Iliad 1.1	μῆνιν ἄειδε θεὰ Πηληϊάδεω Ἀχιλῆος
Iliad 1.2	οὐλομένην, ἣ μυρίʼ Ἀχαιοῖς ἄλγεʼ ἔθηκε,
Iliad 1.3	πολλὰς δʼ ἰφθίμους ψυχὰς Ἄϊδι προΐαψεν
Iliad 1.4	ἡρώων, αὐτοὺς δὲ ἑλώρια τεῦχε κύνεσσιν
Iliad 1.5	οἰωνοῖσί τε πᾶσι, Διὸς δʼ ἐτελείετο βουλή,
Iliad 1.6	ἐξ οὗ δὴ τὰ πρῶτα διαστήτην ἐρίσαντε
Iliad 1.7	Ἀτρεΐδης τε ἄναξ ἀνδρῶν καὶ δῖος Ἀχιλλεύς.
Iliad 1.8	τίς τʼ ἄρ σφωε θεῶν ἔριδι ξυνέηκε μάχεσθαι;
Iliad 1.9	Λητοῦς καὶ Διὸς υἱός· ὃ γὰρ βασιλῆϊ χολωθεὶς
Iliad 1.10	νοῦσον ἀνὰ στρατὸν ὄρσε κακήν, ὀλέκοντο δὲ λαοί,
Iliad 1.11	οὕνεκα τὸν Χρύσην ἠτίμασεν ἀρητῆρα
Iliad 1.12	Ἀτρεΐδης· ὃ γὰρ ἦλθε θοὰς ἐπὶ νῆας Ἀχαιῶν
Iliad 1.13	λυσόμενός τε θύγατρα φέρων τʼ ἀπερείσιʼ ἄποινα,
Iliad 1.14	στέμματʼ ἔχων ἐν χερσὶν ἑκηβόλου Ἀπόλλωνος
Iliad 1.15	χρυσέῳ ἀνὰ σκήπτρῳ, καὶ λίσσετο πάντας Ἀχαιούς,
Iliad 1.16	Ἀτρεΐδα δὲ μάλιστα δύω, κοσμήτορε λαῶν·
Iliad 1.17	Ἀτρεΐδαι τε καὶ ἄλλοι ἐϋκνήμιδες Ἀχαιοί,
Iliad 1.18	ὑμῖν μὲν θεοὶ δοῖεν Ὀλύμπια δώματʼ ἔχοντες
Iliad 1.19	ἐκπέρσαι Πριάμοιο πόλιν, εὖ δʼ οἴκαδʼ ἱκέσθαι·
Iliad 1.20	παῖδα δʼ ἐμοὶ λύσαιτε φίλην, τὰ δʼ ἄποινα δέχεσθαι,
Iliad 1.21	ἁζόμενοι Διὸς υἱὸν ἑκηβόλον Ἀπόλλωνα.
Iliad 1.22	ἔνθʼ ἄλλοι μὲν πάντες ἐπευφήμησαν Ἀχαιοὶ
Iliad 1.23	αἰδεῖσθαί θʼ ἱερῆα καὶ ἀγλαὰ δέχθαι ἄποινα·
Iliad 1.24	ἀλλʼ οὐκ Ἀτρεΐδῃ Ἀγαμέμνονι ἥνδανε θυμῷ,
Iliad 1.25	ἀλλὰ κακῶς ἀφίει, κρατερὸν δʼ ἐπὶ μῦθον ἔτελλε·
Iliad 1.26	μή σε γέρον κοίλῃσιν ἐγὼ παρὰ νηυσὶ κιχείω
Iliad 1.27	ἢ νῦν δηθύνοντʼ ἢ ὕστερον αὖτις ἰόντα,
Iliad 1.28	μή νύ τοι οὐ χραίσμῃ σκῆπτρον καὶ στέμμα θεοῖο·
Iliad 1.29	τὴν δʼ ἐγὼ οὐ λύσω· πρίν μιν καὶ γῆρας ἔπεισιν
Iliad 1.30	ἡμετέρῳ ἐνὶ οἴκῳ ἐν Ἄργεϊ τηλόθι πάτρης
Iliad 1.31	ἱστὸν ἐποιχομένην καὶ ἐμὸν λέχος ἀντιόωσαν·
Iliad 1.32	ἀλλʼ ἴθι μή μʼ ἐρέθιζε σαώτερος ὥς κε νέηαι.
Iliad 1.33	ὣς ἔφατʼ, ἔδεισεν δʼ ὃ γέρων καὶ ἐπείθετο μύθῳ·
Iliad 1.34	βῆ δʼ ἀκέων παρὰ θῖνα πολυφλοίσβοιο θαλάσσης·
Iliad 1.35	πολλὰ δʼ ἔπειτʼ ἀπάνευθε κιὼν ἠρᾶθʼ ὁ γεραιὸς
Iliad 1.36	Ἀπόλλωνι ἄνακτι, τὸν ἠΰκομος τέκε Λητώ·
Iliad 1.37	κλῦθί μευ ἀργυρότοξʼ, ὃς Χρύσην ἀμφιβέβηκας
Iliad 1.38	Κίλλαν τε ζαθέην Τενέδοιό τε ἶφι ἀνάσσεις,
Iliad 1.39	Σμινθεῦ εἴ ποτέ τοι χαρίεντʼ ἐπὶ νηὸν ἔρεψα,
Iliad 1.40	ἢ εἰ δή ποτέ τοι κατὰ πίονα μηρίʼ ἔκηα
Iliad 1.41	ταύρων ἠδʼ αἰγῶν, τὸ δέ μοι κρήηνον ἐέλδωρ·
Iliad 1.42	τίσειαν Δαναοὶ ἐμὰ δάκρυα σοῖσι βέλεσσιν.
Iliad 1.43	ὣς ἔφατʼ εὐχόμενος, τοῦ δʼ ἔκλυε Φοῖβος Ἀπόλλων,
Iliad 1.44	βῆ δὲ κατʼ Οὐλύμποιο καρήνων χωόμενος κῆρ,
Iliad 1.45	τόξʼ ὤμοισιν ἔχων ἀμφηρεφέα τε φαρέτρην·
Iliad 1.46	ἔκλαγξαν δʼ ἄρʼ ὀϊστοὶ ἐπʼ ὤμων χωομένοιο,
Iliad 1.47	αὐτοῦ κινηθέντος· ὃ δʼ ἤϊε νυκτὶ ἐοικώς.
Iliad 1.48	ἕζετʼ ἔπειτʼ ἀπάνευθε νεῶν, μετὰ δʼ ἰὸν ἕηκε·
Iliad 1.49	δεινὴ δὲ κλαγγὴ γένετʼ ἀργυρέοιο βιοῖο·
Iliad 1.50	οὐρῆας μὲν πρῶτον ἐπῴχετο καὶ κύνας ἀργούς,
Iliad 1.51	αὐτὰρ ἔπειτʼ αὐτοῖσι βέλος ἐχεπευκὲς ἐφιεὶς
Iliad 1.52	βάλλʼ· αἰεὶ δὲ πυραὶ νεκύων καίοντο θαμειαί.
Iliad 1.53	ἐννῆμαρ μὲν ἀνὰ στρατὸν ᾤχετο κῆλα θεοῖο,
Iliad 1.54	τῇ δεκάτῃ δʼ ἀγορὴν δὲ καλέσσατο λαὸν Ἀχιλλεύς·
Iliad 1.55	τῷ γὰρ ἐπὶ φρεσὶ θῆκε θεὰ λευκώλενος Ἥρη·
Iliad 1.56	κήδετο γὰρ Δαναῶν, ὅτι ῥα θνήσκοντας ὁρᾶτο.
Iliad 1.57	οἳ δʼ ἐπεὶ οὖν ἤγερθεν ὁμηγερέες τε γένοντο,
Iliad 1.58	τοῖσι δʼ ἀνιστάμενος μετέφη πόδας ὠκὺς Ἀχιλλεύς·
Iliad 1.59	Ἀτρεΐδη νῦν ἄμμε παλιμπλαγχθέντας ὀΐω
Iliad 1.60	ἂψ ἀπονοστήσειν, εἴ κεν θάνατόν γε φύγοιμεν,
Iliad 1.61	εἰ δὴ ὁμοῦ πόλεμός τε δαμᾷ καὶ λοιμὸς Ἀχαιούς·
Iliad 1.62	ἀλλʼ ἄγε δή τινα μάντιν ἐρείομεν ἢ ἱερῆα
Iliad 1.63	ἢ καὶ ὀνειροπόλον, καὶ γάρ τʼ ὄναρ ἐκ Διός ἐστιν,
Iliad 1.64	ὅς κʼ εἴποι ὅ τι τόσσον ἐχώσατο Φοῖβος Ἀπόλλων,
Iliad 1.65	εἴτʼ ἄρʼ ὅ γʼ εὐχωλῆς ἐπιμέμφεται ἠδʼ ἑκατόμβης,
Iliad 1.66	αἴ κέν πως ἀρνῶν κνίσης αἰγῶν τε τελείων
Iliad 1.67	βούλεται ἀντιάσας ἡμῖν ἀπὸ λοιγὸν ἀμῦναι.
Iliad 1.68	ἤτοι ὅ γʼ ὣς εἰπὼν κατʼ ἄρʼ ἕζετο· τοῖσι δʼ ἀνέστη
Iliad 1.69	Κάλχας Θεστορίδης οἰωνοπόλων ὄχʼ ἄριστος,
Iliad 1.70	ὃς ᾔδη τά τʼ ἐόντα τά τʼ ἐσσόμενα πρό τʼ ἐόντα,
Iliad 1.71	καὶ νήεσσʼ ἡγήσατʼ Ἀχαιῶν Ἴλιον εἴσω
Iliad 1.72	ἣν διὰ μαντοσύνην, τήν οἱ πόρε Φοῖβος Ἀπόλλων·
Iliad 1.73	ὅ σφιν ἐὺ φρονέων ἀγορήσατο καὶ μετέειπεν·
Iliad 1.74	ὦ Ἀχιλεῦ κέλεαί με Διῒ φίλε μυθήσασθαι
Iliad 1.75	μῆνιν Ἀπόλλωνος ἑκατηβελέταο ἄνακτος·
Iliad 1.76	τοὶ γὰρ ἐγὼν ἐρέω· σὺ δὲ σύνθεο καί μοι ὄμοσσον
Iliad 1.77	ἦ μέν μοι πρόφρων ἔπεσιν καὶ χερσὶν ἀρήξειν·
Iliad 1.78	ἦ γὰρ ὀΐομαι ἄνδρα χολωσέμεν, ὃς μέγα πάντων
Iliad 1.79	Ἀργείων κρατέει καί οἱ πείθονται Ἀχαιοί·
Iliad 1.80	κρείσσων γὰρ βασιλεὺς ὅτε χώσεται ἀνδρὶ χέρηϊ·
Iliad 1.81	εἴ περ γάρ τε χόλον γε καὶ αὐτῆμαρ καταπέψῃ,
Iliad 1.82	ἀλλά τε καὶ μετόπισθεν ἔχει κότον, ὄφρα τελέσσῃ,
Iliad 1.83	ἐν στήθεσσιν ἑοῖσι· σὺ δὲ φράσαι εἴ με σαώσεις.
Iliad 1.84	τὸν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 1.85	θαρσήσας μάλα εἰπὲ θεοπρόπιον ὅ τι οἶσθα·
Iliad 1.86	οὐ μὰ γὰρ Ἀπόλλωνα Διῒ φίλον, ᾧ τε σὺ Κάλχαν
Iliad 1.87	εὐχόμενος Δαναοῖσι θεοπροπίας ἀναφαίνεις,
Iliad 1.88	οὔ τις ἐμεῦ ζῶντος καὶ ἐπὶ χθονὶ δερκομένοιο
Iliad 1.89	σοὶ κοίλῃς παρὰ νηυσί βαρείας χεῖρας ἐποίσει
Iliad 1.90	συμπάντων Δαναῶν, οὐδʼ ἢν Ἀγαμέμνονα εἴπῃς,
Iliad 1.91	ὃς νῦν πολλὸν ἄριστος Ἀχαιῶν εὔχεται εἶναι.
Iliad 1.92	καὶ τότε δὴ θάρσησε καὶ ηὔδα μάντις ἀμύμων·
Iliad 1.93	οὔ τʼ ἄρ ὅ γʼ εὐχωλῆς ἐπιμέμφεται οὐδʼ ἑκατόμβης,
Iliad 1.94	ἀλλʼ ἕνεκʼ ἀρητῆρος ὃν ἠτίμησʼ Ἀγαμέμνων,
Iliad 1.95	οὐδʼ ἀπέλυσε θύγατρα καὶ οὐκ ἀπεδέξατʼ ἄποινα,
Iliad 1.96	τοὔνεκʼ ἄρʼ ἄλγεʼ ἔδωκεν ἑκηβόλος ἠδʼ ἔτι δώσει·
Iliad 1.97	οὐδʼ ὅ γε πρὶν Δαναοῖσιν ἀεικέα λοιγὸν ἀπώσει
Iliad 1.98	πρίν γʼ ἀπὸ πατρὶ φίλῳ δόμεναι ἑλικώπιδα κούρην
Iliad 1.99	ἀπριάτην ἀνάποινον, ἄγειν θʼ ἱερὴν ἑκατόμβην
Iliad 1.100	ἐς Χρύσην· τότε κέν μιν ἱλασσάμενοι πεπίθοιμεν.
Iliad 1.101	ἤτοι ὅ γʼ ὣς εἰπὼν κατʼ ἄρʼ ἕζετο· τοῖσι δʼ ἀνέστη
Iliad 1.102	ἥρως Ἀτρεΐδης εὐρὺ κρείων Ἀγαμέμνων
Iliad 1.103	ἀχνύμενος· μένεος δὲ μέγα φρένες ἀμφιμέλαιναι
Iliad 1.104	πίμπλαντʼ, ὄσσε δέ οἱ πυρὶ λαμπετόωντι ἐΐκτην·
Iliad 1.105	Κάλχαντα πρώτιστα κάκʼ ὀσσόμενος προσέειπε·
Iliad 1.106	μάντι κακῶν οὐ πώ ποτέ μοι τὸ κρήγυον εἶπας·
Iliad 1.107	αἰεί τοι τὰ κάκʼ ἐστὶ φίλα φρεσὶ μαντεύεσθαι,
Iliad 1.108	ἐσθλὸν δʼ οὔτέ τί πω εἶπας ἔπος οὔτʼ ἐτέλεσσας·
Iliad 1.109	καὶ νῦν ἐν Δαναοῖσι θεοπροπέων ἀγορεύεις
Iliad 1.110	ὡς δὴ τοῦδʼ ἕνεκά σφιν ἑκηβόλος ἄλγεα τεύχει,
Iliad 1.111	οὕνεκʼ ἐγὼ κούρης Χρυσηΐδος ἀγλάʼ ἄποινα
Iliad 1.112	οὐκ ἔθελον δέξασθαι, ἐπεὶ πολὺ βούλομαι αὐτὴν
Iliad 1.113	οἴκοι ἔχειν· καὶ γάρ ῥα Κλυταιμνήστρης προβέβουλα
Iliad 1.114	κουριδίης ἀλόχου, ἐπεὶ οὔ ἑθέν ἐστι χερείων,
Iliad 1.115	οὐ δέμας οὐδὲ φυήν, οὔτʼ ἂρ φρένας οὔτέ τι ἔργα.
Iliad 1.116	ἀλλὰ καὶ ὧς ἐθέλω δόμεναι πάλιν εἰ τό γʼ ἄμεινον·
Iliad 1.117	βούλομʼ ἐγὼ λαὸν σῶν ἔμμεναι ἢ ἀπολέσθαι·
Iliad 1.118	αὐτὰρ ἐμοὶ γέρας αὐτίχʼ ἑτοιμάσατʼ ὄφρα μὴ οἶος
Iliad 1.119	Ἀργείων ἀγέραστος ἔω, ἐπεὶ οὐδὲ ἔοικε·
Iliad 1.120	λεύσσετε γὰρ τό γε πάντες ὅ μοι γέρας ἔρχεται ἄλλῃ.
Iliad 1.121	τὸν δʼ ἠμείβετʼ ἔπειτα ποδάρκης δῖος Ἀχιλλεύς·
Iliad 1.122	Ἀτρεΐδη κύδιστε φιλοκτεανώτατε πάντων,
Iliad 1.123	πῶς γάρ τοι δώσουσι γέρας μεγάθυμοι Ἀχαιοί;
Iliad 1.124	οὐδέ τί που ἴδμεν ξυνήϊα κείμενα πολλά·
Iliad 1.125	ἀλλὰ τὰ μὲν πολίων ἐξεπράθομεν, τὰ δέδασται,
Iliad 1.126	λαοὺς δʼ οὐκ ἐπέοικε παλίλλογα ταῦτʼ ἐπαγείρειν.
Iliad 1.127	ἀλλὰ σὺ μὲν νῦν τήνδε θεῷ πρόες· αὐτὰρ Ἀχαιοὶ
Iliad 1.128	τριπλῇ τετραπλῇ τʼ ἀποτείσομεν, αἴ κέ ποθι Ζεὺς
Iliad 1.129	δῷσι πόλιν Τροίην εὐτείχεον ἐξαλαπάξαι.
Iliad 1.130	τὸν δʼ ἀπαμειβόμενος προσέφη κρείων Ἀγαμέμνων·
Iliad 1.131	μὴ δʼ οὕτως ἀγαθός περ ἐὼν θεοείκελʼ Ἀχιλλεῦ
Iliad 1.132	κλέπτε νόῳ, ἐπεὶ οὐ παρελεύσεαι οὐδέ με πείσεις.
Iliad 1.133	ἦ ἐθέλεις ὄφρʼ αὐτὸς ἔχῃς γέρας, αὐτὰρ ἔμʼ αὔτως
Iliad 1.134	ἧσθαι δευόμενον, κέλεαι δέ με τήνδʼ ἀποδοῦναι;
Iliad 1.135	ἀλλʼ εἰ μὲν δώσουσι γέρας μεγάθυμοι Ἀχαιοὶ
Iliad 1.136	ἄρσαντες κατὰ θυμὸν ὅπως ἀντάξιον ἔσται·
Iliad 1.137	εἰ δέ κε μὴ δώωσιν ἐγὼ δέ κεν αὐτὸς ἕλωμαι
Iliad 1.138	ἢ τεὸν ἢ Αἴαντος ἰὼν γέρας, ἢ Ὀδυσῆος
Iliad 1.139	ἄξω ἑλών· ὃ δέ κεν κεχολώσεται ὅν κεν ἵκωμαι.
Iliad 1.140	ἀλλʼ ἤτοι μὲν ταῦτα μεταφρασόμεσθα καὶ αὖτις,
Iliad 1.141	νῦν δʼ ἄγε νῆα μέλαιναν ἐρύσσομεν εἰς ἅλα δῖαν,
Iliad 1.142	ἐν δʼ ἐρέτας ἐπιτηδὲς ἀγείρομεν, ἐς δʼ ἑκατόμβην
Iliad 1.143	θείομεν, ἂν δʼ αὐτὴν Χρυσηΐδα καλλιπάρῃον
Iliad 1.144	βήσομεν· εἷς δέ τις ἀρχὸς ἀνὴρ βουληφόρος ἔστω,
Iliad 1.145	ἢ Αἴας ἢ Ἰδομενεὺς ἢ δῖος Ὀδυσσεὺς
Iliad 1.146	ἠὲ σὺ Πηλεΐδη πάντων ἐκπαγλότατʼ ἀνδρῶν,
Iliad 1.147	ὄφρʼ ἥμιν ἑκάεργον ἱλάσσεαι ἱερὰ ῥέξας.
Iliad 1.148	τὸν δʼ ἄρʼ ὑπόδρα ἰδὼν προσέφη πόδας ὠκὺς Ἀχιλλεύς·
Iliad 1.149	ὤ μοι ἀναιδείην ἐπιειμένε κερδαλεόφρον
Iliad 1.150	πῶς τίς τοι πρόφρων ἔπεσιν πείθηται Ἀχαιῶν
Iliad 1.151	ἢ ὁδὸν ἐλθέμεναι ἢ ἀνδράσιν ἶφι μάχεσθαι;
Iliad 1.152	οὐ γὰρ ἐγὼ Τρώων ἕνεκʼ ἤλυθον αἰχμητάων
Iliad 1.153	δεῦρο μαχησόμενος, ἐπεὶ οὔ τί μοι αἴτιοί εἰσιν·
Iliad 1.154	οὐ γὰρ πώποτʼ ἐμὰς βοῦς ἤλασαν οὐδὲ μὲν ἵππους,
Iliad 1.155	οὐδέ ποτʼ ἐν Φθίῃ ἐριβώλακι βωτιανείρῃ
Iliad 1.156	καρπὸν ἐδηλήσαντʼ, ἐπεὶ ἦ μάλα πολλὰ μεταξὺ
Iliad 1.157	οὔρεά τε σκιόεντα θάλασσά τε ἠχήεσσα·
Iliad 1.158	ἀλλὰ σοὶ ὦ μέγʼ ἀναιδὲς ἅμʼ ἑσπόμεθʼ ὄφρα σὺ χαίρῃς,
Iliad 1.159	τιμὴν ἀρνύμενοι Μενελάῳ σοί τε κυνῶπα
Iliad 1.160	πρὸς Τρώων· τῶν οὔ τι μετατρέπῃ οὐδʼ ἀλεγίζεις·
Iliad 1.161	καὶ δή μοι γέρας αὐτὸς ἀφαιρήσεσθαι ἀπειλεῖς,
Iliad 1.162	ᾧ ἔπι πολλὰ μόγησα, δόσαν δέ μοι υἷες Ἀχαιῶν.
Iliad 1.163	οὐ μὲν σοί ποτε ἶσον ἔχω γέρας ὁππότʼ Ἀχαιοὶ
Iliad 1.164	Τρώων ἐκπέρσωσʼ εὖ ναιόμενον πτολίεθρον·
Iliad 1.165	ἀλλὰ τὸ μὲν πλεῖον πολυάϊκος πολέμοιο
Iliad 1.166	χεῖρες ἐμαὶ διέπουσʼ· ἀτὰρ ἤν ποτε δασμὸς ἵκηται,
Iliad 1.167	σοὶ τὸ γέρας πολὺ μεῖζον, ἐγὼ δʼ ὀλίγον τε φίλον τε
Iliad 1.168	ἔρχομʼ ἔχων ἐπὶ νῆας, ἐπεί κε κάμω πολεμίζων.
Iliad 1.169	νῦν δʼ εἶμι Φθίην δʼ, ἐπεὶ ἦ πολὺ φέρτερόν ἐστιν
Iliad 1.170	οἴκαδʼ ἴμεν σὺν νηυσὶ κορωνίσιν, οὐδέ σʼ ὀΐω
Iliad 1.171	ἐνθάδʼ ἄτιμος ἐὼν ἄφενος καὶ πλοῦτον ἀφύξειν.
Iliad 1.172	τὸν δʼ ἠμείβετʼ ἔπειτα ἄναξ ἀνδρῶν Ἀγαμέμνων·
Iliad 1.173	φεῦγε μάλʼ εἴ τοι θυμὸς ἐπέσσυται, οὐδέ σʼ ἔγωγε
Iliad 1.174	λίσσομαι εἵνεκʼ ἐμεῖο μένειν· πάρʼ ἔμοιγε καὶ ἄλλοι
Iliad 1.175	οἵ κέ με τιμήσουσι, μάλιστα δὲ μητίετα Ζεύς.
Iliad 1.176	ἔχθιστος δέ μοί ἐσσι διοτρεφέων βασιλήων·
Iliad 1.177	αἰεὶ γάρ τοι ἔρις τε φίλη πόλεμοί τε μάχαι τε·
Iliad 1.178	εἰ μάλα καρτερός ἐσσι, θεός που σοὶ τό γʼ ἔδωκεν·
Iliad 1.179	οἴκαδʼ ἰὼν σὺν νηυσί τε σῇς καὶ σοῖς ἑτάροισι
Iliad 1.180	Μυρμιδόνεσσιν ἄνασσε, σέθεν δʼ ἐγὼ οὐκ ἀλεγίζω,
Iliad 1.181	οὐδʼ ὄθομαι κοτέοντος· ἀπειλήσω δέ τοι ὧδε·
Iliad 1.182	ὡς ἔμʼ ἀφαιρεῖται Χρυσηΐδα Φοῖβος Ἀπόλλων,
Iliad 1.183	τὴν μὲν ἐγὼ σὺν νηΐ τʼ ἐμῇ καὶ ἐμοῖς ἑτάροισι
Iliad 1.184	πέμψω, ἐγὼ δέ κʼ ἄγω Βρισηΐδα καλλιπάρῃον
Iliad 1.185	αὐτὸς ἰὼν κλισίην δὲ τὸ σὸν γέρας ὄφρʼ ἐῢ εἰδῇς
Iliad 1.186	ὅσσον φέρτερός εἰμι σέθεν, στυγέῃ δὲ καὶ ἄλλος
Iliad 1.187	ἶσον ἐμοὶ φάσθαι καὶ ὁμοιωθήμεναι ἄντην.
Iliad 1.188	ὣς φάτο· Πηλεΐωνι δʼ ἄχος γένετʼ, ἐν δέ οἱ ἦτορ
Iliad 1.189	στήθεσσιν λασίοισι διάνδιχα μερμήριξεν,
Iliad 1.190	ἢ ὅ γε φάσγανον ὀξὺ ἐρυσσάμενος παρὰ μηροῦ
Iliad 1.191	τοὺς μὲν ἀναστήσειεν, ὃ δʼ Ἀτρεΐδην ἐναρίζοι,
Iliad 1.192	ἦε χόλον παύσειεν ἐρητύσειέ τε θυμόν.
Iliad 1.193	ἧος ὃ ταῦθʼ ὥρμαινε κατὰ φρένα καὶ κατὰ θυμόν,
Iliad 1.194	ἕλκετο δʼ ἐκ κολεοῖο μέγα ξίφος, ἦλθε δʼ Ἀθήνη
Iliad 1.195	οὐρανόθεν· πρὸ γὰρ ἧκε θεὰ λευκώλενος Ἥρη
Iliad 1.196	ἄμφω ὁμῶς θυμῷ φιλέουσά τε κηδομένη τε·
Iliad 1.197	στῆ δʼ ὄπιθεν, ξανθῆς δὲ κόμης ἕλε Πηλεΐωνα
Iliad 1.198	οἴῳ φαινομένη· τῶν δʼ ἄλλων οὔ τις ὁρᾶτο·
Iliad 1.199	θάμβησεν δʼ Ἀχιλεύς, μετὰ δʼ ἐτράπετʼ, αὐτίκα δʼ ἔγνω
Iliad 1.200	Παλλάδʼ Ἀθηναίην· δεινὼ δέ οἱ ὄσσε φάανθεν·
Iliad 1.201	καί μιν φωνήσας ἔπεα πτερόεντα προσηύδα·
Iliad 1.202	τίπτʼ αὖτʼ αἰγιόχοιο Διὸς τέκος εἰλήλουθας;
Iliad 1.203	ἦ ἵνα ὕβριν ἴδῃ Ἀγαμέμνονος Ἀτρεΐδαο;
Iliad 1.204	ἀλλʼ ἔκ τοι ἐρέω, τὸ δὲ καὶ τελέεσθαι ὀΐω·
Iliad 1.205	ᾗς ὑπεροπλίῃσι τάχʼ ἄν ποτε θυμὸν ὀλέσσῃ.
Iliad 1.206	τὸν δʼ αὖτε προσέειπε θεὰ γλαυκῶπις Ἀθήνη·
Iliad 1.207	ἦλθον ἐγὼ παύσουσα τὸ σὸν μένος, αἴ κε πίθηαι,
Iliad 1.208	οὐρανόθεν· πρὸ δέ μʼ ἧκε θεὰ λευκώλενος Ἥρη
Iliad 1.209	ἄμφω ὁμῶς θυμῷ φιλέουσά τε κηδομένη τε·
Iliad 1.210	ἀλλʼ ἄγε λῆγʼ ἔριδος, μηδὲ ξίφος ἕλκεο χειρί·
Iliad 1.211	ἀλλʼ ἤτοι ἔπεσιν μὲν ὀνείδισον ὡς ἔσεταί περ·
Iliad 1.212	ὧδε γὰρ ἐξερέω, τὸ δὲ καὶ τετελεσμένον ἔσται·
Iliad 1.213	καί ποτέ τοι τρὶς τόσσα παρέσσεται ἀγλαὰ δῶρα
Iliad 1.214	ὕβριος εἵνεκα τῆσδε· σὺ δʼ ἴσχεο, πείθεο δʼ ἡμῖν.
Iliad 1.215	τὴν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 1.216	χρὴ μὲν σφωΐτερόν γε θεὰ ἔπος εἰρύσσασθαι
Iliad 1.217	καὶ μάλα περ θυμῷ κεχολωμένον· ὧς γὰρ ἄμεινον·
Iliad 1.218	ὅς κε θεοῖς ἐπιπείθηται μάλα τʼ ἔκλυον αὐτοῦ.
Iliad 1.219	ἦ καὶ ἐπʼ ἀργυρέῃ κώπῃ σχέθε χεῖρα βαρεῖαν,
Iliad 1.220	ἂψ δʼ ἐς κουλεὸν ὦσε μέγα ξίφος, οὐδʼ ἀπίθησε
Iliad 1.221	μύθῳ Ἀθηναίης· ἣ δʼ Οὔλυμπον δὲ βεβήκει
Iliad 1.222	δώματʼ ἐς αἰγιόχοιο Διὸς μετὰ δαίμονας ἄλλους.
Iliad 1.223	Πηλεΐδης δʼ ἐξαῦτις ἀταρτηροῖς ἐπέεσσιν
Iliad 1.224	Ἀτρεΐδην προσέειπε, καὶ οὔ πω λῆγε χόλοιο·
Iliad 1.225	οἰνοβαρές, κυνὸς ὄμματʼ ἔχων, κραδίην δʼ ἐλάφοιο,
Iliad 1.226	οὔτέ ποτʼ ἐς πόλεμον ἅμα λαῷ θωρηχθῆναι
Iliad 1.227	οὔτε λόχον δʼ ἰέναι σὺν ἀριστήεσσιν Ἀχαιῶν
Iliad 1.228	τέτληκας θυμῷ· τὸ δέ τοι κὴρ εἴδεται εἶναι.
Iliad 1.229	ἦ πολὺ λώϊόν ἐστι κατὰ στρατὸν εὐρὺν Ἀχαιῶν
Iliad 1.230	δῶρʼ ἀποαιρεῖσθαι ὅς τις σέθεν ἀντίον εἴπῃ·
Iliad 1.231	δημοβόρος βασιλεὺς ἐπεὶ οὐτιδανοῖσιν ἀνάσσεις·
Iliad 1.232	ἦ γὰρ ἂν Ἀτρεΐδη νῦν ὕστατα λωβήσαιο.
Iliad 1.233	ἀλλʼ ἔκ τοι ἐρέω καὶ ἐπὶ μέγαν ὅρκον ὀμοῦμαι·
Iliad 1.234	ναὶ μὰ τόδε σκῆπτρον, τὸ μὲν οὔ ποτε φύλλα καὶ ὄζους
Iliad 1.235	φύσει, ἐπεὶ δὴ πρῶτα τομὴν ἐν ὄρεσσι λέλοιπεν,
Iliad 1.236	οὐδʼ ἀναθηλήσει· περὶ γάρ ῥά ἑ χαλκὸς ἔλεψε
Iliad 1.237	φύλλά τε καὶ φλοιόν· νῦν αὖτέ μιν υἷες Ἀχαιῶν
Iliad 1.238	ἐν παλάμῃς φορέουσι δικασπόλοι, οἵ τε θέμιστας
Iliad 1.239	πρὸς Διὸς εἰρύαται· ὃ δέ τοι μέγας ἔσσεται ὅρκος·
Iliad 1.240	ἦ ποτʼ Ἀχιλλῆος ποθὴ ἵξεται υἷας Ἀχαιῶν
Iliad 1.241	σύμπαντας· τότε δʼ οὔ τι δυνήσεαι ἀχνύμενός περ
Iliad 1.242	χραισμεῖν, εὖτʼ ἂν πολλοὶ ὑφʼ Ἕκτορος ἀνδροφόνοιο
Iliad 1.243	θνήσκοντες πίπτωσι· σὺ δʼ ἔνδοθι θυμὸν ἀμύξεις
Iliad 1.244	χωόμενος ὅ τʼ ἄριστον Ἀχαιῶν οὐδὲν ἔτισας.
Iliad 1.245	ὣς φάτο Πηλεΐδης, ποτὶ δὲ σκῆπτρον βάλε γαίῃ
Iliad 1.246	χρυσείοις ἥλοισι πεπαρμένον, ἕζετο δʼ αὐτός·
Iliad 1.247	Ἀτρεΐδης δʼ ἑτέρωθεν ἐμήνιε· τοῖσι δὲ Νέστωρ
Iliad 1.248	ἡδυεπὴς ἀνόρουσε λιγὺς Πυλίων ἀγορητής,
Iliad 1.249	τοῦ καὶ ἀπὸ γλώσσης μέλιτος γλυκίων ῥέεν αὐδή·
Iliad 1.250	τῷ δʼ ἤδη δύο μὲν γενεαὶ μερόπων ἀνθρώπων
Iliad 1.251	ἐφθίαθʼ, οἵ οἱ πρόσθεν ἅμα τράφεν ἠδʼ ἐγένοντο
Iliad 1.252	ἐν Πύλῳ ἠγαθέῃ, μετὰ δὲ τριτάτοισιν ἄνασσεν·
Iliad 1.253	ὅ σφιν ἐὺ φρονέων ἀγορήσατο καὶ μετέειπεν·
Iliad 1.254	ὦ πόποι ἦ μέγα πένθος Ἀχαιΐδα γαῖαν ἱκάνει·
Iliad 1.255	ἦ κεν γηθήσαι Πρίαμος Πριάμοιό τε παῖδες
Iliad 1.256	ἄλλοι τε Τρῶες μέγα κεν κεχαροίατο θυμῷ
Iliad 1.257	εἰ σφῶϊν τάδε πάντα πυθοίατο μαρναμένοιϊν,
Iliad 1.258	οἳ περὶ μὲν βουλὴν Δαναῶν, περὶ δʼ ἐστὲ μάχεσθαι.
Iliad 1.259	ἀλλὰ πίθεσθʼ· ἄμφω δὲ νεωτέρω ἐστὸν ἐμεῖο·
Iliad 1.260	ἤδη γάρ ποτʼ ἐγὼ καὶ ἀρείοσιν ἠέ περ ὑμῖν
Iliad 1.261	ἀνδράσιν ὡμίλησα, καὶ οὔ ποτέ μʼ οἵ γʼ ἀθέριζον.
Iliad 1.262	οὐ γάρ πω τοίους ἴδον ἀνέρας οὐδὲ ἴδωμαι,
Iliad 1.263	οἷον Πειρίθοόν τε Δρύαντά τε ποιμένα λαῶν
Iliad 1.264	Καινέα τʼ Ἐξάδιόν τε καὶ ἀντίθεον Πολύφημον
Iliad 1.265	Θησέα τʼ Αἰγεΐδην, ἐπιείκελον ἀθανάτοισιν·
Iliad 1.266	κάρτιστοι δὴ κεῖνοι ἐπιχθονίων τράφεν ἀνδρῶν·
Iliad 1.267	κάρτιστοι μὲν ἔσαν καὶ καρτίστοις ἐμάχοντο
Iliad 1.268	φηρσὶν ὀρεσκῴοισι καὶ ἐκπάγλως ἀπόλεσσαν.
Iliad 1.269	καὶ μὲν τοῖσιν ἐγὼ μεθομίλεον ἐκ Πύλου ἐλθὼν
Iliad 1.270	τηλόθεν ἐξ ἀπίης γαίης· καλέσαντο γὰρ αὐτοί·
Iliad 1.271	καὶ μαχόμην κατʼ ἔμʼ αὐτὸν ἐγώ· κείνοισι δʼ ἂν οὔ τις
Iliad 1.272	τῶν οἳ νῦν βροτοί εἰσιν ἐπιχθόνιοι μαχέοιτο·
Iliad 1.273	καὶ μέν μευ βουλέων ξύνιεν πείθοντό τε μύθῳ·
Iliad 1.274	ἀλλὰ πίθεσθε καὶ ὔμμες, ἐπεὶ πείθεσθαι ἄμεινον·
Iliad 1.275	μήτε σὺ τόνδʼ ἀγαθός περ ἐὼν ἀποαίρεο κούρην,
Iliad 1.276	ἀλλʼ ἔα ὥς οἱ πρῶτα δόσαν γέρας υἷες Ἀχαιῶν·
Iliad 1.277	μήτε σὺ Πηλείδη ἔθελʼ ἐριζέμεναι βασιλῆϊ
Iliad 1.278	ἀντιβίην, ἐπεὶ οὔ ποθʼ ὁμοίης ἔμμορε τιμῆς
Iliad 1.279	σκηπτοῦχος βασιλεύς, ᾧ τε Ζεὺς κῦδος ἔδωκεν.
Iliad 1.280	εἰ δὲ σὺ καρτερός ἐσσι θεὰ δέ σε γείνατο μήτηρ,
Iliad 1.281	ἀλλʼ ὅ γε φέρτερός ἐστιν ἐπεὶ πλεόνεσσιν ἀνάσσει.
Iliad 1.282	Ἀτρεΐδη σὺ δὲ παῦε τεὸν μένος· αὐτὰρ ἔγωγε
Iliad 1.283	λίσσομʼ Ἀχιλλῆϊ μεθέμεν χόλον, ὃς μέγα πᾶσιν
Iliad 1.284	ἕρκος Ἀχαιοῖσιν πέλεται πολέμοιο κακοῖο.
Iliad 1.285	τὸν δʼ ἀπαμειβόμενος προσέφη κρείων Ἀγαμέμνων·
Iliad 1.286	ναὶ δὴ ταῦτά γε πάντα γέρον κατὰ μοῖραν ἔειπες·
Iliad 1.287	ἀλλʼ ὅδʼ ἀνὴρ ἐθέλει περὶ πάντων ἔμμεναι ἄλλων,
Iliad 1.288	πάντων μὲν κρατέειν ἐθέλει, πάντεσσι δʼ ἀνάσσειν,
Iliad 1.289	πᾶσι δὲ σημαίνειν, ἅ τινʼ οὐ πείσεσθαι ὀΐω·
Iliad 1.290	εἰ δέ μιν αἰχμητὴν ἔθεσαν θεοὶ αἰὲν ἐόντες
Iliad 1.291	τοὔνεκά οἱ προθέουσιν ὀνείδεα μυθήσασθαι;
Iliad 1.292	τὸν δʼ ἄρʼ ὑποβλήδην ἠμείβετο δῖος Ἀχιλλεύς·
Iliad 1.293	ἦ γάρ κεν δειλός τε καὶ οὐτιδανὸς καλεοίμην
Iliad 1.294	εἰ δὴ σοὶ πᾶν ἔργον ὑπείξομαι ὅττί κεν εἴπῃς·
Iliad 1.295	ἄλλοισιν δὴ ταῦτʼ ἐπιτέλλεο, μὴ γὰρ ἔμοιγε
Iliad 1.296	σήμαινʼ· οὐ γὰρ ἔγωγʼ ἔτι σοὶ πείσεσθαι ὀΐω.
Iliad 1.297	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσι·
Iliad 1.298	χερσὶ μὲν οὔ τοι ἔγωγε μαχήσομαι εἵνεκα κούρης
Iliad 1.299	οὔτε σοὶ οὔτέ τῳ ἄλλῳ, ἐπεί μʼ ἀφέλεσθέ γε δόντες·
Iliad 1.300	τῶν δʼ ἄλλων ἅ μοί ἐστι θοῇ παρὰ νηῒ μελαίνῃ
Iliad 1.301	τῶν οὐκ ἄν τι φέροις ἀνελὼν ἀέκοντος ἐμεῖο·
Iliad 1.302	εἰ δʼ ἄγε μὴν πείρησαι ἵνα γνώωσι καὶ οἵδε·
Iliad 1.303	αἶψά τοι αἷμα κελαινὸν ἐρωήσει περὶ δουρί.
Iliad 1.304	ὣς τώ γʼ ἀντιβίοισι μαχεσσαμένω ἐπέεσσιν
Iliad 1.305	ἀνστήτην, λῦσαν δʼ ἀγορὴν παρὰ νηυσὶν Ἀχαιῶν·
Iliad 1.306	Πηλεΐδης μὲν ἐπὶ κλισίας καὶ νῆας ἐΐσας
Iliad 1.307	ἤϊε σύν τε Μενοιτιάδῃ καὶ οἷς ἑτάροισιν·
Iliad 1.308	Ἀτρεΐδης δʼ ἄρα νῆα θοὴν ἅλα δὲ προέρυσσεν,
Iliad 1.309	ἐν δʼ ἐρέτας ἔκρινεν ἐείκοσιν, ἐς δʼ ἑκατόμβην
Iliad 1.310	βῆσε θεῷ, ἀνὰ δὲ Χρυσηΐδα καλλιπάρῃον
Iliad 1.311	εἷσεν ἄγων· ἐν δʼ ἀρχὸς ἔβη πολύμητις Ὀδυσσεύς.
Iliad 1.312	οἳ μὲν ἔπειτʼ ἀναβάντες ἐπέπλεον ὑγρὰ κέλευθα,
Iliad 1.313	λαοὺς δʼ Ἀτρεΐδης ἀπολυμαίνεσθαι ἄνωγεν·
Iliad 1.314	οἳ δʼ ἀπελυμαίνοντο καὶ εἰς ἅλα λύματα βάλλον,
Iliad 1.315	ἕρδον δʼ Ἀπόλλωνι τεληέσσας ἑκατόμβας
Iliad 1.316	ταύρων ἠδʼ αἰγῶν παρὰ θῖνʼ ἁλὸς ἀτρυγέτοιο·
Iliad 1.317	κνίση δʼ οὐρανὸν ἷκεν ἑλισσομένη περὶ καπνῷ.
Iliad 1.318	ὣς οἳ μὲν τὰ πένοντο κατὰ στρατόν· οὐδʼ Ἀγαμέμνων
Iliad 1.319	λῆγʼ ἔριδος τὴν πρῶτον ἐπηπείλησʼ Ἀχιλῆϊ,
Iliad 1.320	ἀλλʼ ὅ γε Ταλθύβιόν τε καὶ Εὐρυβάτην προσέειπε,
Iliad 1.321	τώ οἱ ἔσαν κήρυκε καὶ ὀτρηρὼ θεράποντε·
Iliad 1.322	ἔρχεσθον κλισίην Πηληϊάδεω Ἀχιλῆος·
Iliad 1.323	χειρὸς ἑλόντʼ ἀγέμεν Βρισηΐδα καλλιπάρῃον·
Iliad 1.324	εἰ δέ κε μὴ δώῃσιν ἐγὼ δέ κεν αὐτὸς ἕλωμαι
Iliad 1.325	ἐλθὼν σὺν πλεόνεσσι· τό οἱ καὶ ῥίγιον ἔσται.
Iliad 1.326	ὣς εἰπὼν προΐει, κρατερὸν δʼ ἐπὶ μῦθον ἔτελλε·
Iliad 1.327	τὼ δʼ ἀέκοντε βάτην παρὰ θῖνʼ ἁλὸς ἀτρυγέτοιο,
Iliad 1.328	Μυρμιδόνων δʼ ἐπί τε κλισίας καὶ νῆας ἱκέσθην,
Iliad 1.329	τὸν δʼ εὗρον παρά τε κλισίῃ καὶ νηῒ μελαίνῃ
Iliad 1.330	ἥμενον· οὐδʼ ἄρα τώ γε ἰδὼν γήθησεν Ἀχιλλεύς.
Iliad 1.331	τὼ μὲν ταρβήσαντε καὶ αἰδομένω βασιλῆα
Iliad 1.332	στήτην, οὐδέ τί μιν προσεφώνεον οὐδʼ ἐρέοντο·
Iliad 1.333	αὐτὰρ ὃ ἔγνω ᾗσιν ἐνὶ φρεσὶ φώνησέν τε·
Iliad 1.334	χαίρετε κήρυκες Διὸς ἄγγελοι ἠδὲ καὶ ἀνδρῶν,
Iliad 1.335	ἆσσον ἴτʼ· οὔ τί μοι ὔμμες ἐπαίτιοι ἀλλʼ Ἀγαμέμνων,
Iliad 1.336	ὃ σφῶϊ προΐει Βρισηΐδος εἵνεκα κούρης.
Iliad 1.337	ἀλλʼ ἄγε διογενὲς Πατρόκλεες ἔξαγε κούρην
Iliad 1.338	καί σφωϊν δὸς ἄγειν· τὼ δʼ αὐτὼ μάρτυροι ἔστων
Iliad 1.339	πρός τε θεῶν μακάρων πρός τε θνητῶν ἀνθρώπων
Iliad 1.340	καὶ πρὸς τοῦ βασιλῆος ἀπηνέος εἴ ποτε δʼ αὖτε
Iliad 1.341	χρειὼ ἐμεῖο γένηται ἀεικέα λοιγὸν ἀμῦναι
Iliad 1.342	τοῖς ἄλλοις· ἦ γὰρ ὅ γʼ ὀλοιῇσι φρεσὶ θύει,
Iliad 1.343	οὐδέ τι οἶδε νοῆσαι ἅμα πρόσσω καὶ ὀπίσσω,
Iliad 1.344	ὅππως οἱ παρὰ νηυσὶ σόοι μαχέοιντο Ἀχαιοί.
Iliad 1.345	ὣς φάτο, Πάτροκλος δὲ φίλῳ ἐπεπείθεθʼ ἑταίρῳ,
Iliad 1.346	ἐκ δʼ ἄγαγε κλισίης Βρισηΐδα καλλιπάρῃον,
Iliad 1.347	δῶκε δʼ ἄγειν· τὼ δʼ αὖτις ἴτην παρὰ νῆας Ἀχαιῶν·
Iliad 1.348	ἣ δʼ ἀέκουσʼ ἅμα τοῖσι γυνὴ κίεν· αὐτὰρ Ἀχιλλεὺς
Iliad 1.349	δακρύσας ἑτάρων ἄφαρ ἕζετο νόσφι λιασθείς,
Iliad 1.350	θῖνʼ ἔφʼ ἁλὸς πολιῆς, ὁρόων ἐπʼ ἀπείρονα πόντον·
Iliad 1.351	πολλὰ δὲ μητρὶ φίλῃ ἠρήσατο χεῖρας ὀρεγνύς·
Iliad 1.352	μῆτερ ἐπεί μʼ ἔτεκές γε μινυνθάδιόν περ ἐόντα,
Iliad 1.353	τιμήν πέρ μοι ὄφελλεν Ὀλύμπιος ἐγγυαλίξαι
Iliad 1.354	Ζεὺς ὑψιβρεμέτης· νῦν δʼ οὐδέ με τυτθὸν ἔτισεν·
Iliad 1.355	ἦ γάρ μʼ Ἀτρεΐδης εὐρὺ κρείων Ἀγαμέμνων
Iliad 1.356	ἠτίμησεν· ἑλὼν γὰρ ἔχει γέρας αὐτὸς ἀπούρας.
Iliad 1.357	ὣς φάτο δάκρυ χέων, τοῦ δʼ ἔκλυε πότνια μήτηρ
Iliad 1.358	ἡμένη ἐν βένθεσσιν ἁλὸς παρὰ πατρὶ γέροντι·
Iliad 1.359	καρπαλίμως δʼ ἀνέδυ πολιῆς ἁλὸς ἠΰτʼ ὀμίχλη,
Iliad 1.360	καί ῥα πάροιθʼ αὐτοῖο καθέζετο δάκρυ χέοντος,
Iliad 1.361	χειρί τέ μιν κατέρεξεν ἔπος τʼ ἔφατʼ ἔκ τʼ ὀνόμαζε·
Iliad 1.362	τέκνον τί κλαίεις; τί δέ σε φρένας ἵκετο πένθος;
Iliad 1.363	ἐξαύδα, μὴ κεῦθε νόῳ, ἵνα εἴδομεν ἄμφω.
Iliad 1.364	τὴν δὲ βαρὺ στενάχων προσέφη πόδας ὠκὺς Ἀχιλλεύς·
Iliad 1.365	οἶσθα· τί ἤ τοι ταῦτα ἰδυίῃ πάντʼ ἀγορεύω;
Iliad 1.366	ᾠχόμεθʼ ἐς Θήβην ἱερὴν πόλιν Ἠετίωνος,
Iliad 1.367	τὴν δὲ διεπράθομέν τε καὶ ἤγομεν ἐνθάδε πάντα·
Iliad 1.368	καὶ τὰ μὲν εὖ δάσσαντο μετὰ σφίσιν υἷες Ἀχαιῶν,
Iliad 1.369	ἐκ δʼ ἕλον Ἀτρεΐδῃ Χρυσηΐδα καλλιπάρῃον.
Iliad 1.370	Χρύσης δʼ αὖθʼ ἱερεὺς ἑκατηβόλου Ἀπόλλωνος
Iliad 1.371	ἦλθε θοὰς ἐπὶ νῆας Ἀχαιῶν χαλκοχιτώνων
Iliad 1.372	λυσόμενός τε θύγατρα φέρων τʼ ἀπερείσιʼ ἄποινα,
Iliad 1.373	στέμματʼ ἔχων ἐν χερσὶν ἑκηβόλου Ἀπόλλωνος
Iliad 1.374	χρυσέῳ ἀνὰ σκήπτρῳ, καὶ λίσσετο πάντας Ἀχαιούς,
Iliad 1.375	Ἀτρεΐδα δὲ μάλιστα δύω κοσμήτορε λαῶν.
Iliad 1.376	ἔνθʼ ἄλλοι μὲν πάντες ἐπευφήμησαν Ἀχαιοὶ
Iliad 1.377	αἰδεῖσθαί θʼ ἱερῆα καὶ ἀγλαὰ δέχθαι ἄποινα·
Iliad 1.378	ἀλλʼ οὐκ Ἀτρεΐδῃ Ἀγαμέμνονι ἥνδανε θυμῷ,
Iliad 1.379	ἀλλὰ κακῶς ἀφίει, κρατερὸν δʼ ἐπὶ μῦθον ἔτελλε·
Iliad 1.380	χωόμενος δʼ ὁ γέρων πάλιν ᾤχετο· τοῖο δʼ Ἀπόλλων
Iliad 1.381	εὐξαμένου ἤκουσεν, ἐπεὶ μάλα οἱ φίλος ἦεν,
Iliad 1.382	ἧκε δʼ ἐπʼ Ἀργείοισι κακὸν βέλος· οἳ δέ νυ λαοὶ
Iliad 1.383	θνῇσκον ἐπασσύτεροι, τὰ δʼ ἐπῴχετο κῆλα θεοῖο
Iliad 1.384	πάντῃ ἀνὰ στρατὸν εὐρὺν Ἀχαιῶν· ἄμμι δὲ μάντις
Iliad 1.385	εὖ εἰδὼς ἀγόρευε θεοπροπίας ἑκάτοιο.
Iliad 1.386	αὐτίκʼ ἐγὼ πρῶτος κελόμην θεὸν ἱλάσκεσθαι·
Iliad 1.387	Ἀτρεΐωνα δʼ ἔπειτα χόλος λάβεν, αἶψα δʼ ἀναστὰς
Iliad 1.388	ἠπείλησεν μῦθον ὃ δὴ τετελεσμένος ἐστί·
Iliad 1.389	τὴν μὲν γὰρ σὺν νηῒ θοῇ ἑλίκωπες Ἀχαιοὶ
Iliad 1.390	ἐς Χρύσην πέμπουσιν, ἄγουσι δὲ δῶρα ἄνακτι·
Iliad 1.391	τὴν δὲ νέον κλισίηθεν ἔβαν κήρυκες ἄγοντες
Iliad 1.392	κούρην Βρισῆος τήν μοι δόσαν υἷες Ἀχαιῶν.
Iliad 1.393	ἀλλὰ σὺ εἰ δύνασαί γε περίσχεο παιδὸς ἑῆος·
Iliad 1.394	ἐλθοῦσʼ Οὔλυμπον δὲ Δία λίσαι, εἴ ποτε δή τι
Iliad 1.395	ἢ ἔπει ὤνησας κραδίην Διὸς ἠὲ καὶ ἔργῳ.
Iliad 1.396	πολλάκι γάρ σεο πατρὸς ἐνὶ μεγάροισιν ἄκουσα
Iliad 1.397	εὐχομένης ὅτʼ ἔφησθα κελαινεφέϊ Κρονίωνι
Iliad 1.398	οἴη ἐν ἀθανάτοισιν ἀεικέα λοιγὸν ἀμῦναι,
Iliad 1.399	ὁππότε μιν ξυνδῆσαι Ὀλύμπιοι ἤθελον ἄλλοι
Iliad 1.400	Ἥρη τʼ ἠδὲ Ποσειδάων καὶ Παλλὰς Ἀθήνη·
Iliad 1.401	ἀλλὰ σὺ τόν γʼ ἐλθοῦσα θεὰ ὑπελύσαο δεσμῶν,
Iliad 1.402	ὦχʼ ἑκατόγχειρον καλέσασʼ ἐς μακρὸν Ὄλυμπον,
Iliad 1.403	ὃν Βριάρεων καλέουσι θεοί, ἄνδρες δέ τε πάντες
Iliad 1.404	Αἰγαίωνʼ, ὃ γὰρ αὖτε βίην οὗ πατρὸς ἀμείνων·
Iliad 1.405	ὅς ῥα παρὰ Κρονίωνι καθέζετο κύδεϊ γαίων·
Iliad 1.406	τὸν καὶ ὑπέδεισαν μάκαρες θεοὶ οὐδʼ ἔτʼ ἔδησαν.
Iliad 1.407	τῶν νῦν μιν μνήσασα παρέζεο καὶ λαβὲ γούνων
Iliad 1.408	αἴ κέν πως ἐθέλῃσιν ἐπὶ Τρώεσσιν ἀρῆξαι,
Iliad 1.409	τοὺς δὲ κατὰ πρύμνας τε καὶ ἀμφʼ ἅλα ἔλσαι Ἀχαιοὺς
Iliad 1.410	κτεινομένους, ἵνα πάντες ἐπαύρωνται βασιλῆος,
Iliad 1.411	γνῷ δὲ καὶ Ἀτρεΐδης εὐρὺ κρείων Ἀγαμέμνων
Iliad 1.412	ἣν ἄτην ὅ τʼ ἄριστον Ἀχαιῶν οὐδὲν ἔτισεν.
Iliad 1.413	τὸν δʼ ἠμείβετʼ ἔπειτα Θέτις κατὰ δάκρυ χέουσα·
Iliad 1.414	ὤ μοι τέκνον ἐμόν, τί νύ σʼ ἔτρεφον αἰνὰ τεκοῦσα;
Iliad 1.415	αἴθʼ ὄφελες παρὰ νηυσὶν ἀδάκρυτος καὶ ἀπήμων
Iliad 1.416	ἧσθαι, ἐπεί νύ τοι αἶσα μίνυνθά περ οὔ τι μάλα δήν·
Iliad 1.417	νῦν δʼ ἅμα τʼ ὠκύμορος καὶ ὀϊζυρὸς περὶ πάντων
Iliad 1.418	ἔπλεο· τώ σε κακῇ αἴσῃ τέκον ἐν μεγάροισι.
Iliad 1.419	τοῦτο δέ τοι ἐρέουσα ἔπος Διὶ τερπικεραύνῳ
Iliad 1.420	εἶμʼ αὐτὴ πρὸς Ὄλυμπον ἀγάννιφον αἴ κε πίθηται.
Iliad 1.421	ἀλλὰ σὺ μὲν νῦν νηυσὶ παρήμενος ὠκυπόροισι
Iliad 1.422	μήνιʼ Ἀχαιοῖσιν, πολέμου δʼ ἀποπαύεο πάμπαν·
Iliad 1.423	Ζεὺς γὰρ ἐς Ὠκεανὸν μετʼ ἀμύμονας Αἰθιοπῆας
Iliad 1.424	χθιζὸς ἔβη κατὰ δαῖτα, θεοὶ δʼ ἅμα πάντες ἕποντο·
Iliad 1.425	δωδεκάτῃ δέ τοι αὖτις ἐλεύσεται Οὔλυμπον δέ,
Iliad 1.426	καὶ τότʼ ἔπειτά τοι εἶμι Διὸς ποτὶ χαλκοβατὲς δῶ,
Iliad 1.427	καί μιν γουνάσομαι καί μιν πείσεσθαι ὀΐω.
Iliad 1.428	ὣς ἄρα φωνήσασʼ ἀπεβήσετο, τὸν δὲ λίπʼ αὐτοῦ
Iliad 1.429	χωόμενον κατὰ θυμὸν ἐϋζώνοιο γυναικὸς
Iliad 1.430	τήν ῥα βίῃ ἀέκοντος ἀπηύρων· αὐτὰρ Ὀδυσσεὺς
Iliad 1.431	ἐς Χρύσην ἵκανεν ἄγων ἱερὴν ἑκατόμβην.
Iliad 1.432	οἳ δʼ ὅτε δὴ λιμένος πολυβενθέος ἐντὸς ἵκοντο
Iliad 1.433	ἱστία μὲν στείλαντο, θέσαν δʼ ἐν νηῒ μελαίνῃ,
Iliad 1.434	ἱστὸν δʼ ἱστοδόκῃ πέλασαν προτόνοισιν ὑφέντες
Iliad 1.435	καρπαλίμως, τὴν δʼ εἰς ὅρμον προέρεσσαν ἐρετμοῖς.
Iliad 1.436	ἐκ δʼ εὐνὰς ἔβαλον, κατὰ δὲ πρυμνήσιʼ ἔδησαν·
Iliad 1.437	ἐκ δὲ καὶ αὐτοὶ βαῖνον ἐπὶ ῥηγμῖνι θαλάσσης,
Iliad 1.438	ἐκ δʼ ἑκατόμβην βῆσαν ἑκηβόλῳ Ἀπόλλωνι·
Iliad 1.439	ἐκ δὲ Χρυσηῒς νηὸς βῆ ποντοπόροιο.
Iliad 1.440	τὴν μὲν ἔπειτʼ ἐπὶ βωμὸν ἄγων πολύμητις Ὀδυσσεὺς
Iliad 1.441	πατρὶ φίλῳ ἐν χερσὶ τίθει καί μιν προσέειπεν·
Iliad 1.442	ὦ Χρύση, πρό μʼ ἔπεμψεν ἄναξ ἀνδρῶν Ἀγαμέμνων
Iliad 1.443	παῖδά τε σοὶ ἀγέμεν, Φοίβῳ θʼ ἱερὴν ἑκατόμβην
Iliad 1.444	ῥέξαι ὑπὲρ Δαναῶν ὄφρʼ ἱλασόμεσθα ἄνακτα,
Iliad 1.445	ὃς νῦν Ἀργείοισι πολύστονα κήδεʼ ἐφῆκεν.
Iliad 1.446	ὣς εἰπὼν ἐν χερσὶ τίθει, ὃ δὲ δέξατο χαίρων
Iliad 1.447	παῖδα φίλην· τοὶ δʼ ὦκα θεῷ ἱερὴν ἑκατόμβην
Iliad 1.448	ἑξείης ἔστησαν ἐΰδμητον περὶ βωμόν,
Iliad 1.449	χερνίψαντο δʼ ἔπειτα καὶ οὐλοχύτας ἀνέλοντο.
Iliad 1.450	τοῖσιν δὲ Χρύσης μεγάλʼ εὔχετο χεῖρας ἀνασχών·
Iliad 1.451	κλῦθί μευ ἀργυρότοξʼ, ὃς Χρύσην ἀμφιβέβηκας
Iliad 1.452	Κίλλαν τε ζαθέην Τενέδοιό τε ἶφι ἀνάσσεις·
Iliad 1.453	ἦ μὲν δή ποτʼ ἐμεῦ πάρος ἔκλυες εὐξαμένοιο,
Iliad 1.454	τίμησας μὲν ἐμέ, μέγα δʼ ἴψαο λαὸν Ἀχαιῶν·
Iliad 1.455	ἠδʼ ἔτι καὶ νῦν μοι τόδʼ ἐπικρήηνον ἐέλδωρ·
Iliad 1.456	ἤδη νῦν Δαναοῖσιν ἀεικέα λοιγὸν ἄμυνον.
Iliad 1.457	ὣς ἔφατʼ εὐχόμενος, τοῦ δʼ ἔκλυε Φοῖβος Ἀπόλλων.
Iliad 1.458	αὐτὰρ ἐπεί ῥʼ εὔξαντο καὶ οὐλοχύτας προβάλοντο,
Iliad 1.459	αὐέρυσαν μὲν πρῶτα καὶ ἔσφαξαν καὶ ἔδειραν,
Iliad 1.460	μηρούς τʼ ἐξέταμον κατά τε κνίσῃ ἐκάλυψαν
Iliad 1.461	δίπτυχα ποιήσαντες, ἐπʼ αὐτῶν δʼ ὠμοθέτησαν·
Iliad 1.462	καῖε δʼ ἐπὶ σχίζῃς ὁ γέρων, ἐπὶ δʼ αἴθοπα οἶνον
Iliad 1.463	λεῖβε· νέοι δὲ παρʼ αὐτὸν ἔχον πεμπώβολα χερσίν.
Iliad 1.464	αὐτὰρ ἐπεὶ κατὰ μῆρε κάη καὶ σπλάγχνα πάσαντο,
Iliad 1.465	μίστυλλόν τʼ ἄρα τἆλλα καὶ ἀμφʼ ὀβελοῖσιν ἔπειραν,
Iliad 1.466	ὤπτησάν τε περιφραδέως, ἐρύσαντό τε πάντα.
Iliad 1.467	αὐτὰρ ἐπεὶ παύσαντο πόνου τετύκοντό τε δαῖτα
Iliad 1.468	δαίνυντʼ, οὐδέ τι θυμὸς ἐδεύετο δαιτὸς ἐΐσης.
Iliad 1.469	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Iliad 1.470	κοῦροι μὲν κρητῆρας ἐπεστέψαντο ποτοῖο,
Iliad 1.471	νώμησαν δʼ ἄρα πᾶσιν ἐπαρξάμενοι δεπάεσσιν·
Iliad 1.472	οἳ δὲ πανημέριοι μολπῇ θεὸν ἱλάσκοντο
Iliad 1.473	καλὸν ἀείδοντες παιήονα κοῦροι Ἀχαιῶν
Iliad 1.474	μέλποντες ἑκάεργον· ὃ δὲ φρένα τέρπετʼ ἀκούων.
Iliad 1.475	ἦμος δʼ ἠέλιος κατέδυ καὶ ἐπὶ κνέφας ἦλθε,
Iliad 1.476	δὴ τότε κοιμήσαντο παρὰ πρυμνήσια νηός·
Iliad 1.477	ἦμος δʼ ἠριγένεια φάνη ῥοδοδάκτυλος Ἠώς,
Iliad 1.478	καὶ τότʼ ἔπειτʼ ἀνάγοντο μετὰ στρατὸν εὐρὺν Ἀχαιῶν·
Iliad 1.479	τοῖσιν δʼ ἴκμενον οὖρον ἵει ἑκάεργος Ἀπόλλων·
Iliad 1.480	οἳ δʼ ἱστὸν στήσαντʼ ἀνά θʼ ἱστία λευκὰ πέτασσαν,
Iliad 1.481	ἐν δʼ ἄνεμος πρῆσεν μέσον ἱστίον, ἀμφὶ δὲ κῦμα
Iliad 1.482	στείρῃ πορφύρεον μεγάλʼ ἴαχε νηὸς ἰούσης·
Iliad 1.483	ἣ δʼ ἔθεεν κατὰ κῦμα διαπρήσσουσα κέλευθον.
Iliad 1.484	αὐτὰρ ἐπεί ῥʼ ἵκοντο κατὰ στρατὸν εὐρὺν Ἀχαιῶν,
Iliad 1.485	νῆα μὲν οἵ γε μέλαιναν ἐπʼ ἠπείροιο ἔρυσσαν
Iliad 1.486	ὑψοῦ ἐπὶ ψαμάθοις, ὑπὸ δʼ ἕρματα μακρὰ τάνυσσαν·
Iliad 1.487	αὐτοὶ δʼ ἐσκίδναντο κατὰ κλισίας τε νέας τε.
Iliad 1.488	αὐτὰρ ὃ μήνιε νηυσὶ παρήμενος ὠκυπόροισι
Iliad 1.489	διογενὴς Πηλῆος υἱὸς πόδας ὠκὺς Ἀχιλλεύς·
Iliad 1.490	οὔτέ ποτʼ εἰς ἀγορὴν πωλέσκετο κυδιάνειραν
Iliad 1.491	οὔτέ ποτʼ ἐς πόλεμον, ἀλλὰ φθινύθεσκε φίλον κῆρ
Iliad 1.492	αὖθι μένων, ποθέεσκε δʼ ἀϋτήν τε πτόλεμόν τε.
Iliad 1.493	ἀλλʼ ὅτε δή ῥʼ ἐκ τοῖο δυωδεκάτη γένετʼ ἠώς,
Iliad 1.494	καὶ τότε δὴ πρὸς Ὄλυμπον ἴσαν θεοὶ αἰὲν ἐόντες
Iliad 1.495	πάντες ἅμα, Ζεὺς δʼ ἦρχε· Θέτις δʼ οὐ λήθετʼ ἐφετμέων
Iliad 1.496	παιδὸς ἑοῦ, ἀλλʼ ἥ γʼ ἀνεδύσετο κῦμα θαλάσσης.
Iliad 1.497	ἠερίη δʼ ἀνέβη μέγαν οὐρανὸν Οὔλυμπόν τε.
Iliad 1.498	εὗρεν δʼ εὐρύοπα Κρονίδην ἄτερ ἥμενον ἄλλων
Iliad 1.499	ἀκροτάτῃ κορυφῇ πολυδειράδος Οὐλύμποιο·
Iliad 1.500	καί ῥα πάροιθʼ αὐτοῖο καθέζετο, καὶ λάβε γούνων
Iliad 1.501	σκαιῇ, δεξιτερῇ δʼ ἄρʼ ὑπʼ ἀνθερεῶνος ἑλοῦσα
Iliad 1.502	λισσομένη προσέειπε Δία Κρονίωνα ἄνακτα·
Iliad 1.503	Ζεῦ πάτερ εἴ ποτε δή σε μετʼ ἀθανάτοισιν ὄνησα
Iliad 1.504	ἢ ἔπει ἢ ἔργῳ, τόδε μοι κρήηνον ἐέλδωρ·
Iliad 1.505	τίμησόν μοι υἱὸν ὃς ὠκυμορώτατος ἄλλων
Iliad 1.506	ἔπλετʼ· ἀτάρ μιν νῦν γε ἄναξ ἀνδρῶν Ἀγαμέμνων
Iliad 1.507	ἠτίμησεν· ἑλὼν γὰρ ἔχει γέρας αὐτὸς ἀπούρας.
Iliad 1.508	ἀλλὰ σύ πέρ μιν τῖσον Ὀλύμπιε μητίετα Ζεῦ·
Iliad 1.509	τόφρα δʼ ἐπὶ Τρώεσσι τίθει κράτος ὄφρʼ ἂν Ἀχαιοὶ
Iliad 1.510	υἱὸν ἐμὸν τίσωσιν ὀφέλλωσίν τέ ἑ τιμῇ.
Iliad 1.511	ὣς φάτο· τὴν δʼ οὔ τι προσέφη νεφεληγερέτα Ζεύς,
Iliad 1.512	ἀλλʼ ἀκέων δὴν ἧστο· Θέτις δʼ ὡς ἥψατο γούνων
Iliad 1.513	ὣς ἔχετʼ ἐμπεφυυῖα, καὶ εἴρετο δεύτερον αὖτις·
Iliad 1.514	νημερτὲς μὲν δή μοι ὑπόσχεο καὶ κατάνευσον
Iliad 1.515	ἢ ἀπόειπʼ, ἐπεὶ οὔ τοι ἔπι δέος, ὄφρʼ ἐῢ εἰδέω
Iliad 1.516	ὅσσον ἐγὼ μετὰ πᾶσιν ἀτιμοτάτη θεός εἰμι.
Iliad 1.517	τὴν δὲ μέγʼ ὀχθήσας προσέφη νεφεληγερέτα Ζεύς·
Iliad 1.518	ἦ δὴ λοίγια ἔργʼ ὅ τέ μʼ ἐχθοδοπῆσαι ἐφήσεις
Iliad 1.519	Ἥρῃ ὅτʼ ἄν μʼ ἐρέθῃσιν ὀνειδείοις ἐπέεσσιν·
Iliad 1.520	ἣ δὲ καὶ αὔτως μʼ αἰεὶ ἐν ἀθανάτοισι θεοῖσι
Iliad 1.521	νεικεῖ, καί τέ μέ φησι μάχῃ Τρώεσσιν ἀρήγειν.
Iliad 1.522	ἀλλὰ σὺ μὲν νῦν αὖτις ἀπόστιχε μή τι νοήσῃ
Iliad 1.523	Ἥρη· ἐμοὶ δέ κε ταῦτα μελήσεται ὄφρα τελέσσω·
Iliad 1.524	εἰ δʼ ἄγε τοι κεφαλῇ κατανεύσομαι ὄφρα πεποίθῃς·
Iliad 1.525	τοῦτο γὰρ ἐξ ἐμέθεν γε μετʼ ἀθανάτοισι μέγιστον
Iliad 1.526	τέκμωρ· οὐ γὰρ ἐμὸν παλινάγρετον οὐδʼ ἀπατηλὸν
Iliad 1.527	οὐδʼ ἀτελεύτητον ὅ τί κεν κεφαλῇ κατανεύσω.
Iliad 1.528	ἦ καὶ κυανέῃσιν ἐπʼ ὀφρύσι νεῦσε Κρονίων·
Iliad 1.529	ἀμβρόσιαι δʼ ἄρα χαῖται ἐπερρώσαντο ἄνακτος
Iliad 1.530	κρατὸς ἀπʼ ἀθανάτοιο· μέγαν δʼ ἐλέλιξεν Ὄλυμπον.
Iliad 1.531	τώ γʼ ὣς βουλεύσαντε διέτμαγεν· ἣ μὲν ἔπειτα
Iliad 1.532	εἰς ἅλα ἆλτο βαθεῖαν ἀπʼ αἰγλήεντος Ὀλύμπου,
Iliad 1.533	Ζεὺς δὲ ἑὸν πρὸς δῶμα· θεοὶ δʼ ἅμα πάντες ἀνέσταν
Iliad 1.534	ἐξ ἑδέων σφοῦ πατρὸς ἐναντίον· οὐδέ τις ἔτλη
Iliad 1.535	μεῖναι ἐπερχόμενον, ἀλλʼ ἀντίοι ἔσταν ἅπαντες.
Iliad 1.536	ὣς ὃ μὲν ἔνθα καθέζετʼ ἐπὶ θρόνου· οὐδέ μιν Ἥρη
Iliad 1.537	ἠγνοίησεν ἰδοῦσʼ ὅτι οἱ συμφράσσατο βουλὰς
Iliad 1.538	ἀργυρόπεζα Θέτις θυγάτηρ ἁλίοιο γέροντος.
Iliad 1.539	αὐτίκα κερτομίοισι Δία Κρονίωνα προσηύδα·
Iliad 1.540	τίς δʼ αὖ τοι δολομῆτα θεῶν συμφράσσατο βουλάς;
Iliad 1.541	αἰεί τοι φίλον ἐστὶν ἐμεῦ ἀπὸ νόσφιν ἐόντα
Iliad 1.542	κρυπτάδια φρονέοντα δικαζέμεν· οὐδέ τί πώ μοι
Iliad 1.543	πρόφρων τέτληκας εἰπεῖν ἔπος ὅττι νοήσῃς.
Iliad 1.544	τὴν δʼ ἠμείβετʼ ἔπειτα πατὴρ ἀνδρῶν τε θεῶν τε·
Iliad 1.545	Ἥρη μὴ δὴ πάντας ἐμοὺς ἐπιέλπεο μύθους
Iliad 1.546	εἰδήσειν· χαλεποί τοι ἔσοντʼ ἀλόχῳ περ ἐούσῃ·
Iliad 1.547	ἀλλʼ ὃν μέν κʼ ἐπιεικὲς ἀκουέμεν οὔ τις ἔπειτα
Iliad 1.548	οὔτε θεῶν πρότερος τὸν εἴσεται οὔτʼ ἀνθρώπων·
Iliad 1.549	ὃν δέ κʼ ἐγὼν ἀπάνευθε θεῶν ἐθέλωμι νοῆσαι
Iliad 1.550	μή τι σὺ ταῦτα ἕκαστα διείρεο μηδὲ μετάλλα.
Iliad 1.551	τὸν δʼ ἠμείβετʼ ἔπειτα βοῶπις πότνια Ἥρη·
Iliad 1.552	αἰνότατε Κρονίδη ποῖον τὸν μῦθον ἔειπες;
Iliad 1.553	καὶ λίην σε πάρος γʼ οὔτʼ εἴρομαι οὔτε μεταλλῶ,
Iliad 1.554	ἀλλὰ μάλʼ εὔκηλος τὰ φράζεαι ἅσσʼ ἐθέλῃσθα.
Iliad 1.555	νῦν δʼ αἰνῶς δείδοικα κατὰ φρένα μή σε παρείπῃ
Iliad 1.556	ἀργυρόπεζα Θέτις θυγάτηρ ἁλίοιο γέροντος·
Iliad 1.557	ἠερίη γὰρ σοί γε παρέζετο καὶ λάβε γούνων·
Iliad 1.558	τῇ σʼ ὀΐω κατανεῦσαι ἐτήτυμον ὡς Ἀχιλῆα
Iliad 1.559	τιμήσῃς, ὀλέσῃς δὲ πολέας ἐπὶ νηυσὶν Ἀχαιῶν.
Iliad 1.560	τὴν δʼ ἀπαμειβόμενος προσέφη νεφεληγερέτα Ζεύς·
Iliad 1.561	δαιμονίη αἰεὶ μὲν ὀΐεαι οὐδέ σε λήθω·
Iliad 1.562	πρῆξαι δʼ ἔμπης οὔ τι δυνήσεαι, ἀλλʼ ἀπὸ θυμοῦ
Iliad 1.563	μᾶλλον ἐμοὶ ἔσεαι· τὸ δέ τοι καὶ ῥίγιον ἔσται.
Iliad 1.564	εἰ δʼ οὕτω τοῦτʼ ἐστὶν ἐμοὶ μέλλει φίλον εἶναι·
Iliad 1.565	ἀλλʼ ἀκέουσα κάθησο, ἐμῷ δʼ ἐπιπείθεο μύθῳ,
Iliad 1.566	μή νύ τοι οὐ χραίσμωσιν ὅσοι θεοί εἰσʼ ἐν Ὀλύμπῳ
Iliad 1.567	ἆσσον ἰόνθʼ, ὅτε κέν τοι ἀάπτους χεῖρας ἐφείω.
Iliad 1.568	ὣς ἔφατʼ ἔδεισεν δὲ βοῶπις πότνια Ἥρη,
Iliad 1.569	καί ῥʼ ἀκέουσα καθῆστο ἐπιγνάμψασα φίλον κῆρ·
Iliad 1.570	ὄχθησαν δʼ ἀνὰ δῶμα Διὸς θεοὶ Οὐρανίωνες·
Iliad 1.571	τοῖσιν δʼ Ἥφαιστος κλυτοτέχνης ἦρχʼ ἀγορεύειν
Iliad 1.572	μητρὶ φίλῃ ἐπίηρα φέρων λευκωλένῳ Ἥρῃ·
Iliad 1.573	ἦ δὴ λοίγια ἔργα τάδʼ ἔσσεται οὐδʼ ἔτʼ ἀνεκτά,
Iliad 1.574	εἰ δὴ σφὼ ἕνεκα θνητῶν ἐριδαίνετον ὧδε,
Iliad 1.575	ἐν δὲ θεοῖσι κολῳὸν ἐλαύνετον· οὐδέ τι δαιτὸς
Iliad 1.576	ἐσθλῆς ἔσσεται ἦδος, ἐπεὶ τὰ χερείονα νικᾷ.
Iliad 1.577	μητρὶ δʼ ἐγὼ παράφημι καὶ αὐτῇ περ νοεούσῃ
Iliad 1.578	πατρὶ φίλῳ ἐπίηρα φέρειν Διί, ὄφρα μὴ αὖτε
Iliad 1.579	νεικείῃσι πατήρ, σὺν δʼ ἡμῖν δαῖτα ταράξῃ.
Iliad 1.580	εἴ περ γάρ κʼ ἐθέλῃσιν Ὀλύμπιος ἀστεροπητὴς
Iliad 1.581	ἐξ ἑδέων στυφελίξαι· ὃ γὰρ πολὺ φέρτατός ἐστιν.
Iliad 1.582	ἀλλὰ σὺ τὸν ἐπέεσσι καθάπτεσθαι μαλακοῖσιν·
Iliad 1.583	αὐτίκʼ ἔπειθʼ ἵλαος Ὀλύμπιος ἔσσεται ἡμῖν.
Iliad 1.584	ὣς ἄρʼ ἔφη καὶ ἀναΐξας δέπας ἀμφικύπελλον
Iliad 1.585	μητρὶ φίλῃ ἐν χειρὶ τίθει καί μιν προσέειπε·
Iliad 1.586	τέτλαθι μῆτερ ἐμή, καὶ ἀνάσχεο κηδομένη περ,
Iliad 1.587	μή σε φίλην περ ἐοῦσαν ἐν ὀφθαλμοῖσιν ἴδωμαι
Iliad 1.588	θεινομένην, τότε δʼ οὔ τι δυνήσομαι ἀχνύμενός περ
Iliad 1.589	χραισμεῖν· ἀργαλέος γὰρ Ὀλύμπιος ἀντιφέρεσθαι·
Iliad 1.590	ἤδη γάρ με καὶ ἄλλοτʼ ἀλεξέμεναι μεμαῶτα
Iliad 1.591	ῥῖψε ποδὸς τεταγὼν ἀπὸ βηλοῦ θεσπεσίοιο,
Iliad 1.592	πᾶν δʼ ἦμαρ φερόμην, ἅμα δʼ ἠελίῳ καταδύντι
Iliad 1.593	κάππεσον ἐν Λήμνῳ, ὀλίγος δʼ ἔτι θυμὸς ἐνῆεν·
Iliad 1.594	ἔνθά με Σίντιες ἄνδρες ἄφαρ κομίσαντο πεσόντα.
Iliad 1.595	ὣς φάτο, μείδησεν δὲ θεὰ λευκώλενος Ἥρη,
Iliad 1.596	μειδήσασα δὲ παιδὸς ἐδέξατο χειρὶ κύπελλον·
Iliad 1.597	αὐτὰρ ὃ τοῖς ἄλλοισι θεοῖς ἐνδέξια πᾶσιν
Iliad 1.598	οἰνοχόει γλυκὺ νέκταρ ἀπὸ κρητῆρος ἀφύσσων·
Iliad 1.599	ἄσβεστος δʼ ἄρʼ ἐνῶρτο γέλως μακάρεσσι θεοῖσιν
Iliad 1.600	ὡς ἴδον Ἥφαιστον διὰ δώματα ποιπνύοντα.
Iliad 1.601	ὣς τότε μὲν πρόπαν ἦμαρ ἐς ἠέλιον καταδύντα
Iliad 1.602	δαίνυντʼ, οὐδέ τι θυμὸς ἐδεύετο δαιτὸς ἐΐσης,
Iliad 1.603	οὐ μὲν φόρμιγγος περικαλλέος ἣν ἔχʼ Ἀπόλλων,
Iliad 1.604	Μουσάων θʼ αἳ ἄειδον ἀμειβόμεναι ὀπὶ καλῇ.
Iliad 1.605	αὐτὰρ ἐπεὶ κατέδυ λαμπρὸν φάος ἠελίοιο,
Iliad 1.606	οἳ μὲν κακκείοντες ἔβαν οἶκον δὲ ἕκαστος,
Iliad 1.607	ἧχι ἑκάστῳ δῶμα περικλυτὸς ἀμφιγυήεις
Iliad 1.608	Ἥφαιστος ποίησεν ἰδυίῃσι πραπίδεσσι·
Iliad 1.609	Ζεὺς δὲ πρὸς ὃν λέχος ἤϊʼ Ὀλύμπιος ἀστεροπητής,
Iliad 1.610	ἔνθα πάρος κοιμᾶθʼ ὅτε μιν γλυκὺς ὕπνος ἱκάνοι·
Iliad 1.611	ἔνθα καθεῦδʼ ἀναβάς, παρὰ δὲ χρυσόθρονος Ἥρη.
Iliad 2.1	ἄλλοι μέν ῥα θεοί τε καὶ ἀνέρες ἱπποκορυσταὶ
Iliad 2.2	εὗδον παννύχιοι, Δία δʼ οὐκ ἔχε νήδυμος ὕπνος,
Iliad 2.3	ἀλλʼ ὅ γε μερμήριζε κατὰ φρένα ὡς Ἀχιλῆα
Iliad 2.4	τιμήσῃ, ὀλέσῃ δὲ πολέας ἐπὶ νηυσὶν Ἀχαιῶν.
Iliad 2.5	ἥδε δέ οἱ κατὰ θυμὸν ἀρίστη φαίνετο βουλή,
Iliad 2.6	πέμψαι ἐπʼ Ἀτρεΐδῃ Ἀγαμέμνονι οὖλον ὄνειρον·
Iliad 2.7	καί μιν φωνήσας ἔπεα πτερόεντα προσηύδα·
Iliad 2.8	βάσκʼ ἴθι οὖλε ὄνειρε θοὰς ἐπὶ νῆας Ἀχαιῶν·
Iliad 2.9	ἐλθὼν ἐς κλισίην Ἀγαμέμνονος Ἀτρεΐδαο
Iliad 2.10	πάντα μάλʼ ἀτρεκέως ἀγορευέμεν ὡς ἐπιτέλλω·
Iliad 2.11	θωρῆξαί ἑ κέλευε κάρη κομόωντας Ἀχαιοὺς
Iliad 2.12	πανσυδίῃ· νῦν γάρ κεν ἕλοι πόλιν εὐρυάγυιαν
Iliad 2.13	Τρώων· οὐ γὰρ ἔτʼ ἀμφὶς Ὀλύμπια δώματʼ ἔχοντες
Iliad 2.14	ἀθάνατοι φράζονται· ἐπέγναμψεν γὰρ ἅπαντας
Iliad 2.15	Ἥρη λισσομένη, Τρώεσσι δὲ κήδεʼ ἐφῆπται.
Iliad 2.16	ὣς φάτο, βῆ δʼ ἄρʼ ὄνειρος ἐπεὶ τὸν μῦθον ἄκουσε·
Iliad 2.17	καρπαλίμως δʼ ἵκανε θοὰς ἐπὶ νῆας Ἀχαιῶν,
Iliad 2.18	βῆ δʼ ἄρʼ ἐπʼ Ἀτρεΐδην Ἀγαμέμνονα· τὸν δὲ κίχανεν
Iliad 2.19	εὕδοντʼ ἐν κλισίῃ, περὶ δʼ ἀμβρόσιος κέχυθʼ ὕπνος.
Iliad 2.20	στῆ δʼ ἄρʼ ὑπὲρ κεφαλῆς Νηληΐῳ υἷι ἐοικώς
Iliad 2.21	Νέστορι, τόν ῥα μάλιστα γερόντων τῖʼ Ἀγαμέμνων·
Iliad 2.22	τῷ μιν ἐεισάμενος προσεφώνεε θεῖος ὄνειρος·
Iliad 2.23	εὕδεις Ἀτρέος υἱὲ δαΐφρονος ἱπποδάμοιο·
Iliad 2.24	οὐ χρὴ παννύχιον εὕδειν βουληφόρον ἄνδρα
Iliad 2.25	ᾧ λαοί τʼ ἐπιτετράφαται καὶ τόσσα μέμηλε·
Iliad 2.26	νῦν δʼ ἐμέθεν ξύνες ὦκα· Διὸς δέ τοι ἄγγελός εἰμι,
Iliad 2.27	ὃς σεῦ ἄνευθεν ἐὼν μέγα κήδεται ἠδʼ ἐλεαίρει.
Iliad 2.28	θωρῆξαί σε κέλευσε κάρη κομόωντας Ἀχαιοὺς
Iliad 2.29	πανσυδίῃ· νῦν γάρ κεν ἕλοις πόλιν εὐρυάγυιαν
Iliad 2.30	Τρώων· οὐ γὰρ ἔτʼ ἀμφὶς Ὀλύμπια δώματʼ ἔχοντες
Iliad 2.31	ἀθάνατοι φράζονται· ἐπέγναμψεν γὰρ ἅπαντας
Iliad 2.32	Ἥρη λισσομένη, Τρώεσσι δὲ κήδεʼ ἐφῆπται
Iliad 2.33	ἐκ Διός· ἀλλὰ σὺ σῇσιν ἔχε φρεσί, μηδέ σε λήθη
Iliad 2.34	αἱρείτω εὖτʼ ἄν σε μελίφρων ὕπνος ἀνήῃ.
Iliad 2.35	ὣς ἄρα φωνήσας ἀπεβήσετο, τὸν δὲ λίπʼ αὐτοῦ
Iliad 2.36	τὰ φρονέοντʼ ἀνὰ θυμὸν ἅ ῥʼ οὐ τελέεσθαι ἔμελλον·
Iliad 2.37	φῆ γὰρ ὅ γʼ αἱρήσειν Πριάμου πόλιν ἤματι κείνῳ
Iliad 2.38	νήπιος, οὐδὲ τὰ ᾔδη ἅ ῥα Ζεὺς μήδετο ἔργα·
Iliad 2.39	θήσειν γὰρ ἔτʼ ἔμελλεν ἐπʼ ἄλγεά τε στοναχάς τε
Iliad 2.40	Τρωσί τε καὶ Δαναοῖσι διὰ κρατερὰς ὑσμίνας.
Iliad 2.41	ἔγρετο δʼ ἐξ ὕπνου, θείη δέ μιν ἀμφέχυτʼ ὀμφή·
Iliad 2.42	ἕζετο δʼ ὀρθωθείς, μαλακὸν δʼ ἔνδυνε χιτῶνα
Iliad 2.43	καλὸν νηγάτεον, περὶ δὲ μέγα βάλλετο φᾶρος·
Iliad 2.44	ποσσὶ δʼ ὑπὸ λιπαροῖσιν ἐδήσατο καλὰ πέδιλα,
Iliad 2.45	ἀμφὶ δʼ ἄρʼ ὤμοισιν βάλετο ξίφος ἀργυρόηλον·
Iliad 2.46	εἵλετο δὲ σκῆπτρον πατρώϊον ἄφθιτον αἰεὶ
Iliad 2.47	σὺν τῷ ἔβη κατὰ νῆας Ἀχαιῶν χαλκοχιτώνων·
Iliad 2.48	ἠὼς μέν ῥα θεὰ προσεβήσετο μακρὸν Ὄλυμπον
Iliad 2.49	Ζηνὶ φόως ἐρέουσα καὶ ἄλλοις ἀθανάτοισιν·
Iliad 2.50	αὐτὰρ ὃ κηρύκεσσι λιγυφθόγγοισι κέλευσε
Iliad 2.51	κηρύσσειν ἀγορὴν δὲ κάρη κομόωντας Ἀχαιούς·
Iliad 2.52	οἳ μὲν ἐκήρυσσον, τοὶ δʼ ἠγείροντο μάλʼ ὦκα·
Iliad 2.53	βουλὴν δὲ πρῶτον μεγαθύμων ἷζε γερόντων
Iliad 2.54	Νεστορέῃ παρὰ νηῒ Πυλοιγενέος βασιλῆος·
Iliad 2.55	τοὺς ὅ γε συγκαλέσας πυκινὴν ἀρτύνετο βουλήν·
Iliad 2.56	κλῦτε φίλοι· θεῖός μοι ἐνύπνιον ἦλθεν ὄνειρος
Iliad 2.57	ἀμβροσίην διὰ νύκτα· μάλιστα δὲ Νέστορι δίῳ
Iliad 2.58	εἶδός τε μέγεθός τε φυήν τʼ ἄγχιστα ἐῴκει·
Iliad 2.59	στῆ δʼ ἄρʼ ὑπὲρ κεφαλῆς καί με πρὸς μῦθον ἔειπεν·
Iliad 2.60	εὕδεις Ἀτρέος υἱὲ δαΐφρονος ἱπποδάμοιο·
Iliad 2.61	οὐ χρὴ παννύχιον εὕδειν βουληφόρον ἄνδρα,
Iliad 2.62	ᾧ λαοί τʼ ἐπιτετράφαται καὶ τόσσα μέμηλε·
Iliad 2.63	νῦν δʼ ἐμέθεν ξύνες ὦκα· Διὸς δέ τοι ἄγγελός εἰμι,
Iliad 2.64	ὃς σεῦ ἄνευθεν ἐὼν μέγα κήδεται ἠδʼ ἐλεαίρει·
Iliad 2.65	θωρῆξαί σε κέλευσε κάρη κομόωντας Ἀχαιοὺς
Iliad 2.66	πανσυδίῃ· νῦν γάρ κεν ἕλοις πόλιν εὐρυάγυιαν
Iliad 2.67	Τρώων· οὐ γὰρ ἔτʼ ἀμφὶς Ὀλύμπια δώματʼ ἔχοντες
Iliad 2.68	ἀθάνατοι φράζονται· ἐπέγναμψεν γὰρ ἅπαντας
Iliad 2.69	Ἥρη λισσομένη, Τρώεσσι δὲ κήδεʼ ἐφῆπται
Iliad 2.70	ἐκ Διός· ἀλλὰ σὺ σῇσιν ἔχε φρεσίν· ὣς ὃ μὲν εἰπὼν
Iliad 2.71	ᾤχετʼ ἀποπτάμενος, ἐμὲ δὲ γλυκὺς ὕπνος ἀνῆκεν.
Iliad 2.72	ἀλλʼ ἄγετʼ αἴ κέν πως θωρήξομεν υἷας Ἀχαιῶν·
Iliad 2.73	πρῶτα δʼ ἐγὼν ἔπεσιν πειρήσομαι, ἣ θέμις ἐστί,
Iliad 2.74	καὶ φεύγειν σὺν νηυσὶ πολυκλήϊσι κελεύσω·
Iliad 2.75	ὑμεῖς δʼ ἄλλοθεν ἄλλος ἐρητύειν ἐπέεσσιν.
Iliad 2.76	ἤτοι ὅ γʼ ὣς εἰπὼν κατʼ ἄρʼ ἕζετο, τοῖσι δʼ ἀνέστη
Iliad 2.77	Νέστωρ, ὅς ῥα Πύλοιο ἄναξ ἦν ἠμαθόεντος,
Iliad 2.78	ὅ σφιν ἐὺ φρονέων ἀγορήσατο καὶ μετέειπεν·
Iliad 2.79	ὦ φίλοι Ἀργείων ἡγήτορες ἠδὲ μέδοντες
Iliad 2.80	εἰ μέν τις τὸν ὄνειρον Ἀχαιῶν ἄλλος ἔνισπε
Iliad 2.81	ψεῦδός κεν φαῖμεν καὶ νοσφιζοίμεθα μᾶλλον·
Iliad 2.82	νῦν δʼ ἴδεν ὃς μέγʼ ἄριστος Ἀχαιῶν εὔχεται εἶναι·
Iliad 2.83	ἀλλʼ ἄγετʼ αἴ κέν πως θωρήξομεν υἷας Ἀχαιῶν.
Iliad 2.84	ὣς ἄρα φωνήσας βουλῆς ἐξῆρχε νέεσθαι,
Iliad 2.85	οἳ δʼ ἐπανέστησαν πείθοντό τε ποιμένι λαῶν
Iliad 2.86	σκηπτοῦχοι βασιλῆες· ἐπεσσεύοντο δὲ λαοί.
Iliad 2.87	ἠΰτε ἔθνεα εἶσι μελισσάων ἁδινάων
Iliad 2.88	πέτρης ἐκ γλαφυρῆς αἰεὶ νέον ἐρχομενάων,
Iliad 2.89	βοτρυδὸν δὲ πέτονται ἐπʼ ἄνθεσιν εἰαρινοῖσιν·
Iliad 2.90	αἳ μέν τʼ ἔνθα ἅλις πεποτήαται, αἳ δέ τε ἔνθα·
Iliad 2.91	ὣς τῶν ἔθνεα πολλὰ νεῶν ἄπο καὶ κλισιάων
Iliad 2.92	ἠϊόνος προπάροιθε βαθείης ἐστιχόωντο
Iliad 2.93	ἰλαδὸν εἰς ἀγορήν· μετὰ δέ σφισιν ὄσσα δεδήει
Iliad 2.94	ὀτρύνουσʼ ἰέναι Διὸς ἄγγελος· οἳ δʼ ἀγέροντο.
Iliad 2.95	τετρήχει δʼ ἀγορή, ὑπὸ δὲ στεναχίζετο γαῖα
Iliad 2.96	λαῶν ἱζόντων, ὅμαδος δʼ ἦν· ἐννέα δέ σφεας
Iliad 2.97	κήρυκες βοόωντες ἐρήτυον, εἴ ποτʼ ἀϋτῆς
Iliad 2.98	σχοίατʼ, ἀκούσειαν δὲ διοτρεφέων βασιλήων.
Iliad 2.99	σπουδῇ δʼ ἕζετο λαός, ἐρήτυθεν δὲ καθʼ ἕδρας
Iliad 2.100	παυσάμενοι κλαγγῆς· ἀνὰ δὲ κρείων Ἀγαμέμνων
Iliad 2.101	ἔστη σκῆπτρον ἔχων τὸ μὲν Ἥφαιστος κάμε τεύχων.
Iliad 2.102	Ἥφαιστος μὲν δῶκε Διὶ Κρονίωνι ἄνακτι,
Iliad 2.103	αὐτὰρ ἄρα Ζεὺς δῶκε διακτόρῳ ἀργεϊφόντῃ·
Iliad 2.104	Ἑρμείας δὲ ἄναξ δῶκεν Πέλοπι πληξίππῳ,
Iliad 2.105	αὐτὰρ ὃ αὖτε Πέλοψ δῶκʼ Ἀτρέϊ ποιμένι λαῶν,
Iliad 2.106	Ἀτρεὺς δὲ θνῄσκων ἔλιπεν πολύαρνι Θυέστῃ,
Iliad 2.107	αὐτὰρ ὃ αὖτε Θυέστʼ Ἀγαμέμνονι λεῖπε φορῆναι,
Iliad 2.108	πολλῇσιν νήσοισι καὶ Ἄργεϊ παντὶ ἀνάσσειν.
Iliad 2.109	τῷ ὅ γʼ ἐρεισάμενος ἔπεʼ Ἀργείοισι μετηύδα·
Iliad 2.110	ὦ φίλοι ἥρωες Δαναοὶ θεράποντες Ἄρηος
Iliad 2.111	Ζεύς με μέγα Κρονίδης ἄτῃ ἐνέδησε βαρείῃ,
Iliad 2.112	σχέτλιος, ὃς πρὶν μέν μοι ὑπέσχετο καὶ κατένευσεν
Iliad 2.113	Ἴλιον ἐκπέρσαντʼ εὐτείχεον ἀπονέεσθαι,
Iliad 2.114	νῦν δὲ κακὴν ἀπάτην βουλεύσατο, καί με κελεύει
Iliad 2.115	δυσκλέα Ἄργος ἱκέσθαι, ἐπεὶ πολὺν ὤλεσα λαόν.
Iliad 2.116	οὕτω που Διὶ μέλλει ὑπερμενέϊ φίλον εἶναι,
Iliad 2.117	ὃς δὴ πολλάων πολίων κατέλυσε κάρηνα
Iliad 2.118	ἠδʼ ἔτι καὶ λύσει· τοῦ γὰρ κράτος ἐστὶ μέγιστον.
Iliad 2.119	αἰσχρὸν γὰρ τόδε γʼ ἐστὶ καὶ ἐσσομένοισι πυθέσθαι
Iliad 2.120	μὰψ οὕτω τοιόνδε τοσόνδε τε λαὸν Ἀχαιῶν
Iliad 2.121	ἄπρηκτον πόλεμον πολεμίζειν ἠδὲ μάχεσθαι
Iliad 2.122	ἀνδράσι παυροτέροισι, τέλος δʼ οὔ πώ τι πέφανται·
Iliad 2.123	εἴ περ γάρ κʼ ἐθέλοιμεν Ἀχαιοί τε Τρῶές τε
Iliad 2.124	ὅρκια πιστὰ ταμόντες ἀριθμηθήμεναι ἄμφω,
Iliad 2.125	Τρῶας μὲν λέξασθαι ἐφέστιοι ὅσσοι ἔασιν,
Iliad 2.126	ἡμεῖς δʼ ἐς δεκάδας διακοσμηθεῖμεν Ἀχαιοί,
Iliad 2.127	Τρώων δʼ ἄνδρα ἕκαστοι ἑλοίμεθα οἰνοχοεύειν,
Iliad 2.128	πολλαί κεν δεκάδες δευοίατο οἰνοχόοιο.
Iliad 2.129	τόσσον ἐγώ φημι πλέας ἔμμεναι υἷας Ἀχαιῶν
Iliad 2.130	Τρώων, οἳ ναίουσι κατὰ πτόλιν· ἀλλʼ ἐπίκουροι
Iliad 2.131	πολλέων ἐκ πολίων ἐγχέσπαλοι ἄνδρες ἔασιν,
Iliad 2.132	οἵ με μέγα πλάζουσι καὶ οὐκ εἰῶσʼ ἐθέλοντα
Iliad 2.133	Ἰλίου ἐκπέρσαι εὖ ναιόμενον πτολίεθρον.
Iliad 2.134	ἐννέα δὴ βεβάασι Διὸς μεγάλου ἐνιαυτοί,
Iliad 2.135	καὶ δὴ δοῦρα σέσηπε νεῶν καὶ σπάρτα λέλυνται·
Iliad 2.136	αἳ δέ που ἡμέτεραί τʼ ἄλοχοι καὶ νήπια τέκνα
Iliad 2.137	εἵατʼ ἐνὶ μεγάροις ποτιδέγμεναι· ἄμμι δὲ ἔργον
Iliad 2.138	αὔτως ἀκράαντον οὗ εἵνεκα δεῦρʼ ἱκόμεσθα.
Iliad 2.139	ἀλλʼ ἄγεθʼ ὡς ἂν ἐγὼ εἴπω πειθώμεθα πάντες·
Iliad 2.140	φεύγωμεν σὺν νηυσὶ φίλην ἐς πατρίδα γαῖαν·
Iliad 2.141	οὐ γὰρ ἔτι Τροίην αἱρήσομεν εὐρυάγυιαν.
Iliad 2.142	ὣς φάτο, τοῖσι δὲ θυμὸν ἐνὶ στήθεσσιν ὄρινε
Iliad 2.143	πᾶσι μετὰ πληθὺν ὅσοι οὐ βουλῆς ἐπάκουσαν·
Iliad 2.144	κινήθη δʼ ἀγορὴ φὴ κύματα μακρὰ θαλάσσης
Iliad 2.145	πόντου Ἰκαρίοιο, τὰ μέν τʼ Εὖρός τε Νότος τε
Iliad 2.146	ὤρορʼ ἐπαΐξας πατρὸς Διὸς ἐκ νεφελάων.
Iliad 2.147	ὡς δʼ ὅτε κινήσῃ Ζέφυρος βαθὺ λήϊον ἐλθὼν
Iliad 2.148	λάβρος ἐπαιγίζων, ἐπί τʼ ἠμύει ἀσταχύεσσιν,
Iliad 2.149	ὣς τῶν πᾶσʼ ἀγορὴ κινήθη· τοὶ δʼ ἀλαλητῷ
Iliad 2.150	νῆας ἔπʼ ἐσσεύοντο, ποδῶν δʼ ὑπένερθε κονίη
Iliad 2.151	ἵστατʼ ἀειρομένη· τοὶ δʼ ἀλλήλοισι κέλευον
Iliad 2.152	ἅπτεσθαι νηῶν ἠδʼ ἑλκέμεν εἰς ἅλα δῖαν,
Iliad 2.153	οὐρούς τʼ ἐξεκάθαιρον· ἀϋτὴ δʼ οὐρανὸν ἷκεν
Iliad 2.154	οἴκαδε ἱεμένων· ὑπὸ δʼ ᾕρεον ἕρματα νηῶν.
Iliad 2.155	ἔνθά κεν Ἀργείοισιν ὑπέρμορα νόστος ἐτύχθη
Iliad 2.156	εἰ μὴ Ἀθηναίην Ἥρη πρὸς μῦθον ἔειπεν·
Iliad 2.157	ὢ πόποι αἰγιόχοιο Διὸς τέκος Ἀτρυτώνη,
Iliad 2.158	οὕτω δὴ οἶκον δὲ φίλην ἐς πατρίδα γαῖαν
Iliad 2.159	Ἀργεῖοι φεύξονται ἐπʼ εὐρέα νῶτα θαλάσσης,
Iliad 2.160	κὰδ δέ κεν εὐχωλὴν Πριάμῳ καὶ Τρωσὶ λίποιεν
Iliad 2.161	Ἀργείην Ἑλένην, ἧς εἵνεκα πολλοὶ Ἀχαιῶν
Iliad 2.162	ἐν Τροίῃ ἀπόλοντο φίλης ἀπὸ πατρίδος αἴης·
Iliad 2.163	ἀλλʼ ἴθι νῦν κατὰ λαὸν Ἀχαιῶν χαλκοχιτώνων·
Iliad 2.164	σοῖς ἀγανοῖς ἐπέεσσιν ἐρήτυε φῶτα ἕκαστον,
Iliad 2.165	μηδὲ ἔα νῆας ἅλα δʼ ἑλκέμεν ἀμφιελίσσας.
Iliad 2.166	ὣς ἔφατʼ, οὐδʼ ἀπίθησε θεὰ γλαυκῶπις Ἀθήνη,
Iliad 2.167	βῆ δὲ κατʼ Οὐλύμποιο καρήνων ἀΐξασα·
Iliad 2.168	καρπαλίμως δʼ ἵκανε θοὰς ἐπὶ νῆας Ἀχαιῶν.
Iliad 2.169	εὗρεν ἔπειτʼ Ὀδυσῆα Διὶ μῆτιν ἀτάλαντον
Iliad 2.170	ἑσταότʼ· οὐδʼ ὅ γε νηὸς ἐϋσσέλμοιο μελαίνης
Iliad 2.171	ἅπτετʼ, ἐπεί μιν ἄχος κραδίην καὶ θυμὸν ἵκανεν·
Iliad 2.172	ἀγχοῦ δʼ ἱσταμένη προσέφη γλαυκῶπις Ἀθήνη·
Iliad 2.173	διογενὲς Λαερτιάδη πολυμήχανʼ Ὀδυσσεῦ,
Iliad 2.174	οὕτω δὴ οἶκον δὲ φίλην ἐς πατρίδα γαῖαν
Iliad 2.175	φεύξεσθʼ ἐν νήεσσι πολυκλήϊσι πεσόντες,
Iliad 2.176	κὰδ δέ κεν εὐχωλὴν Πριάμῳ καὶ Τρωσὶ λίποιτε
Iliad 2.177	Ἀργείην Ἑλένην, ἧς εἵνεκα πολλοὶ Ἀχαιῶν
Iliad 2.178	ἐν Τροίῃ ἀπόλοντο φίλης ἀπὸ πατρίδος αἴης;
Iliad 2.179	ἀλλʼ ἴθι νῦν κατὰ λαὸν Ἀχαιῶν, μηδʼ ἔτʼ ἐρώει,
Iliad 2.180	σοῖς δʼ ἀγανοῖς ἐπέεσσιν ἐρήτυε φῶτα ἕκαστον,
Iliad 2.181	μηδὲ ἔα νῆας ἅλα δʼ ἑλκέμεν ἀμφιελίσσας.
Iliad 2.182	ὣς φάθʼ, ὃ δὲ ξυνέηκε θεᾶς ὄπα φωνησάσης,
Iliad 2.183	βῆ δὲ θέειν, ἀπὸ δὲ χλαῖναν βάλε· τὴν δὲ κόμισσε
Iliad 2.184	κῆρυξ Εὐρυβάτης Ἰθακήσιος ὅς οἱ ὀπήδει·
Iliad 2.185	αὐτὸς δʼ Ἀτρεΐδεω Ἀγαμέμνονος ἀντίος ἐλθὼν
Iliad 2.186	δέξατό οἱ σκῆπτρον πατρώϊον ἄφθιτον αἰεί·
Iliad 2.187	σὺν τῷ ἔβη κατὰ νῆας Ἀχαιῶν χαλκοχιτώνων.
Iliad 2.188	ὅν τινα μὲν βασιλῆα καὶ ἔξοχον ἄνδρα κιχείη
Iliad 2.189	τὸν δʼ ἀγανοῖς ἐπέεσσιν ἐρητύσασκε παραστάς·
Iliad 2.190	δαιμόνιʼ οὔ σε ἔοικε κακὸν ὣς δειδίσσεσθαι,
Iliad 2.191	ἀλλʼ αὐτός τε κάθησο καὶ ἄλλους ἵδρυε λαούς·
Iliad 2.192	οὐ γάρ πω σάφα οἶσθʼ οἷος νόος Ἀτρεΐωνος·
Iliad 2.193	νῦν μὲν πειρᾶται, τάχα δʼ ἴψεται υἷας Ἀχαιῶν.
Iliad 2.194	ἐν βουλῇ δʼ οὐ πάντες ἀκούσαμεν οἷον ἔειπε.
Iliad 2.195	μή τι χολωσάμενος ῥέξῃ κακὸν υἷας Ἀχαιῶν·
Iliad 2.196	θυμὸς δὲ μέγας ἐστὶ διοτρεφέων βασιλήων,
Iliad 2.197	τιμὴ δʼ ἐκ Διός ἐστι, φιλεῖ δέ ἑ μητίετα Ζεύς.
Iliad 2.198	ὃν δʼ αὖ δήμου τʼ ἄνδρα ἴδοι βοόωντά τʼ ἐφεύροι,
Iliad 2.199	τὸν σκήπτρῳ ἐλάσασκεν ὁμοκλήσασκέ τε μύθῳ·
Iliad 2.200	δαιμόνιʼ ἀτρέμας ἧσο καὶ ἄλλων μῦθον ἄκουε,
Iliad 2.201	οἳ σέο φέρτεροί εἰσι, σὺ δʼ ἀπτόλεμος καὶ ἄναλκις
Iliad 2.202	οὔτέ ποτʼ ἐν πολέμῳ ἐναρίθμιος οὔτʼ ἐνὶ βουλῇ·
Iliad 2.203	οὐ μέν πως πάντες βασιλεύσομεν ἐνθάδʼ Ἀχαιοί·
Iliad 2.204	οὐκ ἀγαθὸν πολυκοιρανίη· εἷς κοίρανος ἔστω,
Iliad 2.205	εἷς βασιλεύς, ᾧ δῶκε Κρόνου πάϊς ἀγκυλομήτεω
Iliad 2.206	σκῆπτρόν τʼ ἠδὲ θέμιστας, ἵνά σφισι βουλεύῃσι.
Iliad 2.207	ὣς ὅ γε κοιρανέων δίεπε στρατόν· οἳ δʼ ἀγορὴν δὲ
Iliad 2.208	αὖτις ἐπεσσεύοντο νεῶν ἄπο καὶ κλισιάων
Iliad 2.209	ἠχῇ, ὡς ὅτε κῦμα πολυφλοίσβοιο θαλάσσης
Iliad 2.210	αἰγιαλῷ μεγάλῳ βρέμεται, σμαραγεῖ δέ τε πόντος.
Iliad 2.211	ἄλλοι μέν ῥʼ ἕζοντο, ἐρήτυθεν δὲ καθʼ ἕδρας·
Iliad 2.212	Θερσίτης δʼ ἔτι μοῦνος ἀμετροεπὴς ἐκολῴα,
Iliad 2.213	ὃς ἔπεα φρεσὶν ᾗσιν ἄκοσμά τε πολλά τε ᾔδη
Iliad 2.214	μάψ, ἀτὰρ οὐ κατὰ κόσμον, ἐριζέμεναι βασιλεῦσιν,
Iliad 2.215	ἀλλʼ ὅ τι οἱ εἴσαιτο γελοίϊον Ἀργείοισιν
Iliad 2.216	ἔμμεναι· αἴσχιστος δὲ ἀνὴρ ὑπὸ Ἴλιον ἦλθε·
Iliad 2.217	φολκὸς ἔην, χωλὸς δʼ ἕτερον πόδα· τὼ δέ οἱ ὤμω
Iliad 2.218	κυρτὼ ἐπὶ στῆθος συνοχωκότε· αὐτὰρ ὕπερθε
Iliad 2.219	φοξὸς ἔην κεφαλήν, ψεδνὴ δʼ ἐπενήνοθε λάχνη.
Iliad 2.220	ἔχθιστος δʼ Ἀχιλῆϊ μάλιστʼ ἦν ἠδʼ Ὀδυσῆϊ·
Iliad 2.221	τὼ γὰρ νεικείεσκε· τότʼ αὖτʼ Ἀγαμέμνονι δίῳ
Iliad 2.222	ὀξέα κεκλήγων λέγʼ ὀνείδεα· τῷ δʼ ἄρʼ Ἀχαιοὶ
Iliad 2.223	ἐκπάγλως κοτέοντο νεμέσσηθέν τʼ ἐνὶ θυμῷ.
Iliad 2.224	αὐτὰρ ὃ μακρὰ βοῶν Ἀγαμέμνονα νείκεε μύθῳ·
Iliad 2.225	Ἀτρεΐδη τέο δʼ αὖτʼ ἐπιμέμφεαι ἠδὲ χατίζεις;
Iliad 2.226	πλεῖαί τοι χαλκοῦ κλισίαι, πολλαὶ δὲ γυναῖκες
Iliad 2.227	εἰσὶν ἐνὶ κλισίῃς ἐξαίρετοι, ἅς τοι Ἀχαιοὶ
Iliad 2.228	πρωτίστῳ δίδομεν εὖτʼ ἂν πτολίεθρον ἕλωμεν.
Iliad 2.229	ἦ ἔτι καὶ χρυσοῦ ἐπιδεύεαι, ὅν κέ τις οἴσει
Iliad 2.230	Τρώων ἱπποδάμων ἐξ Ἰλίου υἷος ἄποινα,
Iliad 2.231	ὅν κεν ἐγὼ δήσας ἀγάγω ἢ ἄλλος Ἀχαιῶν,
Iliad 2.232	ἠὲ γυναῖκα νέην, ἵνα μίσγεαι ἐν φιλότητι,
Iliad 2.233	ἥν τʼ αὐτὸς ἀπονόσφι κατίσχεαι; οὐ μὲν ἔοικεν
Iliad 2.234	ἀρχὸν ἐόντα κακῶν ἐπιβασκέμεν υἷας Ἀχαιῶν.
Iliad 2.235	ὦ πέπονες κάκʼ ἐλέγχεʼ Ἀχαιΐδες οὐκέτʼ Ἀχαιοὶ
Iliad 2.236	οἴκαδέ περ σὺν νηυσὶ νεώμεθα, τόνδε δʼ ἐῶμεν
Iliad 2.237	αὐτοῦ ἐνὶ Τροίῃ γέρα πεσσέμεν, ὄφρα ἴδηται
Iliad 2.238	ἤ ῥά τί οἱ χἠμεῖς προσαμύνομεν ἦε καὶ οὐκί·
Iliad 2.239	ὃς καὶ νῦν Ἀχιλῆα ἕο μέγʼ ἀμείνονα φῶτα
Iliad 2.240	ἠτίμησεν· ἑλὼν γὰρ ἔχει γέρας αὐτὸς ἀπούρας.
Iliad 2.241	ἀλλὰ μάλʼ οὐκ Ἀχιλῆϊ χόλος φρεσίν, ἀλλὰ μεθήμων·
Iliad 2.242	ἦ γὰρ ἂν Ἀτρεΐδη νῦν ὕστατα λωβήσαιο·
Iliad 2.243	ὣς φάτο νεικείων Ἀγαμέμνονα ποιμένα λαῶν,
Iliad 2.244	Θερσίτης· τῷ δʼ ὦκα παρίστατο δῖος Ὀδυσσεύς,
Iliad 2.245	καί μιν ὑπόδρα ἰδὼν χαλεπῷ ἠνίπαπε μύθῳ·
Iliad 2.246	Θερσῖτʼ ἀκριτόμυθε, λιγύς περ ἐὼν ἀγορητής,
Iliad 2.247	ἴσχεο, μηδʼ ἔθελʼ οἶος ἐριζέμεναι βασιλεῦσιν·
Iliad 2.248	οὐ γὰρ ἐγὼ σέο φημὶ χερειότερον βροτὸν ἄλλον
Iliad 2.249	ἔμμεναι, ὅσσοι ἅμʼ Ἀτρεΐδῃς ὑπὸ Ἴλιον ἦλθον.
Iliad 2.250	τὼ οὐκ ἂν βασιλῆας ἀνὰ στόμʼ ἔχων ἀγορεύοις,
Iliad 2.251	καί σφιν ὀνείδεά τε προφέροις, νόστόν τε φυλάσσοις.
Iliad 2.252	οὐδέ τί πω σάφα ἴδμεν ὅπως ἔσται τάδε ἔργα,
Iliad 2.253	ἢ εὖ ἦε κακῶς νοστήσομεν υἷες Ἀχαιῶν.
Iliad 2.254	τὼ νῦν Ἀτρεΐδῃ Ἀγαμέμνονι ποιμένι λαῶν
Iliad 2.255	ἧσαι ὀνειδίζων, ὅτι οἱ μάλα πολλὰ διδοῦσιν
Iliad 2.256	ἥρωες Δαναοί· σὺ δὲ κερτομέων ἀγορεύεις.
Iliad 2.257	ἀλλʼ ἔκ τοι ἐρέω, τὸ δὲ καὶ τετελεσμένον ἔσται·
Iliad 2.258	εἴ κʼ ἔτι σʼ ἀφραίνοντα κιχήσομαι ὥς νύ περ ὧδε,
Iliad 2.259	μηκέτʼ ἔπειτʼ Ὀδυσῆϊ κάρη ὤμοισιν ἐπείη,
Iliad 2.260	μηδʼ ἔτι Τηλεμάχοιο πατὴρ κεκλημένος εἴην,
Iliad 2.261	εἰ μὴ ἐγώ σε λαβὼν ἀπὸ μὲν φίλα εἵματα δύσω,
Iliad 2.262	χλαῖνάν τʼ ἠδὲ χιτῶνα, τά τʼ αἰδῶ ἀμφικαλύπτει,
Iliad 2.263	αὐτὸν δὲ κλαίοντα θοὰς ἐπὶ νῆας ἀφήσω
Iliad 2.264	πεπλήγων ἀγορῆθεν ἀεικέσσι πληγῇσιν.
Iliad 2.265	ὣς ἄρʼ ἔφη, σκήπτρῳ δὲ μετάφρενον ἠδὲ καὶ ὤμω
Iliad 2.266	πλῆξεν· ὃ δʼ ἰδνώθη, θαλερὸν δέ οἱ ἔκπεσε δάκρυ·
Iliad 2.267	σμῶδιξ δʼ αἱματόεσσα μεταφρένου ἐξυπανέστη
Iliad 2.268	σκήπτρου ὕπο χρυσέου· ὃ δʼ ἄρʼ ἕζετο τάρβησέν τε,
Iliad 2.269	ἀλγήσας δʼ ἀχρεῖον ἰδὼν ἀπομόρξατο δάκρυ.
Iliad 2.270	οἳ δὲ καὶ ἀχνύμενοί περ ἐπʼ αὐτῷ ἡδὺ γέλασσαν·
Iliad 2.271	ὧδε δέ τις εἴπεσκεν ἰδὼν ἐς πλησίον ἄλλον·
Iliad 2.272	ὢ πόποι ἦ δὴ μυρίʼ Ὀδυσσεὺς ἐσθλὰ ἔοργε
Iliad 2.273	βουλάς τʼ ἐξάρχων ἀγαθὰς πόλεμόν τε κορύσσων·
Iliad 2.274	νῦν δὲ τόδε μέγʼ ἄριστον ἐν Ἀργείοισιν ἔρεξεν,
Iliad 2.275	ὃς τὸν λωβητῆρα ἐπεσβόλον ἔσχʼ ἀγοράων.
Iliad 2.276	οὔ θήν μιν πάλιν αὖτις ἀνήσει θυμὸς ἀγήνωρ
Iliad 2.277	νεικείειν βασιλῆας ὀνειδείοις ἐπέεσσιν.
Iliad 2.278	ὣς φάσαν ἣ πληθύς· ἀνὰ δʼ ὃ πτολίπορθος Ὀδυσσεὺς
Iliad 2.279	ἔστη σκῆπτρον ἔχων· παρὰ δὲ γλαυκῶπις Ἀθήνη
Iliad 2.280	εἰδομένη κήρυκι σιωπᾶν λαὸν ἀνώγει,
Iliad 2.281	ὡς ἅμα θʼ οἳ πρῶτοί τε καὶ ὕστατοι υἷες Ἀχαιῶν
Iliad 2.282	μῦθον ἀκούσειαν καὶ ἐπιφρασσαίατο βουλήν·
Iliad 2.283	ὅ σφιν ἐὺ φρονέων ἀγορήσατο καὶ μετέειπεν·
Iliad 2.284	Ἀτρεΐδη νῦν δή σε ἄναξ ἐθέλουσιν Ἀχαιοὶ
Iliad 2.285	πᾶσιν ἐλέγχιστον θέμεναι μερόπεσσι βροτοῖσιν,
Iliad 2.286	οὐδέ τοι ἐκτελέουσιν ὑπόσχεσιν ἥν περ ὑπέσταν
Iliad 2.287	ἐνθάδʼ ἔτι στείχοντες ἀπʼ Ἄργεος ἱπποβότοιο
Iliad 2.288	Ἴλιον ἐκπέρσαντʼ εὐτείχεον ἀπονέεσθαι.
Iliad 2.289	ὥς τε γὰρ ἢ παῖδες νεαροὶ χῆραί τε γυναῖκες
Iliad 2.290	ἀλλήλοισιν ὀδύρονται οἶκον δὲ νέεσθαι.
Iliad 2.291	ἦ μὴν καὶ πόνος ἐστὶν ἀνιηθέντα νέεσθαι·
Iliad 2.292	καὶ γάρ τίς θʼ ἕνα μῆνα μένων ἀπὸ ἧς ἀλόχοιο
Iliad 2.293	ἀσχαλάᾳ σὺν νηῒ πολυζύγῳ, ὅν περ ἄελλαι
Iliad 2.294	χειμέριαι εἰλέωσιν ὀρινομένη τε θάλασσα·
Iliad 2.295	ἡμῖν δʼ εἴνατός ἐστι περιτροπέων ἐνιαυτὸς
Iliad 2.296	ἐνθάδε μιμνόντεσσι· τὼ οὐ νεμεσίζομʼ Ἀχαιοὺς
Iliad 2.297	ἀσχαλάαν παρὰ νηυσὶ κορωνίσιν· ἀλλὰ καὶ ἔμπης
Iliad 2.298	αἰσχρόν τοι δηρόν τε μένειν κενεόν τε νέεσθαι.
Iliad 2.299	τλῆτε φίλοι, καὶ μείνατʼ ἐπὶ χρόνον ὄφρα δαῶμεν
Iliad 2.300	ἢ ἐτεὸν Κάλχας μαντεύεται ἦε καὶ οὐκί.
Iliad 2.301	εὖ γὰρ δὴ τόδε ἴδμεν ἐνὶ φρεσίν, ἐστὲ δὲ πάντες
Iliad 2.302	μάρτυροι, οὓς μὴ κῆρες ἔβαν θανάτοιο φέρουσαι·
Iliad 2.303	χθιζά τε καὶ πρωΐζʼ ὅτʼ ἐς Αὐλίδα νῆες Ἀχαιῶν
Iliad 2.304	ἠγερέθοντο κακὰ Πριάμῳ καὶ Τρωσὶ φέρουσαι,
Iliad 2.305	ἡμεῖς δʼ ἀμφὶ περὶ κρήνην ἱεροὺς κατὰ βωμοὺς
Iliad 2.306	ἕρδομεν ἀθανάτοισι τεληέσσας ἑκατόμβας
Iliad 2.307	καλῇ ὑπὸ πλατανίστῳ ὅθεν ῥέεν ἀγλαὸν ὕδωρ·
Iliad 2.308	ἔνθʼ ἐφάνη μέγα σῆμα· δράκων ἐπὶ νῶτα δαφοινὸς
Iliad 2.309	σμερδαλέος, τόν ῥʼ αὐτὸς Ὀλύμπιος ἧκε φόως δέ,
Iliad 2.310	βωμοῦ ὑπαΐξας πρός ῥα πλατάνιστον ὄρουσεν.
Iliad 2.311	ἔνθα δʼ ἔσαν στρουθοῖο νεοσσοί, νήπια τέκνα,
Iliad 2.312	ὄζῳ ἐπʼ ἀκροτάτῳ πετάλοις ὑποπεπτηῶτες
Iliad 2.313	ὀκτώ, ἀτὰρ μήτηρ ἐνάτη ἦν ἣ τέκε τέκνα·
Iliad 2.314	ἔνθʼ ὅ γε τοὺς ἐλεεινὰ κατήσθιε τετριγῶτας·
Iliad 2.315	μήτηρ δʼ ἀμφεποτᾶτο ὀδυρομένη φίλα τέκνα·
Iliad 2.316	τὴν δʼ ἐλελιξάμενος πτέρυγος λάβεν ἀμφιαχυῖαν.
Iliad 2.317	αὐτὰρ ἐπεὶ κατὰ τέκνα φάγε στρουθοῖο καὶ αὐτήν,
Iliad 2.318	τὸν μὲν ἀρίζηλον θῆκεν θεὸς ὅς περ ἔφηνε·
Iliad 2.319	λᾶαν γάρ μιν ἔθηκε Κρόνου πάϊς ἀγκυλομήτεω·
Iliad 2.320	ἡμεῖς δʼ ἑσταότες θαυμάζομεν οἷον ἐτύχθη.
Iliad 2.321	ὡς οὖν δεινὰ πέλωρα θεῶν εἰσῆλθʼ ἑκατόμβας,
Iliad 2.322	Κάλχας δʼ αὐτίκʼ ἔπειτα θεοπροπέων ἀγόρευε·
Iliad 2.323	τίπτʼ ἄνεῳ ἐγένεσθε κάρη κομόωντες Ἀχαιοί;
Iliad 2.324	ἡμῖν μὲν τόδʼ ἔφηνε τέρας μέγα μητίετα Ζεὺς
Iliad 2.325	ὄψιμον ὀψιτέλεστον, ὅου κλέος οὔ ποτʼ ὀλεῖται.
Iliad 2.326	ὡς οὗτος κατὰ τέκνα φάγε στρουθοῖο καὶ αὐτὴν
Iliad 2.327	ὀκτώ, ἀτὰρ μήτηρ ἐνάτη ἦν ἣ τέκε τέκνα,
Iliad 2.328	ὣς ἡμεῖς τοσσαῦτʼ ἔτεα πτολεμίξομεν αὖθι,
Iliad 2.329	τῷ δεκάτῳ δὲ πόλιν αἱρήσομεν εὐρυάγυιαν.
Iliad 2.330	κεῖνος τὼς ἀγόρευε· τὰ δὴ νῦν πάντα τελεῖται.
Iliad 2.331	ἀλλʼ ἄγε μίμνετε πάντες ἐϋκνήμιδες Ἀχαιοὶ
Iliad 2.332	αὐτοῦ εἰς ὅ κεν ἄστυ μέγα Πριάμοιο ἕλωμεν.
Iliad 2.333	ὣς ἔφατʼ, Ἀργεῖοι δὲ μέγʼ ἴαχον, ἀμφὶ δὲ νῆες
Iliad 2.334	σμερδαλέον κονάβησαν ἀϋσάντων ὑπʼ Ἀχαιῶν,
Iliad 2.335	μῦθον ἐπαινήσαντες Ὀδυσσῆος θείοιο·
Iliad 2.336	τοῖσι δὲ καὶ μετέειπε Γερήνιος ἱππότα Νέστωρ·
Iliad 2.337	ὦ πόποι ἦ δὴ παισὶν ἐοικότες ἀγοράασθε
Iliad 2.338	νηπιάχοις οἷς οὔ τι μέλει πολεμήϊα ἔργα.
Iliad 2.339	πῇ δὴ συνθεσίαι τε καὶ ὅρκια βήσεται ἥμιν;
Iliad 2.340	ἐν πυρὶ δὴ βουλαί τε γενοίατο μήδεά τʼ ἀνδρῶν
Iliad 2.341	σπονδαί τʼ ἄκρητοι καὶ δεξιαί, ᾗς ἐπέπιθμεν·
Iliad 2.342	αὔτως γὰρ ἐπέεσσʼ ἐριδαίνομεν, οὐδέ τι μῆχος
Iliad 2.343	εὑρέμεναι δυνάμεσθα, πολὺν χρόνον ἐνθάδʼ ἐόντες.
Iliad 2.344	Ἀτρεΐδη σὺ δʼ ἔθʼ ὡς πρὶν ἔχων ἀστεμφέα βουλὴν
Iliad 2.345	ἄρχευʼ Ἀργείοισι κατὰ κρατερὰς ὑσμίνας,
Iliad 2.346	τούσδε δʼ ἔα φθινύθειν ἕνα καὶ δύο, τοί κεν Ἀχαιῶν
Iliad 2.347	νόσφιν βουλεύωσʼ· ἄνυσις δʼ οὐκ ἔσσεται αὐτῶν·
Iliad 2.348	πρὶν Ἄργος δʼ ἰέναι πρὶν καὶ Διὸς αἰγιόχοιο
Iliad 2.349	γνώμεναι εἴ τε ψεῦδος ὑπόσχεσις εἴ τε καὶ οὐκί.
Iliad 2.350	φημὶ γὰρ οὖν κατανεῦσαι ὑπερμενέα Κρονίωνα
Iliad 2.351	ἤματι τῷ ὅτε νηυσὶν ἐν ὠκυπόροισιν ἔβαινον
Iliad 2.352	Ἀργεῖοι Τρώεσσι φόνον καὶ κῆρα φέροντες
Iliad 2.353	ἀστράπτων ἐπιδέξιʼ ἐναίσιμα σήματα φαίνων.
Iliad 2.354	τὼ μή τις πρὶν ἐπειγέσθω οἶκον δὲ νέεσθαι
Iliad 2.355	πρίν τινα πὰρ Τρώων ἀλόχῳ κατακοιμηθῆναι,
Iliad 2.356	τίσασθαι δʼ Ἑλένης ὁρμήματά τε στοναχάς τε.
Iliad 2.357	εἰ δέ τις ἐκπάγλως ἐθέλει οἶκον δὲ νέεσθαι
Iliad 2.358	ἁπτέσθω ἧς νηὸς ἐϋσσέλμοιο μελαίνης,
Iliad 2.359	ὄφρα πρόσθʼ ἄλλων θάνατον καὶ πότμον ἐπίσπῃ.
Iliad 2.360	ἀλλὰ ἄναξ αὐτός τʼ εὖ μήδεο πείθεό τʼ ἄλλῳ·
Iliad 2.361	οὔ τοι ἀπόβλητον ἔπος ἔσσεται ὅττί κεν εἴπω·
Iliad 2.362	κρῖνʼ ἄνδρας κατὰ φῦλα κατὰ φρήτρας Ἀγάμεμνον,
Iliad 2.363	ὡς φρήτρη φρήτρηφιν ἀρήγῃ, φῦλα δὲ φύλοις.
Iliad 2.364	εἰ δέ κεν ὣς ἕρξῃς καί τοι πείθωνται Ἀχαιοί,
Iliad 2.365	γνώσῃ ἔπειθʼ ὅς θʼ ἡγεμόνων κακὸς ὅς τέ νυ λαῶν
Iliad 2.366	ἠδʼ ὅς κʼ ἐσθλὸς ἔῃσι· κατὰ σφέας γὰρ μαχέονται.
Iliad 2.367	γνώσεαι δʼ εἰ καὶ θεσπεσίῃ πόλιν οὐκ ἀλαπάξεις,
Iliad 2.368	ἦ ἀνδρῶν κακότητι καὶ ἀφραδίῃ πολέμοιο.
Iliad 2.369	τὸν δʼ ἀπαμειβόμενος προσέφη κρείων Ἀγαμέμνων·
Iliad 2.370	ἦ μὰν αὖτʼ ἀγορῇ νικᾷς γέρον υἷας Ἀχαιῶν.
Iliad 2.371	αἲ γὰρ Ζεῦ τε πάτερ καὶ Ἀθηναίη καὶ Ἄπολλον
Iliad 2.372	τοιοῦτοι δέκα μοι συμφράδμονες εἶεν Ἀχαιῶν·
Iliad 2.373	τώ κε τάχʼ ἠμύσειε πόλις Πριάμοιο ἄνακτος
Iliad 2.374	χερσὶν ὑφʼ ἡμετέρῃσιν ἁλοῦσά τε περθομένη τε.
Iliad 2.375	ἀλλά μοι αἰγίοχος Κρονίδης Ζεὺς ἄλγεʼ ἔδωκεν,
Iliad 2.376	ὅς με μετʼ ἀπρήκτους ἔριδας καὶ νείκεα βάλλει.
Iliad 2.377	καὶ γὰρ ἐγὼν Ἀχιλεύς τε μαχεσσάμεθʼ εἵνεκα κούρης
Iliad 2.378	ἀντιβίοις ἐπέεσσιν, ἐγὼ δʼ ἦρχον χαλεπαίνων·
Iliad 2.379	εἰ δέ ποτʼ ἔς γε μίαν βουλεύσομεν, οὐκέτʼ ἔπειτα
Iliad 2.380	Τρωσὶν ἀνάβλησις κακοῦ ἔσσεται οὐδʼ ἠβαιόν.
Iliad 2.381	νῦν δʼ ἔρχεσθʼ ἐπὶ δεῖπνον ἵνα ξυνάγωμεν Ἄρηα.
Iliad 2.382	εὖ μέν τις δόρυ θηξάσθω, εὖ δʼ ἀσπίδα θέσθω,
Iliad 2.383	εὖ δέ τις ἵπποισιν δεῖπνον δότω ὠκυπόδεσσιν,
Iliad 2.384	εὖ δέ τις ἅρματος ἀμφὶς ἰδὼν πολέμοιο μεδέσθω,
Iliad 2.385	ὥς κε πανημέριοι στυγερῷ κρινώμεθʼ Ἄρηϊ.
Iliad 2.386	οὐ γὰρ παυσωλή γε μετέσσεται οὐδʼ ἠβαιὸν
Iliad 2.387	εἰ μὴ νὺξ ἐλθοῦσα διακρινέει μένος ἀνδρῶν.
Iliad 2.388	ἱδρώσει μέν τευ τελαμὼν ἀμφὶ στήθεσφιν
Iliad 2.389	ἀσπίδος ἀμφιβρότης, περὶ δʼ ἔγχεϊ χεῖρα καμεῖται·
Iliad 2.390	ἱδρώσει δέ τευ ἵππος ἐΰξοον ἅρμα τιταίνων.
Iliad 2.391	ὃν δέ κʼ ἐγὼν ἀπάνευθε μάχης ἐθέλοντα νοήσω
Iliad 2.392	μιμνάζειν παρὰ νηυσὶ κορωνίσιν, οὔ οἱ ἔπειτα
Iliad 2.393	ἄρκιον ἐσσεῖται φυγέειν κύνας ἠδʼ οἰωνούς.
Iliad 2.394	ὣς ἔφατʼ, Ἀργεῖοι δὲ μέγʼ ἴαχον ὡς ὅτε κῦμα
Iliad 2.395	ἀκτῇ ἐφʼ ὑψηλῇ, ὅτε κινήσῃ Νότος ἐλθών,
Iliad 2.396	προβλῆτι σκοπέλῳ· τὸν δʼ οὔ ποτε κύματα λείπει
Iliad 2.397	παντοίων ἀνέμων, ὅτʼ ἂν ἔνθʼ ἢ ἔνθα γένωνται.
Iliad 2.398	ἀνστάντες δʼ ὀρέοντο κεδασθέντες κατὰ νῆας,
Iliad 2.399	κάπνισσάν τε κατὰ κλισίας, καὶ δεῖπνον ἕλοντο.
Iliad 2.400	ἄλλος δʼ ἄλλῳ ἔρεζε θεῶν αἰειγενετάων
Iliad 2.401	εὐχόμενος θάνατόν τε φυγεῖν καὶ μῶλον Ἄρηος.
Iliad 2.402	αὐτὰρ ὃ βοῦν ἱέρευσε ἄναξ ἀνδρῶν Ἀγαμέμνων
Iliad 2.403	πίονα πενταέτηρον ὑπερμενέϊ Κρονίωνι,
Iliad 2.404	κίκλησκεν δὲ γέροντας ἀριστῆας Παναχαιῶν,
Iliad 2.405	Νέστορα μὲν πρώτιστα καὶ Ἰδομενῆα ἄνακτα,
Iliad 2.406	αὐτὰρ ἔπειτʼ Αἴαντε δύω καὶ Τυδέος υἱόν,
Iliad 2.407	ἕκτον δʼ αὖτʼ Ὀδυσῆα Διὶ μῆτιν ἀτάλαντον.
Iliad 2.408	αὐτόματος δέ οἱ ἦλθε βοὴν ἀγαθὸς Μενέλαος·
Iliad 2.409	ᾔδεε γὰρ κατὰ θυμὸν ἀδελφεὸν ὡς ἐπονεῖτο.
Iliad 2.410	βοῦν δὲ περιστήσαντο καὶ οὐλοχύτας ἀνέλοντο·
Iliad 2.411	τοῖσιν δʼ εὐχόμενος μετέφη κρείων Ἀγαμέμνων·
Iliad 2.412	Ζεῦ κύδιστε μέγιστε κελαινεφὲς αἰθέρι ναίων
Iliad 2.413	μὴ πρὶν ἐπʼ ἠέλιον δῦναι καὶ ἐπὶ κνέφας ἐλθεῖν
Iliad 2.414	πρίν με κατὰ πρηνὲς βαλέειν Πριάμοιο μέλαθρον
Iliad 2.415	αἰθαλόεν, πρῆσαι δὲ πυρὸς δηΐοιο θύρετρα,
Iliad 2.416	Ἑκτόρεον δὲ χιτῶνα περὶ στήθεσσι δαΐξαι
Iliad 2.417	χαλκῷ ῥωγαλέον· πολέες δʼ ἀμφʼ αὐτὸν ἑταῖροι
Iliad 2.418	πρηνέες ἐν κονίῃσιν ὀδὰξ λαζοίατο γαῖαν.
Iliad 2.419	ὣς ἔφατʼ, οὐδʼ ἄρα πώ οἱ ἐπεκραίαινε Κρονίων,
Iliad 2.420	ἀλλʼ ὅ γε δέκτο μὲν ἱρά, πόνον δʼ ἀμέγαρτον ὄφελλεν.
Iliad 2.421	αὐτὰρ ἐπεί ῥʼ εὔξαντο καὶ οὐλοχύτας προβάλοντο,
Iliad 2.422	αὐέρυσαν μὲν πρῶτα καὶ ἔσφαξαν καὶ ἔδειραν,
Iliad 2.423	μηρούς τʼ ἐξέταμον κατά τε κνίσῃ ἐκάλυψαν
Iliad 2.424	δίπτυχα ποιήσαντες, ἐπʼ αὐτῶν δʼ ὠμοθέτησαν.
Iliad 2.425	καὶ τὰ μὲν ἂρ σχίζῃσιν ἀφύλλοισιν κατέκαιον,
Iliad 2.426	σπλάγχνα δʼ ἄρʼ ἀμπείραντες ὑπείρεχον Ἡφαίστοιο.
Iliad 2.427	αὐτὰρ ἐπεὶ κατὰ μῆρε κάη καὶ σπλάγχνα πάσαντο,
Iliad 2.428	μίστυλλόν τʼ ἄρα τἆλλα καὶ ἀμφʼ ὀβελοῖσιν ἔπειραν,
Iliad 2.429	ὤπτησάν τε περιφραδέως, ἐρύσαντό τε πάντα.
Iliad 2.430	αὐτὰρ ἐπεὶ παύσαντο πόνου τετύκοντό τε δαῖτα
Iliad 2.431	δαίνυντʼ, οὐδέ τι θυμὸς ἐδεύετο δαιτὸς ἐΐσης.
Iliad 2.432	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Iliad 2.433	τοῖς ἄρα μύθων ἦρχε Γερήνιος ἱππότα Νέστωρ·
Iliad 2.434	Ἀτρεΐδη κύδιστε ἄναξ ἀνδρῶν Ἀγάμεμνον,
Iliad 2.435	μηκέτι νῦν δήθʼ αὖθι λεγώμεθα, μηδʼ ἔτι δηρὸν
Iliad 2.436	ἀμβαλλώμεθα ἔργον ὃ δὴ θεὸς ἐγγυαλίζει.
Iliad 2.437	ἀλλʼ ἄγε κήρυκες μὲν Ἀχαιῶν χαλκοχιτώνων
Iliad 2.438	λαὸν κηρύσσοντες ἀγειρόντων κατὰ νῆας,
Iliad 2.439	ἡμεῖς δʼ ἀθρόοι ὧδε κατὰ στρατὸν εὐρὺν Ἀχαιῶν
Iliad 2.440	ἴομεν ὄφρα κε θᾶσσον ἐγείρομεν ὀξὺν Ἄρηα.
Iliad 2.441	ὣς ἔφατʼ, οὐδʼ ἀπίθησεν ἄναξ ἀνδρῶν Ἀγαμέμνων.
Iliad 2.442	αὐτίκα κηρύκεσσι λιγυφθόγγοισι κέλευσε
Iliad 2.443	κηρύσσειν πόλεμον δὲ κάρη κομόωντας Ἀχαιούς·
Iliad 2.444	οἳ μὲν ἐκήρυσσον, τοὶ δʼ ἠγείροντο μάλʼ ὦκα.
Iliad 2.445	οἳ δʼ ἀμφʼ Ἀτρεΐωνα διοτρεφέες βασιλῆες
Iliad 2.446	θῦνον κρίνοντες, μετὰ δὲ γλαυκῶπις Ἀθήνη
Iliad 2.447	αἰγίδʼ ἔχουσʼ ἐρίτιμον ἀγήρων ἀθανάτην τε,
Iliad 2.448	τῆς ἑκατὸν θύσανοι παγχρύσεοι ἠερέθονται,
Iliad 2.449	πάντες ἐϋπλεκέες, ἑκατόμβοιος δὲ ἕκαστος·
Iliad 2.450	σὺν τῇ παιφάσσουσα διέσσυτο λαὸν Ἀχαιῶν
Iliad 2.451	ὀτρύνουσʼ ἰέναι· ἐν δὲ σθένος ὦρσεν ἑκάστῳ
Iliad 2.452	καρδίῃ ἄλληκτον πολεμίζειν ἠδὲ μάχεσθαι.
Iliad 2.453	τοῖσι δʼ ἄφαρ πόλεμος γλυκίων γένετʼ ἠὲ νέεσθαι
Iliad 2.454	ἐν νηυσὶ γλαφυρῇσι φίλην ἐς πατρίδα γαῖαν.
Iliad 2.455	ἠΰτε πῦρ ἀΐδηλον ἐπιφλέγει ἄσπετον ὕλην
Iliad 2.456	οὔρεος ἐν κορυφῇς, ἕκαθεν δέ τε φαίνεται αὐγή,
Iliad 2.457	ὣς τῶν ἐρχομένων ἀπὸ χαλκοῦ θεσπεσίοιο
Iliad 2.458	αἴγλη παμφανόωσα διʼ αἰθέρος οὐρανὸν ἷκε.
Iliad 2.459	τῶν δʼ ὥς τʼ ὀρνίθων πετεηνῶν ἔθνεα πολλὰ
Iliad 2.460	χηνῶν ἢ γεράνων ἢ κύκνων δουλιχοδείρων
Iliad 2.461	Ἀσίω ἐν λειμῶνι Καϋστρίου ἀμφὶ ῥέεθρα
Iliad 2.462	ἔνθα καὶ ἔνθα ποτῶνται ἀγαλλόμενα πτερύγεσσι
Iliad 2.463	κλαγγηδὸν προκαθιζόντων, σμαραγεῖ δέ τε λειμών,
Iliad 2.464	ὣς τῶν ἔθνεα πολλὰ νεῶν ἄπο καὶ κλισιάων
Iliad 2.465	ἐς πεδίον προχέοντο Σκαμάνδριον· αὐτὰρ ὑπὸ χθὼν
Iliad 2.466	σμερδαλέον κονάβιζε ποδῶν αὐτῶν τε καὶ ἵππων.
Iliad 2.467	ἔσταν δʼ ἐν λειμῶνι Σκαμανδρίῳ ἀνθεμόεντι
Iliad 2.468	μυρίοι, ὅσσά τε φύλλα καὶ ἄνθεα γίγνεται ὥρῃ.
Iliad 2.469	ἠΰτε μυιάων ἁδινάων ἔθνεα πολλὰ
Iliad 2.470	αἵ τε κατὰ σταθμὸν ποιμνήϊον ἠλάσκουσιν
Iliad 2.471	ὥρῃ ἐν εἰαρινῇ ὅτε τε γλάγος ἄγγεα δεύει,
Iliad 2.472	τόσσοι ἐπὶ Τρώεσσι κάρη κομόωντες Ἀχαιοὶ
Iliad 2.473	ἐν πεδίῳ ἵσταντο διαρραῖσαι μεμαῶτες.
Iliad 2.474	τοὺς δʼ ὥς τʼ αἰπόλια πλατέʼ αἰγῶν αἰπόλοι ἄνδρες
Iliad 2.475	ῥεῖα διακρίνωσιν ἐπεί κε νομῷ μιγέωσιν,
Iliad 2.476	ὣς τοὺς ἡγεμόνες διεκόσμεον ἔνθα καὶ ἔνθα
Iliad 2.477	ὑσμίνην δʼ ἰέναι, μετὰ δὲ κρείων Ἀγαμέμνων
Iliad 2.478	ὄμματα καὶ κεφαλὴν ἴκελος Διὶ τερπικεραύνῳ,
Iliad 2.479	Ἄρεϊ δὲ ζώνην, στέρνον δὲ Ποσειδάωνι.
Iliad 2.480	ἠΰτε βοῦς ἀγέληφι μέγʼ ἔξοχος ἔπλετο πάντων
Iliad 2.481	ταῦρος· ὃ γάρ τε βόεσσι μεταπρέπει ἀγρομένῃσι·
Iliad 2.482	τοῖον ἄρʼ Ἀτρεΐδην θῆκε Ζεὺς ἤματι κείνῳ
Iliad 2.483	ἐκπρεπέʼ ἐν πολλοῖσι καὶ ἔξοχον ἡρώεσσιν.
Iliad 2.484	ἔσπετε νῦν μοι Μοῦσαι Ὀλύμπια δώματʼ ἔχουσαι·
Iliad 2.485	ὑμεῖς γὰρ θεαί ἐστε πάρεστέ τε ἴστέ τε πάντα,
Iliad 2.486	ἡμεῖς δὲ κλέος οἶον ἀκούομεν οὐδέ τι ἴδμεν·
Iliad 2.487	οἵ τινες ἡγεμόνες Δαναῶν καὶ κοίρανοι ἦσαν·
Iliad 2.488	πληθὺν δʼ οὐκ ἂν ἐγὼ μυθήσομαι οὐδʼ ὀνομήνω,
Iliad 2.489	οὐδʼ εἴ μοι δέκα μὲν γλῶσσαι, δέκα δὲ στόματʼ εἶεν,
Iliad 2.490	φωνὴ δʼ ἄρρηκτος, χάλκεον δέ μοι ἦτορ ἐνείη,
Iliad 2.491	εἰ μὴ Ὀλυμπιάδες Μοῦσαι Διὸς αἰγιόχοιο
Iliad 2.492	θυγατέρες μνησαίαθʼ ὅσοι ὑπὸ Ἴλιον ἦλθον·
Iliad 2.493	ἀρχοὺς αὖ νηῶν ἐρέω νῆάς τε προπάσας.
Iliad 2.494	Βοιωτῶν μὲν Πηνέλεως καὶ Λήϊτος ἦρχον
Iliad 2.495	Ἀρκεσίλαός τε Προθοήνωρ τε Κλονίος τε,
Iliad 2.496	οἵ θʼ Ὑρίην ἐνέμοντο καὶ Αὐλίδα πετρήεσσαν
Iliad 2.497	Σχοῖνόν τε Σκῶλόν τε πολύκνημόν τʼ Ἐτεωνόν,
Iliad 2.498	Θέσπειαν Γραῖάν τε καὶ εὐρύχορον Μυκαλησσόν,
Iliad 2.499	οἵ τʼ ἀμφʼ Ἅρμʼ ἐνέμοντο καὶ Εἰλέσιον καὶ Ἐρυθράς,
Iliad 2.500	οἵ τʼ Ἐλεῶνʼ εἶχον ἠδʼ Ὕλην καὶ Πετεῶνα,
Iliad 2.501	Ὠκαλέην Μεδεῶνά τʼ ἐϋκτίμενον πτολίεθρον,
Iliad 2.502	Κώπας Εὔτρησίν τε πολυτρήρωνά τε Θίσβην,
Iliad 2.503	οἵ τε Κορώνειαν καὶ ποιήενθʼ Ἁλίαρτον,
Iliad 2.504	οἵ τε Πλάταιαν ἔχον ἠδʼ οἳ Γλισᾶντʼ ἐνέμοντο,
Iliad 2.505	οἵ θʼ Ὑποθήβας εἶχον ἐϋκτίμενον πτολίεθρον,
Iliad 2.506	Ὀγχηστόν θʼ ἱερὸν Ποσιδήϊον ἀγλαὸν ἄλσος,
Iliad 2.507	οἵ τε πολυστάφυλον Ἄρνην ἔχον, οἵ τε Μίδειαν
Iliad 2.508	Νῖσάν τε ζαθέην Ἀνθηδόνα τʼ ἐσχατόωσαν·
Iliad 2.509	τῶν μὲν πεντήκοντα νέες κίον, ἐν δὲ ἑκάστῃ
Iliad 2.510	κοῦροι Βοιωτῶν ἑκατὸν καὶ εἴκοσι βαῖνον.
Iliad 2.511	οἳ δʼ Ἀσπληδόνα ναῖον ἰδʼ Ὀρχομενὸν Μινύειον,
Iliad 2.512	τῶν ἦρχʼ Ἀσκάλαφος καὶ Ἰάλμενος υἷες Ἄρηος
Iliad 2.513	οὓς τέκεν Ἀστυόχη δόμῳ Ἄκτορος Ἀζεΐδαο,
Iliad 2.514	παρθένος αἰδοίη ὑπερώϊον εἰσαναβᾶσα
Iliad 2.515	Ἄρηϊ κρατερῷ· ὃ δέ οἱ παρελέξατο λάθρῃ·
Iliad 2.516	τοῖς δὲ τριήκοντα γλαφυραὶ νέες ἐστιχόωντο.
Iliad 2.517	αὐτὰρ Φωκήων Σχεδίος καὶ Ἐπίστροφος ἦρχον
Iliad 2.518	υἷες Ἰφίτου μεγαθύμου Ναυβολίδαο,
Iliad 2.519	οἳ Κυπάρισσον ἔχον Πυθῶνά τε πετρήεσσαν
Iliad 2.520	Κρῖσάν τε ζαθέην καὶ Δαυλίδα καὶ Πανοπῆα,
Iliad 2.521	οἵ τʼ Ἀνεμώρειαν καὶ Ὑάμπολιν ἀμφενέμοντο,
Iliad 2.522	οἵ τʼ ἄρα πὰρ ποταμὸν Κηφισὸν δῖον ἔναιον,
Iliad 2.523	οἵ τε Λίλαιαν ἔχον πηγῇς ἔπι Κηφισοῖο·
Iliad 2.524	τοῖς δʼ ἅμα τεσσαράκοντα μέλαιναι νῆες ἕποντο.
Iliad 2.525	οἳ μὲν Φωκήων στίχας ἵστασαν ἀμφιέποντες,
Iliad 2.526	Βοιωτῶν δʼ ἔμπλην ἐπʼ ἀριστερὰ θωρήσσοντο.
Iliad 2.527	Λοκρῶν δʼ ἡγεμόνευεν Ὀϊλῆος ταχὺς Αἴας
Iliad 2.528	μείων, οὔ τι τόσος γε ὅσος Τελαμώνιος Αἴας
Iliad 2.529	ἀλλὰ πολὺ μείων· ὀλίγος μὲν ἔην λινοθώρηξ,
Iliad 2.530	ἐγχείῃ δʼ ἐκέκαστο Πανέλληνας καὶ Ἀχαιούς·
Iliad 2.531	οἳ Κῦνόν τʼ ἐνέμοντʼ Ὀπόεντά τε Καλλίαρόν τε
Iliad 2.532	Βῆσσάν τε Σκάρφην τε καὶ Αὐγειὰς ἐρατεινὰς
Iliad 2.533	Τάρφην τε Θρόνιον τε Βοαγρίου ἀμφὶ ῥέεθρα·
Iliad 2.534	τῷ δʼ ἅμα τεσσαράκοντα μέλαιναι νῆες ἕποντο
Iliad 2.535	Λοκρῶν, οἳ ναίουσι πέρην ἱερῆς Εὐβοίης.
Iliad 2.536	οἳ δʼ Εὔβοιαν ἔχον μένεα πνείοντες Ἄβαντες
Iliad 2.537	Χαλκίδα τʼ Εἰρέτριάν τε πολυστάφυλόν θʼ Ἱστίαιαν
Iliad 2.538	Κήρινθόν τʼ ἔφαλον Δίου τʼ αἰπὺ πτολίεθρον,
Iliad 2.539	οἵ τε Κάρυστον ἔχον ἠδʼ οἳ Στύρα ναιετάασκον,
Iliad 2.540	τῶν αὖθʼ ἡγεμόνευʼ Ἐλεφήνωρ ὄζος Ἄρηος
Iliad 2.541	Χαλκωδοντιάδης μεγαθύμων ἀρχὸς Ἀβάντων.
Iliad 2.542	τῷ δʼ ἅμʼ Ἄβαντες ἕποντο θοοὶ ὄπιθεν κομόωντες
Iliad 2.543	αἰχμηταὶ μεμαῶτες ὀρεκτῇσιν μελίῃσι
Iliad 2.544	θώρηκας ῥήξειν δηΐων ἀμφὶ στήθεσσι·
Iliad 2.545	τῷ δʼ ἅμα τεσσαράκοντα μέλαιναι νῆες ἕποντο.
Iliad 2.546	οἳ δʼ ἄρʼ Ἀθήνας εἶχον ἐϋκτίμενον πτολίεθρον
Iliad 2.547	δῆμον Ἐρεχθῆος μεγαλήτορος, ὅν ποτʼ Ἀθήνη
Iliad 2.548	θρέψε Διὸς θυγάτηρ, τέκε δὲ ζείδωρος ἄρουρα,
Iliad 2.549	κὰδ δʼ ἐν Ἀθήνῃς εἷσεν ἑῷ ἐν πίονι νηῷ·
Iliad 2.550	ἔνθα δέ μιν ταύροισι καὶ ἀρνειοῖς ἱλάονται
Iliad 2.551	κοῦροι Ἀθηναίων περιτελλομένων ἐνιαυτῶν·
Iliad 2.552	τῶν αὖθʼ ἡγεμόνευʼ υἱὸς Πετεῶο Μενεσθεύς.
Iliad 2.553	τῷ δʼ οὔ πώ τις ὁμοῖος ἐπιχθόνιος γένετʼ ἀνὴρ
Iliad 2.554	κοσμῆσαι ἵππους τε καὶ ἀνέρας ἀσπιδιώτας·
Iliad 2.555	Νέστωρ οἶος ἔριζεν· ὃ γὰρ προγενέστερος ἦεν·
Iliad 2.556	τῷ δʼ ἅμα πεντήκοντα μέλαιναι νῆες ἕποντο.
