብኦ ፡ ምስለ ፡ ጽዮን ፡ ወይቅትሎሙ ፡ ለኵሎሙ ፡ በአፈ ፡ ኀጺን ፤ እስመ ፡ በአፉሁ ፡ ነበበ ፡ ወይቤ ፡ ሕያው ፡ እግዚኣብሔር ፡ አምላከ ፡ እስራኤል ፡ ከመ ፡ ሰብአ ፡ ሞት ፡ እሙንቱ ፡ ወኢኮኑ ፡ ለሕይወት ፡ እስመ ፡ በአማን ፡ ይደልዎሙ ፡ ሞት ፡ በእንተ ፡ ዘሰረቁ ፡ ቤተ ፡ መቅደሱ ፡ ለእግዚኣብሔር ፡ ወፈቀዱ ፡ ያርኵሱ ፡ ማኅደረ ፡ ስሙ ፡ ውስተ ፡ ምድር ፡ ዘአልቦ ፡ ሕገ ፨ ፨ ፨ ፨ ፨ ፨ ፨ ፨
=== chapter 58 ===
[፶፰ ፡ ኀበ ፡ ተንሥአ ፡ ሰሎሞን ፡ ይቅትሎሙ ።]
ከመዝ ፡ ተናገረ ፡ ንጉሥ ፡ ሰሎሞን ፡ ወተንሥአ ፡ በመዐት ፡ ወሖረ ፡ ከመ ፡ ይኅሥሦሙ ፤ ወሶበ ፡ ተንሥኡ ፡ ንጉሥ ፡ ወመኳንንቲሁ ፡ ወኀያላኒሁ ፡ ተጋብኡ ፡ አእሩገ ፡ እስራኤል ፡ ውስተ ፡ ቤተ ፡ እግዚኣብሔር ፡ ምስለ ፡ አቤራት ፡ ወደናግል ፡ ወበከዩ ፡ በእንተ ፡ ጽዮን ፡ እስመ ፡ ተነሥአት ፡ እምኔሆሙ ፡ ታቦተ ፡ ሕጉ ፡ ለእግዚኣብሔር ። ወለሰዶቅኒ ፡ እስመ ፡ ገብአ ፡ ልቡ ፡ እምድኅረ ፡ ጒንዱይ ፡ ሰዐት ። ወእምዝ ፡ አዘዘ ፡ ንጉሥ ፡ ከመ ፡ ይሖሩ ፡ ይምነ ፡ ወፅግመ ፡ ከመ ፡ እመቦ ፡ ከመ ፡ ይትገሐሡ ፡ እምፍርሀተ ፡ ስርቅ ፤ ወለሊሁሰ ፡ ንጉሥ ፡ ተንሥአ ፡ በአሠረ ፡ ፍኖቶሙ ፡ ለሰብአ ፡ ኢትዮጵያ ፡ ወፈነወ ፡ መባርዲን ፤ ሰብአ ፡ አፍራስ ፤ ከመ ፡ ያእምሩ ፡ ኀበ ፡ ሀለዉ ፡ ወይግብኡ ፡ ወይንግርዎ ። ወሖሩ ፡ ወበጽሑ ፡ ሀገረ ፡ ምስር ፡ ኀበ ፡ ተዐየኑ ፡ ህየ ፡ ሰብአ ፡ ኢትዮጵያ ፡ ምስለ ፡ ንጉሦሙ ፡ ወኀበሂ ፡ ተሰለምዋ ፡ ለጽዮን ፤ ወተፈሥሑ ፡ ወሐተቱ ፡ ኪያሆሙ ፡ ሐራ ፡ ንጉሥ ፡ ወይቤልዎሙ ፡ ሰብአ ፡ ብሔረ ፡ ግብጽ ፤ እምርሑቅ ፡ መዋዕል ፡ በዝየ ፡ ኀለፉ ፡ ሰብአ ፡ ኢትዮጵያ ፡ እንዘ ፡ ይረውጹ ፡ በሰረገላ ፡ ከመ ፡ መላእክት ፡ ወይቀልሉ ፡ እምነ ፡ አንስርት ፡ በውስተ ፡ ሰማይ ፤ ወይቤልዎሙ ፡ ማእዜ ፡ ዕለት ፡ ኀለፉ ፡ እምኔክ ፡ ሙ ፤ ወይቤልዎሙ ፡ ዮም ፡ ተሱዕ ፡ መዋዕል ፡ በዘ ፡ ኀለፉ ፡ እምኔነ ። ወቦ ፡ እምኔሆሙ ፡ እለ ፡ ገብኡ ፡ ወነገርዎ ፡ ለንጉሥ ፡ ሰሎሞን ፡ ከመ ፡ ኀለፉ ፡ ተሱዐ ፡ መዋዕል ፡ እምዘ ፡ ኀለፉ ፡ እምስር ፤ ወአብያጺነሰ ፡ ሖሩ ፡ ከመ ፡ ይኅሥሡ ፡ እስከ ፡ ባሕረ ፡ ኢርትራ ፡ ወንሕነሰ ፡ ገባእነ ፡ ከመ ፡ ንንግርከ ፡ ዘንተ ፤ እስኩ ፡ ኀሊ ፡ ለሊከ ፡ ንጉሥ ፡ በዕለተ ፡ ሰኑይ ፡ እምከመ ፡ ወፅኡ ፡ እምኀቤከ ፡ በጽሑ ፡ በሠሉስ ፡ ኀበ ፡ ፈለገ ፡ ተከዚ ፡ ሀገረ ፡ ምስር ፤ ወለነኒ ፡ ሶበ ፡ ፈነውከነ ፡ እምኢየሩሳሌም ፡ በጻሕነ ፡ በዕለተ ፡ ሰንበት ፡ ወገባእነ ፡ ኀቤከ ፡ ዮምበዕለተ ፡ ራብዕ ፤ ኀሊኬ ፡ በጥበብ ፡ መጠነ ፡ ይበጽሑ ፡ እሙንቱ ፡ ሰብእ ። ወተምዐ ፡ ንጉሥ ፡ ወይቤ ፡ አኀዝዎሙ ፡ ኀምስቲሆሙ ፡ እስከ ፡ ንረክብ ፡ ጽድቀ ፡ ቃሎሙ ፨ ፡ ወአፍጠኑ ፡ ሐዊረ ፡ ንጉሥ ፡ ወሰራዊቱ ፡ ወበጽሑ ፡ ጋዛ ፡ ወተስእሎሙ ፡ ወይቤሎሙ ፡ ማእዜ ፡ ኀለፈ ፡ ወልድየ ፡ እምኔክሙ ። አውሥኡ ፡ ወይቤሉ ፡ ኀለፈ ፡ ይእቲ ፡ ሠሉስ ፡ ዕለት ፤ ወሶበ ፡ ጸዐኑ ፡ ሰረገላቲሆሙ ፡ አልቦ ፡ ዘየሐውር ፡ መልዕልተ ፡ ምድር ፡ አላ ፡ በሰረገላ ፡ ስቁላን ፡ መልዕልተ ፡ ነፉስ ፡ ወይቀልሉ ፡ እምነ ፡ አንስርት ፡ ዘውስተ ፡ ሰማይ ፡ ወኵሉ ፡ ንዋዮሙ ፡ የሐውር ፡ ምስሌሆሙ ፡ መልዕልተ ፡ ነፉስ ፡ በሰረገላ ፤ ወለነሰ ፡ መሰለነ ፡ ዘአንተ ፡ ረሰይከ ፡ ሎሙ ፡ በጥበብከ ፡ ከመ ፡ ይሖሩ ፡ በሰረገላ ፡ መልዕልተ ፡ ነፋስ ። ወይቤሎሙ ፡ ቦኑ ፡ ዘሀለወት ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ ምስሌሆሙ ፤ ወይቤልዎ ፡ አልቦ ፡ ዘርኢነ ፨
=== chapter 59 ===
[፶፱ ፡ ኀበ ፡ ሐተቶ ፡ ለግብጻዊ ፡ ገብረ ፡ ፈርዖን ።]
ወኀለፈ ፡ እምህየ ፡ ወረከበ ፡ ፩ ፡ መኰንነ ፡ እመኳንንተ ፡ ግብጽ ፡ ዘንጉሥ ፡ ፈርዖን ፡ ዘለአኮ ፡ ኀቤሁ ፡ ምስለ ፡ አምኃ ፡ ወምሉእ ፡ ንዋይ ፡ ምስሌሁ ፡ ወበጽሐ ፡ ወሰገደ ፡ ለንጉሥ ። ወአፍጠኖ ፡ ሐቲተ ፡ ሰሎሞን ፡ ንጉሥ ፡ ዘእንበለ ፡ የሀብ ፡ አምኃሁ ፡ ወመልእክቶ ፡ ወይቤሎ ፡ ቦኑ ፡ ዘርኢከ ፡ ሰብአ ፡ ኢትዮጵያ ፡ እንዘ ፡ ይግዕዙ ፡ እምህየ ። ወአውሥአ ፡ ወይቤሎ ፡ መልአከ ፡ ፈርዖን ፡ ለንጉሥ ፡ ሕያው ፡ አንተ ፡ ንጉሥ ፡ ለዓለም ፤ ለአከኒ ፡ እግዚእየ ፡ ንጉሥ ፡ ፈርዖን ፡ እምእስክንድርያ ፡ ኀቤከ ፡ ወነዋ ፡ ኣየድዐከ ፡ ዘከመ ፡ መጻእኩ ፤ ወሶበ ፡ መጻእኩ ፡ እምእስክንድርያ ፡ ቦእኩ ፡ ቃህራ ፡ ውስተ ፡ ሀገሩ ፡ ለንጉሥ ፡ ወበብጽሐትየ ፡ በጽሑ ፡ ህየ ፡ እሉ ፡ ሰብአ ፡ ኢትዮጵያ ፡ ዘትብል ፤ በጽሑ ፡ እንተ ፡ ኀለፈት ፡ ሠሉስ ፡ ውስተ ፡ ተከዚ ፡ ፈለገ ፡ ምስር ፡ እንዘ ፡ ይነፍሑ ፡ በዕንዚራት ፡ ወይረውጹ ፡ በሰረገላት ፡ ከመ ፡ ኀይለ ፡ ሰማያዊያን ፤ ወእለ ፡ ርእይዎሙ ፡ ይቤልዎሙ ፡ እሉሰ ፡ እንዘ ፡ መሬታዊያን ፡ ኮኑ ፡ ሰማያዊያን ፡ መኑኬ ፡ ይጠብብ ፡ እምሰሎሞን ፡ ንጉሠ ፡ ይሁዳ ፡ ወውእቱኒ ፡ ኢሖረ ፡ በሰረገላ ፡ ነፉስ ፡ ከመዝ ፤ ወእለ ፡ ሀለዉ ፡ ውስተ ፡ አህጉር ፡ ወማኅፈድ ፡ ስምዐ ፡ ኮኑ ፡ ከመ ፡ ሶበ ፡ ቦኡ ፡ እሉ ፡ ውስተ ፡ ብሔረ ፡ ግብጽ ፡ ወድቁ ፡ ወተሰብሩ ፡ አማልክቲነ ፡ ወአማልክተ ፡ ንጉሥ ፡ ወማኅፈደ ፡ ጣዖታትኒ ፡ ከማሁ ፡ ተቀጥቀጡ ፤ ወሐተቱ ፡ ገነውተ ፡ አማልክት ፡ ማርያነ ፡ ግብጽ ፡ በእንተ ፡ ዘወድቁ ፡ አማልክቲነ ፡ ወይቤሉነ ፡ ታቦተ ፡ አምላከ ፡ እስራኤል ፡ እንተ ፡ ወረደት ፡ እምሰማይ ፡ ሀለወት ፡ ምስሌሆሙ ፡ ወትነብር ፡ ውስተ ፡ ሀገሮሙ ፡ እስከ ፡ ለዓለም ፤ ወበእንተዝኬ ፡ ሶበ ፡ ትበውእ ፡ ብሔረ ፡ ግብጽ ፡ ተቀጥቀጡ ፡ አማልክቲነ ፤ ወአንተሰ ፡ ኦንጉሥ ፡ አልቦ ፡ ዘይመስላ ፡ ለጥበብከ ፡ እምታሕተ ፡ ሰማይ ፡ ወለምንት ፡ ወሀብከ ፡ ታቦተ ፡ ሕጉ ፡ ለእግዚኣብሔር ፡ አምላክከ ፡ ዘአንጽሑ ፡ ለከ ፡ አበዊከ ፤ እስመ ፡ ንሰምዕ ፡ ከመ ፡ ይእቲ ፡ ታድኅነክሙ ፡ እምእደ ፡ ፀርክሙ ፡ ወመንፈሰ ፡ ትንቢትኒ ፡ ባቲ ፡ ይትናገረክሙ ፡ ወአምላከ ፡ ሰማይኒአ ፡ የኀድር ፡ ውስቴታ ፡ በመንፈሱ ፡ ቅዱስ ፡ ወትሰመዩ ፡ ሰብአ ፡ ቤቱ ፡ ለእግዚኣብሔር ፤ ወለምንት ፡ ዘወሀብክሙ ፡ ክብርክሙ ፡ ለባዕድ ። አውሥአ ፡ በጥበብ ፡ ሰሎሞን ፡ ወይቤ ፡ በአይቴ ፡ ይክል ፡ ነሢኦታ ፡ ለእግዝእትነ ፡ እስመ ፡ ሀለወት ፡ ኀቤነ ፨ ፨
=== chapter 60 ===
[፷ ፡ ኀበ ፡ ላሐዋ ፡ ሰሎሞን ፡ ለጽዮን ።]
ወቦአ ፡ ውስተ ፡ ኀይመቱ ፡ ወበከየ ፡ ብካየ ፡ መሪረ ፡ እንዘ ፡ ይብል ፡ እግዚኦ ፡ በመዋዕልየኑ ፡ ትነሥኣ ፡ ለታቦተ ፡ ኪዳንከ ፡ እምኔነ ፤ ባሕቱ ፡ እምቀደምከ ፡ ነሢአ ፡ ነፍስየ ፡ እምኔሃ ፡ ዘበመዋዕልየ ፡ ትነሥኣ ፤ እስመ ፡ አንተሰ ፡ ኢትሔሱ ፡ ቃልከ ፡ ወኢትዔምፅ ፡ ኪዳነከ ፡ ዘተካየድከ ፡ ምስለ ፡ አበዊነ ፤ ምስለ ፡ ኖኅ ፡ ገብርከ ፡ ዘዐቀባ ፡ ለጽድቅ ፡ ወምስለ ፡ አብርሃም ፡ ዘኢተዐደወ ፡ ትእዛዝከ ፡ ወምስለ ፡ ይስሐቅ ፡ ቊልዔከ ፡ ዘአንጽሐ ፡ ሥጋሁ ፡ እምርስሐተ ፡ ኀጢአት ፡ ወምስለ ፡ እስራኤል ፡ ቅዱስከ ፡ ዘአስተባዛኅከ ፡ በመንፈስ ፡ ቅዱስ ፡ ወሰመይኮ ፡ አሠረ ፡ ዚአከ ፤ እስራኤል ፤ ወምስለ ፡ ሙሴ ፡ ወአሮን ፡ ካህናቲከ ፡ እለ ፡ በመዋዕሊሆሙ ፡ አውረድካ ፡ ለታቦተ ፡ ሕግ ፡ እምሰማይ ፡ ዲበ ፡ ምድር ፡ ለደቂቀ ፡ ያዕቆብ ፡ ርስትከ ፡ ምስለ ፡ ሕግከ ፡ ወትእዛዝከ ፡ በአርአያ ፡ ሥርዐተ ፡ መላእክት ፤ እስመ ፡ አቅደምከ ፡ ሳርሮታ ፡ ለጽዮን ፡ ለማኅደረ ፡ ስብሐቲከ ፡ ውስተ ፡ ደብረ ፡ መቅደስከ ፡ ወበዳግምሰ ፡ ወሀብኮለሙሴ ፡ ከመ ፡ ያሰኒ ፡ ገቢሮታ ፡ በዲበ ፡ ምድር ፡ ወያንብራ ፡ ውስተ ፡ ደብተራ ፡ ዘስምዕ ፡ ከመ ፡ አንተኒ ፡ ትምጻእ ፡ ህየ ፡ እምደብረ ፡ መቅደስከ ፡ ወታስ ፡ ምዖሙ ፡ ቃልከ ፡ ከመ ፡ ይሖሩ ፡ በትእዛዝከ ። አእመርኩ ፡ ይእዜ ፡ ከመ ፡ ተሀየይከ ፡ ርስተከ ፡ እምነ ፡ እስራኤል ፡ ሕዝበከ ፤ ወእስከ ፡ ይእዜ ፡ ሀለወት ፡ ምስሌነ ፡ ወኢያሠነይነ ፡ ተግባራ ፡ ወበእንተዝ ፡ ተምዐዕከነ ፡ ወሜጥከ ፡ ገጸከ ፡ እምኔነ ፤ እግዚኦ ፡ ኢትነጽር ፡ ምግባረነ ፡ እኩየ ፡ አላ ፡ ነጽር ፡ ኂሩቶሙ ፡ ለአበዊነ ፡ ቀደምት ። አቡየ ፡ ዳዊት ፡ ገብርከ ፡ ፈቀደ ፡ ይሕንጽ ፡ ቤተ ፡ ለስምከ ፡ ሰሚዖ ፡ ቃለ ፡ ነቢይከ ፡ ዘይቤ ፡ አይኑ ፡ ቤት ፡ ለማኅደርየ ፡ ወአይኑ ፡ መካን ፡ ለምዕራፍየ ፡ አኮኑ ፡ እደዊየ ፡ ዘገብራ ፡ ዘኵሎ ፡ ይቤ ፡ እግዚኣብሔር ፡ ዘኵሎ ፡ ይመልክ ፤ ወዘንተ ፡ ሶበ ፡ ኀለየ ፡ ትቤሎ ፡ ኢይትከሀለከ ፡ ዘዘንተ ፡ ሐነጽከ ፡ አላ ፡ ዘወፅአ ፡ እምሐቌከ ፡ የሀንጽ ፡ ሊተ ። ወይእዜኒ ፡ እግዚኦ ፡ ኢተሐሰወ ፡ ቃልከ ፡ ወሐነጽኩ ፡ ቤተከ ፡ እንዘ ፡ አንተ ፡ ረዳእየ ፤ ወሶበ ፡ ፈጸምኩ ፡ ሐኒጾ ፡ ቤትከ ፡ አባእክዋ ፡ ለታቦተ ፡ ኪዳን ፡ ውስቴታ ፡ ወሦዕኩ ፡ መሥዋዕተ ፡ ለሥላሴ ፡ ስምከ ፡ ቅዱስ ፡ ወሐወጽከ ፡ ውስቴታ ፤ ወመልአ ፡ ቤት ፡ ስብሐቲከ ፡ እንዘ ፡ ኵሉ ፡ ዓለም ፡ ምሉእ ፡ መለኮትከ ፡ ወተፈሣሕነ ፡ ሕዝብከ ፡ በነጽሮ ፡ ስብሐቲከ ፡ ውስቴታ ። ወእምአሜሃሰ ፡ ዮም ፡ ሣልሲት ፡ ዓመታ ፡ ወመሠጥካ ፡ ለብርሃንነ ፡ እምኔነ ፡ ከመ ፡ ታብርህ ፡ ለእለ ፡ ውስተ ፡ ጽልመት ፡ ነሠትካ ፡ ለክብርነ ፡ ከመ ፡ ታክብሮሙ ፡ ለኅሱራን ፡ አ ፡ ጥፋእከ ፡ ግርማነ ፡ ከመ ፡ ታግርሞ ፡ ለዘ ፡ ኢኮነ ፡ ግሩመ ፡ ነሠትካ ፡ ለሕይወትነ ፡ ከመ ፡ ትሕንጾለዘ ፡ ርሕቀ ፡ ሕይወቱ ፡ እምኔከ ። አሌሊተ ፡ አሌሊተ ፡ እበኪ ፡ በእንተ ፡ ርእስየ ፡ ተንሥእ ፡ ዳዊት ፡ አቡየ ፡ ወብኪ ፡ ምስሌየ ፡ በእንተ ፡ እግዝእትነ ፡ እስመ ፡ ተሀየየነ ፡ እግዚኣብሔር ፡ ወነሥኣ ፡ ለእግዝእትነ ፡ እምደቂቅከ ፤ አሌሊተ ፡ አሌሊተ ፡ እስመ ፡ ተሀየየኒ ፡ ፀሐየ ፡ ጽድቅ ፤ አሌሊተ ፡ በእንተ ፡ ዘተሀየይነ ፡ ትእዛዘ ፡ አምላክነ ፡ ኮነ ፡ ኅሱራነ ፡ በዲበ ፡ ምድር ፡ ካህናትኒ ፡ ኢያሠነይነ ፡ ወነገሥትኒ ፡ ኢያርታዕነ ፡ ፍትሐ ፡ ለእጓለ ፡ ማውታ ፤ አሌለነ ፡ አሌለነ ፡ እስመ ፡ ኀለፈት ፡ ርትዕ ፡ እምኔነ ፡ ወተገሠጽነ ፤ አሌለነ ፡ ፍሥሓነ ፡ ተመይጠት ፡ ኀበ ፡ ጸላእትነ ፡ ወሞገስነ ፡ ተረስዐት ፡ እምላዕሌነ ፤ አሌለነ ፡ አሌለነ ፡ ተመጠወ ፡ ዘባንነ ፡ ለኵናተ ፡ ፀርነ ፤ አሌለነ ፡ አሌለነ ፡ ኮኑ ፡ ሕብልያ ፡ ደቂቅነ ፡ ወፄዋ ፡ ለእለ ፡ ይእዜ ፡ ነሐበልዮሙ ፡ ወንፄውዎሙ ፤ አሌለነ ፡ አሌለነ ፡ በከያ ፡ አቤራቲነ ፡ ወላሐዋደናግሊነ ፤ አሌለነ ፡ አሌለነ ፡ አውየዉ ፡ ርሡኣኒነ ፡ ወከልሑ ፡ ሕፃናቲነ ፤ አሌለነ ፡ አሌለነ ፡ አንብዓ ፡ አንስቲያነ ፡ ወማሰነት ፡ ሀገርነ ፤ አሌ ፡ ለነ ፡ አሌ ፡ ለነ ፡ እምዮም ፡ እስከ ፡ ተፍጻሜተ ፡ መዋዕሊነ ፡ ምስለ ፡ ደቂቅነ ፤ አሌለነ ፡ አሌለነ ፡ እስመ ፡ ተነሥተ ፡ ክብራ ፡ ለወለተ ፡ ጽዮን ፡ ክብርት ፡ ወዐብየ ፡ ክብራ ፡ ለወለተ ፡ ኢትዮጵያ ፡ ኅስርት ። ተምዕዐ ፡ እግዚኣብሔር ፡ ወመኑ ፡ ይሣሀል ፤ አስተራኰሰ ፡ እግዚኣብሔር ፡ ወመኑ ፡ ያነጽሕ ፤ መከረ ፡ እግዚኣብሔር ፡ ወመኑ ፡ ይትቃወማ ፡ ለምክሩ ፤ ፈቀደ ፡ እግዚኣብሔር ፡ ወመኑ ፡ የአብያ ፡ ለኅሊናሁ ፤ ይቤ ፡ እግዚኣብሔር ፡ ወኵሉ ፡ ይከውን ፤ አኅሰረ ፡ እግዚኣብሔር ፡ ወአልቦ ፡ ዘያከብር ፤ ነሥአ ፡ እግዚኣብሔር ፡ ወአልቦ ፡ ዘያገብእ ፤ ጸልአ ፡ እግዚኣብሔር ፡ ወአልቦ ፡ ዘያፈቅር ። አሌለነ ፡ እንዘ ፡ ክቡር ፡ ስምነዮምሰ ፡ ተመነነ ፡ ስምነ ፤ አሌለነ ፡ እንዘ ፡ ሰብአ ፡ ቤት ፡ ንሕነ ፡ ኮነ ፡ ሰብአ ፡ አፍአ ፡ እንዘ ፡ ሰብአ ፡ ውስጥ ፡ ንሕነ ፡ ተሰደድነ ፡ በኀጢአትነ ። እስመ ፡ እግዚኣብሔር ፡ ያፈቅር ፡ ንጽሐ ፡ ካህናትኒ ፡ አበይዋ ፡ ለንጽሕ ፡ ወአፍቀርዋ ፡ ለርኵስ ፤ ወነቢያትኒ ፡ ገሠጹነ ፡ ወኢተገሠጽነ ፡ ወአስምዑነ ፡ ወኢሰማዕነ ፤ አሌለነ ፡ በኀጢአትነ ፡ ተመነነ ፡ በኀሳርነ ፡ ተቀሠፍነ ። መንግሥትኒ ፡ ኢይበቊዕ ፡ ዘእንበለ ፡ ንጽሕ ፡ ወፍትሕ ፡ ኒ ፡ ኢይበቊዕ ፡ ዘእንበለ ፡ ርትዕ ፡ ወብዕልኒ ፡ ኢይበቊዕ ፡ ዘእንበለ ፡ ፍርሀተ ፡ እግዚኣብሔር ፤ ካህናትኒ ፡ አፍቀሩ ፡ ነገረ ፡ ዘውዕ ፡ እምነገረ ፡ መጻሕፍት ፡ ወአፍቀሩ ፡ ቃለ ፡ መሰንቆ ፡ እምቃለ ፡ መዝሙር ፡ ወአፍቀሩ ፡ ግብረ ፡ ዓለም ፡ እምጸሎት ፡ ወአፍቀሩ ፡ ቅሥተ ፡ ዓለም ፡ እምቃለ ፡ መለኮት ፡ ወአፍቀሩ ፡ ሰሐቀ ፡ ወዝሙተ ፡ እምብካየ ፡ ሕይወት ፡ ወአፍቀሩ ፡ መብልዐ ፡ ኀላፊተ ፡ እምጸዊም ፡ ለእግዚኣብሔር ፡ ወአፍቀሩ ፡ መስቴ ፡ ወስካረ ፡ እምሠዊዕ ፡ ለእግዚኣብሔር ፡ ወአፍቀሩ ፡ ሀኬተ ፡ እምስእለት ፡ ወአፍቀሩ ፡ ንዋየ ፡ እምነ ፡ ምጽወት ፡ ወአፍቀሩ ፡ ንዋመ ፡ እምስብሐት ፡ ወአፍቀሩ ፡ ነዛህላለ ፡ እምንቃህ ። አሌለነ ፡ አሌለነ ፡ ነገሥትኒ ፡ ተሀከይነ ፡ እምነ ፡ ትእዛዘ ፡ እግዚኣብሔር ፡ ወአፍቀርነ ፡ ነገረ ፡ መስተዛውዓን ፡ እምቃለ ፡ ካህናትወገጸ ፡ አንስቲያነ ፡ ንፈቅድ ፡ ነጽሮ ፡ እምኀሢሠ ፡ ገጸ ፡ እግዚኣብሔር ፡ በንስሓ ፡ ወአፍቀርነ ፡ ነጽሮ ፡ ሕፃናቲነ ፡ እምሰሚዐ ፡ ቃለ ፡ እግዚኣብሔር ፡ ወአፍቀርነ ፡ ተናዝዞ ፡ በእብነ ፡ ሰርድዮን ፡ እምአርትዖ ፡ ፍትሕ ፡ ለእጓለ ፡ ማውታ ፡ ወአፍቀርነ ፡ ነጽሮ ፡ ክብርነ ፡ እምሰሚዐ ፡ ቃለ ፡ እግዚኣብሔር ፡ ወአፍቀርነ ፡ ነገረ ፡ በክ ፡ እምቃለ ፡ ማእምራን ፡ ወአፍቀርነ ፡ ነገረ ፡ እቡዳን ፡ እምነ ፡ ሰሚዐ ፡ ነገረ ፡ ነቢያት ። አሌለነ ፡ በፈቃድነ ፡ አርኰስና ፡ ለሕይወትነ ፤ አሌለነ ፡ እስመ ፡ ዘያፈቅር ፡ እግዚኣብሔር ፡ ንስሓ ፡ ወምሕረተ ፡ ኢገበርነ ፤ አሌለነ ፡ ወሀበነ ፡ ክብረ ፡ ወበእበድነ ፡ ገደፍነ ፡ አጥበበነ ፡ ፈድፋደ ፡ ወበፈቃድነ ፡ አበድነ ፡ እምነ ፡ እንስሳ ፡ ወሀበነ ፡ ብዕለ ፡ ወአንደይነ ፡ ርእስነ ፡ እምጽዋት ። ነጸርነ ፡ አፍራሲነ ፡ ወረሳዕነ ፡ ምግባኢነ ፤ አፍቀርነ ፡ ኀላፊተ ፡ ወኢያእመርና ፡ ለነባሪት ፤ ረሰይነ ፡ መዋዕሊነ ፡ ተቀጽቦ ፡ ለሕይወትነ ፡ ወአብደርነ ፡ ተድላ ፡ ሲሲትነ ፡ ዘይከውን ፡ አደፈ ፡ እመብልዐ ፡ ሕይወት ፡ ዘይነብር ፡ ለዓለም ፡ ወቀጠንተ ፡ አልባስ ፡ ዘኢይበቊዕ ፡ ለነፍስ ፡ ወአእተትነልብሰ ፡ ግርማ ፡ ዘለዓለም ፤ ወመኳንንቲነኒ ፡ ወአሕዛብ ፡ ይገብሩ ፡ ዘይጸልእ ፡ እግዚኣብሔር ፡ ወኢያፍቀሩ ፡ ዘያፈቅር ፡ እግዚኣብሔር ፡ ፍቅረ ፡ ቢጾሙ ፡ ወትሕትና ፡ ወየውሀተ ፡ ወምሒረ ፡ ነዳይ ፡ ወትዕግሥተ ፡ ወአፍቅሮ ፡ ቤተ ፡ እግዚኣብሔር ፡ ወሰጊድ ፡ ለወልድ ፤ ወዘይጸልእሰ ፡ እግዚኣብሔር ፡ ተጠይሮ ፡ ወአጣዕዎ ፡ ወሐቲተ ፡ ማሪት ፡ ወመቃስም ፡ ወሰገል ፡ ወጽንጽንያ ፡ ወአቀሪኖ ፡ ወብትክ ፡ ወማውታ ፡ ወስርቅ ፡ ወዐመፃ ፡ ወዝሙት ፡ ወተቃንኦ ፡ ወሐቢል ፡ ወስታይ ፡ ወስካር ፡ ወማሕላ ፡ በሐሰት ፡ ለቢጾሙ ፡ ወስምዐ ፡ ሐሰት ፡ ላዕለ ፡ ቢጾሙ ፡ ዘንተ ፡ ኵሎ ፡ ይገብሩ ፡ ዘይጸልእ ፡ እግዚኣብሔር ። ወበእንተ ፡ ዝንቱኬ ፡ ዘነሥኣ ፡ እግዚኣብሔር ፡ ለታቦተ ፡ ኪዳኑ ፡ እምኔነ ፡ ወወሀባ ፡ ለሕዝብ ፡ እለ ፡ ይገብሩ ፡ ፈቃዶ ፡ ወሕጎ ፡ ወሥርዐቶ ፤ ሜጠ ፡ ገጾ ፡ እምኔነ ፡ ወአብርሀ ፡ ገጾ ፡ ላዕሌሆሙ ፡ ተሀየየ ፡ ኪያነ ፡ ወአፍቀረ ፡ ኪያሆሙ ፡ መሐረ ፡ ኪያሆሙ ፡ ወአጥፍአ ፡ ኪያነ ፡ በእንተ ፡ ዘነሥኣ ፡ ለታቦተ ፡ ኪዳኑ ፡ እምኔነ ። እስመ ፡ መሐለ ፡ ማሕላ ፡ በርእሱ ፡ ከመ ፡ ኢይከልእ ፡ ክረምተ ፡ ወሐጋየ ፡ ዘርአ ፡ ወማእረረ ፡ ፍሬ ፡ ወተግባረ ፡ ፀሐየ ፡ ወወርኀ ፡ እንዘ ፡ ሀለወት ፡ ጽዮን ፡ ዲበ ፡ ምድር ፡ ወከመ ፡ ኢይትመዐዕ ፡ ለሰማይ ፡ ወምድር ፡ ኢበአይኅ ፡ ወኢበእሳት ፡ ወከመ ፡ ኢያጠፍእ ፡ ሰብአ ፡ ወእንስሳ ፡ ወአራዊተ ፡ አላ ፡ ዳእሙ ፡ ከመ ፡ ይምሐር ፡ ተግባረ ፡ እደዊሁ ፡ ወከመ ፡ ያብዝኅ ፡ ምሕረቶላዕለ ፡ ልሕኵቱ ፤ ወአመ ፡ ይነሥኣ ፡ እግዚኣብሔር ፡ ለታቦተ ፡ ኪዳኑ ፡ አሜሃ ፡ ያጠፍኦሙ ፡ ለሰማያት ፡ ወምድር ፡ ወለኵሉ ፡ ተግባሩ ፤ ወዮምኒ ፡ እስመ ፡ ተሀየየነ ፡ እግዚኣብሔር ፡ ወነሥኣ ፡ እምኔነ ፡ ለታቦተ ፡ ሕጉ ፨ ፡ ወዘንተ ፡ እንዘ ፡ ይብል ፡ ኢያዐርፍ ፡ ብካየ ፡ ወአንብዐ ፡ እምአዕይንቲሁ ። ወአውሥአ ፡ መንፈሰ ፡ ትንቢት ፡ እንዘ ፡ ይብሎ ፡ ለምንት ፡ ከመዝ ፡ ተሐዝን ፡ እስመ ፡ በፈቃደ ፡ እግዚኣብሔር ፡ ኮነ ፡ ዝንቱ ፡ ወይእቲኒ ፡ አኮ ፡ ለባዕድ ፡ ዘተውህበት ፡ አላ ፡ ለወልድከ ፡ ቀዳሜ ፡ በኵርከ ፡ ዘይነብር ፡ ዲበ ፡ መንበረ ፡ ዳዊት ፡ አቡከ ፤ እስመ ፡ መሐለ ፡ እግዚኣብሔር ፡ ለዳዊት ፡ በጽድቅ ፡ ወኢይኔስሕ ፡ ከመ ፡ እምፍሬ ፡ ከርሡ ፡ ያነብር ፡ ዲበ ፡ መንበሩ ፡ እስከ ፡ ለዓለም ፡ በውስተ ፡ ታቦተ ፡ ኪዳኑ ፡ ጽዮን ፡ ቅድስት ፤ ወእሬስዮ ፡ ልዑለ ፡ እምነገሥተ ፡ ምድር ፡ ወመንበሮሂ ፡ ከመ ፡ መዋዕለ ፡ ሰማይ ፡ ወከመ ፡ ሥርዐተ ፡ ወርኅ ፡ እስከ ፡ ለዓለም ፤ ወበሰማያትኒ ፡ ዘይነብር ፡ ዲበ ፡ መንበረ ፡ መለኮት ፡ በሥጋ ፡ ይኴንን ፡ ሕያዋነ ፡ ወሙታነ ፡ እስከ ፡ ለዓለም ፡ ወይገንዩ ፡ ሎቱ ፡ መላእክት ፡ ወሰብእ ፡ ወይሴብሖ ፡ ኵሉ ፡ ልሳን ፡ ወይሰግዱ ፡ ሎቱ ፡ ኵሉ ፡ ብርክ ፡ በቀላያት ፡ ወበአፍላግ ፤ ወበዝንቱ ፡ ተናዘዝ ፡ ወግባእ ፡ ቤትከወኢታሕዝን ፡ ልብከ ፡ ፍጹመ ። ወበዝንቱ ፡ ተናዘዘ ፡ ወይቤ ፡ ይኩን ፡ ፈቃዱ ፡ ለእግዚኣብሔር ፡ ወአኮ ፡ ፈቃደ ፡ ሰብእ ። ወካዕበ ፡ አስተርአዮ ፡ መልአከ ፡ እግዚኣብሔር ፡ ገሃደ ፡ ወይቤሎ ፡ ወአንተሰ ፡ ሐነጽከ ፡ ቤተ ፡ እግዚኣብሔር ፡ ወትከውነከ ፡ ምክሐ ፡ ይእቲ ፡ ወምስማከ ፡ ለእመ ፡ ዐቀብከ ፡ ትእዛዞ ፡ ወኢያምለከ ፡ ባዕደ ፡ አማልክተ ፡ ትትፈቀር ፡ በኀበ ፡ እግዚኣብሔር ፡ ከመ ፡ ዳዊት ፡ አቡከ ፨ ፨ ፨
=== chapter 61 ===
[፷፩ ፡ በእንተ ፡ ግብአተ ፡ ሰሎሞን ፡ ኢየሩሳሌም ።]
ወእምዝ ፡ አተወ ፡ ሀገረ ፡ ኢየሩሳሌም ፡ ወበከየ ፡ በህየኒ ፡ ምስለ ፡ አእሩገ ፡ ኢየሩሳሌም ፡ ብካየ ፡ ዐቢየ ፡ በውስተ ፡ ቤተ ፡ እግዚኣብሔር ፤ ወእምድኅረዝ ፡ ተኣኀዙ ፡ ንጉሥ ፡ ምስለ ፡ ሰዶቅ ፡ ካህን ፡ በክሳውዲሆሙ ፡ ወበከዩ ፡ መሪረ ፡ በውስተ ፡ ምንባሪሃ ፡ ለጽዮን ፡ ወአርመሙ ፡ እምድኅረ ፡ ጒንዱይ ፡ ሰዐት ። ወተንሥኡ ፡ መላህቅት ፡ ወተናገርዎ ፡ ለንጉሥ ፡ እንዘ ፡ ይብሉ ፡ ኢትሕዝን ፡ እግዚእነ ፡ በእንተዝ ፡ ነገር ፡ እስመ ፡ ንሕነ ፡ አእመርነ ፡ ዘእንበለ ፡ ኀበ ፡ ፈቀደ ፡ እግዚኣብሔር ፡ ኢትነብር ፡ ጽዮን ፡ እምቀዳሚ ፡ እስከ ፡ ደኃሪ ፡ ወአልቦ ፡ ዘይከውን ፡ ዘእንበለ ፡ በፈቃደ ፡ እግዚኣብሔር ፤ ወዘበእንተ ፡ ጽዮንሂ ፡ ቀዲሙ ፡ በመዋዕለ ፡ ኤሊ ፡ ካህን ፡ ዘእንበለ ፡ ይስአሉ ፡ አበዊነ ፡ ንጉሠ ፡ ፄወውዋ ፡ ኢሎፍሊ ፡ በውስተ ፡ ትዕይንት ፡ ሶበ ፡ ተሀየዮሙ ፡ እግዚኣብሔር ፡ ለእስራኤል ፡ በውስተ ፡ ፀብእ ፡ ወወድቁ ፡ ካህናቲሃ ፡ አፍኒ ፡ ወፊናሐስ ፡ በአፈ ፡ ኀጺን ፡ ወነሥእዋ ፡ ኢሎፍሊ ፡ ለታቦተ ፡ ሕጉ ፡ ለእግዚኣብሔር ፡ ወአእተውዋ ፡ ውስተ ፡ ሀገሮሙ ፡ ወወደይዋ ፡ ውስተ ፡ ቤተ ፡ አምላኮሙ ፡ ዳጎን ፤ ወተሰብረ ፡ ወተሀጒለ ፡ ዳጎን ፡ ወኮነ ፡ ከመ ፡ ጸበል ፡ ወምድሮሙ ፡ ኮነት ፡ በድወ ፡ በአና ፡ ጹት ፡ ወበልዐ ፡ ኵሎ ፡ ፍሬ ፡ ምድሮሙ ፡ ወነፍስቶሙኒ ፡ ኮነ ፡ ጸልዐ ፡ ወሕበጠ ፤ ወአስተጋብኡ ፡ ማርያኒሆሙ ፡ ወመሰግላኒሆሙ ፡ ወረአይተ ፡ ከዋክብቲሆሙ ፡ ወተስእልዎሙ ፡ ወይቤልዎሙ ፡ እፎ ፡ ንድኅን ፡ እምዝጸልዕ ፡ ወምንዳቤ ፡ ዘረከበነ ፡ ለነ ፡ ወለሀገርነ ፤ ኀለዩ ፡ እሙንቱ ፡ መሰግላን ፡ ተግሒሦሙ ፡ እንተ ፡ ባሕቲቶሙ ፡ ወአምጽኡ ፡ ሰገላቲሆሙ ፡ ወኀለዩ ፡ ወሐሰቡ ፡ ወመከሩ ፡ ዘከመ ፡ እፎ ፡ ይድኅኑ ፡ እምንዳቤ ፡ ሀገሮሙ ፡ ወነፍስቶሙ ፤ ወረከቡ ፡ ዘንተ ፡ ከመ ፡ በእንተ ፡ ጽዮን ፡ ዘረከቦሙ ፡ ዝንቱ ፡ መቅሠፍት ፡ ሎሙ ፡ ወለሀገሮሙ ። ወሖሩ ፡ ኀበ ፡ ነገሥቶሙ ፡ ወመኳንንቲሆሙ ፡ ወይቤልዎሙ ፡ ዝንቱ ፡ ኵሉ ፡ ዘረከበክሙ ፡ በእንተ ፡ ጽዮን ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፤ ወይእዜኒ ፡ አእምሩ ፡ ዘከመ ፡ ታገብእዋ ፡ ውስተ ፡ ሀገራ ፡ ወብሔራ ፡ ወቤታ ፤ ወአኮ ፡ ዕራቃ ፡ ዘንፌንዋ ፡ አላ ፡ ሀብዋ ፡ ሞጻ ፡ ከመ ፡ ትስረይ ፡ ዛቲ ፡ ኀጢአተክሙ ፡ ወትሰስል ፡ ምንዳቤክሙ ፡ ሶበ ፡ ገብአት ፡ ጽዮን ፡ ውስተ ፡ ሀገራ ፡ ወሶበሰ ፡ ኢፈነውክምዋ ፡ ውስተ ፡ ሀገራ ፡ ኢኮነ ፡ ሠናየ ፡ አንብሮታ ፡ ኀቤክሙ ፡ አላ ፡ ትትቀሠፉ ፡ ኵልክሙ ፡ እስከ ፡ ተኀል ፡ ቁ ። ወይቤልዎሙ ፡ ነገሥቶሙ ፡ ወመኳንንቲሆሙ ፡ ለማርያኒሆሙ ፡ ምንተኬ ፡ ዘትብሉ ፡ ዘንሁባ ፡ ሞጻ ፡ ወከመ ፡ እፎ ፡ ንፌንዋ ፡ ጠዪቀክሙ ፡ ንግሩነ ፡ ዘከመ ፡ ንሬሲ ። ወመከሩ ፡ ካዕበ ፡ ማርያነ ፡ ኢሎፍሊ ፡ ወይቤልዎሙ ፡ ለነገሥቶሙ ፡ ወለመኳንንቲሆሙ ፡ ግበሩ ፡ ላቲ ፡ በርእሰ ፡ አብያቲክሙ ፡ ወርቀ ፡ ሞጻ ፡ ፰ ፡ አምሳለ ፡ አናጹት ፡ በከመ ፡ አጥፍኡ ፡ ሀገርክሙ ፡ ወአምሳለ ፡ ነፍስተ ፡ ብእሲ ፡ ፰ ፡ በከመ ፡ ሐመምክሙ ፡ ነፍስተክሙ ፡ በጸልዕ ፡ ወሕበጥ ፡ እንተ ፡ ኀበ ፡ ቊልፈትክሙ ። ወገብሩ ፡ በከመ ፡ አዘዝዎሙ ፡ ኢሎፍሊ ፡ ፻፳ ፡ ሞጻ ፡ ዘወርቅ ፡ ወወሀብዋ ፡ ለጽዮን ፤ ወካዕበ ፡ ይቤልዎሙ ፡ ዘከመ ፡ እፎ ፡ ንፌንዋ ፡ ወመኑ ፡ ትብሉ ፡ ይሰዳ ፡ ውስተ ፡ ሀገራ ። ወይቤልዎሙ ፡ ካዕበ ፡ መሰግላነ ፡ ኢሎፍሊ ፡ ያምጽኡ ፡ ክልኤ ፡ ናቃት ፡ እለ ፡ ተበኵራ ፡ በአሐቲ ፡ ጊዜ ፡ ወይርሐኑ ፡ ሰረገላተ ፡ ዲቤሆሙ ፡ ወይክልኡ ፡ እጐላቲሆሙ ፡ ወይዕጽዉ ፡ ውስተ ፡ ቤት ፡ ወይፅምድዎን ፡ ይኅድግዎን ፡ ይሖራ ፡ ኀበ ፡ ፈቀዳ ፤ ወለእመ ፡ አርትዓ ፡ ለኢየሩሳሌም ፡ ዮጊ ፡ ናአምር ፡ ከመ ፡ ተሣሀላ ፡ እግዚኣብሔር ፡ ለምድርነ ፡ ወለእመሰ ፡ አውከካ ፡ ወአንጌ ፡ ገያ ፡ ወፈቀዳ ፡ ገቢአ ፡ ድኅሬሆን ፡ ናአምር ፡ ከመ ፡ ተምዕዐነ ፡ እግዚኣብሔር ፡ ወኢያእተተ ፡ መቅሠፍቶ ፡ እስከ ፡ ያጠፍአነ ፡ ኪያነሂ ፡ ወሀገርነ ። ወገብሩ ፡ በከመ ፡ አዘዝዎሙ ፡ ማርያነ ፡ ኢሎፍሊ ፡ ለመኳንንቲሆሙ ፡ ወአስተፉነውዋ ፡ ወገነዩ ፡ ላቲ ፤ ወእምዝ ፡ አርትዓ ፡ እማንቱ ፡ አግማል ፡ ለፍኖተ ፡ ብሔረ ፡ ይሁዳ ፡ ወበጽሐአ ፡ ውስተ ፡ ዐውደ ፡ እክል ፡ ወተቀበልዋ ፡ ቤተ ፡ ዘመድከ ፤ ወእለሰ ፡ ኢተቀበልዋ ፡ ሰብአ ፡ ቤተ ፡ ዳን ፡ እለ ፡ ኢገነዩ ፡ ላቲ ፡ እንዘ ፡ ይሬእይዋ ፡ አኅለቆሙ ፡ እግዚኣብሔር ፡ በመዐት ፤ ወለእሙንቱሰ ፡ ዕፀወ ፡ ሰረገላ ፡ ሠፀርዎን ፡ ወለእማንቱኒ ፡ አግማል ፡ ረሰይዎን ፡ መሥዋዕተ ፡ ወገብአት ፡ ጽዮን ፡ ውስተ ፡ መካና ። ወአሜሃ ፡ እንዘ ፡ ሀለወት ፡ ውስተ ፡ ቤት ፡ ተልእካ ፡ ሳሙኤል ፡ ነቢይ ፡ ወተከሥተ ፡ ሎቱ ፡ ራእይ ፡ ወትንቢት ፡ ወኮነ ፡ ዘያሠምሮ ፡ ለእግዚኣብሔር ፡ በኵሉ ፡ ግብሩ ፡ ወኰነኖሙ ፡ ለእስራኤል ፡ ፵ወ፰ ፡ ዓመተ ። ወእምድኅሬሁ ፡ ሰአሉ ፡ ሕዝብነ ፡ ያንግሥ ፡ ሎሙ ፡ እግዚኣብሔር ፡ ከመ ፡ አሕዛብ ፡ እለ ፡ አውዶሙ ፤ ወቀብኦ ፡ ሳሙኤል ፡ ነቢይ ፡ ለሳኦል ፡ ንጉሥ ፡ ወውእቱኒ ፡ ነግሠ ፡ ፵ ፡ ዓ ፡ መተ ፤ ወለሊሁሰ ፡ እምሕዝበ ፡ ብንያሚ ፡ እንተ ፡ ትንእስ ፡ በትር ፡ እምሕዝበ ፡ እስራኤል ፤ ወቀብኦ ፡ ካዕበ ፡ ሳሙኤል ፡ ነቢይ ፡ ለአቡከ ፡ ዳዊት ። ወሶበ ፡ ተኣኀዙ ፡ ቀትለ ፡ ኢሎፍሊ ፡ ምስለ ፡ ሳኦል ፡ ንጉሥ ፡ ተመውአ ፡ ሳኦል ፡ ወሞተ ፡ ምስለ ፡ ናታን ፡ ወልዱ ። ወእለ ፡ ተርፉ ፡ ደቂቁ ፡ ፈቀዱ ፡ ከመ ፡ ይንሥእዋ ፡ ለጽዮን ፡ ሶበ ፡ አእመሩ ፡ ሞተ ፡ አቡሆሙ ፡ ወእኁሆሙ ፤ ወእምዝ ፡ ሶበ ፡ ፈቀዱ ፡ ኀቢኦታ ፡ ወአግዕዞታ ፡ እስከ ፡ ቈላተ ፡ ጌላቡሔ ፡ ከመ ፡ ኢይንሥኦሙ ፡ አቡከ ፡ ዳዊት ፡ ወአበየቶሙ ፡ ተነሥኦ ፡ እስከ ፡ ይመጽእ ፡ አቡከ ፡ ወይነሥኣ ፡ እምሀገሮሙ ፡ ኢበመሥዋዕት ፡ ወኢበዕጣን ፡ ወአጸንሕሖ ፡ እስመ ፡ ኢይትከሀል ፡ ነሢኦታ ፡ ለጽዮን ፡ ዘእንበለ ፡ ፈቃዳ ፡ ወፈቃደ ፡ እግዚኣብሔር ፤ ወካዕበ ፡ አቡከ ፡ ሶበ ፡ አርትዐ ፡ ወነግሠ ፡ ላዕለ ፡ እስራኤል ፡ ነሥኣ ፡ እምሀገረ ፡ ሰማርያ ፡ ወአብኣ ፡ ዝየ ፡ ኢየሩሳሌም ፡ እንዘ ፡ ያፅሕስ ፡ በእገሪሁ ፡ በቅድሜሃ ፡ ወይጠፍሕ ፡ በእደዊሁ ፡ በእንተ ፡ ፍሥሓሃ ፡ እስመ ፡ ተንሥአት ፡ ሎቱ ፡ ከመ ፡ ትምጻእ ፡ ሀገረ ፡ ዳዊት ፡ አቡከ ። ወዝንቱሰ ፡ ዘትብል ፡ በእንተ ፡ ዘሖረት ፡ ጽዮን ፡ ሀገሮሙ ፡ ለብሔረ ፡ ኢትዮጵያ ፡ ለእመ ፡ ፈቀደ ፡ እግዚኣብሔር ፡ ወፈ ፡ ቀደት ፡ ለሊሃ ፡ ኢይክል ፡ ከሊኦታ ፡ ወኢ፩ ፡ እስመ ፡ በፈቃዳ ፡ ተሐውር ፡ ወበፈቃዳ ፡ ትገብእ ፡ ለእመ ፡ ሠምረ ፡ እግዚኣብሔር ፤ ወለእመሰ ፡ ኢገብአት ፡ ይኩን ፡ ሥምረቱ ፡ ለእግዚኣብሔር ፡ ወለነሰ ፡ ለእመ ፡ ፈቀደ ፡ እግዚኣብሔር ፡ ሀለወት ፡ ኀቤነ ፡ ኢየሩሳሌም ፡ ዘሐነጽከ ፡ ለነ ፡ ቤተ ፡ እግዚኣብሔር ። ወይእዜኒ ፡ ኢታሕዝን ፡ ልበከ ፡ ወተናዘዝ ፡ በዘ ፡ ንነግረከ ፡ ወጥበብሰ ፡ እምኀቤከ ፡ ይእቲ ፡ ሠረጸት ፡ ዘወሀበከ ፡ እግዚኣብሔር ፡ አምላከ ፡ እስራኤል ፤ እስመ ፡ ነኪር ፡ ለጥበብ ፡ ከመ ፡ ማኅቶት ፡ ለፀሐይ ፡ ዘኢይበቊዕ ፡ ወከመ ፡ ብሒእ ፡ ወዕጒስታር ፡ ለመዓር ፡ ኢይበቊዕ ፡ ከማሁ ፡ ነገሮሙ ፡ ለአብዳን ፡ በላዕለ ፡ ጠቢብ ፡ ኢይበቊዕ ፡ ከመ ፡ ጢስ ፡ ለዐይን ፡ ወከመ ፡ ቆዕ ፡ ለስነን ፡ ከማሁ ፡ ኢይበቊዕ ፡ በላዕለ ፡ ጠቢብ ፡ ነገረ ፡ አብዳን ፨ ፨ ፨ ፨ ፨ ፨ ፨ ፨
=== chapter 62 ===
[፷፪ ፡ በእንተ ፡ ዘአውሥኦሙ ፡ ሰሎሞን ።]
ወአውሥኦሙ ፡ ሰሎሞን ፡ ንጉሥ ፡ ወይቤሎሙ ፡ ስምዑኒ ፡ ዘእነግረክሙ ፡ ኪያየ ፡ ሶበ ፡ ወሰደኒ ፡ እንዘ ፡ እጸውር ፡ ኪያሃ ፡ ምንት ፡ እምተስእኖ ፡ ለእግዚኣብሔር ፡ ወኪያክሙኒ ፡ ሶበ ፡ ይወስደክሙ ፡ ጸዊረክ ፡ ሙ ፡ ኪያሃ ፡ ምንት ፡ እምተስእኖ ፡ ለእግዚኣብሔር ፡ ወሶበሂ ፡ ያወርሶሙ ፡ ሀገርነ ፡ ወይሤርወነ ፡ ኪያነ ፡ ምንት ፡ እምተስእኖ ፡ ለእግዚኣብሔር ፤ እስመ ፡ ኵሉ ፡ ሎቱ ፡ ወአልቦ ፡ ዘየአብያ ፡ ለፈቃዱ ፡ ወአልቦ ፡ ዘይትዐደው ፡ እምትእዛዙ ፡ በሰማይ ፡ በላዕሉ ፡ ወበምድር ፡ በታሕቱ ፡ ንጉሥ ፡ ውእቱ ፡ ዘኢይሰዐር ፡ መንግሥቱ ፡ ለዓለመ ፡ ዓለም ፡ አሜን ። ወባሕቱ ፡ ንሖር ፡ ንትጋነይ ፡ በውስተ ፡ ቤተ ፡ እግዚኣብሔር ፨ ፡ ወሖሩ ፡ ሊቃውንተ ፡ እስራኤል ፡ ምስለ ፡ ንጉሦሙ ፡ ውስተ ፡ ቤተ ፡ እግዚኣብሔር ፡ ወቦኡ ፡ ውስተ ፡ ቅድስተ ፡ ቅዱሳን ፡ ወሰአሉ ፡ ወተጋነዩ ፡ ወበፅዑ ፡ ለእግዚኣብሔር ፤ ወሰሎሞንሂ ፡ በከየ ፡ በውስተ ፡ ምንባሪሃ ፡ ለጽዮን ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ወበከዩ ፡ ኵሎሙ ፡ ምስሌሁ ፡ ወእምድኅረ ፡ ሕቅ ፡ አርመሙ ፨ ፡ አውሥአ ፡ ሰሎሞን ፡ ወይቤሎሙ ፡ ኅድጉኬ ፡ ከመ ፡ ኢይትመክሑ ፡ ቈላፋን ፡ ሕዝብ ፡ ላዕሌነ ፡ ወኢይበሉነ ፡ ተነሥተ ፡ ክብሮሙ ፡ ወኀደጎሙ ፡ እግዚኣብሔር ፤ ኢትክሥቱ ፡ እምዝ ፡ ዳግመ ፡ ለባዕዳን ፡ ሕዝብ ፤ ወእሉሂ ፡ አልዋሕ ፡ እለ ፡ ስሙካን ፡ ወልጹቃን ፡ ዝየ ፡ ንሢሞን ፡ ወንልብጦን ፡ በወርቅ ፡ ወናሰርግዎን ፡ በአምሳለ ፡ እግዝእትነ ፡ ጽዮን ፡ ወመጽሐፈ ፡ ሕግሂ ፡ ናንብር ፡ ውስቴታ ፤ ወሀለወት ፡ ኀቤነ ፡ ኢየሩሳሌም ፡ አግ ፡ ዓዚት ፡ እንተ ፡ በሰማያት ፡ መልዕልቴነ ፡ ዘርእየ ፡ ያዕቆብ ፡ አቡነ ፡ ወእምታሕቴሃ ፡ ዛቲ ፡ ይእቲ ፡ አንቀጸ ፡ ሰማይ ፡ እንተ ፡ በምድር ፡ ኢየሩሳሌም ። ለእመ ፡ ገበርነ ፡ ፈቃዶ ፡ ለእግዚኣብሔር ፡ ወሥምረቶ ፡ ይሄሉ ፡ እግዚኣብሔርኒ ፡ ምስሌነ ፡ ወያነግፈነ ፡ እምእደ ፡ ፀርነ ፡ ወእምእደ ፡ ኵሎሙ ፡ እለ ፡ ይጸልኡነ ፤ ወይኩን ፡ ፈቃዶ ፡ ለእግዚኣብሔር ፡ ወአኮ ፡ ፈቃደ ፡ ዚአነ ፡ ወይኩን ፡ ሥምረተ ፡ እግዚኣብሔር ፡ ወአኮ ፡ ሥምረተ ፡ ዚአነ ፤ ወበይእቲሰ ፡ አሕዘነነ ፡ ወባሕቱ ፡ እምይእዜሰ ፡ ያቈርር ፡ መዐቶ ፡ እምኔነ ፡ ወኢየኀድገነ ፡ ለጸላእትነ ፡ ወኢያርሕቅ ፡ ሣህሎ ፡ እምኔነ ፤ ተዘኪሮ ፡ ኪዳነ ፡ ዘምስለ ፡ አበዊነ ፡ አብርሃም ፡ ወይስሐቅ ፡ ወያዕቆብ ፡ ኢይሔሱ ፡ ቃሎ ፡ ወኢይዔምፅ ፡ ኪዳኖ ፡ ከመ ፡ ኢያማስን ፡ ዘርኦሙ ፡ ለአበዊነ ፨ ፨ ፨
=== chapter 63 ===
[፷፫ ፡ ኀበ ፡ ኀበሩ ፡ ዐበይተ ፡ እስራኤል ።]
ወእምዝ ፡ አውሥእዎ ፡ መላህቅተ ፡ እስራኤል ፡ ወይቤልዎ ፡ ትኩን ፡ ሥምረትከ ፡ ወሥምረተ ፡ እግዚኣብሔር ፡ አምላክከ ፡ ወንሕነሰ ፡ አልቦ ፡ ዘንትዐደው ፡ እምቃልከ ፡ ወኢናየድዖሙ ፡ ለባዕድ ፡ አሕዛብ ፡ ከመ ፡ ተነሥአት ፡ ጽዮን ፡ እምኔነ ። ወአቀሙ ፡ ዘንተ ፡ ኪዳነ ፡ በውስተ ፡ ቤተ ፡ እግዚኣብሔር ፡ መላህቅተ ፡ እስራኤል ፡ ምስለ ፡ ንጉሦሙ ፡ ሰሎሞን ፡ እስከ ፡ ይእዜ ፨ ፡ ወሰሎሞንሰ ፡ ነበረ ፡ እምድኅረ ፡ ተነሥአት ፡ ጽዮን ፡ እምኔሁ ፡ ዐሠርቱ ፡ ወአሐዱ ፡ ዓመተወእምዝ ፡ አእተተ ፡ ልቦ ፡ እምፍቅረ ፡ እግዚኣብሔር ፡ ወረስዐ ፡ ጥበቦ ፡ እምብዝኀ ፡ ፍቅረ ፡ አንስት ፤ ወአፍቀራ ፡ ፈድፋደ ፡ ለወለተ ፡ ፈርዖን ፡ ንጉሠ ፡ ግብጽ ፡ እንተ ፡ ስማ ፡ ማቅሣራ ፡ ወአእተዋ ፡ ውስተ ፡ ቤቱ ፡ ዘገብረ ፡ አምሳለ ፡ ፀሐይ ፡ ወወርኅ ፡ ወከዋክብት ፡ ውስተ ፡ ጠፈራ ፡ ዘያበርህ ፡ ሌሊተ ፡ ከመ ፡ መዐልት ፤ ወሥረዊሁ ፡ ብርት ፡ ወተድባቡ ፡ ብሩር ፡ ወደፍዳፉ ፡ ዐረር ፡ ወመንድቀ ፡ እብኑ ፡ አፍራጽ ፡ በአስዋድ ፡ አሕማር ፡ በአብያድ ፡ አክደር ፡ ወጸፍጸፉኒ ፡ አብላቀ ፡ ሶፎር ፡ ወእብነ ፡ ሰርዴዮን ፤ ወየሐውር ፡ ወይነብር ፡ ህየ ፡ በእንተ ፡ ፍቅረ ፡ ቤቱ ፡ ወብእሲቱ ፡ መቅሣራ ፡ ወለተ ፡ ፈርዖን ፡ ንጉሠ ፡ ግብጽ ። ወይእቲሰ ፡ ባቲ ፡ ጣዖታተ ፡ ዘወሀባ ፡ አቡሃ ፡ ከመ ፡ ትስግድ ፡ ሎሙ ፤ ወበእንተዝ ፡ እንዘ ፡ ይሬእያ ፡ እንዘ ፡ ትሠውዕ ፡ ወትሰግድ ፡ ሎሙ ፡ ኢገሠጻ ፡ ወኢኀደጋ ፡ ሰሎሞን ፡ ወበእንተዝ ፡ ተምዕዖ ፡ እግዚኣብሔር ፡ ወአርስዖ ፡ ጥበቢሁ ። ወይእቲሰ ፡ አፈድፈደት ፡ ሠዊዐ ፡ ወሰጊደ ፡ ወተውኔተ ፡ በከመ ፡ እበዶሙ ፡ ለግብጻዊያን ፡ ወይሰግዱ ፡ ለጣዖት ፡ ወተምህሩ ፡ ኵሉ ፡ ሰብአ ፡ ቤታ ፡ ተውኔተ ፡ ጣዖታት ፡ ወበአስተኣድሞ ፡ ሐውዘ ፡ ተውኔቶሙ ፡ ይሰግዱ ፡ ምስሌሃ ፡ ለወለተ ፡ ፈርዖን ፡ ወኀብሩ ፡ ደቂቀ ፡ እስራኤል ፡ ምስሌሃ ፡ ወአንስት ፡ ወአእማቲሃ ፡ ኀብሩ ፡ ምስሌሃ ፡ በሰጊድ ፡ ወበተዋንዮ ፡ ለጣዖታ ፤ ወለሊሁኒ ፡ ያስተኣድም ፡ ሰሚዐ ፡ ተውኔታ ፡ ወእበዳ ። ወሶበ ፡ ርእየት ፡ ከመ ፡ ያፈቅር ፡ ላቲ ፡ ወይሰምዕ ፡ ወያረምም ፡ ወየሐትት ፡ ተውኔተ ፡ አማልክቲሆሙ ፡ ለግብጻዊያን ፡ ፈድፋደ ፡ ታስተጣዕም ፡ ሎቱ ፡ ወትነግሮ ፡ በጥዑም ፡ ቃል ፡ ወበድኩም ፡ ነገረ ፡ አንስት ፡ ወበአክሞስሶ ፡ ዘምስለ ፡ አርእዮ ፡ ምግባረ ፡ እኩይ ፡ በተመይጦ ፡ ገጽ ፡ ወበአሠንዮ ፡ ወበአትሕቶ ፡ ርእስ ፡ ወበዘከመዝ ፡ ታፈርስ ፡ ልቦ ፡ እምሠናይ ፡ ኅሊናሁ ፡ ወትቀጽቦ ፡ ውስተ ፡ እከየ ፡ ምግባራ ፡ ወትፈቅድ ፡ ታውርዶ ፡ ውስተ ፡ እበደ ፡ ተውኔተ ፡ ጣዖት ፡ በንዝህላል ፤ ወከመ ፡ ባሕር ፡ ዕሙቅ ፡ ዘይስሕብ ፡ ውስተ ፡ ልጐት ፡ ለዘ ፡ ኢይክል ፡ ጸቢተ ፡ እስከ ፡ የዐዝዞ ፡ ማይ ፡ ወየሀጒል ፡ ነፍሶ ፡ ከማሁ ፡ ትፈቅድ ፡ አስጥሞቶ ፡ ይእቲ ፡ ብእሲት ፡ ለሰሎሞን ፡ ንጉሥ ፨ ፨ ፨ ፨ ፨
=== chapter 64 ===
[፷፬ ፡ ኀበ ፡ አስሐተቶ ፡ ለሰሎሞን ፡ ወለተ ፡ ፈርዖን ።]
ወእምዝ ፡ ተግህደት ፡ በቅድሜሁ ፡ ወትቤሎ ፡ ይኄይስ ፡ ሰጊድ ፡ ለአማልክት ፡ ከመ ፡ አቡየ ፡ ወኵሎሙ ፡ ነገሥተ ፡ ግብጽ ፡ እለ ፡ እምቅድሜሁ ፡ ለአቡየ ። ወአውሥኣ ፡ ወይቤላ ፡ ሎሙሰ ፡ ይብሉ ፡ አማልክቲሆሙ ፡ ዘገብሩ ፡ በእደዊሆሙ ፡ በነሃቢ ፡ ወበጸራቢ ፡ በለሓኵ ፡ ወበሰዓሊ ፡ በወቃሪ ፡ ወበገላፊ ፡ እለ ፡ ኢኮኑ ፡ አማልክተ ፡ ግብረ ፡ እደ ፡ ሰብእ ፡ ወርቅ ፡ ወብሩር ፡ ብርት ፡ ወዐረር ፡ ኀጺን ፡ ወልሕኵት ፡ ወእብን ፤ ወትብልዎሙ ፡ አማልክቲነ ፡ ለእለ ፡ ኢኮኑ ፡ አማልክቲክሙ ፤ ወንሕነሰ ፡ ኢንሰግድ ፡ ለባዕድ ፡ ዘእንበለ ፡ ለአምላከ ፡ ቅዱሰ ፡ እስራኤል ፡ ወለእግዝእትነ ፡ ጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ዘወሀበነ ፡ ከመ ፡ ንስግድ ፡ ላቲ ፡ ንሕነ ፡ ወዘርእነ ፡ እምድኅሬነ ። አውሥአቶ ፡ ወትቤሎ ፡ ለእግዝእትከሰ ፡ ነሥአ ፡ ወልድከ ፡ ዘወለድኮ ፡ ዘእምነኪር ፡ ሕዝብ ፡ ዘኢአዘዘክሙ ፡ ከመ ፡ ታውስቡ ፡ ኢትዮጵያዊተ ፡ እንተ ፡ ኢኮነት ፡ ሕብርከ ፡ ወቅርብተ ፡ ሀገርከ ፡ ጸሊማን ፡ ሕዝበ ፡ ባዕድ ። አውሥኣ ፡ ወይቤላ ፡ ለእመ ፡ ከመዝ ፡ ትቤሊ ፡ አንቲኒ ፡ ኢኮንኪ ፡ እምዘ ፡ አዘዘነ ፡ እግዚኣብሔር ፡ ከመ ፡ ንትዋሰብ ፡ ወዘመድክሙ ፡ ምስለ ፡ ዘመደ ፡ ዚአሃ ፡ ደቂቀ ፡ ካም ፡ ኵልክሙ ፤ ወሠሪዎ ፡ ዘርአ ፡ ካም ፡ ፯ ፡ ነገሥተ ፡ አውረሰነ ፡ እግዚኣብሔር ፡ ዘሀገረ ፡ ኀበ ፡ ንነብር ፡ ውስቴታ ፡ ለዓለም ፡ ንሕነ ፡ ወዘርእነ ፡ እምድኅሬነ ፤ ወበእንተ ፡ ጽዮንሂ ፡ ፈቃደ ፡ እግዚኣብሔር ፡ ኮነ ፡ ወወሀቦሙ ፡ ከመ ፡ ያምልኩ ፡ ኪያሃ ፤ ወአንሰ ፡ ኢይሠውዕሂ ፡ ወኢይሰግድሂ ፡ ለጣዖትኪ ፡ ወኢይገብር ፡ ፈቃደኪ ፨ ፡ ወዘንተ ፡ እንዘ ፡ ትብሎ ፡ እንዘ ፡ ታስተጣዕም ፡ ሎቱ ፡ ሰርከ ፡ ወነግሀ ፡ ሌሊተ ፡ ወመዓልተ ፡ ወውእቱኒ ፡ እንዘ ፡ የአብያ ፡ አሐተ ፡ ዕለተ ፡ ተሠነየት ፡ ወተምዕዘት ፡ ሎቱ ፡ ወተከብረት ፡ ሎቱ ፡ ወተዐበየት ፡ ሎቱ ፤ ወይቤላ ፡ ምንተ ፡ እገብር ፡ እስመ ፡ አሕሠምኪ ፡ ገጽኪ ፡ ላዕሌየ ፡ ወነጽሮትኪኒ ፡ አኮ ፡ ከመ ፡ ዘትካት ፡ ወላሕይኪኒ ፡ ኢኮነ ፡ አዳም ፡ ወሰአልኒ ፡ ዘእሁበኪ ፡ ዘትፈቅዲ ፡ ወዘእገብር ፡ ለኪ ፡ ከመ ፡ ታሠንዪ ፡ ገጽኪ ፡ ኀቤየ ፡ ከመ ፡ ዘትካት ፤ ወአርመመት ፡ ወኢያውሥአቶ ፤ ወደገመ ፡ ላቲ ፡ ቃለ ፡ ከመ ፡ ይግበር ፡ ላቲ ፡ ዘፈቀደት ፡ ወትቤሎ ፡ መሐል ፡ ሊተ ፡ በአምላከ ፡ እስራኤል ፡ ከመ ፡ ኢተሐስወኒ ፡ ወመሐለ ፡ ላቲ ፡ ከመ ፡ የሀባ ፡ ዘሰአለቶ ፡ ወከመ ፡ ይግበር ፡ ላቲ ፡ ኵሎ ፡ ዘትቤሎ ። ወአሰረት ፡ ፈትለ ፡ ለይ ፡ በመንፈቀ ፡ ኆኅታ ፡ [ለቤተ] ፡ አማልክቲሃ ፡ ወአምጽአት ፡ ሠለስተ ፡ አንበጣ ፡ ወነበረት ፡ ውስተ ፡ ቤተ ፡ አማልክቲሃ ፡ ወትቤሎ ፡ ባእ ፡ ኀቤየ ፡ ዘእንበለ ፡ ትብትክ ፡ ፈትለ ፡ ለይ ፡ ደኒነከ ፡ ወቅትሎሙ ፡ ለእሉ ፡ አንበጣ ፡ በቅድሜየ ፡ ወክላዕ ፡ ክሳውዲሆሙ ፤ ወገብረ ፡ ከማሁ ። ወትቤሎ ፡ አነ ፡ እገብር ፡ እምይእዜሰ ፡ ፈቃድከ ፡ እስመ ፡ ሦዕከሂ ፡ ወሰገድከሂ ፡ ለአማልክትየ ። ወውእቱሰ ፡ በእንተ ፡ ማሕላሁ ፡ ገብረ ፡ ከመዝ ፡ ከመ ፡ ኢይብላዕ ፡ ማሕላሁ ፡ ዘአምሐለቶ ፡ እንዘ ፡ ያአምር ፡ ከመ ፡ ጌጋይ ፡ ውእቱ ፡ በዊእ ፡ ውስተ ፡ ቤተ ፡ አማልክቲሃ ፨ ፡ ወእግዚኣብሔርኒ ፡ አዘዞሙ ፡ ለደቂቀ ፡ እስራኤል ፡ እንዘ ፡ ይብል ፡ ኢታውስቡ ፡ እምአንስተ ፡ ባዕድ ፡ ከመ ፡ ኢትስሐቱ ፡ ቦቶን ፡ በአማልክቲሆን ፡ በእከየ ፡ ምግባሪሆን ፡ ወበጣዕመ ፡ ቃሎን ፤ እስመ ፡ ያደክማ ፡ ልበ ፡ ወራዙት ፡ የዋሃን ፡ በጣዕመ ፡ ቃሎን ፡ ድኩማት ፡ ወበሥነ ፡ ላሕዮን ፡ ይዘርዋ ፡ ጥበበ ፡ ብእሲ ፡ አብድ ። መኑ ፡ ይጠብብ ፡ እምሰሎሞን ፡ ወስሕተ ፡ በብእሲት ፤ ወመኑ ፡ ይጸድቅ ፡ እምነ ፡ ዳዊት ፡ ወስሕተ ፡ በብእሲት ፤ ወመኑ ፡ ይጸንዕ ፡ እምነ ፡ ሳምሶን ፡ ወስሕተ ፡ በብእሲት ፤ ወመኑ ፡ ይሤኒ ፡ በላሕይ ፡ እምነ ፡ አምኖን ፡ ወስሕተ ፡ በእኅቱ ፡ ትዕማር ፡ ወለተ ፡ ዳዊት ፡ አቡሁ ፤ ወአዳምኒ ፡ ቀዳሜ ፡ ልሕኵቱ ፡ ለእግዚኣብሔር ፡ ወስሕተ ፡ በሔዋን ፡ ብእሲቱ ፡ ወበይእቲ ፡ ስሕተት ፡ ተፈጥረ ፡ ሞት ፡ ላዕለ ፡ ኵሉ ፡ ፍጥረት ፤ ወይእቲ ፡ ስሕተተ ፡ ተባዕት ፡ እምአንስት ፡ ተፈጥረት ፡ እምሔዋን ፡ እስመ ፡ አዋልደ ፡ ሔዋን ፡ ኵሎን ፨ ፨ ፨ ፨ ፨ ፨ ፨ ፨ ፨
