Odyssey 1.1	ἄνδρα μοι ἔννεπε, μοῦσα, πολύτροπον, ὃς μάλα πολλὰ
Odyssey 1.2	πλάγχθη, ἐπεὶ Τροίης ἱερὸν πτολίεθρον ἔπερσεν·
Odyssey 1.3	πολλῶν δʼ ἀνθρώπων ἴδεν ἄστεα καὶ νόον ἔγνω,
Odyssey 1.4	πολλὰ δʼ ὅ γʼ ἐν πόντῳ πάθεν ἄλγεα ὃν κατὰ θυμόν,
Odyssey 1.5	ἀρνύμενος ἥν τε ψυχὴν καὶ νόστον ἑταίρων.
Odyssey 1.6	ἀλλʼ οὐδʼ ὣς ἑτάρους ἐρρύσατο, ἱέμενός περ·
Odyssey 1.7	αὐτῶν γὰρ σφετέρῃσιν ἀτασθαλίῃσιν ὄλοντο,
Odyssey 1.8	νήπιοι, οἳ κατὰ βοῦς Ὑπερίονος Ἠελίοιο
Odyssey 1.9	ἤσθιον· αὐτὰρ ὁ τοῖσιν ἀφείλετο νόστιμον ἦμαρ.
Odyssey 1.10	τῶν ἁμόθεν γε, θεά, θύγατερ Διός, εἰπὲ καὶ ἡμῖν.
Odyssey 1.11	ἔνθʼ ἄλλοι μὲν πάντες, ὅσοι φύγον αἰπὺν ὄλεθρον,
Odyssey 1.12	οἴκοι ἔσαν, πόλεμόν τε πεφευγότες ἠδὲ θάλασσαν·
Odyssey 1.13	τὸν δʼ οἶον νόστου κεχρημένον ἠδὲ γυναικὸς
Odyssey 1.14	νύμφη πότνιʼ ἔρυκε Καλυψὼ δῖα θεάων
Odyssey 1.15	ἐν σπέσσι γλαφυροῖσι, λιλαιομένη πόσιν εἶναι.
Odyssey 1.16	ἀλλʼ ὅτε δὴ ἔτος ἦλθε περιπλομένων ἐνιαυτῶν,
Odyssey 1.17	τῷ οἱ ἐπεκλώσαντο θεοὶ οἶκόνδε νέεσθαι
Odyssey 1.18	εἰς Ἰθάκην, οὐδʼ ἔνθα πεφυγμένος ἦεν ἀέθλων
Odyssey 1.19	καὶ μετὰ οἷσι φίλοισι. θεοὶ δʼ ἐλέαιρον ἅπαντες
Odyssey 1.20	νόσφι Ποσειδάωνος· ὁ δʼ ἀσπερχὲς μενέαινεν
Odyssey 1.21	ἀντιθέῳ Ὀδυσῆι πάρος ἣν γαῖαν ἱκέσθαι.
Odyssey 1.22	ἀλλʼ ὁ μὲν Αἰθίοπας μετεκίαθε τηλόθʼ ἐόντας,
Odyssey 1.23	Αἰθίοπας τοὶ διχθὰ δεδαίαται, ἔσχατοι ἀνδρῶν,
Odyssey 1.24	οἱ μὲν δυσομένου Ὑπερίονος οἱ δʼ ἀνιόντος,
Odyssey 1.25	ἀντιόων ταύρων τε καὶ ἀρνειῶν ἑκατόμβης.
Odyssey 1.26	ἔνθʼ ὅ γʼ ἐτέρπετο δαιτὶ παρήμενος· οἱ δὲ δὴ ἄλλοι
Odyssey 1.27	Ζηνὸς ἐνὶ μεγάροισιν Ὀλυμπίου ἁθρόοι ἦσαν.
Odyssey 1.28	τοῖσι δὲ μύθων ἦρχε πατὴρ ἀνδρῶν τε θεῶν τε·
Odyssey 1.29	μνήσατο γὰρ κατὰ θυμὸν ἀμύμονος Αἰγίσθοιο,
Odyssey 1.30	τόν ῥʼ Ἀγαμεμνονίδης τηλεκλυτὸς ἔκτανʼ Ὀρέστης·
Odyssey 1.31	τοῦ ὅ γʼ ἐπιμνησθεὶς ἔπεʼ ἀθανάτοισι μετηύδα·
Odyssey 1.32	ὢ πόποι, οἷον δή νυ θεοὺς βροτοὶ αἰτιόωνται·
Odyssey 1.33	ἐξ ἡμέων γάρ φασι κάκʼ ἔμμεναι, οἱ δὲ καὶ αὐτοὶ
Odyssey 1.34	σφῇσιν ἀτασθαλίῃσιν ὑπὲρ μόρον ἄλγεʼ ἔχουσιν,
Odyssey 1.35	ὡς καὶ νῦν Αἴγισθος ὑπὲρ μόρον Ἀτρεΐδαο
Odyssey 1.36	γῆμʼ ἄλοχον μνηστήν, τὸν δʼ ἔκτανε νοστήσαντα,
Odyssey 1.37	εἰδὼς αἰπὺν ὄλεθρον, ἐπεὶ πρό οἱ εἴπομεν ἡμεῖς,
Odyssey 1.38	Ἑρμείαν πέμψαντες, ἐύσκοπον ἀργεϊφόντην,
Odyssey 1.39	μήτʼ αὐτὸν κτείνειν μήτε μνάασθαι ἄκοιτιν·
Odyssey 1.40	ἐκ γὰρ Ὀρέσταο τίσις ἔσσεται Ἀτρεΐδαο,
Odyssey 1.41	ὁππότʼ ἂν ἡβήσῃ τε καὶ ἧς ἱμείρεται αἴης.
Odyssey 1.42	ὣς ἔφαθʼ Ἑρμείας, ἀλλʼ οὐ φρένας Αἰγίσθοιο
Odyssey 1.43	πεῖθʼ ἀγαθὰ φρονέων· νῦν δʼ ἁθρόα πάντʼ ἀπέτισεν.
Odyssey 1.44	τὸν δʼ ἠμείβετʼ ἔπειτα θεά, γλαυκῶπις Ἀθήνη·
Odyssey 1.45	ὦ πάτερ ἡμέτερε Κρονίδη, ὕπατε κρειόντων,
Odyssey 1.46	καὶ λίην κεῖνός γε ἐοικότι κεῖται ὀλέθρῳ·
Odyssey 1.47	ὡς ἀπόλοιτο καὶ ἄλλος, ὅτις τοιαῦτά γε ῥέζοι·
Odyssey 1.48	ἀλλά μοι ἀμφʼ Ὀδυσῆι δαΐφρονι δαίεται ἦτορ,
Odyssey 1.49	δυσμόρῳ, ὃς δὴ δηθὰ φίλων ἄπο πήματα πάσχει
Odyssey 1.50	νήσῳ ἐν ἀμφιρύτῃ, ὅθι τʼ ὀμφαλός ἐστι θαλάσσης.
Odyssey 1.51	νῆσος δενδρήεσσα, θεὰ δʼ ἐν δώματα ναίει,
Odyssey 1.52	Ἄτλαντος θυγάτηρ ὀλοόφρονος, ὅς τε θαλάσσης
Odyssey 1.53	πάσης βένθεα οἶδεν, ἔχει δέ τε κίονας αὐτὸς
Odyssey 1.54	μακράς, αἳ γαῖάν τε καὶ οὐρανὸν ἀμφὶς ἔχουσιν.
Odyssey 1.55	τοῦ θυγάτηρ δύστηνον ὀδυρόμενον κατερύκει,
Odyssey 1.56	αἰεὶ δὲ μαλακοῖσι καὶ αἱμυλίοισι λόγοισιν
Odyssey 1.57	θέλγει, ὅπως Ἰθάκης ἐπιλήσεται· αὐτὰρ Ὀδυσσεύς,
Odyssey 1.58	ἱέμενος καὶ καπνὸν ἀποθρῴσκοντα νοῆσαι
Odyssey 1.59	ἧς γαίης, θανέειν ἱμείρεται. οὐδέ νυ σοί περ
Odyssey 1.60	ἐντρέπεται φίλον ἦτορ, Ὀλύμπιε. οὔ νύ τʼ Ὀδυσσεὺς
Odyssey 1.61	Ἀργείων παρὰ νηυσὶ χαρίζετο ἱερὰ ῥέζων
Odyssey 1.62	Τροίῃ ἐν εὐρείῃ; τί νύ οἱ τόσον ὠδύσαο, Ζεῦ;
Odyssey 1.63	τὴν δʼ ἀπαμειβόμενος προσέφη νεφεληγερέτα Ζεύς·
Odyssey 1.64	τέκνον ἐμόν, ποῖόν σε ἔπος φύγεν ἕρκος ὀδόντων.
Odyssey 1.65	πῶς ἂν ἔπειτʼ Ὀδυσῆος ἐγὼ θείοιο λαθοίμην,
Odyssey 1.66	ὃς περὶ μὲν νόον ἐστὶ βροτῶν, περὶ δʼ ἱρὰ θεοῖσιν
Odyssey 1.67	ἀθανάτοισιν ἔδωκε, τοὶ οὐρανὸν εὐρὺν ἔχουσιν;
Odyssey 1.68	ἀλλὰ Ποσειδάων γαιήοχος ἀσκελὲς αἰεὶ
Odyssey 1.69	Κύκλωπος κεχόλωται, ὃν ὀφθαλμοῦ ἀλάωσεν,
Odyssey 1.70	ἀντίθεον Πολύφημον, ὅου κράτος ἐστὶ μέγιστον
Odyssey 1.71	πᾶσιν Κυκλώπεσσι· Θόωσα δέ μιν τέκε νύμφη,
Odyssey 1.72	Φόρκυνος θυγάτηρ ἁλὸς ἀτρυγέτοιο μέδοντος,
Odyssey 1.73	ἐν σπέσσι γλαφυροῖσι Ποσειδάωνι μιγεῖσα.
Odyssey 1.74	ἐκ τοῦ δὴ Ὀδυσῆα Ποσειδάων ἐνοσίχθων
Odyssey 1.75	οὔ τι κατακτείνει, πλάζει δʼ ἀπὸ πατρίδος αἴης.
Odyssey 1.76	ἀλλʼ ἄγεθʼ, ἡμεῖς οἵδε περιφραζώμεθα πάντες
Odyssey 1.77	νόστον, ὅπως ἔλθῃσι· Ποσειδάων δὲ μεθήσει
Odyssey 1.78	ὃν χόλον· οὐ μὲν γάρ τι δυνήσεται ἀντία πάντων
Odyssey 1.79	ἀθανάτων ἀέκητι θεῶν ἐριδαινέμεν οἶος.
Odyssey 1.80	τὸν δʼ ἠμείβετʼ ἔπειτα θεά, γλαυκῶπις Ἀθήνη·
Odyssey 1.81	ὦ πάτερ ἡμέτερε Κρονίδη, ὕπατε κρειόντων,
Odyssey 1.82	εἰ μὲν δὴ νῦν τοῦτο φίλον μακάρεσσι θεοῖσιν,
Odyssey 1.83	νοστῆσαι Ὀδυσῆα πολύφρονα ὅνδε δόμονδε,
Odyssey 1.84	Ἑρμείαν μὲν ἔπειτα διάκτορον ἀργεϊφόντην
Odyssey 1.85	νῆσον ἐς Ὠγυγίην ὀτρύνομεν, ὄφρα τάχιστα
Odyssey 1.86	νύμφῃ ἐυπλοκάμῳ εἴπῃ νημερτέα βουλήν,
Odyssey 1.87	νόστον Ὀδυσσῆος ταλασίφρονος, ὥς κε νέηται·
Odyssey 1.88	αὐτὰρ ἐγὼν Ἰθάκηνδʼ ἐσελεύσομαι, ὄφρα οἱ υἱὸν
Odyssey 1.89	μᾶλλον ἐποτρύνω καί οἱ μένος ἐν φρεσὶ θείω,
Odyssey 1.90	εἰς ἀγορὴν καλέσαντα κάρη κομόωντας Ἀχαιοὺς
Odyssey 1.91	πᾶσι μνηστήρεσσιν ἀπειπέμεν, οἵ τέ οἱ αἰεὶ
Odyssey 1.92	μῆλʼ ἁδινὰ σφάζουσι καὶ εἰλίποδας ἕλικας βοῦς.
Odyssey 1.93	πέμψω δʼ ἐς Σπάρτην τε καὶ ἐς Πύλον ἠμαθόεντα
Odyssey 1.94	νόστον πευσόμενον πατρὸς φίλου, ἤν που ἀκούσῃ,
Odyssey 1.95	ἠδʼ ἵνα μιν κλέος ἐσθλὸν ἐν ἀνθρώποισιν ἔχῃσιν.
Odyssey 1.96	ὣς εἰποῦσʼ ὑπὸ ποσσὶν ἐδήσατο καλὰ πέδιλα,
Odyssey 1.97	ἀμβρόσια χρύσεια, τά μιν φέρον ἠμὲν ἐφʼ ὑγρὴν
Odyssey 1.98	ἠδʼ ἐπʼ ἀπείρονα γαῖαν ἅμα πνοιῇς ἀνέμοιο·
Odyssey 1.99	εἵλετο δʼ ἄλκιμον ἔγχος, ἀκαχμένον ὀξέι χαλκῷ,
Odyssey 1.100	βριθὺ μέγα στιβαρόν, τῷ δάμνησι στίχας ἀνδρῶν
Odyssey 1.101	ἡρώων, τοῖσίν τε κοτέσσεται ὀβριμοπάτρη.
Odyssey 1.102	βῆ δὲ κατʼ Οὐλύμποιο καρήνων ἀίξασα,
Odyssey 1.103	στῆ δʼ Ἰθάκης ἐνὶ δήμῳ ἐπὶ προθύροις Ὀδυσῆος,
Odyssey 1.104	οὐδοῦ ἐπʼ αὐλείου· παλάμῃ δʼ ἔχε χάλκεον ἔγχος,
Odyssey 1.105	εἰδομένη ξείνῳ, Ταφίων ἡγήτορι Μέντῃ.
Odyssey 1.106	εὗρε δʼ ἄρα μνηστῆρας ἀγήνορας. οἱ μὲν ἔπειτα
Odyssey 1.107	πεσσοῖσι προπάροιθε θυράων θυμὸν ἔτερπον
Odyssey 1.108	ἥμενοι ἐν ῥινοῖσι βοῶν, οὓς ἔκτανον αὐτοί·
Odyssey 1.109	κήρυκες δʼ αὐτοῖσι καὶ ὀτρηροὶ θεράποντες
Odyssey 1.110	οἱ μὲν οἶνον ἔμισγον ἐνὶ κρητῆρσι καὶ ὕδωρ,
Odyssey 1.111	οἱ δʼ αὖτε σπόγγοισι πολυτρήτοισι τραπέζας
Odyssey 1.112	νίζον καὶ πρότιθεν, τοὶ δὲ κρέα πολλὰ δατεῦντο.
Odyssey 1.113	τὴν δὲ πολὺ πρῶτος ἴδε Τηλέμαχος θεοειδής,
Odyssey 1.114	ἧστο γὰρ ἐν μνηστῆρσι φίλον τετιημένος ἦτορ,
Odyssey 1.115	ὀσσόμενος πατέρʼ ἐσθλὸν ἐνὶ φρεσίν, εἴ ποθεν ἐλθὼν
Odyssey 1.116	μνηστήρων τῶν μὲν σκέδασιν κατὰ δώματα θείη,
Odyssey 1.117	τιμὴν δʼ αὐτὸς ἔχοι καὶ δώμασιν οἷσιν ἀνάσσοι.
Odyssey 1.118	τὰ φρονέων, μνηστῆρσι μεθήμενος, εἴσιδʼ Ἀθήνην.
Odyssey 1.119	βῆ δʼ ἰθὺς προθύροιο, νεμεσσήθη δʼ ἐνὶ θυμῷ
Odyssey 1.120	ξεῖνον δηθὰ θύρῃσιν ἐφεστάμεν· ἐγγύθι δὲ στὰς
Odyssey 1.121	χεῖρʼ ἕλε δεξιτερὴν καὶ ἐδέξατο χάλκεον ἔγχος,
Odyssey 1.122	καί μιν φωνήσας ἔπεα πτερόεντα προσηύδα·
Odyssey 1.123	χαῖρε, ξεῖνε, παρʼ ἄμμι φιλήσεαι· αὐτὰρ ἔπειτα
Odyssey 1.124	δείπνου πασσάμενος μυθήσεαι ὅττεό σε χρή.
Odyssey 1.125	ὣς εἰπὼν ἡγεῖθʼ, ἡ δʼ ἕσπετο Παλλὰς Ἀθήνη.
Odyssey 1.126	οἱ δʼ ὅτε δή ῥʼ ἔντοσθεν ἔσαν δόμου ὑψηλοῖο,
Odyssey 1.127	ἔγχος μέν ῥʼ ἔστησε φέρων πρὸς κίονα μακρὴν
Odyssey 1.128	δουροδόκης ἔντοσθεν ἐυξόου, ἔνθα περ ἄλλα
Odyssey 1.129	ἔγχεʼ Ὀδυσσῆος ταλασίφρονος ἵστατο πολλά,
Odyssey 1.130	αὐτὴν δʼ ἐς θρόνον εἷσεν ἄγων, ὑπὸ λῖτα πετάσσας,
Odyssey 1.131	καλὸν δαιδάλεον· ὑπὸ δὲ θρῆνυς ποσὶν ἦεν.
Odyssey 1.132	πὰρ δʼ αὐτὸς κλισμὸν θέτο ποικίλον, ἔκτοθεν ἄλλων
Odyssey 1.133	μνηστήρων, μὴ ξεῖνος ἀνιηθεὶς ὀρυμαγδῷ
Odyssey 1.134	δείπνῳ ἁδήσειεν, ὑπερφιάλοισι μετελθών,
Odyssey 1.135	ἠδʼ ἵνα μιν περὶ πατρὸς ἀποιχομένοιο ἔροιτο.
Odyssey 1.136	χέρνιβα δʼ ἀμφίπολος προχόῳ ἐπέχευε φέρουσα
Odyssey 1.137	καλῇ χρυσείῃ, ὑπὲρ ἀργυρέοιο λέβητος,
Odyssey 1.138	νίψασθαι· παρὰ δὲ ξεστὴν ἐτάνυσσε τράπεζαν.
Odyssey 1.139	σῖτον δʼ αἰδοίη ταμίη παρέθηκε φέρουσα,
Odyssey 1.140	εἴδατα πόλλʼ ἐπιθεῖσα, χαριζομένη παρεόντων·
Odyssey 1.141	δαιτρὸς δὲ κρειῶν πίνακας παρέθηκεν ἀείρας
Odyssey 1.142	παντοίων, παρὰ δέ σφι τίθει χρύσεια κύπελλα·
Odyssey 1.143	κῆρυξ δʼ αὐτοῖσιν θάμʼ ἐπῴχετο οἰνοχοεύων.
Odyssey 1.144	ἐς δʼ ἦλθον μνηστῆρες ἀγήνορες. οἱ μὲν ἔπειτα
Odyssey 1.145	ἑξείης ἕζοντο κατὰ κλισμούς τε θρόνους τε,
Odyssey 1.146	τοῖσι δὲ κήρυκες μὲν ὕδωρ ἐπὶ χεῖρας ἔχευαν,
Odyssey 1.147	σῖτον δὲ δμῳαὶ παρενήνεον ἐν κανέοισιν,
Odyssey 1.148	κοῦροι δὲ κρητῆρας ἐπεστέψαντο ποτοῖο.
Odyssey 1.149	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.150	αὐτὰρ ἐπεὶ πόσιος καὶ ἐδητύος ἐξ ἔρον ἕντο
Odyssey 1.151	μνηστῆρες, τοῖσιν μὲν ἐνὶ φρεσὶν ἄλλα μεμήλει,
Odyssey 1.152	μολπή τʼ ὀρχηστύς τε· τὰ γάρ τʼ ἀναθήματα δαιτός·
Odyssey 1.153	κῆρυξ δʼ ἐν χερσὶν κίθαριν περικαλλέα θῆκεν
Odyssey 1.154	Φημίῳ, ὅς ῥʼ ἤειδε παρὰ μνηστῆρσιν ἀνάγκῃ.
Odyssey 1.155	ἦ τοι ὁ φορμίζων ἀνεβάλλετο καλὸν ἀείδειν.
Odyssey 1.156	αὐτὰρ Τηλέμαχος προσέφη γλαυκῶπιν Ἀθήνην,
Odyssey 1.157	ἄγχι σχὼν κεφαλήν, ἵνα μὴ πευθοίαθʼ οἱ ἄλλοι·
Odyssey 1.158	ξεῖνε φίλʼ, ἦ καί μοι νεμεσήσεαι ὅττι κεν εἴπω;
Odyssey 1.159	τούτοισιν μὲν ταῦτα μέλει, κίθαρις καὶ ἀοιδή,
Odyssey 1.160	ῥεῖʼ, ἐπεὶ ἀλλότριον βίοτον νήποινον ἔδουσιν,
Odyssey 1.161	ἀνέρος, οὗ δή που λεύκʼ ὀστέα πύθεται ὄμβρῳ
Odyssey 1.162	κείμενʼ ἐπʼ ἠπείρου, ἢ εἰν ἁλὶ κῦμα κυλίνδει.
Odyssey 1.163	εἰ κεῖνόν γʼ Ἰθάκηνδε ἰδοίατο νοστήσαντα,
Odyssey 1.164	πάντες κʼ ἀρησαίατʼ ἐλαφρότεροι πόδας εἶναι
Odyssey 1.165	ἢ ἀφνειότεροι χρυσοῖό τε ἐσθῆτός τε.
Odyssey 1.166	νῦν δʼ ὁ μὲν ὣς ἀπόλωλε κακὸν μόρον, οὐδέ τις ἡμῖν
Odyssey 1.167	θαλπωρή, εἴ πέρ τις ἐπιχθονίων ἀνθρώπων
Odyssey 1.168	φῇσιν ἐλεύσεσθαι· τοῦ δʼ ὤλετο νόστιμον ἦμαρ.
Odyssey 1.169	ἀλλʼ ἄγε μοι τόδε εἰπὲ καὶ ἀτρεκέως κατάλεξον·
Odyssey 1.170	τίς πόθεν εἰς ἀνδρῶν; πόθι τοι πόλις ἠδὲ τοκῆες;
Odyssey 1.171	ὁπποίης τʼ ἐπὶ νηὸς ἀφίκεο· πῶς δέ σε ναῦται
Odyssey 1.172	ἤγαγον εἰς Ἰθάκην; τίνες ἔμμεναι εὐχετόωντο;
Odyssey 1.173	οὐ μὲν γάρ τί σε πεζὸν ὀίομαι ἐνθάδʼ ἱκέσθαι.
Odyssey 1.174	καί μοι τοῦτʼ ἀγόρευσον ἐτήτυμον, ὄφρʼ ἐὺ εἰδῶ,
Odyssey 1.175	ἠὲ νέον μεθέπεις ἦ καὶ πατρώιός ἐσσι
Odyssey 1.176	ξεῖνος, ἐπεὶ πολλοὶ ἴσαν ἀνέρες ἡμέτερον δῶ
Odyssey 1.177	ἄλλοι, ἐπεὶ καὶ κεῖνος ἐπίστροφος ἦν ἀνθρώπων.
Odyssey 1.178	τὸν δʼ αὖτε προσέειπε θεά, γλαυκῶπις Ἀθήνη·
Odyssey 1.179	τοιγὰρ ἐγώ τοι ταῦτα μάλʼ ἀτρεκέως ἀγορεύσω.
Odyssey 1.180	Μέντης Ἀγχιάλοιο δαΐφρονος εὔχομαι εἶναι
Odyssey 1.181	υἱός, ἀτὰρ Ταφίοισι φιληρέτμοισιν ἀνάσσω.
Odyssey 1.182	νῦν δʼ ὧδε ξὺν νηὶ κατήλυθον ἠδʼ ἑτάροισιν
Odyssey 1.183	πλέων ἐπὶ οἴνοπα πόντον ἐπʼ ἀλλοθρόους ἀνθρώπους,
Odyssey 1.184	ἐς Τεμέσην μετὰ χαλκόν, ἄγω δʼ αἴθωνα σίδηρον.
Odyssey 1.185	νηῦς δέ μοι ἥδʼ ἕστηκεν ἐπʼ ἀγροῦ νόσφι πόληος,
Odyssey 1.186	ἐν λιμένι Ῥείθρῳ ὑπὸ Νηίῳ ὑλήεντι.
Odyssey 1.187	ξεῖνοι δʼ ἀλλήλων πατρώιοι εὐχόμεθʼ εἶναι
Odyssey 1.188	ἐξ ἀρχῆς, εἴ πέρ τε γέροντʼ εἴρηαι ἐπελθὼν
Odyssey 1.189	Λαέρτην ἥρωα, τὸν οὐκέτι φασὶ πόλινδε
Odyssey 1.190	ἔρχεσθʼ, ἀλλʼ ἀπάνευθεν ἐπʼ ἀγροῦ πήματα πάσχειν
Odyssey 1.191	γρηὶ σὺν ἀμφιπόλῳ, ἥ οἱ βρῶσίν τε πόσιν τε
Odyssey 1.192	παρτιθεῖ, εὖτʼ ἄν μιν κάματος κατὰ γυῖα λάβῃσιν
Odyssey 1.193	ἑρπύζοντʼ ἀνὰ γουνὸν ἀλωῆς οἰνοπέδοιο.
Odyssey 1.194	νῦν δʼ ἦλθον· δὴ γάρ μιν ἔφαντʼ ἐπιδήμιον εἶναι,
Odyssey 1.195	σὸν πατέρʼ· ἀλλά νυ τόν γε θεοὶ βλάπτουσι κελεύθου.
Odyssey 1.196	οὐ γάρ πω τέθνηκεν ἐπὶ χθονὶ δῖος Ὀδυσσεύς,
Odyssey 1.197	ἀλλʼ ἔτι που ζωὸς κατερύκεται εὐρέι πόντῳ
Odyssey 1.198	νήσῳ ἐν ἀμφιρύτῃ, χαλεποὶ δέ μιν ἄνδρες ἔχουσιν
Odyssey 1.199	ἄγριοι, οἵ που κεῖνον ἐρυκανόωσʼ ἀέκοντα.
Odyssey 1.200	αὐτὰρ νῦν τοι ἐγὼ μαντεύσομαι, ὡς ἐνὶ θυμῷ
Odyssey 1.201	ἀθάνατοι βάλλουσι καὶ ὡς τελέεσθαι ὀίω,
Odyssey 1.202	οὔτε τι μάντις ἐὼν οὔτʼ οἰωνῶν σάφα εἰδώς.
Odyssey 1.203	οὔ τοι ἔτι δηρόν γε φίλης ἀπὸ πατρίδος αἴης
Odyssey 1.204	ἔσσεται, οὐδʼ εἴ πέρ τε σιδήρεα δέσματʼ ἔχῃσιν·
Odyssey 1.205	φράσσεται ὥς κε νέηται, ἐπεὶ πολυμήχανός ἐστιν.
Odyssey 1.206	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Odyssey 1.207	εἰ δὴ ἐξ αὐτοῖο τόσος πάϊς εἰς Ὀδυσῆος.
Odyssey 1.208	αἰνῶς μὲν κεφαλήν τε καὶ ὄμματα καλὰ ἔοικας
Odyssey 1.209	κείνῳ, ἐπεὶ θαμὰ τοῖον ἐμισγόμεθʼ ἀλλήλοισιν,
Odyssey 1.210	πρίν γε τὸν ἐς Τροίην ἀναβήμεναι, ἔνθα περ ἄλλοι
Odyssey 1.211	Ἀργείων οἱ ἄριστοι ἔβαν κοίλῃς ἐνὶ νηυσίν·
Odyssey 1.212	ἐκ τοῦ δʼ οὔτʼ Ὀδυσῆα ἐγὼν ἴδον οὔτʼ ἔμʼ ἐκεῖνος.
Odyssey 1.213	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.214	τοιγὰρ ἐγώ τοι, ξεῖνε, μάλʼ ἀτρεκέως ἀγορεύσω.
Odyssey 1.215	μήτηρ μέν τέ μέ φησι τοῦ ἔμμεναι, αὐτὰρ ἐγώ γε
Odyssey 1.216	οὐκ οἶδʼ· οὐ γάρ πώ τις ἑὸν γόνον αὐτὸς ἀνέγνω.
Odyssey 1.217	ὡς δὴ ἐγώ γʼ ὄφελον μάκαρός νύ τευ ἔμμεναι υἱὸς
Odyssey 1.218	ἀνέρος, ὃν κτεάτεσσιν ἑοῖς ἔπι γῆρας ἔτετμε.
Odyssey 1.219	νῦν δʼ ὃς ἀποτμότατος γένετο θνητῶν ἀνθρώπων,
Odyssey 1.220	τοῦ μʼ ἔκ φασι γενέσθαι, ἐπεὶ σύ με τοῦτʼ ἐρεείνεις.
Odyssey 1.221	τὸν δʼ αὖτε προσέειπε θεά, γλαυκῶπις Ἀθήνη·
Odyssey 1.222	οὐ μέν τοι γενεήν γε θεοὶ νώνυμνον ὀπίσσω
Odyssey 1.223	θῆκαν, ἐπεὶ σέ γε τοῖον ἐγείνατο Πηνελόπεια.
Odyssey 1.224	ἀλλʼ ἄγε μοι τόδε εἰπὲ καὶ ἀτρεκέως κατάλεξον·
Odyssey 1.225	τίς δαίς, τίς δὲ ὅμιλος ὅδʼ ἔπλετο; τίπτε δέ σε χρεώ;
Odyssey 1.226	εἰλαπίνη ἠὲ γάμος; ἐπεὶ οὐκ ἔρανος τάδε γʼ ἐστίν·
Odyssey 1.227	ὥς τέ μοι ὑβρίζοντες ὑπερφιάλως δοκέουσι
Odyssey 1.228	δαίνυσθαι κατὰ δῶμα. νεμεσσήσαιτό κεν ἀνὴρ
Odyssey 1.229	αἴσχεα πόλλʼ ὁρόων, ὅς τις πινυτός γε μετέλθοι.
Odyssey 1.230	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.231	ξεῖνʼ, ἐπεὶ ἂρ δὴ ταῦτά μʼ ἀνείρεαι ἠδὲ μεταλλᾷς,
Odyssey 1.232	μέλλεν μέν ποτε οἶκος ὅδʼ ἀφνειὸς καὶ ἀμύμων
Odyssey 1.233	ἔμμεναι, ὄφρʼ ἔτι κεῖνος ἀνὴρ ἐπιδήμιος ἦεν·
Odyssey 1.234	νῦν δʼ ἑτέρως ἐβόλοντο θεοὶ κακὰ μητιόωντες,
Odyssey 1.235	οἳ κεῖνον μὲν ἄιστον ἐποίησαν περὶ πάντων
Odyssey 1.236	ἀνθρώπων, ἐπεὶ οὔ κε θανόντι περ ὧδʼ ἀκαχοίμην,
Odyssey 1.237	εἰ μετὰ οἷς ἑτάροισι δάμη Τρώων ἐνὶ δήμῳ,
Odyssey 1.238	ἠὲ φίλων ἐν χερσίν, ἐπεὶ πόλεμον τολύπευσεν.
Odyssey 1.239	τῷ κέν οἱ τύμβον μὲν ἐποίησαν Παναχαιοί,
Odyssey 1.240	ἠδέ κε καὶ ᾧ παιδὶ μέγα κλέος ἤρατʼ ὀπίσσω.
Odyssey 1.241	νῦν δέ μιν ἀκλειῶς ἅρπυιαι ἀνηρείψαντο·
Odyssey 1.242	οἴχετʼ ἄιστος ἄπυστος, ἐμοὶ δʼ ὀδύνας τε γόους τε
Odyssey 1.243	κάλλιπεν. οὐδέ τι κεῖνον ὀδυρόμενος στεναχίζω
Odyssey 1.244	οἶον, ἐπεί νύ μοι ἄλλα θεοὶ κακὰ κήδεʼ ἔτευξαν.
Odyssey 1.245	ὅσσοι γὰρ νήσοισιν ἐπικρατέουσιν ἄριστοι,
Odyssey 1.246	Δουλιχίῳ τε Σάμῃ τε καὶ ὑλήεντι Ζακύνθῳ,
Odyssey 1.247	ἠδʼ ὅσσοι κραναὴν Ἰθάκην κάτα κοιρανέουσιν,
Odyssey 1.248	τόσσοι μητέρʼ ἐμὴν μνῶνται, τρύχουσι δὲ οἶκον.
Odyssey 1.249	ἡ δʼ οὔτʼ ἀρνεῖται στυγερὸν γάμον οὔτε τελευτὴν
Odyssey 1.250	ποιῆσαι δύναται· τοὶ δὲ φθινύθουσιν ἔδοντες
Odyssey 1.251	οἶκον ἐμόν· τάχα δή με διαρραίσουσι καὶ αὐτόν.
Odyssey 1.252	τὸν δʼ ἐπαλαστήσασα προσηύδα Παλλὰς Ἀθήνη·
Odyssey 1.253	ὢ πόποι, ἦ δὴ πολλὸν ἀποιχομένου Ὀδυσῆος
Odyssey 1.254	δεύῃ, ὅ κε μνηστῆρσιν ἀναιδέσι χεῖρας ἐφείη.
Odyssey 1.255	εἰ γὰρ νῦν ἐλθὼν δόμου ἐν πρώτῃσι θύρῃσι
Odyssey 1.256	σταίη, ἔχων πήληκα καὶ ἀσπίδα καὶ δύο δοῦρε,
Odyssey 1.257	τοῖος ἐὼν οἷόν μιν ἐγὼ τὰ πρῶτʼ ἐνόησα
Odyssey 1.258	οἴκῳ ἐν ἡμετέρῳ πίνοντά τε τερπόμενόν τε,
Odyssey 1.259	ἐξ Ἐφύρης ἀνιόντα παρʼ Ἴλου Μερμερίδαο—
Odyssey 1.260	ᾤχετο γὰρ καὶ κεῖσε θοῆς ἐπὶ νηὸς Ὀδυσσεὺς
Odyssey 1.261	φάρμακον ἀνδροφόνον διζήμενος, ὄφρα οἱ εἴη
Odyssey 1.262	ἰοὺς χρίεσθαι χαλκήρεας· ἀλλʼ ὁ μὲν οὔ οἱ
Odyssey 1.263	δῶκεν, ἐπεί ῥα θεοὺς νεμεσίζετο αἰὲν ἐόντας,
Odyssey 1.264	ἀλλὰ πατήρ οἱ δῶκεν ἐμός· φιλέεσκε γὰρ αἰνῶς—
Odyssey 1.265	τοῖος ἐὼν μνηστῆρσιν ὁμιλήσειεν Ὀδυσσεύς·
Odyssey 1.266	πάντες κʼ ὠκύμοροί τε γενοίατο πικρόγαμοί τε.
Odyssey 1.267	ἀλλʼ ἦ τοι μὲν ταῦτα θεῶν ἐν γούνασι κεῖται,
Odyssey 1.268	ἤ κεν νοστήσας ἀποτίσεται, ἦε καὶ οὐκί,
Odyssey 1.269	οἷσιν ἐνὶ μεγάροισι· σὲ δὲ φράζεσθαι ἄνωγα,
Odyssey 1.270	ὅππως κε μνηστῆρας ἀπώσεαι ἐκ μεγάροιο.
Odyssey 1.271	εἰ δʼ ἄγε νῦν ξυνίει καὶ ἐμῶν ἐμπάζεο μύθων·
Odyssey 1.272	αὔριον εἰς ἀγορὴν καλέσας ἥρωας Ἀχαιοὺς
Odyssey 1.273	μῦθον πέφραδε πᾶσι, θεοὶ δʼ ἐπὶ μάρτυροι ἔστων.
Odyssey 1.274	μνηστῆρας μὲν ἐπὶ σφέτερα σκίδνασθαι ἄνωχθι,
Odyssey 1.275	μητέρα δʼ, εἴ οἱ θυμὸς ἐφορμᾶται γαμέεσθαι,
Odyssey 1.276	ἂψ ἴτω ἐς μέγαρον πατρὸς μέγα δυναμένοιο·
Odyssey 1.277	οἱ δὲ γάμον τεύξουσι καὶ ἀρτυνέουσιν ἔεδνα
Odyssey 1.278	πολλὰ μάλʼ, ὅσσα ἔοικε φίλης ἐπὶ παιδὸς ἕπεσθαι.
Odyssey 1.279	σοὶ δʼ αὐτῷ πυκινῶς ὑποθήσομαι, αἴ κε πίθηαι·
Odyssey 1.280	νῆʼ ἄρσας ἐρέτῃσιν ἐείκοσιν, ἥ τις ἀρίστη,
Odyssey 1.281	ἔρχεο πευσόμενος πατρὸς δὴν οἰχομένοιο,
Odyssey 1.282	ἤν τίς τοι εἴπῃσι βροτῶν, ἢ ὄσσαν ἀκούσῃς
Odyssey 1.283	ἐκ Διός, ἥ τε μάλιστα φέρει κλέος ἀνθρώποισι.
Odyssey 1.284	πρῶτα μὲν ἐς Πύλον ἐλθὲ καὶ εἴρεο Νέστορα δῖον,
Odyssey 1.285	κεῖθεν δὲ Σπάρτηνδε παρὰ ξανθὸν Μενέλαον·
Odyssey 1.286	ὃς γὰρ δεύτατος ἦλθεν Ἀχαιῶν χαλκοχιτώνων.
Odyssey 1.287	εἰ μέν κεν πατρὸς βίοτον καὶ νόστον ἀκούσῃς,
Odyssey 1.288	ἦ τʼ ἂν τρυχόμενός περ ἔτι τλαίης ἐνιαυτόν·
Odyssey 1.289	εἰ δέ κε τεθνηῶτος ἀκούσῃς μηδʼ ἔτʼ ἐόντος,
Odyssey 1.290	νοστήσας δὴ ἔπειτα φίλην ἐς πατρίδα γαῖαν
Odyssey 1.291	σῆμά τέ οἱ χεῦαι καὶ ἐπὶ κτέρεα κτερεΐξαι
Odyssey 1.292	πολλὰ μάλʼ, ὅσσα ἔοικε, καὶ ἀνέρι μητέρα δοῦναι.
Odyssey 1.293	αὐτὰρ ἐπὴν δὴ ταῦτα τελευτήσῃς τε καὶ ἔρξῃς,
Odyssey 1.294	φράζεσθαι δὴ ἔπειτα κατὰ φρένα καὶ κατὰ θυμὸν
Odyssey 1.295	ὅππως κε μνηστῆρας ἐνὶ μεγάροισι τεοῖσι
Odyssey 1.296	κτείνῃς ἠὲ δόλῳ ἢ ἀμφαδόν· οὐδέ τί σε χρὴ
Odyssey 1.297	νηπιάας ὀχέειν, ἐπεὶ οὐκέτι τηλίκος ἐσσι.
Odyssey 1.298	ἢ οὐκ ἀίεις οἷον κλέος ἔλλαβε δῖος Ὀρέστης
Odyssey 1.299	πάντας ἐπʼ ἀνθρώπους, ἐπεὶ ἔκτανε πατροφονῆα,
Odyssey 1.300	Αἴγισθον δολόμητιν, ὅ οἱ πατέρα κλυτὸν ἔκτα;
Odyssey 1.301	καὶ σύ, φίλος, μάλα γάρ σʼ ὁρόω καλόν τε μέγαν τε,
Odyssey 1.302	ἄλκιμος ἔσσʼ, ἵνα τίς σε καὶ ὀψιγόνων ἐὺ εἴπῃ.
Odyssey 1.303	αὐτὰρ ἐγὼν ἐπὶ νῆα θοὴν κατελεύσομαι ἤδη
Odyssey 1.304	ἠδʼ ἑτάρους, οἵ πού με μάλʼ ἀσχαλόωσι μένοντες·
Odyssey 1.305	σοὶ δʼ αὐτῷ μελέτω, καὶ ἐμῶν ἐμπάζεο μύθων.
Odyssey 1.306	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.307	ξεῖνʼ, ἦ τοι μὲν ταῦτα φίλα φρονέων ἀγορεύεις,
Odyssey 1.308	ὥς τε πατὴρ ᾧ παιδί, καὶ οὔ ποτε λήσομαι αὐτῶν.
Odyssey 1.309	ἀλλʼ ἄγε νῦν ἐπίμεινον, ἐπειγόμενός περ ὁδοῖο,
Odyssey 1.310	ὄφρα λοεσσάμενός τε τεταρπόμενός τε φίλον κῆρ,
Odyssey 1.311	δῶρον ἔχων ἐπὶ νῆα κίῃς, χαίρων ἐνὶ θυμῷ,
Odyssey 1.312	τιμῆεν, μάλα καλόν, ὅ τοι κειμήλιον ἔσται
Odyssey 1.313	ἐξ ἐμεῦ, οἷα φίλοι ξεῖνοι ξείνοισι διδοῦσι.
Odyssey 1.314	τὸν δʼ ἠμείβετʼ ἔπειτα θεά, γλαυκῶπις Ἀθήνη·
Odyssey 1.315	μή μʼ ἔτι νῦν κατέρυκε, λιλαιόμενόν περ ὁδοῖο.
Odyssey 1.316	δῶρον δʼ ὅττι κέ μοι δοῦναι φίλον ἦτορ ἀνώγῃ,
Odyssey 1.317	αὖτις ἀνερχομένῳ δόμεναι οἶκόνδε φέρεσθαι,
Odyssey 1.318	καὶ μάλα καλὸν ἑλών· σοὶ δʼ ἄξιον ἔσται ἀμοιβῆς.
Odyssey 1.319	ἡ μὲν ἄρʼ ὣς εἰποῦσʼ ἀπέβη γλαυκῶπις Ἀθήνη,
Odyssey 1.320	ὄρνις δʼ ὣς ἀνόπαια διέπτατο· τῷ δʼ ἐνὶ θυμῷ
Odyssey 1.321	θῆκε μένος καὶ θάρσος, ὑπέμνησέν τέ ἑ πατρὸς
Odyssey 1.322	μᾶλλον ἔτʼ ἢ τὸ πάροιθεν. ὁ δὲ φρεσὶν ᾗσι νοήσας
Odyssey 1.323	θάμβησεν κατὰ θυμόν· ὀίσατο γὰρ θεὸν εἶναι.
Odyssey 1.324	αὐτίκα δὲ μνηστῆρας ἐπῴχετο ἰσόθεος φώς.
Odyssey 1.325	τοῖσι δʼ ἀοιδὸς ἄειδε περικλυτός, οἱ δὲ σιωπῇ
Odyssey 1.326	ἥατʼ ἀκούοντες· ὁ δʼ Ἀχαιῶν νόστον ἄειδε
Odyssey 1.327	λυγρόν, ὃν ἐκ Τροίης ἐπετείλατο Παλλὰς Ἀθήνη.
Odyssey 1.328	τοῦ δʼ ὑπερωιόθεν φρεσὶ σύνθετο θέσπιν ἀοιδὴν
Odyssey 1.329	κούρη Ἰκαρίοιο, περίφρων Πηνελόπεια·
Odyssey 1.330	κλίμακα δʼ ὑψηλὴν κατεβήσετο οἷο δόμοιο,
Odyssey 1.331	οὐκ οἴη, ἅμα τῇ γε καὶ ἀμφίπολοι δύʼ ἕποντο.
Odyssey 1.332	ἡ δʼ ὅτε δὴ μνηστῆρας ἀφίκετο δῖα γυναικῶν,
Odyssey 1.333	στῆ ῥα παρὰ σταθμὸν τέγεος πύκα ποιητοῖο,
Odyssey 1.334	ἄντα παρειάων σχομένη λιπαρὰ κρήδεμνα·
Odyssey 1.335	ἀμφίπολος δʼ ἄρα οἱ κεδνὴ ἑκάτερθε παρέστη.
Odyssey 1.336	δακρύσασα δʼ ἔπειτα προσηύδα θεῖον ἀοιδόν·
Odyssey 1.337	Φήμιε, πολλὰ γὰρ ἄλλα βροτῶν θελκτήρια οἶδας,
Odyssey 1.338	ἔργʼ ἀνδρῶν τε θεῶν τε, τά τε κλείουσιν ἀοιδοί·
Odyssey 1.339	τῶν ἕν γέ σφιν ἄειδε παρήμενος, οἱ δὲ σιωπῇ
Odyssey 1.340	οἶνον πινόντων· ταύτης δʼ ἀποπαύεʼ ἀοιδῆς
Odyssey 1.341	λυγρῆς, ἥ τέ μοι αἰεὶ ἐνὶ στήθεσσι φίλον κῆρ
Odyssey 1.342	τείρει, ἐπεί με μάλιστα καθίκετο πένθος ἄλαστον.
Odyssey 1.343	τοίην γὰρ κεφαλὴν ποθέω μεμνημένη αἰεί,
Odyssey 1.344	ἀνδρός, τοῦ κλέος εὐρὺ καθʼ Ἑλλάδα καὶ μέσον Ἄργος.
Odyssey 1.345	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.346	μῆτερ ἐμή, τί τʼ ἄρα φθονέεις ἐρίηρον ἀοιδὸν
Odyssey 1.347	τέρπειν ὅππῃ οἱ νόος ὄρνυται; οὔ νύ τʼ ἀοιδοὶ
Odyssey 1.348	αἴτιοι, ἀλλά ποθι Ζεὺς αἴτιος, ὅς τε δίδωσιν
Odyssey 1.349	ἀνδράσιν ἀλφηστῇσιν, ὅπως ἐθέλῃσιν, ἑκάστῳ.
Odyssey 1.350	τούτῳ δʼ οὐ νέμεσις Δαναῶν κακὸν οἶτον ἀείδειν·
Odyssey 1.351	τὴν γὰρ ἀοιδὴν μᾶλλον ἐπικλείουσʼ ἄνθρωποι,
Odyssey 1.352	ἥ τις ἀκουόντεσσι νεωτάτη ἀμφιπέληται.
Odyssey 1.353	σοὶ δʼ ἐπιτολμάτω κραδίη καὶ θυμὸς ἀκούειν·
Odyssey 1.354	οὐ γὰρ Ὀδυσσεὺς οἶος ἀπώλεσε νόστιμον ἦμαρ
Odyssey 1.355	ἐν Τροίῃ, πολλοὶ δὲ καὶ ἄλλοι φῶτες ὄλοντο.
Odyssey 1.356	ἀλλʼ εἰς οἶκον ἰοῦσα τὰ σʼ αὐτῆς ἔργα κόμιζε,
Odyssey 1.357	ἱστόν τʼ ἠλακάτην τε, καὶ ἀμφιπόλοισι κέλευε
Odyssey 1.358	ἔργον ἐποίχεσθαι· μῦθος δʼ ἄνδρεσσι μελήσει
Odyssey 1.359	πᾶσι, μάλιστα δʼ ἐμοί· τοῦ γὰρ κράτος ἔστʼ ἐνὶ οἴκῳ.
Odyssey 1.360	ἡ μὲν θαμβήσασα πάλιν οἶκόνδε βεβήκει·
Odyssey 1.361	παιδὸς γὰρ μῦθον πεπνυμένον ἔνθετο θυμῷ.
Odyssey 1.362	ἐς δʼ ὑπερῷʼ ἀναβᾶσα σὺν ἀμφιπόλοισι γυναιξὶ
Odyssey 1.363	κλαῖεν ἔπειτʼ Ὀδυσῆα φίλον πόσιν, ὄφρα οἱ ὕπνον
Odyssey 1.364	ἡδὺν ἐπὶ βλεφάροισι βάλε γλαυκῶπις Ἀθήνη.
Odyssey 1.365	μνηστῆρες δʼ ὁμάδησαν ἀνὰ μέγαρα σκιόεντα,
Odyssey 1.366	πάντες δʼ ἠρήσαντο παραὶ λεχέεσσι κλιθῆναι.
Odyssey 1.367	τοῖσι δὲ Τηλέμαχος πεπνυμένος ἤρχετο μύθων·
Odyssey 1.368	μητρὸς ἐμῆς μνηστῆρες ὑπέρβιον ὕβριν ἔχοντες,
Odyssey 1.369	νῦν μὲν δαινύμενοι τερπώμεθα, μηδὲ βοητὺς
Odyssey 1.370	ἔστω, ἐπεὶ τόδε καλὸν ἀκουέμεν ἐστὶν ἀοιδοῦ
Odyssey 1.371	τοιοῦδʼ οἷος ὅδʼ ἐστί, θεοῖς ἐναλίγκιος αὐδήν.
Odyssey 1.372	ἠῶθεν δʼ ἀγορήνδε καθεζώμεσθα κιόντες
Odyssey 1.373	πάντες, ἵνʼ ὕμιν μῦθον ἀπηλεγέως ἀποείπω,
Odyssey 1.374	ἐξιέναι μεγάρων· ἄλλας δʼ ἀλεγύνετε δαῖτας,
Odyssey 1.375	ὑμὰ κτήματʼ ἔδοντες, ἀμειβόμενοι κατὰ οἴκους.
Odyssey 1.376	εἰ δʼ ὕμιν δοκέει τόδε λωίτερον καὶ ἄμεινον
Odyssey 1.377	ἔμμεναι, ἀνδρὸς ἑνὸς βίοτον νήποινον ὀλέσθαι,
Odyssey 1.378	κείρετʼ· ἐγὼ δὲ θεοὺς ἐπιβώσομαι αἰὲν ἐόντας,
Odyssey 1.379	αἴ κέ ποθι Ζεὺς δῷσι παλίντιτα ἔργα γενέσθαι·
Odyssey 1.380	νήποινοί κεν ἔπειτα δόμων ἔντοσθεν ὄλοισθε.
Odyssey 1.381	ὣς ἔφαθʼ, οἱ δʼ ἄρα πάντες ὀδὰξ ἐν χείλεσι φύντες
Odyssey 1.382	Τηλέμαχον θαύμαζον, ὃ θαρσαλέως ἀγόρευεν.
Odyssey 1.383	τὸν δʼ αὖτʼ Ἀντίνοος προσέφη, Εὐπείθεος υἱός·
Odyssey 1.384	Τηλέμαχʼ, ἦ μάλα δή σε διδάσκουσιν θεοὶ αὐτοὶ
Odyssey 1.385	ὑψαγόρην τʼ ἔμεναι καὶ θαρσαλέως ἀγορεύειν·
Odyssey 1.386	μὴ σέ γʼ ἐν ἀμφιάλῳ Ἰθάκῃ βασιλῆα Κρονίων
Odyssey 1.387	ποιήσειεν, ὅ τοι γενεῇ πατρώιόν ἐστιν.
Odyssey 1.388	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.389	Ἀντίνοʼ, ἦ καί μοι νεμεσήσεαι ὅττι κεν εἴπω;
Odyssey 1.390	καί κεν τοῦτʼ ἐθέλοιμι Διός γε διδόντος ἀρέσθαι.
Odyssey 1.391	ἦ φῂς τοῦτο κάκιστον ἐν ἀνθρώποισι τετύχθαι;
Odyssey 1.392	οὐ μὲν γάρ τι κακὸν βασιλευέμεν· αἶψά τέ οἱ δῶ
Odyssey 1.393	ἀφνειὸν πέλεται καὶ τιμηέστερος αὐτός.
Odyssey 1.394	ἀλλʼ ἦ τοι βασιλῆες Ἀχαιῶν εἰσὶ καὶ ἄλλοι
Odyssey 1.395	πολλοὶ ἐν ἀμφιάλῳ Ἰθάκῃ, νέοι ἠδὲ παλαιοί,
Odyssey 1.396	τῶν κέν τις τόδʼ ἔχῃσιν, ἐπεὶ θάνε δῖος Ὀδυσσεύς·
Odyssey 1.397	αὐτὰρ ἐγὼν οἴκοιο ἄναξ ἔσομʼ ἡμετέροιο
Odyssey 1.398	καὶ δμώων, οὕς μοι ληίσσατο δῖος Ὀδυσσεύς.
Odyssey 1.399	τὸν δʼ αὖτʼ Εὐρύμαχος Πολύβου πάϊς ἀντίον ηὔδα·
Odyssey 1.400	Τηλέμαχʼ, ἦ τοι ταῦτα θεῶν ἐν γούνασι κεῖται,
Odyssey 1.401	ὅς τις ἐν ἀμφιάλῳ Ἰθάκῃ βασιλεύσει Ἀχαιῶν·
Odyssey 1.402	κτήματα δʼ αὐτὸς ἔχοις καὶ δώμασιν οἷσιν ἀνάσσοις.
Odyssey 1.403	μὴ γὰρ ὅ γʼ ἔλθοι ἀνὴρ ὅς τίς σʼ ἀέκοντα βίηφιν
Odyssey 1.404	κτήματʼ ἀπορραίσει, Ἰθάκης ἔτι ναιετοώσης.
Odyssey 1.405	ἀλλʼ ἐθέλω σε, φέριστε, περὶ ξείνοιο ἐρέσθαι,
Odyssey 1.406	ὁππόθεν οὗτος ἀνήρ, ποίης δʼ ἐξ εὔχεται εἶναι
Odyssey 1.407	γαίης, ποῦ δέ νύ οἱ γενεὴ καὶ πατρὶς ἄρουρα.
Odyssey 1.408	ἠέ τινʼ ἀγγελίην πατρὸς φέρει ἐρχομένοιο,
Odyssey 1.409	ἦ ἑὸν αὐτοῦ χρεῖος ἐελδόμενος τόδʼ ἱκάνει;
Odyssey 1.410	οἷον ἀναΐξας ἄφαρ οἴχεται, οὐδʼ ὑπέμεινε
Odyssey 1.411	γνώμεναι· οὐ μὲν γάρ τι κακῷ εἰς ὦπα ἐῴκει.
Odyssey 1.412	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.413	Εὐρύμαχʼ, ἦ τοι νόστος ἀπώλετο πατρὸς ἐμοῖο·
Odyssey 1.414	οὔτʼ οὖν ἀγγελίῃ ἔτι πείθομαι, εἴ ποθεν ἔλθοι,
Odyssey 1.415	οὔτε θεοπροπίης ἐμπάζομαι, ἥν τινα μήτηρ
Odyssey 1.416	ἐς μέγαρον καλέσασα θεοπρόπον ἐξερέηται.
Odyssey 1.417	ξεῖνος δʼ οὗτος ἐμὸς πατρώιος ἐκ Τάφου ἐστίν,
Odyssey 1.418	Μέντης δʼ Ἀγχιάλοιο δαΐφρονος εὔχεται εἶναι
Odyssey 1.419	υἱός, ἀτὰρ Ταφίοισι φιληρέτμοισιν ἀνάσσει.
Odyssey 1.420	ὣς φάτο Τηλέμαχος, φρεσὶ δʼ ἀθανάτην θεὸν ἔγνω.
Odyssey 1.421	οἱ δʼ εἰς ὀρχηστύν τε καὶ ἱμερόεσσαν ἀοιδὴν
Odyssey 1.422	τρεψάμενοι τέρποντο, μένον δʼ ἐπὶ ἕσπερον ἐλθεῖν.
Odyssey 1.423	τοῖσι δὲ τερπομένοισι μέλας ἐπὶ ἕσπερος ἦλθε·
Odyssey 1.424	δὴ τότε κακκείοντες ἔβαν οἶκόνδε ἕκαστος.
Odyssey 1.425	Τηλέμαχος δʼ, ὅθι οἱ θάλαμος περικαλλέος αὐλῆς
Odyssey 1.426	ὑψηλὸς δέδμητο περισκέπτῳ ἐνὶ χώρῳ,
Odyssey 1.427	ἔνθʼ ἔβη εἰς εὐνὴν πολλὰ φρεσὶ μερμηρίζων.
Odyssey 1.428	τῷ δʼ ἄρʼ ἅμʼ αἰθομένας δαΐδας φέρε κεδνὰ ἰδυῖα
Odyssey 1.429	Εὐρύκλειʼ, Ὦπος θυγάτηρ Πεισηνορίδαο,
Odyssey 1.430	τήν ποτε Λαέρτης πρίατο κτεάτεσσιν ἑοῖσιν
Odyssey 1.431	πρωθήβην ἔτʼ ἐοῦσαν, ἐεικοσάβοια δʼ ἔδωκεν,
Odyssey 1.432	ἶσα δέ μιν κεδνῇ ἀλόχῳ τίεν ἐν μεγάροισιν,
Odyssey 1.433	εὐνῇ δʼ οὔ ποτʼ ἔμικτο, χόλον δʼ ἀλέεινε γυναικός·
Odyssey 1.434	ἥ οἱ ἅμʼ αἰθομένας δαΐδας φέρε, καί ἑ μάλιστα
Odyssey 1.435	δμῳάων φιλέεσκε, καὶ ἔτρεφε τυτθὸν ἐόντα.
Odyssey 1.436	ὤιξεν δὲ θύρας θαλάμου πύκα ποιητοῖο,
Odyssey 1.437	ἕζετο δʼ ἐν λέκτρῳ, μαλακὸν δʼ ἔκδυνε χιτῶνα·
Odyssey 1.438	καὶ τὸν μὲν γραίης πυκιμηδέος ἔμβαλε χερσίν.
Odyssey 1.439	ἡ μὲν τὸν πτύξασα καὶ ἀσκήσασα χιτῶνα,
Odyssey 1.440	πασσάλῳ ἀγκρεμάσασα παρὰ τρητοῖσι λέχεσσι
Odyssey 1.441	βῆ ῥʼ ἴμεν ἐκ θαλάμοιο, θύρην δʼ ἐπέρυσσε κορώνῃ
Odyssey 1.442	ἀργυρέῃ, ἐπὶ δὲ κληῖδʼ ἐτάνυσσεν ἱμάντι.
Odyssey 1.443	ἔνθʼ ὅ γε παννύχιος, κεκαλυμμένος οἰὸς ἀώτῳ,
Odyssey 1.444	βούλευε φρεσὶν ᾗσιν ὁδὸν τὴν πέφραδʼ Ἀθήνη.
Odyssey 1.1	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.2	ὤρνυτʼ ἄρʼ ἐξ εὐνῆφιν Ὀδυσσῆος φίλος υἱὸς
Odyssey 1.3	εἵματα ἑσσάμενος, περὶ δὲ ξίφος ὀξὺ θέτʼ ὤμῳ,
Odyssey 1.4	ποσσὶ δʼ ὑπὸ λιπαροῖσιν ἐδήσατο καλὰ πέδιλα,
Odyssey 1.5	βῆ δʼ ἴμεν ἐκ θαλάμοιο θεῷ ἐναλίγκιος ἄντην.
Odyssey 1.6	αἶψα δὲ κηρύκεσσι λιγυφθόγγοισι κέλευσε
Odyssey 1.7	κηρύσσειν ἀγορήνδε κάρη κομόωντας Ἀχαιούς.
Odyssey 1.8	οἱ μὲν ἐκήρυσσον, τοὶ δʼ ἠγείροντο μάλʼ ὦκα.
Odyssey 1.9	αὐτὰρ ἐπεί ῥʼ ἤγερθεν ὁμηγερέες τʼ ἐγένοντο,
Odyssey 1.10	βῆ ῥʼ ἴμεν εἰς ἀγορήν, παλάμῃ δʼ ἔχε χάλκεον ἔγχος,
Odyssey 1.11	οὐκ οἶος, ἅμα τῷ γε δύω κύνες ἀργοὶ ἕποντο.
Odyssey 1.12	θεσπεσίην δʼ ἄρα τῷ γε χάριν κατέχευεν Ἀθήνη.
Odyssey 1.13	τὸν δʼ ἄρα πάντες λαοὶ ἐπερχόμενον θηεῦντο·
Odyssey 1.14	ἕζετο δʼ ἐν πατρὸς θώκῳ, εἶξαν δὲ γέροντες.
Odyssey 1.15	τοῖσι δʼ ἔπειθʼ ἥρως Αἰγύπτιος ἦρχʼ ἀγορεύειν,
Odyssey 1.16	ὃς δὴ γήραϊ κυφὸς ἔην καὶ μυρία ᾔδη.
Odyssey 1.17	καὶ γὰρ τοῦ φίλος υἱὸς ἅμʼ ἀντιθέῳ Ὀδυσῆι
Odyssey 1.18	Ἴλιον εἰς ἐύπωλον ἔβη κοίλῃς ἐνὶ νηυσίν,
Odyssey 1.19	Ἄντιφος αἰχμητής· τὸν δʼ ἄγριος ἔκτανε Κύκλωψ
Odyssey 1.20	ἐν σπῆι γλαφυρῷ, πύματον δʼ ὡπλίσσατο δόρπον.
Odyssey 1.21	τρεῖς δέ οἱ ἄλλοι ἔσαν, καὶ ὁ μὲν μνηστῆρσιν ὁμίλει,
Odyssey 1.22	Εὐρύνομος, δύο δʼ αἰὲν ἔχον πατρώια ἔργα.
Odyssey 1.23	ἀλλʼ οὐδʼ ὣς τοῦ λήθετʼ ὀδυρόμενος καὶ ἀχεύων.
Odyssey 1.24	τοῦ ὅ γε δάκρυ χέων ἀγορήσατο καὶ μετέειπε·
Odyssey 1.25	κέκλυτε δὴ νῦν μευ, Ἰθακήσιοι, ὅττι κεν εἴπω·
Odyssey 1.26	οὔτε ποθʼ ἡμετέρη ἀγορὴ γένετʼ οὔτε θόωκος
Odyssey 1.27	ἐξ οὗ Ὀδυσσεὺς δῖος ἔβη κοίλῃς ἐνὶ νηυσί.
Odyssey 1.28	νῦν δὲ τίς ὧδʼ ἤγειρε; τίνα χρειὼ τόσον ἵκει
Odyssey 1.29	ἠὲ νέων ἀνδρῶν ἢ οἳ προγενέστεροί εἰσιν;
Odyssey 1.30	ἠέ τινʼ ἀγγελίην στρατοῦ ἔκλυεν ἐρχομένοιο,
Odyssey 1.31	ἥν χʼ ἡμῖν σάφα εἴποι, ὅτε πρότερός γε πύθοιτο;
Odyssey 1.32	ἦέ τι δήμιον ἄλλο πιφαύσκεται ἠδʼ ἀγορεύει;
Odyssey 1.33	ἐσθλός μοι δοκεῖ εἶναι, ὀνήμενος. εἴθε οἱ αὐτῷ
Odyssey 1.34	Ζεὺς ἀγαθὸν τελέσειεν, ὅτι φρεσὶν ᾗσι μενοινᾷ.
Odyssey 1.35	ὣς φάτο, χαῖρε δὲ φήμῃ Ὀδυσσῆος φίλος υἱός,
Odyssey 1.36	οὐδʼ ἄρʼ ἔτι δὴν ἧστο, μενοίνησεν δʼ ἀγορεύειν,
Odyssey 1.37	στῆ δὲ μέσῃ ἀγορῇ· σκῆπτρον δέ οἱ ἔμβαλε χειρὶ
Odyssey 1.38	κῆρυξ Πεισήνωρ πεπνυμένα μήδεα εἰδώς.
Odyssey 1.39	πρῶτον ἔπειτα γέροντα καθαπτόμενος προσέειπεν·
Odyssey 1.40	ὦ γέρον, οὐχ ἑκὰς οὗτος ἀνήρ, τάχα δʼ εἴσεαι αὐτός,
Odyssey 1.41	ὃς λαὸν ἤγειρα· μάλιστα δέ μʼ ἄλγος ἱκάνει.
Odyssey 1.42	οὔτε τινʼ ἀγγελίην στρατοῦ ἔκλυον ἐρχομένοιο,
Odyssey 1.43	ἥν χʼ ὑμῖν σάφα εἴπω, ὅτε πρότερός γε πυθοίμην,
Odyssey 1.44	οὔτε τι δήμιον ἄλλο πιφαύσκομαι οὐδʼ ἀγορεύω,
Odyssey 1.45	ἀλλʼ ἐμὸν αὐτοῦ χρεῖος, ὅ μοι κακὰ ἔμπεσεν οἴκῳ
Odyssey 1.46	δοιά· τὸ μὲν πατέρʼ ἐσθλὸν ἀπώλεσα, ὅς ποτʼ ἐν ὑμῖν
Odyssey 1.47	τοίσδεσσιν βασίλευε, πατὴρ δʼ ὣς ἤπιος ἦεν·
Odyssey 1.48	νῦν δʼ αὖ καὶ πολὺ μεῖζον, ὃ δὴ τάχα οἶκον ἅπαντα
Odyssey 1.49	πάγχυ διαρραίσει, βίοτον δʼ ἀπὸ πάμπαν ὀλέσσει.
Odyssey 1.50	μητέρι μοι μνηστῆρες ἐπέχραον οὐκ ἐθελούσῃ,
Odyssey 1.51	τῶν ἀνδρῶν φίλοι υἷες, οἳ ἐνθάδε γʼ εἰσὶν ἄριστοι,
Odyssey 1.52	οἳ πατρὸς μὲν ἐς οἶκον ἀπερρίγασι νέεσθαι
Odyssey 1.53	Ἰκαρίου, ὥς κʼ αὐτὸς ἐεδνώσαιτο θύγατρα,
Odyssey 1.54	δοίη δʼ ᾧ κʼ ἐθέλοι καί οἱ κεχαρισμένος ἔλθοι·
Odyssey 1.55	οἱ δʼ εἰς ἡμέτερον πωλεύμενοι ἤματα πάντα,
Odyssey 1.56	βοῦς ἱερεύοντες καὶ ὄις καὶ πίονας αἶγας
Odyssey 1.57	εἰλαπινάζουσιν πίνουσί τε αἴθοπα οἶνον
Odyssey 1.58	μαψιδίως· τὰ δὲ πολλὰ κατάνεται. οὐ γὰρ ἔπʼ ἀνήρ,
Odyssey 1.59	οἷος Ὀδυσσεὺς ἔσκεν, ἀρὴν ἀπὸ οἴκου ἀμῦναι.
Odyssey 1.60	ἡμεῖς δʼ οὔ νύ τι τοῖοι ἀμυνέμεν· ἦ καὶ ἔπειτα
Odyssey 1.61	λευγαλέοι τʼ ἐσόμεσθα καὶ οὐ δεδαηκότες ἀλκήν.
Odyssey 1.62	ἦ τʼ ἂν ἀμυναίμην, εἴ μοι δύναμίς γε παρείη.
Odyssey 1.63	οὐ γὰρ ἔτʼ ἀνσχετὰ ἔργα τετεύχαται, οὐδʼ ἔτι καλῶς
Odyssey 1.64	οἶκος ἐμὸς διόλωλε. νεμεσσήθητε καὶ αὐτοί,
Odyssey 1.65	ἄλλους τʼ αἰδέσθητε περικτίονας ἀνθρώπους,
Odyssey 1.66	οἳ περιναιετάουσι· θεῶν δʼ ὑποδείσατε μῆνιν,
Odyssey 1.67	μή τι μεταστρέψωσιν ἀγασσάμενοι κακὰ ἔργα.
Odyssey 1.68	λίσσομαι ἠμὲν Ζηνὸς Ὀλυμπίου ἠδὲ Θέμιστος,
Odyssey 1.69	ἥ τʼ ἀνδρῶν ἀγορὰς ἠμὲν λύει ἠδὲ καθίζει·
Odyssey 1.70	σχέσθε, φίλοι, καί μʼ οἶον ἐάσατε πένθεϊ λυγρῷ
Odyssey 1.71	τείρεσθʼ, εἰ μή πού τι πατὴρ ἐμὸς ἐσθλὸς Ὀδυσσεὺς
Odyssey 1.72	δυσμενέων κάκʼ ἔρεξεν ἐυκνήμιδας Ἀχαιούς,
Odyssey 1.73	τῶν μʼ ἀποτινύμενοι κακὰ ῥέζετε δυσμενέοντες,
Odyssey 1.74	τούτους ὀτρύνοντες. ἐμοὶ δέ κε κέρδιον εἴη
Odyssey 1.75	ὑμέας ἐσθέμεναι κειμήλιά τε πρόβασίν τε.
Odyssey 1.76	εἴ χʼ ὑμεῖς γε φάγοιτε, τάχʼ ἄν ποτε καὶ τίσις εἴη·
Odyssey 1.77	τόφρα γὰρ ἂν κατὰ ἄστυ ποτιπτυσσοίμεθα μύθῳ
Odyssey 1.78	χρήματʼ ἀπαιτίζοντες, ἕως κʼ ἀπὸ πάντα δοθείη·
Odyssey 1.79	νῦν δέ μοι ἀπρήκτους ὀδύνας ἐμβάλλετε θυμῷ.
Odyssey 1.80	ὣς φάτο χωόμενος, ποτὶ δὲ σκῆπτρον βάλε γαίῃ
Odyssey 1.81	δάκρυʼ ἀναπρήσας· οἶκτος δʼ ἕλε λαὸν ἅπαντα.
Odyssey 1.82	ἔνθʼ ἄλλοι μὲν πάντες ἀκὴν ἔσαν, οὐδέ τις ἔτλη
Odyssey 1.83	Τηλέμαχον μύθοισιν ἀμείψασθαι χαλεποῖσιν·
Odyssey 1.84	Ἀντίνοος δέ μιν οἶος ἀμειβόμενος προσέειπε·
Odyssey 1.85	Τηλέμαχʼ ὑψαγόρη, μένος ἄσχετε, ποῖον ἔειπες
Odyssey 1.86	ἡμέας αἰσχύνων· ἐθέλοις δέ κε μῶμον ἀνάψαι.
Odyssey 1.87	σοὶ δʼ οὔ τι μνηστῆρες Ἀχαιῶν αἴτιοί εἰσιν,
Odyssey 1.88	ἀλλὰ φίλη μήτηρ, ἥ τοι πέρι κέρδεα οἶδεν.
Odyssey 1.89	ἤδη γὰρ τρίτον ἐστὶν ἔτος, τάχα δʼ εἶσι τέταρτον,
Odyssey 1.90	ἐξ οὗ ἀτέμβει θυμὸν ἐνὶ στήθεσσιν Ἀχαιῶν.
Odyssey 1.91	πάντας μέν ῥʼ ἔλπει καὶ ὑπίσχεται ἀνδρὶ ἑκάστῳ
Odyssey 1.92	ἀγγελίας προϊεῖσα, νόος δέ οἱ ἄλλα μενοινᾷ.
Odyssey 1.93	ἡ δὲ δόλον τόνδʼ ἄλλον ἐνὶ φρεσὶ μερμήριξε·
Odyssey 1.94	στησαμένη μέγαν ἱστὸν ἐνὶ μεγάροισιν ὕφαινε,
Odyssey 1.95	λεπτὸν καὶ περίμετρον· ἄφαρ δʼ ἡμῖν μετέειπε·
Odyssey 1.96	κοῦροι ἐμοὶ μνηστῆρες, ἐπεὶ θάνε δῖος Ὀδυσσεύς,
Odyssey 1.97	μίμνετʼ ἐπειγόμενοι τὸν ἐμὸν γάμον, εἰς ὅ κε φᾶρος
Odyssey 1.98	ἐκτελέσω, μή μοι μεταμώνια νήματʼ ὄληται,
Odyssey 1.99	Λαέρτῃ ἥρωι ταφήιον, εἰς ὅτε κέν μιν
Odyssey 1.100	μοῖρʼ ὀλοὴ καθέλῃσι τανηλεγέος θανάτοιο,
Odyssey 1.101	μή τίς μοι κατὰ δῆμον Ἀχαιϊάδων νεμεσήσῃ.
Odyssey 1.102	αἴ κεν ἄτερ σπείρου κεῖται πολλὰ κτεατίσσας.
Odyssey 1.103	ὣς ἔφαθʼ, ἡμῖν δʼ αὖτʼ ἐπεπείθετο θυμὸς ἀγήνωρ.
Odyssey 1.104	ἔνθα καὶ ἠματίη μὲν ὑφαίνεσκεν μέγαν ἱστόν,
Odyssey 1.105	νύκτας δʼ ἀλλύεσκεν, ἐπεὶ δαΐδας παραθεῖτο.
Odyssey 1.106	ὣς τρίετες μὲν ἔληθε δόλῳ καὶ ἔπειθεν Ἀχαιούς·
Odyssey 1.107	ἀλλʼ ὅτε τέτρατον ἦλθεν ἔτος καὶ ἐπήλυθον ὧραι,
Odyssey 1.108	καὶ τότε δή τις ἔειπε γυναικῶν, ἣ σάφα ᾔδη,
Odyssey 1.109	καὶ τήν γʼ ἀλλύουσαν ἐφεύρομεν ἀγλαὸν ἱστόν.
Odyssey 1.110	ὣς τὸ μὲν ἐξετέλεσσε καὶ οὐκ ἐθέλουσʼ ὑπʼ ἀνάγκης·
Odyssey 1.111	σοὶ δʼ ὧδε μνηστῆρες ὑποκρίνονται, ἵνʼ εἰδῇς
Odyssey 1.112	αὐτὸς σῷ θυμῷ, εἰδῶσι δὲ πάντες Ἀχαιοί·
Odyssey 1.113	μητέρα σὴν ἀπόπεμψον, ἄνωχθι δέ μιν γαμέεσθαι
Odyssey 1.114	τῷ ὅτεῴ τε πατὴρ κέλεται καὶ ἁνδάνει αὐτῇ.
Odyssey 1.115	εἰ δʼ ἔτʼ ἀνιήσει γε πολὺν χρόνον υἷας Ἀχαιῶν,
Odyssey 1.116	τὰ φρονέουσʼ ἀνὰ θυμόν, ὅ οἱ πέρι δῶκεν Ἀθήνη
Odyssey 1.117	ἔργα τʼ ἐπίστασθαι περικαλλέα καὶ φρένας ἐσθλὰς
Odyssey 1.118	κέρδεά θʼ, οἷʼ οὔ πώ τινʼ ἀκούομεν οὐδὲ παλαιῶν,
Odyssey 1.119	τάων αἳ πάρος ἦσαν ἐυπλοκαμῖδες Ἀχαιαί,
Odyssey 1.120	Τυρώ τʼ Ἀλκμήνη τε ἐυστέφανός τε Μυκήνη·
Odyssey 1.121	τάων οὔ τις ὁμοῖα νοήματα Πηνελοπείῃ
Odyssey 1.122	ᾔδη· ἀτὰρ μὲν τοῦτό γʼ ἐναίσιμον οὐκ ἐνόησε.
Odyssey 1.123	τόφρα γὰρ οὖν βίοτόν τε τεὸν καὶ κτήματʼ ἔδονται,
Odyssey 1.124	ὄφρα κε κείνη τοῦτον ἔχῃ νόον, ὅν τινά οἱ νῦν
Odyssey 1.125	ἐν στήθεσσι τιθεῖσι θεοί. μέγα μὲν κλέος αὐτῇ
Odyssey 1.126	ποιεῖτʼ, αὐτὰρ σοί γε ποθὴν πολέος βιότοιο.
Odyssey 1.127	ἡμεῖς δʼ οὔτʼ ἐπὶ ἔργα πάρος γʼ ἴμεν οὔτε πῃ ἄλλῃ,
Odyssey 1.128	πρίν γʼ αὐτὴν γήμασθαι Ἀχαιῶν ᾧ κʼ ἐθέλῃσι.
Odyssey 1.129	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.130	Ἀντίνοʼ, οὔ πως ἔστι δόμων ἀέκουσαν ἀπῶσαι
Odyssey 1.131	ἥ μʼ ἔτεχʼ, ἥ μʼ ἔθρεψε· πατὴρ δʼ ἐμὸς ἄλλοθι γαίης,
Odyssey 1.132	ζώει ὅ γʼ ἦ τέθνηκε· κακὸν δέ με πόλλʼ ἀποτίνειν
Odyssey 1.133	Ἰκαρίῳ, αἴ κʼ αὐτὸς ἑκὼν ἀπὸ μητέρα πέμψω.
Odyssey 1.134	ἐκ γὰρ τοῦ πατρὸς κακὰ πείσομαι, ἄλλα δὲ δαίμων
Odyssey 1.135	δώσει, ἐπεὶ μήτηρ στυγερὰς ἀρήσετʼ ἐρινῦς
Odyssey 1.136	οἴκου ἀπερχομένη· νέμεσις δέ μοι ἐξ ἀνθρώπων
Odyssey 1.137	ἔσσεται· ὣς οὐ τοῦτον ἐγώ ποτε μῦθον ἐνίψω.
Odyssey 1.138	ὑμέτερος δʼ εἰ μὲν θυμὸς νεμεσίζεται αὐτῶν,
Odyssey 1.139	ἔξιτέ μοι μεγάρων, ἄλλας δʼ ἀλεγύνετε δαῖτας
Odyssey 1.140	ὑμὰ κτήματʼ ἔδοντες ἀμειβόμενοι κατὰ οἴκους.
Odyssey 1.141	εἰ δʼ ὑμῖν δοκέει τόδε λωίτερον καὶ ἄμεινον
Odyssey 1.142	ἔμμεναι, ἀνδρὸς ἑνὸς βίοτον νήποινον ὀλέσθαι,
Odyssey 1.143	κείρετʼ· ἐγὼ δὲ θεοὺς ἐπιβώσομαι αἰὲν ἐόντας,
Odyssey 1.144	αἴ κέ ποθι Ζεὺς δῷσι παλίντιτα ἔργα γενέσθαι.
Odyssey 1.145	νήποινοί κεν ἔπειτα δόμων ἔντοσθεν ὄλοισθε.
Odyssey 1.146	ὣς φάτο Τηλέμαχος, τῷ δʼ αἰετὼ εὐρύοπα Ζεὺς
Odyssey 1.147	ὑψόθεν ἐκ κορυφῆς ὄρεος προέηκε πέτεσθαι.
Odyssey 1.148	τὼ δʼ ἕως μέν ῥʼ ἐπέτοντο μετὰ πνοιῇς ἀνέμοιο
Odyssey 1.149	πλησίω ἀλλήλοισι τιταινομένω πτερύγεσσιν·
Odyssey 1.150	ἀλλʼ ὅτε δὴ μέσσην ἀγορὴν πολύφημον ἱκέσθην,
Odyssey 1.151	ἔνθʼ ἐπιδινηθέντε τιναξάσθην πτερὰ πυκνά,
Odyssey 1.152	ἐς δʼ ἰδέτην πάντων κεφαλάς, ὄσσοντο δʼ ὄλεθρον·
Odyssey 1.153	δρυψαμένω δʼ ὀνύχεσσι παρειὰς ἀμφί τε δειρὰς
Odyssey 1.154	δεξιὼ ἤιξαν διά τʼ οἰκία καὶ πόλιν αὐτῶν.
Odyssey 1.155	θάμβησαν δʼ ὄρνιθας, ἐπεὶ ἴδον ὀφθαλμοῖσιν·
Odyssey 1.156	ὥρμηναν δʼ ἀνὰ θυμὸν ἅ περ τελέεσθαι ἔμελλον.
Odyssey 1.157	τοῖσι δὲ καὶ μετέειπε γέρων ἥρως Ἁλιθέρσης
Odyssey 1.158	Μαστορίδης· ὁ γὰρ οἶος ὁμηλικίην ἐκέκαστο
Odyssey 1.159	ὄρνιθας γνῶναι καὶ ἐναίσιμα μυθήσασθαι·
Odyssey 1.160	ὅ σφιν ἐὺ φρονέων ἀγορήσατο καὶ μετέειπε·
Odyssey 1.161	κέκλυτε δὴ νῦν μευ, Ἰθακήσιοι, ὅττι κεν εἴπω·
Odyssey 1.162	μνηστῆρσιν δὲ μάλιστα πιφαυσκόμενος τάδε εἴρω·
Odyssey 1.163	τοῖσιν γὰρ μέγα πῆμα κυλίνδεται· οὐ γὰρ Ὀδυσσεὺς
Odyssey 1.164	δὴν ἀπάνευθε φίλων ὧν ἔσσεται, ἀλλά που ἤδη
Odyssey 1.165	ἐγγὺς ἐὼν τοῖσδεσσι φόνον καὶ κῆρα φυτεύει
Odyssey 1.166	πάντεσσιν· πολέσιν δὲ καὶ ἄλλοισιν κακὸν ἔσται,
Odyssey 1.167	οἳ νεμόμεσθʼ Ἰθάκην ἐυδείελον. ἀλλὰ πολὺ πρὶν
Odyssey 1.168	φραζώμεσθʼ, ὥς κεν καταπαύσομεν· οἱ δὲ καὶ αὐτοὶ
Odyssey 1.169	παυέσθων· καὶ γάρ σφιν ἄφαρ τόδε λώιόν ἐστιν.
Odyssey 1.170	οὐ γὰρ ἀπείρητος μαντεύομαι, ἀλλʼ ἐὺ εἰδώς·
Odyssey 1.171	καὶ γὰρ κείνῳ φημὶ τελευτηθῆναι ἅπαντα,
Odyssey 1.172	ὥς οἱ ἐμυθεόμην, ὅτε Ἴλιον εἰσανέβαινον
Odyssey 1.173	Ἀργεῖοι, μετὰ δέ σφιν ἔβη πολύμητις Ὀδυσσεύς.
Odyssey 1.174	φῆν κακὰ πολλὰ παθόντʼ, ὀλέσαντʼ ἄπο πάντας ἑταίρους,
Odyssey 1.175	ἄγνωστον πάντεσσιν ἐεικοστῷ ἐνιαυτῷ
Odyssey 1.176	οἴκαδʼ ἐλεύσεσθαι· τὰ δὲ δὴ νῦν πάντα τελεῖται.
Odyssey 1.177	τὸν δʼ αὖτʼ Εὐρύμαχος Πολύβου πάϊς ἀντίον ηὔδα·
Odyssey 1.178	ὦ γέρον, εἰ δʼ ἄγε νῦν μαντεύεο σοῖσι τέκεσσιν
Odyssey 1.179	οἴκαδʼ ἰών, μή πού τι κακὸν πάσχωσιν ὀπίσσω·
Odyssey 1.180	ταῦτα δʼ ἐγὼ σέο πολλὸν ἀμείνων μαντεύεσθαι.
Odyssey 1.181	ὄρνιθες δέ τε πολλοὶ ὑπʼ αὐγὰς ἠελίοιο
Odyssey 1.182	φοιτῶσʼ, οὐδέ τε πάντες ἐναίσιμοι· αὐτὰρ Ὀδυσσεὺς
Odyssey 1.183	ὤλετο τῆλʼ, ὡς καὶ σὺ καταφθίσθαι σὺν ἐκείνῳ
Odyssey 1.184	ὤφελες. οὐκ ἂν τόσσα θεοπροπέων ἀγόρευες,
Odyssey 1.185	οὐδέ κε Τηλέμαχον κεχολωμένον ὧδʼ ἀνιείης,
Odyssey 1.186	σῷ οἴκῳ δῶρον ποτιδέγμενος, αἴ κε πόρῃσιν.
Odyssey 1.187	ἀλλʼ ἔκ τοι ἐρέω, τὸ δὲ καὶ τετελεσμένον ἔσται·
Odyssey 1.188	αἴ κε νεώτερον ἄνδρα παλαιά τε πολλά τε εἰδὼς
Odyssey 1.189	παρφάμενος ἐπέεσσιν ἐποτρύνῃς χαλεπαίνειν,
Odyssey 1.190	αὐτῷ μέν οἱ πρῶτον ἀνιηρέστερον ἔσται,
Odyssey 1.191	πρῆξαι δʼ ἔμπης οὔ τι δυνήσεται εἵνεκα τῶνδε·
Odyssey 1.192	σοὶ δέ, γέρον, θωὴν ἐπιθήσομεν, ἥν κʼ ἐνὶ θυμῷ
Odyssey 1.193	τίνων ἀσχάλλῃς· χαλεπὸν δέ τοι ἔσσεται ἄλγος.
Odyssey 1.194	Τηλεμάχῳ δʼ ἐν πᾶσιν ἐγὼν ὑποθήσομαι αὐτός·
Odyssey 1.195	μητέρα ἣν ἐς πατρὸς ἀνωγέτω ἀπονέεσθαι·
Odyssey 1.196	οἱ δὲ γάμον τεύξουσι καὶ ἀρτυνέουσιν ἔεδνα
Odyssey 1.197	πολλὰ μάλʼ, ὅσσα ἔοικε φίλης ἐπὶ παιδὸς ἕπεσθαι.
Odyssey 1.198	οὐ γὰρ πρὶν παύσεσθαι ὀίομαι υἷας Ἀχαιῶν
Odyssey 1.199	μνηστύος ἀργαλέης, ἐπεὶ οὔ τινα δείδιμεν ἔμπης,
Odyssey 1.200	οὔτʼ οὖν Τηλέμαχον μάλα περ πολύμυθον ἐόντα,
Odyssey 1.201	οὔτε θεοπροπίης ἐμπαζόμεθʼ, ἣν σύ, γεραιέ,
Odyssey 1.202	μυθέαι ἀκράαντον, ἀπεχθάνεαι δʼ ἔτι μᾶλλον.
Odyssey 1.203	χρήματα δʼ αὖτε κακῶς βεβρώσεται, οὐδέ ποτʼ ἶσα
Odyssey 1.204	ἔσσεται, ὄφρα κεν ἥ γε διατρίβῃσιν Ἀχαιοὺς
Odyssey 1.205	ὃν γάμον· ἡμεῖς δʼ αὖ ποτιδέγμενοι ἤματα πάντα
Odyssey 1.206	εἵνεκα τῆς ἀρετῆς ἐριδαίνομεν, οὐδὲ μετʼ ἄλλας
Odyssey 1.207	ἐρχόμεθʼ, ἃς ἐπιεικὲς ὀπυιέμεν ἐστὶν ἑκάστῳ.
Odyssey 1.208	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.209	Εὐρύμαχʼ ἠδὲ καὶ ἄλλοι, ὅσοι μνηστῆρες ἀγαυοί,
Odyssey 1.210	ταῦτα μὲν οὐχ ὑμέας ἔτι λίσσομαι οὐδʼ ἀγορεύω·
Odyssey 1.211	ἤδη γὰρ τὰ ἴσασι θεοὶ καὶ πάντες Ἀχαιοί.
Odyssey 1.212	ἀλλʼ ἄγε μοι δότε νῆα θοὴν καὶ εἴκοσʼ ἑταίρους,
Odyssey 1.213	οἵ κέ μοι ἔνθα καὶ ἔνθα διαπρήσσωσι κέλευθον.
Odyssey 1.214	εἶμι γὰρ ἐς Σπάρτην τε καὶ ἐς Πύλον ἠμαθόεντα
Odyssey 1.215	νόστον πευσόμενος πατρὸς δὴν οἰχομένοιο,
Odyssey 1.216	ἤν τίς μοι εἴπῃσι βροτῶν ἢ ὄσσαν ἀκούσω
Odyssey 1.217	ἐκ Διός, ἥ τε μάλιστα φέρει κλέος ἀνθρώποισιν·
Odyssey 1.218	εἰ μέν κεν πατρὸς βίοτον καὶ νόστον ἀκούσω,
Odyssey 1.219	ἦ τʼ ἄν, τρυχόμενός περ, ἔτι τλαίην ἐνιαυτόν·
Odyssey 1.220	εἰ δέ κε τεθνηῶτος ἀκούσω μηδʼ ἔτʼ ἐόντος,
Odyssey 1.221	νοστήσας δὴ ἔπειτα φίλην ἐς πατρίδα γαῖαν
Odyssey 1.222	σῆμά τέ οἱ χεύω καὶ ἐπὶ κτέρεα κτερεΐξω
Odyssey 1.223	πολλὰ μάλʼ, ὅσσα ἔοικε, καὶ ἀνέρι μητέρα δώσω.
Odyssey 1.224	ἦ τοι ὅ γʼ ὣς εἰπὼν κατʼ ἄρʼ ἕζετο, τοῖσι δʼ ἀνέστη
Odyssey 1.225	Μέντωρ, ὅς ῥʼ Ὀδυσῆος ἀμύμονος ἦεν ἑταῖρος,
Odyssey 1.226	καί οἱ ἰὼν ἐν νηυσὶν ἐπέτρεπεν οἶκον ἅπαντα,
Odyssey 1.227	πείθεσθαί τε γέροντι καὶ ἔμπεδα πάντα φυλάσσειν·
Odyssey 1.228	ὅ σφιν ἐὺ φρονέων ἀγορήσατο καὶ μετέειπεν·
Odyssey 1.229	κέκλυτε δὴ νῦν μευ, Ἰθακήσιοι, ὅττι κεν εἴπω·
Odyssey 1.230	μή τις ἔτι πρόφρων ἀγανὸς καὶ ἤπιος ἔστω
Odyssey 1.231	σκηπτοῦχος βασιλεύς, μηδὲ φρεσὶν αἴσιμα εἰδώς,
Odyssey 1.232	ἀλλʼ αἰεὶ χαλεπός τʼ εἴη καὶ αἴσυλα ῥέζοι·
Odyssey 1.233	ὡς οὔ τις μέμνηται Ὀδυσσῆος θείοιο
Odyssey 1.234	λαῶν οἷσιν ἄνασσε, πατὴρ δʼ ὣς ἤπιος ἦεν.
Odyssey 1.235	ἀλλʼ ἦ τοι μνηστῆρας ἀγήνορας οὔ τι μεγαίρω
Odyssey 1.236	ἔρδειν ἔργα βίαια κακορραφίῃσι νόοιο·
Odyssey 1.237	σφὰς γὰρ παρθέμενοι κεφαλὰς κατέδουσι βιαίως
Odyssey 1.238	οἶκον Ὀδυσσῆος, τὸν δʼ οὐκέτι φασὶ νέεσθαι.
Odyssey 1.239	νῦν δʼ ἄλλῳ δήμῳ νεμεσίζομαι, οἷον ἅπαντες
Odyssey 1.240	ἧσθʼ ἄνεῳ, ἀτὰρ οὔ τι καθαπτόμενοι ἐπέεσσι
Odyssey 1.241	παύρους μνηστῆρας καταπαύετε πολλοὶ ἐόντες.
Odyssey 1.242	τὸν δʼ Εὐηνορίδης Λειώκριτος ἀντίον ηὔδα·
Odyssey 1.243	Μέντορ ἀταρτηρέ, φρένας ἠλεέ, ποῖον ἔειπες
Odyssey 1.244	ἡμέας ὀτρύνων καταπαυέμεν. ἀργαλέον δὲ
Odyssey 1.245	ἀνδράσι καὶ πλεόνεσσι μαχήσασθαι περὶ δαιτί.
Odyssey 1.246	εἴ περ γάρ κʼ Ὀδυσεὺς Ἰθακήσιος αὐτὸς ἐπελθὼν
Odyssey 1.247	δαινυμένους κατὰ δῶμα ἑὸν μνηστῆρας ἀγαυοὺς
Odyssey 1.248	ἐξελάσαι μεγάροιο μενοινήσειʼ ἐνὶ θυμῷ,
Odyssey 1.249	οὔ κέν οἱ κεχάροιτο γυνή, μάλα περ χατέουσα,
Odyssey 1.250	ἐλθόντʼ, ἀλλά κεν αὐτοῦ ἀεικέα πότμον ἐπίσποι,
Odyssey 1.251	εἰ πλεόνεσσι μάχοιτο· σὺ δʼ οὐ κατὰ μοῖραν ἔειπες.
Odyssey 1.252	ἀλλʼ ἄγε, λαοὶ μὲν σκίδνασθʼ ἐπὶ ἔργα ἕκαστος,
Odyssey 1.253	τούτῳ δʼ ὀτρυνέει Μέντωρ ὁδὸν ἠδʼ Ἁλιθέρσης,
Odyssey 1.254	οἵ τέ οἱ ἐξ ἀρχῆς πατρώιοί εἰσιν ἑταῖροι.
Odyssey 1.255	ἀλλʼ ὀίω, καὶ δηθὰ καθήμενος ἀγγελιάων
Odyssey 1.256	πεύσεται εἰν Ἰθάκῃ, τελέει δʼ ὁδὸν οὔ ποτε ταύτην.
Odyssey 1.257	ὣς ἄρʼ ἐφώνησεν, λῦσεν δʼ ἀγορὴν αἰψηρήν.
Odyssey 1.258	οἱ μὲν ἄρʼ ἐσκίδναντο ἑὰ πρὸς δώμαθʼ ἕκαστος,
Odyssey 1.259	μνηστῆρες δʼ ἐς δώματʼ ἴσαν θείου Ὀδυσῆος.
Odyssey 1.260	Τηλέμαχος δʼ ἀπάνευθε κιὼν ἐπὶ θῖνα θαλάσσης,
Odyssey 1.261	χεῖρας νιψάμενος πολιῆς ἁλὸς εὔχετʼ Ἀθήνῃ·
Odyssey 1.262	κλῦθί μευ, ὃ χθιζὸς θεὸς ἤλυθες ἡμέτερον δῶ
Odyssey 1.263	καί μʼ ἐν νηὶ κέλευσας ἐπʼ ἠεροειδέα πόντον
Odyssey 1.264	νόστον πευσόμενον πατρὸς δὴν οἰχομένοιο
Odyssey 1.265	ἔρχεσθαι· τὰ δὲ πάντα διατρίβουσιν Ἀχαιοί,
Odyssey 1.266	μνηστῆρες δὲ μάλιστα κακῶς ὑπερηνορέοντες.
Odyssey 1.267	ὣς ἔφατʼ εὐχόμενος, σχεδόθεν δέ οἱ ἦλθεν Ἀθήνη,
Odyssey 1.268	Μέντορι εἰδομένη ἠμὲν δέμας ἠδὲ καὶ αὐδήν,
Odyssey 1.269	καί μιν φωνήσασʼ ἔπεα πτερόεντα προσηύδα·
Odyssey 1.270	Τηλέμαχʼ, οὐδʼ ὄπιθεν κακὸς ἔσσεαι οὐδʼ ἀνοήμων,
Odyssey 1.271	εἰ δή τοι σοῦ πατρὸς ἐνέστακται μένος ἠύ,
Odyssey 1.272	οἷος κεῖνος ἔην τελέσαι ἔργον τε ἔπος τε·
Odyssey 1.273	οὔ τοι ἔπειθʼ ἁλίη ὁδὸς ἔσσεται οὐδʼ ἀτέλεστος.
Odyssey 1.274	εἰ δʼ οὐ κείνου γʼ ἐσσὶ γόνος καὶ Πηνελοπείης,
Odyssey 1.275	οὐ σέ γʼ ἔπειτα ἔολπα τελευτήσειν, ἃ μενοινᾷς.
Odyssey 1.276	παῦροι γάρ τοι παῖδες ὁμοῖοι πατρὶ πέλονται,
Odyssey 1.277	οἱ πλέονες κακίους, παῦροι δέ τε πατρὸς ἀρείους.
Odyssey 1.278	ἀλλʼ ἐπεὶ οὐδʼ ὄπιθεν κακὸς ἔσσεαι οὐδʼ ἀνοήμων,
Odyssey 1.279	οὐδέ σε πάγχυ γε μῆτις Ὀδυσσῆος προλέλοιπεν,
Odyssey 1.280	ἐλπωρή τοι ἔπειτα τελευτῆσαι τάδε ἔργα.
Odyssey 1.281	τῶ νῦν μνηστήρων μὲν ἔα βουλήν τε νόον τε
Odyssey 1.282	ἀφραδέων, ἐπεὶ οὔ τι νοήμονες οὐδὲ δίκαιοι·
Odyssey 1.283	οὐδέ τι ἴσασιν θάνατον καὶ κῆρα μέλαιναν,
Odyssey 1.284	ὃς δή σφι σχεδόν ἐστιν, ἐπʼ ἤματι πάντας ὀλέσθαι.
Odyssey 1.285	σοὶ δʼ ὁδὸς οὐκέτι δηρὸν ἀπέσσεται ἣν σὺ μενοινᾷς·
Odyssey 1.286	τοῖος γάρ τοι ἑταῖρος ἐγὼ πατρώιός εἰμι,
Odyssey 1.287	ὅς τοι νῆα θοὴν στελέω καὶ ἅμʼ ἕψομαι αὐτός.
Odyssey 1.288	ἀλλὰ σὺ μὲν πρὸς δώματʼ ἰὼν μνηστῆρσιν ὁμίλει,
Odyssey 1.289	ὅπλισσόν τʼ ἤια καὶ ἄγγεσιν ἄρσον ἅπαντα,
Odyssey 1.290	οἶνον ἐν ἀμφιφορεῦσι, καὶ ἄλφιτα, μυελὸν ἀνδρῶν,
Odyssey 1.291	δέρμασιν ἐν πυκινοῖσιν· ἐγὼ δʼ ἀνὰ δῆμον ἑταίρους
Odyssey 1.292	αἶψʼ ἐθελοντῆρας συλλέξομαι. εἰσὶ δὲ νῆες
Odyssey 1.293	πολλαὶ ἐν ἀμφιάλῳ Ἰθάκῃ, νέαι ἠδὲ παλαιαί·
Odyssey 1.294	τάων μέν τοι ἐγὼν ἐπιόψομαι ἥ τις ἀρίστη,
Odyssey 1.295	ὦκα δʼ ἐφοπλίσσαντες ἐνήσομεν εὐρέι πόντῳ.
Odyssey 1.296	ὣς φάτʼ Ἀθηναίη κούρη Διός· οὐδʼ ἄρʼ ἔτι δὴν
Odyssey 1.297	Τηλέμαχος παρέμιμνεν, ἐπεὶ θεοῦ ἔκλυεν αὐδήν.
Odyssey 1.298	βῆ δʼ ἰέναι πρὸς δῶμα, φίλον τετιημένος ἦτορ,
Odyssey 1.299	εὗρε δʼ ἄρα μνηστῆρας ἀγήνορας ἐν μεγάροισιν,
Odyssey 1.300	αἶγας ἀνιεμένους σιάλους θʼ εὕοντας ἐν αὐλῇ.
Odyssey 1.301	Ἀντίνοος δʼ ἰθὺς γελάσας κίε Τηλεμάχοιο,
Odyssey 1.302	ἔν τʼ ἄρα οἱ φῦ χειρί, ἔπος τʼ ἔφατʼ ἔκ τʼ ὀνόμαζε·
Odyssey 1.303	Τηλέμαχʼ ὑψαγόρη, μένος ἄσχετε, μή τί τοι ἄλλο
Odyssey 1.304	ἐν στήθεσσι κακὸν μελέτω ἔργον τε ἔπος τε,
Odyssey 1.305	ἀλλά μοι ἐσθιέμεν καὶ πινέμεν, ὡς τὸ πάρος περ.
Odyssey 1.306	ταῦτα δέ τοι μάλα πάντα τελευτήσουσιν Ἀχαιοί,
Odyssey 1.307	νῆα καὶ ἐξαίτους ἐρέτας, ἵνα θᾶσσον ἵκηαι
Odyssey 1.308	ἐς Πύλον ἠγαθέην μετʼ ἀγαυοῦ πατρὸς ἀκουήν.
Odyssey 1.309	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.310	Ἀντίνοʼ, οὔ πως ἔστιν ὑπερφιάλοισι μεθʼ ὑμῖν
Odyssey 1.311	δαίνυσθαί τʼ ἀκέοντα καὶ εὐφραίνεσθαι ἕκηλον.
Odyssey 1.312	ἦ οὐχ ἅλις ὡς τὸ πάροιθεν ἐκείρετε πολλὰ καὶ ἐσθλὰ
Odyssey 1.313	κτήματʼ ἐμά, μνηστῆρες, ἐγὼ δʼ ἔτι νήπιος ἦα;
Odyssey 1.314	νῦν δʼ ὅτε δὴ μέγας εἰμὶ καὶ ἄλλων μῦθον ἀκούων
Odyssey 1.315	πυνθάνομαι, καὶ δή μοι ἀέξεται ἔνδοθι θυμός,
Odyssey 1.316	πειρήσω, ὥς κʼ ὔμμι κακὰς ἐπὶ κῆρας ἰήλω,
Odyssey 1.317	ἠὲ Πύλονδʼ ἐλθών, ἢ αὐτοῦ τῷδʼ ἐνὶ δήμῳ.
Odyssey 1.318	εἶμι μέν, οὐδʼ ἁλίη ὁδὸς ἔσσεται ἣν ἀγορεύω,
Odyssey 1.319	ἔμπορος· οὐ γὰρ νηὸς ἐπήβολος οὐδʼ ἐρετάων
Odyssey 1.320	γίγνομαι· ὥς νύ που ὔμμιν ἐείσατο κέρδιον εἶναι.
Odyssey 1.321	ἦ ῥα, καὶ ἐκ χειρὸς χεῖρα σπάσατʼ Ἀντινόοιο
Odyssey 1.322	ῥεῖα· μνηστῆρες δὲ δόμον κάτα δαῖτα πένοντο.
Odyssey 1.323	οἱ δʼ ἐπελώβευον καὶ ἐκερτόμεον ἐπέεσσιν.
Odyssey 1.324	ὧδε δέ τις εἴπεσκε νέων ὑπερηνορεόντων·
Odyssey 1.325	ἦ μάλα Τηλέμαχος φόνον ἡμῖν μερμηρίζει.
Odyssey 1.326	ἤ τινας ἐκ Πύλου ἄξει ἀμύντορας ἠμαθόεντος
Odyssey 1.327	ἢ ὅ γε καὶ Σπάρτηθεν, ἐπεί νύ περ ἵεται αἰνῶς·
Odyssey 1.328	ἠὲ καὶ εἰς Ἐφύρην ἐθέλει, πίειραν ἄρουραν,
Odyssey 1.329	ἐλθεῖν, ὄφρʼ ἔνθεν θυμοφθόρα φάρμακʼ ἐνείκῃ,
Odyssey 1.330	ἐν δὲ βάλῃ κρητῆρι καὶ ἡμέας πάντας ὀλέσσῃ.
Odyssey 1.331	ἄλλος δʼ αὖτʼ εἴπεσκε νέων ὑπερηνορεόντων·
Odyssey 1.332	τίς δʼ οἶδʼ, εἴ κε καὶ αὐτὸς ἰὼν κοίλης ἐπὶ νηὸς
Odyssey 1.333	τῆλε φίλων ἀπόληται ἀλώμενος ὥς περ Ὀδυσσεύς;
Odyssey 1.334	οὕτω κεν καὶ μᾶλλον ὀφέλλειεν πόνον ἄμμιν·
Odyssey 1.335	κτήματα γάρ κεν πάντα δασαίμεθα, οἰκία δʼ αὖτε
Odyssey 1.336	τούτου μητέρι δοῖμεν ἔχειν ἠδʼ ὅς τις ὀπυίοι.
Odyssey 1.337	ὣς φάν, ὁ δʼ ὑψόροφον θάλαμον κατεβήσετο πατρὸς
Odyssey 1.338	εὐρύν, ὅθι νητὸς χρυσὸς καὶ χαλκὸς ἔκειτο
Odyssey 1.339	ἐσθής τʼ ἐν χηλοῖσιν ἅλις τʼ ἐυῶδες ἔλαιον·
Odyssey 1.340	ἐν δὲ πίθοι οἴνοιο παλαιοῦ ἡδυπότοιο
Odyssey 1.341	ἕστασαν, ἄκρητον θεῖον ποτὸν ἐντὸς ἔχοντες,
Odyssey 1.342	ἑξείης ποτὶ τοῖχον ἀρηρότες, εἴ ποτʼ Ὀδυσσεὺς
Odyssey 1.343	οἴκαδε νοστήσειε καὶ ἄλγεα πολλὰ μογήσας.
Odyssey 1.344	κληισταὶ δʼ ἔπεσαν σανίδες πυκινῶς ἀραρυῖαι,
Odyssey 1.345	δικλίδες· ἐν δὲ γυνὴ ταμίη νύκτας τε καὶ ἦμαρ
Odyssey 1.346	ἔσχʼ, ἣ πάντʼ ἐφύλασσε νόου πολυϊδρείῃσιν,
Odyssey 1.347	Εὐρύκλειʼ, Ὦπος θυγάτηρ Πεισηνορίδαο.
Odyssey 1.348	τὴν τότε Τηλέμαχος προσέφη θαλαμόνδε καλέσσας·
Odyssey 1.349	μαῖʼ, ἄγε δή μοι οἶνον ἐν ἀμφιφορεῦσιν ἄφυσσον
Odyssey 1.350	ἡδύν, ὅτις μετὰ τὸν λαρώτατος ὃν σὺ φυλάσσεις
Odyssey 1.351	κεῖνον ὀιομένη τὸν κάμμορον, εἴ ποθεν ἔλθοι
Odyssey 1.352	διογενὴς Ὀδυσεὺς θάνατον καὶ κῆρας ἀλύξας.
Odyssey 1.353	δώδεκα δʼ ἔμπλησον καὶ πώμασιν ἄρσον ἅπαντας.
Odyssey 1.354	ἐν δέ μοι ἄλφιτα χεῦον ἐϋρραφέεσσι δοροῖσιν·
Odyssey 1.355	εἴκοσι δʼ ἔστω μέτρα μυληφάτου ἀλφίτου ἀκτῆς.
Odyssey 1.356	αὐτὴ δʼ οἴη ἴσθι· τὰ δʼ ἁθρόα πάντα τετύχθω·
Odyssey 1.357	ἑσπέριος γὰρ ἐγὼν αἱρήσομαι, ὁππότε κεν δὴ
Odyssey 1.358	μήτηρ εἰς ὑπερῷʼ ἀναβῇ κοίτου τε μέδηται.
Odyssey 1.359	εἶμι γὰρ ἐς Σπάρτην τε καὶ ἐς Πύλον ἠμαθόεντα
Odyssey 1.360	νόστον πευσόμενος πατρὸς φίλου, ἤν που ἀκούσω.
Odyssey 1.361	ὣς φάτο, κώκυσεν δὲ φίλη τροφὸς Εὐρύκλεια,
Odyssey 1.362	καί ῥʼ ὀλοφυρομένη ἔπεα πτερόεντα προσηύδα·
Odyssey 1.363	τίπτε δέ τοι, φίλε τέκνον, ἐνὶ φρεσὶ τοῦτο νόημα
Odyssey 1.364	ἔπλετο; πῇ δʼ ἐθέλεις ἰέναι πολλὴν ἐπὶ γαῖαν
Odyssey 1.365	μοῦνος ἐὼν ἀγαπητός; ὁ δʼ ὤλετο τηλόθι πάτρης
Odyssey 1.366	διογενὴς Ὀδυσεὺς ἀλλογνώτῳ ἐνὶ δήμῳ.
Odyssey 1.367	οἱ δέ τοι αὐτίκʼ ἰόντι κακὰ φράσσονται ὀπίσσω,
Odyssey 1.368	ὥς κε δόλῳ φθίῃς, τάδε δʼ αὐτοὶ πάντα δάσονται.
Odyssey 1.369	ἀλλὰ μένʼ αὖθʼ ἐπὶ σοῖσι καθήμενος· οὐδέ τί σε χρὴ
Odyssey 1.370	πόντον ἐπʼ ἀτρύγετον κακὰ πάσχειν οὐδʼ ἀλάλησθαι.
Odyssey 1.371	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.372	θάρσει, μαῖʼ, ἐπεὶ οὔ τοι ἄνευ θεοῦ ἥδε γε βουλή.
Odyssey 1.373	ἀλλʼ ὄμοσον μὴ μητρὶ φίλῃ τάδε μυθήσασθαι,
Odyssey 1.374	πρίν γʼ ὅτʼ ἂν ἑνδεκάτη τε δυωδεκάτη τε γένηται,
Odyssey 1.375	ἢ αὐτὴν ποθέσαι καὶ ἀφορμηθέντος ἀκοῦσαι,
Odyssey 1.376	ὡς ἂν μὴ κλαίουσα κατὰ χρόα καλὸν ἰάπτῃ.
Odyssey 1.377	ὣς ἄρʼ ἔφη, γρῆυς δὲ θεῶν μέγαν ὅρκον ἀπώμνυ.
Odyssey 1.378	αὐτὰρ ἐπεί ῥʼ ὄμοσέν τε τελεύτησέν τε τὸν ὅρκον,
Odyssey 1.379	αὐτίκʼ ἔπειτά οἱ οἶνον ἐν ἀμφιφορεῦσιν ἄφυσσεν,
Odyssey 1.380	ἐν δέ οἱ ἄλφιτα χεῦεν ἐϋρραφέεσσι δοροῖσι.
Odyssey 1.381	Τηλέμαχος δʼ ἐς δώματʼ ἰὼν μνηστῆρσιν ὁμίλει.
Odyssey 1.382	ἔνθʼ αὖτʼ ἄλλʼ ἐνόησε θεά, γλαυκῶπις Ἀθήνη.
Odyssey 1.383	Τηλεμάχῳ ἐικυῖα κατὰ πτόλιν ᾤχετο πάντῃ,
Odyssey 1.384	καί ῥα ἑκάστῳ φωτὶ παρισταμένη φάτο μῦθον,
Odyssey 1.385	ἑσπερίους δʼ ἐπὶ νῆα θοὴν ἀγέρεσθαι ἀνώγει.
Odyssey 1.386	ἡ δʼ αὖτε Φρονίοιο Νοήμονα φαίδιμον υἱὸν
Odyssey 1.387	ᾔτεε νῆα θοήν· ὁ δέ οἱ πρόφρων ὑπέδεκτο.
Odyssey 1.388	δύσετό τʼ ἠέλιος σκιόωντό τε πᾶσαι ἀγυιαί,
Odyssey 1.389	καὶ τότε νῆα θοὴν ἅλαδʼ εἴρυσε, πάντα δʼ ἐν αὐτῇ
Odyssey 1.390	ὅπλʼ ἐτίθει, τά τε νῆες ἐύσσελμοι φορέουσι.
Odyssey 1.391	στῆσε δʼ ἐπʼ ἐσχατιῇ λιμένος, περὶ δʼ ἐσθλοὶ ἑταῖροι
Odyssey 1.392	ἁθρόοι ἠγερέθοντο· θεὰ δʼ ὤτρυνεν ἕκαστον.
Odyssey 1.393	ἔνθʼ αὖτʼ ἄλλʼ ἐνόησε θεά, γλαυκῶπις Ἀθήνη.
Odyssey 1.394	βῆ ῥʼ ἰέναι πρὸς δώματʼ Ὀδυσσῆος θείοιο·
Odyssey 1.395	ἔνθα μνηστήρεσσιν ἐπὶ γλυκὺν ὕπνον ἔχευε,
Odyssey 1.396	πλάζε δὲ πίνοντας, χειρῶν δʼ ἔκβαλλε κύπελλα.
Odyssey 1.397	οἱ δʼ εὕδειν ὤρνυντο κατὰ πτόλιν, οὐδʼ ἄρʼ ἔτι δὴν
Odyssey 1.398	ἥατʼ, ἐπεί σφισιν ὕπνος ἐπὶ βλεφάροισιν ἔπιπτεν.
Odyssey 1.399	αὐτὰρ Τηλέμαχον προσέφη γλαυκῶπις Ἀθήνη
Odyssey 1.400	ἐκπροκαλεσσαμένη μεγάρων ἐὺ ναιεταόντων,
Odyssey 1.401	Μέντορι εἰδομένη ἠμὲν δέμας ἠδὲ καὶ αὐδήν·
Odyssey 1.402	Τηλέμαχʼ, ἤδη μέν τοι ἐυκνήμιδες ἑταῖροι
Odyssey 1.403	ἥατʼ ἐπήρετμοι τὴν σὴν ποτιδέγμενοι ὁρμήν·
Odyssey 1.404	ἀλλʼ ἴομεν, μὴ δηθὰ διατρίβωμεν ὁδοῖο.
Odyssey 1.405	ὣς ἄρα φωνήσασʼ ἡγήσατο Παλλὰς Ἀθήνη
Odyssey 1.406	καρπαλίμως· ὁ δʼ ἔπειτα μετʼ ἴχνια βαῖνε θεοῖο.
Odyssey 1.407	αὐτὰρ ἐπεί ῥʼ ἐπὶ νῆα κατήλυθον ἠδὲ θάλασσαν,
Odyssey 1.408	εὗρον ἔπειτʼ ἐπὶ θινὶ κάρη κομόωντας ἑταίρους.
Odyssey 1.409	τοῖσι δὲ καὶ μετέειφʼ ἱερὴ ἲς Τηλεμάχοιο·
Odyssey 1.410	δεῦτε, φίλοι, ἤια φερώμεθα· πάντα γὰρ ἤδη
Odyssey 1.411	ἁθρόʼ ἐνὶ μεγάρῳ. μήτηρ δʼ ἐμὴ οὔ τι πέπυσται,
Odyssey 1.412	οὐδʼ ἄλλαι δμωαί, μία δʼ οἴη μῦθον ἄκουσεν.
Odyssey 1.413	ὣς ἄρα φωνήσας ἡγήσατο, τοὶ δʼ ἅμʼ ἕποντο.
Odyssey 1.414	οἱ δʼ ἄρα πάντα φέροντες ἐυσσέλμῳ ἐπὶ νηὶ
Odyssey 1.415	κάτθεσαν, ὡς ἐκέλευσεν Ὀδυσσῆος φίλος υἱός.
Odyssey 1.416	ἂν δʼ ἄρα Τηλέμαχος νηὸς βαῖνʼ, ἦρχε δʼ Ἀθήνη,
Odyssey 1.417	νηὶ δʼ ἐνὶ πρυμνῇ κατʼ ἄρʼ ἕζετο· ἄγχι δʼ ἄρʼ αὐτῆς
Odyssey 1.418	ἕζετο Τηλέμαχος. τοὶ δὲ πρυμνήσιʼ ἔλυσαν,
Odyssey 1.419	ἂν δὲ καὶ αὐτοὶ βάντες ἐπὶ κληῖσι καθῖζον.
Odyssey 1.420	τοῖσιν δʼ ἴκμενον οὖρον ἵει γλαυκῶπις Ἀθήνη,
Odyssey 1.421	ἀκραῆ Ζέφυρον, κελάδοντʼ ἐπὶ οἴνοπα πόντον.
Odyssey 1.422	Τηλέμαχος δʼ ἑτάροισιν ἐποτρύνας ἐκέλευσεν
Odyssey 1.423	ὅπλων ἅπτεσθαι· τοὶ δʼ ὀτρύνοντος ἄκουσαν.
Odyssey 1.424	ἱστὸν δʼ εἰλάτινον κοίλης ἔντοσθε μεσόδμης
Odyssey 1.425	στῆσαν ἀείραντες, κατὰ δὲ προτόνοισιν ἔδησαν,
Odyssey 1.426	ἕλκον δʼ ἱστία λευκὰ ἐυστρέπτοισι βοεῦσιν.
Odyssey 1.427	ἔπρησεν δʼ ἄνεμος μέσον ἱστίον, ἀμφὶ δὲ κῦμα
Odyssey 1.428	στείρῃ πορφύρεον μεγάλʼ ἴαχε νηὸς ἰούσης·
Odyssey 1.429	ἡ δʼ ἔθεεν κατὰ κῦμα διαπρήσσουσα κέλευθον.
Odyssey 1.430	δησάμενοι δʼ ἄρα ὅπλα θοὴν ἀνὰ νῆα μέλαιναν
Odyssey 1.431	στήσαντο κρητῆρας ἐπιστεφέας οἴνοιο,
Odyssey 1.432	λεῖβον δʼ ἀθανάτοισι θεοῖς αἰειγενέτῃσιν,
Odyssey 1.433	ἐκ πάντων δὲ μάλιστα Διὸς γλαυκώπιδι κούρῃ.
Odyssey 1.434	παννυχίη μέν ῥʼ ἥ γε καὶ ἠῶ πεῖρε κέλευθον.
Odyssey 1.1	Ἠέλιος δʼ ἀνόρουσε, λιπὼν περικαλλέα λίμνην,
Odyssey 1.2	οὐρανὸν ἐς πολύχαλκον, ἵνʼ ἀθανάτοισι φαείνοι
Odyssey 1.3	καὶ θνητοῖσι βροτοῖσιν ἐπὶ ζείδωρον ἄρουραν·
Odyssey 1.4	οἱ δὲ Πύλον, Νηλῆος ἐυκτίμενον πτολίεθρον,
Odyssey 1.5	ἷξον· τοὶ δʼ ἐπὶ θινὶ θαλάσσης ἱερὰ ῥέζον,
Odyssey 1.6	ταύρους παμμέλανας, ἐνοσίχθονι κυανοχαίτῃ.
Odyssey 1.7	ἐννέα δʼ ἕδραι ἔσαν, πεντακόσιοι δʼ ἐν ἑκάστῃ
Odyssey 1.8	ἥατο καὶ προύχοντο ἑκάστοθι ἐννέα ταύρους.
Odyssey 1.9	εὖθʼ οἱ σπλάγχνα πάσαντο, θεῷ δʼ ἐπὶ μηρίʼ ἔκαιον,
Odyssey 1.10	οἱ δʼ ἰθὺς κατάγοντο ἰδʼ ἱστία νηὸς ἐίσης
Odyssey 1.11	στεῖλαν ἀείραντες, τὴν δʼ ὥρμισαν, ἐκ δʼ ἔβαν αὐτοί·
Odyssey 1.12	ἐκ δʼ ἄρα Τηλέμαχος νηὸς βαῖνʼ, ἦρχε δʼ Ἀθήνη.
Odyssey 1.13	τὸν προτέρη προσέειπε θεά, γλαυκῶπις Ἀθήνη·
Odyssey 1.14	Τηλέμαχʼ, οὐ μέν σε χρὴ ἔτʼ αἰδοῦς, οὐδʼ ἠβαιόν·
Odyssey 1.15	τοὔνεκα γὰρ καὶ πόντον ἐπέπλως, ὄφρα πύθηαι
Odyssey 1.16	πατρός, ὅπου κύθε γαῖα καὶ ὅν τινα πότμον ἐπέσπεν.
Odyssey 1.17	ἀλλʼ ἄγε νῦν ἰθὺς κίε Νέστορος ἱπποδάμοιο·
Odyssey 1.18	εἴδομεν ἥν τινα μῆτιν ἐνὶ στήθεσσι κέκευθε.
Odyssey 1.19	λίσσεσθαι δέ μιν αὐτός, ὅπως νημερτέα εἴπῃ·
Odyssey 1.20	ψεῦδος δʼ οὐκ ἐρέει· μάλα γὰρ πεπνυμένος ἐστί.
Odyssey 1.21	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.22	Μέντορ, πῶς τʼ ἄρʼ ἴω; πῶς τʼ ἂρ προσπτύξομαι αὐτόν;
Odyssey 1.23	οὐδέ τί πω μύθοισι πεπείρημαι πυκινοῖσιν·
Odyssey 1.24	αἰδὼς δʼ αὖ νέον ἄνδρα γεραίτερον ἐξερέεσθαι.
Odyssey 1.25	τὸν δʼ αὖτε προσέειπε θεά, γλαυκῶπις Ἀθήνη·
Odyssey 1.26	Τηλέμαχʼ, ἄλλα μὲν αὐτὸς ἐνὶ φρεσὶ σῇσι νοήσεις,
Odyssey 1.27	ἄλλα δὲ καὶ δαίμων ὑποθήσεται· οὐ γὰρ ὀίω
Odyssey 1.28	οὔ σε θεῶν ἀέκητι γενέσθαι τε τραφέμεν τε.
Odyssey 1.29	ὣς ἄρα φωνήσασʼ ἡγήσατο Παλλὰς Ἀθήνη
Odyssey 1.30	καρπαλίμως· ὁ δʼ ἔπειτα μετʼ ἴχνια βαῖνε θεοῖο.
Odyssey 1.31	ἷξον δʼ ἐς Πυλίων ἀνδρῶν ἄγυρίν τε καὶ ἕδρας,
Odyssey 1.32	ἔνθʼ ἄρα Νέστωρ ἧστο σὺν υἱάσιν, ἀμφὶ δʼ ἑταῖροι
Odyssey 1.33	δαῖτʼ ἐντυνόμενοι κρέα τʼ ὤπτων ἄλλα τʼ ἔπειρον.
Odyssey 1.34	οἱ δʼ ὡς οὖν ξείνους ἴδον, ἁθρόοι ἦλθον ἅπαντες,
Odyssey 1.35	χερσίν τʼ ἠσπάζοντο καὶ ἑδριάασθαι ἄνωγον.
Odyssey 1.36	πρῶτος Νεστορίδης Πεισίστρατος ἐγγύθεν ἐλθὼν
Odyssey 1.37	ἀμφοτέρων ἕλε χεῖρα καὶ ἵδρυσεν παρὰ δαιτὶ
Odyssey 1.38	κώεσιν ἐν μαλακοῖσιν ἐπὶ ψαμάθοις ἁλίῃσιν
Odyssey 1.39	πάρ τε κασιγνήτῳ Θρασυμήδεϊ καὶ πατέρι ᾧ·
Odyssey 1.40	δῶκε δʼ ἄρα σπλάγχνων μοίρας, ἐν δʼ οἶνον ἔχευεν
Odyssey 1.41	χρυσείῳ δέπαϊ· δειδισκόμενος δὲ προσηύδα
Odyssey 1.42	Παλλάδʼ Ἀθηναίην κούρην Διὸς αἰγιόχοιο·
Odyssey 1.43	εὔχεο νῦν, ὦ ξεῖνε, Ποσειδάωνι ἄνακτι·
Odyssey 1.44	τοῦ γὰρ καὶ δαίτης ἠντήσατε δεῦρο μολόντες.
Odyssey 1.45	αὐτὰρ ἐπὴν σπείσῃς τε καὶ εὔξεαι, ἣ θέμις ἐστί,
Odyssey 1.46	δὸς καὶ τούτῳ ἔπειτα δέπας μελιηδέος οἴνου
Odyssey 1.47	σπεῖσαι, ἐπεὶ καὶ τοῦτον ὀίομαι ἀθανάτοισιν
Odyssey 1.48	εὔχεσθαι· πάντες δὲ θεῶν χατέουσʼ ἄνθρωποι.
Odyssey 1.49	ἀλλὰ νεώτερός ἐστιν, ὁμηλικίη δʼ ἐμοὶ αὐτῷ·
Odyssey 1.50	τοὔνεκα σοὶ προτέρῳ δώσω χρύσειον ἄλεισον.
Odyssey 1.51	ὣς εἰπὼν ἐν χειρὶ τίθει δέπας ἡδέος οἴνου·
Odyssey 1.52	χαῖρε δʼ Ἀθηναίη πεπνυμένῳ ἀνδρὶ δικαίῳ,
Odyssey 1.53	οὕνεκα οἷ προτέρῃ δῶκε χρύσειον ἄλεισον·
Odyssey 1.54	αὐτίκα δʼ εὔχετο πολλὰ Ποσειδάωνι ἄνακτι·
Odyssey 1.55	κλῦθι, Ποσείδαον γαιήοχε, μηδὲ μεγήρῃς
Odyssey 1.56	ἡμῖν εὐχομένοισι τελευτῆσαι τάδε ἔργα.
Odyssey 1.57	Νέστορι μὲν πρώτιστα καὶ υἱάσι κῦδος ὄπαζε,
Odyssey 1.58	αὐτὰρ ἔπειτʼ ἄλλοισι δίδου χαρίεσσαν ἀμοιβὴν
Odyssey 1.59	σύμπασιν Πυλίοισιν ἀγακλειτῆς ἑκατόμβης.
Odyssey 1.60	δὸς δʼ ἔτι Τηλέμαχον καὶ ἐμὲ πρήξαντα νέεσθαι,
Odyssey 1.61	οὕνεκα δεῦρʼ ἱκόμεσθα θοῇ σὺν νηὶ μελαίνῃ.
Odyssey 1.62	ὣς ἄρʼ ἔπειτʼ ἠρᾶτο καὶ αὐτὴ πάντα τελεύτα.
Odyssey 1.63	δῶκε δὲ Τηλεμάχῳ καλὸν δέπας ἀμφικύπελλον·
Odyssey 1.64	ὣς δʼ αὔτως ἠρᾶτο Ὀδυσσῆος φίλος υἱός.
Odyssey 1.65	οἱ δʼ ἐπεὶ ὤπτησαν κρέʼ ὑπέρτερα καὶ ἐρύσαντο,
Odyssey 1.66	μοίρας δασσάμενοι δαίνυντʼ ἐρικυδέα δαῖτα.
Odyssey 1.67	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.68	τοῖς ἄρα μύθων ἦρχε Γερήνιος ἱππότα Νέστωρ·
Odyssey 1.69	νῦν δὴ κάλλιόν ἐστι μεταλλῆσαι καὶ ἐρέσθαι
Odyssey 1.70	ξείνους, οἵ τινές εἰσιν, ἐπεὶ τάρπησαν ἐδωδῆς.
Odyssey 1.71	ὦ ξεῖνοι, τίνες ἐστέ; πόθεν πλεῖθʼ ὑγρὰ κέλευθα;
Odyssey 1.72	ἤ τι κατὰ πρῆξιν ἦ μαψιδίως ἀλάλησθε
Odyssey 1.73	οἷά τε ληιστῆρες ὑπεὶρ ἅλα, τοί τʼ ἀλόωνται
Odyssey 1.74	ψυχὰς παρθέμενοι κακὸν ἀλλοδαποῖσι φέροντες;
Odyssey 1.75	τὸν δʼ αὖ Τηλέμαχος πεπνυμένος ἀντίον ηὔδα
Odyssey 1.76	θαρσήσας· αὐτὴ γὰρ ἐνὶ φρεσὶ θάρσος Ἀθήνη
Odyssey 1.77	θῆχʼ, ἵνα μιν περὶ πατρὸς ἀποιχομένοιο ἔροιτο
Odyssey 1.78	ἠδʼ ἵνα μιν κλέος ἐσθλὸν ἐν ἀνθρώποισιν ἔχῃσιν·
Odyssey 1.79	ὦ Νέστορ Νηληϊάδη, μέγα κῦδος Ἀχαιῶν,
Odyssey 1.80	εἴρεαι ὁππόθεν εἰμέν· ἐγὼ δέ κέ τοι καταλέξω.
Odyssey 1.81	ἡμεῖς ἐξ Ἰθάκης ὑπονηίου εἰλήλουθμεν·
Odyssey 1.82	πρῆξις δʼ ἥδʼ ἰδίη, οὐ δήμιος, ἣν ἀγορεύω.
Odyssey 1.83	πατρὸς ἐμοῦ κλέος εὐρὺ μετέρχομαι, ἤν που ἀκούσω,
Odyssey 1.84	δίου Ὀδυσσῆος ταλασίφρονος, ὅν ποτέ φασι
Odyssey 1.85	σὺν σοὶ μαρνάμενον Τρώων πόλιν ἐξαλαπάξαι.
Odyssey 1.86	ἄλλους μὲν γὰρ πάντας, ὅσοι Τρωσὶν πολέμιζον,
Odyssey 1.87	πευθόμεθʼ, ἧχι ἕκαστος ἀπώλετο λυγρῷ ὀλέθρῳ,
Odyssey 1.88	κείνου δʼ αὖ καὶ ὄλεθρον ἀπευθέα θῆκε Κρονίων.
Odyssey 1.89	οὐ γάρ τις δύναται σάφα εἰπέμεν ὁππόθʼ ὄλωλεν,
Odyssey 1.90	εἴθʼ ὅ γʼ ἐπʼ ἠπείρου δάμη ἀνδράσι δυσμενέεσσιν,
Odyssey 1.91	εἴτε καὶ ἐν πελάγει μετὰ κύμασιν Ἀμφιτρίτης.
Odyssey 1.92	τοὔνεκα νῦν τὰ σὰ γούναθʼ ἱκάνομαι, αἴ κʼ ἐθέλῃσθα
Odyssey 1.93	κείνου λυγρὸν ὄλεθρον ἐνισπεῖν, εἴ που ὄπωπας
Odyssey 1.94	ὀφθαλμοῖσι τεοῖσιν ἢ ἄλλου μῦθον ἄκουσας
Odyssey 1.95	πλαζομένου· πέρι γάρ μιν ὀιζυρὸν τέκε μήτηρ.
Odyssey 1.96	μηδέ τί μʼ αἰδόμενος μειλίσσεο μηδʼ ἐλεαίρων,
Odyssey 1.97	ἀλλʼ εὖ μοι κατάλεξον ὅπως ἤντησας ὀπωπῆς.
Odyssey 1.98	λίσσομαι, εἴ ποτέ τοί τι πατὴρ ἐμός, ἐσθλὸς Ὀδυσσεύς,
Odyssey 1.99	ἢ ἔπος ἠέ τι ἔργον ὑποστὰς ἐξετέλεσσε
Odyssey 1.100	δήμῳ ἔνι Τρώων, ὅθι πάσχετε πήματʼ Ἀχαιοί,
Odyssey 1.101	τῶν νῦν μοι μνῆσαι, καί μοι νημερτὲς ἐνίσπες.
Odyssey 1.102	τὸν δʼ ἠμείβετʼ ἔπειτα Γερήνιος ἱππότα Νέστωρ·
Odyssey 1.103	ὦ φίλʼ, ἐπεί μʼ ἔμνησας ὀιζύος, ἣν ἐν ἐκείνῳ
Odyssey 1.104	δήμῳ ἀνέτλημεν μένος ἄσχετοι υἷες Ἀχαιῶν,
Odyssey 1.105	ἠμὲν ὅσα ξὺν νηυσὶν ἐπʼ ἠεροειδέα πόντον
Odyssey 1.106	πλαζόμενοι κατὰ ληίδʼ, ὅπῃ ἄρξειεν Ἀχιλλεύς,
Odyssey 1.107	ἠδʼ ὅσα καὶ περὶ ἄστυ μέγα Πριάμοιο ἄνακτος
Odyssey 1.108	μαρνάμεθʼ· ἔνθα δʼ ἔπειτα κατέκταθεν ὅσσοι ἄριστοι.
Odyssey 1.109	ἔνθα μὲν Αἴας κεῖται ἀρήιος, ἔνθα δʼ Ἀχιλλεύς,
Odyssey 1.110	ἔνθα δὲ Πάτροκλος, θεόφιν μήστωρ ἀτάλαντος,
Odyssey 1.111	ἔνθα δʼ ἐμὸς φίλος υἱός, ἅμα κρατερὸς καὶ ἀμύμων,
Odyssey 1.112	Ἀντίλοχος, πέρι μὲν θείειν ταχὺς ἠδὲ μαχητής·
Odyssey 1.113	ἄλλα τε πόλλʼ ἐπὶ τοῖς πάθομεν κακά· τίς κεν ἐκεῖνα
Odyssey 1.114	πάντα γε μυθήσαιτο καταθνητῶν ἀνθρώπων;
Odyssey 1.115	οὐδʼ εἰ πεντάετές γε καὶ ἑξάετες παραμίμνων
Odyssey 1.116	ἐξερέοις ὅσα κεῖθι πάθον κακὰ δῖοι Ἀχαιοί·
Odyssey 1.117	πρίν κεν ἀνιηθεὶς σὴν πατρίδα γαῖαν ἵκοιο.
Odyssey 1.118	εἰνάετες γάρ σφιν κακὰ ῥάπτομεν ἀμφιέποντες
Odyssey 1.119	παντοίοισι δόλοισι, μόγις δʼ ἐτέλεσσε Κρονίων.
Odyssey 1.120	ἔνθʼ οὔ τίς ποτε μῆτιν ὁμοιωθήμεναι ἄντην
Odyssey 1.121	ἤθελʼ, ἐπεὶ μάλα πολλὸν ἐνίκα δῖος Ὀδυσσεὺς
Odyssey 1.122	παντοίοισι δόλοισι, πατὴρ τεός, εἰ ἐτεόν γε
Odyssey 1.123	κείνου ἔκγονός ἐσσι· σέβας μʼ ἔχει εἰσορόωντα.
Odyssey 1.124	ἦ τοι γὰρ μῦθοί γε ἐοικότες, οὐδέ κε φαίης
Odyssey 1.125	ἄνδρα νεώτερον ὧδε ἐοικότα μυθήσασθαι.
Odyssey 1.126	ἔνθʼ ἦ τοι ἧος μὲν ἐγὼ καὶ δῖος Ὀδυσσεὺς
Odyssey 1.127	οὔτε ποτʼ εἰν ἀγορῇ δίχʼ ἐβάζομεν οὔτʼ ἐνὶ βουλῇ,
Odyssey 1.128	ἀλλʼ ἕνα θυμὸν ἔχοντε νόῳ καὶ ἐπίφρονι βουλῇ
Odyssey 1.129	φραζόμεθʼ Ἀργείοισιν ὅπως ὄχʼ ἄριστα γένοιτο.
Odyssey 1.130	αὐτὰρ ἐπεὶ Πριάμοιο πόλιν διεπέρσαμεν αἰπήν,
Odyssey 1.131	βῆμεν δʼ ἐν νήεσσι, θεὸς δʼ ἐκέδασσεν Ἀχαιούς,
Odyssey 1.132	καὶ τότε δὴ Ζεὺς λυγρὸν ἐνὶ φρεσὶ μήδετο νόστον
Odyssey 1.133	Ἀργείοις, ἐπεὶ οὔ τι νοήμονες οὐδὲ δίκαιοι
Odyssey 1.134	πάντες ἔσαν· τῶ σφεων πολέες κακὸν οἶτον ἐπέσπον
Odyssey 1.135	μήνιος ἐξ ὀλοῆς γλαυκώπιδος ὀβριμοπάτρης.
Odyssey 1.136	ἥ τʼ ἔριν Ἀτρεΐδῃσι μετʼ ἀμφοτέροισιν ἔθηκε.
Odyssey 1.137	τὼ δὲ καλεσσαμένω ἀγορὴν ἐς πάντας Ἀχαιούς,
Odyssey 1.138	μάψ, ἀτὰρ οὐ κατὰ κόσμον, ἐς ἠέλιον καταδύντα,
Odyssey 1.139	οἱ δʼ ἦλθον οἴνῳ βεβαρηότες υἷες Ἀχαιῶν,
Odyssey 1.140	μῦθον μυθείσθην, τοῦ εἵνεκα λαὸν ἄγειραν.
Odyssey 1.141	ἔνθʼ ἦ τοι Μενέλαος ἀνώγει πάντας Ἀχαιοὺς
Odyssey 1.142	νόστου μιμνήσκεσθαι ἐπʼ εὐρέα νῶτα θαλάσσης,
Odyssey 1.143	οὐδʼ Ἀγαμέμνονι πάμπαν ἑήνδανε· βούλετο γάρ ῥα
Odyssey 1.144	λαὸν ἐρυκακέειν ῥέξαι θʼ ἱερὰς ἑκατόμβας,
Odyssey 1.145	ὡς τὸν Ἀθηναίης δεινὸν χόλον ἐξακέσαιτο,
Odyssey 1.146	νήπιος, οὐδὲ τὸ ᾔδη, ὃ οὐ πείσεσθαι ἔμελλεν·
Odyssey 1.147	οὐ γάρ τʼ αἶψα θεῶν τρέπεται νόος αἰὲν ἐόντων.
Odyssey 1.148	ὣς τὼ μὲν χαλεποῖσιν ἀμειβομένω ἐπέεσσιν
Odyssey 1.149	ἕστασαν· οἱ δʼ ἀνόρουσαν ἐυκνήμιδες Ἀχαιοὶ
Odyssey 1.150	ἠχῇ θεσπεσίῃ, δίχα δέ σφισιν ἥνδανε βουλή.
Odyssey 1.151	νύκτα μὲν ἀέσαμεν χαλεπὰ φρεσὶν ὁρμαίνοντες
Odyssey 1.152	ἀλλήλοις· ἐπὶ γὰρ Ζεὺς ἤρτυε πῆμα κακοῖο·
Odyssey 1.153	ἠῶθεν δʼ οἱ μὲν νέας ἕλκομεν εἰς ἅλα δῖαν
Odyssey 1.154	κτήματά τʼ ἐντιθέμεσθα βαθυζώνους τε γυναῖκας.
Odyssey 1.155	ἡμίσεες δʼ ἄρα λαοὶ ἐρητύοντο μένοντες
Odyssey 1.156	αὖθι παρʼ Ἀτρεΐδῃ Ἀγαμέμνονι, ποιμένι λαῶν·
Odyssey 1.157	ἡμίσεες δʼ ἀναβάντες ἐλαύνομεν· αἱ δὲ μάλʼ ὦκα
Odyssey 1.158	ἔπλεον, ἐστόρεσεν δὲ θεὸς μεγακήτεα πόντον.
Odyssey 1.159	ἐς Τένεδον δʼ ἐλθόντες ἐρέξαμεν ἱρὰ θεοῖσιν,
Odyssey 1.160	οἴκαδε ἱέμενοι· Ζεὺς δʼ οὔ πω μήδετο νόστον,
Odyssey 1.161	σχέτλιος, ὅς ῥʼ ἔριν ὦρσε κακὴν ἔπι δεύτερον αὖτις.
Odyssey 1.162	οἱ μὲν ἀποστρέψαντες ἔβαν νέας ἀμφιελίσσας
Odyssey 1.163	ἀμφʼ Ὀδυσῆα ἄνακτα δαΐφρονα, ποικιλομήτην,
Odyssey 1.164	αὖτις ἐπʼ Ἀτρεΐδῃ Ἀγαμέμνονι ἦρα φέροντες·
Odyssey 1.165	αὐτὰρ ἐγὼ σὺν νηυσὶν ἀολλέσιν, αἵ μοι ἕποντο,
Odyssey 1.166	φεῦγον, ἐπεὶ γίγνωσκον, ὃ δὴ κακὰ μήδετο δαίμων.
Odyssey 1.167	φεῦγε δὲ Τυδέος υἱὸς ἀρήιος, ὦρσε δʼ ἑταίρους.
Odyssey 1.168	ὀψὲ δὲ δὴ μετὰ νῶι κίε ξανθὸς Μενέλαος,
Odyssey 1.169	ἐν Λέσβῳ δʼ ἔκιχεν δολιχὸν πλόον ὁρμαίνοντας,
Odyssey 1.170	ἢ καθύπερθε Χίοιο νεοίμεθα παιπαλοέσσης,
Odyssey 1.171	νήσου ἔπι Ψυρίης, αὐτὴν ἐπʼ ἀριστέρʼ ἔχοντες,
Odyssey 1.172	ἦ ὑπένερθε Χίοιο, παρʼ ἠνεμόεντα Μίμαντα.
Odyssey 1.173	ᾐτέομεν δὲ θεὸν φῆναι τέρας· αὐτὰρ ὅ γʼ ἡμῖν
Odyssey 1.174	δεῖξε, καὶ ἠνώγει πέλαγος μέσον εἰς Ἐύβοιαν
Odyssey 1.175	τέμνειν, ὄφρα τάχιστα ὑπὲκ κακότητα φύγοιμεν.
Odyssey 1.176	ὦρτο δʼ ἐπὶ λιγὺς οὖρος ἀήμεναι· αἱ δὲ μάλʼ ὦκα
Odyssey 1.177	ἰχθυόεντα κέλευθα διέδραμον, ἐς δὲ Γεραιστὸν
Odyssey 1.178	ἐννύχιαι κατάγοντο· Ποσειδάωνι δὲ ταύρων
Odyssey 1.179	πόλλʼ ἐπὶ μῆρʼ ἔθεμεν, πέλαγος μέγα μετρήσαντες.
Odyssey 1.180	τέτρατον ἦμαρ ἔην, ὅτʼ ἐν Ἄργεϊ νῆας ἐίσας
Odyssey 1.181	Τυδεΐδεω ἕταροι Διομήδεος ἱπποδάμοιο
Odyssey 1.182	ἵστασαν· αὐτὰρ ἐγώ γε Πύλονδʼ ἔχον, οὐδέ ποτʼ ἔσβη
Odyssey 1.183	οὖρος, ἐπεὶ δὴ πρῶτα θεὸς προέηκεν ἀῆναι.
Odyssey 1.184	ὣς ἦλθον, φίλε τέκνον, ἀπευθής, οὐδέ τι οἶδα
Odyssey 1.185	κείνων, οἵ τʼ ἐσάωθεν Ἀχαιῶν οἵ τʼ ἀπόλοντο.
Odyssey 1.186	ὅσσα δʼ ἐνὶ μεγάροισι καθήμενος ἡμετέροισι
Odyssey 1.187	πεύθομαι, ἣ θέμις ἐστί, δαήσεαι, οὐδέ σε κεύσω.
Odyssey 1.188	εὖ μὲν Μυρμιδόνας φάσʼ ἐλθέμεν ἐγχεσιμώρους,
Odyssey 1.189	οὓς ἄγʼ Ἀχιλλῆος μεγαθύμου φαίδιμος υἱός,
Odyssey 1.190	εὖ δὲ Φιλοκτήτην, Ποιάντιον ἀγλαὸν υἱόν.
Odyssey 1.191	πάντας δʼ Ἰδομενεὺς Κρήτην εἰσήγαγʼ ἑταίρους,
Odyssey 1.192	οἳ φύγον ἐκ πολέμου, πόντος δέ οἱ οὔ τινʼ ἀπηύρα.
Odyssey 1.193	Ἀτρεΐδην δὲ καὶ αὐτοὶ ἀκούετε, νόσφιν ἐόντες,
Odyssey 1.194	ὥς τʼ ἦλθʼ, ὥς τʼ Αἴγισθος ἐμήσατο λυγρὸν ὄλεθρον.
Odyssey 1.195	ἀλλʼ ἦ τοι κεῖνος μὲν ἐπισμυγερῶς ἀπέτισεν·
Odyssey 1.196	ὡς ἀγαθὸν καὶ παῖδα καταφθιμένοιο λιπέσθαι
Odyssey 1.197	ἀνδρός, ἐπεὶ καὶ κεῖνος ἐτίσατο πατροφονῆα,
Odyssey 1.198	Αἴγισθον δολόμητιν, ὅ οἱ πατέρα κλυτὸν ἔκτα.
Odyssey 1.199	καὶ σὺ φίλος, μάλα γάρ σʼ ὁρόω καλόν τε μέγαν τε,
Odyssey 1.200	ἄλκιμος ἔσσʼ, ἵνα τίς σε καὶ ὀψιγόνων ἐὺ εἴπῃ.
Odyssey 1.201	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.202	ὦ Νέστορ Νηληϊάδη, μέγα κῦδος Ἀχαιῶν,
Odyssey 1.203	καὶ λίην κεῖνος μὲν ἐτίσατο, καί οἱ Ἀχαιοὶ
Odyssey 1.204	οἴσουσι κλέος εὐρὺ καὶ ἐσσομένοισι πυθέσθαι·
Odyssey 1.205	αἲ γὰρ ἐμοὶ τοσσήνδε θεοὶ δύναμιν περιθεῖεν,
Odyssey 1.206	τίσασθαι μνηστῆρας ὑπερβασίης ἀλεγεινῆς,
Odyssey 1.207	οἵ τέ μοι ὑβρίζοντες ἀτάσθαλα μηχανόωνται.
Odyssey 1.208	ἀλλʼ οὔ μοι τοιοῦτον ἐπέκλωσαν θεοὶ ὄλβον,
Odyssey 1.209	πατρί τʼ ἐμῷ καὶ ἐμοί· νῦν δὲ χρὴ τετλάμεν ἔμπης.
Odyssey 1.210	τὸν δʼ ἠμείβετʼ ἔπειτα Γερήνιος ἱππότα Νέστωρ·
Odyssey 1.211	ὦ φίλʼ, ἐπεὶ δὴ ταῦτά μʼ ἀνέμνησας καὶ ἔειπες,
Odyssey 1.212	φασὶ μνηστῆρας σῆς μητέρος εἵνεκα πολλοὺς
Odyssey 1.213	ἐν μεγάροις ἀέκητι σέθεν κακὰ μηχανάασθαι·
Odyssey 1.214	εἰπέ μοι, ἠὲ ἑκὼν ὑποδάμνασαι, ἦ σέ γε λαοὶ
Odyssey 1.215	ἐχθαίρουσʼ ἀνὰ δῆμον, ἐπισπόμενοι θεοῦ ὀμφῇ.
Odyssey 1.216	τίς δʼ οἶδʼ εἴ κέ ποτέ σφι βίας ἀποτίσεται ἐλθών,
Odyssey 1.217	ἢ ὅ γε μοῦνος ἐὼν ἢ καὶ σύμπαντες Ἀχαιοί;
Odyssey 1.218	εἰ γάρ σʼ ὣς ἐθέλοι φιλέειν γλαυκῶπις Ἀθήνη,
Odyssey 1.219	ὡς τότʼ Ὀδυσσῆος περικήδετο κυδαλίμοιο
Odyssey 1.220	δήμῳ ἔνι Τρώων, ὅθι πάσχομεν ἄλγεʼ Ἀχαιοί—
Odyssey 1.221	οὐ γάρ πω ἴδον ὧδε θεοὺς ἀναφανδὰ φιλεῦντας,
Odyssey 1.222	ὡς κείνῳ ἀναφανδὰ παρίστατο Παλλὰς Ἀθήνη—
Odyssey 1.223	εἴ σʼ οὕτως ἐθέλοι φιλέειν κήδοιτό τε θυμῷ,
Odyssey 1.224	τῶ κέν τις κείνων γε καὶ ἐκλελάθοιτο γάμοιο.
Odyssey 1.225	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.226	ὦ γέρον, οὔ πω τοῦτο ἔπος τελέεσθαι ὀίω·
Odyssey 1.227	λίην γὰρ μέγα εἶπες· ἄγη μʼ ἔχει. οὐκ ἂν ἐμοί γε
Odyssey 1.228	ἐλπομένῳ τὰ γένοιτʼ, οὐδʼ εἰ θεοὶ ὣς ἐθέλοιεν.
Odyssey 1.229	τὸν δʼ αὖτε προσέειπε θεά, γλαυκῶπις Ἀθήνη·
Odyssey 1.230	Τηλέμαχε, ποῖόν σε ἔπος φύγεν ἕρκος ὀδόντων.
Odyssey 1.231	ῥεῖα θεός γʼ ἐθέλων καὶ τηλόθεν ἄνδρα σαώσαι.
Odyssey 1.232	βουλοίμην δʼ ἂν ἐγώ γε καὶ ἄλγεα πολλὰ μογήσας
Odyssey 1.233	οἴκαδέ τʼ ἐλθέμεναι καὶ νόστιμον ἦμαρ ἰδέσθαι,
Odyssey 1.234	ἢ ἐλθὼν ἀπολέσθαι ἐφέστιος, ὡς Ἀγαμέμνων
Odyssey 1.235	ὤλεθʼ ὑπʼ Αἰγίσθοιο δόλῳ καὶ ἧς ἀλόχοιο.
Odyssey 1.236	ἀλλʼ ἦ τοι θάνατον μὲν ὁμοίιον οὐδὲ θεοί περ
Odyssey 1.237	καὶ φίλῳ ἀνδρὶ δύνανται ἀλαλκέμεν, ὁππότε κεν δὴ
Odyssey 1.238	μοῖρʼ ὀλοὴ καθέλῃσι τανηλεγέος θανάτοιο.
Odyssey 1.239	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.240	Μέντορ, μηκέτι ταῦτα λεγώμεθα κηδόμενοί περ·
Odyssey 1.241	κείνῳ δʼ οὐκέτι νόστος ἐτήτυμος, ἀλλά οἱ ἤδη
Odyssey 1.242	φράσσαντʼ ἀθάνατοι θάνατον καὶ κῆρα μέλαιναν.
Odyssey 1.243	νῦν δʼ ἐθέλω ἔπος ἄλλο μεταλλῆσαι καὶ ἐρέσθαι
Odyssey 1.244	Νέστορʼ, ἐπεὶ περὶ οἶδε δίκας ἠδὲ φρόνιν ἄλλων·
Odyssey 1.245	τρὶς γὰρ δή μίν φασιν ἀνάξασθαι γένεʼ ἀνδρῶν·
Odyssey 1.246	ὥς τέ μοι ἀθάνατος ἰνδάλλεται εἰσοράασθαι.
Odyssey 1.247	ὦ Νέστορ Νηληϊάδη, σὺ δʼ ἀληθὲς ἐνίσπες·
Odyssey 1.248	πῶς ἔθανʼ Ἀτρεΐδης εὐρὺ κρείων Ἀγαμέμνων;
Odyssey 1.249	ποῦ Μενέλαος ἔην; τίνα δʼ αὐτῷ μήσατʼ ὄλεθρον
Odyssey 1.250	Αἴγισθος δολόμητις, ἐπεὶ κτάνε πολλὸν ἀρείω;
Odyssey 1.251	ἦ οὐκ Ἄργεος ἦεν Ἀχαιικοῦ, ἀλλά πῃ ἄλλῃ
Odyssey 1.252	πλάζετʼ ἐπʼ ἀνθρώπους, ὁ δὲ θαρσήσας κατέπεφνε;
Odyssey 1.253	τὸν δʼ ἠμείβετʼ ἔπειτα Γερήνιος ἱππότα Νέστωρ·
Odyssey 1.254	τοιγὰρ ἐγώ τοι, τέκνον, ἀληθέα πάντʼ ἀγορεύσω.
Odyssey 1.255	ἦ τοι μὲν τάδε καὐτὸς ὀίεαι, ὥς κεν ἐτύχθη,
Odyssey 1.256	εἰ ζωόν γʼ Αἴγισθον ἐνὶ μεγάροισιν ἔτετμεν
Odyssey 1.257	Ἀτρεΐδης Τροίηθεν ἰών, ξανθὸς Μενέλαος·
Odyssey 1.258	τῶ κέ οἱ οὐδὲ θανόντι χυτὴν ἐπὶ γαῖαν ἔχευαν,
Odyssey 1.259	ἀλλʼ ἄρα τόν γε κύνες τε καὶ οἰωνοὶ κατέδαψαν
Odyssey 1.260	κείμενον ἐν πεδίῳ ἑκὰς ἄστεος, οὐδέ κέ τίς μιν
Odyssey 1.261	κλαῦσεν Ἀχαιιάδων· μάλα γὰρ μέγα μήσατο ἔργον.
Odyssey 1.262	ἡμεῖς μὲν γὰρ κεῖθι πολέας τελέοντες ἀέθλους
Odyssey 1.263	ἥμεθʼ· ὁ δʼ εὔκηλος μυχῷ Ἄργεος ἱπποβότοιο
Odyssey 1.264	πόλλʼ Ἀγαμεμνονέην ἄλοχον θέλγεσκʼ ἐπέεσσιν.
Odyssey 1.265	ἡ δʼ ἦ τοι τὸ πρὶν μὲν ἀναίνετο ἔργον ἀεικὲς
Odyssey 1.266	δῖα Κλυταιμνήστρη· φρεσὶ γὰρ κέχρητʼ ἀγαθῇσι·
Odyssey 1.267	πὰρ δʼ ἄρʼ ἔην καὶ ἀοιδὸς ἀνήρ, ᾧ πόλλʼ ἐπέτελλεν
Odyssey 1.268	Ἀτρεΐδης Τροίηνδε κιὼν εἴρυσθαι ἄκοιτιν.
Odyssey 1.269	ἀλλʼ ὅτε δή μιν μοῖρα θεῶν ἐπέδησε δαμῆναι,
Odyssey 1.270	δὴ τότε τὸν μὲν ἀοιδὸν ἄγων ἐς νῆσον ἐρήμην
Odyssey 1.271	κάλλιπεν οἰωνοῖσιν ἕλωρ καὶ κύρμα γενέσθαι,
Odyssey 1.272	τὴν δʼ ἐθέλων ἐθέλουσαν ἀνήγαγεν ὅνδε δόμονδε.
Odyssey 1.273	πολλὰ δὲ μηρίʼ ἔκηε θεῶν ἱεροῖς ἐπὶ βωμοῖς,
Odyssey 1.274	πολλὰ δʼ ἀγάλματʼ ἀνῆψεν, ὑφάσματά τε χρυσόν τε,
Odyssey 1.275	ἐκτελέσας μέγα ἔργον, ὃ οὔ ποτε ἔλπετο θυμῷ.
Odyssey 1.276	ἡμεῖς μὲν γὰρ ἅμα πλέομεν Τροίηθεν ἰόντες,
Odyssey 1.277	Ἀτρεΐδης καὶ ἐγώ, φίλα εἰδότες ἀλλήλοισιν·
Odyssey 1.278	ἀλλʼ ὅτε Σούνιον ἱρὸν ἀφικόμεθʼ, ἄκρον Ἀθηνέων,
Odyssey 1.279	ἔνθα κυβερνήτην Μενελάου Φοῖβος Ἀπόλλων
Odyssey 1.280	οἷς ἀγανοῖς βελέεσσιν ἐποιχόμενος κατέπεφνε,
Odyssey 1.281	πηδάλιον μετὰ χερσὶ θεούσης νηὸς ἔχοντα,
Odyssey 1.282	Φρόντιν Ὀνητορίδην, ὃς ἐκαίνυτο φῦλʼ ἀνθρώπων
Odyssey 1.283	νῆα κυβερνῆσαι, ὁπότε σπέρχοιεν ἄελλαι.
Odyssey 1.284	ὣς ὁ μὲν ἔνθα κατέσχετʼ, ἐπειγόμενός περ ὁδοῖο,
Odyssey 1.285	ὄφρʼ ἕταρον θάπτοι καὶ ἐπὶ κτέρεα κτερίσειεν.
Odyssey 1.286	ἀλλʼ ὅτε δὴ καὶ κεῖνος ἰὼν ἐπὶ οἴνοπα πόντον
Odyssey 1.287	ἐν νηυσὶ γλαφυρῇσι Μαλειάων ὄρος αἰπὺ
Odyssey 1.288	ἷξε θέων, τότε δὴ στυγερὴν ὁδὸν εὐρύοπα Ζεὺς
Odyssey 1.289	ἐφράσατο, λιγέων δʼ ἀνέμων ἐπʼ ἀυτμένα χεῦε,
Odyssey 1.290	κύματά τε τροφέοντο πελώρια, ἶσα ὄρεσσιν.
Odyssey 1.291	ἔνθα διατμήξας τὰς μὲν Κρήτῃ ἐπέλασσεν,
Odyssey 1.292	ἧχι Κύδωνες ἔναιον Ἰαρδάνου ἀμφὶ ῥέεθρα.
Odyssey 1.293	ἔστι δέ τις λισσὴ αἰπεῖά τε εἰς ἅλα πέτρη
Odyssey 1.294	ἐσχατιῇ Γόρτυνος ἐν ἠεροειδέι πόντῳ·
Odyssey 1.295	ἔνθα Νότος μέγα κῦμα ποτὶ σκαιὸν ῥίον ὠθεῖ,
Odyssey 1.296	ἐς Φαιστόν, μικρὸς δὲ λίθος μέγα κῦμʼ ἀποέργει.
Odyssey 1.297	αἱ μὲν ἄρʼ ἔνθʼ ἦλθον, σπουδῇ δʼ ἤλυξαν ὄλεθρον
Odyssey 1.298	ἄνδρες, ἀτὰρ νῆάς γε ποτὶ σπιλάδεσσιν ἔαξαν
Odyssey 1.299	κύματʼ· ἀτὰρ τὰς πέντε νέας κυανοπρῳρείους
Odyssey 1.300	Αἰγύπτῳ ἐπέλασσε φέρων ἄνεμός τε καὶ ὕδωρ.
Odyssey 1.301	ὣς ὁ μὲν ἔνθα πολὺν βίοτον καὶ χρυσὸν ἀγείρων
Odyssey 1.302	ἠλᾶτο ξὺν νηυσὶ κατʼ ἀλλοθρόους ἀνθρώπους·
Odyssey 1.303	τόφρα δὲ ταῦτʼ Αἴγισθος ἐμήσατο οἴκοθι λυγρά.
Odyssey 1.305	ἑπτάετες δʼ ἤνασσε πολυχρύσοιο Μυκήνης,
Odyssey 1.304	κτείνας Ἀτρεΐδην, δέδμητο δὲ λαὸς ὑπʼ αὐτῷ.
Odyssey 1.306	τῷ δέ οἱ ὀγδοάτῳ κακὸν ἤλυθε δῖος Ὀρέστης
Odyssey 1.307	ἂψ ἀπʼ Ἀθηνάων, κατὰ δʼ ἔκτανε πατροφονῆα,
Odyssey 1.308	Αἴγισθον δολόμητιν, ὅ οἱ πατέρα κλυτὸν ἔκτα.
Odyssey 1.309	ἦ τοι ὁ τὸν κτείνας δαίνυ τάφον Ἀργείοισιν
Odyssey 1.310	μητρός τε στυγερῆς καὶ ἀνάλκιδος Αἰγίσθοιο·
Odyssey 1.311	αὐτῆμαρ δέ οἱ ἦλθε βοὴν ἀγαθὸς Μενέλαος
Odyssey 1.312	πολλὰ κτήματʼ ἄγων, ὅσα οἱ νέες ἄχθος ἄειραν.
Odyssey 1.313	καὶ σύ, φίλος, μὴ δηθὰ δόμων ἄπο τῆλʼ ἀλάλησο,
Odyssey 1.314	κτήματά τε προλιπὼν ἄνδρας τʼ ἐν σοῖσι δόμοισιν
Odyssey 1.315	οὕτω ὑπερφιάλους, μή τοι κατὰ πάντα φάγωσιν
Odyssey 1.316	κτήματα δασσάμενοι, σὺ δὲ τηϋσίην ὁδὸν ἔλθῃς.
Odyssey 1.317	ἀλλʼ ἐς μὲν Μενέλαον ἐγὼ κέλομαι καὶ ἄνωγα
Odyssey 1.318	ἐλθεῖν· κεῖνος γὰρ νέον ἄλλοθεν εἰλήλουθεν,
Odyssey 1.319	ἐκ τῶν ἀνθρώπων, ὅθεν οὐκ ἔλποιτό γε θυμῷ
Odyssey 1.320	ἐλθέμεν, ὅν τινα πρῶτον ἀποσφήλωσιν ἄελλαι
Odyssey 1.321	ἐς πέλαγος μέγα τοῖον, ὅθεν τέ περ οὐδʼ οἰωνοὶ
Odyssey 1.322	αὐτόετες οἰχνεῦσιν, ἐπεὶ μέγα τε δεινόν τε.
Odyssey 1.323	ἀλλʼ ἴθι νῦν σὺν νηί τε σῇ καὶ σοῖς ἑτάροισιν·
Odyssey 1.324	εἰ δʼ ἐθέλεις πεζός, πάρα τοι δίφρος τε καὶ ἵπποι,
Odyssey 1.325	πὰρ δέ τοι υἷες ἐμοί, οἵ τοι πομπῆες ἔσονται
Odyssey 1.326	ἐς Λακεδαίμονα δῖαν, ὅθι ξανθὸς Μενέλαος.
Odyssey 1.327	λίσσεσθαι δέ μιν αὐτός, ἵνα νημερτὲς ἐνίσπῃ·
Odyssey 1.328	ψεῦδος δʼ οὐκ ἐρέει· μάλα γὰρ πεπνυμένος ἐστίν.
Odyssey 1.329	ὣς ἔφατʼ, ἠέλιος δʼ ἄρʼ ἔδυ καὶ ἐπὶ κνέφας ἦλθε.
Odyssey 1.330	τοῖσι δὲ καὶ μετέειπε θεά, γλαυκῶπις Ἀθήνη·
Odyssey 1.331	ὦ γέρον, ἦ τοι ταῦτα κατὰ μοῖραν κατέλεξας·
Odyssey 1.332	ἀλλʼ ἄγε τάμνετε μὲν γλώσσας, κεράασθε δὲ οἶνον,
Odyssey 1.333	ὄφρα Ποσειδάωνι καὶ ἄλλοις ἀθανάτοισιν
Odyssey 1.334	σπείσαντες κοίτοιο μεδώμεθα· τοῖο γὰρ ὥρη.
Odyssey 1.335	ἤδη γὰρ φάος οἴχεθʼ ὑπὸ ζόφον, οὐδὲ ἔοικεν·
Odyssey 1.336	δηθὰ θεῶν ἐν δαιτὶ θαασσέμεν, ἀλλὰ νέεσθαι.
Odyssey 1.337	ἦ ῥα Διὸς θυγάτηρ, οἱ δʼ ἔκλυον αὐδησάσης.
Odyssey 1.338	τοῖσι δὲ κήρυκες μὲν ὕδωρ ἐπὶ χεῖρας ἔχευαν,
Odyssey 1.339	κοῦροι δὲ κρητῆρας ἐπεστέψαντο ποτοῖο,
Odyssey 1.340	νώμησαν δʼ ἄρα πᾶσιν ἐπαρξάμενοι δεπάεσσι·
Odyssey 1.341	γλώσσας δʼ ἐν πυρὶ βάλλον, ἀνιστάμενοι δʼ ἐπέλειβον.
Odyssey 1.342	αὐτὰρ ἐπεὶ σπεῖσάν τʼ ἔπιον θʼ, ὅσον ἤθελε θυμός,
Odyssey 1.343	δὴ τότʼ Ἀθηναίη καὶ Τηλέμαχος θεοειδὴς
Odyssey 1.344	ἄμφω ἱέσθην κοίλην ἐπὶ νῆα νέεσθαι.
Odyssey 1.345	Νέστωρ δʼ αὖ κατέρυκε καθαπτόμενος ἐπέεσσιν·
Odyssey 1.346	Ζεὺς τό γʼ ἀλεξήσειε καὶ ἀθάνατοι θεοὶ ἄλλοι,
Odyssey 1.347	ὡς ὑμεῖς παρʼ ἐμεῖο θοὴν ἐπὶ νῆα κίοιτε
Odyssey 1.348	ὥς τέ τευ ἦ παρὰ πάμπαν ἀνείμονος ἠδὲ πενιχροῦ,
Odyssey 1.349	ᾧ οὔ τι χλαῖναι καὶ ῥήγεα πόλλʼ ἐνὶ οἴκῳ,
Odyssey 1.350	οὔτʼ αὐτῷ μαλακῶς οὔτε ξείνοισιν ἐνεύδειν.
Odyssey 1.351	αὐτὰρ ἐμοὶ πάρα μὲν χλαῖναι καὶ ῥήγεα καλά.
Odyssey 1.352	οὔ θην δὴ τοῦδʼ ἀνδρὸς Ὀδυσσῆος φίλος υἱὸς
Odyssey 1.353	νηὸς ἐπʼ ἰκριόφιν καταλέξεται, ὄφρʼ ἂν ἐγώ γε
Odyssey 1.354	ζώω, ἔπειτα δὲ παῖδες ἐνὶ μεγάροισι λίπωνται,
Odyssey 1.355	ξείνους ξεινίζειν, ὅς τίς κʼ ἐμὰ δώμαθʼ ἵκηται.
Odyssey 1.356	τὸν δʼ αὖτε προσέειπε θεά, γλαυκῶπις Ἀθήνη·
Odyssey 1.357	εὖ δὴ ταῦτά γʼ ἔφησθα, γέρον φίλε· σοὶ δὲ ἔοικεν
Odyssey 1.358	Τηλέμαχον πείθεσθαι, ἐπεὶ πολὺ κάλλιον οὕτως.
Odyssey 1.359	ἀλλʼ οὗτος μὲν νῦν σοὶ ἅμʼ ἕψεται, ὄφρα κεν εὕδῃ
Odyssey 1.360	σοῖσιν ἐνὶ μεγάροισιν· ἐγὼ δʼ ἐπὶ νῆα μέλαιναν
Odyssey 1.361	εἶμʼ, ἵνα θαρσύνω θʼ ἑτάρους εἴπω τε ἕκαστα.
Odyssey 1.362	οἶος γὰρ μετὰ τοῖσι γεραίτερος εὔχομαι εἶναι·
Odyssey 1.363	οἱ δʼ ἄλλοι φιλότητι νεώτεροι ἄνδρες ἕπονται,
Odyssey 1.364	πάντες ὁμηλικίη μεγαθύμου Τηλεμάχοιο.
Odyssey 1.365	ἔνθα κε λεξαίμην κοίλῃ παρὰ νηὶ μελαίνῃ
Odyssey 1.366	νῦν· ἀτὰρ ἠῶθεν μετὰ Καύκωνας μεγαθύμους
Odyssey 1.367	εἶμʼ ἔνθα χρεῖός μοι ὀφέλλεται, οὔ τι νέον γε
Odyssey 1.368	οὐδʼ ὀλίγον. σὺ δὲ τοῦτον, ἐπεὶ τεὸν ἵκετο δῶμα,
Odyssey 1.369	πέμψον σὺν δίφρῳ τε καὶ υἱέι· δὸς δέ οἱ ἵππους,
Odyssey 1.370	οἵ τοι ἐλαφρότατοι θείειν καὶ κάρτος ἄριστοι.
Odyssey 1.371	ὣς ἄρα φωνήσασʼ ἀπέβη γλαυκῶπις Ἀθήνη
Odyssey 1.372	φήνῃ εἰδομένη· θάμβος δʼ ἕλε πάντας ἰδόντας.
Odyssey 1.373	θαύμαζεν δʼ ὁ γεραιός, ὅπως ἴδεν ὀφθαλμοῖσι·
Odyssey 1.374	Τηλεμάχου δʼ ἕλε χεῖρα, ἔπος τʼ ἔφατʼ ἔκ τʼ ὀνόμαζεν·
Odyssey 1.375	ὦ φίλος, οὔ σε ἔολπα κακὸν καὶ ἄναλκιν ἔσεσθαι,
Odyssey 1.376	εἰ δή τοι νέῳ ὧδε θεοὶ πομπῆες ἕπονται.
Odyssey 1.377	οὐ μὲν γάρ τις ὅδʼ ἄλλος Ὀλύμπια δώματʼ ἐχόντων,
Odyssey 1.378	ἀλλὰ Διὸς θυγάτηρ, κυδίστη Τριτογένεια,
Odyssey 1.379	ἥ τοι καὶ πατέρʼ ἐσθλὸν ἐν Ἀργείοισιν ἐτίμα.
Odyssey 1.380	ἀλλὰ ἄνασσʼ ἵληθι, δίδωθι δέ μοι κλέος ἐσθλόν,
Odyssey 1.381	αὐτῷ καὶ παίδεσσι καὶ αἰδοίῃ παρακοίτι·
Odyssey 1.382	σοὶ δʼ αὖ ἐγὼ ῥέξω βοῦν ἦνιν εὐρυμέτωπον
Odyssey 1.383	ἀδμήτην, ἣν οὔ πω ὑπὸ ζυγὸν ἤγαγεν ἀνήρ·
Odyssey 1.384	τήν τοι ἐγὼ ῥέξω χρυσὸν κέρασιν περιχεύας.
Odyssey 1.385	ὣς ἔφατʼ εὐχόμενος, τοῦ δʼ ἔκλυε Παλλὰς Ἀθήνη.
Odyssey 1.386	τοῖσιν δʼ ἡγεμόνευε Γερήνιος ἱππότα Νέστωρ,
Odyssey 1.387	υἱάσι καὶ γαμβροῖσιν, ἑὰ πρὸς δώματα καλά.
Odyssey 1.388	ἀλλʼ ὅτε δώμαθʼ ἵκοντο ἀγακλυτὰ τοῖο ἄνακτος,
Odyssey 1.389	ἑξείης ἕζοντο κατὰ κλισμούς τε θρόνους τε·
Odyssey 1.390	τοῖς δʼ ὁ γέρων ἐλθοῦσιν ἀνὰ κρητῆρα κέρασσεν
Odyssey 1.391	οἴνου ἡδυπότοιο, τὸν ἑνδεκάτῳ ἐνιαυτῷ
Odyssey 1.392	ὤιξεν ταμίη καὶ ἀπὸ κρήδεμνον ἔλυσε·
Odyssey 1.393	τοῦ ὁ γέρων κρητῆρα κεράσσατο, πολλὰ δʼ Ἀθήνῃ
Odyssey 1.394	εὔχετʼ ἀποσπένδων, κούρῃ Διὸς αἰγιόχοιο.
Odyssey 1.395	αὐτὰρ ἐπεὶ σπεῖσάν τʼ ἔπιον θʼ, ὅσον ἤθελε θυμός,
Odyssey 1.396	οἱ μὲν κακκείοντες ἔβαν οἶκόνδε ἕκαστος,
Odyssey 1.397	τὸν δʼ αὐτοῦ κοίμησε Γερήνιος ἱππότα Νέστωρ,
Odyssey 1.398	Τηλέμαχον, φίλον υἱὸν Ὀδυσσῆος θείοιο,
Odyssey 1.399	τρητοῖς ἐν λεχέεσσιν ὑπʼ αἰθούσῃ ἐριδούπῳ,
Odyssey 1.400	πὰρʼ δʼ ἄρʼ ἐυμμελίην Πεισίστρατον, ὄρχαμον ἀνδρῶν,
Odyssey 1.401	ὅς οἱ ἔτʼ ἠίθεος παίδων ἦν ἐν μεγάροισιν·
Odyssey 1.402	αὐτὸς δʼ αὖτε καθεῦδε μυχῷ δόμου ὑψηλοῖο,
Odyssey 1.403	τῷ δʼ ἄλοχος δέσποινα λέχος πόρσυνε καὶ εὐνήν.
Odyssey 1.404	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.405	ὤρνυτʼ ἄρʼ ἐξ εὐνῆφι Γερήνιος ἱππότα Νέστωρ,
Odyssey 1.406	ἐκ δʼ ἐλθὼν κατʼ ἄρʼ ἕζετʼ ἐπὶ ξεστοῖσι λίθοισιν,
Odyssey 1.407	οἵ οἱ ἔσαν προπάροιθε θυράων ὑψηλάων,
Odyssey 1.408	λευκοί, ἀποστίλβοντες ἀλείφατος· οἷς ἔπι μὲν πρὶν
Odyssey 1.409	Νηλεὺς ἵζεσκεν, θεόφιν μήστωρ ἀτάλαντος·
Odyssey 1.410	ἀλλʼ ὁ μὲν ἤδη κηρὶ δαμεὶς Ἄϊδόσδε βεβήκει,
Odyssey 1.411	Νέστωρ αὖ τότʼ ἐφῖζε Γερήνιος, οὖρος Ἀχαιῶν,
Odyssey 1.412	σκῆπτρον ἔχων. περὶ δʼ υἷες ἀολλέες ἠγερέθοντο
Odyssey 1.413	ἐκ θαλάμων ἐλθόντες, Ἐχέφρων τε Στρατίος τε
Odyssey 1.414	Περσεύς τʼ Ἄρητός τε καὶ ἀντίθεος Θρασυμήδης.
Odyssey 1.415	τοῖσι δʼ ἔπειθʼ ἕκτος Πεισίστρατος ἤλυθεν ἥρως,
Odyssey 1.416	πὰρ δʼ ἄρα Τηλέμαχον θεοείκελον εἷσαν ἄγοντες.
Odyssey 1.417	τοῖσι δὲ μύθων ἦρχε Γερήνιος ἱππότα Νέστωρ·
Odyssey 1.418	καρπαλίμως μοι, τέκνα φίλα, κρηήνατʼ ἐέλδωρ,
Odyssey 1.419	ὄφρʼ ἦ τοι πρώτιστα θεῶν ἱλάσσομʼ Ἀθήνην,
Odyssey 1.420	ἥ μοι ἐναργὴς ἦλθε θεοῦ ἐς δαῖτα θάλειαν.
Odyssey 1.421	ἀλλʼ ἄγʼ ὁ μὲν πεδίονδʼ ἐπὶ βοῦν, ἴτω, ὄφρα τάχιστα
Odyssey 1.422	ἔλθῃσιν, ἐλάσῃ δὲ βοῶν ἐπιβουκόλος ἀνήρ·
Odyssey 1.423	εἷς δʼ ἐπὶ Τηλεμάχου μεγαθύμου νῆα μέλαιναν
Odyssey 1.424	πάντας ἰὼν ἑτάρους ἀγέτω, λιπέτω δὲ δύʼ οἴους·
Odyssey 1.425	εἷς δʼ αὖ χρυσοχόον Λαέρκεα δεῦρο κελέσθω
Odyssey 1.426	ἐλθεῖν, ὄφρα βοὸς χρυσὸν κέρασιν περιχεύῃ.
Odyssey 1.427	οἱ δʼ ἄλλοι μένετʼ αὐτοῦ ἀολλέες, εἴπατε δʼ εἴσω
Odyssey 1.428	δμῳῇσιν κατὰ δώματʼ ἀγακλυτὰ δαῖτα πένεσθαι,
Odyssey 1.429	ἕδρας τε ξύλα τʼ ἀμφὶ καὶ ἀγλαὸν οἰσέμεν ὕδωρ.
Odyssey 1.430	ὣς ἔφαθʼ, οἱ δʼ ἄρα πάντες ἐποίπνυον. ἦλθε μὲν ἂρ βοῦς
Odyssey 1.431	ἐκ πεδίου, ἦλθον δὲ θοῆς παρὰ νηὸς ἐίσης
Odyssey 1.432	Τηλεμάχου ἕταροι μεγαλήτορος, ἦλθε δὲ χαλκεὺς
Odyssey 1.433	ὅπλʼ ἐν χερσὶν ἔχων χαλκήια, πείρατα τέχνης,
Odyssey 1.434	ἄκμονά τε σφῦράν τʼ ἐυποίητόν τε πυράγρην,
Odyssey 1.435	οἷσίν τε χρυσὸν εἰργάζετο· ἦλθε δʼ Ἀθήνη
Odyssey 1.436	ἱρῶν ἀντιόωσα. γέρων δʼ ἱππηλάτα Νέστωρ
Odyssey 1.437	χρυσὸν ἔδωχʼ· ὁ δʼ ἔπειτα βοὸς κέρασιν περίχευεν
Odyssey 1.438	ἀσκήσας, ἵνʼ ἄγαλμα θεὰ κεχάροιτο ἰδοῦσα.
Odyssey 1.439	βοῦν δʼ ἀγέτην κεράων Στρατίος καὶ δῖος Ἐχέφρων.
Odyssey 1.440	χέρνιβα δέ σφʼ Ἄρητος ἐν ἀνθεμόεντι λέβητι
Odyssey 1.441	ἤλυθεν ἐκ θαλάμοιο φέρων, ἑτέρῃ δʼ ἔχεν οὐλὰς
Odyssey 1.442	ἐν κανέῳ πέλεκυν δὲ μενεπτόλεμος Θρασυμήδης
Odyssey 1.443	ὀξὺν ἔχων ἐν χειρὶ παρίστατο βοῦν ἐπικόψων.
Odyssey 1.444	Περσεὺς δʼ ἀμνίον εἶχε· γέρων δʼ ἱππηλάτα Νέστωρ
Odyssey 1.445	χέρνιβά τʼ οὐλοχύτας τε κατήρχετο, πολλὰ δʼ Ἀθήνῃ
Odyssey 1.446	εὔχετʼ ἀπαρχόμενος, κεφαλῆς τρίχας ἐν πυρὶ βάλλων.
Odyssey 1.447	αὐτὰρ ἐπεί ῥʼ εὔξαντο καὶ οὐλοχύτας προβάλοντο,
Odyssey 1.448	αὐτίκα Νέστορος υἱὸς ὑπέρθυμος Θρασυμήδης
Odyssey 1.449	ἤλασεν ἄγχι στάς· πέλεκυς δʼ ἀπέκοψε τένοντας
Odyssey 1.450	αὐχενίους, λῦσεν δὲ βοὸς μένος. αἱ δʼ ὀλόλυξαν
Odyssey 1.451	θυγατέρες τε νυοί τε καὶ αἰδοίη παράκοιτις
Odyssey 1.452	Νέστορος, Εὐρυδίκη, πρέσβα Κλυμένοιο θυγατρῶν.
Odyssey 1.453	οἱ μὲν ἔπειτʼ ἀνελόντες ἀπὸ χθονὸς εὐρυοδείης
Odyssey 1.454	ἔσχον· ἀτὰρ σφάξεν Πεισίστρατος, ὄρχαμος ἀνδρῶν.
Odyssey 1.455	τῆς δʼ ἐπεὶ ἐκ μέλαν αἷμα ῥύη, λίπε δʼ ὀστέα θυμός,
Odyssey 1.456	αἶψʼ ἄρα μιν διέχευαν, ἄφαρ δʼ ἐκ μηρία τάμνον
Odyssey 1.457	πάντα κατὰ μοῖραν, κατά τε κνίσῃ ἐκάλυψαν
Odyssey 1.458	δίπτυχα ποιήσαντες, ἐπʼ αὐτῶν δʼ ὠμοθέτησαν.
Odyssey 1.459	καῖε δʼ ἐπὶ σχίζῃς ὁ γέρων, ἐπὶ δʼ αἴθοπα οἶνον
Odyssey 1.460	λεῖβε· νέοι δὲ παρʼ αὐτὸν ἔχον πεμπώβολα χερσίν.
Odyssey 1.461	αὐτὰρ ἐπεὶ κατὰ μῆρʼ ἐκάη καὶ σπλάγχνα πάσαντο,
Odyssey 1.462	μίστυλλόν τʼ ἄρα τἆλλα καὶ ἀμφʼ ὀβελοῖσιν ἔπειραν,
Odyssey 1.463	ὤπτων δʼ ἀκροπόρους ὀβελοὺς ἐν χερσὶν ἔχοντες.
Odyssey 1.464	τόφρα δὲ Τηλέμαχον λοῦσεν καλὴ Πολυκάστη,
Odyssey 1.465	Νέστορος ὁπλοτάτη θυγάτηρ Νηληϊάδαο.
Odyssey 1.466	αὐτὰρ ἐπεὶ λοῦσέν τε καὶ ἔχρισεν λίπʼ ἐλαίῳ,
Odyssey 1.467	ἀμφὶ δέ μιν φᾶρος καλὸν βάλεν ἠδὲ χιτῶνα,
Odyssey 1.468	ἔκ ῥʼ ἀσαμίνθου βῆ δέμας ἀθανάτοισιν ὁμοῖος·
Odyssey 1.469	πὰρ δʼ ὅ γε Νέστορʼ ἰὼν κατʼ ἄρʼ ἕζετο, ποιμένα λαῶν.
Odyssey 1.470	οἱ δʼ ἐπεὶ ὤπτησαν κρέʼ ὑπέρτερα καὶ ἐρύσαντο,
Odyssey 1.471	δαίνυνθʼ ἑζόμενοι· ἐπὶ δʼ ἀνέρες ἐσθλοὶ ὄροντο
Odyssey 1.472	οἶνον οἰνοχοεῦντες ἐνὶ χρυσέοις δεπάεσσιν.
Odyssey 1.473	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.474	τοῖσι δὲ μύθων ἦρχε Γερήνιος ἱππότα Νέστωρ·
Odyssey 1.475	παῖδες ἐμοί, ἄγε Τηλεμάχῳ καλλίτριχας ἵππους
Odyssey 1.476	ζεύξαθʼ ὑφʼ ἅρματʼ ἄγοντες, ἵνα πρήσσῃσιν ὁδοῖο.
Odyssey 1.477	ὣς ἔφαθʼ, οἱ δʼ ἄρα τοῦ μάλα μὲν κλύον ἠδʼ ἐπίθοντο,
Odyssey 1.478	καρπαλίμως δʼ ἔζευξαν ὑφʼ ἅρμασιν ὠκέας ἵππους.
Odyssey 1.479	ἐν δὲ γυνὴ ταμίη σῖτον καὶ οἶνον ἔθηκεν
Odyssey 1.480	ὄψα τε, οἷα ἔδουσι διοτρεφέες βασιλῆες.
Odyssey 1.481	ἂν δʼ ἄρα Τηλέμαχος περικαλλέα βήσετο δίφρον·
Odyssey 1.482	πὰρ δʼ ἄρα Νεστορίδης Πεισίστρατος, ὄρχαμος ἀνδρῶν,
Odyssey 1.483	ἐς δίφρον τʼ ἀνέβαινε καὶ ἡνία λάζετο χερσί,
Odyssey 1.484	μάστιξεν δʼ ἐλάαν, τὼ δʼ οὐκ ἀέκοντε πετέσθην
Odyssey 1.485	ἐς πεδίον, λιπέτην δὲ Πύλου αἰπὺ πτολίεθρον.
Odyssey 1.486	οἱ δὲ πανημέριοι σεῖον ζυγὸν ἀμφὶς ἔχοντες.
Odyssey 1.487	δύσετό τʼ ἠέλιος σκιόωντό τε πᾶσαι ἀγυιαί,
Odyssey 1.488	ἐς Φηρὰς δʼ ἵκοντο Διοκλῆος ποτὶ δῶμα,
Odyssey 1.489	υἱέος Ὀρτιλόχοιο, τὸν Ἀλφειὸς τέκε παῖδα.
Odyssey 1.490	ἔνθα δὲ νύκτʼ ἄεσαν, ὁ δὲ τοῖς πὰρ ξείνια θῆκεν.
Odyssey 1.491	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.492	ἵππους τε ζεύγνυντʼ ἀνά θʼ ἅρματα ποικίλʼ ἔβαινον·
Odyssey 1.493	ἐκ δʼ ἔλασαν προθύροιο καὶ αἰθούσης ἐριδούπου·
Odyssey 1.494	μάστιξεν δʼ ἐλάαν, τὼ δʼ οὐκ ἀέκοντε πετέσθην.
Odyssey 1.495	ἷξον δʼ ἐς πεδίον πυρηφόρον, ἔνθα δʼ ἔπειτα
Odyssey 1.496	ἦνον ὁδόν· τοῖον γὰρ ὑπέκφερον ὠκέες ἵπποι.
Odyssey 1.497	δύσετό τʼ ἠέλιος σκιόωντό τε πᾶσαι ἀγυιαί.
Odyssey 1.1	οἱ δʼ ἷξον κοίλην Λακεδαίμονα κητώεσσαν,
Odyssey 1.2	πρὸς δʼ ἄρα δώματʼ ἔλων Μενελάου κυδαλίμοιο.
Odyssey 1.3	τὸν δʼ εὗρον δαινύντα γάμον πολλοῖσιν ἔτῃσιν
Odyssey 1.4	υἱέος ἠδὲ θυγατρὸς ἀμύμονος ᾧ ἐνὶ οἴκῳ.
Odyssey 1.5	τὴν μὲν Ἀχιλλῆος ῥηξήνορος υἱέι πέμπεν·
Odyssey 1.6	ἐν Τροίῃ γὰρ πρῶτον ὑπέσχετο καὶ κατένευσε
Odyssey 1.7	δωσέμεναι, τοῖσιν δὲ θεοὶ γάμον ἐξετέλειον.
Odyssey 1.8	τὴν ἄρʼ ὅ γʼ ἔνθʼ ἵπποισι καὶ ἅρμασι πέμπε νέεσθαι
Odyssey 1.9	Μυρμιδόνων προτὶ ἄστυ περικλυτόν, οἷσιν ἄνασσεν.
Odyssey 1.10	υἱέι δὲ Σπάρτηθεν Ἀλέκτορος ἤγετο κούρην,
Odyssey 1.11	ὅς οἱ τηλύγετος γένετο κρατερὸς Μεγαπένθης
Odyssey 1.12	ἐκ δούλης· Ἑλένῃ δὲ θεοὶ γόνον οὐκέτʼ ἔφαινον,
Odyssey 1.13	ἐπεὶ δὴ τὸ πρῶτον ἐγείνατο παῖδʼ ἐρατεινήν,
Odyssey 1.14	Ἑρμιόνην, ἣ εἶδος ἔχε χρυσέης Ἀφροδίτης.
Odyssey 1.15	ὣς οἱ μὲν δαίνυντο καθʼ ὑψερεφὲς μέγα δῶμα
Odyssey 1.16	γείτονες ἠδὲ ἔται Μενελάου κυδαλίμοιο,
Odyssey 1.17	τερπόμενοι· μετὰ δέ σφιν ἐμέλπετο θεῖος ἀοιδὸς
Odyssey 1.18	φορμίζων, δοιὼ δὲ κυβιστητῆρε κατʼ αὐτούς,
Odyssey 1.19	μολπῆς ἐξάρχοντος, ἐδίνευον κατὰ μέσσους.
Odyssey 1.20	τὼ δʼ αὖτʼ ἐν προθύροισι δόμων αὐτώ τε καὶ ἵππω,
Odyssey 1.21	Τηλέμαχός θʼ ἥρως καὶ Νέστορος ἀγλαὸς υἱός,
Odyssey 1.22	στῆσαν· ὁ δὲ προμολὼν ἴδετο κρείων Ἐτεωνεύς,
Odyssey 1.23	ὀτρηρὸς θεράπων Μενελάου κυδαλίμοιο,
Odyssey 1.24	βῆ δʼ ἴμεν ἀγγελέων διὰ δώματα ποιμένι λαῶν,
Odyssey 1.25	ἀγχοῦ δʼ ἱστάμενος ἔπεα πτερόεντα προσηύδα·
Odyssey 1.26	ξείνω δή τινε τώδε, διοτρεφὲς ὦ Μενέλαε,
Odyssey 1.27	ἄνδρε δύω, γενεῇ δὲ Διὸς μεγάλοιο ἔικτον.
Odyssey 1.28	ἀλλʼ εἴπʼ, ἤ σφωιν καταλύσομεν ὠκέας ἵππους,
Odyssey 1.29	ἦ ἄλλον πέμπωμεν ἱκανέμεν, ὅς κε φιλήσῃ.
Odyssey 1.30	τὸν δὲ μέγʼ ὀχθήσας προσέφη ξανθὸς Μενέλαος·
Odyssey 1.31	οὐ μὲν νήπιος ἦσθα, Βοηθοΐδη Ἐτεωνεῦ,
Odyssey 1.32	τὸ πρίν· ἀτὰρ μὲν νῦν γε πάϊς ὣς νήπια βάζεις.
Odyssey 1.33	ἦ μὲν δὴ νῶι ξεινήια πολλὰ φαγόντε
Odyssey 1.34	ἄλλων ἀνθρώπων δεῦρʼ ἱκόμεθʼ, αἴ κέ ποθι Ζεὺς
Odyssey 1.35	ἐξοπίσω περ παύσῃ ὀιζύος. ἀλλὰ λύʼ ἵππους
Odyssey 1.36	ξείνων, ἐς δʼ αὐτοὺς προτέρω ἄγε θοινηθῆναι.
Odyssey 1.37	ὣς φάθʼ, ὁ δὲ μεγάροιο διέσσυτο, κέκλετο δʼ ἄλλους
Odyssey 1.38	ὀτρηροὺς θεράποντας ἅμα σπέσθαι ἑοῖ αὐτῷ.
Odyssey 1.39	οἱ δʼ ἵππους μὲν λῦσαν ὑπὸ ζυγοῦ ἱδρώοντας,
Odyssey 1.40	καὶ τοὺς μὲν κατέδησαν ἐφʼ ἱππείῃσι κάπῃσι,
Odyssey 1.41	πὰρ δʼ ἔβαλον ζειάς, ἀνὰ δὲ κρῖ λευκὸν ἔμιξαν,
Odyssey 1.42	ἅρματα δʼ ἔκλιναν πρὸς ἐνώπια παμφανόωντα,
Odyssey 1.43	αὐτοὺς δʼ εἰσῆγον θεῖον δόμον. οἱ δὲ ἰδόντες
Odyssey 1.44	θαύμαζον κατὰ δῶμα διοτρεφέος βασιλῆος·
Odyssey 1.45	ὥς τε γὰρ ἠελίου αἴγλη πέλεν ἠὲ σελήνης
Odyssey 1.46	δῶμα καθʼ ὑψερεφὲς Μενελάου κυδαλίμοιο.
Odyssey 1.47	αὐτὰρ ἐπεὶ τάρπησαν ὁρώμενοι ὀφθαλμοῖσιν,
Odyssey 1.48	ἔς ῥʼ ἀσαμίνθους βάντες ἐυξέστας λούσαντο.
Odyssey 1.49	τοὺς δʼ ἐπεὶ οὖν δμῳαὶ λοῦσαν καὶ χρῖσαν ἐλαίῳ,
Odyssey 1.50	ἀμφὶ δʼ ἄρα χλαίνας οὔλας βάλον ἠδὲ χιτῶνας,
Odyssey 1.51	ἔς ῥα θρόνους ἕζοντο παρʼ Ἀτρεΐδην Μενέλαον.
Odyssey 1.52	χέρνιβα δʼ ἀμφίπολος προχόῳ ἐπέχευε φέρουσα
Odyssey 1.53	καλῇ χρυσείῃ ὑπὲρ ἀργυρέοιο λέβητος,
Odyssey 1.54	νίψασθαι· παρὰ δὲ ξεστὴν ἐτάνυσσε τράπεζαν.
Odyssey 1.55	σῖτον δʼ αἰδοίη ταμίη παρέθηκε φέρουσα,
Odyssey 1.56	εἴδατα πόλλʼ ἐπιθεῖσα, χαριζομένη παρεόντων.
Odyssey 1.57	δαιτρὸς δὲ κρειῶν πίνακας παρέθηκεν ἀείρας
Odyssey 1.58	παντοίων, παρὰ δέ σφι τίθει χρύσεια κύπελλα.
Odyssey 1.59	τὼ καὶ δεικνύμενος προσέφη ξανθὸς Μενέλαος·
Odyssey 1.60	σίτου θʼ ἅπτεσθον καὶ χαίρετον. αὐτὰρ ἔπειτα
Odyssey 1.61	δείπνου πασσαμένω εἰρησόμεθʼ, οἵ τινές ἐστον
Odyssey 1.62	ἀνδρῶν· οὐ γὰρ σφῷν γε γένος ἀπόλωλε τοκήων,
Odyssey 1.63	ἀλλʼ ἀνδρῶν γένος ἐστὲ διοτρεφέων βασιλήων
Odyssey 1.64	σκηπτούχων, ἐπεὶ οὔ κε κακοὶ τοιούσδε τέκοιεν.
Odyssey 1.65	ὣς φάτο, καί σφιν νῶτα βοὸς παρὰ πίονα θῆκεν
Odyssey 1.66	ὄπτʼ ἐν χερσὶν ἑλών, τά ῥά οἱ γέρα πάρθεσαν αὐτῷ.
Odyssey 1.67	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.68	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.69	δὴ τότε Τηλέμαχος προσεφώνεε Νέστορος υἱόν,
Odyssey 1.70	ἄγχι σχὼν κεφαλήν, ἵνα μὴ πευθοίαθʼ οἱ ἄλλοι·
Odyssey 1.71	φράζεο, Νεστορίδη, τῷ ἐμῷ κεχαρισμένε θυμῷ,
Odyssey 1.72	χαλκοῦ τε στεροπὴν κὰδ δώματα ἠχήεντα
Odyssey 1.73	χρυσοῦ τʼ ἠλέκτρου τε καὶ ἀργύρου ἠδʼ ἐλέφαντος.
Odyssey 1.74	Ζηνός που τοιήδε γʼ Ὀλυμπίου ἔνδοθεν αὐλή,
Odyssey 1.75	ὅσσα τάδʼ ἄσπετα πολλά· σέβας μʼ ἔχει εἰσορόωντα.
Odyssey 1.76	τοῦ δʼ ἀγορεύοντος ξύνετο ξανθὸς Μενέλαος,
Odyssey 1.77	καί σφεας φωνήσας ἔπεα πτερόεντα προσηύδα·
Odyssey 1.78	τέκνα φίλʼ, ἦ τοι Ζηνὶ βροτῶν οὐκ ἄν τις ἐρίζοι·
Odyssey 1.79	ἀθάνατοι γὰρ τοῦ γε δόμοι καὶ κτήματʼ ἔασιν·
Odyssey 1.80	ἀνδρῶν δʼ ἤ κέν τίς μοι ἐρίσσεται, ἠὲ καὶ οὐκί,
Odyssey 1.81	κτήμασιν. ἦ γὰρ πολλὰ παθὼν καὶ πόλλʼ ἐπαληθεὶς
Odyssey 1.82	ἠγαγόμην ἐν νηυσὶ καὶ ὀγδοάτῳ ἔτει ἦλθον,
Odyssey 1.83	Κύπρον Φοινίκην τε καὶ Αἰγυπτίους ἐπαληθείς,
Odyssey 1.84	Αἰθίοπάς θʼ ἱκόμην καὶ Σιδονίους καὶ Ἐρεμβοὺς
Odyssey 1.85	καὶ Λιβύην, ἵνα τʼ ἄρνες ἄφαρ κεραοὶ τελέθουσι.
Odyssey 1.86	τρὶς γὰρ τίκτει μῆλα τελεσφόρον εἰς ἐνιαυτόν.
Odyssey 1.87	ἔνθα μὲν οὔτε ἄναξ ἐπιδευὴς οὔτε τι ποιμὴν
Odyssey 1.88	τυροῦ καὶ κρειῶν οὐδὲ γλυκεροῖο γάλακτος,
Odyssey 1.89	ἀλλʼ αἰεὶ παρέχουσιν ἐπηετανὸν γάλα θῆσθαι.
Odyssey 1.90	ἧος ἐγὼ περὶ κεῖνα πολὺν βίοτον συναγείρων
Odyssey 1.91	ἠλώμην, τῆός μοι ἀδελφεὸν ἄλλος ἔπεφνεν
Odyssey 1.92	λάθρῃ, ἀνωιστί, δόλῳ οὐλομένης ἀλόχοιο·
Odyssey 1.93	ὣς οὔ τοι χαίρων τοῖσδε κτεάτεσσιν ἀνάσσω.
Odyssey 1.94	καὶ πατέρων τάδε μέλλετʼ ἀκουέμεν, οἵ τινες ὑμῖν
Odyssey 1.95	εἰσίν, ἐπεὶ μάλα πολλὰ πάθον, καὶ ἀπώλεσα οἶκον
Odyssey 1.96	εὖ μάλα ναιετάοντα, κεχανδότα πολλὰ καὶ ἐσθλά.
Odyssey 1.97	ὧν ὄφελον τριτάτην περ ἔχων ἐν δώμασι μοῖραν
Odyssey 1.98	ναίειν, οἱ δʼ ἄνδρες σόοι ἔμμεναι, οἳ τότʼ ὄλοντο
Odyssey 1.99	Τροίῃ ἐν εὐρείῃ ἑκὰς Ἄργεος ἱπποβότοιο.
Odyssey 1.100	ἀλλʼ ἔμπης πάντας μὲν ὀδυρόμενος καὶ ἀχεύων
Odyssey 1.101	πολλάκις ἐν μεγάροισι καθήμενος ἡμετέροισιν
Odyssey 1.102	ἄλλοτε μέν τε γόῳ φρένα τέρπομαι, ἄλλοτε δʼ αὖτε
Odyssey 1.103	παύομαι· αἰψηρὸς δὲ κόρος κρυεροῖο γόοιο.
Odyssey 1.104	τῶν πάντων οὐ τόσσον ὀδύρομαι, ἀχνύμενός περ,
Odyssey 1.105	ὡς ἑνός, ὅς τέ μοι ὕπνον ἀπεχθαίρει καὶ ἐδωδὴν
Odyssey 1.106	μνωομένῳ, ἐπεὶ οὔ τις Ἀχαιῶν τόσσʼ ἐμόγησεν,
Odyssey 1.107	ὅσσʼ Ὀδυσεὺς ἐμόγησε καὶ ἤρατο. τῷ δʼ ἄρʼ ἔμελλεν
Odyssey 1.108	αὐτῷ κήδεʼ ἔσεσθαι, ἐμοὶ δʼ ἄχος αἰὲν ἄλαστον
Odyssey 1.109	κείνου, ὅπως δὴ δηρὸν ἀποίχεται, οὐδέ τι ἴδμεν,
Odyssey 1.110	ζώει ὅ γʼ ἦ τέθνηκεν. ὀδύρονταί νύ που αὐτὸν
Odyssey 1.111	Λαέρτης θʼ ὁ γέρων καὶ ἐχέφρων Πηνελόπεια
Odyssey 1.112	Τηλέμαχός θʼ, ὃν ἔλειπε νέον γεγαῶτʼ ἐνὶ οἴκῳ.
Odyssey 1.113	ὣς φάτο, τῷ δʼ ἄρα πατρὸς ὑφʼ ἵμερον ὦρσε γόοιο.
Odyssey 1.114	δάκρυ δʼ ἀπὸ βλεφάρων χαμάδις βάλε πατρὸς ἀκούσας,
Odyssey 1.115	χλαῖναν πορφυρέην ἄντʼ ὀφθαλμοῖιν ἀνασχὼν
Odyssey 1.116	ἀμφοτέρῃσιν χερσί. νόησε δέ μιν Μενέλαος,
Odyssey 1.117	μερμήριξε δʼ ἔπειτα κατὰ φρένα καὶ κατὰ θυμόν,
Odyssey 1.118	ἠέ μιν αὐτὸν πατρὸς ἐάσειε μνησθῆναι
Odyssey 1.119	ἦ πρῶτʼ ἐξερέοιτο ἕκαστά τε πειρήσαιτο.
Odyssey 1.120	ἧος ὁ ταῦθʼ ὥρμαινε κατὰ φρένα καὶ κατὰ θυμόν,
Odyssey 1.121	ἐκ δʼ Ἑλένη θαλάμοιο θυώδεος ὑψορόφοιο
Odyssey 1.122	ἤλυθεν Ἀρτέμιδι χρυσηλακάτῳ ἐικυῖα.
Odyssey 1.123	τῇ δʼ ἄρʼ ἅμʼ Ἀδρήστη κλισίην εὔτυκτον ἔθηκεν,
Odyssey 1.124	Ἀλκίππη δὲ τάπητα φέρεν μαλακοῦ ἐρίοιο,
Odyssey 1.125	Φυλὼ δʼ ἀργύρεον τάλαρον φέρε, τόν οἱ ἔθηκεν
Odyssey 1.126	Ἀλκάνδρη, Πολύβοιο δάμαρ, ὃς ἔναιʼ ἐνὶ Θήβῃς
Odyssey 1.127	Αἰγυπτίῃς, ὅθι πλεῖστα δόμοις ἐν κτήματα κεῖται·
Odyssey 1.128	ὃς Μενελάῳ δῶκε δύʼ ἀργυρέας ἀσαμίνθους,
Odyssey 1.129	δοιοὺς δὲ τρίποδας, δέκα δὲ χρυσοῖο τάλαντα.
Odyssey 1.130	χωρὶς δʼ αὖθʼ Ἑλένῃ ἄλοχος πόρε κάλλιμα δῶρα·
Odyssey 1.131	χρυσέην τʼ ἠλακάτην τάλαρόν θʼ ὑπόκυκλον ὄπασσεν
Odyssey 1.132	ἀργύρεον, χρυσῷ δʼ ἐπὶ χείλεα κεκράαντο.
Odyssey 1.133	τόν ῥά οἱ ἀμφίπολος Φυλὼ παρέθηκε φέρουσα
Odyssey 1.134	νήματος ἀσκητοῖο βεβυσμένον· αὐτὰρ ἐπʼ αὐτῷ
Odyssey 1.135	ἠλακάτη τετάνυστο ἰοδνεφὲς εἶρος ἔχουσα.