Iliad 2.557	Αἴας δʼ ἐκ Σαλαμῖνος ἄγεν δυοκαίδεκα νῆας,
Iliad 2.558	στῆσε δʼ ἄγων ἵνʼ Ἀθηναίων ἵσταντο φάλαγγες.
Iliad 2.559	οἳ δʼ Ἄργός τʼ εἶχον Τίρυνθά τε τειχιόεσσαν
Iliad 2.560	Ἑρμιόνην Ἀσίνην τε, βαθὺν κατὰ κόλπον ἐχούσας,
Iliad 2.561	Τροιζῆνʼ Ἠϊόνας τε καὶ ἀμπελόεντʼ Ἐπίδαυρον,
Iliad 2.562	οἵ τʼ ἔχον Αἴγιναν Μάσητά τε κοῦροι Ἀχαιῶν,
Iliad 2.563	τῶν αὖθʼ ἡγεμόνευε βοὴν ἀγαθὸς Διομήδης
Iliad 2.564	καὶ Σθένελος, Καπανῆος ἀγακλειτοῦ φίλος υἱός·
Iliad 2.565	τοῖσι δʼ ἅμʼ Εὐρύαλος τρίτατος κίεν ἰσόθεος φὼς
Iliad 2.566	Μηκιστέος υἱὸς Ταλαϊονίδαο ἄνακτος·
Iliad 2.567	συμπάντων δʼ ἡγεῖτο βοὴν ἀγαθὸς Διομήδης·
Iliad 2.568	τοῖσι δʼ ἅμʼ ὀγδώκοντα μέλαιναι νῆες ἕποντο.
Iliad 2.569	οἳ δὲ Μυκήνας εἶχον ἐϋκτίμενον πτολίεθρον
Iliad 2.570	ἀφνειόν τε Κόρινθον ἐϋκτιμένας τε Κλεωνάς,
Iliad 2.571	Ὀρνειάς τʼ ἐνέμοντο Ἀραιθυρέην τʼ ἐρατεινὴν
Iliad 2.572	καὶ Σικυῶνʼ, ὅθʼ ἄρʼ Ἄδρηστος πρῶτʼ ἐμβασίλευεν,
Iliad 2.573	οἵ θʼ Ὑπερησίην τε καὶ αἰπεινὴν Γονόεσσαν
Iliad 2.574	Πελλήνην τʼ εἶχον ἠδʼ Αἴγιον ἀμφενέμοντο
Iliad 2.575	Αἰγιαλόν τʼ ἀνὰ πάντα καὶ ἀμφʼ Ἑλίκην εὐρεῖαν,
Iliad 2.576	τῶν ἑκατὸν νηῶν ἦρχε κρείων Ἀγαμέμνων
Iliad 2.577	Ἀτρεΐδης· ἅμα τῷ γε πολὺ πλεῖστοι καὶ ἄριστοι
Iliad 2.578	λαοὶ ἕποντʼ· ἐν δʼ αὐτὸς ἐδύσετο νώροπα χαλκὸν
Iliad 2.579	κυδιόων, πᾶσιν δὲ μετέπρεπεν ἡρώεσσιν
Iliad 2.580	οὕνεκʼ ἄριστος ἔην πολὺ δὲ πλείστους ἄγε λαούς.
Iliad 2.581	οἳ δʼ εἶχον κοίλην Λακεδαίμονα κητώεσσαν,
Iliad 2.582	Φᾶρίν τε Σπάρτην τε πολυτρήρωνά τε Μέσσην,
Iliad 2.583	Βρυσειάς τʼ ἐνέμοντο καὶ Αὐγειὰς ἐρατεινάς,
Iliad 2.584	οἵ τʼ ἄρʼ Ἀμύκλας εἶχον Ἕλος τʼ ἔφαλον πτολίεθρον,
Iliad 2.585	οἵ τε Λάαν εἶχον ἠδʼ Οἴτυλον ἀμφενέμοντο,
Iliad 2.586	τῶν οἱ ἀδελφεὸς ἦρχε βοὴν ἀγαθὸς Μενέλαος
Iliad 2.587	ἑξήκοντα νεῶν· ἀπάτερθε δὲ θωρήσσοντο·
Iliad 2.588	ἐν δʼ αὐτὸς κίεν ᾗσι προθυμίῃσι πεποιθὼς
Iliad 2.589	ὀτρύνων πόλεμον δέ· μάλιστα δὲ ἵετο θυμῷ
Iliad 2.590	τίσασθαι Ἑλένης ὁρμήματά τε στοναχάς τε.
Iliad 2.591	οἳ δὲ Πύλον τʼ ἐνέμοντο καὶ Ἀρήνην ἐρατεινὴν
Iliad 2.592	καὶ Θρύον Ἀλφειοῖο πόρον καὶ ἐΰκτιτον Αἰπὺ
Iliad 2.593	καὶ Κυπαρισσήεντα καὶ Ἀμφιγένειαν ἔναιον
Iliad 2.594	καὶ Πτελεὸν καὶ Ἕλος καὶ Δώριον, ἔνθά τε Μοῦσαι
Iliad 2.595	ἀντόμεναι Θάμυριν τὸν Θρήϊκα παῦσαν ἀοιδῆς
Iliad 2.596	Οἰχαλίηθεν ἰόντα παρʼ Εὐρύτου Οἰχαλιῆος·
Iliad 2.597	στεῦτο γὰρ εὐχόμενος νικησέμεν εἴ περ ἂν αὐταὶ
Iliad 2.598	Μοῦσαι ἀείδοιεν κοῦραι Διὸς αἰγιόχοιο·
Iliad 2.599	αἳ δὲ χολωσάμεναι πηρὸν θέσαν, αὐτὰρ ἀοιδὴν
Iliad 2.600	θεσπεσίην ἀφέλοντο καὶ ἐκλέλαθον κιθαριστύν·
Iliad 2.601	τῶν αὖθʼ ἡγεμόνευε Γερήνιος ἱππότα Νέστωρ·
Iliad 2.602	τῷ δʼ ἐνενήκοντα γλαφυραὶ νέες ἐστιχόωντο.
Iliad 2.603	οἳ δʼ ἔχον Ἀρκαδίην ὑπὸ Κυλλήνης ὄρος αἰπὺ
Iliad 2.604	Αἰπύτιον παρὰ τύμβον ἵνʼ ἀνέρες ἀγχιμαχηταί,
Iliad 2.605	οἳ Φενεόν τʼ ἐνέμοντο καὶ Ὀρχομενὸν πολύμηλον
Iliad 2.606	Ῥίπην τε Στρατίην τε καὶ ἠνεμόεσσαν Ἐνίσπην
Iliad 2.607	καὶ Τεγέην εἶχον καὶ Μαντινέην ἐρατεινὴν
Iliad 2.608	Στύμφηλόν τʼ εἶχον καὶ Παρρασίην ἐνέμοντο,
Iliad 2.609	τῶν ἦρχʼ Ἀγκαίοιο πάϊς κρείων Ἀγαπήνωρ
Iliad 2.610	ἑξήκοντα νεῶν· πολέες δʼ ἐν νηῒ ἑκάστῃ
Iliad 2.611	Ἀρκάδες ἄνδρες ἔβαινον ἐπιστάμενοι πολεμίζειν.
Iliad 2.612	αὐτὸς γάρ σφιν δῶκεν ἄναξ ἀνδρῶν Ἀγαμέμνων
Iliad 2.613	νῆας ἐϋσσέλμους περάαν ἐπὶ οἴνοπα πόντον
Iliad 2.614	Ἀτρεΐδης, ἐπεὶ οὔ σφι θαλάσσια ἔργα μεμήλει.
Iliad 2.615	οἳ δʼ ἄρα Βουπράσιόν τε καὶ Ἤλιδα δῖαν ἔναιον
Iliad 2.616	ὅσσον ἐφʼ Ὑρμίνη καὶ Μύρσινος ἐσχατόωσα
Iliad 2.617	πέτρη τʼ Ὠλενίη καὶ Ἀλήσιον ἐντὸς ἐέργει,
Iliad 2.618	τῶν αὖ τέσσαρες ἀρχοὶ ἔσαν, δέκα δʼ ἀνδρὶ ἑκάστῳ
Iliad 2.619	νῆες ἕποντο θοαί, πολέες δʼ ἔμβαινον Ἐπειοί.
Iliad 2.620	τῶν μὲν ἄρʼ Ἀμφίμαχος καὶ Θάλπιος ἡγησάσθην
Iliad 2.621	υἷες ὃ μὲν Κτεάτου, ὃ δʼ ἄρʼ Εὐρύτου, Ἀκτορίωνε·
Iliad 2.622	τῶν δʼ Ἀμαρυγκεΐδης ἦρχε κρατερὸς Διώρης·
Iliad 2.623	τῶν δὲ τετάρτων ἦρχε Πολύξεινος θεοειδὴς
Iliad 2.624	υἱὸς Ἀγασθένεος Αὐγηϊάδαο ἄνακτος.
Iliad 2.625	οἳ δʼ ἐκ Δουλιχίοιο Ἐχινάων θʼ ἱεράων
Iliad 2.626	νήσων, αἳ ναίουσι πέρην ἁλὸς Ἤλιδος ἄντα,
Iliad 2.627	τῶν αὖθʼ ἡγεμόνευε Μέγης ἀτάλαντος Ἄρηϊ
Iliad 2.628	Φυλεΐδης, ὃν τίκτε Διῒ φίλος ἱππότα Φυλεύς,
Iliad 2.629	ὅς ποτε Δουλίχιον δʼ ἀπενάσσατο πατρὶ χολωθείς·
Iliad 2.630	τῷ δʼ ἅμα τεσσαράκοντα μέλαιναι νῆες ἕποντο.
Iliad 2.631	αὐτὰρ Ὀδυσσεὺς ἦγε Κεφαλλῆνας μεγαθύμους,
Iliad 2.632	οἵ ῥʼ Ἰθάκην εἶχον καὶ Νήριτον εἰνοσίφυλλον
Iliad 2.633	καὶ Κροκύλειʼ ἐνέμοντο καὶ Αἰγίλιπα τρηχεῖαν,
Iliad 2.634	οἵ τε Ζάκυνθον ἔχον ἠδʼ οἳ Σάμον ἀμφενέμοντο,
Iliad 2.635	οἵ τʼ ἤπειρον ἔχον ἠδʼ ἀντιπέραιʼ ἐνέμοντο·
Iliad 2.636	τῶν μὲν Ὀδυσσεὺς ἦρχε Διὶ μῆτιν ἀτάλαντος·
Iliad 2.637	τῷ δʼ ἅμα νῆες ἕποντο δυώδεκα μιλτοπάρῃοι.
Iliad 2.638	Αἰτωλῶν δʼ ἡγεῖτο Θόας Ἀνδραίμονος υἱός,
Iliad 2.639	οἳ Πλευρῶνʼ ἐνέμοντο καὶ Ὤλενον ἠδὲ Πυλήνην
Iliad 2.640	Χαλκίδα τʼ ἀγχίαλον Καλυδῶνά τε πετρήεσσαν·
Iliad 2.641	οὐ γὰρ ἔτʼ Οἰνῆος μεγαλήτορος υἱέες ἦσαν,
Iliad 2.642	οὐδʼ ἄρʼ ἔτʼ αὐτὸς ἔην, θάνε δὲ ξανθὸς Μελέαγρος·
Iliad 2.643	τῷ δʼ ἐπὶ πάντʼ ἐτέταλτο ἀνασσέμεν Αἰτωλοῖσι·
Iliad 2.644	τῷ δʼ ἅμα τεσσαράκοντα μέλαιναι νῆες ἕποντο.
Iliad 2.645	Κρητῶν δʼ Ἰδομενεὺς δουρὶ κλυτὸς ἡγεμόνευεν,
Iliad 2.646	οἳ Κνωσόν τʼ εἶχον Γόρτυνά τε τειχιόεσσαν,
Iliad 2.647	Λύκτον Μίλητόν τε καὶ ἀργινόεντα Λύκαστον
Iliad 2.648	Φαιστόν τε Ῥύτιόν τε, πόλεις εὖ ναιετοώσας,
Iliad 2.649	ἄλλοι θʼ οἳ Κρήτην ἑκατόμπολιν ἀμφενέμοντο.
Iliad 2.650	τῶν μὲν ἄρʼ Ἰδομενεὺς δουρὶ κλυτὸς ἡγεμόνευε
Iliad 2.651	Μηριόνης τʼ ἀτάλαντος Ἐνυαλίῳ ἀνδρειφόντῃ·
Iliad 2.652	τοῖσι δʼ ἅμʼ ὀγδώκοντα μέλαιναι νῆες ἕποντο.
Iliad 2.653	Τληπόλεμος δʼ Ἡρακλεΐδης ἠΰς τε μέγας τε
Iliad 2.654	ἐκ Ῥόδου ἐννέα νῆας ἄγεν Ῥοδίων ἀγερώχων,
Iliad 2.655	οἳ Ῥόδον ἀμφενέμοντο διὰ τρίχα κοσμηθέντες
Iliad 2.656	Λίνδον Ἰηλυσόν τε καὶ ἀργινόεντα Κάμειρον.
Iliad 2.657	τῶν μὲν Τληπόλεμος δουρὶ κλυτὸς ἡγεμόνευεν,
Iliad 2.658	ὃν τέκεν Ἀστυόχεια βίῃ Ἡρακληείῃ,
Iliad 2.659	τὴν ἄγετʼ ἐξ Ἐφύρης ποταμοῦ ἄπο Σελλήεντος
Iliad 2.660	πέρσας ἄστεα πολλὰ διοτρεφέων αἰζηῶν.
Iliad 2.661	Τληπόλεμος δʼ ἐπεὶ οὖν τράφʼ ἐνὶ μεγάρῳ εὐπήκτῳ,
Iliad 2.662	αὐτίκα πατρὸς ἑοῖο φίλον μήτρωα κατέκτα
Iliad 2.663	ἤδη γηράσκοντα Λικύμνιον ὄζον Ἄρηος·
Iliad 2.664	αἶψα δὲ νῆας ἔπηξε, πολὺν δʼ ὅ γε λαὸν ἀγείρας
Iliad 2.665	βῆ φεύγων ἐπὶ πόντον· ἀπείλησαν γάρ οἱ ἄλλοι
Iliad 2.666	υἱέες υἱωνοί τε βίης Ἡρακληείης.
Iliad 2.667	αὐτὰρ ὅ γʼ ἐς Ῥόδον ἷξεν ἀλώμενος ἄλγεα πάσχων·
Iliad 2.668	τριχθὰ δὲ ᾤκηθεν καταφυλαδόν, ἠδὲ φίληθεν
Iliad 2.669	ἐκ Διός, ὅς τε θεοῖσι καὶ ἀνθρώποισιν ἀνάσσει,
Iliad 2.670	καί σφιν θεσπέσιον πλοῦτον κατέχευε Κρονίων.
Iliad 2.671	Νιρεὺς αὖ Σύμηθεν ἄγε τρεῖς νῆας ἐΐσας
Iliad 2.672	Νιρεὺς Ἀγλαΐης υἱὸς Χαρόποιό τʼ ἄνακτος
Iliad 2.673	Νιρεύς, ὃς κάλλιστος ἀνὴρ ὑπὸ Ἴλιον ἦλθε
Iliad 2.674	τῶν ἄλλων Δαναῶν μετʼ ἀμύμονα Πηλεΐωνα·
Iliad 2.675	ἀλλʼ ἀλαπαδνὸς ἔην, παῦρος δέ οἱ εἵπετο λαός.
Iliad 2.676	οἳ δʼ ἄρα Νίσυρόν τʼ εἶχον Κράπαθόν τε Κάσον τε
Iliad 2.677	καὶ Κῶν Εὐρυπύλοιο πόλιν νήσους τε Καλύδνας,
Iliad 2.678	τῶν αὖ Φείδιππός τε καὶ Ἄντιφος ἡγησάσθην
Iliad 2.679	Θεσσαλοῦ υἷε δύω Ἡρακλεΐδαο ἄνακτος·
Iliad 2.680	τοῖς δὲ τριήκοντα γλαφυραὶ νέες ἐστιχόωντο.
Iliad 2.681	νῦν αὖ τοὺς ὅσσοι τὸ Πελασγικὸν Ἄργος ἔναιον,
Iliad 2.682	οἵ τʼ Ἄλον οἵ τʼ Ἀλόπην οἵ τε Τρηχῖνα νέμοντο,
Iliad 2.683	οἵ τʼ εἶχον Φθίην ἠδʼ Ἑλλάδα καλλιγύναικα,
Iliad 2.684	Μυρμιδόνες δὲ καλεῦντο καὶ Ἕλληνες καὶ Ἀχαιοί,
Iliad 2.685	τῶν αὖ πεντήκοντα νεῶν ἦν ἀρχὸς Ἀχιλλεύς.
Iliad 2.686	ἀλλʼ οἵ γʼ οὐ πολέμοιο δυσηχέος ἐμνώοντο·
Iliad 2.687	οὐ γὰρ ἔην ὅς τίς σφιν ἐπὶ στίχας ἡγήσαιτο·
Iliad 2.688	κεῖτο γὰρ ἐν νήεσσι ποδάρκης δῖος Ἀχιλλεὺς
Iliad 2.689	κούρης χωόμενος Βρισηΐδος ἠϋκόμοιο,
Iliad 2.690	τὴν ἐκ Λυρνησσοῦ ἐξείλετο πολλὰ μογήσας
Iliad 2.691	Λυρνησσὸν διαπορθήσας καὶ τείχεα Θήβης,
Iliad 2.692	κὰδ δὲ Μύνητʼ ἔβαλεν καὶ Ἐπίστροφον ἐγχεσιμώρους,
Iliad 2.693	υἱέας Εὐηνοῖο Σεληπιάδαο ἄνακτος·
Iliad 2.694	τῆς ὅ γε κεῖτʼ ἀχέων, τάχα δʼ ἀνστήσεσθαι ἔμελλεν.
Iliad 2.695	οἳ δʼ εἶχον Φυλάκην καὶ Πύρασον ἀνθεμόεντα
Iliad 2.696	Δήμητρος τέμενος, Ἴτωνά τε μητέρα μήλων,
Iliad 2.697	ἀγχίαλόν τʼ Ἀντρῶνα ἰδὲ Πτελεὸν λεχεποίην,
Iliad 2.698	τῶν αὖ Πρωτεσίλαος ἀρήϊος ἡγεμόνευε
Iliad 2.699	ζωὸς ἐών· τότε δʼ ἤδη ἔχεν κάτα γαῖα μέλαινα.
Iliad 2.700	τοῦ δὲ καὶ ἀμφιδρυφὴς ἄλοχος Φυλάκῃ ἐλέλειπτο
Iliad 2.701	καὶ δόμος ἡμιτελής· τὸν δʼ ἔκτανε Δάρδανος ἀνὴρ
Iliad 2.702	νηὸς ἀποθρῴσκοντα πολὺ πρώτιστον Ἀχαιῶν.
Iliad 2.703	οὐδὲ μὲν οὐδʼ οἳ ἄναρχοι ἔσαν, πόθεόν γε μὲν ἀρχόν·
Iliad 2.704	ἀλλά σφεας κόσμησε Ποδάρκης ὄζος Ἄρηος
Iliad 2.705	Ἰφίκλου υἱὸς πολυμήλου Φυλακίδαο
Iliad 2.706	αὐτοκασίγνητος μεγαθύμου Πρωτεσιλάου
Iliad 2.707	ὁπλότερος γενεῇ· ὁ δʼ ἅμα πρότερος καὶ ἀρείων
Iliad 2.708	ἥρως Πρωτεσίλαος ἀρήϊος· οὐδέ τι λαοὶ
Iliad 2.709	δεύονθʼ ἡγεμόνος, πόθεόν γε μὲν ἐσθλὸν ἐόντα·
Iliad 2.710	τῷ δʼ ἅμα τεσσαράκοντα μέλαιναι νῆες ἕποντο.
Iliad 2.711	οἳ δὲ Φερὰς ἐνέμοντο παραὶ Βοιβηΐδα λίμνην
Iliad 2.712	Βοίβην καὶ Γλαφύρας καὶ ἐϋκτιμένην Ἰαωλκόν,
Iliad 2.713	τῶν ἦρχʼ Ἀδμήτοιο φίλος πάϊς ἕνδεκα νηῶν
Iliad 2.714	Εὔμηλος, τὸν ὑπʼ Ἀδμήτῳ τέκε δῖα γυναικῶν
Iliad 2.715	Ἄλκηστις Πελίαο θυγατρῶν εἶδος ἀρίστη.
Iliad 2.716	οἳ δʼ ἄρα Μηθώνην καὶ Θαυμακίην ἐνέμοντο
Iliad 2.717	καὶ Μελίβοιαν ἔχον καὶ Ὀλιζῶνα τρηχεῖαν,
Iliad 2.718	τῶν δὲ Φιλοκτήτης ἦρχεν τόξων ἐῢ εἰδὼς
Iliad 2.719	ἑπτὰ νεῶν· ἐρέται δʼ ἐν ἑκάστῃ πεντήκοντα
Iliad 2.720	ἐμβέβασαν τόξων εὖ εἰδότες ἶφι μάχεσθαι.
Iliad 2.721	ἀλλʼ ὃ μὲν ἐν νήσῳ κεῖτο κρατέρʼ ἄλγεα πάσχων
Iliad 2.722	Λήμνῳ ἐν ἠγαθέῃ, ὅθι μιν λίπον υἷες Ἀχαιῶν
Iliad 2.723	ἕλκεϊ μοχθίζοντα κακῷ ὀλοόφρονος ὕδρου·
Iliad 2.724	ἔνθʼ ὅ γε κεῖτʼ ἀχέων· τάχα δὲ μνήσεσθαι ἔμελλον
Iliad 2.725	Ἀργεῖοι παρὰ νηυσὶ Φιλοκτήταο ἄνακτος.
Iliad 2.726	οὐδὲ μὲν οὐδʼ οἳ ἄναρχοι ἔσαν, πόθεόν γε μὲν ἀρχόν·
Iliad 2.727	ἀλλὰ Μέδων κόσμησεν Ὀϊλῆος νόθος υἱός,
Iliad 2.728	τόν ῥʼ ἔτεκεν Ῥήνη ὑπʼ Ὀϊλῆϊ πτολιπόρθῳ.
Iliad 2.729	οἳ δʼ εἶχον Τρίκκην καὶ Ἰθώμην κλωμακόεσσαν,
Iliad 2.730	οἵ τʼ ἔχον Οἰχαλίην πόλιν Εὐρύτου Οἰχαλιῆος,
Iliad 2.731	τῶν αὖθʼ ἡγείσθην Ἀσκληπιοῦ δύο παῖδε
Iliad 2.732	ἰητῆρʼ ἀγαθὼ Ποδαλείριος ἠδὲ Μαχάων·
Iliad 2.733	τοῖς δὲ τριήκοντα γλαφυραὶ νέες ἐστιχόωντο.
Iliad 2.734	οἳ δʼ ἔχον Ὀρμένιον, οἵ τε κρήνην Ὑπέρειαν,
Iliad 2.735	οἵ τʼ ἔχον Ἀστέριον Τιτάνοιό τε λευκὰ κάρηνα,
Iliad 2.736	τῶν ἦρχʼ Εὐρύπυλος Εὐαίμονος ἀγλαὸς υἱός·
Iliad 2.737	τῷ δʼ ἅμα τεσσαράκοντα μέλαιναι νῆες ἕποντο.
Iliad 2.738	οἳ δʼ Ἄργισσαν ἔχον καὶ Γυρτώνην ἐνέμοντο,
Iliad 2.739	Ὄρθην Ἠλώνην τε πόλιν τʼ Ὀλοοσσόνα λευκήν,
Iliad 2.740	τῶν αὖθʼ ἡγεμόνευε μενεπτόλεμος Πολυποίτης
Iliad 2.741	υἱὸς Πειριθόοιο τὸν ἀθάνατος τέκετο Ζεύς·
Iliad 2.742	τόν ῥʼ ὑπὸ Πειριθόῳ τέκετο κλυτὸς Ἱπποδάμεια
Iliad 2.743	ἤματι τῷ ὅτε Φῆρας ἐτίσατο λαχνήεντας,
Iliad 2.744	τοὺς δʼ ἐκ Πηλίου ὦσε καὶ Αἰθίκεσσι πέλασσεν·
Iliad 2.745	οὐκ οἶος, ἅμα τῷ γε Λεοντεὺς ὄζος Ἄρηος
Iliad 2.746	υἱὸς ὑπερθύμοιο Κορώνου Καινεΐδαο·
Iliad 2.747	τοῖς δʼ ἅμα τεσσαράκοντα μέλαιναι νῆες ἕποντο.
Iliad 2.748	Γουνεὺς δʼ ἐκ Κύφου ἦγε δύω καὶ εἴκοσι νῆας·
Iliad 2.749	τῷ δʼ Ἐνιῆνες ἕποντο μενεπτόλεμοί τε Περαιβοὶ
Iliad 2.750	οἳ περὶ Δωδώνην δυσχείμερον οἰκίʼ ἔθεντο,
Iliad 2.751	οἵ τʼ ἀμφʼ ἱμερτὸν Τιταρησσὸν ἔργα νέμοντο
Iliad 2.752	ὅς ῥʼ ἐς Πηνειὸν προΐει καλλίρροον ὕδωρ,
Iliad 2.753	οὐδʼ ὅ γε Πηνειῷ συμμίσγεται ἀργυροδίνῃ,
Iliad 2.754	ἀλλά τέ μιν καθύπερθεν ἐπιρρέει ἠΰτʼ ἔλαιον·
Iliad 2.755	ὅρκου γὰρ δεινοῦ Στυγὸς ὕδατός ἐστιν ἀπορρώξ.
Iliad 2.756	Μαγνήτων δʼ ἦρχε Πρόθοος Τενθρηδόνος υἱός,
Iliad 2.757	οἳ περὶ Πηνειὸν καὶ Πήλιον εἰνοσίφυλλον
Iliad 2.758	ναίεσκον· τῶν μὲν Πρόθοος θοὸς ἡγεμόνευε,
Iliad 2.759	τῷ δʼ ἅμα τεσσαράκοντα μέλαιναι νῆες ἕποντο.
Iliad 2.760	οὗτοι ἄρʼ ἡγεμόνες Δαναῶν καὶ κοίρανοι ἦσαν·
Iliad 2.761	τίς τὰρ τῶν ὄχʼ ἄριστος ἔην σύ μοι ἔννεπε Μοῦσα
Iliad 2.762	αὐτῶν ἠδʼ ἵππων, οἳ ἅμʼ Ἀτρεΐδῃσιν ἕποντο.
Iliad 2.763	ἵπποι μὲν μέγʼ ἄρισται ἔσαν Φηρητιάδαο,
Iliad 2.764	τὰς Εὔμηλος ἔλαυνε ποδώκεας ὄρνιθας ὣς
Iliad 2.765	ὄτριχας οἰέτεας σταφύλῇ ἐπὶ νῶτον ἐΐσας·
Iliad 2.766	τὰς ἐν Πηρείῃ θρέψʼ ἀργυρότοξος Ἀπόλλων
Iliad 2.767	ἄμφω θηλείας, φόβον Ἄρηος φορεούσας.
Iliad 2.768	ἀνδρῶν αὖ μέγʼ ἄριστος ἔην Τελαμώνιος Αἴας
Iliad 2.769	ὄφρʼ Ἀχιλεὺς μήνιεν· ὃ γὰρ πολὺ φέρτατος ἦεν,
Iliad 2.770	ἵπποι θʼ οἳ φορέεσκον ἀμύμονα Πηλεΐωνα.
Iliad 2.771	ἀλλʼ ὃ μὲν ἐν νήεσσι κορωνίσι ποντοπόροισι
Iliad 2.772	κεῖτʼ ἀπομηνίσας Ἀγαμέμνονι ποιμένι λαῶν
Iliad 2.773	Ἀτρεΐδῃ· λαοὶ δὲ παρὰ ῥηγμῖνι θαλάσσης
Iliad 2.774	δίσκοισιν τέρποντο καὶ αἰγανέῃσιν ἱέντες
Iliad 2.775	τόξοισίν θʼ· ἵπποι δὲ παρʼ ἅρμασιν οἷσιν ἕκαστος
Iliad 2.776	λωτὸν ἐρεπτόμενοι ἐλεόθρεπτόν τε σέλινον
Iliad 2.777	ἕστασαν· ἅρματα δʼ εὖ πεπυκασμένα κεῖτο ἀνάκτων
Iliad 2.778	ἐν κλισίῃς· οἳ δʼ ἀρχὸν ἀρηΐφιλον ποθέοντες
Iliad 2.779	φοίτων ἔνθα καὶ ἔνθα κατὰ στρατὸν οὐδὲ μάχοντο.
Iliad 2.780	οἳ δʼ ἄρʼ ἴσαν ὡς εἴ τε πυρὶ χθὼν πᾶσα νέμοιτο·
Iliad 2.781	γαῖα δʼ ὑπεστενάχιζε Διὶ ὣς τερπικεραύνῳ
Iliad 2.782	χωομένῳ ὅτε τʼ ἀμφὶ Τυφωέϊ γαῖαν ἱμάσσῃ
Iliad 2.783	εἰν Ἀρίμοις, ὅθι φασὶ Τυφωέος ἔμμεναι εὐνάς·
Iliad 2.784	ὣς ἄρα τῶν ὑπὸ ποσσὶ μέγα στεναχίζετο γαῖα
Iliad 2.785	ἐρχομένων· μάλα δʼ ὦκα διέπρησσον πεδίοιο.
Iliad 2.786	Τρωσὶν δʼ ἄγγελος ἦλθε ποδήνεμος ὠκέα Ἶρις
Iliad 2.787	πὰρ Διὸς αἰγιόχοιο σὺν ἀγγελίῃ ἀλεγεινῇ·
Iliad 2.788	οἳ δʼ ἀγορὰς ἀγόρευον ἐπὶ Πριάμοιο θύρῃσι
Iliad 2.789	πάντες ὁμηγερέες ἠμὲν νέοι ἠδὲ γέροντες·
Iliad 2.790	ἀγχοῦ δʼ ἱσταμένη προσέφη πόδας ὠκέα Ἶρις·
Iliad 2.791	εἴσατο δὲ φθογγὴν υἷϊ Πριάμοιο Πολίτῃ,
Iliad 2.792	ὃς Τρώων σκοπὸς ἷζε ποδωκείῃσι πεποιθὼς
Iliad 2.793	τύμβῳ ἐπʼ ἀκροτάτῳ Αἰσυήταο γέροντος,
Iliad 2.794	δέγμενος ὁππότε ναῦφιν ἀφορμηθεῖεν Ἀχαιοί·
Iliad 2.795	τῷ μιν ἐεισαμένη προσέφη πόδας ὠκέα Ἶρις·
Iliad 2.796	ὦ γέρον αἰεί τοι μῦθοι φίλοι ἄκριτοί εἰσιν,
Iliad 2.797	ὥς ποτʼ ἐπʼ εἰρήνης· πόλεμος δʼ ἀλίαστος ὄρωρεν.
Iliad 2.798	ἤδη μὲν μάλα πολλὰ μάχας εἰσήλυθον ἀνδρῶν,
Iliad 2.799	ἀλλʼ οὔ πω τοιόνδε τοσόνδέ τε λαὸν ὄπωπα·
Iliad 2.800	λίην γὰρ φύλλοισιν ἐοικότες ἢ ψαμάθοισιν
Iliad 2.801	ἔρχονται πεδίοιο μαχησόμενοι προτὶ ἄστυ.
Iliad 2.802	Ἕκτορ σοὶ δὲ μάλιστʼ ἐπιτέλλομαι, ὧδε δὲ ῥέξαι·
Iliad 2.803	πολλοὶ γὰρ κατὰ ἄστυ μέγα Πριάμου ἐπίκουροι,
Iliad 2.804	ἄλλη δʼ ἄλλων γλῶσσα πολυσπερέων ἀνθρώπων·
Iliad 2.805	τοῖσιν ἕκαστος ἀνὴρ σημαινέτω οἷσί περ ἄρχει,
Iliad 2.806	τῶν δʼ ἐξηγείσθω κοσμησάμενος πολιήτας.
Iliad 2.807	ὣς ἔφαθʼ, Ἕκτωρ δʼ οὔ τι θεᾶς ἔπος ἠγνοίησεν,
Iliad 2.808	αἶψα δʼ ἔλυσʼ ἀγορήν· ἐπὶ τεύχεα δʼ ἐσσεύοντο·
Iliad 2.809	πᾶσαι δʼ ὠΐγνυντο πύλαι, ἐκ δʼ ἔσσυτο λαὸς
Iliad 2.810	πεζοί θʼ ἱππῆές τε· πολὺς δʼ ὀρυμαγδὸς ὀρώρει.
Iliad 2.811	ἔστι δέ τις προπάροιθε πόλιος αἰπεῖα κολώνη
Iliad 2.812	ἐν πεδίῳ ἀπάνευθε περίδρομος ἔνθα καὶ ἔνθα,
Iliad 2.813	τὴν ἤτοι ἄνδρες Βατίειαν κικλήσκουσιν,
Iliad 2.814	ἀθάνατοι δέ τε σῆμα πολυσκάρθμοιο Μυρίνης·
Iliad 2.815	ἔνθα τότε Τρῶές τε διέκριθεν ἠδʼ ἐπίκουροι.
Iliad 2.816	Τρωσὶ μὲν ἡγεμόνευε μέγας κορυθαίολος Ἕκτωρ
Iliad 2.817	Πριαμίδης· ἅμα τῷ γε πολὺ πλεῖστοι καὶ ἄριστοι
Iliad 2.818	λαοὶ θωρήσσοντο μεμαότες ἐγχείῃσι.
Iliad 2.819	Δαρδανίων αὖτʼ ἦρχεν ἐῢς πάϊς Ἀγχίσαο
Iliad 2.820	Αἰνείας, τὸν ὑπʼ Ἀγχίσῃ τέκε δῖʼ Ἀφροδίτη
Iliad 2.821	Ἴδης ἐν κνημοῖσι θεὰ βροτῷ εὐνηθεῖσα,
Iliad 2.822	οὐκ οἶος, ἅμα τῷ γε δύω Ἀντήνορος υἷε
Iliad 2.823	Ἀρχέλοχός τʼ Ἀκάμας τε μάχης εὖ εἰδότε πάσης.
Iliad 2.824	οἳ δὲ Ζέλειαν ἔναιον ὑπαὶ πόδα νείατον Ἴδης
Iliad 2.825	ἀφνειοὶ πίνοντες ὕδωρ μέλαν Αἰσήποιο
Iliad 2.826	Τρῶες, τῶν αὖτʼ ἦρχε Λυκάονος ἀγλαὸς υἱὸς
Iliad 2.827	Πάνδαρος, ᾧ καὶ τόξον Ἀπόλλων αὐτὸς ἔδωκεν.
Iliad 2.828	οἳ δʼ Ἀδρήστειάν τʼ εἶχον καὶ δῆμον Ἀπαισοῦ
Iliad 2.829	καὶ Πιτύειαν ἔχον καὶ Τηρείης ὄρος αἰπύ,
Iliad 2.830	τῶν ἦρχʼ Ἄδρηστός τε καὶ Ἄμφιος λινοθώρηξ
Iliad 2.831	υἷε δύω Μέροπος Περκωσίου, ὃς περὶ πάντων
Iliad 2.832	ᾔδεε μαντοσύνας, οὐδὲ οὓς παῖδας ἔασκε
Iliad 2.833	στείχειν ἐς πόλεμον φθισήνορα· τὼ δέ οἱ οὔ τι
Iliad 2.834	πειθέσθην· κῆρες γὰρ ἄγον μέλανος θανάτοιο.
Iliad 2.835	οἳ δʼ ἄρα Περκώτην καὶ Πράκτιον ἀμφενέμοντο
Iliad 2.836	καὶ Σηστὸν καὶ Ἄβυδον ἔχον καὶ δῖαν Ἀρίσβην,
Iliad 2.837	τῶν αὖθʼ Ὑρτακίδης ἦρχʼ Ἄσιος ὄρχαμος ἀνδρῶν,
Iliad 2.838	Ἄσιος Ὑρτακίδης ὃν Ἀρίσβηθεν φέρον ἵπποι
Iliad 2.839	αἴθωνες μεγάλοι ποταμοῦ ἄπο Σελλήεντος.
Iliad 2.840	Ἱππόθοος δʼ ἄγε φῦλα Πελασγῶν ἐγχεσιμώρων
Iliad 2.841	τῶν οἳ Λάρισαν ἐριβώλακα ναιετάασκον·
Iliad 2.842	τῶν ἦρχʼ Ἱππόθοός τε Πύλαιός τʼ ὄζος Ἄρηος,
Iliad 2.843	υἷε δύω Λήθοιο Πελασγοῦ Τευταμίδαο.
Iliad 2.844	αὐτὰρ Θρήϊκας ἦγʼ Ἀκάμας καὶ Πείροος ἥρως
Iliad 2.845	ὅσσους Ἑλλήσποντος ἀγάρροος ἐντὸς ἐέργει.
Iliad 2.846	Εὔφημος δʼ ἀρχὸς Κικόνων ἦν αἰχμητάων
Iliad 2.847	υἱὸς Τροιζήνοιο διοτρεφέος Κεάδαο.
Iliad 2.848	αὐτὰρ Πυραίχμης ἄγε Παίονας ἀγκυλοτόξους
Iliad 2.849	τηλόθεν ἐξ Ἀμυδῶνος ἀπʼ Ἀξιοῦ εὐρὺ ῥέοντος,
Iliad 2.850	Ἀξιοῦ οὗ κάλλιστον ὕδωρ ἐπικίδναται αἶαν.
Iliad 2.851	Παφλαγόνων δʼ ἡγεῖτο Πυλαιμένεος λάσιον κῆρ
Iliad 2.852	ἐξ Ἐνετῶν, ὅθεν ἡμιόνων γένος ἀγροτεράων,
Iliad 2.853	οἵ ῥα Κύτωρον ἔχον καὶ Σήσαμον ἀμφενέμοντο
Iliad 2.854	ἀμφί τε Παρθένιον ποταμὸν κλυτὰ δώματʼ ἔναιον
Iliad 2.855	Κρῶμνάν τʼ Αἰγιαλόν τε καὶ ὑψηλοὺς Ἐρυθίνους.
Iliad 2.856	αὐτὰρ Ἁλιζώνων Ὀδίος καὶ Ἐπίστροφος ἦρχον
Iliad 2.857	τηλόθεν ἐξ Ἀλύβης, ὅθεν ἀργύρου ἐστὶ γενέθλη.
Iliad 2.858	Μυσῶν δὲ Χρόμις ἦρχε καὶ Ἔννομος οἰωνιστής·
Iliad 2.859	ἀλλʼ οὐκ οἰωνοῖσιν ἐρύσατο κῆρα μέλαιναν,
Iliad 2.860	ἀλλʼ ἐδάμη ὑπὸ χερσὶ ποδώκεος Αἰακίδαο
Iliad 2.861	ἐν ποταμῷ, ὅθι περ Τρῶας κεράϊζε καὶ ἄλλους.
Iliad 2.862	Φόρκυς αὖ Φρύγας ἦγε καὶ Ἀσκάνιος θεοειδὴς
Iliad 2.863	τῆλʼ ἐξ Ἀσκανίης· μέμασαν δʼ ὑσμῖνι μάχεσθαι.
Iliad 2.864	Μῄοσιν αὖ Μέσθλης τε καὶ Ἄντιφος ἡγησάσθην
Iliad 2.865	υἷε Ταλαιμένεος τὼ Γυγαίη τέκε λίμνη,
Iliad 2.866	οἳ καὶ Μῄονας ἦγον ὑπὸ Τμώλῳ γεγαῶτας.
Iliad 2.867	Νάστης αὖ Καρῶν ἡγήσατο βαρβαροφώνων,
Iliad 2.868	οἳ Μίλητον ἔχον Φθιρῶν τʼ ὄρος ἀκριτόφυλλον
Iliad 2.869	Μαιάνδρου τε ῥοὰς Μυκάλης τʼ αἰπεινὰ κάρηνα·
Iliad 2.870	τῶν μὲν ἄρʼ Ἀμφίμαχος καὶ Νάστης ἡγησάσθην,
Iliad 2.871	Νάστης Ἀμφίμαχός τε Νομίονος ἀγλαὰ τέκνα,
Iliad 2.872	ὃς καὶ χρυσὸν ἔχων πόλεμον δʼ ἴεν ἠΰτε κούρη
Iliad 2.873	νήπιος, οὐδέ τί οἱ τό γʼ ἐπήρκεσε λυγρὸν ὄλεθρον,
Iliad 2.874	ἀλλʼ ἐδάμη ὑπὸ χερσὶ ποδώκεος Αἰακίδαο
Iliad 2.875	ἐν ποταμῷ, χρυσὸν δʼ Ἀχιλεὺς ἐκόμισσε δαΐφρων.
Iliad 2.876	Σαρπηδὼν δʼ ἦρχεν Λυκίων καὶ Γλαῦκος ἀμύμων
Iliad 2.877	τηλόθεν ἐκ Λυκίης, Ξάνθου ἄπο δινήεντος.
Iliad 3.1	αὐτὰρ ἐπεὶ κόσμηθεν ἅμʼ ἡγεμόνεσσιν ἕκαστοι,
Iliad 3.2	Τρῶες μὲν κλαγγῇ τʼ ἐνοπῇ τʼ ἴσαν ὄρνιθες ὣς
Iliad 3.3	ἠΰτε περ κλαγγὴ γεράνων πέλει οὐρανόθι πρό·
Iliad 3.4	αἵ τʼ ἐπεὶ οὖν χειμῶνα φύγον καὶ ἀθέσφατον ὄμβρον
Iliad 3.5	κλαγγῇ ταί γε πέτονται ἐπʼ ὠκεανοῖο ῥοάων
Iliad 3.6	ἀνδράσι Πυγμαίοισι φόνον καὶ κῆρα φέρουσαι·
Iliad 3.7	ἠέριαι δʼ ἄρα ταί γε κακὴν ἔριδα προφέρονται.
Iliad 3.8	οἳ δʼ ἄρʼ ἴσαν σιγῇ μένεα πνείοντες Ἀχαιοὶ
Iliad 3.9	ἐν θυμῷ μεμαῶτες ἀλεξέμεν ἀλλήλοισιν.
Iliad 3.10	εὖτʼ ὄρεος κορυφῇσι Νότος κατέχευεν ὀμίχλην
Iliad 3.11	ποιμέσιν οὔ τι φίλην, κλέπτῃ δέ τε νυκτὸς ἀμείνω,
Iliad 3.12	τόσσόν τίς τʼ ἐπιλεύσσει ὅσον τʼ ἐπὶ λᾶαν ἵησιν·
Iliad 3.13	ὣς ἄρα τῶν ὑπὸ ποσσὶ κονίσαλος ὄρνυτʼ ἀελλὴς
Iliad 3.14	ἐρχομένων· μάλα δʼ ὦκα διέπρησσον πεδίοιο.
Iliad 3.15	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες,
Iliad 3.16	Τρωσὶν μὲν προμάχιζεν Ἀλέξανδρος θεοειδὴς
Iliad 3.17	παρδαλέην ὤμοισιν ἔχων καὶ καμπύλα τόξα
Iliad 3.18	καὶ ξίφος· αὐτὰρ δοῦρε δύω κεκορυθμένα χαλκῷ
Iliad 3.19	πάλλων Ἀργείων προκαλίζετο πάντας ἀρίστους
Iliad 3.20	ἀντίβιον μαχέσασθαι ἐν αἰνῇ δηϊοτῆτι.
Iliad 3.21	τὸν δʼ ὡς οὖν ἐνόησεν ἀρηΐφιλος Μενέλαος
Iliad 3.22	ἐρχόμενον προπάροιθεν ὁμίλου μακρὰ βιβάντα,
Iliad 3.23	ὥς τε λέων ἐχάρη μεγάλῳ ἐπὶ σώματι κύρσας
Iliad 3.24	εὑρὼν ἢ ἔλαφον κεραὸν ἢ ἄγριον αἶγα
Iliad 3.25	πεινάων· μάλα γάρ τε κατεσθίει, εἴ περ ἂν αὐτὸν
Iliad 3.26	σεύωνται ταχέες τε κύνες θαλεροί τʼ αἰζηοί·
Iliad 3.27	ὣς ἐχάρη Μενέλαος Ἀλέξανδρον θεοειδέα
Iliad 3.28	ὀφθαλμοῖσιν ἰδών· φάτο γὰρ τίσεσθαι ἀλείτην·
Iliad 3.29	αὐτίκα δʼ ἐξ ὀχέων σὺν τεύχεσιν ἆλτο χαμᾶζε.
Iliad 3.30	τὸν δʼ ὡς οὖν ἐνόησεν Ἀλέξανδρος θεοειδὴς
Iliad 3.31	ἐν προμάχοισι φανέντα, κατεπλήγη φίλον ἦτορ,
Iliad 3.32	ἂψ δʼ ἑτάρων εἰς ἔθνος ἐχάζετο κῆρʼ ἀλεείνων.
Iliad 3.33	ὡς δʼ ὅτε τίς τε δράκοντα ἰδὼν παλίνορσος ἀπέστη
Iliad 3.34	οὔρεος ἐν βήσσῃς, ὑπό τε τρόμος ἔλλαβε γυῖα,
Iliad 3.35	ἂψ δʼ ἀνεχώρησεν, ὦχρός τέ μιν εἷλε παρειάς,
Iliad 3.36	ὣς αὖτις καθʼ ὅμιλον ἔδυ Τρώων ἀγερώχων
Iliad 3.37	δείσας Ἀτρέος υἱὸν Ἀλέξανδρος θεοειδής.
Iliad 3.38	τὸν δʼ Ἕκτωρ νείκεσσεν ἰδὼν αἰσχροῖς ἐπέεσσιν·
Iliad 3.39	Δύσπαρι εἶδος ἄριστε γυναιμανὲς ἠπεροπευτὰ
Iliad 3.40	αἴθʼ ὄφελες ἄγονός τʼ ἔμεναι ἄγαμός τʼ ἀπολέσθαι·
Iliad 3.41	καί κε τὸ βουλοίμην, καί κεν πολὺ κέρδιον ἦεν
Iliad 3.42	ἢ οὕτω λώβην τʼ ἔμεναι καὶ ὑπόψιον ἄλλων.
Iliad 3.43	ἦ που καγχαλόωσι κάρη κομόωντες Ἀχαιοὶ
Iliad 3.44	φάντες ἀριστῆα πρόμον ἔμμεναι, οὕνεκα καλὸν
Iliad 3.45	εἶδος ἔπʼ, ἀλλʼ οὐκ ἔστι βίη φρεσὶν οὐδέ τις ἀλκή.
Iliad 3.46	ἦ τοιόσδε ἐὼν ἐν ποντοπόροισι νέεσσι
Iliad 3.47	πόντον ἐπιπλώσας, ἑτάρους ἐρίηρας ἀγείρας,
Iliad 3.48	μιχθεὶς ἀλλοδαποῖσι γυναῖκʼ εὐειδέʼ ἀνῆγες
Iliad 3.49	ἐξ ἀπίης γαίης νυὸν ἀνδρῶν αἰχμητάων
Iliad 3.50	πατρί τε σῷ μέγα πῆμα πόληΐ τε παντί τε δήμῳ,
Iliad 3.51	δυσμενέσιν μὲν χάρμα, κατηφείην δὲ σοὶ αὐτῷ;
Iliad 3.52	οὐκ ἂν δὴ μείνειας ἀρηΐφιλον Μενέλαον;
Iliad 3.53	γνοίης χʼ οἵου φωτὸς ἔχεις θαλερὴν παράκοιτιν·
Iliad 3.54	οὐκ ἄν τοι χραίσμῃ κίθαρις τά τε δῶρʼ Ἀφροδίτης
Iliad 3.55	ἥ τε κόμη τό τε εἶδος ὅτʼ ἐν κονίῃσι μιγείης.
Iliad 3.56	ἀλλὰ μάλα Τρῶες δειδήμονες· ἦ τέ κεν ἤδη
Iliad 3.57	λάϊνον ἕσσο χιτῶνα κακῶν ἕνεχʼ ὅσσα ἔοργας.
Iliad 3.58	τὸν δʼ αὖτε προσέειπεν Ἀλέξανδρος θεοειδής·
Iliad 3.59	Ἕκτορ ἐπεί με κατʼ αἶσαν ἐνείκεσας οὐδʼ ὑπὲρ αἶσαν·
Iliad 3.60	αἰεί τοι κραδίη πέλεκυς ὥς ἐστιν ἀτειρὴς
Iliad 3.61	ὅς τʼ εἶσιν διὰ δουρὸς ὑπʼ ἀνέρος ὅς ῥά τε τέχνῃ
Iliad 3.62	νήϊον ἐκτάμνῃσιν, ὀφέλλει δʼ ἀνδρὸς ἐρωήν·
Iliad 3.63	ὣς σοὶ ἐνὶ στήθεσσιν ἀτάρβητος νόος ἐστί·
Iliad 3.64	μή μοι δῶρʼ ἐρατὰ πρόφερε χρυσέης Ἀφροδίτης·
Iliad 3.65	οὔ τοι ἀπόβλητʼ ἐστὶ θεῶν ἐρικυδέα δῶρα
Iliad 3.66	ὅσσά κεν αὐτοὶ δῶσιν, ἑκὼν δʼ οὐκ ἄν τις ἕλοιτο·
Iliad 3.67	νῦν αὖτʼ εἴ μʼ ἐθέλεις πολεμίζειν ἠδὲ μάχεσθαι,
Iliad 3.68	ἄλλους μὲν κάθισον Τρῶας καὶ πάντας Ἀχαιούς,
Iliad 3.69	αὐτὰρ ἔμʼ ἐν μέσσῳ καὶ ἀρηΐφιλον Μενέλαον
Iliad 3.70	συμβάλετʼ ἀμφʼ Ἑλένῃ καὶ κτήμασι πᾶσι μάχεσθαι·
Iliad 3.71	ὁππότερος δέ κε νικήσῃ κρείσσων τε γένηται,
Iliad 3.72	κτήμαθʼ ἑλὼν εὖ πάντα γυναῖκά τε οἴκαδʼ ἀγέσθω·
Iliad 3.73	οἳ δʼ ἄλλοι φιλότητα καὶ ὅρκια πιστὰ ταμόντες
Iliad 3.74	ναίοιτε Τροίην ἐριβώλακα, τοὶ δὲ νεέσθων
Iliad 3.75	Ἄργος ἐς ἱππόβοτον καὶ Ἀχαιΐδα καλλιγύναικα.
Iliad 3.76	ὣς ἔφαθʼ, Ἕκτωρ δʼ αὖτʼ ἐχάρη μέγα μῦθον ἀκούσας,
Iliad 3.77	καί ῥʼ ἐς μέσσον ἰὼν Τρώων ἀνέεργε φάλαγγας
Iliad 3.78	μέσσου δουρὸς ἑλών· τοὶ δʼ ἱδρύνθησαν ἅπαντες.
Iliad 3.79	τῷ δʼ ἐπετοξάζοντο κάρη κομόωντες Ἀχαιοὶ
Iliad 3.80	ἰοῖσίν τε τιτυσκόμενοι λάεσσί τʼ ἔβαλλον·
Iliad 3.81	αὐτὰρ ὃ μακρὸν ἄϋσεν ἄναξ ἀνδρῶν Ἀγαμέμνων·
Iliad 3.82	ἴσχεσθʼ Ἀργεῖοι, μὴ βάλλετε κοῦροι Ἀχαιῶν·
Iliad 3.83	στεῦται γάρ τι ἔπος ἐρέειν κορυθαίολος Ἕκτωρ.
Iliad 3.84	ὣς ἔφαθʼ, οἳ δʼ ἔσχοντο μάχης ἄνεῴ τʼ ἐγένοντο
Iliad 3.85	ἐσσυμένως· Ἕκτωρ δὲ μετʼ ἀμφοτέροισιν ἔειπε·
Iliad 3.86	κέκλυτέ μευ Τρῶες καὶ ἐϋκνήμιδες Ἀχαιοὶ
Iliad 3.87	μῦθον Ἀλεξάνδροιο, τοῦ εἵνεκα νεῖκος ὄρωρεν.
Iliad 3.88	ἄλλους μὲν κέλεται Τρῶας καὶ πάντας Ἀχαιοὺς
Iliad 3.89	τεύχεα κάλʼ ἀποθέσθαι ἐπὶ χθονὶ πουλυβοτείρῃ,
Iliad 3.90	αὐτὸν δʼ ἐν μέσσῳ καὶ ἀρηΐφιλον Μενέλαον
Iliad 3.91	οἴους ἀμφʼ Ἑλένῃ καὶ κτήμασι πᾶσι μάχεσθαι.
Iliad 3.92	ὁππότερος δέ κε νικήσῃ κρείσσων τε γένηται
Iliad 3.93	κτήμαθʼ ἑλὼν εὖ πάντα γυναῖκά τε οἴκαδʼ ἀγέσθω·
Iliad 3.94	οἳ δʼ ἄλλοι φιλότητα καὶ ὅρκια πιστὰ τάμωμεν.
Iliad 3.95	ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ·
Iliad 3.96	τοῖσι δὲ καὶ μετέειπε βοὴν ἀγαθὸς Μενέλαος·
Iliad 3.97	κέκλυτε νῦν καὶ ἐμεῖο· μάλιστα γὰρ ἄλγος ἱκάνει
Iliad 3.98	θυμὸν ἐμόν, φρονέω δὲ διακρινθήμεναι ἤδη
Iliad 3.99	Ἀργείους καὶ Τρῶας, ἐπεὶ κακὰ πολλὰ πέπασθε
Iliad 3.100	εἵνεκʼ ἐμῆς ἔριδος καὶ Ἀλεξάνδρου ἕνεκʼ ἀρχῆς·
Iliad 3.101	ἡμέων δʼ ὁπποτέρῳ θάνατος καὶ μοῖρα τέτυκται
Iliad 3.102	τεθναίη· ἄλλοι δὲ διακρινθεῖτε τάχιστα.
Iliad 3.103	οἴσετε ἄρνʼ, ἕτερον λευκόν, ἑτέρην δὲ μέλαιναν,
Iliad 3.104	Γῇ τε καὶ Ἠελίῳ· Διὶ δʼ ἡμεῖς οἴσομεν ἄλλον·
Iliad 3.105	ἄξετε δὲ Πριάμοιο βίην, ὄφρʼ ὅρκια τάμνῃ
Iliad 3.106	αὐτός, ἐπεί οἱ παῖδες ὑπερφίαλοι καὶ ἄπιστοι,
Iliad 3.107	μή τις ὑπερβασίῃ Διὸς ὅρκια δηλήσηται.
Iliad 3.108	αἰεὶ δʼ ὁπλοτέρων ἀνδρῶν φρένες ἠερέθονται·
Iliad 3.109	οἷς δʼ ὁ γέρων μετέῃσιν ἅμα πρόσσω καὶ ὀπίσσω
Iliad 3.110	λεύσσει, ὅπως ὄχʼ ἄριστα μετʼ ἀμφοτέροισι γένηται.
Iliad 3.111	ὣς ἔφαθʼ, οἳ δʼ ἐχάρησαν Ἀχαιοί τε Τρῶές τε
Iliad 3.112	ἐλπόμενοι παύσασθαι ὀϊζυροῦ πολέμοιο.
Iliad 3.113	καί ῥʼ ἵππους μὲν ἔρυξαν ἐπὶ στίχας, ἐκ δʼ ἔβαν αὐτοί,
Iliad 3.114	τεύχεά τʼ ἐξεδύοντο· τὰ μὲν κατέθεντʼ ἐπὶ γαίῃ
Iliad 3.115	πλησίον ἀλλήλων, ὀλίγη δʼ ἦν ἀμφὶς ἄρουρα·
Iliad 3.116	Ἕκτωρ δὲ προτὶ ἄστυ δύω κήρυκας ἔπεμπε
Iliad 3.117	καρπαλίμως ἄρνάς τε φέρειν Πρίαμόν τε καλέσσαι·
Iliad 3.118	αὐτὰρ ὃ Ταλθύβιον προΐει κρείων Ἀγαμέμνων
Iliad 3.119	νῆας ἔπι γλαφυρὰς ἰέναι, ἠδʼ ἄρνʼ ἐκέλευεν
Iliad 3.120	οἰσέμεναι· ὃ δʼ ἄρʼ οὐκ ἀπίθησʼ Ἀγαμέμνονι δίῳ.
Iliad 3.121	Ἶρις δʼ αὖθʼ Ἑλένῃ λευκωλένῳ ἄγγελος ἦλθεν
Iliad 3.122	εἰδομένη γαλόῳ Ἀντηνορίδαο δάμαρτι,
Iliad 3.123	τὴν Ἀντηνορίδης εἶχε κρείων Ἑλικάων
Iliad 3.124	Λαοδίκην Πριάμοιο θυγατρῶν εἶδος ἀρίστην.
Iliad 3.125	τὴν δʼ εὗρʼ ἐν μεγάρῳ· ἣ δὲ μέγαν ἱστὸν ὕφαινε
Iliad 3.126	δίπλακα πορφυρέην, πολέας δʼ ἐνέπασσεν ἀέθλους
Iliad 3.127	Τρώων θʼ ἱπποδάμων καὶ Ἀχαιῶν χαλκοχιτώνων,
Iliad 3.128	οὕς ἑθεν εἵνεκʼ ἔπασχον ὑπʼ Ἄρηος παλαμάων·
Iliad 3.129	ἀγχοῦ δʼ ἱσταμένη προσέφη πόδας ὠκέα Ἶρις·
Iliad 3.130	δεῦρʼ ἴθι νύμφα φίλη, ἵνα θέσκελα ἔργα ἴδηαι
Iliad 3.131	Τρώων θʼ ἱπποδάμων καὶ Ἀχαιῶν χαλκοχιτώνων,
Iliad 3.132	οἳ πρὶν ἐπʼ ἀλλήλοισι φέρον πολύδακρυν Ἄρηα
Iliad 3.133	ἐν πεδίῳ ὀλοοῖο λιλαιόμενοι πολέμοιο·
Iliad 3.134	οἳ δὴ νῦν ἕαται σιγῇ, πόλεμος δὲ πέπαυται,
Iliad 3.135	ἀσπίσι κεκλιμένοι, παρὰ δʼ ἔγχεα μακρὰ πέπηγεν.
Iliad 3.136	αὐτὰρ Ἀλέξανδρος καὶ ἀρηΐφιλος Μενέλαος
Iliad 3.137	μακρῇς ἐγχείῃσι μαχήσονται περὶ σεῖο·
Iliad 3.138	τῷ δέ κε νικήσαντι φίλη κεκλήσῃ ἄκοιτις.
Iliad 3.139	ὣς εἰποῦσα θεὰ γλυκὺν ἵμερον ἔμβαλε θυμῷ
Iliad 3.140	ἀνδρός τε προτέρου καὶ ἄστεος ἠδὲ τοκήων·
Iliad 3.141	αὐτίκα δʼ ἀργεννῇσι καλυψαμένη ὀθόνῃσιν
Iliad 3.142	ὁρμᾶτʼ ἐκ θαλάμοιο τέρεν κατὰ δάκρυ χέουσα
Iliad 3.143	οὐκ οἴη, ἅμα τῇ γε καὶ ἀμφίπολοι δύʼ ἕποντο,
Iliad 3.144	Αἴθρη Πιτθῆος θυγάτηρ, Κλυμένη τε βοῶπις·
Iliad 3.145	αἶψα δʼ ἔπειθʼ ἵκανον ὅθι Σκαιαὶ πύλαι ἦσαν.
Iliad 3.146	οἳ δʼ ἀμφὶ Πρίαμον καὶ Πάνθοον ἠδὲ Θυμοίτην
Iliad 3.147	Λάμπόν τε Κλυτίον θʼ Ἱκετάονά τʼ ὄζον Ἄρηος
Iliad 3.148	Οὐκαλέγων τε καὶ Ἀντήνωρ πεπνυμένω ἄμφω
Iliad 3.149	ἥατο δημογέροντες ἐπὶ Σκαιῇσι πύλῃσι,
Iliad 3.150	γήραϊ δὴ πολέμοιο πεπαυμένοι, ἀλλʼ ἀγορηταὶ
Iliad 3.151	ἐσθλοί, τεττίγεσσιν ἐοικότες οἵ τε καθʼ ὕλην
Iliad 3.152	δενδρέῳ ἐφεζόμενοι ὄπα λειριόεσσαν ἱεῖσι·
Iliad 3.153	τοῖοι ἄρα Τρώων ἡγήτορες ἧντʼ ἐπὶ πύργῳ.
Iliad 3.154	οἳ δʼ ὡς οὖν εἴδονθʼ Ἑλένην ἐπὶ πύργον ἰοῦσαν,
Iliad 3.155	ἦκα πρὸς ἀλλήλους ἔπεα πτερόεντʼ ἀγόρευον·
Iliad 3.156	οὐ νέμεσις Τρῶας καὶ ἐϋκνήμιδας Ἀχαιοὺς
Iliad 3.157	τοιῇδʼ ἀμφὶ γυναικὶ πολὺν χρόνον ἄλγεα πάσχειν·
Iliad 3.158	αἰνῶς ἀθανάτῃσι θεῇς εἰς ὦπα ἔοικεν·
Iliad 3.159	ἀλλὰ καὶ ὧς τοίη περ ἐοῦσʼ ἐν νηυσὶ νεέσθω,
Iliad 3.160	μηδʼ ἡμῖν τεκέεσσί τʼ ὀπίσσω πῆμα λίποιτο.
Iliad 3.161	ὣς ἄρʼ ἔφαν, Πρίαμος δʼ Ἑλένην ἐκαλέσσατο φωνῇ·
Iliad 3.162	δεῦρο πάροιθʼ ἐλθοῦσα φίλον τέκος ἵζευ ἐμεῖο,
Iliad 3.163	ὄφρα ἴδῃ πρότερόν τε πόσιν πηούς τε φίλους τε·
Iliad 3.164	οὔ τί μοι αἰτίη ἐσσί, θεοί νύ μοι αἴτιοί εἰσιν
Iliad 3.165	οἵ μοι ἐφώρμησαν πόλεμον πολύδακρυν Ἀχαιῶν·
Iliad 3.166	ὥς μοι καὶ τόνδʼ ἄνδρα πελώριον ἐξονομήνῃς
Iliad 3.167	ὅς τις ὅδʼ ἐστὶν Ἀχαιὸς ἀνὴρ ἠΰς τε μέγας τε.
Iliad 3.168	ἤτοι μὲν κεφαλῇ καὶ μείζονες ἄλλοι ἔασι,
Iliad 3.169	καλὸν δʼ οὕτω ἐγὼν οὔ πω ἴδον ὀφθαλμοῖσιν,
Iliad 3.170	οὐδʼ οὕτω γεραρόν· βασιλῆϊ γὰρ ἀνδρὶ ἔοικε.
Iliad 3.171	τὸν δʼ Ἑλένη μύθοισιν ἀμείβετο δῖα γυναικῶν·
Iliad 3.172	αἰδοῖός τέ μοί ἐσσι φίλε ἑκυρὲ δεινός τε·
Iliad 3.173	ὡς ὄφελεν θάνατός μοι ἁδεῖν κακὸς ὁππότε δεῦρο
Iliad 3.174	υἱέϊ σῷ ἑπόμην θάλαμον γνωτούς τε λιποῦσα
Iliad 3.175	παῖδά τε τηλυγέτην καὶ ὁμηλικίην ἐρατεινήν.
Iliad 3.176	ἀλλὰ τά γʼ οὐκ ἐγένοντο· τὸ καὶ κλαίουσα τέτηκα.
Iliad 3.177	τοῦτο δέ τοι ἐρέω ὅ μʼ ἀνείρεαι ἠδὲ μεταλλᾷς·
Iliad 3.178	οὗτός γʼ Ἀτρεΐδης εὐρὺ κρείων Ἀγαμέμνων,
Iliad 3.179	ἀμφότερον βασιλεύς τʼ ἀγαθὸς κρατερός τʼ αἰχμητής·
Iliad 3.180	δαὴρ αὖτʼ ἐμὸς ἔσκε κυνώπιδος, εἴ ποτʼ ἔην γε.
Iliad 3.181	ὣς φάτο, τὸν δʼ ὁ γέρων ἠγάσσατο φώνησέν τε·
Iliad 3.182	ὦ μάκαρ Ἀτρεΐδη μοιρηγενὲς ὀλβιόδαιμον,
Iliad 3.183	ἦ ῥά νύ τοι πολλοὶ δεδμήατο κοῦροι Ἀχαιῶν.
Iliad 3.184	ἤδη καὶ Φρυγίην εἰσήλυθον ἀμπελόεσσαν,
Iliad 3.185	ἔνθα ἴδον πλείστους Φρύγας ἀνέρας αἰολοπώλους
Iliad 3.186	λαοὺς Ὀτρῆος καὶ Μυγδόνος ἀντιθέοιο,
Iliad 3.187	οἵ ῥα τότʼ ἐστρατόωντο παρʼ ὄχθας Σαγγαρίοιο·
Iliad 3.188	καὶ γὰρ ἐγὼν ἐπίκουρος ἐὼν μετὰ τοῖσιν ἐλέχθην
Iliad 3.189	ἤματι τῷ ὅτε τʼ ἦλθον Ἀμαζόνες ἀντιάνειραι·
Iliad 3.190	ἀλλʼ οὐδʼ οἳ τόσοι ἦσαν ὅσοι ἑλίκωπες Ἀχαιοί.
Iliad 3.191	δεύτερον αὖτʼ Ὀδυσῆα ἰδὼν ἐρέεινʼ ὁ γεραιός·
Iliad 3.192	εἴπʼ ἄγε μοι καὶ τόνδε φίλον τέκος ὅς τις ὅδʼ ἐστί·
Iliad 3.193	μείων μὲν κεφαλῇ Ἀγαμέμνονος Ἀτρεΐδαο,
Iliad 3.194	εὐρύτερος δʼ ὤμοισιν ἰδὲ στέρνοισιν ἰδέσθαι.
Iliad 3.195	τεύχεα μέν οἱ κεῖται ἐπὶ χθονὶ πουλυβοτείρῃ,
Iliad 3.196	αὐτὸς δὲ κτίλος ὣς ἐπιπωλεῖται στίχας ἀνδρῶν·
Iliad 3.197	ἀρνειῷ μιν ἔγωγε ἐΐσκω πηγεσιμάλλῳ,
Iliad 3.198	ὅς τʼ οἰῶν μέγα πῶϋ διέρχεται ἀργεννάων.
Iliad 3.199	τὸν δʼ ἠμείβετʼ ἔπειθʼ Ἑλένη Διὸς ἐκγεγαυῖα·
Iliad 3.200	οὗτος δʼ αὖ Λαερτιάδης πολύμητις Ὀδυσσεύς,
Iliad 3.201	ὃς τράφη ἐν δήμῳ Ἰθάκης κραναῆς περ ἐούσης
Iliad 3.202	εἰδὼς παντοίους τε δόλους καὶ μήδεα πυκνά.
Iliad 3.203	τὴν δʼ αὖτʼ Ἀντήνωρ πεπνυμένος ἀντίον ηὔδα·
Iliad 3.204	ὦ γύναι ἦ μάλα τοῦτο ἔπος νημερτὲς ἔειπες·
Iliad 3.205	ἤδη γὰρ καὶ δεῦρό ποτʼ ἤλυθε δῖος Ὀδυσσεὺς
Iliad 3.206	σεῦ ἕνεκʼ ἀγγελίης σὺν ἀρηϊφίλῳ Μενελάῳ·
Iliad 3.207	τοὺς δʼ ἐγὼ ἐξείνισσα καὶ ἐν μεγάροισι φίλησα,
Iliad 3.208	ἀμφοτέρων δὲ φυὴν ἐδάην καὶ μήδεα πυκνά.
Iliad 3.209	ἀλλʼ ὅτε δὴ Τρώεσσιν ἐν ἀγρομένοισιν ἔμιχθεν
Iliad 3.210	στάντων μὲν Μενέλαος ὑπείρεχεν εὐρέας ὤμους,
Iliad 3.211	ἄμφω δʼ ἑζομένω γεραρώτερος ἦεν Ὀδυσσεύς·
Iliad 3.212	ἀλλʼ ὅτε δὴ μύθους καὶ μήδεα πᾶσιν ὕφαινον
Iliad 3.213	ἤτοι μὲν Μενέλαος ἐπιτροχάδην ἀγόρευε,
Iliad 3.214	παῦρα μὲν ἀλλὰ μάλα λιγέως, ἐπεὶ οὐ πολύμυθος
Iliad 3.215	οὐδʼ ἀφαμαρτοεπής· ἦ καὶ γένει ὕστερος ἦεν.
Iliad 3.216	ἀλλʼ ὅτε δὴ πολύμητις ἀναΐξειεν Ὀδυσσεὺς
Iliad 3.217	στάσκεν, ὑπαὶ δὲ ἴδεσκε κατὰ χθονὸς ὄμματα πήξας,
Iliad 3.218	σκῆπτρον δʼ οὔτʼ ὀπίσω οὔτε προπρηνὲς ἐνώμα,
Iliad 3.219	ἀλλʼ ἀστεμφὲς ἔχεσκεν ἀΐδρεϊ φωτὶ ἐοικώς·
Iliad 3.220	φαίης κε ζάκοτόν τέ τινʼ ἔμμεναι ἄφρονά τʼ αὔτως.
Iliad 3.221	ἀλλʼ ὅτε δὴ ὄπα τε μεγάλην ἐκ στήθεος εἵη
Iliad 3.222	καὶ ἔπεα νιφάδεσσιν ἐοικότα χειμερίῃσιν,
Iliad 3.223	οὐκ ἂν ἔπειτʼ Ὀδυσῆΐ γʼ ἐρίσσειε βροτὸς ἄλλος·
Iliad 3.224	οὐ τότε γʼ ὧδʼ Ὀδυσῆος ἀγασσάμεθʼ εἶδος ἰδόντες.
Iliad 3.225	τὸ τρίτον αὖτʼ Αἴαντα ἰδὼν ἐρέεινʼ ὃ γεραιός·
Iliad 3.226	τίς τὰρ ὅδʼ ἄλλος Ἀχαιὸς ἀνὴρ ἠΰς τε μέγας τε
Iliad 3.227	ἔξοχος Ἀργείων κεφαλήν τε καὶ εὐρέας ὤμους;
Iliad 3.228	τὸν δʼ Ἑλένη τανύπεπλος ἀμείβετο δῖα γυναικῶν·
Iliad 3.229	οὗτος δʼ Αἴας ἐστὶ πελώριος ἕρκος Ἀχαιῶν·
Iliad 3.230	Ἰδομενεὺς δʼ ἑτέρωθεν ἐνὶ Κρήτεσσι θεὸς ὣς
Iliad 3.231	ἕστηκʼ, ἀμφὶ δέ μιν Κρητῶν ἀγοὶ ἠγερέθονται.
Iliad 3.232	πολλάκι μιν ξείνισσεν ἀρηΐφιλος Μενέλαος
Iliad 3.233	οἴκῳ ἐν ἡμετέρῳ ὁπότε Κρήτηθεν ἵκοιτο.
Iliad 3.234	νῦν δʼ ἄλλους μὲν πάντας ὁρῶ ἑλίκωπας Ἀχαιούς,
Iliad 3.235	οὕς κεν ἐῢ γνοίην καί τʼ οὔνομα μυθησαίμην·
Iliad 3.236	δοιὼ δʼ οὐ δύναμαι ἰδέειν κοσμήτορε λαῶν
Iliad 3.237	Κάστορά θʼ ἱππόδαμον καὶ πὺξ ἀγαθὸν Πολυδεύκεα
Iliad 3.238	αὐτοκασιγνήτω, τώ μοι μία γείνατο μήτηρ.
Iliad 3.239	ἢ οὐχ ἑσπέσθην Λακεδαίμονος ἐξ ἐρατεινῆς,
Iliad 3.240	ἢ δεύρω μὲν ἕποντο νέεσσʼ ἔνι ποντοπόροισι,
Iliad 3.241	νῦν αὖτʼ οὐκ ἐθέλουσι μάχην καταδύμεναι ἀνδρῶν
Iliad 3.242	αἴσχεα δειδιότες καὶ ὀνείδεα πόλλʼ ἅ μοί ἐστιν.
Iliad 3.243	ὣς φάτο, τοὺς δʼ ἤδη κάτεχεν φυσίζοος αἶα
Iliad 3.244	ἐν Λακεδαίμονι αὖθι φίλῃ ἐν πατρίδι γαίῃ.
Iliad 3.245	κήρυκες δʼ ἀνὰ ἄστυ θεῶν φέρον ὅρκια πιστὰ
Iliad 3.246	ἄρνε δύω καὶ οἶνον ἐΰφρονα καρπὸν ἀρούρης
Iliad 3.247	ἀσκῷ ἐν αἰγείῳ· φέρε δὲ κρητῆρα φαεινὸν
Iliad 3.248	κῆρυξ Ἰδαῖος ἠδὲ χρύσεια κύπελλα·
Iliad 3.249	ὄτρυνεν δὲ γέροντα παριστάμενος ἐπέεσσιν·
Iliad 3.250	ὄρσεο Λαομεδοντιάδη, καλέουσιν ἄριστοι
Iliad 3.251	Τρώων θʼ ἱπποδάμων καὶ Ἀχαιῶν χαλκοχιτώνων
Iliad 3.252	ἐς πεδίον καταβῆναι ἵνʼ ὅρκια πιστὰ τάμητε·
Iliad 3.253	αὐτὰρ Ἀλέξανδρος καὶ ἀρηΐφιλος Μενέλαος
Iliad 3.254	μακρῇς ἐγχείῃσι μαχήσοντʼ ἀμφὶ γυναικί·
Iliad 3.255	τῷ δέ κε νικήσαντι γυνὴ καὶ κτήμαθʼ ἕποιτο·
Iliad 3.256	οἳ δʼ ἄλλοι φιλότητα καὶ ὅρκια πιστὰ ταμόντες
Iliad 3.257	ναίοιμεν Τροίην ἐριβώλακα, τοὶ δὲ νέονται
Iliad 3.258	Ἄργος ἐς ἱππόβοτον καὶ Ἀχαιΐδα καλλιγύναικα.
Iliad 3.259	ὣς φάτο ῥίγησεν δʼ ὃ γέρων, ἐκέλευσε δʼ ἑταίρους
Iliad 3.260	ἵππους ζευγνύμεναι· τοὶ δʼ ὀτραλέως ἐπίθοντο.
Iliad 3.261	ἂν δʼ ἄρʼ ἔβη Πρίαμος, κατὰ δʼ ἡνία τεῖνεν ὀπίσσω·
Iliad 3.262	πὰρ δέ οἱ Ἀντήνωρ περικαλλέα βήσετο δίφρον·
Iliad 3.263	τὼ δὲ διὰ Σκαιῶν πεδίον δʼ ἔχον ὠκέας ἵππους.
Iliad 3.264	ἀλλʼ ὅτε δή ῥʼ ἵκοντο μετὰ Τρῶας καὶ Ἀχαιούς,
Iliad 3.265	ἐξ ἵππων ἀποβάντες ἐπὶ χθόνα πουλυβότειραν
Iliad 3.266	ἐς μέσσον Τρώων καὶ Ἀχαιῶν ἐστιχόωντο.
Iliad 3.267	ὄρνυτο δʼ αὐτίκʼ ἔπειτα ἄναξ ἀνδρῶν Ἀγαμέμνων,
Iliad 3.268	ἂν δʼ Ὀδυσεὺς πολύμητις· ἀτὰρ κήρυκες ἀγαυοὶ
Iliad 3.269	ὅρκια πιστὰ θεῶν σύναγον, κρητῆρι δὲ οἶνον
Iliad 3.270	μίσγον, ἀτὰρ βασιλεῦσιν ὕδωρ ἐπὶ χεῖρας ἔχευαν.
Iliad 3.271	Ἀτρεΐδης δὲ ἐρυσσάμενος χείρεσσι μάχαιραν,
Iliad 3.272	ἥ οἱ πὰρ ξίφεος μέγα κουλεόν αἰὲν ἄωρτο,
Iliad 3.273	ἀρνῶν ἐκ κεφαλέων τάμνε τρίχας· αὐτὰρ ἔπειτα
Iliad 3.274	κήρυκες Τρώων καὶ Ἀχαιῶν νεῖμαν ἀρίστοις.
Iliad 3.275	τοῖσιν δʼ Ἀτρεΐδης μεγάλʼ εὔχετο χεῖρας ἀνασχών·
Iliad 3.276	Ζεῦ πάτερ Ἴδηθεν μεδέων κύδιστε μέγιστε,
Iliad 3.277	Ἠέλιός θʼ, ὃς πάντʼ ἐφορᾷς καὶ πάντʼ ἐπακούεις,
Iliad 3.278	καὶ ποταμοὶ καὶ γαῖα, καὶ οἳ ὑπένερθε καμόντας
Iliad 3.279	ἀνθρώπους τίνυσθον ὅτις κʼ ἐπίορκον ὀμόσσῃ,
Iliad 3.280	ὑμεῖς μάρτυροι ἔστε, φυλάσσετε δʼ ὅρκια πιστά·
Iliad 3.281	εἰ μέν κεν Μενέλαον Ἀλέξανδρος καταπέφνῃ
Iliad 3.282	αὐτὸς ἔπειθʼ Ἑλένην ἐχέτω καὶ κτήματα πάντα,
Iliad 3.283	ἡμεῖς δʼ ἐν νήεσσι νεώμεθα ποντοπόροισιν·
Iliad 3.284	εἰ δέ κʼ Ἀλέξανδρον κτείνῃ ξανθὸς Μενέλαος,
Iliad 3.285	Τρῶας ἔπειθʼ Ἑλένην καὶ κτήματα πάντʼ ἀποδοῦναι,
Iliad 3.286	τιμὴν δʼ Ἀργείοις ἀποτινέμεν ἥν τινʼ ἔοικεν,
Iliad 3.287	ἥ τε καὶ ἐσσομένοισι μετʼ ἀνθρώποισι πέληται.
Iliad 3.288	εἰ δʼ ἂν ἐμοὶ τιμὴν Πρίαμος Πριάμοιό τε παῖδες
Iliad 3.289	τίνειν οὐκ ἐθέλωσιν Ἀλεξάνδροιο πεσόντος,
Iliad 3.290	αὐτὰρ ἐγὼ καὶ ἔπειτα μαχήσομαι εἵνεκα ποινῆς
Iliad 3.291	αὖθι μένων, ἧός κε τέλος πολέμοιο κιχείω.
Iliad 3.292	ἦ, καὶ ἀπὸ στομάχους ἀρνῶν τάμε νηλέϊ χαλκῷ·
Iliad 3.293	καὶ τοὺς μὲν κατέθηκεν ἐπὶ χθονὸς ἀσπαίροντας
Iliad 3.294	θυμοῦ δευομένους· ἀπὸ γὰρ μένος εἵλετο χαλκός.
Iliad 3.295	οἶνον δʼ ἐκ κρητῆρος ἀφυσσόμενοι δεπάεσσιν
Iliad 3.296	ἔκχεον, ἠδʼ εὔχοντο θεοῖς αἰειγενέτῃσιν.
Iliad 3.297	ὧδε δέ τις εἴπεσκεν Ἀχαιῶν τε Τρώων τε·
Iliad 3.298	Ζεῦ κύδιστε μέγιστε καὶ ἀθάνατοι θεοὶ ἄλλοι
Iliad 3.299	ὁππότεροι πρότεροι ὑπὲρ ὅρκια πημήνειαν
Iliad 3.300	ὧδέ σφʼ ἐγκέφαλος χαμάδις ῥέοι ὡς ὅδε οἶνος
Iliad 3.301	αὐτῶν καὶ τεκέων, ἄλοχοι δʼ ἄλλοισι δαμεῖεν.
Iliad 3.302	ὣς ἔφαν, οὐδʼ ἄρα πώ σφιν ἐπεκραίαινε Κρονίων.
Iliad 3.303	τοῖσι δὲ Δαρδανίδης Πρίαμος μετὰ μῦθον ἔειπε·
Iliad 3.304	κέκλυτέ μευ Τρῶες καὶ ἐϋκνήμιδες Ἀχαιοί·
Iliad 3.305	ἤτοι ἐγὼν εἶμι προτὶ Ἴλιον ἠνεμόεσσαν
Iliad 3.306	ἄψ, ἐπεὶ οὔ πω τλήσομʼ ἐν ὀφθαλμοῖσιν ὁρᾶσθαι
Iliad 3.307	μαρνάμενον φίλον υἱὸν ἀρηϊφίλῳ Μενελάῳ·
Iliad 3.308	Ζεὺς μέν που τό γε οἶδε καὶ ἀθάνατοι θεοὶ ἄλλοι
Iliad 3.309	ὁπποτέρῳ θανάτοιο τέλος πεπρωμένον ἐστίν.
Iliad 3.310	ἦ ῥα καὶ ἐς δίφρον ἄρνας θέτο ἰσόθεος φώς,
Iliad 3.311	ἂν δʼ ἄρʼ ἔβαινʼ αὐτός, κατὰ δʼ ἡνία τεῖνεν ὀπίσσω·
Iliad 3.312	πὰρ δέ οἱ Ἀντήνωρ περικαλλέα βήσετο δίφρον.
Iliad 3.313	τὼ μὲν ἄρʼ ἄψορροι προτὶ Ἴλιον ἀπονέοντο·
Iliad 3.314	Ἕκτωρ δὲ Πριάμοιο πάϊς καὶ δῖος Ὀδυσσεὺς
Iliad 3.315	χῶρον μὲν πρῶτον διεμέτρεον, αὐτὰρ ἔπειτα
Iliad 3.316	κλήρους ἐν κυνέῃ χαλκήρεϊ πάλλον ἑλόντες,
Iliad 3.317	ὁππότερος δὴ πρόσθεν ἀφείη χάλκεον ἔγχος.
Iliad 3.318	λαοὶ δʼ ἠρήσαντο, θεοῖσι δὲ χεῖρας ἀνέσχον,
Iliad 3.319	ὧδε δέ τις εἴπεσκεν Ἀχαιῶν τε Τρώων τε·
Iliad 3.320	Ζεῦ πάτερ Ἴδηθεν μεδέων κύδιστε μέγιστε
Iliad 3.321	ὁππότερος τάδε ἔργα μετʼ ἀμφοτέροισιν ἔθηκε,
Iliad 3.322	τὸν δὸς ἀποφθίμενον δῦναι δόμον Ἄϊδος εἴσω,
Iliad 3.323	ἡμῖν δʼ αὖ φιλότητα καὶ ὅρκια πιστὰ γενέσθαι.
Iliad 3.324	ὣς ἄρʼ ἔφαν, πάλλεν δὲ μέγας κορυθαίολος Ἕκτωρ
Iliad 3.325	ἂψ ὁρόων· Πάριος δὲ θοῶς ἐκ κλῆρος ὄρουσεν.
Iliad 3.326	οἳ μὲν ἔπειθʼ ἵζοντο κατὰ στίχας, ἧχι ἑκάστῳ
Iliad 3.327	ἵπποι ἀερσίποδες καὶ ποικίλα τεύχεʼ ἔκειτο·
Iliad 3.328	αὐτὰρ ὅ γʼ ἀμφʼ ὤμοισιν ἐδύσετο τεύχεα καλὰ
Iliad 3.329	δῖος Ἀλέξανδρος Ἑλένης πόσις ἠϋκόμοιο.
Iliad 3.330	κνημῖδας μὲν πρῶτα περὶ κνήμῃσιν ἔθηκε
Iliad 3.331	καλάς, ἀργυρέοισιν ἐπισφυρίοις ἀραρυίας·
Iliad 3.332	δεύτερον αὖ θώρηκα περὶ στήθεσσιν ἔδυνεν
Iliad 3.333	οἷο κασιγνήτοιο Λυκάονος· ἥρμοσε δʼ αὐτῷ.
Iliad 3.334	ἀμφὶ δʼ ἄρʼ ὤμοισιν βάλετο ξίφος ἀργυρόηλον
Iliad 3.335	χάλκεον, αὐτὰρ ἔπειτα σάκος μέγα τε στιβαρόν τε·
Iliad 3.336	κρατὶ δʼ ἐπʼ ἰφθίμῳ κυνέην εὔτυκτον ἔθηκεν
Iliad 3.337	ἵππουριν· δεινὸν δὲ λόφος καθύπερθεν ἔνευεν·
Iliad 3.338	εἵλετο δʼ ἄλκιμον ἔγχος, ὅ οἱ παλάμηφιν ἀρήρει.
Iliad 3.339	ὣς δʼ αὔτως Μενέλαος ἀρήϊος ἔντεʼ ἔδυνεν.
Iliad 3.340	οἳ δʼ ἐπεὶ οὖν ἑκάτερθεν ὁμίλου θωρήχθησαν,
Iliad 3.341	ἐς μέσσον Τρώων καὶ Ἀχαιῶν ἐστιχόωντο
Iliad 3.342	δεινὸν δερκόμενοι· θάμβος δʼ ἔχεν εἰσορόωντας
Iliad 3.343	Τρῶάς θʼ ἱπποδάμους καὶ ἐϋκνήμιδας Ἀχαιούς.
Iliad 3.344	καί ῥʼ ἐγγὺς στήτην διαμετρητῷ ἐνὶ χώρῳ
Iliad 3.345	σείοντʼ ἐγχείας ἀλλήλοισιν κοτέοντε.
Iliad 3.346	πρόσθε δʼ Ἀλέξανδρος προΐει δολιχόσκιον ἔγχος,
Iliad 3.347	καὶ βάλεν Ἀτρεΐδαο κατʼ ἀσπίδα πάντοσε ἴσην,
Iliad 3.348	οὐδʼ ἔρρηξεν χαλκός, ἀνεγνάμφθη δέ οἱ αἰχμὴ
Iliad 3.349	ἀσπίδʼ ἐνὶ κρατερῇ· ὃ δὲ δεύτερον ὄρνυτο χαλκῷ
Iliad 3.350	Ἀτρεΐδης Μενέλαος ἐπευξάμενος Διὶ πατρί·
Iliad 3.351	Ζεῦ ἄνα δὸς τίσασθαι ὅ με πρότερος κάκʼ ἔοργε
Iliad 3.352	δῖον Ἀλέξανδρον, καὶ ἐμῇς ὑπὸ χερσὶ δάμασσον,
Iliad 3.353	ὄφρα τις ἐρρίγῃσι καὶ ὀψιγόνων ἀνθρώπων
Iliad 3.354	ξεινοδόκον κακὰ ῥέξαι, ὅ κεν φιλότητα παράσχῃ.
Iliad 3.355	ἦ ῥα καὶ ἀμπεπαλὼν προΐει δολιχόσκιον ἔγχος,
Iliad 3.356	καὶ βάλε Πριαμίδαο κατʼ ἀσπίδα πάντοσε ἴσην·
Iliad 3.357	διὰ μὲν ἀσπίδος ἦλθε φαεινῆς ὄβριμον ἔγχος,
Iliad 3.358	καὶ διὰ θώρηκος πολυδαιδάλου ἠρήρειστο·
Iliad 3.359	ἀντικρὺ δὲ παραὶ λαπάρην διάμησε χιτῶνα
Iliad 3.360	ἔγχος· ὃ δʼ ἐκλίνθη καὶ ἀλεύατο κῆρα μέλαιναν.
Iliad 3.361	Ἀτρεΐδης δὲ ἐρυσσάμενος ξίφος ἀργυρόηλον
Iliad 3.362	πλῆξεν ἀνασχόμενος κόρυθος φάλον· ἀμφὶ δʼ ἄρʼ αὐτῷ
Iliad 3.363	τριχθά τε καὶ τετραχθὰ διατρυφὲν ἔκπεσε χειρός.
Iliad 3.364	Ἀτρεΐδης δʼ ᾤμωξεν ἰδὼν εἰς οὐρανὸν εὐρύν·
Iliad 3.365	Ζεῦ πάτερ οὔ τις σεῖο θεῶν ὀλοώτερος ἄλλος·
Iliad 3.366	ἦ τʼ ἐφάμην τίσασθαι Ἀλέξανδρον κακότητος·
Iliad 3.367	νῦν δέ μοι ἐν χείρεσσιν ἄγη ξίφος, ἐκ δέ μοι ἔγχος
Iliad 3.368	ἠΐχθη παλάμηφιν ἐτώσιον, οὐδʼ ἔβαλόν μιν.
Iliad 3.369	ἦ καὶ ἐπαΐξας κόρυθος λάβεν ἱπποδασείης,
Iliad 3.370	ἕλκε δʼ ἐπιστρέψας μετʼ ἐϋκνήμιδας Ἀχαιούς·
Iliad 3.371	ἄγχε δέ μιν πολύκεστος ἱμὰς ἁπαλὴν ὑπὸ δειρήν,
Iliad 3.372	ὅς οἱ ὑπʼ ἀνθερεῶνος ὀχεὺς τέτατο τρυφαλείης.
Iliad 3.373	καί νύ κεν εἴρυσσέν τε καὶ ἄσπετον ἤρατο κῦδος,
Iliad 3.374	εἰ μὴ ἄρʼ ὀξὺ νόησε Διὸς θυγάτηρ Ἀφροδίτη,
Iliad 3.375	ἥ οἱ ῥῆξεν ἱμάντα βοὸς ἶφι κταμένοιο·
Iliad 3.376	κεινὴ δὲ τρυφάλεια ἅμʼ ἕσπετο χειρὶ παχείῃ.
Iliad 3.377	τὴν μὲν ἔπειθʼ ἥρως μετʼ ἐϋκνήμιδας Ἀχαιοὺς
Iliad 3.378	ῥῖψʼ ἐπιδινήσας, κόμισαν δʼ ἐρίηρες ἑταῖροι·
Iliad 3.379	αὐτὰρ ὃ ἂψ ἐπόρουσε κατακτάμεναι μενεαίνων
Iliad 3.380	ἔγχεϊ χαλκείῳ· τὸν δʼ ἐξήρπαξʼ Ἀφροδίτη
Iliad 3.381	ῥεῖα μάλʼ ὥς τε θεός, ἐκάλυψε δʼ ἄρʼ ἠέρι πολλῇ,
Iliad 3.382	κὰδ δʼ εἷσʼ ἐν θαλάμῳ εὐώδεϊ κηώεντι.
Iliad 3.383	αὐτὴ δʼ αὖ Ἑλένην καλέουσʼ ἴε· τὴν δὲ κίχανε
Iliad 3.384	πύργῳ ἐφʼ ὑψηλῷ, περὶ δὲ Τρῳαὶ ἅλις ἦσαν·
Iliad 3.385	χειρὶ δὲ νεκταρέου ἑανοῦ ἐτίναξε λαβοῦσα,
Iliad 3.386	γρηῒ δέ μιν ἐϊκυῖα παλαιγενέϊ προσέειπεν
Iliad 3.387	εἰροκόμῳ, ἥ οἱ Λακεδαίμονι ναιετοώσῃ
Iliad 3.388	ἤσκειν εἴρια καλά, μάλιστα δέ μιν φιλέεσκε·
Iliad 3.389	τῇ μιν ἐεισαμένη προσεφώνεε δῖʼ Ἀφροδίτη·
Iliad 3.390	δεῦρʼ ἴθʼ· Ἀλέξανδρός σε καλεῖ οἶκον δὲ νέεσθαι.
Iliad 3.391	κεῖνος ὅ γʼ ἐν θαλάμῳ καὶ δινωτοῖσι λέχεσσι
Iliad 3.392	κάλλεΐ τε στίλβων καὶ εἵμασιν· οὐδέ κε φαίης
Iliad 3.393	ἀνδρὶ μαχεσσάμενον τόν γʼ ἐλθεῖν, ἀλλὰ χορὸν δὲ
Iliad 3.394	ἔρχεσθʼ, ἠὲ χοροῖο νέον λήγοντα καθίζειν.
Iliad 3.395	ὣς φάτο, τῇ δʼ ἄρα θυμὸν ἐνὶ στήθεσσιν ὄρινε·
Iliad 3.396	καί ῥʼ ὡς οὖν ἐνόησε θεᾶς περικαλλέα δειρὴν
Iliad 3.397	στήθεά θʼ ἱμερόεντα καὶ ὄμματα μαρμαίροντα,
Iliad 3.398	θάμβησέν τʼ ἄρʼ ἔπειτα ἔπος τʼ ἔφατʼ ἔκ τʼ ὀνόμαζε·
Iliad 3.399	δαιμονίη, τί με ταῦτα λιλαίεαι ἠπεροπεύειν;
Iliad 3.400	ἦ πῄ με προτέρω πολίων εὖ ναιομενάων
Iliad 3.401	ἄξεις, ἢ Φρυγίης ἢ Μῃονίης ἐρατεινῆς,
Iliad 3.402	εἴ τίς τοι καὶ κεῖθι φίλος μερόπων ἀνθρώπων·
Iliad 3.403	οὕνεκα δὴ νῦν δῖον Ἀλέξανδρον Μενέλαος
Iliad 3.404	νικήσας ἐθέλει στυγερὴν ἐμὲ οἴκαδʼ ἄγεσθαι,
Iliad 3.405	τοὔνεκα δὴ νῦν δεῦρο δολοφρονέουσα παρέστης;
Iliad 3.406	ἧσο παρʼ αὐτὸν ἰοῦσα, θεῶν δʼ ἀπόεικε κελεύθου,
Iliad 3.407	μηδʼ ἔτι σοῖσι πόδεσσιν ὑποστρέψειας Ὄλυμπον,
Iliad 3.408	ἀλλʼ αἰεὶ περὶ κεῖνον ὀΐζυε καί ἑ φύλασσε,
Iliad 3.409	εἰς ὅ κέ σʼ ἢ ἄλοχον ποιήσεται ἢ ὅ γε δούλην.
Iliad 3.410	κεῖσε δʼ ἐγὼν οὐκ εἶμι· νεμεσσητὸν δέ κεν εἴη·
Iliad 3.411	κείνου πορσανέουσα λέχος· Τρῳαὶ δέ μʼ ὀπίσσω
Iliad 3.412	πᾶσαι μωμήσονται· ἔχω δʼ ἄχεʼ ἄκριτα θυμῷ.
Iliad 3.413	τὴν δὲ χολωσαμένη προσεφώνεε δῖʼ Ἀφροδίτη·
Iliad 3.414	μή μʼ ἔρεθε σχετλίη, μὴ χωσαμένη σε μεθείω,
Iliad 3.415	τὼς δέ σʼ ἀπεχθήρω ὡς νῦν ἔκπαγλʼ ἐφίλησα,
Iliad 3.416	μέσσῳ δʼ ἀμφοτέρων μητίσομαι ἔχθεα λυγρὰ
Iliad 3.417	Τρώων καὶ Δαναῶν, σὺ δέ κεν κακὸν οἶτον ὄληαι.
Iliad 3.418	ὣς ἔφατʼ, ἔδεισεν δʼ Ἑλένη Διὸς ἐκγεγαυῖα,
Iliad 3.419	βῆ δὲ κατασχομένη ἑανῷ ἀργῆτι φαεινῷ
Iliad 3.420	σιγῇ, πάσας δὲ Τρῳὰς λάθεν· ἦρχε δὲ δαίμων.
Iliad 3.421	αἳ δʼ ὅτʼ Ἀλεξάνδροιο δόμον περικαλλέʼ ἵκοντο,
Iliad 3.422	ἀμφίπολοι μὲν ἔπειτα θοῶς ἐπὶ ἔργα τράποντο,
Iliad 3.423	ἣ δʼ εἰς ὑψόροφον θάλαμον κίε δῖα γυναικῶν.
Iliad 3.424	τῇ δʼ ἄρα δίφρον ἑλοῦσα φιλομειδὴς Ἀφροδίτη
Iliad 3.425	ἀντίʼ Ἀλεξάνδροιο θεὰ κατέθηκε φέρουσα·
Iliad 3.426	ἔνθα κάθιζʼ Ἑλένη κούρη Διὸς αἰγιόχοιο
Iliad 3.427	ὄσσε πάλιν κλίνασα, πόσιν δʼ ἠνίπαπε μύθῳ·
Iliad 3.428	ἤλυθες ἐκ πολέμου· ὡς ὤφελες αὐτόθʼ ὀλέσθαι
Iliad 3.429	ἀνδρὶ δαμεὶς κρατερῷ, ὃς ἐμὸς πρότερος πόσις ἦεν.
Iliad 3.430	ἦ μὲν δὴ πρίν γʼ εὔχεʼ ἀρηϊφίλου Μενελάου
Iliad 3.431	σῇ τε βίῃ καὶ χερσὶ καὶ ἔγχεϊ φέρτερος εἶναι·
Iliad 3.432	ἀλλʼ ἴθι νῦν προκάλεσσαι ἀρηΐφιλον Μενέλαον
Iliad 3.433	ἐξαῦτις μαχέσασθαι ἐναντίον· ἀλλά σʼ ἔγωγε
Iliad 3.434	παύεσθαι κέλομαι, μηδὲ ξανθῷ Μενελάῳ
Iliad 3.435	ἀντίβιον πόλεμον πολεμίζειν ἠδὲ μάχεσθαι
Iliad 3.436	ἀφραδέως, μή πως τάχʼ ὑπʼ αὐτοῦ δουρὶ δαμήῃς.
Iliad 3.437	τὴν δὲ Πάρις μύθοισιν ἀμειβόμενος προσέειπε·
Iliad 3.438	μή με γύναι χαλεποῖσιν ὀνείδεσι θυμὸν ἔνιπτε·
Iliad 3.439	νῦν μὲν γὰρ Μενέλαος ἐνίκησεν σὺν Ἀθήνῃ,
Iliad 3.440	κεῖνον δʼ αὖτις ἐγώ· πάρα γὰρ θεοί εἰσι καὶ ἡμῖν.
Iliad 3.441	ἀλλʼ ἄγε δὴ φιλότητι τραπείομεν εὐνηθέντε·
Iliad 3.442	οὐ γάρ πώ ποτέ μʼ ὧδέ γʼ ἔρως φρένας ἀμφεκάλυψεν,
Iliad 3.443	οὐδʼ ὅτε σε πρῶτον Λακεδαίμονος ἐξ ἐρατεινῆς
Iliad 3.444	ἔπλεον ἁρπάξας ἐν ποντοπόροισι νέεσσι,
Iliad 3.445	νήσῳ δʼ ἐν Κραναῇ ἐμίγην φιλότητι καὶ εὐνῇ,
Iliad 3.446	ὥς σεο νῦν ἔραμαι καί με γλυκὺς ἵμερος αἱρεῖ.
Iliad 3.447	ἦ ῥα, καὶ ἄρχε λέχος δὲ κιών· ἅμα δʼ εἵπετʼ ἄκοιτις.
Iliad 3.448	τὼ μὲν ἄρʼ ἐν τρητοῖσι κατεύνασθεν λεχέεσσιν,
Iliad 3.449	Ἀτρεΐδης δʼ ἀνʼ ὅμιλον ἐφοίτα θηρὶ ἐοικὼς
Iliad 3.450	εἴ που ἐσαθρήσειεν Ἀλέξανδρον θεοειδέα.
Iliad 3.451	ἀλλʼ οὔ τις δύνατο Τρώων κλειτῶν τʼ ἐπικούρων
Iliad 3.452	δεῖξαι Ἀλέξανδρον τότʼ ἀρηϊφίλῳ Μενελάῳ·
Iliad 3.453	οὐ μὲν γὰρ φιλότητί γʼ ἐκεύθανον εἴ τις ἴδοιτο·
Iliad 3.454	ἶσον γάρ σφιν πᾶσιν ἀπήχθετο κηρὶ μελαίνῃ.
Iliad 3.455	τοῖσι δὲ καὶ μετέειπεν ἄναξ ἀνδρῶν Ἀγαμέμνων·
Iliad 3.456	κέκλυτέ μευ Τρῶες καὶ Δάρδανοι ἠδʼ ἐπίκουροι·
Iliad 3.457	νίκη μὲν δὴ φαίνετʼ ἀρηϊφίλου Μενελάου,
Iliad 3.458	ὑμεῖς δʼ Ἀργείην Ἑλένην καὶ κτήμαθʼ ἅμʼ αὐτῇ
Iliad 3.459	ἔκδοτε, καὶ τιμὴν ἀποτινέμεν ἥν τινʼ ἔοικεν,
Iliad 3.460	ἥ τε καὶ ἐσσομένοισι μετʼ ἀνθρώποισι πέληται.
Iliad 3.461	ὣς ἔφατʼ Ἀτρεΐδης, ἐπὶ δʼ ᾔνεον ἄλλοι Ἀχαιοί.
Iliad 4.1	οἳ δὲ θεοὶ πὰρ Ζηνὶ καθήμενοι ἠγορόωντο
Iliad 4.2	χρυσέῳ ἐν δαπέδῳ, μετὰ δέ σφισι πότνια Ἥβη
Iliad 4.3	νέκταρ ἐοινοχόει· τοὶ δὲ χρυσέοις δεπάεσσι
Iliad 4.4	δειδέχατʼ ἀλλήλους, Τρώων πόλιν εἰσορόωντες·
Iliad 4.5	αὐτίκʼ ἐπειρᾶτο Κρονίδης ἐρεθιζέμεν Ἥρην
Iliad 4.6	κερτομίοις ἐπέεσσι παραβλήδην ἀγορεύων·
Iliad 4.7	δοιαὶ μὲν Μενελάῳ ἀρηγόνες εἰσὶ θεάων
Iliad 4.8	Ἥρη τʼ Ἀργείη καὶ Ἀλαλκομενηῒς Ἀθήνη.
Iliad 4.9	ἀλλʼ ἤτοι ταὶ νόσφι καθήμεναι εἰσορόωσαι
Iliad 4.10	τέρπεσθον· τῷ δʼ αὖτε φιλομειδὴς Ἀφροδίτη
Iliad 4.11	αἰεὶ παρμέμβλωκε καὶ αὐτοῦ κῆρας ἀμύνει·
Iliad 4.12	καὶ νῦν ἐξεσάωσεν ὀϊόμενον θανέεσθαι.
Iliad 4.13	ἀλλʼ ἤτοι νίκη μὲν ἀρηϊφίλου Μενελάου·
Iliad 4.14	ἡμεῖς δὲ φραζώμεθʼ ὅπως ἔσται τάδε ἔργα,
Iliad 4.15	ἤ ῥʼ αὖτις πόλεμόν τε κακὸν καὶ φύλοπιν αἰνὴν
Iliad 4.16	ὄρσομεν, ἦ φιλότητα μετʼ ἀμφοτέροισι βάλωμεν.
Iliad 4.17	εἰ δʼ αὖ πως τόδε πᾶσι φίλον καὶ ἡδὺ γένοιτο,
Iliad 4.18	ἤτοι μὲν οἰκέοιτο πόλις Πριάμοιο ἄνακτος,
Iliad 4.19	αὖτις δʼ Ἀργείην Ἑλένην Μενέλαος ἄγοιτο.
Iliad 4.20	ὣς ἔφαθʼ, αἳ δʼ ἐπέμυξαν Ἀθηναίη τε καὶ Ἥρη·
Iliad 4.21	πλησίαι αἵ γʼ ἥσθην, κακὰ δὲ Τρώεσσι μεδέσθην.
Iliad 4.22	ἤτοι Ἀθηναίη ἀκέων ἦν οὐδέ τι εἶπε
Iliad 4.23	σκυζομένη Διὶ πατρί, χόλος δέ μιν ἄγριος ᾕρει·
Iliad 4.24	Ἥρῃ δʼ οὐκ ἔχαδε στῆθος χόλον, ἀλλὰ προσηύδα·
Iliad 4.25	αἰνότατε Κρονίδη ποῖον τὸν μῦθον ἔειπες·
Iliad 4.26	πῶς ἐθέλεις ἅλιον θεῖναι πόνον ἠδʼ ἀτέλεστον,
Iliad 4.27	ἱδρῶ θʼ ὃν ἵδρωσα μόγῳ, καμέτην δέ μοι ἵπποι
Iliad 4.28	λαὸν ἀγειρούσῃ, Πριάμῳ κακὰ τοῖό τε παισίν.
Iliad 4.29	ἕρδʼ· ἀτὰρ οὔ τοι πάντες ἐπαινέομεν θεοὶ ἄλλοι.
Iliad 4.30	τὴν δὲ μέγʼ ὀχθήσας προσέφη νεφεληγερέτα Ζεύς·
Iliad 4.31	δαιμονίη τί νύ σε Πρίαμος Πριάμοιό τε παῖδες
Iliad 4.32	τόσσα κακὰ ῥέζουσιν, ὅ τʼ ἀσπερχὲς μενεαίνεις
Iliad 4.33	Ἰλίου ἐξαλαπάξαι ἐϋκτίμενον πτολίεθρον;
Iliad 4.34	εἰ δὲ σύ γʼ εἰσελθοῦσα πύλας καὶ τείχεα μακρὰ
Iliad 4.35	ὠμὸν βεβρώθοις Πρίαμον Πριάμοιό τε παῖδας
Iliad 4.36	ἄλλους τε Τρῶας, τότε κεν χόλον ἐξακέσαιο.
Iliad 4.37	ἕρξον ὅπως ἐθέλεις· μὴ τοῦτό γε νεῖκος ὀπίσσω
Iliad 4.38	σοὶ καὶ ἐμοὶ μέγʼ ἔρισμα μετʼ ἀμφοτέροισι γένηται.
Iliad 4.39	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Iliad 4.40	ὁππότε κεν καὶ ἐγὼ μεμαὼς πόλιν ἐξαλαπάξαι
Iliad 4.41	τὴν ἐθέλω ὅθι τοι φίλοι ἀνέρες ἐγγεγάασι,
Iliad 4.42	μή τι διατρίβειν τὸν ἐμὸν χόλον, ἀλλά μʼ ἐᾶσαι·
Iliad 4.43	καὶ γὰρ ἐγὼ σοὶ δῶκα ἑκὼν ἀέκοντί γε θυμῷ·
Iliad 4.44	αἳ γὰρ ὑπʼ ἠελίῳ τε καὶ οὐρανῷ ἀστερόεντι
Iliad 4.45	ναιετάουσι πόληες ἐπιχθονίων ἀνθρώπων,
Iliad 4.46	τάων μοι περὶ κῆρι τιέσκετο Ἴλιος ἱρὴ
Iliad 4.47	καὶ Πρίαμος καὶ λαὸς ἐϋμμελίω Πριάμοιο.
Iliad 4.48	οὐ γάρ μοί ποτε βωμὸς ἐδεύετο δαιτὸς ἐΐσης
Iliad 4.49	λοιβῆς τε κνίσης τε· τὸ γὰρ λάχομεν γέρας ἡμεῖς.
Iliad 4.50	τὸν δʼ ἠμείβετʼ ἔπειτα βοῶπις πότνια Ἥρη·
Iliad 4.51	ἤτοι ἐμοὶ τρεῖς μὲν πολὺ φίλταταί εἰσι πόληες
Iliad 4.52	Ἄργός τε Σπάρτη τε καὶ εὐρυάγυια Μυκήνη·
Iliad 4.53	τὰς διαπέρσαι ὅτʼ ἄν τοι ἀπέχθωνται περὶ κῆρι·
Iliad 4.54	τάων οὔ τοι ἐγὼ πρόσθʼ ἵσταμαι οὐδὲ μεγαίρω.
Iliad 4.55	εἴ περ γὰρ φθονέω τε καὶ οὐκ εἰῶ διαπέρσαι,
Iliad 4.56	οὐκ ἀνύω φθονέουσʼ ἐπεὶ ἦ πολὺ φέρτερός ἐσσι.
Iliad 4.57	ἀλλὰ χρὴ καὶ ἐμὸν θέμεναι πόνον οὐκ ἀτέλεστον·
Iliad 4.58	καὶ γὰρ ἐγὼ θεός εἰμι, γένος δέ μοι ἔνθεν ὅθεν σοί,
Iliad 4.59	καί με πρεσβυτάτην τέκετο Κρόνος ἀγκυλομήτης,
Iliad 4.60	ἀμφότερον γενεῇ τε καὶ οὕνεκα σὴ παράκοιτις
Iliad 4.61	κέκλημαι, σὺ δὲ πᾶσι μετʼ ἀθανάτοισιν ἀνάσσεις.
Iliad 4.62	ἀλλʼ ἤτοι μὲν ταῦθʼ ὑποείξομεν ἀλλήλοισι,
Iliad 4.63	σοὶ μὲν ἐγώ, σὺ δʼ ἐμοί· ἐπὶ δʼ ἕψονται θεοὶ ἄλλοι
Iliad 4.64	ἀθάνατοι· σὺ δὲ θᾶσσον Ἀθηναίῃ ἐπιτεῖλαι
Iliad 4.65	ἐλθεῖν ἐς Τρώων καὶ Ἀχαιῶν φύλοπιν αἰνήν,
Iliad 4.66	πειρᾶν δʼ ὥς κε Τρῶες ὑπερκύδαντας Ἀχαιοὺς
Iliad 4.67	ἄρξωσι πρότεροι ὑπὲρ ὅρκια δηλήσασθαι.
Iliad 4.68	ὣς ἔφατʼ, οὐδʼ ἀπίθησε πατὴρ ἀνδρῶν τε θεῶν τε·
Iliad 4.69	αὐτίκʼ Ἀθηναίην ἔπεα πτερόεντα προσηύδα·
Iliad 4.70	αἶψα μάλʼ ἐς στρατὸν ἐλθὲ μετὰ Τρῶας καὶ Ἀχαιούς,
Iliad 4.71	πειρᾶν δʼ ὥς κε Τρῶες ὑπερκύδαντας Ἀχαιοὺς
Iliad 4.72	ἄρξωσι πρότεροι ὑπὲρ ὅρκια δηλήσασθαι.
Iliad 4.73	ὣς εἰπὼν ὄτρυνε πάρος μεμαυῖαν Ἀθήνην,
Iliad 4.74	βῆ δὲ κατʼ Οὐλύμποιο καρήνων ἀΐξασα.
Iliad 4.75	οἷον δʼ ἀστέρα ἧκε Κρόνου πάϊς ἀγκυλομήτεω
Iliad 4.76	ἢ ναύτῃσι τέρας ἠὲ στρατῷ εὐρέϊ λαῶν
Iliad 4.77	λαμπρόν· τοῦ δέ τε πολλοὶ ἀπὸ σπινθῆρες ἵενται·
Iliad 4.78	τῷ ἐϊκυῖʼ ἤϊξεν ἐπὶ χθόνα Παλλὰς Ἀθήνη,
Iliad 4.79	κὰδ δʼ ἔθορʼ ἐς μέσσον· θάμβος δʼ ἔχεν εἰσορόωντας
Iliad 4.80	Τρῶάς θʼ ἱπποδάμους καὶ ἐϋκνήμιδας Ἀχαιούς·
Iliad 4.81	ὧδε δέ τις εἴπεσκεν ἰδὼν ἐς πλησίον ἄλλον·
Iliad 4.82	ἦ ῥʼ αὖτις πόλεμός τε κακὸς καὶ φύλοπις αἰνὴ
Iliad 4.83	ἔσσεται, ἢ φιλότητα μετʼ ἀμφοτέροισι τίθησι
Iliad 4.84	Ζεύς, ὅς τʼ ἀνθρώπων ταμίης πολέμοιο τέτυκται.
Iliad 4.85	ὣς ἄρα τις εἴπεσκεν Ἀχαιῶν τε Τρώων τε.
Iliad 4.86	ἣ δʼ ἀνδρὶ ἰκέλη Τρώων κατεδύσεθʼ ὅμιλον
Iliad 4.87	Λαοδόκῳ Ἀντηνορίδῃ κρατερῷ αἰχμητῇ,
Iliad 4.88	Πάνδαρον ἀντίθεον διζημένη εἴ που ἐφεύροι.
Iliad 4.89	εὗρε Λυκάονος υἱὸν ἀμύμονά τε κρατερόν τε
Iliad 4.90	ἑσταότʼ· ἀμφὶ δέ μιν κρατεραὶ στίχες ἀσπιστάων
Iliad 4.91	λαῶν, οἵ οἱ ἕποντο ἀπʼ Αἰσήποιο ῥοάων·
Iliad 4.92	ἀγχοῦ δʼ ἱσταμένη ἔπεα πτερόεντα προσηύδα·
Iliad 4.93	ἦ ῥά νύ μοί τι πίθοιο Λυκάονος υἱὲ δαΐφρον.
Iliad 4.94	τλαίης κεν Μενελάῳ ἐπιπροέμεν ταχὺν ἰόν,
Iliad 4.95	πᾶσι δέ κε Τρώεσσι χάριν καὶ κῦδος ἄροιο,
Iliad 4.96	ἐκ πάντων δὲ μάλιστα Ἀλεξάνδρῳ βασιλῆϊ.
Iliad 4.97	τοῦ κεν δὴ πάμπρωτα παρʼ ἀγλαὰ δῶρα φέροιο,
Iliad 4.98	αἴ κεν ἴδῃ Μενέλαον ἀρήϊον Ἀτρέος υἱὸν
Iliad 4.99	σῷ βέλεϊ δμηθέντα πυρῆς ἐπιβάντʼ ἀλεγεινῆς.
Iliad 4.100	ἀλλʼ ἄγʼ ὀΐστευσον Μενελάου κυδαλίμοιο,
Iliad 4.101	εὔχεο δʼ Ἀπόλλωνι Λυκηγενέϊ κλυτοτόξῳ
Iliad 4.102	ἀρνῶν πρωτογόνων ῥέξειν κλειτὴν ἑκατόμβην
Iliad 4.103	οἴκαδε νοστήσας ἱερῆς εἰς ἄστυ Ζελείης.
Iliad 4.104	ὣς φάτʼ Ἀθηναίη, τῷ δὲ φρένας ἄφρονι πεῖθεν·
Iliad 4.105	αὐτίκʼ ἐσύλα τόξον ἐΰξοον ἰξάλου αἰγὸς
Iliad 4.106	ἀγρίου, ὅν ῥά ποτʼ αὐτὸς ὑπὸ στέρνοιο τυχήσας
Iliad 4.107	πέτρης ἐκβαίνοντα δεδεγμένος ἐν προδοκῇσι
Iliad 4.108	βεβλήκει πρὸς στῆθος· ὃ δʼ ὕπτιος ἔμπεσε πέτρῃ.
Iliad 4.109	τοῦ κέρα ἐκ κεφαλῆς ἑκκαιδεκάδωρα πεφύκει·
Iliad 4.110	καὶ τὰ μὲν ἀσκήσας κεραοξόος ἤραρε τέκτων,
Iliad 4.111	πᾶν δʼ εὖ λειήνας χρυσέην ἐπέθηκε κορώνην.
Iliad 4.112	καὶ τὸ μὲν εὖ κατέθηκε τανυσσάμενος ποτὶ γαίῃ
Iliad 4.113	ἀγκλίνας· πρόσθεν δὲ σάκεα σχέθον ἐσθλοὶ ἑταῖροι
Iliad 4.114	μὴ πρὶν ἀναΐξειαν ἀρήϊοι υἷες Ἀχαιῶν
Iliad 4.115	πρὶν βλῆσθαι Μενέλαον ἀρήϊον Ἀτρέος υἱόν.
Iliad 4.116	αὐτὰρ ὁ σύλα πῶμα φαρέτρης, ἐκ δʼ ἕλετʼ ἰὸν
Iliad 4.117	ἀβλῆτα πτερόεντα μελαινέων ἕρμʼ ὀδυνάων·
Iliad 4.118	αἶψα δʼ ἐπὶ νευρῇ κατεκόσμει πικρὸν ὀϊστόν,
Iliad 4.119	εὔχετο δʼ Ἀπόλλωνι Λυκηγενέϊ κλυτοτόξῳ
Iliad 4.120	ἀρνῶν πρωτογόνων ῥέξειν κλειτὴν ἑκατόμβην
Iliad 4.121	οἴκαδε νοστήσας ἱερῆς εἰς ἄστυ Ζελείης.
Iliad 4.122	ἕλκε δʼ ὁμοῦ γλυφίδας τε λαβὼν καὶ νεῦρα βόεια·
Iliad 4.123	νευρὴν μὲν μαζῷ πέλασεν, τόξῳ δὲ σίδηρον.
Iliad 4.124	αὐτὰρ ἐπεὶ δὴ κυκλοτερὲς μέγα τόξον ἔτεινε,
Iliad 4.125	λίγξε βιός, νευρὴ δὲ μέγʼ ἴαχεν, ἆλτο δʼ ὀϊστὸς
Iliad 4.126	ὀξυβελὴς καθʼ ὅμιλον ἐπιπτέσθαι μενεαίνων.
Iliad 4.127	οὐδὲ σέθεν Μενέλαε θεοὶ μάκαρες λελάθοντο
Iliad 4.128	ἀθάνατοι, πρώτη δὲ Διὸς θυγάτηρ ἀγελείη,
Iliad 4.129	ἥ τοι πρόσθε στᾶσα βέλος ἐχεπευκὲς ἄμυνεν.
Iliad 4.130	ἣ δὲ τόσον μὲν ἔεργεν ἀπὸ χροὸς ὡς ὅτε μήτηρ
Iliad 4.131	παιδὸς ἐέργῃ μυῖαν ὅθʼ ἡδέϊ λέξεται ὕπνῳ,
Iliad 4.132	αὐτὴ δʼ αὖτʼ ἴθυνεν ὅθι ζωστῆρος ὀχῆες
Iliad 4.133	χρύσειοι σύνεχον καὶ διπλόος ἤντετο θώρηξ.
Iliad 4.134	ἐν δʼ ἔπεσε ζωστῆρι ἀρηρότι πικρὸς ὀϊστός·
Iliad 4.135	διὰ μὲν ἂρ ζωστῆρος ἐλήλατο δαιδαλέοιο,
Iliad 4.136	καὶ διὰ θώρηκος πολυδαιδάλου ἠρήρειστο
Iliad 4.137	μίτρης θʼ, ἣν ἐφόρει ἔρυμα χροὸς ἕρκος ἀκόντων,
Iliad 4.138	ἥ οἱ πλεῖστον ἔρυτο· διὰ πρὸ δὲ εἴσατο καὶ τῆς.
Iliad 4.139	ἀκρότατον δʼ ἄρʼ ὀϊστὸς ἐπέγραψε χρόα φωτός·
Iliad 4.140	αὐτίκα δʼ ἔρρεεν αἷμα κελαινεφὲς ἐξ ὠτειλῆς.
Iliad 4.141	ὡς δʼ ὅτε τίς τʼ ἐλέφαντα γυνὴ φοίνικι μιήνῃ
Iliad 4.142	Μῃονὶς ἠὲ Κάειρα παρήϊον ἔμμεναι ἵππων·
Iliad 4.143	κεῖται δʼ ἐν θαλάμῳ, πολέες τέ μιν ἠρήσαντο
Iliad 4.144	ἱππῆες φορέειν· βασιλῆϊ δὲ κεῖται ἄγαλμα,
Iliad 4.145	ἀμφότερον κόσμός θʼ ἵππῳ ἐλατῆρί τε κῦδος·
Iliad 4.146	τοῖοί τοι Μενέλαε μιάνθην αἵματι μηροὶ
Iliad 4.147	εὐφυέες κνῆμαί τε ἰδὲ σφυρὰ κάλʼ ὑπένερθε.
Iliad 4.148	ῥίγησεν δʼ ἄρʼ ἔπειτα ἄναξ ἀνδρῶν Ἀγαμέμνων
Iliad 4.149	ὡς εἶδεν μέλαν αἷμα καταρρέον ἐξ ὠτειλῆς·
Iliad 4.150	ῥίγησεν δὲ καὶ αὐτὸς ἀρηΐφιλος Μενέλαος.
Iliad 4.151	ὡς δὲ ἴδεν νεῦρόν τε καὶ ὄγκους ἐκτὸς ἐόντας
Iliad 4.152	ἄψορρόν οἱ θυμὸς ἐνὶ στήθεσσιν ἀγέρθη.
Iliad 4.153	τοῖς δὲ βαρὺ στενάχων μετέφη κρείων Ἀγαμέμνων
Iliad 4.154	χειρὸς ἔχων Μενέλαον, ἐπεστενάχοντο δʼ ἑταῖροι·
Iliad 4.155	φίλε κασίγνητε θάνατόν νύ τοι ὅρκιʼ ἔταμνον
Iliad 4.156	οἶον προστήσας πρὸ Ἀχαιῶν Τρωσὶ μάχεσθαι,
Iliad 4.157	ὥς σʼ ἔβαλον Τρῶες, κατὰ δʼ ὅρκια πιστὰ πάτησαν.
Iliad 4.158	οὐ μέν πως ἅλιον πέλει ὅρκιον αἷμά τε ἀρνῶν
Iliad 4.159	σπονδαί τʼ ἄκρητοι καὶ δεξιαὶ ᾗς ἐπέπιθμεν.
Iliad 4.160	εἴ περ γάρ τε καὶ αὐτίκʼ Ὀλύμπιος οὐκ ἐτέλεσσεν,
Iliad 4.161	ἔκ τε καὶ ὀψὲ τελεῖ, σύν τε μεγάλῳ ἀπέτισαν
Iliad 4.162	σὺν σφῇσιν κεφαλῇσι γυναιξί τε καὶ τεκέεσσιν.
Iliad 4.163	εὖ γὰρ ἐγὼ τόδε οἶδα κατὰ φρένα καὶ κατὰ θυμόν·
Iliad 4.164	ἔσσεται ἦμαρ ὅτʼ ἄν ποτʼ ὀλώλῃ Ἴλιος ἱρὴ
Iliad 4.165	καὶ Πρίαμος καὶ λαὸς ἐϋμμελίω Πριάμοιο,
Iliad 4.166	Ζεὺς δέ σφι Κρονίδης ὑψίζυγος αἰθέρι ναίων
Iliad 4.167	αὐτὸς ἐπισσείῃσιν ἐρεμνὴν αἰγίδα πᾶσι
Iliad 4.168	τῆσδʼ ἀπάτης κοτέων· τὰ μὲν ἔσσεται οὐκ ἀτέλεστα·
Iliad 4.169	ἀλλά μοι αἰνὸν ἄχος σέθεν ἔσσεται ὦ Μενέλαε
Iliad 4.170	αἴ κε θάνῃς καὶ πότμον ἀναπλήσῃς βιότοιο.
Iliad 4.171	καί κεν ἐλέγχιστος πολυδίψιον Ἄργος ἱκοίμην·
Iliad 4.172	αὐτίκα γὰρ μνήσονται Ἀχαιοὶ πατρίδος αἴης·
Iliad 4.173	κὰδ δέ κεν εὐχωλὴν Πριάμῳ καὶ Τρωσὶ λίποιμεν
Iliad 4.174	Ἀργείην Ἑλένην· σέο δʼ ὀστέα πύσει ἄρουρα
Iliad 4.175	κειμένου ἐν Τροίῃ ἀτελευτήτῳ ἐπὶ ἔργῳ.
Iliad 4.176	καί κέ τις ὧδʼ ἐρέει Τρώων ὑπερηνορεόντων
Iliad 4.177	τύμβῳ ἐπιθρῴσκων Μενελάου κυδαλίμοιο·
Iliad 4.178	αἴθʼ οὕτως ἐπὶ πᾶσι χόλον τελέσειʼ Ἀγαμέμνων,
Iliad 4.179	ὡς καὶ νῦν ἅλιον στρατὸν ἤγαγεν ἐνθάδʼ Ἀχαιῶν,
Iliad 4.180	καὶ δὴ ἔβη οἶκον δὲ φίλην ἐς πατρίδα γαῖαν
Iliad 4.181	σὺν κεινῇσιν νηυσὶ λιπὼν ἀγαθὸν Μενέλαον.
Iliad 4.182	ὥς ποτέ τις ἐρέει· τότε μοι χάνοι εὐρεῖα χθών.
Iliad 4.183	τὸν δʼ ἐπιθαρσύνων προσέφη ξανθὸς Μενέλαος·
Iliad 4.184	θάρσει, μηδέ τί πω δειδίσσεο λαὸν Ἀχαιῶν·
Iliad 4.185	οὐκ ἐν καιρίῳ ὀξὺ πάγη βέλος, ἀλλὰ πάροιθεν
Iliad 4.186	εἰρύσατο ζωστήρ τε παναίολος ἠδʼ ὑπένερθε
Iliad 4.187	ζῶμά τε καὶ μίτρη, τὴν χαλκῆες κάμον ἄνδρες.
Iliad 4.188	τὸν δʼ ἀπαμειβόμενος προσέφη κρείων Ἀγαμέμνων·
Iliad 4.189	αἲ γὰρ δὴ οὕτως εἴη φίλος ὦ Μενέλαε·
Iliad 4.190	ἕλκος δʼ ἰητὴρ ἐπιμάσσεται ἠδʼ ἐπιθήσει
Iliad 4.191	φάρμαχʼ ἅ κεν παύσῃσι μελαινάων ὀδυνάων.
Iliad 4.192	ἦ καὶ Ταλθύβιον θεῖον κήρυκα προσηύδα·
Iliad 4.193	Ταλθύβιʼ ὅττι τάχιστα Μαχάονα δεῦρο κάλεσσον
Iliad 4.194	φῶτʼ Ἀσκληπιοῦ υἱὸν ἀμύμονος ἰητῆρος,
Iliad 4.195	ὄφρα ἴδῃ Μενέλαον ἀρήϊον Ἀτρέος υἱόν,
Iliad 4.196	ὅν τις ὀϊστεύσας ἔβαλεν τόξων ἐῢ εἰδὼς
Iliad 4.197	Τρώων ἢ Λυκίων, τῷ μὲν κλέος, ἄμμι δὲ πένθος.
Iliad 4.198	ὣς ἔφατʼ, οὐδʼ ἄρα οἱ κῆρυξ ἀπίθησεν ἀκούσας,
Iliad 4.199	βῆ δʼ ἰέναι κατὰ λαὸν Ἀχαιῶν χαλκοχιτώνων
Iliad 4.200	παπταίνων ἥρωα Μαχάονα· τὸν δὲ νόησεν
Iliad 4.201	ἑσταότʼ· ἀμφὶ δέ μιν κρατεραὶ στίχες ἀσπιστάων
Iliad 4.202	λαῶν, οἵ οἱ ἕποντο Τρίκης ἐξ ἱπποβότοιο.
Iliad 4.203	ἀγχοῦ δʼ ἱστάμενος ἔπεα πτερόεντα προσηύδα·
Iliad 4.204	ὄρσʼ Ἀσκληπιάδη, καλέει κρείων Ἀγαμέμνων,
Iliad 4.205	ὄφρα ἴδῃς Μενέλαον ἀρήϊον ἀρχὸν Ἀχαιῶν,
Iliad 4.206	ὅν τις ὀϊστεύσας ἔβαλεν τόξων ἐῢ εἰδὼς
Iliad 4.207	Τρώων ἢ Λυκίων, τῷ μὲν κλέος, ἄμμι δὲ πένθος.
Iliad 4.208	ὣς φάτο, τῷ δʼ ἄρα θυμὸν ἐνὶ στήθεσσιν ὄρινε·
Iliad 4.209	βὰν δʼ ἰέναι καθʼ ὅμιλον ἀνὰ στρατὸν εὐρὺν Ἀχαιῶν.
Iliad 4.210	ἀλλʼ ὅτε δή ῥʼ ἵκανον ὅθι ξανθὸς Μενέλαος
Iliad 4.211	βλήμενος ἦν, περὶ δʼ αὐτὸν ἀγηγέραθʼ ὅσσοι ἄριστοι
Iliad 4.212	κυκλόσʼ, ὃ δʼ ἐν μέσσοισι παρίστατο ἰσόθεος φώς,
Iliad 4.213	αὐτίκα δʼ ἐκ ζωστῆρος ἀρηρότος ἕλκεν ὀϊστόν·
Iliad 4.214	τοῦ δʼ ἐξελκομένοιο πάλιν ἄγεν ὀξέες ὄγκοι.
Iliad 4.215	λῦσε δέ οἱ ζωστῆρα παναίολον ἠδʼ ὑπένερθε
Iliad 4.216	ζῶμά τε καὶ μίτρην, τὴν χαλκῆες κάμον ἄνδρες.
Iliad 4.217	αὐτὰρ ἐπεὶ ἴδεν ἕλκος ὅθʼ ἔμπεσε πικρὸς ὀϊστός,
Iliad 4.218	αἷμʼ ἐκμυζήσας ἐπʼ ἄρʼ ἤπια φάρμακα εἰδὼς
Iliad 4.219	πάσσε, τά οἵ ποτε πατρὶ φίλα φρονέων πόρε Χείρων.
Iliad 4.220	ὄφρα τοὶ ἀμφεπένοντο βοὴν ἀγαθὸν Μενέλαον,
Iliad 4.221	τόφρα δʼ ἐπὶ Τρώων στίχες ἤλυθον ἀσπιστάων·
Iliad 4.222	οἳ δʼ αὖτις κατὰ τεύχεʼ ἔδυν, μνήσαντο δὲ χάρμης.
Iliad 4.223	ἔνθʼ οὐκ ἂν βρίζοντα ἴδοις Ἀγαμέμνονα δῖον
Iliad 4.224	οὐδὲ καταπτώσσοντʼ οὐδʼ οὐκ ἐθέλοντα μάχεσθαι,
Iliad 4.225	ἀλλὰ μάλα σπεύδοντα μάχην ἐς κυδιάνειραν.
Iliad 4.226	ἵππους μὲν γὰρ ἔασε καὶ ἅρματα ποικίλα χαλκῷ·
Iliad 4.227	καὶ τοὺς μὲν θεράπων ἀπάνευθʼ ἔχε φυσιόωντας
Iliad 4.228	Εὐρυμέδων υἱὸς Πτολεμαίου Πειραΐδαο·
Iliad 4.229	τῷ μάλα πόλλʼ ἐπέτελλε παρισχέμεν ὁππότε κέν μιν
Iliad 4.230	γυῖα λάβῃ κάματος πολέας διὰ κοιρανέοντα·
Iliad 4.231	αὐτὰρ ὃ πεζὸς ἐὼν ἐπεπωλεῖτο στίχας ἀνδρῶν·
Iliad 4.232	καί ῥʼ οὓς μὲν σπεύδοντας ἴδοι Δαναῶν ταχυπώλων,
Iliad 4.233	τοὺς μάλα θαρσύνεσκε παριστάμενος ἐπέεσσιν·
Iliad 4.234	Ἀργεῖοι μή πώ τι μεθίετε θούριδος ἀλκῆς·
Iliad 4.235	οὐ γὰρ ἐπὶ ψευδέσσι πατὴρ Ζεὺς ἔσσετʼ ἀρωγός,
Iliad 4.236	ἀλλʼ οἵ περ πρότεροι ὑπὲρ ὅρκια δηλήσαντο
Iliad 4.237	τῶν ἤτοι αὐτῶν τέρενα χρόα γῦπες ἔδονται,
Iliad 4.238	ἡμεῖς αὖτʼ ἀλόχους τε φίλας καὶ νήπια τέκνα
Iliad 4.239	ἄξομεν ἐν νήεσσιν, ἐπὴν πτολίεθρον ἕλωμεν.
Iliad 4.240	οὕς τινας αὖ μεθιέντας ἴδοι στυγεροῦ πολέμοιο,
Iliad 4.241	τοὺς μάλα νεικείεσκε χολωτοῖσιν ἐπέεσσιν·
Iliad 4.242	Ἀργεῖοι ἰόμωροι ἐλεγχέες οὔ νυ σέβεσθε;
Iliad 4.243	τίφθʼ οὕτως ἔστητε τεθηπότες ἠΰτε νεβροί,
Iliad 4.244	αἵ τʼ ἐπεὶ οὖν ἔκαμον πολέος πεδίοιο θέουσαι
Iliad 4.245	ἑστᾶσʼ, οὐδʼ ἄρα τίς σφι μετὰ φρεσὶ γίγνεται ἀλκή·
Iliad 4.246	ὣς ὑμεῖς ἔστητε τεθηπότες οὐδὲ μάχεσθε.
Iliad 4.247	ἦ μένετε Τρῶας σχεδὸν ἐλθέμεν ἔνθά τε νῆες
Iliad 4.248	εἰρύατʼ εὔπρυμνοι πολιῆς ἐπὶ θινὶ θαλάσσης,
Iliad 4.249	ὄφρα ἴδητʼ αἴ κʼ ὔμμιν ὑπέρσχῃ χεῖρα Κρονίων;
Iliad 4.250	ὣς ὅ γε κοιρανέων ἐπεπωλεῖτο στίχας ἀνδρῶν·
Iliad 4.251	ἦλθε δʼ ἐπὶ Κρήτεσσι κιὼν ἀνὰ οὐλαμὸν ἀνδρῶν.
Iliad 4.252	οἳ δʼ ἀμφʼ Ἰδομενῆα δαΐφρονα θωρήσσοντο·
Iliad 4.253	Ἰδομενεὺς μὲν ἐνὶ προμάχοις συῒ εἴκελος ἀλκήν,
Iliad 4.254	Μηριόνης δʼ ἄρα οἱ πυμάτας ὄτρυνε φάλαγγας.
Iliad 4.255	τοὺς δὲ ἰδὼν γήθησεν ἄναξ ἀνδρῶν Ἀγαμέμνων,
Iliad 4.256	αὐτίκα δʼ Ἰδομενῆα προσηύδα μειλιχίοισιν·
Iliad 4.257	Ἰδομενεῦ περὶ μέν σε τίω Δαναῶν ταχυπώλων
Iliad 4.258	ἠμὲν ἐνὶ πτολέμῳ ἠδʼ ἀλλοίῳ ἐπὶ ἔργῳ
Iliad 4.259	ἠδʼ ἐν δαίθʼ, ὅτε πέρ τε γερούσιον αἴθοπα οἶνον
Iliad 4.260	Ἀργείων οἳ ἄριστοι ἐνὶ κρητῆρι κέρωνται.
Iliad 4.261	εἴ περ γάρ τʼ ἄλλοι γε κάρη κομόωντες Ἀχαιοὶ
Iliad 4.262	δαιτρὸν πίνωσιν, σὸν δὲ πλεῖον δέπας αἰεὶ
Iliad 4.263	ἕστηχʼ, ὥς περ ἐμοί, πιέειν ὅτε θυμὸς ἀνώγοι.
Iliad 4.264	ἀλλʼ ὄρσευ πόλεμον δʼ οἷος πάρος εὔχεαι εἶναι.
Iliad 4.265	τὸν δʼ αὖτʼ Ἰδομενεὺς Κρητῶν ἀγὸς ἀντίον ηὔδα·
Iliad 4.266	Ἀτρεΐδη μάλα μέν τοι ἐγὼν ἐρίηρος ἑταῖρος
Iliad 4.267	ἔσσομαι, ὡς τὸ πρῶτον ὑπέστην καὶ κατένευσα·
Iliad 4.268	ἀλλʼ ἄλλους ὄτρυνε κάρη κομόωντας Ἀχαιοὺς
Iliad 4.269	ὄφρα τάχιστα μαχώμεθʼ, ἐπεὶ σύν γʼ ὅρκιʼ ἔχευαν
Iliad 4.270	Τρῶες· τοῖσιν δʼ αὖ θάνατος καὶ κήδεʼ ὀπίσσω
Iliad 4.271	ἔσσετʼ ἐπεὶ πρότεροι ὑπὲρ ὅρκια δηλήσαντο.
Iliad 4.272	ὣς ἔφατʼ, Ἀτρεΐδης δὲ παρῴχετο γηθόσυνος κῆρ·
Iliad 4.273	ἦλθε δʼ ἐπʼ Αἰάντεσσι κιὼν ἀνὰ οὐλαμὸν ἀνδρῶν·
Iliad 4.274	τὼ δὲ κορυσσέσθην, ἅμα δὲ νέφος εἵπετο πεζῶν.
Iliad 4.275	ὡς δʼ ὅτʼ ἀπὸ σκοπιῆς εἶδεν νέφος αἰπόλος ἀνὴρ
Iliad 4.276	ἐρχόμενον κατὰ πόντον ὑπὸ Ζεφύροιο ἰωῆς·
Iliad 4.277	τῷ δέ τʼ ἄνευθεν ἐόντι μελάντερον ἠΰτε πίσσα
Iliad 4.278	φαίνετʼ ἰὸν κατὰ πόντον, ἄγει δέ τε λαίλαπα πολλήν,
Iliad 4.279	ῥίγησέν τε ἰδών, ὑπό τε σπέος ἤλασε μῆλα·
Iliad 4.280	τοῖαι ἅμʼ Αἰάντεσσι διοτρεφέων αἰζηῶν
Iliad 4.281	δήϊον ἐς πόλεμον πυκιναὶ κίνυντο φάλαγγες
Iliad 4.282	κυάνεαι, σάκεσίν τε καὶ ἔγχεσι πεφρικυῖαι.
Iliad 4.283	καὶ τοὺς μὲν γήθησεν ἰδὼν κρείων Ἀγαμέμνων,
Iliad 4.284	καί σφεας φωνήσας ἔπεα πτερόεντα προσηύδα·
Iliad 4.285	Αἴαντʼ Ἀργείων ἡγήτορε χαλκοχιτώνων,
Iliad 4.286	σφῶϊ μέν· οὐ γὰρ ἔοικʼ ὀτρυνέμεν· οὔ τι κελεύω·
Iliad 4.287	αὐτὼ γὰρ μάλα λαὸν ἀνώγετον ἶφι μάχεσθαι.
Iliad 4.288	αἲ γὰρ Ζεῦ τε πάτερ καὶ Ἀθηναίη καὶ Ἄπολλον
Iliad 4.289	τοῖος πᾶσιν θυμὸς ἐνὶ στήθεσσι γένοιτο·
Iliad 4.290	τώ κε τάχʼ ἠμύσειε πόλις Πριάμοιο ἄνακτος
Iliad 4.291	χερσὶν ὑφʼ ἡμετέρῃσιν ἁλοῦσά τε περθομένη τε.
Iliad 4.292	ὣς εἰπὼν τοὺς μὲν λίπεν αὐτοῦ, βῆ δὲ μετʼ ἄλλους·
Iliad 4.293	ἔνθʼ ὅ γε Νέστορʼ ἔτετμε λιγὺν Πυλίων ἀγορητὴν
Iliad 4.294	οὓς ἑτάρους στέλλοντα καὶ ὀτρύνοντα μάχεσθαι
Iliad 4.295	ἀμφὶ μέγαν Πελάγοντα Ἀλάστορά τε Χρομίον τε
Iliad 4.296	Αἵμονά τε κρείοντα Βίαντά τε ποιμένα λαῶν·
Iliad 4.297	ἱππῆας μὲν πρῶτα σὺν ἵπποισιν καὶ ὄχεσφι,
Iliad 4.298	πεζοὺς δʼ ἐξόπιθε στῆσεν πολέας τε καὶ ἐσθλοὺς
Iliad 4.299	ἕρκος ἔμεν πολέμοιο· κακοὺς δʼ ἐς μέσσον ἔλασσεν,
Iliad 4.300	ὄφρα καὶ οὐκ ἐθέλων τις ἀναγκαίῃ πολεμίζοι.
Iliad 4.301	ἱππεῦσιν μὲν πρῶτʼ ἐπετέλλετο· τοὺς γὰρ ἀνώγει
Iliad 4.302	σφοὺς ἵππους ἐχέμεν μηδὲ κλονέεσθαι ὁμίλῳ·
Iliad 4.303	μηδέ τις ἱπποσύνῃ τε καὶ ἠνορέηφι πεποιθὼς
Iliad 4.304	οἶος πρόσθʼ ἄλλων μεμάτω Τρώεσσι μάχεσθαι,
Iliad 4.305	μηδʼ ἀναχωρείτω· ἀλαπαδνότεροι γὰρ ἔσεσθε.
Iliad 4.306	ὃς δέ κʼ ἀνὴρ ἀπὸ ὧν ὀχέων ἕτερʼ ἅρμαθʼ ἵκηται
Iliad 4.307	ἔγχει ὀρεξάσθω, ἐπεὶ ἦ πολὺ φέρτερον οὕτω.
Iliad 4.308	ὧδε καὶ οἱ πρότεροι πόλεας καὶ τείχεʼ ἐπόρθεον
Iliad 4.309	τόνδε νόον καὶ θυμὸν ἐνὶ στήθεσσιν ἔχοντες.
Iliad 4.310	ὣς ὃ γέρων ὄτρυνε πάλαι πολέμων ἐῢ εἰδώς·
Iliad 4.311	καὶ τὸν μὲν γήθησεν ἰδὼν κρείων Ἀγαμέμνων,
Iliad 4.312	καί μιν φωνήσας ἔπεα πτερόεντα προσηύδα·
Iliad 4.313	ὦ γέρον εἴθʼ ὡς θυμὸς ἐνὶ στήθεσσι φίλοισιν
Iliad 4.314	ὥς τοι γούναθʼ ἕποιτο, βίη δέ τοι ἔμπεδος εἴη·
Iliad 4.315	ἀλλά σε γῆρας τείρει ὁμοίϊον· ὡς ὄφελέν τις
Iliad 4.316	ἀνδρῶν ἄλλος ἔχειν, σὺ δὲ κουροτέροισι μετεῖναι.
Iliad 4.317	τὸν δʼ ἠμείβετʼ ἔπειτα Γερήνιος ἱππότα Νέστωρ·
Iliad 4.318	Ἀτρεΐδη μάλα μέν τοι ἐγὼν ἐθέλοιμι καὶ αὐτὸς
Iliad 4.319	ὣς ἔμεν ὡς ὅτε δῖον Ἐρευθαλίωνα κατέκταν.
Iliad 4.320	ἀλλʼ οὔ πως ἅμα πάντα θεοὶ δόσαν ἀνθρώποισιν·
Iliad 4.321	εἰ τότε κοῦρος ἔα νῦν αὖτέ με γῆρας ὀπάζει.
Iliad 4.322	ἀλλὰ καὶ ὧς ἱππεῦσι μετέσσομαι ἠδὲ κελεύσω
Iliad 4.323	βουλῇ καὶ μύθοισι· τὸ γὰρ γέρας ἐστὶ γερόντων.
Iliad 4.324	αἰχμὰς δʼ αἰχμάσσουσι νεώτεροι, οἵ περ ἐμεῖο
Iliad 4.325	ὁπλότεροι γεγάασι πεποίθασίν τε βίηφιν.
Iliad 4.326	ὣς ἔφατʼ, Ἀτρεΐδης δὲ παρῴχετο γηθόσυνος κῆρ.
Iliad 4.327	εὗρʼ υἱὸν Πετεῶο Μενεσθῆα πλήξιππον
Iliad 4.328	ἑσταότʼ· ἀμφὶ δʼ Ἀθηναῖοι μήστωρες ἀϋτῆς·
Iliad 4.329	αὐτὰρ ὃ πλησίον ἑστήκει πολύμητις Ὀδυσσεύς,
Iliad 4.330	πὰρ δὲ Κεφαλλήνων ἀμφὶ στίχες οὐκ ἀλαπαδναὶ
Iliad 4.331	ἕστασαν· οὐ γάρ πώ σφιν ἀκούετο λαὸς ἀϋτῆς,
Iliad 4.332	ἀλλὰ νέον συνορινόμεναι κίνυντο φάλαγγες
Iliad 4.333	Τρώων ἱπποδάμων καὶ Ἀχαιῶν· οἳ δὲ μένοντες
Iliad 4.334	ἕστασαν ὁππότε πύργος Ἀχαιῶν ἄλλος ἐπελθὼν
Iliad 4.335	Τρώων ὁρμήσειε καὶ ἄρξειαν πολέμοιο.
Iliad 4.336	τοὺς δὲ ἰδὼν νείκεσσεν ἄναξ ἀνδρῶν Ἀγαμέμνων,
Iliad 4.337	καί σφεας φωνήσας ἔπεα πτερόεντα προσηύδα·
Iliad 4.338	ὦ υἱὲ Πετεῶο διοτρεφέος βασιλῆος,
Iliad 4.339	καὶ σὺ κακοῖσι δόλοισι κεκασμένε κερδαλεόφρον
Iliad 4.340	τίπτε καταπτώσσοντες ἀφέστατε, μίμνετε δʼ ἄλλους;
Iliad 4.341	σφῶϊν μέν τʼ ἐπέοικε μετὰ πρώτοισιν ἐόντας
Iliad 4.342	ἑστάμεν ἠδὲ μάχης καυστείρης ἀντιβολῆσαι·
Iliad 4.343	πρώτω γὰρ καὶ δαιτὸς ἀκουάζεσθον ἐμεῖο,
Iliad 4.344	ὁππότε δαῖτα γέρουσιν ἐφοπλίζωμεν Ἀχαιοί.
Iliad 4.345	ἔνθα φίλʼ ὀπταλέα κρέα ἔδμεναι ἠδὲ κύπελλα
Iliad 4.346	οἴνου πινέμεναι μελιηδέος ὄφρʼ ἐθέλητον·
Iliad 4.347	νῦν δὲ φίλως χʼ ὁρόῳτε καὶ εἰ δέκα πύργοι Ἀχαιῶν
Iliad 4.348	ὑμείων προπάροιθε μαχοίατο νηλέϊ χαλκῷ.
Iliad 4.349	τὸν δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
Iliad 4.350	Ἀτρεΐδη ποῖόν σε ἔπος φύγεν ἕρκος ὀδόντων;
Iliad 4.351	πῶς δὴ φῂς πολέμοιο μεθιέμεν ὁππότʼ Ἀχαιοὶ
Iliad 4.352	Τρωσὶν ἐφʼ ἱπποδάμοισιν ἐγείρομεν ὀξὺν Ἄρηα;
Iliad 4.353	ὄψεαι αἴ κʼ ἐθέλῃσθα καὶ αἴ κέν τοι τὰ μεμήλῃ
Iliad 4.354	Τηλεμάχοιο φίλον πατέρα προμάχοισι μιγέντα
Iliad 4.355	Τρώων ἱπποδάμων· σὺ δὲ ταῦτʼ ἀνεμώλια βάζεις.
Iliad 4.356	τὸν δʼ ἐπιμειδήσας προσέφη κρείων Ἀγαμέμνων
Iliad 4.357	ὡς γνῶ χωομένοιο· πάλιν δʼ ὅ γε λάζετο μῦθον·
Iliad 4.358	διογενὲς Λαερτιάδη πολυμήχανʼ Ὀδυσσεῦ
Iliad 4.359	οὔτέ σε νεικείω περιώσιον οὔτε κελεύω·
Iliad 4.360	οἶδα γὰρ ὥς τοι θυμὸς ἐνὶ στήθεσσι φίλοισιν
Iliad 4.361	ἤπια δήνεα οἶδε· τὰ γὰρ φρονέεις ἅ τʼ ἐγώ περ.
Iliad 4.362	ἀλλʼ ἴθι ταῦτα δʼ ὄπισθεν ἀρεσσόμεθʼ εἴ τι κακὸν νῦν
Iliad 4.363	εἴρηται, τὰ δὲ πάντα θεοὶ μεταμώνια θεῖεν.
Iliad 4.364	ὣς εἰπὼν τοὺς μὲν λίπεν αὐτοῦ, βῆ δὲ μετʼ ἄλλους.
Iliad 4.365	εὗρε δὲ Τυδέος υἱὸν ὑπέρθυμον Διομήδεα
Iliad 4.366	ἑσταότʼ ἔν θʼ ἵπποισι καὶ ἅρμασι κολλητοῖσι·
Iliad 4.367	πὰρ δέ οἱ ἑστήκει Σθένελος Καπανήϊος υἱός.
Iliad 4.368	καὶ τὸν μὲν νείκεσσεν ἰδὼν κρείων Ἀγαμέμνων,
Iliad 4.369	καί μιν φωνήσας ἔπεα πτερόεντα προσηύδα·
Iliad 4.370	ὤ μοι Τυδέος υἱὲ δαΐφρονος ἱπποδάμοιο
Iliad 4.371	τί πτώσσεις, τί δʼ ὀπιπεύεις πολέμοιο γεφύρας;
Iliad 4.372	οὐ μὲν Τυδέϊ γʼ ὧδε φίλον πτωσκαζέμεν ἦεν,
Iliad 4.373	ἀλλὰ πολὺ πρὸ φίλων ἑτάρων δηΐοισι μάχεσθαι,
Iliad 4.374	ὡς φάσαν οἵ μιν ἴδοντο πονεύμενον· οὐ γὰρ ἔγωγε
Iliad 4.375	ἤντησʼ οὐδὲ ἴδον· περὶ δʼ ἄλλων φασὶ γενέσθαι.
Iliad 4.376	ἤτοι μὲν γὰρ ἄτερ πολέμου εἰσῆλθε Μυκήνας
Iliad 4.377	ξεῖνος ἅμʼ ἀντιθέῳ Πολυνείκεϊ λαὸν ἀγείρων·
Iliad 4.378	οἳ δὲ τότʼ ἐστρατόωνθʼ ἱερὰ πρὸς τείχεα Θήβης,
Iliad 4.379	καί ῥα μάλα λίσσοντο δόμεν κλειτοὺς ἐπικούρους·
Iliad 4.380	οἳ δʼ ἔθελον δόμεναι καὶ ἐπῄνεον ὡς ἐκέλευον·
Iliad 4.381	ἀλλὰ Ζεὺς ἔτρεψε παραίσια σήματα φαίνων.
Iliad 4.382	οἳ δʼ ἐπεὶ οὖν ᾤχοντο ἰδὲ πρὸ ὁδοῦ ἐγένοντο,
Iliad 4.383	Ἀσωπὸν δʼ ἵκοντο βαθύσχοινον λεχεποίην,
Iliad 4.384	ἔνθʼ αὖτʼ ἀγγελίην ἐπὶ Τυδῆ στεῖλαν Ἀχαιοί.
Iliad 4.385	αὐτὰρ ὃ βῆ, πολέας δὲ κιχήσατο Καδμεΐωνας
Iliad 4.386	δαινυμένους κατὰ δῶμα βίης Ἐτεοκληείης.
Iliad 4.387	ἔνθʼ οὐδὲ ξεῖνός περ ἐὼν ἱππηλάτα Τυδεὺς
Iliad 4.388	τάρβει, μοῦνος ἐὼν πολέσιν μετὰ Καδμείοισιν,
Iliad 4.389	ἀλλʼ ὅ γʼ ἀεθλεύειν προκαλίζετο, πάντα δʼ ἐνίκα
Iliad 4.390	ῥηϊδίως· τοίη οἱ ἐπίρροθος ἦεν Ἀθήνη.
Iliad 4.391	οἳ δὲ χολωσάμενοι Καδμεῖοι κέντορες ἵππων
Iliad 4.392	ἂψ ἄρʼ ἀνερχομένῳ πυκινὸν λόχον εἷσαν ἄγοντες
Iliad 4.393	κούρους πεντήκοντα· δύω δʼ ἡγήτορες ἦσαν,
Iliad 4.394	Μαίων Αἱμονίδης ἐπιείκελος ἀθανάτοισιν,
Iliad 4.395	υἱός τʼ Αὐτοφόνοιο μενεπτόλεμος Πολυφόντης.
Iliad 4.396	Τυδεὺς μὲν καὶ τοῖσιν ἀεικέα πότμον ἐφῆκε·
Iliad 4.397	πάντας ἔπεφνʼ, ἕνα δʼ οἶον ἵει οἶκον δὲ νέεσθαι·
Iliad 4.398	Μαίονʼ ἄρα προέηκε θεῶν τεράεσσι πιθήσας.
Iliad 4.399	τοῖος ἔην Τυδεὺς Αἰτώλιος· ἀλλὰ τὸν υἱὸν
Iliad 4.400	γείνατο εἷο χέρεια μάχῃ, ἀγορῇ δέ τʼ ἀμείνω.