=== chapter 65 ===
[፷፭ ፡ በእንተ ፡ ኀጢአተ ፡ ሰሎሞን ።]
ወለሰሎሞንሰ ፡ ኮኖ ፡ ጌጋየ ፡ በእንተ ፡ ሰጊድ ፡ ለጣዖት ፡ ፈድፋደ ፡ እስመ ፡ እንዘ ፡ ጠቢብ ፡ ኮነ ፡ አብደ ፡ ወተጽሕፈ ፡ ኀጢአቱ ፡ ውስተ ፡ መጽሐፈ ፡ ነቢያቲሆሙ ። ወአውሥኡ ፡ እለ ፡ ሂየ ፡ ሊቃነ ፡ ጳጳሳት ፡ ወይቤሉ ፡ ይምሕሮኑ ፡ እግዚኣብሔር ፡ ለሰሎሞን ፡ በእንተዝ ፡ ጌጋይ ፡ ዘተጽሕፈ ፡ ኀጢአቱ ፨ ፡ እወ ፡ መሐሮ ፡ እግዚኣብሔር ፡ ወኆለቈ ፡ ስሞ ፡ ምስለ ፡ አብርሃም ፡ ይስሐቅ ፡ ወያዕቆብ ፡ ወዳዊት ፡ አቡሁ ፡ ውስተ ፡ መጽሐፈ ፡ ሕይወት ፡ በሰማያት ፡ እስመ ፡ ሰራዪ ፡ እግዚኣብሔር ፡ ለእለ ፡ አበሱ ፤ ሀቡኬ ፡ አበይኑ ፡ ለአቡሁኑ ፡ የዐቢ ፡ ኀጢአቱ ፡ ወሚመ ፡ ለወልዲ ፡ ሰሎሞን ፤ ወአቅተሎ ፡ ለአርዮን ፡ በውስተ ፡ ፀብእ ፡ በምክረ ፡ ጒሕሉት ፡ ከመ ፡ ይንሥኣ ፡ ለብእሲቱ ፡ ቤርሳቤሕ ፡ እሙ ፡ ለሰሎሞን ፡ ወነስሐ ፡ ወመሐሮ ፡ እግዚኣብሔር ፤ ወእንዘ ፡ ይመውትኒ ፡ አምከሮ ፡ ለወልዲ ፡ ሰሎሞን ፡ እንዘ ፡ ይብል ፡ ቅትሎ ፡ ለኢዮአብ ፡ በከመ ፡ ቀተሎ ፡ ለአሜር ፡ ወቅትሎ ፡ ለሳሚ ፡ በእንተ ፡ ዘረገመኒ ፤ ወገብረ ፡ ፈቃደ ፡ አቡሁ ፡ ወቀተሎሙ ፡ እምድኅረ ፡ ሞተ ፡ ዳዊት ፡ አቡሁ ፤ ወሰሎሞንሰ ፡ አልቦ ፡ ዘቀተለ ፡ ዘእንበለ ፡ እኁሁ ፡ ሶበ ፡ ፈቀደ ፡ ያውስብ ፡ ብእሲተ ፡ አቡሁ ፡ ዳዊት ፡ ሰሜናዊት ፡ እንተ ፡ ስማ ፡ አቢስ ፡ ወበእንተሰ ፡ ዘተጽሕፈ ፡ ጌጋዩ ፡ ለሰሎሞን ፡ አነ ፡ እከሥት ፡ ለክሙ ፡ በዘ ፡ ከሠተ ፡ ሊተ ፡ እግዚኣብሔር ፨ ፨ ፨ ፨
=== chapter 66 ===
[፷፮ ፡ በእንተ ፡ ትንቢተ ፡ ክርስቶስ ።]
እስመ ፡ ሰሎሞን ፡ ብሂል ፡ በስዉር ፡ ነገር ፡ በፍካሬ ፡ ትንቢት ፡ ክርስቶስ ፡ ብሂል ። ወበከመ ፡ ሰሎሞን ፡ ሐነጸ ፡ ቤተ ፡ እግዚኣብሔር ፡ ከማሁ ፡ ክርስቶስኒ ፡ አንሥአ ፡ ወረሰየ ፡ ሥጋሁ ፡ ቤተ ፡ ክርስቲያን ፤ ወበከመ ፡ ይቤሎሙ ፡ ለአይሁድ ፡ ንሥትዎ ፡ ለዝንቱ ፡ ቤት ፡ ወበሠሉስ ፡ ዕለት ፡ አሐንጾ ፡ እስመ ፡ ይቤሎሙ ፡ በእንተ ፡ ቤተ ፡ ሥጋሁ ። ወበከመ ፡ ሰሎሞን ፡ አብዝኀ ፡ አንስተ ፡ እምሕዝበ ፡ ነኪር ፡ በእንተ ፡ ሥኖን ፡ ወላሕዮን ፡ ወበአምስሎ ፡ አፍቅሮ ፡ ፍትወታት ፡ ከማሁ ፡ ክርስቶስኒ ፡ አስተጋብአ ፡ እምሕዝበ ፡ ነኪር ፡ እለ ፡ አልቦሙ ፡ ሕግ ፡ እለ ፡ አምኑ ፡ ቦቱ ፡ ዘአልቦ ፡ ቈላፈ ፡ ወአልቦ ፡ አረማዌ ፡ ወአልቦ ፡ ገብረ ፡ ወአይሁዳዌ ፡ ወአልቦ ፡ ነባሬ ፡ ወአግዓዜ ፡ ኵሎሙ ፡ አስተጋብአ ፡ ውስተ ፡ መንግሥተ ፡ ሰማያት ፡ በሥጋሁ ፡ ወደሙ ፡ ወበመሓልየ ፡ መሓልይሂ ፡ ለሊሁ ፡ ሰሎሞን ፡ ሐለየ ፡ እንዘ ፡ ይብል ፡ ዐራቱ ፡ ለሰሎሞን ፡ ፷ ፡ ኀያላን ፡ ዐውዳ ፡ ኵሎሙ ፡ ምሁራነ ፡ ቀትል ፡ እኁዛነ ፡ አስይፍት ፡ ብእሲ ፡ ብእሲ ፡ ዲበ ፡ መንቅዕቱ ፡ ሰይፈ ፡ ያነብር ፤ ፷ ፡ ብሂል ፡ በኆልቈ ፡ አርእስተ ፡ አበው ፡ ጻድቃን ፡ ወነቢያት ፡ ወሐዋርያት ፡ ወሰማዕት ፡ ወመሀይምናን ፡ ወቅዱሳን ፡ ወመነኮሳት ፡ እለ ፡ የአብይዎ ፡ ለኅሊና ፡ እኩይ ፡ ፀብአ ፡ ሰይጣን ፤ ወሰይፍሂ ፡ ይተረጐም ፡ ቃለ ፡ መጻሕፍት ፡ ከመ ፡ መላጼ ፡ በሊኅ ፡ ዘርቱዕ ፡ ይመትር ፡ ቃለ ፡ እግዚኣብሔር ፡ ከማሁ ፡ ይመትሩ ፡ እምልቦሙ ፡ ድንጋፄ ፡ ለያልይ ፡ ዘሕልመ ፡ ሐሰት ፤ ወዐራተ ፡ ሰሎሞንሰ ፡ ምስካቡ ፡ ይተረጐም ፡ በቤተ ፡ ክርስቲያኑ ፡ ለክርስቶስ ። ወካዕበ ፡ ሐለየ ፡ እንዘ ፡ ይብል ፡ መጾረ ፡ ገብረ ፡ ለርእሱ ፡ ንጉሥ ፡ ሰሎሞን ፤ ወዝንቱሂ ፡ ተተርጐመ ፡ ከመ ፡ ክርስቶስ ፡ ለብሰ ፡ ሥጋነ ፤ ሰሎሞን ፡ ብሂል ፡ በነገረ ፡ ዕብራዊያን ፡ ክርስቶስ ፡ ብሂል ። ወአብዳንሰ ፡ አይሁድ ፡ ያመስልዎ ፡ ለቃለ ፡ ዳዊት ፡ ዘተብህለ ፡ በእንተ ፡ ሰሎሞን ፡ ወልዲ ፡ እግዚኣብሔር ፡ ይቤለኒ ፡ ወልድየ ፡ አንተ ፡ ወአነ ፡ ዮም ፡ ወለድኩከ ። እግዚኦ ፡ ኵነኔከ ፡ ሀቦ ፡ ለንጉሥ ፡ ወጽድቅከ ፡ ለወልደ ፡ ንጉሥ ፡ ከመ ፡ ይኰንኖሙ ፡ ለሕዝብከ ፡ በጽድቅ ፡ ወለነዳያኒከኒ ፡ በፍትሕ ፡ ወየሐዩ ፡ ወይሁብዎ ፡ እምወርቀ ፡ ዐረብ ፡ ወዘልፈ ፡ ይጼልዩ ፡ በእንቲአሁ ፡ ወኵሎ ፡ አሚረ ፡ ይድኅርዎ ፡ ወይከውን ፡ ምስማከ ፡ ለኵሉ ፡ ምድር ፡ ውስተ ፡ አርእስተ ፡ አድባር ፡ ወይነውኅ ፡ እምአርዝ ፡ ፍሬሁ ፡ ወይበቊል ፡ ውስተ ፡ ሀገር ፡ ከመ ፡ ሣዕረ ፡ ምድር ፡ ወይከውን ፡ ቡሩክ ፡ ስሙ ፡ ለዓለም ፡ እምቅድመ ፡ ፀሐይ ፡ ሀሎ ፡ ስሙ ፤ ወለድኩከ ፡ እምከርሥ ፡ እምቅድመ ፡ ኮከበ ፡ ጽባሕ ፡ መሐለ ፡ እግዚኣብሔር ፡ ወኢይኔስሕ ፡ አንተ ፡ ካህኑ ፡ ለዓለም ፡ በከመ ፡ ሢመቱ ፡ ለመልከ ፡ ጼዴቅ ። ወዘንተ ፡ ወዘይመስሎ ፡ ትንቢት ፡ ዘበእንተ ፡ ክርስቶስ ፡ ዘተነበየ ፡ ዳዊት ፡ ይብሉ ፡ አብዳን ፡ ዕዉራነ ፡ ልብ ፡ አይሁድ ፡ ይቤ ፡ ዳዊት ፡ ውስተ ፡ ርእሰ ፡ መጽሐፉ ፡ በእንተ ፡ ሰሎሞን ፡ ወልዲ ፡ ዘተናገረ ፤ ዘንተ ፡ ይብሉ ፡ አይሁድ ፡ ወያመስልዎ ፡ ለክርስቶስ ፡ በሰሎሞን ፡ በመኵሴ ፡ ስም ፡ በጥበብ ፡ ወበወልደ ፡ ዳዊት ፡ በሥጋ ። ወዘንተ ፡ እምድኅረ ፡ አእመሩ ፡ እለ ፡ እምድኅረ ፡ ዳዊት ፡ ወሰሎሞን ፡ ኤልያስ ፡ ወኤልሳዕ ፡ ጸሐፉ ፡ ኀጢአቶ ፡ ለሰሎሞን ፡ ውስተ ፡ መጽሐፈ ፡ ነገሥት ፡ ከመ ፡ ያስተኀፍርዎሙ ፡ ለአይሁድ ፡ ዕዉራነ ፡ ልብ ፡ ጸራ ፡ ለጽድቅ ። ወሰሎሞንሰ ፡ ንጉሥ ፡ ወልደ ፡ ዳዊት ፡ ንጉሥ ፡ ወነቢይ ፡ ወለሊሁኒ ፡ ንጉሥ ፡ ወነቢይ ፡ ውእቱ ፡ ወበጥበብ ፡ ተነበየ ፡ ዘበእንተ ፡ ክርስቶስ ፡ ብዙኀ ፡ አምሳለ ፡ ወበእንተ ፡ ቤተ ፡ ክርስቲያን ፡ ወጸሐፈ ፡ ፬ ፡ መጽሐፈ ፡ ትንቢቱ ፡ ውተኆለቈ ፡ ምስለ ፡ አብርሃም ፡ ይስሐቅ ፡ ወያዕቆብ ፡ ወዳዊት ፡ አቡሁ ፡ በመንግሥተ ፡ ሰማያት ፨
=== chapter 67 ===
[፷ወ፯ ፡ በእንተ ፡ ብካየ ፡ ሰሎሞን ።]
ወዘከመሂ ፡ አዕረፈ ፡ እነግረክሙ ፤ ኮነ ፡ መዋዕሊሁ ፡ ፷ ፡ ወአኀዞ ፡ ሕማም ፡ ወበከመ ፡ መዋዕለ ፡ አቡሁሰ ፡ ዳዊት ፡ ኢኮነ ፡ አላ ፡ ፳ ፡ ሐጸ ፡ እምኔሁ ፡ በእንተ ፡ ዘተአዘዘ ፡ ለአንስት ፡ ወሰገደ ፡ ለጣዖታት ። ወመጽአ ፡ መልአከ ፡ ሞት ፡ ወዘበጦ ፡ እግሮ ፡ ወበከየ ፡ ወይቤ ፡ እግዚኦ ፡ አምላከ ፡ እስራኤል ፡ እስመ ፡ ሕገ ፡ መሬታዊ ፡ ተመዋእኩ ፡ እስመ ፡ አልቦ ፡ ንጹሐ ፡ እምርስሐት ፡ በቅድሜከ ፡ እግዚኦ ፡ ወአልቦ ፡ ዘይጸድቅ ፡ ወይጠብብ ፡ በቅድሜከ ፡ እግዚኦ ፡ እስመ ፡ አንተ ፡ ትሬኢ ፡ ወትፈትን ፡ ልበ ፡ ወአልቦ ፡ ዘይሴወር ፡ እምኔከ ፡ ኅቡኣተ ፡ ትሬኢ ፡ በክሡታት ፡ ወልበ ፡ ተሐትት ፡ መሐረኒ ፡ እግዚኦ ፤ ልበ ፡ ሰብእ ፡ ተኀሥሥ ፡ ወኵልያተ ፡ ትፈትን ፡ መሐረኒ ፡ እግዚኦ ፤ ዘልሑሳስ ፡ ወዘረዓም ፡ ትሰምዕ ፡ መሐረኒ ፡ እግዚኦ ፤ ወእመሰ ፡ መሐርኮሙ ፡ ለጻድቃን ፡ እለ ፡ ኢተዐደዉ ፡ እምትእዛዝከ ፡ ምንት ፡ መንክር ፡ ምሕረትከ ፡ መሐረኒ ፡ እግዚኦ ፤ አላ ፡ ሶበ ፡ ትምሕር ፡ ኪያየ ፡ ኃጥአ ፡ ውእቱኬ ፡ መንክር ፡ ወአዳም ፡ ምሕረትከ ፡ መሐረኒ ፡ እግዚኦ ፤ ሶበ ፡ አነ ፡ አበስኩ ፡ ተዘከር ፡ አብርሃም ፡ ወይስሐቅ ፡ ወያዕቆብ ፡ አበዊየ ፡ እለ ፡ ኢተዐደዉ ፡ እምትእዛዝከ ፡ መሐረኒ ፡ እግዚኦ ፤ እስመ ፡ መሓሪ ፡ ወሰራዪ ፡ አንተ ፡ እግዚኦ ፡ በእንተ ፡ ዳዊት ፡ ገብርከ ፡ መሐረኒ ፡ እግዚኦ ፤ አኃዜ ፡ ዓለም ፡ ወነገሥት ፡ ወመኳንንት ፡ መሐረኒ ፡ እግዚኦ ፤ መጥበቤ ፡ አብዳን ፡ ወማእበዴ ፡ ጠቢባን ፡ መሐረኒ ፡ እግዚኦ ፤ መያጤ ፡ ኃጥኣን ፡ ወዐሳዬ ፡ ጻድቃን ፡ መሐረኒ ፡ እግዚኦ ። ወዘንተ ፡ እንዘ ፡ ይብል ፡ ይውሕዝ ፡ አንብዑ ፡ ውስተ ፡ ገጹ ፡ ወየኀሥሥ ፡ በሰበኑ ፨ ፡ ወወረደ ፡ ኀቤሁ ፡ መልአከ ፡ እግዚኣብሔር ፡ ወይቤሎ ፡ ስማዕ ፡ ዘእነግረከ ፡ ዘለአከኒ ፡ እግዚኣብሔር ፤ እንዘ ፡ ጠቢብአ ፡ አብደ ፡ ረሰይከ ፡ ርእስከ ፡ ወእንዘ ፡ ባዕል ፡ አንደይከ ፡ ርእስከ ፡ ወእንዘ ፡ ንጉሥ ፡ አኅሰርከ ፡ ርእስከ ፡ በተዐድዎ ፡ ትእዛዘ ፡ እግዚኣብሔር ፤ ወርእሳ ፡ ለእከይ ፡ በእንተ ፡ ዘአብዛኅከ ፡ አንስተ ፡ ተዐዲወከ ፡ ሕጎ ፡ ወፍትሖ ፡ ወሥርዐቶ ፡ ለእግዚኣብሔር ፡ ዘጸሐፈ ፡ ሙሴ ፡ ወወሀበክሙ ፡ ለእስራኤል ፡ ከመ ፡ ኢታውስቡ ፡ እምባዕደ ፡ ፍጥረት ፡ ዘእንበለ ፡ እምዘመድክሙ ፡ ወቤተ ፡ አቡክሙ ፡ ከመ ፡ ይኩኑ ፡ ንጹሓነ ፡ ወቅዱሳነ ፡ ዘርእክሙ ፡ ከመ ፡ ይኅድር ፡ እግዚኣብሔር ፡ ምስሌክሙ ፤ ወአንተሰ ፡ አስተሐቀርከ ፡ ሕገ ፡ እግዚኣብሔር ፡ እንዘ ፡ ይመስለከ ፡ ዘትጠበብ ፡ እምእግዚኣብሔር ፡ ወትረክብ ፡ ብዙኀ ፡ ደቂቀ ፡ ተባዕተ ። ወእበዲ ፡ ለእግዚኣብሔር ፡ ይጠብብ ፡ እምጥበቢሁ ፡ ለእጓለ ፡ እመሕያው ፡ ወኢወሀበከ ፡ ዘእንበለ ፡ ፫ ፡ ደቂቅ ፡ ፩ ፡ ዘነሥአ ፡ ክብርከ ፡ ለባዕድ ፡ ወረሰየ ፡ ማኅደሮ ፡ ለእግዚኣብሔር ፡ ውስተ ፡ ብሔረ ፡ ኢትዮጵያ ፤ ወ፩ ፡ ፅዉሰ ፡ እግር ፡ ዘይከውን ፡ ዲበ ፡ መንበርከ ፡ ለነገደ ፡ እስራኤል ፡ ወልደ ፡ ዘመደ ፡ ዘመድከ ፡ ተርባነ ፡ እምቤተ ፡ ይሁዳ ፤ ወ፩ ፡ ወልደ ፡ ሮማዊት ፡ አመት ፡ ዘበደኃሪ ፡ መዋዕል ፡ ይሤርዎ ፡ ለዮርብዓም ፡ ወለኵሉ ፡ ዘመድከ ፡ እስራኤል ፡ ወትከውን ፡ ሎቱ ፡ ዛቲ ፡ ምድር ፡ እስመ ፡ ለሊሁ ፡ የአምን ፡ በዘ ፡ ይመጽእ ፡ መድኅን ፤ ወነገደ ፡ ዮርብዓምሰ ፡ ወእለ ፡ ተርፉ ፡ እስራኤል ፡ ይሰቅልዎ ፡ ለዘ ፡ ይመጽእ ፡ መድኅን ፡ ወይጠፍእ ፡ ዝክርክሙ ፡ እምነ ፡ ምድር ፡ እስመ ፡ ይኄልዩ ፡ ምክረ ፡ እንተ ፡ ኢይክሉ ፡ አቅሞ ፡ ወውእቱኒ ፡ ይትመዓዖሙ ፡ ወያጠፍእ ፡ ዝክሮሙ ። ወለከሰ ፡ ይኩንከ ፡ ትእምርተ ፡ ዮሴፍ ፡ ወልደ ፡ ያዕቆብ ፡ እስመ ፡ ሤጥዎ ፡ አኀዊሁ ፡ ብሔረ ፡ ግብጽ ፡ እምሶርያ ፡ ሀገረ ፡ ላባ ፡ ወበርደቱ ፡ ብሔረ ፡ ግብጽ ፡ ኮነ ፡ ረኃብ ፡ ውስተ ፡ ሶርያ ፡ ወውስተ ፡ ኵሉ ፡ ዓለም ፡ ወበርደቱ ፡ ጸውዖሙ ፡ ለአዝማዲሁ ፡ ወአድኀኖሙ ፡ እምረኃብ ፡ ወወሀቦሙ ፡ ማኅደረ ፡ በምድረ ፡ ግብጽ ፡ እንተ ፡ ስማ ፡ ጌሤን ፡ እስመ ፡ ለሊሁ ፡ ንጉሥ ፡ እምታሕተ ፡ ፈርዖን ፡ ንጉሠ ፡ ግብጽ ። ወከማሁ ፡ ዘይመጽእ ፡ መድኅን ፡ እምዘመድከ ፡ ይሰሪ ፡ ለከ ፡ በምጽአቱ ፡ ወያወፅአከ ፡ እምሲኦል ፤ ወእስከ ፡ ይመጽእ ፡ መድኅን ፡ ትሣቀይ ፡ በህየ ፡ ምስለ ፡ አበዊከ ፡ ወያወፅአከ ፤ እስመ ፡ እምዘርእከ ፡ ይመጽእ ፡ መድኅን ፡ ዘያድኅነክሙ ፡ ለከ ፡ ወለእለ ፡ እምቅድሜከ ፡ ወለእለ ፡ እምድኅሬከ ፡ እምአዳም ፡ እስከ ፡ ምጽአቱ ፡ በዘመደ ፡ ዘመድክሙ ፡ ወያወፅአክሙ ፡ እምሲኦል ፤ በከመ ፡ አውፅኦሙ ፡ ዮሴፍ ፡ ለአዝማዲሁ ፡ እምረኃብ ፡ እስመ ፡ ቀዳሚት ፡ ሲኦል ፡ በምድረ ፡ ረኃብ ፡ ወከማሁ ፡ ያወፅአክሙ ፡ መድኅን ፡ እምሲኦል ፡ ለአዝማዲሁ ፤ ወበከመ ፡ ቀነይዎሙ ፡ ድኅረ ፡ ግብጻዊያን ፡ ከማሁ ፡ ቀነዩክሙ ፡ አጋንንት ፡ በስሕተተ ፡ ጣዖት ፤ ወበከመ ፡ አውፅኦሙ ፡ ሙሴ ፡ ለአዝማዲሁ ፡ እምግብርናት ፡ ከማሁ ፡ ያወፅአክሙ ፡ መድኅን ፡ እምግብርናተ ፡ ሲኦል ፤ ወበከመ ፡ ገብረ ፡ ሙሴ ፡ ዐሠርተ ፡ ተኣምራተ ፡ ወመቅሠፍታተ ፡ በቅድመ ፡ ፈርዖን ፡ ንጉሥ ፡ ከማሁ ፡ ዘይመጽእ ፡ መድኅን ፡ እምዘመድከ ፡ ይገብር ፡ ፲ ፡ ተኣምራተ ፡ ለሕይወት ፡ በቅድመ ፡ ሕዝብከ ፤ ወገቢሮ ፡ ትእምርታተ ፡ ሙሴ ፡ በከመ ፡ ዘበጠ ፡ ባሕረ ፡ ወአኅለፎሙ ፡ እንተ ፡ የብስ ፡ ከማሁ ፡ ዘይመጽእ ፡ መድኅን ፡ ይነስት ፡ አረፋቲሃ ፡ ለሲኦል ፡ ወያወ ፡ ፅአክሙ ፤ ወበከመ ፡ አስጠሞ ፡ ሙሴ ፡ ለፈርዖን ፡ ምስለ ፡ ግብጻዊያን ፡ ውስተ ፡ ባሕረ ፡ ኤርትራ ፡ ከማሁ ፡ ያሰጥሞሙ ፡ ለሰይጣን ፡ ወለአጋንንቲሁ ፡ መድኅን ፡ ውስተ ፡ ሲኦል ፡ እስመ ፡ ባሕር ፡ ትተረጐም ፡ በሲኦል ፡ ወፈርዖን ፡ ይተረጐም ፡ በሰይጣን ፡ ወሰራዊቱ ፡ ግብጻዊያን ፡ ይተረጐሙ ፡ በአጋንንት ፤ ወበከመ ፡ ሴሰዮሙ ፡ መና ፡ በገዳም ፡ ዘእንበለ ፡ ጻማ ፡ ከማሁ ፡ ይሴስየክሙ ፡ መድኅን ፡ መብልዐ ፡ ገነት ፡ ዘለዓለም ፡ እምድኅረ ፡ አውፅአክሙ ፡ እምሲኦል ፤ ወበከመ ፡ አንበሮሙ ፡ በገዳም ፡ ፵ ፡ ዓመተ ፡ እንዘ ፡ ኢበልየ ፡ አልባሲሆሙ ፡ ወኢነቅዐ ፡ ሰኰናሆሙ ፡ ከማሁ ፡ መድኅን ፡ ያነብረክሙ ፡ ዘእንበለ ፡ ጻማ ፡ እምድኅረ ፡ ትንሣኤ ፤ ወበከመ ፡ አብኦሙ ፡ ኢየሱስ ፡ ምድረ ፡ ርስት ፡ ከማሁ ፡ ያበውአክሙ ፡ መድኅን ፡ ውስተ ፡ ገነተ ፡ ትፍሥሕት ፤ ወበከመ ፡ ቀተሎሙ ፡ ኢየሱስ ፡ ለ፯ ፡ ነገሥተ ፡ ከነአን ፡ ከማሁ ፡ ይቀትሎሙ ፡ መድኅን ፡ ለሰብዐቱ ፡ አርእስተ ፡ አብሊስ ፤ ወከመ ፡ ሠረዎሙ ፡ ኢያሱ ፡ ለሕዝበ ፡ ከነኦን ፡ ከማሁ ፡ ይሤርዎሙ ፡ መድኅን ፡ ለኃጥኣን ፡ ወየኀትሞሙ ፡ ውስተ ፡ ማኅተመ ፡ ሲኦል ፤ ወበከመ ፡ አንተ ፡ ሐነጽከ ፡ ቤተ ፡ እግዚኣብሔር ፡ ከማሁ ፡ ይትሐነጽ ፡ አብያተ ፡ እግዚኣብሔር ፡ ውስተ ፡ አርእስተ ፡ አድባር ፨ ፨ ፨ ፨
=== chapter 68 ===
[፷፰ ፡ በእንተ ፡ መድኀኒትነ ፡ ማርያም ።]
ወካዕበ ፡ ይኩንከ ፡ ትእምርተ ፡ ከመ ፡ ይመጽእ ፡ መድኅን ፡ እምዘርእከ ፡ ወከመ ፡ ያድኅንከ ፡ ምስለ ፡ አበዊከ ፡ ወዘርእከ ፡ እምድኅሬከ ፡ በምጽአቱ ። ተፈጥረት ፡ መደኀኒትክሙ ፡ ውስተ ፡ ከርሠ ፡ አዳም ፡ ከመ ፡ ዕንቈ ፡ ባሕርይ ፡ እምቅድመ ፡ ሔዋን ፤ ወሶበ ፡ ፈጠራ ፡ ለሔዋን ፡ እምዐፅመ ፡ ገቦሁ ፡ ለአዳም ፡ ወይቤሎሙ ፡ ብዝኁ ፡ እምከርሠ ፡ አዳም ፡ ኢወፅአት ፡ ኀበ ፡ ቀየን ፡ ወአቤል ፡ አላ ፡ ኀበ ፡ ሣልስ ፡ ወፅአት ፡ እምከርሠ ፡ አዳም ፡ ወገብአት ፡ ውስተ ፡ ከርሡ ፡ ለሴት ፤ ወእምኔሁ ፡ እንዘ ፡ ተሐውር ፡ ይእቲ ፡ ባሕርይ ፡ ኀበ ፡ እለ ፡ ኮኑ ፡ በኵረ ፡ በጽሐት ፡ እስከ ፡ አብርሃም ፤ ወእምነ ፡ አብርሃም ፡ ኢወፅአት ፡ ውስተ ፡ በኵሩ ፡ ይስማዔል ፡ አላ ፡ ጸንሐት ፡ ወቦአት ፡ ኀበ ፡ ይስሐቅ ፡ ንጹሕ ፤ ወእምይስሐቅኒ ፡ ኢሖረት ፡ ኀበ ፡ በኵር ፡ ዕቡይ ፡ ዔሳው ፡ አላ ፡ ቦአት ፡ ኀበ ፡ ያዕቆብ ፡ ትሑት ፤ ወእምያዕቆብ ፡ ኢቦአት ፡ ኀበ ፡ ሮቤል ፡ በኵሩ ፡ ስሑት ፡ አላ ፡ ቦአት ፡ ኀበ ፡ ይሁዳ ፡ የዋህ ፤ ወእምይሁዳኒ ፡ ኢወፅአት ፡ እስከ ፡ ይትወለዲ ፡ ፬ ፡ መአብሳን ፡ አላ ፡ ቦአት ፡ ኀበ ፡ ፋሬስ ፡ መስተዐግስ ፤ ወእምኔሁ ፡ ይእቲ ፡ ባሕርይ ፡ ሖረት ፡ ኀበ ፡ በኵር ፡ እስከነ ፡ በጽሐት ፡ ውስተ ፡ ከርሠ ፡ እሴይ ፡ አበ ፡ አቡከ ፤ ወእምዝ ፡ ጸንሐት ፡ እስከ ፡ ይትወለዲ ፡ ፮ ፡ ህርቡዳን ፡ ወእምዝ ፡ ቦአት ፡ ኀበ ፡ ሳብዓይ ፡ ዳዊት ፡ አቡከ ፡ የዋህ ፡ ወትሑት ፡ እስመ ፡ እግዚኣብሔር ፡ ይጸልእ ፡ ዕቡያነ ፡ ወዝኁራነ ፡ ወያፈቅር ፡ የዋሃነ ፡ ወትሑታነ ፤ ወእምዝ ፡ ጸንሐት ፡ ውስተ ፡ ሐቌ ፡ አቡከ ፡ እስከ ፡ ይትወለዲ ፡ ፭ ፡ ስሑታን ፡ ወአብዳን ፡ ወቦአት ፡ ውስተ ፡ ሐቌ ፡ ዚአከ ፡ በእንተ ፡ ጥበብከ ፡ ወልቡናከ ። ወእምዝ ፡ ጸንሐት ፡ ባሕርይ ፡ ወኢሖረት ፡ ኀበ ፡ በኵርከ ፡ እስመ ፡ ሠናያን ፡ እሙንቱ ፡ ሰብአ ፡ ሀገሩ ፡ እመ ፡ ኢክሕድዎ ፡ ወእመ ፡ ኢሰቀልዎ ፡ ከመ ፡ እስራኤል ፡ ሕዝብከ ፡ ሶበ ፡ ይሬእዩ ፡ ዘይገብር ፡ ተኣምረ ፡ ዘይትወለድ ፡ እምባሕርይ ፡ እሙንቱሰ ፡ የአምኑ ፡ ቦቱ ፡ በሰሚዐ ፡ ዜናሁ ፤ ወኀበ ፡ ዘይንእስኒ ፡ ወልድከ ፡ አድራሚ ፡ ኢሖረት ፡ እስመ ፡ እሙን ፡ ቱ ፡ ሰናያን ፡ እመ ፡ ኢሰቀልዎ ፡ ወእመ ፡ ኢክሕዲ ፡ ሶበ ፡ ርእዩ ፡ ዘይገብር ፡ ተኣምረ ፡ ወመንክረ ፡ ዘይትወለድ ፡ እምባሕርይ ፡ ወበደኃሪ ፡ የአምኑ ፡ ቦቱ ፡ በአርድእቱ ። አላ ፡ ባሕቱ ፡ ወፅአት ፡ ባሕርይ ፡ እምከርሥከ ፡ እንተ ፡ ትከውን ፡ መድኀኒተክሙ ፡ ወቦአት ፡ ውስተ ፡ ከርሠ ፡ ኢዮርብዓም ፡ ወልድከ ፡ በእንተ ፡ እከዮሙ ፡ ለእስራኤል ፡ ሕዝብከ ፡ እስመ ፡ በክሕደቶሙ ፡ ወበ ፡ እከዮሙ ፡ ይሰቅልዎ ፤ ወሶበሰ ፡ ኢተሰቅለ ፡ እመ ፡ ኢኮነ ፡ መድኀኒትክሙ ፡ እስመ ፡ ይሰቀል ፡ ዘእንበለ ፡ ኀጢአት ፡ ወይትነሣእ ፡ ዘእንበለ ፡ ሙስና ፡ ወበእንተዝ ፡ ይወርድ ፡ ኀቤከሙ ፡ ውስተ ፡ ሲኦል ፡ ወይነሥት ፡ አረፋቲሃ ፡ ከመ ፡ ያድኅንክሙ ፡ ወያውፅእክሙ ፡ ወይምሐርክሙ ፡ ለኵልክሙ ፤ እለ ፡ ተጸውረት ፡ ባሕርይ ፡ ውስተ ፡ ከርሥክሙ ፡ ትድኅኑ ፡ ምስለ ፡ አንስቲያክሙ ፡ ወአልቦ ፡ ዘይትሀጐል ፡ እምኔክሙ ፡ እምአቡከ ፡ አዳም ፡ እስከ ፡ ዘይመጽእ ፡ ዘመድከ ፡ ኤያቄም ፡ ወእምሔዋን ፡ እምከ ፡ ብእሲቱ ፡ ለአዳም ፡ እስከ ፡ ኖኅ ፡ ወብእሲቱ ፡ ተርሚዛ ፡ እስከ ፡ ታራ ፡ ወብእሲቱ ፡ አሚንያ ፡ ወእስከ ፡ አብርሃም ፡ ወብእሲቱ ፡ ሳራ ፡ ወእስከ ፡ ይስሐቅ ፡ ወብእሲቱ ፡ ርብቃ ፡ ወእስከ ፡ ያዕቆብ ፡ ወብእሲቱ ፡ ልያ ፡ ወእስከ ፡ ይሁዳ ፡ ወመርዓቱ ፡ ትዕማር ፡ ወእስከ ፡ አቡከ ፡ ወብእሲቱ ፡ ቤርሳቤሕ ፡ ወእስከ ፡ ለሊከ ፡ ወተርባና ፡ ብእሲትከ ፡ ወእስከ ፡ ኢዮርብዓም ፡ ወልድከ ፡ ወአሚሳ ፡ ብእሲቱ ፡ ወእስከ ፡ ኢዮአቄም ፡ ዘይመጽእ ፡ ዘመድከ ፡ ወብእሲቱ ፡ ሐና ፤ ኵልክሙ ፡ እለ ፡ ጾርክምዋ ፡ ለባሕርይ ፡ አልቦ ፡ ዘይትሀጐል ፡ እምኔክሙ ፡ እምተባዕትክሙ ፡ ወእስከ ፡ አንስቲያክሙ ፡ ኢትትሀጐሉ ፡ እለ ፡ ጾርክምዋ ፡ ለባሕርይ ። እስመ ፡ ትጸወር ፡ ባሕርይ ፡ በተባዕት ፡ እለ ፡ ትከውኑ ፡ ጻድቃነ ፡ ወአንስትሂ ፡ እለ ፡ ጾራ ፡ ምጽዋረ ፡ ባሕርይ ፡ ኢይትሀጐላ ፡ እስመ ፡ ንጹሓተ ፡ ይከውና ፡ በይእቲ ፡ ባሕርይ ፡ እስመ ፡ ቅድስት ፡ ወንጽሕት ፡ ይእቲ ፡ ወባቲ ፡ ትትቄደሱ ፡ ወትነጽሑ ፤ እስመ ፡ በእንቲአሃ ፡ ወበእንተ ፡ ጽዮን ፡ ፈጠሮ ፡ ለኵሉ ፡ ዓለም ። ጽዮንሰ ፡ ነበረት ፡ ኀበ ፡ በኵርከ ፡ ወትከውን ፡ መድኀኒቶሙ ፡ ለሕዝበ ፡ ኢትዮጵያ ፡ እስከ ፡ ለዓለም ፡ ወባሕርይኒ ፡ ተጸውረት ፡ ውስተ ፡ ከርሠ ፡ አዮር ፡ በዓም ፡ ወልድከ ፡ ወትከውን ፡ መድኀኒት ፡ ለኵሉ ፡ ዓለም ፤ እስመ ፡ አመ ፡ በጽሐ ፡ ዕድሜሁ ፡ ትትወለድ ፡ እምዘርእከ ፡ ይእቲ ፡ ባሕርይ ፡ እስመ ፡ ንጽሕት ፡ ፈድፋደ ፡ ምስብዒተ ፡ እምነ ፡ ፀሐይ ፤ ወይመጽእ ፡ መድኅን ፡ እመንበረ ፡ መለኮቱ ፡ ወየኀድር ፡ ላዕሌሃ ፡ ወይለብስ ፡ ሥጋሃ ፤ ወአሜሃኒ ፡ ለሊከ ፡ ትዜንዋ ፡ ይቤለኒ ፡ እግዚእየ ፡ ወእግዚእከ ፡ አነ ፡ ገብርኤል ፡ መልአክ ፡ ዐቃቢክሙ ፡ ለእለ ፡ ትጸውር ፡ ዋ ፡ ለባሕርይ ፡ እምከርሠ ፡ አዳም ፡ ወእስከ ፡ ከርሠ ፡ ሐና ፡ ከመ ፡ እክላእክሙ ፡ እምግብርናት ፡ ወርኵስ ፡ ኀበ ፡ ተኀድር ፡ ባሕርይ ፤ ወሚካኤልኒ ፡ ተአዘዘ ፡ ኀበ ፡ ጽዮን ፡ ከመ ፡ ይመግባ ፡ በኵሉ ፡ ኀበ ፡ ሖረት ፤ ወኡርያልኒ ፡ ይሜግብ ፡ ዕፀ ፡ ሳቤቅ ፡ እንተ ፡ ትከውን ፡ መስቀሎ ፡ ለመድኅን ። ወአመ ፡ ሰቀልዎ ፡ በቅንአቶሙ ፡ ሕዝብከ ፡ ሀለዎሙ ፡ ይድብይዎ ፡ ለመስቀሉ ፡ እምብዝኀ ፡ ተኣምራት ፡ ዘይከውን ፡ ቦቱ ፡ ወየኀፍሩ ፡ ርኢዮሙ ፡ መንክራቲሁ ፤ ወበደኃሪ ፡ ይነሥኦ ፡ ለዕፀ ፡ መስቀል ፡ ዘርአ ፡ አድራሚስ ፡ ወልድከ ፡ ፫ ፡ መድኀኒተ ፡ ዘተፈነወ ፡ ዲበ ፡ ምድር ። ሚካኤል ፡ መልአክ ፡ ኀበ ፡ ጽዮን ፡ ምስለ ፡ ዳዊት ፡ ወልድከ ፡ በኵርከ ፡ ዘነሥአ ፡ መንበረ ፡ ዳዊት ፡ አቡከ ፤ ወአነ ፡ ኀበ ፡ ባሕርይ ፡ ንጽሕት ፡ ለዘ ፡ ይነግሥ ፡ እስከ ፡ ለዓለም ፡ ኀበ ፡ ኢዮርብዓም ፡ ወልድከ ፡ ማእከላዊ ፤ ወኡርኤል ፡ መልአክ ፡ ኀበ ፡ አድራሚ ፡ ወልድከ ፡ ዘይንእስ ። ዘንተ ፡ ነገርኩከ ፡ ወኢታሕዝን ፡ ልበከ ፡ በእንተ ፡ መድኀኒትከ ፡ ወበእንተ ፡ መድኀኒተ ፡ ደቂቅከ ፨ ፡ ወዘንተ ፡ ሶበ ፡ ሰምዐ ፡ ተኀየለ ፡ በውስተ ፡ ምስካቡ ፡ ወሰገደ ፡ ለመልአከ ፡ እግዚኣብሔር ፡ ወይቤ ፡ ኣአኵቶ ፡ ለእግዚኣብሔር ፡ ለእግዚእየ ፡ ወለእ ፡ ግዚእከ ፡ ኦብርሃናዊ ፡ መንፈሳዊ ፡ ዘአስማዕከኒ ፡ ቃለ ፡ ዘያስተፈሥሐኒ ፡ ዘኢይሜቊሳ ፡ ለነፍስየ ፡ በእንተ ፡ አበሳየ ፡ እምርስተ ፡ አበውየ ፡ ዘተወክፈ ፡ ንስሓየ ፡ እምድኅረ ፡ ምንዳቤየ ፡ ዘነጸረ ፡ አንብዕየ ፡ ወሰምዐ ፡ ገዓርየ ፡ ዘርእየ ፡ ምንዳቤየ ፡ ወኢኀደገኒ ፡ ትኩዝየ ፡ እሞት ፡ አላ ፡ አስተፈሥሐኒ ፡ ዘእንበለ ፡ ትፃእ ፡ ነፍስየ ፡ እምሥጋየ ፤ እምይእዜሰ ፡ ኢያሐዝነኒ ፡ መዊት ፡ ወኣፈቅሮ ፡ ከመ ፡ ሕይወት ፡ እምይእዜሰ ፡ እሰርቦ ፡ ለጽዋዐ ፡ ሞት ፡ መሪር ፡ ከመ ፡ መዓር ፡ እምይእዜሰ ፡ ኣፈቅራ ፡ ለመቃብር ፡ ከመ ፡ ማኅደር ፡ ዘበ ፡ አፍራጽ ። ወእመኒ ፡ ወረድኩ ፡ ወተወረውኩ ፡ ውስተ ፡ ሲኦል ፡ በእንተ ፡ አበሳየ ፡ ኢያሐዝነኒ ፡ እስመ ፡ ሰማዕኩ ፡ ቃለ ፡ ዘያስተፈሥሐኒ ፤ ወእመኒ ፡ ወረድኩ ፡ ውስተ ፡ መትሕተ ፡ ታሕቲት ፡ መዓምቅተ ፡ ሲኦል ፡ ዘበእንተ ፡ አበሳየ ፡ ሚላዕሌየ ፤ ወእመኒ ፡ ጠሰየኒ ፡ ውስተ ፡ እዴሁ ፡ ወዘረወኒ ፡ እስከ ፡ አጽናፈ ፡ ምድር ፡ ወውስተ ፡ ነፋሳት ፡ በእንተ ፡ አበሳየ ፡ ኢያሐዝነኒ ፡ እስመ ፡ ሰማዕኩ ፡ ቃለ ፡ ዘያስተፈሥሐኒ ፡ ዘኢመቈሳ ፡ ለነፍስየ ፡ እምርስተ ፡ አበዊየ ፤ ወትከውን ፡ ነፍስየ ፡ ምስለ ፡ ነፍሰ ፡ ዳዊት ፡ አቡየ ፡ ወምስለ ፡ ነፍሰ ፡ አብርሃም ፡ ወይስሐቅ ፡ ወያዕቆብ ፡ አበዊየ ፡ ወይመጽእ ፡ መድኅን ፡ ወያወፅአነ ፡ እምሲኦል ፡ ምስለ ፡ ኵሎሙ ፡ አበዊየ ፡ ወአዝማድየ ፡ ቀደምት ፡ ወደኀርት ፡ ወለደቂቅየኒ ፡ በዲበ ፡ ምድር ፡ ፫ ፡ መላእክት ፡ ኀያላን ፡ እለ ፡ የዐቅብዎሙ ፤ ረከብኩ ፡ መንግሥተ ፡ ሰማያት ፡ ወረከብኩ ፡ መንግሥተ ፡ ምድር ። መኑ ፡ ከመ ፡ እግዚኣብሔር ፡ መሓሪ ፡ ዘይምሕር ፡ ወይምሕክ ፡ ተግባሮ ፡ ዘይሰሪ ፡ አበሳ ፡ ለመአብሳን ፡ ወኢያጠፍእ ፡ ዝክረ ፡ ነሳሕያን ፤ እስመ ፡ ኵለንታሁ ፡ ስርየት ፡ ወኵለንታሁ ፡ ምሕረት ፡ ወሎቱ ፡ ይደሉ ፡ ስብሐት ፡ አሜን ፨ ፨
=== chapter 69 ===
[፷፱ ፡ በእንተ ፡ ስእለተ ፡ ሰሎሞን ።]
ወተመይጠ ፡ ወአንቃዕደወ ፡ ኀበ ፡ መልአክ ፡ ወሰፍሐ ፡ ክልኤሆን ፡ እደዊሁ ፡ ወይቤ ፡ እግዚኦ ፡ ቀርበኑ ፡ ምጽአቱ ፡ ለመድኅን ፡ ዘትቤ ፡ ወሚመ ፡ ርሑቅኑ ፡ አውሥአ ፡ መልአክ ፡ ወይቤሎ ፡ በ፵ወ፫ ፡ ትውልድ ፡ እምዘመድከ ፡ ወእምዘርእከ ፡ ይመጽእ ፡ ወያድኅነክሙ ፤ ወእስራኤልሰ ፡ ይጸልኡ ፡ መድኀኒቶሙ ፡ ወይቀንኡ ፡ ላዕሌሁ ፡ በዘገብረ ፡ ተኣምረ ፡ ወመንክረ ፡ በቅድሜሆሙ ፡ ወይሰቅልዎ ፡ ወይቀትልዎ ፡ ወይትነሣእ ፡ ወያድኅነክሙ ፤ እስመ ፡ መሓሪ ፡ ውእቱ ፡ ለነሳሕያን ፡ ወኄር ፡ ለኅሩያኒሁ ፤ ወናሁ ፡ ነገርኩክሙ ፡ ጥዩቀ ፡ ከመ ፡ ኢየኀድገክሙ ፡ ውስተ ፡ ሲኦል ፡ ለዘመዲ ፡ እስራኤል ፡ እለ ፡ ተጸውረት ፡ ባሕርይ ፡ ኀቤክሙ ፡ ወዘንተ ፡ ብሂሎ ፡ መልአከ ፡ እግዚኣብሔር ፡ ይቤሎ ፡ ሰላም ፡ ለከ ። ወአውሥአ ፡ ሰሎሞን ፡ ወይቤሎ ፡ ብቊዐኒ ፡ እግዚእየ ፡ አሐተ ፡ እስአለከ ፡ ወኢትትሀየየኒ ፡ ገዓርየ ። ወይቤሎ ፡ በል ፡ ተሰአለኒ ፡ ወአነ ፡ ኣየድዐከ ፡ ዘሰማዕኩ ፡ ወዘርኢኩ ። ወይቤሎ ፡ ሰሎሞን ፡ ባሕቱ ፡ አሐዝን ፡ በእንተ ፡ እስራኤል ፡ ሕዝቡ ፡ እለ ፡ ኀረየ ፡ እምኵሉ ፡ በትረ ፡ ርስቱ ፡ ቀዳሜ ፡ በኵሩ ፤ ትቤለኒ ፡ ይጠፍኡ ፡ እምድኅረ ፡ መጽአ ፡ መድኅን ። ወካዕበ ፡ አውሥኦ ፡ መልአከ ፡ እግዚኣብሔር ፡ ወይቤሎ ፡ እወ ፡ ነገርኩከ ፡ ከመ ፡ ይሰቅልዎ ፡ ለመድኅን ፡ ወሶበ ፡ ከዐዉ ፡ ደሞ ፡ በዲበ ፡ ዕፀ ፡ መስቀል ፡ ይከውኑ ፡ ዝርዋነ ፡ ውስተ ፡ ኵሉ ፡ ዓለም ። ወይቤ ፡ ሰሎሞን ፡ እበክዮሙ ፡ ለሕዝብየ ፤ አሌሎሙ ፡ ለሕዝብየ ፡ እለ ፡ ዘልፈ ፡ ያምዕዑ ፡ ፈጣሪሆሙ ፡ እምቀዳሚ ፡ ወእስከ ፡ ደኃሪ ፡ አነ ፡ ወእለ ፡ እምቅድሜየ ፡ ወኢይደሉ ፡ ከመ ፡ ይምሐሩነ ፡ በእንተ ፡ እከየ ፡ ምግባሪነ ፡ እስመ ፡ ትውልድ ፡ ዘአልብነ ፡ አሚነ ፤ አሌሎሙ ፡ እለ ፡ ይክዕዉ ፡ ደመ ፡ ንጹሐ ፡ ወእለ ፡ ይጠቅሉ ፡ ጻድቀ ፡ ወይትካፈሉ ፡ በርበራቲሁ ፡ ወኢየአምኑ ፡ በቃሉ ፡ ወኢየሐውሩ ፡ በትእዛዙ ፤ ጽኑሕ ፡ ደይኖሙ ፡ ወንቡር ፡ ጌጋዮሙ ፡ ዐቢይ ፡ መቅሠፍቶሙ ፡ ወጽኑሕ ፡ ኀጢአቶሙ ፡ ወኢይሰሪ ፡ ሎሙ ፡ ወያዜክሩ ፡ ኀጢአተ ፡ አበዊሆሙ ፡ እስመ ፡ ምግባሮሙ ፡ ኀጢአት ፡ ወይትሀጐሉ ፡ በዘመከሩ ፡ ለሊሆሙ ፤ ወባሕቱሰ ፡ አሌላ ፡ ለነፍስየ ፡ እስመ ፡ ከበርኩ ፡ አኀስር ፡ በሞትየ ፡ ወተጠበብኩ ፡ በዲበ ፡ ምድር ፡ ወእከውን ፡ ሐመደ ። ምንት ፡ ኅይስናሁ ፡ ለንጉሥ ፡ ለእመ ፡ ኢገብረ ፡ ሠናየ ፡ በዲበ ፡ ምድር ፡ ምስለ ፡ ነዳያን ፤ አሐቲ ፡ ድቀቶሙ ፡ ውስተ ፡ መቃብር ፡ ወአሐቲ ፡ ፍኖቶሙ ፡ ውስተ ፡ መዓምቅት ፤ ምንት ፡ በቊዔትነ ፡ ለሰብእ ፡ እስመ ፡ በከ ፡ ተፈጠርነ ፡ ወእምድኅረ ፡ ንስቲት ፡ ንከውን ፡ ከመዘ ፡ ኢተፈጠርነ ፤ እስመ ፡ ጢስ ፡ እስትንፋስነ ፡ ለእመ ፡ አርመመት ፡ ሕቀ ፡ ተኀልፍ ፡ ነፍስነ ፡ ወቃለ ፡ ቀለምጽጽልብነዘይትሐወስ ፡ ውስተ ፡ ኅሊናነ ፡ እምከመ ፡ ኀለፈት ፡ ንከውን ፡ ሐመደ ፡ ወያስቆርሩነ ፡ ፍቁራኒነ ፡ ወማኅፈርነ ፤ ወአእምሮ ፡ ኅሊናነ ፡ ዘመልዕልተ ፡ ርእስነ ፡ እምከመ ፡ ተክዕወት ፡ ነፍስነ ፡ ንከውን ፡ ዕፄ ፡ ወጺአተ ፤ ወሙቀተ ፡ ሥጋነ ፡ እምከመ ፡ ኀለፈት ፡ ከመ ፡ ወኢምንትኒ ፡ ንከውን ፡ ወከመ ፡ ሳሕወ ፡ ደመና ፡ ነኀልፍ ። ምንተኬ ፡ አብዝኆ ፡ ነቢብኒ ፡ ኢይበቊዕ ፡ ወሥነ ፡ ላሕይኒ ፡ ይትሀጐል ፡ ወጽንዐ ፡ ነገሥትኒ ፡ ይጠፍእ ፡ ወኀይለ ፡ መኳንንትኒ ፡ ይትሀጐል ፡ ወኢይትረከብ ፤ ወኵልነ ፡ ከመ ፡ ጽላሎት ፡ ነኀልፍ ፡ ወእምድኅረ ፡ ኀለፍነ ፡ በሞት ፡ ይትረሳዕ ፡ ስምነ ፡ ወኢይትረከብ ፡ አሠርነ ፤ እምድኅረ ፡ ፫ ፡ ትውልደ ፡ ደቂቅነ ፡ አልቦ ፡ ዘይዜክር ፡ ስምነ ። ወሶቤሃ ፡ አንጸረ ፡ ገጾ ፡ ኀበ ፡ ዮርብዓም ፡ ወልዱ ፡ ወይቤሎ ፡ ወልድየ ፡ ተዐገሳ ፡ ለእኪት ፡ ወግበራ ፡ ለሠናይት ፡ ከመ ፡ ትርከብ ፡ ብዙኀ ፡ መዋዕለ ፡ በዲበ ፡ ምድር ፤ ወኢትስግድ ፡ ለአማልክት ፡ ባዕድ ፡ ወኢታምልኮሙ ፡ አላ ፡ ባሕቱ ፡ እግዚኣብሔር ፡ ፍራህ ፡ ወአክብሮ ፡ ከመ ፡ ትማእ ፡ ፀረከ ፡ ወጸላእተከ ፡ ወበሰማያትኒ ፡ ከመ ፡ ትረስ ፡ ማኅደረ ፡ አበዊከ ፡ ወትረስ ፡ ሕይወተ ፡ ዘለዓለም ። ወይቤ ፡ ጸሐፉ ፡ ሊተ ፡ ውስተ ፡ መጽሐፈ ፡ ጡማር ፡ ወአንብራ ፡ ውስተ ፡ ቀማጥር ። ወይቤሎ ፡ ለሳዶቅ ፡ ካህን ፡ ቅብኦ ፡ ወአንግ ፡ ሦ ፡ ለወልድየ ፤ በከመ ፡ አንገሠኒ ፡ አቡየ ፡ ዳዊት ፡ እግዚእየ ፡ እንዘ ፡ ሕያው ፡ አነሂ ፡ ኣነግሦ ፡ ለወልድየ ፡ ኢዮርብዓም ፡ ወይኩን ፡ ዘርኡ ፡ መድኀኒትየ ፡ ሊተ ፡ ወለአበውየ ፡ እስከ ፡ ለዓለም ፡ በከመ ፡ ነገረኒ ፡ መልአከ ፡ እግዚኣብሔር ፨ ፨ ፨ ፨ ፨ ፨
=== chapter 70 ===
[፸ ፡ በእንተ ፡ ዘነግሠ ፡ ሮብዓም ።]
ወእምዝ ፡ ነሥኦ ፡ ሳዶቅ ፡ ካህን ፡ ወአንገሦ ፡ ወቀብኦ ፡ ወገብረ ፡ ሎቱ ፡ ዘበሕጉ ፡ ወአንበረ ፡ ዕፀ ፡ ዲበ ፡ ደብተራ ፡ ወረከቦ ፡ በስመ ፡ አቡሁ ፡ ሰሎሞን ፡ ወአጽዐንዎ ፡ ዲበ ፡ በቅለ ፡ ንጉሥ ፡ ወይቤልዎ ፡ ባሕ ፡ ሕያው ፡ አበ ፡ ነጋሢ ፤ ወደምፀት ፡ ሀገር ፡ ወተነፍሐ ፡ ቀርን ። ወዘእንበለ ፡ ይግባእ ፡ ኀበ ፡ አቡሁ ፡ አዕረፈ ፡ ሰሎሞን ፤ ወወሰክዎ ፡ ኀበ ፡ መቃብረ ፡ አቡሁ ፡ ዳዊት ፡ ወላሐውዎ ፡ ለሰሎሞን ፡ ዐቢየ ፡ ላሐ ፡ እስመ ፡ አልቦ ፡ ዘተረክበ ፡ ዘከማሁ ፡ በጥበብ ፡ በውእቱ ፡ መዋዕል ፨ ፡ ወእምድኅረ ፡ ኀለፈ ፡ ሰቡዐ ፡ መዋዕለ ፡ አንገፍዎ ፡ ላሐ ፡ አቡሁ ፡ ለዮርብዓም ፤ ወተጋብኡ ፡ ሕዝበ ፡ እስራኤል ፡ ኀበ ፡ ዮርብዓም ፡ ወይቤልዎ ፡ አቅልል ፡ ለነ ፡ ግብረ ፡ እስመ ፡ አቡከ ፡ አክበደ ፡ ለነ ፡ በሐጢበ ፡ ዕፅ ፡ ወበውቅረተ ፡ እብን ፡ ወበአቅሞ ፡ ሰረገላ ፡ ለአርውጾ ፡ ዕፅ ፡ ቄድሮስ ። ወመከረ ፡ ምስለ ፡ መማክርት ፡ ወመላህቅት ፡ ዘቤተ ፡ ንጉሥ ፡ ወይቤልዎ ፡ አውሥኦሙ ፡ ሠናየ ፡ እስመ ፡ አንተ ፡ ይእዜ ፡ ከመ ፡ ሕፃን ፡ ዘኢያጽንዐ ፡ ሐቌሁ ፡ ለሐዊር ፤ ወይእዜሰ ፡ ተናገሮሙ ፡ ሠናየ ፡ ወበሎሙ ፡ እገብር ፡ ለክሙ ፡ ኵሎ ፡ ዘትፈቅዱ ፤ ወእምከመ ፡ ጸንዐት ፡ እዴከ ፡ ላዕሌሆሙ ፡ ትገብር ፡ ሕዝበከ ፡ ዘፈቀድከ ። ወአውፅኦሙ ፡ ለመላህቅቲሁ ፡ ወአብኦሙ ፡ ለዕደው ፡ ዕንቡዛን ፡ እለ ፡ ተሐፅኑ ፡ ምስሌሁ ፡ ወመከረ ፡ ምስሌሆሙ ፡ ወነገሮሙ ፡ ዘለአኩ ፡ ሎቱ ፡ ቤተ ፡ እስራኤል ፡ ወዘከመሂ ፡ አምከርዎ ፡ መላህቅተ ፡ ቤተ ፡ ንጉሥ ። ወይቤልዎ ፡ እሙንቱ ፡ ዕንቡዛን ፡ አረጋዊ ፡ ይገብር ፡ ምክረ ፡ አእሩግ ፡ ወልሂቅ ፡ ይገብር ፡ ምክረ ፡ ልሂቃን ፡ ወርሡእሂ ፡ ይገብር ፡ ምክረ ፡ ርሡኣን ፡ ወወሬዛሰ ፡ ዘከማከ ፡ ይገብር ፡ ምክረ ፡ ወራዙት ፡ ዘከማሁ ፡ ወእሉኒ ፡ ርሡኣን ፡ ደክሙ ፡ ሐቌሆሙ ፡ ከመ ፡ ሕፃን ፡ ዘኢይክል ፡ ሐዊረ ፤ ወበዝንቱሰ ፡ ነገር ፡ ዘትብል ፡ መኑ ፡ የአቢ ፡ ትእዛዘ ፡ እግዚእነ ፡ ንጉሥ ፤ ወቦ ፡ እምኔሆሙ ፡ ዘይሰርር ፡ በቅድመ ፡ ዮርብዓም ፡ ወቦእምኔሆሙ ፡ ዘይመልኅ ፡ ሰይፎ ፡ ወቦእምኔሆሙ ፡ ዘይቀልብ ፡ ረምሖ ፡ ወቦ ፡ ዘይእኅዝ ፡ ቀስቶ ፡ ወምጒንጳሁ ። ወሶበ ፡ ፈጸሙ ፡ ተውኔቶሙ ፡ አምከርዎ ፡ ወይቤልዎ ፡ እግዚእነ ፡ እንዘ ፡ ንሕነ ፡ ምስሌከ ፡ ወአንተ ፡ ምስሌነ ፤ ወአቡከኒ ፡ በጥበብ ፡ ወሀበከ ፡ ኪያነ ፡ ደቂቀ ፡ ምሁራነ ፡ ፀብእ ፡ እስራኤል ፡ ከመ ፡ ንልሀቅ ፡ ምስሌከ ፡ ወከመ ፡ ትጽናዕ ፡ መንግሥትከ ፡ እምድኅሬሁ ፤ ወአንተሰ ፡ እግዚእነ ፡ ኢታርእዮሙ ፡ ገጸ ፡ ሕመቅ ፡ ለእሙንቱ ፡ ሕዝብ ፡ ከመ ፡ ኢያምስሉከ ፡ ድኩመ ፡ ወዘኢትክል ፡ ገቢረ ፡ ፀብእ ፡ ላዕሌሆሙ ፡ ወላዕለ ፡ ፀርከ ፡ ወእመሰ ፡ ርእዩ ፡ ለነ ፡ ገጸ ፡ ድካም ፡ በቃል ፡ ወበምግባር ፡ ንከውን ፡ ሕቁራነ ፡ እምኔሆሙ ፡ ወኢይሁቡነ ፡ አምኃ ፡ ወጋዳ ፡ ወኢገብረ ፡ ወኢጸባሕተ ፡ ወትማስን ፡ መንግሥትከ ፤ አላ ፡ በሎሙ ፡ በጽኑዕ ፡ ቃል ፡ ወበገንሕ ፡ ተናገሮሙ ፡ እንዘ ፡ ትብል ፡ አቡየሰ ፡ ትቤልዎ ፡ በዕፅ ፡ ወበእብን ፡ ወአንሰ ፡ እቀንየክሙ ፡ በጋጋት ፡ ወበዐቃርብት ፡ እስመ ፡ እምግዝፈ ፡ አቡየ ፡ ይጸንዕ ፡ ቊጠጠ ፡ ዚአየ ፡ ወእምክሩ ፡ ለአቡየ ፡ ለዘወለደኒ ፡ የዐቢ ፡ ምክረ ፡ ዚአየ ፡ አልቦ ፡ ዘኣነትግ ፡ ለክሙ ፡ ግብረ ፡ ወገብጋበ ፡ ዘእንበለ ፡ ዘኣፈደፍድ ፡ ለክሙ ፡ በኵሉ ፤ ወለእመኒ ፡ ኢሰማዕክሙ ፡ ቃልየ ፡ ወኢገበርክሙ ፡ ትእዛዝየ ፡ እገብር ፡ እንስሳክሙ ፡ ሕብልያ ፡ ወደቂቅክሙ ፡ ይከውኑ ፡ ፄዋወለክሙኒ ፡ መጥባኅትየ ፡ ትበልዐክሙ ፡ ወእነሥእ ፡ አህጉሪክሙ ፡ ወአዕጻዲክሙ ፡ ወአትክልቲክሙ ፡ ወዐዘቃቲክሙ ፡ ወገራውሂክሙ ፡ ወአዕጻዳተ ፡ ወፍርክሙ ፤ ወለክቡራኒክሙ ፡ በእደ ፡ ሰናስለ ፡ ኀጺን ፡ ወለአብዕልቲክሙኒ ፡ ሲሳየ ፡ አግብርትየ ፡ ወአንስትያክሙኒ ፡ ሰርጐ ፡ ለቤተ ፡ ክቡራንየ ፤ ወዘንተ ፡ ቃልየ ፡ ኢያፀርዓ ፡ ወኢያሐጽጻ ፡ ወኢይሜቊሳ ፡ ወኢያበጥላ ፡ ወእገብራ ፡ ፍጡነ ፡ ወእከትባ ፡ ለዓለም ፤ እስመ ፡ ኵላ ፡ ዘይእቲ ፡ ምድር ፡ ተውህበት ፡ መንግሥት ፡ ለአበ ፡ አቡየ ፡ ዳዊት ፡ ወለአቡየ ፡ ሰሎሞን ፡ እምድኅሬሁ ፡ ወሊተኒ ፡ እምድኅረ ፡ አቡየ ፡ ወሀበኒ ፡ ከማሆሙ ፡ ወእቀንየክሙ ፡ አነኒ ፡ ከማሆሙ ፡ ወይእዜኒ ፡ ምክሩ ፡ ወተአዘዙ ፡ ሊተ ፨ ፡ ወነገሮሙ ፡ ከመዝ ፡ ለሊቃውንተ ፡ እስራኤል ። ወተንሥኡ ፡ ኵሎሙ ፡ ኅቡረ ፡ በምልኦሙ ፡ ወይቤሉ ፡ እቱ ፡ ቤተከ ፡ እስራኤል ፤ አልብነኑ ፡ ዘናነግሥ ፡ ዘእንበለ ፡ በቤተ ፡ ይሁዳ ፡ ወበቤተ ፡ ብንያሚ ፤ አበይናሆሙ ፡ ለቤቶሙ ፡ ወለሕዝበ ፡ ክልኤሆሙ ፡ ወናነግሥ ፡ ዘፈቀድነ ፡ ለርእስነ ፡ ወለዘሠምረት ፡ ነፍስነ ። ወጾሩ ፡ ንዋየ ፡ ሐቅሎሙ ፡ ወጐዩ ፡ በምልኦሙ ፡ ወበጽሑ ፡ ሀገረ ፡ ሰማርያ ፡ ዘቤተ ፡ ኤፍራታ ፤ ወበህየ ፡ መከሩ ፡ ወአንገለጉ ፡ ወተዓፀዉ ፡ ቤተ ፡ እስራኤል ፡ ከመ ፡ ያንግሡ ፡ ዘኀረዩ ፡ እምኔሆሙ ፡ ለዘ ፡ ረከቡ ፡ ዕፃ ፡ በውስተቤተ ፡ አቡሁ ፤ ወበጽሐ ፡ ዕፃ ፡ ኀበ ፡ ቤተ ፡ ኤፍሬም ፡ ወልደ ፡ ናባጥ ፡ ወኀረዩ ፡ በውስተ ፡ ቤተ ፡ አቡሁ ፡ ወአንገሥዎ ፡ ለኢዮርብዓም ፤ ወከመዝ ፡ ተከፍለት ፡ መንግሥት ፡ እምኀበ ፡ ዮርብዓም ፡ ወልደ ፡ ሰሎሞን ፡ ወኢተርፎ ፡ ዘእንበለ ፡ ቤተ ፡ ብንያሚ ፡ ወቤተ ፡ ይሁዳ ፡ አቡሁ ፨ ፡ ወቃለ ፡ እግዚኣብሔር ፡ ኢተሐሰ ፡ ወ ፡ ዘይቤሎ ፡ ለዳዊት ፡ ገብሩ ፡ እምፍሬ ፡ ከርሥከ ፡ ኣነብር ፡ ዲበ ፡ መንበርከ ፤ ወካዕበ ፡ ይቤ ፡ ሥሩዕ ፡ ከመ ፡ ወርኅ ፡ ለዓለም ፤ ወካዕበ ፡ ይቤ ፡ መሐለ ፡ እግዚኣብሔር ፡ ለዳዊት ፡ በጽድቅ ፡ ወኢይኔስሕ ። ዘነግሠ ፡ ዲበ ፡ መንበረ ፡ ዳዊት ፡ አቡሁ ፡ ውእቱ ፡ ኢየሱስ ፡ ክርስቶስ ፡ ዘመዱ ፡ በሥጋ ፡ እምድንግል ፡ ዘነበረ ፡ ዲበ ፡ መንበረ ፡ መለኮቱ ፤ ወበምድርኒ ፡ ወሀቦ ፡ ዘይነግሥ ፡ ዲበ ፡ መንበሩ ፡ ንጉሠ ፡ ኢትዮጵያ ፡ በኵሩ ፡ ለሰሎሞን ፤ ወለዮርበዓምሰ ፡ ኢወሀቦ ፡ እግዚኣብሔር ፡ ዘእንበለ ፡ ፪ ፡ በትር ፤ ወንጉሠሮምሂ ፡ ወልዱ ፡ ለሰሎሞን ፡ ዘይንእስ ። ወዘንተ ፡ ዘገብረ ፡ እግዚኣብሔር ፡ ከመ ፡ ኢይበሉነ ፡ አብዳን ፡ ሕዝበ ፡ አይሁድ ፡ በእንተ ፡ ሰሎሞን ፡ ወበእንተ ፡ ዮርብዓም ፡ ወልዱ ፡ እስመ ፡ ማእምረ ፡ ልብ ፡ እግዚኣብሔር ፡ ከመ ፡ ኢያምስሉ ፡ ዘንተ ፡ ገብረ ። ወለዮርብዓምኒ ፡ ሰመይዎ ፡ ንጉሠ ፡ ይሁዳ ፡ ወለንጉሠ ፡ ሰማርያ ፡ ሰመይዎ ፡ ንጉሠ ፡ እስራኤል ። ወእምትውልደ ፡ ኢዮርብዓም ፡ ኮነት ፡ ትውልድ ፡ እስከ ፡ ኢያቄም ፡ ፵ወ፩ ፡ ወአሜሃ ፡ ተወልዱ ፡ ለመልኪ ፡ ክልኤ ፡ ደቂቅ ፡ ሌዊ ፡ ወሴም ፡ ወላዴ ፡ ሆናሴ ፤ ወሆናሴ ፡ ወለደ ፡ ቀላምዮስ ፡ ወቀላምዮስ ፡ ወለደ ፡ ኢየቄ ፡ ም ፡ ወኢያቄምኒ ፡ ወለዳ ፡ ለማርያም ፡ ወለተ ፡ ዳዊት ፤ ወካዕበ ፡ ኢሊ ፡ ወለደ ፡ መልኪ ፡ ወሜልኪ ፡ ወለዶ ፡ ለማቲ ፡ ወማቴ ፡ ወለዶሙ ፡ ለኤሊ ፡ ወለያዕቆብ ፡ ወለሐና ፡ ብእሲተ ፡ ኢያቄም ፤ ወአውሰበ ፡ ኤሊ ፡ ብእሲተ ፡ ወሞተ ፡ እንዘ ፡ አልቦ ፡ ውሉደ ፡ ወአውሰባ ፡ ያዕቆብ ፡ ለብእሲተ ፡ ኤሊ ፡ ዮሐዳ ፡ ወወለደ ፡ ላቲ ፡ ዮሴፍ ፡ ጸራቤ ፡ ዘፈኀራ ፡ ለማርያም ። ወዮሴፍሰ ፡ ወልደ ፡ ያዕቆብ ፡ በሥጋወወልደኤሊ ፡ በሕገ ፡ ኦሪት ፡ በከመ ፡ አዘዞ ፡ እግዚኣብሔር ፡ ለሙሴ ፡ ከመ ፡ ይትዋሰቡ ፡ ምስለ ፡ ዘመዶሙ ፡ በበ ፡ አብያተ ፡ አበዊሆሙ ፡ ወኢይትዋሰቡ ፡ እምባዕድ ፡ ዘመድ ፨ ፨ ፨ ፨ ፨ ፨
=== chapter 71 ===
[፸፩ ፡ በእንተ ፡ ማርያም ፡ ወለተ ፡ ዳዊት ።]
ወበእንተዝኬ ፡ ተዐውቀ ፡ ከመ ፡ ማርያም ፡ ወለተ ፡ ዳዊት ፡ ይእቲ ፡ ወዮሴፍኒ ፡ ወልደ ፡ ዳዊት ፡ ውእቱ ፤ ወበእንተዝ ፡ ተፍኅረት ፡ ማርያም ፡ ለዮሴፍ ፡ ዘመዳ ፡ በከመ ፡ ተብህለ ፡ በወንጌል ፡ ኦዮሴፍ ፡ ወልደ ፡ ዳዊት ፡ ኢትፍራህ ፡ ነሢኦታ ፡ ለምርያም ፡ ፍኅርትከ ፡ እስመ ፡ ዘይትወለድ ፡ እምኔሃ ፡ እመንፈስ ፡ ቅዱስ ፡ ቃለ ፡ እግዚኣብሔር ፡ ውእቱ ፤ ወተወልደ ፡ እምኔሃ ፡ እግዚኣብሔር ፡ ቃል ፡ ብርሃን ፡ ዘእምብርሃን ፡ አምላክ ፡ ዘእምአምላክ ፡ ወልድ ፡ እምአብ ፡ ዘመጽአ ፡ ወአድኀነ ፡ ፍጥረቶ ፤ እምእደ ፡ ሲኦል ፡ ወእምሰይጣንወእሞት ፡ ባልሐነ ፡ ለኵልነ ፡ እለ ፡ አመነ ፡ ቦቱ ፡ ሰሐበነ ፡ ኀበ ፡ አቡሁ ፡ ወአዕረገነ ፡ ውስተ ፡ ሰማያት ፡ መንበሩ ፡ ከመ ፡ ንኩን ፡ መዋርስቲሁ ፤ እስመ ፡ ውእቱ ፡ መፍቀሬ ፡ ሰብእ ፡ ውእቱ ፡ ወሎቱ ፡ ይደሉ ፡ ስብሐት ፡ እስከ ፡ ለዓለም ፡ አሜን ፨ ፨ ፨ ፨ ፨