Odyssey 1.136	ἕζετο δʼ ἐν κλισμῷ, ὑπὸ δὲ θρῆνυς ποσὶν ἦεν.
Odyssey 1.137	αὐτίκα δʼ ἥ γʼ ἐπέεσσι πόσιν ἐρέεινεν ἕκαστα·
Odyssey 1.138	ἴδμεν δή, Μενέλαε διοτρεφές, οἵ τινες οἵδε
Odyssey 1.139	ἀνδρῶν εὐχετόωνται ἱκανέμεν ἡμέτερον δῶ;
Odyssey 1.140	ψεύσομαι ἦ ἔτυμον ἐρέω; κέλεται δέ με θυμός.
Odyssey 1.141	οὐ γάρ πώ τινά φημι ἐοικότα ὧδε ἰδέσθαι
Odyssey 1.142	οὔτʼ ἄνδρʼ οὔτε γυναῖκα, σέβας μʼ ἔχει εἰσορόωσαν,
Odyssey 1.143	ὡς ὅδʼ Ὀδυσσῆος μεγαλήτορος υἷι ἔοικε,
Odyssey 1.144	Τηλεμάχῳ, τὸν ἔλειπε νέον γεγαῶτʼ ἐνὶ οἴκῳ
Odyssey 1.145	κεῖνος ἀνήρ, ὅτʼ ἐμεῖο κυνώπιδος εἵνεκʼ Ἀχαιοὶ
Odyssey 1.146	ἤλθεθʼ ὑπὸ Τροίην πόλεμον θρασὺν ὁρμαίνοντες.
Odyssey 1.147	τὴν δʼ ἀπαμειβόμενος προσέφη ξανθὸς Μενέλαος·
Odyssey 1.148	οὕτω νῦν καὶ ἐγὼ νοέω, γύναι, ὡς σὺ ἐίσκεις·
Odyssey 1.149	κείνου γὰρ τοιοίδε πόδες τοιαίδε τε χεῖρες
Odyssey 1.150	ὀφθαλμῶν τε βολαὶ κεφαλή τʼ ἐφύπερθέ τε χαῖται.
Odyssey 1.151	καὶ νῦν ἦ τοι ἐγὼ μεμνημένος ἀμφʼ Ὀδυσῆι
Odyssey 1.152	μυθεόμην, ὅσα κεῖνος ὀιζύσας ἐμόγησεν
Odyssey 1.153	ἀμφʼ ἐμοί, αὐτὰρ ὁ πικρὸν ὑπʼ ὀφρύσι δάκρυον εἶβε,
Odyssey 1.154	χλαῖναν πορφυρέην ἄντʼ ὀφθαλμοῖιν ἀνασχών.
Odyssey 1.155	τὸν δʼ αὖ Νεστορίδης Πεισίστρατος ἀντίον ηὔδα·
Odyssey 1.156	Ἀτρεΐδη Μενέλαε διοτρεφές, ὄρχαμε λαῶν,
Odyssey 1.157	κείνου μέν τοι ὅδʼ υἱὸς ἐτήτυμον, ὡς ἀγορεύεις·
Odyssey 1.158	ἀλλὰ σαόφρων ἐστί, νεμεσσᾶται δʼ ἐνὶ θυμῷ
Odyssey 1.159	ὧδʼ ἐλθὼν τὸ πρῶτον ἐπεσβολίας ἀναφαίνειν
Odyssey 1.160	ἄντα σέθεν, τοῦ νῶι θεοῦ ὣς τερπόμεθʼ αὐδῇ.
Odyssey 1.161	αὐτὰρ ἐμὲ προέηκε Γερήνιος ἱππότα Νέστωρ
Odyssey 1.162	τῷ ἅμα πομπὸν ἕπεσθαι· ἐέλδετο γάρ σε ἰδέσθαι,
Odyssey 1.163	ὄφρα οἱ ἤ τι ἔπος ὑποθήσεαι ἠέ τι ἔργον.
Odyssey 1.164	πολλὰ γὰρ ἄλγεʼ ἔχει πατρὸς πάϊς οἰχομένοιο
Odyssey 1.165	ἐν μεγάροις, ᾧ μὴ ἄλλοι ἀοσσητῆρες ἔωσιν,
Odyssey 1.166	ὡς νῦν Τηλεμάχῳ ὁ μὲν οἴχεται, οὐδέ οἱ ἄλλοι
Odyssey 1.167	εἴσʼ οἵ κεν κατὰ δῆμον ἀλάλκοιεν κακότητα.
Odyssey 1.168	τὸν δʼ ἀπαμειβόμενος προσέφη ξανθὸς Μενέλαος·
Odyssey 1.169	ὢ πόποι, ἦ μάλα δὴ φίλου ἀνέρος υἱὸς ἐμὸν δῶ
Odyssey 1.170	ἵκεθʼ, ὃς εἵνεκʼ ἐμεῖο πολέας ἐμόγησεν ἀέθλους·
Odyssey 1.171	καί μιν ἔφην ἐλθόντα φιλησέμεν ἔξοχον ἄλλων
Odyssey 1.172	Ἀργείων, εἰ νῶιν ὑπεὶρ ἅλα νόστον ἔδωκε
Odyssey 1.173	νηυσὶ θοῇσι γενέσθαι Ὀλύμπιος εὐρύοπα Ζεύς.
Odyssey 1.174	καί κέ οἱ Ἄργεϊ νάσσα πόλιν καὶ δώματʼ ἔτευξα,
Odyssey 1.175	ἐξ Ἰθάκης ἀγαγὼν σὺν κτήμασι καὶ τέκεϊ ᾧ
Odyssey 1.176	καὶ πᾶσιν λαοῖσι, μίαν πόλιν ἐξαλαπάξας,
Odyssey 1.177	αἳ περιναιετάουσιν, ἀνάσσονται δʼ ἐμοὶ αὐτῷ.
Odyssey 1.178	καί κε θάμʼ ἐνθάδʼ ἐόντες ἐμισγόμεθʼ· οὐδέ κεν ἡμέας
Odyssey 1.179	ἄλλο διέκρινεν φιλέοντέ τε τερπομένω τε,
Odyssey 1.180	πρίν γʼ ὅτε δὴ θανάτοιο μέλαν νέφος ἀμφεκάλυψεν.
Odyssey 1.181	ἀλλὰ τὰ μέν που μέλλεν ἀγάσσεσθαι θεὸς αὐτός,
Odyssey 1.182	ὃς κεῖνον δύστηνον ἀνόστιμον οἶον ἔθηκεν.
Odyssey 1.183	ὣς φάτο, τοῖσι δὲ πᾶσιν ὑφʼ ἵμερον ὦρσε γόοιο.
Odyssey 1.184	κλαῖε μὲν Ἀργείη Ἑλένη, Διὸς ἐκγεγαυῖα,
Odyssey 1.185	κλαῖε δὲ Τηλέμαχός τε καὶ Ἀτρεΐδης Μενέλαος,
Odyssey 1.186	οὐδʼ ἄρα Νέστορος υἱὸς ἀδακρύτω ἔχεν ὄσσε·
Odyssey 1.187	μνήσατο γὰρ κατὰ θυμὸν ἀμύμονος Ἀντιλόχοιο,
Odyssey 1.188	τόν ῥʼ Ἠοῦς ἔκτεινε φαεινῆς ἀγλαὸς υἱός·
Odyssey 1.189	τοῦ ὅ γʼ ἐπιμνησθεὶς ἔπεα πτερόεντʼ ἀγόρευεν·
Odyssey 1.190	Ἀτρεΐδη, περὶ μέν σε βροτῶν πεπνυμένον εἶναι
Odyssey 1.191	Νέστωρ φάσχʼ ὁ γέρων, ὅτʼ ἐπιμνησαίμεθα σεῖο
Odyssey 1.192	οἷσιν ἐνὶ μεγάροισι, καὶ ἀλλήλους ἐρέοιμεν.
Odyssey 1.193	καὶ νῦν, εἴ τί που ἔστι, πίθοιό μοι· οὐ γὰρ ἐγώ γε
Odyssey 1.194	τέρπομʼ ὀδυρόμενος μεταδόρπιος, ἀλλὰ καὶ ἠὼς
Odyssey 1.195	ἔσσεται ἠριγένεια· νεμεσσῶμαί γε μὲν οὐδὲν
Odyssey 1.196	κλαίειν ὅς κε θάνῃσι βροτῶν καὶ πότμον ἐπίσπῃ.
Odyssey 1.197	τοῦτό νυ καὶ γέρας οἶον ὀιζυροῖσι βροτοῖσιν,
Odyssey 1.198	κείρασθαί τε κόμην βαλέειν τʼ ἀπὸ δάκρυ παρειῶν.
Odyssey 1.199	καὶ γὰρ ἐμὸς τέθνηκεν ἀδελφεός, οὔ τι κάκιστος
Odyssey 1.200	Ἀργείων· μέλλεις δὲ σὺ ἴδμεναι· οὐ γὰρ ἐγώ γε
Odyssey 1.201	ἤντησʼ οὐδὲ ἴδον· περὶ δʼ ἄλλων φασὶ γενέσθαι
Odyssey 1.202	Ἀντίλοχον, πέρι μὲν θείειν ταχὺν ἠδὲ μαχητήν.
Odyssey 1.203	τὸν δʼ ἀπαμειβόμενος προσέφη ξανθὸς Μενέλαος·
Odyssey 1.204	ὦ φίλʼ, ἐπεὶ τόσα εἶπες, ὅσʼ ἂν πεπνυμένος ἀνὴρ
Odyssey 1.205	εἴποι καὶ ῥέξειε, καὶ ὃς προγενέστερος εἴη·
Odyssey 1.206	τοίου γὰρ καὶ πατρός, ὃ καὶ πεπνυμένα βάζεις,
Odyssey 1.207	ῥεῖα δʼ ἀρίγνωτος γόνος ἀνέρος ᾧ τε Κρονίων
Odyssey 1.208	ὄλβον ἐπικλώσῃ γαμέοντί τε γεινομένῳ τε,
Odyssey 1.209	ὡς νῦν Νέστορι δῶκε διαμπερὲς ἤματα πάντα
Odyssey 1.210	αὐτὸν μὲν λιπαρῶς γηρασκέμεν ἐν μεγάροισιν,
Odyssey 1.211	υἱέας αὖ πινυτούς τε καὶ ἔγχεσιν εἶναι ἀρίστους.
Odyssey 1.212	ἡμεῖς δὲ κλαυθμὸν μὲν ἐάσομεν, ὃς πρὶν ἐτύχθη,
Odyssey 1.213	δόρπου δʼ ἐξαῦτις μνησώμεθα, χερσὶ δʼ ἐφʼ ὕδωρ
Odyssey 1.214	χευάντων. μῦθοι δὲ καὶ ἠῶθέν περ ἔσονται
Odyssey 1.215	Τηλεμάχῳ καὶ ἐμοὶ διαειπέμεν ἀλλήλοισιν.
Odyssey 1.216	ὣς ἔφατʼ, Ἀσφαλίων δʼ ἄρʼ ὕδωρ ἐπὶ χεῖρας ἔχευεν,
Odyssey 1.217	ὀτρηρὸς θεράπων Μενελάου κυδαλίμοιο.
Odyssey 1.218	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.219	ἔνθʼ αὖτʼ ἄλλʼ ἐνόησʼ Ἑλένη Διὸς ἐκγεγαυῖα·
Odyssey 1.220	αὐτίκʼ ἄρʼ εἰς οἶνον βάλε φάρμακον, ἔνθεν ἔπινον,
Odyssey 1.221	νηπενθές τʼ ἄχολόν τε, κακῶν ἐπίληθον ἁπάντων.
Odyssey 1.222	ὃς τὸ καταβρόξειεν, ἐπὴν κρητῆρι μιγείη,
Odyssey 1.223	οὔ κεν ἐφημέριός γε βάλοι κατὰ δάκρυ παρειῶν,
Odyssey 1.224	οὐδʼ εἴ οἱ κατατεθναίη μήτηρ τε πατήρ τε,
Odyssey 1.225	οὐδʼ εἴ οἱ προπάροιθεν ἀδελφεὸν ἢ φίλον υἱὸν
Odyssey 1.226	χαλκῷ δηιόῳεν, ὁ δʼ ὀφθαλμοῖσιν ὁρῷτο.
Odyssey 1.227	τοῖα Διὸς θυγάτηρ ἔχε φάρμακα μητιόεντα,
Odyssey 1.228	ἐσθλά, τά οἱ Πολύδαμνα πόρεν, Θῶνος παράκοιτις
Odyssey 1.229	Αἰγυπτίη, τῇ πλεῖστα φέρει ζείδωρος ἄρουρα
Odyssey 1.230	φάρμακα, πολλὰ μὲν ἐσθλὰ μεμιγμένα πολλὰ δὲ λυγρά·
Odyssey 1.231	ἰητρὸς δὲ ἕκαστος ἐπιστάμενος περὶ πάντων
Odyssey 1.232	ἀνθρώπων· ἦ γὰρ Παιήονός εἰσι γενέθλης.
Odyssey 1.233	αὐτὰρ ἐπεί ῥʼ ἐνέηκε κέλευσέ τε οἰνοχοῆσαι,
Odyssey 1.234	ἐξαῦτις μύθοισιν ἀμειβομένη προσέειπεν·
Odyssey 1.235	Ἀτρεΐδη Μενέλαε διοτρεφὲς ἠδὲ καὶ οἵδε
Odyssey 1.236	ἀνδρῶν ἐσθλῶν παῖδες· ἀτὰρ θεὸς ἄλλοτε ἄλλῳ
Odyssey 1.237	Ζεὺς ἀγαθόν τε κακόν τε διδοῖ· δύναται γὰρ ἅπαντα·
Odyssey 1.238	ἦ τοι νῦν δαίνυσθε καθήμενοι ἐν μεγάροισι
Odyssey 1.239	καὶ μύθοις τέρπεσθε· ἐοικότα γὰρ καταλέξω.
Odyssey 1.240	πάντα μὲν οὐκ ἂν ἐγὼ μυθήσομαι οὐδʼ ὀνομήνω,
Odyssey 1.241	ὅσσοι Ὀδυσσῆος ταλασίφρονός εἰσιν ἄεθλοι·
Odyssey 1.242	ἀλλʼ οἷον τόδʼ ἔρεξε καὶ ἔτλη καρτερὸς ἀνὴρ
Odyssey 1.243	δήμῳ ἔνι Τρώων, ὅθι πάσχετε πήματʼ Ἀχαιοί.
Odyssey 1.244	αὐτόν μιν πληγῇσιν ἀεικελίῃσι δαμάσσας,
Odyssey 1.245	σπεῖρα κάκʼ ἀμφʼ ὤμοισι βαλών, οἰκῆι ἐοικώς,
Odyssey 1.246	ἀνδρῶν δυσμενέων κατέδυ πόλιν εὐρυάγυιαν·
Odyssey 1.247	ἄλλῳ δʼ αὐτὸν φωτὶ κατακρύπτων ἤισκε,
Odyssey 1.248	δέκτῃ, ὃς οὐδὲν τοῖος ἔην ἐπὶ νηυσὶν Ἀχαιῶν.
Odyssey 1.249	τῷ ἴκελος κατέδυ Τρώων πόλιν, οἱ δʼ ἀβάκησαν
Odyssey 1.250	πάντες· ἐγὼ δέ μιν οἴη ἀνέγνων τοῖον ἐόντα,
Odyssey 1.251	καί μιν ἀνηρώτων· ὁ δὲ κερδοσύνῃ ἀλέεινεν.
Odyssey 1.252	ἀλλʼ ὅτε δή μιν ἐγὼ λόεον καὶ χρῖον ἐλαίῳ,
Odyssey 1.253	ἀμφὶ δὲ εἵματα ἕσσα καὶ ὤμοσα καρτερὸν ὅρκον
Odyssey 1.254	μὴ μὲν πρὶν Ὀδυσῆα μετὰ Τρώεσσʼ ἀναφῆναι,
Odyssey 1.255	πρίν γε τὸν ἐς νῆάς τε θοὰς κλισίας τʼ ἀφικέσθαι,
Odyssey 1.256	καὶ τότε δή μοι πάντα νόον κατέλεξεν Ἀχαιῶν.
Odyssey 1.257	πολλοὺς δὲ Τρώων κτείνας ταναήκεϊ χαλκῷ
Odyssey 1.258	ἦλθε μετʼ Ἀργείους, κατὰ δὲ φρόνιν ἤγαγε πολλήν.
Odyssey 1.259	ἔνθʼ ἄλλαι Τρῳαὶ λίγʼ ἐκώκυον· αὐτὰρ ἐμὸν κῆρ
Odyssey 1.260	χαῖρʼ, ἐπεὶ ἤδη μοι κραδίη τέτραπτο νέεσθαι
Odyssey 1.261	ἂψ οἶκόνδʼ, ἄτην δὲ μετέστενον, ἣν Ἀφροδίτη
Odyssey 1.262	δῶχʼ, ὅτε μʼ ἤγαγε κεῖσε φίλης ἀπὸ πατρίδος αἴης,
Odyssey 1.263	παῖδά τʼ ἐμὴν νοσφισσαμένην θάλαμόν τε πόσιν τε
Odyssey 1.264	οὔ τευ δευόμενον, οὔτʼ ἂρ φρένας οὔτε τι εἶδος.
Odyssey 1.265	τὴν δʼ ἀπαμειβόμενος προσέφη ξανθὸς Μενέλαος·
Odyssey 1.266	ναὶ δὴ ταῦτά γε πάντα, γύναι, κατὰ μοῖραν ἔειπες.
Odyssey 1.267	ἤδη μὲν πολέων ἐδάην βουλήν τε νόον τε
Odyssey 1.268	ἀνδρῶν ἡρώων, πολλὴν δʼ ἐπελήλυθα γαῖαν·
Odyssey 1.269	ἀλλʼ οὔ πω τοιοῦτον ἐγὼν ἴδον ὀφθαλμοῖσιν,
Odyssey 1.270	οἷον Ὀδυσσῆος ταλασίφρονος ἔσκε φίλον κῆρ.
Odyssey 1.271	οἷον καὶ τόδʼ ἔρεξε καὶ ἔτλη καρτερὸς ἀνὴρ
Odyssey 1.272	ἵππῳ ἔνι ξεστῷ, ἵνʼ ἐνήμεθα πάντες ἄριστοι
Odyssey 1.273	Ἀργείων Τρώεσσι φόνον καὶ κῆρα φέροντες.
Odyssey 1.274	ἦλθες ἔπειτα σὺ κεῖσε· κελευσέμεναι δέ σʼ ἔμελλε
Odyssey 1.275	δαίμων, ὃς Τρώεσσιν ἐβούλετο κῦδος ὀρέξαι·
Odyssey 1.276	καί τοι Δηΐφοβος θεοείκελος ἕσπετʼ ἰούσῃ.
Odyssey 1.277	τρὶς δὲ περίστειξας κοῖλον λόχον ἀμφαφόωσα,
Odyssey 1.278	ἐκ δʼ ὀνομακλήδην Δαναῶν ὀνόμαζες ἀρίστους,
Odyssey 1.279	πάντων Ἀργείων φωνὴν ἴσκουσʼ ἀλόχοισιν.
Odyssey 1.280	αὐτὰρ ἐγὼ καὶ Τυδεΐδης καὶ δῖος Ὀδυσσεὺς
Odyssey 1.281	ἥμενοι ἐν μέσσοισιν ἀκούσαμεν ὡς ἐβόησας.
Odyssey 1.282	νῶι μὲν ἀμφοτέρω μενεήναμεν ὁρμηθέντε
Odyssey 1.283	ἢ ἐξελθέμεναι, ἢ ἔνδοθεν αἶψʼ ὑπακοῦσαι·
Odyssey 1.284	ἀλλʼ Ὀδυσεὺς κατέρυκε καὶ ἔσχεθεν ἱεμένω περ.
Odyssey 1.285	ἔνθʼ ἄλλοι μὲν πάντες ἀκὴν ἔσαν υἷες Ἀχαιῶν,
Odyssey 1.286	Ἄντικλος δὲ σέ γʼ οἶος ἀμείψασθαι ἐπέεσσιν
Odyssey 1.287	ἤθελεν. ἀλλʼ Ὀδυσεὺς ἐπὶ μάστακα χερσὶ πίεζεν
Odyssey 1.288	νωλεμέως κρατερῇσι, σάωσε δὲ πάντας Ἀχαιούς·
Odyssey 1.289	τόφρα δʼ ἔχʼ, ὄφρα σε νόσφιν ἀπήγαγε Παλλὰς Ἀθήνη.
Odyssey 1.290	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.291	Ἀτρεΐδη Μενέλαε διοτρεφές, ὄρχαμε λαῶν,
Odyssey 1.292	ἄλγιον· οὐ γάρ οἵ τι τάδʼ ἤρκεσε λυγρὸν ὄλεθρον,
Odyssey 1.293	οὐδʼ εἴ οἱ κραδίη γε σιδηρέη ἔνδοθεν ἦεν.
Odyssey 1.294	ἀλλʼ ἄγετʼ εἰς εὐνὴν τράπεθʼ ἡμέας, ὄφρα καὶ ἤδη
Odyssey 1.295	ὕπνῳ ὕπο γλυκερῷ ταρπώμεθα κοιμηθέντες.
Odyssey 1.296	ὣς ἔφατʼ, Ἀργείη δʼ Ἑλένη δμῳῇσι κέλευσεν
Odyssey 1.297	δέμνιʼ ὑπʼ αἰθούσῃ θέμεναι καὶ ῥήγεα καλὰ
Odyssey 1.298	πορφύρεʼ ἐμβαλέειν στορέσαι τʼ ἐφύπερθε τάπητας,
Odyssey 1.299	χλαίνας τʼ ἐνθέμεναι οὔλας καθύπερθεν ἕσασθαι.
Odyssey 1.300	αἱ δʼ ἴσαν ἐκ μεγάροιο δάος μετὰ χερσὶν ἔχουσαι,
Odyssey 1.301	δέμνια δὲ στόρεσαν· ἐκ δὲ ξείνους ἄγε κῆρυξ.
Odyssey 1.302	οἱ μὲν ἄρʼ ἐν προδόμῳ δόμου αὐτόθι κοιμήσαντο,
Odyssey 1.303	Τηλέμαχός θʼ ἥρως καὶ Νέστορος ἀγλαὸς υἱός·
Odyssey 1.304	Ἀτρεΐδης δὲ καθεῦδε μυχῷ δόμου ὑψηλοῖο,
Odyssey 1.305	πὰρ δʼ Ἑλένη τανύπεπλος ἐλέξατο, δῖα γυναικῶν.
Odyssey 1.306	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.307	ὤρνυτʼ ἄρʼ ἐξ εὐνῆφι βοὴν ἀγαθὸς Μενέλαος
Odyssey 1.308	εἵματα ἑσσάμενος, περὶ δὲ ξίφος ὀξὺ θέτʼ ὤμῳ,
Odyssey 1.309	ποσσὶ δʼ ὑπὸ λιπαροῖσιν ἐδήσατο καλὰ πέδιλα,
Odyssey 1.310	βῆ δʼ ἴμεν ἐκ θαλάμοιο θεῷ ἐναλίγκιος ἄντην,
Odyssey 1.311	Τηλεμάχῳ δὲ παρῖζεν, ἔπος τʼ ἔφατʼ ἔκ τʼ ὀνόμαζεν·
Odyssey 1.312	τίπτε δέ σε χρειὼ δεῦρʼ ἤγαγε, Τηλέμαχʼ ἥρως,
Odyssey 1.313	ἐς Λακεδαίμονα δῖαν, ἐπʼ εὐρέα νῶτα θαλάσσης;
Odyssey 1.314	δήμιον ἦ ἴδιον; τόδε μοι νημερτὲς ἐνίσπες.
Odyssey 1.315	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.316	Ἀτρεΐδη Μενέλαε διοτρεφές, ὄρχαμε λαῶν,
Odyssey 1.317	ἤλυθον, εἴ τινά μοι κληηδόνα πατρὸς ἐνίσποις.
Odyssey 1.318	ἐσθίεταί μοι οἶκος, ὄλωλε δὲ πίονα ἔργα,
Odyssey 1.319	δυσμενέων δʼ ἀνδρῶν πλεῖος δόμος, οἵ τέ μοι αἰεὶ
Odyssey 1.320	μῆλʼ ἁδινὰ σφάζουσι καὶ εἰλίποδας ἕλικας βοῦς,
Odyssey 1.321	μητρὸς ἐμῆς μνηστῆρες ὑπέρβιον ὕβριν ἔχοντες.
Odyssey 1.322	τοὔνεκα νῦν τὰ σὰ γούναθʼ ἱκάνομαι, αἴ κʼ ἐθέλῃσθα
Odyssey 1.323	κείνου λυγρὸν ὄλεθρον ἐνισπεῖν, εἴ που ὄπωπας
Odyssey 1.324	ὀφθαλμοῖσι τεοῖσιν ἢ ἄλλου μῦθον ἄκουσας
Odyssey 1.325	πλαζομένου· περὶ γάρ μιν ὀιζυρὸν τέκε μήτηρ.
Odyssey 1.326	μηδέ τί μʼ αἰδόμενος μειλίσσεο μηδʼ ἐλεαίρων,
Odyssey 1.327	ἀλλʼ εὖ μοι κατάλεξον ὅπως ἤντησας ὀπωπῆς.
Odyssey 1.328	λίσσομαι, εἴ ποτέ τοί τι πατὴρ ἐμός, ἐσθλὸς Ὀδυσσεὺς
Odyssey 1.329	ἢ ἔπος ἠέ τι ἔργον ὑποστὰς ἐξετέλεσσε
Odyssey 1.330	δήμῳ ἔνι Τρώων, ὅθι πάσχετε πήματʼ Ἀχαιοί,
Odyssey 1.331	τῶν νῦν μοι μνῆσαι, καί μοι νημερτὲς ἐνίσπες.
Odyssey 1.332	τὸν δὲ μέγʼ ὀχθήσας προσέφη ξανθὸς Μενέλαος·
Odyssey 1.333	ὢ πόποι, ἦ μάλα δὴ κρατερόφρονος ἀνδρὸς ἐν εὐνῇ
Odyssey 1.334	ἤθελον εὐνηθῆναι ἀνάλκιδες αὐτοὶ ἐόντες.
Odyssey 1.335	ὡς δʼ ὁπότʼ ἐν ξυλόχῳ ἔλαφος κρατεροῖο λέοντος
Odyssey 1.336	νεβροὺς κοιμήσασα νεηγενέας γαλαθηνοὺς
Odyssey 1.337	κνημοὺς ἐξερέῃσι καὶ ἄγκεα ποιήεντα
Odyssey 1.338	βοσκομένη, ὁ δʼ ἔπειτα ἑὴν εἰσήλυθεν εὐνήν,
Odyssey 1.339	ἀμφοτέροισι δὲ τοῖσιν ἀεικέα πότμον ἐφῆκεν,
Odyssey 1.340	ὣς Ὀδυσεὺς κείνοισιν ἀεικέα πότμον ἐφήσει.
Odyssey 1.341	αἲ γάρ, Ζεῦ τε πάτερ καὶ Ἀθηναίη καὶ Ἄπολλον,
Odyssey 1.342	τοῖος ἐών, οἷός ποτʼ ἐυκτιμένῃ ἐνὶ Λέσβῳ
Odyssey 1.343	ἐξ ἔριδος Φιλομηλεΐδῃ ἐπάλαισεν ἀναστάς,
Odyssey 1.344	κὰδ δʼ ἔβαλε κρατερῶς, κεχάροντο δὲ πάντες Ἀχαιοί,
Odyssey 1.345	τοῖος ἐὼν μνηστῆρσιν ὁμιλήσειεν Ὀδυσσεύς·
Odyssey 1.346	πάντες κʼ ὠκύμοροί τε γενοίατο πικρόγαμοί τε.
Odyssey 1.347	ταῦτα δʼ ἅ μʼ εἰρωτᾷς καὶ λίσσεαι, οὐκ ἂν ἐγώ γε
Odyssey 1.348	ἄλλα παρὲξ εἴποιμι παρακλιδόν, οὐδʼ ἀπατήσω,
Odyssey 1.349	ἀλλὰ τὰ μέν μοι ἔειπε γέρων ἅλιος νημερτής,
Odyssey 1.350	τῶν οὐδέν τοι ἐγὼ κρύψω ἔπος οὐδʼ ἐπικεύσω.
Odyssey 1.351	Αἰγύπτῳ μʼ ἔτι δεῦρο θεοὶ μεμαῶτα νέεσθαι
Odyssey 1.352	ἔσχον, ἐπεὶ οὔ σφιν ἔρεξα τεληέσσας ἑκατόμβας.
Odyssey 1.353	οἱ δʼ αἰεὶ βούλοντο θεοὶ μεμνῆσθαι ἐφετμέων.
Odyssey 1.354	νῆσος ἔπειτά τις ἔστι πολυκλύστῳ ἐνὶ πόντῳ
Odyssey 1.355	Αἰγύπτου προπάροιθε, Φάρον δέ ἑ κικλήσκουσι,
Odyssey 1.356	τόσσον ἄνευθʼ ὅσσον τε πανημερίη γλαφυρὴ νηῦς
Odyssey 1.357	ἤνυσεν, ᾗ λιγὺς οὖρος ἐπιπνείῃσιν ὄπισθεν·
Odyssey 1.358	ἐν δὲ λιμὴν ἐύορμος, ὅθεν τʼ ἀπὸ νῆας ἐίσας
Odyssey 1.359	ἐς πόντον βάλλουσιν, ἀφυσσάμενοι μέλαν ὕδωρ.
Odyssey 1.360	ἔνθα μʼ ἐείκοσιν ἤματʼ ἔχον θεοί, οὐδέ ποτʼ οὖροι
Odyssey 1.361	πνείοντες φαίνονθʼ ἁλιαέες, οἵ ῥά τε νηῶν
Odyssey 1.362	πομπῆες γίγνονται ἐπʼ εὐρέα νῶτα θαλάσσης.
Odyssey 1.363	καί νύ κεν ἤια πάντα κατέφθιτο καὶ μένεʼ ἀνδρῶν,
Odyssey 1.364	εἰ μή τίς με θεῶν ὀλοφύρατο καί μʼ ἐσάωσε,
Odyssey 1.365	Πρωτέος ἰφθίμου θυγάτηρ ἁλίοιο γέροντος,
Odyssey 1.366	Εἰδοθέη· τῇ γάρ ῥα μάλιστά γε θυμὸν ὄρινα.
Odyssey 1.367	ἥ μʼ οἴῳ ἔρροντι συνήντετο νόσφιν ἑταίρων·
Odyssey 1.368	αἰεὶ γὰρ περὶ νῆσον ἀλώμενοι ἰχθυάασκον
Odyssey 1.369	γναμπτοῖς ἀγκίστροισιν, ἔτειρε δὲ γαστέρα λιμός.
Odyssey 1.370	ἡ δέ μευ ἄγχι στᾶσα ἔπος φάτο φώνησέν τε·
Odyssey 1.371	νήπιός εἰς, ὦ ξεῖνε, λίην τόσον ἠδὲ χαλίφρων,
Odyssey 1.372	ἦε ἑκὼν μεθίεις καὶ τέρπεαι ἄλγεα πάσχων;
Odyssey 1.373	ὡς δὴ δήθʼ ἐνὶ νήσῳ ἐρύκεαι, οὐδέ τι τέκμωρ
Odyssey 1.374	εὑρέμεναι δύνασαι, μινύθει δέ τοι ἦτορ ἑταίρων.
Odyssey 1.375	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.376	ἐκ μέν τοι ἐρέω, ἥ τις σύ πέρ ἐσσι θεάων,
Odyssey 1.377	ὡς ἐγὼ οὔ τι ἑκὼν κατερύκομαι, ἀλλά νυ μέλλω
Odyssey 1.378	ἀθανάτους ἀλιτέσθαι, οἳ οὐρανὸν εὐρὺν ἔχουσιν.
Odyssey 1.379	ἀλλὰ σύ πέρ μοι εἰπέ, θεοὶ δέ τε πάντα ἴσασιν,
Odyssey 1.380	ὅς τίς μʼ ἀθανάτων πεδάᾳ καὶ ἔδησε κελεύθου,
Odyssey 1.381	νόστον θʼ, ὡς ἐπὶ πόντον ἐλεύσομαι ἰχθυόεντα.
Odyssey 1.382	ὣς ἐφάμην, ἡ δʼ αὐτίκʼ ἀμείβετο δῖα θεάων·
Odyssey 1.383	τοιγὰρ ἐγώ τοι, ξεῖνε, μάλʼ ἀτρεκέως ἀγορεύσω.
Odyssey 1.384	πωλεῖταί τις δεῦρο γέρων ἅλιος νημερτὴς
Odyssey 1.385	ἀθάνατος Πρωτεὺς Αἰγύπτιος, ὅς τε θαλάσσης
Odyssey 1.386	πάσης βένθεα οἶδε, Ποσειδάωνος ὑποδμώς·
Odyssey 1.387	τὸν δέ τʼ ἐμόν φασιν πατέρʼ ἔμμεναι ἠδὲ τεκέσθαι.
Odyssey 1.388	τόν γʼ εἴ πως σὺ δύναιο λοχησάμενος λελαβέσθαι,
Odyssey 1.389	ὅς κέν τοι εἴπῃσιν ὁδὸν καὶ μέτρα κελεύθου
Odyssey 1.390	νόστον θʼ, ὡς ἐπὶ πόντον ἐλεύσεαι ἰχθυόεντα.
Odyssey 1.391	καὶ δέ κέ τοι εἴπῃσι, διοτρεφές, αἴ κʼ ἐθέλῃσθα,
Odyssey 1.392	ὅττι τοι ἐν μεγάροισι κακόν τʼ ἀγαθόν τε τέτυκται
Odyssey 1.393	οἰχομένοιο σέθεν δολιχὴν ὁδὸν ἀργαλέην τε.
Odyssey 1.394	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.395	αὐτὴ νῦν φράζευ σὺ λόχον θείοιο γέροντος,
Odyssey 1.396	μή πώς με προϊδὼν ἠὲ προδαεὶς ἀλέηται·
Odyssey 1.397	ἀργαλέος γάρ τʼ ἐστὶ θεὸς βροτῷ ἀνδρὶ δαμῆναι.
Odyssey 1.398	ὣς ἐφάμην, ἡ δʼ αὐτίκʼ ἀμείβετο δῖα θεάων·
Odyssey 1.399	τοιγὰρ ἐγώ τοι, ξεῖνε, μάλʼ ἀτρεκέως ἀγορεύσω.
Odyssey 1.400	ἦμος δʼ ἠέλιος μέσον οὐρανὸν ἀμφιβεβήκῃ,
Odyssey 1.401	τῆμος ἄρʼ ἐξ ἁλὸς εἶσι γέρων ἅλιος νημερτὴς
Odyssey 1.402	πνοιῇ ὕπο Ζεφύροιο μελαίνῃ φρικὶ καλυφθείς,
Odyssey 1.403	ἐκ δʼ ἐλθὼν κοιμᾶται ὑπὸ σπέσσι γλαφυροῖσιν·
Odyssey 1.404	ἀμφὶ δέ μιν φῶκαι νέποδες καλῆς ἁλοσύδνης
Odyssey 1.405	ἁθρόαι εὕδουσιν, πολιῆς ἁλὸς ἐξαναδῦσαι,
Odyssey 1.406	πικρὸν ἀποπνείουσαι ἁλὸς πολυβενθέος ὀδμήν.
Odyssey 1.407	ἔνθα σʼ ἐγὼν ἀγαγοῦσα ἅμʼ ἠοῖ φαινομένηφιν
Odyssey 1.408	εὐνάσω ἑξείης· σὺ δʼ ἐὺ κρίνασθαι ἑταίρους
Odyssey 1.409	τρεῖς, οἵ τοι παρὰ νηυσὶν ἐυσσέλμοισιν ἄριστοι.
Odyssey 1.410	πάντα δέ τοι ἐρέω ὀλοφώια τοῖο γέροντος.
Odyssey 1.411	φώκας μέν τοι πρῶτον ἀριθμήσει καὶ ἔπεισιν·
Odyssey 1.412	αὐτὰρ ἐπὴν πάσας πεμπάσσεται ἠδὲ ἴδηται,
Odyssey 1.413	λέξεται ἐν μέσσῃσι νομεὺς ὣς πώεσι μήλων.
Odyssey 1.414	τὸν μὲν ἐπὴν δὴ πρῶτα κατευνηθέντα ἴδησθε,
Odyssey 1.415	καὶ τότʼ ἔπειθʼ ὑμῖν μελέτω κάρτος τε βίη τε,
Odyssey 1.416	αὖθι δʼ ἔχειν μεμαῶτα καὶ ἐσσύμενόν περ ἀλύξαι.
Odyssey 1.417	πάντα δὲ γιγνόμενος πειρήσεται, ὅσσʼ ἐπὶ γαῖαν
Odyssey 1.418	ἑρπετὰ γίγνονται, καὶ ὕδωρ καὶ θεσπιδαὲς πῦρ·
Odyssey 1.419	ὑμεῖς δʼ ἀστεμφέως ἐχέμεν μᾶλλόν τε πιέζειν.
Odyssey 1.420	ἀλλʼ ὅτε κεν δή σʼ αὐτὸς ἀνείρηται ἐπέεσσι,
Odyssey 1.421	τοῖος ἐὼν οἷόν κε κατευνηθέντα ἴδησθε,
Odyssey 1.422	καὶ τότε δὴ σχέσθαι τε βίης λῦσαί τε γέροντα,
Odyssey 1.423	ἥρως, εἴρεσθαι δέ, θεῶν ὅς τίς σε χαλέπτει,
Odyssey 1.424	νόστον θʼ, ὡς ἐπὶ πόντον ἐλεύσεαι ἰχθυόεντα.
Odyssey 1.425	ὣς εἰποῦσʼ ὑπὸ πόντον ἐδύσετο κυμαίνοντα.
Odyssey 1.426	αὐτὰρ ἐγὼν ἐπὶ νῆας, ὅθʼ ἕστασαν ἐν ψαμάθοισιν,
Odyssey 1.427	ἤια· πολλὰ δέ μοι κραδίη πόρφυρε κιόντι.
Odyssey 1.428	αὐτὰρ ἐπεί ῥʼ ἐπὶ νῆα κατήλυθον ἠδὲ θάλασσαν,
Odyssey 1.429	δόρπον θʼ ὁπλισάμεσθʼ, ἐπί τʼ ἤλυθεν ἀμβροσίη νύξ·
Odyssey 1.430	δὴ τότε κοιμήθημεν ἐπὶ ῥηγμῖνι θαλάσσης.
Odyssey 1.431	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.432	καὶ τότε δὴ παρὰ θῖνα θαλάσσης εὐρυπόροιο
Odyssey 1.433	ἤια πολλὰ θεοὺς γουνούμενος· αὐτὰρ ἑταίρους
Odyssey 1.434	τρεῖς ἄγον, οἷσι μάλιστα πεποίθεα πᾶσαν ἐπʼ ἰθύν.
Odyssey 1.435	τόφρα δʼ ἄρʼ ἥ γʼ ὑποδῦσα θαλάσσης εὐρέα κόλπον
Odyssey 1.436	τέσσαρα φωκάων ἐκ πόντου δέρματʼ ἔνεικε·
Odyssey 1.437	πάντα δʼ ἔσαν νεόδαρτα· δόλον δʼ ἐπεμήδετο πατρί.
Odyssey 1.438	εὐνὰς δʼ ἐν ψαμάθοισι διαγλάψασʼ ἁλίῃσιν
Odyssey 1.439	ἧστο μένουσʼ· ἡμεῖς δὲ μάλα σχεδὸν ἤλθομεν αὐτῆς·
Odyssey 1.440	ἑξείης δʼ εὔνησε, βάλεν δʼ ἐπὶ δέρμα ἑκάστῳ.
Odyssey 1.441	ἔνθα κεν αἰνότατος λόχος ἔπλετο· τεῖρε γὰρ αἰνῶς
Odyssey 1.442	φωκάων ἁλιοτρεφέων ὀλοώτατος ὀδμή·
Odyssey 1.443	τίς γάρ κʼ εἰναλίῳ παρὰ κήτεϊ κοιμηθείη;
Odyssey 1.444	ἀλλʼ αὐτὴ ἐσάωσε καὶ ἐφράσατο μέγʼ ὄνειαρ·
Odyssey 1.445	ἀμβροσίην ὑπὸ ῥῖνα ἑκάστῳ θῆκε φέρουσα
Odyssey 1.446	ἡδὺ μάλα πνείουσαν, ὄλεσσε δὲ κήτεος ὀδμήν.
Odyssey 1.447	πᾶσαν δʼ ἠοίην μένομεν τετληότι θυμῷ·
Odyssey 1.448	φῶκαι δʼ ἐξ ἁλὸς ἦλθον ἀολλέες. αἱ μὲν ἔπειτα
Odyssey 1.449	ἑξῆς εὐνάζοντο παρὰ ῥηγμῖνι θαλάσσης·
Odyssey 1.450	ἔνδιος δʼ ὁ γέρων ἦλθʼ ἐξ ἁλός, εὗρε δὲ φώκας
Odyssey 1.451	ζατρεφέας, πάσας δʼ ἄρʼ ἐπῴχετο, λέκτο δʼ ἀριθμόν·
Odyssey 1.452	ἐν δʼ ἡμέας πρώτους λέγε κήτεσιν, οὐδέ τι θυμῷ
Odyssey 1.453	ὠΐσθη δόλον εἶναι· ἔπειτα δὲ λέκτο καὶ αὐτός.
Odyssey 1.454	ἡμεῖς δὲ ἰάχοντες ἐπεσσύμεθʼ, ἀμφὶ δὲ χεῖρας
Odyssey 1.455	βάλλομεν· οὐδʼ ὁ γέρων δολίης ἐπελήθετο τέχνης,
Odyssey 1.456	ἀλλʼ ἦ τοι πρώτιστα λέων γένετʼ ἠυγένειος,
Odyssey 1.457	αὐτὰρ ἔπειτα δράκων καὶ πάρδαλις ἠδὲ μέγας σῦς·
Odyssey 1.458	γίγνετο δʼ ὑγρὸν ὕδωρ καὶ δένδρεον ὑψιπέτηλον·
Odyssey 1.459	ἡμεῖς δʼ ἀστεμφέως ἔχομεν τετληότι θυμῷ.
Odyssey 1.460	ἀλλʼ ὅτε δή ῥʼ ἀνίαζʼ ὁ γέρων ὀλοφώια εἰδώς,
Odyssey 1.461	καὶ τότε δή μʼ ἐπέεσσιν ἀνειρόμενος προσέειπε·
Odyssey 1.462	τίς νύ τοι, Ἀτρέος υἱέ, θεῶν συμφράσσατο βουλάς,
Odyssey 1.463	ὄφρα μʼ ἕλοις ἀέκοντα λοχησάμενος; τέο σε χρή;
Odyssey 1.464	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.465	οἶσθα, γέρον, τί με ταῦτα παρατροπέων ἐρεείνεις;
Odyssey 1.466	ὡς δὴ δήθʼ ἐνὶ νήσῳ ἐρύκομαι, οὐδέ τι τέκμωρ
Odyssey 1.467	εὑρέμεναι δύναμαι, μινύθει δέ μοι ἔνδοθεν ἦτορ.
Odyssey 1.468	ἀλλὰ σύ πέρ μοι εἰπέ, θεοὶ δέ τε πάντα ἴσασιν,
Odyssey 1.469	ὅς τίς μʼ ἀθανάτων πεδάᾳ καὶ ἔδησε κελεύθου,
Odyssey 1.470	νόστον θʼ, ὡς ἐπὶ πόντον ἐλεύσομαι ἰχθυόεντα.
Odyssey 1.471	ὣς ἐφάμην, ὁ δέ μʼ αὐτίκʼ ἀμειβόμενος προσέειπεν·
Odyssey 1.472	ἀλλὰ μάλʼ ὤφελλες Διί τʼ ἄλλοισίν τε θεοῖσι
Odyssey 1.473	ῥέξας ἱερὰ κάλʼ ἀναβαινέμεν, ὄφρα τάχιστα
Odyssey 1.474	σὴν ἐς πατρίδʼ ἵκοιο πλέων ἐπὶ οἴνοπα πόντον.
Odyssey 1.475	οὐ γάρ τοι πρὶν μοῖρα φίλους τʼ ἰδέειν καὶ ἱκέσθαι
Odyssey 1.476	οἶκον ἐυκτίμενον καὶ σὴν ἐς πατρίδα γαῖαν,
Odyssey 1.477	πρίν γʼ ὅτʼ ἂν Αἰγύπτοιο, διιπετέος ποταμοῖο,
Odyssey 1.478	αὖτις ὕδωρ ἔλθῃς ῥέξῃς θʼ ἱερὰς ἑκατόμβας
Odyssey 1.479	ἀθανάτοισι θεοῖσι, τοὶ οὐρανὸν εὐρὺν ἔχουσι·
Odyssey 1.480	καὶ τότε τοι δώσουσιν ὁδὸν θεοί, ἣν σὺ μενοινᾷς.
Odyssey 1.481	ὣς ἔφατʼ, αὐτὰρ ἐμοί γε κατεκλάσθη φίλον ἦτορ,
Odyssey 1.482	οὕνεκά μʼ αὖτις ἄνωγεν ἐπʼ ἠεροειδέα πόντον
Odyssey 1.483	Αἴγυπτόνδʼ ἰέναι, δολιχὴν ὁδὸν ἀργαλέην τε.
Odyssey 1.484	ἀλλὰ καὶ ὣς μύθοισιν ἀμειβόμενος προσέειπον·
Odyssey 1.485	ταῦτα μὲν οὕτω δὴ τελέω, γέρον, ὡς σὺ κελεύεις.
Odyssey 1.486	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Odyssey 1.487	ἢ πάντες σὺν νηυσὶν ἀπήμονες ἦλθον Ἀχαιοί,
Odyssey 1.488	οὓς Νέστωρ καὶ ἐγὼ λίπομεν Τροίηθεν ἰόντες,
Odyssey 1.489	ἦέ τις ὤλετʼ ὀλέθρῳ ἀδευκέι ἧς ἐπὶ νηὸς
Odyssey 1.490	ἠὲ φίλων ἐν χερσίν, ἐπεὶ πόλεμον τολύπευσεν.
Odyssey 1.491	ὣς ἐφάμην, ὁ δέ μʼ αὐτίκʼ ἀμειβόμενος προσέειπεν·
Odyssey 1.492	Ἀτρεΐδη, τί με ταῦτα διείρεαι; οὐδέ τί σε χρὴ
Odyssey 1.493	ἴδμεναι, οὐδὲ δαῆναι ἐμὸν νόον· οὐδέ σέ φημι
Odyssey 1.494	δὴν ἄκλαυτον ἔσεσθαι, ἐπὴν ἐὺ πάντα πύθηαι.
Odyssey 1.495	πολλοὶ μὲν γὰρ τῶν γε δάμεν, πολλοὶ δὲ λίποντο·
Odyssey 1.496	ἀρχοὶ δʼ αὖ δύο μοῦνοι Ἀχαιῶν χαλκοχιτώνων
Odyssey 1.497	ἐν νόστῳ ἀπόλοντο· μάχῃ δέ τε καὶ σὺ παρῆσθα.
Odyssey 1.498	εἷς δʼ ἔτι που ζωὸς κατερύκεται εὐρέι πόντῳ.
Odyssey 1.499	Αἴας μὲν μετὰ νηυσὶ δάμη δολιχηρέτμοισι.
Odyssey 1.500	Γυρῇσίν μιν πρῶτα Ποσειδάων ἐπέλασσεν
Odyssey 1.501	πέτρῃσιν μεγάλῃσι καὶ ἐξεσάωσε θαλάσσης·
Odyssey 1.502	καί νύ κεν ἔκφυγε κῆρα καὶ ἐχθόμενός περ Ἀθήνῃ,
Odyssey 1.503	εἰ μὴ ὑπερφίαλον ἔπος ἔκβαλε καὶ μέγʼ ἀάσθη·
Odyssey 1.504	φῆ ῥʼ ἀέκητι θεῶν φυγέειν μέγα λαῖτμα θαλάσσης.
Odyssey 1.505	τοῦ δὲ Ποσειδάων μεγάλʼ ἔκλυεν αὐδήσαντος·
Odyssey 1.506	αὐτίκʼ ἔπειτα τρίαιναν ἑλὼν χερσὶ στιβαρῇσιν
Odyssey 1.507	ἤλασε Γυραίην πέτρην, ἀπὸ δʼ ἔσχισεν αὐτήν·
Odyssey 1.508	καὶ τὸ μὲν αὐτόθι μεῖνε, τὸ δὲ τρύφος ἔμπεσε πόντῳ,
Odyssey 1.509	τῷ ῥʼ Αἴας τὸ πρῶτον ἐφεζόμενος μέγʼ ἀάσθη·
Odyssey 1.510	τὸν δʼ ἐφόρει κατὰ πόντον ἀπείρονα κυμαίνοντα.
Odyssey 1.511	ὣς ὁ μὲν ἔνθʼ ἀπόλωλεν, ἐπεὶ πίεν ἁλμυρὸν ὕδωρ.
Odyssey 1.512	σὸς δέ που ἔκφυγε κῆρας ἀδελφεὸς ἠδʼ ὑπάλυξεν
Odyssey 1.513	ἐν νηυσὶ γλαφυρῇσι· σάωσε δὲ πότνια Ἥρη.
Odyssey 1.514	ἀλλʼ ὅτε δὴ τάχʼ ἔμελλε Μαλειάων ὄρος αἰπὺ
Odyssey 1.515	ἵξεσθαι, τότε δή μιν ἀναρπάξασα θύελλα
Odyssey 1.516	πόντον ἐπʼ ἰχθυόεντα φέρεν βαρέα στενάχοντα,
Odyssey 1.517	ἀγροῦ ἐπʼ ἐσχατιήν, ὅθι δώματα ναῖε Θυέστης
Odyssey 1.518	τὸ πρίν, ἀτὰρ τότʼ ἔναιε Θυεστιάδης Αἴγισθος.
Odyssey 1.519	ἀλλʼ ὅτε δὴ καὶ κεῖθεν ἐφαίνετο νόστος ἀπήμων,
Odyssey 1.520	ἂψ δὲ θεοὶ οὖρον στρέψαν, καὶ οἴκαδʼ ἵκοντο,
Odyssey 1.521	ἦ τοι ὁ μὲν χαίρων ἐπεβήσετο πατρίδος αἴης
Odyssey 1.522	καὶ κύνει ἁπτόμενος ἣν πατρίδα· πολλὰ δʼ ἀπʼ αὐτοῦ
Odyssey 1.523	δάκρυα θερμὰ χέοντʼ, ἐπεὶ ἀσπασίως ἴδε γαῖαν.
Odyssey 1.524	τὸν δʼ ἄρʼ ἀπὸ σκοπιῆς εἶδε σκοπός, ὅν ῥα καθεῖσεν
Odyssey 1.525	Αἴγισθος δολόμητις ἄγων, ὑπὸ δʼ ἔσχετο μισθὸν
Odyssey 1.526	χρυσοῦ δοιὰ τάλαντα· φύλασσε δʼ ὅ γʼ εἰς ἐνιαυτόν,
Odyssey 1.527	μή ἑ λάθοι παριών, μνήσαιτο δὲ θούριδος ἀλκῆς.
Odyssey 1.528	βῆ δʼ ἴμεν ἀγγελέων πρὸς δώματα ποιμένι λαῶν.
Odyssey 1.529	αὐτίκα δʼ Αἴγισθος δολίην ἐφράσσατο τέχνην·
Odyssey 1.530	κρινάμενος κατὰ δῆμον ἐείκοσι φῶτας ἀρίστους
Odyssey 1.531	εἷσε λόχον, ἑτέρωθι δʼ ἀνώγει δαῖτα πένεσθαι.
Odyssey 1.532	αὐτὰρ ὁ βῆ καλέων Ἀγαμέμνονα, ποιμένα λαῶν
Odyssey 1.533	ἵπποισιν καὶ ὄχεσφιν, ἀεικέα μερμηρίζων.
Odyssey 1.534	τὸν δʼ οὐκ εἰδότʼ ὄλεθρον ἀνήγαγε καὶ κατέπεφνεν
Odyssey 1.535	δειπνίσσας, ὥς τίς τε κατέκτανε βοῦν ἐπὶ φάτνῃ.
Odyssey 1.536	οὐδέ τις Ἀτρεΐδεω ἑτάρων λίπεθʼ οἵ οἱ ἕποντο,
Odyssey 1.537	οὐδέ τις Αἰγίσθου, ἀλλʼ ἔκταθεν ἐν μεγάροισιν.
Odyssey 1.538	ὣς ἔφατʼ, αὐτὰρ ἐμοί γε κατεκλάσθη φίλον ἦτορ,
Odyssey 1.539	κλαῖον δʼ ἐν ψαμάθοισι καθήμενος, οὐδέ νύ μοι κῆρ
Odyssey 1.540	ἤθελʼ ἔτι ζώειν καὶ ὁρᾶν φάος ἠελίοιο.
Odyssey 1.541	αὐτὰρ ἐπεὶ κλαίων τε κυλινδόμενός τε κορέσθην,
Odyssey 1.542	δὴ τότε με προσέειπε γέρων ἅλιος νημερτής·
Odyssey 1.543	μηκέτι, Ἀτρέος υἱέ, πολὺν χρόνον ἀσκελὲς οὕτω
Odyssey 1.544	κλαῖʼ, ἐπεὶ οὐκ ἄνυσίν τινα δήομεν· ἀλλὰ τάχιστα
Odyssey 1.545	πείρα ὅπως κεν δὴ σὴν πατρίδα γαῖαν ἵκηαι.
Odyssey 1.546	ἢ γάρ μιν ζωόν γε κιχήσεαι, ἤ κεν Ὀρέστης
Odyssey 1.547	κτεῖνεν ὑποφθάμενος, σὺ δέ κεν τάφου ἀντιβολήσαις.
Odyssey 1.548	ὣς ἔφατʼ, αὐτὰρ ἐμοὶ κραδίη καὶ θυμὸς ἀγήνωρ
Odyssey 1.549	αὖτις ἐνὶ στήθεσσι καὶ ἀχνυμένῳ περ ἰάνθη,
Odyssey 1.550	καί μιν φωνήσας ἔπεα πτερόεντα προσηύδων·
Odyssey 1.551	τούτους μὲν δὴ οἶδα· σὺ δὲ τρίτον ἄνδρʼ ὀνόμαζε,
Odyssey 1.552	ὅς τις ἔτι ζωὸς κατερύκεται εὐρέι πόντῳ
Odyssey 1.553	ἠὲ θανών· ἐθέλω δὲ καὶ ἀχνύμενός περ ἀκοῦσαι.
Odyssey 1.554	ὣς ἐφάμην, ὁ δέ μʼ αὐτίκʼ ἀμειβόμενος προσέειπεν·
Odyssey 1.555	υἱὸς Λαέρτεω, Ἰθάκῃ ἔνι οἰκία ναίων·
Odyssey 1.556	τὸν δʼ ἴδον ἐν νήσῳ θαλερὸν κατὰ δάκρυ χέοντα,
Odyssey 1.557	νύμφης ἐν μεγάροισι Καλυψοῦς, ἥ μιν ἀνάγκῃ
Odyssey 1.558	ἴσχει· ὁ δʼ οὐ δύναται ἣν πατρίδα γαῖαν ἱκέσθαι·
Odyssey 1.559	οὐ γάρ οἱ πάρα νῆες ἐπήρετμοι καὶ ἑταῖροι,
Odyssey 1.560	οἵ κέν μιν πέμποιεν ἐπʼ εὐρέα νῶτα θαλάσσης.
Odyssey 1.561	σοὶ δʼ οὐ θέσφατόν ἐστι, διοτρεφὲς ὦ Μενέλαε,
Odyssey 1.562	Ἄργει ἐν ἱπποβότῳ θανέειν καὶ πότμον ἐπισπεῖν,
Odyssey 1.563	ἀλλά σʼ ἐς Ἠλύσιον πεδίον καὶ πείρατα γαίης
Odyssey 1.564	ἀθάνατοι πέμψουσιν, ὅθι ξανθὸς Ῥαδάμανθυς,
Odyssey 1.565	τῇ περ ῥηίστη βιοτὴ πέλει ἀνθρώποισιν·
Odyssey 1.566	οὐ νιφετός, οὔτʼ ἂρ χειμὼν πολὺς οὔτε ποτʼ ὄμβρος,
Odyssey 1.567	ἀλλʼ αἰεὶ Ζεφύροιο λιγὺ πνείοντος ἀήτας
Odyssey 1.568	Ὠκεανὸς ἀνίησιν ἀναψύχειν ἀνθρώπους·
Odyssey 1.569	οὕνεκʼ ἔχεις Ἑλένην καί σφιν γαμβρὸς Διός ἐσσι.
Odyssey 1.570	ὣς εἰπὼν ὑπὸ πόντον ἐδύσετο κυμαίνοντα.
Odyssey 1.571	αὐτὰρ ἐγὼν ἐπὶ νῆας ἅμʼ ἀντιθέοις ἑτάροισιν
Odyssey 1.572	ἤια, πολλὰ δέ μοι κραδίη πόρφυρε κιόντι.
Odyssey 1.573	αὐτὰρ ἐπεί ῥʼ ἐπὶ νῆα κατήλθομεν ἠδὲ θάλασσαν,
Odyssey 1.574	δόρπον θʼ ὁπλισάμεσθʼ, ἐπί τʼ ἤλυθεν ἀμβροσίη νύξ,
Odyssey 1.575	δὴ τότε κοιμήθημεν ἐπὶ ῥηγμῖνι θαλάσσης.
Odyssey 1.576	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.577	νῆας μὲν πάμπρωτον ἐρύσσαμεν εἰς ἅλα δῖαν,
Odyssey 1.578	ἐν δʼ ἱστοὺς τιθέμεσθα καὶ ἱστία νηυσὶν ἐίσῃς,
Odyssey 1.579	ἂν δὲ καὶ αὐτοὶ βάντες ἐπὶ κληῖσι καθῖζον·
Odyssey 1.580	ἑξῆς δʼ ἑζόμενοι πολιὴν ἅλα τύπτον ἐρετμοῖς.
Odyssey 1.581	ἂψ δʼ εἰς Αἰγύπτοιο διιπετέος ποταμοῖο
Odyssey 1.582	στῆσα νέας, καὶ ἔρεξα τεληέσσας ἑκατόμβας.
Odyssey 1.583	αὐτὰρ ἐπεὶ κατέπαυσα θεῶν χόλον αἰὲν ἐόντων,
Odyssey 1.584	χεῦʼ Ἀγαμέμνονι τύμβον, ἵνʼ ἄσβεστον κλέος εἴη.
Odyssey 1.585	ταῦτα τελευτήσας νεόμην, ἔδοσαν δέ μοι οὖρον
Odyssey 1.586	ἀθάνατοι, τοί μʼ ὦκα φίλην ἐς πατρίδʼ ἔπεμψαν.
Odyssey 1.587	ἀλλʼ ἄγε νῦν ἐπίμεινον ἐνὶ μεγάροισιν ἐμοῖσιν,
Odyssey 1.588	ὄφρα κεν ἑνδεκάτη τε δυωδεκάτη τε γένηται·
Odyssey 1.589	καὶ τότε σʼ εὖ πέμψω, δώσω δέ τοι ἀγλαὰ δῶρα,
Odyssey 1.590	τρεῖς ἵππους καὶ δίφρον ἐύξοον· αὐτὰρ ἔπειτα
Odyssey 1.591	δώσω καλὸν ἄλεισον, ἵνα σπένδῃσθα θεοῖσιν
Odyssey 1.592	ἀθανάτοις ἐμέθεν μεμνημένος ἤματα πάντα.
Odyssey 1.593	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.594	Ἀτρεΐδη, μὴ δή με πολὺν χρόνον ἐνθάδʼ ἔρυκε.
Odyssey 1.595	καὶ γάρ κʼ εἰς ἐνιαυτὸν ἐγὼ παρὰ σοί γʼ ἀνεχοίμην
Odyssey 1.596	ἥμενος, οὐδέ κέ μʼ οἴκου ἕλοι πόθος οὐδὲ τοκήων·
Odyssey 1.597	αἰνῶς γὰρ μύθοισιν ἔπεσσί τε σοῖσιν ἀκούων
Odyssey 1.598	τέρπομαι. ἀλλʼ ἤδη μοι ἀνιάζουσιν ἑταῖροι
Odyssey 1.599	ἐν Πύλῳ ἠγαθέῃ· σὺ δέ με χρόνον ἐνθάδʼ ἐρύκεις.
Odyssey 1.600	δῶρον δʼ ὅττι κέ μοι δοίης, κειμήλιον ἔστω·
Odyssey 1.601	ἵππους δʼ εἰς Ἰθάκην οὐκ ἄξομαι, ἀλλὰ σοὶ αὐτῷ
Odyssey 1.602	ἐνθάδε λείψω ἄγαλμα· σὺ γὰρ πεδίοιο ἀνάσσεις
Odyssey 1.603	εὐρέος, ᾧ ἔνι μὲν λωτὸς πολύς, ἐν δὲ κύπειρον
Odyssey 1.604	πυροί τε ζειαί τε ἰδʼ εὐρυφυὲς κρῖ λευκόν.
Odyssey 1.605	ἐν δʼ Ἰθάκῃ οὔτʼ ἂρ δρόμοι εὐρέες οὔτε τι λειμών·
Odyssey 1.606	αἰγίβοτος, καὶ μᾶλλον ἐπήρατος ἱπποβότοιο.
Odyssey 1.607	οὐ γάρ τις νήσων ἱππήλατος οὐδʼ ἐυλείμων,
Odyssey 1.608	αἵ θʼ ἁλὶ κεκλίαται· Ἰθάκη δέ τε καὶ περὶ πασέων.
Odyssey 1.609	ὣς φάτο, μείδησεν δὲ βοὴν ἀγαθὸς Μενέλαος,
Odyssey 1.610	χειρί τέ μιν κατέρεξεν ἔπος τʼ ἔφατʼ ἔκ τʼ ὀνόμαζεν·
Odyssey 1.611	αἵματός εἰς ἀγαθοῖο, φίλον τέκος, οἷʼ ἀγορεύεις·
Odyssey 1.612	τοιγὰρ ἐγώ τοι ταῦτα μεταστήσω· δύναμαι γάρ.
Odyssey 1.613	δώρων δʼ ὅσσʼ ἐν ἐμῷ οἴκῳ κειμήλια κεῖται,
Odyssey 1.614	δώσω ὃ κάλλιστον καὶ τιμηέστατόν ἐστιν·
Odyssey 1.615	δώσω τοι κρητῆρα τετυγμένον· ἀργύρεος δὲ
Odyssey 1.616	ἔστιν ἅπας, χρυσῷ δʼ ἐπὶ χείλεα κεκράανται,
Odyssey 1.617	ἔργον δʼ Ἡφαίστοιο. πόρεν δέ ἑ Φαίδιμος ἥρως,
Odyssey 1.618	Σιδονίων βασιλεύς, ὅθʼ ἑὸς δόμος ἀμφεκάλυψε
Odyssey 1.619	κεῖσέ με νοστήσαντα· τεῒν δʼ ἐθέλω τόδʼ ὀπάσσαι.
Odyssey 1.620	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.621	δαιτυμόνες δʼ ἐς δώματʼ ἴσαν θείου βασιλῆος.
Odyssey 1.622	οἱ δʼ ἦγον μὲν μῆλα, φέρον δʼ ἐυήνορα οἶνον·
Odyssey 1.623	σῖτον δέ σφʼ ἄλοχοι καλλικρήδεμνοι ἔπεμπον.
Odyssey 1.624	ὣς οἱ μὲν περὶ δεῖπνον ἐνὶ μεγάροισι πένοντο.
Odyssey 1.625	μνηστῆρες δὲ πάροιθεν Ὀδυσσῆος μεγάροιο
Odyssey 1.626	δίσκοισιν τέρποντο καὶ αἰγανέῃσιν ἱέντες
Odyssey 1.627	ἐν τυκτῷ δαπέδῳ, ὅθι περ πάρος, ὕβριν ἔχοντες.
Odyssey 1.628	Ἀντίνοος δὲ καθῆστο καὶ Εὐρύμαχος θεοειδής,
Odyssey 1.629	ἀρχοὶ μνηστήρων, ἀρετῇ δʼ ἔσαν ἔξοχʼ ἄριστοι.
Odyssey 1.630	τοῖς δʼ υἱὸς Φρονίοιο Νοήμων ἐγγύθεν ἐλθὼν
Odyssey 1.631	Ἀντίνοον μύθοισιν ἀνειρόμενος προσέειπεν·
Odyssey 1.632	Ἀντίνοʼ, ἦ ῥά τι ἴδμεν ἐνὶ φρεσίν, ἦε καὶ οὐκί,
Odyssey 1.633	ὁππότε Τηλέμαχος νεῖτʼ ἐκ Πύλου ἠμαθόεντος;
Odyssey 1.634	νῆά μοι οἴχετʼ ἄγων· ἐμὲ δὲ χρεὼ γίγνεται αὐτῆς
Odyssey 1.635	Ἤλιδʼ ἐς εὐρύχορον διαβήμεναι, ἔνθα μοι ἵπποι
Odyssey 1.636	δώδεκα θήλειαι, ὑπὸ δʼ ἡμίονοι ταλαεργοὶ
Odyssey 1.637	ἀδμῆτες· τῶν κέν τινʼ ἐλασσάμενος δαμασαίμην.
Odyssey 1.638	ὣς ἔφαθʼ, οἱ δʼ ἀνὰ θυμὸν ἐθάμβεον· οὐ γὰρ ἔφαντο
Odyssey 1.639	ἐς Πύλον οἴχεσθαι Νηλήιον, ἀλλά που αὐτοῦ
Odyssey 1.640	ἀγρῶν ἢ μήλοισι παρέμμεναι ἠὲ συβώτῃ.
Odyssey 1.641	τὸν δʼ αὖτʼ Ἀντίνοος προσέφη Ἐυπείθεος υἱός·
Odyssey 1.642	νημερτές μοι ἔνισπε, πότʼ ᾤχετο καὶ τίνες αὐτῷ
Odyssey 1.643	κοῦροι ἕποντʼ; Ἰθάκης ἐξαίρετοι, ἦ ἑοὶ αὐτοῦ
Odyssey 1.644	θῆτές τε δμῶές τε; δύναιτό κε καὶ τὸ τελέσσαι.
Odyssey 1.645	καί μοι τοῦτʼ ἀγόρευσον ἐτήτυμον, ὄφρʼ ἐὺ εἰδῶ,
Odyssey 1.646	ἤ σε βίῃ ἀέκοντος ἀπηύρα νῆα μέλαιναν,
Odyssey 1.647	ἦε ἑκών οἱ δῶκας, ἐπεὶ προσπτύξατο μύθῳ.
Odyssey 1.648	τὸν δʼ υἱὸς Φρονίοιο Νοήμων ἀντίον ηὔδα·
Odyssey 1.649	αὐτὸς ἑκών οἱ δῶκα· τί κεν ῥέξειε καὶ ἄλλος,
Odyssey 1.650	ὁππότʼ ἀνὴρ τοιοῦτος ἔχων μελεδήματα θυμῷ
Odyssey 1.651	αἰτίζῃ; χαλεπόν κεν ἀνήνασθαι δόσιν εἴη.
Odyssey 1.652	κοῦροι δʼ, οἳ κατὰ δῆμον ἀριστεύουσι μεθʼ ἡμέας,
Odyssey 1.653	οἵ οἱ ἕποντʼ· ἐν δʼ ἀρχὸν ἐγὼ βαίνοντʼ ἐνόησα
Odyssey 1.654	Μέντορα, ἠὲ θεόν, τῷ δʼ αὐτῷ πάντα ἐῴκει.
Odyssey 1.655	ἀλλὰ τὸ θαυμάζω· ἴδον ἐνθάδε Μέντορα δῖον
Odyssey 1.656	χθιζὸν ὑπηοῖον, τότε δʼ ἔμβη νηὶ Πύλονδε.
Odyssey 1.657	ὣς ἄρα φωνήσας ἀπέβη πρὸς δώματα πατρός,
Odyssey 1.658	τοῖσιν δʼ ἀμφοτέροισιν ἀγάσσατο θυμὸς ἀγήνωρ.
Odyssey 1.659	μνηστῆρας δʼ ἄμυδις κάθισαν καὶ παῦσαν ἀέθλων.
Odyssey 1.660	τοῖσιν δʼ Ἀντίνοος μετέφη Εὐπείθεος υἱός,
Odyssey 1.661	ἀχνύμενος· μένεος δὲ μέγα φρένες ἀμφιμέλαιναι
Odyssey 1.662	πίμπλαντʼ, ὄσσε δέ οἱ πυρὶ λαμπετόωντι ἐίκτην·
Odyssey 1.663	ὢ πόποι, ἦ μέγα ἔργον ὑπερφιάλως ἐτελέσθη
Odyssey 1.664	Τηλεμάχῳ ὁδὸς ἥδε· φάμεν δέ οἱ οὐ τελέεσθαι.
Odyssey 1.665	ἐκ τοσσῶνδʼ ἀέκητι νέος πάϊς οἴχεται αὔτως
Odyssey 1.666	νῆα ἐρυσσάμενος, κρίνας τʼ ἀνὰ δῆμον ἀρίστους.
Odyssey 1.667	ἄρξει καὶ προτέρω κακὸν ἔμμεναι· ἀλλά οἱ αὐτῷ
Odyssey 1.668	Ζεὺς ὀλέσειε βίην, πρὶν ἥβης μέτρον ἱκέσθαι.
Odyssey 1.669	ἀλλʼ ἄγε μοι δότε νῆα θοὴν καὶ εἴκοσʼ ἑταίρους,
Odyssey 1.670	ὄφρα μιν αὐτὸν ἰόντα λοχήσομαι ἠδὲ φυλάξω
Odyssey 1.671	ἐν πορθμῷ Ἰθάκης τε Σάμοιό τε παιπαλοέσσης,
Odyssey 1.672	ὡς ἂν ἐπισμυγερῶς ναυτίλλεται εἵνεκα πατρός.
Odyssey 1.673	ὣς ἔφαθʼ, οἱ δʼ ἄρα πάντες ἐπῄνεον ἠδʼ ἐκέλευον.
Odyssey 1.674	αὐτίκʼ ἔπειτʼ ἀνστάντες ἔβαν δόμον εἰς Ὀδυσῆος.
Odyssey 1.675	οὐδʼ ἄρα Πηνελόπεια πολὺν χρόνον ἦεν ἄπυστος
Odyssey 1.676	μύθων, οὓς μνηστῆρες ἐνὶ φρεσὶ βυσσοδόμευον·
Odyssey 1.677	κῆρυξ γάρ οἱ ἔειπε Μέδων, ὃς ἐπεύθετο βουλὰς
Odyssey 1.678	αὐλῆς ἐκτὸς ἐών· οἱ δʼ ἔνδοθι μῆτιν ὕφαινον.
Odyssey 1.679	βῆ δʼ ἴμεν ἀγγελέων διὰ δώματα Πηνελοπείῃ·
Odyssey 1.680	τὸν δὲ κατʼ οὐδοῦ βάντα προσηύδα Πηνελόπεια·
Odyssey 1.681	κῆρυξ, τίπτε δέ σε πρόεσαν μνηστῆρες ἀγαυοί;
Odyssey 1.682	ἦ εἰπέμεναι δμῳῇσιν Ὀδυσσῆος θείοιο
Odyssey 1.683	ἔργων παύσασθαι, σφίσι δʼ αὐτοῖς δαῖτα πένεσθαι;
Odyssey 1.684	μὴ μνηστεύσαντες μηδʼ ἄλλοθʼ ὁμιλήσαντες
Odyssey 1.685	ὕστατα καὶ πύματα νῦν ἐνθάδε δειπνήσειαν·
Odyssey 1.686	οἳ θάμʼ ἀγειρόμενοι βίοτον κατακείρετε πολλόν,
Odyssey 1.687	κτῆσιν Τηλεμάχοιο δαΐφρονος· οὐδέ τι πατρῶν
Odyssey 1.688	ὑμετέρων τὸ πρόσθεν ἀκούετε, παῖδες ἐόντες,
Odyssey 1.689	οἷος Ὀδυσσεὺς ἔσκε μεθʼ ὑμετέροισι τοκεῦσιν,
Odyssey 1.690	οὔτε τινὰ ῥέξας ἐξαίσιον οὔτε τι εἰπὼν
Odyssey 1.691	ἐν δήμῳ, ἥ τʼ ἐστὶ δίκη θείων βασιλήων·
Odyssey 1.692	ἄλλον κʼ ἐχθαίρῃσι βροτῶν, ἄλλον κε φιλοίη.
Odyssey 1.693	κεῖνος δʼ οὔ ποτε πάμπαν ἀτάσθαλον ἄνδρα ἐώργει.
Odyssey 1.694	ἀλλʼ ὁ μὲν ὑμέτερος θυμὸς καὶ ἀεικέα ἔργα
Odyssey 1.695	φαίνεται, οὐδέ τίς ἐστι χάρις μετόπισθʼ ἐυεργέων.
Odyssey 1.696	τὴν δʼ αὖτε προσέειπε Μέδων πεπνυμένα εἰδώς·
Odyssey 1.697	αἲ γὰρ δή, βασίλεια, τόδε πλεῖστον κακὸν εἴη.
Odyssey 1.698	ἀλλὰ πολὺ μεῖζόν τε καὶ ἀργαλεώτερον ἄλλο
Odyssey 1.699	μνηστῆρες φράζονται, ὃ μὴ τελέσειε Κρονίων·
Odyssey 1.700	Τηλέμαχον μεμάασι κατακτάμεν ὀξέι χαλκῷ
Odyssey 1.701	οἴκαδε νισόμενον· ὁ δʼ ἔβη μετὰ πατρὸς ἀκουὴν
Odyssey 1.702	ἐς Πύλον ἠγαθέην ἠδʼ ἐς Λακεδαίμονα δῖαν.
Odyssey 1.703	ὣς φάτο, τῆς δʼ αὐτοῦ λύτο γούνατα καὶ φίλον ἦτορ,
Odyssey 1.704	δὴν δέ μιν ἀμφασίη ἐπέων λάβε· τὼ δέ οἱ ὄσσε
Odyssey 1.705	δακρυόφι πλῆσθεν, θαλερὴ δέ οἱ ἔσχετο φωνή.
Odyssey 1.706	ὀψὲ δὲ δή μιν ἔπεσσιν ἀμειβομένη προσέειπε·
Odyssey 1.707	κῆρυξ, τίπτε δέ μοι πάϊς οἴχεται; οὐδέ τί μιν χρεὼ
Odyssey 1.708	νηῶν ὠκυπόρων ἐπιβαινέμεν, αἵ θʼ ἁλὸς ἵπποι
Odyssey 1.709	ἀνδράσι γίγνονται, περόωσι δὲ πουλὺν ἐφʼ ὑγρήν.
Odyssey 1.710	ἦ ἵνα μηδʼ ὄνομʼ αὐτοῦ ἐν ἀνθρώποισι λίπηται;
Odyssey 1.711	τὴν δʼ ἠμείβετʼ ἔπειτα Μέδων πεπνυμένα εἰδώς·
Odyssey 1.712	οὐκ οἶδʼ ἤ τίς μιν θεὸς ὤρορεν, ἦε καὶ αὐτοῦ
Odyssey 1.713	θυμὸς ἐφωρμήθη ἴμεν ἐς Πύλον, ὄφρα πύθηται
Odyssey 1.714	πατρὸς ἑοῦ ἢ νόστον ἢ ὅν τινα πότμον ἐπέσπεν.
Odyssey 1.715	ὣς ἄρα φωνήσας ἀπέβη κατὰ δῶμʼ Ὀδυσῆος.
Odyssey 1.716	τὴν δʼ ἄχος ἀμφεχύθη θυμοφθόρον, οὐδʼ ἄρʼ ἔτʼ ἔτλη
Odyssey 1.717	δίφρῳ ἐφέζεσθαι πολλῶν κατὰ οἶκον ἐόντων,
Odyssey 1.718	ἀλλʼ ἄρʼ ἐπʼ οὐδοῦ ἷζε πολυκμήτου θαλάμοιο
Odyssey 1.719	οἴκτρʼ ὀλοφυρομένη· περὶ δὲ δμῳαὶ μινύριζον
Odyssey 1.720	πᾶσαι, ὅσαι κατὰ δώματʼ ἔσαν νέαι ἠδὲ παλαιαί.
Odyssey 1.721	τῇς δʼ ἁδινὸν γοόωσα μετηύδα Πηνελόπεια·
Odyssey 1.722	κλῦτε, φίλαι· πέρι γάρ μοι Ὀλύμπιος ἄλγεʼ ἔδωκεν
Odyssey 1.723	ἐκ πασέων, ὅσσαι μοι ὁμοῦ τράφεν ἠδʼ ἐγένοντο·
Odyssey 1.724	ἣ πρὶν μὲν πόσιν ἐσθλὸν ἀπώλεσα θυμολέοντα,
Odyssey 1.725	παντοίῃς ἀρετῇσι κεκασμένον ἐν Δαναοῖσιν,
Odyssey 1.726	ἐσθλόν, τοῦ κλέος εὐρὺ καθʼ Ἑλλάδα καὶ μέσον Ἄργος.
Odyssey 1.727	νῦν αὖ παῖδʼ ἀγαπητὸν ἀνηρείψαντο θύελλαι
Odyssey 1.728	ἀκλέα ἐκ μεγάρων, οὐδʼ ὁρμηθέντος ἄκουσα.
Odyssey 1.729	σχέτλιαι, οὐδʼ ὑμεῖς περ ἐνὶ φρεσὶ θέσθε ἑκάστη
Odyssey 1.730	ἐκ λεχέων μʼ ἀνεγεῖραι, ἐπιστάμεναι σάφα θυμῷ,
Odyssey 1.731	ὁππότʼ ἐκεῖνος ἔβη κοίλην ἐπὶ νῆα μέλαιναν.
Odyssey 1.732	εἰ γὰρ ἐγὼ πυθόμην ταύτην ὁδὸν ὁρμαίνοντα,
Odyssey 1.733	τῷ κε μάλʼ ἤ κεν ἔμεινε καὶ ἐσσύμενός περ ὁδοῖο,
Odyssey 1.734	ἤ κέ με τεθνηκυῖαν ἐνὶ μεγάροισιν ἔλειπεν.
Odyssey 1.735	ἀλλά τις ὀτρηρῶς Δολίον καλέσειε γέροντα,
Odyssey 1.736	δμῶʼ ἐμόν, ὅν μοι δῶκε πατὴρ ἔτι δεῦρο κιούσῃ,
Odyssey 1.737	καί μοι κῆπον ἔχει πολυδένδρεον, ὄφρα τάχιστα
Odyssey 1.738	Λαέρτῃ τάδε πάντα παρεζόμενος καταλέξῃ,
Odyssey 1.739	εἰ δή πού τινα κεῖνος ἐνὶ φρεσὶ μῆτιν ὑφήνας
Odyssey 1.740	ἐξελθὼν λαοῖσιν ὀδύρεται, οἳ μεμάασιν
Odyssey 1.741	ὃν καὶ Ὀδυσσῆος φθῖσαι γόνον ἀντιθέοιο.
Odyssey 1.742	τὴν δʼ αὖτε προσέειπε φίλη τροφὸς Εὐρύκλεια·
Odyssey 1.743	νύμφα φίλη, σὺ μὲν ἄρ με κατάκτανε νηλέι χαλκῷ
Odyssey 1.744	ἢ ἔα ἐν μεγάρῳ· μῦθον δέ τοι οὐκ ἐπικεύσω.
Odyssey 1.745	ᾔδεʼ ἐγὼ τάδε πάντα, πόρον δέ οἱ ὅσσʼ ἐκέλευε,
Odyssey 1.746	σῖτον καὶ μέθυ ἡδύ· ἐμεῦ δʼ ἕλετο μέγαν ὅρκον
Odyssey 1.747	μὴ πρὶν σοὶ ἐρέειν, πρὶν δωδεκάτην γε γενέσθαι
Odyssey 1.748	ἢ σʼ αὐτὴν ποθέσαι καὶ ἀφορμηθέντος ἀκοῦσαι,
Odyssey 1.749	ὡς ἂν μὴ κλαίουσα κατὰ χρόα καλὸν ἰάπτῃς.
Odyssey 1.750	ἀλλʼ ὑδρηναμένη, καθαρὰ χροῒ εἵμαθʼ ἑλοῦσα,
Odyssey 1.751	εἰς ὑπερῷʼ ἀναβᾶσα σὺν ἀμφιπόλοισι γυναιξὶν
Odyssey 1.752	εὔχεʼ Ἀθηναίῃ κούρῃ Διὸς αἰγιόχοιο·
Odyssey 1.753	ἡ γάρ κέν μιν ἔπειτα καὶ ἐκ θανάτοιο σαώσαι.
Odyssey 1.754	μηδὲ γέροντα κάκου κεκακωμένον· οὐ γὰρ ὀίω
Odyssey 1.755	πάγχυ θεοῖς μακάρεσσι γονὴν Ἀρκεισιάδαο
Odyssey 1.756	ἔχθεσθʼ, ἀλλʼ ἔτι πού τις ἐπέσσεται ὅς κεν ἔχῃσι
Odyssey 1.757	δώματά θʼ ὑψερεφέα καὶ ἀπόπροθι πίονας ἀγρούς.
Odyssey 1.758	ὣς φάτο, τῆς δʼ εὔνησε γόον, σχέθε δʼ ὄσσε γόοιο.
Odyssey 1.759	ἡ δʼ ὑδρηναμένη, καθαρὰ χροῒ εἵμαθʼ ἑλοῦσα
Odyssey 1.760	εἰς ὑπερῷʼ ἀνέβαινε σὺν ἀμφιπόλοισι γυναιξίν,
Odyssey 1.761	ἐν δʼ ἔθετʼ οὐλοχύτας κανέῳ, ἠρᾶτο δʼ Ἀθήνῃ·
Odyssey 1.762	κλῦθί μευ, αἰγιόχοιο Διὸς τέκος, Ἀτρυτώνη,
Odyssey 1.763	εἴ ποτέ τοι πολύμητις ἐνὶ μεγάροισιν Ὀδυσσεὺς
Odyssey 1.764	ἢ βοὸς ἢ ὄϊος κατὰ πίονα μηρίʼ ἔκηε,
Odyssey 1.765	τῶν νῦν μοι μνῆσαι, καί μοι φίλον υἷα σάωσον,
Odyssey 1.766	μνηστῆρας δʼ ἀπάλαλκε κακῶς ὑπερηνορέοντας.
Odyssey 1.767	ὣς εἰποῦσʼ ὀλόλυξε, θεὰ δέ οἱ ἔκλυεν ἀρῆς.
Odyssey 1.768	μνηστῆρες δʼ ὁμάδησαν ἀνὰ μέγαρα σκιόεντα·
Odyssey 1.769	ὧδε δέ τις εἴπεσκε νέων ὑπερηνορεόντων·
Odyssey 1.770	ἦ μάλα δὴ γάμον ἄμμι πολυμνήστη βασίλεια
Odyssey 1.771	ἀρτύει, οὐδέ τι οἶδεν ὅ οἱ φόνος υἷι τέτυκται.
Odyssey 1.772	ὣς ἄρα τις εἴπεσκε, τὰ δʼ οὐκ ἴσαν ὡς ἐτέτυκτο.
Odyssey 1.773	τοῖσιν δʼ Ἀντίνοος ἀγορήσατο καὶ μετέειπε·
Odyssey 1.774	δαιμόνιοι, μύθους μὲν ὑπερφιάλους ἀλέασθε
Odyssey 1.775	πάντας ὁμῶς, μή πού τις ἀπαγγείλῃσι καὶ εἴσω.
Odyssey 1.776	ἀλλʼ ἄγε σιγῇ τοῖον ἀναστάντες τελέωμεν
Odyssey 1.777	μῦθον, ὃ δὴ καὶ πᾶσιν ἐνὶ φρεσὶν ἤραρεν ἡμῖν.
Odyssey 1.778	ὣς εἰπὼν ἐκρίνατʼ ἐείκοσι φῶτας ἀρίστους,
Odyssey 1.779	βὰν δʼ ἰέναι ἐπὶ νῆα θοὴν καὶ θῖνα θαλάσσης.
Odyssey 1.780	νῆα μὲν οὖν πάμπρωτον ἁλὸς βένθοσδε ἔρυσσαν,
Odyssey 1.781	ἐν δʼ ἱστόν τʼ ἐτίθεντο καὶ ἱστία νηὶ μελαίνῃ,
Odyssey 1.782	ἠρτύναντο δʼ ἐρετμὰ τροποῖς ἐν δερματίνοισιν,
Odyssey 1.783	πάντα κατὰ μοῖραν, ἀνά θʼ ἱστία λευκὰ πέτασσαν·
Odyssey 1.784	τεύχεα δέ σφʼ ἤνεικαν ὑπέρθυμοι θεράποντες.
Odyssey 1.785	ὑψοῦ δʼ ἐν νοτίῳ τήν γʼ ὥρμισαν, ἐκ δʼ ἔβαν αὐτοί·
Odyssey 1.786	ἔνθα δὲ δόρπον ἕλοντο, μένον δʼ ἐπὶ ἕσπερον ἐλθεῖν.
Odyssey 1.787	ἡ δʼ ὑπερωίῳ αὖθι περίφρων Πηνελόπεια
Odyssey 1.788	κεῖτʼ ἄρʼ ἄσιτος, ἄπαστος ἐδητύος ἠδὲ ποτῆτος,
Odyssey 1.789	ὁρμαίνουσʼ ἤ οἱ θάνατον φύγοι υἱὸς ἀμύμων,
Odyssey 1.790	ἦ ὅ γʼ ὑπὸ μνηστῆρσιν ὑπερφιάλοισι δαμείη.
Odyssey 1.791	ὅσσα δὲ μερμήριξε λέων ἀνδρῶν ἐν ὁμίλῳ
Odyssey 1.792	δείσας, ὁππότε μιν δόλιον περὶ κύκλον ἄγωσι,
Odyssey 1.793	τόσσα μιν ὁρμαίνουσαν ἐπήλυθε νήδυμος ὕπνος·
Odyssey 1.794	εὗδε δʼ ἀνακλινθεῖσα, λύθεν δέ οἱ ἅψεα πάντα.
Odyssey 1.795	ἔνθʼ αὖτʼ ἄλλʼ ἐνόησε θεά, γλαυκῶπις Ἀθήνη·
Odyssey 1.796	εἴδωλον ποίησε, δέμας δʼ ἤικτο γυναικί,
Odyssey 1.797	Ἰφθίμῃ, κούρῃ μεγαλήτορος Ἰκαρίοιο,
Odyssey 1.798	τὴν Εὔμηλος ὄπυιε Φερῇς ἔνι οἰκία ναίων.
Odyssey 1.799	πέμπε δέ μιν πρὸς δώματʼ Ὀδυσσῆος θείοιο,
Odyssey 1.800	ἧος Πηνελόπειαν ὀδυρομένην γοόωσαν
Odyssey 1.801	παύσειε κλαυθμοῖο γόοιό τε δακρυόεντος.
Odyssey 1.802	ἐς θάλαμον δʼ εἰσῆλθε παρὰ κληῖδος ἱμάντα,
Odyssey 1.803	στῆ δʼ ἄρʼ ὑπὲρ κεφαλῆς, καί μιν πρὸς μῦθον ἔειπεν·
Odyssey 1.804	εὕδεις, Πηνελόπεια, φίλον τετιημένη ἦτορ;
Odyssey 1.805	οὐ μέν σʼ οὐδὲ ἐῶσι θεοὶ ῥεῖα ζώοντες
Odyssey 1.806	κλαίειν οὐδʼ ἀκάχησθαι, ἐπεί ῥʼ ἔτι νόστιμός ἐστι
Odyssey 1.807	σὸς παῖς· οὐ μὲν γάρ τι θεοῖς ἀλιτήμενός ἐστι.
Odyssey 1.808	τὴν δʼ ἠμείβετʼ ἔπειτα περίφρων Πηνελόπεια,
Odyssey 1.809	ἡδὺ μάλα κνώσσουσʼ ἐν ὀνειρείῃσι πύλῃσιν·
Odyssey 1.810	τίπτε, κασιγνήτη, δεῦρʼ ἤλυθες; οὔ τι πάρος γε
Odyssey 1.811	πωλέʼ, ἐπεὶ μάλα πολλὸν ἀπόπροθι δώματα ναίεις·
Odyssey 1.812	καί με κέλεαι παύσασθαι ὀιζύος ἠδʼ ὀδυνάων
Odyssey 1.813	πολλέων, αἵ μʼ ἐρέθουσι κατὰ φρένα καὶ κατὰ θυμόν,
Odyssey 1.814	ἣ πρὶν μὲν πόσιν ἐσθλὸν ἀπώλεσα θυμολέοντα,
Odyssey 1.815	παντοίῃς ἀρετῇσι κεκασμένον ἐν Δαναοῖσιν,
Odyssey 1.816	ἐσθλόν, τοῦ κλέος εὐρὺ καθʼ Ἑλλάδα καὶ μέσον Ἄργος·
Odyssey 1.817	νῦν αὖ παῖς ἀγαπητὸς ἔβη κοίλης ἐπὶ νηός,
Odyssey 1.818	νήπιος, οὔτε πόνων ἐὺ εἰδὼς οὔτʼ ἀγοράων.
Odyssey 1.819	τοῦ δὴ ἐγὼ καὶ μᾶλλον ὀδύρομαι ἤ περ ἐκείνου·
Odyssey 1.820	τοῦ δʼ ἀμφιτρομέω καὶ δείδια, μή τι πάθῃσιν,
Odyssey 1.821	ἢ ὅ γε τῶν ἐνὶ δήμῳ, ἵνʼ οἴχεται, ἢ ἐνὶ πόντῳ·
Odyssey 1.822	δυσμενέες γὰρ πολλοὶ ἐπʼ αὐτῷ μηχανόωνται,
Odyssey 1.823	ἱέμενοι κτεῖναι πρὶν πατρίδα γαῖαν ἱκέσθαι.
Odyssey 1.824	τὴν δʼ ἀπαμειβόμενον προσέφη εἴδωλον ἀμαυρόν·
Odyssey 1.825	θάρσει, μηδέ τι πάγχυ μετὰ φρεσὶ δείδιθι λίην·
Odyssey 1.826	τοίη γάρ οἱ πομπὸς ἅμʼ ἔρχεται, ἥν τε καὶ ἄλλοι
Odyssey 1.827	ἀνέρες ἠρήσαντο παρεστάμεναι, δύναται γάρ,
Odyssey 1.828	Παλλὰς Ἀθηναίη· σὲ δʼ ὀδυρομένην ἐλεαίρει·
Odyssey 1.829	ἣ νῦν με προέηκε τεῒν τάδε μυθήσασθαι.
Odyssey 1.830	τὴν δʼ αὖτε προσέειπε περίφρων Πηνελόπεια·
Odyssey 1.831	εἰ μὲν δὴ θεός ἐσσι θεοῖό τε ἔκλυες αὐδῆς,
Odyssey 1.832	εἰ δʼ ἄγε μοι καὶ κεῖνον ὀιζυρὸν κατάλεξον,
Odyssey 1.833	ἤ που ἔτι ζώει καὶ ὁρᾷ φάος ἠελίοιο,
Odyssey 1.834	ἦ ἤδη τέθνηκε καὶ εἰν Ἀίδαο δόμοισι.
Odyssey 1.835	τὴν δʼ ἀπαμειβόμενον προσέφη εἴδωλον ἀμαυρόν·
Odyssey 1.836	οὐ μέν τοι κεῖνόν γε διηνεκέως ἀγορεύσω,
Odyssey 1.837	ζώει ὅ γʼ ἦ τέθνηκε· κακὸν δʼ ἀνεμώλια βάζειν.
Odyssey 1.838	ὣς εἰπὸν σταθμοῖο παρὰ κληῖδα λιάσθη
Odyssey 1.839	ἐς πνοιὰς ἀνέμων. ἡ δʼ ἐξ ὕπνου ἀνόρουσε
Odyssey 1.840	κούρη Ἰκαρίοιο· φίλον δέ οἱ ἦτορ ἰάνθη,
Odyssey 1.841	ὥς οἱ ἐναργὲς ὄνειρον ἐπέσσυτο νυκτὸς ἀμολγῷ.
Odyssey 1.842	μνηστῆρες δʼ ἀναβάντες ἐπέπλεον ὑγρὰ κέλευθα
Odyssey 1.843	Τηλεμάχῳ φόνον αἰπὺν ἐνὶ φρεσὶν ὁρμαίνοντες.
Odyssey 1.844	ἔστι δέ τις νῆσος μέσσῃ ἁλὶ πετρήεσσα,
Odyssey 1.845	μεσσηγὺς Ἰθάκης τε Σάμοιό τε παιπαλοέσσης,
Odyssey 1.846	Ἀστερίς, οὐ μεγάλη· λιμένες δʼ ἔνι ναύλοχοι αὐτῇ
Odyssey 1.847	ἀμφίδυμοι· τῇ τόν γε μένον λοχόωντες Ἀχαιοί.
Odyssey 1.1	Ἠὼς δʼ ἐκ λεχέων παρʼ ἀγαυοῦ Τιθωνοῖο
Odyssey 1.2	ὤρνυθʼ, ἵνʼ ἀθανάτοισι φόως φέροι ἠδὲ βροτοῖσιν·
Odyssey 1.3	οἱ δὲ θεοὶ θῶκόνδε καθίζανον, ἐν δʼ ἄρα τοῖσι
Odyssey 1.4	Ζεὺς ὑψιβρεμέτης, οὗ τε κράτος ἐστὶ μέγιστον.
Odyssey 1.5	τοῖσι δʼ Ἀθηναίη λέγε κήδεα πόλλʼ Ὀδυσῆος
Odyssey 1.6	μνησαμένη· μέλε γάρ οἱ ἐὼν ἐν δώμασι νύμφης·
Odyssey 1.7	Ζεῦ πάτερ ἠδʼ ἄλλοι μάκαρες θεοὶ αἰὲν ἐόντες,
Odyssey 1.8	μή τις ἔτι πρόφρων ἀγανὸς καὶ ἤπιος ἔστω
Odyssey 1.9	σκηπτοῦχος βασιλεύς, μηδὲ φρεσὶν αἴσιμα εἰδώς,
Odyssey 1.10	ἀλλʼ αἰεὶ χαλεπός τʼ εἴη καὶ αἴσυλα ῥέζοι·
Odyssey 1.11	ὡς οὔ τις μέμνηται Ὀδυσσῆος θείοιο
Odyssey 1.12	λαῶν οἷσιν ἄνασσε, πατὴρ δʼ ὣς ἤπιος ἦεν.
Odyssey 1.13	ἀλλʼ ὁ μὲν ἐν νήσῳ κεῖται κρατέρʼ ἄλγεα πάσχων
Odyssey 1.14	νύμφης ἐν μεγάροισι Καλυψοῦς, ἥ μιν ἀνάγκῃ
Odyssey 1.15	ἴσχει· ὁ δʼ οὐ δύναται ἣν πατρίδα γαῖαν ἱκέσθαι·
Odyssey 1.16	οὐ γάρ οἱ πάρα νῆες ἐπήρετμοι καὶ ἑταῖροι,
Odyssey 1.17	οἵ κέν μιν πέμποιεν ἐπʼ εὐρέα νῶτα θαλάσσης.
Odyssey 1.18	νῦν αὖ παῖδʼ ἀγαπητὸν ἀποκτεῖναι μεμάασιν
Odyssey 1.19	οἴκαδε νισόμενον· ὁ δʼ ἔβη μετὰ πατρὸς ἀκουὴν
Odyssey 1.20	ἐς Πύλον ἠγαθέην ἠδʼ ἐς Λακεδαίμονα δῖαν.
Odyssey 1.21	τὴν δʼ ἀπαμειβόμενος προσέφη νεφεληγερέτα Ζεύς·
Odyssey 1.22	τέκνον ἐμόν, ποῖόν σε ἔπος φύγεν ἕρκος ὀδόντων.
Odyssey 1.23	οὐ γὰρ δὴ τοῦτον μὲν ἐβούλευσας νόον αὐτή,
Odyssey 1.24	ὡς ἦ τοι κείνους Ὀδυσεὺς ἀποτίσεται ἐλθών;
Odyssey 1.25	Τηλέμαχον δὲ σὺ πέμψον ἐπισταμένως, δύνασαι γάρ,
Odyssey 1.26	ὥς κε μάλʼ ἀσκηθὴς ἣν πατρίδα γαῖαν ἵκηται,
Odyssey 1.27	μνηστῆρες δʼ ἐν νηὶ· παλιμπετὲς ἀπονέωνται.
Odyssey 1.28	ἦ ῥα καὶ Ἑρμείαν, υἱὸν φίλον, ἀντίον ηὔδα·
Odyssey 1.29	Ἑρμεία, σὺ γὰρ αὖτε τά τʼ ἄλλα περ ἄγγελός ἐσσι,
Odyssey 1.30	νύμφῃ ἐυπλοκάμῳ εἰπεῖν νημερτέα βουλήν,
Odyssey 1.31	νόστον Ὀδυσσῆος ταλασίφρονος, ὥς κε νέηται
Odyssey 1.32	οὔτε θεῶν πομπῇ οὔτε θνητῶν ἀνθρώπων·
Odyssey 1.33	ἀλλʼ ὅ γʼ ἐπὶ σχεδίης πολυδέσμου πήματα πάσχων
Odyssey 1.34	ἤματί κʼ εἰκοστῷ Σχερίην ἐρίβωλον ἵκοιτο,
Odyssey 1.35	Φαιήκων ἐς γαῖαν, οἳ ἀγχίθεοι γεγάασιν,
Odyssey 1.36	οἵ κέν μιν περὶ κῆρι θεὸν ὣς τιμήσουσιν,
Odyssey 1.37	πέμψουσιν δʼ ἐν νηὶ φίλην ἐς πατρίδα γαῖαν,
Odyssey 1.38	χαλκόν τε χρυσόν τε ἅλις ἐσθῆτά τε δόντες,
Odyssey 1.39	πόλλʼ, ὅσʼ ἂν οὐδέ ποτε Τροίης ἐξήρατʼ Ὀδυσσεύς,
Odyssey 1.40	εἴ περ ἀπήμων ἦλθε, λαχὼν ἀπὸ ληίδος αἶσαν.
Odyssey 1.41	ὣς γάρ οἱ μοῖρʼ ἐστὶ φίλους τʼ ἰδέειν καὶ ἱκέσθαι
Odyssey 1.42	οἶκον ἐς ὑψόροφον καὶ ἑὴν ἐς πατρίδα γαῖαν.
Odyssey 1.43	ὣς ἔφατʼ, οὐδʼ ἀπίθησε διάκτορος ἀργεϊφόντης.
Odyssey 1.44	αὐτίκʼ ἔπειθʼ ὑπὸ ποσσὶν ἐδήσατο καλὰ πέδιλα,
Odyssey 1.45	ἀμβρόσια χρύσεια, τά μιν φέρον ἠμὲν ἐφʼ ὑγρὴν
Odyssey 1.46	ἠδʼ ἐπʼ ἀπείρονα γαῖαν ἅμα πνοιῇς ἀνέμοιο.
Odyssey 1.47	εἵλετο δὲ ῥάβδον, τῇ τʼ ἀνδρῶν ὄμματα θέλγει,
Odyssey 1.48	ὧν ἐθέλει, τοὺς δʼ αὖτε καὶ ὑπνώοντας ἐγείρει.
Odyssey 1.49	τὴν μετὰ χερσὶν ἔχων πέτετο κρατὺς ἀργεϊφόντης.
Odyssey 1.50	Πιερίην δʼ ἐπιβὰς ἐξ αἰθέρος ἔμπεσε πόντῳ·
Odyssey 1.51	σεύατʼ ἔπειτʼ ἐπὶ κῦμα λάρῳ ὄρνιθι ἐοικώς,
Odyssey 1.52	ὅς τε κατὰ δεινοὺς κόλπους ἁλὸς ἀτρυγέτοιο
Odyssey 1.53	ἰχθῦς ἀγρώσσων πυκινὰ πτερὰ δεύεται ἅλμῃ·
Odyssey 1.54	τῷ ἴκελος πολέεσσιν ὀχήσατο κύμασιν Ἑρμῆς.
Odyssey 1.55	ἀλλʼ ὅτε δὴ τὴν νῆσον ἀφίκετο τηλόθʼ ἐοῦσαν,
Odyssey 1.56	ἔνθʼ ἐκ πόντου βὰς ἰοειδέος ἤπειρόνδε
Odyssey 1.57	ἤιεν, ὄφρα μέγα σπέος ἵκετο, τῷ ἔνι νύμφη
Odyssey 1.58	ναῖεν ἐυπλόκαμος· τὴν δʼ ἔνδοθι τέτμεν ἐοῦσαν.
Odyssey 1.59	πῦρ μὲν ἐπʼ ἐσχαρόφιν μέγα καίετο, τηλόσε δʼ ὀδμὴ
Odyssey 1.60	κέδρου τʼ εὐκεάτοιο θύου τʼ ἀνὰ νῆσον ὀδώδει
Odyssey 1.61	δαιομένων· ἡ δʼ ἔνδον ἀοιδιάουσʼ ὀπὶ καλῇ
Odyssey 1.62	ἱστὸν ἐποιχομένη χρυσείῃ κερκίδʼ ὕφαινεν.
Odyssey 1.63	ὕλη δὲ σπέος ἀμφὶ πεφύκει τηλεθόωσα,
Odyssey 1.64	κλήθρη τʼ αἴγειρός τε καὶ εὐώδης κυπάρισσος.
Odyssey 1.65	ἔνθα δέ τʼ ὄρνιθες τανυσίπτεροι εὐνάζοντο,
Odyssey 1.66	σκῶπές τʼ ἴρηκές τε τανύγλωσσοί τε κορῶναι
Odyssey 1.67	εἰνάλιαι, τῇσίν τε θαλάσσια ἔργα μέμηλεν.
Odyssey 1.68	ἡ δʼ αὐτοῦ τετάνυστο περὶ σπείους γλαφυροῖο
Odyssey 1.69	ἡμερὶς ἡβώωσα, τεθήλει δὲ σταφυλῇσι.
Odyssey 1.70	κρῆναι δʼ ἑξείης πίσυρες ῥέον ὕδατι λευκῷ,
Odyssey 1.71	πλησίαι ἀλλήλων τετραμμέναι ἄλλυδις ἄλλη.
Odyssey 1.72	ἀμφὶ δὲ λειμῶνες μαλακοὶ ἴου ἠδὲ σελίνου
Odyssey 1.73	θήλεον. ἔνθα κʼ ἔπειτα καὶ ἀθάνατός περ ἐπελθὼν
Odyssey 1.74	θηήσαιτο ἰδὼν καὶ τερφθείη φρεσὶν ᾗσιν.
Odyssey 1.75	ἔνθα στὰς θηεῖτο διάκτορος ἀργεϊφόντης.
Odyssey 1.76	αὐτὰρ ἐπεὶ δὴ πάντα ἑῷ θηήσατο θυμῷ,
Odyssey 1.77	αὐτίκʼ ἄρʼ εἰς εὐρὺ σπέος ἤλυθεν. οὐδέ μιν ἄντην
Odyssey 1.78	ἠγνοίησεν ἰδοῦσα Καλυψώ, δῖα θεάων·
Odyssey 1.79	οὐ γάρ τʼ ἀγνῶτες θεοὶ ἀλλήλοισι πέλονται
Odyssey 1.80	ἀθάνατοι, οὐδʼ εἴ τις ἀπόπροθι δώματα ναίει.
Odyssey 1.81	οὐδʼ ἄρʼ Ὀδυσσῆα μεγαλήτορα ἔνδον ἔτετμεν,
Odyssey 1.82	ἀλλʼ ὅ γʼ ἐπʼ ἀκτῆς κλαῖε καθήμενος, ἔνθα πάρος περ,
Odyssey 1.83	δάκρυσι καὶ στοναχῇσι καὶ ἄλγεσι θυμὸν ἐρέχθων.
Odyssey 1.84	πόντον ἐπʼ ἀτρύγετον δερκέσκετο δάκρυα λείβων.
Odyssey 1.85	Ἑρμείαν δʼ ἐρέεινε Καλυψώ, δῖα θεάων,
Odyssey 1.86	ἐν θρόνῳ ἱδρύσασα φαεινῷ σιγαλόεντι·
Odyssey 1.87	τίπτε μοι, Ἑρμεία χρυσόρραπι, εἰλήλουθας
Odyssey 1.88	αἰδοῖός τε φίλος τε; πάρος γε μὲν οὔ τι θαμίζεις.
Odyssey 1.89	αὔδα ὅ τι φρονέεις· τελέσαι δέ με θυμὸς ἄνωγεν,
Odyssey 1.90	εἰ δύναμαι τελέσαι γε καὶ εἰ τετελεσμένον ἐστίν.
Odyssey 1.91	ἀλλʼ ἕπεο προτέρω, ἵνα τοι πὰρ ξείνια θείω.
Odyssey 1.92	ὥς ἄρα φωνήσασα θεὰ παρέθηκε τράπεζαν
Odyssey 1.93	ἀμβροσίης πλήσασα, κέρασσε δὲ νέκταρ ἐρυθρόν.
Odyssey 1.94	αὐτὰρ ὁ πῖνε καὶ ἦσθε διάκτορος ἀργεϊφόντης.
Odyssey 1.95	αὐτὰρ ἐπεὶ δείπνησε καὶ ἤραρε θυμὸν ἐδωδῇ,
Odyssey 1.96	καὶ τότε δή μιν ἔπεσσιν ἀμειβόμενος προσέειπεν·
Odyssey 1.97	εἰρωτᾷς μʼ ἐλθόντα θεὰ θεόν· αὐτὰρ ἐγώ τοι
Odyssey 1.98	νημερτέως τὸν μῦθον ἐνισπήσω· κέλεαι γάρ.
Odyssey 1.99	Ζεὺς ἐμέ γʼ ἠνώγει δεῦρʼ ἐλθέμεν οὐκ ἐθέλοντα·
Odyssey 1.100	τίς δʼ ἂν ἑκὼν τοσσόνδε διαδράμοι ἁλμυρὸν ὕδωρ
Odyssey 1.101	ἄσπετον; οὐδέ τις ἄγχι βροτῶν πόλις, οἵ τε θεοῖσιν
Odyssey 1.102	ἱερά τε ῥέζουσι καὶ ἐξαίτους ἑκατόμβας.
Odyssey 1.103	ἀλλὰ μάλʼ οὔ πως ἔστι Διὸς νόον αἰγιόχοιο
Odyssey 1.104	οὔτε παρεξελθεῖν ἄλλον θεὸν οὔθʼ ἁλιῶσαι.
Odyssey 1.105	φησί τοι ἄνδρα παρεῖναι ὀιζυρώτατον ἄλλων,
Odyssey 1.106	τῶν ἀνδρῶν, οἳ ἄστυ πέρι Πριάμοιο μάχοντο
Odyssey 1.107	εἰνάετες, δεκάτῳ δὲ πόλιν πέρσαντες ἔβησαν
Odyssey 1.108	οἴκαδʼ· ἀτὰρ ἐν νόστῳ Ἀθηναίην ἀλίτοντο,
Odyssey 1.109	ἥ σφιν ἐπῶρσʼ ἄνεμόν τε κακὸν καὶ κύματα μακρά.
Odyssey 1.110	ἔνθʼ ἄλλοι μὲν πάντες ἀπέφθιθεν ἐσθλοὶ ἑταῖροι,
Odyssey 1.111	τὸν δʼ ἄρα δεῦρʼ ἄνεμός τε φέρων καὶ κῦμα πέλασσε.
Odyssey 1.112	τὸν νῦν σʼ ἠνώγειν ἀποπεμπέμεν ὅττι τάχιστα·
Odyssey 1.113	οὐ γάρ οἱ τῇδʼ αἶσα φίλων ἀπονόσφιν ὀλέσθαι,
Odyssey 1.114	ἀλλʼ ἔτι οἱ μοῖρʼ ἐστὶ φίλους τʼ ἰδέειν καὶ ἱκέσθαι
Odyssey 1.115	οἶκον ἐς ὑψόροφον καὶ ἑὴν ἐς πατρίδα γαῖαν.
Odyssey 1.116	ὣς φάτο, ῥίγησεν δὲ Καλυψώ, δῖα θεάων,
Odyssey 1.117	καί μιν φωνήσασʼ ἔπεα πτερόεντα προσηύδα·
Odyssey 1.118	σχέτλιοί ἐστε, θεοί, ζηλήμονες ἔξοχον ἄλλων,
Odyssey 1.119	οἵ τε θεαῖς ἀγάασθε παρʼ ἀνδράσιν εὐνάζεσθαι
Odyssey 1.120	ἀμφαδίην, ἤν τίς τε φίλον ποιήσετʼ ἀκοίτην.
Odyssey 1.121	ὣς μὲν ὅτʼ Ὠρίωνʼ ἕλετο ῥοδοδάκτυλος Ἠώς,
Odyssey 1.122	τόφρα οἱ ἠγάασθε θεοὶ ῥεῖα ζώοντες,
Odyssey 1.123	ἧος ἐν Ὀρτυγίῃ χρυσόθρονος Ἄρτεμις ἁγνὴ
Odyssey 1.124	οἷς ἀγανοῖς βελέεσσιν ἐποιχομένη κατέπεφνεν.
Odyssey 1.125	ὣς δʼ ὁπότʼ Ἰασίωνι ἐυπλόκαμος Δημήτηρ,
Odyssey 1.126	ᾧ θυμῷ εἴξασα, μίγη φιλότητι καὶ εὐνῇ
Odyssey 1.127	νειῷ ἔνι τριπόλῳ· οὐδὲ δὴν ἦεν ἄπυστος
Odyssey 1.128	Ζεύς, ὅς μιν κατέπεφνε βαλὼν ἀργῆτι κεραυνῷ.
Odyssey 1.129	ὣς δʼ αὖ νῦν μοι ἄγασθε, θεοί, βροτὸν ἄνδρα παρεῖναι.
Odyssey 1.130	τὸν μὲν ἐγὼν ἐσάωσα περὶ τρόπιος βεβαῶτα
Odyssey 1.131	οἶον, ἐπεί οἱ νῆα θοὴν ἀργῆτι κεραυνῷ
Odyssey 1.132	Ζεὺς ἔλσας ἐκέασσε μέσῳ ἐνὶ οἴνοπι πόντῳ.
Odyssey 1.133	ἔνθʼ ἄλλοι μὲν πάντες ἀπέφθιθεν ἐσθλοὶ ἑταῖροι,
Odyssey 1.134	τὸν δʼ ἄρα δεῦρʼ ἄνεμός τε φέρων καὶ κῦμα πέλασσε.
Odyssey 1.135	τὸν μὲν ἐγὼ φίλεόν τε καὶ ἔτρεφον, ἠδὲ ἔφασκον
Odyssey 1.136	θήσειν ἀθάνατον καὶ ἀγήραον ἤματα πάντα.
Odyssey 1.137	ἀλλʼ ἐπεὶ οὔ πως ἔστι Διὸς νόον αἰγιόχοιο
Odyssey 1.138	οὔτε παρεξελθεῖν ἄλλον θεὸν οὔθʼ ἁλιῶσαι,
Odyssey 1.139	ἐρρέτω, εἴ μιν κεῖνος ἐποτρύνει καὶ ἀνώγει,
Odyssey 1.140	πόντον ἐπʼ ἀτρύγετον· πέμψω δέ μιν οὔ πῃ ἐγώ γε·
Odyssey 1.141	οὐ γάρ μοι πάρα νῆες ἐπήρετμοι καὶ ἑταῖροι,
Odyssey 1.142	οἵ κέν μιν πέμποιεν ἐπʼ εὐρέα νῶτα θαλάσσης.
Odyssey 1.143	αὐτάρ οἱ πρόφρων ὑποθήσομαι, οὐδʼ ἐπικεύσω,
Odyssey 1.144	ὥς κε μάλʼ ἀσκηθὴς ἣν πατρίδα γαῖαν ἵκηται.
Odyssey 1.145	τὴν δʼ αὖτε προσέειπε διάκτορος ἀργεϊφόντης·
Odyssey 1.146	οὕτω νῦν ἀπόπεμπε, Διὸς δʼ ἐποπίζεο μῆνιν,
Odyssey 1.147	μή πώς τοι μετόπισθε κοτεσσάμενος χαλεπήνῃ.
Odyssey 1.148	ὣς ἄρα φωνήσας ἀπέβη κρατὺς ἀργεϊφόντης·
Odyssey 1.149	ἡ δʼ ἐπʼ Ὀδυσσῆα μεγαλήτορα πότνια νύμφη
Odyssey 1.150	ἤιʼ, ἐπεὶ δὴ Ζηνὸς ἐπέκλυεν ἀγγελιάων.
Odyssey 1.151	τὸν δʼ ἄρʼ ἐπʼ ἀκτῆς εὗρε καθήμενον· οὐδέ ποτʼ ὄσσε
Odyssey 1.152	δακρυόφιν τέρσοντο, κατείβετο δὲ γλυκὺς αἰὼν
Odyssey 1.153	νόστον ὀδυρομένῳ, ἐπεὶ οὐκέτι ἥνδανε νύμφη.
Odyssey 1.154	ἀλλʼ ἦ τοι νύκτας μὲν ἰαύεσκεν καὶ ἀνάγκῃ
Odyssey 1.155	ἐν σπέσσι γλαφυροῖσι παρʼ οὐκ ἐθέλων ἐθελούσῃ·
Odyssey 1.156	ἤματα δʼ ἂμ πέτρῃσι καὶ ἠιόνεσσι καθίζων
Odyssey 1.157	δάκρυσι καὶ στοναχῇσι καὶ ἄλγεσι θυμὸν ἐρέχθων
Odyssey 1.158	πόντον ἐπʼ ἀτρύγετον δερκέσκετο δάκρυα λείβων.
Odyssey 1.159	ἀγχοῦ δʼ ἱσταμένη προσεφώνεε δῖα θεάων·
Odyssey 1.160	κάμμορε, μή μοι ἔτʼ ἐνθάδʼ ὀδύρεο, μηδέ τοι αἰὼν
Odyssey 1.161	φθινέτω· ἤδη γάρ σε μάλα πρόφρασσʼ ἀποπέμψω.
Odyssey 1.162	ἀλλʼ ἄγε δούρατα μακρὰ ταμὼν ἁρμόζεο χαλκῷ
Odyssey 1.163	εὐρεῖαν σχεδίην· ἀτὰρ ἴκρια πῆξαι ἐπʼ αὐτῆς
Odyssey 1.164	ὑψοῦ, ὥς σε φέρῃσιν ἐπʼ ἠεροειδέα πόντον.
Odyssey 1.165	αὐτὰρ ἐγὼ σῖτον καὶ ὕδωρ καὶ οἶνον ἐρυθρὸν
Odyssey 1.166	ἐνθήσω μενοεικέʼ, ἅ κέν τοι λιμὸν ἐρύκοι,
Odyssey 1.167	εἵματά τʼ ἀμφιέσω· πέμψω δέ τοι οὖρον ὄπισθεν,
Odyssey 1.168	ὥς κε μάλʼ ἀσκηθὴς σὴν πατρίδα γαῖαν ἵκηαι,
Odyssey 1.169	αἴ κε θεοί γʼ ἐθέλωσι, τοὶ οὐρανὸν εὐρὺν ἔχουσιν,
Odyssey 1.170	οἵ μευ φέρτεροί εἰσι νοῆσαί τε κρῆναί τε.
Odyssey 1.171	ὣς φάτο, ῥίγησεν δὲ πολύτλας δῖος Ὀδυσσεύς,
Odyssey 1.172	καί μιν φωνήσας ἔπεα πτερόεντα προσηύδα·
Odyssey 1.173	ἄλλο τι δὴ σύ, θεά, τόδε μήδεαι, οὐδέ τι πομπήν,
Odyssey 1.174	ἥ με κέλεαι σχεδίῃ περάαν μέγα λαῖτμα θαλάσσης,
Odyssey 1.175	δεινόν τʼ ἀργαλέον τε· τὸ δʼ οὐδʼ ἐπὶ νῆες ἐῖσαι
Odyssey 1.176	ὠκύποροι περόωσιν, ἀγαλλόμεναι Διὸς οὔρῳ.
Odyssey 1.177	οὐδʼ ἂν ἐγὼν ἀέκητι σέθεν σχεδίης ἐπιβαίην,
Odyssey 1.178	εἰ μή μοι τλαίης γε, θεά, μέγαν ὅρκον ὀμόσσαι
Odyssey 1.179	μή τί μοι αὐτῷ πῆμα κακὸν βουλευσέμεν ἄλλο.
Odyssey 1.180	ὣς φάτο, μείδησεν δὲ Καλυψὼ δῖα θεάων,
Odyssey 1.181	χειρί τέ μιν κατέρεξεν ἔπος τʼ ἔφατʼ ἔκ τʼ ὀνόμαζεν·
Odyssey 1.182	ἦ δὴ ἀλιτρός γʼ ἐσσὶ καὶ οὐκ ἀποφώλια εἰδώς,
Odyssey 1.183	οἷον δὴ τὸν μῦθον ἐπεφράσθης ἀγορεῦσαι.
Odyssey 1.184	ἴστω νῦν τόδε γαῖα καὶ οὐρανὸς εὐρὺς ὕπερθε
Odyssey 1.185	καὶ τὸ κατειβόμενον Στυγὸς ὕδωρ, ὅς τε μέγιστος
Odyssey 1.186	ὅρκος δεινότατός τε πέλει μακάρεσσι θεοῖσι,
Odyssey 1.187	μή τί τοι αὐτῷ πῆμα κακὸν βουλευσέμεν ἄλλο.
Odyssey 1.188	ἀλλὰ τὰ μὲν νοέω καὶ φράσσομαι, ἅσσʼ ἂν ἐμοί περ
Odyssey 1.189	αὐτῇ μηδοίμην, ὅτε με χρειὼ τόσον ἵκοι·
Odyssey 1.190	καὶ γὰρ ἐμοὶ νόος ἐστὶν ἐναίσιμος, οὐδέ μοι αὐτῇ
Odyssey 1.191	θυμὸς ἐνὶ στήθεσσι σιδήρεος, ἀλλʼ ἐλεήμων.
Odyssey 1.192	ὣς ἄρα φωνήσασʼ ἡγήσατο δῖα θεάων
Odyssey 1.193	καρπαλίμως· ὁ δʼ ἔπειτα μετʼ ἴχνια βαῖνε θεοῖο.
Odyssey 1.194	ἷξον δὲ σπεῖος γλαφυρὸν θεὸς ἠδὲ καὶ ἀνήρ,
Odyssey 1.195	καί ῥʼ ὁ μὲν ἔνθα καθέζετʼ ἐπὶ θρόνου ἔνθεν ἀνέστη
Odyssey 1.196	Ἑρμείας, νύμφη δʼ ἐτίθει πάρα πᾶσαν ἐδωδήν,
Odyssey 1.197	ἔσθειν καὶ πίνειν, οἷα βροτοὶ ἄνδρες ἔδουσιν·
Odyssey 1.198	αὐτὴ δʼ ἀντίον ἷζεν Ὀδυσσῆος θείοιο,
Odyssey 1.199	τῇ δὲ παρʼ ἀμβροσίην δμῳαὶ καὶ νέκταρ ἔθηκαν.
Odyssey 1.200	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.201	αὐτὰρ ἐπεὶ τάρπησαν ἐδητύος ἠδὲ ποτῆτος,
Odyssey 1.202	τοῖς ἄρα μύθων ἦρχε Καλυψώ, δῖα θεάων·
Odyssey 1.203	διογενὲς Λαερτιάδη, πολυμήχανʼ Ὀδυσσεῦ,
Odyssey 1.204	οὕτω δὴ οἶκόνδε φίλην ἐς πατρίδα γαῖαν
Odyssey 1.205	αὐτίκα νῦν ἐθέλεις ἰέναι; σὺ δὲ χαῖρε καὶ ἔμπης.
Odyssey 1.206	εἴ γε μὲν εἰδείης σῇσι φρεσὶν ὅσσα τοι αἶσα
Odyssey 1.207	κήδεʼ ἀναπλῆσαι, πρὶν πατρίδα γαῖαν ἱκέσθαι,
Odyssey 1.208	ἐνθάδε κʼ αὖθι μένων σὺν ἐμοὶ τόδε δῶμα φυλάσσοις
Odyssey 1.209	ἀθάνατός τʼ εἴης, ἱμειρόμενός περ ἰδέσθαι
Odyssey 1.210	σὴν ἄλοχον, τῆς τʼ αἰὲν ἐέλδεαι ἤματα πάντα.
Odyssey 1.211	οὐ μέν θην κείνης γε χερείων εὔχομαι εἶναι,
Odyssey 1.212	οὐ δέμας οὐδὲ φυήν, ἐπεὶ οὔ πως οὐδὲ ἔοικεν
Odyssey 1.213	θνητὰς ἀθανάτῃσι δέμας καὶ εἶδος ἐρίζειν.
Odyssey 1.214	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.215	πότνα θεά, μή μοι τόδε χώεο· οἶδα καὶ αὐτὸς
Odyssey 1.216	πάντα μάλʼ, οὕνεκα σεῖο περίφρων Πηνελόπεια
Odyssey 1.217	εἶδος ἀκιδνοτέρη μέγεθός τʼ εἰσάντα ἰδέσθαι·
Odyssey 1.218	ἡ μὲν γὰρ βροτός ἐστι, σὺ δʼ ἀθάνατος καὶ ἀγήρως.
Odyssey 1.219	ἀλλὰ καὶ ὣς ἐθέλω καὶ ἐέλδομαι ἤματα πάντα
Odyssey 1.220	οἴκαδέ τʼ ἐλθέμεναι καὶ νόστιμον ἦμαρ ἰδέσθαι.
Odyssey 1.221	εἰ δʼ αὖ τις ῥαίῃσι θεῶν ἐνὶ οἴνοπι πόντῳ,
Odyssey 1.222	τλήσομαι ἐν στήθεσσιν ἔχων ταλαπενθέα θυμόν·
Odyssey 1.223	ἤδη γὰρ μάλα πολλὰ πάθον καὶ πολλὰ μόγησα
Odyssey 1.224	κύμασι καὶ πολέμῳ· μετὰ καὶ τόδε τοῖσι γενέσθω.
Odyssey 1.225	ὣς ἔφατʼ, ἠέλιος δʼ ἄρʼ ἔδυ καὶ ἐπὶ κνέφας ἦλθεν·
Odyssey 1.226	ἐλθόντες δʼ ἄρα τώ γε μυχῷ σπείους γλαφυροῖο
Odyssey 1.227	τερπέσθην φιλότητι, παρʼ ἀλλήλοισι μένοντες.
Odyssey 1.228	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.229	αὐτίχʼ ὁ μὲν χλαῖνάν τε χιτῶνά τε ἕννυτʼ Ὀδυσσεύς,
Odyssey 1.230	αὐτὴ δʼ ἀργύφεον φᾶρος μέγα ἕννυτο νύμφη,
Odyssey 1.231	λεπτὸν καὶ χαρίεν, περὶ δὲ ζώνην βάλετʼ ἰξυῖ
Odyssey 1.232	καλὴν χρυσείην, κεφαλῇ δʼ ἐφύπερθε καλύπτρην.
Odyssey 1.233	καὶ τότʼ Ὀδυσσῆι μεγαλήτορι μήδετο πομπήν·
Odyssey 1.234	δῶκέν οἱ πέλεκυν μέγαν, ἄρμενον ἐν παλάμῃσι,
Odyssey 1.235	χάλκεον, ἀμφοτέρωθεν ἀκαχμένον· αὐτὰρ ἐν αὐτῷ
Odyssey 1.236	στειλειὸν περικαλλὲς ἐλάινον, εὖ ἐναρηρός·
Odyssey 1.237	δῶκε δʼ ἔπειτα σκέπαρνον ἐύξοον· ἦρχε δʼ ὁδοῖο
Odyssey 1.238	νήσου ἐπʼ ἐσχατιῆς, ὅθι δένδρεα μακρὰ πεφύκει,
Odyssey 1.239	κλήθρη τʼ αἴγειρός τʼ, ἐλάτη τʼ ἦν οὐρανομήκης,
Odyssey 1.240	αὖα πάλαι, περίκηλα, τά οἱ πλώοιεν ἐλαφρῶς.
Odyssey 1.241	αὐτὰρ ἐπεὶ δὴ δεῖξʼ, ὅθι δένδρεα μακρὰ πεφύκει,
Odyssey 1.242	ἡ μὲν ἔβη πρὸς δῶμα Καλυψώ, δῖα θεάων,
Odyssey 1.243	αὐτὰρ ὁ τάμνετο δοῦρα· θοῶς δέ οἱ ἤνυτο ἔργον.
Odyssey 1.244	εἴκοσι δʼ ἔκβαλε πάντα, πελέκκησεν δʼ ἄρα χαλκῷ,
Odyssey 1.245	ξέσσε δʼ ἐπισταμένως καὶ ἐπὶ στάθμην ἴθυνεν.
Odyssey 1.246	τόφρα δʼ ἔνεικε τέρετρα Καλυψώ, δῖα θεάων·
Odyssey 1.247	τέτρηνεν δʼ ἄρα πάντα καὶ ἥρμοσεν ἀλλήλοισιν,
Odyssey 1.248	γόμφοισιν δʼ ἄρα τήν γε καὶ ἁρμονίῃσιν ἄρασσεν.
Odyssey 1.249	ὅσσον τίς τʼ ἔδαφος νηὸς τορνώσεται ἀνὴρ
Odyssey 1.250	φορτίδος εὐρείης, ἐὺ εἰδὼς τεκτοσυνάων,
Odyssey 1.251	τόσσον ἔπʼ εὐρεῖαν σχεδίην ποιήσατʼ Ὀδυσσεύς.
Odyssey 1.252	ἴκρια δὲ στήσας, ἀραρὼν θαμέσι σταμίνεσσι,
Odyssey 1.253	ποίει· ἀτὰρ μακρῇσιν ἐπηγκενίδεσσι τελεύτα.
Odyssey 1.254	ἐν δʼ ἱστὸν ποίει καὶ ἐπίκριον ἄρμενον αὐτῷ·
Odyssey 1.255	πρὸς δʼ ἄρα πηδάλιον ποιήσατο, ὄφρʼ ἰθύνοι.
Odyssey 1.256	φράξε δέ μιν ῥίπεσσι διαμπερὲς οἰσυΐνῃσι
Odyssey 1.257	κύματος εἶλαρ ἔμεν· πολλὴν δʼ ἐπεχεύατο ὕλην.
Odyssey 1.258	τόφρα δὲ φάρεʼ ἔνεικε Καλυψώ, δῖα θεάων,
Odyssey 1.259	ἱστία ποιήσασθαι· ὁ δʼ εὖ τεχνήσατο καὶ τά.
Odyssey 1.260	ἐν δʼ ὑπέρας τε κάλους τε πόδας τʼ ἐνέδησεν ἐν αὐτῇ,
Odyssey 1.261	μοχλοῖσιν δʼ ἄρα τήν γε κατείρυσεν εἰς ἅλα δῖαν.
Odyssey 1.262	τέτρατον ἦμαρ ἔην, καὶ τῷ τετέλεστο ἅπαντα·
Odyssey 1.263	τῷ δʼ ἄρα πέμπτῳ πέμπʼ ἀπὸ νήσου δῖα Καλυψώ,
Odyssey 1.264	εἵματά τʼ ἀμφιέσασα θυώδεα καὶ λούσασα.
Odyssey 1.265	ἐν δέ οἱ ἀσκὸν ἔθηκε θεὰ μέλανος οἴνοιο
Odyssey 1.266	τὸν ἕτερον, ἕτερον δʼ ὕδατος μέγαν, ἐν δὲ καὶ ᾖα
Odyssey 1.267	κωρύκῳ· ἐν δέ οἱ ὄψα τίθει μενοεικέα πολλά·
Odyssey 1.268	οὖρον δὲ προέηκεν ἀπήμονά τε λιαρόν τε.
Odyssey 1.269	γηθόσυνος δʼ οὔρῳ πέτασʼ ἱστία δῖος Ὀδυσσεύς.
Odyssey 1.270	αὐτὰρ ὁ πηδαλίῳ ἰθύνετο τεχνηέντως
Odyssey 1.271	ἥμενος, οὐδέ οἱ ὕπνος ἐπὶ βλεφάροισιν ἔπιπτεν
Odyssey 1.272	Πληιάδας τʼ ἐσορῶντι καὶ ὀψὲ δύοντα Βοώτην
Odyssey 1.273	Ἄρκτον θʼ, ἣν καὶ ἄμαξαν ἐπίκλησιν καλέουσιν,
Odyssey 1.274	ἥ τʼ αὐτοῦ στρέφεται καί τʼ Ὠρίωνα δοκεύει,
Odyssey 1.275	οἴη δʼ ἄμμορός ἐστι λοετρῶν Ὠκεανοῖο·
Odyssey 1.276	τὴν γὰρ δή μιν ἄνωγε Καλυψώ, δῖα θεάων,
Odyssey 1.277	ποντοπορευέμεναι ἐπʼ ἀριστερὰ χειρὸς ἔχοντα.
Odyssey 1.278	ἑπτὰ δὲ καὶ δέκα μὲν πλέεν ἤματα ποντοπορεύων,
Odyssey 1.279	ὀκτωκαιδεκάτῃ δʼ ἐφάνη ὄρεα σκιόεντα
Odyssey 1.280	γαίης Φαιήκων, ὅθι τʼ ἄγχιστον πέλεν αὐτῷ·
Odyssey 1.281	εἴσατο δʼ ὡς ὅτε ῥινὸν ἐν ἠεροειδέι πόντῳ.
Odyssey 1.282	τὸν δʼ ἐξ Αἰθιόπων ἀνιὼν κρείων ἐνοσίχθων
Odyssey 1.283	τηλόθεν ἐκ Σολύμων ὀρέων ἴδεν· εἴσατο γάρ οἱ
Odyssey 1.284	πόντον ἐπιπλώων. ὁ δʼ ἐχώσατο κηρόθι μᾶλλον,
Odyssey 1.285	κινήσας δὲ κάρη προτὶ ὃν μυθήσατο θυμόν·
Odyssey 1.286	ὢ πόποι, ἦ μάλα δὴ μετεβούλευσαν θεοὶ ἄλλως
Odyssey 1.287	ἀμφʼ Ὀδυσῆι ἐμεῖο μετʼ Αἰθιόπεσσιν ἐόντος,
Odyssey 1.288	καὶ δὴ Φαιήκων γαίης σχεδόν, ἔνθα οἱ αἶσα
Odyssey 1.289	ἐκφυγέειν μέγα πεῖραρ ὀιζύος, ἥ μιν ἱκάνει.
Odyssey 1.290	ἀλλʼ ἔτι μέν μίν φημι ἅδην ἐλάαν κακότητος.
Odyssey 1.291	ὣς εἰπὼν σύναγεν νεφέλας, ἐτάραξε δὲ πόντον
Odyssey 1.292	χερσὶ τρίαιναν ἑλών· πάσας δʼ ὀρόθυνεν ἀέλλας
Odyssey 1.293	παντοίων ἀνέμων, σὺν δὲ νεφέεσσι κάλυψε
Odyssey 1.294	γαῖαν ὁμοῦ καὶ πόντον· ὀρώρει δʼ οὐρανόθεν νύξ.
Odyssey 1.295	σὺν δʼ Εὖρός τε Νότος τʼ ἔπεσον Ζέφυρός τε δυσαὴς
Odyssey 1.296	καὶ Βορέης αἰθρηγενέτης, μέγα κῦμα κυλίνδων.
Odyssey 1.297	καὶ τότʼ Ὀδυσσῆος λύτο γούνατα καὶ φίλον ἦτορ,
Odyssey 1.298	ὀχθήσας δʼ ἄρα εἶπε πρὸς ὃν μεγαλήτορα θυμόν·
Odyssey 1.299	ὤ μοι ἐγὼ δειλός, τί νύ μοι μήκιστα γένηται;
Odyssey 1.300	δείδω μὴ δὴ πάντα θεὰ νημερτέα εἶπεν,
Odyssey 1.301	ἥ μʼ ἔφατʼ ἐν πόντῳ, πρὶν πατρίδα γαῖαν ἱκέσθαι,
Odyssey 1.302	ἄλγεʼ ἀναπλήσειν· τὰ δὲ δὴ νῦν πάντα τελεῖται.
Odyssey 1.303	οἵοισιν νεφέεσσι περιστέφει οὐρανὸν εὐρὺν
Odyssey 1.304	Ζεύς, ἐτάραξε δὲ πόντον, ἐπισπέρχουσι δʼ ἄελλαι
Odyssey 1.305	παντοίων ἀνέμων. νῦν μοι σῶς αἰπὺς ὄλεθρος.
Odyssey 1.306	τρὶς μάκαρες Δαναοὶ καὶ τετράκις, οἳ τότʼ ὄλοντο
Odyssey 1.307	Τροίῃ ἐν εὐρείῃ χάριν Ἀτρεΐδῃσι φέροντες.
Odyssey 1.308	ὡς δὴ ἐγώ γʼ ὄφελον θανέειν καὶ πότμον ἐπισπεῖν
Odyssey 1.309	ἤματι τῷ ὅτε μοι πλεῖστοι χαλκήρεα δοῦρα
Odyssey 1.310	Τρῶες ἐπέρριψαν περὶ Πηλεΐωνι θανόντι.
Odyssey 1.311	τῷ κʼ ἔλαχον κτερέων, καί μευ κλέος ἦγον Ἀχαιοί·
Odyssey 1.312	νῦν δέ με λευγαλέῳ θανάτῳ εἵμαρτο ἁλῶναι.
Odyssey 1.313	ὣς ἄρα μιν εἰπόντʼ ἔλασεν μέγα κῦμα κατʼ ἄκρης
Odyssey 1.314	δεινὸν ἐπεσσύμενον, περὶ δὲ σχεδίην ἐλέλιξε.
Odyssey 1.315	τῆλε δʼ ἀπὸ σχεδίης αὐτὸς πέσε, πηδάλιον δὲ
Odyssey 1.316	ἐκ χειρῶν προέηκε· μέσον δέ οἱ ἱστὸν ἔαξεν
Odyssey 1.317	δεινὴ μισγομένων ἀνέμων ἐλθοῦσα θύελλα,
Odyssey 1.318	τηλοῦ δὲ σπεῖρον καὶ ἐπίκριον ἔμπεσε πόντῳ.
Odyssey 1.319	τὸν δʼ ἄρʼ ὑπόβρυχα θῆκε πολὺν χρόνον, οὐδʼ ἐδυνάσθη
Odyssey 1.320	αἶψα μάλʼ ἀνσχεθέειν μεγάλου ὑπὸ κύματος ὁρμῆς·
Odyssey 1.321	εἵματα γάρ ῥʼ ἐβάρυνε, τά οἱ πόρε δῖα Καλυψώ.
Odyssey 1.322	ὀψὲ δὲ δή ῥʼ ἀνέδυ, στόματος δʼ ἐξέπτυσεν ἅλμην
Odyssey 1.323	πικρήν, ἥ οἱ πολλὴ ἀπὸ κρατὸς κελάρυζεν.
Odyssey 1.324	ἀλλʼ οὐδʼ ὣς σχεδίης ἐπελήθετο, τειρόμενός περ,
Odyssey 1.325	ἀλλὰ μεθορμηθεὶς ἐνὶ κύμασιν ἐλλάβετʼ αὐτῆς,
Odyssey 1.326	ἐν μέσσῃ δὲ καθῖζε τέλος θανάτου ἀλεείνων.
Odyssey 1.327	τὴν δʼ ἐφόρει μέγα κῦμα κατὰ ῥόον ἔνθα καὶ ἔνθα.
Odyssey 1.328	ὡς δʼ ὅτʼ ὀπωρινὸς Βορέης φορέῃσιν ἀκάνθας
Odyssey 1.329	ἂμ πεδίον, πυκιναὶ δὲ πρὸς ἀλλήλῃσιν ἔχονται,
Odyssey 1.330	ὣς τὴν ἂμ πέλαγος ἄνεμοι φέρον ἔνθα καὶ ἔνθα·
Odyssey 1.331	ἄλλοτε μέν τε Νότος Βορέῃ προβάλεσκε φέρεσθαι,
Odyssey 1.332	ἄλλοτε δʼ αὖτʼ Εὖρος Ζεφύρῳ εἴξασκε διώκειν.
Odyssey 1.333	τὸν δὲ ἴδεν Κάδμου θυγάτηρ, καλλίσφυρος Ἰνώ,
Odyssey 1.334	Λευκοθέη, ἣ πρὶν μὲν ἔην βροτὸς αὐδήεσσα,
Odyssey 1.335	νῦν δʼ ἁλὸς ἐν πελάγεσσι θεῶν ἒξ ἔμμορε τιμῆς.
Odyssey 1.336	ἥ ῥʼ Ὀδυσῆʼ ἐλέησεν ἀλώμενον, ἄλγεʼ ἔχοντα,
Odyssey 1.337	αἰθυίῃ δʼ ἐικυῖα ποτῇ ἀνεδύσετο λίμνης,
Odyssey 1.338	ἷζε δʼ ἐπὶ σχεδίης πολυδέσμου εἶπέ τε μῦθον·
Odyssey 1.339	κάμμορε, τίπτε τοι ὧδε Ποσειδάων ἐνοσίχθων
Odyssey 1.340	ὠδύσατʼ ἐκπάγλως, ὅτι τοι κακὰ πολλὰ φυτεύει;
Odyssey 1.341	οὐ μὲν δή σε καταφθίσει μάλα περ μενεαίνων.
Odyssey 1.342	ἀλλὰ μάλʼ ὧδʼ ἔρξαι, δοκέεις δέ μοι οὐκ ἀπινύσσειν·
Odyssey 1.343	εἵματα ταῦτʼ ἀποδὺς σχεδίην ἀνέμοισι φέρεσθαι
Odyssey 1.344	κάλλιπʼ, ἀτὰρ χείρεσσι νέων ἐπιμαίεο νόστου
Odyssey 1.345	γαίης Φαιήκων, ὅθι τοι μοῖρʼ ἐστὶν ἀλύξαι.
Odyssey 1.346	τῆ δέ, τόδε κρήδεμνον ὑπὸ στέρνοιο τανύσσαι
Odyssey 1.347	ἄμβροτον· οὐδέ τί τοι παθέειν δέος οὐδʼ ἀπολέσθαι.
Odyssey 1.348	αὐτὰρ ἐπὴν χείρεσσιν ἐφάψεαι ἠπείροιο,
Odyssey 1.349	ἂψ ἀπολυσάμενος βαλέειν εἰς οἴνοπα πόντον
Odyssey 1.350	πολλὸν ἀπʼ ἠπείρου, αὐτὸς δʼ ἀπονόσφι τραπέσθαι.
Odyssey 1.351	ὣς ἄρα φωνήσασα θεὰ κρήδεμνον ἔδωκεν,
Odyssey 1.352	αὐτὴ δʼ ἂψ ἐς πόντον ἐδύσετο κυμαίνοντα
Odyssey 1.353	αἰθυίῃ ἐικυῖα· μέλαν δέ ἑ κῦμα κάλυψεν.
Odyssey 1.354	αὐτὰρ ὁ μερμήριξε πολύτλας δῖος Ὀδυσσεύς,
Odyssey 1.355	ὀχθήσας δʼ ἄρα εἶπε πρὸς ὃν μεγαλήτορα θυμόν·
Odyssey 1.356	ὤ μοι ἐγώ, μή τίς μοι ὑφαίνῃσιν δόλον αὖτε
Odyssey 1.357	ἀθανάτων, ὅ τέ με σχεδίης ἀποβῆναι ἀνώγει.
Odyssey 1.358	ἀλλὰ μάλʼ οὔ πω πείσομʼ, ἐπεὶ ἑκὰς ὀφθαλμοῖσιν
Odyssey 1.359	γαῖαν ἐγὼν ἰδόμην, ὅθι μοι φάτο φύξιμον εἶναι.
Odyssey 1.360	ἀλλὰ μάλʼ ὧδʼ ἔρξω, δοκέει δέ μοι εἶναι ἄριστον·
Odyssey 1.361	ὄφρʼ ἂν μέν κεν δούρατʼ ἐν ἁρμονίῃσιν ἀρήρῃ,
Odyssey 1.362	τόφρʼ αὐτοῦ μενέω καὶ τλήσομαι ἄλγεα πάσχων·
Odyssey 1.363	αὐτὰρ ἐπὴν δή μοι σχεδίην διὰ κῦμα τινάξῃ,
Odyssey 1.364	νήξομʼ, ἐπεὶ οὐ μέν τι πάρα προνοῆσαι ἄμεινον.
Odyssey 1.365	ἧος ὁ ταῦθʼ ὥρμαινε κατὰ φρένα καὶ κατὰ θυμόν,
Odyssey 1.366	ὦρσε δʼ ἐπὶ μέγα κῦμα Ποσειδάων ἐνοσίχθων,
Odyssey 1.367	δεινόν τʼ ἀργαλέον τε, κατηρεφές, ἤλασε δʼ αὐτόν.
Odyssey 1.368	ὡς δʼ ἄνεμος ζαὴς ἠΐων θημῶνα τινάξῃ
Odyssey 1.369	καρφαλέων· τὰ μὲν ἄρ τε διεσκέδασʼ ἄλλυδις ἄλλῃ·
Odyssey 1.370	ὣς τῆς δούρατα μακρὰ διεσκέδασʼ. αὐτὰρ Ὀδυσσεὺς
Odyssey 1.371	ἀμφʼ ἑνὶ δούρατι βαῖνε, κέληθʼ ὡς ἵππον ἐλαύνων,
Odyssey 1.372	εἵματα δʼ ἐξαπέδυνε, τά οἱ πόρε δῖα Καλυψώ.
Odyssey 1.373	αὐτίκα δὲ κρήδεμνον ὑπὸ στέρνοιο τάνυσσεν,
Odyssey 1.374	αὐτὸς δὲ πρηνὴς ἁλὶ κάππεσε, χεῖρε πετάσσας,
Odyssey 1.375	νηχέμεναι μεμαώς. ἴδε δὲ κρείων ἐνοσίχθων,
Odyssey 1.376	κινήσας δὲ κάρη προτὶ ὃν μυθήσατο θυμόν·
Odyssey 1.377	οὕτω νῦν κακὰ πολλὰ παθὼν ἀλόω κατὰ πόντον,
Odyssey 1.378	εἰς ὅ κεν ἀνθρώποισι διοτρεφέεσσι μιγήῃς.
Odyssey 1.379	ἀλλʼ οὐδʼ ὥς σε ἔολπα ὀνόσσεσθαι κακότητος.
Odyssey 1.380	ὣς ἄρα φωνήσας ἵμασεν καλλίτριχας ἵππους,
Odyssey 1.381	ἵκετο δʼ εἰς Αἰγάς, ὅθι οἱ κλυτὰ δώματʼ ἔασιν.
Odyssey 1.382	αὐτὰρ Ἀθηναίη κούρη Διὸς ἄλλʼ ἐνόησεν.
Odyssey 1.383	ἦ τοι τῶν ἄλλων ἀνέμων κατέδησε κελεύθους,
Odyssey 1.384	παύσασθαι δʼ ἐκέλευσε καὶ εὐνηθῆναι ἅπαντας·
Odyssey 1.385	ὦρσε δʼ ἐπὶ κραιπνὸν Βορέην, πρὸ δὲ κύματʼ ἔαξεν,
Odyssey 1.386	ἧος ὃ Φαιήκεσσι φιληρέτμοισι μιγείη
Odyssey 1.387	διογενὴς Ὀδυσεὺς θάνατον καὶ κῆρας ἀλύξας.
Odyssey 1.388	ἔνθα δύω νύκτας δύο τʼ ἤματα κύματι πηγῷ
Odyssey 1.389	πλάζετο, πολλὰ δέ οἱ κραδίη προτιόσσετʼ ὄλεθρον.
Odyssey 1.390	ἀλλʼ ὅτε δὴ τρίτον ἦμαρ ἐυπλόκαμος τέλεσʼ Ἠώς,
Odyssey 1.391	καὶ τότʼ ἔπειτʼ ἄνεμος μὲν ἐπαύσατο ἠδὲ γαλήνη
Odyssey 1.392	ἔπλετο νηνεμίη· ὁ δʼ ἄρα σχεδὸν εἴσιδε γαῖαν
Odyssey 1.393	ὀξὺ μάλα προϊδών, μεγάλου ὑπὸ κύματος ἀρθείς.
Odyssey 1.394	ὡς δʼ ὅτʼ ἂν ἀσπάσιος βίοτος παίδεσσι φανήῃ
Odyssey 1.395	πατρός, ὃς ἐν νούσῳ κεῖται κρατέρʼ ἄλγεα πάσχων,
Odyssey 1.396	δηρὸν τηκόμενος, στυγερὸς δέ οἱ ἔχραε δαίμων,
Odyssey 1.397	ἀσπάσιον δʼ ἄρα τόν γε θεοὶ κακότητος ἔλυσαν,
Odyssey 1.398	ὣς Ὀδυσεῖ ἀσπαστὸν ἐείσατο γαῖα καὶ ὕλη,
Odyssey 1.399	νῆχε δʼ ἐπειγόμενος ποσὶν ἠπείρου ἐπιβῆναι.
Odyssey 1.400	ἀλλʼ ὅτε τόσσον ἀπῆν ὅσσον τε γέγωνε βοήσας,
Odyssey 1.401	καὶ δὴ δοῦπον ἄκουσε ποτὶ σπιλάδεσσι θαλάσσης·
Odyssey 1.402	ῥόχθει γὰρ μέγα κῦμα ποτὶ ξερὸν ἠπείροιο
Odyssey 1.403	δεινὸν ἐρευγόμενον, εἴλυτο δὲ πάνθʼ ἁλὸς ἄχνῃ·
Odyssey 1.404	οὐ γὰρ ἔσαν λιμένες νηῶν ὄχοι, οὐδʼ ἐπιωγαί.
Odyssey 1.405	ἀλλʼ ἀκταὶ προβλῆτες ἔσαν σπιλάδες τε πάγοι τε·
Odyssey 1.406	καὶ τότʼ Ὀδυσσῆος λύτο γούνατα καὶ φίλον ἦτορ,
Odyssey 1.407	ὀχθήσας δʼ ἄρα εἶπε πρὸς ὃν μεγαλήτορα θυμόν·
Odyssey 1.408	ὤ μοι, ἐπεὶ δὴ γαῖαν ἀελπέα δῶκεν ἰδέσθαι
Odyssey 1.409	Ζεύς, καὶ δὴ τόδε λαῖτμα διατμήξας ἐπέρησα,
Odyssey 1.410	ἔκβασις οὔ πῃ φαίνεθʼ ἁλὸς πολιοῖο θύραζε·
Odyssey 1.411	ἔκτοσθεν μὲν γὰρ πάγοι ὀξέες, ἀμφὶ δὲ κῦμα
Odyssey 1.412	βέβρυχεν ῥόθιον, λισσὴ δʼ ἀναδέδρομε πέτρη,
Odyssey 1.413	ἀγχιβαθὴς δὲ θάλασσα, καὶ οὔ πως ἔστι πόδεσσι
Odyssey 1.414	στήμεναι ἀμφοτέροισι καὶ ἐκφυγέειν κακότητα·
Odyssey 1.415	μή πώς μʼ ἐκβαίνοντα βάλῃ λίθακι ποτὶ πέτρῃ
Odyssey 1.416	κῦμα μέγʼ ἁρπάξαν· μελέη δέ μοι ἔσσεται ὁρμή.
Odyssey 1.417	εἰ δέ κʼ ἔτι προτέρω παρανήξομαι, ἤν που ἐφεύρω
Odyssey 1.418	ἠιόνας τε παραπλῆγας λιμένας τε θαλάσσης,
Odyssey 1.419	δείδω μή μʼ ἐξαῦτις ἀναρπάξασα θύελλα
Odyssey 1.420	πόντον ἐπʼ ἰχθυόεντα φέρῃ βαρέα στενάχοντα,
Odyssey 1.421	ἠέ τί μοι καὶ κῆτος ἐπισσεύῃ μέγα δαίμων
Odyssey 1.422	ἐξ ἁλός, οἷά τε πολλὰ τρέφει κλυτὸς Ἀμφιτρίτη·
Odyssey 1.423	οἶδα γάρ, ὥς μοι ὀδώδυσται κλυτὸς ἐννοσίγαιος.
Odyssey 1.424	ἧος ὁ ταῦθʼ ὥρμαινε κατὰ φρένα καὶ κατὰ θυμόν,
Odyssey 1.425	τόφρα δέ μιν μέγα κῦμα φέρε τρηχεῖαν ἐπʼ ἀκτήν.
Odyssey 1.426	ἔνθα κʼ ἀπὸ ῥινοὺς δρύφθη, σὺν δʼ ὀστέʼ ἀράχθη,
Odyssey 1.427	εἰ μὴ ἐπὶ φρεσὶ θῆκε θεά, γλαυκῶπις Ἀθήνη·
Odyssey 1.428	ἀμφοτέρῃσι δὲ χερσὶν ἐπεσσύμενος λάβε πέτρης,
Odyssey 1.429	τῆς ἔχετο στενάχων, ἧος μέγα κῦμα παρῆλθε.
Odyssey 1.430	καὶ τὸ μὲν ὣς ὑπάλυξε, παλιρρόθιον δέ μιν αὖτις
Odyssey 1.431	πλῆξεν ἐπεσσύμενον, τηλοῦ δέ μιν ἔμβαλε πόντῳ.
Odyssey 1.432	ὡς δʼ ὅτε πουλύποδος θαλάμης ἐξελκομένοιο
Odyssey 1.433	πρὸς κοτυληδονόφιν πυκιναὶ λάιγγες ἔχονται,
Odyssey 1.434	ὣς τοῦ πρὸς πέτρῃσι θρασειάων ἀπὸ χειρῶν
Odyssey 1.435	ῥινοὶ ἀπέδρυφθεν· τὸν δὲ μέγα κῦμα κάλυψεν.
Odyssey 1.436	ἔνθα κε δὴ δύστηνος ὑπὲρ μόρον ὤλετʼ Ὀδυσσεύς,
Odyssey 1.437	εἰ μὴ ἐπιφροσύνην δῶκε γλαυκῶπις Ἀθήνη.
Odyssey 1.438	κύματος ἐξαναδύς, τά τʼ ἐρεύγεται ἤπειρόνδε,
Odyssey 1.439	νῆχε παρέξ, ἐς γαῖαν ὁρώμενος, εἴ που ἐφεύροι
Odyssey 1.440	ἠιόνας τε παραπλῆγας λιμένας τε θαλάσσης.
Odyssey 1.441	ἀλλʼ ὅτε δὴ ποταμοῖο κατὰ στόμα καλλιρόοιο
Odyssey 1.442	ἷξε νέων, τῇ δή οἱ ἐείσατο χῶρος ἄριστος,
Odyssey 1.443	λεῖος πετράων, καὶ ἐπὶ σκέπας ἦν ἀνέμοιο,
Odyssey 1.444	ἔγνω δὲ προρέοντα καὶ εὔξατο ὃν κατὰ θυμόν·
Odyssey 1.445	κλῦθι, ἄναξ, ὅτις ἐσσί· πολύλλιστον δέ σʼ ἱκάνω,
Odyssey 1.446	φεύγων ἐκ πόντοιο Ποσειδάωνος ἐνιπάς.
Odyssey 1.447	αἰδοῖος μέν τʼ ἐστὶ καὶ ἀθανάτοισι θεοῖσιν
Odyssey 1.448	ἀνδρῶν ὅς τις ἵκηται ἀλώμενος, ὡς καὶ ἐγὼ νῦν
Odyssey 1.449	σόν τε ῥόον σά τε γούναθʼ ἱκάνω πολλὰ μογήσας.
Odyssey 1.450	ἀλλʼ ἐλέαιρε, ἄναξ· ἱκέτης δέ τοι εὔχομαι εἶναι.
Odyssey 1.451	ὣς φάθʼ, ὁ δʼ αὐτίκα παῦσεν ἑὸν ῥόον, ἔσχε δὲ κῦμα,
Odyssey 1.452	πρόσθε δέ οἱ ποίησε γαλήνην, τὸν δʼ ἐσάωσεν
Odyssey 1.453	ἐς ποταμοῦ προχοάς. ὁ δʼ ἄρʼ ἄμφω γούνατʼ ἔκαμψε
Odyssey 1.454	χεῖράς τε στιβαράς. ἁλὶ γὰρ δέδμητο φίλον κῆρ.
Odyssey 1.455	ᾤδεε δὲ χρόα πάντα, θάλασσα δὲ κήκιε πολλὴ
Odyssey 1.456	ἂν στόμα τε ῥῖνάς θʼ· ὁ δʼ ἄρʼ ἄπνευστος καὶ ἄναυδος
Odyssey 1.457	κεῖτʼ ὀλιγηπελέων, κάματος δέ μιν αἰνὸς ἵκανεν.
Odyssey 1.458	ἀλλʼ ὅτε δή ῥʼ ἄμπνυτο καὶ ἐς φρένα θυμὸς ἀγέρθη,
Odyssey 1.459	καὶ τότε δὴ κρήδεμνον ἀπὸ ἕο λῦσε θεοῖο.
Odyssey 1.460	καὶ τὸ μὲν ἐς ποταμὸν ἁλιμυρήεντα μεθῆκεν,
Odyssey 1.461	ἂψ δʼ ἔφερεν μέγα κῦμα κατὰ ῥόον, αἶψα δʼ ἄρʼ Ἰνὼ
Odyssey 1.462	δέξατο χερσὶ φίλῃσιν· ὁ δʼ ἐκ ποταμοῖο λιασθεὶς
Odyssey 1.463	σχοίνῳ ὑπεκλίνθη, κύσε δὲ ζείδωρον ἄρουραν.
Odyssey 1.464	ὀχθήσας δʼ ἄρα εἶπε πρὸς ὃν μεγαλήτορα θυμόν·
Odyssey 1.465	ὤ μοι ἐγώ, τί πάθω; τί νύ μοι μήκιστα γένηται;
Odyssey 1.466	εἰ μέν κʼ ἐν ποταμῷ δυσκηδέα νύκτα φυλάσσω,
Odyssey 1.467	μή μʼ ἄμυδις στίβη τε κακὴ καὶ θῆλυς ἐέρση
Odyssey 1.468	ἐξ ὀλιγηπελίης δαμάσῃ κεκαφηότα θυμόν·
Odyssey 1.469	αὔρη δʼ ἐκ ποταμοῦ ψυχρὴ πνέει ἠῶθι πρό.
Odyssey 1.470	εἰ δέ κεν ἐς κλιτὺν ἀναβὰς καὶ δάσκιον ὕλην
Odyssey 1.471	θάμνοις ἐν πυκινοῖσι καταδράθω, εἴ με μεθείη
Odyssey 1.472	ῥῖγος καὶ κάματος, γλυκερὸς δέ μοι ὕπνος ἐπέλθῃ,
Odyssey 1.473	δείδω, μὴ θήρεσσιν ἕλωρ καὶ κύρμα γένωμαι.
Odyssey 1.474	ὣς ἄρα οἱ φρονέοντι δοάσσατο κέρδιον εἶναι·
Odyssey 1.475	βῆ ῥʼ ἴμεν εἰς ὕλην· τὴν δὲ σχεδὸν ὕδατος εὗρεν
Odyssey 1.476	ἐν περιφαινομένῳ· δοιοὺς δʼ ἄρʼ ὑπήλυθε θάμνους,
Odyssey 1.477	ἐξ ὁμόθεν πεφυῶτας· ὁ μὲν φυλίης, ὁ δʼ ἐλαίης.
Odyssey 1.478	τοὺς μὲν ἄρʼ οὔτʼ ἀνέμων διάη μένος ὑγρὸν ἀέντων,
Odyssey 1.479	οὔτε ποτʼ ἠέλιος φαέθων ἀκτῖσιν ἔβαλλεν,
Odyssey 1.480	οὔτʼ ὄμβρος περάασκε διαμπερές· ὣς ἄρα πυκνοὶ
Odyssey 1.481	ἀλλήλοισιν ἔφυν ἐπαμοιβαδίς· οὓς ὑπʼ Ὀδυσσεὺς
Odyssey 1.482	δύσετʼ. ἄφαρ δʼ εὐνὴν ἐπαμήσατο χερσὶ φίλῃσιν
Odyssey 1.483	εὐρεῖαν· φύλλων γὰρ ἔην χύσις ἤλιθα πολλή,
Odyssey 1.484	ὅσσον τʼ ἠὲ δύω ἠὲ τρεῖς ἄνδρας ἔρυσθαι
Odyssey 1.485	ὥρῃ χειμερίῃ, εἰ καὶ μάλα περ χαλεπαίνοι.
Odyssey 1.486	τὴν μὲν ἰδὼν γήθησε πολύτλας δῖος Ὀδυσσεύς,
Odyssey 1.487	ἐν δʼ ἄρα μέσσῃ λέκτο, χύσιν δʼ ἐπεχεύατο φύλλων.
Odyssey 1.488	ὡς δʼ ὅτε τις δαλὸν σποδιῇ ἐνέκρυψε μελαίνῃ
Odyssey 1.489	ἀγροῦ ἐπʼ ἐσχατιῆς, ᾧ μὴ πάρα γείτονες ἄλλοι,
Odyssey 1.490	σπέρμα πυρὸς σώζων, ἵνα μή ποθεν ἄλλοθεν αὔοι,
Odyssey 1.491	ὣς Ὀδυσεὺς φύλλοισι καλύψατο· τῷ δʼ ἄρʼ Ἀθήνη
Odyssey 1.492	ὕπνον ἐπʼ ὄμμασι χεῦʼ, ἵνα μιν παύσειε τάχιστα
Odyssey 1.493	δυσπονέος καμάτοιο φίλα βλέφαρʼ ἀμφικαλύψας.
Odyssey 1.1	ὣς ὁ μὲν ἔνθα καθεῦδε πολύτλας δῖος Ὀδυσσεὺς
Odyssey 1.2	ὕπνῳ καὶ καμάτῳ ἀρημένος· αὐτὰρ Ἀθήνη
Odyssey 1.3	βῆ ῥʼ ἐς Φαιήκων ἀνδρῶν δῆμόν τε πόλιν τε,
Odyssey 1.4	οἳ πρὶν μέν ποτʼ ἔναιον ἐν εὐρυχόρῳ Ὑπερείῃ,
Odyssey 1.5	ἀγχοῦ Κυκλώπων ἀνδρῶν ὑπερηνορεόντων,
Odyssey 1.6	οἵ σφεας σινέσκοντο, βίηφι δὲ φέρτεροι ἦσαν.
Odyssey 1.7	ἔνθεν ἀναστήσας ἄγε Ναυσίθοος θεοειδής,
Odyssey 1.8	εἷσεν δὲ Σχερίῃ, ἑκὰς ἀνδρῶν ἀλφηστάων,
Odyssey 1.9	ἀμφὶ δὲ τεῖχος ἔλασσε πόλει, καὶ ἐδείματο οἴκους,
Odyssey 1.10	καὶ νηοὺς ποίησε θεῶν, καὶ ἐδάσσατʼ ἀρούρας.
Odyssey 1.11	ἀλλʼ ὁ μὲν ἤδη κηρὶ δαμεὶς Ἄϊδόσδε βεβήκει,
Odyssey 1.12	Ἀλκίνοος δὲ τότʼ ἦρχε, θεῶν ἄπο μήδεα εἰδώς.
Odyssey 1.13	τοῦ μὲν ἔβη πρὸς δῶμα θεά, γλαυκῶπις Ἀθήνη,
Odyssey 1.14	νόστον Ὀδυσσῆι μεγαλήτορι μητιόωσα.
Odyssey 1.15	βῆ δʼ ἴμεν ἐς θάλαμον πολυδαίδαλον, ᾧ ἔνι κούρη
Odyssey 1.16	κοιμᾶτʼ ἀθανάτῃσι φυὴν καὶ εἶδος ὁμοίη,
Odyssey 1.17	Ναυσικάα, θυγάτηρ μεγαλήτορος Ἀλκινόοιο,
Odyssey 1.18	πὰρ δὲ δύʼ ἀμφίπολοι, Χαρίτων ἄπο κάλλος ἔχουσαι,
Odyssey 1.19	σταθμοῖιν ἑκάτερθε· θύραι δʼ ἐπέκειντο φαειναί.
Odyssey 1.20	ἡ δʼ ἀνέμου ὡς πνοιὴ ἐπέσσυτο δέμνια κούρης,
Odyssey 1.21	στῆ δʼ ἄρʼ ὑπὲρ κεφαλῆς, καί μιν πρὸς μῦθον ἔειπεν,
Odyssey 1.22	εἰδομένη κούρῃ ναυσικλειτοῖο Δύμαντος,
Odyssey 1.23	ἥ οἱ ὁμηλικίη μὲν ἔην, κεχάριστο δὲ θυμῷ.
Odyssey 1.24	τῇ μιν ἐεισαμένη προσέφη γλαυκῶπις Ἀθήνη·
Odyssey 1.25	Ναυσικάα, τί νύ σʼ ὧδε μεθήμονα γείνατο μήτηρ;
Odyssey 1.26	εἵματα μέν τοι κεῖται ἀκηδέα σιγαλόεντα,
Odyssey 1.27	σοὶ δὲ γάμος σχεδόν ἐστιν, ἵνα χρὴ καλὰ μὲν αὐτὴν
Odyssey 1.28	ἕννυσθαι, τὰ δὲ τοῖσι παρασχεῖν, οἵ κέ σʼ ἄγωνται.
Odyssey 1.29	ἐκ γάρ τοι τούτων φάτις ἀνθρώπους ἀναβαίνει
Odyssey 1.30	ἐσθλή, χαίρουσιν δὲ πατὴρ καὶ πότνια μήτηρ.
Odyssey 1.31	ἀλλʼ ἴομεν πλυνέουσαι ἅμʼ ἠοῖ φαινομένηφι·
Odyssey 1.32	καί τοι ἐγὼ συνέριθος ἅμʼ ἕψομαι, ὄφρα τάχιστα
Odyssey 1.33	ἐντύνεαι, ἐπεὶ οὔ τοι ἔτι δὴν παρθένος ἔσσεαι·
Odyssey 1.34	ἤδη γάρ σε μνῶνται ἀριστῆες κατὰ δῆμον
Odyssey 1.35	πάντων Φαιήκων, ὅθι τοι γένος ἐστὶ καὶ αὐτῇ.
Odyssey 1.36	ἀλλʼ ἄγʼ ἐπότρυνον πατέρα κλυτὸν ἠῶθι πρὸ
Odyssey 1.37	ἡμιόνους καὶ ἄμαξαν ἐφοπλίσαι, ἥ κεν ἄγῃσι
Odyssey 1.38	ζῶστρά τε καὶ πέπλους καὶ ῥήγεα σιγαλόεντα.
Odyssey 1.39	καὶ δὲ σοὶ ὧδʼ αὐτῇ πολὺ κάλλιον ἠὲ πόδεσσιν
Odyssey 1.40	ἔρχεσθαι· πολλὸν γὰρ ἀπὸ πλυνοί εἰσι πόληος.
Odyssey 1.41	ἡ μὲν ἄρʼ ὣς εἰποῦσʼ ἀπέβη γλαυκῶπις Ἀθήνη
Odyssey 1.42	Οὔλυμπόνδʼ, ὅθι φασὶ θεῶν ἕδος ἀσφαλὲς αἰεὶ
Odyssey 1.43	ἔμμεναι. οὔτʼ ἀνέμοισι τινάσσεται οὔτε ποτʼ ὄμβρῳ
Odyssey 1.44	δεύεται οὔτε χιὼν ἐπιπίλναται, ἀλλὰ μάλʼ αἴθρη
Odyssey 1.45	πέπταται ἀνέφελος, λευκὴ δʼ ἐπιδέδρομεν αἴγλη·
Odyssey 1.46	τῷ ἔνι τέρπονται μάκαρες θεοὶ ἤματα πάντα.
Odyssey 1.47	ἔνθʼ ἀπέβη γλαυκῶπις, ἐπεὶ διεπέφραδε κούρῃ.
Odyssey 1.48	αὐτίκα δʼ Ἠὼς ἦλθεν ἐύθρονος, ἥ μιν ἔγειρε
Odyssey 1.49	Ναυσικάαν ἐύπεπλον· ἄφαρ δʼ ἀπεθαύμασʼ ὄνειρον,
Odyssey 1.50	βῆ δʼ ἰέναι διὰ δώμαθʼ, ἵνʼ ἀγγείλειε τοκεῦσιν,
Odyssey 1.51	πατρὶ φίλῳ καὶ μητρί· κιχήσατο δʼ ἔνδον ἐόντας·
Odyssey 1.52	ἡ μὲν ἐπʼ ἐσχάρῃ ἧστο σὺν ἀμφιπόλοισι γυναιξὶν
Odyssey 1.53	ἠλάκατα στρωφῶσʼ ἁλιπόρφυρα· τῷ δὲ θύραζε
Odyssey 1.54	ἐρχομένῳ ξύμβλητο μετὰ κλειτοὺς βασιλῆας
Odyssey 1.55	ἐς βουλήν, ἵνα μιν κάλεον Φαίηκες ἀγαυοί.
Odyssey 1.56	ἡ δὲ μάλʼ ἄγχι στᾶσα φίλον πατέρα προσέειπε·
Odyssey 1.57	πάππα φίλʼ, οὐκ ἂν δή μοι ἐφοπλίσσειας ἀπήνην
Odyssey 1.58	ὑψηλὴν ἐύκυκλον, ἵνα κλυτὰ εἵματʼ ἄγωμαι
Odyssey 1.59	ἐς ποταμὸν πλυνέουσα, τά μοι ῥερυπωμένα κεῖται;
Odyssey 1.60	καὶ δὲ σοὶ αὐτῷ ἔοικε μετὰ πρώτοισιν ἐόντα
Odyssey 1.61	βουλὰς βουλεύειν καθαρὰ χροΐ εἵματʼ ἔχοντα.
Odyssey 1.62	πέντε δέ τοι φίλοι υἷες ἐνὶ μεγάροις γεγάασιν,
Odyssey 1.63	οἱ δύʼ ὀπυίοντες, τρεῖς δʼ ἠίθεοι θαλέθοντες·
Odyssey 1.64	οἱ δʼ αἰεὶ ἐθέλουσι νεόπλυτα εἵματʼ ἔχοντες
Odyssey 1.65	ἐς χορὸν ἔρχεσθαι· τὰ δʼ ἐμῇ φρενὶ πάντα μέμηλεν.
Odyssey 1.66	ὣς ἔφατʼ· αἴδετο γὰρ θαλερὸν γάμον ἐξονομῆναι
Odyssey 1.67	πατρὶ φίλῳ. ὁ δὲ πάντα νόει καὶ ἀμείβετο μύθῳ·
Odyssey 1.68	οὔτε τοι ἡμιόνων φθονέω, τέκος, οὔτε τευ ἄλλου.
Odyssey 1.69	ἔρχευ· ἀτάρ τοι δμῶες ἐφοπλίσσουσιν ἀπήνην
Odyssey 1.70	ὑψηλὴν ἐύκυκλον, ὑπερτερίῃ ἀραρυῖαν.
Odyssey 1.71	ὣς εἰπὼν δμώεσσιν ἐκέκλετο, τοὶ δʼ ἐπίθοντο.
Odyssey 1.72	οἱ μὲν ἄρʼ ἐκτὸς ἄμαξαν ἐύτροχον ἡμιονείην
Odyssey 1.73	ὥπλεον, ἡμιόνους θʼ ὕπαγον ζεῦξάν θʼ ὑπʼ ἀπήνῃ·
Odyssey 1.74	κούρη δʼ ἐκ θαλάμοιο φέρεν ἐσθῆτα φαεινήν.
Odyssey 1.75	καὶ τὴν μὲν κατέθηκεν ἐυξέστῳ ἐπʼ ἀπήνῃ,
Odyssey 1.76	μήτηρ δʼ ἐν κίστῃ ἐτίθει μενοεικέʼ ἐδωδὴν
Odyssey 1.77	παντοίην, ἐν δʼ ὄψα τίθει, ἐν δʼ οἶνον ἔχευεν
Odyssey 1.78	ἀσκῷ ἐν αἰγείῳ· κούρη δʼ ἐπεβήσετʼ ἀπήνης.
Odyssey 1.79	δῶκεν δὲ χρυσέῃ ἐν ληκύθῳ ὑγρὸν ἔλαιον,
Odyssey 1.80	ἧος χυτλώσαιτο σὺν ἀμφιπόλοισι γυναιξίν.
Odyssey 1.81	ἡ δʼ ἔλαβεν μάστιγα καὶ ἡνία σιγαλόεντα,
Odyssey 1.82	μάστιξεν δʼ ἐλάαν· καναχὴ δʼ ἦν ἡμιόνοιιν.
Odyssey 1.83	αἱ δʼ ἄμοτον τανύοντο, φέρον δʼ ἐσθῆτα καὶ αὐτήν,
Odyssey 1.84	οὐκ οἴην, ἅμα τῇ γε καὶ ἀμφίπολοι κίον ἄλλαι.
Odyssey 1.85	αἱ δʼ ὅτε δὴ ποταμοῖο ῥόον περικαλλέʼ ἵκοντο,
Odyssey 1.86	ἔνθʼ ἦ τοι πλυνοὶ ἦσαν ἐπηετανοί, πολὺ δʼ ὕδωρ
Odyssey 1.87	καλὸν ὑπεκπρόρεεν μάλα περ ῥυπόωντα καθῆραι,
Odyssey 1.88	ἔνθʼ αἵ γʼ ἡμιόνους μὲν ὑπεκπροέλυσαν ἀπήνης.
Odyssey 1.89	καὶ τὰς μὲν σεῦαν ποταμὸν πάρα δινήεντα
Odyssey 1.90	τρώγειν ἄγρωστιν μελιηδέα· ταὶ δʼ ἀπʼ ἀπήνης
Odyssey 1.91	εἵματα χερσὶν ἕλοντο καὶ ἐσφόρεον μέλαν ὕδωρ,
Odyssey 1.92	στεῖβον δʼ ἐν βόθροισι θοῶς ἔριδα προφέρουσαι.
Odyssey 1.93	αὐτὰρ ἐπεὶ πλῦνάν τε κάθηράν τε ῥύπα πάντα,
Odyssey 1.94	ἑξείης πέτασαν παρὰ θῖνʼ ἁλός, ἧχι μάλιστα
Odyssey 1.95	λάιγγας ποτὶ χέρσον ἀποπλύνεσκε θάλασσα.
Odyssey 1.96	αἱ δὲ λοεσσάμεναι καὶ χρισάμεναι λίπʼ ἐλαίῳ
Odyssey 1.97	δεῖπνον ἔπειθʼ εἵλοντο παρʼ ὄχθῃσιν ποταμοῖο,
Odyssey 1.98	εἵματα δʼ ἠελίοιο μένον τερσήμεναι αὐγῇ.
Odyssey 1.99	αὐτὰρ ἐπεὶ σίτου τάρφθεν δμῳαί τε καὶ αὐτή,
Odyssey 1.100	σφαίρῃ ταὶ δʼ ἄρʼ ἔπαιζον, ἀπὸ κρήδεμνα βαλοῦσαι·
Odyssey 1.101	τῇσι δὲ Ναυσικάα λευκώλενος ἤρχετο μολπῆς.
Odyssey 1.102	οἵη δʼ Ἄρτεμις εἶσι κατʼ οὔρεα ἰοχέαιρα,
Odyssey 1.103	ἢ κατὰ Τηΰγετον περιμήκετον ἢ Ἐρύμανθον,
Odyssey 1.104	τερπομένη κάπροισι καὶ ὠκείῃς ἐλάφοισι·
Odyssey 1.105	τῇ δέ θʼ ἅμα νύμφαι, κοῦραι Διὸς αἰγιόχοιο,
Odyssey 1.106	ἀγρονόμοι παίζουσι, γέγηθε δέ τε φρένα Λητώ·
Odyssey 1.107	πασάων δʼ ὑπὲρ ἥ γε κάρη ἔχει ἠδὲ μέτωπα,
Odyssey 1.108	ῥεῖά τʼ ἀριγνώτη πέλεται, καλαὶ δέ τε πᾶσαι·
Odyssey 1.109	ὣς ἥ γʼ ἀμφιπόλοισι μετέπρεπε παρθένος ἀδμής.
Odyssey 1.110	ἀλλʼ ὅτε δὴ ἄρʼ ἔμελλε πάλιν οἶκόνδε νέεσθαι
Odyssey 1.111	ζεύξασʼ ἡμιόνους πτύξασά τε εἵματα καλά,
Odyssey 1.112	ἔνθʼ αὖτʼ ἄλλʼ ἐνόησε θεά, γλαυκῶπις Ἀθήνη,
Odyssey 1.113	ὡς Ὀδυσεὺς ἔγροιτο, ἴδοι τʼ ἐυώπιδα κούρην,
Odyssey 1.114	ἥ οἱ Φαιήκων ἀνδρῶν πόλιν ἡγήσαιτο.
Odyssey 1.115	σφαῖραν ἔπειτʼ ἔρριψε μετʼ ἀμφίπολον βασίλεια·
Odyssey 1.116	ἀμφιπόλου μὲν ἅμαρτε, βαθείῃ δʼ ἔμβαλε δίνῃ·
Odyssey 1.117	αἱ δʼ ἐπὶ μακρὸν ἄυσαν· ὁ δʼ ἔγρετο δῖος Ὀδυσσεύς,
Odyssey 1.118	ἑζόμενος δʼ ὥρμαινε κατὰ φρένα καὶ κατὰ θυμόν·
Odyssey 1.119	ὤ μοι ἐγώ, τέων αὖτε βροτῶν ἐς γαῖαν ἱκάνω;
Odyssey 1.120	ἦ ῥʼ οἵ γʼ ὑβρισταί τε καὶ ἄγριοι οὐδὲ δίκαιοι,
Odyssey 1.121	ἦε φιλόξεινοι καί σφιν νόος ἐστὶ θεουδής;
Odyssey 1.122	ὥς τέ με κουράων ἀμφήλυθε θῆλυς ἀυτή·
Odyssey 1.123	νυμφάων, αἳ ἔχουσʼ ὀρέων αἰπεινὰ κάρηνα
Odyssey 1.124	καὶ πηγὰς ποταμῶν καὶ πίσεα ποιήεντα.
Odyssey 1.125	ἦ νύ που ἀνθρώπων εἰμὶ σχεδὸν αὐδηέντων;
Odyssey 1.126	ἀλλʼ ἄγʼ ἐγὼν αὐτὸς πειρήσομαι ἠδὲ ἴδωμαι.
Odyssey 1.127	ὣς εἰπὼν θάμνων ὑπεδύσετο δῖος Ὀδυσσεύς,
Odyssey 1.128	ἐκ πυκινῆς δʼ ὕλης πτόρθον κλάσε χειρὶ παχείῃ
Odyssey 1.129	φύλλων, ὡς ῥύσαιτο περὶ χροῒ μήδεα φωτός.
Odyssey 1.130	βῆ δʼ ἴμεν ὥς τε λέων ὀρεσίτροφος ἀλκὶ πεποιθώς,
Odyssey 1.131	ὅς τʼ εἶσʼ ὑόμενος καὶ ἀήμενος, ἐν δέ οἱ ὄσσε
Odyssey 1.132	δαίεται· αὐτὰρ ὁ βουσὶ μετέρχεται ἢ ὀίεσσιν
Odyssey 1.133	ἠὲ μετʼ ἀγροτέρας ἐλάφους· κέλεται δέ ἑ γαστὴρ
Odyssey 1.134	μήλων πειρήσοντα καὶ ἐς πυκινὸν δόμον ἐλθεῖν·
Odyssey 1.135	ὣς Ὀδυσεὺς κούρῃσιν ἐυπλοκάμοισιν ἔμελλε
Odyssey 1.136	μίξεσθαι, γυμνός περ ἐών· χρειὼ γὰρ ἵκανε.
Odyssey 1.137	σμερδαλέος δʼ αὐτῇσι φάνη κεκακωμένος ἅλμῃ,
Odyssey 1.138	τρέσσαν δʼ ἄλλυδις ἄλλη ἐπʼ ἠιόνας προὐχούσας·
Odyssey 1.139	οἴη δʼ Ἀλκινόου θυγάτηρ μένε· τῇ γὰρ Ἀθήνη
Odyssey 1.140	θάρσος ἐνὶ φρεσὶ θῆκε καὶ ἐκ δέος εἵλετο γυίων.
Odyssey 1.141	στῆ δʼ ἄντα σχομένη· ὁ δὲ μερμήριξεν Ὀδυσσεύς,
Odyssey 1.142	ἢ γούνων λίσσοιτο λαβὼν ἐυώπιδα κούρην,
Odyssey 1.143	ἦ αὔτως ἐπέεσσιν ἀποσταδὰ μειλιχίοισι
Odyssey 1.144	λίσσοιτʼ, εἰ δείξειε πόλιν καὶ εἵματα δοίη.
Odyssey 1.145	ὣς ἄρα οἱ φρονέοντι δοάσσατο κέρδιον εἶναι,
Odyssey 1.146	λίσσεσθαι ἐπέεσσιν ἀποσταδὰ μειλιχίοισι,
Odyssey 1.147	μή οἱ γοῦνα λαβόντι χολώσαιτο φρένα κούρη.
Odyssey 1.148	αὐτίκα μειλίχιον καὶ κερδαλέον φάτο μῦθον.
Odyssey 1.149	γουνοῦμαί σε, ἄνασσα· θεός νύ τις, ἦ βροτός ἐσσι;
Odyssey 1.150	εἰ μέν τις θεός ἐσσι, τοὶ οὐρανὸν εὐρὺν ἔχουσιν,
Odyssey 1.151	Ἀρτέμιδί σε ἐγώ γε, Διὸς κούρῃ μεγάλοιο,
Odyssey 1.152	εἶδός τε μέγεθός τε φυήν τʼ ἄγχιστα ἐίσκω·
Odyssey 1.153	εἰ δέ τίς ἐσσι βροτῶν, τοὶ ἐπὶ χθονὶ ναιετάουσιν,
Odyssey 1.154	τρὶς μάκαρες μὲν σοί γε πατὴρ καὶ πότνια μήτηρ,
Odyssey 1.155	τρὶς μάκαρες δὲ κασίγνητοι· μάλα πού σφισι θυμὸς
Odyssey 1.156	αἰὲν ἐυφροσύνῃσιν ἰαίνεται εἵνεκα σεῖο,
Odyssey 1.157	λευσσόντων τοιόνδε θάλος χορὸν εἰσοιχνεῦσαν.
Odyssey 1.158	κεῖνος δʼ αὖ περὶ κῆρι μακάρτατος ἔξοχον ἄλλων,
Odyssey 1.159	ὅς κέ σʼ ἐέδνοισι βρίσας οἶκόνδʼ ἀγάγηται.
Odyssey 1.160	οὐ γάρ πω τοιοῦτον ἴδον βροτὸν ὀφθαλμοῖσιν,
Odyssey 1.161	οὔτʼ ἄνδρʼ οὔτε γυναῖκα· σέβας μʼ ἔχει εἰσορόωντα.
Odyssey 1.162	Δήλῳ δή ποτε τοῖον Ἀπόλλωνος παρὰ βωμῷ
Odyssey 1.163	φοίνικος νέον ἔρνος ἀνερχόμενον ἐνόησα·
Odyssey 1.164	ἦλθον γὰρ καὶ κεῖσε, πολὺς δέ μοι ἕσπετο λαός,
Odyssey 1.165	τὴν ὁδὸν ᾗ δὴ μέλλεν ἐμοὶ κακὰ κήδεʼ ἔσεσθαι.
Odyssey 1.166	ὣς δʼ αὔτως καὶ κεῖνο ἰδὼν ἐτεθήπεα θυμῷ
Odyssey 1.167	δήν, ἐπεὶ οὔ πω τοῖον ἀνήλυθεν ἐκ δόρυ γαίης,
Odyssey 1.168	ὡς σέ, γύναι, ἄγαμαί τε τέθηπά τε, δείδια δʼ αἰνῶς
Odyssey 1.169	γούνων ἅψασθαι· χαλεπὸν δέ με πένθος ἱκάνει.
Odyssey 1.170	χθιζὸς ἐεικοστῷ φύγον ἤματι οἴνοπα πόντον·
Odyssey 1.171	τόφρα δέ μʼ αἰεὶ κῦμʼ ἐφόρει κραιπναί τε θύελλαι
Odyssey 1.172	νήσου ἀπʼ Ὠγυγίης. νῦν δʼ ἐνθάδε κάββαλε δαίμων,
Odyssey 1.173	ὄφρʼ ἔτι που καὶ τῇδε πάθω κακόν· οὐ γὰρ ὀίω
Odyssey 1.174	παύσεσθʼ, ἀλλʼ ἔτι πολλὰ θεοὶ τελέουσι πάροιθεν.
Odyssey 1.175	ἀλλά, ἄνασσʼ, ἐλέαιρε· σὲ γὰρ κακὰ πολλὰ μογήσας
Odyssey 1.176	ἐς πρώτην ἱκόμην, τῶν δʼ ἄλλων οὔ τινα οἶδα
Odyssey 1.177	ἀνθρώπων, οἳ τήνδε πόλιν καὶ γαῖαν ἔχουσιν.
Odyssey 1.178	ἄστυ δέ μοι δεῖξον, δὸς δὲ ῥάκος ἀμφιβαλέσθαι,
Odyssey 1.179	εἴ τί που εἴλυμα σπείρων ἔχες ἐνθάδʼ ἰοῦσα.
Odyssey 1.180	σοὶ δὲ θεοὶ τόσα δοῖεν ὅσα φρεσὶ σῇσι μενοινᾷς,
Odyssey 1.181	ἄνδρα τε καὶ οἶκον, καὶ ὁμοφροσύνην ὀπάσειαν
Odyssey 1.182	ἐσθλήν· οὐ μὲν γὰρ τοῦ γε κρεῖσσον καὶ ἄρειον,
Odyssey 1.183	ἢ ὅθʼ ὁμοφρονέοντε νοήμασιν οἶκον ἔχητον
Odyssey 1.184	ἀνὴρ ἠδὲ γυνή· πόλλʼ ἄλγεα δυσμενέεσσι,
Odyssey 1.185	χάρματα δʼ εὐμενέτῃσι, μάλιστα δέ τʼ ἔκλυον αὐτοί.
Odyssey 1.186	τὸν δʼ αὖ Ναυσικάα λευκώλενος ἀντίον ηὔδα·
Odyssey 1.187	ξεῖνʼ, ἐπεὶ οὔτε κακῷ οὔτʼ ἄφρονι φωτὶ ἔοικας·
Odyssey 1.188	Ζεὺς δʼ αὐτὸς νέμει ὄλβον Ὀλύμπιος ἀνθρώποισιν,
Odyssey 1.189	ἐσθλοῖς ἠδὲ κακοῖσιν, ὅπως ἐθέλῃσιν, ἑκάστῳ·
Odyssey 1.190	καί που σοὶ τάδʼ ἔδωκε, σὲ δὲ χρὴ τετλάμεν ἔμπης.
Odyssey 1.191	νῦν δʼ, ἐπεὶ ἡμετέρην τε πόλιν καὶ γαῖαν ἱκάνεις,
Odyssey 1.192	οὔτʼ οὖν ἐσθῆτος δευήσεαι οὔτε τευ ἄλλου,
Odyssey 1.193	ὧν ἐπέοιχʼ ἱκέτην ταλαπείριον ἀντιάσαντα.
Odyssey 1.194	ἄστυ δέ τοι δείξω, ἐρέω δέ τοι οὔνομα λαῶν.
Odyssey 1.195	Φαίηκες μὲν τήνδε πόλιν καὶ γαῖαν ἔχουσιν,
Odyssey 1.196	εἰμὶ δʼ ἐγὼ θυγάτηρ μεγαλήτορος Ἀλκινόοιο,
Odyssey 1.197	τοῦ δʼ ἐκ Φαιήκων ἔχεται κάρτος τε βίη τε.
Odyssey 1.198	ἦ ῥα καὶ ἀμφιπόλοισιν ἐυπλοκάμοισι κέλευσε·
Odyssey 1.199	στῆτέ μοι, ἀμφίπολοι· πόσε φεύγετε φῶτα ἰδοῦσαι;
Odyssey 1.200	ἦ μή πού τινα δυσμενέων φάσθʼ ἔμμεναι ἀνδρῶν;
Odyssey 1.201	οὐκ ἔσθʼ οὗτος ἀνὴρ διερὸς βροτὸς οὐδὲ γένηται,
Odyssey 1.202	ὅς κεν Φαιήκων ἀνδρῶν ἐς γαῖαν ἵκηται
Odyssey 1.203	δηιοτῆτα φέρων· μάλα γὰρ φίλοι ἀθανάτοισιν.
Odyssey 1.204	οἰκέομεν δʼ ἀπάνευθε πολυκλύστῳ ἐνὶ πόντῳ,
Odyssey 1.205	ἔσχατοι, οὐδέ τις ἄμμι βροτῶν ἐπιμίσγεται ἄλλος.
Odyssey 1.206	ἀλλʼ ὅδε τις δύστηνος ἀλώμενος ἐνθάδʼ ἱκάνει,
Odyssey 1.207	τὸν νῦν χρὴ κομέειν· πρὸς γὰρ Διός εἰσιν ἅπαντες
Odyssey 1.208	ξεῖνοί τε πτωχοί τε, δόσις δʼ ὀλίγη τε φίλη τε.
Odyssey 1.209	ἀλλὰ δότʼ, ἀμφίπολοι, ξείνῳ βρῶσίν τε πόσιν τε,
Odyssey 1.210	λούσατέ τʼ ἐν ποταμῷ, ὅθʼ ἐπὶ σκέπας ἔστʼ ἀνέμοιο.
Odyssey 1.211	ὣς ἔφαθʼ, αἱ δʼ ἔσταν τε καὶ ἀλλήλῃσι κέλευσαν,
Odyssey 1.212	κὰδ δʼ ἄρʼ Ὀδυσσῆʼ εἷσαν ἐπὶ σκέπας, ὡς ἐκέλευσεν
Odyssey 1.213	Ναυσικάα θυγάτηρ μεγαλήτορος Ἀλκινόοιο·
Odyssey 1.214	πὰρ δʼ ἄρα οἱ φᾶρός τε χιτῶνά τε εἵματʼ ἔθηκαν,
Odyssey 1.215	δῶκαν δὲ χρυσέῃ ἐν ληκύθῳ ὑγρὸν ἔλαιον,
Odyssey 1.216	ἤνωγον δʼ ἄρα μιν λοῦσθαι ποταμοῖο ῥοῇσιν.
Odyssey 1.217	δή ῥα τότʼ ἀμφιπόλοισι μετηύδα δῖος Ὀδυσσεύς·
Odyssey 1.218	ἀμφίπολοι, στῆθʼ οὕτω ἀπόπροθεν, ὄφρʼ ἐγὼ αὐτὸς
Odyssey 1.219	ἅλμην ὤμοιιν ἀπολούσομαι, ἀμφὶ δʼ ἐλαίῳ
Odyssey 1.220	χρίσομαι· ἦ γὰρ δηρὸν ἀπὸ χροός ἐστιν ἀλοιφή.
Odyssey 1.221	ἄντην δʼ οὐκ ἂν ἐγώ γε λοέσσομαι· αἰδέομαι γὰρ
Odyssey 1.222	γυμνοῦσθαι κούρῃσιν ἐυπλοκάμοισι μετελθών.
Odyssey 1.223	ὣς ἔφαθʼ, αἱ δʼ ἀπάνευθεν ἴσαν, εἶπον δʼ ἄρα κούρῃ.
Odyssey 1.224	αὐτὰρ ὁ ἐκ ποταμοῦ χρόα νίζετο δῖος Ὀδυσσεὺς
Odyssey 1.225	ἅλμην, ἥ οἱ νῶτα καὶ εὐρέας ἄμπεχεν ὤμους,
Odyssey 1.226	ἐκ κεφαλῆς δʼ ἔσμηχεν ἁλὸς χνόον ἀτρυγέτοιο.
Odyssey 1.227	αὐτὰρ ἐπεὶ δὴ πάντα λοέσσατο καὶ λίπʼ ἄλειψεν,
Odyssey 1.228	ἀμφὶ δὲ εἵματα ἕσσαθʼ ἅ οἱ πόρε παρθένος ἀδμής,
Odyssey 1.229	τὸν μὲν Ἀθηναίη θῆκεν Διὸς ἐκγεγαυῖα
Odyssey 1.230	μείζονά τʼ εἰσιδέειν καὶ πάσσονα, κὰδ δὲ κάρητος
Odyssey 1.231	οὔλας ἧκε κόμας, ὑακινθίνῳ ἄνθει ὁμοίας.
Odyssey 1.232	ὡς δʼ ὅτε τις χρυσὸν περιχεύεται ἀργύρῳ ἀνὴρ
Odyssey 1.233	ἴδρις, ὃν Ἥφαιστος δέδαεν καὶ Παλλὰς Ἀθήνη
Odyssey 1.234	τέχνην παντοίην, χαρίεντα δὲ ἔργα τελείει,
Odyssey 1.235	ὣς ἄρα τῷ κατέχευε χάριν κεφαλῇ τε καὶ ὤμοις.
Odyssey 1.236	ἕζετʼ ἔπειτʼ ἀπάνευθε κιὼν ἐπὶ θῖνα θαλάσσης,
Odyssey 1.237	κάλλεϊ καὶ χάρισι στίλβων· θηεῖτο δὲ κούρη.
Odyssey 1.238	δή ῥα τότʼ ἀμφιπόλοισιν ἐυπλοκάμοισι μετηύδα·
Odyssey 1.239	κλῦτέ μευ, ἀμφίπολοι λευκώλενοι, ὄφρα τι εἴπω.
Odyssey 1.240	οὐ πάντων ἀέκητι θεῶν, οἳ Ὄλυμπον ἔχουσιν,
Odyssey 1.241	Φαιήκεσσʼ ὅδʼ ἀνὴρ ἐπιμίσγεται ἀντιθέοισι·
Odyssey 1.242	πρόσθεν μὲν γὰρ δή μοι ἀεικέλιος δέατʼ εἶναι,
Odyssey 1.243	νῦν δὲ θεοῖσιν ἔοικε, τοὶ οὐρανὸν εὐρὺν ἔχουσιν.
Odyssey 1.244	αἲ γὰρ ἐμοὶ τοιόσδε πόσις κεκλημένος εἴη
Odyssey 1.245	ἐνθάδε ναιετάων, καί οἱ ἅδοι αὐτόθι μίμνειν.
Odyssey 1.246	ἀλλὰ δότʼ, ἀμφίπολοι, ξείνῳ βρῶσίν τε πόσιν τε.
Odyssey 1.247	ὣς ἔφαθʼ, αἱ δʼ ἄρα τῆς μάλα μὲν κλύον ἠδʼ ἐπίθοντο,
Odyssey 1.248	πὰρ δʼ ἄρʼ Ὀδυσσῆι ἔθεσαν βρῶσίν τε πόσιν τε.
Odyssey 1.249	ἦ τοι ὁ πῖνε καὶ ἦσθε πολύτλας δῖος Ὀδυσσεὺς
Odyssey 1.250	ἁρπαλέως· δηρὸν γὰρ ἐδητύος ἦεν ἄπαστος.
Odyssey 1.251	αὐτὰρ Ναυσικάα λευκώλενος ἄλλʼ ἐνόησεν·
Odyssey 1.252	εἵματʼ ἄρα πτύξασα τίθει καλῆς ἐπʼ ἀπήνης,
Odyssey 1.253	ζεῦξεν δʼ ἡμιόνους κρατερώνυχας, ἂν δʼ ἔβη αὐτή,
Odyssey 1.254	ὤτρυνεν δʼ Ὀδυσῆα, ἔπος τʼ ἔφατʼ ἔκ τʼ ὀνόμαζεν·
Odyssey 1.255	ὄρσεο δὴ νῦν, ξεῖνε, πόλινδʼ ἴμεν ὄφρα σε πέμψω
Odyssey 1.256	πατρὸς ἐμοῦ πρὸς δῶμα δαΐφρονος, ἔνθα σέ φημι
Odyssey 1.257	πάντων Φαιήκων εἰδησέμεν ὅσσοι ἄριστοι.
Odyssey 1.258	ἀλλὰ μάλʼ ὧδʼ ἔρδειν, δοκέεις δέ μοι οὐκ ἀπινύσσειν·
Odyssey 1.259	ὄφρʼ ἂν μέν κʼ ἀγροὺς ἴομεν καὶ ἔργʼ ἀνθρώπων,
Odyssey 1.260	τόφρα σὺν ἀμφιπόλοισι μεθʼ ἡμιόνους καὶ ἄμαξαν
Odyssey 1.261	καρπαλίμως ἔρχεσθαι· ἐγὼ δʼ ὁδὸν ἡγεμονεύσω.
Odyssey 1.262	αὐτὰρ ἐπὴν πόλιος ἐπιβήομεν, ἣν πέρι πύργος
Odyssey 1.263	ὑψηλός, καλὸς δὲ λιμὴν ἑκάτερθε πόληος,
Odyssey 1.264	λεπτὴ δʼ εἰσίθμη· νῆες δʼ ὁδὸν ἀμφιέλισσαι
Odyssey 1.265	εἰρύαται· πᾶσιν γὰρ ἐπίστιόν ἐστιν ἑκάστῳ.
Odyssey 1.266	ἔνθα δέ τέ σφʼ ἀγορὴ καλὸν Ποσιδήιον ἀμφίς,
Odyssey 1.267	ῥυτοῖσιν λάεσσι κατωρυχέεσσʼ ἀραρυῖα.
Odyssey 1.268	ἔνθα δὲ νηῶν ὅπλα μελαινάων ἀλέγουσι,
Odyssey 1.269	πείσματα καὶ σπεῖρα, καὶ ἀποξύνουσιν ἐρετμά.
Odyssey 1.270	οὐ γὰρ Φαιήκεσσι μέλει βιὸς οὐδὲ φαρέτρη,
Odyssey 1.271	ἀλλʼ ἱστοὶ καὶ ἐρετμὰ νεῶν καὶ νῆες ἐῖσαι,
Odyssey 1.272	ᾗσιν ἀγαλλόμενοι πολιὴν περόωσι θάλασσαν.
Odyssey 1.273	τῶν ἀλεείνω φῆμιν ἀδευκέα, μή τις ὀπίσσω
Odyssey 1.274	μωμεύῃ· μάλα δʼ εἰσὶν ὑπερφίαλοι κατὰ δῆμον·
Odyssey 1.275	καί νύ τις ὧδʼ εἴπῃσι κακώτερος ἀντιβολήσας·
Odyssey 1.276	τίς δʼ ὅδε Ναυσικάᾳ ἕπεται καλός τε μέγας τε
Odyssey 1.277	ξεῖνος; ποῦ δέ μιν εὗρε; πόσις νύ οἱ ἔσσεται αὐτῇ.
Odyssey 1.278	ἦ τινά που πλαγχθέντα κομίσσατο ἧς ἀπὸ νηὸς
Odyssey 1.279	ἀνδρῶν τηλεδαπῶν, ἐπεὶ οὔ τινες ἐγγύθεν εἰσίν·
Odyssey 1.280	ἤ τίς οἱ εὐξαμένῃ πολυάρητος θεὸς ἦλθεν
Odyssey 1.281	οὐρανόθεν καταβάς, ἕξει δέ μιν ἤματα πάντα.
Odyssey 1.282	βέλτερον, εἰ καὐτή περ ἐποιχομένη πόσιν εὗρεν
Odyssey 1.283	ἄλλοθεν· ἦ γὰρ τούσδε γʼ ἀτιμάζει κατὰ δῆμον
Odyssey 1.284	Φαίηκας, τοί μιν μνῶνται πολέες τε καὶ ἐσθλοί.
Odyssey 1.285	ὣς ἐρέουσιν, ἐμοὶ δέ κʼ ὀνείδεα ταῦτα γένοιτο.
Odyssey 1.286	καὶ δʼ ἄλλῃ νεμεσῶ, ἥ τις τοιαῦτά γε ῥέζοι,
Odyssey 1.287	ἥ τʼ ἀέκητι φίλων πατρὸς καὶ μητρὸς ἐόντων,
Odyssey 1.288	ἀνδράσι μίσγηται, πρίν γʼ ἀμφάδιον γάμον ἐλθεῖν.
Odyssey 1.289	ξεῖνε, σὺ δʼ ὦκʼ ἐμέθεν ξυνίει ἔπος, ὄφρα τάχιστα
Odyssey 1.290	πομπῆς καὶ νόστοιο τύχῃς παρὰ πατρὸς ἐμοῖο.
Odyssey 1.291	δήεις ἀγλαὸν ἄλσος Ἀθήνης ἄγχι κελεύθου
Odyssey 1.292	αἰγείρων· ἐν δὲ κρήνη νάει, ἀμφὶ δὲ λειμών·
Odyssey 1.293	ἔνθα δὲ πατρὸς ἐμοῦ τέμενος τεθαλυῖά τʼ ἀλωή,
Odyssey 1.294	τόσσον ἀπὸ πτόλιος, ὅσσον τε γέγωνε βοήσας.
Odyssey 1.295	ἔνθα καθεζόμενος μεῖναι χρόνον, εἰς ὅ κεν ἡμεῖς
Odyssey 1.296	ἄστυδε ἔλθωμεν καὶ ἱκώμεθα δώματα πατρός.
Odyssey 1.297	αὐτὰρ ἐπὴν ἡμέας ἔλπῃ ποτὶ δώματʼ ἀφῖχθαι,
Odyssey 1.298	καὶ τότε Φαιήκων ἴμεν ἐς πόλιν ἠδʼ ἐρέεσθαι
Odyssey 1.299	δώματα πατρὸς ἐμοῦ μεγαλήτορος Ἀλκινόοιο.