Iliad 4.401	ὣς φάτο, τὸν δʼ οὔ τι προσέφη κρατερὸς Διομήδης
Iliad 4.402	αἰδεσθεὶς βασιλῆος ἐνιπὴν αἰδοίοιο·
Iliad 4.403	τὸν δʼ υἱὸς Καπανῆος ἀμείψατο κυδαλίμοιο·
Iliad 4.404	Ἀτρεΐδη μὴ ψεύδεʼ ἐπιστάμενος σάφα εἰπεῖν·
Iliad 4.405	ἡμεῖς τοι πατέρων μέγʼ ἀμείνονες εὐχόμεθʼ εἶναι·
Iliad 4.406	ἡμεῖς καὶ Θήβης ἕδος εἵλομεν ἑπταπύλοιο
Iliad 4.407	παυρότερον λαὸν ἀγαγόνθʼ ὑπὸ τεῖχος ἄρειον,
Iliad 4.408	πειθόμενοι τεράεσσι θεῶν καὶ Ζηνὸς ἀρωγῇ·
Iliad 4.409	κεῖνοι δὲ σφετέρῃσιν ἀτασθαλίῃσιν ὄλοντο·
Iliad 4.410	τὼ μή μοι πατέρας ποθʼ ὁμοίῃ ἔνθεο τιμῇ.
Iliad 4.411	τὸν δʼ ἄρʼ ὑπόδρα ἰδὼν προσέφη κρατερὸς Διομήδης·
Iliad 4.412	τέττα, σιωπῇ ἧσο, ἐμῷ δʼ ἐπιπείθεο μύθῳ·
Iliad 4.413	οὐ γὰρ ἐγὼ νεμεσῶ Ἀγαμέμνονι ποιμένι λαῶν
Iliad 4.414	ὀτρύνοντι μάχεσθαι ἐϋκνήμιδας Ἀχαιούς·
Iliad 4.415	τούτῳ μὲν γὰρ κῦδος ἅμʼ ἕψεται εἴ κεν Ἀχαιοὶ
Iliad 4.416	Τρῶας δῃώσωσιν ἕλωσί τε Ἴλιον ἱρήν,
Iliad 4.417	τούτῳ δʼ αὖ μέγα πένθος Ἀχαιῶν δῃωθέντων.
Iliad 4.418	ἀλλʼ ἄγε δὴ καὶ νῶϊ μεδώμεθα θούριδος ἀλκῆς.
Iliad 4.419	ἦ ῥα καὶ ἐξ ὀχέων σὺν τεύχεσιν ἆλτο χαμᾶζε·
Iliad 4.420	δεινὸν δʼ ἔβραχε χαλκὸς ἐπὶ στήθεσσιν ἄνακτος
Iliad 4.421	ὀρνυμένου· ὑπό κεν ταλασίφρονά περ δέος εἷλεν.
Iliad 4.422	ὡς δʼ ὅτʼ ἐν αἰγιαλῷ πολυηχέϊ κῦμα θαλάσσης
Iliad 4.423	ὄρνυτʼ ἐπασσύτερον Ζεφύρου ὕπο κινήσαντος·
Iliad 4.424	πόντῳ μέν τε πρῶτα κορύσσεται, αὐτὰρ ἔπειτα
Iliad 4.425	χέρσῳ ῥηγνύμενον μεγάλα βρέμει, ἀμφὶ δέ τʼ ἄκρας
Iliad 4.426	κυρτὸν ἐὸν κορυφοῦται, ἀποπτύει δʼ ἁλὸς ἄχνην·
Iliad 4.427	ὣς τότʼ ἐπασσύτεραι Δαναῶν κίνυντο φάλαγγες
Iliad 4.428	νωλεμέως πόλεμον δέ· κέλευε δὲ οἷσιν ἕκαστος
Iliad 4.429	ἡγεμόνων· οἳ δʼ ἄλλοι ἀκὴν ἴσαν, οὐδέ κε φαίης
Iliad 4.430	τόσσον λαὸν ἕπεσθαι ἔχοντʼ ἐν στήθεσιν αὐδήν,
Iliad 4.431	σιγῇ δειδιότες σημάντορας· ἀμφὶ δὲ πᾶσι
Iliad 4.432	τεύχεα ποικίλʼ ἔλαμπε, τὰ εἱμένοι ἐστιχόωντο.
Iliad 4.433	Τρῶες δʼ, ὥς τʼ ὄϊες πολυπάμονος ἀνδρὸς ἐν αὐλῇ
Iliad 4.434	μυρίαι ἑστήκασιν ἀμελγόμεναι γάλα λευκὸν
Iliad 4.435	ἀζηχὲς μεμακυῖαι ἀκούουσαι ὄπα ἀρνῶν,
Iliad 4.436	ὣς Τρώων ἀλαλητὸς ἀνὰ στρατὸν εὐρὺν ὀρώρει·
Iliad 4.437	οὐ γὰρ πάντων ἦεν ὁμὸς θρόος οὐδʼ ἴα γῆρυς,
Iliad 4.438	ἀλλὰ γλῶσσα μέμικτο, πολύκλητοι δʼ ἔσαν ἄνδρες.
Iliad 4.439	ὄρσε δὲ τοὺς μὲν Ἄρης, τοὺς δὲ γλαυκῶπις Ἀθήνη
Iliad 4.440	Δεῖμός τʼ ἠδὲ Φόβος καὶ Ἔρις ἄμοτον μεμαυῖα,
Iliad 4.441	Ἄρεος ἀνδροφόνοιο κασιγνήτη ἑτάρη τε,
Iliad 4.442	ἥ τʼ ὀλίγη μὲν πρῶτα κορύσσεται, αὐτὰρ ἔπειτα
Iliad 4.443	οὐρανῷ ἐστήριξε κάρη καὶ ἐπὶ χθονὶ βαίνει·
Iliad 4.444	ἥ σφιν καὶ τότε νεῖκος ὁμοίϊον ἔμβαλε μέσσῳ
Iliad 4.445	ἐρχομένη καθʼ ὅμιλον ὀφέλλουσα στόνον ἀνδρῶν.
Iliad 4.446	οἳ δʼ ὅτε δή ῥʼ ἐς χῶρον ἕνα ξυνιόντες ἵκοντο,
Iliad 4.447	σύν ῥʼ ἔβαλον ῥινούς, σὺν δʼ ἔγχεα καὶ μένεʼ ἀνδρῶν
Iliad 4.448	χαλκεοθωρήκων· ἀτὰρ ἀσπίδες ὀμφαλόεσσαι
Iliad 4.449	ἔπληντʼ ἀλλήλῃσι, πολὺς δʼ ὀρυμαγδὸς ὀρώρει.
Iliad 4.450	ἔνθα δʼ ἅμʼ οἰμωγή τε καὶ εὐχωλὴ πέλεν ἀνδρῶν
Iliad 4.451	ὀλλύντων τε καὶ ὀλλυμένων, ῥέε δʼ αἵματι γαῖα.
Iliad 4.452	ὡς δʼ ὅτε χείμαρροι ποταμοὶ κατʼ ὄρεσφι ῥέοντες
Iliad 4.453	ἐς μισγάγκειαν συμβάλλετον ὄβριμον ὕδωρ
Iliad 4.454	κρουνῶν ἐκ μεγάλων κοίλης ἔντοσθε χαράδρης,
Iliad 4.455	τῶν δέ τε τηλόσε δοῦπον ἐν οὔρεσιν ἔκλυε ποιμήν·
Iliad 4.456	ὣς τῶν μισγομένων γένετο ἰαχή τε πόνος τε.
Iliad 4.457	πρῶτος δʼ Ἀντίλοχος Τρώων ἕλεν ἄνδρα κορυστὴν
Iliad 4.458	ἐσθλὸν ἐνὶ προμάχοισι Θαλυσιάδην Ἐχέπωλον·
Iliad 4.459	τόν ῥʼ ἔβαλε πρῶτος κόρυθος φάλον ἱπποδασείης,
Iliad 4.460	ἐν δὲ μετώπῳ πῆξε, πέρησε δʼ ἄρʼ ὀστέον εἴσω
Iliad 4.461	αἰχμὴ χαλκείη· τὸν δὲ σκότος ὄσσε κάλυψεν,
Iliad 4.462	ἤριπε δʼ ὡς ὅτε πύργος ἐνὶ κρατερῇ ὑσμίνῃ.
Iliad 4.463	τὸν δὲ πεσόντα ποδῶν ἔλαβε κρείων Ἐλεφήνωρ
Iliad 4.464	Χαλκωδοντιάδης μεγαθύμων ἀρχὸς Ἀβάντων,
Iliad 4.465	ἕλκε δʼ ὑπʼ ἐκ βελέων, λελιημένος ὄφρα τάχιστα
Iliad 4.466	τεύχεα συλήσειε· μίνυνθα δέ οἱ γένεθʼ ὁρμή.
Iliad 4.467	νεκρὸν γὰρ ἐρύοντα ἰδὼν μεγάθυμος Ἀγήνωρ
Iliad 4.468	πλευρά, τά οἱ κύψαντι παρʼ ἀσπίδος ἐξεφαάνθη,
Iliad 4.469	οὔτησε ξυστῷ χαλκήρεϊ, λῦσε δὲ γυῖα.
Iliad 4.470	ὣς τὸν μὲν λίπε θυμός, ἐπʼ αὐτῷ δʼ ἔργον ἐτύχθη
Iliad 4.471	ἀργαλέον Τρώων καὶ Ἀχαιῶν· οἳ δὲ λύκοι ὣς
Iliad 4.472	ἀλλήλοις ἐπόρουσαν, ἀνὴρ δʼ ἄνδρʼ ἐδνοπάλιζεν.
Iliad 4.473	ἔνθʼ ἔβαλʼ Ἀνθεμίωνος υἱὸν Τελαμώνιος Αἴας
Iliad 4.474	ἠΐθεον θαλερὸν Σιμοείσιον, ὅν ποτε μήτηρ
Iliad 4.475	Ἴδηθεν κατιοῦσα παρʼ ὄχθῃσιν Σιμόεντος
Iliad 4.476	γείνατʼ, ἐπεί ῥα τοκεῦσιν ἅμʼ ἕσπετο μῆλα ἰδέσθαι·
Iliad 4.477	τοὔνεκά μιν κάλεον Σιμοείσιον· οὐδὲ τοκεῦσι
Iliad 4.478	θρέπτρα φίλοις ἀπέδωκε, μινυνθάδιος δέ οἱ αἰὼν
Iliad 4.479	ἔπλεθʼ ὑπʼ Αἴαντος μεγαθύμου δουρὶ δαμέντι.
Iliad 4.480	πρῶτον γάρ μιν ἰόντα βάλε στῆθος παρὰ μαζὸν
Iliad 4.481	δεξιόν· ἀντικρὺ δὲ διʼ ὤμου χάλκεον ἔγχος
Iliad 4.482	ἦλθεν· ὁ δʼ ἐν κονίῃσι χαμαὶ πέσεν αἴγειρος ὣς
Iliad 4.483	ἥ ῥά τʼ ἐν εἱαμενῇ ἕλεος μεγάλοιο πεφύκει
Iliad 4.484	λείη, ἀτάρ τέ οἱ ὄζοι ἐπʼ ἀκροτάτῃ πεφύασι·
Iliad 4.485	τὴν μέν θʼ ἁρματοπηγὸς ἀνὴρ αἴθωνι σιδήρῳ
Iliad 4.486	ἐξέταμʼ, ὄφρα ἴτυν κάμψῃ περικαλλέϊ δίφρῳ·
Iliad 4.487	ἣ μέν τʼ ἀζομένη κεῖται ποταμοῖο παρʼ ὄχθας.
Iliad 4.488	τοῖον ἄρʼ Ἀνθεμίδην Σιμοείσιον ἐξενάριξεν
Iliad 4.489	Αἴας διογενής· τοῦ δʼ Ἄντιφος αἰολοθώρηξ
Iliad 4.490	Πριαμίδης καθʼ ὅμιλον ἀκόντισεν ὀξέϊ δουρί.
Iliad 4.491	τοῦ μὲν ἅμαρθʼ, ὃ δὲ Λεῦκον Ὀδυσσέος ἐσθλὸν ἑταῖρον
Iliad 4.492	βεβλήκει βουβῶνα, νέκυν ἑτέρωσʼ ἐρύοντα·
Iliad 4.493	ἤριπε δʼ ἀμφʼ αὐτῷ, νεκρὸς δέ οἱ ἔκπεσε χειρός.
Iliad 4.494	τοῦ δʼ Ὀδυσεὺς μάλα θυμὸν ἀποκταμένοιο χολώθη,
Iliad 4.495	βῆ δὲ διὰ προμάχων κεκορυθμένος αἴθοπι χαλκῷ,
Iliad 4.496	στῆ δὲ μάλʼ ἐγγὺς ἰὼν καὶ ἀκόντισε δουρὶ φαεινῷ
Iliad 4.497	ἀμφὶ ἓ παπτήνας· ὑπὸ δὲ Τρῶες κεκάδοντο
Iliad 4.498	ἀνδρὸς ἀκοντίσσαντος· ὃ δʼ οὐχ ἅλιον βέλος ἧκεν,
Iliad 4.499	ἀλλʼ υἱὸν Πριάμοιο νόθον βάλε Δημοκόωντα
Iliad 4.500	ὅς οἱ Ἀβυδόθεν ἦλθε παρʼ ἵππων ὠκειάων.
Iliad 4.501	τόν ῥʼ Ὀδυσεὺς ἑτάροιο χολωσάμενος βάλε δουρὶ
Iliad 4.502	κόρσην· ἣ δʼ ἑτέροιο διὰ κροτάφοιο πέρησεν
Iliad 4.503	αἰχμὴ χαλκείη· τὸν δὲ σκότος ὄσσε κάλυψε,
Iliad 4.504	δούπησεν δὲ πεσών, ἀράβησε δὲ τεύχεʼ ἐπʼ αὐτῷ.
Iliad 4.505	χώρησαν δʼ ὑπό τε πρόμαχοι καὶ φαίδιμος Ἕκτωρ·
Iliad 4.506	Ἀργεῖοι δὲ μέγα ἴαχον, ἐρύσαντο δὲ νεκρούς,
Iliad 4.507	ἴθυσαν δὲ πολὺ προτέρω· νεμέσησε δʼ Ἀπόλλων
Iliad 4.508	Περγάμου ἐκκατιδών, Τρώεσσι δὲ κέκλετʼ ἀΰσας·
Iliad 4.509	ὄρνυσθʼ ἱππόδαμοι Τρῶες μηδʼ εἴκετε χάρμης
Iliad 4.510	Ἀργείοις, ἐπεὶ οὔ σφι λίθος χρὼς οὐδὲ σίδηρος
Iliad 4.511	χαλκὸν ἀνασχέσθαι ταμεσίχροα βαλλομένοισιν·
Iliad 4.512	οὐ μὰν οὐδʼ Ἀχιλεὺς Θέτιδος πάϊς ἠϋκόμοιο
Iliad 4.513	μάρναται, ἀλλʼ ἐπὶ νηυσὶ χόλον θυμαλγέα πέσσει.
Iliad 4.514	ὣς φάτʼ ἀπὸ πτόλιος δεινὸς θεός· αὐτὰρ Ἀχαιοὺς
Iliad 4.515	ὦρσε Διὸς θυγάτηρ κυδίστη Τριτογένεια
Iliad 4.516	ἐρχομένη καθʼ ὅμιλον, ὅθι μεθιέντας ἴδοιτο.
Iliad 4.517	ἔνθʼ Ἀμαρυγκείδην Διώρεα μοῖρα πέδησε·
Iliad 4.518	χερμαδίῳ γὰρ βλῆτο παρὰ σφυρὸν ὀκριόεντι
Iliad 4.519	κνήμην δεξιτερήν· βάλε δὲ Θρῃκῶν ἀγὸς ἀνδρῶν
Iliad 4.520	Πείρως Ἰμβρασίδης ὃς ἄρʼ Αἰνόθεν εἰληλούθει.
Iliad 4.521	ἀμφοτέρω δὲ τένοντε καὶ ὀστέα λᾶας ἀναιδὴς
Iliad 4.522	ἄχρις ἀπηλοίησεν· ὃ δʼ ὕπτιος ἐν κονίῃσι
Iliad 4.523	κάππεσεν ἄμφω χεῖρε φίλοις ἑτάροισι πετάσσας
Iliad 4.524	θυμὸν ἀποπνείων· ὃ δʼ ἐπέδραμεν ὅς ῥʼ ἔβαλέν περ
Iliad 4.525	Πείροος, οὖτα δὲ δουρὶ παρʼ ὀμφαλόν· ἐκ δʼ ἄρα πᾶσαι
Iliad 4.526	χύντο χαμαὶ χολάδες, τὸν δὲ σκότος ὄσσε κάλυψε.
Iliad 4.527	τὸν δὲ Θόας Αἰτωλὸς ἀπεσσύμενον βάλε δουρὶ
Iliad 4.528	στέρνον ὑπὲρ μαζοῖο, πάγη δʼ ἐν πνεύμονι χαλκός·
Iliad 4.529	ἀγχίμολον δέ οἱ ἦλθε Θόας, ἐκ δʼ ὄβριμον ἔγχος
Iliad 4.530	ἐσπάσατο στέρνοιο, ἐρύσσατο δὲ ξίφος ὀξύ,
Iliad 4.531	τῷ ὅ γε γαστέρα τύψε μέσην, ἐκ δʼ αἴνυτο θυμόν.
Iliad 4.532	τεύχεα δʼ οὐκ ἀπέδυσε· περίστησαν γὰρ ἑταῖροι
Iliad 4.533	Θρήϊκες ἀκρόκομοι δολίχʼ ἔγχεα χερσὶν ἔχοντες,
Iliad 4.534	οἵ ἑ μέγαν περ ἐόντα καὶ ἴφθιμον καὶ ἀγαυὸν
Iliad 4.535	ὦσαν ἀπὸ σφείων· ὃ δὲ χασσάμενος πελεμίχθη.
Iliad 4.536	ὣς τώ γʼ ἐν κονίῃσι παρʼ ἀλλήλοισι τετάσθην,
Iliad 4.537	ἤτοι ὃ μὲν Θρῃκῶν, ὃ δʼ Ἐπειῶν χαλκοχιτώνων
Iliad 4.538	ἡγεμόνες· πολλοὶ δὲ περὶ κτείνοντο καὶ ἄλλοι.
Iliad 4.539	ἔνθά κεν οὐκέτι ἔργον ἀνὴρ ὀνόσαιτο μετελθών,
Iliad 4.540	ὅς τις ἔτʼ ἄβλητος καὶ ἀνούτατος ὀξέϊ χαλκῷ
Iliad 4.541	δινεύοι κατὰ μέσσον, ἄγοι δέ ἑ Παλλὰς Ἀθήνη
Iliad 4.542	χειρὸς ἑλοῦσʼ, αὐτὰρ βελέων ἀπερύκοι ἐρωήν·
Iliad 4.543	πολλοὶ γὰρ Τρώων καὶ Ἀχαιῶν ἤματι κείνῳ
Iliad 4.544	πρηνέες ἐν κονίῃσι παρʼ ἀλλήλοισι τέταντο.
Iliad 5.1	ἔνθʼ αὖ Τυδεΐδῃ Διομήδεϊ Παλλὰς Ἀθήνη
Iliad 5.2	δῶκε μένος καὶ θάρσος, ἵνʼ ἔκδηλος μετὰ πᾶσιν
Iliad 5.3	Ἀργείοισι γένοιτο ἰδὲ κλέος ἐσθλὸν ἄροιτο·
Iliad 5.4	δαῖέ οἱ ἐκ κόρυθός τε καὶ ἀσπίδος ἀκάματον πῦρ
Iliad 5.5	ἀστέρʼ ὀπωρινῷ ἐναλίγκιον, ὅς τε μάλιστα
Iliad 5.6	λαμπρὸν παμφαίνῃσι λελουμένος ὠκεανοῖο·
Iliad 5.7	τοῖόν οἱ πῦρ δαῖεν ἀπὸ κρατός τε καὶ ὤμων,
Iliad 5.8	ὦρσε δέ μιν κατὰ μέσσον ὅθι πλεῖστοι κλονέοντο.
Iliad 5.9	ἦν δέ τις ἐν Τρώεσσι Δάρης ἀφνειὸς ἀμύμων
Iliad 5.10	ἱρεὺς Ἡφαίστοιο· δύω δέ οἱ υἱέες ἤστην
Iliad 5.11	Φηγεὺς Ἰδαῖός τε μάχης εὖ εἰδότε πάσης.
Iliad 5.12	τώ οἱ ἀποκρινθέντε ἐναντίω ὁρμηθήτην·
Iliad 5.13	τὼ μὲν ἀφʼ ἵπποιιν, ὃ δʼ ἀπὸ χθονὸς ὄρνυτο πεζός.
Iliad 5.14	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες
Iliad 5.15	Φηγεύς ῥα πρότερος προΐει δολιχόσκιον ἔγχος·
Iliad 5.16	Τυδεΐδεω δʼ ὑπὲρ ὦμον ἀριστερὸν ἤλυθʼ ἀκωκὴ
Iliad 5.17	ἔγχεος, οὐδʼ ἔβαλʼ αὐτόν· ὃ δʼ ὕστερος ὄρνυτο χαλκῷ
Iliad 5.18	Τυδεΐδης· τοῦ δʼ οὐχ ἅλιον βέλος ἔκφυγε χειρός,
Iliad 5.19	ἀλλʼ ἔβαλε στῆθος μεταμάζιον, ὦσε δʼ ἀφʼ ἵππων.
Iliad 5.20	Ἰδαῖος δʼ ἀπόρουσε λιπὼν περικαλλέα δίφρον,
Iliad 5.21	οὐδʼ ἔτλη περιβῆναι ἀδελφειοῦ κταμένοιο·
Iliad 5.22	οὐδὲ γὰρ οὐδέ κεν αὐτὸς ὑπέκφυγε κῆρα μέλαιναν,
Iliad 5.23	ἀλλʼ Ἥφαιστος ἔρυτο, σάωσε δὲ νυκτὶ καλύψας,
Iliad 5.24	ὡς δή οἱ μὴ πάγχυ γέρων ἀκαχήμενος εἴη.
Iliad 5.25	ἵππους δʼ ἐξελάσας μεγαθύμου Τυδέος υἱὸς
Iliad 5.26	δῶκεν ἑταίροισιν κατάγειν κοίλας ἐπὶ νῆας.
Iliad 5.27	Τρῶες δὲ μεγάθυμοι ἐπεὶ ἴδον υἷε Δάρητος
Iliad 5.28	τὸν μὲν ἀλευάμενον, τὸν δὲ κτάμενον παρʼ ὄχεσφι,
Iliad 5.29	πᾶσιν ὀρίνθη θυμός· ἀτὰρ γλαυκῶπις Ἀθήνη
Iliad 5.30	χειρὸς ἑλοῦσʼ ἐπέεσσι προσηύδα θοῦρον Ἄρηα·
Iliad 5.31	Ἆρες Ἄρες βροτολοιγὲ μιαιφόνε τειχεσιπλῆτα
Iliad 5.32	οὐκ ἂν δὴ Τρῶας μὲν ἐάσαιμεν καὶ Ἀχαιοὺς
Iliad 5.33	μάρνασθʼ, ὁπποτέροισι πατὴρ Ζεὺς κῦδος ὀρέξῃ,
Iliad 5.34	νῶϊ δὲ χαζώμεσθα, Διὸς δʼ ἀλεώμεθα μῆνιν;
Iliad 5.35	ὣς εἰποῦσα μάχης ἐξήγαγε θοῦρον Ἄρηα·
Iliad 5.36	τὸν μὲν ἔπειτα καθεῖσεν ἐπʼ ἠϊόεντι Σκαμάνδρῳ,
Iliad 5.37	Τρῶας δʼ ἔκλιναν Δαναοί· ἕλε δʼ ἄνδρα ἕκαστος
Iliad 5.38	ἡγεμόνων· πρῶτος δὲ ἄναξ ἀνδρῶν Ἀγαμέμνων
Iliad 5.39	ἀρχὸν Ἁλιζώνων Ὀδίον μέγαν ἔκβαλε δίφρου·
Iliad 5.40	πρώτῳ γὰρ στρεφθέντι μεταφρένῳ ἐν δόρυ πῆξεν
Iliad 5.41	ὤμων μεσσηγύς, διὰ δὲ στήθεσφιν ἔλασσε,
Iliad 5.42	δούπησεν δὲ πεσών, ἀράβησε δὲ τεύχεʼ ἐπʼ αὐτῷ.
Iliad 5.43	Ἰδομενεὺς δʼ ἄρα Φαῖστον ἐνήρατο Μῄονος υἱὸν
Iliad 5.44	Βώρου, ὃς ἐκ Τάρνης ἐριβώλακος εἰληλούθει.
Iliad 5.45	τὸν μὲν ἄρʼ Ἰδομενεὺς δουρικλυτὸς ἔγχεϊ μακρῷ
Iliad 5.46	νύξʼ ἵππων ἐπιβησόμενον κατὰ δεξιὸν ὦμον·
Iliad 5.47	ἤριπε δʼ ἐξ ὀχέων, στυγερὸς δʼ ἄρα μιν σκότος εἷλε.
Iliad 5.48	τὸν μὲν ἄρʼ Ἰδομενῆος ἐσύλευον θεράποντες·
Iliad 5.49	υἱὸν δὲ Στροφίοιο Σκαμάνδριον αἵμονα θήρης
Iliad 5.50	Ἀτρεΐδης Μενέλαος ἕλʼ ἔγχεϊ ὀξυόεντι
Iliad 5.51	ἐσθλὸν θηρητῆρα· δίδαξε γὰρ Ἄρτεμις αὐτὴ
Iliad 5.52	βάλλειν ἄγρια πάντα, τά τε τρέφει οὔρεσιν ὕλη·
Iliad 5.53	ἀλλʼ οὔ οἱ τότε γε χραῖσμʼ Ἄρτεμις ἰοχέαιρα,
Iliad 5.54	οὐδὲ ἑκηβολίαι ᾗσιν τὸ πρίν γε κέκαστο·
Iliad 5.55	ἀλλά μιν Ἀτρεΐδης δουρικλειτὸς Μενέλαος
Iliad 5.56	πρόσθεν ἕθεν φεύγοντα μετάφρενον οὔτασε δουρὶ
Iliad 5.57	ὤμων μεσσηγύς, διὰ δὲ στήθεσφιν ἔλασσεν,
Iliad 5.58	ἤριπε δὲ πρηνής, ἀράβησε δὲ τεύχεʼ ἐπʼ αὐτῷ.
Iliad 5.59	Μηριόνης δὲ Φέρεκλον ἐνήρατο, τέκτονος υἱὸν
Iliad 5.60	Ἁρμονίδεω, ὃς χερσὶν ἐπίστατο δαίδαλα πάντα
Iliad 5.61	τεύχειν· ἔξοχα γάρ μιν ἐφίλατο Παλλὰς Ἀθήνη·
Iliad 5.62	ὃς καὶ Ἀλεξάνδρῳ τεκτήνατο νῆας ἐΐσας
Iliad 5.63	ἀρχεκάκους, αἳ πᾶσι κακὸν Τρώεσσι γένοντο
Iliad 5.64	οἷ τʼ αὐτῷ, ἐπεὶ οὔ τι θεῶν ἐκ θέσφατα ᾔδη.
Iliad 5.65	τὸν μὲν Μηριόνης ὅτε δὴ κατέμαρπτε διώκων
Iliad 5.66	βεβλήκει γλουτὸν κατὰ δεξιόν· ἣ δὲ διαπρὸ
Iliad 5.67	ἀντικρὺ κατὰ κύστιν ὑπʼ ὀστέον ἤλυθʼ ἀκωκή·
Iliad 5.68	γνὺξ δʼ ἔριπʼ οἰμώξας, θάνατος δέ μιν ἀμφεκάλυψε.
Iliad 5.69	Πήδαιον δʼ ἄρʼ ἔπεφνε Μέγης Ἀντήνορος υἱὸν
Iliad 5.70	ὅς ῥα νόθος μὲν ἔην, πύκα δʼ ἔτρεφε δῖα Θεανὼ
Iliad 5.71	ἶσα φίλοισι τέκεσσι χαριζομένη πόσεϊ ᾧ.
Iliad 5.72	τὸν μὲν Φυλεΐδης δουρὶ κλυτὸς ἐγγύθεν ἐλθὼν
Iliad 5.73	βεβλήκει κεφαλῆς κατὰ ἰνίον ὀξέϊ δουρί·
Iliad 5.74	ἀντικρὺ δʼ ἀνʼ ὀδόντας ὑπὸ γλῶσσαν τάμε χαλκός·
Iliad 5.75	ἤριπε δʼ ἐν κονίῃ, ψυχρὸν δʼ ἕλε χαλκὸν ὀδοῦσιν.
Iliad 5.76	Εὐρύπυλος δʼ Εὐαιμονίδης Ὑψήνορα δῖον
Iliad 5.77	υἱὸν ὑπερθύμου Δολοπίονος, ὅς ῥα Σκαμάνδρου
Iliad 5.78	ἀρητὴρ ἐτέτυκτο, θεὸς δʼ ὣς τίετο δήμῳ,
Iliad 5.79	τὸν μὲν ἄρʼ Εὐρύπυλος, Εὐαίμονος ἀγλαὸς υἱός,
Iliad 5.80	πρόσθεν ἕθεν φεύγοντα μεταδρομάδην ἔλασʼ ὦμον
Iliad 5.81	φασγάνῳ ἀΐξας, ἀπὸ δʼ ἔξεσε χεῖρα βαρεῖαν·
Iliad 5.82	αἱματόεσσα δὲ χεὶρ πεδίῳ πέσε· τὸν δὲ κατʼ ὄσσε
Iliad 5.83	ἔλλαβε πορφύρεος θάνατος καὶ μοῖρα κραταιή.
Iliad 5.84	ὣς οἳ μὲν πονέοντο κατὰ κρατερὴν ὑσμίνην·
Iliad 5.85	Τυδεΐδην δʼ οὐκ ἂν γνοίης ποτέροισι μετείη
Iliad 5.86	ἠὲ μετὰ Τρώεσσιν ὁμιλέοι ἦ μετʼ Ἀχαιοῖς.
Iliad 5.87	θῦνε γὰρ ἂμ πεδίον ποταμῷ πλήθοντι ἐοικὼς
Iliad 5.88	χειμάρρῳ, ὅς τʼ ὦκα ῥέων ἐκέδασσε γεφύρας·
Iliad 5.89	τὸν δʼ οὔτʼ ἄρ τε γέφυραι ἐεργμέναι ἰσχανόωσιν,
Iliad 5.90	οὔτʼ ἄρα ἕρκεα ἴσχει ἀλωάων ἐριθηλέων
Iliad 5.91	ἐλθόντʼ ἐξαπίνης ὅτʼ ἐπιβρίσῃ Διὸς ὄμβρος·
Iliad 5.92	πολλὰ δʼ ὑπʼ αὐτοῦ ἔργα κατήριπε κάλʼ αἰζηῶν·
Iliad 5.93	ὣς ὑπὸ Τυδεΐδῃ πυκιναὶ κλονέοντο φάλαγγες
Iliad 5.94	Τρώων, οὐδʼ ἄρα μιν μίμνον πολέες περ ἐόντες.
Iliad 5.95	τὸν δʼ ὡς οὖν ἐνόησε Λυκάονος ἀγλαὸς υἱὸς
Iliad 5.96	θύνοντʼ ἂμ πεδίον πρὸ ἕθεν κλονέοντα φάλαγγας,
Iliad 5.97	αἶψʼ ἐπὶ Τυδεΐδῃ ἐτιταίνετο καμπύλα τόξα,
Iliad 5.98	καὶ βάλʼ ἐπαΐσσοντα τυχὼν κατὰ δεξιὸν ὦμον
Iliad 5.99	θώρηκος γύαλον· διὰ δʼ ἔπτατο πικρὸς ὀϊστός,
Iliad 5.100	ἀντικρὺ δὲ διέσχε, παλάσσετο δʼ αἵματι θώρηξ.
Iliad 5.101	τῷ δʼ ἐπὶ μακρὸν ἄϋσε Λυκάονος ἀγλαὸς υἱός·
Iliad 5.102	ὄρνυσθε Τρῶες μεγάθυμοι κέντορες ἵππων·
Iliad 5.103	βέβληται γὰρ ἄριστος Ἀχαιῶν, οὐδέ ἕ φημι
Iliad 5.104	δήθʼ ἀνσχήσεσθαι κρατερὸν βέλος, εἰ ἐτεόν με
Iliad 5.105	ὦρσεν ἄναξ Διὸς υἱὸς ἀπορνύμενον Λυκίηθεν.
Iliad 5.106	ὣς ἔφατʼ εὐχόμενος· τὸν δʼ οὐ βέλος ὠκὺ δάμασσεν,
Iliad 5.107	ἀλλʼ ἀναχωρήσας πρόσθʼ ἵπποιιν καὶ ὄχεσφιν
Iliad 5.108	ἔστη, καὶ Σθένελον προσέφη Καπανήϊον υἱόν·
Iliad 5.109	ὄρσο πέπον Καπανηϊάδη, καταβήσεο δίφρου,
Iliad 5.110	ὄφρά μοι ἐξ ὤμοιο ἐρύσσῃς πικρὸν ὀϊστόν.
Iliad 5.111	ὣς ἄρʼ ἔφη, Σθένελος δὲ καθʼ ἵππων ἆλτο χαμᾶζε,
Iliad 5.112	πὰρ δὲ στὰς βέλος ὠκὺ διαμπερὲς ἐξέρυσʼ ὤμου·
Iliad 5.113	αἷμα δʼ ἀνηκόντιζε διὰ στρεπτοῖο χιτῶνος.
Iliad 5.114	δὴ τότʼ ἔπειτʼ ἠρᾶτο βοὴν ἀγαθὸς Διομήδης·
Iliad 5.115	κλῦθί μευ αἰγιόχοιο Διὸς τέκος Ἀτρυτώνη,
Iliad 5.116	εἴ ποτέ μοι καὶ πατρὶ φίλα φρονέουσα παρέστης
Iliad 5.117	δηΐῳ ἐν πολέμῳ, νῦν αὖτʼ ἐμὲ φῖλαι Ἀθήνη·
Iliad 5.118	δὸς δέ τέ μʼ ἄνδρα ἑλεῖν καὶ ἐς ὁρμὴν ἔγχεος ἐλθεῖν
Iliad 5.119	ὅς μʼ ἔβαλε φθάμενος καὶ ἐπεύχεται, οὐδέ μέ φησι
Iliad 5.120	δηρὸν ἔτʼ ὄψεσθαι λαμπρὸν φάος ἠελίοιο.
Iliad 5.121	ὣς ἔφατʼ εὐχόμενος· τοῦ δʼ ἔκλυε Παλλὰς Ἀθήνη,
Iliad 5.122	γυῖα δʼ ἔθηκεν ἐλαφρά, πόδας καὶ χεῖρας ὕπερθεν·
Iliad 5.123	ἀγχοῦ δʼ ἱσταμένη ἔπεα πτερόεντα προσηύδα·
Iliad 5.124	θαρσῶν νῦν Διόμηδες ἐπὶ Τρώεσσι μάχεσθαι·
Iliad 5.125	ἐν γάρ τοι στήθεσσι μένος πατρώϊον ἧκα
Iliad 5.126	ἄτρομον, οἷον ἔχεσκε σακέσπαλος ἱππότα Τυδεύς·
Iliad 5.127	ἀχλὺν δʼ αὖ τοι ἀπʼ ὀφθαλμῶν ἕλον ἣ πρὶν ἐπῆεν,
Iliad 5.128	ὄφρʼ εὖ γιγνώσκῃς ἠμὲν θεὸν ἠδὲ καὶ ἄνδρα.
Iliad 5.129	τὼ νῦν αἴ κε θεὸς πειρώμενος ἐνθάδʼ ἵκηται
Iliad 5.130	μή τι σύ γʼ ἀθανάτοισι θεοῖς ἀντικρὺ μάχεσθαι
Iliad 5.131	τοῖς ἄλλοις· ἀτὰρ εἴ κε Διὸς θυγάτηρ Ἀφροδίτη
Iliad 5.132	ἔλθῃσʼ ἐς πόλεμον, τήν γʼ οὐτάμεν ὀξέϊ χαλκῷ.
Iliad 5.133	ἣ μὲν ἄρʼ ὣς εἰποῦσʼ ἀπέβη γλαυκῶπις Ἀθήνη,
Iliad 5.134	Τυδεΐδης δʼ ἐξαῦτις ἰὼν προμάχοισιν ἐμίχθη
Iliad 5.135	καὶ πρίν περ θυμῷ μεμαὼς Τρώεσσι μάχεσθαι·
Iliad 5.136	δὴ τότε μιν τρὶς τόσσον ἕλεν μένος ὥς τε λέοντα
Iliad 5.137	ὅν ῥά τε ποιμὴν ἀγρῷ ἐπʼ εἰροπόκοις ὀΐεσσι
Iliad 5.138	χραύσῃ μέν τʼ αὐλῆς ὑπεράλμενον οὐδὲ δαμάσσῃ·
Iliad 5.139	τοῦ μέν τε σθένος ὦρσεν, ἔπειτα δέ τʼ οὐ προσαμύνει,
Iliad 5.140	ἀλλὰ κατὰ σταθμοὺς δύεται, τὰ δʼ ἐρῆμα φοβεῖται·
Iliad 5.141	αἳ μέν τʼ ἀγχιστῖναι ἐπʼ ἀλλήλῃσι κέχυνται,
Iliad 5.142	αὐτὰρ ὃ ἐμμεμαὼς βαθέης ἐξάλλεται αὐλῆς·
Iliad 5.143	ὣς μεμαὼς Τρώεσσι μίγη κρατερὸς Διομήδης.
Iliad 5.144	ἔνθʼ ἕλεν Ἀστύνοον καὶ Ὑπείρονα ποιμένα λαῶν,
Iliad 5.145	τὸν μὲν ὑπὲρ μαζοῖο βαλὼν χαλκήρεϊ δουρί,
Iliad 5.146	τὸν δʼ ἕτερον ξίφεϊ μεγάλῳ κληῗδα παρʼ ὦμον
Iliad 5.147	πλῆξʼ, ἀπὸ δʼ αὐχένος ὦμον ἐέργαθεν ἠδʼ ἀπὸ νώτου.
Iliad 5.148	τοὺς μὲν ἔασʼ, ὃ δʼ Ἄβαντα μετῴχετο καὶ Πολύειδον
Iliad 5.149	υἱέας Εὐρυδάμαντος ὀνειροπόλοιο γέροντος·
Iliad 5.150	τοῖς οὐκ ἐρχομένοις ὃ γέρων ἐκρίνατʼ ὀνείρους,
Iliad 5.151	ἀλλά σφεας κρατερὸς Διομήδης ἐξενάριξε·
Iliad 5.152	βῆ δὲ μετὰ Ξάνθόν τε Θόωνά τε Φαίνοπος υἷε
Iliad 5.153	ἄμφω τηλυγέτω· ὃ δὲ τείρετο γήραϊ λυγρῷ,
Iliad 5.154	υἱὸν δʼ οὐ τέκετʼ ἄλλον ἐπὶ κτεάτεσσι λιπέσθαι.
Iliad 5.155	ἔνθʼ ὅ γε τοὺς ἐνάριζε, φίλον δʼ ἐξαίνυτο θυμὸν
Iliad 5.156	ἀμφοτέρω, πατέρι δὲ γόον καὶ κήδεα λυγρὰ
Iliad 5.157	λεῖπʼ, ἐπεὶ οὐ ζώοντε μάχης ἐκνοστήσαντε
Iliad 5.158	δέξατο· χηρωσταὶ δὲ διὰ κτῆσιν δατέοντο.
Iliad 5.159	ἔνθʼ υἷας Πριάμοιο δύω λάβε Δαρδανίδαο
Iliad 5.160	εἰν ἑνὶ δίφρῳ ἐόντας Ἐχέμμονά τε Χρομίον τε.
Iliad 5.161	ὡς δὲ λέων ἐν βουσὶ θορὼν ἐξ αὐχένα ἄξῃ
Iliad 5.162	πόρτιος ἠὲ βοὸς ξύλοχον κάτα βοσκομενάων,
Iliad 5.163	ὣς τοὺς ἀμφοτέρους ἐξ ἵππων Τυδέος υἱὸς
Iliad 5.164	βῆσε κακῶς ἀέκοντας, ἔπειτα δὲ τεύχεʼ ἐσύλα·
Iliad 5.165	ἵππους δʼ οἷς ἑτάροισι δίδου μετὰ νῆας ἐλαύνειν.
Iliad 5.166	τὸν δʼ ἴδεν Αἰνείας ἀλαπάζοντα στίχας ἀνδρῶν,
Iliad 5.167	βῆ δʼ ἴμεν ἄν τε μάχην καὶ ἀνὰ κλόνον ἐγχειάων
Iliad 5.168	Πάνδαρον ἀντίθεον διζήμενος εἴ που ἐφεύροι·
Iliad 5.169	εὗρε Λυκάονος υἱὸν ἀμύμονά τε κρατερόν τε,
Iliad 5.170	στῆ δὲ πρόσθʼ αὐτοῖο ἔπος τέ μιν ἀντίον ηὔδα·
Iliad 5.171	Πάνδαρε ποῦ τοι τόξον ἰδὲ πτερόεντες ὀϊστοὶ
Iliad 5.172	καὶ κλέος; ᾧ οὔ τίς τοι ἐρίζεται ἐνθάδε γʼ ἀνήρ,
Iliad 5.173	οὐδέ τις ἐν Λυκίῃ σέο γʼ εὔχεται εἶναι ἀμείνων.
Iliad 5.174	ἀλλʼ ἄγε τῷδʼ ἔφες ἀνδρὶ βέλος Διὶ χεῖρας ἀνασχὼν
Iliad 5.175	ὅς τις ὅδε κρατέει καὶ δὴ κακὰ πολλὰ ἔοργε
Iliad 5.176	Τρῶας, ἐπεὶ πολλῶν τε καὶ ἐσθλῶν γούνατʼ ἔλυσεν·
Iliad 5.177	εἰ μή τις θεός ἐστι κοτεσσάμενος Τρώεσσιν
Iliad 5.178	ἱρῶν μηνίσας· χαλεπὴ δὲ θεοῦ ἔπι μῆνις.
Iliad 5.179	τὸν δʼ αὖτε προσέειπε Λυκάονος ἀγλαὸς υἱός·
Iliad 5.180	Αἰνεία Τρώων βουληφόρε χαλκοχιτώνων
Iliad 5.181	Τυδεΐδῃ μιν ἔγωγε δαΐφρονι πάντα ἐΐσκω,
Iliad 5.182	ἀσπίδι γιγνώσκων αὐλώπιδί τε τρυφαλείῃ,
Iliad 5.183	ἵππους τʼ εἰσορόων· σάφα δʼ οὐκ οἶδʼ εἰ θεός ἐστιν.
Iliad 5.184	εἰ δʼ ὅ γʼ ἀνὴρ ὅν φημι δαΐφρων Τυδέος υἱὸς
Iliad 5.185	οὐχ ὅ γʼ ἄνευθε θεοῦ τάδε μαίνεται, ἀλλά τις ἄγχι
Iliad 5.186	ἕστηκʼ ἀθανάτων νεφέλῃ εἰλυμένος ὤμους,
Iliad 5.187	ὃς τούτου βέλος ὠκὺ κιχήμενον ἔτραπεν ἄλλῃ.
Iliad 5.188	ἤδη γάρ οἱ ἐφῆκα βέλος, καί μιν βάλον ὦμον
Iliad 5.189	δεξιὸν ἀντικρὺ διὰ θώρηκος γυάλοιο·
Iliad 5.190	καί μιν ἔγωγʼ ἐφάμην Ἀϊδωνῆϊ προϊάψειν,
Iliad 5.191	ἔμπης δʼ οὐκ ἐδάμασσα· θεός νύ τίς ἐστι κοτήεις.
Iliad 5.192	ἵπποι δʼ οὐ παρέασι καὶ ἅρματα τῶν κʼ ἐπιβαίην·
Iliad 5.193	ἀλλά που ἐν μεγάροισι Λυκάονος ἕνδεκα δίφροι
Iliad 5.194	καλοὶ πρωτοπαγεῖς νεοτευχέες· ἀμφὶ δὲ πέπλοι
Iliad 5.195	πέπτανται· παρὰ δέ σφιν ἑκάστῳ δίζυγες ἵπποι
Iliad 5.196	ἑστᾶσι κρῖ λευκὸν ἐρεπτόμενοι καὶ ὀλύρας.
Iliad 5.197	ἦ μέν μοι μάλα πολλὰ γέρων αἰχμητὰ Λυκάων
Iliad 5.198	ἐρχομένῳ ἐπέτελλε δόμοις ἔνι ποιητοῖσιν·
Iliad 5.199	ἵπποισίν μʼ ἐκέλευε καὶ ἅρμασιν ἐμβεβαῶτα
Iliad 5.200	ἀρχεύειν Τρώεσσι κατὰ κρατερὰς ὑσμίνας·
Iliad 5.201	ἀλλʼ ἐγὼ οὐ πιθόμην· ἦ τʼ ἂν πολὺ κέρδιον ἦεν·
Iliad 5.202	ἵππων φειδόμενος, μή μοι δευοίατο φορβῆς
Iliad 5.203	ἀνδρῶν εἰλομένων εἰωθότες ἔδμεναι ἄδην.
Iliad 5.204	ὣς λίπον, αὐτὰρ πεζὸς ἐς Ἴλιον εἰλήλουθα
Iliad 5.205	τόξοισιν πίσυνος· τὰ δέ μʼ οὐκ ἄρʼ ἔμελλον ὀνήσειν.
Iliad 5.206	ἤδη γὰρ δοιοῖσιν ἀριστήεσσιν ἐφῆκα
Iliad 5.207	Τυδεΐδῃ τε καὶ Ἀτρεΐδῃ, ἐκ δʼ ἀμφοτέροιιν
Iliad 5.208	ἀτρεκὲς αἷμʼ ἔσσευα βαλών, ἤγειρα δὲ μᾶλλον.
Iliad 5.209	τώ ῥα κακῇ αἴσῃ ἀπὸ πασσάλου ἀγκύλα τόξα
Iliad 5.210	ἤματι τῷ ἑλόμην ὅτε Ἴλιον εἰς ἐρατεινὴν
Iliad 5.211	ἡγεόμην Τρώεσσι φέρων χάριν Ἕκτορι δίῳ.
Iliad 5.212	εἰ δέ κε νοστήσω καὶ ἐσόψομαι ὀφθαλμοῖσι
Iliad 5.213	πατρίδʼ ἐμὴν ἄλοχόν τε καὶ ὑψερεφὲς μέγα δῶμα,
Iliad 5.214	αὐτίκʼ ἔπειτʼ ἀπʼ ἐμεῖο κάρη τάμοι ἀλλότριος φὼς
Iliad 5.215	εἰ μὴ ἐγὼ τάδε τόξα φαεινῷ ἐν πυρὶ θείην
Iliad 5.216	χερσὶ διακλάσσας· ἀνεμώλια γάρ μοι ὀπηδεῖ.
Iliad 5.217	τὸν δʼ αὖτʼ Αἰνείας Τρώων ἀγὸς ἀντίον ηὔδα·
Iliad 5.218	μὴ δʼ οὕτως ἀγόρευε· πάρος δʼ οὐκ ἔσσεται ἄλλως,
Iliad 5.219	πρίν γʼ ἐπὶ νὼ τῷδʼ ἀνδρὶ σὺν ἵπποισιν καὶ ὄχεσφιν
Iliad 5.220	ἀντιβίην ἐλθόντε σὺν ἔντεσι πειρηθῆναι.
Iliad 5.221	ἀλλʼ ἄγʼ ἐμῶν ὀχέων ἐπιβήσεο, ὄφρα ἴδηαι
Iliad 5.222	οἷοι Τρώϊοι ἵπποι ἐπιστάμενοι πεδίοιο
Iliad 5.223	κραιπνὰ μάλʼ ἔνθα καὶ ἔνθα διωκέμεν ἠδὲ φέβεσθαι·
Iliad 5.224	τὼ καὶ νῶϊ πόλιν δὲ σαώσετον, εἴ περ ἂν αὖτε
Iliad 5.225	Ζεὺς ἐπὶ Τυδεΐδῃ Διομήδεϊ κῦδος ὀρέξῃ.
Iliad 5.226	ἀλλʼ ἄγε νῦν μάστιγα καὶ ἡνία σιγαλόεντα
Iliad 5.227	δέξαι, ἐγὼ δʼ ἵππων ἀποβήσομαι ὄφρα μάχωμαι·
Iliad 5.228	ἠὲ σὺ τόνδε δέδεξο, μελήσουσιν δʼ ἐμοὶ ἵπποι.
Iliad 5.229	τὸν δʼ αὖτε προσέειπε Λυκάονος ἀγλαὸς υἱός·
Iliad 5.230	Αἰνεία σὺ μὲν αὐτὸς ἔχʼ ἡνία καὶ τεὼ ἵππω·
Iliad 5.231	μᾶλλον ὑφʼ ἡνιόχῳ εἰωθότι καμπύλον ἅρμα
Iliad 5.232	οἴσετον, εἴ περ ἂν αὖτε φεβώμεθα Τυδέος υἱόν·
Iliad 5.233	μὴ τὼ μὲν δείσαντε ματήσετον, οὐδʼ ἐθέλητον
Iliad 5.234	ἐκφερέμεν πολέμοιο τεὸν φθόγγον ποθέοντε,
Iliad 5.235	νῶϊ δʼ ἐπαΐξας μεγαθύμου Τυδέος υἱὸς
Iliad 5.236	αὐτώ τε κτείνῃ καὶ ἐλάσσῃ μώνυχας ἵππους.
Iliad 5.237	ἀλλὰ σύ γʼ αὐτὸς ἔλαυνε τέʼ ἅρματα καὶ τεὼ ἵππω,
Iliad 5.238	τὸν δὲ δʼ ἐγὼν ἐπιόντα δεδέξομαι ὀξέϊ δουρί.
Iliad 5.239	ὣς ἄρα φωνήσαντες ἐς ἅρματα ποικίλα βάντες
Iliad 5.240	ἐμμεμαῶτʼ ἐπὶ Τυδεΐδῃ ἔχον ὠκέας ἵππους.
Iliad 5.241	τοὺς δὲ ἴδε Σθένελος Καπανήϊος ἀγλαὸς υἱός,
Iliad 5.242	αἶψα δὲ Τυδεΐδην ἔπεα πτερόεντα προσηύδα·
Iliad 5.243	Τυδεΐδη Διόμηδες ἐμῷ κεχαρισμένε θυμῷ,
Iliad 5.244	ἄνδρʼ ὁρόω κρατερὼ ἐπὶ σοὶ μεμαῶτε μάχεσθαι
Iliad 5.245	ἶνʼ ἀπέλεθρον ἔχοντας· ὃ μὲν τόξων ἐῢ εἰδὼς
Iliad 5.246	Πάνδαρος, υἱὸς δʼ αὖτε Λυκάονος εὔχεται εἶναι·
Iliad 5.247	Αἰνείας δʼ υἱὸς μὲν ἀμύμονος Ἀγχίσαο
Iliad 5.248	εὔχεται ἐκγεγάμεν, μήτηρ δέ οἵ ἐστʼ Ἀφροδίτη.
Iliad 5.249	ἀλλʼ ἄγε δὴ χαζώμεθʼ ἐφʼ ἵππων, μηδέ μοι οὕτω
Iliad 5.250	θῦνε διὰ προμάχων, μή πως φίλον ἦτορ ὀλέσσῃς.
Iliad 5.251	τὸν δʼ ἄρʼ ὑπόδρα ἰδὼν προσέφη κρατερὸς Διομήδης·
Iliad 5.252	μή τι φόβον δʼ ἀγόρευʼ, ἐπεὶ οὐδὲ σὲ πεισέμεν οἴω.
Iliad 5.253	οὐ γάρ μοι γενναῖον ἀλυσκάζοντι μάχεσθαι
Iliad 5.254	οὐδὲ καταπτώσσειν· ἔτι μοι μένος ἔμπεδόν ἐστιν·
Iliad 5.255	ὀκνείω δʼ ἵππων ἐπιβαινέμεν, ἀλλὰ καὶ αὔτως
Iliad 5.256	ἀντίον εἶμʼ αὐτῶν· τρεῖν μʼ οὐκ ἐᾷ Παλλὰς Ἀθήνη.
Iliad 5.257	τούτω δʼ οὐ πάλιν αὖτις ἀποίσετον ὠκέες ἵπποι
Iliad 5.258	ἄμφω ἀφʼ ἡμείων, εἴ γʼ οὖν ἕτερός γε φύγῃσιν.
Iliad 5.259	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Iliad 5.260	αἴ κέν μοι πολύβουλος Ἀθήνη κῦδος ὀρέξῃ
Iliad 5.261	ἀμφοτέρω κτεῖναι, σὺ δὲ τούσδε μὲν ὠκέας ἵππους
Iliad 5.262	αὐτοῦ ἐρυκακέειν ἐξ ἄντυγος ἡνία τείνας,
Iliad 5.263	Αἰνείαο δʼ ἐπαΐξαι μεμνημένος ἵππων,
Iliad 5.264	ἐκ δʼ ἐλάσαι Τρώων μετʼ ἐϋκνήμιδας Ἀχαιούς.
Iliad 5.265	τῆς γάρ τοι γενεῆς ἧς Τρωΐ περ εὐρύοπα Ζεὺς
Iliad 5.266	δῶχʼ υἷος ποινὴν Γανυμήδεος, οὕνεκʼ ἄριστοι
Iliad 5.267	ἵππων ὅσσοι ἔασιν ὑπʼ ἠῶ τʼ ἠέλιόν τε,
Iliad 5.268	τῆς γενεῆς ἔκλεψεν ἄναξ ἀνδρῶν Ἀγχίσης
Iliad 5.269	λάθρῃ Λαομέδοντος ὑποσχὼν θήλεας ἵππους·
Iliad 5.270	τῶν οἱ ἓξ ἐγένοντο ἐνὶ μεγάροισι γενέθλη.
Iliad 5.271	τοὺς μὲν τέσσαρας αὐτὸς ἔχων ἀτίταλλʼ ἐπὶ φάτνῃ,
Iliad 5.272	τὼ δὲ δύʼ Αἰνείᾳ δῶκεν μήστωρε φόβοιο.
Iliad 5.273	εἰ τούτω κε λάβοιμεν, ἀροίμεθά κε κλέος ἐσθλόν.
Iliad 5.274	ὣς οἳ μὲν τοιαῦτα πρὸς ἀλλήλους ἀγόρευον,
Iliad 5.275	τὼ δὲ τάχʼ ἐγγύθεν ἦλθον ἐλαύνοντʼ ὠκέας ἵππους.
Iliad 5.276	τὸν πρότερος προσέειπε Λυκάονος ἀγλαὸς υἱός·
Iliad 5.277	καρτερόθυμε δαΐφρον ἀγαυοῦ Τυδέος υἱὲ
Iliad 5.278	ἦ μάλα σʼ οὐ βέλος ὠκὺ δαμάσσατο πικρὸς ὀϊστός·
Iliad 5.279	νῦν αὖτʼ ἐγχείῃ πειρήσομαι αἴ κε τύχωμι.
Iliad 5.280	ἦ ῥα καὶ ἀμπεπαλὼν προΐει δολιχόσκιον ἔγχος
Iliad 5.281	καὶ βάλε Τυδεΐδαο κατʼ ἀσπίδα· τῆς δὲ διὰ πρὸ
Iliad 5.282	αἰχμὴ χαλκείη πταμένη θώρηκι πελάσθη·
Iliad 5.283	τῷ δʼ ἐπὶ μακρὸν ἄϋσε Λυκάονος ἀγλαὸς υἱός·
Iliad 5.284	βέβληαι κενεῶνα διαμπερές, οὐδέ σʼ ὀΐω
Iliad 5.285	δηρὸν ἔτʼ ἀνσχήσεσθαι· ἐμοὶ δὲ μέγʼ εὖχος ἔδωκας.
Iliad 5.286	τὸν δʼ οὐ ταρβήσας προσέφη κρατερὸς Διομήδης·
Iliad 5.287	ἤμβροτες οὐδʼ ἔτυχες· ἀτὰρ οὐ μὲν σφῶΐ γʼ ὀΐω
Iliad 5.288	πρίν γʼ ἀποπαύσεσθαι πρίν γʼ ἢ ἕτερόν γε πεσόντα
Iliad 5.289	αἵματος ἆσαι Ἄρηα, ταλαύρινον πολεμιστήν.
Iliad 5.290	ὣς φάμενος προέηκε· βέλος δʼ ἴθυνεν Ἀθήνη
Iliad 5.291	ῥῖνα παρʼ ὀφθαλμόν, λευκοὺς δʼ ἐπέρησεν ὀδόντας.
Iliad 5.292	τοῦ δʼ ἀπὸ μὲν γλῶσσαν πρυμνὴν τάμε χαλκὸς ἀτειρής,
Iliad 5.293	αἰχμὴ δʼ ἐξελύθη παρὰ νείατον ἀνθερεῶνα·
Iliad 5.294	ἤριπε δʼ ἐξ ὀχέων, ἀράβησε δὲ τεύχεʼ ἐπʼ αὐτῷ
Iliad 5.295	αἰόλα παμφανόωντα, παρέτρεσσαν δέ οἱ ἵπποι
Iliad 5.296	ὠκύποδες· τοῦ δʼ αὖθι λύθη ψυχή τε μένος τε.
Iliad 5.297	Αἰνείας δʼ ἀπόρουσε σὺν ἀσπίδι δουρί τε μακρῷ
Iliad 5.298	δείσας μή πώς οἱ ἐρυσαίατο νεκρὸν Ἀχαιοί.
Iliad 5.299	ἀμφὶ δʼ ἄρʼ αὐτῷ βαῖνε λέων ὣς ἀλκὶ πεποιθώς,
Iliad 5.300	πρόσθε δέ οἱ δόρυ τʼ ἔσχε καὶ ἀσπίδα πάντοσʼ ἐΐσην,
Iliad 5.301	τὸν κτάμεναι μεμαὼς ὅς τις τοῦ γʼ ἀντίος ἔλθοι
Iliad 5.302	σμερδαλέα ἰάχων· ὃ δὲ χερμάδιον λάβε χειρὶ
Iliad 5.303	Τυδεΐδης μέγα ἔργον ὃ οὐ δύο γʼ ἄνδρε φέροιεν,
Iliad 5.304	οἷοι νῦν βροτοί εἰσʼ· ὃ δέ μιν ῥέα πάλλε καὶ οἶος.
Iliad 5.305	τῷ βάλεν Αἰνείαο κατʼ ἰσχίον ἔνθά τε μηρὸς
Iliad 5.306	ἰσχίῳ ἐνστρέφεται, κοτύλην δέ τέ μιν καλέουσι·
Iliad 5.307	θλάσσε δέ οἱ κοτύλην, πρὸς δʼ ἄμφω ῥῆξε τένοντε·
Iliad 5.308	ὦσε δʼ ἀπὸ ῥινὸν τρηχὺς λίθος· αὐτὰρ ὅ γʼ ἥρως
Iliad 5.309	ἔστη γνὺξ ἐριπὼν καὶ ἐρείσατο χειρὶ παχείῃ
Iliad 5.310	γαίης· ἀμφὶ δὲ ὄσσε κελαινὴ νὺξ ἐκάλυψε.
Iliad 5.311	καί νύ κεν ἔνθʼ ἀπόλοιτο ἄναξ ἀνδρῶν Αἰνείας,
Iliad 5.312	εἰ μὴ ἄρʼ ὀξὺ νόησε Διὸς θυγάτηρ Ἀφροδίτη
Iliad 5.313	μήτηρ, ἥ μιν ὑπʼ Ἀγχίσῃ τέκε βουκολέοντι·
Iliad 5.314	ἀμφὶ δʼ ἑὸν φίλον υἱὸν ἐχεύατο πήχεε λευκώ,
Iliad 5.315	πρόσθε δέ οἱ πέπλοιο φαεινοῦ πτύγμα κάλυψεν
Iliad 5.316	ἕρκος ἔμεν βελέων, μή τις Δαναῶν ταχυπώλων
Iliad 5.317	χαλκὸν ἐνὶ στήθεσσι βαλὼν ἐκ θυμὸν ἕλοιτο.
Iliad 5.318	ἣ μὲν ἑὸν φίλον υἱὸν ὑπεξέφερεν πολέμοιο·
Iliad 5.319	οὐδʼ υἱὸς Καπανῆος ἐλήθετο συνθεσιάων
Iliad 5.320	τάων ἃς ἐπέτελλε βοὴν ἀγαθὸς Διομήδης,
Iliad 5.321	ἀλλʼ ὅ γε τοὺς μὲν ἑοὺς ἠρύκακε μώνυχας ἵππους
Iliad 5.322	νόσφιν ἀπὸ φλοίσβου ἐξ ἄντυγος ἡνία τείνας,
Iliad 5.323	Αἰνείαο δʼ ἐπαΐξας καλλίτριχας ἵππους
Iliad 5.324	ἐξέλασε Τρώων μετʼ ἐϋκνήμιδας Ἀχαιούς.
Iliad 5.325	δῶκε δὲ Δηϊπύλῳ ἑτάρῳ φίλῳ, ὃν περὶ πάσης
Iliad 5.326	τῖεν ὁμηλικίης ὅτι οἱ φρεσὶν ἄρτια ᾔδη,
Iliad 5.327	νηυσὶν ἔπι γλαφυρῇσιν ἐλαυνέμεν· αὐτὰρ ὅ γʼ ἥρως
Iliad 5.328	ὧν ἵππων ἐπιβὰς ἔλαβʼ ἡνία σιγαλόεντα,
Iliad 5.329	αἶψα δὲ Τυδεΐδην μέθεπε κρατερώνυχας ἵππους
Iliad 5.330	ἐμμεμαώς· ὃ δὲ Κύπριν ἐπῴχετο νηλέϊ χαλκῷ
Iliad 5.331	γιγνώσκων ὅ τʼ ἄναλκις ἔην θεός, οὐδὲ θεάων
Iliad 5.332	τάων αἵ τʼ ἀνδρῶν πόλεμον κάτα κοιρανέουσιν,
Iliad 5.333	οὔτʼ ἄρʼ Ἀθηναίη οὔτε πτολίπορθος Ἐνυώ.
Iliad 5.334	ἀλλʼ ὅτε δή ῥʼ ἐκίχανε πολὺν καθʼ ὅμιλον ὀπάζων,
Iliad 5.335	ἔνθʼ ἐπορεξάμενος μεγαθύμου Τυδέος υἱὸς
Iliad 5.336	ἄκρην οὔτασε χεῖρα μετάλμενος ὀξέϊ δουρὶ
Iliad 5.337	ἀβληχρήν· εἶθαρ δὲ δόρυ χροὸς ἀντετόρησεν
Iliad 5.338	ἀμβροσίου διὰ πέπλου, ὅν οἱ Χάριτες κάμον αὐταί,
Iliad 5.339	πρυμνὸν ὕπερ θέναρος· ῥέε δʼ ἄμβροτον αἷμα θεοῖο
Iliad 5.340	ἰχώρ, οἷός πέρ τε ῥέει μακάρεσσι θεοῖσιν·
Iliad 5.341	οὐ γὰρ σῖτον ἔδουσʼ, οὐ πίνουσʼ αἴθοπα οἶνον,
Iliad 5.342	τοὔνεκʼ ἀναίμονές εἰσι καὶ ἀθάνατοι καλέονται.
Iliad 5.343	ἣ δὲ μέγα ἰάχουσα ἀπὸ ἕο κάββαλεν υἱόν·
Iliad 5.344	καὶ τὸν μὲν μετὰ χερσὶν ἐρύσατο Φοῖβος Ἀπόλλων
Iliad 5.345	κυανέῃ νεφέλῃ, μή τις Δαναῶν ταχυπώλων
Iliad 5.346	χαλκὸν ἐνὶ στήθεσσι βαλὼν ἐκ θυμὸν ἕλοιτο·
Iliad 5.347	τῇ δʼ ἐπὶ μακρὸν ἄϋσε βοὴν ἀγαθὸς Διομήδης·
Iliad 5.348	εἶκε Διὸς θύγατερ πολέμου καὶ δηϊοτῆτος·
Iliad 5.349	ἦ οὐχ ἅλις ὅττι γυναῖκας ἀνάλκιδας ἠπεροπεύεις;
Iliad 5.350	εἰ δὲ σύ γʼ ἐς πόλεμον πωλήσεαι, ἦ τέ σʼ ὀΐω
Iliad 5.351	ῥιγήσειν πόλεμόν γε καὶ εἴ χʼ ἑτέρωθι πύθηαι.
Iliad 5.352	ὣς ἔφαθʼ, ἣ δʼ ἀλύουσʼ ἀπεβήσετο, τείρετο δʼ αἰνῶς·
Iliad 5.353	τὴν μὲν ἄρʼ Ἶρις ἑλοῦσα ποδήνεμος ἔξαγʼ ὁμίλου
Iliad 5.354	ἀχθομένην ὀδύνῃσι, μελαίνετο δὲ χρόα καλόν.
Iliad 5.355	εὗρεν ἔπειτα μάχης ἐπʼ ἀριστερὰ θοῦρον Ἄρηα
Iliad 5.356	ἥμενον· ἠέρι δʼ ἔγχος ἐκέκλιτο καὶ ταχέʼ ἵππω·
Iliad 5.357	ἣ δὲ γνὺξ ἐριποῦσα κασιγνήτοιο φίλοιο
Iliad 5.358	πολλὰ λισσομένη χρυσάμπυκας ᾔτεεν ἵππους·
Iliad 5.359	φίλε κασίγνητε κόμισαί τέ με δός τέ μοι ἵππους,
Iliad 5.360	ὄφρʼ ἐς Ὄλυμπον ἵκωμαι ἵνʼ ἀθανάτων ἕδος ἐστί.
Iliad 5.361	λίην ἄχθομαι ἕλκος ὅ με βροτὸς οὔτασεν ἀνὴρ
Iliad 5.362	Τυδεΐδης, ὃς νῦν γε καὶ ἂν Διὶ πατρὶ μάχοιτο.
Iliad 5.363	ὣς φάτο, τῇ δʼ ἄρʼ Ἄρης δῶκε χρυσάμπυκας ἵππους·
Iliad 5.364	ἣ δʼ ἐς δίφρον ἔβαινεν ἀκηχεμένη φίλον ἦτορ,
Iliad 5.365	πὰρ δέ οἱ Ἶρις ἔβαινε καὶ ἡνία λάζετο χερσί,
Iliad 5.366	μάστιξεν δʼ ἐλάαν, τὼ δʼ οὐκ ἀέκοντε πετέσθην.
Iliad 5.367	αἶψα δʼ ἔπειθʼ ἵκοντο θεῶν ἕδος αἰπὺν Ὄλυμπον·
Iliad 5.368	ἔνθʼ ἵππους ἔστησε ποδήνεμος ὠκέα Ἶρις
Iliad 5.369	λύσασʼ ἐξ ὀχέων, παρὰ δʼ ἀμβρόσιον βάλεν εἶδαρ·
Iliad 5.370	ἣ δʼ ἐν γούνασι πῖπτε Διώνης δῖʼ Ἀφροδίτη
Iliad 5.371	μητρὸς ἑῆς· ἣ δʼ ἀγκὰς ἐλάζετο θυγατέρα ἥν,
Iliad 5.372	χειρί τέ μιν κατέρεξεν ἔπος τʼ ἔφατʼ ἐκ τʼ ὀνόμαζε·
Iliad 5.373	τίς νύ σε τοιάδʼ ἔρεξε φίλον τέκος Οὐρανιώνων
Iliad 5.374	μαψιδίως, ὡς εἴ τι κακὸν ῥέζουσαν ἐνωπῇ;
Iliad 5.375	τὴν δʼ ἠμείβετʼ ἔπειτα φιλομμειδὴς Ἀφροδίτη·
Iliad 5.376	οὖτά με Τυδέος υἱὸς ὑπέρθυμος Διομήδης,
Iliad 5.377	οὕνεκʼ ἐγὼ φίλον υἱὸν ὑπεξέφερον πολέμοιο
Iliad 5.378	Αἰνείαν, ὃς ἐμοὶ πάντων πολὺ φίλτατός ἐστιν.
Iliad 5.379	οὐ γὰρ ἔτι Τρώων καὶ Ἀχαιῶν φύλοπις αἰνή,
Iliad 5.380	ἀλλʼ ἤδη Δαναοί γε καὶ ἀθανάτοισι μάχονται.
Iliad 5.381	τὴν δʼ ἠμείβετʼ ἔπειτα Διώνη, δῖα θεάων·
Iliad 5.382	τέτλαθι τέκνον ἐμόν, καὶ ἀνάσχεο κηδομένη περ·
Iliad 5.383	πολλοὶ γὰρ δὴ τλῆμεν Ὀλύμπια δώματʼ ἔχοντες
Iliad 5.384	ἐξ ἀνδρῶν χαλέπʼ ἄλγεʼ ἐπʼ ἀλλήλοισι τιθέντες.
Iliad 5.385	τλῆ μὲν Ἄρης ὅτε μιν Ὦτος κρατερός τʼ Ἐφιάλτης
Iliad 5.386	παῖδες Ἀλωῆος, δῆσαν κρατερῷ ἐνὶ δεσμῷ·
Iliad 5.387	χαλκέῳ δʼ ἐν κεράμῳ δέδετο τρισκαίδεκα μῆνας·
Iliad 5.388	καί νύ κεν ἔνθʼ ἀπόλοιτο Ἄρης ἆτος πολέμοιο,
Iliad 5.389	εἰ μὴ μητρυιὴ περικαλλὴς Ἠερίβοια
Iliad 5.390	Ἑρμέᾳ ἐξήγγειλεν· ὃ δʼ ἐξέκλεψεν Ἄρηα
Iliad 5.391	ἤδη τειρόμενον, χαλεπὸς δέ ἑ δεσμὸς ἐδάμνα.
Iliad 5.392	τλῆ δʼ Ἥρη, ὅτε μιν κρατερὸς πάϊς Ἀμφιτρύωνος
Iliad 5.393	δεξιτερὸν κατὰ μαζὸν ὀϊστῷ τριγλώχινι
Iliad 5.394	βεβλήκει· τότε καί μιν ἀνήκεστον λάβεν ἄλγος.
Iliad 5.395	τλῆ δʼ Ἀΐδης ἐν τοῖσι πελώριος ὠκὺν ὀϊστόν,
Iliad 5.396	εὖτέ μιν ωὐτὸς ἀνὴρ υἱὸς Διὸς αἰγιόχοιο
Iliad 5.397	ἐν Πύλῳ ἐν νεκύεσσι βαλὼν ὀδύνῃσιν ἔδωκεν·
Iliad 5.398	αὐτὰρ ὃ βῆ πρὸς δῶμα Διὸς καὶ μακρὸν Ὄλυμπον
Iliad 5.399	κῆρ ἀχέων ὀδύνῃσι πεπαρμένος· αὐτὰρ ὀϊστὸς
Iliad 5.400	ὤμῳ ἔνι στιβαρῷ ἠλήλατο, κῆδε δὲ θυμόν.
Iliad 5.401	τῷ δʼ ἐπὶ Παιήων ὀδυνήφατα φάρμακα πάσσων
Iliad 5.402	ἠκέσατʼ· οὐ μὲν γάρ τι καταθνητός γε τέτυκτο.
Iliad 5.403	σχέτλιος ὀβριμοεργὸς ὃς οὐκ ὄθετʼ αἴσυλα ῥέζων,
Iliad 5.404	ὃς τόξοισιν ἔκηδε θεοὺς οἳ Ὄλυμπον ἔχουσι.
Iliad 5.405	σοὶ δʼ ἐπὶ τοῦτον ἀνῆκε θεὰ γλαυκῶπις Ἀθήνη·
Iliad 5.406	νήπιος, οὐδὲ τὸ οἶδε κατὰ φρένα Τυδέος υἱὸς
Iliad 5.407	ὅττι μάλʼ οὐ δηναιὸς ὃς ἀθανάτοισι μάχηται,
Iliad 5.408	οὐδέ τί μιν παῖδες ποτὶ γούνασι παππάζουσιν
Iliad 5.409	ἐλθόντʼ ἐκ πολέμοιο καὶ αἰνῆς δηϊοτῆτος.
Iliad 5.410	τὼ νῦν Τυδεΐδης, εἰ καὶ μάλα καρτερός ἐστι,
Iliad 5.411	φραζέσθω μή τίς οἱ ἀμείνων σεῖο μάχηται,
Iliad 5.412	μὴ δὴν Αἰγιάλεια περίφρων Ἀδρηστίνη
Iliad 5.413	ἐξ ὕπνου γοόωσα φίλους οἰκῆας ἐγείρῃ
Iliad 5.414	κουρίδιον ποθέουσα πόσιν τὸν ἄριστον Ἀχαιῶν
Iliad 5.415	ἰφθίμη ἄλοχος Διομήδεος ἱπποδάμοιο.
Iliad 5.416	ἦ ῥα καὶ ἀμφοτέρῃσιν ἀπʼ ἰχῶ χειρὸς ὀμόργνυ·
Iliad 5.417	ἄλθετο χείρ, ὀδύναι δὲ κατηπιόωντο βαρεῖαι.
Iliad 5.418	αἳ δʼ αὖτʼ εἰσορόωσαι Ἀθηναίη τε καὶ Ἥρη
Iliad 5.419	κερτομίοις ἐπέεσσι Δία Κρονίδην ἐρέθιζον.
Iliad 5.420	τοῖσι δὲ μύθων ἦρχε θεὰ γλαυκῶπις Ἀθήνη·
Iliad 5.421	Ζεῦ πάτερ ἦ ῥά τί μοι κεχολώσεαι ὅττι κεν εἴπω;
Iliad 5.422	ἦ μάλα δή τινα Κύπρις Ἀχαιϊάδων ἀνιεῖσα
Iliad 5.423	Τρωσὶν ἅμα σπέσθαι, τοὺς νῦν ἔκπαγλα φίλησε,
Iliad 5.424	τῶν τινα καρρέζουσα Ἀχαιϊάδων ἐϋπέπλων
Iliad 5.425	πρὸς χρυσῇ περόνῃ καταμύξατο χεῖρα ἀραιήν.
Iliad 5.426	ὣς φάτο, μείδησεν δὲ πατὴρ ἀνδρῶν τε θεῶν τε,
Iliad 5.427	καί ῥα καλεσσάμενος προσέφη χρυσῆν Ἀφροδίτην·
Iliad 5.428	οὔ τοι τέκνον ἐμὸν δέδοται πολεμήϊα ἔργα,
Iliad 5.429	ἀλλὰ σύ γʼ ἱμερόεντα μετέρχεο ἔργα γάμοιο,
Iliad 5.430	ταῦτα δʼ Ἄρηϊ θοῷ καὶ Ἀθήνῃ πάντα μελήσει.
Iliad 5.431	ὣς οἳ μὲν τοιαῦτα πρὸς ἀλλήλους ἀγόρευον,
Iliad 5.432	Αἰνείᾳ δʼ ἐπόρουσε βοὴν ἀγαθὸς Διομήδης,
Iliad 5.433	γιγνώσκων ὅ οἱ αὐτὸς ὑπείρεχε χεῖρας Ἀπόλλων·
Iliad 5.434	ἀλλʼ ὅ γʼ ἄρʼ οὐδὲ θεὸν μέγαν ἅζετο, ἵετο δʼ αἰεὶ
Iliad 5.435	Αἰνείαν κτεῖναι καὶ ἀπὸ κλυτὰ τεύχεα δῦσαι.
Iliad 5.436	τρὶς μὲν ἔπειτʼ ἐπόρουσε κατακτάμεναι μενεαίνων,
Iliad 5.437	τρὶς δέ οἱ ἐστυφέλιξε φαεινὴν ἀσπίδʼ Ἀπόλλων·
Iliad 5.438	ἀλλʼ ὅτε δὴ τὸ τέταρτον ἐπέσσυτο δαίμονι ἶσος,
Iliad 5.439	δεινὰ δʼ ὁμοκλήσας προσέφη ἑκάεργος Ἀπόλλων·
Iliad 5.440	φράζεο Τυδεΐδη καὶ χάζεο, μηδὲ θεοῖσιν
Iliad 5.441	ἶσʼ ἔθελε φρονέειν, ἐπεὶ οὔ ποτε φῦλον ὁμοῖον
Iliad 5.442	ἀθανάτων τε θεῶν χαμαὶ ἐρχομένων τʼ ἀνθρώπων.
Iliad 5.443	ὣς φάτο, Τυδεΐδης δʼ ἀνεχάζετο τυτθὸν ὀπίσσω
Iliad 5.444	μῆνιν ἀλευάμενος ἑκατηβόλου Ἀπόλλωνος.
Iliad 5.445	Αἰνείαν δʼ ἀπάτερθεν ὁμίλου θῆκεν Ἀπόλλων
Iliad 5.446	Περγάμῳ εἰν ἱερῇ, ὅθι οἱ νηός γε τέτυκτο.
Iliad 5.447	ἤτοι τὸν Λητώ τε καὶ Ἄρτεμις ἰοχέαιρα
Iliad 5.448	ἐν μεγάλῳ ἀδύτῳ ἀκέοντό τε κύδαινόν τε·
Iliad 5.449	αὐτὰρ ὃ εἴδωλον τεῦξʼ ἀργυρότοξος Ἀπόλλων
Iliad 5.450	αὐτῷ τʼ Αἰνείᾳ ἴκελον καὶ τεύχεσι τοῖον,
Iliad 5.451	ἀμφὶ δʼ ἄρʼ εἰδώλῳ Τρῶες καὶ δῖοι Ἀχαιοὶ
Iliad 5.452	δῄουν ἀλλήλων ἀμφὶ στήθεσσι βοείας
Iliad 5.453	ἀσπίδας εὐκύκλους λαισήϊά τε πτερόεντα.
Iliad 5.454	δὴ τότε θοῦρον Ἄρηα προσηύδα Φοῖβος Ἀπόλλων·
Iliad 5.455	Ἆρες Ἄρες βροτολοιγὲ μιαιφόνε τειχεσιπλῆτα,
Iliad 5.456	οὐκ ἂν δὴ τόνδʼ ἄνδρα μάχης ἐρύσαιο μετελθὼν
Iliad 5.457	Τυδεΐδην, ὃς νῦν γε καὶ ἂν Διὶ πατρὶ μάχοιτο;
Iliad 5.458	Κύπριδα μὲν πρῶτα σχεδὸν οὔτασε χεῖρʼ ἐπὶ καρπῷ,
Iliad 5.459	αὐτὰρ ἔπειτʼ αὐτῷ μοι ἐπέσσυτο δαίμονι ἶσος.
Iliad 5.460	ὣς εἰπὼν αὐτὸς μὲν ἐφέζετο Περγάμῳ ἄκρῃ,
Iliad 5.461	Τρῳὰς δὲ στίχας οὖλος Ἄρης ὄτρυνε μετελθὼν
Iliad 5.462	εἰδόμενος Ἀκάμαντι θοῷ ἡγήτορι Θρῃκῶν·
Iliad 5.463	υἱάσι δὲ Πριάμοιο διοτρεφέεσσι κέλευεν·
Iliad 5.464	ὦ υἱεῖς Πριάμοιο διοτρεφέος βασιλῆος
Iliad 5.465	ἐς τί ἔτι κτείνεσθαι ἐάσετε λαὸν Ἀχαιοῖς;
Iliad 5.466	ἦ εἰς ὅ κεν ἀμφὶ πύλῃς εὖ ποιητῇσι μάχωνται;
Iliad 5.467	κεῖται ἀνὴρ ὃν ἶσον ἐτίομεν Ἕκτορι δίῳ
Iliad 5.468	Αἰνείας υἱὸς μεγαλήτορος Ἀγχίσαο·
Iliad 5.469	ἀλλʼ ἄγετʼ ἐκ φλοίσβοιο σαώσομεν ἐσθλὸν ἑταῖρον.
Iliad 5.470	ὣς εἰπὼν ὄτρυνε μένος καὶ θυμὸν ἑκάστου.
Iliad 5.471	ἔνθʼ αὖ Σαρπηδὼν μάλα νείκεσεν Ἕκτορα δῖον·
Iliad 5.472	Ἕκτορ πῇ δή τοι μένος οἴχεται ὃ πρὶν ἔχεσκες;
Iliad 5.473	φῆς που ἄτερ λαῶν πόλιν ἑξέμεν ἠδʼ ἐπικούρων
Iliad 5.474	οἶος σὺν γαμβροῖσι κασιγνήτοισί τε σοῖσι.
Iliad 5.475	τῶν νῦν οὔ τινʼ ἐγὼ ἰδέειν δύναμʼ οὐδὲ νοῆσαι,
Iliad 5.476	ἀλλὰ καταπτώσσουσι κύνες ὣς ἀμφὶ λέοντα·
Iliad 5.477	ἡμεῖς δὲ μαχόμεσθʼ οἵ πέρ τʼ ἐπίκουροι ἔνειμεν.
Iliad 5.478	καὶ γὰρ ἐγὼν ἐπίκουρος ἐὼν μάλα τηλόθεν ἥκω·
Iliad 5.479	τηλοῦ γὰρ Λυκίη Ξάνθῳ ἔπι δινήεντι,
Iliad 5.480	ἔνθʼ ἄλοχόν τε φίλην ἔλιπον καὶ νήπιον υἱόν,
Iliad 5.481	κὰδ δὲ κτήματα πολλά, τὰ ἔλδεται ὅς κʼ ἐπιδευής.
Iliad 5.482	ἀλλὰ καὶ ὧς Λυκίους ὀτρύνω καὶ μέμονʼ αὐτὸς
Iliad 5.483	ἀνδρὶ μαχήσασθαι· ἀτὰρ οὔ τί μοι ἐνθάδε τοῖον
Iliad 5.484	οἷόν κʼ ἠὲ φέροιεν Ἀχαιοὶ ἤ κεν ἄγοιεν·
Iliad 5.485	τύνη δʼ ἕστηκας, ἀτὰρ οὐδʼ ἄλλοισι κελεύεις
Iliad 5.486	λαοῖσιν μενέμεν καὶ ἀμυνέμεναι ὤρεσσι.
Iliad 5.487	μή πως ὡς ἀψῖσι λίνου ἁλόντε πανάγρου
Iliad 5.488	ἀνδράσι δυσμενέεσσιν ἕλωρ καὶ κύρμα γένησθε·
Iliad 5.489	οἳ δὲ τάχʼ ἐκπέρσουσʼ εὖ ναιομένην πόλιν ὑμήν.
Iliad 5.490	σοὶ δὲ χρὴ τάδε πάντα μέλειν νύκτάς τε καὶ ἦμαρ
Iliad 5.491	ἀρχοὺς λισσομένῳ τηλεκλειτῶν ἐπικούρων
Iliad 5.492	νωλεμέως ἐχέμεν, κρατερὴν δʼ ἀποθέσθαι ἐνιπήν.
Iliad 5.493	ὣς φάτο Σαρπηδών, δάκε δὲ φρένας Ἕκτορι μῦθος·
Iliad 5.494	αὐτίκα δʼ ἐξ ὀχέων σὺν τεύχεσιν ἆλτο χαμᾶζε,
Iliad 5.495	πάλλων δʼ ὀξέα δοῦρα κατὰ στρατὸν ᾤχετο πάντῃ
Iliad 5.496	ὀτρύνων μαχέσασθαι, ἔγειρε δὲ φύλοπιν αἰνήν.
Iliad 5.497	οἳ δʼ ἐλελίχθησαν καὶ ἐναντίοι ἔσταν Ἀχαιῶν·
Iliad 5.498	Ἀργεῖοι δʼ ὑπέμειναν ἀολλέες οὐδὲ φόβηθεν.
Iliad 5.499	ὡς δʼ ἄνεμος ἄχνας φορέει ἱερὰς κατʼ ἀλωὰς
Iliad 5.500	ἀνδρῶν λικμώντων, ὅτε τε ξανθὴ Δημήτηρ
Iliad 5.501	κρίνῃ ἐπειγομένων ἀνέμων καρπόν τε καὶ ἄχνας,
Iliad 5.502	αἳ δʼ ὑπολευκαίνονται ἀχυρμιαί· ὣς τότʼ Ἀχαιοὶ
Iliad 5.503	λευκοὶ ὕπερθε γένοντο κονισάλῳ, ὅν ῥα διʼ αὐτῶν
Iliad 5.504	οὐρανὸν ἐς πολύχαλκον ἐπέπληγον πόδες ἵππων
Iliad 5.505	ἂψ ἐπιμισγομένων· ὑπὸ δʼ ἔστρεφον ἡνιοχῆες.
Iliad 5.506	οἳ δὲ μένος χειρῶν ἰθὺς φέρον· ἀμφὶ δὲ νύκτα
Iliad 5.507	θοῦρος Ἄρης ἐκάλυψε μάχῃ Τρώεσσιν ἀρήγων
Iliad 5.508	πάντοσʼ ἐποιχόμενος· τοῦ δʼ ἐκραίαινεν ἐφετμὰς
Iliad 5.509	Φοίβου Ἀπόλλωνος χρυσαόρου, ὅς μιν ἀνώγει
Iliad 5.510	Τρωσὶν θυμὸν ἐγεῖραι, ἐπεὶ ἴδε Παλλάδʼ Ἀθήνην
Iliad 5.511	οἰχομένην· ἣ γάρ ῥα πέλεν Δαναοῖσιν ἀρηγών.
Iliad 5.512	αὐτὸς δʼ Αἰνείαν μάλα πίονος ἐξ ἀδύτοιο
Iliad 5.513	ἧκε, καὶ ἐν στήθεσσι μένος βάλε ποιμένι λαῶν.
Iliad 5.514	Αἰνείας δʼ ἑτάροισι μεθίστατο· τοὶ δὲ χάρησαν,
Iliad 5.515	ὡς εἶδον ζωόν τε καὶ ἀρτεμέα προσιόντα
Iliad 5.516	καὶ μένος ἐσθλὸν ἔχοντα· μετάλλησάν γε μὲν οὔ τι.
Iliad 5.517	οὐ γὰρ ἔα πόνος ἄλλος, ὃν ἀργυρότοξος ἔγειρεν
Iliad 5.518	Ἄρης τε βροτολοιγὸς Ἔρις τʼ ἄμοτον μεμαυῖα.
Iliad 5.519	τοὺς δʼ Αἴαντε δύω καὶ Ὀδυσσεὺς καὶ Διομήδης
Iliad 5.520	ὄτρυνον Δαναοὺς πολεμιζέμεν· οἳ δὲ καὶ αὐτοὶ
Iliad 5.521	οὔτε βίας Τρώων ὑπεδείδισαν οὔτε ἰωκάς,
Iliad 5.522	ἀλλʼ ἔμενον νεφέλῃσιν ἐοικότες ἅς τε Κρονίων
Iliad 5.523	νηνεμίης ἔστησεν ἐπʼ ἀκροπόλοισιν ὄρεσσιν
Iliad 5.524	ἀτρέμας, ὄφρʼ εὕδῃσι μένος Βορέαο καὶ ἄλλων
Iliad 5.525	ζαχρειῶν ἀνέμων, οἵ τε νέφεα σκιόεντα
Iliad 5.526	πνοιῇσιν λιγυρῇσι διασκιδνᾶσιν ἀέντες·
Iliad 5.527	ὣς Δαναοὶ Τρῶας μένον ἔμπεδον οὐδὲ φέβοντο.
Iliad 5.528	Ἀτρεΐδης δʼ ἀνʼ ὅμιλον ἐφοίτα πολλὰ κελεύων·
Iliad 5.529	ὦ φίλοι ἀνέρες ἔστε καὶ ἄλκιμον ἦτορ ἕλεσθε,
Iliad 5.530	ἀλλήλους τʼ αἰδεῖσθε κατὰ κρατερὰς ὑσμίνας·
Iliad 5.531	αἰδομένων ἀνδρῶν πλέονες σόοι ἠὲ πέφανται·
Iliad 5.532	φευγόντων δʼ οὔτʼ ἂρ κλέος ὄρνυται οὔτε τις ἀλκή.
Iliad 5.533	ἦ καὶ ἀκόντισε δουρὶ θοῶς, βάλε δὲ πρόμον ἄνδρα
Iliad 5.534	Αἰνείω ἕταρον μεγαθύμου Δηϊκόωντα
Iliad 5.535	Περγασίδην, ὃν Τρῶες ὁμῶς Πριάμοιο τέκεσσι
Iliad 5.536	τῖον, ἐπεὶ θοὸς ἔσκε μετὰ πρώτοισι μάχεσθαι.
Iliad 5.537	τόν ῥα κατʼ ἀσπίδα δουρὶ βάλε κρείων Ἀγαμέμνων·
Iliad 5.538	ἣ δʼ οὐκ ἔγχος ἔρυτο, διὰ πρὸ δὲ εἴσατο χαλκός,
Iliad 5.539	νειαίρῃ δʼ ἐν γαστρὶ διὰ ζωστῆρος ἔλασσε·
Iliad 5.540	δούπησεν δὲ πεσών, ἀράβησε δὲ τεύχεʼ ἐπʼ αὐτῷ.
Iliad 5.541	ἔνθʼ αὖτʼ Αἰνείας Δαναῶν ἕλεν ἄνδρας ἀρίστους
Iliad 5.542	υἷε Διοκλῆος Κρήθωνά τε Ὀρσίλοχόν τε,
Iliad 5.543	τῶν ῥα πατὴρ μὲν ἔναιεν ἐϋκτιμένῃ ἐνὶ Φηρῇ
Iliad 5.544	ἀφνειὸς βιότοιο, γένος δʼ ἦν ἐκ ποταμοῖο
Iliad 5.545	Ἀλφειοῦ, ὅς τʼ εὐρὺ ῥέει Πυλίων διὰ γαίης,
Iliad 5.546	ὃς τέκετʼ Ὀρτίλοχον πολέεσσʼ ἄνδρεσσιν ἄνακτα·
Iliad 5.547	Ὀρτίλοχος δʼ ἄρʼ ἔτικτε Διοκλῆα μεγάθυμον,
Iliad 5.548	ἐκ δὲ Διοκλῆος διδυμάονε παῖδε γενέσθην,
Iliad 5.549	Κρήθων Ὀρσίλοχός τε μάχης εὖ εἰδότε πάσης.
Iliad 5.550	τὼ μὲν ἄρʼ ἡβήσαντε μελαινάων ἐπὶ νηῶν
Iliad 5.551	Ἴλιον εἰς εὔπωλον ἅμʼ Ἀργείοισιν ἑπέσθην,
Iliad 5.552	τιμὴν Ἀτρεΐδῃς Ἀγαμέμνονι καὶ Μενελάῳ
Iliad 5.553	ἀρνυμένω· τὼ δʼ αὖθι τέλος θανάτοιο κάλυψεν.
Iliad 5.554	οἵω τώ γε λέοντε δύω ὄρεος κορυφῇσιν
Iliad 5.555	ἐτραφέτην ὑπὸ μητρὶ βαθείης τάρφεσιν ὕλης·
Iliad 5.556	τὼ μὲν ἄρʼ ἁρπάζοντε βόας καὶ ἴφια μῆλα
Iliad 5.557	σταθμοὺς ἀνθρώπων κεραΐζετον, ὄφρα καὶ αὐτὼ
Iliad 5.558	ἀνδρῶν ἐν παλάμῃσι κατέκταθεν ὀξέϊ χαλκῷ·
Iliad 5.559	τοίω τὼ χείρεσσιν ὑπʼ Αἰνείαο δαμέντε
Iliad 5.560	καππεσέτην, ἐλάτῃσιν ἐοικότες ὑψηλῇσι.
Iliad 5.561	τὼ δὲ πεσόντʼ ἐλέησεν ἀρηΐφιλος Μενέλαος,
Iliad 5.562	βῆ δὲ διὰ προμάχων κεκορυθμένος αἴθοπι χαλκῷ
Iliad 5.563	σείων ἐγχείην· τοῦ δʼ ὄτρυνεν μένος Ἄρης,
Iliad 5.564	τὰ φρονέων ἵνα χερσὶν ὑπʼ Αἰνείαο δαμείη.
Iliad 5.565	τὸν δʼ ἴδεν Ἀντίλοχος μεγαθύμου Νέστορος υἱός,
Iliad 5.566	βῆ δὲ διὰ προμάχων· περὶ γὰρ δίε ποιμένι λαῶν
Iliad 5.567	μή τι πάθοι, μέγα δέ σφας ἀποσφήλειε πόνοιο.
Iliad 5.568	τὼ μὲν δὴ χεῖράς τε καὶ ἔγχεα ὀξυόεντα
Iliad 5.569	ἀντίον ἀλλήλων ἐχέτην μεμαῶτε μάχεσθαι·
Iliad 5.570	Ἀντίλοχος δὲ μάλʼ ἄγχι παρίστατο ποιμένι λαῶν.
Iliad 5.571	Αἰνείας δʼ οὐ μεῖνε θοός περ ἐὼν πολεμιστὴς
Iliad 5.572	ὡς εἶδεν δύο φῶτε παρʼ ἀλλήλοισι μένοντε.
Iliad 5.573	οἳ δʼ ἐπεὶ οὖν νεκροὺς ἔρυσαν μετὰ λαὸν Ἀχαιῶν,
Iliad 5.574	τὼ μὲν ἄρα δειλὼ βαλέτην ἐν χερσὶν ἑταίρων,
Iliad 5.575	αὐτὼ δὲ στρεφθέντε μετὰ πρώτοισι μαχέσθην.
Iliad 5.576	ἔνθα Πυλαιμένεα ἑλέτην ἀτάλαντον Ἄρηϊ
Iliad 5.577	ἀρχὸν Παφλαγόνων μεγαθύμων ἀσπιστάων.
Iliad 5.578	τὸν μὲν ἄρʼ Ἀτρεΐδης δουρικλειτὸς Μενέλαος
Iliad 5.579	ἑσταότʼ ἔγχεϊ νύξε κατὰ κληῗδα τυχήσας·
Iliad 5.580	Ἀντίλοχος δὲ Μύδωνα βάλʼ ἡνίοχον θεράποντα
Iliad 5.581	ἐσθλὸν Ἀτυμνιάδην· ὃ δʼ ὑπέστρεφε μώνυχας ἵππους·
Iliad 5.582	χερμαδίῳ ἀγκῶνα τυχὼν μέσον· ἐκ δʼ ἄρα χειρῶν
Iliad 5.583	ἡνία λεύκʼ ἐλέφαντι χαμαὶ πέσον ἐν κονίῃσιν.
Iliad 5.584	Ἀντίλοχος δʼ ἄρʼ ἐπαΐξας ξίφει ἤλασε κόρσην·
Iliad 5.585	αὐτὰρ ὅ γʼ ἀσθμαίνων εὐεργέος ἔκπεσε δίφρου
Iliad 5.586	κύμβαχος ἐν κονίῃσιν ἐπὶ βρεχμόν τε καὶ ὤμους.
Iliad 5.587	δηθὰ μάλʼ ἑστήκει· τύχε γάρ ῥʼ ἀμάθοιο βαθείης·
Iliad 5.588	ὄφρʼ ἵππω πλήξαντε χαμαὶ βάλον ἐν κονίῃσι·
Iliad 5.589	τοὺς ἵμασʼ Ἀντίλοχος, μετὰ δὲ στρατὸν ἤλασʼ Ἀχαιῶν.
Iliad 5.590	τοὺς δʼ Ἕκτωρ ἐνόησε κατὰ στίχας, ὦρτο δʼ ἐπʼ αὐτοὺς
Iliad 5.591	κεκλήγων· ἅμα δὲ Τρώων εἵποντο φάλαγγες
Iliad 5.592	καρτεραί· ἦρχε δʼ ἄρα σφιν Ἄρης καὶ πότνιʼ Ἐνυώ,
Iliad 5.593	ἣ μὲν ἔχουσα Κυδοιμὸν ἀναιδέα δηϊοτῆτος,
Iliad 5.594	Ἄρης δʼ ἐν παλάμῃσι πελώριον ἔγχος ἐνώμα,
Iliad 5.595	φοίτα δʼ ἄλλοτε μὲν πρόσθʼ Ἕκτορος, ἄλλοτʼ ὄπισθε.
Iliad 5.596	τὸν δὲ ἰδὼν ῥίγησε βοὴν ἀγαθὸς Διομήδης·
Iliad 5.597	ὡς δʼ ὅτʼ ἀνὴρ ἀπάλαμνος ἰὼν πολέος πεδίοιο
Iliad 5.598	στήῃ ἐπʼ ὠκυρόῳ ποταμῷ ἅλα δὲ προρέοντι
Iliad 5.599	ἀφρῷ μορμύροντα ἰδών, ἀνά τʼ ἔδραμʼ ὀπίσσω,
Iliad 5.600	ὣς τότε Τυδεΐδης ἀνεχάζετο, εἶπέ τε λαῷ·
Iliad 5.601	ὦ φίλοι οἷον δὴ θαυμάζομεν Ἕκτορα δῖον
Iliad 5.602	αἰχμητήν τʼ ἔμεναι καὶ θαρσαλέον πολεμιστήν·
Iliad 5.603	τῷ δʼ αἰεὶ πάρα εἷς γε θεῶν, ὃς λοιγὸν ἀμύνει·
Iliad 5.604	καὶ νῦν οἱ πάρα κεῖνος Ἄρης βροτῷ ἀνδρὶ ἐοικώς.
Iliad 5.605	ἀλλὰ πρὸς Τρῶας τετραμμένοι αἰὲν ὀπίσσω
Iliad 5.606	εἴκετε, μηδὲ θεοῖς μενεαινέμεν ἶφι μάχεσθαι.
Iliad 5.607	ὣς ἄρʼ ἔφη, Τρῶες δὲ μάλα σχεδὸν ἤλυθον αὐτῶν.
Iliad 5.608	ἔνθʼ Ἕκτωρ δύο φῶτε κατέκτανεν εἰδότε χάρμης
Iliad 5.609	εἰν ἑνὶ δίφρῳ ἐόντε, Μενέσθην Ἀγχίαλόν τε.
Iliad 5.610	τὼ δὲ πεσόντʼ ἐλέησε μέγας Τελαμώνιος Αἴας·
Iliad 5.611	στῆ δὲ μάλʼ ἐγγὺς ἰών, καὶ ἀκόντισε δουρὶ φαεινῷ,
Iliad 5.612	καὶ βάλεν Ἄμφιον Σελάγου υἱόν, ὅς ῥʼ ἐνὶ Παισῷ
Iliad 5.613	ναῖε πολυκτήμων πολυλήϊος· ἀλλά ἑ μοῖρα
Iliad 5.614	ἦγʼ ἐπικουρήσοντα μετὰ Πρίαμόν τε καὶ υἷας.
Iliad 5.615	τόν ῥα κατὰ ζωστῆρα βάλεν Τελαμώνιος Αἴας,
Iliad 5.616	νειαίρῃ δʼ ἐν γαστρὶ πάγη δολιχόσκιον ἔγχος,
Iliad 5.617	δούπησεν δὲ πεσών· ὃ δʼ ἐπέδραμε φαίδιμος Αἴας
Iliad 5.618	τεύχεα συλήσων· Τρῶες δʼ ἐπὶ δούρατʼ ἔχευαν
Iliad 5.619	ὀξέα παμφανόωντα· σάκος δʼ ἀνεδέξατο πολλά.
Iliad 5.620	αὐτὰρ ὃ λὰξ προσβὰς ἐκ νεκροῦ χάλκεον ἔγχος
Iliad 5.621	ἐσπάσατʼ· οὐδʼ ἄρʼ ἔτʼ ἄλλα δυνήσατο τεύχεα καλὰ
Iliad 5.622	ὤμοιιν ἀφελέσθαι· ἐπείγετο γὰρ βελέεσσι.
Iliad 5.623	δεῖσε δʼ ὅ γʼ ἀμφίβασιν κρατερὴν Τρώων ἀγερώχων,
Iliad 5.624	οἳ πολλοί τε καὶ ἐσθλοὶ ἐφέστασαν ἔγχεʼ ἔχοντες,
Iliad 5.625	οἵ ἑ μέγαν περ ἐόντα καὶ ἴφθιμον καὶ ἀγαυὸν
Iliad 5.626	ὦσαν ἀπὸ σφείων· ὃ δὲ χασσάμενος πελεμίχθη.
Iliad 5.627	ὣς οἳ μὲν πονέοντο κατὰ κρατερὴν ὑσμίνην·
Iliad 5.628	Τληπόλεμον δʼ Ἡρακλεΐδην ἠΰν τε μέγαν τε
Iliad 5.629	ὦρσεν ἐπʼ ἀντιθέῳ Σαρπηδόνι μοῖρα κραταιή.
Iliad 5.630	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες
Iliad 5.631	υἱός θʼ υἱωνός τε Διὸς νεφεληγερέταο,
Iliad 5.632	τὸν καὶ Τληπόλεμος πρότερος πρὸς μῦθον ἔειπε·
Iliad 5.633	Σαρπῆδον Λυκίων βουληφόρε, τίς τοι ἀνάγκη
Iliad 5.634	πτώσσειν ἐνθάδʼ ἐόντι μάχης ἀδαήμονι φωτί;
Iliad 5.635	ψευδόμενοι δέ σέ φασι Διὸς γόνον αἰγιόχοιο
Iliad 5.636	εἶναι, ἐπεὶ πολλὸν κείνων ἐπιδεύεαι ἀνδρῶν
Iliad 5.637	οἳ Διὸς ἐξεγένοντο ἐπὶ προτέρων ἀνθρώπων·
Iliad 5.638	ἀλλʼ οἷόν τινά φασι βίην Ἡρακληείην
Iliad 5.639	εἶναι, ἐμὸν πατέρα θρασυμέμνονα θυμολέοντα·
Iliad 5.640	ὅς ποτε δεῦρʼ ἐλθὼν ἕνεχʼ ἵππων Λαομέδοντος
Iliad 5.641	ἓξ οἴῃς σὺν νηυσὶ καὶ ἀνδράσι παυροτέροισιν
Iliad 5.642	Ἰλίου ἐξαλάπαξε πόλιν, χήρωσε δʼ ἀγυιάς·
Iliad 5.643	σοὶ δὲ κακὸς μὲν θυμός, ἀποφθινύθουσι δὲ λαοί.
Iliad 5.644	οὐδέ τί σε Τρώεσσιν ὀΐομαι ἄλκαρ ἔσεσθαι
Iliad 5.645	ἐλθόντʼ ἐκ Λυκίης, οὐδʼ εἰ μάλα καρτερός ἐσσι,
Iliad 5.646	ἀλλʼ ὑπʼ ἐμοὶ δμηθέντα πύλας Ἀΐδαο περήσειν.
Iliad 5.647	τὸν δʼ αὖ Σαρπηδὼν Λυκίων ἀγὸς ἀντίον ηὔδα·
Iliad 5.648	Τληπόλεμʼ ἤτοι κεῖνος ἀπώλεσεν Ἴλιον ἱρὴν
Iliad 5.649	ἀνέρος ἀφραδίῃσιν ἀγαυοῦ Λαομέδοντος,
Iliad 5.650	ὅς ῥά μιν εὖ ἕρξαντα κακῷ ἠνίπαπε μύθῳ,
Iliad 5.651	οὐδʼ ἀπέδωχʼ ἵππους, ὧν εἵνεκα τηλόθεν ἦλθε.
Iliad 5.652	σοὶ δʼ ἐγὼ ἐνθάδε φημὶ φόνον καὶ κῆρα μέλαιναν
Iliad 5.653	ἐξ ἐμέθεν τεύξεσθαι, ἐμῷ δʼ ὑπὸ δουρὶ δαμέντα
Iliad 5.654	εὖχος ἐμοὶ δώσειν, ψυχὴν δʼ Ἄϊδι κλυτοπώλῳ.
Iliad 5.655	ὣς φάτο Σαρπηδών, ὃ δʼ ἀνέσχετο μείλινον ἔγχος
Iliad 5.656	Τληπόλεμος· καὶ τῶν μὲν ἁμαρτῇ δούρατα μακρὰ
Iliad 5.657	ἐκ χειρῶν ἤϊξαν· ὃ μὲν βάλεν αὐχένα μέσσον
Iliad 5.658	Σαρπηδών, αἰχμὴ δὲ διαμπερὲς ἦλθʼ ἀλεγεινή·
Iliad 5.659	τὸν δὲ κατʼ ὀφθαλμῶν ἐρεβεννὴ νὺξ ἐκάλυψε.
Iliad 5.660	Τληπόλεμος δʼ ἄρα μηρὸν ἀριστερὸν ἔγχεϊ μακρῷ
Iliad 5.661	βεβλήκειν, αἰχμὴ δὲ διέσσυτο μαιμώωσα
Iliad 5.662	ὀστέω ἐγχριμφθεῖσα, πατὴρ δʼ ἔτι λοιγὸν ἄμυνεν.
Iliad 5.663	οἳ μὲν ἄρʼ ἀντίθεον Σαρπηδόνα δῖοι ἑταῖροι
Iliad 5.664	ἐξέφερον πολέμοιο· βάρυνε δέ μιν δόρυ μακρὸν
Iliad 5.665	ἑλκόμενον· τὸ μὲν οὔ τις ἐπεφράσατʼ οὐδὲ νόησε
Iliad 5.666	μηροῦ ἐξερύσαι δόρυ μείλινον ὄφρʼ ἐπιβαίη
Iliad 5.667	σπευδόντων· τοῖον γὰρ ἔχον πόνον ἀμφιέποντες.
Iliad 5.668	Τληπόλεμον δʼ ἑτέρωθεν ἐϋκνήμιδες Ἀχαιοὶ
Iliad 5.669	ἐξέφερον πολέμοιο· νόησε δὲ δῖος Ὀδυσσεὺς
Iliad 5.670	τλήμονα θυμὸν ἔχων, μαίμησε δέ οἱ φίλον ἦτορ·
Iliad 5.671	μερμήριξε δʼ ἔπειτα κατὰ φρένα καὶ κατὰ θυμὸν
Iliad 5.672	ἢ προτέρω Διὸς υἱὸν ἐριγδούποιο διώκοι,
Iliad 5.673	ἦ ὅ γε τῶν πλεόνων Λυκίων ἀπὸ θυμὸν ἕλοιτο.
Iliad 5.674	οὐδʼ ἄρʼ Ὀδυσσῆϊ μεγαλήτορι μόρσιμον ἦεν
Iliad 5.675	ἴφθιμον Διὸς υἱὸν ἀποκτάμεν ὀξέϊ χαλκῷ·
Iliad 5.676	τώ ῥα κατὰ πληθὺν Λυκίων τράπε θυμὸν Ἀθήνη.
Iliad 5.677	ἔνθʼ ὅ γε Κοίρανον εἷλεν Ἀλάστορά τε Χρομίον τε
Iliad 5.678	Ἄλκανδρόν θʼ Ἅλιόν τε Νοήμονά τε Πρύτανίν τε.
Iliad 5.679	καί νύ κʼ ἔτι πλέονας Λυκίων κτάνε δῖος Ὀδυσσεὺς
Iliad 5.680	εἰ μὴ ἄρʼ ὀξὺ νόησε μέγας κορυθαίολος Ἕκτωρ·
Iliad 5.681	βῆ δὲ διὰ προμάχων κεκορυθμένος αἴθοπι χαλκῷ
Iliad 5.682	δεῖμα φέρων Δαναοῖσι· χάρη δʼ ἄρα οἱ προσιόντι
Iliad 5.683	Σαρπηδὼν Διὸς υἱός, ἔπος δʼ ὀλοφυδνὸν ἔειπε·
Iliad 5.684	Πριαμίδη, μὴ δή με ἕλωρ Δαναοῖσιν ἐάσῃς
Iliad 5.685	κεῖσθαι, ἀλλʼ ἐπάμυνον· ἔπειτά με καὶ λίποι αἰὼν
Iliad 5.686	ἐν πόλει ὑμετέρῃ, ἐπεὶ οὐκ ἄρʼ ἔμελλον ἔγωγε
Iliad 5.687	νοστήσας οἶκον δὲ φίλην ἐς πατρίδα γαῖαν
Iliad 5.688	εὐφρανέειν ἄλοχόν τε φίλην καὶ νήπιον υἱόν.
Iliad 5.689	ὣς φάτο, τὸν δʼ οὔ τι προσέφη κορυθαίολος Ἕκτωρ,
Iliad 5.690	ἀλλὰ παρήϊξεν λελιημένος ὄφρα τάχιστα
Iliad 5.691	ὤσαιτʼ Ἀργείους, πολέων δʼ ἀπὸ θυμὸν ἕλοιτο.
Iliad 5.692	οἳ μὲν ἄρʼ ἀντίθεον Σαρπηδόνα δῖοι ἑταῖροι
Iliad 5.693	εἷσαν ὑπʼ αἰγιόχοιο Διὸς περικαλλέϊ φηγῷ·
Iliad 5.694	ἐκ δʼ ἄρα οἱ μηροῦ δόρυ μείλινον ὦσε θύραζε
Iliad 5.695	ἴφθιμος Πελάγων, ὅς οἱ φίλος ἦεν ἑταῖρος.
Iliad 5.696	τὸν δʼ ἔλιπε ψυχή, κατὰ δʼ ὀφθαλμῶν κέχυτʼ ἀχλύς·
Iliad 5.697	αὖτις δʼ ἐμπνύνθη, περὶ δὲ πνοιὴ Βορέαο
Iliad 5.698	ζώγρει ἐπιπνείουσα κακῶς κεκαφηότα θυμόν.
Iliad 5.699	Ἀργεῖοι δʼ ὑπʼ Ἄρηϊ καὶ Ἕκτορι χαλκοκορυστῇ
Iliad 5.700	οὔτε ποτὲ προτρέποντο μελαινάων ἐπὶ νηῶν
Iliad 5.701	οὔτε ποτʼ ἀντεφέροντο μάχῃ, ἀλλʼ αἰὲν ὀπίσσω
Iliad 5.702	χάζονθʼ, ὡς ἐπύθοντο μετὰ Τρώεσσιν Ἄρηα.
Iliad 5.703	ἔνθα τίνα πρῶτον τίνα δʼ ὕστατον ἐξενάριξαν
Iliad 5.704	Ἕκτωρ τε Πριάμοιο πάϊς καὶ χάλκεος Ἄρης;
Iliad 5.705	ἀντίθεον Τεύθραντʼ, ἐπὶ δὲ πλήξιππον Ὀρέστην,
Iliad 5.706	Τρῆχόν τʼ αἰχμητὴν Αἰτώλιον Οἰνόμαόν τε,
Iliad 5.707	Οἰνοπίδην θʼ Ἕλενον καὶ Ὀρέσβιον αἰολομίτρην,
Iliad 5.708	ὅς ῥʼ ἐν Ὕλῃ ναίεσκε μέγα πλούτοιο μεμηλώς,
Iliad 5.709	λίμνῃ κεκλιμένος Κηφισίδι· πὰρ δέ οἱ ἄλλοι
Iliad 5.710	ναῖον Βοιωτοὶ μάλα πίονα δῆμον ἔχοντες.
Iliad 5.711	τοὺς δʼ ὡς οὖν ἐνόησε θεὰ λευκώλενος Ἥρη
Iliad 5.712	Ἀργείους ὀλέκοντας ἐνὶ κρατερῇ ὑσμίνῃ,
Iliad 5.713	αὐτίκʼ Ἀθηναίην ἔπεα πτερόεντα προσηύδα·
Iliad 5.714	ὢ πόποι αἰγιόχοιο Διὸς τέκος Ἀτρυτώνη,
Iliad 5.715	ἦ ῥʼ ἅλιον τὸν μῦθον ὑπέστημεν Μενελάῳ
Iliad 5.716	Ἴλιον ἐκπέρσαντʼ εὐτείχεον ἀπονέεσθαι,
Iliad 5.717	εἰ οὕτω μαίνεσθαι ἐάσομεν οὖλον Ἄρηα.
Iliad 5.718	ἀλλʼ ἄγε δὴ καὶ νῶϊ μεδώμεθα θούριδος ἀλκῆς.
Iliad 5.719	ὣς ἔφατʼ, οὐδʼ ἀπίθησε θεὰ γλαυκῶπις Ἀθήνη.
Iliad 5.720	ἣ μὲν ἐποιχομένη χρυσάμπυκας ἔντυεν ἵππους
Iliad 5.721	Ἥρη πρέσβα θεὰ θυγάτηρ μεγάλοιο Κρόνοιο·
Iliad 5.722	Ἥβη δʼ ἀμφʼ ὀχέεσσι θοῶς βάλε καμπύλα κύκλα
Iliad 5.723	χάλκεα ὀκτάκνημα σιδηρέῳ ἄξονι ἀμφίς.
Iliad 5.724	τῶν ἤτοι χρυσέη ἴτυς ἄφθιτος, αὐτὰρ ὕπερθε
Iliad 5.725	χάλκεʼ ἐπίσσωτρα προσαρηρότα, θαῦμα ἰδέσθαι·
Iliad 5.726	πλῆμναι δʼ ἀργύρου εἰσὶ περίδρομοι ἀμφοτέρωθεν·
Iliad 5.727	δίφρος δὲ χρυσέοισι καὶ ἀργυρέοισιν ἱμᾶσιν
Iliad 5.728	ἐντέταται, δοιαὶ δὲ περίδρομοι ἄντυγές εἰσι.
Iliad 5.729	τοῦ δʼ ἐξ ἀργύρεος ῥυμὸς πέλεν· αὐτὰρ ἐπʼ ἄκρῳ
Iliad 5.730	δῆσε χρύσειον καλὸν ζυγόν, ἐν δὲ λέπαδνα
Iliad 5.731	κάλʼ ἔβαλε χρύσειʼ· ὑπὸ δὲ ζυγὸν ἤγαγεν Ἥρη
Iliad 5.732	ἵππους ὠκύποδας, μεμαυῖʼ ἔριδος καὶ ἀϋτῆς.
Iliad 5.733	αὐτὰρ Ἀθηναίη κούρη Διὸς αἰγιόχοιο
Iliad 5.734	πέπλον μὲν κατέχευεν ἑανὸν πατρὸς ἐπʼ οὔδει
Iliad 5.735	ποικίλον, ὅν ῥʼ αὐτὴ ποιήσατο καὶ κάμε χερσίν·
Iliad 5.736	ἣ δὲ χιτῶνʼ ἐνδῦσα Διὸς νεφεληγερέταο
Iliad 5.737	τεύχεσιν ἐς πόλεμον θωρήσσετο δακρυόεντα.
Iliad 5.738	ἀμφὶ δʼ ἄρʼ ὤμοισιν βάλετʼ αἰγίδα θυσσανόεσσαν
Iliad 5.739	δεινήν, ἣν περὶ μὲν πάντῃ Φόβος ἐστεφάνωται,
Iliad 5.740	ἐν δʼ Ἔρις, ἐν δʼ Ἀλκή, ἐν δὲ κρυόεσσα Ἰωκή,
Iliad 5.741	ἐν δέ τε Γοργείη κεφαλὴ δεινοῖο πελώρου
Iliad 5.742	δεινή τε σμερδνή τε, Διὸς τέρας αἰγιόχοιο.
Iliad 5.743	κρατὶ δʼ ἐπʼ ἀμφίφαλον κυνέην θέτο τετραφάληρον
Iliad 5.744	χρυσείην, ἑκατὸν πολίων πρυλέεσσʼ ἀραρυῖαν·
Iliad 5.745	ἐς δʼ ὄχεα φλόγεα ποσὶ βήσετο, λάζετο δʼ ἔγχος
Iliad 5.746	βριθὺ μέγα στιβαρόν, τῷ δάμνησι στίχας ἀνδρῶν
Iliad 5.747	ἡρώων, οἷσίν τε κοτέσσεται ὀβριμοπάτρη.
Iliad 5.748	Ἥρη δὲ μάστιγι θοῶς ἐπεμαίετʼ ἄρʼ ἵππους·
Iliad 5.749	αὐτόμαται δὲ πύλαι μύκον οὐρανοῦ ἃς ἔχον Ὧραι,
Iliad 5.750	τῇς ἐπιτέτραπται μέγας οὐρανὸς Οὔλυμπός τε
Iliad 5.751	ἠμὲν ἀνακλῖναι πυκινὸν νέφος ἠδʼ ἐπιθεῖναι.
Iliad 5.752	τῇ ῥα διʼ αὐτάων κεντρηνεκέας ἔχον ἵππους·
Iliad 5.753	εὗρον δὲ Κρονίωνα θεῶν ἄτερ ἥμενον ἄλλων
Iliad 5.754	ἀκροτάτῃ κορυφῇ πολυδειράδος Οὐλύμποιο.
Iliad 5.755	ἔνθʼ ἵππους στήσασα θεὰ λευκώλενος Ἥρη
Iliad 5.756	Ζῆνʼ ὕπατον Κρονίδην ἐξείρετο καὶ προσέειπε·
Iliad 5.757	Ζεῦ πάτερ οὐ νεμεσίζῃ Ἄρῃ τάδε καρτερὰ ἔργα
Iliad 5.758	ὁσσάτιόν τε καὶ οἷον ἀπώλεσε λαὸν Ἀχαιῶν
Iliad 5.759	μὰψ ἀτὰρ οὐ κατὰ κόσμον ἐμοὶ δʼ ἄχος, οἳ δὲ ἕκηλοι
Iliad 5.760	τέρπονται Κύπρίς τε καὶ ἀργυρότοξος Ἀπόλλων
Iliad 5.761	ἄφρονα τοῦτον ἀνέντες, ὃς οὔ τινα οἶδε θέμιστα;
Iliad 5.762	Ζεῦ πάτερ ἦ ῥά τί μοι κεχολώσεαι, αἴ κεν Ἄρηα
Iliad 5.763	λυγρῶς πεπληγυῖα μάχης ἐξαποδίωμαι;
Iliad 5.764	τὴν δʼ ἀπαμειβόμενος προσέφη νεφεληγερέτα Ζεύς·
Iliad 5.765	ἄγρει μάν οἱ ἔπορσον Ἀθηναίην ἀγελείην,
Iliad 5.766	ἥ ἑ μάλιστʼ εἴωθε κακῇς ὀδύνῃσι πελάζειν.
Iliad 5.767	ὣς ἔφατʼ, οὐδʼ ἀπίθησε θεὰ λευκώλενος Ἥρη,
Iliad 5.768	μάστιξεν δʼ ἵππους· τὼ δʼ οὐκ ἀέκοντε πετέσθην
Iliad 5.769	μεσσηγὺς γαίης τε καὶ οὐρανοῦ ἀστερόεντος.
Iliad 5.770	ὅσσον δʼ ἠεροειδὲς ἀνὴρ ἴδεν ὀφθαλμοῖσιν
Iliad 5.771	ἥμενος ἐν σκοπιῇ, λεύσσων ἐπὶ οἴνοπα πόντον,
Iliad 5.772	τόσσον ἐπιθρῴσκουσι θεῶν ὑψηχέες ἵπποι.
Iliad 5.773	ἀλλʼ ὅτε δὴ Τροίην ἷξον ποταμώ τε ῥέοντε,
Iliad 5.774	ἧχι ῥοὰς Σιμόεις συμβάλλετον ἠδὲ Σκάμανδρος,
Iliad 5.775	ἔνθʼ ἵππους ἔστησε θεὰ λευκώλενος Ἥρη
Iliad 5.776	λύσασʼ ἐξ ὀχέων, περὶ δʼ ἠέρα πουλὺν ἔχευε·
Iliad 5.777	τοῖσιν δʼ ἀμβροσίην Σιμόεις ἀνέτειλε νέμεσθαι.
Iliad 5.778	αἳ δὲ βάτην τρήρωσι πελειάσιν ἴθμαθʼ ὁμοῖαι
Iliad 5.779	ἀνδράσιν Ἀργείοισιν ἀλεξέμεναι μεμαυῖαι·
Iliad 5.780	ἀλλʼ ὅτε δή ῥʼ ἵκανον ὅθι πλεῖστοι καὶ ἄριστοι
Iliad 5.781	ἕστασαν ἀμφὶ βίην Διομήδεος ἱπποδάμοιο
Iliad 5.782	εἰλόμενοι λείουσιν ἐοικότες ὠμοφάγοισιν
Iliad 5.783	ἢ συσὶ κάπροισιν, τῶν τε σθένος οὐκ ἀλαπαδνόν,
Iliad 5.784	ἔνθα στᾶσʼ ἤϋσε θεὰ λευκώλενος Ἥρη
Iliad 5.785	Στέντορι εἰσαμένη μεγαλήτορι χαλκεοφώνῳ,
Iliad 5.786	ὃς τόσον αὐδήσασχʼ ὅσον ἄλλοι πεντήκοντα·
Iliad 5.787	αἰδὼς Ἀργεῖοι κάκʼ ἐλέγχεα εἶδος ἀγητοί·
Iliad 5.788	ὄφρα μὲν ἐς πόλεμον πωλέσκετο δῖος Ἀχιλλεύς,
Iliad 5.789	οὐδέ ποτε Τρῶες πρὸ πυλάων Δαρδανιάων
Iliad 5.790	οἴχνεσκον· κείνου γὰρ ἐδείδισαν ὄβριμον ἔγχος·
Iliad 5.791	νῦν δὲ ἑκὰς πόλιος κοίλῃς ἐπὶ νηυσὶ μάχονται.
Iliad 5.792	ὣς εἰποῦσʼ ὄτρυνε μένος καὶ θυμὸν ἑκάστου.
Iliad 5.793	Τυδεΐδῃ δʼ ἐπόρουσε θεὰ γλαυκῶπις Ἀθήνη·
Iliad 5.794	εὗρε δὲ τόν γε ἄνακτα παρʼ ἵπποισιν καὶ ὄχεσφιν
Iliad 5.795	ἕλκος ἀναψύχοντα τό μιν βάλε Πάνδαρος ἰῷ.
Iliad 5.796	ἱδρὼς γάρ μιν ἔτειρεν ὑπὸ πλατέος τελαμῶνος
Iliad 5.797	ἀσπίδος εὐκύκλου· τῷ τείρετο, κάμνε δὲ χεῖρα,
Iliad 5.798	ἂν δʼ ἴσχων τελαμῶνα κελαινεφὲς αἷμʼ ἀπομόργνυ.
Iliad 5.799	ἱππείου δὲ θεὰ ζυγοῦ ἥψατο φώνησέν τε·
Iliad 5.800	ἦ ὀλίγον οἷ παῖδα ἐοικότα γείνατο Τυδεύς.
Iliad 5.801	Τυδεύς τοι μικρὸς μὲν ἔην δέμας, ἀλλὰ μαχητής·
Iliad 5.802	καί ῥʼ ὅτε πέρ μιν ἐγὼ πολεμίζειν οὐκ εἴασκον
Iliad 5.803	οὐδʼ ἐκπαιφάσσειν, ὅτε τʼ ἤλυθε νόσφιν Ἀχαιῶν
Iliad 5.804	ἄγγελος ἐς Θήβας πολέας μετὰ Καδμείωνας·
Iliad 5.805	δαίνυσθαί μιν ἄνωγον ἐνὶ μεγάροισιν ἕκηλον·
Iliad 5.806	αὐτὰρ ὃ θυμὸν ἔχων ὃν καρτερὸν ὡς τὸ πάρος περ
Iliad 5.807	κούρους Καδμείων προκαλίζετο, πάντα δʼ ἐνίκα
Iliad 5.808	ῥηϊδίως· τοίη οἱ ἐγὼν ἐπιτάρροθος ἦα.
Iliad 5.809	σοὶ δʼ ἤτοι μὲν ἐγὼ παρά θʼ ἵσταμαι ἠδὲ φυλάσσω,
Iliad 5.810	καί σε προφρονέως κέλομαι Τρώεσσι μάχεσθαι·
Iliad 5.811	ἀλλά σευ ἢ κάματος πολυᾶϊξ γυῖα δέδυκεν
Iliad 5.812	ἤ νύ σέ που δέος ἴσχει ἀκήριον· οὐ σύ γʼ ἔπειτα
Iliad 5.813	Τυδέος ἔκγονός ἐσσι δαΐφρονος Οἰνεΐδαο.
Iliad 5.814	τὴν δʼ ἀπαμειβόμενος προσέφη κρατερὸς Διομήδης·
Iliad 5.815	γιγνώσκω σε θεὰ θύγατερ Διὸς αἰγιόχοιο·
Iliad 5.816	τώ τοι προφρονέως ἐρέω ἔπος οὐδʼ ἐπικεύσω.
Iliad 5.817	οὔτέ τί με δέος ἴσχει ἀκήριον οὔτέ τις ὄκνος,
Iliad 5.818	ἀλλʼ ἔτι σέων μέμνημαι ἐφετμέων ἃς ἐπέτειλας·
Iliad 5.819	οὔ μʼ εἴας μακάρεσσι θεοῖς ἀντικρὺ μάχεσθαι
Iliad 5.820	τοῖς ἄλλοις· ἀτὰρ εἴ κε Διὸς θυγάτηρ Ἀφροδίτη
Iliad 5.821	ἔλθῃσʼ ἐς πόλεμον, τήν γʼ οὐτάμεν ὀξέϊ χαλκῷ.
Iliad 5.822	τοὔνεκα νῦν αὐτός τʼ ἀναχάζομαι ἠδὲ καὶ ἄλλους
Iliad 5.823	Ἀργείους ἐκέλευσα ἀλήμεναι ἐνθάδε πάντας·
Iliad 5.824	γιγνώσκω γὰρ Ἄρηα μάχην ἀνὰ κοιρανέοντα.
Iliad 5.825	τὸν δʼ ἠμείβετʼ ἔπειτα θεὰ γλαυκῶπις Ἀθήνη·
Iliad 5.826	Τυδεΐδη Διόμηδες ἐμῷ κεχαρισμένε θυμῷ
Iliad 5.827	μήτε σύ γʼ Ἄρηα τό γε δείδιθι μήτε τινʼ ἄλλον
Iliad 5.828	ἀθανάτων, τοίη τοι ἐγὼν ἐπιτάρροθός εἰμι·
Iliad 5.829	ἀλλʼ ἄγʼ ἐπʼ Ἄρηϊ πρώτῳ ἔχε μώνυχας ἵππους,
Iliad 5.830	τύψον δὲ σχεδίην μηδʼ ἅζεο θοῦρον Ἄρηα
Iliad 5.831	τοῦτον μαινόμενον, τυκτὸν κακόν, ἀλλοπρόσαλλον,
Iliad 5.832	ὃς πρῴην μὲν ἐμοί τε καὶ Ἥρῃ στεῦτʼ ἀγορεύων
Iliad 5.833	Τρωσὶ μαχήσεσθαι, ἀτὰρ Ἀργείοισιν ἀρήξειν,
Iliad 5.834	νῦν δὲ μετὰ Τρώεσσιν ὁμιλεῖ, τῶν δὲ λέλασται.
Iliad 5.835	ὣς φαμένη Σθένελον μὲν ἀφʼ ἵππων ὦσε χαμᾶζε,
Iliad 5.836	χειρὶ πάλιν ἐρύσασʼ, ὃ δʼ ἄρʼ ἐμμαπέως ἀπόρουσεν·
Iliad 5.837	ἣ δʼ ἐς δίφρον ἔβαινε παραὶ Διομήδεα δῖον
Iliad 5.838	ἐμμεμαυῖα θεά· μέγα δʼ ἔβραχε φήγινος ἄξων
Iliad 5.839	βριθοσύνῃ· δεινὴν γὰρ ἄγεν θεὸν ἄνδρά τʼ ἄριστον.
Iliad 5.840	λάζετο δὲ μάστιγα καὶ ἡνία Παλλὰς Ἀθήνη·
Iliad 5.841	αὐτίκʼ ἐπʼ Ἄρηϊ πρώτῳ ἔχε μώνυχας ἵππους.
Iliad 5.842	ἤτοι ὃ μὲν Περίφαντα πελώριον ἐξενάριζεν
Iliad 5.843	Αἰτωλῶν ὄχʼ ἄριστον Ὀχησίου ἀγλαὸν υἱόν·
Iliad 5.844	τὸν μὲν Ἄρης ἐνάριζε μιαιφόνος· αὐτὰρ Ἀθήνη
Iliad 5.845	δῦνʼ Ἄϊδος κυνέην, μή μιν ἴδοι ὄβριμος Ἄρης.
Iliad 5.846	ὡς δὲ ἴδε βροτολοιγὸς Ἄρης Διομήδεα δῖον,
Iliad 5.847	ἤτοι ὃ μὲν Περίφαντα πελώριον αὐτόθʼ ἔασε
Iliad 5.848	κεῖσθαι ὅθι πρῶτον κτείνων ἐξαίνυτο θυμόν,
Iliad 5.849	αὐτὰρ ὃ βῆ ῥʼ ἰθὺς Διομήδεος ἱπποδάμοιο.
Iliad 5.850	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες,
Iliad 5.851	πρόσθεν Ἄρης ὠρέξαθʼ ὑπὲρ ζυγὸν ἡνία θʼ ἵππων
Iliad 5.852	ἔγχεϊ χαλκείῳ μεμαὼς ἀπὸ θυμὸν ἑλέσθαι·
Iliad 5.853	καὶ τό γε χειρὶ λαβοῦσα θεὰ γλαυκῶπις Ἀθήνη
Iliad 5.854	ὦσεν ὑπὲκ δίφροιο ἐτώσιον ἀϊχθῆναι.
Iliad 5.855	δεύτερος αὖθʼ ὡρμᾶτο βοὴν ἀγαθὸς Διομήδης
Iliad 5.856	ἔγχεϊ χαλκείῳ· ἐπέρεισε δὲ Παλλὰς Ἀθήνη
Iliad 5.857	νείατον ἐς κενεῶνα ὅθι ζωννύσκετο μίτρῃ·
Iliad 5.858	τῇ ῥά μιν οὖτα τυχών, διὰ δὲ χρόα καλὸν ἔδαψεν,
Iliad 5.859	ἐκ δὲ δόρυ σπάσεν αὖτις· ὃ δʼ ἔβραχε χάλκεος Ἄρης
Iliad 5.860	ὅσσόν τʼ ἐννεάχιλοι ἐπίαχον ἢ δεκάχιλοι
Iliad 5.861	ἀνέρες ἐν πολέμῳ ἔριδα ξυνάγοντες Ἄρηος.
Iliad 5.862	τοὺς δʼ ἄρʼ ὑπὸ τρόμος εἷλεν Ἀχαιούς τε Τρῶάς τε
Iliad 5.863	δείσαντας· τόσον ἔβραχʼ Ἄρης ἆτος πολέμοιο.
Iliad 5.864	οἵη δʼ ἐκ νεφέων ἐρεβεννὴ φαίνεται ἀὴρ
Iliad 5.865	καύματος ἐξ ἀνέμοιο δυσαέος ὀρνυμένοιο,
Iliad 5.866	τοῖος Τυδεΐδῃ Διομήδεϊ χάλκεος Ἄρης
Iliad 5.867	φαίνεθʼ ὁμοῦ νεφέεσσιν ἰὼν εἰς οὐρανὸν εὐρύν.
Iliad 5.868	καρπαλίμως δʼ ἵκανε θεῶν ἕδος αἰπὺν Ὄλυμπον,
Iliad 5.869	πὰρ δὲ Διὶ Κρονίωνι καθέζετο θυμὸν ἀχεύων,
Iliad 5.870	δεῖξεν δʼ ἄμβροτον αἷμα καταρρέον ἐξ ὠτειλῆς,
Iliad 5.871	καί ῥʼ ὀλοφυρόμενος ἔπεα πτερόεντα προσηύδα·
Iliad 5.872	Ζεῦ πάτερ οὐ νεμεσίζῃ ὁρῶν τάδε καρτερὰ ἔργα;
Iliad 5.873	αἰεί τοι ῥίγιστα θεοὶ τετληότες εἰμὲν
Iliad 5.874	ἀλλήλων ἰότητι, χάριν ἄνδρεσσι φέροντες.
Iliad 5.875	σοὶ πάντες μαχόμεσθα· σὺ γὰρ τέκες ἄφρονα κούρην
Iliad 5.876	οὐλομένην, ᾗ τʼ αἰὲν ἀήσυλα ἔργα μέμηλεν.
Iliad 5.877	ἄλλοι μὲν γὰρ πάντες ὅσοι θεοί εἰσʼ ἐν Ὀλύμπῳ
Iliad 5.878	σοί τʼ ἐπιπείθονται καὶ δεδμήμεσθα ἕκαστος·
Iliad 5.879	ταύτην δʼ οὔτʼ ἔπεϊ προτιβάλλεαι οὔτέ τι ἔργῳ,
Iliad 5.880	ἀλλʼ ἀνιεῖς, ἐπεὶ αὐτὸς ἐγείναο παῖδʼ ἀΐδηλον·
Iliad 5.881	ἣ νῦν Τυδέος υἱὸν ὑπερφίαλον Διομήδεα
Iliad 5.882	μαργαίνειν ἀνέηκεν ἐπʼ ἀθανάτοισι θεοῖσι.
Iliad 5.883	Κύπριδα μὲν πρῶτον σχεδὸν οὔτασε χεῖρʼ ἐπὶ καρπῷ,
Iliad 5.884	αὐτὰρ ἔπειτʼ αὐτῷ μοι ἐπέσσυτο δαίμονι ἶσος·
Iliad 5.885	ἀλλά μʼ ὑπήνεικαν ταχέες πόδες· ἦ τέ κε δηρὸν
Iliad 5.886	αὐτοῦ πήματʼ ἔπασχον ἐν αἰνῇσιν νεκάδεσσιν,
Iliad 5.887	ἤ κε ζὼς ἀμενηνὸς ἔα χαλκοῖο τυπῇσι.
Iliad 5.888	τὸν δʼ ἄρʼ ὑπόδρα ἰδὼν προσέφη νεφεληγερέτα Ζεύς.
Iliad 5.889	μή τί μοι ἀλλοπρόσαλλε παρεζόμενος μινύριζε.
Iliad 5.890	ἔχθιστος δέ μοί ἐσσι θεῶν οἳ Ὄλυμπον ἔχουσιν·
Iliad 5.891	αἰεὶ γάρ τοι ἔρις τε φίλη πόλεμοί τε μάχαι τε.
Iliad 5.892	μητρός τοι μένος ἐστὶν ἀάσχετον οὐκ ἐπιεικτὸν
Iliad 5.893	Ἥρης· τὴν μὲν ἐγὼ σπουδῇ δάμνημʼ ἐπέεσσι·
Iliad 5.894	τώ σʼ ὀΐω κείνης τάδε πάσχειν ἐννεσίῃσιν.
Iliad 5.895	ἀλλʼ οὐ μάν σʼ ἔτι δηρὸν ἀνέξομαι ἄλγεʼ ἔχοντα·
Iliad 5.896	ἐκ γὰρ ἐμεῦ γένος ἐσσί, ἐμοὶ δέ σε γείνατο μήτηρ·
Iliad 5.897	εἰ δέ τευ ἐξ ἄλλου γε θεῶν γένευ ὧδʼ ἀΐδηλος
Iliad 5.898	καί κεν δὴ πάλαι ἦσθα ἐνέρτερος Οὐρανιώνων.
Iliad 5.899	ὣς φάτο, καὶ Παιήονʼ ἀνώγειν ἰήσασθαι.
Iliad 5.900	τῷ δʼ ἐπὶ Παιήων ὀδυνήφατα φάρμακα πάσσων
Iliad 5.901	ἠκέσατʼ· οὐ μὲν γάρ τι καταθνητός γʼ ἐτέτυκτο.
Iliad 5.902	ὡς δʼ ὅτʼ ὀπὸς γάλα λευκὸν ἐπειγόμενος συνέπηξεν
Iliad 5.903	ὑγρὸν ἐόν, μάλα δʼ ὦκα περιτρέφεται κυκόωντι,
Iliad 5.904	ὣς ἄρα καρπαλίμως ἰήσατο θοῦρον Ἄρηα.
Iliad 5.905	τὸν δʼ Ἥβη λοῦσεν, χαρίεντα δὲ εἵματα ἕσσε·
Iliad 5.906	πὰρ δὲ Διὶ Κρονίωνι καθέζετο κύδεϊ γαίων.
Iliad 5.907	αἳ δʼ αὖτις πρὸς δῶμα Διὸς μεγάλοιο νέοντο
Iliad 5.908	Ἥρη τʼ Ἀργείη καὶ Ἀλαλκομενηῒς Ἀθήνη
Iliad 5.909	παύσασαι βροτολοιγὸν Ἄρηʼ ἀνδροκτασιάων.
Iliad 6.1	Τρώων δʼ οἰώθη καὶ Ἀχαιῶν φύλοπις αἰνή·
Iliad 6.2	πολλὰ δʼ ἄρʼ ἔνθα καὶ ἔνθʼ ἴθυσε μάχη πεδίοιο
Iliad 6.3	ἀλλήλων ἰθυνομένων χαλκήρεα δοῦρα
Iliad 6.4	μεσσηγὺς Σιμόεντος ἰδὲ Ξάνθοιο ῥοάων.
Iliad 6.5	Αἴας δὲ πρῶτος Τελαμώνιος ἕρκος Ἀχαιῶν
Iliad 6.6	Τρώων ῥῆξε φάλαγγα, φόως δʼ ἑτάροισιν ἔθηκεν,
Iliad 6.7	ἄνδρα βαλὼν ὃς ἄριστος ἐνὶ Θρῄκεσσι τέτυκτο
Iliad 6.8	υἱὸν Ἐϋσσώρου Ἀκάμαντʼ ἠΰν τε μέγαν τε.
Iliad 6.9	τόν ῥʼ ἔβαλε πρῶτος κόρυθος φάλον ἱπποδασείης,
Iliad 6.10	ἐν δὲ μετώπῳ πῆξε, πέρησε δʼ ἄρʼ ὀστέον εἴσω
Iliad 6.11	αἰχμὴ χαλκείη· τὸν δὲ σκότος ὄσσε κάλυψεν.
Iliad 6.12	Ἄξυλον δʼ ἄρʼ ἔπεφνε βοὴν ἀγαθὸς Διομήδης
Iliad 6.13	Τευθρανίδην, ὃς ἔναιεν ἐϋκτιμένῃ ἐν Ἀρίσβῃ
Iliad 6.14	ἀφνειὸς βιότοιο, φίλος δʼ ἦν ἀνθρώποισι.
Iliad 6.15	πάντας γὰρ φιλέεσκεν ὁδῷ ἔπι οἰκία ναίων.
Iliad 6.16	ἀλλά οἱ οὔ τις τῶν γε τότʼ ἤρκεσε λυγρὸν ὄλεθρον
Iliad 6.17	πρόσθεν ὑπαντιάσας, ἀλλʼ ἄμφω θυμὸν ἀπηύρα
Iliad 6.18	αὐτὸν καὶ θεράποντα Καλήσιον, ὅς ῥα τόθʼ ἵππων
Iliad 6.19	ἔσκεν ὑφηνίοχος· τὼ δʼ ἄμφω γαῖαν ἐδύτην.
Iliad 6.20	Δρῆσον δʼ Εὐρύαλος καὶ Ὀφέλτιον ἐξενάριξε·
Iliad 6.21	βῆ δὲ μετʼ Αἴσηπον καὶ Πήδασον, οὕς ποτε νύμφη
Iliad 6.22	νηῒς Ἀβαρβαρέη τέκʼ ἀμύμονι Βουκολίωνι.
Iliad 6.23	Βουκολίων δʼ ἦν υἱὸς ἀγαυοῦ Λαομέδοντος
Iliad 6.24	πρεσβύτατος γενεῇ, σκότιον δέ ἑ γείνατο μήτηρ·
Iliad 6.25	ποιμαίνων δʼ ἐπʼ ὄεσσι μίγη φιλότητι καὶ εὐνῇ,
Iliad 6.26	ἣ δʼ ὑποκυσαμένη διδυμάονε γείνατο παῖδε.
Iliad 6.27	καὶ μὲν τῶν ὑπέλυσε μένος καὶ φαίδιμα γυῖα
Iliad 6.28	Μηκιστηϊάδης καὶ ἀπʼ ὤμων τεύχεʼ ἐσύλα.
Iliad 6.29	Ἀστύαλον δʼ ἄρʼ ἔπεφνε μενεπτόλεμος Πολυποίτης·
Iliad 6.30	Πιδύτην δʼ Ὀδυσεὺς Περκώσιον ἐξενάριξεν
Iliad 6.31	ἔγχεϊ χαλκείῳ, Τεῦκρος δʼ Ἀρετάονα δῖον.
Iliad 6.32	Ἀντίλοχος δʼ Ἄβληρον ἐνήρατο δουρὶ φαεινῷ
Iliad 6.33	Νεστορίδης, Ἔλατον δὲ ἄναξ ἀνδρῶν Ἀγαμέμνων·
Iliad 6.34	ναῖε δὲ Σατνιόεντος ἐϋρρείταο παρʼ ὄχθας
Iliad 6.35	Πήδασον αἰπεινήν. Φύλακον δʼ ἕλε Λήϊτος ἥρως
Iliad 6.36	φεύγοντʼ· Εὐρύπυλος δὲ Μελάνθιον ἐξενάριξεν.
Iliad 6.37	Ἄδρηστον δʼ ἄρʼ ἔπειτα βοὴν ἀγαθὸς Μενέλαος
Iliad 6.38	ζωὸν ἕλʼ· ἵππω γάρ οἱ ἀτυζομένω πεδίοιο
Iliad 6.39	ὄζῳ ἔνι βλαφθέντε μυρικίνῳ ἀγκύλον ἅρμα
Iliad 6.40	ἄξαντʼ ἐν πρώτῳ ῥυμῷ αὐτὼ μὲν ἐβήτην
Iliad 6.41	πρὸς πόλιν, ᾗ περ οἱ ἄλλοι ἀτυζόμενοι φοβέοντο,
Iliad 6.42	αὐτὸς δʼ ἐκ δίφροιο παρὰ τροχὸν ἐξεκυλίσθη
Iliad 6.43	πρηνὴς ἐν κονίῃσιν ἐπὶ στόμα· πὰρ δέ οἱ ἔστη
Iliad 6.44	Ἀτρεΐδης Μενέλαος ἔχων δολιχόσκιον ἔγχος.
Iliad 6.45	Ἄδρηστος δʼ ἄρʼ ἔπειτα λαβὼν ἐλίσσετο γούνων·
Iliad 6.46	ζώγρει Ἀτρέος υἱέ, σὺ δʼ ἄξια δέξαι ἄποινα·
Iliad 6.47	πολλὰ δʼ ἐν ἀφνειοῦ πατρὸς κειμήλια κεῖται
Iliad 6.48	χαλκός τε χρυσός τε πολύκμητός τε σίδηρος,
Iliad 6.49	τῶν κέν τοι χαρίσαιτο πατὴρ ἀπερείσιʼ ἄποινα
Iliad 6.50	εἴ κεν ἐμὲ ζωὸν πεπύθοιτʼ ἐπὶ νηυσὶν Ἀχαιῶν.
Iliad 6.51	ὣς φάτο, τῷ δʼ ἄρα θυμὸν ἐνὶ στήθεσσιν ἔπειθε·
Iliad 6.52	καὶ δή μιν τάχʼ ἔμελλε θοὰς ἐπὶ νῆας Ἀχαιῶν
Iliad 6.53	δώσειν ᾧ θεράποντι καταξέμεν· ἀλλʼ Ἀγαμέμνων
Iliad 6.54	ἀντίος ἦλθε θέων, καὶ ὁμοκλήσας ἔπος ηὔδα·
Iliad 6.55	ὦ πέπον ὦ Μενέλαε, τί ἢ δὲ σὺ κήδεαι οὕτως
Iliad 6.56	ἀνδρῶν; ἦ σοὶ ἄριστα πεποίηται κατὰ οἶκον
Iliad 6.57	πρὸς Τρώων; τῶν μή τις ὑπεκφύγοι αἰπὺν ὄλεθρον
Iliad 6.58	χεῖράς θʼ ἡμετέρας, μηδʼ ὅν τινα γαστέρι μήτηρ
Iliad 6.59	κοῦρον ἐόντα φέροι, μηδʼ ὃς φύγοι, ἀλλʼ ἅμα πάντες
Iliad 6.60	Ἰλίου ἐξαπολοίατʼ ἀκήδεστοι καὶ ἄφαντοι.
Iliad 6.61	ὣς εἰπὼν ἔτρεψεν ἀδελφειοῦ φρένας ἥρως
Iliad 6.62	αἴσιμα παρειπών· ὃ δʼ ἀπὸ ἕθεν ὤσατο χειρὶ
Iliad 6.63	ἥρωʼ Ἄδρηστον· τὸν δὲ κρείων Ἀγαμέμνων
Iliad 6.64	οὖτα κατὰ λαπάρην· ὃ δʼ ἀνετράπετʼ, Ἀτρεΐδης δὲ
Iliad 6.65	λὰξ ἐν στήθεσι βὰς ἐξέσπασε μείλινον ἔγχος.
Iliad 6.66	Νέστωρ δʼ Ἀργείοισιν ἐκέκλετο μακρὸν ἀΰσας·
Iliad 6.67	ὦ φίλοι ἥρωες Δαναοὶ θεράποντες Ἄρηος
Iliad 6.68	μή τις νῦν ἐνάρων ἐπιβαλλόμενος μετόπισθε
Iliad 6.69	μιμνέτω ὥς κε πλεῖστα φέρων ἐπὶ νῆας ἵκηται,
Iliad 6.70	ἀλλʼ ἄνδρας κτείνωμεν· ἔπειτα δὲ καὶ τὰ ἕκηλοι
Iliad 6.71	νεκροὺς ἂμ πεδίον συλήσετε τεθνηῶτας.
Iliad 6.72	ὣς εἰπὼν ὄτρυνε μένος καὶ θυμὸν ἑκάστου.
Iliad 6.73	ἔνθά κεν αὖτε Τρῶες ἀρηϊφίλων ὑπʼ Ἀχαιῶν
Iliad 6.74	Ἴλιον εἰσανέβησαν ἀναλκείῃσι δαμέντες,
Iliad 6.75	εἰ μὴ ἄρʼ Αἰνείᾳ τε καὶ Ἕκτορι εἶπε παραστὰς
Iliad 6.76	Πριαμίδης Ἕλενος οἰωνοπόλων ὄχʼ ἄριστος·
Iliad 6.77	Αἰνεία τε καὶ Ἕκτορ, ἐπεὶ πόνος ὔμμι μάλιστα
Iliad 6.78	Τρώων καὶ Λυκίων ἐγκέκλιται, οὕνεκʼ ἄριστοι
Iliad 6.79	πᾶσαν ἐπʼ ἰθύν ἐστε μάχεσθαί τε φρονέειν τε,
Iliad 6.80	στῆτʼ αὐτοῦ, καὶ λαὸν ἐρυκάκετε πρὸ πυλάων
Iliad 6.81	πάντῃ ἐποιχόμενοι πρὶν αὖτʼ ἐν χερσὶ γυναικῶν
Iliad 6.82	φεύγοντας πεσέειν, δηΐοισι δὲ χάρμα γενέσθαι.
Iliad 6.83	αὐτὰρ ἐπεί κε φάλαγγας ἐποτρύνητον ἁπάσας,
Iliad 6.84	ἡμεῖς μὲν Δαναοῖσι μαχησόμεθʼ αὖθι μένοντες,
Iliad 6.85	καὶ μάλα τειρόμενοί περ· ἀναγκαίη γὰρ ἐπείγει·
Iliad 6.86	Ἕκτορ ἀτὰρ σὺ πόλιν δὲ μετέρχεο, εἰπὲ δʼ ἔπειτα
Iliad 6.87	μητέρι σῇ καὶ ἐμῇ· ἣ δὲ ξυνάγουσα γεραιὰς
Iliad 6.88	νηὸν Ἀθηναίης γλαυκώπιδος ἐν πόλει ἄκρῃ
Iliad 6.89	οἴξασα κληῗδι θύρας ἱεροῖο δόμοιο
Iliad 6.90	πέπλον, ὅς οἱ δοκέει χαριέστατος ἠδὲ μέγιστος
Iliad 6.91	εἶναι ἐνὶ μεγάρῳ καί οἱ πολὺ φίλτατος αὐτῇ,
Iliad 6.92	θεῖναι Ἀθηναίης ἐπὶ γούνασιν ἠϋκόμοιο,
Iliad 6.93	καί οἱ ὑποσχέσθαι δυοκαίδεκα βοῦς ἐνὶ νηῷ
Iliad 6.94	ἤνις ἠκέστας ἱερευσέμεν, αἴ κʼ ἐλεήσῃ
Iliad 6.95	ἄστύ τε καὶ Τρώων ἀλόχους καὶ νήπια τέκνα,
Iliad 6.96	ὥς κεν Τυδέος υἱὸν ἀπόσχῃ Ἰλίου ἱρῆς
Iliad 6.97	ἄγριον αἰχμητὴν κρατερὸν μήστωρα φόβοιο,
Iliad 6.98	ὃν δὴ ἐγὼ κάρτιστον Ἀχαιῶν φημι γενέσθαι.
Iliad 6.99	οὐδʼ Ἀχιλῆά ποθʼ ὧδέ γʼ ἐδείδιμεν ὄρχαμον ἀνδρῶν,
Iliad 6.100	ὅν πέρ φασι θεᾶς ἐξέμμεναι· ἀλλʼ ὅδε λίην
Iliad 6.101	μαίνεται, οὐδέ τίς οἱ δύναται μένος ἰσοφαρίζειν.
Iliad 6.102	ὣς ἔφαθʼ, Ἕκτωρ δʼ οὔ τι κασιγνήτῳ ἀπίθησεν.
Iliad 6.103	αὐτίκα δʼ ἐξ ὀχέων σὺν τεύχεσιν ἆλτο χαμᾶζε,
Iliad 6.104	πάλλων δʼ ὀξέα δοῦρα κατὰ στρατὸν ᾤχετο πάντῃ
Iliad 6.105	ὀτρύνων μαχέσασθαι, ἔγειρε δὲ φύλοπιν αἰνήν.
Iliad 6.106	οἳ δʼ ἐλελίχθησαν καὶ ἐναντίοι ἔσταν Ἀχαιῶν·
Iliad 6.107	Ἀργεῖοι δʼ ὑπεχώρησαν, λῆξαν δὲ φόνοιο,
Iliad 6.108	φὰν δέ τινʼ ἀθανάτων ἐξ οὐρανοῦ ἀστερόεντος
Iliad 6.109	Τρωσὶν ἀλεξήσοντα κατελθέμεν, ὡς ἐλέλιχθεν.
Iliad 6.110	Ἕκτωρ δὲ Τρώεσσιν ἐκέκλετο μακρὸν ἀΰσας·
Iliad 6.111	Τρῶες ὑπέρθυμοι τηλεκλειτοί τʼ ἐπίκουροι
Iliad 6.112	ἀνέρες ἔστε φίλοι, μνήσασθε δὲ θούριδος ἀλκῆς,
Iliad 6.113	ὄφρʼ ἂν ἐγὼ βείω προτὶ Ἴλιον, ἠδὲ γέρουσιν
Iliad 6.114	εἴπω βουλευτῇσι καὶ ἡμετέρῃς ἀλόχοισι
Iliad 6.115	δαίμοσιν ἀρήσασθαι, ὑποσχέσθαι δʼ ἑκατόμβας.
Iliad 6.116	ὣς ἄρα φωνήσας ἀπέβη κορυθαίολος Ἕκτωρ·
Iliad 6.117	ἀμφὶ δέ μιν σφυρὰ τύπτε καὶ αὐχένα δέρμα κελαινὸν
Iliad 6.118	ἄντυξ ἣ πυμάτη θέεν ἀσπίδος ὀμφαλοέσσης.
Iliad 6.119	Γλαῦκος δʼ Ἱππολόχοιο πάϊς καὶ Τυδέος υἱὸς
Iliad 6.120	ἐς μέσον ἀμφοτέρων συνίτην μεμαῶτε μάχεσθαι.
Iliad 6.121	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντε,
Iliad 6.122	τὸν πρότερος προσέειπε βοὴν ἀγαθὸς Διομήδης·
Iliad 6.123	τίς δὲ σύ ἐσσι φέριστε καταθνητῶν ἀνθρώπων;
Iliad 6.124	οὐ μὲν γάρ ποτʼ ὄπωπα μάχῃ ἔνι κυδιανείρῃ
Iliad 6.125	τὸ πρίν· ἀτὰρ μὲν νῦν γε πολὺ προβέβηκας ἁπάντων
Iliad 6.126	σῷ θάρσει, ὅ τʼ ἐμὸν δολιχόσκιον ἔγχος ἔμεινας·
Iliad 6.127	δυστήνων δέ τε παῖδες ἐμῷ μένει ἀντιόωσιν.