=== chapter 72 ===
[፸፪ ፡ በእንተ ፡ ንጉሠ ፡ ሮምሂ ።]
ወበእንተ ፡ ንጉሠ ፡ ሮምሂ ፡ ንዌጥን ፡ ንንግርክሙ ፡ ዘሰማዕነ ፡ ወዘረከብነ ፡ ጽሑፈ ፡ ዘርኢነ ። መንግሥተ ፡ ሮምሰ ፡ ለያፌት ፡ ወልደ ፡ ኖሕ ፡ ኮነት ፡ ክፍሉ ፡ ወመንግሥቱ ፤ ወእንዘ ፡ ይነብሩ ፡ ገብሩ ፡ አህጉረ ፡ ዐበይተ ፡ ዓሥሩ ፡ ወክልኤ ፡ ወእለ ፡ የዐብያ ፡ አህጒረ ፡ መንግሥቶሙ ፡ ዳርዮስ ፡ ሐነጸ ፡ አንጦክያ ፡ ወዲርስያ ፡ ወባርቶንያ ፡ ወሮምያ ፡ ወይነብሩ ፡ ህየ ፡ እለ ፡ ነግሡ ። ወቊስጥንጥንያ ፡ እምድኅረ ፡ ክርስቶስ ፡ ሐነጸ ፡ ቈስጠንጢኖስ ፡ ንጉሥ ፡ በስሙ ፡ ሶበ ፡ አስተርአዮ ፡ ትእምርተ ፡ መስቀል ፡ በውስተ ፡ ፀብእ ፡ በአምሳለ ፡ ከዋክብት ፡ ጽሑፋን ፡ ውስተ ፡ ሰማይ ፡ ወድኅነሂ ፡ እምእደ ፡ ፀሩ ፤ ወእምአሜሃ ፡ ረሰዩ ፡ ማኅደሮሙ ፡ ህየ ፡ ነገሥተ ፡ ሮም ። ወውእቱ ፡ ዳርዮስ ፡ ኮነ ፡ ዘርኡ ፡ ብዙኀ ፡ ወእምዳርዮስ ፡ እስከ ፡ መዋዕለ ፡ ሰሎሞን ፡ ኮኑ ፡ ፲ወ፰ ፡ ትውልድ ። እምዘርአ ፡ ዚአሁ ፡ ተወልደ ፡ ብእሲ ፡ ዘስሙ ፡ ዘንበሬስ ፡ ወገብረ ፡ በጥበብ ፡ መጽሐፈ ፡ አስጠሎባ ፡ ወረሰየ ፡ ከዋክብተ ፡ ወመዳልወ ፡ ፀሐይ ፤ ወርእየ ፡ ዘደኃሪ ፡ ከመ ፡ ኢትነብር ፡ መንግሥት ፡ ኀቤሆሙ ፡ ለደቂቀ ፡ ያፌት ፡ አላ ፡ ትፈልስ ፡ ኀበ ፡ ዘርአ ፡ ዳዊት ፡ ነገደ ፡ ሴም ። ወሶበ ፡ ርእየ ፡ ከመዝ ፡ ለአከ ፡ ኀበ ፡ ዳዊት ፡ ንጉሥ ፡ ወይቤ ፡ ንሣእአ ፡ ወለትየ ፡ ለወልድከ ፤ ወነሥኣ ፡ ዳዊት ፡ ንጉሥ ፡ ወወሀቦ ፡ ለሰሎሞን ፡ ወልዲ ፤ ወወለደ ፡ እምኔሃ ፡ ወሰመዮ ፡ አድራሚ ። ወሞተ ፡ ውእቱ ፡ ቀዳሚ ፡ ወነግሠ ፡ ባልጠሶር ፡ ዘእምአዝማዲሁ ፡ ወኀጥአ ፡ ተባዕተ ፡ ውሉደ ፡ ዘይነግሥ ፡ ድኅሬሁ ፡ ዲበ ፡ መንበሩ ፤ ወይቀንእ ፡ ከመ ፡ ኢይንግሡ ፡ ድኅሬሁ ፡ ደቂቀ ፡ አቡሁ ። ወለአከ ፡ ኀበ ፡ ሰሎሞን ፡ ንጉሥ ፡ ጽሒፎ ፡ እንዘ ፡ ይብል ፡ ሰላምአ ፡ ለዕበየ ፡ መንግሥትከ ፡ ወለጥበብከ ፡ ክብርት ፤ ወይእዜኒአ ፡ ሀበኒአ ፡ ወልድከአ ፡ ዘኣነግሥአ ፡ ላዕለ ፡ ሀገረ ፡ ሮምያአ ፤ እስመ ፡ አንሰ ፡ ስእንኩአ ፡ ወሊደ ፡ ተባዕት ፡ ዘእንበለ ፡ ፫ ፡ አዋልድ ፡ ወእሁቦ ፡ እምአዋልድየ ፡ ዘፈቀደ ፡ ወእሁቦ ፡ መንበርየ ፡ ወይከውን ፡ ንጉሠ ፡ ውእቱ ፡ ወዘርኡ ፡ እምድኅሬሁ ፡ ውስተ ፡ ሀገረ ፡ ሮምያ ፡ እስከ ፡ ለዓለም ፡ ወሶበ ፡ አንበባ ፡ ለይእቲ ፡ ክርታስ ፡ ንጉሥ ፡ ሰሎሞን ፡ ኀለየ ፡ እንዘ ፡ ይብል ፡ ለእመ ፡ ከላእክዎ ፡ ወልድየ ፡ ይልእክ ፡ ኀበ ፡ ንጉሠ ፡ ሠረቅ ፡ ወይሁቦ ፡ ወልዶ ፡ ወትበጥል ፡ እንተ ፡ መከርኩ ፤ ወይእዜሰ ፡ እሁቦ ። ወመከረ ፡ ምስለ ፡ መማክርቲሁ ፡ ዘቤተ ፡ እስራኤል ፡ ወይቤሎሙ ፡ እስመ ፡ ወሀብነ ፡ ወልደነ ፡ ወደቂቀነ ፡ ለብሔረ ፡ ኢትዮጵያ ፡ ወኮነ ፡ በህየ ፡ መንግሥት ፡ ለእስራኤል ፤ ወይእዜኒ ፡ ከመ ፡ ይኩን ፡ ለነ ፡ ሣልስ ፡ መንግሥት ፤ ለሀገረ ፡ ሮሜ ፡ ወአነሂ ፡ እፌንዎ ፡ ለአርዳሚስ ፡ ወልድየ ፡ ዘይንእስ ፤ ወአንትሙኒ ፡ ኢታስተአክዩኒ ፡ በእንተ ፡ ዘቀዲሙ ፡ ዘነሣእክዎሙ ፡ ለደቂቅክሙ ፡ እስመ ፡ ይከውን ፡ ብፅዐ ፡ ለእግዚኣብሔር ፡ በእንተ ፡ ዘአእመሩ ፡ ስሞ ፡ ሰብአ ፡ ኢትዮጵያ ፡ ወኮንዎ ፡ ሕዝቦ ፤ ወከማሁ ፡ ሰብአ ፡ ሮምኒ ፡ ለእመ ፡ ወሀብኖሙ ፡ ደቂቅነ ፡ ይከውኑ ፡ ሕዝበ ፡ እግዚኣብሔር ፡ ወለነኒ ፡ ይትወሀብ ፡ ለነ ፡ ስም ፡ በተብህሎ ፡ ወበተሰምዮ ፡ ሕዝበ ፡ እግዚኣብሔር ፤ ነሥኡ ፡ መንግሥተ ፡ ኢትዮጵያ ፡ ወመንግሥተ ፡ ሮምያ ፡ ሕዝበ ፡ እስራኤል ፤ ወሀቡ ፡ ከመ ፡ ቀዳሚ ፡ ደቂቅክሙ ፡ መንእሳነ ፤ ወማእከላውያንሰ ፡ ይቁሙ ፡ ውስተ ፡ ሀገርነ ፡ ወተንሥኡ ፡ ወመከሩ ፡ ወገብኡ ፡ ወይቤልዎ ፡ ንንግሮ ፡ ለእግዚእነ ፡ ንጉሥ ፡ ዘንተ ፡ ነገረ ፡ ወይግበር ፡ ፈቃዶ ። ወይቤሎሙ ፡ አስምዑኒ ፡ ዘትብሉ ። ወይቤልዎ ፡ ነሣእከ ፡ መላህቅተ ፡ ቤትነ ፡ ወይእዜኒ ፡ ንሣእ ፡ እምእለ ፡ ይቴሐቱ ፡ ደቂቆሙ ፡ መንእሳነ ፤ ወሠምረ ፡ በዝንቱ ፡ ምክር ፡ ወገብረ ፡ ሎሙ ፡ በከመ ፡ ፈቀዲ ፡ ወሤሞ ፡ ለአድራሚ ፡ ወልዲ ፡ ወነሥአ ፡ እምእለ ፡ ይቴሐቱ ፡ መኳንንተ ፡ ቤተ ፡ እስራኤል ፡ ወረከቦ ፡ ዕፅ ፡ በስመ ፡ አቡሁ ፡ ሰሎሞን ፡ ወወሀብዎ ፡ ካህነ ፡ እምነገደ ፡ ሌዋዊያን ፡ ዘስሙ ፡ አኪሚሔል ፡ ወአጽዐንዎ ፡ ዲበ ፡ በቅለ ፡ ንጉሥ ፡ ወይቤልዎ ፡ ባሕ ፡ ሕያው ፡ አበ ፡ ነጋሢ ፤ ወይቤሉ ፡ ኵሉ ፡ ሕዝብ ፡ ርቱዕ ፡ ይደልዎ ። ወቀብእዎ ፡ ቅብአ ፡ መንግሥት ፡ ዕፍረተ ፡ ወአዘዝዎ ፡ ይዕቀብ ፡ ኵሎ ፡ ሕገ ፡ መንግሥት ፡ ወአምሐልዎ ፡ ከመ ፡ ኢያምልክ ፡ ባዕደ ፡ አማልክተ ፡ ዘእንበለ ፡ አምላከ ፡ እስራኤል ፤ ወባረክዎ ፡ በከመ ፡ ባረክዎ ፡ ለዳዊት ፡ እኁሁ ፡ ወትእዛዘኒ ፡ በከመ ፡ አዘዝዎ ፡ ከማሁ ፡ አዘዝዎ ፡ ለአድራሚ ፡ ወአስተፋነውዎ ፡ እስከ ፡ ሐይቀ ፡ ባሕር ፨ ፡ ወጸሐፈ ፡ ወለአከ ፡ እንዘ ፡ ይብል ፡ ንጉሥ ፡ ሰሎሞን ፡ ሰላምአ ፡ ለበልጠሶር ፡ ንጉሠ ፡ ሮሜ ፤ ንሣእአ ፡ ወልድየ ፡ አድራሚ ፡ ወሀቦ ፡ ወለተከ ፡ ወአንግሦ ፡ ውስተ ፡ ሀገረ ፡ ሮምያ ፤ እስመ ፡ አፍቀርከ ፡ ንጉሠ ፡ እምዘርአ ፡ ዳዊት ፡ አቡየ ፡ ወአነሂ ፡ ገበርኩ ፡ ፈቃደከ ፡ ወለአኩ ፡ ለከ ፡ ፲ወ፬ ፡ መኳንንቲሁ ፡ በየማኑ ፡ ወበፀጋሙ ፡ እለ ፡ የዐቅቡ ፡ ሕገ ፡ ምስሌሁ ፡ ወይትኤዘዙ ፡ ለከ ፡ በከመ ፡ ፈቀድከ ፨ ፡ ወበጽሑ ፡ ህየ ፡ ምስለ ፡ ልኡካነ ፡ ንጉሠ ፡ ሮሜ ፡ ምስለ ፡ ብዙኅ ፡ ክብር ፡ ወኵሉ ፡ ንዋይ ፡ ዘይትፈቀድ ፡ ለብሔረ ፡ ሮሜ ። ወበጽሑ ፡ ሀገረ ፡ ሮሜ ፡ ኀበ ፡ በልጣሶር ፡ ንጉሥ ፡ ወነገርዎ ፡ ኵሎ ፡ ዘለአኮሙ ፡ ወአወፈይዎ ፡ ለወልዲ ፨ ፡ ወተፈሥሐ ፡ ፈድፋደ ፡ በልጣሶር ፡ ወወሀቦ ፡ ወለቶ ፡ እንተ ፡ ትልህቅ ፡ እንተ ፡ ስማ ፡ አድሎንያ ፡ ወገብረ ፡ ዐቢየ ፡ ከብካበ ፡ በከመ ፡ ዕበየ ፡ መንግሥቱ ፡ ወሤሞ ፡ ውስተ ፡ ኵሉ ፡ ሀገረ ፡ ሮምያ ፤ ወባረኮ ፡ ላዕሌሁ ፡ ወተፈሥሐ ፡ ቦቱ ፡ እስመ ፡ ሠናይ ፡ ላሕዩ ፡ ወመንክር ፡ ጥበቢሁ ፡ ወጽኑዕ ፡ ፈድፋደ ፡ በኀይሉ ፨ ፡ ወእምዝ ፡ አሐተ ፡ ዕለተ ፡ ፈቀደ ፡ ያመክሮ ፡ በውስተ ፡ ፍትሕ ፡ ሶበ ፡ መጽአ ፡ ኀቤሁ ፡ ባዕለ ፡ ዐጸደ ፡ ወይን ፡ ወከልሐ ፡ ሎቱ ፡ እንዘ ፡ ይብል ፡ እግዚእየ ፡ ተዐደወኒ ፡ ቃልከ ፡ ወአኅለቀ ፡ ዐጸደ ፡ ወይንየ ፡ አርሳኒ ፡ ወልደ ፡ ዮዳድ ፡ በአባግዒሁ ፤ ወነዋ ፡ ውስተ ፡ ቤትየ ፡ አኀዝኩ ፡ አባግዒሁ ፤ ምንተ ፡ ትፈትሕ ፡ ላዕሌየ ። ወመጽአ ፡ ባዕለ ፡ አባግዕኒ ፡ ኀበ ፡ ንጉሥ ፡ ወከልሐ ፡ እንዘ ፡ ይብል ፡ አግብእ ፡ ሊተ ፡ አባግዕየ ፤ እስመ ፡ ይነሥኦን ፡ በእንተ ፡ ዘቦአ ፡ ውስተ ፡ ዐጸደ ፡ ወይኑ ። ወይቤሎሙ ፡ ንጉሥ ፡ ሖሩ ፡ ተዋቀሱ ፡ በኀበ ፡ ንጉሥክሙ ፡ አድራሚ ፡ ወዘይቤለክሙ ፡ ግበሩ ። ወሖሩ ፡ ወተዋቀሱ ፡ በቅድሜሁ ፤ ሐተቶ ፡ ለቀዳማዊ ፡ እንዘ ፡ ይብል ፡ እፎ ፡ በልዐ ፡ አባግዕ ፡ ዐጸደ ፡ ወይን ፤ ቈጽለኑ ፡ ወሚመ ፡ አዕጹቀ ፡ ወሚመ ፡ ቆዐ ፡ ወሚመ ፡ ሥርወ ፡ እምጒንዲ ። አውሥአ ፡ ወይቤሎ ፡ ባዕለ ፡ ዐጸደ ፡ ወይን ፡ በልዐ ፡ አዕጹቂሁ ፡ ምስለ ፡ አዕጹቀ ፡ ቆዑ ፡ ወኢያትረፈ ፡ ዘእንበለ ፡ አሕሩጊሁ ፡ ምስለ ፡ ጒንዲ ። ወካዕበ ፡ ሐተቶ ፡ ለባዕለ ፡ አባግዕ ፡ ወይቤሎ ፡ አማንኑ ፡ ከመዝ ። ወአውሥኦ ፡ ወይቤሎ ፡ ባዕለ ፡ አባግዕ ፡ እግዚእየ ፡ በልዐ ፡ አዕጹቀ ፡ ምስለ ፡ ቊጸሊሁ ። ወአውሥአ ፡ አድራሚ ፡ ወይቤ ፡ ወዝንቱሰ ፡ ይብል ፡ በልዓ ፡ ቆዐ ፤ አማንኑ ፡ ከመዝ ። አውሥአ ፡ ወይቤ ፡ ባዕለ ፡ አባግዕ ፡ አልቦ ፡ እግዚእየ ፡ ዘእንበለ ፡ ይኩን ፡ ቆዐ ፡ ሠርጸ ፡ ጽጌ ፡ በልዐ ፨ ፨ ፨ ፨ ፨ ፨
=== chapter 73 ===
[፸፫ ፡ በእንተ ፡ ቀዳሜ ፡ ፍትሑ ፡ ለአድራሚ ፡ ንጉሠ ፡ ሮም ።]
ወይቤሎሙ ፡ ስምዑኒ ፡ ዘእፈትሕ ፡ ለክሙ ፤ ለእመ ፡ ሠረዋ ፡ አሕሩገ ፡ ጒንዲ ፡ ሥረዎን ፡ ወኵሎን ፡ ለከ ፡ ወለእመ ፡ በልዓ ፡ ቈጽለ ፡ አዕጹቅ ፡ ወጽጌ ፡ ቆዕ ፡ ንሣእ ፡ ቅርፅ ፡ ፀምሮን ፡ ወደቂቆን ፡ እለ ፡ ኢተበኵራ ፤ ወእለሰ ፡ ተበኵራ ፡ ወወለዳ ፡ ኅድግ ፡ ሎቱ ፡ ለባዕለ ፡ አባግዕ ። ወአንከርዎ ፡ ኵሎሙ ፡ እለ ፡ ሰምዑ ፡ አውሥኦተ ፡ ፍትሑ ። ወይቤ ፡ በልጣሶር ፡ በአማን ፡ ዝንቱ ፡ ፍትሕ ፡ ፍትሐ ፡ ሕዝበ ፡ አምላከ ፡ እስራኤል ፡ ወእምይእዜሰ ፡ ለዘሂ ፡ ይትዋቀሥ ፡ ፍታሕ ፡ ወለዘሂ ፡ ይፀብእ ፡ ፅባእ ፡ ወለዘሂ ፡ ይትኴነን ፡ ኰንን ፡ ወለዘሂ ፡ የሐዩ ፡ አሕዩ ፡ ወለኵሉ ፡ በከመ ፡ ፍትሑ ፡ ፍታሕ ፡ ወንሥኣ ፡ ለዛቲ ፡ ሀገር ፡ ለከ ፡ ወለዘርእከ ፡ እምድኅሬከ ። ወሠምሩ ፡ ኵሎሙ ፡ ሰብአ ፡ ሀገረ ፡ ሮሜ ፡ ወአንገሥዎ ፡ ላዕሌሆሙ ፡ ወተፈሥሑ ፡ ቦቱ ፡ ዐቢየ ፡ ፍሥሓ ፤ እስመ ፡ በፈቃዶሙ ፡ ወበፈቃደ ፡ እግዚኣብሔር ፡ ኮነ ፡ ከመዝ ። ወአኀዞ ፡ ፈፀንት ፡ ለበልጣሶር ፡ ወእምአሜሃ ፡ ይልእኮ ፡ ኀበ ፡ ፀብእ ፡ ወውስተ ፡ ኵሉ ፡ ዘፈቀደ ፡ ወውእቱሰ ፡ ይነብር ፡ ሀገረ ። ወእምድኅረዝ ፡ ሞተ ፡ በልጣሶር ፡ ወአርትዐ ፡ መንግሥተ ፤ ወኮነት ፡ ሀገረ ፡ ሮሜ ፡ ለአድራሚ ፡ ለትውልደ ፡ ትውልዲ ፡ እስመ ፡ በፈቃደ ፡ እግዚኣብሔር ፡ ተውህበ ፡ ኵሉ ፡ መንግሥተ ፡ ዓለም ፡ ለዘርአ ፡ ሴም ፡ ወግብርናት ፡ ለዘርአ ፡ ካም ፡ ወጒዕትያ ፡ ለዘርአ ፡ ያፌት ፨ ፨ ፨ ፨ ፨ ፨ ፨ ፨ ፨
=== chapter 74 ===
[፸፬ ፡ በእንተ ፡ ንጉሠ ፡ ምድያም ።]
ንጉሠ ፡ ምድያምሂ ፡ ዘርአ ፡ ሤም ፡ ውእቱ ፤ እስመ ፡ ዘርአ ፡ ይስሐቅ ፡ ዔሳው ፡ ውእቱ ፡ ዘወፅአ ፡ እምከርሠ ፡ እሙ ፡ እንዘ ፡ ይእኅዞ ፡ ያዕቆብ ፡ በሰኰናሁ ፡ ወሄደ ፡ ብኵርናቱ ፡ ለዔሳው ፡ በእንተ ፡ ተብሲለ ፡ ብርስን ፡ ወበስመ ፡ ጽዕለቱ ፡ ተሰምየ ፡ ስመ ፡ መንግሥቱ ፡ እስመ ፡ ኤዶም ፡ ትርጒምናሁ ፡ ብርስን ፡ ብሂል ፤ ወበእንተዝኬ ፡ ተሰምዩ ፡ ዘርአ ፡ ዔሳው ፡ ኤዶማውያነ ፡ እስመ ፡ በስጥመተ ፡ ከርሡ ፡ ኀደገ ፡ ወተስዕረ ፡ እምብኵርናተ ፡ ዘርአ ፡ ሴም ፡ እስመ ፡ ለእመ ፡ ኢተአስረት ፡ ነፍስ ፡ በትዕግሥት ፡ ያወርዶ ፡ ለኵሉ ፡ ዘሥጋ ፡ ፍትወተ ፡ ከርሥ ፡ ውስተ ፡ መሥገርት ፤ እስመ ፡ ሥጋሰ ፡ ሥሥዕት ፡ ወነፍስሰ ፡ እስርት ፡ በትዕግሥት ፤ ወበእንተዝ ፡ ይቤ ፡ ጳውሎስ ፡ ዘኢትፈቱ ፡ ነፍስ ፡ ትፈቱ ፡ ሥጋ ፡ ወዘኢትፈቱ ፡ ሥጋ ፡ ትፈቱ ፡ ነፍስ ፡ ወክልኤሆን ፡ ይትኣበያ ፡ በበይናቲሆን ። ለእመ ፡ አጥብዐ ፡ ብእሲ ፡ ወኀብረት ፡ ነፍሱ ፡ ምስለ ፡ ፍትወተ ፡ ሥጋሁ ፡ ይከውን ፡ ከመ ፡ ዲያብሎስ ፤ ወለእመሰ ፡ አሰረ ፡ ሥጋሁ ፡ ወኀብረ ፡ ምስለ ፡ ፍትወተ ፡ ነፍሱ ፡ ይከውን ፡ ከመ ፡ ክርስቶስ ፤ እስመ ፡ ኵሉ ፡ ብእሲ ፡ ዘየሐውር ፡ በፍኖት ፡ ርትዕት ፡ ርእሱ ፡ ክርስቶስ ፡ ይቤሉ ፡ ሐዋርያት ። ወእግዚእነሂ ፡ ይቤሎሙ ፡ ለአርዳኢሁ ፡ በመንፈስ ፡ ሖሩ ፡ ወፍትወተ ፡ ሥጋክሙ ፡ ኢትግበሩ ፤ ወዘንተ ፡ ሰሚዖሙ ፡ ኀደጉ ፡ ኵሎ ፡ ፍትወተ ፡ ሥጋ ፡ ወይቤልዎ ፡ ለእግዚእነ ፡ ናሁኬ ፡ ኀደግነ ፡ ኵሎ ፡ ወተለውናከ ፡ ምንት ፡ ዐስብነ ። ወይቤሎሙ ፡ መድኀኒነ ፡ እስመ ፡ ተመሰልክሙ ፡ በሥጋ ፡ ከመ ፡ መላእክት ፡ ወትገብሩ ፡ ኀይለ ፡ ከማየ ፤ ወናሁ ፡ አባሕኩክ ፡ ሙ ፡ ታንሥኡ ፡ ምዉታነ ፡ ወወሀብኩክሙ ፡ ስልጣነ ፡ ትፈውሱ ፡ ድውያነ ፡ ወትኪዲ ፡ ኵሎ ፡ ኀይለ ፡ ጸላኢ ፤ ወበዳግም ፡ ምጽአትየ ፡ ትኴንንዎሙ ፡ ወታስተኀፍርዎሙ ፡ ለ፲ወ፪ ፡ ነገደ ፡ እስራኤል ፡ በእንተ ፡ ዘኢአምኑ ፡ ኪያየ ፡ ወአስተሐቀሩ ፡ ስብሐትየ ፤ ወለእለሰ ፡ የአምኑ ፡ ብየ ፡ ታዐብይዎሙ ፡ ወታስተፌሥሕዎሙ ፡ ምስሌክሙ ፡ በመንግሥትየ ፨ ፨ ፨ ፨ ፨
=== chapter 75 ===
[፸፭ ፡ በእንተ ፡ ንጉሠ ፡ ባቢሎን ።]
ወንጉሠ ፡ ባቢሎንሂ ፡ ዘርአ ፡ ሴም ፡ ውእቱ ፤ ወንነግረክሙ ፡ ጥዩቀ ፡ ከመ ፡ ዘርአ ፡ ሴም ፡ ንጉሠ ፡ ባቢሎን ። ወሀሎ ፡ በውእቱ ፡ መዋዕል ፡ በመንግሥተ ፡ ምናሴ ፡ ንጉሠ ፡ እስራኤል ፡ ወሀሎ ፡ ፩ ፡ ብእሲ ፡ ዘስሙ ፡ ከርሚን ፡ ፈራሄ ፡ እግዚኣብሔር ፡ ወይገብር ፡ ብዙኀ ፡ ምጽዋተ ፡ ለነዳያነ ፡ እስራኤል ፤ ወሶበሂ ፡ ይሠውዕ ፡ ለቤተ ፡ እግዚኣብሔር ፡ ይገብር ፡ በንጹሕ ፡ ወዓሥራተሂ ፡ ይሁብ ፡ አመክዒቦ ፡ ወበኵሉ ፡ ፍኖቱ ፡ ሠናይ ፡ ወአልቦ ፡ ወኢምንተኒ ፡ እኩየ ፡ በቅድሜሁ ፤ ወሰይጣንሰ ፡ ጸላኤ ፡ ሠናያት ፡ ይቀንእ ፡ ላዕሌሁ ፡ በዘ ፡ ርእየ ፡ ሠናየ ፡ ፍኖቶ ። ወውእቱሰ ፡ ብእሲ ፡ ባዕል ፡ ጥቀ ፡ አግማለ ፡ ወአፍራሰ ፡ ወመራዕየ ፡ እንስሳ ፡ ወአልህምተ ፡ ወርቀ ፡ ወብሩረ ፡ ወአልባሰ ፡ ክቡረ ፤ ወይሴሲ ፡ በቅለ ፡ ንጉሥ ፡ በአርማቴም ፡ ሀገረ ፡ እስራኤል ። እስመ ፡ ደወሉሰ ፡ ብሔረ ፡ ይሁዳ ፡ ክፍለ ፡ አበዊሁ ፤ ወበእንተ ፡ ፍቅረ ፡ ንዋይ ፡ ሖረ ፡ ውስተ ፡ አርማቴም ፡ ከመ ፡ ይንበር ፡ ወአንበርዎ ፡ እስራኤል ፡ በእንተ ፡ ብዕሉ ፡ እስመ ፡ ቦ ፡ ብዙኀ ፡ ንዋየ ፡ ወይፈርህ ፡ መኳንንተ ፨ ፨ ፨
=== chapter 76 ===
[፸፮ ፡ በእንተ ፡ ሰማዕተ ፡ ሐሰት ።]
ወሀሎ ፡ ፩ ፡ ፀዋግ ፡ እምዘርአ ፡ ብንያም ፡ ዘስሙ ፡ ብንያስ ፡ ዘይስሕብ ፡ በቅለ ፡ ንጉሠ ፡ እስራኤል ፡ ወይሴስዮ ፡ ከርሚን ፡ ምስለ ፡ በቅለ ፡ ንጉሥ ፡ ምናሴ ። ወእምጎሩ ፡ ለከርሚን ፡ ሀለዉ ፡ እለ ፡ ይቀንኡ ፡ ላዕሌሁ ፡ በእንተ ፡ ሣዕር ፡ ወዐዘቅት ፡ ወበእንተ ፡ ብዝኀ ፡ እንስሳ ፡ ወአግብርት ፤ እስመ ፡ ይእቲ ፡ ምድር ፡ ርስተ ፡ አበዊሆሙ ፡ ይእቲ ፡ ወበእንተ ፡ ዝንቱ ፡ ይፈቅዲ ፡ ያርሕቅዎ ፡ እምሀገሮሙ ። ወይዋሕይዎ ፡ በእኪት ፡ ለብንያስ ፡ ሰሓቤ ፡ በቅለ ፡ ንጉሥ ፡ ወሐመይዎ ፡ ወይቤልዎ ፡ ይፀርፍ ፡ ዝንቱ ፡ ከርሚን ፡ ፀረፈ ፡ ላዕለ ፡ ንጉሠ ፡ እስራኤል ፡ መሲሑ ፡ ለእግዚኣብሔር ፡ እንዘ ፡ ይብል ፡ ዝንቱ ፡ ንጉሥ ፡ ኢኮነ ፡ ወልደ ፡ አግዓዚት ፡ አላ ፡ ወልደ ፡ አመት ፡ አረጋዊት ፡ እንተ ፡ ተሣየጥዋ ፡ በክልኤ ፡ መስፈርተ ፡ ቆሮስ ፡ ለግብረ ፡ ማኅረጽ ፡ ወግንፋል ፤ ወአንተ ፡ ተዋቀሦ ፡ በኀበ ፡ ንጉሥ ፡ ወዝልፎ ፡ እስመ ፡ ንከውነከ ፡ ስምዐ ፡ በቅድመ ፡ ንጉሥ ፡ ወኢናኀፍረከ ። ወአቀሙ ፡ ኪዳነ ፡ ወመሐሉ ፡ ሎቱ ፡ ከመ ፡ ይኩኑ ፡ ስምዐ ፡ ላዕሌሁ ፡ ለከርሚን ፡ በሐሰት ፡ ዘኢተናገረ ፡ በልሳኑ ፡ ወውስተ ፡ ኅሊናሁኒ ፡ ጥቀ ፡ ኢዐርገ ፡ ውእቱ ፡ ነገር ፨ ፡ ወሖረ ፡ ብንያስ ፡ ኀበ ፡ እግዚኡ ፡ ንጉሥ ፡ ወነገሮ ፡ ዘንተ ፡ ኵሎ ። ወይቤሎ ፡ ቦኑ ፡ ዘሰምዐ ፡ ምስሌከ ። ወአውሥአ ፡ ወይቤ ፡ እወ ፡ ሀለዉ ፡ እለ ፡ ሰምዑ ፡ ፪ ፡ ዐበይተ ፡ እስራኤል ፡ ዘእምአርማቴም ። ወይቤ ፡ ንጉሥ ፡ ሖርኬ ፡ አምጽኦሙ ፡ በኅቡእ ፡ ከመ ፡ ንጠይቆሙ ፡ ለእመ ፡ የኀብሩ ፡ ምስለ ፡ ቃልከ ፡ ወንምትሮ ፡ ርእሶ ፡ ወሖረ ፡ ወአምጽኦሙ ፡ ለዘርዮስ ፡ ወካርሜሎስ ፡ ነገደ ፡ ምነሴ ፡ እስመ ፡ ምስሌሆሙ ፡ ተካየደ ፡ ከመ ፡ ኢያኅፍርዎ ፡ በቅድመ ፡ ንጉሥ ፡ በእንተ ፡ ስምዐ ፡ ሐሰቶሙ ። ወበባሕቲቶሙ ፡ መከሩ ፡ በፍኖት ፡ እንዘ ፡ ይብሉ ፡ ሶበ ፡ ነገርናሁ ፡ ለንጉሥ ፡ ለእመ ፡ ተጠየቀነ ፡ በበ ፡ ባሕቲትነ ፡ ከመ ፡ ያእምር ፡ ጽድቀ ፡ ቃልነ ፡ ወይብለነ ፡ በአይቴ ፡ ሰማዕክሙ ፡ ዘንተ ፡ ቃለ ፡ ንበሎ ፡ በባሕቲትነ ፡ እንዘ ፡ ንሰቲ ፡ ወይነ ፡ ምስሌሁ ፤ ወሶበ ፡ ይቤለነ ፡ ምንት ፡ ዕለቱ ፡ ንበሎ ፡ አመ ፡ ሠረቀ ፡ ወርኅ ፡ እንተ ፡ ኀለፈት ፡ ኀሙስ ፤ ወሶበ ፡ ይቤለነ ፡ አየ ፡ ጊዜ ፡ ንበሎ ፡ በ፱ ፡ ሰዐት ፡ እንዘ ፡ ይነብር ፡ ማእከሌነ ፡ ወንሰቲ ፡ ወይነ ፡ ኅቡረ ፤ ወሶበ ፡ ተስእለነ ፡ እንዘ ፡ ይብል ፡ በምንት ፡ ሰተይክምዎ ፡ ወአይቴ ፡ ነበርክሙ ፡ ንበሎ ፡ በቀናዲል ፡ ዘወርቅ ፡ ወምንባሪነሂ ፡ ውስተ ፡ ጽርሕ ፡ ኅቡረ ፡ ውስተ ፡ ምፅንጋ ፡ ዕ ። ወበዛቲ ፡ እኪት ፡ ምክር ፡ ኀብሩ ፡ በውስተ ፡ ፍኖት ። ወሶበ ፡ በጽሑ ፡ ኀበ ፡ ንጉሥ ፡ አብጽሖሙ ፡ ብንያስ ፡ ወሐተቶሙ ፡ ንጉሥ ፡ ወነገርዎ ፡ ኵሎ ፡ ምክረ ፡ ሐሰቶሙ ፡ ወተስእሎሙ ፡ በከመ ፡ መከሩ ፡ በፍኖት ፡ ጊዜሁ ፡ ወዕለቶ ፡ ወሰዐቶ ፡ ወመስቴሆሙ ፡ ወመናብርቲሆሙ ፡ ወነገርዎ ። በከመ ፡ አዘዘ ፡ እግዚኣብሔር ፡ ይጠይቁ ፡ ፍትሐ ፡ ነገሥት ፡ ወመኳንንት ፡ ወኵሎሙ ፡ እለ ፡ ይነብሩ ፡ በልዑል ፡ መንበር ፡ በከመ ፡ አዘዞ ፡ እግዚኣብሔር ፡ ለሙሴ ። ወዘንተ ፡ ሶበ ፡ ተጠየቀ ፡ ንጉሥ ፡ ጸውዖ ፡ ለሊቀ ፡ ሐራሁ ፡ ዘይቀውም ፡ ቅድሜሁ ፡ ወይቤሎ ፡ ሖር ፡ ነግሀ ፡ በጽባሕ ፡ ወዕግታ ፡ ለቤተ ፡ ካርሚን ፡ ወኢያምሥጥከ ፡ ፩ ፡ እምእሊአሁ ፡ ኢተባዕት ፡ ወኢአንስት ፤ ቅትል ፡ በአፈ ፡ ኀጺን ፤ ወለሊሁኒ ፡ ምትር ፡ ርእሶ ፡ ወአምጽእ ፡ ኵሎ ፡ ንዋዮ ፡ ወበርበሮ ፡ ወእንስሳሁ ፡ ወወርቆ ፡ ወብሩሮ ። ወተፈሥሑ ፡ ወገብኡ ፡ እሙንቱ ፡ ሐሳውያን ፡ ውስተ ፡ ሀገሮሙ ፡ ወሖሩ ፡ ውስተ ፡ ቤተ ፡ ካርሚን ፡ ወተናገርዎ ፡ በነገረ ፡ ሰላም ፡ ወይዌድስዎ ፡ ወይስሕቁ ፡ በቅድሜሁ ፡ እንዘ ፡ ውስተ ፡ ልቦሙ ፡ እኪት ፤ አሜሃኬ ፡ ተፈጸመ ፡ ላዕሌሆሙ ፡ ትንቢተ ፡ ዳዊት ፡ ዘይቤ ፡ እለ ፡ ይትናገሩ ፡ ሰላመ ፡ ምስለ ፡ ቢጾሙ ፡ ወእኩይ ፡ ውስተ ፡ ልቦሙ ፡ ሀቦሙ ፡ በከመ ፡ እከየ ፡ ምግባሮሙ ፡ ወበከመ ፡ እከየ ፡ ኅሊናሆሙ ። ወእሙንቱሰ ፡ ሰክሩ ፡ በውስተ ፡ ቤተ ፡ ከርሚን ፡ ወኖሙ ፡ ኅቡረ ፡ ምስሌሁ ። ወሶበ ፡ ኖሙ ፡ ናሁ ፡ ተፈነወ ፡ መልአከ ፡ እግዚኣብሔር ፡ ኀበ ፡ ካርሚን ፡ ወአንቅሆ ፡ ወይቤሎ ፡ ኅድግ ፡ ኵሎ ፡ ንዋየከ ፡ ወአድኅን ፡ ርእሰከ ፡ እስመ ፡ ተአዘዘ ፡ እምኀበ ፡ ምናሴ ፡ ንጉሥ ፡ ከመ ፡ ይምትሩ ፡ ርእሰከ ፤ ወንሣእ ፡ እምንዋይከ ፡ መጠነ ፡ ትክል ፡ ዘፈቀድከ ፡ ወጒይይ ፡ ውስተ ፡ ብሔረ ፡ ባዕድ ፡ እስመ ፡ ቀታሌ ፡ ነቢያት ፡ ወኀሣሤ ፡ ደመ ፡ ንጹሓን ፡ ውእቱ ፡ ምናሴ ። ወእምዝ ፡ ተንሥአ ፡ ሶቤሃ ፡ ወኀሠሠ ፡ ወርቀ ፡ አስከሬን ፡ ወነሥኣ ፡ ወአንቅሃ ፡ ለብእሲቱ ፡ ምስለ ፡ ክልኤ ፡ ደቂቁ ፡ ወካዕበ ፡ አንቅሀ ፡ አግብርቲሁ ፡ እለ ፡ ኀረየ ፡ ወአጾሮሙ ፡ ንዋየ ፡ ክብር ፤ ወወፅአ ፡ በሌሊት ፡ ወፈነዎሙ ፡ ለብእሲቱ ፡ ወለደቂቁ ፡ ምስለ ፡ ክልኤ ፡ አግብርቲሁ ፡ ይባኡ ፡ ኢየሩሳሌም ፤ ወውእቱሰ ፡ ሖረ ፡ ምስለ ፡ ክልኤ ፡ አግብርቲሁ ፡ ርሑቀ ፡ ብሔረ ፡ መጠነ ፡ ምሕዋረ ፡ ፫ ፡ አውራኅ ፡ ወበጽሐ ፡ ብሔረ ፡ ባቢሎን ፡ ወቦአ ፡ ኀበ ፡ በላዖን ፡ ንጉሠ ፡ ባቢሎን ፡ ወአብአ ፡ አምኃ ፡ ሎቱ ፡ ወነገሮ ፡ ዘከመ ፡ መጽአ ፡ ኀቤሁ ፤ ወአፍቀሮ ፡ ለባኦን ፡ ለካርሚን ፡ ወወሀቦ ፡ ማኅደረ ፡ በአግዋረ ፡ ቤተ ፡ ነጋዲሁ ፤ ወነጋዲሁሰ ፡ ሖረ ፡ ርሑቀ ፡ ብሔረ ፡ መጠነ ፡ ፫ ፡ ዓመት ፡ ወለእሉሰ ፡ እለ ፡ ሐሰዉ ፡ ስምዐ ፡ ቀተልዎሙ ፡ በውስተ ፡ ምስካብ ፡ በቤት ፨ ፡ ወአፍቀረቶ ፡ ለከርሚን ፡ ብእሲተ ፡ ነጋዲ ፡ ወተስሕተት ፡ ቦቱ ፡ ወፀንሰትእስመ ፡ እኩይ ፡ ምግባሪሆን ፡ ለአንስት ። እስመ ፡ ኀደጋ ፡ ብእሲሃ ፡ እንዘ ፡ ፅንስት ፡ ይእቲ ፡ ወወለደት ፡ ወወሀበት ፡ ለሐፃኒት ፡ ወአልሀቀት ፤ ወበካልእ ፡ ዓመት ፡ ተስሕተት ፡ ወፀንሰት ፡ እምኀበ ፡ ከርሚን ፡ እስመ ፡ ሠናይ ፡ ላሕዩ ፡ ለከርሚን ፡ ፈድፋደ ፡ በውስተ ፡ እስራኤል ። ወይእቲሰ ፡ ፈቀደት ፡ ለዘፀንሰቶ ፡ ወሊዳ ፡ ትግድፎ ፡ ውስተ ፡ ባሕር ፡ ወትጽንሖ ፡ ለነጋዲ ፡ ብእሲሃ ፡ ከመ ፡ ዘኢተስሕተት ፡ ወኢገብረት ፡ ምንተኒ ፤ በከመ ፡ ይቤ ፡ ሰሎሞን ፡ ጠቢብ ፡ ፫ ፡ የዐጽበኒ ፡ በኅሊናየ ፡ ወራብዖሙሰ ፡ ስእንኩ ፡ ጠይቆቶ ፡ አሠረ ፡ ንስር ፡ በውስተ ፡ ሰማይ ፡ ወፍኖተ ፡ አርዌ ፡ ምድር ፡ በዲበ ፡ ኰኵሕ ፡ ወፍኖተ ፡ ሐመር ፡ በዲበ ፡ ባሕር ፤ ወራብዖሙሰ ፡ ስእንኩ ፡ ጠይቆ ፡ ዘይቤ ፡ በእንተ ፡ ብእሲት ፡ እኪት ፡ እንተ ፡ ትዔምፅ ፡ ምታ ፡ ወተኀፂባ ፡ ትነብር ፡ ከመ ፡ ዘኢገብረት ፡ ወትምሕል ፡ እንዘ ፡ ትሔሱ ፨ ፡ ወአሜሃ ፡ ብእሲተ ፡ በላዖን ፡ ንጉሠ ፡ ባቢሎን ፡ ፀንሰት ፡ ወወለደት ፡ አምሳለ ፡ ንስር ፡ ዘአልቦ ፡ ክንፈ ፡ ኵለንታሁ ፡ ዖፍ ፡ ፍጹም ፤ ወጸውዐታ ፡ ለአመታ ፡ እንተ ፡ ኀርየት ፡ ወፈነወቶ ፡ ውስተ ፡ ምቅላደ ፡ መሶብ ፡ ወአዘዘታ ፡ ዘእንበለ ፡ ያእምር ፡ ፩ ፡ ትገሮ ፡ ውስተ ፡ ባሕር ። ወይእቲኒ ፡ ብእሲተ ፡ ነጋዲ ፡ በጽሐ ፡ ወሊዶታ ፡ ወወለደት ፡ ሕፃነ ፡ ተባዕተ ፡ መምሕረ ፡ ዘሠናይ ፡ ላሕዩ ፤ ወዘእንበለ ፡ ታጥብዎ ፡ ጸውዐታ ፡ ለአመታ ፡ እንተ ፡ ኀረየት ፡ ወፈነወቶ ፡ ውስተ ፡ ቀማጥረ ፡ ሳጥን ፡ ወአዘዘታ ፡ ዘእንበለ ፡ ያእምር ፡ ፩ ፡ ትውግሮ ፡ ውስተ ፡ ባሕር ፤ እስመ ፡ ፈርሀት ፡ ብእሴሃ ። ወበአሐቲ ፡ ሌሊት ፡ ወለዳ ፡ ምስለ ፡ ብእሲተ ፡ ንጉሥ ፡ ወበአፈ ፡ ጽባሕ ፡ ፈነዋ ፡ አእማቲሆን ፡ ከመ ፡ ይውግራሆሙ ፡ ውስተ ፡ ባሕር ፡ ለደቂቆን ። ወበፈቃደ ፡ እግዚኣብሔር ፡ ተራከባ ፡ እላ ፡ አእማት ፡ ዘእንበለ ፡ ይውግራሆሙ ፡ ውስተ ፡ ባሕር ፡ ወተናገራ ፡ በበይናቲሆን ፡ ወሐተተታ ፡ አመተ ፡ ንጉሥ ፡ ለአመተ ፡ ነጋዲ ፡ ወትቤላ ፡ ምንት ፡ ዘውስተ ፡ ሣጹንኪ ፤ ወአርአየታ ፡ ሕፃነ ፡ ሠናየ ፤ ወትቤላ ፡ ለምንት ፡ አምጻእኪዮ ፡ ዝየ ፤ ወትቤላ ፡ እስመ ፡ ብእሲተ ፡ እግዚእየ ፡ ስሕተት ፡ በኀበ ፡ ፩ ፡ እስራኤላዊ ፡ ወፀንሰት ፡ ወወለደት ፡ ወልደ ፡ ወአዘዘተኒ ፡ ከመ ፡ እውግሮ ፡ ውስተ ፡ ባሕር ፤ ወትቤላ ፡ አመተ ፡ ንጉሥ ፡ ለምንት ፡ ኢያልሀቀት ፡ ዘመጠነዝ ፡ ሠናይ ፡ ሕፃነ ፤ ወትቤላ ፡ እንዘ ፡ ፅንስት ፡ ይእቲ ፡ ኀደጋ ፡ ብእሲሃ ፡ ወወለደት ፡ ወአልሀቀት ፡ ወዝንቱ ፡ በአይቴ ፡ ተሐፅን ፡ ዘባዕድ ፡ ነኪር ፡ ዘርእ ። ወይእቲኒ ፡ ሐተተታ ፡ ወትቤላ ፡ ምንት ፡ ውእቱ ፡ ዘውስተ ፡ መሶብ ፤ ወትቤላ ፡ ዘንተ ፡ እግዝእትየ ፡ ወለደት ፡ ዘአልቦ ፡ አርአያ ፡ ሰብእ ፡ ላዕሌሁ ፡ አላ ፡ ይመስል ፡ ንስረ ፡ ዘአልቦ ፡ ክንፈ ፡ ወአዘዘተኒ ፡ ከመ ፡ እውግሮ ፡ ውስተ ፡ ባሕር ፤ ወይእዜኒ ፡ ሀብንዮ ፡ ለዝንቱ ፡ ወልድኪ ፡ ከመ ፡ እሰዶ ፡ ኀበ ፡ እግዝእትየ ፡ ወአንቲኒ ፡ ንሥኢ ፡ ውግርዮ ፡ ለዝንቱ ፡ ዖፍ ፡ ውስተ ፡ ባሕር ፤ ወገብራ ፡ ከማሁ ። ወወሰደት ፡ አመተ ፡ ንጉሥ ፡ ውእተ ፡ ሕፃነ ፡ ኀበ ፡ እግዝእታ ፡ ወተፈሥሐት ፡ ንግሥት ፤ ወአርድእዎ ፡ ለንጉሥ ፡ ከመ ፡ ወለደት ፡ ይእቲ ፡ ንግሥት ፡ ወልደ ፤ ወወሀብዎ ፡ ለሐፃንያን ፡ ወልህቀ ፡ በቤተ ፡ ንጉሥ ፤ ወሰመየቶ ፡ ስሞ ፡ ናቡክድናጸር ፡ በገደ ፡ ዖፍ ፡ ብሂል ፨ ፡ ወበእንተዝ ፡ ተዐውቀ ፡ ከመ ፡ ዘርአ ፡ ሴም ፡ ውእቱ ፡ ንጉሠ ፡ በቢሎን ። ወመጽአ ፡ ወነሠታ ፡ ለኢየሩሳሌም ፡ በፈቃደ ፡ እግዚኣብሔር ፡ ወፄወዎሙ ፡ ለደቂቀ ፡ እስራኤል ፡ ወአግዐዞሙ ፡ ውስተ ፡ ሀገረ ፡ ባቢሎን ፡ ምስለ ፡ ደቂቀ ፡ ደቂቁ ፡ ለምናሴ ። ወኮነ ፡ ባዕለ ፡ ጥቀ ፡ እስከ ፡ ያቀውም ፡ ሐውልተ ፡ ወርቅ ፡ በሐቅለ ፡ ባቢሎን ፡ ዘ፷ ፡ እመት ፡ ኑኁ ፡ ወ፮ ፡ እመት ፡ ግድሙ ። ወኮነ ፡ ዕቡየ ፡ ልብ ፡ ወይቤ ፡ ኣሠርቅ ፡ ፀሐየ ፡ በላዕለ ፡ ሰማይ ፤ ወሰገደ ፡ ለጣዖት ። ወሠረዎ ፡ እግዚኣብሔር ፡ ከመ ፡ ያእምር ፡ ኪያሁ ፡ ወመክፈልቶሂ ፡ ምስለ ፡ አራዊተ ፡ ገዳም ፡ ረሰየ ፤ ወሶበ ፡ አእመረ ፡ ስመ ፡ እግዚኣብሔር ፡ እምድኅረ ፡ ዓመት ፡ ፯ ፡ ምሕሮ ፡ ወአግብኦ ፡ ውስተ ፡ ንስሓ ፤ ወኮነት ፡ መንግሥተ ፡ ባቢሎን ፡ ሎቱ ፡ ዘለዘርኡ ፡ እስከ ፡ ለዓለም ፨ ፨ ፨ ፨ ፨ ፨
=== chapter 77 ===
[፸፯ ፡ በእንተ ፡ ንጉሠ ፡ ፋርስ ። ወንጉሠ ፡ ፋርስኒ ፡ ዘርአ ፡ ሴም ፡ ውእቱ ፡ ወዘበእንቲአሁ ፡ ናየድዐክሙ ።]
ወለደ ፡ ይሁዳ ፡ ክልኤ ፡ ደቂቀ ፡ ወአእተወ ፡ ሎቱ ፡ ትዕማርሃ ፡ ለዘ ፡ ይልህቅ ፡ ወልዲ ፤ ወሞተ ፡ ወፈነዎ ፡ ለዘ ፡ ይንእስ ፡ ወልዲ ፡ ኀቤሃ ፡ ከመ ፡ ያቅም ፡ ለእኁሁ ፡ ዘርአ ፡ ኀበ ፡ ብእሲቱ ፡ እኁሁ ። ወውእቱኒ ፡ ገብረ ፡ ዘይጸልእ ፡ እግዚኣብሔር ፡ ወኢፈቀደ ፡ ከመ ፡ ያቅም ፡ ዘርአ ፡ ለእኁሁ ፡ በከመ ፡ አዘዞ ፡ አቡሁ ፡ ይሁዳ ፡ ወውእቱሰ ፡ ሶበ ፡ ይሰክብ ፡ ምስለ ፡ ትዕማር ፡ ያወፅእ ፡ ዘርኦ ፡ ውስተ ፡ ምድር ፡ ከመ ፡ ኢይትዐቈር ፡ ውስተ ፡ ከርሠ ፡ ዚአሃ ፡ ወኢይሰመይ ፡ ዘርአ ፡ እኁሁ ፤ አላ ፡ ይፈቅድ ፡ ከመ ፡ ያቅም ፡ ዘርአ ፡ እምብእሲቱ ፡ በስመ ፡ ዚአሁ ፤ ወርእዮ ፡ እግዚኣብሔር ፡ እከየ ፡ ምግባሪሁ ፡ ሜጠ ፡ ገጾ ፡ እምኔሁ ፡ ወቀተሎ ። ወአግብኣ ፡ ይሁዳ ፡ ሐሙሃ ፡ ለትዕማር ፡ ወአእተዋ ፡ ውስተ ፡ ቤተ ፡ አቡሃ ፡ ወይቤሎሙ ፡ ለአዝማዲሃ ፡ ዕቀብዋ ፡ ለዛቲ ፡ እስራኤላዊት ፡ ወኢታርኵስዋ ፡ ኀበ ፡ ባዕድ ፡ እስመ ፡ ብየ ፡ ንኡሰ ፡ ሕፃነ ፡ ለእመ ፡ አልሀቆ ፡ እግዚኣብሔር ፡ እሁቦ ፡ ኪያሃ ። ወእንዘ ፡ ትነብር ፡ ምዕስብት ፡ ውስተ ፡ ቤተ ፡ አቡሃ ፡ ናሁ ፡ መጽአ ፡ ይሁዳ ፡ ሐሙሃ ፡ ውስተ ፡ መራዕየ ፡ አዕጻ ፡ ዳተ ፡ አባግዒሁ ፡ ከመ ፡ ይቅርጽ ፡ ፀምረ ፡ ምስለ ፡ ብዙኅ ፡ ፍግዓ ፡ ወተድላ ፤ ወትዕማርሰ ፡ ሶበ ፡ ሰምዐት ፡ ከመ ፡ መጽአ ፡ ሐሙሃ ፡ ገደፈት ፡ እምላዕሌሃ ፡ አልባሰ ፡ ምዕስብና ፡ ወተረሰየት ፡ በአልባሰ ፡ ክብር ፡ ወተገልበበት ፡ በአምሳለ ፡ ዘማት ፡ ወሖረት ፡ እንተ ፡ ድኅሬሁ ፡ ወነበረት ። ወለአከ ፡ ኀቤሃ ፡ እንዘ ፡ ይብል ፡ እፈቅድ ፡ እባእ ፡ ኀቤኪ ፤ ወትቤሎ ፡ ምንተ ፡ ትሁበኒ ፡ ዐስብየ ፤ ወይቤላ ፡ እፌኑ ፡ ለኪ ፡ ነግሀ ፡ በጽባሕ ፡ ማሕስአ ፡ ጠሊ ፤ ወትቤሎ ፡ ሀበኒ ፡ አኅዘ ፡ እስከ ፡ ትሁበኒ ፡ ጠሊተ ፤ ወወሀባ ፡ በትረ ፡ ወሕልቀተ ፡ ወቆብዐ ፡ እንተ ፡ መትሕተ ፡ አክሊሉ ። ወቦአ ፡ ኀቤሃ ፡ ወነሥአት ፡ ወሖረት ፡ ውስተ ፡ ቤታ ፡ ወፈነወ ፡ ላቲ ፡ በጽባሕ ፡ ጠሌ ፤ ወተስእሉ ፡ አግብርቲሁ ፡ ወይቤሉ ፡ አይቴ ፡ ውእቱ ፡ ቤተ ፡ ዘማት ፡ ወይቤልዎሙ ፡ አልቦ ፡ ውስተ ፡ ሀገርነ ፡ ዘማት ፤ ወገብኡ ፡ ውስተ ፡ ሀገሮሙ ፡ ወነገርዎ ፡ ከመ ፡ አልቦ ፡ ውስተ ፡ ሀገሮሙ ፡ ዘማት ፤ ወይቤ ፡ ይሁዳ ፡ ኅድጉአ ፡ ፈቃደ ፡ እግዚኣብሔር ፡ ለይኩን ። ወእምዝ ፡ ፀንሰት ፡ ትዕማር ፡ ወነገርዎ ፡ ለሐሙሃ ፡ ከመ ፡ ፀንሰት ፤ ወሖረ ፡ ወነሥአ ፡ መላህቅተ ፡ እስራኤል ፡ ኀበ ፡ አቡሃ ፡ ለትዕማር ፡ ወይቤሎ ፡ አቅርብ ፡ ሊተ ፡ ወለትከ ፡ ፅንስተ ፡ ከመ ፡ ንውግራ ፡ በአእባ ፡ ን ፡ በከመ ፡ አዘዘ ፡ ሙሴ ፡ እስመ ፡ አኅሰረት ፡ ቤተ ፡ እስራኤል ። ወነገርዋ ፡ ለትዕማር ፡ አቡሃ ፡ ወአዝማዲሃ ፡ ከመ ፡ ከመዝ ፡ ይቤ ፡ ሐሙሃ ፤ ወአውፅአት ፡ ሕልቀተ ፡ ወበትረ ፡ ወቆብዐ ፡ ወወሀበት ፡ ለአቡሃ ፡ ወለአዝማዲሃ ፡ ወትቤሎሙ ፡ ባዕለ ፡ ዝንቱአ ፡ ዘአስሐተኒ ፡ ወይውግሩኒ ፡ ምስሌሁ ፡ በአእባን ። ወሶበ ፡ ርእየ ፡ ይሁዳ ፡ ንዋዮ ፡ አእመረ ፡ ወይቤ ፡ ጸድቀት ፡ ትዕማር ፡ እምኔየ ፤ ወኀደጋ ፡ ወአተወ ፡ ቤቶ ። ወወለደት ፡ ትዕማር ፡ መንታ ፡ ክልኤተ ፡ ሕዝበ ፡ ፋሬስ ፡ ወዛራ ፤ ወተሐንጸት ፡ ፋርስ ፡ በስመ ፡ ፋሬስ ፡ ወነግሠ ፡ ላዕሌሃ ፡ ውእቱ ፡ ወዘርኡ ፡ እምድኅሬሁ ፡ ወተሰምዩ ፡ ፈረሳዊያን ። ናሁኬ ፡ ተዐውቀ ፡ ንጉሠ ፡ ፋርስ ፡ ከመ ፡ ዘርአ ፡ ሴም ፡ ውእቱ ፨ ፨ ፨ ፨
=== chapter 78 ===
[፸፰ ፡ በእንተ ፡ ንጉሠ ፡ ሞአብ ። ወንጉሠ ፡ ሞአብሂ ፡ ዘርአ ፡ ሴም ፡ ውእቱ ፡ ወናየድዐክሙ ፡ ዘከመሂ ፡ ኮነ ።]
ወሶበ ፡ አፍለሶ ፡ እግዚኣብሔር ፡ ለአብርሃም ፡ እምሀገረ ፡ አቡሁ ፡ ውስተ ፡ ምድረ ፡ ካራን ፡ ወለሎጥኒ ፡ አዕደዎ ፡ እግዚኣብሔር ፡ ውስተ ፡ ምድረ ፡ ሰዶም ፡ ወገሞራ ፤ ወሶበ ፡ ፈቀደ ፡ እግዚኣብሔር ፡ ከመ ፡ ያጥፍኦሙ ፡ ለሰብአ ፡ ሰዶም ፡ ወገሞራ ፡ ፈነወ ፡ እግዚኣብሔር ፡ መላእክቲሁ ፡ ሚካኤል ፡ ወገብርኤል ፡ ከመ ፡ ያውፅእዎ ፡ ለሎጥ ፡ ወያውዕይዋ ፡ ለሀገረ ፡ ሰዶም ፡ ወገሞራ ፤ ወአማሰኑ ፡ ኪያሃ ፡ ወአውፅእዎ ፡ ለሎጥ ፡ ምስለ ፡ ደቂቁ ፡ ወብእሲቱሰ ፡ ሶበ ፡ ተመይጠት ፡ ድኅሬሃ ፡ ከመ ፡ ትርአይ ፡ ሀገረ ፡ አቡሃ ፡ ወእማ ፤ እስመ ፡ ወረደ ፡ መዐተ ፡ እግዚኣብሔር ፡ ላዕለ ፡ ሀገረ ፡ ሰዶም ፡ ዝናመ ፡ እሳት ፡ እምሰማይ ፡ ዘያነድድ ፡ አድባረ ፡ ወአውግረ ፡ አእባነ ፡ ወመሬተ ፡ ወይወርድ ፡ መባርቅት ፡ ወፀዓዓት ፡ ወነጐድጓድ ፡ ምስለ ፡ ድምፀ ፡ መዐተ ፡ እግዚኣብሔር ፡ ወደመና ፡ እሳትኒ ፡ ዘያጠይሶ ፡ ለመርቄ ፤ ወዝንቱ ፡ ኵሉ ፡ ሶበ ፡ ተሰምዐ ፡ ድምፅ ፡ ይቤልዎ ፡ መላእክት ፡ ለሎጥ ፡ ኢትትመየጡ ፡ ድኅረ ፡ እምከመ ፡ ወፃእክሙ ፡ እምሀገርክሙ ፡ ኢትትመየጡ ፡ ድኅሬክሙ ፡ ከመ ፡ ሞተ ፡ ኢትሙቱ ፤ ወሶበ ፡ ሰምዐት ፡ ይእቲ ፡ ብእሲተ ፡ ሎጥ ፡ አቅማባ ፡ ተመይጠት ፡ ድኅሬሃ ፡ ወኮነት ፡ ሐውልተ ፡ ፄው ፡ ወሀለወት ፡ እስከ ፡ ዮም ፡ ወእስከ ፡ ዛቲ ፡ ዕለት ፡ ወለሎጥሰ ፡ እኁሁ ፡ ለአብርሃም ፡ አንበሮ ፡ እግዚኣብሔር ፡ ውስተ ፡ አድባረ ፡ አራራት ፨ ፡ ወተከለ ፡ ወይነ ፡ ሐዲሰ ፤ ወአስተያሁ ፡ ወይነ ፡ ለአቡሆን ፡ አዋልዲሁ ፡ እስመ ፡ መከራ ፡ ምክረ ፡ እኪተ ፡ ወይቤላ ፡ ዝንቱ ፡ ንዋየ ፡ አቡነ ፡ በአይቴ ፡ ይጠፍእ ፤ እምነኬ ፡ ተሀጒለት ፡ በፍኖት ፡ ወለነኒ ፡ አልቦ ፡ ዘያወስበነ ፡ በዝየ ። ወአስከራሁ ፡ ለአቡሆን ፡ ወሰከበት ፡ እንተ ፡ ትልህቅ ፡ ወለቱ ፡ ምስሌሁ ፡ ኅበ ፡ ጸልመ ፡ ልቡ ፡ በወይን ፤ ወሎጥሰ ፡ ጻድቅ ፡ ኢያእመረ ፡ በሰኪቦታ ፡ ለወለቱ ፡ ወኢያእመረ ፡ በተንሥኦታ ፡ ለወለቱ ፡ እስመ ፡ ስካር ፡ ያጸልም ፡ ልቦ ። ወኖኅሂ ፡ በስካር ፡ ኮነ ፡ ዕሩቀ ፡ እምብእሲቱ ፡ ወደቂቁ ፡ እስከ ፡ ይረግም ፡ ውሉዶ ፡ ለዘ ፡ ሰሐቆ ፤ ወለሎጥሰ ፡ ኢተኆለቆ ፡ ኀጢአተ ፡ እስመ ፡ በኢያእምሮ ፡ ገብረ ። ወፀንሰት ፡ ወወለደት ፡ እንተ ፡ ትልህቅ ፡ ወሰመየቶ ፡ ስሞ ፡ ሞአብ ፡ እምኀበ ፡ አቡየ ፡ በብርክየ ፡ ብሂል ፤ ወውእቱኬ ፡ አቡሆሙ ፡ ለሞአባውያን ፡ ወለአጋራዊያን ። ናሁኬ ፡ ተዐውቀ ፡ ንጉሠ ፡ ሞአብሂ ፡ ከመ ፡ ዘርአ ፡ ሴም ፡ ውእቱ ፨ ፨ ፨
=== chapter 79 ===
[፸፱ ፡ በእንተ ፡ ንጉሠ ፡ ዓማሌቅ ።]
ወሶበ ፡ ወለደት ፡ እንተ ፡ ትልህቅ ፡ ትቤላ ፡ ለእንተ ፡ ትንእስ ፡ ሀቢኬ ፡ ናስትዮ ፡ ወይነ ፡ ለአቡነ ፡ ወአንቲኒ ፡ ከመ ፡ ትባኢ ፡ ኀቤሁ ፡ እመ ፡ ትረክቢ ፡ ውሉደ ፡ ወካዕበ ፡ ገብራ ፡ ወይነ ፡ ወደገማ ፡ ቃለ ፡ እበድ ፡ እንዘ ፡ ይብላ ፡ ስተይ ፡ ወይነ ፡ ኦአቡነ ፡ ከመ ፡ ይትናዘዝ ፡ ልብከ ፤ ወውእቱሰ ፡ የዋህ ፡ ሰትየ ፡ ወሰክረ ። ወካዕበ ፡ ሶበ ፡ ሰትየ ፡ ወጸልመ ፡ ልቡ ፡ ቦአት ፡ እንተ ፡ ትንእስ ፡ ወሰከበት ፡ ምስሌሁ ፡ ወውእቱሰ ፡ ካዕበ ፡ ኢያእመረ ፡ በሰኪቦታ ፡ ወበተንሥኦታ ። ወካዕበ ፡ ይእቲኒ ፡ ፀንሰት ፡ ወወለደት ፡ ወልደ ፡ ወሰመየቶ ፡ ስሞ ፡ ዓሞን ፤ ወውእቱ ፡ ንጉሦሙ ፡ ለዓማሌቃውያን ፡ ወናሁኬ ፡ ተዐውቀ ፡ ከመ ፡ ንጉሠ ፡ ዓማሌቅ ፡ ከመ ፡ ዘርአ ፡ ሤም ፡ ውእቱ ፨ ፨ ፨ ፨ ፨ ፨ ፨ ፨
=== chapter 80 ===
[፹ ፡ በእንተ ፡ ንጉሠ ፡ ኢሎፍሊ ። ወናሁ ፡ ኢሎፍሊ ፡ ዘርአ ፡ ሳምሶን ፡ ይነግሡ ፡ ላዕሌሆሙ ።]
ወሰምሶንሰ ፡ እም፲ወ፪ ፡ ደቂቀ ፡ ያዕቆብ ፡ ዘርአ ፡ ዳን ፡ ውእቱ ፡ ወልደ ፡ አመት ፡ እምያዕቆብ ፤ ውእቱሰ ፡ ሳምሶን ፡ ናየድዐክሙ ፡ ዘከመ ፡ ኮነ ። አስተርአያ ፡ መልአከ ፡ እግዚኣብሔር ፡ ለእሙ ፡ ለሰምሶን ፡ ወይቤላ ፡ ተዐቀቢ ፡ እምኵሉ ፡ ርኩስ ፡ ወኢትቅረቢ ፡ ዘእንበለ ፡ ኀበ ፡ ምትኪ ፡ እስመ ፡ ዘይትወለድ ፡ እምኔኪ ፡ ናዝራዊ ፡ ቅዱሱ ፡ ለእግዚኣብሔር ፡ ወይከውን ፡ መድኀኒቶሙ ፡ ለእስራኤል ፡ እምእደ ፡ ኢሎፍሊ ፡ ወእምዝ ፡ ወለደቶ ፡ ወካዕበ ፡ አስተርአያ ፡ ወይቤላ ፡ ኢታዕርጊ ፡ መላጼ ፡ ዲበ ፡ ርእሱ ፡ ወኢይብላዕ ፡ ሥጋ ፡ ወኢወይነ ፡ ወኢያውስብ ፡ እምባዕድ ፡ ፈጥረት ፡ ዘእንበለ ፡ እምዘመዲ ፡ ወቤተ ፡ አቡሁ ። ወዘከመ ፡ ወሀቦ ፡ እግዚኣብሔር ፡ ኀይለ ፡ ሰማዕክሙ ፡ በውስተ ፡ መጽሐፈ ፡ መሳፍንት ። ወተዐደወ ፡ ትእዛዘ ፡ እግዚኣብሔር ፡ ወቦአ ፡ ወአውሰበ ፡ ውስተ ፡ አዋልደ ፡ ኢሎፍሊ ፡ ቈላፋን ፡ ወበእንተዝ ፡ ተምዕዖ ፡ እግዚኣብሔር ፡ ወመጠዎ ፡ ውስተ ፡ እደዊሆሙ ፡ ለሰብአ ፡ ኢሎፍሊ ፡ ቈላፋን ፡ ወአዖርዎ ፡ አዕይንቲሁ ፡ ወረሰይዎ ፡ መስተዛውዐ ፡ በው ፡ ስተ ፡ ቤተ ፡ ንጉሦሙ ፤ ወአፍረሰ ፡ መልዕልቶሙ ፡ ወቀተሎሙ ፡ ፸፼ ፡ ወበሕይወቱሰ ፡ ቀተሎሙ ፡ ፸፼ ፡ ወ፪፼ ፡ በኀጺን ፡ ወበእብን ፡ ወበበትር ፡ ወበመንከሰ ፡ አድግ ፤ እስመ ፡ ብዝኆሙ ፡ ከመ ፡ አንበጣ ፡ እስከ ፡ አኅደጎሙ ፡ ለእስራኤል ፡ እምግብርናተ ፡ ኢሎፍሊ ። ወእምዝ ፡ ፀንሰት ፡ ደሊላ ፡ እምሳምሶን ፡ ወእንዘ ፡ ፅንስት ፡ ይእቲ ፡ ሞተ ፡ ሳምሶን ፡ ምስለ ፡ ሰብአ ፡ ኢሎፍሊ ፤ ወወለደት ፡ ወልደ ፡ ደሊላ ፡ ወሰመየቶ ፡ ምናሔም ፡ ዘርአ ፡ ኀያል ፡ ብሂል ፨ ፡ ወደሊላሰ ፡ እኅታ ፡ ይእቲ ፡ ለመክሳባ ፡ ብእሲተ ፡ ንጉሠ ፡ ኢሎፍሊ ። ወሶበ ፡ ቀተሎ ፡ ሰምሶን ፡ ለንጉሠ ፡ ኢሎፍሊ ፡ በውስተ ፡ ቤት ፡ ምስለ ፡ ሕዝቡ ፡ ወለሊሁኒ ፡ ሞተ ፡ ምስሌሁ ፡ ወገብአት ፡ ደሊላ ፡ ኀበ ፡ እኅታ ፡ ንግሥተ ፡ ኢሎፍሊ ፡ መክሳባ ፤ እስመ ፡ ክልኤሆን ፡ ላሕያት ፡ እማንቱ ፡ ወአልቦን ፡ ውሉደ ፡ ወባሕቱ ፡ ፅኑሳት ፡ ህየ ፡ ስድስቱ ፡ አውራኅ ፡ መክሳባ ፡ እምዘ ፡ ፀንሰት ፡ እምኀበ ፡ ቈላሶን ፡ ንጉሠ ፡ ኢሎፍሊ ፡ ወደሊላ ፡ ፬ ፡ አውራኅ ፡ እሙንቱ ፡ እምዘ ፡ ፀንሰት ፡ እምሳምሶን ፡ ወሞቱ ፡ አምታቲሆን ። ወይትፋቀራ ፡ ፈድፋደ ፡ ወፍቅሮንሂ ፡ አኮ ፡ ከመ ፡ አኃት ፡ አላ ፡ ከመ ፡ እም ፡ ለሕፃና ፡ ወከመ ፡ ሕፃን ፡ ለእም ፡ ከማሁ ፡ ፍ ፡ ቅሮን ፤ ወነበራ ፡ ክልኤሆን ፡ ኅቡረ ፡ ወመንግሥትሰ ፡ ውስተ ፡ እዴሃ ፡ ለመክሳባ ፡ እምእለ ፡ ተርፉ ፡ እምቀትለ ፡ ሰምሶን ፡ በውስተ ፡ ቤተ ፡ ንጉሥ ። እስመ ፡ አልቦ ፡ ዘተርፈ ፡ እምደቂቀ ፡ ኀይለ ፡ መንግሥተ ፡ ኢሎፍሊ ፡ ወበእንተዝ ፡ ነግሠት ፡ ላዕለ ፡ እለ ፡ ተርፉ ፡ መክሳባ ፤ ወይብልዋ ፡ ነግሀ ፡ ወሰርከ ፡ አልብነ ፡ ንጉሠ ፡ ዘእንበሌኪ ፡ ካልአ ፡ ወዘእንበለ ፡ ዘወፅአ ፡ እምከርሥኪ ፤ ለእመ ፡ አሠነየ ፡ ለነ ፡ እግዚእነ ፡ ዳጎን ፡ ይከውን ፡ ወልደ ፡ ዘውስተ ፡ ከርሥኪ ፡ ዘያነሥኦ ፡ ለአምላክነ ፡ ዳጎን ፡ ወዘይነግሥ ፡ ላዕሌነ ፤ ወእመሂ ፡ ኮነት ፡ ወለተ ፡ ናነግሣ ፡ ላዕሌነ ፡ ከመ ፡ ይኩን ፡ ስምኪ ፡ ወስመ ፡ ቈላሶን ፡ እግዚእነ ፡ ላዕሌነ ፡ ዝክርክሙ ። ወእምዝ ፡ ወለደት ፡ ተባዕተ ፡ ወተፈሥሑ ፡ ኵሎሙ ፡ ሰብአ ፡ ኢሎፍሊ ፡ ወገነዩ ፡ ላቲ ፡ ወሐለዩ ፡ እንዘ ፡ ይብሉ ፡ ዳጎን ፡ ወቤል ፡ አክበርዋ ፡ ወአፍቀርዋ ፡ ለመክሳባ ፡ ወተረክበ ፡ ዘርአ ፡ ቈላሶን ፡ እምኔሃ ፡ ለመክሳባ ፤ ወደሊላኒ ፡ ወለደት ፡ ወልደ ፡ ወሐፀናሆሙ ፡ በብዙኅ ፡ ክብር ፡ ለደቂቆን ። ወሶበ ፡ ኮነ ፡ ሎሙ ፡ ፭ ፡ ዓመተ ፡ ይበልዑ ፡ ወይትዋነዩ ፡ በቅድሜሆን ፤ ወገብራ ፡ ሎሙ ፡ ዐስቀ ፡ ዘዲባጋት ፡ ወሰዋትለ ፡ ውስተ ፡ ሐቌያቲሆሙ ፡ ወአዕ ፡ ኑገ ፡ ውስተ ፡ ክሳውዲሆሙ ። ወረሰይዎ ፡ ንጉሠ ፡ ለወልደ ፡ መክሳባ ፡ ውስተ ፡ መንበረ ፡ አቡሁ ፡ ላዕለ ፡ ኢሎፍሊ ፨ ፨ ፨ ፨
=== chapter 81 ===
[፹፩ ፡ ዘከመ ፡ ቀተሎ ፡ ወልደ ፡ ሳምሶን ፡ ለወልደ ፡ ንጉሠ ፡ ኢሎፍሊ ።]