Odyssey 1.300	ῥεῖα δʼ ἀρίγνωτʼ ἐστί, καὶ ἂν πάϊς ἡγήσαιτο
Odyssey 1.301	νήπιος· οὐ μὲν γάρ τι ἐοικότα τοῖσι τέτυκται
Odyssey 1.302	δώματα Φαιήκων, οἷος δόμος Ἀλκινόοιο
Odyssey 1.303	ἥρωος. ἀλλʼ ὁπότʼ ἄν σε δόμοι κεκύθωσι καὶ αὐλή,
Odyssey 1.304	ὦκα μάλα μεγάροιο διελθέμεν, ὄφρʼ ἂν ἵκηαι
Odyssey 1.305	μητέρʼ ἐμήν· ἡ δʼ ἧσται ἐπʼ ἐσχάρῃ ἐν πυρὸς αὐγῇ,
Odyssey 1.306	ἠλάκατα στρωφῶσʼ ἁλιπόρφυρα, θαῦμα ἰδέσθαι,
Odyssey 1.307	κίονι κεκλιμένη· δμωαὶ δέ οἱ εἵατʼ ὄπισθεν.
Odyssey 1.308	ἔνθα δὲ πατρὸς ἐμοῖο θρόνος ποτικέκλιται αὐτῇ,
Odyssey 1.309	τῷ ὅ γε οἰνοποτάζει ἐφήμενος ἀθάνατος ὥς.
Odyssey 1.310	τὸν παραμειψάμενος μητρὸς περὶ γούνασι χεῖρας
Odyssey 1.311	βάλλειν ἡμετέρης, ἵνα νόστιμον ἦμαρ ἴδηαι
Odyssey 1.312	χαίρων καρπαλίμως, εἰ καὶ μάλα τηλόθεν ἐσσί.
Odyssey 1.313	εἴ κέν τοι κείνη γε φίλα φρονέῃσʼ ἐνὶ θυμῷ,
Odyssey 1.314	ἐλπωρή τοι ἔπειτα φίλους τʼ ἰδέειν καὶ ἱκέσθαι
Odyssey 1.315	οἶκον ἐυκτίμενον καὶ σὴν ἐς πατρίδα γαῖαν.
Odyssey 1.316	ὣς ἄρα φωνήσασʼ ἵμασεν μάστιγι φαεινῇ
Odyssey 1.317	ἡμιόνους· αἱ δʼ ὦκα λίπον ποταμοῖο ῥέεθρα.
Odyssey 1.318	αἱ δʼ ἐὺ μὲν τρώχων, ἐὺ δὲ πλίσσοντο πόδεσσιν·
Odyssey 1.319	ἡ δὲ μάλʼ ἡνιόχευεν, ὅπως ἅμʼ ἑποίατο πεζοὶ
Odyssey 1.320	ἀμφίπολοί τʼ Ὀδυσεύς τε, νόῳ δʼ ἐπέβαλλεν ἱμάσθλην.
Odyssey 1.321	δύσετό τʼ ἠέλιος καὶ τοὶ κλυτὸν ἄλσος ἵκοντο
Odyssey 1.322	ἱρὸν Ἀθηναίης, ἵνʼ ἄρʼ ἕζετο δῖος Ὀδυσσεύς.
Odyssey 1.323	αὐτίκʼ ἔπειτʼ ἠρᾶτο Διὸς κούρῃ μεγάλοιο·
Odyssey 1.324	κλῦθί μευ, αἰγιόχοιο Διὸς τέκος, Ἀτρυτώνη·
Odyssey 1.325	νῦν δή πέρ μευ ἄκουσον, ἐπεὶ πάρος οὔ ποτʼ ἄκουσας
Odyssey 1.326	ῥαιομένου, ὅτε μʼ ἔρραιε κλυτὸς ἐννοσίγαιος.
Odyssey 1.327	δός μʼ ἐς Φαίηκας φίλον ἐλθεῖν ἠδʼ ἐλεεινόν.
Odyssey 1.328	ὣς ἔφατʼ εὐχόμενος, τοῦ δʼ ἔκλυε Παλλὰς Ἀθήνη.
Odyssey 1.329	αὐτῷ δʼ οὔ πω φαίνετʼ ἐναντίη· αἴδετο γάρ ῥα
Odyssey 1.330	πατροκασίγνητον· ὁ δʼ ἐπιζαφελῶς μενέαινεν
Odyssey 1.331	ἀντιθέῳ Ὀδυσῆι πάρος ἣν γαῖαν ἱκέσθαι.
Odyssey 1.1	ὧς ὁ μὲν ἔνθʼ ἠρᾶτο πολύτλας δῖος Ὀδυσσεύς,
Odyssey 1.2	κούρην δὲ προτὶ ἄστυ φέρεν μένος ἡμιόνοιιν.
Odyssey 1.3	ἡ δʼ ὅτε δὴ οὗ πατρὸς ἀγακλυτὰ δώμαθʼ ἵκανε,
Odyssey 1.4	στῆσεν ἄρʼ ἐν προθύροισι, κασίγνητοι δέ μιν ἀμφὶς
Odyssey 1.5	ἵσταντʼ ἀθανάτοις ἐναλίγκιοι, οἵ ῥʼ ὑπʼ ἀπήνης
Odyssey 1.6	ἡμιόνους ἔλυον ἐσθῆτά τε ἔσφερον εἴσω.
Odyssey 1.7	αὐτὴ δʼ ἐς θάλαμον ἑὸν ἤιε· δαῖε δέ οἱ πῦρ
Odyssey 1.8	γρῆυς Ἀπειραίη, θαλαμηπόλος Εὐρυμέδουσα,
Odyssey 1.9	τήν ποτʼ Ἀπείρηθεν νέες ἤγαγον ἀμφιέλισσαι·
Odyssey 1.10	Ἀλκινόῳ δʼ αὐτὴν γέρας ἔξελον, οὕνεκα πᾶσιν
Odyssey 1.11	Φαιήκεσσιν ἄνασσε, θεοῦ δʼ ὣς δῆμος ἄκουεν·
Odyssey 1.12	ἣ τρέφε Ναυσικάαν λευκώλενον ἐν μεγάροισιν.
Odyssey 1.13	ἥ οἱ πῦρ ἀνέκαιε καὶ εἴσω δόρπον ἐκόσμει.
Odyssey 1.14	καὶ τότʼ Ὀδυσσεὺς ὦρτο πόλινδʼ ἴμεν· ἀμφὶ δʼ Ἀθήνη
Odyssey 1.15	πολλὴν ἠέρα χεῦε φίλα φρονέουσʼ Ὀδυσῆι,
Odyssey 1.16	μή τις Φαιήκων μεγαθύμων ἀντιβολήσας
Odyssey 1.17	κερτομέοι τʼ ἐπέεσσι καὶ ἐξερέοιθʼ ὅτις εἴη.
Odyssey 1.18	ἀλλʼ ὅτε δὴ ἄρʼ ἔμελλε πόλιν δύσεσθαι ἐραννήν,
Odyssey 1.19	ἔνθα οἱ ἀντεβόλησε θεά, γλαυκῶπις Ἀθήνη,
Odyssey 1.20	παρθενικῇ ἐικυῖα νεήνιδι, κάλπιν ἐχούσῃ.
Odyssey 1.21	στῆ δὲ πρόσθʼ αὐτοῦ, ὁ δʼ ἀνείρετο δῖος Ὀδυσσεύς·
Odyssey 1.22	ὦ τέκος, οὐκ ἄν μοι δόμον ἀνέρος ἡγήσαιο
Odyssey 1.23	Ἀλκινόου, ὃς τοῖσδε μετʼ ἀνθρώποισι ἀνάσσει;
Odyssey 1.24	καὶ γὰρ ἐγὼ ξεῖνος ταλαπείριος ἐνθάδʼ ἱκάνω
Odyssey 1.25	τηλόθεν ἐξ ἀπίης γαίης· τῷ οὔ τινα οἶδα
Odyssey 1.26	ἀνθρώπων, οἳ τήνδε πόλιν καὶ γαῖαν ἔχουσιν.
Odyssey 1.27	τὸν δʼ αὖτε προσέειπε θεά, γλαυκῶπις Ἀθήνη·
Odyssey 1.28	τοιγὰρ ἐγώ τοι, ξεῖνε πάτερ, δόμον, ὅν με κελεύεις,
Odyssey 1.29	δείξω, ἐπεί μοι πατρὸς ἀμύμονος ἐγγύθι ναίει.
Odyssey 1.30	ἀλλʼ ἴθι σιγῇ τοῖον, ἐγὼ δʼ ὁδὸν ἡγεμονεύσω,
Odyssey 1.31	μηδέ τινʼ ἀνθρώπων προτιόσσεο μηδʼ ἐρέεινε.
Odyssey 1.32	οὐ γὰρ ξείνους οἵδε μάλʼ ἀνθρώπους ἀνέχονται,
Odyssey 1.33	οὐδʼ ἀγαπαζόμενοι φιλέουσʼ ὅς κʼ ἄλλοθεν ἔλθῃ.
Odyssey 1.34	νηυσὶ θοῇσιν τοί γε πεποιθότες ὠκείῃσι
Odyssey 1.35	λαῖτμα μέγʼ ἐκπερόωσιν, ἐπεί σφισι δῶκʼ ἐνοσίχθων·
Odyssey 1.36	τῶν νέες ὠκεῖαι ὡς εἰ πτερὸν ἠὲ νόημα.
Odyssey 1.37	ὣς ἄρα φωνήσασʼ ἡγήσατο Παλλὰς Ἀθήνη
Odyssey 1.38	καρπαλίμως· ὁ δʼ ἔπειτα μετʼ ἴχνια βαῖνε θεοῖο.
Odyssey 1.39	τὸν δʼ ἄρα Φαίηκες ναυσικλυτοὶ οὐκ ἐνόησαν
Odyssey 1.40	ἐρχόμενον κατὰ ἄστυ διὰ σφέας· οὐ γὰρ Ἀθήνη
Odyssey 1.41	εἴα ἐυπλόκαμος, δεινὴ θεός, ἥ ῥά οἱ ἀχλὺν
Odyssey 1.42	θεσπεσίην κατέχευε φίλα φρονέουσʼ ἐνὶ θυμῷ.
Odyssey 1.43	θαύμαζεν δʼ Ὀδυσεὺς λιμένας καὶ νῆας ἐίσας
Odyssey 1.44	αὐτῶν θʼ ἡρώων ἀγορὰς καὶ τείχεα μακρὰ
Odyssey 1.45	ὑψηλά, σκολόπεσσιν ἀρηρότα, θαῦμα ἰδέσθαι.
Odyssey 1.46	ἀλλʼ ὅτε δὴ βασιλῆος ἀγακλυτὰ δώμαθʼ ἵκοντο,
Odyssey 1.47	τοῖσι δὲ μύθων ἦρχε θεά, γλαυκῶπις Ἀθήνη·
Odyssey 1.48	οὗτος δή τοι, ξεῖνε πάτερ, δόμος, ὅν με κελεύεις
Odyssey 1.49	πεφραδέμεν· δήεις δὲ διοτρεφέας βασιλῆας
Odyssey 1.50	δαίτην δαινυμένους· σὺ δʼ ἔσω κίε, μηδέ τι θυμῷ
Odyssey 1.51	τάρβει· θαρσαλέος γὰρ ἀνὴρ ἐν πᾶσιν ἀμείνων
Odyssey 1.52	ἔργοισιν τελέθει, εἰ καί ποθεν ἄλλοθεν ἔλθοι.
Odyssey 1.53	δέσποιναν μὲν πρῶτα κιχήσεαι ἐν μεγάροισιν·
Odyssey 1.54	Ἀρήτη δʼ ὄνομʼ ἐστὶν ἐπώνυμον, ἐκ δὲ τοκήων
Odyssey 1.55	τῶν αὐτῶν οἵ περ τέκον Ἀλκίνοον βασιλῆα.
Odyssey 1.56	Ναυσίθοον μὲν πρῶτα Ποσειδάων ἐνοσίχθων
Odyssey 1.57	γείνατο καὶ Περίβοια, γυναικῶν εἶδος ἀρίστη,
Odyssey 1.58	ὁπλοτάτη θυγάτηρ μεγαλήτορος Εὐρυμέδοντος,
Odyssey 1.59	ὅς ποθʼ ὑπερθύμοισι Γιγάντεσσιν βασίλευεν.
Odyssey 1.60	ἀλλʼ ὁ μὲν ὤλεσε λαὸν ἀτάσθαλον, ὤλετο δʼ αὐτός·
Odyssey 1.61	τῇ δὲ Ποσειδάων ἐμίγη καὶ ἐγείνατο παῖδα
Odyssey 1.62	Ναυσίθοον μεγάθυμον, ὃς ἐν Φαίηξιν ἄνασσε·
Odyssey 1.63	Ναυσίθοος δʼ ἔτεκεν Ῥηξήνορά τʼ Ἀλκίνοόν τε.
Odyssey 1.64	τὸν μὲν ἄκουρον ἐόντα βάλʼ ἀργυρότοξος Ἀπόλλων
Odyssey 1.65	νυμφίον ἐν μεγάρῳ, μίαν οἴην παῖδα λιπόντα
Odyssey 1.66	Ἀρήτην· τὴν δʼ Ἀλκίνοος ποιήσατʼ ἄκοιτιν,
Odyssey 1.67	καί μιν ἔτισʼ, ὡς οὔ τις ἐπὶ χθονὶ τίεται ἄλλη,
Odyssey 1.68	ὅσσαι νῦν γε γυναῖκες ὑπʼ ἀνδράσιν οἶκον ἔχουσιν.
Odyssey 1.69	ὣς κείνη περὶ κῆρι τετίμηταί τε καὶ ἔστιν
Odyssey 1.70	ἔκ τε φίλων παίδων ἔκ τʼ αὐτοῦ Ἀλκινόοιο
Odyssey 1.71	καὶ λαῶν, οἵ μίν ῥα θεὸν ὣς εἰσορόωντες
Odyssey 1.72	δειδέχαται μύθοισιν, ὅτε στείχῃσʼ ἀνὰ ἄστυ.
Odyssey 1.73	οὐ μὲν γάρ τι νόου γε καὶ αὐτὴ δεύεται ἐσθλοῦ·
Odyssey 1.74	ᾗσι τʼ ἐὺ φρονέῃσι καὶ ἀνδράσι νείκεα λύει.
Odyssey 1.75	εἴ κέν τοι κείνη γε φίλα φρονέῃσʼ ἐνὶ θυμῷ,
Odyssey 1.76	ἐλπωρή τοι ἔπειτα φίλους τʼ ἰδέειν καὶ ἱκέσθαι
Odyssey 1.77	οἶκον ἐς ὑψόροφον καὶ σὴν ἐς πατρίδα γαῖαν.
Odyssey 1.78	ὣς ἄρα φωνήσασʼ ἀπέβη γλαυκῶπις Ἀθήνη
Odyssey 1.79	πόντον ἐπʼ ἀτρύγετον, λίπε δὲ Σχερίην ἐρατεινήν,
Odyssey 1.80	ἵκετο δʼ ἐς Μαραθῶνα καὶ εὐρυάγυιαν Ἀθήνην,
Odyssey 1.81	δῦνε δʼ Ἐρεχθῆος πυκινὸν δόμον. αὐτὰρ Ὀδυσσεὺς
Odyssey 1.82	Ἀλκινόου πρὸς δώματʼ ἴε κλυτά· πολλὰ δέ οἱ κῆρ
Odyssey 1.83	ὥρμαινʼ ἱσταμένῳ, πρὶν χάλκεον οὐδὸν ἱκέσθαι.
Odyssey 1.84	ὥς τε γὰρ ἠελίου αἴγλη πέλεν ἠὲ σελήνης
Odyssey 1.85	δῶμα καθʼ ὑψερεφὲς μεγαλήτορος Ἀλκινόοιο.
Odyssey 1.86	χάλκεοι μὲν γὰρ τοῖχοι ἐληλέδατʼ ἔνθα καὶ ἔνθα,
Odyssey 1.87	ἐς μυχὸν ἐξ οὐδοῦ, περὶ δὲ θριγκὸς κυάνοιο·
Odyssey 1.88	χρύσειαι δὲ θύραι πυκινὸν δόμον ἐντὸς ἔεργον·
Odyssey 1.89	σταθμοὶ δʼ ἀργύρεοι ἐν χαλκέῳ ἕστασαν οὐδῷ,
Odyssey 1.90	ἀργύρεον δʼ ἐφʼ ὑπερθύριον, χρυσέη δὲ κορώνη.
Odyssey 1.91	χρύσειοι δʼ ἑκάτερθε καὶ ἀργύρεοι κύνες ἦσαν,
Odyssey 1.92	οὓς Ἥφαιστος ἔτευξεν ἰδυίῃσι πραπίδεσσι
Odyssey 1.93	δῶμα φυλασσέμεναι μεγαλήτορος Ἀλκινόοιο,
Odyssey 1.94	ἀθανάτους ὄντας καὶ ἀγήρως ἤματα πάντα.
Odyssey 1.95	ἐν δὲ θρόνοι περὶ τοῖχον ἐρηρέδατʼ ἔνθα καὶ ἔνθα,
Odyssey 1.96	ἐς μυχὸν ἐξ οὐδοῖο διαμπερές, ἔνθʼ ἐνὶ πέπλοι
Odyssey 1.97	λεπτοὶ ἐύννητοι βεβλήατο, ἔργα γυναικῶν.
Odyssey 1.98	ἔνθα δὲ Φαιήκων ἡγήτορες ἑδριόωντο
Odyssey 1.99	πίνοντες καὶ ἔδοντες· ἐπηετανὸν γὰρ ἔχεσκον.
Odyssey 1.100	χρύσειοι δʼ ἄρα κοῦροι ἐυδμήτων ἐπὶ βωμῶν
Odyssey 1.101	ἕστασαν αἰθομένας δαΐδας μετὰ χερσὶν ἔχοντες,
Odyssey 1.102	φαίνοντες νύκτας κατὰ δώματα δαιτυμόνεσσι.
Odyssey 1.103	πεντήκοντα δέ οἱ δμωαὶ κατὰ δῶμα γυναῖκες
Odyssey 1.104	αἱ μὲν ἀλετρεύουσι μύλῃς ἔπι μήλοπα καρπόν,
Odyssey 1.105	αἱ δʼ ἱστοὺς ὑφόωσι καὶ ἠλάκατα στρωφῶσιν
Odyssey 1.106	ἥμεναι, οἷά τε φύλλα μακεδνῆς αἰγείροιο·
Odyssey 1.107	καιρουσσέων δʼ ὀθονέων ἀπολείβεται ὑγρὸν ἔλαιον.
Odyssey 1.108	ὅσσον Φαίηκες περὶ πάντων ἴδριες ἀνδρῶν
Odyssey 1.109	νῆα θοὴν ἐνὶ πόντῳ ἐλαυνέμεν, ὣς δὲ γυναῖκες
Odyssey 1.110	ἱστῶν τεχνῆσσαι· πέρι γάρ σφισι δῶκεν Ἀθήνη
Odyssey 1.111	ἔργα τʼ ἐπίστασθαι περικαλλέα καὶ φρένας ἐσθλάς.
Odyssey 1.112	ἔκτοσθεν δʼ αὐλῆς μέγας ὄρχατος ἄγχι θυράων
Odyssey 1.113	τετράγυος· περὶ δʼ ἕρκος ἐλήλαται ἀμφοτέρωθεν.
Odyssey 1.114	ἔνθα δὲ δένδρεα μακρὰ πεφύκασι τηλεθόωντα,
Odyssey 1.115	ὄγχναι καὶ ῥοιαὶ καὶ μηλέαι ἀγλαόκαρποι
Odyssey 1.116	συκέαι τε γλυκεραὶ καὶ ἐλαῖαι τηλεθόωσαι.
Odyssey 1.117	τάων οὔ ποτε καρπὸς ἀπόλλυται οὐδʼ ἀπολείπει
Odyssey 1.118	χείματος οὐδὲ θέρευς, ἐπετήσιος· ἀλλὰ μάλʼ αἰεὶ
Odyssey 1.119	Ζεφυρίη πνείουσα τὰ μὲν φύει, ἄλλα δὲ πέσσει.
Odyssey 1.120	ὄγχνη ἐπʼ ὄγχνῃ γηράσκει, μῆλον δʼ ἐπὶ μήλῳ,
Odyssey 1.121	αὐτὰρ ἐπὶ σταφυλῇ σταφυλή, σῦκον δʼ ἐπὶ σύκῳ.
Odyssey 1.122	ἔνθα δέ οἱ πολύκαρπος ἀλωὴ ἐρρίζωται,
Odyssey 1.123	τῆς ἕτερον μὲν θειλόπεδον λευρῷ ἐνὶ χώρῳ
Odyssey 1.124	τέρσεται ἠελίῳ, ἑτέρας δʼ ἄρα τε τρυγόωσιν,
Odyssey 1.125	ἄλλας δὲ τραπέουσι· πάροιθε δέ τʼ ὄμφακές εἰσιν
Odyssey 1.126	ἄνθος ἀφιεῖσαι, ἕτεραι δʼ ὑποπερκάζουσιν.
Odyssey 1.127	ἔνθα δὲ κοσμηταὶ πρασιαὶ παρὰ νείατον ὄρχον
Odyssey 1.128	παντοῖαι πεφύασιν, ἐπηετανὸν γανόωσαι·
Odyssey 1.129	ἐν δὲ δύω κρῆναι ἡ μέν τʼ ἀνὰ κῆπον ἅπαντα
Odyssey 1.130	σκίδναται, ἡ δʼ ἑτέρωθεν ὑπʼ αὐλῆς οὐδὸν ἵησι
Odyssey 1.131	πρὸς δόμον ὑψηλόν, ὅθεν ὑδρεύοντο πολῖται.
Odyssey 1.132	τοῖʼ ἄρʼ ἐν Ἀλκινόοιο θεῶν ἔσαν ἀγλαὰ δῶρα.
Odyssey 1.133	ἔνθα στὰς θηεῖτο πολύτλας δῖος Ὀδυσσεύς.
Odyssey 1.134	αὐτὰρ ἐπεὶ δὴ πάντα ἑῷ θηήσατο θυμῷ,
Odyssey 1.135	καρπαλίμως ὑπὲρ οὐδὸν ἐβήσετο δώματος εἴσω.
Odyssey 1.136	εὗρε δὲ Φαιήκων ἡγήτορας ἠδὲ μέδοντας
Odyssey 1.137	σπένδοντας δεπάεσσιν ἐυσκόπῳ ἀργεϊφόντῃ,
Odyssey 1.138	ᾧ πυμάτῳ σπένδεσκον, ὅτε μνησαίατο κοίτου.
Odyssey 1.139	αὐτὰρ ὁ βῆ διὰ δῶμα πολύτλας δῖος Ὀδυσσεὺς
Odyssey 1.140	πολλὴν ἠέρʼ ἔχων, ἥν οἱ περίχευεν Ἀθήνη,
Odyssey 1.141	ὄφρʼ ἵκετʼ Ἀρήτην τε καὶ Ἀλκίνοον βασιλῆα.
Odyssey 1.142	ἀμφὶ δʼ ἄρʼ Ἀρήτης βάλε γούνασι χεῖρας Ὀδυσσεύς,
Odyssey 1.143	καὶ τότε δή ῥʼ αὐτοῖο πάλιν χύτο θέσφατος ἀήρ.
Odyssey 1.144	οἱ δʼ ἄνεῳ ἐγένοντο, δόμον κάτα φῶτα ἰδόντες·
Odyssey 1.145	θαύμαζον δʼ ὁρόωντες. ὁ δὲ λιτάνευεν Ὀδυσσεύς·
Odyssey 1.146	Ἀρήτη, θύγατερ Ῥηξήνορος ἀντιθέοιο,
Odyssey 1.147	σόν τε πόσιν σά τε γούναθʼ ἱκάνω πολλὰ μογήσας
Odyssey 1.148	τούσδε τε δαιτυμόνας· τοῖσιν θεοὶ ὄλβια δοῖεν
Odyssey 1.149	ζωέμεναι, καὶ παισὶν ἐπιτρέψειεν ἕκαστος
Odyssey 1.150	κτήματʼ ἐνὶ μεγάροισι γέρας θʼ ὅ τι δῆμος ἔδωκεν·
Odyssey 1.151	αὐτὰρ ἐμοὶ πομπὴν ὀτρύνετε πατρίδʼ ἱκέσθαι
Odyssey 1.152	θᾶσσον, ἐπεὶ δὴ δηθὰ φίλων ἄπο πήματα πάσχω.
Odyssey 1.153	ὣς εἰπὼν κατʼ ἄρʼ ἕζετʼ ἐπʼ ἐσχάρῃ ἐν κονίῃσιν
Odyssey 1.154	πὰρ πυρί· οἱ δʼ ἄρα πάντες ἀκὴν ἐγένοντο σιωπῇ.
Odyssey 1.155	ὀψὲ δὲ δὴ μετέειπε γέρων ἥρως Ἐχένηος,
Odyssey 1.156	ὃς δὴ Φαιήκων ἀνδρῶν προγενέστερος ἦεν
Odyssey 1.157	καὶ μύθοισι κέκαστο, παλαιά τε πολλά τε εἰδώς·
Odyssey 1.158	ὅ σφιν ἐὺ φρονέων ἀγορήσατο καὶ μετέειπεν·
Odyssey 1.159	Ἀλκίνοʼ, οὐ μέν τοι τόδε κάλλιον, οὐδὲ ἔοικε,
Odyssey 1.160	ξεῖνον μὲν χαμαὶ ἧσθαι ἐπʼ ἐσχάρῃ ἐν κονίῃσιν,
Odyssey 1.161	οἵδε δὲ σὸν μῦθον ποτιδέγμενοι ἰσχανόωνται.
Odyssey 1.162	ἄλλʼ ἄγε δὴ ξεῖνον μὲν ἐπὶ θρόνου ἀργυροήλου
Odyssey 1.163	εἷσον ἀναστήσας, σὺ δὲ κηρύκεσσι κέλευσον
Odyssey 1.164	οἶνον ἐπικρῆσαι, ἵνα καὶ Διὶ τερπικεραύνῳ
Odyssey 1.165	σπείσομεν, ὅς θʼ ἱκέτῃσιν ἅμʼ αἰδοίοισιν ὀπηδεῖ·
Odyssey 1.166	δόρπον δὲ ξείνῳ ταμίη δότω ἔνδον ἐόντων.
Odyssey 1.167	αὐτὰρ ἐπεὶ τό γʼ ἄκουσʼ ἱερὸν μένος Ἀλκινόοιο,
Odyssey 1.168	χειρὸς ἑλὼν Ὀδυσῆα δαΐφρονα ποικιλομήτην
Odyssey 1.169	ὦρσεν ἀπʼ ἐσχαρόφιν καὶ ἐπὶ θρόνου εἷσε φαεινοῦ,
Odyssey 1.170	υἱὸν ἀναστήσας ἀγαπήνορα Λαοδάμαντα,
Odyssey 1.171	ὅς οἱ πλησίον ἷζε, μάλιστα δέ μιν φιλέεσκεν.
Odyssey 1.172	χέρνιβα δʼ ἀμφίπολος προχόῳ ἐπέχευε φέρουσα
Odyssey 1.173	καλῇ χρυσείῃ ὑπὲρ ἀργυρέοιο λέβητος,
Odyssey 1.174	νίψασθαι· παρὰ δὲ ξεστὴν ἐτάνυσσε τράπεζαν.
Odyssey 1.175	σῖτον δʼ αἰδοίη ταμίη παρέθηκε φέρουσα,
Odyssey 1.176	εἴδατα πόλλʼ ἐπιθεῖσα, χαριζομένη παρεόντων.
Odyssey 1.177	αὐτὰρ ὁ πῖνε καὶ ἦσθε πολύτλας δῖος Ὀδυσσεύς.
Odyssey 1.178	καὶ τότε κήρυκα προσέφη μένος Ἀλκινόοιο·
Odyssey 1.179	Ποντόνοε, κρητῆρα κερασσάμενος μέθυ νεῖμον
Odyssey 1.180	πᾶσιν ἀνὰ μέγαρον, ἵνα καὶ Διὶ τερπικεραύνῳ
Odyssey 1.181	σπείσομεν, ὅς θʼ ἱκέτῃσιν ἅμʼ αἰδοίοισιν ὀπηδεῖ.
Odyssey 1.182	ὣς φάτο, Ποντόνοος δὲ μελίφρονα οἶνον ἐκίρνα,
Odyssey 1.183	νώμησεν δʼ ἄρα πᾶσιν ἐπαρξάμενος δεπάεσσιν.
Odyssey 1.184	αὐτὰρ ἐπεὶ σπεῖσάν τʼ ἔπιόν θʼ, ὅσον ἤθελε θυμός,
Odyssey 1.185	τοῖσιν δʼ Ἀλκίνοος ἀγορήσατο καὶ μετέειπε·
Odyssey 1.186	κέκλυτε, Φαιήκων ἡγήτορες ἠδὲ μέδοντες
Odyssey 1.187	ὄφρʼ εἴπω τά με θυμὸς ἐνὶ στήθεσσι κελεύει.
Odyssey 1.188	νῦν μὲν δαισάμενοι κατακείετε οἴκαδʼ ἰόντες·
Odyssey 1.189	ἠῶθεν δὲ γέροντας ἐπὶ πλέονας καλέσαντες
Odyssey 1.190	ξεῖνον ἐνὶ μεγάροις ξεινίσσομεν ἠδὲ θεοῖσιν
Odyssey 1.191	ῥέξομεν ἱερὰ καλά, ἔπειτα δὲ καὶ περὶ πομπῆς
Odyssey 1.192	μνησόμεθʼ, ὥς χʼ ὁ ξεῖνος ἄνευθε πόνου καὶ ἀνίης
Odyssey 1.193	πομπῇ ὑφʼ ἡμετέρῃ ἣν πατρίδα γαῖαν ἵκηται
Odyssey 1.194	χαίρων καρπαλίμως, εἰ καὶ μάλα τηλόθεν ἐστί,
Odyssey 1.195	μηδέ τι μεσσηγύς γε κακὸν καὶ πῆμα πάθῃσι,
Odyssey 1.196	πρίν γε τὸν ἧς γαίης ἐπιβήμεναι· ἔνθα δʼ ἔπειτα
Odyssey 1.197	πείσεται, ἅσσα οἱ αἶσα κατὰ κλῶθές τε βαρεῖαι
Odyssey 1.198	γιγνομένῳ νήσαντο λίνῳ, ὅτε μιν τέκε μήτηρ.
Odyssey 1.199	εἰ δέ τις ἀθανάτων γε κατʼ οὐρανοῦ εἰλήλουθεν,
Odyssey 1.200	ἄλλο τι δὴ τόδʼ ἔπειτα θεοὶ περιμηχανόωνται.
Odyssey 1.201	αἰεὶ γὰρ τὸ πάρος γε θεοὶ φαίνονται ἐναργεῖς
Odyssey 1.202	ἡμῖν, εὖτʼ ἔρδωμεν ἀγακλειτὰς ἑκατόμβας,
Odyssey 1.203	δαίνυνταί τε παρʼ ἄμμι καθήμενοι ἔνθα περ ἡμεῖς.
Odyssey 1.204	εἰ δʼ ἄρα τις καὶ μοῦνος ἰὼν ξύμβληται ὁδίτης,
Odyssey 1.205	οὔ τι κατακρύπτουσιν, ἐπεί σφισιν ἐγγύθεν εἰμέν,
Odyssey 1.206	ὥς περ Κύκλωπές τε καὶ ἄγρια φῦλα Γιγάντων.
Odyssey 1.207	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.208	Ἀλκίνοʼ, ἄλλο τί τοι μελέτω φρεσίν· οὐ γὰρ ἐγώ γε
Odyssey 1.209	ἀθανάτοισιν ἔοικα, τοὶ οὐρανὸν εὐρὺν ἔχουσιν,
Odyssey 1.210	οὐ δέμας οὐδὲ φυήν, ἀλλὰ θνητοῖσι βροτοῖσιν.
Odyssey 1.211	οὕς τινας ὑμεῖς ἴστε μάλιστʼ ὀχέοντας ὀιζὺν
Odyssey 1.212	ἀνθρώπων, τοῖσίν κεν ἐν ἄλγεσιν ἰσωσαίμην.
Odyssey 1.213	καὶ δʼ ἔτι κεν καὶ μᾶλλον ἐγὼ κακὰ μυθησαίμην,
Odyssey 1.214	ὅσσα γε δὴ ξύμπαντα θεῶν ἰότητι μόγησα.
Odyssey 1.215	ἀλλʼ ἐμὲ μὲν δορπῆσαι ἐάσατε κηδόμενόν περ·
Odyssey 1.216	οὐ γάρ τι στυγερῇ ἐπὶ γαστέρι κύντερον ἄλλο
Odyssey 1.217	ἔπλετο, ἥ τʼ ἐκέλευσεν ἕο μνήσασθαι ἀνάγκῃ
Odyssey 1.218	καὶ μάλα τειρόμενον καὶ ἐνὶ φρεσὶ πένθος ἔχοντα,
Odyssey 1.219	ὡς καὶ ἐγὼ πένθος μὲν ἔχω φρεσίν, ἡ δὲ μάλʼ αἰεὶ
Odyssey 1.220	ἐσθέμεναι κέλεται καὶ πινέμεν, ἐκ δέ με πάντων
Odyssey 1.221	ληθάνει ὅσσʼ ἔπαθον, καὶ ἐνιπλησθῆναι ἀνώγει.
Odyssey 1.222	ὑμεῖς δʼ ὀτρύνεσθαι ἅμʼ ἠοῖ φαινομένηφιν,
Odyssey 1.223	ὥς κʼ ἐμὲ τὸν δύστηνον ἐμῆς ἐπιβήσετε πάτρης
Odyssey 1.224	καί περ πολλὰ παθόντα· ἰδόντα με καὶ λίποι αἰὼν
Odyssey 1.225	κτῆσιν ἐμήν, δμῶάς τε καὶ ὑψερεφὲς μέγα δῶμα.
Odyssey 1.226	ὣς ἔφαθʼ, οἱ δʼ ἄρα πάντες ἐπῄνεον ἠδʼ ἐκέλευον
Odyssey 1.227	πεμπέμεναι τὸν ξεῖνον, ἐπεὶ κατὰ μοῖραν ἔειπεν.
Odyssey 1.228	αὐτὰρ ἐπεὶ σπεῖσάν τʼ ἔπιον θʼ ὅσον ἤθελε θυμός,
Odyssey 1.229	οἱ μὲν κακκείοντες ἔβαν οἶκόνδε ἕκαστος,
Odyssey 1.230	αὐτὰρ ὁ ἐν μεγάρῳ ὑπελείπετο δῖος Ὀδυσσεύς,
Odyssey 1.231	πὰρ δέ οἱ Ἀρήτη τε καὶ Ἀλκίνοος θεοειδὴς
Odyssey 1.232	ἥσθην· ἀμφίπολοι δʼ ἀπεκόσμεον ἔντεα δαιτός.
Odyssey 1.233	τοῖσιν δʼ Ἀρήτη λευκώλενος ἤρχετο μύθων·
Odyssey 1.234	ἔγνω γὰρ φᾶρός τε χιτῶνά τε εἵματʼ ἰδοῦσα
Odyssey 1.235	καλά, τά ῥʼ αὐτὴ τεῦξε σὺν ἀμφιπόλοισι γυναιξί·
Odyssey 1.236	καί μιν φωνήσασʼ ἔπεα πτερόεντα προσηύδα·
Odyssey 1.237	ξεῖνε, τὸ μέν σε πρῶτον ἐγὼν εἰρήσομαι αὐτή·
Odyssey 1.238	τίς πόθεν εἰς ἀνδρῶν; τίς τοι τάδε εἵματʼ ἔδωκεν;
Odyssey 1.239	οὐ δὴ φῆς ἐπὶ πόντον ἀλώμενος ἐνθάδʼ ἱκέσθαι;
Odyssey 1.240	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.241	ἀργαλέον, βασίλεια, διηνεκέως ἀγορεῦσαι
Odyssey 1.242	κήδεʼ, ἐπεί μοι πολλὰ δόσαν θεοὶ Οὐρανίωνες·
Odyssey 1.243	τοῦτο δέ τοι ἐρέω ὅ μʼ ἀνείρεαι ἠδὲ μεταλλᾷς.
Odyssey 1.244	Ὠγυγίη τις νῆσος ἀπόπροθεν εἰν ἁλὶ κεῖται·
Odyssey 1.245	ἔνθα μὲν Ἄτλαντος θυγάτηρ, δολόεσσα Καλυψὼ
Odyssey 1.246	ναίει ἐυπλόκαμος, δεινὴ θεός· οὐδέ τις αὐτῇ
Odyssey 1.247	μίσγεται οὔτε θεῶν οὔτε θνητῶν ἀνθρώπων.
Odyssey 1.248	ἀλλʼ ἐμὲ τὸν δύστηνον ἐφέστιον ἤγαγε δαίμων
Odyssey 1.249	οἶον, ἐπεί μοι νῆα θοὴν ἀργῆτι κεραυνῷ
Odyssey 1.250	Ζεὺς ἔλσας ἐκέασσε μέσῳ ἐνὶ οἴνοπι πόντῳ.
Odyssey 1.251	ἔνθʼ ἄλλοι μὲν πάντες ἀπέφθιθεν ἐσθλοὶ ἑταῖροι,
Odyssey 1.252	αὐτὰρ ἐγὼ τρόπιν ἀγκὰς ἑλὼν νεὸς ἀμφιελίσσης
Odyssey 1.253	ἐννῆμαρ φερόμην· δεκάτῃ δέ με νυκτὶ μελαίνῃ
Odyssey 1.254	νῆσον ἐς Ὠγυγίην πέλασαν θεοί, ἔνθα Καλυψὼ
Odyssey 1.255	ναίει ἐυπλόκαμος, δεινὴ θεός, ἥ με λαβοῦσα
Odyssey 1.256	ἐνδυκέως ἐφίλει τε καὶ ἔτρεφεν ἠδὲ ἔφασκε
Odyssey 1.257	θήσειν ἀθάνατον καὶ ἀγήραον ἤματα πάντα·
Odyssey 1.258	ἀλλʼ ἐμὸν οὔ ποτε θυμὸν ἐνὶ στήθεσσιν ἔπειθεν.
Odyssey 1.259	ἔνθα μὲν ἑπτάετες μένον ἔμπεδον, εἵματα δʼ αἰεὶ
Odyssey 1.260	δάκρυσι δεύεσκον, τά μοι ἄμβροτα δῶκε Καλυψώ·
Odyssey 1.261	ἀλλʼ ὅτε δὴ ὀγδόατόν μοι ἐπιπλόμενον ἔτος ἦλθεν,
Odyssey 1.262	καὶ τότε δή μʼ ἐκέλευσεν ἐποτρύνουσα νέεσθαι
Odyssey 1.263	Ζηνὸς ὑπʼ ἀγγελίης, ἢ καὶ νόος ἐτράπετʼ αὐτῆς.
Odyssey 1.264	πέμπε δʼ ἐπὶ σχεδίης πολυδέσμου, πολλὰ δʼ ἔδωκε,
Odyssey 1.265	σῖτον καὶ μέθυ ἡδύ, καὶ ἄμβροτα εἵματα ἕσσεν,
Odyssey 1.266	οὖρον δὲ προέηκεν ἀπήμονά τε λιαρόν τε.
Odyssey 1.267	ἑπτὰ δὲ καὶ δέκα μὲν πλέον ἤματα ποντοπορεύων,
Odyssey 1.268	ὀκτωκαιδεκάτῃ δʼ ἐφάνη ὄρεα σκιόεντα
Odyssey 1.269	γαίης ὑμετέρης, γήθησε δέ μοι φίλον ἦτορ
Odyssey 1.270	δυσμόρῳ· ἦ γὰρ ἔμελλον ἔτι ξυνέσεσθαι ὀιζυῖ
Odyssey 1.271	πολλῇ, τήν μοι ἐπῶρσε Ποσειδάων ἐνοσίχθων,
Odyssey 1.272	ὅς μοι ἐφορμήσας ἀνέμους κατέδησε κέλευθον,
Odyssey 1.273	ὤρινεν δὲ θάλασσαν ἀθέσφατον, οὐδέ τι κῦμα
Odyssey 1.274	εἴα ἐπὶ σχεδίης ἁδινὰ στενάχοντα φέρεσθαι.
Odyssey 1.275	τὴν μὲν ἔπειτα θύελλα διεσκέδασʼ· αὐτὰρ ἐγώ γε
Odyssey 1.276	νηχόμενος τόδε λαῖτμα διέτμαγον, ὄφρα με γαίῃ
Odyssey 1.277	ὑμετέρῃ ἐπέλασσε φέρων ἄνεμός τε καὶ ὕδωρ.
Odyssey 1.278	ἔνθα κέ μʼ ἐκβαίνοντα βιήσατο κῦμʼ ἐπὶ χέρσου,
Odyssey 1.279	πέτρῃς πρὸς μεγάλῃσι βαλὸν καὶ ἀτερπέι χώρῳ·
Odyssey 1.280	ἀλλʼ ἀναχασσάμενος νῆχον πάλιν, ἧος ἐπῆλθον
Odyssey 1.281	ἐς ποταμόν, τῇ δή μοι ἐείσατο χῶρος ἄριστος,
Odyssey 1.282	λεῖος πετράων, καὶ ἐπὶ σκέπας ἦν ἀνέμοιο.
Odyssey 1.283	ἐκ δʼ ἔπεσον θυμηγερέων, ἐπὶ δʼ ἀμβροσίη νὺξ
Odyssey 1.284	ἤλυθʼ. ἐγὼ δʼ ἀπάνευθε διιπετέος ποταμοῖο
Odyssey 1.285	ἐκβὰς ἐν θάμνοισι κατέδραθον, ἀμφὶ δὲ φύλλα
Odyssey 1.286	ἠφυσάμην· ὕπνον δὲ θεὸς κατʼ ἀπείρονα χεῦεν.
Odyssey 1.287	ἔνθα μὲν ἐν φύλλοισι φίλον τετιημένος ἦτορ
Odyssey 1.288	εὗδον παννύχιος καὶ ἐπʼ ἠῶ καὶ μέσον ἦμαρ.
Odyssey 1.289	δείλετό τʼ ἠέλιος καί με γλυκὺς ὕπνος ἀνῆκεν.
Odyssey 1.290	ἀμφιπόλους δʼ ἐπὶ θινὶ τεῆς ἐνόησα θυγατρὸς
Odyssey 1.291	παιζούσας, ἐν δʼ αὐτὴ ἔην ἐικυῖα θεῇσι·
Odyssey 1.292	τὴν ἱκέτευσʼ· ἡ δʼ οὔ τι νοήματος ἤμβροτεν ἐσθλοῦ,
Odyssey 1.293	ὡς οὐκ ἂν ἔλποιο νεώτερον ἀντιάσαντα
Odyssey 1.294	ἐρξέμεν· αἰεὶ γάρ τε νεώτεροι ἀφραδέουσιν.
Odyssey 1.295	ἥ μοι σῖτον ἔδωκεν ἅλις ἠδʼ αἴθοπα οἶνον
Odyssey 1.296	καὶ λοῦσʼ ἐν ποταμῷ καί μοι τάδε εἵματʼ ἔδωκε.
Odyssey 1.297	ταῦτά τοι ἀχνύμενός περ ἀληθείην κατέλεξα.
Odyssey 1.298	τὸν δʼ αὖτʼ Ἀλκίνοος ἀπαμείβετο φώνησέν τε·
Odyssey 1.299	ξεῖνʼ, ἦ τοι μὲν τοῦτό γʼ ἐναίσιμον οὐκ ἐνόησε
Odyssey 1.300	παῖς ἐμή, οὕνεκά σʼ οὔ τι μετʼ ἀμφιπόλοισι γυναιξὶν
Odyssey 1.301	ἦγεν ἐς ἡμέτερον, σὺ δʼ ἄρα πρώτην ἱκέτευσας.
Odyssey 1.302	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.303	ἥρως, μή τοι τοὔνεκʼ ἀμύμονα νείκεε κούρην·
Odyssey 1.304	ἡ μὲν γάρ μʼ ἐκέλευε σὺν ἀμφιπόλοισιν ἕπεσθαι,
Odyssey 1.305	ἀλλʼ ἐγὼ οὐκ ἔθελον δείσας αἰσχυνόμενός τε,
Odyssey 1.306	μή πως καὶ σοὶ θυμὸς ἐπισκύσσαιτο ἰδόντι·
Odyssey 1.307	δύσζηλοι γάρ τʼ εἰμὲν ἐπὶ χθονὶ φῦλʼ ἀνθρώπων.
Odyssey 1.308	τὸν δʼ αὖτʼ Ἀλκίνοος ἀπαμείβετο φώνησέν τε·
Odyssey 1.309	ξεῖνʼ, οὔ μοι τοιοῦτον ἐνὶ στήθεσσι φίλον κῆρ
Odyssey 1.310	μαψιδίως κεχολῶσθαι· ἀμείνω δʼ αἴσιμα πάντα.
Odyssey 1.311	αἲ γάρ, Ζεῦ τε πάτερ καὶ Ἀθηναίη καὶ Ἄπολλον,
Odyssey 1.312	τοῖος ἐὼν οἷός ἐσσι, τά τε φρονέων ἅ τʼ ἐγώ περ,
Odyssey 1.313	παῖδά τʼ ἐμὴν ἐχέμεν καὶ ἐμὸς γαμβρὸς καλέεσθαι
Odyssey 1.314	αὖθι μένων· οἶκον δέ κʼ ἐγὼ καὶ κτήματα δοίην,
Odyssey 1.315	εἴ κʼ ἐθέλων γε μένοις· ἀέκοντα δέ σʼ οὔ τις ἐρύξει
Odyssey 1.316	Φαιήκων· μὴ τοῦτο φίλον Διὶ πατρὶ γένοιτο.
Odyssey 1.317	πομπὴν δʼ ἐς τόδʼ ἐγὼ τεκμαίρομαι, ὄφρʼ ἐὺ εἰδῇς,
Odyssey 1.318	αὔριον ἔς· τῆμος δὲ σὺ μὲν δεδμημένος ὕπνῳ
Odyssey 1.319	λέξεαι, οἱ δʼ ἐλόωσι γαλήνην, ὄφρʼ ἂν ἵκηαι
Odyssey 1.320	πατρίδα σὴν καὶ δῶμα, καὶ εἴ πού τοι φίλον ἐστίν,
Odyssey 1.321	εἴ περ καὶ μάλα πολλὸν ἑκαστέρω ἔστʼ Εὐβοίης,
Odyssey 1.322	τήν περ τηλοτάτω φάσʼ ἔμμεναι, οἵ μιν ἴδοντο
Odyssey 1.323	λαῶν ἡμετέρων, ὅτε τε ξανθὸν Ῥαδάμανθυν
Odyssey 1.324	ἦγον ἐποψόμενον Τιτυὸν Γαιήιον υἱόν.
Odyssey 1.325	καὶ μὲν οἱ ἔνθʼ ἦλθον καὶ ἄτερ καμάτοιο τέλεσσαν
Odyssey 1.326	ἤματι τῷ αὐτῷ καὶ ἀπήνυσαν οἴκαδʼ ὀπίσσω.
Odyssey 1.327	εἰδήσεις δὲ καὶ αὐτὸς ἐνὶ φρεσὶν ὅσσον ἄρισται
Odyssey 1.328	νῆες ἐμαὶ καὶ κοῦροι ἀναρρίπτειν ἅλα πηδῷ.
Odyssey 1.329	ὣς φάτο, γήθησεν δὲ πολύτλας δῖος Ὀδυσσεύς,
Odyssey 1.330	εὐχόμενος δʼ ἄρα εἶπεν, ἔπος τʼ ἔφατʼ ἔκ τʼ ὀνόμαζεν·
Odyssey 1.331	Ζεῦ πάτερ, αἴθʼ ὅσα εἶπε τελευτήσειεν ἅπαντα
Odyssey 1.332	Ἀλκίνοος· τοῦ μέν κεν ἐπὶ ζείδωρον ἄρουραν
Odyssey 1.333	ἄσβεστον κλέος εἴη, ἐγὼ δέ κε πατρίδʼ ἱκοίμην.
Odyssey 1.334	ὣς οἱ μὲν τοιαῦτα πρὸς ἀλλήλους ἀγόρευον·
Odyssey 1.335	κέκλετο δʼ Ἀρήτη λευκώλενος ἀμφιπόλοισιν
Odyssey 1.336	δέμνιʼ ὑπʼ αἰθούσῃ θέμεναι καὶ ῥήγεα καλὰ
Odyssey 1.337	πορφύρεʼ ἐμβαλέειν, στορέσαι τʼ ἐφύπερθε τάπητας
Odyssey 1.338	χλαίνας τʼ ἐνθέμεναι οὔλας καθύπερθεν ἕσασθαι.
Odyssey 1.339	αἱ δʼ ἴσαν ἐκ μεγάροιο δάος μετὰ χερσὶν ἔχουσαι·
Odyssey 1.340	αὐτὰρ ἐπεὶ στόρεσαν πυκινὸν λέχος ἐγκονέουσαι,
Odyssey 1.341	ὤτρυνον δʼ Ὀδυσῆα παριστάμεναι ἐπέεσσιν·
Odyssey 1.342	ὄρσο κέων, ὦ ξεῖνε· πεποίηται δέ τοι εὐνή.
Odyssey 1.343	ὣς φάν, τῷ δʼ ἀσπαστὸν ἐείσατο κοιμηθῆναι.
Odyssey 1.344	ὣς ὁ μὲν ἔνθα καθεῦδε πολύτλας δῖος Ὀδυσσεὺς
Odyssey 1.345	τρητοῖς ἐν λεχέεσσιν ὑπʼ αἰθούσῃ ἐριδούπῳ·
Odyssey 1.346	Ἀλκίνοος δʼ ἄρα λέκτο μυχῷ δόμου ὑψηλοῖο,
Odyssey 1.347	πὰρ δὲ γυνὴ δέσποινα λέχος πόρσυνε καὶ εὐνήν.
Odyssey 1.1	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.2	ὤρνυτʼ ἄρʼ ἐξ εὐνῆς ἱερὸν μένος Ἀλκινόοιο,
Odyssey 1.3	ἂν δʼ ἄρα διογενὴς ὦρτο πτολίπορθος Ὀδυσσεύς.
Odyssey 1.4	τοῖσιν δʼ ἡγεμόνευʼ ἱερὸν μένος Ἀλκινόοιο
Odyssey 1.5	Φαιήκων ἀγορήνδʼ, ἥ σφιν παρὰ νηυσὶ τέτυκτο.
Odyssey 1.6	ἐλθόντες δὲ καθῖζον ἐπὶ ξεστοῖσι λίθοισι
Odyssey 1.7	πλησίον. ἡ δʼ ἀνὰ ἄστυ μετῴχετο Παλλὰς Ἀθήνη
Odyssey 1.8	εἰδομένη κήρυκι δαΐφρονος Ἀλκινόοιο,
Odyssey 1.9	νόστον Ὀδυσσῆι μεγαλήτορι μητιόωσα,
Odyssey 1.10	καί ῥα ἑκάστῳ φωτὶ παρισταμένη φάτο μῦθον·
Odyssey 1.11	δεῦτʼ ἄγε, Φαιήκων ἡγήτορες ἠδὲ μέδοντες,
Odyssey 1.12	εἰς ἀγορὴν ἰέναι, ὄφρα ξείνοιο πύθησθε,
Odyssey 1.13	ὃς νέον Ἀλκινόοιο δαΐφρονος ἵκετο δῶμα
Odyssey 1.14	πόντον ἐπιπλαγχθείς, δέμας ἀθανάτοισιν ὁμοῖος.
Odyssey 1.15	ὣς εἰποῦσʼ ὤτρυνε μένος καὶ θυμὸν ἑκάστου.
Odyssey 1.16	καρπαλίμως δʼ ἔμπληντο βροτῶν ἀγοραί τε καὶ ἕδραι
Odyssey 1.17	ἀγρομένων· πολλοὶ δʼ ἄρʼ ἐθηήσαντο ἰδόντες
Odyssey 1.18	υἱὸν Λαέρταο δαΐφρονα· τῷ δʼ ἄρʼ Ἀθήνη
Odyssey 1.19	θεσπεσίην κατέχευε χάριν κεφαλῇ τε καὶ ὤμοις
Odyssey 1.20	καί μιν μακρότερον καὶ πάσσονα θῆκεν ἰδέσθαι,
Odyssey 1.21	ὥς κεν Φαιήκεσσι φίλος πάντεσσι γένοιτο
Odyssey 1.22	δεινός τʼ αἰδοῖός τε καὶ ἐκτελέσειεν ἀέθλους
Odyssey 1.23	πολλούς, τοὺς Φαίηκες ἐπειρήσαντʼ Ὀδυσῆος.
Odyssey 1.24	αὐτὰρ ἐπεί ῥʼ ἤγερθεν ὁμηγερέες τʼ ἐγένοντο,
Odyssey 1.25	τοῖσιν δʼ Ἀλκίνοος ἀγορήσατο καὶ μετέειπε·
Odyssey 1.26	κέκλυτε, Φαιήκων ἡγήτορες ἠδὲ μέδοντες,
Odyssey 1.27	ὄφρʼ εἴπω τά με θυμὸς ἐνὶ στήθεσσι κελεύει.
Odyssey 1.28	ξεῖνος ὅδʼ, οὐκ οἶδʼ ὅς τις, ἀλώμενος ἵκετʼ ἐμὸν δῶ,
Odyssey 1.29	ἠὲ πρὸς ἠοίων ἦ ἑσπερίων ἀνθρώπων·
Odyssey 1.30	πομπὴν δʼ ὀτρύνει, καὶ λίσσεται ἔμπεδον εἶναι.
Odyssey 1.31	ἡμεῖς δʼ, ὡς τὸ πάρος περ, ἐποτρυνώμεθα πομπήν.
Odyssey 1.32	οὐδὲ γὰρ οὐδέ τις ἄλλος, ὅτις κʼ ἐμὰ δώμαθʼ ἵκηται,
Odyssey 1.33	ἐνθάδʼ ὀδυρόμενος δηρὸν μένει εἵνεκα πομπῆς.
Odyssey 1.34	ἀλλʼ ἄγε νῆα μέλαιναν ἐρύσσομεν εἰς ἅλα δῖαν
Odyssey 1.35	πρωτόπλοον, κούρω δὲ δύω καὶ πεντήκοντα
Odyssey 1.36	κρινάσθων κατὰ δῆμον, ὅσοι πάρος εἰσὶν ἄριστοι.
Odyssey 1.37	δησάμενοι δʼ ἐὺ πάντες ἐπὶ κληῖσιν ἐρετμὰ
Odyssey 1.38	ἔκβητʼ· αὐτὰρ ἔπειτα θοὴν ἀλεγύνετε δαῖτα
Odyssey 1.39	ἡμέτερόνδʼ ἐλθόντες· ἐγὼ δʼ ἐὺ πᾶσι παρέξω.
Odyssey 1.40	κούροισιν μὲν ταῦτʼ ἐπιτέλλομαι· αὐτὰρ οἱ ἄλλοι
Odyssey 1.41	σκηπτοῦχοι βασιλῆες ἐμὰ πρὸς δώματα καλὰ
Odyssey 1.42	ἔρχεσθʼ, ὄφρα ξεῖνον ἐνὶ μεγάροισι φιλέωμεν,
Odyssey 1.43	μηδέ τις ἀρνείσθω. καλέσασθε δὲ θεῖον ἀοιδὸν
Odyssey 1.44	Δημόδοκον· τῷ γάρ ῥα θεὸς πέρι δῶκεν ἀοιδὴν
Odyssey 1.45	τέρπειν, ὅππῃ θυμὸς ἐποτρύνῃσιν ἀείδειν.
Odyssey 1.46	ὣς ἄρα φωνήσας ἡγήσατο, τοὶ δʼ ἅμʼ ἕποντο
Odyssey 1.47	σκηπτοῦχοι· κῆρυξ δὲ μετῴχετο θεῖον ἀοιδόν.
Odyssey 1.48	κούρω δὲ κρινθέντε δύω καὶ πεντήκοντα
Odyssey 1.49	βήτην, ὡς ἐκέλευσʼ, ἐπὶ θῖνʼ ἁλὸς ἀτρυγέτοιο.
Odyssey 1.50	αὐτὰρ ἐπεί ῥʼ ἐπὶ νῆα κατήλυθον ἠδὲ θάλασσαν,
Odyssey 1.51	νῆα μὲν οἵ γε μέλαιναν ἁλὸς βένθοσδε ἔρυσσαν,
Odyssey 1.52	ἐν δʼ ἱστόν τʼ ἐτίθεντο καὶ ἱστία νηὶ μελαίνῃ,
Odyssey 1.53	ἠρτύναντο δʼ ἐρετμὰ τροποῖς ἐν δερματίνοισι,
Odyssey 1.54	πάντα κατὰ μοῖραν, ἀνά θʼ ἱστία λευκὰ πέτασσαν.
Odyssey 1.55	ὑψοῦ δʼ ἐν νοτίῳ τήν γʼ ὥρμισαν· αὐτὰρ ἔπειτα
Odyssey 1.56	βάν ῥʼ ἴμεν Ἀλκινόοιο δαΐφρονος ἐς μέγα δῶμα.
Odyssey 1.57	πλῆντο δʼ ἄρʼ αἴθουσαί τε καὶ ἕρκεα καὶ δόμοι ἀνδρῶν
Odyssey 1.58	ἀγρομένων· πολλοὶ δʼ ἄρʼ ἔσαν, νέοι ἠδὲ παλαιοί.
Odyssey 1.59	τοῖσιν δʼ Ἀλκίνοος δυοκαίδεκα μῆλʼ ἱέρευσεν,
Odyssey 1.60	ὀκτὼ δʼ ἀργιόδοντας ὕας, δύο δʼ εἰλίποδας βοῦς·
Odyssey 1.61	τοὺς δέρον ἀμφί θʼ ἕπον, τετύκοντό τε δαῖτʼ ἐρατεινήν.
Odyssey 1.62	κῆρυξ δʼ ἐγγύθεν ἦλθεν ἄγων ἐρίηρον ἀοιδόν,
Odyssey 1.63	τὸν πέρι μοῦσʼ ἐφίλησε, δίδου δʼ ἀγαθόν τε κακόν τε·
Odyssey 1.64	ὀφθαλμῶν μὲν ἄμερσε, δίδου δʼ ἡδεῖαν ἀοιδήν.
Odyssey 1.65	τῷ δʼ ἄρα Ποντόνοος θῆκε θρόνον ἀργυρόηλον
Odyssey 1.66	μέσσῳ δαιτυμόνων, πρὸς κίονα μακρὸν ἐρείσας·
Odyssey 1.67	κὰδ δʼ ἐκ πασσαλόφι κρέμασεν φόρμιγγα λίγειαν
Odyssey 1.68	αὐτοῦ ὑπὲρ κεφαλῆς καὶ ἐπέφραδε χερσὶν ἑλέσθαι
Odyssey 1.69	κῆρυξ· πὰρ δʼ ἐτίθει κάνεον καλήν τε τράπεζαν,
Odyssey 1.70	πὰρ δὲ δέπας οἴνοιο, πιεῖν ὅτε θυμὸς ἀνώγοι.
Odyssey 1.71	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.72	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.73	μοῦσʼ ἄρʼ ἀοιδὸν ἀνῆκεν ἀειδέμεναι κλέα ἀνδρῶν,
Odyssey 1.74	οἴμης τῆς τότʼ ἄρα κλέος οὐρανὸν εὐρὺν ἵκανε,
Odyssey 1.75	νεῖκος Ὀδυσσῆος καὶ Πηλεΐδεω Ἀχιλῆος,
Odyssey 1.76	ὥς ποτε δηρίσαντο θεῶν ἐν δαιτὶ θαλείῃ
Odyssey 1.77	ἐκπάγλοις ἐπέεσσιν, ἄναξ δʼ ἀνδρῶν Ἀγαμέμνων
Odyssey 1.78	χαῖρε νόῳ, ὅ τʼ ἄριστοι Ἀχαιῶν δηριόωντο.
Odyssey 1.79	ὣς γάρ οἱ χρείων μυθήσατο Φοῖβος Ἀπόλλων
Odyssey 1.80	Πυθοῖ ἐν ἠγαθέῃ, ὅθʼ ὑπέρβη λάινον οὐδὸν
Odyssey 1.81	χρησόμενος· τότε γάρ ῥα κυλίνδετο πήματος ἀρχὴ
Odyssey 1.82	Τρωσί τε καὶ Δαναοῖσι Διὸς μεγάλου διὰ βουλάς.
Odyssey 1.83	ταῦτʼ ἄρʼ ἀοιδὸς ἄειδε περικλυτός· αὐτὰρ Ὀδυσσεὺς
Odyssey 1.84	πορφύρεον μέγα φᾶρος ἑλὼν χερσὶ στιβαρῇσι
Odyssey 1.85	κὰκ κεφαλῆς εἴρυσσε, κάλυψε δὲ καλὰ πρόσωπα·
Odyssey 1.86	αἴδετο γὰρ Φαίηκας ὑπʼ ὀφρύσι δάκρυα λείβων.
Odyssey 1.87	ἦ τοι ὅτε λήξειεν ἀείδων θεῖος ἀοιδός,
Odyssey 1.88	δάκρυ ὀμορξάμενος κεφαλῆς ἄπο φᾶρος ἕλεσκε
Odyssey 1.89	καὶ δέπας ἀμφικύπελλον ἑλὼν σπείσασκε θεοῖσιν·
Odyssey 1.90	αὐτὰρ ὅτʼ ἂψ ἄρχοιτο καὶ ὀτρύνειαν ἀείδειν
Odyssey 1.91	Φαιήκων οἱ ἄριστοι, ἐπεὶ τέρποντʼ ἐπέεσσιν,
Odyssey 1.92	ἂψ Ὀδυσεὺς κατὰ κρᾶτα καλυψάμενος γοάασκεν.
Odyssey 1.93	ἔνθʼ ἄλλους μὲν πάντας ἐλάνθανε δάκρυα λείβων,
Odyssey 1.94	Ἀλκίνοος δέ μιν οἶος ἐπεφράσατʼ ἠδʼ ἐνόησεν
Odyssey 1.95	ἥμενος ἄγχʼ αὐτοῦ, βαρὺ δὲ στενάχοντος ἄκουσεν.
Odyssey 1.96	αἶψα δὲ Φαιήκεσσι φιληρέτμοισι μετηύδα·
Odyssey 1.97	κέκλυτε, Φαιήκων ἡγήτορες ἠδὲ μέδοντες.
Odyssey 1.98	ἤδη μὲν δαιτὸς κεκορήμεθα θυμὸν ἐίσης
Odyssey 1.99	φόρμιγγός θʼ, ἣ δαιτὶ συνήορός ἐστι θαλείῃ·
Odyssey 1.100	νῦν δʼ ἐξέλθωμεν καὶ ἀέθλων πειρηθῶμεν
Odyssey 1.101	πάντων, ὥς χʼ ὁ ξεῖνος ἐνίσπῃ οἷσι φίλοισιν
Odyssey 1.102	οἴκαδε νοστήσας, ὅσσον περιγιγνόμεθʼ ἄλλων
Odyssey 1.103	πύξ τε παλαιμοσύνῃ τε καὶ ἅλμασιν ἠδὲ πόδεσσιν.
Odyssey 1.104	ὣς ἄρα φωνήσας ἡγήσατο, τοὶ δʼ ἅμʼ ἕποντο.
Odyssey 1.105	κὰδ δʼ ἐκ πασσαλόφι κρέμασεν φόρμιγγα λίγειαν,
Odyssey 1.106	Δημοδόκου δʼ ἕλε χεῖρα καὶ ἔξαγεν ἐκ μεγάροιο
Odyssey 1.107	κῆρυξ· ἦρχε δὲ τῷ αὐτὴν ὁδὸν ἥν περ οἱ ἄλλοι
Odyssey 1.108	Φαιήκων οἱ ἄριστοι, ἀέθλια θαυμανέοντες.
Odyssey 1.109	βὰν δʼ ἴμεν εἰς ἀγορήν, ἅμα δʼ ἕσπετο πουλὺς ὅμιλος,
Odyssey 1.110	μυρίοι· ἂν δʼ ἵσταντο νέοι πολλοί τε καὶ ἐσθλοί.
Odyssey 1.111	ὦρτο μὲν Ἀκρόνεώς τε καὶ Ὠκύαλος καὶ Ἐλατρεύς,
Odyssey 1.112	Ναυτεύς τε Πρυμνεύς τε καὶ Ἀγχίαλος καὶ Ἐρετμεύς,
Odyssey 1.113	Ποντεύς τε Πρωρεύς τε, Θόων Ἀναβησίνεώς τε
Odyssey 1.114	Ἀμφίαλός θʼ, υἱὸς Πολυνήου Τεκτονίδαο·
Odyssey 1.115	ἂν δὲ καὶ Εὐρύαλος, βροτολοιγῷ ἶσος Ἄρηϊ,
Odyssey 1.116	Ναυβολίδης, ὃς ἄριστος ἔην εἶδός τε δέμας τε
Odyssey 1.117	πάντων Φαιήκων μετʼ ἀμύμονα Λαοδάμαντα.
Odyssey 1.118	ἂν δʼ ἔσταν τρεῖς παῖδες ἀμύμονος Ἀλκινόοιο,
Odyssey 1.119	Λαοδάμας θʼ Ἅλιός τε καὶ ἀντίθεος Κλυτόνηος.
Odyssey 1.120	οἱ δʼ ἦ τοι πρῶτον μὲν ἐπειρήσαντο πόδεσσι.
Odyssey 1.121	τοῖσι δʼ ἀπὸ νύσσης τέτατο δρόμος· οἱ δʼ ἅμα πάντες
Odyssey 1.122	καρπαλίμως ἐπέτοντο κονίοντες πεδίοιο·
Odyssey 1.123	τῶν δὲ θέειν ὄχʼ ἄριστος ἔην Κλυτόνηος ἀμύμων·
Odyssey 1.124	ὅσσον τʼ ἐν νειῷ οὖρον πέλει ἡμιόνοιιν,
Odyssey 1.125	τόσσον ὑπεκπροθέων λαοὺς ἵκεθʼ, οἱ δʼ ἐλίποντο.
Odyssey 1.126	οἱ δὲ παλαιμοσύνης ἀλεγεινῆς πειρήσαντο·
Odyssey 1.127	τῇ δʼ αὖτʼ Εὐρύαλος ἀπεκαίνυτο πάντας ἀρίστους.
Odyssey 1.128	ἅλματι δʼ Ἀμφίαλος πάντων προφερέστατος ἦεν·
Odyssey 1.129	δίσκῳ δʼ αὖ πάντων πολὺ φέρτατος ἦεν Ἐλατρεύς,
Odyssey 1.130	πὺξ δʼ αὖ Λαοδάμας, ἀγαθὸς πάϊς Ἀλκινόοιο.
Odyssey 1.131	αὐτὰρ ἐπεὶ δὴ πάντες ἐτέρφθησαν φρένʼ ἀέθλοις,
Odyssey 1.132	τοῖς ἄρα Λαοδάμας μετέφη πάϊς Ἀλκινόοιο·
Odyssey 1.133	δεῦτε, φίλοι, τὸν ξεῖνον ἐρώμεθα εἴ τινʼ ἄεθλον
Odyssey 1.134	οἶδέ τε καὶ δεδάηκε. φυήν γε μὲν οὐ κακός ἐστι,
Odyssey 1.135	μηρούς τε κνήμας τε καὶ ἄμφω χεῖρας ὕπερθεν
Odyssey 1.136	αὐχένα τε στιβαρὸν μέγα τε σθένος· οὐδέ τι ἥβης
Odyssey 1.137	δεύεται, ἀλλὰ κακοῖσι συνέρρηκται πολέεσσιν·
Odyssey 1.138	οὐ γὰρ ἐγώ γέ τί φημι κακώτερον ἄλλο θαλάσσης
Odyssey 1.139	ἄνδρα γε συγχεῦαι, εἰ καὶ μάλα καρτερὸς εἴη.
Odyssey 1.140	τὸν δʼ αὖτʼ Εὐρύαλος ἀπαμείβετο φώνησέν τε·
Odyssey 1.141	Λαοδάμα, μάλα τοῦτο ἔπος κατὰ μοῖραν ἔειπες.
Odyssey 1.142	αὐτὸς νῦν προκάλεσσαι ἰὼν καὶ πέφραδε μῦθον.
Odyssey 1.143	αὐτὰρ ἐπεὶ τό γʼ ἄκουσʼ ἀγαθὸς πάϊς Ἀλκινόοιο,
Odyssey 1.144	στῆ ῥʼ ἐς μέσσον ἰὼν καὶ Ὀδυσσῆα προσέειπε·
Odyssey 1.145	δεῦρʼ ἄγε καὶ σύ, ξεῖνε πάτερ, πείρησαι ἀέθλων,
Odyssey 1.146	εἴ τινά που δεδάηκας· ἔοικε δέ σʼ ἴδμεν ἀέθλους·
Odyssey 1.147	οὐ μὲν γὰρ μεῖζον κλέος ἀνέρος ὄφρα κʼ ἔῃσιν,
Odyssey 1.148	ἤ ὅ τι ποσσίν τε ῥέξῃ καὶ χερσὶν ἑῇσιν.
Odyssey 1.149	ἀλλʼ ἄγε πείρησαι, σκέδασον δʼ ἀπὸ κήδεα θυμοῦ.
Odyssey 1.150	σοὶ δʼ ὁδὸς οὐκέτι δηρὸν ἀπέσσεται, ἀλλά τοι ἤδη
Odyssey 1.151	νηῦς τε κατείρυσται καὶ ἐπαρτέες εἰσὶν ἑταῖροι.
Odyssey 1.152	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.153	Λαοδάμα, τί με ταῦτα κελεύετε κερτομέοντες;
Odyssey 1.154	κήδεά μοι καὶ μᾶλλον ἐνὶ φρεσὶν ἤ περ ἄεθλοι,
Odyssey 1.155	ὃς πρὶν μὲν μάλα πολλὰ πάθον καὶ πολλὰ μόγησα,
Odyssey 1.156	νῦν δὲ μεθʼ ὑμετέρῃ ἀγορῇ νόστοιο χατίζων
Odyssey 1.157	ἧμαι, λισσόμενος βασιλῆά τε πάντα τε δῆμον.
Odyssey 1.158	τὸν δʼ αὖτʼ Εὐρύαλος ἀπαμείβετο νείκεσέ τʼ ἄντην·
Odyssey 1.159	οὐ γάρ σʼ οὐδέ, ξεῖνε, δαήμονι φωτὶ ἐίσκω
Odyssey 1.160	ἄθλων, οἷά τε πολλὰ μετʼ ἀνθρώποισι πέλονται,
Odyssey 1.161	ἀλλὰ τῷ, ὅς θʼ ἅμα νηὶ πολυκλήιδι θαμίζων,
Odyssey 1.162	ἀρχὸς ναυτάων οἵ τε πρηκτῆρες ἔασιν,
Odyssey 1.163	φόρτου τε μνήμων καὶ ἐπίσκοπος ᾖσιν ὁδαίων
Odyssey 1.164	κερδέων θʼ ἁρπαλέων· οὐδʼ ἀθλητῆρι ἔοικας.
Odyssey 1.165	τὸν δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
Odyssey 1.166	ξεῖνʼ, οὐ καλὸν ἔειπες· ἀτασθάλῳ ἀνδρὶ ἔοικας.
Odyssey 1.167	οὕτως οὐ πάντεσσι θεοὶ χαρίεντα διδοῦσιν
Odyssey 1.168	ἀνδράσιν, οὔτε φυὴν οὔτʼ ἂρ φρένας οὔτʼ ἀγορητύν.
Odyssey 1.169	ἄλλος μὲν γάρ τʼ εἶδος ἀκιδνότερος πέλει ἀνήρ,
Odyssey 1.170	ἀλλὰ θεὸς μορφὴν ἔπεσι στέφει, οἱ δέ τʼ ἐς αὐτὸν
Odyssey 1.171	τερπόμενοι λεύσσουσιν· ὁ δʼ ἀσφαλέως ἀγορεύει
Odyssey 1.172	αἰδοῖ μειλιχίῃ, μετὰ δὲ πρέπει ἀγρομένοισιν,
Odyssey 1.173	ἐρχόμενον δʼ ἀνὰ ἄστυ θεὸν ὣς εἰσορόωσιν.
Odyssey 1.174	ἄλλος δʼ αὖ εἶδος μὲν ἀλίγκιος ἀθανάτοισιν,
Odyssey 1.175	ἀλλʼ οὔ οἱ χάρις ἀμφιπεριστέφεται ἐπέεσσιν,
Odyssey 1.176	ὡς καὶ σοὶ εἶδος μὲν ἀριπρεπές, οὐδέ κεν ἄλλως
Odyssey 1.177	οὐδὲ θεὸς τεύξειε, νόον δʼ ἀποφώλιός ἐσσι.
Odyssey 1.178	ὤρινάς μοι θυμὸν ἐνὶ στήθεσσι φίλοισιν
Odyssey 1.179	εἰπὼν οὐ κατὰ κόσμον. ἐγὼ δʼ οὐ νῆις ἀέθλων,
Odyssey 1.180	ὡς σύ γε μυθεῖαι, ἀλλʼ ἐν πρώτοισιν ὀίω
Odyssey 1.181	ἔμμεναι, ὄφρʼ ἥβῃ τε πεποίθεα χερσί τʼ ἐμῇσι.
Odyssey 1.182	νῦν δʼ ἔχομαι κακότητι καὶ ἄλγεσι· πολλὰ γὰρ ἔτλην
Odyssey 1.183	ἀνδρῶν τε πτολέμους ἀλεγεινά τε κύματα πείρων.
Odyssey 1.184	ἀλλὰ καὶ ὥς, κακὰ πολλὰ παθών, πειρήσομʼ ἀέθλων·
Odyssey 1.185	θυμοδακὴς γὰρ μῦθος, ἐπώτρυνας δέ με εἰπών.
Odyssey 1.186	ἦ ῥα καὶ αὐτῷ φάρει ἀναΐξας λάβε δίσκον
Odyssey 1.187	μείζονα καὶ πάχετον, στιβαρώτερον οὐκ ὀλίγον περ
Odyssey 1.188	ἢ οἵῳ Φαίηκες ἐδίσκεον ἀλλήλοισι.
Odyssey 1.189	τόν ῥα περιστρέψας ἧκε στιβαρῆς ἀπὸ χειρός,
Odyssey 1.190	βόμβησεν δὲ λίθος· κατὰ δʼ ἔπτηξαν ποτὶ γαίῃ
Odyssey 1.191	Φαίηκες δολιχήρετμοι, ναυσίκλυτοι ἄνδρες,
Odyssey 1.192	λᾶος ὑπὸ ῥιπῆς· ὁ δʼ ὑπέρπτατο σήματα πάντων
Odyssey 1.193	ῥίμφα θέων ἀπὸ χειρός. ἔθηκε δὲ τέρματʼ Ἀθήνη
Odyssey 1.194	ἀνδρὶ δέμας ἐικυῖα, ἔπος τʼ ἔφατʼ ἔκ τʼ ὀνόμαζεν·
Odyssey 1.195	καί κʼ ἀλαός τοι, ξεῖνε, διακρίνειε τὸ σῆμα
Odyssey 1.196	ἀμφαφόων, ἐπεὶ οὔ τι μεμιγμένον ἐστὶν ὁμίλῳ,
Odyssey 1.197	ἀλλὰ πολὺ πρῶτον. σὺ δὲ θάρσει τόνδε γʼ ἄεθλον·
Odyssey 1.198	οὔ τις Φαιήκων τόδε γʼ ἵξεται, οὐδʼ ὑπερήσει.
Odyssey 1.199	ὣς φάτο, γήθησεν δὲ πολύτλας δῖος Ὀδυσσεύς,
Odyssey 1.200	χαίρων, οὕνεχʼ ἑταῖρον ἐνηέα λεῦσσʼ ἐν ἀγῶνι.
Odyssey 1.201	καὶ τότε κουφότερον μετεφώνεε Φαιήκεσσιν·
Odyssey 1.202	τοῦτον νῦν ἀφίκεσθε, νέοι. τάχα δʼ ὕστερον ἄλλον
Odyssey 1.203	ἥσειν ἢ τοσσοῦτον ὀίομαι ἢ ἔτι μᾶσσον.
Odyssey 1.204	τῶν δʼ ἄλλων ὅτινα κραδίη θυμός τε κελεύει,
Odyssey 1.205	δεῦρʼ ἄγε πειρηθήτω, ἐπεί μʼ ἐχολώσατε λίην,
Odyssey 1.206	ἢ πὺξ ἠὲ πάλῃ ἢ καὶ ποσίν, οὔ τι μεγαίρω,
Odyssey 1.207	πάντων Φαιήκων, πλήν γʼ αὐτοῦ Λαοδάμαντος.
Odyssey 1.208	ξεῖνος γάρ μοι ὅδʼ ἐστί· τίς ἂν φιλέοντι μάχοιτο;
Odyssey 1.209	ἄφρων δὴ κεῖνός γε καὶ οὐτιδανὸς πέλει ἀνήρ,
Odyssey 1.210	ὅς τις ξεινοδόκῳ ἔριδα προφέρηται ἀέθλων
Odyssey 1.211	δήμῳ ἐν ἀλλοδαπῷ· ἕο δʼ αὐτοῦ πάντα κολούει.
Odyssey 1.212	τῶν δʼ ἄλλων οὔ πέρ τινʼ ἀναίνομαι οὐδʼ ἀθερίζω,
Odyssey 1.213	ἀλλʼ ἐθέλω ἴδμεν καὶ πειρηθήμεναι ἄντην.
Odyssey 1.214	πάντα γὰρ οὐ κακός εἰμι, μετʼ ἀνδράσιν ὅσσοι ἄεθλοι·
Odyssey 1.215	εὖ μὲν τόξον οἶδα ἐύξοον ἀμφαφάασθαι·
Odyssey 1.216	πρῶτός κʼ ἄνδρα βάλοιμι ὀιστεύσας ἐν ὁμίλῳ
Odyssey 1.217	ἀνδρῶν δυσμενέων, εἰ καὶ μάλα πολλοὶ ἑταῖροι
Odyssey 1.218	ἄγχι παρασταῖεν καὶ τοξαζοίατο φωτῶν.
Odyssey 1.219	οἶος δή με Φιλοκτήτης ἀπεκαίνυτο τόξῳ
Odyssey 1.220	δήμῳ ἔνι Τρώων, ὅτε τοξαζοίμεθʼ Ἀχαιοί.
Odyssey 1.221	τῶν δʼ ἄλλων ἐμέ φημι πολὺ προφερέστερον εἶναι,
Odyssey 1.222	ὅσσοι νῦν βροτοί εἰσιν ἐπὶ χθονὶ σῖτον ἔδοντες.
Odyssey 1.223	ἀνδράσι δὲ προτέροισιν ἐριζέμεν οὐκ ἐθελήσω,
Odyssey 1.224	οὔθʼ Ἡρακλῆι οὔτʼ Εὐρύτῳ Οἰχαλιῆι,
Odyssey 1.225	οἵ ῥα καὶ ἀθανάτοισιν ἐρίζεσκον περὶ τόξων.
Odyssey 1.226	τῷ ῥα καὶ αἶψʼ ἔθανεν μέγας Εὔρυτος, οὐδʼ ἐπὶ γῆρας
Odyssey 1.227	ἵκετʼ ἐνὶ μεγάροισι· χολωσάμενος γὰρ Ἀπόλλων
Odyssey 1.228	ἔκτανεν, οὕνεκά μιν προκαλίζετο τοξάζεσθαι.
Odyssey 1.229	δουρὶ δʼ ἀκοντίζω ὅσον οὐκ ἄλλος τις ὀιστῷ.
Odyssey 1.230	οἴοισιν δείδοικα ποσὶν μή τίς με παρέλθῃ
Odyssey 1.231	Φαιήκων· λίην γὰρ ἀεικελίως ἐδαμάσθην
Odyssey 1.232	κύμασιν ἐν πολλοῖς, ἐπεὶ οὐ κομιδὴ κατὰ νῆα
Odyssey 1.233	ἦεν ἐπηετανός· τῷ μοι φίλα γυῖα λέλυνται.
Odyssey 1.234	ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ.
Odyssey 1.235	Ἀλκίνοος δέ μιν οἶος ἀμειβόμενος προσέειπεν·
Odyssey 1.236	ξεῖνʼ, ἐπεὶ οὐκ ἀχάριστα μεθʼ ἡμῖν ταῦτʼ ἀγορεύεις,
Odyssey 1.237	ἀλλʼ ἐθέλεις ἀρετὴν σὴν φαινέμεν, ἥ τοι ὀπηδεῖ,
Odyssey 1.238	χωόμενος ὅτι σʼ οὗτος ἀνὴρ ἐν ἀγῶνι παραστὰς
Odyssey 1.239	νείκεσεν, ὡς ἂν σὴν ἀρετὴν βροτὸς οὔ τις ὄνοιτο,
Odyssey 1.240	ὅς τις ἐπίσταιτο ᾗσι φρεσὶν ἄρτια βάζειν·
Odyssey 1.241	ἀλλʼ ἄγε νῦν ἐμέθεν ξυνίει ἔπος, ὄφρα καὶ ἄλλῳ
Odyssey 1.242	εἴπῃς ἡρώων, ὅτε κεν σοῖς ἐν μεγάροισι
Odyssey 1.243	δαινύῃ παρὰ σῇ τʼ ἀλόχῳ καὶ σοῖσι τέκεσσιν,
Odyssey 1.244	ἡμετέρης ἀρετῆς μεμνημένος, οἷα καὶ ἡμῖν
Odyssey 1.245	Ζεὺς ἐπὶ ἔργα τίθησι διαμπερὲς ἐξ ἔτι πατρῶν.
Odyssey 1.246	οὐ γὰρ πυγμάχοι εἰμὲν ἀμύμονες οὐδὲ παλαισταί,
Odyssey 1.247	ἀλλὰ ποσὶ κραιπνῶς θέομεν καὶ νηυσὶν ἄριστοι,
Odyssey 1.248	αἰεὶ δʼ ἡμῖν δαίς τε φίλη κίθαρίς τε χοροί τε
Odyssey 1.249	εἵματά τʼ ἐξημοιβὰ λοετρά τε θερμὰ καὶ εὐναί.
Odyssey 1.250	ἀλλʼ ἄγε, Φαιήκων βητάρμονες ὅσσοι ἄριστοι,
Odyssey 1.251	παίσατε, ὥς χʼ ὁ ξεῖνος ἐνίσπῃ οἷσι φίλοισιν
Odyssey 1.252	οἴκαδε νοστήσας, ὅσσον περιγιγνόμεθʼ ἄλλων
Odyssey 1.253	ναυτιλίῃ καὶ ποσσὶ καὶ ὀρχηστυῖ καὶ ἀοιδῇ.
Odyssey 1.254	Δημοδόκῳ δέ τις αἶψα κιὼν φόρμιγγα λίγειαν
Odyssey 1.255	οἰσέτω, ἥ που κεῖται ἐν ἡμετέροισι δόμοισιν.
Odyssey 1.256	ὣς ἔφατʼ Ἀλκίνοος θεοείκελος, ὦρτο δὲ κῆρυξ
Odyssey 1.257	οἴσων φόρμιγγα γλαφυρὴν δόμου ἐκ βασιλῆος.
Odyssey 1.258	αἰσυμνῆται δὲ κριτοὶ ἐννέα πάντες ἀνέσταν
Odyssey 1.259	δήμιοι, οἳ κατʼ ἀγῶνας ἐὺ πρήσσεσκον ἕκαστα,
Odyssey 1.260	λείηναν δὲ χορόν, καλὸν δʼ εὔρυναν ἀγῶνα.
Odyssey 1.261	κῆρυξ δʼ ἐγγύθεν ἦλθε φέρων φόρμιγγα λίγειαν
Odyssey 1.262	Δημοδόκῳ· ὁ δʼ ἔπειτα κίʼ ἐς μέσον· ἀμφὶ δὲ κοῦροι
Odyssey 1.263	πρωθῆβαι ἵσταντο, δαήμονες ὀρχηθμοῖο,
Odyssey 1.264	πέπληγον δὲ χορὸν θεῖον ποσίν. αὐτὰρ Ὀδυσσεὺς
Odyssey 1.265	μαρμαρυγὰς θηεῖτο ποδῶν, θαύμαζε δὲ θυμῷ.
Odyssey 1.266	αὐτὰρ ὁ φορμίζων ἀνεβάλλετο καλὸν ἀείδειν
Odyssey 1.267	ἀμφʼ Ἄρεος φιλότητος εὐστεφάνου τʼ Ἀφροδίτης,
Odyssey 1.268	ὡς τὰ πρῶτα μίγησαν ἐν Ἡφαίστοιο δόμοισι
Odyssey 1.269	λάθρῃ, πολλὰ δʼ ἔδωκε, λέχος δʼ ᾔσχυνε καὶ εὐνὴν
Odyssey 1.270	Ἡφαίστοιο ἄνακτος. ἄφαρ δέ οἱ ἄγγελος ἦλθεν
Odyssey 1.271	Ἥλιος, ὅ σφʼ ἐνόησε μιγαζομένους φιλότητι.
Odyssey 1.272	Ἥφαιστος δʼ ὡς οὖν θυμαλγέα μῦθον ἄκουσε,
Odyssey 1.273	βῆ ῥʼ ἴμεν ἐς χαλκεῶνα κακὰ φρεσὶ βυσσοδομεύων,
Odyssey 1.274	ἐν δʼ ἔθετʼ ἀκμοθέτῳ μέγαν ἄκμονα, κόπτε δὲ δεσμοὺς
Odyssey 1.275	ἀρρήκτους ἀλύτους, ὄφρʼ ἔμπεδον αὖθι μένοιεν.
Odyssey 1.276	αὐτὰρ ἐπεὶ δὴ τεῦξε δόλον κεχολωμένος Ἄρει,
Odyssey 1.277	βῆ ῥʼ ἴμεν ἐς θάλαμον, ὅθι οἱ φίλα δέμνιʼ ἔκειτο,
Odyssey 1.278	ἀμφὶ δʼ ἄρʼ ἑρμῖσιν χέε δέσματα κύκλῳ ἁπάντῃ·
Odyssey 1.279	πολλὰ δὲ καὶ καθύπερθε μελαθρόφιν ἐξεκέχυντο,
Odyssey 1.280	ἠύτʼ ἀράχνια λεπτά, τά γʼ οὔ κέ τις οὐδὲ ἴδοιτο,
Odyssey 1.281	οὐδὲ θεῶν μακάρων· πέρι γὰρ δολόεντα τέτυκτο.
Odyssey 1.282	αὐτὰρ ἐπεὶ δὴ πάντα δόλον περὶ δέμνια χεῦεν,
Odyssey 1.283	εἴσατʼ ἴμεν ἐς Λῆμνον, ἐυκτίμενον πτολίεθρον,
Odyssey 1.284	ἥ οἱ γαιάων πολὺ φιλτάτη ἐστὶν ἁπασέων.
Odyssey 1.285	οὐδʼ ἀλαοσκοπιὴν εἶχε χρυσήνιος Ἄρης,
Odyssey 1.286	ὡς ἴδεν Ἥφαιστον κλυτοτέχνην νόσφι κιόντα·
Odyssey 1.287	βῆ δʼ ἰέναι πρὸς δῶμα περικλυτοῦ Ἡφαίστοιο
Odyssey 1.288	ἰσχανόων φιλότητος ἐυστεφάνου Κυθερείης.
Odyssey 1.289	ἡ δὲ νέον παρὰ πατρὸς ἐρισθενέος Κρονίωνος
Odyssey 1.290	ἐρχομένη κατʼ ἄρʼ ἕζεθʼ· ὁ δʼ εἴσω δώματος ᾔει,
Odyssey 1.291	ἔν τʼ ἄρα οἱ φῦ χειρί, ἔπος τʼ ἔφατʼ ἔκ τʼ ὀνόμαζε·
Odyssey 1.292	δεῦρο, φίλη, λέκτρονδε τραπείομεν εὐνηθέντες·
Odyssey 1.293	οὐ γὰρ ἔθʼ Ἥφαιστος μεταδήμιος, ἀλλά που ἤδη
Odyssey 1.294	οἴχεται ἐς Λῆμνον μετὰ Σίντιας ἀγριοφώνους.
Odyssey 1.295	ὣς φάτο, τῇ δʼ ἀσπαστὸν ἐείσατο κοιμηθῆναι.
Odyssey 1.296	τὼ δʼ ἐς δέμνια βάντε κατέδραθον· ἀμφὶ δὲ δεσμοὶ
Odyssey 1.297	τεχνήεντες ἔχυντο πολύφρονος Ἡφαίστοιο,
Odyssey 1.298	οὐδέ τι κινῆσαι μελέων ἦν οὐδʼ ἀναεῖραι.
Odyssey 1.299	καὶ τότε δὴ γίγνωσκον, ὅ τʼ οὐκέτι φυκτὰ πέλοντο.
Odyssey 1.300	ἀγχίμολον δέ σφʼ ἦλθε περικλυτὸς ἀμφιγυήεις,
Odyssey 1.301	αὖτις ὑποστρέψας πρὶν Λήμνου γαῖαν ἱκέσθαι·
Odyssey 1.302	Ἠέλιος γάρ οἱ σκοπιὴν ἔχεν εἶπέ τε μῦθον.
Odyssey 1.303	βῆ δʼ ἴμεναι πρὸς δῶμα φίλον τετιημένος ἦτορ·
Odyssey 1.304	ἔστη δʼ ἐν προθύροισι, χόλος δέ μιν ἄγριος ᾕρει·
Odyssey 1.305	σμερδαλέον δʼ ἐβόησε, γέγωνέ τε πᾶσι θεοῖσιν·
Odyssey 1.306	Ζεῦ πάτερ ἠδʼ ἄλλοι μάκαρες θεοὶ αἰὲν ἐόντες,
Odyssey 1.307	δεῦθʼ, ἵνα ἔργα γελαστὰ καὶ οὐκ ἐπιεικτὰ ἴδησθε,
Odyssey 1.308	ὡς ἐμὲ χωλὸν ἐόντα Διὸς θυγάτηρ Ἀφροδίτη
Odyssey 1.309	αἰὲν ἀτιμάζει, φιλέει δʼ ἀίδηλον Ἄρηα,
Odyssey 1.310	οὕνεχʼ ὁ μὲν καλός τε καὶ ἀρτίπος, αὐτὰρ ἐγώ γε
Odyssey 1.311	ἠπεδανὸς γενόμην. ἀτὰρ οὔ τί μοι αἴτιος ἄλλος,
Odyssey 1.312	ἀλλὰ τοκῆε δύω, τὼ μὴ γείνασθαι ὄφελλον.
Odyssey 1.313	ἀλλʼ ὄψεσθʼ, ἵνα τώ γε καθεύδετον ἐν φιλότητι
Odyssey 1.314	εἰς ἐμὰ δέμνια βάντες, ἐγὼ δʼ ὁρόων ἀκάχημαι.
Odyssey 1.315	οὐ μέν σφεας ἔτʼ ἔολπα μίνυνθά γε κειέμεν οὕτως
Odyssey 1.316	καὶ μάλα περ φιλέοντε· τάχʼ οὐκ ἐθελήσετον ἄμφω
Odyssey 1.317	εὕδειν· ἀλλά σφωε δόλος καὶ δεσμὸς ἐρύξει,
Odyssey 1.318	εἰς ὅ κέ μοι μάλα πάντα πατὴρ ἀποδῷσιν ἔεδνα,
Odyssey 1.319	ὅσσα οἱ ἐγγυάλιξα κυνώπιδος εἵνεκα κούρης,
Odyssey 1.320	οὕνεκά οἱ καλὴ θυγάτηρ, ἀτὰρ οὐκ ἐχέθυμος.
Odyssey 1.321	ὣς ἔφαθʼ, οἱ δʼ ἀγέροντο θεοὶ ποτὶ χαλκοβατὲς δῶ·
Odyssey 1.322	ἦλθε Ποσειδάων γαιήοχος, ἦλθʼ ἐριούνης
Odyssey 1.323	Ἑρμείας, ἦλθεν δὲ ἄναξ ἑκάεργος Ἀπόλλων.
Odyssey 1.324	θηλύτεραι δὲ θεαὶ μένον αἰδοῖ οἴκοι ἑκάστη.
Odyssey 1.325	ἔσταν δʼ ἐν προθύροισι θεοί, δωτῆρες ἑάων·
Odyssey 1.326	ἄσβεστος δʼ ἄρʼ ἐνῶρτο γέλως μακάρεσσι θεοῖσι
Odyssey 1.327	τέχνας εἰσορόωσι πολύφρονος Ἡφαίστοιο.
Odyssey 1.328	ὧδε δέ τις εἴπεσκεν ἰδὼν ἐς πλησίον ἄλλον·
Odyssey 1.329	οὐκ ἀρετᾷ κακὰ ἔργα· κιχάνει τοι βραδὺς ὠκύν,
Odyssey 1.330	ὡς καὶ νῦν Ἥφαιστος ἐὼν βραδὺς εἷλεν Ἄρηα
Odyssey 1.331	ὠκύτατόν περ ἐόντα θεῶν οἳ Ὄλυμπον ἔχουσιν,
Odyssey 1.332	χωλὸς ἐὼν τέχνῃσι· τὸ καὶ μοιχάγριʼ ὀφέλλει.
Odyssey 1.333	ὣς οἱ μὲν τοιαῦτα πρὸς ἀλλήλους ἀγόρευον·
Odyssey 1.334	Ἑρμῆν δὲ προσέειπεν ἄναξ Διὸς υἱὸς Ἀπόλλων·
Odyssey 1.335	Ἑρμεία, Διὸς υἱέ, διάκτορε, δῶτορ ἑάων,
Odyssey 1.336	ἦ ῥά κεν ἐν δεσμοῖς ἐθέλοις κρατεροῖσι πιεσθεὶς
Odyssey 1.337	εὕδειν ἐν λέκτροισι παρὰ χρυσέῃ Ἀφροδίτῃ;
Odyssey 1.338	τὸν δʼ ἠμείβετʼ ἔπειτα διάκτορος ἀργεϊφόντης·
Odyssey 1.339	αἲ γὰρ τοῦτο γένοιτο, ἄναξ ἑκατηβόλʼ Ἄπολλον·
Odyssey 1.340	δεσμοὶ μὲν τρὶς τόσσοι ἀπείρονες ἀμφὶς ἔχοιεν,
Odyssey 1.341	ὑμεῖς δʼ εἰσορόῳτε θεοὶ πᾶσαί τε θέαιναι,
Odyssey 1.342	αὐτὰρ ἐγὼν εὕδοιμι παρὰ χρυσέῃ Ἀφροδίτῃ.
Odyssey 1.343	ὣς ἔφατʼ, ἐν δὲ γέλως ὦρτʼ ἀθανάτοισι θεοῖσιν.
Odyssey 1.344	οὐδὲ Ποσειδάωνα γέλως ἔχε, λίσσετο δʼ αἰεὶ
Odyssey 1.345	Ἥφαιστον κλυτοεργὸν ὅπως λύσειεν Ἄρηα.
Odyssey 1.346	καί μιν φωνήσας ἔπεα πτερόεντα προσηύδα·
Odyssey 1.347	λῦσον· ἐγὼ δέ τοι αὐτὸν ὑπίσχομαι, ὡς σὺ κελεύεις,
Odyssey 1.348	τίσειν αἴσιμα πάντα μετʼ ἀθανάτοισι θεοῖσιν.
Odyssey 1.349	τὸν δʼ αὖτε προσέειπε περικλυτὸς ἀμφιγυήεις·
Odyssey 1.350	μή με, Ποσείδαον γαιήοχε, ταῦτα κέλευε·
Odyssey 1.351	δειλαί τοι δειλῶν γε καὶ ἐγγύαι ἐγγυάασθαι.
Odyssey 1.352	πῶς ἂν ἐγώ σε δέοιμι μετʼ ἀθανάτοισι θεοῖσιν,
Odyssey 1.353	εἴ κεν Ἄρης οἴχοιτο χρέος καὶ δεσμὸν ἀλύξας;
Odyssey 1.354	τὸν δʼ αὖτε προσέειπε Ποσειδάων ἐνοσίχθων·
Odyssey 1.355	Ἥφαιστʼ, εἴ περ γάρ κεν Ἄρης χρεῖος ὑπαλύξας
Odyssey 1.356	οἴχηται φεύγων, αὐτός τοι ἐγὼ τάδε τίσω.
Odyssey 1.357	τὸν δʼ ἠμείβετʼ ἔπειτα περικλυτὸς ἀμφιγυήεις·
Odyssey 1.358	οὐκ ἔστʼ οὐδὲ ἔοικε τεὸν ἔπος ἀρνήσασθαι.
Odyssey 1.359	ὣς εἰπὼν δεσμὸν ἀνίει μένος Ἡφαίστοιο.
Odyssey 1.360	τὼ δʼ ἐπεὶ ἐκ δεσμοῖο λύθεν, κρατεροῦ περ ἐόντος,
Odyssey 1.361	αὐτίκʼ ἀναΐξαντε ὁ μὲν Θρῄκηνδε βεβήκει,
Odyssey 1.362	ἡ δʼ ἄρα Κύπρον ἵκανε φιλομμειδὴς Ἀφροδίτη,
Odyssey 1.363	ἐς Πάφον· ἔνθα δέ οἱ τέμενος βωμός τε θυήεις.
Odyssey 1.364	ἔνθα δέ μιν Χάριτες λοῦσαν καὶ χρῖσαν ἐλαίῳ
Odyssey 1.365	ἀμβρότῳ, οἷα θεοὺς ἐπενήνοθεν αἰὲν ἐόντας,
Odyssey 1.366	ἀμφὶ δὲ εἵματα ἕσσαν ἐπήρατα, θαῦμα ἰδέσθαι.
Odyssey 1.367	ταῦτʼ ἄρʼ ἀοιδὸς ἄειδε περικλυτός· αὐτὰρ Ὀδυσσεὺς
Odyssey 1.368	τέρπετʼ ἐνὶ φρεσὶν ᾗσιν ἀκούων ἠδὲ καὶ ἄλλοι
Odyssey 1.369	Φαίηκες δολιχήρετμοι, ναυσίκλυτοι ἄνδρες.
Odyssey 1.370	Ἀλκίνοος δʼ Ἅλιον καὶ Λαοδάμαντα κέλευσεν
Odyssey 1.371	μουνὰξ ὀρχήσασθαι, ἐπεί σφισιν οὔ τις ἔριζεν.
Odyssey 1.372	οἱ δʼ ἐπεὶ οὖν σφαῖραν καλὴν μετὰ χερσὶν ἕλοντο,
Odyssey 1.373	πορφυρέην, τήν σφιν Πόλυβος ποίησε δαΐφρων,
Odyssey 1.374	τὴν ἕτερος ῥίπτασκε ποτὶ νέφεα σκιόεντα
Odyssey 1.375	ἰδνωθεὶς ὀπίσω, ὁ δʼ ἀπὸ χθονὸς ὑψόσʼ ἀερθεὶς
Odyssey 1.376	ῥηιδίως μεθέλεσκε, πάρος ποσὶν οὖδας ἱκέσθαι.
Odyssey 1.377	αὐτὰρ ἐπεὶ δὴ σφαίρῃ ἀνʼ ἰθὺν πειρήσαντο,
Odyssey 1.378	ὠρχείσθην δὴ ἔπειτα ποτὶ χθονὶ πουλυβοτείρῃ
Odyssey 1.379	ταρφέʼ ἀμειβομένω· κοῦροι δʼ ἐπελήκεον ἄλλοι
Odyssey 1.380	ἑστεῶτες κατʼ ἀγῶνα, πολὺς δʼ ὑπὸ κόμπος ὀρώρει.
Odyssey 1.381	δὴ τότʼ ἄρʼ Ἀλκίνοον προσεφώνεε δῖος Ὀδυσσεύς·
Odyssey 1.382	Ἀλκίνοε κρεῖον, πάντων ἀριδείκετε λαῶν,
Odyssey 1.383	ἠμὲν ἀπείλησας βητάρμονας εἶναι ἀρίστους,
Odyssey 1.384	ἠδʼ ἄρʼ ἑτοῖμα τέτυκτο· σέβας μʼ ἔχει εἰσορόωντα.
Odyssey 1.385	ὣς φάτο, γήθησεν δʼ ἱερὸν μένος Ἀλκινόοιο,
Odyssey 1.386	αἶψα δὲ Φαιήκεσσι φιληρέτμοισι μετηύδα·
Odyssey 1.387	κέκλυτε, Φαιήκων ἡγήτορες ἠδὲ μέδοντες.
Odyssey 1.388	ὁ ξεῖνος μάλα μοι δοκέει πεπνυμένος εἶναι.
Odyssey 1.389	ἀλλʼ ἄγε οἱ δῶμεν ξεινήιον, ὡς ἐπιεικές.
Odyssey 1.390	δώδεκα γὰρ κατὰ δῆμον ἀριπρεπέες βασιλῆες
Odyssey 1.391	ἀρχοὶ κραίνουσι, τρισκαιδέκατος δʼ ἐγὼ αὐτός·
Odyssey 1.392	τῶν οἱ ἕκαστος φᾶρος ἐυπλυνὲς ἠδὲ χιτῶνα
Odyssey 1.393	καὶ χρυσοῖο τάλαντον ἐνείκατε τιμήεντος.
Odyssey 1.394	αἶψα δὲ πάντα φέρωμεν ἀολλέα, ὄφρʼ ἐνὶ χερσὶν
Odyssey 1.395	ξεῖνος ἔχων ἐπὶ δόρπον ἴῃ χαίρων ἐνὶ θυμῷ.
Odyssey 1.396	Εὐρύαλος δέ ἑ αὐτὸν ἀρεσσάσθω ἐπέεσσι
Odyssey 1.397	καὶ δώρῳ, ἐπεὶ οὔ τι ἔπος κατὰ μοῖραν ἔειπεν.
Odyssey 1.398	ὣς ἔφαθʼ, οἱ δʼ ἄρα πάντες ἐπῄνεον ἠδʼ ἐκέλευον,
Odyssey 1.399	δῶρα δʼ ἄρʼ οἰσέμεναι πρόεσαν κήρυκα ἕκαστος.
Odyssey 1.400	τὸν δʼ αὖτʼ Εὐρύαλος ἀπαμείβετο φώνησέν τε·
Odyssey 1.401	Ἀλκίνοε κρεῖον, πάντων ἀριδείκετε λαῶν,
Odyssey 1.402	τοιγὰρ ἐγὼ τὸν ξεῖνον ἀρέσσομαι, ὡς σὺ κελεύεις.
Odyssey 1.403	δώσω οἱ τόδʼ ἄορ παγχάλκεον, ᾧ ἔπι κώπη
Odyssey 1.404	ἀργυρέη, κολεὸν δὲ νεοπρίστου ἐλέφαντος
Odyssey 1.405	ἀμφιδεδίνηται· πολέος δέ οἱ ἄξιον ἔσται.
Odyssey 1.406	ὣς εἰπὼν ἐν χερσὶ τίθει ξίφος ἀργυρόηλον
Odyssey 1.407	καί μιν φωνήσας ἔπεα πτερόεντα προσηύδα·
Odyssey 1.408	χαῖρε, πάτερ ὦ ξεῖνε· ἔπος δʼ εἴ πέρ τι βέβακται
Odyssey 1.409	δεινόν, ἄφαρ τὸ φέροιεν ἀναρπάξασαι ἄελλαι.
Odyssey 1.410	σοὶ δὲ θεοὶ ἄλοχόν τʼ ἰδέειν καὶ πατρίδʼ ἱκέσθαι
Odyssey 1.411	δοῖεν, ἐπεὶ δὴ δηθὰ φίλων ἄπο πήματα πάσχεις.
Odyssey 1.412	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.413	καὶ σὺ φίλος μάλα χαῖρε, θεοὶ δέ τοι ὄλβια δοῖεν.
Odyssey 1.414	μηδέ τι τοι ξίφεός γε ποθὴ μετόπισθε γένοιτο
Odyssey 1.415	τούτου, ὃ δή μοι δῶκας ἀρεσσάμενος ἐπέεσσιν.
Odyssey 1.416	ἦ ῥα καὶ ἀμφʼ ὤμοισι θέτο ξίφος ἀργυρόηλον.
Odyssey 1.417	δύσετό τʼ ἠέλιος, καὶ τῷ κλυτὰ δῶρα παρῆεν.
Odyssey 1.418	καὶ τά γʼ ἐς Ἀλκινόοιο φέρον κήρυκες ἀγαυοί·
Odyssey 1.419	δεξάμενοι δʼ ἄρα παῖδες ἀμύμονος Ἀλκινόοιο
Odyssey 1.420	μητρὶ παρʼ αἰδοίῃ ἔθεσαν περικαλλέα δῶρα.
Odyssey 1.421	τοῖσιν δʼ ἡγεμόνευʼ ἱερὸν μένος Ἀλκινόοιο,
Odyssey 1.422	ἐλθόντες δὲ καθῖζον ἐν ὑψηλοῖσι θρόνοισι.
Odyssey 1.423	δή ῥα τότʼ Ἀρήτην προσέφη μένος Ἀλκινόοιο·
Odyssey 1.424	δεῦρο, γύναι, φέρε χηλὸν ἀριπρεπέʼ, ἥ τις ἀρίστη·
Odyssey 1.425	ἐν δʼ αὐτὴ θὲς φᾶρος ἐυπλυνὲς ἠδὲ χιτῶνα.
Odyssey 1.426	ἀμφὶ δέ οἱ πυρὶ χαλκὸν ἰήνατε, θέρμετε δʼ ὕδωρ,
Odyssey 1.427	ὄφρα λοεσσάμενός τε ἰδών τʼ ἐὺ κείμενα πάντα
Odyssey 1.428	δῶρα, τά οἱ Φαίηκες ἀμύμονες ἐνθάδʼ ἔνεικαν,
Odyssey 1.429	δαιτί τε τέρπηται καὶ ἀοιδῆς ὕμνον ἀκούων.
Odyssey 1.430	καί οἱ ἐγὼ τόδʼ ἄλεισον ἐμὸν περικαλλὲς ὀπάσσω,
Odyssey 1.431	χρύσεον, ὄφρʼ ἐμέθεν μεμνημένος ἤματα πάντα
Odyssey 1.432	σπένδῃ ἐνὶ μεγάρῳ Διί τʼ ἄλλοισίν τε θεοῖσιν.
Odyssey 1.433	ὣς ἔφατʼ, Ἀρήτη δὲ μετὰ δμῳῇσιν ἔειπεν
Odyssey 1.434	ἀμφὶ πυρὶ στῆσαι τρίποδα μέγαν ὅττι τάχιστα.
Odyssey 1.435	αἱ δὲ λοετροχόον τρίποδʼ ἵστασαν ἐν πυρὶ κηλέῳ,
Odyssey 1.436	ἔν δʼ ἄρʼ ὕδωρ ἔχεαν, ὑπὸ δὲ ξύλα δαῖον ἑλοῦσαι.
Odyssey 1.437	γάστρην μὲν τρίποδος πῦρ ἄμφεπε, θέρμετο δʼ ὕδωρ·
Odyssey 1.438	τόφρα δʼ ἄρʼ Ἀρήτη ξείνῳ περικαλλέα χηλὸν
Odyssey 1.439	ἐξέφερεν θαλάμοιο, τίθει δʼ ἐνὶ κάλλιμα δῶρα,
Odyssey 1.440	ἐσθῆτα χρυσόν τε, τά οἱ Φαίηκες ἔδωκαν·
Odyssey 1.441	ἐν δʼ αὐτὴ φᾶρος θῆκεν καλόν τε χιτῶνα,
Odyssey 1.442	καί μιν φωνήσασʼ ἔπεα πτερόεντα προσηύδα·
Odyssey 1.443	αὐτὸς νῦν ἴδε πῶμα, θοῶς δʼ ἐπὶ δεσμὸν ἴηλον,
Odyssey 1.444	μή τίς τοι καθʼ ὁδὸν δηλήσεται, ὁππότʼ ἂν αὖτε
Odyssey 1.445	εὕδῃσθα γλυκὺν ὕπνον ἰὼν ἐν νηὶ μελαίνῃ.
Odyssey 1.446	αὐτὰρ ἐπεὶ τό γʼ ἄκουσε πολύτλας δῖος Ὀδυσσεύς,
Odyssey 1.447	αὐτίκʼ ἐπήρτυε πῶμα, θοῶς δʼ ἐπὶ δεσμὸν ἴηλεν
Odyssey 1.448	ποικίλον, ὅν ποτέ μιν δέδαε φρεσὶ πότνια Κίρκη·
Odyssey 1.449	αὐτόδιον δʼ ἄρα μιν ταμίη λούσασθαι ἀνώγει
Odyssey 1.450	ἔς ῥʼ ἀσάμινθον βάνθʼ· ὁ δʼ ἄρ ἀσπασίως ἴδε θυμῷ
Odyssey 1.451	θερμὰ λοέτρʼ, ἐπεὶ οὔ τι κομιζόμενός γε θάμιζεν,
Odyssey 1.452	ἐπεὶ δὴ λίπε δῶμα Καλυψοῦς ἠυκόμοιο.
Odyssey 1.453	τόφρα δέ οἱ κομιδή γε θεῷ ὣς ἔμπεδος ἦεν.
Odyssey 1.454	τὸν δʼ ἐπεὶ οὖν δμῳαὶ λοῦσαν καὶ χρῖσαν ἐλαίῳ,
Odyssey 1.455	ἀμφὶ δέ μιν χλαῖναν καλὴν βάλον ἠδὲ χιτῶνα,
Odyssey 1.456	ἔκ ῥʼ ἀσαμίνθου βὰς ἄνδρας μέτα οἰνοποτῆρας
Odyssey 1.457	ἤιε· Ναυσικάα δὲ θεῶν ἄπο κάλλος ἔχουσα
Odyssey 1.458	στῆ ῥα παρὰ σταθμὸν τέγεος πύκα ποιητοῖο,
Odyssey 1.459	θαύμαζεν δʼ Ὀδυσῆα ἐν ὀφθαλμοῖσιν ὁρῶσα,
Odyssey 1.460	καί μιν φωνήσασʼ ἔπεα πτερόεντα προσηύδα·
Odyssey 1.461	χαῖρε, ξεῖνʼ, ἵνα καί ποτʼ ἐὼν ἐν πατρίδι γαίῃ
Odyssey 1.462	μνήσῃ ἐμεῦ, ὅτι μοι πρώτῃ ζωάγριʼ ὀφέλλεις.
Odyssey 1.463	τὴν δʼ ἀπαμειβόμενος προσέφη πολύμητις Ὀδυσσεύς.
Odyssey 1.464	Ναυσικάα θύγατερ μεγαλήτορος Ἀλκινόοιο,
Odyssey 1.465	οὕτω νῦν Ζεὺς θείη, ἐρίγδουπος πόσις Ἥρης,
Odyssey 1.466	οἴκαδέ τʼ ἐλθέμεναι καὶ νόστιμον ἦμαρ ἰδέσθαι·
Odyssey 1.467	τῷ κέν τοι καὶ κεῖθι θεῷ ὣς εὐχετοῴμην
Odyssey 1.468	αἰεὶ ἤματα πάντα· σὺ γάρ μʼ ἐβιώσαο, κούρη.
Odyssey 1.469	ἦ ῥα καὶ ἐς θρόνον ἷζε παρʼ Ἀλκίνοον βασιλῆα·
Odyssey 1.470	οἱ δʼ ἤδη μοίρας τʼ ἔνεμον κερόωντό τε οἶνον.
Odyssey 1.471	κῆρυξ δʼ ἐγγύθεν ἦλθεν ἄγων ἐρίηρον ἀοιδόν,
Odyssey 1.472	Δημόδοκον λαοῖσι τετιμένον· εἷσε δʼ ἄρʼ αὐτὸν
Odyssey 1.473	μέσσῳ δαιτυμόνων, πρὸς κίονα μακρὸν ἐρείσας.
Odyssey 1.474	δὴ τότε κήρυκα προσέφη πολύμητις Ὀδυσσεύς,
Odyssey 1.475	νώτου ἀποπροταμών, ἐπὶ δὲ πλεῖον ἐλέλειπτο,
Odyssey 1.476	ἀργιόδοντος ὑός, θαλερὴ δʼ ἦν ἀμφὶς ἀλοιφή·
Odyssey 1.477	κῆρυξ, τῆ δή, τοῦτο πόρε κρέας, ὄφρα φάγῃσιν,
Odyssey 1.478	Δημοδόκῳ· καί μιν προσπτύξομαι ἀχνύμενός περ·
Odyssey 1.479	πᾶσι γὰρ ἀνθρώποισιν ἐπιχθονίοισιν ἀοιδοὶ
Odyssey 1.480	τιμῆς ἔμμοροί εἰσι καὶ αἰδοῦς, οὕνεκʼ ἄρα σφέας
Odyssey 1.481	οἴμας μοῦσʼ ἐδίδαξε, φίλησε δὲ φῦλον ἀοιδῶν.
Odyssey 1.482	ὣς ἄρʼ ἔφη, κῆρυξ δὲ φέρων ἐν χερσὶν ἔθηκεν
Odyssey 1.483	ἥρῳ Δημοδόκῳ· ὁ δʼ ἐδέξατο, χαῖρε δὲ θυμῷ.
Odyssey 1.484	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.485	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.486	δὴ τότε Δημόδοκον προσέφη πολύμητις Ὀδυσσεύς·
Odyssey 1.487	Δημόδοκʼ, ἔξοχα δή σε βροτῶν αἰνίζομʼ ἁπάντων.
Odyssey 1.488	ἢ σέ γε μοῦσʼ ἐδίδαξε, Διὸς πάϊς, ἢ σέ γʼ Ἀπόλλων·
Odyssey 1.489	λίην γὰρ κατὰ κόσμον Ἀχαιῶν οἶτον ἀείδεις,
Odyssey 1.490	ὅσσʼ ἔρξαν τʼ ἔπαθόν τε καὶ ὅσσʼ ἐμόγησαν Ἀχαιοί,
Odyssey 1.491	ὥς τέ που ἢ αὐτὸς παρεὼν ἢ ἄλλου ἀκούσας.
Odyssey 1.492	ἀλλʼ ἄγε δὴ μετάβηθι καὶ ἵππου κόσμον ἄεισον
Odyssey 1.493	δουρατέου, τὸν Ἐπειὸς ἐποίησεν σὺν Ἀθήνῃ,
Odyssey 1.494	ὅν ποτʼ ἐς ἀκρόπολιν δόλον ἤγαγε δῖος Ὀδυσσεὺς
Odyssey 1.495	ἀνδρῶν ἐμπλήσας οἵ ῥʼ Ἴλιον ἐξαλάπαξαν.
Odyssey 1.496	αἴ κεν δή μοι ταῦτα κατὰ μοῖραν καταλέξῃς,
Odyssey 1.497	αὐτίκʼ ἐγὼ πᾶσιν μυθήσομαι ἀνθρώποισιν,
Odyssey 1.498	ὡς ἄρα τοι πρόφρων θεὸς ὤπασε θέσπιν ἀοιδήν.
Odyssey 1.499	ὣς φάθʼ, ὁ δʼ ὁρμηθεὶς θεοῦ ἤρχετο, φαῖνε δʼ ἀοιδήν,
Odyssey 1.500	ἔνθεν ἑλὼν ὡς οἱ μὲν ἐυσσέλμων ἐπὶ νηῶν
Odyssey 1.501	βάντες ἀπέπλειον, πῦρ ἐν κλισίῃσι βαλόντες,
Odyssey 1.502	Ἀργεῖοι, τοὶ δʼ ἤδη ἀγακλυτὸν ἀμφʼ Ὀδυσῆα
Odyssey 1.503	ἥατʼ ἐνὶ Τρώων ἀγορῇ κεκαλυμμένοι ἵππῳ·
Odyssey 1.504	αὐτοὶ γάρ μιν Τρῶες ἐς ἀκρόπολιν ἐρύσαντο.
Odyssey 1.505	ὣς ὁ μὲν ἑστήκει, τοὶ δʼ ἄκριτα πόλλʼ ἀγόρευον
Odyssey 1.506	ἥμενοι ἀμφʼ αὐτόν· τρίχα δέ σφισιν ἥνδανε βουλή,
Odyssey 1.507	ἠὲ διαπλῆξαι κοῖλον δόρυ νηλέι χαλκῷ,
Odyssey 1.508	ἢ κατὰ πετράων βαλέειν ἐρύσαντας ἐπʼ ἄκρης,
Odyssey 1.509	ἢ ἐάαν μέγʼ ἄγαλμα θεῶν θελκτήριον εἶναι,
Odyssey 1.510	τῇ περ δὴ καὶ ἔπειτα τελευτήσεσθαι ἔμελλεν·
Odyssey 1.511	αἶσα γὰρ ἦν ἀπολέσθαι, ἐπὴν πόλις ἀμφικαλύψῃ
Odyssey 1.512	δουράτεον μέγαν ἵππον, ὅθʼ ἥατο πάντες ἄριστοι
Odyssey 1.513	Ἀργείων Τρώεσσι φόνον καὶ κῆρα φέροντες.
Odyssey 1.514	ἤειδεν δʼ ὡς ἄστυ διέπραθον υἷες Ἀχαιῶν
Odyssey 1.515	ἱππόθεν ἐκχύμενοι, κοῖλον λόχον ἐκπρολιπόντες.
Odyssey 1.516	ἄλλον δʼ ἄλλῃ ἄειδε πόλιν κεραϊζέμεν αἰπήν,
Odyssey 1.517	αὐτὰρ Ὀδυσσῆα προτὶ δώματα Δηιφόβοιο
Odyssey 1.518	βήμεναι, ἠύτʼ Ἄρηα σὺν ἀντιθέῳ Μενελάῳ.
Odyssey 1.519	κεῖθι δὴ αἰνότατον πόλεμον φάτο τολμήσαντα
Odyssey 1.520	νικῆσαι καὶ ἔπειτα διὰ μεγάθυμον Ἀθήνην.
Odyssey 1.521	ταῦτʼ ἄρʼ ἀοιδὸς ἄειδε περικλυτός· αὐτὰρ Ὀδυσσεὺς
Odyssey 1.522	τήκετο, δάκρυ δʼ ἔδευεν ὑπὸ βλεφάροισι παρειάς.
Odyssey 1.523	ὡς δὲ γυνὴ κλαίῃσι φίλον πόσιν ἀμφιπεσοῦσα,
Odyssey 1.524	ὅς τε ἑῆς πρόσθεν πόλιος λαῶν τε πέσῃσιν,
Odyssey 1.525	ἄστεϊ καὶ τεκέεσσιν ἀμύνων νηλεὲς ἦμαρ·
Odyssey 1.526	ἡ μὲν τὸν θνήσκοντα καὶ ἀσπαίροντα ἰδοῦσα
Odyssey 1.527	ἀμφʼ αὐτῷ χυμένη λίγα κωκύει· οἱ δέ τʼ ὄπισθε
Odyssey 1.528	κόπτοντες δούρεσσι μετάφρενον ἠδὲ καὶ ὤμους
Odyssey 1.529	εἴρερον εἰσανάγουσι, πόνον τʼ ἐχέμεν καὶ ὀιζύν·
Odyssey 1.530	τῆς δʼ ἐλεεινοτάτῳ ἄχεϊ φθινύθουσι παρειαί·
Odyssey 1.531	ὣς Ὀδυσεὺς ἐλεεινὸν ὑπʼ ὀφρύσι δάκρυον εἶβεν.
Odyssey 1.532	ἔνθʼ ἄλλους μὲν πάντας ἐλάνθανε δάκρυα λείβων,
Odyssey 1.533	Ἀλκίνοος δέ μιν οἶος ἐπεφράσατʼ ἠδʼ ἐνόησεν,
Odyssey 1.534	ἥμενος ἄγχʼ αὐτοῦ, βαρὺ δὲ στενάχοντος ἄκουσεν.
Odyssey 1.535	αἶψα δὲ Φαιήκεσσι φιληρέτμοισι μετηύδα·
Odyssey 1.536	κέκλυτε, Φαιήκων ἡγήτορες ἠδὲ μέδοντες,
Odyssey 1.537	Δημόδοκος δʼ ἤδη σχεθέτω φόρμιγγα λίγειαν·
Odyssey 1.538	οὐ γάρ πως πάντεσσι χαριζόμενος τάδʼ ἀείδει.
Odyssey 1.539	ἐξ οὗ δορπέομέν τε καὶ ὤρορε θεῖος ἀοιδός,
Odyssey 1.540	ἐκ τοῦ δʼ οὔ πω παύσατʼ ὀιζυροῖο γόοιο
Odyssey 1.541	ὁ ξεῖνος· μάλα πού μιν ἄχος φρένας ἀμφιβέβηκεν.
Odyssey 1.542	ἀλλʼ ἄγʼ ὁ μὲν σχεθέτω, ἵνʼ ὁμῶς τερπώμεθα πάντες,
Odyssey 1.543	ξεινοδόκοι καὶ ξεῖνος, ἐπεὶ πολὺ κάλλιον οὕτως·
Odyssey 1.544	εἵνεκα γὰρ ξείνοιο τάδʼ αἰδοίοιο τέτυκται,
Odyssey 1.545	πομπὴ καὶ φίλα δῶρα, τά οἱ δίδομεν φιλέοντες.
Odyssey 1.546	ἀντὶ κασιγνήτου ξεῖνός θʼ ἱκέτης τε τέτυκται
Odyssey 1.547	ἀνέρι, ὅς τʼ ὀλίγον περ ἐπιψαύῃ πραπίδεσσι.
Odyssey 1.548	τῷ νῦν μηδὲ σὺ κεῦθε νοήμασι κερδαλέοισιν
Odyssey 1.549	ὅττι κέ σʼ εἴρωμαι· φάσθαι δέ σε κάλλιόν ἐστιν.
Odyssey 1.550	εἴπʼ ὄνομʼ ὅττι σε κεῖθι κάλεον μήτηρ τε πατήρ τε
Odyssey 1.551	ἄλλοι θʼ οἳ κατὰ ἄστυ καὶ οἳ περιναιετάουσιν.
Odyssey 1.552	οὐ μὲν γάρ τις πάμπαν ἀνώνυμός ἐστʼ ἀνθρώπων,
Odyssey 1.553	οὐ κακὸς οὐδὲ μὲν ἐσθλός, ἐπὴν τὰ πρῶτα γένηται,
Odyssey 1.554	ἀλλʼ ἐπὶ πᾶσι τίθενται, ἐπεί κε τέκωσι, τοκῆες.
Odyssey 1.555	εἰπὲ δέ μοι γαῖάν τε· τεὴν δῆμόν τε πόλιν τε,
Odyssey 1.556	ὄφρα σε τῇ πέμπωσι τιτυσκόμεναι φρεσὶ νῆες·
Odyssey 1.557	οὐ γὰρ Φαιήκεσσι κυβερνητῆρες ἔασιν,
Odyssey 1.558	οὐδέ τι πηδάλιʼ ἔστι, τά τʼ ἄλλαι νῆες ἔχουσιν·
Odyssey 1.559	ἀλλʼ αὐταὶ ἴσασι νοήματα καὶ φρένας ἀνδρῶν,
Odyssey 1.560	καὶ πάντων ἴσασι πόλιας καὶ πίονας ἀγροὺς
Odyssey 1.561	ἀνθρώπων, καὶ λαῖτμα τάχισθʼ ἁλὸς ἐκπερόωσιν
Odyssey 1.562	ἠέρι καὶ νεφέλῃ κεκαλυμμέναι· οὐδέ ποτέ σφιν
Odyssey 1.563	οὔτε τι πημανθῆναι ἔπι δέος οὔτʼ ἀπολέσθαι.
Odyssey 1.564	ἀλλὰ τόδʼ ὥς ποτε πατρὸς ἐγὼν εἰπόντος ἄκουσα
Odyssey 1.565	Ναυσιθόου, ὃς ἔφασκε Ποσειδάωνʼ ἀγάσασθαι
Odyssey 1.566	ἡμῖν, οὕνεκα πομποὶ ἀπήμονές εἰμεν ἁπάντων.
Odyssey 1.567	φῆ ποτὲ Φαιήκων ἀνδρῶν ἐυεργέα νῆα
Odyssey 1.568	ἐκ πομπῆς ἀνιοῦσαν ἐν ἠεροειδέι πόντῳ
Odyssey 1.569	ῥαισέμεναι, μέγα δʼ ἧμιν ὄρος πόλει ἀμφικαλύψειν.
Odyssey 1.570	ὣς ἀγόρευʼ ὁ γέρων· τὰ δέ κεν θεὸς ἢ τελέσειεν
Odyssey 1.571	ἤ κʼ ἀτέλεστʼ εἴη, ὥς οἱ φίλον ἔπλετο θυμῷ·
Odyssey 1.572	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Odyssey 1.573	ὅππῃ ἀπεπλάγχθης τε καὶ ἅς τινας ἵκεο χώρας
Odyssey 1.574	ἀνθρώπων, αὐτούς τε πόλιάς τʼ ἐὺ ναιετοώσας,
Odyssey 1.575	ἠμὲν ὅσοι χαλεποί τε καὶ ἄγριοι οὐδὲ δίκαιοι,
Odyssey 1.576	οἵ τε φιλόξεινοι, καί σφιν νόος ἐστὶ θεουδής.
Odyssey 1.577	εἰπὲ δʼ ὅ τι κλαίεις καὶ ὀδύρεαι ἔνδοθι θυμῷ
Odyssey 1.578	Ἀργείων Δαναῶν ἠδʼ Ἰλίου οἶτον ἀκούων.
Odyssey 1.579	τὸν δὲ θεοὶ μὲν τεῦξαν, ἐπεκλώσαντο δʼ ὄλεθρον
Odyssey 1.580	ἀνθρώποις, ἵνα ᾖσι καὶ ἐσσομένοισιν ἀοιδή.
Odyssey 1.581	ἦ τίς τοι καὶ πηὸς ἀπέφθιτο Ἰλιόθι πρὸ
Odyssey 1.582	ἐσθλὸς ἐών, γαμβρὸς ἢ πενθερός, οἵ τε μάλιστα
Odyssey 1.583	κήδιστοι τελέθουσι μεθʼ αἷμά τε καὶ γένος αὐτῶν;
Odyssey 1.584	ἦ τίς που καὶ ἑταῖρος ἀνὴρ κεχαρισμένα εἰδώς,
Odyssey 1.585	ἐσθλός; ἐπεὶ οὐ μέν τι κασιγνήτοιο χερείων
Odyssey 1.586	γίγνεται, ὅς κεν ἑταῖρος ἐὼν πεπνυμένα εἰδῇ.
Odyssey 1.1	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.2	Ἀλκίνοε κρεῖον, πάντων ἀριδείκετε λαῶν,
Odyssey 1.3	ἦ τοι μὲν τόδε καλὸν ἀκουέμεν ἐστὶν ἀοιδοῦ
Odyssey 1.4	τοιοῦδʼ οἷος ὅδʼ ἐστί, θεοῖς ἐναλίγκιος αὐδήν.
Odyssey 1.5	οὐ γὰρ ἐγώ γέ τί φημι τέλος χαριέστερον εἶναι
Odyssey 1.6	ἢ ὅτʼ ἐυφροσύνη μὲν ἔχῃ κάτα δῆμον ἅπαντα,
Odyssey 1.7	δαιτυμόνες δʼ ἀνὰ δώματʼ ἀκουάζωνται ἀοιδοῦ
Odyssey 1.8	ἥμενοι ἑξείης, παρὰ δὲ πλήθωσι τράπεζαι
Odyssey 1.9	σίτου καὶ κρειῶν, μέθυ δʼ ἐκ κρητῆρος ἀφύσσων
Odyssey 1.10	οἰνοχόος φορέῃσι καὶ ἐγχείῃ δεπάεσσι·
Odyssey 1.11	τοῦτό τί μοι κάλλιστον ἐνὶ φρεσὶν εἴδεται εἶναι.
Odyssey 1.12	σοὶ δʼ ἐμὰ κήδεα θυμὸς ἐπετράπετο στονόεντα
Odyssey 1.13	εἴρεσθʼ, ὄφρʼ ἔτι μᾶλλον ὀδυρόμενος στεναχίζω·
Odyssey 1.14	τί πρῶτόν τοι ἔπειτα, τί δʼ ὑστάτιον καταλέξω;
Odyssey 1.15	κήδεʼ ἐπεί μοι πολλὰ δόσαν θεοὶ Οὐρανίωνες.
Odyssey 1.16	νῦν δʼ ὄνομα πρῶτον μυθήσομαι, ὄφρα καὶ ὑμεῖς
Odyssey 1.17	εἴδετʼ, ἐγὼ δʼ ἂν ἔπειτα φυγὼν ὕπο νηλεὲς ἦμαρ
Odyssey 1.18	ὑμῖν ξεῖνος ἔω καὶ ἀπόπροθι δώματα ναίων.
Odyssey 1.19	εἴμʼ Ὀδυσεὺς Λαερτιάδης, ὃς πᾶσι δόλοισιν
Odyssey 1.20	ἀνθρώποισι μέλω, καί μευ κλέος οὐρανὸν ἵκει.
Odyssey 1.21	ναιετάω δʼ Ἰθάκην ἐυδείελον· ἐν δʼ ὄρος αὐτῇ
Odyssey 1.22	Νήριτον εἰνοσίφυλλον, ἀριπρεπές· ἀμφὶ δὲ νῆσοι
Odyssey 1.23	πολλαὶ ναιετάουσι μάλα σχεδὸν ἀλλήλῃσι,
Odyssey 1.24	Δουλίχιόν τε Σάμη τε καὶ ὑλήεσσα Ζάκυνθος.
Odyssey 1.25	αὐτὴ δὲ χθαμαλὴ πανυπερτάτη εἰν ἁλὶ κεῖται
Odyssey 1.26	πρὸς ζόφον, αἱ δέ τʼ ἄνευθε πρὸς ἠῶ τʼ ἠέλιόν τε,
Odyssey 1.27	τρηχεῖʼ, ἀλλʼ ἀγαθὴ κουροτρόφος· οὔ τοι ἐγώ γε
Odyssey 1.28	ἧς γαίης δύναμαι γλυκερώτερον ἄλλο ἰδέσθαι.
Odyssey 1.29	ἦ μέν μʼ αὐτόθʼ ἔρυκε Καλυψώ, δῖα θεάων,
Odyssey 1.30	ἐν σπέσσι γλαφυροῖσι, λιλαιομένη πόσιν εἶναι·
Odyssey 1.31	ὣς δʼ αὔτως Κίρκη κατερήτυεν ἐν μεγάροισιν
Odyssey 1.32	Αἰαίη δολόεσσα, λιλαιομένη πόσιν εἶναι·
Odyssey 1.33	ἀλλʼ ἐμὸν οὔ ποτε θυμὸν ἐνὶ στήθεσσιν ἔπειθον.
Odyssey 1.34	ὣς οὐδὲν γλύκιον ἧς πατρίδος οὐδὲ τοκήων
Odyssey 1.35	γίγνεται, εἴ περ καί τις ἀπόπροθι πίονα οἶκον
Odyssey 1.36	γαίῃ ἐν ἀλλοδαπῇ ναίει ἀπάνευθε τοκήων.
Odyssey 1.37	εἰ δʼ ἄγε τοι καὶ νόστον ἐμὸν πολυκηδέʼ ἐνίσπω,
Odyssey 1.38	ὅν μοι Ζεὺς ἐφέηκεν ἀπὸ Τροίηθεν ἰόντι.
Odyssey 1.39	Ἰλιόθεν με φέρων ἄνεμος Κικόνεσσι πέλασσεν,
Odyssey 1.40	Ἰσμάρῳ. ἔνθα δʼ ἐγὼ πόλιν ἔπραθον, ὤλεσα δʼ αὐτούς·
Odyssey 1.41	ἐκ πόλιος δʼ ἀλόχους καὶ κτήματα πολλὰ λαβόντες
Odyssey 1.42	δασσάμεθʼ, ὡς μή τίς μοι ἀτεμβόμενος κίοι ἴσης.
Odyssey 1.43	ἔνθʼ ἦ τοι μὲν ἐγὼ διερῷ ποδὶ φευγέμεν ἡμέας
Odyssey 1.44	ἠνώγεα, τοὶ δὲ μέγα νήπιοι οὐκ ἐπίθοντο.
Odyssey 1.45	ἔνθα δὲ πολλὸν μὲν μέθυ πίνετο, πολλὰ δὲ μῆλα
Odyssey 1.46	ἔσφαζον παρὰ θῖνα καὶ εἰλίποδας ἕλικας βοῦς·
Odyssey 1.47	τόφρα δʼ ἄρʼ οἰχόμενοι Κίκονες Κικόνεσσι γεγώνευν,
Odyssey 1.48	οἵ σφιν γείτονες ἦσαν, ἅμα πλέονες καὶ ἀρείους,
Odyssey 1.49	ἤπειρον ναίοντες, ἐπιστάμενοι μὲν ἀφʼ ἵππων
Odyssey 1.50	ἀνδράσι μάρνασθαι καὶ ὅθι χρὴ πεζὸν ἐόντα.
Odyssey 1.51	ἦλθον ἔπειθʼ ὅσα φύλλα καὶ ἄνθεα γίγνεται ὥρῃ,
Odyssey 1.52	ἠέριοι· τότε δή ῥα κακὴ Διὸς αἶσα παρέστη
Odyssey 1.53	ἡμῖν αἰνομόροισιν, ἵνʼ ἄλγεα πολλὰ πάθοιμεν.
Odyssey 1.54	στησάμενοι δʼ ἐμάχοντο μάχην παρὰ νηυσὶ θοῇσι,
Odyssey 1.55	βάλλον δʼ ἀλλήλους χαλκήρεσιν ἐγχείῃσιν.
Odyssey 1.56	ὄφρα μὲν ἠὼς ἦν καὶ ἀέξετο ἱερὸν ἦμαρ,
Odyssey 1.57	τόφρα δʼ ἀλεξόμενοι μένομεν πλέονάς περ ἐόντας.
Odyssey 1.58	ἦμος δʼ ἠέλιος μετενίσσετο βουλυτόνδε,
Odyssey 1.59	καὶ τότε δὴ Κίκονες κλῖναν δαμάσαντες Ἀχαιούς.
Odyssey 1.60	ἓξ δʼ ἀφʼ ἑκάστης νηὸς ἐυκνήμιδες ἑταῖροι
Odyssey 1.61	ὤλονθʼ· οἱ δʼ ἄλλοι φύγομεν θάνατόν τε μόρον τε.
Odyssey 1.62	ἔνθεν δὲ προτέρω πλέομεν ἀκαχήμενοι ἦτορ,
Odyssey 1.63	ἄσμενοι ἐκ θανάτοιο, φίλους ὀλέσαντες ἑταίρους.
Odyssey 1.64	οὐδʼ ἄρα μοι προτέρω νῆες κίον ἀμφιέλισσαι,
Odyssey 1.65	πρίν τινα τῶν δειλῶν ἑτάρων τρὶς ἕκαστον ἀῦσαι,
Odyssey 1.66	οἳ θάνον ἐν πεδίῳ Κικόνων ὕπο δῃωθέντες.
Odyssey 1.67	νηυσὶ δʼ ἐπῶρσʼ ἄνεμον Βορέην νεφεληγερέτα Ζεὺς
Odyssey 1.68	λαίλαπι θεσπεσίῃ, σὺν δὲ νεφέεσσι κάλυψε
Odyssey 1.69	γαῖαν ὁμοῦ καὶ πόντον· ὀρώρει δʼ οὐρανόθεν νύξ.
Odyssey 1.70	αἱ μὲν ἔπειτʼ ἐφέροντʼ ἐπικάρσιαι, ἱστία δέ σφιν
Odyssey 1.71	τριχθά τε καὶ τετραχθὰ διέσχισεν ἲς ἀνέμοιο.
Odyssey 1.72	καὶ τὰ μὲν ἐς νῆας κάθεμεν, δείσαντες ὄλεθρον,
Odyssey 1.73	αὐτὰς δʼ ἐσσυμένως προερέσσαμεν ἤπειρόνδε.
Odyssey 1.74	ἔνθα δύω νύκτας δύο τʼ ἤματα συνεχὲς αἰεὶ
Odyssey 1.75	κείμεθʼ, ὁμοῦ καμάτῳ τε καὶ ἄλγεσι θυμὸν ἔδοντες.
Odyssey 1.76	ἀλλʼ ὅτε δὴ τρίτον ἦμαρ ἐυπλόκαμος τέλεσʼ Ἠώς,
Odyssey 1.77	ἱστοὺς στησάμενοι ἀνά θʼ ἱστία λεύκʼ ἐρύσαντες
Odyssey 1.78	ἥμεθα, τὰς δʼ ἄνεμός τε κυβερνῆταί τʼ ἴθυνον.
Odyssey 1.79	καί νύ κεν ἀσκηθὴς ἱκόμην ἐς πατρίδα γαῖαν·
Odyssey 1.80	ἀλλά με κῦμα ῥόος τε περιγνάμπτοντα Μάλειαν
Odyssey 1.81	καὶ Βορέης ἀπέωσε, παρέπλαγξεν δὲ Κυθήρων.
Odyssey 1.82	ἔνθεν δʼ ἐννῆμαρ φερόμην ὀλοοῖς ἀνέμοισιν
Odyssey 1.83	πόντον ἐπʼ ἰχθυόεντα· ἀτὰρ δεκάτῃ ἐπέβημεν
Odyssey 1.84	γαίης Λωτοφάγων, οἵ τʼ ἄνθινον εἶδαρ ἔδουσιν.
Odyssey 1.85	ἔνθα δʼ ἐπʼ ἠπείρου βῆμεν καὶ ἀφυσσάμεθʼ ὕδωρ,
Odyssey 1.86	αἶψα δὲ δεῖπνον ἕλοντο θοῇς παρὰ νηυσὶν ἑταῖροι.
Odyssey 1.87	αὐτὰρ ἐπεὶ σίτοιό τʼ ἐπασσάμεθʼ ἠδὲ ποτῆτος,
Odyssey 1.88	δὴ τότʼ ἐγὼν ἑτάρους προΐειν πεύθεσθαι ἰόντας,
Odyssey 1.89	οἵ τινες ἀνέρες εἶεν ἐπὶ χθονὶ σῖτον ἔδοντες
Odyssey 1.90	ἄνδρε δύω κρίνας, τρίτατον κήρυχʼ ἅμʼ ὀπάσσας.
Odyssey 1.91	οἱ δʼ αἶψʼ οἰχόμενοι μίγεν ἀνδράσι Λωτοφάγοισιν·
Odyssey 1.92	οὐδʼ ἄρα Λωτοφάγοι μήδονθʼ ἑτάροισιν ὄλεθρον
Odyssey 1.93	ἡμετέροις, ἀλλά σφι δόσαν λωτοῖο πάσασθαι.
Odyssey 1.94	τῶν δʼ ὅς τις λωτοῖο φάγοι μελιηδέα καρπόν,
Odyssey 1.95	οὐκέτʼ ἀπαγγεῖλαι πάλιν ἤθελεν οὐδὲ νέεσθαι,
Odyssey 1.96	ἀλλʼ αὐτοῦ βούλοντο μετʼ ἀνδράσι Λωτοφάγοισι
Odyssey 1.97	λωτὸν ἐρεπτόμενοι μενέμεν νόστου τε λαθέσθαι.
Odyssey 1.98	τοὺς μὲν ἐγὼν ἐπὶ νῆας ἄγον κλαίοντας ἀνάγκῃ,
Odyssey 1.99	νηυσὶ δʼ ἐνὶ γλαφυρῇσιν ὑπὸ ζυγὰ δῆσα ἐρύσσας.
Odyssey 1.100	αὐτὰρ τοὺς ἄλλους κελόμην ἐρίηρας ἑταίρους
Odyssey 1.101	σπερχομένους νηῶν ἐπιβαινέμεν ὠκειάων,
Odyssey 1.102	μή πώς τις λωτοῖο φαγὼν νόστοιο λάθηται.
Odyssey 1.103	οἱ δʼ αἶψʼ εἴσβαινον καὶ ἐπὶ κληῖσι καθῖζον,
Odyssey 1.104	ἑξῆς δʼ ἑζόμενοι πολιὴν ἅλα τύπτον ἐρετμοῖς.
Odyssey 1.105	ἔνθεν δὲ προτέρω πλέομεν ἀκαχήμενοι ἦτορ·
Odyssey 1.106	Κυκλώπων δʼ ἐς γαῖαν ὑπερφιάλων ἀθεμίστων
Odyssey 1.107	ἱκόμεθʼ, οἵ ῥα θεοῖσι πεποιθότες ἀθανάτοισιν
Odyssey 1.108	οὔτε φυτεύουσιν χερσὶν φυτὸν οὔτʼ ἀρόωσιν,
Odyssey 1.109	ἀλλὰ τά γʼ ἄσπαρτα καὶ ἀνήροτα πάντα φύονται,
Odyssey 1.110	πυροὶ καὶ κριθαὶ ἠδʼ ἄμπελοι, αἵ τε φέρουσιν
Odyssey 1.111	οἶνον ἐριστάφυλον, καί σφιν Διὸς ὄμβρος ἀέξει.
Odyssey 1.112	τοῖσιν δʼ οὔτʼ ἀγοραὶ βουληφόροι οὔτε θέμιστες,
Odyssey 1.113	ἀλλʼ οἵ γʼ ὑψηλῶν ὀρέων ναίουσι κάρηνα
Odyssey 1.114	ἐν σπέσσι γλαφυροῖσι, θεμιστεύει δὲ ἕκαστος
Odyssey 1.115	παίδων ἠδʼ ἀλόχων, οὐδʼ ἀλλήλων ἀλέγουσιν.
Odyssey 1.116	νῆσος ἔπειτα λάχεια παρὲκ λιμένος τετάνυσται,
Odyssey 1.117	γαίης Κυκλώπων οὔτε σχεδὸν οὔτʼ ἀποτηλοῦ,
Odyssey 1.118	ὑλήεσσʼ· ἐν δʼ αἶγες ἀπειρέσιαι γεγάασιν
Odyssey 1.119	ἄγριαι· οὐ μὲν γὰρ πάτος ἀνθρώπων ἀπερύκει,
Odyssey 1.120	οὐδέ μιν εἰσοιχνεῦσι κυνηγέται, οἵ τε καθʼ ὕλην
Odyssey 1.121	ἄλγεα πάσχουσιν κορυφὰς ὀρέων ἐφέποντες.
Odyssey 1.122	οὔτʼ ἄρα ποίμνῃσιν καταΐσχεται οὔτʼ ἀρότοισιν,
Odyssey 1.123	ἀλλʼ ἥ γʼ ἄσπαρτος καὶ ἀνήροτος ἤματα πάντα
Odyssey 1.124	ἀνδρῶν χηρεύει, βόσκει δέ τε μηκάδας αἶγας.
Odyssey 1.125	οὐ γὰρ Κυκλώπεσσι νέες πάρα μιλτοπάρῃοι,
Odyssey 1.126	οὐδʼ ἄνδρες νηῶν ἔνι τέκτονες, οἵ κε κάμοιεν
Odyssey 1.127	νῆας ἐυσσέλμους, αἵ κεν τελέοιεν ἕκαστα
Odyssey 1.128	ἄστεʼ ἐπʼ ἀνθρώπων ἱκνεύμεναι, οἷά τε πολλὰ
Odyssey 1.129	ἄνδρες ἐπʼ ἀλλήλους νηυσὶν περόωσι θάλασσαν·
Odyssey 1.130	οἵ κέ σφιν καὶ νῆσον ἐυκτιμένην ἐκάμοντο.
Odyssey 1.131	οὐ μὲν γάρ τι κακή γε, φέροι δέ κεν ὥρια πάντα·
Odyssey 1.132	ἐν μὲν γὰρ λειμῶνες ἁλὸς πολιοῖο παρʼ ὄχθας
Odyssey 1.133	ὑδρηλοὶ μαλακοί· μάλα κʼ ἄφθιτοι ἄμπελοι εἶεν.
Odyssey 1.134	ἐν δʼ ἄροσις λείη· μάλα κεν βαθὺ λήιον αἰεὶ
Odyssey 1.135	εἰς ὥρας ἀμῷεν, ἐπεὶ μάλα πῖαρ ὑπʼ οὖδας.
Odyssey 1.136	ἐν δὲ λιμὴν ἐύορμος, ἵνʼ οὐ χρεὼ πείσματός ἐστιν,
Odyssey 1.137	οὔτʼ εὐνὰς βαλέειν οὔτε πρυμνήσιʼ ἀνάψαι,
Odyssey 1.138	ἀλλʼ ἐπικέλσαντας μεῖναι χρόνον εἰς ὅ κε ναυτέων
Odyssey 1.139	θυμὸς ἐποτρύνῃ καὶ ἐπιπνεύσωσιν ἀῆται.
Odyssey 1.140	αὐτὰρ ἐπὶ κρατὸς λιμένος ῥέει ἀγλαὸν ὕδωρ,
Odyssey 1.141	κρήνη ὑπὸ σπείους· περὶ δʼ αἴγειροι πεφύασιν.
Odyssey 1.142	ἔνθα κατεπλέομεν, καί τις θεὸς ἡγεμόνευεν
Odyssey 1.143	νύκτα διʼ ὀρφναίην, οὐδὲ προυφαίνετʼ ἰδέσθαι·
Odyssey 1.144	ἀὴρ γὰρ περὶ νηυσὶ βαθεῖʼ ἦν, οὐδὲ σελήνη
Odyssey 1.145	οὐρανόθεν προύφαινε, κατείχετο δὲ νεφέεσσιν.
Odyssey 1.146	ἔνθʼ οὔ τις τὴν νῆσον ἐσέδρακεν ὀφθαλμοῖσιν,
Odyssey 1.147	οὔτʼ οὖν κύματα μακρὰ κυλινδόμενα προτὶ χέρσον
Odyssey 1.148	εἰσίδομεν, πρὶν νῆας ἐυσσέλμους ἐπικέλσαι.
Odyssey 1.149	κελσάσῃσι δὲ νηυσὶ καθείλομεν ἱστία πάντα,
Odyssey 1.150	ἐκ δὲ καὶ αὐτοὶ βῆμεν ἐπὶ ῥηγμῖνι θαλάσσης·
Odyssey 1.151	ἔνθα δʼ ἀποβρίξαντες ἐμείναμεν Ἠῶ δῖαν.
Odyssey 1.152	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.153	νῆσον θαυμάζοντες ἐδινεόμεσθα κατʼ αὐτήν.
Odyssey 1.154	ὦρσαν δὲ νύμφαι, κοῦραι Διὸς αἰγιόχοιο,
Odyssey 1.155	αἶγας ὀρεσκῴους, ἵνα δειπνήσειαν ἑταῖροι.
Odyssey 1.156	αὐτίκα καμπύλα τόξα καὶ αἰγανέας δολιχαύλους
Odyssey 1.157	εἱλόμεθʼ ἐκ νηῶν, διὰ δὲ τρίχα κοσμηθέντες
Odyssey 1.158	βάλλομεν· αἶψα δʼ ἔδωκε θεὸς μενοεικέα θήρην.
Odyssey 1.159	νῆες μέν μοι ἕποντο δυώδεκα, ἐς δὲ ἑκάστην
Odyssey 1.160	ἐννέα λάγχανον αἶγες· ἐμοὶ δὲ δέκʼ ἔξελον οἴῳ.
Odyssey 1.161	ὣς τότε μὲν πρόπαν ἦμαρ ἐς ἠέλιον καταδύντα
Odyssey 1.162	ἥμεθα δαινύμενοι κρέα τʼ ἄσπετα καὶ μέθυ ἡδύ·
Odyssey 1.163	οὐ γάρ πω νηῶν ἐξέφθιτο οἶνος ἐρυθρός,
Odyssey 1.164	ἀλλʼ ἐνέην· πολλὸν γὰρ ἐν ἀμφιφορεῦσιν ἕκαστοι
Odyssey 1.165	ἠφύσαμεν Κικόνων. ἱερὸν πτολίεθρον ἑλόντες.
Odyssey 1.166	Κυκλώπων δʼ ἐς γαῖαν ἐλεύσσομεν ἐγγὺς ἐόντων,
Odyssey 1.167	καπνόν τʼ αὐτῶν τε φθογγὴν ὀίων τε καὶ αἰγῶν.
Odyssey 1.168	ἦμος δʼ ἠέλιος κατέδυ καὶ ἐπὶ κνέφας ἦλθε,
Odyssey 1.169	δὴ τότε κοιμήθημεν ἐπὶ ῥηγμῖνι θαλάσσης.
Odyssey 1.170	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.171	καὶ τότʼ ἐγὼν ἀγορὴν θέμενος μετὰ πᾶσιν ἔειπον·
Odyssey 1.172	ἄλλοι μὲν νῦν μίμνετʼ, ἐμοὶ ἐρίηρες ἑταῖροι·
Odyssey 1.173	αὐτὰρ ἐγὼ σὺν νηί τʼ ἐμῇ καὶ ἐμοῖς ἑτάροισιν
Odyssey 1.174	ἐλθὼν τῶνδʼ ἀνδρῶν πειρήσομαι, οἵ τινές εἰσιν,
Odyssey 1.175	ἤ ῥʼ οἵ γʼ ὑβρισταί τε καὶ ἄγριοι οὐδὲ δίκαιοι,
Odyssey 1.176	ἦε φιλόξεινοι, καί σφιν νόος ἐστὶ θεουδής.
Odyssey 1.177	ὣς εἰπὼν ἀνὰ νηὸς ἔβην, ἐκέλευσα δʼ ἑταίρους
Odyssey 1.178	αὐτούς τʼ ἀμβαίνειν ἀνά τε πρυμνήσια λῦσαι.
Odyssey 1.179	οἱ δʼ αἶψʼ εἴσβαινον καὶ ἐπὶ κληῖσι καθῖζον,
Odyssey 1.180	ἑξῆς δʼ ἑζόμενοι πολιὴν ἅλα τύπτον ἐρετμοῖς.
Odyssey 1.181	ἀλλʼ ὅτε δὴ τὸν χῶρον ἀφικόμεθʼ ἐγγὺς ἐόντα,
Odyssey 1.182	ἔνθα δʼ ἐπʼ ἐσχατιῇ σπέος εἴδομεν ἄγχι θαλάσσης,
Odyssey 1.183	ὑψηλόν, δάφνῃσι κατηρεφές. ἔνθα δὲ πολλὰ
Odyssey 1.184	μῆλʼ, ὄιές τε καὶ αἶγες, ἰαύεσκον· περὶ δʼ αὐλὴ
Odyssey 1.185	ὑψηλὴ δέδμητο κατωρυχέεσσι λίθοισι
Odyssey 1.186	μακρῇσίν τε πίτυσσιν ἰδὲ δρυσὶν ὑψικόμοισιν.
Odyssey 1.187	ἔνθα δʼ ἀνὴρ ἐνίαυε πελώριος, ὅς ῥα τὰ μῆλα
Odyssey 1.188	οἶος ποιμαίνεσκεν ἀπόπροθεν· οὐδὲ μετʼ ἄλλους
Odyssey 1.189	πωλεῖτʼ, ἀλλʼ ἀπάνευθεν ἐὼν ἀθεμίστια ᾔδη.
Odyssey 1.190	καὶ γὰρ θαῦμʼ ἐτέτυκτο πελώριον, οὐδὲ ἐῴκει
Odyssey 1.191	ἀνδρί γε σιτοφάγῳ, ἀλλὰ ῥίῳ ὑλήεντι
Odyssey 1.192	ὑψηλῶν ὀρέων, ὅ τε φαίνεται οἶον ἀπʼ ἄλλων.
Odyssey 1.193	δὴ τότε τοὺς ἄλλους κελόμην ἐρίηρας ἑταίρους
Odyssey 1.194	αὐτοῦ πὰρ νηί τε μένειν καὶ νῆα ἔρυσθαι,
Odyssey 1.195	αὐτὰρ ἐγὼ κρίνας ἑτάρων δυοκαίδεκʼ ἀρίστους
Odyssey 1.196	βῆν· ἀτὰρ αἴγεον ἀσκὸν ἔχον μέλανος οἴνοιο
Odyssey 1.197	ἡδέος, ὅν μοι ἔδωκε Μάρων, Ἐυάνθεος υἱός,
Odyssey 1.198	ἱρεὺς Ἀπόλλωνος, ὃς Ἴσμαρον ἀμφιβεβήκει,
Odyssey 1.199	οὕνεκά μιν σὺν παιδὶ περισχόμεθʼ ἠδὲ γυναικὶ
Odyssey 1.200	ἁζόμενοι· ᾤκει γὰρ ἐν ἄλσεϊ δενδρήεντι
Odyssey 1.201	Φοίβου Ἀπόλλωνος. ὁ δέ μοι πόρεν ἀγλαὰ δῶρα·
Odyssey 1.202	χρυσοῦ μέν μοι ἔδωκʼ ἐυεργέος ἑπτὰ τάλαντα,
Odyssey 1.203	δῶκε δέ μοι κρητῆρα πανάργυρον, αὐτὰρ ἔπειτα
Odyssey 1.204	οἶνον ἐν ἀμφιφορεῦσι δυώδεκα πᾶσιν ἀφύσσας
Odyssey 1.205	ἡδὺν ἀκηράσιον, θεῖον ποτόν· οὐδέ τις αὐτὸν
Odyssey 1.206	ἠείδη δμώων οὐδʼ ἀμφιπόλων ἐνὶ οἴκῳ,
Odyssey 1.207	ἀλλʼ αὐτὸς ἄλοχός τε φίλη ταμίη τε μίʼ οἴη.
Odyssey 1.208	τὸν δʼ ὅτε πίνοιεν μελιηδέα οἶνον ἐρυθρόν,
Odyssey 1.209	ἓν δέπας ἐμπλήσας ὕδατος ἀνὰ εἴκοσι μέτρα
Odyssey 1.210	χεῦʼ, ὀδμὴ δʼ ἡδεῖα ἀπὸ κρητῆρος ὀδώδει
Odyssey 1.211	θεσπεσίη· τότʼ ἂν οὔ τοι ἀποσχέσθαι φίλον ἦεν.
Odyssey 1.212	τοῦ φέρον ἐμπλήσας ἀσκὸν μέγαν, ἐν δὲ καὶ ᾖα
Odyssey 1.213	κωρύκῳ· αὐτίκα γάρ μοι ὀίσατο θυμὸς ἀγήνωρ
Odyssey 1.214	ἄνδρʼ ἐπελεύσεσθαι μεγάλην ἐπιειμένον ἀλκήν,
Odyssey 1.215	ἄγριον, οὔτε δίκας ἐὺ εἰδότα οὔτε θέμιστας.
Odyssey 1.216	καρπαλίμως δʼ εἰς ἄντρον ἀφικόμεθʼ, οὐδέ μιν ἔνδον
Odyssey 1.217	εὕρομεν, ἀλλʼ ἐνόμευε νομὸν κάτα πίονα μῆλα.
Odyssey 1.218	ἐλθόντες δʼ εἰς ἄντρον ἐθηεύμεσθα ἕκαστα.
Odyssey 1.219	ταρσοὶ μὲν τυρῶν βρῖθον, στείνοντο δὲ σηκοὶ
Odyssey 1.220	ἀρνῶν ἠδʼ ἐρίφων· διακεκριμέναι δὲ ἕκασται
Odyssey 1.221	ἔρχατο, χωρὶς μὲν πρόγονοι, χωρὶς δὲ μέτασσαι,
Odyssey 1.222	χωρὶς δʼ αὖθʼ ἕρσαι. ναῖον δʼ ὀρῷ ἄγγεα πάντα,
Odyssey 1.223	γαυλοί τε σκαφίδες τε, τετυγμένα, τοῖς ἐνάμελγεν.
Odyssey 1.224	ἔνθʼ ἐμὲ μὲν πρώτισθʼ ἕταροι λίσσοντʼ ἐπέεσσιν
Odyssey 1.225	τυρῶν αἰνυμένους ἰέναι πάλιν, αὐτὰρ ἔπειτα
Odyssey 1.226	καρπαλίμως ἐπὶ νῆα θοὴν ἐρίφους τε καὶ ἄρνας
Odyssey 1.227	σηκῶν ἐξελάσαντας ἐπιπλεῖν ἁλμυρὸν ὕδωρ·
Odyssey 1.228	ἀλλʼ ἐγὼ οὐ πιθόμην, ἦ τʼ ἂν πολὺ κέρδιον ἦεν,
Odyssey 1.229	ὄφρʼ αὐτόν τε ἴδοιμι, καὶ εἴ μοι ξείνια δοίη.
Odyssey 1.230	οὐδʼ ἄρʼ ἔμελλʼ ἑτάροισι φανεὶς ἐρατεινὸς ἔσεσθαι.
Odyssey 1.231	ἔνθα δὲ πῦρ κήαντες ἐθύσαμεν ἠδὲ καὶ αὐτοὶ
Odyssey 1.232	τυρῶν αἰνύμενοι φάγομεν, μένομέν τέ μιν ἔνδον
Odyssey 1.233	ἥμενοι, ἧος ἐπῆλθε νέμων. φέρε δʼ ὄβριμον ἄχθος
Odyssey 1.234	ὕλης ἀζαλέης, ἵνα οἱ ποτιδόρπιον εἴη,
Odyssey 1.235	ἔντοσθεν δʼ ἄντροιο βαλὼν ὀρυμαγδὸν ἔθηκεν·
Odyssey 1.236	ἡμεῖς δὲ δείσαντες ἀπεσσύμεθʼ ἐς μυχὸν ἄντρου.
Odyssey 1.237	αὐτὰρ ὅ γʼ εἰς εὐρὺ σπέος ἤλασε πίονα μῆλα
Odyssey 1.238	πάντα μάλʼ ὅσσʼ ἤμελγε, τὰ δʼ ἄρσενα λεῖπε θύρηφιν,
Odyssey 1.239	ἀρνειούς τε τράγους τε, βαθείης ἔκτοθεν αὐλῆς.
Odyssey 1.240	αὐτὰρ ἔπειτʼ ἐπέθηκε θυρεὸν μέγαν ὑψόσʼ ἀείρας,
Odyssey 1.241	ὄβριμον· οὐκ ἂν τόν γε δύω καὶ εἴκοσʼ ἄμαξαι
Odyssey 1.242	ἐσθλαὶ τετράκυκλοι ἀπʼ οὔδεος ὀχλίσσειαν·
Odyssey 1.243	τόσσην ἠλίβατον πέτρην ἐπέθηκε θύρῃσιν.
Odyssey 1.244	ἑζόμενος δʼ ἤμελγεν ὄις καὶ μηκάδας αἶγας,
Odyssey 1.245	πάντα κατὰ μοῖραν, καὶ ὑπʼ ἔμβρυον ἧκεν ἑκάστῃ.
Odyssey 1.246	αὐτίκα δʼ ἥμισυ μὲν θρέψας λευκοῖο γάλακτος
Odyssey 1.247	πλεκτοῖς ἐν ταλάροισιν ἀμησάμενος κατέθηκεν,
Odyssey 1.248	ἥμισυ δʼ αὖτʼ ἔστησεν ἐν ἄγγεσιν, ὄφρα οἱ εἴη
Odyssey 1.249	πίνειν αἰνυμένῳ καί οἱ ποτιδόρπιον εἴη.
Odyssey 1.250	αὐτὰρ ἐπεὶ δὴ σπεῦσε πονησάμενος τὰ ἃ ἔργα,
Odyssey 1.251	καὶ τότε πῦρ ἀνέκαιε καὶ εἴσιδεν, εἴρετο δʼ ἡμέας·
Odyssey 1.252	ὦ ξεῖνοι, τίνες ἐστέ; πόθεν πλεῖθʼ ὑγρὰ κέλευθα;
Odyssey 1.253	ἦ τι κατὰ πρῆξιν ἦ μαψιδίως ἀλάλησθε,
Odyssey 1.254	οἷά τε ληιστῆρες, ὑπεὶρ ἅλα, τοί τʼ ἀλόωνται
Odyssey 1.255	ψυχὰς παρθέμενοι κακὸν ἀλλοδαποῖσι φέροντες;
Odyssey 1.256	ὣς ἔφαθʼ, ἡμῖν δʼ αὖτε κατεκλάσθη φίλον ἦτορ,
Odyssey 1.257	δεισάντων φθόγγον τε βαρὺν αὐτόν τε πέλωρον.
Odyssey 1.258	ἀλλὰ καὶ ὥς μιν ἔπεσσιν ἀμειβόμενος προσέειπον·
Odyssey 1.259	ἡμεῖς τοι Τροίηθεν ἀποπλαγχθέντες Ἀχαιοὶ
Odyssey 1.260	παντοίοις ἀνέμοισιν ὑπὲρ μέγα λαῖτμα θαλάσσης,
Odyssey 1.261	οἴκαδε ἱέμενοι, ἄλλην ὁδὸν ἄλλα κέλευθα
Odyssey 1.262	ἤλθομεν· οὕτω που Ζεὺς ἤθελε μητίσασθαι.
Odyssey 1.263	λαοὶ δʼ Ἀτρεΐδεω Ἀγαμέμνονος εὐχόμεθʼ εἶναι,
Odyssey 1.264	τοῦ δὴ νῦν γε μέγιστον ὑπουράνιον κλέος ἐστί·
Odyssey 1.265	τόσσην γὰρ διέπερσε πόλιν καὶ ἀπώλεσε λαοὺς
Odyssey 1.266	πολλούς. ἡμεῖς δʼ αὖτε κιχανόμενοι τὰ σὰ γοῦνα
Odyssey 1.267	ἱκόμεθʼ, εἴ τι πόροις ξεινήιον ἠὲ καὶ ἄλλως
Odyssey 1.268	δοίης δωτίνην, ἥ τε ξείνων θέμις ἐστίν.
Odyssey 1.269	ἀλλʼ αἰδεῖο, φέριστε, θεούς· ἱκέται δέ τοί εἰμεν,
Odyssey 1.270	Ζεὺς δʼ ἐπιτιμήτωρ ἱκετάων τε ξείνων τε,
Odyssey 1.271	ξείνιος, ὃς ξείνοισιν ἅμʼ αἰδοίοισιν ὀπηδεῖ.
Odyssey 1.272	ὣς ἐφάμην, ὁ δέ μʼ αὐτίκʼ ἀμείβετο νηλέι θυμῷ·
Odyssey 1.273	νήπιός εἰς, ὦ ξεῖνʼ, ἢ τηλόθεν εἰλήλουθας,
Odyssey 1.274	ὅς με θεοὺς κέλεαι ἢ δειδίμεν ἢ ἀλέασθαι·
Odyssey 1.275	οὐ γὰρ Κύκλωπες Διὸς αἰγιόχου ἀλέγουσιν
Odyssey 1.276	οὐδὲ θεῶν μακάρων, ἐπεὶ ἦ πολὺ φέρτεροί εἰμεν·
Odyssey 1.277	οὐδʼ ἂν ἐγὼ Διὸς ἔχθος ἀλευάμενος πεφιδοίμην
Odyssey 1.278	οὔτε σεῦ οὔθʼ ἑτάρων, εἰ μὴ θυμός με κελεύοι.
Odyssey 1.279	ἀλλά μοι εἴφʼ ὅπῃ ἔσχες ἰὼν ἐυεργέα νῆα,
Odyssey 1.280	ἤ που ἐπʼ ἐσχατιῆς, ἦ καὶ σχεδόν, ὄφρα δαείω.
Odyssey 1.281	ὣς φάτο πειράζων, ἐμὲ δʼ οὐ λάθεν εἰδότα πολλά,
Odyssey 1.282	ἀλλά μιν ἄψορρον προσέφην δολίοις ἐπέεσσι·
Odyssey 1.283	νέα μέν μοι κατέαξε Ποσειδάων ἐνοσίχθων
Odyssey 1.284	πρὸς πέτρῃσι βαλὼν ὑμῆς ἐπὶ πείρασι γαίης,
Odyssey 1.285	ἄκρῃ προσπελάσας· ἄνεμος δʼ ἐκ πόντου ἔνεικεν·
Odyssey 1.286	αὐτὰρ ἐγὼ σὺν τοῖσδε ὑπέκφυγον αἰπὺν ὄλεθρον.
Odyssey 1.287	ὣς ἐφάμην, ὁ δέ μʼ οὐδὲν ἀμείβετο νηλέι θυμῷ,
Odyssey 1.288	ἀλλʼ ὅ γʼ ἀναΐξας ἑτάροις ἐπὶ χεῖρας ἴαλλε,
Odyssey 1.289	σὺν δὲ δύω μάρψας ὥς τε σκύλακας ποτὶ γαίῃ
Odyssey 1.290	κόπτʼ· ἐκ δʼ ἐγκέφαλος χαμάδις ῥέε, δεῦε δὲ γαῖαν.
Odyssey 1.291	τοὺς δὲ διὰ μελεϊστὶ ταμὼν ὡπλίσσατο δόρπον·
Odyssey 1.292	ἤσθιε δʼ ὥς τε λέων ὀρεσίτροφος, οὐδʼ ἀπέλειπεν,
Odyssey 1.293	ἔγκατά τε σάρκας τε καὶ ὀστέα μυελόεντα.
Odyssey 1.294	ἡμεῖς δὲ κλαίοντες ἀνεσχέθομεν Διὶ χεῖρας,
Odyssey 1.295	σχέτλια ἔργʼ ὁρόωντες, ἀμηχανίη δʼ ἔχε θυμόν.
Odyssey 1.296	αὐτὰρ ἐπεὶ Κύκλωψ μεγάλην ἐμπλήσατο νηδὺν
Odyssey 1.297	ἀνδρόμεα κρέʼ ἔδων καὶ ἐπʼ ἄκρητον γάλα πίνων,
Odyssey 1.298	κεῖτʼ ἔντοσθʼ ἄντροιο τανυσσάμενος διὰ μήλων.
Odyssey 1.299	τὸν μὲν ἐγὼ βούλευσα κατὰ μεγαλήτορα θυμὸν
Odyssey 1.300	ἆσσον ἰών, ξίφος ὀξὺ ἐρυσσάμενος παρὰ μηροῦ,
Odyssey 1.301	οὐτάμεναι πρὸς στῆθος, ὅθι φρένες ἧπαρ ἔχουσι,
Odyssey 1.302	χείρʼ ἐπιμασσάμενος· ἕτερος δέ με θυμὸς ἔρυκεν.
Odyssey 1.303	αὐτοῦ γάρ κε καὶ ἄμμες ἀπωλόμεθʼ αἰπὺν ὄλεθρον·
Odyssey 1.304	οὐ γάρ κεν δυνάμεσθα θυράων ὑψηλάων
Odyssey 1.305	χερσὶν ἀπώσασθαι λίθον ὄβριμον, ὃν προσέθηκεν.
Odyssey 1.306	ὣς τότε μὲν στενάχοντες ἐμείναμεν Ἠῶ δῖαν.
Odyssey 1.307	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.308	καὶ τότε πῦρ ἀνέκαιε καὶ ἤμελγε κλυτὰ μῆλα,
Odyssey 1.309	πάντα κατὰ μοῖραν, καὶ ὑπʼ ἔμβρυον ἧκεν ἑκάστῃ.
Odyssey 1.310	αὐτὰρ ἐπεὶ δὴ σπεῦσε πονησάμενος τὰ ἃ ἔργα,
Odyssey 1.311	σὺν δʼ ὅ γε δὴ αὖτε δύω μάρψας ὡπλίσσατο δεῖπνον.
Odyssey 1.312	δειπνήσας δʼ ἄντρου ἐξήλασε πίονα μῆλα,
Odyssey 1.313	ῥηιδίως ἀφελὼν θυρεὸν μέγαν· αὐτὰρ ἔπειτα
Odyssey 1.314	ἂψ ἐπέθηχʼ, ὡς εἴ τε φαρέτρῃ πῶμʼ ἐπιθείη.
Odyssey 1.315	πολλῇ δὲ ῥοίζῳ πρὸς ὄρος τρέπε πίονα μῆλα
Odyssey 1.316	Κύκλωψ· αὐτὰρ ἐγὼ λιπόμην κακὰ βυσσοδομεύων,
Odyssey 1.317	εἴ πως τισαίμην, δοίη δέ μοι εὖχος Ἀθήνη.
Odyssey 1.318	ἥδε δέ μοι κατὰ θυμὸν ἀρίστη φαίνετο βουλή.
Odyssey 1.319	Κύκλωπος γὰρ ἔκειτο μέγα ῥόπαλον παρὰ σηκῷ,
Odyssey 1.320	χλωρὸν ἐλαΐνεον· τὸ μὲν ἔκταμεν, ὄφρα φοροίη
Odyssey 1.321	αὐανθέν. τὸ μὲν ἄμμες ἐίσκομεν εἰσορόωντες
Odyssey 1.322	ὅσσον θʼ ἱστὸν νηὸς ἐεικοσόροιο μελαίνης,
Odyssey 1.323	φορτίδος εὐρείης, ἥ τʼ ἐκπεράᾳ μέγα λαῖτμα·
Odyssey 1.324	τόσσον ἔην μῆκος, τόσσον πάχος εἰσοράασθαι.
Odyssey 1.325	τοῦ μὲν ὅσον τʼ ὄργυιαν ἐγὼν ἀπέκοψα παραστὰς
Odyssey 1.326	καὶ παρέθηχʼ ἑτάροισιν, ἀποξῦναι δʼ ἐκέλευσα·
Odyssey 1.327	οἱ δʼ ὁμαλὸν ποίησαν· ἐγὼ δʼ ἐθόωσα παραστὰς
Odyssey 1.328	ἄκρον, ἄφαρ δὲ λαβὼν ἐπυράκτεον ἐν πυρὶ κηλέῳ.
Odyssey 1.329	καὶ τὸ μὲν εὖ κατέθηκα κατακρύψας ὑπὸ κόπρῳ,
Odyssey 1.330	ἥ ῥα κατὰ σπείους κέχυτο μεγάλʼ ἤλιθα πολλή·
Odyssey 1.331	αὐτὰρ τοὺς ἄλλους κλήρῳ πεπαλάσθαι ἄνωγον,
Odyssey 1.332	ὅς τις τολμήσειεν ἐμοὶ σὺν μοχλὸν ἀείρας
Odyssey 1.333	τρῖψαι ἐν ὀφθαλμῷ, ὅτε τὸν γλυκὺς ὕπνος ἱκάνοι.
Odyssey 1.334	οἱ δʼ ἔλαχον τοὺς ἄν κε καὶ ἤθελον αὐτὸς ἑλέσθαι,
Odyssey 1.335	τέσσαρες, αὐτὰρ ἐγὼ πέμπτος μετὰ τοῖσιν ἐλέγμην.
Odyssey 1.336	ἑσπέριος δʼ ἦλθεν καλλίτριχα μῆλα νομεύων.
Odyssey 1.337	αὐτίκα δʼ εἰς εὐρὺ σπέος ἤλασε πίονα μῆλα
Odyssey 1.338	πάντα μάλʼ, οὐδέ τι λεῖπε βαθείης ἔκτοθεν αὐλῆς,
Odyssey 1.339	ἤ τι ὀισάμενος, ἢ καὶ θεὸς ὣς ἐκέλευσεν.
Odyssey 1.340	αὐτὰρ ἔπειτʼ ἐπέθηκε θυρεὸν μέγαν ὑψόσʼ ἀείρας,
Odyssey 1.341	ἑζόμενος δʼ ἤμελγεν ὄις καὶ μηκάδας αἶγας,
Odyssey 1.342	πάντα κατὰ μοῖραν, καὶ ὑπʼ ἔμβρυον ἧκεν ἑκάστῃ.
Odyssey 1.343	αὐτὰρ ἐπεὶ δὴ σπεῦσε πονησάμενος τὰ ἃ ἔργα,
Odyssey 1.344	σὺν δʼ ὅ γε δὴ αὖτε δύω μάρψας ὡπλίσσατο δόρπον.
Odyssey 1.345	καὶ τότʼ ἐγὼ Κύκλωπα προσηύδων ἄγχι παραστάς,
Odyssey 1.346	κισσύβιον μετὰ χερσὶν ἔχων μέλανος οἴνοιο·
Odyssey 1.347	Κύκλωψ, τῆ, πίε οἶνον, ἐπεὶ φάγες ἀνδρόμεα κρέα,
Odyssey 1.348	ὄφρʼ εἰδῇς οἷόν τι ποτὸν τόδε νηῦς ἐκεκεύθει
Odyssey 1.349	ἡμετέρη. σοὶ δʼ αὖ λοιβὴν φέρον, εἴ μʼ ἐλεήσας
Odyssey 1.350	οἴκαδε πέμψειας· σὺ δὲ μαίνεαι οὐκέτʼ ἀνεκτῶς.
Odyssey 1.351	σχέτλιε, πῶς κέν τίς σε καὶ ὕστερον ἄλλος ἵκοιτο
Odyssey 1.352	ἀνθρώπων πολέων, ἐπεὶ οὐ κατὰ μοῖραν ἔρεξας;
Odyssey 1.353	ὣς ἐφάμην, ὁ δʼ ἔδεκτο καὶ ἔκπιεν· ἥσατο δʼ αἰνῶς
Odyssey 1.354	ἡδὺ ποτὸν πίνων καὶ μʼ ᾔτεε δεύτερον αὖτις·
Odyssey 1.355	δός μοι ἔτι πρόφρων, καί μοι τεὸν οὔνομα εἰπὲ
Odyssey 1.356	αὐτίκα νῦν, ἵνα τοι δῶ ξείνιον, ᾧ κε σὺ χαίρῃς·
Odyssey 1.357	καὶ γὰρ Κυκλώπεσσι φέρει ζείδωρος ἄρουρα
Odyssey 1.358	οἶνον ἐριστάφυλον, καί σφιν Διὸς ὄμβρος ἀέξει·
Odyssey 1.359	ἀλλὰ τόδʼ ἀμβροσίης καὶ νέκταρός ἐστιν ἀπορρώξ.
Odyssey 1.360	ὣς φάτʼ, ἀτάρ οἱ αὖτις ἐγὼ πόρον αἴθοπα οἶνον.
Odyssey 1.361	τρὶς μὲν ἔδωκα φέρων, τρὶς δʼ ἔκπιεν ἀφραδίῃσιν.
Odyssey 1.362	αὐτὰρ ἐπεὶ Κύκλωπα περὶ φρένας ἤλυθεν οἶνος,
Odyssey 1.363	καὶ τότε δή μιν ἔπεσσι προσηύδων μειλιχίοισι·
Odyssey 1.364	Κύκλωψ, εἰρωτᾷς μʼ ὄνομα κλυτόν, αὐτὰρ ἐγώ τοι
Odyssey 1.365	ἐξερέω· σὺ δέ μοι δὸς ξείνιον, ὥς περ ὑπέστης.
Odyssey 1.366	Οὖτις ἐμοί γʼ ὄνομα· Οὖτιν δέ με κικλήσκουσι
Odyssey 1.367	μήτηρ ἠδὲ πατὴρ ἠδʼ ἄλλοι πάντες ἑταῖροι.
Odyssey 1.368	ὣς ἐφάμην, ὁ δέ μʼ αὐτίκʼ ἀμείβετο νηλέι θυμῷ·
Odyssey 1.369	Οὖτιν ἐγὼ πύματον ἔδομαι μετὰ οἷς ἑτάροισιν,
Odyssey 1.370	τοὺς δʼ ἄλλους πρόσθεν· τὸ δέ τοι ξεινήιον ἔσται.
Odyssey 1.371	ἦ καὶ ἀνακλινθεὶς πέσεν ὕπτιος, αὐτὰρ ἔπειτα
Odyssey 1.372	κεῖτʼ ἀποδοχμώσας παχὺν αὐχένα, κὰδ δέ μιν ὕπνος
Odyssey 1.373	ᾕρει πανδαμάτωρ· φάρυγος δʼ ἐξέσσυτο οἶνος
Odyssey 1.374	ψωμοί τʼ ἀνδρόμεοι· ὁ δʼ ἐρεύγετο οἰνοβαρείων.
Odyssey 1.375	καὶ τότʼ ἐγὼ τὸν μοχλὸν ὑπὸ σποδοῦ ἤλασα πολλῆς,
Odyssey 1.376	ἧος θερμαίνοιτο· ἔπεσσι δὲ πάντας ἑταίρους
Odyssey 1.377	θάρσυνον, μή τίς μοι ὑποδείσας ἀναδύη.
Odyssey 1.378	ἀλλʼ ὅτε δὴ τάχʼ ὁ μοχλὸς ἐλάινος ἐν πυρὶ μέλλεν
Odyssey 1.379	ἅψεσθαι, χλωρός περ ἐών, διεφαίνετο δʼ αἰνῶς,
Odyssey 1.380	καὶ τότʼ ἐγὼν ἆσσον φέρον ἐκ πυρός, ἀμφὶ δʼ ἑταῖροι
Odyssey 1.381	ἵσταντʼ· αὐτὰρ θάρσος ἐνέπνευσεν μέγα δαίμων.
Odyssey 1.382	οἱ μὲν μοχλὸν ἑλόντες ἐλάινον, ὀξὺν ἐπʼ ἄκρῳ,
Odyssey 1.383	ὀφθαλμῷ ἐνέρεισαν· ἐγὼ δʼ ἐφύπερθεν ἐρεισθεὶς
Odyssey 1.384	δίνεον, ὡς ὅτε τις τρυπῷ δόρυ νήιον ἀνὴρ
Odyssey 1.385	τρυπάνῳ, οἱ δέ τʼ ἔνερθεν ὑποσσείουσιν ἱμάντι
Odyssey 1.386	ἁψάμενοι ἑκάτερθε, τὸ δὲ τρέχει ἐμμενὲς αἰεί.
Odyssey 1.387	ὣς τοῦ ἐν ὀφθαλμῷ πυριήκεα μοχλὸν ἑλόντες
Odyssey 1.388	δινέομεν, τὸν δʼ αἷμα περίρρεε θερμὸν ἐόντα.
Odyssey 1.389	πάντα δέ οἱ βλέφαρʼ ἀμφὶ καὶ ὀφρύας εὗσεν ἀυτμὴ
Odyssey 1.390	γλήνης καιομένης, σφαραγεῦντο δέ οἱ πυρὶ ῥίζαι.
Odyssey 1.391	ὡς δʼ ὅτʼ ἀνὴρ χαλκεὺς πέλεκυν μέγαν ἠὲ σκέπαρνον
Odyssey 1.392	εἰν ὕδατι ψυχρῷ βάπτῃ μεγάλα ἰάχοντα
Odyssey 1.393	φαρμάσσων· τὸ γὰρ αὖτε σιδήρου γε κράτος ἐστίν
Odyssey 1.394	ὣς τοῦ σίζʼ ὀφθαλμὸς ἐλαϊνέῳ περὶ μοχλῷ.
Odyssey 1.395	σμερδαλέον δὲ μέγʼ ᾤμωξεν, περὶ δʼ ἴαχε πέτρη,
Odyssey 1.396	ἡμεῖς δὲ δείσαντες ἀπεσσύμεθʼ· αὐτὰρ ὁ μοχλὸν
Odyssey 1.397	ἐξέρυσʼ ὀφθαλμοῖο πεφυρμένον αἵματι πολλῷ.
Odyssey 1.398	τὸν μὲν ἔπειτʼ ἔρριψεν ἀπὸ ἕο χερσὶν ἀλύων,
Odyssey 1.399	αὐτὰρ ὁ Κύκλωπας μεγάλʼ ἤπυεν, οἵ ῥά μιν ἀμφὶς
Odyssey 1.400	ᾤκεον ἐν σπήεσσι διʼ ἄκριας ἠνεμοέσσας.
Odyssey 1.401	οἱ δὲ βοῆς ἀίοντες ἐφοίτων ἄλλοθεν ἄλλος,
Odyssey 1.402	ἱστάμενοι δʼ εἴροντο περὶ σπέος ὅττι ἑ κήδοι·
Odyssey 1.403	τίπτε τόσον, Πολύφημʼ, ἀρημένος ὧδʼ ἐβόησας
Odyssey 1.404	νύκτα διʼ ἀμβροσίην καὶ ἀύπνους ἄμμε τίθησθα;
Odyssey 1.405	ἦ μή τίς σευ μῆλα βροτῶν ἀέκοντος ἐλαύνει;
Odyssey 1.406	ἦ μή τίς σʼ αὐτὸν κτείνει δόλῳ ἠὲ βίηφιν;
Odyssey 1.407	τοὺς δʼ αὖτʼ ἐξ ἄντρου προσέφη κρατερὸς Πολύφημος·
Odyssey 1.408	ὦ φίλοι, Οὖτίς με κτείνει δόλῳ οὐδὲ βίηφιν.
Odyssey 1.409	οἱ δʼ ἀπαμειβόμενοι ἔπεα πτερόεντʼ ἀγόρευον·
Odyssey 1.410	εἰ μὲν δὴ μή τίς σε βιάζεται οἶον ἐόντα,
Odyssey 1.411	νοῦσον γʼ οὔ πως ἔστι Διὸς μεγάλου ἀλέασθαι,
Odyssey 1.412	ἀλλὰ σύ γʼ εὔχεο πατρὶ Ποσειδάωνι ἄνακτι.
Odyssey 1.413	ὣς ἄρʼ ἔφαν ἀπιόντες, ἐμὸν δʼ ἐγέλασσε φίλον κῆρ,
Odyssey 1.414	ὡς ὄνομʼ ἐξαπάτησεν ἐμὸν καὶ μῆτις ἀμύμων.
Odyssey 1.415	Κύκλωψ δὲ στενάχων τε καὶ ὠδίνων ὀδύνῃσι
Odyssey 1.416	χερσὶ ψηλαφόων ἀπὸ μὲν λίθον εἷλε θυράων,
Odyssey 1.417	αὐτὸς δʼ εἰνὶ θύρῃσι καθέζετο χεῖρε πετάσσας,
Odyssey 1.418	εἴ τινά που μετʼ ὄεσσι λάβοι στείχοντα θύραζε·
Odyssey 1.419	οὕτω γάρ πού μʼ ἤλπετʼ ἐνὶ φρεσὶ νήπιον εἶναι.
Odyssey 1.420	αὐτὰρ ἐγὼ βούλευον, ὅπως ὄχʼ ἄριστα γένοιτο,
Odyssey 1.421	εἴ τινʼ ἑταίροισιν θανάτου λύσιν ἠδʼ ἐμοὶ αὐτῷ
Odyssey 1.422	εὑροίμην· πάντας δὲ δόλους καὶ μῆτιν ὕφαινον
Odyssey 1.423	ὥς τε περὶ ψυχῆς· μέγα γὰρ κακὸν ἐγγύθεν ἦεν.
Odyssey 1.424	ἥδε δέ μοι κατὰ θυμὸν ἀρίστη φαίνετο βουλή.
Odyssey 1.425	ἄρσενες ὄιες ἦσαν ἐυτρεφέες, δασύμαλλοι,
Odyssey 1.426	καλοί τε μεγάλοι τε, ἰοδνεφὲς εἶρος ἔχοντες·
Odyssey 1.427	τοὺς ἀκέων συνέεργον ἐυστρεφέεσσι λύγοισιν,
Odyssey 1.428	τῇς ἔπι Κύκλωψ εὗδε πέλωρ, ἀθεμίστια εἰδώς,
Odyssey 1.429	σύντρεις αἰνύμενος· ὁ μὲν ἐν μέσῳ ἄνδρα φέρεσκε,
Odyssey 1.430	τὼ δʼ ἑτέρω ἑκάτερθεν ἴτην σώοντες ἑταίρους.
Odyssey 1.431	τρεῖς δὲ ἕκαστον φῶτʼ ὄιες φέρον· αὐτὰρ ἐγώ γε—
Odyssey 1.432	ἀρνειὸς γὰρ ἔην μήλων ὄχʼ ἄριστος ἁπάντων,
Odyssey 1.433	τοῦ κατὰ νῶτα λαβών, λασίην ὑπὸ γαστέρʼ ἐλυσθεὶς
Odyssey 1.434	κείμην· αὐτὰρ χερσὶν ἀώτου θεσπεσίοιο
Odyssey 1.435	νωλεμέως στρεφθεὶς ἐχόμην τετληότι θυμῷ.
Odyssey 1.436	ὣς τότε μὲν στενάχοντες ἐμείναμεν Ἠῶ δῖαν.
Odyssey 1.437	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.438	καὶ τότʼ ἔπειτα νομόνδʼ ἐξέσσυτο ἄρσενα μῆλα,
Odyssey 1.439	θήλειαι δὲ μέμηκον ἀνήμελκτοι περὶ σηκούς·
Odyssey 1.440	οὔθατα γὰρ σφαραγεῦντο. ἄναξ δʼ ὀδύνῃσι κακῇσι
Odyssey 1.441	τειρόμενος πάντων ὀίων ἐπεμαίετο νῶτα
Odyssey 1.442	ὀρθῶν ἑσταότων· τὸ δὲ νήπιος οὐκ ἐνόησεν,
Odyssey 1.443	ὥς οἱ ὑπʼ εἰροπόκων ὀίων στέρνοισι δέδεντο.
Odyssey 1.444	ὕστατος ἀρνειὸς μήλων ἔστειχε θύραζε
Odyssey 1.445	λάχνῳ στεινόμενος καὶ ἐμοὶ πυκινὰ φρονέοντι.
Odyssey 1.446	τὸν δʼ ἐπιμασσάμενος προσέφη κρατερὸς Πολύφημος·
Odyssey 1.447	κριὲ πέπον, τί μοι ὧδε διὰ σπέος ἔσσυο μήλων
Odyssey 1.448	ὕστατος; οὔ τι πάρος γε λελειμμένος ἔρχεαι οἰῶν,
Odyssey 1.449	ἀλλὰ πολὺ πρῶτος νέμεαι τέρενʼ ἄνθεα ποίης
Odyssey 1.450	μακρὰ βιβάς, πρῶτος δὲ ῥοὰς ποταμῶν ἀφικάνεις,
Odyssey 1.451	πρῶτος δὲ σταθμόνδε λιλαίεαι ἀπονέεσθαι
Odyssey 1.452	ἑσπέριος· νῦν αὖτε πανύστατος. ἦ σύ γʼ ἄνακτος
Odyssey 1.453	ὀφθαλμὸν ποθέεις, τὸν ἀνὴρ κακὸς ἐξαλάωσε
Odyssey 1.454	σὺν λυγροῖς ἑτάροισι δαμασσάμενος φρένας οἴνῳ,
Odyssey 1.455	Οὖτις, ὃν οὔ πώ φημι πεφυγμένον εἶναι ὄλεθρον.
Odyssey 1.456	εἰ δὴ ὁμοφρονέοις ποτιφωνήεις τε γένοιο
Odyssey 1.457	εἰπεῖν ὅππῃ κεῖνος ἐμὸν μένος ἠλασκάζει·
Odyssey 1.458	τῷ κέ οἱ ἐγκέφαλός γε διὰ σπέος ἄλλυδις ἄλλῃ
Odyssey 1.459	θεινομένου ῥαίοιτο πρὸς οὔδεϊ, κὰδ δέ κʼ ἐμὸν κῆρ
Odyssey 1.460	λωφήσειε κακῶν, τά μοι οὐτιδανὸς πόρεν Οὖτις.
Odyssey 1.461	ὣς εἰπὼν τὸν κριὸν ἀπὸ ἕο πέμπε θύραζε.
Odyssey 1.462	ἐλθόντες δʼ ἠβαιὸν ἀπὸ σπείους τε καὶ αὐλῆς
Odyssey 1.463	πρῶτος ὑπʼ ἀρνειοῦ λυόμην, ὑπέλυσα δʼ ἑταίρους.
Odyssey 1.464	καρπαλίμως δὲ τὰ μῆλα ταναύποδα, πίονα δημῷ,
Odyssey 1.465	πολλὰ περιτροπέοντες ἐλαύνομεν, ὄφρʼ ἐπὶ νῆα
Odyssey 1.466	ἱκόμεθʼ. ἀσπάσιοι δὲ φίλοις ἑτάροισι φάνημεν,
Odyssey 1.467	οἳ φύγομεν θάνατον, τοὺς δὲ στενάχοντο γοῶντες.
Odyssey 1.468	ἀλλʼ ἐγὼ οὐκ εἴων, ἀνὰ δʼ ὀφρύσι νεῦον ἑκάστῳ,
Odyssey 1.469	κλαίειν, ἀλλʼ ἐκέλευσα θοῶς καλλίτριχα μῆλα
Odyssey 1.470	πόλλʼ ἐν νηὶ βαλόντας ἐπιπλεῖν ἁλμυρὸν ὕδωρ.
Odyssey 1.471	οἱ δʼ αἶψʼ εἴσβαινον καὶ ἐπὶ κληῖσι καθῖζον,
Odyssey 1.472	ἑξῆς δʼ ἑζόμενοι πολιὴν ἅλα τύπτον ἐρετμοῖς.
Odyssey 1.473	ἀλλʼ ὅτε τόσσον ἀπῆν, ὅσσον τε γέγωνε βοήσας,
Odyssey 1.474	καὶ τότʼ ἐγὼ Κύκλωπα προσηύδων κερτομίοισι·
Odyssey 1.475	Κύκλωψ, οὐκ ἄρʼ ἔμελλες ἀνάλκιδος ἀνδρὸς ἑταίρους
Odyssey 1.476	ἔδμεναι ἐν σπῆι γλαφυρῷ κρατερῆφι βίηφι.
Odyssey 1.477	καὶ λίην σέ γʼ ἔμελλε κιχήσεσθαι κακὰ ἔργα,
Odyssey 1.478	σχέτλιʼ, ἐπεὶ ξείνους οὐχ ἅζεο σῷ ἐνὶ οἴκῳ
Odyssey 1.479	ἐσθέμεναι· τῷ σε Ζεὺς τίσατο καὶ θεοὶ ἄλλοι.
Odyssey 1.480	ὣς ἐφάμην, ὁ δʼ ἔπειτα χολώσατο κηρόθι μᾶλλον,
Odyssey 1.481	ἧκε δʼ ἀπορρήξας κορυφὴν ὄρεος μεγάλοιο,
Odyssey 1.482	κὰδ δʼ ἔβαλε προπάροιθε νεὸς κυανοπρῴροιο
Odyssey 1.483	τυτθόν, ἐδεύησεν δʼ οἰήιον ἄκρον ἱκέσθαι,
Odyssey 1.484	ἐκλύσθη δὲ θάλασσα κατερχομένης ὑπὸ πέτρης·
Odyssey 1.485	τὴν δʼ αἶψʼ ἤπειρόνδε παλιρρόθιον φέρε κῦμα,
Odyssey 1.486	πλημυρὶς ἐκ πόντοιο, θέμωσε δὲ χέρσον ἱκέσθαι.
Odyssey 1.487	αὐτὰρ ἐγὼ χείρεσσι λαβὼν περιμήκεα κοντὸν
Odyssey 1.488	ὦσα παρέξ, ἑτάροισι δʼ ἐποτρύνας ἐκέλευσα
Odyssey 1.489	ἐμβαλέειν κώπῃς, ἵνʼ ὑπὲκ κακότητα φύγοιμεν,
Odyssey 1.490	κρατὶ κατανεύων· οἱ δὲ προπεσόντες ἔρεσσον.
Odyssey 1.491	ἀλλʼ ὅτε δὴ δὶς τόσσον ἅλα πρήσσοντες ἀπῆμεν,
Odyssey 1.492	καὶ τότε δὴ Κύκλωπα προσηύδων· ἀμφὶ δʼ ἑταῖροι
Odyssey 1.493	μειλιχίοις ἐπέεσσιν ἐρήτυον ἄλλοθεν ἄλλος·
Odyssey 1.494	σχέτλιε, τίπτʼ ἐθέλεις ἐρεθιζέμεν ἄγριον ἄνδρα;
Odyssey 1.495	ὃς καὶ νῦν πόντονδε βαλὼν βέλος ἤγαγε νῆα
Odyssey 1.496	αὖτις ἐς ἤπειρον, καὶ δὴ φάμεν αὐτόθʼ ὀλέσθαι.
Odyssey 1.497	εἰ δὲ φθεγξαμένου τευ ἢ αὐδήσαντος ἄκουσε,
Odyssey 1.498	σύν κεν ἄραξʼ ἡμέων κεφαλὰς καὶ νήια δοῦρα
Odyssey 1.499	μαρμάρῳ ὀκριόεντι βαλών· τόσσον γὰρ ἵησιν.
Odyssey 1.500	ὣς φάσαν, ἀλλʼ οὐ πεῖθον ἐμὸν μεγαλήτορα θυμόν,
Odyssey 1.501	ἀλλά μιν ἄψορρον προσέφην κεκοτηότι θυμῷ·
Odyssey 1.502	Κύκλωψ, αἴ κέν τίς σε καταθνητῶν ἀνθρώπων
Odyssey 1.503	ὀφθαλμοῦ εἴρηται ἀεικελίην ἀλαωτύν,
Odyssey 1.504	φάσθαι Ὀδυσσῆα πτολιπόρθιον ἐξαλαῶσαι,
Odyssey 1.505	υἱὸν Λαέρτεω, Ἰθάκῃ ἔνι οἰκίʼ ἔχοντα.
Odyssey 1.506	ὣς ἐφάμην, ὁ δέ μʼ οἰμώξας ἠμείβετο μύθῳ·
Odyssey 1.507	ὢ πόποι, ἦ μάλα δή με παλαίφατα θέσφαθʼ ἱκάνει.
Odyssey 1.508	ἔσκε τις ἐνθάδε μάντις ἀνὴρ ἠύς τε μέγας τε,
Odyssey 1.509	Τήλεμος Εὐρυμίδης, ὃς μαντοσύνῃ ἐκέκαστο
Odyssey 1.510	καὶ μαντευόμενος κατεγήρα Κυκλώπεσσιν·
Odyssey 1.511	ὅς μοι ἔφη τάδε πάντα τελευτήσεσθαι ὀπίσσω,
Odyssey 1.512	χειρῶν ἐξ Ὀδυσῆος ἁμαρτήσεσθαι ὀπωπῆς.
Odyssey 1.513	ἀλλʼ αἰεί τινα φῶτα μέγαν καὶ καλὸν ἐδέγμην
Odyssey 1.514	ἐνθάδʼ ἐλεύσεσθαι, μεγάλην ἐπιειμένον ἀλκήν·
Odyssey 1.515	νῦν δέ μʼ ἐὼν ὀλίγος τε καὶ οὐτιδανὸς καὶ ἄκικυς
Odyssey 1.516	ὀφθαλμοῦ ἀλάωσεν, ἐπεί μʼ ἐδαμάσσατο οἴνῳ.
Odyssey 1.517	ἀλλʼ ἄγε δεῦρʼ, Ὀδυσεῦ, ἵνα τοι πὰρ ξείνια θείω
Odyssey 1.518	πομπήν τʼ ὀτρύνω δόμεναι κλυτὸν ἐννοσίγαιον·
Odyssey 1.519	τοῦ γὰρ ἐγὼ πάϊς εἰμί, πατὴρ δʼ ἐμὸς εὔχεται εἶναι.
Odyssey 1.520	αὐτὸς δʼ, αἴ κʼ ἐθέλῃσʼ, ἰήσεται, οὐδέ τις ἄλλος
Odyssey 1.521	οὔτε θεῶν μακάρων οὔτε θνητῶν ἀνθρώπων.
Odyssey 1.522	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.523	αἲ γὰρ δὴ ψυχῆς τε καὶ αἰῶνός σε δυναίμην
Odyssey 1.524	εὖνιν ποιήσας πέμψαι δόμον Ἄϊδος εἴσω,
Odyssey 1.525	ὡς οὐκ ὀφθαλμόν γʼ ἰήσεται οὐδʼ ἐνοσίχθων.
Odyssey 1.526	ὣς ἐφάμην, ὁ δʼ ἔπειτα Ποσειδάωνι ἄνακτι
Odyssey 1.527	εὔχετο χεῖρʼ ὀρέγων εἰς οὐρανὸν ἀστερόεντα·
Odyssey 1.528	κλῦθι, Ποσείδαον γαιήοχε κυανοχαῖτα,
Odyssey 1.529	εἰ ἐτεόν γε σός εἰμι, πατὴρ δʼ ἐμὸς εὔχεαι εἶναι,
Odyssey 1.530	δὸς μὴ Ὀδυσσῆα πτολιπόρθιον οἴκαδʼ ἱκέσθαι
Odyssey 1.531	υἱὸν Λαέρτεω, Ἰθάκῃ ἔνι οἰκίʼ ἔχοντα.
Odyssey 1.532	ἀλλʼ εἴ οἱ μοῖρʼ ἐστὶ φίλους τʼ ἰδέειν καὶ ἱκέσθαι
Odyssey 1.533	οἶκον ἐυκτίμενον καὶ ἑὴν ἐς πατρίδα γαῖαν,
Odyssey 1.534	ὀψὲ κακῶς ἔλθοι, ὀλέσας ἄπο πάντας ἑταίρους,
Odyssey 1.535	νηὸς ἐπʼ ἀλλοτρίης, εὕροι δʼ ἐν πήματα οἴκῳ.
Odyssey 1.536	ὣς ἔφατʼ εὐχόμενος, τοῦ δʼ ἔκλυε κυανοχαίτης.
Odyssey 1.537	αὐτὰρ ὅ γʼ ἐξαῦτις πολὺ μείζονα λᾶαν ἀείρας
Odyssey 1.538	ἧκʼ ἐπιδινήσας, ἐπέρεισε δὲ ἶνʼ ἀπέλεθρον,
Odyssey 1.539	κὰδʼ δʼ ἔβαλεν μετόπισθε νεὸς κυανοπρῴροιο
Odyssey 1.540	τυτθόν, ἐδεύησεν δʼ οἰήιον ἄκρον ἱκέσθαι.
Odyssey 1.541	ἐκλύσθη δὲ θάλασσα κατερχομένης ὑπὸ πέτρης·
Odyssey 1.542	τὴν δὲ πρόσω φέρε κῦμα, θέμωσε δὲ χέρσον ἱκέσθαι.
Odyssey 1.543	ἀλλʼ ὅτε δὴ τὴν νῆσον ἀφικόμεθʼ, ἔνθα περ ἄλλαι
Odyssey 1.544	νῆες ἐύσσελμοι μένον ἁθρόαι, ἀμφὶ δʼ ἑταῖροι
Odyssey 1.545	ἥατʼ ὀδυρόμενοι, ἡμέας ποτιδέγμενοι αἰεί,
Odyssey 1.546	νῆα μὲν ἔνθʼ ἐλθόντες ἐκέλσαμεν ἐν ψαμάθοισιν,
Odyssey 1.547	ἐκ δὲ καὶ αὐτοὶ βῆμεν ἐπὶ ῥηγμῖνι θαλάσσης.