Iliad 6.128	εἰ δέ τις ἀθανάτων γε κατʼ οὐρανοῦ εἰλήλουθας,
Iliad 6.129	οὐκ ἂν ἔγωγε θεοῖσιν ἐπουρανίοισι μαχοίμην.
Iliad 6.130	οὐδὲ γὰρ οὐδὲ Δρύαντος υἱὸς κρατερὸς Λυκόοργος
Iliad 6.131	δὴν ἦν, ὅς ῥα θεοῖσιν ἐπουρανίοισιν ἔριζεν·
Iliad 6.132	ὅς ποτε μαινομένοιο Διωνύσοιο τιθήνας
Iliad 6.133	σεῦε κατʼ ἠγάθεον Νυσήϊον· αἳ δʼ ἅμα πᾶσαι
Iliad 6.134	θύσθλα χαμαὶ κατέχευαν ὑπʼ ἀνδροφόνοιο Λυκούργου
Iliad 6.135	θεινόμεναι βουπλῆγι· Διώνυσος δὲ φοβηθεὶς
Iliad 6.136	δύσεθʼ ἁλὸς κατὰ κῦμα, Θέτις δʼ ὑπεδέξατο κόλπῳ
Iliad 6.137	δειδιότα· κρατερὸς γὰρ ἔχε τρόμος ἀνδρὸς ὁμοκλῇ.
Iliad 6.138	τῷ μὲν ἔπειτʼ ὀδύσαντο θεοὶ ῥεῖα ζώοντες,
Iliad 6.139	καί μιν τυφλὸν ἔθηκε Κρόνου πάϊς· οὐδʼ ἄρʼ ἔτι δὴν
Iliad 6.140	ἦν, ἐπεὶ ἀθανάτοισιν ἀπήχθετο πᾶσι θεοῖσιν·
Iliad 6.141	οὐδʼ ἂν ἐγὼ μακάρεσσι θεοῖς ἐθέλοιμι μάχεσθαι.
Iliad 6.142	εἰ δέ τίς ἐσσι βροτῶν οἳ ἀρούρης καρπὸν ἔδουσιν,
Iliad 6.143	ἆσσον ἴθʼ ὥς κεν θᾶσσον ὀλέθρου πείραθʼ ἵκηαι.
Iliad 6.144	τὸν δʼ αὖθʼ Ἱππολόχοιο προσηύδα φαίδιμος υἱός·
Iliad 6.145	Τυδεΐδη μεγάθυμε τί ἢ γενεὴν ἐρεείνεις;
Iliad 6.146	οἵη περ φύλλων γενεὴ τοίη δὲ καὶ ἀνδρῶν.
Iliad 6.147	φύλλα τὰ μέν τʼ ἄνεμος χαμάδις χέει, ἄλλα δέ θʼ ὕλη
Iliad 6.148	τηλεθόωσα φύει, ἔαρος δʼ ἐπιγίγνεται ὥρη·
Iliad 6.149	ὣς ἀνδρῶν γενεὴ ἣ μὲν φύει ἣ δʼ ἀπολήγει.
Iliad 6.150	εἰ δʼ ἐθέλεις καὶ ταῦτα δαήμεναι ὄφρʼ ἐῢ εἰδῇς
Iliad 6.151	ἡμετέρην γενεήν, πολλοὶ δέ μιν ἄνδρες ἴσασιν·
Iliad 6.152	ἔστι πόλις Ἐφύρη μυχῷ Ἄργεος ἱπποβότοιο,
Iliad 6.153	ἔνθα δὲ Σίσυφος ἔσκεν, ὃ κέρδιστος γένετʼ ἀνδρῶν,
Iliad 6.154	Σίσυφος Αἰολίδης· ὃ δʼ ἄρα Γλαῦκον τέκεθʼ υἱόν,
Iliad 6.155	αὐτὰρ Γλαῦκος τίκτεν ἀμύμονα Βελλεροφόντην·
Iliad 6.156	τῷ δὲ θεοὶ κάλλός τε καὶ ἠνορέην ἐρατεινὴν
Iliad 6.157	ὤπασαν· αὐτάρ οἱ Προῖτος κακὰ μήσατο θυμῷ,
Iliad 6.158	ὅς ῥʼ ἐκ δήμου ἔλασσεν, ἐπεὶ πολὺ φέρτερος ἦεν,
Iliad 6.159	Ἀργείων· Ζεὺς γάρ οἱ ὑπὸ σκήπτρῳ ἐδάμασσε.
Iliad 6.160	τῷ δὲ γυνὴ Προίτου ἐπεμήνατο δῖʼ Ἄντεια
Iliad 6.161	κρυπταδίῃ φιλότητι μιγήμεναι· ἀλλὰ τὸν οὔ τι
Iliad 6.162	πεῖθʼ ἀγαθὰ φρονέοντα δαΐφρονα Βελλεροφόντην.
Iliad 6.163	ἣ δὲ ψευσαμένη Προῖτον βασιλῆα προσηύδα·
Iliad 6.164	τεθναίης ὦ Προῖτʼ, ἢ κάκτανε Βελλεροφόντην,
Iliad 6.165	ὅς μʼ ἔθελεν φιλότητι μιγήμεναι οὐκ ἐθελούσῃ.
Iliad 6.166	ὣς φάτο, τὸν δὲ ἄνακτα χόλος λάβεν οἷον ἄκουσε·
Iliad 6.167	κτεῖναι μέν ῥʼ ἀλέεινε, σεβάσσατο γὰρ τό γε θυμῷ,
Iliad 6.168	πέμπε δέ μιν Λυκίην δέ, πόρεν δʼ ὅ γε σήματα λυγρὰ
Iliad 6.169	γράψας ἐν πίνακι πτυκτῷ θυμοφθόρα πολλά,
Iliad 6.170	δεῖξαι δʼ ἠνώγειν ᾧ πενθερῷ ὄφρʼ ἀπόλοιτο.
Iliad 6.171	αὐτὰρ ὁ βῆ Λυκίην δὲ θεῶν ὑπʼ ἀμύμονι πομπῇ.
Iliad 6.172	ἀλλʼ ὅτε δὴ Λυκίην ἷξε Ξάνθόν τε ῥέοντα,
Iliad 6.173	προφρονέως μιν τῖεν ἄναξ Λυκίης εὐρείης·
Iliad 6.174	ἐννῆμαρ ξείνισσε καὶ ἐννέα βοῦς ἱέρευσεν.
Iliad 6.175	ἀλλʼ ὅτε δὴ δεκάτη ἐφάνη ῥοδοδάκτυλος Ἠὼς
Iliad 6.176	καὶ τότε μιν ἐρέεινε καὶ ᾔτεε σῆμα ἰδέσθαι
Iliad 6.177	ὅττί ῥά οἱ γαμβροῖο πάρα Προίτοιο φέροιτο.
Iliad 6.178	αὐτὰρ ἐπεὶ δὴ σῆμα κακὸν παρεδέξατο γαμβροῦ,
Iliad 6.179	πρῶτον μέν ῥα Χίμαιραν ἀμαιμακέτην ἐκέλευσε
Iliad 6.180	πεφνέμεν· ἣ δʼ ἄρʼ ἔην θεῖον γένος οὐδʼ ἀνθρώπων,
Iliad 6.181	πρόσθε λέων, ὄπιθεν δὲ δράκων, μέσση δὲ χίμαιρα,
Iliad 6.182	δεινὸν ἀποπνείουσα πυρὸς μένος αἰθομένοιο,
Iliad 6.183	καὶ τὴν μὲν κατέπεφνε θεῶν τεράεσσι πιθήσας.
Iliad 6.184	δεύτερον αὖ Σολύμοισι μαχέσσατο κυδαλίμοισι·
Iliad 6.185	καρτίστην δὴ τήν γε μάχην φάτο δύμεναι ἀνδρῶν.
Iliad 6.186	τὸ τρίτον αὖ κατέπεφνεν Ἀμαζόνας ἀντιανείρας.
Iliad 6.187	τῷ δʼ ἄρʼ ἀνερχομένῳ πυκινὸν δόλον ἄλλον ὕφαινε·
Iliad 6.188	κρίνας ἐκ Λυκίης εὐρείης φῶτας ἀρίστους
Iliad 6.189	εἷσε λόχον· τοὶ δʼ οὔ τι πάλιν οἶκον δὲ νέοντο·
Iliad 6.190	πάντας γὰρ κατέπεφνεν ἀμύμων Βελλεροφόντης.
Iliad 6.191	ἀλλʼ ὅτε δὴ γίγνωσκε θεοῦ γόνον ἠῢν ἐόντα
Iliad 6.192	αὐτοῦ μιν κατέρυκε, δίδου δʼ ὅ γε θυγατέρα ἥν,
Iliad 6.193	δῶκε δέ οἱ τιμῆς βασιληΐδος ἥμισυ πάσης·
Iliad 6.194	καὶ μέν οἱ Λύκιοι τέμενος τάμον ἔξοχον ἄλλων
Iliad 6.195	καλὸν φυταλιῆς καὶ ἀρούρης, ὄφρα νέμοιτο.
Iliad 6.196	ἣ δʼ ἔτεκε τρία τέκνα δαΐφρονι Βελλεροφόντῃ
Iliad 6.197	Ἴσανδρόν τε καὶ Ἱππόλοχον καὶ Λαοδάμειαν.
Iliad 6.198	Λαοδαμείῃ μὲν παρελέξατο μητίετα Ζεύς,
Iliad 6.199	ἣ δʼ ἔτεκʼ ἀντίθεον Σαρπηδόνα χαλκοκορυστήν.
Iliad 6.200	ἀλλʼ ὅτε δὴ καὶ κεῖνος ἀπήχθετο πᾶσι θεοῖσιν,
Iliad 6.201	ἤτοι ὃ κὰπ πεδίον τὸ Ἀλήϊον οἶος ἀλᾶτο
Iliad 6.202	ὃν θυμὸν κατέδων, πάτον ἀνθρώπων ἀλεείνων·
Iliad 6.203	Ἴσανδρον δέ οἱ υἱὸν Ἄρης ἆτος πολέμοιο
Iliad 6.204	μαρνάμενον Σολύμοισι κατέκτανε κυδαλίμοισι·
Iliad 6.205	τὴν δὲ χολωσαμένη χρυσήνιος Ἄρτεμις ἔκτα.
Iliad 6.206	Ἱππόλοχος δέ μʼ ἔτικτε, καὶ ἐκ τοῦ φημι γενέσθαι·
Iliad 6.207	πέμπε δέ μʼ ἐς Τροίην, καί μοι μάλα πόλλʼ ἐπέτελλεν
Iliad 6.208	αἰὲν ἀριστεύειν καὶ ὑπείροχον ἔμμεναι ἄλλων,
Iliad 6.209	μηδὲ γένος πατέρων αἰσχυνέμεν, οἳ μέγʼ ἄριστοι
Iliad 6.210	ἔν τʼ Ἐφύρῃ ἐγένοντο καὶ ἐν Λυκίῃ εὐρείῃ.
Iliad 6.211	ταύτης τοι γενεῆς τε καὶ αἵματος εὔχομαι εἶναι.
Iliad 6.212	ὣς φάτο, γήθησεν δὲ βοὴν ἀγαθὸς Διομήδης·
Iliad 6.213	ἔγχος μὲν κατέπηξεν ἐπὶ χθονὶ πουλυβοτείρῃ,
Iliad 6.214	αὐτὰρ ὃ μειλιχίοισι προσηύδα ποιμένα λαῶν·
Iliad 6.215	ἦ ῥά νύ μοι ξεῖνος πατρώϊός ἐσσι παλαιός·
Iliad 6.216	Οἰνεὺς γάρ ποτε δῖος ἀμύμονα Βελλεροφόντην
Iliad 6.217	ξείνισʼ ἐνὶ μεγάροισιν ἐείκοσιν ἤματʼ ἐρύξας·
Iliad 6.218	οἳ δὲ καὶ ἀλλήλοισι πόρον ξεινήϊα καλά·
Iliad 6.219	Οἰνεὺς μὲν ζωστῆρα δίδου φοίνικι φαεινόν,
Iliad 6.220	Βελλεροφόντης δὲ χρύσεον δέπας ἀμφικύπελλον
Iliad 6.221	καί μιν ἐγὼ κατέλειπον ἰὼν ἐν δώμασʼ ἐμοῖσι.
Iliad 6.222	Τυδέα δʼ οὐ μέμνημαι, ἐπεί μʼ ἔτι τυτθὸν ἐόντα
Iliad 6.223	κάλλιφʼ, ὅτʼ ἐν Θήβῃσιν ἀπώλετο λαὸς Ἀχαιῶν.
Iliad 6.224	τὼ νῦν σοὶ μὲν ἐγὼ ξεῖνος φίλος Ἄργεϊ μέσσῳ
Iliad 6.225	εἰμί, σὺ δʼ ἐν Λυκίῃ ὅτε κεν τῶν δῆμον ἵκωμαι.
Iliad 6.226	ἔγχεα δʼ ἀλλήλων ἀλεώμεθα καὶ διʼ ὁμίλου·
Iliad 6.227	πολλοὶ μὲν γὰρ ἐμοὶ Τρῶες κλειτοί τʼ ἐπίκουροι
Iliad 6.228	κτείνειν ὅν κε θεός γε πόρῃ καὶ ποσσὶ κιχείω,
Iliad 6.229	πολλοὶ δʼ αὖ σοὶ Ἀχαιοὶ ἐναιρέμεν ὅν κε δύνηαι.
Iliad 6.230	τεύχεα δʼ ἀλλήλοις ἐπαμείψομεν, ὄφρα καὶ οἵδε
Iliad 6.231	γνῶσιν ὅτι ξεῖνοι πατρώϊοι εὐχόμεθʼ εἶναι.
Iliad 6.232	ὣς ἄρα φωνήσαντε καθʼ ἵππων ἀΐξαντε
Iliad 6.233	χεῖράς τʼ ἀλλήλων λαβέτην καὶ πιστώσαντο·
Iliad 6.234	ἔνθʼ αὖτε Γλαύκῳ Κρονίδης φρένας ἐξέλετο Ζεύς,
Iliad 6.235	ὃς πρὸς Τυδεΐδην Διομήδεα τεύχεʼ ἄμειβε
Iliad 6.236	χρύσεα χαλκείων, ἑκατόμβοιʼ ἐννεαβοίων.
Iliad 6.237	Ἕκτωρ δʼ ὡς Σκαιάς τε πύλας καὶ φηγὸν ἵκανεν,
Iliad 6.238	ἀμφʼ ἄρα μιν Τρώων ἄλοχοι θέον ἠδὲ θύγατρες
Iliad 6.239	εἰρόμεναι παῖδάς τε κασιγνήτους τε ἔτας τε
Iliad 6.240	καὶ πόσιας· ὃ δʼ ἔπειτα θεοῖς εὔχεσθαι ἀνώγει
Iliad 6.241	πάσας ἑξείης· πολλῇσι δὲ κήδεʼ ἐφῆπτο.
Iliad 6.242	ἀλλʼ ὅτε δὴ Πριάμοιο δόμον περικαλλέʼ ἵκανε
Iliad 6.243	ξεστῇς αἰθούσῃσι τετυγμένον· αὐτὰρ ἐν αὐτῷ
Iliad 6.244	πεντήκοντʼ ἔνεσαν θάλαμοι ξεστοῖο λίθοιο
Iliad 6.245	πλησίον ἀλλήλων δεδμημένοι, ἔνθα δὲ παῖδες
Iliad 6.246	κοιμῶντο Πριάμοιο παρὰ μνηστῇς ἀλόχοισι,
Iliad 6.247	κουράων δʼ ἑτέρωθεν ἐναντίοι ἔνδοθεν αὐλῆς
Iliad 6.248	δώδεκʼ ἔσαν τέγεοι θάλαμοι ξεστοῖο λίθοιο
Iliad 6.249	πλησίον ἀλλήλων δεδμημένοι, ἔνθα δὲ γαμβροὶ
Iliad 6.250	κοιμῶντο Πριάμοιο παρʼ αἰδοίῃς ἀλόχοισιν·
Iliad 6.251	ἔνθά οἱ ἠπιόδωρος ἐναντίη ἤλυθε μήτηρ
Iliad 6.252	Λαοδίκην ἐσάγουσα θυγατρῶν εἶδος ἀρίστην·
Iliad 6.253	ἔν τʼ ἄρα οἱ φῦ χειρὶ ἔπος τʼ ἔφατʼ ἔκ τʼ ὀνόμαζε·
Iliad 6.254	τέκνον τίπτε λιπὼν πόλεμον θρασὺν εἰλήλουθας;
Iliad 6.255	ἦ μάλα δὴ τείρουσι δυσώνυμοι υἷες Ἀχαιῶν
Iliad 6.256	μαρνάμενοι περὶ ἄστυ· σὲ δʼ ἐνθάδε θυμὸς ἀνῆκεν
Iliad 6.257	ἐλθόντʼ ἐξ ἄκρης πόλιος Διὶ χεῖρας ἀνασχεῖν.
Iliad 6.258	ἀλλὰ μένʼ ὄφρά κέ τοι μελιηδέα οἶνον ἐνείκω,
Iliad 6.259	ὡς σπείσῃς Διὶ πατρὶ καὶ ἄλλοις ἀθανάτοισι
Iliad 6.260	πρῶτον, ἔπειτα δὲ καὐτὸς ὀνήσεαι αἴ κε πίῃσθα.
Iliad 6.261	ἀνδρὶ δὲ κεκμηῶτι μένος μέγα οἶνος ἀέξει,
Iliad 6.262	ὡς τύνη κέκμηκας ἀμύνων σοῖσιν ἔτῃσι.
Iliad 6.263	τὴν δʼ ἠμείβετʼ ἔπειτα μέγας κορυθαίολος Ἕκτωρ·
Iliad 6.264	μή μοι οἶνον ἄειρε μελίφρονα πότνια μῆτερ,
Iliad 6.265	μή μʼ ἀπογυιώσῃς μένεος, ἀλκῆς τε λάθωμαι·
Iliad 6.266	χερσὶ δʼ ἀνίπτοισιν Διὶ λείβειν αἴθοπα οἶνον
Iliad 6.267	ἅζομαι· οὐδέ πῃ ἔστι κελαινεφέϊ Κρονίωνι
Iliad 6.268	αἵματι καὶ λύθρῳ πεπαλαγμένον εὐχετάασθαι.
Iliad 6.269	ἀλλὰ σὺ μὲν πρὸς νηὸν Ἀθηναίης ἀγελείης
Iliad 6.270	ἔρχεο σὺν θυέεσσιν ἀολλίσσασα γεραιάς·
Iliad 6.271	πέπλον δʼ, ὅς τίς τοι χαριέστατος ἠδὲ μέγιστος
Iliad 6.272	ἔστιν ἐνὶ μεγάρῳ καί τοι πολὺ φίλτατος αὐτῇ,
Iliad 6.273	τὸν θὲς Ἀθηναίης ἐπὶ γούνασιν ἠϋκόμοιο,
Iliad 6.274	καί οἱ ὑποσχέσθαι δυοκαίδεκα βοῦς ἐνὶ νηῷ
Iliad 6.275	ἤνις ἠκέστας ἱερευσέμεν, αἴ κʼ ἐλεήσῃ
Iliad 6.276	ἄστύ τε καὶ Τρώων ἀλόχους καὶ νήπια τέκνα,
Iliad 6.277	αἴ κεν Τυδέος υἱὸν ἀπόσχῃ Ἰλίου ἱρῆς
Iliad 6.278	ἄγριον αἰχμητὴν κρατερὸν μήστωρα φόβοιο.
Iliad 6.279	ἀλλὰ σὺ μὲν πρὸς νηὸν Ἀθηναίης ἀγελείης
Iliad 6.280	ἔρχευ, ἐγὼ δὲ Πάριν μετελεύσομαι ὄφρα καλέσσω
Iliad 6.281	αἴ κʼ ἐθέλῃσʼ εἰπόντος ἀκουέμεν· ὥς κέ οἱ αὖθι
Iliad 6.282	γαῖα χάνοι· μέγα γάρ μιν Ὀλύμπιος ἔτρεφε πῆμα
Iliad 6.283	Τρωσί τε καὶ Πριάμῳ μεγαλήτορι τοῖό τε παισίν.
Iliad 6.284	εἰ κεῖνόν γε ἴδοιμι κατελθόντʼ Ἄϊδος εἴσω
Iliad 6.285	φαίην κε φρένʼ ἀτέρπου ὀϊζύος ἐκλελαθέσθαι.
Iliad 6.286	ὣς ἔφαθʼ, ἣ δὲ μολοῦσα ποτὶ μέγαρʼ ἀμφιπόλοισι
Iliad 6.287	κέκλετο· ταὶ δʼ ἄρʼ ἀόλλισσαν κατὰ ἄστυ γεραιάς.
Iliad 6.288	αὐτὴ δʼ ἐς θάλαμον κατεβήσετο κηώεντα,
Iliad 6.289	ἔνθʼ ἔσάν οἱ πέπλοι παμποίκιλα ἔργα γυναικῶν
Iliad 6.290	Σιδονίων, τὰς αὐτὸς Ἀλέξανδρος θεοειδὴς
Iliad 6.291	ἤγαγε Σιδονίηθεν ἐπιπλὼς εὐρέα πόντον,
Iliad 6.292	τὴν ὁδὸν ἣν Ἑλένην περ ἀνήγαγεν εὐπατέρειαν·
Iliad 6.293	τῶν ἕνʼ ἀειραμένη Ἑκάβη φέρε δῶρον Ἀθήνῃ,
Iliad 6.294	ὃς κάλλιστος ἔην ποικίλμασιν ἠδὲ μέγιστος,
Iliad 6.295	ἀστὴρ δʼ ὣς ἀπέλαμπεν· ἔκειτο δὲ νείατος ἄλλων.
Iliad 6.296	βῆ δʼ ἰέναι, πολλαὶ δὲ μετεσσεύοντο γεραιαί.
Iliad 6.297	αἱ δʼ ὅτε νηὸν ἵκανον Ἀθήνης ἐν πόλει ἄκρῃ,
Iliad 6.298	τῇσι θύρας ὤϊξε Θεανὼ καλλιπάρῃος
Iliad 6.299	Κισσηῒς ἄλοχος Ἀντήνορος ἱπποδάμοιο·
Iliad 6.300	τὴν γὰρ Τρῶες ἔθηκαν Ἀθηναίης ἱέρειαν.
Iliad 6.301	αἳ δʼ ὀλολυγῇ πᾶσαι Ἀθήνῃ χεῖρας ἀνέσχον·
Iliad 6.302	ἣ δʼ ἄρα πέπλον ἑλοῦσα Θεανὼ καλλιπάρῃος
Iliad 6.303	θῆκεν Ἀθηναίης ἐπὶ γούνασιν ἠϋκόμοιο,
Iliad 6.304	εὐχομένη δʼ ἠρᾶτο Διὸς κούρῃ μεγάλοιο·
Iliad 6.305	πότνιʼ Ἀθηναίη ἐρυσίπτολι δῖα θεάων
Iliad 6.306	ἆξον δὴ ἔγχος Διομήδεος, ἠδὲ καὶ αὐτὸν
Iliad 6.307	πρηνέα δὸς πεσέειν Σκαιῶν προπάροιθε πυλάων,
Iliad 6.308	ὄφρά τοι αὐτίκα νῦν δυοκαίδεκα βοῦς ἐνὶ νηῷ
Iliad 6.309	ἤνις ἠκέστας ἱερεύσομεν, αἴ κʼ ἐλεήσῃς
Iliad 6.310	ἄστύ τε καὶ Τρώων ἀλόχους καὶ νήπια τέκνα.
Iliad 6.311	ὣς ἔφατʼ εὐχομένη, ἀνένευε δὲ Παλλὰς Ἀθήνη.
Iliad 6.312	ὣς αἳ μέν ῥʼ εὔχοντο Διὸς κούρῃ μεγάλοιο,
Iliad 6.313	Ἕκτωρ δὲ πρὸς δώματʼ Ἀλεξάνδροιο βεβήκει
Iliad 6.314	καλά, τά ῥʼ αὐτὸς ἔτευξε σὺν ἀνδράσιν οἳ τότʼ ἄριστοι
Iliad 6.315	ἦσαν ἐνὶ Τροίῃ ἐριβώλακι τέκτονες ἄνδρες,
Iliad 6.316	οἵ οἱ ἐποίησαν θάλαμον καὶ δῶμα καὶ αὐλὴν
Iliad 6.317	ἐγγύθι τε Πριάμοιο καὶ Ἕκτορος ἐν πόλει ἄκρῃ.
Iliad 6.318	ἔνθʼ Ἕκτωρ εἰσῆλθε Διῒ φίλος, ἐν δʼ ἄρα χειρὶ
Iliad 6.319	ἔγχος ἔχʼ ἑνδεκάπηχυ· πάροιθε δὲ λάμπετο δουρὸς
Iliad 6.320	αἰχμὴ χαλκείη, περὶ δὲ χρύσεος θέε πόρκης.
Iliad 6.321	τὸν δʼ εὗρʼ ἐν θαλάμῳ περικαλλέα τεύχεʼ ἕποντα
Iliad 6.322	ἀσπίδα καὶ θώρηκα, καὶ ἀγκύλα τόξʼ ἁφόωντα·
Iliad 6.323	Ἀργείη δʼ Ἑλένη μετʼ ἄρα δμῳῇσι γυναιξὶν
Iliad 6.324	ἧστο καὶ ἀμφιπόλοισι περικλυτὰ ἔργα κέλευε.
Iliad 6.325	τὸν δʼ Ἕκτωρ νείκεσσεν ἰδὼν αἰσχροῖς ἐπέεσσι·
Iliad 6.326	δαιμόνιʼ οὐ μὲν καλὰ χόλον τόνδʼ ἔνθεο θυμῷ,
Iliad 6.327	λαοὶ μὲν φθινύθουσι περὶ πτόλιν αἰπύ τε τεῖχος
Iliad 6.328	μαρνάμενοι· σέο δʼ εἵνεκʼ ἀϋτή τε πτόλεμός τε
Iliad 6.329	ἄστυ τόδʼ ἀμφιδέδηε· σὺ δʼ ἂν μαχέσαιο καὶ ἄλλῳ,
Iliad 6.330	ὅν τινά που μεθιέντα ἴδοις στυγεροῦ πολέμοιο.
Iliad 6.331	ἀλλʼ ἄνα μὴ τάχα ἄστυ πυρὸς δηΐοιο θέρηται.
Iliad 6.332	τὸν δʼ αὖτε προσέειπεν Ἀλέξανδρος θεοειδής·
Iliad 6.333	Ἕκτορ ἐπεί με κατʼ αἶσαν ἐνείκεσας οὐδʼ ὑπὲρ αἶσαν,
Iliad 6.334	τοὔνεκά τοι ἐρέω· σὺ δὲ σύνθεο καί μευ ἄκουσον·
Iliad 6.335	οὔ τοι ἐγὼ Τρώων τόσσον χόλῳ οὐδὲ νεμέσσι
Iliad 6.336	ἥμην ἐν θαλάμῳ, ἔθελον δʼ ἄχεϊ προτραπέσθαι.
Iliad 6.337	νῦν δέ με παρειποῦσʼ ἄλοχος μαλακοῖς ἐπέεσσιν
Iliad 6.338	ὅρμησʼ ἐς πόλεμον· δοκέει δέ μοι ὧδε καὶ αὐτῷ
Iliad 6.339	λώϊον ἔσσεσθαι· νίκη δʼ ἐπαμείβεται ἄνδρας.
Iliad 6.340	ἀλλʼ ἄγε νῦν ἐπίμεινον, Ἀρήϊα τεύχεα δύω·
Iliad 6.341	ἢ ἴθʼ, ἐγὼ δὲ μέτειμι· κιχήσεσθαι δέ σʼ ὀΐω.
Iliad 6.342	ὣς φάτο, τὸν δʼ οὔ τι προσέφη κορυθαίολος Ἕκτωρ·
Iliad 6.343	τὸν δʼ Ἑλένη μύθοισι προσηύδα μειλιχίοισι·
Iliad 6.344	δᾶερ ἐμεῖο κυνὸς κακομηχάνου ὀκρυοέσσης,
Iliad 6.345	ὥς μʼ ὄφελʼ ἤματι τῷ ὅτε με πρῶτον τέκε μήτηρ
Iliad 6.346	οἴχεσθαι προφέρουσα κακὴ ἀνέμοιο θύελλα
Iliad 6.347	εἰς ὄρος ἢ εἰς κῦμα πολυφλοίσβοιο θαλάσσης,
Iliad 6.348	ἔνθά με κῦμʼ ἀπόερσε πάρος τάδε ἔργα γενέσθαι.
Iliad 6.349	αὐτὰρ ἐπεὶ τάδε γʼ ὧδε θεοὶ κακὰ τεκμήραντο,
Iliad 6.350	ἀνδρὸς ἔπειτʼ ὤφελλον ἀμείνονος εἶναι ἄκοιτις,
Iliad 6.351	ὃς ᾔδη νέμεσίν τε καὶ αἴσχεα πόλλʼ ἀνθρώπων.
Iliad 6.352	τούτῳ δʼ οὔτʼ ἂρ νῦν φρένες ἔμπεδοι οὔτʼ ἄρʼ ὀπίσσω
Iliad 6.353	ἔσσονται· τὼ καί μιν ἐπαυρήσεσθαι ὀΐω.
Iliad 6.354	ἀλλʼ ἄγε νῦν εἴσελθε καὶ ἕζεο τῷδʼ ἐπὶ δίφρῳ
Iliad 6.355	δᾶερ, ἐπεί σε μάλιστα πόνος φρένας ἀμφιβέβηκεν
Iliad 6.356	εἵνεκʼ ἐμεῖο κυνὸς καὶ Ἀλεξάνδρου ἕνεκʼ ἄτης,
Iliad 6.357	οἷσιν ἐπὶ Ζεὺς θῆκε κακὸν μόρον, ὡς καὶ ὀπίσσω
Iliad 6.358	ἀνθρώποισι πελώμεθʼ ἀοίδιμοι ἐσσομένοισι.
Iliad 6.359	τὴν δʼ ἠμείβετʼ ἔπειτα μέγας κορυθαίολος Ἕκτωρ
Iliad 6.360	μή με κάθιζʼ Ἑλένη φιλέουσά περ· οὐδέ με πείσεις·
Iliad 6.361	ἤδη γάρ μοι θυμὸς ἐπέσσυται ὄφρʼ ἐπαμύνω
Iliad 6.362	Τρώεσσʼ, οἳ μέγʼ ἐμεῖο ποθὴν ἀπεόντος ἔχουσιν.
Iliad 6.363	ἀλλὰ σύ γʼ ὄρνυθι τοῦτον, ἐπειγέσθω δὲ καὶ αὐτός,
Iliad 6.364	ὥς κεν ἔμʼ ἔντοσθεν πόλιος καταμάρψῃ ἐόντα.
Iliad 6.365	καὶ γὰρ ἐγὼν οἶκον δὲ ἐλεύσομαι ὄφρα ἴδωμαι
Iliad 6.366	οἰκῆας ἄλοχόν τε φίλην καὶ νήπιον υἱόν.
Iliad 6.367	οὐ γὰρ οἶδʼ εἰ ἔτι σφιν ὑπότροπος ἵξομαι αὖτις,
Iliad 6.368	ἦ ἤδη μʼ ὑπὸ χερσὶ θεοὶ δαμόωσιν Ἀχαιῶν.
Iliad 6.369	ὣς ἄρα φωνήσας ἀπέβη κορυθαίολος Ἕκτωρ·
Iliad 6.370	αἶψα δʼ ἔπειθʼ ἵκανε δόμους εὖ ναιετάοντας,
Iliad 6.371	οὐδʼ εὗρʼ Ἀνδρομάχην λευκώλενον ἐν μεγάροισιν,
Iliad 6.372	ἀλλʼ ἥ γε ξὺν παιδὶ καὶ ἀμφιπόλῳ ἐϋπέπλῳ
Iliad 6.373	πύργῳ ἐφεστήκει γοόωσά τε μυρομένη τε.
Iliad 6.374	Ἕκτωρ δʼ ὡς οὐκ ἔνδον ἀμύμονα τέτμεν ἄκοιτιν
Iliad 6.375	ἔστη ἐπʼ οὐδὸν ἰών, μετὰ δὲ δμῳῇσιν ἔειπεν·
Iliad 6.376	εἰ δʼ ἄγε μοι δμῳαὶ νημερτέα μυθήσασθε·
Iliad 6.377	πῇ ἔβη Ἀνδρομάχη λευκώλενος ἐκ μεγάροιο;
Iliad 6.378	ἠέ πῃ ἐς γαλόων ἢ εἰνατέρων ἐϋπέπλων
Iliad 6.379	ἢ ἐς Ἀθηναίης ἐξοίχεται, ἔνθά περ ἄλλαι
Iliad 6.380	Τρῳαὶ ἐϋπλόκαμοι δεινὴν θεὸν ἱλάσκονται;
Iliad 6.381	τὸν δʼ αὖτʼ ὀτρηρὴ ταμίη πρὸς μῦθον ἔειπεν·
Iliad 6.382	Ἕκτορ ἐπεὶ μάλʼ ἄνωγας ἀληθέα μυθήσασθαι,
Iliad 6.383	οὔτέ πῃ ἐς γαλόων οὔτʼ εἰνατέρων ἐϋπέπλων
Iliad 6.384	οὔτʼ ἐς Ἀθηναίης ἐξοίχεται, ἔνθά περ ἄλλαι
Iliad 6.385	Τρῳαὶ ἐϋπλόκαμοι δεινὴν θεὸν ἱλάσκονται,
Iliad 6.386	ἀλλʼ ἐπὶ πύργον ἔβη μέγαν Ἰλίου, οὕνεκʼ ἄκουσε
Iliad 6.387	τείρεσθαι Τρῶας, μέγα δὲ κράτος εἶναι Ἀχαιῶν.
Iliad 6.388	ἣ μὲν δὴ πρὸς τεῖχος ἐπειγομένη ἀφικάνει
Iliad 6.389	μαινομένῃ ἐϊκυῖα· φέρει δʼ ἅμα παῖδα τιθήνη.
Iliad 6.390	ἦ ῥα γυνὴ ταμίη, ὃ δʼ ἀπέσσυτο δώματος Ἕκτωρ
Iliad 6.391	τὴν αὐτὴν ὁδὸν αὖτις ἐϋκτιμένας κατʼ ἀγυιάς.
Iliad 6.392	εὖτε πύλας ἵκανε διερχόμενος μέγα ἄστυ
Iliad 6.393	Σκαιάς, τῇ ἄρʼ ἔμελλε διεξίμεναι πεδίον δέ,
Iliad 6.394	ἔνθʼ ἄλοχος πολύδωρος ἐναντίη ἦλθε θέουσα
Iliad 6.395	Ἀνδρομάχη θυγάτηρ μεγαλήτορος Ἠετίωνος
Iliad 6.396	Ἠετίων ὃς ἔναιεν ὑπὸ Πλάκῳ ὑληέσσῃ
Iliad 6.397	Θήβῃ Ὑποπλακίῃ Κιλίκεσσʼ ἄνδρεσσιν ἀνάσσων·
Iliad 6.398	τοῦ περ δὴ θυγάτηρ ἔχεθʼ Ἕκτορι χαλκοκορυστῇ.
Iliad 6.399	ἥ οἱ ἔπειτʼ ἤντησʼ, ἅμα δʼ ἀμφίπολος κίεν αὐτῇ
Iliad 6.400	παῖδʼ ἐπὶ κόλπῳ ἔχουσʼ ἀταλάφρονα νήπιον αὔτως
Iliad 6.401	Ἑκτορίδην ἀγαπητὸν ἀλίγκιον ἀστέρι καλῷ,
Iliad 6.402	τόν ῥʼ Ἕκτωρ καλέεσκε Σκαμάνδριον, αὐτὰρ οἱ ἄλλοι
Iliad 6.403	Ἀστυάνακτʼ· οἶος γὰρ ἐρύετο Ἴλιον Ἕκτωρ.
Iliad 6.404	ἤτοι ὃ μὲν μείδησεν ἰδὼν ἐς παῖδα σιωπῇ·
Iliad 6.405	Ἀνδρομάχη δέ οἱ ἄγχι παρίστατο δάκρυ χέουσα,
Iliad 6.406	ἔν τʼ ἄρα οἱ φῦ χειρὶ ἔπος τʼ ἔφατʼ ἔκ τʼ ὀνόμαζε·
Iliad 6.407	δαιμόνιε φθίσει σε τὸ σὸν μένος, οὐδʼ ἐλεαίρεις
Iliad 6.408	παῖδά τε νηπίαχον καὶ ἔμʼ ἄμμορον, ἣ τάχα χήρη
Iliad 6.409	σεῦ ἔσομαι· τάχα γάρ σε κατακτανέουσιν Ἀχαιοὶ
Iliad 6.410	πάντες ἐφορμηθέντες· ἐμοὶ δέ κε κέρδιον εἴη
Iliad 6.411	σεῦ ἀφαμαρτούσῃ χθόνα δύμεναι· οὐ γὰρ ἔτʼ ἄλλη
Iliad 6.412	ἔσται θαλπωρὴ ἐπεὶ ἂν σύ γε πότμον ἐπίσπῃς
Iliad 6.413	ἀλλʼ ἄχεʼ· οὐδέ μοι ἔστι πατὴρ καὶ πότνια μήτηρ.
Iliad 6.414	ἤτοι γὰρ πατέρʼ ἁμὸν ἀπέκτανε δῖος Ἀχιλλεύς,
Iliad 6.415	ἐκ δὲ πόλιν πέρσεν Κιλίκων εὖ ναιετάουσαν
Iliad 6.416	Θήβην ὑψίπυλον· κατὰ δʼ ἔκτανεν Ἠετίωνα,
Iliad 6.417	οὐδέ μιν ἐξενάριξε, σεβάσσατο γὰρ τό γε θυμῷ,
Iliad 6.418	ἀλλʼ ἄρα μιν κατέκηε σὺν ἔντεσι δαιδαλέοισιν
Iliad 6.419	ἠδʼ ἐπὶ σῆμʼ ἔχεεν· περὶ δὲ πτελέας ἐφύτευσαν
Iliad 6.420	νύμφαι ὀρεστιάδες κοῦραι Διὸς αἰγιόχοιο.
Iliad 6.421	οἳ δέ μοι ἑπτὰ κασίγνητοι ἔσαν ἐν μεγάροισιν
Iliad 6.422	οἳ μὲν πάντες ἰῷ κίον ἤματι Ἄϊδος εἴσω·
Iliad 6.423	πάντας γὰρ κατέπεφνε ποδάρκης δῖος Ἀχιλλεὺς
Iliad 6.424	βουσὶν ἐπʼ εἰλιπόδεσσι καὶ ἀργεννῇς ὀΐεσσι.
Iliad 6.425	μητέρα δʼ, ἣ βασίλευεν ὑπὸ Πλάκῳ ὑληέσσῃ,
Iliad 6.426	τὴν ἐπεὶ ἂρ δεῦρʼ ἤγαγʼ ἅμʼ ἄλλοισι κτεάτεσσιν,
Iliad 6.427	ἂψ ὅ γε τὴν ἀπέλυσε λαβὼν ἀπερείσιʼ ἄποινα,
Iliad 6.428	πατρὸς δʼ ἐν μεγάροισι βάλʼ Ἄρτεμις ἰοχέαιρα.
Iliad 6.429	Ἕκτορ ἀτὰρ σύ μοί ἐσσι πατὴρ καὶ πότνια μήτηρ
Iliad 6.430	ἠδὲ κασίγνητος, σὺ δέ μοι θαλερὸς παρακοίτης·
Iliad 6.431	ἀλλʼ ἄγε νῦν ἐλέαιρε καὶ αὐτοῦ μίμνʼ ἐπὶ πύργῳ,
Iliad 6.432	μὴ παῖδʼ ὀρφανικὸν θήῃς χήρην τε γυναῖκα·
Iliad 6.433	λαὸν δὲ στῆσον παρʼ ἐρινεόν, ἔνθα μάλιστα
Iliad 6.434	ἀμβατός ἐστι πόλις καὶ ἐπίδρομον ἔπλετο τεῖχος.
Iliad 6.435	τρὶς γὰρ τῇ γʼ ἐλθόντες ἐπειρήσανθʼ οἱ ἄριστοι
Iliad 6.436	ἀμφʼ Αἴαντε δύω καὶ ἀγακλυτὸν Ἰδομενῆα
Iliad 6.437	ἠδʼ ἀμφʼ Ἀτρεΐδας καὶ Τυδέος ἄλκιμον υἱόν·
Iliad 6.438	ἤ πού τίς σφιν ἔνισπε θεοπροπίων ἐῢ εἰδώς,
Iliad 6.439	ἤ νυ καὶ αὐτῶν θυμὸς ἐποτρύνει καὶ ἀνώγει.
Iliad 6.440	τὴν δʼ αὖτε προσέειπε μέγας κορυθαίολος Ἕκτωρ·
Iliad 6.441	ἦ καὶ ἐμοὶ τάδε πάντα μέλει γύναι· ἀλλὰ μάλʼ αἰνῶς
Iliad 6.442	αἰδέομαι Τρῶας καὶ Τρῳάδας ἑλκεσιπέπλους,
Iliad 6.443	αἴ κε κακὸς ὣς νόσφιν ἀλυσκάζω πολέμοιο·
Iliad 6.444	οὐδέ με θυμὸς ἄνωγεν, ἐπεὶ μάθον ἔμμεναι ἐσθλὸς
Iliad 6.445	αἰεὶ καὶ πρώτοισι μετὰ Τρώεσσι μάχεσθαι
Iliad 6.446	ἀρνύμενος πατρός τε μέγα κλέος ἠδʼ ἐμὸν αὐτοῦ.
Iliad 6.447	εὖ γὰρ ἐγὼ τόδε οἶδα κατὰ φρένα καὶ κατὰ θυμόν·
Iliad 6.448	ἔσσεται ἦμαρ ὅτʼ ἄν ποτʼ ὀλώλῃ Ἴλιος ἱρὴ
Iliad 6.449	καὶ Πρίαμος καὶ λαὸς ἐϋμμελίω Πριάμοιο.
Iliad 6.450	ἀλλʼ οὔ μοι Τρώων τόσσον μέλει ἄλγος ὀπίσσω,
Iliad 6.451	οὔτʼ αὐτῆς Ἑκάβης οὔτε Πριάμοιο ἄνακτος
Iliad 6.452	οὔτε κασιγνήτων, οἵ κεν πολέες τε καὶ ἐσθλοὶ
Iliad 6.453	ἐν κονίῃσι πέσοιεν ὑπʼ ἀνδράσι δυσμενέεσσιν,
Iliad 6.454	ὅσσον σεῦ, ὅτε κέν τις Ἀχαιῶν χαλκοχιτώνων
Iliad 6.455	δακρυόεσσαν ἄγηται ἐλεύθερον ἦμαρ ἀπούρας·
Iliad 6.456	καί κεν ἐν Ἄργει ἐοῦσα πρὸς ἄλλης ἱστὸν ὑφαίνοις,
Iliad 6.457	καί κεν ὕδωρ φορέοις Μεσσηΐδος ἢ Ὑπερείης
Iliad 6.458	πόλλʼ ἀεκαζομένη, κρατερὴ δʼ ἐπικείσετʼ ἀνάγκη·
Iliad 6.459	καί ποτέ τις εἴπῃσιν ἰδὼν κατὰ δάκρυ χέουσαν·
Iliad 6.460	Ἕκτορος ἥδε γυνὴ ὃς ἀριστεύεσκε μάχεσθαι
Iliad 6.461	Τρώων ἱπποδάμων ὅτε Ἴλιον ἀμφεμάχοντο.
Iliad 6.462	ὥς ποτέ τις ἐρέει· σοὶ δʼ αὖ νέον ἔσσεται ἄλγος
Iliad 6.463	χήτεϊ τοιοῦδʼ ἀνδρὸς ἀμύνειν δούλιον ἦμαρ.
Iliad 6.464	ἀλλά με τεθνηῶτα χυτὴ κατὰ γαῖα καλύπτοι
Iliad 6.465	πρίν γέ τι σῆς τε βοῆς σοῦ θʼ ἑλκηθμοῖο πυθέσθαι.
Iliad 6.466	ὣς εἰπὼν οὗ παιδὸς ὀρέξατο φαίδιμος Ἕκτωρ·
Iliad 6.467	ἂψ δʼ ὃ πάϊς πρὸς κόλπον ἐϋζώνοιο τιθήνης
Iliad 6.468	ἐκλίνθη ἰάχων πατρὸς φίλου ὄψιν ἀτυχθεὶς
Iliad 6.469	ταρβήσας χαλκόν τε ἰδὲ λόφον ἱππιοχαίτην,
Iliad 6.470	δεινὸν ἀπʼ ἀκροτάτης κόρυθος νεύοντα νοήσας.
Iliad 6.471	ἐκ δʼ ἐγέλασσε πατήρ τε φίλος καὶ πότνια μήτηρ·
Iliad 6.472	αὐτίκʼ ἀπὸ κρατὸς κόρυθʼ εἵλετο φαίδιμος Ἕκτωρ,
Iliad 6.473	καὶ τὴν μὲν κατέθηκεν ἐπὶ χθονὶ παμφανόωσαν·
Iliad 6.474	αὐτὰρ ὅ γʼ ὃν φίλον υἱὸν ἐπεὶ κύσε πῆλέ τε χερσὶν
Iliad 6.475	εἶπε δʼ ἐπευξάμενος Διί τʼ ἄλλοισίν τε θεοῖσι·
Iliad 6.476	Ζεῦ ἄλλοι τε θεοὶ δότε δὴ καὶ τόνδε γενέσθαι
Iliad 6.477	παῖδʼ ἐμὸν ὡς καὶ ἐγώ περ ἀριπρεπέα Τρώεσσιν,
Iliad 6.478	ὧδε βίην τʼ ἀγαθόν, καὶ Ἰλίου ἶφι ἀνάσσειν·
Iliad 6.479	καί ποτέ τις εἴποι πατρός γʼ ὅδε πολλὸν ἀμείνων
Iliad 6.480	ἐκ πολέμου ἀνιόντα· φέροι δʼ ἔναρα βροτόεντα
Iliad 6.481	κτείνας δήϊον ἄνδρα, χαρείη δὲ φρένα μήτηρ.
Iliad 6.482	ὣς εἰπὼν ἀλόχοιο φίλης ἐν χερσὶν ἔθηκε
Iliad 6.483	παῖδʼ ἑόν· ἣ δʼ ἄρα μιν κηώδεϊ δέξατο κόλπῳ
Iliad 6.484	δακρυόεν γελάσασα· πόσις δʼ ἐλέησε νοήσας,
Iliad 6.485	χειρί τέ μιν κατέρεξεν ἔπος τʼ ἔφατʼ ἔκ τʼ ὀνόμαζε·
Iliad 6.486	δαιμονίη μή μοί τι λίην ἀκαχίζεο θυμῷ·
Iliad 6.487	οὐ γάρ τίς μʼ ὑπὲρ αἶσαν ἀνὴρ Ἄϊδι προϊάψει·
Iliad 6.488	μοῖραν δʼ οὔ τινά φημι πεφυγμένον ἔμμεναι ἀνδρῶν,
Iliad 6.489	οὐ κακὸν οὐδὲ μὲν ἐσθλόν, ἐπὴν τὰ πρῶτα γένηται.
Iliad 6.490	ἀλλʼ εἰς οἶκον ἰοῦσα τὰ σʼ αὐτῆς ἔργα κόμιζε
Iliad 6.491	ἱστόν τʼ ἠλακάτην τε, καὶ ἀμφιπόλοισι κέλευε
Iliad 6.492	ἔργον ἐποίχεσθαι· πόλεμος δʼ ἄνδρεσσι μελήσει
Iliad 6.493	πᾶσι, μάλιστα δʼ ἐμοί, τοὶ Ἰλίῳ ἐγγεγάασιν.
Iliad 6.494	ὣς ἄρα φωνήσας κόρυθʼ εἵλετο φαίδιμος Ἕκτωρ
Iliad 6.495	ἵππουριν· ἄλοχος δὲ φίλη οἶκον δὲ βεβήκει
Iliad 6.496	ἐντροπαλιζομένη, θαλερὸν κατὰ δάκρυ χέουσα.
Iliad 6.497	αἶψα δʼ ἔπειθʼ ἵκανε δόμους εὖ ναιετάοντας
Iliad 6.498	Ἕκτορος ἀνδροφόνοιο, κιχήσατο δʼ ἔνδοθι πολλὰς
Iliad 6.499	ἀμφιπόλους, τῇσιν δὲ γόον πάσῃσιν ἐνῶρσεν.
Iliad 6.500	αἳ μὲν ἔτι ζωὸν γόον Ἕκτορα ᾧ ἐνὶ οἴκῳ·
Iliad 6.501	οὐ γάρ μιν ἔτʼ ἔφαντο ὑπότροπον ἐκ πολέμοιο
Iliad 6.502	ἵξεσθαι προφυγόντα μένος καὶ χεῖρας Ἀχαιῶν.
Iliad 6.503	οὐδὲ Πάρις δήθυνεν ἐν ὑψηλοῖσι δόμοισιν,
Iliad 6.504	ἀλλʼ ὅ γʼ, ἐπεὶ κατέδυ κλυτὰ τεύχεα ποικίλα χαλκῷ,
Iliad 6.505	σεύατʼ ἔπειτʼ ἀνὰ ἄστυ ποσὶ κραιπνοῖσι πεποιθώς.
Iliad 6.506	ὡς δʼ ὅτε τις στατὸς ἵππος ἀκοστήσας ἐπὶ φάτνῃ
Iliad 6.507	δεσμὸν ἀπορρήξας θείῃ πεδίοιο κροαίνων
Iliad 6.508	εἰωθὼς λούεσθαι ἐϋρρεῖος ποταμοῖο
Iliad 6.509	κυδιόων· ὑψοῦ δὲ κάρη ἔχει, ἀμφὶ δὲ χαῖται
Iliad 6.510	ὤμοις ἀΐσσονται· ὃ δʼ ἀγλαΐηφι πεποιθὼς
Iliad 6.511	ῥίμφά ἑ γοῦνα φέρει μετά τʼ ἤθεα καὶ νομὸν ἵππων·
Iliad 6.512	ὣς υἱὸς Πριάμοιο Πάρις κατὰ Περγάμου ἄκρης
Iliad 6.513	τεύχεσι παμφαίνων ὥς τʼ ἠλέκτωρ ἐβεβήκει
Iliad 6.514	καγχαλόων, ταχέες δὲ πόδες φέρον· αἶψα δʼ ἔπειτα
Iliad 6.515	Ἕκτορα δῖον ἔτετμεν ἀδελφεὸν εὖτʼ ἄρʼ ἔμελλε
Iliad 6.516	στρέψεσθʼ ἐκ χώρης ὅθι ᾗ ὀάριζε γυναικί.
Iliad 6.517	τὸν πρότερος προσέειπεν Ἀλέξανδρος θεοειδής·
Iliad 6.518	ἠθεῖʼ ἦ μάλα δή σε καὶ ἐσσύμενον κατερύκω
Iliad 6.519	δηθύνων, οὐδʼ ἦλθον ἐναίσιμον ὡς ἐκέλευες;
Iliad 6.520	τὸν δʼ ἀπαμειβόμενος προσέφη κορυθαίολος Ἕκτωρ·
Iliad 6.521	δαιμόνιʼ οὐκ ἄν τίς τοι ἀνὴρ ὃς ἐναίσιμος εἴη
Iliad 6.522	ἔργον ἀτιμήσειε μάχης, ἐπεὶ ἄλκιμός ἐσσι·
Iliad 6.523	ἀλλὰ ἑκὼν μεθιεῖς τε καὶ οὐκ ἐθέλεις· τὸ δʼ ἐμὸν κῆρ
Iliad 6.524	ἄχνυται ἐν θυμῷ, ὅθʼ ὑπὲρ σέθεν αἴσχεʼ ἀκούω
Iliad 6.525	πρὸς Τρώων, οἳ ἔχουσι πολὺν πόνον εἵνεκα σεῖο.
Iliad 6.526	ἀλλʼ ἴομεν· τὰ δʼ ὄπισθεν ἀρεσσόμεθʼ, αἴ κέ ποθι Ζεὺς
Iliad 6.527	δώῃ ἐπουρανίοισι θεοῖς αἰειγενέτῃσι
Iliad 6.528	κρητῆρα στήσασθαι ἐλεύθερον ἐν μεγάροισιν
Iliad 6.529	ἐκ Τροίης ἐλάσαντας ἐϋκνήμιδας Ἀχαιούς.
Iliad 7.1	ὣς εἰπὼν πυλέων ἐξέσσυτο φαίδιμος Ἕκτωρ,
Iliad 7.2	τῷ δʼ ἅμʼ Ἀλέξανδρος κίʼ ἀδελφεός· ἐν δʼ ἄρα θυμῷ
Iliad 7.3	ἀμφότεροι μέμασαν πολεμίζειν ἠδὲ μάχεσθαι.
Iliad 7.4	ὡς δὲ θεὸς ναύτῃσιν ἐελδομένοισιν ἔδωκεν
Iliad 7.5	οὖρον, ἐπεί κε κάμωσιν ἐϋξέστῃς ἐλάτῃσι
Iliad 7.6	πόντον ἐλαύνοντες, καμάτῳ δʼ ὑπὸ γυῖα λέλυνται,
Iliad 7.7	ὣς ἄρα τὼ Τρώεσσιν ἐελδομένοισι φανήτην.
Iliad 7.8	ἔνθʼ ἑλέτην ὃ μὲν υἱὸν Ἀρηϊθόοιο ἄνακτος
Iliad 7.9	Ἄρνῃ ναιετάοντα Μενέσθιον, ὃν κορυνήτης
Iliad 7.10	γείνατʼ Ἀρηΐθοος καὶ Φυλομέδουσα βοῶπις·
Iliad 7.11	Ἕκτωρ δʼ Ἠϊονῆα βάλʼ ἔγχεϊ ὀξυόεντι
Iliad 7.12	αὐχένʼ ὑπὸ στεφάνης εὐχάλκου, λύντο δὲ γυῖα.
Iliad 7.13	Γλαῦκος δʼ Ἱππολόχοιο πάϊς Λυκίων ἀγὸς ἀνδρῶν
Iliad 7.14	Ἰφίνοον βάλε δουρὶ κατὰ κρατερὴν ὑσμίνην
Iliad 7.15	Δεξιάδην ἵππων ἐπιάλμενον ὠκειάων
Iliad 7.16	ὦμον· ὃ δʼ ἐξ ἵππων χαμάδις πέσε, λύντο δὲ γυῖα.
Iliad 7.17	τοὺς δʼ ὡς οὖν ἐνόησε θεὰ γλαυκῶπις Ἀθήνη
Iliad 7.18	Ἀργείους ὀλέκοντας ἐνὶ κρατερῇ ὑσμίνῃ,
Iliad 7.19	βῆ ῥα κατʼ Οὐλύμποιο καρήνων ἀΐξασα
Iliad 7.20	Ἴλιον εἰς ἱερήν· τῇ δʼ ἀντίος ὄρνυτʼ Ἀπόλλων
Iliad 7.21	Περγάμου ἐκκατιδών, Τρώεσσι δὲ βούλετο νίκην·
Iliad 7.22	ἀλλήλοισι δὲ τώ γε συναντέσθην παρὰ φηγῷ.
Iliad 7.23	τὴν πρότερος προσέειπεν ἄναξ Διὸς υἱὸς Ἀπόλλων·
Iliad 7.24	τίπτε σὺ δʼ αὖ μεμαυῖα Διὸς θύγατερ μεγάλοιο
Iliad 7.25	ἦλθες ἀπʼ Οὐλύμποιο, μέγας δέ σε θυμὸς ἀνῆκεν;
Iliad 7.26	ἦ ἵνα δὴ Δαναοῖσι μάχης ἑτεραλκέα νίκην
Iliad 7.27	δῷς; ἐπεὶ οὔ τι Τρῶας ἀπολλυμένους ἐλεαίρεις.
Iliad 7.28	ἀλλʼ εἴ μοί τι πίθοιο τό κεν πολὺ κέρδιον εἴη·
Iliad 7.29	νῦν μὲν παύσωμεν πόλεμον καὶ δηϊοτῆτα
Iliad 7.30	σήμερον· ὕστερον αὖτε μαχήσοντʼ εἰς ὅ κε τέκμωρ
Iliad 7.31	Ἰλίου εὕρωσιν, ἐπεὶ ὣς φίλον ἔπλετο θυμῷ
Iliad 7.32	ὑμῖν ἀθανάτῃσι, διαπραθέειν τόδε ἄστυ.
Iliad 7.33	τὸν δʼ αὖτε προσέειπε θεὰ γλαυκῶπις Ἀθήνη·
Iliad 7.34	ὧδʼ ἔστω ἑκάεργε· τὰ γὰρ φρονέουσα καὶ αὐτὴ
Iliad 7.35	ἦλθον ἀπʼ Οὐλύμποιο μετὰ Τρῶας καὶ Ἀχαιούς.
Iliad 7.36	ἀλλʼ ἄγε πῶς μέμονας πόλεμον καταπαυσέμεν ἀνδρῶν;
Iliad 7.37	τὴν δʼ αὖτε προσέειπεν ἄναξ Διὸς υἱὸς Ἀπόλλων·
Iliad 7.38	Ἕκτορος ὄρσωμεν κρατερὸν μένος ἱπποδάμοιο,
Iliad 7.39	ἤν τινά που Δαναῶν προκαλέσσεται οἰόθεν οἶος
Iliad 7.40	ἀντίβιον μαχέσασθαι ἐν αἰνῇ δηϊοτῆτι,
Iliad 7.41	οἳ δέ κʼ ἀγασσάμενοι χαλκοκνήμιδες Ἀχαιοὶ
Iliad 7.42	οἶον ἐπόρσειαν πολεμίζειν Ἕκτορι δίῳ.
Iliad 7.43	ὣς ἔφατʼ, οὐδʼ ἀπίθησε θεὰ γλαυκῶπις Ἀθήνη.
Iliad 7.44	τῶν δʼ Ἕλενος Πριάμοιο φίλος παῖς σύνθετο θυμῷ
Iliad 7.45	βουλήν, ἥ ῥα θεοῖσιν ἐφήνδανε μητιόωσι·
Iliad 7.46	στῆ δὲ παρʼ Ἕκτορʼ ἰὼν καί μιν πρὸς μῦθον ἔειπεν·
Iliad 7.47	Ἕκτορ υἱὲ Πριάμοιο Διὶ μῆτιν ἀτάλαντε
Iliad 7.48	ἦ ῥά νύ μοί τι πίθοιο, κασίγνητος δέ τοί εἰμι·
Iliad 7.49	ἄλλους μὲν κάθισον Τρῶας καὶ πάντας Ἀχαιούς,
Iliad 7.50	αὐτὸς δὲ προκάλεσσαι Ἀχαιῶν ὅς τις ἄριστος
Iliad 7.51	ἀντίβιον μαχέσασθαι ἐν αἰνῇ δηϊοτῆτι·
Iliad 7.52	οὐ γάρ πώ τοι μοῖρα θανεῖν καὶ πότμον ἐπισπεῖν·
Iliad 7.53	ὣς γὰρ ἐγὼ ὄπʼ ἄκουσα θεῶν αἰειγενετάων.
Iliad 7.54	ὣς ἔφαθʼ, Ἕκτωρ δʼ αὖτε χάρη μέγα μῦθον ἀκούσας,
Iliad 7.55	καί ῥʼ ἐς μέσσον ἰὼν Τρώων ἀνέεργε φάλαγγας,
Iliad 7.56	μέσσου δουρὸς ἑλών· οἳ δʼ ἱδρύνθησαν ἅπαντες.
Iliad 7.57	κὰδ δʼ Ἀγαμέμνων εἷσεν ἐϋκνήμιδας Ἀχαιούς·
Iliad 7.58	κὰδ δʼ ἄρʼ Ἀθηναίη τε καὶ ἀργυρότοξος Ἀπόλλων
Iliad 7.59	ἑζέσθην ὄρνισιν ἐοικότες αἰγυπιοῖσι
Iliad 7.60	φηγῷ ἐφʼ ὑψηλῇ πατρὸς Διὸς αἰγιόχοιο
Iliad 7.61	ἀνδράσι τερπόμενοι· τῶν δὲ στίχες εἵατο πυκναὶ
Iliad 7.62	ἀσπίσι καὶ κορύθεσσι καὶ ἔγχεσι πεφρικυῖαι.
Iliad 7.63	οἵη δὲ Ζεφύροιο ἐχεύατο πόντον ἔπι φρὶξ
Iliad 7.64	ὀρνυμένοιο νέον, μελάνει δέ τε πόντος ὑπʼ αὐτῆς,
Iliad 7.65	τοῖαι ἄρα στίχες εἵατʼ Ἀχαιῶν τε Τρώων τε
Iliad 7.66	ἐν πεδίῳ· Ἕκτωρ δὲ μετʼ ἀμφοτέροισιν ἔειπε·
Iliad 7.67	κέκλυτέ μευ Τρῶες καὶ ἐϋκνήμιδες Ἀχαιοὶ
Iliad 7.68	ὄφρʼ εἴπω τά με θυμὸς ἐνὶ στήθεσσι κελεύει.
Iliad 7.69	ὅρκια μὲν Κρονίδης ὑψίζυγος οὐκ ἐτέλεσσεν,
Iliad 7.70	ἀλλὰ κακὰ φρονέων τεκμαίρεται ἀμφοτέροισιν
Iliad 7.71	εἰς ὅ κεν ἢ ὑμεῖς Τροίην εὔπυργον ἕλητε
Iliad 7.72	ἢ αὐτοὶ παρὰ νηυσὶ δαμείετε ποντοπόροισιν.
Iliad 7.73	ὑμῖν δʼ ἐν γὰρ ἔασιν ἀριστῆες Παναχαιῶν·
Iliad 7.74	τῶν νῦν ὅν τινα θυμὸς ἐμοὶ μαχέσασθαι ἀνώγει
Iliad 7.75	δεῦρʼ ἴτω ἐκ πάντων πρόμος ἔμμεναι Ἕκτορι δίῳ.
Iliad 7.76	ὧδε δὲ μυθέομαι, Ζεὺς δʼ ἄμμʼ ἐπιμάρτυρος ἔστω·
Iliad 7.77	εἰ μέν κεν ἐμὲ κεῖνος ἕλῃ ταναήκεϊ χαλκῷ,
Iliad 7.78	τεύχεα συλήσας φερέτω κοίλας ἐπὶ νῆας,
Iliad 7.79	σῶμα δὲ οἴκαδʼ ἐμὸν δόμεναι πάλιν, ὄφρα πυρός με
Iliad 7.80	Τρῶες καὶ Τρώων ἄλοχοι λελάχωσι θανόντα.
Iliad 7.81	εἰ δέ κʼ ἐγὼ τὸν ἕλω, δώῃ δέ μοι εὖχος Ἀπόλλων,
Iliad 7.82	τεύχεα σύλησας οἴσω προτὶ Ἴλιον ἱρήν,
Iliad 7.83	καὶ κρεμόω προτὶ νηὸν Ἀπόλλωνος ἑκάτοιο,
Iliad 7.84	τὸν δὲ νέκυν ἐπὶ νῆας ἐϋσσέλμους ἀποδώσω,
Iliad 7.85	ὄφρά ἑ ταρχύσωσι κάρη κομόωντες Ἀχαιοί,
Iliad 7.86	σῆμά τέ οἱ χεύωσιν ἐπὶ πλατεῖ Ἑλλησπόντῳ.
Iliad 7.87	καί ποτέ τις εἴπῃσι καὶ ὀψιγόνων ἀνθρώπων
Iliad 7.88	νηῒ πολυκλήϊδι πλέων ἐπὶ οἴνοπα πόντον·
Iliad 7.89	ἀνδρὸς μὲν τόδε σῆμα πάλαι κατατεθνηῶτος,
Iliad 7.90	ὅν ποτʼ ἀριστεύοντα κατέκτανε φαίδιμος Ἕκτωρ.
Iliad 7.91	ὥς ποτέ τις ἐρέει· τὸ δʼ ἐμὸν κλέος οὔ ποτʼ ὀλεῖται.
Iliad 7.92	ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ·
Iliad 7.93	αἴδεσθεν μὲν ἀνήνασθαι, δεῖσαν δʼ ὑποδέχθαι·
Iliad 7.94	ὀψὲ δὲ δὴ Μενέλαος ἀνίστατο καὶ μετέειπε
Iliad 7.95	νείκει ὀνειδίζων, μέγα δὲ στεναχίζετο θυμῷ·
Iliad 7.96	ὤ μοι ἀπειλητῆρες Ἀχαιΐδες οὐκέτʼ Ἀχαιοί·
Iliad 7.97	ἦ μὲν δὴ λώβη τάδε γʼ ἔσσεται αἰνόθεν αἰνῶς
Iliad 7.98	εἰ μή τις Δαναῶν νῦν Ἕκτορος ἀντίος εἶσιν.
Iliad 7.99	ἀλλʼ ὑμεῖς μὲν πάντες ὕδωρ καὶ γαῖα γένοισθε
Iliad 7.100	ἥμενοι αὖθι ἕκαστοι ἀκήριοι ἀκλεὲς αὔτως·
Iliad 7.101	τῷδε δʼ ἐγὼν αὐτὸς θωρήξομαι· αὐτὰρ ὕπερθε
Iliad 7.102	νίκης πείρατʼ ἔχονται ἐν ἀθανάτοισι θεοῖσιν.
Iliad 7.103	ὣς ἄρα φωνήσας κατεδύσετο τεύχεα καλά.
Iliad 7.104	ἔνθά κέ τοι Μενέλαε φάνη βιότοιο τελευτὴ
Iliad 7.105	Ἕκτορος ἐν παλάμῃσιν, ἐπεὶ πολὺ φέρτερος ἦεν,
Iliad 7.106	εἰ μὴ ἀναΐξαντες ἕλον βασιλῆες Ἀχαιῶν,
Iliad 7.107	αὐτός τʼ Ἀτρεΐδης εὐρὺ κρείων Ἀγαμέμνων
Iliad 7.108	δεξιτερῆς ἕλε χειρὸς ἔπος τʼ ἔφατʼ ἔκ τʼ ὀνόμαζεν·
Iliad 7.109	ἀφραίνεις Μενέλαε διοτρεφές, οὐδέ τί σε χρὴ
Iliad 7.110	ταύτης ἀφροσύνης· ἀνὰ δὲ σχέο κηδόμενός περ,
Iliad 7.111	μηδʼ ἔθελʼ ἐξ ἔριδος σεῦ ἀμείνονι φωτὶ μάχεσθαι
Iliad 7.112	Ἕκτορι Πριαμίδῃ, τόν τε στυγέουσι καὶ ἄλλοι.
Iliad 7.113	καὶ δʼ Ἀχιλεὺς τούτῳ γε μάχῃ ἔνι κυδιανείρῃ
Iliad 7.114	ἔρριγʼ ἀντιβολῆσαι, ὅ περ σέο πολλὸν ἀμείνων.
Iliad 7.115	ἀλλὰ σὺ μὲν νῦν ἵζευ ἰὼν μετὰ ἔθνος ἑταίρων,
Iliad 7.116	τούτῳ δὲ πρόμον ἄλλον ἀναστήσουσιν Ἀχαιοί.
Iliad 7.117	εἴ περ ἀδειής τʼ ἐστὶ καὶ εἰ μόθου ἔστʼ ἀκόρητος,
Iliad 7.118	φημί μιν ἀσπασίως γόνυ κάμψειν, αἴ κε φύγῃσι
Iliad 7.119	δηΐου ἐκ πολέμοιο καὶ αἰνῆς δηϊοτῆτος.
Iliad 7.120	ὣς εἰπὼν παρέπεισεν ἀδελφειοῦ φρένας ἥρως
Iliad 7.121	αἴσιμα παρειπών, ὃ δʼ ἐπείθετο· τοῦ μὲν ἔπειτα
Iliad 7.122	γηθόσυνοι θεράποντες ἀπʼ ὤμων τεύχεʼ ἕλοντο·
Iliad 7.123	Νέστωρ δʼ Ἀργείοισιν ἀνίστατο καὶ μετέειπεν·
Iliad 7.124	ὢ πόποι ἦ μέγα πένθος Ἀχαιΐδα γαῖαν ἱκάνει.
Iliad 7.125	ἦ κε μέγʼ οἰμώξειε γέρων ἱππηλάτα Πηλεὺς
Iliad 7.126	ἐσθλὸς Μυρμιδόνων βουληφόρος ἠδʼ ἀγορητής,
Iliad 7.127	ὅς ποτέ μʼ εἰρόμενος μέγʼ ἐγήθεεν ᾧ ἐνὶ οἴκῳ
Iliad 7.128	πάντων Ἀργείων ἐρέων γενεήν τε τόκον τε.
Iliad 7.129	τοὺς νῦν εἰ πτώσσοντας ὑφʼ Ἕκτορι πάντας ἀκούσαι,
Iliad 7.130	πολλά κεν ἀθανάτοισι φίλας ἀνὰ χεῖρας ἀείραι
Iliad 7.131	θυμὸν ἀπὸ μελέων δῦναι δόμον Ἄϊδος εἴσω.
Iliad 7.132	αἲ γὰρ Ζεῦ τε πάτερ καὶ Ἀθηναίη καὶ Ἄπολλον
Iliad 7.133	ἡβῷμʼ ὡς ὅτʼ ἐπʼ ὠκυρόῳ Κελάδοντι μάχοντο
Iliad 7.134	ἀγρόμενοι Πύλιοί τε καὶ Ἀρκάδες ἐγχεσίμωροι
Iliad 7.135	Φειᾶς πὰρ τείχεσσιν Ἰαρδάνου ἀμφὶ ῥέεθρα.
Iliad 7.136	τοῖσι δʼ Ἐρευθαλίων πρόμος ἵστατο ἰσόθεος φὼς
Iliad 7.137	τεύχεʼ ἔχων ὤμοισιν Ἀρηϊθόοιο ἄνακτος
Iliad 7.138	δίου Ἀρηϊθόου, τὸν ἐπίκλησιν κορυνήτην
Iliad 7.139	ἄνδρες κίκλησκον καλλίζωνοί τε γυναῖκες
Iliad 7.140	οὕνεκʼ ἄρʼ οὐ τόξοισι μαχέσκετο δουρί τε μακρῷ,
Iliad 7.141	ἀλλὰ σιδηρείῃ κορύνῃ ῥήγνυσκε φάλαγγας.
Iliad 7.142	τὸν Λυκόοργος ἔπεφνε δόλῳ, οὔ τι κράτεΐ γε,
Iliad 7.143	στεινωπῷ ἐν ὁδῷ ὅθʼ ἄρʼ οὐ κορύνη οἱ ὄλεθρον
Iliad 7.144	χραῖσμε σιδηρείη· πρὶν γὰρ Λυκόοργος ὑποφθὰς
Iliad 7.145	δουρὶ μέσον περόνησεν, ὃ δʼ ὕπτιος οὔδει ἐρείσθη·
Iliad 7.146	τεύχεα δʼ ἐξενάριξε, τά οἱ πόρε χάλκεος Ἄρης.
Iliad 7.147	καὶ τὰ μὲν αὐτὸς ἔπειτα φόρει μετὰ μῶλον Ἄρηος·
Iliad 7.148	αὐτὰρ ἐπεὶ Λυκόοργος ἐνὶ μεγάροισιν ἐγήρα,
Iliad 7.149	δῶκε δʼ Ἐρευθαλίωνι φίλῳ θεράποντι φορῆναι·
Iliad 7.150	τοῦ ὅ γε τεύχεʼ ἔχων προκαλίζετο πάντας ἀρίστους.
Iliad 7.151	οἳ δὲ μάλʼ ἐτρόμεον καὶ ἐδείδισαν, οὐδέ τις ἔτλη·
Iliad 7.152	ἀλλʼ ἐμὲ θυμὸς ἀνῆκε πολυτλήμων πολεμίζειν
Iliad 7.153	θάρσεϊ ᾧ· γενεῇ δὲ νεώτατος ἔσκον ἁπάντων·
Iliad 7.154	καὶ μαχόμην οἱ ἐγώ, δῶκεν δέ μοι εὖχος Ἀθήνη.
Iliad 7.155	τὸν δὴ μήκιστον καὶ κάρτιστον κτάνον ἄνδρα·
Iliad 7.156	πολλὸς γάρ τις ἔκειτο παρήορος ἔνθα καὶ ἔνθα.
Iliad 7.157	εἴθʼ ὣς ἡβώοιμι, βίη δέ μοι ἔμπεδος εἴη·
Iliad 7.158	τώ κε τάχʼ ἀντήσειε μάχης κορυθαίολος Ἕκτωρ.
Iliad 7.159	ὑμέων δʼ οἵ περ ἔασιν ἀριστῆες Παναχαιῶν
Iliad 7.160	οὐδʼ οἳ προφρονέως μέμαθʼ Ἕκτορος ἀντίον ἐλθεῖν.
Iliad 7.161	ὣς νείκεσσʼ ὃ γέρων, οἳ δʼ ἐννέα πάντες ἀνέσταν.
Iliad 7.162	ὦρτο πολὺ πρῶτος μὲν ἄναξ ἀνδρῶν Ἀγαμέμνων,
Iliad 7.163	τῷ δʼ ἐπὶ Τυδεΐδης ὦρτο κρατερὸς Διομήδης,
Iliad 7.164	τοῖσι δʼ ἐπʼ Αἴαντες θοῦριν ἐπιειμένοι ἀλκήν,
Iliad 7.165	τοῖσι δʼ ἐπʼ Ἰδομενεὺς καὶ ὀπάων Ἰδομενῆος
Iliad 7.166	Μηριόνης ἀτάλαντος Ἐνυαλίῳ ἀνδρειφόντῃ,
Iliad 7.167	τοῖσι δʼ ἐπʼ Εὐρύπυλος Εὐαίμονος ἀγλαὸς υἱός,
Iliad 7.168	ἂν δὲ Θόας Ἀνδραιμονίδης καὶ δῖος Ὀδυσσεύς·
Iliad 7.169	πάντες ἄρʼ οἵ γʼ ἔθελον πολεμίζειν Ἕκτορι δίῳ.
Iliad 7.170	τοῖς δʼ αὖτις μετέειπε Γερήνιος ἱππότα Νέστωρ·
Iliad 7.171	κλήρῳ νῦν πεπάλασθε διαμπερὲς ὅς κε λάχῃσιν·
Iliad 7.172	οὗτος γὰρ δὴ ὀνήσει ἐϋκνήμιδας Ἀχαιούς,
Iliad 7.173	καὶ δʼ αὐτὸς ὃν θυμὸν ὀνήσεται αἴ κε φύγῃσι
Iliad 7.174	δηΐου ἐκ πολέμοιο καὶ αἰνῆς δηϊοτῆτος.
Iliad 7.175	ὣς ἔφαθʼ, οἳ δὲ κλῆρον ἐσημήναντο ἕκαστος,
Iliad 7.176	ἐν δʼ ἔβαλον κυνέῃ Ἀγαμέμνονος Ἀτρεΐδαο.
Iliad 7.177	λαοὶ δʼ ἠρήσαντο, θεοῖσι δὲ χεῖρας ἀνέσχον·
Iliad 7.178	ὧδε δέ τις εἴπεσκεν ἰδὼν εἰς οὐρανὸν εὐρύν·
Iliad 7.179	Ζεῦ πάτερ ἢ Αἴαντα λαχεῖν, ἢ Τυδέος υἱόν,
Iliad 7.180	ἢ αὐτὸν βασιλῆα πολυχρύσοιο Μυκήνης.
Iliad 7.181	ὣς ἄρʼ ἔφαν, πάλλεν δὲ Γερήνιος ἱππότα Νέστωρ,
Iliad 7.182	ἐκ δʼ ἔθορε κλῆρος κυνέης ὃν ἄρʼ ἤθελον αὐτοὶ
Iliad 7.183	Αἴαντος· κῆρυξ δὲ φέρων ἀνʼ ὅμιλον ἁπάντῃ
Iliad 7.184	δεῖξʼ ἐνδέξια πᾶσιν ἀριστήεσσιν Ἀχαιῶν.
Iliad 7.185	οἳ δʼ οὐ γιγνώσκοντες ἀπηνήναντο ἕκαστος.
Iliad 7.186	ἀλλʼ ὅτε δὴ τὸν ἵκανε φέρων ἀνʼ ὅμιλον ἁπάντῃ
Iliad 7.187	ὅς μιν ἐπιγράψας κυνέῃ βάλε φαίδιμος Αἴας,
Iliad 7.188	ἤτοι ὑπέσχεθε χεῖρʼ, ὃ δʼ ἄρʼ ἔμβαλεν ἄγχι παραστάς,
Iliad 7.189	γνῶ δὲ κλήρου σῆμα ἰδών, γήθησε δὲ θυμῷ.
Iliad 7.190	τὸν μὲν πὰρ πόδʼ ἑὸν χαμάδις βάλε φώνησέν τε·
Iliad 7.191	ὦ φίλοι ἤτοι κλῆρος ἐμός, χαίρω δὲ καὶ αὐτὸς
Iliad 7.192	θυμῷ, ἐπεὶ δοκέω νικησέμεν Ἕκτορα δῖον.
Iliad 7.193	ἀλλʼ ἄγετʼ ὄφρʼ ἂν ἐγὼ πολεμήϊα τεύχεα δύω,
Iliad 7.194	τόφρʼ ὑμεῖς εὔχεσθε Διὶ Κρονίωνι ἄνακτι
Iliad 7.195	σιγῇ ἐφʼ ὑμείων ἵνα μὴ Τρῶές γε πύθωνται,
Iliad 7.196	ἠὲ καὶ ἀμφαδίην, ἐπεὶ οὔ τινα δείδιμεν ἔμπης·
Iliad 7.197	οὐ γάρ τίς με βίῃ γε ἑκὼν ἀέκοντα δίηται
Iliad 7.198	οὐδέ τι ἰδρείῃ, ἐπεὶ οὐδʼ ἐμὲ νήϊδά γʼ οὕτως
Iliad 7.199	ἔλπομαι ἐν Σαλαμῖνι γενέσθαι τε τραφέμεν τε.
Iliad 7.200	ὣς ἔφαθʼ, οἳ δʼ εὔχοντο Διὶ Κρονίωνι ἄνακτι·
Iliad 7.201	ὧδε δέ τις εἴπεσκεν ἰδὼν εἰς οὐρανὸν εὐρύν·
Iliad 7.202	Ζεῦ πάτερ Ἴδηθεν μεδέων κύδιστε μέγιστε
Iliad 7.203	δὸς νίκην Αἴαντι καὶ ἀγλαὸν εὖχος ἀρέσθαι·
Iliad 7.204	εἰ δὲ καὶ Ἕκτορά περ φιλέεις καὶ κήδεαι αὐτοῦ,
Iliad 7.205	ἴσην ἀμφοτέροισι βίην καὶ κῦδος ὄπασσον.
Iliad 7.206	ὣς ἄρʼ ἔφαν, Αἴας δὲ κορύσσετο νώροπι χαλκῷ.
Iliad 7.207	αὐτὰρ ἐπεὶ δὴ πάντα περὶ χροῒ ἕσσατο τεύχεα,
Iliad 7.208	σεύατʼ ἔπειθʼ οἷός τε πελώριος ἔρχεται Ἄρης,
Iliad 7.209	ὅς τʼ εἶσιν πόλεμον δὲ μετʼ ἀνέρας οὕς τε Κρονίων
Iliad 7.210	θυμοβόρου ἔριδος μένεϊ ξυνέηκε μάχεσθαι.
Iliad 7.211	τοῖος ἄρʼ Αἴας ὦρτο πελώριος ἕρκος Ἀχαιῶν
Iliad 7.212	μειδιόων βλοσυροῖσι προσώπασι· νέρθε δὲ ποσσὶν
Iliad 7.213	ἤϊε μακρὰ βιβάς, κραδάων δολιχόσκιον ἔγχος.
Iliad 7.214	τὸν δὲ καὶ Ἀργεῖοι μὲν ἐγήθεον εἰσορόωντες,
Iliad 7.215	Τρῶας δὲ τρόμος αἰνὸς ὑπήλυθε γυῖα ἕκαστον,
Iliad 7.216	Ἕκτορί τʼ αὐτῷ θυμὸς ἐνὶ στήθεσσι πάτασσεν·
Iliad 7.217	ἀλλʼ οὔ πως ἔτι εἶχεν ὑποτρέσαι οὐδʼ ἀναδῦναι
Iliad 7.218	ἂψ λαῶν ἐς ὅμιλον, ἐπεὶ προκαλέσσατο χάρμῃ.
Iliad 7.219	Αἴας δʼ ἐγγύθεν ἦλθε φέρων σάκος ἠΰτε πύργον
Iliad 7.220	χάλκεον ἑπταβόειον, ὅ οἱ Τυχίος κάμε τεύχων
Iliad 7.221	σκυτοτόμων ὄχʼ ἄριστος Ὕλῃ ἔνι οἰκία ναίων,
Iliad 7.222	ὅς οἱ ἐποίησεν σάκος αἰόλον ἑπταβόειον
Iliad 7.223	ταύρων ζατρεφέων, ἐπὶ δʼ ὄγδοον ἤλασε χαλκόν.
Iliad 7.224	τὸ πρόσθε στέρνοιο φέρων Τελαμώνιος Αἴας
Iliad 7.225	στῆ ῥα μάλʼ Ἕκτορος ἐγγύς, ἀπειλήσας δὲ προσηύδα·
Iliad 7.226	Ἕκτορ νῦν μὲν δὴ σάφα εἴσεαι οἰόθεν οἶος
Iliad 7.227	οἷοι καὶ Δαναοῖσιν ἀριστῆες μετέασι
Iliad 7.228	καὶ μετʼ Ἀχιλλῆα ῥηξήνορα θυμολέοντα.
Iliad 7.229	ἀλλʼ ὃ μὲν ἐν νήεσσι κορωνίσι ποντοπόροισι
Iliad 7.230	κεῖτʼ ἀπομηνίσας Ἀγαμέμνονι ποιμένι λαῶν·
Iliad 7.231	ἡμεῖς δʼ εἰμὲν τοῖοι οἳ ἂν σέθεν ἀντιάσαιμεν
Iliad 7.232	καὶ πολέες· ἀλλʼ ἄρχε μάχης ἠδὲ πτολέμοιο.
Iliad 7.233	τὸν δʼ αὖτε προσέειπε μέγας κορυθαίολος Ἕκτωρ·
Iliad 7.234	Αἶαν διογενὲς Τελαμώνιε κοίρανε λαῶν
Iliad 7.235	μή τί μευ ἠΰτε παιδὸς ἀφαυροῦ πειρήτιζε
Iliad 7.236	ἠὲ γυναικός, ἣ οὐκ οἶδεν πολεμήϊα ἔργα.
Iliad 7.237	αὐτὰρ ἐγὼν εὖ οἶδα μάχας τʼ ἀνδροκτασίας τε·
Iliad 7.238	οἶδʼ ἐπὶ δεξιά, οἶδʼ ἐπʼ ἀριστερὰ νωμῆσαι βῶν
Iliad 7.239	ἀζαλέην, τό μοι ἔστι ταλαύρινον πολεμίζειν·
Iliad 7.240	οἶδα δʼ ἐπαΐξαι μόθον ἵππων ὠκειάων·
Iliad 7.241	οἶδα δʼ ἐνὶ σταδίῃ δηΐῳ μέλπεσθαι Ἄρηϊ.
Iliad 7.242	ἀλλʼ οὐ γάρ σʼ ἐθέλω βαλέειν τοιοῦτον ἐόντα
Iliad 7.243	λάθρῃ ὀπιπεύσας, ἀλλʼ ἀμφαδόν, αἴ κε τύχωμι.
Iliad 7.244	ἦ ῥα, καὶ ἀμπεπαλὼν προΐει δολιχόσκιον ἔγχος,
Iliad 7.245	καὶ βάλεν Αἴαντος δεινὸν σάκος ἑπταβόειον
Iliad 7.246	ἀκρότατον κατὰ χαλκόν, ὃς ὄγδοος ἦεν ἐπʼ αὐτῷ.
Iliad 7.247	ἓξ δὲ διὰ πτύχας ἦλθε δαΐζων χαλκὸς ἀτειρής,
Iliad 7.248	ἐν τῇ δʼ ἑβδομάτῃ ῥινῷ σχέτο· δεύτερος αὖτε
Iliad 7.249	Αἴας διογενὴς προΐει δολιχόσκιον ἔγχος,
Iliad 7.250	καὶ βάλε Πριαμίδαο κατʼ ἀσπίδα πάντοσʼ ἐΐσην.
Iliad 7.251	διὰ μὲν ἀσπίδος ἦλθε φαεινῆς ὄβριμον ἔγχος,
Iliad 7.252	καὶ διὰ θώρηκος πολυδαιδάλου ἠρήρειστο·
Iliad 7.253	ἀντικρὺ δὲ παραὶ λαπάρην διάμησε χιτῶνα
Iliad 7.254	ἔγχος· ὃ δʼ ἐκλίνθη καὶ ἀλεύατο κῆρα μέλαιναν.
Iliad 7.255	τὼ δʼ ἐκσπασσαμένω δολίχʼ ἔγχεα χερσὶν ἅμʼ ἄμφω
Iliad 7.256	σύν ῥʼ ἔπεσον λείουσιν ἐοικότες ὠμοφάγοισιν
Iliad 7.257	ἢ συσὶ κάπροισιν, τῶν τε σθένος οὐκ ἀλαπαδνόν.
Iliad 7.258	Πριαμίδης μὲν ἔπειτα μέσον σάκος οὔτασε δουρί,
Iliad 7.259	οὐδʼ ἔρρηξεν χαλκός, ἀνεγνάμφθη δέ οἱ αἰχμή.
Iliad 7.260	Αἴας δʼ ἀσπίδα νύξεν ἐπάλμενος· ἣ δὲ διαπρὸ
Iliad 7.261	ἤλυθεν ἐγχείη, στυφέλιξε δέ μιν μεμαῶτα,
Iliad 7.262	τμήδην δʼ αὐχένʼ ἐπῆλθε, μέλαν δʼ ἀνεκήκιεν αἷμα,
Iliad 7.263	ἀλλʼ οὐδʼ ὧς ἀπέληγε μάχης κορυθαίολος Ἕκτωρ,
Iliad 7.264	ἀλλʼ ἀναχασσάμενος λίθον εἵλετο χειρὶ παχείῃ
Iliad 7.265	κείμενον ἐν πεδίῳ μέλανα τρηχύν τε μέγαν τε·
Iliad 7.266	τῷ βάλεν Αἴαντος δεινὸν σάκος ἑπταβόειον
Iliad 7.267	μέσσον ἐπομφάλιον· περιήχησεν δʼ ἄρα χαλκός.
Iliad 7.268	δεύτερος αὖτʼ Αἴας πολὺ μείζονα λᾶαν ἀείρας
Iliad 7.269	ἧκʼ ἐπιδινήσας, ἐπέρεισε δὲ ἶνʼ ἀπέλεθρον,
Iliad 7.270	εἴσω δʼ ἀσπίδʼ ἔαξε βαλὼν μυλοειδέϊ πέτρῳ,
Iliad 7.271	βλάψε δέ οἱ φίλα γούναθʼ· ὃ δʼ ὕπτιος ἐξετανύσθη
Iliad 7.272	ἀσπίδι ἐγχριμφθείς· τὸν δʼ αἶψʼ ὤρθωσεν Ἀπόλλων.
Iliad 7.273	καί νύ κε δὴ ξιφέεσσʼ αὐτοσχεδὸν οὐτάζοντο,
Iliad 7.274	εἰ μὴ κήρυκες Διὸς ἄγγελοι ἠδὲ καὶ ἀνδρῶν
Iliad 7.275	ἦλθον, ὃ μὲν Τρώων, ὃ δʼ Ἀχαιῶν χαλκοχιτώνων,
Iliad 7.276	Ταλθύβιός τε καὶ Ἰδαῖος πεπνυμένω ἄμφω·
Iliad 7.277	μέσσῳ δʼ ἀμφοτέρων σκῆπτρα σχέθον, εἶπέ τε μῦθον
Iliad 7.278	κῆρυξ Ἰδαῖος πεπνυμένα μήδεα εἰδώς·
Iliad 7.279	μηκέτι παῖδε φίλω πολεμίζετε μηδὲ μάχεσθον·
Iliad 7.280	ἀμφοτέρω γὰρ σφῶϊ φιλεῖ νεφεληγερέτα Ζεύς,
Iliad 7.281	ἄμφω δʼ αἰχμητά· τό γε δὴ καὶ ἴδμεν ἅπαντες.
Iliad 7.282	νὺξ δʼ ἤδη τελέθει· ἀγαθὸν καὶ νυκτὶ πιθέσθαι.
Iliad 7.283	τὸν δʼ ἀπαμειβόμενος προσέφη Τελαμώνιος Αἴας·
Iliad 7.284	Ἰδαῖʼ Ἕκτορα ταῦτα κελεύετε μυθήσασθαι·
Iliad 7.285	αὐτὸς γὰρ χάρμῃ προκαλέσσατο πάντας ἀρίστους.
Iliad 7.286	ἀρχέτω· αὐτὰρ ἐγὼ μάλα πείσομαι ᾗ περ ἂν οὗτος.
Iliad 7.287	τὸν δʼ αὖτε προσέειπε μέγας κορυθαίολος Ἕκτωρ·
Iliad 7.288	Αἶαν ἐπεί τοι δῶκε θεὸς μέγεθός τε βίην τε
Iliad 7.289	καὶ πινυτήν, περὶ δʼ ἔγχει Ἀχαιῶν φέρτατός ἐσσι,
Iliad 7.290	νῦν μὲν παυσώμεσθα μάχης καὶ δηϊοτῆτος
Iliad 7.291	σήμερον· ὕστερον αὖτε μαχησόμεθʼ εἰς ὅ κε δαίμων
Iliad 7.292	ἄμμε διακρίνῃ, δώῃ δʼ ἑτέροισί γε νίκην.
Iliad 7.293	νὺξ δʼ ἤδη τελέθει· ἀγαθὸν καὶ νυκτὶ πιθέσθαι,
Iliad 7.294	ὡς σύ τʼ ἐϋφρήνῃς πάντας παρὰ νηυσὶν Ἀχαιούς,
Iliad 7.295	σούς τε μάλιστα ἔτας καὶ ἑταίρους, οἵ τοι ἔασιν·
Iliad 7.296	αὐτὰρ ἐγὼ κατὰ ἄστυ μέγα Πριάμοιο ἄνακτος
Iliad 7.297	Τρῶας ἐϋφρανέω καὶ Τρῳάδας ἑλκεσιπέπλους,
Iliad 7.298	αἵ τέ μοι εὐχόμεναι θεῖον δύσονται ἀγῶνα.
Iliad 7.299	δῶρα δʼ ἄγʼ ἀλλήλοισι περικλυτὰ δώομεν ἄμφω,
Iliad 7.300	ὄφρά τις ὧδʼ εἴπῃσιν Ἀχαιῶν τε Τρώων τε·
Iliad 7.301	ἠμὲν ἐμαρνάσθην ἔριδος πέρι θυμοβόροιο,
Iliad 7.302	ἠδʼ αὖτʼ ἐν φιλότητι διέτμαγεν ἀρθμήσαντε.
Iliad 7.303	ὣς ἄρα φωνήσας δῶκε ξίφος ἀργυρόηλον
Iliad 7.304	σὺν κολεῷ τε φέρων καὶ ἐϋτμήτῳ τελαμῶνι·
Iliad 7.305	Αἴας δὲ ζωστῆρα δίδου φοίνικι φαεινόν.
Iliad 7.306	τὼ δὲ διακρινθέντε ὃ μὲν μετὰ λαὸν Ἀχαιῶν
Iliad 7.307	ἤϊʼ, ὃ δʼ ἐς Τρώων ὅμαδον κίε· τοὶ δὲ χάρησαν,
Iliad 7.308	ὡς εἶδον ζωόν τε καὶ ἀρτεμέα προσιόντα,
Iliad 7.309	Αἴαντος προφυγόντα μένος καὶ χεῖρας ἀάπτους·
Iliad 7.310	καί ῥʼ ἦγον προτὶ ἄστυ ἀελπτέοντες σόον εἶναι.
Iliad 7.311	Αἴαντʼ αὖθʼ ἑτέρωθεν ἐϋκνήμιδες Ἀχαιοὶ
Iliad 7.312	εἰς Ἀγαμέμνονα δῖον ἄγον κεχαρηότα νίκῃ.
Iliad 7.313	οἳ δʼ ὅτε δὴ κλισίῃσιν ἐν Ἀτρεΐδαο γένοντο,
Iliad 7.314	τοῖσι δὲ βοῦν ἱέρευσεν ἄναξ ἀνδρῶν Ἀγαμέμνων
Iliad 7.315	ἄρσενα πενταέτηρον ὑπερμενέϊ Κρονίωνι.
Iliad 7.316	τὸν δέρον ἀμφί θʼ ἕπον, καί μιν διέχευαν ἅπαντα,
Iliad 7.317	μίστυλλόν τʼ ἄρʼ ἐπισταμένως πεῖράν τʼ ὀβελοῖσιν,
Iliad 7.318	ὄπτησάν τε περιφραδέως, ἐρύσαντό τε πάντα.
Iliad 7.319	αὐτὰρ ἐπεὶ παύσαντο πόνου τετύκοντό τε δαῖτα,
Iliad 7.320	δαίνυντʼ, οὐδέ τι θυμὸς ἐδεύετο δαιτὸς ἐΐσης·
Iliad 7.321	νώτοισιν δʼ Αἴαντα διηνεκέεσσι γέραιρεν
Iliad 7.322	ἥρως Ἀτρεΐδης εὐρὺ κρείων Ἀγαμέμνων.
Iliad 7.323	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Iliad 7.324	τοῖς ὁ γέρων πάμπρωτος ὑφαίνειν ἤρχετο μῆτιν
Iliad 7.325	Νέστωρ, οὗ καὶ πρόσθεν ἀρίστη φαίνετο βουλή·
Iliad 7.326	ὅ σφιν ἐϋφρονέων ἀγορήσατο καὶ μετέειπεν·
Iliad 7.327	Ἀτρεΐδη τε καὶ ἄλλοι ἀριστῆες Παναχαιῶν,
Iliad 7.328	πολλοὶ γὰρ τεθνᾶσι κάρη κομόωντες Ἀχαιοί,
Iliad 7.329	τῶν νῦν αἷμα κελαινὸν ἐΰρροον ἀμφὶ Σκάμανδρον
Iliad 7.330	ἐσκέδασʼ ὀξὺς Ἄρης, ψυχαὶ δʼ Ἄϊδος δὲ κατῆλθον·
Iliad 7.331	τώ σε χρὴ πόλεμον μὲν ἅμʼ ἠοῖ παῦσαι Ἀχαιῶν,
Iliad 7.332	αὐτοὶ δʼ ἀγρόμενοι κυκλήσομεν ἐνθάδε νεκροὺς
Iliad 7.333	βουσὶ καὶ ἡμιόνοισιν· ἀτὰρ κατακήομεν αὐτοὺς
Iliad 7.334	τυτθὸν ἀπὸ πρὸ νεῶν, ὥς κʼ ὀστέα παισὶν ἕκαστος
Iliad 7.335	οἴκαδʼ ἄγῃ ὅτʼ ἂν αὖτε νεώμεθα πατρίδα γαῖαν.
Iliad 7.336	τύμβον δʼ ἀμφὶ πυρὴν ἕνα χεύομεν ἐξαγαγόντες
Iliad 7.337	ἄκριτον ἐκ πεδίου· ποτὶ δʼ αὐτὸν δείμομεν ὦκα
Iliad 7.338	πύργους ὑψηλοὺς εἶλαρ νηῶν τε καὶ αὐτῶν.
Iliad 7.339	ἐν δʼ αὐτοῖσι πύλας ποιήσομεν εὖ ἀραρυίας,
Iliad 7.340	ὄφρα διʼ αὐτάων ἱππηλασίη ὁδὸς εἴη·
Iliad 7.341	ἔκτοσθεν δὲ βαθεῖαν ὀρύξομεν ἐγγύθι τάφρον,
Iliad 7.342	ἥ χʼ ἵππον καὶ λαὸν ἐρυκάκοι ἀμφὶς ἐοῦσα,
Iliad 7.343	μή ποτʼ ἐπιβρίσῃ πόλεμος Τρώων ἀγερώχων.
Iliad 7.344	ὣς ἔφαθʼ, οἳ δʼ ἄρα πάντες ἐπῄνησαν βασιλῆες.
Iliad 7.345	Τρώων αὖτʼ ἀγορὴ γένετʼ Ἰλίου ἐν πόλει ἄκρῃ
Iliad 7.346	δεινὴ τετρηχυῖα, παρὰ Πριάμοιο θύρῃσι·
Iliad 7.347	τοῖσιν δʼ Ἀντήνωρ πεπνυμένος ἦρχʼ ἀγορεύειν·
Iliad 7.348	κέκλυτέ μευ Τρῶες καὶ Δάρδανοι ἠδʼ ἐπίκουροι,
Iliad 7.349	ὄφρʼ εἴπω τά με θυμὸς ἐνὶ στήθεσσι κελεύει.
Iliad 7.350	δεῦτʼ ἄγετʼ Ἀργείην Ἑλένην καὶ κτήμαθʼ ἅμʼ αὐτῇ
Iliad 7.351	δώομεν Ἀτρεΐδῃσιν ἄγειν· νῦν δʼ ὅρκια πιστὰ
Iliad 7.352	ψευσάμενοι μαχόμεσθα· τὼ οὔ νύ τι κέρδιον ἡμῖν
Iliad 7.353	ἔλπομαι ἐκτελέεσθαι, ἵνα μὴ ῥέξομεν ὧδε.
Iliad 7.354	ἤτοι ὅ γʼ ὣς εἰπὼν κατʼ ἄρʼ ἕζετο· τοῖσι δʼ ἀνέστη
Iliad 7.355	δῖος Ἀλέξανδρος Ἑλένης πόσις ἠϋκόμοιο,
Iliad 7.356	ὅς μιν ἀμειβόμενος ἔπεα πτερόεντα προσηύδα·
Iliad 7.357	Ἀντῆνορ σὺ μὲν οὐκέτʼ ἐμοὶ φίλα ταῦτʼ ἀγορεύεις·
Iliad 7.358	οἶσθα καὶ ἄλλον μῦθον ἀμείνονα τοῦδε νοῆσαι.
Iliad 7.359	εἰ δʼ ἐτεὸν δὴ τοῦτον ἀπὸ σπουδῆς ἀγορεύεις,
Iliad 7.360	ἐξ ἄρα δή τοι ἔπειτα θεοὶ φρένας ὤλεσαν αὐτοί.
Iliad 7.361	αὐτὰρ ἐγὼ Τρώεσσι μεθʼ ἱπποδάμοις ἀγορεύσω·
Iliad 7.362	ἀντικρὺ δʼ ἀπόφημι γυναῖκα μὲν οὐκ ἀποδώσω·
Iliad 7.363	κτήματα δʼ ὅσσʼ ἀγόμην ἐξ Ἄργεος ἡμέτερον δῶ
Iliad 7.364	πάντʼ ἐθέλω δόμεναι καὶ οἴκοθεν ἄλλʼ ἐπιθεῖναι.
Iliad 7.365	ἤτοι ὅ γʼ ὣς εἰπὼν κατʼ ἄρʼ ἕζετο· τοῖσι δʼ ἀνέστη
Iliad 7.366	Δαρδανίδης Πρίαμος, θεόφιν μήστωρ ἀτάλαντος,
Iliad 7.367	ὅ σφιν ἐϋφρονέων ἀγορήσατο καὶ μετέειπε·
Iliad 7.368	κέκλυτέ μευ Τρῶες καὶ Δάρδανοι ἠδʼ ἐπίκουροι,
Iliad 7.369	ὄφρʼ εἴπω τά με θυμὸς ἐνὶ στήθεσσι κελεύει.
Iliad 7.370	νῦν μὲν δόρπον ἕλεσθε κατὰ πτόλιν ὡς τὸ πάρος περ,
Iliad 7.371	καὶ φυλακῆς μνήσασθε καὶ ἐγρήγορθε ἕκαστος·
Iliad 7.372	ἠῶθεν δʼ Ἰδαῖος ἴτω κοίλας ἐπὶ νῆας
Iliad 7.373	εἰπέμεν Ἀτρεΐδῃς Ἀγαμέμνονι καὶ Μενελάῳ
Iliad 7.374	μῦθον Ἀλεξάνδροιο, τοῦ εἵνεκα νεῖκος ὄρωρε·
Iliad 7.375	καὶ δὲ τόδʼ εἰπέμεναι πυκινὸν ἔπος, αἴ κʼ ἐθέλωσι
Iliad 7.376	παύσασθαι πολέμοιο δυσηχέος, εἰς ὅ κε νεκροὺς
Iliad 7.377	κήομεν· ὕστερον αὖτε μαχησόμεθʼ εἰς ὅ κε δαίμων
Iliad 7.378	ἄμμε διακρίνῃ, δώῃ δʼ ἑτέροισί γε νίκην.
Iliad 7.379	ὣς ἔφαθʼ, οἳ δʼ ἄρα τοῦ μάλα μὲν κλύον ἠδʼ ἐπίθοντο·
Iliad 7.380	δόρπον ἔπειθʼ εἵλοντο κατὰ στρατὸν ἐν τελέεσσιν·
Iliad 7.381	ἠῶθεν δʼ Ἰδαῖος ἔβη κοίλας ἐπὶ νῆας·
Iliad 7.382	τοὺς δʼ εὗρʼ εἰν ἀγορῇ Δαναοὺς θεράποντας Ἄρηος
Iliad 7.383	νηῒ πάρα πρύμνῃ Ἀγαμέμνονος· αὐτὰρ ὃ τοῖσι
Iliad 7.384	στὰς ἐν μέσσοισιν μετεφώνεεν ἠπύτα κῆρυξ·
Iliad 7.385	Ἀτρεΐδη τε καὶ ἄλλοι ἀριστῆες Παναχαιῶν
Iliad 7.386	ἠνώγει Πρίαμός τε καὶ ἄλλοι Τρῶες ἀγαυοὶ
Iliad 7.387	εἰπεῖν, αἴ κέ περ ὔμμι φίλον καὶ ἡδὺ γένοιτο,
Iliad 7.388	μῦθον Ἀλεξάνδροιο, τοῦ εἵνεκα νεῖκος ὄρωρε·
Iliad 7.389	κτήματα μὲν ὅσʼ Ἀλέξανδρος κοίλῃς ἐνὶ νηυσὶν
Iliad 7.390	ἠγάγετο Τροίηνδʼ· ὡς πρὶν ὤφελλʼ ἀπολέσθαι·
Iliad 7.391	πάντʼ ἐθέλει δόμεναι καὶ οἴκοθεν ἄλλʼ ἐπιθεῖναι·
Iliad 7.392	κουριδίην δʼ ἄλοχον Μενελάου κυδαλίμοιο
Iliad 7.393	οὔ φησιν δώσειν· ἦ μὴν Τρῶές γε κέλονται.
Iliad 7.394	καὶ δὲ τόδʼ ἠνώγεον εἰπεῖν ἔπος αἴ κʼ ἐθέλητε
Iliad 7.395	παύσασθαι πολέμοιο δυσηχέος εἰς ὅ κε νεκροὺς
Iliad 7.396	κήομεν· ὕστερον αὖτε μαχησόμεθʼ εἰς ὅ κε δαίμων
Iliad 7.397	ἄμμε διακρίνῃ, δώῃ δʼ ἑτέροισί γε νίκην.
Iliad 7.398	ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ·
Iliad 7.399	ὀψὲ δὲ δὴ μετέειπε βοὴν ἀγαθὸς Διομήδης·
Iliad 7.400	μήτʼ ἄρ τις νῦν κτήματʼ Ἀλεξάνδροιο δεχέσθω
Iliad 7.401	μήθʼ Ἑλένην· γνωτὸν δὲ καὶ ὃς μάλα νήπιός ἐστιν
Iliad 7.402	ὡς ἤδη Τρώεσσιν ὀλέθρου πείρατʼ ἐφῆπται.
Iliad 7.403	ὣς ἔφαθʼ, οἳ δʼ ἄρα πάντες ἐπίαχον υἷες Ἀχαιῶν
Iliad 7.404	μῦθον ἀγασσάμενοι Διομήδεος ἱπποδάμοιο·
Iliad 7.405	καὶ τότʼ ἄρʼ Ἰδαῖον προσέφη κρείων Ἀγαμέμνων·
Iliad 7.406	Ἰδαῖʼ ἤτοι μῦθον Ἀχαιῶν αὐτὸς ἀκούεις
Iliad 7.407	ὥς τοι ὑποκρίνονται· ἐμοὶ δʼ ἐπιανδάνει οὕτως
Iliad 7.408	ἀμφὶ δὲ νεκροῖσιν κατακαιέμεν οὔ τι μεγαίρω·
Iliad 7.409	οὐ γάρ τις φειδὼ νεκύων κατατεθνηώτων
Iliad 7.410	γίγνετʼ ἐπεί κε θάνωσι πυρὸς μειλισσέμεν ὦκα.
Iliad 7.411	ὅρκια δὲ Ζεὺς ἴστω ἐρίγδουπος πόσις Ἥρης.
Iliad 7.412	ὣς εἰπὼν τὸ σκῆπτρον ἀνέσχεθε πᾶσι θεοῖσιν,
Iliad 7.413	ἄψορρον δʼ Ἰδαῖος ἔβη προτὶ Ἴλιον ἱρήν.
Iliad 7.414	οἳ δʼ ἕατʼ εἰν ἀγορῇ Τρῶες καὶ Δαρδανίωνες
Iliad 7.415	πάντες ὁμηγερέες, ποτιδέγμενοι ὁππότʼ ἄρʼ ἔλθοι
Iliad 7.416	Ἰδαῖος· ὃ δʼ ἄρʼ ἦλθε καὶ ἀγγελίην ἀπέειπε
Iliad 7.417	στὰς ἐν μέσσοισιν· τοὶ δʼ ὁπλίζοντο μάλʼ ὦκα,
Iliad 7.418	ἀμφότερον νέκυάς τʼ ἀγέμεν ἕτεροι δὲ μεθʼ ὕλην·
Iliad 7.419	Ἀργεῖοι δʼ ἑτέρωθεν ἐϋσσέλμων ἀπὸ νηῶν
Iliad 7.420	ὀτρύνοντο νέκυς τʼ ἀγέμεν, ἕτεροι δὲ μεθʼ ὕλην.
Iliad 7.421	Ἠέλιος μὲν ἔπειτα νέον προσέβαλλεν ἀρούρας
Iliad 7.422	ἐξ ἀκαλαρρείταο βαθυρρόου Ὠκεανοῖο
Iliad 7.423	οὐρανὸν εἰσανιών· οἳ δʼ ἤντεον ἀλλήλοισιν.
Iliad 7.424	ἔνθα διαγνῶναι χαλεπῶς ἦν ἄνδρα ἕκαστον·
Iliad 7.425	ἀλλʼ ὕδατι νίζοντες ἄπο βρότον αἱματόεντα
Iliad 7.426	δάκρυα θερμὰ χέοντες ἀμαξάων ἐπάειραν.
Iliad 7.427	οὐδʼ εἴα κλαίειν Πρίαμος μέγας· οἳ δὲ σιωπῇ
Iliad 7.428	νεκροὺς πυρκαϊῆς ἐπινήνεον ἀχνύμενοι κῆρ,
Iliad 7.429	ἐν δὲ πυρὶ πρήσαντες ἔβαν προτὶ Ἴλιον ἱρήν.
Iliad 7.430	ὣς δʼ αὔτως ἑτέρωθεν ἐϋκνήμιδες Ἀχαιοὶ
Iliad 7.431	νεκροὺς πυρκαϊῆς ἐπινήνεον ἀχνύμενοι κῆρ,
Iliad 7.432	ἐν δὲ πυρὶ πρήσαντες ἔβαν κοίλας ἐπὶ νῆας.
Iliad 7.433	ἦμος δʼ οὔτʼ ἄρ πω ἠώς, ἔτι δʼ ἀμφιλύκη νύξ,
Iliad 7.434	τῆμος ἄρʼ ἀμφὶ πυρὴν κριτὸς ἔγρετο λαὸς Ἀχαιῶν,
Iliad 7.435	τύμβον δʼ ἀμφʼ αὐτὴν ἕνα ποίεον ἐξαγαγόντες
Iliad 7.436	ἄκριτον ἐκ πεδίου, ποτὶ δʼ αὐτὸν τεῖχος ἔδειμαν
Iliad 7.437	πύργους θʼ ὑψηλούς, εἶλαρ νηῶν τε καὶ αὐτῶν.
Iliad 7.438	ἐν δʼ αὐτοῖσι πύλας ἐνεποίεον εὖ ἀραρυίας,
Iliad 7.439	ὄφρα διʼ αὐτάων ἱππηλασίη ὁδὸς εἴη·
Iliad 7.440	ἔκτοσθεν δὲ βαθεῖαν ἐπʼ αὐτῷ τάφρον ὄρυξαν
Iliad 7.441	εὐρεῖαν μεγάλην, ἐν δὲ σκόλοπας κατέπηξαν.
Iliad 7.442	ὣς οἳ μὲν πονέοντο κάρη κομόωντες Ἀχαιοί·
Iliad 7.443	οἳ δὲ θεοὶ πὰρ Ζηνὶ καθήμενοι ἀστεροπητῇ
Iliad 7.444	θηεῦντο μέγα ἔργον Ἀχαιῶν χαλκοχιτώνων.
Iliad 7.445	τοῖσι δὲ μύθων ἦρχε Ποσειδάων ἐνοσίχθων·
Iliad 7.446	Ζεῦ πάτερ, ἦ ῥά τίς ἐστι βροτῶν ἐπʼ ἀπείρονα γαῖαν
Iliad 7.447	ὅς τις ἔτʼ ἀθανάτοισι νόον καὶ μῆτιν ἐνίψει;
Iliad 7.448	οὐχ ὁράᾳς ὅτι δʼ αὖτε κάρη κομόωντες Ἀχαιοὶ
Iliad 7.449	τεῖχος ἐτειχίσσαντο νεῶν ὕπερ, ἀμφὶ δὲ τάφρον
Iliad 7.450	ἤλασαν, οὐδὲ θεοῖσι δόσαν κλειτὰς ἑκατόμβας;
Iliad 7.451	τοῦ δʼ ἤτοι κλέος ἔσται ὅσον τʼ ἐπικίδναται ἠώς·
Iliad 7.452	τοῦ δʼ ἐπιλήσονται τὸ ἐγὼ καὶ Φοῖβος Ἀπόλλων
Iliad 7.453	ἥρῳ Λαομέδοντι πολίσσαμεν ἀθλήσαντε.
Iliad 7.454	τὸν δὲ μέγʼ ὀχθήσας προσέφη νεφεληγερέτα Ζεύς·
Iliad 7.455	ὢ πόποι ἐννοσίγαιʼ εὐρυσθενές, οἷον ἔειπες.
Iliad 7.456	ἄλλός κέν τις τοῦτο θεῶν δείσειε νόημα,
Iliad 7.457	ὃς σέο πολλὸν ἀφαυρότερος χεῖράς τε μένος τε·
Iliad 7.458	σὸν δʼ ἤτοι κλέος ἔσται ὅσον τʼ ἐπικίδναται ἠώς.
Iliad 7.459	ἄγρει μὰν ὅτʼ ἂν αὖτε κάρη κομόωντες Ἀχαιοὶ
Iliad 7.460	οἴχωνται σὺν νηυσὶ φίλην ἐς πατρίδα γαῖαν
Iliad 7.461	τεῖχος ἀναρρήξας τὸ μὲν εἰς ἅλα πᾶν καταχεῦαι,
Iliad 7.462	αὖτις δʼ ἠϊόνα μεγάλην ψαμάθοισι καλύψαι,
Iliad 7.463	ὥς κέν τοι μέγα τεῖχος ἀμαλδύνηται Ἀχαιῶν.
Iliad 7.464	ὣς οἳ μὲν τοιαῦτα πρὸς ἀλλήλους ἀγόρευον,
Iliad 7.465	δύσετο δʼ ἠέλιος, τετέλεστο δὲ ἔργον Ἀχαιῶν,
Iliad 7.466	βουφόνεον δὲ κατὰ κλισίας καὶ δόρπον ἕλοντο.
Iliad 7.467	νῆες δʼ ἐκ Λήμνοιο παρέσταν οἶνον ἄγουσαι
Iliad 7.468	πολλαί, τὰς προέηκεν Ἰησονίδης Εὔνηος,
Iliad 7.469	τόν ῥʼ ἔτεχʼ Ὑψιπύλη ὑπʼ Ἰήσονι ποιμένι λαῶν.
Iliad 7.470	χωρὶς δʼ Ἀτρεΐδῃς Ἀγαμέμνονι καὶ Μενελάῳ
Iliad 7.471	δῶκεν Ἰησονίδης ἀγέμεν μέθυ χίλια μέτρα.
Iliad 7.472	ἔνθεν οἰνίζοντο κάρη κομόωντες Ἀχαιοί,
Iliad 7.473	ἄλλοι μὲν χαλκῷ, ἄλλοι δʼ αἴθωνι σιδήρῳ,
Iliad 7.474	ἄλλοι δὲ ῥινοῖς, ἄλλοι δʼ αὐτῇσι βόεσσιν,
Iliad 7.475	ἄλλοι δʼ ἀνδραπόδεσσι· τίθεντο δὲ δαῖτα θάλειαν.
Iliad 7.476	παννύχιοι μὲν ἔπειτα κάρη κομόωντες Ἀχαιοὶ
Iliad 7.477	δαίνυντο, Τρῶες δὲ κατὰ πτόλιν ἠδʼ ἐπίκουροι·
Iliad 7.478	παννύχιος δέ σφιν κακὰ μήδετο μητίετα Ζεὺς
Iliad 7.479	σμερδαλέα κτυπέων· τοὺς δὲ χλωρὸν δέος ᾕρει·
Iliad 7.480	οἶνον δʼ ἐκ δεπάων χαμάδις χέον, οὐδέ τις ἔτλη
Iliad 7.481	πρὶν πιέειν πρὶν λεῖψαι ὑπερμενέϊ Κρονίωνι.
Iliad 7.482	κοιμήσαντʼ ἄρʼ ἔπειτα καὶ ὕπνου δῶρον ἕλοντο.
Iliad 8.1	Ἠὼς μὲν κροκόπεπλος ἐκίδνατο πᾶσαν ἐπʼ αἶαν,
Iliad 8.2	Ζεὺς δὲ θεῶν ἀγορὴν ποιήσατο τερπικέραυνος
Iliad 8.3	ἀκροτάτῃ κορυφῇ πολυδειράδος Οὐλύμποιο·
Iliad 8.4	αὐτὸς δέ σφʼ ἀγόρευε, θεοὶ δʼ ὑπὸ πάντες ἄκουον·
Iliad 8.5	κέκλυτέ μευ πάντές τε θεοὶ πᾶσαί τε θέαιναι,
Iliad 8.6	ὄφρʼ εἴπω τά με θυμὸς ἐνὶ στήθεσσι κελεύει.
Iliad 8.7	μήτέ τις οὖν θήλεια θεὸς τό γε μήτέ τις ἄρσην
Iliad 8.8	πειράτω διακέρσαι ἐμὸν ἔπος, ἀλλʼ ἅμα πάντες
Iliad 8.9	αἰνεῖτʼ, ὄφρα τάχιστα τελευτήσω τάδε ἔργα.
Iliad 8.10	ὃν δʼ ἂν ἐγὼν ἀπάνευθε θεῶν ἐθέλοντα νοήσω
Iliad 8.11	ἐλθόντʼ ἢ Τρώεσσιν ἀρηγέμεν ἢ Δαναοῖσι
Iliad 8.12	πληγεὶς οὐ κατὰ κόσμον ἐλεύσεται Οὔλυμπον δέ·
Iliad 8.13	ἤ μιν ἑλὼν ῥίψω ἐς Τάρταρον ἠερόεντα
Iliad 8.14	τῆλε μάλʼ, ἧχι βάθιστον ὑπὸ χθονός ἐστι βέρεθρον,
Iliad 8.15	ἔνθα σιδήρειαί τε πύλαι καὶ χάλκεος οὐδός,
Iliad 8.16	τόσσον ἔνερθʼ Ἀΐδεω ὅσον οὐρανός ἐστʼ ἀπὸ γαίης·
Iliad 8.17	γνώσετʼ ἔπειθʼ ὅσον εἰμὶ θεῶν κάρτιστος ἁπάντων.
Iliad 8.18	εἰ δʼ ἄγε πειρήσασθε θεοὶ ἵνα εἴδετε πάντες·
Iliad 8.19	σειρὴν χρυσείην ἐξ οὐρανόθεν κρεμάσαντες
Iliad 8.20	πάντές τʼ ἐξάπτεσθε θεοὶ πᾶσαί τε θέαιναι·
Iliad 8.21	ἀλλʼ οὐκ ἂν ἐρύσαιτʼ ἐξ οὐρανόθεν πεδίον δὲ
Iliad 8.22	Ζῆνʼ ὕπατον μήστωρʼ, οὐδʼ εἰ μάλα πολλὰ κάμοιτε.
Iliad 8.23	ἀλλʼ ὅτε δὴ καὶ ἐγὼ πρόφρων ἐθέλοιμι ἐρύσσαι,
Iliad 8.24	αὐτῇ κεν γαίῃ ἐρύσαιμʼ αὐτῇ τε θαλάσσῃ·
Iliad 8.25	σειρὴν μέν κεν ἔπειτα περὶ ῥίον Οὐλύμποιο
Iliad 8.26	δησαίμην, τὰ δέ κʼ αὖτε μετήορα πάντα γένοιτο.
Iliad 8.27	τόσσον ἐγὼ περί τʼ εἰμὶ θεῶν περί τʼ εἴμʼ ἀνθρώπων.
Iliad 8.28	ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ
Iliad 8.29	μῦθον ἀγασσάμενοι· μάλα γὰρ κρατερῶς ἀγόρευσεν.
Iliad 8.30	ὀψὲ δὲ δὴ μετέειπε θεὰ γλαυκῶπις Ἀθήνη·
Iliad 8.31	ὦ πάτερ ἡμέτερε Κρονίδη ὕπατε κρειόντων
Iliad 8.32	εὖ νυ καὶ ἡμεῖς ἴδμεν ὅ τοι σθένος οὐκ ἐπιεικτόν·
Iliad 8.33	ἀλλʼ ἔμπης Δαναῶν ὀλοφυρόμεθʼ αἰχμητάων,
Iliad 8.34	οἵ κεν δὴ κακὸν οἶτον ἀναπλήσαντες ὄλωνται.
Iliad 8.35	ἀλλʼ ἤτοι πολέμου μὲν ἀφεξόμεθʼ ὡς σὺ κελεύεις·
Iliad 8.36	βουλὴν δʼ Ἀργείοις ὑποθησόμεθʼ ἥ τις ὀνήσει,
Iliad 8.37	ὡς μὴ πάντες ὄλωνται ὀδυσσαμένοιο τεοῖο.
Iliad 8.38	τὴν δʼ ἐπιμειδήσας προσέφη νεφεληγερέτα Ζεύς·
Iliad 8.39	θάρσει Τριτογένεια φίλον τέκος· οὔ νύ τι θυμῷ
Iliad 8.40	πρόφρονι μυθέομαι, ἐθέλω δέ τοι ἤπιος εἶναι.
Iliad 8.41	ὣς εἰπὼν ὑπʼ ὄχεσφι τιτύσκετο χαλκόποδʼ ἵππω
Iliad 8.42	ὠκυπέτα χρυσέῃσιν ἐθείρῃσιν κομόωντε,
Iliad 8.43	χρυσὸν δʼ αὐτὸς ἔδυνε περὶ χροΐ, γέντο δʼ ἱμάσθλην
Iliad 8.44	χρυσείην εὔτυκτον, ἑοῦ δʼ ἐπεβήσετο δίφρου,
Iliad 8.45	μάστιξεν δʼ ἐλάαν· τὼ δʼ οὐκ ἀέκοντε πετέσθην
Iliad 8.46	μεσσηγὺς γαίης τε καὶ οὐρανοῦ ἀστερόεντος.
Iliad 8.47	Ἴδην δʼ ἵκανεν πολυπίδακα μητέρα θηρῶν
Iliad 8.48	Γάργαρον, ἔνθά τέ οἱ τέμενος βωμός τε θυήεις.
Iliad 8.49	ἔνθʼ ἵππους ἔστησε πατὴρ ἀνδρῶν τε θεῶν τε
Iliad 8.50	λύσας ἐξ ὀχέων, κατὰ δʼ ἠέρα πουλὺν ἔχευεν.
Iliad 8.51	αὐτὸς δʼ ἐν κορυφῇσι καθέζετο κύδεϊ γαίων
Iliad 8.52	εἰσορόων Τρώων τε πόλιν καὶ νῆας Ἀχαιῶν.
Iliad 8.53	οἳ δʼ ἄρα δεῖπνον ἕλοντο κάρη κομόωντες Ἀχαιοὶ
Iliad 8.54	ῥίμφα κατὰ κλισίας, ἀπὸ δʼ αὐτοῦ θωρήσσοντο.
Iliad 8.55	Τρῶες δʼ αὖθʼ ἑτέρωθεν ἀνὰ πτόλιν ὁπλίζοντο
Iliad 8.56	παυρότεροι· μέμασαν δὲ καὶ ὧς ὑσμῖνι μάχεσθαι
Iliad 8.57	χρειοῖ ἀναγκαίῃ, πρό τε παίδων καὶ πρὸ γυναικῶν.
Iliad 8.58	πᾶσαι δʼ ὠΐγνυντο πύλαι, ἐκ δʼ ἔσσυτο λαός,
Iliad 8.59	πεζοί θʼ ἱππῆές τε· πολὺς δʼ ὀρυμαγδὸς ὀρώρει.
Iliad 8.60	οἳ δʼ ὅτε δή ῥʼ ἐς χῶρον ἕνα ξυνιόντες ἵκοντο
Iliad 8.61	σύν ῥʼ ἔβαλον ῥινούς, σὺν δʼ ἔγχεα καὶ μένεʼ ἀνδρῶν
Iliad 8.62	χαλκεοθωρήκων· ἀτὰρ ἀσπίδες ὀμφαλόεσσαι
Iliad 8.63	ἔπληντʼ ἀλλήλῃσι, πολὺς δʼ ὀρυμαγδὸς ὀρώρει.
Iliad 8.64	ἔνθα δʼ ἅμʼ οἰμωγή τε καὶ εὐχωλὴ πέλεν ἀνδρῶν
Iliad 8.65	ὀλλύντων τε καὶ ὀλλυμένων, ῥέε δʼ αἵματι γαῖα.
Iliad 8.66	ὄφρα μὲν ἠὼς ἦν καὶ ἀέξετο ἱερὸν ἦμαρ,
Iliad 8.67	τόφρα μάλʼ ἀμφοτέρων βέλεʼ ἥπτετο, πῖπτε δὲ λαός.
Iliad 8.68	ἦμος δʼ Ἠέλιος μέσον οὐρανὸν ἀμφιβεβήκει,
Iliad 8.69	καὶ τότε δὴ χρύσεια πατὴρ ἐτίταινε τάλαντα·
Iliad 8.70	ἐν δʼ ἐτίθει δύο κῆρε τανηλεγέος θανάτοιο
Iliad 8.71	Τρώων θʼ ἱπποδάμων καὶ Ἀχαιῶν χαλκοχιτώνων,
Iliad 8.72	ἕλκε δὲ μέσσα λαβών· ῥέπε δʼ αἴσιμον ἦμαρ Ἀχαιῶν.
Iliad 8.73	αἳ μὲν Ἀχαιῶν κῆρες ἐπὶ χθονὶ πουλυβοτείρῃ
Iliad 8.74	ἑζέσθην, Τρώων δὲ πρὸς οὐρανὸν εὐρὺν ἄερθεν·
Iliad 8.75	αὐτὸς δʼ ἐξ Ἴδης μεγάλʼ ἔκτυπε, δαιόμενον δὲ
Iliad 8.76	ἧκε σέλας μετὰ λαὸν Ἀχαιῶν· οἳ δὲ ἰδόντες
Iliad 8.77	θάμβησαν, καὶ πάντας ὑπὸ χλωρὸν δέος εἷλεν.
Iliad 8.78	ἔνθʼ οὔτʼ Ἰδομενεὺς τλῆ μίμνειν οὔτʼ Ἀγαμέμνων,
Iliad 8.79	οὔτε δύʼ Αἴαντες μενέτην θεράποντες Ἄρηος·
Iliad 8.80	Νέστωρ οἶος ἔμιμνε Γερήνιος οὖρος Ἀχαιῶν
Iliad 8.81	οὔ τι ἑκών, ἀλλʼ ἵππος ἐτείρετο, τὸν βάλεν ἰῷ
Iliad 8.82	δῖος Ἀλέξανδρος Ἑλένης πόσις ἠϋκόμοιο
Iliad 8.83	ἄκρην κὰκ κορυφήν, ὅθι τε πρῶται τρίχες ἵππων
Iliad 8.84	κρανίῳ ἐμπεφύασι, μάλιστα δὲ καίριόν ἐστιν.
Iliad 8.85	ἀλγήσας δʼ ἀνέπαλτο, βέλος δʼ εἰς ἐγκέφαλον δῦ,
Iliad 8.86	σὺν δʼ ἵππους ἐτάραξε κυλινδόμενος περὶ χαλκῷ.
Iliad 8.87	ὄφρʼ ὁ γέρων ἵπποιο παρηορίας ἀπέταμνε
Iliad 8.88	φασγάνῳ ἀΐσσων, τόφρʼ Ἕκτορος ὠκέες ἵπποι
Iliad 8.89	ἦλθον ἀνʼ ἰωχμὸν θρασὺν ἡνίοχον φορέοντες
Iliad 8.90	Ἕκτορα· καί νύ κεν ἔνθʼ ὁ γέρων ἀπὸ θυμὸν ὄλεσσεν
Iliad 8.91	εἰ μὴ ἄρʼ ὀξὺ νόησε βοὴν ἀγαθὸς Διομήδης·
Iliad 8.92	σμερδαλέον δʼ ἐβόησεν ἐποτρύνων Ὀδυσῆα·
Iliad 8.93	διογενὲς Λαερτιάδη πολυμήχανʼ Ὀδυσσεῦ
Iliad 8.94	πῇ φεύγεις μετὰ νῶτα βαλὼν κακὸς ὣς ἐν ὁμίλῳ;
Iliad 8.95	μή τίς τοι φεύγοντι μεταφρένῳ ἐν δόρυ πήξῃ·
Iliad 8.96	ἀλλὰ μένʼ ὄφρα γέροντος ἀπώσομεν ἄγριον ἄνδρα.
Iliad 8.97	ὣς ἔφατʼ, οὐδʼ ἐσάκουσε πολύτλας δῖος Ὀδυσσεύς,
Iliad 8.98	ἀλλὰ παρήϊξεν κοίλας ἐπὶ νῆας Ἀχαιῶν.
Iliad 8.99	Τυδεΐδης δʼ αὐτός περ ἐὼν προμάχοισιν ἐμίχθη,
Iliad 8.100	στῆ δὲ πρόσθʼ ἵππων Νηληϊάδαο γέροντος,
Iliad 8.101	καί μιν φωνήσας ἔπεα πτερόεντα προσηύδα·
Iliad 8.102	ὦ γέρον ἦ μάλα δή σε νέοι τείρουσι μαχηταί,
Iliad 8.103	σὴ δὲ βίη λέλυται, χαλεπὸν δέ σε γῆρας ὀπάζει,
Iliad 8.104	ἠπεδανὸς δέ νύ τοι θεράπων, βραδέες δέ τοι ἵπποι.
Iliad 8.105	ἀλλʼ ἄγʼ ἐμῶν ὀχέων ἐπιβήσεο, ὄφρα ἴδηαι
Iliad 8.106	οἷοι Τρώϊοι ἵπποι ἐπιστάμενοι πεδίοιο
Iliad 8.107	κραιπνὰ μάλʼ ἔνθα καὶ ἔνθα διωκέμεν ἠδὲ φέβεσθαι,
Iliad 8.108	οὕς ποτʼ ἀπʼ Αἰνείαν ἑλόμην μήστωρε φόβοιο.
Iliad 8.109	τούτω μὲν θεράποντε κομείτων, τώδε δὲ νῶϊ
Iliad 8.110	Τρωσὶν ἐφʼ ἱπποδάμοις ἰθύνομεν, ὄφρα καὶ Ἕκτωρ
Iliad 8.111	εἴσεται εἰ καὶ ἐμὸν δόρυ μαίνεται ἐν παλάμῃσιν.
Iliad 8.112	ὣς ἔφατʼ, οὐδʼ ἀπίθησε Γερήνιος ἱππότα Νέστωρ.
Iliad 8.113	Νεστορέας μὲν ἔπειθʼ ἵππους θεράποντε κομείτην
Iliad 8.114	ἴφθιμοι Σθένελός τε καὶ Εὐρυμέδων ἀγαπήνωρ.
Iliad 8.115	τὼ δʼ εἰς ἀμφοτέρω Διομήδεος ἅρματα βήτην·
Iliad 8.116	Νέστωρ δʼ ἐν χείρεσσι λάβʼ ἡνία σιγαλόεντα,
Iliad 8.117	μάστιξεν δʼ ἵππους· τάχα δʼ Ἕκτορος ἄγχι γένοντο.
Iliad 8.118	τοῦ δʼ ἰθὺς μεμαῶτος ἀκόντισε Τυδέος υἱός·
Iliad 8.119	καὶ τοῦ μέν ῥʼ ἀφάμαρτεν, ὃ δʼ ἡνίοχον θεράποντα
Iliad 8.120	υἱὸν ὑπερθύμου Θηβαίου Ἠνιοπῆα
Iliad 8.121	ἵππων ἡνίʼ ἔχοντα βάλε στῆθος παρὰ μαζόν.
Iliad 8.122	ἤριπε δʼ ἐξ ὀχέων, ὑπερώησαν δέ οἱ ἵπποι
Iliad 8.123	ὠκύποδες· τοῦ δʼ αὖθι λύθη ψυχή τε μένος τε.
Iliad 8.124	Ἕκτορα δʼ αἰνὸν ἄχος πύκασε φρένας ἡνιόχοιο·
Iliad 8.125	τὸν μὲν ἔπειτʼ εἴασε καὶ ἀχνύμενός περ ἑταίρου
Iliad 8.126	κεῖσθαι, ὃ δʼ ἡνίοχον μέθεπε θρασύν· οὐδʼ ἄρʼ ἔτι δὴν
Iliad 8.127	ἵππω δευέσθην σημάντορος· αἶψα γὰρ εὗρεν
Iliad 8.128	Ἰφιτίδην Ἀρχεπτόλεμον θρασύν, ὅν ῥα τόθʼ ἵππων
Iliad 8.129	ὠκυπόδων ἐπέβησε, δίδου δέ οἱ ἡνία χερσίν.
Iliad 8.130	ἔνθά κε λοιγὸς ἔην καὶ ἀμήχανα ἔργα γένοντο,
Iliad 8.131	καί νύ κε σήκασθεν κατὰ Ἴλιον ἠΰτε ἄρνες,
Iliad 8.132	εἰ μὴ ἄρʼ ὀξὺ νόησε πατὴρ ἀνδρῶν τε θεῶν τε·
Iliad 8.133	βροντήσας δʼ ἄρα δεινὸν ἀφῆκʼ ἀργῆτα κεραυνόν,
Iliad 8.134	κὰδ δὲ πρόσθʼ ἵππων Διομήδεος ἧκε χαμᾶζε·
Iliad 8.135	δεινὴ δὲ φλὸξ ὦρτο θεείου καιομένοιο,
Iliad 8.136	τὼ δʼ ἵππω δείσαντε καταπτήτην ὑπʼ ὄχεσφι·
Iliad 8.137	Νέστορα δʼ ἐκ χειρῶν φύγον ἡνία σιγαλόεντα,
Iliad 8.138	δεῖσε δʼ ὅ γʼ ἐν θυμῷ, Διομήδεα δὲ προσέειπε·
Iliad 8.139	Τυδεΐδη ἄγε δʼ αὖτε φόβον δʼ ἔχε μώνυχας ἵππους.
Iliad 8.140	ἦ οὐ γιγνώσκεις ὅ τοι ἐκ Διὸς οὐχ ἕπετʼ ἀλκή;
Iliad 8.141	νῦν μὲν γὰρ τούτῳ Κρονίδης Ζεὺς κῦδος ὀπάζει
Iliad 8.142	σήμερον· ὕστερον αὖτε καὶ ἡμῖν, αἴ κʼ ἐθέλῃσι,
Iliad 8.143	δώσει· ἀνὴρ δέ κεν οὔ τι Διὸς νόον εἰρύσσαιτο
Iliad 8.144	οὐδὲ μάλʼ ἴφθιμος, ἐπεὶ ἦ πολὺ φέρτερός ἐστι.
Iliad 8.145	τὸν δʼ ἠμείβετʼ ἔπειτα βοὴν ἀγαθὸς Διομήδης·
Iliad 8.146	ναὶ δὴ ταῦτά γε πάντα γέρον κατὰ μοῖραν ἔειπες·
Iliad 8.147	ἀλλὰ τόδʼ αἰνὸν ἄχος κραδίην καὶ θυμὸν ἱκάνει·
Iliad 8.148	Ἕκτωρ γάρ ποτε φήσει ἐνὶ Τρώεσσʼ ἀγορεύων·
Iliad 8.149	Τυδεΐδης ὑπʼ ἐμεῖο φοβεύμενος ἵκετο νῆας.
Iliad 8.150	ὥς ποτʼ ἀπειλήσει· τότε μοι χάνοι εὐρεῖα χθών.
Iliad 8.151	τὸν δʼ ἠμείβετʼ ἔπειτα Γερήνιος ἱππότα Νέστωρ·
Iliad 8.152	ὤ μοι Τυδέος υἱὲ δαΐφρονος, οἷον ἔειπες.
Iliad 8.153	εἴ περ γάρ σʼ Ἕκτωρ γε κακὸν καὶ ἀνάλκιδα φήσει,
Iliad 8.154	ἀλλʼ οὐ πείσονται Τρῶες καὶ Δαρδανίωνες
Iliad 8.155	καὶ Τρώων ἄλοχοι μεγαθύμων ἀσπιστάων,
Iliad 8.156	τάων ἐν κονίῃσι βάλες θαλεροὺς παρακοίτας.
Iliad 8.157	ὣς ἄρα φωνήσας φύγαδε τράπε μώνυχας ἵππους
Iliad 8.158	αὖτις ἀνʼ ἰωχμόν· ἐπὶ δὲ Τρῶές τε καὶ Ἕκτωρ
Iliad 8.159	ἠχῇ θεσπεσίῃ βέλεα στονόεντα χέοντο.
Iliad 8.160	τῷ δʼ ἐπὶ μακρὸν ἄϋσε μέγας κορυθαίολος Ἕκτωρ·
Iliad 8.161	Τυδεΐδη περὶ μέν σε τίον Δαναοὶ ταχύπωλοι
Iliad 8.162	ἕδρῃ τε κρέασίν τε ἰδὲ πλείοις δεπάεσσι·
Iliad 8.163	νῦν δέ σʼ ἀτιμήσουσι· γυναικὸς ἄρʼ ἀντὶ τέτυξο.
Iliad 8.164	ἔρρε κακὴ γλήνη, ἐπεὶ οὐκ εἴξαντος ἐμεῖο
Iliad 8.165	πύργων ἡμετέρων ἐπιβήσεαι, οὐδὲ γυναῖκας
Iliad 8.166	ἄξεις ἐν νήεσσι· πάρος τοι δαίμονα δώσω.
Iliad 8.167	ὣς φάτο, Τυδεΐδης δὲ διάνδιχα μερμήριξεν
Iliad 8.168	ἵππους τε στρέψαι καὶ ἐναντίβιον μαχέσασθαι.
Iliad 8.169	τρὶς μὲν μερμήριξε κατὰ φρένα καὶ κατὰ θυμόν,
Iliad 8.170	τρὶς δʼ ἄρʼ ἀπʼ Ἰδαίων ὀρέων κτύπε μητίετα Ζεὺς
Iliad 8.171	σῆμα τιθεὶς Τρώεσσι μάχης ἑτεραλκέα νίκην.
Iliad 8.172	Ἕκτωρ δὲ Τρώεσσιν ἐκέκλετο μακρὸν ἀΰσας·
Iliad 8.173	Τρῶες καὶ Λύκιοι καὶ Δάρδανοι ἀγχιμαχηταὶ
Iliad 8.174	ἀνέρες ἔστε φίλοι, μνήσασθε δὲ θούριδος ἀλκῆς.
Iliad 8.175	γιγνώσκω δʼ ὅτι μοι πρόφρων κατένευσε Κρονίων
Iliad 8.176	νίκην καὶ μέγα κῦδος, ἀτὰρ Δαναοῖσί γε πῆμα·
Iliad 8.177	νήπιοι οἳ ἄρα δὴ τάδε τείχεα μηχανόωντο
Iliad 8.178	ἀβλήχρʼ οὐδενόσωρα· τὰ δʼ οὐ μένος ἁμὸν ἐρύξει·
Iliad 8.179	ἵπποι δὲ ῥέα τάφρον ὑπερθορέονται ὀρυκτήν.
Iliad 8.180	ἀλλʼ ὅτε κεν δὴ νηυσὶν ἔπι γλαφυρῇσι γένωμαι,
Iliad 8.181	μνημοσύνη τις ἔπειτα πυρὸς δηΐοιο γενέσθω,
Iliad 8.182	ὡς πυρὶ νῆας ἐνιπρήσω, κτείνω δὲ καὶ αὐτοὺς
Iliad 8.183	Ἀργείους παρὰ νηυσὶν ἀτυζομένους ὑπὸ καπνοῦ.
Iliad 8.184	ὣς εἰπὼν ἵπποισιν ἐκέκλετο φώνησέν τε·
Iliad 8.185	Ξάνθέ τε καὶ σὺ Πόδαργε καὶ Αἴθων Λάμπέ τε δῖε
Iliad 8.186	νῦν μοι τὴν κομιδὴν ἀποτίνετον, ἣν μάλα πολλὴν
Iliad 8.187	Ἀνδρομάχη θυγάτηρ μεγαλήτορος Ἠετίωνος
Iliad 8.188	ὑμῖν πὰρ προτέροισι μελίφρονα πυρὸν ἔθηκεν
Iliad 8.189	οἶνόν τʼ ἐγκεράσασα πιεῖν, ὅτε θυμὸς ἀνώγοι,
Iliad 8.190	ἢ ἐμοί, ὅς πέρ οἱ θαλερὸς πόσις εὔχομαι εἶναι.
Iliad 8.191	ἀλλʼ ἐφομαρτεῖτον καὶ σπεύδετον ὄφρα λάβωμεν
Iliad 8.192	ἀσπίδα Νεστορέην, τῆς νῦν κλέος οὐρανὸν ἵκει
Iliad 8.193	πᾶσαν χρυσείην ἔμεναι, κανόνας τε καὶ αὐτήν,
Iliad 8.194	αὐτὰρ ἀπʼ ὤμοιιν Διομήδεος ἱπποδάμοιο
Iliad 8.195	δαιδάλεον θώρηκα, τὸν Ἥφαιστος κάμε τεύχων.
Iliad 8.196	εἰ τούτω κε λάβοιμεν, ἐελποίμην κεν Ἀχαιοὺς
Iliad 8.197	αὐτονυχὶ νηῶν ἐπιβησέμεν ὠκειάων.
Iliad 8.198	ὣς ἔφατʼ εὐχόμενος, νεμέσησε δὲ πότνια Ἥρη,
Iliad 8.199	σείσατο δʼ εἰνὶ θρόνῳ, ἐλέλιξε δὲ μακρὸν Ὄλυμπον,
Iliad 8.200	καί ῥα Ποσειδάωνα μέγαν θεὸν ἀντίον ηὔδα·
Iliad 8.201	ὢ πόποι ἐννοσίγαιʼ εὐρυσθενές, οὐδέ νυ σοί περ
Iliad 8.202	ὀλλυμένων Δαναῶν ὀλοφύρεται ἐν φρεσὶ θυμός.
Iliad 8.203	οἳ δέ τοι εἰς Ἑλίκην τε καὶ Αἰγὰς δῶρʼ ἀνάγουσι
Iliad 8.204	πολλά τε καὶ χαρίεντα· σὺ δέ σφισι βούλεο νίκην.
Iliad 8.205	εἴ περ γάρ κʼ ἐθέλοιμεν, ὅσοι Δαναοῖσιν ἀρωγοί,
Iliad 8.206	Τρῶας ἀπώσασθαι καὶ ἐρυκέμεν εὐρύοπα Ζῆν,
Iliad 8.207	αὐτοῦ κʼ ἔνθʼ ἀκάχοιτο καθήμενος οἶος ἐν Ἴδῃ.
Iliad 8.208	τὴν δὲ μέγʼ ὀχθήσας προσέφη κρείων ἐνοσίχθων·
Iliad 8.209	Ἥρη ἀπτοεπὲς ποῖον τὸν μῦθον ἔειπες.
Iliad 8.210	οὐκ ἂν ἔγωγʼ ἐθέλοιμι Διὶ Κρονίωνι μάχεσθαι
Iliad 8.211	ἡμέας τοὺς ἄλλους, ἐπεὶ ἦ πολὺ φέρτερός ἐστιν.
Iliad 8.212	ὣς οἳ μὲν τοιαῦτα πρὸς ἀλλήλους ἀγόρευον·
Iliad 8.213	τῶν δʼ ὅσον ἐκ νηῶν ἀπὸ πύργου τάφρος ἔεργε
Iliad 8.214	πλῆθεν ὁμῶς ἵππων τε καὶ ἀνδρῶν ἀσπιστάων
Iliad 8.215	εἰλομένων· εἴλει δὲ θοῷ ἀτάλαντος Ἄρηϊ
Iliad 8.216	Ἕκτωρ Πριαμίδης, ὅτε οἱ Ζεὺς κῦδος ἔδωκε.
Iliad 8.217	καί νύ κʼ ἐνέπρησεν πυρὶ κηλέῳ νῆας ἐΐσας,
Iliad 8.218	εἰ μὴ ἐπὶ φρεσὶ θῆκʼ Ἀγαμέμνονι πότνια Ἥρη
Iliad 8.219	αὐτῷ ποιπνύσαντι θοῶς ὀτρῦναι Ἀχαιούς.
Iliad 8.220	βῆ δʼ ἰέναι παρά τε κλισίας καὶ νῆας Ἀχαιῶν
Iliad 8.221	πορφύρεον μέγα φᾶρος ἔχων ἐν χειρὶ παχείῃ,
Iliad 8.222	στῆ δʼ ἐπʼ Ὀδυσσῆος μεγακήτεϊ νηῒ μελαίνῃ,
Iliad 8.223	ἥ ῥʼ ἐν μεσσάτῳ ἔσκε γεγωνέμεν ἀμφοτέρωσε,
Iliad 8.224	ἠμὲν ἐπʼ Αἴαντος κλισίας Τελαμωνιάδαο
Iliad 8.225	ἠδʼ ἐπʼ Ἀχιλλῆος, τοί ῥʼ ἔσχατα νῆας ἐΐσας
Iliad 8.226	εἴρυσαν, ἠνορέῃ πίσυνοι καὶ κάρτεϊ χειρῶν·
Iliad 8.227	ἤϋσεν δὲ διαπρύσιον Δαναοῖσι γεγωνώς·
Iliad 8.228	αἰδὼς Ἀργεῖοι, κάκʼ ἐλέγχεα, εἶδος ἀγητοί·
Iliad 8.229	πῇ ἔβαν εὐχωλαί, ὅτε δὴ φάμεν εἶναι ἄριστοι,
Iliad 8.230	ἃς ὁπότʼ ἐν Λήμνῳ κενεαυχέες ἠγοράασθε,
Iliad 8.231	ἔσθοντες κρέα πολλὰ βοῶν ὀρθοκραιράων
Iliad 8.232	πίνοντες κρητῆρας ἐπιστεφέας οἴνοιο,
Iliad 8.233	Τρώων ἄνθʼ ἑκατόν τε διηκοσίων τε ἕκαστος
Iliad 8.234	στήσεσθʼ ἐν πολέμῳ· νῦν δʼ οὐδʼ ἑνὸς ἄξιοί εἰμεν
Iliad 8.235	Ἕκτορος, ὃς τάχα νῆας ἐνιπρήσει πυρὶ κηλέῳ.
Iliad 8.236	Ζεῦ πάτερ, ἦ ῥά τινʼ ἤδη ὑπερμενέων βασιλήων
Iliad 8.237	τῇδʼ ἄτῃ ἄασας καί μιν μέγα κῦδος ἀπηύρας;
Iliad 8.238	οὐ μὲν δή ποτέ φημι τεὸν περικαλλέα βωμὸν
Iliad 8.239	νηῒ πολυκλήϊδι παρελθέμεν ἐνθάδε ἔρρων,
Iliad 8.240	ἀλλʼ ἐπὶ πᾶσι βοῶν δημὸν καὶ μηρίʼ ἔκηα
Iliad 8.241	ἱέμενος Τροίην εὐτείχεον ἐξαλαπάξαι.
Iliad 8.242	ἀλλὰ Ζεῦ τόδε πέρ μοι ἐπικρήηνον ἐέλδωρ·
Iliad 8.243	αὐτοὺς δή περ ἔασον ὑπεκφυγέειν καὶ ἀλύξαι,
Iliad 8.244	μηδʼ οὕτω Τρώεσσιν ἔα δάμνασθαι Ἀχαιούς.
Iliad 8.245	ὣς φάτο, τὸν δὲ πατὴρ ὀλοφύρατο δάκρυ χέοντα,
Iliad 8.246	νεῦσε δέ οἱ λαὸν σόον ἔμμεναι οὐδʼ ἀπολέσθαι.
Iliad 8.247	αὐτίκα δʼ αἰετὸν ἧκε τελειότατον πετεηνῶν,
Iliad 8.248	νεβρὸν ἔχοντʼ ὀνύχεσσι τέκος ἐλάφοιο ταχείης·
Iliad 8.249	πὰρ δὲ Διὸς βωμῷ περικαλλέϊ κάββαλε νεβρόν,
Iliad 8.250	ἔνθα πανομφαίῳ Ζηνὶ ῥέζεσκον Ἀχαιοί.
Iliad 8.251	οἳ δʼ ὡς οὖν εἴδονθʼ ὅ τʼ ἄρʼ ἐκ Διὸς ἤλυθεν ὄρνις,
Iliad 8.252	μᾶλλον ἐπὶ Τρώεσσι θόρον, μνήσαντο δὲ χάρμης.
Iliad 8.253	ἔνθʼ οὔ τις πρότερος Δαναῶν πολλῶν περ ἐόντων
Iliad 8.254	εὔξατο Τυδεΐδαο πάρος σχέμεν ὠκέας ἵππους
Iliad 8.255	τάφρου τʼ ἐξελάσαι καὶ ἐναντίβιον μαχέσασθαι,
Iliad 8.256	ἀλλὰ πολὺ πρῶτος Τρώων ἕλεν ἄνδρα κορυστὴν
Iliad 8.257	Φραδμονίδην Ἀγέλαον· ὃ μὲν φύγαδʼ ἔτραπεν ἵππους·
Iliad 8.258	τῷ δὲ μεταστρεφθέντι μεταφρένῳ ἐν δόρυ πῆξεν
Iliad 8.259	ὤμων μεσσηγύς, διὰ δὲ στήθεσφιν ἔλασσεν·
Iliad 8.260	ἤριπε δʼ ἐξ ὀχέων, ἀράβησε δὲ τεύχεʼ ἐπʼ αὐτῷ.
Iliad 8.261	τὸν δὲ μετʼ Ἀτρεΐδαι Ἀγαμέμνων καὶ Μενέλαος,
Iliad 8.262	τοῖσι δʼ ἐπʼ Αἴαντες θοῦριν ἐπιειμένοι ἀλκήν,
Iliad 8.263	τοῖσι δʼ ἐπʼ Ἰδομενεὺς καὶ ὀπάων Ἰδομενῆος
Iliad 8.264	Μηριόνης ἀτάλαντος Ἐνυαλίῳ ἀνδρειφόντῃ,
Iliad 8.265	τοῖσι δʼ ἐπʼ Εὐρύπυλος Εὐαίμονος ἀγλαὸς υἱός·
Iliad 8.266	Τεῦκρος δʼ εἴνατος ἦλθε παλίντονα τόξα τιταίνων,
Iliad 8.267	στῆ δʼ ἄρʼ ὑπʼ Αἴαντος σάκεϊ Τελαμωνιάδαο.
Iliad 8.268	ἔνθʼ Αἴας μὲν ὑπεξέφερεν σάκος· αὐτὰρ ὅ γʼ ἥρως
Iliad 8.269	παπτήνας, ἐπεὶ ἄρ τινʼ ὀϊστεύσας ἐν ὁμίλῳ
Iliad 8.270	βεβλήκοι, ὃ μὲν αὖθι πεσὼν ἀπὸ θυμὸν ὄλεσσεν,
Iliad 8.271	αὐτὰρ ὃ αὖτις ἰὼν πάϊς ὣς ὑπὸ μητέρα δύσκεν
Iliad 8.272	εἰς Αἴανθʼ· ὃ δέ μιν σάκεϊ κρύπτασκε φαεινῷ.
Iliad 8.273	ἔνθα τίνα πρῶτον Τρώων ἕλε Τεῦκρος ἀμύμων;
Iliad 8.274	Ὀρσίλοχον μὲν πρῶτα καὶ Ὄρμενον ἠδʼ Ὀφελέστην
Iliad 8.275	Δαίτορά τε Χρομίον τε καὶ ἀντίθεον Λυκοφόντην
Iliad 8.276	καὶ Πολυαιμονίδην Ἀμοπάονα καὶ Μελάνιππον,
Iliad 8.277	πάντας ἐπασσυτέρους πέλασε χθονὶ πουλυβοτείρῃ.
Iliad 8.278	τὸν δὲ ἰδὼν γήθησεν ἄναξ ἀνδρῶν Ἀγαμέμνων
Iliad 8.279	τόξου ἄπο κρατεροῦ Τρώων ὀλέκοντα φάλαγγας·
Iliad 8.280	στῆ δὲ παρʼ αὐτὸν ἰὼν καί μιν πρὸς μῦθον ἔειπε·
Iliad 8.281	Τεῦκρε φίλη κεφαλή, Τελαμώνιε κοίρανε λαῶν
Iliad 8.282	βάλλʼ οὕτως, αἴ κέν τι φόως Δαναοῖσι γένηαι
Iliad 8.283	πατρί τε σῷ Τελαμῶνι, ὅ σʼ ἔτρεφε τυτθὸν ἐόντα,
Iliad 8.284	καί σε νόθον περ ἐόντα κομίσσατο ᾧ ἐνὶ οἴκῳ·
Iliad 8.285	τὸν καὶ τηλόθʼ ἐόντα ἐϋκλείης ἐπίβησον.
Iliad 8.286	σοὶ δʼ ἐγὼ ἐξερέω ὡς καὶ τετελεσμένον ἔσται·
Iliad 8.287	αἴ κέν μοι δώῃ Ζεύς τʼ αἰγίοχος καὶ Ἀθήνη
Iliad 8.288	Ἰλίου ἐξαλαπάξαι ἐϋκτίμενον πτολίεθρον,
Iliad 8.289	πρώτῳ τοι μετʼ ἐμὲ πρεσβήϊον ἐν χερὶ θήσω,
Iliad 8.290	ἢ τρίποδʼ ἠὲ δύω ἵππους αὐτοῖσιν ὄχεσφιν
Iliad 8.291	ἠὲ γυναῖχʼ, ἥ κέν τοι ὁμὸν λέχος εἰσαναβαίνοι.