ወውእቱሰ ፡ ወልድ ፡ አከምሔል ፡ ወልደ ፡ ሳምሶን ፡ ወይቤላ ፡ ለእሙ ፡ ደሊላ ፡ ለምንት ፡ አነ ፡ ኢይነግሥ ፡ ወኢይነብር ፡ ላዕለ ፡ ዝንቱ ፡ መንበር ። ወትቤሎ ፡ እሙ ፡ ኅድግ ፡ ወልድየ ፡ ኢኮነት ፡ ዛቲ ፡ መንበር ፡ ዘአቡከ ፡ ወኢኮነ ፡ ዝየ ፡ ሀገሩ ፡ ለአቡከ ፤ ወአንተሰ ፡ ለእመ ፡ አልሀቀከ ፡ አምላከ ፡ አበዊከ ፡ ተሐውር ፡ ኀበ ፡ መንበረ ፡ አቡከ ፡ ወይቤላ ፡ ወልዳ ፡ አልቦ ፡ ኢየኀድግ ፡ ኪያኪ ፡ እምየ ፡ ወመክሳባ ፡ እምየ ፡ ወእነግሥ ፡ በዝየ ፨ ፡ ወአሐተ ፡ ዕለተ ፡ ሰክሩ ፡ ክልኤሆሙ ፡ እምድኅረ ፡ ኀለፈ ፡ ምሳሕ ፡ ወተዐጽወ ፡ ኀዋኅው ። ወሀለዋ ፡ ይነብራ ፡ ክልኤሆን ፡ ከመ ፡ ይብልዓ ፡ ሥጋ ፡ ወእሙንቱኒ ፡ ደቂቅ ፡ ይትዋነዩ ፡ ቅድሜሆን ፡ ወይበልዑ ፡ ምስሌሆን ፡ ወአሐቲ ፡ አመት ፡ ትእኅዝ ፡ መጽብኀ ፡ በማእከሌሆን ። ወነሥአ ፡ አኬሜሔል ፡ ወልደ ፡ ደሊላ ፡ ሥጋ ፡ ምልአ ፡ ክልኤሆን ፡ እደዊሁ ፡ እምነ ፡ መጽብኅ ፡ ወተፍእመ ፤ ወዘአትረፈ ፡ እምአፉሁ ፡ ጠለፎ ፡ ወልደ ፡ መክሳባ ፡ ጥብሬሌስ ፡ ንጉሠ ፡ ኢሎፍሊ ። ወአውፅአ ፡ ሰይፎ ፡ አኬሜሔል ፡ ወአውቀዮ ፡ ርእሶ ፡ ወወድቀት ፡ ውስተ ፡ መጽብኅ ፡ ዘእንበለ ፡ የኀጥ ፡ እንተ ፡ ሄደ ፤ ወሥጋሁኒ ፡ ወድቀ ፡ ውስተ ፡ ጸፍጸፈ ፡ ቤት ፡ ወአንቀጥቀጠ ፡ እዴሁ ፡ ወእገሪሁ ፡ ወተፈጸመ ፡ ሶቤሃ ። ወእማንቱሰ ፡ እማቲሆሙ ፡ አኀዞን ፡ ፍርሀት ፡ ወድንጋፄ ፡ ወኢነገራ ፡ ወኢለመኑሂ ፡ እስመ ፡ ፈርሃ ፡ ወውኅጣ ፡ ዘውስተ ፡ አፉሆን ፡ ወተናጸራ ፡ እስመ ፡ ኢያእመራ ፡ ዘይገብራ ፤ ወይእቲሰ ፡ አመት ፡ ተንሥአት ፡ እምኔሆን ፡ ወነሥአት ፡ ርእሶ ፡ እምነ ፡ መጽብኅ ፡ ወአስተጣግዐት ፡ ዲበ ፡ ክሳዲ ፡ ወከደነቶ ፡ ልብሳ ። ወተንሥአት ፡ ደሊላ ፡ ወመልኀት ፡ ሰይፈ ፡ ምውት ፡ ወልደ ፡ እኅታ ፡ ወሖረት ፡ ከመ ፡ ትቅትሎ ፡ ለኣኬሜሔል ፤ ወውእቱሰ ፡ ተጸወነ ፡ ኀበ ፡ ምስዋረ ፡ ዐምድ ፡ ወተደለወ ፡ ለቀትለ ፡ እሙ ። ወተንሥአት ፡ እኅታ ፡ ወአኀዘታ ፡ እንዘ ፡ ትብል ፡ ለምንት ፡ ተሀጐልነ ፡ እምካልኣኒሆሙ ፤ ወዝንቱሰ ፡ ዘጒንዲ ፡ እኩይ ፡ ኢይክል ፡ ፈሪየ ፡ ሠናየ ፡ ኒዒ ፡ እኅትየ ፡ ኪያኪኒ ፡ ኢያህጒልኪ ፡ ወነሥአት ፡ እምእዴሃ ፡ ሰይፈ ፡ ወአንሥአት ፡ እምትርኣሲሃ ፡ ልብሰ ፡ ሠናየ ፡ ዘሜላት ፡ ዘይለብሱ ፡ ነገሥት ፡ ወወሀበቶ ፡ ወየውሀቶ ፡ በጥዑም ፡ ቃል ፡ እንዘ ፡ ትብል ፡ ንሣእ ፡ ወልድየ ፡ ልብሰ ፡ ወትነብር ፡ አንተ ፡ ዲበ ፡ መንበረ ፡ መንግሥተ ፡ ኢሎፍሊ ፡ ወውእቱሰ ፡ ኮነ ፡ ፀዋገ ፡ ከመ ፡ ድብ ፡ እስመ ፡ ፈቀደ ፡ ይቅትሎን ፡ ለክል ፡ ኤሆን ፡ እስከ ፡ የኀድጋ ፡ ቤተ ፡ ወወፅኣ ፤ ወእምዝ ፡ ሶበ ፡ የኀድጋ ፡ ነሥአ ፡ ወለብሰ ፡ ሜላተ ፡ ወወፅአ ፡ አፍአ ፤ ወእማንቱኒ ፡ ቦኣ ፡ ወገነዛ ፡ በድኖ ፡ ወቀበራሁ ፡ በጽምሚት ። ወሶበ ፡ ኮነ ፡ ጊዜ ፡ ድራር ፡ ኀሠሥዎ ፡ ወኢረከብዎ ፡ ወተስእልዎ ፡ መሐዛት ፡ ወመገብት ፤ ወትቤሎሙ ፡ እሙ ፡ እስመ ፡ ሐመ ፡ ውእቱ ፡ ንጉሥክሙ ፡ ወዝንቱ ፡ ይነብር ፡ ህየንቴሁ ። ወነሥእዎ ፡ ወአንበርዎ ፡ ወሠርዑ ፡ ማእደ ፡ ወተፈሥሑ ፤ ወእምአሜሃ ፡ ነግሠ ፡ ወልደ ፡ ሳምሶን ፡ ላዕሌሆሙ ፡ ወአልቦ ፡ ዘተዐደወ ፡ እምትእዛዙ ፤ እምዘ ፡ ፭ ፡ ክረምት ፡ ዘተወልደ ፡ ዘንተ ፡ ገብረ ፤ ወኮነት ፡ መንግሥተ ፡ ኢሎፍሊ ፡ ሎቱ ፡ ወለዘርኡ ፡ እምድኅሬሁ ። ናሁኬ ፡ ተዐውቀ ፡ ከመ ፡ መንግሥተ ፡ ኢሎፍሊኒ ፡ ከመ ፡ ዘኮነ ፡ ለዘርአ ፡ ሴም ፡ ውእቱ ፨ ፨
=== chapter 82 ===
[፹፪ ፡ በእንተ ፡ ርደተ ፡ አብርሃም ፡ ግብጽ ።]
ወካዕበ ፡ ናየድዐክሙ ፡ ከመ ፡ ሶበ ፡ ወሀቦ ፡ እግዚኣብሔር ፡ ለአብርሃም ፡ ክብረ ፡ ወብዕለ ፡ ኀጥአ ፡ ውሉደ ። በውስተ ፡ ምስካቢሆሙ ፡ ይትናገሩ ፡ ሳራ ፡ ወአብርሃም ፡ ወይቤላ ፡ ኮንኪ ፡ መካነ ፡ ወይእቲኒ ፡ ትቤሎ ፡ አኮ ፡ አነ ፡ መካን ፡ አላ ፡ አንተ ፤ ወበእንተዝ ፡ ነበሩ ፡ ይትማከሩ ፡ ይትገአዙ ፡ በበይናቲሆሙ ። ወቦአ ፡ ረኃብ ፡ ውስተ ፡ ምድረ ፡ ከናኦን ፡ ወሰምዐ ፡ አብርሃም ፡ ከመ ፡ ቦ ፡ እክል ፡ በብሔረ ፡ ግብጽ ፡ ሀገረ ፡ ፈርዖን ፤ ወሶበ ፡ አኅለቀ ፡ ኵሎ ፡ ንዋዮ ፡ በምሒረ ፡ ነዳይ ፡ በመዋዕለ ፡ ረኃብ ፡ እንዘ ፡ ኢይናፍቅ ፡ ለጌሠም ፡ ወጸንዐ ፡ ረኃብ ፡ ብሔረ ፡ ከናኦን ፡ ወኀጥአ ፡ ዘይሴሰይ ፡ ወይቤ ፡ ኣአኵቶ ፡ ለእግዚኣብሔር ፡ ዘወሀበኒ ፡ አኅለቁ ፡ ምስለ ፡ አግብርትየ ፤ ወባሕቱ ፡ አንቲ ፡ እኅትየ ፡ ሰራ ፡ ኒዒ ፡ ንሖር ፡ ውስተ ፡ ብሔረ ፡ ግብጽ ፡ ከመ ፡ ናድኅን ፡ ርእስነ ፡ እሞተ ፡ ረኃብ ። ወትቤሎ ፡ ይኩን ፡ ሥምረትከ ፡ እግዚእየ ፡ ወእመኒ ፡ ሞትከ ፡ እመውት ፡ ምስሌከ ፡ ወእመኒ ፡ ሐየውከ ፡ አሐዩ ፡ ምስሌከ ፡ ወአልብየ ፡ ዘእትዐደው ፡ እምቃልከ ፡ እስከ ፡ ለዓለም ፨ ፡ ወእምዝ ፡ ተንሥኡ ፡ ወአኀዙ ፡ ይሖሩ ፤ ወሶበ ፡ ቀርቡ ፡ ይቤላ ፡ አብርሃም ፡ ለሰራ ፡ አሐተ ፡ እሴአለ ፡ ኪ ፡ ወግበሪ ፡ ዘእቤለኪ ፤ ወትቤ ፡ ሰራ ፡ በል ፡ እግዚእየ ፡ ወይቤላ ፡ አነ ፡ ሰማዕኩ ፡ ዘእንበለ ፡ ሕግ ፡ ንብረቶሙ ፡ በጣዖት ፡ ወበዝሙት ፤ ወሶበ ፡ ርእዩኪ ፡ ላዕሌየ ፡ ይመክሩ ፡ እኩየ ፡ ይቅትሉኒ ፡ በእንተ ፡ ሥነ ፡ ላሕይኪ ፡ እስመ ፡ አልቦ ፡ ዘይትማሰለኪ ፡ በኀቤሆሙ ፤ ወይእዜኒ ፡ ከመ ፡ ታሕይዊ ፡ ነፍስየ ፡ በሊ ፡ አንቲ ፡ ለእመ ፡ ተስእሉኪ ፡ በእንቲአየ ፡ በሊ ፡ እኅቱ ፡ አነ ፡ ከመ ፡ ታድኅንያ ፡ ለነፍስየ ፡ እሞት ፡ በእደ ፡ ነኪራን ። ወትቤ ፡ ሳራ ፡ ይኩን ፡ ፈቃድከ ፡ በሊ ፡ ዘትቤለኒ ፡ እብል ፡ ወግበሪ ፡ ዘትቤለኒ ፡ እገብር ። ወበከዩ ፡ ወሰገዲ ፡ ለእግዚኣብሔር ፡ ወቦኡ ፡ ውስተ ፡ ዐባይ ፡ ሀገረ ፡ ንጉሠ ፡ ምስር ፤ ወሶበ ፡ ርእይዎሙ ፡ ግብጽ ፡ ለአብርሃም ፡ ወለሳራ ፡ አንከሩ ፡ በእንተ ፡ ሥነ ፡ ራእዮሙ ፡ እስመ ፡ ይመስሉ ፡ ከመ ፡ ዘተወልዲ ፡ እምአሐቲ ፡ እም ፤ ወይቤልዎ ፡ ለአብርሃም ፡ ምንትከ ፡ ይእቲ ፡ ዛቲ ፤ ወይቤሎሙ ፡ እኅትየ ፤ ወካዕበ ፡ ተስእልዋ ፡ ለሳራ ፡ ወይቤልዋ ፡ ምንትኪ ፡ ውእቱዝ ፤ ወትቤሎሙ ፡ እኁየ ፡ ውእቱ ። ወበእንተዝ ፡ አርድእዎ ፡ ለፈርዖን ፡ ከመ ፡ መጽኡ ፡ ፪ ፡ አኀው ፡ ሠናያነ ፡ ላሕይ ፡ አሐቲ ፡ ብእሲት ፡ ወ፩ ፡ ወሬዛ ፡ ወአልቦ ፡ ዘይመስሎሙ ፡ በውስተ ፡ ኵሉ ፡ ምድር ፡ ወተፈሥሐ ፡ ፈርዖን ፡ ወለአከ ፡ ሎቱ ፡ ለአብርሃም ፡ እንዘ ፡ ይብል ፡ ሀበኒአ ፡ እኅተከ ፡ ከመ ፡ እሕፅያ ። ወኀለየ ፡ አብርሃም ፡ እንዘ ፡ ይብል ፡ ለእመ ፡ ከላእኩ ፡ ይቀትለኒ ፡ ወይነሥኣ ፤ ወይቤሎ ፡ ግበርአ ፡ ለእመ ፡ አሥመርከኒ ፡ ወወሀቦ ፡ ጠፋልሐ ፡ ብሩር ፡ ፼ ፡ ወነሥኣ ፡ ለሳራ ፡ ከመ ፡ ይረስያ ፡ ብእሲቶ ፡ ወአእተዋ ፡ ውስተ ፡ ቤቱ ፡ ወአንበራ ፡ ውስተ ፡ ዐራቱ ፡ ወቦአ ፡ ኀቤሃ ፡ ፈርዖን ፡ ንጉሠ ፡ ግብጽ ። ወአስተርአዮ ፡ መልአከ ፡ እግዚኣብሔር ፡ በሌሊት ፡ እንዘ ፡ ይጸውር ፡ ሰይፈ ፡ እሳት ፡ ወቀርበ ፡ ኀቤሁ ፡ ወአብርሀ ፡ ቤተ ፡ እምነበልባሉ ፡ ወፈቀደ ፡ ይቅትሎ ፤ ወጐየ ፡ ፈርዖን ፡ እምአረፍተ ፡ ቤት ፡ እስከ ፡ አረፍተ ፡ ቤት ፡ ወእማእዝንተ ፡ ቤት ፡ እስከ ፡ ማእዝንተ ፡ ቤት ፡ ወኀበ ፡ ሖረ ፡ ይተልዎ ፡ ወኀጥአ ፡ ኀበ ፡ ይትገመር ፡ ወኀበ ፡ ይትኀባእ ። ወእምዝ ፡ ሰፍሐ ፡ እደዊሁ ፡ ወይቤሎ ፡ ለመልአክ ፡ ኅድግ ፡ ሊተ ፡ ዛተ ፡ አበሳየ ፡ እግዚኦ ። ወይቤሎ ፡ ለምንት ፡ ትገፍዕ ፡ ብእሲቶ ፡ ለብእሲ ። ወይቤሎ ፡ እግዚኦ ፡ ኢትቅትል ፡ ደመ ፡ ንጹሐ ፤ እስመ ፡ ይቤለኒ ፡ እኅትየ ፡ ወበእንተዝ ፡ አነ ፡ ሐፀይክዋ ፡ በንጹሕ ፤ ወምንተ ፡ እግበር ፡ ከመ ፡ እድኀን ፡ እምእዴከ ፡ ወይቤሎ ፡ አግብእ ፡ ሎቱ ፡ ለአብርሃ ፡ ም ፡ ብእሲቶ ፡ ወሀቦ ፡ ዐስበ ፡ ወፈንዎ ፡ በሰላም ፡ ይእቱ ፡ ብሔሮ ። ወሶቤሃ ፡ ጸውዖ ፡ ለአብርሃም ፡ ወወሀቦ ፡ ሳራ ፡ ብእሲቶ ፡ ምስለ ፡ አመት ፡ እንተ ፡ ስማ ፡ አጋር ፡ ወወሀቦ ፡ ወርቀ ፡ ወብሩረ ፡ ወአልባሰ ፡ ክቡረ ፡ ለአብርሃም ፡ ወፈነዎ ፡ በሰላም ፨ ፡ ወገብኡ ፡ ውስተ ፡ ሀገሮሙ ። ወትቤሎ ፡ ሳራ ፡ ለአብርሃም ፡ አእመርኩ ፡ አነ ፡ ከመ ፡ መካን ፡ አነ ፡ ወባሕቱ ፡ ባእ ፡ ኀበ ፡ ዛቲ ፡ አመትየ ፡ እንተ ፡ ወሀበኒ ፡ ፈርዖን ፡ እመ ፡ ይሁበከ ፡ እግዚኣብሔር ፡ ዘርአ ፡ በውስቴታ ፤ ወአንሰ ፡ ቀበጽኩ ፡ ርእስየ ፡ ወተነግፈ ፡ ወየብሰ ፡ ጽጌ ፡ ከርሥየ ። ወወሀበቶ ፡ አጋር ፡ ወቦአ ፡ ኀቤሃ ፡ ወፀንሰት ፡ ሎቱ ፡ ወወለደት ፡ ወሰመየቶ ፡ ስሞ ፡ እስማዔል ፤ ሰምዐኒ ፡ እግዚኣብሔር ፡ ብሂል ፨ ፡ ወእምድኅሬሁ ፡ ወሀቦ ፡ ዘርአ ፡ እግዚኣብሔር ፡ እምነ ፡ ሳራ ፡ ብእሲቱ ፡ ወወለደ ፡ ይስሐቅ ፡ ወእምድኅሬሁ ፡ ቀንአት ፡ ሳራ ፡ በእንተ ፡ ይስማዔል ፡ ወልደ ፡ አመታ ፡ እስመ ፡ ልህቀ ፡ እምቅድመ ፡ ወልዳ ፤ ትቤ ፡ ዮጊ ፡ ይቀትሎ ፡ ለወልድየ ፡ ወይወርስ ፡ ቤተ ፡ አቡሁ ። ወሦዐ ፡ መሥዋዕተ ፡ አብርሃም ፡ ለእግዚኣብሔር ፡ ወይቤ ፡ እግዚኦ ፡ ምንተ ፡ እግበር ፡ በእንተ ፡ ይስማዔል ፡ ወልድየ ፡ ቀዳሜ ፡ በኵርየ ፤ አነ ፡ እፈቅድ ፡ ይሕየወኒ ፡ ቅድ ፡ ሜከ ፡ ወሳራ ፡ እኅትየ ፡ ትቀንእ ፡ በእንተ ፡ ዘወሀብከኒ ፡ ዘርአ ፡ በርሥኣኒ ፡ እስመ ፡ ኮኖ ፡ ለይስማዔል ፡ ፲ወ፬ ፡ ዓመት ፡ ዘእንበለ ፡ ይትወለድ ፡ ይስሓቅ ። ወይቤሎ ፡ እግዚኣብሔር ፡ ለአብርሃም ፡ አማን ፡ ዘትቤ ፡ ሳራ ፤ ስድዳ ፡ ለአመት ፡ ምስለ ፡ ወልዳ ፡ ይስማዔል ፤ ወለይስማዔልሰ ፡ ኅድጎ ፡ ይሕየው ፡ ቅድሜየ ፡ ወአነ ፡ እሬስዮ ፡ ሕዝበ ፡ ዐቢየ ፡ ወይወልድ ፡ ፲ወ፪ ፡ ሕዝበ ፡ ወይነግሥ ፡ ላዕሌሆሙ ፤ ወኪዳንየሰ ፡ ኣቀውም ፡ ምስለ ፡ ይስሓቅ ፡ ገብርየ ፡ ወልደ ፡ ሳራ ፡ ወእባርክ ፡ በዘርኡ ፡ ኵሎሙ ፡ አሕዛበ ፡ ምድር ፡ ወእገብሮ ፡ ዐበይተ ፡ ነገሥተ ፡ ላዕለ ፡ ኵሉ ፡ አሕዛበ ፡ ምድር ፡ ወበሰማያትኒ ፡ እሬስዮ ፡ ንጉሠ ፨ ፨ ፨ ፨ ፨ ፨ ፨ ፨ ፨
=== chapter 83 ===
[፹፫ ፡ በእንተ ፡ ንጉሠ ፡ እስማኤላውያን ።]
ወበእንተዝ ፡ ኮኑ ፡ ነገሥተ ፡ ደቂቀ ፡ ይስማዔል ፡ ላዕለ ፡ ትርብ ፡ ወላዕለ ፡ ቅብጥ ፡ ወላዕለ ፡ ኖባ ፡ ወሶበ ፡ ወኵርጒ ፡ ወሪፊ ፡ ወማካ ፡ ወሞርና ፡ ወፊንቃና ፡ ወኣርሲባና ፡ ወሊባ ፡ ወመስዕ ፤ እስመ ፡ ዘርአ ፡ ሴም ፡ ውእቱ ። ወዘርአ ፡ ይስሓቅኒ ፡ ነግሠ ፡ ላዕለ ፡ ይሁዳ ፡ ወላዕለ ፡ አሞሬዎን ፡ ወላዕለ ፡ ኬጤዎን ፡ ወኢያቡሴዎን ፡ ወፌርዜዎን ፡ ወኤዌዎን ፡ ወኬልቄዴዎን ፡ ወሮምያ ፡ ወአንጾክያ ፡ ወሶርያ ፡ ወአርማንያ ፡ ወፍልስጥኤም ፡ ወኢትዮጵያ ፡ ወኤዶም ፡ ወኢሎፍሊ ፡ ወኢዮኣብ ፡ ወዓማሌቅ ፡ ወአፍራግያ ፡ ወባቢሎን ፡ ወዮናንስጥ ፡ ወዕብራይስጥ ። እስመ ፡ ኵላ ፡ መንግሥት ፡ በከመ ፡ መሐለ ፡ እግዚኣብሔር ፡ ወሀቦሙ ፡ ለዘርአ ፡ ሴም ፤ ልዑል ፡ መንበር ፡ ወምኵናን ፡ ለዘርአ ፡ ሴም ፡ በከመ ፡ ባረኮ ፡ አቡሁ ፡ ኖኅ ፡ በቃለ ፡ እግዚኣብሔር ፡ ለሤም ፡ ወልዲ ፡ እንዘ ፡ ይብል ፡ ኵን ፡ እግዚአ ፡ ለአኀዊከ ፡ ወንግሥ ፡ ላዕሌሆሙ ፤ ወዘንተ ፡ ዘይቤ ፡ በእንተ ፡ መድኅን ፡ ዘለኵልነ ፡ ንጉሥ ፡ ኢየሱስ ፡ ክርስቶስ ፡ ንጉሠ ፡ ሰማያት ፡ ወምድር ፡ ዘውእቱ ፡ ያዐቢ ፡ ነገሥተ ፡ ወለእለ ፡ ፈቀደ ፡ ካዕበ ፡ ይስዕር ፡ ስልጣኖሙ ፤ እስመ ፡ ሎቱ ፡ ክሂል ፡ ወስልጣን ፡ ላዕለ ፡ ኵሉ ፡ ፍጥረት ፡ ለዓለመ ፡ ዓለም ፡ አሜን ፨ ፨ ፨
=== chapter 84 ===
[፹፬ ፡ በእንተ ፡ ንጉሠ ፡ ኢትዮጵያ ፡ ዘከመ ፡ ገብአ ፡ ሀገሩ ።]
ወንጉሠ ፡ ኢትዮጵያሰ ፡ ቦአ ፡ ውስተ ፡ ሀገሩ ፡ በዐቢይ ፡ ፍሥሓ ፡ ወተድላ ፡ ምስለ ፡ ኵሉ ፡ ቃለ ፡ ማሕሌቶሙ ፡ ወዕንዚራቲሆሙ ፡ ወሰረገላቲሆሙ ፡ ከመ ፡ ኀይለ ፡ ሰማያዊያን ፡ እንዘ ፡ ይረውጹ ፡ በጽሑ ፡ ደወሎሙ ፡ እምኢየሩሳሌም ፡ በዕለት ፡ ሀገረ ፡ ወቄሮም ። ወለአኩ ፡ ላቲ ፡ በአሕማር ፡ ከመ ፡ ይንግርዋ ፡ ለማክዳ ፡ ንግሥተ ፡ ኢትዮጵያ ፡ ወአርድእዋ ፡ ዘከመ ፡ ረከቡ ፡ ኵሎ ፡ ሠናያተ ፡ ወዘከመ ፡ ነግሠ ፡ ወልዳ ፡ ወዘከመ ፡ አምጽእዋ ፡ ለጽዮን ፡ ሰማያዊት ፡ ተዜነወት ፡ ዘንተ ፡ ኵሎ ፡ ክብረ ፡ ወአዖደት ፡ ዐዋዴ ፡ ውስተ ፡ ኵሉ ፡ መንግሥት ፡ ዘእምታሕቴሃ ፡ ከመ ፡ ትትቀበሎ ፡ ለወልዳ ፡ ወፈድፋደሰ ፡ ዘበእንተ ፡ ጽዮን ፡ ሰማያዊት ፡ ታቦተ ፡ አምላከ ፡ እስራኤል ፤ ወነፍኁ ፡ ቀርነ ፡ በቅድሜሃ ፡ ውተፈሥሑ ፡ ኵሎሙ ፡ ሰብአ ፡ ኢትዮጵያ ፡ እምንኡስ ፡ እስከ ፡ ዐቢይ ፡ ወእምተባዕት ፡ እስከ ፡ አንስት ፤ ወተንሥኡ ፡ ፀብኣ ፡ ምስሌሃ ፡ ከመ ፡ ይትቀበልዎ ፡ ለንጉሦሙ ። ወበጽሐት ፡ ሀገረ ፡ ምስፍና ፡ እንተ ፡ ይእቲ ፡ ርእሰ ፡ መንግሥተ ፡ ኢትዮጵያ ፡ ዘበደኃሪ ፡ መዋዕል ፡ ኮነ ፡ ርእሰ ፡ ክርስትያነ ፡ ኢትዮጵያ ፤ ወውስቴታ ፡ አስተዳለወት ፡ ዕፍረተ ፡ ዘአልቦ ፡ ኆልቈ ፡ እምነ ፡ ህንድ ፡ ወእምነ ፡ ባልቴ ፡ እስከ ፡ ጋልቴት ፡ ወእምነ ፡ አልሳፉ ፡ እስከ ፡ አዘዘት ፡ ወአስተጋብአት ። ወመጽአ ፡ ወልዳ ፡ እንተ ፡ ፍኖተ ፡ አዝያባ ፡ ወቂሮ ፡ ወወፅአ ፡ እንተ ፡ መሰስ ፡ ወዐርገ ፡ ቡር ፡ ወመጽአ ፡ ሀገረ ፡ ምስፍና ፡ ርእሰ ፡ ኢትዮጵያ ፡ ዘለሊሃ ፡ አሕነጸታ ፡ በስማ ፡ ወተብህለት ፡ ደብረ ፡ ማክዳ ፨ ፨ ፨ ፨ ፨ ፨ ፨ ፨
=== chapter 85 ===
[፹፭ ፡ ኀበ ፡ ተፈሥሐት ፡ ማክዳ ፡ ንግሥት ።]
ወበጽሐ ፡ ዳዊት ፡ ንጉሥ ፡ በዐቢይ ፡ ግርማ ፡ ውስተ ፡ ሀገረ ፡ እሙ ፤ ወእምዝ ፡ ርእየታ ፡ በመልዕልት ፡ ለጽዮን ፡ ቅድስት ፡ እንዘ ፡ ታበርህ ፡ ከመ ፡ እንተ ፡ ፀሐይ ፡ ወሶበ ፡ ርእየታ ፡ አእኰተቶ ፡ ወሰብሐቶ ፡ ለአምላከ ፡ እስራኤል ፡ ወሰገደት ፡ ወጐድአት ፡ እንግድዓሃ ፡ ወአልዐለት ፡ ርእሳ ፡ ወነጸረት ፡ ውስተ ፡ ሰማያት ፡ ወአእኰተቶ ፡ ለፈጣሪሃ ፡ ወጠፍሐት ፡ በእደዊሃ ፡ ወየበበት ፡ በአፉሃ ፡ ወአጽሐሰት ፡ በእገሪሃ ፡ ወአሰርገወት ፡ ኵሎ ፡ ሥጋሃ ፡ በፍሥሓ ፡ ወተሐሥየት ፡ በመንፈስ ፡ ኵሉ ፡ ውሳጥያቲሃ ። ወምንተ ፡ እብል ፡ ዘኮነ ፡ አሜሃ ፡ ፍሥሓ ፡ ለብሔረ ፡ ኢትዮጵያ ፡ እምሰብእ ፡ እስከ ፡ እንስሳ ፡ እምንኡስ ፡ እስከ ፡ ዐቢይ ፡ ወእምአንስት ፡ እስከ ፡ ተባዕት ። ወተከለት ፡ ደባትራ ፡ ወኀይመታተ ፡ መትሕተ ፡ ደብረ ፡ መክዳ ፡ ውስተ ፡ ስፉሕ ፡ ምድር ፡ ኀበ ፡ ሠናይ ፡ ማይ ፡ ወጠብሐት ፡ መጋዝአ ፡ ላህም ፡ ወአስዋረ ፡ መጠነ ፡ ፫፼ወ፳፻ ፡ ወአንበርዋ ፡ ለጽዮን ፡ ውስተ ፡ ሕጽነ ፡ ደብረ ፡ ማክዳ ፤ ወአግበረት ፡ ላቲ ፡ ዐቀብተ ፡ ፫፻ ፡ እኁዛነ ፡ አስይፍት ፡ ለጽዮን ፡ እለ ፡ የዐቅቡ ፡ ደባትሪሃ ፡ ለጽዮን ፡ ምስለ ፡ እሊአሃ ፡ ወመኳንንቲሃ ፡ ኀያላነ ፡ እስራኤል ፤ ወእሊአሃ ፡ ፫፻ ፡ እኁ ፡ ዛነ ፡ አስይፍት ፡ ወለወልዳሂ ፡ ንጉሥ ፡ ዳዊት ፡ ከማሆሙ ፡ ፯፻ ። ወይትፌሥሑ ፡ ፈድፋደ ፡ በብዙኅ ፡ ክብር ፡ ወተድላ ፡ በሠናይ ፡ አልባስ ፤ እስመ ፡ አርትዐት ፡ መንግሥተ ፡ እምነ ፡ ባሕረ ፡ አሌባ ፡ እስከ ፡ ባሕረ ፡ ኣሴካ ፡ ወኵሉ ፡ ይትኤዘዝ ፡ በቃላ ፡ ወባቲ ፡ ክብረ ፡ ወብዕለ ፡ ፈድፋደ ፡ ዘአልቦ ፡ ዘኮነ ፡ እምቅድሜሃ ፡ ወኢይከውንሂ ፡ እምድኅሬሃ ። እስመ ፡ በውእቱ ፡ መዋዕል ፡ በኢየሩሳሌም ፡ ሰሎሞን ፡ ንጉሥ ፡ ወበኢትዮጵያ ፡ መክዳ ፡ ንግሥት ፡ ለክልኤሆሙ ፡ ተውህበ ፡ ጥበብ ፡ ወክብር ፡ ወብዕል ፡ ወሞገስ ፡ ወአእምሮ ፡ ወሥነ ፡ ቃል ፡ ወልቡና ፤ ወወርቅ ፡ ወብሩር ፡ ኀስረ ፡ ከመ ፡ ብርት ፡ ወዲባጋት ፡ ዘወርቅ ፡ ኮነ ፡ ከመ ፡ ዐግያት ፡ ዘፈትል ፡ ወእንስሳ ፡ ወአፍራስ ፡ ዘአልቦ ፡ ኆልቈ ፨ ፨ ፨ ፨ ፨ ፨ ፨
=== chapter 86 ===
[፹፮ ፡ ኀበ ፡ አንገሠቶ ፡ ማክዳ ፡ ለወልዳ ።]
ወአመ ፡ ሣልስት ፡ ዕለት ፡ አወፈየቶ ፡ ለወልዳ ፡ አፍራሰ ፡ ኅሩያነ ፡ እለ ፡ የዐቅቡ ፡ ተዓይነ ፡ ፀር ፡ ወያመዘብሩ ፡ ካዕበ ፡ አህጉረ ፡ ፀር ፡ ፯፻ ፡ ወ፼ ፡ ወ፸፻ ፡ ወጋኝተ ፡ አፍራስ ፡ እለ ፡ ይወልዳ ፡ ፸ወ፯፻ ፡ ወበቅለ ፡ አንስት ፡ ፲፻ ፡ ወበቅለ ፡ ተባዕት ፡ ኅሩያነ ፡ ፯፻ ፡ ወአልባሰ ፡ ክብር ፡ ወርቀ ፡ ወብሩረ ፡ ስፉረ ፡ በጎሞር ፡ ወመጠነ ፡ መስፈርተ ፡ ቆሮስ ፡ በበ ፡ ሳድስ ፡ ወሳብዕ ፡ ወአወፈየቶ ፡ ኵሎ ፡ ዘበሕጉ ፡ ወመንበረ ፡ መንግሥታኒ ፤ ኵሎ ፡ አወፈየቶ ፡ ለወልዳ ፨ ፨ ፨ ፨ ፨ ፨ ፨ ፨
=== chapter 87 ===
[፹፯ ፡ ኀበ ፡ መሐሉ ፡ መኳንንተ ፡ ኢትዮጵያ ።]
ወትቤሎሙ ፡ ለመኳንንቲሃ ፡ በሉኬ ፡ መሐሉ ፡ በጽዮን ፡ ሰማያዊት ፡ ከመ ፡ ኢታንግሡ ፡ አንስተ ፡ ውስተ ፡ መንበረ ፡ መንግሥተ ፡ ኢትዮጵያ ፡ ዘእንበለ ፡ ዘርኡ ፡ ለዳዊት ፡ ወልደ ፡ ሰሎሞን ፡ ንጉሥ ፡ ተባዕተ ፡ እስከ ፡ ለዓለም ፤ ወኢታንግሡ ፡ አንስተ ፡ እስከ ፡ ለዓለመ ፡ ዓለም ። ወመሐሉ ፡ ኵሎሙ ፡ ዐበይተ ፡ ቤተ ፡ ንጉሥ ፡ ወመኳንንት ፡ ወመማክርት ፡ ወመገብት ፤ ወአምሐልዎሙ ፡ ኤልምያስ ፡ ወአዛርያስ ፡ ሊቀ ፡ ካህናት ፡ ወሊቀ ፡ ዲያቆናት ፡ ወሐደሱ ፡ መንግሥተ ፡ ወገብሩ ፡ ሕገ ፡ ደቂቀ ፡ ኀይለ ፡ እስራኤል ፡ ምስለ ፡ ንጉሦሙ ፡ ዳዊት ፡ በውስተ ፡ ደብተራ ፡ ስምዕ ፡ ወተሐደሰት ፡ መንግሥት ፡ ወበርሀ ፡ አልባበ ፡ ሰብእ ፡ በርእየ ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ ወገደፉ ፡ ጣዖቶሙ ፡ ሕዝበ ፡ ኢትዮጵያ ፡ ወአምለኩ ፡ ፈጣሪሆሙ ፡ ለዘ ፡ ገብሮሙ ፡ እግዚኣብሔር ፤ ኀደጉ ፡ ምግባራቲሆሙ ፡ ሰብአ ፡ ኢትዮጵያ ፡ ወአፍቀሩ ፡ ጽድቀ ፡ ወርትዐ ፡ ዘያፈቅር ፡ እግዚኣብሔር ፤ ኀደጉ ፡ ዝሙቶሙ ፡ ዘትካት ፡ ወአፍቀሩ ፡ ንጽሐ ፡ በውስተ ፡ ትዕይንት ፡ ዘርእዮተ ፡ ጽዮን ፡ ሰማያዊት ፤ ኀደጉ ፡ ማሪተ ፡ ወሰገለ ፡ ወአፍቀሩ ፡ ንስሓ ፡ ወአንብዐ ፡ ለእግዚኣብሔር ፤ ኀደጉ ፡ ተጠይሮ ፡ ወአጣዕዎ ፡ ወገብኡ ፡ ለሰሚዕ ፡ ወለሠዊዕ ፡ ለእግዚኣብሔር ፤ ኀደጉ ፡ ተውኔተ ፡ አማልክት ፡ ዘአጋንንት ፡ ወአፍቀሩ ፡ ተቀንዮ ፡ ወሰብሖ ፡ ለእግዚኣብሔር ፨ ፡ ኀስራ ፡ አዋልደ ፡ ኢየሩሳሌም ፡ ወከብራ ፡ አዋልደ ፡ ኢትዮጵያ ፤ ተከዘት ፡ ወለተ ፡ ይሁዳ ፡ ወተፈሥሐት ፡ ወለተ ፡ ኢትዮጵያ ፤ ተፈሥሐ ፡ አድባረ ፡ ኢትዮጵያ ፡ ወተከዛ ፡ አድባረ ፡ ሊባኖስ ። በጣዖት ፡ ወግልፈዋት ፡ ተኀርዩ ፡ ሕዝበ ፡ ኢትዮጵያ ፡ ወተመነኑ ፡ ሕዝበ ፡ እስራኤል ፤ ተመነና ፡ አዋልደ ፡ ጽዮን ፡ ወከብራ ፡ አዋልደ ፡ ኢትዮጵያ ፤ ኀስሩ ፡ አእሩገ ፡ እስራኤል ፡ ወከብሩ ፡ አእሩገ ፡ ኢትዮጵያ ፡ እስመ ፡ እግዚኣብሔር ፡ ተወክፎሙ ፡ ለግዲፋን ፡ ሕዝብ ፡ ወመነኖሙ ፡ ለእስራኤል ፡ በእንተ ፡ ዘተንሥአት ፡ ጽዮን ፡ እምኔሆሙ ፡ ወመጽአት ፡ ውስተ ፡ ብሔረ ፡ ኢትዮጵያ ፤ እስመ ፡ ኀበ ፡ ሠምረ ፡ እግዚኣብሔር ፡ ተኀድር ፡ ጽዮን ፡ ማኅደራ ፡ ወኀበሰ ፡ ኢሠምረ ፡ ኢተኀድር ፤ እስመ ፡ ለሊሁ ፡ ኬንያሃ ፡ ገባሪሃ ፡ ወሐናጺሃ ፡ እግዚኣብሔር ፡ ኄር ፡ በውስተ ፡ ጽርሐ ፡ መቅደሱ ፡ ለማኅደረ ፡ ስብሐቲሁ ፡ ምስለ ፡ ወልዲ ፡ ወመንፈሱ ፡ ቅዱስ ፡ እስከ ፡ ለዓለመ ፡ ዓለም ፡ አሜን ፨ ፡ ወወሀበት ፡ ንግሥተ ፡ ኢትዮጵያ ፡ መከዳ ፡ መንግሥተ ፡ ለወልዳ ፡ ዳዊት ፡ ወልደ ፡ ሰሎሞን ፡ ንጉሠ ፡ እስራኤል ፤ ወትቤሎ ፡ ንሣእ ፡ ወሀብኩከ ፡ ወአንገሥኩ ፡ ዘእግዚኣብሔር ፡ አንገሠ ፡ ወኀረይኩ ፡ ዘእግዚኣብሔር ፡ ኀረየ ፡ ቀዋሚሃ ፡ ለደብተራሁ ፡ ወሠመርኩ ፡ ዘእግዚኣብሔር ፡ ሠምረ ፡ ላእከ ፡ ታቦተ ፡ ኪዳኑ ፡ ወሕጉ ፡ ወአዕበይኩ ፡ ዘእግዚኣብሔር ፡ አዕበየ ፡ መጋቤ ፡ ለአቤራቲሁ ፡ ወአክበርኩ ፡ ዘእግዚኣብሔር ፡ አክበረ ፡ ወሃቤ ፡ ሲሳይ ፡ ለእጓለ ፡ ማውታ ፨ ፡ ወተንሥአ ፡ ንጉሥ ፡ ወቀነተ ፡ ዘይትዐጸፍ ፡ ወሰገደ ፡ ለእሙ ፡ ወይቤላ ፡ ንግሥትሰ ፡ አንቲ ፡ እግዝእትየ ፡ ወአነ ፡ እትለአክ ፡ በኀበ ፡ ኵሉ ፡ ዘአዘዝክኒ ፡ እመሂ ፡ ለሞት ፡ ወእመሂ ፡ ለሕይወት ፡ ኀበ ፡ ፈነውክኒ ፡ እትፌነው ፡ ወኀበ ፡ ለአክኒ ፡ እትለአክ ፡ ወኵሎ ፡ ዘአዘዝክኒ ፡ እገብር ፤ እስመ ፡ አንቲ ፡ ርእስ ፡ ወአነ ፡ እግር ፡ ወአንቲ ፡ እግዝእት ፡ ወአነ ፡ ገብር ፡ ለኪ ፡ ወኵሉ ፡ ይትገበር ፡ በቃልኪ ፡ ወአልቦ ፡ ዘይትዐደው ፡ እምትእዛዝኪ ፡ ወእገብር ፡ ኵሎ ፡ ዘፈቀድኪ ። ወባሕቱ ፡ ጸልዪ ፡ ላዕሌየ ፡ ከመ ፡ ያድኅነኒ ፡ እመዐቱ ፡ አምላከ ፡ እስራኤል ፤ እስመ ፡ ይትመዐዕ ፡ ይቤሉነ ፡ ለእመ ፡ ኢያርታዕነ ፡ ልበነ ፡ ለገቢረ ፡ ፈቃዲ ፡ ወኢያሠነይነ ፡ በኵሉ ፡ ትእዛዙ ፡ ለጽዮን ፡ ማኅደረ ፡ ስብሐቲሁ ፡ ለእ ፡ ግዚኣብሔር ፤ እስመ ፡ መልአከ ፡ ኀይሉ ፡ ምስሌነ ፡ ዘመገበነ ፡ ወአብጽሐነ ፡ ዝየ ፡ ወኢይትፈለጥ ፡ ወኢይትአተት ፡ እምኔነ ። ወይእዜኒ ፡ ስምዒ ፡ ኦእግዝእትየ ፡ ለእመ ፡ አሠነይነ ፡ ወገበርነ ፡ ፈቃዶ ፡ አነ ፡ ወእለ ፡ እምድኅሬየ ፡ ይነብር ፡ እግዚኣብሔር ፡ ምስሌነ ፡ ወየዐቅበነ ፡ እምነ ፡ ኵሉ ፡ እኩይ ፡ ወእምእደ ፡ ፀርነ ፤ ወእመሰ ፡ ኢያርታዕነ ፡ ልበነ ፡ ኀቤሁ ፡ ይትመዐዐነ ፡ ወይመይጥ ፡ ገጾ ፡ እምኔነ ፡ ወይቀሥፈነ ፡ ወይትሐበለዩነ ፡ ጸላእትነ ፡ ወይመጽአነ ፡ ፍርሀት ፡ ወረዓድ ፡ እምኀበ ፡ ኢተሐዘብነ ፡ ወይትነሥኡ ፡ ላዕሌነ ፡ ወይጸብዑነ ፡ አጽባአ ፡ ወያጠፍኡነ ። ወለእመሰ ፡ ገበርነ ፡ ፈቃደ ፡ እግዚኣብሔር ፡ ወአሠነይነ ፡ ግብራ ፡ ለጽዮን ፡ ንከውን ፡ ኄራን ፡ ወአልቦ ፡ ዘይክል ፡ አሕሥሞ ፡ ላዕሌነ ፡ በደብረ ፡ መቅደሱ ፡ እንዘ ፡ ሀለወት ፡ ማኅደሩ ፡ ምስሌነ ። ወነዋ ፡ ዘአምጻእነ ፡ ጽሑፍ ፡ ምስሌነ ፡ ኵሉ ፡ ሕገ ፡ መንግሥት ፡ ወትእዛዘ ፡ እግዚኣብሔር ፡ ዘነገረነ ፡ ሰዶቅ ፡ ሊቀ ፡ ካህናት ፡ አመ ፡ ይቀብአኒ ፡ ቅብአ ፡ መንግሥት ፡ በውስተ ፡ ቤተ ፡ መቅደሱ ፡ ለእግዚኣብሔር ፡ እንዘ ፡ ውስተ ፡ እዴሁ ፡ ቀርነ ፡ ቅብአ ፡ ዕፍረት ፡ ዘክህነት ፡ ወዘመንግሥት ፤ ወገብሩ ፡ ለነ ፡ ዘበሕጉ ፡ ወተቀ ፡ ባእነ ፡ አዛርያስ ፡ ለክህነት ፡ ወአነ ፡ ለመንግሥት ፡ ወአልምያስ ፡ አፈ ፡ እግዚኣብሔር ፡ ዐቃቤ ፡ ሕግ ፡ ዘውእቱ ፡ ዐቃቢሃ ፡ ለጽዮን ፡ ወእዘኒሁ ፡ ለንጉሥ ፡ በኵሉ ፡ ፍኖተ ፡ ጽድቅ ። ወአዘዙኒ ፡ ከመ ፡ አልቦ ፡ ዘእገብር ፡ ዘእንበለ ፡ በምክሮሙ ፡ ወአቀሙነ ፡ ቅድመ ፡ ንጉሥ ፡ ወቅድመ ፡ ሊቃውንተ ፡ እስራኤል ፡ ወኵሉ ፡ ሕዝብ ፡ ይሰምዕ ፡ እንዘ ፡ ይኤዝዘነ ፡ ሰዶቅ ፡ ካህን ። ወተነፍኀ ፡ ኢዮብልዮስ ፡ ወኣርጋኖን ፡ ወቃለ ፡ ዕንዚራቲሆሙ ፡ ወብዕዛቲሆሙ ፡ ወድምፀ ፡ ጽራኃቲሆሙ ፡ ዘተገብረ ፡ አሜሃ ፡ በአናቅጺሃ ፡ ለኢየሩሳሌም ። ምንተ ፡ እነግረክሙ ፡ ለእለ ፡ ሀለውክሙ ፡ ዝየ ፤ እስመ ፡ መሰለነ ፡ ምድር ፡ ዘታድለቀልቅ ፡ እስከ ፡ መሠረታቲሃ ፡ ወሰማይኒ ፡ ዘያንጐደጒድ ፡ በመልዕልቴነ ፤ ወልብኒ ፡ ትርዕድ ፡ ምስለ ፡ ብረኪሃ ፨ ፨ ፨ ፨ ፨ ፨ ፨ ፨
=== chapter 88 ===
[፹፰ ፡ ኀበ ፡ ዜነዋ ፡ ለእሙ ፡ ዘከመ ፡ አንገሥዎ ።]
ወሶበ ፡ አርመሙ ፡ እሉ ፡ ተንሥአ ፡ ካህን ፡ ዘይኤዝዘነ ፡ ዘምስለ ፡ ፍርሀተ ፡ እግዚኣብሔር ፡ ወአንብዕ ፡ እንዘ ፡ ትርዕድ ፡ ከርሥነ ፡ ወትውኅዝ ፡ አንብዕነ ፤ ውስተ ፡ ልብነ ፡ በአማንኬ ፡ ወኢኮነ ፡ ሐሰተ ፡ ህልው ፡ እግዚኣብሔር ፡ ወይነብር ፡ ውስተ ፡ ትእዛዙ ፡ ወነጊረ ፡ ትእዛዙ ፡ ኢያአትት ፡ እምእለ ፡ ያፈቅርዎ ፡ ወየዐቅቡ ፡ ትእዛዞ ፡ ይሄሉ ፡ ወትረ ፡ ምስሌሆሙ ፡ ወይእዜኒአ ፡ ስምዕዮሙአ ፡ እሉ ፡ መላህቅት ፡ ወደቂቀ ፡ ኀያላነ ፡ እስራኤል ፡ ዘአምጽኡ ፡ ኵነኔ ፡ ወፍትሐ ፡ ዘጸሐፉ ፡ በቅድመ ፡ ንጉሥ ፡ ሰሎሞን ፡ ወወሀቡነ ፡ ከመ ፡ ኢንትገሐሥ ፡ ኢለየማን ፡ ወኢለፀጋም ፡ እምዘ ፡ አዘዙነ ፤ ወካዕበ ፡ ይቤሉነ ፡ ወአለበዉነ ፡ ከመ ፡ ነሣእነ ፡ ሞተ ፡ ወሕይወተ ፡ ወከመ ፡ ብእሲ ፡ ዘቦቱ ፡ ውስተ ፡ ፀጋሙ ፡ እሳት ፡ ወውስተ ፡ የማኑ ፡ ማይ ፡ ወኀበ ፡ ይፈቅድ ፡ ይወዲ ፡ እዴሁ ፤ እስመ ፡ መቅሠፍት ፡ ወሕይወት ፡ ጽሑፍ ፡ ውስቴቱ ፡ ለእለ ፡ ገብርዋ ፡ ለእኪት ፡ መቅሠፍት ፡ ወለእለ ፡ ገብርዋ ፡ ለሠናይት ፡ ሕይወት ፨ ፡ ወአውፅኡ ፡ ኤልምያስ ፡ ወአዛርያስ ፡ ይእቲ ፡ መጽሐፈ ፡ እንተ ፡ ተጽሕፈት ፡ በቅድመ ፡ እግዚኣብሔር ፡ ወበቅድመ ፡ ንጉሠ ፡ እስራኤል ፡ ወአንበብዋ ፡ በቅድመ ፡ መክዳ ፡ ወበቅድመ ፡ ዐበይተ ፡ እስራኤል ። ወሶበ ፡ ሰምዑ ፡ ዘንተ ፡ ቃላተ ፡ ሰገዲ ፡ ለእግዚኣብሔር ፡ ኵሎሙ ፡ እለ ፡ ውስተ ፡ ዐውድ ፡ ንኡሶሙ ፡ ወዐቢዮሙ ፡ ወገነዩ ፡ ወሰብሑ ፡ ለእግዚኣብሔር ፡ ለዘ ፡ አስምዖሙ ፡ ዘንተ ፡ ቃለ ፡ ወወሀቦሙ ፡ ዘንተ ፡ ትእዛዘ ፡ ከመ ፡ ይግበሩ ፡ ፍትሐ ፡ ወኵነኔሁ ፡ ለእግዚኣብሔር ፤ ወዓዲ ፡ ረሰዮሙ ፡ ሰብአ ፡ ቤቱ ፡ እስመ ፡ ሀለወት ፡ ጽዮን ፡ ማእከሌሆሙ ፡ ወማኅደረ ፡ ስብሐቲሁ ፡ ለእግዚኣብሔር ፡ እንተ ፡ ታድኅኖሙ ፡ እምኵሉ ፡ እኩይ ፡ ወትባርክ ፡ ፍሬ ፡ ምድሮሙ ፡ ወታበዝኅ ፡ እንስሳሆሙ ፡ ወትባርክ ፡ አንቅዕተ ፡ ማያቲሆሙ ፡ ወትባርክ ፡ ተግባሮሙ ፡ ወፍሬ ፡ አትክልቲሆሙ ፡ ወታልህቅ ፡ ውሉዶሙ ፡ ወተዐቅብ ፡ ርሡኣኒሆሙ ፡ ወትከውኖሙ ፡ ፍጽመ ፡ ወኳላ ፡ ኀበ ፡ ኵሉ ፡ ዘኀደሩ ፡ ወይመውኡ ፡ ፀሮሙ ፡ በኵሉ ፡ ኀበ ፡ ሖሩ ። ወተፈሥሑ ፡ ኵሎሙ ፡ ሰብአ ፡ ኢትዮጵያ ፨ ፡ ወንግሥትኒ ፡ ትቤሎ ፡ ለወልዳ ፡ ወልድየ ፡ ወሀበከ ፡ እግዚኣብሔር ፡ ርትዐ ፡ ወሖር ፡ ባቲ ፡ ወኢትትገሐሥ ፡ ኢለየማን ፡ ወኢለፀጋም ፤ ወአፍቅር ፡ እግዚኣብሔር ፡ አምላክከ ፡ እስመ ፡ መሓሪ ፡ ውእቱ ፡ ለየዋሃን ፡ እስመ ፡ እምትእዛዙ ፡ ይትዐወቅ ፡ ፍኖቱ ፡ ወእምአምርሕተ ፡ ነገሩ ፡ ይትአመር ፡ ኂሩቱ ። ወተመይጠት ፡ ኀቤሆሙ ፡ ለኤልምያስ ፡ ወአዛርያ ፡ ወለኵሎሙ ፡ ኀያላነ ፡ እስራኤል ፤ አንትሙ ፡ ዕቀብዎ ፡ ወመሀርዎ ፡ ፍኖተ ፡ ለመንግሥተ ፡ እግዚኣብሔር ፡ ወአክብሮታ ፡ ለጽዮን ፡ እግዝእትነ ፡ ወለኵሉ ፡ ዘኢታፈቅር ፡ እግዝእትነ ፡ ኢንግበር ፡ ንግሩነ ፡ በአስተጠናቅቆ ፡ ለዓለም ፡ ለትውልደ ፡ ትውልድ ፡ ከመ ፡ ኢትትመዐዐነ ፡ ለእመ ፡ ኢያሠነይነ ፡ ግብራ ፡ ወእግዚኣብሔርኒ ፡ ከመ ፡ ይኅድር ፡ ምስሌነ ፤ ወአንተኒ ፡ ኦወልድየ ፡ ስማዕ ፡ ቃለ ፡ አበዊከ ፡ ወሖር ፡ በምክሮሙ ፡ ኢያእብድከ ፡ ስታይ ፡ ወኢአንስት ፡ ወኢአስተምክሖ ፡ አልባስ ፡ ወአልጒሞ ፡ አፍራስ ፡ ኢነጽሮ ፡ ንዋየ ፡ ሐቅል ፡ ዘቅድም ፡ ወዘድኅር ፡ አላ ፡ ይኩን ፡ ትውክልትከ ፡ በእግዚኣብሔር ፡ ወበጽዮን ፡ ታቦተ ፡ ሕጉ ፡ ለእግዚኣብሔር ፡ ፈጣሪከ ፡ ከመ ፡ ትማዕ ፡ ፀርከ ፡ ወይብዛኅ ፡ ዘርእከ ፡ በዲበ ፡ ምድር ፡ ወይግረሩ ፡ ጸላእትከ ፡ ወፀርከ ፡ ዘቅሩብ ፡ ወዘርሑቅ ፨ ፡ ወእሙንቱኒ ፡ ደቂቀ ፡ ኀይል ፡ አውሥኡ ፡ በአሐዲ ፡ ቃል ፡ ወይቤሉ ፡ ንሕነሰ ፡ እግዝእትነ ፡ ምስሌክሙ ፡ ኵሎ ፡ ጊዜ ፡ ወንዜከሮ ፡ ለእግዚእ ፡ ንጉሥ ፡ ናሁ ፡ ዘጽሑፍ ፡ ወገቢርሰ ፡ እንዘ ፡ አምላከ ፡ እስራኤል ፡ ይከውኖ ፡ ረዳኤ ፡ ወነገረ ፡ እሙ ፡ ይሰምዕ ፡ ወንንግሮ ፡ ፍኖታ ፡ ለምግባረ ፡ ሠናይ ፤ እስመ ፡ አልቦ ፡ ዘይትረከብ ፡ በዝ ፡ መዋዕል ፡ በጥበብ ፡ ዘእንበለ ፡ እግዚእነ ፡ ንጉሥ ፡ ዘከማኪ ፤ ሰሐብክነ ፡ ዝየ ፡ ከመ ፡ አግብርትኪ ፡ ምስለ ፡ እግዝእትነ ፡ ጽዮን ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ አምላክነ ፡ በከመ ፡ ይስሕብዎ ፡ ለገመል ፡ ዘጽዑን ፡ ንዋየ ፡ ክብር ፡ በንስቲት ፡ ቀጢን ፡ ፈትለ ፡ ኢዊጥ ፡ እንተ ፡ ኢትትበተክ ፡ ዲበ ፡ አንፉ ፡ ዝማማት ፤ ወይእዜኒ ፡ ኢትትሀየዩነ ፡ ወኢትረስዩነ ፡ ከመ ፡ ነግድ ፡ ባዕድ ፡ አላ ፡ ረስዩነ ፡ ከመ ፡ አግብርቲክሙ ፡ እለ ፡ የኀፅቡ ፡ እገሪክሙ ፡ እስመ ፡ ንሕነሰ ፡ እመኒ ፡ ሞትነ ፡ ወእመኒ ፡ ሐየውነ ፡ ምስሌክሙ ፡ ወአልብነ ፡ ተስፋ ፡ ውስተ ፡ ብሔረ ፡ ሙላድነ ፡ ዘእንበለ ፡ ኀቤክሙ ፡ ወእግዝእትነ ፡ ጽዮን ፡ ቅድስት ፡ ሰማያዊት ፡ ማኅደረ ፡ ስብሐቲሁ ፡ ለእግዚኣብሔር ፨ ፨ ፨ ፨
=== chapter 89 ===
[፹፱ ፡ ኀበ ፡ ነገረቶሙ ፡ ንግሥት ፡ ለደቂቀ ፡ እስራኤል ።]
ወአውሥአት ፡ ንግሥት ፡ ወትቤሎሙ ፡ አኮ ፡ ከመ ፡ አግብርት ፡ ዘትብሉ ፡ አላ ፡ ንሬስየክሙ ፡ ከመ ፡ አብ ፡ ወከመ ፡ መምህር ፤ እስመ ፡ አንትሙ ፡ ዐቃብያነ ፡ ሕጉ ፡ ለእግዚኣብሔር ፡ ወመራሕያነ ፡ ትእዛዙ ፡ ለአምላከ ፡ እስራኤል ፡ ወሰብአ ፡ ቤቱ ፡ ለእግዚኣብሔር ፡ ወዐቃብያኒሃ ፡ ለጽዮን ፡ ታቦተ ፡ ሕጉ ፡ ለእግዚኣብሔር ፡ ወአልቦ ፡ ዘንትዐደው ፡ እምትእዛዝክሙ ፡ እስመ ፡ አንትሙ ፡ ትከውኑነ ፡ መርሐ ፡ በኀበ ፡ ፍኖተ ፡ እግዚኣብሔር ፡ እምኵሉ ፡ እኩይ ፤ ንትገሐሥ ፡ በቃልክሙ ፡ እምዘኢይሠምር ፡ እግዚኣብሔር ፡ ወንቅረብ ፡ ኀበ ፡ ኵሉ ፡ ሠናይ ፡ ዘሠምረ ፡ እግዚኣብሔር ፡ በትእዛዘ ፡ ዚአክሙ ፤ ወባሕቱ ፡ አይድዑ ፡ ለዝንቱ ፡ ኵሉ ፡ ሕዝብ ፡ ወመሀርዎሙ ፡ ቃላተ ፡ አእምሮ ፡ እስመ ፡ አልቦ ፡ አመ ፡ ሰምዑ ፡ ዘእንበለ ፡ ዮም ፡ ዘከመዝ ፤ ወባሕቱ ፡ ጥበብሰ ፡ ወአእምሮ ፡ ታበርህ ፡ ከመ ፡ ብርሃነፀሐይ ፡ ለእለ ፡ ቦሙ ፡ አእምሮ ። ወአንሰ ፡ እስከ ፡ ይእዜሂ ፡ ኢረወይክዎ ፡ ለማየ ፡ አእምሮ ፡ እስመ ፡ ይጥዕም ፡ እምነ ፡ መዓር ፡ ወያረዊ ፡ እምነ ፡ ወይን ፡ ወያጸግብ ፡ ወያጐሥዕ ፡ ጥበበ ፡ ወያስዖዝዝ ፡ ልቡና ፡ ወያልሕስ ፡ ከመ ፡ ዘሰክረ ፡ ወያለጸልጽ ፡ ከመ ፡ ዘጐየ ፡ ወያሀ ፡ ፉ ፡ ከመ ፡ ዘጾረ ፡ ክቡደ ፡ በፍኖተ ፡ ዐቀብ ፡ በብሔረ ፡ ሐሩር ፡ ወላህበ ፡ ፀሐይ ፤ ሶበ ፡ ተከሥተ ፡ አልባቢሆሙ ፡ ለጠቢባን ፡ ለትንቢት ፡ ወለምህሮ ፡ ኢይፈርህዎ ፡ ለንጉሥ ፡ በእንተ ፡ ዕበየ ፡ ክብሩ ፡ ለእመ ፡ ተግሕሠ ፡ እምፍኖተ ፡ እግዚኣብሔር ። ነዋኬዝ ፡ ዘተነግረ ፡ ቃለ ፡ ሕግ ፡ ዘበአማን ፡ አእምሮ ፡ ለእለ ፡ ይፈቅድዎ ፡ ወይሰትይዎ ፡ ወይረውይዎ ፤ አንሰ ፡ እጼሊ ፡ እግዚኦ ፡ አምላከ ፡ እስራኤል ፡ ቅዱሰ ፡ ቅዱሳን ፡ ሀበኒ ፡ ከመ ፡ እትልዋ ፡ ለጥበብ ፡ ወኢይትገደፍ ፡ ሀበኒ ፡ ከመ ፡ እጠቀም ፡ ባቲ ፡ ወኢይንኀል ፡ ሀበኒ ፡ ከመ ፡ እሣረር ፡ ባቲ ፡ ወኢያንቀልቅል ፡ ሀበኒ ፡ ከመ ፡ እትዐመድ ፡ ባቲ ፡ ወኢይጽነን ፡ ሀበኒ ፡ ከመ ፡ እሰወር ፡ ባቲ ፡ ወኢይትቀላዕ ፡ ሀበኒ ፡ ከመ ፡ እትሐነጽ ፡ ባቲ ፡ ወኢይንሐድ ፡ ሀበኒ ፡ ከመ ፡ እትወርዘው ፡ ባቲ ፡ ወኢይድክም ፡ ሀበኒ ፡ ከመ ፡ እቁም ፡ ባቲ ፡ ወኢይደቅ ፡ ሀበኒ ፡ ከመ ፡ እትመርጐዝ ፡ ባቲ ፡ ወኢይተንትን ፡ ሀበኒ ፡ ከመ ፡ እሠአን ፡ ባቲ ፡ ወኢይድኀፅ ፡ ሀበኒ ፡ ከመ ፡ እትአኀዝ ፡ ባቲ ፡ ወኢይሰጠም ፡ ሀበኒ ፡ ከመ ፡ እጽናዕ ፡ ባቲ ፡ ወኢይሠረም ፡ ሀበኒ ፡ ከመ ፡ እንበር ፡ ባቲ ፡ በስንኣሃ ፡ እጽገብ ፡ በማእዳ ፡ ወኢይሜጽራ ፡ እስትያ ፡ ወኢይረውያ ፡ እጽገባ ፡ ወኢይተፍኣ ፤ ሰከርኩ ፡ ባቲ ፡ ወኢተንተንኩ ፡ ተንተንኩ ፡ በእንቲ ፡ አሃ ፡ ወኢወደቁ ፡ ወደቁ ፡ በእንቲአሃ ፡ ወኢተሀጐልኩ ፡ ባቲ ። ተሰጠምኩ ፡ በእንቲአሃ ፡ ውስተ ፡ ዐቢይ ፡ ባሕር ፡ ወአኀዝኩ ፡ ባሕርየ ፡ በውስተ ፡ ልጐተ ፡ መዓምቅቲሃ ፡ በዘባቲ ፡ እብዕል ፤ ወረድኩ ፡ ከመ ፡ ዐቢይ ፡ መልሕቀ ፡ ኀጺን ፡ በዘ ፡ ይበይታ ፡ አሕማር ፡ ውስተ ፡ ዕመቀ ፡ ባሕር ፡ ወነሣእኩ ፡ ማኅቶተ ፡ እንተ ፡ ታበርህ ፡ ሊተ ፡ ወዐረጉ ፡ በአሕባለ ፡ ራግናቲሃ ፡ ለልቡና ፤ ኖምኩ ፡ ውስተ ፡ መዓምቅቲሃ ፡ ለባሕር ፡ ወዘእንበለ ፡ እትዐዘዝ ፡ በማይ ፡ ሐለምኩ ፡ ባቲ ፡ እንዘ ፡ ኮከብ ፡ ውስተ ፡ ሕፅንየ ፡ ወአንከርኩ ፡ ባቲ ፡ በእኂዞታ ፡ ወአጽናዕክዋ ፡ ምስለ ፡ ጸዳለ ፡ ፀሐይ ፡ አኀዝክዋ ፡ ወኢየኀድጋ ፡ እስከ ፡ ለዓለም ፤ ቦእኩ ፡ ውስተ ፡ አናቅጸ ፡ መዛግብቲሃ ፡ ለጥበብ ፡ ወሔብኩ ፡ ሊተ ፡ ማየ ፡ አእምሮ ፤ ቦእኩ ፡ ውስተ ፡ ዋዕየ ፡ ነበልባለ ፡ ፀሐይ ፡ ወአብርሀተኒ ፡ በጸዳላ ፡ ወተወልተውኩ ፡ ባቲ ፡ ወድኅንኩ ፡ በተወክሎታ ፤ አኮ ፡ ሊተ ፡ ባሕቲትየ ፡ አላ ፡ ለኵሎሙ ፡ እለ ፡ ሖሩ ፡ በአሠራ ፡ ለጥበብ ፡ አኮ ፡ ሊተ ፡ ለባሕቲትየ ፡ አላ ፡ ለኵሎሙ ፡ ሰብአ ፡ ሀገርየ ፡ መንግሥተ ፡ ኢትዮጵያ ፡ ወአኮ ፡ ሎሙ ፡ ለባሕቲቶሙ ፡ አላ ፡ ለእለ ፡ የሐውሩ ፡ በፍኖቶሙ ፡ አሕዛብ ፡ እለ ፡ ዐውዶ ፡ ሙ ። እስመ ፡ እግዚኣብሔር ፡ ወሀበነ ፡ ዘርአ ፡ በጽዮን ፡ ወማኅደረ ፡ በኢየሩሳሌም ፡ ወዓዲ ፡ ኮነ ፡ ክፍለ ፡ ምስለ ፡ እለ ፡ ኀረየ ፡ ዘርአ ፡ ያዕቆብ ፡ እስመ ፡ ረሰያ ፡ ለማኅደሩ ፡ ትኅድር ፡ ምስሌነ ፤ እሙንቱሰ ፡ እምይእዜ ፡ ተዐቅጹ ፡ ወንሕነሰ ፡ እምይእዜ ፡ ረታዕነ ፡ እሙንቱሰ ፡ እምይእዜ ፡ ኀስሩ ፡ ወተመነኑ ፡ ወንሕነሰ ፡ እምይእዜ ፡ ከበርነ ፡ ወተፈቀርነ ፡ እስከ ፡ ለዓለመ ፡ ዓለም ፡ ወለትውልደ ፡ ትውልድ ፡ ዘይመጽእ ። ወአንትሙኒ ፡ መኳንንት ፡ ስምዑኒ ፡ ወጠይቅዋ ፡ ለመክሥተ ፡ አፉየ ፡ ወቃልየ ፤ አፍቅርዋ ፡ ለርትዕ ፡ ወጽልእዋ ፡ ለሐሰት ፡ ርትዕሰ ፡ ጽድቅ ፡ ወሐሰትሰ ፡ ርእሰ ፡ ዐመፃ ፡ ወኢትትዓመፁ ፡ በበይናቲክሙ ፤ እስመ ፡ እግዚኣብሔር ፡ የኀድር ፡ ምስሌክሙ ፡ ወማኅደረ ፡ ስብሐቲሁ ፡ ማእከሌክሙ ፡ እስመ ፡ ሰብአ ፡ ቤቱ ፡ ኮንክሙ ፡ ወኅድጉ ፡ እምይእዜ ፡ ዘትካት ፡ ልማድክሙ ፡ ተጠይሮ ፡ ወአጣዕዎ ፡ ሰገለ ፡ ወሥራየ ፡ ወቀስመ ፡ ወሐረሰ ፤ ወለእመቦ ፡ ዘተረክበ ፡ እምዮም ፡ በውስተ ፡ ዘትካት ፡ ልማድ ፡ ይትበርበር ፡ ቤቱ ፡ ወይትኰነን ፡ ምስለ ፡ ብእሲቱ ፡ ወውሉዲ ፡ ወንዋዩ ፨ ፡ ወትቤሎ ፡ ለአዛርያስ ፡ በል ፡ ንግር ፡ ዘከመ ፡ ታፈቅር ፡ እግዝእትነ ፡ ምስለ ፡ ንጉሥ ፡ ሰማያዊ ፨ ፨ ፨ ፨ ፨ ፨
=== chapter 90 ===
[፺ ፡ ኀበ ፡ ወደሳ ፡ አዛርያስ ፡ ለንግሥት ፡ ወለሀገራ ።]