Odyssey 1.548	μῆλα δὲ Κύκλωπος γλαφυρῆς ἐκ νηὸς ἑλόντες
Odyssey 1.549	δασσάμεθʼ, ὡς μή τίς μοι ἀτεμβόμενος κίοι ἴσης.
Odyssey 1.550	ἀρνειὸν δʼ ἐμοὶ οἴῳ ἐυκνήμιδες ἑταῖροι
Odyssey 1.551	μήλων δαιομένων δόσαν ἔξοχα· τὸν δʼ ἐπὶ θινὶ
Odyssey 1.552	Ζηνὶ κελαινεφέι Κρονίδῃ, ὃς πᾶσιν ἀνάσσει,
Odyssey 1.553	ῥέξας μηρίʼ ἔκαιον· ὁ δʼ οὐκ ἐμπάζετο ἱρῶν,
Odyssey 1.554	ἀλλʼ ὅ γε μερμήριξεν ὅπως ἀπολοίατο πᾶσαι
Odyssey 1.555	νῆες ἐύσσελμοι καὶ ἐμοὶ ἐρίηρες ἑταῖροι.
Odyssey 1.556	ὣς τότε μὲν πρόπαν ἦμαρ ἐς ἠέλιον καταδύντα
Odyssey 1.557	ἥμεθα δαινύμενοι κρέα τʼ ἄσπετα καὶ μέθυ ἡδύ·
Odyssey 1.558	ἦμος δʼ ἠέλιος κατέδυ καὶ ἐπὶ κνέφας ἦλθε,
Odyssey 1.559	δὴ τότε κοιμήθημεν ἐπὶ ῥηγμῖνι θαλάσσης.
Odyssey 1.560	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.561	δὴ τότʼ ἐγὼν ἑτάροισιν ἐποτρύνας ἐκέλευσα
Odyssey 1.562	αὐτούς τʼ ἀμβαίνειν ἀνά τε πρυμνήσια λῦσαι·
Odyssey 1.563	οἱ δʼ αἶψʼ εἴσβαινον καὶ ἐπὶ κληῖσι καθῖζον,
Odyssey 1.564	ἑξῆς δʼ ἑζόμενοι πολιὴν ἅλα τύπτον ἐρετμοῖς.
Odyssey 1.565	ἔνθεν δὲ προτέρω πλέομεν ἀκαχήμενοι ἦτορ,
Odyssey 1.566	ἄσμενοι ἐκ θανάτοιο, φίλους ὀλέσαντες ἑταίρους.
Odyssey 1.1	Αἰολίην δʼ ἐς νῆσον ἀφικόμεθʼ· ἔνθα δʼ ἔναιεν
Odyssey 1.2	Αἴολος Ἱπποτάδης, φίλος ἀθανάτοισι θεοῖσιν,
Odyssey 1.3	πλωτῇ ἐνὶ νήσῳ· πᾶσαν δέ τέ μιν πέρι τεῖχος
Odyssey 1.4	χάλκεον ἄρρηκτον, λισσὴ δʼ ἀναδέδρομε πέτρη.
Odyssey 1.5	τοῦ καὶ δώδεκα παῖδες ἐνὶ μεγάροις γεγάασιν,
Odyssey 1.6	ἓξ μὲν θυγατέρες, ἓξ δʼ υἱέες ἡβώοντες·
Odyssey 1.7	ἔνθʼ ὅ γε θυγατέρας πόρεν υἱάσιν εἶναι ἀκοίτις.
Odyssey 1.8	οἱ δʼ αἰεὶ παρὰ πατρὶ φίλῳ καὶ μητέρι κεδνῇ
Odyssey 1.9	δαίνυνται, παρὰ δέ σφιν ὀνείατα μυρία κεῖται,
Odyssey 1.10	κνισῆεν δέ τε δῶμα περιστεναχίζεται αὐλῇ
Odyssey 1.11	ἤματα· νύκτας δʼ αὖτε παρʼ αἰδοίῃς ἀλόχοισιν
Odyssey 1.12	εὕδουσʼ ἔν τε τάπησι καὶ ἐν τρητοῖσι λέχεσσι.
Odyssey 1.13	καὶ μὲν τῶν ἱκόμεσθα πόλιν καὶ δώματα καλά.
Odyssey 1.14	μῆνα δὲ πάντα φίλει με καὶ ἐξερέεινεν ἕκαστα,
Odyssey 1.15	Ἴλιον Ἀργείων τε νέας καὶ νόστον Ἀχαιῶν·
Odyssey 1.16	καὶ μὲν ἐγὼ τῷ πάντα κατὰ μοῖραν κατέλεξα.
Odyssey 1.17	ἀλλʼ ὅτε δὴ καὶ ἐγὼν ὁδὸν ᾔτεον ἠδʼ ἐκέλευον
Odyssey 1.18	πεμπέμεν, οὐδέ τι κεῖνος ἀνήνατο, τεῦχε δὲ πομπήν.
Odyssey 1.19	δῶκε δέ μʼ ἐκδείρας ἀσκὸν βοὸς ἐννεώροιο,
Odyssey 1.20	ἔνθα δὲ βυκτάων ἀνέμων κατέδησε κέλευθα·
Odyssey 1.21	κεῖνον γὰρ ταμίην ἀνέμων ποίησε Κρονίων,
Odyssey 1.22	ἠμὲν παυέμεναι ἠδʼ ὀρνύμεν, ὅν κʼ ἐθέλῃσι.
Odyssey 1.23	νηὶ δʼ ἐνὶ γλαφυρῇ κατέδει μέρμιθι φαεινῇ
Odyssey 1.24	ἀργυρέῃ, ἵνα μή τι παραπνεύσῃ ὀλίγον περ·
Odyssey 1.25	αὐτὰρ ἐμοὶ πνοιὴν Ζεφύρου προέηκεν ἀῆναι,
Odyssey 1.26	ὄφρα φέροι νῆάς τε καὶ αὐτούς· οὐδʼ ἄρʼ ἔμελλεν
Odyssey 1.27	ἐκτελέειν· αὐτῶν γὰρ ἀπωλόμεθʼ ἀφραδίῃσιν.
Odyssey 1.28	ἐννῆμαρ μὲν ὁμῶς πλέομεν νύκτας τε καὶ ἦμαρ,
Odyssey 1.29	τῇ δεκάτῃ δʼ ἤδη ἀνεφαίνετο πατρὶς ἄρουρα,
Odyssey 1.30	καὶ δὴ πυρπολέοντας ἐλεύσσομεν ἐγγὺς ἐόντες·
Odyssey 1.31	ἔνθʼ ἐμὲ μὲν γλυκὺς ὕπνος ἐπήλυθε κεκμηῶτα,
Odyssey 1.32	αἰεὶ γὰρ πόδα νηὸς ἐνώμων, οὐδέ τῳ ἄλλῳ
Odyssey 1.33	δῶχʼ ἑτάρων, ἵνα θᾶσσον ἱκοίμεθα πατρίδα γαῖαν·
Odyssey 1.34	οἱ δʼ ἕταροι ἐπέεσσι πρὸς ἀλλήλους ἀγόρευον,
Odyssey 1.35	καί μʼ ἔφασαν χρυσόν τε καὶ ἄργυρον οἴκαδʼ ἄγεσθαι
Odyssey 1.36	δῶρα παρʼ Αἰόλου μεγαλήτορος Ἱπποτάδαο.
Odyssey 1.37	ὧδε δέ τις εἴπεσκεν ἰδὼν ἐς πλησίον ἄλλον·
Odyssey 1.38	ὦ πόποι, ὡς ὅδε πᾶσι φίλος καὶ τίμιός ἐστιν
Odyssey 1.39	ἀνθρώποις, ὅτεών τε πόλιν καὶ γαῖαν ἵκηται.
Odyssey 1.40	πολλὰ μὲν ἐκ Τροίης ἄγεται κειμήλια καλὰ
Odyssey 1.41	ληίδος, ἡμεῖς δʼ αὖτε ὁμὴν ὁδὸν ἐκτελέσαντες
Odyssey 1.42	οἴκαδε νισσόμεθα κενεὰς σὺν χεῖρας ἔχοντες·
Odyssey 1.43	καὶ νῦν οἱ τάδʼ ἔδωκε χαριζόμενος φιλότητι
Odyssey 1.44	Αἴολος. ἀλλʼ ἄγε θᾶσσον ἰδώμεθα ὅττι τάδʼ ἐστίν,
Odyssey 1.45	ὅσσος τις χρυσός τε καὶ ἄργυρος ἀσκῷ ἔνεστιν.
Odyssey 1.46	ὣς ἔφασαν, βουλὴ δὲ κακὴ νίκησεν ἑταίρων·
Odyssey 1.47	ἀσκὸν μὲν λῦσαν, ἄνεμοι δʼ ἐκ πάντες ὄρουσαν.
Odyssey 1.48	τοὺς δʼ αἶψʼ ἁρπάξασα φέρεν πόντονδε θύελλα
Odyssey 1.49	κλαίοντας, γαίης ἄπο πατρίδος. αὐτὰρ ἐγώ γε
Odyssey 1.50	ἐγρόμενος κατὰ θυμὸν ἀμύμονα μερμήριξα,
Odyssey 1.51	ἠὲ πεσὼν ἐκ νηὸς ἀποφθίμην ἐνὶ πόντῳ,
Odyssey 1.52	ἦ ἀκέων τλαίην καὶ ἔτι ζωοῖσι μετείην.
Odyssey 1.53	ἀλλʼ ἔτλην καὶ ἔμεινα, καλυψάμενος δʼ ἐνὶ νηὶ
Odyssey 1.54	κείμην. αἱ δʼ ἐφέροντο κακῇ ἀνέμοιο θυέλλῃ
Odyssey 1.55	αὖτις ἐπʼ Αἰολίην νῆσον, στενάχοντο δʼ ἑταῖροι.
Odyssey 1.56	ἔνθα δʼ ἐπʼ ἠπείρου βῆμεν καὶ ἀφυσσάμεθʼ ὕδωρ,
Odyssey 1.57	αἶψα δὲ δεῖπνον ἕλοντο θοῇς παρὰ νηυσὶν ἑταῖροι.
Odyssey 1.58	αὐτὰρ ἐπεὶ σίτοιό τʼ ἐπασσάμεθʼ ἠδὲ ποτῆτος,
Odyssey 1.59	δὴ τότʼ ἐγὼ κήρυκά τʼ ὀπασσάμενος καὶ ἑταῖρον
Odyssey 1.60	βῆν εἰς Αἰόλου κλυτὰ δώματα· τὸν δʼ ἐκίχανον
Odyssey 1.61	δαινύμενον παρὰ ᾗ τʼ ἀλόχῳ καὶ οἷσι τέκεσσιν.
Odyssey 1.62	ἐλθόντες δʼ ἐς δῶμα παρὰ σταθμοῖσιν ἐπʼ οὐδοῦ
Odyssey 1.63	ἑζόμεθʼ· οἱ δʼ ἀνὰ θυμὸν ἐθάμβεον ἔκ τʼ ἐρέοντο·
Odyssey 1.64	πῶς ἦλθες, Ὀδυσεῦ; τίς τοι κακὸς ἔχραε δαίμων;
Odyssey 1.65	ἦ μέν σʼ ἐνδυκέως ἀπεπέμπομεν, ὄφρʼ ἀφίκοιο
Odyssey 1.66	πατρίδα σὴν καὶ δῶμα καὶ εἴ πού τοι φίλον ἐστίν.
Odyssey 1.67	ὣς φάσαν, αὐτὰρ ἐγὼ μετεφώνεον ἀχνύμενος κῆρ·
Odyssey 1.68	ἄασάν μʼ ἕταροί τε κακοὶ πρὸς τοῖσί τε ὕπνος
Odyssey 1.69	σχέτλιος. ἀλλʼ ἀκέσασθε, φίλοι· δύναμις γὰρ ἐν ὑμῖν.
Odyssey 1.70	ὣς ἐφάμην μαλακοῖσι καθαπτόμενος ἐπέεσσιν,
Odyssey 1.71	οἱ δʼ ἄνεῳ ἐγένοντο· πατὴρ δʼ ἠμείβετο μύθῳ·
Odyssey 1.72	ἔρρʼ ἐκ νήσου θᾶσσον, ἐλέγχιστε ζωόντων·
Odyssey 1.73	οὐ γάρ μοι θέμις ἐστὶ κομιζέμεν οὐδʼ ἀποπέμπειν
Odyssey 1.74	ἄνδρα τόν, ὅς κε θεοῖσιν ἀπέχθηται μακάρεσσιν·
Odyssey 1.75	ἔρρε, ἐπεὶ ἄρα θεοῖσιν ἀπεχθόμενος τόδʼ ἱκάνεις.
Odyssey 1.76	ὣς εἰπὼν ἀπέπεμπε δόμων βαρέα στενάχοντα.
Odyssey 1.77	ἔνθεν δὲ προτέρω πλέομεν ἀκαχήμενοι ἦτορ.
Odyssey 1.78	τείρετο δʼ ἀνδρῶν θυμὸς ὑπʼ εἰρεσίης ἀλεγεινῆς
Odyssey 1.79	ἡμετέρῃ ματίῃ, ἐπεὶ οὐκέτι φαίνετο πομπή.
Odyssey 1.80	ἑξῆμαρ μὲν ὁμῶς πλέομεν νύκτας τε καὶ ἦμαρ,
Odyssey 1.81	ἑβδομάτῃ δʼ ἱκόμεσθα Λάμου αἰπὺ πτολίεθρον,
Odyssey 1.82	Τηλέπυλον Λαιστρυγονίην, ὅθι ποιμένα ποιμὴν
Odyssey 1.83	ἠπύει εἰσελάων, ὁ δέ τʼ ἐξελάων ὑπακούει.
Odyssey 1.84	ἔνθα κʼ ἄυπνος ἀνὴρ δοιοὺς ἐξήρατο μισθούς,
Odyssey 1.85	τὸν μὲν βουκολέων, τὸν δʼ ἄργυφα μῆλα νομεύων·
Odyssey 1.86	ἐγγὺς γὰρ νυκτός τε καὶ ἤματός εἰσι κέλευθοι.
Odyssey 1.87	ἔνθʼ ἐπεὶ ἐς λιμένα κλυτὸν ἤλθομεν, ὃν πέρι πέτρη
Odyssey 1.88	ἠλίβατος τετύχηκε διαμπερὲς ἀμφοτέρωθεν,
Odyssey 1.89	ἀκταὶ δὲ προβλῆτες ἐναντίαι ἀλλήλῃσιν
Odyssey 1.90	ἐν στόματι προύχουσιν, ἀραιὴ δʼ εἴσοδός ἐστιν,
Odyssey 1.91	ἔνθʼ οἵ γʼ εἴσω πάντες ἔχον νέας ἀμφιελίσσας.
Odyssey 1.92	αἱ μὲν ἄρʼ ἔντοσθεν λιμένος κοίλοιο δέδεντο
Odyssey 1.93	πλησίαι· οὐ μὲν γάρ ποτʼ ἀέξετο κῦμά γʼ ἐν αὐτῷ,
Odyssey 1.94	οὔτε μέγʼ οὔτʼ ὀλίγον, λευκὴ δʼ ἦν ἀμφὶ γαλήνη·
Odyssey 1.95	αὐτὰρ ἐγὼν οἶος σχέθον ἔξω νῆα μέλαιναν,
Odyssey 1.96	αὐτοῦ ἐπʼ ἐσχατιῇ, πέτρης ἐκ πείσματα δήσας·
Odyssey 1.97	ἔστην δὲ σκοπιὴν ἐς παιπαλόεσσαν ἀνελθών.
Odyssey 1.98	ἔνθα μὲν οὔτε βοῶν οὔτʼ ἀνδρῶν φαίνετο ἔργα,
Odyssey 1.99	καπνὸν δʼ οἶον ὁρῶμεν ἀπὸ χθονὸς ἀίσσοντα.
Odyssey 1.100	δὴ τότʼ ἐγὼν ἑτάρους προΐειν πεύθεσθαι ἰόντας,
Odyssey 1.101	οἵ τινες ἀνέρες εἶεν ἐπὶ χθονὶ σῖτον ἔδοντες,
Odyssey 1.102	ἄνδρε δύω κρίνας, τρίτατον κήρυχʼ ἅμʼ ὀπάσσας.
Odyssey 1.103	οἱ δʼ ἴσαν ἐκβάντες λείην ὁδόν, ᾗ περ ἄμαξαι
Odyssey 1.104	ἄστυδʼ ἀφʼ ὑψηλῶν ὀρέων καταγίνεον ὕλην,
Odyssey 1.105	κούρῃ δὲ ξύμβληντο πρὸ ἄστεος ὑδρευούσῃ,
Odyssey 1.106	θυγατέρʼ ἰφθίμῃ Λαιστρυγόνος Ἀντιφάταο.
Odyssey 1.107	ἡ μὲν ἄρʼ ἐς κρήνην κατεβήσετο καλλιρέεθρον
Odyssey 1.108	Ἀρτακίην· ἔνθεν γὰρ ὕδωρ προτὶ ἄστυ φέρεσκον·
Odyssey 1.109	οἱ δὲ παριστάμενοι προσεφώνεον ἔκ τʼ ἐρέοντο
Odyssey 1.110	ὅς τις τῶνδʼ εἴη βασιλεὺς καὶ οἷσιν ἀνάσσοι·
Odyssey 1.111	ἡ δὲ μάλʼ αὐτίκα πατρὸς ἐπέφραδεν ὑψερεφὲς δῶ.
Odyssey 1.112	οἱ δʼ ἐπεὶ εἰσῆλθον κλυτὰ δώματα, τὴν δὲ γυναῖκα
Odyssey 1.113	εὗρον, ὅσην τʼ ὄρεος κορυφήν, κατὰ δʼ ἔστυγον αὐτήν.
Odyssey 1.114	ἡ δʼ αἶψʼ ἐξ ἀγορῆς ἐκάλει κλυτὸν Ἀντιφατῆα,
Odyssey 1.115	ὃν πόσιν, ὃς δὴ τοῖσιν ἐμήσατο λυγρὸν ὄλεθρον.
Odyssey 1.116	αὐτίχʼ ἕνα μάρψας ἑτάρων ὡπλίσσατο δεῖπνον·
Odyssey 1.117	τὼ δὲ δύʼ ἀίξαντε φυγῇ ἐπὶ νῆας ἱκέσθην.
Odyssey 1.118	αὐτὰρ ὁ τεῦχε βοὴν διὰ ἄστεος· οἱ δʼ ἀίοντες
Odyssey 1.119	φοίτων ἴφθιμοι Λαιστρυγόνες ἄλλοθεν ἄλλος,
Odyssey 1.120	μυρίοι, οὐκ ἄνδρεσσιν ἐοικότες, ἀλλὰ Γίγασιν.
Odyssey 1.121	οἵ ῥʼ ἀπὸ πετράων ἀνδραχθέσι χερμαδίοισιν
Odyssey 1.122	βάλλον· ἄφαρ δὲ κακὸς κόναβος κατὰ νῆας ὀρώρει
Odyssey 1.123	ἀνδρῶν τʼ ὀλλυμένων νηῶν θʼ ἅμα ἀγνυμενάων·
Odyssey 1.124	ἰχθῦς δʼ ὣς πείροντες ἀτερπέα δαῖτα φέροντο.
Odyssey 1.125	ὄφρʼ οἱ τοὺς ὄλεκον λιμένος πολυβενθέος ἐντός,
Odyssey 1.126	τόφρα δʼ ἐγὼ ξίφος ὀξὺ ἐρυσσάμενος παρὰ μηροῦ
Odyssey 1.127	τῷ ἀπὸ πείσματʼ ἔκοψα νεὸς κυανοπρῴροιο.
Odyssey 1.128	αἶψα δʼ ἐμοῖς ἑτάροισιν ἐποτρύνας ἐκέλευσα
Odyssey 1.129	ἐμβαλέειν κώπῃς, ἵνʼ ὑπὲκ κακότητα φύγοιμεν·
Odyssey 1.130	οἱ δʼ ἅλα πάντες ἀνέρριψαν, δείσαντες ὄλεθρον.
Odyssey 1.131	ἀσπασίως δʼ ἐς πόντον ἐπηρεφέας φύγε πέτρας
Odyssey 1.132	νηῦς ἐμή· αὐτὰρ αἱ ἄλλαι ἀολλέες αὐτόθʼ ὄλοντο.
Odyssey 1.133	ἔνθεν δὲ προτέρω πλέομεν ἀκαχήμενοι ἦτορ,
Odyssey 1.134	ἄσμενοι ἐκ θανάτοιο, φίλους ὀλέσαντες ἑταίρους.
Odyssey 1.135	Αἰαίην δʼ ἐς νῆσον ἀφικόμεθʼ· ἔνθα δʼ ἔναιε
Odyssey 1.136	Κίρκη ἐυπλόκαμος, δεινὴ θεὸς αὐδήεσσα,
Odyssey 1.137	αὐτοκασιγνήτη ὀλοόφρονος Αἰήταο·
Odyssey 1.138	ἄμφω δʼ ἐκγεγάτην φαεσιμβρότου Ἠελίοιο
Odyssey 1.139	μητρός τʼ ἐκ Πέρσης, τὴν Ὠκεανὸς τέκε παῖδα.
Odyssey 1.140	ἔνθα δʼ ἐπʼ ἀκτῆς νηὶ κατηγαγόμεσθα σιωπῇ
Odyssey 1.141	ναύλοχον ἐς λιμένα, καί τις θεὸς ἡγεμόνευεν.
Odyssey 1.142	ἔνθα τότʼ ἐκβάντες δύο τʼ ἤματα καὶ δύο νύκτας
Odyssey 1.143	κείμεθʼ ὁμοῦ καμάτῳ τε καὶ ἄλγεσι θυμὸν ἔδοντες.
Odyssey 1.144	ἀλλʼ ὅτε δὴ τρίτον ἦμαρ ἐυπλόκαμος τέλεσʼ Ἠώς,
Odyssey 1.145	καὶ τότʼ ἐγὼν ἐμὸν ἔγχος ἑλὼν καὶ φάσγανον ὀξὺ
Odyssey 1.146	καρπαλίμως παρὰ νηὸς ἀνήιον ἐς περιωπήν,
Odyssey 1.147	εἴ πως ἔργα ἴδοιμι βροτῶν ἐνοπήν τε πυθοίμην.
Odyssey 1.148	ἔστην δὲ σκοπιὴν ἐς παιπαλόεσσαν ἀνελθών,
Odyssey 1.149	καί μοι ἐείσατο καπνὸς ἀπὸ χθονὸς εὐρυοδείης,
Odyssey 1.150	Κίρκης ἐν μεγάροισι, διὰ δρυμὰ πυκνὰ καὶ ὕλην.
Odyssey 1.151	μερμήριξα δʼ ἔπειτα κατὰ φρένα καὶ κατὰ θυμὸν
Odyssey 1.152	ἐλθεῖν ἠδὲ πυθέσθαι, ἐπεὶ ἴδον αἴθοπα καπνόν.
Odyssey 1.153	ὧδε δέ μοι φρονέοντι δοάσσατο κέρδιον εἶναι,
Odyssey 1.154	πρῶτʼ ἐλθόντʼ ἐπὶ νῆα θοὴν καὶ θῖνα θαλάσσης
Odyssey 1.155	δεῖπνον ἑταίροισιν δόμεναι προέμεν τε πυθέσθαι.
Odyssey 1.156	ἀλλʼ ὅτε δὴ σχεδὸν ἦα κιὼν νεὸς ἀμφιελίσσης,
Odyssey 1.157	καὶ τότε τίς με θεῶν ὀλοφύρατο μοῦνον ἐόντα,
Odyssey 1.158	ὅς ῥά μοι ὑψίκερων ἔλαφον μέγαν εἰς ὁδὸν αὐτὴν
Odyssey 1.159	ἧκεν. ὁ μὲν ποταμόνδε κατήιεν ἐκ νομοῦ ὕλης
Odyssey 1.160	πιόμενος· δὴ γάρ μιν ἔχεν μένος ἠελίοιο.
Odyssey 1.161	τὸν δʼ ἐγὼ ἐκβαίνοντα κατʼ ἄκνηστιν μέσα νῶτα
Odyssey 1.162	πλῆξα· τὸ δʼ ἀντικρὺ δόρυ χάλκεον ἐξεπέρησε,
Odyssey 1.163	κὰδ δʼ ἔπεσʼ ἐν κονίῃσι μακών, ἀπὸ δʼ ἔπτατο θυμός.
Odyssey 1.164	τῷ δʼ ἐγὼ ἐμβαίνων δόρυ χάλκεον ἐξ ὠτειλῆς
Odyssey 1.165	εἰρυσάμην· τὸ μὲν αὖθι κατακλίνας ἐπὶ γαίῃ
Odyssey 1.166	εἴασʼ· αὐτὰρ ἐγὼ σπασάμην ῥῶπάς τε λύγους τε,
Odyssey 1.167	πεῖσμα δʼ, ὅσον τʼ ὄργυιαν, ἐυστρεφὲς ἀμφοτέρωθεν
Odyssey 1.168	πλεξάμενος συνέδησα πόδας δεινοῖο πελώρου,
Odyssey 1.169	βῆν δὲ καταλοφάδεια φέρων ἐπὶ νῆα μέλαιναν
Odyssey 1.170	ἔγχει ἐρειδόμενος, ἐπεὶ οὔ πως ἦεν ἐπʼ ὤμου
Odyssey 1.171	χειρὶ φέρειν ἑτέρῃ· μάλα γὰρ μέγα θηρίον ἦεν.
Odyssey 1.172	κὰδʼ δʼ ἔβαλον προπάροιθε νεός, ἀνέγειρα δʼ ἑταίρους
Odyssey 1.173	μειλιχίοις ἐπέεσσι παρασταδὸν ἄνδρα ἕκαστον·
Odyssey 1.174	ὦ φίλοι, οὐ γάρ πω καταδυσόμεθʼ ἀχνύμενοί περ
Odyssey 1.175	εἰς Ἀίδαο δόμους, πρὶν μόρσιμον ἦμαρ ἐπέλθῃ·
Odyssey 1.176	ἀλλʼ ἄγετʼ, ὄφρʼ ἐν νηὶ θοῇ βρῶσίς τε πόσις τε,
Odyssey 1.177	μνησόμεθα βρώμης, μηδὲ τρυχώμεθα λιμῷ.
Odyssey 1.178	ὣς ἐφάμην, οἱ δʼ ὦκα ἐμοῖς ἐπέεσσι πίθοντο,
Odyssey 1.179	ἐκ δὲ καλυψάμενοι παρὰ θῖνʼ ἁλὸς ἀτρυγέτοιο
Odyssey 1.180	θηήσαντʼ ἔλαφον· μάλα γὰρ μέγα θηρίον ἦεν.
Odyssey 1.181	αὐτὰρ ἐπεὶ τάρπησαν ὁρώμενοι ὀφθαλμοῖσιν,
Odyssey 1.182	χεῖρας νιψάμενοι τεύχοντʼ ἐρικυδέα δαῖτα.
Odyssey 1.183	ὣς τότε μὲν πρόπαν ἦμαρ ἐς ἠέλιον καταδύντα
Odyssey 1.184	ἥμεθα δαινύμενοι κρέα τʼ ἄσπετα καὶ μέθυ ἡδύ·
Odyssey 1.185	ἦμος δʼ ἠέλιος κατέδυ καὶ ἐπὶ κνέφας ἦλθε,
Odyssey 1.186	δὴ τότε κοιμήθημεν ἐπὶ ῥηγμῖνι θαλάσσης.
Odyssey 1.187	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.188	καὶ τότʼ ἐγὼν ἀγορὴν θέμενος μετὰ πᾶσιν ἔειπον·
Odyssey 1.189	κέκλυτέ μευ μύθων, κακά περ πάσχοντες ἑταῖροι·
Odyssey 1.190	ὦ φίλοι, οὐ γάρ τʼ ἴδμεν, ὅπῃ ζόφος οὐδʼ ὅπῃ ἠώς,
Odyssey 1.191	οὐδʼ ὅπῃ ἠέλιος φαεσίμβροτος εἶσʼ ὑπὸ γαῖαν,
Odyssey 1.192	οὐδʼ ὅπῃ ἀννεῖται· ἀλλὰ φραζώμεθα θᾶσσον
Odyssey 1.193	εἴ τις ἔτʼ ἔσται μῆτις. ἐγὼ δʼ οὐκ οἴομαι εἶναι.
Odyssey 1.194	εἶδον γὰρ σκοπιὴν ἐς παιπαλόεσσαν ἀνελθὼν
Odyssey 1.195	νῆσον, τὴν πέρι πόντος ἀπείριτος ἐστεφάνωται·
Odyssey 1.196	αὐτὴ δὲ χθαμαλὴ κεῖται· καπνὸν δʼ ἐνὶ μέσσῃ
Odyssey 1.197	ἔδρακον ὀφθαλμοῖσι διὰ δρυμὰ πυκνὰ καὶ ὕλην.
Odyssey 1.198	ὣς ἐφάμην, τοῖσιν δὲ κατεκλάσθη φίλον ἦτορ
Odyssey 1.199	μνησαμένοις ἔργων Λαιστρυγόνος Ἀντιφάταο
Odyssey 1.200	Κύκλωπός τε βίης μεγαλήτορος, ἀνδροφάγοιο.
Odyssey 1.201	κλαῖον δὲ λιγέως θαλερὸν κατὰ δάκρυ χέοντες·
Odyssey 1.202	ἀλλʼ οὐ γάρ τις πρῆξις ἐγίγνετο μυρομένοισιν.
Odyssey 1.203	αὐτὰρ ἐγὼ δίχα πάντας ἐυκνήμιδας ἑταίρους
Odyssey 1.204	ἠρίθμεον, ἀρχὸν δὲ μετʼ ἀμφοτέροισιν ὄπασσα·
Odyssey 1.205	τῶν μὲν ἐγὼν ἦρχον, τῶν δʼ Εὐρύλοχος θεοειδής.
Odyssey 1.206	κλήρους δʼ ἐν κυνέῃ χαλκήρεϊ πάλλομεν ὦκα·
Odyssey 1.207	ἐκ δʼ ἔθορε κλῆρος μεγαλήτορος Εὐρυλόχοιο.
Odyssey 1.208	βῆ δʼ ἰέναι, ἅμα τῷ γε δύω καὶ εἴκοσʼ ἑταῖροι
Odyssey 1.209	κλαίοντες· κατὰ δʼ ἄμμε λίπον γοόωντας ὄπισθεν.
Odyssey 1.210	εὗρον δʼ ἐν βήσσῃσι τετυγμένα δώματα Κίρκης
Odyssey 1.211	ξεστοῖσιν λάεσσι, περισκέπτῳ ἐνὶ χώρῳ·
Odyssey 1.212	ἀμφὶ δέ μιν λύκοι ἦσαν ὀρέστεροι ἠδὲ λέοντες,
Odyssey 1.213	τοὺς αὐτὴ κατέθελξεν, ἐπεὶ κακὰ φάρμακʼ ἔδωκεν.
Odyssey 1.214	οὐδʼ οἵ γʼ ὡρμήθησαν ἐπʼ ἀνδράσιν, ἀλλʼ ἄρα τοί γε
Odyssey 1.215	οὐρῇσιν μακρῇσι περισσαίνοντες ἀνέσταν.
Odyssey 1.216	ὡς δʼ ὅτʼ ἂν ἀμφὶ ἄνακτα κύνες δαίτηθεν ἰόντα
Odyssey 1.217	σαίνωσʼ, αἰεὶ γάρ τε φέρει μειλίγματα θυμοῦ,
Odyssey 1.218	ὣς τοὺς ἀμφὶ λύκοι κρατερώνυχες ἠδὲ λέοντες
Odyssey 1.219	σαῖνον· τοὶ δʼ ἔδεισαν, ἐπεὶ ἴδον αἰνὰ πέλωρα.
Odyssey 1.220	ἔσταν δʼ ἐν προθύροισι θεᾶς καλλιπλοκάμοιο,
Odyssey 1.221	Κίρκης δʼ ἔνδον ἄκουον ἀειδούσης ὀπὶ καλῇ,
Odyssey 1.222	ἱστὸν ἐποιχομένης μέγαν ἄμβροτον, οἷα θεάων
Odyssey 1.223	λεπτά τε καὶ χαρίεντα καὶ ἀγλαὰ ἔργα πέλονται.
Odyssey 1.224	τοῖσι δὲ μύθων ἦρχε Πολίτης ὄρχαμος ἀνδρῶν,
Odyssey 1.225	ὅς μοι κήδιστος ἑτάρων ἦν κεδνότατός τε·
Odyssey 1.226	ὦ φίλοι, ἔνδον γάρ τις ἐποιχομένη μέγαν ἱστὸν
Odyssey 1.227	καλὸν ἀοιδιάει, δάπεδον δʼ ἅπαν ἀμφιμέμυκεν,
Odyssey 1.228	ἢ θεὸς ἠὲ γυνή· ἀλλὰ φθεγγώμεθα θᾶσσον.
Odyssey 1.229	ὣς ἄρʼ ἐφώνησεν, τοὶ δὲ φθέγγοντο καλεῦντες.
Odyssey 1.230	ἡ δʼ αἶψʼ ἐξελθοῦσα θύρας ὤιξε φαεινὰς
Odyssey 1.231	καὶ κάλει· οἱ δʼ ἅμα πάντες ἀιδρείῃσιν ἕποντο·
Odyssey 1.232	Εὐρύλοχος δʼ ὑπέμεινεν, ὀισάμενος δόλον εἶναι.
Odyssey 1.233	εἷσεν δʼ εἰσαγαγοῦσα κατὰ κλισμούς τε θρόνους τε,
Odyssey 1.234	ἐν δέ σφιν τυρόν τε καὶ ἄλφιτα καὶ μέλι χλωρὸν
Odyssey 1.235	οἴνῳ Πραμνείῳ ἐκύκα· ἀνέμισγε δὲ σίτῳ
Odyssey 1.236	φάρμακα λύγρʼ, ἵνα πάγχυ λαθοίατο πατρίδος αἴης.
Odyssey 1.237	αὐτὰρ ἐπεὶ δῶκέν τε καὶ ἔκπιον, αὐτίκʼ ἔπειτα
Odyssey 1.238	ῥάβδῳ πεπληγυῖα κατὰ συφεοῖσιν ἐέργνυ.
Odyssey 1.239	οἱ δὲ συῶν μὲν ἔχον κεφαλὰς φωνήν τε τρίχας τε
Odyssey 1.240	καὶ δέμας, αὐτὰρ νοῦς ἦν ἔμπεδος, ὡς τὸ πάρος περ.
Odyssey 1.241	ὣς οἱ μὲν κλαίοντες ἐέρχατο, τοῖσι δὲ Κίρκη
Odyssey 1.242	πάρ ῥʼ ἄκυλον βάλανόν τε βάλεν καρπόν τε κρανείης
Odyssey 1.243	ἔδμεναι, οἷα σύες χαμαιευνάδες αἰὲν ἔδουσιν.
Odyssey 1.244	Εὐρύλοχος δʼ αἶψʼ ἦλθε θοὴν ἐπὶ νῆα μέλαιναν
Odyssey 1.245	ἀγγελίην ἑτάρων ἐρέων καὶ ἀδευκέα πότμον.
Odyssey 1.246	οὐδέ τι ἐκφάσθαι δύνατο ἔπος ἱέμενός περ,
Odyssey 1.247	κῆρ ἄχεϊ μεγάλῳ βεβολημένος· ἐν δέ οἱ ὄσσε
Odyssey 1.248	δακρυόφιν πίμπλαντο, γόον δʼ ὠίετο θυμός.
Odyssey 1.249	ἀλλʼ ὅτε δή μιν πάντες ἀγασσάμεθʼ ἐξερέοντες,
Odyssey 1.250	καὶ τότε τῶν ἄλλων ἑτάρων κατέλεξεν ὄλεθρον·
Odyssey 1.251	ἤιομεν, ὡς ἐκέλευες, ἀνὰ δρυμά, φαίδιμʼ Ὀδυσσεῦ·
Odyssey 1.252	εὕρομεν ἐν βήσσῃσι τετυγμένα δώματα καλὰ
Odyssey 1.253	ξεστοῖσιν λάεσσι, περισκέπτῳ ἐνὶ χώρῳ.
Odyssey 1.254	ἔνθα δέ τις μέγαν ἱστὸν ἐποιχομένη λίγʼ ἄειδεν,
Odyssey 1.255	ἢ θεὸς ἠὲ γυνή· τοὶ δὲ φθέγγοντο καλεῦντες.
Odyssey 1.256	ἡ δʼ αἶψʼ ἐξελθοῦσα θύρας ὤιξε φαεινὰς
Odyssey 1.257	καὶ κάλει· οἱ δʼ ἅμα πάντες ἀιδρείῃσιν ἕποντο·
Odyssey 1.258	αὐτὰρ ἐγὼν ὑπέμεινα, ὀισάμενος δόλον εἶναι.
Odyssey 1.259	οἱ δʼ ἅμʼ ἀιστώθησαν ἀολλέες, οὐδέ τις αὐτῶν
Odyssey 1.260	ἐξεφάνη· δηρὸν δὲ καθήμενος ἐσκοπίαζον.
Odyssey 1.261	ὣς ἔφατʼ, αὐτὰρ ἐγὼ περὶ μὲν ξίφος ἀργυρόηλον
Odyssey 1.262	ὤμοιιν βαλόμην, μέγα χάλκεον, ἀμφὶ δὲ τόξα·
Odyssey 1.263	τὸν δʼ ἂψ ἠνώγεα αὐτὴν ὁδὸν ἡγήσασθαι.
Odyssey 1.264	αὐτὰρ ὅ γʼ ἀμφοτέρῃσι λαβὼν ἐλλίσσετο γούνων
Odyssey 1.265	καί μʼ ὀλοφυρόμενος ἔπεα πτερόεντα προσηύδα·
Odyssey 1.266	μή μʼ ἄγε κεῖσʼ ἀέκοντα, διοτρεφές, ἀλλὰ λίπʼ αὐτοῦ.
Odyssey 1.267	οἶδα γάρ, ὡς οὔτʼ αὐτὸς ἐλεύσεαι οὔτε τινʼ ἄλλον
Odyssey 1.268	ἄξεις σῶν ἑτάρων. ἀλλὰ ξὺν τοίσδεσι θᾶσσον
Odyssey 1.269	φεύγωμεν· ἔτι γάρ κεν ἀλύξαιμεν κακὸν ἦμαρ.
Odyssey 1.270	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.271	Εὐρύλοχʼ, ἦ τοι μὲν σὺ μένʼ αὐτοῦ τῷδʼ ἐνὶ χώρῳ
Odyssey 1.272	ἔσθων καὶ πίνων κοίλῃ παρὰ νηὶ μελαίνῃ·
Odyssey 1.273	αὐτὰρ ἐγὼν εἶμι, κρατερὴ δέ μοι ἔπλετʼ ἀνάγκη.
Odyssey 1.274	ὣς εἰπὼν παρὰ νηὸς ἀνήιον ἠδὲ θαλάσσης.
Odyssey 1.275	ἀλλʼ ὅτε δὴ ἄρʼ ἔμελλον ἰὼν ἱερὰς ἀνὰ βήσσας
Odyssey 1.276	Κίρκης ἵξεσθαι πολυφαρμάκου ἐς μέγα δῶμα,
Odyssey 1.277	ἔνθα μοι Ἑρμείας χρυσόρραπις ἀντεβόλησεν
Odyssey 1.278	ἐρχομένῳ πρὸς δῶμα, νεηνίῃ ἀνδρὶ ἐοικώς,
Odyssey 1.279	πρῶτον ὑπηνήτῃ, τοῦ περ χαριεστάτη ἥβη·
Odyssey 1.280	ἔν τʼ ἄρα μοι φῦ χειρί, ἔπος τʼ ἔφατʼ ἔκ τʼ ὀνόμαζε·
Odyssey 1.281	πῇ δὴ αὖτʼ, ὦ δύστηνε, διʼ ἄκριας ἔρχεαι οἶος,
Odyssey 1.282	χώρου ἄιδρις ἐών; ἕταροι δέ τοι οἵδʼ ἐνὶ Κίρκης
Odyssey 1.283	ἔρχαται ὥς τε σύες πυκινοὺς κευθμῶνας ἔχοντες.
Odyssey 1.284	ἦ τοὺς λυσόμενος δεῦρʼ ἔρχεαι; οὐδέ σέ φημι
Odyssey 1.285	αὐτὸν νοστήσειν, μενέεις δὲ σύ γʼ, ἔνθα περ ἄλλοι.
Odyssey 1.286	ἀλλʼ ἄγε δή σε κακῶν ἐκλύσομαι ἠδὲ σαώσω.
Odyssey 1.287	τῆ, τόδε φάρμακον ἐσθλὸν ἔχων ἐς δώματα Κίρκης
Odyssey 1.288	ἔρχευ, ὅ κέν τοι κρατὸς ἀλάλκῃσιν κακὸν ἦμαρ.
Odyssey 1.289	πάντα δέ τοι ἐρέω ὀλοφώια δήνεα Κίρκης.
Odyssey 1.290	τεύξει τοι κυκεῶ, βαλέει δʼ ἐν φάρμακα σίτῳ.
Odyssey 1.291	ἀλλʼ οὐδʼ ὣς θέλξαι σε δυνήσεται· οὐ γὰρ ἐάσει
Odyssey 1.292	φάρμακον ἐσθλόν, ὅ τοι δώσω, ἐρέω δὲ ἕκαστα.
Odyssey 1.293	ὁππότε κεν Κίρκη σʼ ἐλάσῃ περιμήκεϊ ῥάβδῳ,
Odyssey 1.294	δὴ τότε σὺ ξίφος ὀξὺ ἐρυσσάμενος παρὰ μηροῦ
Odyssey 1.295	Κίρκῃ ἐπαῖξαι, ὥς τε κτάμεναι μενεαίνων.
Odyssey 1.296	ἡ δέ σʼ ὑποδείσασα κελήσεται εὐνηθῆναι·
Odyssey 1.297	ἔνθα σὺ μηκέτʼ ἔπειτʼ ἀπανήνασθαι θεοῦ εὐνήν,
Odyssey 1.298	ὄφρα κέ τοι λύσῃ θʼ ἑτάρους αὐτόν τε κομίσσῃ·
Odyssey 1.299	ἀλλὰ κέλεσθαί μιν μακάρων μέγαν ὅρκον ὀμόσσαι,
Odyssey 1.300	μή τί τοι αὐτῷ πῆμα κακὸν βουλευσέμεν ἄλλο,
Odyssey 1.301	μή σʼ ἀπογυμνωθέντα κακὸν καὶ ἀνήνορα θήῃ.
Odyssey 1.302	ὣς ἄρα φωνήσας πόρε φάρμακον ἀργεϊφόντης
Odyssey 1.303	ἐκ γαίης ἐρύσας, καί μοι φύσιν αὐτοῦ ἔδειξε.
Odyssey 1.304	ῥίζῃ μὲν μέλαν ἔσκε, γάλακτι δὲ εἴκελον ἄνθος·
Odyssey 1.305	μῶλυ δέ μιν καλέουσι θεοί· χαλεπὸν δέ τʼ ὀρύσσειν
Odyssey 1.306	ἀνδράσι γε θνητοῖσι, θεοὶ δέ τε πάντα δύνανται.
Odyssey 1.307	Ἑρμείας μὲν ἔπειτʼ ἀπέβη πρὸς μακρὸν Ὄλυμπον
Odyssey 1.308	νῆσον ἀνʼ ὑλήεσσαν, ἐγὼ δʼ ἐς δώματα Κίρκης
Odyssey 1.309	ἤια, πολλὰ δέ μοι κραδίη πόρφυρε κιόντι.
Odyssey 1.310	ἔστην δʼ εἰνὶ θύρῃσι θεᾶς καλλιπλοκάμοιο·
Odyssey 1.311	ἔνθα στὰς ἐβόησα, θεὰ δέ μευ ἔκλυεν αὐδῆς.
Odyssey 1.312	ἡ δʼ αἶψʼ ἐξελθοῦσα θύρας ὤιξε φαεινὰς
Odyssey 1.313	καὶ κάλει· αὐτὰρ ἐγὼν ἑπόμην ἀκαχήμενος ἦτορ.
Odyssey 1.314	εἷσε δέ μʼ εἰσαγαγοῦσα ἐπὶ θρόνου ἀργυροήλου
Odyssey 1.315	καλοῦ δαιδαλέου· ὑπὸ δὲ θρῆνυς ποσὶν ἦεν·
Odyssey 1.316	τεῦχε δέ μοι κυκεῶ χρυσέῳ δέπαι, ὄφρα πίοιμι,
Odyssey 1.317	ἐν δέ τε φάρμακον ἧκε, κακὰ φρονέουσʼ ἐνὶ θυμῷ.
Odyssey 1.318	αὐτὰρ ἐπεὶ δῶκέν τε καὶ ἔκπιον, οὐδέ μʼ ἔθελξε,
Odyssey 1.319	ῥάβδῳ πεπληγυῖα ἔπος τʼ ἔφατʼ ἔκ τʼ ὀνόμαζεν·
Odyssey 1.320	ἔρχεο νῦν συφεόνδε, μετʼ ἄλλων λέξο ἑταίρων.
Odyssey 1.321	ὣς φάτʼ, ἐγὼ δʼ ἄορ ὀξὺ ἐρυσσάμενος παρὰ μηροῦ
Odyssey 1.322	Κίρκῃ ἐπήιξα ὥς τε κτάμεναι μενεαίνων.
Odyssey 1.323	ἡ δὲ μέγα ἰάχουσα ὑπέδραμε καὶ λάβε γούνων,
Odyssey 1.324	καί μʼ ὀλοφυρομένη ἔπεα πτερόεντα προσηύδα·
Odyssey 1.325	τίς πόθεν εἰς ἀνδρῶν; πόθι τοι πόλις ἠδὲ τοκῆες;
Odyssey 1.326	θαῦμά μʼ ἔχει ὡς οὔ τι πιὼν τάδε φάρμακʼ ἐθέλχθης·
Odyssey 1.327	οὐδὲ γὰρ οὐδέ τις ἄλλος ἀνὴρ τάδε φάρμακʼ ἀνέτλη,
Odyssey 1.328	ὅς κε πίῃ καὶ πρῶτον ἀμείψεται ἕρκος ὀδόντων.
Odyssey 1.329	σοὶ δέ τις ἐν στήθεσσιν ἀκήλητος νόος ἐστίν.
Odyssey 1.330	ἦ σύ γʼ Ὀδυσσεύς ἐσσι πολύτροπος, ὅν τέ μοι αἰεὶ
Odyssey 1.331	φάσκεν ἐλεύσεσθαι χρυσόρραπις ἀργεϊφόντης,
Odyssey 1.332	ἐκ Τροίης ἀνιόντα θοῇ σὺν νηὶ μελαίνῃ.
Odyssey 1.333	ἀλλʼ ἄγε δὴ κολεῷ μὲν ἄορ θέο, νῶι δʼ ἔπειτα
Odyssey 1.334	εὐνῆς ἡμετέρης ἐπιβείομεν, ὄφρα μιγέντε
Odyssey 1.335	εὐνῇ καὶ φιλότητι πεποίθομεν ἀλλήλοισιν.
Odyssey 1.336	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.337	ὦ Κίρκη, πῶς γάρ με κέλεαι σοὶ ἤπιον εἶναι,
Odyssey 1.338	ἥ μοι σῦς μὲν ἔθηκας ἐνὶ μεγάροισιν ἑταίρους,
Odyssey 1.339	αὐτὸν δʼ ἐνθάδʼ ἔχουσα δολοφρονέουσα κελεύεις
Odyssey 1.340	ἐς θάλαμόν τʼ ἰέναι καὶ σῆς ἐπιβήμεναι εὐνῆς,
Odyssey 1.341	ὄφρα με γυμνωθέντα κακὸν καὶ ἀνήνορα θήῃς.
Odyssey 1.342	οὐδʼ ἂν ἐγώ γʼ ἐθέλοιμι τεῆς ἐπιβήμεναι εὐνῆς,
Odyssey 1.343	εἰ μή μοι τλαίης γε, θεά, μέγαν ὅρκον ὀμόσσαι
Odyssey 1.344	μή τί μοι αὐτῷ πῆμα κακὸν βουλευσέμεν ἄλλο.
Odyssey 1.345	ὣς ἐφάμην, ἡ δʼ αὐτίκʼ ἀπώμνυεν, ὡς ἐκέλευον.
Odyssey 1.346	αὐτὰρ ἐπεί ῥʼ ὄμοσέν τε τελεύτησέν τε τὸν ὅρκον,
Odyssey 1.347	καὶ τότʼ ἐγὼ Κίρκης ἐπέβην περικαλλέος εὐνῆς.
Odyssey 1.348	ἀμφίπολοι δʼ ἄρα τέως μὲν ἐνὶ μεγάροισι πένοντο
Odyssey 1.349	τέσσαρες, αἵ οἱ δῶμα κάτα δρήστειραι ἔασι·
Odyssey 1.350	γίγνονται δʼ ἄρα ταί γʼ ἔκ τε κρηνέων ἀπό τʼ ἀλσέων
Odyssey 1.351	ἔκ θʼ ἱερῶν ποταμῶν, οἵ τʼ εἰς ἅλαδε προρέουσι.
Odyssey 1.352	τάων ἡ μὲν ἔβαλλε θρόνοις ἔνι ῥήγεα καλὰ
Odyssey 1.353	πορφύρεα καθύπερθʼ, ὑπένερθε δὲ λῖθʼ ὑπέβαλλεν·
Odyssey 1.354	ἡ δʼ ἑτέρη προπάροιθε θρόνων ἐτίταινε τραπέζας
Odyssey 1.355	ἀργυρέας, ἐπὶ δέ σφι τίθει χρύσεια κάνεια·
Odyssey 1.356	ἡ δὲ τρίτη κρητῆρι μελίφρονα οἶνον ἐκίρνα
Odyssey 1.357	ἡδὺν ἐν ἀργυρέῳ, νέμε δὲ χρύσεια κύπελλα·
Odyssey 1.358	ἡ δὲ τετάρτη ὕδωρ ἐφόρει καὶ πῦρ ἀνέκαιε
Odyssey 1.359	πολλὸν ὑπὸ τρίποδι μεγάλῳ· ἰαίνετο δʼ ὕδωρ.
Odyssey 1.360	αὐτὰρ ἐπεὶ δὴ ζέσσεν ὕδωρ ἐνὶ ἤνοπι χαλκῷ,
Odyssey 1.361	ἔς ῥʼ ἀσάμινθον ἕσασα λόʼ ἐκ τρίποδος μεγάλοιο,
Odyssey 1.362	θυμῆρες κεράσασα, κατὰ κρατός τε καὶ ὤμων,
Odyssey 1.363	ὄφρα μοι ἐκ κάματον θυμοφθόρον εἵλετο γυίων.
Odyssey 1.364	αὐτὰρ ἐπεὶ λοῦσέν τε καὶ ἔχρισεν λίπʼ ἐλαίῳ,
Odyssey 1.365	ἀμφὶ δέ με χλαῖναν καλὴν βάλεν ἠδὲ χιτῶνα,
Odyssey 1.366	εἷσε δέ μʼ εἰσαγαγοῦσα ἐπὶ θρόνου ἀργυροήλου
Odyssey 1.367	καλοῦ δαιδαλέου, ὑπὸ δὲ θρῆνυς ποσὶν ἦεν·
Odyssey 1.368	χέρνιβα δʼ ἀμφίπολος προχόῳ ἐπέχευε φέρουσα
Odyssey 1.369	καλῇ χρυσείῃ, ὑπὲρ ἀργυρέοιο λέβητος,
Odyssey 1.370	νίψασθαι· παρὰ δὲ ξεστὴν ἐτάνυσσε τράπεζαν.
Odyssey 1.371	σῖτον δʼ αἰδοίη ταμίη παρέθηκε φέρουσα,
Odyssey 1.372	εἴδατα πόλλʼ ἐπιθεῖσα, χαριζομένη παρεόντων.
Odyssey 1.373	ἐσθέμεναι δʼ ἐκέλευεν· ἐμῷ δʼ οὐχ ἥνδανε θυμῷ,
Odyssey 1.374	ἀλλʼ ἥμην ἀλλοφρονέων, κακὰ δʼ ὄσσετο θυμός.
Odyssey 1.375	Κίρκη δʼ ὡς ἐνόησεν ἔμʼ ἥμενον οὐδʼ ἐπὶ σίτῳ
Odyssey 1.376	χεῖρας ἰάλλοντα, κρατερὸν δέ με πένθος ἔχοντα,
Odyssey 1.377	ἄγχι παρισταμένη ἔπεα πτερόεντα προσηύδα·
Odyssey 1.378	τίφθʼ οὕτως, Ὀδυσεῦ, κατʼ ἄρʼ ἕζεαι ἶσος ἀναύδῳ,
Odyssey 1.379	θυμὸν ἔδων, βρώμης δʼ οὐχ ἅπτεαι οὐδὲ ποτῆτος;
Odyssey 1.380	ἦ τινά που δόλον ἄλλον ὀίεαι· οὐδέ τί σε χρὴ
Odyssey 1.381	δειδίμεν· ἤδη γάρ τοι ἀπώμοσα καρτερὸν ὅρκον.
Odyssey 1.382	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.383	ὦ Κίρκη, τίς γάρ κεν ἀνήρ, ὃς ἐναίσιμος εἴη,
Odyssey 1.384	πρὶν τλαίη πάσσασθαι ἐδητύος ἠδὲ ποτῆτος,
Odyssey 1.385	πρὶν λύσασθʼ ἑτάρους καὶ ἐν ὀφθαλμοῖσιν ἰδέσθαι;
Odyssey 1.386	ἀλλʼ εἰ δὴ πρόφρασσα πιεῖν φαγέμεν τε κελεύεις,
Odyssey 1.387	λῦσον, ἵνʼ ὀφθαλμοῖσιν ἴδω ἐρίηρας ἑταίρους.
Odyssey 1.388	ὣς ἐφάμην, Κίρκη δὲ διὲκ μεγάροιο βεβήκει
Odyssey 1.389	ῥάβδον ἔχουσʼ ἐν χειρί, θύρας δʼ ἀνέῳξε συφειοῦ,
Odyssey 1.390	ἐκ δʼ ἔλασεν σιάλοισιν ἐοικότας ἐννεώροισιν.
Odyssey 1.391	οἱ μὲν ἔπειτʼ ἔστησαν ἐναντίοι, ἡ δὲ διʼ αὐτῶν
Odyssey 1.392	ἐρχομένη προσάλειφεν ἑκάστῳ φάρμακον ἄλλο.
Odyssey 1.393	τῶν δʼ ἐκ μὲν μελέων τρίχες ἔρρεον, ἃς πρὶν ἔφυσε
Odyssey 1.394	φάρμακον οὐλόμενον, τό σφιν πόρε πότνια Κίρκη·
Odyssey 1.395	ἄνδρες δʼ ἂψ ἐγένοντο νεώτεροι ἢ πάρος ἦσαν,
Odyssey 1.396	καὶ πολὺ καλλίονες καὶ μείζονες εἰσοράασθαι.
Odyssey 1.397	ἔγνωσαν δέ μʼ ἐκεῖνοι ἔφυν τʼ ἐν χερσὶν ἕκαστος.
Odyssey 1.398	πᾶσιν δʼ ἱμερόεις ὑπέδυ γόος, ἀμφὶ δὲ δῶμα
Odyssey 1.399	σμερδαλέον κονάβιζε· θεὰ δʼ ἐλέαιρε καὶ αὐτή.
Odyssey 1.400	ἡ δέ μευ ἄγχι στᾶσα προσηύδα δῖα θεάων·
Odyssey 1.401	διογενὲς Λαερτιάδη, πολυμήχανʼ Ὀδυσσεῦ,
Odyssey 1.402	ἔρχεο νῦν ἐπὶ νῆα θοὴν καὶ θῖνα θαλάσσης.
Odyssey 1.403	νῆα μὲν ἂρ πάμπρωτον ἐρύσσατε ἤπειρόνδε,
Odyssey 1.404	κτήματα δʼ ἐν σπήεσσι πελάσσατε ὅπλα τε πάντα·
Odyssey 1.405	αὐτὸς δʼ ἂψ ἰέναι καὶ ἄγειν ἐρίηρας ἑταίρους.
Odyssey 1.406	ὣς ἔφατʼ, αὐτὰρ ἐμοί γʼ ἐπεπείθετο θυμὸς ἀγήνωρ,
Odyssey 1.407	βῆν δʼ ἰέναι ἐπὶ νῆα θοὴν καὶ θῖνα θαλάσσης.
Odyssey 1.408	εὗρον ἔπειτʼ ἐπὶ νηὶ θοῇ ἐρίηρας ἑταίρους
Odyssey 1.409	οἴκτρʼ ὀλοφυρομένους, θαλερὸν κατὰ δάκρυ χέοντας.
Odyssey 1.410	ὡς δʼ ὅτʼ ἂν ἄγραυλοι πόριες περὶ βοῦς ἀγελαίας,
Odyssey 1.411	ἐλθούσας ἐς κόπρον, ἐπὴν βοτάνης κορέσωνται,
Odyssey 1.412	πᾶσαι ἅμα σκαίρουσιν ἐναντίαι· οὐδʼ ἔτι σηκοὶ
Odyssey 1.413	ἴσχουσʼ, ἀλλʼ ἁδινὸν μυκώμεναι ἀμφιθέουσι·
Odyssey 1.414	μητέρας· ὣς ἔμʼ ἐκεῖνοι ἐπεὶ ἴδον ὀφθαλμοῖσι,
Odyssey 1.415	δακρυόεντες ἔχυντο· δόκησε δʼ ἄρα σφίσι θυμὸς
Odyssey 1.416	ὣς ἔμεν, ὡς εἰ πατρίδʼ ἱκοίατο καὶ πόλιν αὐτὴν
Odyssey 1.417	τρηχείης Ἰθάκης, ἵνα τʼ ἔτραφεν ἠδʼ ἐγένοντο.
Odyssey 1.418	καί μʼ ὀλοφυρόμενοι ἔπεα πτερόεντα προσηύδων·
Odyssey 1.419	σοὶ μὲν νοστήσαντι, διοτρεφές, ὣς ἐχάρημεν,
Odyssey 1.420	ὡς εἴ τʼ εἰς Ἰθάκην ἀφικοίμεθα πατρίδα γαῖαν·
Odyssey 1.421	ἀλλʼ ἄγε, τῶν ἄλλων ἑτάρων κατάλεξον ὄλεθρον.
Odyssey 1.422	ὣς ἔφαν, αὐτὰρ ἐγὼ προσέφην μαλακοῖς ἐπέεσσι·
Odyssey 1.423	νῆα μὲν ἂρ πάμπρωτον ἐρύσσομεν ἤπειρόνδε,
Odyssey 1.424	κτήματα δʼ ἐν σπήεσσι πελάσσομεν ὅπλα τε πάντα·
Odyssey 1.425	αὐτοὶ δʼ ὀτρύνεσθε ἐμοὶ ἅμα πάντες ἕπεσθαι,
Odyssey 1.426	ὄφρα ἴδηθʼ ἑτάρους ἱεροῖς ἐν δώμασι Κίρκης
Odyssey 1.427	πίνοντας καὶ ἔδοντας· ἐπηετανὸν γὰρ ἔχουσιν.
Odyssey 1.428	ὣς ἐφάμην, οἱ δʼ ὦκα ἐμοῖς ἐπέεσσι πίθοντο.
Odyssey 1.429	Εὐρύλοχος δέ μοι οἶος ἐρύκανε πάντας ἑταίρους·
Odyssey 1.430	καί σφεας φωνήσας ἔπεα πτερόεντα προσηύδα·
Odyssey 1.431	ἆ δειλοί, πόσʼ ἴμεν; τί κακῶν ἱμείρετε τούτων;
Odyssey 1.432	Κίρκης ἐς μέγαρον καταβήμεναι, ἥ κεν ἅπαντας
Odyssey 1.433	ἢ σῦς ἠὲ λύκους ποιήσεται ἠὲ λέοντας,
Odyssey 1.434	οἵ κέν οἱ μέγα δῶμα φυλάσσοιμεν καὶ ἀνάγκῃ,
Odyssey 1.435	ὥς περ Κύκλωψ ἔρξʼ, ὅτε οἱ μέσσαυλον ἵκοντο
Odyssey 1.436	ἡμέτεροι ἕταροι, σὺν δʼ ὁ θρασὺς εἵπετʼ Ὀδυσσεύς·
Odyssey 1.437	τούτου γὰρ καὶ κεῖνοι ἀτασθαλίῃσιν ὄλοντο.
Odyssey 1.438	ὣς ἔφατʼ, αὐτὰρ ἐγώ γε μετὰ φρεσὶ μερμήριξα,
Odyssey 1.439	σπασσάμενος τανύηκες ἄορ παχέος παρὰ μηροῦ,
Odyssey 1.440	τῷ οἱ ἀποπλήξας κεφαλὴν οὖδάσδε πελάσσαι,
Odyssey 1.441	καὶ πηῷ περ ἐόντι μάλα σχεδόν· ἀλλά μʼ ἑταῖροι
Odyssey 1.442	μειλιχίοις ἐπέεσσιν ἐρήτυον ἄλλοθεν ἄλλος·
Odyssey 1.443	διογενές, τοῦτον μὲν ἐάσομεν, εἰ σὺ κελεύεις,
Odyssey 1.444	αὐτοῦ πὰρ νηί τε μένειν καὶ νῆα ἔρυσθαι·
Odyssey 1.445	ἡμῖν δʼ ἡγεμόνευʼ ἱερὰ πρὸς δώματα Κίρκης.
Odyssey 1.446	ὣς φάμενοι παρὰ νηὸς ἀνήιον ἠδὲ θαλάσσης.
Odyssey 1.447	οὐδὲ μὲν Εὐρύλοχος κοίλῃ παρὰ νηὶ λέλειπτο,
Odyssey 1.448	ἀλλʼ ἕπετʼ· ἔδεισεν γὰρ ἐμὴν ἔκπαγλον ἐνιπήν.
Odyssey 1.449	τόφρα δὲ τοὺς ἄλλους ἑτάρους ἐν δώμασι Κίρκη
Odyssey 1.450	ἐνδυκέως λοῦσέν τε καὶ ἔχρισεν λίπʼ ἐλαίῳ,
Odyssey 1.451	ἀμφὶ δʼ ἄρα χλαίνας οὔλας βάλεν ἠδὲ χιτῶνας·
Odyssey 1.452	δαινυμένους δʼ ἐὺ πάντας ἐφεύρομεν ἐν μεγάροισιν.
Odyssey 1.453	οἱ δʼ ἐπεὶ ἀλλήλους εἶδον φράσσαντό τʼ ἐσάντα,
Odyssey 1.454	κλαῖον ὀδυρόμενοι, περὶ δὲ στεναχίζετο δῶμα.
Odyssey 1.455	ἡ δέ μευ ἄγχι στᾶσα προσηύδα δῖα θεάων·
Odyssey 1.457	μηκέτι νῦν θαλερὸν γόον ὄρνυτε· οἶδα καὶ αὐτὴ
Odyssey 1.458	ἠμὲν ὅσʼ ἐν πόντῳ πάθετʼ ἄλγεα ἰχθυόεντι,
Odyssey 1.459	ἠδʼ ὅσʼ ἀνάρσιοι ἄνδρες ἐδηλήσαντʼ ἐπὶ χέρσου.
Odyssey 1.460	ἀλλʼ ἄγετʼ ἐσθίετε βρώμην καὶ πίνετε οἶνον,
Odyssey 1.461	εἰς ὅ κεν αὖτις θυμὸν ἐνὶ στήθεσσι λάβητε,
Odyssey 1.462	οἷον ὅτε πρώτιστον ἐλείπετε πατρίδα γαῖαν
Odyssey 1.463	τρηχείης Ἰθάκης. νῦν δʼ ἀσκελέες καὶ ἄθυμοι,
Odyssey 1.464	αἰὲν ἄλης χαλεπῆς μεμνημένοι, οὐδέ ποθʼ ὕμιν
Odyssey 1.465	θυμὸς ἐν εὐφροσύνῃ, ἐπεὶ ἦ μάλα πολλὰ πέποσθε.
Odyssey 1.466	ὣς ἔφαθʼ, ἡμῖν δʼ αὖτʼ ἐπεπείθετο θυμὸς ἀγήνωρ.
Odyssey 1.467	ἔνθα μὲν ἤματα πάντα τελεσφόρον εἰς ἐνιαυτὸν
Odyssey 1.468	ἥμεθα δαινύμενοι κρέα τʼ ἄσπετα καὶ μέθυ ἡδύ·
Odyssey 1.469	ἀλλʼ ὅτε δή ῥʼ ἐνιαυτὸς ἔην, περὶ δʼ ἔτραπον ὧραι
Odyssey 1.470	μηνῶν φθινόντων, περὶ δʼ ἤματα μακρὰ τελέσθη,
Odyssey 1.471	καὶ τότε μʼ ἐκκαλέσαντες ἔφαν ἐρίηρες ἑταῖροι·
Odyssey 1.472	δαιμόνιʼ, ἤδη νῦν μιμνήσκεο πατρίδος αἴης,
Odyssey 1.473	εἴ τοι θέσφατόν ἐστι σαωθῆναι καὶ ἱκέσθαι
Odyssey 1.474	οἶκον ἐς ὑψόροφον καὶ σὴν ἐς πατρίδα γαῖαν.
Odyssey 1.475	ὣς ἔφαν, αὐτὰρ ἐμοί γʼ ἐπεπείθετο θυμὸς ἀγήνωρ.
Odyssey 1.476	ὣς τότε μὲν πρόπαν ἦμαρ ἐς ἠέλιον καταδύντα
Odyssey 1.477	ἥμεθα, δαινύμενοι κρέα τʼ ἄσπετα καὶ μέθυ ἡδύ·
Odyssey 1.478	ἦμος δʼ ἠέλιος κατέδυ καὶ ἐπὶ κνέφας ἦλθεν,
Odyssey 1.479	οἱ μὲν κοιμήσαντο κατὰ μέγαρα σκιόεντα.
Odyssey 1.480	αὐτὰρ ἐγὼ Κίρκης ἐπιβὰς περικαλλέος εὐνῆς
Odyssey 1.481	γούνων ἐλλιτάνευσα, θεὰ δέ μευ ἔκλυεν αὐδῆς·
Odyssey 1.482	καί μιν φωνήσας ἔπεα πτερόεντα προσηύδων·
Odyssey 1.483	ὢ Κίρκη, τέλεσόν μοι ὑπόσχεσιν ἥν περ ὑπέστης,
Odyssey 1.484	οἴκαδε πεμψέμεναι· θυμὸς δέ μοι ἔσσυται ἤδη,
Odyssey 1.485	ἠδʼ ἄλλων ἑτάρων, οἵ μευ φθινύθουσι φίλον κῆρ
Odyssey 1.486	ἀμφʼ ἔμʼ ὀδυρόμενοι, ὅτε που σύ γε νόσφι γένηαι.
Odyssey 1.487	ὣς ἐφάμην, ἡ δʼ αὐτίκʼ ἀμείβετο δῖα θεάων·
Odyssey 1.488	διογενὲς Λαερτιάδη, πολυμήχανʼ Ὀδυσσεῦ,
Odyssey 1.489	μηκέτι νῦν ἀέκοντες ἐμῷ ἐνὶ μίμνετε οἴκῳ.
Odyssey 1.490	ἀλλʼ ἄλλην χρὴ πρῶτον ὁδὸν τελέσαι καὶ ἱκέσθαι
Odyssey 1.491	εἰς Ἀίδαο δόμους καὶ ἐπαινῆς Περσεφονείης,
Odyssey 1.492	ψυχῇ χρησομένους Θηβαίου Τειρεσίαο,
Odyssey 1.493	μάντηος ἀλαοῦ, τοῦ τε φρένες ἔμπεδοί εἰσι·
Odyssey 1.494	τῷ καὶ τεθνηῶτι νόον πόρε Περσεφόνεια,
Odyssey 1.495	οἴῳ πεπνῦσθαι, τοὶ δὲ σκιαὶ ἀίσσουσιν.
Odyssey 1.496	ὣς ἔφατʼ, αὐτὰρ ἐμοί γε κατεκλάσθη φίλον ἦτορ·
Odyssey 1.497	κλαῖον δʼ ἐν λεχέεσσι καθήμενος, οὐδέ νύ μοι κῆρ
Odyssey 1.498	ἤθελʼ ἔτι ζώειν καὶ ὁρᾶν φάος ἠελίοιο.
Odyssey 1.499	αὐτὰρ ἐπεὶ κλαίων τε κυλινδόμενος τʼ ἐκορέσθην,
Odyssey 1.500	καὶ τότε δή μιν ἔπεσσιν ἀμειβόμενος προσέειπον·
Odyssey 1.501	ὢ Κίρκη, τίς γὰρ ταύτην ὁδὸν ἡγεμονεύσει;
Odyssey 1.502	εἰς Ἄϊδος δʼ οὔ πώ τις ἀφίκετο νηὶ μελαίνῃ.
Odyssey 1.503	ὣς ἐφάμην, ἡ δʼ αὐτίκʼ ἀμείβετο δῖα θεάων·
Odyssey 1.504	διογενὲς Λαερτιάδη, πολυμήχανʼ Ὀδυσσεῦ,
Odyssey 1.505	μή τί τοι ἡγεμόνος γε ποθὴ παρὰ νηὶ μελέσθω,
Odyssey 1.506	ἱστὸν δὲ στήσας, ἀνά θʼ ἱστία λευκὰ πετάσσας
Odyssey 1.507	ἧσθαι· τὴν δέ κέ τοι πνοιὴ Βορέαο φέρῃσιν.
Odyssey 1.508	ἀλλʼ ὁπότʼ ἂν δὴ νηὶ διʼ Ὠκεανοῖο περήσῃς,
Odyssey 1.509	ἔνθʼ ἀκτή τε λάχεια καὶ ἄλσεα Περσεφονείης,
Odyssey 1.510	μακραί τʼ αἴγειροι καὶ ἰτέαι ὠλεσίκαρποι,
Odyssey 1.511	νῆα μὲν αὐτοῦ κέλσαι ἐπʼ Ὠκεανῷ βαθυδίνῃ,
Odyssey 1.512	αὐτὸς δʼ εἰς Ἀίδεω ἰέναι δόμον εὐρώεντα.
Odyssey 1.513	ἔνθα μὲν εἰς Ἀχέροντα Πυριφλεγέθων τε ῥέουσιν
Odyssey 1.514	Κώκυτός θʼ, ὃς δὴ Στυγὸς ὕδατός ἐστιν ἀπορρώξ,
Odyssey 1.515	πέτρη τε ξύνεσίς τε δύω ποταμῶν ἐριδούπων·
Odyssey 1.516	ἔνθα δʼ ἔπειθʼ, ἥρως, χριμφθεὶς πέλας, ὥς σε κελεύω,
Odyssey 1.517	βόθρον ὀρύξαι, ὅσον τε πυγούσιον ἔνθα καὶ ἔνθα,
Odyssey 1.518	ἀμφʼ αὐτῷ δὲ χοὴν χεῖσθαι πᾶσιν νεκύεσσιν,
Odyssey 1.519	πρῶτα μελικρήτῳ, μετέπειτα δὲ ἡδέι οἴνῳ,
Odyssey 1.520	τὸ τρίτον αὖθʼ ὕδατι· ἐπὶ δʼ ἄλφιτα λευκὰ παλύνειν.
Odyssey 1.521	πολλὰ δὲ γουνοῦσθαι νεκύων ἀμενηνὰ κάρηνα,
Odyssey 1.522	ἐλθὼν εἰς Ἰθάκην στεῖραν βοῦν, ἥ τις ἀρίστη,
Odyssey 1.523	ῥέξειν ἐν μεγάροισι πυρήν τʼ ἐμπλησέμεν ἐσθλῶν,
Odyssey 1.524	Τειρεσίῃ δʼ ἀπάνευθεν ὄιν ἱερευσέμεν οἴῳ
Odyssey 1.525	παμμέλανʼ, ὃς μήλοισι μεταπρέπει ὑμετέροισιν.
Odyssey 1.526	αὐτὰρ ἐπὴν εὐχῇσι λίσῃ κλυτὰ ἔθνεα νεκρῶν,
Odyssey 1.527	ἔνθʼ ὄιν ἀρνειὸν ῥέζειν θῆλύν τε μέλαιναν
Odyssey 1.528	εἰς Ἔρεβος στρέψας, αὐτὸς δʼ ἀπονόσφι τραπέσθαι
Odyssey 1.529	ἱέμενος ποταμοῖο ῥοάων· ἔνθα δὲ πολλαὶ
Odyssey 1.530	ψυχαὶ ἐλεύσονται νεκύων κατατεθνηώτων.
Odyssey 1.531	δὴ τότʼ ἔπειθʼ ἑτάροισιν ἐποτρῦναι καὶ ἀνῶξαι
Odyssey 1.532	μῆλα, τὰ δὴ κατάκειτʼ ἐσφαγμένα νηλέι χαλκῷ,
Odyssey 1.533	δείραντας κατακῆαι, ἐπεύξασθαι δὲ θεοῖσιν,
Odyssey 1.534	ἰφθίμῳ τʼ Ἀίδῃ καὶ ἐπαινῇ Περσεφονείῃ·
Odyssey 1.535	αὐτὸς δὲ ξίφος ὀξὺ ἐρυσσάμενος παρὰ μηροῦ
Odyssey 1.536	ἧσθαι, μηδὲ ἐᾶν νεκύων ἀμενηνὰ κάρηνα
Odyssey 1.537	αἵματος ἆσσον ἴμεν, πρὶν Τειρεσίαο πυθέσθαι.
Odyssey 1.538	ἔνθα τοι αὐτίκα μάντις ἐλεύσεται, ὄρχαμε λαῶν,
Odyssey 1.539	ὅς κέν τοι εἴπῃσιν ὁδὸν καὶ μέτρα κελεύθου
Odyssey 1.540	νόστον θʼ, ὡς ἐπὶ πόντον ἐλεύσεαι ἰχθυόεντα.
Odyssey 1.541	ὣς ἔφατʼ, αὐτίκα δὲ χρυσόθρονος ἤλυθεν Ἠώς.
Odyssey 1.542	ἀμφὶ δέ με χλαῖνάν τε χιτῶνά τε εἵματα ἕσσεν·
Odyssey 1.543	αὐτὴ δʼ ἀργύφεον φᾶρος μέγα ἕννυτο νύμφη,
Odyssey 1.544	λεπτὸν καὶ χαρίεν, περὶ δὲ ζώνην βάλετʼ ἰξυῖ
Odyssey 1.545	καλὴν χρυσείην, κεφαλῇ δʼ ἐπέθηκε καλύπτρην.
Odyssey 1.546	αὐτὰρ ἐγὼ διὰ δώματʼ ἰὼν ὤτρυνον ἑταίρους
Odyssey 1.547	μειλιχίοις ἐπέεσσι παρασταδὸν ἄνδρα ἕκαστον·
Odyssey 1.548	μηκέτι νῦν εὕδοντες ἀωτεῖτε γλυκὺν ὕπνον,
Odyssey 1.549	ἀλλʼ ἴομεν· δὴ γάρ μοι ἐπέφραδε πότνια Κίρκη.
Odyssey 1.550	ὣς ἐφάμην, τοῖσιν δʼ ἐπεπείθετο θυμὸς ἀγήνωρ.
Odyssey 1.551	οὐδὲ μὲν οὐδʼ ἔνθεν περ ἀπήμονας ἦγον ἑταίρους.
Odyssey 1.552	Ἐλπήνωρ δέ τις ἔσκε νεώτατος, οὔτε τι λίην
Odyssey 1.553	ἄλκιμος ἐν πολέμῳ οὔτε φρεσὶν ᾗσιν ἀρηρώς·
Odyssey 1.554	ὅς μοι ἄνευθʼ ἑτάρων ἱεροῖς ἐν δώμασι Κίρκης,
Odyssey 1.555	ψύχεος ἱμείρων, κατελέξατο οἰνοβαρείων.
Odyssey 1.556	κινυμένων δʼ ἑτάρων ὅμαδον καὶ δοῦπον ἀκούσας
Odyssey 1.557	ἐξαπίνης ἀνόρουσε καὶ ἐκλάθετο φρεσὶν ᾗσιν
Odyssey 1.558	ἄψορρον καταβῆναι ἰὼν ἐς κλίμακα μακρήν,
Odyssey 1.559	ἀλλὰ καταντικρὺ τέγεος πέσεν· ἐκ δέ οἱ αὐχὴν
Odyssey 1.560	ἀστραγάλων ἐάγη, ψυχὴ δʼ Ἄϊδόσδε κατῆλθεν.
Odyssey 1.561	ἐρχομένοισι δὲ τοῖσιν ἐγὼ μετὰ μῦθον ἔειπον·
Odyssey 1.562	φάσθε νύ που οἶκόνδε φίλην ἐς πατρίδα γαῖαν
Odyssey 1.563	ἔρχεσθʼ· ἄλλην δʼ ἧμιν ὁδὸν τεκμήρατο Κίρκη,
Odyssey 1.564	εἰς Ἀίδαο δόμους καὶ ἐπαινῆς Περσεφονείης
Odyssey 1.565	ψυχῇ χρησομένους Θηβαίου Τειρεσίαο.
Odyssey 1.566	ὣς ἐφάμην, τοῖσιν δὲ κατεκλάσθη φίλον ἦτορ,
Odyssey 1.567	ἑζόμενοι δὲ κατʼ αὖθι γόων τίλλοντό τε χαίτας·
Odyssey 1.568	ἀλλʼ οὐ γάρ τις πρῆξις ἐγίγνετο μυρομένοισιν.
Odyssey 1.569	ἀλλʼ ὅτε δή ῥʼ ἐπὶ νῆα θοὴν καὶ θῖνα θαλάσσης
Odyssey 1.570	ᾔομεν ἀχνύμενοι θαλερὸν κατὰ δάκρυ χέοντες,
Odyssey 1.571	τόφρα δʼ ἄρʼ οἰχομένη Κίρκη παρὰ νηὶ μελαίνῃ
Odyssey 1.572	ἀρνειὸν κατέδησεν ὄιν θῆλύν τε μέλαιναν,
Odyssey 1.573	ῥεῖα παρεξελθοῦσα· τίς ἂν θεὸν οὐκ ἐθέλοντα
Odyssey 1.574	ὀφθαλμοῖσιν ἴδοιτʼ ἢ ἔνθʼ ἢ ἔνθα κιόντα;
Odyssey 1.1	αὐτὰρ ἐπεί ῥʼ ἐπὶ νῆα κατήλθομεν ἠδὲ θάλασσαν,
Odyssey 1.2	νῆα μὲν ἂρ πάμπρωτον ἐρύσσαμεν εἰς ἅλα δῖαν,
Odyssey 1.3	ἐν δʼ ἱστὸν τιθέμεσθα καὶ ἱστία νηὶ μελαίνῃ,
Odyssey 1.4	ἐν δὲ τὰ μῆλα λαβόντες ἐβήσαμεν, ἂν δὲ καὶ αὐτοὶ
Odyssey 1.5	βαίνομεν ἀχνύμενοι θαλερὸν κατὰ δάκρυ χέοντες.
Odyssey 1.6	ἡμῖν δʼ αὖ κατόπισθε νεὸς κυανοπρῴροιο
Odyssey 1.7	ἴκμενον οὖρον ἵει πλησίστιον, ἐσθλὸν ἑταῖρον,
Odyssey 1.8	Κίρκη εὐπλόκαμος, δεινὴ θεὸς αὐδήεσσα.
Odyssey 1.9	ἡμεῖς δʼ ὅπλα ἕκαστα πονησάμενοι κατὰ νῆα
Odyssey 1.10	ἥμεθα· τὴν δʼ ἄνεμός τε κυβερνήτης τʼ ἴθυνε.
Odyssey 1.11	τῆς δὲ πανημερίης τέταθʼ ἱστία ποντοπορούσης·
Odyssey 1.12	δύσετό τʼ ἠέλιος σκιόωντό τε πᾶσαι ἀγυιαί.
Odyssey 1.13	ἡ δʼ ἐς πείραθʼ ἵκανε βαθυρρόου Ὠκεανοῖο.
Odyssey 1.14	ἔνθα δὲ Κιμμερίων ἀνδρῶν δῆμός τε πόλις τε,
Odyssey 1.15	ἠέρι καὶ νεφέλῃ κεκαλυμμένοι· οὐδέ ποτʼ αὐτοὺς
Odyssey 1.16	ἠέλιος φαέθων καταδέρκεται ἀκτίνεσσιν,
Odyssey 1.17	οὔθʼ ὁπότʼ ἂν στείχῃσι πρὸς οὐρανὸν ἀστερόεντα,
Odyssey 1.18	οὔθʼ ὅτʼ ἂν ἂψ ἐπὶ γαῖαν ἀπʼ οὐρανόθεν προτράπηται,
Odyssey 1.19	ἀλλʼ ἐπὶ νὺξ ὀλοὴ τέταται δειλοῖσι βροτοῖσι.
Odyssey 1.20	νῆα μὲν ἔνθʼ ἐλθόντες ἐκέλσαμεν, ἐκ δὲ τὰ μῆλα
Odyssey 1.21	εἱλόμεθʼ· αὐτοὶ δʼ αὖτε παρὰ ῥόον Ὠκεανοῖο
Odyssey 1.22	ᾔομεν, ὄφρʼ ἐς χῶρον ἀφικόμεθʼ, ὃν φράσε Κίρκη.
Odyssey 1.23	ἔνθʼ ἱερήια μὲν Περιμήδης Εὐρύλοχός τε
Odyssey 1.24	ἔσχον· ἐγὼ δʼ ἄορ ὀξὺ ἐρυσσάμενος παρὰ μηροῦ
Odyssey 1.25	βόθρον ὄρυξʼ ὅσσον τε πυγούσιον ἔνθα καὶ ἔνθα,
Odyssey 1.26	ἀμφʼ αὐτῷ δὲ χοὴν χεόμην πᾶσιν νεκύεσσι,
Odyssey 1.27	πρῶτα μελικρήτῳ, μετέπειτα δὲ ἡδέι οἴνῳ,
Odyssey 1.28	τὸ τρίτον αὖθʼ ὕδατι· ἐπὶ δʼ ἄλφιτα λευκὰ πάλυνον.
Odyssey 1.29	πολλὰ δὲ γουνούμην νεκύων ἀμενηνὰ κάρηνα,
Odyssey 1.30	ἐλθὼν εἰς Ἰθάκην στεῖραν βοῦν, ἥ τις ἀρίστη,
Odyssey 1.31	ῥέξειν ἐν μεγάροισι πυρήν τʼ ἐμπλησέμεν ἐσθλῶν,
Odyssey 1.32	Τειρεσίῃ δʼ ἀπάνευθεν ὄιν ἱερευσέμεν οἴῳ
Odyssey 1.33	παμμέλανʼ, ὃς μήλοισι μεταπρέπει ἡμετέροισι.
Odyssey 1.34	τοὺς δʼ ἐπεὶ εὐχωλῇσι λιτῇσί τε, ἔθνεα νεκρῶν,
Odyssey 1.35	ἐλλισάμην, τὰ δὲ μῆλα λαβὼν ἀπεδειροτόμησα
Odyssey 1.36	ἐς βόθρον, ῥέε δʼ αἷμα κελαινεφές· αἱ δʼ ἀγέροντο
Odyssey 1.37	ψυχαὶ ὑπὲξ Ἐρέβευς νεκύων κατατεθνηώτων.
Odyssey 1.38	νύμφαι τʼ ἠίθεοί τε πολύτλητοί τε γέροντες
Odyssey 1.39	παρθενικαί τʼ ἀταλαὶ νεοπενθέα θυμὸν ἔχουσαι,
Odyssey 1.40	πολλοὶ δʼ οὐτάμενοι χαλκήρεσιν ἐγχείῃσιν,
Odyssey 1.41	ἄνδρες ἀρηίφατοι βεβροτωμένα τεύχεʼ ἔχοντες·
Odyssey 1.42	οἳ πολλοὶ περὶ βόθρον ἐφοίτων ἄλλοθεν ἄλλος
Odyssey 1.43	θεσπεσίῃ ἰαχῇ· ἐμὲ δὲ χλωρὸν δέος ᾕρει.
Odyssey 1.44	δὴ τότʼ ἔπειθʼ ἑτάροισιν ἐποτρύνας ἐκέλευσα
Odyssey 1.45	μῆλα, τὰ δὴ κατέκειτʼ ἐσφαγμένα νηλέι χαλκῷ,
Odyssey 1.46	δείραντας κατακῆαι, ἐπεύξασθαι δὲ θεοῖσιν,
Odyssey 1.47	ἰφθίμῳ τʼ Ἀΐδῃ καὶ ἐπαινῇ Περσεφονείῃ·
Odyssey 1.48	αὐτὸς δὲ ξίφος ὀξὺ ἐρυσσάμενος παρὰ μηροῦ
Odyssey 1.49	ἥμην, οὐδʼ εἴων νεκύων ἀμενηνὰ κάρηνα
Odyssey 1.50	αἵματος ἆσσον ἴμεν, πρὶν Τειρεσίαο πυθέσθαι.
Odyssey 1.51	πρώτη δὲ ψυχὴ Ἐλπήνορος ἦλθεν ἑταίρου·
Odyssey 1.52	οὐ γάρ πω ἐτέθαπτο ὑπὸ χθονὸς εὐρυοδείης·
Odyssey 1.53	σῶμα γὰρ ἐν Κίρκης μεγάρῳ κατελείπομεν ἡμεῖς
Odyssey 1.54	ἄκλαυτον καὶ ἄθαπτον, ἐπεὶ πόνος ἄλλος ἔπειγε.
Odyssey 1.55	τὸν μὲν ἐγὼ δάκρυσα ἰδὼν ἐλέησά τε θυμῷ,
Odyssey 1.56	καί μιν φωνήσας ἔπεα πτερόεντα προσηύδων·
Odyssey 1.57	Ἐλπῆνορ, πῶς ἦλθες ὑπὸ ζόφον ἠερόεντα;
Odyssey 1.58	ἔφθης πεζὸς ἰὼν ἢ ἐγὼ σὺν νηὶ μελαίνῃ.
Odyssey 1.59	ὣς ἐφάμην, ὁ δέ μʼ οἰμώξας ἠμείβετο μύθῳ·
Odyssey 1.60	διογενὲς Λαερτιάδη, πολυμήχανʼ Ὀδυσσεῦ,
Odyssey 1.61	ἆσέ με δαίμονος αἶσα κακὴ καὶ ἀθέσφατος οἶνος.
Odyssey 1.62	Κίρκης δʼ ἐν μεγάρῳ καταλέγμενος οὐκ ἐνόησα
Odyssey 1.63	ἄψορρον καταβῆναι ἰὼν ἐς κλίμακα μακρήν,
Odyssey 1.64	ἀλλὰ καταντικρὺ τέγεος πέσον· ἐκ δέ μοι αὐχὴν
Odyssey 1.65	ἀστραγάλων ἐάγη, ψυχὴ δʼ Ἄϊδόσδε κατῆλθε.
Odyssey 1.66	νῦν δέ σε τῶν ὄπιθεν γουνάζομαι, οὐ παρεόντων,
Odyssey 1.67	πρός τʼ ἀλόχου καὶ πατρός, ὅ σʼ ἔτρεφε τυτθὸν ἐόντα,
Odyssey 1.68	Τηλεμάχου θʼ, ὃν μοῦνον ἐνὶ μεγάροισιν ἔλειπες·
Odyssey 1.69	οἶδα γὰρ ὡς ἐνθένδε κιὼν δόμου ἐξ Ἀίδαο
Odyssey 1.70	νῆσον ἐς Αἰαίην σχήσεις ἐυεργέα νῆα·
Odyssey 1.71	ἔνθα σʼ ἔπειτα, ἄναξ, κέλομαι μνήσασθαι ἐμεῖο.
Odyssey 1.72	μή μʼ ἄκλαυτον ἄθαπτον ἰὼν ὄπιθεν καταλείπειν
Odyssey 1.73	νοσφισθείς, μή τοί τι θεῶν μήνιμα γένωμαι,
Odyssey 1.74	ἀλλά με κακκῆαι σὺν τεύχεσιν, ἅσσα μοι ἔστιν,
Odyssey 1.75	σῆμά τέ μοι χεῦαι πολιῆς ἐπὶ θινὶ θαλάσσης,
Odyssey 1.76	ἀνδρὸς δυστήνοιο καὶ ἐσσομένοισι πυθέσθαι.
Odyssey 1.77	ταῦτά τέ μοι τελέσαι πῆξαί τʼ ἐπὶ τύμβῳ ἐρετμόν,
Odyssey 1.78	τῷ καὶ ζωὸς ἔρεσσον ἐὼν μετʼ ἐμοῖς ἑτάροισιν.
Odyssey 1.79	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.80	ταῦτά τοι, ὦ δύστηνε, τελευτήσω τε καὶ ἔρξω.
Odyssey 1.81	νῶι μὲν ὣς ἐπέεσσιν ἀμειβομένω στυγεροῖσιν
Odyssey 1.82	ἥμεθʼ, ἐγὼ μὲν ἄνευθεν ἐφʼ αἵματι φάσγανον ἴσχων,
Odyssey 1.83	εἴδωλον δʼ ἑτέρωθεν ἑταίρου πόλλʼ ἀγόρευεν·
Odyssey 1.84	ἦλθε δʼ ἐπὶ ψυχὴ μητρὸς κατατεθνηυίης,
Odyssey 1.85	Αὐτολύκου θυγάτηρ μεγαλήτορος Ἀντίκλεια,
Odyssey 1.86	τὴν ζωὴν κατέλειπον ἰὼν εἰς Ἴλιον ἱρήν.
Odyssey 1.87	τὴν μὲν ἐγὼ δάκρυσα ἰδὼν ἐλέησά τε θυμῷ·
Odyssey 1.88	ἀλλʼ οὐδʼ ὣς εἴων προτέρην, πυκινόν περ ἀχεύων,
Odyssey 1.89	αἵματος ἆσσον ἴμεν, πρὶν Τειρεσίαο πυθέσθαι.
Odyssey 1.90	ἦλθε δʼ ἐπὶ ψυχὴ Θηβαίου Τειρεσίαο
Odyssey 1.91	χρύσεον σκῆπτρον ἔχων, ἐμὲ δʼ ἔγνω καὶ προσέειπεν·
Odyssey 1.92	διογενὲς Λαερτιάδη, πολυμήχανʼ Ὀδυσσεῦ,
Odyssey 1.93	τίπτʼ αὖτʼ, ὦ δύστηνε, λιπὼν φάος ἠελίοιο
Odyssey 1.94	ἤλυθες, ὄφρα ἴδῃ νέκυας καὶ ἀτερπέα χῶρον;
Odyssey 1.95	ἀλλʼ ἀποχάζεο βόθρου, ἄπισχε δὲ φάσγανον ὀξύ,
Odyssey 1.96	αἵματος ὄφρα πίω καί τοι νημερτέα εἴπω.
Odyssey 1.97	ὣς φάτʼ, ἐγὼ δʼ ἀναχασσάμενος ξίφος ἀργυρόηλον
Odyssey 1.98	κουλεῷ ἐγκατέπηξʼ. ὁ δʼ ἐπεὶ πίεν αἷμα κελαινόν,
Odyssey 1.99	καὶ τότε δή μʼ ἐπέεσσι προσηύδα μάντις ἀμύμων·
Odyssey 1.100	νόστον δίζηαι μελιηδέα, φαίδιμʼ Ὀδυσσεῦ·
Odyssey 1.101	τὸν δέ τοι ἀργαλέον θήσει θεός· οὐ γὰρ ὀίω
Odyssey 1.102	λήσειν ἐννοσίγαιον, ὅ τοι κότον ἔνθετο θυμῷ
Odyssey 1.103	χωόμενος ὅτι οἱ υἱὸν φίλον ἐξαλάωσας.
Odyssey 1.104	ἀλλʼ ἔτι μέν κε καὶ ὣς κακά περ πάσχοντες ἵκοισθε,
Odyssey 1.105	αἴ κʼ ἐθέλῃς σὸν θυμὸν ἐρυκακέειν καὶ ἑταίρων,
Odyssey 1.106	ὁππότε κε πρῶτον πελάσῃς ἐυεργέα νῆα
Odyssey 1.107	Θρινακίῃ νήσῳ, προφυγὼν ἰοειδέα πόντον,
Odyssey 1.108	βοσκομένας δʼ εὕρητε βόας καὶ ἴφια μῆλα
Odyssey 1.109	Ἠελίου, ὃς πάντʼ ἐφορᾷ καὶ πάντʼ ἐπακούει.
Odyssey 1.110	τὰς εἰ μέν κʼ ἀσινέας ἐάᾳς νόστου τε μέδηαι,
Odyssey 1.111	καί κεν ἔτʼ εἰς Ἰθάκην κακά περ πάσχοντες ἵκοισθε·
Odyssey 1.112	εἰ δέ κε σίνηαι, τότε τοι τεκμαίρομʼ ὄλεθρον,
Odyssey 1.113	νηί τε καὶ ἑτάροις. αὐτὸς δʼ εἴ πέρ κεν ἀλύξῃς,
Odyssey 1.114	ὀψὲ κακῶς νεῖαι, ὀλέσας ἄπο πάντας ἑταίρους,
Odyssey 1.115	νηὸς ἐπʼ ἀλλοτρίης· δήεις δʼ ἐν πήματα οἴκῳ,
Odyssey 1.116	ἄνδρας ὑπερφιάλους, οἵ τοι βίοτον κατέδουσι
Odyssey 1.117	μνώμενοι ἀντιθέην ἄλοχον καὶ ἕδνα διδόντες.
Odyssey 1.118	ἀλλʼ ἦ τοι κείνων γε βίας ἀποτίσεαι ἐλθών·
Odyssey 1.119	αὐτὰρ ἐπὴν μνηστῆρας ἐνὶ μεγάροισι τεοῖσι
Odyssey 1.120	κτείνῃς ἠὲ δόλῳ ἢ ἀμφαδὸν ὀξέι χαλκῷ,
Odyssey 1.121	ἔρχεσθαι δὴ ἔπειτα λαβὼν ἐυῆρες ἐρετμόν,
Odyssey 1.122	εἰς ὅ κε τοὺς ἀφίκηαι οἳ οὐκ ἴσασι θάλασσαν
Odyssey 1.123	ἀνέρες, οὐδέ θʼ ἅλεσσι μεμιγμένον εἶδαρ ἔδουσιν·
Odyssey 1.124	οὐδʼ ἄρα τοί γʼ ἴσασι νέας φοινικοπαρῄους
Odyssey 1.125	οὐδʼ ἐυήρεʼ ἐρετμά, τά τε πτερὰ νηυσὶ πέλονται.
Odyssey 1.126	σῆμα δέ τοι ἐρέω μάλʼ ἀριφραδές, οὐδέ σε λήσει·
Odyssey 1.127	ὁππότε κεν δή τοι συμβλήμενος ἄλλος ὁδίτης
Odyssey 1.128	φήῃ ἀθηρηλοιγὸν ἔχειν ἀνὰ φαιδίμῳ ὤμῳ,
Odyssey 1.129	καὶ τότε δὴ γαίῃ πήξας ἐυῆρες ἐρετμόν,
Odyssey 1.130	ῥέξας ἱερὰ καλὰ Ποσειδάωνι ἄνακτι,
Odyssey 1.131	ἀρνειὸν ταῦρόν τε συῶν τʼ ἐπιβήτορα κάπρον,
Odyssey 1.132	οἴκαδʼ ἀποστείχειν ἔρδειν θʼ ἱερᾶς ἑκατόμβας
Odyssey 1.133	ἀθανάτοισι θεοῖσι, τοὶ οὐρανὸν εὐρὺν ἔχουσι,
Odyssey 1.134	πᾶσι μάλʼ ἑξείης. θάνατος δέ τοι ἐξ ἁλὸς αὐτῷ
Odyssey 1.135	ἀβληχρὸς μάλα τοῖος ἐλεύσεται, ὅς κέ σε πέφνῃ
Odyssey 1.136	γήραι ὕπο λιπαρῷ ἀρημένον· ἀμφὶ δὲ λαοὶ
Odyssey 1.137	ὄλβιοι ἔσσονται. τὰ δέ τοι νημερτέα εἴρω.
Odyssey 1.138	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.139	Τειρεσίη, τὰ μὲν ἄρ που ἐπέκλωσαν θεοὶ αὐτοί.
Odyssey 1.140	ἀλλʼ ἄγε μοι τόδε εἰπὲ καὶ ἀτρεκέως κατάλεξον·
Odyssey 1.141	μητρὸς τήνδʼ ὁρόω ψυχὴν κατατεθνηυίης·
Odyssey 1.142	ἡ δʼ ἀκέουσʼ ἧσται σχεδὸν αἵματος, οὐδʼ ἑὸν υἱὸν
Odyssey 1.143	ἔτλη ἐσάντα ἰδεῖν οὐδὲ προτιμυθήσασθαι.
Odyssey 1.144	εἰπέ, ἄναξ, πῶς κέν με ἀναγνοίη τὸν ἐόντα;
Odyssey 1.145	ὣς ἐφάμην, ὁ δέ μʼ αὐτίκʼ ἀμειβόμενος προσέειπεν·
Odyssey 1.146	ῥηΐδιόν τοι ἔπος ἐρέω καὶ ἐπὶ φρεσὶ θήσω.
Odyssey 1.147	ὅν τινα μέν κεν ἐᾷς νεκύων κατατεθνηώτων
Odyssey 1.148	αἵματος ἆσσον ἴμεν, ὁ δέ τοι νημερτὲς ἐνίψει·
Odyssey 1.149	ᾧ δέ κʼ ἐπιφθονέῃς, ὁ δέ τοι πάλιν εἶσιν ὀπίσσω.
Odyssey 1.150	ὣς φαμένη ψυχὴ μὲν ἔβη δόμον Ἄϊδος εἴσω
Odyssey 1.151	Τειρεσίαο ἄνακτος, ἐπεὶ κατὰ θέσφατʼ ἔλεξεν·
Odyssey 1.152	αὐτὰρ ἐγὼν αὐτοῦ μένον ἔμπεδον, ὄφρʼ ἐπὶ μήτηρ
Odyssey 1.153	ἤλυθε καὶ πίεν αἷμα κελαινεφές· αὐτίκα δʼ ἔγνω,
Odyssey 1.154	καί μʼ ὀλοφυρομένη ἔπεα πτερόεντα προσηύδα·
Odyssey 1.155	τέκνον ἐμόν, πῶς ἦλθες ὑπὸ ζόφον ἠερόεντα
Odyssey 1.156	ζωὸς ἐών; χαλεπὸν δὲ τάδε ζωοῖσιν ὁρᾶσθαι.
Odyssey 1.157	μέσσῳ γὰρ μεγάλοι ποταμοὶ καὶ δεινὰ ῥέεθρα,
Odyssey 1.158	Ὠκεανὸς μὲν πρῶτα, τὸν οὔ πως ἔστι περῆσαι
Odyssey 1.159	πεζὸν ἐόντʼ, ἢν μή τις ἔχῃ ἐυεργέα νῆα.
Odyssey 1.160	ἦ νῦν δὴ Τροίηθεν ἀλώμενος ἐνθάδʼ ἱκάνεις
Odyssey 1.161	νηί τε καὶ ἑτάροισι πολὺν χρόνον; οὐδέ πω ἦλθες
Odyssey 1.162	εἰς Ἰθάκην, οὐδʼ εἶδες ἐνὶ μεγάροισι γυναῖκα;
Odyssey 1.163	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.164	μῆτερ ἐμή, χρειώ με κατήγαγεν εἰς Ἀίδαο
Odyssey 1.165	ψυχῇ χρησόμενον Θηβαίου Τειρεσίαο·
Odyssey 1.166	οὐ γάρ πω σχεδὸν ἦλθον Ἀχαιΐδος, οὐδέ πω ἁμῆς
Odyssey 1.167	γῆς ἐπέβην, ἀλλʼ αἰὲν ἔχων ἀλάλημαι ὀιζύν,
Odyssey 1.168	ἐξ οὗ τὰ πρώτισθʼ ἑπόμην Ἀγαμέμνονι δίῳ
Odyssey 1.169	Ἴλιον εἰς ἐύπωλον, ἵνα Τρώεσσι μαχοίμην.
Odyssey 1.170	ἀλλʼ ἄγε μοι τόδε εἰπὲ καὶ ἀτρεκέως κατάλεξον·
Odyssey 1.171	τίς νύ σε κὴρ ἐδάμασσε τανηλεγέος θανάτοιο;
Odyssey 1.172	ἦ δολιχὴ νοῦσος, ἦ Ἄρτεμις ἰοχέαιρα
Odyssey 1.173	οἷς ἀγανοῖς βελέεσσιν ἐποιχομένη κατέπεφνεν;
Odyssey 1.174	εἰπὲ δέ μοι πατρός τε καὶ υἱέος, ὃν κατέλειπον,
Odyssey 1.175	ἢ ἔτι πὰρ κείνοισιν ἐμὸν γέρας, ἦέ τις ἤδη
Odyssey 1.176	ἀνδρῶν ἄλλος ἔχει, ἐμὲ δʼ οὐκέτι φασὶ νέεσθαι.
Odyssey 1.177	εἰπὲ δέ μοι μνηστῆς ἀλόχου βουλήν τε νόον τε,
Odyssey 1.178	ἠὲ μένει παρὰ παιδὶ καὶ ἔμπεδα πάντα φυλάσσει
Odyssey 1.179	ἦ ἤδη μιν ἔγημεν Ἀχαιῶν ὅς τις ἄριστος.
Odyssey 1.180	ὣς ἐφάμην, ἡ δʼ αὐτίκʼ ἀμείβετο πότνια μήτηρ·
Odyssey 1.181	καὶ λίην κείνη γε μένει τετληότι θυμῷ
Odyssey 1.182	σοῖσιν ἐνὶ μεγάροισιν· ὀιζυραὶ δέ οἱ αἰεὶ
Odyssey 1.183	φθίνουσιν νύκτες τε καὶ ἤματα δάκρυ χεούσῃ.
Odyssey 1.184	σὸν δʼ οὔ πώ τις ἔχει καλὸν γέρας, ἀλλὰ ἕκηλος
Odyssey 1.185	Τηλέμαχος τεμένεα νέμεται καὶ δαῖτας ἐίσας
Odyssey 1.186	δαίνυται, ἃς ἐπέοικε δικασπόλον ἄνδρʼ ἀλεγύνειν·
Odyssey 1.187	πάντες γὰρ καλέουσι. πατὴρ δὲ σὸς αὐτόθι μίμνει
Odyssey 1.188	ἀγρῷ, οὐδὲ πόλινδε κατέρχεται. οὐδέ οἱ εὐναὶ
Odyssey 1.189	δέμνια καὶ χλαῖναι καὶ ῥήγεα σιγαλόεντα,
Odyssey 1.190	ἀλλʼ ὅ γε χεῖμα μὲν εὕδει ὅθι δμῶες ἐνὶ οἴκῳ,
Odyssey 1.191	ἐν κόνι ἄγχι πυρός, κακὰ δὲ χροῒ εἵματα εἷται·
Odyssey 1.192	αὐτὰρ ἐπὴν ἔλθῃσι θέρος τεθαλυῖά τʼ ὀπώρη,
Odyssey 1.193	πάντῃ οἱ κατὰ γουνὸν ἀλωῆς οἰνοπέδοιο
Odyssey 1.194	φύλλων κεκλιμένων χθαμαλαὶ βεβλήαται εὐναί.
Odyssey 1.195	ἔνθʼ ὅ γε κεῖτʼ ἀχέων, μέγα δὲ φρεσὶ πένθος ἀέξει
Odyssey 1.196	σὸν νόστον ποθέων, χαλεπὸν δʼ ἐπὶ γῆρας ἱκάνει.
Odyssey 1.197	οὕτω γὰρ καὶ ἐγὼν ὀλόμην καὶ πότμον ἐπέσπον·
Odyssey 1.198	οὔτʼ ἐμέ γʼ ἐν μεγάροισιν ἐύσκοπος ἰοχέαιρα
Odyssey 1.199	οἷς ἀγανοῖς βελέεσσιν ἐποιχομένη κατέπεφνεν,
Odyssey 1.200	οὔτε τις οὖν μοι νοῦσος ἐπήλυθεν, ἥ τε μάλιστα
Odyssey 1.201	τηκεδόνι στυγερῇ μελέων ἐξείλετο θυμόν·
Odyssey 1.202	ἀλλά με σός τε πόθος σά τε μήδεα, φαίδιμʼ Ὀδυσσεῦ,
Odyssey 1.203	σή τʼ ἀγανοφροσύνη μελιηδέα θυμὸν ἀπηύρα.
Odyssey 1.204	ὣς ἔφατʼ, αὐτὰρ ἐγώ γʼ ἔθελον φρεσὶ μερμηρίξας
Odyssey 1.205	μητρὸς ἐμῆς ψυχὴν ἑλέειν κατατεθνηυίης.
Odyssey 1.206	τρὶς μὲν ἐφωρμήθην, ἑλέειν τέ με θυμὸς ἀνώγει,
Odyssey 1.207	τρὶς δέ μοι ἐκ χειρῶν σκιῇ εἴκελον ἢ καὶ ὀνείρῳ
Odyssey 1.208	ἔπτατʼ. ἐμοὶ δʼ ἄχος ὀξὺ γενέσκετο κηρόθι μᾶλλον,
Odyssey 1.209	καί μιν φωνήσας ἔπεα πτερόεντα προσηύδων·
Odyssey 1.210	μῆτερ ἐμή, τί νύ μʼ οὐ μίμνεις ἑλέειν μεμαῶτα,
Odyssey 1.211	ὄφρα καὶ εἰν Ἀίδαο φίλας περὶ χεῖρε βαλόντε
Odyssey 1.212	ἀμφοτέρω κρυεροῖο τεταρπώμεσθα γόοιο;
Odyssey 1.213	ἦ τί μοι εἴδωλον τόδʼ ἀγαυὴ Περσεφόνεια
Odyssey 1.214	ὤτρυνʼ, ὄφρʼ ἔτι μᾶλλον ὀδυρόμενος στεναχίζω;
Odyssey 1.215	ὣς ἐφάμην, ἡ δʼ αὐτίκʼ ἀμείβετο πότνια μήτηρ·
Odyssey 1.216	ὤ μοι, τέκνον ἐμόν, περὶ πάντων κάμμορε φωτῶν,
Odyssey 1.217	οὔ τί σε Περσεφόνεια Διὸς θυγάτηρ ἀπαφίσκει,
Odyssey 1.218	ἀλλʼ αὕτη δίκη ἐστὶ βροτῶν, ὅτε τίς κε θάνῃσιν·
Odyssey 1.219	οὐ γὰρ ἔτι σάρκας τε καὶ ὀστέα ἶνες ἔχουσιν,
Odyssey 1.220	ἀλλὰ τὰ μέν τε πυρὸς κρατερὸν μένος αἰθομένοιο
Odyssey 1.221	δαμνᾷ, ἐπεί κε πρῶτα λίπῃ λεύκʼ ὀστέα θυμός,
Odyssey 1.222	ψυχὴ δʼ ἠύτʼ ὄνειρος ἀποπταμένη πεπότηται.
Odyssey 1.223	ἀλλὰ φόωσδε τάχιστα λιλαίεο· ταῦτα δὲ πάντα
Odyssey 1.224	ἴσθʼ, ἵνα καὶ μετόπισθε τεῇ εἴπῃσθα γυναικί.
Odyssey 1.225	νῶι μὲν ὣς ἐπέεσσιν ἀμειβόμεθʼ, αἱ δὲ γυναῖκες
Odyssey 1.226	ἤλυθον, ὤτρυνεν γὰρ ἀγαυὴ Περσεφόνεια,
Odyssey 1.227	ὅσσαι ἀριστήων ἄλοχοι ἔσαν ἠδὲ θύγατρες.
Odyssey 1.228	αἱ δʼ ἀμφʼ αἷμα κελαινὸν ἀολλέες ἠγερέθοντο,
Odyssey 1.229	αὐτὰρ ἐγὼ βούλευον ὅπως ἐρέοιμι ἑκάστην.
Odyssey 1.230	ἥδε δέ μοι κατὰ θυμὸν ἀρίστη φαίνετο βουλή·
Odyssey 1.231	σπασσάμενος τανύηκες ἄορ παχέος παρὰ μηροῦ
Odyssey 1.232	οὐκ εἴων πίνειν ἅμα πάσας αἷμα κελαινόν.
Odyssey 1.233	αἱ δὲ προμνηστῖναι ἐπήισαν, ἠδὲ ἑκάστη
Odyssey 1.234	ὃν γόνον ἐξαγόρευεν· ἐγὼ δʼ ἐρέεινον ἁπάσας.
Odyssey 1.235	ἔνθʼ ἦ τοι πρώτην Τυρὼ ἴδον εὐπατέρειαν,
Odyssey 1.236	ἣ φάτο Σαλμωνῆος ἀμύμονος ἔκγονος εἶναι,
Odyssey 1.237	φῆ δὲ Κρηθῆος γυνὴ ἔμμεναι Αἰολίδαο·
Odyssey 1.238	ἣ ποταμοῦ ἠράσσατʼ Ἐνιπῆος θείοιο,
Odyssey 1.239	ὃς πολὺ κάλλιστος ποταμῶν ἐπὶ γαῖαν ἵησι,
Odyssey 1.240	καί ῥʼ ἐπʼ Ἐνιπῆος πωλέσκετο καλὰ ῥέεθρα.
Odyssey 1.241	τῷ δʼ ἄρα εἰσάμενος γαιήοχος ἐννοσίγαιος
Odyssey 1.242	ἐν προχοῇς ποταμοῦ παρελέξατο δινήεντος·
Odyssey 1.243	πορφύρεον δʼ ἄρα κῦμα περιστάθη, οὔρεϊ ἶσον,
Odyssey 1.244	κυρτωθέν, κρύψεν δὲ θεὸν θνητήν τε γυναῖκα.
Odyssey 1.245	λῦσε δὲ παρθενίην ζώνην, κατὰ δʼ ὕπνον ἔχευεν.
Odyssey 1.246	αὐτὰρ ἐπεί ῥʼ ἐτέλεσσε θεὸς φιλοτήσια ἔργα,
Odyssey 1.247	ἔν τʼ ἄρα οἱ φῦ χειρί, ἔπος τʼ ἔφατʼ ἔκ τʼ ὀνόμαζε·
Odyssey 1.248	χαῖρε, γύναι, φιλότητι· περιπλομένου δʼ ἐνιαυτοῦ
Odyssey 1.249	τέξεις ἀγλαὰ τέκνα, ἐπεὶ οὐκ ἀποφώλιοι εὐναὶ
Odyssey 1.250	ἀθανάτων· σὺ δὲ τοὺς κομέειν ἀτιταλλέμεναί τε.
Odyssey 1.251	νῦν δʼ ἔρχευ πρὸς δῶμα, καὶ ἴσχεο μηδʼ ὀνομήνῃς·
Odyssey 1.252	αὐτὰρ ἐγώ τοί εἰμι Ποσειδάων ἐνοσίχθων.
Odyssey 1.253	ὣς εἰπὼν ὑπὸ πόντον ἐδύσετο κυμαίνοντα.
Odyssey 1.254	ἡ δʼ ὑποκυσαμένη Πελίην τέκε καὶ Νηλῆα,
Odyssey 1.255	τὼ κρατερὼ θεράποντε Διὸς μεγάλοιο γενέσθην
Odyssey 1.256	ἀμφοτέρω· Πελίης μὲν ἐν εὐρυχόρῳ Ἰαωλκῷ
Odyssey 1.257	ναῖε πολύρρηνος, ὁ δʼ ἄρʼ ἐν Πύλῳ ἠμαθόεντι.
Odyssey 1.258	τοὺς δʼ ἑτέρους Κρηθῆι τέκεν βασίλεια γυναικῶν,
Odyssey 1.259	Αἴσονά τʼ ἠδὲ Φέρητʼ Ἀμυθάονά θʼ ἱππιοχάρμην.
Odyssey 1.260	τὴν δὲ μετʼ Ἀντιόπην ἴδον, Ἀσωποῖο θύγατρα,
Odyssey 1.261	ἣ δὴ καὶ Διὸς εὔχετʼ ἐν ἀγκοίνῃσιν ἰαῦσαι,
Odyssey 1.262	καί ῥʼ ἔτεκεν δύο παῖδʼ, Ἀμφίονά τε Ζῆθόν τε,
Odyssey 1.263	οἳ πρῶτοι Θήβης ἕδος ἔκτισαν ἑπταπύλοιο,
Odyssey 1.264	πύργωσάν τʼ, ἐπεὶ οὐ μὲν ἀπύργωτόν γʼ ἐδύναντο
Odyssey 1.265	ναιέμεν εὐρύχορον Θήβην, κρατερώ περ ἐόντε.
Odyssey 1.266	τὴν δὲ μετʼ Ἀλκμήνην ἴδον, Ἀμφιτρύωνος ἄκοιτιν,
Odyssey 1.267	ἥ ῥʼ Ἡρακλῆα θρασυμέμνονα θυμολέοντα
Odyssey 1.268	γείνατʼ ἐν ἀγκοίνῃσι Διὸς μεγάλοιο μιγεῖσα·
Odyssey 1.269	καὶ Μεγάρην, Κρείοντος ὑπερθύμοιο θύγατρα,
Odyssey 1.270	τὴν ἔχεν Ἀμφιτρύωνος υἱὸς μένος αἰὲν ἀτειρής.
Odyssey 1.271	μητέρα τʼ Οἰδιπόδαο ἴδον, καλὴν Ἐπικάστην,
Odyssey 1.272	ἣ μέγα ἔργον ἔρεξεν ἀιδρείῃσι νόοιο
Odyssey 1.273	γημαμένη ᾧ υἷι· ὁ δʼ ὃν πατέρʼ ἐξεναρίξας
Odyssey 1.274	γῆμεν· ἄφαρ δʼ ἀνάπυστα θεοὶ θέσαν ἀνθρώποισιν.
Odyssey 1.275	ἀλλʼ ὁ μὲν ἐν Θήβῃ πολυηράτῳ ἄλγεα πάσχων
Odyssey 1.276	Καδμείων ἤνασσε θεῶν ὀλοὰς διὰ βουλάς·
Odyssey 1.277	ἡ δʼ ἔβη εἰς Ἀίδαο πυλάρταο κρατεροῖο,
Odyssey 1.278	ἁψαμένη βρόχον αἰπὺν ἀφʼ ὑψηλοῖο μελάθρου,
Odyssey 1.279	ᾧ ἄχεϊ σχομένη· τῷ δʼ ἄλγεα κάλλιπʼ ὀπίσσω
Odyssey 1.280	πολλὰ μάλʼ, ὅσσα τε μητρὸς Ἐρινύες ἐκτελέουσιν.
Odyssey 1.281	καὶ Χλῶριν εἶδον περικαλλέα, τήν ποτε Νηλεὺς
Odyssey 1.282	γῆμεν ἑὸν διὰ κάλλος, ἐπεὶ πόρε μυρία ἕδνα,
Odyssey 1.283	ὁπλοτάτην κούρην Ἀμφίονος Ἰασίδαο,
Odyssey 1.284	ὅς ποτʼ ἐν Ὀρχομενῷ Μινυείῳ ἶφι ἄνασσεν·
Odyssey 1.285	ἡ δὲ Πύλου βασίλευε, τέκεν δέ οἱ ἀγλαὰ τέκνα,
Odyssey 1.286	Νέστορά τε Χρόμιον τε Περικλύμενόν τʼ ἀγέρωχον.
Odyssey 1.287	τοῖσι δʼ ἐπʼ ἰφθίμην Πηρὼ τέκε, θαῦμα βροτοῖσι,
Odyssey 1.288	τὴν πάντες μνώοντο περικτίται· οὐδʼ ἄρα Νηλεὺς
Odyssey 1.289	τῷ ἐδίδου ὃς μὴ ἕλικας βόας εὐρυμετώπους
Odyssey 1.290	ἐκ Φυλάκης ἐλάσειε βίης Ἰφικληείης
Odyssey 1.291	ἀργαλέας· τὰς δʼ οἶος ὑπέσχετο μάντις ἀμύμων
Odyssey 1.292	ἐξελάαν· χαλεπὴ δὲ θεοῦ κατὰ μοῖρα πέδησε,
Odyssey 1.293	δεσμοί τʼ ἀργαλέοι καὶ βουκόλοι ἀγροιῶται.
Odyssey 1.294	ἀλλʼ ὅτε δὴ μῆνές τε καὶ ἡμέραι ἐξετελεῦντο
Odyssey 1.295	ἂψ περιτελλομένου ἔτεος καὶ ἐπήλυθον ὧραι,
Odyssey 1.296	καὶ τότε δή μιν ἔλυσε βίη Ἰφικληείη,
Odyssey 1.297	θέσφατα πάντʼ εἰπόντα· Διὸς δʼ ἐτελείετο βουλή.
Odyssey 1.298	καὶ Λήδην εἶδον, τὴν Τυνδαρέου παράκοιτιν,
Odyssey 1.299	ἥ ῥʼ ὑπὸ Τυνδαρέῳ κρατερόφρονε γείνατο παῖδε,
Odyssey 1.300	Κάστορά θʼ ἱππόδαμον καὶ πὺξ ἀγαθὸν Πολυδεύκεα,
Odyssey 1.301	τοὺς ἄμφω ζωοὺς κατέχει φυσίζοος αἶα·
Odyssey 1.302	οἳ καὶ νέρθεν γῆς τιμὴν πρὸς Ζηνὸς ἔχοντες
Odyssey 1.303	ἄλλοτε μὲν ζώουσʼ ἑτερήμεροι, ἄλλοτε δʼ αὖτε
Odyssey 1.304	τεθνᾶσιν· τιμὴν δὲ λελόγχασιν ἶσα θεοῖσι.
Odyssey 1.305	τὴν δὲ μετʼ Ἰφιμέδειαν, Ἀλωῆος παράκοιτιν
Odyssey 1.306	εἴσιδον, ἣ δὴ φάσκε Ποσειδάωνι μιγῆναι,
Odyssey 1.307	καί ῥʼ ἔτεκεν δύο παῖδε, μινυνθαδίω δʼ ἐγενέσθην,
Odyssey 1.308	Ὦτόν τʼ ἀντίθεον τηλεκλειτόν τʼ Ἐφιάλτην,
Odyssey 1.309	οὓς δὴ μηκίστους θρέψε ζείδωρος ἄρουρα
Odyssey 1.310	καὶ πολὺ καλλίστους μετά γε κλυτὸν Ὠρίωνα·
Odyssey 1.311	ἐννέωροι γὰρ τοί γε καὶ ἐννεαπήχεες ἦσαν
Odyssey 1.312	εὖρος, ἀτὰρ μῆκός γε γενέσθην ἐννεόργυιοι.
Odyssey 1.313	οἵ ῥα καὶ ἀθανάτοισιν ἀπειλήτην ἐν Ὀλύμπῳ
Odyssey 1.314	φυλόπιδα στήσειν πολυάικος πολέμοιο.
Odyssey 1.315	Ὄσσαν ἐπʼ Οὐλύμπῳ μέμασαν θέμεν, αὐτὰρ ἐπʼ Ὄσσῃ
Odyssey 1.316	Πήλιον εἰνοσίφυλλον, ἵνʼ οὐρανὸς ἀμβατὸς εἴη.
Odyssey 1.317	καί νύ κεν ἐξετέλεσσαν, εἰ ἥβης μέτρον ἵκοντο·
Odyssey 1.318	ἀλλʼ ὄλεσεν Διὸς υἱός, ὃν ἠύκομος τέκε Λητώ,
Odyssey 1.319	ἀμφοτέρω, πρίν σφωιν ὑπὸ κροτάφοισιν ἰούλους
Odyssey 1.320	ἀνθῆσαι πυκάσαι τε γένυς ἐυανθέι λάχνῃ.
Odyssey 1.321	Φαίδρην τε Πρόκριν τε ἴδον καλήν τʼ Ἀριάδνην,
Odyssey 1.322	κούρην Μίνωος ὀλοόφρονος, ἥν ποτε Θησεὺς
Odyssey 1.323	ἐκ Κρήτης ἐς γουνὸν Ἀθηνάων ἱεράων
Odyssey 1.324	ἦγε μέν, οὐδʼ ἀπόνητο· πάρος δέ μιν Ἄρτεμις ἔκτα
Odyssey 1.325	Δίῃ ἐν ἀμφιρύτῃ Διονύσου μαρτυρίῃσιν.
Odyssey 1.326	Μαῖράν τε Κλυμένην τε ἴδον στυγερήν τʼ Ἐριφύλην,
Odyssey 1.327	ἣ χρυσὸν φίλου ἀνδρὸς ἐδέξατο τιμήεντα.
Odyssey 1.328	πάσας δʼ οὐκ ἂν ἐγὼ μυθήσομαι οὐδʼ ὀνομήνω,
Odyssey 1.329	ὅσσας ἡρώων ἀλόχους ἴδον ἠδὲ θύγατρας·
Odyssey 1.330	πρὶν γάρ κεν καὶ νὺξ φθῖτʼ ἄμβροτος. ἀλλὰ καὶ ὥρη
Odyssey 1.331	εὕδειν, ἢ ἐπὶ νῆα θοὴν ἐλθόντʼ ἐς ἑταίρους
Odyssey 1.332	ἢ αὐτοῦ· πομπὴ δὲ θεοῖς ὑμῖν τε μελήσει.
Odyssey 1.333	ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ,
Odyssey 1.334	κηληθμῷ δʼ ἔσχοντο κατὰ μέγαρα σκιόεντα.
Odyssey 1.335	τοῖσιν δʼ Ἀρήτη λευκώλενος ἤρχετο μύθων.
Odyssey 1.336	Φαίηκες, πῶς ὔμμιν ἀνὴρ ὅδε φαίνεται εἶναι
Odyssey 1.337	εἶδός τε μέγεθός τε ἰδὲ φρένας ἔνδον ἐίσας;
Odyssey 1.338	ξεῖνος δʼ αὖτʼ ἐμός ἐστιν, ἕκαστος δʼ ἔμμορε τιμῆς·
Odyssey 1.339	τῷ μὴ ἐπειγόμενοι ἀποπέμπετε, μηδὲ τὰ δῶρα
Odyssey 1.340	οὕτω χρηίζοντι κολούετε· πολλὰ γὰρ ὑμῖν
Odyssey 1.341	κτήματʼ ἐνὶ μεγάροισι θεῶν ἰότητι κέονται.
Odyssey 1.342	τοῖσι δὲ καὶ μετέειπε γέρων ἥρως Ἐχένηος,
Odyssey 1.343	ὃς δὴ Φαιήκων ἀνδρῶν προγενέστερος ἦεν·
Odyssey 1.344	ὦ φίλοι, οὐ μὰν ἧμιν ἀπὸ σκοποῦ οὐδʼ ἀπὸ δόξης
Odyssey 1.345	μυθεῖται βασίλεια περίφρων· ἀλλὰ πίθεσθε.
Odyssey 1.346	Ἀλκινόου δʼ ἐκ τοῦδʼ ἔχεται ἔργον τε ἔπος τε.
Odyssey 1.347	τὸν δʼ αὖτʼ Ἀλκίνοος ἀπαμείβετο φώνησέν τε·
Odyssey 1.348	τοῦτο μὲν οὕτω δὴ ἔσται ἔπος, αἴ κεν ἐγώ γε
Odyssey 1.349	ζωὸς Φαιήκεσσι φιληρέτμοισιν ἀνάσσω·
Odyssey 1.350	ξεῖνος δὲ τλήτω μάλα περ νόστοιο χατίζων
Odyssey 1.351	ἔμπης οὖν ἐπιμεῖναι ἐς αὔριον, εἰς ὅ κε πᾶσαν
Odyssey 1.352	δωτίνην τελέσω· πομπὴ δʼ ἄνδρεσσι μελήσει
Odyssey 1.353	πᾶσι, μάλιστα δʼ ἐμοί· τοῦ γὰρ κράτος ἔστʼ ἐνὶ δήμῳ.
Odyssey 1.354	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.355	Ἀλκίνοε κρεῖον, πάντων ἀριδείκετε λαῶν,
Odyssey 1.356	εἴ με καὶ εἰς ἐνιαυτὸν ἀνώγοιτʼ αὐτόθι μίμνειν,
Odyssey 1.357	πομπὴν δʼ ὀτρύνοιτε καὶ ἀγλαὰ δῶρα διδοῖτε,
Odyssey 1.358	καί κε τὸ βουλοίμην, καί κεν πολὺ κέρδιον εἴη,
Odyssey 1.359	πλειοτέρῃ σὺν χειρὶ φίλην ἐς πατρίδʼ ἱκέσθαι·
Odyssey 1.360	καί κʼ αἰδοιότερος καὶ φίλτερος ἀνδράσιν εἴην
Odyssey 1.361	πᾶσιν, ὅσοι μʼ Ἰθάκηνδε ἰδοίατο νοστήσαντα.
Odyssey 1.362	τὸν δʼ αὖτʼ Ἀλκίνοος ἀπαμείβετο φώνησέν τε·
Odyssey 1.363	ὦ Ὀδυσεῦ, τὸ μὲν οὔ τί σʼ ἐίσκομεν εἰσορόωντες,
Odyssey 1.364	ἠπεροπῆά τʼ ἔμεν καὶ ἐπίκλοπον, οἷά τε πολλοὺς
Odyssey 1.365	βόσκει γαῖα μέλαινα πολυσπερέας ἀνθρώπους,
Odyssey 1.366	ψεύδεά τʼ ἀρτύνοντας ὅθεν κέ τις οὐδὲ ἴδοιτο·
Odyssey 1.367	σοὶ δʼ ἔπι μὲν μορφὴ ἐπέων, ἔνι δὲ φρένες ἐσθλαί.
Odyssey 1.368	μῦθον δʼ ὡς ὅτʼ ἀοιδὸς ἐπισταμένως κατέλεξας,
Odyssey 1.369	πάντων τʼ Ἀργείων σέο τʼ αὐτοῦ κήδεα λυγρά.
Odyssey 1.370	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Odyssey 1.371	εἴ τινας ἀντιθέων ἑτάρων ἴδες, οἵ τοι ἅμʼ αὐτῷ
Odyssey 1.372	Ἴλιον εἰς ἅμʼ ἕποντο καὶ αὐτοῦ πότμον ἐπέσπον.
Odyssey 1.373	νὺξ δʼ ἥδε μάλα μακρή, ἀθέσφατος· οὐδέ πω ὥρη
Odyssey 1.374	εὕδειν ἐν μεγάρῳ, σὺ δέ μοι λέγε θέσκελα ἔργα.
Odyssey 1.375	καί κεν ἐς ἠῶ δῖαν ἀνασχοίμην, ὅτε μοι σὺ
Odyssey 1.376	τλαίης ἐν μεγάρῳ τὰ σὰ κήδεα μυθήσασθαι.
Odyssey 1.377	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.378	Ἀλκίνοε κρεῖον, πάντων ἀριδείκετε λαῶν,
Odyssey 1.379	ὥρη μὲν πολέων μύθων, ὥρη δὲ καὶ ὕπνου·
Odyssey 1.380	εἰ δʼ ἔτʼ ἀκουέμεναί γε λιλαίεαι, οὐκ ἂν ἐγώ γε
Odyssey 1.381	τούτων σοι φθονέοιμι καὶ οἰκτρότερʼ ἄλλʼ ἀγορεύειν,
Odyssey 1.382	κήδεʼ ἐμῶν ἑτάρων, οἳ δὴ μετόπισθεν ὄλοντο,
Odyssey 1.383	οἳ Τρώων μὲν ὑπεξέφυγον στονόεσσαν ἀυτήν,
Odyssey 1.384	ἐν νόστῳ δʼ ἀπόλοντο κακῆς ἰότητι γυναικός.
Odyssey 1.385	αὐτὰρ ἐπεὶ ψυχὰς μὲν ἀπεσκέδασʼ ἄλλυδις ἄλλῃ
Odyssey 1.386	ἁγνὴ Περσεφόνεια γυναικῶν θηλυτεράων,
Odyssey 1.387	ἦλθε δʼ ἐπὶ ψυχὴ Ἀγαμέμνονος Ἀτρεΐδαο
Odyssey 1.388	ἀχνυμένη· περὶ δʼ ἄλλαι ἀγηγέραθʼ, ὅσσοι ἅμʼ αὐτῷ
Odyssey 1.389	οἴκῳ ἐν Αἰγίσθοιο θάνον καὶ πότμον ἐπέσπον.
Odyssey 1.390	ἔγνω δʼ αἶψʼ ἔμʼ ἐκεῖνος, ἐπεὶ πίεν αἷμα κελαινόν·
Odyssey 1.391	κλαῖε δʼ ὅ γε λιγέως, θαλερὸν κατὰ δάκρυον εἴβων,
Odyssey 1.392	πιτνὰς εἰς ἐμὲ χεῖρας, ὀρέξασθαι μενεαίνων·
Odyssey 1.393	ἀλλʼ οὐ γάρ οἱ ἔτʼ ἦν ἲς ἔμπεδος οὐδέ τι κῖκυς,
Odyssey 1.394	οἵη περ πάρος ἔσκεν ἐνὶ γναμπτοῖσι μέλεσσι.
Odyssey 1.395	τὸν μὲν ἐγὼ δάκρυσα ἰδὼν ἐλέησά τε θυμῷ,
Odyssey 1.396	καί μιν φωνήσας ἔπεα πτερόεντα προσηύδων·
Odyssey 1.397	Ἀτρεΐδη κύδιστε, ἄναξ ἀνδρῶν Ἀγάμεμνον,
Odyssey 1.398	τίς νύ σε κὴρ ἐδάμασσε τανηλεγέος θανάτοιο;
Odyssey 1.399	ἦε σέ γʼ ἐν νήεσσι Ποσειδάων ἐδάμασσεν
Odyssey 1.400	ὄρσας ἀργαλέων ἀνέμων ἀμέγαρτον ἀυτμήν;
Odyssey 1.401	ἦέ σʼ ἀνάρσιοι ἄνδρες ἐδηλήσαντʼ ἐπὶ χέρσου
Odyssey 1.402	βοῦς περιταμνόμενον ἠδʼ οἰῶν πώεα καλά,
Odyssey 1.403	ἠὲ περὶ πτόλιος μαχεούμενον ἠδὲ γυναικῶν;
Odyssey 1.404	ὣς ἐφάμην, ὁ δέ μʼ αὐτίκʼ ἀμειβόμενος προσέειπε·
Odyssey 1.405	διογενὲς Λαερτιάδη, πολυμήχανʼ Ὀδυσσεῦ,
Odyssey 1.406	οὔτʼ ἐμέ γʼ ἐν νήεσσι Ποσειδάων ἐδάμασσεν
Odyssey 1.407	ὄρσας ἀργαλέων ἀνέμων ἀμέγαρτον ἀυτμήν,
Odyssey 1.408	οὔτε μʼ ἀνάρσιοι ἄνδρες ἐδηλήσαντʼ ἐπὶ χέρσου,
Odyssey 1.409	ἀλλά μοι Αἴγισθος τεύξας θάνατόν τε μόρον τε
Odyssey 1.410	ἔκτα σὺν οὐλομένῃ ἀλόχῳ, οἶκόνδε καλέσσας,
Odyssey 1.411	δειπνίσσας, ὥς τίς τε κατέκτανε βοῦν ἐπὶ φάτνῃ.
Odyssey 1.412	ὣς θάνον οἰκτίστῳ θανάτῳ· περὶ δʼ ἄλλοι ἑταῖροι
Odyssey 1.413	νωλεμέως κτείνοντο σύες ὣς ἀργιόδοντες,
Odyssey 1.414	οἵ ῥά τʼ ἐν ἀφνειοῦ ἀνδρὸς μέγα δυναμένοιο
Odyssey 1.415	ἢ γάμῳ ἢ ἐράνῳ ἢ εἰλαπίνῃ τεθαλυίῃ.
Odyssey 1.416	ἤδη μὲν πολέων φόνῳ ἀνδρῶν ἀντεβόλησας,
Odyssey 1.417	μουνὰξ κτεινομένων καὶ ἐνὶ κρατερῇ ὑσμίνῃ·
Odyssey 1.418	ἀλλά κε κεῖνα μάλιστα ἰδὼν ὀλοφύραο θυμῷ,
Odyssey 1.419	ὡς ἀμφὶ κρητῆρα τραπέζας τε πληθούσας
Odyssey 1.420	κείμεθʼ ἐνὶ μεγάρῳ, δάπεδον δʼ ἅπαν αἵματι θῦεν.
Odyssey 1.421	οἰκτροτάτην δʼ ἤκουσα ὄπα Πριάμοιο θυγατρός,
Odyssey 1.422	Κασσάνδρης, τὴν κτεῖνε Κλυταιμνήστρη δολόμητις
Odyssey 1.423	ἀμφʼ ἐμοί, αὐτὰρ ἐγὼ ποτὶ γαίῃ χεῖρας ἀείρων
Odyssey 1.424	βάλλον ἀποθνήσκων περὶ φασγάνῳ· ἡ δὲ κυνῶπις
Odyssey 1.425	νοσφίσατʼ, οὐδέ μοι ἔτλη ἰόντι περ εἰς Ἀίδαο
Odyssey 1.426	χερσὶ κατʼ ὀφθαλμοὺς ἑλέειν σύν τε στόμʼ ἐρεῖσαι.
Odyssey 1.427	ὣς οὐκ αἰνότερον καὶ κύντερον ἄλλο γυναικός,
Odyssey 1.428	ἥ τις δὴ τοιαῦτα μετὰ φρεσὶν ἔργα βάληται·
Odyssey 1.429	οἷον δὴ καὶ κείνη ἐμήσατο ἔργον ἀεικές,
Odyssey 1.430	κουριδίῳ τεύξασα πόσει φόνον. ἦ τοι ἔφην γε
Odyssey 1.431	ἀσπάσιος παίδεσσιν ἰδὲ δμώεσσιν ἐμοῖσιν
Odyssey 1.432	οἴκαδʼ ἐλεύσεσθαι· ἡ δʼ ἔξοχα λυγρὰ ἰδυῖα
Odyssey 1.433	οἷ τε κατʼ αἶσχος ἔχευε καὶ ἐσσομένῃσιν ὀπίσσω
Odyssey 1.434	θηλυτέρῃσι γυναιξί, καὶ ἥ κʼ ἐυεργὸς ἔῃσιν.
Odyssey 1.435	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.436	ὢ πόποι, ἦ μάλα δὴ γόνον Ἀτρέος εὐρύοπα Ζεὺς
Odyssey 1.437	ἐκπάγλως ἤχθηρε γυναικείας διὰ βουλὰς
Odyssey 1.438	ἐξ ἀρχῆς· Ἑλένης μὲν ἀπωλόμεθʼ εἵνεκα πολλοί,
Odyssey 1.439	σοὶ δὲ Κλυταιμνήστρη δόλον ἤρτυε τηλόθʼ ἐόντι.
Odyssey 1.440	ὣς ἐφάμην, ὁ δέ μʼ αὐτίκʼ ἀμειβόμενος προσέειπε·
Odyssey 1.441	τῷ νῦν μή ποτε καὶ σὺ γυναικί περ ἤπιος εἶναι·
Odyssey 1.442	μή οἱ μῦθον ἅπαντα πιφαυσκέμεν, ὅν κʼ ἐὺ εἰδῇς,
Odyssey 1.443	ἀλλὰ τὸ μὲν φάσθαι, τὸ δὲ καὶ κεκρυμμένον εἶναι.
Odyssey 1.444	ἀλλʼ οὐ σοί γʼ, Ὀδυσεῦ, φόνος ἔσσεται ἔκ γε γυναικός·
Odyssey 1.445	λίην γὰρ πινυτή τε καὶ εὖ φρεσὶ μήδεα οἶδε
Odyssey 1.446	κούρη Ἰκαρίοιο, περίφρων Πηνελόπεια.
Odyssey 1.447	ἦ μέν μιν νύμφην γε νέην κατελείπομεν ἡμεῖς
Odyssey 1.448	ἐρχόμενοι πόλεμόνδε· πάϊς δέ οἱ ἦν ἐπὶ μαζῷ
Odyssey 1.449	νήπιος, ὅς που νῦν γε μετʼ ἀνδρῶν ἵζει ἀριθμῷ,
Odyssey 1.450	ὄλβιος· ἦ γὰρ τόν γε πατὴρ φίλος ὄψεται ἐλθών,
Odyssey 1.451	καὶ κεῖνος πατέρα προσπτύξεται, ἣ θέμις ἐστίν.
Odyssey 1.452	ἡ δʼ ἐμὴ οὐδέ περ υἷος ἐνιπλησθῆναι ἄκοιτις
Odyssey 1.453	ὀφθαλμοῖσιν ἔασε· πάρος δέ με πέφνε καὶ αὐτόν.
Odyssey 1.454	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Odyssey 1.455	κρύβδην, μηδʼ ἀναφανδά, φίλην ἐς πατρίδα γαῖαν
Odyssey 1.456	νῆα κατισχέμεναι· ἐπεὶ οὐκέτι πιστὰ γυναιξίν.
Odyssey 1.457	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Odyssey 1.458	εἴ που ἔτι ζώοντος ἀκούετε παιδὸς ἐμοῖο,
Odyssey 1.459	ἤ που ἐν Ὀρχομενῷ ἢ ἐν Πύλῳ ἠμαθόεντι,
Odyssey 1.460	ἤ που πὰρ Μενελάῳ ἐνὶ Σπάρτῃ εὐρείῃ·
Odyssey 1.461	οὐ γάρ πω τέθνηκεν ἐπὶ χθονὶ δῖος Ὀρέστης.
Odyssey 1.462	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.463	Ἀτρεΐδη, τί με ταῦτα διείρεαι; οὐδέ τι οἶδα,
Odyssey 1.464	ζώει ὅ γʼ ἦ τέθνηκε· κακὸν δʼ ἀνεμώλια βάζειν.
Odyssey 1.465	νῶι μὲν ὣς ἐπέεσσιν ἀμειβομένω στυγεροῖσιν
Odyssey 1.466	ἕσταμεν ἀχνύμενοι θαλερὸν κατὰ δάκρυ χέοντες·
Odyssey 1.467	ἦλθε δʼ ἐπὶ ψυχὴ Πηληϊάδεω Ἀχιλῆος
Odyssey 1.468	καὶ Πατροκλῆος καὶ ἀμύμονος Ἀντιλόχοιο
Odyssey 1.469	Αἴαντός θʼ, ὃς ἄριστος ἔην εἶδός τε δέμας τε
Odyssey 1.470	τῶν ἄλλων Δαναῶν μετʼ ἀμύμονα Πηλεΐωνα.
Odyssey 1.471	ἔγνω δὲ ψυχή με ποδώκεος Αἰακίδαο
Odyssey 1.472	καί ῥʼ ὀλοφυρομένη ἔπεα πτερόεντα προσηύδα·
Odyssey 1.473	διογενὲς Λαερτιάδη, πολυμήχανʼ Ὀδυσσεῦ,
Odyssey 1.474	σχέτλιε, τίπτʼ ἔτι μεῖζον ἐνὶ φρεσὶ μήσεαι ἔργον;
Odyssey 1.475	πῶς ἔτλης Ἄϊδόσδε κατελθέμεν, ἔνθα τε νεκροὶ
Odyssey 1.476	ἀφραδέες ναίουσι, βροτῶν εἴδωλα καμόντων;
Odyssey 1.477	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.478	ὦ Ἀχιλεῦ Πηλῆος υἱέ, μέγα φέρτατʼ Ἀχαιῶν,
Odyssey 1.479	ἦλθον Τειρεσίαο κατὰ χρέος, εἴ τινα βουλὴν
Odyssey 1.480	εἴποι, ὅπως Ἰθάκην ἐς παιπαλόεσσαν ἱκοίμην·
Odyssey 1.481	οὐ γάρ πω σχεδὸν ἦλθον Ἀχαιΐδος, οὐδέ πω ἁμῆς
Odyssey 1.482	γῆς ἐπέβην, ἀλλʼ αἰὲν ἔχω κακά. σεῖο δʼ, Ἀχιλλεῦ,
Odyssey 1.483	οὔ τις ἀνὴρ προπάροιθε μακάρτατος οὔτʼ ἄρʼ ὀπίσσω.
Odyssey 1.484	πρὶν μὲν γάρ σε ζωὸν ἐτίομεν ἶσα θεοῖσιν
Odyssey 1.485	Ἀργεῖοι, νῦν αὖτε μέγα κρατέεις νεκύεσσιν
Odyssey 1.486	ἐνθάδʼ ἐών· τῷ μή τι θανὼν ἀκαχίζευ, Ἀχιλλεῦ.
Odyssey 1.487	ὣς ἐφάμην, ὁ δέ μʼ αὐτίκʼ ἀμειβόμενος προσέειπε·
Odyssey 1.488	μὴ δή μοι θάνατόν γε παραύδα, φαίδιμʼ Ὀδυσσεῦ.
Odyssey 1.489	βουλοίμην κʼ ἐπάρουρος ἐὼν θητευέμεν ἄλλῳ,
Odyssey 1.490	ἀνδρὶ παρʼ ἀκλήρῳ, ᾧ μὴ βίοτος πολὺς εἴη,
Odyssey 1.491	ἢ πᾶσιν νεκύεσσι καταφθιμένοισιν ἀνάσσειν.
Odyssey 1.492	ἀλλʼ ἄγε μοι τοῦ παιδὸς ἀγαυοῦ μῦθον ἐνίσπες,
Odyssey 1.493	ἢ ἕπετʼ ἐς πόλεμον πρόμος ἔμμεναι, ἦε καὶ οὐκί.
Odyssey 1.494	εἰπὲ δέ μοι Πηλῆος ἀμύμονος, εἴ τι πέπυσσαι,
Odyssey 1.495	ἢ ἔτʼ ἔχει τιμὴν πολέσιν μετὰ Μυρμιδόνεσσιν,
Odyssey 1.496	ἦ μιν ἀτιμάζουσιν ἀνʼ Ἑλλάδα τε Φθίην τε,
Odyssey 1.497	οὕνεκά μιν κατὰ γῆρας ἔχει χεῖράς τε πόδας τε.
Odyssey 1.498	οὐ γὰρ ἐγὼν ἐπαρωγὸς ὑπʼ αὐγὰς ἠελίοιο,
Odyssey 1.499	τοῖος ἐών, οἷός ποτʼ ἐνὶ Τροίῃ εὐρείῃ
Odyssey 1.500	πέφνον λαὸν ἄριστον, ἀμύνων Ἀργείοισιν·
Odyssey 1.501	εἰ τοιόσδʼ ἔλθοιμι μίνυνθά περ ἐς πατέρος δῶ·
Odyssey 1.502	τῷ κέ τεῳ στύξαιμι μένος καὶ χεῖρας ἀάπτους,
Odyssey 1.503	οἳ κεῖνον βιόωνται ἐέργουσίν τʼ ἀπὸ τιμῆς.
Odyssey 1.504	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.505	ἦ τοι μὲν Πηλῆος ἀμύμονος οὔ τι πέπυσμαι,
Odyssey 1.506	αὐτάρ τοι παιδός γε Νεοπτολέμοιο φίλοιο
Odyssey 1.507	πᾶσαν ἀληθείην μυθήσομαι, ὥς με κελεύεις·
Odyssey 1.508	αὐτὸς γάρ μιν ἐγὼ κοίλης ἐπὶ νηὸς ἐίσης
Odyssey 1.509	ἤγαγον ἐκ Σκύρου μετʼ ἐυκνήμιδας Ἀχαιούς.
Odyssey 1.510	ἦ τοι ὅτʼ ἀμφὶ πόλιν Τροίην φραζοίμεθα βουλάς,
Odyssey 1.511	αἰεὶ πρῶτος ἔβαζε καὶ οὐχ ἡμάρτανε μύθων·
Odyssey 1.512	Νέστωρ ἀντίθεος καὶ ἐγὼ νικάσκομεν οἴω.
Odyssey 1.513	αὐτὰρ ὅτʼ ἐν πεδίῳ Τρώων μαρναίμεθα χαλκῷ,
Odyssey 1.514	οὔ ποτʼ ἐνὶ πληθυῖ μένεν ἀνδρῶν οὐδʼ ἐν ὁμίλῳ,
Odyssey 1.515	ἀλλὰ πολὺ προθέεσκε τὸ ὃν μένος οὐδενὶ εἴκων,
Odyssey 1.516	πολλοὺς δʼ ἄνδρας ἔπεφνεν ἐν αἰνῇ δηιοτῆτι.
Odyssey 1.517	πάντας δʼ οὐκ ἂν ἐγὼ μυθήσομαι οὐδʼ ὀνομήνω,
Odyssey 1.518	ὅσσον λαὸν ἔπεφνεν ἀμύνων Ἀργείοισιν,
Odyssey 1.519	ἀλλʼ οἷον τὸν Τηλεφίδην κατενήρατο χαλκῷ,
Odyssey 1.520	ἥρωʼ Εὐρύπυλον, πολλοὶ δʼ ἀμφʼ αὐτὸν ἑταῖροι
Odyssey 1.521	Κήτειοι κτείνοντο γυναίων εἵνεκα δώρων.
Odyssey 1.522	κεῖνον δὴ κάλλιστον ἴδον μετὰ Μέμνονα δῖον.
Odyssey 1.523	αὐτὰρ ὅτʼ εἰς ἵππον κατεβαίνομεν, ὃν κάμʼ Ἐπειός,
Odyssey 1.524	Ἀργείων οἱ ἄριστοι, ἐμοὶ δʼ ἐπὶ πάντα τέταλτο,
Odyssey 1.525	ἠμὲν ἀνακλῖναι πυκινὸν λόχον ἠδʼ ἐπιθεῖναι,
Odyssey 1.526	ἔνθʼ ἄλλοι Δαναῶν ἡγήτορες ἠδὲ μέδοντες
Odyssey 1.527	δάκρυά τʼ ὠμόργνυντο τρέμον θʼ ὑπὸ γυῖα ἑκάστου·
Odyssey 1.528	κεῖνον δʼ οὔ ποτε πάμπαν ἐγὼν ἴδον ὀφθαλμοῖσιν
Odyssey 1.529	οὔτʼ ὠχρήσαντα χρόα κάλλιμον οὔτε παρειῶν
Odyssey 1.530	δάκρυ ὀμορξάμενον· ὁ δέ γε μάλα πόλλʼ ἱκέτευεν
Odyssey 1.531	ἱππόθεν ἐξέμεναι, ξίφεος δʼ ἐπεμαίετο κώπην
Odyssey 1.532	καὶ δόρυ χαλκοβαρές, κακὰ δὲ Τρώεσσι μενοίνα.
Odyssey 1.533	ἀλλʼ ὅτε δὴ Πριάμοιο πόλιν διεπέρσαμεν αἰπήν,
Odyssey 1.534	μοῖραν καὶ γέρας ἐσθλὸν ἔχων ἐπὶ νηὸς ἔβαινεν
Odyssey 1.535	ἀσκηθής, οὔτʼ ἂρ βεβλημένος ὀξέι χαλκῷ
Odyssey 1.536	οὔτʼ αὐτοσχεδίην οὐτασμένος, οἷά τε πολλὰ
Odyssey 1.537	γίγνεται ἐν πολέμῳ· ἐπιμὶξ δέ τε μαίνεται Ἄρης.
Odyssey 1.538	ὣς ἐφάμην, ψυχὴ δὲ ποδώκεος Αἰακίδαο
Odyssey 1.539	φοίτα μακρὰ βιβᾶσα κατʼ ἀσφοδελὸν λειμῶνα,
Odyssey 1.540	γηθοσύνη ὅ οἱ υἱὸν ἔφην ἀριδείκετον εἶναι.
Odyssey 1.541	αἱ δʼ ἄλλαι ψυχαὶ νεκύων κατατεθνηώτων
Odyssey 1.542	ἕστασαν ἀχνύμεναι, εἴροντο δὲ κήδεʼ ἑκάστη.
Odyssey 1.543	οἴη δʼ Αἴαντος ψυχὴ Τελαμωνιάδαο
Odyssey 1.544	νόσφιν ἀφεστήκει, κεχολωμένη εἵνεκα νίκης,
Odyssey 1.545	τήν μιν ἐγὼ νίκησα δικαζόμενος παρὰ νηυσὶ
Odyssey 1.546	τεύχεσιν ἀμφʼ Ἀχιλῆος· ἔθηκε δὲ πότνια μήτηρ.
Odyssey 1.547	παῖδες δὲ Τρώων δίκασαν καὶ Παλλὰς Ἀθήνη.
Odyssey 1.548	ὡς δὴ μὴ ὄφελον νικᾶν τοιῷδʼ ἐπʼ ἀέθλῳ·
Odyssey 1.549	τοίην γὰρ κεφαλὴν ἕνεκʼ αὐτῶν γαῖα κατέσχεν,
Odyssey 1.550	Αἴανθʼ, ὃς πέρι μὲν εἶδος, πέρι δʼ ἔργα τέτυκτο
Odyssey 1.551	τῶν ἄλλων Δαναῶν μετʼ ἀμύμονα Πηλεΐωνα.
Odyssey 1.552	τὸν μὲν ἐγὼν ἐπέεσσι προσηύδων μειλιχίοισιν·
Odyssey 1.553	Αἶαν, παῖ Τελαμῶνος ἀμύμονος, οὐκ ἄρʼ ἔμελλες
Odyssey 1.554	οὐδὲ θανὼν λήσεσθαι ἐμοὶ χόλου εἵνεκα τευχέων
Odyssey 1.555	οὐλομένων; τὰ δὲ πῆμα θεοὶ θέσαν Ἀργείοισι,
Odyssey 1.556	τοῖος γάρ σφιν πύργος ἀπώλεο· σεῖο δʼ Ἀχαιοὶ
Odyssey 1.557	ἶσον Ἀχιλλῆος κεφαλῇ Πηληϊάδαο
Odyssey 1.558	ἀχνύμεθα φθιμένοιο διαμπερές· οὐδέ τις ἄλλος
Odyssey 1.559	αἴτιος, ἀλλὰ Ζεὺς Δαναῶν στρατὸν αἰχμητάων
Odyssey 1.560	ἐκπάγλως ἤχθηρε, τεῒν δʼ ἐπὶ μοῖραν ἔθηκεν.
Odyssey 1.561	ἀλλʼ ἄγε δεῦρο, ἄναξ, ἵνʼ ἔπος καὶ μῦθον ἀκούσῃς
Odyssey 1.562	ἡμέτερον· δάμασον δὲ μένος καὶ ἀγήνορα θυμόν.
Odyssey 1.563	ὣς ἐφάμην, ὁ δέ μʼ οὐδὲν ἀμείβετο, βῆ δὲ μετʼ ἄλλας
Odyssey 1.564	ψυχὰς εἰς Ἔρεβος νεκύων κατατεθνηώτων.
Odyssey 1.565	ἔνθα χʼ ὅμως προσέφη κεχολωμένος, ἤ κεν ἐγὼ τόν·
Odyssey 1.566	ἀλλά μοι ἤθελε θυμὸς ἐνὶ στήθεσσι φίλοισι
Odyssey 1.567	τῶν ἄλλων ψυχὰς ἰδέειν κατατεθνηώτων.
Odyssey 1.568	ἔνθʼ ἦ τοι Μίνωα ἴδον, Διὸς ἀγλαὸν υἱόν,
Odyssey 1.569	χρύσεον σκῆπτρον ἔχοντα, θεμιστεύοντα νέκυσσιν,
Odyssey 1.570	ἥμενον, οἱ δέ μιν ἀμφὶ δίκας εἴροντο ἄνακτα,
Odyssey 1.571	ἥμενοι ἑσταότες τε κατʼ εὐρυπυλὲς Ἄϊδος δῶ.
Odyssey 1.572	τὸν δὲ μετʼ Ὠρίωνα πελώριον εἰσενόησα
Odyssey 1.573	θῆρας ὁμοῦ εἰλεῦντα κατʼ ἀσφοδελὸν λειμῶνα,
Odyssey 1.574	τοὺς αὐτὸς κατέπεφνεν ἐν οἰοπόλοισιν ὄρεσσι
Odyssey 1.575	χερσὶν ἔχων ῥόπαλον παγχάλκεον, αἰὲν ἀαγές.
Odyssey 1.576	καὶ Τιτυὸν εἶδον, Γαίης ἐρικυδέος υἱόν,
Odyssey 1.577	κείμενον ἐν δαπέδῳ· ὁ δʼ ἐπʼ ἐννέα κεῖτο πέλεθρα,
Odyssey 1.578	γῦπε δέ μιν ἑκάτερθε παρημένω ἧπαρ ἔκειρον,
Odyssey 1.579	δέρτρον ἔσω δύνοντες, ὁ δʼ οὐκ ἀπαμύνετο χερσί·
Odyssey 1.580	Λητὼ γὰρ ἕλκησε, Διὸς κυδρὴν παράκοιτιν,
Odyssey 1.581	Πυθώδʼ ἐρχομένην διὰ καλλιχόρου Πανοπῆος.
Odyssey 1.582	καὶ μὴν Τάνταλον εἰσεῖδον κρατέρʼ ἄλγεʼ ἔχοντα
Odyssey 1.583	ἑστεῶτʼ ἐν λίμνῃ· ἡ δὲ προσέπλαζε γενείῳ·
Odyssey 1.584	στεῦτο δὲ διψάων, πιέειν δʼ οὐκ εἶχεν ἑλέσθαι·
Odyssey 1.585	ὁσσάκι γὰρ κύψειʼ ὁ γέρων πιέειν μενεαίνων,
Odyssey 1.586	τοσσάχʼ ὕδωρ ἀπολέσκετʼ ἀναβροχέν, ἀμφὶ δὲ ποσσὶ
Odyssey 1.587	γαῖα μέλαινα φάνεσκε, καταζήνασκε δὲ δαίμων.
Odyssey 1.588	δένδρεα δʼ ὑψιπέτηλα κατὰ κρῆθεν χέε καρπόν,
Odyssey 1.589	ὄγχναι καὶ ῥοιαὶ καὶ μηλέαι ἀγλαόκαρποι
Odyssey 1.590	συκέαι τε γλυκεραὶ καὶ ἐλαῖαι τηλεθόωσαι·
Odyssey 1.591	τῶν ὁπότʼ ἰθύσειʼ ὁ γέρων ἐπὶ χερσὶ μάσασθαι,
Odyssey 1.592	τὰς δʼ ἄνεμος ῥίπτασκε ποτὶ νέφεα σκιόεντα.
Odyssey 1.593	καὶ μὴν Σίσυφον εἰσεῖδον κρατέρʼ ἄλγεʼ ἔχοντα
Odyssey 1.594	λᾶαν βαστάζοντα πελώριον ἀμφοτέρῃσιν.
Odyssey 1.595	ἦ τοι ὁ μὲν σκηριπτόμενος χερσίν τε ποσίν τε
Odyssey 1.596	λᾶαν ἄνω ὤθεσκε ποτὶ λόφον· ἀλλʼ ὅτε μέλλοι
Odyssey 1.597	ἄκρον ὑπερβαλέειν, τότʼ ἀποστρέψασκε κραταιίς·
Odyssey 1.598	αὖτις ἔπειτα πέδονδε κυλίνδετο λᾶας ἀναιδής.
Odyssey 1.599	αὐτὰρ ὅ γʼ ἂψ ὤσασκε τιταινόμενος, κατὰ δʼ ἱδρὼς
Odyssey 1.600	ἔρρεεν ἐκ μελέων, κονίη δʼ ἐκ κρατὸς ὀρώρει.
Odyssey 1.601	τὸν δὲ μετʼ εἰσενόησα βίην Ἡρακληείην,
Odyssey 1.602	εἴδωλον· αὐτὸς δὲ μετʼ ἀθανάτοισι θεοῖσι
Odyssey 1.603	τέρπεται ἐν θαλίῃς καὶ ἔχει καλλίσφυρον Ἥβην,
Odyssey 1.604	παῖδα Διὸς μεγάλοιο καὶ Ἥρης χρυσοπεδίλου.
Odyssey 1.605	ἀμφὶ δέ μιν κλαγγὴ νεκύων ἦν οἰωνῶν ὥς,
Odyssey 1.606	πάντοσʼ ἀτυζομένων· ὁ δʼ ἐρεμνῇ νυκτὶ ἐοικώς,
Odyssey 1.607	γυμνὸν τόξον ἔχων καὶ ἐπὶ νευρῆφιν ὀιστόν,
Odyssey 1.608	δεινὸν παπταίνων, αἰεὶ βαλέοντι ἐοικώς.
Odyssey 1.609	σμερδαλέος δέ οἱ ἀμφὶ περὶ στήθεσσιν ἀορτὴρ
Odyssey 1.610	χρύσεος ἦν τελαμών, ἵνα θέσκελα ἔργα τέτυκτο,
Odyssey 1.611	ἄρκτοι τʼ ἀγρότεροί τε σύες χαροποί τε λέοντες,
Odyssey 1.612	ὑσμῖναί τε μάχαι τε φόνοι τʼ ἀνδροκτασίαι τε.
Odyssey 1.613	μὴ τεχνησάμενος μηδʼ ἄλλο τι τεχνήσαιτο,
Odyssey 1.614	ὃς κεῖνον τελαμῶνα ἑῇ ἐγκάτθετο τέχνῃ.
Odyssey 1.615	ἔγνω δʼ αὖτʼ ἔμʼ ἐκεῖνος, ἐπεὶ ἴδεν ὀφθαλμοῖσιν,
Odyssey 1.616	καί μʼ ὀλοφυρόμενος ἔπεα πτερόεντα προσηύδα·
Odyssey 1.617	διογενὲς Λαερτιάδη, πολυμήχανʼ Ὀδυσσεῦ,
Odyssey 1.618	ἆ δείλʼ, ἦ τινὰ καὶ σὺ κακὸν μόρον ἡγηλάζεις,
Odyssey 1.619	ὅν περ ἐγὼν ὀχέεσκον ὑπʼ αὐγὰς ἠελίοιο.
Odyssey 1.620	Ζηνὸς μὲν πάϊς ἦα Κρονίονος, αὐτὰρ ὀιζὺν
Odyssey 1.621	εἶχον ἀπειρεσίην· μάλα γὰρ πολὺ χείρονι φωτὶ
Odyssey 1.622	δεδμήμην, ὁ δέ μοι χαλεποὺς ἐπετέλλετʼ ἀέθλους.
Odyssey 1.623	καί ποτέ μʼ ἐνθάδʼ ἔπεμψε κύνʼ ἄξοντʼ· οὐ γὰρ ἔτʼ ἄλλον
Odyssey 1.624	φράζετο τοῦδέ γέ μοι κρατερώτερον εἶναι ἄεθλον·
Odyssey 1.625	τὸν μὲν ἐγὼν ἀνένεικα καὶ ἤγαγον ἐξ Ἀίδαο·
Odyssey 1.626	Ἑρμείας δέ μʼ ἔπεμψεν ἰδὲ γλαυκῶπις Ἀθήνη.
Odyssey 1.627	ὣς εἰπὼν ὁ μὲν αὖτις ἔβη δόμον Ἄϊδος εἴσω,
Odyssey 1.628	αὐτὰρ ἐγὼν αὐτοῦ μένον ἔμπεδον, εἴ τις ἔτʼ ἔλθοι
Odyssey 1.629	ἀνδρῶν ἡρώων, οἳ δὴ τὸ πρόσθεν ὄλοντο.
Odyssey 1.630	καί νύ κʼ ἔτι προτέρους ἴδον ἀνέρας, οὓς ἔθελόν περ,
Odyssey 1.631	Θησέα Πειρίθοόν τε, θεῶν ἐρικυδέα τέκνα·
Odyssey 1.632	ἀλλὰ πρὶν ἐπὶ ἔθνεʼ ἀγείρετο μυρία νεκρῶν
Odyssey 1.633	ἠχῇ θεσπεσίῃ· ἐμὲ δὲ χλωρὸν δέος ᾕρει,
Odyssey 1.634	μή μοι Γοργείην κεφαλὴν δεινοῖο πελώρου
Odyssey 1.635	ἐξ Ἀίδεω πέμψειεν ἀγαυὴ Περσεφόνεια.
Odyssey 1.636	αὐτίκʼ ἔπειτʼ ἐπὶ νῆα κιὼν ἐκέλευον ἑταίρους
Odyssey 1.637	αὐτούς τʼ ἀμβαίνειν ἀνά τε πρυμνήσια λῦσαι.
Odyssey 1.638	οἱ δʼ αἶψʼ εἴσβαινον καὶ ἐπὶ κληῖσι καθῖζον.
Odyssey 1.639	τὴν δὲ κατʼ Ὠκεανὸν ποταμὸν φέρε κῦμα ῥόοιο,
Odyssey 1.640	πρῶτα μὲν εἰρεσίῃ, μετέπειτα δὲ κάλλιμος οὖρος.
Odyssey 1.1	αὐτὰρ ἐπεὶ ποταμοῖο λίπεν ῥόον Ὠκεανοῖο
Odyssey 1.2	νηῦς, ἀπὸ δʼ ἵκετο κῦμα θαλάσσης εὐρυπόροιο
Odyssey 1.3	νῆσόν τʼ Αἰαίην, ὅθι τʼ Ἠοῦς ἠριγενείης
Odyssey 1.4	οἰκία καὶ χοροί εἰσι καὶ ἀντολαὶ Ἠελίοιο,
Odyssey 1.5	νῆα μὲν ἔνθʼ ἐλθόντες ἐκέλσαμεν ἐν ψαμάθοισιν,
Odyssey 1.6	ἐκ δὲ καὶ αὐτοὶ βῆμεν ἐπὶ ῥηγμῖνι θαλάσσης·
Odyssey 1.7	ἔνθα δʼ ἀποβρίξαντες ἐμείναμεν Ἠῶ δῖαν.
Odyssey 1.8	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.9	δὴ τότʼ ἐγὼν ἑτάρους προΐειν ἐς δώματα Κίρκης
Odyssey 1.10	οἰσέμεναι νεκρόν, Ἐλπήνορα τεθνηῶτα.
Odyssey 1.11	φιτροὺς δʼ αἶψα ταμόντες, ὅθʼ ἀκροτάτη πρόεχʼ ἀκτή,
Odyssey 1.12	θάπτομεν ἀχνύμενοι θαλερὸν κατὰ δάκρυ χέοντες.
Odyssey 1.13	αὐτὰρ ἐπεὶ νεκρός τʼ ἐκάη καὶ τεύχεα νεκροῦ,
Odyssey 1.14	τύμβον χεύαντες καὶ ἐπὶ στήλην ἐρύσαντες
Odyssey 1.15	πήξαμεν ἀκροτάτῳ τύμβῳ ἐυῆρες ἐρετμόν.
Odyssey 1.16	ἡμεῖς μὲν τὰ ἕκαστα διείπομεν· οὐδʼ ἄρα Κίρκην
Odyssey 1.17	ἐξ Ἀίδεω ἐλθόντες ἐλήθομεν, ἀλλὰ μάλʼ ὦκα
Odyssey 1.18	ἦλθʼ ἐντυναμένη· ἅμα δʼ ἀμφίπολοι φέρον αὐτῇ
Odyssey 1.19	σῖτον καὶ κρέα πολλὰ καὶ αἴθοπα οἶνον ἐρυθρόν.
Odyssey 1.20	ἡ δʼ ἐν μέσσῳ στᾶσα μετηύδα δῖα θεάων·
Odyssey 1.21	σχέτλιοι, οἳ ζώοντες ὑπήλθετε δῶμʼ Ἀίδαο,
Odyssey 1.22	δισθανέες, ὅτε τʼ ἄλλοι ἅπαξ θνῄσκουσʼ ἄνθρωποι.
Odyssey 1.23	ἀλλʼ ἄγετʼ ἐσθίετε βρώμην καὶ πίνετε οἶνον
Odyssey 1.24	αὖθι πανημέριοι· ἅμα δʼ ἠοῖ φαινομένηφι
Odyssey 1.25	πλεύσεσθʼ· αὐτὰρ ἐγὼ δείξω ὁδὸν ἠδὲ ἕκαστα
Odyssey 1.26	σημανέω, ἵνα μή τι κακορραφίῃ ἀλεγεινῇ
Odyssey 1.27	ἢ ἁλὸς ἢ ἐπὶ γῆς ἀλγήσετε πῆμα παθόντες.
Odyssey 1.28	ὣς ἔφαθʼ, ἡμῖν δʼ αὖτʼ ἐπεπείθετο θυμὸς ἀγήνωρ.
Odyssey 1.29	ὣς τότε μὲν πρόπαν ἦμαρ ἐς ἠέλιον καταδύντα
Odyssey 1.30	ἥμεθα δαινύμενοι κρέα τʼ ἄσπετα καὶ μέθυ ἡδύ·
Odyssey 1.31	ἦμος δʼ ἠέλιος κατέδυ καὶ ἐπὶ κνέφας ἦλθεν,
Odyssey 1.32	οἱ μὲν κοιμήσαντο παρὰ πρυμνήσια νηός,
Odyssey 1.33	ἡ δʼ ἐμὲ χειρὸς ἑλοῦσα φίλων ἀπονόσφιν ἑταίρων
Odyssey 1.34	εἷσέ τε καὶ προσέλεκτο καὶ ἐξερέεινεν ἕκαστα·
Odyssey 1.35	αὐτὰρ ἐγὼ τῇ πάντα κατὰ μοῖραν κατέλεξα.
Odyssey 1.36	καὶ τότε δή μʼ ἐπέεσσι προσηύδα πότνια Κίρκη·
Odyssey 1.37	ταῦτα μὲν οὕτω πάντα πεπείρανται, σὺ δʼ ἄκουσον,
Odyssey 1.38	ὥς τοι ἐγὼν ἐρέω, μνήσει δέ σε καὶ θεὸς αὐτός.
Odyssey 1.39	Σειρῆνας μὲν πρῶτον ἀφίξεαι, αἵ ῥά τε πάντας
Odyssey 1.40	ἀνθρώπους θέλγουσιν, ὅτις σφεας εἰσαφίκηται.
Odyssey 1.41	ὅς τις ἀιδρείῃ πελάσῃ καὶ φθόγγον ἀκούσῃ
Odyssey 1.42	Σειρήνων, τῷ δʼ οὔ τι γυνὴ καὶ νήπια τέκνα
Odyssey 1.43	οἴκαδε νοστήσαντι παρίσταται οὐδὲ γάνυνται,
Odyssey 1.44	ἀλλά τε Σειρῆνες λιγυρῇ θέλγουσιν ἀοιδῇ
Odyssey 1.45	ἥμεναι ἐν λειμῶνι, πολὺς δʼ ἀμφʼ ὀστεόφιν θὶς
Odyssey 1.46	ἀνδρῶν πυθομένων, περὶ δὲ ῥινοὶ μινύθουσι.
Odyssey 1.47	ἀλλὰ παρεξελάαν, ἐπὶ δʼ οὔατʼ ἀλεῖψαι ἑταίρων
Odyssey 1.48	κηρὸν δεψήσας μελιηδέα, μή τις ἀκούσῃ
Odyssey 1.49	τῶν ἄλλων· ἀτὰρ αὐτὸς ἀκουέμεν αἴ κʼ ἐθέλῃσθα,
Odyssey 1.50	δησάντων σʼ ἐν νηὶ θοῇ χεῖράς τε πόδας τε
Odyssey 1.51	ὀρθὸν ἐν ἱστοπέδῃ, ἐκ δʼ αὐτοῦ πείρατʼ ἀνήφθω,
Odyssey 1.52	ὄφρα κε τερπόμενος ὄπʼ ἀκούσῃς Σειρήνοιιν.
Odyssey 1.53	εἰ δέ κε λίσσηαι ἑτάρους λῦσαί τε κελεύῃς,
Odyssey 1.54	οἱ δέ σʼ ἔτι πλεόνεσσι τότʼ ἐν δεσμοῖσι διδέντων.
Odyssey 1.55	αὐτὰρ ἐπὴν δὴ τάς γε παρὲξ ἐλάσωσιν ἑταῖροι,
Odyssey 1.56	ἔνθα τοι οὐκέτʼ ἔπειτα διηνεκέως ἀγορεύσω,
Odyssey 1.57	ὁπποτέρη δή τοι ὁδὸς ἔσσεται, ἀλλὰ καὶ αὐτὸς
Odyssey 1.58	θυμῷ βουλεύειν· ἐρέω δέ τοι ἀμφοτέρωθεν.
Odyssey 1.59	ἔνθεν μὲν γὰρ πέτραι ἐπηρεφέες, προτὶ δʼ αὐτὰς
Odyssey 1.60	κῦμα μέγα ῥοχθεῖ κυανώπιδος Ἀμφιτρίτης·
Odyssey 1.61	Πλαγκτὰς δή τοι τάς γε θεοὶ μάκαρες καλέουσι.
Odyssey 1.62	τῇ μέν τʼ οὐδὲ ποτητὰ παρέρχεται οὐδὲ πέλειαι
Odyssey 1.63	τρήρωνες, ταί τʼ ἀμβροσίην Διὶ πατρὶ φέρουσιν,
Odyssey 1.64	ἀλλά τε καὶ τῶν αἰὲν ἀφαιρεῖται λὶς πέτρη·
Odyssey 1.65	ἀλλʼ ἄλλην ἐνίησι πατὴρ ἐναρίθμιον εἶναι.
Odyssey 1.66	τῇ δʼ οὔ πώ τις νηῦς φύγεν ἀνδρῶν, ἥ τις ἵκηται,
Odyssey 1.67	ἀλλά θʼ ὁμοῦ πίνακάς τε νεῶν καὶ σώματα φωτῶν
Odyssey 1.68	κύμαθʼ ἁλὸς φορέουσι πυρός τʼ ὀλοοῖο θύελλαι.
Odyssey 1.69	οἴη δὴ κείνη γε παρέπλω ποντοπόρος νηῦς,
Odyssey 1.70	Ἀργὼ πᾶσι μέλουσα, παρʼ Αἰήταο πλέουσα.
Odyssey 1.71	καὶ νύ κε τὴν ἔνθʼ ὦκα βάλεν μεγάλας ποτὶ πέτρας,
Odyssey 1.72	ἀλλʼ Ἥρη παρέπεμψεν, ἐπεὶ φίλος ἦεν Ἰήσων.
Odyssey 1.73	οἱ δὲ δύω σκόπελοι ὁ μὲν οὐρανὸν εὐρὺν ἱκάνει
Odyssey 1.74	ὀξείῃ κορυφῇ, νεφέλη δέ μιν ἀμφιβέβηκε
Odyssey 1.75	κυανέη· τὸ μὲν οὔ ποτʼ ἐρωεῖ, οὐδέ ποτʼ αἴθρη
Odyssey 1.76	κείνου ἔχει κορυφὴν οὔτʼ ἐν θέρει οὔτʼ ἐν ὀπώρῃ.
Odyssey 1.77	οὐδέ κεν ἀμβαίη βροτὸς ἀνὴρ οὐδʼ ἐπιβαίη,
Odyssey 1.78	οὐδʼ εἴ οἱ χεῖρές τε ἐείκοσι καὶ πόδες εἶεν·
Odyssey 1.79	πέτρη γὰρ λίς ἐστι, περιξεστῇ ἐικυῖα.
Odyssey 1.80	μέσσῳ δʼ ἐν σκοπέλῳ ἔστι σπέος ἠεροειδές,
Odyssey 1.81	πρὸς ζόφον εἰς Ἔρεβος τετραμμένον, ᾗ περ ἂν ὑμεῖς
Odyssey 1.82	νῆα παρὰ γλαφυρὴν ἰθύνετε, φαίδιμʼ Ὀδυσσεῦ.
Odyssey 1.83	οὐδέ κεν ἐκ νηὸς γλαφυρῆς αἰζήιος ἀνὴρ
Odyssey 1.84	τόξῳ ὀιστεύσας κοῖλον σπέος εἰσαφίκοιτο.
Odyssey 1.85	ἔνθα δʼ ἐνὶ Σκύλλη ναίει δεινὸν λελακυῖα.
Odyssey 1.86	τῆς ἦ τοι φωνὴ μὲν ὅση σκύλακος νεογιλῆς
Odyssey 1.87	γίγνεται, αὐτὴ δʼ αὖτε πέλωρ κακόν· οὐδέ κέ τίς μιν
Odyssey 1.88	γηθήσειεν ἰδών, οὐδʼ εἰ θεὸς ἀντιάσειεν.
Odyssey 1.89	τῆς ἦ τοι πόδες εἰσὶ δυώδεκα πάντες ἄωροι,
Odyssey 1.90	ἓξ δέ τέ οἱ δειραὶ περιμήκεες, ἐν δὲ ἑκάστῃ
Odyssey 1.91	σμερδαλέη κεφαλή, ἐν δὲ τρίστοιχοι ὀδόντες
Odyssey 1.92	πυκνοὶ καὶ θαμέες, πλεῖοι μέλανος θανάτοιο.
Odyssey 1.93	μέσση μέν τε κατὰ σπείους κοίλοιο δέδυκεν,
Odyssey 1.94	ἔξω δʼ ἐξίσχει κεφαλὰς δεινοῖο βερέθρου,
Odyssey 1.95	αὐτοῦ δʼ ἰχθυάᾳ, σκόπελον περιμαιμώωσα,
Odyssey 1.96	δελφῖνάς τε κύνας τε, καὶ εἴ ποθι μεῖζον ἕλῃσι
Odyssey 1.97	κῆτος, ἃ μυρία βόσκει ἀγάστονος Ἀμφιτρίτη.
Odyssey 1.98	τῇ δʼ οὔ πώ ποτε ναῦται ἀκήριοι εὐχετόωνται
Odyssey 1.99	παρφυγέειν σὺν νηί· φέρει δέ τε κρατὶ ἑκάστῳ
Odyssey 1.100	φῶτʼ ἐξαρπάξασα νεὸς κυανοπρῴροιο.
Odyssey 1.101	τὸν δʼ ἕτερον σκόπελον χθαμαλώτερον ὄψει, Ὀδυσσεῦ.
Odyssey 1.102	πλησίον ἀλλήλων· καί κεν διοϊστεύσειας.
Odyssey 1.103	τῷ δʼ ἐν ἐρινεὸς ἔστι μέγας, φύλλοισι τεθηλώς·
Odyssey 1.104	τῷ δʼ ὑπὸ δῖα Χάρυβδις ἀναρροιβδεῖ μέλαν ὕδωρ.
Odyssey 1.105	τρὶς μὲν γάρ τʼ ἀνίησιν ἐπʼ ἤματι, τρὶς δʼ ἀναροιβδεῖ
Odyssey 1.106	δεινόν· μὴ σύ γε κεῖθι τύχοις, ὅτε ῥοιβδήσειεν·
Odyssey 1.107	οὐ γάρ κεν ῥύσαιτό σʼ ὑπὲκ κακοῦ οὐδʼ ἐνοσίχθων.
Odyssey 1.108	ἀλλὰ μάλα Σκύλλης σκοπέλῳ πεπλημένος ὦκα
Odyssey 1.109	νῆα παρὲξ ἐλάαν, ἐπεὶ ἦ πολὺ φέρτερόν ἐστιν
Odyssey 1.110	ἓξ ἑτάρους ἐν νηὶ ποθήμεναι ἢ ἅμα πάντας.
Odyssey 1.111	ὣς ἔφατʼ, αὐτὰρ ἐγώ μιν ἀμειβόμενος προσέειπον·
Odyssey 1.112	εἰ δʼ ἄγε δή μοι τοῦτο, θεά, νημερτὲς ἐνίσπες,
Odyssey 1.113	εἴ πως τὴν ὀλοὴν μὲν ὑπεκπροφύγοιμι Χάρυβδιν,
Odyssey 1.114	τὴν δέ κʼ ἀμυναίμην, ὅτε μοι σίνοιτό γʼ ἑταίρους.
Odyssey 1.115	ὣς ἐφάμην, ἡ δʼ αὐτίκʼ ἀμείβετο δῖα θεάων·
Odyssey 1.116	σχέτλιε, καὶ δὴ αὖ τοι πολεμήια ἔργα μέμηλε
Odyssey 1.117	καὶ πόνος· οὐδὲ θεοῖσιν ὑπείξεαι ἀθανάτοισιν;
Odyssey 1.118	ἡ δέ τοι οὐ θνητή, ἀλλʼ ἀθάνατον κακόν ἐστι,
Odyssey 1.119	δεινόν τʼ ἀργαλέον τε καὶ ἄγριον οὐδὲ μαχητόν·
Odyssey 1.120	οὐδέ τις ἔστʼ ἀλκή· φυγέειν κάρτιστον ἀπʼ αὐτῆς.
Odyssey 1.121	ἢν γὰρ δηθύνῃσθα κορυσσόμενος παρὰ πέτρῃ,
Odyssey 1.122	δείδω, μή σʼ ἐξαῦτις ἐφορμηθεῖσα κίχῃσι
Odyssey 1.123	τόσσῃσιν κεφαλῇσι, τόσους δʼ ἐκ φῶτας ἕληται.
Odyssey 1.124	ἀλλὰ μάλα σφοδρῶς ἐλάαν, βωστρεῖν δὲ Κράταιιν,
Odyssey 1.125	μητέρα τῆς Σκύλλης, ἥ μιν τέκε πῆμα βροτοῖσιν·
Odyssey 1.126	ἥ μιν ἔπειτʼ ἀποπαύσει ἐς ὕστερον ὁρμηθῆναι.
Odyssey 1.127	Θρινακίην δʼ ἐς νῆσον ἀφίξεαι· ἔνθα δὲ πολλαὶ
Odyssey 1.128	βόσκοντʼ Ἠελίοιο βόες καὶ ἴφια μῆλα,
Odyssey 1.129	ἑπτὰ βοῶν ἀγέλαι, τόσα δʼ οἰῶν πώεα καλά,
Odyssey 1.130	πεντήκοντα δʼ ἕκαστα. γόνος δʼ οὐ γίγνεται αὐτῶν,
Odyssey 1.131	οὐδέ ποτε φθινύθουσι. θεαὶ δʼ ἐπιποιμένες εἰσίν,
Odyssey 1.132	νύμφαι ἐυπλόκαμοι, Φαέθουσά τε Λαμπετίη τε,
Odyssey 1.133	ἃς τέκεν Ἠελίῳ Ὑπερίονι δῖα Νέαιρα.
Odyssey 1.134	τὰς μὲν ἄρα θρέψασα τεκοῦσά τε πότνια μήτηρ
Odyssey 1.135	Θρινακίην ἐς νῆσον ἀπῴκισε τηλόθι ναίειν,
Odyssey 1.136	μῆλα φυλασσέμεναι πατρώια καὶ ἕλικας βοῦς.
Odyssey 1.137	τὰς εἰ μέν κʼ ἀσινέας ἐάᾳς νόστου τε μέδηαι,
Odyssey 1.138	ἦ τʼ ἂν ἔτʼ εἰς Ἰθάκην κακά περ πάσχοντες ἵκοισθε·
Odyssey 1.139	εἰ δέ κε σίνηαι, τότε τοι τεκμαίρομʼ ὄλεθρον,
Odyssey 1.140	νηί τε καὶ ἑτάροις· αὐτὸς δʼ εἴ πέρ κεν ἀλύξῃς,
Odyssey 1.141	ὀψὲ κακῶς νεῖαι, ὀλέσας ἄπο πάντας ἑταίρους.
Odyssey 1.142	ὣς ἔφατʼ, αὐτίκα δὲ χρυσόθρονος ἤλυθεν Ἠώς.
Odyssey 1.143	ἡ μὲν ἔπειτʼ ἀνὰ νῆσον ἀπέστιχε δῖα θεάων·
Odyssey 1.144	αὐτὰρ ἐγὼν ἐπὶ νῆα κιὼν ὤτρυνον ἑταίρους
Odyssey 1.145	αὐτούς τʼ ἀμβαίνειν ἀνά τε πρυμνήσια λῦσαι·
Odyssey 1.146	οἱ δʼ αἶψʼ εἴσβαινον καὶ ἐπὶ κληῖσι καθῖζον.
Odyssey 1.147	ἑξῆς δʼ ἑζόμενοι πολιὴν ἅλα τύπτον ἐρετμοῖς.
Odyssey 1.148	ἡμῖν δʼ αὖ κατόπισθε νεὸς κυανοπρῴροιο
Odyssey 1.149	ἴκμενον οὖρον ἵει πλησίστιον, ἐσθλὸν ἑταῖρον,
Odyssey 1.150	Κίρκη ἐυπλόκαμος, δεινὴ θεὸς αὐδήεσσα.
Odyssey 1.151	αὐτίκα δʼ ὅπλα ἕκαστα πονησάμενοι κατὰ νῆα
Odyssey 1.152	ἥμεθα· τὴν δʼ ἄνεμός τε κυβερνήτης τʼ ἴθυνε.
Odyssey 1.153	δὴ τότʼ ἐγὼν ἑτάροισι μετηύδων ἀχνύμενος κῆρ·
Odyssey 1.154	ὦ φίλοι, οὐ γὰρ χρὴ ἕνα ἴδμεναι οὐδὲ δύʼ οἴους
Odyssey 1.155	θέσφαθʼ ἅ μοι Κίρκη μυθήσατο, δῖα θεάων·
Odyssey 1.156	ἀλλʼ ἐρέω μὲν ἐγών, ἵνα εἰδότες ἤ κε θάνωμεν
Odyssey 1.157	ἤ κεν ἀλευάμενοι θάνατον καὶ κῆρα φύγοιμεν.
Odyssey 1.158	Σειρήνων μὲν πρῶτον ἀνώγει θεσπεσιάων
Odyssey 1.159	φθόγγον ἀλεύασθαι καὶ λειμῶνʼ ἀνθεμόεντα.
Odyssey 1.160	οἶον ἔμʼ ἠνώγει ὄπʼ ἀκουέμεν· ἀλλά με δεσμῷ
Odyssey 1.161	δήσατʼ ἐν ἀργαλέῳ, ὄφρʼ ἔμπεδον αὐτόθι μίμνω,
Odyssey 1.162	ὀρθὸν ἐν ἱστοπέδῃ, ἐκ δʼ αὐτοῦ πείρατʼ ἀνήφθω.
Odyssey 1.163	εἰ δέ κε λίσσωμαι ὑμέας λῦσαί τε κελεύω,
Odyssey 1.164	ὑμεῖς δὲ πλεόνεσσι τότʼ ἐν δεσμοῖσι πιέζειν.
Odyssey 1.165	ἦ τοι ἐγὼ τὰ ἕκαστα λέγων ἑτάροισι πίφαυσκον·
Odyssey 1.166	τόφρα δὲ καρπαλίμως ἐξίκετο νηῦς ἐυεργὴς
Odyssey 1.167	νῆσον Σειρήνοιιν· ἔπειγε γὰρ οὖρος ἀπήμων.
Odyssey 1.168	αὐτίκʼ ἔπειτʼ ἄνεμος μὲν ἐπαύσατο ἠδὲ γαλήνη
Odyssey 1.169	ἔπλετο νηνεμίη, κοίμησε δὲ κύματα δαίμων.
Odyssey 1.170	ἀνστάντες δʼ ἕταροι νεὸς ἱστία μηρύσαντο
Odyssey 1.171	καὶ τὰ μὲν ἐν νηὶ γλαφυρῇ θέσαν, οἱ δʼ ἐπʼ ἐρετμὰ
Odyssey 1.172	ἑζόμενοι λεύκαινον ὕδωρ ξεστῇς ἐλάτῃσιν.
Odyssey 1.173	αὐτὰρ ἐγὼ κηροῖο μέγαν τροχὸν ὀξέι χαλκῷ
Odyssey 1.174	τυτθὰ διατμήξας χερσὶ στιβαρῇσι πίεζον·
Odyssey 1.175	αἶψα δʼ ἰαίνετο κηρός, ἐπεὶ κέλετο μεγάλη ἲς
Odyssey 1.176	Ἠελίου τʼ αὐγὴ Ὑπεριονίδαο ἄνακτος·
Odyssey 1.177	ἑξείης δʼ ἑτάροισιν ἐπʼ οὔατα πᾶσιν ἄλειψα.
Odyssey 1.178	οἱ δʼ ἐν νηί μʼ ἔδησαν ὁμοῦ χεῖράς τε πόδας τε
Odyssey 1.179	ὀρθὸν ἐν ἱστοπέδῃ, ἐκ δʼ αὐτοῦ πείρατʼ ἀνῆπτον·
Odyssey 1.180	αὐτοὶ δʼ ἑζόμενοι πολιὴν ἅλα τύπτον ἐρετμοῖς.
Odyssey 1.181	ἀλλʼ ὅτε τόσσον ἀπῆμεν ὅσον τε γέγωνε βοήσας,
Odyssey 1.182	ῥίμφα διώκοντες, τὰς δʼ οὐ λάθεν ὠκύαλος νηῦς
Odyssey 1.183	ἐγγύθεν ὀρνυμένη, λιγυρὴν δʼ ἔντυνον ἀοιδήν·
Odyssey 1.184	δεῦρʼ ἄγʼ ἰών, πολύαινʼ Ὀδυσεῦ, μέγα κῦδος Ἀχαιῶν,
Odyssey 1.185	νῆα κατάστησον, ἵνα νωιτέρην ὄπ ἀκούσῃς.
Odyssey 1.186	οὐ γάρ πώ τις τῇδε παρήλασε νηὶ μελαίνῃ,
Odyssey 1.187	πρίν γʼ ἡμέων μελίγηρυν ἀπὸ στομάτων ὄπʼ ἀκοῦσαι,
Odyssey 1.188	ἀλλʼ ὅ γε τερψάμενος νεῖται καὶ πλείονα εἰδώς.
Odyssey 1.189	ἴδμεν γάρ τοι πάνθʼ ὅσʼ ἐνὶ Τροίῃ εὐρείῃ
Odyssey 1.190	Ἀργεῖοι Τρῶές τε θεῶν ἰότητι μόγησαν,
Odyssey 1.191	ἴδμεν δʼ, ὅσσα γένηται ἐπὶ χθονὶ πουλυβοτείρῃ.
Odyssey 1.192	ὣς φάσαν ἱεῖσαι ὄπα κάλλιμον· αὐτὰρ ἐμὸν κῆρ
Odyssey 1.193	ἤθελʼ ἀκουέμεναι, λῦσαί τʼ ἐκέλευον ἑταίρους
Odyssey 1.194	ὀφρύσι νευστάζων· οἱ δὲ προπεσόντες ἔρεσσον.
Odyssey 1.195	αὐτίκα δʼ ἀνστάντες Περιμήδης Εὐρύλοχός τε
Odyssey 1.196	πλείοσί μʼ ἐν δεσμοῖσι δέον μᾶλλόν τε πίεζον.
Odyssey 1.197	αὐτὰρ ἐπεὶ δὴ τάς γε παρήλασαν, οὐδʼ ἔτʼ ἔπειτα
Odyssey 1.198	φθογγῆς Σειρήνων ἠκούομεν οὐδέ τʼ ἀοιδῆς,
Odyssey 1.199	αἶψʼ ἀπὸ κηρὸν ἕλοντο ἐμοὶ ἐρίηρες ἑταῖροι,
Odyssey 1.200	ὅν σφιν ἐπʼ ὠσὶν ἄλειψʼ, ἐμέ τʼ ἐκ δεσμῶν ἀνέλυσαν.
Odyssey 1.201	ἀλλʼ ὅτε δὴ τὴν νῆσον ἐλείπομεν, αὐτίκʼ ἔπειτα
Odyssey 1.202	καπνὸν καὶ μέγα κῦμα ἴδον καὶ δοῦπον ἄκουσα.
Odyssey 1.203	τῶν δʼ ἄρα δεισάντων ἐκ χειρῶν ἔπτατʼ ἐρετμά,
Odyssey 1.204	βόμβησαν δʼ ἄρα πάντα κατὰ ῥόον· ἔσχετο δʼ αὐτοῦ
Odyssey 1.205	νηῦς, ἐπεὶ οὐκέτʼ ἐρετμὰ προήκεα χερσὶν ἔπειγον.
Odyssey 1.206	αὐτὰρ ἐγὼ διὰ νηὸς ἰὼν ὤτρυνον ἑταίρους
Odyssey 1.207	μειλιχίοις ἐπέεσσι παρασταδὸν ἄνδρα ἕκαστον·
Odyssey 1.208	ὦ φίλοι, οὐ γάρ πώ τι κακῶν ἀδαήμονές εἰμεν·
Odyssey 1.209	οὐ μὲν δὴ τόδε μεῖζον ἕπει κακόν, ἢ ὅτε Κύκλωψ
Odyssey 1.210	εἴλει ἐνὶ σπῆι γλαφυρῷ κρατερῆφι βίηφιν·
Odyssey 1.211	ἀλλὰ καὶ ἔνθεν ἐμῇ ἀρετῇ, βουλῇ τε νόῳ τε,
Odyssey 1.212	ἐκφύγομεν, καί που τῶνδε μνήσεσθαι ὀίω.
Odyssey 1.213	νῦν δʼ ἄγεθʼ, ὡς ἂν ἐγὼ εἴπω, πειθώμεθα πάντες.
Odyssey 1.214	ὑμεῖς μὲν κώπῃσιν ἁλὸς ῥηγμῖνα βαθεῖαν
Odyssey 1.215	τύπτετε κληίδεσσιν ἐφήμενοι, αἴ κέ ποθι Ζεὺς
Odyssey 1.216	δώῃ τόνδε γʼ ὄλεθρον ὑπεκφυγέειν καὶ ἀλύξαι·
Odyssey 1.217	σοὶ δέ, κυβερνῆθʼ, ὧδʼ ἐπιτέλλομαι· ἀλλʼ ἐνὶ θυμῷ
Odyssey 1.218	βάλλευ, ἐπεὶ νηὸς γλαφυρῆς οἰήια νωμᾷς.
Odyssey 1.219	τούτου μὲν καπνοῦ καὶ κύματος ἐκτὸς ἔεργε
Odyssey 1.220	νῆα, σὺ δὲ σκοπέλου ἐπιμαίεο, μή σε λάθῃσι
Odyssey 1.221	κεῖσʼ ἐξορμήσασα καὶ ἐς κακὸν ἄμμε βάλῃσθα.
Odyssey 1.222	ὣς ἐφάμην, οἱ δʼ ὦκα ἐμοῖς ἐπέεσσι πίθοντο.
Odyssey 1.223	Σκύλλην δʼ οὐκέτʼ ἐμυθεόμην, ἄπρηκτον ἀνίην,
Odyssey 1.224	μή πώς μοι δείσαντες ἀπολλήξειαν ἑταῖροι
Odyssey 1.225	εἰρεσίης, ἐντὸς δὲ πυκάζοιεν σφέας αὐτούς.
Odyssey 1.226	καὶ τότε δὴ Κίρκης μὲν ἐφημοσύνης ἀλεγεινῆς
Odyssey 1.227	λανθανόμην, ἐπεὶ οὔ τί μʼ ἀνώγει θωρήσσεσθαι·
Odyssey 1.228	αὐτὰρ ἐγὼ καταδὺς κλυτὰ τεύχεα καὶ δύο δοῦρε
Odyssey 1.229	μάκρʼ ἐν χερσὶν ἑλὼν εἰς ἴκρια νηὸς ἔβαινον
Odyssey 1.230	πρῴρης· ἔνθεν γάρ μιν ἐδέγμην πρῶτα φανεῖσθαι
Odyssey 1.231	Σκύλλην πετραίην, ἥ μοι φέρε πῆμʼ ἑτάροισιν.
Odyssey 1.232	οὐδέ πῃ ἀθρῆσαι δυνάμην, ἔκαμον δέ μοι ὄσσε
Odyssey 1.233	πάντῃ παπταίνοντι πρὸς ἠεροειδέα πέτρην.
Odyssey 1.234	ἡμεῖς μὲν στεινωπὸν ἀνεπλέομεν γοόωντες·
Odyssey 1.235	ἔνθεν μὲν Σκύλλη, ἑτέρωθι δὲ δῖα Χάρυβδις
Odyssey 1.236	δεινὸν ἀνερροίβδησε θαλάσσης ἁλμυρὸν ὕδωρ.
Odyssey 1.237	ἦ τοι ὅτʼ ἐξεμέσειε, λέβης ὣς ἐν πυρὶ πολλῷ
Odyssey 1.238	πᾶσʼ ἀναμορμύρεσκε κυκωμένη, ὑψόσε δʼ ἄχνη
Odyssey 1.239	ἄκροισι σκοπέλοισιν ἐπʼ ἀμφοτέροισιν ἔπιπτεν·
Odyssey 1.240	ἀλλʼ ὅτʼ ἀναβρόξειε θαλάσσης ἁλμυρὸν ὕδωρ,
Odyssey 1.241	πᾶσʼ ἔντοσθε φάνεσκε κυκωμένη, ἀμφὶ δὲ πέτρη
Odyssey 1.242	δεινὸν ἐβεβρύχει, ὑπένερθε δὲ γαῖα φάνεσκε
Odyssey 1.243	ψάμμῳ κυανέη· τοὺς δὲ χλωρὸν δέος ᾕρει.
Odyssey 1.244	ἡμεῖς μὲν πρὸς τὴν ἴδομεν δείσαντες ὄλεθρον·
Odyssey 1.245	τόφρα δέ μοι Σκύλλη γλαφυρῆς ἐκ νηὸς ἑταίρους
Odyssey 1.246	ἓξ ἕλεθʼ, οἳ χερσίν τε βίηφί τε φέρτατοι ἦσαν.
Odyssey 1.247	σκεψάμενος δʼ ἐς νῆα θοὴν ἅμα καὶ μεθʼ ἑταίρους
Odyssey 1.248	ἤδη τῶν ἐνόησα πόδας καὶ χεῖρας ὕπερθεν
Odyssey 1.249	ὑψόσʼ ἀειρομένων· ἐμὲ δὲ φθέγγοντο καλεῦντες
Odyssey 1.250	ἐξονομακλήδην, τότε γʼ ὕστατον, ἀχνύμενοι κῆρ.
Odyssey 1.251	ὡς δʼ ὅτʼ ἐπὶ προβόλῳ ἁλιεὺς περιμήκεϊ ῥάβδῳ
Odyssey 1.252	ἰχθύσι τοῖς ὀλίγοισι δόλον κατὰ εἴδατα βάλλων
Odyssey 1.253	ἐς πόντον προΐησι βοὸς κέρας ἀγραύλοιο,
Odyssey 1.254	ἀσπαίροντα δʼ ἔπειτα λαβὼν ἔρριψε θύραζε,
Odyssey 1.255	ὣς οἵ γʼ ἀσπαίροντες ἀείροντο προτὶ πέτρας·
Odyssey 1.256	αὐτοῦ δʼ εἰνὶ θύρῃσι κατήσθιε κεκληγῶτας
Odyssey 1.257	χεῖρας ἐμοὶ ὀρέγοντας ἐν αἰνῇ δηιοτῆτι·
Odyssey 1.258	οἴκτιστον δὴ κεῖνο ἐμοῖς ἴδον ὀφθαλμοῖσι
Odyssey 1.259	πάντων, ὅσσʼ ἐμόγησα πόρους ἁλὸς ἐξερεείνων.
Odyssey 1.260	αὐτὰρ ἐπεὶ πέτρας φύγομεν δεινήν τε Χάρυβδιν
Odyssey 1.261	Σκύλλην τʼ, αὐτίκʼ ἔπειτα θεοῦ ἐς ἀμύμονα νῆσον
Odyssey 1.262	ἱκόμεθʼ· ἔνθα δʼ ἔσαν καλαὶ βόες εὐρυμέτωποι,
Odyssey 1.263	πολλὰ δὲ ἴφια μῆλʼ Ὑπερίονος Ἠελίοιο.
Odyssey 1.264	δὴ τότʼ ἐγὼν ἔτι πόντῳ ἐὼν ἐν νηὶ μελαίνῃ
Odyssey 1.265	μυκηθμοῦ τʼ ἤκουσα βοῶν αὐλιζομενάων
Odyssey 1.266	οἰῶν τε βληχήν· καί μοι ἔπος ἔμπεσε θυμῷ
Odyssey 1.267	μάντηος ἀλαοῦ, Θηβαίου Τειρεσίαο,
Odyssey 1.268	Κίρκης τʼ Αἰαίης, ἥ μοι μάλα πόλλʼ ἐπέτελλε
Odyssey 1.269	νῆσον ἀλεύασθαι τερψιμβρότου Ἠελίοιο.
Odyssey 1.270	δὴ τότʼ ἐγὼν ἑτάροισι μετηύδων ἀχνύμενος κῆρ·
Odyssey 1.271	κέκλυτέ μευ μύθων κακά περ πάσχοντες ἑταῖροι,
Odyssey 1.272	ὄφρʼ ὑμῖν εἴπω μαντήια Τειρεσίαο
Odyssey 1.273	Κίρκης τʼ Αἰαίης, ἥ μοι μάλα πόλλʼ ἐπέτελλε
Odyssey 1.274	νῆσον ἀλεύασθαι τερψιμβρότου Ἠελίοιο·
Odyssey 1.275	ἔνθα γὰρ αἰνότατον κακὸν ἔμμεναι ἄμμιν ἔφασκεν.
Odyssey 1.276	ἀλλὰ παρὲξ τὴν νῆσον ἐλαύνετε νῆα μέλαιναν.
Odyssey 1.277	ὣς ἐφάμην, τοῖσιν δὲ κατεκλάσθη φίλον ἦτορ.
Odyssey 1.278	αὐτίκα δʼ Εὐρύλοχος στυγερῷ μʼ ἠμείβετο μύθῳ·
Odyssey 1.279	σχέτλιός εἰς, Ὀδυσεῦ· περί τοι μένος, οὐδέ τι γυῖα
Odyssey 1.280	κάμνεις· ἦ ῥά νυ σοί γε σιδήρεα πάντα τέτυκται,
Odyssey 1.281	ὅς ῥʼ ἑτάρους καμάτῳ ἁδηκότας ἠδὲ καὶ ὕπνῳ
Odyssey 1.282	οὐκ ἐάᾳς γαίης ἐπιβήμεναι, ἔνθα κεν αὖτε
Odyssey 1.283	νήσῳ ἐν ἀμφιρύτῃ λαρὸν τετυκοίμεθα δόρπον,
Odyssey 1.284	ἀλλʼ αὔτως διὰ νύκτα θοὴν ἀλάλησθαι ἄνωγας
Odyssey 1.285	νήσου ἀποπλαγχθέντας ἐν ἠεροειδέι πόντῳ.