Iliad 8.292	τὸν δʼ ἀπαμειβόμενος προσεφώνεε Τεῦκρος ἀμύμων·
Iliad 8.293	Ἀτρεΐδη κύδιστε τί με σπεύδοντα καὶ αὐτὸν
Iliad 8.294	ὀτρύνεις; οὐ μέν τοι ὅση δύναμίς γε πάρεστι
Iliad 8.295	παύομαι, ἀλλʼ ἐξ οὗ προτὶ Ἴλιον ὠσάμεθʼ αὐτοὺς
Iliad 8.296	ἐκ τοῦ δὴ τόξοισι δεδεγμένος ἄνδρας ἐναίρω.
Iliad 8.297	ὀκτὼ δὴ προέηκα τανυγλώχινας ὀϊστούς,
Iliad 8.298	πάντες δʼ ἐν χροῒ πῆχθεν ἀρηϊθόων αἰζηῶν·
Iliad 8.299	τοῦτον δʼ οὐ δύναμαι βαλέειν κύνα λυσσητῆρα.
Iliad 8.300	ἦ ῥα καὶ ἄλλον ὀϊστὸν ἀπὸ νευρῆφιν ἴαλλεν
Iliad 8.301	Ἕκτορος ἀντικρύ, βαλέειν δέ ἑ ἵετο θυμός·
Iliad 8.302	καὶ τοῦ μέν ῥʼ ἀφάμαρθʼ, ὃ δʼ ἀμύμονα Γοργυθίωνα
Iliad 8.303	υἱὸν ἐῢν Πριάμοιο κατὰ στῆθος βάλεν ἰῷ,
Iliad 8.304	τόν ῥʼ ἐξ Αἰσύμηθεν ὀπυιομένη τέκε μήτηρ
Iliad 8.305	καλὴ Καστιάνειρα δέμας ἐϊκυῖα θεῇσι.
Iliad 8.306	μήκων δʼ ὡς ἑτέρωσε κάρη βάλεν, ἥ τʼ ἐνὶ κήπῳ
Iliad 8.307	καρπῷ βριθομένη νοτίῃσί τε εἰαρινῇσιν,
Iliad 8.308	ὣς ἑτέρωσʼ ἤμυσε κάρη πήληκι βαρυνθέν.
Iliad 8.309	Τεῦκρος δʼ ἄλλον ὀϊστὸν ἀπὸ νευρῆφιν ἴαλλεν
Iliad 8.310	Ἕκτορος ἀντικρύ, βαλέειν δέ ἑ ἵετο θυμός.
Iliad 8.311	ἀλλʼ ὅ γε καὶ τόθʼ ἅμαρτε· παρέσφηλεν γὰρ Ἀπόλλων·
Iliad 8.312	ἀλλʼ Ἀρχεπτόλεμον θρασὺν Ἕκτορος ἡνιοχῆα
Iliad 8.313	ἱέμενον πόλεμον δὲ βάλε στῆθος παρὰ μαζόν·
Iliad 8.314	ἤριπε δʼ ἐξ ὀχέων, ὑπερώησαν δέ οἱ ἵπποι
Iliad 8.315	ὠκύποδες· τοῦ δʼ αὖθι λύθη ψυχή τε μένος τε.
Iliad 8.316	Ἕκτορα δʼ αἰνὸν ἄχος πύκασε φρένας ἡνιόχοιο·
Iliad 8.317	τὸν μὲν ἔπειτʼ εἴασε καὶ ἀχνύμενός περ ἑταίρου,
Iliad 8.318	Κεβριόνην δʼ ἐκέλευσεν ἀδελφεὸν ἐγγὺς ἐόντα
Iliad 8.319	ἵππων ἡνίʼ ἑλεῖν· ὃ δʼ ἄρʼ οὐκ ἀπίθησεν ἀκούσας.
Iliad 8.320	αὐτὸς δʼ ἐκ δίφροιο χαμαὶ θόρε παμφανόωντος
Iliad 8.321	σμερδαλέα ἰάχων· ὃ δὲ χερμάδιον λάβε χειρί,
Iliad 8.322	βῆ δʼ ἰθὺς Τεύκρου, βαλέειν δέ ἑ θυμὸς ἀνώγει.
Iliad 8.323	ἤτοι ὃ μὲν φαρέτρης ἐξείλετο πικρὸν ὀϊστόν,
Iliad 8.324	θῆκε δʼ ἐπὶ νευρῇ· τὸν δʼ αὖ κορυθαίολος Ἕκτωρ
Iliad 8.325	αὐερύοντα παρʼ ὦμον, ὅθι κληῒς ἀποέργει
Iliad 8.326	αὐχένα τε στῆθός τε, μάλιστα δὲ καίριόν ἐστι,
Iliad 8.327	τῇ ῥʼ ἐπὶ οἷ μεμαῶτα βάλεν λίθῳ ὀκριόεντι,
Iliad 8.328	ῥῆξε δέ οἱ νευρήν· νάρκησε δὲ χεὶρ ἐπὶ καρπῷ,
Iliad 8.329	στῆ δὲ γνὺξ ἐριπών, τόξον δέ οἱ ἔκπεσε χειρός.
Iliad 8.330	Αἴας δʼ οὐκ ἀμέλησε κασιγνήτοιο πεσόντος,
Iliad 8.331	ἀλλὰ θέων περίβη καί οἱ σάκος ἀμφεκάλυψε.
Iliad 8.332	τὸν μὲν ἔπειθʼ ὑποδύντε δύω ἐρίηρες ἑταῖροι
Iliad 8.333	Μηκιστεὺς Ἐχίοιο πάϊς καὶ δῖος Ἀλάστωρ
Iliad 8.334	νῆας ἔπι γλαφυρὰς φερέτην βαρέα στενάχοντα.
Iliad 8.335	ἂψ δʼ αὖτις Τρώεσσιν Ὀλύμπιος ἐν μένος ὦρσεν·
Iliad 8.336	οἳ δʼ ἰθὺς τάφροιο βαθείης ὦσαν Ἀχαιούς·
Iliad 8.337	Ἕκτωρ δʼ ἐν πρώτοισι κίε σθένεϊ βλεμεαίνων.
Iliad 8.338	ὡς δʼ ὅτε τίς τε κύων συὸς ἀγρίου ἠὲ λέοντος
Iliad 8.339	ἅπτηται κατόπισθε ποσὶν ταχέεσσι διώκων
Iliad 8.340	ἰσχία τε γλουτούς τε, ἑλισσόμενόν τε δοκεύει,
Iliad 8.341	ὣς Ἕκτωρ ὤπαζε κάρη κομόωντας Ἀχαιούς,
Iliad 8.342	αἰὲν ἀποκτείνων τὸν ὀπίστατον· οἳ δὲ φέβοντο.
Iliad 8.343	αὐτὰρ ἐπεὶ διά τε σκόλοπας καὶ τάφρον ἔβησαν
Iliad 8.344	φεύγοντες, πολλοὶ δὲ δάμεν Τρώων ὑπὸ χερσίν,
Iliad 8.345	οἳ μὲν δὴ παρὰ νηυσὶν ἐρητύοντο μένοντες,
Iliad 8.346	ἀλλήλοισί τε κεκλόμενοι καὶ πᾶσι θεοῖσι
Iliad 8.347	χεῖρας ἀνίσχοντες μεγάλʼ εὐχετόωντο ἕκαστος·
Iliad 8.348	Ἕκτωρ δʼ ἀμφιπεριστρώφα καλλίτριχας ἵππους
Iliad 8.349	Γοργοῦς ὄμματʼ ἔχων ἠδὲ βροτολοιγοῦ Ἄρηος.
Iliad 8.350	τοὺς δὲ ἰδοῦσʼ ἐλέησε θεὰ λευκώλενος Ἥρη,
Iliad 8.351	αἶψα δʼ Ἀθηναίην ἔπεα πτερόεντα προσηύδα·
Iliad 8.352	ὢ πόποι αἰγιόχοιο Διὸς τέκος οὐκέτι νῶϊ
Iliad 8.353	ὀλλυμένων Δαναῶν κεκαδησόμεθʼ ὑστάτιόν περ;
Iliad 8.354	οἵ κεν δὴ κακὸν οἶτον ἀναπλήσαντες ὄλωνται
Iliad 8.355	ἀνδρὸς ἑνὸς ῥιπῇ, ὃ δὲ μαίνεται οὐκέτʼ ἀνεκτῶς
Iliad 8.356	Ἕκτωρ Πριαμίδης, καὶ δὴ κακὰ πολλὰ ἔοργε.
Iliad 8.357	τὴν δʼ αὖτε προσέειπε θεὰ γλαυκῶπις Ἀθήνη·
Iliad 8.358	καὶ λίην οὗτός γε μένος θυμόν τʼ ὀλέσειε
Iliad 8.359	χερσὶν ὑπʼ Ἀργείων φθίμενος ἐν πατρίδι γαίῃ·
Iliad 8.360	ἀλλὰ πατὴρ οὑμὸς φρεσὶ μαίνεται οὐκ ἀγαθῇσι
Iliad 8.361	σχέτλιος, αἰὲν ἀλιτρός, ἐμῶν μενέων ἀπερωεύς·
Iliad 8.362	οὐδέ τι τῶν μέμνηται, ὅ οἱ μάλα πολλάκις υἱὸν
Iliad 8.363	τειρόμενον σώεσκον ὑπʼ Εὐρυσθῆος ἀέθλων.
Iliad 8.364	ἤτοι ὃ μὲν κλαίεσκε πρὸς οὐρανόν, αὐτὰρ ἐμὲ Ζεὺς
Iliad 8.365	τῷ ἐπαλεξήσουσαν ἀπʼ οὐρανόθεν προΐαλλεν.
Iliad 8.366	εἰ γὰρ ἐγὼ τάδε ᾔδεʼ ἐνὶ φρεσὶ πευκαλίμῃσιν
Iliad 8.367	εὖτέ μιν εἰς Ἀΐδαο πυλάρταο προὔπεμψεν
Iliad 8.368	ἐξ Ἐρέβευς ἄξοντα κύνα στυγεροῦ Ἀΐδαο,
Iliad 8.369	οὐκ ἂν ὑπεξέφυγε Στυγὸς ὕδατος αἰπὰ ῥέεθρα.
Iliad 8.370	νῦν δʼ ἐμὲ μὲν στυγέει, Θέτιδος δʼ ἐξήνυσε βουλάς,
Iliad 8.371	ἥ οἱ γούνατʼ ἔκυσσε καὶ ἔλλαβε χειρὶ γενείου,
Iliad 8.372	λισσομένη τιμῆσαι Ἀχιλλῆα πτολίπορθον.
Iliad 8.373	ἔσται μὰν ὅτʼ ἂν αὖτε φίλην γλαυκώπιδα εἴπῃ.
Iliad 8.374	ἀλλὰ σὺ μὲν νῦν νῶϊν ἐπέντυε μώνυχας ἵππους,
Iliad 8.375	ὄφρʼ ἂν ἐγὼ καταδῦσα Διὸς δόμον αἰγιόχοιο
Iliad 8.376	τεύχεσιν ἐς πόλεμον θωρήξομαι, ὄφρα ἴδωμαι
Iliad 8.377	ἢ νῶϊ Πριάμοιο πάϊς κορυθαίολος Ἕκτωρ
Iliad 8.378	γηθήσει προφανέντε ἀνὰ πτολέμοιο γεφύρας,
Iliad 8.379	ἦ τις καὶ Τρώων κορέει κύνας ἠδʼ οἰωνοὺς
Iliad 8.380	δημῷ καὶ σάρκεσσι, πεσὼν ἐπὶ νηυσὶν Ἀχαιῶν.
Iliad 8.381	ὣς ἔφατʼ, οὐδʼ ἀπίθησε θεὰ λευκώλενος Ἥρη.
Iliad 8.382	ἣ μὲν ἐποιχομένη χρυσάμπυκας ἔντυεν ἵππους
Iliad 8.383	Ἥρη πρέσβα θεὰ θυγάτηρ μεγάλοιο Κρόνοιο·
Iliad 8.384	αὐτὰρ Ἀθηναίη κούρη Διὸς αἰγιόχοιο
Iliad 8.385	πέπλον μὲν κατέχευεν ἑανὸν πατρὸς ἐπʼ οὔδει
Iliad 8.386	ποικίλον, ὅν ῥʼ αὐτὴ ποιήσατο καὶ κάμε χερσίν,
Iliad 8.387	ἣ δὲ χιτῶνʼ ἐνδῦσα Διὸς νεφεληγερέταο
Iliad 8.388	τεύχεσιν ἐς πόλεμον θωρήσσετο δακρυόεντα.
Iliad 8.389	ἐς δʼ ὄχεα φλόγεα ποσὶ βήσετο, λάζετο δʼ ἔγχος
Iliad 8.390	βριθὺ μέγα στιβαρόν, τῷ δάμνησι στίχας ἀνδρῶν
Iliad 8.391	ἡρώων, τοῖσίν τε κοτέσσεται ὀβριμοπάτρη.
Iliad 8.392	Ἥρη δὲ μάστιγι θοῶς ἐπεμαίετʼ ἄρʼ ἵππους·
Iliad 8.393	αὐτόμαται δὲ πύλαι μύκον οὐρανοῦ ἃς ἔχον Ὧραι,
Iliad 8.394	τῇς ἐπιτέτραπται μέγας οὐρανὸς Οὔλυμπός τε
Iliad 8.395	ἠμὲν ἀνακλῖναι πυκινὸν νέφος ἠδʼ ἐπιθεῖναι.
Iliad 8.396	τῇ ῥα διʼ αὐτάων κεντρηνεκέας ἔχον ἵππους.
Iliad 8.397	Ζεὺς δὲ πατὴρ Ἴδηθεν ἐπεὶ ἴδε χώσατʼ ἄρʼ αἰνῶς,
Iliad 8.398	Ἶριν δʼ ὄτρυνε χρυσόπτερον ἀγγελέουσαν·
Iliad 8.399	βάσκʼ ἴθι Ἶρι ταχεῖα, πάλιν τρέπε μηδʼ ἔα ἄντην
Iliad 8.400	ἔρχεσθʼ· οὐ γὰρ καλὰ συνοισόμεθα πτόλεμον δέ.
Iliad 8.401	ὧδε γὰρ ἐξερέω, τὸ δὲ καὶ τετελεσμένον ἔσται·
Iliad 8.402	γυιώσω μέν σφωϊν ὑφʼ ἅρμασιν ὠκέας ἵππους,
Iliad 8.403	αὐτὰς δʼ ἐκ δίφρου βαλέω κατά θʼ ἅρματα ἄξω·
Iliad 8.404	οὐδέ κεν ἐς δεκάτους περιτελλομένους ἐνιαυτοὺς
Iliad 8.405	ἕλκεʼ ἀπαλθήσεσθον, ἅ κεν μάρπτῃσι κεραυνός·
Iliad 8.406	ὄφρα ἰδῇ γλαυκῶπις ὅτʼ ἂν ᾧ πατρὶ μάχηται.
Iliad 8.407	Ἥρῃ δʼ οὔ τι τόσον νεμεσίζομαι οὐδὲ χολοῦμαι·
Iliad 8.408	αἰεὶ γάρ μοι ἔωθεν ἐνικλᾶν ὅττί κεν εἴπω.
Iliad 8.409	ὣς ἔφατʼ, ὦρτο δὲ Ἶρις ἀελλόπος ἀγγελέουσα,
Iliad 8.410	βῆ δʼ ἐξ Ἰδαίων ὀρέων ἐς μακρὸν Ὄλυμπον.
Iliad 8.411	πρώτῃσιν δὲ πύλῃσι πολυπτύχου Οὐλύμποιο
Iliad 8.412	ἀντομένη κατέρυκε, Διὸς δέ σφʼ ἔννεπε μῦθον·
Iliad 8.413	πῇ μέματον; τί σφῶϊν ἐνὶ φρεσὶ μαίνεται ἦτορ;
Iliad 8.414	οὐκ ἐάᾳ Κρονίδης ἐπαμυνέμεν Ἀργείοισιν.
Iliad 8.415	ὧδε γὰρ ἠπείλησε Κρόνου πάϊς, ᾗ τελέει περ,
Iliad 8.416	γυιώσειν μὲν σφῶϊν ὑφʼ ἅρμασιν ὠκέας ἵππους,
Iliad 8.417	αὐτὰς δʼ ἐκ δίφρου βαλέειν κατά θʼ ἅρματα ἄξειν·
Iliad 8.418	οὐδέ κεν ἐς δεκάτους περιτελλομένους ἐνιαυτοὺς
Iliad 8.419	ἕλκεʼ ἀπαλθήσεσθον, ἅ κεν μάρπτῃσι κεραυνός·
Iliad 8.420	ὄφρα ἰδῇς γλαυκῶπι ὅτʼ ἂν σῷ πατρὶ μάχηαι.
Iliad 8.421	Ἥρῃ δʼ οὔ τι τόσον νεμεσίζεται οὐδὲ χολοῦται·
Iliad 8.422	αἰεὶ γάρ οἱ ἔωθεν ἐνικλᾶν ὅττι κεν εἴπῃ·
Iliad 8.423	ἀλλὰ σύ γʼ αἰνοτάτη κύον ἀδεὲς εἰ ἐτεόν γε
Iliad 8.424	τολμήσεις Διὸς ἄντα πελώριον ἔγχος ἀεῖραι.
Iliad 8.425	ἣ μὲν ἄρʼ ὣς εἰποῦσʼ ἀπέβη πόδας ὠκέα Ἶρις,
Iliad 8.426	αὐτὰρ Ἀθηναίην Ἥρη πρὸς μῦθον ἔειπεν·
Iliad 8.427	ὢ πόποι αἰγιόχοιο Διὸς τέκος, οὐκέτʼ ἔγωγε
Iliad 8.428	νῶϊ ἐῶ Διὸς ἄντα βροτῶν ἕνεκα πτολεμίζειν·
Iliad 8.429	τῶν ἄλλος μὲν ἀποφθίσθω, ἄλλος δὲ βιώτω,
Iliad 8.430	ὅς κε τύχῃ· κεῖνος δὲ τὰ ἃ φρονέων ἐνὶ θυμῷ
Iliad 8.431	Τρωσί τε καὶ Δαναοῖσι δικαζέτω, ὡς ἐπιεικές.
Iliad 8.432	ὣς ἄρα φωνήσασα πάλιν τρέπε μώνυχας ἵππους·
Iliad 8.433	τῇσιν δʼ Ὧραι μὲν λῦσαν καλλίτριχας ἵππους,
Iliad 8.434	καὶ τοὺς μὲν κατέδησαν ἐπʼ ἀμβροσίῃσι κάπῃσιν,
Iliad 8.435	ἅρματα δʼ ἔκλιναν πρὸς ἐνώπια παμφανόωντα·
Iliad 8.436	αὐταὶ δὲ χρυσέοισιν ἐπὶ κλισμοῖσι κάθιζον
Iliad 8.437	μίγδʼ ἄλλοισι θεοῖσι, φίλον τετιημέναι ἦτορ.
Iliad 8.438	Ζεὺς δὲ πατὴρ Ἴδηθεν ἐΰτροχον ἅρμα καὶ ἵππους
Iliad 8.439	Οὔλυμπον δὲ δίωκε, θεῶν δʼ ἐξίκετο θώκους.
Iliad 8.440	τῷ δὲ καὶ ἵππους μὲν λῦσε κλυτὸς ἐννοσίγαιος,
Iliad 8.441	ἅρματα δʼ ἂμ βωμοῖσι τίθει κατὰ λῖτα πετάσσας·
Iliad 8.442	αὐτὸς δὲ χρύσειον ἐπὶ θρόνον εὐρύοπα Ζεὺς
Iliad 8.443	ἕζετο, τῷ δʼ ὑπὸ ποσσὶ μέγας πελεμίζετʼ Ὄλυμπος.
Iliad 8.444	αἳ δʼ οἶαι Διὸς ἀμφὶς Ἀθηναίη τε καὶ Ἥρη
Iliad 8.445	ἥσθην, οὐδέ τί μιν προσεφώνεον οὐδʼ ἐρέοντο·
Iliad 8.446	αὐτὰρ ὃ ἔγνω ᾗσιν ἐνὶ φρεσὶ φώνησέν τε·
Iliad 8.447	τίφθʼ οὕτω τετίησθον Ἀθηναίη τε καὶ Ἥρη;
Iliad 8.448	οὐ μέν θην κάμετόν γε μάχῃ ἔνι κυδιανείρῃ
Iliad 8.449	ὀλλῦσαι Τρῶας, τοῖσιν κότον αἰνὸν ἔθεσθε.
Iliad 8.450	πάντως, οἷον ἐμόν γε μένος καὶ χεῖρες ἄαπτοι,
Iliad 8.451	οὐκ ἄν με τρέψειαν ὅσοι θεοί εἰσʼ ἐν Ὀλύμπῳ.
Iliad 8.452	σφῶϊν δὲ πρίν περ τρόμος ἔλλαβε φαίδιμα γυῖα
Iliad 8.453	πρὶν πόλεμόν τε ἰδεῖν πολέμοιό τε μέρμερα ἔργα.
Iliad 8.454	ὧδε γὰρ ἐξερέω, τὸ δέ κεν τετελεσμένον ἦεν·
Iliad 8.455	οὐκ ἂν ἐφʼ ὑμετέρων ὀχέων πληγέντε κεραυνῷ
Iliad 8.456	ἂψ ἐς Ὄλυμπον ἵκεσθον, ἵνʼ ἀθανάτων ἕδος ἐστίν.
Iliad 8.457	ὣς ἔφαθʼ, αἳ δʼ ἐπέμυξαν Ἀθηναίη τε καὶ Ἥρη·
Iliad 8.458	πλησίαι αἵ γʼ ἥσθην, κακὰ δὲ Τρώεσσι μεδέσθην.
Iliad 8.459	ἤτοι Ἀθηναίη ἀκέων ἦν οὐδέ τι εἶπε
Iliad 8.460	σκυζομένη Διὶ πατρί, χόλος δέ μιν ἄγριος ᾕρει·
Iliad 8.461	Ἥρῃ δʼ οὐκ ἔχαδε στῆθος χόλον, ἀλλὰ προσηύδα·
Iliad 8.462	αἰνότατε Κρονίδη ποῖον τὸν μῦθον ἔειπες.
Iliad 8.463	εὖ νυ καὶ ἡμεῖς ἴδμεν ὅ τοι σθένος οὐκ ἀλαπαδνόν·
Iliad 8.464	ἀλλʼ ἔμπης Δαναῶν ὀλοφυρόμεθʼ αἰχμητάων,
Iliad 8.465	οἵ κεν δὴ κακὸν οἶτον ἀναπλήσαντες ὄλωνται.
Iliad 8.466	ἀλλʼ ἤτοι πολέμου μὲν ἀφεξόμεθʼ, εἰ σὺ κελεύεις·
Iliad 8.467	βουλὴν δʼ Ἀργείοις ὑποθησόμεθʼ ἥ τις ὀνήσει,
Iliad 8.468	ὡς μὴ πάντες ὄλωνται ὀδυσσαμένοιο τεοῖο.
Iliad 8.469	τὴν δʼ ἀπαμειβόμενος προσέφη νεφεληγερέτα Ζεύς·
Iliad 8.470	ἠοῦς δὴ καὶ μᾶλλον ὑπερμενέα Κρονίωνα
Iliad 8.471	ὄψεαι, αἴ κʼ ἐθέλῃσθα, βοῶπις πότνια Ἥρη
Iliad 8.472	ὀλλύντʼ Ἀργείων πουλὺν στρατὸν αἰχμητάων·
Iliad 8.473	οὐ γὰρ πρὶν πολέμου ἀποπαύσεται ὄβριμος Ἕκτωρ
Iliad 8.474	πρὶν ὄρθαι παρὰ ναῦφι ποδώκεα Πηλεΐωνα,
Iliad 8.475	ἤματι τῷ ὅτʼ ἂν οἳ μὲν ἐπὶ πρύμνῃσι μάχωνται
Iliad 8.476	στείνει ἐν αἰνοτάτῳ περὶ Πατρόκλοιο θανόντος·
Iliad 8.477	ὣς γὰρ θέσφατόν ἐστι· σέθεν δʼ ἐγὼ οὐκ ἀλεγίζω
Iliad 8.478	χωομένης, οὐδʼ εἴ κε τὰ νείατα πείραθʼ ἵκηαι
Iliad 8.479	γαίης καὶ πόντοιο, ἵνʼ Ἰάπετός τε Κρόνος τε
Iliad 8.480	ἥμενοι οὔτʼ αὐγῇς Ὑπερίονος Ἠελίοιο
Iliad 8.481	τέρποντʼ οὔτʼ ἀνέμοισι, βαθὺς δέ τε Τάρταρος ἀμφίς·
Iliad 8.482	οὐδʼ ἢν ἔνθʼ ἀφίκηαι ἀλωμένη, οὔ σευ ἔγωγε
Iliad 8.483	σκυζομένης ἀλέγω, ἐπεὶ οὐ σέο κύντερον ἄλλο.
Iliad 8.484	ὣς φάτο, τὸν δʼ οὔ τι προσέφη λευκώλενος Ἥρη.
Iliad 8.485	ἐν δʼ ἔπεσʼ Ὠκεανῷ λαμπρὸν φάος ἠελίοιο
Iliad 8.486	ἕλκον νύκτα μέλαιναν ἐπὶ ζείδωρον ἄρουραν.
Iliad 8.487	Τρωσὶν μέν ῥʼ ἀέκουσιν ἔδυ φάος, αὐτὰρ Ἀχαιοῖς
Iliad 8.488	ἀσπασίη τρίλλιστος ἐπήλυθε νὺξ ἐρεβεννή.
Iliad 8.489	Τρώων αὖτʼ ἀγορὴν ποιήσατο φαίδιμος Ἕκτωρ
Iliad 8.490	νόσφι νεῶν ἀγαγὼν ποταμῷ ἔπι δινήεντι,
Iliad 8.491	ἐν καθαρῷ ὅθι δὴ νεκύων διεφαίνετο χῶρος.
Iliad 8.492	ἐξ ἵππων δʼ ἀποβάντες ἐπὶ χθόνα μῦθον ἄκουον
Iliad 8.493	τόν ῥʼ Ἕκτωρ ἀγόρευε Διῒ φίλος· ἐν δʼ ἄρα χειρὶ
Iliad 8.494	ἔγχος ἔχʼ ἑνδεκάπηχυ· πάροιθε δὲ λάμπετο δουρὸς
Iliad 8.495	αἰχμὴ χαλκείη, περὶ δὲ χρύσεος θέε πόρκης,
Iliad 8.496	τῷ ὅ γʼ ἐρεισάμενος ἔπεα Τρώεσσι μετηύδα·
Iliad 8.497	κέκλυτέ μευ Τρῶες καὶ Δάρδανοι ἠδʼ ἐπίκουροι·
Iliad 8.498	νῦν ἐφάμην νῆάς τʼ ὀλέσας καὶ πάντας Ἀχαιοὺς
Iliad 8.499	ἂψ ἀπονοστήσειν προτὶ Ἴλιον ἠνεμόεσσαν·
Iliad 8.500	ἀλλὰ πρὶν κνέφας ἦλθε, τὸ νῦν ἐσάωσε μάλιστα
Iliad 8.501	Ἀργείους καὶ νῆας ἐπὶ ῥηγμῖνι θαλάσσης.
Iliad 8.502	ἀλλʼ ἤτοι νῦν μὲν πειθώμεθα νυκτὶ μελαίνῃ
Iliad 8.503	δόρπά τʼ ἐφοπλισόμεσθα· ἀτὰρ καλλίτριχας ἵππους
Iliad 8.504	λύσαθʼ ὑπὲξ ὀχέων, παρὰ δέ σφισι βάλλετʼ ἐδωδήν·
Iliad 8.505	ἐκ πόλιος δʼ ἄξεσθε βόας καὶ ἴφια μῆλα
Iliad 8.506	καρπαλίμως, οἶνον δὲ μελίφρονα οἰνίζεσθε
Iliad 8.507	σῖτόν τʼ ἐκ μεγάρων, ἐπὶ δὲ ξύλα πολλὰ λέγεσθε,
Iliad 8.508	ὥς κεν παννύχιοι μέσφʼ ἠοῦς ἠριγενείης
Iliad 8.509	καίωμεν πυρὰ πολλά, σέλας δʼ εἰς οὐρανὸν ἵκῃ,
Iliad 8.510	μή πως καὶ διὰ νύκτα κάρη κομόωντες Ἀχαιοὶ
Iliad 8.511	φεύγειν ὁρμήσωνται ἐπʼ εὐρέα νῶτα θαλάσσης.
Iliad 8.512	μὴ μὰν ἀσπουδί γε νεῶν ἐπιβαῖεν ἕκηλοι,
Iliad 8.513	ἀλλʼ ὥς τις τούτων γε βέλος καὶ οἴκοθι πέσσῃ
Iliad 8.514	βλήμενος ἢ ἰῷ ἢ ἔγχεϊ ὀξυόεντι
Iliad 8.515	νηὸς ἐπιθρῴσκων, ἵνα τις στυγέῃσι καὶ ἄλλος
Iliad 8.516	Τρωσὶν ἐφʼ ἱπποδάμοισι φέρειν πολύδακρυν Ἄρηα.
Iliad 8.517	κήρυκες δʼ ἀνὰ ἄστυ Διῒ φίλοι ἀγγελλόντων
Iliad 8.518	παῖδας πρωθήβας πολιοκροτάφους τε γέροντας
Iliad 8.519	λέξασθαι περὶ ἄστυ θεοδμήτων ἐπὶ πύργων·
Iliad 8.520	θηλύτεραι δὲ γυναῖκες ἐνὶ μεγάροισιν ἑκάστη
Iliad 8.521	πῦρ μέγα καιόντων· φυλακὴ δέ τις ἔμπεδος ἔστω
Iliad 8.522	μὴ λόχος εἰσέλθῃσι πόλιν λαῶν ἀπεόντων.
Iliad 8.523	ὧδʼ ἔστω Τρῶες μεγαλήτορες ὡς ἀγορεύω·
Iliad 8.524	μῦθος δʼ ὃς μὲν νῦν ὑγιὴς εἰρημένος ἔστω,
Iliad 8.525	τὸν δʼ ἠοῦς Τρώεσσι μεθʼ ἱπποδάμοις ἀγορεύσω.
Iliad 8.526	ἔλπομαι εὐχόμενος Διί τʼ ἄλλοισίν τε θεοῖσιν
Iliad 8.527	ἐξελάαν ἐνθένδε κύνας κηρεσσιφορήτους,
Iliad 8.528	οὓς κῆρες φορέουσι μελαινάων ἐπὶ νηῶν.
Iliad 8.529	ἀλλʼ ἤτοι ἐπὶ νυκτὶ φυλάξομεν ἡμέας αὐτούς,
Iliad 8.530	πρῶϊ δʼ ὑπηοῖοι σὺν τεύχεσι θωρηχθέντες
Iliad 8.531	νηυσὶν ἔπι γλαφυρῇσιν ἐγείρομεν ὀξὺν Ἄρηα.
Iliad 8.532	εἴσομαι εἴ κέ μʼ ὁ Τυδεΐδης κρατερὸς Διομήδης
Iliad 8.533	πὰρ νηῶν πρὸς τεῖχος ἀπώσεται, ἤ κεν ἐγὼ τὸν
Iliad 8.534	χαλκῷ δῃώσας ἔναρα βροτόεντα φέρωμαι.
Iliad 8.535	αὔριον ἣν ἀρετὴν διαείσεται, εἴ κʼ ἐμὸν ἔγχος
Iliad 8.536	μείνῃ ἐπερχόμενον· ἀλλʼ ἐν πρώτοισιν ὀΐω
Iliad 8.537	κείσεται οὐτηθείς, πολέες δʼ ἀμφʼ αὐτὸν ἑταῖροι
Iliad 8.538	ἠελίου ἀνιόντος ἐς αὔριον· εἰ γὰρ ἐγὼν ὣς
Iliad 8.539	εἴην ἀθάνατος καὶ ἀγήρως ἤματα πάντα,
Iliad 8.540	τιοίμην δʼ ὡς τίετʼ Ἀθηναίη καὶ Ἀπόλλων,
Iliad 8.541	ὡς νῦν ἡμέρη ἥδε κακὸν φέρει Ἀργείοισιν.
Iliad 8.542	ὣς Ἕκτωρ ἀγόρευʼ, ἐπὶ δὲ Τρῶες κελάδησαν.
Iliad 8.543	οἳ δʼ ἵππους μὲν λῦσαν ὑπὸ ζυγοῦ ἱδρώοντας,
Iliad 8.544	δῆσαν δʼ ἱμάντεσσι παρʼ ἅρμασιν οἷσιν ἕκαστος·
Iliad 8.545	ἐκ πόλιος δʼ ἄξοντο βόας καὶ ἴφια μῆλα
Iliad 8.546	καρπαλίμως, οἶνον δὲ μελίφρονα οἰνίζοντο,
Iliad 8.547	σῖτόν τʼ ἐκ μεγάρων, ἐπὶ δὲ ξύλα πολλὰ λέγοντο.
Iliad 8.548	ἔρδον δ’ ἀθανάτοισι τεληέσσας ἑκατόμβας
Iliad 8.549	κνίσην δʼ ἐκ πεδίου ἄνεμοι φέρον οὐρανὸν εἴσω.
Iliad 8.550	ἡδεῖαν· τῆς δ’ οὔ τι θεοὶ μάκαρες δατέοντο,
Iliad 8.551	οὐδ’ ἔθελον· μάλα γάρ σφιν ἀπήχθετο Ἴλιος ἱρή,
Iliad 8.552	καὶ Πρίαμος καὶ λαὸς ἐϋμμελίω Πριάμοιο
Iliad 8.553	οἳ δὲ μέγα φρονέοντες ἐπὶ πτολέμοιο γεφύρας
Iliad 8.554	εἴατο παννύχιοι, πυρὰ δέ σφισι καίετο πολλά.
Iliad 8.555	ὡς δʼ ὅτʼ ἐν οὐρανῷ ἄστρα φαεινὴν ἀμφὶ σελήνην
Iliad 8.556	φαίνετʼ ἀριπρεπέα, ὅτε τʼ ἔπλετο νήνεμος αἰθήρ·
Iliad 8.557	ἔκ τʼ ἔφανεν πᾶσαι σκοπιαὶ καὶ πρώονες ἄκροι
Iliad 8.558	καὶ νάπαι· οὐρανόθεν δʼ ἄρʼ ὑπερράγη ἄσπετος αἰθήρ,
Iliad 8.559	πάντα δὲ εἴδεται ἄστρα, γέγηθε δέ τε φρένα ποιμήν·
Iliad 8.560	τόσσα μεσηγὺ νεῶν ἠδὲ Ξάνθοιο ῥοάων
Iliad 8.561	Τρώων καιόντων πυρὰ φαίνετο Ἰλιόθι πρό.
Iliad 8.562	χίλιʼ ἄρʼ ἐν πεδίῳ πυρὰ καίετο, πὰρ δὲ ἑκάστῳ
Iliad 8.563	εἴατο πεντήκοντα σέλᾳ πυρὸς αἰθομένοιο.
Iliad 8.564	ἵπποι δὲ κρῖ λευκὸν ἐρεπτόμενοι καὶ ὀλύρας
Iliad 8.565	ἑσταότες παρʼ ὄχεσφιν ἐΰθρονον Ἠῶ μίμνον.
Iliad 9.1	ὣς οἱ μὲν Τρῶες φυλακὰς ἔχον· αὐτὰρ Ἀχαιοὺς
Iliad 9.2	θεσπεσίη ἔχε φύζα φόβου κρυόεντος ἑταίρη,
Iliad 9.3	πένθεϊ δʼ ἀτλήτῳ βεβολήατο πάντες ἄριστοι.
Iliad 9.4	ὡς δʼ ἄνεμοι δύο πόντον ὀρίνετον ἰχθυόεντα
Iliad 9.5	Βορέης καὶ Ζέφυρος, τώ τε Θρῄκηθεν ἄητον
Iliad 9.6	ἐλθόντʼ ἐξαπίνης· ἄμυδις δέ τε κῦμα κελαινὸν
Iliad 9.7	κορθύεται, πολλὸν δὲ παρὲξ ἅλα φῦκος ἔχευεν·
Iliad 9.8	ὣς ἐδαΐζετο θυμὸς ἐνὶ στήθεσσιν Ἀχαιῶν.
Iliad 9.9	Ἀτρεΐδης δʼ ἄχεϊ μεγάλῳ βεβολημένος ἦτορ
Iliad 9.10	φοίτα κηρύκεσσι λιγυφθόγγοισι κελεύων
Iliad 9.11	κλήδην εἰς ἀγορὴν κικλήσκειν ἄνδρα ἕκαστον,
Iliad 9.12	μὴ δὲ βοᾶν· αὐτὸς δὲ μετὰ πρώτοισι πονεῖτο.
Iliad 9.13	ἷζον δʼ εἰν ἀγορῇ τετιηότες· ἂν δʼ Ἀγαμέμνων
Iliad 9.14	ἵστατο δάκρυ χέων ὥς τε κρήνη μελάνυδρος
Iliad 9.15	ἥ τε κατʼ αἰγίλιπος πέτρης δνοφερὸν χέει ὕδωρ·
Iliad 9.16	ὣς ὃ βαρὺ στενάχων ἔπεʼ Ἀργείοισι μετηύδα·
Iliad 9.17	ὦ φίλοι Ἀργείων ἡγήτορες ἠδὲ μέδοντες
Iliad 9.18	Ζεύς με μέγα Κρονίδης ἄτῃ ἐνέδησε βαρείῃ
Iliad 9.19	σχέτλιος, ὃς τότε μέν μοι ὑπέσχετο καὶ κατένευσεν
Iliad 9.20	Ἴλιον ἐκπέρσαντʼ εὐτείχεον ἀπονέεσθαι,
Iliad 9.21	νῦν δὲ κακὴν ἀπάτην βουλεύσατο, καί με κελεύει
Iliad 9.22	δυσκλέα Ἄργος ἱκέσθαι, ἐπεὶ πολὺν ὤλεσα λαόν.
Iliad 9.23	οὕτω που Διὶ μέλλει ὑπερμενέϊ φίλον εἶναι,
Iliad 9.24	ὃς δὴ πολλάων πολίων κατέλυσε κάρηνα
Iliad 9.25	ἠδʼ ἔτι καὶ λύσει· τοῦ γὰρ κράτος ἐστὶ μέγιστον.
Iliad 9.26	ἀλλʼ ἄγεθʼ ὡς ἂν ἐγὼ εἴπω πειθώμεθα πάντες·
Iliad 9.27	φεύγωμεν σὺν νηυσὶ φίλην ἐς πατρίδα γαῖαν·
Iliad 9.28	οὐ γὰρ ἔτι Τροίην αἱρήσομεν εὐρυάγυιαν.
Iliad 9.29	ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ.
Iliad 9.30	δὴν δʼ ἄνεῳ ἦσαν τετιηότες υἷες Ἀχαιῶν·
Iliad 9.31	ὀψὲ δὲ δὴ μετέειπε βοὴν ἀγαθὸς Διομήδης·
Iliad 9.32	Ἀτρεΐδη σοὶ πρῶτα μαχήσομαι ἀφραδέοντι,
Iliad 9.33	ἣ θέμις ἐστὶν ἄναξ ἀγορῇ· σὺ δὲ μή τι χολωθῇς.
Iliad 9.34	ἀλκὴν μέν μοι πρῶτον ὀνείδισας ἐν Δαναοῖσι
Iliad 9.35	φὰς ἔμεν ἀπτόλεμον καὶ ἀνάλκιδα· ταῦτα δὲ πάντα
Iliad 9.36	ἴσασʼ Ἀργείων ἠμὲν νέοι ἠδὲ γέροντες.
Iliad 9.37	σοὶ δὲ διάνδιχα δῶκε Κρόνου πάϊς ἀγκυλομήτεω·
Iliad 9.38	σκήπτρῳ μέν τοι δῶκε τετιμῆσθαι περὶ πάντων,
Iliad 9.39	ἀλκὴν δʼ οὔ τοι δῶκεν, ὅ τε κράτος ἐστὶ μέγιστον.
Iliad 9.40	δαιμόνιʼ οὕτω που μάλα ἔλπεαι υἷας Ἀχαιῶν
Iliad 9.41	ἀπτολέμους τʼ ἔμεναι καὶ ἀνάλκιδας ὡς ἀγορεύεις;
Iliad 9.42	εἰ δέ τοι αὐτῷ θυμὸς ἐπέσσυται ὥς τε νέεσθαι
Iliad 9.43	ἔρχεο· πάρ τοι ὁδός, νῆες δέ τοι ἄγχι θαλάσσης
Iliad 9.44	ἑστᾶσʼ, αἵ τοι ἕποντο Μυκήνηθεν μάλα πολλαί.
Iliad 9.45	ἀλλʼ ἄλλοι μενέουσι κάρη κομόωντες Ἀχαιοὶ
Iliad 9.46	εἰς ὅ κέ περ Τροίην διαπέρσομεν. εἰ δὲ καὶ αὐτοὶ
Iliad 9.47	φευγόντων σὺν νηυσὶ φίλην ἐς πατρίδα γαῖαν·
Iliad 9.48	νῶϊ δʼ ἐγὼ Σθένελός τε μαχησόμεθʼ εἰς ὅ κε τέκμωρ
Iliad 9.49	Ἰλίου εὕρωμεν· σὺν γὰρ θεῷ εἰλήλουθμεν.
Iliad 9.50	ὣς ἔφαθʼ, οἳ δʼ ἄρα πάντες ἐπίαχον υἷες Ἀχαιῶν
Iliad 9.51	μῦθον ἀγασσάμενοι Διομήδεος ἱπποδάμοιο.
Iliad 9.52	τοῖσι δʼ ἀνιστάμενος μετεφώνεεν ἱππότα Νέστωρ·
Iliad 9.53	Τυδεΐδη περὶ μὲν πολέμῳ ἔνι καρτερός ἐσσι,
Iliad 9.54	καὶ βουλῇ μετὰ πάντας ὁμήλικας ἔπλευ ἄριστος.
Iliad 9.55	οὔ τίς τοι τὸν μῦθον ὀνόσσεται ὅσσοι Ἀχαιοί,
Iliad 9.56	οὐδὲ πάλιν ἐρέει· ἀτὰρ οὐ τέλος ἵκεο μύθων.
Iliad 9.57	ἦ μὲν καὶ νέος ἐσσί, ἐμὸς δέ κε καὶ πάϊς εἴης
Iliad 9.58	ὁπλότατος γενεῆφιν· ἀτὰρ πεπνυμένα βάζεις
Iliad 9.59	Ἀργείων βασιλῆας, ἐπεὶ κατὰ μοῖραν ἔειπες.
Iliad 9.60	ἀλλʼ ἄγʼ ἐγών, ὃς σεῖο γεραίτερος εὔχομαι εἶναι,
Iliad 9.61	ἐξείπω καὶ πάντα διίξομαι· οὐδέ κέ τίς μοι
Iliad 9.62	μῦθον ἀτιμήσειʼ, οὐδὲ κρείων Ἀγαμέμνων.
Iliad 9.63	ἀφρήτωρ ἀθέμιστος ἀνέστιός ἐστιν ἐκεῖνος
Iliad 9.64	ὃς πολέμου ἔραται ἐπιδημίου ὀκρυόεντος.
Iliad 9.65	ἀλλʼ ἤτοι νῦν μὲν πειθώμεθα νυκτὶ μελαίνῃ
Iliad 9.66	δόρπά τʼ ἐφοπλισόμεσθα· φυλακτῆρες δὲ ἕκαστοι
Iliad 9.67	λεξάσθων παρὰ τάφρον ὀρυκτὴν τείχεος ἐκτός.
Iliad 9.68	κούροισιν μὲν ταῦτʼ ἐπιτέλλομαι· αὐτὰρ ἔπειτα
Iliad 9.69	Ἀτρεΐδη σὺ μὲν ἄρχε· σὺ γὰρ βασιλεύτατός ἐσσι.
Iliad 9.70	δαίνυ δαῖτα γέρουσιν· ἔοικέ τοι, οὔ τοι ἀεικές.
Iliad 9.71	πλεῖαί τοι οἴνου κλισίαι, τὸν νῆες Ἀχαιῶν
Iliad 9.72	ἠμάτιαι Θρῄκηθεν ἐπʼ εὐρέα πόντον ἄγουσι·
Iliad 9.73	πᾶσά τοί ἐσθʼ ὑποδεξίη, πολέεσσι δʼ ἀνάσσεις.
Iliad 9.74	πολλῶν δʼ ἀγρομένων τῷ πείσεαι ὅς κεν ἀρίστην
Iliad 9.75	βουλὴν βουλεύσῃ· μάλα δὲ χρεὼ πάντας Ἀχαιοὺς
Iliad 9.76	ἐσθλῆς καὶ πυκινῆς, ὅτι δήϊοι ἐγγύθι νηῶν
Iliad 9.77	καίουσιν πυρὰ πολλά· τίς ἂν τάδε γηθήσειε;
Iliad 9.78	νὺξ δʼ ἧδʼ ἠὲ διαρραίσει στρατὸν ἠὲ σαώσει.
Iliad 9.79	ὣς ἔφαθʼ, οἳ δʼ ἄρα τοῦ μάλα μὲν κλύον ἠδὲ πίθοντο.
Iliad 9.80	ἐκ δὲ φυλακτῆρες σὺν τεύχεσιν ἐσσεύοντο
Iliad 9.81	ἀμφί τε Νεστορίδην Θρασυμήδεα ποιμένα λαῶν,
Iliad 9.82	ἠδʼ ἀμφʼ Ἀσκάλαφον καὶ Ἰάλμενον υἷας Ἄρηος
Iliad 9.83	ἀμφί τε Μηριόνην Ἀφαρῆά τε Δηΐπυρόν τε,
Iliad 9.84	ἠδʼ ἀμφὶ Κρείοντος υἱὸν Λυκομήδεα δῖον.
Iliad 9.85	ἕπτʼ ἔσαν ἡγεμόνες φυλάκων, ἑκατὸν δὲ ἑκάστῳ
Iliad 9.86	κοῦροι ἅμα στεῖχον δολίχʼ ἔγχεα χερσὶν ἔχοντες·
Iliad 9.87	κὰδ δὲ μέσον τάφρου καὶ τείχεος ἷζον ἰόντες·
Iliad 9.88	ἔνθα δὲ πῦρ κήαντο, τίθεντο δὲ δόρπα ἕκαστος.
Iliad 9.89	Ἀτρεΐδης δὲ γέροντας ἀολλέας ἦγεν Ἀχαιῶν
Iliad 9.90	ἐς κλισίην, παρὰ δέ σφι τίθει μενοεικέα δαῖτα.
Iliad 9.91	οἳ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Iliad 9.92	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Iliad 9.93	τοῖς ὁ γέρων πάμπρωτος ὑφαίνειν ἤρχετο μῆτιν
Iliad 9.94	Νέστωρ, οὗ καὶ πρόσθεν ἀρίστη φαίνετο βουλή·
Iliad 9.95	ὅ σφιν ἐϋφρονέων ἀγορήσατο καὶ μετέειπεν·
Iliad 9.96	Ἀτρεΐδη κύδιστε ἄναξ ἀνδρῶν Ἀγάμεμνον
Iliad 9.97	ἐν σοὶ μὲν λήξω, σέο δʼ ἄρξομαι, οὕνεκα πολλῶν
Iliad 9.98	λαῶν ἐσσι ἄναξ καί τοι Ζεὺς ἐγγυάλιξε
Iliad 9.99	σκῆπτρόν τʼ ἠδὲ θέμιστας, ἵνά σφισι βουλεύῃσθα.
Iliad 9.100	τώ σε χρὴ περὶ μὲν φάσθαι ἔπος ἠδʼ ἐπακοῦσαι,
Iliad 9.101	κρηῆναι δὲ καὶ ἄλλῳ, ὅτʼ ἄν τινα θυμὸς ἀνώγῃ
Iliad 9.102	εἰπεῖν εἰς ἀγαθόν· σέο δʼ ἕξεται ὅττί κεν ἄρχῃ.
Iliad 9.103	αὐτὰρ ἐγὼν ἐρέω ὥς μοι δοκεῖ εἶναι ἄριστα.
Iliad 9.104	οὐ γάρ τις νόον ἄλλος ἀμείνονα τοῦδε νοήσει
Iliad 9.105	οἷον ἐγὼ νοέω ἠμὲν πάλαι ἠδʼ ἔτι καὶ νῦν
Iliad 9.106	ἐξ ἔτι τοῦ ὅτε διογενὲς Βρισηΐδα κούρην
Iliad 9.107	χωομένου Ἀχιλῆος ἔβης κλισίηθεν ἀπούρας
Iliad 9.108	οὔ τι καθʼ ἡμέτερόν γε νόον· μάλα γάρ τοι ἔγωγε
Iliad 9.109	πόλλʼ ἀπεμυθεόμην· σὺ δὲ σῷ μεγαλήτορι θυμῷ
Iliad 9.110	εἴξας ἄνδρα φέριστον, ὃν ἀθάνατοί περ ἔτισαν,
Iliad 9.111	ἠτίμησας, ἑλὼν γὰρ ἔχεις γέρας· ἀλλʼ ἔτι καὶ νῦν
Iliad 9.112	φραζώμεσθʼ ὥς κέν μιν ἀρεσσάμενοι πεπίθωμεν
Iliad 9.113	δώροισίν τʼ ἀγανοῖσιν ἔπεσσί τε μειλιχίοισι.
Iliad 9.114	τὸν δʼ αὖτε προσέειπεν ἄναξ ἀνδρῶν Ἀγαμέμνων·
Iliad 9.115	ὦ γέρον οὔ τι ψεῦδος ἐμὰς ἄτας κατέλεξας·
Iliad 9.116	ἀασάμην, οὐδʼ αὐτὸς ἀναίνομαι. ἀντί νυ πολλῶν
Iliad 9.117	λαῶν ἐστὶν ἀνὴρ ὅν τε Ζεὺς κῆρι φιλήσῃ,
Iliad 9.118	ὡς νῦν τοῦτον ἔτισε, δάμασσε δὲ λαὸν Ἀχαιῶν.
Iliad 9.119	ἀλλʼ ἐπεὶ ἀασάμην φρεσὶ λευγαλέῃσι πιθήσας,
Iliad 9.120	ἂψ ἐθέλω ἀρέσαι δόμεναί τʼ ἀπερείσιʼ ἄποινα.
Iliad 9.121	ὑμῖν δʼ ἐν πάντεσσι περικλυτὰ δῶρʼ ὀνομήνω
Iliad 9.122	ἕπτʼ ἀπύρους τρίποδας, δέκα δὲ χρυσοῖο τάλαντα,
Iliad 9.123	αἴθωνας δὲ λέβητας ἐείκοσι, δώδεκα δʼ ἵππους
Iliad 9.124	πηγοὺς ἀθλοφόρους, οἳ ἀέθλια ποσσὶν ἄροντο.
Iliad 9.125	οὔ κεν ἀλήϊος εἴη ἀνὴρ ᾧ τόσσα γένοιτο,
Iliad 9.126	οὐδέ κεν ἀκτήμων ἐριτίμοιο χρυσοῖο,
Iliad 9.127	ὅσσά μοι ἠνείκαντο ἀέθλια μώνυχες ἵπποι.
Iliad 9.128	δώσω δʼ ἑπτὰ γυναῖκας ἀμύμονα ἔργα ἰδυίας
Iliad 9.129	Λεσβίδας, ἃς ὅτε Λέσβον ἐϋκτιμένην ἕλεν αὐτὸς
Iliad 9.130	ἐξελόμην, αἳ κάλλει ἐνίκων φῦλα γυναικῶν.
Iliad 9.131	τὰς μέν οἱ δώσω, μετὰ δʼ ἔσσεται ἣν τότʼ ἀπηύρων
Iliad 9.132	κούρη Βρισῆος· ἐπὶ δὲ μέγαν ὅρκον ὀμοῦμαι
Iliad 9.133	μή ποτε τῆς εὐνῆς ἐπιβήμεναι ἠδὲ μιγῆναι,
Iliad 9.134	ἣ θέμις ἀνθρώπων πέλει ἀνδρῶν ἠδὲ γυναικῶν.
Iliad 9.135	ταῦτα μὲν αὐτίκα πάντα παρέσσεται· εἰ δέ κεν αὖτε
Iliad 9.136	ἄστυ μέγα Πριάμοιο θεοὶ δώωσʼ ἀλαπάξαι,
Iliad 9.137	νῆα ἅλις χρυσοῦ καὶ χαλκοῦ νηησάσθω
Iliad 9.138	εἰσελθών, ὅτε κεν δατεώμεθα ληΐδʼ Ἀχαιοί,
Iliad 9.139	Τρωϊάδας δὲ γυναῖκας ἐείκοσιν αὐτὸς ἑλέσθω,
Iliad 9.140	αἴ κε μετʼ Ἀργείην Ἑλένην κάλλισται ἔωσιν.
Iliad 9.141	εἰ δέ κεν Ἄργος ἱκοίμεθʼ Ἀχαιϊκὸν οὖθαρ ἀρούρης
Iliad 9.142	γαμβρός κέν μοι ἔοι· τίσω δέ μιν ἶσον Ὀρέστῃ,
Iliad 9.143	ὅς μοι τηλύγετος τρέφεται θαλίῃ ἔνι πολλῇ.
Iliad 9.144	τρεῖς δέ μοί εἰσι θύγατρες ἐνὶ μεγάρῳ εὐπήκτῳ
Iliad 9.145	Χρυσόθεμις καὶ Λαοδίκη καὶ Ἰφιάνασσα,
Iliad 9.146	τάων ἥν κʼ ἐθέλῃσι φίλην ἀνάεδνον ἀγέσθω
Iliad 9.147	πρὸς οἶκον Πηλῆος· ἐγὼ δʼ ἐπὶ μείλια δώσω
Iliad 9.148	πολλὰ μάλʼ, ὅσσʼ οὔ πώ τις ἑῇ ἐπέδωκε θυγατρί·
Iliad 9.149	ἑπτὰ δέ οἱ δώσω εὖ ναιόμενα πτολίεθρα
Iliad 9.150	Καρδαμύλην Ἐνόπην τε καὶ Ἱρὴν ποιήεσσαν
Iliad 9.151	Φηράς τε ζαθέας ἠδʼ Ἄνθειαν βαθύλειμον
Iliad 9.152	καλήν τʼ Αἴπειαν καὶ Πήδασον ἀμπελόεσσαν.
Iliad 9.153	πᾶσαι δʼ ἐγγὺς ἁλός, νέαται Πύλου ἠμαθόεντος·
Iliad 9.154	ἐν δʼ ἄνδρες ναίουσι πολύρρηνες πολυβοῦται,
Iliad 9.155	οἵ κέ ἑ δωτίνῃσι θεὸν ὣς τιμήσουσι
Iliad 9.156	καί οἱ ὑπὸ σκήπτρῳ λιπαρὰς τελέουσι θέμιστας.
Iliad 9.157	ταῦτά κέ οἱ τελέσαιμι μεταλήξαντι χόλοιο.
Iliad 9.158	δμηθήτω· Ἀΐδης τοι ἀμείλιχος ἠδʼ ἀδάμαστος,
Iliad 9.159	τοὔνεκα καί τε βροτοῖσι θεῶν ἔχθιστος ἁπάντων·
Iliad 9.160	καί μοι ὑποστήτω ὅσσον βασιλεύτερός εἰμι
Iliad 9.161	ἠδʼ ὅσσον γενεῇ προγενέστερος εὔχομαι εἶναι.
Iliad 9.162	τὸν δʼ ἠμείβετʼ ἔπειτα Γερήνιος ἱππότα Νέστωρ·
Iliad 9.163	Ἀτρεΐδη κύδιστε ἄναξ ἀνδρῶν Ἀγάμεμνον
Iliad 9.164	δῶρα μὲν οὐκέτʼ ὀνοστὰ διδοῖς Ἀχιλῆϊ ἄνακτι·
Iliad 9.165	ἀλλʼ ἄγετε κλητοὺς ὀτρύνομεν, οἵ κε τάχιστα
Iliad 9.166	ἔλθωσʼ ἐς κλισίην Πηληϊάδεω Ἀχιλῆος.
Iliad 9.167	εἰ δʼ ἄγε τοὺς ἂν ἐγὼ ἐπιόψομαι οἳ δὲ πιθέσθων.
Iliad 9.168	Φοῖνιξ μὲν πρώτιστα Διῒ φίλος ἡγησάσθω,
Iliad 9.169	αὐτὰρ ἔπειτʼ Αἴας τε μέγας καὶ δῖος Ὀδυσσεύς·
Iliad 9.170	κηρύκων δʼ Ὀδίος τε καὶ Εὐρυβάτης ἅμʼ ἑπέσθων.
Iliad 9.171	φέρτε δὲ χερσὶν ὕδωρ, εὐφημῆσαί τε κέλεσθε,
Iliad 9.172	ὄφρα Διὶ Κρονίδῃ ἀρησόμεθʼ, αἴ κʼ ἐλεήσῃ.
Iliad 9.173	ὣς φάτο, τοῖσι δὲ πᾶσιν ἑαδότα μῦθον ἔειπεν.
Iliad 9.174	αὐτίκα κήρυκες μὲν ὕδωρ ἐπὶ χεῖρας ἔχευαν,
Iliad 9.175	κοῦροι δὲ κρητῆρας ἐπεστέψαντο ποτοῖο,
Iliad 9.176	νώμησαν δʼ ἄρα πᾶσιν ἐπαρξάμενοι δεπάεσσιν.
Iliad 9.177	αὐτὰρ ἐπεὶ σπεῖσάν τʼ ἔπιόν θʼ ὅσον ἤθελε θυμός,
Iliad 9.178	ὁρμῶντʼ ἐκ κλισίης Ἀγαμέμνονος Ἀτρεΐδαο.
Iliad 9.179	τοῖσι δὲ πόλλʼ ἐπέτελλε Γερήνιος ἱππότα Νέστωρ
Iliad 9.180	δενδίλλων ἐς ἕκαστον, Ὀδυσσῆϊ δὲ μάλιστα,
Iliad 9.181	πειρᾶν ὡς πεπίθοιεν ἀμύμονα Πηλεΐωνα.
Iliad 9.182	τὼ δὲ βάτην παρὰ θῖνα πολυφλοίσβοιο θαλάσσης
Iliad 9.183	πολλὰ μάλʼ εὐχομένω γαιηόχῳ ἐννοσιγαίῳ
Iliad 9.184	ῥηϊδίως πεπιθεῖν μεγάλας φρένας Αἰακίδαο.
Iliad 9.185	Μυρμιδόνων δʼ ἐπί τε κλισίας καὶ νῆας ἱκέσθην,
Iliad 9.186	τὸν δʼ εὗρον φρένα τερπόμενον φόρμιγγι λιγείῃ
Iliad 9.187	καλῇ δαιδαλέῃ, ἐπὶ δʼ ἀργύρεον ζυγὸν ἦεν,
Iliad 9.188	τὴν ἄρετʼ ἐξ ἐνάρων πόλιν Ἠετίωνος ὀλέσσας·
Iliad 9.189	τῇ ὅ γε θυμὸν ἔτερπεν, ἄειδε δʼ ἄρα κλέα ἀνδρῶν.
Iliad 9.190	Πάτροκλος δέ οἱ οἶος ἐναντίος ἧστο σιωπῇ,
Iliad 9.191	δέγμενος Αἰακίδην ὁπότε λήξειεν ἀείδων,
Iliad 9.192	τὼ δὲ βάτην προτέρω, ἡγεῖτο δὲ δῖος Ὀδυσσεύς,
Iliad 9.193	στὰν δὲ πρόσθʼ αὐτοῖο· ταφὼν δʼ ἀνόρουσεν Ἀχιλλεὺς
Iliad 9.194	αὐτῇ σὺν φόρμιγγι λιπὼν ἕδος ἔνθα θάασσεν.
Iliad 9.195	ὣς δʼ αὔτως Πάτροκλος, ἐπεὶ ἴδε φῶτας, ἀνέστη.
Iliad 9.196	τὼ καὶ δεικνύμενος προσέφη πόδας ὠκὺς Ἀχιλλεύς·
Iliad 9.197	χαίρετον· ἦ φίλοι ἄνδρες ἱκάνετον ἦ τι μάλα χρεώ,
Iliad 9.198	οἵ μοι σκυζομένῳ περ Ἀχαιῶν φίλτατοί ἐστον.
Iliad 9.199	ὣς ἄρα φωνήσας προτέρω ἄγε δῖος Ἀχιλλεύς,
Iliad 9.200	εἷσεν δʼ ἐν κλισμοῖσι τάπησί τε πορφυρέοισιν.
Iliad 9.201	αἶψα δὲ Πάτροκλον προσεφώνεεν ἐγγὺς ἐόντα·
Iliad 9.202	μείζονα δὴ κρητῆρα Μενοιτίου υἱὲ καθίστα,
Iliad 9.203	ζωρότερον δὲ κέραιε, δέπας δʼ ἔντυνον ἑκάστῳ·
Iliad 9.204	οἳ γὰρ φίλτατοι ἄνδρες ἐμῷ ὑπέασι μελάθρῳ.
Iliad 9.205	ὣς φάτο, Πάτροκλος δὲ φίλῳ ἐπεπείθεθʼ ἑταίρῳ.
Iliad 9.206	αὐτὰρ ὅ γε κρεῖον μέγα κάββαλεν ἐν πυρὸς αὐγῇ,
Iliad 9.207	ἐν δʼ ἄρα νῶτον ἔθηκʼ ὄϊος καὶ πίονος αἰγός,
Iliad 9.208	ἐν δὲ συὸς σιάλοιο ῥάχιν τεθαλυῖαν ἀλοιφῇ.
Iliad 9.209	τῷ δʼ ἔχεν Αὐτομέδων, τάμνεν δʼ ἄρα δῖος Ἀχιλλεύς.
Iliad 9.210	καὶ τὰ μὲν εὖ μίστυλλε καὶ ἀμφʼ ὀβελοῖσιν ἔπειρε,
Iliad 9.211	πῦρ δὲ Μενοιτιάδης δαῖεν μέγα ἰσόθεος φώς.
Iliad 9.212	αὐτὰρ ἐπεὶ κατὰ πῦρ ἐκάη καὶ φλὸξ ἐμαράνθη,
Iliad 9.213	ἀνθρακιὴν στορέσας ὀβελοὺς ἐφύπερθε τάνυσσε,
Iliad 9.214	πάσσε δʼ ἁλὸς θείοιο κρατευτάων ἐπαείρας.
Iliad 9.215	αὐτὰρ ἐπεί ῥʼ ὤπτησε καὶ εἰν ἐλεοῖσιν ἔχευε,
Iliad 9.216	Πάτροκλος μὲν σῖτον ἑλὼν ἐπένειμε τραπέζῃ
Iliad 9.217	καλοῖς ἐν κανέοισιν, ἀτὰρ κρέα νεῖμεν Ἀχιλλεύς.
Iliad 9.218	αὐτὸς δʼ ἀντίον ἷζεν Ὀδυσσῆος θείοιο
Iliad 9.219	τοίχου τοῦ ἑτέροιο, θεοῖσι δὲ θῦσαι ἀνώγει
Iliad 9.220	Πάτροκλον ὃν ἑταῖρον· ὃ δʼ ἐν πυρὶ βάλλε θυηλάς.
Iliad 9.221	οἳ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Iliad 9.222	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Iliad 9.223	νεῦσʼ Αἴας Φοίνικι· νόησε δὲ δῖος Ὀδυσσεύς,
Iliad 9.224	πλησάμενος δʼ οἴνοιο δέπας δείδεκτʼ Ἀχιλῆα·
Iliad 9.225	χαῖρʼ Ἀχιλεῦ· δαιτὸς μὲν ἐΐσης οὐκ ἐπιδευεῖς
Iliad 9.226	ἠμὲν ἐνὶ κλισίῃ Ἀγαμέμνονος Ἀτρεΐδαο
Iliad 9.227	ἠδὲ καὶ ἐνθάδε νῦν, πάρα γὰρ μενοεικέα πολλὰ
Iliad 9.228	δαίνυσθʼ· ἀλλʼ οὐ δαιτὸς ἐπηράτου ἔργα μέμηλεν,
Iliad 9.229	ἀλλὰ λίην μέγα πῆμα διοτρεφὲς εἰσορόωντες
Iliad 9.230	δείδιμεν· ἐν δοιῇ δὲ σαωσέμεν ἢ ἀπολέσθαι
Iliad 9.231	νῆας ἐϋσσέλμους, εἰ μὴ σύ γε δύσεαι ἀλκήν.
Iliad 9.232	ἐγγὺς γὰρ νηῶν καὶ τείχεος αὖλιν ἔθεντο
Iliad 9.233	Τρῶες ὑπέρθυμοι τηλεκλειτοί τʼ ἐπίκουροι
Iliad 9.234	κηάμενοι πυρὰ πολλὰ κατὰ στρατόν, οὐδʼ ἔτι φασὶ
Iliad 9.235	σχήσεσθʼ, ἀλλʼ ἐν νηυσὶ μελαίνῃσιν πεσέεσθαι.
Iliad 9.236	Ζεὺς δέ σφι Κρονίδης ἐνδέξια σήματα φαίνων
Iliad 9.237	ἀστράπτει· Ἕκτωρ δὲ μέγα σθένεϊ βλεμεαίνων
Iliad 9.238	μαίνεται ἐκπάγλως πίσυνος Διί, οὐδέ τι τίει
Iliad 9.239	ἀνέρας οὐδὲ θεούς· κρατερὴ δέ ἑ λύσσα δέδυκεν.
Iliad 9.240	ἀρᾶται δὲ τάχιστα φανήμεναι Ἠῶ δῖαν·
Iliad 9.241	στεῦται γὰρ νηῶν ἀποκόψειν ἄκρα κόρυμβα
Iliad 9.242	αὐτάς τʼ ἐμπρήσειν μαλεροῦ πυρός, αὐτὰρ Ἀχαιοὺς
Iliad 9.243	δῃώσειν παρὰ τῇσιν ὀρινομένους ὑπὸ καπνοῦ.
Iliad 9.244	ταῦτʼ αἰνῶς δείδοικα κατὰ φρένα, μή οἱ ἀπειλὰς
Iliad 9.245	ἐκτελέσωσι θεοί, ἡμῖν δὲ δὴ αἴσιμον εἴη
Iliad 9.246	φθίσθαι ἐνὶ Τροίῃ ἑκὰς Ἄργεος ἱπποβότοιο.
Iliad 9.247	ἀλλʼ ἄνα εἰ μέμονάς γε καὶ ὀψέ περ υἷας Ἀχαιῶν
Iliad 9.248	τειρομένους ἐρύεσθαι ὑπὸ Τρώων ὀρυμαγδοῦ.
Iliad 9.249	αὐτῷ τοι μετόπισθʼ ἄχος ἔσσεται, οὐδέ τι μῆχος
Iliad 9.250	ῥεχθέντος κακοῦ ἔστʼ ἄκος εὑρεῖν· ἀλλὰ πολὺ πρὶν
Iliad 9.251	φράζευ ὅπως Δαναοῖσιν ἀλεξήσεις κακὸν ἦμαρ.
Iliad 9.252	ὦ πέπον ἦ μὲν σοί γε πατὴρ ἐπετέλλετο Πηλεὺς
Iliad 9.253	ἤματι τῷ ὅτε σʼ ἐκ Φθίης Ἀγαμέμνονι πέμπε·
Iliad 9.254	τέκνον ἐμὸν κάρτος μὲν Ἀθηναίη τε καὶ Ἥρη
Iliad 9.255	δώσουσʼ αἴ κʼ ἐθέλωσι, σὺ δὲ μεγαλήτορα θυμὸν
Iliad 9.256	ἴσχειν ἐν στήθεσσι· φιλοφροσύνη γὰρ ἀμείνων·
Iliad 9.257	ληγέμεναι δʼ ἔριδος κακομηχάνου, ὄφρά σε μᾶλλον
Iliad 9.258	τίωσʼ Ἀργείων ἠμὲν νέοι ἠδὲ γέροντες.
Iliad 9.259	ὣς ἐπέτελλʼ ὃ γέρων, σὺ δὲ λήθεαι· ἀλλʼ ἔτι καὶ νῦν
Iliad 9.260	παύεʼ, ἔα δὲ χόλον θυμαλγέα· σοὶ δʼ Ἀγαμέμνων
Iliad 9.261	ἄξια δῶρα δίδωσι μεταλήξαντι χόλοιο.
Iliad 9.262	εἰ δὲ σὺ μέν μευ ἄκουσον, ἐγὼ δέ κέ τοι καταλέξω
Iliad 9.263	ὅσσά τοι ἐν κλισίῃσιν ὑπέσχετο δῶρʼ Ἀγαμέμνων·
Iliad 9.264	ἕπτʼ ἀπύρους τρίποδας, δέκα δὲ χρυσοῖο τάλαντα,
Iliad 9.265	αἴθωνας δὲ λέβητας ἐείκοσι, δώδεκα δʼ ἵππους
Iliad 9.266	πηγοὺς ἀθλοφόρους, οἳ ἀέθλια ποσσὶν ἄροντο.
Iliad 9.267	οὔ κεν ἀλήϊος εἴη ἀνὴρ ᾧ τόσσα γένοιτο
Iliad 9.268	οὐδέ κεν ἀκτήμων ἐριτίμοιο χρυσοῖο,
Iliad 9.269	ὅσσʼ Ἀγαμέμνονος ἵπποι ἀέθλια ποσσὶν ἄροντο.
Iliad 9.270	δώσει δʼ ἑπτὰ γυναῖκας ἀμύμονα ἔργα ἰδυίας
Iliad 9.271	Λεσβίδας, ἃς ὅτε Λέσβον ἐϋκτιμένην ἕλες αὐτὸς
Iliad 9.272	ἐξέλεθʼ, αἳ τότε κάλλει ἐνίκων φῦλα γυναικῶν.
Iliad 9.273	τὰς μέν τοι δώσει, μετὰ δʼ ἔσσεται ἣν τότʼ ἀπηύρα
Iliad 9.274	κούρη Βρισῆος· ἐπὶ δὲ μέγαν ὅρκον ὀμεῖται
Iliad 9.275	μή ποτε τῆς εὐνῆς ἐπιβήμεναι ἠδὲ μιγῆναι
Iliad 9.276	ἣ θέμις ἐστὶν ἄναξ ἤτʼ ἀνδρῶν ἤτε γυναικῶν.
Iliad 9.277	ταῦτα μὲν αὐτίκα πάντα παρέσσεται· εἰ δέ κεν αὖτε
Iliad 9.278	ἄστυ μέγα Πριάμοιο θεοὶ δώωσʼ ἀλαπάξαι,
Iliad 9.279	νῆα ἅλις χρυσοῦ καὶ χαλκοῦ νηήσασθαι
Iliad 9.280	εἰσελθών, ὅτε κεν δατεώμεθα ληΐδʼ Ἀχαιοί,
Iliad 9.281	Τρωϊάδας δὲ γυναῖκας ἐείκοσιν αὐτὸς ἑλέσθαι,
Iliad 9.282	αἵ κε μετʼ Ἀργείην Ἑλένην κάλλισται ἔωσιν.
Iliad 9.283	εἰ δέ κεν Ἄργος ἱκοίμεθʼ Ἀχαιϊκὸν οὖθαρ ἀρούρης
Iliad 9.284	γαμβρός κέν οἱ ἔοις· τίσει δέ σε ἶσον Ὀρέστῃ,
Iliad 9.285	ὅς οἱ τηλύγετος τρέφεται θαλίῃ ἔνι πολλῇ.
Iliad 9.286	τρεῖς δέ οἵ εἰσι θύγατρες ἐνὶ μεγάρῳ εὐπήκτῳ
Iliad 9.287	Χρυσόθεμις καὶ Λαοδίκη καὶ Ἰφιάνασσα,
Iliad 9.288	τάων ἥν κʼ ἐθέλῃσθα φίλην ἀνάεδνον ἄγεσθαι
Iliad 9.289	πρὸς οἶκον Πηλῆος· ὃ δʼ αὖτʼ ἐπὶ μείλια δώσει
Iliad 9.290	πολλὰ μάλʼ, ὅσσʼ οὔ πώ τις ἑῇ ἐπέδωκε θυγατρί·
Iliad 9.291	ἑπτὰ δέ τοι δώσει εὖ ναιόμενα πτολίεθρα
Iliad 9.292	Καρδαμύλην Ἐνόπην τε καὶ Ἱρὴν ποιήεσσαν
Iliad 9.293	Φηράς τε ζαθέας ἠδʼ Ἄνθειαν βαθύλειμον
Iliad 9.294	καλήν τʼ Αἴπειαν καὶ Πήδασον ἀμπελόεσσαν.
Iliad 9.295	πᾶσαι δʼ ἐγγὺς ἁλός, νέαται Πύλου ἠμαθόεντος·
Iliad 9.296	ἐν δʼ ἄνδρες ναίουσι πολύρρηνες πολυβοῦται,
Iliad 9.297	οἵ κέ σε δωτίνῃσι θεὸν ὣς τιμήσουσι
Iliad 9.298	καί τοι ὑπὸ σκήπτρῳ λιπαρὰς τελέουσι θέμιστας.
Iliad 9.299	ταῦτά κέ τοι τελέσειε μεταλήξαντι χόλοιο.
Iliad 9.300	εἰ δέ τοι Ἀτρεΐδης μὲν ἀπήχθετο κηρόθι μᾶλλον
Iliad 9.301	αὐτὸς καὶ τοῦ δῶρα, σὺ δʼ ἄλλους περ Παναχαιοὺς
Iliad 9.302	τειρομένους ἐλέαιρε κατὰ στρατόν, οἵ σε θεὸν ὣς
Iliad 9.303	τίσουσʼ· ἦ γάρ κέ σφι μάλα μέγα κῦδος ἄροιο·
Iliad 9.304	νῦν γάρ χʼ Ἕκτορʼ ἕλοις, ἐπεὶ ἂν μάλα τοι σχεδὸν ἔλθοι
Iliad 9.305	λύσσαν ἔχων ὀλοήν, ἐπεὶ οὔ τινά φησιν ὁμοῖον
Iliad 9.306	οἷ ἔμεναι Δαναῶν οὓς ἐνθάδε νῆες ἔνεικαν.
Iliad 9.307	τὸν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 9.308	διογενὲς Λαερτιάδη πολυμήχανʼ Ὀδυσσεῦ
Iliad 9.309	χρὴ μὲν δὴ τὸν μῦθον ἀπηλεγέως ἀποειπεῖν,
Iliad 9.310	ᾗ περ δὴ φρονέω τε καὶ ὡς τετελεσμένον ἔσται,
Iliad 9.311	ὡς μή μοι τρύζητε παρήμενοι ἄλλοθεν ἄλλος.
Iliad 9.312	ἐχθρὸς γάρ μοι κεῖνος ὁμῶς Ἀΐδαο πύλῃσιν
Iliad 9.313	ὅς χʼ ἕτερον μὲν κεύθῃ ἐνὶ φρεσίν, ἄλλο δὲ εἴπῃ.
Iliad 9.314	αὐτὰρ ἐγὼν ἐρέω ὥς μοι δοκεῖ εἶναι ἄριστα·
Iliad 9.315	οὔτʼ ἔμεγʼ Ἀτρεΐδην Ἀγαμέμνονα πεισέμεν οἴω
Iliad 9.316	οὔτʼ ἄλλους Δαναούς, ἐπεὶ οὐκ ἄρα τις χάρις ἦεν
Iliad 9.317	μάρνασθαι δηΐοισιν ἐπʼ ἀνδράσι νωλεμὲς αἰεί.
Iliad 9.318	ἴση μοῖρα μένοντι καὶ εἰ μάλα τις πολεμίζοι·
Iliad 9.319	ἐν δὲ ἰῇ τιμῇ ἠμὲν κακὸς ἠδὲ καὶ ἐσθλός·
Iliad 9.320	κάτθανʼ ὁμῶς ὅ τʼ ἀεργὸς ἀνὴρ ὅ τε πολλὰ ἐοργώς.
Iliad 9.321	οὐδέ τί μοι περίκειται, ἐπεὶ πάθον ἄλγεα θυμῷ
Iliad 9.322	αἰεὶ ἐμὴν ψυχὴν παραβαλλόμενος πολεμίζειν.
Iliad 9.323	ὡς δʼ ὄρνις ἀπτῆσι νεοσσοῖσι προφέρῃσι
Iliad 9.324	μάστακʼ ἐπεί κε λάβῃσι, κακῶς δʼ ἄρα οἱ πέλει αὐτῇ,
Iliad 9.325	ὣς καὶ ἐγὼ πολλὰς μὲν ἀΰπνους νύκτας ἴαυον,
Iliad 9.326	ἤματα δʼ αἱματόεντα διέπρησσον πολεμίζων
Iliad 9.327	ἀνδράσι μαρνάμενος ὀάρων ἕνεκα σφετεράων.
Iliad 9.328	δώδεκα δὴ σὺν νηυσὶ πόλεις ἀλάπαξʼ ἀνθρώπων,
Iliad 9.329	πεζὸς δʼ ἕνδεκά φημι κατὰ Τροίην ἐρίβωλον·
Iliad 9.330	τάων ἐκ πασέων κειμήλια πολλὰ καὶ ἐσθλὰ
Iliad 9.331	ἐξελόμην, καὶ πάντα φέρων Ἀγαμέμνονι δόσκον
Iliad 9.332	Ἀτρεΐδῃ· ὃ δʼ ὄπισθε μένων παρὰ νηυσὶ θοῇσι
Iliad 9.333	δεξάμενος διὰ παῦρα δασάσκετο, πολλὰ δʼ ἔχεσκεν.
Iliad 9.334	ἄλλα δʼ ἀριστήεσσι δίδου γέρα καὶ βασιλεῦσι·
Iliad 9.335	τοῖσι μὲν ἔμπεδα κεῖται, ἐμεῦ δʼ ἀπὸ μούνου Ἀχαιῶν
Iliad 9.336	εἵλετʼ, ἔχει δʼ ἄλοχον θυμαρέα· τῇ παριαύων
Iliad 9.337	τερπέσθω. τί δὲ δεῖ πολεμιζέμεναι Τρώεσσιν
Iliad 9.338	Ἀργείους; τί δὲ λαὸν ἀνήγαγεν ἐνθάδʼ ἀγείρας
Iliad 9.339	Ἀτρεΐδης; ἦ οὐχ Ἑλένης ἕνεκʼ ἠϋκόμοιο;
Iliad 9.340	ἦ μοῦνοι φιλέουσʼ ἀλόχους μερόπων ἀνθρώπων
Iliad 9.341	Ἀτρεΐδαι; ἐπεὶ ὅς τις ἀνὴρ ἀγαθὸς καὶ ἐχέφρων
Iliad 9.342	τὴν αὐτοῦ φιλέει καὶ κήδεται, ὡς καὶ ἐγὼ τὴν
Iliad 9.343	ἐκ θυμοῦ φίλεον δουρικτητήν περ ἐοῦσαν.
Iliad 9.344	νῦν δʼ ἐπεὶ ἐκ χειρῶν γέρας εἵλετο καί μʼ ἀπάτησε
Iliad 9.345	μή μευ πειράτω εὖ εἰδότος· οὐδέ με πείσει.
Iliad 9.346	ἀλλʼ Ὀδυσεῦ σὺν σοί τε καὶ ἄλλοισιν βασιλεῦσι
Iliad 9.347	φραζέσθω νήεσσιν ἀλεξέμεναι δήϊον πῦρ.
Iliad 9.348	ἦ μὲν δὴ μάλα πολλὰ πονήσατο νόσφιν ἐμεῖο,
Iliad 9.349	καὶ δὴ τεῖχος ἔδειμε, καὶ ἤλασε τάφρον ἐπʼ αὐτῷ
Iliad 9.350	εὐρεῖαν μεγάλην, ἐν δὲ σκόλοπας κατέπηξεν·
Iliad 9.351	ἀλλʼ οὐδʼ ὧς δύναται σθένος Ἕκτορος ἀνδροφόνοιο
Iliad 9.352	ἴσχειν· ὄφρα δʼ ἐγὼ μετʼ Ἀχαιοῖσιν πολέμιζον
Iliad 9.353	οὐκ ἐθέλεσκε μάχην ἀπὸ τείχεος ὀρνύμεν Ἕκτωρ,
Iliad 9.354	ἀλλʼ ὅσον ἐς Σκαιάς τε πύλας καὶ φηγὸν ἵκανεν·
Iliad 9.355	ἔνθά ποτʼ οἶον ἔμιμνε, μόγις δέ μευ ἔκφυγεν ὁρμήν.
Iliad 9.356	νῦν δʼ ἐπεὶ οὐκ ἐθέλω πολεμιζέμεν Ἕκτορι δίῳ
Iliad 9.357	αὔριον ἱρὰ Διὶ ῥέξας καὶ πᾶσι θεοῖσι
Iliad 9.358	νηήσας εὖ νῆας, ἐπὴν ἅλα δὲ προερύσσω,
Iliad 9.359	ὄψεαι, αἴ κʼ ἐθέλῃσθα καὶ αἴ κέν τοι τὰ μεμήλῃ,
Iliad 9.360	ἦρι μάλʼ Ἑλλήσποντον ἐπʼ ἰχθυόεντα πλεούσας
Iliad 9.361	νῆας ἐμάς, ἐν δʼ ἄνδρας ἐρεσσέμεναι μεμαῶτας·
Iliad 9.362	εἰ δέ κεν εὐπλοίην δώῃ κλυτὸς ἐννοσίγαιος
Iliad 9.363	ἤματί κε τριτάτῳ Φθίην ἐρίβωλον ἱκοίμην.
Iliad 9.364	ἔστι δέ μοι μάλα πολλά, τὰ κάλλιπον ἐνθάδε ἔρρων·
Iliad 9.365	ἄλλον δʼ ἐνθένδε χρυσὸν καὶ χαλκὸν ἐρυθρὸν
Iliad 9.366	ἠδὲ γυναῖκας ἐϋζώνους πολιόν τε σίδηρον
Iliad 9.367	ἄξομαι, ἅσσʼ ἔλαχόν γε· γέρας δέ μοι, ὅς περ ἔδωκεν,
Iliad 9.368	αὖτις ἐφυβρίζων ἕλετο κρείων Ἀγαμέμνων
Iliad 9.369	Ἀτρεΐδης· τῷ πάντʼ ἀγορευέμεν ὡς ἐπιτέλλω
Iliad 9.370	ἀμφαδόν, ὄφρα καὶ ἄλλοι ἐπισκύζωνται Ἀχαιοὶ
Iliad 9.371	εἴ τινά που Δαναῶν ἔτι ἔλπεται ἐξαπατήσειν
Iliad 9.372	αἰὲν ἀναιδείην ἐπιειμένος· οὐδʼ ἂν ἔμοιγε
Iliad 9.373	τετλαίη κύνεός περ ἐὼν εἰς ὦπα ἰδέσθαι·
Iliad 9.374	οὐδέ τί οἱ βουλὰς συμφράσσομαι, οὐδὲ μὲν ἔργον·
Iliad 9.375	ἐκ γὰρ δή μʼ ἀπάτησε καὶ ἤλιτεν· οὐδʼ ἂν ἔτʼ αὖτις
Iliad 9.376	ἐξαπάφοιτʼ ἐπέεσσιν· ἅλις δέ οἱ· ἀλλὰ ἕκηλος
Iliad 9.377	ἐρρέτω· ἐκ γάρ εὑ φρένας εἵλετο μητίετα Ζεύς.
Iliad 9.378	ἐχθρὰ δέ μοι τοῦ δῶρα, τίω δέ μιν ἐν καρὸς αἴσῃ.
Iliad 9.379	οὐδʼ εἴ μοι δεκάκις τε καὶ εἰκοσάκις τόσα δοίη
Iliad 9.380	ὅσσά τέ οἱ νῦν ἔστι, καὶ εἴ ποθεν ἄλλα γένοιτο,
Iliad 9.381	οὐδʼ ὅσʼ ἐς Ὀρχομενὸν ποτινίσεται, οὐδʼ ὅσα Θήβας
Iliad 9.382	Αἰγυπτίας, ὅθι πλεῖστα δόμοις ἐν κτήματα κεῖται,
Iliad 9.383	αἵ θʼ ἑκατόμπυλοί εἰσι, διηκόσιοι δʼ ἀνʼ ἑκάστας
Iliad 9.384	ἀνέρες ἐξοιχνεῦσι σὺν ἵπποισιν καὶ ὄχεσφιν·
Iliad 9.385	οὐδʼ εἴ μοι τόσα δοίη ὅσα ψάμαθός τε κόνις τε,
Iliad 9.386	οὐδέ κεν ὧς ἔτι θυμὸν ἐμὸν πείσειʼ Ἀγαμέμνων
Iliad 9.387	πρίν γʼ ἀπὸ πᾶσαν ἐμοὶ δόμεναι θυμαλγέα λώβην.
Iliad 9.388	κούρην δʼ οὐ γαμέω Ἀγαμέμνονος Ἀτρεΐδαο,
Iliad 9.389	οὐδʼ εἰ χρυσείῃ Ἀφροδίτῃ κάλλος ἐρίζοι,
Iliad 9.390	ἔργα δʼ Ἀθηναίῃ γλαυκώπιδι ἰσοφαρίζοι·
Iliad 9.391	οὐδέ μιν ὧς γαμέω· ὃ δʼ Ἀχαιῶν ἄλλον ἑλέσθω,
Iliad 9.392	ὅς τις οἷ τʼ ἐπέοικε καὶ ὃς βασιλεύτερός ἐστιν.
Iliad 9.393	ἢν γὰρ δή με σαῶσι θεοὶ καὶ οἴκαδʼ ἵκωμαι,
Iliad 9.394	Πηλεύς θήν μοι ἔπειτα γυναῖκά γε μάσσεται αὐτός.
Iliad 9.395	πολλαὶ Ἀχαιΐδες εἰσὶν ἀνʼ Ἑλλάδα τε Φθίην τε
Iliad 9.396	κοῦραι ἀριστήων, οἵ τε πτολίεθρα ῥύονται,
Iliad 9.397	τάων ἥν κʼ ἐθέλωμι φίλην ποιήσομʼ ἄκοιτιν.
Iliad 9.398	ἔνθα δέ μοι μάλα πολλὸν ἐπέσσυτο θυμὸς ἀγήνωρ
Iliad 9.399	γήμαντα μνηστὴν ἄλοχον ἐϊκυῖαν ἄκοιτιν
Iliad 9.400	κτήμασι τέρπεσθαι τὰ γέρων ἐκτήσατο Πηλεύς·
Iliad 9.401	οὐ γὰρ ἐμοὶ ψυχῆς ἀντάξιον οὐδʼ ὅσα φασὶν
Iliad 9.402	Ἴλιον ἐκτῆσθαι εὖ ναιόμενον πτολίεθρον
Iliad 9.403	τὸ πρὶν ἐπʼ εἰρήνης, πρὶν ἐλθεῖν υἷας Ἀχαιῶν,
Iliad 9.404	οὐδʼ ὅσα λάϊνος οὐδὸς ἀφήτορος ἐντὸς ἐέργει
Iliad 9.405	Φοίβου Ἀπόλλωνος Πυθοῖ ἔνι πετρηέσσῃ.
Iliad 9.406	ληϊστοὶ μὲν γάρ τε βόες καὶ ἴφια μῆλα,
Iliad 9.407	κτητοὶ δὲ τρίποδές τε καὶ ἵππων ξανθὰ κάρηνα,
Iliad 9.408	ἀνδρὸς δὲ ψυχὴ πάλιν ἐλθεῖν οὔτε λεϊστὴ
Iliad 9.409	οὔθʼ ἑλετή, ἐπεὶ ἄρ κεν ἀμείψεται ἕρκος ὀδόντων.
Iliad 9.410	μήτηρ γάρ τέ μέ φησι θεὰ Θέτις ἀργυρόπεζα
Iliad 9.411	διχθαδίας κῆρας φερέμεν θανάτοιο τέλος δέ.
Iliad 9.412	εἰ μέν κʼ αὖθι μένων Τρώων πόλιν ἀμφιμάχωμαι,
Iliad 9.413	ὤλετο μέν μοι νόστος, ἀτὰρ κλέος ἄφθιτον ἔσται·
Iliad 9.414	εἰ δέ κεν οἴκαδʼ ἵκωμι φίλην ἐς πατρίδα γαῖαν,
Iliad 9.415	ὤλετό μοι κλέος ἐσθλόν, ἐπὶ δηρὸν δέ μοι αἰὼν
Iliad 9.416	ἔσσεται, οὐδέ κέ μʼ ὦκα τέλος θανάτοιο κιχείη.
Iliad 9.417	καὶ δʼ ἂν τοῖς ἄλλοισιν ἐγὼ παραμυθησαίμην
Iliad 9.418	οἴκαδʼ ἀποπλείειν, ἐπεὶ οὐκέτι δήετε τέκμωρ
Iliad 9.419	Ἰλίου αἰπεινῆς· μάλα γάρ ἑθεν εὐρύοπα Ζεὺς
Iliad 9.420	χεῖρα ἑὴν ὑπερέσχε, τεθαρσήκασι δὲ λαοί.
Iliad 9.421	ἀλλʼ ὑμεῖς μὲν ἰόντες ἀριστήεσσιν Ἀχαιῶν
Iliad 9.422	ἀγγελίην ἀπόφασθε· τὸ γὰρ γέρας ἐστὶ γερόντων·
Iliad 9.423	ὄφρʼ ἄλλην φράζωνται ἐνὶ φρεσὶ μῆτιν ἀμείνω,
Iliad 9.424	ἥ κέ σφιν νῆάς τε σαῷ καὶ λαὸν Ἀχαιῶν
Iliad 9.425	νηυσὶν ἔπι γλαφυρῇς, ἐπεὶ οὔ σφισιν ἥδέ γʼ ἑτοίμη
Iliad 9.426	ἣν νῦν ἐφράσσαντο ἐμεῦ ἀπομηνίσαντος·
Iliad 9.427	Φοῖνιξ δʼ αὖθι παρʼ ἄμμι μένων κατακοιμηθήτω,
Iliad 9.428	ὄφρά μοι ἐν νήεσσι φίλην ἐς πατρίδʼ ἕπηται
Iliad 9.429	αὔριον ἢν ἐθέλῃσιν· ἀνάγκῃ δʼ οὔ τί μιν ἄξω.
Iliad 9.430	ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ
Iliad 9.431	μῦθον ἀγασσάμενοι· μάλα γὰρ κρατερῶς ἀπέειπεν·
Iliad 9.432	ὀψὲ δὲ δὴ μετέειπε γέρων ἱππηλάτα Φοῖνιξ
Iliad 9.433	δάκρυʼ ἀναπρήσας· περὶ γὰρ δίε νηυσὶν Ἀχαιῶν·
Iliad 9.434	εἰ μὲν δὴ νόστόν γε μετὰ φρεσὶ φαίδιμʼ Ἀχιλλεῦ
Iliad 9.435	βάλλεαι, οὐδέ τι πάμπαν ἀμύνειν νηυσὶ θοῇσι
Iliad 9.436	πῦρ ἐθέλεις ἀΐδηλον, ἐπεὶ χόλος ἔμπεσε θυμῷ,
Iliad 9.437	πῶς ἂν ἔπειτʼ ἀπὸ σεῖο φίλον τέκος αὖθι λιποίμην
Iliad 9.438	οἶος; σοὶ δέ μʼ ἔπεμπε γέρων ἱππηλάτα Πηλεὺς
Iliad 9.439	ἤματι τῷ ὅτε σʼ ἐκ Φθίης Ἀγαμέμνονι πέμπε
Iliad 9.440	νήπιον οὔ πω εἰδόθʼ ὁμοιΐου πολέμοιο
Iliad 9.441	οὐδʼ ἀγορέων, ἵνα τʼ ἄνδρες ἀριπρεπέες τελέθουσι.
Iliad 9.442	τοὔνεκά με προέηκε διδασκέμεναι τάδε πάντα,
Iliad 9.443	μύθων τε ῥητῆρʼ ἔμεναι πρηκτῆρά τε ἔργων.
Iliad 9.444	ὡς ἂν ἔπειτʼ ἀπὸ σεῖο φίλον τέκος οὐκ ἐθέλοιμι
Iliad 9.445	λείπεσθʼ, οὐδʼ εἴ κέν μοι ὑποσταίη θεὸς αὐτὸς
Iliad 9.446	γῆρας ἀποξύσας θήσειν νέον ἡβώοντα,
Iliad 9.447	οἷον ὅτε πρῶτον λίπον Ἑλλάδα καλλιγύναικα
Iliad 9.448	φεύγων νείκεα πατρὸς Ἀμύντορος Ὀρμενίδαο,
Iliad 9.449	ὅς μοι παλλακίδος περιχώσατο καλλικόμοιο,
Iliad 9.450	τὴν αὐτὸς φιλέεσκεν, ἀτιμάζεσκε δʼ ἄκοιτιν
Iliad 9.451	μητέρʼ ἐμήν· ἣ δʼ αἰὲν ἐμὲ λισσέσκετο γούνων
Iliad 9.452	παλλακίδι προμιγῆναι, ἵνʼ ἐχθήρειε γέροντα.
Iliad 9.453	τῇ πιθόμην καὶ ἔρεξα· πατὴρ δʼ ἐμὸς αὐτίκʼ ὀϊσθεὶς
Iliad 9.454	πολλὰ κατηρᾶτο, στυγερὰς δʼ ἐπεκέκλετʼ Ἐρινῦς,
Iliad 9.455	μή ποτε γούνασιν οἷσιν ἐφέσσεσθαι φίλον υἱὸν
Iliad 9.456	ἐξ ἐμέθεν γεγαῶτα· θεοὶ δʼ ἐτέλειον ἐπαρὰς
Iliad 9.457	Ζεύς τε καταχθόνιος καὶ ἐπαινὴ Περσεφόνεια.
Iliad 9.462	ἔνθʼ ἐμοὶ οὐκέτι πάμπαν ἐρητύετʼ ἐν φρεσὶ θυμὸς
Iliad 9.463	πατρὸς χωομένοιο κατὰ μέγαρα στρωφᾶσθαι.
Iliad 9.464	ἦ μὲν πολλὰ ἔται καὶ ἀνεψιοὶ ἀμφὶς ἐόντες
Iliad 9.465	αὐτοῦ λισσόμενοι κατερήτυον ἐν μεγάροισι,
Iliad 9.466	πολλὰ δὲ ἴφια μῆλα καὶ εἰλίποδας ἕλικας βοῦς
Iliad 9.467	ἔσφαζον, πολλοὶ δὲ σύες θαλέθοντες ἀλοιφῇ
Iliad 9.468	εὑόμενοι τανύοντο διὰ φλογὸς Ἡφαίστοιο,
Iliad 9.469	πολλὸν δʼ ἐκ κεράμων μέθυ πίνετο τοῖο γέροντος.
Iliad 9.470	εἰνάνυχες δέ μοι ἀμφʼ αὐτῷ παρὰ νύκτας ἴαυον·
Iliad 9.471	οἳ μὲν ἀμειβόμενοι φυλακὰς ἔχον, οὐδέ ποτʼ ἔσβη
Iliad 9.472	πῦρ, ἕτερον μὲν ὑπʼ αἰθούσῃ εὐερκέος αὐλῆς,
Iliad 9.473	ἄλλο δʼ ἐνὶ προδόμῳ, πρόσθεν θαλάμοιο θυράων.
Iliad 9.474	ἀλλʼ ὅτε δὴ δεκάτη μοι ἐπήλυθε νὺξ ἐρεβεννή,
Iliad 9.475	καὶ τότʼ ἐγὼ θαλάμοιο θύρας πυκινῶς ἀραρυίας
Iliad 9.476	ῥήξας ἐξῆλθον, καὶ ὑπέρθορον ἑρκίον αὐλῆς
Iliad 9.477	ῥεῖα, λαθὼν φύλακάς τʼ ἄνδρας δμῳάς τε γυναῖκας.
Iliad 9.478	φεῦγον ἔπειτʼ ἀπάνευθε διʼ Ἑλλάδος εὐρυχόροιο,
Iliad 9.479	Φθίην δʼ ἐξικόμην ἐριβώλακα μητέρα μήλων
Iliad 9.480	ἐς Πηλῆα ἄναχθʼ· ὃ δέ με πρόφρων ὑπέδεκτο,
Iliad 9.481	καί μʼ ἐφίλησʼ ὡς εἴ τε πατὴρ ὃν παῖδα φιλήσῃ
Iliad 9.482	μοῦνον τηλύγετον πολλοῖσιν ἐπὶ κτεάτεσσι,
Iliad 9.483	καί μʼ ἀφνειὸν ἔθηκε, πολὺν δέ μοι ὤπασε λαόν·
Iliad 9.484	ναῖον δʼ ἐσχατιὴν Φθίης Δολόπεσσιν ἀνάσσων.
Iliad 9.485	καί σε τοσοῦτον ἔθηκα θεοῖς ἐπιείκελʼ Ἀχιλλεῦ,
Iliad 9.486	ἐκ θυμοῦ φιλέων, ἐπεὶ οὐκ ἐθέλεσκες ἅμʼ ἄλλῳ
Iliad 9.487	οὔτʼ ἐς δαῖτʼ ἰέναι οὔτʼ ἐν μεγάροισι πάσασθαι,
Iliad 9.488	πρίν γʼ ὅτε δή σʼ ἐπʼ ἐμοῖσιν ἐγὼ γούνεσσι καθίσσας
Iliad 9.489	ὄψου τʼ ἄσαιμι προταμὼν καὶ οἶνον ἐπισχών.
Iliad 9.490	πολλάκι μοι κατέδευσας ἐπὶ στήθεσσι χιτῶνα
Iliad 9.491	οἴνου ἀποβλύζων ἐν νηπιέῃ ἀλεγεινῇ.
Iliad 9.492	ὣς ἐπὶ σοὶ μάλα πολλὰ πάθον καὶ πολλὰ μόγησα,
Iliad 9.493	τὰ φρονέων ὅ μοι οὔ τι θεοὶ γόνον ἐξετέλειον
Iliad 9.494	ἐξ ἐμεῦ· ἀλλὰ σὲ παῖδα θεοῖς ἐπιείκελʼ Ἀχιλλεῦ
Iliad 9.495	ποιεύμην, ἵνα μοί ποτʼ ἀεικέα λοιγὸν ἀμύνῃς.
Iliad 9.496	ἀλλʼ Ἀχιλεῦ δάμασον θυμὸν μέγαν· οὐδέ τί σε χρὴ
Iliad 9.497	νηλεὲς ἦτορ ἔχειν· στρεπτοὶ δέ τε καὶ θεοὶ αὐτοί,
Iliad 9.498	τῶν περ καὶ μείζων ἀρετὴ τιμή τε βίη τε.
Iliad 9.499	καὶ μὲν τοὺς θυέεσσι καὶ εὐχωλῇς ἀγανῇσι
Iliad 9.500	λοιβῇ τε κνίσῃ τε παρατρωπῶσʼ ἄνθρωποι
Iliad 9.501	λισσόμενοι, ὅτε κέν τις ὑπερβήῃ καὶ ἁμάρτῃ.
Iliad 9.502	καὶ γάρ τε λιταί εἰσι Διὸς κοῦραι μεγάλοιο
Iliad 9.503	χωλαί τε ῥυσαί τε παραβλῶπές τʼ ὀφθαλμώ,
Iliad 9.504	αἵ ῥά τε καὶ μετόπισθʼ ἄτης ἀλέγουσι κιοῦσαι.
Iliad 9.505	ἣ δʼ ἄτη σθεναρή τε καὶ ἀρτίπος, οὕνεκα πάσας
Iliad 9.506	πολλὸν ὑπεκπροθέει, φθάνει δέ τε πᾶσαν ἐπʼ αἶαν
Iliad 9.507	βλάπτουσʼ ἀνθρώπους· αἳ δʼ ἐξακέονται ὀπίσσω.
Iliad 9.508	ὃς μέν τʼ αἰδέσεται κούρας Διὸς ἆσσον ἰούσας,
Iliad 9.509	τὸν δὲ μέγʼ ὤνησαν καί τʼ ἔκλυον εὐχομένοιο·
Iliad 9.510	ὃς δέ κʼ ἀνήνηται καί τε στερεῶς ἀποείπῃ,
Iliad 9.511	λίσσονται δʼ ἄρα ταί γε Δία Κρονίωνα κιοῦσαι
Iliad 9.512	τῷ ἄτην ἅμʼ ἕπεσθαι, ἵνα βλαφθεὶς ἀποτίσῃ.
Iliad 9.513	ἀλλʼ Ἀχιλεῦ πόρε καὶ σὺ Διὸς κούρῃσιν ἕπεσθαι
Iliad 9.514	τιμήν, ἥ τʼ ἄλλων περ ἐπιγνάμπτει νόον ἐσθλῶν.
Iliad 9.515	εἰ μὲν γὰρ μὴ δῶρα φέροι τὰ δʼ ὄπισθʼ ὀνομάζοι
Iliad 9.516	Ἀτρεΐδης, ἀλλʼ αἰὲν ἐπιζαφελῶς χαλεπαίνοι,
Iliad 9.517	οὐκ ἂν ἔγωγέ σε μῆνιν ἀπορρίψαντα κελοίμην
Iliad 9.518	Ἀργείοισιν ἀμυνέμεναι χατέουσί περ ἔμπης·
Iliad 9.519	νῦν δʼ ἅμα τʼ αὐτίκα πολλὰ διδοῖ τὰ δʼ ὄπισθεν ὑπέστη,
Iliad 9.520	ἄνδρας δὲ λίσσεσθαι ἐπιπροέηκεν ἀρίστους
Iliad 9.521	κρινάμενος κατὰ λαὸν Ἀχαιϊκόν, οἵ τε σοὶ αὐτῷ
Iliad 9.522	φίλτατοι Ἀργείων· τῶν μὴ σύ γε μῦθον ἐλέγξῃς
Iliad 9.523	μηδὲ πόδας· πρὶν δʼ οὔ τι νεμεσσητὸν κεχολῶσθαι.
Iliad 9.524	οὕτω καὶ τῶν πρόσθεν ἐπευθόμεθα κλέα ἀνδρῶν
Iliad 9.525	ἡρώων, ὅτε κέν τινʼ ἐπιζάφελος χόλος ἵκοι·
Iliad 9.526	δωρητοί τε πέλοντο παράρρητοί τʼ ἐπέεσσι.
Iliad 9.527	μέμνημαι τόδε ἔργον ἐγὼ πάλαι οὔ τι νέον γε
Iliad 9.528	ὡς ἦν· ἐν δʼ ὑμῖν ἐρέω πάντεσσι φίλοισι.
Iliad 9.529	Κουρῆτές τʼ ἐμάχοντο καὶ Αἰτωλοὶ μενεχάρμαι
Iliad 9.530	ἀμφὶ πόλιν Καλυδῶνα καὶ ἀλλήλους ἐνάριζον,
Iliad 9.531	Αἰτωλοὶ μὲν ἀμυνόμενοι Καλυδῶνος ἐραννῆς,
Iliad 9.532	Κουρῆτες δὲ διαπραθέειν μεμαῶτες Ἄρηϊ.
Iliad 9.533	καὶ γὰρ τοῖσι κακὸν χρυσόθρονος Ἄρτεμις ὦρσε
Iliad 9.534	χωσαμένη ὅ οἱ οὔ τι θαλύσια γουνῷ ἀλωῆς
Iliad 9.535	Οἰνεὺς ῥέξʼ· ἄλλοι δὲ θεοὶ δαίνυνθʼ ἑκατόμβας,
Iliad 9.536	οἴῃ δʼ οὐκ ἔρρεξε Διὸς κούρῃ μεγάλοιο.
Iliad 9.537	ἢ λάθετʼ ἢ οὐκ ἐνόησεν· ἀάσατο δὲ μέγα θυμῷ.
Iliad 9.538	ἣ δὲ χολωσαμένη δῖον γένος ἰοχέαιρα
Iliad 9.539	ὦρσεν ἔπι χλούνην σῦν ἄγριον ἀργιόδοντα,
Iliad 9.540	ὃς κακὰ πόλλʼ ἕρδεσκεν ἔθων Οἰνῆος ἀλωήν·
Iliad 9.541	πολλὰ δʼ ὅ γε προθέλυμνα χαμαὶ βάλε δένδρεα μακρὰ
Iliad 9.542	αὐτῇσιν ῥίζῃσι καὶ αὐτοῖς ἄνθεσι μήλων.
Iliad 9.543	τὸν δʼ υἱὸς Οἰνῆος ἀπέκτεινεν Μελέαγρος
Iliad 9.544	πολλέων ἐκ πολίων θηρήτορας ἄνδρας ἀγείρας
Iliad 9.545	καὶ κύνας· οὐ μὲν γάρ κε δάμη παύροισι βροτοῖσι·
Iliad 9.546	τόσσος ἔην, πολλοὺς δὲ πυρῆς ἐπέβησʼ ἀλεγεινῆς.
Iliad 9.547	ἣ δʼ ἀμφʼ αὐτῷ θῆκε πολὺν κέλαδον καὶ ἀϋτὴν
Iliad 9.548	ἀμφὶ συὸς κεφαλῇ καὶ δέρματι λαχνήεντι,
Iliad 9.549	Κουρήτων τε μεσηγὺ καὶ Αἰτωλῶν μεγαθύμων.
Iliad 9.550	ὄφρα μὲν οὖν Μελέαγρος ἄρηι φίλος πολέμιζε,
Iliad 9.551	τόφρα δὲ Κουρήτεσσι κακῶς ἦν, οὐδὲ δύναντο
Iliad 9.552	τείχεος ἔκτοσθεν μίμνειν πολέες περ ἐόντες·
Iliad 9.553	ἀλλʼ ὅτε δὴ Μελέαγρον ἔδυ χόλος, ὅς τε καὶ ἄλλων
Iliad 9.554	οἰδάνει ἐν στήθεσσι νόον πύκα περ φρονεόντων,
Iliad 9.555	ἤτοι ὃ μητρὶ φίλῃ Ἀλθαίῃ χωόμενος κῆρ
Iliad 9.556	κεῖτο παρὰ μνηστῇ ἀλόχῳ καλῇ Κλεοπάτρῃ
Iliad 9.557	κούρῃ Μαρπήσσης καλλισφύρου Εὐηνίνης
Iliad 9.558	Ἴδεώ θʼ, ὃς κάρτιστος ἐπιχθονίων γένετʼ ἀνδρῶν
Iliad 9.559	τῶν τότε· καί ῥα ἄνακτος ἐναντίον εἵλετο τόξον
Iliad 9.560	Φοίβου Ἀπόλλωνος καλλισφύρου εἵνεκα νύμφης,
Iliad 9.561	τὴν δὲ τότʼ ἐν μεγάροισι πατὴρ καὶ πότνια μήτηρ
Iliad 9.562	Ἀλκυόνην καλέεσκον ἐπώνυμον, οὕνεκʼ ἄρʼ αὐτῆς
Iliad 9.563	μήτηρ ἀλκυόνος πολυπενθέος οἶτον ἔχουσα
Iliad 9.564	κλαῖεν ὅ μιν ἑκάεργος ἀνήρπασε Φοῖβος Ἀπόλλων·
Iliad 9.565	τῇ ὅ γε παρκατέλεκτο χόλον θυμαλγέα πέσσων
Iliad 9.566	ἐξ ἀρέων μητρὸς κεχολωμένος, ἥ ῥα θεοῖσι
Iliad 9.567	πόλλʼ ἀχέουσʼ ἠρᾶτο κασιγνήτοιο φόνοιο,
Iliad 9.568	πολλὰ δὲ καὶ γαῖαν πολυφόρβην χερσὶν ἀλοία
Iliad 9.569	κικλήσκουσʼ Ἀΐδην καὶ ἐπαινὴν Περσεφόνειαν
Iliad 9.570	πρόχνυ καθεζομένη, δεύοντο δὲ δάκρυσι κόλποι,
Iliad 9.571	παιδὶ δόμεν θάνατον· τῆς δʼ ἠεροφοῖτις Ἐρινὺς
Iliad 9.572	ἔκλυεν ἐξ Ἐρέβεσφιν ἀμείλιχον ἦτορ ἔχουσα.
Iliad 9.573	τῶν δὲ τάχʼ ἀμφὶ πύλας ὅμαδος καὶ δοῦπος ὀρώρει
Iliad 9.574	πύργων βαλλομένων· τὸν δὲ λίσσοντο γέροντες
Iliad 9.575	Αἰτωλῶν, πέμπον δὲ θεῶν ἱερῆας ἀρίστους,
Iliad 9.576	ἐξελθεῖν καὶ ἀμῦναι ὑποσχόμενοι μέγα δῶρον·
Iliad 9.577	ὁππόθι πιότατον πεδίον Καλυδῶνος ἐραννῆς,
Iliad 9.578	ἔνθά μιν ἤνωγον τέμενος περικαλλὲς ἑλέσθαι
Iliad 9.579	πεντηκοντόγυον, τὸ μὲν ἥμισυ οἰνοπέδοιο,
Iliad 9.580	ἥμισυ δὲ ψιλὴν ἄροσιν πεδίοιο ταμέσθαι.
Iliad 9.581	πολλὰ δέ μιν λιτάνευε γέρων ἱππηλάτα Οἰνεὺς
Iliad 9.582	οὐδοῦ ἐπεμβεβαὼς ὑψηρεφέος θαλάμοιο
Iliad 9.583	σείων κολλητὰς σανίδας γουνούμενος υἱόν·
Iliad 9.584	πολλὰ δὲ τόν γε κασίγνηται καὶ πότνια μήτηρ
Iliad 9.585	ἐλλίσσονθʼ· ὃ δὲ μᾶλλον ἀναίνετο· πολλὰ δʼ ἑταῖροι,
Iliad 9.586	οἵ οἱ κεδνότατοι καὶ φίλτατοι ἦσαν ἁπάντων·
Iliad 9.587	ἀλλʼ οὐδʼ ὧς τοῦ θυμὸν ἐνὶ στήθεσσιν ἔπειθον,
Iliad 9.588	πρίν γʼ ὅτε δὴ θάλαμος πύκʼ ἐβάλλετο, τοὶ δʼ ἐπὶ πύργων
Iliad 9.589	βαῖνον Κουρῆτες καὶ ἐνέπρηθον μέγα ἄστυ.
Iliad 9.590	καὶ τότε δὴ Μελέαγρον ἐΰζωνος παράκοιτις
Iliad 9.591	λίσσετʼ ὀδυρομένη, καί οἱ κατέλεξεν ἅπαντα
Iliad 9.592	κήδεʼ, ὅσʼ ἀνθρώποισι πέλει τῶν ἄστυ ἁλώῃ·
Iliad 9.593	ἄνδρας μὲν κτείνουσι, πόλιν δέ τε πῦρ ἀμαθύνει,
Iliad 9.594	τέκνα δέ τʼ ἄλλοι ἄγουσι βαθυζώνους τε γυναῖκας.
Iliad 9.595	τοῦ δʼ ὠρίνετο θυμὸς ἀκούοντος κακὰ ἔργα,
Iliad 9.596	βῆ δʼ ἰέναι, χροῒ δʼ ἔντεʼ ἐδύσετο παμφανόωντα.
Iliad 9.597	ὣς ὃ μὲν Αἰτωλοῖσιν ἀπήμυνεν κακὸν ἦμαρ
Iliad 9.598	εἴξας ᾧ θυμῷ· τῷ δʼ οὐκέτι δῶρα τέλεσσαν
Iliad 9.599	πολλά τε καὶ χαρίεντα, κακὸν δʼ ἤμυνε καὶ αὔτως.
Iliad 9.600	ἀλλὰ σὺ μή μοι ταῦτα νόει φρεσί, μὴ δέ σε δαίμων
Iliad 9.601	ἐνταῦθα τρέψειε φίλος· κάκιον δέ κεν εἴη
Iliad 9.602	νηυσὶν καιομένῃσιν ἀμυνέμεν· ἀλλʼ ἐπὶ δώρων
Iliad 9.603	ἔρχεο· ἶσον γάρ σε θεῷ τίσουσιν Ἀχαιοί.
Iliad 9.604	εἰ δέ κʼ ἄτερ δώρων πόλεμον φθισήνορα δύῃς
Iliad 9.605	οὐκέθʼ ὁμῶς τιμῆς ἔσεαι πόλεμόν περ ἀλαλκών.
Iliad 9.606	τὸν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 9.607	Φοῖνιξ ἄττα γεραιὲ διοτρεφὲς οὔ τί με ταύτης
Iliad 9.608	χρεὼ τιμῆς· φρονέω δὲ τετιμῆσθαι Διὸς αἴσῃ,
Iliad 9.609	ἥ μʼ ἕξει παρὰ νηυσὶ κορωνίσιν εἰς ὅ κʼ ἀϋτμὴ
Iliad 9.610	ἐν στήθεσσι μένῃ καί μοι φίλα γούνατʼ ὀρώρῃ.
Iliad 9.611	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσι·
Iliad 9.612	μή μοι σύγχει θυμὸν ὀδυρόμενος καὶ ἀχεύων
Iliad 9.613	Ἀτρεΐδῃ ἥρωϊ φέρων χάριν· οὐδέ τί σε χρὴ
Iliad 9.614	τὸν φιλέειν, ἵνα μή μοι ἀπέχθηαι φιλέοντι.
Iliad 9.615	καλόν τοι σὺν ἐμοὶ τὸν κήδειν ὅς κʼ ἐμὲ κήδῃ·
Iliad 9.616	ἶσον ἐμοὶ βασίλευε καὶ ἥμισυ μείρεο τιμῆς.
Iliad 9.617	οὗτοι δʼ ἀγγελέουσι, σὺ δʼ αὐτόθι λέξεο μίμνων
Iliad 9.618	εὐνῇ ἔνι μαλακῇ· ἅμα δʼ ἠοῖ φαινομένηφι
Iliad 9.619	φρασσόμεθʼ ἤ κε νεώμεθʼ ἐφʼ ἡμέτερʼ ἦ κε μένωμεν.
Iliad 9.620	ἦ καὶ Πατρόκλῳ ὅ γʼ ἐπʼ ὀφρύσι νεῦσε σιωπῇ
Iliad 9.621	Φοίνικι στορέσαι πυκινὸν λέχος, ὄφρα τάχιστα
Iliad 9.622	ἐκ κλισίης νόστοιο μεδοίατο· τοῖσι δʼ ἄρʼ Αἴας
Iliad 9.623	ἀντίθεος Τελαμωνιάδης μετὰ μῦθον ἔειπε·
Iliad 9.624	διογενὲς Λαερτιάδη πολυμήχανʼ Ὀδυσσεῦ
Iliad 9.625	ἴομεν· οὐ γάρ μοι δοκέει μύθοιο τελευτὴ
Iliad 9.626	τῇδέ γʼ ὁδῷ κρανέεσθαι· ἀπαγγεῖλαι δὲ τάχιστα
Iliad 9.627	χρὴ μῦθον Δαναοῖσι καὶ οὐκ ἀγαθόν περ ἐόντα
Iliad 9.628	οἵ που νῦν ἕαται ποτιδέγμενοι. αὐτάρ Ἀχιλλεὺς
Iliad 9.629	ἄγριον ἐν στήθεσσι θέτο μεγαλήτορα θυμὸν
Iliad 9.630	σχέτλιος, οὐδὲ μετατρέπεται φιλότητος ἑταίρων
Iliad 9.631	τῆς ᾗ μιν παρὰ νηυσὶν ἐτίομεν ἔξοχον ἄλλων
Iliad 9.632	νηλής· καὶ μέν τίς τε κασιγνήτοιο φονῆος
Iliad 9.633	ποινὴν ἢ οὗ παιδὸς ἐδέξατο τεθνηῶτος·
Iliad 9.634	καί ῥʼ ὃ μὲν ἐν δήμῳ μένει αὐτοῦ πόλλʼ ἀποτίσας,
Iliad 9.635	τοῦ δέ τʼ ἐρητύεται κραδίη καὶ θυμὸς ἀγήνωρ
Iliad 9.636	ποινὴν δεξαμένῳ· σοὶ δʼ ἄληκτόν τε κακόν τε
Iliad 9.637	θυμὸν ἐνὶ στήθεσσι θεοὶ θέσαν εἵνεκα κούρης
Iliad 9.638	οἴης· νῦν δέ τοι ἑπτὰ παρίσχομεν ἔξοχʼ ἀρίστας,
Iliad 9.639	ἄλλά τε πόλλʼ ἐπὶ τῇσι· σὺ δʼ ἵλαον ἔνθεο θυμόν,
Iliad 9.640	αἴδεσσαι δὲ μέλαθρον· ὑπωρόφιοι δέ τοί εἰμεν
Iliad 9.641	πληθύος ἐκ Δαναῶν, μέμαμεν δέ τοι ἔξοχον ἄλλων
Iliad 9.642	κήδιστοί τʼ ἔμεναι καὶ φίλτατοι ὅσσοι Ἀχαιοί.
Iliad 9.643	τὸν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 9.644	Αἶαν διογενὲς Τελαμώνιε κοίρανε λαῶν
Iliad 9.645	πάντά τί μοι κατὰ θυμὸν ἐείσαο μυθήσασθαι·
Iliad 9.646	ἀλλά μοι οἰδάνεται κραδίη χόλῳ ὁππότε κείνων
Iliad 9.647	μνήσομαι ὥς μʼ ἀσύφηλον ἐν Ἀργείοισιν ἔρεξεν
Iliad 9.648	Ἀτρεΐδης ὡς εἴ τινʼ ἀτίμητον μετανάστην.
Iliad 9.649	ἀλλʼ ὑμεῖς ἔρχεσθε καὶ ἀγγελίην ἀπόφασθε·
Iliad 9.650	οὐ γὰρ πρὶν πολέμοιο μεδήσομαι αἱματόεντος
Iliad 9.651	πρίν γʼ υἱὸν Πριάμοιο δαΐφρονος Ἕκτορα δῖον
Iliad 9.652	Μυρμιδόνων ἐπί τε κλισίας καὶ νῆας ἱκέσθαι
Iliad 9.653	κτείνοντʼ Ἀργείους, κατά τε σμῦξαι πυρὶ νῆας.
Iliad 9.654	ἀμφὶ δέ τοι τῇ ἐμῇ κλισίῃ καὶ νηῒ μελαίνῃ
Iliad 9.655	Ἕκτορα καὶ μεμαῶτα μάχης σχήσεσθαι ὀΐω.
Iliad 9.656	ὣς ἔφαθʼ, οἳ δὲ ἕκαστος ἑλὼν δέπας ἀμφικύπελλον
Iliad 9.657	σπείσαντες παρὰ νῆας ἴσαν πάλιν· ἦρχε δʼ Ὀδυσσεύς.
Iliad 9.658	Πάτροκλος δʼ ἑτάροισιν ἰδὲ δμωῇσι κέλευσε
Iliad 9.659	Φοίνικι στορέσαι πυκινὸν λέχος ὅττι τάχιστα.
Iliad 9.660	αἳ δʼ ἐπιπειθόμεναι στόρεσαν λέχος ὡς ἐκέλευσε
Iliad 9.661	κώεά τε ῥῆγός τε λίνοιό τε λεπτὸν ἄωτον.
Iliad 9.662	ἔνθʼ ὃ γέρων κατέλεκτο καὶ ἠῶ δῖαν ἔμιμνεν.
Iliad 9.663	αὐτὰρ Ἀχιλλεὺς εὗδε μυχῷ κλισίης εὐπήκτου·
Iliad 9.664	τῷ δʼ ἄρα παρκατέλεκτο γυνή, τὴν Λεσβόθεν ἦγε,
Iliad 9.665	Φόρβαντος θυγάτηρ Διομήδη καλλιπάρῃος.
Iliad 9.666	Πάτροκλος δʼ ἑτέρωθεν ἐλέξατο· πὰρ δʼ ἄρα καὶ τῷ
Iliad 9.667	Ἶφις ἐΰζωνος, τήν οἱ πόρε δῖος Ἀχιλλεὺς
Iliad 9.668	Σκῦρον ἑλὼν αἰπεῖαν Ἐνυῆος πτολίεθρον.
Iliad 9.669	οἳ δʼ ὅτε δὴ κλισίῃσιν ἐν Ἀτρεΐδαο γένοντο.
Iliad 9.670	τοὺς μὲν ἄρα χρυσέοισι κυπέλλοις υἷες Ἀχαιῶν
Iliad 9.671	δειδέχατʼ ἄλλοθεν ἄλλος ἀνασταδόν, ἔκ τʼ ἐρέοντο·
Iliad 9.672	πρῶτος δʼ ἐξερέεινεν ἄναξ ἀνδρῶν Ἀγαμέμνων·
Iliad 9.673	εἴπʼ ἄγε μʼ ὦ πολύαινʼ Ὀδυσεῦ μέγα κῦδος Ἀχαιῶν
Iliad 9.674	ἤ ῥʼ ἐθέλει νήεσσιν ἀλεξέμεναι δήϊον πῦρ,
Iliad 9.675	ἦ ἀπέειπε, χόλος δʼ ἔτʼ ἔχει μεγαλήτορα θυμόν;
Iliad 9.676	τὸν δʼ αὖτε προσέειπε πολύτλας δῖος Ὀδυσσεύς·
Iliad 9.677	Ἀτρεΐδη κύδιστε ἄναξ ἀνδρῶν Ἀγάμεμνον
Iliad 9.678	κεῖνός γʼ οὐκ ἐθέλει σβέσσαι χόλον, ἀλλʼ ἔτι μᾶλλον
Iliad 9.679	πιμπλάνεται μένεος, σὲ δʼ ἀναίνεται ἠδὲ σὰ δῶρα.
Iliad 9.680	αὐτόν σε φράζεσθαι ἐν Ἀργείοισιν ἄνωγεν
Iliad 9.681	ὅππως κεν νῆάς τε σαῷς καὶ λαὸν Ἀχαιῶν·
Iliad 9.682	αὐτὸς δʼ ἠπείλησεν ἅμʼ ἠοῖ φαινομένηφι
Iliad 9.683	νῆας ἐϋσσέλμους ἅλαδʼ ἑλκέμεν ἀμφιελίσσας.
Iliad 9.684	καὶ δʼ ἂν τοῖς ἄλλοισιν ἔφη παραμυθήσασθαι
Iliad 9.685	οἴκαδʼ ἀποπλείειν, ἐπεὶ οὐκέτι δήετε τέκμωρ
Iliad 9.686	Ἰλίου αἰπεινῆς· μάλα γάρ ἑθεν εὐρύοπα Ζεὺς
Iliad 9.687	χεῖρα ἑὴν ὑπερέσχε, τεθαρσήκασι δὲ λαοί.
Iliad 9.688	ὣς ἔφατʼ· εἰσὶ καὶ οἵδε τάδʼ εἰπέμεν, οἵ μοι ἕποντο,
Iliad 9.689	Αἴας καὶ κήρυκε δύω πεπνυμένω ἄμφω.
Iliad 9.690	Φοῖνιξ δʼ αὖθʼ ὃ γέρων κατελέξατο, ὡς γὰρ ἀνώγει,
Iliad 9.691	ὄφρά οἱ ἐν νήεσσι φίλην ἐς πατρίδʼ ἕπηται
Iliad 9.692	αὔριον, ἢν ἐθέλῃσιν· ἀνάγκῃ δʼ οὔ τί μιν ἄξει.
Iliad 9.693	ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ
Iliad 9.694	μῦθον ἀγασσάμενοι· μάλα γὰρ κρατερῶς ἀγόρευσε.
Iliad 9.695	δὴν δʼ ἄνεῳ ἦσαν τετιηότες υἷες Ἀχαιῶν·
Iliad 9.696	ὀψὲ δὲ δὴ μετέειπε βοὴν ἀγαθὸς Διομήδης·
Iliad 9.697	Ἀτρεΐδη κύδιστε ἄναξ ἀνδρῶν Ἀγάμεμνον
Iliad 9.698	μὴ ὄφελες λίσσεσθαι ἀμύμονα Πηλεΐωνα
Iliad 9.699	μυρία δῶρα διδούς· ὃ δʼ ἀγήνωρ ἐστὶ καὶ ἄλλως·
Iliad 9.700	νῦν αὖ μιν πολὺ μᾶλλον ἀγηνορίῃσιν ἐνῆκας.
Iliad 9.701	ἀλλʼ ἤτοι κεῖνον μὲν ἐάσομεν ἤ κεν ἴῃσιν
Iliad 9.702	ἦ κε μένῃ· τότε δʼ αὖτε μαχήσεται ὁππότε κέν μιν
Iliad 9.703	θυμὸς ἐνὶ στήθεσσιν ἀνώγῃ καὶ θεὸς ὄρσῃ.
Iliad 9.704	ἀλλʼ ἄγεθʼ ὡς ἂν ἐγὼ εἴπω πειθώμεθα πάντες·
Iliad 9.705	νῦν μὲν κοιμήσασθε τεταρπόμενοι φίλον ἦτορ
Iliad 9.706	σίτου καὶ οἴνοιο· τὸ γὰρ μένος ἐστὶ καὶ ἀλκή·
Iliad 9.707	αὐτὰρ ἐπεί κε φανῇ καλὴ ῥοδοδάκτυλος Ἠώς,
Iliad 9.708	καρπαλίμως πρὸ νεῶν ἐχέμεν λαόν τε καὶ ἵππους
Iliad 9.709	ὀτρύνων, καὶ δʼ αὐτὸς ἐνὶ πρώτοισι μάχεσθαι.
Iliad 9.710	ὣς ἔφαθʼ, οἳ δʼ ἄρα πάντες ἐπῄνησαν βασιλῆες
Iliad 9.711	μῦθον ἀγασσάμενοι Διομήδεος ἱπποδάμοιο.
Iliad 9.712	καὶ τότε δὴ σπείσαντες ἔβαν κλισίην δὲ ἕκαστος,
Iliad 9.713	ἔνθα δὲ κοιμήσαντο καὶ ὕπνου δῶρον ἕλοντο.
Iliad 10.1	ἄλλοι μὲν παρὰ νηυσὶν ἀριστῆες Παναχαιῶν
Iliad 10.2	εὗδον παννύχιοι μαλακῷ δεδμημένοι ὕπνῳ·
Iliad 10.3	ἀλλʼ οὐκ Ἀτρεΐδην Ἀγαμέμνονα ποιμένα λαῶν
Iliad 10.4	ὕπνος ἔχε γλυκερὸς πολλὰ φρεσὶν ὁρμαίνοντα.
Iliad 10.5	ὡς δʼ ὅτʼ ἂν ἀστράπτῃ πόσις Ἥρης ἠϋκόμοιο
Iliad 10.6	τεύχων ἢ πολὺν ὄμβρον ἀθέσφατον ἠὲ χάλαζαν
Iliad 10.7	ἢ νιφετόν, ὅτε πέρ τε χιὼν ἐπάλυνεν ἀρούρας,
Iliad 10.8	ἠέ ποθι πτολέμοιο μέγα στόμα πευκεδανοῖο,
Iliad 10.9	ὣς πυκίνʼ ἐν στήθεσσιν ἀνεστενάχιζʼ Ἀγαμέμνων
Iliad 10.10	νειόθεν ἐκ κραδίης, τρομέοντο δέ οἱ φρένες ἐντός.
Iliad 10.11	ἤτοι ὅτʼ ἐς πεδίον τὸ Τρωϊκὸν ἀθρήσειε,
Iliad 10.12	θαύμαζεν πυρὰ πολλὰ τὰ καίετο Ἰλιόθι πρὸ
Iliad 10.13	αὐλῶν συρίγγων τʼ ἐνοπὴν ὅμαδόν τʼ ἀνθρώπων.
Iliad 10.14	αὐτὰρ ὅτʼ ἐς νῆάς τε ἴδοι καὶ λαὸν Ἀχαιῶν,
Iliad 10.15	πολλὰς ἐκ κεφαλῆς προθελύμνους ἕλκετο χαίτας
Iliad 10.16	ὑψόθʼ ἐόντι Διί, μέγα δʼ ἔστενε κυδάλιμον κῆρ.
Iliad 10.17	ἥδε δέ οἱ κατὰ θυμὸν ἀρίστη φαίνετο βουλὴ
Iliad 10.18	Νέστορʼ ἔπι πρῶτον Νηλήϊον ἐλθέμεν ἀνδρῶν,
Iliad 10.19	εἴ τινά οἱ σὺν μῆτιν ἀμύμονα τεκτήναιτο,
Iliad 10.20	ἥ τις ἀλεξίκακος πᾶσιν Δαναοῖσι γένοιτο.
Iliad 10.21	ὀρθωθεὶς δʼ ἔνδυνε περὶ στήθεσσι χιτῶνα,
Iliad 10.22	ποσσὶ δʼ ὑπὸ λιπαροῖσιν ἐδήσατο καλὰ πέδιλα,
Iliad 10.23	ἀμφὶ δʼ ἔπειτα δαφοινὸν ἑέσσατο δέρμα λέοντος
Iliad 10.24	αἴθωνος μεγάλοιο ποδηνεκές, εἵλετο δʼ ἔγχος.
Iliad 10.25	ὣς δʼ αὔτως Μενέλαον ἔχε τρόμος· οὐδὲ γὰρ αὐτῷ
Iliad 10.26	ὕπνος ἐπὶ βλεφάροισιν ἐφίζανε· μή τι πάθοιεν
Iliad 10.27	Ἀργεῖοι, τοὶ δὴ ἕθεν εἵνεκα πουλὺν ἐφʼ ὑγρὴν
Iliad 10.28	ἤλυθον ἐς Τροίην πόλεμον θρασὺν ὁρμαίνοντες.
Iliad 10.29	παρδαλέῃ μὲν πρῶτα μετάφρενον εὐρὺ κάλυψε
Iliad 10.30	ποικίλῃ, αὐτὰρ ἐπὶ στεφάνην κεφαλῆφιν ἀείρας
Iliad 10.31	θήκατο χαλκείην, δόρυ δʼ εἵλετο χειρὶ παχείῃ.
Iliad 10.32	βῆ δʼ ἴμεν ἀνστήσων ὃν ἀδελφεόν, ὃς μέγα πάντων
Iliad 10.33	Ἀργείων ἤνασσε, θεὸς δʼ ὣς τίετο δήμῳ.
Iliad 10.34	τὸν δʼ εὗρʼ ἀμφʼ ὤμοισι τιθήμενον ἔντεα καλὰ
Iliad 10.35	νηῒ πάρα πρύμνῃ· τῷ δʼ ἀσπάσιος γένετʼ ἐλθών.
Iliad 10.36	τὸν πρότερος προσέειπε βοὴν ἀγαθὸς Μενέλαος·
Iliad 10.37	τίφθʼ οὕτως ἠθεῖε κορύσσεαι; ἦ τινʼ ἑταίρων
Iliad 10.38	ὀτρυνέεις Τρώεσσιν ἐπίσκοπον; ἀλλὰ μάλʼ αἰνῶς
Iliad 10.39	δείδω μὴ οὔ τίς τοι ὑπόσχηται τόδε ἔργον
Iliad 10.40	ἄνδρας δυσμενέας σκοπιαζέμεν οἶος ἐπελθὼν
Iliad 10.41	νύκτα διʼ ἀμβροσίην· μάλα τις θρασυκάρδιος ἔσται.
Iliad 10.42	τὸν δʼ ἀπαμειβόμενος προσέφη κρείων Ἀγαμέμνων·
Iliad 10.43	χρεὼ βουλῆς ἐμὲ καὶ σὲ διοτρεφὲς ὦ Μενέλαε
Iliad 10.44	κερδαλέης, ἥ τίς κεν ἐρύσσεται ἠδὲ σαώσει
Iliad 10.45	Ἀργείους καὶ νῆας, ἐπεὶ Διὸς ἐτράπετο φρήν.
Iliad 10.46	Ἑκτορέοις ἄρα μᾶλλον ἐπὶ φρένα θῆχʼ ἱεροῖσιν·
Iliad 10.47	οὐ γάρ πω ἰδόμην, οὐδʼ ἔκλυον αὐδήσαντος
Iliad 10.48	ἄνδρʼ ἕνα τοσσάδε μέρμερʼ ἐπʼ ἤματι μητίσασθαι,
Iliad 10.49	ὅσσʼ Ἕκτωρ ἔρρεξε Διῒ φίλος υἷας Ἀχαιῶν
Iliad 10.50	αὔτως, οὔτε θεᾶς υἱὸς φίλος οὔτε θεοῖο.
Iliad 10.51	ἔργα δʼ ἔρεξʼ ὅσα φημὶ μελησέμεν Ἀργείοισι
Iliad 10.52	δηθά τε καὶ δολιχόν· τόσα γὰρ κακὰ μήσατʼ Ἀχαιούς.
Iliad 10.53	ἀλλʼ ἴθι νῦν Αἴαντα καὶ Ἰδομενῆα κάλεσσον
Iliad 10.54	ῥίμφα θέων παρὰ νῆας· ἐγὼ δʼ ἐπὶ Νέστορα δῖον
Iliad 10.55	εἶμι, καὶ ὀτρυνέω ἀνστήμεναι, αἴ κʼ ἐθέλῃσιν
Iliad 10.56	ἐλθεῖν ἐς φυλάκων ἱερὸν τέλος ἠδʼ ἐπιτεῖλαι.
Iliad 10.57	κείνῳ γάρ κε μάλιστα πιθοίατο· τοῖο γὰρ υἱὸς
Iliad 10.58	σημαίνει φυλάκεσσι καὶ Ἰδομενῆος ὀπάων
Iliad 10.59	Μηριόνης· τοῖσιν γὰρ ἐπετράπομέν γε μάλιστα.
Iliad 10.60	τὸν δʼ ἠμείβετʼ ἔπειτα βοὴν ἀγαθὸς Μενέλαος·
Iliad 10.61	πῶς γάρ μοι μύθῳ ἐπιτέλλεαι ἠδὲ κελεύεις;
Iliad 10.62	αὖθι μένω μετὰ τοῖσι δεδεγμένος εἰς ὅ κεν ἔλθῃς,
Iliad 10.63	ἦε θέω μετὰ σʼ αὖτις, ἐπὴν εὖ τοῖς ἐπιτείλω;
Iliad 10.64	τὸν δʼ αὖτε προσέειπεν ἄναξ ἀνδρῶν Ἀγαμέμνων,
Iliad 10.65	αὖθι μένειν, μή πως ἀβροτάξομεν ἀλλήλοιιν
Iliad 10.66	ἐρχομένω· πολλαὶ γὰρ ἀνὰ στρατόν εἰσι κέλευθοι.
Iliad 10.67	φθέγγεο δʼ ᾗ κεν ἴῃσθα καὶ ἐγρήγορθαι ἄνωχθι
Iliad 10.68	πατρόθεν ἐκ γενεῆς ὀνομάζων ἄνδρα ἕκαστον
Iliad 10.69	πάντας κυδαίνων· μηδὲ μεγαλίζεο θυμῷ,
Iliad 10.70	ἀλλὰ καὶ αὐτοί περ πονεώμεθα· ὧδέ που ἄμμι
Iliad 10.71	Ζεὺς ἐπὶ γιγνομένοισιν ἵει κακότητα βαρεῖαν.
Iliad 10.72	ὣς εἰπὼν ἀπέπεμπεν ἀδελφεὸν εὖ ἐπιτείλας·
Iliad 10.73	αὐτὰρ ὃ βῆ ῥʼ ἰέναι μετὰ Νέστορα ποιμένα λαῶν·
Iliad 10.74	τὸν δʼ εὗρεν παρά τε κλισίῃ καὶ νηῒ μελαίνῃ
Iliad 10.75	εὐνῇ ἔνι μαλακῇ· παρὰ δʼ ἔντεα ποικίλʼ ἔκειτο
Iliad 10.76	ἀσπὶς καὶ δύο δοῦρε φαεινή τε τρυφάλεια.
Iliad 10.77	πὰρ δὲ ζωστὴρ κεῖτο παναίολος, ᾧ ῥʼ ὁ γεραιὸς
Iliad 10.78	ζώννυθʼ ὅτʼ ἐς πόλεμον φθισήνορα θωρήσσοιτο
Iliad 10.79	λαὸν ἄγων, ἐπεὶ οὐ μὲν ἐπέτρεπε γήραϊ λυγρῷ.
Iliad 10.80	ὀρθωθεὶς δʼ ἄρʼ ἐπʼ ἀγκῶνος κεφαλὴν ἐπαείρας
Iliad 10.81	Ἀτρεΐδην προσέειπε καὶ ἐξερεείνετο μύθῳ·
Iliad 10.82	τίς δʼ οὗτος κατὰ νῆας ἀνὰ στρατὸν ἔρχεαι οἶος
Iliad 10.83	νύκτα διʼ ὀρφναίην, ὅτε θʼ εὕδουσι βροτοὶ ἄλλοι,
Iliad 10.84	ἠέ τινʼ οὐρήων διζήμενος, ἤ τινʼ ἑταίρων;
Iliad 10.85	φθέγγεο, μηδʼ ἀκέων ἐπʼ ἔμʼ ἔρχεο· τίπτε δέ σε χρεώ;
Iliad 10.86	τὸν δʼ ἠμείβετʼ ἔπειτα ἄναξ ἀνδρῶν Ἀγαμέμνων·
Iliad 10.87	ὦ Νέστορ Νηληϊάδη μέγα κῦδος Ἀχαιῶν
Iliad 10.88	γνώσεαι Ἀτρεΐδην Ἀγαμέμνονα, τὸν περὶ πάντων
Iliad 10.89	Ζεὺς ἐνέηκε πόνοισι διαμπερὲς εἰς ὅ κʼ ἀϋτμὴ
Iliad 10.90	ἐν στήθεσσι μένῃ καί μοι φίλα γούνατʼ ὀρώρῃ.
Iliad 10.91	πλάζομαι ὧδʼ ἐπεὶ οὔ μοι ἐπʼ ὄμμασι νήδυμος ὕπνος
Iliad 10.92	ἱζάνει, ἀλλὰ μέλει πόλεμος καὶ κήδεʼ Ἀχαιῶν.
Iliad 10.93	αἰνῶς γὰρ Δαναῶν περιδείδια, οὐδέ μοι ἦτορ
Iliad 10.94	ἔμπεδον, ἀλλʼ ἀλαλύκτημαι, κραδίη δέ μοι ἔξω
Iliad 10.95	στηθέων ἐκθρῴσκει, τρομέει δʼ ὑπὸ φαίδιμα γυῖα.
Iliad 10.96	ἀλλʼ εἴ τι δραίνεις, ἐπεὶ οὐδὲ σέ γʼ ὕπνος ἱκάνει,
Iliad 10.97	δεῦρʼ ἐς τοὺς φύλακας καταβήομεν, ὄφρα ἴδωμεν
Iliad 10.98	μὴ τοὶ μὲν καμάτῳ ἀδηκότες ἠδὲ καὶ ὕπνῳ
Iliad 10.99	κοιμήσωνται, ἀτὰρ φυλακῆς ἐπὶ πάγχυ λάθωνται.
Iliad 10.100	δυσμενέες δʼ ἄνδρες σχεδὸν εἵαται· οὐδέ τι ἴδμεν
Iliad 10.101	μή πως καὶ διὰ νύκτα μενοινήσωσι μάχεσθαι.
Iliad 10.102	τὸν δʼ ἠμείβετʼ ἔπειτα Γερήνιος ἱππότα Νέστωρ·
Iliad 10.103	Ἀτρεΐδη κύδιστε ἄναξ ἀνδρῶν Ἀγάμεμνον
Iliad 10.104	οὔ θην Ἕκτορι πάντα νοήματα μητίετα Ζεὺς
Iliad 10.105	ἐκτελέει, ὅσα πού νυν ἐέλπεται· ἀλλά μιν οἴω
Iliad 10.106	κήδεσι μοχθήσειν καὶ πλείοσιν, εἴ κεν Ἀχιλλεὺς
Iliad 10.107	ἐκ χόλου ἀργαλέοιο μεταστρέψῃ φίλον ἦτορ.
Iliad 10.108	σοὶ δὲ μάλʼ ἕψομʼ ἐγώ· ποτὶ δʼ αὖ καὶ ἐγείρομεν ἄλλους
Iliad 10.109	ἠμὲν Τυδεΐδην δουρὶ κλυτὸν ἠδʼ Ὀδυσῆα
Iliad 10.110	ἠδʼ Αἴαντα ταχὺν καὶ Φυλέος ἄλκιμον υἱόν.
Iliad 10.111	ἀλλʼ εἴ τις καὶ τούσδε μετοιχόμενος καλέσειεν
Iliad 10.112	ἀντίθεόν τʼ Αἴαντα καὶ Ἰδομενῆα ἄνακτα·
Iliad 10.113	τῶν γὰρ νῆες ἔασιν ἑκαστάτω, οὐδὲ μάλʼ ἐγγύς.
Iliad 10.114	ἀλλὰ φίλον περ ἐόντα καὶ αἰδοῖον Μενέλαον
Iliad 10.115	νεικέσω, εἴ πέρ μοι νεμεσήσεαι, οὐδʼ ἐπικεύσω
Iliad 10.116	ὡς εὕδει, σοὶ δʼ οἴῳ ἐπέτρεψεν πονέεσθαι.
Iliad 10.117	νῦν ὄφελεν κατὰ πάντας ἀριστῆας πονέεσθαι
Iliad 10.118	λισσόμενος· χρειὼ γὰρ ἱκάνεται οὐκέτʼ ἀνεκτός.
Iliad 10.119	τὸν δʼ αὖτε προσέειπεν ἄναξ ἀνδρῶν Ἀγαμέμνων·
Iliad 10.120	ὦ γέρον ἄλλοτε μέν σε καὶ αἰτιάασθαι ἄνωγα·
Iliad 10.121	πολλάκι γὰρ μεθιεῖ τε καὶ οὐκ ἐθέλει πονέεσθαι
Iliad 10.122	οὔτʼ ὄκνῳ εἴκων οὔτʼ ἀφραδίῃσι νόοιο,
Iliad 10.123	ἀλλʼ ἐμέ τʼ εἰσορόων καὶ ἐμὴν ποτιδέγμενος ὁρμήν.
Iliad 10.124	νῦν δʼ ἐμέο πρότερος μάλʼ ἐπέγρετο καί μοι ἐπέστη·
Iliad 10.125	τὸν μὲν ἐγὼ προέηκα καλήμεναι οὓς σὺ μεταλλᾷς.
Iliad 10.126	ἀλλʼ ἴομεν· κείνους δὲ κιχησόμεθα πρὸ πυλάων
Iliad 10.127	ἐν φυλάκεσσʼ, ἵνα γάρ σφιν ἐπέφραδον ἠγερέθεσθαι.
Iliad 10.128	τὸν δʼ ἠμείβετʼ ἔπειτα Γερήνιος ἱππότα Νέστωρ·
Iliad 10.129	οὕτως οὔ τίς οἱ νεμεσήσεται οὐδʼ ἀπιθήσει
Iliad 10.130	Ἀργείων, ὅτε κέν τινʼ ἐποτρύνῃ καὶ ἀνώγῃ.
Iliad 10.131	ὣς εἰπὼν ἔνδυνε περὶ στήθεσσι χιτῶνα,
Iliad 10.132	ποσσὶ δʼ ὑπὸ λιπαροῖσιν ἐδήσατο καλὰ πέδιλα,
Iliad 10.133	ἀμφὶ δʼ ἄρα χλαῖναν περονήσατο φοινικόεσσαν
Iliad 10.134	διπλῆν ἐκταδίην, οὔλη δʼ ἐπενήνοθε λάχνη.
Iliad 10.135	εἵλετο δʼ ἄλκιμον ἔγχος ἀκαχμένον ὀξέϊ χαλκῷ,
Iliad 10.136	βῆ δʼ ἰέναι κατὰ νῆας Ἀχαιῶν χαλκοχιτώνων.
Iliad 10.137	πρῶτον ἔπειτʼ Ὀδυσῆα Διὶ μῆτιν ἀτάλαντον
Iliad 10.138	ἐξ ὕπνου ἀνέγειρε Γερήνιος ἱππότα Νέστωρ
Iliad 10.139	φθεγξάμενος· τὸν δʼ αἶψα περὶ φρένας ἤλυθʼ ἰωή,
Iliad 10.140	ἐκ δʼ ἦλθε κλισίης καί σφεας πρὸς μῦθον ἔειπε·
Iliad 10.141	τίφθʼ οὕτω κατὰ νῆας ἀνὰ στρατὸν οἶοι ἀλᾶσθε
Iliad 10.142	νύκτα διʼ ἀμβροσίην, ὅ τι δὴ χρειὼ τόσον ἵκει;
Iliad 10.143	τὸν δʼ ἠμείβετʼ ἔπειτα Γερήνιος ἱππότα Νέστωρ·
Iliad 10.144	διογενὲς Λαερτιάδη πολυμήχανʼ Ὀδυσσεῦ
Iliad 10.145	μὴ νεμέσα· τοῖον γὰρ ἄχος βεβίηκεν Ἀχαιούς.
Iliad 10.146	ἀλλʼ ἕπεʼ, ὄφρα καὶ ἄλλον ἐγείρομεν ὅν τʼ ἐπέοικε
Iliad 10.147	βουλὰς βουλεύειν, ἢ φευγέμεν ἠὲ μάχεσθαι.
Iliad 10.148	ὣς φάθʼ, ὃ δὲ κλισίην δὲ κιὼν πολύμητις Ὀδυσσεὺς
Iliad 10.149	ποικίλον ἀμφʼ ὤμοισι σάκος θέτο, βῆ δὲ μετʼ αὐτούς.
Iliad 10.150	βὰν δʼ ἐπὶ Τυδεΐδην Διομήδεα· τὸν δὲ κίχανον
Iliad 10.151	ἐκτὸς ἀπὸ κλισίης σὺν τεύχεσιν· ἀμφὶ δʼ ἑταῖροι
Iliad 10.152	εὗδον, ὑπὸ κρασὶν δʼ ἔχον ἀσπίδας· ἔγχεα δέ σφιν
Iliad 10.153	ὄρθʼ ἐπὶ σαυρωτῆρος ἐλήλατο, τῆλε δὲ χαλκὸς
Iliad 10.154	λάμφʼ ὥς τε στεροπὴ πατρὸς Διός· αὐτὰρ ὅ γʼ ἥρως
Iliad 10.155	εὗδʼ, ὑπὸ δʼ ἔστρωτο ῥινὸν βοὸς ἀγραύλοιο,
Iliad 10.156	αὐτὰρ ὑπὸ κράτεσφι τάπης τετάνυστο φαεινός.
Iliad 10.157	τὸν παρστὰς ἀνέγειρε Γερήνιος ἱππότα Νέστωρ,
Iliad 10.158	λὰξ ποδὶ κινήσας, ὄτρυνέ τε νείκεσέ τʼ ἄντην·
Iliad 10.159	ἔγρεο Τυδέος υἱέ· τί πάννυχον ὕπνον ἀωτεῖς;
Iliad 10.160	οὐκ ἀΐεις ὡς Τρῶες ἐπὶ θρωσμῷ πεδίοιο
Iliad 10.161	εἵαται ἄγχι νεῶν, ὀλίγος δʼ ἔτι χῶρος ἐρύκει;
Iliad 10.162	ὣς φάθʼ, ὃ δʼ ἐξ ὕπνοιο μάλα κραιπνῶς ἀνόρουσε,
Iliad 10.163	καί μιν φωνήσας ἔπεα πτερόεντα προσηύδα·
Iliad 10.164	σχέτλιός ἐσσι γεραιέ· σὺ μὲν πόνου οὔ ποτε λήγεις.
Iliad 10.165	οὔ νυ καὶ ἄλλοι ἔασι νεώτεροι υἷες Ἀχαιῶν
Iliad 10.166	οἵ κεν ἔπειτα ἕκαστον ἐγείρειαν βασιλήων
Iliad 10.167	πάντῃ ἐποιχόμενοι; σὺ δʼ ἀμήχανός ἐσσι γεραιέ.
Iliad 10.168	τὸν δʼ αὖτε προσέειπε Γερήνιος ἱππότα Νέστωρ·
Iliad 10.169	ναὶ δὴ ταῦτά γε πάντα φίλος κατὰ μοῖραν ἔειπες.
Iliad 10.170	εἰσὶν μέν μοι παῖδες ἀμύμονες, εἰσὶ δὲ λαοὶ
Iliad 10.171	καὶ πολέες, τῶν κέν τις ἐποιχόμενος καλέσειεν·
Iliad 10.172	ἀλλὰ μάλα μεγάλη χρειὼ βεβίηκεν Ἀχαιούς.
Iliad 10.173	νῦν γὰρ δὴ πάντεσσιν ἐπὶ ξυροῦ ἵσταται ἀκμῆς
Iliad 10.174	ἢ μάλα λυγρὸς ὄλεθρος Ἀχαιοῖς ἠὲ βιῶναι.
Iliad 10.175	ἀλλʼ ἴθι νῦν Αἴαντα ταχὺν καὶ Φυλέος υἱὸν
Iliad 10.176	ἄνστησον· σὺ γάρ ἐσσι νεώτερος· εἴ μʼ ἐλεαίρεις.
Iliad 10.177	ὣς φάθʼ, ὃ δʼ ἀμφʼ ὤμοισιν ἑέσσατο δέρμα λέοντος
Iliad 10.178	αἴθωνος μεγάλοιο ποδηνεκές, εἵλετο δʼ ἔγχος.
Iliad 10.179	βῆ δʼ ἰέναι, τοὺς δʼ ἔνθεν ἀναστήσας ἄγεν ἥρως.
Iliad 10.180	οἳ δʼ ὅτε δὴ φυλάκεσσιν ἐν ἀγρομένοισιν ἔμιχθεν,
Iliad 10.181	οὐδὲ μὲν εὕδοντας φυλάκων ἡγήτορας εὗρον,
Iliad 10.182	ἀλλʼ ἐγρηγορτὶ σὺν τεύχεσιν εἵατο πάντες.
Iliad 10.183	ὡς δὲ κύνες περὶ μῆλα δυσωρήσωνται ἐν αὐλῇ
Iliad 10.184	θηρὸς ἀκούσαντες κρατερόφρονος, ὅς τε καθʼ ὕλην
Iliad 10.185	ἔρχηται διʼ ὄρεσφι· πολὺς δʼ ὀρυμαγδὸς ἐπʼ αὐτῷ
Iliad 10.186	ἀνδρῶν ἠδὲ κυνῶν, ἀπό τέ σφισιν ὕπνος ὄλωλεν·
Iliad 10.187	ὣς τῶν νήδυμος ὕπνος ἀπὸ βλεφάροιιν ὀλώλει
Iliad 10.188	νύκτα φυλασσομένοισι κακήν· πεδίον δὲ γὰρ αἰεὶ
Iliad 10.189	τετράφαθʼ, ὁππότʼ ἐπὶ Τρώων ἀΐοιεν ἰόντων.
Iliad 10.190	τοὺς δʼ ὃ γέρων γήθησεν ἰδὼν θάρσυνέ τε μύθῳ
Iliad 10.191	καί σφεας φωνήσας ἔπεα πτερόεντα προσηύδα·
Iliad 10.192	οὕτω νῦν φίλα τέκνα φυλάσσετε· μηδέ τινʼ ὕπνος
Iliad 10.193	αἱρείτω, μὴ χάρμα γενώμεθα δυσμενέεσσιν.
Iliad 10.194	ὣς εἰπὼν τάφροιο διέσσυτο· τοὶ δʼ ἅμʼ ἕποντο
Iliad 10.195	Ἀργείων βασιλῆες ὅσοι κεκλήατο βουλήν.
Iliad 10.196	τοῖς δʼ ἅμα Μηριόνης καὶ Νέστορος ἀγλαὸς υἱὸς
Iliad 10.197	ἤϊσαν· αὐτοὶ γὰρ κάλεον συμμητιάασθαι.