ወተንሥአ ፡ አዛርያስ ፡ ወይቤላ ፡ ለንግሥት ፡ ኦእግዝእትነ ፡ በአማን ፡ አልቦ ፡ ዘይትማሰለኪ ፡ በጥበብ ፡ ወበአእምሮ ፡ ወተውህበ ፡ ለኪ ፡ እምኀበ ፡ እግዚኣብሔር ፡ ዘእንበለ ፡ እግዚእየ ፡ ንጉሥ ፡ ዘአብጽሐነ ፡ ውስተ ፡ ዛቲ ፡ ምድር ፡ ምስለ ፡ እግዝእትነ ፡ ጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ። ንሕነሰ ፡ ወአበዊነ ፡ ቀደምት ፡ ንቤ ፡ አልቦ ፡ ዘኀረየ ፡ እግዚኣብሔር ፡ ዘእንበለ ፡ ቤተ ፡ ያዕቆብ ፡ ኪያነ ፡ ኀረየ ፡ ወኪያነ ፡ አብዝኀ ፡ ወኪያነ ፡ ሠምረ ፡ ወአንገሠነ ፡ ወረሰየነ ፡ ሰብአ ፡ ቤቱ ፡ ወመማክርቲሁ ፡ ለስብሐቲሁ ፡ ወለታቦተ ፡ ኪዳኑ ፡ ወሀገርኒ ፡ ንብል ፡ አልቦ ፡ ዘኀረየ ፡ ዘእንበለ ፡ ሀገርነ ፤ ወይእዜሰ ፡ ርኢነ ፡ እንተ ፡ ትኄይስ ፡ ሀገረ ፡ ኢትዮጵያ ፡ እምብሔረ ፡ ይሁዳ ፤ ወእምከመ ፡ በጻሕነ ፡ ውስተ ፡ ብሔርክሙ ፡ ሠነየነ ፡ ኵሉ ፡ ዘርኢነ ፡ ማይክሙኒ ፡ ሠናይ ፡ ወትሁቡ ፡ ዘእንበለ ፡ ሤጥ ፡ ወነፋስ ፡ ዘእንበለ ፡ መረዋሕት ፡ ወጸቃውዕ ፡ ከመ ፡ ጽንጒነ ፡ መርሕብ ፡ ወእንስሳ ፡ ከመ ፡ ኆጻ ፡ ባሕር ፡ ወእምዘ ፡ ርኢነ ፡ አልቦ ፡ ሕሱመ ፡ ወአልቦ ፡ ፀዋገ ፡ እምዘ ፡ ንሰምዕ ፡ ወእምዘ ፡ ንከይድ ፡ ወእምዘ ፡ ን ፡ ገስስ ፡ ወእምዘ ፡ ንጥዕም ፡ በአፉነ ፤ ወባሕቱ ፡ እምእንተ ፡ ትኔጽር ፡ አሐቲ ፡ ሀለወት ፡ ኮንክሙ ፡ ጸሊማነ ፡ በገጽ ፡ ወዘንተ ፡ ዘእቤ ፡ በዘ ፡ ርኢኩ ፡ ወባሕቱ ፡ ለእመ ፡ አብርሀ ፡ እግዚኣብሔር ፡ አልባቢክሙ ፡ አልቦ ፡ ዘይነኪየክሙ ። ወባሕቱ ፡ ተገሐሡ ፡ እማውታ ፡ ወደም ፡ ወብትክ ፡ ወዝሙት ፡ ወእምኵሉ ፡ ዘይጸልእ ፡ እግዚኣብሔር ፡ ከመ ፡ ንትፈሣሕ ፡ ብክሙ ፡ ሶበ ፡ ንሬኢየክሙ ፡ እንዘ ፡ ትፈርሁ ፡ እግዚኣብሔር ፡ ወእንዘ ፡ ትርዕዲ ፡ እምቃሉ ፤ በከመ ፡ አዘዞሙ ፡ እግዚአብሔር ፡ ለአበዊነ ፡ ወይቤሎ ፡ ለሙሴ ፡ አዝዞሙ ፡ በኵሉ ፡ ወንግሮሙ ፡ ከመ ፡ ይዕቀቡ ፡ ሕግየ ፡ ወሥርዐትየ ፤ ወኢትትገሐሡ ፡ ኢለየማን ፡ ወኢለፀጋም ፡ እምዘ ፡ ንኤዝዘክሙ ፡ ዮም ፡ ወይእዜኒ ፡ ከመ ፡ ታምልክዎ ፡ ለእግዚኣብሔር ፡ ቅዱሰ ፡ እስራኤል ፡ ወትግበሩ ፡ ሥምረቶ ፡ እስመ ፡ መነኖሙ ፡ ለሕዝብነ ፡ በከመ ፡ ተነበዩ ፡ ነቢያቲነ ፡ ወኀረየ ፡ ኪያክሙ ፤ አኮኑ ፡ ለኵልክሙ ፡ እግዚኣብሔር ፡ ፈጣሪክሙ ፡ ምንተ ፡ ይሰአኖ ፡ ለእግዚኣብሔር ፡ ለእመ ፡ አፍቀረ ፡ ኪያነ ፡ ወጸልአ ፡ ኪያሆሙ ፡ እስመ ፡ ኵሉ ፡ ሎቱ ፡ ወኵሉ ፡ ተግባሩ ፡ ወአልቦ ፡ ዘይሰአኖ ፡ ለእግዚኣብሔር ፡ አምላከ ፡ እስራኤል ። ወስምዑ ፡ እንግርክሙ ፡ ትእዛዞ ፤ ፩ ፡ ኢይትኀየል ፡ ካልኦ ፡ ወኢትሂዲ ፡ ንዋየ ፡ ቢጽክሙ ፡ ወኢትትሓመዩ ፡ ወኢትትዓመፁ ፡ ወኢትትላኰዩ ፤ ወለእመቦ ፡ ዘአተወ ፡ እንስሳ ፡ ምስለ ፡ ንዋይክሙ ፡ እምንዋየ ፡ ቢጽክሙ ፡ ኢትትዐወርዎ ፡ አላ ፡ አግብኡ ፡ ሎቱ ፡ ወለእመሰ ፡ ኢያእመርክሙ ፡ ባዕለ ፡ ንዋዩ ፡ አጽንዑ ፡ ሎቱ ፡ ወእምከመ ፡ ረከበ ፡ አግብኡ ፡ ሎቱ ፡ ንዋዮ ፤ ወእመቦ ፡ ዘወድቀ ፡ ንዋየ ፡ ቢጽክሙ ፡ ውስተ ፡ ግብ ፡ አው ፡ ውስተ ፡ ዐዘቅት ፡ አው ፡ ውስተ ፡ ቀላይ ፡ አው ፡ ውስተ ፡ ጸድፍ ፡ ኢትትዐደዉ ፡ ወኢትትኀለፉ ፡ እስከ ፡ ትነግርዎ ፡ ወታስተላዕልዎ ፤ ወእመኒቦ ፡ ዘከረየ ፡ ዐዘቅተ ፡ ወዘሐነጸ ፡ ማኅፈደ ፡ ኢይኅድግ ፡ ዘእንበለ ፡ መክደን ፡ ወተድባብ ፤ ወለእመኒቦ ፡ ዘጾረ ፡ ጾረ ፡ ክቡደ ፡ አው ፡ ለእመኒ ፡ ቦዘጸዓነ ፡ ዘወድቆ ፡ ኢትኅልፉ ፡ ዘእንበለ ፡ ታስተላዕልዎ ፡ ወታቅልሉ ፡ ሎቱ ፡ እስመ ፡ እኁክሙ ፡ ውእቱ ፤ ወኢታብስሉ ፡ እጐልተ ፡ በሐሊበ ፡ እሙ ፤ ወኢትግምጹ ፡ ፍትሐ ፡ ምስኪን ፡ ወእጓለ ፡ ማውታ ፤ ወኢታድልዉ ፡ ለገጽ ፡ ወኢትንሥኡ ፡ ሕልያነ ፡ ለገሚጸ ፡ ፍትሕ ፡ ወለስምዐ ፡ ሐሰት ፤ ወሶበ ፡ ትረክቡ ፡ ዖፈ ፡ በውስተ ፡ ምድርክሙ ፡ ምስለ ፡ አፍኅርቲሃ ፡ ታሕይዉ ፡ ኪያሃ ፡ ወኢትንሥኡ ፡ ደቂቃ ፡ ከመ ፡ ይኑኅ ፡ መዋዕሊክሙ ፡ በዲበ ፡ ምድር ፡ ወይትባረኩ ፡ ዘርእ ፡ ክሙ ፡ ለነዋኅ ፡ መዋዕል ፤ ወሶበ ፡ ተዐጽዲ ፡ ማእረረ ፡ እክልክሙ ፡ ኢትጠናቀቁ ፡ ዐጺደ ፡ ወዘወድቀሂ ፡ ኢትእርዩ ፡ ወዘረሳዕክሙ ፡ ክልስስተ ፡ ኅድጉ ፡ ተመዪጠክሙ ፡ ኢትንሥኡ ፡ አላ ፡ ኅድጉ ፡ ለግዩረ ፡ ሀገርክሙ ፡ ከመ ፡ ይባርክ ፡ እግዚኣብሔር ፡ ፍሬ ፡ ምድርክሙ ፤ ወኢትግበሩ ፡ ርኩሰ ፡ ወኢትፍትሑ ፡ በአድልዎ ፡ ወኢትግበሩ ፡ ዐመፃ ፡ በኵሉ ፡ ዘትትናገሩ ፡ ከመ ፡ ትትባረኩ ፡ ወከመ ፡ ይብዛኅ ፡ ፍሬ ፡ ምድርክሙ ፡ ወከመ ፡ ትድኀኑ ፡ እመርገመ ፡ ሕግ ፡ ዘአዘዘ ፡ እግዚኣብሔር ፡ ከመ ፡ ይርግምዎ ፡ ለገባሬ ፡ እኪት ፡ ወጸሐፈ ፡ እንዘ ፡ ይብል ፡ ዘያስሕቶ ፡ ፍኖቶ ፡ ለዕዉር ፡ ርጉም ፡ ውእቱ ፤ ወዘይነግሮ ፡ ሕሡመ ፡ ለጽሙም ፡ ርጉም ፡ ውእቱ ፤ ወዘአርኰሰ ፡ ምስካበ ፡ አቡሁ ፡ ርጉም ፡ ውእቱ ፤ ወዘይዘብጥ ፡ ቢጾ ፡ በጒሕሉት ፡ ርጉም ፡ ውእቱ ፤ ወዘይገምጽ ፡ ፍትሐ ፡ ግዩር ፡ ከመ ፡ ይቅትል ፡ ደመ ፡ ንጹሕ ፡ ርጉም ፡ ውእቱ ፤ ዘያስተአኪ ፡ አቡሁ ፡ ወእሞ ፡ ርጉም ፡ ውእቱ ፤ ወኵሉ ፡ ዘይገብር ፡ ግልፎ ፡ ወስብኮ ፡ ዘርኩስ ፡ ግብረ ፡ እደ ፡ ሰብእ ፡ ወይሠይሞ ፡ ወየኀብኦ ፡ ውስተ ፡ ቤቱ ፡ ወይሰግድ ፡ ሎቱ ፡ ከመ ፡ አምላክ ፡ ኢአሚኖ ፡ ከመ ፡ እግዚኣብሔር ፡ ፈጣሬ ፡ ሰማያት ፡ ወምድር ፡ ዘገብሮ ፡ ለአዳም ፡ በዘ ፡ ዚአሁ ፡ አርአያ ፡ ወአምሳል ፡ ወሤሞ ፡ ላዕለ ፡ ኵሉ ፡ ዘፈጠረ ፡ ወኵልነ ፡ ተግባሩ ፡ ንሕነ ፡ ዘንተ ፡ ዘኢየአምን ፡ ርጉመ ፡ ለይኩን ፡ አሜን ፤ ወዘይሰክብ ፡ ምስለ ፡ እንስሳ ፡ ርጉመ ፡ ለይኩን ፤ ወዘይሰክብ ፡ ምስለ ፡ ተባዕት ፡ ከመ ፡ ዘምስለ ፡ አንስት ፡ ርጉመ ፡ ለይኩን ፤ ዘይቀትል ፡ ነፍሰ ፡ ደመ ፡ ንጹሐ ፡ በዐመፃ ፡ ወበጒሕሉት ፡ ርጉመ ፡ ለይኩን ፡ ወእምኵሉሰ ፡ ኢታምልኩ ፡ ባዕደ ፡ አማልክተ ፡ እስመ ፡ ቀናኢ ፡ እግዚኣብሔር ፡ ለእለ ፡ ይትዔወርዎ ፡ ወይገብሩ ፡ ከመዝ ፡ ወያቀውም ፡ ገጾ ፡ ላዕሌሆሙ ፡ እስከ ፡ ይሤርዎሙ ፡ እምድር ፡ ሕይወቶሙ ፡ ወያጠፍእ ፡ ዝክሮሙ ፡ እስከ ፡ ለዓለም ፤ ብፁዓን ፡ እለ ፡ ይሰምዑ ፡ ቃለ ፡ እግዚኣብሔር ፡ ወይገብሩ ፡ ወየዐቅቡ ፡ ወብፁዓን ፡ እለ ፡ ይትገሐሡ ፡ እምእለ ፡ ይገብሩ ፡ እኩየ ፡ ከመ ፡ ኢትርክቦሙ ፡ እምእንተ ፡ ትመጽእ ፡ መቅሠፍት ፡ ለኃጥኣን ፤ ወለእመሰ ፡ ኮንከ ፡ ዘተዐቅብ ፡ ቃለ ፡ እግዚኣብሔር ፡ ተገሐሥ ፡ እምፍኖተ ፡ ኃጥኣን ፡ ከመ ፡ ኢትዘበጥ ፡ በእንተ ፡ ተዘብጡ ፡ በበትር ፤ በከመ ፡ ይቤ ፡ ዳዊት ፡ አበ ፡ አቡሁ ፡ ለእግዚእነ ፡ ዳዊት ፡ እስመ ፡ ኢየኀድግ ፡ እግዚኣብሔር ፡ በትረ ፡ ኃጥኣን ፡ ዲበ ፡ መክፈልተ ፡ ጻድቃን ፡ ከመ ፡ ኢያንሥኡ ፡ እደዊሆሙ ፡ ጻድቃን ፡ በዐመፃ ፤ ለእመ ፡ ተክህ ፡ ሎ ፡ ለብእሲ ፡ ይግበር ፡ ሠናየ ፡ ለሊሁኒ ፡ ይዕቀብ ፡ ወለቢጹኒ ፡ ይንግር ፡ ከመ ፡ ይኩን ፡ ባዕለ ፡ ክልኤ ፡ መካልይ ፡ ወይትወሰኮ ፡ ክልኤ ፡ መካልይ ፡ ወይከውን ፡ ትርብዕተ ፡ ዐስቡ ፡ በኀበ ፡ እግዚኣብሔር ፡ እስመ ፡ ገብረ ፡ ለሊሁ ፡ ወመህረ ፡ ለቢጹ ፡ ወበእንተዝ ፡ ይፈደፍድ ፡ ዐስቡ ፤ ወካዕበ ፡ ብፁዓን ፡ ትከውኑ ፡ ለእመ ፡ ወሀብክሙ ፡ ንዋይክሙ ፡ ዘእንበለ ፡ ርዴ ፡ ወልቃሕ ፨ ፨ ፨ ፨ ፨
=== chapter 91 ===
[፺፩ ፡ ዘንተ ፡ ዘይበልዑ ፡ ንጹሕ ፡ ወርኩስ ።]
ወዝንቱ ፡ ዘትበልዑ ፡ ንጹሕ ፡ ወዘኢኮነ ፡ ንጹሕ ፤ ላህም ፡ በግዕ ፡ ወጠሊ ፡ ሐርጌ ፡ ሀየል ፡ ወይጠል ፡ ቶራ ፡ ድስክነ ፡ ወውዕላ ፡ ዓርጋ ፡ ወዝራት ፡ ወኵሉ ፡ እንስሳ ፡ ዘንፉቅ ፡ ሰኰናሁ ፡ ወጽፈሪሁ ፡ ብልዑ ፡ ወዘይትመሰኳዕ ፡ ብልዑ ፤ ወዝንቱሰ ፡ ዘኢትበልዑ ፡ እምውስተ ፡ ዘይትመሰኳዕ ፡ ወዘንፉቅ ፡ ሰኰናሁ ፡ ገመል ፡ ወዳሲጳዳ ፡ ወካርግልዮን ፡ እስመ ፡ ይትመሰኵዑ ፡ ወኢኮነ ፡ ንፉቅ ፡ ጽፈሪሆሙ ፤ ወዝእብ ፡ ወሐራዊያ ፡ ኢትብልዑ ፡ እስመ ፡ ንፉቅ ፡ ሰኰናሆሙ ፡ ወኢይትመሰኵዑ ፡ ርኩሳን ፡ ኢትብልዑ ፤ በውስተ ፡ ማይ ፡ ዘቦ ፡ ክንፈ ፡ ወቅሣረ ፡ ብልዑ ፡ ወእምኔሁ ፡ ርኩሰ ፡ ኢትብልዑ ፤ ወእምነ ፡ ውስተ ፡ አዕዋፍ ፡ ኵሉ ፡ ዘንጹሕ ፡ ብልዑ ፡ ወዘኢትበልዑ ፡ ዝንቱ ፡ ንስር ፡ ጊጳ ፡ ኤልያጣን ፡ ግሪጳ ፡ ሆባይ ፡ ወዘአምሳሊሁ ፡ ቋዕ ፡ ሰገኖ ፡ ግላውቃ ፡ ለሮን ፡ አሮድዮን ፡ ቃቃኖን ፡ ኢብን ፡ ቀጣራቃጤን ፡ ጒዛ ፡ ሂጳጳ ፡ ጒጓ ፡ ወኣባጒንባሕ ፡ ወክራድዮን ፡ ጳርፋርዮና ፡ ጽግነት ፡ ዝንቱ ፡ ዘርኵስ ፤ ወዘኢትበልዑ ፡ ደገብያ ፡ ወዘአምሳሉ ፡ አቃጣን ፡ ወዘአምሳሉ ፡ አፍዮማክን ፡ ወዘአምሳሉ ፡ አንበጣ ፡ ወዘአምሳሉ ፤ እምነ ፡ ዘይሰርር ፡ በበ፪ ፡ በበ፬ ፡ ወበበ፮ ፡ እግሩ ፡ ውእቱ ፡ ርኩስ ፡ ሥጋሆሙ ፡ ኢትብልዑ ፡ ወበድኖሙ ፡ ኢትግስሱ ፡ ወዘገሰሰ ፡ በድኖሙ ፡ እስከ ፡ ሰርክ ፡ ርኩስ ፡ ውእቱ ። ዘንተኬ ፡ ነገርናክሙ ፡ ከመ ፡ ትዕቀቡ ፡ ወትግበሩ ፡ ፍርሀተ ፡ እግዚኣብሔር ፡ ከመ ፡ ትትባረኩ ፡ በዛቲ ፡ ምድርክሙ ፡ እንተ ፡ ወሀበክሙ ፡ እግዚኣብሔር ፡ በእንተ ፡ ጽዮን ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ እስመ ፡ ተኀረይክሙ ፡ በእንቲአሃ ፤ ወአበዊነሰ ፡ ተመነኑ ፡ በእንተ ፡ ዘነሥኦሙ ፡ እግዚኣብሔር ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ ትዕቀብክሙ ፡ ለክሙ ፡ ወለዘርእክሙ ፡ እስከ ፡ ለዓለም ፤ ወይባርክ ፡ ፍሬ ፡ ምድርክሙ ፡ ወያብዝኅ ፡ እንስሳክሙ ፡ ወይዕቀብ ፡ ደቂቅክሙ ፡ በኵሉ ፡ ዘትትመሐፀኑ ፡ ወአንቲኒ ፡ እግዝእትየ ፡ ጥበብኪ ፡ ሠናይ ፡ ዘተዐደወ ፡ እምጥበበ ፡ ሰብእ ፡ ዘከማኪ ፡ አልቦ ፡ ዘይትማሰላ ፡ ለኅሊናኪ ፡ አኮ ፡ ምክረ ፡ አንስት ፡ ባሕቱ ፡ ዘተፈጥረ ፡ እስከ ፡ ይእዜ ፡ አላ ፡ እምክረ ፡ ተባዕትኒ ፡ ፈድፈደ ፡ አእምሮ ፡ ልብኪ ፡ ወአልቦ ፡ ዘይትማሰለኪ ፡ በብዝኀ ፡ አእምሮትኪ ፡ ዘእንበለ ፡ ሰሎሞን ፡ እግዚእየ ፤ ወእምሰሎሞንኒ ፡ ተዐደወ ፡ ጥበብኪ ፡ እስከ ፡ ትስሕቢ ፡ ደቂቀ ፡ ኀይለ ፡ እስራኤል ፡ ወታቦተ ፡ ሕጉ ፡ ለእግዚኣብሔር ፡ በአሕባለ ፡ አእምሮትኪ ፡ ወነሠትኪ ፡ ቤተ ፡ ጣዖቶሙ ፡ ወደምሰስኪ ፡ አ ፡ ምሳሊሆሙ ፡ ወአንጻሕኪ ፡ ርኵሰ ፡ እምሕዝብኪ ፡ እስመ ፡ አሰሰልኪ ፡ ዘጸልአ ፡ እግዚኣብሔር ፡ እምላዕሌሆሙ ፡ ወለስምኪኒ ፡ እግዚኣብሔር ፡ አስተዳለዎ ፡ ዘሰመየኪ ፡ ማክዳ ፡ ወትርጒምናሁ ፡ አኮ ፡ ከመዝ ፡ ብሂል ፤ ነጸርኪ ፡ በውስተ ፡ ሕዝብኪ ፡ ዘኢይሠምር ፡ እግዚኣብሔር ፡ ወትቤሊ ፡ አኮ ፡ ከመዝ ፡ ሠናይ ፡ አላ ፡ ይረትዕ ፡ ንስግድ ፡ ለእግዚኣብሔር ፤ አኮ ፡ ከመዝ ፡ ሠናይ ፡ ሰጊድ ፡ ለፀሐይ ፡ አላ ፡ ሰጊድ ፡ ለእግዚኣብሔር ፡ ይረትዕ ፡ ትቤሊ ፤ አኮ ፡ ከመዝ ፡ ሠናይ ፡ ሐቲተ ፡ ማሪት ፡ አላ ፡ ተወክሎ ፡ በእግዚኣብሔር ፡ ይኄይስ ፡ ትቤሊ ፤ አኮ ፡ ከመዝ ፡ ሠናይ ፡ አስተቃስሞ ፡ ሰገል ፡ አላ ፡ አስምኮ ፡ በቅዱሰ ፡ እስራኤል ፡ ይኄይስ ፡ ትቤሊ ፤ አኮ ፡ ከመዝ ፡ ሠናይ ፡ ሠዊዕ ፡ ለአእባን ፡ ወለአዕዋም ፡ አላ ፡ ሠዊዕ ፡ ለእግዚኣብሔር ፡ ይረትዕ ፡ ትቤሊ ፤ አኮ ፡ ከመዝ ፡ ሠናይ ፡ ተጠይሮ ፡ በአዕዋፍ ፡ አላ ፡ ተአምኖ ፡ በፈጣሪ ፡ ይረትዕ ፡ ትቤሊ ። ወእምዝ ፡ ኀረይኪያ ፡ ለጥበብ ፡ ወኮነተኪ ፡ እመ ፤ ኀሠሥኪያ ፡ ወኮነተኪ ፡ መዝገበ ፤ ተጸወንኪያ ፡ ወኮነተኪ ፡ ጥቅመ ፤ ጸህቂያ ፡ ወአፍቀረተኪ ፡ እምኵሉ ፤ ተወከልኪያ ፡ ወሐቀፈተኪ ፡ ከመ ፡ ሕፃና ፤ አፍቀርኪያ ፡ ወኮነተኪ ፡ በከ ፡ መ ፡ ፈቀድኪ ፤ አኀዝኪያ ፡ ወኢተኀድገኪ ፡ እስከ ፡ ዕለተ ፡ ሞትኪ ፤ አንቲ ፡ ሐዘንኪ ፡ በእንቲአሃ ፡ ወአስተፍሥሐተኪ ፡ እስከ ፡ ለዓለም ፤ ጸመውኪ ፡ በእንቲአሃ ፡ ወአጥዐየተኪ ፡ እስከ ፡ ለዓለም ፤ ረኀብኪ ፡ በእንቲአሃ ፡ ወአጽገበተኪ ፡ እስከ ፡ ለዓለም ፤ ጸማእኪ ፡ ለጥበብ ፡ ወአርወየተኪ ፡ እስከ ፡ ለዓለም ፤ ተመንደብኪ ፡ በእንቲአሃ ፡ ለጥበብ ፡ ወኮነተኪ ፡ ፈውሰ ፡ እስከ ፡ ለዓለም ፤ ጸመምኪ ፡ በእንቲአሃ ፡ ለጥበብ ፡ ወአስምዐተኪ ፡ እስከ ፡ ለዓለም ፤ ዖርኪ ፡ በእንቲአሃ ፡ ለጥበብ ፡ ወአብርሀተኪ ፡ ፈድፋደ ፡ እምነ ፡ ፀሐይ ፡ እስከ ፡ ለዓለም ፡ ወዝንቱ ፡ ኵሉ ፡ ዘኮነ ፡ እምኀበ ፡ እግዚኣብሔር ፡ በእንተ ፡ ዘአፍቀርኪያ ፡ ለጥበብ ፤ እስመ ፡ ጥበብ ፡ ወአእምሮ ፡ ወልቡና ፡ እምኀበ ፡ እግዚኣብሔር ፡ ውእቱ ፤ ልቡና ፡ ወአእምሮ ፡ ወቀዳሜ ፡ ጥበብሰ ፡ ፈሪሀ ፡ እግዚኣብሔር ፡ ወአእምሮ ፡ ወመኪረ ፡ ሠናይኒ ፡ ምጽዋት ፡ ወምሕረት ፡ እስከ ፡ ለዓለም ፡ እንተ ፡ ትሄሉ ፡ ዘንተ ፡ ኵሎ ፡ ረከብኪ ፡ እግዝእትየ ፡ ኀበ ፡ አምላከ ፡ እስራኤል ፡ ቅዱሰ ፡ ቅዱሳን ፡ ማእመሬ ፡ አልባብ ፡ ዘየሐትት ፡ ዘውስተ ፡ ልበ ፡ ሰብእ ፡ ዘእምኀቤሁ ፡ ኵሉ ፡ ኮነ ፤ ወዘኒ ፡ ኮነ ፡ በፈቃደ ፡ እግዚኣብሔር ፡ ኮነ ፡ ከመ ፡ ትምጻእ ፡ ጽዮን ፡ ውስተ ፡ ዛቲ ፡ ብሔረ ፡ ኢትዮጵያ ፡ ወከመ ፡ ትኩኖ ፡ መርሐ ፡ ለንጉሥነ ፡ ዳዊት ፡ መፍቀሬ ፡ እግዚኣብሔር ፡ ቀዋሚሃ ፡ ለደብተራሁ ፡ መጋቢሃ ፡ ለማኅደረ ፡ ስብሐቲሁ ፨ ፨ ፨ ፨ ፨
=== chapter 92 ===
[፺፪ ፡ ኀበ ፡ ሐደሱ ፡ መንግሥቶ ፡ ለዳዊት ።]
ወይቤ ፡ አዛርያስ ፡ አምጽኡ ፡ ኢዮቤል ፡ ወንሖር ፡ ኀበ ፡ ጽዮን ፡ ወበህየ ፡ ነሐድስ ፡ መንግሥቶ ፡ ለእግዚእነ ፡ ዳዊት ። ወነሥአ ፡ ቅብአ ፡ መንግሥትኒ ፡ ምልአ ፡ ቀርን ፡ ወቀብእዎ ፡ ዕፍረተ ፡ ዘውእቱ ፡ ቅብአ ፡ መንግሥት ፤ ወነፍኁ ፡ ቀርነ ፡ ወብዕዛ ፡ ወከበሮ ፡ ወመሰንቆ ፡ ወዕንዚራ ፡ ወኵሎ ፡ ተውኔተ ፡ ወማኅሌተ ፡ ዘምስለ ፡ ፈረስ ፡ ወወልታ ፡ ወቀስት ፡ ወኵሉ ፡ ተባዕት ፡ ወአንስት ፡ ሰብአ ፡ ብሔረ ፡ ኢትዮጵያ ፡ ንኡሶሙ ፡ ወዐቢዮሙ ፡ ወንኡሳን ፡ ጸሊማን ፡ በበ፷፻ወአዋልድ ፡ ደናግል ፡ እለ ፡ ኀረየ ፡ አዛርያስ ፡ ለአዋልደ ፡ ጽዮን ፡ ዘበሕግ ፡ እለ ፡ ይከይድ ፡ ንጉሥ ፡ ዳዊት ፡ ሶበ ፡ የዐርግ ፡ ውስተ ፡ ቄፋዝ ፡ ለምሳሕ ፡ ወለድራር ፡ በውስተ ፡ ታዕካ ፡ መንግሥት ፤ ወከመዝ ፡ ተሐደሰ ፡ መንግሥቱ ፡ ለዳዊት ፡ ወልደ ፡ ሰሎሞን ፡ ንጉሠ ፡ እስራኤል ፡ በሀገረ ፡ ምስፍና ፡ በደብረ ፡ ማክዳ ፡ በቤተ ፡ ጽዮን ፡ ኀበ ፡ ተገብረ ፡ ቀዳሚ ፡ ሕግ ፡ ለንጉሠ ፡ ኢትዮጵያ ፤ ወእምዝ ፡ ሶበ ፡ ፈጸመ ፡ ዘተገብረ ፡ ሕግ ፡ ወበከመ ፡ ርእዩ ፡ በኢየሩሳሌም ፡ ገብሩ ፡ በቤተ ፡ ጽዮን ፡ ሕገ ፡ ለኅሩያነ ፡ መንግሥት ፡ ወለእለ ፡ ውስጥ ፡ ወለእለ ፡ አፍአ ፡ ወለሕዝብ ፡ ወለአላዳስ ፡ ወለአህጉር ፡ ወለበሓውርት ፡ ወለኵሉ ፡ ሕዘቢሆ ፡ ሙ ፡ ወአንጋዲሆሙ ፡ ከመዝ ፡ ሠርዑ ። ወከመዝ ፡ ሞጻእተ ፡ ህገረ ፡ መንግሥቱ ፡ ለንጉሠ ፡ ኢትዮጵያ ፡ ሠረቃዊ ፡ ጥንተ ፡ ሀገረ ፡ ጋዛ ፡ በምድረ ፡ ይሁዳ ፡ ዘውእቱ ፡ ኢየሩሳሌም ፡ ወሞጻእቱ ፡ ባሕረ ፡ ኢያሪኮ ፡ ወትትኃለፍ ፡ በሐይቀ ፡ ባሕሩ ፡ እስከ ፡ ሊባ ፡ ወሳባ ፡ ወትወርድ ፡ ሞጻእቱ ፡ እስከ ፡ ቢሲስ ፡ ወአስኔት ፡ ወሞጻእቱ ፡ ብሔረ ፡ ጸሊማን ፡ ወዕሩቃን ፡ ወተዐርግ ፡ ደብረ ፡ ኬቤሬኔዮን ፡ ውስተ ፡ ባሕረ ፡ ጽልመት ፡ ዝውእቱ ፡ ምዕራበ ፡ ፀሐይ ፡ ወተዐዲ ፡ ሞጻእቱ ፡ እስከ ፡ ፌኔኤል ፡ ወለሲፋላ ፡ ወሞጻእቱ ፡ አግዋረ ፡ ገነት ፡ መስመረ ፡ እክል ፡ ወብዝኀተ ፡ እንስሳ ፡ ወፌኔቄንሃ ፡ ወሞጻእቱ ፡ እስከ ፡ ዛውል ፡ ወትትኃለፍ ፡ ባሕረ ፡ ህንድ ፡ ወሞጻእቱ ፡ እስከ ፡ ባሕረ ፡ ተርሲስ ፡ ወበቅሥፈቱ ፡ ብሔረ ፡ ምድያም ፡ እስከ ፡ ይበጽሕ ፡ ብሔረ ፡ ጋዛ ፡ ወሞጻእቱ ፡ ኀበ ፡ ቀዳሚ ፡ ተወጠነ ፤ ወከመዝ ፡ ሢመቱ ፡ ለንጉሠ ፡ ኢትዮጵያ ፡ ሎቱ ፡ ወለዘርኡ ፡ እስከ ፡ ለዓለም ፨ ፨ ፨ ፨ ፨
=== chapter 93 ===
[፺፫ ፡ በእንተ ፡ ዘአማሰኑ ፡ ሃይማኖተ ፡ ሮም ።]
ወእምድኅረ ፡ ነበሩ ፡ ፫አውራኀ ፡ እስመ ፡ መጽአት ፡ ጽዮን ፡ ውስተ ፡ ብሔረ ፡ ኢትዮጵያ ፡ አመ ፡ ሠረቀ ፡ ቀዳሚ ፡ ወርኅ ፡ በነገረ ፡ ዕብራዊያን ፡ ወበጽርእ ፡ ታርሞን ፡ ወበግዕዝ ፡ ሚያዝያ ፡ አመ ፡ ፮ ፡ ወጸሐፍዎን ፡ ለእሉ ፡ ሕግ ፡ ወአስማት ፡ ወአንበርዎን ፡ ለተዝካር ፡ ለደኃሪ ፡ መዋዕል ፡ በዘ ፡ ይትገበር ፡ ሕግ ፡ ለደብተራ ፡ ወበዘ ፡ ይትዐወቅ ፡ ክብረ ፡ ነገሥተ ፡ ኢትዮጵያ ፡ ወክብረ ፡ ነገሥተ ፡ ሮምያ ፤ እስመ ፡ አኀው ፡ እሙንቱ ፡ ወበአሚነ ፡ ክርስቶስኒ ፤ ቀዳሚሰ ፡ ርቱዐ ፡ አምነ ፡ በስብከተ ፡ ሐዋርያት ፡ እስከ ፡ ቈስጠንጢኖስ ፡ ወእሌኒ ፡ ንግሥት ፡ ዘአውፅአት ፡ ዕፀ ፡ መስቀል ፤ ወነበሩ ፡ ፻ወ፴ ፡ ዓመት ፡ ወእምድኅሬሁ ፡ ተንሥአ ፡ ሰይጣን ፡ ዘእምትካት ፡ ዕድዉ ፡ ለሰብእ ፡ ወአስሐቶሙ ፡ ለሰብአ ፡ ብሔረ ፡ ሮሜ ፡ ወአሕሠምዋ ፡ ለሃይማኖተ ፡ ክርስቶስ ፡ ወአምጽኡ ፡ ኑፋቄ ፡ ላዕለ ፡ ቤተ ፡ ክርስቲያን ፡ ዘእግዚኣብሔር ፡ በአፈ ፡ ንስጥሮስ ፤ ወንስጥሮስ ፡ ወአርዮስ ፡ ወይባሶ ፡ እለ ፡ ወደየ ፡ ውስተ ፡ ልቦሙ ፡ ዘወደየ ፡ ቅንአተ ፡ ውስተ ፡ ልቡ ፡ ለቀየን ፡ ከመ ፡ ይቅትል ፡ እኁሁ ፡ አቤልሃ ፤ ወከማሁ ፡ ወደየ ፡ ውስተ ፡ ልቦሙ ፡ አቡሆሙ ፡ ዲያብሎስ ፡ ጸራ ፡ ለጽድቅ ፡ ወጸላኤ ፡ ሠናያት ፤ በከመ ፡ ይቤ ፡ ዳዊት ፡ ወነበቡ ፡ ዐመፃ ፡ ውስተ ፡ አርያም ፡ ወአንበሩ ፡ ውስተ ፡ ሰማይ ፡ አፉሆሙ ፡ ወአንሶሰወ ፡ ውስተ ፡ ምድር ፡ ልሳኖሙ ፡ ዘለሊሆሙ ፡ ኢያእመሩ ፡ እምኀበ ፡ መጽኡ ፡ ወኢያእመሩ ፡ ኀበ ፡ የሐውሩ ፡ ለፈጣሪሆሙ ፡ በልሳኖሙ ፡ ይውሕኩ ፡ ወይፀርፉ ፡ ላዕለ ፡ ስብሐቲሁ ፡ እንዘ ፡ አምላክ ፡ ውእቱ ፡ ቃለ ፡ እግዚኣብሔር ፤ ወረደ ፡ እመንበረ ፡ መለኮቱ ፡ ወለብሰ ፡ ሥጋ ፡ አዳም ፡ ወእግዚኣብሔር ፡ ውእቱ ፡ ቃል ፡ ወበይእቲ ፡ ሥጋ ፡ ተሰቅለ ፡ ከመ ፡ ይቤዝዎ ፡ ለአዳም ፡ በዕልወቱ ፡ ወዐርገ ፡ ውስተ ፡ ሰማይ ፡ ወነበረ ፡ ዲበ ፡ መንበረ ፡ መለኮቱ ፡ በይእቲ ፡ ሥጋ ፡ እንተ ፡ ነሥአ ፡ ወካዕበ ፡ ይመጽእ ፡ በስብሐት ፡ ይኴንን ፡ ሕያዋነ ፡ ወሙታነ ፡ ወይፈድዮ ፡ ለኵሉ ፡ በከመ ፡ ምግባሩ ፡ ለዓለመ ፡ ዓለም ፡ አሜን ፡ ወንሕነሰ ፡ ነአምን ፡ ከመዝ ፡ ወንገኒ ፡ ለቅድስት ፡ ሥላሴ ፤ ወእለሰ ፡ ኢየአምኑ ፡ ከመዝ ፡ ውጉዛን ፡ እሙንቱ ፡ በቃለ ፡ እግዚኣብሔር ፡ ንጉሠ ፡ ሰማያት ፡ ወምድር ፡ በዝ ፡ ዓለም ፡ ወበዘይመጽእ ፡ ዓለም ፤ ወንሕነሰ ፡ ጸናዕነ ፡ በርትዕት ፡ ሃይማኖት ፡ እንተ ፡ አበው ፡ ሐዋርያት ፡ ወአወፈዩነ ፡ ሃይማኖተ ፡ እንተ ፡ ቤተ ፡ ክርስቲያን ፤ ወከማሁ ፡ ትነብር ፡ ኢትዮጵያ ፡ ምስለ ፡ ሃይማኖታ ፡ እስከ ፡ ምጽአተ ፡ እግዚእነ ፡ ኢየሱስ ፡ ክርስቶስ ፡ ዘሎቱ ፡ ስብሐት ፡ ለዓለመ ፡ ዓለም ፡ አሜን ፨ ፨ ፨ ፨ ፨ ፨ ፨
=== chapter 94 ===
[፺፬ ፡ ቀዳሚ ፡ ፀብአ ፡ ንጉሠ ፡ ኢትዮጵያ ።]
ወእምዝ ፡ ተንሥኡ ፡ ለፀብእ ፡ እምድኅረ ፡ ፫ ፡ አውራኅ ፡ እምነ ፡ ሀገረ ፡ ምስፍና ፡ ምስለ ፡ ማክዳ ፡ እሙ ፡ ወጽዮን ፡ እግዝእቱ ፡ ወሌዋዊያን ፡ ይጸውርዋ ፡ ለታቦተ ፡ ሕግ ፡ ምስለ ፡ ንዋየ ፡ ሐቢቶሙ ፡ ወእንዘ ፡ የሐውሩ ፡ በብዙኅ ፡ ግርማ ፡ ከመ ፡ አሜሃ ፡ በደብረ ፡ ሲና ፡ አመ ፡ ያወርዳ ፡ እግዚኣብሔር ፡ እምሰማያት ፡ ለጽዮን ፡ በቅድስና ፡ ኀበ ፡ ሙሴ ፡ ወአሮን ፡ ወከማሁ ፡ ይጸውርዋ ፡ ለታቦተ ፡ ሕግ ፡ አዛርያስ ፡ ወኤልሚያስ ፡ ወባዕዳን ፡ ደቂቀ ፡ ኀይለ ፡ እስራኤል ፡ እንዘ ፡ የሐውሩ ፡ በየማና ፡ ወበፀጋማ ፡ በገቦሃ ፡ በፍጽማ ፡ ወበኳላሃ ፡ እንዘ ፡ ይሴብሑ ፡ ወይዜምሩ ፡ እንዘ ፡ መሬታዊያን ፡ ከመ ፡ ኀይለ ፡ ሰማያዊያን ፤ ወወሀቦሙ ፡ እግዚኣብሔር ፡ ቃለ ፡ ሠናየ ፡ ወዜማ ፡ መንክረ ፡ እስመ ፡ ሠምረ ፡ እግዚኣብሔር ፡ ከመ ፡ ይሴባሕ ፡ ቦሙ ፡ ወበጽሑ ፡ እምህገረ ፡ ምስፍና ፡ ተዐየኑ ፡ በማየ ፡ አበው ፡ ወበነግህ ፡ አጥፍእዋ ፡ ለብሔረ ፡ ዛዉ ፡ ምስለ ፡ ሐድያ ፤ እስመ ፡ ጋእዘ ፡ ባ ፡ ምስሌሆሙ ፡ እምቀዳሚ ፡ ወእምዝ ፡ አጥፍእዎሙ ፡ ወቀተልዎሙ ፡ በአፈ ፡ ኀጺን ፡ ወተኃለፉ ፡ እምህየ ፡ ወተዐየኑ ፡ ጌርሳ ፤ ወካዕበ ፡ አጥፍኡ ፡ ህገረ ፡ ሰባድዕት ፡ እለ ፡ ገጾሙ ፡ ሰብእ ፡ ወዘነበ ፡ አድግ ፡ ውስተ ፡ ሐቌሆሙ ፡ ወገብአት ፡ ወተዐየነት ፡ ውስተ ፡ ሀገረ ፡ ጽዮን ፡ ወነበሩ ፡ ባቲ ፡ እስከ ፡ ፫ ፡ አውራኅ ፡ ወአንሥኡ ፡ ሰረገላቲሆሙ ፡ ወበጽሑ ፡ ህገረ ፡ ምስፍና ፤ ወእምህየ ፡ በአሐቲ ፡ ዕለት ፡ በጽሑ ፡ ሀገረ ፡ ሳባ ፡ ወአጥፍእዋ ፡ ለኖባ ፡ ወእምህየ ፡ ተዐየኑ ፡ ሳባ ፡ ወአጥፍኡ ፡ እስከ ፡ ደወለ ፡ ግብጽ ። ወኮነ ፡ ግርማ ፡ ዐቢይ ፡ ለንጉሠ ፡ ኢትዮጵያ ፡ እስከ ፡ ያመጽኡ ፡ አምኃ ፡ ንጉሠ ፡ ምድያም ፡ ወንጉሠ ፡ ግብጽ ፡ ወበጽሑ ፡ ውስተ ፡ ሀገረ ፡ ምስፍና ፡ ወእምህየ ፡ ተዐየኑ ፡ አብዓት ፡ ወፀብኡ ፡ ውስተ ፡ ባሕረ ፡ ህንደኬ ፤ ወአብአ ፡ ንጉሠ ፡ ህንደኬ ፡ አምኃ ፡ ወጋዳ ፡ ወሰገደ ፡ ለሊሁ ፡ ለንጉሠ ፡ ኢትዮጵያ ፡ ወኀበ ፡ ኵሉ ፡ ዘፈቀደ ፡ ወፀብአ ፡ አልቦ ፡ ዘይመውኦ ፡ ዘእንበለ ፡ ዘይመውእ ፡ ለሊሁ ፤ ወእለ ፡ ያስተሓይጽዎ ፡ በውስተ ፡ ትዕይንቱ ፡ ከመ ፡ ይስምዑ ፡ ዜና ፡ ወይንግሩ ፡ ለሀገሮሙ ፡ ወኢይክሉ ፡ ረዊጸ ፡ በሰረገላ ፡ እስመ ፡ ለሊሃ ፡ ጽዮን ፡ ታደክም ፡ ኀይሎሙ ፡ ለፀር ። ወንጉሥሰ ፡ ዳዊት ፡ ምስለ ፡ ሰራዊቱ ፡ ወሰራዊተ ፡ ሰራዊቱ ፡ ወኵሎሙ ፡ እለ ፡ ይትኤዘዙ ፡ በቃሉ ፡ ይረው ፡ ጹ ፡ በሰረገላ ፡ ዘእንበለ ፡ ደዌ ፡ ወሕማም ፡ ዘእንበለ ፡ ረኃብ ፡ ወጽምእ ፡ ዘእንበለ ፡ ሃፍ ፡ ወድካም ፡ ይበጽሑ ፡ በአሐቲ ፡ ዕለት ፡ መጠነ ፡ ምሕዋረ ፡ ፫ ፡ አውራኅ ፤ ወአልቦ ፡ ወኢምንተኒ ፡ ዘየኀጥኡ ፡ እምዘ ፡ ሰአሉ ፡ በኀበ ፡ እግዚኣብሔር ፡ በውስተ ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ እስመ ፡ ለሊሁ ፡ ይነብር ፡ ምስሌሃ ፡ ወመልአኩ ፡ ይሜግባ ፡ ወማኅደሩ ፡ ለሊሃ ፤ ወለንጉሥ ፡ ዘይትለአክ ፡ ኀበ ፡ ደብተራሁ ፡ ለእመ ፡ ሖረ ፡ በኵሉ ፡ ፍኖቱ ፡ ወበገቢረ ፡ ፈቃዲ ፡ ይትገበር ፡ ኵሉ ፡ ዘፈቀደ ፡ ወዘኀለየ ፡ በልቡ ፡ ወዘአንጸረ ፡ በአጽባዕቱ ፡ ኵሉ ፡ ይትገበር ፡ በቃሉ ፡ ወኵሉ ፡ ይፈርሆ ፤ ወውእቱሰ ፡ አልቦ ፡ ዘይፈርህ ፡ እስመ ፡ እደ ፡ እግዚኣብሔር ፡ ምስሌሁ ፡ እንተ ፡ ተዐቅቦ ፡ ሌሊተ ፡ ወመዐልተ ፡ እስመ ፡ ገብረ ፡ ፈቃዶ ፡ ወውእቱኒ ፡ ይገብር ፡ ሎቱ ፡ ወየዐቅቦ ፡ እምኵሉ ፡ እኩይ ፡ ለዓለመ ፡ ዓለም ፡ አሜን ፨ ፡ ዘንተ ፡ ረከብኩ ፡ እመጻሕፍት ፡ ዘቤተ ፡ ሶፍያ ፡ ዘቊስጥንጥንያ ፨ ፡ ወይቤልዎ ፡ እለ ፡ ህየ ፡ ሊቃነ ፡ ጳጳሳት ፡ አማንኬ ፡ ዝንቱ ፡ ዘተጽሕፈ ፡ እመዋዕለ ፡ ሰሎሞን ፡ ንጉሥ ። ወይቤ ፡ ድማትዮስ ፡ ዘአንጾኪያ ፡ እወ ፡ ይመስል ፡ እስከ ፡ ዕለተ ፡ ሞቱ ፡ ለሰሎሞን ፡ ዘተጽሕፈ ፡ ወእምድኅረ ፡ ሞቱሰ ፡ ለሰሎሞን ፡ እምባዕዳን ፡ ነቢያት ፡ ዘተጽሕፈ ፡ አምሳሉ ፨ ፨ ፨ ፨ ፨ ፨ ፨ ፨ ፨
=== chapter 95 ===
[፺፭ ፡ ኀበ ፡ ኀብሩ ፡ ክብሩ ፡ ለንጉሠ ፡ ኢትዮጵያ ።]
ወበእንተሰ ፡ ክብረ ፡ ነገሥት ፡ አእመርነ ፡ ወጠየቅነ ፡ ከመ ፡ ይከብር ፡ ንጉሠ ፡ ኢትዮጵያ ፡ ንጉሠ ፡ ጽዮን ፡ ውእቱ ፡ ወበኵርኒ ፡ ውእቱ ፡ እምዘርአ ፡ ሴም ፡ ወማኅደሩሂ ፡ ውስተ ፡ ጽዮን ፡ ለእግዚኣብሔር ፡ ውእቱ ፡ ወበህየ ፡ ይሰብር ፡ ኀይለ ፡ ኵሎሙ ፡ ፀሩ ፡ ወጸላእቱ ። ወእምድኅሬሁ ፡ ንጉሠ ፡ ሮም ፡ መሲሑ ፡ ለእግዚኣብሔር ፡ በእንተ ፡ ዕፀ ፡ መስቀል ፡ ወመንግሥተ ፡ እስራኤልሰ ፡ እምአመ ፡ ተወልደት ፡ ባሕርይ ፡ እምኔሆሙ ፡ ወእምባሕርይ ፡ ካዕበ ፡ ተወልደ ፡ ፀሐየ ፡ ጽድቅ ፡ ተሰዊሮ ፡ በሥጋ ፡ ዚአሃ ፡ ወእመሰ ፡ ኢተሰወረ ፡ በሥጋ ፡ ሰብእ ፡ እመ ፡ ኢተርእየ ፡ ለአዕይንተ ፡ መዋቲ ፤ ለቢሶ ፡ ሥጋነ ፡ ተመሰለ ፡ ኪያነ ፡ ወአንሶሰወ ፡ ምስሌሆሙ ፡ ወገብረ ፡ ተኣምረ ፡ ወመንክረ ፡ በማእከሌሆሙ ፤ አንሥአ ፡ ሙታኒሆሙ ፡ ወፈወሰ ፡ ድዉያኒሆሙ ፡ ወአብርሀ ፡ አዕይንተ ፡ ዕዉራኒሆሙ ፡ ወከሠተ ፡ እዝነ ፡ ጽሙማኒሆሙ ፡ ወእለ ፡ ለምጽ ፡ አንጽሐ ፡ ወርኁባነ ፡ አጽገበ ፡ ወብዙኀ ፡ ተኣምረ ፡ ወመንክረ ፡ ገብረ ፡ ዘተጽሕፈ ፡ ወዘኢተጽሕፈ ፤ በከመ ፡ ይቤ ፡ ዮሐንስ ፡ ወንጌላዊ ፡ ወልደ ፡ ዘብዴዎስ ፡ ሶበሰ ፡ ተጽሕፈ ፡ ኵሉ ፡ ዘገብረ ፡ ኢየሱስ ፡ እመ ፡ ኢያግመሮ ፡ ዓለም ፡ ጥቀ ፡ መጻሕፍ ፡ ቲሁ ፡ ዘእምተጽሕፈ ። ወዘንተ ፡ ኵሎ ፡ ሶበ ፡ ርእዩ ፡ ደቂቀ ፡ እስራኤል ፡ ዐላዊያን ፡ አምሰልዎ ፡ ከመ ፡ ሰብእ ፡ ወቀንኡ ፡ ላዕሌሁ ፡ በዘ ፡ ርእዩ ፡ ወሰምዑ ፡ ወሰቀልዎ ፡ ዲበ ፡ ዕፀ ፡ መስቀል ፡ ወቀተልዎ ፤ ወተንሥአ ፡ እሙታን ፡ በሣልስት ፡ ዕለት ፡ ወዐርገ ፡ ሰማያተ ፡ በስብሐት ፡ ዲበ ፡ መንበረ ፡ መለኮት ፡ ወተወፈየ ፡ እምኀበ ፡ አብ ፡ መንግሥተ ፡ ዘኢየኀልቅ ፡ ለዓለመ ፡ ዓለም ፡ ላዕለ ፡ መንፈሳዊያን ፡ ወመሬታዊያን ፡ ወላዕለ ፡ ኵሉ ፡ ፍጥረት ፡ ከመ ፡ ለስሙ ፡ ይግነይ ፡ ኵሉ ፡ ልሳን ፡ ወይስግድ ፡ ኵሉ ፡ ብርክ ፡ ወይኴንን ፡ ሕያዋነ ፡ ወሙታነ ፡ ወይፈድዮ ፡ ለኵሉ ፡ በከመ ፡ ምግባሩ ። አሜሃኬ ፡ ሀለዎሙ ፡ ለአይሁድ ፡ ይርአይዎ ፡ ወይትኀፈሩ ፡ ወይትኴነኑ ፡ በእሳት ፡ ዘለዓለም ፤ ወንሕነሰ ፡ እለ ፡ አመነ ፡ በርትዕት ፡ ሃይማኖት ፡ ዲበ ፡ መንበርነ ፡ ንሄሉ ፡ ወንትፌሣሕ ፡ ምስለ ፡ መምህራን ፡ ሐዋርያት ፡ ለእመ ፡ ሖርነ ፡ በፍኖተ ፡ ክርስቶስ ፡ ወበትእዛዛቲሁ ፤ ወሶበ ፡ ሰቀሉ ፡ መድኀኔ ፡ ዓለም ፡ ኮኑ ፡ ዝርዋነ ፡ ወመንግሥቶሙ ፡ ኮነት ፡ ብዲተ ፡ ወኀልቁ ፡ ወተሠረዉ ፡ እስከ ፡ ለዓለመ ፡ ዓለም ፨ ፡ ወይቤሉ ፡ ኵሎሙ ፡ ማኅበረ ፡ ቅዱሳን ፡ ጥዩቀ ፡ በአማን ፡ የዐቢ ፡ ወይትሌ ፡ ዐል ፡ ወይከብር ፡ ንጉሠ ፡ ኢትዮጵያ ፡ እምኵሎሙ ፡ ነገሥተ ፡ ምድር ፡ በእንተ ፡ ክብራ ፡ ወዕበያ ፡ ለጽዮን ፡ ሰማያዊት ፤ ወእግዚኣብሔር ፡ አፍቀሮሙ ፡ ለሕዝበ ፡ ኢትዮጵያ ፡ እስመ ፡ ዘእንበለ ፡ ያእምሩ ፡ ሕጎ ፡ ሠረዉ ፡ ጣዖቶሙ ፡ ወእለሰ ፡ ተውህቦሙ ፡ ሕገ ፡ እግዚኣብሔር ፡ ገብሩ ፡ ጣዖተ ፡ ወሰገዲ ፡ ለአማልክት ፡ ዘይጸልእ ፡ እግዚኣብሔር ፨ ፡ ወበደኃሪ ፡ አመ ፡ ተወልደ ፡ ከመ ፡ ይቤዝዎ ፡ ለአዳም ፡ ገብረ ፡ ተኣምረ ፡ ወመንክረ ፡ በቅድሜሆሙ ፡ ወኢአምኑ ፡ ቦቱ ፡ ኢበስብከቱ ፡ ወኢበስብከተ ፡ አበዊሁ ፡ ወሕዝበ ፡ ኢትዮጵያሰ ፡ አምኑ ፡ በ፩ ፡ ረድእ ፡ መሀይምን ፡ ወበእንተዝ ፡ አፍቀሮሙ ፡ እግዚኣብሔር ፡ ፈድፋደ ፡ ለሕዝበ ፡ ኢትዮጵያ ፨ ፡ አውሥኡ ፡ ወይቤልዎ ፡ ጳጳሳት ፡ ሠናየ ፡ ነበብከ ፡ ወርቱዕ ፡ ቃልከ ፡ ወጥዩቀ ፡ ፈከርከ ፡ ወተርጐምከ ፡ ለነ ፤ በከመ ፡ ይቤ ፡ ጳውሎስ ፡ አኮኑ ፡ ዘርአ ፡ አብርሃም ፡ አልዐለ ፡ ውእቱ ፡ ዘርአ ፡ ሴም ፤ ኵሎሙ ፡ ነገሥተ ፡ ምድር ፡ እሙንቱ ፡ ወኅሩያኒሁ ፡ ለእግዚኣብሔር ፡ ሰብአ ፡ ኢትዮጵያ ፤ እስመ ፡ ማኅደሩ ፡ ለእግዚኣብሔር ፡ ኮነት ፡ ህየ ፡ ጽዮን ፡ ሰማያዊት ፡ ታቦተ ፡ ሕጉ ፡ ወታቦተ ፡ ኪዳኑ ፡ እንተ ፡ ረሰያ ፡ ለምሥሃል ፡ በእንተ ፡ ምሕረተ ፡ ውሉደ ፡ ሰብእ ፡ ለክራማት ፡ ወለዝናማት ፡ ለአትክልት ፡ ወለፍረያት ፡ ለአሕዛብ ፡ ወለበሓውርት ፡ ለነገሥት ፡ ወለመኳንንት ፡ ለሰብእ ፡ ወለእንስሳ ፡ ለአዕዋፍ ፡ ወለአራዊት ፨ ፡ አውሥአ ፡ ወይቤሎሙ ፡ ጎርጎርዮስ ፡ ጳጳስ ፡ ገባሬ ፡ መንክር ፡ በአማን ፡ ተውህበት ፡ ለነ ፡ መድኀኒት ፡ ለኵልነ ፡ ሕዝበ ፡ ከርስቲያን ፡ ለእለ ፡ አመነ ፡ ባቲ ፡ ለእግዝእትነ ፡ ማርያም ፡ አምሳሊሃ ፡ ለጽዮን ፡ ሰማያዊት ፤ እስመ ፡ ኀደረ ፡ እግዚኣብሔር ፡ ውስተ ፡ ከርሠ ፡ ድንግል ፡ ወተወልደ ፡ እምኔሃ ፡ ዘእንበለ ፡ ሩካቤ ፡ ወበአጽባዕተ ፡ እግዚኣብሔር ፡ ተጽሕፈ ፡ ፲ ፡ ቃላት ፡ ዘሕግ ፡ ተገብረ ፡ ውስተ ፡ ጽዮን ፡ ታቦተ ፡ ሕጉ ፡ ለእግዚኣብሔር ። ወይእዜኒ ፡ ሀቡ ፡ ንንግር ፡ ትንቢቶሙ ፡ ለነቢያት ፡ አበዊነ ፡ ቀደምት ፡ ቅዱሳን ፡ እምኦሪተ ፡ ሙሴ ፡ ወነቢያት ፡ በእንተ ፡ ክርስቶስ ፡ መድኀኒነ ፡ ከመ ፡ ይስምዑ ፡ ደኃሪ ፡ ትውልድ ፡ ፍካሬ ፡ ዜና ፡ ዘንዜንዎሙ ፡ በእንተ ፡ ተርጒሞ ፡ መጻሕፍት ። ነአኀዝኬ ፡ እምርእሰ ፡ መጽሐፍ ፡ ወንለቡ ፡ በመንፈስ ፡ በከመ ፡ ይቤ ፡ ዳዊት ፡ በመንፈስ ፡ ቅዱስ ፡ ውስተ ፡ ርእሰ ፡ መጽሐፍ ፡ ተጽሕፈ ፡ በእንቲአየ ፨ ፡ አውሥአ ፡ ወይቤ ፡ ምንት ፡ ውእቱ ፡ ርእሰ ፡ መጽሐፍ ። አውሥኡ ፡ ወይቤልዎ ፡ ዝውእቱ ፡ ኦሪት ፡ ዘተጽሕፈ ፡ በእንተ ፡ ክርስቶስ ፡ ወልደ ፡ እግዚኣብሔር ፤ ወይቤ ፡ በቀዳሚ ፡ ገብረ ፡ እግዚኣብሔር ፡ ሰማየ ፡ ወምድረ ፡ ወህልው ፡ እምትካት ፤ ወምድርሰ ፡ ኢኮነት ፡ ድሉተ ፡ አላ ፡ ድሙራን ፡ ጽልመት ፡ ወነፋስ ፡ ወማይ ፡ ወጊሜ ፡ ወመሬት ፡ ኵሎሙ ፡ ድሙራን ፡ ወመንፈሰ ፡ እግዚኣብሔር ፡ ይጼልል ፡ መልዕልተ ፡ ማ ፡ ይ ፤ ዘንተሰ ፡ ዘይቤ ፡ በቃለ ፡ እግዚኣብሔር ፡ ተፈጥሩ ፡ ሰማያት ፡ ወምድር ፡ ወመንፈሰ ፡ እግዚኣብሔር ፡ ኀደረ ፡ ላዕለ ፡ ኵሉ ፡ ፍጥረት ፡ ብሂል ፨ ፨ ፨ ፨ ፨ ፨
=== chapter 96 ===
[፺፮ ፡ በእንተ ፡ ትንቢት ፡ ዘክርስቶስ ።]
ወካዕበ ፡ ሰበከ ፡ ሙሴ ፡ በኦሪት ፡ ወይቤ ፡ ነቢየ ፡ ያነሥእ ፡ ለክሙ ፡ ዘከማየ ፡ እምአኀዊክሙ ፡ ወስምዕዎ ፡ ለውእቱ ፡ ነቢይ ፡ ወኵሉ ፡ ነፍስ ፡ እንተ ፡ ኢትሰምዖ ፡ ለውእቱ ፡ ነቢይ ፡ ይእቲ ፡ ነፍስ ፡ ለትሠሮ ፡ እምሕዝባ ፤ ወዘንተ ፡ ይቤ ፡ በእንተ ፡ ክርስቶስ ፡ ወልደ ፡ እግዚኣብሔር ፡ ወካዕበ ፡ ተነበየ ፡ በእንተ ፡ ስቅለቱ ፡ ወይቤ ፡ ሶበ ፡ አመንደብዎሙ ፡ አክይስት ፡ ለደቂቀ ፡ እስራኤል ፡ አውየዉ ፡ ኀበ ፡ ሙሴ ፡ ወሙሴሂ ፡ አውየወ ፡ ኀበ ፡ እግዚኣብሔር ፡ ከመ ፡ ያድኅኖሙ ፡ እምአርዌ ፡ ምድር ፡ ወይቤሎ ፡ ግበር ፡ ሣዕለ ፡ ከይሲ ፡ ዘብርት ፡ ወስቅሎ ፡ ኀበ ፡ ይትኤመርዎ ፡ ወኵሉ ፡ ዘነሰኮ ፡ ከይሲ ፡ ይነጽሮ ፡ ለውእቱ ፡ ሥዕለ ፡ ብርት ፡ ወይሕየው ፡ ወሶበ ፡ ተህከዩ ፡ ነጽሮ ፡ ይመውቱ ፡ ወእለሰ ፡ ነጸርዎ ፡ ወአምኑ ፡ የሐይዉ ፤ ወከማሁ ፡ ክርስቶስ ፡ ለእለ ፡ ተህከዩ ፡ ወኢአምኑ ፡ ቦቱ ፡ የኀልቁ ፡ በሲኦል ፡ ወእለሰ ፡ አምኑ ፡ ወሰምዑ ፡ ይወርሱ ፡ ምድረ ፡ ሕይወት ፡ ዘለዓለም ፡ ኀበ ፡ አልቦ ፡ ደዌ ፡ ወሕማም ፡ ዘለዓለም ። ወዘከመሂ ፡ ተህየይዎ ፡ ለክርስቶስ ፡ ቃለ ፡ እግዚኣብሔር ፡ ንሕነ ፡ ናየድዐክሙ ፤ ሶበ ፡ ሐመይዎ ፡ ለሙሴ ፡ ደቂቀ ፡ እስራኤል ፡ እንዘ ፡ ይብሉ ፡ ለባሕቲቱኑ ፡ ለሙሴ ፡ ዘተና ፡ ገሮ ፡ እግዚኣብሔር ፡ ወንሕነሰ ፡ እፎ ፡ ዘኢንሰምዕ ፡ ቃለ ፡ እግዚኣብሔር ፡ ከመ ፡ ንእመን ፡ ቦቱ ፡ ወሰምዐ ፡ እግዚኣብሔር ፡ ማእመሬ ፡ አልባብ ፡ ሐሜቶሙ ፡ ለደቂቀ ፡ እስራኤል ፡ ወይቤሎ ፡ ለሙሴ ፡ ወአንተሰ ፡ በዝየ ፡ ትስእል ፡ ስርየተ ፡ ለሕዝብከ ፡ ወእሙንቱሰ ፡ ሐመዩከ ፡ እንዘ ፡ ይብሉ ፡ ለነሰ ፡ እፎ ፡ ዘኢይትናገረነ ፡ እግዚኣብሔር ፤ ወይእዜኒ ፡ ለእመ ፡ አምኑኒ ፡ ይምጽኡ ፡ ኀቤየ ፡ ምስሌከ ፡ ዝየ ፡ ወበሎሙ ፡ ከመ ፡ ያንጽሑ ፡ ርእሶሙ ፡ ወይኅፅቡ ፡ አልባሲሆሙ ፡ ወይዕርጉ ፡ ዐበይተ ፡ እስራኤል ፡ ከመ ፡ ይስምዑ ፡ ዘአነ ፡ እኤዝዞሙ ፡ ወይስምዑ ፡ ቃልየ ፡ ወይግበሩ ፡ ትእዛዝየ ፡ ዘአነ ፡ አዘዝኩ ፤ ወተአዚዞ ፡ ሙሴ ፡ ነገሮሙ ፡ ለደቂቀ ፡ እስራኤል ፡ ወሰገዲ ፡ ሕዝብ ፡ ለእግዚኣብሔር ፡ ወአንጽሑ ፡ ርእሶሙ ፡ በሣልስት ፡ ዕለት ፡ ወዐርጉ ፡ ውስተ ፡ ደብረ ፡ ሲና ፡ ፸ ፡ አእሩገ ፡ እስራኤል ፡ ወወፅኡ ፡ እምትዕይንት ፡ ወዐርጉ ፡ ውስተ ፡ ደብረ ፡ ሲና ፡ እንዘ ፡ ይትራሐቁ ፡ መጠነ ፡ ምንዳፈ ፡ ሐጽ ፡ ቆሙ ፡ በበ፩ ፡ በአንጻረ ፡ ቢጹ ፡ ወእሙንቱሰ ፡ መጠነ ፡ ቦሙ ፡ ፈተኑ ፡ ምግባሮሙ ፡ ወኢክህሉ ፡ ዐሪገ ፡ ውስተ ፡ ቆባር ፡ ምስለ ፡ ሙሴ ፡ ወአኀዞሙ ፡ ረዓድ ፡ ወድንጋፄ ፡ ወደፈኖሙ ፡ ጽላሎተ ፡ ሞት ፡ ወሰምዑ ፡ ቃለ ፡ ቀርን ፡ ወዕንዚራ ፡ ወጽልመት ፡ ወነፋስ ፤ ወቦአ ፡ ሙሴ ፡ ውስተ ፡ ቆባር ፡ ወተናገረ ፡ ምስለ ፡ እግዚኣብሔር ፡ ወሰምዑ ፡ ኵሎሙ ፡ ዐበይተ ፡ እስራኤል ፡ ውእቱ ፡ ቃለ ፡ እግዚኣብሔር ፡ ፈርሁ ፡ ወርዕዲ ፡ ወኢክህሉ ፡ ቀዊመ ፡ እምብዝኀ ፡ ፍርሀት ፡ ዘውስተ ፡ ልቦሙ ፤ ወሶበ ፡ ወፅአ ፡ ሙሴ ፡ ይቤልዎ ፡ ኢንሰምዓ ፡ ለዛቲ ፡ ቃለ ፡ እግዚኣብሔር ፡ ከመ ፡ ኢንሙት ፡ በድንጋፄ ፡ ወናሁ ፡ አእመርነ ፡ ከመ ፡ ተናገረከ ፡ እግዚኣብሔር ፡ ወለእመቦ ፡ ዘይነግረነኬ ፡ አንተ ፡ ስማዕ ፡ ወንግረነ ፡ ወኩነነ ፡ አፈ ፡ በኀበ ፡ እግዚኣብሔር ፡ ወንከውኖ ፡ ሕዝበ ፡ ዚአሁ ፡ ትሬእዩኑ ፡ ዘከመ ፡ ክሕድዎ ፡ ለክርስቶስ ፡ ወይቤሉ ፡ ኢንሰምዖ ፡ ለውእቱ ፡ ቃል ፡ ከመ ፡ ኢንሙት ፡ በድንጋፄ ፤ ወቃልሰ ፡ ዘእግዚኣብሔር ፡ ክርስቶስ ፡ ውእቱ ፤ ወአሜሃ ፡ ዘይቤሉ ፡ ኢንስምዖ ፡ ለውእቱ ፡ ቃል ፡ ኢነአምኖ ፡ ለክርስቶስ ፡ ብሂል ፨ ፡ ወካዕበ ፡ ሰአለ ፡ ሙሴ ፡ ኀበ ፡ እግዚኣብሔር ፡ ወይቤ ፡ አርእየኒ ፡ ገጽከ ፤ ወይቤሎ ፡ እግዚኣብሔር ፡ ለሙሴ ፡ እስመ ፡ አልቦ ፡ ዘይክል ፡ ርኢየ ፡ ገጽየ ፡ ወየሐዩ ፡ ወባሕቱ ፡ ከመ ፡ መጽሔት ፡ ሚጥ ፡ ገጽከ ፡ ለምዕራብ ፡ ወትሬኢ ፡ በውስተ ፡ ኰኵሕ ፡ መጽሔተ ፡ ገጽየ ፤ ወሶበ ፡ ርእየ ፡ ሙሴ ፡ ጽላሎተ ፡ ገጹ ፡ ለእግዚኣብሔር ፡ በርሀ ፡ ገጹ ፡ ምስብዒተ ፡ እምነ ፡ ፀሐይ ፡ እስከ ፡ ኢይክሉ ፡ ደቂቀ ፡ እስራኤል ፡ ነጽሮተ ፡ ገጹ ፡ ዘእንበለ ፡ በግላ ፤ ወርእየ ፡ አሜሃኒ ፡ ከመ ፡ ኢፈተዉ ፡ ይርአዩ ፡ ገጸ ፡ እግዚኣብሔር ፡ አላ ፡ ይቤልዎ ፡ ግበር ፡ ለነ ፡ ግላ ፡ ከመ ፡ ኢንርአይ ፡ ገጽከ ፤ ወዘንተ ፡ ሶበ ፡ ይቤሉ ፡ ይትዐወቅ ፡ ከመ ፡ ጸልእዎ ፡ ለክርስቶስ ፡ ሰሚዐ ፡ ቃሉ ፡ ወርኢየ ፡ ገጹ ። ዓዲ ፡ ሶበ ፡ አዕረጎ ፡ አብርሃም ፡ ለይስሐቅ ፡ ወልዲ ፡ ውስተ ፡ ደብረ ፡ ቀርሜሌዎስ ፡ አውረደ ፡ እምሰማያት ፡ ቤዛ ፡ ይስሐቅ ፡ በግዐ ፡ ወይስሐቅሰ ፡ ኢተጠብሐ ፡ አላ ፡ ተጠብሐ ፡ በግዕ ፡ ዘወረደ ፡ እምሰማያት ፤ እስመ ፡ አብርሃም ፡ ይተረጐም ፡ በእግዚኣብሔር ፡ አብ ፡ ወይስሐቅኒ ፡ ይተረጐም ፡ አምሳሊሁ ፡ ለክርስቶስ ፡ ወልድ ፤ ወአመ ፡ ይወርድ ፡ እምሰማያት ፡ ለመድኀኒተ ፡ አዳም ፡ ወደቂቁ ፡ ኢተጠብሐ ፡ መለኮት ፡ ዘወረደ ፡ እምሰማያት ፡ አላ ፡ ተጠብሐት ፡ ሥጋሁ ፡ እንተ ፡ ለብሰ ፡ በእንቲአነ ፡ ይእቲ ፡ ምድራዊት ፡ እንተ ፡ ለብሰ ፡ እማርያም ፤ ትሌብዉኑ ፡ ወትጤይቁ ፡ ዘንተ ፡ አርአያ ፡ ወአምሳለ ፡ ለምድራዊ ፡ ይስሐቅ ፡ ወልደ ፡ አብርሃም ፡ ዘኮነ ፡ መሥዋዕተ ፡ ለፈቃደ ፡ አቡሁ ፤ ኮነ ፡ ሎቱ ፡ ቤዛሁ ፡ በግዕ ፡ ሰማያዊ ፡ ወተቤዘወ ፡ ወልደ ፡ አብርሃም ፡ ወለዘሰ ፡ ወረደ ፡ ወልደ ፡ እግዚኣብሔር ፡ ኮነ ፡ ቤዛሁ ፡ ለመለኮት ፡ ሥጋሁ ፡ ለምድራዊ ፡ ወሞተ ፡ በሥጋሁ ፡ እንዘ ፡ ኢየሐምም ፡ መለኮቱ ፡ ወተውላጠ ፡ ኮነ ፤ መዋቲት ፡ ኮነት ፡ ሕይወተ ፡ በትንሣኤሃ ፡ ምስለ ፡ መለኮት ። ወገሃደ ፡ ተዐውቀ ፡ ዕበይነ ፡ ለሰብእ ፡ በእንተ ፡ ዘቤዘወነ ፡ ክርስቶስ ፡ ወልደ ፡ እግዚኣብሔር ፤ ወፈድፋደ ፡ ናክብራ ፡ በምድርኒ ፡ ወበሰማይኒ ፡ ለዛቲ ፡ እግዝእትነ ፡ ወላዲተ ፡ አምላክ ፡ ማርያም ፡ ድንግል ፡ ወስምዑ ፡ ዘኒ ፡ ፍካሬ ፡ ቀዳማዊ ፡ ብእሲ ፡ ዘውእቱ ፡ አቡነ ፡ አዳም ፤ ዘእንበለ ፡ ትድምርት ፡ ወሩካቤ ፡ እምዐፅመ ፡ ገቦሁ ፡ ተፈጥረት ፡ ሔዋን ፡ እምብእሲ ፡ ወይእቲ ፡ ኮነቶ ፡ ቢ ፡ ጾ ፤ ወሰሚዓ ፡ ቃለ ፡ ሕብል ፡ እምዕድዉ ፡ ለአዳም ፡ ኮነቶ ፡ ቀታሊተ ፡ በአዕልዎ ፡ ትእዛዝ ፤ ወበምሕረቱ ፡ እግዚኣብሔር ፡ አብ ፡ ፈጠራ ፡ ለባሕርይ ፡ በውስተ ፡ ከርሡ ፡ ለአዳም ፤ አንጺሖ ፡ ሥጋሃ ፡ ወቀዱሶ ፡ አኅደራ ፡ ላዕሌሃ ፡ ለመድኀኒቱ ፤ ተወልደት ፡ ዘእንበለ ፡ ጥልቀት ፡ እስመ ፡ ገብራ ፡ ለንጽሕት ፡ ዘእንበለ ፡ ርስሐት ፡ ወይእቲ ፡ ፈደየት ፡ ዕዳሁ ፡ ዘእንበለ ፡ ትድምርት ፡ ወዘእንበለ ፡ ሩካቤ ፤ ወለደት ፡ በሥጋ ፡ ሰማያዊ ፡ ንጉሠ ፡ ወውእቱ ፡ ተወልደ ፡ እምኔሃ ፡ ወሐደሳ ፡ ለሕይወት ፡ በንጽሐ ፡ ሥጋሁ ፡ ወቀተሎ ፡ ለሞት ፡ በሥጋሁ ፡ ንጽሕት ፡ ወተንሥአ ፡ ዘእንበለ ፡ ሙስና ፡ ወአንሥአነ ፡ ምስሌሁ ፡ ኀበ ፡ ኢመዋቲት ፡ መንበረ ፡ መለኮት ፡ ወአዕረገነ ፡ ኀቤሁ ፡ ወተወለጥነ ፡ ሕይወተ ፡ በሥጋነ ፡ መዋቲት ፡ ወረከብነ ፡ ሕይወተ ፡ እንተ ፡ ኢትመውት ፤ በስሕታተ ፡ አዳም ፡ ተመንደብነ ፡ ወበትዕግሥተ ፡ ክርስቶስ ፡ ተፈወስነ ፡ በዕልወተ ፡ ሔዋን ፡ ሞትነ ፡ ወተቀበርነ ፡ ወበንጽሓ ፡ ለማርያም ፡ ከበርነ ፡ ወተላዐልነ ፡ እስከ ፡ አርያም ፡ ተነበየ ፡ ካዕበ ፡ ሕዝቅኤል ፡ በእንተ ፡ ማርያም ፡ ወይቤ ፡ ርኢኩ ፡ ኆኅተ ፡ በምሥራቅ ፡ ኅቱም ፡ በዐቢይ ፡ መንክር ፡ ማኅተም ፡ ወአልቦ ፡ ዘቦአ ፡ ውስቴታ ፡ ዘእንበ ፡ ለ ፡ እግዚአ ፡ ኀያላን ፡ ቦአ ፡ ውስቴታ ፡ ወወፅአ ፤ ዘኒ ፡ ፍካሬሁ ፡ ስምዑ ፤ ዘይቤ ፡ ርኢኩ ፡ ኆኅተ ፡ በአማን ፡ ኆኅተ ፡ አንቀጸ ፡ ሰማይ ፡ ሙባኦሙ ፡ ለቅዱሳን ፡ ውስተ ፡ መንግሥተ ፡ ሰማያት ፤ ወበምሥራቅ ፡ ሶበ ፡ ይብል ፡ በእንተ ፡ ንጽሐ ፡ ወአዳም ፡ ሥና ፤ ይብልዋ ፡ አንቀጸ ፡ አድኅኖ ፡ ወይብልዋ ፡ ምሥራቅ ፡ ዘይኔጽርዎ ፡ ቅዱሳን ፡ በፍሥሓ ፡ ወበሐሤት ፤ ወዕጹታ ፡ ዘይቤ ፡ በእንተ ፡ ንጽሐ ፡ ድንግልናሃ ፡ ወሥጋሃ ፤ ወበእንተ ፡ ዘይቤ ፡ በዐቢይ ፡ መንክር ፡ ማኅተም ፡ ዝኒ ፡ ያርኢ ፡ ገሃደ ፡ በእግዚኣብሔር ፡ ዐቢይ ፡ መንክር ፡ በመንፈስ ፡ ቅዱስ ፡ ተኀትመት ፤ ወዘይቤሂ ፡ አልቦ ፡ ዘቦአ ፡ ውስቴታ ፡ ዘእንበለ ፡ እግዚአ ፡ ኀያላን ፡ ቦአ ፡ ወወፅአ ፡ ውእቱኬ ፡ ፈጣሬ ፡ ሰማያት ፡ ወምድር ፡ ፈጣሬ ፡ መላእክት ፡ ወሰብእ ፡ ወአጋእዝት ፡ እግዚአ ፡ ኀያላን ፡ ውእቱ ፡ ፍሬ ፡ መለኮት ፡ ዘለብሰ ፡ ሥጋነ ፡ እምኔሃ ፡ ክርስቶስ ፡ ቦአ ፡ ወወፅአ ፡ እንተ ፡ ኀቤሃ ፡ ዘእንበለ ፡ ሙስና ። ወካዕበ ፡ ተነበየ ፡ ሙሴ ፡ በእንተ ፡ ማርያም ፡ ወይቤ ፡ ርኢኩ ፡ ጳጦስ ፡ በደብረ ፡ ሲና ፡ እንተ ፡ ኢያውዐያ ፡ እሳት ፡ በላዒ ፤ ወፍካሬሁ ፡ ለዝንቱ ፡ እሳት ፡ መለኮት ፡ ወልደ ፡ እግዚኣብሔር ፡ ወዕፀ ፡ ጳጦስ ፡ ዘትነድድ ፡ ወቈጽላ ፡ ኢትውዒ ፡ ዛቲ ፡ ይእቲ ፡ ማርያም ፨ ፨ ፨ ፨ ፨ ፨