Odyssey 1.286	ἐκ νυκτῶν δʼ ἄνεμοι χαλεποί, δηλήματα νηῶν,
Odyssey 1.287	γίγνονται· πῇ κέν τις ὑπεκφύγοι αἰπὺν ὄλεθρον,
Odyssey 1.288	ἤν πως ἐξαπίνης ἔλθῃ ἀνέμοιο θύελλα,
Odyssey 1.289	ἢ Νότου ἢ Ζεφύροιο δυσαέος, οἵ τε μάλιστα
Odyssey 1.290	νῆα διαρραίουσι θεῶν ἀέκητι ἀνάκτων.
Odyssey 1.291	ἀλλʼ ἦ τοι νῦν μὲν πειθώμεθα νυκτὶ μελαίνῃ
Odyssey 1.292	δόρπον θʼ ὁπλισόμεσθα θοῇ παρὰ νηὶ μένοντες,
Odyssey 1.293	ἠῶθεν δʼ ἀναβάντες ἐνήσομεν εὐρέι πόντῳ.
Odyssey 1.294	ὣς ἔφατʼ Εὐρύλοχος, ἐπὶ δʼ ᾔνεον ἄλλοι ἑταῖροι.
Odyssey 1.295	καὶ τότε δὴ γίγνωσκον ὃ δὴ κακὰ μήδετο δαίμων,
Odyssey 1.296	καί μιν φωνήσας ἔπεα πτερόεντα προσηύδων·
Odyssey 1.297	Εὐρύλοχʼ, ἦ μάλα δή με βιάζετε μοῦνον ἐόντα.
Odyssey 1.298	ἀλλʼ ἄγε νῦν μοι πάντες ὀμόσσατε καρτερὸν ὅρκον·
Odyssey 1.299	εἴ κέ τινʼ ἠὲ βοῶν ἀγέλην ἢ πῶυ μέγʼ οἰῶν
Odyssey 1.300	εὕρωμεν, μή πού τις ἀτασθαλίῃσι κακῇσιν
Odyssey 1.301	ἢ βοῦν ἠέ τι μῆλον ἀποκτάνῃ· ἀλλὰ ἕκηλοι
Odyssey 1.302	ἐσθίετε βρώμην, τὴν ἀθανάτη πόρε Κίρκη.
Odyssey 1.303	ὣς ἐφάμην, οἱ δʼ αὐτίκʼ ἀπώμνυον, ὡς ἐκέλευον.
Odyssey 1.304	αὐτὰρ ἐπεί ῥʼ ὄμοσάν τε τελεύτησάν τε τὸν ὅρκον,
Odyssey 1.305	στήσαμεν ἐν λιμένι γλαφυρῷ ἐυεργέα νῆα
Odyssey 1.306	ἄγχʼ ὕδατος γλυκεροῖο, καὶ ἐξαπέβησαν ἑταῖροι
Odyssey 1.307	νηός, ἔπειτα δὲ δόρπον ἐπισταμένως τετύκοντο.
Odyssey 1.308	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.309	μνησάμενοι δὴ ἔπειτα φίλους ἔκλαιον ἑταίρους,
Odyssey 1.310	οὓς ἔφαγε Σκύλλη γλαφυρῆς ἐκ νηὸς ἑλοῦσα·
Odyssey 1.311	κλαιόντεσσι δὲ τοῖσιν ἐπήλυθε νήδυμος ὕπνος.
Odyssey 1.312	ἦμος δὲ τρίχα νυκτὸς ἔην, μετὰ δʼ ἄστρα βεβήκει,
Odyssey 1.313	ὦρσεν ἔπι ζαῆν ἄνεμον νεφεληγερέτα Ζεὺς
Odyssey 1.314	λαίλαπι θεσπεσίῃ, σὺν δὲ νεφέεσσι κάλυψε
Odyssey 1.315	γαῖαν ὁμοῦ καὶ πόντον· ὀρώρει δʼ οὐρανόθεν νύξ.
Odyssey 1.316	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.317	νῆα μὲν ὡρμίσαμεν κοῖλον σπέος εἰσερύσαντες.
Odyssey 1.318	ἔνθα δʼ ἔσαν νυμφέων καλοὶ χοροὶ ἠδὲ θόωκοι·
Odyssey 1.319	καὶ τότʼ ἐγὼν ἀγορὴν θέμενος μετὰ μῦθον ἔειπον·
Odyssey 1.320	ὦ φίλοι, ἐν γὰρ νηὶ θοῇ βρῶσίς τε πόσις τε
Odyssey 1.321	ἔστιν, τῶν δὲ βοῶν ἀπεχώμεθα, μή τι πάθωμεν·
Odyssey 1.322	δεινοῦ γὰρ θεοῦ αἵδε βόες καὶ ἴφια μῆλα,
Odyssey 1.323	Ἠελίου, ὃς πάντʼ ἐφορᾷ καὶ πάντʼ ἐπακούει.
Odyssey 1.324	ὣς ἐφάμην, τοῖσιν δʼ ἐπεπείθετο θυμὸς ἀγήνωρ.
Odyssey 1.325	μῆνα δὲ πάντʼ ἄλληκτος ἄη Νότος, οὐδέ τις ἄλλος
Odyssey 1.326	γίγνετʼ ἔπειτʼ ἀνέμων εἰ μὴ Εὖρός τε Νότος τε.
Odyssey 1.327	οἱ δʼ ἧος μὲν σῖτον ἔχον καὶ οἶνον ἐρυθρόν,
Odyssey 1.328	τόφρα βοῶν ἀπέχοντο λιλαιόμενοι βιότοιο.
Odyssey 1.329	ἀλλʼ ὅτε δὴ νηὸς ἐξέφθιτο ἤια πάντα,
Odyssey 1.330	καὶ δὴ ἄγρην ἐφέπεσκον ἀλητεύοντες ἀνάγκῃ,
Odyssey 1.331	ἰχθῦς ὄρνιθάς τε, φίλας ὅ τι χεῖρας ἵκοιτο,
Odyssey 1.332	γναμπτοῖς ἀγκίστροισιν, ἔτειρε δὲ γαστέρα λιμός·
Odyssey 1.333	δὴ τότʼ ἐγὼν ἀνὰ νῆσον ἀπέστιχον, ὄφρα θεοῖσιν
Odyssey 1.334	εὐξαίμην, εἴ τίς μοι ὁδὸν φήνειε νέεσθαι.
Odyssey 1.335	ἀλλʼ ὅτε δὴ διὰ νήσου ἰὼν ἤλυξα ἑταίρους,
Odyssey 1.336	χεῖρας νιψάμενος, ὅθʼ ἐπὶ σκέπας ἦν ἀνέμοιο,
Odyssey 1.337	ἠρώμην πάντεσσι θεοῖς οἳ Ὄλυμπον ἔχουσιν·
Odyssey 1.338	οἱ δʼ ἄρα μοι γλυκὺν ὕπνον ἐπὶ βλεφάροισιν ἔχευαν.
Odyssey 1.339	Εὐρύλοχος δʼ ἑτάροισι κακῆς ἐξήρχετο βουλῆς·
Odyssey 1.340	κέκλυτέ μευ μύθων κακά περ πάσχοντες ἑταῖροι.
Odyssey 1.341	πάντες μὲν στυγεροὶ θάνατοι δειλοῖσι βροτοῖσι,
Odyssey 1.342	λιμῷ δʼ οἴκτιστον θανέειν καὶ πότμον ἐπισπεῖν.
Odyssey 1.343	ἀλλʼ ἄγετʼ, Ἠελίοιο βοῶν ἐλάσαντες ἀρίστας
Odyssey 1.344	ῥέξομεν ἀθανάτοισι, τοὶ οὐρανὸν εὐρὺν ἔχουσιν.
Odyssey 1.345	εἰ δέ κεν εἰς Ἰθάκην ἀφικοίμεθα, πατρίδα γαῖαν,
Odyssey 1.346	αἶψά κεν Ἠελίῳ Ὑπερίονι πίονα νηὸν
Odyssey 1.347	τεύξομεν, ἐν δέ κε θεῖμεν ἀγάλματα πολλὰ καὶ ἐσθλά.
Odyssey 1.348	εἰ δὲ χολωσάμενός τι βοῶν ὀρθοκραιράων
Odyssey 1.349	νῆʼ ἐθέλῃ ὀλέσαι, ἐπὶ δʼ ἕσπωνται θεοὶ ἄλλοι,
Odyssey 1.350	βούλομʼ ἅπαξ πρὸς κῦμα χανὼν ἀπὸ θυμὸν ὀλέσσαι,
Odyssey 1.351	ἢ δηθὰ στρεύγεσθαι ἐὼν ἐν νήσῳ ἐρήμῃ.
Odyssey 1.352	ὣς ἔφατʼ Εὐρύλοχος, ἐπὶ δʼ ᾔνεον ἄλλοι ἑταῖροι.
Odyssey 1.353	αὐτίκα δʼ Ἠελίοιο βοῶν ἐλάσαντες ἀρίστας
Odyssey 1.354	ἐγγύθεν, οὐ γὰρ τῆλε νεὸς κυανοπρῴροιο
Odyssey 1.355	βοσκέσκονθʼ ἕλικες καλαὶ βόες εὐρυμέτωποι·
Odyssey 1.356	τὰς δὲ περίστησάν τε καὶ εὐχετόωντο θεοῖσιν,
Odyssey 1.357	φύλλα δρεψάμενοι τέρενα δρυὸς ὑψικόμοιο·
Odyssey 1.358	οὐ γὰρ ἔχον κρῖ λευκὸν ἐυσσέλμου ἐπὶ νηός.
Odyssey 1.359	αὐτὰρ ἐπεί ῥʼ εὔξαντο καὶ ἔσφαξαν καὶ ἔδειραν,
Odyssey 1.360	μηρούς τʼ ἐξέταμον κατά τε κνίσῃ ἐκάλυψαν
Odyssey 1.361	δίπτυχα ποιήσαντες, ἐπʼ αὐτῶν δʼ ὠμοθέτησαν.
Odyssey 1.362	οὐδʼ εἶχον μέθυ λεῖψαι ἐπʼ αἰθομένοις ἱεροῖσιν,
Odyssey 1.363	ἀλλʼ ὕδατι σπένδοντες ἐπώπτων ἔγκατα πάντα.
Odyssey 1.364	αὐτὰρ ἐπεὶ κατὰ μῆρʼ ἐκάη καὶ σπλάγχνα πάσαντο,
Odyssey 1.365	μίστυλλόν τʼ ἄρα τἆλλα καὶ ἀμφʼ ὀβελοῖσιν ἔπειραν.
Odyssey 1.366	καὶ τότε μοι βλεφάρων ἐξέσσυτο νήδυμος ὕπνος,
Odyssey 1.367	βῆν δʼ ἰέναι ἐπὶ νῆα θοὴν καὶ θῖνα θαλάσσης.
Odyssey 1.368	ἀλλʼ ὅτε δὴ σχεδὸν ἦα κιὼν νεὸς ἀμφιελίσσης,
Odyssey 1.369	καὶ τότε με κνίσης ἀμφήλυθεν ἡδὺς ἀυτμή.
Odyssey 1.370	οἰμώξας δὲ θεοῖσι μέγʼ ἀθανάτοισι γεγώνευν·
Odyssey 1.371	Ζεῦ πάτερ ἠδʼ ἄλλοι μάκαρες θεοὶ αἰὲν ἐόντες,
Odyssey 1.372	ἦ με μάλʼ εἰς ἄτην κοιμήσατε νηλέι ὕπνῳ.
Odyssey 1.373	οἱ δʼ ἕταροι μέγα ἔργον ἐμητίσαντο μένοντες.
Odyssey 1.374	ὠκέα δʼ Ἠελίῳ Ὑπερίονι ἄγγελος ἦλθε
Odyssey 1.375	Λαμπετίη τανύπεπλος, ὅ οἱ βόας ἔκταμεν ἡμεῖς.
Odyssey 1.376	αὐτίκα δʼ ἀθανάτοισι μετηύδα χωόμενος κῆρ·
Odyssey 1.377	Ζεῦ πάτερ ἠδʼ ἄλλοι μάκαρες θεοὶ αἰὲν ἐόντες,
Odyssey 1.378	τῖσαι δὴ ἑτάρους Λαερτιάδεω Ὀδυσῆος,
Odyssey 1.379	οἵ μευ βοῦς ἔκτειναν ὑπέρβιον, ᾗσιν ἐγώ γε
Odyssey 1.380	χαίρεσκον μὲν ἰὼν εἰς οὐρανὸν ἀστερόεντα,
Odyssey 1.381	ἠδʼ ὁπότʼ ἂψ ἐπὶ γαῖαν ἀπʼ οὐρανόθεν προτραποίμην.
Odyssey 1.382	εἰ δέ μοι οὐ τίσουσι βοῶν ἐπιεικέʼ ἀμοιβήν,
Odyssey 1.383	δύσομαι εἰς Ἀίδαο καὶ ἐν νεκύεσσι φαείνω.
Odyssey 1.384	τὸν δʼ ἀπαμειβόμενος προσέφη νεφεληγερέτα Ζεύς·
Odyssey 1.385	Ἠέλιʼ, ἦ τοι μὲν σὺ μετʼ ἀθανάτοισι φάεινε
Odyssey 1.386	καὶ θνητοῖσι βροτοῖσιν ἐπὶ ζείδωρον ἄρουραν·
Odyssey 1.387	τῶν δέ κʼ ἐγὼ τάχα νῆα θοὴν ἀργῆτι κεραυνῷ
Odyssey 1.388	τυτθὰ βαλὼν κεάσαιμι μέσῳ ἐνὶ οἴνοπι πόντῳ.
Odyssey 1.389	ταῦτα δʼ ἐγὼν ἤκουσα Καλυψοῦς ἠυκόμοιο·
Odyssey 1.390	ἡ δʼ ἔφη Ἑρμείαο διακτόρου αὐτὴ ἀκοῦσαι.
Odyssey 1.391	αὐτὰρ ἐπεί ῥʼ ἐπὶ νῆα κατήλυθον ἠδὲ θάλασσαν,
Odyssey 1.392	νείκεον ἄλλοθεν ἄλλον ἐπισταδόν, οὐδέ τι μῆχος
Odyssey 1.393	εὑρέμεναι δυνάμεσθα, βόες δʼ ἀποτέθνασαν ἤδη.
Odyssey 1.394	τοῖσιν δʼ αὐτίκʼ ἔπειτα θεοὶ τέραα προύφαινον·
Odyssey 1.395	εἷρπον μὲν ῥινοί, κρέα δʼ ἀμφʼ ὀβελοῖσι μεμύκει,
Odyssey 1.396	ὀπταλέα τε καὶ ὠμά, βοῶν δʼ ὣς γίγνετο φωνή.
Odyssey 1.397	ἑξῆμαρ μὲν ἔπειτα ἐμοὶ ἐρίηρες ἑταῖροι
Odyssey 1.398	δαίνυντʼ Ἠελίοιο βοῶν ἐλάσαντες ἀρίστας·
Odyssey 1.399	ἀλλʼ ὅτε δὴ ἕβδομον ἦμαρ ἐπὶ Ζεὺς θῆκε Κρονίων,
Odyssey 1.400	καὶ τότʼ ἔπειτʼ ἄνεμος μὲν ἐπαύσατο λαίλαπι θύων,
Odyssey 1.401	ἡμεῖς δʼ αἶψʼ ἀναβάντες ἐνήκαμεν εὐρέι πόντῳ,
Odyssey 1.402	ἱστὸν στησάμενοι ἀνά θʼ ἱστία λεύκʼ ἐρύσαντες.
Odyssey 1.403	ἀλλʼ ὅτε δὴ τὴν νῆσον ἐλείπομεν, οὐδέ τις ἄλλη
Odyssey 1.404	φαίνετο γαιάων, ἀλλʼ οὐρανὸς ἠδὲ θάλασσα,
Odyssey 1.405	δὴ τότε κυανέην νεφέλην ἔστησε Κρονίων
Odyssey 1.406	νηὸς ὕπερ γλαφυρῆς, ἤχλυσε δὲ πόντος ὑπʼ αὐτῆς.
Odyssey 1.407	ἡ δʼ ἔθει οὐ μάλα πολλὸν ἐπὶ χρόνον· αἶψα γὰρ ἦλθε
Odyssey 1.408	κεκληγὼς Ζέφυρος μεγάλῃ σὺν λαίλαπι θύων,
Odyssey 1.409	ἱστοῦ δὲ προτόνους ἔρρηξʼ ἀνέμοιο θύελλα
Odyssey 1.410	ἀμφοτέρους· ἱστὸς δʼ ὀπίσω πέσεν, ὅπλα τε πάντα
Odyssey 1.411	εἰς ἄντλον κατέχυνθʼ. ὁ δʼ ἄρα πρυμνῇ ἐνὶ νηὶ
Odyssey 1.412	πλῆξε κυβερνήτεω κεφαλήν, σὺν δʼ ὀστέʼ ἄραξε
Odyssey 1.413	πάντʼ ἄμυδις κεφαλῆς· ὁ δʼ ἄρʼ ἀρνευτῆρι ἐοικὼς
Odyssey 1.414	κάππεσʼ ἀπʼ ἰκριόφιν, λίπε δʼ ὀστέα θυμὸς ἀγήνωρ.
Odyssey 1.415	Ζεὺς δʼ ἄμυδις βρόντησε καὶ ἔμβαλε νηὶ κεραυνόν·
Odyssey 1.416	ἡ δʼ ἐλελίχθη πᾶσα Διὸς πληγεῖσα κεραυνῷ,
Odyssey 1.417	ἐν δὲ θεείου πλῆτο, πέσον δʼ ἐκ νηὸς ἑταῖροι.
Odyssey 1.418	οἱ δὲ κορώνῃσιν ἴκελοι περὶ νῆα μέλαιναν
Odyssey 1.419	κύμασιν ἐμφορέοντο, θεὸς δʼ ἀποαίνυτο νόστον.
Odyssey 1.420	αὐτὰρ ἐγὼ διὰ νηὸς ἐφοίτων, ὄφρʼ ἀπὸ τοίχους
Odyssey 1.421	λῦσε κλύδων τρόπιος, τὴν δὲ ψιλὴν φέρε κῦμα,
Odyssey 1.422	ἐκ δέ οἱ ἱστὸν ἄραξε ποτὶ τρόπιν. αὐτὰρ ἐπʼ αὐτῷ
Odyssey 1.423	ἐπίτονος βέβλητο, βοὸς ῥινοῖο τετευχώς·
Odyssey 1.424	τῷ ῥʼ ἄμφω συνέεργον, ὁμοῦ τρόπιν ἠδὲ καὶ ἱστόν,
Odyssey 1.425	ἑζόμενος δʼ ἐπὶ τοῖς φερόμην ὀλοοῖς ἀνέμοισιν.
Odyssey 1.426	ἔνθʼ ἦ τοι Ζέφυρος μὲν ἐπαύσατο λαίλαπι θύων,
Odyssey 1.427	ἦλθε δʼ ἐπὶ Νότος ὦκα, φέρων ἐμῷ ἄλγεα θυμῷ,
Odyssey 1.428	ὄφρʼ ἔτι τὴν ὀλοὴν ἀναμετρήσαιμι Χάρυβδιν.
Odyssey 1.429	παννύχιος φερόμην, ἅμα δʼ ἠελίῳ ἀνιόντι
Odyssey 1.430	ἦλθον ἐπὶ Σκύλλης σκόπελον δεινήν τε Χάρυβδιν.
Odyssey 1.431	ἡ μὲν ἀνερροίβδησε θαλάσσης ἁλμυρὸν ὕδωρ·
Odyssey 1.432	αὐτὰρ ἐγὼ ποτὶ μακρὸν ἐρινεὸν ὑψόσʼ ἀερθείς,
Odyssey 1.433	τῷ προσφὺς ἐχόμην ὡς νυκτερίς. οὐδέ πῃ εἶχον
Odyssey 1.434	οὔτε στηρίξαι ποσὶν ἔμπεδον οὔτʼ ἐπιβῆναι·
Odyssey 1.435	ῥίζαι γὰρ ἑκὰς εἶχον, ἀπήωροι δʼ ἔσαν ὄζοι,
Odyssey 1.436	μακροί τε μεγάλοι τε, κατεσκίαον δὲ Χάρυβδιν.
Odyssey 1.437	νωλεμέως δʼ ἐχόμην, ὄφρʼ ἐξεμέσειεν ὀπίσσω
Odyssey 1.438	ἱστὸν καὶ τρόπιν αὖτις· ἐελδομένῳ δέ μοι ἦλθον
Odyssey 1.439	ὄψʼ· ἦμος δʼ ἐπὶ δόρπον ἀνὴρ ἀγορῆθεν ἀνέστη
Odyssey 1.440	κρίνων νείκεα πολλὰ δικαζομένων αἰζηῶν,
Odyssey 1.441	τῆμος δὴ τά γε δοῦρα Χαρύβδιος ἐξεφαάνθη.
Odyssey 1.442	ἧκα δʼ ἐγὼ καθύπερθε πόδας καὶ χεῖρε φέρεσθαι,
Odyssey 1.443	μέσσῳ δʼ ἐνδούπησα παρὲξ περιμήκεα δοῦρα,
Odyssey 1.444	ἑζόμενος δʼ ἐπὶ τοῖσι διήρεσα χερσὶν ἐμῇσι.
Odyssey 1.445	Σκύλλην δʼ οὐκέτʼ ἔασε πατὴρ ἀνδρῶν τε θεῶν τε
Odyssey 1.446	εἰσιδέειν· οὐ γάρ κεν ὑπέκφυγον αἰπὺν ὄλεθρον.
Odyssey 1.447	ἔνθεν δʼ ἐννῆμαρ φερόμην, δεκάτῃ δέ με νυκτὶ
Odyssey 1.448	νῆσον ἐς Ὠγυγίην πέλασαν θεοί, ἔνθα Καλυψὼ
Odyssey 1.449	ναίει ἐυπλόκαμος, δεινὴ θεὸς αὐδήεσσα,
Odyssey 1.450	ἥ μʼ ἐφίλει τʼ ἐκόμει τε. τί τοι τάδε μυθολογεύω;
Odyssey 1.451	ἤδη γάρ τοι χθιζὸς ἐμυθεόμην ἐνὶ οἴκῳ
Odyssey 1.452	σοί τε καὶ ἰφθίμῃ ἀλόχῳ· ἐχθρὸν δέ μοί ἐστιν
Odyssey 1.453	αὖτις ἀριζήλως εἰρημένα μυθολογεύειν.
Odyssey 1.1	ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ,
Odyssey 1.2	κηληθμῷ δʼ ἔσχοντο κατὰ μέγαρα σκιόεντα.
Odyssey 1.3	τὸν δʼ αὖτʼ Ἀλκίνοος ἀπαμείβετο φώνησέν τε·
Odyssey 1.4	ὦ Ὀδυσεῦ, ἐπεὶ ἵκευ ἐμὸν ποτὶ χαλκοβατὲς δῶ,
Odyssey 1.5	ὑψερεφές, τῷ σʼ οὔ τι παλιμπλαγχθέντα γʼ ὀΐω
Odyssey 1.6	ἂψ ἀπονοστήσειν, εἰ καὶ μάλα πολλὰ πέπονθας.
Odyssey 1.7	ὑμέων δʼ ἀνδρὶ ἑκάστῳ ἐφιέμενος τάδε εἴρω,
Odyssey 1.8	ὅσσοι ἐνὶ μεγάροισι γερούσιον αἴθοπα οἶνον
Odyssey 1.9	αἰεὶ πίνετʼ ἐμοῖσιν, ἀκουάζεσθε δʼ ἀοιδοῦ.
Odyssey 1.10	εἵματα μὲν δὴ ξείνῳ ἐϋξέστῃ ἐνὶ χηλῷ
Odyssey 1.11	κεῖται καὶ χρυσὸς πολυδαίδαλος ἄλλα τε πάντα
Odyssey 1.12	δῶρʼ, ὅσα Φαιήκων βουληφόροι ἐνθάδʼ ἔνεικαν·
Odyssey 1.13	ἀλλʼ ἄγε οἱ δῶμεν τρίποδα μέγαν ἠδὲ λέβητα
Odyssey 1.14	ἀνδρακάς· ἡμεῖς δʼ αὖτε ἀγειρόμενοι κατὰ δῆμον
Odyssey 1.15	τισόμεθʼ· ἀργαλέον γὰρ ἕνα προικὸς χαρίσασθαι.
Odyssey 1.16	ὣς ἔφατʼ Ἀλκίνοος, τοῖσιν δʼ ἐπιήνδανε μῦθος.
Odyssey 1.17	οἱ μὲν κακκείοντες ἔβαν οἶκόνδε ἕκαστος,
Odyssey 1.18	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.19	νῆάδʼ ἐπεσσεύοντο, φέρον δʼ εὐήνορα χαλκόν.
Odyssey 1.20	καὶ τὰ μὲν εὖ κατέθηχʼ ἱερὸν μένος Ἀλκινόοιο,
Odyssey 1.21	αὐτὸς ἰὼν διὰ νηὸς ὑπὸ ζυγά, μή τινʼ ἑταίρων
Odyssey 1.22	βλάπτοι ἐλαυνόντων, ὁπότε σπερχοίατʼ ἐρετμοῖς.
Odyssey 1.23	οἱ δʼ εἰς Ἀλκινόοιο κίον καὶ δαῖτʼ ἀλέγυνον.
Odyssey 1.24	τοῖσι δὲ βοῦν ἱέρευσʼ ἱερὸν μένος Ἀλκινόοιο
Odyssey 1.25	Ζηνὶ κελαινεφέϊ Κρονίδῃ, ὃς πᾶσιν ἀνάσσει.
Odyssey 1.26	μῆρα δὲ κήαντες δαίνυντʼ ἐρικυδέα δαῖτα
Odyssey 1.27	τερπόμενοι· μετὰ δέ σφιν ἐμέλπετο θεῖος ἀοιδός,
Odyssey 1.28	Δημόδοκος, λαοῖσι τετιμένος. αὐτὰρ Ὀδυσσεὺς
Odyssey 1.29	πολλὰ πρὸς ἠέλιον κεφαλὴν τρέπε παμφανόωντα,
Odyssey 1.30	δῦναι ἐπειγόμενος· δὴ γὰρ μενέαινε νέεσθαι.
Odyssey 1.31	ὡς δʼ ὅτʼ ἀνὴρ δόρποιο λιλαίεται, ᾧ τε πανῆμαρ
Odyssey 1.32	νειὸν ἀνʼ ἕλκητον βόε οἴνοπε πηκτὸν ἄροτρον·
Odyssey 1.33	ἀσπασίως δʼ ἄρα τῷ κατέδυ φάος ἠελίοιο
Odyssey 1.34	δόρπον ἐποίχεσθαι, βλάβεται δέ τε γούνατʼ ἰόντι·
Odyssey 1.35	ὣς Ὀδυσῆʼ ἀσπαστὸν ἔδυ φάος ἠελίοιο.
Odyssey 1.36	αἶψα δὲ Φαιήκεσσι φιληρέτμοισι μετηύδα,
Odyssey 1.37	Ἀλκινόῳ δὲ μάλιστα πιφαυσκόμενος φάτο μῦθον·
Odyssey 1.38	Ἀλκίνοε κρεῖον, πάντων ἀριδείκετε λαῶν,
Odyssey 1.39	πέμπετέ με σπείσαντες ἀπήμονα, χαίρετε δʼ αὐτοί·
Odyssey 1.40	ἤδη γὰρ τετέλεσται ἅ μοι φίλος ἤθελε θυμός,
Odyssey 1.41	πομπὴ καὶ φίλα δῶρα, τά μοι θεοὶ Οὐρανίωνες
Odyssey 1.42	ὄλβια ποιήσειαν· ἀμύμονα δʼ οἴκοι ἄκοιτιν
Odyssey 1.43	νοστήσας εὕροιμι σὺν ἀρτεμέεσσι φίλοισιν.
Odyssey 1.44	ὑμεῖς δʼ αὖθι μένοντες ἐϋφραίνοιτε γυναῖκας
Odyssey 1.45	κουριδίας καὶ τέκνα· θεοὶ δʼ ἀρετὴν ὀπάσειαν
Odyssey 1.46	παντοίην, καὶ μή τι κακὸν μεταδήμιον εἴη.
Odyssey 1.47	ὣς ἔφαθʼ, οἱ δʼ ἄρα πάντες ἐπῄνεον ἠδʼ ἐκέλευον
Odyssey 1.48	πεμπέμεναι τὸν ξεῖνον, ἐπεὶ κατὰ μοῖραν ἔειπεν.
Odyssey 1.49	καὶ τότε κήρυκα προσέφη μένος Ἀλκινόοιο·
Odyssey 1.50	Ποντόνοε, κρητῆρα κερασσάμενος μέθυ νεῖμον
Odyssey 1.51	πᾶσιν ἀνὰ μέγαρον, ὄφρʼ εὐξάμενοι Διὶ πατρὶ
Odyssey 1.52	τὸν ξεῖνον πέμπωμεν ἑὴν ἐς πατρίδα γαῖαν.
Odyssey 1.53	ὣς φάτο, Ποντόνοος δὲ μελίφρονα οἶνον ἐκίρνα,
Odyssey 1.54	νώμησεν δʼ ἄρα πᾶσιν ἐπισταδόν· οἱ δὲ θεοῖσιν
Odyssey 1.55	ἔσπεισαν μακάρεσσι, τοὶ οὐρανὸν εὐρὺν ἔχουσιν,
Odyssey 1.56	αὐτόθεν ἐξ ἑδρέων. ἀνὰ δʼ ἵστατο δῖος Ὀδυσσεύς,
Odyssey 1.57	Ἀρήτῃ δʼ ἐν χειρὶ τίθει δέπας ἀμφικύπελλον,
Odyssey 1.58	καί μιν φωνήσας ἔπεα πτερόεντα προσηύδα·
Odyssey 1.59	χαῖρέ μοι, ὦ βασίλεια, διαμπερές, εἰς ὅ κε γῆρας
Odyssey 1.60	ἔλθῃ καὶ θάνατος, τά τʼ ἐπʼ ἀνθρώποισι πέλονται.
Odyssey 1.61	αὐτὰρ ἐγὼ νέομαι· σὺ δὲ τέρπεο τῷδʼ ἐνὶ οἴκῳ
Odyssey 1.62	παισί τε καὶ λαοῖσι καὶ Ἀλκινόῳ βασιλῆϊ.
Odyssey 1.63	ὣς εἰπὼν ὑπὲρ οὐδὸν ἐβήσετο δῖος Ὀδυσσεύς,
Odyssey 1.64	τῷ δʼ ἅμα κήρυκα προΐει μένος Ἀλκινόοιο,
Odyssey 1.65	ἡγεῖσθαι ἐπὶ νῆα θοὴν καὶ θῖνα θαλάσσης·
Odyssey 1.66	Ἀρήτη δʼ ἄρα οἱ δμῳὰς ἅμʼ ἔπεμπε γυναῖκας,
Odyssey 1.67	τὴν μὲν φᾶρος ἔχουσαν ἐϋπλυνὲς ἠδὲ χιτῶνα,
Odyssey 1.68	τὴν δʼ ἑτέρην χηλὸν πυκινὴν ἅμʼ ὄπασσε κομίζειν·
Odyssey 1.69	ἡ δʼ ἄλλη σῖτόν τʼ ἔφερεν καὶ οἶνον ἐρυθρόν.
Odyssey 1.70	αὐτὰρ ἐπεί ῥʼ ἐπὶ νῆα κατήλυθον ἠδὲ θάλασσαν,
Odyssey 1.71	αἶψα τά γʼ ἐν νηῒ γλαφυρῇ πομπῆες ἀγαυοὶ
Odyssey 1.72	δεξάμενοι κατέθεντο, πόσιν καὶ βρῶσιν ἅπασαν·
Odyssey 1.73	κὰδ δʼ ἄρʼ Ὀδυσσῆϊ στόρεσαν ῥῆγός τε λίνον τε
Odyssey 1.74	νηὸς ἐπʼ ἰκριόφιν γλαφυρῆς, ἵνα νήγρετον εὕδοι,
Odyssey 1.75	πρυμνῆς· ἂν δὲ καὶ αὐτὸς ἐβήσετο καὶ κατέλεκτο
Odyssey 1.76	σιγῇ· τοὶ δὲ καθῖζον ἐπὶ κληῗσιν ἕκαστοι
Odyssey 1.77	κόσμῳ, πεῖσμα δʼ ἔλυσαν ἀπὸ τρητοῖο λίθοιο.
Odyssey 1.78	εὖθʼ οἱ ἀνακλινθέντες ἀνερρίπτουν ἅλα πηδῷ,
Odyssey 1.79	καὶ τῷ νήδυμος ὕπνος ἐπὶ βλεφάροισιν ἔπιπτε,
Odyssey 1.80	νήγρετος, ἥδιστος, θανάτῳ ἄγχιστα ἐοικώς.
Odyssey 1.81	ἡ δʼ, ὥς τʼ ἐν πεδίῳ τετράοροι ἄρσενες ἵπποι,
Odyssey 1.82	πάντες ἅμʼ ὁρμηθέντες ὑπὸ πληγῇσιν ἱμάσθλης,
Odyssey 1.83	ὑψόσʼ ἀειρόμενοι ῥίμφα πρήσσουσι κέλευθον,
Odyssey 1.84	ὣς ἄρα τῆς πρύμνη μὲν ἀείρετο, κῦμα δʼ ὄπισθε
Odyssey 1.85	πορφύρεον μέγα θῦε πολυφλοίσβοιο θαλάσσης.
Odyssey 1.86	ἡ δὲ μάλʼ ἀσφαλέως θέεν ἔμπεδον· οὐδέ κεν ἴρηξ
Odyssey 1.87	κίρκος ὁμαρτήσειεν, ἐλαφρότατος πετεηνῶν.
Odyssey 1.88	ὣς ἡ ῥίμφα θέουσα θαλάσσης κύματʼ ἔταμνεν,
Odyssey 1.89	ἄνδρα φέρουσα θεοῖς ἐναλίγκια μήδεʼ ἔχοντα·
Odyssey 1.90	ὃς πρὶν μὲν μάλα πολλὰ πάθʼ ἄλγεα ὃν κατὰ θυμὸν
Odyssey 1.91	ἀνδρῶν τε πτολέμους ἀλεγεινά τε κύματα πείρων,
Odyssey 1.92	δὴ τότε γʼ ἀτρέμας εὗδε, λελασμένος ὅσσʼ ἐπεπόνθει.
Odyssey 1.93	εὖτʼ ἀστὴρ ὑπερέσχε φαάντατος, ὅς τε μάλιστα
Odyssey 1.94	ἔρχεται ἀγγέλλων φάος Ἠοῦς ἠριγενείης,
Odyssey 1.95	τῆμος δὴ νήσῳ προσεπίλνατο ποντοπόρος νηῦς.
Odyssey 1.96	Φόρκυνος δέ τίς ἐστι λιμήν, ἁλίοιο γέροντος,
Odyssey 1.97	ἐν δήμῳ Ἰθάκης· δύο δὲ προβλῆτες ἐν αὐτῷ
Odyssey 1.98	ἀκταὶ ἀπορρῶγες, λιμένος ποτιπεπτηυῖαι,
Odyssey 1.99	αἵ τʼ ἀνέμων σκεπόωσι δυσαήων μέγα κῦμα
Odyssey 1.100	ἔκτοθεν· ἔντοσθεν δέ τʼ ἄνευ δεσμοῖο μένουσι
Odyssey 1.101	νῆες ἐΰσσελμοι, ὅτʼ ἂν ὅρμου μέτρον ἵκωνται.
Odyssey 1.102	αὐτὰρ ἐπὶ κρατὸς λιμένος τανύφυλλος ἐλαίη,
Odyssey 1.103	ἀγχόθι δʼ αὐτῆς ἄντρον ἐπήρατον ἠεροειδές,
Odyssey 1.104	ἱρὸν νυμφάων αἳ νηϊάδες καλέονται.
Odyssey 1.105	ἐν δὲ κρητῆρές τε καὶ ἀμφιφορῆες ἔασιν
Odyssey 1.106	λάϊνοι· ἔνθα δʼ ἔπειτα τιθαιβώσσουσι μέλισσαι.
Odyssey 1.107	ἐν δʼ ἱστοὶ λίθεοι περιμήκεες, ἔνθα τε νύμφαι
Odyssey 1.108	φάρεʼ ὑφαίνουσιν ἁλιπόρφυρα, θαῦμα ἰδέσθαι·
Odyssey 1.109	ἐν δʼ ὕδατʼ ἀενάοντα. δύω δέ τέ οἱ θύραι εἰσίν,
Odyssey 1.110	αἱ μὲν πρὸς Βορέαο καταιβαταὶ ἀνθρώποισιν,
Odyssey 1.111	αἱ δʼ αὖ πρὸς Νότου εἰσὶ θεώτεραι· οὐδέ τι κείνῃ
Odyssey 1.112	ἄνδρες ἐσέρχονται, ἀλλʼ ἀθανάτων ὁδός ἐστιν.
Odyssey 1.113	ἔνθʼ οἵ γʼ εἰσέλασαν, πρὶν εἰδότες· ἡ μὲν ἔπειτα
Odyssey 1.114	ἠπείρῳ ἐπέκελσεν, ὅσον τʼ ἐπὶ ἥμισυ πάσης,
Odyssey 1.115	σπερχομένη· τοῖον γὰρ ἐπείγετο χέρσʼ ἐρετάων·
Odyssey 1.116	οἱ δʼ ἐκ νηὸς βάντες ἐϋζύγου ἤπειρόνδε
Odyssey 1.117	πρῶτον Ὀδυσσῆα γλαφυρῆς ἐκ νηὸς ἄειραν
Odyssey 1.118	αὐτῷ σύν τε λίνῳ καὶ ῥήγεϊ σιγαλόεντι,
Odyssey 1.119	κὰδ δʼ ἄρʼ ἐπὶ ψαμάθῳ ἔθεσαν δεδμημένον ὕπνῳ,
Odyssey 1.120	ἐκ δὲ κτήματʼ ἄειραν, ἅ οἱ Φαίηκες ἀγαυοὶ
Odyssey 1.121	ὤπασαν οἴκαδʼ ἰόντι διὰ μεγάθυμον Ἀθήνην.
Odyssey 1.122	καὶ τὰ μὲν οὖν παρὰ πυθμένʼ ἐλαίης ἀθρόα θῆκαν
Odyssey 1.123	ἐκτὸς ὁδοῦ, μή πώς τις ὁδιτάων ἀνθρώπων,
Odyssey 1.124	πρίν γʼ Ὀδυσῆʼ ἔγρεσθαι, ἐπελθὼν δηλήσαιτο·
Odyssey 1.125	αὐτοὶ δʼ αὖτʼ οἶκόνδε πάλιν κίον. οὐδʼ ἐνοσίχθων
Odyssey 1.126	λήθετʼ ἀπειλάων, τὰς ἀντιθέῳ Ὀδυσῆϊ
Odyssey 1.127	πρῶτον ἐπηπείλησε, Διὸς δʼ ἐξείρετο βουλήν·
Odyssey 1.128	Ζεῦ πάτερ, οὐκέτʼ ἐγώ γε μετʼ ἀθανάτοισι θεοῖσι
Odyssey 1.129	τιμήεις ἔσομαι, ὅτε με βροτοὶ οὔ τι τίουσιν,
Odyssey 1.130	Φαίηκες, τοί πέρ τοι ἐμῆς ἔξ εἰσι γενέθλης.
Odyssey 1.131	καὶ γὰρ νῦν Ὀδυσῆʼ ἐφάμην κακὰ πολλὰ παθόντα
Odyssey 1.132	οἴκαδʼ ἐλεύσεσθαι· νόστον δέ οἱ οὔ ποτʼ ἀπηύρων
Odyssey 1.133	πάγχυ, ἐπεὶ σὺ πρῶτον ὑπέσχεο καὶ κατένευσας.
Odyssey 1.134	οἱ δʼ εὕδοντʼ ἐν νηῒ θοῇ ἐπὶ πόντον ἄγοντες
Odyssey 1.135	κάτθεσαν εἰν Ἰθάκῃ, ἔδοσαν δέ οἱ ἄσπετα δῶρα,
Odyssey 1.136	χαλκόν τε χρυσόν τε ἅλις ἐσθῆτά θʼ ὑφαντήν,
Odyssey 1.137	πόλλʼ, ὅσʼ ἂν οὐδέ ποτε Τροίης ἐξήρατʼ Ὀδυσσεύς,
Odyssey 1.138	εἴ περ ἀπήμων ἦλθε, λαχὼν ἀπὸ ληΐδος αἶσαν.
Odyssey 1.139	τὸν δʼ ἀπαμειβόμενος προσέφη νεφεληγερέτα Ζεύς·
Odyssey 1.140	ὢ πόποι, ἐννοσίγαιʼ εὐρυσθενές, οἷον ἔειπες.
Odyssey 1.141	οὔ τί σʼ ἀτιμάζουσι θεοί· χαλεπὸν δέ κεν εἴη
Odyssey 1.142	πρεσβύτατον καὶ ἄριστον ἀτιμίῃσιν ἰάλλειν.
Odyssey 1.143	ἀνδρῶν δʼ εἴ πέρ τίς σε βίῃ καὶ κάρτεϊ εἴκων
Odyssey 1.144	οὔ τι τίει. σοὶ δʼ ἐστὶ καὶ ἐξοπίσω τίσις αἰεί.
Odyssey 1.145	ἔρξον ὅπως ἐθέλεις καί τοι φίλον ἔπλετο θυμῷ.
Odyssey 1.146	τὸν δʼ ἠμείβετʼ ἔπειτα Ποσειδάων ἐνοσίχθων·
Odyssey 1.147	αἶψά κʼ ἐγὼν ἔρξαιμι, κελαινεφές, ὡς ἀγορεύεις·
Odyssey 1.148	ἀλλὰ σὸν αἰεὶ θυμὸν ὀπίζομαι ἠδʼ ἀλεείνω.
Odyssey 1.149	νῦν αὖ Φαιήκων ἐθέλω περικαλλέα νῆα,
Odyssey 1.150	ἐκ πομπῆς ἀνιοῦσαν, ἐν ἠεροειδέϊ πόντῳ
Odyssey 1.151	ῥαῖσαι, ἵνʼ ἤδη σχῶνται, ἀπολλήξωσι δὲ πομπῆς
Odyssey 1.152	ἀνθρώπων, μέγα δέ σφιν ὄρος πόλει ἀμφικαλύψαι.
Odyssey 1.153	τὸν δʼ ἀπαμειβόμενος προσέφη νεφεληγερέτα Ζεύς·
Odyssey 1.154	ὢ πέπον, ὡς μὲν ἐμῷ θυμῷ δοκεῖ εἶναι ἄριστα,
Odyssey 1.155	ὁππότε κεν δὴ πάντες ἐλαυνομένην προΐδωνται
Odyssey 1.156	λαοὶ ἀπὸ πτόλιος, θεῖναι λίθον ἐγγύθι γαίης
Odyssey 1.157	νηῒ θοῇ ἴκελον, ἵνα θαυμάζωσιν ἅπαντες
Odyssey 1.158	ἄνθρωποι, μέγα δέ σφιν ὄρος πόλει ἀμφικαλύψαι.
Odyssey 1.159	αὐτὰρ ἐπεὶ τό γʼ ἄκουσε Ποσειδάων ἐνοσίχθων,
Odyssey 1.160	βῆ ῥʼ ἴμεν ἐς Σχερίην, ὅθι Φαίηκες γεγάασιν.
Odyssey 1.161	ἔνθʼ ἔμενʼ· ἡ δὲ μάλα σχεδὸν ἤλυθε ποντοπόρος νηῦς
Odyssey 1.162	ῥίμφα διωκομένη· τῆς δὲ σχεδὸν ἦλθʼ ἐνοσίχθων,
Odyssey 1.163	ὅς μιν λᾶαν ἔθηκε καὶ ἐρρίζωσεν ἔνερθε
Odyssey 1.164	χειρὶ καταπρηνεῖ ἐλάσας· ὁ δὲ νόσφι βεβήκει.
Odyssey 1.165	οἱ δὲ πρὸς ἀλλήλους ἔπεα πτερόεντʼ ἀγόρευον
Odyssey 1.166	Φαίηκες δολιχήρετμοι, ναυσίκλυτοι ἄνδρες.
Odyssey 1.167	ὧδε δέ τις εἴπεσκεν ἰδὼν ἐς πλησίον ἄλλον·
Odyssey 1.168	ὤ μοι, τίς δὴ νῆα θοὴν ἐπέδησʼ ἐνὶ πόντῳ
Odyssey 1.169	οἴκαδʼ ἐλαυνομένην; καὶ δὴ προὐφαίνετο πᾶσα.
Odyssey 1.170	ὣς ἄρα τις εἴπεσκε· τὰ δʼ οὐκ ἴσαν ὡς ἐτέτυκτο.
Odyssey 1.171	τοῖσιν δʼ Ἀλκίνοος ἀγορήσατο καὶ μετέειπεν·
Odyssey 1.172	ὢ πόποι, ἦ μάλα δή με παλαίφατα θέσφαθʼ ἱκάνει
Odyssey 1.173	πατρὸς ἐμοῦ, ὃς ἔφασκε Ποσειδάωνʼ ἀγάσασθαι
Odyssey 1.174	ἡμῖν, οὕνεκα πομποὶ ἀπήμονές εἰμεν ἁπάντων.
Odyssey 1.175	φῆ ποτὲ Φαιήκων ἀνδρῶν περικαλλέα, νῆα,
Odyssey 1.176	ἐκ πομπῆς ἀνιοῦσαν, ἐν ἠεροειδέϊ πόντῳ
Odyssey 1.177	ῥαισέμεναι, μέγα δʼ ἧμιν ὄρος πόλει ἀμφικαλύψειν.
Odyssey 1.178	ὣς ἀγόρευʼ ὁ γέρων· τὰ δὲ δὴ νῦν πάντα τελεῖται.
Odyssey 1.179	ἀλλʼ ἄγεθʼ, ὡς ἂν ἐγὼ εἴπω, πειθώμεθα πάντες·
Odyssey 1.180	πομπῆς μὲν παύσασθε βροτῶν, ὅτε κέν τις ἵκηται
Odyssey 1.181	ἡμέτερον προτὶ ἄστυ· Ποσειδάωνι δὲ ταύρους
Odyssey 1.182	δώδεκα κεκριμένους ἱερεύσομεν, αἴ κʼ ἐλεήσῃ,
Odyssey 1.183	μηδʼ ἡμῖν περίμηκες ὄρος πόλει ἀμφικαλύψῃ.
Odyssey 1.184	ὣς ἔφαθʼ, οἱ δʼ ἔδεισαν, ἑτοιμάσσαντο δὲ ταύρους.
Odyssey 1.185	ὣς οἱ μέν ῥʼ εὔχοντο Ποσειδάωνι ἄνακτι
Odyssey 1.186	δήμου Φαιήκων ἡγήτορες ἠδὲ μέδοντες,
Odyssey 1.187	ἑσταότες περὶ βωμόν. ὁ δʼ ἔγρετο δῖος Ὀδυσσεὺς
Odyssey 1.188	εὕδων ἐν γαίῃ πατρωΐῃ, οὐδέ μιν ἔγνω,
Odyssey 1.189	ἤδη δὴν ἀπεών· περὶ γὰρ θεὸς ἠέρα χεῦε
Odyssey 1.190	Παλλὰς Ἀθηναίη, κούρη Διός, ὄφρα μιν αὐτὸν
Odyssey 1.191	ἄγνωστον τεύξειεν ἕκαστά τε μυθήσαιτο,
Odyssey 1.192	μή μιν πρὶν ἄλοχος γνοίη ἀστοί τε φίλοι τε,
Odyssey 1.193	πρὶν πᾶσαν μνηστῆρας ὑπερβασίην ἀποτῖσαι.
Odyssey 1.194	τοὔνεκʼ ἄρʼ ἀλλοειδέα φαινέσκετο πάντα ἄνακτι,
Odyssey 1.195	ἀτραπιτοί τε διηνεκέες λιμένες τε πάνορμοι
Odyssey 1.196	πέτραι τʼ ἠλίβατοι καὶ δένδρεα τηλεθόωντα.
Odyssey 1.197	στῆ δʼ ἄρʼ ἀναΐξας καί ῥʼ εἴσιδε πατρίδα γαῖαν·
Odyssey 1.198	ᾤμωξέν τʼ ἄρ ἔπειτα καὶ ὣ πεπλήγετο μηρὼ
Odyssey 1.199	χερσὶ καταπρηνέσσʼ, ὀλοφυρόμενος δʼ ἔπος ηὔδα·
Odyssey 1.200	ὤ μοι ἐγώ, τέων αὖτε βροτῶν ἐς γαῖαν ἱκάνω;
Odyssey 1.201	ἦ ῥʼ οἵ γʼ ὑβρισταί τε καὶ ἄγριοι οὐδὲ δίκαιοι,
Odyssey 1.202	ἦε φιλόξεινοι, καί σφιν νόος ἐστὶ θεουδής;
Odyssey 1.203	πῇ δὴ χρήματα πολλὰ φέρω τάδε; πῇ τε καὶ αὐτὸς
Odyssey 1.204	πλάζομαι; αἴθʼ ὄφελον μεῖναι παρὰ Φαιήκεσσιν
Odyssey 1.205	αὐτοῦ· ἐγὼ δέ κεν ἄλλον ὑπερμενέων βασιλήων
Odyssey 1.206	ἐξικόμην, ὅς κέν μʼ ἐφίλει καὶ ἔπεμπε νέεσθαι.
Odyssey 1.207	νῦν δʼ οὔτʼ ἄρ πῃ θέσθαι ἐπίσταμαι, οὐδὲ μὲν αὐτοῦ
Odyssey 1.208	καλλείψω, μή πώς μοι ἕλωρ ἄλλοισι γένηται.
Odyssey 1.209	ὢ πόποι, οὐκ ἄρα πάντα νοήμονες οὐδὲ δίκαιοι
Odyssey 1.210	ἦσαν Φαιήκων ἡγήτορες ἠδὲ μέδοντες,
Odyssey 1.211	οἵ μʼ εἰς ἄλλην γαῖαν ἀπήγαγον, ἦ τέ μʼ ἔφαντο
Odyssey 1.212	ἄξειν εἰς Ἰθάκην εὐδείελον, οὐδʼ ἐτέλεσσαν.
Odyssey 1.213	Ζεὺς σφέας τίσαιτο ἱκετήσιος, ὅς τε καὶ ἄλλους
Odyssey 1.214	ἀνθρώπους ἐφορᾷ καὶ τίνυται ὅς τις ἁμάρτῃ.
Odyssey 1.215	ἀλλʼ ἄγε δὴ τὰ χρήματʼ ἀριθμήσω καὶ ἴδωμαι,
Odyssey 1.216	μή τί μοι οἴχωνται κοίλης ἐπὶ νηὸς ἄγοντες.
Odyssey 1.217	ὣς εἰπὼν τρίποδας περικαλλέας ἠδὲ λέβητας
Odyssey 1.218	ἠρίθμει καὶ χρυσὸν ὑφαντά τε εἵματα καλά.
Odyssey 1.219	τῶν μὲν ἄρʼ οὔ τι πόθει· ὁ δʼ ὀδύρετο πατρίδα γαῖαν
Odyssey 1.220	ἑρπύζων παρὰ θῖνα πολυφλοίσβοιο θαλάσσης,
Odyssey 1.221	πόλλʼ ὀλοφυρόμενος. σχεδόθεν δέ οἱ ἦλθεν Ἀθήνη,
Odyssey 1.222	ἀνδρὶ δέμας εἰκυῖα νέῳ, ἐπιβώτορι μήλων,
Odyssey 1.223	παναπάλῳ, οἷοί τε ἀνάκτων παῖδες ἔασι,
Odyssey 1.224	δίπτυχον ἀμφʼ ὤμοισιν ἔχουσʼ εὐεργέα λώπην·
Odyssey 1.225	ποσσὶ δʼ ὑπὸ λιπαροῖσι πέδιλʼ ἔχε, χερσὶ δʼ ἄκοντα.
Odyssey 1.226	τὴν δʼ Ὀδυσεὺς γήθησεν ἰδὼν καὶ ἐναντίος ἦλθε,
Odyssey 1.227	καί μιν φωνήσας ἔπεα πτερόεντα προσηύδα·
Odyssey 1.228	ὦ φίλʼ, ἐπεί σε πρῶτα κιχάνω τῷδʼ ἐνὶ χώρῳ,
Odyssey 1.229	χαῖρέ τε καὶ μή μοί τι κακῷ νόῳ ἀντιβολήσαις,
Odyssey 1.230	ἀλλὰ σάω μὲν ταῦτα, σάω δʼ ἐμέ· σοὶ γὰρ ἐγώ γε
Odyssey 1.231	εὔχομαι ὥς τε θεῷ καί σευ φίλα γούναθʼ ἱκάνω.
Odyssey 1.232	καί μοι τοῦτʼ ἀγόρευσον ἐτήτυμον, ὄφρʼ ἐῢ εἰδῶ·
Odyssey 1.233	τίς γῆ, τίς δῆμος, τίνες ἀνέρες ἐγγεγάασιν;
Odyssey 1.234	ἦ πού τις νήσων εὐδείελος, ἦέ τις ἀκτὴ
Odyssey 1.235	κεῖθʼ ἁλὶ κεκλιμένη ἐριβώλακος ἠπείροιο;
Odyssey 1.236	τὸν δʼ αὖτε προσέειπε θεὰ γλαυκῶπις Ἀθήνη·
Odyssey 1.237	νήπιός εἰς, ὦ ξεῖνʼ, ἢ τηλόθεν εἰλήλουθας,
Odyssey 1.238	εἰ δὴ τήνδε τε γαῖαν ἀνείρεαι. οὐδέ τι λίην
Odyssey 1.239	οὕτω νώνυμός ἐστιν· ἴσασι δέ μιν μάλα πολλοί,
Odyssey 1.240	ἠμὲν ὅσοι ναίουσι πρὸς ἠῶ τʼ ἠέλιόν τε,
Odyssey 1.241	ἠδʼ ὅσσοι μετόπισθε ποτὶ ζόφον ἠερόεντα.
Odyssey 1.242	ἦ τοι μὲν τρηχεῖα καὶ οὐχ ἱππήλατός ἐστιν,
Odyssey 1.243	οὐδὲ λίην λυπρή, ἀτὰρ οὐδʼ εὐρεῖα τέτυκται.
Odyssey 1.244	ἐν μὲν γάρ οἱ σῖτος ἀθέσφατος, ἐν δέ τε οἶνος
Odyssey 1.245	γίγνεται· αἰεὶ δʼ ὄμβρος ἔχει τεθαλυῖά τʼ ἐέρση·
Odyssey 1.246	αἰγίβοτος δʼ ἀγαθὴ καὶ βούβοτος· ἔστι μὲν ὕλη
Odyssey 1.247	παντοίη, ἐν δʼ ἀρδμοὶ ἐπηετανοὶ παρέασι.
Odyssey 1.248	τῷ τοι, ξεῖνʼ, Ἰθάκης γε καὶ ἐς Τροίην ὄνομʼ ἵκει,
Odyssey 1.249	τήν περ τηλοῦ φασὶν Ἀχαιΐδος ἔμμεναι αἴης.
Odyssey 1.250	ὣς φάτο, γήθησεν δὲ πολύτλας δῖος Ὀδυσσεύς,
Odyssey 1.251	χαίρων ᾗ γαίῃ πατρωΐῃ, ὥς οἱ ἔειπε
Odyssey 1.252	Παλλὰς Ἀθηναίη, κούρη Διὸς, αἰγιόχοιο·
Odyssey 1.253	καί μιν φωνήσας ἔπεα πτερόεντα προσηύδα·
Odyssey 1.254	οὐδʼ ὅ γʼ ἀληθέα εἶπε, πάλιν δʼ ὅ γε λάζετο μῦθον,
Odyssey 1.255	αἰεὶ ἐνὶ στήθεσσι νόον πολυκερδέα νωμῶν·
Odyssey 1.256	πυνθανόμην Ἰθάκης γε καὶ ἐν Κρήτῃ εὐρείῃ,
Odyssey 1.257	τηλοῦ ὑπὲρ πόντου· νῦν δʼ εἰλήλουθα καὶ αὐτὸς
Odyssey 1.258	χρήμασι σὺν τοίσδεσσι· λιπὼν δʼ ἔτι παισὶ τοσαῦτα
Odyssey 1.259	φεύγω, ἐπεὶ φίλον υἷα κατέκτανον Ἰδομενῆος,
Odyssey 1.260	Ὀρσίλοχον πόδας ὠκύν, ὃς ἐν Κρήτῃ εὐρείῃ
Odyssey 1.261	ἀνέρας ἀλφηστὰς νίκα ταχέεσσι πόδεσσιν,
Odyssey 1.262	οὕνεκά με στερέσαι τῆς ληΐδος ἤθελε πάσης
Odyssey 1.263	Τρωϊάδος, τῆς εἵνεκʼ ἐγὼ πάθον ἄλγεα θυμῷ,
Odyssey 1.264	ἀνδρῶν τε πτολέμους ἀλεγεινά τε κύματα πείρων,
Odyssey 1.265	οὕνεκʼ ἄρʼ οὐχ ᾧ πατρὶ χαριζόμενος θεράπευον
Odyssey 1.266	δήμῳ ἔνι Τρώων, ἀλλʼ ἄλλων ἦρχον ἑταίρων.
Odyssey 1.267	τὸν μὲν ἐγὼ κατιόντα βάλον χαλκήρεϊ δουρὶ
Odyssey 1.268	ἀγρόθεν, ἐγγὺς ὁδοῖο λοχησάμενος σὺν ἑταίρῳ·
Odyssey 1.269	νὺξ δὲ μάλα δνοφερὴ κάτεχʼ οὐρανόν, οὐδέ τις ἡμέας
Odyssey 1.270	ἀνθρώπων ἐνόησε, λάθον δέ ἑ θυμὸν ἀπούρας.
Odyssey 1.271	αὐτὰρ ἐπεὶ δὴ τόν γε κατέκτανον ὀξέϊ χαλκῷ,
Odyssey 1.272	αὐτίκʼ ἐγὼν ἐπὶ νῆα κιὼν Φοίνικας ἀγαυοὺς
Odyssey 1.273	ἐλλισάμην, καί σφιν μενοεικέα ληΐδα δῶκα·
Odyssey 1.274	τούς μʼ ἐκέλευσα Πύλονδε καταστῆσαι καὶ ἐφέσσαι
Odyssey 1.275	ἢ εἰς Ἤλιδα δῖαν, ὅθι κρατέουσιν Ἐπειοί.
Odyssey 1.276	ἀλλʼ ἦ τοι σφέας κεῖθεν ἀπώσατο ἲς ἀνέμοιο
Odyssey 1.277	πόλλʼ ἀεκαζομένους, οὐδʼ ἤθελον ἐξαπατῆσαι.
Odyssey 1.278	κεῖθεν δὲ πλαγχθέντες ἱκάνομεν ἐνθάδε νυκτός.
Odyssey 1.279	σπουδῇ δʼ ἐς λιμένα προερέσσαμεν, οὐδέ τις ἡμῖν
Odyssey 1.280	δόρπου μνῆστις ἔην, μάλα περ χατέουσιν ἑλέσθαι,
Odyssey 1.281	ἀλλʼ αὔτως ἀποβάντες ἐκείμεθα νηὸς ἅπαντες.
Odyssey 1.282	ἔνθʼ ἐμὲ μὲν γλυκὺς ὕπνος ἐπήλυθε κεκμηῶτα,
Odyssey 1.283	οἱ δὲ χρήματʼ ἐμὰ γλαφυρῆς ἐκ νηὸς ἑλόντες
Odyssey 1.284	κάτθεσαν, ἔνθα περ αὐτὸς ἐπὶ ψαμάθοισιν ἐκείμην.
Odyssey 1.285	οἱ δʼ ἐς Σιδονίην εὖ ναιομένην ἀναβάντες
Odyssey 1.286	ᾤχοντʼ· αὐτὰρ ἐγὼ λιπόμην ἀκαχήμενος ἦτορ.
Odyssey 1.287	ὣς φάτο, μείδησεν δὲ θεὰ γλαυκῶπις Ἀθήνη,
Odyssey 1.288	χειρί τέ μιν κατέρεξε· δέμας δʼ ἤϊκτο γυναικὶ
Odyssey 1.289	καλῇ τε μεγάλῃ τε καὶ ἀγλαὰ ἔργα ἰδυίῃ·
Odyssey 1.290	καί μιν φωνήσασʼ ἔπεα πτερόεντα προσηύδα·
Odyssey 1.291	κερδαλέος κʼ εἴη καὶ ἐπίκλοπος ὅς σε παρέλθοι
Odyssey 1.292	ἐν πάντεσσι δόλοισι, καὶ εἰ θεὸς ἀντιάσειε.
Odyssey 1.293	σχέτλιε, ποικιλομῆτα, δόλων ἆτʼ, οὐκ ἄρʼ ἔμελλες,
Odyssey 1.294	οὐδʼ ἐν σῇ περ ἐὼν γαίῃ, λήξειν ἀπατάων
Odyssey 1.295	μύθων τε κλοπίων, οἵ τοι πεδόθεν φίλοι εἰσίν.
Odyssey 1.296	ἀλλʼ ἄγε, μηκέτι ταῦτα λεγώμεθα, εἰδότες ἄμφω
Odyssey 1.297	κέρδεʼ, ἐπεὶ σὺ μέν ἐσσι βροτῶν ὄχʼ ἄριστος ἁπάντων
Odyssey 1.298	βουλῇ καὶ μύθοισιν, ἐγὼ δʼ ἐν πᾶσι θεοῖσι
Odyssey 1.299	μήτι τε κλέομαι καὶ κέρδεσιν· οὐδὲ σύ γʼ ἔγνως
Odyssey 1.300	Παλλάδʼ Ἀθηναίην, κούρην Διός, ἥ τέ τοι αἰεὶ
Odyssey 1.301	ἐν πάντεσσι πόνοισι παρίσταμαι ἠδὲ φυλάσσω,
Odyssey 1.302	καὶ δέ σε Φαιήκεσσι φίλον πάντεσσιν ἔθηκα,
Odyssey 1.303	νῦν αὖ δεῦρʼ ἱκόμην, ἵνα τοι σὺν μῆτιν ὑφήνω
Odyssey 1.304	χρήματά τε κρύψω, ὅσα τοι Φαίηκες ἀγαυοὶ
Odyssey 1.305	ὤπασαν οἴκαδʼ ἰόντι ἐμῇ βουλῇ τε νόῳ τε,
Odyssey 1.306	εἴπω θʼ ὅσσα τοι αἶσα δόμοις ἔνι ποιητοῖσι
Odyssey 1.307	κήδεʼ ἀνασχέσθαι· σὺ δὲ τετλάμεναι καὶ ἀνάγκῃ,
Odyssey 1.308	μηδέ τῳ ἐκφάσθαι μήτʼ ἀνδρῶν μήτε γυναικῶν,
Odyssey 1.309	πάντων, οὕνεκʼ ἄρʼ ἦλθες ἀλώμενος, ἀλλὰ σιωπῇ
Odyssey 1.310	πάσχειν ἄλγεα πολλά, βίας ὑποδέγμενος ἀνδρῶν.
Odyssey 1.311	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.312	ἀργαλέον σε, θεά, γνῶναι βροτῷ ἀντιάσαντι,
Odyssey 1.313	καὶ μάλʼ ἐπισταμένῳ· σὲ γὰρ αὐτὴν παντὶ ἐΐσκεις.
Odyssey 1.314	τοῦτο δʼ ἐγὼν εὖ οἶδʼ, ὅτι μοι πάρος ἠπίη ἦσθα,
Odyssey 1.315	ἧος ἐνὶ Τροίῃ πολεμίζομεν υἷες Ἀχαιῶν.
Odyssey 1.316	αὐτὰρ ἐπεὶ Πριάμοιο πόλιν διεπέρσαμεν αἰπήν,
Odyssey 1.317	βῆμεν δʼ ἐν νήεσσι, θεὸς δʼ ἐκέδασσεν Ἀχαιούς,
Odyssey 1.318	οὔ σέ γʼ ἔπειτα ἴδον, κούρη Διός, οὐδʼ ἐνόησα
Odyssey 1.319	νηὸς ἐμῆς ἐπιβᾶσαν, ὅπως τί μοι ἄλγος ἀλάλκοις.
Odyssey 1.320	ἀλλʼ αἰεὶ φρεσὶν ᾗσιν ἔχων δεδαϊγμένον ἦτορ
Odyssey 1.321	ἠλώμην, ἧός με θεοὶ κακότητος ἔλυσαν·
Odyssey 1.322	πρίν γʼ ὅτε Φαιήκων ἀνδρῶν ἐν πίονι δήμῳ
Odyssey 1.323	θάρσυνάς τε ἔπεσσι καὶ ἐς πόλιν ἤγαγες αὐτή.
Odyssey 1.324	νῦν δέ σε πρὸς πατρὸς γουνάζομαι—οὐ γὰρ ὀΐω
Odyssey 1.325	ἥκειν εἰς Ἰθάκην εὐδείελον, ἀλλά τινʼ ἄλλην
Odyssey 1.326	γαῖαν ἀναστρέφομαι· σὲ δὲ κερτομέουσαν ὀΐω
Odyssey 1.327	ταῦτʼ ἀγορευέμεναι, ἵνʼ ἐμὰς φρένας ἠπεροπεύσῃς—
Odyssey 1.328	εἰπέ μοι εἰ ἐτεόν γε φίλην ἐς πατρίδʼ ἱκάνω.
Odyssey 1.329	τὸν δʼ ἠμείβετʼ ἔπειτα θεὰ γλαυκῶπις Ἀθήνη·
Odyssey 1.330	αἰεί τοι τοιοῦτον ἐνὶ στήθεσσι νόημα·
Odyssey 1.331	τῷ σε καὶ οὐ δύναμαι προλιπεῖν δύστηνον ἐόντα,
Odyssey 1.332	οὕνεκʼ ἐπητής ἐσσι καὶ ἀγχίνοος καὶ ἐχέφρων.
Odyssey 1.333	ἀσπασίως γάρ κʼ ἄλλος ἀνὴρ ἀλαλήμενος ἐλθὼν
Odyssey 1.334	ἵετʼ ἐνὶ μεγάροις ἰδέειν παῖδάς τʼ ἄλοχόν τε·
Odyssey 1.335	σοὶ δʼ οὔ πω φίλον ἐστὶ δαήμεναι οὐδὲ πυθέσθαι,
Odyssey 1.336	πρίν γʼ ἔτι σῆς ἀλόχου πειρήσεαι, ἥ τέ τοι αὔτως
Odyssey 1.337	ἧσται ἐνὶ μεγάροισιν, ὀϊζυραὶ δέ οἱ αἰεὶ
Odyssey 1.338	φθίνουσιν νύκτες τε καὶ ἤματα δάκρυ χεούσῃ.
Odyssey 1.339	αὐτὰρ ἐγὼ τὸ μὲν οὔ ποτʼ ἀπίστεον, ἀλλʼ ἐνὶ θυμῷ
Odyssey 1.340	ᾔδεʼ, ὃ νοστήσεις ὀλέσας ἄπο πάντας ἑταίρους·
Odyssey 1.341	ἀλλά τοι οὐκ ἐθέλησα Ποσειδάωνι μάχεσθαι
Odyssey 1.342	πατροκασιγνήτῳ, ὅς τοι κότον ἔνθετο θυμῷ,
Odyssey 1.343	χωόμενος ὅτι οἱ υἱὸν φίλον ἐξαλάωσας.
Odyssey 1.344	ἀλλʼ ἄγε τοι δείξω Ἰθάκης ἕδος, ὄφρα πεποίθῃς.
Odyssey 1.345	Φόρκυνος μὲν ὅδʼ ἐστὶ λιμήν, ἁλίοιο γέροντος,
Odyssey 1.346	ἥδε δʼ ἐπὶ κρατὸς λιμένος τανύφυλλος ἐλαίη·
Odyssey 1.347	ἀγχόθι δʼ αὐτῆς ἄντρον ἐπήρατον ἠεροειδές,
Odyssey 1.348	ἱρὸν νυμφάων, αἳ νηϊάδες καλέονται·
Odyssey 1.349	τοῦτο δέ τοι σπέος ἐστὶ κατηρεφές, ἔνθα σὺ πολλὰς
Odyssey 1.350	ἔρδεσκες νύμφῃσι τεληέσσας ἑκατόμβας·
Odyssey 1.351	τοῦτο δὲ Νήριτόν ἐστιν ὄρος καταειμένον ὕλῃ.
Odyssey 1.352	ὣς εἰποῦσα θεὰ σκέδασʼ ἠέρα, εἴσατο δὲ χθών·
Odyssey 1.353	γήθησέν τʼ ἄρʼ ἔπειτα πολύτλας δῖος Ὀδυσσεύς,
Odyssey 1.354	χαίρων ᾗ γαίῃ, κύσε δὲ ζείδωρον ἄρουραν.
Odyssey 1.355	αὐτίκα δὲ νύμφῃς ἠρήσατο, χεῖρας ἀνασχών·
Odyssey 1.356	νύμφαι νηϊάδες, κοῦραι Διός, οὔ ποτʼ ἐγώ γε
Odyssey 1.357	ὄψεσθʼ ὔμμʼ ἐφάμην· νῦν δʼ εὐχωλῇς ἀγανῇσι
Odyssey 1.358	χαίρετʼ· ἀτὰρ καὶ δῶρα διδώσομεν, ὡς τὸ πάρος περ,
Odyssey 1.359	αἴ κεν ἐᾷ πρόφρων με Διὸς θυγάτηρ ἀγελείη
Odyssey 1.360	αὐτόν τε ζώειν καί μοι φίλον υἱὸν ἀέξῃ.
Odyssey 1.361	τὸν δʼ αὖτε προσέειπε θεὰ γλαυκῶπις Ἀθήνη·
Odyssey 1.362	θάρσει, μή τοι ταῦτα μετὰ φρεσὶ σῇσι μελόντων.
Odyssey 1.363	ἀλλὰ χρήματα μὲν μυχῷ ἄντρου θεσπεσίοιο
Odyssey 1.364	θείμεν αὐτίκα νῦν, ἵνα περ τάδε τοι σόα μίμνῃ·
Odyssey 1.365	αὐτοὶ δὲ φραζώμεθʼ ὅπως ὄχʼ ἄριστα γένηται.
Odyssey 1.366	ὣς εἰποῦσα θεὰ δῦνε σπέος ἠεροειδές,
Odyssey 1.367	μαιομένη κευθμῶνας ἀνὰ σπέος· αὐτὰρ Ὀδυσσεὺς
Odyssey 1.368	ἆσσον πάντʼ ἐφόρει, χρυσὸν καὶ ἀτειρέα χαλκὸν
Odyssey 1.369	εἵματά τʼ εὐποίητα, τά οἱ Φαίηκες ἔδωκαν.
Odyssey 1.370	καὶ τὰ μὲν εὖ κατέθηκε, λίθον δʼ ἐπέθηκε θύρῃσι
Odyssey 1.371	Παλλὰς Ἀθηναίη, κούρη Διὸς αἰγιόχοιο.
Odyssey 1.372	τὼ δὲ καθεζομένω ἱερῆς παρὰ πυθμένʼ ἐλαίης
Odyssey 1.373	φραζέσθην μνηστῆρσιν ὑπερφιάλοισιν ὄλεθρον.
Odyssey 1.374	τοῖσι δὲ μύθων ἦρχε θεὰ γλαυκῶπις Ἀθήνη·
Odyssey 1.375	διογενὲς Λαερτιάδη, πολυμήχανʼ Ὀδυσσεῦ,
Odyssey 1.376	φράζευ ὅπως μνηστῆρσιν ἀναιδέσι χεῖρας ἐφήσεις,
Odyssey 1.377	οἳ δή τοι τρίετες μέγαρον κάτα κοιρανέουσι,
Odyssey 1.378	μνώμενοι ἀντιθέην ἄλοχον καὶ ἕδνα διδόντες·
Odyssey 1.379	ἡ δὲ σὸν αἰεὶ νόστον ὀδυρομένη κατὰ θυμὸν
Odyssey 1.380	πάντας μέν ῥʼ ἔλπει καὶ ὑπίσχεται ἀνδρὶ ἑκάστῳ,
Odyssey 1.381	ἀγγελίας προϊεῖσα, νόος δέ οἱ ἄλλα μενοινᾷ.
Odyssey 1.382	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.383	ὢ πόποι, ἦ μάλα δὴ Ἀγαμέμνονος Ἀτρεΐδαο
Odyssey 1.384	φθίσεσθαι κακὸν οἶτον ἐνὶ μεγάροισιν ἔμελλον,
Odyssey 1.385	εἰ μή μοι σὺ ἕκαστα, θεά, κατὰ μοῖραν ἔειπες.
Odyssey 1.386	ἀλλʼ ἄγε μῆτιν ὕφηνον, ὅπως ἀποτίσομαι αὐτούς·
Odyssey 1.387	πὰρ δέ μοι αὐτὴ στῆθι, μένος πολυθαρσὲς ἐνεῖσα,
Odyssey 1.388	οἷον ὅτε Τροίης λύομεν λιπαρὰ κρήδεμνα.
Odyssey 1.389	αἴ κέ μοι ὣς μεμαυῖα παρασταίης, γλαυκῶπι,
Odyssey 1.390	καί κε τριηκοσίοισιν ἐγὼν ἄνδρεσσι μαχοίμην
Odyssey 1.391	σὺν σοί, πότνα θεά, ὅτε μοι πρόφρασσʼ ἐπαρήγοις.
Odyssey 1.392	τὸν δʼ ἠμείβετʼ ἔπειτα θεὰ γλαυκῶπις Ἀθήνη·
Odyssey 1.393	καὶ λίην τοι ἐγώ γε παρέσσομαι, οὐδέ με λήσεις,
Odyssey 1.394	ὁππότε κεν δὴ ταῦτα πενώμεθα· καί τινʼ ὀΐω
Odyssey 1.395	αἵματί τʼ ἐγκεφάλῳ τε παλαξέμεν ἄσπετον οὖδας
Odyssey 1.396	ἀνδρῶν μνηστήρων, οἵ τοι βίοτον κατέδουσιν.
Odyssey 1.397	ἀλλʼ ἄγε σʼ ἄγνωστον τεύξω πάντεσσι βροτοῖσι·
Odyssey 1.398	κάρψω μὲν χρόα καλὸν ἐνὶ γναμπτοῖσι μέλεσσι,
Odyssey 1.399	ξανθὰς δʼ ἐκ κεφαλῆς ὀλέσω τρίχας, ἀμφὶ δὲ λαῖφος
Odyssey 1.400	ἕσσω ὅ κε στυγέῃσιν ἰδὼν ἄνθρωπον ἔχοντα,
Odyssey 1.401	κνυζώσω δέ τοι ὄσσε πάρος περικαλλέʼ ἐόντε,
Odyssey 1.402	ὡς ἂν ἀεικέλιος πᾶσι μνηστῆρσι φανήῃς
Odyssey 1.403	σῇ τʼ ἀλόχῳ καὶ παιδί, τὸν ἐν μεγάροισιν ἔλειπες.
Odyssey 1.404	αὐτὸς δὲ πρώτιστα συβώτην εἰσαφικέσθαι,
Odyssey 1.405	ὅς τοι ὑῶν ἐπίουρος, ὁμῶς δέ τοι ἤπια οἶδε,
Odyssey 1.406	παῖδά τε σὸν φιλέει καὶ ἐχέφρονα Πηνελόπειαν.
Odyssey 1.407	δήεις τόν γε σύεσσι παρήμενον· αἱ δὲ νέμονται
Odyssey 1.408	πὰρ Κόρακος πέτρῃ ἐπί τε κρήνῃ Ἀρεθούσῃ,
Odyssey 1.409	ἔσθουσαι βάλανον μενοεικέα καὶ μέλαν ὕδωρ
Odyssey 1.410	πίνουσαι, τά θʼ ὕεσσι τρέφει τεθαλυῖαν ἀλοιφήν.
Odyssey 1.411	ἔνθα μένειν καὶ πάντα παρήμενος ἐξερέεσθαι,
Odyssey 1.412	ὄφρʼ ἂν ἐγὼν ἔλθω Σπάρτην ἐς καλλιγύναικα
Odyssey 1.413	Τηλέμαχον καλέουσα, τεὸν φίλον υἱόν, Ὀδυσσεῦ·
Odyssey 1.414	ὅς τοι ἐς εὐρύχορον Λακεδαίμονα πὰρ Μενέλαον
Odyssey 1.415	ᾤχετο πευσόμενος μετὰ σὸν κλέος, εἴ που ἔτʼ εἴης.
Odyssey 1.416	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.417	τίπτε τʼ ἄρʼ οὔ οἱ ἔειπες, ἐνὶ φρεσὶ πάντα ἰδυῖα;
Odyssey 1.418	ἦ ἵνα που καὶ κεῖνος ἀλώμενος ἄλγεα πάσχῃ
Odyssey 1.419	πόντον ἐπʼ ἀτρύγετον· βίοτον δέ οἱ ἄλλοι ἔδουσι;
Odyssey 1.420	τὸν δʼ ἠμείβετʼ ἔπειτα θεὰ γλαυκῶπις Ἀθήνη·
Odyssey 1.421	μὴ δή τοι κεῖνός γε λίην ἐνθύμιος ἔστω.
Odyssey 1.422	αὐτή μιν πόμπευον, ἵνα κλέος ἐσθλὸν ἄροιτο
Odyssey 1.423	κεῖσʼ ἐλθών· ἀτὰρ οὔ τινʼ ἔχει πόνον, ἀλλὰ ἕκηλος
Odyssey 1.424	ἧσται ἐν Ἀτρεΐδαο δόμοις, παρὰ δʼ ἄσπετα κεῖται.
Odyssey 1.425	ἦ μέν μιν λοχόωσι νέοι σὺν νηῒ μελαίνῃ,
Odyssey 1.426	ἱέμενοι κτεῖναι, πρὶν πατρίδα γαῖαν ἱκέσθαι·
Odyssey 1.427	ἀλλὰ τά γʼ οὐκ ὀΐω, πρὶν καί τινα γαῖα καθέξει
Odyssey 1.428	ἀνδρῶν μνηστήρων, οἵ τοι βίοτον κατέδουσιν.
Odyssey 1.429	ὣς ἄρα μιν φαμένη ῥάβδῳ ἐπεμάσσατʼ Ἀθήνη.
Odyssey 1.430	κάρψεν μὲν χρόα καλὸν ἐνὶ γναμπτοῖσι μέλεσσι,
Odyssey 1.431	ξανθὰς δʼ ἐκ κεφαλῆς ὄλεσε τρίχας, ἀμφὶ δὲ δέρμα
Odyssey 1.432	πάντεσσιν μελέεσσι παλαιοῦ θῆκε γέροντος,
Odyssey 1.433	κνύζωσεν δέ οἱ ὄσσε πάρος περικαλλέʼ ἐόντε·
Odyssey 1.434	ἀμφὶ δέ μιν ῥάκος ἄλλο κακὸν βάλεν ἠδὲ χιτῶνα,
Odyssey 1.435	ῥωγαλέα ῥυπόωντα, κακῷ μεμορυγμένα καπνῷ·
Odyssey 1.436	ἀμφὶ δέ μιν μέγα δέρμα ταχείης ἕσσʼ ἐλάφοιο,
Odyssey 1.437	ψιλόν· δῶκε δέ οἱ σκῆπτρον καὶ ἀεικέα πήρην,
Odyssey 1.438	πυκνὰ ῥωγαλέην· ἐν δὲ στρόφος ἦεν ἀορτήρ.
Odyssey 1.439	τώ γʼ ὣς βουλεύσαντε διέτμαγεν. ἡ μὲν ἔπειτα
Odyssey 1.440	ἐς Λακεδαίμονα δῖαν ἔβη μετὰ παῖδʼ Ὀδυσῆος.
Odyssey 1.1	αὐτὰρ ὁ ἐκ λιμένος προσέβη τρηχεῖαν ἀταρπὸν
Odyssey 1.2	χῶρον ἀνʼ ὑλήεντα διʼ ἄκριας, ᾗ οἱ Ἀθήνη
Odyssey 1.3	πέφραδε δῖον ὑφορβόν, ὅ οἱ βιότοιο μάλιστα
Odyssey 1.4	κήδετο οἰκήων, οὓς κτήσατο δῖος Ὀδυσσεύς.
Odyssey 1.5	τὸν δʼ ἄρʼ ἐνὶ προδόμῳ εὗρʼ ἥμενον, ἔνθα οἱ αὐλὴ
Odyssey 1.6	ὑψηλὴ δέδμητο, περισκέπτῳ ἐνὶ χώρῳ,
Odyssey 1.7	καλή τε μεγάλη τε, περίδρομος· ἥν ῥα συβώτης
Odyssey 1.8	αὐτὸς δείμαθʼ ὕεσσιν ἀποιχομένοιο ἄνακτος,
Odyssey 1.9	νόσφιν δεσποίνης καὶ Λαέρταο γέροντος,
Odyssey 1.10	ῥυτοῖσιν λάεσσι καὶ ἐθρίγκωσεν ἀχέρδῳ·
Odyssey 1.11	σταυροὺς δʼ ἐκτὸς ἔλασσε διαμπερὲς ἔνθα καὶ ἔνθα,
Odyssey 1.12	πυκνοὺς καὶ θαμέας, τὸ μέλαν δρυὸς ἀμφικεάσσας·
Odyssey 1.13	ἔντοσθεν δʼ αὐλῆς συφεοὺς δυοκαίδεκα ποίει
Odyssey 1.14	πλησίον ἀλλήλων, εὐνὰς συσίν· ἐν δὲ ἑκάστῳ
Odyssey 1.15	πεντήκοντα σύες χαμαιευνάδες ἐρχατόωντο,
Odyssey 1.16	θήλειαι τοκάδες· τοὶ δʼ ἄρσενες ἐκτὸς ἴαυον,
Odyssey 1.17	πολλὸν παυρότεροι· τοὺς γὰρ μινύθεσκον ἔδοντες
Odyssey 1.18	ἀντίθεοι μνηστῆρες, ἐπεὶ προΐαλλε συβώτης
Odyssey 1.19	αἰεὶ ζατρεφέων σιάλων τὸν ἄριστον ἁπάντων·
Odyssey 1.20	οἱ δὲ τριηκόσιοί τε καὶ ἑξήκοντα πέλοντο.
Odyssey 1.21	πὰρ δὲ κύνες, θήρεσσιν ἐοικότες αἰὲν ἴαυον
Odyssey 1.22	τέσσαρες, οὓς ἔθρεψε συβώτης, ὄρχαμος ἀνδρῶν.
Odyssey 1.23	αὐτὸς δʼ ἀμφὶ πόδεσσιν ἑοῖς ἀράρισκε πέδιλα,
Odyssey 1.24	τάμνων δέρμα βόειον ἐϋχροές· οἱ δὲ δὴ ἄλλοι
Odyssey 1.25	ᾤχοντʼ ἄλλυδις ἄλλος ἅμʼ ἀγρομένοισι σύεσσιν,
Odyssey 1.26	οἱ τρεῖς· τὸν δὲ τέταρτον ἀποπροέηκε πόλινδε
Odyssey 1.27	σῦν ἀγέμεν μνηστῆρσιν ὑπερφιάλοισιν ἀνάγκῃ,
Odyssey 1.28	ὄφρʼ ἱερεύσαντες κρειῶν κορεσαίατο θυμόν.
Odyssey 1.29	ἐξαπίνης δʼ Ὀδυσῆα ἴδον κύνες ὑλακόμωροι.
Odyssey 1.30	οἱ μὲν κεκλήγοντες ἐπέδραμον· αὐτὰρ Ὀδυσσεὺς
Odyssey 1.31	ἕζετο κερδοσύνῃ, σκῆπτρον δέ οἱ ἔκπεσε χειρός.
Odyssey 1.32	ἔνθα κεν ᾧ πὰρ σταθμῷ ἀεικέλιον πάθεν ἄλγος·
Odyssey 1.33	ἀλλὰ συβώτης ὦκα ποσὶ κραιπνοῖσι μετασπὼν
Odyssey 1.34	ἔσσυτʼ ἀνὰ πρόθυρον, σκῦτος δέ οἱ ἔκπεσε χειρός.
Odyssey 1.35	τοὺς μὲν ὁμοκλήσας σεῦεν κύνας ἄλλυδις ἄλλον
Odyssey 1.36	πυκνῇσιν λιθάδεσσιν· ὁ δὲ προσέειπεν ἄνακτα·
Odyssey 1.37	ὦ γέρον, ἦ ὀλίγου σε κύνες διεδηλήσαντο
Odyssey 1.38	ἐξαπίνης, καί κέν μοι ἐλεγχείην κατέχευας.
Odyssey 1.39	καὶ δέ μοι ἄλλα θεοὶ δόσαν ἄλγεά τε στοναχάς τε·
Odyssey 1.40	ἀντιθέου γὰρ ἄνακτος ὀδυρόμενος καὶ ἀχεύων
Odyssey 1.41	ἧμαι, ἄλλοισιν δὲ σύας σιάλους ἀτιτάλλω
Odyssey 1.42	ἔδμεναι· αὐτὰρ κεῖνος ἐελδόμενός που ἐδωδῆς
Odyssey 1.43	πλάζετʼ ἐπʼ ἀλλοθρόων ἀνδρῶν δῆμόν τε πόλιν τε,
Odyssey 1.44	εἴ που ἔτι ζώει καὶ ὁρᾷ φάος ἠελίοιο.
Odyssey 1.45	ἀλλʼ ἕπεο, κλισίηνδʼ ἴομεν, γέρον, ὄφρα καὶ αὐτός,
Odyssey 1.46	σίτου καὶ οἴνοιο κορεσσάμενος κατὰ θυμόν,
Odyssey 1.47	εἴπῃς ὁππόθεν ἐσσὶ καὶ ὁππόσα κήδεʼ ἀνέτλης.
Odyssey 1.48	ὣς εἰπὼν κλισίηνδʼ ἡγήσατο δῖος ὑφορβός,
Odyssey 1.49	εἷσεν δʼ εἰσαγαγών, ῥῶπας δʼ ὑπέχευε δασείας,
Odyssey 1.50	ἐστόρεσεν δʼ ἐπὶ δέρμα ἰονθάδος ἀγρίου αἰγός,
Odyssey 1.51	αὐτοῦ ἐνεύναιον, μέγα καὶ δασύ. χαῖρε δʼ Ὀδυσσεὺς
Odyssey 1.52	ὅττι μιν ὣς ὑπέδεκτο, ἔπος τʼ ἔφατʼ ἔκ τʼ ὀνόμαζεν·
Odyssey 1.53	Ζεύς τοι δοίη, ξεῖνε, καὶ ἀθάνατοι θεοὶ ἄλλοι
Odyssey 1.54	ὅττι μάλιστʼ ἐθέλεις, ὅτι με πρόφρων ὑπέδεξο.
Odyssey 1.55	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.56	ξεῖνʼ, οὔ μοι θέμις ἔστʼ, οὐδʼ εἰ κακίων σέθεν ἔλθοι,
Odyssey 1.57	ξεῖνον ἀτιμῆσαι· πρὸς γὰρ Διός εἰσιν ἅπαντες
Odyssey 1.58	ξεῖνοί τε πτωχοί τε· δόσις δʼ ὀλίγη τε φίλη τε
Odyssey 1.59	γίγνεται ἡμετέρη· ἡ γὰρ δμώων δίκη ἐστὶν
Odyssey 1.60	αἰεὶ δειδιότων, ὅτʼ ἐπικρατέωσιν ἄνακτες
Odyssey 1.61	οἱ νέοι. ἦ γὰρ τοῦ γε θεοὶ κατὰ νόστον ἔδησαν,
Odyssey 1.62	ὅς κεν ἔμʼ ἐνδυκέως ἐφίλει καὶ κτῆσιν ὄπασσεν,
Odyssey 1.64	οἶκόν τε κλῆρόν τε πολυμνήστην τε γυναῖκα,
Odyssey 1.63	οἷά τε ᾧ οἰκῆϊ ἄναξ εὔθυμος ἔδωκεν,
Odyssey 1.65	ὅς οἱ πολλὰ κάμῃσι, θεὸς δʼ ἐπὶ ἔργον ἀέξῃ,
Odyssey 1.66	ὡς καὶ ἐμοὶ τόδε ἔργον ἀέξεται, ᾧ ἐπιμίμνω.
Odyssey 1.67	τῷ κέ με πόλλʼ ὤνησεν ἄναξ, εἰ αὐτόθʼ ἐγήρα·
Odyssey 1.68	ἀλλʼ ὄλεθʼ—ὡς ὤφελλʼ Ἑλένης ἀπὸ φῦλον ὀλέσθαι
Odyssey 1.69	πρόχνυ, ἐπεὶ πολλῶν ἀνδρῶν ὑπὸ γούνατʼ ἔλυσε·
Odyssey 1.70	καὶ γὰρ κεῖνος ἔβη Ἀγαμέμνονος εἵνεκα τιμῆς
Odyssey 1.71	Ἴλιον εἰς εὔπωλον, ἵνα Τρώεσσι μάχοιτο.
Odyssey 1.72	ὣς εἰπὼν ζωστῆρι θοῶς συνέεργε χιτῶνα,
Odyssey 1.73	βῆ δʼ ἴμεν ἐς συφεούς, ὅθι ἔθνεα ἔρχατο χοίρων.
Odyssey 1.74	ἔνθεν ἑλὼν δύʼ ἔνεικε καὶ ἀμφοτέρους ἱέρευσεν,
Odyssey 1.75	εὗσέ τε μίστυλλέν τε καὶ ἀμφʼ ὀβελοῖσιν ἔπειρεν.
Odyssey 1.76	ὀπτήσας δʼ ἄρα πάντα φέρων παρέθηκʼ Ὀδυσῆϊ
Odyssey 1.77	θέρμʼ αὐτοῖς ὀβελοῖσιν· ὁ δʼ ἄλφιτα λευκὰ πάλυνεν·
Odyssey 1.78	ἐν δʼ ἄρα κισσυβίῳ κίρνη μελιηδέα οἶνον,
Odyssey 1.79	αὐτὸς δʼ ἀντίον ἷζεν, ἐποτρύνων δὲ προσηύδα·
Odyssey 1.80	ἔσθιε νῦν, ὦ ξεῖνε, τά τε δμώεσσι πάρεστι,
Odyssey 1.81	χοίρεʼ· ἀτὰρ σιάλους γε σύας μνηστῆρες ἔδουσιν,
Odyssey 1.82	οὐκ ὄπιδα φρονέοντες ἐνὶ φρεσὶν οὐδʼ ἐλεητύν.
Odyssey 1.83	οὐ μὲν σχέτλια ἔργα θεοὶ μάκαρες φιλέουσιν,
Odyssey 1.84	ἀλλὰ δίκην τίουσι καὶ αἴσιμα ἔργʼ ἀνθρώπων.
Odyssey 1.85	καὶ μὲν δυσμενέες καὶ ἀνάρσιοι, οἵ τʼ ἐπὶ γαίης
Odyssey 1.86	ἀλλοτρίης βῶσιν καί σφι Ζεὺς ληΐδα δώῃ,
Odyssey 1.87	πλησάμενοι δέ τε νῆας ἔβαν οἶκόνδε νέεσθαι,
Odyssey 1.88	καὶ μὲν τοῖς ὄπιδος κρατερὸν δέος ἐν φρεσὶ πίπτει.
Odyssey 1.89	οἵδε δὲ καί τι ἴσασι, θεοῦ δέ τινʼ ἔκλυον αὐδήν,
Odyssey 1.90	κείνου λυγρὸν ὄλεθρον, ὅτʼ οὐκ ἐθέλουσι δικαίως
Odyssey 1.91	μνᾶσθαι οὐδὲ νέεσθαι ἐπὶ σφέτερʼ, ἀλλὰ ἕκηλοι
Odyssey 1.92	κτήματα δαρδάπτουσιν ὑπέρβιον, οὐδʼ ἔπι φειδώ.
Odyssey 1.93	ὅσσαι γὰρ νύκτες τε καὶ ἡμέραι ἐκ Διός εἰσιν,
Odyssey 1.94	οὔ ποθʼ ἓν ἱρεύουσʼ ἱερήϊον, οὐδὲ δύʼ οἴω·
Odyssey 1.95	οἶνον δὲ φθινύθουσιν ὑπέρβιον ἐξαφύοντες.
Odyssey 1.96	ἦ γάρ οἱ ζωή γʼ ἦν ἄσπετος· οὔ τινι τόσση
Odyssey 1.97	ἀνδρῶν ἡρώων, οὔτʼ ἠπείροιο μελαίνης
Odyssey 1.98	οὔτʼ αὐτῆς Ἰθάκης· οὐδὲ ξυνεείκοσι φωτῶν
Odyssey 1.99	ἔστʼ ἄφενος τοσσοῦτον· ἐγὼ δέ κέ τοι καταλέξω.
Odyssey 1.100	δώδεκʼ ἐν ἠπείρῳ ἀγέλαι· τόσα πώεα οἰῶν,
Odyssey 1.101	τόσσα συῶν συβόσια, τόσʼ αἰπόλια πλατέʼ αἰγῶν
Odyssey 1.102	βόσκουσι ξεῖνοί τε καὶ αὐτοῦ βώτορες ἄνδρες.
Odyssey 1.103	ἐνθάδε δʼ αἰπόλια πλατέʼ αἰγῶν ἕνδεκα πάντα
Odyssey 1.104	ἐσχατιῇ βόσκοντʼ, ἐπὶ δʼ ἀνέρες ἐσθλοὶ ὄρονται.
Odyssey 1.105	τῶν αἰεί σφιν ἕκαστος ἐπʼ ἤματι μῆλον ἀγινεῖ,
Odyssey 1.106	ζατρεφέων αἰγῶν ὅς τις φαίνηται ἄριστος.
Odyssey 1.107	αὐτὰρ ἐγὼ σῦς τάσδε φυλάσσω τε ῥύομαί τε,
Odyssey 1.108	καί σφι συῶν τὸν ἄριστον ἐῢ κρίνας ἀποπέμπω.
Odyssey 1.109	ὣς φάθʼ, ὁ δʼ ἐνδυκέως κρέα τʼ ἤσθιε πῖνέ τε οἶνον
Odyssey 1.110	ἁρπαλέως ἀκέων, κακὰ δὲ μνηστῆρσι φύτευεν.
Odyssey 1.111	αὐτὰρ ἐπεὶ δείπνησε καὶ ἤραρε θυμὸν ἐδωδῇ,
Odyssey 1.112	καί οἱ πλησάμενος δῶκε σκύφον, ᾧ περ ἔπινεν,
Odyssey 1.113	οἴνου ἐνίπλειον· ὁ δʼ ἐδέξατο, χαῖρε δὲ θυμῷ,
Odyssey 1.114	καί μιν φωνήσας ἔπεα πτερόεντα προσηύδα·
Odyssey 1.115	ὦ φίλε, τίς γάρ σε πρίατο κτεάτεσσιν ἑοῖσιν,
Odyssey 1.116	ὧδε μάλʼ ἀφνειὸς καὶ καρτερὸς ὡς ἀγορεύεις;
Odyssey 1.117	φῆς δʼ αὐτὸν φθίσθαι Ἀγαμέμνονος εἵνεκα τιμῆς.
Odyssey 1.118	εἰπέ μοι, αἴ κέ ποθι γνώω τοιοῦτον ἐόντα.
Odyssey 1.119	Ζεὺς γάρ που τό γε οἶδε καὶ ἀθάνατοι θεοὶ ἄλλοι,
Odyssey 1.120	εἴ κέ μιν ἀγγείλαιμι ἰδών· ἐπὶ πολλὰ δʼ ἀλήθην.
Odyssey 1.121	τὸν δʼ ἠμείβετʼ ἔπειτα συβώτης, ὄρχαμος ἀνδρῶν·
Odyssey 1.122	ὦ γέρον, οὔ τις κεῖνον ἀνὴρ ἀλαλήμενος ἐλθὼν
Odyssey 1.123	ἀγγέλλων πείσειε γυναῖκά τε καὶ φίλον υἱόν,
Odyssey 1.124	ἀλλʼ ἄλλως κομιδῆς κεχρημένοι ἄνδρες ἀλῆται
Odyssey 1.125	ψεύδοντʼ, οὐδʼ ἐθέλουσιν ἀληθέα μυθήσασθαι.
Odyssey 1.126	ὃς δέ κʼ ἀλητεύων Ἰθάκης ἐς δῆμον ἵκηται,
Odyssey 1.127	ἐλθὼν ἐς δέσποιναν ἐμὴν ἀπατήλια βάζει·
Odyssey 1.128	ἡ δʼ εὖ δεξαμένη φιλέει καὶ ἕκαστα μεταλλᾷ,
Odyssey 1.129	καί οἱ ὀδυρομένῃ βλεφάρων ἄπο δάκρυα πίπτει,
Odyssey 1.130	ἣ θέμις ἐστὶ γυναικός, ἐπὴν πόσις ἄλλοθʼ ὄληται.
Odyssey 1.131	αἶψά κε καὶ σύ, γεραιέ, ἔπος παρατεκτήναιο.
Odyssey 1.132	εἴ τίς τοι χλαῖνάν τε χιτῶνά τε εἵματα δοίη.
Odyssey 1.133	τοῦ δʼ ἤδη μέλλουσι κύνες ταχέες τʼ οἰωνοὶ
Odyssey 1.134	ῥινὸν ἀπʼ ὀστεόφιν ἐρύσαι, ψυχὴ δὲ λέλοιπεν·
Odyssey 1.135	ἢ τόν γʼ ἐν πόντῳ φάγον ἰχθύες, ὀστέα δʼ αὐτοῦ
Odyssey 1.136	κεῖται ἐπʼ ἠπείρου ψαμάθῳ εἰλυμένα πολλῇ.
Odyssey 1.137	ὣς ὁ μὲν ἔνθʼ ἀπόλωλε, φίλοισι δὲ κήδεʼ ὀπίσσω
Odyssey 1.138	πᾶσιν, ἐμοὶ δὲ μάλιστα, τετεύχαται· οὐ γὰρ ἔτʼ ἄλλον
Odyssey 1.139	ἤπιον ὧδε ἄνακτα κιχήσομαι, ὁππόσʼ ἐπέλθω,
Odyssey 1.140	οὐδʼ εἴ κεν πατρὸς καὶ μητέρος αὖτις ἵκωμαι
Odyssey 1.141	οἶκον, ὅθι πρῶτον γενόμην καί μʼ ἔτρεφον αὐτοί.
Odyssey 1.142	οὐδέ νυ τῶν ἔτι τόσσον ὀδύρομαι, ἱέμενός περ
Odyssey 1.143	ὀφθαλμοῖσιν ἰδέσθαι ἐὼν ἐν πατρίδι γαίῃ·
Odyssey 1.144	ἀλλά μʼ Ὀδυσσῆος πόθος αἴνυται οἰχομένοιο.
Odyssey 1.145	τὸν μὲν ἐγών, ὦ ξεῖνε, καὶ οὐ παρεόντʼ ὀνομάζειν
Odyssey 1.146	αἰδέομαι· πέρι γάρ μʼ ἐφίλει καὶ κήδετο θυμῷ·
Odyssey 1.147	ἀλλά μιν ἠθεῖον καλέω καὶ νόσφιν ἐόντα.
Odyssey 1.148	τὸν δʼ αὖτε προσέειπε πολύτλας δῖος Ὀδυσσεύς·
Odyssey 1.149	ὦ φίλʼ, ἐπειδὴ πάμπαν ἀναίνεαι, οὐδʼ ἔτι φῇσθα
Odyssey 1.150	κεῖνον ἐλεύσεσθαι, θυμὸς δέ τοι αἰὲν ἄπιστος·
Odyssey 1.151	ἀλλʼ ἐγὼ οὐκ αὔτως μυθήσομαι, ἀλλὰ σὺν ὅρκῳ,
Odyssey 1.152	ὡς νεῖται Ὀδυσεύς· εὐαγγέλιον δέ μοι ἔστω
Odyssey 1.153	αὐτίκʼ, ἐπεί κεν κεῖνος ἰὼν τὰ ἃ δώμαθʼ ἵκηται·
Odyssey 1.154	ἕσσαι με χλαῖνάν τε χιτῶνά τε, εἵματα καλά·
Odyssey 1.155	πρὶν δέ κε, καὶ μάλα περ κεχρημένος, οὔ τι δεχοίμην.
Odyssey 1.156	ἐχθρὸς γάρ μοι κεῖνος ὁμῶς Ἀΐδαο πύλῃσι
Odyssey 1.157	γίγνεται, ὃς πενίῃ εἴκων ἀπατήλια βάζει.
Odyssey 1.158	ἴστω νῦν Ζεὺς πρῶτα θεῶν, ξενίη τε τράπεζα,
Odyssey 1.159	ἱστίη τʼ Ὀδυσῆος ἀμύμονος, ἣν ἀφικάνω·
Odyssey 1.160	ἦ μέν τοι τάδε πάντα τελείεται ὡς ἀγορεύω.
Odyssey 1.161	τοῦδʼ αὐτοῦ λυκάβαντος ἐλεύσεται ἐνθάδʼ Ὀδυσσεύς.
Odyssey 1.162	τοῦ μὲν φθίνοντος μηνός, τοῦ δʼ ἱσταμένοιο,
Odyssey 1.163	οἴκαδε νοστήσει, καὶ τίσεται ὅς τις ἐκείνου
Odyssey 1.164	ἐνθάδʼ ἀτιμάζει ἄλοχον καὶ φαίδιμον υἱόν.
Odyssey 1.165	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.166	ὦ γέρον, οὔτʼ ἄρʼ ἐγὼν εὐαγγέλιον τόδε τίσω,
Odyssey 1.167	οὔτʼ Ὀδυσεὺς ἔτι οἶκον ἐλεύσεται· ἀλλὰ ἕκηλος
Odyssey 1.168	πῖνε, καὶ ἄλλα παρὲξ μεμνώμεθα, μηδέ με τούτων
Odyssey 1.169	μίμνησκʼ· ἦ γὰρ θυμὸς ἐνὶ στήθεσσιν ἐμοῖσιν
Odyssey 1.170	ἄχνυται, ὁππότε τις μνήσῃ κεδνοῖο ἄνακτος.
Odyssey 1.171	ἀλλʼ ἦ τοι ὅρκον μὲν ἐάσομεν, αὐτὰρ Ὀδυσσεὺς
Odyssey 1.172	ἔλθοι ὅπως μιν ἐγώ γʼ ἐθέλω καὶ Πηνελόπεια
Odyssey 1.173	Λαέρτης θʼ ὁ γέρων καὶ Τηλέμαχος θεοειδής.
Odyssey 1.174	νῦν αὖ παιδὸς ἄλαστον ὀδύρομαι, ὃν τέκʼ Ὀδυσσεύς,
Odyssey 1.175	Τηλεμάχου· τὸν ἐπεὶ θρέψαν θεοὶ ἔρνεϊ ἶσον,
Odyssey 1.176	καί μιν ἔφην ἔσσεσθαι ἐν ἀνδράσιν οὔ τι χέρηα
Odyssey 1.177	πατρὸς ἑοῖο φίλοιο, δέμας καὶ εἶδος ἀγητόν,
Odyssey 1.178	τὸν δέ τις ἀθανάτων βλάψε φρένας ἔνδον ἐΐσας
Odyssey 1.179	ἠέ τις ἀνθρώπων· ὁ δʼ ἔβη μετὰ πατρὸς ἀκουὴν
Odyssey 1.180	ἐς Πύλον ἠγαθέην· τὸν δὲ μνηστῆρες ἀγαυοὶ
Odyssey 1.181	οἴκαδʼ ἰόντα λοχῶσιν, ὅπως ἀπὸ φῦλον ὄληται
Odyssey 1.182	νώνυμον ἐξ Ἰθάκης Ἀρκεισίου ἀντιθέοιο.
Odyssey 1.183	ἀλλʼ ἦ τοι κεῖνον μὲν ἐάσομεν, ἤ κεν ἁλώῃ
Odyssey 1.184	ἦ κε φύγῃ καί κέν οἱ ὑπέρσχῃ χεῖρα Κρονίων.
Odyssey 1.185	ἀλλʼ ἄγε μοι σύ, γεραιέ, τὰ σʼ αὐτοῦ κήδεʼ ἐνίσπες
Odyssey 1.186	καί μοι τοῦτʼ ἀγόρευσον ἐτήτυμον, ὄφρʼ ἐῢ εἰδῶ·
Odyssey 1.187	τίς πόθεν εἶς ἀνδρῶν; πόθι τοι πόλις ἠδὲ τοκῆες;
Odyssey 1.188	ὁπποίης τʼ ἐπὶ νηὸς ἀφίκεο· πῶς δέ σε ναῦται
Odyssey 1.189	ἤγαγον εἰς Ἰθάκην; τίνες ἔμμεναι εὐχετόωντο;
Odyssey 1.190	οὐ μὲν γάρ τί σε πεζὸν ὀΐομαι ἐνθάδʼ ἱκέσθαι.
Odyssey 1.191	τὸν δʼ ἀπαμειβόμενος προσέφη πολύμητις Ὀδυσσεύς
Odyssey 1.192	τοιγὰρ ἐγώ τοι ταῦτα μάλʼ ἀτρεκέως ἀγορεύσω.
Odyssey 1.193	εἴη μὲν νῦν νῶϊν ἐπὶ χρόνον ἠμὲν ἐδωδὴ
Odyssey 1.194	ἠδὲ μέθυ γλυκερὸν κλισίης ἔντοσθεν ἐοῦσι,
Odyssey 1.195	δαίνυσθαι ἀκέοντʼ, ἄλλοι δʼ ἐπὶ ἔργον ἕποιεν·
Odyssey 1.196	ῥηϊδίως κεν ἔπειτα καὶ εἰς ἐνιαυτὸν ἅπαντα
Odyssey 1.197	οὔ τι διαπρήξαιμι λέγων ἐμὰ κήδεα θυμοῦ,
Odyssey 1.198	ὅσσα γε δὴ ξύμπαντα θεῶν ἰότητι μόγησα.
Odyssey 1.199	ἐκ μὲν Κρητάων γένος εὔχομαι εὐρειάων,
Odyssey 1.200	ἀνέρος ἀφνειοῖο πάϊς· πολλοὶ δὲ καὶ ἄλλοι
Odyssey 1.201	υἱέες ἐν μεγάρῳ ἠμὲν τράφεν ἠδʼ ἐγένοντο
Odyssey 1.202	γνήσιοι ἐξ ἀλόχου· ἐμὲ δʼ ὠνητὴ τέκε μήτηρ
Odyssey 1.203	παλλακίς, ἀλλά με ἶσον ἰθαιγενέεσσιν ἐτίμα
Odyssey 1.204	Κάστωρ Ὑλακίδης, τοῦ ἐγὼ γένος εὔχομαι εἶναι
Odyssey 1.205	ὃς τότʼ ἐνὶ Κρήτεσσι θεὸς ὣς τίετο δήμῳ
Odyssey 1.206	ὄλβῳ τε πλούτῳ τε καὶ υἱάσι κυδαλίμοισιν.
Odyssey 1.207	ἀλλʼ ἦ τοι τὸν κῆρες ἔβαν θανάτοιο φέρουσαι
Odyssey 1.208	εἰς Ἀΐδαο δόμους· τοὶ δὲ ζωὴν ἐδάσαντο
Odyssey 1.209	παῖδες ὑπέρθυμοι καὶ ἐπὶ κλήρους ἐβάλοντο,
Odyssey 1.210	αὐτὰρ ἐμοὶ μάλα παῦρα δόσαν καὶ οἰκίʼ ἔνειμαν.
Odyssey 1.211	ἠγαγόμην δὲ γυναῖκα πολυκλήρων ἀνθρώπων
Odyssey 1.212	εἵνεκʼ ἐμῆς ἀρετῆς, ἐπεὶ οὐκ ἀποφώλιος ἦα
Odyssey 1.213	οὐδὲ φυγοπτόλεμος· νῦν δʼ ἤδη πάντα λέλοιπεν
Odyssey 1.214	ἀλλʼ ἔμπης καλάμην γέ σʼ ὀΐομαι εἰσορόωντα
Odyssey 1.215	γιγνώσκειν· ἦ γάρ με δύη ἔχει ἤλιθα πολλή.
Odyssey 1.216	ἦ μὲν δὴ θάρσος μοι Ἄρης τʼ ἔδοσαν καὶ Ἀθήνη
Odyssey 1.217	καὶ ῥηξηνορίην· ὁπότε κρίνοιμι λόχονδε
Odyssey 1.218	ἄνδρας ἀριστῆας, κακὰ δυσμενέεσσι φυτεύων,
Odyssey 1.219	οὔ ποτέ μοι θάνατον προτιόσσετο θυμὸς ἀγήνωρ,
Odyssey 1.220	ἀλλὰ πολὺ πρώτιστος ἐπάλμενος ἔγχει ἕλεσκον
Odyssey 1.221	ἀνδρῶν δυσμενέων ὅ τέ μοι εἴξειε πόδεσσιν.
Odyssey 1.222	τοῖος ἔα ἐν πολέμῳ· ἔργον δέ μοι οὐ φίλον ἔσκεν
Odyssey 1.223	οὐδʼ οἰκωφελίη, ἥ τε τρέφει ἀγλαὰ τέκνα,
Odyssey 1.224	ἀλλά μοι αἰεὶ νῆες ἐπήρετμοι φίλαι ἦσαν
Odyssey 1.225	καὶ πόλεμοι καὶ ἄκοντες ἐΰξεστοι καὶ ὀϊστοί,
Odyssey 1.226	λυγρά, τά τʼ ἄλλοισίν γε καταριγηλὰ πέλονται.
Odyssey 1.227	αὐτὰρ ἐμοὶ τὰ φίλʼ ἔσκε τά που θεὸς ἐν φρεσὶ θῆκεν·
Odyssey 1.228	ἄλλος γάρ τʼ ἄλλοισιν ἀνὴρ ἐπιτέρπεται ἔργοις.
Odyssey 1.229	πρὶν μὲν γὰρ Τροίης ἐπιβήμεναι υἷας Ἀχαιῶν
Odyssey 1.230	εἰνάκις ἀνδράσιν ἦρξα καὶ ὠκυπόροισι νέεσσιν
Odyssey 1.231	ἄνδρας ἐς ἀλλοδαπούς, καί μοι μάλα τύγχανε πολλά.
Odyssey 1.232	τῶν ἐξαιρεύμην μενοεικέα, πολλὰ δʼ ὀπίσσω
Odyssey 1.233	λάγχανον· αἶψα δὲ οἶκος ὀφέλλετο, καί ῥα ἔπειτα
Odyssey 1.234	δεινός τʼ αἰδοῖός τε μετὰ Κρήτεσσι τετύγμην.
Odyssey 1.235	ἀλλʼ ὅτε δὴ τήν γε στυγερὴν ὁδὸν εὐρύοπα Ζεὺς
Odyssey 1.236	ἐφράσαθʼ, ἣ πολλῶν ἀνδρῶν ὑπὸ γούνατʼ ἔλυσε,
Odyssey 1.237	δὴ τότʼ ἔμʼ ἤνωγον καὶ ἀγακλυτὸν Ἰδομενῆα
Odyssey 1.238	νήεσσʼ ἡγήσασθαι ἐς Ἴλιον· οὐδέ τι μῆχος
Odyssey 1.239	ἦεν ἀνήνασθαι, χαλεπὴ δʼ ἔχε δήμου φῆμις.
Odyssey 1.240	ἔνθα μὲν εἰνάετες πολεμίζομεν υἷες Ἀχαιῶν,
Odyssey 1.241	τῷ δεκάτῳ δὲ πόλιν Πριάμου πέρσαντες ἔβημεν
Odyssey 1.242	οἴκαδε σὺν νήεσσι, θεὸς δʼ ἐκέδασσεν Ἀχαιούς.
Odyssey 1.243	αὐτὰρ ἐμοὶ δειλῷ κακὰ μήδετο μητίετα Ζεύς·
Odyssey 1.244	μῆνα γὰρ οἶον ἔμεινα τεταρπόμενος τεκέεσσιν
Odyssey 1.245	κουριδίῃ τʼ ἀλόχῳ καὶ κτήμασιν· αὐτὰρ ἔπειτα
Odyssey 1.246	Αἴγυπτόνδε με θυμὸς ἀνώγει ναυτίλλεσθαι,
Odyssey 1.247	νῆας ἐῢ στείλαντα σὺν ἀντιθέοις ἑτάροισιν.
Odyssey 1.248	ἐννέα νῆας στεῖλα, θοῶς δʼ ἐσαγείρατο λαός.
Odyssey 1.249	ἑξῆμαρ μὲν ἔπειτα ἐμοὶ ἐρίηρες ἑταῖροι
Odyssey 1.250	δαίνυντʼ· αὐτὰρ ἐγὼν ἱερήϊα πολλὰ παρεῖχον
Odyssey 1.251	θεοῖσίν τε ῥέζειν αὐτοῖσί τε δαῖτα πένεσθαι.
Odyssey 1.252	ἑβδομάτῃ δʼ ἀναβάντες ἀπὸ Κρήτης εὐρείης
Odyssey 1.253	ἐπλέομεν Βορέῃ ἀνέμῳ ἀκραέϊ καλῷ
Odyssey 1.254	ῥηϊδίως, ὡς εἴ τε κατὰ ῥόον· οὐδέ τις οὖν μοι
Odyssey 1.255	νηῶν πημάνθη, ἀλλʼ ἀσκηθέες καὶ ἄνουσοι
Odyssey 1.256	ἥμεθα, τὰς δʼ ἄνεμός τε κυβερνῆταί τʼ ἴθυνον.
Odyssey 1.257	πεμπταῖοι δʼ Αἴγυπτον ἐϋρρείτην ἱκόμεσθα,
Odyssey 1.258	στῆσα δʼ ἐν Αἰγύπτῳ ποταμῷ νέας ἀμφιελίσσας.
Odyssey 1.259	ἔνθʼ ἦ τοι μὲν ἐγὼ κελόμην ἐρίηρας ἑταίρους
Odyssey 1.260	αὐτοῦ πὰρ νήεσσι μένειν καὶ νῆας ἔρυσθαι,
Odyssey 1.261	ὀπτῆρας δὲ κατὰ σκοπιὰς ὤτρυνα νέεσθαι·
Odyssey 1.262	οἱ δʼ ὕβρει εἴξαντες, ἐπισπόμενοι μένεϊ σφῷ,
Odyssey 1.263	αἶψα μάλʼ Αἰγυπτίων ἀνδρῶν περικαλλέας ἀγροὺς
Odyssey 1.264	πόρθεον, ἐκ δὲ γυναῖκας ἄγον καὶ νήπια τέκνα,
Odyssey 1.265	αὐτούς τʼ ἔκτεινον· τάχα δʼ ἐς πόλιν ἵκετʼ ἀϋτή.
Odyssey 1.266	οἱ δὲ βοῆς ἀΐοντες ἅμʼ ἠοῖ φαινομένηφιν
Odyssey 1.267	ἦλθον· πλῆτο δὲ πᾶν πεδίον πεζῶν τε καὶ ἵππων
Odyssey 1.268	χαλκοῦ τε στεροπῆς· ἐν δὲ Ζεὺς τερπικέραυνος
Odyssey 1.269	φύζαν ἐμοῖς ἑτάροισι κακὴν βάλεν, οὐδέ τις ἔτλη
Odyssey 1.270	μεῖναι ἐναντίβιον· περὶ γὰρ κακὰ πάντοθεν ἔστη.
Odyssey 1.271	ἔνθʼ ἡμέων πολλοὺς μὲν ἀπέκτανον ὀξέϊ χαλκῷ,
Odyssey 1.272	τοὺς δʼ ἄναγον ζωούς, σφίσιν ἐργάζεσθαι ἀνάγκῃ.
Odyssey 1.273	αὐτὰρ ἐμοὶ Ζεὺς αὐτὸς ἐνὶ φρεσὶν ὧδε νόημα
Odyssey 1.274	ποίησʼ—ὡς ὄφελον θανέειν καὶ πότμον ἐπισπεῖν
Odyssey 1.275	αὐτοῦ ἐν Αἰγύπτῳ· ἔτι γάρ νύ με πῆμʼ ὑπέδεκτο—
Odyssey 1.276	αὐτίκʼ ἀπὸ κρατὸς κυνέην εὔτυκτον ἔθηκα
Odyssey 1.277	καὶ σάκος ὤμοιϊν, δόρυ δʼ ἔκβαλον ἔκτοσε χειρός·
Odyssey 1.278	αὐτὰρ ἐγὼ βασιλῆος ἐναντίον ἤλυθον ἵππων
Odyssey 1.279	καὶ κύσα γούναθʼ ἑλών· ὁδʼ ἐρύσατο καί μʼ ἐλέησεν,
Odyssey 1.280	ἐς δίφρον δέ μʼ ἕσας ἄγεν οἴκαδε δάκρυ χέοντα.
Odyssey 1.281	ἦ μέν μοι μάλα πολλοὶ ἐπήϊσσον μελίῃσιν,
Odyssey 1.282	ἱέμενοι κτεῖναι—δὴ γὰρ κεχολώατο λίην—
Odyssey 1.283	ἀλλʼ ἀπὸ κεῖνος ἔρυκε, Διὸς δʼ ὠπίζετο μῆνιν
Odyssey 1.284	ξεινίου, ὅς τε μάλιστα νεμεσσᾶται κακὰ ἔργα.
Odyssey 1.285	ἔνθα μὲν ἑπτάετες μένον αὐτόθι, πολλὰ δʼ ἄγειρα
Odyssey 1.286	χρήματʼ ἀνʼ Αἰγυπτίους ἄνδρας· δίδοσαν γὰρ ἅπαντες.
Odyssey 1.287	ἀλλʼ ὅτε δὴ ὄγδοόν μοι ἐπιπλόμενον ἔτος ἦλθεν,
Odyssey 1.288	δὴ τότε Φοῖνιξ ἦλθεν ἀνὴρ ἀπατήλια εἰδώς,
Odyssey 1.289	τρώκτης, ὃς δὴ πολλὰ κάκʼ ἀνθρώποισιν ἐώργει·
Odyssey 1.290	ὅς μʼ ἄγε παρπεπιθὼν ᾗσι φρεσίν, ὄφρʼ ἱκόμεσθα
Odyssey 1.291	Φοινίκην, ὅθι τοῦ γε δόμοι καὶ κτήματʼ ἔκειτο.
Odyssey 1.292	ἔνθα παρʼ αὐτῷ μεῖνα τελεσφόρον εἰς ἐνιαυτόν.
Odyssey 1.293	ἀλλʼ ὅτε δὴ μῆνές τε καὶ ἡμέραι ἐξετελεῦντο
Odyssey 1.294	ἄψ περιτελλομένου ἔτεος καὶ ἐπήλυθον ὧραι,
Odyssey 1.295	ἐς Λιβύην μʼ ἐπὶ νηὸς ἐέσσατο ποντοπόροιο
Odyssey 1.296	ψεύδεα βουλεύσας, ἵνα οἱ σὺν φόρτον ἄγοιμι,
Odyssey 1.297	κεῖθι δέ μʼ ὡς περάσειε καὶ ἄσπετον ὦνον ἕλοιτο.
Odyssey 1.298	τῷ ἑπόμην ἐπὶ νηός, ὀϊόμενός περ, ἀνάγκῃ.
Odyssey 1.299	ἡ δʼ ἔθεεν Βορέῃ ἀνέμῳ ἀκραέϊ καλῷ,
Odyssey 1.300	μέσσον ὑπὲρ Κρήτης· Ζεὺς δέ σφισι μήδετʼ ὄλεθρον.
Odyssey 1.301	ἀλλʼ ὅτε δὴ Κρήτην μὲν ἐλείπομεν, οὐδέ τις ἄλλη
Odyssey 1.302	φαίνετο γαιάων, ἀλλʼ οὐρανὸς ἠδὲ θάλασσα,
Odyssey 1.303	δὴ τότε κυανέην νεφέλην ἔστησε Κρονίων
Odyssey 1.304	νηὸς ὕπερ γλαφυρῆς, ἤχλυσε δὲ πόντος ὑπʼ αὐτῆς.
Odyssey 1.305	Ζεὺς δʼ ἄμυδις βρόντησε καὶ ἔμβαλε νηῒ κεραυνόν·
Odyssey 1.306	ἡ δʼ ἐλελίχθη πᾶσα Διὸς πληγεῖσα κεραυνῷ,
Odyssey 1.307	ἐν δὲ θεείου πλῆτο· πέσον δʼ ἐκ νηὸς ἅπαντες.
Odyssey 1.308	οἱ δὲ κορώνῃσιν ἴκελοι περὶ νῆα μέλαιναν
Odyssey 1.309	κύμασιν ἐμφορέοντο· θεὸς δʼ ἀποαίνυτο νόστον.
Odyssey 1.310	αὐτὰρ ἐμοὶ Ζεὺς αὐτός, ἔχοντί περ ἄλγεα θυμῷ,
Odyssey 1.311	ἱστὸν ἀμαιμάκετον νηὸς κυανοπρῴροιο
Odyssey 1.312	ἐν χείρεσσιν ἔθηκεν, ὅπως ἔτι πῆμα φύγοιμι.
Odyssey 1.313	τῷ ῥα περιπλεχθεὶς φερόμην ὀλοοῖς ἀνέμοισιν.
Odyssey 1.314	ἐννῆμαρ φερόμην, δεκάτῃ δέ με νυκτὶ μελαίνῃ
Odyssey 1.315	γαίῃ Θεσπρωτῶν πέλασεν μέγα κῦμα κυλίνδον.
Odyssey 1.316	ἔνθα με Θεσπρωτῶν βασιλεὺς ἐκομίσσατο Φείδων
Odyssey 1.317	ἥρως ἀπριάτην· τοῦ γὰρ φίλος υἱὸς ἐπελθὼν
Odyssey 1.318	αἴθρῳ καὶ καμάτῳ δεδμημένον ἦγεν ἐς οἶκον,
Odyssey 1.319	χειρὸς ἀναστήσας, ὄφρʼ ἵκετο δώματα πατρός·
Odyssey 1.320	ἀμφὶ δέ με χλαῖνάν τε χιτῶνά τε εἵματα ἕσσεν.
Odyssey 1.321	ἔνθʼ Ὀδυσῆος ἐγὼ πυθόμην· κεῖνος γὰρ ἔφασκε
Odyssey 1.322	ξεινίσαι ἠδὲ φιλῆσαι ἰόντʼ ἐς πατρίδα γαῖαν,
Odyssey 1.323	καί μοι κτήματʼ ἔδειξεν ὅσα ξυναγείρατʼ Ὀδυσσεύς,
Odyssey 1.324	χαλκόν τε χρυσόν τε πολύκμητόν τε σίδηρον.
Odyssey 1.325	καί νύ κεν ἐς δεκάτην γενεὴν ἕτερόν γʼ ἔτι βόσκοι·
Odyssey 1.326	τόσσα οἱ ἐν μεγάροις κειμήλια κεῖτο ἄνακτος.
Odyssey 1.327	τὸν δʼ ἐς Δωδώνην φάτο βήμεναι, ὄφρα θεοῖο
Odyssey 1.328	ἐκ δρυὸς ὑψικόμοιο Διὸς βουλὴν ἐπακούσαι,
Odyssey 1.329	ὅππως νοστήσειʼ Ἰθάκης ἐς πίονα δῆμον
Odyssey 1.330	ἤδη δὴν ἀπεών, ἢ ἀμφαδὸν ἦε κρυφηδόν.
Odyssey 1.331	ὤμοσε δὲ πρὸς ἔμʼ αὐτόν, ἀποσπένδων ἐνὶ οἴκῳ,
Odyssey 1.332	νῆα κατειρύσθαι καὶ ἐπαρτέας ἔμμεν ἑταίρους,
Odyssey 1.333	οἳ δή μιν πέμψουσι φίλην ἐς πατρίδα γαῖαν.
Odyssey 1.334	ἀλλʼ ἐμὲ πρὶν ἀπέπεμψε· τύχησε γὰρ ἐρχομένη νηῦς
Odyssey 1.335	ἀνδρῶν Θεσπρωτῶν ἐς Δουλίχιον πολύπυρον.
Odyssey 1.336	ἔνθʼ ὅ γέ μʼ ἠνώγει πέμψαι βασιλῆϊ Ἀκάστῳ
Odyssey 1.337	ἐνδυκέως· τοῖσιν δὲ κακὴ φρεσὶν ἥνδανε βουλὴ
Odyssey 1.338	ἀμφʼ ἐμοί, ὄφρʼ ἔτι πάγχυ δύης ἐπὶ πῆμα γενοίμην.
Odyssey 1.339	ἀλλʼ ὅτε γαίης πολλὸν ἀπέπλω ποντοπόρος νηῦς,
Odyssey 1.340	αὐτίκα δούλιον ἦμαρ ἐμοὶ περιμηχανόωντο.
Odyssey 1.341	ἐκ μέν με χλαῖνάν τε χιτῶνά τε εἵματʼ ἔδυσαν,
Odyssey 1.342	ἀμφὶ δέ μοι ῥάκος ἄλλο κακὸν βάλον ἠδὲ χιτῶνα,
Odyssey 1.343	ῥωγαλέα, τὰ καὶ αὐτὸς ἐν ὀφθαλμοῖσιν ὅρηαι·
Odyssey 1.344	ἑσπέριοι δʼ Ἰθάκης εὐδειέλου ἔργʼ ἀφίκοντο.
Odyssey 1.345	ἔνθʼ ἐμὲ μὲν κατέδησαν ἐϋσσέλμῳ ἐνὶ νηῒ
Odyssey 1.346	ὅπλῳ ἐϋστρεφέϊ στερεῶς, αὐτοὶ δʼ ἀποβάντες
Odyssey 1.347	ἐσσυμένως παρὰ θῖνα θαλάσσης δόρπον ἕλοντο.
Odyssey 1.348	αὐτὰρ ἐμοὶ δεσμὸν μὲν ἀνέγναμψαν θεοὶ αὐτοὶ
Odyssey 1.349	ῥηϊδίως· κεφαλῇ δὲ κατὰ ῥάκος ἀμφικαλύψας,
Odyssey 1.350	ξεστὸν ἐφόλκαιον καταβὰς ἐπέλασσα θαλάσσῃ
Odyssey 1.351	στῆθος, ἔπειτα δὲ χερσὶ διήρεσσʼ ἀμφοτέρῃσι
Odyssey 1.352	νηχόμενος, μάλα δʼ ὦκα θύρηθʼ ἔα ἀμφὶς ἐκείνων.
Odyssey 1.353	ἔνθʼ ἀναβάς, ὅθι τε δρίος ἦν πολυανθέος ὕλης,
Odyssey 1.354	κείμην πεπτηώς. οἱ δὲ μεγάλα στενάχοντες
Odyssey 1.355	φοίτων· ἀλλʼ οὐ γάρ σφιν ἐφαίνετο κέρδιον εἶναι
Odyssey 1.356	μαίεσθαι προτέρω, τοὶ μὲν πάλιν αὖτις ἔβαινον
Odyssey 1.357	νηὸς ἔπι γλαφυρῆς· ἐμὲ δʼ ἔκρυψαν θεοὶ αὐτοὶ
Odyssey 1.358	ῥηϊδίως, καί με σταθμῷ ἐπέλασσαν ἄγοντες
Odyssey 1.359	ἀνδρὸς ἐπισταμένου· ἔτι γάρ νύ μοι αἶσα βιῶναι.
Odyssey 1.360	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.361	ἆ δειλὲ ξείνων, ἦ μοι μάλα θυμὸν ὄρινας
Odyssey 1.362	ταῦτα ἕκαστα λέγων, ὅσα δὴ πάθες ἠδʼ ὅσʼ ἀλήθης.
Odyssey 1.363	ἀλλὰ τά γʼ οὐ κατὰ κόσμον ὀΐομαι, οὐδέ με πείσεις
Odyssey 1.364	εἰπὼν ἀμφʼ Ὀδυσῆϊ· τί σε χρὴ τοῖον ἐόντα
Odyssey 1.365	μαψιδίως ψεύδεσθαι; ἐγὼ δʼ εὖ οἶδα καὶ αὐτὸς
Odyssey 1.366	νόστον ἐμοῖο ἄνακτος, ὅ τʼ ἤχθετο πᾶσι θεοῖσι
Odyssey 1.367	πάγχυ μάλʼ, ὅττι μιν οὔ τι μετὰ Τρώεσσι δάμασσαν
Odyssey 1.368	ἠὲ φίλων ἐν χερσίν, ἐπεὶ πόλεμον τολύπευσε.
Odyssey 1.369	τῷ κέν οἱ τύμβον μὲν ἐποίησαν Παναχαιοί,
Odyssey 1.370	ἠδέ κε καὶ ᾧ παιδὶ μέγα κλέος ἤρατʼ ὀπίσσω
Odyssey 1.371	νῦν δέ μιν ἀκλειῶς ἅρπυιαι ἀνηρείψαντο.
Odyssey 1.372	αὐτὰρ ἐγὼ παρʼ ὕεσσιν ἀπότροπος· οὐδὲ πόλινδε
Odyssey 1.373	ἔρχομαι, εἰ μή πού τι περίφρων Πηνελόπεια
Odyssey 1.374	ἐλθέμεν ὀτρύνῃσιν, ὅτʼ ἀγγελίη ποθὲν ἔλθῃ.
Odyssey 1.375	ἀλλʼ οἱ μὲν τὰ ἕκαστα παρήμενοι ἐξερέουσιν,
Odyssey 1.376	ἠμὲν οἳ ἄχνυνται δὴν οἰχομένοιο ἄνακτος,
Odyssey 1.377	ἠδʼ οἳ χαίρουσιν βίοτον νήποινον ἔδοντες·
Odyssey 1.378	ἀλλʼ ἐμοὶ οὐ φίλον ἐστὶ μεταλλῆσαι καὶ ἐρέσθαι,
Odyssey 1.379	ἐξ οὗ δή μʼ Αἰτωλὸς ἀνὴρ ἐξήπαφε μύθῳ,
Odyssey 1.380	ὅς ῥʼ ἄνδρα κτείνας, πολλὴν ἐπὶ γαῖαν ἀληθείς,
Odyssey 1.381	ἦλθεν ἐμὰ πρὸς δώματʼ· ἐγὼ δέ μιν ἀμφαγάπαζον.
Odyssey 1.382	φῆ δέ μιν ἐν Κρήτεσσι παρʼ Ἰδομενῆϊ ἰδέσθαι
Odyssey 1.383	νῆας ἀκειόμενον, τάς οἱ ξυνέαξαν ἄελλαι·
Odyssey 1.384	καὶ φάτʼ ἐλεύσεσθαι ἢ ἐς θέρος ἢ ἐς ὀπώρην,
Odyssey 1.385	πολλὰ χρήματʼ ἄγοντα, σὺν ἀντιθέοις ἑτάροισι.
Odyssey 1.386	καὶ σύ, γέρον πολυπενθές, ἐπεί σέ μοι ἤγαγε δαίμων,
Odyssey 1.387	μήτε τί μοι ψεύδεσσι χαρίζεο μήτε τι θέλγε·
Odyssey 1.388	οὐ γὰρ τοὔνεκʼ ἐγώ σʼ αἰδέσσομαι οὐδὲ φιλήσω,
Odyssey 1.389	ἀλλὰ Δία ξένιον δείσας αὐτόν τʼ ἐλεαίρων.
Odyssey 1.390	τὸν δʼ ἀπαμειβόμενος προσέφη πολύμητις Ὀδυσσεύς
Odyssey 1.391	ἦ μάλα τίς τοι θυμὸς ἐνὶ στήθεσσιν ἄπιστος,
Odyssey 1.392	οἷόν σʼ οὐδʼ ὀμόσας περ ἐπήγαγον οὐδέ σε πείθω.
Odyssey 1.393	ἀλλʼ ἄγε νῦν ῥήτρην ποιησόμεθʼ· αὐτὰρ ὄπισθε
Odyssey 1.394	μάρτυροι ἀμφοτέροισι θεοί, τοὶ Ὄλυμπον ἔχουσιν.
Odyssey 1.395	εἰ μέν κεν νοστήσῃ ἄναξ τεὸς ἐς τόδε δῶμα,
Odyssey 1.396	ἕσσας με χλαῖνάν τε χιτῶνά τε εἵματα πέμψαι
Odyssey 1.397	Δουλίχιόνδʼ ἰέναι, ὅθι μοι φίλον ἔπλετο θυμῷ·
Odyssey 1.398	εἰ δέ κε μὴ ἔλθῃσιν ἄναξ τεὸς ὡς ἀγορεύω,
Odyssey 1.399	δμῶας ἐπισσεύας βαλέειν μεγάλης κατὰ πέτρης,
Odyssey 1.400	ὄφρα καὶ ἄλλος πτωχὸς ἀλεύεται ἠπεροπεύειν.
Odyssey 1.401	τὸν δʼ ἀπαμειβόμενος προσεφώνεε δῖος ὑφορβός·
Odyssey 1.402	ξεῖνʼ, οὕτω γάρ κέν μοι ἐϋκλείη τʼ ἀρετή τε
Odyssey 1.403	εἴη ἐπʼ ἀνθρώπους ἅμα τʼ αὐτίκα καὶ μετέπειτα,
Odyssey 1.404	ὅς σʼ ἐπεὶ ἐς κλισίην ἄγαγον καὶ ξείνια δῶκα,
Odyssey 1.405	αὖτις δὲ κτείναιμι φίλον τʼ ἀπὸ θυμὸν ἑλοίμην·
Odyssey 1.406	πρόφρων κεν δὴ ἔπειτα Δία Κρονίωνα λιτοίμην.
Odyssey 1.407	νῦν δʼ ὥρη δόρποιο· τάχιστά μοι ἔνδον ἑταῖροι
Odyssey 1.408	εἶεν, ἵνʼ ἐν κλισίῃ λαρὸν τετυκοίμεθα δόρπον.
Odyssey 1.409	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.410	ἀγχίμολον δὲ σύες τε καὶ ἀνέρες ἦλθον ὑφορβοί.
Odyssey 1.411	τὰς μὲν ἄρα ἔρξαν κατὰ ἤθεα κοιμηθῆναι,
Odyssey 1.412	κλαγγὴ δʼ ἄσπετος ὦρτο συῶν αὐλιζομενάων
Odyssey 1.413	αὐτὰρ ὁ οἷς ἑτάροισιν ἐκέκλετο δῖος ὑφορβός·
Odyssey 1.414	ἄξεθʼ ὑῶν τὸν ἄριστον, ἵνα ξείνῳ ἱερεύσω
Odyssey 1.415	τηλεδαπῷ· πρὸς δʼ αὐτοὶ ὀνησόμεθʼ, οἵ περ ὀϊζὺν
Odyssey 1.416	δὴν ἔχομεν πάσχοντες ὑῶν ἕνεκʼ ἀργιοδόντων·
Odyssey 1.417	ἄλλοι δʼ ἡμέτερον κάματον νήποινον ἔδουσιν.
Odyssey 1.418	ὣς ἄρα φωνήσας κέασε ξύλα νηλέϊ χαλκῷ,
Odyssey 1.419	οἱ δʼ ὗν εἰσῆγον μάλα πίονα πενταέτηρον.
Odyssey 1.420	τὸν μὲν ἔπειτʼ ἔστησαν ἐπʼ ἐσχάρῃ· οὐδὲ συβώτης
Odyssey 1.421	λήθετʼ ἄρʼ ἀθανάτων· φρεσὶ γὰρ κέχρητʼ ἀγαθῇσιν·
Odyssey 1.422	ἀλλʼ ὅγʼ ἀπαρχόμενος κεφαλῆς τρίχας ἐν πυρὶ βάλλεν
Odyssey 1.423	ἀργιόδοντος ὑός, καὶ ἐπεύχετο πᾶσι θεοῖσιν
Odyssey 1.424	νοστῆσαι Ὀδυσῆα πολύφρονα ὅνδε δόμονδε.
Odyssey 1.425	κόψε δʼ ἀνασχόμενος σχίζῃ δρυός, ἣν λίπε κείων·
Odyssey 1.426	τὸν δʼ ἔλιπε ψυχή. τοὶ δʼ ἔσφαξάν τε καὶ εὗσαν·
Odyssey 1.427	αἶψα δέ μιν διέχευαν· ὁ δʼ ὠμοθετεῖτο συβώτης,
Odyssey 1.428	πάντων ἀρχόμενος μελέων, ἐς πίονα δημόν,
Odyssey 1.429	καὶ τὰ μὲν ἐν πυρὶ βάλλε, παλύνας ἀλφίτου ἀκτῇ,
Odyssey 1.430	μίστυλλόν τʼ ἄρα τἆλλα καὶ ἀμφʼ ὀβελοῖσιν ἔπειραν,
Odyssey 1.431	ὤπτησάν τε περιφραδέως ἐρύσαντό τε πάντα,
Odyssey 1.432	βάλλον δʼ εἰν ἐλεοῖσιν ἀολλέα· ἂν δὲ συβώτης
Odyssey 1.433	ἵστατο δαιτρεύσων· περὶ γὰρ φρεσὶν αἴσιμα ᾔδη.
Odyssey 1.434	καὶ τὰ μὲν ἕπταχα πάντα διεμοιρᾶτο δαΐζων·
Odyssey 1.435	τὴν μὲν ἴαν νύμφῃσι καὶ Ἑρμῇ, Μαιάδος υἱεῖ,
Odyssey 1.436	θῆκεν ἐπευξάμενος, τὰς δʼ ἄλλας νεῖμεν ἑκάστῳ·
Odyssey 1.437	νώτοισιν δʼ Ὀδυσῆα διηνεκέεσσι γέραιρεν
Odyssey 1.438	ἀργιόδοντος ὑός, κύδαινε δὲ θυμὸν ἄνακτος·
Odyssey 1.439	καί μιν φωνήσας προσέφη πολύμητις Ὀδυσσεύς·
Odyssey 1.440	αἴθʼ οὕτως, Εὔμαιε, φίλος Διὶ πατρὶ γένοιο
Odyssey 1.441	ὡς ἐμοί, ὅττι τε τοῖον ἐόντʼ ἀγαθοῖσι γεραίρεις.
Odyssey 1.442	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.443	ἔσθιε, δαιμόνιε ξείνων, καὶ τέρπεο τοῖσδε,
Odyssey 1.444	οἷα πάρεστι· θεὸς δὲ τὸ μὲν δώσει, τὸ δʼ ἐάσει,
Odyssey 1.445	ὅττι κεν ᾧ θυμῷ ἐθέλῃ· δύναται γὰρ ἅπαντα.
Odyssey 1.446	ἦ ῥα καὶ ἄργματα θῦσε θεοῖς αἰειγενέτῃσι,
Odyssey 1.447	σπείσας δʼ αἴθοπα οἶνον Ὀδυσσῆϊ πτολιπόρθῳ
Odyssey 1.448	ἐν χείρεσσιν ἔθηκεν· ὁ δʼ ἕζετο ᾗ παρὰ μοίρῃ.
Odyssey 1.449	σῖτον δέ σφιν ἔνειμε Μεσαύλιος, ὅν ῥα συβώτης
Odyssey 1.450	αὐτὸς κτήσατο οἶος ἀποιχομένοιο ἄνακτος,
Odyssey 1.451	νόσφιν δεσποίνης καὶ Λαέρταο γέροντος·
Odyssey 1.452	πὰρ δʼ ἄρα μιν Ταφίων πρίατο κτεάτεσσιν ἑοῖσιν.
Odyssey 1.453	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.454	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.455	σῖτον μέν σφιν ἀφεῖλε Μεσαύλιος, οἱ δʼ ἐπὶ κοῖτον
Odyssey 1.456	σίτου καὶ κρειῶν κεκορημένοι ἐσσεύοντο.
Odyssey 1.457	νὺξ δʼ ἄρʼ ἐπῆλθε κακὴ σκοτομήνιος, ὗε δʼ ἄρα Ζεὺς
Odyssey 1.458	πάννυχος, αὐτὰρ ἄη Ζέφυρος μέγας αἰὲν ἔφυδρος.
Odyssey 1.459	τοῖς δʼ Ὀδυσεὺς μετέειπε, συβώτεω πειρητίζων,
Odyssey 1.460	εἴ πώς οἱ ἐκδὺς χλαῖναν πόροι, ἤ τινʼ ἑταίρων
Odyssey 1.461	ἄλλον ἐποτρύνειεν, ἐπεί ἑο κήδετο λίην·
Odyssey 1.462	κέκλυθι νῦν, Εὔμαιε καὶ ἄλλοι πάντες ἑταῖροι,
Odyssey 1.463	εὐξάμενός τι ἔπος ἐρέω· οἶνος γὰρ ἀνώγει
Odyssey 1.464	ἠλεός, ὅς τʼ ἐφέηκε πολύφρονά περ μάλʼ ἀεῖσαι
Odyssey 1.465	καί θʼ ἁπαλὸν γελάσαι, καί τʼ ὀρχήσασθαι ἀνῆκε,
Odyssey 1.466	καί τι ἔπος προέηκεν ὅ περ τʼ ἄρρητον ἄμεινον.
Odyssey 1.467	ἀλλʼ ἐπεὶ οὖν τὸ πρῶτον ἀνέκραγον, οὐκ ἐπικεύσω.
Odyssey 1.468	εἴθʼ ὣς ἡβώοιμι βίη τέ μοι ἔμπεδος εἴη,
Odyssey 1.469	ὡς ὅθʼ ὑπὸ Τροίην λόχον ἤγομεν ἀρτύναντες.
Odyssey 1.470	ἡγείσθην δʼ Ὀδυσεύς τε καὶ Ἀτρεΐδης Μενέλαος,
Odyssey 1.471	τοῖσι δʼ ἅμα τρίτος ἄρχον ἐγών· αὐτοὶ γὰρ ἄνωγον.
Odyssey 1.472	ἀλλʼ ὅτε δή ῥʼ ἱκόμεσθα ποτὶ πτόλιν αἰπύ τε τεῖχος,
Odyssey 1.473	ἡμεῖς μὲν περὶ ἄστυ κατὰ ῥωπήϊα πυκνά,
Odyssey 1.474	ἂν δόνακας καὶ ἕλος, ὑπὸ τεύχεσι πεπτηῶτες
Odyssey 1.475	κείμεθα. νὺξ δʼ ἄρʼ ἐπῆλθε κακὴ Βορέαο πεσόντος,
Odyssey 1.476	πηγυλίς· αὐτὰρ ὕπερθε χιὼν γένετʼ ἠΰτε πάχνη,
Odyssey 1.477	ψυχρή, καὶ σακέεσσι περιτρέφετο κρύσταλλος.
Odyssey 1.478	ἔνθʼ ἄλλοι πάντες χλαίνας ἔχον ἠδὲ χιτῶνας,
Odyssey 1.479	εὗδον δʼ εὔκηλοι, σάκεσιν εἰλυμένοι ὤμους·
Odyssey 1.480	αὐτὰρ ἐγὼ χλαῖναν μὲν ἰὼν ἑτάροισιν ἔλειπον
Odyssey 1.481	ἀφραδίῃς, ἐπεὶ οὐκ ἐφάμην ῥιγωσέμεν ἔμπης,
Odyssey 1.482	ἀλλʼ ἑπόμην σάκος οἶον ἔχων καὶ ζῶμα φαεινόν.
Odyssey 1.483	ἀλλʼ ὅτε δὴ τρίχα νυκτὸς ἔην, μετὰ δʼ ἄστρα βεβήκει,
Odyssey 1.484	καὶ τότʼ ἐγὼν Ὀδυσῆα προσηύδων ἐγγὺς ἐόντα
Odyssey 1.485	ἀγκῶνι νύξας· ὁ δʼ ἄρʼ ἐμμαπέως ὑπάκουσε·
Odyssey 1.486	διογενὲς Λαερτιάδη, πολυμήχανʼ Ὀδυσσεῦ,
Odyssey 1.487	οὔ τοι ἔτι ζωοῖσι μετέσσομαι, ἀλλά με χεῖμα
Odyssey 1.488	δάμναται· οὐ γὰρ ἔχω χλαῖναν· παρά μʼ ἤπαφε δαίμων
Odyssey 1.489	οἰοχίτωνʼ ἔμεναι· νῦν δʼ οὐκέτι φυκτὰ πέλονται.
Odyssey 1.490	ὣς ἐφάμην, ὁ δʼ ἔπειτα νόον σχέθε τόνδʼ ἐνὶ θυμῷ,
Odyssey 1.491	οἷος κεῖνος ἔην βουλευέμεν ἠδὲ μάχεσθαι·
Odyssey 1.492	φθεγξάμενος δʼ ὀλίγῃ ὀπί με πρὸς μῦθον ἔειπε·
Odyssey 1.493	σίγα νῦν, μή τίς σευ Ἀχαιῶν ἄλλος ἀκούσῃ.
Odyssey 1.494	ἦ καὶ ἐπʼ ἀγκῶνος κεφαλὴν σχέθεν εἶπέ τε μῦθον·
Odyssey 1.495	κλῦτε, φίλοι· θεῖός μοι ἐνύπνιον ἦλθεν ὄνειρος.
Odyssey 1.496	λίην γὰρ νηῶν ἑκὰς ἤλθομεν· ἀλλά τις εἴη
Odyssey 1.497	εἰπεῖν Ἀτρεΐδῃ Ἀγαμέμνονι, ποιμένι λαῶν,
Odyssey 1.498	εἰ πλέονας παρὰ ναῦφιν ἐποτρύνειε νέεσθαι.
Odyssey 1.499	ὣς ἔφατʼ, ὦρτο δʼ ἔπειτα Θόας, Ἀνδραίμονος υἱός,
Odyssey 1.500	καρπαλίμως, ἀπὸ δὲ χλαῖναν θέτο φοινικόεσσαν,
Odyssey 1.501	βῆ δὲ θέειν ἐπὶ νῆας· ἐγὼ δʼ ἐνὶ εἵματι κείνου
Odyssey 1.502	κείμην ἀσπασίως, φάε δὲ χρυσόθρονος Ἠώς.
Odyssey 1.503	ὣς νῦν ἡβώοιμι βίη τέ μοι ἔμπεδος εἴη·
Odyssey 1.504	δοίη κέν τις χλαῖναν ἐνὶ σταθμοῖσι συφορβῶν,
Odyssey 1.505	ἀμφότερον, φιλότητι καὶ αἰδοῖ φωτὸς ἑῆος·
Odyssey 1.506	νῦν δέ μʼ ἀτιμάζουσι κακὰ χροῒ εἵματʼ ἔχοντα.
Odyssey 1.507	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.508	ὦ γέρον, αἶνος μέν τοι ἀμύμων, ὃν κατέλεξας,
Odyssey 1.509	οὐδέ τί πω παρὰ μοῖραν ἔπος νηκερδὲς ἔειπες·
Odyssey 1.510	τῷ οὔτʼ ἐσθῆτος δευήσεαι οὔτε τευ ἄλλου,
Odyssey 1.511	ὧν ἐπέοιχʼ ἱκέτην ταλαπείριον ἀντιάσαντα,
Odyssey 1.512	νῦν· ἀτὰρ ἠῶθέν γε τὰ σὰ ῥάκεα δνοπαλίξεις.
Odyssey 1.513	οὐ γὰρ πολλαὶ χλαῖναι ἐπημοιβοί τε χιτῶνες
Odyssey 1.514	ἐνθάδε ἕννυσθαι, μία δʼ οἴη φωτὶ ἑκάστῳ.
Odyssey 1.515	αὐτὰρ ἐπὴν ἔλθῃσιν Ὀδυσσῆος φίλος υἱός,
Odyssey 1.516	αὐτός τοι χλαῖνάν τε χιτῶνά τε εἵματα δώσει,
Odyssey 1.517	πέμψει δʼ ὅππῃ σε κραδίη θυμός τε κελεύει.
Odyssey 1.518	ὣς εἰπὼν ἀνόρουσε, τίθει δʼ ἄρα οἱ πυρὸς ἐγγὺς
Odyssey 1.519	εὐνήν, ἐν δʼ ὀΐων τε καὶ αἰγῶν δέρματʼ ἔβαλλεν.
Odyssey 1.520	ἔνθʼ Ὀδυσεὺς κατέλεκτʼ· ἐπὶ δὲ χλαῖναν βάλεν αὐτῷ
Odyssey 1.521	πυκνὴν καὶ μεγάλην, ἥ οἱ παρεκέσκετʼ ἀμοιβάς,
Odyssey 1.522	ἕννυσθαι ὅτε τις χειμὼν ἔκπαγλος ὄροιτο.
Odyssey 1.523	ὣς ὁ μὲν ἔνθʼ Ὀδυσεὺς κοιμήσατο, τοὶ δὲ παρʼ αὐτὸν
Odyssey 1.524	ἄνδρες κοιμήσαντο νεηνίαι· οὐδὲ συβώτῃ
Odyssey 1.525	ἥνδανεν αὐτόθι κοῖτος, ὑῶν ἄπο κοιμηθῆναι,
Odyssey 1.526	ἀλλʼ ὅ γʼ ἄρʼ ἔξω ἰὼν ὡπλίζετο· χαῖρε δʼ Ὀδυσσεύς,
Odyssey 1.527	ὅττι ῥά οἱ βιότου περικήδετο νόσφιν ἐόντος.
Odyssey 1.528	πρῶτον μὲν ξίφος ὀξὺ περὶ στιβαροῖς βάλετʼ ὤμοις,
Odyssey 1.529	ἀμφὶ δὲ χλαῖναν ἑέσσατʼ ἀλεξάνεμον, μάλα πυκνήν,
Odyssey 1.530	ἂν δὲ νάκην ἕλετʼ αἰγὸς ἐϋτρεφέος μεγάλοιο,
Odyssey 1.531	εἵλετο δʼ ὀξὺν ἄκοντα, κυνῶν ἀλκτῆρα καὶ ἀνδρῶν.
Odyssey 1.532	βῆ δʼ ἴμεναι κείων ὅθι περ σύες ἀργιόδοντες
Odyssey 1.533	πέτρῃ ὕπο γλαφυρῇ εὗδον, Βορέω ὑπʼ ἰωγῇ.
Odyssey 1.1	ἡ δʼ εἰς εὐρύχορον Λακεδαίμονα Παλλὰς Ἀθήνη
Odyssey 1.2	ᾤχετʼ, Ὀδυσσῆος μεγαθύμου φαίδιμον υἱὸν
Odyssey 1.3	νόστου ὑπομνήσουσα καὶ ὀτρυνέουσα νέεσθαι.
Odyssey 1.4	εὗρε δὲ Τηλέμαχον καὶ Νέστορος ἀγλαὸν υἱὸν
Odyssey 1.5	εὕδοντʼ ἐν προδόμῳ Μενελάου κυδαλίμοιο,
Odyssey 1.6	ἦ τοι Νεστορίδην μαλακῷ δεδμημένον ὕπνῳ·
Odyssey 1.7	Τηλέμαχον δʼ οὐχ ὕπνος ἔχε γλυκύς, ἀλλʼ ἐνὶ θυμῷ
Odyssey 1.8	νύκτα διʼ ἀμβροσίην μελεδήματα πατρὸς ἔγειρεν.
Odyssey 1.9	ἀγχοῦ δʼ ἱσταμένη προσέφη γλαυκῶπις Ἀθήνη·
Odyssey 1.10	Τηλέμαχʼ, οὐκέτι καλὰ δόμων ἄπο τῆλʼ ἀλάλησαι,
Odyssey 1.11	κτήματά τε προλιπὼν ἄνδρας τʼ ἐν σοῖσι δόμοισιν
Odyssey 1.12	οὕτω ὑπερφιάλους· μή τοι κατὰ πάντα φάγωσι
Odyssey 1.13	κτήματα δασσάμενοι, σὺ δὲ τηϋσίην ὁδὸν ἔλθῃς.
Odyssey 1.14	ἀλλʼ ὄτρυνε τάχιστα βοὴν ἀγαθὸν Μενέλαον
Odyssey 1.15	πεμπέμεν, ὄφρʼ ἔτι οἴκοι ἀμύμονα μητέρα τέτμῃς.
Odyssey 1.16	ἤδη γάρ ῥα πατήρ τε κασίγνητοί τε κέλονται
Odyssey 1.17	Εὐρυμάχῳ γήμασθαι· ὁ γὰρ περιβάλλει ἅπαντας
Odyssey 1.18	μνηστῆρας δώροισι καὶ ἐξώφελλεν ἔεδνα·
Odyssey 1.19	μή νύ τι σεῦ ἀέκητι δόμων ἐκ κτῆμα φέρηται.
Odyssey 1.20	οἶσθα γὰρ οἷος θυμὸς ἐνὶ στήθεσσι γυναικός·
Odyssey 1.21	κείνου βούλεται οἶκον ὀφέλλειν ὅς κεν ὀπυίῃ,
Odyssey 1.22	παίδων δὲ προτέρων καὶ κουριδίοιο φίλοιο
Odyssey 1.23	οὐκέτι μέμνηται τεθνηκότος οὐδὲ μεταλλᾷ.
Odyssey 1.24	ἀλλὰ σύ γʼ ἐλθὼν αὐτὸς ἐπιτρέψειας ἕκαστα
Odyssey 1.25	δμῳάων ἥ τίς τοι ἀρίστη φαίνεται εἶναι,
Odyssey 1.26	εἰς ὅ κέ τοι φήνωσι θεοὶ κυδρὴν παράκοιτιν.
Odyssey 1.27	ἄλλο δέ τοί τι ἔπος ἐρέω, σὺ δὲ σύνθεο θυμῷ.
Odyssey 1.28	μνηστήρων σʼ ἐπιτηδὲς ἀριστῆες λοχόωσιν
Odyssey 1.29	ἐν πορθμῷ Ἰθάκης τε Σάμοιό τε παιπαλοέσσης.
Odyssey 1.30	ἱέμενοι κτεῖναι, πρὶν πατρίδα γαῖαν ἱκέσθαι.
Odyssey 1.31	ἀλλὰ τά γʼ οὐκ ὀΐω· πρὶν καί τινα γαῖα καθέξει
Odyssey 1.32	ἀνδρῶν μνηστήρων, οἵ τοι βίοτον κατέδουσιν.
Odyssey 1.33	ἀλλὰ ἑκὰς νήσων ἀπέχειν εὐεργέα νῆα,
Odyssey 1.34	νυκτὶ δʼ ὁμῶς πλείειν· πέμψει δέ τοι οὖρον ὄπισθεν
Odyssey 1.35	ἀθανάτων ὅς τίς σε φυλάσσει τε ῥύεταί τε.
Odyssey 1.36	αὐτὰρ ἐπὴν πρώτην ἀκτὴν Ἰθάκης ἀφίκηαι,
Odyssey 1.37	νῆα μὲν ἐς πόλιν ὀτρῦναι καὶ πάντας ἑταίρους,
Odyssey 1.38	αὐτὸς δὲ πρώτιστα συβώτην εἰσαφικέσθαι,
Odyssey 1.39	ὅς τοι ὑῶν ἐπίουρος, ὁμῶς δέ τοι ἤπια οἶδεν.
Odyssey 1.40	ἔνθα δὲ νύκτʼ ἀέσαι· τὸν δʼ ὀτρῦναι πόλιν εἴσω
Odyssey 1.41	ἀγγελίην ἐρέοντα περίφρονι Πηνελοπείῃ,
Odyssey 1.42	οὕνεκά οἱ σῶς ἐσσὶ καὶ ἐκ Πύλου εἰλήλουθας.
Odyssey 1.43	ἡ μὲν ἄρʼ ὣς εἰποῦσʼ ἀπέβη πρὸς μακρὸν Ὄλυμπον,
Odyssey 1.44	αὐτὰρ ὁ Νεστορίδην ἐξ ἡδέος ὕπνου ἔγειρεν
Odyssey 1.45	λὰξ ποδὶ κινήσας, καί μιν πρὸς μῦθον ἔειπεν·
Odyssey 1.46	ἔγρεο, Νεστορίδη Πεισίστρατε, μώνυχας ἵππους
Odyssey 1.47	ζεῦξον ὑφʼ ἅρματʼ ἄγων, ὄφρα πρήσσωμεν ὁδοῖο.
Odyssey 1.48	τὸν δʼ αὖ Νεστορίδης Πεισίστρατος ἀντίον ηὔδα·
Odyssey 1.49	Τηλέμαχʼ, οὔ πως ἔστιν ἐπειγομένους περ ὁδοῖο
Odyssey 1.50	νύκτα διὰ δνοφερὴν ἐλάαν· τάχα δʼ ἔσσεται ἠώς.
Odyssey 1.51	ἀλλὰ μένʼ εἰς ὅ κε δῶρα φέρων ἐπιδίφρια θήῃ
Odyssey 1.52	ἥρως Ἀτρείδης, δουρικλειτὸς Μενέλαος,
Odyssey 1.53	καὶ μύθοις ἀγανοῖσι παραυδήσας ἀποπέμψῃ.
Odyssey 1.54	τοῦ γάρ τε ξεῖνος μιμνήσκεται ἤματα πάντα
Odyssey 1.55	ἀνδρὸς ξεινοδόκου, ὅς κεν φιλότητα παράσχῃ.
Odyssey 1.56	ὣς ἔφατʼ, αὐτίκα δὲ χρυσόθρονος ἤλυθεν Ἠώς.
Odyssey 1.57	ἀγχίμολον δέ σφʼ ἦλθε βοὴν ἀγαθὸς Μενέλαος,
Odyssey 1.58	ἀνστὰς ἐξ εὐνῆς, Ἑλένης πάρα καλλικόμοιο.
Odyssey 1.59	τὸν δʼ ὡς οὖν ἐνόησεν Ὀδυσσῆος φίλος υἱός,
Odyssey 1.60	σπερχόμενός ῥα χιτῶνα περὶ χροῒ σιγαλόεντα
Odyssey 1.61	δῦνεν, καὶ μέγα φᾶρος ἐπὶ στιβαροῖς βάλετʼ ὤμοις
Odyssey 1.62	ἥρως, βῆ δὲ θύραζε, παριστάμενος δὲ προσηύδα
Odyssey 1.63	Τηλέμαχος, φίλος υἱὸς Ὀδυσσῆος θείοιο·
Odyssey 1.64	Ἀτρεΐδη Μενέλαε διοτρεφές, ὄρχαμε λαῶν,
Odyssey 1.65	ἤδη νῦν μʼ ἀπόπεμπε φίλην ἐς πατρίδα γαῖαν·
Odyssey 1.66	ἤδη γάρ μοι θυμὸς ἐέλδεται οἴκαδʼ ἱκέσθαι.
Odyssey 1.67	τὸν δʼ ἠμείβετʼ ἔπειτα βοὴν ἀγαθὸς Μενέλαος·
Odyssey 1.68	Τηλέμαχʼ, οὔ τί σʼ ἐγώ γε πολὺν χρόνον ἐνθάδʼ ἐρύξω
Odyssey 1.69	ἱέμενον νόστοιο· νεμεσσῶμαι δὲ καὶ ἄλλῳ
Odyssey 1.70	ἀνδρὶ ξεινοδόκῳ, ὅς κʼ ἔξοχα μὲν φιλέῃσιν,
Odyssey 1.71	ἔξοχα δʼ ἐχθαίρῃσιν· ἀμείνω δʼ αἴσιμα πάντα.
Odyssey 1.72	ἶσόν τοι κακόν ἐσθʼ, ὅς τʼ οὐκ ἐθέλοντα νέεσθαι
Odyssey 1.73	ξεῖνον ἐποτρύνει καὶ ὃς ἐσσύμενον κατερύκει.
Odyssey 1.74	χρὴ ξεῖνον παρεόντα φιλεῖν, ἐθέλοντα δὲ πέμπειν.
Odyssey 1.75	ἀλλὰ μένʼ εἰς ὅ κε δῶρα φέρων ἐπιδίφρια θείω
Odyssey 1.76	καλά, σὺ δʼ ὀφθαλμοῖσιν ἴδῃς, εἴπω δὲ γυναιξὶ
Odyssey 1.77	δεῖπνον ἐνὶ μεγάροις τετυκεῖν ἅλις ἔνδον ἐόντων.
Odyssey 1.78	ἀμφότερον, κῦδός τε καὶ ἀγλαΐη καὶ ὄνειαρ,
Odyssey 1.79	δειπνήσαντας ἴμεν πολλὴν ἐπʼ ἀπείρονα γαῖαν.
Odyssey 1.80	εἰ δʼ ἐθέλεις τραφθῆναι ἀνʼ Ἑλλάδα καὶ μέσον Ἄργος,
Odyssey 1.81	ὄφρα τοι αὐτὸς ἕπωμαι, ὑποζεύξω δέ τοι ἵππους,
Odyssey 1.82	ἄστεα δʼ ἀνθρώπων ἡγήσομαι· οὐδέ τις ἡμέας
Odyssey 1.83	αὔτως ἀππέμψει, δώσει δέ τι ἕν γε φέρεσθαι,
Odyssey 1.84	ἠέ τινα τριπόδων εὐχάλκων ἠὲ λεβήτων,
Odyssey 1.85	ἠὲ δύʼ ἡμιόνους ἠὲ χρύσειον ἄλεισον.
Odyssey 1.86	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.87	Ἀτρεΐδη Μενέλαε διοτρεφές, ὄρχαμε λαῶν,
Odyssey 1.88	βούλομαι ἤδη νεῖσθαι ἐφʼ ἡμέτερʼ· οὐ γὰρ ὄπισθεν
Odyssey 1.89	οὖρον ἰὼν κατέλειπον ἐπὶ κτεάτεσσιν ἐμοῖσιν·
Odyssey 1.90	μὴ πατέρʼ ἀντίθεον διζήμενος αὐτὸς ὄλωμαι,
Odyssey 1.91	ἤ τί μοι ἐκ μεγάρων κειμήλιον ἐσθλὸν ὄληται.
Odyssey 1.92	αὐτὰρ ἐπεὶ τό γʼ ἄκουσε βοὴν ἀγαθὸς Μενέλαος,
Odyssey 1.93	αὐτίκʼ ἄρʼ ᾗ ἀλόχῳ ἠδὲ δμῳῇσι κέλευσε
Odyssey 1.94	δεῖπνον ἐνὶ μεγάροις τετυκεῖν ἅλις ἔνδον ἐόντων.
Odyssey 1.95	ἀγχίμολον δέ οἱ ἦλθε Βοηθοΐδης Ἐτεωνεύς,
Odyssey 1.96	ἀνστὰς ἐξ εὐνῆς, ἐπεὶ οὐ πολὺ ναῖεν ἀπʼ αὐτοῦ·
Odyssey 1.97	τὸν πῦρ κῆαι ἄνωγε βοὴν ἀγαθὸς Μενέλαος
Odyssey 1.98	ὀπτῆσαί τε κρεῶν· ὁ δʼ ἄρʼ οὐκ ἀπίθησεν ἀκούσας.
Odyssey 1.99	αὐτὸς δʼ ἐς θάλαμον κατεβήσετο κηώεντα,
Odyssey 1.100	οὐκ οἶος, ἅμα τῷ γʼ Ἑλένη κίε καὶ Μεγαπένθης.
Odyssey 1.101	ἀλλʼ ὅτε δή ῥʼ ἵκανον ὅθι κειμήλια κεῖτο,
Odyssey 1.102	Ἀτρεΐδης μὲν ἔπειτα δέπας λάβεν ἀμφικύπελλον,
Odyssey 1.103	υἱὸν δὲ κρητῆρα φέρειν Μεγαπένθεʼ ἄνωγεν
Odyssey 1.104	ἀργύρεον· Ἑλένη δὲ παρίστατο φωριαμοῖσιν,
Odyssey 1.105	ἔνθʼ ἔσαν οἱ πέπλοι παμποίκιλοι, οὓς κάμεν αὐτή.
Odyssey 1.106	τῶν ἕνʼ ἀειραμένη Ἑλένη φέρε, δῖα γυναικῶν,
Odyssey 1.107	ὃς κάλλιστος ἔην ποικίλμασιν ἠδὲ μέγιστος,
Odyssey 1.108	ἀστὴρ δʼ ὣς ἀπέλαμπεν· ἔκειτο δὲ νείατος ἄλλων.
Odyssey 1.109	βὰν δʼ ἰέναι προτέρω διὰ δώματος, ἧος ἵκοντο
Odyssey 1.110	Τηλέμαχον· τὸν δὲ προσέφη ξανθὸς Μενέλαος·
Odyssey 1.111	Τηλέμαχʼ, ἦ τοι νόστον, ὅπως φρεσὶ σῇσι μενοινᾷς,
Odyssey 1.112	ὥς τοι Ζεὺς τελέσειεν, ἐρίγδουπος πόσις Ἥρης.
Odyssey 1.113	δώρων δʼ, ὅσσʼ ἐν ἐμῷ οἴκῳ κειμήλια κεῖται,
Odyssey 1.114	δώσω ὃ κάλλιστον καὶ τιμηέστατόν ἐστι.
Odyssey 1.115	δώσω τοι κρητῆρα τετυγμένον· ἀργύρεος δὲ
Odyssey 1.116	ἐστὶν ἅπας, χρυσῷ δʼ ἐπὶ χείλεα κεκράανται,
Odyssey 1.117	ἔργον δʼ Ἡφαίστοιο· πόρεν δέ ἑ Φαίδιμος ἥρως,
Odyssey 1.118	Σιδονίων βασιλεύς, ὅθʼ ἑὸς δόμος ἀμφεκάλυψε
Odyssey 1.119	κεῖσέ με νοστήσαντα· τεῒν δʼ ἐθέλω τόδʼ ὀπάσσαι.
Odyssey 1.120	ὣς εἰπὼν ἐν χειρὶ τίθει δέπας ἀμφικύπελλον
Odyssey 1.121	ἥρως Ἀτρεΐδης· ὁ δʼ ἄρα κρητῆρα φαεινὸν
Odyssey 1.122	θῆκʼ αὐτοῦ προπάροιθε φέρων κρατερὸς Μεγαπένθης,
Odyssey 1.123	ἀργύρεον· Ἑλένη δὲ παρίστατο καλλιπάρῃος
Odyssey 1.124	πέπλον ἔχουσʼ ἐν χερσίν, ἔπος τʼ ἔφατʼ ἔκ τʼ ὀνόμαζε·
Odyssey 1.125	δῶρόν τοι καὶ ἐγώ, τέκνον φίλε, τοῦτο δίδωμι,
Odyssey 1.126	μνῆμʼ Ἑλένης χειρῶν, πολυηράτου ἐς γάμου ὥρην,
Odyssey 1.127	σῇ ἀλόχῳ φορέειν· τῆος δὲ φίλῃ παρὰ μητρὶ
Odyssey 1.128	κείσθω ἐνὶ μεγάρῳ. σὺ δέ μοι χαίρων ἀφίκοιο
Odyssey 1.129	οἶκον ἐϋκτίμενον καὶ σὴν ἐς πατρίδα γαῖαν.
Odyssey 1.130	ὣς εἰποῦσʼ ἐν χερσὶ τίθει, ὁ δʼ ἐδέξατο χαίρων.
Odyssey 1.131	καὶ τὰ μὲν ἐς πείρινθα τίθει Πεισίστρατος ἥρως
Odyssey 1.132	δεξάμενος, καὶ πάντα ἑῷ θηήσατο θυμῷ·
Odyssey 1.133	τοὺς δʼ ἦγε πρὸς δῶμα κάρη ξανθὸς Μενέλαος.
Odyssey 1.134	ἑζέσθην δʼ ἄρʼ ἔπειτα κατὰ κλισμούς τε θρόνους τε.
Odyssey 1.135	χέρνιβα δʼ ἀμφίπολος προχόῳ ἐπέχευε φέρουσα
Odyssey 1.136	καλῇ χρυσείῃ, ὑπὲρ ἀργυρέοιο λέβητος,
Odyssey 1.137	νίψασθαι· παρὰ δὲ ξεστὴν ἐτάνυσσε τράπεζαν.
Odyssey 1.138	σῖτον δʼ αἰδοίη ταμίη παρέθηκε φέρουσα·
Odyssey 1.139	εἴδατα πόλλʼ ἐπιθεῖσα, χαριζομένη παρεόντων·
Odyssey 1.140	πὰρ δὲ Βοηθοΐδης κρέα δαίετο καὶ νέμε μοίρας·
Odyssey 1.141	οἰνοχόει δʼ υἱὸς Μενελάου κυδαλίμοιο.
Odyssey 1.142	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.143	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.144	δὴ τότε Τηλέμαχος καὶ Νέστορος ἀγλαὸς υἱὸς
Odyssey 1.145	ἵππους τε ζεύγνυντʼ ἀνά θʼ ἅρματα ποικίλʼ ἔβαινον,
Odyssey 1.146	ἐκ δʼ ἔλασαν προθύροιο καὶ αἰθούσης ἐριδούπου.
Odyssey 1.147	τοὺς δὲ μετʼ Ἀτρεΐδης ἔκιε ξανθὸς Μενέλαος,
Odyssey 1.148	οἶνον ἔχων ἐν χειρὶ μελίφρονα δεξιτερῆφι,
Odyssey 1.149	ἐν δέπαϊ χρυσέῳ, ὄφρα λείψαντε κιοίτην.
Odyssey 1.150	στῆ δʼ ἵππων προπάροιθε, δεδισκόμενος δὲ προσηύδα·
Odyssey 1.151	χαίρετον, ὦ κούρω, καὶ Νέστορι ποιμένι λαῶν
Odyssey 1.152	εἰπεῖν· ἦ γὰρ ἐμοί γε πατὴρ ὣς ἤπιος ἦεν,
Odyssey 1.153	ἧος ἐνὶ Τροίῃ πολεμίζομεν υἷες Ἀχαιῶν.
Odyssey 1.154	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.155	καὶ λίην κείνῳ γε, διοτρεφές, ὡς ἀγορεύεις,
Odyssey 1.156	πάντα τάδʼ ἐλθόντες καταλέξομεν· αἲ γὰρ ἐγὼν ὣς
Odyssey 1.157	νοστήσας Ἰθάκηνδε, κιχὼν Ὀδυσῆʼ ἐνὶ οἴκῳ,
Odyssey 1.158	εἴποιμʼ ὡς παρὰ σεῖο τυχὼν φιλότητος ἁπάσης
Odyssey 1.159	ἔρχομαι, αὐτὰρ ἄγω κειμήλια πολλὰ καὶ ἐσθλά.
Odyssey 1.160	ὣς ἄρα οἱ εἰπόντι ἐπέπτατο δεξιὸς ὄρνις,
Odyssey 1.161	αἰετὸς ἀργὴν χῆνα φέρων ὀνύχεσσι πέλωρον,
Odyssey 1.162	ἥμερον ἐξ αὐλῆς· οἱ δʼ ἰΰζοντες ἕποντο
Odyssey 1.163	ἀνέρες ἠδὲ γυναῖκες· ὁ δέ σφισιν ἐγγύθεν ἐλθὼν
Odyssey 1.164	δεξιὸς ἤϊξε πρόσθʼ ἵππων· οἱ δὲ ἰδόντες
Odyssey 1.165	γήθησαν, καὶ πᾶσιν ἐνὶ φρεσὶ θυμὸς ἰάνθη.
Odyssey 1.166	τοῖσι δὲ Νεστορίδης Πεισίστρατος ἤρχετο μύθων·
Odyssey 1.167	φράζεο δή, Μενέλαε διοτρεφές, ὄρχαμε λαῶν,
Odyssey 1.168	ἢ νῶϊν τόδʼ ἔφηνε θεὸς τέρας ἦε σοὶ αὐτῷ.
Odyssey 1.169	ὣς φάτο, μερμήριξε δʼ ἀρηΐφιλος Μενέλαος,
Odyssey 1.170	ὅππως οἱ κατὰ μοῖραν ὑποκρίναιτο νοήσας.
Odyssey 1.171	τὸν δʼ Ἑλένη τανύπεπλος ὑποφθαμένη φάτο μῦθον·
Odyssey 1.172	κλῦτέ μευ· αὐτὰρ ἐγὼ μαντεύσομαι, ὡς ἐνὶ θυμῷ
Odyssey 1.173	ἀθάνατοι βάλλουσι καὶ ὡς τελέεσθαι ὀΐω.
Odyssey 1.174	ὡς ὅδε χῆνʼ ἥρπαξʼ ἀτιταλλομένην ἐνὶ οἴκῳ
Odyssey 1.175	ἐλθὼν ἐξ ὄρεος, ὅθι οἱ γενεή τε τόκος τε,
Odyssey 1.176	ὣς Ὀδυσεὺς κακὰ πολλὰ παθὼν καὶ πόλλʼ ἐπαληθεὶς
Odyssey 1.177	οἴκαδε νοστήσει καὶ τίσεται· ἠὲ καὶ ἤδη
Odyssey 1.178	οἴκοι, ἀτὰρ μνηστῆρσι κακὸν πάντεσσι φυτεύει.
Odyssey 1.179	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.180	οὕτω νῦν Ζεὺς θείη, ἐρίγδουπος πόσις Ἥρης·
Odyssey 1.181	τῷ κέν τοι καὶ κεῖθι θεῷ ὣς εὐχετοῴμην.
Odyssey 1.182	ἦ καὶ ἐφʼ ἵπποιϊν μάστιν βάλεν· οἱ δὲ μάλʼ ὦκα
Odyssey 1.183	ἤϊξαν πεδίονδε διὰ πτόλιος μεμαῶτες.
Odyssey 1.184	οἱ δὲ πανημέριοι σεῖον ζυγὸν ἀμφὶς ἔχοντες.
Odyssey 1.185	δύσετό τʼ ἠέλιος σκιόωντό τε πᾶσαι ἀγυιαί·
Odyssey 1.186	ἐς Φηρὰς δʼ ἵκοντο Διοκλῆος ποτὶ δῶμα,
Odyssey 1.187	υἱέος Ὀρτιλόχοιο, τὸν Ἀλφειὸς τέκε παῖδα.
Odyssey 1.188	ἔνθα δὲ νύκτʼ ἄεσαν ὁ δὲ τοῖς πὰρ ξείνια θῆκεν.
Odyssey 1.189	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.190	ἵππους τε ζεύγνυντʼ ἀνά θʼ ἅρματα ποικίλʼ ἔβαινον,
Odyssey 1.191	ἐκ δʼ ἔλασαν προθύροιο καὶ αἰθούσης ἐριδούπου·
Odyssey 1.192	μάστιξεν δʼ ἐλάαν, τὼ δʼ οὐκ ἄκοντε πετέσθην.
Odyssey 1.193	αἶψα δʼ ἔπειθʼ ἵκοντο Πύλου αἰπὺ πτολίεθρον·
Odyssey 1.194	καὶ τότε Τηλέμαχος προσεφώνεε Νέστορος υἱόν·
Odyssey 1.195	Νεστορίδη, πῶς κέν μοι ὑποσχόμενος τελέσειας
Odyssey 1.196	μῦθον ἐμόν; ξεῖνοι δὲ διαμπερὲς εὐχόμεθʼ εἶναι
Odyssey 1.197	ἐκ πατέρων φιλότητος, ἀτὰρ καὶ ὁμήλικές εἰμεν·
Odyssey 1.198	ἥδε δʼ ὁδὸς καὶ μᾶλλον ὁμοφροσύνῃσιν ἐνήσει.
Odyssey 1.199	μή με παρὲξ ἄγε νῆα, διοτρεφές, ἀλλὰ λίπʼ αὐτοῦ,
Odyssey 1.200	μή μʼ ὁ γέρων ἀέκοντα κατάσχῃ ᾧ ἐνὶ οἴκῳ
Odyssey 1.201	ἱέμενος φιλέειν· ἐμὲ δὲ χρεὼ θᾶσσον ἱκέσθαι.
Odyssey 1.202	ὣς φάτο, Νεστορίδης δʼ ἄρʼ ἑῷ συμφράσσατο θυμῷ,
Odyssey 1.203	ὅππως οἱ κατὰ μοῖραν ὑποσχόμενος τελέσειεν.
Odyssey 1.204	ὧδε δέ οἱ φρονέοντι δοάσσατο κέρδιον εἶναι·
Odyssey 1.205	στρέψʼ ἵππους ἐπὶ νῆα θοὴν καὶ θῖνα θαλάσσης,
Odyssey 1.206	νηῒ δʼ ἐνὶ πρύμνῃ ἐξαίνυτο κάλλιμα δῶρα,
Odyssey 1.207	ἐσθῆτα χρυσόν τε, τά οἱ Μενέλαος ἔδωκε·
Odyssey 1.208	καί μιν ἐποτρύνων ἔπεα πτερόεντα προσηύδα·
Odyssey 1.209	σπουδῇ νῦν ἀνάβαινε κέλευέ τε πάντας ἑταίρους,
Odyssey 1.210	πρὶν ἐμὲ οἴκαδʼ ἱκέσθαι ἀπαγγεῖλαί τε γέροντι.
Odyssey 1.211	εὖ γὰρ ἐγὼ τόδε οἶδα κατὰ φρένα καὶ κατὰ θυμόν·
Odyssey 1.212	οἷος κείνου θυμὸς ὑπέρβιος, οὔ σε μεθήσει,
Odyssey 1.213	ἀλλʼ αὐτὸς καλέων δεῦρʼ εἴσεται, οὐδέ ἕ φημι
Odyssey 1.214	ἂψ ἰέναι κενεόν· μάλα γὰρ κεχολώσεται ἔμπης.
Odyssey 1.215	ὣς ἄρα φωνήσας ἔλασεν καλλίτριχας ἵππους
Odyssey 1.216	ἂψ Πυλίων εἰς ἄστυ, θοῶς δʼ ἄρα δώμαθʼ ἵκανε.
Odyssey 1.217	Τηλέμαχος δʼ ἑτάροισιν ἐποτρύνων ἐκέλευσεν·
Odyssey 1.218	ἐγκοσμεῖτε τὰ τεύχεʼ, ἑταῖροι, νηῒ μελαίνῃ,
Odyssey 1.219	αὐτοί τʼ ἀμβαίνωμεν, ἵνα πρήσσωμεν ὁδοῖο.
Odyssey 1.220	ὣς ἔφαθʼ, οἱ δʼ ἄρα τοῦ μάλα μὲν κλύον ἠδʼ ἐπίθοντο,
Odyssey 1.221	αἶψα δʼ ἄρʼ εἴσβαινον καὶ ἐπὶ κληῗσι καθῖζον.
Odyssey 1.222	ἦ τοι ὁ μὲν τὰ πονεῖτο καὶ εὔχετο, θῦε δʼ Ἀθήνῃ
Odyssey 1.223	νηῒ πάρα πρυμνῇ· σχεδόθεν δέ οἱ ἤλυθεν ἀνὴρ
Odyssey 1.224	τηλεδαπός, φεύγων ἐξ Ἄργεος ἄνδρα κατακτάς,
Odyssey 1.225	μάντις· ἀτὰρ γενεήν γε Μελάμποδος ἔκγονος ἦεν,
Odyssey 1.226	ὃς πρὶν μέν ποτʼ ἔναιε Πύλῳ ἔνι, μητέρι μήλων,
Odyssey 1.227	ἀφνειὸς Πυλίοισι μέγʼ ἔξοχα δώματα ναίων·
Odyssey 1.228	δὴ τότε γʼ ἄλλων δῆμον ἀφίκετο, πατρίδα φεύγων
Odyssey 1.229	Νηλέα τε μεγάθυμον, ἀγαυότατον ζωόντων,
Odyssey 1.230	ὅς οἱ χρήματα πολλὰ τελεσφόρον εἰς ἐνιαυτὸν
Odyssey 1.231	εἶχε βίῃ. ὁ δὲ τῆος ἐνὶ μεγάροις Φυλάκοιο
Odyssey 1.232	δεσμῷ ἐν ἀργαλέῳ δέδετο, κρατέρʼ ἄλγεα πάσχων
Odyssey 1.233	εἵνεκα Νηλῆος κούρης ἄτης τε βαρείης,
Odyssey 1.234	τήν οἱ ἐπὶ φρεσὶ θῆκε θεὰ δασπλῆτις Ἐρινύς.
Odyssey 1.235	ἀλλʼ ὁ μὲν ἔκφυγε κῆρα καὶ ἤλασε βοῦς ἐριμύκους
Odyssey 1.236	ἐς Πύλον ἐκ Φυλάκης καὶ ἐτίσατο ἔργον ἀεικὲς
Odyssey 1.237	ἀντίθεον Νηλῆα, κασιγνήτῳ δὲ γυναῖκα
Odyssey 1.238	ἠγάγετο πρὸς δώμαθʼ. ὁ δʼ ἄλλων ἵκετο δῆμον,
Odyssey 1.239	Ἄργος ἐς ἱππόβοτον· τόθι γάρ νύ οἱ αἴσιμον ἦεν
Odyssey 1.240	ναιέμεναι πολλοῖσιν ἀνάσσοντʼ Ἀργείοισιν
Odyssey 1.241	ἔνθα δʼ ἔγημε γυναῖκα καὶ ὑψερεφὲς θέτο δῶμα,
Odyssey 1.242	γείνατο δʼ Ἀντιφάτην καὶ Μάντιον, υἷε κραταιώ.
Odyssey 1.243	Ἀντιφάτης μὲν ἔτικτεν Ὀϊκλῆα μεγάθυμον,
Odyssey 1.244	αὐτὰρ Ὀϊκλείης λαοσσόον Ἀμφιάραον,
Odyssey 1.245	ὃν περὶ κῆρι φίλει Ζεύς τʼ αἰγίοχος καὶ Ἀπόλλων
Odyssey 1.246	παντοίην φιλότητʼ· οὐδʼ ἵκετο γήραος οὐδόν,
Odyssey 1.247	ἀλλʼ ὄλετʼ ἐν Θήβῃσι γυναίων εἵνεκα δώρων.
Odyssey 1.248	τοῦ δʼ υἱεῖς ἐγένοντʼ Ἀλκμαίων Ἀμφίλοχός τε.
Odyssey 1.249	Μάντιος αὖ τέκετο Πολυφείδεά τε Κλεῖτόν τε·
Odyssey 1.250	ἀλλʼ ἦ τοι Κλεῖτον χρυσόθρονος ἥρπασεν Ἠὼς
Odyssey 1.251	κάλλεος εἵνεκα οἷο, ἵνʼ ἀθανάτοισι μετείη·
Odyssey 1.252	αὐτὰρ ὑπέρθυμον Πολυφείδεα μάντιν Ἀπόλλων
Odyssey 1.253	θῆκε βροτῶν ὄχʼ ἄριστον, ἐπεὶ θάνεν Ἀμφιάραος·
Odyssey 1.254	ὅς ῥʼ Ὑπερησίηνδʼ ἀπενάσσατο πατρὶ χολωθείς,
Odyssey 1.255	ἔνθʼ ὅ γε ναιετάων μαντεύετο πᾶσι βροτοῖσιν.
Odyssey 1.256	τοῦ μὲν ἄρʼ υἱὸς ἐπῆλθε, Θεοκλύμενος δʼ ὄνομʼ ἦεν,
Odyssey 1.257	ὃς τότε Τηλεμάχου πέλας ἵστατο· τὸν δʼ ἐκίχανεν
Odyssey 1.258	σπένδοντʼ εὐχόμενόν τε θοῇ παρὰ νηῒ μελαίνῃ,
Odyssey 1.259	καί μιν φωνήσας ἔπεα πτερόεντα προσηύδα·
Odyssey 1.260	ὦ φίλʼ, ἐπεί σε θύοντα κιχάνω τῷδʼ ἐνὶ χώρῳ,
Odyssey 1.261	λίσσομʼ ὑπὲρ θυέων καὶ δαίμονος, αὐτὰρ ἔπειτα
Odyssey 1.262	σῆς τʼ αὐτοῦ κεφαλῆς καὶ ἑταίρων, οἵ τοι ἕπονται,
Odyssey 1.263	εἰπέ μοι εἰρομένῳ νημερτέα μηδʼ ἐπικεύσῃς·
Odyssey 1.264	τίς πόθεν εἶς ἀνδρῶν; πόθι τοι πόλις ἠδὲ τοκῆες;
Odyssey 1.265	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.266	τοιγὰρ ἐγώ τοι, ξεῖνε, μάλʼ ἀτρεκέως ἀγορεύσω.
Odyssey 1.267	ἐξ Ἰθάκης γένος εἰμί, πατὴρ δέ μοί ἐστιν Ὀδυσσεύς,
Odyssey 1.268	εἴ ποτʼ ἔην· νῦν δʼ ἤδη ἀπέφθιτο λυγρῷ ὀλέθρῳ.
Odyssey 1.269	τοὔνεκα νῦν ἑτάρους τε λαβὼν καὶ νῆα μέλαιναν
Odyssey 1.270	ἦλθον πευσόμενος πατρὸς δὴν οἰχομένοιο.
Odyssey 1.271	τὸν δʼ αὖτε προσέειπε Θεοκλύμενος θεοειδής·
Odyssey 1.272	οὕτω τοι καὶ ἐγὼν ἐκ πατρίδος, ἄνδρα κατακτὰς
Odyssey 1.273	ἔμφυλον· πολλοὶ δὲ κασίγνητοί τε ἔται τε
Odyssey 1.274	Ἄργος ἀνʼ ἱππόβοτον, μέγα δὲ κρατέουσιν Ἀχαιῶν.
Odyssey 1.275	τῶν ὑπαλευάμενος θάνατον καὶ κῆρα μέλαιναν
Odyssey 1.276	φεύγω, ἐπεί νύ μοι αἶσα κατʼ ἀνθρώπους ἀλάλησθαι.
Odyssey 1.277	ἀλλά με νηὸς ἔφεσσαι, ἐπεί σε φυγὼν ἱκέτευσα,
Odyssey 1.278	μή με κατακτείνωσι· διωκέμεναι γὰρ ὀΐω.
Odyssey 1.279	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.280	οὐ μὲν δή σʼ ἐθέλοντά γʼ ἀπώσω νηὸς ἐΐσης,
Odyssey 1.281	ἀλλʼ ἕπευ· αὐτὰρ κεῖθι φιλήσεαι, οἷά κʼ ἔχωμεν.
Odyssey 1.282	ὣς ἄρα φωνήσας οἱ ἐδέξατο χάλκεον ἔγχος,
Odyssey 1.283	καὶ τό γʼ ἐπʼ ἰκριόφιν τάνυσεν νεὸς ἀμφιελίσσης·
Odyssey 1.284	ἂν δὲ καὶ αὐτὸς νηὸς ἐβήσετο ποντοπόροιο.
Odyssey 1.285	ἐν πρύμνῃ δʼ ἄρʼ ἔπειτα καθέζετο, πὰρ δὲ οἷ αὐτῷ
Odyssey 1.286	εἷσε Θεοκλύμενον· τοὶ δὲ πρυμνήσιʼ ἔλυσαν.
Odyssey 1.287	Τηλέμαχος δʼ ἑτάροισιν ἐποτρύνας ἐκέλευσεν
Odyssey 1.288	ὅπλων ἅπτεσθαι· τοὶ δʼ ἐσσυμένως ἐπίθοντο.
Odyssey 1.289	ἱστὸν δʼ εἰλάτινον κοίλης ἔντοσθε μεσόδμης
Odyssey 1.290	στῆσαν ἀείραντες, κατὰ δὲ προτόνοισιν ἔδησαν,
Odyssey 1.291	ἕλκον δʼ ἱστία λευκὰ ἐϋστρέπτοισι βοεῦσι.
Odyssey 1.292	τοῖσιν δʼ ἴκμενον οὖρον ἵει γλαυκῶπις Ἀθήνη,
Odyssey 1.293	λάβρον ἐπαιγίζοντα διʼ αἰθέρος, ὄφρα τάχιστα
Odyssey 1.294	νηῦς ἀνύσειε θέουσα θαλάσσης ἁλμυρὸν ὕδωρ.
Odyssey 1.295	βὰν δὲ παρὰ Κρουνοὺς καὶ Χαλκίδα καλλιρέεθρον.
Odyssey 1.296	δύσετό τʼ ἠέλιος σκιόωντό τε πᾶσαι ἀγυιαί·
Odyssey 1.297	ἡ δὲ Φεὰς ἐπέβαλλεν ἐπειγομένη Διὸς οὔρῳ
Odyssey 1.298	ἠδὲ παρʼ Ἤλιδα δῖαν, ὅθι κρατέουσιν Ἐπειοί.
Odyssey 1.299	ἔνθεν δʼ αὖ νήσοισιν ἐπιπροέηκε θοῇσιν,
Odyssey 1.300	ὁρμαίνων ἤ κεν θάνατον φύγοι ἦ κεν ἁλώῃ.
Odyssey 1.301	τὼ δʼ αὖτʼ ἐν κλισίῃ Ὀδυσεὺς καὶ δῖος ὑφορβὸς
Odyssey 1.302	δορπείτην· παρὰ δέ σφιν ἐδόρπεον ἀνέρες ἄλλοι.
Odyssey 1.303	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.304	τοῖς δʼ Ὀδυσεὺς μετέειπε, συβώτεω πειρητίζων,
Odyssey 1.305	ἤ μιν ἔτʼ ἐνδυκέως φιλέοι μεῖναί τε κελεύοι
Odyssey 1.306	αὐτοῦ ἐνὶ σταθμῷ, ἦ ὀτρύνειε πόλινδε·
Odyssey 1.307	κέκλυθι νῦν, Εὔμαιε, καὶ ἄλλοι πάντες ἑταῖροι·
Odyssey 1.308	ἠῶθεν προτὶ ἄστυ λιλαίομαι ἀπονέεσθαι
Odyssey 1.309	πτωχεύσων, ἵνα μή σε κατατρύχω καὶ ἑταίρους.
Odyssey 1.310	ἀλλά μοι εὖ θʼ ὑπόθευ καὶ ἅμʼ ἡγεμόνʼ ἐσθλὸν ὄπασσον
Odyssey 1.311	ὅς κέ με κεῖσʼ ἀγάγῃ· κατὰ δὲ πτόλιν αὐτὸς ἀνάγκῃ
Odyssey 1.312	πλάγξομαι, αἴ κέν τις κοτύλην καὶ πύρνον ὀρέξῃ.
Odyssey 1.313	καί κʼ ἐλθὼν πρὸς δώματʼ Ὀδυσσῆος θείοιο
Odyssey 1.314	ἀγγελίην εἴποιμι περίφρονι Πηνελοπείῃ,
Odyssey 1.315	καί κε μνηστήρεσσιν ὑπερφιάλοισι μιγείην,
Odyssey 1.316	εἴ μοι δεῖπνον δοῖεν ὀνείατα μυρίʼ ἔχοντες.
Odyssey 1.317	αἶψά κεν εὖ δρώοιμι μετὰ σφίσιν ἅσσʼ ἐθέλοιεν.
Odyssey 1.318	ἐκ γάρ τοι ἐρέω, σὺ δὲ σύνθεο καί μευ ἄκουσον·
Odyssey 1.319	Ἑρμείαο ἕκητι διακτόρου, ὅς ῥά τε πάντων
Odyssey 1.320	ἀνθρώπων ἔργοισι χάριν καὶ κῦδος ὀπάζει,
Odyssey 1.321	δρηστοσύνῃ οὐκ ἄν μοι ἐρίσσειε βροτὸς ἄλλος,
Odyssey 1.322	πῦρ τʼ εὖ νηῆσαι διά τε ξύλα δανὰ κεάσσαι,
Odyssey 1.323	δαιτρεῦσαί τε καὶ ὀπτῆσαι καὶ οἰνοχοῆσαι,
Odyssey 1.324	οἷά τε τοῖς ἀγαθοῖσι παραδρώωσι χέρηες.
Odyssey 1.325	τὸν δὲ μέγʼ ὀχθήσας προσέφης, Εὔμαιε συβῶτα·
Odyssey 1.326	ὤ μοι, ξεῖνε, τίη τοι ἐνὶ φρεσὶ τοῦτο νόημα
Odyssey 1.327	ἔπλετο; ἦ σύ γε πάγχυ λιλαίεαι αὐτόθʼ ὀλέσθαι.
Odyssey 1.328	εἰ δὴ μνηστήρων ἐθέλεις καταδῦναι ὅμιλον,
Odyssey 1.329	τῶν ὕβρις τε βίη τε σιδήρεον οὐρανὸν ἵκει.
Odyssey 1.330	οὔ τοι τοιοίδʼ εἰσὶν ὑποδρηστῆρες ἐκείνων,
Odyssey 1.331	ἀλλὰ νέοι, χλαίνας εὖ εἱμένοι ἠδὲ χιτῶνας,
Odyssey 1.332	αἰεὶ δὲ λιπαροὶ κεφαλὰς καὶ καλὰ πρόσωπα,
Odyssey 1.333	οἵ σφιν ὑποδρώωσιν· ἐΰξεστοι δὲ τράπεζαι
Odyssey 1.334	σίτου καὶ κρειῶν ἠδʼ οἴνου βεβρίθασιν.
Odyssey 1.335	ἀλλὰ μένʼ· οὐ γάρ τίς τοι ἀνιᾶται παρεόντι,
Odyssey 1.336	οὔτʼ ἐγὼ οὔτε τις ἄλλος ἑταίρων, οἵ μοι ἔασιν.
Odyssey 1.337	αὐτὰρ ἐπὴν ἔλθῃσιν Ὀδυσσῆος φίλος υἱός,
Odyssey 1.338	κεῖνός σε χλαῖνάν τε χιτῶνά τε εἵματα ἕσσει,
Odyssey 1.339	πέμψει δʼ ὅππη σε κραδίη θυμός τε κελεύει.
Odyssey 1.340	τὸν δʼ ἠμείβετʼ ἔπειτα πολύτλας δῖος Ὀδυσσεύς·
Odyssey 1.341	αἴθʼ οὕτως, Εὔμαιε, φίλος Διὶ πατρὶ γένοιο
Odyssey 1.342	ὡς ἐμοί, ὅττι μʼ ἔπαυσας ἄλης καὶ ὀϊζύος αἰνῆς.
Odyssey 1.343	πλαγκτοσύνης δʼ οὐκ ἔστι κακώτερον ἄλλο βροτοῖσιν·
Odyssey 1.344	ἀλλʼ ἕνεκʼ οὐλομένης γαστρὸς κακὰ κήδεʼ ἔχουσιν
Odyssey 1.345	ἀνέρες, ὅν τινʼ ἵκηται ἄλη καὶ πῆμα καὶ ἄλγος.
Odyssey 1.346	νῦν δʼ ἐπεὶ ἰσχανάᾳς μεῖναί τέ με κεῖνον ἄνωγας,
Odyssey 1.347	εἴπʼ ἄγε μοι περὶ μητρὸς Ὀδυσσῆος θείοιο
Odyssey 1.348	πατρός θʼ, ὃν κατέλειπεν ἰὼν ἐπὶ γήραος οὐδῷ,
Odyssey 1.349	ἤ που ἔτι ζώουσιν ὑπʼ αὐγὰς ἠελίοιο,
Odyssey 1.350	ἦ ἤδη τεθνᾶσι καὶ εἰν Ἀΐδαο δόμοισι.
Odyssey 1.351	τὸν δʼ αὖτε προσέειπε συβώτης, ὄρχαμος ἀνδρῶν·
Odyssey 1.352	τοιγὰρ ἐγώ τοι, ξεῖνε, μάλʼ ἀτρεκέως ἀγορεύσω.
Odyssey 1.353	Λαέρτης μὲν ἔτι ζώει, Διὶ δʼ εὔχεται αἰεὶ
Odyssey 1.354	θυμὸν ἀπὸ μελέων φθίσθαι οἷς ἐν μεγάροισιν·
Odyssey 1.355	ἐκπάγλως γὰρ παιδὸς ὀδύρεται οἰχομένοιο
Odyssey 1.356	κουριδίης τʼ ἀλόχοιο δαΐφρονος, ἥ ἑ μάλιστα
Odyssey 1.357	ἤκαχʼ ἀποφθιμένη καὶ ἐν ὠμῷ γήραϊ θῆκεν.
Odyssey 1.358	ἡ δʼ ἄχεϊ οὗ παιδὸς ἀπέφθιτο κυδαλίμοιο,
Odyssey 1.359	λευγαλέῳ θανάτῳ, ὡς μὴ θάνοι ὅς τις ἐμοί γε
Odyssey 1.360	ἐνθάδε ναιετάων φίλος εἴη καὶ φίλα ἔρδοι.
Odyssey 1.361	ὄφρα μὲν οὖν δὴ κείνη ἔην, ἀχέουσά περ ἔμπης,
Odyssey 1.362	τόφρα τί μοι φίλον ἔσκε μεταλλῆσαι καὶ ἐρέσθαι,
Odyssey 1.363	οὕνεκά μʼ αὐτὴ θρέψεν ἅμα Κτιμένῃ τανυπέπλῳ,
Odyssey 1.364	θυγατέρʼ ἰφθίμῃ, τὴν ὁπλοτάτην τέκε παίδων·
Odyssey 1.365	τῇ ὁμοῦ ἐτρεφόμην, ὀλίγον δέ τί μʼ ἧσσον ἐτίμα.
Odyssey 1.366	αὐτὰρ ἐπεί ῥʼ ἥβην πολυήρατον ἱκόμεθʼ ἄμφω,
Odyssey 1.367	τὴν μὲν ἔπειτα Σάμηνδʼ ἔδοσαν καὶ μυρίʼ ἕλοντο,
Odyssey 1.368	αὐτὰρ ἐμὲ χλαῖνάν τε χιτῶνά τε εἵματʼ ἐκείνη
Odyssey 1.369	καλὰ μάλʼ ἀμφιέσασα, ποσὶν δʼ ὑποδήματα δοῦσα
Odyssey 1.370	ἀγρόνδε προΐαλλε· φίλει δέ με κηρόθι μᾶλλον.
Odyssey 1.371	νῦν δʼ ἤδη τούτων ἐπιδεύομαι· ἀλλά μοι αὐτῷ
Odyssey 1.372	ἔργον ἀέξουσιν μάκαρες θεοὶ ᾧ ἐπιμίμνω·
Odyssey 1.373	τῶν ἔφαγόν τʼ ἔπιόν τε καὶ αἰδοίοισιν ἔδωκα.