Iliad 10.198	τάφρον δʼ ἐκδιαβάντες ὀρυκτὴν ἑδριόωντο
Iliad 10.199	ἐν καθαρῷ, ὅθι δὴ νεκύων διεφαίνετο χῶρος
Iliad 10.200	πιπτόντων· ὅθεν αὖτις ἀπετράπετʼ ὄβριμος Ἕκτωρ
Iliad 10.201	ὀλλὺς Ἀργείους, ὅτε δὴ περὶ νὺξ ἐκάλυψεν.
Iliad 10.202	ἔνθα καθεζόμενοι ἔπεʼ ἀλλήλοισι πίφαυσκον·
Iliad 10.203	τοῖσι δὲ μύθων ἦρχε Γερήνιος ἱππότα Νέστωρ·
Iliad 10.204	ὦ φίλοι οὐκ ἂν δή τις ἀνὴρ πεπίθοιθʼ ἑῷ αὐτοῦ
Iliad 10.205	θυμῷ τολμήεντι μετὰ Τρῶας μεγαθύμους
Iliad 10.206	ἐλθεῖν, εἴ τινά που δηΐων ἕλοι ἐσχατόωντα,
Iliad 10.207	ἤ τινά που καὶ φῆμιν ἐνὶ Τρώεσσι πύθοιτο,
Iliad 10.208	ἅσσά τε μητιόωσι μετὰ σφίσιν, ἢ μεμάασιν
Iliad 10.209	αὖθι μένειν παρὰ νηυσὶν ἀπόπροθεν, ἦε πόλιν δὲ
Iliad 10.210	ἂψ ἀναχωρήσουσιν, ἐπεὶ δαμάσαντό γʼ Ἀχαιούς.
Iliad 10.211	ταῦτά κε πάντα πύθοιτο, καὶ ἂψ εἰς ἡμέας ἔλθοι
Iliad 10.212	ἀσκηθής· μέγα κέν οἱ ὑπουράνιον κλέος εἴη
Iliad 10.213	πάντας ἐπʼ ἀνθρώπους, καί οἱ δόσις ἔσσεται ἐσθλή·
Iliad 10.214	ὅσσοι γὰρ νήεσσιν ἐπικρατέουσιν ἄριστοι
Iliad 10.215	τῶν πάντων οἱ ἕκαστος ὄϊν δώσουσι μέλαιναν
Iliad 10.216	θῆλυν ὑπόρρηνον· τῇ μὲν κτέρας οὐδὲν ὁμοῖον,
Iliad 10.217	αἰεὶ δʼ ἐν δαίτῃσι καὶ εἰλαπίνῃσι παρέσται.
Iliad 10.218	ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ.
Iliad 10.219	τοῖσι δὲ καὶ μετέειπε βοὴν ἀγαθὸς Διομήδης·
Iliad 10.220	Νέστορ ἔμʼ ὀτρύνει κραδίη καὶ θυμὸς ἀγήνωρ
Iliad 10.221	ἀνδρῶν δυσμενέων δῦναι στρατὸν ἐγγὺς ἐόντων
Iliad 10.222	Τρώων· ἀλλʼ εἴ τίς μοι ἀνὴρ ἅμʼ ἕποιτο καὶ ἄλλος
Iliad 10.223	μᾶλλον θαλπωρὴ καὶ θαρσαλεώτερον ἔσται.
Iliad 10.224	σύν τε δύʼ ἐρχομένω καί τε πρὸ ὃ τοῦ ἐνόησεν
Iliad 10.225	ὅππως κέρδος ἔῃ· μοῦνος δʼ εἴ πέρ τε νοήσῃ
Iliad 10.226	ἀλλά τέ οἱ βράσσων τε νόος, λεπτὴ δέ τε μῆτις.
Iliad 10.227	ὣς ἔφαθʼ, οἳ δʼ ἔθελον Διομήδεϊ πολλοὶ ἕπεσθαι.
Iliad 10.228	ἠθελέτην Αἴαντε δύω θεράποντες Ἄρηος,
Iliad 10.229	ἤθελε Μηριόνης, μάλα δʼ ἤθελε Νέστορος υἱός,
Iliad 10.230	ἤθελε δʼ Ἀτρεΐδης δουρικλειτὸς Μενέλαος,
Iliad 10.231	ἤθελε δʼ ὁ τλήμων Ὀδυσεὺς καταδῦναι ὅμιλον
Iliad 10.232	Τρώων· αἰεὶ γάρ οἱ ἐνὶ φρεσὶ θυμὸς ἐτόλμα.
Iliad 10.233	τοῖσι δὲ καὶ μετέειπεν ἄναξ ἀνδρῶν Ἀγαμέμνων·
Iliad 10.234	Τυδεΐδη Διόμηδες ἐμῷ κεχαρισμένε θυμῷ
Iliad 10.235	τὸν μὲν δὴ ἕταρόν γʼ αἱρήσεαι ὅν κʼ ἐθέλῃσθα,
Iliad 10.236	φαινομένων τὸν ἄριστον, ἐπεὶ μεμάασί γε πολλοί.
Iliad 10.237	μηδὲ σύ γʼ αἰδόμενος σῇσι φρεσὶ τὸν μὲν ἀρείω
Iliad 10.238	καλλείπειν, σὺ δὲ χείρονʼ ὀπάσσεαι αἰδοῖ εἴκων
Iliad 10.239	ἐς γενεὴν ὁρόων, μηδʼ εἰ βασιλεύτερός ἐστιν.
Iliad 10.240	ὣς ἔφατʼ, ἔδεισεν δὲ περὶ ξανθῷ Μενελάῳ.
Iliad 10.241	τοῖς δʼ αὖτις μετέειπε βοὴν ἀγαθὸς Διομήδης·
Iliad 10.242	εἰ μὲν δὴ ἕταρόν γε κελεύετέ μʼ αὐτὸν ἑλέσθαι,
Iliad 10.243	πῶς ἂν ἔπειτʼ Ὀδυσῆος ἐγὼ θείοιο λαθοίμην,
Iliad 10.244	οὗ πέρι μὲν πρόφρων κραδίη καὶ θυμὸς ἀγήνωρ
Iliad 10.245	ἐν πάντεσσι πόνοισι, φιλεῖ δέ ἑ Παλλὰς Ἀθήνη.
Iliad 10.246	τούτου γʼ ἑσπομένοιο καὶ ἐκ πυρὸς αἰθομένοιο
Iliad 10.247	ἄμφω νοστήσαιμεν, ἐπεὶ περίοιδε νοῆσαι.
Iliad 10.248	τὸν δʼ αὖτε προσέειπε πολύτλας δῖος Ὀδυσσεύς·
Iliad 10.249	Τυδεΐδη μήτʼ ἄρ με μάλʼ αἴνεε μήτέ τι νείκει·
Iliad 10.250	εἰδόσι γάρ τοι ταῦτα μετʼ Ἀργείοις ἀγορεύεις.
Iliad 10.251	ἀλλʼ ἴομεν· μάλα γὰρ νὺξ ἄνεται, ἐγγύθι δʼ ἠώς,
Iliad 10.252	ἄστρα δὲ δὴ προβέβηκε, παροίχωκεν δὲ πλέων νὺξ
Iliad 10.253	τῶν δύο μοιράων, τριτάτη δʼ ἔτι μοῖρα λέλειπται.
Iliad 10.254	ὣς εἰπόνθʼ ὅπλοισιν ἔνι δεινοῖσιν ἐδύτην.
Iliad 10.255	Τυδεΐδῃ μὲν δῶκε μενεπτόλεμος Θρασυμήδης
Iliad 10.256	φάσγανον ἄμφηκες· τὸ δʼ ἑὸν παρὰ νηῒ λέλειπτο·
Iliad 10.257	καὶ σάκος· ἀμφὶ δέ οἱ κυνέην κεφαλῆφιν ἔθηκε
Iliad 10.258	ταυρείην, ἄφαλόν τε καὶ ἄλλοφον, ἥ τε καταῖτυξ
Iliad 10.259	κέκληται, ῥύεται δὲ κάρη θαλερῶν αἰζηῶν.
Iliad 10.260	Μηριόνης δʼ Ὀδυσῆϊ δίδου βιὸν ἠδὲ φαρέτρην
Iliad 10.261	καὶ ξίφος, ἀμφὶ δέ οἱ κυνέην κεφαλῆφιν ἔθηκε
Iliad 10.262	ῥινοῦ ποιητήν· πολέσιν δʼ ἔντοσθεν ἱμᾶσιν
Iliad 10.263	ἐντέτατο στερεῶς· ἔκτοσθε δὲ λευκοὶ ὀδόντες
Iliad 10.264	ἀργιόδοντος ὑὸς θαμέες ἔχον ἔνθα καὶ ἔνθα
Iliad 10.265	εὖ καὶ ἐπισταμένως· μέσσῃ δʼ ἐνὶ πῖλος ἀρήρει.
Iliad 10.266	τήν ῥά ποτʼ ἐξ Ἐλεῶνος Ἀμύντορος Ὀρμενίδαο
Iliad 10.267	ἐξέλετʼ Αὐτόλυκος πυκινὸν δόμον ἀντιτορήσας,
Iliad 10.268	Σκάνδειαν δʼ ἄρα δῶκε Κυθηρίῳ Ἀμφιδάμαντι·
Iliad 10.269	Ἀμφιδάμας δὲ Μόλῳ δῶκε ξεινήϊον εἶναι,
Iliad 10.270	αὐτὰρ ὃ Μηριόνῃ δῶκεν ᾧ παιδὶ φορῆναι·
Iliad 10.271	δὴ τότʼ Ὀδυσσῆος πύκασεν κάρη ἀμφιτεθεῖσα.
Iliad 10.272	τὼ δʼ ἐπεὶ οὖν ὅπλοισιν ἔνι δεινοῖσιν ἐδύτην,
Iliad 10.273	βάν ῥʼ ἰέναι, λιπέτην δὲ κατʼ αὐτόθι πάντας ἀρίστους.
Iliad 10.274	τοῖσι δὲ δεξιὸν ἧκεν ἐρῳδιὸν ἐγγὺς ὁδοῖο
Iliad 10.275	Παλλὰς Ἀθηναίη· τοὶ δʼ οὐκ ἴδον ὀφθαλμοῖσι
Iliad 10.276	νύκτα διʼ ὀρφναίην, ἀλλὰ κλάγξαντος ἄκουσαν.
Iliad 10.277	χαῖρε δὲ τῷ ὄρνιθʼ Ὀδυσεύς, ἠρᾶτο δʼ Ἀθήνῃ·
Iliad 10.278	κλῦθί μευ αἰγιόχοιο Διὸς τέκος, ἥ τέ μοι αἰεὶ
Iliad 10.279	ἐν πάντεσσι πόνοισι παρίστασαι, οὐδέ σε λήθω
Iliad 10.280	κινύμενος· νῦν αὖτε μάλιστά με φῖλαι Ἀθήνη,
Iliad 10.281	δὸς δὲ πάλιν ἐπὶ νῆας ἐϋκλεῖας ἀφικέσθαι
Iliad 10.282	ῥέξαντας μέγα ἔργον, ὅ κε Τρώεσσι μελήσῃ.
Iliad 10.283	δεύτερος αὖτʼ ἠρᾶτο βοὴν ἀγαθὸς Διομήδης·
Iliad 10.284	κέκλυθι νῦν καὶ ἐμεῖο Διὸς τέκος Ἀτρυτώνη·
Iliad 10.285	σπεῖό μοι ὡς ὅτε πατρὶ ἅμʼ ἕσπεο Τυδέϊ δίῳ
Iliad 10.286	ἐς Θήβας, ὅτε τε πρὸ Ἀχαιῶν ἄγγελος ᾔει.
Iliad 10.287	τοὺς δʼ ἄρʼ ἐπʼ Ἀσωπῷ λίπε χαλκοχίτωνας Ἀχαιούς,
Iliad 10.288	αὐτὰρ ὃ μειλίχιον μῦθον φέρε Καδμείοισι
Iliad 10.289	κεῖσʼ· ἀτὰρ ἂψ ἀπιὼν μάλα μέρμερα μήσατο ἔργα
Iliad 10.290	σὺν σοὶ δῖα θεά, ὅτε οἱ πρόφρασσα παρέστης.
Iliad 10.291	ὣς νῦν μοι ἐθέλουσα παρίσταο καί με φύλασσε.
Iliad 10.292	σοὶ δʼ αὖ ἐγὼ ῥέξω βοῦν ἦνιν εὐρυμέτωπον
Iliad 10.293	ἀδμήτην, ἣν οὔ πω ὑπὸ ζυγὸν ἤγαγεν ἀνήρ·
Iliad 10.294	τήν τοι ἐγὼ ῥέξω χρυσὸν κέρασιν περιχεύας.
Iliad 10.295	ὣς ἔφαν εὐχόμενοι, τῶν δʼ ἔκλυε Παλλὰς Ἀθήνη.
Iliad 10.296	οἳ δʼ ἐπεὶ ἠρήσαντο Διὸς κούρῃ μεγάλοιο,
Iliad 10.297	βάν ῥʼ ἴμεν ὥς τε λέοντε δύω διὰ νύκτα μέλαιναν
Iliad 10.298	ἂμ φόνον, ἂν νέκυας, διά τʼ ἔντεα καὶ μέλαν αἷμα.
Iliad 10.299	οὐδὲ μὲν οὐδὲ Τρῶας ἀγήνορας εἴασεν Ἕκτωρ
Iliad 10.300	εὕδειν, ἀλλʼ ἄμυδις κικλήσκετο πάντας ἀρίστους,
Iliad 10.301	ὅσσοι ἔσαν Τρώων ἡγήτορες ἠδὲ μέδοντες·
Iliad 10.302	τοὺς ὅ γε συγκαλέσας πυκινὴν ἀρτύνετο βουλήν·
Iliad 10.303	τίς κέν μοι τόδε ἔργον ὑποσχόμενος τελέσειε
Iliad 10.304	δώρῳ ἔπι μεγάλῳ; μισθὸς δέ οἱ ἄρκιος ἔσται.
Iliad 10.305	δώσω γὰρ δίφρόν τε δύω τʼ ἐριαύχενας ἵππους
Iliad 10.306	οἵ κεν ἄριστοι ἔωσι θοῇς ἐπὶ νηυσὶν Ἀχαιῶν
Iliad 10.307	ὅς τίς κε τλαίη, οἷ τʼ αὐτῷ κῦδος ἄροιτο,
Iliad 10.308	νηῶν ὠκυπόρων σχεδὸν ἐλθέμεν, ἔκ τε πυθέσθαι
Iliad 10.309	ἠέ φυλάσσονται νῆες θοαὶ ὡς τὸ πάρος περ,
Iliad 10.310	ἦ ἤδη χείρεσσιν ὑφʼ ἡμετέρῃσι δαμέντες
Iliad 10.311	φύξιν βουλεύουσι μετὰ σφίσιν, οὐδʼ ἐθέλουσι
Iliad 10.312	νύκτα φυλασσέμεναι, καμάτῳ ἀδηκότες αἰνῷ.
Iliad 10.313	ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ.
Iliad 10.314	ἦν δέ τις ἐν Τρώεσσι Δόλων Εὐμήδεος υἱὸς
Iliad 10.315	κήρυκος θείοιο πολύχρυσος πολύχαλκος,
Iliad 10.316	ὃς δή τοι εἶδος μὲν ἔην κακός, ἀλλὰ ποδώκης·
Iliad 10.317	αὐτὰρ ὃ μοῦνος ἔην μετὰ πέντε κασιγνήτῃσιν.
Iliad 10.318	ὅς ῥα τότε Τρωσίν τε καὶ Ἕκτορι μῦθον ἔειπεν·
Iliad 10.319	Ἕκτορ ἔμʼ ὀτρύνει κραδίη καὶ θυμὸς ἀγήνωρ
Iliad 10.320	νηῶν ὠκυπόρων σχεδὸν ἐλθέμεν ἔκ τε πυθέσθαι.
Iliad 10.321	ἀλλʼ ἄγε μοι τὸ σκῆπτρον ἀνάσχεο, καί μοι ὄμοσσον
Iliad 10.322	ἦ μὲν τοὺς ἵππους τε καὶ ἅρματα ποικίλα χαλκῷ
Iliad 10.323	δωσέμεν, οἳ φορέουσιν ἀμύμονα Πηλεΐωνα,
Iliad 10.324	σοὶ δʼ ἐγὼ οὐχ ἅλιος σκοπὸς ἔσσομαι οὐδʼ ἀπὸ δόξης·
Iliad 10.325	τόφρα γὰρ ἐς στρατὸν εἶμι διαμπερὲς ὄφρʼ ἂν ἵκωμαι
Iliad 10.326	νῆʼ Ἀγαμεμνονέην, ὅθι που μέλλουσιν ἄριστοι
Iliad 10.327	βουλὰς βουλεύειν ἢ φευγέμεν ἠὲ μάχεσθαι.
Iliad 10.328	ὣς φάθʼ, ὃ δʼ ἐν χερσὶ σκῆπτρον λάβε καί οἱ ὄμοσσεν·
Iliad 10.329	ἴστω νῦν Ζεὺς αὐτὸς ἐρίγδουπος πόσις Ἥρης
Iliad 10.330	μὴ μὲν τοῖς ἵπποισιν ἀνὴρ ἐποχήσεται ἄλλος
Iliad 10.331	Τρώων, ἀλλά σέ φημι διαμπερὲς ἀγλαϊεῖσθαι.
Iliad 10.332	ὣς φάτο καί ῥʼ ἐπίορκον ἐπώμοσε, τὸν δʼ ὀρόθυνεν·
Iliad 10.333	αὐτίκα δʼ ἀμφʼ ὤμοισιν ἐβάλλετο καμπύλα τόξα,
Iliad 10.334	ἕσσατο δʼ ἔκτοσθεν ῥινὸν πολιοῖο λύκοιο,
Iliad 10.335	κρατὶ δʼ ἐπὶ κτιδέην κυνέην, ἕλε δʼ ὀξὺν ἄκοντα,
Iliad 10.336	βῆ δʼ ἰέναι προτὶ νῆας ἀπὸ στρατοῦ· οὐδʼ ἄρʼ ἔμελλεν
Iliad 10.337	ἐλθὼν ἐκ νηῶν ἂψ Ἕκτορι μῦθον ἀποίσειν.
Iliad 10.338	ἀλλʼ ὅτε δή ῥʼ ἵππων τε καὶ ἀνδρῶν κάλλιφʼ ὅμιλον,
Iliad 10.339	βῆ ῥʼ ἀνʼ ὁδὸν μεμαώς· τὸν δὲ φράσατο προσιόντα
Iliad 10.340	διογενὴς Ὀδυσεύς, Διομήδεα δὲ προσέειπεν·
Iliad 10.341	οὗτός τις Διόμηδες ἀπὸ στρατοῦ ἔρχεται ἀνήρ,
Iliad 10.342	οὐκ οἶδʼ ἢ νήεσσιν ἐπίσκοπος ἡμετέρῃσιν,
Iliad 10.343	ἦ τινα συλήσων νεκύων κατατεθνηώτων.
Iliad 10.344	ἀλλʼ ἐῶμέν μιν πρῶτα παρεξελθεῖν πεδίοιο
Iliad 10.345	τυτθόν· ἔπειτα δέ κʼ αὐτὸν ἐπαΐξαντες ἕλοιμεν
Iliad 10.346	καρπαλίμως· εἰ δʼ ἄμμε παραφθαίησι πόδεσσιν,
Iliad 10.347	αἰεί μιν ἐπὶ νῆας ἀπὸ στρατόφι προτιειλεῖν
Iliad 10.348	ἔγχει ἐπαΐσσων, μή πως προτὶ ἄστυ ἀλύξῃ.
Iliad 10.349	ὣς ἄρα φωνήσαντε παρὲξ ὁδοῦ ἐν νεκύεσσι
Iliad 10.350	κλινθήτην· ὃ δʼ ἄρʼ ὦκα παρέδραμεν ἀφραδίῃσιν.
Iliad 10.351	ἀλλʼ ὅτε δή ῥʼ ἀπέην ὅσσόν τʼ ἐπὶ οὖρα πέλονται
Iliad 10.352	ἡμιόνων· αἱ γάρ τε βοῶν προφερέστεραί εἰσιν
Iliad 10.353	ἑλκέμεναι νειοῖο βαθείης πηκτὸν ἄροτρον·
Iliad 10.354	τὼ μὲν ἐπεδραμέτην, ὃ δʼ ἄρʼ ἔστη δοῦπον ἀκούσας.
Iliad 10.355	ἔλπετο γὰρ κατὰ θυμὸν ἀποστρέψοντας ἑταίρους
Iliad 10.356	ἐκ Τρώων ἰέναι πάλιν Ἕκτορος ὀτρύναντος.
Iliad 10.357	ἀλλʼ ὅτε δή ῥʼ ἄπεσαν δουρηνεκὲς ἢ καὶ ἔλασσον,
Iliad 10.358	γνῶ ῥʼ ἄνδρας δηΐους, λαιψηρὰ δὲ γούνατʼ ἐνώμα
Iliad 10.359	φευγέμεναι· τοὶ δʼ αἶψα διώκειν ὁρμήθησαν.
Iliad 10.360	ὡς δʼ ὅτε καρχαρόδοντε δύω κύνε εἰδότε θήρης
Iliad 10.361	ἢ κεμάδʼ ἠὲ λαγωὸν ἐπείγετον ἐμμενὲς αἰεὶ
Iliad 10.362	χῶρον ἀνʼ ὑλήενθʼ, ὃ δέ τε προθέῃσι μεμηκώς,
Iliad 10.363	ὣς τὸν Τυδεΐδης ἠδʼ ὃ πτολίπορθος Ὀδυσσεὺς
Iliad 10.364	λαοῦ ἀποτμήξαντε διώκετον ἐμμενὲς αἰεί.
Iliad 10.365	ἀλλʼ ὅτε δὴ τάχʼ ἔμελλε μιγήσεσθαι φυλάκεσσι
Iliad 10.366	φεύγων ἐς νῆας, τότε δὴ μένος ἔμβαλʼ Ἀθήνη
Iliad 10.367	Τυδεΐδῃ, ἵνα μή τις Ἀχαιῶν χαλκοχιτώνων
Iliad 10.368	φθαίη ἐπευξάμενος βαλέειν, ὃ δὲ δεύτερος ἔλθοι.
Iliad 10.369	δουρὶ δʼ ἐπαΐσσων προσέφη κρατερὸς Διομήδης·
Iliad 10.370	ἠὲ μένʼ ἠέ σε δουρὶ κιχήσομαι, οὐδέ σέ φημι
Iliad 10.371	δηρὸν ἐμῆς ἀπὸ χειρὸς ἀλύξειν αἰπὺν ὄλεθρον.
Iliad 10.372	ἦ ῥα καὶ ἔγχος ἀφῆκεν, ἑκὼν δʼ ἡμάρτανε φωτός·
Iliad 10.373	δεξιτερὸν δʼ ὑπὲρ ὦμον ἐΰξου δουρὸς ἀκωκὴ
Iliad 10.374	ἐν γαίῃ ἐπάγη· ὃ δʼ ἄρʼ ἔστη τάρβησέν τε
Iliad 10.375	βαμβαίνων· ἄραβος δὲ διὰ στόμα γίγνετʼ ὀδόντων·
Iliad 10.376	χλωρὸς ὑπαὶ δείους· τὼ δʼ ἀσθμαίνοντε κιχήτην,
Iliad 10.377	χειρῶν δʼ ἁψάσθην· ὃ δὲ δακρύσας ἔπος ηὔδα·
Iliad 10.378	ζωγρεῖτʼ, αὐτὰρ ἐγὼν ἐμὲ λύσομαι· ἔστι γὰρ ἔνδον
Iliad 10.379	χαλκός τε χρυσός τε πολύκμητός τε σίδηρος,
Iliad 10.380	τῶν κʼ ὔμμιν χαρίσαιτο πατὴρ ἀπερείσιʼ ἄποινα
Iliad 10.381	εἴ κεν ἐμὲ ζωὸν πεπύθοιτʼ ἐπὶ νηυσὶν Ἀχαιῶν.
Iliad 10.382	τὸν δʼ ἀπαμειβόμενος προσέφη πολύμητις Ὀδυσσεύς·
Iliad 10.383	θάρσει, μηδέ τί τοι θάνατος καταθύμιος ἔστω.
Iliad 10.384	ἀλλʼ ἄγε μοι τόδε εἰπὲ καὶ ἀτρεκέως κατάλεξον·
Iliad 10.385	πῇ δὴ οὕτως ἐπὶ νῆας ἀπὸ στρατοῦ ἔρχεαι οἶος
Iliad 10.386	νύκτα διʼ ὀρφναίην, ὅτε θʼ εὕδουσι βροτοὶ ἄλλοι;
Iliad 10.387	ἤ τινα συλήσων νεκύων κατατεθνηώτων;
Iliad 10.388	ἦ σʼ Ἕκτωρ προέηκε διασκοπιᾶσθαι ἕκαστα
Iliad 10.389	νῆας ἔπι γλαφυράς; ἦ σʼ αὐτὸν θυμὸς ἀνῆκε;
Iliad 10.390	τὸν δʼ ἠμείβετʼ ἔπειτα Δόλων, ὑπὸ δʼ ἔτρεμε γυῖα·
Iliad 10.391	πολλῇσίν μʼ ἄτῃσι παρὲκ νόον ἤγαγεν Ἕκτωρ,
Iliad 10.392	ὅς μοι Πηλεΐωνος ἀγαυοῦ μώνυχας ἵππους
Iliad 10.393	δωσέμεναι κατένευσε καὶ ἅρματα ποικίλα χαλκῷ,
Iliad 10.394	ἠνώγει δέ μʼ ἰόντα θοὴν διὰ νύκτα μέλαιναν
Iliad 10.395	ἀνδρῶν δυσμενέων σχεδὸν ἐλθέμεν, ἔκ τε πυθέσθαι
Iliad 10.396	ἠὲ φυλάσσονται νῆες θοαὶ ὡς τὸ πάρος περ,
Iliad 10.397	ἦ ἤδη χείρεσσιν ὑφʼ ἡμετέρῃσι δαμέντες
Iliad 10.398	φύξιν βουλεύουσι μετὰ σφίσιν, οὐδʼ ἐθέλουσι
Iliad 10.399	νύκτα φυλασσέμεναι, καμάτῳ ἀδηκότες αἰνῷ.
Iliad 10.400	τὸν δʼ ἐπιμειδήσας προσέφη πολύμητις Ὀδυσσεύς·
Iliad 10.401	ἦ ῥά νύ τοι μεγάλων δώρων ἐπεμαίετο θυμὸς
Iliad 10.402	ἵππων Αἰακίδαο δαΐφρονος· οἳ δʼ ἀλεγεινοὶ
Iliad 10.403	ἀνδράσι γε θνητοῖσι δαμήμεναι ἠδʼ ὀχέεσθαι
Iliad 10.404	ἄλλῳ γʼ ἢ Ἀχιλῆϊ, τὸν ἀθανάτη τέκε μήτηρ.
Iliad 10.405	ἀλλʼ ἄγε μοι τόδε εἰπὲ καὶ ἀτρεκέως κατάλεξον·
Iliad 10.406	ποῦ νῦν δεῦρο κιὼν λίπες Ἕκτορα ποιμένα λαῶν;
Iliad 10.407	ποῦ δέ οἱ ἔντεα κεῖται ἀρήϊα, ποῦ δέ οἱ ἵπποι;
Iliad 10.408	πῶς δαὶ τῶν ἄλλων Τρώων φυλακαί τε καὶ εὐναί;
Iliad 10.409	ἅσσά τε μητιόωσι μετὰ σφίσιν, ἢ μεμάασιν
Iliad 10.410	αὖθι μένειν παρὰ νηυσὶν ἀπόπροθεν, ἦε πόλιν δὲ
Iliad 10.411	ἂψ ἀναχωρήσουσιν, ἐπεὶ δαμάσαντό γʼ Ἀχαιούς.
Iliad 10.412	τὸν δʼ αὖτε προσέειπε Δόλων Εὐμήδεος υἱός·
Iliad 10.413	τοὶ γὰρ ἐγώ τοι ταῦτα μάλʼ ἀτρεκέως καταλέξω.
Iliad 10.414	Ἕκτωρ μὲν μετὰ τοῖσιν, ὅσοι βουληφόροι εἰσί,
Iliad 10.415	βουλὰς βουλεύει θείου παρὰ σήματι Ἴλου
Iliad 10.416	νόσφιν ἀπὸ φλοίσβου· φυλακὰς δʼ ἃς εἴρεαι ἥρως
Iliad 10.417	οὔ τις κεκριμένη ῥύεται στρατὸν οὐδὲ φυλάσσει.
Iliad 10.418	ὅσσαι μὲν Τρώων πυρὸς ἐσχάραι, οἷσιν ἀνάγκη
Iliad 10.419	οἷ δʼ ἐγρηγόρθασι φυλασσέμεναί τε κέλονται
Iliad 10.420	ἀλλήλοις· ἀτὰρ αὖτε πολύκλητοι ἐπίκουροι
Iliad 10.421	εὕδουσι· Τρωσὶν γὰρ ἐπιτραπέουσι φυλάσσειν·
Iliad 10.422	οὐ γάρ σφιν παῖδες σχεδὸν εἵαται οὐδὲ γυναῖκες.
Iliad 10.423	τὸν δʼ ἀπαμειβόμενος προσέφη πολύμητις Ὀδυσσεύς·
Iliad 10.424	πῶς γὰρ νῦν Τρώεσσι μεμιγμένοι ἱπποδάμοισιν
Iliad 10.425	εὕδουσʼ ἦ ἀπάνευθε; δίειπέ μοι ὄφρα δαείω.
Iliad 10.426	τὸν δʼ ἠμείβετʼ ἔπειτα Δόλων Εὐμήδεος υἱός·
Iliad 10.427	τοὶ γὰρ ἐγὼ καὶ ταῦτα μάλʼ ἀτρεκέως καταλέξω.
Iliad 10.428	πρὸς μὲν ἁλὸς Κᾶρες καὶ Παίονες ἀγκυλότοξοι
Iliad 10.429	καὶ Λέλεγες καὶ Καύκωνες δῖοί τε Πελασγοί,
Iliad 10.430	πρὸς Θύμβρης δʼ ἔλαχον Λύκιοι Μυσοί τʼ ἀγέρωχοι
Iliad 10.431	καὶ Φρύγες ἱππόμαχοι καὶ Μῄονες ἱπποκορυσταί.
Iliad 10.432	ἀλλὰ τί ἢ ἐμὲ ταῦτα διεξερέεσθε ἕκαστα;
Iliad 10.433	εἰ γὰρ δὴ μέματον Τρώων καταδῦναι ὅμιλον
Iliad 10.434	Θρήϊκες οἷδʼ ἀπάνευθε νεήλυδες ἔσχατοι ἄλλων·
Iliad 10.435	ἐν δέ σφιν Ῥῆσος βασιλεὺς πάϊς Ἠϊονῆος.
Iliad 10.436	τοῦ δὴ καλλίστους ἵππους ἴδον ἠδὲ μεγίστους·
Iliad 10.437	λευκότεροι χιόνος, θείειν δʼ ἀνέμοισιν ὁμοῖοι·
Iliad 10.438	ἅρμα δέ οἱ χρυσῷ τε καὶ ἀργύρῳ εὖ ἤσκηται·
Iliad 10.439	τεύχεα δὲ χρύσεια πελώρια θαῦμα ἰδέσθαι
Iliad 10.440	ἤλυθʼ ἔχων· τὰ μὲν οὔ τι καταθνητοῖσιν ἔοικεν
Iliad 10.441	ἄνδρεσσιν φορέειν, ἀλλʼ ἀθανάτοισι θεοῖσιν.
Iliad 10.442	ἀλλʼ ἐμὲ μὲν νῦν νηυσὶ πελάσσετον ὠκυπόροισιν,
Iliad 10.443	ἠέ με δήσαντες λίπετʼ αὐτόθι νηλέϊ δεσμῷ,
Iliad 10.444	ὄφρά κεν ἔλθητον καὶ πειρηθῆτον ἐμεῖο
Iliad 10.445	ἠὲ κατʼ αἶσαν ἔειπον ἐν ὑμῖν, ἦε καὶ οὐκί.
Iliad 10.446	τὸν δʼ ἄρʼ ὑπόδρα ἰδὼν προσέφη κρατερὸς Διομήδης·
Iliad 10.447	μὴ δή μοι φύξίν γε Δόλων ἐμβάλλεο θυμῷ·
Iliad 10.448	ἐσθλά περ ἀγγείλας, ἐπεὶ ἵκεο χεῖρας ἐς ἁμάς.
Iliad 10.449	εἰ μὲν γάρ κέ σε νῦν ἀπολύσομεν ἠὲ μεθῶμεν,
Iliad 10.450	ἦ τε καὶ ὕστερον εἶσθα θοὰς ἐπὶ νῆας Ἀχαιῶν
Iliad 10.451	ἠὲ διοπτεύσων ἢ ἐναντίβιον πολεμίξων·
Iliad 10.452	εἰ δέ κʼ ἐμῇς ὑπὸ χερσὶ δαμεὶς ἀπὸ θυμὸν ὀλέσσῃς,
Iliad 10.453	οὐκέτʼ ἔπειτα σὺ πῆμά ποτʼ ἔσσεαι Ἀργείοισιν.
Iliad 10.454	ἦ, καὶ ὃ μέν μιν ἔμελλε γενείου χειρὶ παχείῃ
Iliad 10.455	ἁψάμενος λίσσεσθαι, ὃ δʼ αὐχένα μέσσον ἔλασσε
Iliad 10.456	φασγάνῳ ἀΐξας, ἀπὸ δʼ ἄμφω κέρσε τένοντε·
Iliad 10.457	φθεγγομένου δʼ ἄρα τοῦ γε κάρη κονίῃσιν ἐμίχθη.
Iliad 10.458	τοῦ δʼ ἀπὸ μὲν κτιδέην κυνέην κεφαλῆφιν ἕλοντο
Iliad 10.459	καὶ λυκέην καὶ τόξα παλίντονα καὶ δόρυ μακρόν·
Iliad 10.460	καὶ τά γʼ Ἀθηναίῃ ληΐτιδι δῖος Ὀδυσσεὺς
Iliad 10.461	ὑψόσʼ ἀνέσχεθε χειρὶ καὶ εὐχόμενος ἔπος ηὔδα·
Iliad 10.462	χαῖρε θεὰ τοῖσδεσσι· σὲ γὰρ πρώτην ἐν Ὀλύμπῳ
Iliad 10.463	πάντων ἀθανάτων ἐπιδωσόμεθʼ· ἀλλὰ καὶ αὖτις
Iliad 10.464	πέμψον ἐπὶ Θρῃκῶν ἀνδρῶν ἵππους τε καὶ εὐνάς.
Iliad 10.465	ὣς ἄρʼ ἐφώνησεν, καὶ ἀπὸ ἕθεν ὑψόσʼ ἀείρας
Iliad 10.466	θῆκεν ἀνὰ μυρίκην· δέελον δʼ ἐπὶ σῆμά τʼ ἔθηκε
Iliad 10.467	συμμάρψας δόνακας μυρίκης τʼ ἐριθηλέας ὄζους,
Iliad 10.468	μὴ λάθοι αὖτις ἰόντε θοὴν διὰ νύκτα μέλαιναν.
Iliad 10.469	τὼ δὲ βάτην προτέρω διά τʼ ἔντεα καὶ μέλαν αἷμα,
Iliad 10.470	αἶψα δʼ ἐπὶ Θρῃκῶν ἀνδρῶν τέλος ἷξον ἰόντες.
Iliad 10.471	οἳ δʼ εὗδον καμάτῳ ἀδηκότες, ἔντεα δέ σφιν
Iliad 10.472	καλὰ παρʼ αὐτοῖσι χθονὶ κέκλιτο εὖ κατὰ κόσμον
Iliad 10.473	τριστοιχί· παρὰ δέ σφιν ἑκάστῳ δίζυγες ἵπποι.
Iliad 10.474	Ῥῆσος δʼ ἐν μέσῳ εὗδε, παρʼ αὐτῷ δʼ ὠκέες ἵπποι
Iliad 10.475	ἐξ ἐπιδιφριάδος πυμάτης ἱμᾶσι δέδεντο.
Iliad 10.476	τὸν δʼ Ὀδυσεὺς προπάροιθεν ἰδὼν Διομήδεϊ δεῖξεν·
Iliad 10.477	οὗτός τοι Διόμηδες ἀνήρ, οὗτοι δέ τοι ἵπποι,
Iliad 10.478	οὓς νῶϊν πίφαυσκε Δόλων ὃν ἐπέφνομεν ἡμεῖς.
Iliad 10.479	ἀλλʼ ἄγε δὴ πρόφερε κρατερὸν μένος· οὐδέ τί σε χρὴ
Iliad 10.480	ἑστάμεναι μέλεον σὺν τεύχεσιν, ἀλλὰ λύʼ ἵππους·
Iliad 10.481	ἠὲ σύ γʼ ἄνδρας ἔναιρε, μελήσουσιν δʼ ἐμοὶ ἵπποι.
Iliad 10.482	ὣς φάτο, τῷ δʼ ἔμπνευσε μένος γλαυκῶπις Ἀθήνη,
Iliad 10.483	κτεῖνε δʼ ἐπιστροφάδην· τῶν δὲ στόνος ὄρνυτʼ ἀεικὴς
Iliad 10.484	ἄορι θεινομένων, ἐρυθαίνετο δʼ αἵματι γαῖα.
Iliad 10.485	ὡς δὲ λέων μήλοισιν ἀσημάντοισιν ἐπελθὼν
Iliad 10.486	αἴγεσιν ἢ ὀΐεσσι κακὰ φρονέων ἐνορούσῃ,
Iliad 10.487	ὣς μὲν Θρήϊκας ἄνδρας ἐπῴχετο Τυδέος υἱὸς
Iliad 10.488	ὄφρα δυώδεκʼ ἔπεφνεν· ἀτὰρ πολύμητις Ὀδυσσεὺς
Iliad 10.489	ὅν τινα Τυδεΐδης ἄορι πλήξειε παραστὰς
Iliad 10.490	τὸν δʼ Ὀδυσεὺς μετόπισθε λαβὼν ποδὸς ἐξερύσασκε,
Iliad 10.491	τὰ φρονέων κατὰ θυμὸν ὅπως καλλίτριχες ἵπποι
Iliad 10.492	ῥεῖα διέλθοιεν μηδὲ τρομεοίατο θυμῷ
Iliad 10.493	νεκροῖς ἀμβαίνοντες· ἀήθεσσον γὰρ ἔτʼ αὐτῶν.
Iliad 10.494	ἀλλʼ ὅτε δὴ βασιλῆα κιχήσατο Τυδέος υἱός,
Iliad 10.495	τὸν τρισκαιδέκατον μελιηδέα θυμὸν ἀπηύρα
Iliad 10.496	ἀσθμαίνοντα· κακὸν γὰρ ὄναρ κεφαλῆφιν ἐπέστη
Iliad 10.497	τὴν νύκτʼ Οἰνεΐδαο πάϊς διὰ μῆτιν Ἀθήνης.
Iliad 10.498	τόφρα δʼ ἄρʼ ὃ τλήμων Ὀδυσεὺς λύε μώνυχας ἵππους,
Iliad 10.499	σὺν δʼ ἤειρεν ἱμᾶσι καὶ ἐξήλαυνεν ὁμίλου
Iliad 10.500	τόξῳ ἐπιπλήσσων, ἐπεὶ οὐ μάστιγα φαεινὴν
Iliad 10.501	ποικίλου ἐκ δίφροιο νοήσατο χερσὶν ἑλέσθαι·
Iliad 10.502	ῥοίζησεν δʼ ἄρα πιφαύσκων Διομήδεϊ δίῳ.
Iliad 10.503	αὐτὰρ ὃ μερμήριζε μένων ὅ τι κύντατον ἕρδοι,
Iliad 10.504	ἢ ὅ γε δίφρον ἑλών, ὅθι ποικίλα τεύχεʼ ἔκειτο,
Iliad 10.505	ῥυμοῦ ἐξερύοι ἢ ἐκφέροι ὑψόσʼ ἀείρας,
Iliad 10.506	ἦ ἔτι τῶν πλεόνων Θρῃκῶν ἀπὸ θυμὸν ἕλοιτο.
Iliad 10.507	εἷος ὃ ταῦθʼ ὥρμαινε κατὰ φρένα, τόφρα δʼ Ἀθήνη
Iliad 10.508	ἐγγύθεν ἱσταμένη προσέφη Διομήδεα δῖον·
Iliad 10.509	νόστου δὴ μνῆσαι μεγαθύμου Τυδέος υἱὲ
Iliad 10.510	νῆας ἔπι γλαφυράς, μὴ καὶ πεφοβημένος ἔλθῃς,
Iliad 10.511	μή πού τις καὶ Τρῶας ἐγείρῃσιν θεὸς ἄλλος.
Iliad 10.512	ὣς φάθʼ, ὃ δὲ ξυνέηκε θεᾶς ὄπα φωνησάσης,
Iliad 10.513	καρπαλίμως δʼ ἵππων ἐπεβήσετο· κόψε δʼ Ὀδυσσεὺς
Iliad 10.514	τόξῳ· τοὶ δʼ ἐπέτοντο θοὰς ἐπὶ νῆας Ἀχαιῶν.
Iliad 10.515	οὐδʼ ἀλαοσκοπιὴν εἶχʼ ἀργυρότοξος Ἀπόλλων
Iliad 10.516	ὡς ἴδʼ Ἀθηναίην μετὰ Τυδέος υἱὸν ἕπουσαν·
Iliad 10.517	τῇ κοτέων Τρώων κατεδύσετο πουλὺν ὅμιλον,
Iliad 10.518	ὦρσεν δὲ Θρῃκῶν βουληφόρον Ἱπποκόωντα
Iliad 10.519	Ῥήσου ἀνεψιὸν ἐσθλόν· ὃ δʼ ἐξ ὕπνου ἀνορούσας
Iliad 10.520	ὡς ἴδε χῶρον ἐρῆμον, ὅθʼ ἕστασαν ὠκέες ἵπποι,
Iliad 10.521	ἄνδράς τʼ ἀσπαίροντας ἐν ἀργαλέῃσι φονῇσιν,
Iliad 10.522	ᾤμωξέν τʼ ἄρʼ ἔπειτα φίλον τʼ ὀνόμηνεν ἑταῖρον.
Iliad 10.523	Τρώων δὲ κλαγγή τε καὶ ἄσπετος ὦρτο κυδοιμὸς
Iliad 10.524	θυνόντων ἄμυδις· θηεῦντο δὲ μέρμερα ἔργα
Iliad 10.525	ὅσσʼ ἄνδρες ῥέξαντες ἔβαν κοίλας ἐπὶ νῆας.
Iliad 10.526	οἳ δʼ ὅτε δή ῥʼ ἵκανον ὅθι σκοπὸν Ἕκτορος ἔκταν,
Iliad 10.527	ἔνθʼ Ὀδυσεὺς μὲν ἔρυξε Διῒ φίλος ὠκέας ἵππους,
Iliad 10.528	Τυδεΐδης δὲ χαμᾶζε θορὼν ἔναρα βροτόεντα
Iliad 10.529	ἐν χείρεσσʼ Ὀδυσῆϊ τίθει, ἐπεβήσετο δʼ ἵππων·
Iliad 10.530	μάστιξεν δʼ ἵππους, τὼ δʼ οὐκ ἀέκοντε πετέσθην
Iliad 10.531	νῆας ἔπι γλαφυράς· τῇ γὰρ φίλον ἔπλετο θυμῷ.
Iliad 10.532	Νέστωρ δὲ πρῶτος κτύπον ἄϊε φώνησέν τε·
Iliad 10.533	ὦ φίλοι Ἀργείων ἡγήτορες ἠδὲ μέδοντες
Iliad 10.534	ψεύσομαι, ἦ ἔτυμον ἐρέω; κέλεται δέ με θυμός.
Iliad 10.535	ἵππων μʼ ὠκυπόδων ἀμφὶ κτύπος οὔατα βάλλει.
Iliad 10.536	αἲ γὰρ δὴ Ὀδυσεύς τε καὶ ὃ κρατερὸς Διομήδης
Iliad 10.537	ὧδʼ ἄφαρ ἐκ Τρώων ἐλασαίατο μώνυχας ἵππους·
Iliad 10.538	ἀλλʼ αἰνῶς δείδοικα κατὰ φρένα μή τι πάθωσιν
Iliad 10.539	Ἀργείων οἳ ἄριστοι ὑπὸ Τρώων ὀρυμαγδοῦ.
Iliad 10.540	οὔ πω πᾶν εἴρητο ἔπος ὅτʼ ἄρʼ ἤλυθον αὐτοί.
Iliad 10.541	καί ῥʼ οἳ μὲν κατέβησαν ἐπὶ χθόνα, τοὶ δὲ χαρέντες
Iliad 10.542	δεξιῇ ἠσπάζοντο ἔπεσσί τε μειλιχίοισι·
Iliad 10.543	πρῶτος δʼ ἐξερέεινε Γερήνιος ἱππότα Νέστωρ·
Iliad 10.544	εἴπʼ ἄγε μʼ ὦ πολύαινʼ Ὀδυσεῦ μέγα κῦδος Ἀχαιῶν
Iliad 10.545	ὅππως τοῦσδʼ ἵππους λάβετον καταδύντες ὅμιλον
Iliad 10.546	Τρώων, ἦ τίς σφωε πόρεν θεὸς ἀντιβολήσας.
Iliad 10.547	αἰνῶς ἀκτίνεσσιν ἐοικότες ἠελίοιο.
Iliad 10.548	αἰεὶ μὲν Τρώεσσʼ ἐπιμίσγομαι, οὐδέ τί φημι
Iliad 10.549	μιμνάζειν παρὰ νηυσὶ γέρων περ ἐὼν πολεμιστής·
Iliad 10.550	ἀλλʼ οὔ πω τοίους ἵππους ἴδον οὐδὲ νόησα.
Iliad 10.551	ἀλλά τινʼ ὔμμʼ ὀΐω δόμεναι θεὸν ἀντιάσαντα·
Iliad 10.552	ἀμφοτέρω γὰρ σφῶϊ φιλεῖ νεφεληγερέτα Ζεὺς
Iliad 10.553	κούρη τʼ αἰγιόχοιο Διὸς γλαυκῶπις Ἀθήνη.
Iliad 10.554	τὸν δʼ ἀπαμειβόμενος προσέφη πολύμητις Ὀδυσσεύς·
Iliad 10.555	ὦ Νέστορ Νηληϊάδη μέγα κῦδος Ἀχαιῶν
Iliad 10.556	ῥεῖα θεός γʼ ἐθέλων καὶ ἀμείνονας ἠέ περ οἵδε
Iliad 10.557	ἵππους δωρήσαιτʼ, ἐπεὶ ἢ πολὺ φέρτεροί εἰσιν.
Iliad 10.558	ἵπποι δʼ οἵδε γεραιὲ νεήλυδες οὓς ἐρεείνεις
Iliad 10.559	Θρηΐκιοι· τὸν δέ σφιν ἄνακτʼ ἀγαθὸς Διομήδης
Iliad 10.560	ἔκτανε, πὰρ δʼ ἑτάρους δυοκαίδεκα πάντας ἀρίστους.
Iliad 10.561	τὸν τρισκαιδέκατον σκοπὸν εἵλομεν ἐγγύθι νηῶν,
Iliad 10.562	τόν ῥα διοπτῆρα στρατοῦ ἔμμεναι ἡμετέροιο
Iliad 10.563	Ἕκτωρ τε προέηκε καὶ ἄλλοι Τρῶες ἀγαυοί.
Iliad 10.564	ὣς εἰπὼν τάφροιο διήλασε μώνυχας ἵππους
Iliad 10.565	καγχαλόων· ἅμα δʼ ἄλλοι ἴσαν χαίροντες Ἀχαιοί.
Iliad 10.566	οἳ δʼ ὅτε Τυδεΐδεω κλισίην εὔτυκτον ἵκοντο,
Iliad 10.567	ἵππους μὲν κατέδησαν ἐϋτμήτοισιν ἱμᾶσι
Iliad 10.568	φάτνῃ ἐφʼ ἱππείῃ, ὅθι περ Διομήδεος ἵπποι
Iliad 10.569	ἕστασαν ὠκύποδες μελιηδέα πυρὸν ἔδοντες·
Iliad 10.570	νηῒ δʼ ἐνὶ πρυμνῇ ἔναρα βροτόεντα Δόλωνος
Iliad 10.571	θῆκʼ Ὀδυσεύς, ὄφρʼ ἱρὸν ἑτοιμασσαίατʼ Ἀθήνῃ.
Iliad 10.572	αὐτοὶ δʼ ἱδρῶ πολλὸν ἀπενίζοντο θαλάσσῃ
Iliad 10.573	ἐσβάντες κνήμας τε ἰδὲ λόφον ἀμφί τε μηρούς.
Iliad 10.574	αὐτὰρ ἐπεί σφιν κῦμα θαλάσσης ἱδρῶ πολλὸν
Iliad 10.575	νίψεν ἀπὸ χρωτὸς καὶ ἀνέψυχθεν φίλον ἦτορ,
Iliad 10.576	ἔς ῥʼ ἀσαμίνθους βάντες ἐϋξέστας λούσαντο.
Iliad 10.577	τὼ δὲ λοεσσαμένω καὶ ἀλειψαμένω λίπʼ ἐλαίῳ
Iliad 10.578	δείπνῳ ἐφιζανέτην, ἀπὸ δὲ κρητῆρος Ἀθήνῃ
Iliad 10.579	πλείου ἀφυσσόμενοι λεῖβον μελιηδέα οἶνον.
Iliad 11.1	Ἠὼς δʼ ἐκ λεχέων παρʼ ἀγαυοῦ Τιθωνοῖο
Iliad 11.2	ὄρνυθʼ, ἵνʼ ἀθανάτοισι φόως φέροι ἠδὲ βροτοῖσι·
Iliad 11.3	Ζεὺς δʼ Ἔριδα προΐαλλε θοὰς ἐπὶ νῆας Ἀχαιῶν
Iliad 11.4	ἀργαλέην, πολέμοιο τέρας μετὰ χερσὶν ἔχουσαν.
Iliad 11.5	στῆ δʼ ἐπʼ Ὀδυσσῆος μεγακήτεϊ νηῒ μελαίνῃ,
Iliad 11.6	ἥ ῥʼ ἐν μεσσάτῳ ἔσκε γεγωνέμεν ἀμφοτέρωσε,
Iliad 11.7	ἠμὲν ἐπʼ Αἴαντος κλισίας Τελαμωνιάδαο
Iliad 11.8	ἠδʼ ἐπʼ Ἀχιλλῆος, τοί ῥʼ ἔσχατα νῆας ἐΐσας
Iliad 11.9	εἴρυσαν ἠνορέῃ πίσυνοι καὶ κάρτεϊ χειρῶν
Iliad 11.10	ἔνθα στᾶσʼ ἤϋσε θεὰ μέγα τε δεινόν τε
Iliad 11.11	ὄρθιʼ, Ἀχαιοῖσιν δὲ μέγα σθένος ἔμβαλʼ ἑκάστῳ
Iliad 11.12	καρδίῃ ἄληκτον πολεμίζειν ἠδὲ μάχεσθαι.
Iliad 11.13	τοῖσι δʼ ἄφαρ πόλεμος γλυκίων γένετʼ ἠὲ νέεσθαι
Iliad 11.14	ἐν νηυσὶ γλαφυρῇσι φίλην ἐς πατρίδα γαῖαν.
Iliad 11.15	Ἀτρεΐδης δʼ ἐβόησεν ἰδὲ ζώννυσθαι ἄνωγεν
Iliad 11.16	Ἀργείους· ἐν δʼ αὐτὸς ἐδύσετο νώροπα χαλκόν.
Iliad 11.17	κνημῖδας μὲν πρῶτα περὶ κνήμῃσιν ἔθηκε
Iliad 11.18	καλὰς ἀργυρέοισιν ἐπισφυρίοις ἀραρυίας·
Iliad 11.19	δεύτερον αὖ θώρηκα περὶ στήθεσσιν ἔδυνε,
Iliad 11.20	τόν ποτέ οἱ Κινύρης δῶκε ξεινήϊον εἶναι.
Iliad 11.21	πεύθετο γὰρ Κύπρον δὲ μέγα κλέος οὕνεκʼ Ἀχαιοὶ
Iliad 11.22	ἐς Τροίην νήεσσιν ἀναπλεύσεσθαι ἔμελλον·
Iliad 11.23	τοὔνεκά οἱ τὸν δῶκε χαριζόμενος βασιλῆϊ.
Iliad 11.24	τοῦ δʼ ἤτοι δέκα οἶμοι ἔσαν μέλανος κυάνοιο,
Iliad 11.25	δώδεκα δὲ χρυσοῖο καὶ εἴκοσι κασσιτέροιο·
Iliad 11.26	κυάνεοι δὲ δράκοντες ὀρωρέχατο προτὶ δειρὴν
Iliad 11.27	τρεῖς ἑκάτερθʼ ἴρισσιν ἐοικότες, ἅς τε Κρονίων
Iliad 11.28	ἐν νέφεϊ στήριξε, τέρας μερόπων ἀνθρώπων.
Iliad 11.29	ἀμφὶ δʼ ἄρʼ ὤμοισιν βάλετο ξίφος· ἐν δέ οἱ ἧλοι
Iliad 11.30	χρύσειοι πάμφαινον, ἀτὰρ περὶ κουλεὸν ἦεν
Iliad 11.31	ἀργύρεον χρυσέοισιν ἀορτήρεσσιν ἀρηρός.
Iliad 11.32	ἂν δʼ ἕλετʼ ἀμφιβρότην πολυδαίδαλον ἀσπίδα θοῦριν
Iliad 11.33	καλήν, ἣν πέρι μὲν κύκλοι δέκα χάλκεοι ἦσαν,
Iliad 11.34	ἐν δέ οἱ ὀμφαλοὶ ἦσαν ἐείκοσι κασσιτέροιο
Iliad 11.35	λευκοί, ἐν δὲ μέσοισιν ἔην μέλανος κυάνοιο.
Iliad 11.36	τῇ δʼ ἐπὶ μὲν Γοργὼ βλοσυρῶπις ἐστεφάνωτο
Iliad 11.37	δεινὸν δερκομένη, περὶ δὲ Δεῖμός τε Φόβος τε.
Iliad 11.38	τῆς δʼ ἐξ ἀργύρεος τελαμὼν ἦν· αὐτὰρ ἐπʼ αὐτοῦ
Iliad 11.39	κυάνεος ἐλέλικτο δράκων, κεφαλαὶ δέ οἱ ἦσαν
Iliad 11.40	τρεῖς ἀμφιστρεφέες ἑνὸς αὐχένος ἐκπεφυυῖαι.
Iliad 11.41	κρατὶ δʼ ἐπʼ ἀμφίφαλον κυνέην θέτο τετραφάληρον
Iliad 11.42	ἵππουριν· δεινὸν δὲ λόφος καθύπερθεν ἔνευεν.
Iliad 11.43	εἵλετο δʼ ἄλκιμα δοῦρε δύω κεκορυθμένα χαλκῷ
Iliad 11.44	ὀξέα· τῆλε δὲ χαλκὸς ἀπʼ αὐτόφιν οὐρανὸν εἴσω
Iliad 11.45	λάμπʼ· ἐπὶ δʼ ἐγδούπησαν Ἀθηναίη τε καὶ Ἥρη
Iliad 11.46	τιμῶσαι βασιλῆα πολυχρύσοιο Μυκήνης.
Iliad 11.47	ἡνιόχῳ μὲν ἔπειτα ἑῷ ἐπέτελλεν ἕκαστος
Iliad 11.48	ἵππους εὖ κατὰ κόσμον ἐρυκέμεν αὖθʼ ἐπὶ τάφρῳ,
Iliad 11.49	αὐτοὶ δὲ πρυλέες σὺν τεύχεσι θωρηχθέντες
Iliad 11.50	ῥώοντʼ· ἄσβεστος δὲ βοὴ γένετʼ ἠῶθι πρό.
Iliad 11.51	φθὰν δὲ μέγʼ ἱππήων ἐπὶ τάφρῳ κοσμηθέντες,
Iliad 11.52	ἱππῆες δʼ ὀλίγον μετεκίαθον· ἐν δὲ κυδοιμὸν
Iliad 11.53	ὦρσε κακὸν Κρονίδης, κατὰ δʼ ὑψόθεν ἧκεν ἐέρσας
Iliad 11.54	αἵματι μυδαλέας ἐξ αἰθέρος, οὕνεκʼ ἔμελλε
Iliad 11.55	πολλὰς ἰφθίμους κεφαλὰς Ἄϊδι προϊάψειν.
Iliad 11.56	Τρῶες δʼ αὖθʼ ἑτέρωθεν ἐπὶ θρωσμῷ πεδίοιο
Iliad 11.57	Ἕκτορά τʼ ἀμφὶ μέγαν καὶ ἀμύμονα Πουλυδάμαντα
Iliad 11.58	Αἰνείαν θʼ, ὃς Τρωσὶ θεὸς ὣς τίετο δήμῳ,
Iliad 11.59	τρεῖς τʼ Ἀντηνορίδας Πόλυβον καὶ Ἀγήνορα δῖον
Iliad 11.60	ἠΐθεόν τʼ Ἀκάμαντʼ ἐπιείκελον ἀθανάτοισιν.
Iliad 11.61	Ἕκτωρ δʼ ἐν πρώτοισι φέρʼ ἀσπίδα πάντοσʼ ἐΐσην,
Iliad 11.62	οἷος δʼ ἐκ νεφέων ἀναφαίνεται οὔλιος ἀστὴρ
Iliad 11.63	παμφαίνων, τοτὲ δʼ αὖτις ἔδυ νέφεα σκιόεντα,
Iliad 11.64	ὣς Ἕκτωρ ὁτὲ μέν τε μετὰ πρώτοισι φάνεσκεν,
Iliad 11.65	ἄλλοτε δʼ ἐν πυμάτοισι κελεύων· πᾶς δʼ ἄρα χαλκῷ
Iliad 11.66	λάμφʼ ὥς τε στεροπὴ πατρὸς Διὸς αἰγιόχοιο.
Iliad 11.67	οἳ δʼ, ὥς τʼ ἀμητῆρες ἐναντίοι ἀλλήλοισιν
Iliad 11.68	ὄγμον ἐλαύνωσιν ἀνδρὸς μάκαρος κατʼ ἄρουραν
Iliad 11.69	πυρῶν ἢ κριθῶν· τὰ δὲ δράγματα ταρφέα πίπτει·
Iliad 11.70	ὣς Τρῶες καὶ Ἀχαιοὶ ἐπʼ ἀλλήλοισι θορόντες
Iliad 11.71	δῄουν, οὐδʼ ἕτεροι μνώοντʼ ὀλοοῖο φόβοιο.
Iliad 11.72	ἴσας δʼ ὑσμίνη κεφαλὰς ἔχεν, οἳ δὲ λύκοι ὣς
Iliad 11.73	θῦνον· Ἔρις δʼ ἄρʼ ἔχαιρε πολύστονος εἰσορόωσα·
Iliad 11.74	οἴη γάρ ῥα θεῶν παρετύγχανε μαρναμένοισιν,
Iliad 11.75	οἳ δʼ ἄλλοι οὔ σφιν πάρεσαν θεοί, ἀλλὰ ἕκηλοι
Iliad 11.76	σφοῖσιν ἐνὶ μεγάροισι καθήατο, ἧχι ἑκάστῳ
Iliad 11.77	δώματα καλὰ τέτυκτο κατὰ πτύχας Οὐλύμποιο.
Iliad 11.78	πάντες δʼ ᾐτιόωντο κελαινεφέα Κρονίωνα
Iliad 11.79	οὕνεκʼ ἄρα Τρώεσσιν ἐβούλετο κῦδος ὀρέξαι.
Iliad 11.80	τῶν μὲν ἄρʼ οὐκ ἀλέγιζε πατήρ· ὃ δὲ νόσφι λιασθεὶς
Iliad 11.81	τῶν ἄλλων ἀπάνευθε καθέζετο κύδεϊ γαίων
Iliad 11.82	εἰσορόων Τρώων τε πόλιν καὶ νῆας Ἀχαιῶν
Iliad 11.83	χαλκοῦ τε στεροπήν, ὀλλύντάς τʼ ὀλλυμένους τε.
Iliad 11.84	ὄφρα μὲν ἠὼς ἦν καὶ ἀέξετο ἱερὸν ἦμαρ,
Iliad 11.85	τόφρα μάλʼ ἀμφοτέρων βέλεʼ ἥπτετο, πῖπτε δὲ λαός·
Iliad 11.86	ἦμος δὲ δρυτόμος περ ἀνὴρ ὁπλίσσατο δεῖπνον
Iliad 11.87	οὔρεος ἐν βήσσῃσιν, ἐπεί τʼ ἐκορέσσατο χεῖρας
Iliad 11.88	τάμνων δένδρεα μακρά, ἅδος τέ μιν ἵκετο θυμόν,
Iliad 11.89	σίτου τε γλυκεροῖο περὶ φρένας ἵμερος αἱρεῖ,
Iliad 11.90	τῆμος σφῇ ἀρετῇ Δαναοὶ ῥήξαντο φάλαγγας
Iliad 11.91	κεκλόμενοι ἑτάροισι κατὰ στίχας· ἐν δʼ Ἀγαμέμνων
Iliad 11.92	πρῶτος ὄρουσʼ, ἕλε δʼ ἄνδρα Βιάνορα ποιμένα λαῶν
Iliad 11.93	αὐτόν, ἔπειτα δʼ ἑταῖρον Ὀϊλῆα πλήξιππον.
Iliad 11.94	ἤτοι ὅ γʼ ἐξ ἵππων κατεπάλμενος ἀντίος ἔστη·
Iliad 11.95	τὸν δʼ ἰθὺς μεμαῶτα μετώπιον ὀξέϊ δουρὶ
Iliad 11.96	νύξʼ, οὐδὲ στεφάνη δόρυ οἱ σχέθε χαλκοβάρεια,
Iliad 11.97	ἀλλὰ διʼ αὐτῆς ἦλθε καὶ ὀστέου, ἐγκέφαλος δὲ
Iliad 11.98	ἔνδον ἅπας πεπάλακτο· δάμασσε δέ μιν μεμαῶτα.
Iliad 11.99	καὶ τοὺς μὲν λίπεν αὖθι ἄναξ ἀνδρῶν Ἀγαμέμνων
Iliad 11.100	στήθεσι παμφαίνοντας, ἐπεὶ περίδυσε χιτῶνας·
Iliad 11.101	αὐτὰρ ὃ βῆ Ἶσόν τε καὶ Ἄντιφον ἐξεναρίξων
Iliad 11.102	υἷε δύω Πριάμοιο νόθον καὶ γνήσιον ἄμφω
Iliad 11.103	εἰν ἑνὶ δίφρῳ ἐόντας· ὃ μὲν νόθος ἡνιόχευεν,
Iliad 11.104	Ἄντιφος αὖ παρέβασκε περικλυτός· ὥ ποτʼ Ἀχιλλεὺς
Iliad 11.105	Ἴδης ἐν κνημοῖσι δίδη μόσχοισι λύγοισι,
Iliad 11.106	ποιμαίνοντʼ ἐπʼ ὄεσσι λαβών, καὶ ἔλυσεν ἀποίνων.
Iliad 11.107	δὴ τότε γʼ Ἀτρεΐδης εὐρὺ κρείων Ἀγαμέμνων
Iliad 11.108	τὸν μὲν ὑπὲρ μαζοῖο κατὰ στῆθος βάλε δουρί,
Iliad 11.109	Ἄντιφον αὖ παρὰ οὖς ἔλασε ξίφει, ἐκ δʼ ἔβαλʼ ἵππων.
Iliad 11.110	σπερχόμενος δʼ ἀπὸ τοῖιν ἐσύλα τεύχεα καλὰ
Iliad 11.111	γιγνώσκων· καὶ γάρ σφε πάρος παρὰ νηυσὶ θοῇσιν
Iliad 11.112	εἶδεν, ὅτʼ ἐξ Ἴδης ἄγαγεν πόδας ὠκὺς Ἀχιλλεύς.
Iliad 11.113	ὡς δὲ λέων ἐλάφοιο ταχείης νήπια τέκνα
Iliad 11.114	ῥηϊδίως συνέαξε λαβὼν κρατεροῖσιν ὀδοῦσιν
Iliad 11.115	ἐλθὼν εἰς εὐνήν, ἁπαλόν τέ σφʼ ἦτορ ἀπηύρα·
Iliad 11.116	ἣ δʼ εἴ πέρ τε τύχῃσι μάλα σχεδόν, οὐ δύναταί σφι
Iliad 11.117	χραισμεῖν· αὐτὴν γάρ μιν ὑπὸ τρόμος αἰνὸς ἱκάνει·
Iliad 11.118	καρπαλίμως δʼ ἤϊξε διὰ δρυμὰ πυκνὰ καὶ ὕλην
Iliad 11.119	σπεύδουσʼ ἱδρώουσα κραταιοῦ θηρὸς ὑφʼ ὁρμῆς·
Iliad 11.120	ὣς ἄρα τοῖς οὔ τις δύνατο χραισμῆσαι ὄλεθρον
Iliad 11.121	Τρώων, ἀλλὰ καὶ αὐτοὶ ὑπʼ Ἀργείοισι φέβοντο.
Iliad 11.122	αὐτὰρ ὃ Πείσανδρόν τε καὶ Ἱππόλοχον μενεχάρμην
Iliad 11.123	υἱέας Ἀντιμάχοιο δαΐφρονος, ὅς ῥα μάλιστα
Iliad 11.124	χρυσὸν Ἀλεξάνδροιο δεδεγμένος ἀγλαὰ δῶρα
Iliad 11.125	οὐκ εἴασχʼ Ἑλένην δόμεναι ξανθῷ Μενελάῳ,
Iliad 11.126	τοῦ περ δὴ δύο παῖδε λάβε κρείων Ἀγαμέμνων
Iliad 11.127	εἰν ἑνὶ δίφρῳ ἐόντας, ὁμοῦ δʼ ἔχον ὠκέας ἵππους·
Iliad 11.128	ἐκ γάρ σφεας χειρῶν φύγον ἡνία σιγαλόεντα,
Iliad 11.129	τὼ δὲ κυκηθήτην· ὃ δʼ ἐναντίον ὦρτο λέων ὣς
Iliad 11.130	Ἀτρεΐδης· τὼ δʼ αὖτʼ ἐκ δίφρου γουναζέσθην·
Iliad 11.131	ζώγρει Ἀτρέος υἱέ, σὺ δʼ ἄξια δέξαι ἄποινα·
Iliad 11.132	πολλὰ δʼ ἐν Ἀντιμάχοιο δόμοις κειμήλια κεῖται
Iliad 11.133	χαλκός τε χρυσός τε πολύκμητός τε σίδηρος,
Iliad 11.134	τῶν κέν τοι χαρίσαιτο πατὴρ ἀπερείσιʼ ἄποινα,
Iliad 11.135	εἰ νῶϊ ζωοὺς πεπύθοιτʼ ἐπὶ νηυσὶν Ἀχαιῶν.
Iliad 11.136	ὣς τώ γε κλαίοντε προσαυδήτην βασιλῆα
Iliad 11.137	μειλιχίοις ἐπέεσσιν· ἀμείλικτον δʼ ὄπʼ ἄκουσαν·
Iliad 11.138	εἰ μὲν δὴ Ἀντιμάχοιο δαΐφρονος υἱέες ἐστόν,
Iliad 11.139	ὅς ποτʼ ἐνὶ Τρώων ἀγορῇ Μενέλαον ἄνωγεν
Iliad 11.140	ἀγγελίην ἐλθόντα σὺν ἀντιθέῳ Ὀδυσῆϊ
Iliad 11.141	αὖθι κατακτεῖναι μηδʼ ἐξέμεν ἂψ ἐς Ἀχαιούς,
Iliad 11.142	νῦν μὲν δὴ τοῦ πατρὸς ἀεικέα τίσετε λώβην.
Iliad 11.143	ἦ, καὶ Πείσανδρον μὲν ἀφʼ ἵππων ὦσε χαμᾶζε
Iliad 11.144	δουρὶ βαλὼν πρὸς στῆθος· ὃ δʼ ὕπτιος οὔδει ἐρείσθη.
Iliad 11.145	Ἱππόλοχος δʼ ἀπόρουσε, τὸν αὖ χαμαὶ ἐξενάριξε
Iliad 11.146	χεῖρας ἀπὸ ξίφεϊ τμήξας ἀπό τʼ αὐχένα κόψας,
Iliad 11.147	ὅλμον δʼ ὣς ἔσσευε κυλίνδεσθαι διʼ ὁμίλου.
Iliad 11.148	τοὺς μὲν ἔασʼ· ὃ δʼ ὅθι πλεῖσται κλονέοντο φάλαγγες,
Iliad 11.149	τῇ ῥʼ ἐνόρουσʼ, ἅμα δʼ ἄλλοι ἐϋκνήμιδες Ἀχαιοί.
Iliad 11.150	πεζοὶ μὲν πεζοὺς ὄλεκον φεύγοντας ἀνάγκῃ,
Iliad 11.151	ἱππεῖς δʼ ἱππῆας· ὑπὸ δέ σφισιν ὦρτο κονίη
Iliad 11.152	ἐκ πεδίου, τὴν ὦρσαν ἐρίγδουποι πόδες ἵππων
Iliad 11.153	χαλκῷ δηϊόωντες· ἀτὰρ κρείων Ἀγαμέμνων
Iliad 11.154	αἰὲν ἀποκτείνων ἕπετʼ Ἀργείοισι κελεύων.
Iliad 11.155	ὡς δʼ ὅτε πῦρ ἀΐδηλον ἐν ἀξύλῳ ἐμπέσῃ ὕλῃ,
Iliad 11.156	πάντῃ τʼ εἰλυφόων ἄνεμος φέρει, οἳ δέ τε θάμνοι
Iliad 11.157	πρόρριζοι πίπτουσιν ἐπειγόμενοι πυρὸς ὁρμῇ·
Iliad 11.158	ὣς ἄρʼ ὑπʼ Ἀτρεΐδῃ Ἀγαμέμνονι πῖπτε κάρηνα
Iliad 11.159	Τρώων φευγόντων, πολλοὶ δʼ ἐριαύχενες ἵπποι
Iliad 11.160	κείνʼ ὄχεα κροτάλιζον ἀνὰ πτολέμοιο γεφύρας
Iliad 11.161	ἡνιόχους ποθέοντες ἀμύμονας· οἳ δʼ ἐπὶ γαίῃ
Iliad 11.162	κείατο, γύπεσσιν πολὺ φίλτεροι ἢ ἀλόχοισιν.
Iliad 11.163	Ἕκτορα δʼ ἐκ βελέων ὕπαγε Ζεὺς ἔκ τε κονίης
Iliad 11.164	ἔκ τʼ ἀνδροκτασίης ἔκ θʼ αἵματος ἔκ τε κυδοιμοῦ·
Iliad 11.165	Ἀτρεΐδης δʼ ἕπετο σφεδανὸν Δαναοῖσι κελεύων.
Iliad 11.166	οἳ δὲ παρʼ Ἴλου σῆμα παλαιοῦ Δαρδανίδαο
Iliad 11.167	μέσσον κὰπ πεδίον παρʼ ἐρινεὸν ἐσσεύοντο
Iliad 11.168	ἱέμενοι πόλιος· ὃ δὲ κεκλήγων ἕπετʼ αἰεὶ
Iliad 11.169	Ἀτρεΐδης, λύθρῳ δὲ παλάσσετο χεῖρας ἀάπτους.
Iliad 11.170	ἀλλʼ ὅτε δὴ Σκαιάς τε πύλας καὶ φηγὸν ἵκοντο,
Iliad 11.171	ἔνθʼ ἄρα δὴ ἵσταντο καὶ ἀλλήλους ἀνέμιμνον.
Iliad 11.172	οἳ δʼ ἔτι κὰμ μέσσον πεδίον φοβέοντο βόες ὥς,
Iliad 11.173	ἅς τε λέων ἐφόβησε μολὼν ἐν νυκτὸς ἀμολγῷ
Iliad 11.174	πάσας· τῇ δέ τʼ ἰῇ ἀναφαίνεται αἰπὺς ὄλεθρος·
Iliad 11.175	τῆς δʼ ἐξ αὐχένʼ ἔαξε λαβὼν κρατεροῖσιν ὀδοῦσι
Iliad 11.176	πρῶτον, ἔπειτα δέ θʼ αἷμα καὶ ἔγκατα πάντα λαφύσσει·
Iliad 11.177	ὣς τοὺς Ἀτρεΐδης ἔφεπε κρείων Ἀγαμέμνων
Iliad 11.178	αἰὲν ἀποκτείνων τὸν ὀπίστατον· οἳ δʼ ἐφέβοντο.
Iliad 11.179	πολλοὶ δὲ πρηνεῖς τε καὶ ὕπτιοι ἔκπεσον ἵππων
Iliad 11.180	Ἀτρεΐδεω ὑπὸ χερσί· περὶ πρὸ γὰρ ἔγχεϊ θῦεν.
Iliad 11.181	ἀλλʼ ὅτε δὴ τάχʼ ἔμελλεν ὑπὸ πτόλιν αἰπύ τε τεῖχος
Iliad 11.182	ἵξεσθαι, τότε δή ῥα πατὴρ ἀνδρῶν τε θεῶν τε
Iliad 11.183	Ἴδης ἐν κορυφῇσι καθέζετο πιδηέσσης
Iliad 11.184	οὐρανόθεν καταβάς· ἔχε δʼ ἀστεροπὴν μετὰ χερσίν.
Iliad 11.185	Ἶριν δʼ ὄτρυνε χρυσόπτερον ἀγγελέουσαν·
Iliad 11.186	βάσκʼ ἴθι Ἶρι ταχεῖα, τὸν Ἕκτορι μῦθον ἐνίσπες·
Iliad 11.187	ὄφρʼ ἂν μέν κεν ὁρᾷ Ἀγαμέμνονα ποιμένα λαῶν
Iliad 11.188	θύνοντʼ ἐν προμάχοισιν ἐναίροντα στίχας ἀνδρῶν,
Iliad 11.189	τόφρʼ ἀναχωρείτω, τὸν δʼ ἄλλον λαὸν ἀνώχθω
Iliad 11.190	μάρνασθαι δηΐοισι κατὰ κρατερὴν ὑσμίνην.
Iliad 11.191	αὐτὰρ ἐπεί κʼ ἢ δουρὶ τυπεὶς ἢ βλήμενος ἰῷ
Iliad 11.192	εἰς ἵππους ἅλεται, τότε οἱ κράτος ἐγγυαλίξω
Iliad 11.193	κτείνειν εἰς ὅ κε νῆας ἐϋσσέλμους ἀφίκηται
Iliad 11.194	δύῃ τʼ ἠέλιος καὶ ἐπὶ κνέφας ἱερὸν ἔλθῃ.
Iliad 11.195	ὣς ἔφατʼ, οὐδʼ ἀπίθησε ποδήνεμος ὠκέα Ἶρις,
Iliad 11.196	βῆ δὲ κατʼ Ἰδαίων ὀρέων εἰς Ἴλιον ἱρήν.
Iliad 11.197	εὗρʼ υἱὸν Πριάμοιο δαΐφρονος Ἕκτορα δῖον
Iliad 11.198	ἑσταότʼ ἔν θʼ ἵπποισι καὶ ἅρμασι κολλητοῖσιν·
Iliad 11.199	ἀγχοῦ δʼ ἱσταμένη προσέφη πόδας ὠκέα Ἶρις·
Iliad 11.200	Ἕκτορ υἱὲ Πριάμοιο Διὶ μῆτιν ἀτάλαντε
Iliad 11.201	Ζεύς με πατὴρ προέηκε τεῒν τάδε μυθήσασθαι.
Iliad 11.202	ὄφρʼ ἂν μέν κεν ὁρᾷς Ἀγαμέμνονα ποιμένα λαῶν
Iliad 11.203	θύνοντʼ ἐν προμάχοισιν, ἐναίροντα στίχας ἀνδρῶν,
Iliad 11.204	τόφρʼ ὑπόεικε μάχης, τὸν δʼ ἄλλον λαὸν ἄνωχθι
Iliad 11.205	μάρνασθαι δηΐοισι κατὰ κρατερὴν ὑσμίνην.
Iliad 11.206	αὐτὰρ ἐπεί κʼ ἢ δουρὶ τυπεὶς ἢ βλήμενος ἰῷ
Iliad 11.207	εἰς ἵππους ἅλεται, τότε τοι κράτος ἐγγυαλίξει
Iliad 11.208	κτείνειν, εἰς ὅ κε νῆας ἐϋσσέλμους ἀφίκηαι
Iliad 11.209	δύῃ τʼ ἠέλιος καὶ ἐπὶ κνέφας ἱερὸν ἔλθῃ.
Iliad 11.210	ἣ μὲν ἄρʼ ὣς εἰποῦσʼ ἀπέβη πόδας ὠκέα Ἶρις,
Iliad 11.211	Ἕκτωρ δʼ ἐξ ὀχέων σὺν τεύχεσιν ἆλτο χαμᾶζε,
Iliad 11.212	πάλλων δʼ ὀξέα δοῦρα κατὰ στρατὸν ᾤχετο πάντῃ
Iliad 11.213	ὀτρύνων μαχέσασθαι, ἔγειρε δὲ φύλοπιν αἰνήν.
Iliad 11.214	οἳ δʼ ἐλελίχθησαν καὶ ἐναντίοι ἔσταν Ἀχαιῶν,
Iliad 11.215	Ἀργεῖοι δʼ ἑτέρωθεν ἐκαρτύναντο φάλαγγας.
Iliad 11.216	ἀρτύνθη δὲ μάχη, στὰν δʼ ἀντίοι· ἐν δʼ Ἀγαμέμνων
Iliad 11.217	πρῶτος ὄρουσʼ, ἔθελεν δὲ πολὺ προμάχεσθαι ἁπάντων.
Iliad 11.218	ἔσπετε νῦν μοι Μοῦσαι Ὀλύμπια δώματʼ ἔχουσαι
Iliad 11.219	ὅς τις δὴ πρῶτος Ἀγαμέμνονος ἀντίον ἦλθεν
Iliad 11.220	ἢ αὐτῶν Τρώων ἠὲ κλειτῶν ἐπικούρων.
Iliad 11.221	Ἰφιδάμας Ἀντηνορίδης ἠΰς τε μέγας τε
Iliad 11.222	ὃς τράφη ἐν Θρῄκῃ ἐριβώλακι μητέρι μήλων·
Iliad 11.223	Κισσῆς τόν γʼ ἔθρεψε δόμοις ἔνι τυτθὸν ἐόντα
Iliad 11.224	μητροπάτωρ, ὃς τίκτε Θεανὼ καλλιπάρῃον·
Iliad 11.225	αὐτὰρ ἐπεί ῥʼ ἥβης ἐρικυδέος ἵκετο μέτρον,
Iliad 11.226	αὐτοῦ μιν κατέρυκε, δίδου δʼ ὅ γε θυγατέρα ἥν·
Iliad 11.227	γήμας δʼ ἐκ θαλάμοιο μετὰ κλέος ἵκετʼ Ἀχαιῶν
Iliad 11.228	σὺν δυοκαίδεκα νηυσὶ κορωνίσιν, αἵ οἱ ἕποντο.
Iliad 11.229	τὰς μὲν ἔπειτʼ ἐν Περκώτῃ λίπε νῆας ἐΐσας,
Iliad 11.230	αὐτὰρ ὃ πεζὸς ἐὼν ἐς Ἴλιον εἰληλούθει·
Iliad 11.231	ὅς ῥα τότʼ Ἀτρεΐδεω Ἀγαμέμνονος ἀντίον ἦλθεν.
Iliad 11.232	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες,
Iliad 11.233	Ἀτρεΐδης μὲν ἅμαρτε, παραὶ δέ οἱ ἐτράπετʼ ἔγχος,
Iliad 11.234	Ἰφιδάμας δὲ κατὰ ζώνην θώρηκος ἔνερθε
Iliad 11.235	νύξʼ, ἐπὶ δʼ αὐτὸς ἔρεισε βαρείῃ χειρὶ πιθήσας·
Iliad 11.236	οὐδʼ ἔτορε ζωστῆρα παναίολον, ἀλλὰ πολὺ πρὶν
Iliad 11.237	ἀργύρῳ ἀντομένη μόλιβος ὣς ἐτράπετʼ αἰχμή.
Iliad 11.238	καὶ τό γε χειρὶ λαβὼν εὐρὺ κρείων Ἀγαμέμνων
Iliad 11.239	ἕλκʼ ἐπὶ οἷ μεμαὼς ὥς τε λίς, ἐκ δʼ ἄρα χειρὸς
Iliad 11.240	σπάσσατο· τὸν δʼ ἄορι πλῆξʼ αὐχένα, λῦσε δὲ γυῖα.
Iliad 11.241	ὣς ὃ μὲν αὖθι πεσὼν κοιμήσατο χάλκεον ὕπνον
Iliad 11.242	οἰκτρὸς ἀπὸ μνηστῆς ἀλόχου, ἀστοῖσιν ἀρήγων,
Iliad 11.243	κουριδίης, ἧς οὔ τι χάριν ἴδε, πολλὰ δʼ ἔδωκε·
Iliad 11.244	πρῶθʼ ἑκατὸν βοῦς δῶκεν, ἔπειτα δὲ χίλιʼ ὑπέστη
Iliad 11.245	αἶγας ὁμοῦ καὶ ὄϊς, τά οἱ ἄσπετα ποιμαίνοντο.
Iliad 11.246	δὴ τότε γʼ Ἀτρεΐδης Ἀγαμέμνων ἐξενάριξε,
Iliad 11.247	βῆ δὲ φέρων ἀνʼ ὅμιλον Ἀχαιῶν τεύχεα καλά.
Iliad 11.248	τὸν δʼ ὡς οὖν ἐνόησε Κόων ἀριδείκετος ἀνδρῶν
Iliad 11.249	πρεσβυγενὴς Ἀντηνορίδης, κρατερόν ῥά ἑ πένθος
Iliad 11.250	ὀφθαλμοὺς ἐκάλυψε κασιγνήτοιο πεσόντος.
Iliad 11.251	στῆ δʼ εὐρὰξ σὺν δουρὶ λαθὼν Ἀγαμέμνονα δῖον,
Iliad 11.252	νύξε δέ μιν κατὰ χεῖρα μέσην ἀγκῶνος ἔνερθε,
Iliad 11.253	ἀντικρὺ δὲ διέσχε φαεινοῦ δουρὸς ἀκωκή.
Iliad 11.254	ῥίγησέν τʼ ἄρʼ ἔπειτα ἄναξ ἀνδρῶν Ἀγαμέμνων·
Iliad 11.255	ἀλλʼ οὐδʼ ὧς ἀπέληγε μάχης ἠδὲ πτολέμοιο,
Iliad 11.256	ἀλλʼ ἐπόρουσε Κόωνι ἔχων ἀνεμοτρεφὲς ἔγχος.
Iliad 11.257	ἤτοι ὃ Ἰφιδάμαντα κασίγνητον καὶ ὄπατρον
Iliad 11.258	ἕλκε ποδὸς μεμαώς, καὶ ἀΰτει πάντας ἀρίστους·
Iliad 11.259	τὸν δʼ ἕλκοντʼ ἀνʼ ὅμιλον ὑπʼ ἀσπίδος ὀμφαλοέσσης
Iliad 11.260	οὔτησε ξυστῷ χαλκήρεϊ, λῦσε δὲ γυῖα·
Iliad 11.261	τοῖο δʼ ἐπʼ Ἰφιδάμαντι κάρη ἀπέκοψε παραστάς.
Iliad 11.262	ἔνθʼ Ἀντήνορος υἷες ὑπʼ Ἀτρεΐδῃ βασιλῆϊ
Iliad 11.263	πότμον ἀναπλήσαντες ἔδυν δόμον Ἄϊδος εἴσω.
Iliad 11.264	αὐτὰρ ὃ τῶν ἄλλων ἐπεπωλεῖτο στίχας ἀνδρῶν
Iliad 11.265	ἔγχεΐ τʼ ἄορί τε μεγάλοισί τε χερμαδίοισιν,
Iliad 11.266	ὄφρά οἱ αἷμʼ ἔτι θερμὸν ἀνήνοθεν ἐξ ὠτειλῆς.
Iliad 11.267	αὐτὰρ ἐπεὶ τὸ μὲν ἕλκος ἐτέρσετο, παύσατο δʼ αἷμα,
Iliad 11.268	ὀξεῖαι δʼ ὀδύναι δῦνον μένος Ἀτρεΐδαο.
Iliad 11.269	ὡς δʼ ὅτʼ ἂν ὠδίνουσαν ἔχῃ βέλος ὀξὺ γυναῖκα
Iliad 11.270	δριμύ, τό τε προϊεῖσι μογοστόκοι Εἰλείθυιαι
Iliad 11.271	Ἥρης θυγατέρες πικρὰς ὠδῖνας ἔχουσαι,
Iliad 11.272	ὣς ὀξεῖʼ ὀδύναι δῦνον μένος Ἀτρεΐδαο.
Iliad 11.273	ἐς δίφρον δʼ ἀνόρουσε, καὶ ἡνιόχῳ ἐπέτελλε
Iliad 11.274	νηυσὶν ἔπι γλαφυρῇσιν ἐλαυνέμεν· ἤχθετο γὰρ κῆρ.
Iliad 11.275	ἤϋσεν δὲ διαπρύσιον Δαναοῖσι γεγωνώς·
Iliad 11.276	ὦ φίλοι Ἀργείων ἡγήτορες ἠδὲ μέδοντες
Iliad 11.277	ὑμεῖς μὲν νῦν νηυσὶν ἀμύνετε ποντοπόροισι
Iliad 11.278	φύλοπιν ἀργαλέην, ἐπεὶ οὐκ ἐμὲ μητίετα Ζεὺς
Iliad 11.279	εἴασε Τρώεσσι πανημέριον πολεμίζειν.
Iliad 11.280	ὣς ἔφαθʼ, ἡνίοχος δʼ ἵμασεν καλλίτριχας ἵππους
Iliad 11.281	νῆας ἔπι γλαφυράς· τὼ δʼ οὐκ ἀέκοντε πετέσθην·
Iliad 11.282	ἄφρεον δὲ στήθεα, ῥαίνοντο δὲ νέρθε κονίῃ
Iliad 11.283	τειρόμενον βασιλῆα μάχης ἀπάνευθε φέροντες.
Iliad 11.284	Ἕκτωρ δʼ ὡς ἐνόησʼ Ἀγαμέμνονα νόσφι κιόντα
Iliad 11.285	Τρωσί τε καὶ Λυκίοισιν ἐκέκλετο μακρὸν ἀΰσας·
Iliad 11.286	Τρῶες καὶ Λύκιοι καὶ Δάρδανοι ἀγχιμαχηταὶ
Iliad 11.287	ἀνέρες ἔστε φίλοι, μνήσασθε δὲ θούριδος ἀλκῆς.
Iliad 11.288	οἴχετʼ ἀνὴρ ὤριστος, ἐμοὶ δὲ μέγʼ εὖχος ἔδωκε
Iliad 11.289	Ζεὺς Κρονίδης· ἀλλʼ ἰθὺς ἐλαύνετε μώνυχας ἵππους
Iliad 11.290	ἰφθίμων Δαναῶν, ἵνʼ ὑπέρτερον εὖχος ἄρησθε.
Iliad 11.291	ὣς εἰπὼν ὄτρυνε μένος καὶ θυμὸν ἑκάστου.
Iliad 11.292	ὡς δʼ ὅτε πού τις θηρητὴρ κύνας ἀργιόδοντας
Iliad 11.293	σεύῃ ἐπʼ ἀγροτέρῳ συῒ καπρίῳ ἠὲ λέοντι,
Iliad 11.294	ὣς ἐπʼ Ἀχαιοῖσιν σεῦε Τρῶας μεγαθύμους
Iliad 11.295	Ἕκτωρ Πριαμίδης βροτολοιγῷ ἶσος Ἄρηϊ.
Iliad 11.296	αὐτὸς δʼ ἐν πρώτοισι μέγα φρονέων ἐβεβήκει,
Iliad 11.297	ἐν δʼ ἔπεσʼ ὑσμίνῃ ὑπεραέϊ ἶσος ἀέλλῃ,
Iliad 11.298	ἥ τε καθαλλομένη ἰοειδέα πόντον ὀρίνει.
Iliad 11.299	ἔνθα τίνα πρῶτον, τίνα δʼ ὕστατον ἐξενάριξεν
Iliad 11.300	Ἕκτωρ Πριαμίδης, ὅτε οἱ Ζεὺς κῦδος ἔδωκεν;
Iliad 11.301	Ἀσαῖον μὲν πρῶτα καὶ Αὐτόνοον καὶ Ὀπίτην
Iliad 11.302	καὶ Δόλοπα Κλυτίδην καὶ Ὀφέλτιον ἠδʼ Ἀγέλαον
Iliad 11.303	Αἴσυμνόν τʼ Ὦρόν τε καὶ Ἱππόνοον μενεχάρμην.
Iliad 11.304	τοὺς ἄρʼ ὅ γʼ ἡγεμόνας Δαναῶν ἕλεν, αὐτὰρ ἔπειτα
Iliad 11.305	πληθύν, ὡς ὁπότε νέφεα Ζέφυρος στυφελίξῃ
Iliad 11.306	ἀργεστᾶο Νότοιο βαθείῃ λαίλαπι τύπτων·
Iliad 11.307	πολλὸν δὲ τρόφι κῦμα κυλίνδεται, ὑψόσε δʼ ἄχνη
Iliad 11.308	σκίδναται ἐξ ἀνέμοιο πολυπλάγκτοιο ἰωῆς·
Iliad 11.309	ὣς ἄρα πυκνὰ καρήαθʼ ὑφʼ Ἕκτορι δάμνατο λαῶν.
Iliad 11.310	ἔνθά κε λοιγὸς ἔην καὶ ἀμήχανα ἔργα γένοντο,
Iliad 11.311	καί νύ κεν ἐν νήεσσι πέσον φεύγοντες Ἀχαιοί,
Iliad 11.312	εἰ μὴ Τυδεΐδῃ Διομήδεϊ κέκλετʼ Ὀδυσσεύς·
Iliad 11.313	Τυδεΐδη τί παθόντε λελάσμεθα θούριδος ἀλκῆς;
Iliad 11.314	ἀλλʼ ἄγε δεῦρο πέπον, παρʼ ἔμʼ ἵσταο· δὴ γὰρ ἔλεγχος
Iliad 11.315	ἔσσεται εἴ κεν νῆας ἕλῃ κορυθαίολος Ἕκτωρ.
Iliad 11.316	τὸν δʼ ἀπαμειβόμενος προσέφη κρατερὸς Διομήδης·
Iliad 11.317	ἤτοι ἐγὼ μενέω καὶ τλήσομαι· ἀλλὰ μίνυνθα
Iliad 11.318	ἡμέων ἔσσεται ἦδος, ἐπεὶ νεφεληγερέτα Ζεὺς
Iliad 11.319	Τρωσὶν δὴ βόλεται δοῦναι κράτος ἠέ περ ἡμῖν.
Iliad 11.320	ἦ καὶ Θυμβραῖον μὲν ἀφʼ ἵππων ὦσε χαμᾶζε
Iliad 11.321	δουρὶ βαλὼν κατὰ μαζὸν ἀριστερόν· αὐτὰρ Ὀδυσσεὺς
Iliad 11.322	ἀντίθεον θεράποντα Μολίονα τοῖο ἄνακτος.
Iliad 11.323	τοὺς μὲν ἔπειτʼ εἴασαν, ἐπεὶ πολέμου ἀπέπαυσαν·
Iliad 11.324	τὼ δʼ ἀνʼ ὅμιλον ἰόντε κυδοίμεον, ὡς ὅτε κάπρω
Iliad 11.325	ἐν κυσὶ θηρευτῇσι μέγα φρονέοντε πέσητον·
Iliad 11.326	ὣς ὄλεκον Τρῶας πάλιν ὀρμένω· αὐτὰρ Ἀχαιοὶ
Iliad 11.327	ἀσπασίως φεύγοντες ἀνέπνεον Ἕκτορα δῖον.
Iliad 11.328	ἔνθʼ ἑλέτην δίφρόν τε καὶ ἀνέρε δήμου ἀρίστω
Iliad 11.329	υἷε δύω Μέροπος Περκωσίου, ὃς περὶ πάντων
Iliad 11.330	ᾔδεε μαντοσύνας, οὐδὲ οὓς παῖδας ἔασκε
Iliad 11.331	στείχειν ἐς πόλεμον φθισήνορα· τὼ δέ οἱ οὔ τι
Iliad 11.332	πειθέσθην· κῆρες γὰρ ἄγον μέλανος θανάτοιο.
Iliad 11.333	τοὺς μὲν Τυδεΐδης δουρικλειτὸς Διομήδης
Iliad 11.334	θυμοῦ καὶ ψυχῆς κεκαδὼν κλυτὰ τεύχεʼ ἀπηύρα·
Iliad 11.335	Ἱππόδαμον δʼ Ὀδυσεὺς καὶ Ὑπείροχον ἐξενάριξεν.
Iliad 11.336	ἔνθά σφιν κατὰ ἶσα μάχην ἐτάνυσσε Κρονίων
Iliad 11.337	ἐξ Ἴδης καθορῶν· τοὶ δʼ ἀλλήλους ἐνάριζον.
Iliad 11.338	ἤτοι Τυδέος υἱὸς Ἀγάστροφον οὔτασε δουρὶ
Iliad 11.339	Παιονίδην ἥρωα κατʼ ἰσχίον· οὐ δέ οἱ ἵπποι
Iliad 11.340	ἐγγὺς ἔσαν προφυγεῖν, ἀάσατο δὲ μέγα θυμῷ.
Iliad 11.341	τοὺς μὲν γὰρ θεράπων ἀπάνευθʼ ἔχεν, αὐτὰρ ὃ πεζὸς
Iliad 11.342	θῦνε διὰ προμάχων, εἷος φίλον ὤλεσε θυμόν.
Iliad 11.343	Ἕκτωρ δʼ ὀξὺ νόησε κατὰ στίχας, ὦρτο δʼ ἐπʼ αὐτοὺς
Iliad 11.344	κεκλήγων· ἅμα δὲ Τρώων εἵποντο φάλαγγες.
Iliad 11.345	τὸν δὲ ἰδὼν ῥίγησε βοὴν ἀγαθὸς Διομήδης,
Iliad 11.346	αἶψα δʼ Ὀδυσσῆα προσεφώνεεν ἐγγὺς ἐόντα·
Iliad 11.347	νῶϊν δὴ τόδε πῆμα κυλίνδεται ὄβριμος Ἕκτωρ·
Iliad 11.348	ἀλλʼ ἄγε δὴ στέωμεν καὶ ἀλεξώμεσθα μένοντες.
Iliad 11.349	ἦ ῥα, καὶ ἀμπεπαλὼν προΐει δολιχόσκιον ἔγχος
Iliad 11.350	καὶ βάλεν, οὐδʼ ἀφάμαρτε τιτυσκόμενος κεφαλῆφιν,
Iliad 11.351	ἄκρην κὰκ κόρυθα· πλάγχθη δʼ ἀπὸ χαλκόφι χαλκός,
Iliad 11.352	οὐδʼ ἵκετο χρόα καλόν· ἐρύκακε γὰρ τρυφάλεια
Iliad 11.353	τρίπτυχος αὐλῶπις, τήν οἱ πόρε Φοῖβος Ἀπόλλων.
Iliad 11.354	Ἕκτωρ δʼ ὦκʼ ἀπέλεθρον ἀνέδραμε, μίκτο δʼ ὁμίλῳ,
Iliad 11.355	στῆ δὲ γνὺξ ἐριπὼν καὶ ἐρείσατο χειρὶ παχείῃ
Iliad 11.356	γαίης· ἀμφὶ δὲ ὄσσε κελαινὴ νὺξ ἐκάλυψεν.
Iliad 11.357	ὄφρα δὲ Τυδεΐδης μετὰ δούρατος ᾤχετʼ ἐρωὴν
Iliad 11.358	τῆλε διὰ προμάχων, ὅθι οἱ καταείσατο γαίης
Iliad 11.359	τόφρʼ Ἕκτωρ ἔμπνυτο, καὶ ἂψ ἐς δίφρον ὀρούσας
Iliad 11.360	ἐξέλασʼ ἐς πληθύν, καὶ ἀλεύατο κῆρα μέλαιναν.
Iliad 11.361	δουρὶ δʼ ἐπαΐσσων προσέφη κρατερὸς Διομήδης·
Iliad 11.362	ἐξ αὖ νῦν ἔφυγες θάνατον κύον· ἦ τέ τοι ἄγχι
Iliad 11.363	ἦλθε κακόν· νῦν αὖτέ σʼ ἐρύσατο Φοῖβος Ἀπόλλων
Iliad 11.364	ᾧ μέλλεις εὔχεσθαι ἰὼν ἐς δοῦπον ἀκόντων.
Iliad 11.365	ἦ θήν σʼ ἐξανύω γε καὶ ὕστερον ἀντιβολήσας,
Iliad 11.366	εἴ πού τις καὶ ἔμοιγε θεῶν ἐπιτάρροθός ἐστι.
Iliad 11.367	νῦν αὖ τοὺς ἄλλους ἐπιείσομαι, ὅν κε κιχείω.
Iliad 11.368	ἦ, καὶ Παιονίδην δουρὶ κλυτὸν ἐξενάριζεν.
Iliad 11.369	αὐτὰρ Ἀλέξανδρος Ἑλένης πόσις ἠϋκόμοιο
Iliad 11.370	Τυδεΐδῃ ἔπι τόξα τιταίνετο ποιμένι λαῶν,
Iliad 11.371	στήλῃ κεκλιμένος ἀνδροκμήτῳ ἐπὶ τύμβῳ
Iliad 11.372	Ἴλου Δαρδανίδαο, παλαιοῦ δημογέροντος.
Iliad 11.373	ἤτοι ὃ μὲν θώρηκα Ἀγαστρόφου ἰφθίμοιο
Iliad 11.374	αἴνυτʼ ἀπὸ στήθεσφι παναίολον ἀσπίδα τʼ ὤμων
Iliad 11.375	καὶ κόρυθα βριαρήν· ὃ δὲ τόξου πῆχυν ἄνελκε
Iliad 11.376	καὶ βάλεν, οὐδʼ ἄρα μιν ἅλιον βέλος ἔκφυγε χειρός,
Iliad 11.377	ταρσὸν δεξιτεροῖο ποδός· διὰ δʼ ἀμπερὲς ἰὸς
Iliad 11.378	ἐν γαίῃ κατέπηκτο· ὃ δὲ μάλα ἡδὺ γελάσσας
Iliad 11.379	ἐκ λόχου ἀμπήδησε καὶ εὐχόμενος ἔπος ηὔδα·
Iliad 11.380	βέβληαι οὐδʼ ἅλιον βέλος ἔκφυγεν· ὡς ὄφελόν τοι
Iliad 11.381	νείατον ἐς κενεῶνα βαλὼν ἐκ θυμὸν ἑλέσθαι.
Iliad 11.382	οὕτω κεν καὶ Τρῶες ἀνέπνευσαν κακότητος,
Iliad 11.383	οἵ τέ σε πεφρίκασι λέονθʼ ὡς μηκάδες αἶγες.
Iliad 11.384	τὸν δʼ οὐ ταρβήσας προσέφη κρατερὸς Διομήδης·
Iliad 11.385	τοξότα λωβητὴρ κέρᾳ ἀγλαὲ παρθενοπῖπα
Iliad 11.386	εἰ μὲν δὴ ἀντίβιον σὺν τεύχεσι πειρηθείης,
Iliad 11.387	οὐκ ἄν τοι χραίσμῃσι βιὸς καὶ ταρφέες ἰοί·
Iliad 11.388	νῦν δέ μʼ ἐπιγράψας ταρσὸν ποδὸς εὔχεαι αὔτως.
Iliad 11.389	οὐκ ἀλέγω, ὡς εἴ με γυνὴ βάλοι ἢ πάϊς ἄφρων·
Iliad 11.390	κωφὸν γὰρ βέλος ἀνδρὸς ἀνάλκιδος οὐτιδανοῖο.
Iliad 11.391	ἦ τʼ ἄλλως ὑπʼ ἐμεῖο, καὶ εἴ κʼ ὀλίγον περ ἐπαύρῃ,
Iliad 11.392	ὀξὺ βέλος πέλεται, καὶ ἀκήριον αἶψα τίθησι.
Iliad 11.393	τοῦ δὲ γυναικὸς μέν τʼ ἀμφίδρυφοί εἰσι παρειαί,
Iliad 11.394	παῖδες δʼ ὀρφανικοί· ὃ δέ θʼ αἵματι γαῖαν ἐρεύθων
Iliad 11.395	πύθεται, οἰωνοὶ δὲ περὶ πλέες ἠὲ γυναῖκες.
Iliad 11.396	ὣς φάτο, τοῦ δʼ Ὀδυσεὺς δουρικλυτὸς ἐγγύθεν ἐλθὼν
Iliad 11.397	ἔστη πρόσθʼ· ὃ δʼ ὄπισθε καθεζόμενος βέλος ὠκὺ
Iliad 11.398	ἐκ ποδὸς ἕλκʼ, ὀδύνη δὲ διὰ χροὸς ἦλθʼ ἀλεγεινή.
Iliad 11.399	ἐς δίφρον δʼ ἀνόρουσε, καὶ ἡνιόχῳ ἐπέτελλε
Iliad 11.400	νηυσὶν ἔπι γλαφυρῇσιν ἐλαυνέμεν· ἤχθετο γὰρ κῆρ.
Iliad 11.401	οἰώθη δʼ Ὀδυσεὺς δουρὶ κλυτός, οὐδέ τις αὐτῷ
Iliad 11.402	Ἀργείων παρέμεινεν, ἐπεὶ φόβος ἔλλαβε πάντας·
Iliad 11.403	ὀχθήσας δʼ ἄρα εἶπε πρὸς ὃν μεγαλήτορα θυμόν·
Iliad 11.404	ὤ μοι ἐγὼ τί πάθω; μέγα μὲν κακὸν αἴ κε φέβωμαι
Iliad 11.405	πληθὺν ταρβήσας· τὸ δὲ ῥίγιον αἴ κεν ἁλώω
Iliad 11.406	μοῦνος· τοὺς δʼ ἄλλους Δαναοὺς ἐφόβησε Κρονίων.
Iliad 11.407	ἀλλὰ τί ἤ μοι ταῦτα φίλος διελέξατο θυμός;
Iliad 11.408	οἶδα γὰρ ὅττι κακοὶ μὲν ἀποίχονται πολέμοιο,
Iliad 11.409	ὃς δέ κʼ ἀριστεύῃσι μάχῃ ἔνι τὸν δὲ μάλα χρεὼ
Iliad 11.410	ἑστάμεναι κρατερῶς, ἤ τʼ ἔβλητʼ ἤ τʼ ἔβαλʼ ἄλλον.
Iliad 11.411	εἷος ὃ ταῦθʼ ὥρμαινε κατὰ φρένα καὶ κατὰ θυμόν,
Iliad 11.412	τόφρα δʼ ἐπὶ Τρώων στίχες ἤλυθον ἀσπιστάων,
Iliad 11.413	ἔλσαν δʼ ἐν μέσσοισι, μετὰ σφίσι πῆμα τιθέντες.
Iliad 11.414	ὡς δʼ ὅτε κάπριον ἀμφὶ κύνες θαλεροί τʼ αἰζηοὶ
Iliad 11.415	σεύωνται, ὃ δέ τʼ εἶσι βαθείης ἐκ ξυλόχοιο
Iliad 11.416	θήγων λευκὸν ὀδόντα μετὰ γναμπτῇσι γένυσσιν,
Iliad 11.417	ἀμφὶ δέ τʼ ἀΐσσονται, ὑπαὶ δέ τε κόμπος ὀδόντων
Iliad 11.418	γίγνεται, οἳ δὲ μένουσιν ἄφαρ δεινόν περ ἐόντα,
Iliad 11.419	ὥς ῥα τότʼ ἀμφʼ Ὀδυσῆα Διῒ φίλον ἐσσεύοντο
Iliad 11.420	Τρῶες· ὃ δὲ πρῶτον μὲν ἀμύμονα Δηϊοπίτην
Iliad 11.421	οὔτασεν ὦμον ὕπερθεν ἐπάλμενος ὀξέϊ δουρί,
Iliad 11.422	αὐτὰρ ἔπειτα Θόωνα καὶ Ἔννομον ἐξενάριξε.
Iliad 11.423	Χερσιδάμαντα δʼ ἔπειτα καθʼ ἵππων ἀΐξαντα
Iliad 11.424	δουρὶ κατὰ πρότμησιν ὑπʼ ἀσπίδος ὀμφαλοέσσης
Iliad 11.425	νύξεν· ὃ δʼ ἐν κονίῃσι πεσὼν ἕλε γαῖαν ἀγοστῷ.
Iliad 11.426	τοὺς μὲν ἔασʼ, ὃ δʼ ἄρʼ Ἱππασίδην Χάροπʼ οὔτασε δουρὶ
Iliad 11.427	αὐτοκασίγνητον εὐηφενέος Σώκοιο.
Iliad 11.428	τῷ δʼ ἐπαλεξήσων Σῶκος κίεν ἰσόθεος φώς,
Iliad 11.429	στῆ δὲ μάλʼ ἐγγὺς ἰὼν καί μιν πρὸς μῦθον ἔειπεν
Iliad 11.430	ὦ Ὀδυσεῦ πολύαινε δόλων ἆτʼ ἠδὲ πόνοιο
Iliad 11.431	σήμερον ἢ δοιοῖσιν ἐπεύξεαι Ἱππασίδῃσι
Iliad 11.432	τοιώδʼ ἄνδρε κατακτείνας καὶ τεύχεʼ ἀπούρας,
Iliad 11.433	ἤ κεν ἐμῷ ὑπὸ δουρὶ τυπεὶς ἀπὸ θυμὸν ὀλέσσῃς.
Iliad 11.434	ὣς εἰπὼν οὔτησε κατʼ ἀσπίδα πάντοσʼ ἐΐσην.
Iliad 11.435	διὰ μὲν ἀσπίδος ἦλθε φαεινῆς ὄβριμον ἔγχος,
Iliad 11.436	καὶ διὰ θώρηκος πολυδαιδάλου ἠρήρειστο,
Iliad 11.437	πάντα δʼ ἀπὸ πλευρῶν χρόα ἔργαθεν, οὐδʼ ἔτʼ ἔασε
Iliad 11.438	Παλλὰς Ἀθηναίη μιχθήμεναι ἔγκασι φωτός.
Iliad 11.439	γνῶ δʼ Ὀδυσεὺς ὅ οἱ οὔ τι τέλος κατακαίριον ἦλθεν,
Iliad 11.440	ἂψ δʼ ἀναχωρήσας Σῶκον πρὸς μῦθον ἔειπεν·
Iliad 11.441	ἆ δείλʼ ἦ μάλα δή σε κιχάνεται αἰπὺς ὄλεθρος.
Iliad 11.442	ἤτοι μέν ῥʼ ἔμʼ ἔπαυσας ἐπὶ Τρώεσσι μάχεσθαι·
Iliad 11.443	σοὶ δʼ ἐγὼ ἐνθάδε φημὶ φόνον καὶ κῆρα μέλαιναν
Iliad 11.444	ἤματι τῷδʼ ἔσσεσθαι, ἐμῷ δʼ ὑπὸ δουρὶ δαμέντα
Iliad 11.445	εὖχος ἐμοὶ δώσειν, ψυχὴν δʼ Ἄϊδι κλυτοπώλῳ.
Iliad 11.446	ἦ, καὶ ὃ μὲν φύγαδʼ αὖτις ὑποστρέψας ἐβεβήκει,
Iliad 11.447	τῷ δὲ μεταστρεφθέντι μεταφρένῳ ἐν δόρυ πῆξεν
Iliad 11.448	ὤμων μεσσηγύς, διὰ δὲ στήθεσφιν ἔλασσε,
Iliad 11.449	δούπησεν δὲ πεσών· ὃ δʼ ἐπεύξατο δῖος Ὀδυσσεύς·
Iliad 11.450	ὦ Σῶχʼ Ἱππάσου υἱὲ δαΐφρονος ἱπποδάμοιο
Iliad 11.451	φθῆ σε τέλος θανάτοιο κιχήμενον, οὐδʼ ὑπάλυξας.
Iliad 11.452	ἆ δείλʼ οὐ μὲν σοί γε πατὴρ καὶ πότνια μήτηρ
Iliad 11.453	ὄσσε καθαιρήσουσι θανόντι περ, ἀλλʼ οἰωνοὶ
Iliad 11.454	ὠμησταὶ ἐρύουσι, περὶ πτερὰ πυκνὰ βαλόντες.
Iliad 11.455	αὐτὰρ ἔμʼ, εἴ κε θάνω, κτεριοῦσί γε δῖοι Ἀχαιοί.
Iliad 11.456	ὣς εἰπὼν Σώκοιο δαΐφρονος ὄβριμον ἔγχος
Iliad 11.457	ἔξω τε χροὸς ἕλκε καὶ ἀσπίδος ὀμφαλοέσσης·
Iliad 11.458	αἷμα δέ οἱ σπασθέντος ἀνέσσυτο, κῆδε δὲ θυμόν.
Iliad 11.459	Τρῶες δὲ μεγάθυμοι ὅπως ἴδον αἷμʼ Ὀδυσῆος
Iliad 11.460	κεκλόμενοι καθʼ ὅμιλον ἐπʼ αὐτῷ πάντες ἔβησαν.
Iliad 11.461	αὐτὰρ ὅ γʼ ἐξοπίσω ἀνεχάζετο, αὖε δʼ ἑταίρους.
Iliad 11.462	τρὶς μὲν ἔπειτʼ ἤϋσεν ὅσον κεφαλὴ χάδε φωτός,
Iliad 11.463	τρὶς δʼ ἄϊεν ἰάχοντος ἄρηι φίλος Μενέλαος.
Iliad 11.464	αἶψα δʼ ἄρʼ Αἴαντα προσεφώνεεν ἐγγὺς ἐόντα·
Iliad 11.465	Αἶαν διογενὲς Τελαμώνιε κοίρανε λαῶν
Iliad 11.466	ἀμφί μʼ Ὀδυσσῆος ταλασίφρονος ἵκετʼ ἀϋτὴ
Iliad 11.467	τῷ ἰκέλη ὡς εἴ ἑ βιῴατο μοῦνον ἐόντα
Iliad 11.468	Τρῶες ἀποτμήξαντες ἐνὶ κρατερῇ ὑσμίνῃ.
Iliad 11.469	ἀλλʼ ἴομεν καθʼ ὅμιλον· ἀλεξέμεναι γὰρ ἄμεινον.
Iliad 11.470	δείδω μή τι πάθῃσιν ἐνὶ Τρώεσσι μονωθεὶς
Iliad 11.471	ἐσθλὸς ἐών, μεγάλη δὲ ποθὴ Δαναοῖσι γένηται.
Iliad 11.472	ὣς εἰπὼν ὃ μὲν ἦρχʼ, ὃ δʼ ἅμʼ ἕσπετο ἰσόθεος φώς.
Iliad 11.473	εὗρον ἔπειτʼ Ὀδυσῆα Διῒ φίλον· ἀμφὶ δʼ ἄρʼ αὐτὸν
Iliad 11.474	Τρῶες ἕπονθʼ ὡς εἴ τε δαφοινοὶ θῶες ὄρεσφιν
Iliad 11.475	ἀμφʼ ἔλαφον κεραὸν βεβλημένον, ὅν τʼ ἔβαλʼ ἀνὴρ
Iliad 11.476	ἰῷ ἀπὸ νευρῆς· τὸν μέν τʼ ἤλυξε πόδεσσι
Iliad 11.477	φεύγων, ὄφρʼ αἷμα λιαρὸν καὶ γούνατʼ ὀρώρῃ·
Iliad 11.478	αὐτὰρ ἐπεὶ δὴ τόν γε δαμάσσεται ὠκὺς ὀϊστός,
Iliad 11.479	ὠμοφάγοι μιν θῶες ἐν οὔρεσι δαρδάπτουσιν
Iliad 11.480	ἐν νέμεϊ σκιερῷ· ἐπί τε λῖν ἤγαγε δαίμων
Iliad 11.481	σίντην· θῶες μέν τε διέτρεσαν, αὐτὰρ ὃ δάπτει·
Iliad 11.482	ὥς ῥα τότʼ ἀμφʼ Ὀδυσῆα δαΐφρονα ποικιλομήτην
Iliad 11.483	Τρῶες ἕπον πολλοί τε καὶ ἄλκιμοι, αὐτὰρ ὅ γʼ ἥρως
Iliad 11.484	ἀΐσσων ᾧ ἔγχει ἀμύνετο νηλεὲς ἦμαρ.
Iliad 11.485	Αἴας δʼ ἐγγύθεν ἦλθε φέρων σάκος ἠΰτε πύργον,
Iliad 11.486	στῆ δὲ παρέξ· Τρῶες δὲ διέτρεσαν ἄλλυδις ἄλλος.
Iliad 11.487	ἤτοι τὸν Μενέλαος ἀρήϊος ἔξαγʼ ὁμίλου
Iliad 11.488	χειρὸς ἔχων, εἷος θεράπων σχεδὸν ἤλασεν ἵππους.
Iliad 11.489	Αἴας δὲ Τρώεσσιν ἐπάλμενος εἷλε Δόρυκλον
Iliad 11.490	Πριαμίδην νόθον υἱόν, ἔπειτα δὲ Πάνδοκον οὖτα,
Iliad 11.491	οὖτα δὲ Λύσανδρον καὶ Πύρασον ἠδὲ Πυλάρτην.
Iliad 11.492	ὡς δʼ ὁπότε πλήθων ποταμὸς πεδίον δὲ κάτεισι
Iliad 11.493	χειμάρρους κατʼ ὄρεσφιν ὀπαζόμενος Διὸς ὄμβρῳ,
Iliad 11.494	πολλὰς δὲ δρῦς ἀζαλέας, πολλὰς δέ τε πεύκας
Iliad 11.495	ἐσφέρεται, πολλὸν δέ τʼ ἀφυσγετὸν εἰς ἅλα βάλλει,
Iliad 11.496	ὣς ἔφεπε κλονέων πεδίον τότε φαίδιμος Αἴας,
Iliad 11.497	δαΐζων ἵππους τε καὶ ἀνέρας· οὐδέ πω Ἕκτωρ
Iliad 11.498	πεύθετʼ, ἐπεί ῥα μάχης ἐπʼ ἀριστερὰ μάρνατο πάσης
Iliad 11.499	ὄχθας πὰρ ποταμοῖο Σκαμάνδρου, τῇ ῥα μάλιστα
Iliad 11.500	ἀνδρῶν πῖπτε κάρηνα, βοὴ δʼ ἄσβεστος ὀρώρει
Iliad 11.501	Νέστορά τʼ ἀμφὶ μέγαν καὶ ἀρήϊον Ἰδομενῆα.
Iliad 11.502	Ἕκτωρ μὲν μετὰ τοῖσιν ὁμίλει μέρμερα ῥέζων
Iliad 11.503	ἔγχεΐ θʼ ἱπποσύνῃ τε, νέων δʼ ἀλάπαζε φάλαγγας·
Iliad 11.504	οὐδʼ ἄν πω χάζοντο κελεύθου δῖοι Ἀχαιοὶ
Iliad 11.505	εἰ μὴ Ἀλέξανδρος Ἑλένης πόσις ἠϋκόμοιο
Iliad 11.506	παῦσεν ἀριστεύοντα Μαχάονα ποιμένα λαῶν,
Iliad 11.507	ἰῷ τριγλώχινι βαλὼν κατὰ δεξιὸν ὦμον.
Iliad 11.508	τῷ ῥα περίδεισαν μένεα πνείοντες Ἀχαιοὶ
Iliad 11.509	μή πώς μιν πολέμοιο μετακλινθέντος ἕλοιεν.
Iliad 11.510	αὐτίκα δʼ Ἰδομενεὺς προσεφώνεε Νέστορα δῖον·
Iliad 11.511	ὦ Νέστορ Νηληϊάδη μέγα κῦδος Ἀχαιῶν
Iliad 11.512	ἄγρει σῶν ὀχέων ἐπιβήσεο, πὰρ δὲ Μαχάων
Iliad 11.513	βαινέτω, ἐς νῆας δὲ τάχιστʼ ἔχε μώνυχας ἵππους·
Iliad 11.514	ἰητρὸς γὰρ ἀνὴρ πολλῶν ἀντάξιος ἄλλων
Iliad 11.515	ἰούς τʼ ἐκτάμνειν ἐπί τʼ ἤπια φάρμακα πάσσειν.
Iliad 11.516	ὣς ἔφατʼ, οὐδʼ ἀπίθησε Γερήνιος ἱππότα Νέστωρ.
Iliad 11.517	αὐτίκα δʼ ὧν ὀχέων ἐπεβήσετο, πὰρ δὲ Μαχάων
Iliad 11.518	βαῖνʼ Ἀσκληπιοῦ υἱὸς ἀμύμονος ἰητῆρος·
Iliad 11.519	μάστιξεν δʼ ἵππους, τὼ δʼ οὐκ ἀέκοντε πετέσθην
Iliad 11.520	νῆας ἔπι γλαφυράς· τῇ γὰρ φίλον ἔπλετο θυμῷ.
Iliad 11.521	Κεβριόνης δὲ Τρῶας ὀρινομένους ἐνόησεν
Iliad 11.522	Ἕκτορι παρβεβαώς, καί μιν πρὸς μῦθον ἔειπεν·
Iliad 11.523	Ἕκτορ νῶϊ μὲν ἐνθάδʼ ὁμιλέομεν Δαναοῖσιν
Iliad 11.524	ἐσχατιῇ πολέμοιο δυσηχέος· οἳ δὲ δὴ ἄλλοι
Iliad 11.525	Τρῶες ὀρίνονται ἐπιμὶξ ἵπποι τε καὶ αὐτοί.
Iliad 11.526	Αἴας δὲ κλονέει Τελαμώνιος· εὖ δέ μιν ἔγνων·
Iliad 11.527	εὐρὺ γὰρ ἀμφʼ ὤμοισιν ἔχει σάκος· ἀλλὰ καὶ ἡμεῖς
Iliad 11.528	κεῖσʼ ἵππους τε καὶ ἅρμʼ ἰθύνομεν, ἔνθα μάλιστα
Iliad 11.529	ἱππῆες πεζοί τε κακὴν ἔριδα προβαλόντες
Iliad 11.530	ἀλλήλους ὀλέκουσι, βοὴ δʼ ἄσβεστος ὄρωρεν.
Iliad 11.531	ὣς ἄρα φωνήσας ἵμασεν καλλίτριχας ἵππους
Iliad 11.532	μάστιγι λιγυρῇ· τοὶ δὲ πληγῆς ἀΐοντες
Iliad 11.533	ῥίμφʼ ἔφερον θοὸν ἅρμα μετὰ Τρῶας καὶ Ἀχαιοὺς
Iliad 11.534	στείβοντες νέκυάς τε καὶ ἀσπίδας· αἵματι δʼ ἄξων
Iliad 11.535	νέρθεν ἅπας πεπάλακτο καὶ ἄντυγες αἳ περὶ δίφρον,
Iliad 11.536	ἃς ἄρʼ ἀφʼ ἱππείων ὁπλέων ῥαθάμιγγες ἔβαλλον
Iliad 11.537	αἵ τʼ ἀπʼ ἐπισσώτρων. ὃ δὲ ἵετο δῦναι ὅμιλον
Iliad 11.538	ἀνδρόμεον ῥῆξαί τε μετάλμενος· ἐν δὲ κυδοιμὸν
Iliad 11.539	ἧκε κακὸν Δαναοῖσι, μίνυνθα δὲ χάζετο δουρός.
Iliad 11.540	αὐτὰρ ὃ τῶν ἄλλων ἐπεπωλεῖτο στίχας ἀνδρῶν
Iliad 11.541	ἔγχεΐ τʼ ἄορί τε μεγάλοισί τε χερμαδίοισιν,
Iliad 11.542	Αἴαντος δʼ ἀλέεινε μάχην Τελαμωνιάδαο.
Iliad 11.544	Ζεὺς δὲ πατὴρ Αἴανθʼ ὑψίζυγος ἐν φόβον ὦρσε·
Iliad 11.545	στῆ δὲ ταφών, ὄπιθεν δὲ σάκος βάλεν ἑπταβόειον,
Iliad 11.546	τρέσσε δὲ παπτήνας ἐφʼ ὁμίλου θηρὶ ἐοικὼς
Iliad 11.547	ἐντροπαλιζόμενος ὀλίγον γόνυ γουνὸς ἀμείβων.
Iliad 11.548	ὡς δʼ αἴθωνα λέοντα βοῶν ἀπὸ μεσσαύλοιο
Iliad 11.549	ἐσσεύαντο κύνες τε καὶ ἀνέρες ἀγροιῶται,
Iliad 11.550	οἵ τέ μιν οὐκ εἰῶσι βοῶν ἐκ πῖαρ ἑλέσθαι
Iliad 11.551	πάννυχοι ἐγρήσσοντες· ὃ δὲ κρειῶν ἐρατίζων
Iliad 11.552	ἰθύει, ἀλλʼ οὔ τι πρήσσει· θαμέες γὰρ ἄκοντες
Iliad 11.553	ἀντίον ἀΐσσουσι θρασειάων ἀπὸ χειρῶν
Iliad 11.554	καιόμεναί τε δεταί, τάς τε τρεῖ ἐσσύμενός περ·
Iliad 11.555	ἠῶθεν δʼ ἀπὸ νόσφιν ἔβη τετιηότι θυμῷ·
Iliad 11.556	ὣς Αἴας τότʼ ἀπὸ Τρώων τετιημένος ἦτορ
Iliad 11.557	ἤϊε πόλλʼ ἀέκων· περὶ γὰρ δίε νηυσὶν Ἀχαιῶν.
Iliad 11.558	ὡς δʼ ὅτʼ ὄνος παρʼ ἄρουραν ἰὼν ἐβιήσατο παῖδας
Iliad 11.559	νωθής, ᾧ δὴ πολλὰ περὶ ῥόπαλʼ ἀμφὶς ἐάγῃ,
Iliad 11.560	κείρει τʼ εἰσελθὼν βαθὺ λήϊον· οἳ δέ τε παῖδες
Iliad 11.561	τύπτουσιν ῥοπάλοισι· βίη δέ τε νηπίη αὐτῶν·
Iliad 11.562	σπουδῇ τʼ ἐξήλασσαν, ἐπεί τʼ ἐκορέσσατο φορβῆς·
Iliad 11.563	ὣς τότʼ ἔπειτʼ Αἴαντα μέγαν Τελαμώνιον υἱὸν
Iliad 11.564	Τρῶες ὑπέρθυμοι πολυηγερέες τʼ ἐπίκουροι
Iliad 11.565	νύσσοντες ξυστοῖσι μέσον σάκος αἰὲν ἕποντο.
Iliad 11.566	Αἴας δʼ ἄλλοτε μὲν μνησάσκετο θούριδος ἀλκῆς
Iliad 11.567	αὖτις ὑποστρεφθείς, καὶ ἐρητύσασκε φάλαγγας
Iliad 11.568	Τρώων ἱπποδάμων· ὁτὲ δὲ τρωπάσκετο φεύγειν.
Iliad 11.569	πάντας δὲ προέεργε θοὰς ἐπὶ νῆας ὁδεύειν,
Iliad 11.570	αὐτὸς δὲ Τρώων καὶ Ἀχαιῶν θῦνε μεσηγὺ
Iliad 11.571	ἱστάμενος· τὰ δὲ δοῦρα θρασειάων ἀπὸ χειρῶν
Iliad 11.572	ἄλλα μὲν ἐν σάκεϊ μεγάλῳ πάγεν ὄρμενα πρόσσω,
Iliad 11.573	πολλὰ δὲ καὶ μεσσηγύ, πάρος χρόα λευκὸν ἐπαυρεῖν,
Iliad 11.574	ἐν γαίῃ ἵσταντο λιλαιόμενα χροὸς ἆσαι.
Iliad 11.575	τὸν δʼ ὡς οὖν ἐνόησʼ Εὐαίμονος ἀγλαὸς υἱὸς
Iliad 11.576	Εὐρύπυλος πυκινοῖσι βιαζόμενον βελέεσσι,
Iliad 11.577	στῆ ῥα παρʼ αὐτὸν ἰών, καὶ ἀκόντισε δουρὶ φαεινῷ,
Iliad 11.578	καὶ βάλε Φαυσιάδην Ἀπισάονα ποιμένα λαῶν
Iliad 11.579	ἧπαρ ὑπὸ πραπίδων, εἶθαρ δʼ ὑπὸ γούνατʼ ἔλυσεν·
Iliad 11.580	Εὐρύπυλος δʼ ἐπόρουσε καὶ αἴνυτο τεύχεʼ ἀπʼ ὤμων.
Iliad 11.581	τὸν δʼ ὡς οὖν ἐνόησεν Ἀλέξανδρος θεοειδὴς
Iliad 11.582	τεύχεʼ ἀπαινύμενον Ἀπισάονος, αὐτίκα τόξον
Iliad 11.583	ἕλκετʼ ἐπʼ Εὐρυπύλῳ, καί μιν βάλε μηρὸν ὀϊστῷ
Iliad 11.584	δεξιόν· ἐκλάσθη δὲ δόναξ, ἐβάρυνε δὲ μηρόν.
Iliad 11.585	ἂψ δʼ ἑτάρων εἰς ἔθνος ἐχάζετο κῆρʼ ἀλεείνων,
Iliad 11.586	ἤϋσεν δὲ διαπρύσιον Δαναοῖσι γεγωνώς·
Iliad 11.587	ὦ φίλοι Ἀργείων ἡγήτορες ἠδὲ μέδοντες
Iliad 11.588	στῆτʼ ἐλελιχθέντες καὶ ἀμύνετε νηλεὲς ἦμαρ
Iliad 11.589	Αἴανθʼ, ὃς βελέεσσι βιάζεται, οὐδέ ἕ φημι
Iliad 11.590	φεύξεσθʼ ἐκ πολέμοιο δυσηχέος· ἀλλὰ μάλʼ ἄντην
Iliad 11.591	ἵστασθʼ ἀμφʼ Αἴαντα μέγαν Τελαμώνιον υἱόν.
Iliad 11.592	ὣς ἔφατʼ Εὐρύπυλος βεβλημένος· οἳ δὲ παρʼ αὐτὸν
Iliad 11.593	πλησίοι ἔστησαν σάκεʼ ὤμοισι κλίναντες
Iliad 11.594	δούρατʼ ἀνασχόμενοι· τῶν δʼ ἀντίος ἤλυθεν Αἴας.
Iliad 11.595	στῆ δὲ μεταστρεφθείς, ἐπεὶ ἵκετο ἔθνος ἑταίρων.
Iliad 11.596	ὣς οἳ μὲν μάρναντο δέμας πυρὸς αἰθομένοιο·
Iliad 11.597	Νέστορα δʼ ἐκ πολέμοιο φέρον Νηλήϊαι ἵπποι
Iliad 11.598	ἱδρῶσαι, ἦγον δὲ Μαχάονα ποιμένα λαῶν.
Iliad 11.599	τὸν δὲ ἰδὼν ἐνόησε ποδάρκης δῖος Ἀχιλλεύς·
Iliad 11.600	ἑστήκει γὰρ ἐπὶ πρυμνῇ μεγακήτεϊ νηῒ
Iliad 11.601	εἰσορόων πόνον αἰπὺν ἰῶκά τε δακρυόεσσαν.
Iliad 11.602	αἶψα δʼ ἑταῖρον ἑὸν Πατροκλῆα προσέειπε
Iliad 11.603	φθεγξάμενος παρὰ νηός· ὃ δὲ κλισίηθεν ἀκούσας
Iliad 11.604	ἔκμολεν ἶσος Ἄρηϊ, κακοῦ δʼ ἄρα οἱ πέλεν ἀρχή.
Iliad 11.605	τὸν πρότερος προσέειπε Μενοιτίου ἄλκιμος υἱός·
Iliad 11.606	τίπτέ με κικλήσκεις Ἀχιλεῦ; τί δέ σε χρεὼ ἐμεῖο;
Iliad 11.607	τὸν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 11.608	δῖε Μενοιτιάδη τῷ ἐμῷ κεχαρισμένε θυμῷ
Iliad 11.609	νῦν ὀΐω περὶ γούνατʼ ἐμὰ στήσεσθαι Ἀχαιοὺς
Iliad 11.610	λισσομένους· χρειὼ γὰρ ἱκάνεται οὐκέτʼ ἀνεκτός.
Iliad 11.611	ἀλλʼ ἴθι νῦν Πάτροκλε Διῒ φίλε Νέστορʼ ἔρειο
Iliad 11.612	ὅν τινα τοῦτον ἄγει βεβλημένον ἐκ πολέμοιο·
Iliad 11.613	ἤτοι μὲν τά γʼ ὄπισθε Μαχάονι πάντα ἔοικε
Iliad 11.614	τῷ Ἀσκληπιάδῃ, ἀτὰρ οὐκ ἴδον ὄμματα φωτός·
Iliad 11.615	ἵπποι γάρ με παρήϊξαν πρόσσω μεμαυῖαι.
Iliad 11.616	ὣς φάτο, Πάτροκλος δὲ φίλῳ ἐπεπείθεθʼ ἑταίρῳ,
Iliad 11.617	βῆ δὲ θέειν παρά τε κλισίας καὶ νῆας Ἀχαιῶν.
Iliad 11.618	οἳ δʼ ὅτε δὴ κλισίην Νηληϊάδεω ἀφίκοντο,
Iliad 11.619	αὐτοὶ μέν ῥʼ ἀπέβησαν ἐπὶ χθόνα πουλυβότειραν,
Iliad 11.620	ἵππους δʼ Εὐρυμέδων θεράπων λύε τοῖο γέροντος
Iliad 11.621	ἐξ ὀχέων· τοὶ δʼ ἱδρῶ ἀπεψύχοντο χιτώνων
Iliad 11.622	στάντε ποτὶ πνοιὴν παρὰ θῖνʼ ἁλός· αὐτὰρ ἔπειτα
Iliad 11.623	ἐς κλισίην ἐλθόντες ἐπὶ κλισμοῖσι κάθιζον.
Iliad 11.624	τοῖσι δὲ τεῦχε κυκειῶ ἐϋπλόκαμος Ἑκαμήδη,
Iliad 11.625	τὴν ἄρετʼ ἐκ Τενέδοιο γέρων, ὅτε πέρσεν Ἀχιλλεύς,
Iliad 11.626	θυγατέρʼ Ἀρσινόου μεγαλήτορος, ἥν οἱ Ἀχαιοὶ
Iliad 11.627	ἔξελον οὕνεκα βουλῇ ἀριστεύεσκεν ἁπάντων.
Iliad 11.628	ἥ σφωϊν πρῶτον μὲν ἐπιπροΐηλε τράπεζαν
Iliad 11.629	καλὴν κυανόπεζαν ἐΰξοον, αὐτὰρ ἐπʼ αὐτῆς
Iliad 11.630	χάλκειον κάνεον, ἐπὶ δὲ κρόμυον ποτῷ ὄψον,
Iliad 11.631	ἠδὲ μέλι χλωρόν, παρὰ δʼ ἀλφίτου ἱεροῦ ἀκτήν,
Iliad 11.632	πὰρ δὲ δέπας περικαλλές, ὃ οἴκοθεν ἦγʼ ὁ γεραιός,
Iliad 11.633	χρυσείοις ἥλοισι πεπαρμένον· οὔατα δʼ αὐτοῦ
Iliad 11.634	τέσσαρʼ ἔσαν, δοιαὶ δὲ πελειάδες ἀμφὶς ἕκαστον
Iliad 11.635	χρύσειαι νεμέθοντο, δύω δʼ ὑπὸ πυθμένες ἦσαν.
Iliad 11.636	ἄλλος μὲν μογέων ἀποκινήσασκε τραπέζης
Iliad 11.637	πλεῖον ἐόν, Νέστωρ δʼ ὁ γέρων ἀμογητὶ ἄειρεν.
Iliad 11.638	ἐν τῷ ῥά σφι κύκησε γυνὴ ἐϊκυῖα θεῇσιν
Iliad 11.639	οἴνῳ Πραμνείῳ, ἐπὶ δʼ αἴγειον κνῆ τυρὸν
Iliad 11.640	κνήστι χαλκείῃ, ἐπὶ δʼ ἄλφιτα λευκὰ πάλυνε,
Iliad 11.641	πινέμεναι δʼ ἐκέλευσεν, ἐπεί ῥʼ ὥπλισσε κυκειῶ.
Iliad 11.642	τὼ δʼ ἐπεὶ οὖν πίνοντʼ ἀφέτην πολυκαγκέα δίψαν
Iliad 11.643	μύθοισιν τέρποντο πρὸς ἀλλήλους ἐνέποντες,
Iliad 11.644	Πάτροκλος δὲ θύρῃσιν ἐφίστατο ἰσόθεος φώς.
Iliad 11.645	τὸν δὲ ἰδὼν ὁ γεραιὸς ἀπὸ θρόνου ὦρτο φαεινοῦ,
Iliad 11.646	ἐς δʼ ἄγε χειρὸς ἑλών, κατὰ δʼ ἑδριάασθαι ἄνωγε.
Iliad 11.647	Πάτροκλος δʼ ἑτέρωθεν ἀναίνετο εἶπέ τε μῦθον·
Iliad 11.648	οὐχ ἕδος ἐστὶ γεραιὲ διοτρεφές, οὐδέ με πείσεις.
Iliad 11.649	αἰδοῖος νεμεσητὸς ὅ με προέηκε πυθέσθαι
Iliad 11.650	ὅν τινα τοῦτον ἄγεις βεβλημένον· ἀλλὰ καὶ αὐτὸς
Iliad 11.651	γιγνώσκω, ὁρόω δὲ Μαχάονα ποιμένα λαῶν.
Iliad 11.652	νῦν δὲ ἔπος ἐρέων πάλιν ἄγγελος εἶμʼ Ἀχιλῆϊ.
Iliad 11.653	εὖ δὲ σὺ οἶσθα γεραιὲ διοτρεφές, οἷος ἐκεῖνος
Iliad 11.654	δεινὸς ἀνήρ· τάχα κεν καὶ ἀναίτιον αἰτιόῳτο.
Iliad 11.655	τὸν δʼ ἠμείβετʼ ἔπειτα Γερήνιος ἱππότα Νέστωρ·
Iliad 11.656	τίπτε τὰρ ὧδʼ Ἀχιλεὺς ὀλοφύρεται υἷας Ἀχαιῶν,
Iliad 11.657	ὅσσοι δὴ βέλεσιν βεβλήαται; οὐδέ τι οἶδε
Iliad 11.658	πένθεος, ὅσσον ὄρωρε κατὰ στρατόν· οἳ γὰρ ἄριστοι
Iliad 11.659	ἐν νηυσὶν κέαται βεβλημένοι οὐτάμενοί τε.
Iliad 11.660	βέβληται μὲν ὃ Τυδεΐδης κρατερὸς Διομήδης,
Iliad 11.661	οὔτασται δʼ Ὀδυσεὺς δουρὶ κλυτὸς ἠδʼ Ἀγαμέμνων·
Iliad 11.662	βέβληται δὲ καὶ Εὐρύπυλος κατὰ μηρὸν ὀϊστῷ·
Iliad 11.663	τοῦτον δʼ ἄλλον ἐγὼ νέον ἤγαγον ἐκ πολέμοιο
Iliad 11.664	ἰῷ ἀπὸ νευρῆς βεβλημένον. αὐτὰρ Ἀχιλλεὺς
Iliad 11.665	ἐσθλὸς ἐὼν Δαναῶν οὐ κήδεται οὐδʼ ἐλεαίρει.
Iliad 11.666	ἦ μένει εἰς ὅ κε δὴ νῆες θοαὶ ἄγχι θαλάσσης
Iliad 11.667	Ἀργείων ἀέκητι πυρὸς δηΐοιο θέρωνται,
Iliad 11.668	αὐτοί τε κτεινώμεθʼ ἐπισχερώ; οὐ γὰρ ἐμὴ ἲς
Iliad 11.669	ἔσθʼ οἵη πάρος ἔσκεν ἐνὶ γναμπτοῖσι μέλεσσιν.
Iliad 11.670	εἴθʼ ὣς ἡβώοιμι βίη δέ μοι ἔμπεδος εἴη
Iliad 11.671	ὡς ὁπότʼ Ἠλείοισι καὶ ἡμῖν νεῖκος ἐτύχθη
Iliad 11.672	ἀμφὶ βοηλασίῃ, ὅτʼ ἐγὼ κτάνον Ἰτυμονῆα
Iliad 11.673	ἐσθλὸν Ὑπειροχίδην, ὃς ἐν Ἤλιδι ναιετάασκε,
Iliad 11.674	ῥύσιʼ ἐλαυνόμενος· ὃ δʼ ἀμύνων ᾗσι βόεσσιν
Iliad 11.675	ἔβλητʼ ἐν πρώτοισιν ἐμῆς ἀπὸ χειρὸς ἄκοντι,
Iliad 11.676	κὰδ δʼ ἔπεσεν, λαοὶ δὲ περίτρεσαν ἀγροιῶται.
Iliad 11.677	ληΐδα δʼ ἐκ πεδίου συνελάσσαμεν ἤλιθα πολλὴν
Iliad 11.678	πεντήκοντα βοῶν ἀγέλας, τόσα πώεα οἰῶν,
Iliad 11.679	τόσσα συῶν συβόσια, τόσʼ αἰπόλια πλατέʼ αἰγῶν,
Iliad 11.680	ἵππους δὲ ξανθὰς ἑκατὸν καὶ πεντήκοντα
Iliad 11.681	πάσας θηλείας, πολλῇσι δὲ πῶλοι ὑπῆσαν.
Iliad 11.682	καὶ τὰ μὲν ἠλασάμεσθα Πύλον Νηλήϊον εἴσω
Iliad 11.683	ἐννύχιοι προτὶ ἄστυ· γεγήθει δὲ φρένα Νηλεύς,
Iliad 11.684	οὕνεκά μοι τύχε πολλὰ νέῳ πόλεμον δὲ κιόντι.
Iliad 11.685	κήρυκες δʼ ἐλίγαινον ἅμʼ ἠοῖ φαινομένηφι
Iliad 11.686	τοὺς ἴμεν οἷσι χρεῖος ὀφείλετʼ ἐν Ἤλιδι δίῃ·
Iliad 11.687	οἳ δὲ συναγρόμενοι Πυλίων ἡγήτορες ἄνδρες
Iliad 11.688	δαίτρευον· πολέσιν γὰρ Ἐπειοὶ χρεῖος ὄφειλον,
Iliad 11.689	ὡς ἡμεῖς παῦροι κεκακωμένοι ἐν Πύλῳ ἦμεν·
Iliad 11.690	ἐλθὼν γάρ ῥʼ ἐκάκωσε βίη Ἡρακληείη
Iliad 11.691	τῶν προτέρων ἐτέων, κατὰ δʼ ἔκταθεν ὅσσοι ἄριστοι·
Iliad 11.692	δώδεκα γὰρ Νηλῆος ἀμύμονος υἱέες ἦμεν·
Iliad 11.693	τῶν οἶος λιπόμην, οἳ δʼ ἄλλοι πάντες ὄλοντο.
Iliad 11.694	ταῦθʼ ὑπερηφανέοντες Ἐπειοὶ χαλκοχίτωνες
Iliad 11.695	ἡμέας ὑβρίζοντες ἀτάσθαλα μηχανόωντο.
Iliad 11.696	ἐκ δʼ ὃ γέρων ἀγέλην τε βοῶν καὶ πῶϋ μέγʼ οἰῶν
Iliad 11.697	εἵλετο κρινάμενος τριηκόσιʼ ἠδὲ νομῆας.
Iliad 11.698	καὶ γὰρ τῷ χρεῖος μέγʼ ὀφείλετʼ ἐν Ἤλιδι δίῃ
Iliad 11.699	τέσσαρες ἀθλοφόροι ἵπποι αὐτοῖσιν ὄχεσφιν
Iliad 11.700	ἐλθόντες μετʼ ἄεθλα· περὶ τρίποδος γὰρ ἔμελλον
Iliad 11.701	θεύσεσθαι· τοὺς δʼ αὖθι ἄναξ ἀνδρῶν Αὐγείας
Iliad 11.702	κάσχεθε, τὸν δʼ ἐλατῆρʼ ἀφίει ἀκαχήμενον ἵππων.
Iliad 11.703	τῶν ὃ γέρων ἐπέων κεχολωμένος ἠδὲ καὶ ἔργων
Iliad 11.704	ἐξέλετʼ ἄσπετα πολλά· τὰ δʼ ἄλλʼ ἐς δῆμον ἔδωκε
Iliad 11.705	δαιτρεύειν, μή τίς οἱ ἀτεμβόμενος κίοι ἴσης.
Iliad 11.706	ἡμεῖς μὲν τὰ ἕκαστα διείπομεν, ἀμφί τε ἄστυ
Iliad 11.707	ἕρδομεν ἱρὰ θεοῖς· οἳ δὲ τρίτῳ ἤματι πάντες
Iliad 11.708	ἦλθον ὁμῶς αὐτοί τε πολεῖς καὶ μώνυχες ἵπποι
Iliad 11.709	πανσυδίῃ· μετὰ δέ σφι Μολίονε θωρήσσοντο
Iliad 11.710	παῖδʼ ἔτʼ ἐόντʼ, οὔ πω μάλα εἰδότε θούριδος ἀλκῆς.
Iliad 11.711	ἔστι δέ τις Θρυόεσσα πόλις αἰπεῖα κολώνη
Iliad 11.712	τηλοῦ ἐπʼ Ἀλφειῷ, νεάτη Πύλου ἠμαθόεντος·
Iliad 11.713	τὴν ἀμφεστρατόωντο διαρραῖσαι μεμαῶτες.
Iliad 11.714	ἀλλʼ ὅτε πᾶν πεδίον μετεκίαθον, ἄμμι δʼ Ἀθήνη
Iliad 11.715	ἄγγελος ἦλθε θέουσʼ ἀπʼ Ὀλύμπου θωρήσσεσθαι
Iliad 11.716	ἔννυχος, οὐδʼ ἀέκοντα Πύλον κάτα λαὸν ἄγειρεν
Iliad 11.717	ἀλλὰ μάλʼ ἐσσυμένους πολεμίζειν. οὐδέ με Νηλεὺς
Iliad 11.718	εἴα θωρήσσεσθαι, ἀπέκρυψεν δέ μοι ἵππους·
Iliad 11.719	οὐ γάρ πώ τί μʼ ἔφη ἴδμεν πολεμήϊα ἔργα.
Iliad 11.720	ἀλλὰ καὶ ὧς ἱππεῦσι μετέπρεπον ἡμετέροισι
Iliad 11.721	καὶ πεζός περ ἐών, ἐπεὶ ὧς ἄγε νεῖκος Ἀθήνη.
Iliad 11.722	ἔστι δέ τις ποταμὸς Μινυήϊος εἰς ἅλα βάλλων
Iliad 11.723	ἐγγύθεν Ἀρήνης, ὅθι μείναμεν Ἠῶ δῖαν
Iliad 11.724	ἱππῆες Πυλίων, τὰ δʼ ἐπέρρεον ἔθνεα πεζῶν.
Iliad 11.725	ἔνθεν πανσυδίῃ σὺν τεύχεσι θωρηχθέντες
Iliad 11.726	ἔνδιοι ἱκόμεσθʼ ἱερὸν ῥόον Ἀλφειοῖο.
Iliad 11.727	ἔνθα Διὶ ῥέξαντες ὑπερμενεῖ ἱερὰ καλά,
Iliad 11.728	ταῦρον δʼ Ἀλφειῷ, ταῦρον δὲ Ποσειδάωνι,
Iliad 11.729	αὐτὰρ Ἀθηναίη γλαυκώπιδι βοῦν ἀγελαίην,
Iliad 11.730	δόρπον ἔπειθʼ ἑλόμεσθα κατὰ στρατὸν ἐν τελέεσσι,
Iliad 11.731	καὶ κατεκοιμήθημεν ἐν ἔντεσιν οἷσιν ἕκαστος
Iliad 11.732	ἀμφὶ ῥοὰς ποταμοῖο. ἀτὰρ μεγάθυμοι Ἐπειοὶ
Iliad 11.733	ἀμφέσταν δὴ ἄστυ διαρραῖσαι μεμαῶτες·
Iliad 11.734	ἀλλά σφι προπάροιθε φάνη μέγα ἔργον Ἄρηος·
Iliad 11.735	εὖτε γὰρ ἠέλιος φαέθων ὑπερέσχεθε γαίης,
Iliad 11.736	συμφερόμεσθα μάχῃ Διί τʼ εὐχόμενοι καὶ Ἀθήνῃ.
Iliad 11.737	ἀλλʼ ὅτε δὴ Πυλίων καὶ Ἐπειῶν ἔπλετο νεῖκος,
Iliad 11.738	πρῶτος ἐγὼν ἕλον ἄνδρα, κόμισσα δὲ μώνυχας ἵππους,
Iliad 11.739	Μούλιον αἰχμητήν· γαμβρὸς δʼ ἦν Αὐγείαο,
Iliad 11.740	πρεσβυτάτην δὲ θύγατρʼ εἶχε ξανθὴν Ἀγαμήδην,
Iliad 11.741	ἣ τόσα φάρμακα ᾔδη ὅσα τρέφει εὐρεῖα χθών.
Iliad 11.742	τὸν μὲν ἐγὼ προσιόντα βάλον χαλκήρεϊ δουρί,
Iliad 11.743	ἤριπε δʼ ἐν κονίῃσιν· ἐγὼ δʼ ἐς δίφρον ὀρούσας
Iliad 11.744	στῆν ῥα μετὰ προμάχοισιν· ἀτὰρ μεγάθυμοι Ἐπειοὶ
Iliad 11.745	ἔτρεσαν ἄλλυδις ἄλλος, ἐπεὶ ἴδον ἄνδρα πεσόντα
Iliad 11.746	ἡγεμόνʼ ἱππήων, ὃς ἀριστεύεσκε μάχεσθαι.
Iliad 11.747	αὐτὰρ ἐγὼν ἐπόρουσα κελαινῇ λαίλαπι ἶσος,
Iliad 11.748	πεντήκοντα δʼ ἕλον δίφρους, δύο δʼ ἀμφὶς ἕκαστον
Iliad 11.749	φῶτες ὀδὰξ ἕλον οὖδας ἐμῷ ὑπὸ δουρὶ δαμέντες.
Iliad 11.750	καί νύ κεν Ἀκτορίωνε Μολίονε παῖδʼ ἀλάπαξα,
Iliad 11.751	εἰ μή σφωε πατὴρ εὐρὺ κρείων ἐνοσίχθων
Iliad 11.752	ἐκ πολέμου ἐσάωσε καλύψας ἠέρι πολλῇ.
Iliad 11.753	ἔνθα Ζεὺς Πυλίοισι μέγα κράτος ἐγγυάλιξε·
Iliad 11.754	τόφρα γὰρ οὖν ἑπόμεσθα διὰ σπιδέος πεδίοιο
Iliad 11.755	κτείνοντές τʼ αὐτοὺς ἀνά τʼ ἔντεα καλὰ λέγοντες,
Iliad 11.756	ὄφρʼ ἐπὶ Βουπρασίου πολυπύρου βήσαμεν ἵππους
Iliad 11.757	πέτρης τʼ Ὠλενίης, καὶ Ἀλησίου ἔνθα κολώνη
Iliad 11.758	κέκληται· ὅθεν αὖτις ἀπέτραπε λαὸν Ἀθήνη.
Iliad 11.759	ἔνθʼ ἄνδρα κτείνας πύματον λίπον· αὐτὰρ Ἀχαιοὶ
Iliad 11.760	ἂψ ἀπὸ Βουπρασίοιο Πύλονδʼ ἔχον ὠκέας ἵππους,
Iliad 11.761	πάντες δʼ εὐχετόωντο θεῶν Διὶ Νέστορί τʼ ἀνδρῶν.
Iliad 11.762	ὣς ἔον, εἴ ποτʼ ἔον γε, μετʼ ἀνδράσιν. αὐτὰρ Ἀχιλλεὺς
Iliad 11.763	οἶος τῆς ἀρετῆς ἀπονήσεται· ἦ τέ μιν οἴω
Iliad 11.764	πολλὰ μετακλαύσεσθαι ἐπεί κʼ ἀπὸ λαὸς ὄληται.
Iliad 11.765	ὦ πέπον ἦ μὲν σοί γε Μενοίτιος ὧδʼ ἐπέτελλεν
Iliad 11.766	ἤματι τῷ ὅτε σʼ ἐκ Φθίης Ἀγαμέμνονι πέμπε,
Iliad 11.767	νῶϊ δέ τʼ ἔνδον ἐόντες ἐγὼ καὶ δῖος Ὀδυσσεὺς
Iliad 11.768	πάντα μάλʼ ἐν μεγάροις ἠκούομεν ὡς ἐπέτελλε.
Iliad 11.769	Πηλῆος δʼ ἱκόμεσθα δόμους εὖ ναιετάοντας
Iliad 11.770	λαὸν ἀγείροντες κατʼ Ἀχαιΐδα πουλυβότειραν.
Iliad 11.771	ἔνθα δʼ ἔπειθʼ ἥρωα Μενοίτιον εὕρομεν ἔνδον
Iliad 11.772	ἠδὲ σέ, πὰρ δʼ Ἀχιλῆα· γέρων δʼ ἱππηλάτα Πηλεὺς
Iliad 11.773	πίονα μηρία καῖε βοὸς Διὶ τερπικεραύνῳ
Iliad 11.774	αὐλῆς ἐν χόρτῳ· ἔχε δὲ χρύσειον ἄλεισον
Iliad 11.775	σπένδων αἴθοπα οἶνον ἐπʼ αἰθομένοις ἱεροῖσι.
Iliad 11.776	σφῶϊ μὲν ἀμφὶ βοὸς ἕπετον κρέα, νῶϊ δʼ ἔπειτα
Iliad 11.777	στῆμεν ἐνὶ προθύροισι· ταφὼν δʼ ἀνόρουσεν Ἀχιλλεύς,
Iliad 11.778	ἐς δʼ ἄγε χειρὸς ἑλών, κατὰ δʼ ἑδριάασθαι ἄνωγε,
Iliad 11.779	ξείνιά τʼ εὖ παρέθηκεν, ἅ τε ξείνοις θέμις ἐστίν.
Iliad 11.780	αὐτὰρ ἐπεὶ τάρπημεν ἐδητύος ἠδὲ ποτῆτος,
Iliad 11.781	ἦρχον ἐγὼ μύθοιο κελεύων ὔμμʼ ἅμʼ ἕπεσθαι·
Iliad 11.782	σφὼ δὲ μάλʼ ἠθέλετον, τὼ δʼ ἄμφω πόλλʼ ἐπέτελλον.
Iliad 11.783	Πηλεὺς μὲν ᾧ παιδὶ γέρων ἐπέτελλʼ Ἀχιλῆϊ
Iliad 11.784	αἰὲν ἀριστεύειν καὶ ὑπείροχον ἔμμεναι ἄλλων·
Iliad 11.785	σοὶ δʼ αὖθʼ ὧδʼ ἐπέτελλε Μενοίτιος Ἄκτορος υἱός·
Iliad 11.786	τέκνον ἐμὸν γενεῇ μὲν ὑπέρτερός ἐστιν Ἀχιλλεύς,
Iliad 11.787	πρεσβύτερος δὲ σύ ἐσσι· βίῃ δʼ ὅ γε πολλὸν ἀμείνων.
Iliad 11.788	ἀλλʼ εὖ οἱ φάσθαι πυκινὸν ἔπος ἠδʼ ὑποθέσθαι
Iliad 11.789	καί οἱ σημαίνειν· ὃ δὲ πείσεται εἰς ἀγαθόν περ.