=== chapter 97 ===
[፺፯ ፡ ኀበ ፡ አንጐርጐሩ ፡ እስራኤል ።]
ወካዕበ ፡ አንጐርጐሩ ፡ ደቂቀ ፡ እስራኤል ፡ በእንተ ፡ ተክህኖ ፡ ቅድመ ፡ እግዚኣብሔር ፡ እንዘ ፡ ይብሉ ፡ ንሕነሰ ፡ አኮኑ ፡ እስራኤል ፡ ንሕነ ፡ ዘርአ ፡ አብርሃም ፡ ወእፎ ፡ ዘኢንሠውዕ ፡ ንሕነ ፡ ከማሆሙ ፡ በውስተ ፡ ደብተራ ፡ ስምዕ ፡ በኀበ ፡ ታቦተ ፡ ሕጉ ፡ ለእግዚኣብሔር ፡ ጽዮን ፡ ቅድስት ፡ በመዓጥንት ፡ ወበዕጣን ፡ ወበቅድሳት ፡ ዘእንበለ ፡ ሙሴ ፡ ወአሮን ፡ እኁሁ ፡ ወደቂቆሙ ፡ ወንሕነሰ ፡ አኮኑ ፡ ሕዝብ ፡ እለ ፡ ኀረየነ ፡ ከማሆሙ ፡ ወንገብር ፡ ፈቃዶ ፤ ወሰሚዖ ፡ ሙሴ ፡ ይቤሎሙ ፡ ግበሩኬ ፡ ዘፈቀድክሙ ፤ ወሖሩ ፡ ወአግበሩ ፡ ሊቃናተ ፡ እስራኤል ፡ ፸ ፡ ማዕጠንታተ ፡ በዘ ፡ የዐጥኑ ፡ ለጽዮን ፡ ወይሴብሑ ፡ ለእግዚኣብሔር ፡ ወነሥኡ ፡ እምአብያቲሆሙ ፡ ዕጣነ ፡ ወፍሕመ ፡ በማዕጠንት ፡ ወሖሩ ፡ ወቦኡ ፡ ውስተ ፡ ቅድስተ ፡ ቅዱሳን ፡ ከመ ፡ ይዕጠኑ ፤ ወሶቤሃ ፡ ወደዩ ፡ ዕጣነ ፡ በአሐቲ ፡ ውዝዋዜ ፡ ማዕጠንት ፡ ወፅአ ፡ ነበልባል ፡ እመዓጥኒሆሙ ፡ ወውዕዩ ፡ ሶቤሃ ፡ ወተመስዉ ፡ ከመ ፡ ሠምዕ ፡ በቅድመ ፡ ገጸ ፡ እሳት ፡ ከማሁ ፡ ተመስዉ ፡ ከመ ፡ ሣዕር ፡ ይቡስ ፡ ሶበ ፡ ይረክቦ ፡ ነበልባለ ፡ እሳት ፡ ከማሁ ፡ ውዕዩ ፡ ምስለ ፡ ንዋየ ፡ ቅድሳቲሆሙ ፡ ወአልቦ ፡ ዘተርፈ ፡ ዘእንበለ ፡ መዓጥኒሆሙ ፤ ወይቤ ፡ እግዚኣብሔር ፡ ቀድስዎን ፡ ሊተ ፡ ለእሉ ፡ መዓጥንት ፡ ለደብተራየ ፡ ወይኩን ፡ ለመሥዋዕትየ ፡ እስመ ፡ ተቀደሰ ፡ በሞተ ፡ ዚአሆሙ ፡ ማዕጠንትሰ ፡ ማርያም ፡ ይእቲ ፡ ወፍሕምኒ ፡ ክርስቶስ ፡ ወልደ ፡ እግዚኣብሔር ፡ መለኮት ፡ ውእቱ ፡ ወጼና ፡ ዕጣን ፡ መዐዛሁ ፡ ለክርስቶስ ፡ ዘበ ፡ መዐዛሁ ፡ ሐዋርያት ፡ ወነቢያት ፡ ወሰማዕታት ፡ ወፈላስያን ፡ መነኑ ፡ ዓለመ ፡ ወወረሱ ፡ መንግሥተ ፡ ሰማያት ፤ ወአሕባሊሃ ፡ ለመዓጥንት ፡ ሰዋስው ፡ ዘርእየ ፡ ያዕቆብ ፡ በዘ ፡ ቦቱ ፡ የዐርጉ ፡ ወይወርዲ ፡ ተእኂዞሙ ፡ ባቲ ፡ ወምስለ ፡ ጢሰ ፡ ዕጣን ፡ የዐርግ ፡ ዲበ ፡ መንበረ ፡ እግዚኣብሔር ፡ ጸሎቶሙ ፡ ለንጹሓን ። ወሶበ ፡ አውዐዮሙ ፡ ነበልባል ፡ ለኃጥኣን ፡ ሐመይዎሙ ፡ ሕዝብ ፡ አዝማዲሆሙ ፡ ለእለ ፡ ኀልቁ ፡ ወይቤልዎሙ ፡ ለሙሴ ፡ ወለአሮን ፡ አኅለቅምዎሙ ፡ ለነ ፡ ለሊቃውንቲነ ፡ ወነሥኡ ፡ እብነ ፡ ከመ ፡ ይውግርዎሙ ፡ ለሙሴ ፡ ወለአሮን ፤ ወተምዕዐ ፡ እግዚኣብሔር ፡ መዓተ ፡ ላዕለ ፡ እስራኤል ፡ ወአስቆረራ ፡ ከመ ፡ ፀርቀ ፡ ትክቶ ፡ ለምክረ ፡ ዳታን ፡ ወአቤሮን ፡ ደቂቀ ፡ ቆሬ ፤ ወቀጸባ ፡ ቃለ ፡ እግዚኣብሔር ፡ ለምድር ፡ ወፈትሐት ፡ ምድር ፡ አፉሃ ፡ ወውኅጠቶሙ ፡ ምስለ ፡ ኵሉ ፡ ዘዚአሆሙ ፡ ወአን ፡ ስቲያሆሙ ፡ ወደቂቆሙ ፡ ወእንስሳሆሙ ፤ ወረዲ ፡ ውስተ ፡ ሲኦል ፡ ሕያዋኒሆሙ ፡ ወተኀትመት ፡ ምድር ፡ በመልዕልቴሆሙ ፤ ወለሕዝብሰ ፡ እለ ፡ ኀብሩ ፡ ምስሌሆሙ ፡ ሰሚዖሙ ፡ ሐሜተ ፡ ዚአሆሙ ፡ ፈነወ ፡ ሎሙ ፡ እግዚኣብሔር ፡ ብድብደ ፡ ወሞቱ ፡ በአሐቲ ፡ ጊዜ ፤ ወቦኡ ፡ ሙሴ ፡ ወአሮን ፡ በዕጣን ፡ ወበማዕጠንት ፡ ወበከዩ ፡ በኀበ ፡ እግዚኣብሔር ፡ ወአስተስረዩ ፡ ለሕዝብ ፡ እንዘ ፡ ይብሉ ፡ ተዘከር ፡ እግዚኦ ፡ አብርሃምሃ ፡ ፍቁርከ ፡ ወይስሐቅ ፡ ቊልዔከ ፡ ወእስራኤል ፡ ቅዱስከ ፡ እስመ ፡ ዘርኦሙ ፡ ንሕነ ፡ ውሉደ ፡ ሕዝብከ ፡ አቊርር ፡ መዐተከ ፡ እምኔነ ፡ ወፍጡነ ፡ ስምዐነ ፡ ወኢታማስነነ ፡ ወአእትት ፡ መቅሠፍተ ፡ እምላዕለ ፡ ሕዝብከ ፤ ወእግዚኣብሔር ፡ መሓሪ ፡ ርእየ ፡ የውሃቶ ፡ ለሙሴ ፡ ወመሐሮሙ ፤ ወነበቦ ፡ እግዚኣብሔር ፡ ለሙሴ ፡ ወይቤሎ ፡ ንግሮሙ ፡ ለዝንቱ ፡ ሕዝብ ፡ ወበሎሙ ፡ ቀድሱ ፡ ርእሰክሙ ፡ ወአምጽኡ ፡ በበአብያተ ፡ አበዊክሙ ፡ በትረ ፤ ወጸሐፉ ፡ ከመ ፡ ታእምሩ ፡ በትሮሙ ፡ አንተ ፡ ወአሮን ፡ እኁከ ፤ ወእምቤትክሙሂ ፡ ይጽሐፍ ፡ አሮን ፡ በትሮ ፤ ወበትርከሰ ፡ ኢትጽሐፍ ፡ እስመ ፡ ፍጽምት ፡ ትእምርት ፡ ለደቂቀ ፡ ሕዝብከ ፡ ቅስት ፡ ለዐላውያን ፡ ወለኵሎሙ ፡ እለ ፡ አምኑሰ ፡ ትእምርተ ፡ ሕይወት ፤ ወሶበ ፡ ጸሐፍከ ፡ ይእ ፡ ዜ ፡ ምስሌሆሙ ፡ ይብሉከ ፡ ዛቲሰ ፡ እምትካት ፡ ገባሪተ ፡ መንክር ፡ በቃለ ፡ እግዚኣብሔር ፡ እምይቤሉ ፡ ሶበ ፡ አርአይኩ ፡ ተኣምረ ፡ በውስቴታ ፤ አላ ፡ ለቤተ ፡ አቡከ ፡ ጸሐፍ ፡ በትረ ፡ አሮን ፨ ፨ ፨ ፨ ፨ ፨ ፨
=== chapter 98 ===
[፺፰ ፡ በእንተ ፡ በትረ ፡ ሙሴ ፡ ወአሮን ።]
ወነገሮሙ ፡ ሙሴ ፡ ዘንተ ፡ ወአምጽኡ ፡ በበአብያተ ፡ አበዊሆሙ ፡ እለ ፡ ኀረዩ ፡ ለንጽሕ ፡ ወኮነ ፡ ፲ ፡ ወ፪ ፡ አብትረ ፤ ወጸሐፈ ፡ ሙሴ ፡ አብትሪሆሙ ፡ በአስማተ ፡ አበዊሆሙ ፤ በትረ ፡ አሮን ፡ ተጽሕፈት ፡ በሌዊ ፡ ወበትረ ፡ ከርሚን ፡ ተጽሕፈ ፡ በይሁዳ ፡ ወበትረ ፡ አዶንያስ ፡ ተጽሕፈት ፡ በሮቤል ፡ ወኵሉ ፡ ቤተ ፡ እስራኤል ፡ ከማሁ ፡ ተጽሕፉ ፡ አብትሪሆሙ ፡ በበአስማተ ፡ አበዊሆሙ ። ወይቤሎ ፡ እግዚኣብሔር ፡ ውግር ፡ ኀበ ፡ ጽዮን ፡ ኀበ ፡ ደብተራ ፡ ዘመርጡል ፡ ወዕጸው ፡ ህየ ፡ እስከ ፡ ነግህ ፡ ወንሥኦን ፡ በቅድሜሆሙ ፡ ወሀቦሙ ፡ ለለ ፡ በትሮሙ ፡ ለለ ፡ አብያተ ፡ አበዊሆሙ ፡ ለለ ፡ አስማቲሆሙ ፡ ዘጽሑፍ ፡ ውስተ ፡ በትሩ ፡ ወዘተረክበ ፡ ትእምርት ፡ በውስተ ፡ በትሩ ፡ ውእቱ ፡ ኀረይኩ ፡ ይኩነኒ ፡ ካህነ ። ወነገሮሙ ፡ ሙሴ ፡ ዘንተ ፡ ነገረ ፡ ወገብሩ ፡ በከመ ፡ አዘዞሙ ፡ እግዚኣብሔር ። ወእምዝ ፡ ሶበ ፡ ጸብሐ ፡ ነሥአ ፡ ወመጽኡ ፡ ኵሉ ፡ አእሩገ ፡ እስራኤል ፡ ወአሮን ፤ ወቦአ ፡ ሙሴ ፡ በቅድሜሆሙ ፡ ወአልዐሎን ፡ ለአብትር ፡ ወአምጽኦን ፡ ቅድመ ፡ ኵሉ ፡ ሕዝብ ፡ ወተረክበት ፡ በትረ ፡ አሮን ፡ ምስለ ፡ ፍሬ ፡ ወጽጌ ፡ ከርካዕ ፡ እንተ ፡ ትምዕዝ ፡ ሠናየ ፡ መዐዛ ፤ ወይቤሎሙ ፡ ሙሴ ፡ ርእዩኬ ፡ ዛቲ ፡ በትር ፡ ዘኀረየ ፡ እግዚኣብሔር ፡ አምላክክሙ ፡ ኪያሁ ፡ ፍርሁ ፡ ወተቀነዩ ፡ ሎቱ ፤ ወሰገዲ ፡ ኵሉ ፡ ሕዝብ ፡ ለእግዚኣብሔር ። በትርኬ ፡ ይእቲ ፡ ማርያም ፡ ወዘእንበለ ፡ ትስተይ ፡ ማየ ፡ ዘሠረጸት ፡ ጽጌ ፡ ዘእንበለ ፡ ዘርአ ፡ ብእሲ ፡ ዘተወልደ ፡ እምኔሃ ፡ ቃለ ፡ እግዚኣብሔር ፤ ወዘይቤ ፡ ኀረይኩ ፡ ኣርኢ ፡ ትእምርተ ፡ ወይኩነኒ ፡ ካህነ ፡ ውእቱ ፡ እግዚኣብሔር ፡ ኀረያ ፡ ለማርያም ፡ እምኵሉ ፡ ተዓይነ ፡ እስራኤል ፤ በከመ ፡ ተነበየ ፡ ዳዊት ፡ አቡሃ ፡ ያበድሮን ፡ እግዚኣብሔር ፡ ለአናቅጸ ፡ ጽዮን ፡ እምኵሉ ፡ ተዓይኒሁ ፡ ለያዕቆብ ፤ ወመትልው ፡ ይቤ ፡ ነኪር ፡ ነገሩ ፡ በእንቲአኪ ፡ ህገረ ፡ እግዚኣብሔር ፤ እምኵሉ ፡ ትዕይንተ ፡ እስራኤል ፡ ወአናቅጺሃ ፡ ሶበ ፡ ይብል ፡ አርምሞ ፡ አፉሃ ፡ ወንጽሐ ፡ ከናፍሪሃ ፡ ወስብሐት ፡ ዘይወፅእ ፡ እምአፉሃ ፡ ከመ ፡ ጸቃውዕ ፡ ዘይውሕዝ ፡ እምከናፍሪሃ ፡ ወንጽሐ ፡ ድንግልናሃ ፡ ዘእንበለ ፡ ጥልቀት ፡ ወዘእንበለ ፡ ሙስና ፡ ወርኵስ ፡ እምቅድመ ፡ ትለድኒ ፤ ወእምድኅረ ፡ ወለደትኒ ፡ ንጽሕትኒ ፡ ወቅድስትኒ ፡ ወከማሁ ፡ ከመኒ ፡ እስከ ፡ ለዓለም ፤ ወበሰማያትኒ ፡ ንጽሕት ፡ ምስለ ፡ መላእክት ፡ ታንሶሱ ፡ ወይእቲ ፡ በትረ ፡ አሮን ፡ ህሉት ፡ ይእቲ ፡ ውስተ ፡ ጽዮን ፡ ምስለ ፡ ጎሞር ፡ መና ፡ ምልእት ፡ ወምስለ ፡ ክልኤ ፡ ጽላት ፡ እለ ፡ ተጽሕፋ ፡ በአጽባዕተ ፡ እግዚኣብሔር ፡ ወጽዮን ፡ ሰማያዊት ፡ መንፈሳዊት ፡ መልዕልቴሆሙ ፡ ጽዮን ፡ እንተ ፡ ግብራ ፡ ወኅብራ ፡ ነኪር ፡ እንተ ፡ ለሊሁ ፡ ገባሪሃ ፡ ወኬንያሃ ፡ ለማኅደረ ፡ ስብሐቲሁ ፨ ፡ ወይቤሎ ፡ ለሙሴ ፡ ግበር ፡ ታቦተ ፡ እምዕፅ ፡ ዘኢይነቅዝ ፡ ወትለብጦ ፡ በወርቅ ፡ ጽሩይ ፡ እንተ ፡ ኵለንታሁ ፤ ወርቅሰ ፡ ጽርየተ ፡ መለኮት ፡ ዘወረደ ፡ እምሰማያት ፡ እስመ ፡ መለኮት ፡ ይእኅዝ ፡ ኵሎ ፡ ሰማያተ ፡ ወምድረ ፡ ወከማሁ ፡ በወርቅ ፡ ተለብጠት ፡ ታቦት ፡ ማኅደራ ፡ ለጽዮን ፡ ሰማያዊት ፡ ወታቦት ፡ ትተረጐም ፡ ማርያም ፡ ወዕፅ ፡ ዘኢይነቅዝ ፡ ይተረጐም ፡ ክርስቶስ ፡ መድኀኒነ ፡ ወጎሞር ፡ እንተ ፡ ይእቲ ፡ መሶበ ፡ ወርቅ ፡ እንተ ፡ ውስተ ፡ ታቦት ፡ ትተረጐም ፡ ይእቲ ፡ ማርያም ፡ ወመና ፡ ዘውስተ ፡ መሶብ ፡ ሥጋሁ ፡ ለክርስቶስ ፡ ይተረጐም ፡ ዘወረደ ፡ እምሰማያት ፡ ወቃለ ፡ እግዚኣብሔር ፡ ዘተጽሕፈ ፡ ውስተ ፡ ክልኤ ፡ ጽላት ፡ ይተረጐም ፡ ክርስቶስ ፡ ወልደ ፡ እግዚኣብሔር ፡ ወጽዮን ፡ መንፈሳዊት ፡ ትተረጐም ፡ ብርሃነ ፡ መለኮት ፤ መንፈሳዊት ፡ ባሕርይ ፡ እንተ ፡ ተገምረት ፡ ውስተ ፡ ታቦት ፡ በከመ ፡ ዕንቈ ፡ ባሕርይ ፡ እንተ ፡ ተኀቱ ፡ ዘብዙኅ ፡ ሤጣ ፡ ወይእኅዛ ፡ ዘአጥረያ ፡ ውስተ ፡ እዴሁ ፡ ወይፀብጣ ፡ ወያገምራ ፡ ውስተ ፡ እዴሁ ፡ ወእንዘ ፡ ሀለወት ፡ ውስተ ፡ እዴሁ ፡ ቦአ ፡ ወተገምረ ፡ ውስቴታ ፤ ወባሕርይ ፡ ዘአጥረያ ፡ ይተረጐም ፡ ቃለ ፡ እግዚኣብሔር ፡ ክርስቶስ ፡ ወእንተ ፡ ተእኅዘት ፡ ባሕርይ ፡ መንፈሳዊት ፡ ትተረጐም ፡ ማርያም ፡ ወላዲተ ፡ ብርሃን ፡ ዘእምኔሃ ፡ ተሠገወ ፡ አክራጦስ ፡ ዘአልቦቱ ፡ ቱስሕት ፤ በውስቴታ ፡ ገብረ ፡ ማኅፈደ ፡ ለርእሱ ፡ እምሥጋሃ ፡ ንጹሕ ፡ ወተወልደ ፡ እምኔሃ ፡ ብርሃን ፡ ዘእምብርሃን ፡ አምላክ ፡ ዘእምአምላክ ፡ ዘተወልደ ፡ በፈቃዲ ፡ ወኢተገብረ ፡ በእደ ፡ ካልእ ፡ አላ ፡ ለርእሱ ፡ ገብረ ፡ ማኅፈደ ፡ በእንተ ፡ ኢትትረከብ ፡ ጥበብ ፡ እንተ ፡ ዕዲት ፡ እምኅሊና ፡ ሰብእ ፨ ፡ ወካዕበ ፡ አመ ፡ አውፅኦሙ ፡ እግዚኣብሔር ፡ ለእስራኤል ፡ እምግብጽ ፡ ጸምኡ ፡ ማየ ፡ በቃዴስ ፡ ወአንጐርጐሩ ፡ ወበከዩ ፡ ኀበ ፡ ሙሴ ፡ ወሖረ ፡ ሙሴ ፡ ኀበ ፡ እግዚኣብሔር ፡ ወአይድዖ ፡ ዘንተ ፡ ለእግዚኣብሔር ፤ ወይቤሎ ፡ እግዚኣብሔር ፡ ንሣእ ፡ በትረከ ፡ ወዝብጣ ፡ ለይእቲ ፡ እዝኅ ፡ ወዘበጣ ፡ ሙሴ ፡ ኑኃ ፡ ወግድማ ፡ በአርአያ ፡ ትእምርተ ፡ መስቀል ፡ ወውሕዘት ፡ ማየ ፡ ፲ወ፪ ፡ አፍላግ ፡ ወሰትዩ ፡ እምኔሃ ፡ ወረ ፡ ወዩ ፡ ሰብኦሙ ፡ ወእንስሳሆሙ ፡ ወሰቲዮሙ ፡ ተለወቶሙ ፡ ይእቲ ፡ ኰኵሕ ፡ ወኰኵሕሰ ፡ ይተረጐም ፡ በክርስቶስ ፡ ወአፍላግ ፡ ሐዋርያት ፡ ወዘሰትዩ ፡ ትምህርተ ፡ ሐዋርያት ፡ ወበትርኒ ፡ ዕፀ ፡ መስቀል ፤ ወኰኵሕሰ ፡ በከመ ፡ ይቤ ፡ በወንጌል ፡ ዘሣረረ ፡ ዲበ ፡ ኰኵሕ ፡ ኢይትሀወክ ፡ እምአጋንንት ፤ ወካዕበ ፡ ይቤ ፡ አነ ፡ አንቀጽ ፤ ወካዕበ ፡ ይቤ ፡ አነ ፡ ዴዴ ፤ ወርእዩሂ ፡ ዘከመ ፡ ከፈሎሙ ፡ ለአርዳኢሁ ፡ እንዘ ፡ ይብል ፡ ወለእለ ፡ እምድኅሬሆሙ ፡ ጳጳሳት ፡ ወማኅበረ ፡ ክርስቲያን ፤ አንተ ፡ ኰኵሕ ፡ ይቤሎ ፡ ለጴጥሮስ ፡ ወላዕሌከ ፡ አሐንጾሙ ፡ ለሕዝበ ፡ ክርስቲያን ፤ ወዓዲ ፡ ይቤ ፡ አነ ፡ ኖላዌ ፡ አባግዕ ፡ ወሎቱኒ ፡ ይቤሎ ፡ ሥልሰ ፡ ረዐይኬ ፡ አባግዕየ ፤ ወካዕበ ፡ ይቤ ፡ አነ ፡ ጒንደ ፡ ዐጸደ ፡ ወይን ፤ ወሎሙኒ ፡ ይቤሎሙ ፡ አንትሙ ፡ አዕጹቂሁ ፡ ወአሕሩጊሁ ። ወበትረ ፡ ሙሴኒ ፡ እንተ ፡ ባቲ ፡ በዘገብረ ፡ ተኣምረ ፡ ትተረጐም ፡ ዕፀ ፡ መስቀል ፡ በዘአድኀኖ ፡ ለአዳም ፡ ወለደቂቁ ፡ እምሥቃየ ፡ አጋንንት ፤ ወበከመ ፡ ሙሴ ፡ ዘበጠ ፡ ባቲ ፡ ማየ ፡ ተከዜ ፡ ወረሰያ ፡ ደመ ፡ ወቀተለ ፡ ዓሣቲሆሙ ፡ ከማሁ ፡ ክርስቶስኒ ፡ በመስቀሉ ፡ ቀተሎ ፡ ለሞት ፡ ወአውፅኦሙ ፡ እምውስተ ፡ ሲኦል ፤ ወበከ ፡ መ ፡ ሙሴ ፡ ዘበጠ ፡ በበትሩ ፡ ውስተ ፡ ነፋሳት ፡ ወጸልመ ፡ ኵላ ፡ ምድረ ፡ ግብጽ ፡ እስከ ፡ ፫ ፡ ዕለት ፡ ወ፫ ፡ ሌሊት ፡ ጽልመት ፡ ዘያርመሰምስ ፡ እስከ ፡ ኢይትነሥኡ ፡ እምስካቢሆሙ ፡ ወከማሁ ፡ ክርስቶስኒ ፡ ተሰቂሎ ፡ ዲበ ፡ ዕፅ ፡ አብርህ ፡ ጽልመተ ፡ አልባበ ፡ ሰብእ ፡ ወተንሥአ ፡ እምዉታን ፡ በሣልስት ፡ ዕለት ፡ ወሣልስት ፡ ሌሊት ፤ ወበከመ ፡ በትረ ፡ ሙሴ ፡ ኮነ ፡ ሚጦተ ፡ ወወልጦተ ፡ በቃለ ፡ እግዚኣብሔር ፡ እንዘ ፡ ይብስት ፡ ኮነት ፡ ዘነፍስ ፡ ወካዕበ ፡ እንዘ ፡ ነፍስ ፡ ኮነት ፡ ይብስተ ፡ ወከማሁ ፡ ክርስቶስኒ ፡ በዕፀ ፡ መስቀሉ ፡ ረሰየ ፡ ሕይወተ ፡ ለሕዝበ ፡ ክርስቲያን ፡ ለእለ ፡ አምኑ ፡ ቦቱ ፤ ረሰየ ፡ በትእምርተ ፡ መስቀል ፡ ከመ ፡ ይሰደዲ ፡ መንፈሰ ፡ አጋንንት ፡ እስመ ፡ ተውላጠ ፡ ኮኑ ፡ አጋንንት ፡ ወክርስቲያን ፤ እሙንቱ ፡ እንዘ ፡ መንፈሳዊያን ፡ ኮኑ ፡ ኅሱራነ ፡ በተዐድዎ ፡ ትእዛዘ ፡ እግዚኦሙ ፡ ኮኑ ፡ ስዲዳነ ፡ በኀይለ ፡ መስቀሉ ፡ ወንሕነኒ ፡ ኮነ ፡ መንፈሳዊያነ ፡ በነሢአ ፡ ሥጋሁ ፡ ወደሙ ፡ ህየንቴሆሙ ፡ ለእለ ፡ ተሰዲ ፡ መንፈሳዊያን ፡ ወኮነ ፡ ንሕነ ፡ ሰባሕያነ ፡ እለ ፡ አመነ ፡ በመስቀሉ ፡ ወበትንሣኤሁ ፡ ቅድስት ፤ ወበከመ ፡ ሙሴ ፡ ዘበጠ ፡ አድባረ ፡ ወአምጽአ ፡ መቅሠፍተ ፡ በትእዛዘ ፡ እግዚኣብሔር ፡ ሰፊሖ ፡ እዴሁ ፡ ምስለ ፡ በትሩ ፡ ከማሁ ፡ ክርስቶስኒ ፡ አውፅኦሙ ፡ ለአጋንንት ፡ እምላዕለ ፡ ሰብእ ፡ በኀይለ ፡ መስቀሉ ፡ ሰፊሖ ፡ እዴሁ ፡ ዲበ ፡ ዕፀ ፡ መስቀል ፤ ሶበ ፡ ይቤሎ ፡ እግዚኣብሔር ፡ ለሙሴ ፡ ዝብጥ ፡ በበትርከ ፡ ዘንተ ፡ ብሂል ፡ ዕትብ ፡ በማዕተበ ፡ መስቀሉ ፡ ለክርስቶስ ፡ ብሂል ፤ ወሶበ ፡ ይቤሎ ፡ እግዚኣብሔር ፡ ለሙሴ ፡ ስፋሕ ፡ እዴከ ፡ ዝኒ ፡ ብሂል ፡ ከመ ፡ በስፍሐተ ፡ እዴሁ ፡ አድኀነነ ፡ ክርስቶስ ፡ እምተቀንዮ ፡ ለጸላኢ ፡ ወወሀበነ ፡ ሕይወተ ፡ እንቲአሁ ፡ በስፍሐተ ፡ እዴሁ ፡ በዲበ ፡ ዕፀ ፡ መስቀል ፡ ብሂል ። ወአመኒ ፡ ይጸብኡ ፡ ዐማልቅ ፡ ምስለ ፡ እስራኤል ፡ ዐርገ ፡ ሙሴ ፡ ውስተ ፡ ደብር ፡ ወአሮን ፡ ምስሌሁ ፡ ዐርጉ ፡ ከመ ፡ ይጸልዩ ፡ እስመ ፡ ተኀየሉ ፡ ዐማሌቅ ፡ ወአዘዞ ፡ እግዚኣብሔር ፡ ለሙሴ ፡ ወይቤሎ ፡ ስፋሕ ፡ እዴከ ፡ እስከ ፡ ይረክቡ ፡ ኀይለ ፡ እስራኤል ፤ ወይቤ ፡ በውስተ ፡ ኦሪት ፡ ኮና ፡ ርቡባተ ፡ እዴሁ ፡ ለሙሴ ፡ እስከ ፡ ዕርበተ ፡ ፀሐይ ፡ አላ ፡ ባሕቱ ፡ ክቡዳት ፡ እደዊሁ ፡ ለሙሴ ፡ ወሶበ ፡ የዐፅቦ ፡ አውረደ ፡ እዴሁ ፡ እምዘ ፡ ሰፍሐ ፡ ይትዌጽዑ ፡ እስራኤል ፡ ወይመውእዎሙ ፡ ፀሮሙ ፤ ወሶበ ፡ ያሌዕል ፡ እዴሁ ፡ ወይሰፍሕ ፡ በርቱዕ ፡ ይትመውኡ ፡ ዐማሌቅ ፡ ወይሰድድዎሙ ፡ እስራኤል ፡ ወይመው ፡ እዎሙ ፡ ለፀሮሙ ፡ ዓማሌቅ ፤ ወዘንተ ፡ ሶበ ፡ ርእዩ ፡ አሮን ፡ ወሆር ፡ ነደቁ ፡ እብነ ፡ በየማኑ ፡ ወበፀጋሙ ፡ ለሙሴ ፡ ወአፅግዑ ፡ እደወ ፡ ሙሴ ፡ ላዕለ ፡ አእባን ፡ ዘነደቁ ፡ አሮን ፡ እንተ ፡ የማኑ ፡ ወሆር ፡ እንተ ፡ ፀጋሙ ፡ ወአኀዝዎ ፡ ዲበ ፡ መታክፍቲሆሙ ፡ ከመ ፡ ኢያግብእ ፡ እዴሁ ፡ እምዘሰፍሖ ። ወዘንተ ፡ እፌክር ፡ ለክሙ ፤ ፀብአ ፡ ዐማሌቅሰ ፡ ምስለ ፡ እስራኤል ፡ ፀብአ ፡ መሀይምናን ፡ ምስለ ፡ አጋንንት ፡ ውእቱ ፡ ወዘእንበለ ፡ ይሰቀል ፡ ክርስቶስ ፡ ሞእዎሙ ፡ ለቀደምት ፤ ወሶበ ፡ ሰፍሐ ፡ እዴሁ ፡ ዲበ ፡ ዕፀ ፡ መስቀል ፡ በእንተ ፡ ኀጢአተ ፡ አዳም ፡ ወደቂቁ ፡ ወሶበ ፡ ሰፍሐ ፡ እዴሁ ፡ ወተቀነወ ፡ እራኁ ፡ ሞእዎሙ ፡ እለ ፡ ይትዐተቡ ፡ በመስቀሉ ፡ ለክርስቶስ ፤ ስፍሐ ፡ እዴሁ ፡ ለሙሴ ፡ ይተረጐም ፡ ስቅለቱ ፡ ለክርስቶስ ፡ ወዘነደቁ ፡ አእባን ፡ አሮን ፡ ወሆር ፡ ይተረጐም ፡ ዕፀ ፡ መስቀል ፡ ወቅንዋት ፤ ወአሮን ፡ ይተረጐም ፡ በፈያታዊ ፡ ዘየማን ፡ ወሆር ፡ በፈያታዊ ፡ ዘፀጋም ፡ ወዐማሌቅ ፡ ይተረጐም ፡ በአጋንንት ፡ ወንጉሦሙ ፡ ለዐማሌቅ ፡ ይተረጐም ፡ በሰይጣን ፤ ወአሜሃ ፡ ዘተመውኡ ፡ ውእቶሙ ፡ በትንሣኤሁ ፡ ለክርስቶስ ፡ ወበመስቀሉ ፡ ሞእናሆሙ ፡ ለአጋንንት ፡ ወለሰይጣን ፡ ወካ ፡ ዕበ ፡ አመ ፡ ይወፅኡ ፡ እስራኤል ፡ እምግብጽ ፡ ወፅኡ ፡ ውስተ ፡ ማይ ፡ መሪር ፡ ወኀጥኡ ፡ ዘይሰትዩ ፡ እምረተ ፡ ማዩ ፡ ወቀዳሚ ፡ ነጐርጓር ፡ አንጐርጐሩ ፡ በእንተ ፡ ምረተ ፡ ማይ ፤ ወይቤሎ ፡ እግዚኣብሔር ፡ ለሙሴ ፡ ንሣእ ፡ በትረከ ፡ ወደይ ፡ ውስቴቱ ፡ ወዕተቦ ፡ ይምነ ፡ ወፅግመ ፤ ወርኢ ፡ በዝንቱ ፡ ሶበ ፡ ይቤሎ ፡ እግዚኣብሔር ፡ ይኩን ፡ ጥዑመ ፡ እመ ፡ ኢኮነኑ ፡ ጥዑመ ፤ ወባሕቱ ፡ ያርኢ ፡ ከመ ፡ በትእምርተ ፡ መስቀል ፡ ይሤኒ ፡ ኵሉ ፡ ወማይ ፡ መሪር ፡ ይከውን ፡ ጥዑመ ፡ ወኵሉ ፡ ዘማሰነ ፡ በኀይለ ፡ መስቀሉ ፡ ለኢየሱስ ፡ ክርስቶስ ፡ ይከውን ፡ ሠናየ ፡ ወአዳመ ። ወባዕድኒ ፡ በዘ ፡ እነግረከ ፡ እምካልኣን ፡ ነቢያት ፡ በእንተ ፡ ስቅለቱ ፤ ይቤ ፡ ዳዊት ፡ ቀነዉኒ ፡ እደውየ ፡ ወእገርየ ፡ ዝኒ ፡ ገሃደ ፡ አርአየ ፡ በእንተ ፡ ቅንዋተ ፡ እደዊሁ ፡ ወእገሪሁ ፤ ወካዕበ ፡ ይቤ ፡ አስተዩኒ ፡ ብሒአ ፡ ለጽምእየ ፡ ዘኒ ፡ ገሃደ ፡ አርአየ ፡ ከመ ፡ ሰረበ ፡ ብሒአ ፡ በእንተ ፡ ስሕተቱ ፡ ለአዳም ፤ መንፈሰ ፡ ሕይወት ፡ ዘነፍሐ ፡ ላዕሌሁ ፡ ለአዳም ፡ ሰረበ ፡ ብሒአ ፡ ወእድ ፡ እንተ ፡ ሣረረታ ፡ ለምድር ፡ ተቀነወት ፡ ዘበእንቲአሁ ፡ ለአዳም ፡ ተትሒቶ ፡ ተወልደ ፡ አያያተ ፡ ገብር ፡ ነሢኦ ፨ ፨ ፨ ፨ ፨
=== chapter 99 ===
[፺፻ ፡ በእንተ ፡ ክልኤቱ ፡ አግብርት ።]
እስመ ፡ ብእሲ ፡ ንጉሥ ፡ ከመ ፡ ዘቦቱ ፡ ፪አግብርተ ፡ ፩ዕቡይ ፡ ወጽኑዕ ፡ ወ፩ትሑት ፡ ወድኩም ፡ ወተኀየሎ ፡ ውእቱ ፡ ዕቡይ ፡ ለውእቱ ፡ ትሑት ፡ ወዘበጦ ፡ ወቀተሎ ፡ ወሰለቦ ፤ ወርእዮሙ ፡ ንጉሥ ፡ እምልዑል ፡ መንበሩ ፡ ወካዕበ ፡ ውእቱ ፡ ንጉሥ ፡ ወሪዶ ፡ አኀዞ ፡ ለውእቱ ፡ ዕቡይ ፡ ወዘበጦ ፡ ወቀጥቀጦ ፡ ወአሰሮ ፡ ወወደዮ ፡ ውስተ ፡ ቤተ ፡ ጽልመት ፡ ወለውእቱሰ ፡ ትሑት ፡ ወድኩም ፡ ገብሩ ፡ አንሥኦ ፡ ወሐቀፎ ፡ ወነገፎ ፡ ጸበሎ ፡ ወኀፀቦ ፡ ወሶጠ ፡ ቅብአ ፡ ወወይነ ፡ ለቊስሉ ፡ ወጸዐኖ ፡ ዲበ ፡ አድጉ ፡ ወአብጽሖ ፡ ውስተ ፡ ህገሩ ፡ ወአዕረጎ ፡ ዲበ ፡ መንበሩ ፡ ወአንበሮ ፡ በየማኑ ፡ ንጉሥሰ ፡ ክርስቶስ ፡ ውእቱ ፡ በአማን ፡ ወአግብርትኒ ፡ ዘእቤ ፡ ሰይጣን ፡ ዕቡይ ፡ ወአዳም ፡ ትሑት ፤ ወርእዮ ፡ ዘከመ ፡ ተኀየሎ ፡ ወአውደቆ ፡ ወረደ ፡ እምልዑል ፡ መንበሩ ፡ ወአንሥኦ ፡ ለአዳም ፡ ገብሩ ፡ ወአሰሮ ፡ ለሰይጣንሰ ፡ ውስተ ፡ ረዓደ ፡ ሲኦል ፤ ወለሥጋ ፡ አዳም ፡ አንበሮ ፡ ዲበ ፡ መንበረ ፡ መለኮት ፡ አዕበዮ ፡ ወአልዐሎ ፡ ወአክበሮ ፡ ወተሰብሐ ፡ እምነ ፡ ኵሎሙ ፡ እለ ፡ ፈጠረ ፡ መላእክት ፡ ወሊቃነ ፡ መላእክት ፡ እልፍ ፡ አእላፋት ፡ ወትእልፊተ ፡ አእላፋት ፡ መንፈሳዊያን ፤ እስመ ፡ አውደቆ ፡ ለዕቡይ ፡ ወ ፡ አንሥኦ ፡ ለትሑት ፡ አኅሰሮ ፡ ለዕቡይ ፡ ወአክበሮ ፡ ለትሑት ፡ አስቆረሮ ፡ ለዕቡይ ፡ ወአፍቀሮ ፡ ለትሑት ፡ ተህየዮ ፡ ለዝኁር ፡ ወመሐሮ ፡ ለነዳይ ፡ እምልዕልና ፡ አውደቆ ፡ ለዕቡይ ፡ ወእመሬት ፡ አንሥኦ ፡ ለምስኪን ፡ እምክብሩ ፡ ነሠቶ ፡ ለኀያል ፡ ወእሙስና ፡ አንሥኦ ፡ ለነዳይ ፤ እስመ ፡ ኀቤሁ ፡ ክብር ፡ ወኀሳር ፡ ለዘ ፡ ፈቀደ ፡ ያከብር ፡ ወለዘፈቀደ ፡ ያኀስር ፨ ፨ ፨ ፨ ፨ ፨
=== chapter 100 ===
[፻ ፡ በእንተ ፡ እለ ፡ ተዐደዉ ፡ መላእክት ።]
ወቦ ፡ ካዕበ ፡ መላእክትሂ ፡ እለ ፡ ተምዕዖሙ ፡ እግዚኣብሔር ፡ እስመ ፡ አእመሮሙ ፡ ማእምረ ፡ ልብ ፡ ዘሐመይዎ ፡ ለአዳም ፡ እንዘ ፡ ይብሉ ፡ እምድኅረ ፡ አፍቀሮ ፡ እግዚኣብሔር ፡ ወወሀቦ ፡ ኪያነሂ ፡ ከመ ፡ ንትለአኮ ፡ ወእንስሳ ፡ ወአራዊት ፡ ወዓሣተ ፡ ባሕር ፡ ወአዕዋፈ ፡ ሰማይ ፡ ወኵሉ ፡ ፍረያት ፡ ወዕፀወ ፡ ገዳም ፡ ወዓዲ ፡ ሰማያት ፡ ወምድር ፤ ወወሀቦ ፡ ሰማይኒ ፡ ከመ ፡ ተሀቦ ፡ ዝናመ ፡ ወምድርኒ ፡ ከመ ፡ ተሀቦ ፡ ፍረያተ ፤ ወዓዲ ፡ ፀሐየ ፡ ወወርኀ ፡ ወሀቦ ፡ ፀሐይኒ ፡ ከመ ፡ ያብርህ ፡ ሎቱ ፡ በመዐልት ፡ ወወርኅኒ ፡ ከመ ፡ ያብርህ ፡ ሎቱ ፡ በሌሊት ፤ ለሐኮ ፡ በአጻብዒሁ ፡ ወፈጠሮ ፡ በአምሳሊሁ ፡ ወሰዐሞ ፡ ወነፍሐ ፡ ላዕሌሁ ፡ መንፈሰ ፡ ሕይወት ፡ ወይቤሎ ፡ ወልድየ ፡ በኵርየ ፡ ወፍቁርየ ፤ ወሤሞ ፡ ውስተ ፡ ገነት ፡ ከመ ፡ ይብላዕ ፡ ወይትፈጋዕ ፡ ዘእንበለ ፡ ደዌ ፡ ወሕማም ፡ ዘእንበለ ፡ ጻማ ፡ ወስራሕ ፡ ወአዘዞ ፡ ከመ ፡ ኢይብላዕ ፡ እምአሐቲ ፡ ዕፅ ፤ ወዘንተ ፡ ኵሎ ፡ እምድኅረ ፡ አወፈዮ ፡ ተዐደወ ፡ ወበልዐ ፡ እምይእቲ ፡ ዕፅ ፡ ወኮነ ፡ ጽሉአ ፡ ወምኑነ ፡ ወሰደዶ ፡ እምገነት ፤ እምይእዜሰ ፡ ቀብጸ ፡ ተስፋሁ ፡ እስመ ፡ ተዐደወ ፡ ትእዛዘ ፡ ፈጣሪሁ ፡ ወአውሥኦሙ ፡ እግዚኣብሔር ፡ ለመላእክት ፡ እለ ፡ ሐመይዎ ፡ ከመዝ ፡ ለአዳም ፡ ወይቤሎሙ ፡ ለምንት ፡ ከመዝ ፡ ተሐምይዎ ፡ ለአዳም ፡ እስመ ፡ ሥጋ ፡ ወደም ፡ ውእቱ ፡ ወሐመድ ፡ ወመሬት ፡ ውእቱ ። ወአውሥኡ ፡ መላእክት ፡ ወይቤልዎ ፡ ንንብብኑ ፡ ቅድሜከ ፡ እግዚኦ ፡ ኀጢአቶ ፡ ለአዳም ፡ ወይቤሎሙ ፡ እግዚኣብሔር ፡ ንብቡ ፡ ወእሰምዐክሙ ፡ አነሂ ፡ ወአወሥአክሙ ፡ በእንተ ፡ አዳም ፡ ገብርየ ፤ እስመ ፡ ተኬነወ ፡ እግዚኣብሔር ፡ በእንተ ፡ አዳም ፡ እስመ ፡ ይቤ ፡ ፈጠርክዎ ፡ እመሬት ፡ ወኢይገድፎ ፡ ለልሕኵትየ ፡ አምጻእክዎ ፡ እምኀበ ፡ ኢሀሎ ፡ ወኢይሬስዮ ፡ ስላተ ፡ ጸላኢሁ ፡ ለግብረ ፡ እደዊየ ፡ ወይቤሉ ፡ እሙንቱ ፡ መላእክት ፡ ስብሐት ፡ ለከ ፡ እግዚኦ ፡ እስመ ፡ አእመርከነ ፡ ማእምረ ፡ አልባብ ፡ ከመ ፡ ሐመይናሁ ፡ ለአዳም ፡ በእንተ ፡ ዘተዐደወ ፡ ትእዛዘ ፡ ዚአከ ፡ ከመ ፡ ኢይብላዕ ፡ እምአሐቲ ፡ ዕፅ ፡ እምድኅረ ፡ አመስፈንኮ ፡ ላዕለ ፡ ኵሉ ፡ ዘፈጠርከ ፡ ወሤምኮ ፡ ላዕለ ፡ ኵሉ ፡ ግብረ ፡ እደዊከ ፤ ወሶበ ፡ እመ ፡ ኢነገርኮ ፡ ወእመ ፡ ኢአዘዝኮ ፡ ከመ ፡ ኢይብላዕ ፡ እምይእቲ ፡ ዕፅ ፡ እመ ፡ ኢኮኖ ፡ ጌጋየ ፡ ወሶበኒ ፡ በልዐ ፡ በኀጢአ ፡ መብልዕ ፡ እመ ፡ ኢኮኖ ፡ ጌጋየ ፤ አላ ፡ አጠየቆ ፡ ቃለከ ፡ ወትቤሎ ፡ እመ ፡ በሊዐ ፡ ትበልዕ ፡ እምዝንቱ ፡ ዕፅ ፡ ሞተ ፡ ትመውት ፤ ወውእቱሰ ፡ እምድኅረ ፡ ሰምዐ ፡ ዘንተ ፡ ጠብዐ ፡ ወበልዐ ፤ ኢያኅጣእኮ ፡ ዘይበልዕ ፡ ጥዑመ ፡ ፍረያተ ፡ እምነ ፡ ገነት ፡ ወኢያኅጣእኮ ፡ ዘይናዝዞ ፡ ወቢጸ ፡ ዘይረድኦ ፡ ከማሁ ፤ ወዘንተ ፡ ንቤ ፡ ወአእመርከነ ፡ ወከሠትነ ፡ ለከ ፡ ከመ ፡ ተዐደወ ፡ ትእዛዝከ ። አውሥኦሙ ፡ መሓሪ ፡ ወመፍቀሬ ፡ ምሕረት ፡ ህየንተ ፡ አዳም ፡ ወይቤሎሙ ፡ አንትሙሰ ፡ ፩ ፡ ኅሊና ፡ ፈጠርኩክሙ ፡ ለስብሐት ፡ እምእሳት ፡ ወነፋስ ፡ ወሎቱሰ ፡ ፈጠርክዎ ፡ ምክዕቢተ ፡ ዚአክሙ ፡ እመሬት ፡ ወእማይ ፡ እምነፋስ ፡ ወእሳት ፤ ወኮነ ፡ ዘሥጋ ፡ ወደም ፤ ወቦቱ ፡ ፲ ፡ ኅሊናተ ፡ ፭ ፡ ዘሠናያት ፡ ወ፭ ፡ ዘእኩይ ፡ ወለእመ ፡ አጥብዐ ፡ ልቡ ፡ ለሠናይ ፡ የሐውር ፡ በኅሊና ፡ ሠናይ ፡ ወለእመሰ ፡ አስሐቶ ፡ ዲያብሎስ ፡ የሐውር ፡ ኀቤሁ ፡ በፍኖት ፡ እኩይ ፤ ወአንትሙሰ ፡ አልብክሙ ፡ ባዕደ ፡ ኅሊና ፡ ዘእንበለ ፡ ስብሐትየ ፡ ዘእንበለ ፡ ውእቱ ፡ ዕቡይ ፡ ዘአሥረጻ ፡ ለእከይ ፡ ወኮነ ፡ እኩየ ፡ ወተስዕረ ፡ እማኅበርክሙ ፤ ወአንትሙኒ ፡ ለምንት ፡ ትትዔበዩ ፡ ላዕለ ፡ አዳም ፤ ወሶበ ፡ ኮንክሙ ፡ ከማሁ ፡ ወፈጠርኩክሙ ፡ እማይ ፡ ወመሬት ፡ እምኮንክሙ ፡ ሥጋ ፡ ወደም ፡ ወእምአፈድፈድክሙ ፡ እምኔሁ ፡ ዐሊ ፡ ወ ፡ ትእዛዝየ ፡ ወክሒደ ፡ ቃልየ ። ወይቤልዎ ፡ ስብሐት ፡ ለከ ፡ እግዚኦ ፤ ሐሰ ፡ ለነ ፡ ኢንትዐደው ፡ ትእዛዝከ ፡ ወኢነዐሉ ፡ ቃለከ ፡ እስመ ፡ ንሕነ ፡ መንፈሳዊያን ፡ ለሕይወት ፡ ወውእቱሰ ፡ መሬታዊ ፡ ለእበድ ፤ ወይእዜኒ ፡ እመ ፡ ንክል ፡ ጥዩቀ ፡ ፍትነነ ፡ ወአመክረነ ፡ ከመ ፡ ታእምር ፡ ለእመ ፡ ንክል ፡ ዐቂበ ፡ ቃልከ ። ወሶበ ፡ ከመዝ ፡ ተመክሑ ፡ ይቤሎሙ ፡ እግዚኣብሔር ፡ መፍቀሬ ፡ ሰብእ ፡ እምከመሰኬ ፡ ተስሕትክሙ ፡ በዐሊወ ፡ ቃልየ ፡ ግፍዕክሙ ፡ ላዕለ ፡ ርእስክሙ ፡ ሐረረት ፡ ገህነም ፡ ወእሳት ፡ ወተይ ፡ ወመርቄ ፡ ወዐውሎ ፡ ምንባሪክሙ ፡ እስከ ፡ ዕለት ፡ ዐባይ ፡ ትትዐቀቡ ፡ በሰናስል ፡ ዘኢይትፈታሕ ፡ ወኢይሰበር ፡ እስከ ፡ ለዓለም ፤ ወለእመሰ ፡ ጥዩቀ ፡ ዐቀብክሙ ፡ ቃልየ ፡ ወገበርክሙ ፡ ትእዛዝየ ፡ ትነብሩ ፡ በየማንየ ፡ ወበፀጋምየ ፤ እስመ ፡ ኵሉ ፡ ዘሞአ ፡ ኀየለ ፡ ወዘሰ ፡ ተመውአ ፡ ተኀየለ ፤ እስመ ፡ ሰይጣንሂ ፡ አልቦ ፡ ኀይለ ፡ ዘእንበለ ፡ ዳእሙ ፡ ዘያሠርጽ ፡ ውስተ ፡ ኅሊና ፡ ወኢይኤዝዝ ፡ ወኢያጌብር ፡ ወኢይዘብጥ ፡ ወኢይስሕብ ፡ ወኢይእኅዝ ፡ ወኢይትዋሣእ ፡ አላ ፡ በጽምሚት ፡ ያሠርጽ ፡ ውስተ ፡ ኅሊና ፤ ወዘተሠጥዎ ፡ ለኅሊና ፡ እኩይ ፡ ይሬስዮ ፡ ለሀጒል ፡ ወእመሰ ፡ ሞኦ ፡ ለኅሊና ፡ እኩይ ፡ ረከበ ፡ ሞገሰ ፡ ወይከውኖ ፡ ምዝጋና ፡ እስከ ፡ ለዓለም ፤ ወአንትሙኒ ፡ በከመ ፡ ፈቀድክሙ ፡ ይኩን ፡ ላዕሌክሙ ፡ ኅሊና ፡ ሰብእ ፡ ወሥጋ ፡ ሰብእ ፡ ወባሕቱ ፡ ዑቁ ፡ ርእስክሙ ፡ ኢትትዐደዉ ፡ እምቃልየ ፡ ወኢትዕልዉ ፡ ትእዛዝየ ፡ ወኢታርኵሱ ፡ ርእስክሙ ፡ ኢበመብልዕ ፡ ወኢበመስቴ ፡ ወኢበዝሙት ፡ ወኢበዘኮነ ፡ ኢትዕድዉ ፡ እምቃልየ ፡ ወሶቤሃ ፡ ተውህቦሙ ፡ ምስለ ፡ ቃሉ ፡ ሥጋ ፡ ወደም ፡ ወልበ ፡ እጓለ ፡ እመሕያው ፡ ወተሠርሙ ፡ እመልዕልተ ፡ ሰማይ ፡ ወወረዲ ፡ ምድረ ፡ ኀበ ፡ እበደ ፡ ዘፍኖሙ ፡ ለደቂቀ ፡ ቀየን ፡ ምስለ ፡ ኵሉ ፡ ኪኖሙ ፡ ዘተኬነዉ ፡ በእበደ ፡ ዝሙቶሙ ፡ ወማሕሌቶሙ ፡ በከበሮ ፡ ወበመሰንቆ ፡ ወበዕንዚራ ፡ ወበረዓም ፡ ብዙኅ ፡ ምስለ ፡ ይባቤ ፡ ወማሕሌት ፤ ወአዋልዲሆሙኒ ፡ ህየ ፡ ሀለዋ ፡ ወይትዋነያ ፡ ዘእንበለ ፡ ኀፍረት ፡ እስመ ፡ ተምዕዛ ፡ ሎሙ ፡ ወአደማሆሙ ፡ ወሆካ ፡ ኅሊናሆሙ ፤ ወኢተዐገሱ ፡ አሐተ ፡ ሰዐተ ፡ አላ ፡ ነሥኡ ፡ ሎሙ ፡ ለርእሶሙ ፡ እምኔሆን ፡ ዘዘ ፡ ኀረዩ ፡ አንስትያ ፡ ወአበሱ ፡ ምስሌሆን ፤ እስመ ፡ እግዚኣብሔር ፡ ኢያዐርፍ ፡ ውስተ ፡ ልበ ፡ ዕቡያን ፡ ወሐማይያን ፡ አላ ፡ ያዐርፍ ፡ ውስተ ፡ ልበ ፡ ትሑታን ፡ ወየዋሃን ፡ ወበወንጌልሂ ፡ ነገረ ፡ እንዘ ፡ ይብል ፡ አሌሎሙ ፡ ለእለ ፡ ያጸድቁ ፡ ርእሶሙ ፡ ወይሜንኑ ፡ ቢጾሙ ፤ ወካዕበ ፡ ይቤ ፡ እስመ ፡ እግዚኣብሔር ፡ ያፈቅሮሙ ፡ ለትሑታን ፡ ወያኀስሮሙ ፡ ለእለ ፡ ያዐብዩ ፡ ርእሶሙ ፡ ወሶቤሃ ፡ ተምዕዖሙ ፡ እግዚኣብሔር ፡ ወአሰሮሙ ፡ ውስተ ፡ ረዓደ ፡ ሲኦል ፡ እስከ ፡ ዕለተ ፡ ፍዳ ፤ በከመ ፡ ይቤ ፡ ሐዋርያ ፡ ለመላእክቲሁ ፡ አቢሶሙ ፡ ጥቀ ፡ ኢመሐኮሙ ፡ አላ ፡ ውስተ ፡ ደይን ፡ አንበሮሙ ፡ ወተአስሩ ፡ ለዕለት ፡ ዐባይ ፤ ሞአ ፡ ቃለ ፡ እግዚኣብሔር ፡ ዘተኬነወ ፡ በልሕኵቱ ፡ አዳም ፡ ወተመውኡ ፡ እለ ፡ ሐመይዎ ፡ ወተሳለቁ ፡ ላዕሌሁ ፡ ለአዳም ፡ ወእለሰ ፡ ተስሕቱ ፡ ቦቶን ፡ መላእክት ፡ አዋልደ ፡ ቀየን ፡ ፀንሳ ፡ ወስእና ፡ ወሊደ ፡ ወሞታ ፡ ወእለ ፡ ውስተ ፡ ከርሦንሂ ፡ ቦእለ ፡ ሞቱ ፡ ወቦእለ ፡ ወፅኡ ፡ ሠጢቆሙ ፡ ከርሠ ፡ እሞሙ ፡ ወፅኡ ፡ እንተ ፡ ሕንብርቲሆን ፤ ወሶበ ፡ ልህቁ ፡ ወተሐፅኑ ፡ ኮኑ ፡ ረዐይተ ፡ እለ ፡ ኑኆሙ ፡ ይበጽሕ ፡ እስከ ፡ ደመናት ፡ ዘበእንቲአሆሙ ፡ ወበእንተ ፡ ኃጥኣን ፡ አነኀ ፡ መዐቶ ፡ ላዕሌሆሙ ፡ እግዚኣብሔር ፡ ወይቤ ፡ ኢይንበር ፡ መንፈስየ ፡ ላዕሌሆሙ ፡ ዘእንበለ ፡ ፻ወ፳ ፡ ዓመት ፤ ወአኅለቆሙ ፡ በማየ ፡ አይኅ ፡ ሎሙኒ ፡ ወለኵሎሙ ፡ ኃጥ ፡ ኣን ፡ እለ ፡ አልቦሙ ፡ አሚነ ፡ በቃለ ፡ እግዚኣብሔር ፤ ወእለሰ ፡ አምኑ ፡ በቃለ ፡ አበዊሆሙ ፡ ወገብሩ ፡ ፈቃዶ ፡ አልቦ ፡ ዘረከቦሙ ፡ እኩይ ፡ እምውእቱ ፡ አይኅ ፡ አላ ፡ አድኀኖሙ ፡ እንዘ ፡ ይብል ፡ ለእመ ፡ አመንከ ፡ ቃልየ ፡ ትክል ፡ ድኂነ ፡ እምአይኅ ፤ ወይቤ ፡ ኖሕ ፡ አመንኩ ፡ እግዚኦ ፡ ቃልከ ፡ ወአይድዐኒ ፡ በዘ ፡ እድኅን ፤ ወይቤሎ ፡ በዕፅ ፡ ትድኅን ፡ እማይ ፤ ወይቤ ፡ እፎ ፡ እግዚእየ ፤ ወይቤሎ ፡ ግበር ፡ ታቦተ ፡ ርብዕት ፡ ወጽርባ ፡ ወግበር ፡ ላቲ ፡ ፫ ፡ ውሣጥያተ ፡ ወባእ ፡ ውስቴታ ፡ ምስለ ፡ ኵሉ ፡ ቤትከ ፤ ወአምነ ፡ በቃለ ፡ እግዚኣብሔር ፡ ወገብረ ፡ ወድኅነ ፡ ወበእንተ ፡ ዝ ፡ ስምዑኒ ፡ እፈክር ፡ ለክሙ ፤ ሶበ ፡ አዘዘ ፡ እግዚኣብሔር ፡ እምወህቦ ፡ ክንፈ ፡ ከመ ፡ ንስር ፡ ወእምአዕደዎ ፡ ብሔረ ፡ ሕያዋን ፡ ምስለ ፡ ኵሉ ፡ ቤቱ ፡ እስከ ፡ ያቈርር ፡ መዐተ ፡ ላዕለ ፡ ኃጥኣን ፡ እለ ፡ ኢየአምኑ ፡ ቃለ ፡ እግዚኣብሔር ፡ ወቃለ ፡ አበዊሆሙ ፡ አው ፡ እምአዕረጎ ፡ እስከ ፡ አየር ፡ አው ፡ እምአዘዞ ፡ ለማየ ፡ አይኅ ፡ ከመ ፡ አረፍት ፡ ከመ ፡ ኢይቅረባ ፡ ለአሐቲ ፡ ደብር ፡ ኀበ ፡ ያነብሮ ፡ ለኖሕ ፡ ወለደቂቁ ፡ ወለእለ ፡ ፈቀደ ፡ አራዊተ ፡ ወእንስሳ ፡ ከመ ፡ ኢይድፍኖሙ ፤ ወባሕቱ ፡ ዘንተ ፡ አእምሩ ፡ ከመ ፡ ሠምረ ፡ እግዚኣብሔር ፡ በዕፅ ፡ ዘተቀደሰ ፡ ኮነ ፡ መድኀኒተ ፡ ፍጥረቱ ፡ እሉ ፡ ታቦት ፡ ወዕፀ ፡ መስቀል ፤ ይቤሎ ፡ ግበር ፡ በዘ ፡ ትድኅን ፡ ዛቲኬ ፡ ታቦት ፡ ዘቤተ ፡ ክርስቲያን ፡ ወሶበኒ ፡ ይቤሎ ፡ ግበር ፡ ርብዕተ ፡ ያርኢ ፡ ዝኒ ፡ ከመ ፡ በርባዔ ፡ ትእምርተ ፡ መስቀል ፤ ፬ ፡ መኣዝኒሃ ፡ ለታቦት ፡ ዝውእቱ ፡ አቅርንተ ፡ ምሥዋዕ ፤ በከመ ፡ አዘዞ ፡ ለሙሴ ፡ ይግበር ፡ ታቦተ ፡ እምዕፅ ፡ ዘኢይነቅዝ ፤ ወአነ ፡ እቄድሶ ፡ ለከ ፡ በይእቲ ፡ ግብረ ፡ እዴየ ፡ ሰማያዊት ፡ መንፈሳዊት ፡ ወአንተኒ ፡ ቀድስ ፡ ርእሰከ ፡ እምግምንና ፡ ወርኵስ ፡ ወዝሙት ፡ ወቂም ፡ ወሐሰት ፡ ምስለ ፡ እኁከ ፡ ወቤትከ ፡ ወንጹሕ ፡ በንጹሕ ፡ ሡዕ ፡ ሊተ ፡ ወአነ ፡ እትዌከፍ ፡ ለከ ፡ እምድኅረ ፡ ቀደስከ ፡ ርእሰከ ፡ ወቤትከ ፡ አዝዞሙ ፡ ለኵሉ ፡ ሕዝብ ፡ ይቀድሱ ፡ ርእሶሙ ፡ እስመ ፡ ቅድሳትየ ፡ በቅዱሳን ፤ ዘንተኬ ፡ ተኀሥሥ ፡ ታቦተ ፡ ኪዳንየ ፡ እንተ ፡ ፈጠርክዋ ፡ ለስብሐትየ ፡ ወለእመ ፡ መጻእክሙ ፡ በንጹሕ ፡ ልብ ፡ በፍቅር ፡ ወበሰላም ፡ ዘእንበለ ፡ ተቃጽቦ ፡ ወተሓምዮ ፡ ወአርታዕክሙ ፡ ልብክሙ ፡ ሊተ ፡ ወለቢጽክሙ ፡ እሰምዐክሙ ፡ ጸሎተክሙ ፡ ወኣፀምእ ፡ ስእለትክሙ ፡ በኵሉ ፡ ዘተጋነይክሙ ፡ ሊተ ፡ ወእመጽእ ፡ ወእሄሉ ፡ ምስሌክሙ ፡ ወኣንሶሱ ፡ ማእከሌክሙ ፡ ወአኀ ፡ ድር ፡ ውስተ ፡ አልባቢክሙ ፤ ወትከውኑኒ ፡ ሕዝብየ ፡ ወእከውነክሙ ፡ አምላክክሙ ፡ በጽድቅ ፨ ፨ ፨ ፨ ፨ ፨ ፨ ፨ ፨
=== chapter 101 ===
[፻፩ ፡ በእንተ ፡ ህላዌ ፡ ኵለሄ ።]
ወካዕበ ፡ ይቤሎ ፡ ግበር ፡ ላቲ ፡ ዐጸደ ፡ ቀዳሚ ፡ ዴዴ ፡ ከመ ፡ ኢይባእ ፡ ህየ ፡ ሥኡብ ፡ ወርኩስ ፡ ወዘኢኮነ ፡ ንጹሐ ፡ እስመ ፡ አነ ፡ እሄሉ ፡ ኀቤሃ ፡ ወአኮ ፡ ህየ ፡ ባሕቲታ ፡ አላ ፡ ኀበ ፡ ኵሉ ፡ አምሳሊሃ ፡ ኀበ ፡ ይጼዋዕ ፡ ስምየ ፡ በንጽሕ ፤ ሀሎኩ ፡ ምስለ ፡ ዳንኤል ፡ ውስተ ፡ ግብ ፡ ወሀሎኩ ፡ ምስለ ፡ ዮናስ ፡ ውስተ ፡ ከርሠ ፡ ዐንበሪ ፡ ወህሎኩ ፡ ምስለ ፡ ዮሴፍ ፡ ውስተ ፡ ግብ ፡ ወሀሎኩ ፡ ምስለ ፡ ኤርምያስ ፡ ውስተ ፡ ዐዘቅተ ፡ ዐምዐም ፤ ሀሎኩ ፡ አዐምድ ፡ ታሕተ ፡ መትሕተ ፡ ታሕቲት ፡ ከመ ፡ ኢይሰጠሙ ፡ አድባር ፡ መትሕተ ፡ ማያት ፡ ወሀሎኩ ፡ መትሕተ ፡ ማያት ፡ ከመ ፡ ኢይሰጠሙ ፡ ላዕለ ፡ እሳት ፡ ወተይ ፡ ሀሎኩ ፡ አዐምድ ፡ መትሕተ ፡ እሳት ፡ ወተይ ፡ ከመ ፡ ኢይሰጠሙ ፡ መልዕልተ ፡ ነፋሳት ፡ ወዛሕል ፡ ሀሎኩ ፡ መትሕተ ፡ ነፋሳት ፡ ወዛሕል ፡ ከመ ፡ ኢይሰጠሙ ፡ መትሕተ ፡ ጽልመት ፡ ወመትሕቴሃኒ ፡ ለጽልመት ፡ ወለቀላያት ፡ አነ ፡ አዐምድ ፡ ወኀቤየ ፡ ያሰምክ ፡ ኵሉ ፡ ፍጥረት ፡ ወኪያየ ፡ ይጸወን ፡ ኵሉ ፡ ዘፈጠርኩ ፤ ህሎኩ ፡ መልዕልተ ፡ ምድር ፡ ወሀሎኩ ፡ አጽናፈ ፡ ዓለም ፡ እሰፍን ፡ ኵሎ ፤ ሀሎኩ ፡ በአየር ፡ ማኅደርየ ፡ ወሀሎኩ ፡ መልዕልተ ፡ ሰረገላ ፡ ኪሩቤል ፡ እሴባሕ ፡ ወትረ ፡ እምኵሉ ፡ መላእክት ፡ ወሰ ፡ ብእ ፡ ቅዱሳን ፤ ወሀሎኩ ፡ መልዕልተ ፡ አርያም ፡ እመልእ ፡ ኵለሄ ፤ ሀሎኩ ፡ መልዕልተ ፡ ፯ ፡ ሰማያት ፡ እሬኢ ፡ ኵሎ ፡ ወእፈትን ፡ ኵሎ ፡ ወአልቦ ፡ ዘይሴወር ፡ እምኔየ ፤ አነ ፡ ህልው ፡ ውስተ ፡ ኵሉ ፡ መካን ፡ ወአልቦ ፡ ባዕደ ፡ አምላከ ፡ ዘእንበሌየ ፡ በሰማይ ፡ በላዕሉ ፡ ወበምድር ፡ በታሕቱ ፤ አልቦ ፡ ዘይመስል ፡ ኪያየ ፡ ይቤ ፡ እግዚኣብሔር ፤ እዴየ ፡ ሣረረታ ፡ ለምድር ፡ ወየማንየ ፡ አጽንዐታ ፡ ለሰማይ ፡ አነ ፡ ምስለ ፡ ወልድየ ፡ ወመንፈስ ፡ ቅዱስ ፨ ፨ ፨ ፨ ፨ ፨ ፨ ፨
=== chapter 102 ===
[፻፪ ፡ በእንተ ፡ ቀዳሚ ።]