Odyssey 1.374	ἐκ δʼ ἄρα δεσποίνης οὐ μείλιχον ἔστιν ἀκοῦσαι
Odyssey 1.375	οὔτʼ ἔπος οὔτε τι ἔργον, ἐπεὶ κακὸν ἔμπεσεν οἴκῳ,
Odyssey 1.376	ἄνδρες ὑπερφίαλοι· μέγα δὲ δμῶες χατέουσιν
Odyssey 1.377	ἀντία δεσποίνης φάσθαι καὶ ἕκαστα πυθέσθαι
Odyssey 1.378	καὶ φαγέμεν πιέμεν τε, ἔπειτα δὲ καί τι φέρεσθαι
Odyssey 1.379	ἀγρόνδʼ, οἷά τε θυμὸν ἀεὶ δμώεσσιν ἰαίνει.
Odyssey 1.380	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.381	ὢ πόποι, ὡς ἄρα τυτθὸς ἐών, Εὔμαιε συβῶτα,
Odyssey 1.382	πολλὸν ἀπεπλάγχθης σῆς πατρίδος ἠδὲ τοκήων.
Odyssey 1.383	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Odyssey 1.384	ἠὲ διεπράθετο πτόλις ἀνδρῶν εὐρυάγυια,
Odyssey 1.385	ᾗ ἔνι ναιετάασκε πατὴρ καὶ πότνια μήτηρ,
Odyssey 1.386	ἦ σέ γε μουνωθέντα παρʼ οἴεσιν ἢ παρὰ βουσὶν
Odyssey 1.387	ἄνδρες δυσμενέες νηυσὶν λάβον ἠδʼ ἐπέρασσαν
Odyssey 1.388	τοῦδʼ ἀνδρὸς πρὸς δώμαθʼ, ὁ δʼ ἄξιον ὦνον ἔδωκε.
Odyssey 1.389	τὸν δʼ αὖτε προσέειπε συβώτης, ὄρχαμος ἀνδρῶν·
Odyssey 1.390	ξεῖνʼ, ἐπεὶ ἂρ δὴ ταῦτά μʼ ἀνείρεαι ἠδὲ μεταλλᾷς,
Odyssey 1.391	σιγῇ νῦν ξυνίει καὶ τέρπεο, πῖνέ τε οἶνον
Odyssey 1.392	ἥμενος. αἵδε δὲ νύκτες ἀθέσφατοι· ἔστι μὲν εὕδειν,
Odyssey 1.393	ἔστι δὲ τερπομένοισιν ἀκούειν· οὐδέ τί σε χρή,
Odyssey 1.394	πρὶν ὥρη, καταλέχθαι· ἀνίη καὶ πολὺς ὕπνος.
Odyssey 1.395	τῶν δʼ ἄλλων ὅτινα κραδίη καὶ θυμὸς ἀνώγει,
Odyssey 1.396	εὑδέτω ἐξελθών· ἅμα δʼ ἠοῖ φαινομένηφι
Odyssey 1.397	δειπνήσας ἅμʼ ὕεσσιν ἀνακτορίῃσιν ἑπέσθω.
Odyssey 1.398	νῶϊ δʼ ἐνὶ κλισίῃ πίνοντέ τε δαινυμένω τε
Odyssey 1.399	κήδεσιν ἀλλήλων τερπώμεθα λευγαλέοισι,
Odyssey 1.400	μνωομένω· μετὰ γάρ τε καὶ ἄλγεσι τέρπεται ἀνήρ,
Odyssey 1.401	ὅς τις δὴ μάλα πολλὰ πάθῃ καὶ πόλλʼ ἐπαληθῇ.
Odyssey 1.402	τοῦτο δέ τοι ἐρέω ὅ μʼ ἀνείρεαι ἠδὲ μεταλλᾷς.
Odyssey 1.403	νῆσός τις Συρίη κικλήσκεται, εἴ που ἀκούεις,
Odyssey 1.404	Ὀρτυγίης καθύπερθεν, ὅθι τροπαὶ ἠελίοιο,
Odyssey 1.405	οὔ τι περιπληθὴς λίην τόσον, ἀλλʼ ἀγαθὴ μέν,
Odyssey 1.406	εὔβοτος, εὔμηλος, οἰνοπληθής, πολύπυρος.
Odyssey 1.407	πείνη δʼ οὔ ποτε δῆμον ἐσέρχεται, οὐδέ τις ἄλλη
Odyssey 1.408	νοῦσος ἐπὶ στυγερὴ πέλεται δειλοῖσι βροτοῖσιν·
Odyssey 1.409	ἀλλʼ ὅτε γηράσκωσι πόλιν κάτα φῦλʼ ἀνθρώπων,
Odyssey 1.410	ἐλθὼν ἀργυρότοξος Ἀπόλλων Ἀρτέμιδι ξὺν
Odyssey 1.411	οἷς ἀγανοῖς βελέεσσιν ἐποιχόμενος κατέπεφνεν.
Odyssey 1.412	ἔνθα δύω πόλιες, δίχα δέ σφισι πάντα δέδασται·
Odyssey 1.413	τῇσιν δʼ ἀμφοτέρῃσι πατὴρ ἐμὸς ἐμβασίλευε,
Odyssey 1.414	Κτήσιος Ὀρμενίδης, ἐπιείκελος ἀθανάτοισιν.
Odyssey 1.415	ἔνθα δὲ Φοίνικες ναυσίκλυτοι ἤλυθον ἄνδρες,
Odyssey 1.416	τρῶκται, μυρίʼ ἄγοντες ἀθύρματα νηῒ μελαίνῃ.
Odyssey 1.417	ἔσκε δὲ πατρὸς ἐμοῖο γυνὴ Φοίνισσʼ ἐνὶ οἴκῳ,
Odyssey 1.418	καλή τε μεγάλη τε καὶ ἀγλαὰ ἔργα ἰδυῖα·
Odyssey 1.419	τὴν δʼ ἄρα Φοίνικες πολυπαίπαλοι ἠπερόπευον.
Odyssey 1.420	πλυνούσῃ τις πρῶτα μίγη κοίλῃ παρὰ νηῒ
Odyssey 1.421	εὐνῇ καὶ φιλότητι, τά τε φρένας ἠπεροπεύει
Odyssey 1.422	θηλυτέρῃσι γυναιξί, καὶ ἥ κʼ εὐεργὸς ἔῃσιν.
Odyssey 1.423	εἰρώτα δὴ ἔπειτα τίς εἴη καὶ πόθεν ἔλθοι·
Odyssey 1.424	ἡ δὲ μάλʼ αὐτίκα πατρὸς ἐπέφραδεν ὑψερεφὲς δῶ·
Odyssey 1.425	ἐκ μὲν Σιδῶνος πολυχάλκου εὔχομαι εἶναι,
Odyssey 1.426	κούρη δʼ εἴμʼ Ἀρύβαντος ἐγὼ ῥυδὸν ἀφνειοῖο·
Odyssey 1.427	ἀλλά μʼ ἀνήρπαξαν Τάφιοι ληΐστορες ἄνδρες
Odyssey 1.428	ἀγρόθεν ἐρχομένην, πέρασαν δέ τε δεῦρʼ ἀγαγόντες
Odyssey 1.429	τοῦδʼ ἀνδρὸς πρὸς δώμαθʼ· ὁ δʼ ἄξιον ὦνον ἔδωκε.
Odyssey 1.430	τὴν δʼ αὖτε προσέειπεν ἀνήρ, ὃς ἐμίσγετο λάθρη·
Odyssey 1.431	ἦ ῥά κε νῦν πάλιν αὖτις ἅμʼ ἡμῖν οἴκαδʼ ἕποιο,
Odyssey 1.432	ὄφρα ἴδῃ πατρὸς καὶ μητέρος ὑψερεφὲς δῶ
Odyssey 1.433	αὐτούς τʼ; ἦ γὰρ ἔτʼ εἰσὶ καὶ ἀφνειοὶ καλέονται.
Odyssey 1.434	τὸν δʼ αὖτε προσέειπε γυνὴ καὶ ἀμείβετο μύθῳ·
Odyssey 1.435	εἴη κεν καὶ τοῦτʼ, εἴ μοι ἐθέλοιτέ γε, ναῦται,
Odyssey 1.436	ὅρκῳ πιστωθῆναι ἀπήμονά μʼ οἴκαδʼ ἀπάξειν.
Odyssey 1.437	ὣς ἔφαθʼ, οἱ δʼ ἄρα πάντες ἐπώμνυον ὡς ἐκέλευεν.
Odyssey 1.438	αὐτὰρ ἐπεί ῥʼ ὄμοσάν τε τελεύτησάν τε τὸν ὅρκον,
Odyssey 1.439	τοῖς δʼ αὖτις μετέειπε γυνὴ καὶ ἀμείβετο μύθῳ·
Odyssey 1.440	σιγῇ νῦν, μή τίς με προσαυδάτω ἐπέεσσιν
Odyssey 1.441	ὑμετέρων ἑτάρων, ξυμβλήμενος ἢ ἐν ἀγυιῇ,
Odyssey 1.442	ἤ που ἐπὶ κρήνῃ· μή τις ποτὶ δῶμα γέροντι
Odyssey 1.443	ἐλθὼν ἐξείπῃ, ὁ δʼ ὀϊσάμενος καταδήσῃ
Odyssey 1.444	δεσμῷ ἐν ἀργαλέῳ, ὑμῖν δʼ ἐπιφράσσετʼ ὄλεθρον.
Odyssey 1.445	ἀλλʼ ἔχετʼ ἐν φρεσὶ μῦθον, ἐπείγετε δʼ ὦνον ὁδαίων.
Odyssey 1.446	ἀλλʼ ὅτε κεν δὴ νηῦς πλείη βιότοιο γένηται,
Odyssey 1.447	ἀγγελίη μοι ἔπειτα θοῶς ἐς δώμαθʼ ἱκέσθω·
Odyssey 1.448	οἴσω γὰρ καὶ χρυσόν, ὅτις χʼ ὑποχείριος ἔλθῃ·
Odyssey 1.449	καὶ δέ κεν ἄλλʼ ἐπίβαθρον ἐγὼν ἐθέλουσά γε δοίην.
Odyssey 1.450	παῖδα γὰρ ἀνδρὸς ἑῆος ἐνὶ μεγάροις ἀτιτάλλω,
Odyssey 1.451	κερδαλέον δὴ τοῖον, ἅμα τροχόωντα θύραζε·
Odyssey 1.452	τόν κεν ἄγοιμʼ ἐπὶ νηός, ὁ δʼ ὑμῖν μυρίον ὦνον
Odyssey 1.453	ἄλφοι, ὅπῃ περάσητε κατʼ ἀλλοθρόους ἀνθρώπους.
Odyssey 1.454	ἡ μὲν ἄρʼ ὣς εἰποῦσʼ ἀπέβη πρὸς δώματα καλά,
Odyssey 1.455	οἱ δʼ ἐνιαυτὸν ἅπαντα παρʼ ἡμῖν αὖθι μένοντες
Odyssey 1.456	ἐν νηῒ γλαφυρῇ βίοτον πολὺν ἐμπολόωντο.
Odyssey 1.457	ἀλλʼ ὅτε δὴ κοίλη νηῦς ἤχθετο τοῖσι νέεσθαι,
Odyssey 1.458	καὶ τότʼ ἄρʼ ἄγγελον ἧκαν, ὃς ἀγγείλειε γυναικί.
Odyssey 1.459	ἤλυθʼ ἀνὴρ πολύϊδρις ἐμοῦ πρὸς δώματα πατρὸς
Odyssey 1.460	χρύσεον ὅρμον ἔχων, μετὰ δʼ ἠλέκτροισιν ἔερτο.
Odyssey 1.461	τὸν μὲν ἄρʼ ἐν μεγάρῳ δμῳαὶ καὶ πότνια μήτηρ
Odyssey 1.462	χερσίν τʼ ἀμφαφόωντο καὶ ὀφθαλμοῖσιν ὁρῶντο,
Odyssey 1.463	ὦνον ὑπισχόμεναι· ὁ δὲ τῇ κατένευσε σιωπῇ.
Odyssey 1.464	ἦ τοι ὁ καννεύσας κοίλην ἐπὶ νῆα βεβήκει,
Odyssey 1.465	ἡ δʼ ἐμὲ χειρὸς ἑλοῦσα δόμων ἐξῆγε θύραζε.
Odyssey 1.466	εὗρε δʼ ἐνὶ προδόμῳ ἠμὲν δέπα ἠδὲ τραπέζας
Odyssey 1.467	ἀνδρῶν δαιτυμόνων, οἵ μευ πατέρʼ ἀμφεπένοντο.
Odyssey 1.468	οἱ μὲν ἄρʼ ἐς θῶκον πρόμολον, δήμοιό τε φῆμιν,
Odyssey 1.469	ἡ δʼ αἶψα τρίʼ ἄλεισα κατακρύψασʼ ὑπὸ κόλπῳ
Odyssey 1.470	ἔκφερεν· αὐτὰρ ἐγὼν ἑπόμην ἀεσιφροσύνῃσι.
Odyssey 1.471	δύσετό τʼ ἠέλιος, σκιόωντό τε πᾶσαι ἀγυιαί·
Odyssey 1.472	ἡμεῖς δʼ ἐς λιμένα κλυτὸν ἤλθομεν ὦκα κιόντες,
Odyssey 1.473	ἔνθʼ ἄρα Φοινίκων ἀνδρῶν ἦν ὠκύαλος νηῦς.
Odyssey 1.474	οἱ μὲν ἔπειτʼ ἀναβάντες ἐπέπλεον ὑγρὰ κέλευθα,
Odyssey 1.475	νὼ ἀναβησάμενοι· ἐπὶ δὲ Ζεὺς οὖρον ἴαλλεν.
Odyssey 1.476	ἑξῆμαρ μὲν ὁμῶς πλέομεν νύκτας τε καὶ ἦμαρ·
Odyssey 1.477	ἀλλʼ ὅτε δὴ ἕβδομον ἦμαρ ἐπὶ Ζεὺς θῆκε Κρονίων,
Odyssey 1.478	τὴν μὲν ἔπειτα γυναῖκα βάλʼ Ἄρτεμις ἰοχέαιρα,
Odyssey 1.479	ἄντλῳ δʼ ἐνδούπησε πεσοῦσʼ ὡς εἰναλίη κήξ.
Odyssey 1.480	καὶ τὴν μὲν φώκῃσι καὶ ἰχθύσι κύρμα γενέσθαι
Odyssey 1.481	ἔκβαλον· αὐτὰρ ἐγὼ λιπόμην ἀκαχήμενος ἦτορ·
Odyssey 1.482	τοὺς δʼ Ἰθάκῃ ἐπέλασσε φέρων ἄνεμός τε καὶ ὕδωρ,
Odyssey 1.483	ἔνθα με Λαέρτης πρίατο κτεάτεσσιν ἑοῖσιν.
Odyssey 1.484	οὕτω τήνδε τε γαῖαν ἐγὼν ἴδον ὀφθαλμοῖσι.
Odyssey 1.485	τὸν δʼ αὖ διογενὴς Ὀδυσεὺς ἠμείβετο μύθῳ·
Odyssey 1.486	Εὔμαιʼ, ἦ μάλα δή μοι ἐνὶ φρεσὶ θυμὸν ὄρινας
Odyssey 1.487	ταῦτα ἕκαστα λέγων, ὅσα δὴ πάθες ἄλγεα θυμῷ.
Odyssey 1.488	ἀλλʼ ἦ τοι σοὶ μὲν παρὰ καὶ κακῷ ἐσθλὸν ἔθηκε
Odyssey 1.489	Ζεύς, ἐπεὶ ἀνδρὸς δώματʼ ἀφίκεο πολλὰ μογήσας
Odyssey 1.490	ἠπίου, ὃς δή τοι παρέχει βρῶσίν τε πόσιν τε
Odyssey 1.491	ἐνδυκέως, ζώεις δʼ ἀγαθὸν βίον· αὐτὰρ ἐγώ γε
Odyssey 1.492	πολλὰ βροτῶν ἐπὶ ἄστεʼ ἀλώμενος ἐνθάδʼ ἱκάνω.
Odyssey 1.493	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.494	καδδραθέτην δʼ οὐ πολλὸν ἐπὶ χρόνον, ἀλλὰ μίνυνθα·
Odyssey 1.495	αἶψα γὰρ Ἠὼς ἦλθεν ἐΰθρονος. οἱ δʼ ἐπὶ χέρσου
Odyssey 1.496	Τηλεμάχου ἕταροι λύον ἱστία, κὰδ δʼ ἕλον ἱστὸν
Odyssey 1.497	καρπαλίμως, τὴν δʼ εἰς ὅρμον προέρυσσαν ἐρετμοῖς·
Odyssey 1.498	ἐκ δʼ εὐνὰς ἔβαλον, κατὰ δὲ πρυμνήσιʼ ἔδησαν·
Odyssey 1.499	ἐκ δὲ καὶ αὐτοὶ βαῖνον ἐπὶ ῥηγμῖνι θαλάσσης,
Odyssey 1.500	δεῖπνόν τʼ ἐντύνοντο κερῶντό τε αἴθοπα οἶνον.
Odyssey 1.501	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.502	τοῖσι δὲ Τηλέμαχος πεπνυμένος ἤρχετο μύθων·
Odyssey 1.503	ὑμεῖς μὲν νῦν ἄστυδʼ ἐλαύνετε νῆα μέλαιναν,
Odyssey 1.504	αὐτὰρ ἐγὼν ἀγροὺς ἐπιείσομαι ἠδὲ βοτῆρας·
Odyssey 1.505	ἑσπέριος δʼ εἰς ἄστυ ἰδὼν ἐμὰ ἔργα κάτειμι.
Odyssey 1.506	ἠῶθεν δέ κεν ὔμμιν ὁδοιπόριον παραθείμην,
Odyssey 1.507	δαῖτʼ ἀγαθὴν κρειῶν τε καὶ οἴνου ἡδυπότοιο.
Odyssey 1.508	τὸν δʼ αὖτε προσέειπε Θεοκλύμενος θεοειδής·
Odyssey 1.509	πῆ γὰρ ἐγώ, φίλε τέκνον, ἴω; τεῦ δώμαθʼ ἵκωμαι
Odyssey 1.510	ἀνδρῶν οἳ κραναὴν Ἰθάκην κάτα κοιρανέουσιν;
Odyssey 1.511	ἦ ἰθὺς σῆς μητρὸς ἴω καὶ σοῖο δόμοιο;
Odyssey 1.512	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.513	ἄλλως μέν σʼ ἂν ἐγώ γε καὶ ἡμέτερόνδε κελοίμην
Odyssey 1.514	ἔρχεσθʼ· οὐ γάρ τι ξενίων ποθή· ἀλλὰ σοὶ αὐτῷ
Odyssey 1.515	χεῖρον, ἐπεί τοι ἐγὼ μὲν ἀπέσσομαι, οὐδέ σε μήτηρ
Odyssey 1.516	ὄψεται· οὐ μὲν γάρ τι θαμὰ μνηστῆρσʼ ἐνὶ οἴκῳ
Odyssey 1.517	φαίνεται, ἀλλʼ ἀπὸ τῶν ὑπερωΐῳ ἱστὸν ὑφαίνει.
Odyssey 1.518	ἀλλά τοι ἄλλον φῶτα πιφαύσκομαι ὅν κεν ἵκοιο,
Odyssey 1.519	Εὐρύμαχον, Πολύβοιο δαΐφρονος ἀγλαὸν υἱόν,
Odyssey 1.520	τὸν νῦν ἶσα θεῷ Ἰθακήσιοι εἰσορόωσι·
Odyssey 1.521	καὶ γὰρ πολλὸν ἄριστος ἀνὴρ μέμονέν τε μάλιστα
Odyssey 1.522	μητέρʼ ἐμὴν γαμέειν καὶ Ὀδυσσῆος γέρας ἕξειν.
Odyssey 1.523	ἀλλὰ τά γε Ζεὺς οἶδεν Ὀλύμπιος, αἰθέρι ναίων,
Odyssey 1.524	εἴ κέ σφι πρὸ γάμοιο τελευτήσει κακὸν ἦμαρ.
Odyssey 1.525	ὣς ἄρα οἱ εἰπόντι ἐπέπτατο δεξιὸς ὄρνις,
Odyssey 1.526	κίρκος, Ἀπόλλωνος ταχὺς ἄγγελος· ἐν δὲ πόδεσσι
Odyssey 1.527	τίλλε πέλειαν ἔχων, κατὰ δὲ πτερὰ χεῦεν ἔραζε
Odyssey 1.528	μεσσηγὺς νηός τε καὶ αὐτοῦ Τηλεμάχοιο.
Odyssey 1.529	τὸν δὲ Θεοκλύμενος ἑτάρων ἀπονόσφι καλέσσας
Odyssey 1.530	ἔν τʼ ἄρα οἱ φῦ χειρὶ ἔπος τʼ ἔφατʼ ἔκ τʼ ὀνόμαζε·
Odyssey 1.531	Τηλέμαχʼ, οὔ τοι ἄνευ θεοῦ ἔπτατο δεξιὸς ὄρνις
Odyssey 1.532	ἔγνων γάρ μιν ἐσάντα ἰδὼν οἰωνὸν ἐόντα.
Odyssey 1.533	ὑμετέρου δʼ οὐκ ἔστι γένος βασιλεύτερον ἄλλο
Odyssey 1.534	ἐν δήμῳ Ἰθάκης, ἀλλʼ ὑμεῖς καρτεροὶ αἰεί.
Odyssey 1.535	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.536	αἲ γὰρ τοῦτο, ξεῖνε, ἔπος τετελεσμένον εἴη·
Odyssey 1.537	τῷ κε τάχα γνοίης φιλότητά τε πολλά τε δῶρα
Odyssey 1.538	ἐξ ἐμεῦ, ὡς ἄν τίς σε συναντόμενος μακαρίζοι.
Odyssey 1.539	ἦ καὶ Πείραιον προσεφώνεε, πιστὸν ἑταῖρον·
Odyssey 1.540	Πείραιε Κλυτίδη, σὺ δέ μοι τά περ ἄλλα μάλιστα
Odyssey 1.541	πείθῃ ἐμῶν ἑτάρων, οἵ μοι Πύλον εἰς ἅμʼ ἕποντο·
Odyssey 1.542	καὶ νῦν μοι τὸν ξεῖνον ἄγων ἐν δώμασι σοῖσιν
Odyssey 1.543	ἐνδυκέως φιλέειν καὶ τιέμεν, εἰς ὅ κεν ἔλθω.
Odyssey 1.544	τὸν δʼ αὖ Πείραιος δουρικλυτὸς ἀντίον ηὔδα·
Odyssey 1.545	Τηλέμαχʼ, εἰ γάρ κεν σὺ πολὺν χρόνον ἐνθάδε μίμνοι,
Odyssey 1.546	τόνδε τʼ ἐγὼ κομιῶ, ξενίων δέ οἱ οὐ ποθὴ ἔσται.
Odyssey 1.547	ὣς εἰπὼν ἐπὶ νηὸς ἔβη, ἐκέλευσε δʼ ἑταίρους
Odyssey 1.548	αὐτούς τʼ ἀμβαίνειν ἀνά τε πρυμνήσια λῦσαι.
Odyssey 1.549	οἱ δʼ αἶψʼ εἴσβαινον καὶ ἐπὶ κληῗσι καθῖζον.
Odyssey 1.550	Τηλέμαχος δʼ ὑπὸ ποσσὶν ἐδήσατο καλὰ πέδιλα,
Odyssey 1.551	εἵλετο δʼ ἄλκιμον ἔγχος, ἀκαχμένον ὀξέϊ χαλκῷ,
Odyssey 1.552	νηὸς ἀπʼ ἰκριόφιν· τοὶ δὲ πρυμνήσιʼ ἔλυσαν.
Odyssey 1.553	οἱ μὲν ἀνώσαντες πλέον ἐς πόλιν, ὡς ἐκέλευσε
Odyssey 1.554	Τηλέμαχος, φίλος υἱὸς Ὀδυσσῆος θείοιο·
Odyssey 1.555	τὸν δʼ ὦκα προβιβάντα πόδες φέρον, ὄφρʼ ἵκετʼ αὐλήν,
Odyssey 1.556	ἔνθα οἱ ἦσαν ὕες μάλα μυρίαι, ᾗσι συβώτης
Odyssey 1.557	ἐσθλὸς ἐὼν ἐνίαυεν, ἀνάκτεσιν ἤπια εἰδώς.
Odyssey 1.1	τὼ δʼ αὖτʼ ἐν κλισίῃ Ὀδυσεὺς καὶ δῖος ὑφορβὸς
Odyssey 1.2	ἐντύνοντο ἄριστον ἅμʼ ἠοῖ, κηαμένω πῦρ,
Odyssey 1.3	ἔκπεμψάν τε νομῆας ἅμʼ ἀγρομένοισι σύεσσι·
Odyssey 1.4	Τηλέμαχον δὲ περίσσαινον κύνες ὑλακόμωροι,
Odyssey 1.5	οὐδʼ ὕλαον προσιόντα. νόησε δὲ δῖος Ὀδυσσεὺς
Odyssey 1.6	σαίνοντάς τε κύνας, περί τε κτύπος ἦλθε ποδοῖϊν.
Odyssey 1.7	αἶψα δʼ ἄρʼ Εὔμαιον ἔπεα πτερόεντα προσηύδα·
Odyssey 1.8	Εὔμαιʼ, ἦ μάλα τίς τοι ἐλεύσεται ἐνθάδʼ ἑταῖρος
Odyssey 1.9	ἢ καὶ γνώριμος ἄλλος, ἐπεὶ κύνες οὐχ ὑλάουσιν,
Odyssey 1.10	ἀλλὰ περισσαίνουσι· ποδῶν δʼ ὑπὸ δοῦπον ἀκούω.
Odyssey 1.11	οὔ πω πᾶν εἴρητο ἔπος, ὅτε οἱ φίλος υἱὸς
Odyssey 1.12	ἔστη ἐνὶ προθύροισι. ταφὼν δʼ ἀνόρουσε συβώτης,
Odyssey 1.13	ἐκ δʼ ἄρα οἱ χειρῶν πέσον ἄγγεα, τοῖς ἐπονεῖτο,
Odyssey 1.14	κιρνὰς αἴθοπα οἶνον. ὁ δʼ ἀντίος ἦλθεν ἄνακτος,
Odyssey 1.15	κύσσε δέ μιν κεφαλήν τε καὶ ἄμφω φάεα καλὰ
Odyssey 1.16	χεῖράς τʼ ἀμφοτέρας· θαλερὸν δέ οἱ ἔκπεσε δάκρυ.
Odyssey 1.17	ὡς δὲ πατὴρ ὃν παῖδα φίλα φρονέων ἀγαπάζῃ
Odyssey 1.18	ἐλθόντʼ ἐξ ἀπίης γαίης δεκάτῳ ἐνιαυτῷ,
Odyssey 1.19	μοῦνον τηλύγετον, τῷ ἔπʼ ἄλγεα πολλὰ μογήσῃ,
Odyssey 1.20	ὣς τότε Τηλέμαχον θεοειδέα δῖος ὑφορβὸς
Odyssey 1.21	πάντα κύσεν περιφύς, ὡς ἐκ θανάτοιο φυγόντα·
Odyssey 1.22	καί ῥʼ ὀλοφυρόμενος ἔπεα πτερόεντα προσηύδα·
Odyssey 1.23	ἦλθες, Τηλέμαχε, γλυκερὸν φάος. οὔ σʼ ἔτʼ ἐγώ γε
Odyssey 1.24	ὄψεσθαι ἐφάμην, ἐπεὶ ᾤχεο νηῒ Πύλονδε.
Odyssey 1.25	ἀλλʼ ἄγε νῦν εἴσελθε, φίλον τέκος, ὄφρα σε θυμῷ
Odyssey 1.26	τέρψομαι εἰσορόων νέον ἄλλοθεν ἔνδον ἐόντα.
Odyssey 1.27	οὐ μὲν γάρ τι θάμʼ ἀγρὸν ἐπέρχεαι οὐδὲ νομῆας,
Odyssey 1.28	ἀλλʼ ἐπιδημεύεις· ὣς γάρ νύ τοι εὔαδε θυμῷ,
Odyssey 1.29	ἀνδρῶν μνηστήρων ἐσορᾶν ἀΐδηλον ὅμιλον.
Odyssey 1.30	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.31	ἔσσεται οὕτως, ἄττα· σέθεν δʼ ἕνεκʼ ἐνθάδʼ ἱκάνω,
Odyssey 1.32	ὄφρα σέ τʼ ὀφθαλμοῖσιν ἴδω καὶ μῦθον ἀκούσω,
Odyssey 1.33	ἤ μοι ἔτʼ ἐν μεγάροις μήτηρ μένει, ἦέ τις ἤδη
Odyssey 1.34	ἀνδρῶν ἄλλος ἔγημεν, Ὀδυσσῆος δέ που εὐνὴ
Odyssey 1.35	χήτει ἐνευναίων κάκʼ ἀράχνια κεῖται ἔχουσα.
Odyssey 1.36	τὸν δʼ αὖτε προσέειπε συβώτης, ὄρχαμος ἀνδρῶν·
Odyssey 1.37	καὶ λίην κείνη γε μένει τετληότι θυμῷ
Odyssey 1.38	σοῖσιν ἐνὶ μεγάροισιν· ὀϊζυραὶ δέ οἱ αἰεὶ
Odyssey 1.39	φθίνουσιν νύκτες τε καὶ ἤματα δάκρυ χεούσῃ.
Odyssey 1.40	ὣς ἄρα φωνήσας οἱ ἐδέξατο χάλκεον ἔγχος·
Odyssey 1.41	αὐτὰρ ὅ γʼ εἴσω ἴεν καὶ ὑπέρβη λάϊνον οὐδόν.
Odyssey 1.42	τῷ δʼ ἕδρης ἐπιόντι πατὴρ ὑπόειξεν Ὀδυσσεύς·
Odyssey 1.43	Τηλέμαχος δʼ ἑτέρωθεν ἐρήτυε φώνησέν τε·
Odyssey 1.44	ἧσʼ, ὦ ξεῖνʼ· ἡμεῖς δὲ καὶ ἄλλοθι δήομεν ἕδρην
Odyssey 1.45	σταθμῷ ἐν ἡμετέρῳ· πάρα δʼ ἀνὴρ ὃς καταθήσει.
Odyssey 1.46	ὣς φάθʼ, ὁ δʼ αὖτις ἰὼν κατʼ ἄρʼ ἕζετο· τῷ δὲ συβώτης.
Odyssey 1.47	χεῦεν ὕπο χλωρὰς ῥῶπας καὶ κῶας ὕπερθεν·
Odyssey 1.48	ἔνθα καθέζετʼ ἔπειτα Ὀδυσσῆος φίλος υἱός.
Odyssey 1.49	τοῖσιν δʼ αὖ κρειῶν πίνακας παρέθηκε συβώτης
Odyssey 1.50	ὀπταλέων, ἅ ῥα τῇ προτέρῃ ὑπέλειπον ἔδοντες,
Odyssey 1.51	σῖτον δʼ ἐσσυμένως παρενήνεεν ἐν κανέοισιν,
Odyssey 1.52	ἐν δʼ ἄρα κισσυβίῳ κίρνη μελιηδέα οἶνον·
Odyssey 1.53	αὐτὸς δʼ ἀντίον ἷζεν Ὀδυσσῆος θείοιο.
Odyssey 1.54	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.55	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.56	δὴ τότε Τηλέμαχος προσεφώνεε δῖον ὑφορβόν·
Odyssey 1.57	ἄττα, πόθεν τοι ξεῖνος ὅδʼ ἵκετο; πῶς δέ ἑ ναῦται
Odyssey 1.58	ἤγαγον εἰς Ἰθάκην; τίνες ἔμμεναι εὐχετόωντο;
Odyssey 1.59	οὐ μὲν γάρ τί ἑ πεζὸν ὀΐομαι ἐνθάδʼ ἱκέσθαι.
Odyssey 1.60	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.61	τοιγὰρ ἐγώ τοι, τέκνον, ἀληθέα πάντʼ ἀγορεύσω.
Odyssey 1.62	ἐκ μὲν Κρητάων γένος εὔχεται εὐρειάων,
Odyssey 1.63	φησὶ δὲ πολλὰ βροτῶν ἐπὶ ἄστεα δινηθῆναι
Odyssey 1.64	πλαζόμενος· ὣς γάρ οἱ ἐπέκλωσεν τά γε δαίμων.
Odyssey 1.65	νῦν αὖ Θεσπρωτῶν ἀνδρῶν ἐκ νηὸς ἀποδρὰς
Odyssey 1.66	ἤλυθʼ ἐμὸν πρὸς σταθμόν, ἐγὼ δέ τοι ἐγγυαλίξω·
Odyssey 1.67	ἔρξον ὅπως ἐθέλεις· ἱκέτης δέ τοι εὔχεται εἶναι.
Odyssey 1.68	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.69	Εὔμαιʼ, ἦ μάλα τοῦτο ἔπος θυμαλγὲς ἔειπες·
Odyssey 1.70	πῶς γὰρ δὴ τὸν ξεῖνον ἐγὼν ὑποδέξομαι οἴκῳ;
Odyssey 1.71	αὐτὸς μὲν νέος εἰμὶ καὶ οὔ πω χερσὶ πέποιθα
Odyssey 1.72	ἄνδρʼ ἀπαμύνασθαι, ὅτε τις πρότερος χαλεπήνῃ·
Odyssey 1.73	μητρὶ δʼ ἐμῇ δίχα θυμὸς ἐνὶ φρεσὶ μερμηρίζει,
Odyssey 1.74	ἢ αὐτοῦ παρʼ ἐμοί τε μένῃ καὶ δῶμα κομίζῃ,
Odyssey 1.75	εὐνήν τʼ αἰδομένη πόσιος δήμοιό τε φῆμιν,
Odyssey 1.76	ἦ ἤδη ἅμʼ ἕπηται Ἀχαιῶν ὅς τις ἄριστος
Odyssey 1.77	μνᾶται ἐνὶ μεγάροισιν ἀνὴρ καὶ πλεῖστα πόρῃσιν.
Odyssey 1.78	ἀλλʼ ἦ τοὶ τὸν ξεῖνον, ἐπεὶ τεὸν ἵκετο δῶμα,
Odyssey 1.79	ἕσσω μιν χλαῖνάν τε χιτῶνά τε, εἵματα καλά,
Odyssey 1.80	δώσω δὲ ξίφος ἄμφηκες καὶ ποσσὶ πέδιλα,
Odyssey 1.81	πέμψω δʼ ὅππη μιν κραδίη θυμός τε κελεύει.
Odyssey 1.82	εἰ δʼ ἐθέλεις, σὺ κόμισσον ἐνὶ σταθμοῖσιν ἐρύξας·
Odyssey 1.83	εἵματα δʼ ἐνθάδʼ ἐγὼ πέμψω καὶ σῖτον ἅπαντα
Odyssey 1.84	ἔδμεναι, ὡς ἂν μή σε κατατρύχῃ καὶ ἑταίρους.
Odyssey 1.85	κεῖσε δʼ ἂν οὔ μιν ἐγώ γε μετὰ μνηστῆρας ἐῷμι
Odyssey 1.86	ἔρχεσθαι· λίην γὰρ ἀτάσθαλον ὕβριν ἔχουσι·
Odyssey 1.87	μή μιν κερτομέωσιν, ἐμοὶ δʼ ἄχος ἔσσεται αἰνόν.
Odyssey 1.88	πρῆξαι δʼ ἀργαλέον τι μετὰ πλεόνεσσιν ἐόντα
Odyssey 1.89	ἄνδρα καὶ ἴφθιμον, ἐπεὶ ἦ πολὺ φέρτεροί εἰσι.
Odyssey 1.90	τὸν δʼ αὖτε προσέειπε πολύτλας δῖος Ὀδυσσεύς·
Odyssey 1.91	ὦ φίλʼ, ἐπεί θήν μοι καὶ ἀμείψασθαι θέμις ἐστίν,
Odyssey 1.92	ἦ μάλα μευ καταδάπτετʼ ἀκούοντος φίλον ἦτορ,
Odyssey 1.93	οἷά φατε μνηστῆρας ἀτάσθαλα μηχανάασθαι
Odyssey 1.94	ἐν μεγάροις, ἀέκητι σέθεν τοιούτου ἐόντος.
Odyssey 1.95	εἰπέ μοι ἠὲ ἑκὼν ὑποδάμνασαι, ἦ σέ γε λαοὶ
Odyssey 1.96	ἐχθαίρουσʼ ἀνὰ δῆμον, ἐπισπόμενοι θεοῦ ὀμφῇ,
Odyssey 1.97	ἦ τι κασιγνήτοις ἐπιμέμφεαι, οἷσί περ ἀνὴρ
Odyssey 1.98	μαρναμένοισι πέποιθε, καὶ εἰ μέγα νεῖκος ὄρηται.
Odyssey 1.99	αἲ γὰρ ἐγὼν οὕτω νέος εἴην τῷδʼ ἐπὶ θυμῷ,
Odyssey 1.100	ἢ παῖς ἐξ Ὀδυσῆος ἀμύμονος ἠὲ καὶ αὐτός·
Odyssey 1.102	αὐτίκʼ ἔπειτʼ ἀπʼ ἐμεῖο κάρη τάμοι ἀλλότριος φώς,
Odyssey 1.103	εἰ μὴ ἐγὼ κείνοισι κακὸν πάντεσσι γενοίμην,
Odyssey 1.104	ἐλθὼν ἐς μέγαρον Λαερτιάδεω Ὀδυσῆος.
Odyssey 1.105	εἰ δʼ αὖ με πληθυῖ δαμασαίατο μοῦνον ἐόντα,
Odyssey 1.106	βουλοίμην κʼ ἐν ἐμοῖσι κατακτάμενος μεγάροισι
Odyssey 1.107	τεθνάμεν ἢ τάδε γʼ αἰὲν ἀεικέα ἔργʼ ὁράασθαι,
Odyssey 1.108	ξείνους τε στυφελιζομένους δμῳάς τε γυναῖκας
Odyssey 1.109	ῥυστάζοντας ἀεικελίως κατὰ δώματα καλά,
Odyssey 1.110	καὶ οἶνον διαφυσσόμενον, καὶ σῖτον ἔδοντας
Odyssey 1.111	μὰψ αὔτως, ἀτέλεστον, ἀνηνύστῳ ἐπὶ ἔργῳ.
Odyssey 1.112	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.113	τοιγὰρ ἐγώ τοι, ξεῖνε, μάλʼ ἀτρεκέως ἀγορεύσω.
Odyssey 1.114	οὔτε τί μοι πᾶς δῆμος ἀπεχθόμενος χαλεπαίνει,
Odyssey 1.115	οὔτε κασιγνήτοις ἐπιμέμφομαι, οἷσί περ ἀνὴρ
Odyssey 1.116	μαρναμένοισι πέποιθε, καὶ εἰ μέγα νεῖκος ὄρηται.
Odyssey 1.117	ὧδε γὰρ ἡμετέρην γενεὴν μούνωσε Κρονίων·
Odyssey 1.118	μοῦνον Λαέρτην Ἀρκείσιος υἱὸν ἔτικτε,
Odyssey 1.119	μοῦνον δʼ αὖτʼ Ὀδυσῆα πατὴρ τέκεν· αὐτὰρ Ὀδυσσεὺς
Odyssey 1.120	μοῦνον ἔμʼ ἐν μεγάροισι τεκὼν λίπεν οὐδʼ ἀπόνητο.
Odyssey 1.121	τῷ νῦν δυσμενέες μάλα μυρίοι εἴσʼ ἐνὶ οἴκῳ.
Odyssey 1.122	ὅσσοι γὰρ νήσοισιν ἐπικρατέουσιν ἄριστοι,
Odyssey 1.123	Δουλιχίῳ τε Σάμῃ τε καὶ ὑλήεντι Ζακύνθῳ,
Odyssey 1.124	ἠδʼ ὅσσοι κραναὴν Ἰθάκην κάτα κοιρανέουσι,
Odyssey 1.125	τόσσοι μητέρʼ ἐμὴν μνῶνται, τρύχουσι δὲ οἶκον.
Odyssey 1.126	ἡ δʼ οὔτʼ ἀρνεῖται στυγερὸν γάμον οὔτε τελευτὴν
Odyssey 1.127	ποιῆσαι δύναται· τοὶ δὲ φθινύθουσιν ἔδοντες
Odyssey 1.128	οἶκον ἐμόν· τάχα δή με διαρραίσουσι καὶ αὐτόν.
Odyssey 1.129	ἀλλʼ ἦ τοι μὲν ταῦτα θεῶν ἐν γούνασι κεῖται·
Odyssey 1.130	ἄττα, σὺ δʼ ἔρχεο θᾶσσον, ἐχέφρονι Πηνελοπείῃ
Odyssey 1.131	εἴφʼ ὅτι οἱ σῶς εἰμὶ καὶ ἐκ Πύλου εἰλήλουθα.
Odyssey 1.132	αὐτὰρ ἐγὼν αὐτοῦ μενέω, σὺ δὲ δεῦρο νέεσθαι,
Odyssey 1.133	οἴῃ ἀπαγγείλας· τῶν δʼ ἄλλων μή τις Ἀχαιῶν
Odyssey 1.134	πευθέσθω· πολλοὶ γὰρ ἐμοὶ κακὰ μηχανόωνται.
Odyssey 1.135	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.136	γιγνώσκω, φρονέω· τά γε δὴ νοέοντι κελεύεις.
Odyssey 1.137	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Odyssey 1.138	ἦ καὶ Λαέρτῃ αὐτὴν ὁδὸν ἄγγελος ἔλθω
Odyssey 1.139	δυσμόρῳ, ὃς τῆος μὲν Ὀδυσσῆος μέγʼ ἀχεύων
Odyssey 1.140	ἔργα τʼ ἐποπτεύεσκε μετὰ δμώων τʼ ἐνὶ οἴκῳ
Odyssey 1.141	πῖνε καὶ ἦσθʼ, ὅτε θυμὸς ἐνὶ στήθεσσιν ἀνώγοι·
Odyssey 1.142	αὐτὰρ νῦν, ἐξ οὗ σύ γε ᾤχεο νηῒ Πύλονδε,
Odyssey 1.143	οὔ πω μίν φασιν φαγέμεν καὶ πιέμεν αὔτως,
Odyssey 1.144	οὐδʼ ἐπὶ ἔργα ἰδεῖν, ἀλλὰ στοναχῇ τε γόῳ τε
Odyssey 1.145	ἧσται ὀδυρόμενος, φθινύθει δʼ ἀμφʼ ὀστεόφι χρώς.
Odyssey 1.146	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.147	ἄλγιον, ἀλλʼ ἔμπης μιν ἐάσομεν, ἀχνύμενοί περ·
Odyssey 1.148	εἰ γάρ πως εἴη αὐτάγρετα πάντα βροτοῖσι,
Odyssey 1.149	πρῶτόν κεν τοῦ πατρὸς ἑλοίμεθα νόστιμον ἦμαρ.
Odyssey 1.150	ἀλλὰ σύ γʼ ἀγγείλας ὀπίσω κίε, μηδὲ κατʼ ἀγροὺς
Odyssey 1.151	πλάζεσθαι μετʼ ἐκεῖνον· ἀτὰρ πρὸς μητέρα εἰπεῖν
Odyssey 1.152	ἀμφίπολον ταμίην ὀτρυνέμεν ὅττι τάχιστα
Odyssey 1.153	κρύβδην· κείνη γάρ κεν ἀπαγγείλειε γέροντι.
Odyssey 1.154	ἦ ῥα καὶ ὦρσε συφορβόν· ὁ δʼ εἵλετο χερσὶ πέδιλα,
Odyssey 1.155	δησάμενος δʼ ὑπὸ ποσσὶ πόλινδʼ ἴεν. οὐδʼ ἄρʼ Ἀθήνην
Odyssey 1.156	λῆθεν ἀπὸ σταθμοῖο κιὼν Εὔμαιος ὑφορβός,
Odyssey 1.157	ἀλλʼ ἥ γε σχεδὸν ἦλθε· δέμας δʼ ἤϊκτο γυναικὶ
Odyssey 1.158	καλῇ τε μεγάλῃ τε καὶ ἀγλαὰ ἔργα ἰδυίῃ.
Odyssey 1.159	στῆ δὲ κατʼ ἀντίθυρον κλισίης Ὀδυσῆϊ φανεῖσα·
Odyssey 1.160	οὐδʼ ἄρα Τηλέμαχος ἴδεν ἀντίον οὐδʼ ἐνόησεν,
Odyssey 1.161	οὐ γάρ πω πάντεσσι θεοὶ φαίνονται ἐναργεῖς,
Odyssey 1.162	ἀλλʼ Ὀδυσεύς τε κύνες τε ἴδον, καί ῥʼ οὐχ ὑλάοντο
Odyssey 1.163	κνυζηθμῷ δʼ ἑτέρωσε διὰ σταθμοῖο φόβηθεν.
Odyssey 1.164	ἡ δʼ ἄρʼ ἐπʼ ὀφρύσι νεῦσε· νόησε δὲ δῖος Ὀδυσσεύς,
Odyssey 1.165	ἐκ δʼ ἦλθεν μεγάροιο παρὲκ μέγα τειχίον αὐλῆς,
Odyssey 1.166	στῆ δὲ πάροιθʼ αὐτῆς· τὸν δὲ προσέειπεν Ἀθήνη·
Odyssey 1.167	διογενὲς Λαερτιάδη, πολυμήχανʼ Ὀδυσσεῦ.
Odyssey 1.168	ἤδη νῦν σῷ παιδὶ ἔπος φάο μηδʼ ἐπίκευθε,
Odyssey 1.169	ὡς ἂν μνηστῆρσιν θάνατον καὶ κῆρʼ ἀραρόντε
Odyssey 1.170	ἔρχησθον προτὶ ἄστυ περικλυτόν· οὐδʼ ἐγὼ αὐτὴ
Odyssey 1.171	δηρὸν ἀπὸ σφῶϊν ἔσομαι μεμαυῖα μάχεσθαι.
Odyssey 1.172	ἦ καὶ χρυσείῃ ῥάβδῳ ἐπεμάσσατʼ Ἀθήνη.
Odyssey 1.173	φᾶρος μέν οἱ πρῶτον ἐϋπλυνὲς ἠδὲ χιτῶνα
Odyssey 1.174	θῆκʼ ἀμφὶ στήθεσσι, δέμας δʼ ὤφελλε καὶ ἥβην.
Odyssey 1.175	ἂψ δὲ μελαγχροιὴς γένετο, γναθμοὶ δὲ τάνυσθεν,
Odyssey 1.176	κυάνεαι δʼ ἐγένοντο γενειάδες ἀμφὶ γένειον.
Odyssey 1.177	ἡ μὲν ἄρʼ ὣς ἔρξασα πάλιν κίεν· αὐτὰρ Ὀδυσσεὺς
Odyssey 1.178	ἤϊεν ἐς κλισίην· θάμβησε δέ μιν φίλος υἱός,
Odyssey 1.179	ταρβήσας δʼ ἑτέρωσε βάλʼ ὄμματα, μὴ θεὸς εἴη,
Odyssey 1.180	καί μιν φωνήσας ἔπεα πτερόεντα προσηύδα·
Odyssey 1.181	ἀλλοῖός μοι, ξεῖνε, φάνης νέον ἠὲ πάροιθεν,
Odyssey 1.182	ἄλλα δὲ εἵματʼ ἔχεις, καί τοι χρὼς οὐκέθʼ ὁμοῖος.
Odyssey 1.183	ἦ μάλα τις θεός ἐσσι, τοὶ οὐρανὸν εὐρὺν ἔχουσιν·
Odyssey 1.184	ἀλλʼ ἵληθʼ, ἵνα τοι κεχαρισμένα δώομεν ἱρὰ
Odyssey 1.185	ἠδὲ χρύσεα δῶρα, τετυγμένα· φείδεο δʼ ἡμέων
Odyssey 1.186	τὸν δʼ ἠμείβετʼ ἔπειτα πολύτλας δῖος Ὀδυσσεύς·
Odyssey 1.187	οὔ τίς τοι θεός εἰμι· τί μʼ ἀθανάτοισιν ἐΐσκεις;
Odyssey 1.188	ἀλλὰ πατὴρ τεός εἰμι, τοῦ εἵνεκα σὺ στεναχίζων
Odyssey 1.189	πάσχεις ἄλγεα πολλά, βίας ὑποδέγμενος ἀνδρῶν.
Odyssey 1.190	ὣς ἄρα φωνήσας υἱὸν κύσε, κὰδ δὲ παρειῶν
Odyssey 1.191	δάκρυον ἧκε χαμᾶζε· πάρος δʼ ἔχε νωλεμὲς αἰεί.
Odyssey 1.192	Τηλέμαχος δʼ, οὐ γάρ πω ἐπείθετο ὃν πατέρʼ εἶναι,
Odyssey 1.193	ἐξαῦτίς μιν ἔπεσσιν ἀμειβόμενος προσέειπεν·
Odyssey 1.194	οὐ σύ γʼ Ὀδυσσεύς ἐσσι, πατὴρ ἐμός, ἀλλά με δαίμων
Odyssey 1.195	θέλγει, ὄφρʼ ἔτι μᾶλλον ὀδυρόμενος στεναχίζω.
Odyssey 1.196	οὐ γάρ πως ἂν θνητὸς ἀνὴρ τάδε μηχανόῳτο
Odyssey 1.197	ᾧ αὐτοῦ γε νόῳ, ὅτε μὴ θεὸς αὐτὸς ἐπελθὼν
Odyssey 1.198	ῥηϊδίως ἐθέλων θείη νέον ἠὲ γέροντα.
Odyssey 1.199	ἦ γάρ τοι νέον ἦσθα γέρων καὶ ἀεικέα ἕσσο·
Odyssey 1.200	νῦν δὲ θεοῖσιν ἔοικας, οἳ οὐρανὸν εὐρὺν ἔχουσι.
Odyssey 1.201	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.202	Τηλέμαχʼ, οὔ σε ἔοικε φίλον πατέρ ἔνδον ἐόντα
Odyssey 1.203	οὔτε τι θαυμάζειν περιώσιον οὔτʼ ἀγάασθαι·
Odyssey 1.204	οὐ μὲν γάρ τοι ἔτʼ ἄλλος ἐλεύσεται ἐνθάδʼ Ὀδυσσεύς,
Odyssey 1.205	ἀλλʼ ὅδʼ ἐγὼ τοιόσδε, παθὼν κακά, πολλὰ δʼ ἀληθείς,
Odyssey 1.206	ἤλυθον εἰκοστῷ ἔτεϊ ἐς πατρίδα γαῖαν.
Odyssey 1.207	αὐτάρ τοι τόδε ἔργον Ἀθηναίης ἀγελείης,
Odyssey 1.208	ἥ τέ με τοῖον ἔθηκεν, ὅπως ἐθέλει, δύναται γάρ,
Odyssey 1.209	ἄλλοτε μὲν πτωχῷ ἐναλίγκιον, ἄλλοτε δʼ αὖτε
Odyssey 1.210	ἀνδρὶ νέῳ καὶ καλὰ περὶ χροῒ εἵματʼ ἔχοντι.
Odyssey 1.211	ῥηΐδιον δὲ θεοῖσι, τοὶ οὐρανὸν εὐρὺν ἔχουσιν,
Odyssey 1.212	ἠμὲν κυδῆναι θνητὸν βροτὸν ἠδὲ κακῶσαι.
Odyssey 1.213	ὣς ἄρα φωνήσας κατʼ ἄρʼ ἕζετο, Τηλέμαχος δὲ
Odyssey 1.214	ἀμφιχυθεὶς πατέρʼ ἐσθλὸν ὀδύρετο, δάκρυα λείβων,
Odyssey 1.215	ἀμφοτέροισι δὲ τοῖσιν ὑφʼ ἵμερος ὦρτο γόοιο·
Odyssey 1.216	κλαῖον δὲ λιγέως, ἀδινώτερον ἤ τʼ οἰωνοί,
Odyssey 1.217	φῆναι ἢ αἰγυπιοὶ γαμψώνυχες, οἷσί τε τέκνα
Odyssey 1.218	ἀγρόται ἐξείλοντο πάρος πετεηνὰ γενέσθαι·
Odyssey 1.219	ὣς ἄρα τοί γʼ ἐλεεινὸν ὑπʼ ὀφρύσι δάκρυον εἶβον.
Odyssey 1.220	καί νύ κʼ ὀδυρομένοισιν ἔδυ φάος ἠελίοιο,
Odyssey 1.221	εἰ μὴ Τηλέμαχος προσεφώνεεν ὃν πατέρʼ αἶψα·
Odyssey 1.222	ποίῃ γὰρ νῦν δεῦρο, πάτερ φίλε, νηΐ σε ναῦται
Odyssey 1.223	ἤγαγον εἰς Ἰθάκην; τίνες ἔμμεναι εὐχετόωντο;
Odyssey 1.224	οὐ μὲν γάρ τί σε πεζὸν ὀΐομαι ἐνθάδʼ ἱκέσθαι.
Odyssey 1.225	τὸν δʼ αὖτε προσέειπε πολύτλας δῖος Ὀδυσσεύς·
Odyssey 1.226	τοιγὰρ ἐγώ τοι, τέκνον, ἀληθείην καταλέξω.
Odyssey 1.227	Φαίηκές μʼ ἄγαγον ναυσίκλυτοι, οἵ τε καὶ ἄλλους
Odyssey 1.228	ἀνθρώπους πέμπουσιν, ὅτις σφέας εἰσαφίκηται·
Odyssey 1.229	καί μʼ εὕδοντʼ ἐν νηῒ θοῇ ἐπὶ πόντον ἄγοντες
Odyssey 1.230	κάτθεσαν εἰς Ἰθάκην, ἔπορον δέ μοι ἀγλαὰ δῶρα,
Odyssey 1.231	χαλκόν τε χρυσόν τε ἅλις ἐσθῆτά θʼ ὑφαντήν.
Odyssey 1.232	καὶ τὰ μὲν ἐν σπήεσσι θεῶν ἰότητι κέονται·
Odyssey 1.233	νῦν αὖ δεῦρʼ ἱκόμην ὑποθημοσύνῃσιν Ἀθήνης,
Odyssey 1.234	ὄφρα κε δυσμενέεσσι φόνου πέρι βουλεύσωμεν.
Odyssey 1.235	ἀλλʼ ἄγε μοι μνηστῆρας ἀριθμήσας κατάλεξον,
Odyssey 1.236	ὄφρʼ εἰδέω ὅσσοι τε καὶ οἵ τινες ἀνέρες εἰσί·
Odyssey 1.237	καί κεν ἐμὸν κατὰ θυμὸν ἀμύμονα μερμηρίξας
Odyssey 1.238	φράσσομαι, ἤ κεν νῶϊ δυνησόμεθʼ ἀντιφέρεσθαι
Odyssey 1.239	μούνω ἄνευθʼ ἄλλων, ἦ καὶ διζησόμεθʼ ἄλλους.
Odyssey 1.240	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.241	ὦ πάτερ, ἦ τοι σεῖο μέγα κλέος αἰὲν ἄκουον,
Odyssey 1.242	χεῖράς τʼ αἰχμητὴν ἔμεναι καὶ ἐπίφρονα βουλήν·
Odyssey 1.243	ἀλλὰ λίην μέγα εἶπες· ἄγη μʼ ἔχει· οὐδέ κεν εἴη
Odyssey 1.244	ἄνδρε δύω πολλοῖσι καὶ ἰφθίμοισι μάχεσθαι.
Odyssey 1.245	μνηστήρων δʼ οὔτʼ ἂρ δεκὰς ἀτρεκὲς οὔτε δύʼ οἶαι,
Odyssey 1.246	ἀλλὰ πολὺ πλέονες· τάχα δʼ εἴσεαι ἐνθάδʼ ἀριθμόν.
Odyssey 1.247	ἐκ μὲν Δουλιχίοιο δύω καὶ πεντήκοντα
Odyssey 1.248	κοῦροι κεκριμένοι, ἓξ δὲ δρηστῆρες ἕπονται·
Odyssey 1.249	ἐκ δὲ Σάμης πίσυρές τε καὶ εἴκοσι φῶτες ἔασιν,
Odyssey 1.250	ἐκ δὲ Ζακύνθου ἔασιν ἐείκοσι κοῦροι Ἀχαιῶν,
Odyssey 1.251	ἐκ δʼ αὐτῆς Ἰθάκης δυοκαίδεκα πάντες ἄριστοι,
Odyssey 1.252	καί σφιν ἅμʼ ἐστὶ Μέδων κῆρυξ καὶ θεῖος ἀοιδὸς
Odyssey 1.253	καὶ δοιὼ θεράποντε, δαήμονε δαιτροσυνάων.
Odyssey 1.254	τῶν εἴ κεν πάντων ἀντήσομεν ἔνδον ἐόντων,
Odyssey 1.255	μὴ πολύπικρα καὶ αἰνὰ βίας ἀποτίσεαι ἐλθών.
Odyssey 1.256	ἀλλὰ σύ γʼ, εἰ δύνασαί τινʼ ἀμύντορα μερμηρίξαι,
Odyssey 1.257	φράζευ, ὅ κέν τις νῶϊν ἀμύνοι πρόφρονι θυμῷ.
Odyssey 1.258	τὸν δʼ αὖτε προσέειπε πολύτλας δῖος Ὀδυσσεύς·
Odyssey 1.259	τοιγὰρ ἐγὼν ἐρέω, σὺ δὲ σύνθεο καί μευ ἄκουσον·
Odyssey 1.260	καὶ φράσαι ἤ κεν νῶϊν Ἀθήνη σὺν Διὶ πατρὶ
Odyssey 1.261	ἀρκέσει, ἦέ τινʼ ἄλλον ἀμύντορα μερμηρίξω.
Odyssey 1.262	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.263	ἐσθλώ τοι τούτω γʼ ἐπαμύντορε, τοὺς ἀγορεύεις,
Odyssey 1.264	ὕψι περ ἐν νεφέεσσι καθημένω· ὥ τε καὶ ἄλλοις
Odyssey 1.265	ἀνδράσι τε κρατέουσι καὶ ἀθανάτοισι θεοῖσι.
Odyssey 1.266	τὸν δʼ αὖτε προσέειπε πολύτλας δῖος Ὀδυσσεύς·
Odyssey 1.267	οὐ μέν τοι κείνω γε πολὺν χρόνον ἀμφὶς ἔσεσθον
Odyssey 1.268	φυλόπιδος κρατερῆς, ὁπότε μνηστῆρσι καὶ ἡμῖν
Odyssey 1.269	ἐν μεγάροισιν ἐμοῖσι μένος κρίνηται Ἄρηος.
Odyssey 1.270	ἀλλὰ σὺ μὲν νῦν ἔρχευ ἅμʼ ἠοῖ φαινομένηφιν
Odyssey 1.271	οἴκαδε, καὶ μνηστῆρσιν ὑπερφιάλοισιν ὁμίλει·
Odyssey 1.272	αὐτὰρ ἐμὲ προτὶ ἄστυ συβώτης ὕστερον ἄξει,
Odyssey 1.273	πτωχῷ λευγαλέῳ ἐναλίγκιον ἠδὲ γέροντι.
Odyssey 1.274	εἰ δέ μʼ ἀτιμήσουσι δόμον κάτα, σὸν δὲ φίλον κῆρ
Odyssey 1.275	τετλάτω ἐν στήθεσσι κακῶς πάσχοντος ἐμεῖο,
Odyssey 1.276	ἤν περ καὶ διὰ δῶμα ποδῶν ἕλκωσι θύραζε
Odyssey 1.277	ἢ βέλεσι βάλλωσι· σὺ δʼ εἰσορόων ἀνέχεσθαι.
Odyssey 1.278	ἀλλʼ ἦ τοι παύεσθαι ἀνωγέμεν ἀφροσυνάων,
Odyssey 1.279	μειλιχίοις ἐπέεσσι παραυδῶν· οἱ δέ τοι οὔ τι
Odyssey 1.280	πείσονται· δὴ γάρ σφι παρίσταται αἴσιμον ἦμαρ.
Odyssey 1.281	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Odyssey 1.282	ὁππότε κεν πολύβουλος ἐνὶ φρεσὶ θῇσιν Ἀθήνη,
Odyssey 1.283	νεύσω μέν τοι ἐγὼ κεφαλῇ, σὺ δʼ ἔπειτα νοήσας
Odyssey 1.284	ὅσσα τοι ἐν μεγάροισιν Ἀρήϊα τεύχεα κεῖται
Odyssey 1.285	ἐς μυχὸν ὑψηλοῦ θαλάμου καταθεῖναι ἀείρας
Odyssey 1.286	πάντα μάλʼ· αὐτὰρ μνηστῆρας μαλακοῖς ἐπέεσσι
Odyssey 1.287	παρφάσθαι, ὅτε κέν σε μεταλλῶσιν ποθέοντες·
Odyssey 1.288	ἐκ καπνοῦ κατέθηκʼ, ἐπεὶ οὐκέτι τοῖσιν ἐῴκει
Odyssey 1.289	οἷά ποτε Τροίηνδε κιὼν κατέλειπεν Ὀδυσσεύς,
Odyssey 1.290	ἀλλὰ κατῄκισται, ὅσσον πυρὸς ἵκετʼ ἀϋτμή.
Odyssey 1.291	πρὸς δʼ ἔτι καὶ τόδε μεῖζον ἐνὶ φρεσὶ θῆκε Κρονίων,
Odyssey 1.292	μή πως οἰνωθέντες, ἔριν στήσαντες ἐν ὑμῖν,
Odyssey 1.293	ἀλλήλους τρώσητε καταισχύνητέ τε δαῖτα
Odyssey 1.294	καὶ μνηστύν· αὐτὸς γὰρ ἐφέλκεται ἄνδρα σίδηρος.
Odyssey 1.295	νῶϊν δʼ οἴοισιν δύο φάσγανα καὶ δύο δοῦρε
Odyssey 1.296	καλλιπέειν καὶ δοιὰ βοάγρια χερσὶν ἑλέσθαι,
Odyssey 1.297	ὡς ἂν ἐπιθύσαντες ἑλοίμεθα· τοὺς δέ κʼ ἔπειτα
Odyssey 1.298	Παλλὰς Ἀθηναίη θέλξει καὶ μητίετα Ζεύς.
Odyssey 1.299	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Odyssey 1.300	εἰ ἐτεόν γʼ ἐμός ἐσσι καὶ αἵματος ἡμετέροιο,
Odyssey 1.301	μή τις ἔπειτʼ Ὀδυσῆος ἀκουσάτω ἔνδον ἐόντος,
Odyssey 1.302	μήτʼ οὖν Λαέρτης ἴστω τό γε μήτε συβώτης
Odyssey 1.303	μήτε τις οἰκήων μήτʼ αὐτὴ Πηνελόπεια,
Odyssey 1.304	ἀλλʼ οἶοι σύ τʼ ἐγώ τε γυναικῶν γνώομεν ἰθύν·
Odyssey 1.305	καί κέ τεο δμώων ἀνδρῶν ἔτι πειρηθεῖμεν,
Odyssey 1.306	ἠμὲν ὅπου τις νῶϊ τίει καὶ δείδιε θυμῷ,
Odyssey 1.307	ἠδʼ ὅτις οὐκ ἀλέγει, σὲ δʼ ἀτιμᾷ τοῖον ἐόντα.
Odyssey 1.308	τὸν δʼ ἀπαμειβόμενος προσεφώνεε φαίδιμος υἱός
Odyssey 1.309	ὦ πάτερ, ἦ τοι ἐμὸν θυμὸν καὶ ἔπειτά γʼ, ὀΐω,
Odyssey 1.310	γνώσεαι· οὐ μὲν γάρ τι χαλιφροσύναι γέ μʼ ἔχουσιν·
Odyssey 1.311	ἀλλʼ οὔ τοι τόδε κέρδος ἐγὼν ἔσσεσθαι ὀΐω
Odyssey 1.312	ἡμῖν ἀμφοτέροισι· σὲ δὲ φράζεσθαι ἄνωγα.
Odyssey 1.313	δηθὰ γὰρ αὔτως εἴσῃ ἑκάστου πειρητίζων,
Odyssey 1.314	ἔργα μετερχόμενος· τοὶ δʼ ἐν μεγάροισιν ἕκηλοι
Odyssey 1.315	χρήματα δαρδάπτουσιν ὑπέρβιον οὐδʼ ἔπι φειδώ.
Odyssey 1.316	ἀλλʼ ἦ τοί σε γυναῖκας ἐγὼ δεδάασθαι ἄνωγα,
Odyssey 1.317	αἵ τέ σʼ ἀτιμάζουσι καὶ αἳ νηλείτιδές εἰσιν·
Odyssey 1.318	ἀνδρῶν δʼ οὐκ ἂν ἐγώ γε κατὰ σταθμοὺς ἐθέλοιμι
Odyssey 1.319	ἡμέας πειράζειν, ἀλλʼ ὕστερα ταῦτα πένεσθαι,
Odyssey 1.320	εἰ ἐτεόν γέ τι οἶσθα Διὸς τέρας αἰγιόχοιο.
Odyssey 1.321	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.322	ἡ δʼ ἄρʼ ἔπειτʼ Ἰθάκηνδε κατήγετο νηῦς εὐεργής,
Odyssey 1.323	ἣ φέρε Τηλέμαχον Πυλόθεν καὶ πάντας ἑταίρους.
Odyssey 1.324	οἱ δʼ ὅτε δὴ λιμένος πολυβενθέος ἐντὸς ἵκοντο,
Odyssey 1.325	νῆα μὲν οἵ γε μέλαιναν ἐπʼ ἠπείροιο ἔρυσσαν,
Odyssey 1.326	τεύχεα δέ σφʼ ἀπένεικαν ὑπέρθυμοι θεράποντες,
Odyssey 1.327	αὐτίκα δʼ ἐς Κλυτίοιο φέρον περικαλλέα δῶρα.
Odyssey 1.328	αὐτὰρ κήρυκα πρόεσαν δόμον εἰς Ὀδυσῆος,
Odyssey 1.329	ἀγγελίην ἐρέοντα περίφρονι Πηνελοπείῃ,
Odyssey 1.330	οὕνεκα Τηλέμαχος μὲν ἐπʼ ἀγροῦ, νῆα δʼ ἀνώγει
Odyssey 1.331	ἄστυδʼ ἀποπλείειν, ἵνα μὴ δείσασʼ ἐνὶ θυμῷ
Odyssey 1.332	ἰφθίμη βασίλεια τέρεν κατὰ δάκρυον εἴβοι
Odyssey 1.333	τὼ δὲ συναντήτην κῆρυξ καὶ δῖος ὑφορβὸς
Odyssey 1.334	τῆς αὐτῆς ἕνεκʼ ἀγγελίης, ἐρέοντε γυναικί.
Odyssey 1.335	ἀλλʼ ὅτε δή ῥʼ ἵκοντο δόμον θείου βασιλῆος,
Odyssey 1.336	κῆρυξ μέν ῥα μέσῃσι μετὰ δμῳῇσιν ἔειπεν·
Odyssey 1.337	ἤδη τοι, βασίλεια, φίλος πάϊς εἰλήλουθε.
Odyssey 1.338	Πηνελοπείῃ δʼ εἶπε συβώτης ἄγχι παραστὰς
Odyssey 1.339	πάνθʼ ὅσα οἱ φίλος υἱὸς ἀνώγει μυθήσασθαι.
Odyssey 1.340	αὐτὰρ ἐπεὶ δὴ πᾶσαν ἐφημοσύνην ἀπέειπε,
Odyssey 1.341	βῆ ῥʼ ἴμεναι μεθʼ ὕας, λίπε δʼ ἕρκεά τε μέγαρόν τε.
Odyssey 1.342	μνηστῆρες δʼ ἀκάχοντο κατήφησάν τʼ ἐνὶ θυμῷ,
Odyssey 1.343	ἐκ δʼ ἦλθον μεγάροιο παρὲκ μέγα τειχίον αὐλῆς,
Odyssey 1.344	αὐτοῦ δὲ προπάροιθε θυράων ἑδριόωντο.
Odyssey 1.345	τοῖσιν δʼ Εὐρύμαχος, Πολύβου πάϊς, ἦρχʼ ἀγορεύειν·
Odyssey 1.346	ὦ φίλοι, ἦ μέγα ἔργον ὑπερφιάλως τετέλεσται
Odyssey 1.347	Τηλεμάχῳ ὁδὸς ἥδε· φάμεν δέ οἱ οὐ τελέεσθαι.
Odyssey 1.348	ἀλλʼ ἄγε νῆα μέλαιναν ἐρύσσομεν ἥ τις ἀρίστη,
Odyssey 1.349	ἐς δʼ ἐρέτας ἁλιῆας ἀγείρομεν, οἵ κε τάχιστα
Odyssey 1.350	κείνοις ἀγγείλωσι θοῶς οἶκόνδε νέεσθαι.
Odyssey 1.351	οὔ πω πᾶν εἴρηθʼ, ὅτʼ ἄρʼ Ἀμφίνομος ἴδε νῆα,
Odyssey 1.352	στρεφθεὶς ἐκ χώρης, λιμένος πολυβενθέος ἐντός,
Odyssey 1.353	ἱστία τε στέλλοντας ἐρετμά τε χερσὶν ἔχοντας.
Odyssey 1.354	ἡδὺ δʼ ἄρʼ ἐκγελάσας μετεφώνεεν οἷς ἑτάροισι·
Odyssey 1.355	μή τινʼ ἔτʼ ἀγγελίην ὀτρύνομεν· οἵδε γὰρ ἔνδον.
Odyssey 1.356	ἤ τίς σφιν τόδʼ ἔειπε θεῶν, ἢ εἴσιδον αὐτοὶ
Odyssey 1.357	νῆα παρερχομένην, τὴν δʼ οὐκ ἐδύναντο κιχῆναι.
Odyssey 1.358	ὣς ἔφαθʼ, οἱ δʼ ἀνστάντες ἔβαν ἐπὶ θῖνα θαλάσσης,
Odyssey 1.359	αἶψα δὲ νῆα μέλαιναν ἐπʼ ἠπείροιο ἔρυσσαν,
Odyssey 1.360	τεύχεα δέ σφʼ ἀπένεικαν ὑπέρθυμοι θεράποντες.
Odyssey 1.361	αὐτοὶ δʼ εἰς ἀγορὴν κίον ἀθρόοι, οὐδέ τινʼ ἄλλον
Odyssey 1.362	εἴων οὔτε νέων μεταΐζειν οὔτε γερόντων.
Odyssey 1.363	τοῖσιν δʼ Ἀντίνοος μετέφη, Εὐπείθεος υἱός·
Odyssey 1.364	ὢ πόποι, ὡς τόνδʼ ἄνδρα θεοὶ κακότητος ἔλυσαν.
Odyssey 1.365	ἤματα μὲν σκοποὶ ἷζον ἐπʼ ἄκριας ἠνεμοέσσας
Odyssey 1.366	αἰὲν ἐπασσύτεροι· ἅμα δʼ ἠελίῳ καταδύντι
Odyssey 1.367	οὔ ποτʼ ἐπʼ ἠπείρου νύκτʼ ἄσαμεν, ἀλλʼ ἐνὶ πόντῳ
Odyssey 1.368	νηῒ θοῇ πλείοντες ἐμίμνομεν Ἠῶ δῖαν,
Odyssey 1.369	Τηλέμαχον λοχόωντες, ἵνα φθίσωμεν ἑλόντες
Odyssey 1.370	αὐτόν· τὸν δʼ ἄρα τῆος ἀπήγαγεν οἴκαδε δαίμων,
Odyssey 1.371	ἡμεῖς δʼ ἐνθάδε οἱ φραζώμεθα λυγρὸν ὄλεθρον
Odyssey 1.372	Τηλεμάχῳ, μηδʼ ἧμας ὑπεκφύγοι· οὐ γὰρ ὀΐω
Odyssey 1.373	τούτου γε ζώοντος ἀνύσσεσθαι τάδε ἔργα.
Odyssey 1.374	αὐτὸς μὲν γὰρ ἐπιστήμων βουλῇ τε νόῳ τε,
Odyssey 1.375	λαοὶ δʼ οὐκέτι πάμπαν ἐφʼ ἡμῖν ἦρα φέρουσιν.
Odyssey 1.376	ἀλλʼ ἄγετε, πρὶν κεῖνον ὁμηγυρίσασθαι Ἀχαιοὺς
Odyssey 1.377	εἰς ἀγορήν—οὐ γάρ τι μεθησέμεναί μιν ὀΐω,
Odyssey 1.378	ἀλλʼ ἀπομηνίσει, ἐρέει δʼ ἐν πᾶσιν ἀναστὰς
Odyssey 1.379	οὕνεκά οἱ φόνον αἰπὺν ἐράπτομεν οὐδʼ ἐκίχημεν·
Odyssey 1.380	οἱ δʼ οὐκ αἰνήσουσιν ἀκούοντες κακὰ ἔργα·
Odyssey 1.381	μή τι κακὸν ῥέξωσι καὶ ἡμέας ἐξελάσωσι
Odyssey 1.382	γαίης ἡμετέρης, ἄλλων δʼ ἀφικώμεθα δῆμον·
Odyssey 1.383	ἀλλὰ φθέωμεν ἑλόντες ἐπʼ ἀγροῦ νόσφι πόληος
Odyssey 1.384	ἢ ἐν ὁδῷ· βίοτον δʼ αὐτοὶ καὶ κτήματʼ ἔχωμεν,
Odyssey 1.385	δασσάμενοι κατὰ μοῖραν ἐφʼ ἡμέας, οἰκία δʼ αὖτε
Odyssey 1.386	κείνου μητέρι δοῖμεν ἔχειν ἠδʼ ὅστις ὀπυίοι.
Odyssey 1.387	εἰ δʼ ὑμῖν ὅδε μῦθος ἀφανδάνει, ἀλλὰ βόλεσθε
Odyssey 1.388	αὐτόν τε ζώειν καὶ ἔχειν πατρώϊα πάντα,
Odyssey 1.389	μή οἱ χρήματʼ ἔπειτα ἅλις θυμηδέʼ ἔδωμεν
Odyssey 1.390	ἐνθάδʼ ἀγειρόμενοι, ἀλλʼ ἐκ μεγάροιο ἕκαστος
Odyssey 1.391	μνάσθω ἐέδνοισιν διζήμενος· ἡ δέ κʼ ἔπειτα
Odyssey 1.392	γήμαιθʼ ὅς κε πλεῖστα πόροι καὶ μόρσιμος ἔλθοι.
Odyssey 1.393	ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ.
Odyssey 1.394	τοῖσιν δʼ Ἀμφίνομος ἀγορήσατο καὶ μετέειπε,
Odyssey 1.395	Νίσου φαίδιμος υἱός, Ἀρητιάδαο ἄνακτος,
Odyssey 1.396	ὅς ῥʼ ἐκ Δουλιχίου πολυπύρου, ποιήεντος,
Odyssey 1.397	ἡγεῖτο μνηστῆρσι, μάλιστα δὲ Πηνελοπείῃ
Odyssey 1.398	ἥνδανε μύθοισι· φρεσὶ γὰρ κέχρητʼ ἀγαθῇσιν·
Odyssey 1.399	ὅ σφιν ἐϋφρονέων ἀγορήσατο καὶ μετέειπεν·
Odyssey 1.400	ὦ φίλοι, οὐκ ἂν ἐγώ γε κατακτείνειν ἐθέλοιμι
Odyssey 1.401	Τηλέμαχον· δεινὸν δὲ γένος βασιλήϊόν ἐστιν
Odyssey 1.402	κτείνειν· ἀλλὰ πρῶτα θεῶν εἰρώμεθα βουλάς.
Odyssey 1.403	εἰ μέν κʼ αἰνήσωσι Διὸς μεγάλοιο θέμιστες,
Odyssey 1.404	αὐτός τε κτενέω τούς τʼ ἄλλους πάντας ἀνώξω·
Odyssey 1.405	εἰ δέ κʼ ἀποτρωπῶσι θεοί, παύσασθαι ἄνωγα.
Odyssey 1.406	ὣς ἔφατʼ Ἀμφίνομος, τοῖσιν δʼ ἐπιήνδανε μῦθος.
Odyssey 1.407	αὐτίκʼ ἔπειτʼ ἀνστάντες ἔβαν δόμον εἰς Ὀδυσῆος,
Odyssey 1.408	ἐλθόντες δὲ καθῖζον ἐπὶ ξεστοῖσι θρόνοισιν.
Odyssey 1.409	ἡ δʼ αὖτʼ ἄλλʼ ἐνόησε περίφρων Πηνελόπεια,
Odyssey 1.410	μνηστήρεσσι φανῆναι ὑπέρβιον ὕβριν ἔχουσι.
Odyssey 1.411	πεύθετο γὰρ οὗ παιδὸς ἐνὶ μεγάροισιν ὄλεθρον·
Odyssey 1.412	κῆρυξ γάρ οἱ ἔειπε Μέδων, ὃς ἐπεύθετο βουλάς.
Odyssey 1.413	βῆ δʼ ἰέναι μέγαρόνδε σὺν ἀμφιπόλοισι γυναιξίν.
Odyssey 1.414	ἀλλʼ ὅτε δὴ μνηστῆρας ἀφίκετο δῖα γυναικῶν,
Odyssey 1.415	στῆ ῥα παρὰ σταθμὸν τέγεος πύκα ποιητοῖο,
Odyssey 1.416	ἄντα παρειάων σχομένη λιπαρὰ κρήδεμνα,
Odyssey 1.417	Ἀντίνοον δʼ ἐνένιπεν ἔπος τʼ ἔφατʼ ἔκ τʼ ὀνόμαζεν·
Odyssey 1.418	Ἀντίνοʼ, ὕβριν ἔχων, κακομήχανε, καὶ δέ σέ φασιν
Odyssey 1.419	ἐν δήμῳ Ἰθάκης μεθʼ ὁμήλικας ἔμμεν ἄριστον
Odyssey 1.420	βουλῇ καὶ μύθοισι· σὺ δʼ οὐκ ἄρα τοῖος ἔησθα.
Odyssey 1.421	μάργε, τίη δὲ σὺ Τηλεμάχῳ θάνατόν τε μόρον τε
Odyssey 1.422	ῥάπτεις, οὐδʼ ἱκέτας ἐμπάζεαι, οἷσιν ἄρα Ζεὺς
Odyssey 1.423	μάρτυρος; οὐδʼ ὁσίη κακὰ ῥάπτειν ἀλλήλοισιν.
Odyssey 1.424	ἦ οὐκ οἶσθʼ ὅτε δεῦρο πατὴρ τεὸς ἵκετο φεύγων,
Odyssey 1.425	δῆμον ὑποδείσας; δὴ γὰρ κεχολώατο λίην,
Odyssey 1.426	οὕνεκα ληϊστῆρσιν ἐπισπόμενος Ταφίοισιν
Odyssey 1.427	ἤκαχε Θεσπρωτούς· οἱ δʼ ἡμῖν ἄρθμιοι ἦσαν·
Odyssey 1.428	τόν ῥʼ ἔθελον φθῖσαι καὶ ἀπορραῖσαι φίλον ἦτορ
Odyssey 1.429	ἠδὲ κατὰ ζωὴν φαγέειν μενοεικέα πολλήν·
Odyssey 1.430	ἀλλʼ Ὀδυσεὺς κατέρυκε καὶ ἔσχεθεν ἱεμένους περ.
Odyssey 1.431	τοῦ νῦν οἶκον ἄτιμον ἔδεις, μνάᾳ δὲ γυναῖκα
Odyssey 1.432	παῖδά τʼ ἀποκτείνεις, ἐμὲ δὲ μεγάλως ἀκαχίζεις·
Odyssey 1.433	ἀλλά σε παύσασθαι κέλομαι καὶ ἀνωγέμεν ἄλλους.
Odyssey 1.434	τὴν δʼ αὖτʼ Εὐρύμαχος, Πολύβου πάϊς, ἀντίον ηὔδα·
Odyssey 1.435	κούρη Ἰκαρίοιο, περίφρον Πηνελόπεια,
Odyssey 1.436	θάρσει· μή τοι ταῦτα μετὰ φρεσὶ σῇσι μελόντων.
Odyssey 1.437	οὐκ ἔσθʼ οὗτος ἀνὴρ οὐδʼ ἔσσεται οὐδὲ γένηται,
Odyssey 1.438	ὅς κεν Τηλεμάχῳ σῷ υἱέϊ χεῖρας ἐποίσει
Odyssey 1.439	ζώοντός γʼ ἐμέθεν καὶ ἐπὶ χθονὶ δερκομένοιο.
Odyssey 1.440	ὧδε γὰρ ἐξερέω, καὶ μὴν τετελεσμένον ἔσται·
Odyssey 1.441	αἶψά οἱ αἷμα κελαινὸν ἐρωήσει περὶ δουρὶ
Odyssey 1.442	ἡμετέρῳ, ἐπεὶ ἦ καὶ ἐμὲ πτολίπορθος Ὀδυσσεὺς
Odyssey 1.443	πολλάκι γούνασιν οἷσιν ἐφεσσάμενος κρέας ὀπτὸν
Odyssey 1.444	ἐν χείρεσσιν ἔθηκεν, ἐπέσχε τε οἶνον ἐρυθρόν.
Odyssey 1.445	τῷ μοι Τηλέμαχος πάντων πολὺ φίλτατός ἐστιν
Odyssey 1.446	ἀνδρῶν, οὐδέ τί μιν θάνατον τρομέεσθαι ἄνωγα
Odyssey 1.447	ἔκ γε μνηστήρων· θεόθεν δʼ οὐκ ἔστʼ ἀλέασθαι.
Odyssey 1.448	ὣς φάτο θαρσύνων, τῷ δʼ ἤρτυεν αὐτὸς ὄλεθρον.
Odyssey 1.449	ἡ μὲν ἄρʼ εἰσαναβᾶσʼ ὑπερώϊα σιγαλόεντα
Odyssey 1.450	κλαῖεν ἔπειτʼ Ὀδυσῆα, φίλον πόσιν, ὄφρα οἱ ὕπνον
Odyssey 1.451	ἡδὺν ἐπὶ βλεφάροισι βάλε γλαυκῶπις Ἀθήνη.
Odyssey 1.452	ἑσπέριος δʼ Ὀδυσῆϊ καὶ υἱέϊ δῖος ὑφορβὸς
Odyssey 1.453	ἤλυθεν· οἱ δʼ ἄρα δόρπον ἐπισταδὸν ὡπλίζοντο,
Odyssey 1.454	σῦν ἱερεύσαντες ἐνιαύσιον. αὐτὰρ Ἀθήνη,
Odyssey 1.455	ἄγχι παρισταμένη, Λαερτιάδην Ὀδυσῆα
Odyssey 1.456	ῥάβδῳ πεπληγυῖα πάλιν ποίησε γέροντα,
Odyssey 1.457	λυγρὰ δὲ εἵματα ἕσσε περὶ χροΐ, μή ἑ συβώτης
Odyssey 1.458	γνοίη ἐσάντα ἰδὼν καὶ ἐχέφρονι Πηνελοπείῃ
Odyssey 1.459	ἔλθοι ἀπαγγέλλων μηδὲ φρεσὶν εἰρύσσαιτο.
Odyssey 1.460	τὸν καὶ Τηλέμαχος πρότερος πρὸς μῦθον ἔειπεν·
Odyssey 1.461	ἦλθες, δῖʼ Εὔμαιε. τί δὴ κλέος ἔστʼ ἀνὰ ἄστυ;
Odyssey 1.462	ἦ ῥʼ ἤδη μνηστῆρες ἀγήνορες ἔνδον ἔασιν
Odyssey 1.463	ἐκ λόχου, ἦ ἔτι μʼ αὖτʼ εἰρύαται οἴκαδʼ ἰόντα;
Odyssey 1.464	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.465	οὐκ ἔμελέν μοι ταῦτα μεταλλῆσαι καὶ ἐρέσθαι
Odyssey 1.466	ἄστυ καταβλώσκοντα· τάχιστά με θυμὸς ἀνώγει
Odyssey 1.467	ἀγγελίην εἰπόντα πάλιν δεῦρʼ ἀπονέεσθαι.
Odyssey 1.468	ὡμήρησε δέ μοι παρʼ ἑταίρων ἄγγελος ὠκύς,
Odyssey 1.469	κῆρυξ, ὃς δὴ πρῶτος ἔπος σῇ μητρὶ ἔειπεν.
Odyssey 1.470	ἄλλο δέ τοι τό γε οἶδα· τὸ γὰρ ἴδον ὀφθαλμοῖσιν.
Odyssey 1.471	ἤδη ὑπὲρ πόλιος, ὅθι θʼ Ἕρμαιος λόφος ἐστίν,
Odyssey 1.472	ἦα κιών, ὅτε νῆα θοὴν ἰδόμην κατιοῦσαν
Odyssey 1.473	ἐς λιμένʼ ἡμέτερον· πολλοὶ δʼ ἔσαν ἄνδρες ἐν αὐτῇ,
Odyssey 1.474	βεβρίθει δὲ σάκεσσι καὶ ἔγχεσιν ἀμφιγύοισι·
Odyssey 1.475	καὶ σφέας ὠΐσθην τοὺς ἔμμεναι, οὐδέ τι οἶδα.
Odyssey 1.476	ὣς φάτο, μείδησεν δʼ ἱερὴ ἲς Τηλεμάχοιο
Odyssey 1.477	ἐς πατέρʼ ὀφθαλμοῖσιν ἰδών, ἀλέεινε δʼ ὑφορβόν.
Odyssey 1.478	οἱ δʼ ἐπεὶ οὖν παύσαντο πόνου τετύκοντό τε δαῖτα,
Odyssey 1.479	δαίνυντʼ, οὐδέ τι θυμὸς ἐδεύετο δαιτὸς ἐΐσης.
Odyssey 1.480	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.481	κοίτου τε μνήσαντο καὶ ὕπνου δῶρον ἕλοντο.
Odyssey 1.1	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.2	δὴ τότʼ ἔπειθʼ ὑπὸ ποσσὶν ἐδήσατο καλὰ πέδιλα
Odyssey 1.3	Τηλέμαχος, φίλος υἱὸς Ὀδυσσῆος θείοιο,
Odyssey 1.4	εἵλετο δʼ ἄλκιμον ἔγχος, ὅ οἱ παλάμηφιν ἀρήρει,
Odyssey 1.5	ἄστυδε ἱέμενος, καὶ ἑὸν προσέειπε συβώτην·
Odyssey 1.6	ἄττʼ, ἦ τοι μὲν ἐγὼν εἶμʼ ἐς πόλιν, ὄφρα με μήτηρ
Odyssey 1.7	ὄψεται· οὐ γάρ μιν πρόσθεν παύσεσθαι ὀΐω
Odyssey 1.8	κλαυθμοῦ τε στυγεροῖο γόοιό τε δακρυόεντος,
Odyssey 1.9	πρίν γʼ αὐτόν με ἴδηται· ἀτὰρ σοί γʼ ὧδʼ ἐπιτέλλω.
Odyssey 1.10	τὸν ξεῖνον δύστηνον ἄγʼ ἐς πόλιν, ὄφρʼ ἂν ἐκεῖθι
Odyssey 1.11	δαῖτα πτωχεύῃ· δώσει δέ οἱ ὅς κʼ ἐθέλῃσι
Odyssey 1.12	πύρνον καὶ κοτύλην· ἐμὲ δʼ οὔ πως ἔστιν ἅπαντας
Odyssey 1.13	ἀνθρώπους ἀνέχεσθαι, ἔχοντά περ ἄλγεα θυμῷ·
Odyssey 1.14	ὁ ξεῖνος δʼ εἴ περ μάλα μηνίει, ἄλγιον αὐτῷ
Odyssey 1.15	ἔσσεται· ἦ γὰρ ἐμοὶ φίλʼ ἀληθέα μυθήσασθαι.
Odyssey 1.16	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.17	ὦ φίλος, οὐδέ τοι αὐτὸς ἐρύκεσθαι μενεαίνω·
Odyssey 1.18	πτωχῷ βέλτερόν ἐστι κατὰ πτόλιν ἠὲ κατʼ ἀγροὺς
Odyssey 1.19	δαῖτα πτωχεύειν· δώσει δέ μοι ὅς κʼ ἐθέλῃσιν.
Odyssey 1.20	οὐ γὰρ ἐπὶ σταθμοῖσι μένειν ἔτι τηλίκος εἰμί,
Odyssey 1.21	ὥστʼ ἐπιτειλαμένῳ σημάντορι πάντα πιθέσθαι.
Odyssey 1.22	ἀλλʼ ἔρχευ· ἐμὲ δʼ ἄξει ἀνὴρ ὅδε, τὸν σὺ κελεύεις,
Odyssey 1.23	αὐτίκʼ ἐπεί κε πυρὸς θερέω ἀλέη τε γένηται.
Odyssey 1.24	αἰνῶς γὰρ τάδε εἵματʼ ἔχω κακά· μή με δαμάσσῃ
Odyssey 1.25	στίβη ὑπηοίη· ἕκαθεν δέ τε ἄστυ φάτʼ εἶναι.
Odyssey 1.26	ὣς φάτο, Τηλέμαχος δὲ διὰ σταθμοῖο βεβήκει,
Odyssey 1.27	κραιπνὰ ποσὶ προβιβάς, κακὰ δὲ μνηστῆρσι φύτευεν.
Odyssey 1.28	αὐτὰρ ἐπεί ῥʼ ἵκανε δόμους εὖ ναιετάοντας,
Odyssey 1.29	ἔγχος μέν ῥʼ ἔστησε φέρων πρὸς κίονα μακρήν,
Odyssey 1.30	αὐτὸς δʼ εἴσω ἴεν καὶ ὑπέρβη λάϊνον οὐδόν.
Odyssey 1.31	τὸν δὲ πολὺ πρώτη εἶδε τροφὸς Εὐρύκλεια,
Odyssey 1.32	κώεα καστορνῦσα θρόνοις ἔνι δαιδαλέοισι,
Odyssey 1.33	δακρύσασα δʼ ἔπειτʼ ἰθὺς κίεν· ἀμφὶ δʼ ἄρʼ ἄλλαι
Odyssey 1.34	δμῳαὶ Ὀδυσσῆος ταλασίφρονος ἠγερέθοντο,
Odyssey 1.35	καὶ κύνεον ἀγαπαζόμεναι κεφαλήν τε καὶ ὤμους.
Odyssey 1.36	ἡ δʼ ἴεν ἐκ θαλάμοιο περίφρων Πηνελόπεια,
Odyssey 1.37	Ἀρτέμιδι ἰκέλη ἠὲ χρυσέῃ Ἀφροδίτῃ,
Odyssey 1.38	ἀμφὶ δὲ παιδὶ φίλῳ βάλε πήχεε δακρύσασα,
Odyssey 1.39	κύσσε δέ μιν κεφαλήν τε καὶ ἄμφω φάεα καλά,
Odyssey 1.40	καί ῥʼ ὀλοφυρομένη ἔπεα πτερόεντα προσηύδα·
Odyssey 1.41	ἦλθες, Τηλέμαχε, γλυκερὸν φάος. οὔ σʼ ἔτʼ ἐγώ γε
Odyssey 1.42	ὄψεσθαι ἐφάμην, ἐπεὶ ᾤχεο νηῒ Πύλονδε
Odyssey 1.43	λάθρη, ἐμεῦ ἀέκητι, φίλου μετὰ πατρὸς ἀκουήν.
Odyssey 1.44	ἀλλʼ ἄγε μοι κατάλεξον ὅπως ἤντησας ὀπωπῆς.
Odyssey 1.45	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.46	μῆτερ ἐμή, μή μοι γόον ὄρνυθι μηδέ μοι ἦτορ
Odyssey 1.47	ἐν στήθεσσιν ὄρινε φυγόντι περ αἰπὺν ὄλεθρον·
Odyssey 1.48	ἀλλʼ ὑδρηναμένη, καθαρὰ χροῒ εἵμαθʼ ἑλοῦσα,
Odyssey 1.49	εἰς ὑπερῷʼ ἀναβᾶσα σὺν ἀμφιπόλοισι γυναιξὶν
Odyssey 1.50	εὔχεο πᾶσι θεοῖσι τεληέσσας ἑκατόμβας
Odyssey 1.51	ῥέξειν, αἴ κέ ποθι Ζεὺς ἄντιτα ἔργα τελέσσῃ.
Odyssey 1.52	αὐτὰρ ἐγὼν ἀγορὴν ἐσελεύσομαι, ὄφρα καλέσσω
Odyssey 1.53	ξεῖνον, ὅτις μοι κεῖθεν ἅμʼ ἕσπετο δεῦρο κιόντι.
Odyssey 1.54	τὸν μὲν ἐγὼ προὔπεμψα σὺν ἀντιθέοις ἑτάροισι,
Odyssey 1.55	Πείραιον δέ μιν ἠνώγεα προτὶ οἶκον ἄγοντα
Odyssey 1.56	ἐνδυκέως φιλέειν καὶ τιέμεν, εἰς ὅ κεν ἔλθω.
Odyssey 1.57	ὣς ἄρʼ ἐφώνησεν, τῇ δʼ ἄπτερος ἔπλετο μῦθος.
Odyssey 1.58	ἡ δʼ ὑδρηναμένη, καθαρὰ χροῒ εἵμαθʼ ἑλοῦσα,
Odyssey 1.59	εὔχετο πᾶσι θεοῖσι τεληέσσας ἑκατόμβας
Odyssey 1.60	ῥέξειν, αἴ κέ ποθι Ζεὺς ἄντιτα ἔργα τελέσσῃ.
Odyssey 1.61	Τηλέμαχος δʼ ἄρʼ ἔπειτα διὲκ μεγάροιο βεβήκει
Odyssey 1.62	ἔγχος ἔχων· ἅμα τῷ γε δύω κύνες ἀργοὶ ἕποντο.
Odyssey 1.63	θεσπεσίην δʼ ἄρα τῷ γε χάριν κατέχευεν Ἀθήνη·
Odyssey 1.64	τὸν δʼ ἄρα πάντες λαοὶ ἐπερχόμενον θηεῦντο.
Odyssey 1.65	ἀμφὶ δέ μιν μνηστῆρες ἀγήνορες ἠγερέθοντο
Odyssey 1.66	ἔσθλʼ ἀγορεύοντες, κακὰ δὲ φρεσὶ βυσσοδόμευον.
Odyssey 1.67	αὐτὰρ ὁ τῶν μὲν ἔπειτα ἀλεύατο πουλὺν ὅμιλον,
Odyssey 1.68	ἀλλʼ ἵνα Μέντωρ ἧστο καὶ Ἄντιφος ἠδʼ Ἁλιθέρσης,
Odyssey 1.69	οἵ τε οἱ ἐξ ἀρχῆς πατρώϊοι ἦσαν ἑταῖροι,
Odyssey 1.70	ἔνθα καθέζετʼ ἰών· τοὶ δʼ ἐξερέεινον ἕκαστα.
Odyssey 1.71	τοῖσι δὲ Πείραιος δουρικλυτὸς ἐγγύθεν ἦλθεν
Odyssey 1.72	ξεῖνον ἄγων ἀγορήνδε διὰ πτόλιν· οὐδʼ ἄρʼ ἔτι δὴν
Odyssey 1.73	Τηλέμαχος ξείνοιο ἑκὰς τράπετʼ, ἀλλὰ παρέστη.
Odyssey 1.74	τὸν καὶ Πείραιος πρότερος πρὸς μῦθον ἔειπε·
Odyssey 1.75	Τηλέμαχʼ, αἶψʼ ὄτρυνον ἐμὸν ποτὶ δῶμα γυναῖκας,
Odyssey 1.76	ὥς τοι δῶρʼ ἀποπέμψω, ἅ τοι Μενέλαος ἔδωκε.
Odyssey 1.77	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.78	Πείραιʼ, οὐ γάρ τʼ ἴδμεν ὅπως ἔσται τάδε ἔργα.
Odyssey 1.79	εἴ κεν ἐμὲ μνηστῆρες ἀγήνορες ἐν μεγάροισι
Odyssey 1.80	λάθρη κτείναντες πατρώϊα πάντα δάσωνται,
Odyssey 1.81	αὐτὸν ἔχοντά σε βούλομʼ ἐπαυρέμεν, ἤ τινα τῶνδε·
Odyssey 1.82	εἰ δέ κʼ ἐγὼ τούτοισι φόνον καὶ κῆρα φυτεύσω,
Odyssey 1.83	δὴ τότε μοι χαίροντι φέρειν πρὸς δώματα χαίρων.
Odyssey 1.84	ὣς εἰπὼν ξεῖνον ταλαπείριον ἦγεν ἐς οἶκον.
Odyssey 1.85	αὐτὰρ ἐπεί ῥʼ ἵκοντο δόμους εὖ ναιετάοντας,
Odyssey 1.86	χλαίνας μὲν κατέθεντο κατὰ κλισμούς τε θρόνους τε,
Odyssey 1.87	ἐς δʼ ἀσαμίνθους βάντες ἐϋξέστας λούσαντο.
Odyssey 1.88	τοὺς δʼ ἐπεὶ οὖν δμῳαὶ λοῦσαν καὶ χρῖσαν ἐλαίῳ,
Odyssey 1.89	ἀμφὶ δʼ ἄρα χλαίνας οὔλας βάλον ἠδὲ χιτῶνας,
Odyssey 1.90	ἔκ ῥʼ ἀσαμίνθων βάντες ἐπὶ κλισμοῖσι καθῖζον.
Odyssey 1.91	χέρνιβα δʼ ἀμφίπολος προχόῳ ἐπέχευε φέρουσα
Odyssey 1.92	καλῇ χρυσείῃ, ὑπὲρ ἀργυρέοιο λέβητος,
Odyssey 1.93	νίψασθαι· παρὰ δὲ ξεστὴν ἐτάνυσσε τράπεζαν.
Odyssey 1.94	σῖτον δʼ αἰδοίη ταμίη παρέθηκε φέρουσα,
Odyssey 1.95	εἴδατα πόλλʼ ἐπιθεῖσα, χαριζομένη παρεόντων.
Odyssey 1.96	μήτηρ δʼ ἀντίον ἷζε παρὰ σταθμὸν μεγάροιο
Odyssey 1.97	κλισμῷ κεκλιμένη, λέπτʼ ἠλάκατα στρωφῶσα.
Odyssey 1.98	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον,
Odyssey 1.99	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Odyssey 1.100	τοῖσι δὲ μύθων ἦρχε περίφρων Πηνελόπεια·
Odyssey 1.101	Τηλέμαχʼ, ἦ τοι ἐγὼν ὑπερώϊον εἰσαναβᾶσα
Odyssey 1.102	λέξομαι εἰς εὐνήν, ἥ μοι στονόεσσα τέτυκται,
Odyssey 1.103	αἰεὶ δάκρυσʼ ἐμοῖσι πεφυρμένη, ἐξ οὗ Ὀδυσσεὺς
Odyssey 1.104	ᾤχεθʼ ἅμʼ Ἀτρεΐδῃσιν ἐς Ἴλιον· οὐδέ μοι ἔτλης,
Odyssey 1.105	πρὶν ἐλθεῖν μνηστῆρας ἀγήνορας ἐς τόδε δῶμα,
Odyssey 1.106	νόστον σοῦ πατρὸς σάφα εἰπέμεν, εἴ που ἄκουσας.
Odyssey 1.107	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.108	τοιγὰρ ἐγώ τοι, μῆτερ, ἀληθείην καταλέξω.
Odyssey 1.109	ᾠχόμεθʼ ἔς τε Πύλον καὶ Νέστορα, ποιμένα λαῶν·
Odyssey 1.110	δεξάμενος δέ με κεῖνος ἐν ὑψηλοῖσι δόμοισιν
Odyssey 1.111	ἐνδυκέως ἐφίλει, ὡς εἴ τε πατὴρ ἑὸν υἱὸν
Odyssey 1.112	ἐλθόντα χρόνιον νέον ἄλλοθεν· ὣς ἐμὲ κεῖνος
Odyssey 1.113	ἐνδυκέως ἐκόμιζε σὺν υἱάσι κυδαλίμοισιν.
Odyssey 1.114	αὐτὰρ Ὀδυσσῆος ταλασίφρονος οὔ ποτʼ ἔφασκεν,
Odyssey 1.115	ζωοῦ οὐδὲ θανόντος, ἐπιχθονίων τευ ἀκοῦσαι·
Odyssey 1.116	ἀλλά μʼ ἐς Ἀτρεΐδην, δουρικλειτὸν Μενέλαον,
Odyssey 1.117	ἵπποισι προὔπεμψε καὶ ἅρμασι κολλητοῖσιν.
Odyssey 1.118	ἔνθʼ ἴδον Ἀργείην Ἑλένην, ἧς εἵνεκα πολλὰ
Odyssey 1.119	Ἀργεῖοι Τρῶές τε θεῶν ἰότητι μόγησαν.
Odyssey 1.120	εἴρετο δʼ αὐτίκʼ ἔπειτα βοὴν ἀγαθὸς Μενέλαος
Odyssey 1.121	ὅττευ χρηΐζων ἱκόμην Λακεδαίμονα δῖαν·
Odyssey 1.122	αὐτὰρ ἐγὼ τῷ πᾶσαν ἀληθείην κατέλεξα·
Odyssey 1.123	καὶ τότε δή με ἔπεσσιν ἀμειβόμενος προσέειπεν·
Odyssey 1.124	ὢ πόποι, ἦ μάλα δὴ κρατερόφρονος ἀνδρὸς ἐν εὐνῇ
Odyssey 1.125	ἤθελον εὐνηθῆναι, ἀνάλκιδες αὐτοὶ ἐόντες.
Odyssey 1.126	ὡς δʼ ὁπότʼ ἐν ξυλόχῳ ἔλαφος κρατεροῖο λέοντος
Odyssey 1.127	νεβροὺς κοιμήσασα νεηγενέας γαλαθηνοὺς
Odyssey 1.128	κνημοὺς ἐξερέῃσι καὶ ἄγκεα ποιήεντα
Odyssey 1.129	βοσκομένη, ὁ δʼ ἔπειτα ἑὴν εἰσήλυθεν εὐνήν,
Odyssey 1.130	ἀμφοτέροισι δὲ τοῖσιν ἀεικέα πότμον ἐφῆκεν,
Odyssey 1.131	ὣς Ὀδυσεὺς κείνοισιν ἀεικέα πότμον ἐφήσει.
Odyssey 1.132	αἲ γάρ, Ζεῦ τε πάτερ καὶ Ἀθηναίη καὶ Ἄπολλον,
Odyssey 1.133	τοῖος ἐὼν οἷός ποτʼ ἐϋκτιμένῃ ἐνὶ Λέσβῳ
Odyssey 1.134	ἐξ ἔριδος Φιλομηλεΐδῃ ἐπάλαισεν ἀναστάς,
Odyssey 1.135	κὰδ δʼ ἔβαλε κρατερῶς, κεχάροντο δὲ πάντες Ἀχαιοί,
Odyssey 1.136	τοῖος ἐὼν μνηστῆρσιν ὁμιλήσειεν Ὀδυσσεύς·
Odyssey 1.137	πάντες κʼ ὠκύμοροί τε γενοίατο πικρόγαμοί τε.
Odyssey 1.138	ταῦτα δʼ ἅ μʼ εἰρωτᾷς καὶ λίσσεαι, οὐκ ἂν ἐγώ γε
Odyssey 1.139	ἄλλα παρὲξ εἴποιμι παρακλιδὸν οὐδʼ ἀπατήσω,
Odyssey 1.140	ἀλλὰ τὰ μέν μοι ἔειπε γέρων ἅλιος νημερτής,
Odyssey 1.141	τῶν οὐδέν τοι ἐγὼ κρύψω ἔπος οὐδʼ ἐπικεύσω.
Odyssey 1.142	φῆ μιν ὅ γʼ ἐν νήσῳ ἰδέειν κρατέρʼ ἄλγεʼ ἔχοντα,
Odyssey 1.143	νύμφης ἐν μεγάροισι Καλυψοῦς, ἥ μιν ἀνάγκῃ
Odyssey 1.144	ἴσχει· ὁ δʼ οὐ δύναται ἣν πατρίδα γαῖαν ἱκέσθαι.
Odyssey 1.145	οὐ γάρ οἱ πάρα νῆες ἐπήρετμοι καὶ ἑταῖροι,
Odyssey 1.146	οἵ κέν μιν πέμποιεν ἐπʼ εὐρέα νῶτα θαλάσσης
Odyssey 1.147	ὣς ἔφατʼ Ἀτρεΐδης, δουρικλειτὸς Μενέλαος.
Odyssey 1.148	ταῦτα τελευτήσας νεόμην· ἔδοσαν δέ μοι οὖρον
Odyssey 1.149	ἀθάνατοι, τοί μʼ ὦκα φίλην ἐς πατρίδʼ ἔπεμψαν.
Odyssey 1.150	ὣς φάτο, τῇ δʼ ἄρα θυμὸν ἐνὶ στήθεσσιν ὄρινε.
Odyssey 1.151	τοῖσι δὲ καὶ μετέειπε Θεοκλύμενος θεοειδής·
Odyssey 1.152	ὦ γύναι αἰδοίη Λαερτιάδεω Ὀδυσῆος,
Odyssey 1.153	ἦ τοι ὅ γʼ οὐ σάφα οἶδεν, ἐμεῖο δὲ σύνθεο μῦθον·
Odyssey 1.154	ἀτρεκέως γάρ σοι μαντεύσομαι οὐδʼ ἐπικεύσω·
Odyssey 1.155	ἴστω νῦν Ζεὺς πρῶτα θεῶν, ξενίη τε τράπεζα
Odyssey 1.156	ἱστίη τʼ Ὀδυσῆος ἀμύμονος, ἣν ἀφικάνω,
Odyssey 1.157	ὡς ἦ τοι Ὀδυσεὺς ἤδη ἐν πατρίδι γαίῃ,
Odyssey 1.158	ἥμενος ἢ ἕρπων, τάδε πευθόμενος κακὰ ἔργα,
Odyssey 1.159	ἔστιν, ἀτὰρ μνηστῆρσι κακὸν πάντεσσι φυτεύει·
Odyssey 1.160	τοῖον ἐγὼν οἰωνὸν ἐϋσσέλμου ἐπὶ νηὸς
Odyssey 1.161	ἥμενος ἐφρασάμην καὶ Τηλεμάχῳ ἐγεγώνευν.
Odyssey 1.162	τὸν δʼ αὖτε προσέειπε περίφρων Πηνελόπεια·
Odyssey 1.163	αἲ γὰρ τοῦτο, ξεῖνε, ἔπος τετελεσμένον εἴη·
Odyssey 1.164	τῷ κε τάχα γνοίης φιλότητά τε πολλά τε δῶρα
Odyssey 1.165	ἐξ ἐμεῦ, ὡς ἄν τίς σε συναντόμενος μακαρίζοι.
Odyssey 1.166	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.167	μνηστῆρες δὲ πάροιθεν Ὀδυσσῆος μεγάροιο
Odyssey 1.168	δίσκοισιν τέρποντο καὶ αἰγανέῃσιν ἱέντες,
Odyssey 1.169	ἐν τυκτῷ δαπέδῳ, ὅθι περ πάρος ὕβριν ἔχοντες.
Odyssey 1.170	ἀλλʼ ὅτε δὴ δείπνηστος ἔην καὶ ἐπήλυθε μῆλα
Odyssey 1.171	πάντοθεν ἐξ ἀγρῶν, οἱ δʼ ἤγαγον οἳ τὸ πάρος περ,
Odyssey 1.172	καὶ τότε δή σφιν ἔειπε Μέδων· ὃς γάρ ῥα μάλιστα
Odyssey 1.173	ἥνδανε κηρύκων, καί σφιν παρεγίγνετο δαιτί·
Odyssey 1.174	κοῦροι, ἐπεὶ δὴ πάντες ἐτέρφθητε φρένʼ ἀέθλοις,
Odyssey 1.175	ἔρχεσθε πρὸς δώμαθʼ, ἵνʼ ἐντυνώμεθα δαῖτα·
Odyssey 1.176	οὐ μὲν γάρ τι χέρειον ἐν ὥρῃ δεῖπνον ἑλέσθαι.
Odyssey 1.177	ὣς ἔφαθʼ, οἱ δʼ ἀνστάντες ἔβαν πείθοντό τε μύθῳ.
Odyssey 1.178	αὐτὰρ ἐπεί ῥʼ ἵκοντο δόμους εὖ ναιετάοντας,
Odyssey 1.179	χλαίνας μὲν κατέθεντο κατὰ κλισμούς τε θρόνους τε,
Odyssey 1.180	οἱ δʼ ἱέρευον ὄϊς μεγάλους καὶ πίονας αἶγας,
Odyssey 1.181	ἵρευον δὲ σύας σιάλους καὶ βοῦν ἀγελαίην,
Odyssey 1.182	δαῖτʼ ἐντυνόμενοι. τοὶ δʼ ἐξ ἀγροῖο πόλινδε
Odyssey 1.183	ὠτρύνοντʼ Ὀδυσεύς τʼ ἰέναι καὶ δῖος ὑφορβός.
Odyssey 1.184	τοῖσι δὲ μύθων ἦρχε συβώτης, ὄρχαμος ἀνδρῶν·
Odyssey 1.185	ξεῖνʼ, ἐπεὶ ἂρ δὴ ἔπειτα πόλινδʼ ἰέναι μενεαίνεις
Odyssey 1.186	σήμερον, ὡς ἐπέτελλεν ἄναξ ἐμός—ἦ σʼ ἂν ἐγώ γε
Odyssey 1.187	αὐτοῦ βουλοίμην σταθμῶν ῥυτῆρα λιπέσθαι·
Odyssey 1.188	ἀλλὰ τὸν αἰδέομαι καὶ δείδια, μή μοι ὀπίσσω
Odyssey 1.189	νεικείῃ· χαλεπαὶ δέ τʼ ἀνάκτων εἰσὶν ὁμοκλαί—
Odyssey 1.190	ἀλλʼ ἄγε νῦν ἴομεν· δὴ γὰρ μέμβλωκε μάλιστα
Odyssey 1.191	ἦμαρ, ἀτὰρ τάχα τοι ποτὶ ἕσπερα ῥίγιον ἔσται.
Odyssey 1.192	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.193	γιγνώσκω, φρονέω· τά γε δὴ νοέοντι κελεύεις.
Odyssey 1.194	ἀλλʼ ἴομεν, σὺ δʼ ἔπειτα διαμπερὲς ἡγεμόνευε.
Odyssey 1.195	δὸς δέ μοι, εἴ ποθί τοι ῥόπαλον τετμημένον ἐστίν,
Odyssey 1.196	σκηρίπτεσθʼ, ἐπεὶ ἦ φατʼ ἀρισφαλέʼ ἔμμεναι οὐδόν.
Odyssey 1.197	ἦ ῥα καὶ ἀμφʼ ὤμοισιν ἀεικέα βάλλετο πήρην,
Odyssey 1.198	πυκνὰ ῥωγαλέην· ἐν δὲ στρόφος ἦεν ἀορτήρ·
Odyssey 1.199	Εὔμαιος δʼ ἄρα οἱ σκῆπτρον θυμαρὲς ἔδωκε.
Odyssey 1.200	τὼ βήτην, σταθμὸν δὲ κύνες καὶ βώτορες ἄνδρες
Odyssey 1.201	ῥύατʼ ὄπισθε μένοντες· ὁ δʼ ἐς πόλιν ἦγεν ἄνακτα
Odyssey 1.202	πτωχῷ λευγαλέῳ ἐναλίγκιον ἠδὲ γέροντι,
Odyssey 1.203	σκηπτόμενον· τὰ δὲ λυγρὰ περὶ χροῒ εἵματα ἕστο.
Odyssey 1.204	ἀλλʼ ὅτε δὴ στείχοντες ὁδὸν κάτα παιπαλόεσσαν
Odyssey 1.205	ἄστεος ἐγγὺς ἔσαν καὶ ἐπὶ κρήνην ἀφίκοντο
Odyssey 1.206	τυκτὴν καλλίροον, ὅθεν ὑδρεύοντο πολῖται,
Odyssey 1.207	τὴν ποίησʼ Ἴθακος καὶ Νήριτος ἠδὲ Πολύκτωρ·
Odyssey 1.208	ἀμφὶ δʼ ἄρʼ αἰγείρων ὑδατοτρεφέων ἦν ἄλσος,
Odyssey 1.209	πάντοσε κυκλοτερές, κατὰ δὲ ψυχρὸν ῥέεν ὕδωρ
Odyssey 1.210	ὑψόθεν ἐκ πέτρης· βωμὸς δʼ ἐφύπερθε τέτυκτο
Odyssey 1.211	νυμφάων, ὅθι πάντες ἐπιρρέζεσκον ὁδῖται·
Odyssey 1.212	ἔνθα σφέας ἐκίχανʼ υἱὸς Δολίοιο Μελανθεὺς
Odyssey 1.213	αἶγας ἄγων, αἳ πᾶσι μετέπρεπον αἰπολίοισι,
Odyssey 1.214	δεῖπνον μνηστήρεσσι· δύω δʼ ἅμʼ ἕποντο νομῆες.
Odyssey 1.215	τοὺς δὲ ἰδὼν νείκεσσεν ἔπος τʼ ἔφατʼ ἔκ τʼ ὀνόμαζεν,
Odyssey 1.216	ἔκπαγλον καὶ ἀεικές· ὄρινε δὲ κῆρ Ὀδυσῆος·
Odyssey 1.217	νῦν μὲν δὴ μάλα πάγχυ κακὸς κακὸν ἡγηλάζει,
Odyssey 1.218	ὡς αἰεὶ τὸν ὁμοῖον ἄγει θεὸς ὡς τὸν ὁμοῖον.
Odyssey 1.219	πῇ δὴ τόνδε μολοβρὸν ἄγεις, ἀμέγαρτε συβῶτα,
Odyssey 1.220	πτωχὸν ἀνιηρόν δαιτῶν ἀπολυμαντῆρα;
Odyssey 1.221	ὃς πολλῇς φλιῇσι παραστὰς θλίψεται ὤμους,
Odyssey 1.222	αἰτίζων ἀκόλους, οὐκ ἄορας οὐδὲ λέβητας·
Odyssey 1.223	τόν κʼ εἴ μοι δοίης σταθμῶν ῥυτῆρα γενέσθαι
Odyssey 1.224	σηκοκόρον τʼ ἔμεναι θαλλόν τʼ ἐρίφοισι φορῆναι,
Odyssey 1.225	καί κεν ὀρὸν πίνων μεγάλην ἐπιγουνίδα θεῖτο.
Odyssey 1.226	ἀλλʼ ἐπεὶ οὖν δὴ ἔργα κάκʼ ἔμμαθεν, οὐκ ἐθελήσει
Odyssey 1.227	ἔργον ἐποίχεσθαι, ἀλλὰ πτώσσων κατὰ δῆμον
Odyssey 1.228	βούλεται αἰτίζων βόσκειν ἣν γαστέρʼ ἄναλτον.
Odyssey 1.229	ἀλλʼ ἔκ τοι ἐρέω, τὸ δὲ καὶ τετελεσμένον ἔσται·
Odyssey 1.230	αἴ κʼ ἔλθῃ πρὸς δώματʼ Ὀδυσσῆος θείοιο,
Odyssey 1.231	πολλά οἱ ἀμφὶ κάρη σφέλα ἀνδρῶν ἐκ παλαμάων
Odyssey 1.232	πλευραὶ ἀποτρίψουσι δόμον κάτα βαλλομένοιο.
Odyssey 1.233	ὣς φάτο, καὶ παριὼν λὰξ ἔνθορεν ἀφραδίῃσιν
Odyssey 1.234	ἰσχίῳ· οὐδέ μιν ἐκτὸς ἀταρπιτοῦ ἐστυφέλιξεν,
Odyssey 1.235	ἀλλʼ ἔμενʼ ἀσφαλέως· ὁ δὲ μερμήριξεν Ὀδυσσεὺς
Odyssey 1.236	ἠὲ μεταΐξας ῥοπάλῳ ἐκ θυμὸν ἕλοιτο,
Odyssey 1.237	ἦ πρὸς γῆν ἐλάσειε κάρη ἀμφουδὶς ἀείρας.
Odyssey 1.238	ἀλλʼ ἐπετόλμησε, φρεσὶ δʼ ἔσχετο· τὸν δὲ συβώτης
Odyssey 1.239	νείκεσʼ ἐσάντα ἰδών, μέγα δʼ εὔξατο χεῖρας ἀνασχών·
Odyssey 1.240	νύμφαι κρηναῖαι, κοῦραι Διός, εἴ ποτʼ Ὀδυσσεὺς
Odyssey 1.241	ὔμμʼ ἐπὶ μηρίʼ ἔκηε, καλύψας πίονι δημῷ,
Odyssey 1.242	ἀρνῶν ἠδʼ ἐρίφων, τόδε μοι κρηήνατʼ ἐέλδωρ,
Odyssey 1.243	ὡς ἔλθοι μὲν κεῖνος ἀνήρ, ἀγάγοι δέ ἑ δαίμων·
Odyssey 1.244	τῷ κέ τοι ἀγλαΐας γε διασκεδάσειεν ἁπάσας,
Odyssey 1.245	τὰς νῦν ὑβρίζων φορέεις, ἀλαλήμενος αἰεὶ
Odyssey 1.246	ἄστυ κάτʼ· αὐτὰρ μῆλα κακοὶ φθείρουσι νομῆες.
Odyssey 1.247	τὸν δʼ αὖτε προσέειπε Μελάνθιος, αἰπόλος αἰγῶν·
Odyssey 1.248	ὢ πόποι, οἷον ἔειπε κύων ὀλοφώϊα εἰδώς,
Odyssey 1.249	τόν ποτʼ ἐγὼν ἐπὶ νηὸς ἐϋσσέλμοιο μελαίνης
Odyssey 1.250	ἄξω τῆλʼ Ἰθάκης, ἵνα μοι βίοτον πολὺν ἄλφοι.
Odyssey 1.251	αἲ γὰρ Τηλέμαχον βάλοι ἀργυρότοξος Ἀπόλλων
Odyssey 1.252	σήμερον ἐν μεγάροις, ἢ ὑπὸ μνηστῆρσι δαμείη,
Odyssey 1.253	ὡς Ὀδυσῆΐ γε τηλοῦ ἀπώλετο νόστιμον ἦμαρ.
Odyssey 1.254	ὣς εἰπὼν τοὺς μὲν λίπεν αὐτοῦ ἦκα κιόντας,
Odyssey 1.255	αὐτὰρ ὁ βῆ, μάλα δʼ ὦκα δόμους ἵκανεν ἄνακτος.
Odyssey 1.256	αὐτίκα δʼ εἴσω ἴεν, μετὰ δὲ μνηστῆρσι καθῖζεν,
Odyssey 1.257	ἀντίον Εὐρυμάχου· τὸν γὰρ φιλέεσκε μάλιστα.
Odyssey 1.258	τῷ πάρα μὲν κρειῶν μοῖραν θέσαν οἳ πονέοντο,
Odyssey 1.259	σῖτον δʼ αἰδοίη ταμίη παρέθηκε φέρουσα
Odyssey 1.260	ἔδμεναι. ἀγχίμολον δʼ Ὀδυσεὺς καὶ δῖος ὑφορβὸς
Odyssey 1.261	στήτην ἐρχομένω, περὶ δέ σφεας ἤλυθʼ ἰωὴ
Odyssey 1.262	φόρμιγγος γλαφυρῆς· ἀνὰ γάρ σφισι βάλλετʼ ἀείδειν
Odyssey 1.263	Φήμιος· αὐτὰρ ὁ χειρὸς ἑλὼν προσέειπε συβώτην·
Odyssey 1.264	Εὔμαιʼ, ἦ μάλα δὴ τάδε δώματα κάλʼ Ὀδυσῆος,
Odyssey 1.265	ῥεῖα δʼ ἀρίγνωτʼ ἐστὶ καὶ ἐν πολλοῖσιν ἰδέσθαι.
Odyssey 1.266	ἐξ ἑτέρων ἕτερʼ ἐστίν, ἐπήσκηται δέ οἱ αὐλὴ
Odyssey 1.267	τοίχῳ καὶ θριγκοῖσι, θύραι δʼ εὐερκέες εἰσὶ
Odyssey 1.268	δικλίδες· οὐκ ἄν τίς μιν ἀνὴρ ὑπεροπλίσσαιτο.
Odyssey 1.269	γιγνώσκω δʼ ὅτι πολλοὶ ἐν αὐτῷ δαῖτα τίθενται
Odyssey 1.270	ἄνδρες, ἐπεὶ κνίση μὲν ἀνήνοθεν, ἐν δέ τε φόρμιγξ
Odyssey 1.271	ἠπύει, ἣν ἄρα δαιτὶ θεοὶ ποίησαν ἑταίρην.
Odyssey 1.272	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.273	ῥεῖʼ ἔγνως, ἐπεὶ οὐδὲ τά τʼ ἄλλα πέρ ἐσσʼ ἀνοήμων.
Odyssey 1.274	ἀλλʼ ἄγε δὴ φραζώμεθʼ ὅπως ἔσται τάδε ἔργα.
Odyssey 1.275	ἠὲ σὺ πρῶτος ἔσελθε δόμους εὖ ναιετάοντας,
Odyssey 1.276	δύσεο δὲ μνηστῆρας, ἐγὼ δʼ ὑπολείψομαι αὐτοῦ·
Odyssey 1.277	εἰ δʼ ἐθέλεις, ἐπίμεινον, ἐγὼ δʼ εἶμι προπάροιθε·
Odyssey 1.278	μηδὲ σὺ δηθύνειν, μή τίς σʼ ἔκτοσθε νοήσας
Odyssey 1.279	ἢ βάλῃ ἢ ἐλάσῃ· τὰ δέ σε φράζεσθαι ἄνωγα.
Odyssey 1.280	τὸν δʼ ἠμείβετʼ ἔπειτα πολύτλας δῖος Ὀδυσσεύς·
Odyssey 1.281	γιγνώσκω, φρονέω· τά γε δὴ νοέοντι κελεύεις.
Odyssey 1.282	ἀλλʼ ἔρχευ προπάροιθεν, ἐγὼ δʼ ὑπολείψομαι αὐτοῦ.
Odyssey 1.283	οὐ γάρ τι πληγέων ἀδαήμων οὐδὲ βολάων·
Odyssey 1.284	τολμήεις μοι θυμός, ἐπεὶ κακὰ πολλὰ πέπονθα
Odyssey 1.285	κύμασι καὶ πολέμῳ· μετὰ καὶ τόδε τοῖσι γενέσθω·
Odyssey 1.286	γαστέρα δʼ οὔ πως ἔστιν ἀποκρύψαι μεμαυῖαν,
Odyssey 1.287	οὐλομένην, ἣ πολλὰ κάκʼ ἀνθρώποισι δίδωσι,
Odyssey 1.288	τῆς ἕνεκεν καὶ νῆες ἐΰζυγοι ὁπλίζονται
Odyssey 1.289	πόντον ἐπʼ ἀτρύγετον, κακὰ δυσμενέεσσι φέρουσαι.
Odyssey 1.290	ὣς οἱ μὲν τοιαῦτα πρὸς ἀλλήλους ἀγόρευον·
Odyssey 1.291	ἂν δὲ κύων κεφαλήν τε καὶ οὔατα κείμενος ἔσχεν,
Odyssey 1.292	Ἄργος, Ὀδυσσῆος ταλασίφρονος, ὅν ῥά ποτʼ αὐτὸς
Odyssey 1.293	θρέψε μέν, οὐδʼ ἀπόνητο, πάρος δʼ εἰς Ἴλιον ἱρὴν
Odyssey 1.294	ᾤχετο. τὸν δὲ πάροιθεν ἀγίνεσκον νέοι ἄνδρες
Odyssey 1.295	αἶγας ἐπʼ ἀγροτέρας ἠδὲ πρόκας ἠδὲ λαγωούς·
Odyssey 1.296	δὴ τότε κεῖτʼ ἀπόθεστος ἀποιχομένοιο ἄνακτος,
Odyssey 1.297	ἐν πολλῇ κόπρῳ, ἥ οἱ προπάροιθε θυράων
Odyssey 1.298	ἡμιόνων τε βοῶν τε ἅλις κέχυτʼ, ὄφρʼ ἂν ἄγοιεν
Odyssey 1.299	δμῶες Ὀδυσσῆος τέμενος μέγα κοπρήσοντες·
Odyssey 1.300	ἔνθα κύων κεῖτʼ Ἄργος, ἐνίπλειος κυνοραιστέων.
Odyssey 1.301	δὴ τότε γʼ, ὡς ἐνόησεν Ὀδυσσέα ἐγγὺς ἐόντα,
Odyssey 1.302	οὐρῇ μέν ῥʼ ὅ γʼ ἔσηνε καὶ οὔατα κάββαλεν ἄμφω,
Odyssey 1.303	ἆσσον δʼ οὐκέτʼ ἔπειτα δυνήσατο οἷο ἄνακτος
Odyssey 1.304	ἐλθέμεν· αὐτὰρ ὁ νόσφιν ἰδὼν ἀπομόρξατο δάκρυ,
Odyssey 1.305	ῥεῖα λαθὼν Εὔμαιον, ἄφαρ δʼ ἐρεείνετο μύθῳ·
Odyssey 1.306	Εὔμαιʼ, ἦ μάλα θαῦμα, κύων ὅδε κεῖτʼ ἐνὶ κόπρῳ.
Odyssey 1.307	καλὸς μὲν δέμας ἐστίν, ἀτὰρ τόδε γʼ οὐ σάφα οἶδα,
Odyssey 1.308	εἰ δὴ καὶ ταχὺς ἔσκε θέειν ἐπὶ εἴδεϊ τῷδε,
Odyssey 1.309	ἦ αὔτως οἷοί τε τραπεζῆες κύνες ἀνδρῶν
Odyssey 1.310	γίγνοντʼ· ἀγλαΐης δʼ ἕνεκεν κομέουσιν ἄνακτες.
Odyssey 1.311	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.312	καὶ λίην ἀνδρός γε κύων ὅδε τῆλε θανόντος.
Odyssey 1.313	εἰ τοιόσδʼ εἴη ἠμὲν δέμας ἠδὲ καὶ ἔργα,
Odyssey 1.314	οἷόν μιν Τροίηνδε κιὼν κατέλειπεν Ὀδυσσεύς,
Odyssey 1.315	αἶψά κε θηήσαιο ἰδὼν ταχυτῆτα καὶ ἀλκήν.
Odyssey 1.316	οὐ μὲν γάρ τι φύγεσκε βαθείης βένθεσιν ὕλης
Odyssey 1.317	κνώδαλον, ὅττι δίοιτο· καὶ ἴχνεσι γὰρ περιῄδη·
Odyssey 1.318	νῦν δʼ ἔχεται κακότητι, ἄναξ δέ οἱ ἄλλοθι πάτρης
Odyssey 1.319	ὤλετο, τὸν δὲ γυναῖκες ἀκηδέες οὐ κομέουσι.
Odyssey 1.320	δμῶες δʼ, εὖτʼ ἂν μηκέτʼ ἐπικρατέωσιν ἄνακτες,
Odyssey 1.321	οὐκέτʼ ἔπειτʼ ἐθέλουσιν ἐναίσιμα ἐργάζεσθαι·
Odyssey 1.322	ἥμισυ γάρ τʼ ἀρετῆς ἀποαίνυται εὐρύοπα Ζεὺς
Odyssey 1.323	ἀνέρος, εὖτʼ ἄν μιν κατὰ δούλιον ἦμαρ ἕλῃσιν.
Odyssey 1.324	ὣς εἰπὼν εἰσῆλθε δόμους εὖ ναιετάοντας,
Odyssey 1.325	βῆ δʼ ἰθὺς μεγάροιο μετὰ μνηστῆρας ἀγαυούς.
Odyssey 1.326	Ἄργον δʼ αὖ κατὰ μοῖρʼ ἔλαβεν μέλανος θανάτοιο,
Odyssey 1.327	αὐτίκʼ ἰδόντʼ Ὀδυσῆα ἐεικοστῷ ἐνιαυτῷ.
Odyssey 1.328	τὸν δὲ πολὺ πρῶτος ἴδε Τηλέμαχος θεοειδὴς
Odyssey 1.329	ἐρχόμενον κατὰ δῶμα συβώτην, ὦκα δʼ ἔπειτα
Odyssey 1.330	νεῦσʼ ἐπὶ οἷ καλέσας· ὁ δὲ παπτήνας ἕλε δίφρον
Odyssey 1.331	κείμενον, ἔνθα τε δαιτρὸς ἐφίζεσκε κρέα πολλὰ
Odyssey 1.332	δαιόμενος μνηστῆρσι δόμον κάτα δαινυμένοισι·
Odyssey 1.333	τὸν κατέθηκε φέρων πρὸς Τηλεμάχοιο τράπεζαν
Odyssey 1.334	ἀντίον, ἔνθα δʼ ἄρʼ αὐτὸς ἐφέζετο· τῷ δʼ ἄρα κῆρυξ
Odyssey 1.335	μοῖραν ἑλὼν ἐτίθει κανέου τʼ ἐκ σῖτον ἀείρας.
Odyssey 1.336	ἀγχίμολον δὲ μετʼ αὐτὸν ἐδύσετο δώματʼ Ὀδυσσεύς,
Odyssey 1.337	πτωχῷ λευγαλέῳ ἐναλίγκιος ἠδὲ γέροντι,
Odyssey 1.338	σκηπτόμενος· τὰ δὲ λυγρὰ περὶ χροΐ εἵματα ἕστο.
Odyssey 1.339	ἷζε δʼ ἐπὶ μελίνου οὐδοῦ ἔντοσθε θυράων,
Odyssey 1.340	κλινάμενος σταθμῷ κυπαρισσίνῳ, ὅν ποτε τέκτων
Odyssey 1.341	ξέσσεν ἐπισταμένως καὶ ἐπὶ στάθμην ἴθυνεν.
Odyssey 1.342	Τηλέμαχος δʼ ἐπὶ οἷ καλέσας προσέειπε συβώτην,
Odyssey 1.343	ἄρτον τʼ οὖλον ἑλὼν περικαλλέος ἐκ κανέοιο
Odyssey 1.344	καὶ κρέας, ὥς οἱ χεῖρες ἐχάνδανον ἀμφιβαλόντι·
Odyssey 1.345	δὸς τῷ ξείνῳ ταῦτα φέρων αὐτόν τε κέλευε
Odyssey 1.346	αἰτίζειν μάλα πάντας ἐποιχόμενον μνηστῆρας·
Odyssey 1.347	αἰδὼς δʼ οὐκ ἀγαθὴ κεχρημένῳ ἀνδρὶ παρεῖναι.
Odyssey 1.348	ὣς φάτο, βῆ δὲ συφορβός, ἐπεὶ τὸν μῦθον ἄκουσεν,
Odyssey 1.349	ἀγχοῦ δʼ ἱστάμενος ἔπεα πτερόεντʼ ἀγόρευε·
Odyssey 1.350	Τηλέμαχός τοι, ξεῖνε, διδοῖ τάδε, καί σε κελεύει
Odyssey 1.351	αἰτίζειν μάλα πάντας ἐποιχόμενον μνηστῆρας·
Odyssey 1.352	αἰδῶ δʼ οὐκ ἀγαθήν φησʼ ἔμμεναι ἀνδρὶ προΐκτῃ.
Odyssey 1.353	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.354	Ζεῦ ἄνα, Τηλέμαχόν μοι ἐν ἀνδράσιν ὄλβιον εἶναι,
Odyssey 1.355	καί οἱ πάντα γένοιθʼ ὅσσα φρεσὶν ᾗσι μενοινᾷ.
Odyssey 1.356	ἦ ῥα καὶ ἀμφοτέρῃσιν ἐδέξατο καὶ κατέθηκεν
Odyssey 1.357	αὖθι ποδῶν προπάροιθεν, ἀεικελίης ἐπὶ πήρης,
Odyssey 1.358	ἤσθιε δʼ ἧος ἀοιδὸς ἐνὶ μεγάροισιν ἄειδεν·
Odyssey 1.359	εὖθʼ ὁ δεδειπνήκειν, ὁ δʼ ἐπαύετο θεῖος ἀοιδός.
Odyssey 1.360	μνηστῆρες δʼ ὁμάδησαν ἀνὰ μέγαρʼ. αὐτὰρ Ἀθήνη,
Odyssey 1.361	ἄγχι παρισταμένη Λαερτιάδην Ὀδυσῆα
Odyssey 1.362	ὤτρυνʼ, ὡς ἂν πύρνα κατὰ μνηστῆρας ἀγείροι,
Odyssey 1.363	γνοίη θʼ οἵ τινές εἰσιν ἐναίσιμοι οἵ τʼ ἀθέμιστοι·
Odyssey 1.364	ἀλλʼ οὐδʼ ὥς τινʼ ἔμελλʼ ἀπαλεξήσειν κακότητος.
Odyssey 1.365	βῆ δʼ ἴμεν αἰτήσων ἐνδέξια φῶτα ἕκαστον,
Odyssey 1.366	πάντοσε χεῖρʼ ὀρέγων, ὡς εἰ πτωχὸς πάλαι εἴη.
Odyssey 1.367	οἱ δʼ ἐλεαίροντες δίδοσαν, καὶ ἐθάμβεον αὐτόν,
Odyssey 1.368	ἀλλήλους τʼ εἴροντο τίς εἴη καὶ πόθεν ἔλθοι.
Odyssey 1.369	τοῖσι δὲ καὶ μετέειπε Μελάνθιος, αἰπόλος αἰγῶν·
Odyssey 1.370	κέκλυτέ μευ, μνηστῆρες ἀγακλειτῆς βασιλείης,
Odyssey 1.371	τοῦδε περὶ ξείνου· ἦ γάρ μιν πρόσθεν ὄπωπα.
Odyssey 1.372	ἦ τοι μέν οἱ δεῦρο συβώτης ἡγεμόνευεν,
Odyssey 1.373	αὐτὸν δʼ οὐ σάφα οἶδα, πόθεν γένος εὔχεται εἶναι.
Odyssey 1.374	ὣς ἔφατʼ, Ἀντίνοος δʼ ἔπεσιν νείκεσσε συβώτην·
Odyssey 1.375	ὦ ἀρίγνωτε συβῶτα, τίη δὲ σὺ τόνδε πόλινδε
Odyssey 1.376	ἤγαγες; ἦ οὐχ ἅλις ἧμιν ἀλήμονές εἰσι καὶ ἄλλοι,
Odyssey 1.377	πτωχοὶ ἀνιηροί, δαιτῶν ἀπολυμαντῆρες;
Odyssey 1.378	ἦ ὄνοσαι ὅτι τοι βίοτον κατέδουσιν ἄνακτος
Odyssey 1.379	ἐνθάδʼ ἀγειρόμενοι, σὺ δὲ καὶ προτὶ τόνδʼ ἐκάλεσσας;
Odyssey 1.380	τὸν δʼ ἀπαμειβόμενος προσέφης, Εὔμαιε συβῶτα·
Odyssey 1.381	Ἀντίνοʼ, οὐ μὲν καλὰ καὶ ἐσθλὸς ἐὼν ἀγορεύεις·
Odyssey 1.382	τίς γὰρ δὴ ξεῖνον καλεῖ ἄλλοθεν αὐτὸς ἐπελθὼν
Odyssey 1.383	ἄλλον γʼ, εἰ μὴ τῶν οἳ δημιοεργοὶ ἔασι,
Odyssey 1.384	μάντιν ἢ ἰητῆρα κακῶν ἢ τέκτονα δούρων,
Odyssey 1.385	ἢ καὶ θέσπιν ἀοιδόν, ὅ κεν τέρπῃσιν ἀείδων;
Odyssey 1.386	οὗτοι γὰρ κλητοί γε βροτῶν ἐπʼ ἀπείρονα γαῖαν·
Odyssey 1.387	πτωχὸν δʼ οὐκ ἄν τις καλέοι τρύξοντα ἓ αὐτόν.
Odyssey 1.388	ἀλλʼ αἰεὶ χαλεπὸς περὶ πάντων εἶς μνηστήρων
Odyssey 1.389	δμωσὶν Ὀδυσσῆος, πέρι δʼ αὖτʼ ἐμοί· αὐτὰρ ἐγώ γε
Odyssey 1.390	οὐκ ἀλέγω, ἧός μοι ἐχέφρων Πηνελόπεια
Odyssey 1.391	ζώει ἐνὶ μεγάροις καὶ Τηλέμαχος θεοειδής.
Odyssey 1.392	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.393	σίγα, μή μοι τοῦτον ἀμείβεο πολλὰ ἔπεσσιν·
Odyssey 1.394	Ἀντίνοος δʼ εἴωθε κακῶς ἐρεθιζέμεν αἰεὶ
Odyssey 1.395	μύθοισιν χαλεποῖσιν, ἐποτρύνει δὲ καὶ ἄλλους.
Odyssey 1.396	ἦ ῥα καὶ Ἀντίνοον ἔπεα πτερόεντα προσηύδα·
Odyssey 1.397	Ἀντίνοʼ, ἦ μευ καλὰ πατὴρ ὣς κήδεαι υἷος,
Odyssey 1.398	ὃς τὸν ξεῖνον ἄνωγας ἀπὸ μεγάροιο διέσθαι
Odyssey 1.399	μύθῳ ἀναγκαίῳ· μὴ τοῦτο θεὸς τελέσειε.
Odyssey 1.400	δός οἱ ἑλών· οὔ τοι φθονέω· κέλομαι γὰρ ἐγώ γε·
Odyssey 1.401	μήτʼ οὖν μητέρʼ ἐμὴν ἅζευ τό γε μήτε τινʼ ἄλλον
Odyssey 1.402	δμώων, οἳ κατὰ δώματʼ Ὀδυσσῆος θείοιο.
Odyssey 1.403	ἀλλʼ οὔ τοι τοιοῦτον ἐνὶ στήθεσσι νόημα·
Odyssey 1.404	αὐτὸς γὰρ φαγέμεν πολὺ βούλεαι ἢ δόμεν ἄλλῳ.
Odyssey 1.405	τὸν δʼ αὖτʼ Ἀντίνοος ἀπαμειβόμενος προσέειπε·
Odyssey 1.406	Τηλέμαχʼ ὑψαγόρη, μένος ἄσχετε, ποῖον ἔειπες.
Odyssey 1.407	εἴ οἱ τόσσον ἅπαντες ὀρέξειαν μνηστῆρες,
Odyssey 1.408	καί κέν μιν τρεῖς μῆνας ἀπόπροθεν οἶκος ἐρύκοι.
Odyssey 1.409	ὣς ἄρʼ ἔφη, καὶ θρῆνυν ἑλὼν ὑπέφηνε τραπέζης
Odyssey 1.410	κείμενον, ᾧ ῥʼ ἔπεχεν λιπαροὺς πόδας εἰλαπινάζων·
Odyssey 1.411	οἱ δʼ ἄλλοι πάντες δίδοσαν, πλῆσαν δʼ ἄρα πήρην
Odyssey 1.412	σίτου καὶ κρειῶν· τάχα δὴ καὶ ἔμελλεν Ὀδυσσεὺς
Odyssey 1.413	αὖτις ἐπʼ οὐδὸν ἰὼν προικὸς γεύσεσθαι Ἀχαιῶν·
Odyssey 1.414	στῆ δὲ παρʼ Ἀντίνοον, καί μιν πρὸς μῦθον ἔειπε·
Odyssey 1.415	δός, φίλος· οὐ μέν μοι δοκέεις ὁ κάκιστος Ἀχαιῶν
Odyssey 1.416	ἔμμεναι, ἀλλʼ ὤριστος, ἐπεὶ βασιλῆϊ ἔοικας.
Odyssey 1.417	τῷ σε χρὴ δόμεναι καὶ λώϊον ἠέ περ ἄλλοι
Odyssey 1.418	σίτου· ἐγὼ δέ κέ σε κλείω κατʼ ἀπείρονα γαῖαν.
Odyssey 1.419	καὶ γὰρ ἐγώ ποτε οἶκον ἐν ἀνθρώποισιν ἔναιον
Odyssey 1.420	ὄλβιος ἀφνειὸν καὶ πολλάκι δόσκον ἀλήτῃ,
Odyssey 1.421	τοίῳ ὁποῖος ἔοι καὶ ὅτευ κεχρημένος ἔλθοι·
Odyssey 1.422	ἦσαν δὲ δμῶες μάλα μυρίοι ἄλλα τε πολλὰ
Odyssey 1.423	οἷσίν τʼ εὖ ζώουσι καὶ ἀφνειοὶ καλέονται.
Odyssey 1.424	ἀλλὰ Ζεὺς ἀλάπαξε Κρονίων—ἤθελε γάρ που—
Odyssey 1.425	ὅς μʼ ἅμα ληϊστῆρσι πολυπλάγκτοισιν ἀνῆκεν
Odyssey 1.426	Αἴγυπτόνδʼ ἰέναι, δολιχὴν ὁδόν, ὄφρʼ ἀπολοίμην.
Odyssey 1.427	στῆσα δʼ ἐν Αἰγύπτῳ ποταμῷ νέας ἀμφιελίσσας.
Odyssey 1.428	ἔνθʼ ἦ τοι μὲν ἐγὼ κελόμην ἐρίηρας ἑταίρους
Odyssey 1.429	αὐτοῦ πὰρ νήεσσι μένειν καὶ νῆας ἔρυσθαι,
Odyssey 1.430	ὀπτῆρας δὲ κατὰ σκοπιὰς ὤτρυνα νέεσθαι.
Odyssey 1.431	οἱ δʼ ὕβρει εἴξαντες, ἐπισπόμενοι μένεϊ σφῷ,
Odyssey 1.432	αἶψα μάλʼ Αἰγυπτίων ἀνδρῶν περικαλλέας ἀγροὺς
Odyssey 1.433	πόρθεον, ἐκ δὲ γυναῖκας ἄγον καὶ νήπια τέκνα,
Odyssey 1.434	αὐτούς τʼ ἔκτεινον· τάχα δʼ ἐς πόλιν ἵκετʼ ἀϋτή.
Odyssey 1.435	οἱ δὲ βοῆς ἀΐοντες ἅμʼ ἠοῖ φαινομένηφιν
Odyssey 1.436	ἦλθον· πλῆτο δὲ πᾶν πεδίον πεζῶν τε καὶ ἵππων
Odyssey 1.437	χαλκοῦ τε στεροπῆς· ἐν δὲ Ζεὺς τερπικέραυνος
Odyssey 1.438	φύζαν ἐμοῖς ἑτάροισι κακὴν βάλεν, οὐδέ τις ἔτλη
Odyssey 1.439	στῆναι ἐναντίβιον· περὶ γὰρ κακὰ πάντοθεν ἔστη.
Odyssey 1.440	ἔνθʼ ἡμέων πολλοὺς μὲν ἀπέκτανον ὀξέϊ χαλκῷ,
Odyssey 1.441	τοὺς δʼ ἄναγον ζωούς, σφίσιν ἐργάζεσθαι ἀνάγκῃ.
Odyssey 1.442	αὐτὰρ ἔμʼ ἐς Κύπρον ξείνῳ δόσαν ἀντιάσαντι,
Odyssey 1.443	Δμήτορι Ἰασίδῃ, ὃς Κύπρου ἶφι ἄνασσεν·
Odyssey 1.444	ἔνθεν δὴ νῦν δεῦρο τόδʼ ἵκω πήματα πάσχων.
Odyssey 1.445	τὸν δʼ αὖτʼ Ἀντίνοος ἀπαμείβετο φώνησέν τε·
Odyssey 1.446	τίς δαίμων τόδε πῆμα προσήγαγε, δαιτὸς ἀνίην;
Odyssey 1.447	στῆθʼ οὕτως ἐς μέσσον, ἐμῆς ἀπάνευθε τραπέζης,
Odyssey 1.448	μὴ τάχα πικρὴν Αἴγυπτον καὶ Κύπρον ἵκηαι·
Odyssey 1.449	ὥς τις θαρσαλέος καὶ ἀναιδής ἐσσι προΐκτης.
Odyssey 1.450	ἑξείης πάντεσσι παρίστασαι· οἱ δὲ διδοῦσι
Odyssey 1.451	μαψιδίως, ἐπεὶ οὔ τις ἐπίσχεσις οὐδʼ ἐλεητὺς
Odyssey 1.452	ἀλλοτρίων χαρίσασθαι, ἐπεὶ πάρα πολλὰ ἑκάστῳ.
Odyssey 1.453	τὸν δʼ ἀναχωρήσας προσέφη πολύμητις Ὀδυσσεύς·
Odyssey 1.454	ὢ πόποι, οὐκ ἄρα σοί γʼ ἐπὶ εἴδεϊ καὶ φρένες ἦσαν·
Odyssey 1.455	οὐ σύ γʼ ἂν ἐξ οἴκου σῷ ἐπιστάτῃ οὐδʼ ἅλα δοίης,
Odyssey 1.456	ὃς νῦν ἀλλοτρίοισι παρήμενος οὔ τί μοι ἔτλης
Odyssey 1.457	σίτου ἀποπροελὼν δόμεναι· τὰ δὲ πολλὰ πάρεστιν.
Odyssey 1.458	ὣς ἔφατʼ, Ἀντίνοος δʼ ἐχολώσατο κηρόθι μᾶλλον,
Odyssey 1.459	καί μιν ὑπόδρα ἰδὼν ἔπεα πτερόεντα προσηύδα·
Odyssey 1.460	νῦν δή σʼ οὐκέτι καλὰ διὲκ μεγάροιό γʼ ὀΐω
Odyssey 1.461	ἂψ ἀναχωρήσειν, ὅτε δὴ καὶ ὀνείδεα βάζεις.
Odyssey 1.462	ὣς ἄρʼ ἔφη, καὶ θρῆνυν ἑλὼν βάλε δεξιὸν ὦμον,
Odyssey 1.463	πρυμνότατον κατὰ νῶτον· ὁ δʼ ἐστάθη ἠΰτε πέτρη
Odyssey 1.464	ἔμπεδον, οὐδʼ ἄρα μιν σφῆλεν βέλος Ἀντινόοιο,
Odyssey 1.465	ἀλλʼ ἀκέων κίνησε κάρη, κακὰ βυσσοδομεύων.
Odyssey 1.466	ἂψ δʼ ὅ γʼ ἐπʼ οὐδὸν ἰὼν κατʼ ἄρʼ ἕζετο, κὰδ δʼ ἄρα πήρην
Odyssey 1.467	θῆκεν ἐϋπλείην, μετὰ δὲ μνηστῆρσιν ἔειπε·
Odyssey 1.468	κέκλυτέ μευ, μνηστῆρες ἀγακλειτῆς βασιλείης,
Odyssey 1.469	ὄφρʼ εἴπω τά με θυμὸς ἐνὶ στήθεσσι κελεύει.
Odyssey 1.470	οὐ μὰν οὔτʼ ἄχος ἐστὶ μετὰ φρεσὶν οὔτε τι πένθος,
Odyssey 1.471	ὁππότʼ ἀνὴρ περὶ οἷσι μαχειόμενος κτεάτεσσι
Odyssey 1.472	βλήεται, ἢ περὶ βουσὶν ἢ ἀργεννῇς ὀΐεσσιν·
Odyssey 1.473	αὐτὰρ ἔμʼ Ἀντίνοος βάλε γαστέρος εἵνεκα λυγρῆς,
Odyssey 1.474	οὐλομένης, ἣ πολλὰ κάκʼ ἀνθρώποισι δίδωσιν.
Odyssey 1.475	ἀλλʼ εἴ που πτωχῶν γε θεοὶ καὶ Ἐρινύες εἰσίν,
Odyssey 1.476	Ἀντίνοον πρὸ γάμοιο τέλος θανάτοιο κιχείη.
Odyssey 1.477	τὸν δʼ αὖτʼ Ἀντίνοος προσέφη, Εὐπείθεος υἱός·
Odyssey 1.478	ἔσθιʼ ἕκηλος, ξεῖνε, καθήμενος, ἢ ἄπιθʼ ἄλλῃ,
Odyssey 1.479	μή σε νέοι διὰ δώματʼ ἐρύσσωσʼ, οἷʼ ἀγορεύεις,
Odyssey 1.480	ἢ ποδὸς ἢ καὶ χειρός, ἀποδρύψωσι δὲ πάντα.
Odyssey 1.481	ὣς ἔφαθʼ, οἱ δʼ ἄρα πάντες ὑπερφιάλως νεμέσησαν·
Odyssey 1.482	ὧδε δέ τις εἴπεσκε νέων ὑπερηνορεόντων·
Odyssey 1.483	Ἀντίνοʼ, οὐ μὲν κάλʼ ἔβαλες δύστηνον ἀλήτην,
Odyssey 1.484	οὐλόμενʼ, εἰ δή πού τις ἐπουράνιος θεός ἐστιν.
Odyssey 1.485	καί τε θεοὶ ξείνοισιν ἐοικότες ἀλλοδαποῖσι,
Odyssey 1.486	παντοῖοι τελέθοντες, ἐπιστρωφῶσι πόληας,
Odyssey 1.487	ἀνθρώπων ὕβριν τε καὶ εὐνομίην ἐφορῶντες.
Odyssey 1.488	ὣς ἄρʼ ἔφαν μνηστῆρες, ὁ δʼ οὐκ ἐμπάζετο μύθων.
Odyssey 1.489	Τηλέμαχος δʼ ἐν μὲν κραδίῃ μέγα πένθος ἄεξε
Odyssey 1.490	βλημένου, οὐδʼ ἄρα δάκρυ χαμαὶ βάλεν ἐκ βλεφάροιϊν,
Odyssey 1.491	ἀλλʼ ἀκέων κίνησε κάρη, κακὰ βυσσοδομεύων.
Odyssey 1.492	τοῦ δʼ ὡς οὖν ἤκουσε περίφρων Πηνελόπεια
Odyssey 1.493	βλημένου ἐν μεγάρῳ, μετʼ ἄρα δμῳῇσιν ἔειπεν·
Odyssey 1.494	αἴθʼ οὕτως αὐτόν σε βάλοι κλυτότοξος Ἀπόλλων.
Odyssey 1.495	τὴν δʼ αὖτʼ Εὐρυνόμη ταμίη πρὸς μῦθον ἔειπεν·
Odyssey 1.496	εἰ γὰρ ἐπʼ ἀρῇσιν τέλος ἡμετέρῃσι γένοιτο·
Odyssey 1.497	οὐκ ἄν τις τούτων γε ἐΰθρονον Ἠῶ ἵκοιτο.
Odyssey 1.498	τὴν δʼ αὖτε προσέειπε περίφρων Πηνελόπεια·
Odyssey 1.499	μαῖʼ, ἐχθροὶ μὲν πάντες, ἐπεὶ κακὰ μηχανόωνται·
Odyssey 1.500	Ἀντίνοος δὲ μάλιστα μελαίνῃ κηρὶ ἔοικε.
Odyssey 1.501	ξεῖνός τις δύστηνος ἀλητεύει κατὰ δῶμα
Odyssey 1.502	ἀνέρας αἰτίζων· ἀχρημοσύνη γὰρ ἀνώγει·
Odyssey 1.503	ἔνθʼ ἄλλοι μὲν πάντες ἐνέπλησάν τʼ ἔδοσάν τε,
Odyssey 1.504	οὗτος δὲ θρήνυι πρυμνὸν βάλε δεξιὸν ὦμον.
Odyssey 1.505	ἡ μὲν ἄρʼ ὣς ἀγόρευε μετὰ δμῳῇσι γυναιξίν,
Odyssey 1.506	ἡμένη ἐν θαλάμῳ· ὁ δʼ ἐδείπνεε δῖος Ὀδυσσεύς·
Odyssey 1.507	ἡ δʼ ἐπὶ οἷ καλέσασα προσηύδα δῖον ὑφορβόν·
Odyssey 1.508	ἔρχεο, δῖʼ Εὔμαιε, κιὼν τὸν ξεῖνον ἄνωχθι
Odyssey 1.509	ἐλθέμεν, ὄφρα τί μιν προσπτύξομαι ἠδʼ ἐρέωμαι
Odyssey 1.510	εἴ που Ὀδυσσῆος ταλασίφρονος ἠὲ πέπυσται
Odyssey 1.511	ἢ ἴδεν ὀφθαλμοῖσι· πολυπλάγκτῳ γὰρ ἔοικε.
Odyssey 1.512	τὴν δʼ ἀπαμειβόμενος προσέφης, Εὔμαιε συβῶτα
Odyssey 1.513	εἰ γάρ τοι, βασίλεια, σιωπήσειαν Ἀχαιοί·
Odyssey 1.514	οἷʼ ὅ γε μυθεῖται, θέλγοιτό κέ τοι φίλον ἦτορ.
Odyssey 1.515	τρεῖς γὰρ δή μιν νύκτας ἔχον, τρία δʼ ἤματʼ ἔρυξα
Odyssey 1.516	ἐν κλισίῃ· πρῶτον γὰρ ἔμʼ ἵκετο νηὸς ἀποδράς·
Odyssey 1.517	ἀλλʼ οὔ πω κακότητα διήνυσεν ἣν ἀγορεύων.
Odyssey 1.518	ὡς δʼ ὅτʼ ἀοιδὸν ἀνὴρ ποτιδέρκεται, ὅς τε θεῶν ἒξ
Odyssey 1.519	ἀείδει δεδαὼς ἔπεʼ ἱμερόεντα βροτοῖσι,
Odyssey 1.520	τοῦ δʼ ἄμοτον μεμάασιν ἀκουέμεν, ὁππότʼ ἀείδῃ·
Odyssey 1.521	ὣς ἐμὲ κεῖνος ἔθελγε παρήμενος ἐν μεγάροισι.
Odyssey 1.522	φησὶ δʼ Ὀδυσσῆος ξεῖνος πατρώϊος εἶναι,
Odyssey 1.523	Κρήτῃ ναιετάων, ὅθι Μίνωος γένος ἐστίν.
Odyssey 1.524	ἔνθεν δὴ νῦν δεῦρο τόδʼ ἵκετο πήματα πάσχων,
Odyssey 1.525	προπροκυλινδόμενος· στεῦται δʼ Ὀδυσῆος ἀκοῦσαι,
Odyssey 1.526	ἀγχοῦ, Θεσπρωτῶν ἀνδρῶν ἐν πίονι δήμῳ,
Odyssey 1.527	ζωοῦ· πολλὰ δʼ ἄγει κειμήλια ὅνδε δόμονδε.
Odyssey 1.528	τὸν δʼ αὖτε προσέειπε περίφρων Πηνελόπεια·
Odyssey 1.529	ἔρχεο, δεῦρο κάλεσσον, ἵνʼ ἀντίον αὐτὸς ἐνίσπῃ.
Odyssey 1.530	οὗτοι δʼ ἠὲ θύρῃσι καθήμενοι ἑψιαάσθων.
Odyssey 1.531	ἢ αὐτοῦ κατὰ δώματʼ, ἐπεί σφισι θυμὸς ἐΰφρων.
Odyssey 1.532	αὐτῶν μὲν γὰρ κτήματʼ ἀκήρατα κεῖτʼ ἐνὶ οἴκῳ,
Odyssey 1.533	σῖτος καὶ μέθυ ἡδύ· τὰ μὲν οἰκῆες ἔδουσιν,
Odyssey 1.534	οἱ δʼ εἰς ἡμέτερον πωλεύμενοι ἤματα πάντα,
Odyssey 1.535	βοῦς ἱερεύοντες καὶ ὄϊς καὶ πίονας αἶγας,
Odyssey 1.536	εἰλαπινάζουσιν πίνουσί τε αἴθοπα οἶνον,
Odyssey 1.537	μαψιδίως· τὰ δὲ πολλὰ κατάνεται. οὐ γὰρ ἔπʼ ἀνήρ,
Odyssey 1.538	οἷος Ὀδυσσεὺς ἔσκεν, ἀρὴν ἀπὸ οἴκου ἀμῦναι.
Odyssey 1.539	εἰ δʼ Ὀδυσεὺς ἔλθοι καὶ ἵκοιτʼ ἐς πατρίδα γαῖαν,
Odyssey 1.540	αἶψά κε σὺν ᾧ παιδὶ βίας ἀποτίσεται ἀνδρῶν.
Odyssey 1.541	ὣς φάτο, Τηλέμαχος δὲ μέγʼ ἔπταρεν, ἀμφὶ δὲ δῶμα
Odyssey 1.542	σμερδαλέον κονάβησε· γέλασσε δὲ Πηνελόπεια,
Odyssey 1.543	αἶψα δʼ ἄρʼ Εὔμαιον ἔπεα πτερόεντα προσηύδα·
Odyssey 1.544	ἔρχεό μοι, τὸν ξεῖνον ἐναντίον ὧδε κάλεσσον.
Odyssey 1.545	οὐχ ὁράᾳς ὅ μοι υἱὸς ἐπέπταρε πᾶσιν ἔπεσσι;
Odyssey 1.546	τῷ κε καὶ οὐκ ἀτελὴς θάνατος μνηστῆρσι γένοιτο
Odyssey 1.547	πᾶσι μάλʼ, οὐδέ κέ τις θάνατον καὶ κῆρας ἀλύξει.
Odyssey 1.548	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Odyssey 1.549	αἴ κʼ αὐτὸν γνώω νημερτέα πάντʼ ἐνέποντα,
Odyssey 1.550	ἕσσω μιν χλαῖνάν τε χιτῶνά τε, εἵματα καλά.
Odyssey 1.551	ὣς φάτο, βῆ δὲ συφορβός, ἐπεὶ τὸν μῦθον ἄκουσεν·
Odyssey 1.552	ἀγχοῦ δʼ ἱστάμενος ἔπεα πτερόεντα προσηύδα·
Odyssey 1.553	ξεῖνε πάτερ, καλέει σε περίφρων Πηνελόπεια,
Odyssey 1.554	μήτηρ Τηλεμάχοιο· μεταλλῆσαί τί ἑ θυμὸς
Odyssey 1.555	ἀμφὶ πόσει κέλεται, καὶ κήδεά περ πεπαθυίῃ.
Odyssey 1.556	εἰ δέ κέ σε γνώῃ νημερτέα πάντʼ ἐνέποντα,
Odyssey 1.557	ἕσσει σε χλαῖνάν τε χιτῶνά τε, τῶν σὺ μάλιστα
Odyssey 1.558	χρηΐζεις· σῖτον δὲ καὶ αἰτίζων κατὰ δῆμον
Odyssey 1.559	γαστέρα βοσκήσεις· δώσει δέ τοι ὅς κʼ ἐθέλῃσι.
Odyssey 1.560	τὸν δʼ αὖτε προσέειπε πολύτλας δῖος Ὀδυσσεύς·
Odyssey 1.561	Εὔμαιʼ, αἶψά κʼ ἐγὼ νημερτέα πάντʼ ἐνέποιμι
Odyssey 1.562	κούρῃ Ἰκαρίοιο, περίφρονι Πηνελοπείῃ·
Odyssey 1.563	οἶδα γὰρ εὖ περὶ κείνου, ὁμὴν δʼ ἀνεδέγμεθʼ ὀϊζύν.
Odyssey 1.564	ἀλλὰ μνηστήρων χαλεπῶν ὑποδείδιʼ ὅμιλον,
Odyssey 1.565	τῶν ὕβρις τε βίη τε σιδήρεον οὐρανὸν ἵκει.
Odyssey 1.566	καὶ γὰρ νῦν, ὅτε μʼ οὗτος ἀνὴρ κατὰ δῶμα κιόντα
Odyssey 1.567	οὔ τι κακὸν ῥέξαντα βαλὼν ὀδύνῃσιν ἔδωκεν,
Odyssey 1.568	οὔτε τι Τηλέμαχος τό γʼ ἐπήρκεσεν οὔτε τις ἄλλος.
Odyssey 1.569	τῷ νῦν Πηνελόπειαν ἐνὶ μεγάροισιν ἄνωχθι
Odyssey 1.570	μεῖναι, ἐπειγομένην περ, ἐς ἠέλιον καταδύντα·
Odyssey 1.571	καὶ τότε μʼ εἰρέσθω πόσιος πέρι νόστιμον ἦμαρ,
Odyssey 1.572	ἀσσοτέρω καθίσασα παραὶ πυρί· εἵματα γάρ τοι
Odyssey 1.573	λύγρʼ ἔχω· οἶσθα καὶ αὐτός, ἐπεί σε πρῶθʼ ἱκέτευσα.
Odyssey 1.574	ὣς φάτο, βῆ δὲ συφορβός, ἐπεὶ τὸν μῦθον ἄκουσε.
Odyssey 1.575	τὸν δʼ ὑπὲρ οὐδοῦ βάντα προσηύδα Πηνελόπεια·
Odyssey 1.576	οὐ σύ γʼ ἄγεις, Εὔμαιε· τί τοῦτʼ ἐνόησεν ἀλήτης;
Odyssey 1.577	ἦ τινά που δείσας ἐξαίσιον ἦε καὶ ἄλλως
Odyssey 1.578	αἰδεῖται κατὰ δῶμα; κακὸς δʼ αἰδοῖος ἀλήτης.
Odyssey 1.579	τὴν δʼ ἀπαμειβόμενος προσέφης, Εὔμαιε συβῶτα·
Odyssey 1.580	μυθεῖται κατὰ μοῖραν, ἅ πέρ κʼ οἴοιτο καὶ ἄλλος,
Odyssey 1.581	ὕβριν ἀλυσκάζων ἀνδρῶν ὑπερηνορεόντων.
Odyssey 1.582	ἀλλά σε μεῖναι ἄνωγεν ἐς ἠέλιον καταδύντα.
Odyssey 1.583	καὶ δὲ σοὶ ὧδʼ αὐτῇ πολὺ κάλλιον, ὦ βασίλεια,
Odyssey 1.584	οἴην πρὸς ξεῖνον φάσθαι ἔπος ἠδʼ ἐπακοῦσαι.
Odyssey 1.585	τὸν δʼ αὖτε προσέειπε περίφρων Πηνελόπεια·
Odyssey 1.586	οὐκ ἄφρων ὁ ξεῖνος· ὀΐεται, ὥς περ ἂν εἴη·
Odyssey 1.587	οὐ γάρ πού τινες ὧδε καταθνητῶν ἀνθρώπων
Odyssey 1.588	ἀνέρες ὑβρίζοντες ἀτάσθαλα μηχανόωνται.
Odyssey 1.589	ἡ μὲν ἄρʼ ὣς ἀγόρευεν, ὁ δʼ ᾤχετο δῖος ὑφορβὸς
Odyssey 1.590	μνηστήρων ἐς ὅμιλον, ἐπεὶ διεπέφραδε πάντα.
Odyssey 1.591	αἶψα δὲ Τηλέμαχον ἔπεα πτερόεντα προσηύδα,
Odyssey 1.592	ἄγχι σχὼν κεφαλήν, ἵνα μὴ πευθοίαθʼ οἱ ἄλλοι·
Odyssey 1.593	ὦ φίλʼ, ἐγὼ μὲν ἄπειμι, σύας καὶ κεῖνα φυλάξων,
Odyssey 1.594	σὸν καὶ ἐμὸν βίοτον· σοὶ δʼ ἐνθάδε πάντα μελόντων.
Odyssey 1.595	αὐτὸν μέν σε πρῶτα σάω, καὶ φράζεο θυμῷ
Odyssey 1.596	μή τι πάθῃς· πολλοὶ δὲ κακὰ φρονέουσιν Ἀχαιῶν,
Odyssey 1.597	τοὺς Ζεὺς ἐξολέσειε πρὶν ἡμῖν πῆμα γενέσθαι.
Odyssey 1.598	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.599	ἔσσεται οὕτως, ἄττα· σὺ δʼ ἔρχεο δειελιήσας·
Odyssey 1.600	ἠῶθεν δʼ ἰέναι καὶ ἄγειν ἱερήϊα καλά·
Odyssey 1.601	αὐτὰρ ἐμοὶ τάδε πάντα καὶ ἀθανάτοισι μελήσει.
Odyssey 1.602	ὣς φάθʼ, ὁ δʼ αὖτις ἄρʼ ἕζετʼ ἐϋξέστου ἐπὶ δίφρου,
Odyssey 1.603	πλησάμενος δʼ ἄρα θυμὸν ἐδητύος ἠδὲ ποτῆτος
Odyssey 1.604	βῆ ῥʼ ἴμεναι μεθʼ ὕας, λίπε δʼ ἕρκεά τε μέγαρόν τε,
Odyssey 1.605	πλεῖον δαιτυμόνων· οἱ δʼ ὀρχηστυῖ καὶ ἀοιδῇ
Odyssey 1.606	τέρποντʼ· ἤδη γὰρ καὶ ἐπήλυθε δείελον ἦμαρ.
Odyssey 1.1	ἦλθε δʼ ἐπὶ πτωχὸς πανδήμιος, ὃς κατὰ ἄστυ
Odyssey 1.2	πτωχεύεσκʼ Ἰθάκης, μετὰ δʼ ἔπρεπε γαστέρι μάργῃ
Odyssey 1.3	ἀζηχὲς φαγέμεν καὶ πιέμεν· οὐδέ οἱ ἦν ἲς
Odyssey 1.4	οὐδὲ βίη, εἶδος δὲ μάλα μέγας ἦν ὁράασθαι.
Odyssey 1.5	Ἀρναῖος δʼ ὄνομʼ ἔσκε· τὸ γὰρ θέτο πότνια μήτηρ
Odyssey 1.6	ἐκ γενετῆς· Ἶρον δὲ νέοι κίκλησκον ἅπαντες,
Odyssey 1.7	οὕνεκʼ ἀπαγγέλλεσκε κιών, ὅτε πού τις ἀνώγοι·
Odyssey 1.8	ὅς ῥʼ ἐλθὼν Ὀδυσῆα διώκετο οἷο δόμοιο,
Odyssey 1.9	καί μιν νεικείων ἔπεα πτερόεντα προσηύδα·
Odyssey 1.10	εἶκε, γέρον, προθύρου, μὴ δὴ τάχα καὶ ποδὸς ἕλκῃ.
Odyssey 1.11	οὐκ ἀΐεις ὅτι δή μοι ἐπιλλίζουσιν ἅπαντες,
Odyssey 1.12	ἑλκέμεναι δὲ κέλονται; ἐγὼ δʼ αἰσχύνομαι ἔμπης.
Odyssey 1.13	ἀλλʼ ἄνα, μὴ τάχα νῶϊν ἔρις καὶ χερσὶ γένηται.
Odyssey 1.14	τὸν δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
Odyssey 1.15	δαιμόνιʼ, οὔτε τί σε ῥέζω κακὸν οὔτʼ ἀγορεύω,
Odyssey 1.16	οὔτε τινὰ φθονέω δόμεναι καὶ πόλλʼ ἀνελόντα.
Odyssey 1.17	οὐδὸς δʼ ἀμφοτέρους ὅδε χείσεται, οὐδέ τί σε χρὴ
Odyssey 1.18	ἀλλοτρίων φθονέειν· δοκέεις δέ μοι εἶναι ἀλήτης
Odyssey 1.19	ὥς περ ἐγών, ὄλβον δὲ θεοὶ μέλλουσιν ὀπάζειν.
Odyssey 1.20	χερσὶ δὲ μή τι λίην προκαλίζεο, μή με χολώσῃς,
Odyssey 1.21	μή σε γέρων περ ἐὼν στῆθος καὶ χείλεα φύρσω
Odyssey 1.22	αἵματος· ἡσυχίη δʼ ἂν ἐμοὶ καὶ μᾶλλον ἔτʼ εἴη
Odyssey 1.23	αὔριον· οὐ μὲν γάρ τί σʼ ὑποστρέψεσθαι ὀΐω
Odyssey 1.24	δεύτερον ἐς μέγαρον Λαερτιάδεω Ὀδυσῆος.
Odyssey 1.25	τὸν δὲ χολωσάμενος προσεφώνεεν Ἶρος ἀλήτης·
Odyssey 1.26	ὢ πόποι, ὡς ὁ μολοβρὸς ἐπιτροχάδην ἀγορεύει,
Odyssey 1.27	γρηῒ καμινοῖ ἶσος· ὃν ἂν κακὰ μητισαίμην
Odyssey 1.28	κόπτων ἀμφοτέρῃσι, χαμαὶ δέ κε πάντας ὀδόντας
Odyssey 1.29	γναθμῶν ἐξελάσαιμι συὸς ὣς ληϊβοτείρης.
Odyssey 1.30	ζῶσαι νῦν, ἵνα πάντες ἐπιγνώωσι καὶ οἵδε
Odyssey 1.31	μαρναμένους· πῶς δʼ ἂν σὺ νεωτέρῳ ἀνδρὶ μάχοιο;
Odyssey 1.32	ὣς οἱ μὲν προπάροιθε θυράων ὑψηλάων
Odyssey 1.33	οὐδοῦ ἔπι ξεστοῦ πανθυμαδὸν ὀκριόωντο.
Odyssey 1.34	τοῖϊν δὲ ξυνέηχʼ ἱερὸν μένος Ἀντινόοιο,
Odyssey 1.35	ἡδὺ δʼ ἄρʼ ἐκγελάσας μετεφώνει μνηστήρεσσιν·
Odyssey 1.36	ὦ φίλοι, οὐ μέν πώ τι πάρος τοιοῦτον ἐτύχθη,
Odyssey 1.37	οἵην τερπωλὴν θεὸς ἤγαγεν ἐς τόδε δῶμα.
Odyssey 1.38	ὁ ξεῖνός τε καὶ Ἶρος ἐρίζετον ἀλλήλοιϊν
Odyssey 1.39	χερσὶ μαχέσσασθαι· ἀλλὰ ξυνελάσσομεν ὦκα.
Odyssey 1.40	ὣς ἔφαθʼ, οἱ δʼ ἄρα πάντες ἀνήϊξαν γελόωντες,
Odyssey 1.41	ἀμφὶ δʼ ἄρα πτωχοὺς κακοείμονας ἠγερέθοντο.
Odyssey 1.42	τοῖσιν δʼ Ἀντίνοος μετέφη, Εὐπείθεος υἱός·
Odyssey 1.43	κέκλυτέ μευ, μνηστῆρες ἀγήνορες, ὄφρα τι εἴπω.
Odyssey 1.44	γαστέρες αἵδʼ αἰγῶν κέατʼ ἐν πυρί, τὰς ἐπὶ δόρπῳ
Odyssey 1.45	κατθέμεθα κνίσης τε καὶ αἵματος ἐμπλήσαντες·
Odyssey 1.46	ὁππότερος δέ κε νικήσῃ κρείσσων τε γένηται,
Odyssey 1.47	τάων ἥν κʼ ἐθέλῃσιν ἀναστὰς αὐτὸς ἑλέσθω·
Odyssey 1.48	αἰεὶ αὖθʼ ἡμῖν μεταδαίσεται, οὐδέ τινʼ ἄλλον
Odyssey 1.49	πτωχὸν ἔσω μίσγεσθαι ἐάσομεν αἰτήσοντα.
Odyssey 1.50	ὣς ἔφατʼ Ἀντίνοος, τοῖσιν δʼ ἐπιήνδανε μῦθος.
Odyssey 1.51	τοῖς δὲ δολοφρονέων μετέφη πολύμητις Ὀδυσσεύς·
Odyssey 1.52	ὦ φίλοι, οὔ πως ἔστι νεωτέρῳ ἀνδρὶ μάχεσθαι
Odyssey 1.53	ἄνδρα γέροντα, δύῃ ἀρημένον· ἀλλά με γαστὴρ
Odyssey 1.54	ὀτρύνει κακοεργός, ἵνα πληγῇσι δαμείω.
Odyssey 1.55	ἀλλʼ ἄγε νῦν μοι πάντες ὀμόσσατε καρτερὸν ὅρκον,
Odyssey 1.56	μή τις ἐπʼ Ἴρῳ ἦρα φέρων ἐμὲ χειρὶ βαρείῃ
Odyssey 1.57	πλήξῃ ἀτασθάλλων, τούτῳ δέ με ἶφι δαμάσσῃ.
Odyssey 1.58	ὣς ἔφαθʼ, οἱ δʼ ἄρα πάντες ἀπώμνυον ὡς ἐκέλευεν.
Odyssey 1.59	αὐτὰρ ἐπεί ῥʼ ὄμοσάν τε τελεύτησάν τε τὸν ὅρκον,
Odyssey 1.60	τοῖς δʼ αὖτις μετέειφʼ ἱερὴ ἲς Τηλεμάχοιο·
Odyssey 1.61	ξεῖνʼ, εἴ σʼ ὀτρύνει κραδίη καὶ θυμὸς ἀγήνωρ
Odyssey 1.62	τοῦτον ἀλέξασθαι, τῶν δʼ ἄλλων μή τινʼ Ἀχαιῶν
Odyssey 1.63	δείδιθʼ, ἐπεὶ πλεόνεσσι μαχήσεται ὅς κέ σε θείνῃ·
Odyssey 1.64	ξεινοδόκος μὲν ἐγών, ἐπὶ δʼ αἰνεῖτον βασιλῆες,
Odyssey 1.65	Ἀντίνοός τε καὶ Εὐρύμαχος, πεπνυμένω ἄμφω.
Odyssey 1.66	ὣς ἔφαθʼ, οἱ δʼ ἄρα πάντες ἐπῄνεον· αὐτὰρ Ὀδυσσεὺς
Odyssey 1.67	ζώσατο μὲν ῥάκεσιν περὶ μήδεα, φαῖνε δὲ μηροὺς
Odyssey 1.68	καλούς τε μεγάλους τε, φάνεν δέ οἱ εὐρέες ὦμοι
Odyssey 1.69	στήθεά τε στιβαροί τε βραχίονες· αὐτὰρ Ἀθήνη
Odyssey 1.70	ἄγχι παρισταμένη μέλεʼ ἤλδανε ποιμένι λαῶν.
Odyssey 1.71	μνηστῆρες δʼ ἄρα πάντες ὑπερφιάλως ἀγάσαντο·
Odyssey 1.72	ὧδε δέ τις εἴπεσκεν ἰδὼν ἐς πλησίον ἄλλον·
Odyssey 1.73	ἦ τάχα Ἶρος Ἄϊρος ἐπίσπαστον κακὸν ἕξει,
Odyssey 1.74	οἵην ἐκ ῥακέων ὁ γέρων ἐπιγουνίδα φαίνει.
Odyssey 1.75	ὣς ἄρʼ ἔφαν, Ἴρῳ δὲ κακῶς ὠρίνετο θυμός.
Odyssey 1.76	ἀλλὰ καὶ ὣς δρηστῆρες ἄγον ζώσαντες ἀνάγκῃ
Odyssey 1.77	δειδιότα· σάρκες δὲ περιτρομέοντο μέλεσσιν.
Odyssey 1.78	Ἀντίνοος δʼ ἐνένιπεν ἔπος τʼ ἔφατʼ ἔκ τʼ ὀνόμαζεν·
Odyssey 1.79	νῦν μὲν μήτʼ εἴης, βουγάϊε, μήτε γένοιο,
Odyssey 1.80	εἰ δὴ τοῦτόν γε τρομέεις καὶ δείδιας αἰνῶς,
Odyssey 1.81	ἄνδρα γέροντα, δύῃ ἀρημένον, ἥ μιν ἱκάνει.
Odyssey 1.82	ἀλλʼ ἔκ τοι ἐρέω, τὸ δὲ καὶ τετελεσμένον ἔσται·
Odyssey 1.83	αἴ κέν σʼ οὗτος νικήσῃ κρείσσων τε γένηται,
Odyssey 1.84	πέμψω σʼ ἤπειρόνδε, βαλὼν ἐν νηὶ μελαίνῃ,
Odyssey 1.85	εἰς Ἔχετον βασιλῆα, βροτῶν δηλήμονα πάντων,
Odyssey 1.86	ὅς κʼ ἀπὸ ῥῖνα τάμῃσι καὶ οὔατα νηλέϊ χαλκῷ,
Odyssey 1.87	μήδεά τʼ ἐξερύσας δώῃ κυσὶν ὠμὰ δάσασθαι.
Odyssey 1.88	ὣς φάτο, τῷ δʼ ἔτι μᾶλλον ὑπὸ τρόμος ἔλλαβε γυῖα.
Odyssey 1.89	ἐς μέσσον δʼ ἄναγον· τὼ δʼ ἄμφω χεῖρας ἀνέσχον.
Odyssey 1.90	δὴ τότε μερμήριξε πολύτλας δῖος Ὀδυσσεὺς
Odyssey 1.91	ἢ ἐλάσειʼ ὥς μιν ψυχὴ λίποι αὖθι πεσόντα,
Odyssey 1.92	ἦέ μιν ἦκʼ ἐλάσειε τανύσσειέν τʼ ἐπὶ γαίῃ.
Odyssey 1.93	ὧδε δέ οἱ φρονέοντι δοάσσατο κέρδιον εἶναι,
Odyssey 1.94	ἦκʼ ἐλάσαι, ἵνα μή μιν ἐπιφρασσαίατʼ Ἀχαιοί.
Odyssey 1.95	δὴ τότʼ ἀνασχομένω ὁ μὲν ἤλασε δεξιὸν ὦμον
Odyssey 1.96	Ἶρος, ὁ δʼ αὐχένʼ ἔλασσεν ὑπʼ οὔατος, ὀστέα δʼ εἴσω
Odyssey 1.97	ἔθλασεν· αὐτίκα δʼ ἦλθε κατὰ στόμα φοίνιον αἷμα,
Odyssey 1.98	κὰδ δʼ ἔπεσʼ ἐν κονίῃσι μακών, σὺν δʼ ἤλασʼ ὀδόντας
Odyssey 1.99	λακτίζων ποσὶ γαῖαν· ἀτὰρ μνηστῆρες ἀγαυοὶ
Odyssey 1.100	χεῖρας ἀνασχόμενοι γέλῳ ἔκθανον. αὐτὰρ Ὀδυσσεὺς
Odyssey 1.101	ἕλκε διὲκ προθύροιο λαβὼν ποδός, ὄφρʼ ἵκετʼ αὐλήν,
Odyssey 1.102	αἰθούσης τε θύρας· καί μιν ποτὶ ἑρκίον αὐλῆς
Odyssey 1.103	εἷσεν ἀνακλίνας· σκῆπτρον δέ οἱ ἔμβαλε χειρί,
Odyssey 1.104	καί μιν φωνήσας ἔπεα πτερόεντα προσηύδα·
Odyssey 1.105	ἐνταυθοῖ νῦν ἧσο σύας τε κύνας τʼ ἀπερύκων,
Odyssey 1.106	μηδὲ σύ γε ξείνων καὶ πτωχῶν κοίρανος εἶναι
Odyssey 1.107	λυγρὸς ἐών, μή πού τι κακὸν καὶ μεῖζον ἐπαύρῃ.
Odyssey 1.108	ἦ ῥα καὶ ἀμφʼ ὤμοισιν ἀεικέα βάλλετο πήρην,
Odyssey 1.109	πυκνὰ ῥωγαλέην· ἐν δὲ στρόφος ἦεν ἀορτήρ.
Odyssey 1.110	ἂψ δʼ ὅ γʼ ἐπʼ οὐδὸν ἰὼν κατʼ ἄρʼ ἕζετο· τοὶ δʼ ἴσαν εἴσω
Odyssey 1.111	ἡδὺ γελώοντες καὶ δεικανόωντʼ ἐπέεσσι·
Odyssey 1.112	Ζεύς τοι δοίη, ξεῖνε, καὶ ἀθάνατοι θεοὶ ἄλλοι,
Odyssey 1.113	ὅττι μάλιστʼ ἐθέλεις καί τοι φίλον ἔπλετο θυμῷ,
Odyssey 1.114	ὃς τοῦτον τὸν ἄναλτον ἀλητεύειν ἀπέπαυσας
Odyssey 1.115	ἐν δήμῳ· τάχα γάρ μιν ἀνάξομεν ἤπειρόνδε
Odyssey 1.116	εἰς Ἔχετον βασιλῆα, βροτῶν δηλήμονα πάντων.
Odyssey 1.117	ὣς ἄρʼ ἔφαν, χαῖρεν δὲ κλεηδόνι δῖος Ὀδυσσεύς.
Odyssey 1.118	Ἀντίνοος δʼ ἄρα οἱ μεγάλην παρὰ γαστέρα θῆκεν,
Odyssey 1.119	ἐμπλείην κνίσης τε καὶ αἵματος· Ἀμφίνομος δὲ
Odyssey 1.120	ἄρτους ἐκ κανέοιο δύω παρέθηκεν ἀείρας
Odyssey 1.121	καὶ δέπαϊ χρυσέῳ δειδίσκετο, φώνησέν τε·
Odyssey 1.122	χαῖρε, πάτερ ὦ ξεῖνε, γένοιτό τοι ἔς περ ὀπίσσω
Odyssey 1.123	ὄλβος· ἀτὰρ μὲν νῦν γε κακοῖς ἔχεαι πολέεσσι.
Odyssey 1.124	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.125	Ἀμφίνομʼ, ἦ μάλα μοι δοκέεις πεπνυμένος εἶναι·
Odyssey 1.126	τοίου γὰρ καὶ πατρός, ἐπεὶ κλέος ἐσθλὸν ἄκουον,
Odyssey 1.127	Νῖσον Δουλιχιῆα ἐΰν τʼ ἔμεν ἀφνειόν τε·
Odyssey 1.128	τοῦ σʼ ἔκ φασι γενέσθαι, ἐπητῇ δʼ ἀνδρὶ ἔοικας.
Odyssey 1.129	τοὔνεκά τοι ἐρέω, σὺ δὲ σύνθεο καί μευ ἄκουσον·
Odyssey 1.130	οὐδὲν ἀκιδνότερον γαῖα τρέφει ἀνθρώποιο,
Odyssey 1.131	πάντων ὅσσα τε γαῖαν ἔπι πνείει τε καὶ ἕρπει.
Odyssey 1.132	οὐ μὲν γάρ ποτέ φησι κακὸν πείσεσθαι ὀπίσσω,
Odyssey 1.133	ὄφρʼ ἀρετὴν παρέχωσι θεοὶ καὶ γούνατʼ ὀρώρῃ·
Odyssey 1.134	ἀλλʼ ὅτε δὴ καὶ λυγρὰ θεοὶ μάκαρες τελέσωσι,
Odyssey 1.135	καὶ τὰ φέρει ἀεκαζόμενος τετληότι θυμῷ·
Odyssey 1.136	τοῖος γὰρ νόος ἐστὶν ἐπιχθονίων ἀνθρώπων
Odyssey 1.137	οἷον ἐπʼ ἦμαρ ἄγησι πατὴρ ἀνδρῶν τε θεῶν τε.
Odyssey 1.138	καὶ γὰρ ἐγώ ποτʼ ἔμελλον ἐν ἀνδράσιν ὄλβιος εἶναι,
Odyssey 1.139	πολλὰ δʼ ἀτάσθαλʼ ἔρεξα βίῃ καὶ κάρτεϊ εἴκων,
Odyssey 1.140	πατρί τʼ ἐμῷ πίσυνος καὶ ἐμοῖσι κασιγνήτοισι.
Odyssey 1.141	τῷ μή τίς ποτε πάμπαν ἀνὴρ ἀθεμίστιος εἴη,
Odyssey 1.142	ἀλλʼ ὅ γε σιγῇ δῶρα θεῶν ἔχοι, ὅττι διδοῖεν.
Odyssey 1.143	οἷʼ ὁρόω μνηστῆρας ἀτάσθαλα μηχανόωντας,
Odyssey 1.144	κτήματα κείροντας καὶ ἀτιμάζοντας ἄκοιτιν
Odyssey 1.145	ἀνδρός, ὃν οὐκέτι φημὶ φίλων καὶ πατρίδος αἴης
Odyssey 1.146	δηρὸν ἀπέσσεσθαι· μάλα δὲ σχεδόν. ἀλλά σε δαίμων
Odyssey 1.147	οἴκαδʼ ὑπεξαγάγοι, μηδʼ ἀντιάσειας ἐκείνῳ,
Odyssey 1.148	ὁππότε νοστήσειε φίλην ἐς πατρίδα γαῖαν·
Odyssey 1.149	οὐ γὰρ ἀναιμωτί γε διακρινέεσθαι ὀΐω
Odyssey 1.150	μνηστῆρας καὶ κεῖνον, ἐπεί κε μέλαθρον ὑπέλθῃ.
Odyssey 1.151	ὣς φάτο, καὶ σπείσας ἔπιεν μελιηδέα οἶνον,
Odyssey 1.152	ἂψ δʼ ἐν χερσὶν ἔθηκε δέπας κοσμήτορι λαῶν.
Odyssey 1.153	αὐτὰρ ὁ βῆ διὰ δῶμα φίλον τετιημένος ἦτορ,
Odyssey 1.154	νευστάζων κεφαλῇ· δὴ γὰρ κακὸν ὄσσετο θυμός.
Odyssey 1.155	ἀλλʼ οὐδʼ ὣς φύγε κῆρα· πέδησε δὲ καὶ τὸν Ἀθήνη
Odyssey 1.156	Τηλεμάχου ὑπὸ χερσὶ καὶ ἔγχεϊ ἶφι δαμῆναι.
Odyssey 1.157	ἂψ δʼ αὖτις κατʼ ἄρʼ ἕζετʼ ἐπὶ θρόνου ἔνθεν ἀνέστη.
Odyssey 1.158	τῇ δʼ ἄρʼ ἐπὶ φρεσὶ θῆκε θεὰ γλαυκῶπις Ἀθήνη,
Odyssey 1.159	κούρῃ Ἰκαρίοιο, περίφρονι Πηνελοπείῃ,
Odyssey 1.160	μνηστήρεσσι φανῆναι, ὅπως πετάσειε μάλιστα
Odyssey 1.161	θυμὸν μνηστήρων ἰδὲ τιμήεσσα γένοιτο
Odyssey 1.162	μᾶλλον πρὸς πόσιός τε καὶ υἱέος ἢ πάρος ἦεν.
Odyssey 1.163	ἀχρεῖον δʼ ἐγέλασσεν ἔπος τʼ ἔφατʼ ἔκ τʼ ὀνόμαζεν·
Odyssey 1.164	Εὐρυνόμη, θυμός μοι ἐέλδεται, οὔ τι πάρος γε,
Odyssey 1.165	μνηστήρεσσι φανῆναι, ἀπεχθομένοισί περ ἔμπης·
Odyssey 1.166	παιδὶ δέ κεν εἴποιμι ἔπος, τό κε κέρδιον εἴη,
Odyssey 1.167	μὴ πάντα μνηστῆρσιν ὑπερφιάλοισιν ὁμιλεῖν,
Odyssey 1.168	οἵ τʼ εὖ μὲν βάζουσι, κακῶς δʼ ὄπιθεν φρονέουσι.
Odyssey 1.169	τὴν δʼ αὖτʼ Εὐρυνόμη ταμίη πρὸς μῦθον ἔειπεν·
Odyssey 1.170	ναὶ δὴ ταῦτά γε πάντα, τέκος, κατὰ μοῖραν ἔειπες.
Odyssey 1.171	ἀλλʼ ἴθι καὶ σῷ παιδὶ ἔπος φάο μηδʼ ἐπίκευθε,
Odyssey 1.172	χρῶτʼ ἀπονιψαμένη καὶ ἐπιχρίσασα παρειάς·
Odyssey 1.173	μηδʼ οὕτω δακρύοισι πεφυρμένη ἀμφὶ πρόσωπα
Odyssey 1.174	ἔρχευ, ἐπεὶ κάκιον πενθήμεναι ἄκριτον αἰεί.
Odyssey 1.175	ἤδη μὲν γάρ τοι παῖς τηλίκος, ὃν σὺ μάλιστα
Odyssey 1.176	ἠρῶ ἀθανάτοισι γενειήσαντα ἰδέσθαι.
Odyssey 1.177	τὴν δʼ αὖτε προσέειπε περίφρων Πηνελόπεια·
Odyssey 1.178	Εὐρυνόμη, μὴ ταῦτα παραύδα, κηδομένη περ,
Odyssey 1.179	χρῶτʼ ἀπονίπτεσθαι καὶ ἐπιχρίεσθαι ἀλοιφῇ·
Odyssey 1.180	ἀγλαΐην γὰρ ἐμοί γε θεοί, τοὶ Ὄλυμπον ἔχουσιν,
Odyssey 1.181	ὤλεσαν, ἐξ οὗ κεῖνος ἔβη κοίλῃς ἐνὶ νηυσίν.
Odyssey 1.182	ἀλλά μοι Αὐτονόην τε καὶ Ἱπποδάμειαν ἄνωχθι
Odyssey 1.183	ἐλθέμεν, ὄφρα κέ μοι παρστήετον ἐν μεγάροισιν·
Odyssey 1.184	οἴη δʼ οὐκ εἴσειμι μετʼ ἀνέρας· αἰδέομαι γάρ.
Odyssey 1.185	ὣς ἄρʼ ἔφη, γρηῢς δὲ διὲκ μεγάροιο βεβήκει
Odyssey 1.186	ἀγγελέουσα γυναιξὶ καὶ ὀτρυνέουσα νέεσθαι.
Odyssey 1.187	ἔνθʼ αὖτʼ ἄλλʼ ἐνόησε θεὰ γλαυκῶπις Ἀθήνη·
Odyssey 1.188	κούρῃ Ἰκαρίοιο κατὰ γλυκὺν ὕπνον ἔχευεν,
Odyssey 1.189	εὗδε δʼ ἀνακλινθεῖσα, λύθεν δέ οἱ ἅψεα πάντα
Odyssey 1.190	αὐτοῦ ἐνὶ κλιντῆρι· τέως δʼ ἄρα δῖα θεάων
Odyssey 1.191	ἄμβροτα δῶρα δίδου, ἵνα μιν θησαίατʼ Ἀχαιοί.
Odyssey 1.192	κάλλεϊ μέν οἱ πρῶτα προσώπατα καλὰ κάθηρεν
Odyssey 1.193	ἀμβροσίῳ, οἵῳ περ ἐϋστέφανος Κυθέρεια
Odyssey 1.194	χρίεται, εὖτʼ ἂν ἴῃ Χαρίτων χορὸν ἱμερόεντα·
Odyssey 1.195	καί μιν μακροτέρην καὶ πάσσονα θῆκεν ἰδέσθαι,
Odyssey 1.196	λευκοτέρην δʼ ἄρα μιν θῆκε πριστοῦ ἐλέφαντος.
Odyssey 1.197	ἡ μὲν ἄρʼ ὣς ἔρξασʼ ἀπεβήσετο δῖα θεάων,
Odyssey 1.198	ἦλθον δʼ ἀμφίπολοι λευκώλενοι ἐκ μεγάροιο
Odyssey 1.199	φθόγγῳ ἐπερχόμεναι· τὴν δὲ γλυκὺς ὕπνος ἀνῆκε,
Odyssey 1.200	καί ῥʼ ἀπομόρξατο χερσὶ παρειὰς φώνησέν τε·
Odyssey 1.201	ἦ με μάλʼ αἰνοπαθῆ μαλακὸν περὶ κῶμʼ ἐκάλυψεν.
Odyssey 1.202	αἴθε μοι ὣς μαλακὸν θάνατον πόροι Ἄρτεμις ἁγνὴ
Odyssey 1.203	αὐτίκα νῦν, ἵνα μηκέτʼ ὀδυρομένη κατὰ θυμὸν
Odyssey 1.204	αἰῶνα φθινύθω, πόσιος ποθέουσα φίλοιο
Odyssey 1.205	παντοίην ἀρετήν, ἐπεὶ ἔξοχος ἦεν Ἀχαιῶν.
Odyssey 1.206	ὣς φαμένη κατέβαινʼ ὑπερώϊα σιγαλόεντα,
Odyssey 1.207	οὐκ οἴη· ἅμα τῇ γε καὶ ἀμφίπολοι δύʼ ἕποντο.
Odyssey 1.208	ἡ δʼ ὅτε δὴ μνηστῆρας ἀφίκετο δῖα γυναικῶν,
Odyssey 1.209	στῆ ῥα παρὰ σταθμὸν τέγεος πύκα ποιητοῖο,
Odyssey 1.210	ἄντα παρειάων σχομένη λιπαρὰ κρήδεμνα·
Odyssey 1.211	ἀμφίπολος δʼ ἄρα οἱ κεδνὴ ἑκάτερθε παρέστη.
Odyssey 1.212	τῶν δʼ αὐτοῦ λύτο γούνατʼ, ἔρῳ δʼ ἄρα θυμὸν ἔθελχθεν,
Odyssey 1.213	πάντες δʼ ἠρήσαντο παραὶ λεχέεσσι κλιθῆναι.
Odyssey 1.214	ἡ δʼ αὖ Τηλέμαχον προσεφώνεεν, ὃν φίλον υἱόν·
Odyssey 1.215	Τηλέμαχʼ, οὐκέτι τοι φρένες ἔμπεδοι οὐδὲ νόημα·
Odyssey 1.216	παῖς ἔτʼ ἐὼν καὶ μᾶλλον ἐνὶ φρεσὶ κέρδεʼ ἐνώμας·
Odyssey 1.217	νῦν δʼ, ὅτε δὴ μέγας ἐσσὶ καὶ ἥβης μέτρον ἱκάνεις,
Odyssey 1.218	καί κέν τις φαίη γόνον ἔμμεναι ὀλβίου ἀνδρός,
Odyssey 1.219	ἐς μέγεθος καὶ κάλλος ὁρώμενος, ἀλλότριος φώς,
Odyssey 1.220	οὐκέτι τοι φρένες εἰσὶν ἐναίσιμοι οὐδὲ νόημα.
Odyssey 1.221	οἷον δὴ τόδε ἔργον ἐνὶ μεγάροισιν ἐτύχθη,
Odyssey 1.222	ὃς τὸν ξεῖνον ἔασας ἀεικισθήμεναι οὕτως.
Odyssey 1.223	πῶς νῦν, εἴ τι ξεῖνος ἐν ἡμετέροισι δόμοισιν
Odyssey 1.224	ἥμενος ὧδε πάθοι ῥυστακτύος ἐξ ἀλεγεινῆς;
Odyssey 1.225	σοί κʼ αἶσχος λώβη τε μετʼ ἀνθρώποισι πέλοιτο.
Odyssey 1.226	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.227	μῆτερ ἐμή, τὸ μὲν οὔ σε νεμεσσῶμαι κεχολῶσθαι·
Odyssey 1.228	αὐτὰρ ἐγὼ θυμῷ νοέω καὶ οἶδα ἕκαστα,
Odyssey 1.229	ἐσθλά τε καὶ τὰ χέρεια· πάρος δʼ ἔτι νήπιος ἦα.
Odyssey 1.230	ἀλλά τοι οὐ δύναμαι πεπνυμένα πάντα νοῆσαι·
Odyssey 1.231	ἐκ γάρ με πλήσσουσι παρήμενοι ἄλλοθεν ἄλλος
Odyssey 1.232	οἵδε κακὰ φρονέοντες, ἐμοὶ δʼ οὐκ εἰσὶν ἀρωγοί.
Odyssey 1.233	οὐ μέν τοι ξείνου γε καὶ Ἴρου μῶλος ἐτύχθη
Odyssey 1.234	μνηστήρων ἰότητι, βίῃ δʼ ὅ γε φέρτερος ἦεν.
Odyssey 1.235	αἲ γάρ, Ζεῦ τε πάτερ καὶ Ἀθηναίη καὶ Ἄπολλον,
Odyssey 1.236	οὕτω νῦν μνηστῆρες ἐν ἡμετέροισι δόμοισι
Odyssey 1.237	νεύοιεν κεφαλὰς δεδμημένοι, οἱ μὲν ἐν αὐλῇ,
Odyssey 1.238	οἱ δʼ ἔντοσθε δόμοιο, λελῦτο δὲ γυῖα ἑκάστου,
Odyssey 1.239	ὡς νῦν Ἶρος κεῖνος ἐπʼ αὐλείῃσι θύρῃσιν
Odyssey 1.240	ἧσται νευστάζων κεφαλῇ, μεθύοντι ἐοικώς,
Odyssey 1.241	οὐδʼ ὀρθὸς στῆναι δύναται ποσὶν οὐδὲ νέεσθαι
Odyssey 1.242	οἴκαδʼ, ὅπη οἱ νόστος, ἐπεὶ φίλα γυῖα λέλυνται.
Odyssey 1.243	ὣς οἱ μὲν τοιαῦτα πρὸς ἀλλήλους ἀγόρευον·
Odyssey 1.244	Εὐρύμαχος δʼ ἐπέεσσι προσηύδα Πηνελόπειαν·
Odyssey 1.245	κούρη Ἰκαρίοιο, περίφρον Πηνελόπεια,
Odyssey 1.246	εἰ πάντες σε ἴδοιεν ἀνʼ Ἴασον Ἄργος Ἀχαιοί,
Odyssey 1.247	πλέονές κε μνηστῆρες ἐν ὑμετέροισι δόμοισιν
Odyssey 1.248	ἠῶθεν δαινύατʼ, ἐπεὶ περίεσσι γυναικῶν
Odyssey 1.249	εἶδός τε μέγεθός τε ἰδὲ φρένας ἔνδον ἐΐσας.
Odyssey 1.250	τὸν δʼ ἠμείβετʼ ἔπειτα περίφρων Πηνελόπεια·
Odyssey 1.251	Εὐρύμαχʼ, ἦ τοι ἐμὴν ἀρετὴν εἶδός τε δέμας τε
Odyssey 1.252	ὤλεσαν ἀθάνατοι, ὅτε Ἴλιον εἰσανέβαινον
Odyssey 1.253	Ἀργεῖοι, μετὰ τοῖσι δʼ ἐμὸς πόσις ᾖεν Ὀδυσσεύς.
Odyssey 1.254	εἰ κεῖνός γʼ ἐλθὼν τὸν ἐμὸν βίον ἀμφιπολεύοι,
Odyssey 1.255	μεῖζόν κε κλέος εἴη ἐμὸν καὶ κάλλιον οὕτως.
Odyssey 1.256	νῦν δʼ ἄχομαι· τόσα γάρ μοι ἐπέσσευεν κακὰ δαίμων.
Odyssey 1.257	ἦ μὲν δὴ ὅτε τʼ ᾖε λιπὼν κάτα πατρίδα γαῖαν,
Odyssey 1.258	δεξιτερὴν ἐπὶ καρπῷ ἑλὼν ἐμὲ χεῖρα προσηύδα·
Odyssey 1.259	ὦ γύναι, οὐ γὰρ ὀΐω ἐϋκνήμιδας Ἀχαιοὺς
Odyssey 1.260	ἐκ Τροίης εὖ πάντας ἀπήμονας ἀπονέεσθαι·
Odyssey 1.261	καὶ γὰρ Τρῶάς φασι μαχητὰς ἔμμεναι ἄνδρας,
Odyssey 1.262	ἠμὲν ἀκοντιστὰς ἠδὲ ῥυτῆρας ὀϊστῶν
Odyssey 1.263	ἵππων τʼ ὠκυπόδων ἐπιβήτορας, οἵ κε τάχιστα
Odyssey 1.264	ἔκριναν μέγα νεῖκος ὁμοιΐου πολέμοιο.