Iliad 11.790	ὣς ἐπέτελλʼ ὃ γέρων, σὺ δὲ λήθεαι· ἀλλʼ ἔτι καὶ νῦν
Iliad 11.791	ταῦτʼ εἴποις Ἀχιλῆϊ δαΐφρονι αἴ κε πίθηται.
Iliad 11.792	τίς δʼ οἶδʼ εἴ κέν οἱ σὺν δαίμονι θυμὸν ὀρίναις
Iliad 11.793	παρειπών; ἀγαθὴ δὲ παραίφασίς ἐστιν ἑταίρου.
Iliad 11.794	εἰ δέ τινα φρεσὶν ᾗσι θεοπροπίην ἀλεείνει
Iliad 11.795	καί τινά οἱ πὰρ Ζηνὸς ἐπέφραδε πότνια μήτηρ,
Iliad 11.796	ἀλλὰ σέ περ προέτω, ἅμα δʼ ἄλλος λαὸς ἑπέσθω
Iliad 11.797	Μυρμιδόνων, αἴ κέν τι φόως Δαναοῖσι γένηαι·
Iliad 11.798	καί τοι τεύχεα καλὰ δότω πόλεμον δὲ φέρεσθαι,
Iliad 11.799	αἴ κέ σε τῷ εἴσκοντες ἀπόσχωνται πολέμοιο
Iliad 11.800	Τρῶες, ἀναπνεύσωσι δʼ ἀρήϊοι υἷες Ἀχαιῶν
Iliad 11.801	τειρόμενοι· ὀλίγη δέ τʼ ἀνάπνευσις πολέμοιο.
Iliad 11.802	ῥεῖα δέ κʼ ἀκμῆτες κεκμηότας ἄνδρας ἀϋτῇ
Iliad 11.803	ὤσαισθε προτὶ ἄστυ νεῶν ἄπο καὶ κλισιάων.
Iliad 11.804	ὣς φάτο, τῷ δʼ ἄρα θυμὸν ἐνὶ στήθεσσιν ὄρινε,
Iliad 11.805	βῆ δὲ θέειν παρὰ νῆας ἐπʼ Αἰακίδην Ἀχιλῆα.
Iliad 11.806	ἀλλʼ ὅτε δὴ κατὰ νῆας Ὀδυσσῆος θείοιο
Iliad 11.807	ἷξε θέων Πάτροκλος, ἵνά σφʼ ἀγορή τε θέμις τε
Iliad 11.808	ἤην, τῇ δὴ καί σφι θεῶν ἐτετεύχατο βωμοί,
Iliad 11.809	ἔνθά οἱ Εὐρύπυλος βεβλημένος ἀντεβόλησε
Iliad 11.810	διογενὴς Εὐαιμονίδης κατὰ μηρὸν ὀϊστῷ
Iliad 11.811	σκάζων ἐκ πολέμου· κατὰ δὲ νότιος ῥέεν ἱδρὼς
Iliad 11.812	ὤμων καὶ κεφαλῆς, ἀπὸ δʼ ἕλκεος ἀργαλέοιο
Iliad 11.813	αἷμα μέλαν κελάρυζε· νόος γε μὲν ἔμπεδος ἦεν.
Iliad 11.814	τὸν δὲ ἰδὼν ᾤκτειρε Μενοιτίου ἄλκιμος υἱός,
Iliad 11.815	καί ῥʼ ὀλοφυρόμενος ἔπεα πτερόεντα προσηύδα·
Iliad 11.816	ἆ δειλοὶ Δαναῶν ἡγήτορες ἠδὲ μέδοντες
Iliad 11.817	ὣς ἄρʼ ἐμέλλετε τῆλε φίλων καὶ πατρίδος αἴης
Iliad 11.818	ἄσειν ἐν Τροίῃ ταχέας κύνας ἀργέτι δημῷ.
Iliad 11.819	ἀλλʼ ἄγε μοι τόδε εἰπὲ διοτρεφὲς Εὐρύπυλʼ ἥρως,
Iliad 11.820	ἤ ῥʼ ἔτι που σχήσουσι πελώριον Ἕκτορʼ Ἀχαιοί,
Iliad 11.821	ἦ ἤδη φθίσονται ὑπʼ αὐτοῦ δουρὶ δαμέντες;
Iliad 11.822	τὸν δʼ αὖτʼ Εὐρύπυλος βεβλημένος ἀντίον ηὔδα·
Iliad 11.823	οὐκέτι διογενὲς Πατρόκλεες ἄλκαρ Ἀχαιῶν
Iliad 11.824	ἔσσεται, ἀλλʼ ἐν νηυσὶ μελαίνῃσιν πεσέονται.
Iliad 11.825	οἳ μὲν γὰρ δὴ πάντες, ὅσοι πάρος ἦσαν ἄριστοι,
Iliad 11.826	ἐν νηυσὶν κέαται βεβλημένοι οὐτάμενοί τε
Iliad 11.827	χερσὶν ὕπο Τρώων· τῶν δὲ σθένος ὄρνυται αἰέν.
Iliad 11.828	ἀλλʼ ἐμὲ μὲν σὺ σάωσον ἄγων ἐπὶ νῆα μέλαιναν,
Iliad 11.829	μηροῦ δʼ ἔκταμʼ ὀϊστόν, ἀπʼ αὐτοῦ δʼ αἷμα κελαινὸν
Iliad 11.830	νίζʼ ὕδατι λιαρῷ, ἐπὶ δʼ ἤπια φάρμακα πάσσε
Iliad 11.831	ἐσθλά, τά σε προτί φασιν Ἀχιλλῆος δεδιδάχθαι,
Iliad 11.832	ὃν Χείρων ἐδίδαξε δικαιότατος Κενταύρων.
Iliad 11.833	ἰητροὶ μὲν γὰρ Ποδαλείριος ἠδὲ Μαχάων
Iliad 11.834	τὸν μὲν ἐνὶ κλισίῃσιν ὀΐομαι ἕλκος ἔχοντα
Iliad 11.835	χρηΐζοντα καὶ αὐτὸν ἀμύμονος ἰητῆρος
Iliad 11.836	κεῖσθαι· ὃ δʼ ἐν πεδίῳ Τρώων μένει ὀξὺν Ἄρηα.
Iliad 11.837	τὸν δʼ αὖτε προσέειπε Μενοιτίου ἄλκιμος υἱός·
Iliad 11.838	πῶς τὰρ ἔοι τάδε ἔργα; τί ῥέξομεν Εὐρύπυλʼ ἥρως;
Iliad 11.839	ἔρχομαι ὄφρʼ Ἀχιλῆϊ δαΐφρονι μῦθον ἐνίσπω
Iliad 11.840	ὃν Νέστωρ ἐπέτελλε Γερήνιος οὖρος Ἀχαιῶν·
Iliad 11.841	ἀλλʼ οὐδʼ ὧς περ σεῖο μεθήσω τειρομένοιο.
Iliad 11.842	ἦ, καὶ ὑπὸ στέρνοιο λαβὼν ἄγε ποιμένα λαῶν
Iliad 11.843	ἐς κλισίην· θεράπων δὲ ἰδὼν ὑπέχευε βοείας.
Iliad 11.844	ἔνθά μιν ἐκτανύσας ἐκ μηροῦ τάμνε μαχαίρῃ
Iliad 11.845	ὀξὺ βέλος περιπευκές, ἀπʼ αὐτοῦ δʼ αἷμα κελαινὸν
Iliad 11.846	νίζʼ ὕδατι λιαρῷ, ἐπὶ δὲ ῥίζαν βάλε πικρὴν
Iliad 11.847	χερσὶ διατρίψας ὀδυνήφατον, ἥ οἱ ἁπάσας
Iliad 11.848	ἔσχʼ ὀδύνας· τὸ μὲν ἕλκος ἐτέρσετο, παύσατο δʼ αἷμα.
Iliad 12.1	ὣς ὃ μὲν ἐν κλισίῃσι Μενοιτίου ἄλκιμος υἱὸς
Iliad 12.2	ἰᾶτʼ Εὐρύπυλον βεβλημένον· οἳ δὲ μάχοντο
Iliad 12.3	Ἀργεῖοι καὶ Τρῶες ὁμιλαδόν· οὐδʼ ἄρʼ ἔμελλε
Iliad 12.4	τάφρος ἔτι σχήσειν Δαναῶν καὶ τεῖχος ὕπερθεν
Iliad 12.5	εὐρύ, τὸ ποιήσαντο νεῶν ὕπερ, ἀμφὶ δὲ τάφρον
Iliad 12.6	ἤλασαν· οὐδὲ θεοῖσι δόσαν κλειτὰς ἑκατόμβας·
Iliad 12.7	ὄφρά σφιν νῆάς τε θοὰς καὶ ληΐδα πολλὴν
Iliad 12.8	ἐντὸς ἔχον ῥύοιτο· θεῶν δʼ ἀέκητι τέτυκτο
Iliad 12.9	ἀθανάτων· τὸ καὶ οὔ τι πολὺν χρόνον ἔμπεδον ἦεν.
Iliad 12.10	ὄφρα μὲν Ἕκτωρ ζωὸς ἔην καὶ μήνιʼ Ἀχιλλεὺς
Iliad 12.11	καὶ Πριάμοιο ἄνακτος ἀπόρθητος πόλις ἔπλεν,
Iliad 12.12	τόφρα δὲ καὶ μέγα τεῖχος Ἀχαιῶν ἔμπεδον ἦεν.
Iliad 12.13	αὐτὰρ ἐπεὶ κατὰ μὲν Τρώων θάνον ὅσσοι ἄριστοι,
Iliad 12.14	πολλοὶ δʼ Ἀργείων οἳ μὲν δάμεν, οἳ δὲ λίποντο,
Iliad 12.15	πέρθετο δὲ Πριάμοιο πόλις δεκάτῳ ἐνιαυτῷ,
Iliad 12.16	Ἀργεῖοι δʼ ἐν νηυσὶ φίλην ἐς πατρίδʼ ἔβησαν,
Iliad 12.17	δὴ τότε μητιόωντο Ποσειδάων καὶ Ἀπόλλων
Iliad 12.18	τεῖχος ἀμαλδῦναι ποταμῶν μένος εἰσαγαγόντες.
Iliad 12.19	ὅσσοι ἀπʼ Ἰδαίων ὀρέων ἅλα δὲ προρέουσι,
Iliad 12.20	Ῥῆσός θʼ Ἑπτάπορός τε Κάρησός τε Ῥοδίος τε
Iliad 12.21	Γρήνικός τε καὶ Αἴσηπος δῖός τε Σκάμανδρος
Iliad 12.22	καὶ Σιμόεις, ὅθι πολλὰ βοάγρια καὶ τρυφάλειαι
Iliad 12.23	κάππεσον ἐν κονίῃσι καὶ ἡμιθέων γένος ἀνδρῶν·
Iliad 12.24	τῶν πάντων ὁμόσε στόματʼ ἔτραπε Φοῖβος Ἀπόλλων,
Iliad 12.25	ἐννῆμαρ δʼ ἐς τεῖχος ἵει ῥόον· ὗε δʼ ἄρα Ζεὺς
Iliad 12.26	συνεχές, ὄφρά κε θᾶσσον ἁλίπλοα τείχεα θείη.
Iliad 12.27	αὐτὸς δʼ ἐννοσίγαιος ἔχων χείρεσσι τρίαιναν
Iliad 12.28	ἡγεῖτʼ, ἐκ δʼ ἄρα πάντα θεμείλια κύμασι πέμπε
Iliad 12.29	φιτρῶν καὶ λάων, τὰ θέσαν μογέοντες Ἀχαιοί,
Iliad 12.30	λεῖα δʼ ἐποίησεν παρʼ ἀγάρροον Ἑλλήσποντον,
Iliad 12.31	αὖτις δʼ ἠϊόνα μεγάλην ψαμάθοισι κάλυψε
Iliad 12.32	τεῖχος ἀμαλδύνας· ποταμοὺς δʼ ἔτρεψε νέεσθαι
Iliad 12.33	κὰρ ῥόον, ᾗ περ πρόσθεν ἵεν καλλίρροον ὕδωρ.
Iliad 12.34	ὣς ἄρʼ ἔμελλον ὄπισθε Ποσειδάων καὶ Ἀπόλλων
Iliad 12.35	θησέμεναι· τότε δʼ ἀμφὶ μάχη ἐνοπή τε δεδήει
Iliad 12.36	τεῖχος ἐΰδμητον, κανάχιζε δὲ δούρατα πύργων
Iliad 12.37	βαλλόμενʼ· Ἀργεῖοι δὲ Διὸς μάστιγι δαμέντες
Iliad 12.38	νηυσὶν ἔπι γλαφυρῇσιν ἐελμένοι ἰσχανόωντο
Iliad 12.39	Ἕκτορα δειδιότες, κρατερὸν μήστωρα φόβοιο·
Iliad 12.40	αὐτὰρ ὅ γʼ ὡς τὸ πρόσθεν ἐμάρνατο ἶσος ἀέλλῃ·
Iliad 12.41	ὡς δʼ ὅτʼ ἂν ἔν τε κύνεσσι καὶ ἀνδράσι θηρευτῇσι
Iliad 12.42	κάπριος ἠὲ λέων στρέφεται σθένεϊ βλεμεαίνων·
Iliad 12.43	οἳ δέ τε πυργηδὸν σφέας αὐτοὺς ἀρτύναντες
Iliad 12.44	ἀντίον ἵστανται καὶ ἀκοντίζουσι θαμειὰς
Iliad 12.45	αἰχμὰς ἐκ χειρῶν· τοῦ δʼ οὔ ποτε κυδάλιμον κῆρ
Iliad 12.46	ταρβεῖ οὐδὲ φοβεῖται, ἀγηνορίη δέ μιν ἔκτα·
Iliad 12.47	ταρφέα τε στρέφεται στίχας ἀνδρῶν πειρητίζων·
Iliad 12.48	ὅππῃ τʼ ἰθύσῃ τῇ εἴκουσι στίχες ἀνδρῶν·
Iliad 12.49	ὣς Ἕκτωρ ἀνʼ ὅμιλον ἰὼν ἐλλίσσεθʼ ἑταίρους
Iliad 12.50	τάφρον ἐποτρύνων διαβαινέμεν· οὐδέ οἱ ἵπποι
Iliad 12.51	τόλμων ὠκύποδες, μάλα δὲ χρεμέτιζον ἐπʼ ἄκρῳ
Iliad 12.52	χείλει ἐφεσταότες· ἀπὸ γὰρ δειδίσσετο τάφρος
Iliad 12.53	εὐρεῖʼ, οὔτʼ ἄρʼ ὑπερθορέειν σχεδὸν οὔτε περῆσαι
Iliad 12.54	ῥηϊδίη· κρημνοὶ γὰρ ἐπηρεφέες περὶ πᾶσαν
Iliad 12.55	ἕστασαν ἀμφοτέρωθεν, ὕπερθεν δὲ σκολόπεσσιν
Iliad 12.56	ὀξέσιν ἠρήρει, τοὺς ἵστασαν υἷες Ἀχαιῶν
Iliad 12.57	πυκνοὺς καὶ μεγάλους δηΐων ἀνδρῶν ἀλεωρήν.
Iliad 12.58	ἔνθʼ οὔ κεν ῥέα ἵππος ἐΰτροχον ἅρμα τιταίνων
Iliad 12.59	ἐσβαίη, πεζοὶ δὲ μενοίνεον εἰ τελέουσι.
Iliad 12.60	δὴ τότε Πουλυδάμας θρασὺν Ἕκτορα εἶπε παραστάς·
Iliad 12.61	Ἕκτορ τʼ ἠδʼ ἄλλοι Τρώων ἀγοὶ ἠδʼ ἐπικούρων
Iliad 12.62	ἀφραδέως διὰ τάφρον ἐλαύνομεν ὠκέας ἵππους·
Iliad 12.63	ἣ δὲ μάλʼ ἀργαλέη περάαν· σκόλοπες γὰρ ἐν αὐτῇ
Iliad 12.64	ὀξέες ἑστᾶσιν, ποτὶ δʼ αὐτοὺς τεῖχος Ἀχαιῶν,
Iliad 12.65	ἔνθʼ οὔ πως ἔστιν καταβήμεναι οὐδὲ μάχεσθαι
Iliad 12.66	ἱππεῦσι· στεῖνος γάρ, ὅθι τρώσεσθαι ὀΐω.
Iliad 12.67	εἰ μὲν γὰρ τοὺς πάγχυ κακὰ φρονέων ἀλαπάζει
Iliad 12.68	Ζεὺς ὑψιβρεμέτης, Τρώεσσι δὲ ἵετʼ ἀρήγειν,
Iliad 12.69	ἦ τʼ ἂν ἔγωγʼ ἐθέλοιμι καὶ αὐτίκα τοῦτο γενέσθαι,
Iliad 12.70	νωνύμνους ἀπολέσθαι ἀπʼ Ἄργεος ἐνθάδʼ Ἀχαιούς·
Iliad 12.71	εἰ δέ χʼ ὑποστρέψωσι, παλίωξις δὲ γένηται
Iliad 12.72	ἐκ νηῶν καὶ τάφρῳ ἐνιπλήξωμεν ὀρυκτῇ,
Iliad 12.73	οὐκέτʼ ἔπειτʼ ὀΐω οὐδʼ ἄγγελον ἀπονέεσθαι
Iliad 12.74	ἄψορρον προτὶ ἄστυ ἑλιχθέντων ὑπʼ Ἀχαιῶν.
Iliad 12.75	ἀλλʼ ἄγεθʼ ὡς ἂν ἐγὼ εἴπω πειθώμεθα πάντες·
Iliad 12.76	ἵππους μὲν θεράποντες ἐρυκόντων ἐπὶ τάφρῳ,
Iliad 12.77	αὐτοὶ δὲ πρυλέες σὺν τεύχεσι θωρηχθέντες
Iliad 12.78	Ἕκτορι πάντες ἑπώμεθʼ ἀολλέες· αὐτὰρ Ἀχαιοὶ
Iliad 12.79	οὐ μενέουσʼ εἰ δή σφιν ὀλέθρου πείρατʼ ἐφῆπται.
Iliad 12.80	ὣς φάτο Πουλυδάμας, ἅδε δʼ Ἕκτορι μῦθος ἀπήμων,
Iliad 12.81	αὐτίκα δʼ ἐξ ὀχέων σὺν τεύχεσιν ἆλτο χαμᾶζε.
Iliad 12.82	οὐδὲ μὲν ἄλλοι Τρῶες ἐφʼ ἵππων ἠγερέθοντο,
Iliad 12.83	ἀλλʼ ἀπὸ πάντες ὄρουσαν, ἐπεὶ ἴδον Ἕκτορα δῖον.
Iliad 12.84	ἡνιόχῳ μὲν ἔπειτα ἑῷ ἐπέτελλεν ἕκαστος
Iliad 12.85	ἵππους εὖ κατὰ κόσμον ἐρυκέμεν αὖθʼ ἐπὶ τάφρῳ·
Iliad 12.86	οἳ δὲ διαστάντες σφέας αὐτοὺς ἀρτύναντες
Iliad 12.87	πένταχα κοσμηθέντες ἅμʼ ἡγεμόνεσσιν ἕποντο.
Iliad 12.88	οἳ μὲν ἅμʼ Ἕκτορʼ ἴσαν καὶ ἀμύμονι Πουλυδάμαντι,
Iliad 12.89	οἳ πλεῖστοι καὶ ἄριστοι ἔσαν, μέμασαν δὲ μάλιστα
Iliad 12.90	τεῖχος ῥηξάμενοι κοίλῃς ἐπὶ νηυσὶ μάχεσθαι.
Iliad 12.91	καί σφιν Κεβριόνης τρίτος εἵπετο· πὰρ δʼ ἄρʼ ὄχεσφιν
Iliad 12.92	ἄλλον Κεβριόναο χερείονα κάλλιπεν Ἕκτωρ.
Iliad 12.93	τῶν δʼ ἑτέρων Πάρις ἦρχε καὶ Ἀλκάθοος καὶ Ἀγήνωρ,
Iliad 12.94	τῶν δὲ τρίτων Ἕλενος καὶ Δηΐφοβος θεοειδὴς
Iliad 12.95	υἷε δύω Πριάμοιο· τρίτος δʼ ἦν Ἄσιος ἥρως
Iliad 12.96	Ἄσιος Ὑρτακίδης, ὃν Ἀρίσβηθεν φέρον ἵπποι
Iliad 12.97	αἴθωνες μεγάλοι ποταμοῦ ἄπο Σελλήεντος.
Iliad 12.98	τῶν δὲ τετάρτων ἦρχεν ἐῢς πάϊς Ἀγχίσαο
Iliad 12.99	Αἰνείας, ἅμα τῷ γε δύω Ἀντήνορος υἷε
Iliad 12.100	Ἀρχέλοχός τʼ Ἀκάμας τε μάχης εὖ εἰδότε πάσης.
Iliad 12.101	Σαρπηδὼν δʼ ἡγήσατʼ ἀγακλειτῶν ἐπικούρων,
Iliad 12.102	πρὸς δʼ ἕλετο Γλαῦκον καὶ ἀρήϊον Ἀστεροπαῖον·
Iliad 12.103	οἳ γάρ οἱ εἴσαντο διακριδὸν εἶναι ἄριστοι
Iliad 12.104	τῶν ἄλλων μετά γʼ αὐτόν· ὃ δʼ ἔπρεπε καὶ διὰ πάντων.
Iliad 12.105	οἳ δʼ ἐπεὶ ἀλλήλους ἄραρον τυκτῇσι βόεσσι
Iliad 12.106	βάν ῥʼ ἰθὺς Δαναῶν λελιημένοι, οὐδʼ ἔτʼ ἔφαντο
Iliad 12.107	σχήσεσθʼ, ἀλλʼ ἐν νηυσὶ μελαίνῃσιν πεσέεσθαι.
Iliad 12.108	ἔνθʼ ἄλλοι Τρῶες τηλεκλειτοί τʼ ἐπίκουροι
Iliad 12.109	βουλῇ Πουλυδάμαντος ἀμωμήτοιο πίθοντο·
Iliad 12.110	ἀλλʼ οὐχ Ὑρτακίδης ἔθελʼ Ἄσιος ὄρχαμος ἀνδρῶν
Iliad 12.111	αὖθι λιπεῖν ἵππους τε καὶ ἡνίοχον θεράποντα,
Iliad 12.112	ἀλλὰ σὺν αὐτοῖσιν πέλασεν νήεσσι θοῇσι
Iliad 12.113	νήπιος, οὐδʼ ἄρʼ ἔμελλε κακὰς ὑπὸ κῆρας ἀλύξας
Iliad 12.114	ἵπποισιν καὶ ὄχεσφιν ἀγαλλόμενος παρὰ νηῶν
Iliad 12.115	ἂψ ἀπονοστήσειν προτὶ Ἴλιον ἠνεμόεσσαν·
Iliad 12.116	πρόσθεν γάρ μιν μοῖρα δυσώνυμος ἀμφεκάλυψεν
Iliad 12.117	ἔγχεϊ Ἰδομενῆος ἀγαυοῦ Δευκαλίδαο.
Iliad 12.118	εἴσατο γὰρ νηῶν ἐπʼ ἀριστερά, τῇ περ Ἀχαιοὶ
Iliad 12.119	ἐκ πεδίου νίσοντο σὺν ἵπποισιν καὶ ὄχεσφι·
Iliad 12.120	τῇ ῥʼ ἵππους τε καὶ ἅρμα διήλασεν, οὐδὲ πύλῃσιν
Iliad 12.121	εὗρʼ ἐπικεκλιμένας σανίδας καὶ μακρὸν ὀχῆα,
Iliad 12.122	ἀλλʼ ἀναπεπταμένας ἔχον ἀνέρες, εἴ τινʼ ἑταίρων
Iliad 12.123	ἐκ πολέμου φεύγοντα σαώσειαν μετὰ νῆας.
Iliad 12.124	τῇ ῥʼ ἰθὺς φρονέων ἵππους ἔχε, τοὶ δʼ ἅμʼ ἕποντο
Iliad 12.125	ὀξέα κεκλήγοντες· ἔφαντο γὰρ οὐκ ἔτʼ Ἀχαιοὺς
Iliad 12.126	σχήσεσθʼ, ἀλλʼ ἐν νηυσὶ μελαίνῃσιν πεσέεσθαι
Iliad 12.127	νήπιοι, ἐν δὲ πύλῃσι δύʼ ἀνέρας εὗρον ἀρίστους
Iliad 12.128	υἷας ὑπερθύμους Λαπιθάων αἰχμητάων,
Iliad 12.129	τὸν μὲν Πειριθόου υἷα κρατερὸν Πολυποίτην,
Iliad 12.130	τὸν δὲ Λεοντῆα βροτολοιγῷ ἶσον Ἄρηϊ.
Iliad 12.131	τὼ μὲν ἄρα προπάροιθε πυλάων ὑψηλάων
Iliad 12.132	ἕστασαν ὡς ὅτε τε δρύες οὔρεσιν ὑψικάρηνοι,
Iliad 12.133	αἵ τʼ ἄνεμον μίμνουσι καὶ ὑετὸν ἤματα πάντα
Iliad 12.134	ῥίζῃσιν μεγάλῃσι διηνεκέεσσʼ ἀραρυῖαι·
Iliad 12.135	ὣς ἄρα τὼ χείρεσσι πεποιθότες ἠδὲ βίηφι
Iliad 12.136	μίμνον ἐπερχόμενον μέγαν Ἄσιον οὐδὲ φέβοντο.
Iliad 12.137	οἳ δʼ ἰθὺς πρὸς τεῖχος ἐΰδμητον βόας αὔας
Iliad 12.138	ὑψόσʼ ἀνασχόμενοι ἔκιον μεγάλῳ ἀλαλητῷ
Iliad 12.139	Ἄσιον ἀμφὶ ἄνακτα καὶ Ἰαμενὸν καὶ Ὀρέστην
Iliad 12.140	Ἀσιάδην τʼ Ἀδάμαντα Θόωνά τε Οἰνόμαόν τε.
Iliad 12.141	οἳ δʼ ἤτοι εἷος μὲν ἐϋκνήμιδας Ἀχαιοὺς
Iliad 12.142	ὄρνυον ἔνδον ἐόντες ἀμύνεσθαι περὶ νηῶν·
Iliad 12.143	αὐτὰρ ἐπεὶ δὴ τεῖχος ἐπεσσυμένους ἐνόησαν
Iliad 12.144	Τρῶας, ἀτὰρ Δαναῶν γένετο ἰαχή τε φόβος τε,
Iliad 12.145	ἐκ δὲ τὼ ἀΐξαντε πυλάων πρόσθε μαχέσθην
Iliad 12.146	ἀγροτέροισι σύεσσιν ἐοικότε, τώ τʼ ἐν ὄρεσσιν
Iliad 12.147	ἀνδρῶν ἠδὲ κυνῶν δέχαται κολοσυρτὸν ἰόντα,
Iliad 12.148	δοχμώ τʼ ἀΐσσοντε περὶ σφίσιν ἄγνυτον ὕλην
Iliad 12.149	πρυμνὴν ἐκτάμνοντες, ὑπαὶ δέ τε κόμπος ὀδόντων
Iliad 12.150	γίγνεται εἰς ὅ κέ τίς τε βαλὼν ἐκ θυμὸν ἕληται·
Iliad 12.151	ὣς τῶν κόμπει χαλκὸς ἐπὶ στήθεσσι φαεινὸς
Iliad 12.152	ἄντην βαλλομένων· μάλα γὰρ κρατερῶς ἐμάχοντο
Iliad 12.153	λαοῖσιν καθύπερθε πεποιθότες ἠδὲ βίηφιν.
Iliad 12.154	οἳ δʼ ἄρα χερμαδίοισιν ἐϋδμήτων ἀπὸ πύργων
Iliad 12.155	βάλλον ἀμυνόμενοι σφῶν τʼ αὐτῶν καὶ κλισιάων
Iliad 12.156	νηῶν τʼ ὠκυπόρων· νιφάδες δʼ ὡς πῖπτον ἔραζε,
Iliad 12.157	ἅς τʼ ἄνεμος ζαὴς νέφεα σκιόεντα δονήσας
Iliad 12.158	ταρφειὰς κατέχευεν ἐπὶ χθονὶ πουλυβοτείρῃ·
Iliad 12.159	ὣς τῶν ἐκ χειρῶν βέλεα ῥέον ἠμὲν Ἀχαιῶν
Iliad 12.160	ἠδὲ καὶ ἐκ Τρώων· κόρυθες δʼ ἀμφʼ αὖον ἀΰτευν
Iliad 12.161	βαλλομένων μυλάκεσσι καὶ ἀσπίδες ὀμφαλόεσσαι.
Iliad 12.162	δή ῥα τότʼ ᾤμωξεν καὶ ὣ πεπλήγετο μηρὼ
Iliad 12.163	Ἄσιος Ὑρτακίδης, καὶ ἀλαστήσας ἔπος ηὔδα·
Iliad 12.164	Ζεῦ πάτερ ἦ ῥά νυ καὶ σὺ φιλοψευδὴς ἐτέτυξο
Iliad 12.165	πάγχυ μάλʼ· οὐ γὰρ ἔγωγʼ ἐφάμην ἥρωας Ἀχαιοὺς
Iliad 12.166	σχήσειν ἡμέτερόν γε μένος καὶ χεῖρας ἀάπτους.
Iliad 12.167	οἳ δʼ, ὥς τε σφῆκες μέσον αἰόλοι ἠὲ μέλισσαι
Iliad 12.168	οἰκία ποιήσωνται ὁδῷ ἔπι παιπαλοέσσῃ,
Iliad 12.169	οὐδʼ ἀπολείπουσιν κοῖλον δόμον, ἀλλὰ μένοντες
Iliad 12.170	ἄνδρας θηρητῆρας ἀμύνονται περὶ τέκνων,
Iliad 12.171	ὣς οἵ γʼ οὐκ ἐθέλουσι πυλάων καὶ δύʼ ἐόντε
Iliad 12.172	χάσσασθαι πρίν γʼ ἠὲ κατακτάμεν ἠὲ ἁλῶναι.
Iliad 12.173	ὣς ἔφατʼ, οὐδὲ Διὸς πεῖθε φρένα ταῦτʼ ἀγορεύων·
Iliad 12.174	Ἕκτορι γάρ οἱ θυμὸς ἐβούλετο κῦδος ὀρέξαι.
Iliad 12.175	ἄλλοι δʼ ἀμφʼ ἄλλῃσι μάχην ἐμάχοντο πύλῃσιν·
Iliad 12.176	ἀργαλέον δέ με ταῦτα θεὸν ὣς πάντʼ ἀγορεῦσαι·
Iliad 12.177	πάντῃ γὰρ περὶ τεῖχος ὀρώρει θεσπιδαὲς πῦρ
Iliad 12.178	λάϊνον· Ἀργεῖοι δὲ καὶ ἀχνύμενοί περ ἀνάγκῃ
Iliad 12.179	νηῶν ἠμύνοντο· θεοὶ δʼ ἀκαχήατο θυμὸν
Iliad 12.180	πάντες ὅσοι Δαναοῖσι μάχης ἐπιτάρροθοι ἦσαν.
Iliad 12.181	σὺν δʼ ἔβαλον Λαπίθαι πόλεμον καὶ δηϊοτῆτα.
Iliad 12.182	ἔνθʼ αὖ Πειριθόου υἱὸς κρατερὸς Πολυποίτης
Iliad 12.183	δουρὶ βάλεν Δάμασον κυνέης διὰ χαλκοπαρῄου·
Iliad 12.184	οὐδʼ ἄρα χαλκείη κόρυς ἔσχεθεν, ἀλλὰ διὰ πρὸ
Iliad 12.185	αἰχμὴ χαλκείη ῥῆξʼ ὀστέον, ἐγκέφαλος δὲ
Iliad 12.186	ἔνδον ἅπας πεπάλακτο· δάμασσε δέ μιν μεμαῶτα·
Iliad 12.187	αὐτὰρ ἔπειτα Πύλωνα καὶ Ὄρμενον ἐξενάριξεν.
Iliad 12.188	υἱὸν δʼ Ἀντιμάχοιο Λεοντεὺς ὄζος Ἄρηος
Iliad 12.189	Ἱππόμαχον βάλε δουρὶ κατὰ ζωστῆρα τυχήσας.
Iliad 12.190	αὖτις δʼ ἐκ κολεοῖο ἐρυσσάμενος ξίφος ὀξὺ
Iliad 12.191	Ἀντιφάτην μὲν πρῶτον ἐπαΐξας διʼ ὁμίλου
Iliad 12.192	πλῆξʼ αὐτοσχεδίην· ὃ δʼ ἄρʼ ὕπτιος οὔδει ἐρείσθη·
Iliad 12.193	αὐτὰρ ἔπειτα Μένωνα καὶ Ἰαμενὸν καὶ Ὀρέστην
Iliad 12.194	πάντας ἐπασσυτέρους πέλασε χθονὶ πουλυβοτείρῃ.
Iliad 12.195	ὄφρʼ οἳ τοὺς ἐνάριζον ἀπʼ ἔντεα μαρμαίροντα,
Iliad 12.196	τόφρʼ οἳ Πουλυδάμαντι καὶ Ἕκτορι κοῦροι ἕποντο,
Iliad 12.197	οἳ πλεῖστοι καὶ ἄριστοι ἔσαν, μέμασαν δὲ μάλιστα
Iliad 12.198	τεῖχός τε ῥήξειν καὶ ἐνιπρήσειν πυρὶ νῆας,
Iliad 12.199	οἵ ῥʼ ἔτι μερμήριζον ἐφεσταότες παρὰ τάφρῳ.
Iliad 12.200	ὄρνις γάρ σφιν ἐπῆλθε περησέμεναι μεμαῶσιν
Iliad 12.201	αἰετὸς ὑψιπέτης ἐπʼ ἀριστερὰ λαὸν ἐέργων
Iliad 12.202	φοινήεντα δράκοντα φέρων ὀνύχεσσι πέλωρον
Iliad 12.203	ζωὸν ἔτʼ ἀσπαίροντα, καὶ οὔ πω λήθετο χάρμης,
Iliad 12.204	κόψε γὰρ αὐτὸν ἔχοντα κατὰ στῆθος παρὰ δειρὴν
Iliad 12.205	ἰδνωθεὶς ὀπίσω· ὃ δʼ ἀπὸ ἕθεν ἧκε χαμᾶζε
Iliad 12.206	ἀλγήσας ὀδύνῃσι, μέσῳ δʼ ἐνὶ κάββαλʼ ὁμίλῳ,
Iliad 12.207	αὐτὸς δὲ κλάγξας πέτετο πνοιῇς ἀνέμοιο.
Iliad 12.208	Τρῶες δʼ ἐρρίγησαν ὅπως ἴδον αἰόλον ὄφιν
Iliad 12.209	κείμενον ἐν μέσσοισι Διὸς τέρας αἰγιόχοιο.
Iliad 12.210	δὴ τότε Πουλυδάμας θρασὺν Ἕκτορα εἶπε παραστάς·
Iliad 12.211	Ἕκτορ ἀεὶ μέν πώς μοι ἐπιπλήσσεις ἀγορῇσιν
Iliad 12.212	ἐσθλὰ φραζομένῳ, ἐπεὶ οὐδὲ μὲν οὐδὲ ἔοικε
Iliad 12.213	δῆμον ἐόντα παρὲξ ἀγορευέμεν, οὔτʼ ἐνὶ βουλῇ
Iliad 12.214	οὔτέ ποτʼ ἐν πολέμῳ, σὸν δὲ κράτος αἰὲν ἀέξειν·
Iliad 12.215	νῦν αὖτʼ ἐξερέω ὥς μοι δοκεῖ εἶναι ἄριστα.
Iliad 12.216	μὴ ἴομεν Δαναοῖσι μαχησόμενοι περὶ νηῶν.
Iliad 12.217	ὧδε γὰρ ἐκτελέεσθαι ὀΐομαι, εἰ ἐτεόν γε
Iliad 12.218	Τρωσὶν ὅδʼ ὄρνις ἦλθε περησέμεναι μεμαῶσιν
Iliad 12.219	αἰετὸς ὑψιπέτης ἐπʼ ἀριστερὰ λαὸν ἐέργων
Iliad 12.220	φοινήεντα δράκοντα φέρων ὀνύχεσσι πέλωρον
Iliad 12.221	ζωόν· ἄφαρ δʼ ἀφέηκε πάρος φίλα οἰκίʼ ἱκέσθαι,
Iliad 12.222	οὐδʼ ἐτέλεσσε φέρων δόμεναι τεκέεσσιν ἑοῖσιν.
Iliad 12.223	ὣς ἡμεῖς, εἴ πέρ τε πύλας καὶ τεῖχος Ἀχαιῶν
Iliad 12.224	ῥηξόμεθα σθένεϊ μεγάλῳ, εἴξωσι δʼ Ἀχαιοί,
Iliad 12.225	οὐ κόσμῳ παρὰ ναῦφιν ἐλευσόμεθʼ αὐτὰ κέλευθα·
Iliad 12.226	πολλοὺς γὰρ Τρώων καταλείψομεν, οὕς κεν Ἀχαιοὶ
Iliad 12.227	χαλκῷ δῃώσωσιν ἀμυνόμενοι περὶ νηῶν.
Iliad 12.228	ὧδέ χʼ ὑποκρίναιτο θεοπρόπος, ὃς σάφα θυμῷ
Iliad 12.229	εἰδείη τεράων καί οἱ πειθοίατο λαοί.
Iliad 12.230	τὸν δʼ ἄρʼ ὑπόδρα ἰδὼν προσέφη κορυθαίολος Ἕκτωρ·
Iliad 12.231	Πουλυδάμα, σὺ μὲν οὐκ ἔτʼ ἐμοὶ φίλα ταῦτʼ ἀγορεύεις·
Iliad 12.232	οἶσθα καὶ ἄλλον μῦθον ἀμείνονα τοῦδε νοῆσαι.
Iliad 12.233	εἰ δʼ ἐτεὸν δὴ τοῦτον ἀπὸ σπουδῆς ἀγορεύεις,
Iliad 12.234	ἐξ ἄρα δή τοι ἔπειτα θεοὶ φρένας ὤλεσαν αὐτοί,
Iliad 12.235	ὃς κέλεαι Ζηνὸς μὲν ἐριγδούποιο λαθέσθαι
Iliad 12.236	βουλέων, ἅς τέ μοι αὐτὸς ὑπέσχετο καὶ κατένευσε·
Iliad 12.237	τύνη δʼ οἰωνοῖσι τανυπτερύγεσσι κελεύεις
Iliad 12.238	πείθεσθαι, τῶν οὔ τι μετατρέπομʼ οὐδʼ ἀλεγίζω
Iliad 12.239	εἴτʼ ἐπὶ δεξίʼ ἴωσι πρὸς ἠῶ τʼ ἠέλιόν τε,
Iliad 12.240	εἴτʼ ἐπʼ ἀριστερὰ τοί γε ποτὶ ζόφον ἠερόεντα.
Iliad 12.241	ἡμεῖς δὲ μεγάλοιο Διὸς πειθώμεθα βουλῇ,
Iliad 12.242	ὃς πᾶσι θνητοῖσι καὶ ἀθανάτοισιν ἀνάσσει.
Iliad 12.243	εἷς οἰωνὸς ἄριστος ἀμύνεσθαι περὶ πάτρης.
Iliad 12.244	τίπτε σὺ δείδοικας πόλεμον καὶ δηϊοτῆτα;
Iliad 12.245	εἴ περ γάρ τʼ ἄλλοι γε περὶ κτεινώμεθα πάντες
Iliad 12.246	νηυσὶν ἐπʼ Ἀργείων, σοὶ δʼ οὐ δέος ἔστʼ ἀπολέσθαι·
Iliad 12.247	οὐ γάρ τοι κραδίη μενεδήϊος οὐδὲ μαχήμων.
Iliad 12.248	εἰ δὲ σὺ δηϊοτῆτος ἀφέξεαι, ἠέ τινʼ ἄλλον
Iliad 12.249	παρφάμενος ἐπέεσσιν ἀποτρέψεις πολέμοιο,
Iliad 12.250	αὐτίκʼ ἐμῷ ὑπὸ δουρὶ τυπεὶς ἀπὸ θυμὸν ὀλέσσεις.
Iliad 12.251	ὣς ἄρα φωνήσας ἡγήσατο, τοὶ δʼ ἅμʼ ἕποντο
Iliad 12.252	ἠχῇ θεσπεσίῃ· ἐπὶ δὲ Ζεὺς τερπικέραυνος
Iliad 12.253	ὦρσεν ἀπʼ Ἰδαίων ὀρέων ἀνέμοιο θύελλαν,
Iliad 12.254	ἥ ῥʼ ἰθὺς νηῶν κονίην φέρεν· αὐτὰρ Ἀχαιῶν
Iliad 12.255	θέλγε νόον, Τρωσὶν δὲ καὶ Ἕκτορι κῦδος ὄπαζε.
Iliad 12.256	τοῦ περ δὴ τεράεσσι πεποιθότες ἠδὲ βίηφι
Iliad 12.257	ῥήγνυσθαι μέγα τεῖχος Ἀχαιῶν πειρήτιζον.
Iliad 12.258	κρόσσας μὲν πύργων ἔρυον, καὶ ἔρειπον ἐπάλξεις,
Iliad 12.259	στήλας τε προβλῆτας ἐμόχλεον, ἃς ἄρʼ Ἀχαιοὶ
Iliad 12.260	πρώτας ἐν γαίῃ θέσαν ἔμμεναι ἔχματα πύργων.
Iliad 12.261	τὰς οἵ γʼ αὐέρυον, ἔλποντο δὲ τεῖχος Ἀχαιῶν
Iliad 12.262	ῥήξειν· οὐδέ νύ πω Δαναοὶ χάζοντο κελεύθου,
Iliad 12.263	ἀλλʼ οἵ γε ῥινοῖσι βοῶν φράξαντες ἐπάλξεις
Iliad 12.264	βάλλον ἀπʼ αὐτάων δηΐους ὑπὸ τεῖχος ἰόντας.
Iliad 12.265	ἀμφοτέρω δʼ Αἴαντε κελευτιόωντʼ ἐπὶ πύργων
Iliad 12.266	πάντοσε φοιτήτην μένος ὀτρύνοντες Ἀχαιῶν.
Iliad 12.267	ἄλλον μειλιχίοις, ἄλλον στερεοῖς ἐπέεσσι
Iliad 12.268	νείκεον, ὅν τινα πάγχυ μάχης μεθιέντα ἴδοιεν·
Iliad 12.269	ὦ φίλοι Ἀργείων ὅς τʼ ἔξοχος ὅς τε μεσήεις
Iliad 12.270	ὅς τε χερειότερος, ἐπεὶ οὔ πω πάντες ὁμοῖοι
Iliad 12.271	ἀνέρες ἐν πολέμῳ, νῦν ἔπλετο ἔργον ἅπασι·
Iliad 12.272	καὶ δʼ αὐτοὶ τόδε που γιγνώσκετε. μή τις ὀπίσσω
Iliad 12.273	τετράφθω ποτὶ νῆας ὁμοκλητῆρος ἀκούσας,
Iliad 12.274	ἀλλὰ πρόσω ἵεσθε καὶ ἀλλήλοισι κέλεσθε,
Iliad 12.275	αἴ κε Ζεὺς δώῃσιν Ὀλύμπιος ἀστεροπητὴς
Iliad 12.276	νεῖκος ἀπωσαμένους δηΐους προτὶ ἄστυ δίεσθαι.
Iliad 12.277	ὣς τώ γε προβοῶντε μάχην ὄτρυνον Ἀχαιῶν.
Iliad 12.278	τῶν δʼ, ὥς τε νιφάδες χιόνος πίπτωσι θαμειαὶ
Iliad 12.279	ἤματι χειμερίῳ, ὅτε τʼ ὤρετο μητίετα Ζεὺς
Iliad 12.280	νιφέμεν ἀνθρώποισι πιφαυσκόμενος τὰ ἃ κῆλα·
Iliad 12.281	κοιμήσας δʼ ἀνέμους χέει ἔμπεδον, ὄφρα καλύψῃ
Iliad 12.282	ὑψηλῶν ὀρέων κορυφὰς καὶ πρώονας ἄκρους
Iliad 12.283	καὶ πεδία λωτοῦντα καὶ ἀνδρῶν πίονα ἔργα,
Iliad 12.284	καί τʼ ἐφʼ ἁλὸς πολιῆς κέχυται λιμέσιν τε καὶ ἀκταῖς,
Iliad 12.285	κῦμα δέ μιν προσπλάζον ἐρύκεται· ἄλλά τε πάντα
Iliad 12.286	εἴλυται καθύπερθʼ, ὅτʼ ἐπιβρίσῃ Διὸς ὄμβρος·
Iliad 12.287	ὣς τῶν ἀμφοτέρωσε λίθοι πωτῶντο θαμειαί,
Iliad 12.288	αἱ μὲν ἄρʼ ἐς Τρῶας, αἱ δʼ ἐκ Τρώων ἐς Ἀχαιούς,
Iliad 12.289	βαλλομένων· τὸ δὲ τεῖχος ὕπερ πᾶν δοῦπος ὀρώρει.
Iliad 12.290	οὐδʼ ἄν πω τότε γε Τρῶες καὶ φαίδιμος Ἕκτωρ
Iliad 12.291	τείχεος ἐρρήξαντο πύλας καὶ μακρὸν ὀχῆα,
Iliad 12.292	εἰ μὴ ἄρʼ υἱὸν ἑὸν Σαρπηδόνα μητίετα Ζεὺς
Iliad 12.293	ὦρσεν ἐπʼ Ἀργείοισι λέονθʼ ὣς βουσὶν ἕλιξιν.
Iliad 12.294	αὐτίκα δʼ ἀσπίδα μὲν πρόσθʼ ἔσχετο πάντοσʼ ἐΐσην
Iliad 12.295	καλὴν χαλκείην ἐξήλατον, ἣν ἄρα χαλκεὺς
Iliad 12.296	ἤλασεν, ἔντοσθεν δὲ βοείας ῥάψε θαμειὰς
Iliad 12.297	χρυσείῃς ῥάβδοισι διηνεκέσιν περὶ κύκλον.
Iliad 12.298	τὴν ἄρʼ ὅ γε πρόσθε σχόμενος δύο δοῦρε τινάσσων
Iliad 12.299	βῆ ῥʼ ἴμεν ὥς τε λέων ὀρεσίτροφος, ὅς τʼ ἐπιδευὴς
Iliad 12.300	δηρὸν ἔῃ κρειῶν, κέλεται δέ ἑ θυμὸς ἀγήνωρ
Iliad 12.301	μήλων πειρήσοντα καὶ ἐς πυκινὸν δόμον ἐλθεῖν·
Iliad 12.302	εἴ περ γάρ χʼ εὕρῃσι παρʼ αὐτόφι βώτορας ἄνδρας
Iliad 12.303	σὺν κυσὶ καὶ δούρεσσι φυλάσσοντας περὶ μῆλα,
Iliad 12.304	οὔ ῥά τʼ ἀπείρητος μέμονε σταθμοῖο δίεσθαι,
Iliad 12.305	ἀλλʼ ὅ γʼ ἄρʼ ἢ ἥρπαξε μετάλμενος, ἠὲ καὶ αὐτὸς
Iliad 12.306	ἔβλητʼ ἐν πρώτοισι θοῆς ἀπὸ χειρὸς ἄκοντι·
Iliad 12.307	ὥς ῥα τότʼ ἀντίθεον Σαρπηδόνα θυμὸς ἀνῆκε
Iliad 12.308	τεῖχος ἐπαΐξαι διά τε ῥήξασθαι ἐπάλξεις.
Iliad 12.309	αὐτίκα δὲ Γλαῦκον προσέφη παῖδʼ Ἱππολόχοιο·
Iliad 12.310	Γλαῦκε τί ἢ δὴ νῶϊ τετιμήμεσθα μάλιστα
Iliad 12.311	ἕδρῃ τε κρέασίν τε ἰδὲ πλείοις δεπάεσσιν
Iliad 12.312	ἐν Λυκίῃ, πάντες δὲ θεοὺς ὣς εἰσορόωσι,
Iliad 12.313	καὶ τέμενος νεμόμεσθα μέγα Ξάνθοιο παρʼ ὄχθας
Iliad 12.314	καλὸν φυταλιῆς καὶ ἀρούρης πυροφόροιο;
Iliad 12.315	τὼ νῦν χρὴ Λυκίοισι μέτα πρώτοισιν ἐόντας
Iliad 12.316	ἑστάμεν ἠδὲ μάχης καυστείρης ἀντιβολῆσαι,
Iliad 12.317	ὄφρά τις ὧδʼ εἴπῃ Λυκίων πύκα θωρηκτάων·
Iliad 12.318	οὐ μὰν ἀκλεέες Λυκίην κάτα κοιρανέουσιν
Iliad 12.319	ἡμέτεροι βασιλῆες, ἔδουσί τε πίονα μῆλα
Iliad 12.320	οἶνόν τʼ ἔξαιτον μελιηδέα· ἀλλʼ ἄρα καὶ ἲς
Iliad 12.321	ἐσθλή, ἐπεὶ Λυκίοισι μέτα πρώτοισι μάχονται.
Iliad 12.322	ὦ πέπον εἰ μὲν γὰρ πόλεμον περὶ τόνδε φυγόντε
Iliad 12.323	αἰεὶ δὴ μέλλοιμεν ἀγήρω τʼ ἀθανάτω τε
Iliad 12.324	ἔσσεσθʼ, οὔτέ κεν αὐτὸς ἐνὶ πρώτοισι μαχοίμην
Iliad 12.325	οὔτέ κε σὲ στέλλοιμι μάχην ἐς κυδιάνειραν·
Iliad 12.326	νῦν δʼ ἔμπης γὰρ κῆρες ἐφεστᾶσιν θανάτοιο
Iliad 12.327	μυρίαι, ἃς οὐκ ἔστι φυγεῖν βροτὸν οὐδʼ ὑπαλύξαι,
Iliad 12.328	ἴομεν ἠέ τῳ εὖχος ὀρέξομεν ἠέ τις ἡμῖν.
Iliad 12.329	ὣς ἔφατʼ, οὐδὲ Γλαῦκος ἀπετράπετʼ οὐδʼ ἀπίθησε·
Iliad 12.330	τὼ δʼ ἰθὺς βήτην Λυκίων μέγα ἔθνος ἄγοντε.
Iliad 12.331	τοὺς δὲ ἰδὼν ῥίγησʼ υἱὸς Πετεῶο Μενεσθεύς·
Iliad 12.332	τοῦ γὰρ δὴ πρὸς πύργον ἴσαν κακότητα φέροντες.
Iliad 12.333	πάπτηνεν δʼ ἀνὰ πύργον Ἀχαιῶν εἴ τινʼ ἴδοιτο
Iliad 12.334	ἡγεμόνων, ὅς τίς οἱ ἀρὴν ἑτάροισιν ἀμύναι·
Iliad 12.335	ἐς δʼ ἐνόησʼ Αἴαντε δύω πολέμου ἀκορήτω
Iliad 12.336	ἑσταότας, Τεῦκρόν τε νέον κλισίηθεν ἰόντα
Iliad 12.337	ἐγγύθεν· ἀλλʼ οὔ πώς οἱ ἔην βώσαντι γεγωνεῖν·
Iliad 12.338	τόσσος γὰρ κτύπος ἦεν, ἀϋτὴ δʼ οὐρανὸν ἷκε,
Iliad 12.339	βαλλομένων σακέων τε καὶ ἱπποκόμων τρυφαλειῶν
Iliad 12.340	καὶ πυλέων· πᾶσαι γὰρ ἐπώχατο, τοὶ δὲ κατʼ αὐτὰς
Iliad 12.341	ἱστάμενοι πειρῶντο βίῃ ῥήξαντες ἐσελθεῖν.
Iliad 12.342	αἶψα δʼ ἐπʼ Αἴαντα προΐει κήρυκα Θοώτην·
Iliad 12.343	ἔρχεο δῖε Θοῶτα, θέων Αἴαντα κάλεσσον,
Iliad 12.344	ἀμφοτέρω μὲν μᾶλλον· ὃ γάρ κʼ ὄχʼ ἄριστον ἁπάντων
Iliad 12.345	εἴη, ἐπεὶ τάχα τῇδε τετεύξεται αἰπὺς ὄλεθρος.
Iliad 12.346	ὧδε γὰρ ἔβρισαν Λυκίων ἀγοί, οἳ τὸ πάρος περ
Iliad 12.347	ζαχρηεῖς τελέθουσι κατὰ κρατερὰς ὑσμίνας.
Iliad 12.348	εἰ δέ σφιν καὶ κεῖθι πόνος καὶ νεῖκος ὄρωρεν,
Iliad 12.349	ἀλλά περ οἶος ἴτω Τελαμώνιος ἄλκιμος Αἴας,
Iliad 12.350	καί οἱ Τεῦκρος ἅμα σπέσθω τόξων ἐῢ εἰδώς.
Iliad 12.351	ὣς ἔφατʼ, οὐδʼ ἄρα οἱ κῆρυξ ἀπίθησεν ἀκούσας,
Iliad 12.352	βῆ δὲ θέειν παρὰ τεῖχος Ἀχαιῶν χαλκοχιτώνων,
Iliad 12.353	στῆ δὲ παρʼ Αἰάντεσσι κιών, εἶθαρ δὲ προσηύδα·
Iliad 12.354	Αἴαντʼ Ἀργείων ἡγήτορε χαλκοχιτώνων
Iliad 12.355	ἠνώγει Πετεῶο διοτρεφέος φίλος υἱὸς
Iliad 12.356	κεῖσʼ ἴμεν, ὄφρα πόνοιο μίνυνθά περ ἀντιάσητον
Iliad 12.357	ἀμφοτέρω μὲν μᾶλλον· ὃ γάρ κʼ ὄχʼ ἄριστον ἁπάντων
Iliad 12.358	εἴη, ἐπεὶ τάχα κεῖθι τετεύξεται αἰπὺς ὄλεθρος·
Iliad 12.359	ὧδε γὰρ ἔβρισαν Λυκίων ἀγοί, οἳ τὸ πάρος περ
Iliad 12.360	ζαχρηεῖς τελέθουσι κατὰ κρατερὰς ὑσμίνας.
Iliad 12.361	εἰ δὲ καὶ ἐνθάδε περ πόλεμος καὶ νεῖκος ὄρωρεν,
Iliad 12.362	ἀλλά περ οἶος ἴτω Τελαμώνιος ἄλκιμος Αἴας,
Iliad 12.363	καί οἱ Τεῦκρος ἅμα σπέσθω τόξων ἐῢ εἰδώς.
Iliad 12.364	ὣς ἔφατʼ, οὐδʼ ἀπίθησε μέγας Τελαμώνιος Αἴας.
Iliad 12.365	αὐτίκʼ Ὀϊλιάδην ἔπεα πτερόεντα προσηύδα·
Iliad 12.366	Αἶαν σφῶϊ μὲν αὖθι, σὺ καὶ κρατερὸς Λυκομήδης,
Iliad 12.367	ἑσταότες Δαναοὺς ὀτρύνετον ἶφι μάχεσθαι·
Iliad 12.368	αὐτὰρ ἐγὼ κεῖσʼ εἶμι καὶ ἀντιόω πολέμοιο·
Iliad 12.369	αἶψα δʼ ἐλεύσομαι αὖτις, ἐπὴν εὖ τοῖς ἐπαμύνω.
Iliad 12.370	ὣς ἄρα φωνήσας ἀπέβη Τελαμώνιος Αἴας,
Iliad 12.371	καί οἱ Τεῦκρος ἅμʼ ᾖε κασίγνητος καὶ ὄπατρος·
Iliad 12.372	τοῖς δʼ ἅμα Πανδίων Τεύκρου φέρε καμπύλα τόξα.
Iliad 12.373	εὖτε Μενεσθῆος μεγαθύμου πύργον ἵκοντο
Iliad 12.374	τείχεος ἐντὸς ἰόντες, ἐπειγομένοισι δʼ ἵκοντο,
Iliad 12.375	οἳ δʼ ἐπʼ ἐπάλξεις βαῖνον ἐρεμνῇ λαίλαπι ἶσοι
Iliad 12.376	ἴφθιμοι Λυκίων ἡγήτορες ἠδὲ μέδοντες·
Iliad 12.377	σὺν δʼ ἐβάλοντο μάχεσθαι ἐναντίον, ὦρτο δʼ ἀϋτή.
Iliad 12.378	Αἴας δὲ πρῶτος Τελαμώνιος ἄνδρα κατέκτα
Iliad 12.379	Σαρπήδοντος ἑταῖρον Ἐπικλῆα μεγάθυμον
Iliad 12.380	μαρμάρῳ ὀκριόεντι βαλών, ὅ ῥα τείχεος ἐντὸς
Iliad 12.381	κεῖτο μέγας παρʼ ἔπαλξιν ὑπέρτατος· οὐδέ κέ μιν ῥέα
Iliad 12.382	χείρεσσʼ ἀμφοτέρῃς ἔχοι ἀνὴρ οὐδὲ μάλʼ ἡβῶν,
Iliad 12.383	οἷοι νῦν βροτοί εἰσʼ· ὃ δʼ ἄρʼ ὑψόθεν ἔμβαλʼ ἀείρας,
Iliad 12.384	θλάσσε δὲ τετράφαλον κυνέην, σὺν δʼ ὀστέʼ ἄραξε
Iliad 12.385	πάντʼ ἄμυδις κεφαλῆς· ὃ δʼ ἄρʼ ἀρνευτῆρι ἐοικὼς
Iliad 12.386	κάππεσʼ ἀφʼ ὑψηλοῦ πύργου, λίπε δʼ ὀστέα θυμός.
Iliad 12.387	Τεῦκρος δὲ Γλαῦκον κρατερὸν παῖδʼ Ἱππολόχοιο
Iliad 12.388	ἰῷ ἐπεσσύμενον βάλε τείχεος ὑψηλοῖο,
Iliad 12.389	ᾗ ῥʼ ἴδε γυμνωθέντα βραχίονα, παῦσε δὲ χάρμης.
Iliad 12.390	ἂψ δʼ ἀπὸ τείχεος ἆλτο λαθών, ἵνα μή τις Ἀχαιῶν
Iliad 12.391	βλήμενον ἀθρήσειε καὶ εὐχετόῳτʼ ἐπέεσσι.
Iliad 12.392	Σαρπήδοντι δʼ ἄχος γένετο Γλαύκου ἀπιόντος
Iliad 12.393	αὐτίκʼ ἐπεί τʼ ἐνόησεν· ὅμως δʼ οὐ λήθετο χάρμης,
Iliad 12.394	ἀλλʼ ὅ γε Θεστορίδην Ἀλκμάονα δουρὶ τυχήσας
Iliad 12.395	νύξʼ, ἐκ δʼ ἔσπασεν ἔγχος· ὃ δʼ ἑσπόμενος πέσε δουρὶ
Iliad 12.396	πρηνής, ἀμφὶ δέ οἱ βράχε τεύχεα ποικίλα χαλκῷ,
Iliad 12.397	Σαρπηδὼν δʼ ἄρʼ ἔπαλξιν ἑλὼν χερσὶ στιβαρῇσιν
Iliad 12.398	ἕλχʼ, ἣ δʼ ἕσπετο πᾶσα διαμπερές, αὐτὰρ ὕπερθε
Iliad 12.399	τεῖχος ἐγυμνώθη, πολέεσσι δὲ θῆκε κέλευθον.
Iliad 12.400	τὸν δʼ Αἴας καὶ Τεῦκρος ὁμαρτήσανθʼ ὃ μὲν ἰῷ
Iliad 12.401	βεβλήκει τελαμῶνα περὶ στήθεσσι φαεινὸν
Iliad 12.402	ἀσπίδος ἀμφιβρότης· ἀλλὰ Ζεὺς κῆρας ἄμυνε
Iliad 12.403	παιδὸς ἑοῦ, μὴ νηυσὶν ἔπι πρύμνῃσι δαμείη·
Iliad 12.404	Αἴας δʼ ἀσπίδα νύξεν ἐπάλμενος, οὐδὲ διὰ πρὸ
Iliad 12.405	ἤλυθεν ἐγχείη, στυφέλιξε δέ μιν μεμαῶτα.
Iliad 12.406	χώρησεν δʼ ἄρα τυτθὸν ἐπάλξιος· οὐδʼ ὅ γε πάμπαν
Iliad 12.407	χάζετʼ, ἐπεί οἱ θυμὸς ἐέλπετο κῦδος ἀρέσθαι.
Iliad 12.408	κέκλετο δʼ ἀντιθέοισιν ἑλιξάμενος Λυκίοισιν·
Iliad 12.409	ὦ Λύκιοι τί τʼ ἄρʼ ὧδε μεθίετε θούριδος ἀλκῆς;
Iliad 12.410	ἀργαλέον δέ μοί ἐστι καὶ ἰφθίμῳ περ ἐόντι
Iliad 12.411	μούνῳ ῥηξαμένῳ θέσθαι παρὰ νηυσὶ κέλευθον·
Iliad 12.412	ἀλλʼ ἐφομαρτεῖτε· πλεόνων δέ τι ἔργον ἄμεινον.
Iliad 12.413	ὣς ἔφαθʼ, οἳ δὲ ἄνακτος ὑποδείσαντες ὁμοκλὴν
Iliad 12.414	μᾶλλον ἐπέβρισαν βουληφόρον ἀμφὶ ἄνακτα.
Iliad 12.415	Ἀργεῖοι δʼ ἑτέρωθεν ἐκαρτύναντο φάλαγγας
Iliad 12.416	τείχεος ἔντοσθεν, μέγα δέ σφισι φαίνετο ἔργον·
Iliad 12.417	οὔτε γὰρ ἴφθιμοι Λύκιοι Δαναῶν ἐδύναντο
Iliad 12.418	τεῖχος ῥηξάμενοι θέσθαι παρὰ νηυσὶ κέλευθον,
Iliad 12.419	οὔτέ ποτʼ αἰχμηταὶ Δαναοὶ Λυκίους ἐδύναντο
Iliad 12.420	τείχεος ἂψ ὤσασθαι, ἐπεὶ τὰ πρῶτα πέλασθεν.
Iliad 12.421	ἀλλʼ ὥς τʼ ἀμφʼ οὔροισι δύʼ ἀνέρε δηριάασθον
Iliad 12.422	μέτρʼ ἐν χερσὶν ἔχοντες ἐπιξύνῳ ἐν ἀρούρῃ,
Iliad 12.423	ὥ τʼ ὀλίγῳ ἐνὶ χώρῳ ἐρίζητον περὶ ἴσης,
Iliad 12.424	ὣς ἄρα τοὺς διέεργον ἐπάλξιες· οἳ δʼ ὑπὲρ αὐτέων
Iliad 12.425	δῄουν ἀλλήλων ἀμφὶ στήθεσσι βοείας
Iliad 12.426	ἀσπίδας εὐκύκλους λαισήϊά τε πτερόεντα.
Iliad 12.427	πολλοὶ δʼ οὐτάζοντο κατὰ χρόα νηλέϊ χαλκῷ,
Iliad 12.428	ἠμὲν ὅτεῳ στρεφθέντι μετάφρενα γυμνωθείη
Iliad 12.429	μαρναμένων, πολλοὶ δὲ διαμπερὲς ἀσπίδος αὐτῆς.
Iliad 12.430	πάντῃ δὴ πύργοι καὶ ἐπάλξιες αἵματι φωτῶν
Iliad 12.431	ἐρράδατʼ ἀμφοτέρωθεν ἀπὸ Τρώων καὶ Ἀχαιῶν.
Iliad 12.432	ἀλλʼ οὐδʼ ὧς ἐδύναντο φόβον ποιῆσαι Ἀχαιῶν,
Iliad 12.433	ἀλλʼ ἔχον ὥς τε τάλαντα γυνὴ χερνῆτις ἀληθής,
Iliad 12.434	ἥ τε σταθμὸν ἔχουσα καὶ εἴριον ἀμφὶς ἀνέλκει
Iliad 12.435	ἰσάζουσʼ, ἵνα παισὶν ἀεικέα μισθὸν ἄρηται·
Iliad 12.436	ὣς μὲν τῶν ἐπὶ ἶσα μάχη τέτατο πτόλεμός τε,
Iliad 12.437	πρίν γʼ ὅτε δὴ Ζεὺς κῦδος ὑπέρτερον Ἕκτορι δῶκε
Iliad 12.438	Πριαμίδῃ, ὃς πρῶτος ἐσήλατο τεῖχος Ἀχαιῶν.
Iliad 12.439	ἤϋσεν δὲ διαπρύσιον Τρώεσσι γεγωνώς·
Iliad 12.440	ὄρνυσθʼ ἱππόδαμοι Τρῶες, ῥήγνυσθε δὲ τεῖχος
Iliad 12.441	Ἀργείων καὶ νηυσὶν ἐνίετε θεσπιδαὲς πῦρ.
Iliad 12.442	ὣς φάτʼ ἐποτρύνων, οἳ δʼ οὔασι πάντες ἄκουον,
Iliad 12.443	ἴθυσαν δʼ ἐπὶ τεῖχος ἀολλέες· οἳ μὲν ἔπειτα
Iliad 12.444	κροσσάων ἐπέβαινον ἀκαχμένα δούρατʼ ἔχοντες,
Iliad 12.445	Ἕκτωρ δʼ ἁρπάξας λᾶαν φέρεν, ὅς ῥα πυλάων
Iliad 12.446	ἑστήκει πρόσθε πρυμνὸς παχύς, αὐτὰρ ὕπερθεν
Iliad 12.447	ὀξὺς ἔην· τὸν δʼ οὔ κε δύʼ ἀνέρε δήμου ἀρίστω
Iliad 12.448	ῥηϊδίως ἐπʼ ἄμαξαν ἀπʼ οὔδεος ὀχλίσσειαν,
Iliad 12.449	οἷοι νῦν βροτοί εἰσʼ· ὃ δέ μιν ῥέα πάλλε καὶ οἶος.
Iliad 12.450	τόν οἱ ἐλαφρὸν ἔθηκε Κρόνου πάϊς ἀγκυλομήτεω.
Iliad 12.451	ὡς δʼ ὅτε ποιμὴν ῥεῖα φέρει πόκον ἄρσενος οἰὸς
Iliad 12.452	χειρὶ λαβὼν ἑτέρῃ, ὀλίγον τέ μιν ἄχθος ἐπείγει,
Iliad 12.453	ὣς Ἕκτωρ ἰθὺς σανίδων φέρε λᾶαν ἀείρας,
Iliad 12.454	αἵ ῥα πύλας εἴρυντο πύκα στιβαρῶς ἀραρυίας
Iliad 12.455	δικλίδας ὑψηλάς· δοιοὶ δʼ ἔντοσθεν ὀχῆες
Iliad 12.456	εἶχον ἐπημοιβοί, μία δὲ κληῒς ἐπαρήρει.
Iliad 12.457	στῆ δὲ μάλʼ ἐγγὺς ἰών, καὶ ἐρεισάμενος βάλε μέσσας
Iliad 12.458	εὖ διαβάς, ἵνα μή οἱ ἀφαυρότερον βέλος εἴη,
Iliad 12.459	ῥῆξε δʼ ἀπʼ ἀμφοτέρους θαιρούς· πέσε δὲ λίθος εἴσω
Iliad 12.460	βριθοσύνῃ, μέγα δʼ ἀμφὶ πύλαι μύκον, οὐδʼ ἄρʼ ὀχῆες
Iliad 12.461	ἐσχεθέτην, σανίδες δὲ διέτμαγεν ἄλλυδις ἄλλη
Iliad 12.462	λᾶος ὑπὸ ῥιπῆς· ὃ δʼ ἄρʼ ἔσθορε φαίδιμος Ἕκτωρ
Iliad 12.463	νυκτὶ θοῇ ἀτάλαντος ὑπώπια· λάμπε δὲ χαλκῷ
Iliad 12.464	σμερδαλέῳ, τὸν ἕεστο περὶ χροΐ, δοιὰ δὲ χερσὶ
Iliad 12.465	δοῦρʼ ἔχεν· οὔ κέν τίς μιν ἐρύκακεν ἀντιβολήσας
Iliad 12.466	νόσφι θεῶν ὅτʼ ἐσᾶλτο πύλας· πυρὶ δʼ ὄσσε δεδήει.
Iliad 12.467	κέκλετο δὲ Τρώεσσιν ἑλιξάμενος καθʼ ὅμιλον
Iliad 12.468	τεῖχος ὑπερβαίνειν· τοὶ δʼ ὀτρύνοντι πίθοντο.
Iliad 12.469	αὐτίκα δʼ οἳ μὲν τεῖχος ὑπέρβασαν, οἳ δὲ κατʼ αὐτὰς
Iliad 12.470	ποιητὰς ἐσέχυντο πύλας· Δαναοὶ δὲ φόβηθεν
Iliad 12.471	νῆας ἀνὰ γλαφυράς, ὅμαδος δʼ ἀλίαστος ἐτύχθη.
Iliad 13.1	Ζεὺς δʼ ἐπεὶ οὖν Τρῶάς τε καὶ Ἕκτορα νηυσὶ πέλασσε,
Iliad 13.2	τοὺς μὲν ἔα παρὰ τῇσι πόνον τʼ ἐχέμεν καὶ ὀϊζὺν
Iliad 13.3	νωλεμέως, αὐτὸς δὲ πάλιν τρέπεν ὄσσε φαεινὼ
Iliad 13.4	νόσφιν ἐφʼ ἱπποπόλων Θρῃκῶν καθορώμενος αἶαν
Iliad 13.5	Μυσῶν τʼ ἀγχεμάχων καὶ ἀγαυῶν ἱππημολγῶν
Iliad 13.6	γλακτοφάγων Ἀβίων τε δικαιοτάτων ἀνθρώπων.
Iliad 13.7	ἐς Τροίην δʼ οὐ πάμπαν ἔτι τρέπεν ὄσσε φαεινώ·
Iliad 13.8	οὐ γὰρ ὅ γʼ ἀθανάτων τινα ἔλπετο ὃν κατὰ θυμὸν
Iliad 13.9	ἐλθόντʼ ἢ Τρώεσσιν ἀρηξέμεν ἢ Δαναοῖσιν.
Iliad 13.10	οὐδʼ ἀλαοσκοπιὴν εἶχε κρείων ἐνοσίχθων·
Iliad 13.11	καὶ γὰρ ὃ θαυμάζων ἧστο πτόλεμόν τε μάχην τε
Iliad 13.12	ὑψοῦ ἐπʼ ἀκροτάτης κορυφῆς Σάμου ὑληέσσης
Iliad 13.13	Θρηϊκίης· ἔνθεν γὰρ ἐφαίνετο πᾶσα μὲν Ἴδη,
Iliad 13.14	φαίνετο δὲ Πριάμοιο πόλις καὶ νῆες Ἀχαιῶν.
Iliad 13.15	ἔνθʼ ἄρʼ ὅ γʼ ἐξ ἁλὸς ἕζετʼ ἰών, ἐλέαιρε δʼ Ἀχαιοὺς
Iliad 13.16	Τρωσὶν δαμναμένους, Διὶ δὲ κρατερῶς ἐνεμέσσα.
Iliad 13.17	αὐτίκα δʼ ἐξ ὄρεος κατεβήσετο παιπαλόεντος
Iliad 13.18	κραιπνὰ ποσὶ προβιβάς· τρέμε δʼ οὔρεα μακρὰ καὶ ὕλη
Iliad 13.19	ποσσὶν ὑπʼ ἀθανάτοισι Ποσειδάωνος ἰόντος.
Iliad 13.20	τρὶς μὲν ὀρέξατʼ ἰών, τὸ δὲ τέτρατον ἵκετο τέκμωρ
Iliad 13.21	Αἰγάς, ἔνθα δέ οἱ κλυτὰ δώματα βένθεσι λίμνης
Iliad 13.22	χρύσεα μαρμαίροντα τετεύχαται ἄφθιτα αἰεί.
Iliad 13.23	ἔνθʼ ἐλθὼν ὑπʼ ὄχεσφι τιτύσκετο χαλκόποδʼ ἵππω
Iliad 13.24	ὠκυπέτα χρυσέῃσιν ἐθείρῃσιν κομόωντε,
Iliad 13.25	χρυσὸν δʼ αὐτὸς ἔδυνε περὶ χροΐ, γέντο δʼ ἱμάσθλην
Iliad 13.26	χρυσείην εὔτυκτον, ἑοῦ δʼ ἐπεβήσετο δίφρου,
Iliad 13.27	βῆ δʼ ἐλάαν ἐπὶ κύματʼ· ἄταλλε δὲ κήτεʼ ὑπʼ αὐτοῦ
Iliad 13.28	πάντοθεν ἐκ κευθμῶν, οὐδʼ ἠγνοίησεν ἄνακτα·
Iliad 13.29	γηθοσύνῃ δὲ θάλασσα διίστατο· τοὶ δὲ πέτοντο
Iliad 13.30	ῥίμφα μάλʼ, οὐδʼ ὑπένερθε διαίνετο χάλκεος ἄξων·
Iliad 13.31	τὸν δʼ ἐς Ἀχαιῶν νῆας ἐΰσκαρθμοι φέρον ἵπποι.
Iliad 13.32	ἔστι δέ τι σπέος εὐρὺ βαθείης βένθεσι λίμνης
Iliad 13.33	μεσσηγὺς Τενέδοιο καὶ Ἴμβρου παιπαλοέσσης·
Iliad 13.34	ἔνθʼ ἵππους ἔστησε Ποσειδάων ἐνοσίχθων
Iliad 13.35	λύσας ἐξ ὀχέων, παρὰ δʼ ἀμβρόσιον βάλεν εἶδαρ
Iliad 13.36	ἔδμεναι· ἀμφὶ δὲ ποσσὶ πέδας ἔβαλε χρυσείας
Iliad 13.37	ἀρρήκτους ἀλύτους, ὄφρʼ ἔμπεδον αὖθι μένοιεν
Iliad 13.38	νοστήσαντα ἄνακτα· ὃ δʼ ἐς στρατὸν ᾤχετʼ Ἀχαιῶν.
Iliad 13.39	Τρῶες δὲ φλογὶ ἶσοι ἀολλέες ἠὲ θυέλλῃ
Iliad 13.40	Ἕκτορι Πριαμίδῃ ἄμοτον μεμαῶτες ἕποντο
Iliad 13.41	ἄβρομοι αὐΐαχοι· ἔλποντο δὲ νῆας Ἀχαιῶν
Iliad 13.42	αἱρήσειν, κτενέειν δὲ παρʼ αὐτόθι πάντας ἀρίστους.
Iliad 13.43	ἀλλὰ Ποσειδάων γαιήοχος ἐννοσίγαιος
Iliad 13.44	Ἀργείους ὄτρυνε βαθείης ἐξ ἁλὸς ἐλθὼν
Iliad 13.45	εἰσάμενος Κάλχαντι δέμας καὶ ἀτειρέα φωνήν·
Iliad 13.46	Αἴαντε πρώτω προσέφη μεμαῶτε καὶ αὐτώ·
Iliad 13.47	Αἴαντε σφὼ μέν τε σαώσετε λαὸν Ἀχαιῶν
Iliad 13.48	ἀλκῆς μνησαμένω, μὴ δὲ κρυεροῖο φόβοιο.
Iliad 13.49	ἄλλῃ μὲν γὰρ ἔγωγʼ οὐ δείδια χεῖρας ἀάπτους
Iliad 13.50	Τρώων, οἳ μέγα τεῖχος ὑπερκατέβησαν ὁμίλῳ·
Iliad 13.51	ἕξουσιν γὰρ πάντας ἐϋκνήμιδες Ἀχαιοί·
Iliad 13.52	τῇ δὲ δὴ αἰνότατον περιδείδια μή τι πάθωμεν,
Iliad 13.53	ᾗ ῥʼ ὅ γʼ ὁ λυσσώδης φλογὶ εἴκελος ἡγεμονεύει
Iliad 13.54	Ἕκτωρ, ὃς Διὸς εὔχετʼ ἐρισθενέος πάϊς εἶναι.
Iliad 13.55	σφῶϊν δʼ ὧδε θεῶν τις ἐνὶ φρεσὶ ποιήσειεν
Iliad 13.56	αὐτώ θʼ ἑστάμεναι κρατερῶς καὶ ἀνωγέμεν ἄλλους·
Iliad 13.57	τώ κε καὶ ἐσσύμενόν περ ἐρωήσαιτʼ ἀπὸ νηῶν
Iliad 13.58	ὠκυπόρων, εἰ καί μιν Ὀλύμπιος αὐτὸς ἐγείρει.
Iliad 13.59	ἦ καὶ σκηπανίῳ γαιήοχος ἐννοσίγαιος
Iliad 13.60	ἀμφοτέρω κεκοπὼς πλῆσεν μένεος κρατεροῖο,
Iliad 13.61	γυῖα δʼ ἔθηκεν ἐλαφρὰ πόδας καὶ χεῖρας ὕπερθεν.
Iliad 13.62	αὐτὸς δʼ ὥς τʼ ἴρηξ ὠκύπτερος ὦρτο πέτεσθαι,
Iliad 13.63	ὅς ῥά τʼ ἀπʼ αἰγίλιπος πέτρης περιμήκεος ἀρθεὶς
Iliad 13.64	ὁρμήσῃ πεδίοιο διώκειν ὄρνεον ἄλλο,
Iliad 13.65	ὣς ἀπὸ τῶν ἤϊξε Ποσειδάων ἐνοσίχθων.
Iliad 13.66	τοῖιν δʼ ἔγνω πρόσθεν Ὀϊλῆος ταχὺς Αἴας,
Iliad 13.67	αἶψα δʼ ἄρʼ Αἴαντα προσέφη Τελαμώνιον υἱόν·
Iliad 13.68	Αἶαν ἐπεί τις νῶϊ θεῶν οἳ Ὄλυμπον ἔχουσι
Iliad 13.69	μάντεϊ εἰδόμενος κέλεται παρὰ νηυσὶ μάχεσθαι,
Iliad 13.70	οὐδʼ ὅ γε Κάλχας ἐστὶ θεοπρόπος οἰωνιστής·
Iliad 13.71	ἴχνια γὰρ μετόπισθε ποδῶν ἠδὲ κνημάων
Iliad 13.72	ῥεῖʼ ἔγνων ἀπιόντος· ἀρίγνωτοι δὲ θεοί περ·
Iliad 13.73	καὶ δʼ ἐμοὶ αὐτῷ θυμὸς ἐνὶ στήθεσσι φίλοισι
Iliad 13.74	μᾶλλον ἐφορμᾶται πολεμίζειν ἠδὲ μάχεσθαι,
Iliad 13.75	μαιμώωσι δʼ ἔνερθε πόδες καὶ χεῖρες ὕπερθε.
Iliad 13.76	τὸν δʼ ἀπαμειβόμενος προσέφη Τελαμώνιος Αἴας·
Iliad 13.77	οὕτω νῦν καὶ ἐμοὶ περὶ δούρατι χεῖρες ἄαπτοι
Iliad 13.78	μαιμῶσιν, καί μοι μένος ὤρορε, νέρθε δὲ ποσσὶν
Iliad 13.79	ἔσσυμαι ἀμφοτέροισι· μενοινώω δὲ καὶ οἶος
Iliad 13.80	Ἕκτορι Πριαμίδῃ ἄμοτον μεμαῶτι μάχεσθαι.
Iliad 13.81	ὣς οἳ μὲν τοιαῦτα πρὸς ἀλλήλους ἀγόρευον
Iliad 13.82	χάρμῃ γηθόσυνοι, τήν σφιν θεὸς ἔμβαλε θυμῷ·
Iliad 13.83	τόφρα δὲ τοὺς ὄπιθεν γαιήοχος ὦρσεν Ἀχαιούς,
Iliad 13.84	οἳ παρὰ νηυσὶ θοῇσιν ἀνέψυχον φίλον ἦτορ.
Iliad 13.85	τῶν ῥʼ ἅμα τʼ ἀργαλέῳ καμάτῳ φίλα γυῖα λέλυντο,
Iliad 13.86	καί σφιν ἄχος κατὰ θυμὸν ἐγίγνετο δερκομένοισι
Iliad 13.87	Τρῶας, τοὶ μέγα τεῖχος ὑπερκατέβησαν ὁμίλῳ.
Iliad 13.88	τοὺς οἵ γʼ εἰσορόωντες ὑπʼ ὀφρύσι δάκρυα λεῖβον·
Iliad 13.89	οὐ γὰρ ἔφαν φεύξεσθαι ὑπʼ ἐκ κακοῦ· ἀλλʼ ἐνοσίχθων
Iliad 13.90	ῥεῖα μετεισάμενος κρατερὰς ὄτρυνε φάλαγγας.
Iliad 13.91	Τεῦκρον ἔπι πρῶτον καὶ Λήϊτον ἦλθε κελεύων
Iliad 13.92	Πηνέλεών θʼ ἥρωα Θόαντά τε Δηΐπυρόν τε
Iliad 13.93	Μηριόνην τε καὶ Ἀντίλοχον μήστωρας ἀϋτῆς·
Iliad 13.94	τοὺς ὅ γʼ ἐποτρύνων ἔπεα πτερόεντα προσηύδα·
Iliad 13.95	αἰδὼς Ἀργεῖοι, κοῦροι νέοι· ὔμμιν ἔγωγε
Iliad 13.96	μαρναμένοισι πέποιθα σαωσέμεναι νέας ἁμάς·
Iliad 13.97	εἰ δʼ ὑμεῖς πολέμοιο μεθήσετε λευγαλέοιο,
Iliad 13.98	νῦν δὴ εἴδεται ἦμαρ ὑπὸ Τρώεσσι δαμῆναι.
Iliad 13.99	ὢ πόποι ἦ μέγα θαῦμα τόδʼ ὀφθαλμοῖσιν ὁρῶμαι
Iliad 13.100	δεινόν, ὃ οὔ ποτʼ ἔγωγε τελευτήσεσθαι ἔφασκον,
Iliad 13.101	Τρῶας ἐφʼ ἡμετέρας ἰέναι νέας, οἳ τὸ πάρος περ
Iliad 13.102	φυζακινῇς ἐλάφοισιν ἐοίκεσαν, αἵ τε καθʼ ὕλην
Iliad 13.103	θώων παρδαλίων τε λύκων τʼ ἤϊα πέλονται
Iliad 13.104	αὔτως ἠλάσκουσαι ἀνάλκιδες, οὐδʼ ἔπι χάρμη·
Iliad 13.105	ὣς Τρῶες τὸ πρίν γε μένος καὶ χεῖρας Ἀχαιῶν
Iliad 13.106	μίμνειν οὐκ ἐθέλεσκον ἐναντίον, οὐδʼ ἠβαιόν·
Iliad 13.107	νῦν δὲ ἑκὰς πόλιος κοίλῃς ἐπὶ νηυσὶ μάχονται
Iliad 13.108	ἡγεμόνος κακότητι μεθημοσύνῃσί τε λαῶν,
Iliad 13.109	οἳ κείνῳ ἐρίσαντες ἀμυνέμεν οὐκ ἐθέλουσι
Iliad 13.110	νηῶν ὠκυπόρων, ἀλλὰ κτείνονται ἀνʼ αὐτάς.
Iliad 13.111	ἀλλʼ εἰ δὴ καὶ πάμπαν ἐτήτυμον αἴτιός ἐστιν
Iliad 13.112	ἥρως Ἀτρεΐδης εὐρὺ κρείων Ἀγαμέμνων
Iliad 13.113	οὕνεκʼ ἀπητίμησε ποδώκεα Πηλεΐωνα,
Iliad 13.114	ἡμέας γʼ οὔ πως ἔστι μεθιέμεναι πολέμοιο.
Iliad 13.115	ἀλλʼ ἀκεώμεθα θᾶσσον· ἀκεσταί τοι φρένες ἐσθλῶν.
Iliad 13.116	ὑμεῖς δʼ οὐκ ἔτι καλὰ μεθίετε θούριδος ἀλκῆς
Iliad 13.117	πάντες ἄριστοι ἐόντες ἀνὰ στρατόν. οὐδʼ ἂν ἔγωγε
Iliad 13.118	ἀνδρὶ μαχεσσαίμην ὅς τις πολέμοιο μεθείη
Iliad 13.119	λυγρὸς ἐών· ὑμῖν δὲ νεμεσσῶμαι περὶ κῆρι.
Iliad 13.120	ὦ πέπονες τάχα δή τι κακὸν ποιήσετε μεῖζον
Iliad 13.121	τῇδε μεθημοσύνῃ· ἀλλʼ ἐν φρεσὶ θέσθε ἕκαστος
Iliad 13.122	αἰδῶ καὶ νέμεσιν· δὴ γὰρ μέγα νεῖκος ὄρωρεν.
Iliad 13.123	Ἕκτωρ δὴ παρὰ νηυσὶ βοὴν ἀγαθὸς πολεμίζει
Iliad 13.124	καρτερός, ἔρρηξεν δὲ πύλας καὶ μακρὸν ὀχῆα.
Iliad 13.125	ὥς ῥα κελευτιόων γαιήοχος ὦρσεν Ἀχαιούς.
Iliad 13.126	ἀμφὶ δʼ ἄρʼ Αἴαντας δοιοὺς ἵσταντο φάλαγγες
Iliad 13.127	καρτεραί, ἃς οὔτʼ ἄν κεν Ἄρης ὀνόσαιτο μετελθὼν
Iliad 13.128	οὔτε κʼ Ἀθηναίη λαοσσόος· οἳ γὰρ ἄριστοι
Iliad 13.129	κρινθέντες Τρῶάς τε καὶ Ἕκτορα δῖον ἔμιμνον,
Iliad 13.130	φράξαντες δόρυ δουρί, σάκος σάκεϊ προθελύμνῳ·
Iliad 13.131	ἀσπὶς ἄρʼ ἀσπίδʼ ἔρειδε, κόρυς κόρυν, ἀνέρα δʼ ἀνήρ·
Iliad 13.132	ψαῦον δʼ ἱππόκομοι κόρυθες λαμπροῖσι φάλοισι
Iliad 13.133	νευόντων, ὡς πυκνοὶ ἐφέστασαν ἀλλήλοισιν·
Iliad 13.134	ἔγχεα δʼ ἐπτύσσοντο θρασειάων ἀπὸ χειρῶν
Iliad 13.135	σειόμενʼ· οἳ δʼ ἰθὺς φρόνεον, μέμασαν δὲ μάχεσθαι.
Iliad 13.136	Τρῶες δὲ προὔτυψαν ἀολλέες, ἦρχε δʼ ἄρʼ Ἕκτωρ
Iliad 13.137	ἀντικρὺ μεμαώς, ὀλοοίτροχος ὣς ἀπὸ πέτρης,
Iliad 13.138	ὅν τε κατὰ στεφάνης ποταμὸς χειμάρροος ὤσῃ
Iliad 13.139	ῥήξας ἀσπέτῳ ὄμβρῳ ἀναιδέος ἔχματα πέτρης·
Iliad 13.140	ὕψι δʼ ἀναθρῴσκων πέτεται, κτυπέει δέ θʼ ὑπʼ αὐτοῦ
Iliad 13.141	ὕλη· ὃ δʼ ἀσφαλέως θέει ἔμπεδον, εἷος ἵκηται
Iliad 13.142	ἰσόπεδον, τότε δʼ οὔ τι κυλίνδεται ἐσσύμενός περ·
Iliad 13.143	ὣς Ἕκτωρ εἷος μὲν ἀπείλει μέχρι θαλάσσης
Iliad 13.144	ῥέα διελεύσεσθαι κλισίας καὶ νῆας Ἀχαιῶν
Iliad 13.145	κτείνων· ἀλλʼ ὅτε δὴ πυκινῇς ἐνέκυρσε φάλαγξι
Iliad 13.146	στῆ ῥα μάλʼ ἐγχριμφθείς· οἳ δʼ ἀντίοι υἷες Ἀχαιῶν
Iliad 13.147	νύσσοντες ξίφεσίν τε καὶ ἔγχεσιν ἀμφιγύοισιν
Iliad 13.148	ὦσαν ἀπὸ σφείων· ὃ δὲ χασσάμενος πελεμίχθη.
Iliad 13.149	ἤϋσεν δὲ διαπρύσιον Τρώεσσι γεγωνώς·
Iliad 13.150	Τρῶες καὶ Λύκιοι καὶ Δάρδανοι ἀγχιμαχηταὶ
Iliad 13.151	παρμένετʼ· οὔ τοι δηρὸν ἐμὲ σχήσουσιν Ἀχαιοὶ
Iliad 13.152	καὶ μάλα πυργηδὸν σφέας αὐτοὺς ἀρτύναντες,
Iliad 13.153	ἀλλʼ ὀΐω χάσσονται ὑπʼ ἔγχεος, εἰ ἐτεόν με
Iliad 13.154	ὦρσε θεῶν ὤριστος, ἐρίγδουπος πόσις Ἥρης.
Iliad 13.155	ὣς εἰπὼν ὄτρυνε μένος καὶ θυμὸν ἑκάστου.
Iliad 13.156	Δηΐφοβος δʼ ἐν τοῖσι μέγα φρονέων ἐβεβήκει
Iliad 13.157	Πριαμίδης, πρόσθεν δʼ ἔχεν ἀσπίδα πάντοσʼ ἐΐσην
Iliad 13.158	κοῦφα ποσὶ προβιβὰς καὶ ὑπασπίδια προποδίζων.
Iliad 13.159	Μηριόνης δʼ αὐτοῖο τιτύσκετο δουρὶ φαεινῷ
Iliad 13.160	καὶ βάλεν, οὐδʼ ἀφάμαρτε, κατʼ ἀσπίδα πάντοσʼ ἐΐσην
Iliad 13.161	ταυρείην· τῆς δʼ οὔ τι διήλασεν, ἀλλὰ πολὺ πρὶν
Iliad 13.162	ἐν καυλῷ ἐάγη δολιχὸν δόρυ· Δηΐφοβος δὲ
Iliad 13.163	ἀσπίδα ταυρείην σχέθʼ ἀπὸ ἕο, δεῖσε δὲ θυμῷ
Iliad 13.164	ἔγχος Μηριόναο δαΐφρονος· αὐτὰρ ὅ γʼ ἥρως
Iliad 13.165	ἂψ ἑτάρων εἰς ἔθνος ἐχάζετο, χώσατο δʼ αἰνῶς
Iliad 13.166	ἀμφότερον, νίκης τε καὶ ἔγχεος ὃ ξυνέαξε.
Iliad 13.167	βῆ δʼ ἰέναι παρά τε κλισίας καὶ νῆας Ἀχαιῶν
Iliad 13.168	οἰσόμενος δόρυ μακρόν, ὅ οἱ κλισίηφι λέλειπτο.
Iliad 13.169	οἳ δʼ ἄλλοι μάρναντο, βοὴ δʼ ἄσβεστος ὀρώρει.
Iliad 13.170	Τεῦκρος δὲ πρῶτος Τελαμώνιος ἄνδρα κατέκτα
Iliad 13.171	Ἴμβριον αἰχμητὴν πολυΐππου Μέντορος υἱόν·
Iliad 13.172	ναῖε δὲ Πήδαιον πρὶν ἐλθεῖν υἷας Ἀχαιῶν,
Iliad 13.173	κούρην δὲ Πριάμοιο νόθην ἔχε, Μηδεσικάστην·
Iliad 13.174	αὐτὰρ ἐπεὶ Δαναῶν νέες ἤλυθον ἀμφιέλισσαι,
Iliad 13.175	ἂψ ἐς Ἴλιον ἦλθε, μετέπρεπε δὲ Τρώεσσι,
Iliad 13.176	ναῖε δὲ πὰρ Πριάμῳ· ὃ δέ μιν τίεν ἶσα τέκεσσι.
Iliad 13.177	τόν ῥʼ υἱὸς Τελαμῶνος ὑπʼ οὔατος ἔγχεϊ μακρῷ
Iliad 13.178	νύξʼ, ἐκ δʼ ἔσπασεν ἔγχος· ὃ δʼ αὖτʼ ἔπεσεν μελίη ὣς
Iliad 13.179	ἥ τʼ ὄρεος κορυφῇ ἕκαθεν περιφαινομένοιο
Iliad 13.180	χαλκῷ ταμνομένη τέρενα χθονὶ φύλλα πελάσσῃ·
Iliad 13.181	ὣς πέσεν, ἀμφὶ δέ οἱ βράχε τεύχεα ποικίλα χαλκῷ.
Iliad 13.182	Τεῦκρος δʼ ὁρμήθη μεμαὼς ἀπὸ τεύχεα δῦσαι·
Iliad 13.183	Ἕκτωρ δʼ ὁρμηθέντος ἀκόντισε δουρὶ φαεινῷ.
Iliad 13.184	ἀλλʼ ὃ μὲν ἄντα ἰδὼν ἠλεύατο χάλκεον ἔγχος
Iliad 13.185	τυτθόν· ὃ δʼ Ἀμφίμαχον Κτεάτου υἷʼ Ἀκτορίωνος
Iliad 13.186	νισόμενον πόλεμον δὲ κατὰ στῆθος βάλε δουρί·
Iliad 13.187	δούπησεν δὲ πεσών, ἀράβησε δὲ τεύχεʼ ἐπʼ αὐτῷ.
Iliad 13.188	Ἕκτωρ δʼ ὁρμήθη κόρυθα κροτάφοις ἀραρυῖαν
Iliad 13.189	κρατὸς ἀφαρπάξαι μεγαλήτορος Ἀμφιμάχοιο·
Iliad 13.190	Αἴας δʼ ὁρμηθέντος ὀρέξατο δουρὶ φαεινῷ
Iliad 13.191	Ἕκτορος· ἀλλʼ οὔ πῃ χροὸς εἴσατο, πᾶς δʼ ἄρα χαλκῷ
Iliad 13.192	σμερδαλέῳ κεκάλυφθʼ· ὃ δʼ ἄρʼ ἀσπίδος ὀμφαλὸν οὖτα,
Iliad 13.193	ὦσε δέ μιν σθένεϊ μεγάλῳ· ὃ δὲ χάσσατʼ ὀπίσσω
Iliad 13.194	νεκρῶν ἀμφοτέρων, τοὺς δʼ ἐξείρυσσαν Ἀχαιοί.
Iliad 13.195	Ἀμφίμαχον μὲν ἄρα Στιχίος δῖός τε Μενεσθεὺς
Iliad 13.196	ἀρχοὶ Ἀθηναίων κόμισαν μετὰ λαὸν Ἀχαιῶν·
Iliad 13.197	Ἴμβριον αὖτʼ Αἴαντε μεμαότε θούριδος ἀλκῆς
Iliad 13.198	ὥς τε δύʼ αἶγα λέοντε κυνῶν ὕπο καρχαροδόντων
Iliad 13.199	ἁρπάξαντε φέρητον ἀνὰ ῥωπήϊα πυκνὰ
Iliad 13.200	ὑψοῦ ὑπὲρ γαίης μετὰ γαμφηλῇσιν ἔχοντε,
Iliad 13.201	ὥς ῥα τὸν ὑψοῦ ἔχοντε δύω Αἴαντε κορυστὰ
Iliad 13.202	τεύχεα συλήτην· κεφαλὴν δʼ ἁπαλῆς ἀπὸ δειρῆς
Iliad 13.203	κόψεν Ὀϊλιάδης κεχολωμένος Ἀμφιμάχοιο,
Iliad 13.204	ἧκε δέ μιν σφαιρηδὸν ἑλιξάμενος διʼ ὁμίλου·
Iliad 13.205	Ἕκτορι δὲ προπάροιθε ποδῶν πέσεν ἐν κονίῃσι.
Iliad 13.206	καὶ τότε δὴ περὶ κῆρι Ποσειδάων ἐχολώθη
Iliad 13.207	υἱωνοῖο πεσόντος ἐν αἰνῇ δηϊοτῆτι,
Iliad 13.208	βῆ δʼ ἰέναι παρά τε κλισίας καὶ νῆας Ἀχαιῶν
Iliad 13.209	ὀτρυνέων Δαναούς, Τρώεσσι δὲ κήδεα τεῦχεν.
Iliad 13.210	Ἰδομενεὺς δʼ ἄρα οἱ δουρικλυτὸς ἀντεβόλησεν
Iliad 13.211	ἐρχόμενος παρʼ ἑταίρου, ὅ οἱ νέον ἐκ πολέμοιο
Iliad 13.212	ἦλθε κατʼ ἰγνύην βεβλημένος ὀξέϊ χαλκῷ.
Iliad 13.213	τὸν μὲν ἑταῖροι ἔνεικαν, ὃ δʼ ἰητροῖς ἐπιτείλας
Iliad 13.214	ἤϊεν ἐς κλισίην· ἔτι γὰρ πολέμοιο μενοίνα
Iliad 13.215	ἀντιάαν· τὸν δὲ προσέφη κρείων ἐνοσίχθων
Iliad 13.216	εἰσάμενος φθογγὴν Ἀνδραίμονος υἷϊ Θόαντι
Iliad 13.217	ὃς πάσῃ Πλευρῶνι καὶ αἰπεινῇ Καλυδῶνι
Iliad 13.218	Αἰτωλοῖσιν ἄνασσε, θεὸς δʼ ὣς τίετο δήμῳ·
Iliad 13.219	Ἰδομενεῦ Κρητῶν βουληφόρε ποῦ τοι ἀπειλαὶ
Iliad 13.220	οἴχονται, τὰς Τρωσὶν ἀπείλεον υἷες Ἀχαιῶν;
Iliad 13.221	τὸν δʼ αὖτʼ Ἰδομενεὺς Κρητῶν ἀγὸς ἀντίον ηὔδα·
Iliad 13.222	ὦ Θόαν οὔ τις ἀνὴρ νῦν γʼ αἴτιος, ὅσσον ἔγωγε
Iliad 13.223	γιγνώσκω· πάντες γὰρ ἐπιστάμεθα πτολεμίζειν.
Iliad 13.224	οὔτέ τινα δέος ἴσχει ἀκήριον οὔτέ τις ὄκνῳ
Iliad 13.225	εἴκων ἀνδύεται πόλεμον κακόν· ἀλλά που οὕτω
Iliad 13.226	μέλλει δὴ φίλον εἶναι ὑπερμενέϊ Κρονίωνι
Iliad 13.227	νωνύμνους ἀπολέσθαι ἀπʼ Ἄργεος ἐνθάδʼ Ἀχαιούς.
Iliad 13.228	ἀλλὰ Θόαν, καὶ γὰρ τὸ πάρος μενεδήϊος ἦσθα,
Iliad 13.229	ὀτρύνεις δὲ καὶ ἄλλον ὅθι μεθιέντα ἴδηαι·
Iliad 13.230	τὼ νῦν μήτʼ ἀπόληγε κέλευέ τε φωτὶ ἑκάστῳ.
Iliad 13.231	τὸν δʼ ἠμείβετʼ ἔπειτα Ποσειδάων ἐνοσίχθων·
Iliad 13.232	Ἰδομενεῦ μὴ κεῖνος ἀνὴρ ἔτι νοστήσειεν
Iliad 13.233	ἐκ Τροίης, ἀλλʼ αὖθι κυνῶν μέλπηθρα γένοιτο,
Iliad 13.234	ὅς τις ἐπʼ ἤματι τῷδε ἑκὼν μεθίῃσι μάχεσθαι.
Iliad 13.235	ἀλλʼ ἄγε τεύχεα δεῦρο λαβὼν ἴθι· ταῦτα δʼ ἅμα χρὴ
Iliad 13.236	σπεύδειν, αἴ κʼ ὄφελός τι γενώμεθα καὶ δύʼ ἐόντε.
Iliad 13.237	συμφερτὴ δʼ ἀρετὴ πέλει ἀνδρῶν καὶ μάλα λυγρῶν,
Iliad 13.238	νῶϊ δὲ καί κʼ ἀγαθοῖσιν ἐπισταίμεσθα μάχεσθαι.
Iliad 13.239	ὣς εἰπὼν ὃ μὲν αὖτις ἔβη θεὸς ἂμ πόνον ἀνδρῶν·
Iliad 13.240	Ἰδομενεὺς δʼ ὅτε δὴ κλισίην εὔτυκτον ἵκανε
Iliad 13.241	δύσετο τεύχεα καλὰ περὶ χροΐ, γέντο δὲ δοῦρε,
Iliad 13.242	βῆ δʼ ἴμεν ἀστεροπῇ ἐναλίγκιος, ἥν τε Κρονίων
Iliad 13.243	χειρὶ λαβὼν ἐτίναξεν ἀπʼ αἰγλήεντος Ὀλύμπου
Iliad 13.244	δεικνὺς σῆμα βροτοῖσιν· ἀρίζηλοι δέ οἱ αὐγαί·
Iliad 13.245	ὣς τοῦ χαλκὸς ἔλαμπε περὶ στήθεσσι θέοντος.
Iliad 13.246	Μηριόνης δʼ ἄρα οἱ θεράπων ἐῢς ἀντεβόλησεν
Iliad 13.247	ἐγγὺς ἔτι κλισίης· μετὰ γὰρ δόρυ χάλκεον ᾔει
Iliad 13.248	οἰσόμενος· τὸν δὲ προσέφη σθένος Ἰδομενῆος·
Iliad 13.249	Μηριόνη Μόλου υἱὲ πόδας ταχὺ φίλταθʼ ἑταίρων
Iliad 13.250	τίπτʼ ἦλθες πόλεμόν τε λιπὼν καὶ δηϊοτῆτα;
Iliad 13.251	ἠέ τι βέβληαι, βέλεος δέ σε τείρει ἀκωκή,
Iliad 13.252	ἦέ τευ ἀγγελίης μετʼ ἔμʼ ἤλυθες; οὐδέ τοι αὐτὸς
Iliad 13.253	ἧσθαι ἐνὶ κλισίῃσι λιλαίομαι, ἀλλὰ μάχεσθαι.
Iliad 13.254	τὸν δʼ αὖ Μηριόνης πεπνυμένος ἀντίον ηὔδα·
Iliad 13.255	Ἰδομενεῦ, Κρητῶν βουληφόρε χαλκοχιτώνων,
Iliad 13.256	ἔρχομαι εἴ τί τοι ἔγχος ἐνὶ κλισίῃσι λέλειπται
Iliad 13.257	οἰσόμενος· τό νυ γὰρ κατεάξαμεν ὃ πρὶν ἔχεσκον
Iliad 13.258	ἀσπίδα Δηϊφόβοιο βαλὼν ὑπερηνορέοντος.
Iliad 13.259	τὸν δʼ αὖτʼ Ἰδομενεὺς Κρητῶν ἀγὸς ἀντίον ηὔδα·
Iliad 13.260	δούρατα δʼ αἴ κʼ ἐθέλῃσθα καὶ ἓν καὶ εἴκοσι δήεις
Iliad 13.261	ἑσταότʼ ἐν κλισίῃ πρὸς ἐνώπια παμφανόωντα
Iliad 13.262	Τρώϊα, τὰ κταμένων ἀποαίνυμαι· οὐ γὰρ ὀΐω
Iliad 13.263	ἀνδρῶν δυσμενέων ἑκὰς ἱστάμενος πολεμίζειν.
Iliad 13.264	τώ μοι δούρατά τʼ ἔστι καὶ ἀσπίδες ὀμφαλόεσσαι
Iliad 13.265	καὶ κόρυθες καὶ θώρηκες λαμπρὸν γανόωντες.
Iliad 13.266	τὸν δʼ αὖ Μηριόνης πεπνυμένος ἀντίον ηὔδα·
Iliad 13.267	καί τοι ἐμοὶ παρά τε κλισίῃ καὶ νηῒ μελαίνῃ
Iliad 13.268	πόλλʼ ἔναρα Τρώων· ἀλλʼ οὐ σχεδόν ἐστιν ἑλέσθαι.
Iliad 13.269	οὐδὲ γὰρ οὐδʼ ἐμέ φημι λελασμένον ἔμμεναι ἀλκῆς,
Iliad 13.270	ἀλλὰ μετὰ πρώτοισι μάχην ἀνὰ κυδιάνειραν
Iliad 13.271	ἵσταμαι, ὁππότε νεῖκος ὀρώρηται πολέμοιο.
Iliad 13.272	ἄλλόν πού τινα μᾶλλον Ἀχαιῶν χαλκοχιτώνων
Iliad 13.273	λήθω μαρνάμενος, σὲ δὲ ἴδμεναι αὐτὸν ὀΐω.
Iliad 13.274	τὸν δʼ αὖτʼ Ἰδομενεὺς Κρητῶν ἀγὸς ἀντίον ηὔδα·
Iliad 13.275	οἶδʼ ἀρετὴν οἷός ἐσσι· τί σε χρὴ ταῦτα λέγεσθαι;
Iliad 13.276	εἰ γὰρ νῦν παρὰ νηυσὶ λεγοίμεθα πάντες ἄριστοι
Iliad 13.277	ἐς λόχον, ἔνθα μάλιστʼ ἀρετὴ διαείδεται ἀνδρῶν,
Iliad 13.278	ἔνθʼ ὅ τε δειλὸς ἀνὴρ ὅς τʼ ἄλκιμος ἐξεφαάνθη·
Iliad 13.279	τοῦ μὲν γάρ τε κακοῦ τρέπεται χρὼς ἄλλυδις ἄλλῃ,
Iliad 13.280	οὐδέ οἱ ἀτρέμας ἧσθαι ἐρητύετʼ ἐν φρεσὶ θυμός,
Iliad 13.281	ἀλλὰ μετοκλάζει καὶ ἐπʼ ἀμφοτέρους πόδας ἵζει,
Iliad 13.282	ἐν δέ τέ οἱ κραδίη μεγάλα στέρνοισι πατάσσει
Iliad 13.283	κῆρας ὀϊομένῳ, πάταγος δέ τε γίγνετʼ ὀδόντων·
Iliad 13.284	τοῦ δʼ ἀγαθοῦ οὔτʼ ἂρ τρέπεται χρὼς οὔτέ τι λίην
Iliad 13.285	ταρβεῖ, ἐπειδὰν πρῶτον ἐσίζηται λόχον ἀνδρῶν,
Iliad 13.286	ἀρᾶται δὲ τάχιστα μιγήμεναι ἐν δαῒ λυγρῇ·
Iliad 13.287	οὐδέ κεν ἔνθα τεόν γε μένος καὶ χεῖρας ὄνοιτο.
Iliad 13.288	εἴ περ γάρ κε βλεῖο πονεύμενος ἠὲ τυπείης
Iliad 13.289	οὐκ ἂν ἐν αὐχένʼ ὄπισθε πέσοι βέλος οὐδʼ ἐνὶ νώτῳ,
Iliad 13.290	ἀλλά κεν ἢ στέρνων ἢ νηδύος ἀντιάσειε
Iliad 13.291	πρόσσω ἱεμένοιο μετὰ προμάχων ὀαριστύν.
Iliad 13.292	ἀλλʼ ἄγε μηκέτι ταῦτα λεγώμεθα νηπύτιοι ὣς
Iliad 13.293	ἑσταότες, μή πού τις ὑπερφιάλως νεμεσήσῃ·
Iliad 13.294	ἀλλὰ σύ γε κλισίην δὲ κιὼν ἕλευ ὄβριμον ἔγχος.
Iliad 13.295	ὣς φάτο, Μηριόνης δὲ θοῷ ἀτάλαντος Ἄρηϊ
Iliad 13.296	καρπαλίμως κλισίηθεν ἀνείλετο χάλκεον ἔγχος,
Iliad 13.297	βῆ δὲ μετʼ Ἰδομενῆα μέγα πτολέμοιο μεμηλώς.
Iliad 13.298	οἷος δὲ βροτολοιγὸς Ἄρης πόλεμον δὲ μέτεισι,
Iliad 13.299	τῷ δὲ Φόβος φίλος υἱὸς ἅμα κρατερὸς καὶ ἀταρβὴς
Iliad 13.300	ἕσπετο, ὅς τʼ ἐφόβησε ταλάφρονά περ πολεμιστήν·
Iliad 13.301	τὼ μὲν ἄρʼ ἐκ Θρῄκης Ἐφύρους μέτα θωρήσσεσθον,
Iliad 13.302	ἠὲ μετὰ Φλεγύας μεγαλήτορας· οὐδʼ ἄρα τώ γε
Iliad 13.303	ἔκλυον ἀμφοτέρων, ἑτέροισι δὲ κῦδος ἔδωκαν·
Iliad 13.304	τοῖοι Μηριόνης τε καὶ Ἰδομενεὺς ἀγοὶ ἀνδρῶν
Iliad 13.305	ἤϊσαν ἐς πόλεμον κεκορυθμένοι αἴθοπι χαλκῷ.
Iliad 13.306	τὸν καὶ Μηριόνης πρότερος πρὸς μῦθον ἔειπε·
Iliad 13.307	Δευκαλίδη πῇ τὰρ μέμονας καταδῦναι ὅμιλον;
Iliad 13.308	ἢ ἐπὶ δεξιόφιν παντὸς στρατοῦ, ἦ ἀνὰ μέσσους,
Iliad 13.309	ἦ ἐπʼ ἀριστερόφιν; ἐπεὶ οὔ ποθι ἔλπομαι οὕτω
Iliad 13.310	δεύεσθαι πολέμοιο κάρη κομόωντας Ἀχαιούς.
Iliad 13.311	τὸν δʼ αὖτʼ Ἰδομενεὺς Κρητῶν ἀγὸς ἀντίον ηὔδα·
Iliad 13.312	νηυσὶ μὲν ἐν μέσσῃσιν ἀμύνειν εἰσὶ καὶ ἄλλοι
Iliad 13.313	Αἴαντές τε δύω Τεῦκρός θʼ, ὃς ἄριστος Ἀχαιῶν
Iliad 13.314	τοξοσύνῃ, ἀγαθὸς δὲ καὶ ἐν σταδίῃ ὑσμίνῃ·
Iliad 13.315	οἵ μιν ἅδην ἐλόωσι καὶ ἐσσύμενον πολέμοιο
Iliad 13.316	Ἕκτορα Πριαμίδην, καὶ εἰ μάλα καρτερός ἐστιν.
Iliad 13.317	αἰπύ οἱ ἐσσεῖται μάλα περ μεμαῶτι μάχεσθαι
Iliad 13.318	κείνων νικήσαντι μένος καὶ χεῖρας ἀάπτους
Iliad 13.319	νῆας ἐνιπρῆσαι, ὅτε μὴ αὐτός γε Κρονίων
Iliad 13.320	ἐμβάλοι αἰθόμενον δαλὸν νήεσσι θοῇσιν.
Iliad 13.321	ἀνδρὶ δέ κʼ οὐκ εἴξειε μέγας Τελαμώνιος Αἴας,
Iliad 13.322	ὃς θνητός τʼ εἴη καὶ ἔδοι Δημήτερος ἀκτὴν
Iliad 13.323	χαλκῷ τε ῥηκτὸς μεγάλοισί τε χερμαδίοισιν.
Iliad 13.324	οὐδʼ ἂν Ἀχιλλῆϊ ῥηξήνορι χωρήσειεν
Iliad 13.325	ἔν γʼ αὐτοσταδίῃ· ποσὶ δʼ οὔ πως ἔστιν ἐρίζειν.
Iliad 13.326	νῶϊν δʼ ὧδʼ ἐπʼ ἀριστέρʼ ἔχε στρατοῦ, ὄφρα τάχιστα
Iliad 13.327	εἴδομεν ἠέ τῳ εὖχος ὀρέξομεν, ἦέ τις ἡμῖν.
Iliad 13.328	ὣς φάτο, Μηριόνης δὲ θοῷ ἀτάλαντος Ἄρηϊ
Iliad 13.329	ἦρχʼ ἴμεν, ὄφρʼ ἀφίκοντο κατὰ στρατὸν ᾗ μιν ἀνώγει,
Iliad 13.330	οἳ δʼ ὡς Ἰδομενῆα ἴδον φλογὶ εἴκελον ἀλκὴν
Iliad 13.331	αὐτὸν καὶ θεράποντα σὺν ἔντεσι δαιδαλέοισι,
Iliad 13.332	κεκλόμενοι καθʼ ὅμιλον ἐπʼ αὐτῷ πάντες ἔβησαν·
Iliad 13.333	τῶν δʼ ὁμὸν ἵστατο νεῖκος ἐπὶ πρυμνῇσι νέεσσιν.
Iliad 13.334	ὡς δʼ ὅθʼ ὑπὸ λιγέων ἀνέμων σπέρχωσιν ἄελλαι
Iliad 13.335	ἤματι τῷ ὅτε τε πλείστη κόνις ἀμφὶ κελεύθους,
Iliad 13.336	οἵ τʼ ἄμυδις κονίης μεγάλην ἱστᾶσιν ὀμίχλην,
Iliad 13.337	ὣς ἄρα τῶν ὁμόσʼ ἦλθε μάχη, μέμασαν δʼ ἐνὶ θυμῷ
Iliad 13.338	ἀλλήλους καθʼ ὅμιλον ἐναιρέμεν ὀξέϊ χαλκῷ.
Iliad 13.339	ἔφριξεν δὲ μάχη φθισίμβροτος ἐγχείῃσι
Iliad 13.340	μακρῇς, ἃς εἶχον ταμεσίχροας· ὄσσε δʼ ἄμερδεν
Iliad 13.341	αὐγὴ χαλκείη κορύθων ἄπο λαμπομενάων
Iliad 13.342	θωρήκων τε νεοσμήκτων σακέων τε φαεινῶν
Iliad 13.343	ἐρχομένων ἄμυδις· μάλα κεν θρασυκάρδιος εἴη
Iliad 13.344	ὃς τότε γηθήσειεν ἰδὼν πόνον οὐδʼ ἀκάχοιτο.
Iliad 13.345	τὼ δʼ ἀμφὶς φρονέοντε δύω Κρόνου υἷε κραταιὼ
Iliad 13.346	ἀνδράσιν ἡρώεσσιν ἐτεύχετον ἄλγεα λυγρά.
Iliad 13.347	Ζεὺς μέν ῥα Τρώεσσι καὶ Ἕκτορι βούλετο νίκην
Iliad 13.348	κυδαίνων Ἀχιλῆα πόδας ταχύν· οὐδέ τι πάμπαν
Iliad 13.349	ἤθελε λαὸν ὀλέσθαι Ἀχαιϊκὸν Ἰλιόθι πρό,
Iliad 13.350	ἀλλὰ Θέτιν κύδαινε καὶ υἱέα καρτερόθυμον.
Iliad 13.351	Ἀργείους δὲ Ποσειδάων ὀρόθυνε μετελθὼν
Iliad 13.352	λάθρῃ ὑπεξαναδὺς πολιῆς ἁλός· ἤχθετο γάρ ῥα
Iliad 13.353	Τρωσὶν δαμναμένους, Διὶ δὲ κρατερῶς ἐνεμέσσα.
Iliad 13.354	ἦ μὰν ἀμφοτέροισιν ὁμὸν γένος ἠδʼ ἴα πάτρη,
Iliad 13.355	ἀλλὰ Ζεὺς πρότερος γεγόνει καὶ πλείονα ᾔδη.
Iliad 13.356	τώ ῥα καὶ ἀμφαδίην μὲν ἀλεξέμεναι ἀλέεινε,
Iliad 13.357	λάθρῃ δʼ αἰὲν ἔγειρε κατὰ στρατὸν ἀνδρὶ ἐοικώς.
Iliad 13.358	τοὶ δʼ ἔριδος κρατερῆς καὶ ὁμοιΐου πτολέμοιο
Iliad 13.359	πεῖραρ ἐπαλλάξαντες ἐπʼ ἀμφοτέροισι τάνυσσαν
Iliad 13.360	ἄρρηκτόν τʼ ἄλυτόν τε, τὸ πολλῶν γούνατʼ ἔλυσεν.
Iliad 13.361	ἔνθα μεσαιπόλιός περ ἐὼν Δαναοῖσι κελεύσας
Iliad 13.362	Ἰδομενεὺς Τρώεσσι μετάλμενος ἐν φόβον ὦρσε.
Iliad 13.363	πέφνε γὰρ Ὀθρυονῆα Καβησόθεν ἔνδον ἐόντα,
Iliad 13.364	ὅς ῥα νέον πολέμοιο μετὰ κλέος εἰληλούθει,
Iliad 13.365	ᾔτεε δὲ Πριάμοιο θυγατρῶν εἶδος ἀρίστην
Iliad 13.366	Κασσάνδρην ἀνάεδνον, ὑπέσχετο δὲ μέγα ἔργον,
Iliad 13.367	ἐκ Τροίης ἀέκοντας ἀπωσέμεν υἷας Ἀχαιῶν.
Iliad 13.368	τῷ δʼ ὁ γέρων Πρίαμος ὑπό τʼ ἔσχετο καὶ κατένευσε
Iliad 13.369	δωσέμεναι· ὃ δὲ μάρναθʼ ὑποσχεσίῃσι πιθήσας.
Iliad 13.370	Ἰδομενεὺς δʼ αὐτοῖο τιτύσκετο δουρὶ φαεινῷ,
Iliad 13.371	καὶ βάλεν ὕψι βιβάντα τυχών· οὐδʼ ἤρκεσε θώρηξ
Iliad 13.372	χάλκεος, ὃν φορέεσκε, μέσῃ δʼ ἐν γαστέρι πῆξε.
Iliad 13.373	δούπησεν δὲ πεσών· ὃ δʼ ἐπεύξατο φώνησέν τε·
Iliad 13.374	Ὀθρυονεῦ περὶ δή σε βροτῶν αἰνίζομʼ ἁπάντων
Iliad 13.375	εἰ ἐτεὸν δὴ πάντα τελευτήσεις ὅσʼ ὑπέστης
Iliad 13.376	Δαρδανίδῃ Πριάμῳ· ὃ δʼ ὑπέσχετο θυγατέρα ἥν.
Iliad 13.377	καί κέ τοι ἡμεῖς ταῦτά γʼ ὑποσχόμενοι τελέσαιμεν,
Iliad 13.378	δοῖμεν δʼ Ἀτρεΐδαο θυγατρῶν εἶδος ἀρίστην
Iliad 13.379	Ἄργεος ἐξαγαγόντες ὀπυιέμεν, εἴ κε σὺν ἄμμιν
Iliad 13.380	Ἰλίου ἐκπέρσῃς εὖ ναιόμενον πτολίεθρον.
Iliad 13.381	ἀλλʼ ἕπεʼ, ὄφρʼ ἐπὶ νηυσὶ συνώμεθα ποντοπόροισιν
Iliad 13.382	ἀμφὶ γάμῳ, ἐπεὶ οὔ τοι ἐεδνωταὶ κακοί εἰμεν.
Iliad 13.383	ὣς εἰπὼν ποδὸς ἕλκε κατὰ κρατερὴν ὑσμίνην
Iliad 13.384	ἥρως Ἰδομενεύς· τῷ δʼ Ἄσιος ἦλθʼ ἐπαμύντωρ
Iliad 13.385	πεζὸς πρόσθʼ ἵππων· τὼ δὲ πνείοντε κατʼ ὤμων
Iliad 13.386	αἰὲν ἔχʼ ἡνίοχος θεράπων· ὃ δὲ ἵετο θυμῷ
Iliad 13.387	Ἰδομενῆα βαλεῖν· ὃ δέ μιν φθάμενος βάλε δουρὶ
Iliad 13.388	λαιμὸν ὑπʼ ἀνθερεῶνα, διὰ πρὸ δὲ χαλκὸν ἔλασσεν.
Iliad 13.389	ἤριπε δʼ ὡς ὅτε τις δρῦς ἤριπεν ἢ ἀχερωῒς
Iliad 13.390	ἠὲ πίτυς βλωθρή, τήν τʼ οὔρεσι τέκτονες ἄνδρες
Iliad 13.391	ἐξέταμον πελέκεσσι νεήκεσι νήϊον εἶναι·
Iliad 13.392	ὣς ὃ πρόσθʼ ἵππων καὶ δίφρου κεῖτο τανυσθεὶς
Iliad 13.393	βεβρυχὼς κόνιος δεδραγμένος αἱματοέσσης.
Iliad 13.394	ἐκ δέ οἱ ἡνίοχος πλήγη φρένας ἃς πάρος εἶχεν,
Iliad 13.395	οὐδʼ ὅ γʼ ἐτόλμησεν δηΐων ὑπὸ χεῖρας ἀλύξας
Iliad 13.396	ἂψ ἵππους στρέψαι, τὸν δʼ Ἀντίλοχος μενεχάρμης
Iliad 13.397	δουρὶ μέσον περόνησε τυχών· οὐδʼ ἤρκεσε θώρηξ
Iliad 13.398	χάλκεος ὃν φορέεσκε, μέσῃ δʼ ἐν γαστέρι πῆξεν.
Iliad 13.399	αὐτὰρ ὃ ἀσθμαίνων εὐεργέος ἔκπεσε δίφρου,
Iliad 13.400	ἵππους δʼ Ἀντίλοχος μεγαθύμου Νέστορος υἱὸς
Iliad 13.401	ἐξέλασε Τρώων μετʼ ἐϋκνήμιδας Ἀχαιούς.
Iliad 13.402	Δηΐφοβος δὲ μάλα σχεδὸν ἤλυθεν Ἰδομενῆος
Iliad 13.403	Ἀσίου ἀχνύμενος, καὶ ἀκόντισε δουρὶ φαεινῷ.
Iliad 13.404	ἀλλʼ ὃ μὲν ἄντα ἰδὼν ἠλεύατο χάλκεον ἔγχος
Iliad 13.405	Ἰδομενεύς· κρύφθη γὰρ ὑπʼ ἀσπίδι πάντοσʼ ἐΐσῃ,
Iliad 13.406	τὴν ἄρʼ ὅ γε ῥινοῖσι βοῶν καὶ νώροπι χαλκῷ
Iliad 13.407	δινωτὴν φορέεσκε, δύω κανόνεσσʼ ἀραρυῖαν·
Iliad 13.408	τῇ ὕπο πᾶς ἐάλη, τὸ δʼ ὑπέρπτατο χάλκεον ἔγχος,
Iliad 13.409	καρφαλέον δέ οἱ ἀσπὶς ἐπιθρέξαντος ἄϋσεν
Iliad 13.410	ἔγχεος· οὐδʼ ἅλιόν ῥα βαρείης χειρὸς ἀφῆκεν,
Iliad 13.411	ἀλλʼ ἔβαλʼ Ἱππασίδην Ὑψήνορα ποιμένα λαῶν
Iliad 13.412	ἧπαρ ὑπὸ πραπίδων, εἶθαρ δʼ ὑπὸ γούνατʼ ἔλυσε.
Iliad 13.413	Δηΐφοβος δʼ ἔκπαγλον ἐπεύξατο μακρὸν ἀΰσας·
Iliad 13.414	οὐ μὰν αὖτʼ ἄτιτος κεῖτʼ Ἄσιος, ἀλλά ἕ φημι
Iliad 13.415	εἰς Ἄϊδός περ ἰόντα πυλάρταο κρατεροῖο
Iliad 13.416	γηθήσειν κατὰ θυμόν, ἐπεί ῥά οἱ ὤπασα πομπόν.
Iliad 13.417	ὣς ἔφατʼ, Ἀργείοισι δʼ ἄχος γένετʼ εὐξαμένοιο,
Iliad 13.418	Ἀντιλόχῳ δὲ μάλιστα δαΐφρονι θυμὸν ὄρινεν·
Iliad 13.419	ἀλλʼ οὐδʼ ἀχνύμενός περ ἑοῦ ἀμέλησεν ἑταίρου,
Iliad 13.420	ἀλλὰ θέων περίβη καί οἱ σάκος ἀμφεκάλυψε.
Iliad 13.421	τὸν μὲν ἔπειθʼ ὑποδύντε δύω ἐρίηρες ἑταῖροι
Iliad 13.422	Μηκιστεὺς Ἐχίοιο πάϊς καὶ δῖος Ἀλάστωρ,
Iliad 13.423	νῆας ἔπι γλαφυρὰς φερέτην βαρέα στενάχοντα.
Iliad 13.424	Ἰδομενεὺς δʼ οὐ λῆγε μένος μέγα, ἵετο δʼ αἰεὶ
Iliad 13.425	ἠέ τινα Τρώων ἐρεβεννῇ νυκτὶ καλύψαι
Iliad 13.426	ἢ αὐτὸς δουπῆσαι ἀμύνων λοιγὸν Ἀχαιοῖς.
Iliad 13.427	ἔνθʼ Αἰσυήταο διοτρεφέος φίλον υἱὸν
Iliad 13.428	ἥρωʼ Ἀλκάθοον, γαμβρὸς δʼ ἦν Ἀγχίσαο,
Iliad 13.429	πρεσβυτάτην δʼ ὤπυιε θυγατρῶν Ἱπποδάμειαν
Iliad 13.430	τὴν περὶ κῆρι φίλησε πατὴρ καὶ πότνια μήτηρ
Iliad 13.431	ἐν μεγάρῳ· πᾶσαν γὰρ ὁμηλικίην ἐκέκαστο
Iliad 13.432	κάλλεϊ καὶ ἔργοισιν ἰδὲ φρεσί· τοὔνεκα καί μιν
Iliad 13.433	γῆμεν ἀνὴρ ὤριστος ἐνὶ Τροίῃ εὐρείῃ·
Iliad 13.434	τὸν τόθʼ ὑπʼ Ἰδομενῆϊ Ποσειδάων ἐδάμασσε
Iliad 13.435	θέλξας ὄσσε φαεινά, πέδησε δὲ φαίδιμα γυῖα·
Iliad 13.436	οὔτε γὰρ ἐξοπίσω φυγέειν δύνατʼ οὔτʼ ἀλέασθαι,
Iliad 13.437	ἀλλʼ ὥς τε στήλην ἢ δένδρεον ὑψιπέτηλον
Iliad 13.438	ἀτρέμας ἑσταότα στῆθος μέσον οὔτασε δουρὶ
Iliad 13.439	ἥρως Ἰδομενεύς, ῥῆξεν δέ οἱ ἀμφὶ χιτῶνα
Iliad 13.440	χάλκεον, ὅς οἱ πρόσθεν ἀπὸ χροὸς ἤρκει ὄλεθρον·
Iliad 13.441	δὴ τότε γʼ αὖον ἄϋσεν ἐρεικόμενος περὶ δουρί.
Iliad 13.442	δούπησεν δὲ πεσών, δόρυ δʼ ἐν κραδίῃ ἐπεπήγει,
Iliad 13.443	ἥ ῥά οἱ ἀσπαίρουσα καὶ οὐρίαχον πελέμιζεν
Iliad 13.444	ἔγχεος· ἔνθα δʼ ἔπειτʼ ἀφίει μένος ὄβριμος Ἄρης·
Iliad 13.445	Ἰδομενεὺς δʼ ἔκπαγλον ἐπεύξατο μακρὸν ἀΰσας
Iliad 13.446	Δηΐφοβʼ ἦ ἄρα δή τι ἐΐσκομεν ἄξιον εἶναι
Iliad 13.447	τρεῖς ἑνὸς ἀντὶ πεφάσθαι; ἐπεὶ σύ περ εὔχεαι οὕτω.
Iliad 13.448	δαιμόνιʼ ἀλλὰ καὶ αὐτὸς ἐναντίον ἵστασʼ ἐμεῖο,
Iliad 13.449	ὄφρα ἴδῃ οἷος Ζηνὸς γόνος ἐνθάδʼ ἱκάνω,
Iliad 13.450	ὃς πρῶτον Μίνωα τέκε Κρήτῃ ἐπίουρον·
Iliad 13.451	Μίνως δʼ αὖ τέκεθʼ υἱὸν ἀμύμονα Δευκαλίωνα,
Iliad 13.452	Δευκαλίων δʼ ἐμὲ τίκτε πολέσσʼ ἄνδρεσσιν ἄνακτα
Iliad 13.453	Κρήτῃ ἐν εὐρείῃ· νῦν δʼ ἐνθάδε νῆες ἔνεικαν
Iliad 13.454	σοί τε κακὸν καὶ πατρὶ καὶ ἄλλοισι Τρώεσσιν.
Iliad 13.455	ὣς φάτο, Δηΐφοβος δὲ διάνδιχα μερμήριξεν
Iliad 13.456	ἤ τινά που Τρώων ἑταρίσσαιτο μεγαθύμων
Iliad 13.457	ἂψ ἀναχωρήσας, ἦ πειρήσαιτο καὶ οἶος.
Iliad 13.458	ὧδε δέ οἱ φρονέοντι δοάσσατο κέρδιον εἶναι
Iliad 13.459	βῆναι ἐπʼ Αἰνείαν· τὸν δʼ ὕστατον εὗρεν ὁμίλου
Iliad 13.460	ἑσταότʼ· αἰεὶ γὰρ Πριάμῳ ἐπεμήνιε δίῳ
Iliad 13.461	οὕνεκʼ ἄρʼ ἐσθλὸν ἐόντα μετʼ ἀνδράσιν οὔ τι τίεσκεν.
Iliad 13.462	ἀγχοῦ δʼ ἱστάμενος ἔπεα πτερόεντα προσηύδα·
Iliad 13.463	Αἰνεία Τρώων βουληφόρε νῦν σε μάλα χρὴ
Iliad 13.464	γαμβρῷ ἀμυνέμεναι, εἴ πέρ τί σε κῆδος ἱκάνει.
Iliad 13.465	ἀλλʼ ἕπευ Ἀλκαθόῳ ἐπαμύνομεν, ὅς σε πάρος γε
Iliad 13.466	γαμβρὸς ἐὼν ἔθρεψε δόμοις ἔνι τυτθὸν ἐόντα·
Iliad 13.467	τὸν δέ τοι Ἰδομενεὺς δουρικλυτὸς ἐξενάριξεν.
Iliad 13.468	ὣς φάτο, τῷ δʼ ἄρα θυμὸν ἐνὶ στήθεσσιν ὄρινε,
Iliad 13.469	βῆ δὲ μετʼ Ἰδομενῆα μέγα πτολέμοιο μεμηλώς.
Iliad 13.470	ἀλλʼ οὐκ Ἰδομενῆα φόβος λάβε τηλύγετον ὥς,
Iliad 13.471	ἀλλʼ ἔμενʼ ὡς ὅτε τις σῦς οὔρεσιν ἀλκὶ πεποιθώς,
Iliad 13.472	ὅς τε μένει κολοσυρτὸν ἐπερχόμενον πολὺν ἀνδρῶν
Iliad 13.473	χώρῳ ἐν οἰοπόλῳ, φρίσσει δέ τε νῶτον ὕπερθεν·
Iliad 13.474	ὀφθαλμὼ δʼ ἄρα οἱ πυρὶ λάμπετον· αὐτὰρ ὀδόντας
Iliad 13.475	θήγει, ἀλέξασθαι μεμαὼς κύνας ἠδὲ καὶ ἄνδρας·
Iliad 13.476	ὣς μένεν Ἰδομενεὺς δουρικλυτός, οὐδʼ ὑπεχώρει,
Iliad 13.477	Αἰνείαν ἐπιόντα βοηθόον· αὖε δʼ ἑταίρους
Iliad 13.478	Ἀσκάλαφόν τʼ ἐσορῶν Ἀφαρῆά τε Δηΐπυρόν τε
Iliad 13.479	Μηριόνην τε καὶ Ἀντίλοχον μήστωρας ἀϋτῆς·
Iliad 13.480	τοὺς ὅ γʼ ἐποτρύνων ἔπεα πτερόεντα προσηύδα·
Iliad 13.481	δεῦτε φίλοι, καί μʼ οἴῳ ἀμύνετε· δείδια δʼ αἰνῶς
Iliad 13.482	Αἰνείαν ἐπιόντα πόδας ταχύν, ὅς μοι ἔπεισιν,
Iliad 13.483	ὃς μάλα καρτερός ἐστι μάχῃ ἔνι φῶτας ἐναίρειν·
Iliad 13.484	καὶ δʼ ἔχει ἥβης ἄνθος, ὅ τε κράτος ἐστὶ μέγιστον.
Iliad 13.485	εἰ γὰρ ὁμηλικίη γε γενοίμεθα τῷδʼ ἐπὶ θυμῷ
Iliad 13.486	αἶψά κεν ἠὲ φέροιτο μέγα κράτος, ἠὲ φεροίμην.
Iliad 13.487	ὣς ἔφαθʼ, οἳ δʼ ἄρα πάντες ἕνα φρεσὶ θυμὸν ἔχοντες
Iliad 13.488	πλησίοι ἔστησαν, σάκεʼ ὤμοισι κλίναντες.
Iliad 13.489	Αἰνείας δʼ ἑτέρωθεν ἐκέκλετο οἷς ἑτάροισι
Iliad 13.490	Δηΐφοβόν τε Πάριν τʼ ἐσορῶν καὶ Ἀγήνορα δῖον,
Iliad 13.491	οἵ οἱ ἅμʼ ἡγεμόνες Τρώων ἔσαν· αὐτὰρ ἔπειτα
Iliad 13.492	λαοὶ ἕπονθʼ, ὡς εἴ τε μετὰ κτίλον ἕσπετο μῆλα
Iliad 13.493	πιόμενʼ ἐκ βοτάνης· γάνυται δʼ ἄρα τε φρένα ποιμήν·
Iliad 13.494	ὣς Αἰνείᾳ θυμὸς ἐνὶ στήθεσσι γεγήθει
Iliad 13.495	ὡς ἴδε λαῶν ἔθνος ἐπισπόμενον ἑοῖ αὐτῷ.
Iliad 13.496	οἳ δʼ ἀμφʼ Ἀλκαθόῳ αὐτοσχεδὸν ὁρμήθησαν
Iliad 13.497	μακροῖσι ξυστοῖσι· περὶ στήθεσσι δὲ χαλκὸς
Iliad 13.498	σμερδαλέον κονάβιζε τιτυσκομένων καθʼ ὅμιλον
Iliad 13.499	ἀλλήλων· δύο δʼ ἄνδρες ἀρήϊοι ἔξοχον ἄλλων
Iliad 13.500	Αἰνείας τε καὶ Ἰδομενεὺς ἀτάλαντοι Ἄρηϊ
Iliad 13.501	ἵεντʼ ἀλλήλων ταμέειν χρόα νηλέϊ χαλκῷ.
Iliad 13.502	Αἰνείας δὲ πρῶτος ἀκόντισεν Ἰδομενῆος·
Iliad 13.503	ἀλλʼ ὃ μὲν ἄντα ἰδὼν ἠλεύατο χάλκεον ἔγχος,
Iliad 13.504	αἰχμὴ δʼ Αἰνείαο κραδαινομένη κατὰ γαίης
Iliad 13.505	ᾤχετʼ, ἐπεί ῥʼ ἅλιον στιβαρῆς ἀπὸ χειρὸς ὄρουσεν.
Iliad 13.506	Ἰδομενεὺς δʼ ἄρα Οἰνόμαον βάλε γαστέρα μέσσην,
Iliad 13.507	ῥῆξε δὲ θώρηκος γύαλον, διὰ δʼ ἔντερα χαλκὸς
Iliad 13.508	ἤφυσʼ· ὃ δʼ ἐν κονίῃσι πεσὼν ἕλε γαῖαν ἀγοστῷ.
Iliad 13.509	Ἰδομενεὺς δʼ ἐκ μὲν νέκυος δολιχόσκιον ἔγχος
Iliad 13.510	ἐσπάσατʼ, οὐδʼ ἄρʼ ἔτʼ ἄλλα δυνήσατο τεύχεα καλὰ
Iliad 13.511	ὤμοιιν ἀφελέσθαι· ἐπείγετο γὰρ βελέεσσιν.
Iliad 13.512	οὐ γὰρ ἔτʼ ἔμπεδα γυῖα ποδῶν ἦν ὁρμηθέντι,
Iliad 13.513	οὔτʼ ἄρʼ ἐπαΐξαι μεθʼ ἑὸν· βέλος οὔτʼ ἀλέασθαι.
Iliad 13.514	τώ ῥα καὶ ἐν σταδίῃ μὲν ἀμύνετο νηλεὲς ἦμαρ,
Iliad 13.515	τρέσσαι δʼ οὐκ ἔτι ῥίμφα πόδες φέρον ἐκ πολέμοιο.
Iliad 13.516	τοῦ δὲ βάδην ἀπιόντος ἀκόντισε δουρὶ φαεινῷ
Iliad 13.517	Δηΐφοβος· δὴ γάρ οἱ ἔχεν κότον ἐμμενὲς αἰεί.
Iliad 13.518	ἀλλʼ ὅ γε καὶ τόθʼ ἅμαρτεν, ὃ δʼ Ἀσκάλαφον βάλε δουρὶ
Iliad 13.519	υἱὸν Ἐνυαλίοιο· διʼ ὤμου δʼ ὄβριμον ἔγχος
Iliad 13.520	ἔσχεν· ὃ δʼ ἐν κονίῃσι πεσὼν ἕλε γαῖαν ἀγοστῷ.
Iliad 13.521	οὐδʼ ἄρα πώ τι πέπυστο βριήπυος ὄβριμος Ἄρης
Iliad 13.522	υἷος ἑοῖο πεσόντος ἐνὶ κρατερῇ ὑσμίνῃ,
Iliad 13.523	ἀλλʼ ὅ γʼ ἄρʼ ἄκρῳ Ὀλύμπῳ ὑπὸ χρυσέοισι νέφεσσιν
Iliad 13.524	ἧστο Διὸς βουλῇσιν ἐελμένος, ἔνθά περ ἄλλοι
Iliad 13.525	ἀθάνατοι θεοὶ ἦσαν ἐεργόμενοι πολέμοιο.
Iliad 13.526	οἳ δʼ ἀμφʼ Ἀσκαλάφῳ αὐτοσχεδὸν ὁρμήθησαν·
Iliad 13.527	Δηΐφοβος μὲν ἀπʼ Ἀσκαλάφου πήληκα φαεινὴν
Iliad 13.528	ἥρπασε, Μηριόνης δὲ θοῷ ἀτάλαντος Ἄρηϊ
Iliad 13.529	δουρὶ βραχίονα τύψεν ἐπάλμενος, ἐκ δʼ ἄρα χειρὸς
Iliad 13.530	αὐλῶπις τρυφάλεια χαμαὶ βόμβησε πεσοῦσα.
Iliad 13.531	Μηριόνης δʼ ἐξ αὖτις ἐπάλμενος αἰγυπιὸς ὣς
Iliad 13.532	ἐξέρυσε πρυμνοῖο βραχίονος ὄβριμον ἔγχος,
Iliad 13.533	ἂψ δʼ ἑτάρων εἰς ἔθνος ἐχάζετο. τὸν δὲ Πολίτης
Iliad 13.534	αὐτοκασίγνητος περὶ μέσσῳ χεῖρε τιτήνας
Iliad 13.535	ἐξῆγεν πολέμοιο δυσηχέος, ὄφρʼ ἵκεθʼ ἵππους
Iliad 13.536	ὠκέας, οἵ οἱ ὄπισθε μάχης ἠδὲ πτολέμοιο
Iliad 13.537	ἕστασαν ἡνίοχόν τε καὶ ἅρματα ποικίλʼ ἔχοντες·
Iliad 13.538	οἳ τόν γε προτὶ ἄστυ φέρον βαρέα στενάχοντα
Iliad 13.539	τειρόμενον· κατὰ δʼ αἷμα νεουτάτου ἔρρεε χειρός.
Iliad 13.540	οἳ δʼ ἄλλοι μάρναντο, βοὴ δʼ ἄσβεστος ὀρώρει.
Iliad 13.541	ἔνθʼ Αἰνέας Ἀφαρῆα Καλητορίδην ἐπορούσας
Iliad 13.542	λαιμὸν τύψʼ ἐπὶ οἷ τετραμμένον ὀξέϊ δουρί·
Iliad 13.543	ἐκλίνθη δʼ ἑτέρωσε κάρη, ἐπὶ δʼ ἀσπὶς ἑάφθη
Iliad 13.544	καὶ κόρυς, ἀμφὶ δέ οἱ θάνατος χύτο θυμοραϊστής.
Iliad 13.545	Ἀντίλοχος δὲ Θόωνα μεταστρεφθέντα δοκεύσας
Iliad 13.546	οὔτασʼ ἐπαΐξας, ἀπὸ δὲ φλέβα πᾶσαν ἔκερσεν,
Iliad 13.547	ἥ τʼ ἀνὰ νῶτα θέουσα διαμπερὲς αὐχένʼ ἱκάνει·
Iliad 13.548	τὴν ἀπὸ πᾶσαν ἔκερσεν· ὃ δʼ ὕπτιος ἐν κονίῃσι
Iliad 13.549	κάππεσεν, ἄμφω χεῖρε φίλοις ἑτάροισι πετάσσας.
Iliad 13.550	Ἀντίλοχος δʼ ἐπόρουσε, καὶ αἴνυτο τεύχεʼ ἀπʼ ὤμων
Iliad 13.551	παπταίνων· Τρῶες δὲ περισταδὸν ἄλλοθεν ἄλλος
Iliad 13.552	οὔταζον σάκος εὐρὺ παναίολον, οὐδὲ δύναντο
Iliad 13.553	εἴσω ἐπιγράψαι τέρενα χρόα νηλέϊ χαλκῷ
Iliad 13.554	Ἀντιλόχου· πέρι γάρ ῥα Ποσειδάων ἐνοσίχθων
Iliad 13.555	Νέστορος υἱὸν ἔρυτο καὶ ἐν πολλοῖσι βέλεσσιν.
Iliad 13.556	οὐ μὲν γάρ ποτʼ ἄνευ δηΐων ἦν, ἀλλὰ κατʼ αὐτοὺς
Iliad 13.557	στρωφᾶτʼ· οὐδέ οἱ ἔγχος ἔχʼ ἀτρέμας, ἀλλὰ μάλʼ αἰεὶ
Iliad 13.558	σειόμενον ἐλέλικτο· τιτύσκετο δὲ φρεσὶν ᾗσιν
Iliad 13.559	ἤ τευ ἀκοντίσσαι, ἠὲ σχεδὸν ὁρμηθῆναι.
Iliad 13.560	ἀλλʼ οὐ λῆθʼ Ἀδάμαντα τιτυσκόμενος καθʼ ὅμιλον
Iliad 13.561	Ἀσιάδην, ὅ οἱ οὖτα μέσον σάκος ὀξέϊ χαλκῷ
Iliad 13.562	ἐγγύθεν ὁρμηθείς· ἀμενήνωσεν δέ οἱ αἰχμὴν
Iliad 13.563	κυανοχαῖτα Ποσειδάων βιότοιο μεγήρας.
Iliad 13.564	καὶ τὸ μὲν αὐτοῦ μεῖνʼ ὥς τε σκῶλος πυρίκαυστος
Iliad 13.565	ἐν σάκει Ἀντιλόχοιο, τὸ δʼ ἥμισυ κεῖτʼ ἐπὶ γαίης·
Iliad 13.566	ἂψ δʼ ἑτάρων εἰς ἔθνος ἐχάζετο κῆρʼ ἀλεείνων·
Iliad 13.567	Μηριόνης δʼ ἀπιόντα μετασπόμενος βάλε δουρὶ
Iliad 13.568	αἰδοίων τε μεσηγὺ καὶ ὀμφαλοῦ, ἔνθα μάλιστα
Iliad 13.569	γίγνετʼ Ἄρης ἀλεγεινὸς ὀϊζυροῖσι βροτοῖσιν.
Iliad 13.570	ἔνθά οἱ ἔγχος ἔπηξεν· ὃ δʼ ἑσπόμενος περὶ δουρὶ
Iliad 13.571	ἤσπαιρʼ ὡς ὅτε βοῦς τόν τʼ οὔρεσι βουκόλοι ἄνδρες
Iliad 13.572	ἰλλάσιν οὐκ ἐθέλοντα βίῃ δήσαντες ἄγουσιν·
Iliad 13.573	ὣς ὃ τυπεὶς ἤσπαιρε μίνυνθά περ, οὔ τι μάλα δήν,
Iliad 13.574	ὄφρά οἱ ἐκ χροὸς ἔγχος ἀνεσπάσατʼ ἐγγύθεν ἐλθὼν
Iliad 13.575	ἥρως Μηριόνης· τὸν δὲ σκότος ὄσσε κάλυψε.
Iliad 13.576	Δηΐπυρον δʼ Ἕλενος ξίφεϊ σχεδὸν ἤλασε κόρσην
Iliad 13.577	Θρηϊκίῳ μεγάλῳ, ἀπὸ δὲ τρυφάλειαν ἄραξεν.
Iliad 13.578	ἣ μὲν ἀποπλαγχθεῖσα χαμαὶ πέσε, καί τις Ἀχαιῶν
Iliad 13.579	μαρναμένων μετὰ ποσσὶ κυλινδομένην ἐκόμισσε·
Iliad 13.580	τὸν δὲ κατʼ ὀφθαλμῶν ἐρεβεννὴ νὺξ ἐκάλυψεν.
Iliad 13.581	Ἀτρεΐδην δʼ ἄχος εἷλε βοὴν ἀγαθὸν Μενέλαον·
Iliad 13.582	βῆ δʼ ἐπαπειλήσας Ἑλένῳ ἥρωϊ ἄνακτι
Iliad 13.583	ὀξὺ δόρυ κραδάων· ὃ δὲ τόξου πῆχυν ἄνελκε.
Iliad 13.584	τὼ δʼ ἄρʼ ὁμαρτήδην ὃ μὲν ἔγχεϊ ὀξυόεντι
Iliad 13.585	ἵετʼ ἀκοντίσσαι, ὃ δʼ ἀπὸ νευρῆφιν ὀϊστῷ.
Iliad 13.586	Πριαμίδης μὲν ἔπειτα κατὰ στῆθος βάλεν ἰῷ
Iliad 13.587	θώρηκος γύαλον, ἀπὸ δʼ ἔπτατο πικρὸς ὀϊστός.
Iliad 13.588	ὡς δʼ ὅτʼ ἀπὸ πλατέος πτυόφιν μεγάλην κατʼ ἀλωὴν
Iliad 13.589	θρῴσκωσιν κύαμοι μελανόχροες ἢ ἐρέβινθοι
Iliad 13.590	πνοιῇ ὕπο λιγυρῇ καὶ λικμητῆρος ἐρωῇ,
Iliad 13.591	ὣς ἀπὸ θώρηκος Μενελάου κυδαλίμοιο
Iliad 13.592	πολλὸν ἀποπλαγχθεὶς ἑκὰς ἔπτατο πικρὸς ὀϊστός.
Iliad 13.593	Ἀτρεΐδης δʼ ἄρα χεῖρα βοὴν ἀγαθὸς Μενέλαος
Iliad 13.594	τὴν βάλεν ᾗ ῥʼ ἔχε τόξον ἐΰξοον· ἐν δʼ ἄρα τόξῳ
Iliad 13.595	ἀντικρὺ διὰ χειρὸς ἐλήλατο χάλκεον ἔγχος.
Iliad 13.596	ἂψ δʼ ἑτάρων εἰς ἔθνος ἐχάζετο κῆρʼ ἀλεείνων
Iliad 13.597	χεῖρα παρακρεμάσας· τὸ δʼ ἐφέλκετο μείλινον ἔγχος.
Iliad 13.598	καὶ τὸ μὲν ἐκ χειρὸς ἔρυσεν μεγάθυμος Ἀγήνωρ,
Iliad 13.599	αὐτὴν δὲ ξυνέδησεν ἐϋστρεφεῖ οἰὸς ἀώτῳ
Iliad 13.600	σφενδόνῃ, ἣν ἄρα οἱ θεράπων ἔχε ποιμένι λαῶν.
Iliad 13.601	Πείσανδρος δʼ ἰθὺς Μενελάου κυδαλίμοιο
Iliad 13.602	ἤϊε· τὸν δʼ ἄγε μοῖρα κακὴ θανάτοιο τέλος δὲ
Iliad 13.603	σοὶ Μενέλαε δαμῆναι ἐν αἰνῇ δηϊοτῆτι.
Iliad 13.604	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες
Iliad 13.605	Ἀτρεΐδης μὲν ἅμαρτε, παραὶ δέ οἱ ἐτράπετʼ ἔγχος,
Iliad 13.606	Πείσανδρος δὲ σάκος Μενελάου κυδαλίμοιο
Iliad 13.607	οὔτασεν, οὐδὲ διὰ πρὸ δυνήσατο χαλκὸν ἐλάσσαι·
Iliad 13.608	ἔσχεθε γὰρ σάκος εὐρύ, κατεκλάσθη δʼ ἐνὶ καυλῷ
Iliad 13.609	ἔγχος· ὃ δὲ φρεσὶν ᾗσι χάρη καὶ ἐέλπετο νίκην.
Iliad 13.610	Ἀτρεΐδης δὲ ἐρυσσάμενος ξίφος ἀργυρόηλον
Iliad 13.611	ἆλτʼ ἐπὶ Πεισάνδρῳ· ὃ δʼ ὑπʼ ἀσπίδος εἵλετο καλὴν
Iliad 13.612	ἀξίνην εὔχαλκον ἐλαΐνῳ ἀμφὶ πελέκκῳ
Iliad 13.613	μακρῷ ἐϋξέστῳ· ἅμα δʼ ἀλλήλων ἐφίκοντο.
Iliad 13.614	ἤτοι ὃ μὲν κόρυθος φάλον ἤλασεν ἱπποδασείης
Iliad 13.615	ἄκρον ὑπὸ λόφον αὐτόν, ὃ δὲ προσιόντα μέτωπον
Iliad 13.616	ῥινὸς ὕπερ πυμάτης· λάκε δʼ ὀστέα, τὼ δέ οἱ ὄσσε
Iliad 13.617	πὰρ ποσὶν αἱματόεντα χαμαὶ πέσον ἐν κονίῃσιν,
Iliad 13.618	ἰδνώθη δὲ πεσών· ὃ δὲ λὰξ ἐν στήθεσι βαίνων
Iliad 13.619	τεύχεά τʼ ἐξενάριξε καὶ εὐχόμενος ἔπος ηὔδα·
Iliad 13.620	λείψετέ θην οὕτω γε νέας Δαναῶν ταχυπώλων
Iliad 13.621	Τρῶες ὑπερφίαλοι δεινῆς ἀκόρητοι ἀϋτῆς,
Iliad 13.622	ἄλλης μὲν λώβης τε καὶ αἴσχεος οὐκ ἐπιδευεῖς
Iliad 13.623	ἣν ἐμὲ λωβήσασθε κακαὶ κύνες, οὐδέ τι θυμῷ
Iliad 13.624	Ζηνὸς ἐριβρεμέτεω χαλεπὴν ἐδείσατε μῆνιν
Iliad 13.625	ξεινίου, ὅς τέ ποτʼ ὔμμι διαφθέρσει πόλιν αἰπήν·
Iliad 13.626	οἵ μευ κουριδίην ἄλοχον καὶ κτήματα πολλὰ
Iliad 13.627	μὰψ οἴχεσθʼ ἀνάγοντες, ἐπεὶ φιλέεσθε παρʼ αὐτῇ·
Iliad 13.628	νῦν αὖτʼ ἐν νηυσὶν μενεαίνετε ποντοπόροισι
Iliad 13.629	πῦρ ὀλοὸν βαλέειν, κτεῖναι δʼ ἥρωας Ἀχαιούς.
Iliad 13.630	ἀλλά ποθι σχήσεσθε καὶ ἐσσύμενοί περ Ἄρηος.
Iliad 13.631	Ζεῦ πάτερ ἦ τέ σέ φασι περὶ φρένας ἔμμεναι ἄλλων
Iliad 13.632	ἀνδρῶν ἠδὲ θεῶν· σέο δʼ ἐκ τάδε πάντα πέλονται·
Iliad 13.633	οἷον δὴ ἄνδρεσσι χαρίζεαι ὑβριστῇσι
Iliad 13.634	Τρωσίν, τῶν μένος αἰὲν ἀτάσθαλον, οὐδὲ δύνανται
Iliad 13.635	φυλόπιδος κορέσασθαι ὁμοιΐου πτολέμοιο.
Iliad 13.636	πάντων μὲν κόρος ἐστὶ καὶ ὕπνου καὶ φιλότητος
Iliad 13.637	μολπῆς τε γλυκερῆς καὶ ἀμύμονος ὀρχηθμοῖο,
Iliad 13.638	τῶν πέρ τις καὶ μᾶλλον ἐέλδεται ἐξ ἔρον εἷναι
Iliad 13.639	ἢ πολέμου· Τρῶες δὲ μάχης ἀκόρητοι ἔασιν.