በከመ ፡ ዳዊት ፡ ተነበየ ፡ በአፈ ፡ መንፈስ ፡ ቅዱስ ፡ እንዘ ፡ ይብል ፡ ምስሌከ ፡ ቀዳማዊ ፡ በዕለተ ፡ ኀይል ፤ ማእዜ ፡ ይእቲ ፡ ዕለተ ፡ ኀይል ፡ ብሂል ፤ አኮኑ ፡ አመ ፡ ፈጠረ ፡ ክርስቶስ ፡ ቃለ ፡ አብ ፡ ሰማየ ፡ ወምድረ ፤ እስመ ፡ ይቤ ፡ ሙሴ ፡ ውስተ ፡ ርእሰ ፡ መጽሐፉ ፡ በቀዳሚ ፡ ገብረ ፡ እግዚኣብሔር ፡ ሰማየ ፡ ወምድረ ፤ ለብዉኬ ፡ በቀዳሚ ፡ ብሂል ፡ በክርስቶስ ፡ ብሂል ፡ ቀዳሚ ፡ ትርጓሜሁ ፡ ክርስቶስ ፡ ይቤ ፡ ዮሐንስ ፡ ወልደ ፡ ዘብዴዎስ ፡ ሐዋርያ ፡ በእንተ ፡ ክርስቶስ ፡ ዝውእቱ ፡ ቀዳሚ ፡ ዘሰማዕነ ፡ ወዘርኢነ ፡ ወዘጠየቅነ ፡ ወዘገሰሳ ፡ እደዊነ ፡ ወንዜንወክሙ ፡ ከመ ፡ ኮነ ፡ ክፍልነ ፡ ምስሌሁ ፡ ወአንትሙኒ ፡ እለ ፡ አመንክሙ ፡ በቃልነ ፡ ትከውኑ ፡ ክፍለ ፡ ምስሌነ ። ወበከመ ፡ ይቤ ፡ ሉቃስ ፡ ረድእ ፡ በግብረ ፡ ሐዋርያት ፡ ቀዳሚሁ ፡ ለነገር ፡ ገበርነ ፡ በእንተ ፡ ኵሉ ፡ ወዘንተ ፡ ዘይቤ ፡ ክርስቶስ ፡ ኮነ ፡ ቤዛ ፡ ኵሉ ፡ ወንሕነኒ ፡ አመነ ፡ ቦቱ ፡ ወማርቆስ ፡ ወንጌላዊ ፡ ውስተ ፡ ርእሰ ፡ መጽሐፉ ፡ ጸሐፈ ፡ ወይቤ ፡ ቀዳሚሁ ፡ ለወንጌል ፡ ኢየሱስ ፡ ክርስቶስ ፡ ወልደ ፡ እግዚኣብሔር ፤ ወዝንቱኒ ፡ ብሂል ፡ ክርስቶስ ፡ ስብከትኒ ፡ ለነቢያት ፡ ወሐዋርያት ፡ ወኀበርነ ፡ በጸጋሁ ፡ ወካዕበ ፡ ዮሐንስ ፡ ወንጌላዊ ፡ ጸሐፈ ፡ እንዘ ፡ ይብል ፡ ቀዳሚሁ ፡ ቃል ፡ ውእቱ ፡ ወውእቱ ፡ ቃል ፡ ኀበ ፡ እግዚኣብሔር ፡ ውእቱ ፤ ወዳግመ ፡ አጠየቀ ፡ ቃሎ ፡ ወይ ፡ ቤ ፡ ወከማሁ ፡ ቀዳሚሁ ፡ እግዚኣብሔር ፡ ውእቱ ፡ ቃል ፤ ይእዜኒ ፡ ኬ ፡ ጠይቅ ፡ ከመ ፡ ውእቱ ፡ ቃለ ፡ አብ ፡ ክርስቶስ ፡ ውእቱ ፡ በዘ ፡ ቦቱ ፡ ገብረ ፡ ሰማየ ፡ ወምድረ ፡ ወኵሎ ፡ ፍጥረተ ፤ ውእቱ ፡ ፈጠረ ፡ ወዘእንበሌሁሰ ፡ አልቦ ፡ ዘኮነ ፡ ወኢምንተኒ ፤ ይቤ ፡ ወኮኑ ፡ ወውእቱ ፡ አዘዘ ፡ ወተፈጥሩ ፡ ወሣልስ ፡ ክብር ፡ ስማዕ ፡ ወበእስትንፋሰ ፡ አፉሁ ፡ ኵሉ ፡ ኀይሎሙ ፡ ዝኒ ፡ ያርኢ ፡ ለመንፈስ ፡ ቅዱስ ፡ ዘተብህለ ፡ ጥዩቀ ፡ ወምንተ ፡ ንብል ፤ ንብኪዮሙ ፡ አሌሆሙ ፡ ለአይሁድ ፡ ወለአረሚ ፡ እለ ፡ ዐውከኩ ፡ እምጽድቅ ፡ ወአበዩ ፡ ገኒየ ፡ ለፍቅረ ፡ እግዚኣብሔር ፡ እንተ ፡ አፍቀሮ ፡ ለሰብእ ፡ በኂሩቱ ፤ እስመ ፡ እምድኅረ ፡ ተገድፈ ፡ አዳም ፡ በዕልወቱ ፡ አድኀኖ ፡ በዕበየ ፡ ምሕረቱ ፡ ተሰቂሎ ፡ ዲበ ፡ ዕፀ ፡ መስቀል ፡ ወተቀኒዎ ፡ በቅንዋተ ፡ እደዊሁ ፤ ሰፊሖ ፡ እራሑ ፡ በትሕትና ፡ አጽኒኖ ፡ ርእሶ ፡ በእንቲአነ ፡ ሐመ ፡ ዘኢይደልዎ ፡ ሕማም ፡ በዕበየ ፡ መለኮቱ ፡ ዘለዓለም ፤ ሞተ ፡ ከመ ፡ ይስዐሮ ፡ ለሞት ፡ ደክመ ፡ ከመ ፡ ያጽንዖ ፡ ለድኩም ፡ መሬታዊ ፤ ጸሚኦ ፡ ሰሪቦ ፡ ብሒአ ፡ ተከሊሎ ፡ አክሊለ ፡ ሦክ ፡ ኢፈርሀ ፡ ወኢኀፈረ ፡ ኀሳረ ፡ ወጽዕለተ ፡ ወምራቀ ፡ ዘርኩሳን ፡ አይሁድ ፤ ተጸፍዐ ፡ ተኰርዐ ፡ ተረግዘ ፡ ተቀነወ ፡ ተፀርፈ ፡ ተጽዕለ ፡ እንዘ ፡ አምላክ ፡ ውእቱ ፡ ወመላኬ ፡ ሞት ፡ ወወሃቤ ፡ ክብር ፡ ወበእንተዝኬ ፡ ተዐገሰ ፡ ኵሎ ፡ ኀሳረ ፤ ድኩምሰ ፡ ወኅሱር ፡ ያሐዝኖ ፡ ሶበ ፡ መነንዎ ፡ ወጸዐልዎ ፡ ወለጽኑዕሰ ፡ ወለክቡር ፡ ምንተ ፡ ያሐዝኖ ፡ ለእመ ፡ ሐሰዉ ፡ ላዕሌሁ ፤ እስመ ፡ ለሊሁ ፡ ያአምር ፡ መለኮቶ ፡ ወያአምር ፡ ክብሮ ፡ ወያአምር ፡ ርእሶ ፤ ወሎቱሰ ፡ አልቦ ፡ ዘያአምሮ ፡ እስመ ፡ ገባሬ ፡ ኵሉ ፡ ውእቱ ፤ ወሶበሰ ፡ አእመሩ ፡ እመ ፡ ኢሰቀልዎ ፡ ለእግዚአ ፡ ስብሐት ፤ ወይቤ ፡ በምሕረቱ ፡ ስረይ ፡ ሎሙ ፡ አባ ፡ እስመ ፡ ዘኢያአምሩ ፡ ይገብሩ ፤ ፈጣሪሆሙ ፡ በፍጥረት ፡ ያመስሉ ፡ ወቀተሉ ፡ ፈላሴ ፡ ዘኢኮነ ፡ እምፍጥረተ ፡ መዋቲ ፡ ወኢኮነ ፡ እምዘ ፡ ተገብረ ፡ በእድ ፡ አላ ፡ ውእቱሰ ፡ ለሊሁ ፡ ገባሪ ፡ ወለሊሁ ፡ ፈጣሪ ፡ ብርሃን ፡ ዘእምብርሃን ፡ አምላክ ፡ ዘእምአምላክ ፡ ወልድ ፡ ዘእምአብ ፡ ኢየሱስ ፡ ክርስቶስ ፤ ለሊሁ ፡ ምስካይ ፡ ለሊሁ ፡ መሴስይ ፡ ለሊሁ ፡ መጋቢ ፡ ውእቱ ፡ ዘህገሩ ፡ ላዕለ ፡ ዘልዑል ፡ መልዕልተ ፡ ኵሉ ፡ ተትሕተ ። በከመ ፡ ይቤ ፡ ኢሳይያስ ፡ በሊኀ ፡ ቃል ፡ እምነቢያት ፡ ትሑት ፡ ብእሲሁ ፡ ወራእዩ ፡ ምኑን ፡ ከመ ፡ ሥርው ፡ በምድር ፡ ጽምእት ፡ ተሰዊሮ ፡ መጽአ ፡ በሥጋ ፡ ምድራዊት ፡ አኃዜ ፡ ኵሉ ፡ ወመድኀኔ ፡ ኵሉ ፡ ወዳዊትሰ ፡ ያስተሴንዮ ፡ እንዘ ፡ ይብል ፡ በስንከ ፡ ወበላሕይከ ፤ ወካዕበ ፡ ይቤ ፡ ይሤኒ ፡ ላሕዩ ፡ እምውሉደ ፡ እጓለ ፡ እመሕያው ፤ ወካዕበ ፡ ይቤ ፡ ተክዕወ ፡ ሞገስ ፡ እምከናፍሪከ ፤ ወካዕበ ፡ ይቤ ፡ አርትዕ ፡ ታሰራሕ ፡ ወንገሥ ፡ በእንተ ፡ ጽድቅ ፡ ወርትዕ ፡ ወየውሃት ፤ ወካዕበ ፡ ይቤ ፡ በእንተ ፡ አይሁድ ፡ ፀራ ፡ ለጽድቅ ፡ አሕፃከ ፡ ስሑል ፡ ኀያል ፡ ውስተ ፡ ልቦሙ ፡ ለጸላእተ ፡ ንጉሥ ፡ ውስተ ፡ ልቦሙሰ ፡ ይረትዕ ፡ ይርግዝዎሙ ፡ ይቤ ፡ ለእለ ፡ ኢይፈቅዲ ፡ ያንግሡኒ ፡ ያምጽእዎሙ ፡ ቅድሜየ ፡ ወይርግዝዎሙ ፡ ወካዕበ ፡ ይቤ ፡ ኢሳይያስ ፡ በእንተ ፡ አይሁድ ፡ ኀሠሥክዎሙ ፡ ወኢረከብክዎሙ ፡ ጸዋዕክዎሙ ፡ ወኢተሰጥዉኒ ፡ ኣፍቀርክዎሙ ፡ ወጸልኡኒ ፡ ወካዕበ ፡ ዳዊትኒ ፡ ይቤ ፡ ፈደዩኒ ፡ እኪተ ፡ ህየንተ ፡ ሠናይት ፡ ወጸልኡኒ ፡ ህየንተ ፡ ዘኣፍቀርክዎሙ ፡ ወካዕበ ፡ ይቤ ፡ ኢሳይያስ ፡ በአፉሆሙ ፡ ያፈቅሩኒ ፡ ወበልቦሙሰ ፡ ነዋኀ ፡ ይርሕቁ ፡ እምኔየ ፡ ወከንቶ ፡ ያመልኩኒ ። ወበከመ ፡ ይቤ ፡ ሙሴ ፡ እሙንቱ ፡ አምዕዑኒ ፡ በአማልክቲሆሙ ፡ ወአነ ፡ ኣቀንኦሙ ፡ በዘ ፡ ኢኮነ ፡ ሕዝበ ፡ እስመ ፡ ሕዝብ ፡ ህጉላነ ፡ ምክር ፡ እሙንቱ ፡ ወእለሰ ፡ ይብሉ ፡ አልብነ ፡ ሕገ ፡ ተውህቦሙ ፡ ሕግ ፡ እስመ ፡ ለኵሉ ፡ ወሃቤ ፡ ሕግ ፡ እግዚኣብሔር ፤ ወፈደዮሙ ፡ እግዚኣብሔር ፡ በከመ ፡ እከዮሙ ፡ ለአይሁድ ፡ ወገብረ ፡ ሎሙ ፡ እግዚኣብሔር ፡ በከመ ፡ የውሃቶሙ ፡ ለአሕዛብ ፤ እስመ ፡ መሓሪ ፡ ውእቱ ፡ ወመስተሣህል ፡ ለእለ ፡ ይጼውዕዎ ፡ ወይትመሐፀኑ ፡ ቦቱ ፡ ወያነጽሑ ፡ ርእሶሙ ፡ እምኵሉ ፡ ርኵስ ፡ በውስተ ፡ ቤተ ፡ ክርስቲያኑ ፡ ወበውስተ ፡ ታቦተ ፡ ሕጉ ፡ ለእግዚኣብሔር ፡ ወእለ ፡ ይበክዩ ፡ ወይኔስሑ ፡ ያፈቅሮሙ ፡ በከመ ፡ ይቤ ፡ እስጢፋኖስ ፡ እምነ ፡ ፸ ፡ አርድእት ፤ ወካዕበ ፡ በውስተ ፡ ፸ ፡ ፈድፋደ ፡ ፯ ፡ እምኔሆሙ ፡ እለ ፡ ተኀርዩ ፡ ለግብር ፡ ምስለ ፡ ፲ወ፪ ፡ ሐዋርያት ፡ ለግብረ ፡ መልእክት ፡ ምስለ ፡ ሲላስ ፡ ወበርናባስ ፡ ወማርቆስ ፡ ወሉቃስ ፡ ወጳውሎስ ፤ ወውእቱ ፡ እስጢፋኖስ ፡ ይቤሎሙ ፡ ለአይሁድ ፡ እንዘ ፡ ይቀውም ፡ ለስምዕ ፡ እንዘ ፡ ይቀትልዎ ፡ ይቤሎሙ ፡ ለአይሁድ ፡ እንዘ ፡ ያርእዮሙ ፡ እበዶሙ ፡ በእንተ ፡ ዘኢዐቀቡ ፡ ትእዛዘ ፡ እግዚኣብሔር ፡ ነሢአክሙ ፡ ኦሪተ ፡ በሥርዐተ ፡ መላእክት ፡ ኢዐቀብክሙ ፤ ወይቤ ፡ በግብር ፤ ሰሚዖሙ ፡ ዘንተ ፡ አብዲ ፡ ወሐቀዩ ፡ ስነኒሆሙ ፡ አፅምኡኒኬ ፡ በእንተ ፡ ዘይቤ ፡ ሥርዐተ ፡ መላእክት ፡ ኦሪተ ፡ ኢዐቀብክሙ ፡ አርአያሃ ፡ ወጽላሎታ ፡ ለእንተ ፡ በሰማይ ፡ እንተ ፡ በሰማይሰ ፡ ኢየሩሳሌም ፡ አግዓዚት ፡ ማኅደሩ ፡ ለልዑል ፡ እንተ ፡ ኢትትዐወቅ ፡ ኅብራ ፡ ወግብራ ፡ በልበ ፡ መዋቲ ፤ ወውስቴታ ፡ መንበሩ ፡ ለልዑል ፡ በእሳት ፡ ክሉል ፡ ወ፬ ፡ እንስሳ ፡ ይጸውሩ ፡ በውስተ ፡ መካኖሙ ፡ ዘውእቱ ፡ ሳድስ ፡ ሰማይ ፡ ወየዐርግ ፡ መንበር ፡ ለሳብዕ ፡ ሰማይ ፡ ማኅደረ ፡ አብ ፡ ወህየ ፡ ይነብር ፡ ዘሀሎ ፡ ምስለ ፡ አቡሁ ፡ ወመንፈሱ ፡ ቅዱስ ፡ ማሕየዌ ፡ ኵሉ ፤ ወአምሳለ ፡ መንበር ፡ ዘቅድስት ፡ ኢየሩሳሌም ፡ ዛቲ ፡ ይእቲ ፡ ታቦት ፡ ዘቤተ ፡ ክርስቲያን ፡ ወአምሳለ ፡ ኢየሩሳሌም ፡ እንተ ፡ በሰማያት ፡ ዛቲ ፡ ይእቲ ፡ ቤተ ፡ ክርስቲያን ፡ እንተ ፡ አሕዛብ ፨ ፨
=== chapter 103 ===
[፻፫ ፡ በእንተ ፡ አቅርንተ ፡ ምሥዋዕ ።]
ታቦትሰ ፡ አቅርንተ ፡ ምሥዋዕ ፡ ውእቱ ፡ ኀበ ፡ ይሠውዑ ፡ ቅዱሳን ፡ ካህናት ፡ ወዘያነብሩ ፡ ዲቤሁ ፡ ጠረጲዛ ፡ አምሳለ ፡ ኀበ ፡ ተቀብረ ፡ በውስተ ፡ ጎልጎታ ፡ መቃብር ፤ ወዘመልዕልተ ፡ ጠረጲዛ ፡ ጵርስፎራ ፡ አምሳለ ፡ አጵርጌ ፡ ዘውእቱ ፡ ሥጋሁ ፡ ለአማኑኤል ፡ አክራጦስ ፡ ንጹሕ ፡ ዘአልቦቱ ፡ ቱስሕተ ፡ እንተ ፡ ነሥአ ፡ መድኀኒነ ፡ እማርያም ፤ ዘይቤሎሙ ፡ ለሐዋርያቲሁ ፡ ቅዱሳን ፡ ብልዑ ፡ ሥጋየ ፡ ወዘሰ ፡ ኢበልዐ ፡ ሥጋየ ፡ አልቦ ፡ ክፍለ ፡ ምስሌየ ፡ ወአልቦ ፡ ሕይወተ ፡ ዘለዓለም ፡ ወዘሰ ፡ በልዐ ፡ ሥጋየ ፡ እመኒ ፡ ሞተ ፡ የሐዩ ፡ ለዓለም ፡ ወተሳተፈ ፡ ሥጋየ ፡ ወደምየ ፡ ወኮነ ፡ መዋርስትየ ፡ ወይብሎ ፡ ለአቡየ ፡ አንተ ፡ አቡነ ፡ ዘበሰማያት ፤ ወአብኒ ፡ ይሰጠዎ ፡ እንዘ ፡ ይብሎ ፡ ወልድየ ፡ አንተ ። ወአክሊል ፡ እንተ ፡ መልዕልተ ፡ ውእቱ ፡ ጵርስፎራ ፡ አምሳለ ፡ እብን ፡ እንተ ፡ ኀተምዋ ፡ አይሁድ ፡ ላዕለ ፡ መቃብር ፨ ፡ ወሶበ ፡ ይብል ፡ ካህን ፡ ፈኑ ፡ መንፈሰ ፡ ቅዱሰ ፡ ይትፌነው ፡ መንፈስ ፡ ቅዱስ ፡ ወይከውን ፡ ሥጋሁ ፡ ለእግዚእነ ፡ ፍጹመ ፡ ወሶበ ፡ ተመጠውነ ፡ ንከውን ፡ ሱቱፋነ ፡ ለሥጋ ፡ ወደም ፡ ለእግዚእነ ፡ ወመድኀኒነ ፡ ኢየሱስ ፡ ክርስቶስ ፡ ወልደ ፡ እግዚኣብሔር ፡ ሕያው ፡ ወመንፈስ ፡ ቅዱስ ፡ እ ፡ ምይእዜ ፡ ወእስከ ፡ ለዓለም ፨ ፡ ወንግሩኬ ፡ ለለ ፡ ፩፩ ፡ ከመ ፡ ኢይትመክሑ ፡ ላዕሌነ ፡ ዕዉራነ ፡ ልብ ፡ አይሁድ ፡ ፀርነ ፡ ወፀረ ፡ እግዚኣብሔር ፡ አምላክነ ፤ ወይብሉ ፡ ብዙኅ ፡ አማልክቲሆሙ ፡ ወይሰግዲ ፡ ለዕፀው ፡ ወይብሉ ፡ ተዘሚሮሙ ፡ ኀበ ፡ ነገረ ፡ ኢሳይያስ ፡ ነቢይ ፡ ለመንፈቁ ፡ ትሰግዲ ፡ ወበመንፈቁ ፡ ትጠብሱ ፡ ሥጋ ፡ ወትበልዑ ፤ ይብል ፡ ኢሳይያስ ፡ ከመዝ ፡ በእንተ ፡ እለ ፡ ይሰግዲ ፡ ለግልፎ ፡ ወለጣዖት ፤ ወይብሉ ፡ እሉ ፡ አማልክቲነ ፡ ወፈጠሩነ ፡ ይብልዎሙ ፡ ወይሰግዲ ፡ ሎሙ ፡ ከመ ፡ እግዚኣብሔር ፡ አምላኮሙ ፤ እሉኬ ፡ እለ ፡ ያስሕትዎሙ ፡ አጋንንት ፡ በእከዮሙ ፡ ወዳዊትኒ ፡ ይቤ ፡ በእንቲአሆሙ ፡ አማልክቲሆሙ ፡ ለአሕዛብ ፡ አጋንንት ፡ ወእግዚኣብሔርሰ ፡ ሰማያተ ፡ ገብረ ፡ አሚን ፡ ወሠናይት ፡ ቅድሜሁ ፨ ፨ ፨
=== chapter 104 ===
[፻፬ ፡ ካዕበ ፡ በእንተ ፡ ታቦት ፡ ወነገረ ፡ ዕልዋን ።]
ወበእንተ ፡ ታቦትሰ ፡ አድኀኖ ፡ ለኖኅ ፡ በታቦት ፤ ወተናገሮ ፡ ለአብርሃም ፡ በኀበ ፡ ዕፀ ፡ መንበር ፡ ዘውእቱ ፡ ዕፅ ፡ ዘኢይነቅዝ ፤ ወአድኀኖ ፡ ለይስሐቅ ፡ በዘ ፡ ተእኅዘ ፡ በዕፀ ፡ ሳቤቅ ፡ በግዕ ፤ ወአብዐሎ ፡ ለያዕቆብ ፡ በ፫ ፡ አብትረ ፡ ዕፀው ፡ እለ ፡ ወደየ ፡ ኰሳኵሰ ፡ ውስተ ፡ ማይ ፤ ወበከተማ ፡ በትሩ ፡ ለያዕቆብ ፡ ተባረከ ፡ ዮሴፍ ፤ ወለሙሴኒ ፡ ይቤሎ ፡ ግበር ፡ ታቦተ ፡ እምዕፅ ፡ ዘኢይነቅዝ ፡ በአምሳሊሃ ፡ ለጽዮን ፡ ታቦተ ፡ ኪዳን ፤ ወዳዊትኒ ፡ አመ ፡ ይነሥኣ ፡ እምሀገረ ፡ ሰማርያ ፡ አንበራ ፡ ለታቦተ ፡ ሕግ ፡ ውስተ ፡ ሐዲስ ፡ ታቦት ፡ ወተፈሥሐ ፡ በቅድሜሃ ፤ እስመ ፡ ረሰያ ፡ ለታቦት ፡ መድኀኒተ ፡ እምትካት ፡ ወተገብረ ፡ ባቲ ፡ በአርአያ ፡ ወአምሳል ፡ ብዙኅ ፡ ተኣምር ፡ ወመንክር ፨ ፡ ስመዑኒ ፡ ወጥዩቀ ፡ እከሥት ፡ ለክሙ ፡ በከመ ፡ ወሀበ ፡ እግዚኣብሔር ፡ መድኀኒተ ፡ በዕፀ ፡ መስቀሉ ፡ በውስተ ፡ ታቦተ ፡ ሕጉ ፡ እምቀዳሚ ፡ እስከ ፡ ደኃሪ ። በዕፅ ፡ ኮነ ፡ መድኀኒቱ ፡ ለአዳም ፡ እስመ ፡ በዕፅ ፡ ኮነ ፡ ቀዳሚ ፡ ስሕተቱ ፡ ለአዳም ፡ ወበዕፅ ፡ ረሰየ ፡ ሎቱ ፡ መድኀኒተ ፡ እምትካት ፤ እስመ ፡ ለሊሁ ፡ እግዚእ ፡ ፈጣሪ ፡ ወሃቤ ፡ ሕይወት ፡ ወሞት ፡ ወኵሉ ፡ ይትገበር ፡ በቃሉ ፡ ወለኵሉ ፡ ው ፡ እቱ ፡ ፈጠረ ፡ ወያጸድቆ ፡ ለዘ ፡ ይትቀነይ ፡ በንጹሕ ፡ በውስተ ፡ ታቦተ ፡ ሕጉ ፡ ንጽሕት ፤ እስመ ፡ ተሰምየት ፡ ምሥሃል ፡ ወካዕበ ፡ ተሰምየት ፡ ምምሕፃነ ፡ ተሰምየት ፡ ምሥዋዐ ፡ ወተሰምየት ፡ ምስትስራየ ፡ ኀጢአት ፡ ተሰምየት ፡ መድኀኒት ፡ ወተሰምየት ፡ አንቀጸ ፡ ሕይወት ፡ ተሰምየት ፡ ምክሐ ፡ ወተሰምየት ፡ ሀገረ ፡ ምስካይ ፡ ተሰምየት ፡ ሐመረ ፡ ወተሰምየት ፡ መርሶ ፡ መድኀኒት ፡ ተሰምየት ፡ ቤተ ፡ ጸሎት ፡ ወተሰምየት ፡ ምስትስራየ ፡ ኀጢአት ፡ ለዘ ፡ ሰአለ ፡ በንጹሕ ፡ በውስቴታ ፡ ከመ ፡ ይስአልዎ ፡ በንጹሕ ፡ ወኢያርኵሱ ፡ ሥጋሆሙ ፤ እስመ ፡ ንጹሐ ፡ ያፈቅር ፡ እግዚኣብሔር ፡ እስመ ፡ ውእቱ ፡ ማኅደር ፡ ለንጹሓን ፡ ለእለ ፡ ይበውኡ ፡ ውስተ ፡ ማኅደሩ ፡ ወይትአኀዙ ፡ በቅድስት ፡ ታቦት ፡ ወይጼልዩ ፡ ኀቤሁ ፡ በኵሉ ፡ ልቦሙ ፡ ወይሰምዖሙ ፡ ወያድኅኖሙ ፡ እምዕለተ ፡ ምንዳቤሆሙ ፡ ወይገብር ፡ ፈቃዶሙ ፤ እስመ ፡ አምሳለ ፡ መንበሩ ፡ አስተማሰላ ፡ ለቅድስት ፡ ታቦት ፡ ወቦእለ ፡ ታበውኡነ ፡ እንዘ ፡ ይትሜሰሉ ፡ ኪያነ ፡ ክርስቲያነ ፡ ወኢየኀድጎሙ ፡ ስሕተት ፡ በዘ ፡ አሥረፀ ፡ ሎሙ ፡ አቡሆሙ ፡ ዲያብሎስ ፡ ወይብል ፡ ከመዝ ፡ ርቱዕሰ ፡ ንስግድ ፡ በውስተ ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ ቀዳሚኒ ፡ ይእቲ ፡ ወይእዜኒ ፡ ዛቲ ፡ አምሳሊሃኒ ፡ ወፍሬሃኒ ፡ ወላዲተ ፡ መድኅን ፡ ማርያም ፡ ርቱዕ ፡ ንስግድ ፡ ላቲ ፤ እስመ ፡ ተባረከ ፡ በስመ ፡ ዚአሃ ፡ ታቦተ ፡ ሕጉ ፡ ለእግዚኣብሔር ፤ ወለሚካኤል ፡ ወለገብርኤል ፡ ርቱዕ ፡ ንስግድ ፨ ፡ ወአውሥኦሙ ፡ ሊቀ ፡ ጳጳሳት ፡ ጌርሎስ ፡ ወይቤሎሙ ፡ ወዘንተ ፡ ሶበ ፡ ይቤሎሙ ፡ ንሕነኒ ፡ ንብሎሙ ፡ ምንተ ፡ ይቤ ፡ እግዚእነ ፡ ኢየሱስ ፡ ክርስቶስ ፡ እንዘ ፡ ይሜህሮሙ ፡ ለእለ ፡ አምኑ ፡ ቦቱ ፤ መጽአ ፡ ፩ ፡ እምአፍአ ፡ ወይቤሎ ፡ ነዮሙ ፡ አቡከ ፡ ወእምከ ፡ አፍአ ፡ የኀሡከ ፤ አውሥአ ፡ መፍቀሬ ፡ ሰብእ ፡ ክርስቶስ ፡ ወሰፍሐ ፡ እዴሁ ፡ ኀበ ፡ እለ ፡ ይሜህሮሙ ፡ ወይቤ ፡ እንዘ ፡ ኢይፈልጥ ፡ ወኢይሌሊ ፡ ዕደ ፡ ወአንስተ ፡ ወይቤ ፡ ነዮሙ ፡ አቡየ ፡ ወእምየ ፡ ወአኀውየ ፡ ኵሉ ፡ ዘሰምዐ ፡ ቃልየ ፡ ወገብረ ፡ ፈቃደ ፡ አቡየ ፡ ውእቱ ፡ አቡየኒ ፡ ወእምየኒ ፡ ወእኅትየኒ ፡ ኦዕዉረ ፡ ልብ ፡ አይሁዳዊ ፡ ትሬኢኑ ፡ ምሕረቶ ፡ ወአፍቅሮቶ ፡ ሰብአ ፡ ሶበ ፡ ይብል ፡ ከመዝ ፤ ኢፈለጠ ፡ ወኢሌለየ ፡ አላ ፡ ይቤሎሙ ፡ አኀውየ ፡ እስመ ፡ ያፈቅሮሙ ፡ ለእለ ፡ ያፈቅርዎ ፡ ወየዐቅቡ ፡ ትእዛዞ ፡ ወዓዲ ፡ በእንቲአሁ ፡ መጠዉ ፡ ነፍሶሙ ፡ ለሞት ፡ እንዘ ፡ ያአምሩ ፡ ምረራ ፡ ለሞት ፡ ሰማዕት ፤ ወፈላሲ ፡ ያን ፡ እለ ፡ የዐቅቡ ፡ ትእዛዞ ፡ ለእግዚኣብሔር ፡ ወአፍቀርዎ ፡ በኵሉ ፡ ልቦሙ ፡ ወውእቱኒ ፡ ያፈቅሮሙ ፡ ወዘተሐንጸ ፡ መቃብሪሆሙ ፡ ዘውእቱ ፡ መርጡል ፡ ወዘተሐንጸ ፡ ቤተ ፡ ክርስቲያን ፡ በስሞሙ ፡ ወዘቀደሱ ፡ ጳጳሳት ፡ ታቦታተ ፡ በስሞሙ ፡ ኵሉ ፡ ቅዱስ ፡ በውስተ ፡ ቤተ ፡ መቅደሱ ፡ ለእግዚኣብሔር ፤ ወዘሰአለ ፡ ሰብእ ፡ በስሞሙ ፡ ይሰምዖ ፡ እግዚኣብሔር ፤ በንጹሕ ፡ ዘእንበለ ፡ ርስሐት ፡ ወጥልቀት ፡ በትሕትና ፡ ወየውሃት ፡ እለ ፡ ይጼልዩ ፡ ኀበ ፡ ዘተቀደሰ ፡ ታቦት ፡ እመሂ ፡ በስመ ፡ ሰማዕት ፡ ወእመሂ ፡ በስመ ፡ መላእክት ፡ ወእመሂ ፡ በስመ ፡ ጻድቃን ፡ ወእመሂ ፡ በስመ ፡ ደናግል ፡ ወእመሂ ፡ በስመ ፡ ቅዱሳት ፡ አንስት ፡ ሶበ ፡ ተቀደሰ ፡ ይወርድ ፡ መንፈስ ፡ ቅዱስ ፡ ላዕሌሆሙ ፡ ወይመይጦ ፡ ለዕፅ ፡ ይኩን ፡ መንፈሳዌ ፤ በከመ ፡ ሜጣ ፡ ለበትረ ፡ ሙሴ ፡ በቃሉ ፡ ወኮነት ፡ ዘነፍስ ፡ ወአፍርሀቶ ፡ ለሙሴ ፡ እግዚኦ ፤ ወበከመ ፡ ሰገደ ፡ ዮሴፍ ፡ ውስተ ፡ ከተማ ፡ በትሩ ፡ ለያዕቆብ ፡ እንዘ ፡ ሀሎ ፡ ቅድሜሁ ፡ ኢያጻምዎ ፡ አላ ፡ በተአምኖ ፡ አቡሁ ፡ ሰገደ ፡ ውስተ ፡ ከተማ ፡ በትሩ ፡ ወዝኒ ፡ ዘጸሐፈ ፡ ሙሴ ፡ ትንቢት ፡ ለደኃሪ ፡ መዋዕል ፡ ከመ ፡ ናእምር ፡ ከመ ፡ ይትቄደሱ ፡ ታቦታት ፡ በስመ ፡ ሰማዕት ፡ ወጻድቃን ፡ እስመ ፡ እንዘ ፡ ይሬእዮ ፡ ሰገደ ፡ ለከተማ ፡ በትሩ ፡ ወካዕበ ፡ እነግረከ ፡ ዘተጽሕፈ ፡ በእንተ ፡ ትዕቢቱ ፡ ለፈርዖን ፤ ሙሴ ፡ ገብረ ፡ በትሮ ፡ በከመ ፡ አዘዞ ፡ እግዚኣብሔር ፡ ረሰየ ፡ አርዌ ፡ ምድር ፡ ወአዘዞሙ ፡ ፈርዖን ፡ ለመሠርያን ፡ ከመ ፡ ይግበሩ ፡ ከማሁ ፡ አብትሪሆሙ ፡ ለሰብአ ፡ ሐራስ ፡ ወገብሩ ፡ አብትሪሆሙ ፡ ፫ ፡ አክይስተ ፡ እለ ፡ ይትሐወሳ ፡ በሥራይ ፡ በቅድመ ፡ ሙሴ ፡ ወአሮን ፡ ወበቅድመ ፡ ፈርዖን ፡ ወዐበይተ ፡ ግብጽ ፤ ወበልዐቶሙ ፡ በትረ ፡ ሙሴ ፡ ለአብትረ ፡ መሠርያን ፡ እስመ ፡ እሙንቱ ፡ ሕስዋነ ፡ ስም ፡ ለአርአያ ፡ ዐይነ ፡ ሰብእ ፡ በሥራይ ፡ ገብሩ ፤ ወዘሰ ፡ ኮነ ፡ በቃለ ፡ እግዚኣብሔር ፡ ይመውእ ፡ ኵሎ ፡ ሥራየ ፡ ዘተገብረ ፡ ወአልቦ ፡ ዘይረክቦ ፡ እኩይ ፤ እስመ ፡ ውእቱ ፡ መንፈስ ፡ ቅዱስ ፡ ዘይሜግቦ ፡ ወያሰፍኖ ፡ ለዘ ፡ ይትአመን ፡ በርቱዕ ፡ ልብ ፡ ዘእንበለ ፡ አስትቶ ፤ በከመ ፡ ይቤ ፡ ጳውሎስ ፡ በተአምኖ ፡ ድኅኑ ፡ አበው ፡ ቀደምት ፡ ፈቀደ ፡ ወአጠየቀ ፡ በበ ፡ ስሞሙ ፡ እምአዳም ፡ ወኖኅ ፡ ወአብርሃም ፡ ወእስከ ፡ ራአብ ፡ ዘማ ፡ እንተ ፡ ተወክፈቶሙ ፡ ለሰብአ ፡ ዐይን ፡ ወአንተኒ ፡ ኦዕዉር ፡ አይሁዳዊ ፡ ኢትሌቡኑ ፡ በውስተ ፡ ሕግ ፡ ዘታነብብ ፡ ዘውእቱ ፡ ዘትትአመን ፡ ኦሪትከ ፡ እንዘ ፡ ኢትክል ፡ አስልጦ ፡ ትእዛዛቲሃ ፡ ወርጉም ፡ አንተ ፡ ባቲ ፤ እስመ ፡ ይብል ፡ ኵሎሙ ፡ ለእለ ፡ የሐውሩ ፡ ባቲ ፡ ለእመ ፡ ኢዐቀቡ ፡ ዘጽሑፍ ፡ ውስቴታ ፡ ርጉመ ፡ ለይኩን ፡ ይብለከ ፤ ወለነሰ ፡ ለእለ ፡ አመነ ፡ በክርስቶስ ፡ ወልደ ፡ እግዚኣብሔር ፡ ኀረየነ ፡ ጸጋ ፡ እግዚኣብሔር ፡ እንዘ ፡ ይብል ፡ ዘአምነ ፡ ወተጠምቀ ፡ ይድኀን ፨ ፨ ፨ ፨ ፨ ፨
=== chapter 105 ===
[፻፭ ፡ በእንተ ፡ አሚነ ፡ አብርሃም ።]
ወአንተሰ ፡ ኢትሌቡ ፡ ከመ ፡ በአሚን ፡ ይጸድቁ ፡ ከመ ፡ አብርሃም ፡ ወዳዊት ፡ ወኵሎሙ ፡ ነቢያት ፡ በበ ፡ መትልው ፡ እለ ፡ ተነበዩ ፡ በእንተ ፡ ምጽአቱ ፡ ለወልደ ፡ እግዚኣብሔር ። ወይቤ ፡ አብርሃም ፡ በመዋዕልየኑ ፡ እግዚኦ ፡ ትፌኑ ፡ ቃልከ ፡ ዲበ ፡ ምድር ፤ ወይቤሎ ፡ እግዚኣብሔር ፡ አልቦ ፡ ኢበጽሐ ፡ ጊዜሁ ፡ አላ ፡ ኣርእየከ ፡ አምሳለ ፡ ምጽአቱ ፡ ወባሕቱ ፡ ዕዲ ፡ ዮርዳኖስ ፡ ወተጠመቅ ፡ እንዘ ፡ ተዐዲ ፡ ወብጻሕ ፡ ሀገረ ፡ ሳሌም ፡ ወትረክቦ ፡ ለመልከ ፡ ጼዴቅ ፡ ወአነ ፡ እኤዝዞ ፡ ያርኢከ ፡ ተኣምሪሁ ፡ ወአምሳሊሁ ፤ ወገብረ ፡ ከማሁ ፡ ወረከቦ ፡ ለመልከ ፡ ጼዴቅ ፡ ወወሀቦ ፡ ምሥጢረ ፡ ኅብስት ፡ ወወይን ፡ ውእቱ ፡ ዘተገብረ ፡ በፋሲካነ ፡ ለመድኀኒትነ ፡ በእግዚእነ ፡ ኢየሱስ ፡ ክርስቶስ ፡ ዝኬ ፡ ውእቱ ፡ ተምኔቱ ፡ ወትፍሥሕቱ ፡ ለአብርሃም ፡ ዐዊዶ ፡ ምሥዋዐ ፡ ዘገብረ ፡ መልከ ፡ ጼዴቅ ፡ ነሢኦ ፡ ጸበርተ ፡ ወበቀልተ ፡ በዕለተ ፡ ሰንበት ፤ በተአምኖኬ ፡ ከመ ፡ ተፈሥሐ ፡ ርኢ ፡ ወበተአምኖ ፡ ጸድቀ ፡ ርኢ ፤ ኦአይሁዳዊ ፡ ዕዉር ፡ እንዘ ፡ ብከ ፡ አዕይንተ ፡ ኢትሬኢ ፡ ወእንዘ ፡ ብከ ፡ እዝ ፡ ነ ፡ ኢትሰምዕ ፤ በከመ ፡ ይቤ ፡ በእንቲአክሙ ፡ ኢሳይያስ ፡ ነቢይ ፡ ዖሩ ፡ አዕይንቲሆሙ ፡ ወተጸለለ ፡ ልቦሙ ፡ ከመ ፡ ኢይለብዉ ፡ ወኢይሣህሎሙ ፨ ፨ ፨ ፨ ፨ ፨ ፨
=== chapter 106 ===
[፻፮ ፡ ትንቢት ፡ በእንተ ፡ ምጽአቱ ፡ ለክርስቶስ ።]
ወበእንተሰ ፡ ምጽአቱ ፡ ስማዕ ፡ ዘከመ ፡ ተነበዩ ፡ ፩፩ዘአዳም ፡ ለሰሚዖት ፡ በእንተ ፡ ምጽአቱ ፡ ተነበየ ፡ ኢሳይያስ ፡ ወይቤ ፡ ወልድ ፡ ተወልደ ፡ ለነ ፡ ሕፃን ፡ ተውህበ ፡ ለነ ፡ ስልጣን ፡ ጽሑፍ ፡ ዲበ ፡ መትከፍቱ ፡ ውእቱ ፡ አምላክ ፡ ጽኑዐ ፡ ምኵናን ፡ ንጉሥ ፡ ዐቢየ ፡ ምክር ፡ ስሙ ፤ ወትርጓሜሁ ፡ ዘንተ ፡ ይብል ፡ ገሃደ ፡ ወልደ ፡ እግዚኣብሔር ፡ ተወልደ ፡ ዘመንግሥቱ ፡ ጽሑፍ ፡ እምቅድመ ፡ ዓለም ፡ ወይጠብብ ፡ እምነ ፡ ኵሉ ፡ ይብለከ ፡ ወካዕበ ፡ ተነበየ ፡ ወይቤ ፡ ኢሳይያስ ፡ ናሁ ፡ ቊልዔየ ፡ ዘኀረይኩ ፡ ዘሠምረት ፡ ነፍስየ ፡ ዲቤሁ ፡ ወይትዌከሉ ፡ አሕሳብ ፡ ቦቱ ፤ ወካዕበ ፡ ዝኒ ፡ ያሌብወነ ፡ ከመ ፡ መንፈሰ ፡ እግዚኣብሔር ፡ ውእቱ ፡ ክርስቶስ ፡ ቃለ ፡ አብ ፡ ዘለብሰ ፡ ሥጋነ ፡ ወተወልደ ፡ ለነ ፡ ወአምኑ ፡ ቦቱ ፡ አሕዛበ ፡ ሮሜ ፡ ወኢትዮጵያ ፡ ወባዕድኒ ፡ ኵሉ ፡ አሕዛብ ፡ ወለእስራኤልሰ ፡ ሕዝብ ፡ ይብሎሙ ፡ ወካዕበ ፡ ተነበየ ፡ ወይቤ ፡ ብዙኃን ፡ ይተልዉከ ፡ ድኅሬከ ፡ እንዘ ፡ ቅኑታን ፡ ሐቌሆሙ ፡ ወእሱራን ፡ ድኅሪተ ፡ በሰናስል ፡ ወይጼልዩ ፡ ኀቤከ ፡ ወይሰግዲ ፡ ለከ ፡ እስመ ፡ እግዚኣብሔር ፡ አንተ ፡ ወኢያእመርናከ ፤ ወዘንተኒ ፡ በእንተ ፡ ሰማዕት ፡ ወእለ ፡ ይከውኑ ፡ ገዳማዊ ፡ ያን ፡ ወፈላስያን ፡ እለ ፡ እሱራን ፡ አልባቢሆሙ ፡ በትእዛዙ ፡ ወይጼልዩ ፡ ሎቱ ፡ እስመ ፡ ድልው ፡ ዐስቦሙ ፡ ለክልኤሆሙ ፡ ሰማዕት ፡ ወፈላስያን ፡ ብሂል ፤ ወኢያእመርናከሰ ፡ እስመ ፡ ተዐወርዎ ፡ እስራኤል ፡ ወሰቀልዎ ፡ ወአበዩ ፡ ሐዊረ ፡ በጽድቁ ። ወካዕበ ፡ ተነበየ ፡ ወይቤ ፡ እግዚኣብሔር ፡ ይመጽእ ፡ ወይትዌከሉ ፡ ወያአምሩ ፡ አሕዛብ ፡ ወዘንተኒ ፡ መጽአ ፡ ክርስቶስ ፡ ወአበይዎ ፡ አይሁድ ፡ ወአምኑ ፡ ቦቱ ፡ አሕዛብ ፡ ብሂል ። ወካዕበ ፡ ተነበየ ፡ ወይቤ ፡ ጽንዑ ፡ እደው ፡ ድኩማን ፡ ወብረከ ፡ ፅቡሳን ፡ ወተፈሥሑ ፡ ዕንቡዛነ ፡ ልብ ፡ እስመ ፡ እግዚኣብሔር ፡ መጽአ ፡ ዘይፈዲ ፡ ዕዳነ ፡ ወያድኅነነ ፡ ወይከሥት ፡ አዕይንተ ፡ ዕውራን ፡ ወያሰምዕ ፡ እዝነ ፡ ጽሙማን ፡ ወያረውጽ ፡ እግረ ፡ ሐንካሳን ፡ ወያነብብ ፡ ልሳነ ፡ በሃማን ፡ ይነቡ ፤ ወዘንተኒ ፡ ዘተብህለ ፡ እለ ፡ ተስሕቱ ፡ በሰጊድ ፡ ለጣዖት ፡ ወእለ ፡ ምዉታን ፡ በኀጢአት ፡ ወእለ ፡ ተጸለለ ፡ ልብክሙ ፡ ወኢታአምሩ ፡ ዘፈጠረክሙ ፤ ተፈሥሑ ፡ ዮም ፡ መጽአ ፡ ዘይፈዲ ፡ ኀጢአተ ፡ አዳም ፡ ረሲዮ ፡ ዕዳ ፡ ዚአሁ ፡ ተሰቂሎ ፡ ዘእንበለ ፡ ኀጢአት ፡ ቀተሎ ፡ ለሞት ፡ በሞቱ ፤ ወርእዩ ፡ ዕዉራን ፡ ወሖሩ ፡ ሐንካሳን ፡ ወሰምዑ ፡ ጽሙማን ፡ ወተናገሩ ፡ ርቱዐ ፡ በሃማን ፡ ወዓዲ ፡ ተንሥኡ ፡ ምዉታን ፡ ብሂል ፡ በከመ ፡ ተነበየ ፡ ዳዊት ፡ ነቢይ ፡ ወይቤ ፡ እግዚኣብሔርሰ ፡ ገሃደ ፡ ይመጽእ ፡ ወአምላክነሂ ፡ ኢያረምም ፡ በከመ ፡ ተነበየ ፡ ኤርምያስ ፡ ወይቤ ፡ ይወርድ ፡ እግዚኣብሔር ፡ ዲበ ፡ ምድር ፡ ወያንሶሱ ፡ ምስለ ፡ ሰብእ ፡ ከማነ ፡ በከመ ፡ ተነበየ ፡ ሕዝቅኤል ፡ ነቢይ ፡ ወይቤ ፡ እመጽእ ፡ አነ ፡ አምላኮሙ ፡ ወኣንሶሱ ፡ ማእከሎሙ ፡ ወያአምሩኒ ፡ ከመ ፡ አምላኮሙ ። ወበከመ ፡ ተነበየ ፡ ዳዊት ፡ ወይቤ ፡ ቡሩክ ፡ ዘይመጽእ ፡ በስመ ፡ እግዚኣብሔር ፡ ባረክናክሙ ፡ በስመ ፡ እግዚአብሔር ፡ በከመ ፡ ተነበየ ፡ እንባቆም ፡ ወይቤ ፡ እግዚኣብሔርሰ ፡ እምቴማን ፡ ይመጽእ ፡ ወቅዱስኒ ፡ እምደብረ ፡ ፋራን ፡ ወእምአህጉረ ፡ ይሁዳ ። በከመ ፡ ተነበየ ፡ ኤልያስ ፡ ነቢይ ፡ ወይቤ ፡ በሐዲስ ፡ ሥርዐት ፡ ይመጽእ ፡ እግዚአብሔር ፡ ኀቤነ ፡ በከመ ፡ ተነበየ ፡ ኢዩኤል ፡ ነቢይ ፡ ወይቤ ፡ አማኑኤል ፡ ሰማያዊ ፡ ይመጽእ ፡ ወያድኅን ፡ ተግባሮ ፡ ዘለሐኰ ፡ በእዴሁ ፡ እምእደ ፡ ዲያብሎስ ፡ ተዐጋሊ ፡ ወአጋንንቲሁ ፡ መስሕታን ፡ ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ያስተርኢ ፡ አምላከ ፡ አማልክት ፡ በጽዮን ፤ ወካዕበ ፡ ይቤ ፡ እምነ ፡ ጽዮን ፡ ይብል ፡ ሰብእ ፡ ወብእ ፡ ሲ ፡ ተወልደ ፡ በውስቴታ ፡ ወውእቱ ፡ ልዑል ፡ ሣረራ ፡ ወበከመ ፡ ተነበየ ፡ ሰሎሞን ፡ ወልዲ ፡ ወይቤ ፡ አማን ፡ ይሄሉ ፡ እግዚኣብሔር ፡ ምስለ ፡ ሰብእ ፡ ወያንሶሱ ፡ ዲበ ፡ ምድር ፡ ወበከመ ፡ ተነበየ ፡ አቡሁ ፡ ዳዊት ፡ ወይቤ ፡ ይወርድ ፡ ከመ ፡ ጠል ፡ ውስተ ፡ ፀምር ፡ ወከመ ፡ ነጠብጣብ ፡ ዘያንጠበጥብ ፡ ዲበ ፡ ምድር ፡ ወይሠርጽ ፡ ጽድቅ ፡ በመዋዕሊሁ ። ወበከመ ፡ ተነበየ ፡ ሰሎሞን ፡ ወልዲ ፡ ወይቤ ፡ ይትወለድ ፡ መድኅን ፡ እምጽዮን ፡ ወያአትት ፡ ኀጢአተ ፡ እምያዕቆብ ፡ ወበከመ ፡ ተነበየ ፡ ሆሴዕ ፡ ነቢይ ፡ ወይቤ ፡ እመጽእ ፡ ኀቤኪ ፡ ጽዮን ፡ ወኣንሶሱ ፡ ማእከሌኪ ፡ ኢየሩሳሌም ፡ ይቤ ፡ እግዚኣብሔር ፡ ቅዱሰ ፡ እስራኤል ፨ ፡ ወበከመ ፡ ተነበየ ፡ ሚኪያስ ፡ ነቢይ ፡ ወይቤ ፡ ያስተርኢ ፡ ቃለ ፡ እግዚኣብሔር ፡ በኢየሩሳሌም ፡ ወሕግ ፡ ይወፅእ ፡ እምጽዮን ፡ ወበከመ ፡ ተነበየ ፡ ሆሴዕ ፡ ነቢይ ፡ ወይቤ ፡ ያስተርኢ ፡ እግዚኣብሔር ፡ ዲበ ፡ ምድር ፡ ወየኀድር ፡ ምስለ ፡ ሰብእ ፡ ከማነ ፡ ወበከመ ፡ ተነበየ ፡ ኤርምያስ ፡ ነቢይ ፡ ወይቤ ፡ ይትፌኖ ፡ መድኅን ፡ እምጽዮን ፡ ወያአትት ፡ ኀጢአተ ፡ እምሕዝበ ፡ እስራኤል ፡ ወበከመ ፡ ተነበየ ፡ ሚኪያስ ፡ ነቢይ ፡ ወይ ፡ ቤ ፡ ይመጽእ ፡ እግዚኣብሔር ፡ እምሰማይ ፡ ወየኀድር ፡ ውስተ ፡ ጽርሑ ። በከመ ፡ ተነበየ ፡ ዘካርያስ ፡ ነቢይ ፡ ወይቤ ፡ ተፈሥሒ ፡ ወለተ ፡ ጽዮን ፡ ናሁ ፡ ሕያው ፡ አነ ፡ ወአኀድር ፡ ውስቴትኪ ፡ ይቤ ፡ እግዚአብሔር ፡ ቅዱሰ ፡ እስራኤል ። ወበከመ ፡ ተነበየ ፡ ሚኪያስ ፡ ነቢይ ፡ ወይቤ ፡ ናሁ ፡ እግዚአብሔር ፡ ይመጽእ ፡ ወያበርህ ፡ ለእለ ፡ ይፈርህዎ ፡ ወፀሐየ ፡ ጽድቅ ፡ ስሙ ። ወበከመ ፡ ተነበየ ፡ ሆሴዕ ፡ ነቢይ ፡ ወይቤ ፡ ይመጽእ ፡ እግዚኣብሔር ፡ ላዕሌኪ ፡ ኢየሩሳሌም ፡ ወያስተርኢ ፡ በውስቴትኪ ፡ ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ወየሐዩ ፡ ወይሁብዎ ፡ እምወርቀ ፡ ዐረብ ፡ ወዘልፈ ፡ ይጼልዩ ፡ በእንቲአሁ ፡ ወይከውን ፡ ምስማከ ፡ ለኵሉ ፡ ምድር ፡ ውስተ ፡ አርእስተ ፡ አድባር ፡ ወበከመ ፡ ተነበየ ፡ ኢዮብ ፡ ጻድቅ ፡ ወይቤ ፡ እግዚኣብሔር ፡ ያንሶሱ ፡ ዲበ ፡ ምድር ፡ ወየሐውር ፡ ዲበ ፡ ባሕር ፡ ከመ ፡ የብስ ፡ ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ አጽነነ ፡ ሰማያተ ፡ ወወረደ ። በከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ናሁ ፡ ድንግል ፡ ትፀንስ ፡ ወትወልድ ፡ ወልደ ፡ ወትሰምዮ ፡ ስሞ ፡ አማኑኤል ፡ ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ወለድኩከ ፡ እምከርሥ ፡ እምቅድመ ፡ ኮከበ ፡ ጽባሕ ፤ ወካዕበ ፡ ይቤ ፡ እግዚኣብሔር ፡ ይቤለኒ ፡ ወልድየ ፡ አንተ ፡ ወአነ ፡ ዮም ፡ ወለድኩከ ፡ ወበከመ ፡ ተነበየ ፡ ጌዴዎን ፡ ወይቤ ፡ ናሁ ፡ ይወርድ ፡ ከመ ፡ ጠል ፡ ውስተ ፡ ፀምር ፡ ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ እግዚኣብሔር ፡ ሐወጸ ፡ እምሰማይ ፡ ላዕለ ፡ እጓለ ፡ እመሕያው ፡ ወእምድልው ፡ ጽርሐ ፡ መቅደሱ ፡ በከመ ፡ ተነበየ ፡ ሙሴ ፡ ነቢይ ፡ ወይቤ ፡ ወይብሉ ፡ ኵሎሙ ፡ ውሉደ ፡ እግዚኣብሔር ፡ ጽኑዕ ፡ ውእቱ ፡ እስመ ፡ ይትቤቀል ፡ ደመ ፡ ደቂቁ ፡ ወበከመ ፡ ተነበየ ፡ ዳዊት ፡ ወይቤ ፡ ወበህየ ፡ ኣበቊል ፡ ቀርነ ፡ ለዳዊት ፡ ወኣስተዴሉ ፡ ማኅቶተ ፡ ለመሲሕየ ፡ ወኣለብሶሙ ፡ ኀፍረተ ፡ ለጸላእቱ ፡ ወቦቱ ፡ ይፈሪ ፡ ቅድሳትየ ፡ ወበከመ ፡ ይቤ ፡ ሆሴዕ ፡ ነቢይ ፡ ኢትፍራህ ፡ እስመ ፡ ኢትትኀፈር ፡ ወኢትደንግፅ ፡ በእንተ ፡ ዘሰባሕከ ፤ ወካዕበ ፡ ይቤ ፡ ስምዑኒ ፡ ስምዑኒ ፡ ሕዝብየ ፡ እስመ ፡ ፍትሕየ ፡ ርቱዕ ፡ እመጽእ ፡ ወአኀድር ፡ ምስሌክሙ ፡ ወይትዌከሉ ፡ አሕዛብ ፡ በብርሃንየ ፤ እስመ ፡ አሕዛብ ፡ ኮኑ ፡ ፍቁራኒሁ ፡ ለክርስቶስ ፡ ወበከመ ፡ ይቤ ፡ ዳዊት ፡ ነቢይ ፡ ሕዝብ ፡ ዘኢያአምር ፡ ተቀንየ ፡ ሊተ ፡ ውስተ ፡ ምስማዐ ፡ እዝን ፡ ተሰጥዉኒ ፤ ወለአይሁድ ፡ ሰ ፡ ይቤሎሙ ፡ ውሉደ ፡ ነኪር ፡ ሐሰዉኒ ፡ ውሉደ ፡ ነኪር ፡ በልዩ ፡ ወሐንከሱ ፡ በፍኖቶሙ ፡ ሕያው ፡ እግዚኣብሔር ፡ ወቡሩክ ፡ አምላኪየ ፤ ሕያው ፡ እግዚኣብሔር ፡ ሶበ ፡ ይብለከ ፡ በእንተ ፡ መለኮቱ ፡ ይነግር ፡ ወቡሩክ ፡ አምላኪየ ፡ ሶበ ፡ ይብለከ ፡ በእንተ ፡ እንተ ፡ ለብሰ ፡ ሥጋ ፡ ይነግር ፡ ወካዕበ ፡ ይቤ ፡ በእንተ ፡ እንተ ፡ ለብሰ ፡ ሥጋ ፡ በኢሳይያስ ፡ ነቢይ ፡ መኑ ፡ ዝንቱ ፡ መካሕ ፡ ዘይወፅእ ፡ እምኤዶም ፡ አዶናይ ፡ ዘወረደ ፡ እምሰማይ ፡ ወይለብስ ፡ ዘበሶር ፡ ግሩም ፤ መካሕ ፡ ሶበ ፡ ይብል ፡ ዘመዐዛሁ ፡ ሠናይ ፡ ወአዶናይ ፡ ብሂል ፡ ቃለ ፡ አብ ፡ ዘእምቅድመ ፡ ዓለም ፡ ወልደ ፡ እግዚኣብሔር ፡ ይለብስ ፡ ዘበሶር ፡ ግሩም ፡ ሶበ ፡ ይብል ፡ ሥጋሁ ፡ ለአዳም ፡ ገሃደ ፡ ያርኢ ። ወበከመ ፡ ተነበየ ፡ ዳዊት ፡ ነቢይ ፡ እንዘ ፡ ይብል ፡ በእንተ ፡ ሕዝበ ፡ ክርስቲያን ፡ በልዎሙ ፡ ለአሕዛብ ፡ ከመ ፡ እግዚኣብሔር ፡ ነግሠ ፡ ወአጽንዓ ፡ ለዓለም ፡ ከመ ፡ ኢታንቀልቅል ፤ ወካዕበ ፡ ተነበየ ፡ በእንተ ፡ ምጽአቱ ፡ ኀበ ፡ አሕዛብ ፡ ወይቤ ፡ እምቅድመ ፡ ገጹ ፡ ለእግዚአብሔር ፡ እስመ ፡ ይመጽእ ፡ ይመጽእ ፡ ወይኴንና ፡ ለምድር ፡ ወይኴንና ፡ ለዓለም ፡ በጽድቅ ፡ ወለአሕዛብኒ ፡ በርትዕ ፡ ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ እግዚኣብሔር ፡ ጸባኦት ፡ መከረ ፡ ይስዐር ፡ ጽዕለቶሙ ፡ ለአሕዛብ ፡ ወያኅስሮሙ ፡ ለክቡራን ፡ ዐበይተ ፡ ምድር ፤ ወዓዲ ፡ አትለወ ፡ ትንቢቶ ፡ ወይቤ ፡ ይመጽእ ፡ ወየሐንጽ ፡ ቤቶ ፡ ወያድኅን ፡ ሕዝቦ ፤ ወዓዲ ፡ ወሰከ ፡ ወይቤ ፡ ወውእተ ፡ አሚረ ፡ ይሠርጽ ፡ እምሥርወ ፡ እሴይ ፡ ዘተሠይመ ፡ መልአከ ፡ አሕዛብ ፡ ወይትዌከሉ ፡ ቦቱ ፡ አሕዛብ ፡ ወይከውን ፡ ክብረ ፡ ምዕራፊሁ ፡ ለዓለም ፡ ወበከመ ፡ ተነበየ ፡ ዳዊት ፡ ወይቤ ፡ ዘምሩ ፡ ለእግዚኣብሔር ፡ ዘየኀድር ፡ ውስተ ፡ ጽዮን ፡ ወንግርዎሙ ፡ ለአሕዛብ ፡ ምግባሮ ፡ ወበከመ ፡ ተነበየ ፡ ሰሎሞን ፡ ወልዲ ፡ ወይቤ ፡ በእንተ ፡ መድኀኒነ ፡ አማኑኤል ፡ ፀሐየ ፡ ጽድቅ ፡ እምቅድመ ፡ አውግር ፡ ወለደኒ ፡ ወእምቅድመ ፡ ይጠአጣእ ፡ ወይግበር ፡ በሓውርተ ፡ ወእምቅድመ ፡ ዓለም ፡ ሣረረኒ ፤ ዘእንበለ ፡ ምድረ ፡ ይግበር ፡ ወዘእንበለ ፡ ቀላ ፡ ያተ ፡ ይግበር ፡ ወዘእንበለ ፡ ይፃእ ፡ አንቅዕተ ፡ ማያት ፡ ወያስተርኢ ፡ ሥነ ፡ ጽገያት ፡ ወእምቅድመ ፡ ይንፋሕ ፡ ነፋሳተ ፡ አየር ፡ እግዚኣብሔር ፡ ፈጠራ ፡ ለምግባሩ ፡ ቅድመ ፡ ገጹ ፡ ወህሎኩ ፡ ኣስተዋድድ ፡ ምስለ ፡ አቡየ ። ወበከመ ፡ ተነበየ ፡ አቡሁ ፡ ዳዊት ፡ ወይቤ ፡ እምቅድመ ፡ ፀሐይ ፡ ህሎ ፡ ስሙ ፡ ወእምቅድመ ፡ ወርኅ ፡ ለትውልደ ፡ ትውልድ ፡ ወበከመ ፡ ተነበየ ፡ ሰሎሞን ፡ ወልዲ ፡ ወይቤ ፡ አመ ፡ ጽኑዐ ፡ ይገብር ፡ መልዕልተ ፡ ደመናት ፡ ወአመ ፡ ያነብር ፡ ምንባረ ፡ አረፋተ ፡ አጽናፈ ፡ ሰማያት ፡ ወአመ ፡ ያነብራ ፡ ለባሕር ፡ በዐቅማ ፡ ወእምቅድመ ፡ ይሣርር ፡ መንበሮ ፡ መልዕልተ ፡ ነፋሳት ፡ ወአመ ፡ ጽኑዐ ፡ ይገብር ፡ መሠረታተ ፡ ምድር ፡ ሀሎኩ ፡ ምስሌሁ ፡ ኣስተዋድድ ፡ አነ ፡ ውእቱ ፡ ለእንተ ፡ ይትፌሥሕ ፡ ወትረ ፡ እንተ ፡ ጸብሐት ፡ ወእትሐሠይ ፡ ምስሌሁ ፡ በኵሉ ፡ ጊዜ ፡ በቅድመ ፡ ገጹ ፡ ወበከመ ፡ ተነበየ ፡ ኢዮብ ፡ ነቢይ ፡ ወይቤ ፡ ዘውእቱ ፡ ገጸ ፡ አምላኪየ ፡ ምሥራቅ ፡ ወእምቅድመ ፡ ፀሐይ ፡ ብርሃኑ ፡ ወይትዌከሉ ፡ አሕዛብ ፡ በስሙ ። ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ኢትዝከሩ ፡ ዘትካት ፡ ወኢተኀልዩ ፡ ዘቀዲሙ ፡ ናሁ ፡ አነ ፡ እገብር ፡ ሐዲሰ ፡ ዘይእዜ ፡ ይሠርቅ ፡ ወከመ ፡ ታእምሩ ፡ እገብር ፡ ፍኖተ ፡ ውስተ ፡ በድው ፡ ወኣውሕዝ ፡ ማየ ፡ ውስተ ፡ ገዳም ፡ ወይድኅሩኒ ፡ አራዊተ ፡ ገዳም ፡ ወእጓለ ፡ አዕዋፍ ፡ ወሴሬኔሲ ፤ እስመ ፡ ወሀብኩ ፡ ማየ ፡ ውስተ ፡ በድው ፡ ወአውሐዝኩ ፡ ውስተ ፡ ገዳም ፡ ከመ ፡ ኣስትዮሙ ፡ ለሕዝብየ ፡ ወለኅሩያንየ ፡ እለ ፡ አጥረይኩ ፡ ከመ ፡ ይንግሩ ፡ ስብሐትየ ፡ ወይግበሩ ፡ ትእዛዝየ ፡ ወበከመ ፡ ተነበየ ፡ ሰሎሞን ፡ ወይቤ ፡ መኑ ፡ ዐርገ ፡ ውስተ ፡ ሰማይ ፡ ወወረደ ፡ ወመኑ ፡ አስተጋብአ ፡ ነፋሳተ ፡ ውስተ ፡ ሕፅኑ ፡ ወመኑ ፡ ዘዐቈረ ፡ ማያተ ፡ በልብሱ ፡ ወመኑ ፡ ሰፈረ ፡ ማየ ፡ ባሕር ፡ በሕፍኑ ፡ ወሰማየኒ ፡ በስዝሩ ፡ ወመኑ ፡ ስሙ ፡ ወመኑ ፡ ስመ ፡ ወልዲ ። ወበከመ ፡ ተነበየ ፡ ሚኪያስ ፡ ነቢይ ፡ ወይቤሎሙ ፡ ለአይሁድ ፡ ኢይሠምር ፡ ብክሙ ፡ ይቤ ፡ እግዚኣብሔር ፡ ዘኵሎ ፡ ይመልክ ፡ ወኢይሠምር ፡ ምሥዋዕተክሙ ፡ ወኢይትመጠው ፡ ቊርባነ ፡ እምእዴክሙ ፡ እስመ ፡ እምሥራቀ ፡ ፀሐይ ፡ እስከ ፡ ዐረብ ፡ ይሴባሕ ፡ ስምየ ፡ በውስተ ፡ ኵሉ ፡ አሕዛብ ፡ ወበኵሉ ፡ በሓውርት ፡ ይትቄረብ ፡ ዕጣን ፡ ለስምየ ፡ ዐቢይ ፡ በውስተ ፡ ኵሉ ፡ አሕዛብ ፡ ይቤ ፡ እግዚኣብሔር ፡ ዘኵሎ ፡ ይመልክ ፡ ወካዕበ ፡ ይቤ ፡ ሚኪያስ ፡ ነቢይ ፡ ሐዲስ ፡ ሥርዐት ፡ ያስተርኢ ፡ ደብረ ፡ እግዚኣብሔር ፡ ወድልውት ፡ ውስተ ፡ አርእስተ ፡ አድባር ፡ ወይትሌዐል ፡ መልዕልተ ፡ አውግር ፡ ወይብሉ ፡ ንዑ ፡ ንዕርግ ፡ ውስተ ፡ ደብረ ፡ እግዚኣብሔር ፤ ወየሐውሩ ፡ ኀቤሁ ፡ ብዙኃን ፡ አሕዛብ ፡ ወይብሉ ፡ ንዑ ፡ ንዕርግ ፡ ውስተ ፡ ደብረ ፡ እግዚኣብሔር ፡ ወይንግሩነ ፡ ፍኖቶ ፡ ወንሖር ፡ ባቲ ፡ ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ስምዐኒ ፡ ሕዝብየ ፡ ወእንግርከ ፡ እስራኤል ፡ ኣሰምዕ ፡ ለከ ፡ አምላክከሰ ፡ አምላክ ፡ አነ ፡ ውእቱ ፡ ወበከመ ፡ ተነበየ ፡ ሙሴ ፡ ነቢይ ፡ ወይቤ ፡ በእንተ ፡ ሥላሴ ፡ ስማዕ ፡ እስራኤል ፡ ፩ ፡ ውእቱ ፡ እግዚኣብሔር ፡ አምላክከ ፤ ወዘንተሰ ፡ ይትፌከር ፡ አብ ፡ ወወልድ ፡ ወመንፈስ ፡ ቅዱስ ፡ ፩ውእቱ ፡ አምላክ ፡ ዘአሐቲ ፡ መንግሥቶሙ ፡ ወአሐቲ ፡ ስልጣኖ ፡ ሙ ፡ ወአሐተ ፡ ይሰግዲ ፡ ሎሙ ፡ በሰማይ ፡ ወበምድር ፡ በባሕር ፡ ወበቀላያት ፤ ወሎቱ ፡ ስብሐት ፡ ለዓለመ ፡ ዓለም ፡ አሜን ፨ ፨ ፨ ፨ ፨ ፨ ፨ ፨ ፨ ፨
=== chapter 107 ===
[፻፯ ፡ በእንተ ፡ በአቱ ፡ ኢየሩሳሌም ፡ በስብሐት ።]
ወበእንተ ፡ በአቱ ፡ ኢየሩሳሌም ፡ በስብሐት ፡ ተነበዩ ፡ ነቢያት ፡ እንዘ ፡ ይብል ፡ ኢሳይያስ ፡ ነቢይ ፡ አብርሂ ፡ አብርሂ ፡ ኢየሩሳሌም ፡ በጽሐ ፡ ብርሃንኪ ፡ ወስብሐተ ፡ እግዚኣብሔር ፡ ሠረቀ ፡ ላዕሌኪ ፡ ወበከመ ፡ ተነበየ ፡ ዘካርያስ ፡ ነቢይ ፡ ወይቤ ፡ ተፈሥሒ ፡ ተፈሥሒ ፡ ወለተ ፡ ጽዮን ፡ ወየብቢ ፡ ኢየሩሳሌም ፡ በፍሥሓ ፡ ወበከመ ፡ ተነበየ ፡ ዳዊት ፡ ወይቤ ፡ እምአፈ ፡ ደቂቅ ፡ ወሕፃናት ፡ አስተዳሎከ ፡ ስብሐተ ፡ በእንተ ፡ ጸላኢ ፡ ከመ ፡ ትንሥቶ ፡ ለጸላኢ ፡ ወለገፋዒ ፡ ወበከመ ፡ ተነበየ ፡ ሰሎሞን ፡ ወይቤ ፡ ደቂቅከ ፡ ምሁራን ፡ በኀበ ፡ እግዚኣብሔር ፡ ወይትፌሥሑ ፡ አሕዛብ ፡ በውስቴትኪ ፡ ወበከመ ፡ ተነበየ ፡ ዳዊት ፡ አቡሁ ፡ ወይቤ ፡ ንፍኁ ፡ ቀርነ ፡ በጽዮን ፡ በዕለተ ፡ ሠርቅ ፡ በእምርት ፡ ዕለት ፡ በዓልነ ፡ እስመ ፡ ሥርዐቱ ፡ ለእስራኤል ፡ ውእቱ ፡ ወበከመ ፡ ተነበየ ፡ ዕዝራ ፡ ጸሓፊ ፡ ወይቤ ፡ ፃኡ ፡ ግበሩ ፡ በዓለ ፡ በትፍሥሕት ፡ ወበልዋ ፡ ለወለተ ፡ ጽዮን ፡ ተፈሥሒ ፡ ነዋ ፡ ንጉሥኪ ፡ በጽሐ ፡ ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ተፈሥሒ ፡ ኢየሩሳሌም ፡ ተፈሥሒ ፡ ነዋ ፡ ን ፡ ጉሥኪ ፡ በጽሐ ፡ እንዘ ፡ ይጼዐን ፡ ዲበ ፡ እድግት ፡ ዘዕሴቱ ፡ ምስሌሁ ፡ ወምግባሩ ፡ ቅድመ ፡ ገጹ ፡ ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ቡሩክ ፡ ዘይመጽእ ፡ በስመ ፡ እግዚኣብሔር ። ወበከመ ፡ ተነበየ ፡ ያዕቆብ ፡ ወልደ ፡ ይስሐቅ ፡ ወይቤ ፡ ይሁዳ ፡ ሰብሑከ ፡ አኀዊከ ፡ እደዊከ ፡ ላዕለ ፡ ዘባኖሙ ፡ ለጸላእትከ ፡ ወይሰግዲ ፡ ለከ ፡ ደቂቀ ፡ እምከ ፤ ወኢየሐጽጽ ፡ ምልክና ፡ እምይሁዳ ፡ ወምስፍና ፡ እምአባሉ ፡ እስከ ፡ አመ ፡ ይረክብ ፡ ዘጽኑሕ ፡ ሎቱ ፡ ወውእቱ ፡ ተስፋሆሙ ፡ ለአሕዛብ ። ወካዕበ ፡ ተነበየ ፡ ወይቤ ፡ ጸዐዳ ፡ ስነኒሁ ፡ ከመ ፡ ዘበረድ ፡ ወፍሡሓት ፡ አዕይንቲሁ ፡ ከመ ፡ ወይን ፡ ወየኀፅብ ፡ በወይን ፡ ልብሶ ፡ ወበደመ ፡ አስካል ፡ ሶንዶኖ ፡ ወካዕበ ፡ ተነበየ ፡ እንዘ ፡ ይብል ፡ ይሁዳ ፡ ወልደ ፡ አንበሳ ፡ ሰከብከ ፡ ወኖምከ ፡ አልቦ ፡ ዘያነቅሆ ፡ አላ ፡ ለሊሁ ፡ እስከ ፡ ይረክብ ፡ ዘነዐወ ፤ እምሕዛእትከ ፡ ዕርግ ፡ ወካዕበ ፡ ባረኮ ፡ ለይሁዳ ፡ ወልዲ ፡ ያዕቆብ ፡ ወይቤሎ ፡ ህሎ ፡ ንጉሥ ፡ ዘይወፅእ ፡ እምኔከ ፡ ዘየኀፅብ ፡ በወይን ፡ ልብሶ ፡ ወክቡር ፡ ምዕራፊሁ ፡ ለፍቁር ፤ ወፍቁር ፡ ብሂል ፡ ክርስቶስ ፡ ብሂል ፤ ወመሲሕ ፡ ብሂል ፡ ክርስቶስ ፡ ብሂል ፡ ወኢየሱስ ፡ ብሂል ፡ መድኀኔ ፡ ሕዝብ ፡ ብሂል ፤ ወነቢያትሰ ፡ ይሰምይዎ ፡ በሥውር ፡ ለክርስቶስ ፡ ወይብልዎ ፡ ፍቁር ፡ ወይቤ ፡ ኢሳይያስ ፡ ኀበ ፡ ዕርገቱ ፡ በትንቢት ፡ ውእተ ፡ አሚረ ፡ ይወርድ ፡ ፍቁር ፡ እምሰማይ ፡ ወየኀሪ ፡ ሎቱ ፡ ፲ወ፪ ፡ ሐዋርያት ፤ ወካዕበ ፡ ይቤ ፡ ርኢኩ ፡ ዕርገቶ ፡ ለፍቁር ፡ ወልድ ፡ እስከ ፡ ሳብዕ ፡ ሰማይ ፡ ወእንዘ ፡ ይትቄበልዎ ፡ መላእክት ፡ ወሊቃነ ፡ መላእክት ፡ እንዘ ፡ ይትሌዐል ፡ ፈድፋደ ፡ እምኔሆሙ ። ወዳዊትኒ ፡ ይቤ ፡ ወፍቁርሰ ፡ ከመ ፡ ወልድ ፡ ዘ፩ቀርኑ ፤ ወካዕበ ፡ ይቤ ፡ ወእምአቅርንት ፡ ዘ፩ቀርኑ ፡ ለብሕቱትየ ፤ ወካዕበ ፡ ይቤ ፡ ወይትሌዐል ፡ ቀርንየ ፡ ከመ ፡ ዘ፩ቀርኑ ፡ አቅርንትሰ ፡ ይተረጐም ፡ መንግሥታተ ፡ ዓለም ፡ ወዘይትበህልሂ ፡ ዘ፩ቀርኑ ፡ ለመንግሥቱ ፡ አልቦ ፡ ዘይትቃረኖ ፡ እስመ ፡ መላኬ ፡ ነገሥት ፡ ውእቱ ፡ ለዘ ፡ ፈቀደ ፡ ይስዕር ፡ ወለዘፈቀደ ፡ ይሠይም ፡ በከመ ፡ ይቤ ፡ ዳዊት ፡ ወእምክቡዳነ ፡ አቅርንት ፡ ዘእምኔሆሙ ፡ ኣስተፈሥሐከ ፤ ወዝንቱ ፡ ዘተብህለ ፡ እምክቡራን ፡ ነገሥት ፡ አንተ ፡ ትከብር ፡ ወትትፌሣሕ ፡ ብሂል ፡ ወበከመ ፡ ተነበየ ፡ እንባቆም ፡ እንዘ ፡ ይብል ፡ አቅርንት ፡ ውስተ ፡ እደዊሁ ፡ ወረሰየ ፡ ፍቁረ ፡ በጽንዐ ፡ ኀይሉ ፤ ወዘንተኒ ፡ ብሂል ፡ አኃዜ ፡ ስልጣነ ፡ ነገሥ ፡ ት ፡ በቅንዋት ፡ ተቀነወ ፡ እራኁ ፡ ዘሕይወተ ፡ ኵሉ ፡ ውስቴቶን ፡ እኁዝ ፡ ዘገብረ ፡ ክርስቶስ ፡ በጽንዐ ፡ ኀይሉ ፡ ፍቁር ፡ ብሂል ፨ ፨ ፨