Odyssey 1.265	τῷ οὐκ οἶδʼ ἤ κέν μʼ ἀνέσει θεός, ἦ κεν ἁλώω
Odyssey 1.266	αὐτοῦ ἐνὶ Τροίῃ· σοὶ δʼ ἐνθάδε πάντα μελόντων.
Odyssey 1.267	μεμνῆσθαι πατρὸς καὶ μητέρος ἐν μεγάροισιν
Odyssey 1.268	ὡς νῦν, ἢ ἔτι μᾶλλον ἐμεῦ ἀπονόσφιν ἐόντος·
Odyssey 1.269	αὐτὰρ ἐπὴν δὴ παῖδα γενειήσαντα ἴδηαι,
Odyssey 1.270	γήμασθʼ ᾧ κʼ ἐθέλῃσθα, τεὸν κατὰ δῶμα λιποῦσα.
Odyssey 1.271	κεῖνος τὼς ἀγόρευε· τὰ δὴ νῦν πάντα τελεῖται.
Odyssey 1.272	νὺξ δʼ ἔσται ὅτε δὴ στυγερὸς γάμος ἀντιβολήσει
Odyssey 1.273	οὐλομένης ἐμέθεν, τῆς τε Ζεὺς ὄλβον ἀπηύρα.
Odyssey 1.274	ἀλλὰ τόδʼ αἰνὸν ἄχος κραδίην καὶ θυμὸν ἱκάνει·
Odyssey 1.275	μνηστήρων οὐχ ἥδε δίκη τὸ πάροιθε τέτυκτο·
Odyssey 1.276	οἵ τʼ ἀγαθήν τε γυναῖκα καὶ ἀφνειοῖο θύγατρα
Odyssey 1.277	μνηστεύειν ἐθέλωσι καὶ ἀλλήλοις ἐρίσωσιν,
Odyssey 1.278	αὐτοὶ τοί γʼ ἀπάγουσι βόας καὶ ἴφια μῆλα,
Odyssey 1.279	κούρης δαῖτα φίλοισι, καὶ ἀγλαὰ δῶρα διδοῦσιν·
Odyssey 1.280	ἀλλʼ οὐκ ἀλλότριον βίοτον νήποινον ἔδουσιν.
Odyssey 1.281	ὣς φάτο, γήθησεν δὲ πολύτλας δῖος Ὀδυσσεύς,
Odyssey 1.282	οὕνεκα τῶν μὲν δῶρα παρέλκετο, θέλγε δὲ θυμὸν
Odyssey 1.283	μειλιχίοις ἐπέεσσι, νόος δέ οἱ ἄλλα μενοίνα.
Odyssey 1.284	τὴν δʼ αὖτʼ Ἀντίνοος προσέφη, Εὐπείθεος υἱός,
Odyssey 1.285	κούρη Ἰκαρίοιο, περίφρον Πηνελόπεια,
Odyssey 1.286	δῶρα μὲν ὅς κʼ ἐθέλῃσιν Ἀχαιῶν ἐνθάδʼ ἐνεῖκαι,
Odyssey 1.287	δέξασθʼ. οὐ γὰρ καλὸν ἀνήνασθαι δόσιν ἐστίν·
Odyssey 1.288	ἡμεῖς δʼ οὔτʼ ἐπὶ ἔργα πάρος γʼ ἴμεν οὔτε πῃ ἄλλῃ,
Odyssey 1.289	πρίν γέ σε τῷ γήμασθαι Ἀχαιῶν ὅς τις ἄριστος.
Odyssey 1.290	ὣς ἔφατʼ Ἀντίνοος, τοῖσιν δʼ ἐπιήνδανε μῦθος·
Odyssey 1.291	δῶρα δʼ ἄρʼ οἰσέμεναι πρόεσαν κήρυκα ἕκαστος.
Odyssey 1.292	Ἀντινόῳ μὲν ἔνεικε μέγαν περικαλλέα πέπλον,
Odyssey 1.293	ποικίλον· ἐν δʼ ἀρʼ ἔσαν περόναι δυοκαίδεκα πᾶσαι
Odyssey 1.294	χρύσειαι, κληῗσιν ἐϋγνάμπτοις ἀραρυῖαι.
Odyssey 1.295	ὅρμον δʼ Εὐρυμάχῳ πολυδαίδαλον αὐτίκʼ ἔνεικε.
Odyssey 1.296	χρύσεον, ἠλέκτροισιν ἐερμένον ἠέλιον ὥς.
Odyssey 1.297	ἕρματα δʼ Εὐρυδάμαντι δύω θεράποντες ἔνεικαν,
Odyssey 1.298	τρίγληνα μορόεντα· χάρις δʼ ἀπελάμπετο πολλή.
Odyssey 1.299	ἐκ δʼ ἄρα Πεισάνδροιο Πολυκτορίδαο ἄνακτος
Odyssey 1.300	ἴσθμιον ἤνεικεν θεράπων, περικαλλὲς ἄγαλμα.
Odyssey 1.301	ἄλλο δʼ ἄρʼ ἄλλος δῶρον Ἀχαιῶν καλὸν ἔνεικεν.
Odyssey 1.302	ἡ μὲν ἔπειτʼ ἀνέβαινʼ ὑπερώϊα δῖα γυναικῶν,
Odyssey 1.303	τῇ δʼ ἄρʼ ἅμʼ ἀμφίπολοι ἔφερον περικαλλέα δῶρα
Odyssey 1.304	οἱ δʼ εἰς ὀρχηστύν τε καὶ ἱμερόεσσαν ἀοιδὴν
Odyssey 1.305	τρεψάμενοι τέρποντο, μένον δʼ ἐπὶ ἕσπερον ἐλθεῖν.
Odyssey 1.306	τοῖσι δὲ τερπομένοισι μέλας ἐπὶ ἕσπερος ἦλθεν.
Odyssey 1.307	αὐτίκα λαμπτῆρας τρεῖς ἵστασαν ἐν μεγάροισιν,
Odyssey 1.308	ὄφρα φαείνοιεν· περὶ δὲ ξύλα κάγκανα θῆκαν,
Odyssey 1.309	αὖα πάλαι, περίκηλα, νέον κεκεασμένα χαλκῷ,
Odyssey 1.310	καὶ δαΐδας μετέμισγον· ἀμοιβηδὶς δʼ ἀνέφαινον
Odyssey 1.311	δμῳαὶ Ὀδυσσῆος ταλασίφρονος. αὐτὰρ ὁ τῇσιν
Odyssey 1.312	αὐτὸς διογενῆς μετέφη πολύμητις Ὀδυσσεύς·
Odyssey 1.313	δμῳαὶ Ὀδυσσῆος, δὴν οἰχομένοιο ἄνακτος,
Odyssey 1.314	ἔρχεσθε πρὸς δώμαθʼ, ἵνʼ αἰδοίη βασίλεια·
Odyssey 1.315	τῇ δὲ παρʼ ἠλάκατα στροφαλίζετε, τέρπετε δʼ αὐτὴν
Odyssey 1.316	ἥμεναι ἐν μεγάρῳ, ἢ εἴρια πείκετε χερσίν·
Odyssey 1.317	αὐτὰρ ἐγὼ τούτοισι φάος πάντεσσι παρέξω.
Odyssey 1.318	ἤν περ γάρ κʼ ἐθέλωσιν ἐΰθρονον Ἠῶ μίμνειν,
Odyssey 1.319	οὔ τί με νικήσουσι· πολυτλήμων δὲ μάλʼ εἰμί.
Odyssey 1.320	ὣς ἔφαθʼ, αἱ δʼ ἐγέλασσαν, ἐς ἀλλήλας δὲ ἴδοντο.
Odyssey 1.321	τὸν δʼ αἰσχρῶς ἐνένιπε Μελανθὼ καλλιπάρῃος,
Odyssey 1.322	τὴν Δολίος μὲν ἔτικτε, κόμισσε δὲ Πηνελόπεια,
Odyssey 1.323	παῖδα δὲ ὣς ἀτίταλλε, δίδου δʼ ἄρʼ ἀθύρματα θυμῷ·
Odyssey 1.324	ἀλλʼ οὐδʼ ὣς ἔχε πένθος ἐνὶ φρεσὶ Πηνελοπείης,
Odyssey 1.325	ἀλλʼ ἥ γʼ Εὐρυμάχῳ μισγέσκετο καὶ φιλέεσκεν.
Odyssey 1.326	ἥ ῥʼ Ὀδυσῆʼ ἐνένιπεν ὀνειδείοις ἐπέεσσιν·
Odyssey 1.327	ξεῖνε τάλαν, σύ γέ τις φρένας ἐκπεπαταγμένος ἐσσί,
Odyssey 1.328	οὐδʼ ἐθέλεις εὕδειν χαλκήϊον ἐς δόμον ἐλθών,
Odyssey 1.329	ἠέ που ἐς λέσχην, ἀλλʼ ἐνθάδε πόλλʼ ἀγορεύεις,
Odyssey 1.330	θαρσαλέως πολλοῖσι μετʼ ἀνδράσιν, οὐδέ τι θυμῷ
Odyssey 1.331	ταρβεῖς· ἦ ῥά σε οἶνος ἔχει φρένας, ἤ νύ τοι αἰεὶ
Odyssey 1.332	τοιοῦτος νόος ἐστίν· ὃ καὶ μεταμώνια βάζεις.
Odyssey 1.333	ἦ ἀλύεις, ὅτι Ἶρον ἐνίκησας τὸν ἀλήτην;
Odyssey 1.334	μή τίς τοι τάχα Ἴρου ἀμείνων ἄλλος ἀναστῇ,
Odyssey 1.335	ὅς τίς σʼ ἀμφὶ κάρη κεκοπὼς χερσὶ στιβαρῇσι
Odyssey 1.336	δώματος ἐκπέμψῃσι, φορύξας αἵματι πολλῷ.
Odyssey 1.337	τὴν δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
Odyssey 1.338	ἦ τάχα Τηλεμάχῳ ἐρέω, κύον, οἷʼ ἀγορεύεις,
Odyssey 1.339	κεῖσʼ ἐλθών, ἵνα σʼ αὖθι διὰ μελεϊστὶ τάμῃσιν.
Odyssey 1.340	ὣς εἰπὼν ἐπέεσσι διεπτοίησε γυναῖκας.
Odyssey 1.341	βὰν δʼ ἴμεναι διὰ δῶμα, λύθεν δʼ ὑπὸ γυῖα ἑκάστης
Odyssey 1.342	ταρβοσύνῃ· φὰν γάρ μιν ἀληθέα μυθήσασθαι.
Odyssey 1.343	αὐτὰρ ὁ πὰρ λαμπτῆρσι φαείνων αἰθομένοισιν
Odyssey 1.344	ἑστήκειν ἐς πάντας ὁρώμενος· ἄλλα δέ οἱ κῆρ
Odyssey 1.345	ὥρμαινε φρεσὶν ᾗσιν, ἅ ῥʼ οὐκ ἀτέλεστα γένοντο.
Odyssey 1.346	μνηστῆρας δʼ οὐ πάμπαν ἀγήνορας εἴα Ἀθήνη
Odyssey 1.347	λώβης ἴσχεσθαι θυμαλγέος, ὄφρʼ ἔτι μᾶλλον
Odyssey 1.348	δύη ἄχος κραδίην Λαερτιάδεω Ὀδυσῆος.
Odyssey 1.349	τοῖσιν δʼ Εὐρύμαχος, Πολύβου πάϊς, ἦρχʼ ἀγορεύειν,
Odyssey 1.350	κερτομέων Ὀδυσῆα· γέλω δʼ ἑτάροισιν ἔτευχε.
Odyssey 1.351	κέκλυτέ μευ, μνηστῆρες ἀγακλειτῆς βασιλείης,
Odyssey 1.352	ὄφρʼ εἴπω τά με θυμὸς ἐνὶ στήθεσσι κελεύει.
Odyssey 1.353	οὐκ ἀθεεὶ ὅδʼ ἀνὴρ Ὀδυσήϊον ἐς δόμον ἵκει·
Odyssey 1.354	ἔμπης μοι δοκέει δαίδων σέλας ἔμμεναι αὐτοῦ
Odyssey 1.355	κὰκ κεφαλῆς, ἐπεὶ οὔ οἱ ἔνι τρίχες οὐδʼ ἠβαιαί.
Odyssey 1.356	ἦ ῥʼ, ἅμα τε προσέειπεν Ὀδυσσῆα πτολίπορθον·
Odyssey 1.357	ξεῖνʼ, ἦ ἄρ κʼ ἐθέλοις θητευέμεν, εἴ σʼ ἀνελοίμην,
Odyssey 1.358	ἀγροῦ ἐπʼ ἐσχατιῆς—μισθὸς δέ τοι ἄρκιος ἔσται—
Odyssey 1.359	αἱμασιάς τε λέγων καὶ δένδρεα μακρὰ φυτεύων;
Odyssey 1.360	ἔνθα κʼ ἐγὼ σῖτον μὲν ἐπηετανὸν παρέχοιμι,
Odyssey 1.361	εἵματα δʼ ἀμφιέσαιμι ποσίν θʼ ὑποδήματα δοίην.
Odyssey 1.362	ἀλλʼ ἐπεὶ οὖν δὴ ἔργα κάκʼ ἔμμαθες, οὐκ ἐθελήσεις
Odyssey 1.363	ἔργον ἐποίχεσθαι, ἀλλὰ πτώσσειν κατὰ δῆμον
Odyssey 1.364	βούλεαι, ὄφρʼ ἄν ἔχῃς βόσκειν σὴν γαστέρʼ ἄναλτον.
Odyssey 1.365	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.366	Εὐρύμαχʼ, εἰ γὰρ νῶϊν ἔρις ἔργοιο γένοιτο
Odyssey 1.367	ὥρῃ ἐν εἰαρινῇ, ὅτε τʼ ἤματα μακρὰ πέλονται,
Odyssey 1.368	ἐν ποίῃ, δρέπανον μὲν ἐγὼν εὐκαμπὲς ἔχοιμι,
Odyssey 1.369	καὶ δὲ σὺ τοῖον ἔχοις, ἵνα πειρησαίμεθα ἔργου
Odyssey 1.370	νήστιες ἄχρι μάλα κνέφαος, ποίη δὲ παρείη.
Odyssey 1.371	εἰ δʼ αὖ καὶ βόες εἶεν ἐλαυνέμεν, οἵ περ ἄριστοι,
Odyssey 1.372	αἴθωνες, μεγάλοι, ἄμφω κεκορηότε ποίης,
Odyssey 1.373	ἥλικες, ἰσοφόροι, τῶν τε σθένος οὐκ ἀλαπαδνόν,
Odyssey 1.374	τετράγυον δʼ εἴη, εἴκοι δʼ ὑπὸ βῶλος ἀρότρῳ·
Odyssey 1.375	τῷ κέ μʼ ἴδοις, εἰ ὦλκα διηνεκέα προταμοίμην.
Odyssey 1.376	εἰ δʼ αὖ καὶ πόλεμόν ποθεν ὁρμήσειε Κρονίων
Odyssey 1.377	σήμερον, αὐτὰρ ἐμοὶ σάκος εἴη καὶ δύο δοῦρε
Odyssey 1.378	καὶ κυνέη πάγχαλκος, ἐπὶ κροτάφοις ἀραρυῖα,
Odyssey 1.379	τῷ κέ μʼ ἴδοις πρώτοισιν ἐνὶ προμάχοισι μιγέντα,
Odyssey 1.380	οὐδʼ ἄν μοι τὴν γαστέρʼ ὀνειδίζων ἀγορεύοις.
Odyssey 1.381	ἀλλὰ μάλʼ ὑβρίζεις, καί τοι νόος ἐστὶν ἀπηνής·
Odyssey 1.382	καί πού τις δοκέεις μέγας ἔμμεναι ἠδὲ κραταιός,
Odyssey 1.383	οὕνεκα πὰρ παύροισι καὶ οὐκ ἀγαθοῖσιν ὁμιλεῖς.
Odyssey 1.384	εἰ δʼ Ὀδυσεὺς ἔλθοι καὶ ἵκοιτʼ ἐς πατρίδα γαῖαν,
Odyssey 1.385	αἶψά κέ τοι τὰ θύρετρα, καὶ εὐρέα περ μάλʼ ἐόντα,
Odyssey 1.386	φεύγοντι στείνοιτο διὲκ προθύροιο θύραζε.
Odyssey 1.387	ὣς ἔφατʼ, Εὐρύμαχος δʼ ἐχολώσατο κηρόθι μᾶλλον,
Odyssey 1.388	καί μιν ὑπόδρα ἰδὼν ἔπεα πτερόεντα προσηύδα·
Odyssey 1.389	ἆ δείλʼ, ἦ τάχα τοι τελέω κακόν, οἷʼ ἀγορεύεις
Odyssey 1.390	θαρσαλέως πολλοῖσι μετʼ ἀνδράσιν, οὐδέ τι θυμῷ
Odyssey 1.391	ταρβεῖς· ἦ ῥά σε οἶνος ἔχει φρένας, ἤ νύ τοι αἰεὶ
Odyssey 1.392	τοιοῦτος νόος ἐστίν· ὃ καὶ μεταμώνια βάζεις.
Odyssey 1.393	ἦ ἀλύεις, ὅτι Ἶρον ἐνίκησας τὸν ἀλήτην;
Odyssey 1.394	ὣς ἄρα φωνήσας σφέλας ἔλλαβεν· αὐτὰρ Ὀδυσσεὺς
Odyssey 1.395	Ἀμφινόμου πρὸς γοῦνα καθέζετο Δουλιχιῆος,
Odyssey 1.396	Εὐρύμαχον δείσας· ὁ δʼ ἄρʼ οἰνοχόον βάλε χεῖρα
Odyssey 1.397	δεξιτερήν· πρόχοος δὲ χαμαὶ βόμβησε πεσοῦσα,
Odyssey 1.398	αὐτὰρ ὅ γʼ οἰμώξας πέσεν ὕπτιος ἐν κονίῃσι.
Odyssey 1.399	μνηστῆρες δʼ ὁμάδησαν ἀνὰ μέγαρα σκιόεντα,
Odyssey 1.400	ὧδε δέ τις εἴπεσκεν ἰδὼν ἐς πλησίον ἄλλον·
Odyssey 1.401	αἴθʼ ὤφελλʼ ὁ ξεῖνος ἀλώμενος ἄλλοθʼ ὀλέσθαι
Odyssey 1.402	πρὶν ἐλθεῖν· τῷ οὔ τι τόσον κέλαδον μετέθηκε.
Odyssey 1.403	νῦν δὲ περὶ πτωχῶν ἐριδαίνομεν, οὐδέ τι δαιτὸς
Odyssey 1.404	ἐσθλῆς ἔσσεται ἦδος, ἐπεὶ τὰ χερείονα νικᾷ.
Odyssey 1.405	τοῖσι δὲ καὶ μετέειφʼ ἱερὴ ἲς Τηλεμάχοιο
Odyssey 1.406	δαιμόνιοι, μαίνεσθε καὶ οὐκέτι κεύθετε θυμῷ
Odyssey 1.407	βρωτὺν οὐδὲ ποτῆτα· θεῶν νύ τις ὔμμʼ ὀροθύνει.
Odyssey 1.408	ἀλλʼ εὖ δαισάμενοι κατακείετε οἴκαδʼ ἰόντες,
Odyssey 1.409	ὁππότε θυμὸς ἄνωγε· διώκω δʼ οὔ τινʼ ἐγώ γε.
Odyssey 1.410	ὣς ἔφαθʼ, οἱ δʼ ἄρα πάντες ὀδὰξ ἐν χείλεσι φύντες
Odyssey 1.411	Τηλέμαχον θαύμαζον, ὃ θαρσαλέως ἀγόρευε.
Odyssey 1.412	τοῖσιν δʼ Ἀμφίνομος ἀγορήσατο καὶ μετέειπε
Odyssey 1.413	Νίσου φαίδιμος υἱός, Ἀρητιάδαο ἄνακτος·
Odyssey 1.414	ὦ φίλοι, οὐκ ἂν δή τις ἐπὶ ῥηθέντι δικαίῳ
Odyssey 1.415	ἀντιβίοις ἐπέεσσι καθαπτόμενος χαλεπαίνοι·
Odyssey 1.416	μήτε τι τὸν ξεῖνον στυφελίζετε μήτε τινʼ ἄλλον
Odyssey 1.417	δμώων, οἳ κατὰ δώματʼ Ὀδυσσῆος θείοιο.
Odyssey 1.418	ἀλλʼ ἄγετʼ, οἰνοχόος μὲν ἐπαρξάσθω δεπάεσσιν,
Odyssey 1.419	ὄφρα σπείσαντες κατακείομεν οἴκαδʼ ἰόντες·
Odyssey 1.420	τὸν ξεῖνον δὲ ἐῶμεν ἐνὶ μεγάροις Ὀδυσῆος
Odyssey 1.421	Τηλεμάχῳ μελέμεν· τοῦ γὰρ φίλον ἵκετο δῶμα.
Odyssey 1.422	ὣς φάτο, τοῖσι δὲ πᾶσιν ἑαδότα μῦθον ἔειπε.
Odyssey 1.423	τοῖσιν δὲ κρητῆρα κεράσσατο Μούλιος ἥρως,
Odyssey 1.424	κῆρυξ Δουλιχιεύς· θεράπων δʼ ἦν Ἀμφινόμοιο·
Odyssey 1.425	νώμησεν δʼ ἄρα πᾶσιν ἐπισταδόν· οἱ δὲ θεοῖσι
Odyssey 1.426	σπείσαντες μακάρεσσι πίον μελιηδέα οἶνον.
Odyssey 1.427	αὐτὰρ ἐπεὶ σπεῖσάν τʼ ἔπιόν θʼ ὅσον ἤθελε θυμός,
Odyssey 1.428	βάν ῥʼ ἴμεναι κείοντες ἑὰ πρὸς δώμαθʼ ἕκαστος.
Odyssey 1.1	αὐτὰρ ὁ ἐν μεγάρῳ ὑπελείπετο δῖος Ὀδυσσεύς,
Odyssey 1.2	μνηστήρεσσι φόνον σὺν Ἀθήνῃ μερμηρίζων·
Odyssey 1.3	αἶψα δὲ Τηλέμαχον ἔπεα πτερόεντα προσηύδα·
Odyssey 1.4	Τηλέμαχε, χρὴ τεύχεʼ ἀρήϊα κατθέμεν εἴσω
Odyssey 1.5	πάντα μάλʼ· αὐτὰρ μνηστῆρας μαλακοῖς ἐπέεσσι
Odyssey 1.6	παρφάσθαι, ὅτε κέν σε μεταλλῶσιν ποθέοντες·
Odyssey 1.7	ἐκ καπνοῦ κατέθηκʼ, ἐπεὶ οὐκέτι τοῖσιν ἐῴκει
Odyssey 1.8	οἷά ποτε Τροίηνδε κιὼν κατέλειπεν Ὀδυσσεύς,
Odyssey 1.9	ἀλλὰ κατῄκισται, ὅσσον πυρὸς ἵκετʼ ἀϋτμή.
Odyssey 1.10	πρὸς δʼ ἔτι καὶ τόδε μεῖζον ἐνὶ φρεσὶν ἔμβαλε δαίμων
Odyssey 1.11	μή πως οἰνωθέντες, ἔριν στήσαντες ἐν ὑμῖν,
Odyssey 1.12	ἀλλήλους τρώσητε καταισχύνητέ τε δαῖτα
Odyssey 1.13	καὶ μνηστύν· αὐτὸς γὰρ ἐφέλκεται ἄνδρα σίδηρος.
Odyssey 1.14	ὣς φάτο, Τηλέμαχος δὲ φίλῳ ἐπεπείθετο πατρί,
Odyssey 1.15	ἐκ δὲ καλεσσάμενος προσέφη τροφὸν Εὐρύκλειαν·
Odyssey 1.16	μαῖʼ, ἄγε δή μοι ἔρυξον ἐνὶ μεγάροισι γυναῖκας,
Odyssey 1.17	ὄφρα κεν ἐς θάλαμον καταθείομαι ἔντεα πατρὸς
Odyssey 1.18	καλά, τά μοι κατὰ οἶκον ἀκηδέα καπνὸς ἀμέρδει
Odyssey 1.19	πατρὸς ἀποιχομένοιο· ἐγὼ δʼ ἔτι νήπιος ἦα.
Odyssey 1.20	νῦν δʼ ἐθέλω καταθέσθαι, ἵνʼ οὐ πυρὸς ἵξετʼ ἀϋτμή.
Odyssey 1.21	τὸν δʼ αὖτε προσέειπε φίλη τροφὸς Εὐρύκλεια·
Odyssey 1.22	αἲ γὰρ δή ποτε, τέκνον, ἐπιφροσύνας ἀνέλοιο
Odyssey 1.23	οἴκου κήδεσθαι καὶ κτήματα πάντα φυλάσσειν.
Odyssey 1.24	ἀλλʼ ἄγε, τίς τοι ἔπειτα μετοιχομένη φάος οἴσει;
Odyssey 1.25	δμῳὰς δʼ οὐκ εἴας προβλωσκέμεν, αἵ κεν ἔφαινον.
Odyssey 1.26	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.27	ξεῖνος ὅδʼ· οὐ γὰρ ἀεργὸν ἀνέξομαι ὅς κεν ἐμῆς γε
Odyssey 1.28	χοίνικος ἅπτηται, καὶ τηλόθεν εἰληλουθώς.
Odyssey 1.29	ὣς ἄρʼ ἐφώνησεν, τῇ δʼ ἄπτερος ἔπλετο μῦθος.
Odyssey 1.30	κλήϊσεν δὲ θύρας μεγάρων εὖ ναιεταόντων.
Odyssey 1.31	τὼ δʼ ἄρʼ ἀναΐξαντʼ Ὀδυσεὺς καὶ φαίδιμος υἱὸς
Odyssey 1.32	ἐσφόρεον κόρυθάς τε καὶ ἀσπίδας ὀμφαλοέσσας
Odyssey 1.33	ἔγχεά τʼ ὀξυόεντα· πάροιθε δὲ Παλλὰς Ἀθήνη,
Odyssey 1.34	χρύσεον λύχνον ἔχουσα, φάος περικαλλὲς ἐποίει.
Odyssey 1.35	δὴ τότε Τηλέμαχος προσεφώνεεν ὃν πατέρʼ αἶψα·
Odyssey 1.36	ὦ πάτερ, ἦ μέγα θαῦμα τόδʼ ὀφθαλμοῖσιν ὁρῶμαι.
Odyssey 1.37	ἔμπης μοι τοῖχοι μεγάρων καλαί τε μεσόδμαι,
Odyssey 1.38	εἰλάτιναί τε δοκοί, καὶ κίονες ὑψόσʼ ἔχοντες
Odyssey 1.39	φαίνοντʼ ὀφθαλμοῖς ὡς εἰ πυρὸς αἰθομένοιο.
Odyssey 1.40	ἦ μάλα τις θεὸς ἔνδον, οἳ οὐρανὸν εὐρὺν ἔχουσι.
Odyssey 1.41	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.42	σίγα καὶ κατὰ σὸν νόον ἴσχανε μηδʼ ἐρέεινε·
Odyssey 1.43	αὕτη τοι δίκη ἐστὶ θεῶν, οἳ Ὄλυμπον ἔχουσιν.
Odyssey 1.44	ἀλλὰ σὺ μὲν κατάλεξαι, ἐγὼ δʼ ὑπολείψομαι αὐτοῦ,
Odyssey 1.45	ὄφρα κʼ ἔτι δμῳὰς καὶ μητέρα σὴν ἐρεθίζω·
Odyssey 1.46	ἡ δέ μʼ ὀδυρομένη εἰρήσεται ἀμφὶς ἕκαστα.
Odyssey 1.47	ὣς φάτο, Τηλέμαχος δὲ διὲκ μεγάροιο βεβήκει
Odyssey 1.48	κείων ἐς θάλαμον, δαΐδων ὕπο λαμπομενάων,
Odyssey 1.49	ἔνθα πάρος κοιμᾶθʼ, ὅτε μιν γλυκὺς ὕπνος ἱκάνοι·
Odyssey 1.50	ἔνθʼ ἄρα καὶ τότʼ ἔλεκτο καὶ Ἠῶ δῖαν ἔμιμνεν.
Odyssey 1.51	αὐτὰρ ὁ ἐν μεγάρῳ ὑπελείπετο δῖος Ὀδυσσεύς,
Odyssey 1.52	μνηστήρεσσι φόνον σὺν Ἀθήνῃ μερμηρίζων.
Odyssey 1.53	ἡ δʼ ἴεν ἐκ θαλάμοιο περίφρων Πηνελόπεια,
Odyssey 1.54	Ἀρτέμιδι ἰκέλη ἠὲ χρυσέῃ Ἀφροδίτῃ.
Odyssey 1.55	τῇ παρὰ μὲν κλισίην πυρὶ κάτθεσαν, ἔνθʼ ἄρʼ ἐφῖζε,
Odyssey 1.56	δινωτὴν ἐλέφαντι καὶ ἀργύρῳ· ἥν ποτε τέκτων
Odyssey 1.57	ποίησʼ Ἰκμάλιος, καὶ ὑπὸ θρῆνυν ποσὶν ἧκε
Odyssey 1.58	προσφυέʼ ἐξ αὐτῆς, ὅθʼ ἐπὶ μέγα βάλλετο κῶας.
Odyssey 1.59	ἔνθα καθέζετʼ ἔπειτα περίφρων Πηνελόπεια.
Odyssey 1.60	ἦλθον δὲ δμῳαὶ λευκώλενοι ἐκ μεγάροιο.
Odyssey 1.61	αἱ δʼ ἀπὸ μὲν σῖτον πολὺν ᾕρεον ἠδὲ τραπέζας
Odyssey 1.62	καὶ δέπα, ἔνθεν ἄρʼ ἄνδρες ὑπερμενέοντες ἔπινον·
Odyssey 1.63	πῦρ δʼ ἀπὸ λαμπτήρων χαμάδις βάλον, ἄλλα δʼ ἐπʼ αὐτῶν
Odyssey 1.64	νήησαν ξύλα πολλά, φόως ἔμεν ἠδὲ θέρεσθαι.
Odyssey 1.65	ἡ δʼ Ὀδυσῆʼ ἐνένιπε Μελανθὼ δεύτερον αὖτις·
Odyssey 1.66	ξεῖνʼ, ἔτι καὶ νῦν ἐνθάδʼ ἀνιήσεις διὰ νύκτα
Odyssey 1.67	δινεύων κατὰ οἶκον, ὀπιπεύσεις δὲ γυναῖκας;
Odyssey 1.68	ἀλλʼ ἔξελθε θύραζε, τάλαν, καὶ δαιτὸς ὄνησο·
Odyssey 1.69	ἢ τάχα καὶ δαλῷ βεβλημένος εἶσθα θύραζε.
Odyssey 1.70	τὴν δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
Odyssey 1.71	δαιμονίη, τί μοι ὧδʼ ἐπέχεις κεκοτηότι θυμῷ;
Odyssey 1.72	ἦ ὅτι δὴ ῥυπόω, κακὰ δὲ χροῒ εἵματα εἷμαι,
Odyssey 1.73	πτωχεύω δʼ ἀνὰ δῆμον; ἀναγκαίη γὰρ ἐπείγει.
Odyssey 1.74	τοιοῦτοι πτωχοὶ καὶ ἀλήμονες ἄνδρες ἔασι
Odyssey 1.75	καὶ γὰρ ἐγώ ποτε οἶκον ἐν ἀνθρώποισιν ἔναιον
Odyssey 1.76	ὄλβιος ἀφνειὸν καὶ πολλάκι δόσκον ἀλήτῃ,
Odyssey 1.77	τοίῳ ὁποῖος ἔοι καὶ ὅτευ κεχρημένος ἔλθοι·
Odyssey 1.78	ἦσαν δὲ δμῶες μάλα μυρίοι, ἄλλα τε πολλὰ
Odyssey 1.79	οἷσίν τʼ εὖ ζώουσι καὶ ἀφνειοὶ καλέονται.
Odyssey 1.80	ἀλλὰ Ζεὺς ἀλάπαξε Κρονίων· ἤθελε γάρ που·
Odyssey 1.81	τῷ νῦν μήποτε καὶ σύ, γύναι, ἀπὸ πᾶσαν ὀλέσσῃς
Odyssey 1.82	ἀγλαΐην, τῇ νῦν γε μετὰ δμῳῇσι κέκασσαι·
Odyssey 1.83	μή πώς τοι δέσποινα κοτεσσαμένη χαλεπήνῃ,
Odyssey 1.84	ἢ Ὀδυσεὺς ἔλθῃ· ἔτι γὰρ καὶ ἐλπίδος αἶσα.
Odyssey 1.85	εἰ δʼ ὁ μὲν ὣς ἀπόλωλε καὶ οὐκέτι νόστιμός ἐστιν,
Odyssey 1.86	ἀλλʼ ἤδη παῖς τοῖος Ἀπόλλωνός γε ἕκητι,
Odyssey 1.87	Τηλέμαχος· τὸν δʼ οὔ τις ἐνὶ μεγάροισι γυναικῶν
Odyssey 1.88	λήθει ἀτασθάλλουσʼ, ἐπεὶ οὐκέτι τηλίκος ἐστίν.
Odyssey 1.89	ὣς φάτο, τοῦ δʼ ἤκουσε περίφρων Πηνελόπεια,
Odyssey 1.90	ἀμφίπολον δʼ ἐνένιπεν ἔπος τʼ ἔφατʼ ἔκ τʼ ὀνόμαζε·
Odyssey 1.91	πάντως, θαρσαλέη, κύον ἀδεές, οὔ τί με λήθεις
Odyssey 1.92	ἔρδουσα μέγα ἔργον, ὃ σῇ κεφαλῇ ἀναμάξεις·
Odyssey 1.93	πάντα γὰρ εὖ ᾔδησθʼ, ἐπεὶ ἐξ ἐμεῦ ἔκλυες αὐτῆς
Odyssey 1.94	ὡς τὸν ξεῖνον ἔμελλον ἐνὶ μεγάροισιν ἐμοῖσιν
Odyssey 1.95	ἀμφὶ πόσει εἴρεσθαι, ἐπεὶ πυκινῶς ἀκάχημαι.
Odyssey 1.96	ἦ ῥα καὶ Εὐρυνόμην ταμίην πρὸς μῦθον ἔειπεν·
Odyssey 1.97	Εὐρυνόμη, φέρε δὴ δίφρον καὶ κῶας ἐπʼ αὐτοῦ,
Odyssey 1.98	ὄφρα καθεζόμενος εἴπῃ ἔπος ἠδʼ ἐπακούσῃ
Odyssey 1.99	ὁ ξεῖνος ἐμέθεν· ἐθέλω δέ μιν ἐξερέεσθαι.
Odyssey 1.100	ὣς ἔφαθʼ, ἡ δὲ μάλʼ ὀτραλέως κατέθηκε φέρουσα
Odyssey 1.101	δίφρον ἐΰξεστον καὶ ἐπʼ αὐτῷ κῶας ἔβαλλεν·
Odyssey 1.102	ἔνθα καθέζετʼ ἔπειτα πολύτλας δῖος Ὀδυσσεύς.
Odyssey 1.103	τοῖσι δὲ μύθων ἦρχε περίφρων Πηνελόπεια·
Odyssey 1.104	ξεῖνε, τὸ μέν σε πρῶτον ἐγὼν εἰρήσομαι αὐτή·
Odyssey 1.105	τίς πόθεν εἶς ἀνδρῶν; πόθι τοι πόλις ἠδὲ τοκῆες;
Odyssey 1.106	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.107	ὦ γύναι, οὐκ ἄν τίς σε βροτῶν ἐπʼ ἀπείρονα γαῖαν
Odyssey 1.108	νεικέοι· ἦ γάρ σευ κλέος οὐρανὸν εὐρὺν ἱκάνει,
Odyssey 1.109	ὥς τέ τευ ἢ βασιλῆος ἀμύμονος, ὅς τε θεουδὴς
Odyssey 1.110	ἀνδράσιν ἐν πολλοῖσι καὶ ἰφθίμοισιν ἀνάσσων
Odyssey 1.111	εὐδικίας ἀνέχῃσι, φέρῃσι δὲ γαῖα μέλαινα
Odyssey 1.112	πυροὺς καὶ κριθάς, βρίθῃσι δὲ δένδρεα καρπῷ,
Odyssey 1.113	τίκτῃ δʼ ἔμπεδα μῆλα, θάλασσα δὲ παρέχῃ ἰχθῦς
Odyssey 1.114	ἐξ εὐηγεσίης, ἀρετῶσι δὲ λαοὶ ὑπʼ αὐτοῦ.
Odyssey 1.115	τῷ ἐμὲ νῦν τὰ μὲν ἄλλα μετάλλα σῷ ἐνὶ οἴκῳ,
Odyssey 1.116	μηδʼ ἐμὸν ἐξερέεινε γένος καὶ πατρίδα γαῖαν,
Odyssey 1.117	μή μοι μᾶλλον θυμὸν ἐνιπλήσῃς ὀδυνάων
Odyssey 1.118	μνησαμένῳ μάλα δʼ εἰμὶ πολύστονος· οὐδέ τί με χρὴ
Odyssey 1.119	οἴκῳ ἐν ἀλλοτρίῳ γοόωντά τε μυρόμενόν τε
Odyssey 1.120	ἧσθαι, ἐπεὶ κάκιον πενθήμεναι ἄκριτον αἰεί·
Odyssey 1.121	μή τίς μοι δμῳῶν νεμεσήσεται, ἠὲ σύ γʼ αὐτή,
Odyssey 1.122	φῇ δὲ δακρυπλώειν βεβαρηότα με φρένας οἴνῳ.
Odyssey 1.123	τὸν δʼ ἠμείβετʼ ἔπειτα περίφρων Πηνελόπεια·
Odyssey 1.124	ξεῖνʼ, ἦ τοι μὲν ἐμὴν ἀρετὴν εἶδός τε δέμας τε
Odyssey 1.125	ὤλεσαν ἀθάνατοι, ὅτε Ἴλιον εἰσανέβαινον
Odyssey 1.126	Ἀργεῖοι, μετὰ τοῖσι δʼ ἐμὸς πόσις ᾖεν Ὀδυσσεύς
Odyssey 1.127	εἰ κεῖνός γʼ ἐλθὼν τὸν ἐμὸν βίον ἀμφιπολεύοι,
Odyssey 1.128	μεῖζον κε κλέος εἴη ἐμὸν καὶ κάλλιον οὕτως.
Odyssey 1.129	νῦν δʼ ἄχομαι· τόσα γάρ μοι ἐπέσσευεν κακὰ δαίμων.
Odyssey 1.130	ὅσσοι γὰρ νήσοισιν ἐπικρατέουσιν ἄριστοι,
Odyssey 1.131	Δουλιχίῳ τε Σάμῃ τε καὶ ὑλήεντι Ζακύνθῳ,
Odyssey 1.132	οἵ τʼ αὐτὴν Ἰθάκην εὐδείελον ἀμφινέμονται,
Odyssey 1.133	οἵ μʼ ἀεκαζομένην μνῶνται, τρύχουσι δὲ οἶκον.
Odyssey 1.134	τῷ οὔτε ξείνων ἐμπάζομαι οὔθʼ ἱκετάων
Odyssey 1.135	οὔτε τι κηρύκων, οἳ δημιοεργοὶ ἔασιν·
Odyssey 1.136	ἀλλʼ Ὀδυσῆ ποθέουσα φίλον κατατήκομαι ἦτορ.
Odyssey 1.137	οἱ δὲ γάμον σπεύδουσιν· ἐγὼ δὲ δόλους τολυπεύω.
Odyssey 1.138	φᾶρος μέν μοι πρῶτον ἐνέπνευσε φρεσὶ δαίμων,
Odyssey 1.139	στησαμένῃ μέγαν ἱστόν, ἐνὶ μεγάροισιν ὑφαίνειν,
Odyssey 1.140	λεπτὸν καὶ περίμετρον· ἄφαρ δʼ αὐτοῖς μετέειπον·
Odyssey 1.141	κοῦροι, ἐμοὶ μνηστῆρες, ἐπεὶ θάνε δῖος Ὀδυσσεύς,
Odyssey 1.142	μίμνετʼ ἐπειγόμενοι τὸν ἐμὸν γάμον, εἰς ὅ κε φᾶρος
Odyssey 1.143	ἐκτελέσω—μή μοι μεταμώνια νήματʼ ὄληται—
Odyssey 1.144	Λαέρτῃ ἥρωϊ ταφήϊον, εἰς ὅτε κέν μιν
Odyssey 1.145	μοῖρʼ ὀλοὴ καθέλῃσι τανηλεγέος θανάτοιο·
Odyssey 1.146	μή τίς μοι κατὰ δῆμον Ἀχαιϊάδων νεμεσήσῃ,
Odyssey 1.147	αἴ κεν ἄτερ σπείρου κεῖται πολλὰ κτεατίσσας.
Odyssey 1.148	ὣς ἐφάμην, τοῖσιν δʼ ἐπεπείθετο θυμὸς ἀγήνωρ.
Odyssey 1.149	ἔνθα καὶ ἠματίη μὲν ὑφαίνεσκον μέγαν ἱστόν,
Odyssey 1.150	νύκτας δʼ ἀλλύεσκον, ἐπεὶ δαΐδας παραθείμην.
Odyssey 1.151	ὣς τρίετες μὲν ἔληθον ἐγὼ καὶ ἔπειθον Ἀχαιούς·
Odyssey 1.152	ἀλλʼ ὅτε τέτρατον ἦλθεν ἔτος καὶ ἐπήλυθον ὧραι,
Odyssey 1.153	μηνῶν φθινόντων, περὶ δʼ ἤματα πόλλʼ ἐτελέσθη,
Odyssey 1.154	καὶ τότε δή με διὰ δμῳάς, κύνας οὐκ ἀλεγούσας,
Odyssey 1.155	εἷλον ἐπελθόντες καὶ ὁμόκλησαν ἐπέεσσιν.
Odyssey 1.156	ὣς τὸ μὲν ἐξετέλεσσα, καὶ οὐκ ἐθέλουσʼ, ὑπʼ ἀνάγκης·
Odyssey 1.157	νῦν δʼ οὔτʼ ἐκφυγέειν δύναμαι γάμον οὔτε τινʼ ἄλλην
Odyssey 1.158	μῆτιν ἔθʼ εὑρίσκω· μάλα δʼ ὀτρύνουσι τοκῆες
Odyssey 1.159	γήμασθʼ, ἀσχαλάᾳ δὲ πάϊς βίοτον κατεδόντων,
Odyssey 1.160	γιγνώσκων· ἤδη γὰρ ἀνὴρ οἷός τε μάλιστα
Odyssey 1.161	οἴκου κήδεσθαι, τῷ τε Ζεὺς κῦδος ὀπάζει.
Odyssey 1.162	ἀλλὰ καὶ ὥς μοι εἰπὲ τεὸν γένος, ὁππόθεν ἐσσί.
Odyssey 1.163	οὐ γὰρ ἀπὸ δρυός ἐσσι παλαιφάτου οὐδʼ ἀπὸ πέτρης.
Odyssey 1.164	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.165	ὦ γύναι αἰδοίη Λαερτιάδεω Ὀδυσῆος,
Odyssey 1.166	οὐκέτʼ ἀπολλήξεις τὸν ἐμὸν γόνον ἐξερέουσα;
Odyssey 1.167	ἀλλʼ ἔκ τοι ἐρέω· ἦ μέν μʼ ἀχέεσσί γε δώσεις
Odyssey 1.168	πλείοσιν ἢ ἔχομαι· ἡ γὰρ δίκη, ὁππότε πάτρης
Odyssey 1.169	ἧς ἀπέῃσιν ἀνὴρ τόσσον χρόνον ὅσσον ἐγὼ νῦν,
Odyssey 1.170	πολλὰ βροτῶν ἐπὶ ἄστεʼ ἀλώμενος, ἄλγεα πάσχων·
Odyssey 1.171	ἀλλὰ καὶ ὣς ἐρέω ὅ μʼ ἀνείρεαι ἠδὲ μεταλλᾷς.
Odyssey 1.172	Κρήτη τις γαῖʼ ἔστι, μέσῳ ἐνὶ οἴνοπι πόντῳ,
Odyssey 1.173	καλὴ καὶ πίειρα, περίρρυτος· ἐν δʼ ἄνθρωποι
Odyssey 1.174	πολλοί, ἀπειρέσιοι, καὶ ἐννήκοντα πόληες.
Odyssey 1.175	ἄλλη δʼ ἄλλων γλῶσσα μεμιγμένη· ἐν μὲν Ἀχαιοί,
Odyssey 1.176	ἐν δʼ Ἐτεόκρητες μεγαλήτορες, ἐν δὲ Κύδωνες,
Odyssey 1.177	Δωριέες τε τριχάϊκες δῖοί τε Πελασγοί.
Odyssey 1.178	τῇσι δʼ ἐνὶ Κνωσός, μεγάλη πόλις, ἔνθα τε Μίνως
Odyssey 1.179	ἐννέωρος βασίλευε Διὸς μεγάλου ὀαριστής,
Odyssey 1.180	πατρὸς ἐμοῖο πατήρ, μεγαθύμου Δευκαλίωνος
Odyssey 1.181	Δευκαλίων δʼ ἐμὲ τίκτε καὶ Ἰδομενῆα ἄνακτα·
Odyssey 1.182	ἀλλʼ ὁ μὲν ἐν νήεσσι κορωνίσιν Ἴλιον εἴσω
Odyssey 1.183	ᾤχεθʼ ἅμʼ Ἀτρείδῃσιν, ἐμοὶ δʼ ὄνομα κλυτὸν Αἴθων,
Odyssey 1.184	ὁπλότερος γενεῇ· ὁ δʼ ἄρα πρότερος καὶ ἀρείων.
Odyssey 1.185	ἔνθʼ Ὀδυσῆα ἐγὼν ἰδόμην καὶ ξείνια δῶκα.
Odyssey 1.186	καὶ γὰρ τὸν Κρήτηνδε κατήγαγεν ἲς ἀνέμοιο,
Odyssey 1.187	ἱέμενον Τροίηνδε παραπλάγξασα Μαλειῶν·
Odyssey 1.188	στῆσε δʼ ἐν Ἀμνισῷ, ὅθι τε σπέος Εἰλειθυίης,
Odyssey 1.189	ἐν λιμέσιν χαλεποῖσι, μόγις δʼ ὑπάλυξεν ἀέλλας.
Odyssey 1.190	αὐτίκα δʼ Ἰδομενῆα μετάλλα ἄστυδʼ ἀνελθών·
Odyssey 1.191	ξεῖνον γάρ οἱ ἔφασκε φίλον τʼ ἔμεν αἰδοῖόν τε.
Odyssey 1.192	τῷ δʼ ἤδη δεκάτη ἢ ἑνδεκάτη πέλεν ἠὼς
Odyssey 1.193	οἰχομένῳ σὺν νηυσὶ κορωνίσιν Ἴλιον εἴσω.
Odyssey 1.194	τὸν μὲν ἐγὼ πρὸς δώματʼ ἄγων ἐῢ ἐξείνισσα,
Odyssey 1.195	ἐνδυκέως φιλέων, πολλῶν κατὰ οἶκον ἐόντων·
Odyssey 1.196	καί οἱ τοῖς ἄλλοις ἑτάροις, οἳ ἅμʼ αὐτῷ ἕποντο,
Odyssey 1.197	δημόθεν ἄλφιτα δῶκα καὶ αἴθοπα οἶνον ἀγείρας
Odyssey 1.198	καὶ βοῦς ἱρεύσασθαι, ἵνα πλησαίατο θυμόν.
Odyssey 1.199	ἔνθα δυώδεκα μὲν μένον ἤματα δῖοι Ἀχαιοί·
Odyssey 1.200	εἴλει γὰρ Βορέης ἄνεμος μέγας οὐδʼ ἐπὶ γαίῃ
Odyssey 1.201	εἴα ἵστασθαι, χαλεπὸς δέ τις ὤρορε δαίμων.
Odyssey 1.202	τῇ τρισκαιδεκάτῃ δʼ ἄνεμος πέσε, τοὶ δʼ ἀνάγοντο.
Odyssey 1.203	ἴσκε ψεύδεα πολλὰ λέγων ἐτύμοισιν ὁμοῖα·
Odyssey 1.204	τῆς δʼ ἄρʼ ἀκουούσης ῥέε δάκρυα, τήκετο δὲ χρώς·
Odyssey 1.205	ὡς δὲ χιὼν κατατήκετʼ ἐν ἀκροπόλοισιν ὄρεσσιν,
Odyssey 1.206	ἥν τʼ Εὖρος κατέτηξεν, ἐπὴν Ζέφυρος καταχεύῃ·
Odyssey 1.207	τηκομένης δʼ ἄρα τῆς ποταμοὶ πλήθουσι ῥέοντες·
Odyssey 1.208	ὣς τῆς τήκετο καλὰ παρήϊα δάκρυ χεούσης,
Odyssey 1.209	κλαιούσης ἑὸν ἄνδρα παρήμενον. αὐτὰρ Ὀδυσσεὺς
Odyssey 1.210	θυμῷ μὲν γοόωσαν ἑὴν ἐλέαιρε γυναῖκα,
Odyssey 1.211	ὀφθαλμοὶ δʼ ὡς εἰ κέρα ἕστασαν ἠὲ σίδηρος
Odyssey 1.212	ἀτρέμας ἐν βλεφάροισι· δόλῳ δʼ ὅ γε δάκρυα κεῦθεν.
Odyssey 1.213	ἡ δʼ ἐπεὶ οὖν τάρφθη πολυδακρύτοιο γόοιο,
Odyssey 1.214	ἐξαῦτίς μιν ἔπεσσιν ἀμειβομένη προσέειπε·
Odyssey 1.215	νῦν μὲν δή σευ, ξεῖνέ γʼ, ὀΐω πειρήσεσθαι,
Odyssey 1.216	εἰ ἐτεὸν δὴ κεῖθι σὺν ἀντιθέοις ἑτάροισι
Odyssey 1.217	ξείνισας ἐν μεγάροισιν ἐμὸν πόσιν, ὡς ἀγορεύεις.
Odyssey 1.218	εἰπέ μοι ὁπποῖʼ ἄσσα περὶ χροῒ εἵματα ἕστο,
Odyssey 1.219	αὐτός θʼ οἷος ἔην, καὶ ἑταίρους, οἵ οἱ ἕποντο.
Odyssey 1.220	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.221	ὦ γύναι, ἀργαλέον τόσσον χρόνον ἀμφὶς ἐόντα
Odyssey 1.222	εἰπέμεν· ἤδη γάρ οἱ ἐεικοστὸν ἔτος ἐστὶν
Odyssey 1.223	ἐξ οὗ κεῖθεν ἔβη καὶ ἐμῆς ἀπελήλυθε πάτρης·
Odyssey 1.224	αὐτάρ τοι ἐρέω ὥς μοι ἰνδάλλεται ἦτορ.
Odyssey 1.225	χλαῖναν πορφυρέην οὔλην ἔχε δῖος Ὀδυσσεύς,
Odyssey 1.226	διπλῆν· αὐτάρ οἱ περόνη χρυσοῖο τέτυκτο
Odyssey 1.227	αὐλοῖσιν διδύμοισι· πάροιθε δὲ δαίδαλον ἦεν·
Odyssey 1.228	ἐν προτέροισι πόδεσσι κύων ἔχε ποικίλον ἐλλόν,
Odyssey 1.229	ἀσπαίροντα λάων· τὸ δὲ θαυμάζεσκον ἅπαντες,
Odyssey 1.230	ὡς οἱ χρύσεοι ἐόντες ὁ μὲν λάε νεβρὸν ἀπάγχων,
Odyssey 1.231	αὐτὰρ ὁ ἐκφυγέειν μεμαὼς ἤσπαιρε πόδεσσι.
Odyssey 1.232	τὸν δὲ χιτῶνʼ ἐνόησα περὶ χροῒ σιγαλόεντα,
Odyssey 1.233	οἷόν τε κρομύοιο λοπὸν κάτα ἰσχαλέοιο·
Odyssey 1.234	τὼς μὲν ἔην μαλακός, λαμπρὸς δʼ ἦν ἠέλιος ὥς·
Odyssey 1.235	ἦ μὲν πολλαί γʼ αὐτὸν ἐθηήσαντο γυναῖκες.
Odyssey 1.236	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Odyssey 1.237	οὐκ οἶδʼ ἢ τάδε ἕστο περὶ χροῒ οἴκοθʼ Ὀδυσσεύς,
Odyssey 1.238	ἦ τις ἑταίρων δῶκε θοῆς ἐπὶ νηὸς ἰόντι,
Odyssey 1.239	ἤ τίς που καὶ ξεῖνος, ἐπεὶ πολλοῖσιν Ὀδυσσεὺς
Odyssey 1.240	ἔσκε φίλος· παῦροι γὰρ Ἀχαιῶν ἦσαν ὁμοῖοι.
Odyssey 1.241	καί οἱ ἐγὼ χάλκειον ἄορ καὶ δίπλακα δῶκα
Odyssey 1.242	καλὴν πορφυρέην καὶ τερμιόεντα χιτῶνα,
Odyssey 1.243	αἰδοίως δʼ ἀπέπεμπον ἐϋσσέλμου ἐπὶ νηός.
Odyssey 1.244	καὶ μέν οἱ κῆρυξ ὀλίγον προγενέστερος αὐτοῦ
Odyssey 1.245	εἵπετο· καὶ τόν τοι μυθήσομαι, οἷος ἔην περ.
Odyssey 1.246	γυρὸς ἐν ὤμοισιν, μελανόχροος, οὐλοκάρηνος,
Odyssey 1.247	Εὐρυβάτης δʼ ὄνομʼ ἔσκε· τίεν δέ μιν ἔξοχον ἄλλων
Odyssey 1.248	ὧν ἑτάρων Ὀδυσεύς, ὅτι οἱ φρεσὶν ἄρτια ᾔδη.
Odyssey 1.249	ὣς φάτο, τῇ δʼ ἔτι μᾶλλον ὑφʼ ἵμερον ὦρσε γόοιο,
Odyssey 1.250	σήματʼ ἀναγνούσῃ τά οἱ ἔμπεδα πέφραδʼ Ὀδυσσεύς.
Odyssey 1.251	ἡ δʼ ἐπεὶ οὖν τάρφθη πολυδακρύτοιο γόοιο.
Odyssey 1.252	καὶ τότε μιν μύθοισιν ἀμειβομένη προσέειπε·
Odyssey 1.253	νῦν μὲν δή μοι, ξεῖνε, πάρος περ ἐὼν ἐλεεινός,
Odyssey 1.254	ἐν μεγάροισιν ἐμοῖσι φίλος τʼ ἔσῃ αἰδοῖός τε·
Odyssey 1.255	αὐτὴ γὰρ τάδε εἵματʼ ἐγὼ πόρον, οἷʼ ἀγορεύεις,
Odyssey 1.256	πτύξασʼ ἐκ θαλάμου, περόνην τʼ ἐπέθηκα φαεινὴν
Odyssey 1.257	κείνῳ ἄγαλμʼ ἔμεναι· τὸν δʼ οὐχ ὑποδέξομαι αὖτις
Odyssey 1.258	οἴκαδε νοστήσαντα φίλην ἐς πατρίδα γαῖαν.
Odyssey 1.259	τῷ ῥα κακῇ αἴσῃ κοίλης ἐπὶ νηὸς Ὀδυσσεὺς
Odyssey 1.260	ᾤχετʼ ἐποψόμενος Κακοΐλιον οὐκ ὀνομαστήν.
Odyssey 1.261	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.262	ὦ γύναι αἰδοίη Λαερτιάδεω Ὀδυσῆος,
Odyssey 1.263	μηκέτι νῦν χρόα καλὸν ἐναίρεο, μηδέ τι θυμὸν
Odyssey 1.264	τῆκε, πόσιν γοόωσα. νεμεσσῶμαί γε μὲν οὐδέν·
Odyssey 1.265	καὶ γάρ τίς τʼ ἀλλοῖον ὀδύρεται ἄνδρʼ ὀλέσασα
Odyssey 1.266	κουρίδιον, τῷ τέκνα τέκῃ φιλότητι μιγεῖσα,
Odyssey 1.267	ἢ Ὀδυσῆʼ, ὅν φασι θεοῖς ἐναλίγκιον εἶναι.
Odyssey 1.268	ἀλλὰ γόου μὲν παῦσαι, ἐμεῖο δὲ σύνθεο μῦθον·
Odyssey 1.269	νημερτέως γάρ τοι μυθήσομαι οὐδʼ ἐπικεύσω
Odyssey 1.270	ὡς ἤδη Ὀδυσῆος ἐγὼ περὶ νόστου ἄκουσα
Odyssey 1.271	ἀγχοῦ, Θεσπρωτῶν ἀνδρῶν ἐν πίονι δήμῳ,
Odyssey 1.272	ζωοῦ· αὐτὰρ ἄγει κειμήλια πολλὰ καὶ ἐσθλὰ
Odyssey 1.273	αἰτίζων ἀνὰ δῆμον. ἀτὰρ ἐρίηρας ἑταίρους
Odyssey 1.274	ὤλεσε καὶ νῆα γλαφυρὴν ἐνὶ οἴνοπι πόντῳ,
Odyssey 1.275	Θρινακίης ἄπο νήσου ἰών· ὀδύσαντο γὰρ αὐτῷ
Odyssey 1.276	Ζεύς τε καὶ Ἠέλιος· τοῦ γὰρ βόας ἔκταν ἑταῖροι.
Odyssey 1.277	οἱ μὲν πάντες ὄλοντο πολυκλύστῳ ἐνὶ πόντῳ·
Odyssey 1.278	τὸν δʼ ἄρʼ ἐπὶ τρόπιος νεὸς ἔκβαλε κῦμʼ ἐπὶ χέρσου,
Odyssey 1.279	Φαιήκων ἐς γαῖαν, οἳ ἀγχίθεοι γεγάασιν,
Odyssey 1.280	οἳ δή μιν περὶ κῆρι θεὸν ὣς τιμήσαντο
Odyssey 1.281	καί οἱ πολλὰ δόσαν πέμπειν τέ μιν ἤθελον αὐτοὶ
Odyssey 1.282	οἴκαδʼ ἀπήμαντον. καί κεν πάλαι ἐνθάδʼ Ὀδυσσεὺς
Odyssey 1.283	ἤην· ἀλλʼ ἄρα οἱ τό γε κέρδιον εἴσατο θυμῷ,
Odyssey 1.284	χρήματʼ ἀγυρτάζειν πολλὴν ἐπὶ γαῖαν ἰόντι·
Odyssey 1.285	ὣς περὶ κέρδεα πολλὰ καταθνητῶν ἀνθρώπων
Odyssey 1.286	οἶδʼ Ὀδυσεύς, οὐδʼ ἄν τις ἐρίσσειε βροτὸς ἄλλος.
Odyssey 1.287	ὥς μοι Θεσπρωτῶν βασιλεὺς μυθήσατο Φείδων·
Odyssey 1.288	ὤμνυε δὲ πρὸς ἔμʼ αὐτόν, ἀποσπένδων ἐνὶ οἴκῳ,
Odyssey 1.289	νῆα κατειρύσθαι καὶ ἐπαρτέας ἔμμεν ἑταίρους,
Odyssey 1.290	οἳ δή μιν πέμψουσι φίλην ἐς πατρίδα γαῖαν.
Odyssey 1.291	ἀλλʼ ἐμὲ πρὶν ἀπέπεμψε· τύχησε γὰρ ἐρχομένη νηῦς
Odyssey 1.292	ἀνδρῶν Θεσπρωτῶν ἐς Δουλίχιον πολύπυρον.
Odyssey 1.293	καί μοι κτήματʼ ἔδειξεν, ὅσα ξυναγείρατʼ Ὀδυσσεύς·
Odyssey 1.294	καί νύ κεν ἐς δεκάτην γενεὴν ἕτερόν γʼ ἔτι βόσκοι,
Odyssey 1.295	ὅσσα οἱ ἐν μεγάροις κειμήλια κεῖτο ἄνακτος.
Odyssey 1.296	τὸν δʼ ἐς Δωδώνην φάτο βήμεναι, ὄφρα θεοῖο
Odyssey 1.297	ἐκ δρυὸς ὑψικόμοιο Διὸς βουλὴν ἐπακούσαι,
Odyssey 1.298	ὅππως νοστήσειε φίλην ἐς πατρίδα γαῖαν
Odyssey 1.299	ἤδη δὴν ἀπεών, ἢ ἀμφαδὸν ἦε κρυφηδόν.
Odyssey 1.300	ὣς ὁ μὲν οὕτως ἐστὶ σόος καὶ ἐλεύσεται ἤδη
Odyssey 1.301	ἄγχι μάλʼ, οὐδʼ ἔτι τῆλε φίλων καὶ πατρίδος αἴης
Odyssey 1.302	δηρὸν ἀπεσσεῖται· ἔμπης δέ τοι ὅρκια δώσω.
Odyssey 1.303	ἴστω νῦν Ζεὺς πρῶτα, θεῶν ὕπατος καὶ ἄριστος,
Odyssey 1.304	ἱστίη τʼ Ὀδυσῆος ἀμύμονος, ἣν ἀφικάνω·
Odyssey 1.305	ἦ μέν τοι τάδε πάντα τελείεται ὡς ἀγορεύω.
Odyssey 1.306	τοῦδʼ αὐτοῦ λυκάβαντος ἐλεύσεται ἐνθάδʼ Ὀδυσσεύς,
Odyssey 1.307	τοῦ μὲν φθίνοντος μηνός, τοῦ δʼ ἱσταμένοιο.
Odyssey 1.308	τὸν δʼ αὖτε προσέειπε περίφρων Πηνελόπεια·
Odyssey 1.309	αἲ γὰρ τοῦτο, ξεῖνε, ἔπος τετελεσμένον εἴη·
Odyssey 1.310	τῷ κε τάχα γνοίης φιλότητά τε πολλά τε δῶρα
Odyssey 1.311	ἐξ ἐμεῦ, ὡς ἄν τίς σε συναντόμενος μακαρίζοι.
Odyssey 1.312	ἀλλά μοι ὧδʼ ἀνὰ θυμὸν ὀΐεται, ὡς ἔσεταί περ·
Odyssey 1.313	οὔτʼ Ὀδυσεὺς ἔτι οἶκον ἐλεύσεται, οὔτε σὺ πομπῆς
Odyssey 1.314	τεύξῃ, ἐπεὶ οὐ τοῖοι σημάντορές εἰσʼ ἐνὶ οἴκῳ
Odyssey 1.315	οἷος Ὀδυσσεὺς ἔσκε μετʼ ἀνδράσιν, εἴ ποτʼ ἔην γε,
Odyssey 1.316	ξείνους αἰδοίους ἀποπεμπέμεν ἠδὲ δέχεσθαι.
Odyssey 1.317	ἀλλά μιν, ἀμφίπολοι, ἀπονίψατε, κάτθετε δʼ εὐνήν,
Odyssey 1.318	δέμνια καὶ χλαίνας καὶ ῥήγεα σιγαλόεντα,
Odyssey 1.319	ὥς κʼ εὖ θαλπιόων χρυσόθρονον Ἠῶ ἵκηται.
Odyssey 1.320	ἠῶθεν δὲ μάλʼ ἦρι λοέσσαι τε χρῖσαί τε,
Odyssey 1.321	ὥς κʼ ἔνδον παρὰ Τηλεμάχῳ δείπνοιο μέδηται
Odyssey 1.322	ἥμενος ἐν μεγάρῳ· τῷ δʼ ἄλγιον ὅς κεν ἐκείνων
Odyssey 1.323	τοῦτον ἀνιάζῃ θυμοφθόρος· οὐδέ τι ἔργον
Odyssey 1.324	ἐνθάδʼ ἔτι πρήξει, μάλα περ κεχολωμένος αἰνῶς.
Odyssey 1.325	πῶς γὰρ ἐμεῦ σύ, ξεῖνε, δαήσεαι εἴ τι γυναικῶν
Odyssey 1.326	ἀλλάων περίειμι νόον καὶ ἐπίφρονα μῆτιν,
Odyssey 1.327	εἴ κεν ἀϋσταλέος, κακὰ εἱμένος ἐν μεγάροισιν
Odyssey 1.328	δαινύῃ; ἄνθρωποι δὲ μινυνθάδιοι τελέθουσιν.
Odyssey 1.329	ὃς μὲν ἀπηνὴς αὐτὸς ἔῃ καὶ ἀπηνέα εἰδῇ,
Odyssey 1.330	τῷ δὲ καταρῶνται πάντες βροτοὶ ἄλγεʼ ὀπίσσω
Odyssey 1.331	ζωῷ, ἀτὰρ τεθνεῶτί γʼ ἐφεψιόωνται ἅπαντες·
Odyssey 1.332	ὃς δʼ ἂν ἀμύμων αὐτὸς ἔῃ καὶ ἀμύμονα εἰδῇ,
Odyssey 1.333	τοῦ μέν τε κλέος εὐρὺ δὶα ξεῖνοι φορέουσι
Odyssey 1.334	πάντας ἐπʼ ἀνθρώπους, πολλοί τέ μιν ἐσθλὸν ἔειπον.
Odyssey 1.335	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.336	ὦ γύναι αἰδοίη Λαερτιάδεω Ὀδυσῆος,
Odyssey 1.337	ἦ τοι ἐμοὶ χλαῖναι καὶ ῥήγεα σιγαλόεντα
Odyssey 1.338	ἤχθεθʼ, ὅτε πρῶτον Κρήτης ὄρεα νιφόεντα
Odyssey 1.339	νοσφισάμην ἐπὶ νηὸς ἰὼν δολιχηρέτμοιο,
Odyssey 1.340	κείω δʼ ὡς τὸ πάρος περ ἀΰπνους νύκτας ἴαυον·
Odyssey 1.341	πολλὰς γὰρ δὴ νύκτας ἀεικελίῳ ἐνὶ κοίτῃ
Odyssey 1.342	ἄεσα καί τʼ ἀνέμεινα ἐΰθρονον Ἠῶ δῖαν.
Odyssey 1.343	οὐδέ τί μοι ποδάνιπτρα ποδῶν ἐπιήρανα θυμῷ
Odyssey 1.344	γίγνεται· οὐδὲ γυνὴ ποδὸς ἅψεται ἡμετέροιο
Odyssey 1.345	τάων αἵ τοι δῶμα κάτα δρήστειραι ἔασιν,
Odyssey 1.346	εἰ μή τις γρηῦς ἔστι παλαιή, κεδνὰ ἰδυῖα,
Odyssey 1.347	ἥ τις δὴ τέτληκε τόσα φρεσὶν ὅσσα τʼ ἐγώ περ·
Odyssey 1.348	τῇ δʼ οὐκ ἂν φθονέοιμι ποδῶν ἅψασθαι ἐμεῖο.
Odyssey 1.349	τὸν δʼ αὖτε προσέειπε περίφρων Πηνελόπεια·
Odyssey 1.350	ξεῖνε φίλʼ· οὐ γάρ πώ τις ἀνὴρ πεπνυμένος ὧδε
Odyssey 1.351	ξείνων τηλεδαπῶν φιλίων ἐμὸν ἵκετο δῶμα,
Odyssey 1.352	ὡς σὺ μάλʼ εὐφραδέως πεπνυμένα πάντʼ ἀγορεύεις·
Odyssey 1.353	ἔστι δέ μοι γρηῢς πυκινὰ φρεσὶ μήδεʼ ἔχουσα
Odyssey 1.354	ἣ κεῖνον δύστηνον ἐῢ τρέφεν ἠδʼ ἀτίταλλε,
Odyssey 1.355	δεξαμένη χείρεσσʼ, ὅτε μιν πρῶτον τέκε μήτηρ,
Odyssey 1.356	ἥ σε πόδας νίψει, ὀλιγηπελέουσά περ ἔμπης.
Odyssey 1.357	ἀλλʼ ἄγε νῦν ἀνστᾶσα, περίφρων Εὐρύκλεια,
Odyssey 1.358	νίψον σοῖο ἄνακτος ὁμήλικα· καί που Ὀδυσσεὺς
Odyssey 1.359	ἤδη τοιόσδʼ ἐστὶ πόδας τοιόσδε τε χεῖρας·
Odyssey 1.360	αἶψα γὰρ ἐν κακότητι βροτοὶ καταγηράσκουσιν.
Odyssey 1.361	ὣς ἄρʼ ἔφη, γρηῢς δὲ κατέσχετο χερσὶ πρόσωπα,
Odyssey 1.362	δάκρυα δʼ ἔκβαλε θερμά, ἔπος δʼ ὀλοφυδνὸν ἔειπεν·
Odyssey 1.363	ὤ μοι ἐγὼ σέο, τέκνον, ἀμήχανος· ἦ σε περὶ Ζεὺς
Odyssey 1.364	ἀνθρώπων ἤχθηρε θεουδέα θυμὸν ἔχοντα.
Odyssey 1.365	οὐ γάρ πώ τις τόσσα βροτῶν Διὶ τερπικεραύνῳ
Odyssey 1.366	πίονα μηρίʼ ἔκηʼ οὐδʼ ἐξαίτους ἑκατόμβας,
Odyssey 1.367	ὅσσα σὺ τῷ ἐδίδους, ἀρώμενος ἧος ἵκοιο
Odyssey 1.368	γῆράς τε λιπαρὸν θρέψαιό τε φαίδιμον υἱόν·
Odyssey 1.369	νῦν δέ τοι οἴῳ πάμπαν ἀφείλετο νόστιμον ἦμαρ.
Odyssey 1.370	οὕτω που καὶ κείνῳ ἐφεψιόωντο γυναῖκες
Odyssey 1.371	ξείνων τηλεδαπῶν, ὅτε τευ κλυτὰ δώμαθʼ ἵκοιτο,
Odyssey 1.372	ὡς σέθεν αἱ κύνες αἵδε καθεψιόωνται ἅπασαι,
Odyssey 1.373	τάων νῦν λώβην τε καὶ αἴσχεα πόλλʼ ἀλεείνων
Odyssey 1.374	οὐκ ἐάᾳς νίζειν· ἐμὲ δʼ οὐκ ἀέκουσαν ἄνωγε
Odyssey 1.375	κούρη Ἰκαρίοιο, περίφρων Πηνελόπεια.
Odyssey 1.376	τῷ σε πόδας νίψω ἅμα τʼ αὐτῆς Πηνελοπείης
Odyssey 1.377	καὶ σέθεν εἵνεκʼ, ἐπεί μοι ὀρώρεται ἔνδοθι θυμὸς
Odyssey 1.378	κήδεσιν. ἀλλʼ ἄγε νῦν ξυνίει ἔπος, ὅττι κεν εἴπω·
Odyssey 1.379	πολλοὶ δὴ ξεῖνοι ταλαπείριοι ἐνθάδʼ ἵκοντο,
Odyssey 1.380	ἀλλʼ οὔ πώ τινά φημι ἐοικότα ὧδε ἰδέσθαι
Odyssey 1.381	ὡς σὺ δέμας φωνήν τε πόδας τʼ Ὀδυσῆϊ ἔοικας.
Odyssey 1.382	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.383	ὦ γρηῦ, οὕτω φασὶν ὅσοι ἴδον ὀφθαλμοῖσιν
Odyssey 1.384	ἡμέας ἀμφοτέρους, μάλα εἰκέλω ἀλλήλοιϊν
Odyssey 1.385	ἔμμεναι, ὡς σύ περ αὐτὴ ἐπιφρονέουσʼ ἀγορεύεις.
Odyssey 1.386	ὣς ἄρʼ ἔφη, γρηῢς δὲ λέβηθʼ ἕλε παμφανόωντα
Odyssey 1.387	τοῦ πόδας ἐξαπένιζεν, ὕδωρ δʼ ἐνεχεύατο πουλὺ
Odyssey 1.388	ψυχρόν, ἔπειτα δὲ θερμὸν ἐπήφυσεν. αὐτὰρ Ὀδυσσεὺς
Odyssey 1.389	ἷζεν ἐπʼ ἐσχαρόφιν, ποτὶ δὲ σκότον ἐτράπετʼ αἶψα·
Odyssey 1.390	αὐτίκα γὰρ κατὰ θυμὸν ὀΐσατο, μή ἑ λαβοῦσα
Odyssey 1.391	οὐλὴν ἀμφράσσαιτο καὶ ἀμφαδὰ ἔργα γένοιτο.
Odyssey 1.392	νίζε δʼ ἄρʼ ἆσσον ἰοῦσα ἄναχθʼ ἑόν· αὐτίκα δʼ ἔγνω
Odyssey 1.393	οὐλήν, τήν ποτέ μιν σῦς ἤλασε λευκῷ ὀδόντι
Odyssey 1.394	Παρνησόνδʼ ἐλθόντα μετʼ Αὐτόλυκόν τε καὶ υἷας,
Odyssey 1.395	μητρὸς ἑῆς πάτερʼ ἐσθλόν, ὃς ἀνθρώπους ἐκέκαστο
Odyssey 1.396	κλεπτοσύνῃ θʼ ὅρκῳ τε· θεὸς δέ οἱ αὐτὸς ἔδωκεν
Odyssey 1.397	Ἑρμείας· τῷ γὰρ κεχαρισμένα μηρία καῖεν
Odyssey 1.398	ἀρνῶν ἠδʼ ἐρίφων· ὁ δέ οἱ πρόφρων ἅμʼ ὀπήδει.
Odyssey 1.399	Αὐτόλυκος δʼ ἐλθὼν Ἰθάκης ἐς πίονα δῆμον
Odyssey 1.400	παῖδα νέον γεγαῶτα κιχήσατο θυγατέρος ἧς·
Odyssey 1.401	τόν ῥά οἱ Εὐρύκλεια φίλοις ἐπὶ γούνασι θῆκε
Odyssey 1.402	παυομένῳ δόρποιο, ἔπος τʼ ἔφατʼ ἔκ τʼ ὀνόμαζεν·
Odyssey 1.403	Αὐτόλυκʼ, αὐτὸς νῦν ὄνομʼ εὕρεο ὅττι κε θῆαι
Odyssey 1.404	παιδὸς παιδὶ φίλῳ· πολυάρητος δέ τοί ἐστιν.
Odyssey 1.405	τὴν δʼ αὖτʼ Αὐτόλυκος ἀπαμείβετο φώνησέν τε·
Odyssey 1.406	γαμβρὸς ἐμὸς θυγάτηρ τε, τίθεσθʼ ὄνομʼ ὅττι κεν εἴπω·
Odyssey 1.407	πολλοῖσιν γὰρ ἐγώ γε ὀδυσσάμενος τόδʼ ἱκάνω,
Odyssey 1.408	ἀνδράσιν ἠδὲ γυναιξὶν ἀνὰ χθόνα πουλυβότειραν·
Odyssey 1.409	τῷ δʼ Ὀδυσεὺς ὄνομʼ ἔστω ἐπώνυμον· αὐτὰρ ἐγώ γε,
Odyssey 1.410	ὁππότʼ ἂν ἡβήσας μητρώϊον ἐς μέγα δῶμα
Odyssey 1.411	ἔλθῃ Παρνησόνδʼ, ὅθι πού μοι κτήματʼ ἔασι,
Odyssey 1.412	τῶν οἱ ἐγὼ δώσω καί μιν χαίροντʼ ἀποπέμψω.
Odyssey 1.413	τῶν ἕνεκʼ ἦλθʼ Ὀδυσεύς, ἵνα οἱ πόροι ἀγλαὰ δῶρα.
Odyssey 1.414	τὸν μὲν ἄρʼ Αὐτόλυκός τε καὶ υἱέες Αὐτολύκοιο
Odyssey 1.415	χερσίν τʼ ἠσπάζοντο ἔπεσσί τε μειλιχίοισι·
Odyssey 1.416	μήτηρ δʼ Ἀμφιθέη μητρὸς περιφῦσʼ Ὀδυσῆϊ
Odyssey 1.417	κύσσʼ ἄρα μιν κεφαλήν τε καὶ ἄμφω φάεα καλά.
Odyssey 1.418	Αὐτόλυκος δʼ υἱοῖσιν ἐκέκλετο κυδαλίμοισι
Odyssey 1.419	δεῖπνον ἐφοπλίσσαι· τοὶ δʼ ὀτρύνοντος ἄκουσαν,
Odyssey 1.420	αὐτίκα δʼ εἰσάγαγον βοῦν ἄρσενα πενταέτηρον·
Odyssey 1.421	τὸν δέρον ἀμφί θʼ ἕπον, καί μιν διέχευαν ἅπαντα,
Odyssey 1.422	μίστυλλόν τʼ ἄρʼ ἐπισταμένως πεῖράν τʼ ὀβελοῖσιν,
Odyssey 1.423	ὤπτησάν τε περιφραδέως, δάσσαντό τε μοίρας.
Odyssey 1.424	ὣς τότε μὲν πρόπαν ἦμαρ ἐς ἠέλιον καταδύντα
Odyssey 1.425	δαίνυντʼ, οὐδέ τι θυμὸς ἐδεύετο δαιτὸς ἐΐσης·
Odyssey 1.426	ἦμος δʼ ἠέλιος κατέδυ καὶ ἐπὶ κνέφας ἦλθεν,
Odyssey 1.427	δὴ τότε κοιμήσαντο καὶ ὕπνου δῶρον ἕλοντο.
Odyssey 1.428	ἦμος δʼ ἠριγένεια φάνη ῥοδοδάκτυλος Ἠώς,
Odyssey 1.429	βάν ῥʼ ἴμεν ἐς θήρην, ἠμὲν κύνες ἠδὲ καὶ αὐτοὶ
Odyssey 1.430	υἱέες Αὐτολύκου· μετὰ τοῖσι δὲ δῖος Ὀδυσσεὺς
Odyssey 1.431	ἤϊεν· αἰπὺ δʼ ὄρος προσέβαν καταειμένον ὕλῃ
Odyssey 1.432	Παρνησοῦ, τάχα δʼ ἵκανον πτύχας ἠνεμοέσσας.
Odyssey 1.433	Ἠέλιος μὲν ἔπειτα νέον προσέβαλλεν ἀρούρας
Odyssey 1.434	ἐξ ἀκαλαρρείταο βαθυρρόου Ὠκεανοῖο,
Odyssey 1.435	οἱ δʼ ἐς βῆσσαν ἵκανον ἐπακτῆρες· πρὸ δʼ ἄρʼ αὐτῶν
Odyssey 1.436	ἴχνιʼ ἐρευνῶντες κύνες ἤϊσαν, αὐτὰρ ὄπισθεν
Odyssey 1.437	υἱέες Αὐτολύκου· μετὰ τοῖσι δὲ δῖος Ὀδυσσεὺς
Odyssey 1.438	ἤϊεν ἄγχι κυνῶν, κραδάων δολιχόσκιον ἔγχος.
Odyssey 1.439	ἔνθα δʼ ἄρʼ ἐν λόχμῃ πυκινῇ κατέκειτο μέγας σῦς·
Odyssey 1.440	τὴν μὲν ἄρʼ οὔτʼ ἀνέμων διάει μένος ὑγρὸν ἀέντων,
Odyssey 1.441	οὔτε μιν Ἠέλιος φαέθων ἀκτῖσιν ἔβαλλεν,
Odyssey 1.442	οὔτʼ ὄμβρος περάασκε διαμπερές· ὣς ἄρα πυκνὴ
Odyssey 1.443	ἦεν, ἀτὰρ φύλλων ἐνέην χύσις ἤλιθα πολλή.
Odyssey 1.444	τὸν δʼ ἀνδρῶν τε κυνῶν τε περὶ κτύπος ἦλθε ποδοῖϊν,
Odyssey 1.445	ὡς ἐπάγοντες ἐπῇσαν· ὁ δʼ ἀντίος ἐκ ξυλόχοιο
Odyssey 1.446	φρίξας εὖ λοφιήν, πῦρ δʼ ὀφθαλμοῖσι δεδορκώς,
Odyssey 1.447	στῆ ῥʼ αὐτῶν σχεδόθεν· ὁ δʼ ἄρα πρώτιστος Ὀδυσσεὺς
Odyssey 1.448	ἔσσυτʼ ἀνασχόμενος δολιχὸν δόρυ χειρὶ παχείῃ,
Odyssey 1.449	οὐτάμεναι μεμαώς· ὁ δέ μιν φθάμενος ἔλασεν σῦς
Odyssey 1.450	γουνὸς ὕπερ, πολλὸν δὲ διήφυσε σαρκὸς ὀδόντι
Odyssey 1.451	λικριφὶς ἀΐξας, οὐδʼ ὀστέον ἵκετο φωτός.
Odyssey 1.452	τὸν δʼ Ὀδυσεὺς οὔτησε τυχὼν κατὰ δεξιὸν ὦμον,
Odyssey 1.453	ἀντικρὺ δὲ διῆλθε φαεινοῦ δουρὸς ἀκωκή·
Odyssey 1.454	κὰδ δʼ ἔπεσʼ ἐν κονίῃσι μακών, ἀπὸ δʼ ἔπτατο θυμός.
Odyssey 1.455	τὸν μὲν ἄρʼ Αὐτολύκου παῖδες φίλοι ἀμφεπένοντο,
Odyssey 1.456	ὠτειλὴν δʼ Ὀδυσῆος ἀμύμονος ἀντιθέοιο
Odyssey 1.457	δῆσαν ἐπισταμένως, ἐπαοιδῇ δʼ αἷμα κελαινὸν
Odyssey 1.458	ἔσχεθον, αἶψα δʼ ἵκοντο φίλου πρὸς δώματα πατρός.
Odyssey 1.459	τὸν μὲν ἄρʼ Αὐτόλυκός τε καὶ υἱέες Αὐτολύκοιο
Odyssey 1.460	εὖ ἰησάμενοι ἠδʼ ἀγλαὰ δῶρα πορόντες
Odyssey 1.461	καρπαλίμως χαίροντα φίλην ἐς πατρίδʼ ἔπεμπον
Odyssey 1.462	εἰς Ἰθάκην. τῷ μέν ῥα πατὴρ καὶ πότνια μήτηρ
Odyssey 1.463	χαῖρον νοστήσαντι καὶ ἐξερέεινον ἕκαστα,
Odyssey 1.464	οὐλὴν ὅττι πάθοι· ὁ δʼ ἄρα σφίσιν εὖ κατέλεξεν
Odyssey 1.465	ὥς μιν θηρεύοντʼ ἔλασεν σῦς λευκῷ ὀδόντι,
Odyssey 1.466	Παρνησόνδʼ ἐλθόντα σὺν υἱάσιν Αὐτολύκοιο.
Odyssey 1.467	τὴν γρηῢς χείρεσσι καταπρηνέσσι λαβοῦσα
Odyssey 1.468	γνῶ ῥʼ ἐπιμασσαμένη, πόδα δὲ προέηκε φέρεσθαι·
Odyssey 1.469	ἐν δὲ λέβητι πέσε κνήμη, κανάχησε δὲ χαλκός,
Odyssey 1.470	ἂψ δʼ ἑτέρωσʼ ἐκλίθη· τὸ δʼ ἐπὶ χθονὸς ἐξέχυθʼ ὕδωρ.
Odyssey 1.471	τὴν δʼ ἅμα χάρμα καὶ ἄλγος ἕλε φρένα, τὼ δέ οἱ ὄσσε
Odyssey 1.472	δακρυόφι πλῆσθεν, θαλερὴ δέ οἱ ἔσχετο φωνή.
Odyssey 1.473	ἁψαμένη δὲ γενείου Ὀδυσσῆα προσέειπεν·
Odyssey 1.474	ἦ μάλʼ Ὀδυσσεύς ἐσσι, φίλον τέκος· οὐδέ σʼ ἐγώ γε
Odyssey 1.475	πρὶν ἔγνων, πρὶν πάντα ἄνακτʼ ἐμὸν ἀμφαφάασθαι.
Odyssey 1.476	ἦ καὶ Πηνελόπειαν ἐσέδρακεν ὀφθαλμοῖσι,
Odyssey 1.477	πεφραδέειν ἐθέλουσα φίλον πόσιν ἔνδον ἐόντα.
Odyssey 1.478	ἡ δʼ οὔτʼ ἀθρῆσαι δύνατʼ ἀντίη οὔτε νοῆσαι·
Odyssey 1.479	τῇ γὰρ Ἀθηναίη νόον ἔτραπεν· αὐτὰρ Ὀδυσσεὺς
Odyssey 1.480	χεῖρʼ ἐπιμασσάμενος φάρυγος λάβε δεξιτερῆφι,
Odyssey 1.481	τῇ δʼ ἑτέρῃ ἕθεν ἆσσον ἐρύσσατο φώνησέν τε.
Odyssey 1.482	μαῖα, τίη μʼ ἐθέλεις ὀλέσαι; σὺ δέ μʼ ἔτρεφες αὐτὴ
Odyssey 1.483	τῷ σῷ ἐπὶ μαζῷ· νῦν δʼ ἄλγεα πολλὰ μογήσας
Odyssey 1.484	ἤλυθον εἰκοστῷ ἔτεϊ ἐς πατρίδα γαῖαν.
Odyssey 1.485	ἀλλʼ ἐπεὶ ἐφράσθης καί τοι θεὸς ἔμβαλε θυμῷ,
Odyssey 1.486	σίγα, μή τίς τʼ ἄλλος ἐνὶ μεγάροισι πύθηται.
Odyssey 1.487	ὧδε γὰρ ἐξερέω, καὶ μὴν τετελεσμένον ἔσται·
Odyssey 1.488	εἴ χʼ ὑπʼ ἐμοί γε θεὸς δαμάσῃ μνηστῆρας ἀγαυούς,
Odyssey 1.489	οὐδὲ τροφοῦ οὔσης σεῦ ἀφέξομαι, ὁππότʼ ἂν ἄλλας
Odyssey 1.490	δμῳὰς ἐν μεγάροισιν ἐμοῖς κτείνωμι γυναῖκας.
Odyssey 1.491	τὸν δʼ αὖτε προσέειπε περίφρων Εὐρύκλεια·
Odyssey 1.492	τέκνον ἐμόν, ποῖόν σε ἔπος φύγεν ἕρκος ὀδόντων.
Odyssey 1.493	οἶσθα μὲν οἷον ἐμὸν μένος ἔμπεδον οὐδʼ ἐπιεικτόν,
Odyssey 1.494	ἕξω δʼ ὡς ὅτε τις στερεὴ λίθος ἠὲ σίδηρος.
Odyssey 1.495	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Odyssey 1.496	εἴ χʼ ὑπό σοι γε θεὸς δαμάσῃ μνηστῆρας ἀγαυούς,
Odyssey 1.497	δὴ τότε τοι καταλέξω ἐνὶ μεγάροισι γυναῖκας,
Odyssey 1.498	αἵ τέ σʼ ἀτιμάζουσι καὶ αἳ νηλείτιδές εἰσι.
Odyssey 1.499	τὴν δʼ ἀπαμειβόμενος προσέφη πολύμητις Ὀδυσσεύς
Odyssey 1.500	μαῖα, τίη δὲ σὺ τὰς μυθήσεαι; οὐδέ τί σε χρή.
Odyssey 1.501	εὖ νυ καὶ αὐτὸς ἐγὼ φράσομαι καὶ εἴσομʼ ἑκάστην·
Odyssey 1.502	ἀλλʼ ἔχε σιγῇ μῦθον, ἐπίτρεψον δὲ θεοῖσιν.
Odyssey 1.503	ὣς ἄρʼ ἔφη, γρηῢς δὲ διὲκ μεγάροιο βεβήκει
Odyssey 1.504	οἰσομένη ποδάνιπτρα· τὰ γὰρ πρότερʼ ἔκχυτο πάντα.
Odyssey 1.505	αὐτὰρ ἐπεὶ νίψεν τε καὶ ἤλειψεν λίπʼ ἐλαίῳ,
Odyssey 1.506	αὖτις ἄρʼ ἀσσοτέρω πυρὸς ἕλκετο δίφρον Ὀδυσσεὺς
Odyssey 1.507	θερσόμενος, οὐλὴν δὲ κατὰ ῥακέεσσι κάλυψε.
Odyssey 1.508	τοῖσι δὲ μύθων ἦρχε περίφρων Πηνελόπεια·
Odyssey 1.509	ξεῖνε, τὸ μέν σʼ ἔτι τυτθὸν ἐγὼν εἰρήσομαι αὐτή·
Odyssey 1.510	καὶ γὰρ δὴ κοίτοιο τάχʼ ἔσσεται ἡδέος ὥρη,
Odyssey 1.511	ὅν τινά γʼ ὕπνος ἕλοι γλυκερός, καὶ κηδόμενόν περ.
Odyssey 1.512	αὐτὰρ ἐμοὶ καὶ πένθος ἀμέτρητον πόρε δαίμων·
Odyssey 1.513	ἤματα μὲν γὰρ τέρπομʼ ὀδυρομένη, γοόωσα,
Odyssey 1.514	ἔς τʼ ἐμὰ ἔργʼ ὁρόωσα καὶ ἀμφιπόλων ἐνὶ οἴκῳ·
Odyssey 1.515	αὐτὰρ ἐπὴν νὺξ ἔλθῃ, ἕλῃσί τε κοῖτος ἅπαντας,
Odyssey 1.516	κεῖμαι ἐνὶ λέκτρῳ, πυκιναὶ δέ μοι ἀμφʼ ἀδινὸν κῆρ
Odyssey 1.517	ὀξεῖαι μελεδῶνες ὀδυρομένην ἐρέθουσιν.
Odyssey 1.518	ὡς δʼ ὅτε Πανδαρέου κούρη, χλωρηῒς ἀηδών,
Odyssey 1.519	καλὸν ἀείδῃσιν ἔαρος νέον ἱσταμένοιο,
Odyssey 1.520	δενδρέων ἐν πετάλοισι καθεζομένη πυκινοῖσιν,
Odyssey 1.521	ἥ τε θαμὰ τρωπῶσα χέει πολυηχέα φωνήν,
Odyssey 1.522	παῖδʼ ὀλοφυρομένη Ἴτυλον φίλον, ὅν ποτε χαλκῷ
Odyssey 1.523	κτεῖνε διʼ ἀφραδίας, κοῦρον Ζήθοιο ἄνακτος,
Odyssey 1.524	ὣς καὶ ἐμοὶ δίχα θυμὸς ὀρώρεται ἔνθα καὶ ἔνθα,
Odyssey 1.525	ἠὲ μένω παρὰ παιδὶ καὶ ἔμπεδα πάντα φυλάσσω,
Odyssey 1.526	κτῆσιν ἐμήν, δμῶάς τε καὶ ὑψερεφὲς μέγα δῶμα,
Odyssey 1.527	εὐνήν τʼ αἰδομένη πόσιος δήμοιό τε φῆμιν,
Odyssey 1.528	ἦ ἤδη ἅμʼ ἕπωμαι Ἀχαιῶν ὅς τις ἄριστος
Odyssey 1.529	μνᾶται ἐνὶ μεγάροισι, πορὼν ἀπερείσια ἕδνα.
Odyssey 1.530	παῖς δʼ ἐμὸς ἧος ἔην ἔτι νήπιος ἠδὲ χαλίφρων,
Odyssey 1.531	γήμασθʼ οὔ μʼ εἴα πόσιος κατὰ δῶμα λιποῦσαν·
Odyssey 1.532	νῦν δʼ ὅτε δὴ μέγας ἐστὶ καὶ ἥβης μέτρον ἱκάνει,
Odyssey 1.533	καὶ δή μʼ ἀρᾶται πάλιν ἐλθέμεν ἐκ μεγάροιο,
Odyssey 1.534	κτήσιος ἀσχαλόων, τήν οἱ κατέδουσιν Ἀχαιοί.
Odyssey 1.535	ἀλλʼ ἄγε μοι τὸν ὄνειρον ὑπόκριναι καὶ ἄκουσον.
Odyssey 1.536	χῆνές μοι κατὰ οἶκον ἐείκοσι πυρὸν ἔδουσιν
Odyssey 1.537	ἐξ ὕδατος, καί τέ σφιν ἰαίνομαι εἰσορόωσα·
Odyssey 1.538	ἐλθὼν δʼ ἐξ ὄρεος μέγας αἰετὸς ἀγκυλοχείλης
Odyssey 1.539	πᾶσι κατʼ αὐχένας ἦξε καὶ ἔκτανεν· οἱ δʼ ἐκέχυντο
Odyssey 1.540	ἀθρόοι ἐν μεγάροις, ὁ δʼ ἐς αἰθέρα δῖαν ἀέρθη.
Odyssey 1.541	αὐτὰρ ἐγὼ κλαῖον καὶ ἐκώκυον ἔν περ ὀνείρῳ,
Odyssey 1.542	ἀμφὶ δʼ ἔμʼ ἠγερέθοντο ἐϋπλοκαμῖδες Ἀχαιαί,
Odyssey 1.543	οἴκτρʼ ὀλοφυρομένην ὅ μοι αἰετὸς ἔκτανε χῆνας.
Odyssey 1.544	ἂψ δʼ ἐλθὼν κατʼ ἄρʼ ἕζετʼ ἐπὶ προὔχοντι μελάθρῳ,
Odyssey 1.545	φωνῇ δὲ βροτέῃ κατερήτυε φώνησέν τε·
Odyssey 1.546	θάρσει, Ἰκαρίου κούρη τηλεκλειτοῖο·
Odyssey 1.547	οὐκ ὄναρ, ἀλλʼ ὕπαρ ἐσθλόν, ὅ τοι τετελεσμένον ἔσται.
Odyssey 1.548	χῆνες μὲν μνηστῆρες, ἐγὼ δέ τοι αἰετὸς ὄρνις
Odyssey 1.549	ἦα πάρος, νῦν αὖτε τεὸς πόσις εἰλήλουθα,
Odyssey 1.550	ὃς πᾶσι μνηστῆρσιν ἀεικέα πότμον ἐφήσω.
Odyssey 1.551	ὣς ἔφατʼ, αὐτὰρ ἐμὲ μελιηδὴς ὕπνος ἀνῆκε·
Odyssey 1.552	παπτήνασα δὲ χῆνας ἐνὶ μεγάροισι νόησα
Odyssey 1.553	πυρὸν ἐρεπτομένους παρὰ πύελον, ἧχι πάρος περ.
Odyssey 1.554	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.555	ὦ γύναι, οὔ πως ἔστιν ὑποκρίνασθαι ὄνειρον
Odyssey 1.556	ἄλλῃ ἀποκλίναντʼ, ἐπεὶ ἦ ῥά τοι αὐτὸς Ὀδυσσεὺς
Odyssey 1.557	πέφραδʼ ὅπως τελέει· μνηστῆρσι δὲ φαίνετʼ ὄλεθρος
Odyssey 1.558	πᾶσι μάλʼ, οὐδέ κέ τις θάνατον καὶ κῆρας ἀλύξει.
Odyssey 1.559	τὸν δʼ αὖτε προσέειπε περίφρων Πηνελόπεια·
Odyssey 1.560	ξεῖνʼ, ἦ τοι μὲν ὄνειροι ἀμήχανοι ἀκριτόμυθοι
Odyssey 1.561	γίγνοντʼ, οὐδέ τι πάντα τελείεται ἀνθρώποισι.
Odyssey 1.562	δοιαὶ γάρ τε πύλαι ἀμενηνῶν εἰσὶν ὀνείρων·
Odyssey 1.563	αἱ μὲν γὰρ κεράεσσι τετεύχαται, αἱ δʼ ἐλέφαντι·
Odyssey 1.564	τῶν οἳ μέν κʼ ἔλθωσι διὰ πριστοῦ ἐλέφαντος,
Odyssey 1.565	οἵ ῥʼ ἐλεφαίρονται, ἔπεʼ ἀκράαντα φέροντες·
Odyssey 1.566	οἱ δὲ διὰ ξεστῶν κεράων ἔλθωσι θύραζε,
Odyssey 1.567	οἵ ῥʼ ἔτυμα κραίνουσι, βροτῶν ὅτε κέν τις ἴδηται.
Odyssey 1.568	ἀλλʼ ἐμοὶ οὐκ ἐντεῦθεν ὀΐομαι αἰνὸν ὄνειρον
Odyssey 1.569	ἐλθέμεν· ἦ κʼ ἀσπαστὸν ἐμοὶ καὶ παιδὶ γένοιτο.
Odyssey 1.570	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Odyssey 1.571	ἥδε δὴ ἠὼς εἶσι δυσώνυμος, ἥ μʼ Ὀδυσῆος
Odyssey 1.572	οἴκου ἀποσχήσει· νῦν γὰρ καταθήσω ἄεθλον,
Odyssey 1.573	τοὺς πελέκεας, τοὺς κεῖνος ἐνὶ μεγάροισιν ἑοῖσιν
Odyssey 1.574	ἵστασχʼ ἑξείης, δρυόχους ὥς, δώδεκα πάντας·
Odyssey 1.575	στὰς δʼ ὅ γε πολλὸν ἄνευθε διαρρίπτασκεν ὀϊστόν.
Odyssey 1.576	νῦν δὲ μνηστήρεσσιν ἄεθλον τοῦτον ἐφήσω·
Odyssey 1.577	ὃς δέ κε ῥηΐτατʼ ἐντανύσῃ βιὸν ἐν παλάμῃσι
Odyssey 1.578	καὶ διοϊστεύσῃ πελέκεων δυοκαίδεκα πάντων,
Odyssey 1.579	τῷ κεν ἅμʼ ἑσποίμην, νοσφισσαμένη τόδε δῶμα
Odyssey 1.580	κουρίδιον, μάλα καλόν, ἐνίπλειον βιότοιο·
Odyssey 1.581	τοῦ ποτὲ μεμνήσεσθαι ὀΐομαι ἔν περ ὀνείρῳ.
Odyssey 1.582	τὴν δʼ ἀπαμειβόμενος προσέφη πολύμητις Ὀδυσσεύς
Odyssey 1.583	ὦ γύναι αἰδοίη Λαερτιάδεω Ὀδυσῆος,
Odyssey 1.584	μηκέτι νῦν ἀνάβαλλε δόμοις ἔνι τοῦτον ἄεθλον·
Odyssey 1.585	πρὶν γάρ τοι πολύμητις ἐλεύσεται ἐνθάδʼ Ὀδυσσεύς,
Odyssey 1.586	πρὶν τούτους τόδε τόξον ἐΰξοον ἀμφαφόωντας
Odyssey 1.587	νευρήν τʼ ἐντανύσαι διοϊστεῦσαί τε σιδήρου.
Odyssey 1.588	τὸν δʼ αὖτε προσέειπε περίφρων Πηνελόπεια·
Odyssey 1.589	εἴ κʼ ἐθέλοις μοι, ξεῖνε, παρήμενος ἐν μεγάροισι
Odyssey 1.590	τέρπειν, οὔ κέ μοι ὕπνος ἐπὶ βλεφάροισι χυθείη.
Odyssey 1.591	ἀλλʼ οὐ γάρ πως ἔστιν ἀΰπνους ἔμμεναι αἰεὶ
Odyssey 1.592	ἀνθρώπους· ἐπὶ γάρ τοι ἑκάστῳ μοῖραν ἔθηκαν
Odyssey 1.593	ἀθάνατοι θνητοῖσιν ἐπὶ ζείδωρον ἄρουραν.
Odyssey 1.594	ἀλλʼ ἦ τοι μὲν ἐγὼν ὑπερώϊον εἰσαναβᾶσα
Odyssey 1.595	λέξομαι εἰς εὐνήν, ἥ μοι στονόεσσα τέτυκται,
Odyssey 1.596	αἰεὶ δάκρυσʼ ἐμοῖσι πεφυρμένη, ἐξ οὗ Ὀδυσσεὺς
Odyssey 1.597	ᾤχετʼ ἐποψόμενος Κακοΐλιον οὐκ ὀνομαστήν.
Odyssey 1.598	ἔνθα κε λεξαίμην· σὺ δὲ λέξεο τῷδʼ ἐνὶ οἴκῳ,
Odyssey 1.599	ἢ χαμάδις στορέσας ἤ τοι κατὰ δέμνια θέντων.
Odyssey 1.600	ὣς εἰποῦσʼ ἀνέβαινʼ ὑπερώϊα σιγαλόεντα,
Odyssey 1.601	οὐκ οἴη, ἅμα τῇ γε καὶ ἀμφίπολοι κίον ἄλλαι.
Odyssey 1.602	ἐς δʼ ὑπερῷʼ ἀναβᾶσα σὺν ἀμφιπόλοισι γυναιξὶ
Odyssey 1.603	κλαῖεν ἔπειτʼ Ὀδυσῆα, φίλον πόσιν, ὄφρα οἱ ὕπνον
Odyssey 1.604	ἡδὺν ἐπὶ βλεφάροισι βάλε γλαυκῶπις Ἀθήνη.
Odyssey 1.1	αὐτὰρ ὁ ἐν προδόμῳ εὐνάζετο δῖος Ὀδυσσεύς·
Odyssey 1.2	κὰμ μὲν ἀδέψητον βοέην στόρεσʼ, αὐτὰρ ὕπερθε
Odyssey 1.3	κώεα πόλλʼ ὀΐων, τοὺς ἱρεύεσκον Ἀχαιοί·
Odyssey 1.4	Εὐρυνόμη δʼ ἄρʼ ἐπὶ χλαῖναν βάλε κοιμηθέντι.
Odyssey 1.5	ἔνθʼ Ὀδυσεὺς μνηστῆρσι κακὰ φρονέων ἐνὶ θυμῷ
Odyssey 1.6	κεῖτʼ ἐγρηγορόων· ταὶ δʼ ἐκ μεγάροιο γυναῖκες
Odyssey 1.7	ἤϊσαν, αἳ μνηστῆρσιν ἐμισγέσκοντο πάρος περ,
Odyssey 1.8	ἀλλήλῃσι γέλω τε καὶ εὐφροσύνην παρέχουσαι.
Odyssey 1.9	τοῦ δʼ ὠρίνετο θυμὸς ἐνὶ στήθεσσι φίλοισι·
Odyssey 1.10	πολλὰ δὲ μερμήριζε κατὰ φρένα καὶ κατὰ θυμόν,
Odyssey 1.11	ἠὲ μεταΐξας θάνατον τεύξειεν ἑκάστῃ,
Odyssey 1.12	ἦ ἔτʼ ἐῷ μνηστῆρσιν ὑπερφιάλοισι μιγῆναι
Odyssey 1.13	ὕστατα καὶ πύματα, κραδίη δέ οἱ ἔνδον ὑλάκτει.
Odyssey 1.14	ὡς δὲ κύων ἀμαλῇσι περὶ σκυλάκεσσι βεβῶσα
Odyssey 1.15	ἄνδρʼ ἀγνοιήσασʼ ὑλάει μέμονέν τε μάχεσθαι,
Odyssey 1.16	ὥς ῥα τοῦ ἔνδον ὑλάκτει ἀγαιομένου κακὰ ἔργα·
Odyssey 1.17	στῆθος δὲ πλήξας κραδίην ἠνίπαπε μύθῳ·
Odyssey 1.18	τέτλαθι δή, κραδίη· καὶ κύντερον ἄλλο ποτʼ ἔτλης.
Odyssey 1.19	ἤματι τῷ ὅτε μοι μένος ἄσχετος ἤσθιε Κύκλωψ
Odyssey 1.20	ἰφθίμους ἑτάρους· σὺ δʼ ἐτόλμας, ὄφρα σε μῆτις
Odyssey 1.21	ἐξάγαγʼ ἐξ ἄντροιο ὀϊόμενον θανέεσθαι.
Odyssey 1.22	ὣς ἔφατʼ, ἐν στήθεσσι καθαπτόμενος φίλον ἦτορ·
Odyssey 1.23	τῷ δὲ μάλʼ ἐν πείσῃ κραδίη μένε τετληυῖα
Odyssey 1.24	νωλεμέως· ἀτὰρ αὐτὸς ἑλίσσετο ἔνθα καὶ ἔνθα.
Odyssey 1.25	ὡς δʼ ὅτε γαστέρʼ ἀνὴρ πολέος πυρὸς αἰθομένοιο,
Odyssey 1.26	ἐμπλείην κνίσης τε καὶ αἵματος, ἔνθα καὶ ἔνθα
Odyssey 1.27	αἰόλλῃ, μάλα δʼ ὦκα λιλαίεται ὀπτηθῆναι,
Odyssey 1.28	ὣς ἄρʼ ὅ γʼ ἔνθα καὶ ἔνθα ἑλίσσετο, μερμηρίζων
Odyssey 1.29	ὅππως δὴ μνηστῆρσιν ἀναιδέσι χεῖρας ἐφήσει
Odyssey 1.30	μοῦνος ἐὼν πολέσι. σχεδόθεν δέ οἱ ἦλθεν Ἀθήνη
Odyssey 1.31	οὐρανόθεν καταβᾶσα· δέμας δʼ ἤϊκτο γυναικί·
Odyssey 1.32	στῆ δʼ ἄρʼ ὑπὲρ κεφαλῆς καί μιν πρὸς μῦθον ἔειπε·
Odyssey 1.33	τίπτʼ αὖτʼ ἐγρήσσεις, πάντων περὶ κάμμορε φωτῶν;
Odyssey 1.34	οἶκος μέν τοι ὅδʼ ἐστί, γυνὴ δέ τοι ἥδʼ ἐνὶ οἴκῳ
Odyssey 1.35	καὶ, πάϊς, οἷόν πού τις ἐέλδεται ἔμμεναι υἷα.
Odyssey 1.36	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.37	ναὶ δὴ ταῦτά γε πάντα, θεά, κατὰ μοῖραν ἔειπες·
Odyssey 1.38	ἀλλά τί μοι τόδε θυμὸς ἐνὶ φρεσὶ μερμηρίζει,
Odyssey 1.39	ὅππως δὴ μνηστῆρσιν ἀναιδέσι χεῖρας ἐφήσω,
Odyssey 1.40	μοῦνος ἐών· οἱ δʼ αἰὲν ἀολλέες ἔνδον ἔασι.
Odyssey 1.41	πρὸς δʼ ἔτι καὶ τόδε μεῖζον ἐνὶ φρεσὶ μερμηρίζω·
Odyssey 1.42	εἴ περ γὰρ κτείναιμι Διός τε σέθεν τε ἕκητι,
Odyssey 1.43	πῆ κεν ὑπεκπροφύγοιμι; τά σε φράζεσθαι ἄνωγα.
Odyssey 1.44	τὸν δʼ αὖτε προσέειπε θεὰ γλαυκῶπις Ἀθήνη·
Odyssey 1.45	σχέτλιε, καὶ μέν τίς τε χερείονι πείθεθʼ ἑταίρῳ,
Odyssey 1.46	ὅς περ θνητός τʼ ἐστὶ καὶ οὐ τόσα μήδεα οἶδεν·
Odyssey 1.47	αὐτὰρ ἐγὼ θεός εἰμι, διαμπερὲς ἥ σε φυλάσσω
Odyssey 1.48	ἐν πάντεσσι πόνοις. ἐρέω δέ τοι ἐξαναφανδόν·
Odyssey 1.49	εἴ περ πεντήκοντα λόχοι μερόπων ἀνθρώπων
Odyssey 1.50	νῶϊ περισταῖεν, κτεῖναι μεμαῶτες Ἄρηϊ,
Odyssey 1.51	καί κεν τῶν ἐλάσαιο βόας καὶ ἴφια μῆλα.
Odyssey 1.52	ἀλλʼ ἑλέτω σε καὶ ὕπνος· ἀνίη καὶ τὸ φυλάσσειν
Odyssey 1.53	πάννυχον ἐγρήσσοντα, κακῶν δʼ ὑποδύσεαι ἤδη.
Odyssey 1.54	ὣς φάτο, καί ῥά οἱ ὕπνον ἐπὶ βλεφάροισιν ἔχευεν,
Odyssey 1.55	αὐτὴ δʼ ἂψ ἐς Ὄλυμπον ἀφίκετο δῖα θεάων.
Odyssey 1.56	εὖτε τὸν ὕπνος ἔμαρπτε, λύων μελεδήματα θυμοῦ,
Odyssey 1.57	λυσιμελής, ἄλοχος δʼ ἄρʼ ἐπέγρετο κεδνὰ ἰδυῖα·
Odyssey 1.58	κλαῖε δʼ ἄρʼ ἐν λέκτροισι καθεζομένη μαλακοῖσιν.
Odyssey 1.59	αὐτὰρ ἐπεὶ κλαίουσα κορέσσατο ὃν κατὰ θυμόν,
Odyssey 1.60	Ἀρτέμιδι πρώτιστον ἐπεύξατο δῖα γυναικῶν·
Odyssey 1.61	Ἄρτεμι, πότνα θεά, θύγατερ Διός, αἴθε μοι ἤδη
Odyssey 1.62	ἰὸν ἐνὶ στήθεσσι βαλοῦσʼ ἐκ θυμὸν ἕλοιο
Odyssey 1.63	αὐτίκα νῦν, ἢ ἔπειτα μʼ ἀναρπάξασα θύελλα
Odyssey 1.64	οἴχοιτο προφέρουσα κατʼ ἠερόεντα κέλευθα,
Odyssey 1.65	ἐν προχοῇς δὲ βάλοι ἀψορρόου Ὠκεανοῖο.
Odyssey 1.66	ὡς δʼ ὅτε Πανδαρέου κούρας ἀνέλοντο θύελλαι·
Odyssey 1.67	τῇσι τοκῆας μὲν φθῖσαν θεοί, αἱ δʼ ἐλίποντο
Odyssey 1.68	ὀρφαναὶ ἐν μεγάροισι, κόμισσε δὲ δῖʼ Ἀφροδίτη
Odyssey 1.69	τυρῷ καὶ μέλιτι γλυκερῷ καὶ ἡδέϊ οἴνῳ·
Odyssey 1.70	Ἥρη δʼ αὐτῇσιν περὶ πασέων δῶκε γυναικῶν
Odyssey 1.71	εἶδος καὶ πινυτήν, μῆκος δʼ ἔπορʼ Ἄρτεμις ἁγνή,
Odyssey 1.72	ἔργα δʼ Ἀθηναίη δέδαε κλυτὰ ἐργάζεσθαι.
Odyssey 1.73	εὖτʼ Ἀφροδίτη δῖα προσέστιχε μακρὸν Ὄλυμπον,
Odyssey 1.74	κούρῃς αἰτήσουσα τέλος θαλεροῖο γάμοιο—
Odyssey 1.75	ἐς Δία τερπικέραυνον, ὁ γάρ τʼ εὖ οἶδεν ἅπαντα,
Odyssey 1.76	μοῖράν τʼ ἀμμορίην τε καταθνητῶν ἀνθρώπων—
Odyssey 1.77	τόφρα δὲ τὰς κούρας ἅρπυιαι ἀνηρείψαντο
Odyssey 1.78	καί ῥʼ ἔδοσαν στυγερῇσιν ἐρινύσιν ἀμφιπολεύειν·
Odyssey 1.79	ὣς ἔμʼ ἀϊστώσειαν Ὀλύμπια δώματʼ ἔχοντες,
Odyssey 1.80	ἠέ μʼ ἐϋπλόκαμος βάλοι Ἄρτεμις, ὄφρʼ Ὀδυσῆα
Odyssey 1.81	ὀσσομένη καὶ γαῖαν ὕπο στυγερὴν ἀφικοίμην,
Odyssey 1.82	μηδέ τι χείρονος ἀνδρὸς ἐϋφραίνοιμι νόημα.
Odyssey 1.83	ἀλλὰ τὸ μὲν καὶ ἀνεκτὸν ἔχει κακόν, ὁππότε κέν τις
Odyssey 1.84	ἤματα μὲν κλαίῃ, πυκινῶς ἀκαχήμενος ἦτορ,
Odyssey 1.85	νύκτας δʼ ὕπνος ἔχῃσιν—ὁ γάρ τʼ ἐπέλησεν ἁπάντων,
Odyssey 1.86	ἐσθλῶν ἠδὲ κακῶν, ἐπεὶ ἄρ βλέφαρʼ ἀμφικαλύψῃ—
Odyssey 1.87	αὐτὰρ ἐμοὶ καὶ ὀνείρατʼ ἐπέσσευεν κακὰ δαίμων.
Odyssey 1.88	τῇδε γὰρ αὖ μοι νυκτὶ παρέδραθεν εἴκελος αὐτῷ,
Odyssey 1.89	τοῖος ἐὼν οἷος ᾖεν ἅμα στρατῷ· αὐτὰρ ἐμὸν κῆρ
Odyssey 1.90	χαῖρʼ, ἐπεὶ οὐκ ἐφάμην ὄναρ ἔμμεναι, ἀλλʼ ὕπαρ ἤδη.
Odyssey 1.91	ὣς ἔφατʼ, αὐτίκα δὲ χρυσόθρονος ἤλυθεν Ἠώς.
Odyssey 1.92	τῆς δʼ ἄρα κλαιούσης ὄπα σύνθετο δῖος Ὀδυσσεύς·
Odyssey 1.93	μερμήριζε δʼ ἔπειτα, δόκησε δέ οἱ κατὰ θυμὸν
Odyssey 1.94	ἤδη γιγνώσκουσα παρεστάμεναι κεφαλῆφι.
Odyssey 1.95	χλαῖναν μὲν συνελὼν καὶ κώεα, τοῖσιν ἐνεῦδεν,
Odyssey 1.96	ἐς μέγαρον κατέθηκεν ἐπὶ θρόνου, ἐκ δὲ βοείην
Odyssey 1.97	θῆκε θύραζε φέρων, Διὶ δʼ εὔξατο χεῖρας ἀνασχών·
Odyssey 1.98	Ζεῦ πάτερ, εἴ μʼ ἐθέλοντες ἐπὶ τραφερήν τε καὶ ὑγρὴν
Odyssey 1.99	ἤγετʼ ἐμὴν ἐς γαῖαν, ἐπεί μʼ ἐκακώσατε λίην,
Odyssey 1.100	φήμην τίς μοι φάσθω ἐγειρομένων ἀνθρώπων
Odyssey 1.101	ἔνδοθεν, ἔκτοσθεν δὲ Διὸς τέρας ἄλλο φανήτω.
Odyssey 1.102	ὣς ἔφατʼ εὐχόμενος· τοῦ δʼ ἔκλυε μητίετα Ζεύς,
Odyssey 1.103	αὐτίκα δʼ ἐβρόντησεν ἀπʼ αἰγλήεντος Ὀλύμπου,
Odyssey 1.104	ὑψόθεν ἐκ νεφέων· γήθησε δὲ δῖος Ὀδυσσεύς.
Odyssey 1.105	φήμην δʼ ἐξ οἴκοιο γυνὴ προέηκεν ἀλετρὶς
Odyssey 1.106	πλησίον, ἔνθʼ ἄρα οἱ μύλαι ἥατο ποιμένι λαῶν,
Odyssey 1.107	τῇσιν δώδεκα πᾶσαι ἐπερρώοντο γυναῖκες
Odyssey 1.108	ἄλφιτα τεύχουσαι καὶ ἀλείατα, μυελὸν ἀνδρῶν.
Odyssey 1.109	αἱ μὲν ἄρʼ ἄλλαι εὗδον, ἐπεὶ κατὰ πυρὸν ἄλεσσαν,
Odyssey 1.110	ἡ δὲ μίʼ οὔπω παύετʼ, ἀφαυροτάτη δʼ ἐτέτυκτο·
Odyssey 1.111	ἥ ῥα μύλην στήσασα ἔπος φάτο, σῆμα ἄνακτι·
Odyssey 1.112	Ζεῦ πάτερ, ὅς τε θεοῖσι καὶ ἀνθρώποισιν ἀνάσσεις,
Odyssey 1.113	ἦ μεγάλʼ ἐβρόντησας ἀπʼ οὐρανοῦ ἀστερόεντος,
Odyssey 1.114	οὐδέ ποθι νέφος ἐστί· τέρας νύ τεῳ τόδε φαίνεις.
Odyssey 1.115	κρῆνον νῦν καὶ ἐμοὶ δειλῇ ἔπος, ὅττι κεν εἴπω·
Odyssey 1.116	μνηστῆρες πύματόν τε καὶ ὕστατον ἤματι τῷδε
Odyssey 1.117	ἐν μεγάροις Ὀδυσῆος ἑλοίατο δαῖτʼ ἐρατεινήν,
Odyssey 1.118	οἳ δή μοι καμάτῳ θυμαλγέι· γούνατʼ ἔλυσαν
Odyssey 1.119	ἄλφιτα τευχούσῃ· νῦν ὕστατα δειπνήσειαν.
Odyssey 1.120	ὣς ἄρʼ ἔφη, χαῖρεν δὲ κλεηδόνι δῖος Ὀδυσσεὺς
Odyssey 1.121	Ζηνός τε βροντῇ· φάτο γὰρ τίσασθαι ἀλείτας.
Odyssey 1.122	αἱ δʼ ἄλλαι δμῳαὶ κατὰ δώματα κάλʼ Ὀδυσῆος
Odyssey 1.123	ἀγρόμεναι ἀνέκαιον ἐπʼ ἐσχάρῃ ἀκάματον πῦρ.
Odyssey 1.124	Τηλέμαχος δʼ εὐνῆθεν ἀνίστατο, ἰσόθεος φώς,
Odyssey 1.125	εἵματα ἑσσάμενος· περὶ δὲ ξίφος ὀξὺ θέτʼ ὤμῳ·
Odyssey 1.126	ποσσὶ δʼ ὑπὸ λιπαροῖσιν ἐδήσατο καλὰ πέδιλα,
Odyssey 1.127	εἵλετο δʼ ἄλκιμον ἔγχος, ἀκαχμένον ὀξέι· χαλκῷ·
Odyssey 1.128	στῆ δʼ ἄρʼ ἐπʼ οὐδὸν ἰών, πρὸς δʼ Εὐρύκλειαν ἔειπε·
Odyssey 1.129	μαῖα φίλη, τὸν ξεῖνον ἐτιμήσασθʼ ἐνὶ οἴκῳ
Odyssey 1.130	εὐνῇ καὶ σίτῳ, ἦ αὔτως κεῖται ἀκηδής;
Odyssey 1.131	τοιαύτη γὰρ ἐμὴ μήτηρ, πινυτή περ ἐοῦσα·
Odyssey 1.132	ἐμπλήγδην ἕτερόν γε τίει μερόπων ἀνθρώπων
Odyssey 1.133	χείρονα, τὸν δέ τʼ ἀρείονʼ ἀτιμήσασʼ ἀποπέμπει.
Odyssey 1.134	τὸν δʼ αὖτε προσέειπε περίφρων Εὐρύκλεια·
Odyssey 1.135	οὐκ ἄν μιν νῦν, τέκνον, ἀναίτιον αἰτιόῳο.
Odyssey 1.136	οἶνον μὲν γὰρ πῖνε καθήμενος, ὄφρʼ ἔθελʼ αὐτός,
Odyssey 1.137	σίτου δʼ οὐκέτʼ ἔφη πεινήμεναι· εἴρετο γάρ μιν.
Odyssey 1.138	ἀλλʼ ὅτε δὴ κοίτοιο καὶ ὕπνου μιμνήσκοιτο,
Odyssey 1.139	ἡ μὲν δέμνιʼ ἄνωγεν ὑποστορέσαι δμῳῇσιν,
Odyssey 1.140	αὐτὰρ ὅ γʼ, ὥς τις πάμπαν ὀϊζυρὸς καὶ ἄποτμος,
Odyssey 1.141	οὐκ ἔθελʼ ἐν λέκτροισι καὶ ἐν ῥήγεσσι καθεύδειν,
Odyssey 1.142	ἀλλʼ ἐν ἀδεψήτῳ βοέῃ καὶ κώεσιν οἰῶν
Odyssey 1.143	ἔδραθʼ ἐνὶ προδόμῳ· χλαῖναν δʼ ἐπιέσσαμεν ἡμεῖς.
Odyssey 1.144	ὣς φάτο, Τηλέμαχος δὲ διὲκ μεγάροιο βεβήκει
Odyssey 1.145	ἔγχος ἔχων, ἅμα τῷ γε δύω κύνες ἀργοὶ ἕποντο.
Odyssey 1.146	βῆ δʼ ἴμεν εἰς ἀγορὴν μετʼ ἐϋκνήμιδας Ἀχαιούς.
Odyssey 1.147	ἡ δʼ αὖτε δμῳῇσιν ἐκέκλετο δῖα γυναικῶν,
Odyssey 1.148	Εὐρύκλειʼ, Ὦπος θυγάτηρ Πεισηνορίδαο·
Odyssey 1.149	ἀγρεῖθʼ, αἱ μὲν δῶμα κορήσατε ποιπνύσασαι,
Odyssey 1.150	ῥάσσατέ τʼ, ἔν τε θρόνοις εὐποιήτοισι τάπητας
Odyssey 1.151	βάλλετε πορφυρέους· αἱ δὲ σπόγγοισι τραπέζας
Odyssey 1.152	πάσας ἀμφιμάσασθε, καθήρατε δὲ κρητῆρας
Odyssey 1.153	καὶ δέπα ἀμφικύπελλα τετυγμένα· ταὶ δὲ μεθʼ ὕδωρ
Odyssey 1.154	ἔρχεσθε κρήνηνδε, καὶ οἴσετε θᾶσσον ἰοῦσαι.
Odyssey 1.155	οὐ γὰρ δὴν μνηστῆρες ἀπέσσονται μεγάροιο,
Odyssey 1.156	ἀλλὰ μάλʼ ἦρι νέονται, ἐπεὶ καὶ πᾶσιν ἑορτή.
Odyssey 1.157	ὣς ἔφαθʼ, αἱ δʼ ἄρα τῆς μάλα μὲν κλύον ἠδʼ ἐπίθοντο.
Odyssey 1.158	αἱ μὲν ἐείκοσι βῆσαν ἐπὶ κρήνην μελάνυδρον,
Odyssey 1.159	αἱ δʼ αὐτοῦ κατὰ δώματʼ ἐπισταμένως πονέοντο.
Odyssey 1.160	ἐς δʼ ἦλθον δρηστῆρες Ἀχαιῶν. οἱ μὲν ἔπειτα
Odyssey 1.161	εὖ καὶ ἐπισταμένως κέασαν ξύλα, ταὶ δὲ γυναῖκες
Odyssey 1.162	ἦλθον ἀπὸ κρήνης· ἐπὶ δέ σφισιν ἦλθε συβώτης
Odyssey 1.163	τρεῖς σιάλους κατάγων, οἳ ἔσαν μετὰ πᾶσιν ἄριστοι.
Odyssey 1.164	καὶ τοὺς μέν ῥʼ εἴασε καθʼ ἕρκεα καλὰ νέμεσθαι,
Odyssey 1.165	αὐτὸς δʼ αὖτʼ Ὀδυσῆα προσηύδα μειλιχίοισι·
Odyssey 1.166	ξεῖνʼ, ἦ ἄρ τί σε μᾶλλον Ἀχαιοὶ εἰσορόωσιν,
Odyssey 1.167	ἦέ σʼ ἀτιμάζουσι κατὰ μέγαρʼ, ὡς τὸ πάρος περ;
Odyssey 1.168	τὸν δʼ ἀπαμειβόμενος προσέφη πολυμήτις Ὀδυσσεύς·
Odyssey 1.169	αἲ γὰρ δή, Εὔμαιε, θεοὶ τισαίατο λώβην,
Odyssey 1.170	ἣν οἵδʼ ὑβρίζοντες ἀτάσθαλα μηχανόωνται
Odyssey 1.171	οἴκῳ ἐν ἀλλοτρίῳ, οὐδʼ αἰδοῦς μοῖραν ἔχουσιν.
Odyssey 1.172	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.173	ἀγχίμολον δέ σφʼ ἦλθε Μελάνθιος, αἰπόλος αἰγῶν.
Odyssey 1.174	αἶγας ἄγων αἳ πᾶσι μετέπρεπον αἰπολίοισι,
Odyssey 1.175	δεῖπνον μνηστήρεσσι. δύω δʼ ἅμʼ ἕποντο νομῆες.
Odyssey 1.176	καὶ τὰς μὲν κατέδησεν ὑπʼ αἰθούσῃ ἐριδούπῳ,
Odyssey 1.177	αὐτὸς δʼ αὖτʼ Ὀδυσῆα προσηύδα κερτομίοισι·
Odyssey 1.178	ξεῖνʼ, ἔτι καὶ νῦν ἐνθάδʼ ἀνιήσεις κατὰ δῶμα
Odyssey 1.179	ἀνέρας αἰτίζων, ἀτὰρ οὐκ ἔξεισθα θύραζε;
Odyssey 1.180	πάντως οὐκέτι νῶϊ διακρινέεσθαι ὀΐω
Odyssey 1.181	πρὶν χειρῶν γεύσασθαι, ἐπεὶ σύ περ οὐ κατὰ κόσμον
Odyssey 1.182	αἰτίζεις· εἰσὶν δὲ καὶ ἄλλαι δαῖτες Ἀχαιῶν.
Odyssey 1.183	ὣς φάτο, τὸν δʼ οὔ τι προσέφη πολύμητις Ὀδυσσεύς,
Odyssey 1.184	ἀλλʼ ἀκέων κίνησε κάρη, κακὰ βυσσοδομεύων.
Odyssey 1.185	τοῖσι δʼ ἐπὶ τρίτος ἦλθε Φιλοίτιος, ὄρχαμος ἀνδρῶν,
Odyssey 1.186	βοῦν στεῖραν μνηστῆρσιν ἄγων καὶ πίονας αἶγας.
Odyssey 1.187	πορθμῆες δʼ ἄρα τούς γε διήγαγον, οἵ τε καὶ ἄλλους
Odyssey 1.188	ἀνθρώπους πέμπουσιν, ὅτις σφέας εἰσαφίκηται.
Odyssey 1.189	καὶ τὰ μὲν εὖ κατέδησεν ὑπʼ αἰθούσῃ ἐριδούπῳ,
Odyssey 1.190	αὐτὸς δʼ αὖτʼ ἐρέεινε συβώτην ἄγχι παραστάς·
Odyssey 1.191	τίς δὴ ὅδε ξεῖνος νέον εἰλήλουθε, συβῶτα,
Odyssey 1.192	ἡμέτερον πρὸς δῶμα; τέων δʼ ἐξ εὔχεται εἶναι
Odyssey 1.193	ἀνδρῶν; ποῦ δέ νύ οἱ γενεὴ καὶ πατρὶς ἄρουρα;
Odyssey 1.194	δύσμορος, ἦ τε ἔοικε δέμας βασιλῆϊ ἄνακτι·
Odyssey 1.195	ἀλλὰ θεοὶ δυόωσι πολυπλάγκτους ἀνθρώπους,
Odyssey 1.196	ὁππότε καὶ βασιλεῦσιν ἐπικλώσωνται ὀϊζύν.
Odyssey 1.197	ἦ καὶ δεξιτερῇ δειδίσκετο χειρὶ παραστάς,
Odyssey 1.198	καί μιν φωνήσας ἔπεα πτερόεντα προσηύδα·
Odyssey 1.199	χαῖρε, πάτερ ὦ ξεῖνε· γένοιτό τοι ἔς περ ὀπίσσω
Odyssey 1.200	ὄλβος· ἀτὰρ μὲν νῦν γε κακοῖς ἔχεαι πολέεσσι.
Odyssey 1.201	Ζεῦ πάτερ, οὔ τις σεῖο θεῶν ὀλοώτερος ἄλλος·
Odyssey 1.202	οὐκ ἐλεαίρεις ἄνδρας, ἐπὴν δὴ γείνεαι αὐτός,
Odyssey 1.203	μισγέμεναι κακότητι καὶ ἄλγεσι λευγαλέοισιν.
Odyssey 1.204	ἴδιον, ὡς ἐνόησα, δεδάκρυνται δέ μοι ὄσσε
Odyssey 1.205	μνησαμένῳ Ὀδυσῆος, ἐπεὶ καὶ κεῖνον ὀΐω
Odyssey 1.206	τοιάδε λαίφεʼ ἔχοντα κατʼ ἀνθρώπους ἀλάλησθαι,
Odyssey 1.207	εἴ που ἔτι ζώει καὶ ὁρᾷ φάος ἠελίοιο.
Odyssey 1.208	εἰ δʼ ἤδη τέθνηκε καὶ εἰν Ἀΐδαο δόμοισιν,
Odyssey 1.209	ὤ μοι ἔπειτʼ Ὀδυσῆος ἀμύμονος, ὅς μʼ ἐπὶ βουσὶν
Odyssey 1.210	εἷσʼ ἔτι τυτθὸν ἐόντα Κεφαλλήνων ἐνὶ δήμῳ.
Odyssey 1.211	νῦν δʼ αἱ μὲν γίγνονται ἀθέσφατοι, οὐδέ κεν ἄλλως
Odyssey 1.212	ἀνδρί γʼ ὑποσταχύοιτο βοῶν γένος εὐρυμετώπων·
Odyssey 1.213	τὰς δʼ ἄλλοι με κέλονται ἀγινέμεναί σφισιν αὐτοῖς
Odyssey 1.214	ἔδμεναι· οὐδέ τι παιδὸς ἐνὶ μεγάροις ἀλέγουσιν,
Odyssey 1.215	οὐδʼ ὄπιδα τρομέουσι θεῶν· μεμάασι γὰρ ἤδη
Odyssey 1.216	κτήματα δάσσασθαι δὴν οἰχομένοιο ἄνακτος.
Odyssey 1.217	αὐτὰρ ἐμοὶ τόδε θυμὸς ἐνὶ στήθεσσι φίλοισι
Odyssey 1.218	πόλλʼ ἐπιδινεῖται· μάλα μὲν κακὸν υἷος ἐόντος
Odyssey 1.219	ἄλλων δῆμον ἱκέσθαι ἰόντʼ αὐτῇσι βόεσσιν,
Odyssey 1.220	ἄνδρας ἐς ἀλλοδαπούς· τὸ δὲ ῥίγιον, αὖθι μένοντα
Odyssey 1.221	βουσὶν ἐπʼ ἀλλοτρίῃσι καθήμενον ἄλγεα πάσχειν.
Odyssey 1.222	καί κεν δὴ πάλαι ἄλλον ὑπερμενέων βασιλήων
Odyssey 1.223	ἐξικόμην φεύγων, ἐπεὶ οὐκέτʼ ἀνεκτὰ πέλονται·
Odyssey 1.224	ἀλλʼ ἔτι τὸν δύστηνον ὀΐομαι, εἴ ποθεν ἐλθὼν
Odyssey 1.225	ἀνδρῶν μνηστήρων σκέδασιν κατὰ δώματα θείῃ.
Odyssey 1.226	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.227	βουκόλʼ, ἐπεὶ οὔτε κακῷ οὔτʼ ἄφρονι φωτὶ ἔοικας,
Odyssey 1.228	γιγνώσκω δὲ καὶ αὐτὸς ὅ τοι πινυτὴ φρένας ἵκει,
Odyssey 1.229	τοὔνεκά τοι ἐρέω καὶ ἐπὶ μέγαν ὅρκον ὀμοῦμαι·
Odyssey 1.230	ἴστω νῦν Ζεὺς πρῶτα θεῶν ξενίη τε τράπεζα
Odyssey 1.231	ἱστίη τʼ Ὀδυσῆος ἀμύμονος, ἣν ἀφικάνω,
Odyssey 1.232	ἦ σέθεν ἐνθάδʼ ἐόντος ἐλεύσεται οἴκαδʼ Ὀδυσσεύς·
Odyssey 1.233	σοῖσιν δʼ ὀφθαλμοῖσιν ἐπόψεαι, αἴ κʼ ἐθέλῃσθα,
Odyssey 1.234	κτεινομένους μνηστῆρας, οἳ ἐνθάδε κοιρανέουσιν.
Odyssey 1.235	τὸν δʼ αὖτε προσέειπε βοῶν ἐπιβουκόλος ἀνήρ·
Odyssey 1.236	αἲ γὰρ τοῦτο, ξεῖνε, ἔπος τελέσειε Κρονίων·
Odyssey 1.237	γνοίης χʼ οἵη ἐμὴ δύναμις καὶ χεῖρες ἕπονται.
Odyssey 1.238	ὣς δʼ αὔτως Εὔμαιος ἐπεύξατο πᾶσι θεοῖσι
Odyssey 1.239	νοστῆσαι Ὀδυσῆα πολύφρονα ὅνδε δόμονδε.
Odyssey 1.240	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.241	μνηστῆρες δʼ ἄρα Τηλεμάχῳ θάνατόν τε μόρον τε
Odyssey 1.242	ἤρτυον· αὐτὰρ ὁ τοῖσιν ἀριστερὸς ἤλυθεν ὄρνις,
Odyssey 1.243	αἰετὸς ὑψιπέτης, ἔχε δὲ τρήρωνα πέλειαν.
Odyssey 1.244	τοῖσιν δʼ Ἀμφίνομος ἀγορήσατο καὶ μετέειπεν·
Odyssey 1.245	ὦ φίλοι, οὐχ ἡμῖν συνθεύσεται ἥδε γε βουλή,
Odyssey 1.246	Τηλεμάχοιο φόνος· ἀλλὰ μνησώμεθα δαιτός.
Odyssey 1.247	ὣς ἔφατʼ Ἀμφίνομος, τοῖσιν δʼ ἐπιήνδανε μῦθος.
Odyssey 1.248	ἐλθόντες δʼ ἐς δώματʼ Ὀδυσσῆος θείοιο
Odyssey 1.249	χλαίνας μὲν κατέθεντο κατὰ κλισμούς τε θρόνους τε,
Odyssey 1.250	οἱ δʼ ἱέρευον ὄϊς μεγάλους καὶ πίονας αἶγας,
Odyssey 1.251	ἵρευον δὲ σύας σιάλους καὶ βοῦν ἀγελαίην·
Odyssey 1.252	σπλάγχνα δʼ ἄρʼ ὀπτήσαντες ἐνώμων, ἐν δέ τε οἶνον
Odyssey 1.253	κρητῆρσιν κερόωντο· κύπελλα δὲ νεῖμε συβώτης.
Odyssey 1.254	σῖτον δέ σφʼ ἐπένειμε Φιλοίτιος, ὄρχαμος ἀνδρῶν,
Odyssey 1.255	καλοῖς ἐν κανέοισιν, ἐῳνοχόει δὲ Μελανθεύς.
Odyssey 1.256	οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Odyssey 1.257	Τηλέμαχος δʼ Ὀδυσῆα καθίδρυε, κέρδεα νωμῶν,
Odyssey 1.258	ἐντὸς ἐϋσταθέος μεγάρου, παρὰ λάϊνον οὐδόν,
Odyssey 1.259	δίφρον ἀεικέλιον καταθεὶς ὀλίγην τε τράπεζαν·
Odyssey 1.260	πὰρ δʼ ἐτίθει σπλάγχνων μοίρας, ἐν δʼ οἶνον ἔχευεν
Odyssey 1.261	ἐν δέπαϊ χρυσέῳ, καί μιν πρὸς μῦθον ἔειπεν·
Odyssey 1.262	ἐνταυθοῖ νῦν ἧσο μετʼ ἀνδράσιν οἰνοποτάζων·
Odyssey 1.263	κερτομίας δέ τοι αὐτὸς ἐγὼ καὶ χεῖρας ἀφέξω
Odyssey 1.264	πάντων μνηστήρων, ἐπεὶ οὔ τοι δήμιός ἐστιν
Odyssey 1.265	οἶκος ὅδʼ, ἀλλʼ Ὀδυσῆος, ἐμοὶ δʼ ἐκτήσατο κεῖνος.
Odyssey 1.266	ὑμεῖς δέ, μνηστῆρες, ἐπίσχετε θυμὸν ἐνιπῆς
Odyssey 1.267	καὶ χειρῶν, ἵνα μή τις ἔρις καὶ νεῖκος ὄρηται.
Odyssey 1.268	ὣς ἔφαθʼ, οἱ δʼ ἄρα πάντες ὀδὰξ ἐν χείλεσι φύντες
Odyssey 1.269	Τηλέμαχον θαύμαζον, ὃ θαρσαλέως ἀγόρευε.
Odyssey 1.270	τοῖσιν δʼ Ἀντίνοος μετέφη, Εὐπείθεος υἱός·
Odyssey 1.271	καὶ χαλεπόν περ ἐόντα δεχώμεθα μῦθον, Ἀχαιοί,
Odyssey 1.272	Τηλεμάχου· μάλα δʼ ἧμιν ἀπειλήσας ἀγορεύει.
Odyssey 1.273	οὐ γὰρ Ζεὺς εἴασε Κρονίων· τῷ κέ μιν ἤδη
Odyssey 1.274	παύσαμεν ἐν μεγάροισι, λιγύν περ ἐόντʼ ἀγορητήν.
Odyssey 1.275	ὣς ἔφατʼ Ἀντίνοος· ὁ δʼ ἄρʼ οὐκ ἐμπάζετο μύθων.
Odyssey 1.276	κήρυκες δʼ ἀνὰ ἄστυ θεῶν ἱερὴν ἑκατόμβην
Odyssey 1.277	ἦγον· τοὶ δʼ ἀγέροντο κάρη κομόωντες Ἀχαιοὶ
Odyssey 1.278	ἄλσος ὕπο σκιερὸν ἑκατηβόλου Ἀπόλλωνος.
Odyssey 1.279	οἱ δʼ ἐπεὶ ὤπτησαν κρέʼ ὑπέρτερα καὶ ἐρύσαντο,
Odyssey 1.280	μοίρας δασσάμενοι δαίνυντʼ ἐρικυδέα δαῖτα·
Odyssey 1.281	πὰρ δʼ ἄρʼ Ὀδυσσῆϊ μοῖραν θέσαν οἳ πονέοντο
Odyssey 1.282	ἴσην, ὡς αὐτοί περ ἐλάγχανον· ὣς γὰρ ἀνώγει
Odyssey 1.283	Τηλέμαχος, φίλος υἱὸς Ὀδυσσῆος θείοιο.
Odyssey 1.284	μνηστῆρας δʼ οὐ πάμπαν ἀγήνορας εἴα Ἀθήνη
Odyssey 1.285	λώβης ἴσχεσθαι θυμαλγέος, ὄφρʼ ἔτι μᾶλλον
Odyssey 1.286	δύη ἄχος κραδίην Λαερτιάδην Ὀδυσῆα.
Odyssey 1.287	ἦν δέ τις ἐν μνηστῆρσιν ἀνὴρ ἀθεμίστια εἰδώς,
Odyssey 1.288	Κτήσιππος δʼ ὄνομʼ ἔσκε, Σάμῃ δʼ ἐνὶ οἰκία ναῖεν·
Odyssey 1.289	ὃς δή τοι κτεάτεσσι πεποιθὼς θεσπεσίοισι
Odyssey 1.290	μνάσκετʼ Ὀδυσσῆος δὴν οἰχομένοιο δάμαρτα.
Odyssey 1.291	ὅς ῥα τότε μνηστῆρσιν ὑπερφιάλοισι μετηύδα·
Odyssey 1.292	κέκλυτέ μευ, μνηστῆρες ἀγήνορες, ὄφρα τι εἴπω·
Odyssey 1.293	μοῖραν μὲν δὴ ξεῖνος ἔχει πάλαι, ὡς ἐπέοικεν,
Odyssey 1.294	ἴσην· οὐ γὰρ καλὸν ἀτέμβειν οὐδὲ δίκαιον
Odyssey 1.295	ξείνους Τηλεμάχου, ὅς κεν τάδε δώμαθʼ ἵκηται.
Odyssey 1.296	ἀλλʼ ἄγε οἱ καὶ ἐγὼ δῶ ξείνιον, ὄφρα καὶ αὐτὸς
Odyssey 1.297	ἠὲ λοετροχόῳ δώῃ γέρας ἠέ τῳ ἄλλῳ
Odyssey 1.298	δμώων, οἳ κατὰ δώματʼ Ὀδυσσῆος θείοιο.
Odyssey 1.299	ὣς εἰπὼν ἔρριψε βοὸς πόδα χειρὶ παχείῃ.
Odyssey 1.300	κείμενον ἐκ κανέοιο λαβών· ὁ δʼ ἀλεύατʼ Ὀδυσσεὺς
Odyssey 1.301	ἦκα παρακλίνας κεφαλήν, μείδησε δὲ θυμῷ
Odyssey 1.302	σαρδάνιον μάλα τοῖον· ὁ δʼ εὔδμητον βάλε τοῖχον.
Odyssey 1.303	Κτήσιππον δʼ ἄρα Τηλέμαχος ἠνίπαπε μύθῳ·
Odyssey 1.304	Κτήσιππʼ, ἦ μάλα τοι τόδε κέρδιον ἔπλετο θυμῷ·
Odyssey 1.305	οὐκ ἔβαλες τὸν ξεῖνον· ἀλεύατο γὰρ βέλος αὐτός.
Odyssey 1.306	ἦ γάρ κέν σε μέσον βάλον ἔγχεϊ ὀξυόεντι,
Odyssey 1.307	καί κέ τοι ἀντὶ γάμοιο πατὴρ τάφον ἀμφεπονεῖτο
Odyssey 1.308	ἐνθάδε. τῷ μή τίς μοι ἀεικείας ἐνὶ οἴκῳ
Odyssey 1.309	φαινέτω· ἤδη γὰρ νοέω καὶ οἶδα ἕκαστα,
Odyssey 1.310	ἐσθλά τε καὶ τὰ χέρηα· πάρος δʼ ἔτι νήπιος ἦα.
Odyssey 1.311	ἀλλʼ ἔμπης τάδε μὲν καὶ τέτλαμεν εἰσορόωντες,
Odyssey 1.312	μήλων σφαζομένων οἴνοιό τε πινομένοιο
Odyssey 1.313	καὶ σίτου· χαλεπὸν γὰρ ἐρυκακέειν ἕνα πολλούς.
Odyssey 1.314	ἀλλʼ ἄγε μηκέτι μοι κακὰ ῥέζετε δυσμενέοντες·
Odyssey 1.315	εἰ δʼ ἤδη μʼ αὐτὸν κτεῖναι μενεαίνετε χαλκῷ,
Odyssey 1.316	καί κε τὸ βουλοίμην, καί κεν πολὺ κέρδιον εἴη
Odyssey 1.317	τεθνάμεν ἢ τάδε γʼ αἰὲν ἀεικέα ἔργʼ ὁράασθαι,
Odyssey 1.318	ξείνους τε στυφελιζομένους δμῳάς τε γυναῖκας
Odyssey 1.319	ῥυστάζοντας ἀεικελίως κατὰ δώματα καλά.
Odyssey 1.320	ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ·
Odyssey 1.321	ὀψὲ δὲ δὴ μετέειπε Δαμαστορίδης Ἀγέλαος·
Odyssey 1.322	ὦ φίλοι, οὐκ ἂν δή τις ἐπὶ ῥηθέντι δικαίῳ
Odyssey 1.323	ἀντιβίοις ἐπέεσσι καθαπτόμενος χαλεπαίνοι·
Odyssey 1.324	μήτε τι τὸν ξεῖνον στυφελίζετε μήτε τινʼ ἄλλον
Odyssey 1.325	δμώων, οἳ κατὰ δώματʼ Ὀδυσσῆος θείοιο.
Odyssey 1.326	Τηλεμάχῳ δέ κε μῦθον ἐγὼ καὶ μητέρι φαίην
Odyssey 1.327	ἤπιον, εἴ σφωϊν κραδίῃ ἅδοι ἀμφοτέροιϊν.
Odyssey 1.328	ὄφρα μὲν ὑμῖν θυμὸς ἐνὶ στήθεσσιν ἐώλπει
Odyssey 1.329	νοστήσειν Ὀδυσῆα πολύφρονα ὅνδε δόμονδε,
Odyssey 1.330	τόφρʼ οὔ τις νέμεσις μενέμεν τʼ ἦν ἰσχέμεναί τε
Odyssey 1.331	μνηστῆρας κατὰ δώματʼ, ἐπεὶ τόδε κέρδιον ἦεν,
Odyssey 1.332	εἰ νόστησʼ Ὀδυσεὺς καὶ ὑπότροπος ἵκετο δῶμα·
Odyssey 1.333	νῦν δʼ ἤδη τόδε δῆλον, ὅ τʼ οὐκέτι νόστιμός ἐστιν.
Odyssey 1.334	ἀλλʼ ἄγε, σῇ τάδε μητρὶ παρεζόμενος κατάλεξον,
Odyssey 1.335	γήμασθʼ ὅς τις ἄριστος ἀνὴρ καὶ πλεῖστα πόρῃσιν,
Odyssey 1.336	ὄφρα σὺ μὲν χαίρων πατρώϊα πάντα νέμηαι,
Odyssey 1.337	ἔσθων καὶ πίνων, ἡ δʼ ἄλλου δῶμα κομίζῃ.
Odyssey 1.338	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.339	οὐ μὰ Ζῆνʼ, Ἀγέλαε, καὶ ἄλγεα πατρὸς ἐμοῖο,
Odyssey 1.340	ὅς που τῆλʼ Ἰθάκης ἢ ἔφθιται ἢ ἀλάληται,
Odyssey 1.341	οὔ τι διατρίβω μητρὸς γάμον, ἀλλὰ κελεύω
Odyssey 1.342	γήμασθʼ ᾧ κʼ ἐθέλῃ, ποτὶ δʼ ἄσπετα δῶρα δίδωμι.
Odyssey 1.343	αἰδέομαι δʼ ἀέκουσαν ἀπὸ μεγάροιο δίεσθαι
Odyssey 1.344	μύθῳ ἀναγκαίῳ· μὴ τοῦτο θεὸς τελέσειεν.
Odyssey 1.345	ὣς φάτο Τηλέμαχος· μνηστῆρσι δὲ Παλλὰς Ἀθήνη
Odyssey 1.346	ἄσβεστον γέλω ὦρσε, παρέπλαγξεν δὲ νόημα.
Odyssey 1.347	οἱ δʼ ἤδη γναθμοῖσι γελοίων ἀλλοτρίοισιν,
Odyssey 1.348	αἱμοφόρυκτα δὲ δὴ κρέα ἤσθιον· ὄσσε δʼ ἄρα σφέων
Odyssey 1.349	δακρυόφιν πίμπλαντο, γόον δʼ ὠΐετο θυμός.
Odyssey 1.350	τοῖσι δὲ καὶ μετέειπε Θεοκλύμενος θεοειδής·
Odyssey 1.351	ἆ δειλοί, τί κακὸν τόδε πάσχετε; νυκτὶ μὲν ὑμέων
Odyssey 1.352	εἰλύαται κεφαλαί τε πρόσωπά τε νέρθε τε γοῦνα.
Odyssey 1.353	οἰμωγὴ δὲ δέδηε, δεδάκρυνται δὲ παρειαί,
Odyssey 1.354	αἵματι δʼ ἐρράδαται τοῖχοι καλαί τε μεσόδμαι·
Odyssey 1.355	εἰδώλων δὲ πλέον πρόθυρον, πλείη δὲ καὶ αὐλή,
Odyssey 1.356	ἱεμένων Ἔρεβόσδε ὑπὸ ζόφον· ἠέλιος δὲ
Odyssey 1.357	οὐρανοῦ ἐξαπόλωλε, κακὴ δʼ ἐπιδέδρομεν ἀχλύς.
Odyssey 1.358	ὣς ἔφαθʼ, οἱ δʼ ἄρα πάντες ἐπʼ αὐτῷ ἡδὺ γέλασσαν.
Odyssey 1.359	τοῖσιν δʼ Εὐρύμαχος, Πολύβου πάϊς, ἦρχʼ ἀγορεύειν·
Odyssey 1.360	ἀφραίνει ξεῖνος νέον ἄλλοθεν εἰληλουθώς.
Odyssey 1.361	ἀλλά μιν αἶψα, νέοι, δόμου ἐκπέμψασθε θύραζε
Odyssey 1.362	εἰς ἀγορὴν ἔρχεσθαι, ἐπεὶ τάδε νυκτὶ ἐΐσκει.
Odyssey 1.363	τὸν δʼ αὖτε προσέειπε Θεοκλύμενος θεοειδής·
Odyssey 1.364	Εὐρύμαχʼ, οὔ τί σʼ ἄνωγα ἐμοὶ πομπῆας ὀπάζειν·
Odyssey 1.365	εἰσί μοι ὀφθαλμοί τε καὶ οὔατα καὶ πόδες ἄμφω
Odyssey 1.366	καὶ νόος ἐν στήθεσσι τετυγμένος οὐδὲν ἀεικής.
Odyssey 1.367	τοῖς ἔξειμι θύραζε, ἐπεὶ νοέω κακὸν ὔμμιν
Odyssey 1.368	ἐρχόμενον, τό κεν οὔ τις ὑπεκφύγοι οὐδʼ ἀλέαιτο
Odyssey 1.369	μνηστήρων, οἳ δῶμα κάτʼ ἀντιθέου Ὀδυσῆος
Odyssey 1.370	ἀνέρας ὑβρίζοντες ἀτάσθαλα μηχανάασθε.
Odyssey 1.371	ὣς εἰπὼν ἐξῆλθε δόμων εὖ ναιεταόντων,
Odyssey 1.372	ἵκετο δʼ ἐς Πείραιον, ὅ μιν πρόφρων ὑπέδεκτο.
Odyssey 1.373	μνηστῆρες δʼ ἄρα πάντες ἐς ἀλλήλους ὁρόωντες
Odyssey 1.374	Τηλέμαχον ἐρέθιζον, ἐπὶ ξείνοις γελόωντες·
Odyssey 1.375	ὧδε δέ τις εἴπεσκε νέων ὑπερηνορεόντων·
Odyssey 1.376	Τηλέμαχʼ, οὔ τις σεῖο κακοξεινώτερος ἄλλος·
Odyssey 1.377	οἷον μέν τινα τοῦτον ἔχεις ἐπίμαστον ἀλήτην,
Odyssey 1.378	σίτου καὶ οἴνου κεχρημένον, οὐδέ τι ἔργων
Odyssey 1.379	ἔμπαιον οὐδὲ βίης, ἀλλʼ αὔτως ἄχθος ἀρούρης.
Odyssey 1.380	ἄλλος δʼ αὖτέ τις οὗτος ἀνέστη μαντεύεσθαι.
Odyssey 1.381	ἀλλʼ εἴ μοί τι πίθοιο, τό κεν πολὺ κέρδιον εἴη·
Odyssey 1.382	τοὺς ξείνους ἐν νηῒ πολυκληῗδι βαλόντες
Odyssey 1.383	ἐς Σικελοὺς πέμψωμεν, ὅθεν κέ τοι ἄξιον ἄλφοι.
Odyssey 1.384	ὣς ἔφασαν μνηστῆρες· ὁ δʼ οὐκ ἐμπάζετο μύθων,
Odyssey 1.385	ἀλλʼ ἀκέων πατέρα προσεδέρκετο, δέγμενος αἰεί,
Odyssey 1.386	ὁππότε δὴ μνηστῆρσιν ἀναιδέσι χεῖρας ἐφήσει.
Odyssey 1.387	ἡ δὲ κατʼ ἄντηστιν θεμένη περικαλλέα δίφρον
Odyssey 1.388	κούρη Ἰκαρίοιο, περίφρων Πηνελόπεια,
Odyssey 1.389	ἀνδρῶν ἐν μεγάροισιν ἑκάστου μῦθον ἄκουεν.
Odyssey 1.390	δεῖπνον μὲν γάρ τοί γε γελοίωντες τετύκοντο
Odyssey 1.391	ἡδὺ τε καὶ μενοεικές, ἐπεὶ μάλα πόλλʼ ἱέρευσαν·
Odyssey 1.392	δόρπου δʼ οὐκ ἄν πως ἀχαρίστερον ἄλλο γένοιτο,
Odyssey 1.393	οἷον δὴ τάχʼ ἔμελλε θεὰ καὶ καρτερὸς ἀνὴρ
Odyssey 1.394	θησέμεναι· πρότεροι γὰρ ἀεικέα μηχανόωντο.
Odyssey 1.1	τῇ δʼ ἄρʼ ἐπὶ φρεσὶ θῆκε θεὰ γλαυκῶπις Ἀθήνη,
Odyssey 1.2	κούρῃ Ἰκαρίοιο, περίφρονι Πηνελοπείῃ,
Odyssey 1.3	τόξον μνηστήρεσσι θέμεν πολιόν τε σίδηρον
Odyssey 1.4	ἐν μεγάροις Ὀδυσῆος, ἀέθλια καὶ φόνου ἀρχήν.
Odyssey 1.5	κλίμακα δʼ ὑψηλὴν προσεβήσετο οἷο δόμοιο,
Odyssey 1.6	εἵλετο δὲ κληῗδʼ εὐκαμπέα χειρὶ παχείῃ
Odyssey 1.7	καλὴν χαλκείην· κώπη δʼ ἐλέφαντος ἐπῆεν.
Odyssey 1.8	βῆ δʼ ἴμεναι θάλαμόνδε σὺν ἀμφιπόλοισι γυναιξὶν
Odyssey 1.9	ἔσχατον· ἔνθα δέ οἱ κειμήλια κεῖτο ἄνακτος,
Odyssey 1.10	χαλκός τε χρυσός τε πολύκμητός τε σίδηρος.
Odyssey 1.11	ἔνθα δὲ τόξον κεῖτο παλίντονον ἠδὲ φαρέτρη
Odyssey 1.12	ἰοδόκος, πολλοὶ δʼ ἔνεσαν στονόεντες ὀϊστοί,
Odyssey 1.13	δῶρα τά οἱ ξεῖνος Λακεδαίμονι δῶκε τυχήσας
Odyssey 1.14	Ἴφιτος Εὐρυτίδης, ἐπιείκελος ἀθανάτοισι.
Odyssey 1.15	τὼ δʼ ἐν Μεσσήνῃ ξυμβλήτην ἀλλήλοιϊν
Odyssey 1.16	οἴκῳ ἐν Ὀρτιλόχοιο δαΐφρονος. ἦ τοι Ὀδυσσεὺς
Odyssey 1.17	ἦλθε μετὰ χρεῖος, τό ῥά οἱ πᾶς δῆμος ὄφελλε·
Odyssey 1.18	μῆλα γὰρ ἐξ Ἰθάκης Μεσσήνιοι ἄνδρες ἄειραν
Odyssey 1.19	νηυσὶ πολυκλήϊσι τριηκόσιʼ ἠδὲ νομῆας.
Odyssey 1.20	τῶν ἕνεκʼ ἐξεσίην πολλὴν ὁδὸν ἦλθεν Ὀδυσσεὺς
Odyssey 1.21	παιδνὸς ἐών· πρὸ γὰρ ἧκε πατὴρ ἄλλοι τε γέροντες.
Odyssey 1.22	Ἴφιτος αὖθʼ ἵππους διζήμενος, αἵ οἱ ὄλοντο
Odyssey 1.23	δώδεκα θήλειαι, ὑπὸ δʼ ἡμίονοι ταλαεργοί·
Odyssey 1.24	αἳ δή οἱ καὶ ἔπειτα φόνος καὶ μοῖρα γένοντο,
Odyssey 1.25	ἐπεὶ δὴ Διὸς υἱὸν ἀφίκετο καρτερόθυμον,
Odyssey 1.26	φῶθʼ Ἡρακλῆα, μεγάλων ἐπιίστορα ἔργων,
Odyssey 1.27	ὅς μιν ξεῖνον ἐόντα κατέκτανεν ᾧ ἐνὶ οἴκῳ,
Odyssey 1.28	σχέτλιος, οὐδὲ θεῶν ὄπιν ᾐδέσατʼ οὐδὲ τράπεζαν,
Odyssey 1.29	τὴν ἥν οἱ παρέθηκεν· ἔπειτα δὲ πέφνε καὶ αὐτόν,
Odyssey 1.30	ἵππους δʼ αὐτὸς ἔχε κρατερώνυχας ἐν μεγάροισι.
Odyssey 1.31	τὰς ἐρέων Ὀδυσῆϊ συνήντετο, δῶκε δὲ τόξον,
Odyssey 1.32	τὸ πρὶν μέν ῥʼ ἐφόρει μέγας Εὔρυτος, αὐτὰρ ὁ παιδὶ
Odyssey 1.33	κάλλιπʼ ἀποθνῄσκων ἐν δώμασιν ὑψηλοῖσι.
Odyssey 1.34	τῷ δʼ Ὀδυσεὺς ξίφος ὀξὺ καὶ ἄλκιμον ἔγχος ἔδωκεν,
Odyssey 1.35	ἀρχὴν ξεινοσύνης προσκηδέος· οὐδὲ τραπέζῃ
Odyssey 1.36	γνώτην ἀλλήλων· πρὶν γὰρ Διὸς υἱὸς ἔπεφνεν
Odyssey 1.37	Ἴφιτον Εὐρυτίδην, ἐπιείκελον ἀθανάτοισιν,
Odyssey 1.38	ὅς οἱ τόξον ἔδωκε. τὸ δʼ οὔ ποτε δῖος Ὀδυσσεὺς
Odyssey 1.39	ἐρχόμενος πόλεμόνδε μελαινάων ἐπὶ νηῶν
Odyssey 1.40	ᾑρεῖτʼ, ἀλλʼ αὐτοῦ μνῆμα ξείνοιο φίλοιο
Odyssey 1.41	κέσκετʼ ἐνὶ μεγάροισι, φόρει δέ μιν ἧς ἐπὶ γαίης.
Odyssey 1.42	ἡ δʼ ὅτε δὴ θάλαμον τὸν ἀφίκετο δῖα γυναικῶν
Odyssey 1.43	οὐδόν τε δρύϊνον προσεβήσετο, τόν ποτε τέκτων
Odyssey 1.44	ξέσσεν ἐπισταμένως καὶ ἐπὶ στάθμην ἴθυνεν,
Odyssey 1.45	ἐν δὲ σταθμοὺς ἄρσε, θύρας δʼ ἐπέθηκε φαεινάς,
Odyssey 1.46	αὐτίκʼ ἄρʼ ἥ γʼ ἱμάντα θοῶς ἀπέλυσε κορώνης,
Odyssey 1.47	ἐν δὲ κληῗδʼ ἧκε, θυρέων δʼ ἀνέκοπτεν ὀχῆας
Odyssey 1.48	ἄντα τιτυσκομένη· τὰ δʼ ἀνέβραχεν ἠΰτε ταῦρος
Odyssey 1.49	βοσκόμενος λειμῶνι· τόσʼ ἔβραχε καλὰ θύρετρα
Odyssey 1.50	πληγέντα κληΐδι, πετάσθησαν δέ οἱ ὦκα.
Odyssey 1.51	ἡ δʼ ἄρʼ ἐφʼ ὑψηλῆς σανίδος βῆ· ἔνθα δὲ χηλοὶ
Odyssey 1.52	ἕστασαν, ἐν δʼ ἄρα τῇσι θυώδεα εἵματʼ ἔκειτο.
Odyssey 1.53	ἔνθεν ὀρεξαμένη ἀπὸ πασσάλου αἴνυτο τόξον
Odyssey 1.54	αὐτῷ γωρυτῷ, ὅς οἱ περίκειτο φαεινός.
Odyssey 1.55	ἑζομένη δὲ κατʼ αὖθι, φίλοις ἐπὶ γούνασι θεῖσα,
Odyssey 1.56	κλαῖε μάλα λιγέως, ἐκ δʼ ᾕρεε τόξον ἄνακτος.
Odyssey 1.57	ἡ δʼ ἐπεὶ οὖν τάρφθη πολυδακρύτοιο γόοιο,
Odyssey 1.58	βῆ ῥʼ ἴμεναι μέγαρόνδε μετὰ μνηστῆρας ἀγαυοὺς
Odyssey 1.59	τόξον ἔχουσʼ ἐν χειρὶ παλίντονον ἠδὲ φαρέτρην
Odyssey 1.60	ἰοδόκον· πολλοὶ δʼ ἔνεσαν στονόεντες ὀϊστοί.
Odyssey 1.61	τῇ δʼ ἄρʼ ἅμʼ ἀμφίπολοι φέρον ὄγκιον, ἔνθα σίδηρος
Odyssey 1.62	κεῖτο πολὺς καὶ χαλκός, ἀέθλια τοῖο ἄνακτος.
Odyssey 1.63	ἡ δʼ ὅτε δὴ μνηστῆρας ἀφίκετο δῖα γυναικῶν,
Odyssey 1.64	στῆ ῥα παρὰ σταθμὸν τέγεος πύκα ποιητοῖο,
Odyssey 1.65	ἄντα παρειάων σχομένη λιπαρὰ κρήδεμνα.
Odyssey 1.66	ἀμφίπολος δʼ ἄρα οἱ κεδνὴ ἑκάτερθε παρέστη.
Odyssey 1.67	αὐτίκα δὲ μνηστῆρσι μετηύδα καὶ φάτο μῦθον·
Odyssey 1.68	κέκλυτέ μευ, μνηστῆρες ἀγήνορες, οἳ τόδε δῶμα
Odyssey 1.69	ἐχράετʼ ἐσθιέμεν καὶ πινέμεν ἐμμενὲς αἰεὶ
Odyssey 1.70	ἀνδρὸς ἀποιχομένοιο πολὺν χρόνον· οὐδέ τινʼ ἄλλην
Odyssey 1.71	μύθου ποιήσασθαι ἐπισχεσίην ἐδύνασθε,
Odyssey 1.72	ἀλλʼ ἐμὲ ἱέμενοι γῆμαι θέσθαι τε γυναῖκα.
Odyssey 1.73	ἀλλʼ ἄγετε, μνηστῆρες, ἐπεὶ τόδε φαίνετʼ ἄεθλον.
Odyssey 1.74	θήσω γὰρ μέγα τόξον Ὀδυσσῆος θείοιο·
Odyssey 1.75	ὃς δέ κε ῥηΐτατʼ ἐντανύσῃ βιὸν ἐν παλάμῃσι
Odyssey 1.76	καὶ διοϊστεύσῃ πελέκεων δυοκαίδεκα πάντων,
Odyssey 1.77	τῷ κεν ἅμʼ ἑσποίμην, νοσφισσαμένη τόδε δῶμα
Odyssey 1.78	κουρίδιον, μάλα καλόν, ἐνίπλειον βιότοιο,
Odyssey 1.79	τοῦ ποτὲ μεμνήσεσθαι ὀΐομαι ἔν περ ὀνείρῳ.
Odyssey 1.80	ὣς φάτο, καί ῥʼ Εὔμαιον ἀνώγει, δῖον ὑφορβόν,
Odyssey 1.81	τόξον μνηστήρεσσι θέμεν πολιόν τε σίδηρον.
Odyssey 1.82	δακρύσας δʼ Εὔμαιος ἐδέξατο καὶ κατέθηκε·
Odyssey 1.83	κλαῖε δὲ βουκόλος ἄλλοθʼ, ἐπεὶ ἴδε τόξον ἄνακτος.
Odyssey 1.84	Ἀντίνοος δʼ ἐνένιπεν ἔπος τʼ ἔφατʼ ἔκ τʼ ὀνόμαζε·
Odyssey 1.85	νήπιοι ἀγροιῶται, ἐφημέρια φρονέοντες,
Odyssey 1.86	ἆ δειλώ, τί νυ δάκρυ κατείβετον ἠδὲ γυναικὶ
Odyssey 1.87	θυμὸν ἐνὶ στήθεσσιν ὀρίνετον; ᾗ τε καὶ ἄλλως
Odyssey 1.88	κεῖται ἐν ἄλγεσι θυμός, ἐπεὶ φίλον ὤλεσʼ ἀκοίτην.
Odyssey 1.89	ἀλλʼ ἀκέων δαίνυσθε καθήμενοι, ἠὲ θύραζε
Odyssey 1.90	κλαίετον ἐξελθόντε, κατʼ αὐτόθι τόξα λιπόντε,
Odyssey 1.91	μνηστήρεσσιν ἄεθλον ἀάατον· οὐ γὰρ ὀΐω
Odyssey 1.92	ῥηϊδίως τόδε τόξον ἐΰξοον ἐντανύεσθαι.
Odyssey 1.93	οὐ γάρ τις μέτα τοῖος ἀνὴρ ἐν τοίσδεσι πᾶσιν
Odyssey 1.94	οἷος Ὀδυσσεὺς ἔσκεν· ἐγὼ δέ μιν αὐτὸς ὄπωπα,
Odyssey 1.95	καὶ γὰρ μνήμων εἰμί, πάϊς δʼ ἔτι νήπιος ἦα.
Odyssey 1.96	ὣς φάτο, τῷ δʼ ἄρα θυμὸς ἐνὶ στήθεσσιν ἐώλπει
Odyssey 1.97	νευρὴν ἐντανύσειν διοϊστεύσειν τε σιδήρου.
Odyssey 1.98	ἦ τοι ὀϊστοῦ γε πρῶτος γεύσεσθαι ἔμελλεν
Odyssey 1.99	ἐκ χειρῶν Ὀδυσῆος ἀμύμονος, ὃν τότʼ ἀτίμα
Odyssey 1.100	ἥμενος ἐν μεγάροις, ἐπὶ δʼ ὤρνυε πάντας ἑταίρους.
Odyssey 1.101	τοῖσι δὲ καὶ μετέειφʼ ἱερὴ ἲς Τηλεμάχοιο·
Odyssey 1.102	ὢ πόποι, ἦ μάλα με Ζεὺς ἄφρονα θῆκε Κρονίων·
Odyssey 1.103	μήτηρ μέν μοί φησι φίλη, πινυτή περ ἐοῦσα,
Odyssey 1.104	ἄλλῳ ἅμʼ ἕψεσθαι νοσφισσαμένη τόδε δῶμα·
Odyssey 1.105	αὐτὰρ ἐγὼ γελόω καὶ τέρπομαι ἄφρονι θυμῷ.
Odyssey 1.106	ἀλλʼ ἄγετε, μνηστῆρες, ἐπεὶ τόδε φαίνετʼ ἄεθλον,
Odyssey 1.107	οἵη νῦν οὐκ ἔστι γυνὴ κατʼ Ἀχαιΐδα γαῖαν,
Odyssey 1.108	οὔτε Πύλου ἱερῆς οὔτʼ Ἄργεος οὔτε Μυκήνης·
Odyssey 1.109	οὔτʼ αὐτῆς Ἰθάκης οὔτʼ ἠπείροιο μελαίνης·
Odyssey 1.110	καὶ δʼ αὐτοὶ τόδε γʼ ἴστε· τί με χρὴ μητέρος αἴνου;
Odyssey 1.111	ἀλλʼ ἄγε μὴ μύνῃσι παρέλκετε μηδʼ ἔτι τόξου
Odyssey 1.112	δηρὸν ἀποτρωπᾶσθε τανυστύος, ὄφρα ἴδωμεν.
Odyssey 1.113	καὶ δέ κεν αὐτὸς ἐγὼ τοῦ τόξου πειρησαίμην·
Odyssey 1.114	εἰ δέ κεν ἐντανύσω διοϊστεύσω τε σιδήρου,
Odyssey 1.115	οὔ κέ μοι ἀχνυμένῳ τάδε δώματα πότνια μήτηρ
Odyssey 1.116	λείποι ἅμʼ ἄλλῳ ἰοῦσʼ, ὅτʼ ἐγὼ κατόπισθε λιποίμην
Odyssey 1.117	οἷός τʼ ἤδη πατρὸς ἀέθλια κάλʼ ἀνελέσθαι.
Odyssey 1.118	ἦ καὶ ἀπʼ ὤμοιϊν χλαῖναν θέτο φοινικόεσσαν
Odyssey 1.119	ὀρθὸς ἀναΐξας, ἀπὸ δὲ ξίφος ὀξὺ θέτʼ ὤμων.
Odyssey 1.120	πρῶτον μὲν πελέκεας στῆσεν, διὰ τάφρον ὀρύξας
Odyssey 1.121	πᾶσι μίαν μακρήν, καὶ ἐπὶ στάθμην ἴθυνεν,
Odyssey 1.122	ἀμφὶ δὲ γαῖαν ἔναξε· τάφος δʼ ἕλε πάντας ἰδόντας,
Odyssey 1.123	ὡς εὐκόσμως στῆσε· πάρος δʼ οὐ πώ ποτʼ ὀπώπει.
Odyssey 1.124	στῆ δʼ ἄρʼ ἐπʼ οὐδὸν ἰὼν καὶ τόξου πειρήτιζε.
Odyssey 1.125	τρὶς μέν μιν πελέμιξεν ἐρύσσεσθαι μενεαίνων,
Odyssey 1.126	τρὶς δὲ μεθῆκε βίης, ἐπιελπόμενος τό γε θυμῷ,
Odyssey 1.127	νευρὴν ἐντανύειν διοϊστεύσειν τε σιδήρου.
Odyssey 1.128	καί νύ κε δή ῥʼ ἐτάνυσσε βίῃ τὸ τέταρτον ἀνέλκων,
Odyssey 1.129	ἀλλʼ Ὀδυσεὺς ἀνένευε καὶ ἔσχεθεν ἱέμενόν περ.
Odyssey 1.130	τοῖς δʼ αὖτις μετέειφʼ ἱερὴ ἲς Τηλεμάχοιο·
Odyssey 1.131	ὢ πόποι, ἦ καὶ ἔπειτα κακός τʼ ἔσομαι καὶ ἄκικυς,
Odyssey 1.132	ἠὲ νεώτερός εἰμι καὶ οὔ πω χερσὶ πέποιθα
Odyssey 1.133	ἄνδρʼ ἀπαμύνασθαι, ὅτε τις πρότερος χαλεπήνῃ.
Odyssey 1.134	ἀλλʼ ἄγεθʼ, οἵ περ ἐμεῖο βίῃ προφερέστεροί ἐστε,
Odyssey 1.135	τόξου πειρήσασθε, καὶ ἐκτελέωμεν ἄεθλον.
Odyssey 1.136	ὣς εἰπὼν τόξον μὲν ἀπὸ ἕο θῆκε χαμᾶζε,
Odyssey 1.137	κλίνας κολλητῇσιν ἐϋξέστῃς σανίδεσσιν,
Odyssey 1.138	αὐτοῦ δʼ ὠκὺ βέλος καλῇ προσέκλινε κορώνῃ,
Odyssey 1.139	ἂψ δʼ αὖτις κατʼ ἄρʼ ἕζετʼ ἐπὶ θρόνου ἔνθεν ἀνέστη.
Odyssey 1.140	τοῖσιν δʼ Ἀντίνοος μετέφη, Εὐπείθεος υἱός·
Odyssey 1.141	ὄρνυσθʼ ἑξείης ἐπιδέξια πάντες ἑταῖροι,
Odyssey 1.142	ἀρξάμενοι τοῦ χώρου ὅθεν τέ περ οἰνοχοεύει.
Odyssey 1.143	ὣς ἔφατʼ Ἀντίνοος, τοῖσιν δʼ ἐπιήνδανε μῦθος.
Odyssey 1.144	Λειώδης δὲ πρῶτος ἀνίστατο, Οἴνοπος υἱός,
Odyssey 1.145	ὅ σφι θυοσκόος ἔσκε, παρὰ κρητῆρα δὲ καλὸν
Odyssey 1.146	ἷζε μυχοίτατος αἰέν· ἀτασθαλίαι δέ οἱ οἴῳ
Odyssey 1.147	ἐχθραὶ ἔσαν, πᾶσιν δὲ νεμέσσα μνηστήρεσσιν·
Odyssey 1.148	ὅς ῥα τότε πρῶτος τόξον λάβε καὶ βέλος ὠκύ.
Odyssey 1.149	στῆ δʼ ἄρʼ ἐπʼ οὐδὸν ἰὼν καὶ τόξου πειρήτιζεν,
Odyssey 1.150	οὐδέ μιν ἐντάνυσε· πρὶν γὰρ κάμε χεῖρας ἀνέλκων
Odyssey 1.151	ἀτρίπτους ἁπαλάς· μετὰ δὲ μνηστῆρσιν ἔειπεν·
Odyssey 1.152	ὦ φίλοι, οὐ μὲν ἐγὼ τανύω, λαβέτω δὲ καὶ ἄλλος.
Odyssey 1.153	πολλοὺς γὰρ τόδε τόξον ἀριστῆας κεκαδήσει
Odyssey 1.154	θυμοῦ καὶ ψυχῆς, ἐπεὶ ἦ πολὺ φέρτερόν ἐστι
Odyssey 1.155	τεθνάμεν ἢ ζώοντας ἁμαρτεῖν, οὗθʼ ἕνεκʼ αἰεὶ
Odyssey 1.156	ἐνθάδʼ ὁμιλέομεν, ποτιδέγμενοι ἤματα πάντα.
Odyssey 1.157	νῦν μέν τις καὶ ἔλπετʼ ἐνὶ φρεσὶν ἠδὲ μενοινᾷ
Odyssey 1.158	γῆμαι Πηνελόπειαν, Ὀδυσσῆος παράκοιτιν.
Odyssey 1.159	αὐτὰρ ἐπὴν τόξου πειρήσεται ἠδὲ ἴδηται,
Odyssey 1.160	ἄλλην δή τινʼ ἔπειτα Ἀχαιϊάδων εὐπέπλων
Odyssey 1.161	μνάσθω ἐέδνοισιν διζήμενος· ἡ δέ κʼ ἔπειτα
Odyssey 1.162	γήμαιθʼ ὅς κε πλεῖστα πόροι καὶ μόρσιμος ἔλθοι.
Odyssey 1.163	ὣς ἄρʼ ἐφώνησεν καὶ ἀπὸ ἕο τόξον ἔθηκε,
Odyssey 1.164	κλίνας κολλητῇσιν ἐϋξέστῃς σανίδεσσιν,
Odyssey 1.165	αὐτοῦ δʼ ὠκὺ βέλος καλῇ προσέκλινε κορώνῃ,
Odyssey 1.166	ἂψ δʼ αὖτις κατʼ ἄρ ἕζετʼ ἐπὶ θρόνου ἔνθεν ἀνέστη.
Odyssey 1.167	Ἀντίνοος δʼ ἐνένιπεν ἔπος τʼ ἔφατʼ ἔκ τʼ ὀνόμαζε·
Odyssey 1.168	Λειῶδες, ποῖόν σε ἔπος φύγεν ἕρκος ὀδόντων,
Odyssey 1.169	δεινόν τʼ ἀργαλέον τε, —νεμεσσῶμαι δέ τʼ ἀκούων—
Odyssey 1.170	εἰ δὴ τοῦτό γε τόξον ἀριστῆας κεκαδήσει
Odyssey 1.171	θυμοῦ καὶ ψυχῆς, ἐπεὶ οὐ δύνασαι σὺ τανύσσαι.
Odyssey 1.172	οὐ γάρ τοί σέ γε τοῖον ἐγείνατο πότνια μήτηρ
Odyssey 1.173	οἷόν τε ῥυτῆρα βιοῦ τʼ ἔμεναι καὶ ὀϊστῶν·
Odyssey 1.174	ἀλλʼ ἄλλοι τανύουσι τάχα μνηστῆρες ἀγαυοί.
Odyssey 1.175	ὣς φάτο, καί ῥʼ ἐκέλευσε Μελάνθιον, αἰπόλον αἰγῶν·
Odyssey 1.176	ἄγρει δή, πῦρ κῆον ἐνὶ μεγάροισι, Μελανθεῦ,
Odyssey 1.177	πὰρ δὲ τίθει δίφρον τε μέγαν καὶ κῶας ἐπʼ αὐτοῦ,
Odyssey 1.178	ἐκ δὲ στέατος ἔνεικε μέγαν τροχὸν ἔνδον ἐόντος,
Odyssey 1.179	ὄφρα νέοι θάλποντες, ἐπιχρίοντες ἀλοιφῇ,
Odyssey 1.180	τόξου πειρώμεσθα καὶ ἐκτελέωμεν ἄεθλον.
Odyssey 1.181	ὣς φάθʼ, ὁ δʼ αἶψʼ ἀνέκαιε Μελάνθιος ἀκάματον πῦρ,
Odyssey 1.182	πὰρ δὲ φέρων δίφρον θῆκεν καὶ κῶας ἐπʼ αὐτοῦ,
Odyssey 1.183	ἐκ δὲ στέατος ἔνεικε μέγαν τροχὸν ἔνδον ἐόντος·
Odyssey 1.184	τῷ ῥα νέοι θάλποντες ἐπειρῶντʼ· οὐδʼ ἐδύναντο
Odyssey 1.185	ἐντανύσαι, πολλὸν δὲ βίης ἐπιδευέες ἦσαν.
Odyssey 1.186	Ἀντίνοος δʼ ἔτʼ ἐπεῖχε καὶ Εὐρύμαχος θεοειδής,
Odyssey 1.187	ἀρχοὶ μνηστήρων· ἀρετῇ δʼ ἔσαν ἔξοχʼ ἄριστοι.
Odyssey 1.188	τὼ δʼ ἐξ οἴκου βῆσαν ὁμαρτήσαντες ἅμʼ ἄμφω
Odyssey 1.189	βουκόλος ἠδὲ συφορβὸς Ὀδυσσῆος θείοιο·
Odyssey 1.190	ἐκ δʼ αὐτὸς μετὰ τοὺς δόμου ἤλυθε δῖος Ὀδυσσεύς.
Odyssey 1.191	ἀλλʼ ὅτε δή ῥʼ ἐκτὸς θυρέων ἔσαν ἠδὲ καὶ αὐλῆς,
Odyssey 1.192	φθεγξάμενός σφε ἔπεσσι προσηύδα μειλιχίοισι·
Odyssey 1.193	βουκόλε καὶ σύ, συφορβέ, ἔπος τί κε μυθησαίμην,
Odyssey 1.194	ἦ αὐτὸς κεύθω; φάσθαι δέ με θυμὸς ἀνώγει.
Odyssey 1.195	ποῖοί κʼ εἶτʼ Ὀδυσῆϊ ἀμυνέμεν, εἴ ποθεν ἔλθοι
Odyssey 1.196	ὧδε μάλʼ ἐξαπίνης καί τις θεὸς αὐτὸν ἐνείκαι;
Odyssey 1.197	ἤ κε μνηστήρεσσιν ἀμύνοιτʼ ἦ Ὀδυσῆϊ;
Odyssey 1.198	εἴπαθʼ ὅπως ὑμέας κραδίη θυμός τε κελεύει.
Odyssey 1.199	τὸν δʼ αὖτε προσέειπε βοῶν ἐπιβουκόλος ἀνήρ·
Odyssey 1.200	Ζεῦ πάτερ, αἲ γὰρ τοῦτο τελευτήσειας ἐέλδωρ,
Odyssey 1.201	ὡς ἔλθοι μὲν κεῖνος ἀνήρ, ἀγάγοι δέ ἑ δαίμων·
Odyssey 1.202	γνοίης χʼ οἵη ἐμὴ δύναμις καὶ χεῖρες ἕπονται.
Odyssey 1.203	ὣς δʼ αὔτως Εὔμαιος ἐπεύχετο πᾶσι θεοῖσι
Odyssey 1.204	νοστῆσαι Ὀδυσῆα πολύφρονα ὅνδε δόμονδε.
Odyssey 1.205	αὐτὰρ ἐπεὶ δὴ τῶν γε νόον νημερτέʼ ἀνέγνω,
Odyssey 1.206	ἐξαῦτίς σφε ἔπεσσιν ἀμειβόμενος προσέειπεν·
Odyssey 1.207	ἔνδον μὲν δὴ ὅδʼ αὐτὸς ἐγώ, κακὰ πολλὰ μογήσας
Odyssey 1.208	ἤλυθον εἰκοστῷ ἔτεϊ ἐς πατρίδα γαῖαν.
Odyssey 1.209	γιγνώσκω δʼ ὡς σφῶϊν ἐελδομένοισιν ἱκάνω
Odyssey 1.210	οἴοισι δμώων· τῶν δʼ ἄλλων οὔ τευ ἄκουσα
Odyssey 1.211	εὐξαμένου ἐμὲ αὖτις ὑπότροπον οἴκαδʼ ἱκέσθαι.
Odyssey 1.212	σφῶϊν δʼ, ὡς ἔσεταί περ, ἀληθείην καταλέξω.
Odyssey 1.213	εἴ χʼ ὑπʼ ἐμοί γε θεὸς δαμάσῃ μνηστῆρας ἀγαυούς,
Odyssey 1.214	ἄξομαι ἀμφοτέροις ἀλόχους καὶ κτήματʼ ὀπάσσω
Odyssey 1.215	οἰκία τʼ ἐγγὺς ἐμεῖο τετυγμένα· καί μοι ἔπειτα
Odyssey 1.216	Τηλεμάχου ἑτάρω τε κασιγνήτω τε ἔσεσθον.
Odyssey 1.217	εἰ δʼ ἄγε δή, καὶ σῆμα ἀριφραδὲς ἄλλο τι δείξω,
Odyssey 1.218	ὄφρα μʼ ἐῢ γνῶτον πιστωθῆτόν τʼ ἐνὶ θυμῷ,
Odyssey 1.219	οὐλήν, τήν ποτέ με σῦς ἤλασε λευκῷ ὀδόντι
Odyssey 1.220	Παρνησόνδʼ ἐλθόντα σὺν υἱάσιν Αὐτολύκοιο.
Odyssey 1.221	ὣς εἰπὼν ῥάκεα μεγάλης ἀποέργαθεν οὐλῆς.
Odyssey 1.222	τὼ δʼ ἐπεὶ εἰσιδέτην εὖ τʼ ἐφράσσαντο ἕκαστα,
Odyssey 1.223	κλαῖον ἄρʼ ἀμφʼ Ὀδυσῆϊ δαΐφρονι χεῖρε βαλόντε,
Odyssey 1.224	καὶ κύνεον ἀγαπαζόμενοι κεφαλήν τε καὶ ὤμους
Odyssey 1.225	ὣς δʼ αὔτως Ὀδυσεὺς κεφαλὰς καὶ χεῖρας ἔκυσσε.
Odyssey 1.226	καί νύ κʼ ὀδυρομένοισιν ἔδυ φάος ἠελίοιο,
Odyssey 1.227	εἰ μὴ Ὀδυσσεὺς αὐτὸς ἐρύκακε φώνησέν τε·
Odyssey 1.228	παύεσθον κλαυθμοῖο γόοιό τε, μή τις ἴδηται
Odyssey 1.229	ἐξελθὼν μεγάροιο, ἀτὰρ εἴπῃσι καὶ εἴσω.
Odyssey 1.230	ἀλλὰ προμνηστῖνοι ἐσέλθετε, μηδʼ ἅμα πάντες,
Odyssey 1.231	πρῶτος ἐγώ, μετὰ δʼ ὔμμες· ἀτὰρ τόδε σῆμα τετύχθω·
Odyssey 1.232	ἄλλοι μὲν γὰρ πάντες, ὅσοι μνηστῆρες ἀγαυοί,
Odyssey 1.233	οὐκ ἐάσουσιν ἐμοὶ δόμεναι βιὸν ἠδὲ φαρέτρην·
Odyssey 1.234	ἀλλὰ σύ, δῖʼ Εὔμαιε, φέρων ἀνὰ δώματα τόξον
Odyssey 1.235	ἐν χείρεσσιν ἐμοὶ θέμεναι, εἰπεῖν τε γυναιξὶ
Odyssey 1.236	κληῗσαι μεγάροιο θύρας πυκινῶς ἀραρυίας,
Odyssey 1.237	ἢν δέ τις ἢ στοναχῆς ἠὲ κτύπου ἔνδον ἀκούσῃ
Odyssey 1.238	ἀνδρῶν ἡμετέροισιν ἐν ἕρκεσι, μή τι θύραζε
Odyssey 1.239	προβλώσκειν, ἀλλʼ αὐτοῦ ἀκὴν ἔμεναι παρὰ ἔργῳ.
Odyssey 1.240	σοὶ δέ, Φιλοίτιε δῖε, θύρας ἐπιτέλλομαι αὐλῆς
Odyssey 1.241	κληῗσαι κληῗδι, θοῶς δʼ ἐπὶ δεσμὸν ἰῆλαι.
Odyssey 1.242	ὣς εἰπὼν εἰσῆλθε δόμους εὖ ναιετάοντας·
Odyssey 1.243	ἕζετʼ ἔπειτʼ ἐπὶ δίφρον ἰών, ἔνθεν περ ἀνέστη·
Odyssey 1.244	ἐς δʼ ἄρα καὶ τὼ δμῶε ἴτην θείου Ὀδυσῆος.
Odyssey 1.245	Εὐρύμαχος δʼ ἤδη τόξον μετὰ χερσὶν ἐνώμα,
Odyssey 1.246	θάλπων ἔνθα καὶ ἔνθα σέλᾳ πυρός· ἀλλά μιν οὐδʼ ὣς
Odyssey 1.247	ἐντανύσαι δύνατο, μέγα δʼ ἔστενε κυδάλιμον κῆρ·
Odyssey 1.248	ὀχθήσας δʼ ἄρα εἶπεν ἔπος τʼ ἔφατʼ ἔκ τʼ ὀνόμαζεν·
Odyssey 1.249	ὢ πόποι, ἦ μοι ἄχος περί τʼ αὐτοῦ καὶ περὶ πάντων·
Odyssey 1.250	οὔ τι γάμου τοσσοῦτον ὀδύρομαι, ἀχνύμενός περ·
Odyssey 1.251	εἰσὶ καὶ ἄλλαι πολλαὶ Ἀχαιΐδες, αἱ μὲν ἐν αὐτῇ
Odyssey 1.252	ἀμφιάλῳ Ἰθάκῃ, αἱ δʼ ἄλλῃσιν πολίεσσιν·
Odyssey 1.253	ἀλλʼ εἰ δὴ τοσσόνδε βίης ἐπιδευέες εἰμὲν
Odyssey 1.254	ἀντιθέου Ὀδυσῆος, ὅ τʼ οὐ δυνάμεσθα τανύσσαι
Odyssey 1.255	τόξον· ἐλεγχείη δὲ καὶ ἐσσομένοισι πυθέσθαι.
Odyssey 1.256	τὸν δʼ αὖτʼ Ἀντίνοος προσέφη, Εὐπείθεος υἱός·
Odyssey 1.257	Εὐρύμαχʼ, οὐχ οὕτως ἔσται· νοέεις δὲ καὶ αὐτός.
Odyssey 1.258	νῦν μὲν γὰρ κατὰ δῆμον ἑορτὴ τοῖο θεοῖο
Odyssey 1.259	ἁγνή· τίς δέ κε τόξα τιταίνοιτʼ; ἀλλὰ ἕκηλοι
Odyssey 1.260	κάτθετʼ· ἀτὰρ πελέκεάς γε καὶ εἴ κʼ εἰῶμεν ἅπαντας
Odyssey 1.261	ἑστάμεν· οὐ μὲν γάρ τινʼ ἀναιρήσεσθαι ὀΐω,
Odyssey 1.262	ἐλθόντʼ ἐς μέγαρον Λαερτιάδεω Ὀδυσῆος.
Odyssey 1.263	ἀλλʼ ἄγετʼ, οἰνοχόος μὲν ἐπαρξάσθω δεπάεσσιν,
Odyssey 1.264	ὄφρα σπείσαντες καταθείομεν ἀγκύλα τόξα·
Odyssey 1.265	ἠῶθεν δὲ κέλεσθε Μελάνθιον, αἰπόλον αἰγῶν,
Odyssey 1.266	αἶγας ἄγειν, αἳ πᾶσι μέγʼ ἔξοχοι αἰπολίοισιν,
Odyssey 1.267	ὄφρʼ ἐπὶ μηρία θέντες Ἀπόλλωνι κλυτοτόξῳ
Odyssey 1.268	τόξου πειρώμεσθα καὶ ἐκτελέωμεν ἄεθλον.
Odyssey 1.269	ὣς ἔφατʼ Ἀντίνοος, τοῖσιν δʼ ἐπιήνδανε μῦθος.
Odyssey 1.270	τοῖσι δὲ κήρυκες μὲν ὕδωρ ἐπὶ χεῖρας ἔχευαν,
Odyssey 1.271	κοῦροι δὲ κρητῆρας ἐπεστέψαντο ποτοῖο,
Odyssey 1.272	νώμησαν δʼ ἄρα πᾶσιν ἐπαρξάμενοι δεπάεσσιν.
Odyssey 1.273	οἱ δʼ ἐπεὶ οὖν σπεῖσάν τʼ ἔπιόν θʼ ὅσον ἤθελε θυμός,
Odyssey 1.274	τοῖς δὲ δολοφρονέων μετέφη πολύμητις Ὀδυσσεύς·
Odyssey 1.275	κέκλυτέ μευ, μνηστῆρες ἀγακλειτῆς βασιλείης·
Odyssey 1.276	ὄφρʼ εἴπω τά με θυμὸς ἐνὶ στήθεσσι κελεύει·
Odyssey 1.277	Εὐρύμαχον δὲ μάλιστα καὶ Ἀντίνοον θεοειδέα
Odyssey 1.278	λίσσομʼ, ἐπεὶ καὶ τοῦτο ἔπος κατὰ μοῖραν ἔειπε,
Odyssey 1.279	νῦν μὲν παῦσαι τόξον, ἐπιτρέψαι δὲ θεοῖσιν·
Odyssey 1.280	ἠῶθεν δὲ θεὸς δώσει κράτος ᾧ κʼ ἐθέλῃσιν.
Odyssey 1.281	ἀλλʼ ἄγʼ ἐμοὶ δότε τόξον ἐΰξοον, ὄφρα μεθʼ ὑμῖν
Odyssey 1.282	χειρῶν καὶ σθένεος πειρήσομαι, ἤ μοι ἔτʼ ἐστὶν
Odyssey 1.283	ἴς, οἵη πάρος ἔσκεν ἐνὶ γναμπτοῖσι μέλεσσιν,
Odyssey 1.284	ἦ ἤδη μοι ὄλεσσεν ἄλη τʼ ἀκομιστίη τε.
Odyssey 1.285	ὣς ἔφαθʼ, οἱ δʼ ἄρα πάντες ὑπερφιάλως νεμέσησαν,
Odyssey 1.286	δείσαντες μὴ τόξον ἐΰξοον ἐντανύσειεν.
Odyssey 1.287	Ἀντίνοος δʼ ἐνένιπεν ἔπος τʼ ἔφατʼ ἔκ τʼ ὀνόμαζεν·
Odyssey 1.288	ἆ δειλὲ ξείνων, ἔνι τοι φρένες οὐδʼ ἠβαιαί·
Odyssey 1.289	οὐκ ἀγαπᾷς ὃ ἕκηλος ὑπερφιάλοισι μεθʼ ἡμῖν
Odyssey 1.290	δαίνυσαι, οὐδέ τι δαιτὸς ἀμέρδεαι, αὐτὰρ ἀκούεις
Odyssey 1.291	μύθων ἡμετέρων καὶ ῥήσιος; οὐδέ τις ἄλλος
Odyssey 1.292	ἡμετέρων μύθων ξεῖνος καὶ πτωχὸς ἀκούει.
Odyssey 1.293	οἶνός σε τρώει μελιηδής, ὅς τε καὶ ἄλλους
Odyssey 1.294	βλάπτει, ὃς ἄν μιν χανδὸν ἕλῃ μηδʼ αἴσιμα πίνῃ.
Odyssey 1.295	οἶνος καὶ Κένταυρον, ἀγακλυτὸν Εὐρυτίωνα,
Odyssey 1.296	ἄασʼ ἐνὶ μεγάρῳ μεγαθύμου Πειριθόοιο,
Odyssey 1.297	ἐς Λαπίθας ἐλθόνθʼ· ὁ δʼ ἐπεὶ φρένας ἄασεν οἴνῳ,
Odyssey 1.298	μαινόμενος κάκʼ ἔρεξε δόμον κάτα Πειριθόοιο·
Odyssey 1.299	ἥρωας δʼ ἄχος εἷλε, διὲκ προθύρου δὲ θύραζε
Odyssey 1.300	ἕλκον ἀναΐξαντες, ἀπʼ οὔατα νηλέϊ χαλκῷ
Odyssey 1.301	ῥῖνάς τʼ ἀμήσαντες· ὁ δὲ φρεσὶν ᾗσιν ἀασθεὶς
Odyssey 1.302	ἤϊεν ἣν ἄτην ὀχέων ἀεσίφρονι θυμῷ.
Odyssey 1.303	ἐξ οὗ Κενταύροισι καὶ ἀνδράσι νεῖκος ἐτύχθη,
Odyssey 1.304	οἷ δʼ αὐτῷ πρώτῳ κακὸν εὕρετο οἰνοβαρείων.
Odyssey 1.305	ὣς καὶ σοὶ μέγα πῆμα πιφαύσκομαι, αἴ κε τὸ τόξον
Odyssey 1.306	ἐντανύσῃς· οὐ γάρ τευ ἐπητύος ἀντιβολήσεις
Odyssey 1.307	ἡμετέρῳ ἐνὶ δήμῳ, ἄφαρ δέ σε νηῒ μελαίνῃ
Odyssey 1.308	εἰς Ἔχετον βασιλῆα, βροτῶν δηλήμονα πάντων,
Odyssey 1.309	πέμψομεν· ἔνθεν δʼ οὔ τι σαώσεαι· ἀλλὰ ἕκηλος
Odyssey 1.310	πῖνέ τε, μηδʼ ἐρίδαινε μετʼ ἀνδράσι κουροτέροισιν.
Odyssey 1.311	τὸν δʼ αὖτε προσέειπε περίφρων Πηνελόπεια·
Odyssey 1.312	Ἀντίνοʼ, οὐ μὲν καλὸν ἀτέμβειν οὐδὲ δίκαιον
Odyssey 1.313	ξείνους Τηλεμάχου, ὅς κεν τάδε δώμαθʼ ἵκηται·
Odyssey 1.314	ἔλπεαι, αἴ χʼ ὁ ξεῖνος Ὀδυσσῆος μέγα τόξον
Odyssey 1.315	ἐντανύσῃ χερσίν τε βίηφί τε ἧφι πιθήσας,
Odyssey 1.316	οἴκαδέ μʼ ἄξεσθαι καὶ ἑὴν θήσεσθαι ἄκοιτιν;
Odyssey 1.317	οὐδʼ αὐτός που τοῦτό γʼ ἐνὶ στήθεσσιν ἔολπε·
Odyssey 1.318	μηδέ τις ὑμείων τοῦ γʼ εἵνεκα θυμὸν ἀχεύων
Odyssey 1.319	ἐνθάδε δαινύσθω, ἐπεὶ οὐδὲ μὲν οὐδὲ ἔοικεν.
Odyssey 1.320	τὴν δʼ αὖτʼ Εὐρύμαχος, Πολύβου πάϊς, ἀντίον ηὔδα·
Odyssey 1.321	κούρη Ἰκαρίοιο, περίφρον Πηνελόπεια,
Odyssey 1.322	οὔ τί σε τόνδʼ ἄξεσθαι ὀϊόμεθʼ· οὐδὲ ἔοικεν·
Odyssey 1.323	ἀλλʼ αἰσχυνόμενοι φάτιν ἀνδρῶν ἠδὲ γυναικῶν,
Odyssey 1.324	μή ποτέ τις εἴπῃσι κακώτερος ἄλλος Ἀχαιῶν
Odyssey 1.325	ἦ πολὺ χείρονες ἄνδρες ἀμύμονος ἀνδρὸς ἄκοιτιν
Odyssey 1.326	μνῶνται, οὐδέ τι τόξον ἐΰξοον ἐντανύουσιν·
Odyssey 1.327	ἀλλʼ ἄλλος τις πτωχὸς ἀνὴρ ἀλαλήμενος ἐλθὼν
Odyssey 1.328	ῥηϊδίως ἐτάνυσσε βιόν, διὰ δʼ ἧκε σιδήρου.
Odyssey 1.329	ὣς ἐρέουσʼ, ἡμῖν δʼ ἂν ἐλέγχεα ταῦτα γένοιτο.
Odyssey 1.330	τὸν δʼ αὖτε προσέειπε περίφρων Πηνελόπεια·
Odyssey 1.331	Εὐρύμαχʼ, οὔ πως ἔστιν ἐϋκλεῖας κατὰ δῆμον
Odyssey 1.332	ἔμμεναι οἳ δὴ οἶκον ἀτιμάζοντες ἔδουσιν
Odyssey 1.333	ἀνδρὸς ἀριστῆος· τί δʼ ἐλέγχεα ταῦτα τίθεσθε;
Odyssey 1.334	οὗτος δὲ ξεῖνος μάλα μὲν μέγας ἠδʼ εὐπηγής,
Odyssey 1.335	πατρὸς δʼ ἐξ ἀγαθοῦ γένος εὔχεται ἔμμεναι υἱός.
Odyssey 1.336	ἀλλʼ ἄγε οἱ δότε τόξον ἐΰξοον, ὄφρα ἴδωμεν.
Odyssey 1.337	ὧδε γὰρ ἐξερέω, τὸ δὲ καὶ τετελεσμένον ἔσται·
Odyssey 1.338	εἴ κέ μιν ἐντανύσῃ, δώῃ δέ οἱ εὖχος Ἀπόλλων,
Odyssey 1.339	ἕσσω μιν χλαῖνάν τε χιτῶνά τε, εἵματα καλά,
Odyssey 1.340	δώσω δʼ ὀξὺν ἄκοντα, κυνῶν ἀλκτῆρα καὶ ἀνδρῶν,
Odyssey 1.341	καὶ ξίφος ἄμφηκες· δώσω δʼ ὑπὸ ποσσὶ πέδιλα,
Odyssey 1.342	πέμψω δʼ ὅππη μιν κραδίη θυμός τε κελεύει.
Odyssey 1.343	τὴν δʼ αὖ Τηλέμαχος πεπνυμένος ἀντίον ηὔδα·
Odyssey 1.344	μῆτερ ἐμή, τόξον μὲν Ἀχαιῶν οὔ τις ἐμεῖο
Odyssey 1.345	κρείσσων, ᾧ κʼ ἐθέλω, δόμεναί τε καὶ ἀρνήσασθαι,
Odyssey 1.346	οὔθʼ ὅσσοι κραναὴν Ἰθάκην κάτα κοιρανέουσιν,
Odyssey 1.347	οὔθʼ ὅσσοι νήσοισι πρὸς Ἤλιδος ἱπποβότοιο·
Odyssey 1.348	τῶν οὔ τίς μʼ ἀέκοντα βιήσεται, αἴ κʼ ἐθέλωμι
Odyssey 1.349	καὶ καθάπαξ ξείνῳ δόμεναι τάδε τόξα φέρεσθαι.