=== chapter 108 ===
[፻፰ ፡ በእንተ ፡ እከየ ፡ ይሁዳ ፡ ዕልው ።]
ወበእንተ ፡ እከዩ ፡ ለይሁዳ ፡ ረሲዕ ፡ ተነበዩ ፡ ነቢያት ፡ ወይቤ ፡ ዳዊት ፡ በእንቲአሁ ፡ ለብእሲ ፡ ዐማፂ ፡ ይንዕዎ ፡ እኪት ፡ ለአማስኖ ፤ ወካዕበ ፡ ይቤ ፡ ወይገብእ ፡ ጻማሁ ፡ ዲበ ፡ ርእሱ ፡ ወትወርድ ፡ ዐመፃሁ ፡ ዲበ ፡ ድማሑ ። ወበከመ ፡ ተነበየ ፡ ሰሎሞን ፡ ወልዲ ፡ ወይቤ ፡ ብእሲ ፡ አብድ ፡ ወዐማፂ ፡ የሐውር ፡ ፍናዋተ ፡ ዘኢኮነ ፡ ርቱዓተ ፡ ወውእቱሰ ፡ ይቀጽብ ፡ በዐይን ፡ ወይዴምር ፡ በእግር ፡ ወይሁብ ፡ ትእምርተ ፡ በቅጽበተ ፡ አጻብዕ ፡ ወበአጽንኖ ፡ ከናፍር ፡ ወዕሉት ፡ ልቡ ፡ ትኄሊ ፡ እኪተ ፡ በኵሉ ፡ ጊዜ ፤ ዘከመዝ ፡ ብእሲ ፡ ያመጽእ ፡ ህከከ ፡ ወቀትለ ፡ ወክዒወ ፡ ደም ፡ በዐመፃ ፡ ወኢያመሥጥ ፡ እምደይን ፡ ወበከመ ፡ ተነበየ ፡ ዳዊት ፡ አቡሁ ፡ ወይቤ ፡ ነገረ ፡ ጌጋይ ፡ አውፅኡ ፡ ላዕሌየ ፤ ዘኖመሰ ፡ ኢይነቅህኑ ፡ እንጋ ፡ ብእሴ ፡ ሰላምየ ፡ ዘኪያሁ ፡ እትአመን ፡ ዘይሴሰይ ፡ እክልየ ፡ አንሥአ ፡ ሰኰናሁ ፡ ላዕሌየ ፡ ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ አሌሎቱ ፡ ለውእቱ ፡ ብእሲ ፡ ዐማፂ ፡ ዘያመጽእ ፡ ለመንሱት ፤ ወካዕበ ፡ ይቤ ፡ ያአትትዎ ፡ ለኃጥእ ፡ ከመ ፡ ኢይርአይ ፡ ስብሐተ ፡ እግዚኣብሔር ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ይነብብ ፡ ኃጥእ ፡ በዘ ፡ ያስሕት ፡ ርእሶ ፡ ወአልቦ ፡ ፍርሀተ ፡ እግዚኣብሔር ፡ ቅድመ ፡ አዕይንቲሁ ፡ ወበከመ ፡ ተነበየ ፡ ሰሎሞን ፡ ወልዲ ፡ ወይቤ ፡ ፀዋግ ፡ ብእሲ ፡ ሀከከ ፡ ያመጽእ ፡ ለህገር ፡ ወያመጽእ ፡ በእንቲአሁ ፡ ተሀጒሎተ ፡ ወዝብጠተ ፡ ወቅጥቃጤ ፡ ዘኢየሐዩ ፡ እስመ ፡ ይትፌሥሕ ፡ በኵሉ ፡ ዘይጸልእ ፡ እግዚኣብሔር ፡ ወበከመ ፡ ተነበየ ፡ ሙሴ ፡ ነቢይ ፡ ወይቤ ፡ ኢይፈቅድ ፡ እግዚኣብሔር ፡ ይስረይ ፡ ሎቱ ፡ ዘእንበለ ፡ ዘያፈደፍድ ፡ በቀለ ፡ ላዕሌሁ ፤ ወያነብር ፡ መቅሠፍተ ፡ ዲቤሁ ፡ ወይከውን ፡ ላዕሌሁ ፡ ዘጽሑፍ ፡ ውስተ ፡ ዝንቱ ፡ መጽሐፍ ፡ መርገም ፡ ወይደመሰስ ፡ ስሙ ፡ እምታሕተ ፡ ሰማይ ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ጥቡዕ ፡ ልቡ ፡ ለቀቲል ፤ አብደራ ፡ ለመርገም ፡ ወትምጽኦ ፡ አበያ ፡ ለበረከት ፡ ወትርሕቅ ፡ እምኔሁ ፡ ወበከመ ፡ ተነበየ ፡ ኤርምያስ ፡ ነቢይ ፡ በእንቲአሁ ፡ ወይቤ ፡ ብእሲ ፡ ፀዋግ ፡ ይትሀጐል ፡ በእንተ ፡ ፍቅረ ፡ ብሩር ፡ ወይሬኢ ፡ ጽልመተ ፡ በእንተ ፡ ጒሕሉቱ ፡ ወበከመ ፡ ተነበየ ፡ ኢዮብ ፡ ወይቤ ፡ በእንቲአሁ ፡ ይዘርዎ ፡ መሠንዮ ፡ ፈጣሪሁ ፡ ወይየብስ ፡ ሥረዊሁ ፡ በታሕቴሁ ፡ ወይትነገፍ ፡ ጽጌ ፡ በመልዕልቴሁ ፡ ወይጠፍእ ፡ እምድር ፡ ዝክሩ ፡ ወይርሕቅ ፡ ስሙ ፡ ነዋኀ ፤ ወያፈልስዎ ፡ ውስተ ፡ ጽልመት ፡ ከመ ፡ ኢይርአይ ፡ ብርሃነ ፡ ለብእሲ ፡ ዐማፂ ፡ ይጠፍእ ፡ ቤቱ ። ወበከመ ፡ ተነበየ ፡ ሆሴዕ ፡ ወይቤ ፡ በእንቲአሁ ፡ ስምዑኒ ፡ ደቂቀ ፡ እስራኤል ፡ እስመ ፡ አልቦ ፡ ጽድቀ ፡ ወአልቦ ፡ ምሕረተ ፡ ወአልቦ ፡ ፍርሀተ ፡ እግዚኣብሔር ፡ ውስተ ፡ ልቡ ፡ ዘእንበለ ፡ ሐሰት ፡ ወስርቅ ፡ ወቀትል ፡ ወዝሙት ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ሰይጣን ፡ ይቁም ፡ በየማኑ ፤ ወካዕበ ፡ ይቤ ፡ ወሢመቶሂ ፡ ይንሣእ ፡ ባዕድ ፡ ወሙሴኒ ፡ ረገመ ፡ በሕግ ፡ ወይቤ ፡ ርጉም ፡ ለይኩን ፡ ኵሉ ፡ ዘይነሣእ ፡ ሕልያነ ፡ ከመ ፡ ይቅትል ፡ ደመ ፡ ንጹሐ ፤ ወይበል ፡ ኵሉ ፡ ሕዝብ ፡ አሜን ፡ ወአሜን ። ወካዕበ ፡ ተነበየ ፡ እንባቆም ፡ ነቢይ ፡ እንዘ ፡ ይብል ፡ መኰንንኒ ፡ አለበወ ፡ በእንተዝ ፡ ዕልወተ ፡ ሕግ ፡ ወኢይወፅእ ፡ ፍትሐ ፡ ጽድቅ ፡ እስመ ፡ ኃጥእ ፡ ይትዔገሎ ፡ ለጻድቅ ፡ በእንተዝ ፡ ይወፅእ ፡ ፍትሕ ፡ ግፍቱእ ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ይሬኢ ፡ ኃጥእ ፡ ወይትመዐዕ ፡ ወየሐቂ ፡ ስነኒሁ ፡ ወይትመሰው ። ወበከመ ፡ ተነበየ ፡ ሰሎሞን ፡ ወልዲ ፡ ወይቤ ፡ ጽሉእ ፡ በኀበ ፡ እግዚኣብሔር ፡ መዳልወ ፡ ዐመፃ ፡ ወበከመ ፡ ተነበየ ፡ ኤርምያስ ፡ ነቢይ ፡ ወይቤ ፡ በእንተ ፡ ይሁዳ ፡ ድልው ፡ ሊተ ፡ ዐስብየ ፡ ፴ ፡ ብሩር ፨ ፨ ፨ ፨ ፨ ፨ ፨ ፨ ፨
=== chapter 109 ===
[፻፱ ፡ በእንተ ፡ ስቅለቱ ።]
ወካዕበ ፡ ተነበዩ ፡ ነቢያት ፡ በእንተ ፡ ስቅለቱ ፡ ለክርስቶስ ፡ ወበከመ ፡ ተነበየ ፡ ሙሴ ፡ ቊልዔሁ ፡ ለእግዚኣብሔር ፡ ወይቤ ፡ ትሬእዩ ፡ መድኀኒትክሙ ፡ ስቁለ ፡ ዲበ ፡ ዕፅ ፡ ወኢተአምኑ ፡ ቦቱ ። ወበከመ ፡ ተነበየ ፡ ዳዊት ፡ ወይቤ ፡ አኀዙኒ ፡ ከለባት ፡ ብዙኃን ፡ ወቀነዉኒ ፡ እደዊየ ፡ ወእገርየ ፡ ወኆለቁ ፡ ኵሎ ፡ አዕፅምትየ ፡ እሙንቱሰ ፡ ጠዪቆሙ ፡ ተዐወሩኒ ፡ ወተካፈሉ ፡ አልባስየ ፡ ለርእሶሙ ፡ ወተዓፀዉ ፡ ዲበ ፡ ዐራዝየ ። ወበከመ ፡ ተነበየ ፡ ኢሳይያስ ፡ ነቢይ ፡ በእንተ ፡ ትስብእቱ ፡ ወስቅለቱ ፡ ለክርስቶስ ፡ ወይቤ ፡ እግዚኦ ፡ መኑ ፡ የአምነነ ፡ ቃልነ ፡ ወለመኑ ፡ ተከሥተ ፡ መዝራዕተ ፡ እግዚኣብሔር ፤ ወነገርነ ፡ ከመ ፡ ሕፃን ፡ በቅድሜሁ ፡ ወከመ ፡ ሥርው ፡ በውስተ ፡ ምድር ፡ ጽምእት ፡ አልቦ ፡ ላሕየ ፡ ወአልቦ ፡ ራእየ ፡ ወራእዩሂ ፡ ምኑን ፡ ወትሑት ፡ እምኵሉ ፡ ሰብእ ፤ ብእሲሁ ፡ ቅሡፍ ፡ ውእቱ ፡ ወሕሙም ፡ እስመ ፡ ሜጠ ፡ ገጻ ፡ ወአስተሐቀርዎ ፡ ወኢተሓሰብዎ ፡ ወበከመ ፡ ተነበየ ፡ ሰሎሞን ፡ ወይቤ ፡ ንቅትሎ ፡ ለጻድቅ ፡ እስመ ፡ ክቡድ ፡ ለነ ፡ ይትቃወሞን ፡ ለምግባሪነ ፡ መዝለፌ ፡ ኮነነ ፡ ለኅሊናነ ፡ ወሰቆራረ ፡ ኮነ ፡ ሎቱ ፡ በኀጣውኢነ ፤ ወካዕበ ፡ ደገመ ፡ ወይቤ ፡ ወልድየ ፡ ኢያስሕቱከ ፡ ሰብእ ፡ ረሲዓን ፡ ለእመ ፡ ይቤሉከ ፡ ነዓ ፡ ምስሌነ ፡ ተሳተፍ ፡ ንድፍን ፡ ደመ ፡ ንጹሐ ፡ ወንንሣእ ፡ በርባሮ ፡ ወይኩነነ ፡ አሐደ ፡ ቊናመተ ፡ ለኵልነ ፤ አግሕሥ ፡ ርእሰከ ፡ እምአሠሮሙ ፡ እስመ ፡ አኮ ፡ በከ ፡ ዘይረብቡ ፡ ለአዕዋፍ ፡ መሥገርተ ። ወበከመ ፡ ተነበየ ፡ ዳዊት ፡ ወይቤ ፡ ወወደዩ ፡ ሐሞተ ፡ ውስተ ፡ መብልዕየ ፡ ወአስተዩኒ ፡ ብሒአ ፡ ለጽምእየ ። ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ውእቱ ፡ ነሥአ ፡ ደዌነ ፡ ወጾረ ፡ ሕማመነ ፡ ወበቊስለ ፡ ዚአሁ ፡ ሐየውነ ፤ ወርኢናሁ ፡ ሕሙመ ፡ ወቊሱለ ፡ በሕማም ፡ ወውእቱሰ ፡ ኢከሠተ ፡ አፉሁ ፡ በሕማሙ ፡ ወመጽአ ፡ ይጠባሕ ፡ ከመ ፡ በግዕ ፡ በቅድመ ፡ ዘይቀርጾ ፡ ከማሁ ፡ ኢከሠተ ፡ አፉሁ ፡ በሕማሙ ፡ እስከ ፡ ይነሥእዋ ፡ ለነፍሱ ፤ ወኢየአምርዋ ፡ ለልደቱ ፤ በኀጢአተ ፡ ሕዝብየ ፡ በጻሕኩ ፡ እስከ ፡ ለሞት ፡ ወበከመ ፡ ተነበየ ፡ ኤርምያስ ፡ ነቢይ ፡ ወይቤ ፡ ወነሣኡ ፡ ሤጦ ፡ ለክቡር ፡ ፴ ፡ ብሩረ ፡ ዘአክበርዎ ፡ እምደቂቀ ፡ እስራኤል ፡ ወይቤለኒ ፡ እግዚኣብሔር ፡ ደዮ ፡ ውስተ ፡ ሕንቅርት ፡ ወፍትኖ ፡ ለእመ ፡ ኮነ ፡ ንጹሐ ፡ ወወህብዎ ፡ ለገራህተ ፡ ለብሓዊ ፤ በከመ ፡ አዘዘኒ ፡ እግዚኣብሔር ፡ እንብብ ፡ ወበከመ ፡ ተነበየ ፡ ኢሳይያስ ፡ ነቢይ ፡ ወይቤ ፡ ኆለቊዎ ፡ ምስለ ፡ ኃጥኣን ፡ ወአግብእዎ ፡ ለሞት ፡ ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ በዝኁ ፡ እለ ፡ ይጸልኡኒ ፡ በዐመፃ ፡ ወፈደዩኒ ፡ እኪተ ፡ ህየንተ ፡ ሠናይት ፡ ወበከመ ፡ ተነበየ ፡ ዘካርያስ ፡ ነቢይ ፡ ወይቤ ፡ ወሀለዎሙ ፡ ይርአይዎ ፡ ለዘሰቀልዎ ፡ ወወግእዎ ፨ ፡ ወብዙኀ ፡ ዘእምተነግረ ፡ ወተዘመረ ፡ ትንቢተ ፡ ነቢያት ፡ በእንተ ፡ ምጽአቱ ፡ ወስቅለቱ ፡ ወሞቱ ፡ ወትንሣኤሁ ፡ ወዕርገቱ ፡ ወዳግም ፡ ምጽአቱ ፡ በስብሐት ፤ ወባሕቱ ፡ ኅዳጠ ፡ ዘከርነ ፡ ትንቢተ ፡ ነቢያት ፡ ለእለ ፡ ትሰምዑ ፡ ወተአምኑ ፡ ወትሌብዉ ፡ ንሕነ ፡ በበ፩፩ ፡ ዘከርነ ፤ በከመ ፡ ተብህለ ፡ በሐዋርያት ፡ በወንጌል ፡ መራሕከነ ፡ ወበነቢያት ፡ ናዘዝከነ ፤ እስመ ፡ ነገረ ፡ ነቢያት ፡ ያረትዕ ፡ ሃይማኖተ ፡ ኑፉቃን ፨
=== chapter 110 ===
[፻፲ ፡ በእንተ ፡ ትንሣኤሁ ።]
ወካዕበ ፡ በእንተ ፡ ትንሣኤሁ ፡ ተነበየ ፡ ዳዊት ፡ ወይቤ ፡ ይእዜ ፡ እትነሣእ ፡ ይቤ ፡ እግዚኣብሔር ፡ እሬሲ ፡ መድኀኒተ ፡ ወኣግህድ ፡ ቦቱ ፤ ወካዕበ ፡ ይቤ ፡ ተንሥእ ፡ እግዚኦ ፡ ወኰንና ፡ ለምድር ፡ እስመ ፡ አንተ ፡ ትወርስ ፡ በኵሉ ፡ አሕዛብ ፤ ወካዕበ ፡ ተነበየ ፡ ወይቤ ፡ ተንሥእ ፡ እግዚኦ ፡ ርድአነ ፡ ወአድኅነነ ፡ በእንተ ፡ ስምከ ፤ ወደገመ ፡ ወይቤ ፡ ይትነሣእ ፡ እግዚኣብሔር ፡ ወይዘረዉ ፡ ፀሩ ፡ ወይጒየዩ ፡ ጸላእቱ ፡ እምቅድመ ፡ ገጹ ፤ ወካዕበ ፡ ተነበየ ፡ ወይቤ ፡ ወተንሥአ ፡ እግዚአብሔር ፡ ከመ ፡ ዘንቃህ ፡ እምንዋም ፡ ወከመ ፡ ኀያል ፡ ወኅዳገ ፡ ወይን ። ወበከመ ፡ ተነበየ ፡ ኢሳይያስ ፡ ነቢይ ፡ ያእትት ፡ ሕማመ ፡ እምነፍሱ ፡ እስመ ፡ ኢገብረ ፡ ኀጢአተ ፡ ወኢተረክበ ፡ ሐሰት ፡ ውስተ ፡ አፉሁ ፤ ወያርእዮ ፡ ብርሃነ ፡ ወያጸድቆ ፡ ለዘ ፡ ይትቀነይ ፡ ለጽድቅ ፡ ወለሠናይ ፡ ወለብዙኃን ፡ ኀጢአቶሙ ፡ ውእቱ ፡ ይደመስስ ፤ እስመ ፡ ኢገብረ ፡ ኀጢአተ ፡ ወኢተረክበ ፡ ሐሰት ፡ ውስተ ፡ አፉሁ ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ እስመ ፡ ኢተኀድጋ ፡ ውስተ ፡ ሲኦል ፡ ለነፍስየ ። ወበከመ ፡ ተነበየ ፡ ሰሎሞን ፡ ወልዲ ፡ ወይቤ ፡ ወይትሌዐል ፡ ፀሐየ ፡ ጽድቅ ፡ ወይምነ ፡ የዐውድ ፡ ወይገብእ ፡ ውስተ ፡ መካኑ ፨ ፨ ፨
=== chapter 111 ===
[፻፲፩ ፡ በእንተ ፡ ዕርገቱ ፡ ወዳግም ፡ ምጽአቱ ።]
ወበከመ ፡ ተነበዩ ፡ ነቢያት ፡ ኵሎሙ ፡ ወአበው ፡ ቀደምት ፡ ብዙኀ ፡ በእንተ ፡ ዕርገቱ ፡ ወዳግም ፡ ምጽአቱ ፡ ይኰንን ፡ ሕያዋነ ፡ ወሙታነ ፡ ወዳዊትኒ ፡ ይቤ ፡ በእንተ ፡ ዕርገቱ ፡ ዐረገ ፡ ውስተ ፡ አርያም ፡ ፄዊወከ ፡ ፄዋ ፡ ወወህብከ ፡ ጸጋከ ፡ ለእጓለ ፡ እመሕያው ፤ ወካዕበ ፡ ይቤ ፡ እግዚአብሔር ፡ ወፂእየ ፡ እገብእ ፡ ወእትመየጥ ፡ እንተ ፡ ቀላየ ፡ ባሕር ፤ ወካዕበ ፡ ይቤ ፡ ዘምሩ ፡ ለእግዚኣብሔር ፡ ዘዐርገ ፡ ውስተ ፡ ሰማይ ፤ ሰማይ ፡ ዘመንገለ ፡ ጽባሕ ። ወበከመ ፡ ተነበየ ፡ አሞጽ ፡ ነቢይ ፡ ወይቤ ፡ መሲሕ ፡ ዘይገብር ፡ ጊዜ ፡ በጽሐ ፡ ወይትሌዐል ፡ እምድር ፡ ውስተ ፡ አርያም ፤ ወእግዚኣብሔር ፡ ስሙ ፡ ዘኵሎ ፡ ይመልክ ፡ ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ተለዐልከ ፡ እግዚኦ ፡ በኀይልከ ፡ ንሴብሕ ፡ ወንዜምር ፡ ለጽንዕከ ፡ ወበከመ ፡ ተነበየ ፡ ዘካርያስ ፡ ነቢይ ፡ ወይቤ ፡ ወይቀውማ ፡ እገሪሁ ፡ ውስተ ፡ ደብረ ፡ ዘይት ፡ ጽባሒሃ ፡ ለኢየሩሳሌም ፡ ወተጽዕነ ፡ ላዕለ ፡ ኪሩቤል ፡ ወሰረረ ፡ በክነፈ ፡ ነፋስ ፡ ወበከመ ፡ ይቤ ፡ ዳዊት ፡ አርኅዉ ፡ ኆኃተ ፡ መኳንንት ፡ ወይትረኀዋ ፡ ኆኃት ፡ እለ ፡ እምፍጥረት ፡ ወይባእ ፡ ንጉሠ ፡ ስብሐት ፤ መኑ ፡ ውእ ፡ ቱ ፡ ዝንቱ ፡ ንጉሠ ፡ ስብሐት ፤ እግዚኣብሔር ፡ ኀያል ፡ ወጽኑዕ ፡ እግዚአብሔር ፡ ኀያል ፡ በውስተ ፡ ፀብእ ፤ ወካዕበ ፡ አጠየቀ ፡ ወይቤ ፡ አርኅዉ ፡ ኆኃተ ፡ መኳንንት ፡ ወይትረኀዋ ፡ ኆኃት ፡ እለ ፡ እምፍጥረት ፡ ወይባእ ፡ ንጉሠ ፡ ስብሐት ፤ መኑ ፡ ውእቱ ፡ ዝንቱ ፡ ንጉሠ ፡ ስብሐት ፤ እግዚአብሔር ፡ አምላከ ፡ ኀያላን ፡ ውእቱ ፡ ዝንቱ ፡ ንጉሠ ፡ ስብሐት ። ወበእንተ ፡ ምጽአቱ ፡ ዳግመ ፡ ይኴንን ፡ ሕያዋነ ፡ ወሙታነ ፡ ዘሎቱ ፡ ስብሐት ፡ ለዓለመ ፡ ዓለም ፡ አሜን ፤ ወበከመ ፡ ተነበየ ፡ ዘካርያስ ፡ ነቢይ ፡ ውእተ ፡ አሚረ ፡ ይመጽእ ፡ እግዚኣብሔር ፡ አምላኪየ ፡ ወኵሎሙ ፡ ቅዱሳኒሁ ፡ ምስሌሁ ። ወበከመ ፡ ተነበየ ፡ ዳዊት ፡ ነቢይ ፡ ወይቤ ፡ ምዕረ ፡ ነበበ ፡ እግዚኣብሔር ፡ ወዘንተ ፡ ክመ ፡ ሰማዕኩ ፤ እስመ ፡ ዘእግዚኣብሔር ፡ ሣህል ፡ ወዚአከ ፡ እግዚኦ ፡ ኀይል ፡ እስመ ፡ አንተ ፡ ትፈድዮ ፡ ለኵሉ ፡ በከመ ፡ ምግባሩ ፡ ወበከመ ፡ ተነበየ ፡ ዳንኤል ፡ ነቢይ ፡ ወይቤ ፡ ርኢኩ ፡ በራእየ ፡ ሌሊት ፡ ወናሁ ፡ መጽአ ፡ ከመ ፡ ወልደ ፡ እጓለ ፡ እመሕያው ፡ ኀበ ፡ ብሉየ ፡ መዋዕል ፡ ወተውህበ ፡ ሎቱ ፡ ምኵናን ፡ ወክብር ፡ ወመንግሥት ፡ ወኵሎሙ ፡ አሕዛብ ፡ ወነገድ ፡ ወበሓውርት ፡ ተቀንዩ ፡ ሎቱ ፡ ወምኵናኑኒ ፡ ዘአልቦ ፡ ማኅለቅተ ፡ እስከ ፡ ለዓለመ ፡ ዓለም ፡ አሜን ፨ ፡ ወኵሎሙ ፡ ነቢያት ፡ ተነበዩ ፡ ወአልቦ ፡ ዘኮነ ፡ ዘእንበለ ፡ ትንቢተ ፡ ነቢያት ፡ ወኵሉ ፡ ነገሩ ፡ ዘኮነ ፡ ወዘይከውን ፡ ዘተገብረ ፡ ወዘይትገበር ፡ ዘቀዳሚ ፡ ወዘደኃሪ ፡ ወእስከ ፡ ዳግም ፡ ምጽአቱ ፤ ወአኮ ፡ በቃል ፡ ባሕቲቱ ፡ ዘተነበዩ ፡ ወዘተናገሩ ፡ አላ ፡ በሥጋሆሙኒ ፡ አርአዩ ፡ ዘምስለ ፡ ትንቢት ፡ ወኮነ ፡ ረኃብ ፡ ምድረ ፡ ኮናአን ፡ ወወረደ ፡ አቡነ ፡ አብርሃም ፡ ግብጸ ፡ ወገብአ ፡ ምስለ ፡ ብዙኅ ፡ ብዕል ፡ ወክብር ፡ ዘእንበለ ፡ ጥልቀት ፤ ወከማሁ ፡ ወረደ ፡ መድኀኒነ ፡ ወአድኀነ ፡ ቤተ ፡ ክርስቲያኑ ፡ ማኅበረ ፡ አሕዛብ ፡ ወዐርገ ፡ ነሢኦ ፡ ክብረ ፡ ወስብሐተ ፨ ፨ ፨ ፨ ፨ ፨
=== chapter 112 ===
[፻፲፪ ፡ በእንተ ፡ ዘአርአዩ ፡ ነቢያት ፡ በሥጋሆሙ ።]
ተአዘዘ ፡ ይስሐቅ ፡ ለአቡሁ ፡ ወይቤ ፡ ዕቅደኒ ፡ ወተሦዐ ፡ እንዘ ፡ ኢይመውት ፡ ተቤዘዎ ፡ በበግዕ ፡ ዘወረደ ፡ እምሰማያት ፤ ወከማሁ ፡ ወልደ ፡ እግዚኣብሔር ፡ ተአዛዜ ፡ ለአቡሁ ፡ ኮነ ፡ እስከ ፡ ለሞት ፡ ወተአስረ ፡ በፍቅረ ፡ ሰብእ ፡ ወተቀነወ ፡ ወተረግዘ ፡ ወኮነ ፡ ቤዛነ ፡ ወልደ ፡ እግዚአብሔር ፡ ወመለኮቱ ፡ ኢሐመ ፡ ወበከመ ፡ ያዕቆብ ፡ ወልዲ ፡ ፈለሰ ፡ ምድረ ፡ ላባ ፡ ሀገረ ፡ እኅወ ፡ እሙ ፡ ምስለ ፡ በትሩ ፡ ባሕቲታ ፡ ወበህየ ፡ ገብረ ፡ ብዙኀ ፡ እንስሳ ፡ ወአጥረየ ፡ ንጹሐ ፡ ወርኩሰ ፡ ወወለደ ፡ ፲ወ፪ደቂቀ ፡ ወከሠተ ፡ ጥምቀተ ፡ ወገብአ ፡ ውስተ ፡ ብሔሩ ፡ ኀበ ፡ ነሥአ ፡ በረከተ ፡ እምኀበ ፡ ይስሐቅ ፡ አቡሁ ፡ ወከማሁ ፡ እግዚእነ ፡ ክርስቶስ ፡ ወረደ ፡ እምሰማያት ፡ ባሕቲታ ፡ ቃለ ፡ መለኮት ፤ ወበትረ ፡ ያዕቆብሰ ፡ በዘ ፡ ይሬዒ ፡ አባግዒሁ ፡ ይእቲ ፡ እግዝእትነ ፡ ማርያም ፡ መድኀኒትነ ፤ ወካዕበ ፡ ትተረጐም ፡ ዕፀ ፡ መስቀል ፡ እንተ ፡ ባቲ ፡ ተሰቂሎ ፡ አድኀነ ፡ መርዔቶ ፡ ወአጥረየነ ፡ እለ ፡ እምአይሁድ ፡ ወአረሚ ፡ ወአሕዛብ ፤ ወኀረየ ፡ ሎቱ ፡ ፲ወ፪ ፡ ሐዋርያተ ፡ ወአእመኑ ፡ በኵሉ ፡ ምድር ፡ ወበሓውርት ፡ ወዐርገ ፡ ሰማያተ ፡ ኀበ ፡ አቡሁ ፡ ወበከመ ፡ ፈለ ፡ ሰ ፡ ሙሴ ፡ ብሔረ ፡ ምድያም ፡ ወበህየ ፡ ተናጊሮ ፡ ምስለ ፡ እግዚኣብሔር ፡ ወአእሚሮ ፡ ተምሂሮ ፡ አሚነ ፡ ዘበትንሣኤ ፡ ምዉታን ፡ ዘበአበዊሁ ፡ አብርሃም ፡ ይስሐቅ ፡ ወያዕቆብ ፡ ወበይእቲ ፡ በትሩ ፡ ተበዊሖ ፡ ከመ ፡ ይግበር ፡ ተኣምረ ፡ ወወለደ ፡ ፪ ፡ ደቂቀ ፡ ወዝኒ ፡ ያርኢ ፡ ገሃደ ፡ ከመ ፡ በሥላሴ ፡ ንድኅን ። በከመ ፡ ነበበ ፡ አፉሁ ፡ ለእግዚኣብሔር ፡ አነ ፡ አምላከ ፡ አብርሃም ፤ ዘንተ ፡ ዘአብ ፤ ወአምላከ ፡ ይስሐቅ ፤ ዘንተ ፡ ዘወልድ ፤ ወአምላከ ፡ ያዕቆብ ፤ ሶበ ፡ ይብል ፡ ዘንተ ፡ ዘመንፈስ ፡ ቅዱስ ፤ ያርኢ ፡ ገሃደ ፡ ሥላሴ ፡ ጥዩቀ ፤ ኢኮንኩ ፡ አምላከ ፡ ምዉታን ፡ አላ ፡ አምላከ ፡ ሕያዋን ፡ እስመ ፡ ኵሎሙ ፡ ሕያዋን ፡ በኀቤሁ ፡ ለእግዚኣብሔር ፡ ወበዝንቱኬ ፡ ተዐውቀ ፡ ትንሣኤ ፡ ምዉታን ፡ ዮናስ ፡ ተገንዘ ፡ ወተወድየ ፡ ውስተ ፡ ከርሠ ፡ ዐንበሪ ፤ ወወረደ ፡ መድኀኒነ ፡ ውስተ ፡ ልበ ፡ ምድር ፡ ወተንሥአ ፡ በሣልስት ፡ ዕለት ። ወዳንኤልኒ ፡ ተወድየ ፡ ውስተ ፡ ግበ ፡ አናብስት ፡ ወኀተምዋ ፡ በማኅተሞሙ ፡ ወተንሥአ ፡ ዘእንበለ ፡ ይብልዕዎ ፤ ወከማሁ ፡ እግዚእነሂ ፡ ተወድየ ፡ ውስተ ፡ መቃብር ፡ ወኀተምዎ ፡ አይሁድ ፡ በማኅተሞሙ ፡ እንዘ ፡ ይመስሎሙ ፡ ዘየኀትሙ ፡ ምሥራቀ ፡ ፀሐይ ፡ ከመ ፡ ኢይብራህ ፤ ኦ ፡ አብዳን ፡ ሕቡላን ፡ ፅሩፋን ፡ ዕውራን ፡ ዕንቡዛን ፡ ትብሉኑ ፡ ከመ ፡ ኢይምጻእ ፡ ወኢይጻእ ፡ መንፈሰ ፡ ሕይወት ፤ ወኀፍሩ ፡ አይሁድ ፡ ወወፅአ ፡ ከመ ፡ ያብርህ ፡ ለነ ፡ ለእለ ፡ አመነ ፡ ቦቱ ። ዮሴፍ ፡ ተሠይጠ ፡ በእደ ፡ አኀዊሁ ፡ ወእግዚእነ ፡ ተሠይጠ ፡ በእደ ፡ ይሁዳ ፤ ወበኀበ ፡ ተሠይጠ ፡ አድኀኖሙ ፡ ለአኀዊሁ ፡ እምረኃብ ፡ ወክርስቶስኒ ፡ አድኀነነ ፡ ለእለ ፡ አመነ ፡ ቦቱ ፡ ወረሰየነ ፡ መዋርስቲሁ ፡ ወአኀዊሁ ፤ ወበከመ ፡ ዮሴፍ ፡ ወህቦሙ ፡ ርስተ ፡ ለአዝማዲሁ ፡ በምድረ ፡ ጌሠም ፡ ከማሁ ፡ ይሁቦሙ ፡ ማኅደረ ፡ ለጻድቃኒሁ ፡ ምድረ ፡ ርስት ፡ ዘለዓለም ። ወካዕበ ፡ በእንተ ፡ ትንሣኤ ፡ ሙታን ፡ አነ ፡ እሁበከ ፡ ትእምርተ ፡ ከመ ፡ ታእምር ፡ ወትለቡ ፡ ወትጠይቅ ፡ በአምርሕተ ፡ ነገሩ ፡ ትሌቡ ፡ አብርሃም ፡ ሶበ ፡ ቦአ ፡ በምድረ ፡ ርስት ፡ አቅደመ ፡ ተሣይጦ ፡ መቃብር ፡ ኀበ ፡ ያስተጋብእ ፡ አብድንተ ፡ አዝማዲሁ ፡ ወውሉዲ ፡ ወብእሲቱ ፡ ከመ ፡ ይኅበር ፡ ተንሥኦ ፡ ምስሌሆሙ ፤ ወቀበርዋ ፡ ህየ ፡ ለሳራ ፡ ብእሲቱ ፡ ወካዕበ ፡ ለሊሁ ፡ ተቀብረ ፡ በህየ ፤ እስመ ፡ ነቢይ ፡ ውእቱ ፡ አእሚሮ ፡ ከመ ፡ ይትነሣእ ፡ ምስለ ፡ ዘመዲ ፤ ወካዕበ ፡ ተቀብሩ ፡ ይስሐቅ ፡ ምስለ ፡ ርብቃ ፡ ብእሲ ፡ ቱ ፡ ወእምዝ ፡ ወረደ ፡ ያዕቆብ ፡ ምድረ ፡ ግብጽ ፡ ምስለ ፡ ፸ ፡ ወ፯ ፡ ነፍስ ፡ በእንተ ፡ ረኃብ ፡ ወበእንተ ፡ ዮሴፍ ፡ ወልዲ ፡ እስከ ፡ በዝኀ ፡ ወኮነ ፡ ኆልቆሙ ፡ ፷፼ ፡ አጋር ፡ እለ ፡ ድልዋን ፡ ለፀብእ ፡ ዘእንበለ ፡ አንስት ፡ ወደቅ ፤ ወሞተ ፡ ያዕቆብ ፡ በህየ ፡ በሠናይ ፡ ርሥእ ፡ ወይቤሎ ፡ ለዮሴፍ ፡ ወልዲ ፡ አምሕሎ ፡ ኣምሕለከ ፡ በሕይወተ ፡ አበውየ ፡ ወአምላኪየ ፡ ሐዳሲሃ ፡ ለሕይወትየ ፡ ከመ ፡ ኢትቅብረኒ ፡ ውስተ ፡ ዛህገር ፡ ዘእንበለ ፡ ውስተ ፡ መቃብረ ፡ አበዊየ ፡ ከመ ፡ ይኩን ፡ ሞትየ ፡ ምስሌሆሙ ፡ ወሕይወትየ ፡ ዓዲ ፡ ምስሌሆሙ ፤ ዑቅኬ ፡ በዝ ፡ አያተ ፡ ነገር ፡ ወጾሮ ፡ ወልዲ ፡ ዮሴፍ ፡ ለእስራኤል ፡ ወቀበሮ ፡ ኀበ ፡ መቃብረ ፡ አበዊሁ ፡ እስመ ፡ ፈርሀ ፡ መሐላሁ ፡ ዘአምሐሎ ። ወካዕበ ፡ ሶበ ፡ ሐመ ፡ ዮሴፍ ፡ በግብጽ ፡ ጸውዖሙ ፡ ለአኀዊሁ ፡ ወለደቂቁ ፡ ወአምሐሎሙ ፡ ከመ ፡ ኢይኅድጉ ፡ አዕፅምቲሁ ፡ ውስተ ፡ ምድረ ፡ ግብጽ ፤ አላ ፡ ከመ ፡ ሶበ ፡ ሐወጸክሙ ፡ እግዚኣብሔር ፡ ንሥኡ ፡ ምስሌክሙ ፡ ወደምሩ ፡ አዕፅምትየ ፡ ውስተ ፡ መቃብረ ፡ አበዊየ ፨ ፨ ፨ ፨ ፨ ፨
=== chapter 113 ===
[፻፲፫ ፡ በእንተ ፡ ሰረገላ ፡ ወመግረሬ ፡ ፀር ።]
አውሥኡ ፡ ወይቤልዎ ፡ ሊቃነ ፡ ጳጳሳት ፡ ለጎርጎርዮስ ፡ ገባሬ ፡ መንክር ፡ ናሁኬ ፡ ጠየቅነ ፡ ወአለበውከነ ፡ ከመ ፡ ከብሩ ፡ ወዐብዩ ፡ ነገሥተ ፡ ኢትዮጵያ ፡ በእንተ ፡ ጽዮን ፤ ወካዕበ ፡ ዐብዩ ፡ ነገሥተ ፡ ሮም ፡ በእንተ ፡ ቅንዋት ፡ ዘገብረት ፡ ልጓመ ፡ እሌኒ ፡ ወኮኖ ፡ መግረሬ ፡ ፀር ፡ ለንጉሠ ፡ ሮም ፡ ወለንጉሠ ፡ ኢትዮጵያ ፡ ኮኖ ፡ ሰረገላ ፡ ወውእቱኒ ፡ ሞአ ፡ ፀሮ ፤ ወካዕበ ፡ ንግረነ ፡ እስከ ፡ ማእዜኑ ፡ ይነብር ፡ መግረሬ ፡ ፀር ፡ ኀበ ፡ ንጉሠ ፡ ሮም ፡ ወሰረገላ ፡ ምስለ ፡ ጽዮን ፡ ኀበ ፡ ንጉሠ ፡ ኢትዮጵያ ፤ ንግረነ ፡ እስመ ፡ ከሠተ ፡ ለከ ፡ እግዚኣብሔር ፡ ዘኮነ ፡ ወዘይከውን ፡ ራእየ ፡ ወትንቢተ ፡ ከመ ፡ ሙሴ ፡ ወኤልያስ ። አውሥአ ፡ ወይቤሎሙ ፡ አነ ፡ እከሥት ፡ ለክሙ ፡ ለንጉሠ ፡ ሮም ፡ ሶበ ፡ ተዐደወ ፡ ወአምዐዖ ፡ ለእግዚኣብሔር ፡ ባውስተ ፡ ሃይማኖት ፡ ዛቲ ፡ እንተ ፡ ሠራዕነ ፡ ሃይማኖተ ፡ ሀሎ ፡ ይትዐደዋ ፡ ዘይመጽእ ፡ ንጉሥ ፡ በሮሜ ፡ ወየኀብር ፡ ምስሌሁ ፡ ፩ ፡ ሊቀ ፡ ጳጵሳት ፡ ወይዌልጥዋ ፡ ወይገፈትእዋ ፡ ለነገረ ፡ ፲ወ፪ ፡ ሐዋርያት ፡ ወያፈልስዎ ፡ ውስተ ፡ ፍትወተ ፡ ልቦሙ ፡ ወይሜህሩ ፡ በፈቃዶሙ ፡ ወይመይጥዎ ፡ ለመጽሐፍ ፡ ውስ ፡ ተ ፡ ግዕዞሙ ፤ በከመ ፡ ይቤ ፡ ሐዋርያ ፡ በዘ ፡ ለሊሆሙ ፡ አትከሉ ፡ ርእሶሙ ፡ ከመ ፡ ሰዶም ፡ ወገሞራ ፤ ወእግዚእነሂ ፡ ይቤሎሙ ፡ በወንጌል ፡ ለአርዳኢሁ ፡ ተዐቅቡ ፡ እምእለ ፡ ይመጽኡ ፡ ኀቤክሙ ፡ በአልባሰ ፡ አባግዕ ፡ ወእንተ ፡ ውስጦሙሰ ፡ ተኵላት ፡ ወመሠጥ ። ወሶበ ፡ አዕለውዋ ፡ ለሃይማኖት ፡ ትትሀየድ ፡ እምኔሆሙ ፡ መግረሬ ፡ ፀር ፡ ወመንበረ ፡ ጴጥሮስኒ ፡ አልቦ ፡ ዘይነብር ፡ ዲቤሃ ፡ እለ ፡ ወለጡ ፡ ሃይማኖትነ ፤ እስመ ፡ ይትዐረቅ ፡ አማዑቲሆሙ ፡ ለሊቃነ ፡ ጳጳሳቲሆሙ ፡ ለእመ ፡ ነበሩ ፡ በሕሡም ፡ ሃይማኖት ፡ ዲቤሃ ፤ እስመ ፡ ይትኤዝዝ ፡ መልአከ ፡ እግዚኣብሔር ፡ ዘየዐቅባ ፡ ለመንበረ ፡ ጴጥሮስ ፡ በሮሜ ፡ ወመግረሬ ፡ ፀርኒ ፡ የሀይዳ ፡ እግዚኣብሔር ፡ እምኔሁ ፡ ለንጉሥ ፡ ዘኢየዐቅብ ፡ ሃይማኖተ ፡ ይፀብእዎ ፡ ፋርስ ፡ ወስሙ ፡ ይመስለኒ ፡ መርቅያኖስ ፡ ዕልወ ፡ ሃይማኖት ፤ ወይከብቶ ፡ ንጉሠ ፡ ፋርስ ፡ ዘስሙ ፡ ሃሬኔዎስ ፡ ወይነሥኦ ፡ ምስለ ፡ ፈረሱ ፡ ንጉሥ ፤ ወበፈቃደ ፡ እግዚኣብሔር ፡ ይትሀወክ ፡ ፈረስ ፡ ዘቦቱ ፡ መግረሬ ፡ ፀር ፡ ወይበውእ ፡ ውስተ ፡ ባሕር ፡ ወየኀልቅ ፡ በህየ ፤ ወቅንዋትሰ ፡ ታበርህ ፡ ህየ ፡ በውስተ ፡ ባሕር ፡ እስከ ፡ ይመጽእ ፡ ክርስቶስ ፡ ዳግመ ፡ በዐቢይ ፡ ስብሐት ፡ በደመና ፡ ሰማይ ፡ ምስለ ፡ ኀይል ፡ ዘንተኬ ፡ አርአየኒ ፡ እግዚኣብሔር ፡ በውስተ ፡ ግብ ፤ ወበእንተ ፡ ንጉሠ ፡ ኢትዮጵያ ፡ ወጽዮን ፡ መርዓተ ፡ ሰማይ ፡ ወሰረገላ ፡ በዘ ፡ ይረውጹ ፡ አነ ፡ እነግረክሙ ፡ ዘከሠተ ፡ ሊተ ፡ አምላኪየ ፡ ወአለበወኒ ፤ ትነብር ፡ በርትዕት ፡ ሃይማኖት ፡ እስከ ፡ ምጽአተ ፡ እግዚእነ ፡ ወአልቦ ፡ ዘትጸንን ፡ እምቃለ ፡ ሐዋርያት ፡ ወንሕነ ፡ በከመ ፡ ሠራዕነ ፡ ትሄሉ ፡ እስከ ፡ ኅልቀተ ፡ ዓለም ፨ ፡ ወአውሥእዎ ፡ ለገባሬ ፡ መንክር ፡ ወይቤልዎ ፡ አመኬ ፡ ይመጽእ ፡ ሰማልያል ፡ ይትኀበልኑ ፡ ውሕኮ ፡ ሃይማኖቶሙ ፡ ለኢትዮጵያ ፡ ዘውእቱ ፡ ሐሳዌ ፡ መሲሕ ፡ አውሥአ ፡ ወይቤ ፡ አልቦ ፡ አኮኑ ፡ ተነበየ ፡ ዳዊት ፡ ወይቤ ፡ ኢትዮጵያ ፡ ታበጽሕ ፡ እደዊሃ ፡ ኀበ ፡ እግዚኣብሔር ፤ ወዘንተ ፡ ዘይቤ ፡ ኢየዐልዉ ፡ ወኢይዌልጡ ፡ ዘንተ ፡ ሃይማኖትነ ፡ ወሥርዐትነ ፡ ወዘእለ ፡ እምቅድሜነ ፡ መምህራነ ፡ ሕግ ፡ ሐዋርያት ፨ ፨ ፨ ፨ ፨ ፨ ፨ ፨
=== chapter 114 ===
[፻፲፬ ፡ በእንተ ፡ ግብአታ ፡ ለጽዮን ።]
ወታቦተ ፡ ሕጉኒ ፡ ለእግዚኣብሔር ፡ ጽዮን ፡ ቅድስት ፡ ትነብር ፡ ህየ ፡ እስከ ፡ ውእተ ፡ አሚረ ፡ አመ ፡ ይነብር ፡ እግዚእነ ፡ ውስተ ፡ ደብረ ፡ ጽዮን ፤ ወትመጽእ ፡ ጽዮን ፡ ወታስተርኢ ፡ ለኵሉ ፡ ድሉተ ፡ ወሕንጽታ ፡ በከመ ፡ ቀፈላ ፡ ሙሴ ፡ በ፫ ፡ ማኅተም ፤ በከመ ፡ ይቤ ፡ በሕግ ፡ ዘብሉይ ፡ ወዘሐዲስ ፡ በስምዐ ፡ ፪ ፡ ወ፫ ፡ ይቁም ፡ ኵሉ ፡ ነገር ፡ ወአሜሃ ፡ ይቤ ፡ ኢሳይያስ ፡ ነቢይ ፡ ምዉታን ፡ ይትነሥኡ ፡ ወየሐይዉ ፡ እለ ፡ ውስተ ፡ መቃብር ፡ እስመ ፡ ጠል ፡ ዘእምኀቤከ ፡ ሕይወቶሙ ፡ ውእቱ ፤ ወሶበ ፡ ተንሥኡ ፡ ምዉታን ፡ በጠለ ፡ ምሕረቱ ፡ ዘይሰቅያ ፡ ለምድር ፡ ይቀውሙ ፡ ቅድሜሁ ፡ ምስለ ፡ ምግባራቲሆሙ ፡ ዘገብሩ ፤ ወይመጽኡ ፡ ሄኖክ ፡ ወኤልያስ ፡ እንዘ ፡ ሕያዋን ፡ ከመ ፡ ይኩኑ ፡ ለስምዕ ፡ ወሙሴ ፡ ወአሮን ፡ እምነ ፡ ምዉታን ፡ ሐይዉ ፡ ምስለ ፡ ኵሉ ፡ ወይፈትሑ ፡ መዛግሒሃ ፡ ወያርእይዎሙ ፡ ለአይሁድ ፡ ሰቃልያን ፡ ወይወቅሥዎሙ ፡ ወይዛለፍዎሙ ፡ በእንተ ፡ ኵሉ ፡ ዘዐለዉ ፡ ቃለ ፡ እግዚኣብሔር ፤ ወይሬእዩ ፡ ዘጸሐፈ ፡ ሎሙ ፡ በእዴሁ ፡ ቃላተ ፡ ለትእዛዙ ፡ ወመና ፡ ዘከመ ፡ ሴሰዮሙ ፡ ዘእንበለ ፡ ጻማ ፡ ምስለ ፡ መስፈሩ ፡ ጎሞር ፡ ወመንፈሳዊት ፡ ጽዮን ፡ ለመድኀኒቶሙ ፡ ዘወረደት ፡ ወበትረ ፡ አሮንመ ፡ እንተ ፡ ሠረጸት ፡ በአምሳለ ፡ ማርያም ፨ ፨ ፨ ፨ ፨ ፨ ፨ ፨
=== chapter 115 ===
[፻፲፭ ፡ በእንተ ፡ ቅስተ ፡ እስራኤል ።]
ወያወሥኦሙ ፡ ወይብሎሙ ፡ ለምንት ፡ ክሕድክሙኒ ፡ ወዐለውክሙኒ ፡ ወሰቀልክሙኒ ፡ ዘንተ ፡ ኵሎ ፡ ዘገበርኩ ፡ ለክሙ ፡ ወአድኀንኩክሙ ፡ ወሪድየ ፡ እምሰይጣን ፡ ወእምግብርናተ ፡ ፈርዖን ፡ ወበእንቲአክሙኒ ፡ መጻእኩ ፡ ወአንትሙሰ ፡ ርእዩ ፡ ዘከመ ፡ ቀነውክሙኒ ፡ ወረገዝክሙኒ ፡ ወይትነሥኡ ፡ ወይኴንንዎሙ ፡ ፲ወ፪ ፡ ሐዋርያት ፡ እንዘ ፡ ይብልዎሙ ፡ አስማዕናክሙ ፡ ወኢሰማዕክሙ ፡ ትንቢተ ፡ ነቢያት ፡ ወስብከተነ ፡ ለነ ፡ ለሐዋርያት ። ወይበክዩ ፡ ወይኔስሑ ፡ በኀበ ፡ ኢይበቊዕ ፡ ወየሐውሩ ፡ ውስተ ፡ ኵነኔ ፡ ዘለዓለም ፤ ምስለ ፡ ዲያብሎስ ፡ አቡሆሙ ፡ ዘአመከሮሙ ፡ ወአጋንንቲሁ ፡ መስሕታን ፡ ይትኀተሙ ፡ ረሲዓን ። ወእለሰ ፡ አምኑ ፡ ወተጠምቁ ፡ ቦቱ ፡ በቅድስት ፡ ሥላሴ ፡ ወተመጠዉ ፡ ሥጋሁ ፡ ወደሞ ፡ ይከውኑ ፡ ሎቱ ፡ አግብርተ ፡ በኵሉ ፡ ልቦሙ ፡ እስመ ፡ አልቦ ፡ ዘይክል ፡ ጸሊአ ፡ ሥጋሁ ፡ ግሙራ ፡ ይጸርኅ ፡ ሥጋ ፡ ክርስቶስ ፡ በውስተ ፡ ሥጋነ ፡ ወይምሕር ፡ በእንተ ፡ ሥጋሁ ፡ ወደሙ ፡ እስመ ፡ ኮንዎ ፡ ውሉዲ ፡ ወአኀዊሁ ፤ ወእመኒቦ ፡ ዘአበሱ ፡ ይትኴነኑ ፡ መጠነ ፡ አበሳሆሙ ፡ በእሳት ፡ ለዘ ፡ ቀሊል ፡ ጾሩ ፡ ቀሊል ፡ ኵነኔሁ ፡ ወለዘ ፡ ክቡድ ፡ ጾ ፡ ሩ ፡ ፈድፈደ ፡ ኵነኔሁ ፤ አሐቲ ፡ ዕለት ፡ በኀበ ፡ እግዚኣብሔር ፡ መጠነ ፡ ፼ ፡ ዓመት ፡ ቦዘ ፡ ይትኴነን ፡ መጠነ ፡ ዕለት ፡ ወቦመንፈቀ ፡ ዕለት ፡ ወቦ ፡ ፫ ፡ ሰዐት ፡ ዘዕለት ፡ ወቦ ፡ ፩ ፡ ሰዓት ፡ ዘዕለት ፡ ወቦዘያሜክርዎ ፡ ወያስተናጽሕዎ ፡ እምነ ፡ አበሳሁ ፨ ፨ ፨
=== chapter 116 ===
[፻፲፮ ፡ በእንተ ፡ ሰረገላ ፡ ኢትዮጵያ ።]
ወአውሥእዎ ፡ ወይቤልዎ ፡ ሊቃነ ፡ ጵጳሳት ፡ ናሁኬ ፡ ነገርከነ ፡ በእንተ ፡ መግረሬ ፡ ፀር ፡ ዘሮሜ ፤ ወይእዜኒ ፡ በእንተ ፡ ሰረገላ ፡ ዘኢትዮጵያ ፡ ወእመሂ ፡ ይነብር ፡ ደኃሪ ፡ እስከ ፡ ምጽአተ ፡ ክርስቶስ ፡ ከመ ፡ ነገርከነ ፡ በእንተ ፡ ጽዮን ፡ ወበእንተ ፡ ሃይማኖቶሙ ፡ ወከማሁ ፡ እመ ፡ ይነብር ፡ ሰረገላሆሙ ፡ ወይቤሎሙ ፡ አልቦ ፡ ሀለዎ ፡ ይሰወር ፤ ወካዕበ ፡ ዘንተ ፡ ስምዑኒ ፡ እንግርክሙ ፡ ሀለዎሙ ፡ ንስቲተ ፡ ያንሥኡ ፡ ርእሶሙ ፡ አይሁድ ፡ ላዕለ ፡ መሀይምናን ፡ በናግራን ፡ ወበአርማንያ ፡ እምድኅረዝ ፡ መዋዕል ፡ ወዘንተ ፡ ይገብር ፡ በፈቃዲ ፡ እግዚኣብሔር ፡ ከመ ፡ ያኅልቆሙ ፤ እስመ ፡ አርማንያ ፡ ደወለ ፡ ሮም ፡ ወናግራን ፡ ደወለ ፡ ኢትዮጵያ ፨ ፨ ፨
=== chapter 117 ===
[፻፲፯ ፡ በእንተ ፡ ንጉሠ ፡ ሮምያ ፡ ወንጉሠ ፡ ኢትዮጵያ ።]
ወይትለአኩ ፡ ንጉሠ ፡ ሮምያ ፡ ወንጉሠ ፡ ኢትዮጵያ ፡ ወሊቀ ፡ ጳጳሳት ፡ ዘእስክንድርያ ፡ ከመ ፡ ያኅልቅዎሙ ፡ እንዘ ፡ ርቱዕ ፡ ሃይማኖቶሙ ፡ ለሰብአ ፡ ሮም ፤ ወይትነሥኡ ፡ ፀብአ ፡ ከመ ፡ ይጽብእዎሙ ፡ ለፀረ ፡ እግዚኣብሔር ፡ አይሁድ ፡ ወያኅልቅዎሙ ፡ ንጉሠ ፡ ሮሜ ፡ ለኤንያ ፡ ወንጉሠ ፡ ኢትዮጵያ ፡ ለፊንሐስ ፡ ወያመዘብሩ ፡ ብሔሮሙ ፡ ወየሐንጹ ፡ አብያተ ፡ ክርስቲያናት ፡ በህየ ፡ ወየሐርድዎሙ ፡ ለነገሥተ ፡ አይሁድ ፡ በተፍጻሜተ ፡ ዛቲ ፡ ቀመር ፡ ፲ወ፪ ፡ አቅማር ። አሜሃ ፡ ትትፌጸም ፡ መንግሥቶሙ ፡ ለአይሁድ ፡ ወትረትዕ ፡ መንግሥተ ፡ ክርስቶስ ፡ እስከ ፡ ምጽአተ ፡ ሐሳዌ ፡ መሲሕ ፡ ወእሙንቱሰ ፡ ነገሥት ፡ ዮስጢኖስ ፡ ንጉሠ ፡ ሮሜ ፡ ወካሌብ ፡ ንጉሠ ፡ ኢትዮጵያ ፡ ይትራከቡ ፡ ክልኤሆሙ ፡ በኢየሩሳሌም ፡ ወይሠርዑ ፡ ቊርባነ ፡ ሊቀ ፡ ጳጳሳቲሆሙ ፡ ወይቄርቡ ፡ ወያኀብሩ ፡ ሃይማኖተ ፡ በፍቅር ፡ ወይትወሀቡ ፡ አምኃ ፡ ወሰላመ ፡ ወይትካፈሉ ፡ ምድረ ፡ እመንፈቃ ፡ ለኢየሩሳሌም ፡ በከመ ፡ ነገርነ ፡ ውስተ ፡ ርእሰ ፡ ዝንቱ ፡ መጽሐፍ ፡ ቀዳሚ ፡ ወካዕበ ፡ በእንተ ፡ ፍቅር ፡ ይዴመሩ ፡ ስመ ፡ መንግሥት ፡ ይዴመሩ ፡ ፩ ፡ ዘኀረዩ ፡ በሃይማኖት ፡ እምነገሥ ፡ ተ ፡ ሮም ፡ በውስተ ፡ ዕፃ ፡ ዘይሰመይ ፡ ምስለ ፡ ዳዊት ፡ ወሰሎሞን ፡ አበዊሆሙ ፡ ከመ ፡ ይሰመይ ፡ ንጉሠ ፡ ኢትዮጵያ ፡ ወንጉሠ ፡ ሮሜሂ ፡ ከማሁ ፡ ይነሥእ ፡ ስመ ፡ ንጉሠ ፡ ኢትዮጵያ ፡ ወይዴምር ፡ ውስተ ፡ ዕፃ ፡ ዘይሰመይ ፡ ምስለ ፡ ዳዊት ፡ ወሰሎሞን ፡ አበዊሆሙ ፡ በአምሳለ ፡ ፬ ፡ ወንጌላዊያን ፡ ወራብዕሰ ፡ ፩ ፡ ዘኀረዩ ፡ በበሀገሮሙ ፡ ወከመዝ ፡ እምድኅረ ፡ ኀብሩ ፡ ወአርትዑ ፡ ሃይማኖተ ፡ ይትማከሩ ፡ ከመ ፡ ኢያሕይዉ ፡ አይሁድ ፡ ወየኀድጉ ፡ ህየ ፡ በበውሉዶሙ ፤ ወንጉሠ ፡ ኢትዮጵያሰ ፡ የኀድግ ፡ ህየ ፡ ወልደ ፡ ዘበኵሩ ፡ ዘስሙ ፡ እስራኤል ፡ ወይገብእ ፡ ብሔሮ ፡ በፍሥሓ ፤ ወሶበ ፡ በጽሐ ፡ ቤተ ፡ መንግሥቱ ፡ ያአኵቶ ፡ ለእግዚኣብሔር ፡ ፈድፋደ ፡ ወይበጽዕ ፡ ሥጋሁ ፡ ለመሥዋዕተ ፡ ስብሐት ፡ ለአምላኩ ፤ ውጥቀ ፡ ይትወከፎ ፡ እግዚኣብሔር ፡ እስመ ፡ ኢያረኵስ ፡ ሥጋሁ ፡ እምድኅረ ፡ ገብአ ፡ አላ ፡ የሐውር ፡ ውስተ ፡ ደብር ፡ በንጹሕ ፡ ልብ ፤ ወያነግሥ ፡ ወልዶ ፡ ዘይንእስ ፡ ዘስሙ ፡ ገብረ ፡ መስቀል ፡ ወውእቱሰ ፡ የዐጹ ፡ ርእሶ ፡ ወሶበ ፡ ነገርዎ ፡ ለንጉሠ ፡ ናግራን ፡ ወልደ ፡ ካሌብ ፡ ይመጽእ ፡ ከመ ፡ ይንግሥ ፡ ኀበ ፡ ጽዮን ፡ ወገብረ ፡ መስቀልኒ ፡ ያነሥእ ፡ ሰራዊተ ፡ ወየሐውር ፡ በሰረገላ ፡ ወይትራከቡ ፡ በኀበ ፡ መጽብበ ፡ ባሕረ ፡ ሊባ ፡ ወይትቃተሉ ፤ ወበአሐቲ ፡ ሌሊት ፡ ይጼልዩ ፡ ክልኤሆሙ ፡ እምሰርክ ፡ እስከ ፡ ነግህ ፡ ሶበ ፡ ጸንዖሙ ፡ ቀትል ፤ ወሶበ ፡ በከዩ ፡ ኀቤሁ ፡ በአንብዕ ፡ ይኔጽር ፡ እግዚኣብሔር ፡ ኀበ ፡ ጸሎተ ፡ ክልኤሆሙ ፡ ወጸሎተ ፡ አቡሆሙ ፡ ንሱሕ ፡ እንዘ ፡ ይብል ፡ ውእቱኒ ፡ መልህቅ ፡ ወቆመ ፡ ከመ ፡ ይግበር ፡ ፈቃደ ፡ አቡሁ ፡ ወለውእቱኒ ፡ መንእስ ፡ አፍቀሮ ፡ አቡሁ ፡ ወጸለየ ፡ ኀበ ፡ እግዚኣብሔር ፤ ወይቤሎ ፡ ለገብረ ፡ መስቀል ፡ ኅረይ ፡ ለከ ፡ እምሰረገላ ፡ ወእምጽዮን ፡ ወአፍተዎ ፡ ከመ ፡ ይንሣእ ፡ ጽዮንሃ ፡ ወይንገሥ ፡ ገሃደ ፡ ዲበ ፡ መንበረ ፡ አቡሁ ፤ ወለእስራኤልኒ ፡ አፍተዎ ፡ ከመ ፡ ይኅረይ ፡ ሰረገላ ፡ ወይንግሥ ፡ በኅቡእ ፡ ወኢይትረአይ ፡ ወይፌንዎ ፡ ኀበ ፡ ኵሎሙ ፡ እለ ፡ ተዐደዉ ፡ ትእዛዘ ፡ እግዚኣብሔር ፤ ወአልቦ ፡ ዘየሐንጽ ፡ አብያተ ፡ ወይነብር ፡ በደብተራት ፡ ወአልቦሙ ፡ ጻማ ፡ ዘስራሕ ፡ ወኢጻማ ፡ በፍኖት ፤ ወመዋዕሊሆሙኒ ፡ ካዕበተ ፡ ሰብእ ፡ ወከመዝኬ ፡ የህይጲ ፡ ወይዌስቁ ፡ ወይወግኡ ፡ ኀበ ፡ ዘጸልኦ ፡ እግዚኣብሔር ። ከመዝ ፡ ገብረ ፡ እግዚኣብሔር ፡ ለንጉሠ ፡ ኢትዮጵያ ፡ ክብረ ፡ ወሞገሰ ፡ ወዐብየ ፡ እምኵሎሙ ፡ ነገሥተ ፡ ምድር ፡ በእንተ ፡ ዕበያ ፡ ለጽዮን ፡ ታቦተ ፡ ሕጉ ፡ ለእግዚኣብሔር ፡ ጽዮን ፡ ሰማያዊት ፤ ወይረስየነ ፡ እግዚኣብሔር ፡ ከመ ፡ ንግበር ፡ ሥምረቶ ፡ መንፈሳዊተ ፡ ወያድኅነነ ፡ እመዐቱ ፡ ወይከፍለነ ፡ መንግሥቶ ፡ አሜን ፨ ፡ ወአውሥኡ ፡ ወይቤልዎ ፡ በአማን ፡ ሠናየ ፡ ነበብከ ፡ እስመ ፡ ከማሁ ፡ ተከሥተ ፡ ለከ ፡ በረድኤተ ፡ መንፈስ ፡ ቅዱስ ፤ ነገርከነ ፡ ኵሎ ፡ ዘኮነ ፡ ወአኅበርከ ፡ ምስለ ፡ መጽሐፈ ፡ ደማቲዮስ ፡ ዘሮሜ ፡ ወተነበይከ ፡ ለነ ፡ ዘይከውንሂ ፡ ለክልኤ ፡ አህጉር ፡ መራዕወ ፡ ክርስቶስ ፡ አብያተ ፡ ክርስቲያናት ፡ ንስታስያ ፡ ወአርቃድያ ፡ ወማሬና ፡ ወኢትዮጵያ ፡ አህጉር ፡ ዐበይት ፡ ዘእግዚኣብሔር ፡ ዘበውስቴቶን ፡ መሥዋዕተ ፡ ወቊርባነ ፡ ንጹሕ ፡ ይትገበር ፡ በኵሉ ፡ ጊዜ ። እግዚኣብሔር ፡ ይጸግወነ ፤ በረከቶሙ ፡ ለኵሎሙ ፡ ቅዱሳን ፡ ወሰማዕት ፡ ለዓለመ ፡ ዓለም ፡ አሜን ፡ ክርስቶስ ፡ ንጉሥነ ፡ ወበክርስቶስ ፡ ሕይወትነ ፡ ለዓለመ ፡ ዓለም ፡ አሜን ፡ ወአሜን ፨ ፨ ፨ ፨ ፨ ፨ ፨ ፨ ፨ ፨ ፨ ፨ ፨ ፨ ፨ ፨ ፨ ፨ ፨ ፨
=== chapter 118 ===
ወተብህለ ፡ በክታበ ፡ ዐረቢ ፡ አውፃእናሃ ፡ እመጽሐፈ ፡ ቅብጥ ፡ ለዐረቢ ፡ እመንበረ ፡ ማርቆስ ፡ ወንጌላዊ ፡ መምህር ፡ አበ ፡ ኵልነ ፤ ወአውፃእናሃ ፡ በ፬፻ ፡ ወ፱ ፡ ዓመተ ፡ ምሕረት ፡ ውስተ ፡ ሀገረ ፡ ኢትዮጵያ ፡ በመዋዕለ ፡ ገብረ ፡ መስቀል ፡ ንጉሥ ፡ ወሰጓሁ ፡ ላሊበላ ፡ በመዋዕለ ፡ አባ ፡ ጊዮርጊስ ፡ ጳጳስ ፡ ኄር ፡ ወአስተተ ፡ እግዚኣብሔር ፡ አውፅኦታ ፡ ወተርጒሞታ ፡ ኀበ ፡ ነገረ ፡ ሐባሲ ፡ ወሶበ ፡ ኀለይኩ ፡ ዘንተ ፡ ለምንት ፡ ኢተርጐምዋ ፡ አበልዕዝ ፡ ወአበልፈረግ ፡ እለ ፡ አውፅእዋ ፡ እቤ ፡ ዘንተ ፡ እስመ ፡ ወፅአት ፡ በመዋዕለ ፡ ዛጓ ፡ ወኢተርጐምዋ ፡ እስመ ፡ ትብል ፡ ዛቲ ፡ መጽሐፍ ፡ እለሰ ፡ ይነግሡ ፡ እለ ፡ ኢኮኑ ፡ እስራኤል ፡ ተዐድዎ ፡ ሕግ ፡ ውእቱ ፤ ወሶበ ፡ ይከውን ፡ በመንግሥተ ፡ እስራኤል ፡ እምአውፅእዋ ፤ ወተረክበት ፡ በናዝሬት ፨ ፡ ወጸልዩ ፡ ላዕሌየ ፡ ለገብርክሙ ፡ ይስሐቅ ፡ ነዳይ ፡ ወኢትሒሱኒ ፡ በእንተ ፡ ኢያርትዖ ፡ ነገረ ፡ ልሳን ፤ እስመ ፡ ብዙኀ ፡ ጻመውኩ ፡ በእንተ ፡ ክብራ ፡ ለሀገረ ፡ ኢትዮጵያ ፡ በእንተ ፡ ጸአታ ፡ ለጽዮን ፡ ሰማያዊት ፡ ወበእንተ ፡ ክብረ ፡ ንጉሠ ፡ ኢትዮጵያ ፡ እስመ ፡ አነሂ ፡ ተስእልክዎ ፡ ለመኰንን ፡ ርቱዕ ፡ ፍቁረ ፡ እግዚኣብሔር ፡ ያዕቢከ ፡ እግዚእ ፡ ወአፍቀረ ፡ ወይቤለኒ ፡ ግበር ፤ ወገበርኩ ፡ እንዘ ፡ እግዚኣብሔር ፡ ይረድአኒ ፡ ወኢፈደየኒ ፡ በከመ ፡ አበሳየ ፡ ለገብርክሙ ፡ ይስሐቅ ፡ ጸልዩ ፡ ወለእለ ፡ ፃመዉ ፡ ምስሌየ ፡ በፀአተ ፡ ዛቲ ፡ መጽሐፍ ፡ እስመ ፡ ተመንደብነ ፡ ፈድፋደ ፡ አነ ፡ ወይምሀረነ ፡ አብ ፡ ወሕዝበ ፡ ክርስቶስ ፡ ወእንድርያስ ፡ ወፊልጶስ ፡ ወመሓሪ ፡ አብ ፡ ይምሐሮሙ ፡ እግዚአብሔር ፡ በመንግሥተ ፡ ሰማያት ፡ ምስለ ፡ ኵሎሙ ፡ ቅዱሳን ፡ ወሰማዕት ፡ ይጽሐፍ ፡ ስሞሙ ፡ ውስተ ፡ መጽሐፈ ፡ ሕይወት ፡ ለዓለመ ፡ ዓለም ፡ አሜን ፡ ወአሜን ፨ ፨ ፨ ፨ ፨ ፨
=== chapter 119 ===
ወእምድኅረ ፡ ተወልደ ፡ መድኀኒነ ፡ እሉ ፡ ነገሥት ። ባዜን ፤ ጽንፈ ፡ አስግድ ፤ ባሕረ ፡ አስግድ ፤ ግርማ ፡ ሰፍር ፤ ሰርዓዳ ፤ ኵሉ ፡ ለጽዮን ፤ ሰርጓይ ፤ ዘርአይ ፤ በጋማይ ፤ ዛን ፡ አስግድ ፤ ጽዮን ፡ ሕግ ፤ ማአልባጋድ ፤ ሳፍ ፡ አርዓድ ፤ አግዳር ፤ አብርሃ ፡ ወአጽብሐ ፡ አኀው ፡ ፍቁራን ፤ አስፍሐ ፤ አርፍድ ፡ ወአምሲ ፡ አኀው ፤ አርዓዳ ፤ ሰልዓዶባ ፤ አልዓሚዳ ፤ ታዜና ፤ ካሌብ ፤ ገብረ ፡ መስቀል ፤ ቈስጠንጢኖስ ፤ በዘጋር ፤ አስፋሕ ፤ አርማሕ ፤ ዠን ፡ አስፍሕ ፤ ዣን ፡ ሰገድ ፤ ፍሬ ፡ ሠናይ ፤ አድርዓዝ ፤ አይዙር ፤ ማዕዳይ ፤ ከላውድዮስ ፤ ግርማ ፡ አስፋ ፤ ዝመዝ ፤ ድግና ፡ ሚካኤል ፤ በደግዝ ፤ አርማኅ ፤ ሕዝበ ፡ አናኒ ፤ ድግናዛን ፤ አንበሳ ፡ ወድም ፤ ድል ፡ ነአድ ፨ ፡ ወእምድኅሬሁ ፡ ተሀይደ ፡ መንግሥት ፡ ለሕዝብ ፡ እለ ፡ ኢኮኑ ፡ እምነገደ ፡ ዳዊት ፡ ወሕዝበ ፡ እስራኤል ፤ በከመ ፡ ይቤ ፡ እግዚአብሔር ፡ አነ ፡ አቀንኦሙ ፡ በዘኢኮነ ፡ ሕዝብ ። ወእምድኅሬሁ ፡ አግብአ ፡ ሎሙ ፤ ይኵኖ ፡ አምላክ ፤ ያግባ ፡ ጽዮን ፤ ባሕር ፡ ሰገድ ፤ ሕዝበ ፡ አርዓድ ፤ ቅድመ ፡ ሰገድ ፤ ዣን ፡ ሰገድ ፤ ውድም ፡ አርዓድ ፤ ዓምደ ፡ ጽዮን ፨ ፨ ፨ ፨ ፨ ፨ ፨ ፨ ፨
##### edition traces (gez)