Odyssey 1.350	ἀλλʼ εἰς οἶκον ἰοῦσα τὰ σʼ αὐτῆς ἔργα κόμιζε,
Odyssey 1.351	ἱστόν τʼ ἠλακάτην τε, καὶ ἀμφιπόλοισι κέλευε
Odyssey 1.352	ἔργον ἐποίχεσθαι· τόξον δʼ ἄνδρεσσι μελήσει
Odyssey 1.353	πᾶσι, μάλιστα δʼ ἐμοί· τοῦ γὰρ κράτος ἔστʼ ἐνὶ οἴκῳ.
Odyssey 1.354	ἡ μὲν θαμβήσασα πάλιν οἶκόνδε βεβήκει·
Odyssey 1.355	παιδὸς γὰρ μῦθον πεπνυμένον ἔνθετο θυμῷ.
Odyssey 1.356	ἐς δʼ ὑπερῷʼ ἀναβᾶσα σὺν ἀμφιπόλοισι γυναιξὶ
Odyssey 1.357	κλαῖεν ἔπειτʼ Ὀδυσῆα, φίλον πόσιν, ὄφρα οἱ ὕπνον
Odyssey 1.358	ἡδὺν ἐπὶ βλεφάροισι βάλε γλαυκῶπις Ἀθήνη.
Odyssey 1.359	αὐτὰρ ὁ τόξα λαβὼν φέρε καμπύλα δῖος ὑφορβός·
Odyssey 1.360	μνηστῆρες δʼ ἄρα πάντες ὁμόκλεον ἐν μεγάροισιν·
Odyssey 1.361	ὧδε δέ τις εἴπεσκε νέων ὑπερηνορεόντων·
Odyssey 1.362	πῆ δὴ καμπύλα τόξα φέρεις, ἀμέγαρτε συβῶτα,
Odyssey 1.363	πλαγκτέ; τάχʼ αὖ σʼ ἐφʼ ὕεσσι κύνες ταχέες κατέδονται
Odyssey 1.364	οἶον ἀπʼ ἀνθρώπων, οὓς ἔτρεφες, εἴ κεν Ἀπόλλων
Odyssey 1.365	ἡμῖν ἱλήκῃσι καὶ ἀθάνατοι θεοὶ ἄλλοι.
Odyssey 1.366	ὣς φάσαν, αὐτὰρ, ὁ θῆκε φέρων αὐτῇ ἐνὶ χώρῃ,
Odyssey 1.367	δείσας, οὕνεκα πολλοὶ ὁμόκλεον ἐν μεγάροισιν.
Odyssey 1.368	Τηλέμαχος δʼ ἑτέρωθεν ἀπειλήσας ἐγεγώνει·
Odyssey 1.369	ἄττα, πρόσω φέρε τόξα· τάχʼ οὐκ εὖ πᾶσι πιθήσεις
Odyssey 1.370	μή σε καὶ ὁπλότερός περ ἐὼν ἀγρόνδε δίωμαι,
Odyssey 1.371	βάλλων χερμαδίοισι· βίηφι δὲ φέρτερός εἰμι.
Odyssey 1.372	αἲ γὰρ πάντων τόσσον, ὅσοι κατὰ δώματʼ ἔασι,
Odyssey 1.373	μνηστήρων χερσίν τε βίηφί τε φέρτερος εἴην·
Odyssey 1.374	τῷ κε τάχα στυγερῶς τινʼ ἐγὼ πέμψαιμι νέεσθαι
Odyssey 1.375	ἡμετέρου ἐξ οἴκου, ἐπεὶ κακὰ μηχανόωνται.
Odyssey 1.376	ὣς ἔφαθʼ, οἱ δʼ ἄρα πάντες ἐπʼ αὐτῷ ἡδὺ γέλασσαν
Odyssey 1.377	μνηστῆρες, καὶ δὴ μέθιεν χαλεποῖο χόλοιο
Odyssey 1.378	Τηλεμάχῳ· τὰ δὲ τόξα φέρων ἀνὰ δῶμα συβώτης
Odyssey 1.379	ἐν χείρεσσʼ Ὀδυσῆϊ δαΐφρονι θῆκε παραστάς.
Odyssey 1.380	ἐκ δὲ καλεσσάμενος προσέφη τροφὸν Εὐρύκλειαν·
Odyssey 1.381	Τηλέμαχος κέλεταί σε, περίφρων Εὐρύκλεια,
Odyssey 1.382	κληῗσαι μεγάροιο θύρας πυκινῶς ἀραρυίας.
Odyssey 1.383	ἢν δέ τις ἢ στοναχῆς ἠὲ κτύπου ἔνδον ἀκούσῃ
Odyssey 1.384	ἀνδρῶν ἡμετέροισιν ἐν ἕρκεσι, μή τι θύραζε
Odyssey 1.385	προβλώσκειν, ἀλλʼ αὐτοῦ ἀκὴν ἔμεναι παρὰ ἔργῳ.
Odyssey 1.386	ὣς ἄρʼ ἐφώνησεν, τῇ δʼ ἄπτερος ἔπλετο μῦθος,
Odyssey 1.387	κλήϊσεν δὲ θύρας μεγάρων εὖ ναιεταόντων.
Odyssey 1.388	σιγῇ δʼ ἐξ οἴκοιο Φιλοίτιος ἆλτο θύραζε,
Odyssey 1.389	κλήϊσεν δʼ ἄρʼ ἔπειτα θύρας εὐερκέος αὐλῆς.
Odyssey 1.390	κεῖτο δʼ ὑπʼ αἰθούσῃ ὅπλον νεὸς ἀμφιελίσσης
Odyssey 1.391	βύβλινον, ᾧ ῥʼ ἐπέδησε θύρας, ἐς δʼ ἤϊεν αὐτός·
Odyssey 1.392	ἕζετʼ ἔπειτʼ ἐπὶ δίφρον ἰών, ἔνθεν περ ἀνέστη,
Odyssey 1.393	εἰσορόων Ὀδυσῆα. ὁ δʼ ἤδη τόξον ἐνώμα
Odyssey 1.394	πάντη ἀναστρωφῶν, πειρώμενος ἔνθα καὶ ἔνθα,
Odyssey 1.395	μὴ κέρα ἶπες ἔδοιεν ἀποιχομένοιο ἄνακτος.
Odyssey 1.396	ὧδε τις εἴπεσκεν ἰδὼν ἐς πλησίον ἄλλον·
Odyssey 1.397	ἦ τις θηητὴρ καὶ ἐπίκλοπος ἔπλετο τόξων·
Odyssey 1.398	ἤ ῥά νύ που τοιαῦτα καὶ αὐτῷ οἴκοθι κεῖται
Odyssey 1.399	ἢ ὅ γʼ ἐφορμᾶται ποιησέμεν, ὡς ἐνὶ χερσὶ
Odyssey 1.400	νωμᾷ ἔνθα καὶ ἔνθα κακῶν ἔμπαιος ἀλήτης.
Odyssey 1.401	ἄλλος δʼ αὖ εἴπεσκε νέων ὑπερηνορεόντων·
Odyssey 1.402	αἲ γὰρ δὴ τοσσοῦτον ὀνήσιος ἀντιάσειεν
Odyssey 1.403	ὡς οὗτός ποτε τοῦτο δυνήσεται ἐντανύσασθαι.
Odyssey 1.404	ὣς ἄρʼ ἔφαν μνηστῆρες· ἀτὰρ πολύμητις Ὀδυσσεύς,
Odyssey 1.405	αὐτίκʼ ἐπεὶ μέγα τόξον ἐβάστασε καὶ ἴδε πάντη,
Odyssey 1.406	ὡς ὅτʼ ἀνὴρ φόρμιγγος ἐπιστάμενος καὶ ἀοιδῆς
Odyssey 1.407	ῥηϊδίως ἐτάνυσσε νέῳ περὶ κόλλοπι χορδήν,
Odyssey 1.408	ἅψας ἀμφοτέρωθεν ἐϋστρεφὲς ἔντερον οἰός,
Odyssey 1.409	ὣς ἄρʼ ἄτερ σπουδῆς τάνυσεν μέγα τόξον Ὀδυσσεύς.
Odyssey 1.410	δεξιτερῇ ἄρα χειρὶ λαβὼν πειρήσατο νευρῆς·
Odyssey 1.411	ἡ δʼ ὑπὸ καλὸν ἄεισε, χελιδόνι εἰκέλη αὐδήν.
Odyssey 1.412	μνηστῆρσιν δʼ ἄρʼ ἄχος γένετο μέγα, πᾶσι δʼ ἄρα χρὼς
Odyssey 1.413	ἐτράπετο· Ζεὺς δὲ μεγάλʼ ἔκτυπε σήματα φαίνων·
Odyssey 1.414	γήθησέν τʼ ἄρʼ ἔπειτα πολύτλας δῖος Ὀδυσσεύς.
Odyssey 1.415	ὅττι ῥά οἱ τέρας ἧκε Κρόνου πάϊς ἀγκυλομήτεω·
Odyssey 1.416	εἵλετο δʼ ὠκὺν ὀϊστόν, ὅ οἱ παρέκειτο τραπέζῃ
Odyssey 1.417	γυμνός· τοὶ δʼ ἄλλοι κοίλης ἔντοσθε φαρέτρης
Odyssey 1.418	κείατο, τῶν τάχʼ ἔμελλον Ἀχαιοὶ πειρήσεσθαι.
Odyssey 1.419	τόν ῥʼ ἐπὶ πήχει ἑλὼν ἕλκεν νευρὴν γλυφίδας τε,
Odyssey 1.420	αὐτόθεν ἐκ δίφροιο καθήμενος, ἧκε δʼ ὀϊστὸν
Odyssey 1.421	ἄντα τιτυσκόμενος, πελέκεων δʼ οὐκ ἤμβροτε πάντων
Odyssey 1.422	πρώτης στειλειῆς, διὰ δʼ ἀμπερὲς ἦλθε θύραζε
Odyssey 1.423	ἰὸς χαλκοβαρής· ὁ δὲ Τηλέμαχον προσέειπε·
Odyssey 1.424	Τηλέμαχʼ, οὔ σʼ ὁ ξεῖνος ἐνὶ μεγάροισιν ἐλέγχει
Odyssey 1.425	ἥμενος, οὐδέ τι τοῦ σκοποῦ ἤμβροτον οὐδέ τι τόξον
Odyssey 1.426	δὴν ἔκαμον τανύων· ἔτι μοι μένος ἔμπεδόν ἐστιν,
Odyssey 1.427	οὐχ ὥς με μνηστῆρες ἀτιμάζοντες ὄνονται.
Odyssey 1.428	νῦν δʼ ὥρη καὶ δόρπον Ἀχαιοῖσιν τετυκέσθαι
Odyssey 1.429	ἐν φάει, αὐτὰρ ἔπειτα καὶ ἄλλως ἑψιάασθαι
Odyssey 1.430	μολπῇ καὶ φόρμιγγι· τὰ γάρ τʼ ἀναθήματα δαιτός.
Odyssey 1.431	ἦ καὶ ἐπʼ ὀφρύσι νεῦσεν· ὁ δʼ ἀμφέθετο ξίφος ὀξὺ
Odyssey 1.432	Τηλέμαχος, φίλος υἱὸς Ὀδυσσῆος θείοιο,
Odyssey 1.433	ἀμφὶ δὲ χεῖρα φίλην βάλεν ἔγχεϊ, ἄγχι δʼ ἄρʼ αὐτοῦ
Odyssey 1.434	πὰρ θρόνον ἑστήκει κεκορυθμένος αἴθοπι χαλκῷ.
Odyssey 1.1	αὐτὰρ ὁ γυμνώθη ῥακέων πολύμητις Ὀδυσσεύς,
Odyssey 1.2	ἆλτο δʼ ἐπὶ μέγαν οὐδόν, ἔχων βιὸν ἠδὲ φαρέτρην
Odyssey 1.3	ἰῶν ἐμπλείην, ταχέας δʼ ἐκχεύατʼ ὀϊστοὺς
Odyssey 1.4	αὐτοῦ πρόσθε ποδῶν, μετὰ δὲ μνηστῆρσιν ἔειπεν·
Odyssey 1.5	οὗτος μὲν δὴ ἄεθλος ἀάατος ἐκτετέλεσται·
Odyssey 1.6	νῦν αὖτε σκοπὸν ἄλλον, ὃν οὔ πώ τις βάλεν ἀνήρ,
Odyssey 1.7	εἴσομαι, αἴ κε τύχωμι, πόρῃ δέ μοι εὖχος Ἀπόλλων.
Odyssey 1.8	ἦ καὶ ἐπʼ Ἀντινόῳ ἰθύνετο πικρὸν ὀϊστόν.
Odyssey 1.9	ἦ τοι ὁ καλὸν ἄλεισον ἀναιρήσεσθαι ἔμελλε,
Odyssey 1.10	χρύσεον ἄμφωτον, καὶ δὴ μετὰ χερσὶν ἐνώμα,
Odyssey 1.11	ὄφρα πίοι οἴνοιο· φόνος δέ οἱ οὐκ ἐνὶ θυμῷ
Odyssey 1.12	μέμβλετο· τίς κʼ οἴοιτο μετʼ ἀνδράσι δαιτυμόνεσσι
Odyssey 1.13	μοῦνον ἐνὶ πλεόνεσσι, καὶ εἰ μάλα καρτερὸς εἴη,
Odyssey 1.14	οἷ τεύξειν θάνατόν τε κακὸν καὶ κῆρα μέλαιναν;
Odyssey 1.15	τὸν δʼ Ὀδυσεὺς κατὰ λαιμὸν ἐπισχόμενος βάλεν ἰῷ,
Odyssey 1.16	ἀντικρὺ δʼ ἁπαλοῖο διʼ αὐχένος ἤλυθʼ ἀκωκή.
Odyssey 1.17	ἐκλίνθη δʼ ἑτέρωσε, δέπας δέ οἱ ἔκπεσε χειρὸς
Odyssey 1.18	βλημένου, αὐτίκα δʼ αὐλὸς ἀνὰ ῥῖνας παχὺς ἦλθεν
Odyssey 1.19	αἵματος ἀνδρομέοιο· θοῶς δʼ ἀπὸ εἷο τράπεζαν
Odyssey 1.20	ὦσε ποδὶ πλήξας, ἀπὸ δʼ εἴδατα χεῦεν ἔραζε·
Odyssey 1.21	σῖτός τε κρέα τʼ ὀπτὰ φορύνετο. τοὶ δʼ ὁμάδησαν
Odyssey 1.22	μνηστῆρες κατὰ δώμαθʼ, ὅπως ἴδον ἄνδρα πεσόντα,
Odyssey 1.23	ἐκ δὲ θρόνων ἀνόρουσαν ὀρινθέντες κατὰ δῶμα,
Odyssey 1.24	πάντοσε παπταίνοντες ἐϋδμήτους ποτὶ τοίχους·
Odyssey 1.25	οὐδέ πη ἀσπὶς ἔην οὐδʼ ἄλκιμον ἔγχος ἑλέσθαι.
Odyssey 1.26	νείκειον δʼ Ὀδυσῆα χολωτοῖσιν ἐπέεσσι·
Odyssey 1.27	ξεῖνε, κακῶς ἀνδρῶν τοξάζεαι· οὐκέτʼ ἀέθλων
Odyssey 1.28	ἄλλων ἀντιάσεις· νῦν τοι σῶς αἰπὺς ὄλεθρος.
Odyssey 1.29	καὶ γὰρ δὴ νῦν φῶτα κατέκτανες ὃς μέγʼ ἄριστος
Odyssey 1.30	κούρων εἰν Ἰθάκῃ· τῷ σʼ ἐνθάδε γῦπες ἔδονται.
Odyssey 1.31	ἴσκεν ἕκαστος ἀνήρ, ἐπεὶ ἦ φάσαν οὐκ ἐθέλοντα
Odyssey 1.32	ἄνδρα κατακτεῖναι· τὸ δὲ νήπιοι οὐκ ἐνόησαν,
Odyssey 1.33	ὡς δή σφιν καὶ πᾶσιν ὀλέθρου πείρατʼ ἐφῆπτο.
Odyssey 1.34	τοὺς δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
Odyssey 1.35	ὦ κύνες, οὔ μʼ ἔτʼ ἐφάσκεθʼ ὑπότροπον οἴκαδʼ ἱκέσθαι
Odyssey 1.36	δήμου ἄπο Τρώων, ὅτι μοι κατεκείρετε οἶκον,
Odyssey 1.37	δμῳῇσιν δὲ γυναιξὶ παρευνάζεσθε βιαίως,
Odyssey 1.38	αὐτοῦ τε ζώοντος ὑπεμνάασθε γυναῖκα,
Odyssey 1.39	οὔτε θεοὺς δείσαντες, οἳ οὐρανὸν εὐρὺν ἔχουσιν,
Odyssey 1.40	οὔτε τινʼ ἀνθρώπων νέμεσιν κατόπισθεν ἔσεσθαι·
Odyssey 1.41	νῦν ὑμῖν καὶ πᾶσιν ὀλέθρου πείρατʼ ἐφῆπται.
Odyssey 1.42	ὣς φάτο, τοὺς δʼ ἄρα πάντας ὑπὸ χλωρὸν δέος εἷλεν·
Odyssey 1.43	πάπτηνεν δὲ ἕκαστος ὅπη φύγοι αἰπὺν ὄλεθρον.
Odyssey 1.44	Εὐρύμαχος δέ μιν οἶος ἀμειβόμενος προσέειπεν·
Odyssey 1.45	εἰ μὲν δὴ Ὀδυσεὺς Ἰθακήσιος εἰλήλουθας,
Odyssey 1.46	ταῦτα μὲν αἴσιμα εἶπας, ὅσα ῥέζεσκον Ἀχαιοί,
Odyssey 1.47	πολλὰ μὲν ἐν μεγάροισιν ἀτάσθαλα, πολλὰ δʼ ἐπʼ ἀγροῦ.
Odyssey 1.48	ἀλλʼ ὁ μὲν ἤδη κεῖται ὃς αἴτιος ἔπλετο πάντων,
Odyssey 1.49	Ἀντίνοος· οὗτος γὰρ ἐπίηλεν τάδε ἔργα,
Odyssey 1.50	οὔ τι γάμου τόσσον κεχρημένος οὐδὲ χατίζων,
Odyssey 1.51	ἀλλʼ ἄλλα φρονέων, τά οἱ οὐκ ἐτέλεσσε Κρονίων,
Odyssey 1.52	ὄφρʼ Ἰθάκης κατὰ δῆμον ἐϋκτιμένης βασιλεύοι
Odyssey 1.53	αὐτός, ἀτὰρ σὸν παῖδα κατακτείνειε λοχήσας.
Odyssey 1.54	νῦν δʼ ὁ μὲν ἐν μοίρῃ πέφαται, σὺ δὲ φείδεο λαῶν
Odyssey 1.55	σῶν· ἀτὰρ ἄμμες ὄπισθεν ἀρεσσάμενοι κατὰ δῆμον,
Odyssey 1.56	ὅσσα τοι ἐκπέποται καὶ ἐδήδοται ἐν μεγάροισι,
Odyssey 1.57	τιμὴν ἀμφὶς ἄγοντες ἐεικοσάβοιον ἕκαστος,
Odyssey 1.58	χαλκόν τε χρυσόν τʼ ἀποδώσομεν, εἰς ὅ κε σὸν κῆρ
Odyssey 1.59	ἰανθῇ· πρὶν δʼ οὔ τι νεμεσσητὸν κεχολῶσθαι.
Odyssey 1.60	τὸν δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
Odyssey 1.61	Εὐρύμαχʼ, οὐδʼ εἴ μοι πατρώϊα πάντʼ ἀποδοῖτε,
Odyssey 1.62	ὅσσα τε νῦν ὔμμʼ ἐστὶ καὶ εἴ ποθεν ἄλλʼ ἐπιθεῖτε,
Odyssey 1.63	οὐδέ κεν ὣς ἔτι χεῖρας ἐμὰς λήξαιμι φόνοιο
Odyssey 1.64	πρὶν πᾶσαν μνηστῆρας ὑπερβασίην ἀποτῖσαι.
Odyssey 1.65	νῦν ὑμῖν παράκειται ἐναντίον ἠὲ μάχεσθαι
Odyssey 1.66	ἢ φεύγειν, ὅς κεν θάνατον καὶ κῆρας ἀλύξῃ·
Odyssey 1.67	ἀλλά τινʼ οὐ φεύξεσθαι ὀΐομαι αἰπὺν ὄλεθρον.
Odyssey 1.68	ὣς φάτο, τῶν δʼ αὐτοῦ λύτο γούνατα καὶ φίλον ἦτορ.
Odyssey 1.69	τοῖσιν δʼ Εὐρύμαχος προσεφώνεε δεύτερον αὖτις·
Odyssey 1.70	ὦ φίλοι, οὐ γὰρ σχήσει ἀνὴρ ὅδε χεῖρας ἀάπτους,
Odyssey 1.71	ἀλλʼ ἐπεὶ ἔλλαβε τόξον ἐΰξοον ἠδὲ φαρέτρην,
Odyssey 1.72	οὐδοῦ ἄπο ξεστοῦ τοξάσσεται, εἰς ὅ κε πάντας
Odyssey 1.73	ἄμμε κατακτείνῃ· ἀλλὰ μνησώμεθα χάρμης.
Odyssey 1.74	φάσγανά τε σπάσσασθε καὶ ἀντίσχεσθε τραπέζας
Odyssey 1.75	ἰῶν ὠκυμόρων· ἐπὶ δʼ αὐτῷ πάντες ἔχωμεν
Odyssey 1.76	ἀθρόοι, εἴ κέ μιν οὐδοῦ ἀπώσομεν ἠδὲ θυράων,
Odyssey 1.77	ἔλθωμεν δʼ ἀνὰ ἄστυ, βοὴ δʼ ὤκιστα γένοιτο·
Odyssey 1.78	τῷ κε τάχʼ οὗτος ἀνὴρ νῦν ὕστατα τοξάσσαιτο.
Odyssey 1.79	ὣς ἄρα φωνήσας εἰρύσσατο φάσγανον ὀξὺ
Odyssey 1.80	χάλκεον, ἀμφοτέρωθεν ἀκαχμένον, ἆλτο δʼ ἐπʼ αὐτῷ
Odyssey 1.81	σμερδαλέα ἰάχων· ὁ δʼ ἁμαρτῆ δῖος Ὀδυσσεὺς
Odyssey 1.82	ἰὸν ἀποπροίει, βάλε δὲ στῆθος παρὰ μαζόν,
Odyssey 1.83	ἐν δέ οἱ ἥπατι πῆξε θοὸν βέλος· ἐκ δʼ ἄρα χειρὸς
Odyssey 1.84	φάσγανον ἧκε χαμᾶζε, περιρρηδὴς δὲ τραπέζῃ
Odyssey 1.85	κάππεσεν ἰδνωθείς, ἀπὸ δʼ εἴδατα χεῦεν ἔραζε
Odyssey 1.86	καὶ δέπας ἀμφικύπελλον· ὁ δὲ χθόνα τύπτε μετώπῳ
Odyssey 1.87	θυμῷ ἀνιάζων, ποσὶ δὲ θρόνον ἀμφοτέροισι
Odyssey 1.88	λακτίζων ἐτίνασσε· κατʼ ὀφθαλμῶν δʼ ἔχυτʼ ἀχλύς.
Odyssey 1.89	Ἀμφίνομος δʼ Ὀδυσῆος ἐείσατο κυδαλίμοιο
Odyssey 1.90	ἀντίος ἀΐξας, εἴρυτο δὲ φάσγανον ὀξύ,
Odyssey 1.91	εἴ πώς οἱ εἴξειε θυράων. ἀλλʼ ἄρα μιν φθῆ
Odyssey 1.92	Τηλέμαχος κατόπισθε βαλὼν χαλκήρεϊ δουρὶ
Odyssey 1.93	ὤμων μεσσηγύς, διὰ δὲ στήθεσφιν ἔλασσεν·
Odyssey 1.94	δούπησεν δὲ πεσών, χθόνα δʼ ἤλασε παντὶ μετώπῳ.
Odyssey 1.95	Τηλέμαχος δʼ ἀπόρουσε, λιπὼν δολιχόσκιον ἔγχος
Odyssey 1.96	αὐτοῦ ἐν Ἀμφινόμῳ· περὶ γὰρ δίε μή τις Ἀχαιῶν
Odyssey 1.97	ἔγχος ἀνελκόμενον δολιχόσκιον ἢ ἐλάσειε
Odyssey 1.98	φασγάνῳ ἀΐξας ἠὲ προπρηνέα τύψας.
Odyssey 1.99	βῆ δὲ θέειν, μάλα δʼ ὦκα φίλον πατέρʼ εἰσαφίκανεν,
Odyssey 1.100	ἀγχοῦ δʼ ἱστάμενος ἔπεα πτερόεντα προσηύδα·
Odyssey 1.101	ὦ πάτερ, ἤδη τοι σάκος οἴσω καὶ δύο δοῦρε
Odyssey 1.102	καὶ κυνέην πάγχαλκον, ἐπὶ κροτάφοις ἀραρυῖαν
Odyssey 1.103	αὐτός τʼ ἀμφιβαλεῦμαι ἰών, δώσω δὲ συβώτῃ
Odyssey 1.104	καὶ τῷ βουκόλῳ ἄλλα· τετευχῆσθαι γὰρ ἄμεινον.
Odyssey 1.105	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.106	οἶσε θέων, ἧός μοι ἀμύνεσθαι πάρʼ ὀϊστοί,
Odyssey 1.107	μή μʼ ἀποκινήσωσι θυράων μοῦνον ἐόντα.
Odyssey 1.108	ὣς φάτο, Τηλέμαχος δὲ φίλῳ ἐπεπείθετο πατρί,
Odyssey 1.109	βῆ δʼ ἴμεναι θάλαμόνδʼ, ὅθι οἱ κλυτὰ τεύχεα κεῖτο.
Odyssey 1.110	ἔνθεν τέσσαρα μὲν σάκεʼ ἔξελε, δούρατα δʼ ὀκτὼ
Odyssey 1.111	καὶ πίσυρας κυνέας χαλκήρεας ἱπποδασείας·
Odyssey 1.112	βῆ δὲ φέρων, μάλα δʼ ὦκα φίλον πατέρʼ εἰσαφίκανεν,
Odyssey 1.113	αὐτὸς δὲ πρώτιστα περὶ χροῒ δύσετο χαλκόν·
Odyssey 1.114	ὣς δʼ αὔτως τὼ δμῶε δυέσθην τεύχεα καλά,
Odyssey 1.115	ἔσταν δʼ ἀμφʼ Ὀδυσῆα δαΐφρονα ποικιλομήτην.
Odyssey 1.116	αὐτὰρ ὅ γʼ, ὄφρα μὲν αὐτῷ ἀμύνεσθαι ἔσαν ἰοί.
Odyssey 1.117	τόφρα μνηστήρων ἕνα γʼ αἰεὶ ᾧ ἐνὶ οἴκῳ
Odyssey 1.118	βάλλε τιτυσκόμενος· τοὶ δʼ ἀγχιστῖνοι ἔπιπτον.
Odyssey 1.119	αὐτὰρ ἐπεὶ λίπον ἰοὶ ὀϊστεύοντα ἄνακτα,
Odyssey 1.120	τόξον μὲν πρὸς σταθμὸν ἐϋσταθέος μεγάροιο
Odyssey 1.121	ἔκλινʼ ἑστάμεναι, πρὸς ἐνώπια παμφανόωντα,
Odyssey 1.122	αὐτὸς δʼ ἀμφʼ ὤμοισι σάκος θέτο τετραθέλυμνον,
Odyssey 1.123	κρατὶ δʼ ἐπʼ ἰφθίμῳ κυνέην εὔτυκτον ἔθηκεν,
Odyssey 1.124	ἵππουριν, δεινὸν δὲ λόφος καθύπερθεν ἔνευεν·
Odyssey 1.125	εἵλετο δʼ ἄλκιμα δοῦρε δύω κεκορυθμένα χαλκῷ.
Odyssey 1.126	ὀρσοθύρη δέ τις ἔσκεν ἐϋδμήτῳ ἐνὶ τοίχῳ,
Odyssey 1.127	ἀκρότατον δὲ παρʼ οὐδὸν ἐϋσταθέος μεγάροιο
Odyssey 1.128	ἦν ὁδὸς ἐς λαύρην, σανίδες δʼ ἔχον εὖ ἀραρυῖαι.
Odyssey 1.129	τὴν δʼ Ὀδυσεὺς φράζεσθαι ἀνώγει δῖον ὑφορβὸν
Odyssey 1.130	ἑσταότʼ ἄγχʼ αὐτῆς· μία δʼ οἴη γίγνετʼ ἐφορμή.
Odyssey 1.131	τοῖς δʼ Ἀγέλεως μετέειπεν, ἔπος πάντεσσι πιφαύσκων·
Odyssey 1.132	ὦ φίλοι, οὐκ ἂν δή τις ἀνʼ ὀρσοθύρην ἀναβαίη
Odyssey 1.133	καὶ εἴποι λαοῖσι, βοὴ δʼ ὤκιστα γένοιτο;
Odyssey 1.134	τῷ κε τάχʼ οὗτος ἀνὴρ νῦν ὕστατα τοξάσσαιτο.
Odyssey 1.135	τὸν δʼ αὖτε προσέειπε Μελάνθιος, αἰπόλος αἰγῶν·
Odyssey 1.136	οὔ πως ἔστʼ, Ἀγέλαε διοτρεφές· ἄγχι γὰρ αἰνῶς
Odyssey 1.137	αὐλῆς καλὰ θύρετρα καὶ ἀργαλέον στόμα λαύρης·
Odyssey 1.138	καί χʼ εἷς πάντας ἐρύκοι ἀνήρ, ὅς τʼ ἄλκιμος εἴη.
Odyssey 1.139	ἀλλʼ ἄγεθʼ, ὑμῖν τεύχεʼ ἐνείκω θωρηχθῆναι
Odyssey 1.140	ἐκ θαλάμου· ἔνδον γάρ, ὀΐομαι, οὐδέ πη ἄλλῃ
Odyssey 1.141	τεύχεα κατθέσθην Ὀδυσεὺς καὶ φαίδιμος υἱός.
Odyssey 1.142	ὣς εἰπὼν ἀνέβαινε Μελάνθιος, αἰπόλος αἰγῶν,
Odyssey 1.143	εἰς θαλάμους Ὀδυσῆος ἀνὰ ῥῶγας μεγάροιο.
Odyssey 1.144	ἔνθεν δώδεκα μὲν σάκεʼ ἔξελε, τόσσα δὲ δοῦρα
Odyssey 1.145	καὶ τόσσας κυνέας χαλκήρεας ἱπποδασείας·
Odyssey 1.146	βῆ δʼ ἴμεναι, μάλα δʼ ὦκα φέρων μνηστῆρσιν ἔδωκεν.
Odyssey 1.147	καὶ τότʼ Ὀδυσσῆος λύτο γούνατα καὶ φίλον ἦτορ,
Odyssey 1.148	ὡς περιβαλλομένους ἴδε τεύχεα χερσί τε δοῦρα
Odyssey 1.149	μακρὰ τινάσσοντας· μέγα δʼ αὐτῷ φαίνετο ἔργον.
Odyssey 1.150	αἶψα δὲ Τηλέμαχον ἔπεα πτερόεντα προσηύδα·
Odyssey 1.151	Τηλέμαχʼ, ἦ μάλα δή τις ἐνὶ μεγάροισι γυναικῶν
Odyssey 1.152	νῶϊν ἐποτρύνει πόλεμον κακὸν ἠὲ Μελανθεύς.
Odyssey 1.153	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.154	ὦ πάτερ, αὐτὸς ἐγὼ τόδε γʼ ἤμβροτον—οὐδέ τις ἄλλος
Odyssey 1.155	αἴτιος—ὃς θαλάμοιο θύρην πυκινῶς ἀραρυῖαν
Odyssey 1.156	κάλλιπον ἀγκλίνας· τῶν δὲ σκοπὸς ἦεν ἀμείνων.
Odyssey 1.157	ἀλλʼ ἴθι, δῖʼ Εὔμαιε, θύρην ἐπίθες θαλάμοιο
Odyssey 1.158	καὶ φράσαι ἤ τις ἄρʼ ἐστὶ γυναικῶν ἣ τάδε ῥέζει,
Odyssey 1.159	ἢ υἱὸς Δολίοιο, Μελανθεύς, τόν περ ὀΐω.
Odyssey 1.160	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.161	βῆ δʼ αὖτις θάλαμόνδε Μελάνθιος, αἰπόλος αἰγῶν,
Odyssey 1.162	οἴσων τεύχεα καλά. νόησε δὲ δῖος ὑφορβός,
Odyssey 1.163	αἶψα δʼ Ὀδυσσῆα προσεφώνεεν ἐγγὺς ἐόντα·
Odyssey 1.164	διογενὲς Λαερτιάδη, πολυμήχανʼ Ὀδυσσεῦ,
Odyssey 1.165	κεῖνος δʼ αὖτʼ ἀΐδηλος ἀνήρ, ὃν ὀϊόμεθʼ αὐτοί,
Odyssey 1.166	ἔρχεται ἐς θάλαμον· σὺ δέ μοι νημερτὲς ἐνίσπες,
Odyssey 1.167	ἤ μιν ἀποκτείνω, αἴ κε κρείσσων γε γένωμαι,
Odyssey 1.168	ἦε σοὶ ἐνθάδʼ ἄγω, ἵνʼ ὑπερβασίας ἀποτίσῃ
Odyssey 1.169	πολλάς, ὅσσας οὗτος ἐμήσατο σῷ ἐνὶ οἴκῳ.
Odyssey 1.170	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.171	ἦ τοι ἐγὼ καὶ Τηλέμαχος μνηστῆρας ἀγαυοὺς
Odyssey 1.172	σχήσομεν ἔντοσθεν μεγάρων, μάλα περ μεμαῶτας.
Odyssey 1.173	σφῶϊ δʼ ἀποστρέψαντε πόδας καὶ χεῖρας ὕπερθεν
Odyssey 1.174	ἐς θάλαμον βαλέειν, σανίδας δʼ ἐκδῆσαι ὄπισθε,
Odyssey 1.175	σειρὴν δὲ πλεκτὴν ἐξ αὐτοῦ πειρήναντε
Odyssey 1.176	κίονʼ ἀνʼ ὑψηλὴν ἐρύσαι πελάσαι τε δοκοῖσιν,
Odyssey 1.177	ὥς κεν δηθὰ ζωὸς ἐὼν χαλέπʼ ἄλγεα πάσχῃ·
Odyssey 1.178	ὣς ἔφαθʼ, οἱ δʼ ἄρα τοῦ μάλα μὲν κλύον ἠδʼ ἐπίθοντο,
Odyssey 1.179	βὰν δʼ ἴμεν ἐς θάλαμον, λαθέτην δέ μιν ἔνδον ἐόντα.
Odyssey 1.180	ἦ τοι ὁ μὲν θαλάμοιο μυχὸν κάτα τεύχεʼ ἐρεύνα,
Odyssey 1.181	τὼ δʼ ἔσταν ἑκάτερθε παρὰ σταθμοῖσι μένοντε.
Odyssey 1.182	εὖθʼ ὑπὲρ οὐδὸν ἔβαινε Μελάνθιος, αἰπόλος αἰγῶν,
Odyssey 1.183	τῇ ἑτέρῃ μὲν χειρὶ φέρων καλὴν τρυφάλειαν,
Odyssey 1.184	τῇ δʼ ἑτέρῃ σάκος εὐρὺ γέρον, πεπαλαγμένον ἄζῃ,
Odyssey 1.185	Λαέρτεω ἥρωος, ὃ κουρίζων φορέεσκε·
Odyssey 1.186	δὴ τότε γʼ ἤδη κεῖτο, ῥαφαὶ δὲ λέλυντο ἱμάντων·
Odyssey 1.187	τὼ δʼ ἄρʼ ἐπαΐξανθʼ ἑλέτην ἔρυσάν τέ μιν εἴσω
Odyssey 1.188	κουρίξ, ἐν δαπέδῳ δὲ χαμαὶ βάλον ἀχνύμενον κῆρ,
Odyssey 1.189	σὺν δὲ πόδας χεῖράς τε δέον θυμαλγέϊ δεσμῷ
Odyssey 1.190	εὖ μάλʼ ἀποστρέψαντε διαμπερές, ὡς ἐκέλευσεν
Odyssey 1.191	υἱὸς Λαέρταο, πολύτλας δῖος Ὀδυσσεύς·
Odyssey 1.192	σειρὴν δὲ πλεκτὴν ἐξ αὐτοῦ πειρήναντε
Odyssey 1.193	κίονʼ ἀνʼ ὑψηλὴν ἔρυσαν πέλασάν τε δοκοῖσι.
Odyssey 1.194	τὸν δʼ ἐπικερτομέων προσέφης, Εὔμαιε συβῶτα·
Odyssey 1.195	νῦν μὲν δὴ μάλα πάγχυ, Μελάνθιε, νύκτα φυλάξεις,
Odyssey 1.196	εὐνῇ ἔνι μαλακῇ καταλέγμενος, ὥς σε ἔοικεν·
Odyssey 1.197	οὐδέ σέ γʼ ἠριγένεια παρʼ Ὠκεανοῖο ῥοάων
Odyssey 1.198	λήσει ἐπερχομένη χρυσόθρονος, ἡνίκʼ ἀγινεῖς
Odyssey 1.199	αἶγας μνηστήρεσσι δόμον κάτα δαῖτα πένεσθαι.
Odyssey 1.200	ὣς ὁ μὲν αὖθι λέλειπτο, ταθεὶς ὀλοῷ ἐνὶ δεσμῷ·
Odyssey 1.201	τὼ δʼ ἐς τεύχεα δύντε, θύρην ἐπιθέντε φαεινήν,
Odyssey 1.202	βήτην εἰς Ὀδυσῆα δαΐφρονα, ποικιλομήτην.
Odyssey 1.203	ἔνθα μένος πνείοντες ἐφέστασαν, οἱ μὲν ἐπʼ οὐδοῦ
Odyssey 1.204	τέσσαρες, οἱ δʼ ἔντοσθε δόμων πολέες τε καὶ ἐσθλοί.
Odyssey 1.205	τοῖσι δʼ ἐπʼ ἀγχίμολον θυγάτηρ Διὸς ἦλθεν Ἀθήνη,
Odyssey 1.206	Μέντορι εἰδομένη ἠμὲν δέμας ἠδὲ καὶ αὐδήν.
Odyssey 1.207	τὴν δʼ Ὀδυσεὺς γήθησεν ἰδὼν καὶ μῦθον ἔειπε·
Odyssey 1.208	Μέντορ, ἄμυνον ἀρήν, μνῆσαι δʼ ἑτάροιο φίλοιο,
Odyssey 1.209	ὅς σʼ ἀγαθὰ ῥέζεσκον· ὁμηλικίην δέ μοί ἐσσι.
Odyssey 1.210	ὣς φάτʼ, ὀϊόμενος λαοσσόον ἔμμεν Ἀθήνην.
Odyssey 1.211	μνηστῆρες δʼ ἑτέρωθεν ὁμόκλεον ἐν μεγάροισι·
Odyssey 1.212	πρῶτος τήν γʼ ἐνένιπε Δαμαστορίδης Ἀγέλαος·
Odyssey 1.213	Μέντορ, μή σʼ ἐπέεσσι παραιπεπίθῃσιν Ὀδυσσεὺς
Odyssey 1.214	μνηστήρεσσι μάχεσθαι, ἀμυνέμεναι δέ οἱ αὐτῷ.
Odyssey 1.215	ὧδε γὰρ ἡμέτερόν γε νόον τελέεσθαι ὀΐω·
Odyssey 1.216	ὁππότε κεν τούτους κτέωμεν, πατέρʼ ἠδὲ καὶ υἱόν,
Odyssey 1.217	ἐν δὲ σὺ τοῖσιν ἔπειτα πεφήσεαι, οἷα μενοινᾷς
Odyssey 1.218	ἔρδειν ἐν μεγάροις· σῷ δʼ αὐτοῦ κράατι τίσεις.
Odyssey 1.219	αὐτὰρ ἐπὴν ὑμέων γε βίας ἀφελώμεθα χαλκῷ,
Odyssey 1.220	κτήμαθʼ ὁπόσσα τοί ἐστι, τά τʼ ἔνδοθι καὶ τὰ θύρηφι,
Odyssey 1.221	τοῖσιν Ὀδυσσῆος μεταμίξομεν· οὐδέ τοι υἷας
Odyssey 1.222	ζώειν ἐν μεγάροισιν ἐάσομεν, οὐδέ θύγατρας
Odyssey 1.223	οὐδʼ ἄλοχον κεδνὴν Ἰθάκης κατὰ ἄστυ πολεύειν.
Odyssey 1.224	ὣς φάτʼ, Ἀθηναίη δὲ χολώσατο κηρόθι μᾶλλον,
Odyssey 1.225	νείκεσσεν δʼ Ὀδυσῆα χολωτοῖσιν ἐπέεσσιν·
Odyssey 1.226	οὐκέτι σοί γʼ, Ὀδυσεῦ, μένος ἔμπεδον οὐδέ τις ἀλκή
Odyssey 1.227	οἵη ὅτʼ ἀμφʼ Ἑλένῃ λευκωλένῳ εὐπατερείῃ,
Odyssey 1.228	εἰνάετες Τρώεσσιν ἐμάρναο νωλεμὲς αἰεί,
Odyssey 1.229	πολλοὺς δʼ ἄνδρας ἔπεφνες ἐν αἰνῇ δηϊοτῆτι,
Odyssey 1.230	σῇ δʼ ἥλω βουλῇ Πριάμου πόλις εὐρυάγυια.
Odyssey 1.231	πῶς δὴ νῦν, ὅτε σόν τε δόμον καὶ κτήμαθʼ ἱκάνεις,
Odyssey 1.232	ἄντα μνηστήρων ὀλοφύρεαι ἄλκιμος εἶναι;
Odyssey 1.233	ἀλλʼ ἄγε δεῦρο, πέπον, παρʼ ἔμʼ ἵστασο καὶ ἴδε ἔργον,
Odyssey 1.234	ὄφρʼ εἰδῇς οἷός τοι ἐν ἀνδράσι δυσμενέεσσιν
Odyssey 1.235	Μέντωρ Ἀλκιμίδης εὐεργεσίας ἀποτίνειν.
Odyssey 1.236	ἦ ῥα, καὶ οὔ πω πάγχυ δίδου ἑτεραλκέα νίκην,
Odyssey 1.237	ἀλλʼ ἔτʼ ἄρα σθένεός τε καὶ ἀλκῆς πειρήτιζεν
Odyssey 1.238	ἠμὲν Ὀδυσσῆος ἠδʼ υἱοῦ κυδαλίμοιο.
Odyssey 1.239	αὐτὴ δʼ αἰθαλόεντος ἀνὰ μεγάροιο μέλαθρον
Odyssey 1.240	ἕζετʼ ἀναΐξασα, χελιδόνι εἰκέλη ἄντην.
Odyssey 1.241	μνηστῆρας δʼ ὤτρυνε Δαμαστορίδης Ἀγέλαος,
Odyssey 1.242	Εὐρύνομός τε καὶ Ἀμφιμέδων Δημοπτόλεμός τε,
Odyssey 1.243	Πείσανδρός τε Πολυκτορίδης Πόλυβός τε δαΐφρων·
Odyssey 1.244	οἱ γὰρ μνηστήρων ἀρετῇ ἔσαν ἔξοχʼ ἄριστοι,
Odyssey 1.245	ὅσσοι ἔτʼ ἔζωον περί τε ψυχέων ἐμάχοντο·
Odyssey 1.246	τοὺς δʼ ἤδη ἐδάμασσε βιὸς καὶ ταρφέες ἰοί.
Odyssey 1.247	τοῖς δʼ Ἀγέλεως μετέειπεν, ἔπος πάντεσσι πιφαύσκων·
Odyssey 1.248	ὦ φίλοι, ἤδη σχήσει ἀνὴρ ὅδε χεῖρας ἀάπτους·
Odyssey 1.249	καὶ δή οἱ Μέντωρ μὲν ἔβη κενὰ εὔγματα εἰπών,
Odyssey 1.250	οἱ δʼ οἶοι λείπονται ἐπὶ πρώτῃσι θύρῃσι.
Odyssey 1.251	τῷ νῦν μὴ ἅμα πάντες ἐφίετε δούρατα μακρά,
Odyssey 1.252	ἀλλʼ ἄγεθʼ οἱ ἓξ πρῶτον ἀκοντίσατʼ, αἴ κέ ποθι Ζεὺς
Odyssey 1.253	δώῃ Ὀδυσσῆα βλῆσθαι καὶ κῦδος ἀρέσθαι.
Odyssey 1.254	τῶν δʼ ἄλλων οὐ κῆδος, ἐπὴν οὗτός γε πέσῃσιν.
Odyssey 1.255	ὣς ἔφαθʼ, οἱ δʼ ἄρα πάντες ἀκόντισαν ὡς ἐκέλευεν,
Odyssey 1.256	ἱέμενοι· τὰ δὲ πάντα ἐτώσια θῆκεν Ἀθήνη,
Odyssey 1.257	τῶν ἄλλος μὲν σταθμὸν ἐϋσταθέος μεγάροιο
Odyssey 1.258	βεβλήκει, ἄλλος δὲ θύρην πυκινῶς ἀραρυῖαν·
Odyssey 1.259	ἄλλου δʼ ἐν τοίχῳ μελίη πέσε χαλκοβάρεια.
Odyssey 1.260	αὐτὰρ ἐπεὶ δὴ δούρατʼ ἀλεύαντο μνηστήρων,
Odyssey 1.261	τοῖς δʼ ἄρα μύθων ἦρχε πολύτλας δῖος Ὀδυσσεύς·
Odyssey 1.262	ὦ φίλοι, ἤδη μέν κεν ἐγὼν εἴποιμι καὶ ἄμμι
Odyssey 1.263	μνηστήρων ἐς ὅμιλον ἀκοντίσαι, οἳ μεμάασιν
Odyssey 1.264	ἡμέας ἐξεναρίξαι ἐπὶ προτέροισι κακοῖσιν.
Odyssey 1.265	ὣς ἔφαθʼ, οἱ δʼ ἄρα πάντες ἀκόντισαν ὀξέα δοῦρα
Odyssey 1.266	ἄντα τιτυσκόμενοι· Δημοπτόλεμον μὲν Ὀδυσσεύς,
Odyssey 1.267	Εὐρυάδην δʼ ἄρα Τηλέμαχος, Ἔλατον δὲ συβώτης,
Odyssey 1.268	Πείσανδρον δʼ ἄρʼ ἔπεφνε βοῶν ἐπιβουκόλος ἀνήρ.
Odyssey 1.269	οἱ μὲν ἔπειθʼ ἅμα πάντες ὀδὰξ ἕλον ἄσπετον οὖδας,
Odyssey 1.270	μνηστῆρες δʼ ἀνεχώρησαν μεγάροιο μυχόνδε·
Odyssey 1.271	τοὶ δʼ ἄρʼ ἐπήϊξαν, νεκύων δʼ ἐξ ἔγχεʼ ἕλοντο.
Odyssey 1.272	αὖτις δὲ μνηστῆρες ἀκόντισαν ὀξέα δοῦρα
Odyssey 1.273	ἱέμενοι· τὰ δὲ πολλὰ ἐτώσια θῆκεν Ἀθήνη.
Odyssey 1.274	τῶν ἄλλος μὲν σταθμὸν ἐϋσταθέος μεγάροιο
Odyssey 1.275	βεβλήκειν, ἄλλος δὲ θύρην πυκινῶς ἀραρυῖαν·
Odyssey 1.276	ἄλλου δʼ ἐν τοίχῳ μελίη πέσε χαλκοβάρεια.
Odyssey 1.277	Ἀμφιμέδων δʼ ἄρα Τηλέμαχον βάλε χεῖρʼ ἐπὶ καρπῷ
Odyssey 1.278	λίγδην, ἄκρον δὲ ῥινὸν δηλήσατο χαλκός.
Odyssey 1.279	Κτήσιππος δʼ Εὔμαιον ὑπὲρ σάκος ἔγχεϊ μακρῷ
Odyssey 1.280	ὦμον ἐπέγραψεν· τὸ δʼ ὑπέρπτατο, πῖπτε δʼ ἔραζε.
Odyssey 1.281	τοὶ δʼ αὖτʼ ἀμφʼ Ὀδυσῆα δαΐφρονα ποικιλομήτην,
Odyssey 1.282	μνηστήρων ἐς ὅμιλον ἀκόντισαν ὀξέα δοῦρα.
Odyssey 1.283	ἔνθʼ αὖτʼ Εὐρυδάμαντα βάλε πτολίπορθος Ὀδυσσεύς,
Odyssey 1.284	Ἀμφιμέδοντα δὲ Τηλέμαχος, Πόλυβον δὲ συβώτης·
Odyssey 1.285	Κτήσιππον δʼ ἄρʼ ἔπειτα βοῶν ἐπιβουκόλος ἀνὴρ
Odyssey 1.286	βεβλήκει πρὸς στῆθος, ἐπευχόμενος δὲ προσηύδα·
Odyssey 1.287	ὦ Πολυθερσεΐδη φιλοκέρτομε, μή ποτε πάμπαν
Odyssey 1.288	εἴκων ἀφραδίῃς μέγα εἰπεῖν, ἀλλὰ θεοῖσιν
Odyssey 1.289	μῦθον ἐπιτρέψαι, ἐπεὶ ἦ πολὺ φέρτεροί εἰσι.
Odyssey 1.290	τοῦτό τοι ἀντὶ ποδὸς ξεινήϊον, ὅν ποτʼ ἔδωκας
Odyssey 1.291	ἀντιθέῳ Ὀδυσῆϊ δόμον κάτʼ ἀλητεύοντι.
Odyssey 1.292	ἦ ῥα βοῶν ἑλίκων ἐπιβουκόλος· αὐτὰρ Ὀδυσσεὺς
Odyssey 1.293	οὖτα Δαμαστορίδην αὐτοσχεδὸν ἔγχεϊ μακρῷ.
Odyssey 1.294	Τηλέμαχος δʼ Εὐηνορίδην Λειώκριτον οὖτα
Odyssey 1.295	δουρὶ μέσον κενεῶνα, διαπρὸ δὲ χαλκὸν ἔλασσεν·
Odyssey 1.296	ἤριπε δὲ πρηνής, χθόνα δʼ ἤλασε παντὶ μετώπῳ.
Odyssey 1.297	δὴ τότʼ Ἀθηναίη φθισίμβροτον αἰγίδʼ ἀνέσχεν
Odyssey 1.298	ὑψόθεν ἐξ ὀροφῆς· τῶν δὲ φρένες ἐπτοίηθεν.
Odyssey 1.299	οἱ δʼ ἐφέβοντο κατὰ μέγαρον βόες ὣς ἀγελαῖαι·
Odyssey 1.300	τὰς μέν τʼ αἰόλος οἶστρος ἐφορμηθεὶς ἐδόνησεν
Odyssey 1.301	ὥρῃ ἐν εἰαρινῇ, ὅτε τʼ ἤματα μακρὰ πέλονται.
Odyssey 1.302	οἱ δʼ ὥς τʼ αἰγυπιοὶ γαμψώνυχες ἀγκυλοχεῖλαι,
Odyssey 1.303	ἐξ ὀρέων ἐλθόντες ἐπʼ ὀρνίθεσσι θόρωσι·
Odyssey 1.304	ταὶ μέν τʼ ἐν πεδίῳ νέφεα πτώσσουσαι ἵενται,
Odyssey 1.305	οἱ δέ τε τὰς ὀλέκουσιν ἐπάλμενοι, οὐδέ τις ἀλκὴ
Odyssey 1.306	γίγνεται οὐδὲ φυγή· χαίρουσι δέ τʼ ἀνέρες ἄγρῃ·
Odyssey 1.307	ὣς ἄρα τοὶ μνηστῆρας ἐπεσσύμενοι κατὰ δῶμα
Odyssey 1.308	τύπτον ἐπιστροφάδην· τῶν δὲ στόνος ὤρνυτʼ ἀεικὴς
Odyssey 1.309	κράτων τυπτομένων, δάπεδον δʼ ἅπαν αἵματι θῦε.
Odyssey 1.310	Λειώδης δʼ Ὀδυσῆος ἐπεσσύμενος λάβε γούνων,
Odyssey 1.311	καί μιν λισσόμενος ἔπεα πτερόεντα προσηύδα·
Odyssey 1.312	γουνοῦμαί σʼ, Ὀδυσεῦ· σὺ δέ μʼ αἴδεο καί μʼ ἐλέησον·
Odyssey 1.313	οὐ γάρ πώ τινά φημι γυναικῶν ἐν μεγάροισιν
Odyssey 1.314	εἰπεῖν οὐδέ τι ῥέξαι ἀτάσθαλον· ἀλλὰ καὶ ἄλλους
Odyssey 1.315	παύεσκον μνηστῆρας, ὅτις τοιαῦτά γε ῥέζοι.
Odyssey 1.316	ἀλλά μοι οὐ πείθοντο κακῶν ἄπο χεῖρας ἔχεσθαι·
Odyssey 1.317	τῷ καὶ ἀτασθαλίῃσιν ἀεικέα πότμον ἐπέσπον.
Odyssey 1.318	αὐτὰρ ἐγὼ μετὰ τοῖσι θυοσκόος οὐδὲν ἐοργὼς
Odyssey 1.319	κείσομαι, ὡς οὐκ ἔστι χάρις μετόπισθʼ εὐεργέων·
Odyssey 1.320	τὸν δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
Odyssey 1.321	εἰ μὲν δὴ μετὰ τοῖσι θυοσκόος εὔχεαι εἶναι,
Odyssey 1.322	πολλάκι που μέλλεις ἀρήμεναι ἐν μεγάροισι
Odyssey 1.323	τηλοῦ ἐμοὶ νόστοιο τέλος γλυκεροῖο γενέσθαι,
Odyssey 1.324	σοὶ δʼ ἄλοχόν τε φίλην σπέσθαι καὶ τέκνα τεκέσθαι·
Odyssey 1.325	τῷ οὐκ ἂν θάνατόν γε δυσηλεγέα προφύγοισθα.
Odyssey 1.326	ὣς ἄρα φωνήσας ξίφος εἵλετο χειρὶ παχείῃ
Odyssey 1.327	κείμενον, ὅ ῥʼ Ἀγέλαος ἀποπροέηκε χαμᾶζε
Odyssey 1.328	κτεινόμενος· τῷ τόν γε κατʼ αὐχένα μέσσον ἔλασσε.
Odyssey 1.329	φθεγγομένου δʼ ἄρα τοῦ γε κάρη κονίῃσιν ἐμίχθη.
Odyssey 1.330	Τερπιάδης δʼ ἔτʼ ἀοιδὸς ἀλύσκανε κῆρα μέλαιναν,
Odyssey 1.331	Φήμιος, ὅς ῥʼ ἤειδε μετὰ μνηστῆρσιν ἀνάγκῃ.
Odyssey 1.332	ἔστη δʼ ἐν χείρεσσίν ἔχων φόρμιγγα λίγειαν
Odyssey 1.333	ἄγχι παρʼ ὀρσοθύρην· δίχα δὲ φρεσὶ μερμήριζεν,
Odyssey 1.334	ἢ ἐκδὺς μεγάροιο Διὸς μεγάλου ποτὶ βωμὸν
Odyssey 1.335	ἑρκείου ἵζοιτο τετυγμένον, ἔνθʼ ἄρα πολλὰ
Odyssey 1.336	Λαέρτης Ὀδυσεύς τε βοῶν ἐπὶ μηρίʼ ἔκηαν,
Odyssey 1.337	ἦ γούνων λίσσοιτο προσαΐξας Ὀδυσῆα.
Odyssey 1.338	ὧδε δέ οἱ φρονέοντι δοάσσατο κέρδιον εἶναι,
Odyssey 1.339	γούνων ἅψασθαι Λαερτιάδεω Ὀδυσῆος.
Odyssey 1.340	ἦ τοι ὁ φόρμιγγα γλαφυρὴν κατέθηκε χαμᾶζε
Odyssey 1.341	μεσσηγὺς κρητῆρος ἰδὲ θρόνου ἀργυροήλου,
Odyssey 1.342	αὐτὸς δʼ αὖτʼ Ὀδυσῆα προσαΐξας λάβε γούνων,
Odyssey 1.343	καί μιν λισσόμενος ἔπεα πτερόεντα προσηύδα·
Odyssey 1.344	γουνοῦμαί σʼ, Ὀδυσεῦ· σὺ δέ μʼ αἴδεο καί μʼ ἐλέησον·
Odyssey 1.345	αὐτῷ τοι μετόπισθʼ ἄχος ἔσσεται, εἴ κεν ἀοιδὸν
Odyssey 1.346	πέφνῃς, ὅς τε θεοῖσι καὶ ἀνθρώποισιν ἀείδω.
Odyssey 1.347	αὐτοδίδακτος δʼ εἰμί, θεὸς δέ μοι ἐν φρεσὶν οἴμας
Odyssey 1.348	παντοίας ἐνέφυσεν· ἔοικα δέ τοι παραείδειν
Odyssey 1.349	ὥς τε θεῷ· τῷ μή με λιλαίεο δειροτομῆσαι.
Odyssey 1.350	καί κεν Τηλέμαχος τάδε γʼ εἴποι, σὸς φίλος υἱός,
Odyssey 1.351	ὡς ἐγὼ οὔ τι ἑκὼν ἐς σὸν δόμον οὐδὲ χατίζων
Odyssey 1.352	πωλεύμην μνηστῆρσιν ἀεισόμενος μετὰ δαῖτας,
Odyssey 1.353	ἀλλὰ πολὺ πλέονες καὶ κρείσσονες ἦγον ἀνάγκῃ.
Odyssey 1.354	ὣς φάτο, τοῦ δʼ ἤκουσʼ ἱερὴ ἲς Τηλεμάχοιο,
Odyssey 1.355	αἶψα δʼ ἑὸν πατέρα προσεφώνεεν ἐγγὺς ἐόντα·
Odyssey 1.356	ἴσχεο μηδέ τι τοῦτον ἀναίτιον οὔταε χαλκῷ·
Odyssey 1.357	καὶ κήρυκα Μέδοντα σαώσομεν, ὅς τέ μευ αἰεὶ
Odyssey 1.358	οἴκῳ ἐν ἡμετέρῳ κηδέσκετο παιδὸς ἐόντος,
Odyssey 1.359	εἰ δὴ μή μιν ἔπεφνε Φιλοίτιος ἠὲ συβώτης,
Odyssey 1.360	ἠὲ σοὶ ἀντεβόλησεν ὀρινομένῳ κατὰ δῶμα.
Odyssey 1.361	ὣς φάτο, τοῦ δʼ ἤκουσε Μέδων πεπνυμένα εἰδώς·
Odyssey 1.362	πεπτηὼς γὰρ ἔκειτο ὑπὸ θρόνον, ἀμφὶ δὲ δέρμα
Odyssey 1.363	ἕστο βοὸς νεόδαρτον, ἀλύσκων κῆρα μέλαιναν.
Odyssey 1.364	αἶψα δʼ ἀπὸ θρόνου ὦρτο, θοῶς δʼ ἀπέδυνε βοείην
Odyssey 1.365	Τηλέμαχον δʼ ἄρʼ ἔπειτα προσαΐξας λάβε γούνων,
Odyssey 1.366	καί μιν λισσόμενος ἔπεα πτερόεντα προσηύδα·
Odyssey 1.367	ὦ φίλʼ, ἐγὼ μὲν ὅδʼ εἰμί, σὺ δʼ ἴσχεο εἰπὲ δὲ πατρὶ
Odyssey 1.368	μή με περισθενέων δηλήσεται ὀξέϊ χαλκῷ,
Odyssey 1.369	ἀνδρῶν μνηστήρων κεχολωμένος, οἵ οἱ ἔκειρον
Odyssey 1.370	κτήματʼ ἐνὶ μεγάροις, σὲ δὲ νήπιοι οὐδὲν ἔτιον.
Odyssey 1.371	τὸν δʼ ἐπιμειδήσας προσέφη πολύμητις Ὀδυσσεύς·
Odyssey 1.372	θάρσει, ἐπεὶ δή σʼ οὗτος ἐρύσσατο καὶ ἐσάωσεν,
Odyssey 1.373	ὄφρα γνῷς κατὰ θυμόν, ἀτὰρ εἴπῃσθα καὶ ἄλλῳ,
Odyssey 1.374	ὡς κακοεργίης εὐεργεσίη μέγʼ ἀμείνων.
Odyssey 1.375	ἀλλʼ ἐξελθόντες μεγάρων ἕζεσθε θύραζε
Odyssey 1.376	ἐκ φόνου εἰς αὐλήν, σύ τε καὶ πολύφημος ἀοιδός,
Odyssey 1.377	ὄφρʼ ἂν ἐγὼ κατὰ δῶμα πονήσομαι ὅττεό με χρή.
Odyssey 1.378	ὣς φάτο, τὼ δʼ ἔξω βήτην μεγάροιο κιόντε,
Odyssey 1.379	ἑζέσθην δʼ ἄρα τώ γε Διὸς μεγάλου ποτὶ βωμόν,
Odyssey 1.380	πάντοσε παπταίνοντε, φόνον ποτιδεγμένω αἰεί.
Odyssey 1.381	πάπτηνεν δʼ Ὀδυσεὺς καθʼ ἑὸν δόμον, εἴ τις ἔτʼ ἀνδρῶν
Odyssey 1.382	ζωὸς ὑποκλοπέοιτο, ἀλύσκων κῆρα μέλαιναν.
Odyssey 1.383	τοὺς δὲ ἴδεν μάλα πάντας ἐν αἵματι καὶ κονίῃσι
Odyssey 1.384	πεπτεῶτας πολλούς, ὥστʼ ἰχθύας, οὕς θʼ ἁλιῆες
Odyssey 1.385	κοῖλον ἐς αἰγιαλὸν πολιῆς ἔκτοσθε θαλάσσης
Odyssey 1.386	δικτύῳ ἐξέρυσαν πολυωπῷ· οἱ δέ τε πάντες
Odyssey 1.387	κύμαθʼ ἁλὸς ποθέοντες ἐπὶ ψαμάθοισι κέχυνται·
Odyssey 1.388	τῶν μέν τʼ Ἠέλιος φαέθων ἐξείλετο θυμόν·
Odyssey 1.389	ὣς τότʼ ἄρα μνηστῆρες ἐπʼ ἀλλήλοισι κέχυντο.
Odyssey 1.390	δὴ τότε Τηλέμαχον προσέφη πολύμητις Ὀδυσσεύς·
Odyssey 1.391	Τηλέμαχʼ, εἰ δʼ ἄγε μοι κάλεσον τροφὸν Εὐρύκλειαν,
Odyssey 1.392	ὄφρα ἔπος εἴπωμι τό μοι καταθύμιόν ἐστιν.
Odyssey 1.393	ὣς φάτο, Τηλέμαχος δὲ φίλῳ ἐπεπείθετο πατρί,
Odyssey 1.394	κινήσας δὲ θύρην προσέφη τροφὸν Εὐρύκλειαν·
Odyssey 1.395	δεῦρο δὴ ὄρσο, γρηῢ παλαιγενές, ἥ τε γυναικῶν
Odyssey 1.396	δμῳάων σκοπός ἐσσι κατὰ μέγαρʼ ἡμετεράων·
Odyssey 1.397	ἔρχεο· κικλήσκει σε πατὴρ ἐμός, ὄφρα τι εἴπῃ.
Odyssey 1.398	ὣς ἄρʼ ἐφώνησεν, τῇ δʼ ἄπτερος ἔπλετο μῦθος,
Odyssey 1.399	ὤϊξεν δὲ θύρας μεγάρων εὖ ναιεταόντων,
Odyssey 1.400	βῆ δʼ ἴμεν· αὐτὰρ Τηλέμαχος πρόσθʼ ἡγεμόνευεν.
Odyssey 1.401	εὗρεν ἔπειτʼ Ὀδυσῆα μετὰ κταμένοισι νέκυσσιν,
Odyssey 1.402	αἵματι καὶ λύθρῳ πεπαλαγμένον ὥστε λέοντα,
Odyssey 1.403	ὅς ῥά τε βεβρωκὼς βοὸς ἔρχεται ἀγραύλοιο·
Odyssey 1.404	πᾶν δʼ ἄρα οἱ στῆθός τε παρήϊά τʼ ἀμφοτέρωθεν
Odyssey 1.405	αἱματόεντα πέλει, δεινὸς δʼ εἰς ὦπα ἰδέσθαι·
Odyssey 1.406	ὣς Ὀδυσεὺς πεπάλακτο πόδας καὶ χεῖρας ὕπερθεν.
Odyssey 1.407	ἡ δʼ ὡς οὖν νέκυάς τε καὶ ἄσπετον εἴσιδεν αἷμα,
Odyssey 1.408	ἴθυσέν ῥʼ ὀλολύξαι, ἐπεὶ μέγα εἴσιδεν ἔργον·
Odyssey 1.409	ἀλλʼ Ὀδυσεὺς κατέρυκε καὶ ἔσχεθεν ἱεμένην περ,
Odyssey 1.410	καί μιν φωνήσας ἔπεα πτερόεντα προσηύδα·
Odyssey 1.411	ἐν θυμῷ, γρηῦ, χαῖρε καὶ ἴσχεο μηδʼ ὀλόλυζε·
Odyssey 1.412	οὐχ ὁσίη κταμένοισιν ἐπʼ ἀνδράσιν εὐχετάασθαι.
Odyssey 1.413	τούσδε δὲ μοῖρʼ ἐδάμασσε θεῶν καὶ σχέτλια ἔργα·
Odyssey 1.414	οὔ τινα γὰρ τίεσκον ἐπιχθονίων ἀνθρώπων,
Odyssey 1.415	οὐ κακὸν οὐδὲ μὲν ἐσθλόν, ὅτις σφέας εἰσαφίκοιτο·
Odyssey 1.416	τῷ καὶ ἀτασθαλίῃσιν ἀεικέα πότμον ἐπέσπον.
Odyssey 1.417	ἀλλʼ ἄγε μοι σὺ γυναῖκας ἐνὶ μεγάροις κατάλεξον,
Odyssey 1.418	αἵ τέ μʼ ἀτιμάζουσι καὶ αἳ νηλείτιδές εἰσιν.
Odyssey 1.419	τὸν δʼ αὖτε προσέειπε φίλη τροφὸς Εὐρύκλεια·
Odyssey 1.420	τοιγὰρ ἐγώ τοι, τέκνον, ἀληθείην καταλέξω.
Odyssey 1.421	πεντήκοντά τοί εἰσιν ἐνὶ μεγάροισι γυναῖκες
Odyssey 1.422	δμῳαί, τὰς μέν τʼ ἔργα διδάξαμεν ἐργάζεσθαι,
Odyssey 1.423	εἴριά τε ξαίνειν καὶ δουλοσύνην ἀνέχεσθαι·
Odyssey 1.424	τάων δώδεκα πᾶσαι ἀναιδείης ἐπέβησαν,
Odyssey 1.425	οὔτʼ ἐμὲ τίουσαι οὔτʼ αὐτὴν Πηνελόπειαν.
Odyssey 1.426	Τηλέμαχος δὲ νέον μὲν ἀέξετο, οὐδέ ἑ μήτηρ
Odyssey 1.427	σημαίνειν εἴασκεν ἐπὶ δμῳῇσι γυναιξίν.
Odyssey 1.428	ἀλλʼ ἄγʼ ἐγὼν ἀναβᾶσʼ ὑπερώϊα σιγαλόεντα
Odyssey 1.429	εἴπω σῇ ἀλόχῳ, τῇ τις θεὸς ὕπνον ἐπῶρσε.
Odyssey 1.430	τὴν δʼ ἀπαμειβόμενος προσέφη πολύμητις Ὀδυσσεύς
Odyssey 1.431	μή πω τήνδʼ ἐπέγειρε· σὺ δʼ ἐνθάδε εἰπὲ γυναιξὶν
Odyssey 1.432	ἐλθέμεν, αἵ περ πρόσθεν ἀεικέα μηχανόωντο.
Odyssey 1.433	ὣς ἄρʼ ἔφη, γρηῢς δὲ διὲκ μεγάροιο βεβήκει
Odyssey 1.434	ἀγγελέουσα γυναιξὶ καὶ ὀτρυνέουσα νέεσθαι.
Odyssey 1.435	αὐτὰρ ὁ Τηλέμαχον καὶ βουκόλον ἠδὲ συβώτην
Odyssey 1.436	εἰς ἓ καλεσσάμενος ἔπεα πτερόεντα προσηύδα·
Odyssey 1.437	ἄρχετε νῦν νέκυας φορέειν καὶ ἄνωχθε γυναῖκας·
Odyssey 1.438	αὐτὰρ ἔπειτα θρόνους περικαλλέας ἠδὲ τραπέζας
Odyssey 1.439	ὕδατι καὶ σπόγγοισι πολυτρήτοισι καθαίρειν.
Odyssey 1.440	αὐτὰρ ἐπὴν δὴ πάντα δόμον κατακοσμήσησθε,
Odyssey 1.441	δμῳὰς ἐξαγαγόντες ἐϋσταθέος μεγάροιο,
Odyssey 1.442	μεσσηγύς τε θόλου καὶ ἀμύμονος ἕρκεος αὐλῆς,
Odyssey 1.443	θεινέμεναι ξίφεσιν τανυήκεσιν, εἰς ὅ κε πασέων
Odyssey 1.444	ψυχὰς ἐξαφέλησθε καὶ ἐκλελάθωντʼ Ἀφροδίτης,
Odyssey 1.445	τὴν ἄρʼ ὑπὸ μνηστῆρσιν ἔχον μίσγοντό τε λάθρη.
Odyssey 1.446	ὣς ἔφαθʼ, αἱ δὲ γυναῖκες ἀολλέες ἦλθον ἅπασαι,
Odyssey 1.447	αἴνʼ ὀλοφυρόμεναι, θαλερὸν κατὰ δάκρυ χέουσαι.
Odyssey 1.448	πρῶτα μὲν οὖν νέκυας φόρεον κατατεθνηῶτας,
Odyssey 1.449	κὰδ δʼ ἄρʼ ὑπʼ αἰθούσῃ τίθεσαν εὐερκέος αὐλῆς,
Odyssey 1.450	ἀλλήλοισιν ἐρείδουσαι· σήμαινε δʼ Ὀδυσσεὺς
Odyssey 1.451	αὐτὸς ἐπισπέρχων· ταὶ δʼ ἐκφόρεον καὶ ἀνάγκῃ.
Odyssey 1.452	αὐτὰρ ἔπειτα θρόνους περικαλλέας ἠδὲ τραπέζας
Odyssey 1.453	ὕδατι καὶ σπόγγοισι πολυτρήτοισι κάθαιρον.
Odyssey 1.454	αὐτὰρ Τηλέμαχος καὶ βουκόλος ἠδὲ συβώτης
Odyssey 1.455	λίστροισιν δάπεδον πύκα ποιητοῖο δόμοιο
Odyssey 1.456	ξῦον· ταὶ δʼ ἐφόρεον δμῳαί, τίθεσαν δὲ θύραζε.
Odyssey 1.457	αὐτὰρ ἐπειδὴ πᾶν μέγαρον διεκοσμήσαντο,
Odyssey 1.458	δμῳὰς δʼ ἐξαγαγόντες ἐϋσταθέος μεγάροιο,
Odyssey 1.459	μεσσηγύς τε θόλου καὶ ἀμύμονος ἕρκεος αὐλῆς,
Odyssey 1.460	εἴλεον ἐν στείνει, ὅθεν οὔ πως ἦεν ἀλύξαι.
Odyssey 1.461	τοῖσι δὲ Τηλέμαχος πεπνυμένος ἦρχʼ ἀγορεύειν·
Odyssey 1.462	μὴ μὲν δὴ καθαρῷ θανάτῳ ἀπὸ θυμὸν ἑλοίμην
Odyssey 1.463	τάων, αἳ δὴ ἐμῇ κεφαλῇ κατʼ ὀνείδεα χεῦαν
Odyssey 1.464	μητέρι θʼ ἡμετέρῃ παρά τε μνηστῆρσιν ἴαυον.
Odyssey 1.465	ὣς ἄρʼ ἔφη, καὶ πεῖσμα νεὸς κυανοπρῴροιο
Odyssey 1.466	κίονος ἐξάψας μεγάλης περίβαλλε θόλοιο,
Odyssey 1.467	ὑψόσʼ ἐπεντανύσας, μή τις ποσὶν οὖδας ἵκοιτο.
Odyssey 1.468	ὡς δʼ ὅτʼ ἂν ἢ κίχλαι τανυσίπτεροι ἠὲ πέλειαι
Odyssey 1.469	ἕρκει ἐνιπλήξωσι, τό θʼ ἑστήκῃ ἐνὶ θάμνῳ,
Odyssey 1.470	αὖλιν ἐσιέμεναι, στυγερὸς δʼ ὑπεδέξατο κοῖτος,
Odyssey 1.471	ὣς αἵ γʼ ἑξείης κεφαλὰς ἔχον, ἀμφὶ δὲ πάσαις
Odyssey 1.472	δειρῇσι βρόχοι ἦσαν, ὅπως οἴκτιστα θάνοιεν.
Odyssey 1.473	ἤσπαιρον δὲ πόδεσσι μίνυνθά περ οὔ τι μάλα δήν.
Odyssey 1.474	ἐκ δὲ Μελάνθιον ἦγον ἀνὰ πρόθυρόν τε καὶ αὐλήν·
Odyssey 1.475	τοῦ δʼ ἀπὸ μὲν ῥῖνάς τε καὶ οὔατα νηλέϊ χαλκῷ
Odyssey 1.476	τάμνον, μήδεά τʼ ἐξέρυσαν, κυσὶν ὠμὰ δάσασθαι,
Odyssey 1.477	χεῖράς τʼ ἠδὲ πόδας κόπτον κεκοτηότι θυμῷ.
Odyssey 1.478	οἱ μὲν ἔπειτʼ ἀπονιψάμενοι χεῖράς τε πόδας τε
Odyssey 1.479	εἰς Ὀδυσῆα δόμονδε κίον, τετέλεστο δὲ ἔργον·
Odyssey 1.480	αὐτὰρ ὅ γε προσέειπε φίλην τροφὸν Εὐρύκλειαν·
Odyssey 1.481	οἶσε θέειον, γρηΰ, κακῶν ἄκος, οἶσε δέ μοι πῦρ,
Odyssey 1.482	ὄφρα θεειώσω μέγαρον· σὺ δὲ Πηνελόπειαν
Odyssey 1.483	ἐλθεῖν ἐνθάδʼ ἄνωχθι σὺν ἀμφιπόλοισι γυναιξί·
Odyssey 1.484	πάσας δʼ ὄτρυνον δμῳὰς κατὰ δῶμα νέεσθαι.
Odyssey 1.485	τὸν δʼ αὖτε προσέειπε φίλη τροφὸς Εὐρύκλεια·
Odyssey 1.486	ναὶ δὴ ταῦτά γε, τέκνον ἐμόν, κατὰ μοῖραν ἔειπες.
Odyssey 1.487	ἀλλʼ ἄγε τοι χλαῖνάν τε χιτῶνά τε εἵματʼ ἐνείκω,
Odyssey 1.488	μηδʼ οὕτω ῥάκεσιν πεπυκασμένος εὐρέας ὤμους
Odyssey 1.489	ἕσταθʼ ἐνὶ μεγάροισι· νεμεσσητὸν δέ κεν εἴη.
Odyssey 1.490	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.491	πῦρ νῦν μοι πρώτιστον ἐνὶ μεγάροισι γενέσθω.
Odyssey 1.492	ὣς ἔφατʼ, οὐδʼ ἀπίθησε φίλη τροφὸς Εὐρύκλεια,
Odyssey 1.493	ἤνεικεν δʼ ἄρα πῦρ καὶ θήϊον· αὐτὰρ Ὀδυσσεὺς
Odyssey 1.494	εὖ διεθείωσεν μέγαρον καὶ δῶμα καὶ αὐλήν.
Odyssey 1.495	γρηῢς δʼ αὖτʼ ἀπέβη διὰ δώματα κάλʼ Ὀδυσῆος
Odyssey 1.496	ἀγγελέουσα γυναιξὶ καὶ ὀτρυνέουσα νέεσθαι·
Odyssey 1.497	αἱ δʼ ἴσαν ἐκ μεγάροιο δάος μετὰ χερσὶν ἔχουσαι.
Odyssey 1.498	αἱ μὲν ἄρʼ ἀμφεχέοντο καὶ ἠσπάζοντʼ Ὀδυσῆα,
Odyssey 1.499	καὶ κύνεον ἀγαπαζόμεναι κεφαλήν τε καὶ ὤμους
Odyssey 1.500	χεῖράς τʼ αἰνύμεναι· τὸν δὲ γλυκὺς ἵμερος ᾕρει
Odyssey 1.501	κλαυθμοῦ καὶ στοναχῆς, γίγνωσκε δʼ ἄρα φρεσὶ πάσας.
Odyssey 1.1	γρηῢς δʼ εἰς ὑπερῷʼ ἀνεβήσετο καγχαλόωσα,
Odyssey 1.2	δεσποίνῃ ἐρέουσα φίλον πόσιν ἔνδον ἐόντα·
Odyssey 1.3	γούνατα δʼ ἐρρώσαντο, πόδες δʼ ὑπερικταίνοντο.
Odyssey 1.4	στῆ δʼ ἄρʼ ὑπὲρ κεφαλῆς καί μιν πρὸς μῦθον ἔειπεν·
Odyssey 1.5	ἔγρεο, Πηνελόπεια, φίλον τέκος, ὄφρα ἴδηαι
Odyssey 1.6	ὀφθαλμοῖσι τεοῖσι τά τʼ ἔλδεαι ἤματα πάντα.
Odyssey 1.7	ἦλθʼ Ὀδυσεὺς καὶ οἶκον ἱκάνεται, ὀψέ περ ἐλθών.
Odyssey 1.8	μνηστῆρας δʼ ἔκτεινεν ἀγήνορας, οἵ θʼ ἑὸν οἶκον
Odyssey 1.9	κήδεσκον καὶ κτήματʼ ἔδον βιόωντό τε παῖδα.
Odyssey 1.10	τὴν δʼ αὖτε προσέειπε περίφρων Πηνελόπεια·
Odyssey 1.11	μαῖα φίλη, μάργην σε θεοὶ θέσαν, οἵ τε δύνανται
Odyssey 1.12	ἄφρονα ποιῆσαι καὶ ἐπίφρονά περ μάλʼ ἐόντα,
Odyssey 1.13	καί τε χαλιφρονέοντα σαοφροσύνης ἐπέβησαν·
Odyssey 1.14	οἵ σέ περ ἔβλαψαν· πρὶν δὲ φρένας αἰσίμη ἦσθα.
Odyssey 1.15	τίπτε με λωβεύεις πολυπενθέα θυμὸν ἔχουσαν
Odyssey 1.16	ταῦτα παρὲξ ἐρέουσα καὶ ἐξ ὕπνου μʼ ἀνεγείρεις
Odyssey 1.17	ἡδέος, ὅς μʼ ἐπέδησε φίλα βλέφαρʼ ἀμφικαλύψας;
Odyssey 1.18	οὐ γάρ πω τοιόνδε κατέδραθον, ἐξ οὗ Ὀδυσσεὺς
Odyssey 1.19	ᾤχετʼ ἐποψόμενος Κακοΐλιον οὐκ ὀνομαστήν.
Odyssey 1.20	ἀλλʼ ἄγε νῦν κατάβηθι καὶ ἂψ ἔρχευ μέγαρόνδε.
Odyssey 1.21	εἰ γάρ τίς μʼ ἄλλη γε γυναικῶν, αἵ μοι ἔασι,
Odyssey 1.22	ταῦτʼ ἐλθοῦσʼ ἤγγειλε καὶ ἐξ ὕπνου ἀνέγειρεν,
Odyssey 1.23	τῷ κε τάχα στυγερῶς μιν ἐγὼν ἀπέπεμψα νέεσθαι
Odyssey 1.24	αὖτις ἔσω μέγαρον· σὲ δὲ τοῦτό γε γῆρας ὀνήσει.
Odyssey 1.25	τὴν δʼ αὖτε προσέειπε φίλη τροφὸς Εὐρύκλεια·
Odyssey 1.26	οὔ τί σε λωβεύω, τέκνον φίλον, ἀλλʼ ἔτυμόν τοι
Odyssey 1.27	ἦλθʼ Ὀδυσεὺς καὶ οἶκον ἱκάνεται, ὡς ἀγορεύω,
Odyssey 1.28	ὁ ξεῖνος, τὸν πάντες ἀτίμων ἐν μεγάροισι.
Odyssey 1.29	Τηλέμαχος δʼ ἄρα μιν πάλαι ᾔδεεν ἔνδον ἐόντα,
Odyssey 1.30	ἀλλὰ σαοφροσύνῃσι νοήματα πατρὸς ἔκευθεν,
Odyssey 1.31	ὄφρʼ ἀνδρῶν τίσαιτο βίην ὑπερηνορεόντων.
Odyssey 1.32	ὣς ἔφαθʼ, ἡ δʼ ἐχάρη καὶ ἀπὸ λέκτροιο θοροῦσα
Odyssey 1.33	γρηῒ περιπλέχθη, βλεφάρων δʼ ἀπὸ δάκρυον ἧκεν·
Odyssey 1.34	καί μιν φωνήσασʼ ἔπεα πτερόεντα προσηύδα·
Odyssey 1.35	εἰ δʼ ἄγε δή μοι, μαῖα φίλη, νημερτὲς ἐνίσπες,
Odyssey 1.36	εἰ ἐτεὸν δὴ οἶκον ἱκάνεται, ὡς ἀγορεύεις,
Odyssey 1.37	ὅππως δὴ μνηστῆρσιν ἀναιδέσι χεῖρας ἐφῆκε
Odyssey 1.38	μοῦνος ἐών, οἱ δʼ αἰὲν ἀολλέες ἔνδον ἔμιμνον.
Odyssey 1.39	τὴν δʼ αὖτε προσέειπε φίλη τροφὸς Εὐρύκλεια·
Odyssey 1.40	οὐκ ἴδον, οὐ πυθόμην, ἀλλὰ στόνον οἶον ἄκουσα
Odyssey 1.41	κτεινομένων· ἡμεῖς δὲ μυχῷ θαλάμων εὐπήκτων
Odyssey 1.42	ἥμεθʼ ἀτυζόμεναι, σανίδες δʼ ἔχον εὖ ἀραρυῖαι,
Odyssey 1.43	πρίν γʼ ὅτε δή με σὸς υἱὸς ἀπὸ μεγάροιο κάλεσσε
Odyssey 1.44	Τηλέμαχος· τὸν γάρ ῥα πατὴρ προέηκε καλέσσαι.
Odyssey 1.45	εὗρον ἔπειτʼ Ὀδυσῆα μετὰ κταμένοισι νέκυσσιν
Odyssey 1.46	ἑσταόθʼ· οἱ δέ μιν ἀμφί, κραταίπεδον οὖδας ἔχοντες,
Odyssey 1.47	κείατʼ ἐπʼ ἀλλήλοισιν· ἰδοῦσά κε θυμὸν ἰάνθης.
Odyssey 1.48	νῦν δʼ οἱ μὲν δὴ πάντες ἐπʼ αὐλείῃσι θύρῃσιν
Odyssey 1.50	ἀθρόοι, αὐτὰρ ὁ δῶμα θεειοῦται περικαλλές,
Odyssey 1.51	πῦρ μέγα κηάμενος· σὲ δέ με προέηκε καλέσσαι.
Odyssey 1.52	ἀλλʼ ἕπευ, ὄφρα σφῶϊν ἐϋφροσύνης ἐπιβῆτον
Odyssey 1.53	ἀμφοτέρω φίλον ἦτορ, ἐπεὶ κακὰ πολλὰ πέποσθε.
Odyssey 1.54	νῦν δʼ ἤδη τόδε μακρὸν ἐέλδωρ ἐκτετέλεσται·
Odyssey 1.55	ἦλθε μὲν αὐτὸς ζωὸς ἐφέστιος, εὗρε δὲ καὶ σὲ
Odyssey 1.56	καὶ παῖδʼ ἐν μεγάροισι· κακῶς δʼ οἵ πέρ μιν ἔρεζον
Odyssey 1.57	μνηστῆρες, τοὺς πάντας ἐτίσατο ᾧ ἐνὶ οἴκῳ.
Odyssey 1.58	τὴν δʼ αὖτε προσέειπε περίφρων Πηνελόπεια·
Odyssey 1.59	μαῖα φίλη, μή πω μέγʼ ἐπεύχεο καγχαλόωσα.
Odyssey 1.60	οἶσθα γὰρ ὥς κʼ ἀσπαστὸς ἐνὶ μεγάροισι φανείη
Odyssey 1.61	πᾶσι, μάλιστα δʼ ἐμοί τε καὶ υἱέϊ, τὸν τεκόμεσθα·
Odyssey 1.62	ἀλλʼ οὐκ ἔσθʼ ὅδε μῦθος ἐτήτυμος, ὡς ἀγορεύεις,
Odyssey 1.63	ἀλλά τις ἀθανάτων κτεῖνε μνηστῆρας ἀγαυούς,
Odyssey 1.64	ὕβριν ἀγασσάμενος θυμαλγέα καὶ κακὰ ἔργα.
Odyssey 1.65	οὔ τινα γὰρ τίεσκον ἐπιχθονίων ἀνθρώπων,
Odyssey 1.66	οὐ κακὸν οὐδὲ μὲν ἐσθλόν, ὅτις σφέας εἰσαφίκοιτο·
Odyssey 1.67	τῷ διʼ ἀτασθαλίας ἔπαθον κακόν· αὐτὰρ Ὀδυσσεὺς
Odyssey 1.68	ὤλεσε τηλοῦ νόστον Ἀχαιΐδος, ὤλετο δʼ αὐτός.
Odyssey 1.69	τὴν δʼ ἠμείβετʼ ἔπειτα φίλη τροφὸς Εὐρύκλεια·
Odyssey 1.70	τέκνον ἐμόν, ποῖόν σε ἔπος φύγεν ἕρκος ὀδόντων,
Odyssey 1.71	ἣ πόσιν ἔνδον ἐόντα παρʼ ἐσχάρῃ οὔ ποτʼ ἔφησθα
Odyssey 1.72	οἴκαδʼ ἐλεύσεσθαι· θυμὸς δέ τοι αἰὲν ἄπιστος.
Odyssey 1.73	ἀλλʼ ἄγε τοι καὶ σῆμα ἀριφραδὲς ἄλλο τι εἴπω,
Odyssey 1.74	οὐλήν, τήν ποτέ μιν σῦς ἤλασε λευκῷ ὀδόντι.
Odyssey 1.75	τὴν ἀπονίζουσα φρασάμην, ἔθελον δὲ σοὶ αὐτῇ
Odyssey 1.76	εἰπέμεν· ἀλλά με κεῖνος ἑλὼν ἐπὶ μάστακα χερσὶν
Odyssey 1.77	οὐκ ἔα εἰπέμεναι πολυϊδρείῃσι νόοιο.
Odyssey 1.78	ἀλλʼ ἕπευ· αὐτὰρ ἐγὼν ἐμέθεν περιδώσομαι αὐτῆς,
Odyssey 1.79	αἴ κέν σʼ ἐξαπάφω, κτεῖναί μʼ οἰκτίστῳ ὀλέθρῳ.
Odyssey 1.80	τὴν δʼ ἠμείβετʼ ἔπειτα περίφρων Πηνελόπεια·
Odyssey 1.81	μαῖα φίλη, χαλεπόν σε θεῶν αἰειγενετάων
Odyssey 1.82	δήνεα εἴρυσθαι, μάλα περ πολύϊδριν ἐοῦσαν.
Odyssey 1.83	ἀλλʼ ἔμπης ἴομεν μετὰ παῖδʼ ἐμόν, ὄφρα ἴδωμαι
Odyssey 1.84	ἄνδρας μνηστῆρας τεθνηότας, ἠδʼ ὃς ἔπεφνεν.
Odyssey 1.85	ὣς φαμένη κατέβαινʼ ὑπερώϊα· πολλὰ δέ οἱ κῆρ
Odyssey 1.86	ὥρμαινʼ, ἢ ἀπάνευθε φίλον πόσιν ἐξερεείνοι,
Odyssey 1.87	ἦ παρστᾶσα κύσειε κάρη καὶ χεῖρε λαβοῦσα.
Odyssey 1.88	ἡ δʼ ἐπεὶ εἰσῆλθεν καὶ ὑπέρβη λάϊνον οὐδόν,
Odyssey 1.89	ἕζετʼ ἔπειτʼ Ὀδυσῆος ἐναντίη, ἐν πυρὸς αὐγῇ,
Odyssey 1.90	τοίχου τοῦ ἑτέρου· ὁ δʼ ἄρα πρὸς κίονα μακρὴν
Odyssey 1.91	ἧστο κάτω ὁρόων, ποτιδέγμενος εἴ τί μιν εἴποι
Odyssey 1.92	ἰφθίμη παράκοιτις, ἐπεὶ ἴδεν ὀφθαλμοῖσιν.
Odyssey 1.93	ἡ δʼ ἄνεω δὴν ἧστο, τάφος δέ οἱ ἦτορ ἵκανεν·
Odyssey 1.94	ὄψει δʼ ἄλλοτε μέν μιν ἐνωπαδίως ἐσίδεσκεν,
Odyssey 1.95	ἄλλοτε δʼ ἀγνώσασκε κακὰ χροῒ εἵματʼ ἔχοντα.
Odyssey 1.96	Τηλέμαχος δʼ ἐνένιπεν ἔπος τʼ ἔφατʼ ἔκ τʼ ὀνόμαζε·
Odyssey 1.97	μῆτερ ἐμή, δύσμητερ, ἀπηνέα θυμὸν ἔχουσα,
Odyssey 1.98	τίφθʼ οὕτω πατρὸς νοσφίζεαι, οὐδὲ παρʼ αὐτὸν
Odyssey 1.99	ἑζομένη μύθοισιν ἀνείρεαι οὐδὲ μεταλλᾷς;
Odyssey 1.100	οὐ μέν κʼ ἄλλη γʼ ὧδε γυνὴ τετληότι θυμῷ
Odyssey 1.101	ἀνδρὸς ἀφεσταίη, ὅς οἱ κακὰ πολλὰ μογήσας
Odyssey 1.102	ἔλθοι ἐεικοστῷ ἔτεϊ ἐς πατρίδα γαῖαν·
Odyssey 1.103	σοὶ δʼ αἰεὶ κραδίη στερεωτέρη ἐστὶ λίθοιο.
Odyssey 1.104	τὸν δʼ αὖτε προσέειπε περίφρων Πηνελόπεια·
Odyssey 1.105	τέκνον ἐμόν, θυμός μοι ἐνὶ στήθεσσι τέθηπεν,
Odyssey 1.106	οὐδέ τι προσφάσθαι δύναμαι ἔπος οὐδʼ ἐρέεσθαι
Odyssey 1.107	οὐδʼ εἰς ὦπα ἰδέσθαι ἐναντίον. εἰ δʼ ἐτεὸν δὴ
Odyssey 1.108	ἔστʼ Ὀδυσεὺς καὶ οἶκον ἱκάνεται, ἦ μάλα νῶϊ
Odyssey 1.109	γνωσόμεθʼ ἀλλήλων καὶ λώϊον· ἔστι γὰρ ἡμῖν
Odyssey 1.110	σήμαθʼ, ἃ δὴ καὶ νῶϊ κεκρυμμένα ἴδμεν ἀπʼ ἄλλων.
Odyssey 1.111	ὣς φάτο, μείδησεν δὲ πολύτλας δῖος Ὀδυσσεύς,
Odyssey 1.112	αἶψα δὲ Τηλέμαχον ἔπεα πτερόεντα προσηύδα·
Odyssey 1.113	Τηλέμαχʼ, ἦ τοι μητέρʼ ἐνὶ μεγάροισιν ἔασον
Odyssey 1.114	πειράζειν ἐμέθεν· τάχα δὲ φράσεται καὶ ἄρειον.
Odyssey 1.115	νῦν δʼ ὅττι ῥυπόω, κακὰ δὲ χροῒ εἵματα εἷμαι,
Odyssey 1.116	τοὔνεκʼ ἀτιμάζει με καὶ οὔ πω φησὶ τὸν εἶναι.
Odyssey 1.117	ἡμεῖς δὲ φραζώμεθʼ ὅπως ὄχʼ ἄριστα γένηται.
Odyssey 1.118	καὶ γάρ τίς θʼ ἕνα φῶτα κατακτείνας ἐνὶ δήμῳ,
Odyssey 1.119	ᾧ μὴ πολλοὶ ἔωσιν ἀοσσητῆρες ὀπίσσω,
Odyssey 1.120	φεύγει πηούς τε προλιπὼν καὶ πατρίδα γαῖαν·
Odyssey 1.121	ἡμεῖς δʼ ἕρμα πόληος ἀπέκταμεν, οἳ μέγʼ ἄριστοι
Odyssey 1.122	κούρων εἰν Ἰθάκῃ· τὰ δέ σε φράζεσθαι ἄνωγα.
Odyssey 1.123	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.124	αὐτὸς ταῦτά γε λεῦσσε, πάτερ φίλε· σὴν γὰρ ἀρίστην
Odyssey 1.125	μῆτιν ἐπʼ ἀνθρώπους φάσʼ ἔμμεναι, οὐδέ κέ τίς τοι
Odyssey 1.126	ἄλλος ἀνὴρ ἐρίσειε καταθνητῶν ἀνθρώπων.
Odyssey 1.127	ἡμεῖς δʼ ἐμμεμαῶτες ἅμʼ ἑψόμεθʼ, οὐδέ τί φημι
Odyssey 1.128	ἀλκῆς δευήσεσθαι, ὅση δύναμίς γε πάρεστιν.
Odyssey 1.129	τὸν δʼ ἀπαμειβόμενος προσέφη πολύμητις Ὀδυσσεύς
Odyssey 1.130	τοιγὰρ ἐγὼν ἐρέω ὥς μοι δοκεῖ εἶναι ἄριστα.
Odyssey 1.131	πρῶτα μὲν ἂρ λούσασθε καὶ ἀμφιέσασθε χιτῶνας,
Odyssey 1.132	δμῳὰς δʼ ἐν μεγάροισιν ἀνώγετε εἵμαθʼ ἑλέσθαι·
Odyssey 1.133	αὐτὰρ θεῖος ἀοιδὸς ἔχων φόρμιγγα λίγειαν
Odyssey 1.134	ἡμῖν ἡγείσθω φιλοπαίγμονος ὀρχηθμοῖο,
Odyssey 1.135	ὥς κέν τις φαίη γάμον ἔμμεναι ἐκτὸς ἀκούων,
Odyssey 1.136	ἢ ἀνʼ ὁδὸν στείχων, ἢ οἳ περιναιετάουσι·
Odyssey 1.137	μὴ πρόσθε κλέος εὐρὺ φόνου κατὰ ἄστυ γένηται
Odyssey 1.138	ἀνδρῶν μνηστήρων, πρίν γʼ ἡμέας ἐλθέμεν ἔξω
Odyssey 1.139	ἀγρὸν ἐς ἡμέτερον πολυδένδρεον· ἔνθα δʼ ἔπειτα
Odyssey 1.140	φρασσόμεθʼ ὅττι κε κέρδος Ὀλύμπιος ἐγγυαλίξῃ.
Odyssey 1.141	ὣς ἔφαθʼ, οἱ δʼ ἄρα τοῦ μάλα μὲν κλύον ἠδʼ ἐπίθοντο
Odyssey 1.142	πρῶτα μὲν οὖν λούσαντο καὶ ἀμφιέσαντο χιτῶνας,
Odyssey 1.143	ὅπλισθεν δὲ γυναῖκες· ὁ δʼ εἵλετο θεῖος ἀοιδὸς
Odyssey 1.144	φόρμιγγα γλαφυρήν, ἐν δέ σφισιν ἵμερον ὦρσε
Odyssey 1.145	μολπῆς τε γλυκερῆς καὶ ἀμύμονος ὀρχηθμοῖο.
Odyssey 1.146	τοῖσιν δὲ μέγα δῶμα περιστεναχίζετο ποσσὶν
Odyssey 1.147	ἀνδρῶν παιζόντων καλλιζώνων τε γυναικῶν.
Odyssey 1.148	ὧδε δέ τις εἴπεσκε δόμων ἔκτοσθεν ἀκούων·
Odyssey 1.149	ἦ μάλα δή τις ἔγημε πολυμνήστην βασίλειαν·
Odyssey 1.150	σχετλίη, οὐδʼ ἔτλη πόσιος οὗ κουριδίοιο
Odyssey 1.151	εἴρυσθαι μέγα δῶμα διαμπερές, ἧος ἵκοιτο.
Odyssey 1.152	ὣς ἄρα τις εἴπεσκε, τὰ δʼ οὐκ ἴσαν ὡς ἐτέτυκτο.
Odyssey 1.153	αὐτὰρ Ὀδυσσῆα μεγαλήτορα ᾧ ἐνὶ οἴκῳ
Odyssey 1.154	Εὐρυνόμη ταμίη λοῦσεν καὶ χρῖσεν ἐλαίῳ,
Odyssey 1.155	ἀμφὶ δέ μιν φᾶρος καλὸν βάλεν ἠδὲ χιτῶνα·
Odyssey 1.156	αὐτὰρ κὰκ κεφαλῆς κάλλος πολὺ χεῦεν Ἀθήνη
Odyssey 1.157	μείζονά τʼ εἰσιδέειν καὶ πάσσονα· κὰδ δὲ κάρητος
Odyssey 1.158	οὔλας ἧκε κόμας, ὑακινθίνῳ ἄνθει ὁμοίας.
Odyssey 1.159	ὡς δʼ ὅτε τις χρυσὸν περιχεύεται ἀργύρῳ ἀνὴρ
Odyssey 1.160	ἴδρις, ὃν Ἥφαιστος δέδαεν καὶ Παλλὰς Ἀθήνη
Odyssey 1.161	τέχνην παντοίην, χαρίεντα δὲ ἔργα τελείει·
Odyssey 1.162	ὣς μὲν τῷ περίχευε χάριν κεφαλῇ τε καὶ ὤμοις.
Odyssey 1.163	ἐκ δʼ ἀσαμίνθου βῆ δέμας ἀθανάτοισιν ὁμοῖος·
Odyssey 1.164	ἂψ δʼ αὖτις κατʼ ἄρʼ ἕζετʼ ἐπὶ θρόνου ἔνθεν ἀνέστη,
Odyssey 1.165	ἀντίον ἧς ἀλόχου, καί μιν πρὸς μῦθον ἔειπε·
Odyssey 1.166	δαιμονίη, περί σοί γε γυναικῶν θηλυτεράων
Odyssey 1.167	κῆρ ἀτέραμνον ἔθηκαν Ὀλύμπια δώματʼ ἔχοντες·
Odyssey 1.168	οὐ μέν κʼ ἄλλη γʼ ὧδε γυνὴ τετληότι θυμῷ
Odyssey 1.169	ἀνδρὸς ἀφεσταίη, ὅς οἱ κακὰ πολλὰ μογήσας
Odyssey 1.170	ἔλθοι ἐεικοστῷ ἔτεϊ ἐς πατρίδα γαῖαν.
Odyssey 1.171	ἀλλʼ ἄγε μοι, μαῖα, στόρεσον λέχος, ὄφρα καὶ αὐτὸς
Odyssey 1.172	λέξομαι· ἦ γὰρ τῇ γε σιδήρεον ἐν φρεσὶ ἦτορ.
Odyssey 1.173	τὸν δʼ αὖτε προσέειπε περίφρων Πηνελόπεια·
Odyssey 1.174	δαιμόνιʼ, οὔτʼ ἄρ τι μεγαλίζομαι οὔτʼ ἀθερίζω
Odyssey 1.175	οὔτε λίην ἄγαμαι, μάλα δʼ εὖ οἶδʼ οἷος ἔησθα
Odyssey 1.176	ἐξ Ἰθάκης ἐπὶ νηὸς ἰὼν δολιχηρέτμοιο.
Odyssey 1.177	ἀλλʼ ἄγε οἱ στόρεσον πυκινὸν λέχος, Εὐρύκλεια,
Odyssey 1.178	ἐκτὸς ἐϋσταθέος θαλάμου, τόν ῥʼ αὐτὸς ἐποίει·
Odyssey 1.179	ἔνθα οἱ ἐκθεῖσαι πυκινὸν λέχος ἐμβάλετʼ εὐνήν,
Odyssey 1.180	κώεα καὶ χλαίνας καὶ ῥήγεα σιγαλόεντα.
Odyssey 1.181	ὣς ἄρʼ ἔφη πόσιος πειρωμένη· αὐτὰρ Ὀδυσσεὺς
Odyssey 1.182	ὀχθήσας ἄλοχον προσεφώνεε κεδνὰ ἰδυῖαν·
Odyssey 1.183	ὦ γύναι, ἦ μάλα τοῦτο ἔπος θυμαλγὲς ἔειπες·
Odyssey 1.184	τίς δέ μοι ἄλλοσε θῆκε λέχος; χαλεπὸν δέ κεν εἴη
Odyssey 1.185	καὶ μάλʼ ἐπισταμένῳ, ὅτε μὴ θεὸς αὐτὸς ἐπελθὼν
Odyssey 1.186	ῥηϊδίως ἐθέλων θείη ἄλλῃ ἐνὶ χώρῃ.
Odyssey 1.187	ἀνδρῶν δʼ οὔ κέν τις ζωὸς βροτός, οὐδὲ μάλʼ ἡβῶν,
Odyssey 1.188	ῥεῖα μετοχλίσσειεν, ἐπεὶ μέγα σῆμα τέτυκται
Odyssey 1.189	ἐν λέχει ἀσκητῷ· τὸ δʼ ἐγὼ κάμον οὐδέ τις ἄλλος.
Odyssey 1.190	θάμνος ἔφυ τανύφυλλος ἐλαίης ἕρκεος ἐντός,
Odyssey 1.191	ἀκμηνὸς θαλέθων· πάχετος δʼ ἦν ἠΰτε κίων.
Odyssey 1.192	τῷ δʼ ἐγὼ ἀμφιβαλὼν θάλαμον δέμον, ὄφρʼ ἐτέλεσσα,
Odyssey 1.193	πυκνῇσιν λιθάδεσσι, καὶ εὖ καθύπερθεν ἔρεψα,
Odyssey 1.194	κολλητὰς δʼ ἐπέθηκα θύρας, πυκινῶς ἀραρυίας.
Odyssey 1.195	καὶ τότʼ ἔπειτʼ ἀπέκοψα κόμην τανυφύλλου ἐλαίης,
Odyssey 1.196	κορμὸν δʼ ἐκ ῥίζης προταμὼν ἀμφέξεσα χαλκῷ
Odyssey 1.197	εὖ καὶ ἐπισταμένως, καὶ ἐπὶ στάθμην ἴθυνα,
Odyssey 1.198	ἑρμῖνʼ ἀσκήσας, τέτρηνα δὲ πάντα τερέτρῳ.
Odyssey 1.199	ἐκ δὲ τοῦ ἀρχόμενος λέχος ἔξεον, ὄφρʼ ἐτέλεσσα,
Odyssey 1.200	δαιδάλλων χρυσῷ τε καὶ ἀργύρῳ ἠδʼ ἐλέφαντι·
Odyssey 1.201	ἐκ δʼ ἐτάνυσσα ἱμάντα βοὸς φοίνικι φαεινόν.
Odyssey 1.202	οὕτω τοι τόδε σῆμα πιφαύσκομαι· οὐδέ τι οἶδα,
Odyssey 1.203	ἤ μοι ἔτʼ ἔμπεδόν ἐστι, γύναι, λέχος, ἦέ τις ἤδη
Odyssey 1.204	ἀνδρῶν ἄλλοσε θῆκε, ταμὼν ὕπο πυθμένʼ ἐλαίης.
Odyssey 1.205	ὣς φάτο, τῆς δʼ αὐτοῦ λύτο γούνατα καὶ φίλον ἦτορ,
Odyssey 1.206	σήματʼ ἀναγνούσῃ τά οἱ ἔμπεδα πέφραδʼ Ὀδυσσεύς·
Odyssey 1.207	δακρύσασα δʼ ἔπειτʼ ἰθὺς δράμεν, ἀμφὶ δὲ χεῖρας
Odyssey 1.208	δειρῇ βάλλʼ Ὀδυσῆϊ, κάρη δʼ ἔκυσʼ ἠδὲ προσηύδα·
Odyssey 1.209	μή μοι, Ὀδυσσεῦ, σκύζευ, ἐπεὶ τά περ ἄλλα μάλιστα
Odyssey 1.210	ἀνθρώπων πέπνυσο· θεοὶ δʼ ὤπαζον ὀϊζύν,
Odyssey 1.211	οἳ νῶϊν ἀγάσαντο παρʼ ἀλλήλοισι μένοντε
Odyssey 1.212	ἥβης ταρπῆναι καὶ γήραος οὐδὸν ἱκέσθαι.
Odyssey 1.213	αὐτὰρ μὴ νῦν μοι τόδε χώεο μηδὲ νεμέσσα,
Odyssey 1.214	οὕνεκά σʼ οὐ τὸ πρῶτον, ἐπεὶ ἴδον, ὧδʼ ἀγάπησα.
Odyssey 1.215	αἰεὶ γάρ μοι θυμὸς ἐνὶ στήθεσσι φίλοισιν
Odyssey 1.216	ἐρρίγει μή τίς με βροτῶν ἀπάφοιτο ἔπεσσιν
Odyssey 1.217	ἐλθών· πολλοὶ γὰρ κακὰ κέρδεα βουλεύουσιν.
Odyssey 1.218	οὐδέ κεν Ἀργείη Ἑλένη, Διὸς ἐκγεγαυῖα,
Odyssey 1.219	ἀνδρὶ παρʼ ἀλλοδαπῷ ἐμίγη φιλότητι καὶ εὐνῇ,
Odyssey 1.220	εἰ ᾔδη ὅ μιν αὖτις ἀρήϊοι υἷες Ἀχαιῶν
Odyssey 1.221	ἀξέμεναι οἶκόνδε φίλην ἐς πατρίδʼ ἔμελλον.
Odyssey 1.222	τὴν δʼ ἦ τοι ῥέξαι θεὸς ὤρορεν ἔργον ἀεικές·
Odyssey 1.223	τὴν δʼ ἄτην οὐ πρόσθεν ἑῷ ἐγκάτθετο θυμῷ
Odyssey 1.224	λυγρήν, ἐξ ἧς πρῶτα καὶ ἡμέας ἵκετο πένθος.
Odyssey 1.225	νῦν δʼ, ἐπεὶ ἤδη σήματʼ ἀριφραδέα κατέλεξας
Odyssey 1.226	εὐνῆς ἡμετέρης, ἣν οὐ βροτὸς ἄλλος ὀπώπει,
Odyssey 1.227	ἀλλʼ οἶοι σύ τʼ ἐγώ τε καὶ ἀμφίπολος μία μούνη,
Odyssey 1.228	Ἀκτορίς, ἥν μοι δῶκε πατὴρ ἔτι δεῦρο κιούσῃ,
Odyssey 1.229	ἣ νῶϊν εἴρυτο θύρας πυκινοῦ θαλάμοιο,
Odyssey 1.230	πείθεις δή μευ θυμόν, ἀπηνέα περ μάλʼ ἐόντα.
Odyssey 1.231	ὣς φάτο, τῷ δʼ ἔτι μᾶλλον ὑφʼ ἵμερον ὦρσε γόοιο·
Odyssey 1.232	κλαῖε δʼ ἔχων ἄλοχον θυμαρέα, κεδνὰ ἰδυῖαν.
Odyssey 1.233	ὡς δʼ ὅτʼ ἂν ἀσπάσιος γῆ νηχομένοισι φανήῃ,
Odyssey 1.234	ὧν τε Ποσειδάων εὐεργέα νῆʼ ἐνὶ πόντῳ
Odyssey 1.235	ῥαίσῃ, ἐπειγομένην ἀνέμῳ καὶ κύματι πηγῷ·
Odyssey 1.236	παῦροι δʼ ἐξέφυγον πολιῆς ἁλὸς ἤπειρόνδε
Odyssey 1.237	νηχόμενοι, πολλὴ δὲ περὶ χροῒ τέτροφεν ἅλμη,
Odyssey 1.238	ἀσπάσιοι δʼ ἐπέβαν γαίης, κακότητα φυγόντες·
Odyssey 1.239	ὣς ἄρα τῇ ἀσπαστὸς ἔην πόσις εἰσοροώσῃ,
Odyssey 1.240	δειρῆς δʼ οὔ πω πάμπαν ἀφίετο πήχεε λευκώ.
Odyssey 1.241	καί νύ κʼ ὀδυρομένοισι φάνη ῥοδοδάκτυλος Ἠώς,
Odyssey 1.242	εἰ μὴ ἄρʼ ἄλλʼ ἐνόησε θεὰ γλαυκῶπις Ἀθήνη.
Odyssey 1.243	νύκτα μὲν ἐν περάτῃ δολιχὴν σχέθεν, Ἠῶ δʼ αὖτε
Odyssey 1.244	ῥύσατʼ ἐπʼ Ὠκεανῷ χρυσόθρονον, οὐδʼ ἔα ἵππους
Odyssey 1.245	ζεύγνυσθʼ ὠκύποδας, φάος ἀνθρώποισι φέροντας,
Odyssey 1.246	Λάμπον καὶ Φαέθονθʼ, οἵ τʼ Ἠῶ πῶλοι ἄγουσι.
Odyssey 1.247	καὶ τότʼ ἄρʼ ἣν ἄλοχον προσέφη πολύμητις Ὀδυσσεύς
Odyssey 1.248	ὦ γύναι, οὐ γάρ πω πάντων ἐπὶ πείρατʼ ἀέθλων
Odyssey 1.249	ἤλθομεν, ἀλλʼ ἔτʼ ὄπισθεν ἀμέτρητος πόνος ἔσται,
Odyssey 1.250	πολλὸς καὶ χαλεπός, τὸν ἐμὲ χρὴ πάντα τελέσσαι.
Odyssey 1.251	ὣς γάρ μοι ψυχὴ μαντεύσατο Τειρεσίαο
Odyssey 1.252	ἤματι τῷ ὅτε δὴ κατέβην δόμον Ἄϊδος εἴσω,
Odyssey 1.253	νόστον ἑταίροισιν διζήμενος ἠδʼ ἐμοὶ αὐτῷ.
Odyssey 1.254	ἀλλʼ ἔρχευ, λέκτρονδʼ ἴομεν, γύναι, ὄφρα καὶ ἤδη
Odyssey 1.255	ὕπνῳ ὕπο γλυκερῷ ταρπώμεθα κοιμηθέντε.
Odyssey 1.256	τὸν δʼ αὖτε προσέειπε περίφρων Πηνελόπεια·
Odyssey 1.257	εὐνὴ μὲν δή σοί γε τότʼ ἔσσεται ὁππότε θυμῷ
Odyssey 1.258	σῷ ἐθέλῃς, ἐπεὶ ἄρ σε θεοὶ ποίησαν ἱκέσθαι
Odyssey 1.259	οἶκον ἐϋκτίμενον καὶ σὴν ἐς πατρίδα γαῖαν·
Odyssey 1.260	ἀλλʼ ἐπεὶ ἐφράσθης καί τοι θεὸς ἔμβαλε θυμῷ,
Odyssey 1.261	εἴπʼ ἄγε μοι τὸν ἄεθλον, ἐπεὶ καὶ ὄπισθεν, ὀΐω,
Odyssey 1.262	πεύσομαι, αὐτίκα δʼ ἐστὶ δαήμεναι οὔ τι χέρειον.
Odyssey 1.263	τὴν δʼ ἀπαμειβόμενος προσέφη πολύμητις Ὀδυσσεύς·
Odyssey 1.264	δαιμονίη, τί τʼ ἄρʼ αὖ με μάλʼ ὀτρύνουσα κελεύεις
Odyssey 1.265	εἰπέμεν; αὐτὰρ ἐγὼ μυθήσομαι οὐδʼ ἐπικεύσω.
Odyssey 1.266	οὐ μέν τοι θυμὸς κεχαρήσεται· οὐδὲ γὰρ αὐτὸς
Odyssey 1.267	χαίρω, ἐπεὶ μάλα πολλὰ βροτῶν ἐπὶ ἄστεʼ ἄνωγεν
Odyssey 1.268	ἐλθεῖν, ἐν χείρεσσιν ἔχοντʼ εὐῆρες ἐρετμόν,
Odyssey 1.269	εἰς ὅ κε τοὺς ἀφίκωμαι οἳ οὐκ ἴσασι θάλασσαν
Odyssey 1.270	ἀνέρες, οὐδέ θʼ ἅλεσσι μεμιγμένον εἶδαρ ἔδουσιν·
Odyssey 1.271	οὐδʼ ἄρα τοί γʼ ἴσασι νέας φοινικοπαρῄους,
Odyssey 1.272	οὐδʼ εὐήρεʼ ἐρετμά, τά τε πτερὰ νηυσὶ πέλονται.
Odyssey 1.273	σῆμα δέ μοι τόδʼ ἔειπεν ἀριφραδές, οὐδέ σε κεύσω·
Odyssey 1.274	ὁππότε κεν δή μοι ξυμβλήμενος ἄλλος ὁδίτης
Odyssey 1.275	φήῃ ἀθηρηλοιγὸν ἔχειν ἀνὰ φαιδίμῳ ὤμῳ,
Odyssey 1.276	καὶ τότε μʼ ἐν γαίῃ πήξαντʼ ἐκέλευεν ἐρετμόν,
Odyssey 1.277	ἔρξανθʼ ἱερὰ καλὰ Ποσειδάωνι ἄνακτι,
Odyssey 1.278	ἀρνειὸν ταῦρόν τε συῶν τʼ ἐπιβήτορα κάπρον,
Odyssey 1.279	οἴκαδʼ ἀποστείχειν, ἔρδειν θʼ ἱερὰς ἑκατόμβας
Odyssey 1.280	ἀθανάτοισι θεοῖσι, τοὶ οὐρανὸν εὐρὺν ἔχουσι,
Odyssey 1.281	πᾶσι μάλʼ ἑξείης· θάνατος δέ μοι ἐξ ἁλὸς αὐτῷ
Odyssey 1.282	ἀβληχρὸς μάλα τοῖος ἐλεύσεται, ὅς κέ με πέφνῃ
Odyssey 1.283	γήρα’ ὕπο λιπαρῷ ἀρημένον· ἀμφὶ δὲ λαοὶ
Odyssey 1.284	ὄλβιοι ἔσσονται· τὰ δέ μοι φάτο πάντα τελεῖσθαι.
Odyssey 1.285	τὸν δʼ αὖτε προσέειπε περίφρων Πηνελόπεια·
Odyssey 1.286	εἰ μὲν δὴ γῆράς γε θεοὶ τελέουσιν ἄρειον,
Odyssey 1.287	ἐλπωρή τοι ἔπειτα κακῶν ὑπάλυξιν ἔσεσθαι.
Odyssey 1.288	ὣς οἱ μὲν τοιαῦτα πρὸς ἀλλήλους ἀγόρευον·
Odyssey 1.289	τόφρα δʼ ἄρʼ Εὐρυνόμη τε ἰδὲ τροφὸς ἔντυον εὐνὴν
Odyssey 1.290	ἐσθῆτος μαλακῆς, δαΐδων ὕπο λαμπομενάων.
Odyssey 1.291	αὐτὰρ ἐπεὶ στόρεσαν πυκινὸν λέχος ἐγκονέουσαι,
Odyssey 1.292	γρηῢς μὲν κείουσα πάλιν οἶκόνδε βεβήκει,
Odyssey 1.293	τοῖσιν δʼ Εὐρυνόμη θαλαμηπόλος ἡγεμόνευεν
Odyssey 1.294	ἐρχομένοισι λέχοσδε, δάος μετὰ χερσὶν ἔχουσα·
Odyssey 1.295	ἐς θάλαμον δʼ ἀγαγοῦσα πάλιν κίεν. οἱ μὲν ἔπειτα
Odyssey 1.296	ἀσπάσιοι λέκτροιο παλαιοῦ θεσμὸν ἵκοντο·
Odyssey 1.297	αὐτὰρ Τηλέμαχος καὶ βουκόλος ἠδὲ συβώτης
Odyssey 1.298	παῦσαν ἄρʼ ὀρχηθμοῖο πόδας, παῦσαν δὲ γυναῖκας,
Odyssey 1.299	αὐτοὶ δʼ εὐνάζοντο κατὰ μέγαρα σκιόεντα.
Odyssey 1.300	τὼ δʼ ἐπεὶ οὖν φιλότητος ἐταρπήτην ἐρατεινῆς,
Odyssey 1.301	τερπέσθην μύθοισι, πρὸς ἀλλήλους ἐνέποντε,
Odyssey 1.302	ἡ μὲν ὅσʼ ἐν μεγάροισιν ἀνέσχετο δῖα γυναικῶν,
Odyssey 1.303	ἀνδρῶν μνηστήρων ἐσορῶσʼ ἀΐδηλον ὅμιλον,
Odyssey 1.304	οἳ ἕθεν εἵνεκα πολλά, βόας καὶ ἴφια μῆλα,
Odyssey 1.305	ἔσφαζον, πολλὸς δὲ πίθων ἠφύσσετο οἶνος·
Odyssey 1.306	αὐτὰρ ὁ διογενὴς Ὀδυσεὺς ὅσα κήδεʼ ἔθηκεν
Odyssey 1.307	ἀνθρώποις ὅσα τʼ αὐτὸς ὀϊζύσας ἐμόγησε,
Odyssey 1.308	πάντʼ ἔλεγʼ· ἡ δʼ ἄρʼ ἐτέρπετʼ ἀκούουσʼ, οὐδέ οἱ ὕπνος
Odyssey 1.309	πῖπτεν ἐπὶ βλεφάροισι πάρος καταλέξαι ἅπαντα.
Odyssey 1.310	ἤρξατο δʼ ὡς πρῶτον Κίκονας δάμασʼ, αὐτὰρ ἔπειτα
Odyssey 1.311	ἦλθʼ ἐς Λωτοφάγων ἀνδρῶν πίειραν ἄρουραν·
Odyssey 1.312	ἠδʼ ὅσα Κύκλωψ ἔρξε, καὶ ὡς ἀπετίσατο ποινὴν
Odyssey 1.313	ἰφθίμων ἑτάρων, οὓς ἤσθιεν οὐδʼ ἐλέαιρεν·
Odyssey 1.314	ἠδʼ ὡς Αἴολον ἵκεθʼ, ὅ μιν πρόφρων ὑπέδεκτο
Odyssey 1.315	καὶ πέμπʼ, οὐδέ πω αἶσα φίλην ἐς πατρίδʼ ἱκέσθαι
Odyssey 1.316	ἤην, ἀλλά μιν αὖτις ἀναρπάξασα θύελλα
Odyssey 1.317	πόντον ἐπʼ ἰχθυόεντα φέρεν βαρέα στενάχοντα·
Odyssey 1.318	ἠδʼ ὡς Τηλέπυλον Λαιστρυγονίην ἀφίκανεν,
Odyssey 1.319	οἳ νῆάς τʼ ὄλεσαν καὶ ἐϋκνήμιδας ἑταίρους
Odyssey 1.320	πάντας· Ὀδυσσεὺς δʼ οἶος ὑπέκφυγε νηῒ μελαίνῃ·
Odyssey 1.321	καὶ Κίρκης κατέλεξε δόλον πολυμηχανίην τε,
Odyssey 1.322	ἠδʼ ὡς εἰς Ἀΐδεω δόμον ἤλυθεν εὐρώεντα,
Odyssey 1.323	ψυχῇ χρησόμενος Θηβαίου Τειρεσίαο,
Odyssey 1.324	νηῒ πολυκλήϊδι, καὶ εἴσιδε πάντας ἑταίρους
Odyssey 1.325	μητέρα θʼ, ἥ μιν ἔτικτε καὶ ἔτρεφε τυτθὸν ἐόντα·
Odyssey 1.326	ἠδʼ ὡς Σειρήνων ἁδινάων φθόγγον ἄκουσεν,
Odyssey 1.327	ὥς θʼ ἵκετο Πλαγκτὰς πέτρας δεινήν τε Χάρυβδιν
Odyssey 1.328	Σκύλλην θʼ, ἣν οὔ πώ ποτʼ ἀκήριοι ἄνδρες ἄλυξαν·
Odyssey 1.329	ἠδʼ ὡς Ἠελίοιο βόας κατέπεφνον ἑταῖροι·
Odyssey 1.330	ἠδʼ ὡς νῆα θοὴν ἔβαλε ψολόεντι κεραυνῷ
Odyssey 1.331	Ζεὺς ὑψιβρεμέτης, ἀπὸ δʼ ἔφθιθεν ἐσθλοὶ ἑταῖροι
Odyssey 1.332	πάντες ὁμῶς, αὐτὸς δὲ κακὰς ὑπὸ κῆρας ἄλυξεν·
Odyssey 1.333	ὥς θʼ ἵκετʼ Ὠγυγίην νῆσον νύμφην τε Καλυψώ,
Odyssey 1.334	ἣ δή μιν κατέρυκε, λιλαιομένη πόσιν εἶναι,
Odyssey 1.335	ἐν σπέσσι γλαφυροῖσι, καὶ ἔτρεφεν ἠδὲ ἔφασκε
Odyssey 1.336	θήσειν ἀθάνατον καὶ ἀγήραον ἤματα πάντα·
Odyssey 1.337	ἀλλὰ τοῦ οὔ ποτε θυμὸν ἐνὶ στήθεσσιν ἔπειθεν·
Odyssey 1.338	ἠδʼ ὡς ἐς Φαίηκας ἀφίκετο πολλὰ μογήσας,
Odyssey 1.339	οἳ δή μιν περὶ κῆρι θεὸν ὣς τιμήσαντο
Odyssey 1.340	καὶ πέμψαν σὺν νηῒ φίλην ἐς πατρίδα γαῖαν,
Odyssey 1.341	χαλκόν τε χρυσόν τε ἅλις ἐσθῆτά τε δόντες.
Odyssey 1.342	τοῦτʼ ἄρα δεύτατον εἶπεν ἔπος, ὅτε οἱ γλυκὺς ὕπνος
Odyssey 1.343	λυσιμελὴς ἐπόρουσε, λύων μελεδήματα θυμοῦ.
Odyssey 1.344	ἡ δʼ αὖτʼ ἄλλʼ ἐνόησε θεὰ γλαυκῶπις Ἀθήνη·
Odyssey 1.345	ὁππότε δή ῥʼ Ὀδυσῆα ἐέλπετο ὃν κατὰ θυμὸν
Odyssey 1.346	εὐνῆς ἧς ἀλόχου ταρπήμεναι ἠδὲ καὶ ὕπνου,
Odyssey 1.347	αὐτίκʼ ἀπʼ Ὠκεανοῦ χρυσόθρονον ἠριγένειαν
Odyssey 1.348	ὦρσεν, ἵνʼ ἀνθρώποισι φόως φέροι· ὦρτο δʼ Ὀδυσσεὺς
Odyssey 1.349	εὐνῆς ἐκ μαλακῆς, ἀλόχῳ δʼ ἐπὶ μῦθον ἔτελλεν·
Odyssey 1.350	ὦ γύναι, ἤδη μὲν πολέων κεκορήμεθʼ ἀέθλων
Odyssey 1.351	ἀμφοτέρω, σὺ μὲν ἐνθάδʼ ἐμὸν πολυκηδέα νόστον
Odyssey 1.352	κλαίουσʼ. αὐτὰρ ἐμὲ Ζεὺς ἄλγεσι καὶ θεοὶ ἄλλοι
Odyssey 1.353	ἱέμενον πεδάασκον ἐμῆς ἀπὸ πατρίδος αἴης·
Odyssey 1.354	νῦν δʼ ἐπεὶ ἀμφοτέρω πολυήρατον ἱκόμεθʼ εὐνήν,
Odyssey 1.355	κτήματα μὲν τά μοι ἔστι, κομιζέμεν ἐν μεγάροισι,
Odyssey 1.356	μῆλα δʼ ἅ μοι μνηστῆρες ὑπερφίαλοι κατέκειραν,
Odyssey 1.357	πολλὰ μὲν αὐτὸς ἐγὼ ληΐσσομαι, ἄλλα δʼ Ἀχαιοὶ
Odyssey 1.358	δώσουσʼ, εἰς ὅ κε πάντας ἐνιπλήσωσιν ἐπαύλους.
Odyssey 1.359	ἀλλʼ ἦ τοι μὲν ἐγὼ πολυδένδρεον ἀγρὸν ἔπειμι,
Odyssey 1.360	ὀψόμενος πατέρʼ ἐσθλόν, ὅ μοι πυκινῶς ἀκάχηται·
Odyssey 1.361	σοὶ δέ, γύναι, τάδʼ ἐπιτέλλω, πινυτῇ περ ἐούσῃ·
Odyssey 1.362	αὐτίκα γὰρ φάτις εἶσιν ἅμʼ ἠελίῳ ἀνιόντι
Odyssey 1.363	ἀνδρῶν μνηστήρων, οὓς ἔκτανον ἐν μεγάροισιν·
Odyssey 1.364	εἰς ὑπερῷʼ ἀναβᾶσα σὺν ἀμφιπόλοισι γυναιξὶν
Odyssey 1.365	ἧσθαι, μηδέ τινα προτιόσσεο μηδʼ ἐρέεινε.
Odyssey 1.366	ἦ ῥα καὶ ἀμφʼ ὤμοισιν ἐδύσετο τεύχεα καλά,
Odyssey 1.367	ὦρσε δὲ Τηλέμαχον καὶ βουκόλον ἠδὲ συβώτην,
Odyssey 1.368	πάντας δʼ ἔντεʼ ἄνωγεν ἀρήϊα χερσὶν ἑλέσθαι.
Odyssey 1.369	οἱ δέ οἱ οὐκ ἀπίθησαν, ἐθωρήσσοντο δὲ χαλκῷ,
Odyssey 1.370	ὤϊξαν δὲ θύρας, ἐκ δʼ ἤϊον· ἦρχε δʼ Ὀδυσσεύς.
Odyssey 1.371	ἤδη μὲν φάος ἦεν ἐπὶ χθόνα, τοὺς δʼ ἄρʼ Ἀθήνη
Odyssey 1.372	νυκτὶ κατακρύψασα θοῶς ἐξῆγε πόληος.
Odyssey 1.1	Ἑρμῆς δὲ ψυχὰς Κυλλήνιος ἐξεκαλεῖτο
Odyssey 1.2	ἀνδρῶν μνηστήρων· ἔχε δὲ ῥάβδον μετὰ χερσὶν
Odyssey 1.3	καλὴν χρυσείην, τῇ τʼ ἀνδρῶν ὄμματα θέλγει
Odyssey 1.4	ὧν ἐθέλει, τοὺς δʼ αὖτε καὶ ὑπνώοντας ἐγείρει·
Odyssey 1.5	τῇ ῥʼ ἄγε κινήσας, ταὶ δὲ τρίζουσαι ἕποντο.
Odyssey 1.6	ὡς δʼ ὅτε νυκτερίδες μυχῷ ἄντρου θεσπεσίοιο
Odyssey 1.7	τρίζουσαι ποτέονται, ἐπεί κέ τις ἀποπέσῃσιν
Odyssey 1.8	ὁρμαθοῦ ἐκ πέτρης, ἀνά τʼ ἀλλήλῃσιν ἔχονται,
Odyssey 1.9	ὣς αἱ τετριγυῖαι ἅμʼ ἤϊσαν· ἦρχε δʼ ἄρα σφιν
Odyssey 1.10	Ἑρμείας ἀκάκητα κατʼ εὐρώεντα κέλευθα.
Odyssey 1.11	πὰρ δʼ ἴσαν Ὠκεανοῦ τε ῥοὰς καὶ Λευκάδα πέτρην,
Odyssey 1.12	ἠδὲ παρʼ Ἠελίοιο πύλας καὶ δῆμον ὀνείρων
Odyssey 1.13	ἤϊσαν· αἶψα δʼ ἵκοντο κατʼ ἀσφοδελὸν λειμῶνα,
Odyssey 1.14	ἔνθα τε ναίουσι ψυχαί, εἴδωλα καμόντων.
Odyssey 1.15	εὗρον δὲ ψυχὴν Πηληϊάδεω Ἀχιλῆος
Odyssey 1.16	καὶ Πατροκλῆος καὶ ἀμύμονος Ἀντιλόχοιο
Odyssey 1.17	Αἴαντός θʼ, ὃς ἄριστος ἔην εἶδός τε δέμας τε
Odyssey 1.18	τῶν ἄλλων Δαναῶν μετʼ ἀμύμονα Πηλεΐωνα.
Odyssey 1.19	ὣς οἱ μὲν περὶ κεῖνον ὁμίλεον· ἀγχίμολον δὲ
Odyssey 1.20	ἤλυθʼ ἔπι ψυχὴ Ἀγαμέμνονος Ἀτρεΐδαο
Odyssey 1.21	ἀχνυμένη· περὶ δʼ ἄλλαι ἀγηγέραθʼ, ὅσσαι ἅμʼ αὐτῷ
Odyssey 1.22	οἴκῳ ἐν Αἰγίσθοιο θάνον καὶ πότμον ἐπέσπον.
Odyssey 1.23	τὸν προτέρη ψυχὴ προσεφώνεε Πηλεΐωνος·
Odyssey 1.24	Ἀτρεΐδη, περὶ μέν σʼ ἔφαμεν Διὶ τερπικεραύνῳ
Odyssey 1.25	ἀνδρῶν ἡρώων φίλον ἔμμεναι ἤματα πάντα,
Odyssey 1.26	οὕνεκα πολλοῖσίν τε καὶ ἰφθίμοισιν ἄνασσες
Odyssey 1.27	δήμῳ ἔνι Τρώων, ὅθι πάσχομεν ἄλγεʼ Ἀχαιοί.
Odyssey 1.28	ἦ τʼ ἄρα καὶ σοὶ πρῶϊ παραστήσεσθαι ἔμελλεν
Odyssey 1.29	μοῖρʼ ὀλοή, τὴν οὔ τις ἀλεύεται ὅς κε γένηται.
Odyssey 1.30	ὡς ὄφελες τιμῆς ἀπονήμενος, ἧς περ ἄνασσες,
Odyssey 1.31	δήμῳ ἔνι Τρώων θάνατον καὶ πότμον ἐπισπεῖν·
Odyssey 1.32	τῷ κέν τοι τύμβον μὲν ἐποίησαν Παναχαιοί,
Odyssey 1.33	ἠδέ κε καὶ σῷ παιδὶ μέγα κλέος ἤραʼ ὀπίσσω·
Odyssey 1.34	νῦν δʼ ἄρα σʼ οἰκτίστῳ θανάτῳ εἵμαρτο ἁλῶναι.
Odyssey 1.35	τὸν δʼ αὖτε ψυχὴ προσεφώνεεν Ἀτρείδαο·
Odyssey 1.36	ὄλβιε Πηλέος υἱέ, θεοῖς ἐπιείκελʼ Ἀχιλλεῦ,
Odyssey 1.37	ὃς θάνες ἐν Τροίῃ ἑκὰς Ἄργεος· ἀμφὶ δέ σʼ ἄλλοι
Odyssey 1.38	κτείνοντο Τρώων καὶ Ἀχαιῶν υἷες ἄριστοι,
Odyssey 1.39	μαρνάμενοι περὶ σεῖο· σὺ δʼ ἐν στροφάλιγγι κονίης
Odyssey 1.40	κεῖσο μέγας μεγαλωστί, λελασμένος ἱπποσυνάων.
Odyssey 1.41	ἡμεῖς δὲ πρόπαν ἦμαρ ἐμαρνάμεθʼ· οὐδέ κε πάμπαν
Odyssey 1.42	παυσάμεθα πτολέμου, εἰ μὴ Ζεὺς λαίλαπι παῦσεν.
Odyssey 1.43	αὐτὰρ ἐπεί σʼ ἐπὶ νῆας ἐνείκαμεν ἐκ πολέμοιο,
Odyssey 1.44	κάτθεμεν ἐν λεχέεσσι, καθήραντες χρόα καλὸν
Odyssey 1.45	ὕδατί τε λιαρῷ καὶ ἀλείφατι· πολλὰ δέ σʼ ἀμφὶ
Odyssey 1.46	δάκρυα θερμὰ χέον Δαναοὶ κείροντό τε χαίτας.
Odyssey 1.47	μήτηρ δʼ ἐξ ἁλὸς ἦλθε σὺν ἀθανάτῃς ἁλίῃσιν
Odyssey 1.48	ἀγγελίης ἀΐουσα· βοὴ δʼ ἐπὶ πόντον ὀρώρει
Odyssey 1.49	θεσπεσίη, ὑπὸ δὲ τρόμος ἔλλαβε πάντας Ἀχαιούς·
Odyssey 1.50	καί νύ κʼ ἀναΐξαντες ἔβαν κοίλας ἐπὶ νῆας,
Odyssey 1.51	εἰ μὴ ἀνὴρ κατέρυκε παλαιά τε πολλά τε εἰδώς,
Odyssey 1.52	Νέστωρ, οὗ καὶ πρόσθεν ἀρίστη φαίνετο βουλή·
Odyssey 1.53	ὅ σφιν ἐϋφρονέων ἀγορήσατο καὶ μετέειπεν·
Odyssey 1.54	ἴσχεσθʼ, Ἀργεῖοι, μὴ φεύγετε, κοῦροι Ἀχαιῶν·
Odyssey 1.55	μήτηρ ἐξ ἁλὸς ἥδε σὺν ἀθανάτῃς ἁλίῃσιν
Odyssey 1.56	ἔρχεται, οὗ παιδὸς τεθνηότος ἀντιόωσα.
Odyssey 1.57	ὣς ἔφαθʼ, οἱ δʼ ἔσχοντο φόβου μεγάθυμοι Ἀχαιοί·
Odyssey 1.58	ἀμφὶ δέ σʼ ἔστησαν κοῦραι ἁλίοιο γέροντος
Odyssey 1.59	οἴκτρʼ ὀλοφυρόμεναι, περὶ δʼ ἄμβροτα εἵματα ἕσσαν.
Odyssey 1.60	Μοῦσαι δʼ ἐννέα πᾶσαι ἀμειβόμεναι ὀπὶ καλῇ
Odyssey 1.61	θρήνεον· ἔνθα κεν οὔ τινʼ ἀδάκρυτόν γʼ ἐνόησας
Odyssey 1.62	Ἀργείων· τοῖον γὰρ ὑπώρορε Μοῦσα λίγεια.
Odyssey 1.63	ἑπτὰ δὲ καὶ δέκα μέν σε ὁμῶς νύκτας τε καὶ ἦμαρ
Odyssey 1.64	κλαίομεν ἀθάνατοί τε θεοὶ θνητοί τʼ ἄνθρωποι·
Odyssey 1.65	ὀκτωκαιδεκάτῃ δʼ ἔδομεν πυρί, πολλὰ δέ σʼ ἀμφὶ
Odyssey 1.66	μῆλα κατεκτάνομεν μάλα πίονα καὶ ἕλικας βοῦς.
Odyssey 1.67	καίεο δʼ ἔν τʼ ἐσθῆτι θεῶν καὶ ἀλείφατι πολλῷ
Odyssey 1.68	καὶ μέλιτι γλυκερῷ· πολλοὶ δʼ ἥρωες Ἀχαιοὶ
Odyssey 1.69	τεύχεσιν ἐρρώσαντο πυρὴν πέρι καιομένοιο,
Odyssey 1.70	πεζοί θʼ ἱππῆές τε· πολὺς δʼ ὀρυμαγδὸς ὀρώρει
Odyssey 1.71	αὐτὰρ ἐπεὶ δή σε φλὸξ ἤνυσεν Ἡφαίστοιο,
Odyssey 1.72	ἠῶθεν δή τοι λέγομεν λεύκʼ ὀστέʼ, Ἀχιλλεῦ,
Odyssey 1.73	οἴνῳ ἐν ἀκρήτῳ καὶ ἀλείφατι· δῶκε δὲ μήτηρ
Odyssey 1.74	χρύσεον ἀμφιφορῆα· Διωνύσοιο δὲ δῶρον
Odyssey 1.75	φάσκʼ ἔμεναι, ἔργον δὲ περικλυτοῦ Ἡφαίστοιο.
Odyssey 1.76	ἐν τῷ τοι κεῖται λεύκʼ ὀστέα, φαίδιμʼ Ἀχιλλεῦ,
Odyssey 1.77	μίγδα δὲ Πατρόκλοιο Μενοιτιάδαο θανόντος,
Odyssey 1.78	χωρὶς δʼ Ἀντιλόχοιο, τὸν ἔξοχα τῖες ἁπάντων
Odyssey 1.79	τῶν ἄλλων ἑτάρων, μετὰ Πάτροκλόν γε θανόντα.
Odyssey 1.80	ἀμφʼ αὐτοῖσι δʼ ἔπειτα μέγαν καὶ ἀμύμονα τύμβον
Odyssey 1.81	χεύαμεν Ἀργείων ἱερὸς στρατὸς αἰχμητάων
Odyssey 1.82	ἀκτῇ ἔπι προὐχούσῃ, ἐπὶ πλατεῖ Ἑλλησπόντῳ,
Odyssey 1.83	ὥς κεν τηλεφανὴς ἐκ ποντόφιν ἀνδράσιν εἴη
Odyssey 1.84	τοῖς οἳ νῦν γεγάασι καὶ οἳ μετόπισθεν ἔσονται.
Odyssey 1.85	μήτηρ δʼ αἰτήσασα θεοὺς περικαλλέʼ ἄεθλα
Odyssey 1.86	θῆκε μέσῳ ἐν ἀγῶνι ἀριστήεσσιν Ἀχαιῶν.
Odyssey 1.87	ἤδη μὲν πολέων τάφῳ ἀνδρῶν ἀντεβόλησας
Odyssey 1.88	ἡρώων, ὅτε κέν ποτʼ ἀποφθιμένου βασιλῆος
Odyssey 1.89	ζώννυνταί τε νέοι καὶ ἐπεντύνονται ἄεθλα·
Odyssey 1.90	ἀλλά κε κεῖνα μάλιστα ἰδὼν θηήσαο θυμῷ,
Odyssey 1.91	οἷʼ ἐπὶ σοὶ κατέθηκε θεὰ περικαλλέʼ ἄεθλα,
Odyssey 1.92	ἀργυρόπεζα Θέτις· μάλα γὰρ φίλος ἦσθα θεοῖσιν.
Odyssey 1.93	ὣς σὺ μὲν οὐδὲ θανὼν ὄνομʼ ὤλεσας, ἀλλά τοι αἰεὶ
Odyssey 1.94	πάντας ἐπʼ ἀνθρώπους κλέος ἔσσεται ἐσθλόν, Ἀχιλλεῦ,
Odyssey 1.95	αὐτὰρ ἐμοὶ τί τόδʼ ἦδος, ἐπεὶ πόλεμον τολύπευσα;
Odyssey 1.96	ἐν νόστῳ γάρ μοι Ζεὺς μήσατο λυγρὸν ὄλεθρον
Odyssey 1.97	Αἰγίσθου ὑπὸ χερσὶ καὶ οὐλομένης ἀλόχοιο.
Odyssey 1.98	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.99	ἀγχίμολον δέ σφʼ ἦλθε διάκτορος ἀργεϊφόντης,
Odyssey 1.100	ψυχὰς μνηστήρων κατάγων Ὀδυσῆϊ δαμέντων,
Odyssey 1.101	τὼ δʼ ἄρα θαμβήσαντʼ ἰθὺς κίον, ὡς ἐσιδέσθην.
Odyssey 1.102	ἔγνω δὲ ψυχὴ Ἀγαμέμνονος Ἀτρεΐδαο
Odyssey 1.103	παῖδα φίλον Μελανῆος, ἀγακλυτὸν Ἀμφιμέδοντα·
Odyssey 1.104	ξεῖνος γάρ οἱ ἔην Ἰθάκῃ ἔνι οἰκία ναίων.
Odyssey 1.105	τὸν προτέρη ψυχὴ προσεφώνεεν Ἀτρεΐδαο·
Odyssey 1.106	Ἀμφίμεδον, τί παθόντες ἐρεμνὴν γαῖαν ἔδυτε
Odyssey 1.107	πάντες κεκριμένοι καὶ ὁμήλικες; οὐδέ κεν ἄλλως
Odyssey 1.108	κρινάμενος λέξαιτο κατὰ πτόλιν ἄνδρας ἀρίστους.
Odyssey 1.109	ἦ ὔμμʼ ἐν νήεσσι Ποσειδάων ἐδάμασσεν,
Odyssey 1.110	ὄρσας ἀργαλέους ἀνέμους καὶ κύματα μακρά;
Odyssey 1.111	ἦ που ἀνάρσιοι ἄνδρες ἐδηλήσαντʼ ἐπὶ χέρσου
Odyssey 1.112	βοῦς περιταμνομένους ἠδʼ οἰῶν πώεα καλά,
Odyssey 1.113	ἠὲ περὶ πτόλιος μαχεούμενοι ἠδὲ γυναικῶν;
Odyssey 1.114	εἰπέ μοι εἰρομένῳ· ξεῖνος δέ τοι εὔχομαι εἶναι.
Odyssey 1.115	ἦ οὐ μέμνῃ ὅτε κεῖσε κατήλυθον ὑμέτερον δῶ,
Odyssey 1.116	ὀτρυνέων Ὀδυσῆα σὺν ἀντιθέῳ Μενελάῳ
Odyssey 1.117	Ἴλιον εἰς ἅμʼ ἕπεσθαι ἐϋσσέλμων ἐπὶ νηῶν;
Odyssey 1.118	μηνὶ δʼ ἄρʼ οὔλῳ πάντα περήσαμεν εὐρέα πόντον,
Odyssey 1.119	σπουδῇ παρπεπιθόντες Ὀδυσσῆα πτολίπορθον.
Odyssey 1.120	τὸν δʼ αὖτε ψυχὴ προσεφώνεεν Ἀμφιμέδοντος·
Odyssey 1.121	Ἀτρεΐδη κύδιστε, ἄναξ ἀνδρῶν Ἀγάμεμνον,
Odyssey 1.122	μέμνημαι τάδε πάντα, διοτρεφές, ὡς ἀγορεύεις·
Odyssey 1.123	σοὶ δʼ ἐγὼ εὖ μάλα πάντα καὶ ἀτρεκέως καταλέξω,
Odyssey 1.124	ἡμετέρου θανάτοιο κακὸν τέλος, οἷον ἐτύχθη.
Odyssey 1.125	μνώμεθʼ Ὀδυσσῆος δὴν οἰχομένοιο δάμαρτα·
Odyssey 1.126	ἡ δʼ οὔτʼ ἠρνεῖτο στυγερὸν γάμον οὔτʼ ἐτελεύτα,
Odyssey 1.127	ἡμῖν φραζομένη θάνατον καὶ κῆρα μέλαιναν,
Odyssey 1.128	ἀλλὰ δόλον τόνδʼ ἄλλον ἐνὶ φρεσὶ μερμήριξε·
Odyssey 1.129	στησαμένη μέγαν ἱστὸν ἐνὶ μεγάροισιν ὕφαινε,
Odyssey 1.130	λεπτὸν καὶ περίμετρον· ἄφαρ δʼ ἡμῖν μετέειπε·
Odyssey 1.131	κοῦροι ἐμοὶ μνηστῆρες, ἐπεὶ θάνε δῖος Ὀδυσσεύς,
Odyssey 1.132	μίμνετʼ ἐπειγόμενοι τὸν ἐμὸν γάμον, εἰς ὅ κε φᾶρος
Odyssey 1.133	ἐκτελέσω, μή μοι μεταμώνια νήματʼ ὄληται,
Odyssey 1.134	Λαέρτῃ ἥρωϊ ταφήϊον, εἰς ὅτε κέν μιν
Odyssey 1.135	μοῖρʼ ὀλοὴ καθέλῃσι τανηλεγέος θανάτοιο,
Odyssey 1.136	μή τίς μοι κατὰ δῆμον Ἀχαιϊάδων νεμεσήσῃ,
Odyssey 1.137	αἴ κεν ἄτερ σπείρου κεῖται πολλὰ κτεατίσσας.
Odyssey 1.138	ὣς ἔφαθʼ, ἡμῖν δʼ αὖτʼ ἐπεπείθετο θυμὸς ἀγήνωρ.
Odyssey 1.139	ἔνθα καὶ ἠματίη μὲν ὑφαίνεσκεν μέγαν ἱστόν,
Odyssey 1.140	νύκτας δʼ ἀλλύεσκεν, ἐπεὶ δαΐδας παραθεῖτο.
Odyssey 1.141	ὣς τρίετες μὲν ἔληθε δόλῳ καὶ ἔπειθεν Ἀχαιούς·
Odyssey 1.142	ἀλλʼ ὅτε τέτρατον ἦλθεν ἔτος καὶ ἐπήλυθον ὧραι,
Odyssey 1.143	μηνῶν φθινόντων, περὶ δʼ ἤματα πόλλʼ ἐτελέσθη,
Odyssey 1.144	καὶ τότε δή τις ἔειπε γυναικῶν, ἣ σάφα ᾔδη,
Odyssey 1.145	καὶ τήν γʼ ἀλλύουσαν ἐφεύρομεν ἀγλαὸν ἱστόν.
Odyssey 1.146	ὣς τὸ μὲν ἐξετέλεσσε καὶ οὐκ ἐθέλουσʼ, ὑπʼ ἀνάγκης.
Odyssey 1.147	εὖθʼ ἡ φᾶρος ἔδειξεν, ὑφήνασα μέγαν ἱστόν,
Odyssey 1.148	πλύνασʼ, ἠελίῳ ἐναλίγκιον ἠὲ σελήνῃ,
Odyssey 1.149	καὶ τότε δή ῥʼ Ὀδυσῆα κακός ποθεν ἤγαγε δαίμων
Odyssey 1.150	ἀγροῦ ἐπʼ ἐσχατιήν, ὅθι δώματα ναῖε συβώτης.
Odyssey 1.151	ἔνθʼ ἦλθεν φίλος υἱὸς Ὀδυσσῆος θείοιο,
Odyssey 1.152	ἐκ Πύλου ἠμαθόεντος ἰὼν σὺν νηῒ μελαίνῃ·
Odyssey 1.153	τὼ δὲ μνηστῆρσιν θάνατον κακὸν ἀρτύναντε
Odyssey 1.154	ἵκοντο προτὶ ἄστυ περικλυτόν, ἦ τοι Ὀδυσσεὺς
Odyssey 1.155	ὕστερος, αὐτὰρ Τηλέμαχος πρόσθʼ ἡγεμόνευε.
Odyssey 1.156	τὸν δὲ συβώτης ἦγε κακὰ χροῒ εἵματʼ ἔχοντα,
Odyssey 1.157	πτωχῷ λευγαλέῳ ἐναλίγκιον ἠδὲ γέροντι
Odyssey 1.158	σκηπτόμενον· τὰ δὲ λυγρὰ περὶ χροῒ εἵματα ἕστο·
Odyssey 1.159	οὐδέ τις ἡμείων δύνατο γνῶναι τὸν ἐόντα
Odyssey 1.160	ἐξαπίνης προφανέντʼ, οὐδʼ οἳ προγενέστεροι ἦσαν,
Odyssey 1.161	ἀλλʼ ἔπεσίν τε κακοῖσιν ἐνίσσομεν ἠδὲ βολῇσιν.
Odyssey 1.162	αὐτὰρ ὁ τῆος ἐτόλμα ἐνὶ μεγάροισιν ἑοῖσι
Odyssey 1.163	βαλλόμενος καὶ ἐνισσόμενος τετληότι θυμῷ·
Odyssey 1.164	ἀλλʼ ὅτε δή μιν ἔγειρε Διὸς νοός αἰγιόχοιο,
Odyssey 1.165	σὺν μὲν Τηλεμάχῳ περικαλλέα τεύχεʼ ἀείρας
Odyssey 1.166	ἐς θάλαμον κατέθηκε καὶ ἐκλήϊσεν ὀχῆας,
Odyssey 1.167	αὐτὰρ ὁ ἣν ἄλοχον πολυκερδείῃσιν ἄνωγε
Odyssey 1.168	τόξον μνηστήρεσσι θέμεν πολιόν τε σίδηρον,
Odyssey 1.169	ἡμῖν αἰνομόροισιν ἀέθλια καὶ φόνου ἀρχήν.
Odyssey 1.170	οὐδέ τις ἡμείων δύνατο κρατεροῖο βιοῖο
Odyssey 1.171	νευρὴν ἐντανύσαι, πολλὸν δʼ ἐπιδευέες ἦμεν.
Odyssey 1.172	ἀλλʼ ὅτε χεῖρας ἵκανεν Ὀδυσσῆος μέγα τόξον,
Odyssey 1.173	ἔνθʼ ἡμεῖς μὲν πάντες ὁμοκλέομεν ἐπέεσσι
Odyssey 1.174	τόξον μὴ δόμεναι, μηδʼ εἰ μάλα πολλʼ ἀγορεύοι·
Odyssey 1.175	Τηλέμαχος δέ μιν οἶος ἐποτρύνων ἐκέλευσεν.
Odyssey 1.176	αὐτὰρ ὁ δέξατο χειρὶ πολύτλας δῖος Ὀδυσσεύς,
Odyssey 1.177	ῥηϊδίως δʼ ἐτάνυσσε βιόν, διὰ δʼ ἧκε σιδήρου,
Odyssey 1.178	στῆ δʼ ἄρʼ ἐπʼ οὐδὸν ἰών, ταχέας δʼ ἐκχεύατʼ ὀϊστοὺς
Odyssey 1.179	δεινὸν παπταίνων, βάλε δʼ Ἀντίνοον βασιλῆα.
Odyssey 1.180	αὐτὰρ ἔπειτʼ ἄλλοις ἐφίει βέλεα στονόεντα,
Odyssey 1.181	ἄντα τιτυσκόμενος· τοὶ δʼ ἀγχιστῖνοι ἔπιπτον.
Odyssey 1.182	γνωτὸν δʼ ἦν ὅ ῥά τίς σφι θεῶν ἐπιτάρροθος ἦεν·
Odyssey 1.183	αὐτίκα γὰρ κατὰ δώματʼ ἐπισπόμενοι μένεϊ σφῷ
Odyssey 1.184	κτεῖνον ἐπιστροφάδην, τῶν δὲ στόνος ὤρνυτʼ ἀεικὴς
Odyssey 1.185	κράτων τυπτομένων, δάπεδον δʼ ἅπαν αἵματι θῦεν.
Odyssey 1.186	ὣς ἡμεῖς, Ἀγάμεμνον, ἀπωλόμεθʼ, ὧν ἔτι καὶ νῦν
Odyssey 1.187	σώματʼ ἀκηδέα κεῖται ἐνὶ μεγάροις Ὀδυσῆος·
Odyssey 1.188	οὐ γάρ πω ἴσασι φίλοι κατὰ δώμαθʼ ἑκάστου,
Odyssey 1.189	οἵ κʼ ἀπονίψαντες μέλανα βρότον ἐξ ὠτειλέων
Odyssey 1.190	κατθέμενοι γοάοιεν· ὃ γὰρ γέρας ἐστὶ θανόντων.
Odyssey 1.191	τὸν δʼ αὖτε ψυχὴ προσεφώνεεν Ἀτρεΐδαο·
Odyssey 1.192	ὄλβιε Λαέρταο πάϊ, πολυμήχανʼ Ὀδυσσεῦ,
Odyssey 1.193	ἦ ἄρα σὺν μεγάλῃ ἀρετῇ ἐκτήσω ἄκοιτιν.
Odyssey 1.194	ὡς ἀγαθαὶ φρένες ἦσαν ἀμύμονι Πηνελοπείῃ,
Odyssey 1.195	κούρῃ Ἰκαρίου· ὡς εὖ μέμνητʼ Ὀδυσῆος,
Odyssey 1.196	ἀνδρὸς κουριδίου· τῷ οἱ κλέος οὔ ποτʼ ὀλεῖται
Odyssey 1.197	ἧς ἀρετῆς, τεύξουσι δʼ ἐπιχθονίοισιν ἀοιδὴν
Odyssey 1.198	ἀθάνατοι χαρίεσσαν ἐχέφρονι Πηνελοπείῃ,
Odyssey 1.199	οὐχ ὡς Τυνδαρέου κούρη κακὰ μήσατο ἔργα,
Odyssey 1.200	κουρίδιον κτείνασα πόσιν, στυγερὴ δέ τʼ ἀοιδὴ
Odyssey 1.201	ἔσσετʼ ἐπʼ ἀνθρώπους, χαλεπὴν δέ τε φῆμιν ὀπάσσει
Odyssey 1.202	θηλυτέρῃσι γυναιξί, καὶ ἥ κʼ εὐεργὸς ἔῃσιν.
Odyssey 1.203	ὣς οἱ μὲν τοιαῦτα πρὸς ἀλλήλους ἀγόρευον,
Odyssey 1.204	ἑσταότʼ εἰν Ἀΐδαο δόμοις, ὑπὸ κεύθεσι γαίης·
Odyssey 1.205	οἱ δʼ ἐπεὶ ἐκ πόλιος κατέβαν, τάχα δʼ ἀγρὸν ἵκοντο
Odyssey 1.206	καλὸν Λαέρταο τετυγμένον, ὅν ῥά ποτʼ αὐτὸς
Odyssey 1.207	Λαέρτης κτεάτισσεν, ἐπεὶ μάλα πόλλʼ ἐμόγησεν.
Odyssey 1.208	ἔνθα οἱ οἶκος ἔην, περὶ δὲ κλίσιον θέε πάντη,
Odyssey 1.209	ἐν τῷ σιτέσκοντο καὶ ἵζανον ἠδὲ ἴαυον
Odyssey 1.210	δμῶες ἀναγκαῖοι, τοί οἱ φίλα ἐργάζοντο.
Odyssey 1.211	ἐν δὲ γυνὴ Σικελὴ γρηῢς πέλεν, ἥ ῥα γέροντα
Odyssey 1.212	ἐνδυκέως κομέεσκεν ἐπʼ ἀγροῦ, νόσφι πόληος.
Odyssey 1.213	ἔνθʼ Ὀδυσεὺς δμώεσσι καὶ υἱέϊ μῦθον ἔειπεν·
Odyssey 1.214	ὑμεῖς μὲν νῦν ἔλθετʼ ἐϋκτίμενον δόμον εἴσω,
Odyssey 1.215	δεῖπνον δʼ αἶψα συῶν ἱερεύσατε ὅς τις ἄριστος·
Odyssey 1.216	αὐτὰρ ἐγὼ πατρὸς πειρήσομαι ἡμετέροιο,
Odyssey 1.217	αἴ κέ μʼ ἐπιγνώῃ καὶ φράσσεται ὀφθαλμοῖσιν,
Odyssey 1.218	ἦέ κεν ἀγνοιῇσι, πολὺν χρόνον ἀμφὶς ἐόντα.
Odyssey 1.219	ὣς εἰπὼν δμώεσσιν ἀρήϊα τεύχεʼ ἔδωκεν.
Odyssey 1.220	οἱ μὲν ἔπειτα δόμονδε θοῶς κίον, αὐτὰρ Ὀδυσσεὺς
Odyssey 1.221	ἆσσον ἴεν πολυκάρπου ἀλωῆς πειρητίζων.
Odyssey 1.222	οὐδʼ εὗρεν Δολίον, μέγαν ὄρχατον ἐσκαταβαίνων,
Odyssey 1.223	οὐδέ τινα δμώων οὐδʼ υἱῶν· ἀλλʼ ἄρα τοί γε
Odyssey 1.224	αἱμασιὰς λέξοντες ἀλωῆς ἔμμεναι ἕρκος
Odyssey 1.225	ᾤχοντʼ, αὐτὰρ ὁ τοῖσι γέρων ὁδὸν ἡγεμόνευε.
Odyssey 1.226	τὸν δʼ οἶον πατέρʼ εὗρεν ἐϋκτιμένῃ ἐν ἀλωῇ,
Odyssey 1.227	λιστρεύοντα φυτόν· ῥυπόωντα δὲ ἕστο χιτῶνα
Odyssey 1.228	ῥαπτὸν ἀεικέλιον, περὶ δὲ κνήμῃσι βοείας
Odyssey 1.229	κνημῖδας ῥαπτὰς δέδετο, γραπτῦς ἀλεείνων,
Odyssey 1.230	χειρῖδάς τʼ ἐπὶ χερσὶ βάτων ἕνεκʼ· αὐτὰρ ὕπερθεν
Odyssey 1.231	αἰγείην κυνέην κεφαλῇ ἔχε, πένθος ἀέξων.
Odyssey 1.232	τὸν δʼ ὡς οὖν ἐνόησε πολύτλας δῖος Ὀδυσσεὺς
Odyssey 1.233	γήραϊ τειρόμενον, μέγα δὲ φρεσὶ πένθος ἔχοντα,
Odyssey 1.234	στὰς ἄρʼ ὑπὸ βλωθρὴν ὄγχνην κατὰ δάκρυον εἶβε.
Odyssey 1.235	μερμήριξε δʼ ἔπειτα κατὰ φρένα καὶ κατὰ θυμὸν
Odyssey 1.236	κύσσαι καὶ περιφῦναι ἑὸν πατέρʼ, ἠδὲ ἕκαστα
Odyssey 1.237	εἰπεῖν, ὡς ἔλθοι καὶ ἵκοιτʼ ἐς πατρίδα γαῖαν,
Odyssey 1.238	ἦ πρῶτʼ ἐξερέοιτο ἕκαστά τε πειρήσαιτο.
Odyssey 1.239	ὧδε δέ οἱ φρονέοντι δοάσσατο κέρδιον εἶναι,
Odyssey 1.240	πρῶτον κερτομίοις ἐπέεσσιν πειρηθῆναι.
Odyssey 1.241	τὰ φρονέων ἰθὺς κίεν αὐτοῦ δῖος Ὀδυσσεύς.
Odyssey 1.242	ἦ τοι ὁ μὲν κατέχων κεφαλὴν φυτὸν ἀμφελάχαινε·
Odyssey 1.243	τὸν δὲ παριστάμενος προσεφώνεε φαίδιμος υἱός·
Odyssey 1.244	ὦ γέρον, οὐκ ἀδαημονίη σʼ ἔχει ἀμφιπολεύειν
Odyssey 1.245	ὄρχατον, ἀλλʼ εὖ τοι κομιδὴ ἔχει, οὐδέ τι πάμπαν,
Odyssey 1.246	οὐ φυτόν, οὐ συκέη, οὐκ ἄμπελος, οὐ μὲν ἐλαίη,
Odyssey 1.247	οὐκ ὄγχνη, οὐ πρασιή τοι ἄνευ κομιδῆς κατὰ κῆπον.
Odyssey 1.248	ἄλλο δέ τοι ἐρέω, σὺ δὲ μὴ χόλον ἔνθεο θυμῷ
Odyssey 1.249	αὐτόν σʼ οὐκ ἀγαθὴ κομιδὴ ἔχει, ἀλλʼ ἅμα γῆρας
Odyssey 1.250	λυγρὸν ἔχεις αὐχμεῖς τε κακῶς καὶ ἀεικέα ἕσσαι.
Odyssey 1.251	οὐ μὲν ἀεργίης γε ἄναξ ἕνεκʼ οὔ σε κομίζει,
Odyssey 1.252	οὐδέ τί τοι δούλειον ἐπιπρέπει εἰσοράασθαι
Odyssey 1.253	εἶδος καὶ μέγεθος· βασιλῆϊ γὰρ ἀνδρὶ ἔοικας.
Odyssey 1.254	τοιούτῳ δὲ ἔοικας, ἐπεὶ λούσαιτο φάγοι τε,
Odyssey 1.255	εὑδέμεναι μαλακῶς· ἡ γὰρ δίκη ἐστὶ γερόντων.
Odyssey 1.256	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Odyssey 1.257	τεῦ δμὼς εἶς ἀνδρῶν; τεῦ δʼ ὄρχατον ἀμφιπολεύεις;
Odyssey 1.258	καὶ μοι τοῦτʼ ἀγόρευσον ἐτήτυμον, ὄφρʼ ἐῢ εἰδῶ,
Odyssey 1.259	εἰ ἐτεόν γʼ Ἰθάκην τήνδʼ ἱκόμεθʼ, ὥς μοι ἔειπεν
Odyssey 1.260	οὗτος ἀνὴρ νῦν δὴ ξυμβλήμενος ἐνθάδʼ ἰόντι,
Odyssey 1.261	οὔ τι μάλʼ ἀρτίφρων, ἐπεὶ οὐ τόλμησεν ἕκαστα
Odyssey 1.262	εἰπεῖν ἠδʼ ἐπακοῦσαι ἐμὸν ἔπος, ὡς ἐρέεινον
Odyssey 1.263	ἀμφὶ ξείνῳ ἐμῷ, ἤ που ζώει τε καὶ ἔστιν
Odyssey 1.264	ἦ ἤδη τέθνηκε καὶ εἰν Ἀΐδαο δόμοισιν.
Odyssey 1.265	ἐκ γάρ τοι ἐρέω, σὺ δὲ σύνθεο καί μευ ἄκουσον·
Odyssey 1.266	ἄνδρα ποτʼ ἐξείνισσα φίλῃ ἐνὶ πατρίδι γαίῃ
Odyssey 1.267	ἡμέτερόνδʼ ἐλθόντα, καὶ οὔ πω τις βροτὸς ἄλλος
Odyssey 1.268	ξείνων τηλεδαπῶν φιλίων ἐμὸν ἵκετο δῶμα·
Odyssey 1.269	εὔχετο δʼ ἐξ Ἰθάκης γένος ἔμμεναι, αὐτὰρ ἔφασκε
Odyssey 1.270	Λαέρτην Ἀρκεισιάδην πατέρʼ ἔμμεναι αὐτῷ.
Odyssey 1.271	τὸν μὲν ἐγὼ πρὸς δώματʼ ἄγων ἐῢ ἐξείνισσα,
Odyssey 1.272	ἐνδυκέως φιλέων, πολλῶν κατὰ οἶκον ἐόντων,
Odyssey 1.273	καί οἱ δῶρα πόρον ξεινήϊα, οἷα ἐῴκει.
Odyssey 1.274	χρυσοῦ μέν οἱ δῶκʼ εὐεργέος ἑπτὰ τάλαντα,
Odyssey 1.275	δῶκα δέ οἱ κρητῆρα πανάργυρον ἀνθεμόεντα,
Odyssey 1.276	δώδεκα δʼ ἁπλοΐδας χλαίνας, τόσσους δὲ τάπητας,
Odyssey 1.277	τόσσα δὲ φάρεα καλά, τόσους δʼ ἐπὶ τοῖσι χιτῶνας,
Odyssey 1.278	χωρὶς δʼ αὖτε γυναῖκας, ἀμύμονα ἔργα ἰδυίας,
Odyssey 1.279	τέσσαρας εἰδαλίμας, ἃς ἤθελεν αὐτὸς ἑλέσθαι.
Odyssey 1.280	τὸν δʼ ἠμείβετʼ ἔπειτα πατὴρ κατὰ δάκρυον εἴβων·
Odyssey 1.281	ξεῖνʼ, ἦ τοι μὲν γαῖαν ἱκάνεις, ἣν ἐρεείνεις,
Odyssey 1.282	ὑβρισταὶ δʼ αὐτὴν καὶ ἀτάσθαλοι ἄνδρες ἔχουσιν·
Odyssey 1.283	δῶρα δʼ ἐτώσια ταῦτα χαρίζεο, μυρίʼ ὀπάζων·
Odyssey 1.284	εἰ γάρ μιν ζωόν γʼ ἐκίχεις Ἰθάκης ἐνὶ δήμῳ,
Odyssey 1.285	τῷ κέν σʼ εὖ δώροισιν ἀμειψάμενος ἀπέπεμψε
Odyssey 1.286	καὶ ξενίῃ ἀγαθῇ ἡ γὰρ θέμις, ὅς τις ὑπάρξῃ.
Odyssey 1.287	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Odyssey 1.288	πόστον δὴ ἔτος ἐστίν, ὅτε ξείνισσας ἐκεῖνον
Odyssey 1.289	σὸν ξεῖνον δύστηνον, ἐμὸν παῖδʼ, εἴ ποτʼ ἔην γε,
Odyssey 1.290	δύσμορον; ὅν που τῆλε φίλων καὶ πατρίδος αἴης
Odyssey 1.291	ἠέ που ἐν πόντῳ φάγον ἰχθύες, ἢ ἐπὶ χέρσου
Odyssey 1.292	θηρσὶ καὶ οἰωνοῖσιν ἕλωρ γένετʼ· οὐδέ ἑ μήτηρ
Odyssey 1.293	κλαῦσε περιστείλασα πατήρ θʼ, οἵ μιν τεκόμεσθα·
Odyssey 1.294	οὐδʼ ἄλοχος πολύδωρος, ἐχέφρων Πηνελόπεια,
Odyssey 1.295	κώκυσʼ ἐν λεχέεσσιν ἑὸν πόσιν, ὡς ἐπεῴκει,
Odyssey 1.296	ὀφθαλμοὺς καθελοῦσα· τὸ γὰρ γέρας ἐστὶ θανόντων.
Odyssey 1.297	καί μοι τοῦτʼ ἀγόρευσον ἐτήτυμον, ὄφρʼ ἐῢ εἰδῶ·
Odyssey 1.298	τίς πόθεν εἶς ἀνδρῶν; πόθι τοι πόλις ἠδὲ τοκῆες;
Odyssey 1.299	ποῦ δὲ νηῦς ἕστηκε θοή, ἥ σʼ ἤγαγε δεῦρο
Odyssey 1.300	ἀντιθέους θʼ ἑτάρους; ἦ ἔμπορος εἰλήλουθας
Odyssey 1.301	νηὸς ἐπʼ ἀλλοτρίης, οἱ δʼ ἐκβήσαντες ἔβησαν;
Odyssey 1.302	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.303	τοιγὰρ ἐγώ τοι πάντα μάλʼ ἀτρεκέως καταλέξω.
Odyssey 1.304	εἰμὶ μὲν ἐξ Ἀλύβαντος, ὅθι κλυτὰ δώματα ναίω,
Odyssey 1.305	υἱὸς Ἀφείδαντος Πολυπημονίδαο ἄνακτος·
Odyssey 1.306	αὐτὰρ ἐμοί γʼ ὄνομʼ ἐστὶν Ἐπήριτος· ἀλλά με δαίμων
Odyssey 1.307	πλάγξʼ ἀπὸ Σικανίης δεῦρʼ ἐλθέμεν οὐκ ἐθέλοντα·
Odyssey 1.308	νηῦς δέ μοι ἥδʼ ἕστηκεν ἐπʼ ἀγροῦ νόσφι πόληος.
Odyssey 1.309	αὐτὰρ Ὀδυσσῆϊ τόδε δὴ πέμπτον ἔτος ἐστίν,
Odyssey 1.310	ἐξ οὗ κεῖθεν ἔβη καὶ ἐμῆς ἀπελήλυθε πάτρης,
Odyssey 1.311	δύσμορος· ἦ τέ οἱ ἐσθλοὶ ἔσαν ὄρνιθες ἰόντι,
Odyssey 1.312	δεξιοί, οἷς χαίρων μὲν ἐγὼν ἀπέπεμπον ἐκεῖνον,
Odyssey 1.313	χαῖρε δὲ κεῖνος ἰών· θυμὸς δʼ ἔτι νῶϊν ἐώλπει
Odyssey 1.314	μίξεσθαι ξενίῃ ἠδʼ ἀγλαὰ δῶρα διδώσειν.
Odyssey 1.315	ὣς φάτο, τὸν δʼ ἄχεος νεφέλη ἐκάλυψε μέλαινα·
Odyssey 1.316	ἀμφοτέρῃσι δὲ χερσὶν ἑλὼν κόνιν αἰθαλόεσσαν
Odyssey 1.317	χεύατο κὰκ κεφαλῆς πολιῆς, ἁδινὰ στεναχίζων.
Odyssey 1.318	τοῦ δʼ ὠρίνετο θυμός, ἀνὰ ῥῖνας δέ οἱ ἤδη
Odyssey 1.319	δριμὺ μένος προὔτυψε φίλον πατέρʼ εἰσορόωντι.
Odyssey 1.320	κύσσε δέ μιν περιφὺς ἐπιάλμενος, ἠδὲ προσηύδα·
Odyssey 1.321	κεῖνος μέν τοι ὅδʼ αὐτὸς ἐγώ, πάτερ, ὃν σὺ μεταλλᾷς,
Odyssey 1.322	ἤλυθον εἰκοστῷ ἔτεϊ ἐς πατρίδα γαῖαν.
Odyssey 1.323	ἀλλʼ ἴσχεο κλαυθμοῖο γόοιό τε δακρυόεντος.
Odyssey 1.324	ἐκ γάρ τοι ἐρέω· μάλα δὲ χρὴ σπευδέμεν ἔμπης·
Odyssey 1.325	μνηστῆρας κατέπεφνον ἐν ἡμετέροισι δόμοισι,
Odyssey 1.326	λώβην τινύμενος θυμαλγέα καὶ κακὰ ἔργα.
Odyssey 1.327	τὸν δʼ αὖ Λαέρτης ἀπαμείβετο φώνησέν τε·
Odyssey 1.328	εἰ μὲν δὴ Ὀδυσεύς γε ἐμὸς πάϊς ἐνθάδʼ ἱκάνεις,
Odyssey 1.329	σῆμά τί μοι νῦν εἰπὲ ἀριφραδές, ὄφρα πεποίθω.
Odyssey 1.330	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.331	οὐλὴν μὲν πρῶτον τήνδε φράσαι ὀφθαλμοῖσι,
Odyssey 1.332	τὴν ἐν Παρνησῷ μʼ ἔλασεν σῦς λευκῷ ὀδόντι
Odyssey 1.333	οἰχόμενον· σὺ δέ με προΐεις καὶ πότνια μήτηρ
Odyssey 1.334	ἐς πατέρʼ Αὐτόλυκον μητρὸς φίλον, ὄφρʼ ἂν ἑλοίμην
Odyssey 1.335	δῶρα, τὰ δεῦρο μολών μοι ὑπέσχετο καὶ κατένευσεν.
Odyssey 1.336	εἰ δʼ ἄγε τοι καὶ δένδρεʼ ἐϋκτιμένην κατʼ ἀλωὴν
Odyssey 1.337	εἴπω, ἅ μοί ποτʼ ἔδωκας, ἐγὼ δʼ ᾔτεόν σε ἕκαστα
Odyssey 1.338	παιδνὸς ἐών, κατὰ κῆπον ἐπισπόμενος· διὰ δʼ αὐτῶν
Odyssey 1.339	ἱκνεύμεσθα, σὺ δʼ ὠνόμασας καὶ ἔειπες ἕκαστα.
Odyssey 1.340	ὄγχνας μοι δῶκας τρισκαίδεκα καὶ δέκα μηλέας,
Odyssey 1.341	συκέας τεσσαράκοντʼ· ὄρχους δέ μοι ὧδʼ ὀνόμηνας
Odyssey 1.342	δώσειν πεντήκοντα, διατρύγιος δὲ ἕκαστος
Odyssey 1.343	ἤην· ἔνθα δʼ ἀνὰ σταφυλαὶ παντοῖαι ἔασιν—
Odyssey 1.344	ὁππότε δὴ Διὸς ὧραι ἐπιβρίσειαν ὕπερθεν.
Odyssey 1.345	ὣς φάτο, τοῦ δʼ αὐτοῦ λύτο γούνατα καὶ φίλον ἦτορ,
Odyssey 1.346	σήματʼ ἀναγνόντος τά οἱ ἔμπεδα πέφραδʼ Ὀδυσσεύς.
Odyssey 1.347	ἀμφὶ δὲ παιδὶ φίλῳ βάλε πήχεε· τὸν δὲ ποτὶ οἷ
Odyssey 1.348	εἷλεν ἀποψύχοντα πολύτλας δῖος Ὀδυσσεύς.
Odyssey 1.349	αὐτὰρ ἐπεί ῥʼ ἄμπνυτο καὶ ἐς φρένα θυμὸς ἀγέρθη,
Odyssey 1.350	ἐξαῦτις μύθοισιν ἀμειβόμενος προσέειπε·
Odyssey 1.351	Ζεῦ πάτερ, ἦ ῥα ἔτʼ ἔστε θεοὶ κατὰ μακρὸν Ὄλυμπον,
Odyssey 1.352	εἰ ἐτεὸν μνηστῆρες ἀτάσθαλον ὕβριν ἔτισαν.
Odyssey 1.353	νῦν δʼ αἰνῶς δείδοικα κατὰ φρένα μὴ τάχα πάντες
Odyssey 1.354	ἐνθάδʼ ἐπέλθωσιν Ἰθακήσιοι, ἀγγελίας δὲ
Odyssey 1.355	πάντη ἐποτρύνωσι Κεφαλλήνων πολίεσσι.
Odyssey 1.356	τὸν δʼ ἀπαμειβόμενος προσέφη πολύμητις Ὀδυσσεύς·
Odyssey 1.357	θάρσει, μή τοι ταῦτα μετὰ φρεσὶ σῇσι μελόντων.
Odyssey 1.358	ἀλλʼ ἴομεν προτὶ οἶκον, ὃς ὀρχάτου ἐγγύθι κεῖται·
Odyssey 1.359	ἔνθα δὲ Τηλέμαχον καὶ βουκόλον ἠδὲ συβώτην
Odyssey 1.360	προὔπεμψʼ, ὡς ἂν δεῖπνον ἐφοπλίσσωσι τάχιστα.
Odyssey 1.361	ὣς ἄρα φωνήσαντε βάτην πρὸς δώματα καλά.
Odyssey 1.362	οἱ δʼ ὅτε δή ῥʼ ἵκοντο δόμους εὖ ναιετάοντας,
Odyssey 1.363	εὗρον Τηλέμαχον καὶ βουκόλον ἠδὲ συβώτην
Odyssey 1.364	ταμνομένους κρέα πολλὰ κερῶντάς τʼ αἴθοπα οἶνον.
Odyssey 1.365	τόφρα δὲ Λαέρτην μεγαλήτορα ᾧ ἐνὶ οἴκῳ
Odyssey 1.366	ἀμφίπολος Σικελὴ λοῦσεν καὶ χρῖσεν ἐλαίῳ,
Odyssey 1.367	ἀμφὶ δʼ ἄρα χλαῖναν καλὴν βάλεν· αὐτὰρ Ἀθήνη
Odyssey 1.368	ἄγχι παρισταμένη μέλεʼ ἤλδανε ποιμένι λαῶν,
Odyssey 1.369	μείζονα δʼ ἠὲ πάρος καὶ πάσσονα θῆκεν ἰδέσθαι.
Odyssey 1.370	ἐκ δʼ ἀσαμίνθου βῆ· θαύμαζε δέ μιν φίλος υἱός,
Odyssey 1.371	ὡς ἴδεν ἀθανάτοισι θεοῖς ἐναλίγκιον ἄντην·
Odyssey 1.372	καί μιν φωνήσας ἔπεα πτερόεντα προσηύδα·
Odyssey 1.373	ὦ πάτερ, ἦ μάλα τίς σε θεῶν αἰειγενετάων
Odyssey 1.374	εἶδός τε μέγεθός τε ἀμείνονα θῆκεν ἰδέσθαι.
Odyssey 1.375	τὸν δʼ αὖ Λαέρτης πεπνυμένος ἀντίον ηὔδα·
Odyssey 1.376	αἲ γάρ, Ζεῦ τε πάτερ καὶ Ἀθηναίη καὶ Ἄπολλον,
Odyssey 1.377	οἷος Νήρικον εἷλον, ἐϋκτίμενον πτολίεθρον,
Odyssey 1.378	ἀκτὴν ἠπείροιο, Κεφαλλήνεσσιν ἀνάσσων,
Odyssey 1.379	τοῖος ἐών τοι χθιζὸς ἐν ἡμετέροισι δόμοισιν,
Odyssey 1.380	τεύχεʼ ἔχων ὤμοισιν, ἐφεστάμεναι καὶ ἀμύνειν
Odyssey 1.381	ἄνδρας μνηστῆρας· τῷ κε σφέων γούνατʼ ἔλυσα
Odyssey 1.382	πολλῶν ἐν μεγάροισι, σὺ δὲ φρένας ἔνδον ἐγήθεις.
Odyssey 1.383	ὣς οἱ μὲν τοιαῦτα πρὸς ἀλλήλους ἀγόρευον.
Odyssey 1.384	οἱ δʼ ἐπεὶ οὖν παύσαντο πόνου τετύκοντό τε δαῖτα,
Odyssey 1.385	ἑξείης ἕζοντο κατὰ κλισμούς τε θρόνους τε·
Odyssey 1.386	ἔνθʼ οἱ μὲν δείπνῳ ἐπεχείρεον, ἀγχίμολον δὲ
Odyssey 1.387	ἦλθʼ ὁ γέρων Δολίος, σὺν δʼ υἱεῖς τοῖο γέροντος,
Odyssey 1.388	ἐξ ἔργων μογέοντες, ἐπεὶ προμολοῦσα κάλεσσεν
Odyssey 1.389	μήτηρ γρηῦς Σικελή, ἥ σφεας τρέφε καί ῥα γέροντα
Odyssey 1.390	ἐνδυκέως κομέεσκεν, ἐπεὶ κατὰ γῆρας ἔμαρψεν.
Odyssey 1.391	οἱ δʼ ὡς οὖν Ὀδυσῆα ἴδον φράσσαντό τε θυμῷ,
Odyssey 1.392	ἔσταν ἐνὶ μεγάροισι τεθηπότες· αὐτὰρ Ὀδυσσεὺς
Odyssey 1.393	μειλιχίοις ἐπέεσσι καθαπτόμενος προσέειπεν·
Odyssey 1.394	ὦ γέρον, ἵζʼ ἐπὶ δεῖπνον, ἀπεκλελάθεσθε δὲ θάμβευς·
Odyssey 1.395	δηρὸν γὰρ σίτῳ ἐπιχειρήσειν μεμαῶτες
Odyssey 1.396	μίμνομεν ἐν μεγάροις, ὑμέας ποτιδέγμενοι αἰεί.
Odyssey 1.397	ὣς ἄρ ἔφη, Δολίος δʼ ἰθὺς κίε χεῖρε πετάσσας
Odyssey 1.398	ἀμφοτέρας, Ὀδυσεῦς δὲ λαβὼν κύσε χεῖρʼ ἐπὶ καρπῷ,
Odyssey 1.399	καί μιν φωνήσας ἔπεα πτερόεντα προσηύδα·
Odyssey 1.400	ὦ φίλʼ, ἐπεὶ νόστησας ἐελδομένοισι μάλʼ ἡμῖν
Odyssey 1.401	οὐδʼ ἔτʼ ὀϊομένοισι, θεοὶ δέ σʼ ἀνήγαγον αὐτοί,
Odyssey 1.402	οὖλέ τε καὶ μάλα χαῖρε, θεοὶ δέ τοι ὄλβια δοῖεν.
Odyssey 1.403	καί μοι τοῦτʼ ἀγόρευσον ἐτήτυμον, ὄφρʼ ἐῢ εἰδῶ,
Odyssey 1.404	ἢ ἤδη σάφα οἶδε περίφρων Πηνελόπεια
Odyssey 1.405	νοστήσαντά σε δεῦρʼ, ἦ ἄγγελον ὀτρύνωμεν.
Odyssey 1.406	τὸν δʼ ἀπαμειβόμενος προσέφη πολύμητις Ὀδυσσεύς
Odyssey 1.407	ὦ γέρον, ἤδη οἶδε· τί σε χρὴ ταῦτα πένεσθαι;
Odyssey 1.408	ὣς φάθʼ, ὁ δʼ αὖτις ἄρʼ ἕζετʼ ἐϋξέστου ἐπὶ δίφρου.
Odyssey 1.409	ὣς δʼ αὔτως παῖδες Δολίου κλυτὸν ἀμφʼ Ὀδυσῆα
Odyssey 1.410	δεικανόωντʼ ἐπέεσσι καὶ ἐν χείρεσσι φύοντο,
Odyssey 1.411	ἑξείης δʼ ἕζοντο παραὶ Δολίον, πατέρα σφόν.
Odyssey 1.412	ὣς οἱ μὲν περὶ δεῖπνον ἐνὶ μεγάροισι πένοντο·
Odyssey 1.413	Ὄσσα δʼ ἄρʼ ἄγγελος ὦκα κατὰ πτόλιν ᾤχετο πάντη,
Odyssey 1.414	μνηστήρων στυγερὸν θάνατον καὶ κῆρʼ ἐνέπουσα.
Odyssey 1.415	οἱ δʼ ἄρʼ ὁμῶς ἀΐοντες ἐφοίτων ἄλλοθεν ἄλλος
Odyssey 1.416	μυχμῷ τε στοναχῇ τε δόμων προπάροιθʼ Ὀδυσῆος,
Odyssey 1.417	ἐκ δὲ νέκυς οἴκων φόρεον καὶ θάπτον ἕκαστοι,
Odyssey 1.418	τοὺς δʼ ἐξ ἀλλάων πολίων οἶκόνδε ἕκαστον
Odyssey 1.419	πέμπον ἄγειν ἁλιεῦσι θοῇς ἐπὶ νηυσὶ τιθέντες·
Odyssey 1.420	αὐτοὶ δʼ εἰς ἀγορὴν κίον ἀθρόοι, ἀχνύμενοι κῆρ.
Odyssey 1.421	αὐτὰρ ἐπεί ῥʼ ἤγερθεν ὁμηγερέες τʼ ἐγένοντο,
Odyssey 1.422	τοῖσιν δʼ Εὐπείθης ἀνά θʼ ἵστατο καὶ μετέειπε·
Odyssey 1.423	παιδὸς γάρ οἱ ἄλαστον ἐνὶ φρεσὶ πένθος ἔκειτο,
Odyssey 1.424	Ἀντινόου, τὸν πρῶτον ἐνήρατο δῖος Ὀδυσσεύς·
Odyssey 1.425	τοῦ ὅ γε δάκρυ χέων ἀγορήσατο καὶ μετέειπεν·
Odyssey 1.426	ὦ φίλοι, ἦ μέγα ἔργον ἀνὴρ ὅδʼ ἐμήσατʼ Ἀχαιούς·
Odyssey 1.427	τοὺς μὲν σὺν νήεσσιν ἄγων πολέας τε καὶ ἐσθλοὺς
Odyssey 1.428	ὤλεσε μὲν νῆας γλαφυράς, ἀπὸ δʼ ὤλεσε λαούς·
Odyssey 1.429	τοὺς δʼ ἐλθὼν ἔκτεινε Κεφαλλήνων ὄχʼ ἀρίστους,
Odyssey 1.430	ἀλλʼ ἄγετε, πρὶν τοῦτον ἢ ἐς Πύλον ὦκα ἱκέσθαι
Odyssey 1.431	ἢ καὶ ἐς Ἤλιδα δῖαν, ὅθι κρατέουσιν Ἐπειοί,
Odyssey 1.432	ἴομεν· ἦ καὶ ἔπειτα κατηφέες ἐσσόμεθʼ αἰεί·
Odyssey 1.433	λώβη γὰρ τάδε γʼ ἐστὶ καὶ ἐσσομένοισι πυθέσθαι,
Odyssey 1.434	εἰ δὴ μὴ παίδων τε κασιγνήτων τε φονῆας
Odyssey 1.435	τισόμεθʼ. οὐκ ἂν ἐμοί γε μετὰ φρεσὶν ἡδὺ γένοιτο
Odyssey 1.436	ζωέμεν, ἀλλὰ τάχιστα θανὼν φθιμένοισι μετείην.
Odyssey 1.437	ἀλλʼ ἴομεν, μὴ φθέωσι περαιωθέντες ἐκεῖνοι.
Odyssey 1.438	ὣς φάτο δάκρυ χέων, οἶκτος δʼ ἕλε πάντας Ἀχαιούς.
Odyssey 1.439	ἀγχίμολον δέ σφʼ ἦλθε Μέδων καὶ θεῖος ἀοιδὸς
Odyssey 1.440	ἐκ μεγάρων Ὀδυσῆος, ἐπεί σφεας ὕπνος ἀνῆκεν,
Odyssey 1.441	ἔσταν δʼ ἐν μέσσοισι· τάφος δʼ ἕλεν ἄνδρα ἕκαστον.
Odyssey 1.442	τοῖσι δὲ καὶ μετέειπε Μέδων πεπνυμένα εἰδώς·
Odyssey 1.443	κέκλυτε δὴ νῦν μευ, Ἰθακήσιοι· οὐ γὰρ Ὀδυσσεὺς
Odyssey 1.444	ἀθανάτων ἀέκητι θεῶν τάδʼ ἐμήσατο ἔργα·
Odyssey 1.445	αὐτὸς ἐγὼν εἶδον θεὸν ἄμβροτον, ὅς ῥʼ Ὀδυσῆϊ
Odyssey 1.446	ἐγγύθεν ἑστήκει καὶ Μέντορι πάντα ἐῴκει.
Odyssey 1.447	ἀθάνατος δὲ θεὸς τοτὲ μὲν προπάροιθʼ Ὀδυσῆος
Odyssey 1.448	φαίνετο θαρσύνων, τοτὲ δὲ μνηστῆρας ὀρίνων
Odyssey 1.449	θῦνε κατὰ μέγαρον· τοὶ δʼ ἀγχιστῖνοι ἔπιπτον.
Odyssey 1.450	ὣς φάτο, τοὺς δʼ ἄρα πάντας ὑπὸ χλωρὸν δέος ᾕρει.
Odyssey 1.451	τοῖσι δὲ καὶ μετέειπε γέρων ἥρως Ἁλιθέρσης
Odyssey 1.452	Μαστορίδης· ὁ γὰρ οἶος ὅρα πρόσσω καὶ ὀπίσσω·
Odyssey 1.453	ὅ σφιν ἐϋφρονέων ἀγορήσατο καὶ μετέειπε·
Odyssey 1.454	κέκλυτε δὴ νῦν μευ, Ἰθακήσιοι, ὅττι κεν εἴπω·
Odyssey 1.455	ὑμετέρῃ κακότητι, φίλοι, τάδε ἔργα γένοντο·
Odyssey 1.456	οὐ γὰρ ἐμοὶ πείθεσθʼ, οὐ Μέντορι ποιμένι λαῶν,
Odyssey 1.457	ὑμετέρους παῖδας καταπαυέμεν ἀφροσυνάων,
Odyssey 1.458	οἳ μέγα ἔργον ἔρεξαν ἀτασθαλίῃσι κακῇσι,
Odyssey 1.459	κτήματα κείροντες καὶ ἀτιμάζοντες ἄκοιτιν
Odyssey 1.460	ἀνδρὸς ἀριστῆος· τὸν δʼ οὐκέτι φάντο νέεσθαι.
Odyssey 1.461	καὶ νῦν ὧδε γένοιτο. πίθεσθέ μοι ὡς ἀγορεύω·
Odyssey 1.462	μὴ ἴομεν, μή πού τις ἐπίσπαστον κακὸν εὕρῃ.
Odyssey 1.463	ὣς ἔφαθʼ, οἱ δʼ ἄρʼ ἀνήϊξαν μεγάλῳ ἀλαλητῷ
Odyssey 1.464	ἡμίσεων πλείους· τοὶ δʼ ἀθρόοι αὐτόθι μίμνον·
Odyssey 1.465	οὐ γάρ σφιν ἅδε μῦθος ἐνὶ φρεσίν, ἀλλʼ Εὐπείθει
Odyssey 1.466	πείθοντʼ· αἶψα δʼ ἔπειτʼ ἐπὶ τεύχεα ἐσσεύοντο.
Odyssey 1.467	αὐτὰρ ἐπεί ῥʼ ἕσσαντο περὶ χροῒ νώροπα χαλκόν,
Odyssey 1.468	ἀθρόοι ἠγερέθοντο πρὸ ἄστεος εὐρυχόροιο.
Odyssey 1.469	τοῖσιν δʼ Εὐπείθης ἡγήσατο νηπιέῃσι·
Odyssey 1.470	φῆ δʼ ὅ γε τίσεσθαι παιδὸς φόνον, οὐδʼ ἄρʼ ἔμελλεν
Odyssey 1.471	ἂψ ἀπονοστήσειν, ἀλλʼ αὐτοῦ πότμον ἐφέψειν.
Odyssey 1.472	αὐτὰρ Ἀθηναίη Ζῆνα Κρονίωνα προσηύδα·
Odyssey 1.473	ὦ πάτερ ἡμέτερε, Κρονίδη, ὕπατε κρειόντων,
Odyssey 1.474	εἰπέ μοι εἰρομένῃ, τί νύ τοι νόος ἔνδοθι κεύθει;
Odyssey 1.475	ἢ προτέρω πόλεμόν τε κακὸν καὶ φύλοπιν αἰνὴν
Odyssey 1.476	τεύξεις, ἦ φιλότητα μετʼ ἀμφοτέροισι τίθησθα;
Odyssey 1.477	τὴν δʼ ἀπαμειβόμενος προσέφη νεφεληγερέτα Ζεύς·
Odyssey 1.478	τέκνον ἐμόν, τί με ταῦτα διείρεαι ἠδὲ μεταλλᾷς;
Odyssey 1.479	οὐ γὰρ δὴ τοῦτον μὲν ἐβούλευσας νόον αὐτή,
Odyssey 1.480	ὡς ἦ τοι κείνους Ὀδυσεὺς ἀποτίσεται ἐλθών;
Odyssey 1.481	ἔρξον ὅπως ἐθέλεις· ἐρέω τέ τοι ὡς ἐπέοικεν.
Odyssey 1.482	ἐπεὶ δὴ μνηστῆρας ἐτίσατο δῖος Ὀδυσσεύς,
Odyssey 1.483	ὅρκια πιστὰ ταμόντες ὁ μὲν βασιλευέτω αἰεί,
Odyssey 1.484	ἡμεῖς δʼ αὖ παίδων τε κασιγνήτων τε φόνοιο
Odyssey 1.485	ἔκλησιν θέωμεν· τοὶ δʼ ἀλλήλους φιλεόντων
Odyssey 1.486	ὡς τὸ πάρος, πλοῦτος δὲ καὶ εἰρήνη ἅλις ἔστω.
Odyssey 1.487	ὣς εἰπὼν ὤτρυνε πάρος μεμαυῖαν Ἀθήνην,
Odyssey 1.488	βῆ δὲ κατʼ Οὐλύμποιο καρήνων ἀΐξασα.
Odyssey 1.489	οἱ δʼ ἐπεὶ οὖν σίτοιο μελίφρονος ἐξ ἔρον ἕντο,
Odyssey 1.490	τοῖς δʼ ἄρα μύθων ἦρχε πολύτλας δῖος Ὀδυσσεύς·
Odyssey 1.491	ἐξελθών τις ἴδοι μὴ δὴ σχεδὸν ὦσι κιόντες.
Odyssey 1.492	ὣς ἔφατʼ· ἐκ δʼ υἱὸς Δολίου κίεν, ὡς ἐκέλευεν·
Odyssey 1.493	στῆ δʼ ἄρʼ ἐπʼ οὐδὸν ἰών, τοὺς δὲ σχεδὸν εἴσιδε πάντας·
Odyssey 1.494	αἶψα δʼ Ὀδυσσῆα ἔπεα πτερόεντα προσηύδα·
Odyssey 1.495	οἵδε δὴ ἐγγὺς ἔασʼ· ἀλλʼ ὁπλιζώμεθα θᾶσσον.
Odyssey 1.496	ὣς ἔφαθʼ, οἱ δʼ ὤρνυντο καὶ ἐν τεύχεσσι δύοντο,
Odyssey 1.497	τέσσαρες ἀμφʼ Ὀδυσῆʼ, ἓξ δʼ υἱεῖς οἱ Δολίοιο·
Odyssey 1.498	ἐν δʼ ἄρα Λαέρτης Δολίος τʼ ἐς τεύχεʼ ἔδυνον,
Odyssey 1.499	καὶ πολιοί περ ἐόντες, ἀναγκαῖοι πολεμισταί.
Odyssey 1.500	αὐτὰρ ἐπεί ῥʼ ἕσσαντο περὶ χροῒ νώροπα χαλκόν,
Odyssey 1.501	ὤϊξάν ῥα θύρας, ἐκ δʼ ἤϊον, ἦρχε δʼ Ὀδυσσεύς.
Odyssey 1.502	τοῖσι δʼ ἐπʼ ἀγχίμολον θυγάτηρ Διὸς ἦλθεν Ἀθήνη
Odyssey 1.503	Μέντορι εἰδομένη ἠμὲν δέμας ἠδὲ καὶ αὐδήν.
Odyssey 1.504	τὴν μὲν ἰδὼν γήθησε πολύτλας δῖος Ὀδυσσεύς·
Odyssey 1.505	αἶψα δὲ Τηλέμαχον προσεφώνεεν ὃν φίλον υἱόν·
Odyssey 1.506	Τηλέμαχʼ, ἤδη μὲν τόδε γʼ εἴσεαι αὐτὸς ἐπελθών,
Odyssey 1.507	ἀνδρῶν μαρναμένων ἵνα τε κρίνονται ἄριστοι,
Odyssey 1.508	μή τι καταισχύνειν πατέρων γένος, οἳ τὸ πάρος περ
Odyssey 1.509	ἀλκῇ τʼ ἠνορέῃ τε κεκάσμεθα πᾶσαν ἐπʼ αἶαν.
Odyssey 1.510	τὸν δʼ αὖ Τηλέμαχος πεπνυμένος ἀντίον ηὔδα·
Odyssey 1.511	ὄψεαι, αἴ κʼ ἐθέλῃσθα, πάτερ φίλε, τῷδʼ ἐπὶ θυμῷ
Odyssey 1.512	οὔ τι καταισχύνοντα τεὸν γένος, ὡς ἀγορεύεις.
Odyssey 1.513	ὣς φάτο, Λαέρτης δʼ ἐχάρη καὶ μῦθον ἔειπε·
Odyssey 1.514	τίς νύ μοι ἡμέρη ἥδε, θεοὶ φίλοι; ἦ μάλα χαίρω·
Odyssey 1.515	υἱός θʼ υἱωνός τʼ ἀρετῆς πέρι δῆριν ἔχουσιν.
Odyssey 1.516	τὸν δὲ παρισταμένη προσέφη γλαυκῶπις Ἀθήνη·
Odyssey 1.517	ὦ Ἀρκεισιάδη, πάντων πολὺ φίλταθʼ ἑταίρων,
Odyssey 1.518	εὐξάμενος κούρῃ γλαυκώπιδι καὶ Διὶ πατρί,
Odyssey 1.519	αἶψα μαλʼ ἀμπεπαλὼν προΐει δολιχόσκιον ἔγχος.
Odyssey 1.520	ὣς φάτο, καί ῥʼ ἔμπνευσε μένος μέγα Παλλὰς Ἀθήνη
Odyssey 1.521	εὐξάμενος δʼ ἄρʼ ἔπειτα Διὸς κούρῃ μεγάλοιο,
Odyssey 1.522	αἶψα μάλʼ ἀμπεπαλὼν προΐει δολιχόσκιον ἔγχος,
Odyssey 1.523	καὶ βάλεν Εὐπείθεα κόρυθος διὰ χαλκοπαρῄου.
Odyssey 1.524	ἡ δʼ οὐκ ἔγχος ἔρυτο, διαπρὸ δὲ εἴσατο χαλκός,
Odyssey 1.525	δούπησεν δὲ πεσών, ἀράβησε δὲ τεύχεʼ ἐπʼ αὐτῷ.
Odyssey 1.526	ἐν δʼ ἔπεσον προμάχοις Ὀδυσεὺς καὶ φαίδιμος υἱός,
Odyssey 1.527	τύπτον δὲ ξίφεσίν τε καὶ ἔγχεσιν ἀμφιγύοισι.
Odyssey 1.528	καί νύ κε δὴ πάντας ὄλεσαν καὶ ἔθηκαν ἀνόστους,
Odyssey 1.529	εἰ μὴ Ἀθηναίη, κούρη Διὸς αἰγιόχοιο,
Odyssey 1.530	ἤϋσεν φωνῇ, κατὰ δʼ ἔσχεθε λαὸν ἅπαντα.
Odyssey 1.531	ἴσχεσθε πτολέμου, Ἰθακήσιοι, ἀργαλέοιο,
Odyssey 1.532	ὥς κεν ἀναιμωτί γε διακρινθῆτε τάχιστα.
Odyssey 1.533	ὣς φάτʼ Ἀθηναίη, τοὺς δὲ χλωρὸν δέος εἷλεν·
Odyssey 1.534	τῶν δʼ ἄρα δεισάντων ἐκ χειρῶν ἔπτατο τεύχεα,
Odyssey 1.535	πάντα δʼ ἐπὶ χθονὶ πῖπτε, θεᾶς ὄπα φωνησάσης·
Odyssey 1.536	πρὸς δὲ πόλιν τρωπῶντο λιλαιόμενοι βιότοιο.
Odyssey 1.537	σμερδαλέον δʼ ἐβόησε πολύτλας δῖος Ὀδυσσεύς,
Odyssey 1.538	οἴμησεν δὲ ἀλεὶς ὥς τʼ αἰετὸς ὑψιπετήεις.
Odyssey 1.539	καὶ τότε δὴ Κρονίδης ἀφίει ψολόεντα κεραυνόν,
Odyssey 1.540	κὰδ δʼ ἔπεσε πρόσθε γλαυκώπιδος ὀβριμοπάτρης.
Odyssey 1.541	δὴ τότʼ Ὀδυσσῆα προσέφη γλαυκῶπις Ἀθήνη·
Odyssey 1.542	διογενὲς Λαερτιάδη, πολυμήχανʼ Ὀδυσσεῦ,
Odyssey 1.543	ἴσχεο, παῦε δὲ νεῖκος ὁμοιΐου πολέμοιο,
Odyssey 1.544	μή πως τοι Κρονίδης κεχολώσεται εὐρύοπα Ζεύς.
Odyssey 1.545	ὣς φάτʼ Ἀθηναίη, ὁ δʼ ἐπείθετο, χαῖρε δὲ θυμῷ.
Odyssey 1.546	ὅρκια δʼ αὖ κατόπισθε μετʼ ἀμφοτέροισιν ἔθηκεν
Odyssey 1.547	Παλλὰς Ἀθηναίη, κούρη Διὸς αἰγιόχοιο,
Odyssey 1.548	Μέντορι εἰδομένη ἠμὲν δέμας ἠδὲ καὶ αὐδήν.