Iliad 13.640	ὣς εἰπὼν τὰ μὲν ἔντεʼ ἀπὸ χροὸς αἱματόεντα
Iliad 13.641	συλήσας ἑτάροισι δίδου Μενέλαος ἀμύμων,
Iliad 13.642	αὐτὸς δʼ αὖτʼ ἐξ αὖτις ἰὼν προμάχοισιν ἐμίχθη.
Iliad 13.643	ἔνθά οἱ υἱὸς ἐπᾶλτο Πυλαιμένεος βασιλῆος
Iliad 13.644	Ἁρπαλίων, ὅ ῥα πατρὶ φίλῳ ἕπετο πτολεμίξων
Iliad 13.645	ἐς τροίην, οὐδʼ αὖτις ἀφίκετο πατρίδα γαῖαν·
Iliad 13.646	ὅς ῥα τότʼ Ἀτρεΐδαο μέσον σάκος οὔτασε δουρὶ
Iliad 13.647	ἐγγύθεν, οὐδὲ διὰ πρὸ δυνήσατο χαλκὸν ἐλάσσαι
Iliad 13.648	ἂψ δʼ ἑτάρων εἰς ἔθνος ἐχάζετο κῆρʼ ἀλεείνων
Iliad 13.649	πάντοσε παπταίνων μή τις χρόα χαλκῷ ἐπαύρῃ.
Iliad 13.650	Μηριόνης δʼ ἀπιόντος ἵει χαλκήρεʼ ὀϊστόν,
Iliad 13.651	καί ῥʼ ἔβαλε γλουτὸν κάτα δεξιόν· αὐτὰρ ὀϊστὸς
Iliad 13.652	ἀντικρὺ κατὰ κύστιν ὑπʼ ὀστέον ἐξεπέρησεν.
Iliad 13.653	ἑζόμενος δὲ κατʼ αὖθι φίλων ἐν χερσὶν ἑταίρων
Iliad 13.654	θυμὸν ἀποπνείων, ὥς τε σκώληξ ἐπὶ γαίῃ
Iliad 13.655	κεῖτο ταθείς· ἐκ δʼ αἷμα μέλαν ῥέε, δεῦε δὲ γαῖαν.
Iliad 13.656	τὸν μὲν Παφλαγόνες μεγαλήτορες ἀμφεπένοντο,
Iliad 13.657	ἐς δίφρον δʼ ἀνέσαντες ἄγον προτὶ Ἴλιον ἱρὴν
Iliad 13.658	ἀχνύμενοι· μετὰ δέ σφι πατὴρ κίε δάκρυα λείβων,
Iliad 13.659	ποινὴ δʼ οὔ τις παιδὸς ἐγίγνετο τεθνηῶτος.
Iliad 13.660	τοῦ δὲ Πάρις μάλα θυμὸν ἀποκταμένοιο χολώθη·
Iliad 13.661	ξεῖνος γάρ οἱ ἔην πολέσιν μετὰ Παφλαγόνεσσι·
Iliad 13.662	τοῦ ὅ γε χωόμενος προΐει χαλκήρεʼ ὀϊστόν.
Iliad 13.663	ἦν δέ τις Εὐχήνωρ Πολυΐδου μάντιος υἱὸς
Iliad 13.664	ἀφνειός τʼ ἀγαθός τε Κορινθόθι οἰκία ναίων,
Iliad 13.665	ὅς ῥʼ εὖ εἰδὼς κῆρʼ ὀλοὴν ἐπὶ νηὸς ἔβαινε·
Iliad 13.666	πολλάκι γάρ οἱ ἔειπε γέρων ἀγαθὸς Πολύϊδος
Iliad 13.667	νούσῳ ὑπʼ ἀργαλέῃ φθίσθαι οἷς ἐν μεγάροισιν,
Iliad 13.668	ἢ μετʼ Ἀχαιῶν νηυσὶν ὑπὸ Τρώεσσι δαμῆναι·
Iliad 13.669	τώ ῥʼ ἅμα τʼ ἀργαλέην θωὴν ἀλέεινεν Ἀχαιῶν
Iliad 13.670	νοῦσόν τε στυγερήν, ἵνα μὴ πάθοι ἄλγεα θυμῷ.
Iliad 13.671	τὸν βάλʼ ὑπὸ γναθμοῖο. καὶ οὔατος· ὦκα δὲ θυμὸς
Iliad 13.672	ᾤχετʼ ἀπὸ μελέων, στυγερὸς δʼ ἄρα μιν σκότος εἷλεν.
Iliad 13.673	ὣς οἳ μὲν μάρναντο δέμας πυρὸς αἰθομένοιο·
Iliad 13.674	Ἕκτωρ δʼ οὐκ ἐπέπυστο Διῒ φίλος, οὐδέ τι ᾔδη
Iliad 13.675	ὅττί ῥά οἱ νηῶν ἐπʼ ἀριστερὰ δηϊόωντο
Iliad 13.676	λαοὶ ὑπʼ Ἀργείων. τάχα δʼ ἂν καὶ κῦδος Ἀχαιῶν
Iliad 13.677	ἔπλετο· τοῖος γὰρ γαιήοχος ἐννοσίγαιος
Iliad 13.678	ὄτρυνʼ Ἀργείους, πρὸς δὲ σθένει αὐτὸς ἄμυνεν·
Iliad 13.679	ἀλλʼ ἔχεν ᾗ τὰ πρῶτα πύλας καὶ τεῖχος ἐσᾶλτο
Iliad 13.680	ῥηξάμενος Δαναῶν πυκινὰς στίχας ἀσπιστάων,
Iliad 13.681	ἔνθʼ ἔσαν Αἴαντός τε νέες καὶ Πρωτεσιλάου
Iliad 13.682	θῖνʼ ἔφʼ ἁλὸς πολιῆς εἰρυμέναι· αὐτὰρ ὕπερθε
Iliad 13.683	τεῖχος ἐδέδμητο χθαμαλώτατον, ἔνθα μάλιστα
Iliad 13.684	ζαχρηεῖς γίγνοντο μάχῃ αὐτοί τε καὶ ἵπποι.
Iliad 13.685	ἔνθα δὲ Βοιωτοὶ καὶ Ἰάονες ἑλκεχίτωνες
Iliad 13.686	Λοκροὶ καὶ Φθῖοι καὶ φαιδιμόεντες Ἐπειοὶ
Iliad 13.687	σπουδῇ ἐπαΐσσοντα νεῶν ἔχον, οὐδὲ δύναντο
Iliad 13.688	ὦσαι ἀπὸ σφείων φλογὶ εἴκελον Ἕκτορα δῖον
Iliad 13.689	οἳ μὲν Ἀθηναίων προλελεγμένοι· ἐν δʼ ἄρα τοῖσιν
Iliad 13.690	ἦρχʼ υἱὸς Πετεῶο Μενεσθεύς, οἳ δʼ ἅμʼ ἕποντο
Iliad 13.691	Φείδας τε Στιχίος τε Βίας τʼ ἐΰς· αὐτὰρ Ἐπειῶν
Iliad 13.692	Φυλεΐδης τε Μέγης Ἀμφίων τε Δρακίος τε,
Iliad 13.693	πρὸ Φθίων δὲ Μέδων τε μενεπτόλεμός τε Ποδάρκης.
Iliad 13.694	ἤτοι ὃ μὲν νόθος υἱὸς Ὀϊλῆος θείοιο
Iliad 13.695	ἔσκε Μέδων Αἴαντος ἀδελφεός· αὐτὰρ ἔναιεν
Iliad 13.696	ἐν Φυλάκῃ γαίης ἄπο πατρίδος ἄνδρα κατακτὰς
Iliad 13.697	γνωτὸν μητρυιῆς Ἐριώπιδος, ἣν ἔχʼ Ὀϊλεύς·
Iliad 13.698	αὐτὰρ ὃ Ἰφίκλοιο πάϊς τοῦ Φυλακίδαο.
Iliad 13.699	οἳ μὲν πρὸ Φθίων μεγαθύμων θωρηχθέντες
Iliad 13.700	ναῦφιν ἀμυνόμενοι μετὰ Βοιωτῶν ἐμάχοντο·
Iliad 13.701	Αἴας δʼ οὐκέτι πάμπαν Ὀϊλῆος ταχὺς υἱὸς
Iliad 13.702	ἵστατʼ ἀπʼ Αἴαντος Τελαμωνίου οὐδʼ ἠβαιόν,
Iliad 13.703	ἀλλʼ ὥς τʼ ἐν νειῷ βόε οἴνοπε πηκτὸν ἄροτρον
Iliad 13.704	ἶσον θυμὸν ἔχοντε τιταίνετον· ἀμφὶ δʼ ἄρά σφι
Iliad 13.705	πρυμνοῖσιν κεράεσσι πολὺς ἀνακηκίει ἱδρώς·
Iliad 13.706	τὼ μέν τε ζυγὸν οἶον ἐΰξοον ἀμφὶς ἐέργει
Iliad 13.707	ἱεμένω κατὰ ὦλκα· τέμει δέ τε τέλσον ἀρούρης·
Iliad 13.708	ὣς τὼ παρβεβαῶτε μάλʼ ἕστασαν ἀλλήλοιιν.
Iliad 13.709	ἀλλʼ ἤτοι Τελαμωνιάδῃ πολλοί τε καὶ ἐσθλοὶ
Iliad 13.710	λαοὶ ἕπονθʼ ἕταροι, οἵ οἱ σάκος ἐξεδέχοντο
Iliad 13.711	ὁππότε μιν κάματός τε καὶ ἱδρὼς γούναθʼ ἵκοιτο.
Iliad 13.712	οὐδʼ ἄρʼ Ὀϊλιάδῃ μεγαλήτορι Λοκροὶ ἕποντο·
Iliad 13.713	οὐ γάρ σφι σταδίῃ ὑσμίνῃ μίμνε φίλον κῆρ·
Iliad 13.714	οὐ γὰρ ἔχον κόρυθας χαλκήρεας ἱπποδασείας,
Iliad 13.715	οὐδʼ ἔχον ἀσπίδας εὐκύκλους καὶ μείλινα δοῦρα,
Iliad 13.716	ἀλλʼ ἄρα τόξοισιν καὶ ἐϋστρεφεῖ οἶος ἀώτῳ
Iliad 13.717	Ἴλιον εἰς ἅμʼ ἕποντο πεποιθότες, οἷσιν ἔπειτα
Iliad 13.718	ταρφέα βάλλοντες Τρώων ῥήγνυντο φάλαγγας·
Iliad 13.719	δή ῥα τόθʼ οἳ μὲν πρόσθε σὺν ἔντεσι δαιδαλέοισι
Iliad 13.720	μάρναντο Τρωσίν τε καὶ Ἕκτορι χαλκοκορυστῇ,
Iliad 13.721	οἳ δʼ ὄπιθεν βάλλοντες ἐλάνθανον· οὐδέ τι χάρμης
Iliad 13.722	Τρῶες μιμνήσκοντο· συνεκλόνεον γὰρ ὀϊστοί.
Iliad 13.723	ἔνθά κε λευγαλέως νηῶν ἄπο καὶ κλισιάων
Iliad 13.724	Τρῶες ἐχώρησαν προτὶ Ἴλιον ἠνεμόεσσαν,
Iliad 13.725	εἰ μὴ Πουλυδάμας θρασὺν Ἕκτορα εἶπε παραστάς·
Iliad 13.726	Ἕκτορ ἀμήχανός ἐσσι παραρρητοῖσι πιθέσθαι.
Iliad 13.727	οὕνεκά τοι περὶ δῶκε θεὸς πολεμήϊα ἔργα
Iliad 13.728	τοὔνεκα καὶ βουλῇ ἐθέλεις περιίδμεναι ἄλλων·
Iliad 13.729	ἀλλʼ οὔ πως ἅμα πάντα δυνήσεαι αὐτὸς ἑλέσθαι.
Iliad 13.730	ἄλλῳ μὲν γὰρ ἔδωκε θεὸς πολεμήϊα ἔργα,
Iliad 13.731	ἄλλῳ δʼ ὀρχηστύν, ἑτέρῳ κίθαριν καὶ ἀοιδήν,
Iliad 13.732	ἄλλῳ δʼ ἐν στήθεσσι τιθεῖ νόον εὐρύοπα Ζεὺς
Iliad 13.733	ἐσθλόν, τοῦ δέ τε πολλοὶ ἐπαυρίσκοντʼ ἄνθρωποι,
Iliad 13.734	καί τε πολέας ἐσάωσε, μάλιστα δὲ καὐτὸς ἀνέγνω.
Iliad 13.735	αὐτὰρ ἐγὼν ἐρέω ὥς μοι δοκεῖ εἶναι ἄριστα·
Iliad 13.736	πάντῃ γάρ σε περὶ στέφανος πολέμοιο δέδηε·
Iliad 13.737	Τρῶες δὲ μεγάθυμοι ἐπεὶ κατὰ τεῖχος ἔβησαν
Iliad 13.738	οἳ μὲν ἀφεστᾶσιν σὺν τεύχεσιν, οἳ δὲ μάχονται
Iliad 13.739	παυρότεροι πλεόνεσσι κεδασθέντες κατὰ νῆας.
Iliad 13.740	ἀλλʼ ἀναχασσάμενος κάλει ἐνθάδε πάντας ἀρίστους·
Iliad 13.741	ἔνθεν δʼ ἂν μάλα πᾶσαν ἐπιφρασσαίμεθα βουλὴν
Iliad 13.742	ἤ κεν ἐνὶ νήεσσι πολυκλήϊσι πέσωμεν
Iliad 13.743	αἴ κʼ ἐθέλῃσι θεὸς δόμεναι κράτος, ἦ κεν ἔπειτα
Iliad 13.744	πὰρ νηῶν ἔλθωμεν ἀπήμονες. ἦ γὰρ ἔγωγε
Iliad 13.745	δείδω μὴ τὸ χθιζὸν ἀποστήσωνται Ἀχαιοὶ
Iliad 13.746	χρεῖος, ἐπεὶ παρὰ νηυσὶν ἀνὴρ ἆτος πολέμοιο
Iliad 13.747	μίμνει, ὃν οὐκέτι πάγχυ μάχης σχήσεσθαι ὀΐω.
Iliad 13.748	ὣς φάτο Πουλυδάμας, ἅδε δʼ Ἕκτορι μῦθος ἀπήμων,
Iliad 13.749	αὐτίκα δʼ ἐξ ὀχέων σὺν τεύχεσιν ἆλτο χαμᾶζε
Iliad 13.750	καί μιν φωνήσας ἔπεα πτερόεντα προσηύδα·
Iliad 13.751	Πουλυδάμα σὺ μὲν αὐτοῦ ἐρύκακε πάντας ἀρίστους,
Iliad 13.752	αὐτὰρ ἐγὼ κεῖσʼ εἶμι καὶ ἀντιόω πολέμοιο·
Iliad 13.753	αἶψα δʼ ἐλεύσομαι αὖτις ἐπὴν εὖ τοῖς ἐπιτείλω.
Iliad 13.754	ἦ ῥα, καὶ ὁρμήθη ὄρεϊ νιφόεντι ἐοικὼς
Iliad 13.755	κεκλήγων, διὰ δὲ Τρώων πέτετʼ ἠδʼ ἐπικούρων.
Iliad 13.756	οἳ δʼ ἐς Πανθοΐδην ἀγαπήνορα Πουλυδάμαντα
Iliad 13.757	πάντες ἐπεσσεύοντʼ, ἐπεὶ Ἕκτορος ἔκλυον αὐδήν.
Iliad 13.758	αὐτὰρ ὃ Δηΐφοβόν τε βίην θʼ Ἑλένοιο ἄνακτος
Iliad 13.759	Ἀσιάδην τʼ Ἀδάμαντα καὶ Ἄσιον Ὑρτάκου υἱὸν
Iliad 13.760	φοίτα ἀνὰ προμάχους διζήμενος, εἴ που ἐφεύροι.
Iliad 13.761	τοὺς δʼ εὗρʼ οὐκέτι πάμπαν ἀπήμονας οὐδʼ ἀνολέθρους·
Iliad 13.762	ἀλλʼ οἳ μὲν δὴ νηυσὶν ἔπι πρυμνῇσιν Ἀχαιῶν
Iliad 13.763	χερσὶν ὑπʼ Ἀργείων κέατο ψυχὰς ὀλέσαντες,
Iliad 13.764	οἳ δʼ ἐν τείχει ἔσαν βεβλημένοι οὐτάμενοί τε.
Iliad 13.765	τὸν δὲ τάχʼ εὗρε μάχης ἐπʼ ἀριστερὰ δακρυοέσσης
Iliad 13.766	δῖον Ἀλέξανδρον Ἑλένης πόσιν ἠϋκόμοιο
Iliad 13.767	θαρσύνονθʼ ἑτάρους καὶ ἐποτρύνοντα μάχεσθαι,
Iliad 13.768	ἀγχοῦ δʼ ἱστάμενος προσέφη αἰσχροῖς ἐπέεσσι·
Iliad 13.769	Δύσπαρι εἶδος ἄριστε γυναιμανὲς ἠπεροπευτὰ
Iliad 13.770	ποῦ τοι Δηΐφοβός τε βίη θʼ Ἑλένοιο ἄνακτος
Iliad 13.771	Ἀσιάδης τʼ Ἀδάμας ἠδʼ Ἄσιος Ὑρτάκου υἱός;
Iliad 13.772	ποῦ δέ τοι Ὀθρυονεύς; νῦν ὤλετο πᾶσα κατʼ ἄκρης
Iliad 13.773	Ἴλιος αἰπεινή· νῦν τοι σῶς αἰπὺς ὄλεθρος.
Iliad 13.774	τὸν δʼ αὖτε προσέειπεν Ἀλέξανδρος θεοειδής·
Iliad 13.775	Ἕκτορ ἐπεί τοι θυμὸς ἀναίτιον αἰτιάασθαι,
Iliad 13.776	ἄλλοτε δή ποτε μᾶλλον ἐρωῆσαι πολέμοιο
Iliad 13.777	μέλλω, ἐπεὶ οὐδʼ ἐμὲ πάμπαν ἀνάλκιδα γείνατο μήτηρ·
Iliad 13.778	ἐξ οὗ γὰρ παρὰ νηυσὶ μάχην ἤγειρας ἑταίρων,
Iliad 13.779	ἐκ τοῦ δʼ ἐνθάδʼ ἐόντες ὁμιλέομεν Δαναοῖσι
Iliad 13.780	νωλεμέως· ἕταροι δὲ κατέκταθεν οὓς σὺ μεταλλᾷς.
Iliad 13.781	οἴω Δηΐφοβός τε βίη θʼ Ἑλένοιο ἄνακτος
Iliad 13.782	οἴχεσθον, μακρῇσι τετυμμένω ἐγχείῃσιν
Iliad 13.783	ἀμφοτέρω κατὰ χεῖρα· φόνον δʼ ἤμυνε Κρονίων.
Iliad 13.784	νῦν δʼ ἄρχʼ ὅππῃ σε κραδίη θυμός τε κελεύει·
Iliad 13.785	ἡμεῖς δʼ ἐμμεμαῶτες ἅμʼ ἑψόμεθʼ, οὐδέ τί φημι
Iliad 13.786	ἀλκῆς δευήσεσθαι, ὅση δύναμίς γε πάρεστι.
Iliad 13.787	πὰρ δύναμιν δʼ οὐκ ἔστι καὶ ἐσσύμενον πολεμίζειν.
Iliad 13.788	ὣς εἰπὼν παρέπεισεν ἀδελφειοῦ φρένας ἥρως·
Iliad 13.789	βὰν δʼ ἴμεν ἔνθα μάλιστα μάχη καὶ φύλοπις ἦεν
Iliad 13.790	ἀμφί τε Κεβριόνην καὶ ἀμύμονα Πουλυδάμαντα
Iliad 13.791	Φάλκην Ὀρθαῖόν τε καὶ ἀντίθεον Πολυφήτην
Iliad 13.792	Πάλμύν τʼ Ἀσκάνιόν τε Μόρυν θʼ υἷʼ Ἱπποτίωνος,
Iliad 13.793	οἵ ῥʼ ἐξ Ἀσκανίης ἐριβώλακος ἦλθον ἀμοιβοὶ
Iliad 13.794	ἠοῖ τῇ προτέρῃ· τότε δὲ Ζεὺς ὦρσε μάχεσθαι.
Iliad 13.795	οἳ δʼ ἴσαν ἀργαλέων ἀνέμων ἀτάλαντοι ἀέλλῃ,
Iliad 13.796	ἥ ῥά θʼ ὑπὸ βροντῆς πατρὸς Διὸς εἶσι πέδον δέ,
Iliad 13.797	θεσπεσίῳ δʼ ὁμάδῳ ἁλὶ μίσγεται, ἐν δέ τε πολλὰ
Iliad 13.798	κύματα παφλάζοντα πολυφλοίσβοιο θαλάσσης
Iliad 13.799	κυρτὰ φαληριόωντα, πρὸ μέν τʼ ἄλλʼ, αὐτὰρ ἐπʼ ἄλλα·
Iliad 13.800	ὣς Τρῶες πρὸ μὲν ἄλλοι ἀρηρότες, αὐτὰρ ἐπʼ ἄλλοι,
Iliad 13.801	χαλκῷ μαρμαίροντες ἅμʼ ἡγεμόνεσσιν ἕποντο.
Iliad 13.802	Ἕκτωρ δʼ ἡγεῖτο βροτολοιγῷ ἶσος Ἄρηϊ
Iliad 13.803	Πριαμίδης· πρόσθεν δʼ ἔχεν ἀσπίδα πάντοσʼ ἐΐσην
Iliad 13.804	ῥινοῖσιν πυκινήν, πολλὸς δʼ ἐπελήλατο χαλκός·
Iliad 13.805	ἀμφὶ δέ οἱ κροτάφοισι φαεινὴ σείετο πήληξ.
Iliad 13.806	πάντῃ δʼ ἀμφὶ φάλαγγας ἐπειρᾶτο προποδίζων,
Iliad 13.807	εἴ πώς οἱ εἴξειαν ὑπασπίδια προβιβῶντι·
Iliad 13.808	ἀλλʼ οὐ σύγχει θυμὸν ἐνὶ στήθεσσιν Ἀχαιῶν.
Iliad 13.809	Αἴας δὲ πρῶτος προκαλέσσατο μακρὰ βιβάσθων·
Iliad 13.810	δαιμόνιε σχεδὸν ἐλθέ· τί ἢ δειδίσσεαι αὔτως
Iliad 13.811	Ἀργείους; οὔ τοί τι μάχης ἀδαήμονές εἰμεν,
Iliad 13.812	ἀλλὰ Διὸς μάστιγι κακῇ ἐδάμημεν Ἀχαιοί.
Iliad 13.813	ἦ θήν πού τοι θυμὸς ἐέλπεται ἐξαλαπάξειν
Iliad 13.814	νῆας· ἄφαρ δέ τε χεῖρες ἀμύνειν εἰσὶ καὶ ἡμῖν.
Iliad 13.815	ἦ κε πολὺ φθαίη εὖ ναιομένη πόλις ὑμὴ
Iliad 13.816	χερσὶν ὑφʼ ἡμετέρῃσιν ἁλοῦσά τε περθομένη τε.
Iliad 13.817	σοὶ δʼ αὐτῷ φημὶ σχεδὸν ἔμμεναι ὁππότε φεύγων
Iliad 13.818	ἀρήσῃ Διὶ πατρὶ καὶ ἄλλοις ἀθανάτοισι
Iliad 13.819	θάσσονας ἰρήκων ἔμεναι καλλίτριχας ἵππους,
Iliad 13.820	οἵ σε πόλιν δʼ οἴσουσι κονίοντες πεδίοιο.
Iliad 13.821	ὣς ἄρα οἱ εἰπόντι ἐπέπτατο δεξιὸς ὄρνις
Iliad 13.822	αἰετὸς ὑψιπέτης· ἐπὶ δʼ ἴαχε λαὸς Ἀχαιῶν
Iliad 13.823	θάρσυνος οἰωνῷ· ὃ δʼ ἀμείβετο φαίδιμος Ἕκτωρ·
Iliad 13.824	Αἶαν ἁμαρτοεπὲς βουγάϊε ποῖον ἔειπες·
Iliad 13.825	εἰ γὰρ ἐγὼν οὕτω γε Διὸς πάϊς αἰγιόχοιο
Iliad 13.826	εἴην ἤματα πάντα, τέκοι δέ με πότνια Ἥρη,
Iliad 13.827	τιοίμην δʼ ὡς τίετʼ Ἀθηναίη καὶ Ἀπόλλων,
Iliad 13.828	ὡς νῦν ἡμέρη ἥδε κακὸν φέρει Ἀργείοισι
Iliad 13.829	πᾶσι μάλʼ, ἐν δὲ σὺ τοῖσι πεφήσεαι, αἴ κε ταλάσσῃς
Iliad 13.830	μεῖναι ἐμὸν δόρυ μακρόν, ὅ τοι χρόα λειριόεντα
Iliad 13.831	δάψει· ἀτὰρ Τρώων κορέεις κύνας ἠδʼ οἰωνοὺς
Iliad 13.832	δημῷ καὶ σάρκεσσι πεσὼν ἐπὶ νηυσὶν Ἀχαιῶν.
Iliad 13.833	ὣς ἄρα φωνήσας ἡγήσατο· τοὶ δʼ ἅμʼ ἕποντο
Iliad 13.834	ἠχῇ θεσπεσίῃ, ἐπὶ δʼ ἴαχε λαὸς ὄπισθεν.
Iliad 13.835	Ἀργεῖοι δʼ ἑτέρωθεν ἐπίαχον, οὐδὲ λάθοντο
Iliad 13.836	ἀλκῆς, ἀλλʼ ἔμενον Τρώων ἐπιόντας ἀρίστους.
Iliad 13.837	ἠχὴ δʼ ἀμφοτέρων ἵκετʼ αἰθέρα καὶ Διὸς αὐγάς.
Iliad 14.1	Νέστορα δʼ οὐκ ἔλαθεν ἰαχὴ πίνοντά περ ἔμπης,
Iliad 14.2	ἀλλʼ Ἀσκληπιάδην ἔπεα πτερόεντα προσηύδα·
Iliad 14.3	φράζεο δῖε Μαχᾶον ὅπως ἔσται τάδε ἔργα·
Iliad 14.4	μείζων δὴ παρὰ νηυσὶ βοὴ θαλερῶν αἰζηῶν.
Iliad 14.5	ἀλλὰ σὺ μὲν νῦν πῖνε καθήμενος αἴθοπα οἶνον
Iliad 14.6	εἰς ὅ κε θερμὰ λοετρὰ ἐϋπλόκαμος Ἑκαμήδη
Iliad 14.7	θερμήνῃ καὶ λούσῃ ἄπο βρότον αἱματόεντα·
Iliad 14.8	αὐτὰρ ἐγὼν ἐλθὼν τάχα εἴσομαι ἐς περιωπήν.
Iliad 14.9	ὣς εἰπὼν σάκος εἷλε τετυγμένον υἷος ἑοῖο
Iliad 14.10	κείμενον ἐν κλισίῃ Θρασυμήδεος ἱπποδάμοιο
Iliad 14.11	χαλκῷ παμφαῖνον· ὃ δʼ ἔχʼ ἀσπίδα πατρὸς ἑοῖο.
Iliad 14.12	εἵλετο δʼ ἄλκιμον ἔγχος ἀκαχμένον ὀξέϊ χαλκῷ,
Iliad 14.13	στῆ δʼ ἐκτὸς κλισίης, τάχα δʼ εἴσιδεν ἔργον ἀεικὲς
Iliad 14.14	τοὺς μὲν ὀρινομένους, τοὺς δὲ κλονέοντας ὄπισθε
Iliad 14.15	Τρῶας ὑπερθύμους· ἐρέριπτο δὲ τεῖχος Ἀχαιῶν.
Iliad 14.16	ὡς δʼ ὅτε πορφύρῃ πέλαγος μέγα κύματι κωφῷ
Iliad 14.17	ὀσσόμενον λιγέων ἀνέμων λαιψηρὰ κέλευθα
Iliad 14.18	αὔτως, οὐδʼ ἄρα τε προκυλίνδεται οὐδετέρωσε,
Iliad 14.19	πρίν τινα κεκριμένον καταβήμεναι ἐκ Διὸς οὖρον,
Iliad 14.20	ὣς ὃ γέρων ὅρμαινε δαϊζόμενος κατὰ θυμὸν
Iliad 14.21	διχθάδιʼ, ἢ μεθʼ ὅμιλον ἴοι Δαναῶν ταχυπώλων,
Iliad 14.22	ἦε μετʼ Ἀτρεΐδην Ἀγαμέμνονα ποιμένα λαῶν.
Iliad 14.23	ὧδε δέ οἱ φρονέοντι δοάσσατο κέρδιον εἶναι
Iliad 14.24	βῆναι ἐπʼ Ἀτρεΐδην. οἳ δʼ ἀλλήλους ἐνάριζον
Iliad 14.25	μαρνάμενοι· λάκε δέ σφι περὶ χροῒ χαλκὸς ἀτειρὴς
Iliad 14.26	νυσσομένων ξίφεσίν τε καὶ ἔγχεσιν ἀμφιγύοισι.
Iliad 14.27	Νέστορι δὲ ξύμβληντο διοτρεφέες βασιλῆες
Iliad 14.28	πὰρ νηῶν ἀνιόντες ὅσοι βεβλήατο χαλκῷ
Iliad 14.29	Τυδεΐδης Ὀδυσεύς τε καὶ Ἀτρεΐδης Ἀγαμέμνων.
Iliad 14.30	πολλὸν γάρ ῥʼ ἀπάνευθε μάχης εἰρύατο νῆες
Iliad 14.31	θῖνʼ ἔφʼ ἁλὸς πολιῆς· τὰς γὰρ πρώτας πεδίον δὲ
Iliad 14.32	εἴρυσαν, αὐτὰρ τεῖχος ἐπὶ πρύμνῃσιν ἔδειμαν.
Iliad 14.33	οὐδὲ γὰρ οὐδʼ εὐρύς περ ἐὼν ἐδυνήσατο πάσας
Iliad 14.34	αἰγιαλὸς νῆας χαδέειν, στείνοντο δὲ λαοί·
Iliad 14.35	τώ ῥα προκρόσσας ἔρυσαν, καὶ πλῆσαν ἁπάσης
Iliad 14.36	ἠϊόνος στόμα μακρόν, ὅσον συνεέργαθον ἄκραι.
Iliad 14.37	τώ ῥʼ οἵ γʼ ὀψείοντες ἀϋτῆς καὶ πολέμοιο
Iliad 14.38	ἔγχει ἐρειδόμενοι κίον ἀθρόοι· ἄχνυτο δέ σφι
Iliad 14.39	θυμὸς ἐνὶ στήθεσσιν. ὃ δὲ ξύμβλητο γεραιὸς
Iliad 14.40	Νέστωρ, πτῆξε δὲ θυμὸν ἐνὶ στήθεσσιν Ἀχαιῶν.
Iliad 14.41	τὸν καὶ φωνήσας προσέφη κρείων Ἀγαμέμνων·
Iliad 14.42	ὦ Νέστορ Νηληϊάδη μέγα κῦδος Ἀχαιῶν
Iliad 14.43	τίπτε λιπὼν πόλεμον φθισήνορα δεῦρʼ ἀφικάνεις;
Iliad 14.44	δείδω μὴ δή μοι τελέσῃ ἔπος ὄβριμος Ἕκτωρ,
Iliad 14.45	ὥς ποτʼ ἐπηπείλησεν ἐνὶ Τρώεσσʼ ἀγορεύων
Iliad 14.46	μὴ πρὶν πὰρ νηῶν προτὶ Ἴλιον ἀπονέεσθαι
Iliad 14.47	πρὶν πυρὶ νῆας ἐνιπρῆσαι, κτεῖναι δὲ καὶ αὐτούς.
Iliad 14.48	κεῖνος τὼς ἀγόρευε· τὰ δὴ νῦν πάντα τελεῖται.
Iliad 14.49	ὢ πόποι ἦ ῥα καὶ ἄλλοι ἐϋκνήμιδες Ἀχαιοὶ
Iliad 14.50	ἐν θυμῷ βάλλονται ἐμοὶ χόλον ὥς περ Ἀχιλλεὺς
Iliad 14.51	οὐδʼ ἐθέλουσι μάχεσθαι ἐπὶ πρυμνῇσι νέεσσι.
Iliad 14.52	τὸν δʼ ἠμείβετʼ ἔπειτα Γερήνιος ἱππότα Νέστωρ·
Iliad 14.53	ἦ δὴ ταῦτά γʼ ἑτοῖμα τετεύχαται, οὐδέ κεν ἄλλως
Iliad 14.54	Ζεὺς ὑψιβρεμέτης αὐτὸς παρατεκτήναιτο.
Iliad 14.55	τεῖχος μὲν γὰρ δὴ κατερήριπεν, ᾧ ἐπέπιθμεν
Iliad 14.56	ἄρρηκτον νηῶν τε καὶ αὐτῶν εἶλαρ ἔσεσθαι·
Iliad 14.57	οἳ δʼ ἐπὶ νηυσὶ θοῇσι μάχην ἀλίαστον ἔχουσι
Iliad 14.58	νωλεμές· οὐδʼ ἂν ἔτι γνοίης μάλα περ σκοπιάζων
Iliad 14.59	ὁπποτέρωθεν Ἀχαιοὶ ὀρινόμενοι κλονέονται,
Iliad 14.60	ὡς ἐπιμὶξ κτείνονται, ἀϋτὴ δʼ οὐρανὸν ἵκει.
Iliad 14.61	ἡμεῖς δὲ φραζώμεθʼ ὅπως ἔσται τάδε ἔργα
Iliad 14.62	εἴ τι νόος ῥέξει· πόλεμον δʼ οὐκ ἄμμε κελεύω
Iliad 14.63	δύμεναι· οὐ γάρ πως βεβλημένον ἐστὶ μάχεσθαι.
Iliad 14.64	τὸν δʼ αὖτε προσέειπεν ἄναξ ἀνδρῶν Ἀγαμέμνων·
Iliad 14.65	Νέστορ ἐπεὶ δὴ νηυσὶν ἔπι πρυμνῇσι μάχονται,
Iliad 14.66	τεῖχος δʼ οὐκ ἔχραισμε τετυγμένον, οὐδέ τι τάφρος,
Iliad 14.67	ᾗ ἔπι πολλὰ πάθον Δαναοί, ἔλποντο δὲ θυμῷ
Iliad 14.68	ἄρρηκτον νηῶν τε καὶ αὐτῶν εἶλαρ ἔσεσθαι·
Iliad 14.69	οὕτω που Διὶ μέλλει ὑπερμενέϊ φίλον εἶναι
Iliad 14.70	νωνύμνους ἀπολέσθαι ἀπʼ Ἄργεος ἐνθάδʼ Ἀχαιούς.
Iliad 14.71	ᾔδεα μὲν γὰρ ὅτε πρόφρων Δαναοῖσιν ἄμυνεν,
Iliad 14.72	οἶδα δὲ νῦν ὅτε τοὺς μὲν ὁμῶς μακάρεσσι θεοῖσι
Iliad 14.73	κυδάνει, ἡμέτερον δὲ μένος καὶ χεῖρας ἔδησεν.
Iliad 14.74	ἀλλʼ ἄγεθʼ ὡς ἂν ἐγὼν εἴπω πειθώμεθα πάντες.
Iliad 14.75	νῆες ὅσαι πρῶται εἰρύαται ἄγχι θαλάσσης
Iliad 14.76	ἕλκωμεν, πάσας δὲ ἐρύσσομεν εἰς ἅλα δῖαν,
Iliad 14.77	ὕψι δʼ ἐπʼ εὐνάων ὁρμίσσομεν, εἰς ὅ κεν ἔλθῃ
Iliad 14.78	νὺξ ἀβρότη, ἢν καὶ τῇ ἀπόσχωνται πολέμοιο
Iliad 14.79	Τρῶες· ἔπειτα δέ κεν ἐρυσαίμεθα νῆας ἁπάσας.
Iliad 14.80	οὐ γάρ τις νέμεσις φυγέειν κακόν, οὐδʼ ἀνὰ νύκτα.
Iliad 14.81	βέλτερον ὃς φεύγων προφύγῃ κακὸν ἠὲ ἁλώῃ.
Iliad 14.82	τὸν δʼ ἄρʼ ὑπόδρα ἰδὼν προσέφη πολύμητις Ὀδυσσεύς·
Iliad 14.83	Ἀτρεΐδη ποῖόν σε ἔπος φύγεν ἕρκος ὀδόντων·
Iliad 14.84	οὐλόμενʼ αἴθʼ ὤφελλες ἀεικελίου στρατοῦ ἄλλου
Iliad 14.85	σημαίνειν, μὴ δʼ ἄμμιν ἀνασσέμεν, οἷσιν ἄρα Ζεὺς
Iliad 14.86	ἐκ νεότητος ἔδωκε καὶ ἐς γῆρας τολυπεύειν
Iliad 14.87	ἀργαλέους πολέμους, ὄφρα φθιόμεσθα ἕκαστος.
Iliad 14.88	οὕτω δὴ μέμονας Τρώων πόλιν εὐρυάγυιαν
Iliad 14.89	καλλείψειν, ἧς εἵνεκʼ ὀϊζύομεν κακὰ πολλά;
Iliad 14.90	σίγα, μή τίς τʼ ἄλλος Ἀχαιῶν τοῦτον ἀκούσῃ
Iliad 14.91	μῦθον, ὃν οὔ κεν ἀνήρ γε διὰ στόμα πάμπαν ἄγοιτο
Iliad 14.92	ὅς τις ἐπίσταιτο ᾗσι φρεσὶν ἄρτια βάζειν
Iliad 14.93	σκηπτοῦχός τʼ εἴη, καί οἱ πειθοίατο λαοὶ
Iliad 14.94	τοσσοίδʼ ὅσσοισιν σὺ μετʼ Ἀργείοισιν ἀνάσσεις·
Iliad 14.95	νῦν δέ σευ ὠνοσάμην πάγχυ φρένας, οἷον ἔειπες·
Iliad 14.96	ὃς κέλεαι πολέμοιο συνεσταότος καὶ ἀϋτῆς
Iliad 14.97	νῆας ἐϋσσέλμους ἅλαδʼ ἑλκέμεν, ὄφρʼ ἔτι μᾶλλον
Iliad 14.98	Τρωσὶ μὲν εὐκτὰ γένηται ἐπικρατέουσί περ ἔμπης,
Iliad 14.99	ἡμῖν δʼ αἰπὺς ὄλεθρος ἐπιρρέπῃ. οὐ γὰρ Ἀχαιοὶ
Iliad 14.100	σχήσουσιν πόλεμον νηῶν ἅλα δʼ ἑλκομενάων,
Iliad 14.101	ἀλλʼ ἀποπαπτανέουσιν, ἐρωήσουσι δὲ χάρμης.
Iliad 14.102	ἔνθά κε σὴ βουλὴ δηλήσεται ὄρχαμε λαῶν.
Iliad 14.103	τὸν δʼ ἠμείβετʼ ἔπειτα ἄναξ ἀνδρῶν Ἀγαμέμνων·
Iliad 14.104	ὦ Ὀδυσεῦ μάλα πώς με καθίκεο θυμὸν ἐνιπῇ
Iliad 14.105	ἀργαλέῃ· ἀτὰρ οὐ μὲν ἐγὼν ἀέκοντας ἄνωγα
Iliad 14.106	νῆας ἐϋσσέλμους ἅλα δʼ ἑλκέμεν υἷας Ἀχαιῶν.
Iliad 14.107	νῦν δʼ εἴη ὃς τῆσδέ γʼ ἀμείνονα μῆτιν ἐνίσποι
Iliad 14.108	ἢ νέος ἠὲ παλαιός· ἐμοὶ δέ κεν ἀσμένῳ εἴη.
Iliad 14.109	τοῖσι δὲ καὶ μετέειπε βοὴν ἀγαθὸς Διομήδης·
Iliad 14.110	ἐγγὺς ἀνήρ· οὐ δηθὰ ματεύσομεν· αἴ κʼ ἐθέλητε
Iliad 14.111	πείθεσθαι, καὶ μή τι κότῳ ἀγάσησθε ἕκαστος
Iliad 14.112	οὕνεκα δὴ γενεῆφι νεώτατός εἰμι μεθʼ ὑμῖν·
Iliad 14.113	πατρὸς δʼ ἐξ ἀγαθοῦ καὶ ἐγὼ γένος εὔχομαι εἶναι
Iliad 14.114	Τυδέος, ὃν Θήβῃσι χυτὴ κατὰ γαῖα καλύπτει.
Iliad 14.115	πορθεῖ γὰρ τρεῖς παῖδες ἀμύμονες ἐξεγένοντο,
Iliad 14.116	οἴκεον δʼ ἐν Πλευρῶνι καὶ αἰπεινῇ Καλυδῶνι
Iliad 14.117	Ἄγριος ἠδὲ Μέλας, τρίτατος δʼ ἦν ἱππότα Οἰνεὺς
Iliad 14.118	πατρὸς ἐμοῖο πατήρ· ἀρετῇ δʼ ἦν ἔξοχος αὐτῶν.
Iliad 14.119	ἀλλʼ ὃ μὲν αὐτόθι μεῖνε, πατὴρ δʼ ἐμὸς Ἄργεϊ νάσθη
Iliad 14.120	πλαγχθείς· ὡς γάρ που Ζεὺς ἤθελε καὶ θεοὶ ἄλλοι.
Iliad 14.121	Ἀδρήστοιο δʼ ἔγημε θυγατρῶν, ναῖε δὲ δῶμα
Iliad 14.122	ἀφνειὸν βιότοιο, ἅλις δέ οἱ ἦσαν ἄρουραι
Iliad 14.123	πυροφόροι, πολλοὶ δὲ φυτῶν ἔσαν ὄρχατοι ἀμφίς,
Iliad 14.124	πολλὰ δέ οἱ πρόβατʼ ἔσκε· κέκαστο δὲ πάντας Ἀχαιοὺς
Iliad 14.125	ἐγχείῃ· τὰ δὲ μέλλετʼ ἀκουέμεν, εἰ ἐτεόν περ.
Iliad 14.126	τὼ οὐκ ἄν με γένος γε κακὸν καὶ ἀνάλκιδα φάντες
Iliad 14.127	μῦθον ἀτιμήσαιτε πεφασμένον ὅν κʼ ἐῢ εἴπω.
Iliad 14.128	δεῦτʼ ἴομεν πόλεμον δὲ καὶ οὐτάμενοί περ ἀνάγκῃ.
Iliad 14.129	ἔνθα δʼ ἔπειτʼ αὐτοὶ μὲν ἐχώμεθα δηϊοτῆτος
Iliad 14.130	ἐκ βελέων, μή πού τις ἐφʼ ἕλκεϊ ἕλκος ἄρηται·
Iliad 14.131	ἄλλους δʼ ὀτρύνοντες ἐνήσομεν, οἳ τὸ πάρος περ
Iliad 14.132	θυμῷ ἦρα φέροντες ἀφεστᾶσʼ οὐδὲ μάχονται.
Iliad 14.133	ὣς ἔφαθʼ, οἳ δʼ ἄρα τοῦ μάλα μὲν κλύον ἠδὲ πίθοντο·
Iliad 14.134	βὰν δʼ ἴμεν, ἦρχε δʼ ἄρά σφιν ἄναξ ἀνδρῶν Ἀγαμέμνων.
Iliad 14.135	οὐδʼ ἀλαοσκοπιὴν εἶχε κλυτὸς ἐννοσίγαιος,
Iliad 14.136	ἀλλὰ μετʼ αὐτοὺς ἦλθε παλαιῷ φωτὶ ἐοικώς,
Iliad 14.137	δεξιτερὴν δʼ ἕλε χεῖρʼ Ἀγαμέμνονος Ἀτρεΐδαο,
Iliad 14.138	καί μιν φωνήσας ἔπεα πτερόεντα προσηύδα·
Iliad 14.139	Ἀτρεΐδη νῦν δή που Ἀχιλλῆος ὀλοὸν κῆρ
Iliad 14.140	γηθεῖ ἐνὶ στήθεσσι φόνον καὶ φύζαν Ἀχαιῶν
Iliad 14.141	δερκομένῳ, ἐπεὶ οὔ οἱ ἔνι φρένες οὐδʼ ἠβαιαί.
Iliad 14.142	ἀλλʼ ὃ μὲν ὣς ἀπόλοιτο, θεὸς δέ ἑ σιφλώσειε·
Iliad 14.143	σοὶ δʼ οὔ πω μάλα πάγχυ θεοὶ μάκαρες κοτέουσιν,
Iliad 14.144	ἀλλʼ ἔτι που Τρώων ἡγήτορες ἠδὲ μέδοντες
Iliad 14.145	εὐρὺ κονίσουσιν πεδίον, σὺ δʼ ἐπόψεαι αὐτὸς
Iliad 14.146	φεύγοντας προτὶ ἄστυ νεῶν ἄπο καὶ κλισιάων.
Iliad 14.147	ὣς εἰπὼν μέγʼ ἄϋσεν ἐπεσσύμενος πεδίοιο.
Iliad 14.148	ὅσσόν τʼ ἐννεάχιλοι ἐπίαχον ἢ δεκάχιλοι
Iliad 14.149	ἀνέρες ἐν πολέμῳ ἔριδα ξυνάγοντες Ἄρηος,
Iliad 14.150	τόσσην ἐκ στήθεσφιν ὄπα κρείων ἐνοσίχθων
Iliad 14.151	ἧκεν· Ἀχαιοῖσιν δὲ μέγα σθένος ἔμβαλʼ ἑκάστῳ
Iliad 14.152	καρδίῃ, ἄληκτον πολεμίζειν ἠδὲ μάχεσθαι.
Iliad 14.153	Ἥρη δʼ εἰσεῖδε χρυσόθρονος ὀφθαλμοῖσι
Iliad 14.154	στᾶσʼ ἐξ Οὐλύμποιο ἀπὸ ῥίου· αὐτίκα δʼ ἔγνω
Iliad 14.155	τὸν μὲν ποιπνύοντα μάχην ἀνὰ κυδιάνειραν
Iliad 14.156	αὐτοκασίγνητον καὶ δαέρα, χαῖρε δὲ θυμῷ·
Iliad 14.157	Ζῆνα δʼ ἐπʼ ἀκροτάτης κορυφῆς πολυπίδακος Ἴδης
Iliad 14.158	ἥμενον εἰσεῖδε, στυγερὸς δέ οἱ ἔπλετο θυμῷ.
Iliad 14.159	μερμήριξε δʼ ἔπειτα βοῶπις πότνια Ἥρη
Iliad 14.160	ὅππως ἐξαπάφοιτο Διὸς νόον αἰγιόχοιο·
Iliad 14.161	ἥδε δέ οἱ κατὰ θυμὸν ἀρίστη φαίνετο βουλὴ
Iliad 14.162	ἐλθεῖν εἰς Ἴδην εὖ ἐντύνασαν ἓ αὐτήν,
Iliad 14.163	εἴ πως ἱμείραιτο παραδραθέειν φιλότητι
Iliad 14.164	ᾗ χροιῇ, τῷ δʼ ὕπνον ἀπήμονά τε λιαρόν τε
Iliad 14.165	χεύῃ ἐπὶ βλεφάροισιν ἰδὲ φρεσὶ πευκαλίμῃσι.
Iliad 14.166	βῆ δʼ ἴμεν ἐς θάλαμον, τόν οἱ φίλος υἱὸς ἔτευξεν
Iliad 14.167	Ἥφαιστος, πυκινὰς δὲ θύρας σταθμοῖσιν ἐπῆρσε
Iliad 14.168	κληῗδι κρυπτῇ, τὴν δʼ οὐ θεὸς ἄλλος ἀνῷγεν·
Iliad 14.169	ἔνθʼ ἥ γʼ εἰσελθοῦσα θύρας ἐπέθηκε φαεινάς.
Iliad 14.170	ἀμβροσίῃ μὲν πρῶτον ἀπὸ χροὸς ἱμερόεντος
Iliad 14.171	λύματα πάντα κάθηρεν, ἀλείψατο δὲ λίπʼ ἐλαίῳ
Iliad 14.172	ἀμβροσίῳ ἑδανῷ, τό ῥά οἱ τεθυωμένον ἦεν·
Iliad 14.173	τοῦ καὶ κινυμένοιο Διὸς κατὰ χαλκοβατὲς δῶ
Iliad 14.174	ἔμπης ἐς γαῖάν τε καὶ οὐρανὸν ἵκετʼ ἀϋτμή.
Iliad 14.175	τῷ ῥʼ ἥ γε χρόα καλὸν ἀλειψαμένη ἰδὲ χαίτας
Iliad 14.176	πεξαμένη χερσὶ πλοκάμους ἔπλεξε φαεινοὺς
Iliad 14.177	καλοὺς ἀμβροσίους ἐκ κράατος ἀθανάτοιο.
Iliad 14.178	ἀμφὶ δʼ ἄρʼ ἀμβρόσιον ἑανὸν ἕσαθʼ, ὅν οἱ Ἀθήνη
Iliad 14.179	ἔξυσʼ ἀσκήσασα, τίθει δʼ ἐνὶ δαίδαλα πολλά·
Iliad 14.180	χρυσείῃς δʼ ἐνετῇσι κατὰ στῆθος περονᾶτο.
Iliad 14.181	ζώσατο δὲ ζώνῃ ἑκατὸν θυσάνοις ἀραρυίῃ,
Iliad 14.182	ἐν δʼ ἄρα ἕρματα ἧκεν ἐϋτρήτοισι λοβοῖσι
Iliad 14.183	τρίγληνα μορόεντα· χάρις δʼ ἀπελάμπετο πολλή.
Iliad 14.184	κρηδέμνῳ δʼ ἐφύπερθε καλύψατο δῖα θεάων
Iliad 14.185	καλῷ νηγατέῳ· λευκὸν δʼ ἦν ἠέλιος ὥς·
Iliad 14.186	ποσσὶ δʼ ὑπὸ λιπαροῖσιν ἐδήσατο καλὰ πέδιλα.
Iliad 14.187	αὐτὰρ ἐπεὶ δὴ πάντα περὶ χροῒ θήκατο κόσμον
Iliad 14.188	βῆ ῥʼ ἴμεν ἐκ θαλάμοιο, καλεσσαμένη δʼ Ἀφροδίτην
Iliad 14.189	τῶν ἄλλων ἀπάνευθε θεῶν πρὸς μῦθον ἔειπε·
Iliad 14.190	ἦ ῥά νύ μοί τι πίθοιο φίλον τέκος ὅττί κεν εἴπω,
Iliad 14.191	ἦέ κεν ἀρνήσαιο κοτεσσαμένη τό γε θυμῷ,
Iliad 14.192	οὕνεκʼ ἐγὼ Δαναοῖσι, σὺ δὲ Τρώεσσιν ἀρήγεις;
Iliad 14.193	τὴν δʼ ἠμείβετʼ ἔπειτα Διὸς θυγάτηρ Ἀφροδίτη·
Iliad 14.194	Ἥρη πρέσβα θεὰ θύγατερ μεγάλοιο Κρόνοιο
Iliad 14.195	αὔδα ὅ τι φρονέεις· τελέσαι δέ με θυμὸς ἄνωγεν,
Iliad 14.196	εἰ δύναμαι τελέσαι γε καὶ εἰ τετελεσμένον ἐστίν.
Iliad 14.197	τὴν δὲ δολοφρονέουσα προσηύδα πότνια Ἥρη·
Iliad 14.198	δὸς νῦν μοι φιλότητα καὶ ἵμερον, ᾧ τε σὺ πάντας
Iliad 14.199	δαμνᾷ ἀθανάτους ἠδὲ θνητοὺς ἀνθρώπους.
Iliad 14.200	εἶμι γὰρ ὀψομένη πολυφόρβου πείρατα γαίης,
Iliad 14.201	Ὠκεανόν τε θεῶν γένεσιν καὶ μητέρα Τηθύν,
Iliad 14.202	οἵ μʼ ἐν σφοῖσι δόμοισιν ἐῢ τρέφον ἠδʼ ἀτίταλλον
Iliad 14.203	δεξάμενοι Ῥείας, ὅτε τε Κρόνον εὐρύοπα Ζεὺς
Iliad 14.204	γαίης νέρθε καθεῖσε καὶ ἀτρυγέτοιο θαλάσσης·
Iliad 14.205	τοὺς εἶμʼ ὀψομένη, καί σφʼ ἄκριτα νείκεα λύσω·
Iliad 14.206	ἤδη γὰρ δηρὸν χρόνον ἀλλήλων ἀπέχονται
Iliad 14.207	εὐνῆς καὶ φιλότητος, ἐπεὶ χόλος ἔμπεσε θυμῷ.
Iliad 14.208	εἰ κείνω ἐπέεσσι παραιπεπιθοῦσα φίλον κῆρ
Iliad 14.209	εἰς εὐνὴν ἀνέσαιμι ὁμωθῆναι φιλότητι,
Iliad 14.210	αἰεί κέ σφι φίλη τε καὶ αἰδοίη καλεοίμην.
Iliad 14.211	τὴν δʼ αὖτε προσέειπε φιλομειδὴς Ἀφροδίτη·
Iliad 14.212	οὐκ ἔστʼ οὐδὲ ἔοικε τεὸν ἔπος ἀρνήσασθαι·
Iliad 14.213	Ζηνὸς γὰρ τοῦ ἀρίστου ἐν ἀγκοίνῃσιν ἰαύεις.
Iliad 14.214	ἦ, καὶ ἀπὸ στήθεσφιν ἐλύσατο κεστὸν ἱμάντα
Iliad 14.215	ποικίλον, ἔνθα δέ οἱ θελκτήρια πάντα τέτυκτο·
Iliad 14.216	ἔνθʼ ἔνι μὲν φιλότης, ἐν δʼ ἵμερος, ἐν δʼ ὀαριστὺς
Iliad 14.217	πάρφασις, ἥ τʼ ἔκλεψε νόον πύκα περ φρονεόντων.
Iliad 14.218	τόν ῥά οἱ ἔμβαλε χερσὶν ἔπος τʼ ἔφατʼ ἔκ τʼ ὀνόμαζε·
Iliad 14.219	τῆ νῦν τοῦτον ἱμάντα τεῷ ἐγκάτθεο κόλπῳ
Iliad 14.220	ποικίλον, ᾧ ἔνι πάντα τετεύχαται· οὐδέ σέ φημι
Iliad 14.221	ἄπρηκτόν γε νέεσθαι, ὅ τι φρεσὶ σῇσι μενοινᾷς.
Iliad 14.222	ὣς φάτο, μείδησεν δὲ βοῶπις πότνια Ἥρη,
Iliad 14.223	μειδήσασα δʼ ἔπειτα ἑῷ ἐγκάτθετο κόλπῳ.
Iliad 14.224	ἣ μὲν ἔβη πρὸς δῶμα Διὸς θυγάτηρ Ἀφροδίτη,
Iliad 14.225	Ἥρη δʼ ἀΐξασα λίπεν ῥίον Οὐλύμποιο,
Iliad 14.226	Πιερίην δʼ ἐπιβᾶσα καὶ Ἠμαθίην ἐρατεινὴν
Iliad 14.227	σεύατʼ ἐφʼ ἱπποπόλων Θρῃκῶν ὄρεα νιφόεντα
Iliad 14.228	ἀκροτάτας κορυφάς· οὐδὲ χθόνα μάρπτε ποδοῖιν·
Iliad 14.229	ἐξ Ἀθόω δʼ ἐπὶ πόντον ἐβήσετο κυμαίνοντα,
Iliad 14.230	Λῆμνον δʼ εἰσαφίκανε πόλιν θείοιο Θόαντος.
Iliad 14.231	ἔνθʼ Ὕπνῳ ξύμβλητο κασιγνήτῳ Θανάτοιο,
Iliad 14.232	ἔν τʼ ἄρα οἱ φῦ χειρὶ ἔπος τʼ ἔφατʼ ἔκ τʼ ὀνόμαζεν·
Iliad 14.233	Ὕπνε ἄναξ πάντων τε θεῶν πάντων τʼ ἀνθρώπων,
Iliad 14.234	ἠμὲν δή ποτʼ ἐμὸν ἔπος ἔκλυες, ἠδʼ ἔτι καὶ νῦν
Iliad 14.235	πείθευ· ἐγὼ δέ κέ τοι ἰδέω χάριν ἤματα πάντα.
Iliad 14.236	κοίμησόν μοι Ζηνὸς ὑπʼ ὀφρύσιν ὄσσε φαεινὼ
Iliad 14.237	αὐτίκʼ ἐπεί κεν ἐγὼ παραλέξομαι ἐν φιλότητι.
Iliad 14.238	δῶρα δέ τοι δώσω καλὸν θρόνον ἄφθιτον αἰεὶ
Iliad 14.239	χρύσεον· Ἥφαιστος δέ κʼ ἐμὸς πάϊς ἀμφιγυήεις
Iliad 14.240	τεύξειʼ ἀσκήσας, ὑπὸ δὲ θρῆνυν ποσὶν ἥσει,
Iliad 14.241	τῷ κεν ἐπισχοίης λιπαροὺς πόδας εἰλαπινάζων.
Iliad 14.242	τὴν δʼ ἀπαμειβόμενος προσεφώνεε νήδυμος Ὕπνος·
Iliad 14.243	Ἥρη πρέσβα θεὰ θύγατερ μεγάλοιο Κρόνοιο
Iliad 14.244	ἄλλον μέν κεν ἔγωγε θεῶν αἰειγενετάων
Iliad 14.245	ῥεῖα κατευνήσαιμι, καὶ ἂν ποταμοῖο ῥέεθρα
Iliad 14.246	Ὠκεανοῦ, ὅς περ γένεσις πάντεσσι τέτυκται·
Iliad 14.247	Ζηνὸς δʼ οὐκ ἂν ἔγωγε Κρονίονος ἆσσον ἱκοίμην
Iliad 14.248	οὐδὲ κατευνήσαιμʼ, ὅτε μὴ αὐτός γε κελεύοι.
Iliad 14.249	ἤδη γάρ με καὶ ἄλλο τεὴ ἐπίνυσσεν ἐφετμὴ
Iliad 14.250	ἤματι τῷ ὅτε κεῖνος ὑπέρθυμος Διὸς υἱὸς
Iliad 14.251	ἔπλεεν Ἰλιόθεν Τρώων πόλιν ἐξαλαπάξας.
Iliad 14.252	ἤτοι ἐγὼ μὲν ἔλεξα Διὸς νόον αἰγιόχοιο
Iliad 14.253	νήδυμος ἀμφιχυθείς· σὺ δέ οἱ κακὰ μήσαο θυμῷ
Iliad 14.254	ὄρσασʼ ἀργαλέων ἀνέμων ἐπὶ πόντον ἀήτας,
Iliad 14.255	καί μιν ἔπειτα Κόων δʼ εὖ ναιομένην ἀπένεικας
Iliad 14.256	νόσφι φίλων πάντων. ὃ δʼ ἐπεγρόμενος χαλέπαινε
Iliad 14.257	ῥιπτάζων κατὰ δῶμα θεούς, ἐμὲ δʼ ἔξοχα πάντων
Iliad 14.258	ζήτει· καί κέ μʼ ἄϊστον ἀπʼ αἰθέρος ἔμβαλε πόντῳ,
Iliad 14.259	εἰ μὴ Νὺξ δμήτειρα θεῶν ἐσάωσε καὶ ἀνδρῶν·
Iliad 14.260	τὴν ἱκόμην φεύγων, ὃ δʼ ἐπαύσατο χωόμενός περ.
Iliad 14.261	ἅζετο γὰρ μὴ Νυκτὶ θοῇ ἀποθύμια ἕρδοι.
Iliad 14.262	νῦν αὖ τοῦτό μʼ ἄνωγας ἀμήχανον ἄλλο τελέσσαι.
Iliad 14.263	τὸν δʼ αὖτε προσέειπε βοῶπις πότνια Ἥρη·
Iliad 14.264	Ὕπνε τί ἢ δὲ σὺ ταῦτα μετὰ φρεσὶ σῇσι μενοινᾷς;
Iliad 14.265	ἦ φῂς ὣς Τρώεσσιν ἀρηξέμεν εὐρύοπα Ζῆν
Iliad 14.266	ὡς Ἡρακλῆος περιχώσατο παῖδος ἑοῖο;
Iliad 14.267	ἀλλʼ ἴθʼ, ἐγὼ δέ κέ τοι Χαρίτων μίαν ὁπλοτεράων
Iliad 14.268	δώσω ὀπυιέμεναι καὶ σὴν κεκλῆσθαι ἄκοιτιν.
Iliad 14.270	ὣς φάτο, χήρατο δʼ Ὕπνος, ἀμειβόμενος δὲ προσηύδα·
Iliad 14.271	ἄγρει νῦν μοι ὄμοσσον ἀάατον Στυγὸς ὕδωρ,
Iliad 14.272	χειρὶ δὲ τῇ ἑτέρῃ μὲν ἕλε χθόνα πουλυβότειραν,
Iliad 14.273	τῇ δʼ ἑτέρῃ ἅλα μαρμαρέην, ἵνα νῶϊν ἅπαντες
Iliad 14.274	μάρτυροι ὦσʼ οἳ ἔνερθε θεοὶ Κρόνον ἀμφὶς ἐόντες,
Iliad 14.275	ἦ μὲν ἐμοὶ δώσειν Χαρίτων μίαν ὁπλοτεράων
Iliad 14.276	Πασιθέην, ἧς τʼ αὐτὸς ἐέλδομαι ἤματα πάντα.
Iliad 14.277	ὣς ἔφατʼ, οὐδʼ ἀπίθησε θεὰ λευκώλενος Ἥρη,
Iliad 14.278	ὄμνυε δʼ ὡς ἐκέλευε, θεοὺς δʼ ὀνόμηνεν ἅπαντας
Iliad 14.279	τοὺς ὑποταρταρίους οἳ Τιτῆνες καλέονται.
Iliad 14.280	αὐτὰρ ἐπεί ῥʼ ὄμοσέν τε τελεύτησέν τε τὸν ὅρκον,
Iliad 14.281	τὼ βήτην Λήμνου τε καὶ Ἴμβρου ἄστυ λιπόντε
Iliad 14.282	ἠέρα ἑσσαμένω ῥίμφα πρήσσοντε κέλευθον.
Iliad 14.283	Ἴδην δʼ ἱκέσθην πολυπίδακα μητέρα θηρῶν
Iliad 14.284	Λεκτόν, ὅθι πρῶτον λιπέτην ἅλα· τὼ δʼ ἐπὶ χέρσου
Iliad 14.285	βήτην, ἀκροτάτη δὲ ποδῶν ὕπο σείετο ὕλη.
Iliad 14.286	ἔνθʼ Ὕπνος μὲν ἔμεινε πάρος Διὸς ὄσσε ἰδέσθαι
Iliad 14.287	εἰς ἐλάτην ἀναβὰς περιμήκετον, ἣ τότʼ ἐν Ἴδῃ
Iliad 14.288	μακροτάτη πεφυυῖα διʼ ἠέρος αἰθέρʼ ἵκανεν·
Iliad 14.289	ἔνθʼ ἧστʼ ὄζοισιν πεπυκασμένος εἰλατίνοισιν
Iliad 14.290	ὄρνιθι λιγυρῇ ἐναλίγκιος, ἥν τʼ ἐν ὄρεσσι
Iliad 14.291	χαλκίδα κικλήσκουσι θεοί, ἄνδρες δὲ κύμινδιν.
Iliad 14.292	Ἥρη δὲ κραιπνῶς προσεβήσετο Γάργαρον ἄκρον
Iliad 14.293	Ἴδης ὑψηλῆς· ἴδε δὲ νεφεληγερέτα Ζεύς.
Iliad 14.294	ὡς δʼ ἴδεν, ὥς μιν ἔρως πυκινὰς φρένας ἀμφεκάλυψεν,
Iliad 14.295	οἷον ὅτε πρῶτόν περ ἐμισγέσθην φιλότητι
Iliad 14.296	εἰς εὐνὴν φοιτῶντε, φίλους λήθοντε τοκῆας.
Iliad 14.297	στῆ δʼ αὐτῆς προπάροιθεν ἔπος τʼ ἔφατʼ ἔκ τʼ ὀνόμαζεν·
Iliad 14.298	Ἥρη πῇ μεμαυῖα κατʼ Οὐλύμπου τόδʼ ἱκάνεις;
Iliad 14.299	ἵπποι δʼ οὐ παρέασι καὶ ἅρματα τῶν κʼ ἐπιβαίης.
Iliad 14.300	τὸν δὲ δολοφρονέουσα προσηύδα πότνια Ἥρη·
Iliad 14.301	ἔρχομαι ὀψομένη πολυφόρβου πείρατα γαίης,
Iliad 14.302	Ὠκεανόν τε θεῶν γένεσιν καὶ μητέρα Τηθύν,
Iliad 14.303	οἵ με σφοῖσι δόμοισιν ἐῢ τρέφον ἠδʼ ἀτίταλλον·
Iliad 14.304	τοὺς εἶμʼ ὀψομένη, καί σφʼ ἄκριτα νείκεα λύσω·
Iliad 14.305	ἤδη γὰρ δηρὸν χρόνον ἀλλήλων ἀπέχονται
Iliad 14.306	εὐνῆς καὶ φιλότητος, ἐπεὶ χόλος ἔμπεσε θυμῷ.
Iliad 14.307	ἵπποι δʼ ἐν πρυμνωρείῃ πολυπίδακος Ἴδης
Iliad 14.308	ἑστᾶσʼ, οἵ μʼ οἴσουσιν ἐπὶ τραφερήν τε καὶ ὑγρήν.
Iliad 14.309	νῦν δὲ σεῦ εἵνεκα δεῦρο κατʼ Οὐλύμπου τόδʼ ἱκάνω,
Iliad 14.310	μή πώς μοι μετέπειτα χολώσεαι, αἴ κε σιωπῇ
Iliad 14.311	οἴχωμαι πρὸς δῶμα βαθυρρόου Ὠκεανοῖο.
Iliad 14.312	τὴν δʼ ἀπαμειβόμενος προσέφη νεφεληγερέτα Ζεύς·
Iliad 14.313	Ἥρη κεῖσε μὲν ἔστι καὶ ὕστερον ὁρμηθῆναι,
Iliad 14.314	νῶϊ δʼ ἄγʼ ἐν φιλότητι τραπείομεν εὐνηθέντε.
Iliad 14.315	οὐ γάρ πώ ποτέ μʼ ὧδε θεᾶς ἔρος οὐδὲ γυναικὸς
Iliad 14.316	θυμὸν ἐνὶ στήθεσσι περιπροχυθεὶς ἐδάμασσεν,
Iliad 14.317	οὐδʼ ὁπότʼ ἠρασάμην Ἰξιονίης ἀλόχοιο,
Iliad 14.318	ἣ τέκε Πειρίθοον θεόφιν μήστωρʼ ἀτάλαντον·
Iliad 14.319	οὐδʼ ὅτε περ Δανάης καλλισφύρου Ἀκρισιώνης,
Iliad 14.320	ἣ τέκε Περσῆα πάντων ἀριδείκετον ἀνδρῶν·
Iliad 14.321	οὐδʼ ὅτε Φοίνικος κούρης τηλεκλειτοῖο,
Iliad 14.322	ἣ τέκε μοι Μίνων τε καὶ ἀντίθεον Ῥαδάμανθυν·
Iliad 14.323	οὐδʼ ὅτε περ Σεμέλης οὐδʼ Ἀλκμήνης ἐνὶ Θήβῃ,
Iliad 14.324	ἥ ῥʼ Ἡρακλῆα κρατερόφρονα γείνατο παῖδα·
Iliad 14.325	ἣ δὲ Διώνυσον Σεμέλη τέκε χάρμα βροτοῖσιν·
Iliad 14.326	οὐδʼ ὅτε Δήμητρος καλλιπλοκάμοιο ἀνάσσης,
Iliad 14.327	οὐδʼ ὁπότε Λητοῦς ἐρικυδέος, οὐδὲ σεῦ αὐτῆς,
Iliad 14.328	ὡς σέο νῦν ἔραμαι καί με γλυκὺς ἵμερος αἱρεῖ.
Iliad 14.329	τὸν δὲ δολοφρονέουσα προσηύδα πότνια Ἥρη·
Iliad 14.330	αἰνότατε Κρονίδη ποῖον τὸν μῦθον ἔειπες.
Iliad 14.331	εἰ νῦν ἐν φιλότητι λιλαίεαι εὐνηθῆναι
Iliad 14.332	Ἴδης ἐν κορυφῇσι, τὰ δὲ προπέφανται ἅπαντα·
Iliad 14.333	πῶς κʼ ἔοι εἴ τις νῶϊ θεῶν αἰειγενετάων
Iliad 14.334	εὕδοντʼ ἀθρήσειε, θεοῖσι δὲ πᾶσι μετελθὼν
Iliad 14.335	πεφράδοι; οὐκ ἂν ἔγωγε τεὸν πρὸς δῶμα νεοίμην
Iliad 14.336	ἐξ εὐνῆς ἀνστᾶσα, νεμεσσητὸν δέ κεν εἴη.
Iliad 14.337	ἀλλʼ εἰ δή ῥʼ ἐθέλεις καί τοι φίλον ἔπλετο θυμῷ,
Iliad 14.338	ἔστιν τοι θάλαμος, τόν τοι φίλος υἱὸς ἔτευξεν
Iliad 14.339	Ἥφαιστος, πυκινὰς δὲ θύρας σταθμοῖσιν ἐπῆρσεν·
Iliad 14.340	ἔνθʼ ἴομεν κείοντες, ἐπεί νύ τοι εὔαδεν εὐνή.
Iliad 14.341	τὴν δʼ ἀπαμειβόμενος προσέφη νεφεληγερέτα Ζεύς·
Iliad 14.342	Ἥρη μήτε θεῶν τό γε δείδιθι μήτέ τινʼ ἀνδρῶν
Iliad 14.343	ὄψεσθαι· τοῖόν τοι ἐγὼ νέφος ἀμφικαλύψω
Iliad 14.344	χρύσεον· οὐδʼ ἂν νῶϊ διαδράκοι Ἠέλιός περ,
Iliad 14.345	οὗ τε καὶ ὀξύτατον πέλεται φάος εἰσοράασθαι.
Iliad 14.346	ἦ ῥα καὶ ἀγκὰς ἔμαρπτε Κρόνου παῖς ἣν παράκοιτιν·
Iliad 14.347	τοῖσι δʼ ὑπὸ χθὼν δῖα φύεν νεοθηλέα ποίην,
Iliad 14.348	λωτόν θʼ ἑρσήεντα ἰδὲ κρόκον ἠδʼ ὑάκινθον
Iliad 14.349	πυκνὸν καὶ μαλακόν, ὃς ἀπὸ χθονὸς ὑψόσʼ ἔεργε.
Iliad 14.350	τῷ ἔνι λεξάσθην, ἐπὶ δὲ νεφέλην ἕσσαντο
Iliad 14.351	καλὴν χρυσείην· στιλπναὶ δʼ ἀπέπιπτον ἔερσαι.
Iliad 14.352	ὣς ὃ μὲν ἀτρέμας εὗδε πατὴρ ἀνὰ Γαργάρῳ ἄκρῳ,
Iliad 14.353	ὕπνῳ καὶ φιλότητι δαμείς, ἔχε δʼ ἀγκὰς ἄκοιτιν·
Iliad 14.354	βῆ δὲ θέειν ἐπὶ νῆας Ἀχαιῶν νήδυμος Ὕπνος
Iliad 14.355	ἀγγελίην ἐρέων γαιηόχῳ ἐννοσιγαίῳ·
Iliad 14.356	ἀγχοῦ δʼ ἱστάμενος ἔπεα πτερόεντα προσηύδα·
Iliad 14.357	πρόφρων νῦν Δαναοῖσι Ποσείδαον ἐπάμυνε,
Iliad 14.358	καί σφιν κῦδος ὄπαζε μίνυνθά περ, ὄφρʼ ἔτι εὕδει
Iliad 14.359	Ζεύς, ἐπεὶ αὐτῷ ἐγὼ μαλακὸν περὶ κῶμʼ ἐκάλυψα·
Iliad 14.360	Ἥρη δʼ ἐν φιλότητι παρήπαφεν εὐνηθῆναι.
Iliad 14.361	ὣς εἰπὼν ὃ μὲν ᾤχετʼ ἐπὶ κλυτὰ φῦλʼ ἀνθρώπων,
Iliad 14.362	τὸν δʼ ἔτι μᾶλλον ἀνῆκεν ἀμυνέμεναι Δαναοῖσιν.
Iliad 14.363	αὐτίκα δʼ ἐν πρώτοισι μέγα προθορὼν ἐκέλευσεν·
Iliad 14.364	Ἀργεῖοι καὶ δʼ αὖτε μεθίεμεν Ἕκτορι νίκην
Iliad 14.365	Πριαμίδῃ, ἵνα νῆας ἕλῃ καὶ κῦδος ἄρηται;
Iliad 14.366	ἀλλʼ ὃ μὲν οὕτω φησὶ καὶ εὔχεται οὕνεκʼ Ἀχιλλεὺς
Iliad 14.367	νηυσὶν ἔπι γλαφυρῇσι μένει κεχολωμένος ἦτορ·
Iliad 14.368	κείνου δʼ οὔ τι λίην ποθὴ ἔσσεται, εἴ κεν οἳ ἄλλοι
Iliad 14.369	ἡμεῖς ὀτρυνώμεθʼ ἀμυνέμεν ἀλλήλοισιν.
Iliad 14.370	ἀλλʼ ἄγεθʼ ὡς ἂν ἐγὼ εἴπω πειθώμεθα πάντες·
Iliad 14.371	ἀσπίδες ὅσσαι ἄρισται ἐνὶ στρατῷ ἠδὲ μέγισται
Iliad 14.372	ἑσσάμενοι, κεφαλὰς δὲ παναίθῃσιν κορύθεσσι
Iliad 14.373	κρύψαντες, χερσίν τε τὰ μακρότατʼ ἔγχεʼ ἑλόντες
Iliad 14.374	ἴομεν· αὐτὰρ ἐγὼν ἡγήσομαι, οὐδʼ ἔτι φημὶ
Iliad 14.375	Ἕκτορα Πριαμίδην μενέειν μάλα περ μεμαῶτα.
Iliad 14.376	ὃς δέ κʼ ἀνὴρ μενέχαρμος, ἔχει δʼ ὀλίγον σάκος ὤμῳ,
Iliad 14.377	χείρονι φωτὶ δότω, ὃ δʼ ἐν ἀσπίδι μείζονι δύτω.
Iliad 14.378	ὣς ἔφαθʼ, οἳ δʼ ἄρα τοῦ μάλα μὲν κλύον ἠδὲ πίθοντο·
Iliad 14.379	τοὺς δʼ αὐτοὶ βασιλῆες ἐκόσμεον οὐτάμενοί περ
Iliad 14.380	Τυδεΐδης Ὀδυσεύς τε καὶ Ἀτρεΐδης Ἀγαμέμνων·
Iliad 14.381	οἰχόμενοι δʼ ἐπὶ πάντας ἀρήϊα τεύχεʼ ἄμειβον·
Iliad 14.382	ἐσθλὰ μὲν ἐσθλὸς ἔδυνε, χέρεια δὲ χείρονι δόσκεν.
Iliad 14.383	αὐτὰρ ἐπεί ῥʼ ἕσσαντο περὶ χροῒ νώροπα χαλκὸν
Iliad 14.384	βάν ῥʼ ἴμεν· ἦρχε δʼ ἄρά σφι Ποσειδάων ἐνοσίχθων
Iliad 14.385	δεινὸν ἄορ τανύηκες ἔχων ἐν χειρὶ παχείῃ
Iliad 14.386	εἴκελον ἀστεροπῇ· τῷ δʼ οὐ θέμις ἐστὶ μιγῆναι
Iliad 14.387	ἐν δαῒ λευγαλέῃ, ἀλλὰ δέος ἰσχάνει ἄνδρας.
Iliad 14.388	Τρῶας δʼ αὖθʼ ἑτέρωθεν ἐκόσμει φαίδιμος Ἕκτωρ.
Iliad 14.389	δή ῥα τότʼ αἰνοτάτην ἔριδα πτολέμοιο τάνυσσαν
Iliad 14.390	κυανοχαῖτα Ποσειδάων καὶ φαίδιμος Ἕκτωρ,
Iliad 14.391	ἤτοι ὃ μὲν Τρώεσσιν, ὃ δʼ Ἀργείοισιν ἀρήγων.
Iliad 14.392	ἐκλύσθη δὲ θάλασσα ποτὶ κλισίας τε νέας τε
Iliad 14.393	Ἀργείων· οἳ δὲ ξύνισαν μεγάλῳ ἀλαλητῷ.
Iliad 14.394	οὔτε θαλάσσης κῦμα τόσον βοάᾳ ποτὶ χέρσον
Iliad 14.395	ποντόθεν ὀρνύμενον πνοιῇ Βορέω ἀλεγεινῇ·
Iliad 14.396	οὔτε πυρὸς τόσσός γε ποτὶ βρόμος αἰθομένοιο
Iliad 14.397	οὔρεος ἐν βήσσῃς, ὅτε τʼ ὤρετο καιέμεν ὕλην·
Iliad 14.398	οὔτʼ ἄνεμος τόσσόν γε περὶ δρυσὶν ὑψικόμοισι
Iliad 14.399	ἠπύει, ὅς τε μάλιστα μέγα βρέμεται χαλεπαίνων,
Iliad 14.400	ὅσση ἄρα Τρώων καὶ Ἀχαιῶν ἔπλετο φωνὴ
Iliad 14.401	δεινὸν ἀϋσάντων, ὅτʼ ἐπʼ ἀλλήλοισιν ὄρουσαν.
Iliad 14.402	Αἴαντος δὲ πρῶτος ἀκόντισε φαίδιμος Ἕκτωρ
Iliad 14.403	ἔγχει, ἐπεὶ τέτραπτο πρὸς ἰθύ οἱ, οὐδʼ ἀφάμαρτε,
Iliad 14.404	τῇ ῥα δύω τελαμῶνε περὶ στήθεσσι τετάσθην,
Iliad 14.405	ἤτοι ὃ μὲν σάκεος, ὃ δὲ φασγάνου ἀργυροήλου·
Iliad 14.406	τώ οἱ ῥυσάσθην τέρενα χρόα. χώσατο δʼ Ἕκτωρ,
Iliad 14.407	ὅττί ῥά οἱ βέλος ὠκὺ ἐτώσιον ἔκφυγε χειρός,
Iliad 14.408	ἂψ δʼ ἑτάρων εἰς ἔθνος ἐχάζετο κῆρʼ ἀλεείνων.
Iliad 14.409	τὸν μὲν ἔπειτʼ ἀπιόντα μέγας Τελαμώνιος Αἴας
Iliad 14.410	χερμαδίῳ, τά ῥα πολλὰ θοάων ἔχματα νηῶν
Iliad 14.411	πὰρ ποσὶ μαρναμένων ἐκυλίνδετο, τῶν ἓν ἀείρας
Iliad 14.412	στῆθος βεβλήκει ὑπὲρ ἄντυγος ἀγχόθι δειρῆς,
Iliad 14.413	στρόμβον δʼ ὣς ἔσσευε βαλών, περὶ δʼ ἔδραμε πάντῃ.
Iliad 14.414	ὡς δʼ ὅθʼ ὑπὸ πληγῆς πατρὸς Διὸς ἐξερίπῃ δρῦς
Iliad 14.415	πρόρριζος, δεινὴ δὲ θεείου γίγνεται ὀδμὴ
Iliad 14.416	ἐξ αὐτῆς, τὸν δʼ οὔ περ ἔχει θράσος ὅς κεν ἴδηται
Iliad 14.417	ἐγγὺς ἐών, χαλεπὸς δὲ Διὸς μεγάλοιο κεραυνός,
Iliad 14.418	ὣς ἔπεσʼ Ἕκτορος ὦκα χαμαὶ μένος ἐν κονίῃσι·
Iliad 14.419	χειρὸς δʼ ἔκβαλεν ἔγχος, ἐπʼ αὐτῷ δʼ ἀσπὶς ἑάφθη
Iliad 14.420	καὶ κόρυς, ἀμφὶ δέ οἱ βράχε τεύχεα ποικίλα χαλκῷ.
Iliad 14.421	οἳ δὲ μέγα ἰάχοντες ἐπέδραμον υἷες Ἀχαιῶν
Iliad 14.422	ἐλπόμενοι ἐρύεσθαι, ἀκόντιζον δὲ θαμειὰς
Iliad 14.423	αἰχμάς· ἀλλʼ οὔ τις ἐδυνήσατο ποιμένα λαῶν
Iliad 14.424	οὐτάσαι οὐδὲ βαλεῖν· πρὶν γὰρ περίβησαν ἄριστοι
Iliad 14.425	Πουλυδάμας τε καὶ Αἰνείας καὶ δῖος Ἀγήνωρ
Iliad 14.426	Σαρπηδών τʼ ἀρχὸς Λυκίων καὶ Γλαῦκος ἀμύμων.
Iliad 14.427	τῶν δʼ ἄλλων οὔ τίς εὑ ἀκήδεσεν, ἀλλὰ πάροιθεν
Iliad 14.428	ἀσπίδας εὐκύκλους σχέθον αὐτοῦ. τὸν δʼ ἄρʼ ἑταῖροι
Iliad 14.429	χερσὶν ἀείραντες φέρον ἐκ πόνου, ὄφρʼ ἵκεθʼ ἵππους
Iliad 14.430	ὠκέας, οἵ οἱ ὄπισθε μάχης ἠδὲ πτολέμοιο
Iliad 14.431	ἕστασαν ἡνίοχόν τε καὶ ἅρματα ποικίλʼ ἔχοντες·
Iliad 14.432	οἳ τόν γε προτὶ ἄστυ φέρον βαρέα στενάχοντα.
Iliad 14.433	ἀλλʼ ὅτε δὴ πόρον ἷξον ἐϋρρεῖος ποταμοῖο
Iliad 14.434	Ξάνθου δινήεντος, ὃν ἀθάνατος τέκετο Ζεύς,
Iliad 14.435	ἔνθά μιν ἐξ ἵππων πέλασαν χθονί, κὰδ δέ οἱ ὕδωρ
Iliad 14.436	χεῦαν· ὃ δʼ ἀμπνύνθη καὶ ἀνέδρακεν ὀφθαλμοῖσιν,
Iliad 14.437	ἑζόμενος δʼ ἐπὶ γοῦνα κελαινεφὲς αἷμʼ ἀπέμεσσεν·
Iliad 14.438	αὖτις δʼ ἐξοπίσω πλῆτο χθονί, τὼ δέ οἱ ὄσσε
Iliad 14.439	νὺξ ἐκάλυψε μέλαινα· βέλος δʼ ἔτι θυμὸν ἐδάμνα.
Iliad 14.440	Ἀργεῖοι δʼ ὡς οὖν ἴδον Ἕκτορα νόσφι κιόντα
Iliad 14.441	μᾶλλον ἐπὶ Τρώεσσι θόρον, μνήσαντο δὲ χάρμης.
Iliad 14.442	ἔνθα πολὺ πρώτιστος Ὀϊλῆος ταχὺς Αἴας
Iliad 14.443	Σάτνιον οὔτασε δουρὶ μετάλμενος ὀξυόεντι
Iliad 14.444	Ἠνοπίδην, ὃν ἄρα νύμφη τέκε νηῒς ἀμύμων
Iliad 14.445	Ἤνοπι βουκολέοντι παρʼ ὄχθας Σατνιόεντος.
Iliad 14.446	τὸν μὲν Ὀϊλιάδης δουρὶ κλυτὸς ἐγγύθεν ἐλθὼν
Iliad 14.447	οὖτα κατὰ λαπάρην· ὃ δʼ ἀνετράπετʼ, ἀμφὶ δʼ ἄρʼ αὐτῷ
Iliad 14.448	Τρῶες καὶ Δαναοὶ σύναγον κρατερὴν ὑσμίνην.
Iliad 14.449	τῷ δʼ ἐπὶ Πουλυδάμας ἐγχέσπαλος ἦλθεν ἀμύντωρ
Iliad 14.450	Πανθοΐδης, βάλε δὲ Προθοήνορα δεξιὸν ὦμον
Iliad 14.451	υἱὸν Ἀρηϊλύκοιο, διʼ ὤμου δʼ ὄβριμον ἔγχος
Iliad 14.452	ἔσχεν, ὃ δʼ ἐν κονίῃσι πεσὼν ἕλε γαῖαν ἀγοστῷ.
Iliad 14.453	Πουλυδάμας δʼ ἔκπαγλον ἐπεύξατο μακρὸν ἀΰσας·
Iliad 14.454	οὐ μὰν αὖτʼ ὀΐω μεγαθύμου Πανθοΐδαο
Iliad 14.455	χειρὸς ἄπο στιβαρῆς ἅλιον πηδῆσαι ἄκοντα,
Iliad 14.456	ἀλλά τις Ἀργείων κόμισε χροΐ, καί μιν ὀΐω
Iliad 14.457	αὐτῷ σκηπτόμενον κατίμεν δόμον Ἄϊδος εἴσω.
Iliad 14.458	ὣς ἔφατʼ, Ἀργείοισι δʼ ἄχος γένετʼ εὐξαμένοιο·
Iliad 14.459	Αἴαντι δὲ μάλιστα δαΐφρονι θυμὸν ὄρινε
Iliad 14.460	τῷ Τελαμωνιάδῃ· τοῦ γὰρ πέσεν ἄγχι μάλιστα.
Iliad 14.461	καρπαλίμως δʼ ἀπιόντος ἀκόντισε δουρὶ φαεινῷ.
Iliad 14.462	Πουλυδάμας δʼ αὐτὸς μὲν ἀλεύατο κῆρα μέλαιναν
Iliad 14.463	λικριφὶς ἀΐξας, κόμισεν δʼ Ἀντήνορος υἱὸς
Iliad 14.464	Ἀρχέλοχος· τῷ γάρ ῥα θεοὶ βούλευσαν ὄλεθρον.
Iliad 14.465	τόν ῥʼ ἔβαλεν κεφαλῆς τε καὶ αὐχένος ἐν συνεοχμῷ,
Iliad 14.466	νείατον ἀστράγαλον, ἀπὸ δʼ ἄμφω κέρσε τένοντε·
Iliad 14.467	τοῦ δὲ πολὺ προτέρη κεφαλὴ στόμα τε ῥῖνές τε
Iliad 14.468	οὔδεϊ πλῆντʼ ἤ περ κνῆμαι καὶ γοῦνα πεσόντος.
Iliad 14.469	Αἴας δʼ αὖτʼ ἐγέγωνεν ἀμύμονι Πουλυδάμαντι·
Iliad 14.470	φράζεο Πουλυδάμα καί μοι νημερτὲς ἐνίσπες
Iliad 14.471	ἦ ῥʼ οὐχ οὗτος ἀνὴρ Προθοήνορος ἀντὶ πεφάσθαι
Iliad 14.472	ἄξιος; οὐ μέν μοι κακὸς εἴδεται οὐδὲ κακῶν ἔξ,
Iliad 14.473	ἀλλὰ κασίγνητος Ἀντήνορος ἱπποδάμοιο
Iliad 14.474	ἢ πάϊς· αὐτῷ γὰρ γενεὴν ἄγχιστα ἐῴκει.
Iliad 14.475	ἦ ῥʼ εὖ γιγνώσκων, Τρῶας δʼ ἄχος ἔλλαβε θυμόν.
Iliad 14.476	ἔνθʼ Ἀκάμας Πρόμαχον Βοιώτιον οὔτασε δουρὶ
Iliad 14.477	ἀμφὶ κασιγνήτῳ βεβαώς· ὃ δʼ ὕφελκε ποδοῖιν.
Iliad 14.478	τῷ δʼ Ἀκάμας ἔκπαγλον ἐπεύξατο μακρὸν ἀΰσας·
Iliad 14.479	Ἀργεῖοι ἰόμωροι ἀπειλάων ἀκόρητοι
Iliad 14.480	οὔ θην οἴοισίν γε πόνος τʼ ἔσεται καὶ ὀϊζὺς
Iliad 14.481	ἡμῖν, ἀλλά ποθʼ ὧδε κατακτενέεσθε καὶ ὔμμες.
Iliad 14.482	φράζεσθʼ ὡς ὑμῖν Πρόμαχος δεδμημένος εὕδει
Iliad 14.483	ἔγχει ἐμῷ, ἵνα μή τι κασιγνήτοιό γε ποινὴ
Iliad 14.484	δηρὸν ἄτιτος ἔῃ· τὼ καί κέ τις εὔχεται ἀνὴρ
Iliad 14.485	γνωτὸν ἐνὶ μεγάροισιν ἀρῆς ἀλκτῆρα λιπέσθαι.
Iliad 14.486	ὣς ἔφατʼ, Ἀργείοισι δʼ ἄχος γένετʼ εὐξαμένοιο·
Iliad 14.487	Πηνέλεῳ δὲ μάλιστα δαΐφρονι θυμὸν ὄρινεν·
Iliad 14.488	ὁρμήθη δʼ Ἀκάμαντος· ὃ δʼ οὐχ ὑπέμεινεν ἐρωὴν
Iliad 14.489	Πηνελέωο ἄνακτος· ὃ δʼ οὔτασεν Ἰλιονῆα
Iliad 14.490	υἱὸν Φόρβαντος πολυμήλου, τόν ῥα μάλιστα
Iliad 14.491	Ἑρμείας Τρώων ἐφίλει καὶ κτῆσιν ὄπασσε·
Iliad 14.492	τῷ δʼ ἄρʼ ὑπὸ μήτηρ μοῦνον τέκεν Ἰλιονῆα.
Iliad 14.493	τὸν τόθʼ ὑπʼ ὀφρύος οὖτα κατʼ ὀφθαλμοῖο θέμεθλα,
Iliad 14.494	ἐκ δʼ ὦσε γλήνην· δόρυ δʼ ὀφθαλμοῖο διὰ πρὸ
Iliad 14.495	καὶ διὰ ἰνίου ἦλθεν, ὃ δʼ ἕζετο χεῖρε πετάσσας
Iliad 14.496	ἄμφω· Πηνέλεως δὲ ἐρυσσάμενος ξίφος ὀξὺ
Iliad 14.497	αὐχένα μέσσον ἔλασσεν, ἀπήραξεν δὲ χαμᾶζε
Iliad 14.498	αὐτῇ σὺν πήληκι κάρη· ἔτι δʼ ὄβριμον ἔγχος
Iliad 14.499	ἦεν ἐν ὀφθαλμῷ· ὃ δὲ φὴ κώδειαν ἀνασχὼν
Iliad 14.500	πέφραδέ τε Τρώεσσι καὶ εὐχόμενος ἔπος ηὔδα·
Iliad 14.501	εἰπέμεναί μοι Τρῶες ἀγαυοῦ Ἰλιονῆος
Iliad 14.502	πατρὶ φίλῳ καὶ μητρὶ γοήμεναι ἐν μεγάροισιν·
Iliad 14.503	οὐδὲ γὰρ ἣ Προμάχοιο δάμαρ Ἀλεγηνορίδαο
Iliad 14.504	ἀνδρὶ φίλῳ ἐλθόντι γανύσσεται, ὁππότε κεν δὴ
Iliad 14.505	ἐκ Τροίης σὺν νηυσὶ νεώμεθα κοῦροι Ἀχαιῶν.
Iliad 14.506	ὣς φάτο, τοὺς δʼ ἄρα πάντας ὑπὸ τρόμος ἔλλαβε γυῖα,
Iliad 14.507	πάπτηνεν δὲ ἕκαστος ὅπῃ φύγοι αἰπὺν ὄλεθρον.
Iliad 14.508	ἔσπετε νῦν μοι Μοῦσαι Ὀλύμπια δώματʼ ἔχουσαι
Iliad 14.509	ὅς τις δὴ πρῶτος βροτόεντʼ ἀνδράγριʼ Ἀχαιῶν
Iliad 14.510	ἤρατʼ, ἐπεί ῥʼ ἔκλινε μάχην κλυτὸς ἐννοσίγαιος.
Iliad 14.511	Αἴας ῥα πρῶτος Τελαμώνιος Ὕρτιον οὖτα
Iliad 14.512	Γυρτιάδην Μυσῶν ἡγήτορα καρτεροθύμων·
Iliad 14.513	Φάλκην δʼ Ἀντίλοχος καὶ Μέρμερον ἐξενάριξε·
Iliad 14.514	Μηριόνης δὲ Μόρυν τε καὶ Ἱπποτίωνα κατέκτα,
Iliad 14.515	Τεῦκρος δὲ Προθόωνά τʼ ἐνήρατο καὶ Περιφήτην·
Iliad 14.516	Ἀτρεΐδης δʼ ἄρʼ ἔπειθʼ Ὑπερήνορα ποιμένα λαῶν
Iliad 14.517	οὖτα κατὰ λαπάρην, διὰ δʼ ἔντερα χαλκὸς ἄφυσσε
Iliad 14.518	δῃώσας· ψυχὴ δὲ κατʼ οὐταμένην ὠτειλὴν
Iliad 14.519	ἔσσυτʼ ἐπειγομένη, τὸν δὲ σκότος ὄσσε κάλυψε.
Iliad 14.520	πλείστους δʼ Αἴας εἷλεν Ὀϊλῆος ταχὺς υἱός·
Iliad 14.521	οὐ γάρ οἵ τις ὁμοῖος ἐπισπέσθαι ποσὶν ἦεν
Iliad 14.522	ἀνδρῶν τρεσσάντων, ὅτε τε Ζεὺς ἐν φόβον ὄρσῃ.
Iliad 15.1	αὐτὰρ ἐπεὶ διά τε σκόλοπας καὶ τάφρον ἔβησαν
Iliad 15.2	φεύγοντες, πολλοὶ δὲ δάμεν Δαναῶν ὑπὸ χερσίν,
Iliad 15.3	οἳ μὲν δὴ παρʼ ὄχεσφιν ἐρητύοντο μένοντες
Iliad 15.4	χλωροὶ ὑπαὶ δείους πεφοβημένοι· ἔγρετο δὲ Ζεὺς
Iliad 15.5	Ἴδης ἐν κορυφῇσι παρὰ χρυσοθρόνου Ἥρης,
Iliad 15.6	στῆ δʼ ἄρʼ ἀναΐξας, ἴδε δὲ Τρῶας καὶ Ἀχαιοὺς
Iliad 15.7	τοὺς μὲν ὀρινομένους, τοὺς δὲ κλονέοντας ὄπισθεν
Iliad 15.8	Ἀργείους, μετὰ δέ σφι Ποσειδάωνα ἄνακτα·
Iliad 15.9	Ἕκτορα δʼ ἐν πεδίῳ ἴδε κείμενον, ἀμφὶ δʼ ἑταῖροι
Iliad 15.10	εἵαθʼ, ὃ δʼ ἀργαλέῳ ἔχετʼ ἄσθματι κῆρ ἀπινύσσων
Iliad 15.11	αἷμʼ ἐμέων, ἐπεὶ οὔ μιν ἀφαυρότατος βάλʼ Ἀχαιῶν.
Iliad 15.12	τὸν δὲ ἰδὼν ἐλέησε πατὴρ ἀνδρῶν τε θεῶν τε,
Iliad 15.13	δεινὰ δʼ ὑπόδρα ἰδὼν Ἥρην πρὸς μῦθον ἔειπεν·
Iliad 15.14	ἦ μάλα δὴ κακότεχνος ἀμήχανε σὸς δόλος Ἥρη
Iliad 15.15	Ἕκτορα δῖον ἔπαυσε μάχης, ἐφόβησε δὲ λαούς.
Iliad 15.16	οὐ μὰν οἶδʼ εἰ αὖτε κακορραφίης ἀλεγεινῆς
Iliad 15.17	πρώτη ἐπαύρηαι καί σε πληγῇσιν ἱμάσσω.
Iliad 15.18	ἦ οὐ μέμνῃ ὅτε τʼ ἐκρέμω ὑψόθεν, ἐκ δὲ ποδοῖιν
Iliad 15.19	ἄκμονας ἧκα δύω, περὶ χερσὶ δὲ δεσμὸν ἴηλα
Iliad 15.20	χρύσεον ἄρρηκτον; σὺ δʼ ἐν αἰθέρι καὶ νεφέλῃσιν
Iliad 15.21	ἐκρέμω· ἠλάστεον δὲ θεοὶ κατὰ μακρὸν Ὄλυμπον,
Iliad 15.22	λῦσαι δʼ οὐκ ἐδύναντο παρασταδόν· ὃν δὲ λάβοιμι
Iliad 15.23	ῥίπτασκον τεταγὼν ἀπὸ βηλοῦ ὄφρʼ ἂν ἵκηται
Iliad 15.24	γῆν ὀλιγηπελέων· ἐμὲ δʼ οὐδʼ ὧς θυμὸν ἀνίει
Iliad 15.25	ἀζηχὴς ὀδύνη Ἡρακλῆος θείοιο,
Iliad 15.26	τὸν σὺ ξὺν Βορέῃ ἀνέμῳ πεπιθοῦσα θυέλλας
Iliad 15.27	πέμψας ἐπʼ ἀτρύγετον πόντον κακὰ μητιόωσα,
Iliad 15.28	καί μιν ἔπειτα Κόων δʼ εὖ ναιομένην ἀπένεικας.
Iliad 15.29	τὸν μὲν ἐγὼν ἔνθεν ῥυσάμην καὶ ἀνήγαγον αὖτις
Iliad 15.30	Ἄργος ἐς ἱππόβοτον καὶ πολλά περ ἀθλήσαντα.
Iliad 15.31	τῶν σʼ αὖτις μνήσω ἵνʼ ἀπολλήξῃς ἀπατάων,
Iliad 15.32	ὄφρα ἴδῃ ἤν τοι χραίσμῃ φιλότης τε καὶ εὐνή,
Iliad 15.33	ἣν ἐμίγης ἐλθοῦσα θεῶν ἄπο καί μʼ ἀπάτησας.
Iliad 15.34	ὣς φάτο, ῥίγησεν δὲ βοῶπις πότνια Ἥρη,
Iliad 15.35	καί μιν φωνήσασʼ ἔπεα πτερόεντα προσηύδα·
Iliad 15.36	ἴστω νῦν τόδε Γαῖα καὶ Οὐρανὸς εὐρὺς ὕπερθε
Iliad 15.37	καὶ τὸ κατειβόμενον Στυγὸς ὕδωρ, ὅς τε μέγιστος
Iliad 15.38	ὅρκος δεινότατός τε πέλει μακάρεσσι θεοῖσι,
Iliad 15.39	σή θʼ ἱερὴ κεφαλὴ καὶ νωΐτερον λέχος αὐτῶν
Iliad 15.40	κουρίδιον, τὸ μὲν οὐκ ἂν ἐγώ ποτε μὰψ ὀμόσαιμι·
Iliad 15.41	μὴ διʼ ἐμὴν ἰότητα Ποσειδάων ἐνοσίχθων
Iliad 15.42	πημαίνει Τρῶάς τε καὶ Ἕκτορα, τοῖσι δʼ ἀρήγει,
Iliad 15.43	ἀλλά που αὐτὸν θυμὸς ἐποτρύνει καὶ ἀνώγει,
Iliad 15.44	τειρομένους δʼ ἐπὶ νηυσὶν ἰδὼν ἐλέησεν Ἀχαιούς.
Iliad 15.45	αὐτάρ τοι καὶ κείνῳ ἐγὼ παραμυθησαίμην
Iliad 15.46	τῇ ἴμεν ᾗ κεν δὴ σὺ κελαινεφὲς ἡγεμονεύῃς.
Iliad 15.47	ὣς φάτο, μείδησεν δὲ πατὴρ ἀνδρῶν τε θεῶν τε,
Iliad 15.48	καί μιν ἀμειβόμενος ἔπεα πτερόεντα προσηύδα·
Iliad 15.49	εἰ μὲν δὴ σύ γʼ ἔπειτα βοῶπις πότνια Ἥρη
Iliad 15.50	ἶσον ἐμοὶ φρονέουσα μετʼ ἀθανάτοισι καθίζοις,
Iliad 15.51	τώ κε Ποσειδάων γε, καὶ εἰ μάλα βούλεται ἄλλῃ,
Iliad 15.52	αἶψα μεταστρέψειε νόον μετὰ σὸν καὶ ἐμὸν κῆρ.
Iliad 15.53	ἀλλʼ εἰ δή ῥʼ ἐτεόν γε καὶ ἀτρεκέως ἀγορεύεις,
Iliad 15.54	ἔρχεο νῦν μετὰ φῦλα θεῶν, καὶ δεῦρο κάλεσσον
Iliad 15.55	Ἶρίν τʼ ἐλθέμεναι καὶ Ἀπόλλωνα κλυτότοξον,
Iliad 15.56	ὄφρʼ ἣ μὲν μετὰ λαὸν Ἀχαιῶν χαλκοχιτώνων
Iliad 15.57	ἔλθῃ, καὶ εἴπῃσι Ποσειδάωνι ἄνακτι
Iliad 15.58	παυσάμενον πολέμοιο τὰ ἃ πρὸς δώμαθʼ ἱκέσθαι,
Iliad 15.59	Ἕκτορα δʼ ὀτρύνῃσι μάχην ἐς Φοῖβος Ἀπόλλων,
Iliad 15.60	αὖτις δʼ ἐμπνεύσῃσι μένος, λελάθῃ δʼ ὀδυνάων
Iliad 15.61	αἳ νῦν μιν τείρουσι κατὰ φρένας, αὐτὰρ Ἀχαιοὺς
Iliad 15.62	αὖτις ἀποστρέψῃσιν ἀνάλκιδα φύζαν ἐνόρσας,
Iliad 15.63	φεύγοντες δʼ ἐν νηυσὶ πολυκλήϊσι πέσωσι
Iliad 15.64	Πηλεΐδεω Ἀχιλῆος· ὃ δʼ ἀνστήσει ὃν ἑταῖρον
Iliad 15.65	Πάτροκλον· τὸν δὲ κτενεῖ ἔγχεϊ φαίδιμος Ἕκτωρ
Iliad 15.66	Ἰλίου προπάροιθε πολέας ὀλέσαντʼ αἰζηοὺς
Iliad 15.67	τοὺς ἄλλους, μετὰ δʼ υἱὸν ἐμὸν Σαρπηδόνα δῖον.
Iliad 15.68	τοῦ δὲ χολωσάμενος κτενεῖ Ἕκτορα δῖος Ἀχιλλεύς.
Iliad 15.69	ἐκ τοῦ δʼ ἄν τοι ἔπειτα παλίωξιν παρὰ νηῶν
Iliad 15.70	αἰὲν ἐγὼ τεύχοιμι διαμπερὲς εἰς ὅ κʼ Ἀχαιοὶ
Iliad 15.71	Ἴλιον αἰπὺ ἕλοιεν Ἀθηναίης διὰ βουλάς.
Iliad 15.72	τὸ πρὶν δʼ οὔτʼ ἄρʼ ἐγὼ παύω χόλον οὔτέ τινʼ ἄλλον
Iliad 15.73	ἀθανάτων Δαναοῖσιν ἀμυνέμεν ἐνθάδʼ ἐάσω
Iliad 15.74	πρίν γε τὸ Πηλεΐδαο τελευτηθῆναι ἐέλδωρ,
Iliad 15.75	ὥς οἱ ὑπέστην πρῶτον, ἐμῷ δʼ ἐπένευσα κάρητι,
Iliad 15.76	ἤματι τῷ ὅτʼ ἐμεῖο θεὰ Θέτις ἥψατο γούνων,
Iliad 15.77	λισσομένη τιμῆσαι Ἀχιλλῆα πτολίπορθον.
Iliad 15.78	ὣς ἔφατʼ, οὐδʼ ἀπίθησε θεὰ λευκώλενος Ἥρη,
Iliad 15.79	βῆ δʼ ἐξ Ἰδαίων ὀρέων ἐς μακρὸν Ὄλυμπον.
Iliad 15.80	ὡς δʼ ὅτʼ ἂν ἀΐξῃ νόος ἀνέρος, ὅς τʼ ἐπὶ πολλὴν
Iliad 15.81	γαῖαν ἐληλουθὼς φρεσὶ πευκαλίμῃσι νοήσῃ
Iliad 15.82	ἔνθʼ εἴην ἢ ἔνθα, μενοινήῃσί τε πολλά,
Iliad 15.83	ὣς κραιπνῶς μεμαυῖα διέπτατο πότνια Ἥρη·
Iliad 15.84	ἵκετο δʼ αἰπὺν Ὄλυμπον, ὁμηγερέεσσι δʼ ἐπῆλθεν
Iliad 15.85	ἀθανάτοισι θεοῖσι Διὸς δόμῳ· οἳ δὲ ἰδόντες
Iliad 15.86	πάντες ἀνήϊξαν καὶ δεικανόωντο δέπασσιν.
Iliad 15.87	ἣ δʼ ἄλλους μὲν ἔασε, Θέμιστι δὲ καλλιπαρῄῳ
Iliad 15.88	δέκτο δέπας· πρώτη γὰρ ἐναντίη ἦλθε θέουσα,
Iliad 15.89	καί μιν φωνήσασʼ ἔπεα πτερόεντα προσηύδα·
Iliad 15.90	Ἥρη τίπτε βέβηκας; ἀτυζομένῃ δὲ ἔοικας·
Iliad 15.91	ἦ μάλα δή σʼ ἐφόβησε Κρόνου πάϊς, ὅς τοι ἀκοίτης.
Iliad 15.92	τὴν δʼ ἠμείβετʼ ἔπειτα θεὰ λευκώλενος Ἥρη·
Iliad 15.93	μή με θεὰ Θέμι ταῦτα διείρεο· οἶσθα καὶ αὐτὴ
Iliad 15.94	οἷος κείνου θυμὸς ὑπερφίαλος καὶ ἀπηνής.
Iliad 15.95	ἀλλὰ σύ γʼ ἄρχε θεοῖσι δόμοις ἔνι δαιτὸς ἐΐσης·
Iliad 15.96	ταῦτα δὲ καὶ μετὰ πᾶσιν ἀκούσεαι ἀθανάτοισιν
Iliad 15.97	οἷα Ζεὺς κακὰ ἔργα πιφαύσκεται· οὐδέ τί φημι
Iliad 15.98	πᾶσιν ὁμῶς θυμὸν κεχαρησέμεν, οὔτε βροτοῖσιν
Iliad 15.99	οὔτε θεοῖς, εἴ πέρ τις ἔτι νῦν δαίνυται εὔφρων.
Iliad 15.100	ἣ μὲν ἄρʼ ὣς εἰποῦσα καθέζετο πότνια Ἥρη,
Iliad 15.101	ὄχθησαν δʼ ἀνὰ δῶμα Διὸς θεοί· ἣ δʼ ἐγέλασσε
Iliad 15.102	χείλεσιν, οὐδὲ μέτωπον ἐπʼ ὀφρύσι κυανέῃσιν
Iliad 15.103	ἰάνθη· πᾶσιν δὲ νεμεσσηθεῖσα μετηύδα·
Iliad 15.104	νήπιοι οἳ Ζηνὶ μενεαίνομεν ἀφρονέοντες·
Iliad 15.105	ἦ ἔτι μιν μέμαμεν καταπαυσέμεν ἆσσον ἰόντες
Iliad 15.106	ἢ ἔπει ἠὲ βίῃ· ὃ δʼ ἀφήμενος οὐκ ἀλεγίζει
Iliad 15.107	οὐδʼ ὄθεται· φησὶν γὰρ ἐν ἀθανάτοισι θεοῖσι
Iliad 15.108	κάρτεΐ τε σθένεΐ τε διακριδὸν εἶναι ἄριστος.
Iliad 15.109	τὼ ἔχεθʼ ὅττί κεν ὔμμι κακὸν πέμπῃσιν ἑκάστῳ.
Iliad 15.110	ἤδη γὰρ νῦν ἔλπομʼ Ἄρηΐ γε πῆμα τετύχθαι·
Iliad 15.111	υἱὸς γάρ οἱ ὄλωλε μάχῃ ἔνι φίλτατος ἀνδρῶν
Iliad 15.112	Ἀσκάλαφος, τόν φησιν ὃν ἔμμεναι ὄβριμος Ἄρης.
Iliad 15.113	ὣς ἔφατʼ, αὐτὰρ Ἄρης θαλερὼ πεπλήγετο μηρὼ
Iliad 15.114	χερσὶ καταπρηνέσσʼ, ὀλοφυρόμενος δʼ ἔπος ηὔδα·
Iliad 15.115	μὴ νῦν μοι νεμεσήσετʼ Ὀλύμπια δώματʼ ἔχοντες
Iliad 15.116	τίσασθαι φόνον υἷος ἰόντʼ ἐπὶ νῆας Ἀχαιῶν,
Iliad 15.117	εἴ πέρ μοι καὶ μοῖρα Διὸς πληγέντι κεραυνῷ
Iliad 15.118	κεῖσθαι ὁμοῦ νεκύεσσι μεθʼ αἵματι καὶ κονίῃσιν.
Iliad 15.119	ὣς φάτο, καί ῥʼ ἵππους κέλετο Δεῖμόν τε Φόβον τε
Iliad 15.120	ζευγνύμεν, αὐτὸς δʼ ἔντεʼ ἐδύσετο παμφανόωντα.
Iliad 15.121	ἔνθά κʼ ἔτι μείζων τε καὶ ἀργαλεώτερος ἄλλος
Iliad 15.122	πὰρ Διὸς ἀθανάτοισι χόλος καὶ μῆνις ἐτύχθη,
Iliad 15.123	εἰ μὴ Ἀθήνη πᾶσι περιδείσασα θεοῖσιν
Iliad 15.124	ὦρτο διὲκ προθύρου, λίπε δὲ θρόνον ἔνθα θάασσε,
Iliad 15.125	τοῦ δʼ ἀπὸ μὲν κεφαλῆς κόρυθʼ εἵλετο καὶ σάκος ὤμων,
Iliad 15.126	ἔγχος δʼ ἔστησε στιβαρῆς ἀπὸ χειρὸς ἑλοῦσα
Iliad 15.127	χάλκεον· ἣ δʼ ἐπέεσσι καθάπτετο θοῦρον Ἄρηα·
Iliad 15.128	μαινόμενε φρένας ἠλὲ διέφθορας· ἦ νύ τοι αὔτως
Iliad 15.129	οὔατʼ ἀκουέμεν ἐστί, νόος δʼ ἀπόλωλε καὶ αἰδώς.
Iliad 15.130	οὐκ ἀΐεις ἅ τέ φησι θεὰ λευκώλενος Ἥρη
Iliad 15.131	ἣ δὴ νῦν πὰρ Ζηνὸς Ὀλυμπίου εἰλήλουθεν;
Iliad 15.132	ἦ ἐθέλεις αὐτὸς μὲν ἀναπλήσας κακὰ πολλὰ
Iliad 15.133	ἂψ ἴμεν Οὔλυμπον δὲ καὶ ἀχνύμενός περ ἀνάγκῃ,
Iliad 15.134	αὐτὰρ τοῖς ἄλλοισι κακὸν μέγα πᾶσι φυτεῦσαι;
Iliad 15.135	αὐτίκα γὰρ Τρῶας μὲν ὑπερθύμους καὶ Ἀχαιοὺς
Iliad 15.136	λείψει, ὃ δʼ ἡμέας εἶσι κυδοιμήσων ἐς Ὄλυμπον,
Iliad 15.137	μάρψει δʼ ἑξείης ὅς τʼ αἴτιος ὅς τε καὶ οὐκί.
Iliad 15.138	τώ σʼ αὖ νῦν κέλομαι μεθέμεν χόλον υἷος ἑῆος·
Iliad 15.139	ἤδη γάρ τις τοῦ γε βίην καὶ χεῖρας ἀμείνων
Iliad 15.140	ἢ πέφατʼ, ἢ καὶ ἔπειτα πεφήσεται· ἀργαλέον δὲ
Iliad 15.141	πάντων ἀνθρώπων ῥῦσθαι γενεήν τε τόκον τε.
Iliad 15.142	ὣς εἰποῦσʼ ἵδρυσε θρόνῳ ἔνι θοῦρον Ἄρηα.
Iliad 15.143	Ἥρη δʼ Ἀπόλλωνα καλέσσατο δώματος ἐκτὸς
Iliad 15.144	Ἶρίν θʼ, ἥ τε θεοῖσι μετάγγελος ἀθανάτοισι,
Iliad 15.145	καί σφεας φωνήσασʼ ἔπεα πτερόεντα προσηύδα·
Iliad 15.146	Ζεὺς σφὼ εἰς Ἴδην κέλετʼ ἐλθέμεν ὅττι τάχιστα·
Iliad 15.147	αὐτὰρ ἐπὴν ἔλθητε, Διός τʼ εἰς ὦπα ἴδησθε,
Iliad 15.148	ἕρδειν ὅττί κε κεῖνος ἐποτρύνῃ καὶ ἀνώγῃ.
Iliad 15.149	ἣ μὲν ἄρʼ ὣς εἰποῦσα πάλιν κίε πότνια Ἥρη,
Iliad 15.150	ἕζετο δʼ εἰνὶ θρόνῳ· τὼ δʼ ἀΐξαντε πετέσθην.
Iliad 15.151	Ἴδην δʼ ἵκανον πολυπίδακα μητέρα θηρῶν,
Iliad 15.152	εὗρον δʼ εὐρύοπα Κρονίδην ἀνὰ Γαργάρῳ ἄκρῳ
Iliad 15.153	ἥμενον· ἀμφὶ δέ μιν θυόεν νέφος ἐστεφάνωτο.
Iliad 15.154	τὼ δὲ πάροιθʼ ἐλθόντε Διὸς νεφεληγερέταο
Iliad 15.155	στήτην· οὐδέ σφωϊν ἰδὼν ἐχολώσατο θυμῷ,
Iliad 15.156	ὅττί οἱ ὦκʼ ἐπέεσσι φίλης ἀλόχοιο πιθέσθην.
Iliad 15.157	Ἶριν δὲ προτέρην ἔπεα πτερόεντα προσηύδα·
Iliad 15.158	βάσκʼ ἴθι Ἶρι ταχεῖα, Ποσειδάωνι ἄνακτι
Iliad 15.159	πάντα τάδʼ ἀγγεῖλαι, μὴ δὲ ψευδάγγελος εἶναι.
Iliad 15.160	παυσάμενόν μιν ἄνωχθι μάχης ἠδὲ πτολέμοιο
Iliad 15.161	ἔρχεσθαι μετὰ φῦλα θεῶν ἢ εἰς ἅλα δῖαν.
Iliad 15.162	εἰ δέ μοι οὐκ ἐπέεσσʼ ἐπιπείσεται, ἀλλʼ ἀλογήσει,
Iliad 15.163	φραζέσθω δὴ ἔπειτα κατὰ φρένα καὶ κατὰ θυμὸν
Iliad 15.164	μή μʼ οὐδὲ κρατερός περ ἐὼν ἐπιόντα ταλάσσῃ
Iliad 15.165	μεῖναι, ἐπεί εὑ φημὶ βίῃ πολὺ φέρτερος εἶναι
Iliad 15.166	καὶ γενεῇ πρότερος· τοῦ δʼ οὐκ ὄθεται φίλον ἦτορ
Iliad 15.167	ἶσον ἐμοὶ φάσθαι, τόν τε στυγέουσι καὶ ἄλλοι.
Iliad 15.168	ὣς ἔφατʼ, οὐδʼ ἀπίθησε ποδήνεμος ὠκέα Ἶρις,
Iliad 15.169	βῆ δὲ κατʼ Ἰδαίων ὀρέων εἰς Ἴλιον ἱρήν.
Iliad 15.170	ὡς δʼ ὅτʼ ἂν ἐκ νεφέων πτῆται νιφὰς ἠὲ χάλαζα
Iliad 15.171	ψυχρὴ ὑπὸ ῥιπῆς αἰθρηγενέος Βορέαο,
Iliad 15.172	ὣς κραιπνῶς μεμαυῖα διέπτατο ὠκέα Ἶρις,
Iliad 15.173	ἀγχοῦ δʼ ἱσταμένη προσέφη κλυτὸν ἐννοσίγαιον·
Iliad 15.174	ἀγγελίην τινά τοι γαιήοχε κυανοχαῖτα
Iliad 15.175	ἦλθον δεῦρο φέρουσα παραὶ Διὸς αἰγιόχοιο.
Iliad 15.176	παυσάμενόν σʼ ἐκέλευσε μάχης ἠδὲ πτολέμοιο
Iliad 15.177	ἔρχεσθαι μετὰ φῦλα θεῶν ἢ εἰς ἅλα δῖαν.
Iliad 15.178	εἰ δέ οἱ οὐκ ἐπέεσσʼ ἐπιπείσεαι, ἀλλʼ ἀλογήσεις,
Iliad 15.179	ἠπείλει καὶ κεῖνος ἐναντίβιον πολεμίξων
Iliad 15.180	ἐνθάδʼ ἐλεύσεσθαι· σὲ δʼ ὑπεξαλέασθαι ἄνωγε
Iliad 15.181	χεῖρας, ἐπεὶ σέο φησὶ βίῃ πολὺ φέρτερος εἶναι
Iliad 15.182	καὶ γενεῇ πρότερος· σὸν δʼ οὐκ ὄθεται φίλον ἦτορ
Iliad 15.183	ἶσόν οἱ φάσθαι, τόν τε στυγέουσι καὶ ἄλλοι.
Iliad 15.184	τὴν δὲ μέγʼ ὀχθήσας προσέφη κλυτὸς ἐννοσίγαιος·
Iliad 15.185	ὢ πόποι ἦ ῥʼ ἀγαθός περ ἐὼν ὑπέροπλον ἔειπεν
Iliad 15.186	εἴ μʼ ὁμότιμον ἐόντα βίῃ ἀέκοντα καθέξει.
Iliad 15.187	τρεῖς γάρ τʼ ἐκ Κρόνου εἰμὲν ἀδελφεοὶ οὓς τέκετο Ῥέα
Iliad 15.188	Ζεὺς καὶ ἐγώ, τρίτατος δʼ Ἀΐδης ἐνέροισιν ἀνάσσων.
Iliad 15.189	τριχθὰ δὲ πάντα δέδασται, ἕκαστος δʼ ἔμμορε τιμῆς·
Iliad 15.190	ἤτοι ἐγὼν ἔλαχον πολιὴν ἅλα ναιέμεν αἰεὶ
Iliad 15.191	παλλομένων, Ἀΐδης δʼ ἔλαχε ζόφον ἠερόεντα,
Iliad 15.192	Ζεὺς δʼ ἔλαχʼ οὐρανὸν εὐρὺν ἐν αἰθέρι καὶ νεφέλῃσι·
Iliad 15.193	γαῖα δʼ ἔτι ξυνὴ πάντων καὶ μακρὸς Ὄλυμπος.
Iliad 15.194	τώ ῥα καὶ οὔ τι Διὸς βέομαι φρεσίν, ἀλλὰ ἕκηλος
Iliad 15.195	καὶ κρατερός περ ἐὼν μενέτω τριτάτῃ ἐνὶ μοίρῃ.
Iliad 15.196	χερσὶ δὲ μή τί με πάγχυ κακὸν ὣς δειδισσέσθω·
Iliad 15.197	θυγατέρεσσιν γάρ τε καὶ υἱάσι βέλτερον εἴη
Iliad 15.198	ἐκπάγλοις ἐπέεσσιν ἐνισσέμεν οὓς τέκεν αὐτός,
Iliad 15.199	οἵ ἑθεν ὀτρύνοντος ἀκούσονται καὶ ἀνάγκῃ.
Iliad 15.200	τὸν δʼ ἠμείβετʼ ἔπειτα ποδήνεμος ὠκέα Ἶρις·
Iliad 15.201	οὕτω γὰρ δή τοι γαιήοχε κυανοχαῖτα
Iliad 15.202	τόνδε φέρω Διὶ μῦθον ἀπηνέα τε κρατερόν τε,
Iliad 15.203	ἦ τι μεταστρέψεις; στρεπταὶ μέν τε φρένες ἐσθλῶν.
Iliad 15.204	οἶσθʼ ὡς πρεσβυτέροισιν Ἐρινύες αἰὲν ἕπονται.
Iliad 15.205	τὴν δʼ αὖτε προσέειπε Ποσειδάων ἐνοσίχθων·
Iliad 15.206	Ἶρι θεὰ μάλα τοῦτο ἔπος κατὰ μοῖραν ἔειπες·
Iliad 15.207	ἐσθλὸν καὶ τὸ τέτυκται ὅτʼ ἄγγελος αἴσιμα εἰδῇ.
Iliad 15.208	ἀλλὰ τόδʼ αἰνὸν ἄχος κραδίην καὶ θυμὸν ἱκάνει
Iliad 15.209	ὁππότʼ ἂν ἰσόμορον καὶ ὁμῇ πεπρωμένον αἴσῃ
Iliad 15.210	νεικείειν ἐθέλῃσι χολωτοῖσιν ἐπέεσσιν.
Iliad 15.211	ἀλλʼ ἤτοι νῦν μέν κε νεμεσσηθεὶς ὑποείξω·
Iliad 15.212	ἄλλο δέ τοι ἐρέω, καὶ ἀπειλήσω τό γε θυμῷ·
Iliad 15.213	αἴ κεν ἄνευ ἐμέθεν καὶ Ἀθηναίης ἀγελείης
Iliad 15.214	Ἥρης Ἑρμείω τε καὶ Ἡφαίστοιο ἄνακτος
Iliad 15.215	Ἰλίου αἰπεινῆς πεφιδήσεται, οὐδʼ ἐθελήσει
Iliad 15.216	ἐκπέρσαι, δοῦναι δὲ μέγα κράτος Ἀργείοισιν,
Iliad 15.217	ἴστω τοῦθʼ ὅτι νῶϊν ἀνήκεστος χόλος ἔσται.
Iliad 15.218	ὣς εἰπὼν λίπε λαὸν Ἀχαιϊκὸν ἐννοσίγαιος,
Iliad 15.219	δῦνε δὲ πόντον ἰών, πόθεσαν δʼ ἥρωες Ἀχαιοί.
Iliad 15.220	καὶ τότʼ Ἀπόλλωνα προσέφη νεφεληγερέτα Ζεύς·
Iliad 15.221	ἔρχεο νῦν φίλε Φοῖβε μεθʼ Ἕκτορα χαλκοκορυστήν·
Iliad 15.222	ἤδη μὲν γάρ τοι γαιήοχος ἐννοσίγαιος
Iliad 15.223	οἴχεται εἰς ἅλα δῖαν ἀλευάμενος χόλον αἰπὺν
Iliad 15.224	ἡμέτερον· μάλα γάρ κε μάχης ἐπύθοντο καὶ ἄλλοι,
Iliad 15.225	οἵ περ ἐνέρτεροί εἰσι θεοὶ Κρόνον ἀμφὶς ἐόντες.
Iliad 15.226	ἀλλὰ τόδʼ ἠμὲν ἐμοὶ πολὺ κέρδιον ἠδέ οἱ αὐτῷ
Iliad 15.227	ἔπλετο, ὅττι πάροιθε νεμεσσηθεὶς ὑπόειξε
Iliad 15.228	χεῖρας ἐμάς, ἐπεὶ οὔ κεν ἀνιδρωτί γʼ ἐτελέσθη.
Iliad 15.229	ἀλλὰ σύ γʼ ἐν χείρεσσι λάβʼ αἰγίδα θυσσανόεσσαν,
Iliad 15.230	τῇ μάλʼ ἐπισσείων φοβέειν ἥρωας Ἀχαιούς·
Iliad 15.231	σοὶ δʼ αὐτῷ μελέτω ἑκατηβόλε φαίδιμος Ἕκτωρ·
Iliad 15.232	τόφρα γὰρ οὖν οἱ ἔγειρε μένος μέγα, ὄφρʼ ἂν Ἀχαιοὶ
Iliad 15.233	φεύγοντες νῆάς τε καὶ Ἑλλήσποντον ἵκωνται.
Iliad 15.234	κεῖθεν δʼ αὐτὸς ἐγὼ φράσομαι ἔργον τε ἔπος τε,
Iliad 15.235	ὥς κε καὶ αὖτις Ἀχαιοὶ ἀναπνεύσωσι πόνοιο.
Iliad 15.236	ὣς ἔφατʼ, οὐδʼ ἄρα πατρὸς ἀνηκούστησεν Ἀπόλλων,
Iliad 15.237	βῆ δὲ κατʼ Ἰδαίων ὀρέων ἴρηκι ἐοικὼς
Iliad 15.238	ὠκέϊ φασσοφόνῳ, ὅς τʼ ὤκιστος πετεηνῶν.
Iliad 15.239	εὗρʼ υἱὸν Πριάμοιο δαΐφρονος Ἕκτορα δῖον
Iliad 15.240	ἥμενον, οὐδʼ ἔτι κεῖτο, νέον δʼ ἐσαγείρετο θυμόν,
Iliad 15.241	ἀμφὶ ἓ γιγνώσκων ἑτάρους· ἀτὰρ ἆσθμα καὶ ἱδρὼς
Iliad 15.242	παύετʼ, ἐπεί μιν ἔγειρε Διὸς νόος αἰγιόχοιο.
Iliad 15.243	ἀγχοῦ δʼ ἱστάμενος προσέφη ἑκάεργος Ἀπόλλων·
Iliad 15.244	Ἕκτορ υἱὲ Πριάμοιο, τί ἢ δὲ σὺ νόσφιν ἀπʼ ἄλλων
Iliad 15.245	ἧσʼ ὀλιγηπελέων; ἦ πού τί σε κῆδος ἱκάνει;
Iliad 15.246	τὸν δʼ ὀλιγοδρανέων προσέφη κορυθαίολος Ἕκτωρ·
Iliad 15.247	τίς δὲ σύ ἐσσι φέριστε θεῶν ὅς μʼ εἴρεαι ἄντην;
Iliad 15.248	οὐκ ἀΐεις ὅ με νηυσὶν ἔπι πρυμνῇσιν Ἀχαιῶν
Iliad 15.249	οὓς ἑτάρους ὀλέκοντα βοὴν ἀγαθὸς βάλεν Αἴας
Iliad 15.250	χερμαδίῳ πρὸς στῆθος, ἔπαυσε δὲ θούριδος ἀλκῆς;
Iliad 15.251	καὶ δὴ ἔγωγʼ ἐφάμην νέκυας καὶ δῶμʼ Ἀΐδαο
Iliad 15.252	ἤματι τῷδʼ ἵξεσθαι, ἐπεὶ φίλον ἄϊον ἦτορ.
Iliad 15.253	τὸν δʼ αὖτε προσέειπεν ἄναξ ἑκάεργος Ἀπόλλων·
Iliad 15.254	θάρσει νῦν· τοῖόν τοι ἀοσσητῆρα Κρονίων
Iliad 15.255	ἐξ Ἴδης προέηκε παρεστάμεναι καὶ ἀμύνειν
Iliad 15.256	Φοῖβον Ἀπόλλωνα χρυσάορον, ὅς σε πάρος περ
Iliad 15.257	ῥύομʼ, ὁμῶς αὐτόν τε καὶ αἰπεινὸν πτολίεθρον.
Iliad 15.258	ἀλλʼ ἄγε νῦν ἱππεῦσιν ἐπότρυνον πολέεσσι
Iliad 15.259	νηυσὶν ἔπι γλαφυρῇσιν ἐλαυνέμεν ὠκέας ἵππους·
Iliad 15.260	αὐτὰρ ἐγὼ προπάροιθε κιὼν ἵπποισι κέλευθον
Iliad 15.261	πᾶσαν λειανέω, τρέψω δʼ ἥρωας Ἀχαιούς.
Iliad 15.262	ὣς εἰπὼν ἔμπνευσε μένος μέγα ποιμένι λαῶν.
Iliad 15.263	ὡς δʼ ὅτε τις στατὸς ἵππος ἀκοστήσας ἐπὶ φάτνῃ
Iliad 15.264	δεσμὸν ἀπορρήξας θείῃ πεδίοιο κροαίνων
Iliad 15.265	εἰωθὼς λούεσθαι ἐϋρρεῖος ποταμοῖο
Iliad 15.266	κυδιόων· ὑψοῦ δὲ κάρη ἔχει, ἀμφὶ δὲ χαῖται
Iliad 15.267	ὤμοις ἀΐσσονται· ὃ δʼ ἀγλαΐηφι πεποιθὼς
Iliad 15.268	ῥίμφά ἑ γοῦνα φέρει μετά τʼ ἤθεα καὶ νομὸν ἵππων·
Iliad 15.269	ὣς Ἕκτωρ λαιψηρὰ πόδας καὶ γούνατʼ ἐνώμα
Iliad 15.270	ὀτρύνων ἱππῆας, ἐπεὶ θεοῦ ἔκλυεν αὐδήν.
Iliad 15.271	οἳ δʼ ὥς τʼ ἢ ἔλαφον κεραὸν ἢ ἄγριον αἶγα
Iliad 15.272	ἐσσεύαντο κύνες τε καὶ ἀνέρες ἀγροιῶται·
Iliad 15.273	τὸν μέν τʼ ἠλίβατος πέτρη καὶ δάσκιος ὕλη
Iliad 15.274	εἰρύσατʼ, οὐδʼ ἄρα τέ σφι κιχήμεναι αἴσιμον ἦεν·
Iliad 15.275	τῶν δέ θʼ ὑπὸ ἰαχῆς ἐφάνη λὶς ἠϋγένειος
Iliad 15.276	εἰς ὁδόν, αἶψα δὲ πάντας ἀπέτραπε καὶ μεμαῶτας·
Iliad 15.277	ὣς Δαναοὶ εἷος μὲν ὁμιλαδὸν αἰὲν ἕποντο
Iliad 15.278	νύσσοντες ξίφεσίν τε καὶ ἔγχεσιν ἀμφιγύοισιν·
Iliad 15.279	αὐτὰρ ἐπεὶ ἴδον Ἕκτορʼ ἐποιχόμενον στίχας ἀνδρῶν
Iliad 15.280	τάρβησαν, πᾶσιν δὲ παραὶ ποσὶ κάππεσε θυμός.
Iliad 15.281	τοῖσι δʼ ἔπειτʼ ἀγόρευε Θόας Ἀνδραίμονος υἱός,
Iliad 15.282	Αἰτωλῶν ὄχʼ ἄριστος ἐπιστάμενος μὲν ἄκοντι
Iliad 15.283	ἐσθλὸς δʼ ἐν σταδίῃ· ἀγορῇ δέ ἑ παῦροι Ἀχαιῶν
Iliad 15.284	νίκων, ὁππότε κοῦροι ἐρίσσειαν περὶ μύθων·
Iliad 15.285	ὅ σφιν ἐϋφρονέων ἀγορήσατο καὶ μετέειπεν·
Iliad 15.286	ὢ πόποι ἦ μέγα θαῦμα τόδʼ ὀφθαλμοῖσιν ὁρῶμαι,
Iliad 15.287	οἷον δʼ αὖτʼ ἐξαῦτις ἀνέστη κῆρας ἀλύξας
Iliad 15.288	Ἕκτωρ· ἦ θήν μιν μάλα ἔλπετο θυμὸς ἑκάστου
Iliad 15.289	χερσὶν ὑπʼ Αἴαντος θανέειν Τελαμωνιάδαο.
Iliad 15.290	ἀλλά τις αὖτε θεῶν ἐρρύσατο καὶ ἐσάωσεν
Iliad 15.291	Ἕκτορʼ, ὃ δὴ πολλῶν Δαναῶν ὑπὸ γούνατʼ ἔλυσεν,
Iliad 15.292	ὡς καὶ νῦν ἔσσεσθαι ὀΐομαι· οὐ γὰρ ἄτερ γε
Iliad 15.293	Ζηνὸς ἐριγδούπου πρόμος ἵσταται ὧδε μενοινῶν.
Iliad 15.294	ἀλλʼ ἄγεθʼ ὡς ἂν ἐγὼν εἴπω πειθώμεθα πάντες.
Iliad 15.295	πληθὺν μὲν ποτὶ νῆας ἀνώξομεν ἀπονέεσθαι·
Iliad 15.296	αὐτοὶ δʼ, ὅσσοι ἄριστοι ἐνὶ στρατῷ εὐχόμεθʼ εἶναι,
Iliad 15.297	στήομεν, εἴ κεν πρῶτον ἐρύξομεν ἀντιάσαντες
Iliad 15.298	δούρατʼ ἀνασχόμενοι· τὸν δʼ οἴω καὶ μεμαῶτα
Iliad 15.299	θυμῷ δείσεσθαι Δαναῶν καταδῦναι ὅμιλον.
Iliad 15.300	ὣς ἔφαθʼ, οἳ δʼ ἄρα τοῦ μάλα μὲν κλύον ἠδὲ πίθοντο·
Iliad 15.301	οἳ μὲν ἄρʼ ἀμφʼ Αἴαντα καὶ Ἰδομενῆα ἄνακτα
Iliad 15.302	Τεῦκρον Μηριόνην τε Μέγην τʼ ἀτάλαντον Ἄρηϊ
Iliad 15.303	ὑσμίνην ἤρτυνον ἀριστῆας καλέσαντες
Iliad 15.304	Ἕκτορι καὶ Τρώεσσιν ἐναντίον· αὐτὰρ ὀπίσσω
Iliad 15.305	ἣ πληθὺς ἐπὶ νῆας Ἀχαιῶν ἀπονέοντο.
Iliad 15.306	Τρῶες δὲ προὔτυψαν ἀολλέες, ἦρχε δʼ ἄρʼ Ἕκτωρ
Iliad 15.307	μακρὰ βιβάς· πρόσθεν δὲ κίʼ αὐτοῦ Φοῖβος Ἀπόλλων
Iliad 15.308	εἱμένος ὤμοιιν νεφέλην, ἔχε δʼ αἰγίδα θοῦριν
Iliad 15.309	δεινὴν ἀμφιδάσειαν ἀριπρεπέʼ, ἣν ἄρα χαλκεὺς
Iliad 15.310	Ἥφαιστος Διὶ δῶκε φορήμεναι ἐς φόβον ἀνδρῶν·
Iliad 15.311	τὴν ἄρʼ ὅ γʼ ἐν χείρεσσιν ἔχων ἡγήσατο λαῶν.
Iliad 15.312	Ἀργεῖοι δʼ ὑπέμειναν ἀολλέες, ὦρτο δʼ ἀϋτὴ
Iliad 15.313	ὀξεῖʼ ἀμφοτέρωθεν, ἀπὸ νευρῆφι δʼ ὀϊστοὶ
Iliad 15.314	θρῷσκον· πολλὰ δὲ δοῦρα θρασειάων ἀπὸ χειρῶν
Iliad 15.315	ἄλλα μὲν ἐν χροῒ πήγνυτʼ ἀρηϊθόων αἰζηῶν,
Iliad 15.316	πολλὰ δὲ καὶ μεσσηγὺ πάρος χρόα λευκὸν ἐπαυρεῖν
Iliad 15.317	ἐν γαίῃ ἵσταντο λιλαιόμενα χροὸς ἆσαι.
Iliad 15.318	ὄφρα μὲν αἰγίδα χερσὶν ἔχʼ ἀτρέμα Φοῖβος Ἀπόλλων,
Iliad 15.319	τόφρα μάλʼ ἀμφοτέρων βέλεʼ ἥπτετο, πῖπτε δὲ λαός.
Iliad 15.320	αὐτὰρ ἐπεὶ κατʼ ἐνῶπα ἰδὼν Δαναῶν ταχυπώλων
Iliad 15.321	σεῖσʼ, ἐπὶ δʼ αὐτὸς ἄϋσε μάλα μέγα, τοῖσι δὲ θυμὸν
Iliad 15.322	ἐν στήθεσσιν ἔθελξε, λάθοντο δὲ θούριδος ἀλκῆς.
Iliad 15.323	οἳ δʼ ὥς τʼ ἠὲ βοῶν ἀγέλην ἢ πῶϋ μέγʼ οἰῶν
Iliad 15.324	θῆρε δύω κλονέωσι μελαίνης νυκτὸς ἀμολγῷ
Iliad 15.325	ἐλθόντʼ ἐξαπίνης σημάντορος οὐ παρεόντος,
Iliad 15.326	ὣς ἐφόβηθεν Ἀχαιοὶ ἀνάλκιδες· ἐν γὰρ Ἀπόλλων
Iliad 15.327	ἧκε φόβον, Τρωσὶν δὲ καὶ Ἕκτορι κῦδος ὄπαζεν.
Iliad 15.328	ἔνθα δʼ ἀνὴρ ἕλεν ἄνδρα κεδασθείσης ὑσμίνης.
Iliad 15.329	Ἕκτωρ μὲν Στιχίον τε καὶ Ἀρκεσίλαον ἔπεφνε,
Iliad 15.330	τὸν μὲν Βοιωτῶν ἡγήτορα χαλκοχιτώνων,
Iliad 15.331	τὸν δὲ Μενεσθῆος μεγαθύμου πιστὸν ἑταῖρον·
Iliad 15.332	Αἰνείας δὲ Μέδοντα καὶ Ἴασον ἐξενάριξεν.
Iliad 15.333	ἤτοι ὃ μὲν νόθος υἱὸς Ὀϊλῆος θείοιο
Iliad 15.334	ἔσκε Μέδων Αἴαντος ἀδελφεός· αὐτὰρ ἔναιεν
Iliad 15.335	ἐν Φυλάκῃ γαίης ἄπο πατρίδος ἄνδρα κατακτὰς
Iliad 15.336	γνωτὸν μητρυιῆς Ἐριώπιδος, ἣν ἔχʼ Ὀϊλεύς·
Iliad 15.337	Ἴασος αὖτʼ ἀρχὸς μὲν Ἀθηναίων ἐτέτυκτο,
Iliad 15.338	υἱὸς δὲ Σφήλοιο καλέσκετο Βουκολίδαο.
Iliad 15.339	Μηκιστῆ δʼ ἕλε Πουλυδάμας, Ἐχίον δὲ Πολίτης
Iliad 15.340	πρώτῃ ἐν ὑσμίνῃ, Κλονίον δʼ ἕλε δῖος Ἀγήνωρ.
Iliad 15.341	Δηΐοχον δὲ Πάρις βάλε νείατον ὦμον ὄπισθε
Iliad 15.342	φεύγοντʼ ἐν προμάχοισι, διὰ πρὸ δὲ χαλκὸν ἔλασσεν.
Iliad 15.343	ὄφρʼ οἳ τοὺς ἐνάριζον ἀπʼ ἔντεα, τόφρα δʼ Ἀχαιοὶ
Iliad 15.344	τάφρῳ καὶ σκολόπεσσιν ἐνιπλήξαντες ὀρυκτῇ
Iliad 15.345	ἔνθα καὶ ἔνθα φέβοντο, δύοντο δὲ τεῖχος ἀνάγκῃ.
Iliad 15.346	Ἕκτωρ δὲ Τρώεσσιν ἐκέκλετο μακρὸν ἀΰσας
Iliad 15.347	νηυσὶν ἐπισσεύεσθαι, ἐᾶν δʼ ἔναρα βροτόεντα·
Iliad 15.348	ὃν δʼ ἂν ἐγὼν ἀπάνευθε νεῶν ἑτέρωθι νοήσω,
Iliad 15.349	αὐτοῦ οἱ θάνατον μητίσομαι, οὐδέ νυ τόν γε
Iliad 15.350	γνωτοί τε γνωταί τε πυρὸς λελάχωσι θανόντα,
Iliad 15.351	ἀλλὰ κύνες ἐρύουσι πρὸ ἄστεος ἡμετέροιο.
Iliad 15.352	ὣς εἰπὼν μάστιγι κατωμαδὸν ἤλασεν ἵππους
Iliad 15.353	κεκλόμενος Τρώεσσι κατὰ στίχας· οἳ δὲ σὺν αὐτῷ
Iliad 15.354	πάντες ὁμοκλήσαντες ἔχον ἐρυσάρματας ἵππους
Iliad 15.355	ἠχῇ θεσπεσίῃ· προπάροιθε δὲ Φοῖβος Ἀπόλλων
Iliad 15.356	ῥεῖʼ ὄχθας καπέτοιο βαθείης ποσσὶν ἐρείπων
Iliad 15.357	ἐς μέσσον κατέβαλλε, γεφύρωσεν δὲ κέλευθον
Iliad 15.358	μακρὴν ἠδʼ εὐρεῖαν, ὅσον τʼ ἐπὶ δουρὸς ἐρωὴ
Iliad 15.359	γίγνεται, ὁππότʼ ἀνὴρ σθένεος πειρώμενος ᾗσι.
Iliad 15.360	τῇ ῥʼ οἵ γε προχέοντο φαλαγγηδόν, πρὸ δʼ Ἀπόλλων
Iliad 15.361	αἰγίδʼ ἔχων ἐρίτιμον· ἔρειπε δὲ τεῖχος Ἀχαιῶν
Iliad 15.362	ῥεῖα μάλʼ, ὡς ὅτε τις ψάμαθον πάϊς ἄγχι θαλάσσης,
Iliad 15.363	ὅς τʼ ἐπεὶ οὖν ποιήσῃ ἀθύρματα νηπιέῃσιν
Iliad 15.364	ἂψ αὖτις συνέχευε ποσὶν καὶ χερσὶν ἀθύρων.
Iliad 15.365	ὥς ῥα σὺ ἤϊε Φοῖβε πολὺν κάματον καὶ ὀϊζὺν
Iliad 15.366	σύγχεας Ἀργείων, αὐτοῖσι δὲ φύζαν ἐνῶρσας.
Iliad 15.367	ὣς οἳ μὲν παρὰ νηυσὶν ἐρητύοντο μένοντες,
Iliad 15.368	ἀλλήλοισί τε κεκλόμενοι καὶ πᾶσι θεοῖσι
Iliad 15.369	χεῖρας ἀνίσχοντες μεγάλʼ εὐχετόωντο ἕκαστος·
Iliad 15.370	Νέστωρ αὖτε μάλιστα Γερήνιος οὖρος Ἀχαιῶν
Iliad 15.371	εὔχετο χεῖρʼ ὀρέγων εἰς οὐρανὸν ἀστερόεντα·
Iliad 15.372	Ζεῦ πάτερ εἴ ποτέ τίς τοι ἐν Ἄργεΐ περ πολυπύρῳ
Iliad 15.373	ἢ βοὸς ἢ οἰὸς κατὰ πίονα μηρία καίων
Iliad 15.374	εὔχετο νοστῆσαι, σὺ δʼ ὑπέσχεο καὶ κατένευσας,
Iliad 15.375	τῶν μνῆσαι καὶ ἄμυνον Ὀλύμπιε νηλεὲς ἦμαρ,
Iliad 15.376	μηδʼ οὕτω Τρώεσσιν ἔα δάμνασθαι Ἀχαιούς.
Iliad 15.377	ὣς ἔφατʼ εὐχόμενος, μέγα δʼ ἔκτυπε μητίετα Ζεύς,
Iliad 15.378	ἀράων ἀΐων Νηληϊάδαο γέροντος.
Iliad 15.379	Τρῶες δʼ ὡς ἐπύθοντο Διὸς κτύπον αἰγιόχοιο,
Iliad 15.380	μᾶλλον ἐπʼ Ἀργείοισι θόρον, μνήσαντο δὲ χάρμης.
Iliad 15.381	οἳ δʼ ὥς τε μέγα κῦμα θαλάσσης εὐρυπόροιο
Iliad 15.382	νηὸς ὑπὲρ τοίχων καταβήσεται, ὁππότʼ ἐπείγῃ
Iliad 15.383	ἲς ἀνέμου· ἣ γάρ τε μάλιστά γε κύματʼ ὀφέλλει·
Iliad 15.384	ὣς Τρῶες μεγάλῃ ἰαχῇ κατὰ τεῖχος ἔβαινον,
Iliad 15.385	ἵππους δʼ εἰσελάσαντες ἐπὶ πρύμνῃσι μάχοντο
Iliad 15.386	ἔγχεσιν ἀμφιγύοις αὐτοσχεδόν, οἳ μὲν ἀφʼ ἵππων,
Iliad 15.387	οἳ δʼ ἀπὸ νηῶν ὕψι μελαινάων ἐπιβάντες
Iliad 15.388	μακροῖσι ξυστοῖσι, τά ῥά σφʼ ἐπὶ νηυσὶν ἔκειτο
Iliad 15.389	ναύμαχα κολλήεντα, κατὰ στόμα εἱμένα χαλκῷ.
Iliad 15.390	Πάτροκλος δʼ εἷος μὲν Ἀχαιοί τε Τρῶές τε
Iliad 15.391	τείχεος ἀμφεμάχοντο θοάων ἔκτοθι νηῶν,
Iliad 15.392	τόφρʼ ὅ γʼ ἐνὶ κλισίῃ ἀγαπήνορος Εὐρυπύλοιο
Iliad 15.393	ἧστό τε καὶ τὸν ἔτερπε λόγοις, ἐπὶ δʼ ἕλκεϊ λυγρῷ
Iliad 15.394	φάρμακʼ ἀκέσματʼ ἔπασσε μελαινάων ὀδυνάων.
Iliad 15.395	αὐτὰρ ἐπεὶ δὴ τεῖχος ἐπεσσυμένους ἐνόησε
Iliad 15.396	Τρῶας, ἀτὰρ Δαναῶν γένετο ἰαχή τε φόβος τε,
Iliad 15.397	ᾤμωξέν τʼ ἄρʼ ἔπειτα καὶ ὣ πεπλήγετο μηρὼ
Iliad 15.398	χερσὶ καταπρηνέσσʼ, ὀλοφυρόμενος δʼ ἔπος ηὔδα·
Iliad 15.399	Εὐρύπυλʼ οὐκ ἔτι τοι δύναμαι χατέοντί περʼ ἔμπης
Iliad 15.400	ἐνθάδε παρμενέμεν· δὴ γὰρ μέγα νεῖκος ὄρωρεν·
Iliad 15.401	ἀλλὰ σὲ μὲν θεράπων ποτιτερπέτω, αὐτὰρ ἔγωγε
Iliad 15.402	σπεύσομαι εἰς Ἀχιλῆα, ἵνʼ ὀτρύνω πολεμίζειν.
Iliad 15.403	τίς δʼ οἶδʼ εἴ κέν οἱ σὺν δαίμονι θυμὸν ὀρίνω
Iliad 15.404	παρειπών; ἀγαθὴ δὲ παραίφασίς ἐστιν ἑταίρου.
Iliad 15.405	τὸν μὲν ἄρʼ ὣς εἰπόντα πόδες φέρον· αὐτὰρ Ἀχαιοὶ
Iliad 15.406	Τρῶας ἐπερχομένους μένον ἔμπεδον, οὐδʼ ἐδύναντο
Iliad 15.407	παυροτέρους περ ἐόντας ἀπώσασθαι παρὰ νηῶν·
Iliad 15.408	οὐδέ ποτε Τρῶες Δαναῶν ἐδύναντο φάλαγγας
Iliad 15.409	ῥηξάμενοι κλισίῃσι μιγήμεναι ἠδὲ νέεσσιν.
Iliad 15.410	ἀλλʼ ὥς τε στάθμη δόρυ νήϊον ἐξιθύνει
Iliad 15.411	τέκτονος ἐν παλάμῃσι δαήμονος, ὅς ῥά τε πάσης
Iliad 15.412	εὖ εἰδῇ σοφίης ὑποθημοσύνῃσιν Ἀθήνης,
Iliad 15.413	ὣς μὲν τῶν ἐπὶ ἶσα μάχη τέτατο πτόλεμός τε·
Iliad 15.414	ἄλλοι δʼ ἀμφʼ ἄλλῃσι μάχην ἐμάχοντο νέεσσιν,
Iliad 15.415	Ἕκτωρ δʼ ἄντʼ Αἴαντος ἐείσατο κυδαλίμοιο.
Iliad 15.416	τὼ δὲ μιῆς περὶ νηὸς ἔχον πόνον, οὐδὲ δύναντο
Iliad 15.417	οὔθʼ ὃ τὸν ἐξελάσαι καὶ ἐνιπρῆσαι πυρὶ νῆα
Iliad 15.418	οὔθʼ ὃ τὸν ἂψ ὤσασθαι, ἐπεί ῥʼ ἐπέλασσέ γε δαίμων.
Iliad 15.419	ἔνθʼ υἷα Κλυτίοιο Καλήτορα φαίδιμος Αἴας
Iliad 15.420	πῦρ ἐς νῆα φέροντα κατὰ στῆθος βάλε δουρί.
Iliad 15.421	δούπησεν δὲ πεσών, δαλὸς δέ οἱ ἔκπεσε χειρός.
Iliad 15.422	Ἕκτωρ δʼ ὡς ἐνόησεν ἀνεψιὸν ὀφθαλμοῖσιν
Iliad 15.423	ἐν κονίῃσι πεσόντα νεὸς προπάροιθε μελαίνης,
Iliad 15.424	Τρωσί τε καὶ Λυκίοισιν ἐκέκλετο μακρὸν ἀΰσας·
Iliad 15.425	Τρῶες καὶ Λύκιοι καὶ Δάρδανοι ἀγχιμαχηταὶ
Iliad 15.426	μὴ δή πω χάζεσθε μάχης ἐν στείνεϊ τῷδε,
Iliad 15.427	ἀλλʼ υἷα Κλυτίοιο σαώσατε, μή μιν Ἀχαιοὶ
Iliad 15.428	τεύχεα συλήσωσι νεῶν ἐν ἀγῶνι πεσόντα.
Iliad 15.429	ὣς εἰπὼν Αἴαντος ἀκόντισε δουρὶ φαεινῷ.
Iliad 15.430	τοῦ μὲν ἅμαρθʼ, ὃ δʼ ἔπειτα Λυκόφρονα Μάστορος υἱὸν
Iliad 15.431	Αἴαντος θεράποντα Κυθήριον, ὅς ῥα παρʼ αὐτῷ
Iliad 15.432	ναῖʼ, ἐπεὶ ἄνδρα κατέκτα Κυθήροισι ζαθέοισι,
Iliad 15.433	τόν ῥʼ ἔβαλεν κεφαλὴν ὑπὲρ οὔατος ὀξέϊ χαλκῷ
Iliad 15.434	ἑσταότʼ ἄγχʼ Αἴαντος· ὃ δʼ ὕπτιος ἐν κονίῃσι
Iliad 15.435	νηὸς ἄπο πρυμνῆς χαμάδις πέσε, λύντο δὲ γυῖα.
Iliad 15.436	Αἴας δʼ ἐρρίγησε, κασίγνητον δὲ προσηύδα·
Iliad 15.437	Τεῦκρε πέπον δὴ νῶϊν ἀπέκτατο πιστὸς ἑταῖρος
Iliad 15.438	Μαστορίδης, ὃν νῶϊ Κυθηρόθεν ἔνδον ἐόντα
Iliad 15.439	ἶσα φίλοισι τοκεῦσιν ἐτίομεν ἐν μεγάροισι·
Iliad 15.440	τὸν δʼ Ἕκτωρ μεγάθυμος ἀπέκτανε. ποῦ νύ τοι ἰοὶ
Iliad 15.441	ὠκύμοροι καὶ τόξον ὅ τοι πόρε Φοῖβος Ἀπόλλων;
Iliad 15.442	ὣς φάθʼ, ὃ δὲ ξυνέηκε, θέων δέ οἱ ἄγχι παρέστη,
Iliad 15.443	τόξον ἔχων ἐν χειρὶ παλίντονον ἠδὲ φαρέτρην
Iliad 15.444	ἰοδόκον· μάλα δʼ ὦκα βέλεα Τρώεσσιν ἐφίει.
Iliad 15.445	καί ῥʼ ἔβαλε Κλεῖτον Πεισήνορος ἀγλαὸν υἱὸν
Iliad 15.446	Πουλυδάμαντος ἑταῖρον ἀγαυοῦ Πανθοΐδαο
Iliad 15.447	ἡνία χερσὶν ἔχοντα· ὃ μὲν πεπόνητο καθʼ ἵππους·
Iliad 15.448	τῇ γὰρ ἔχʼ ᾗ ῥα πολὺ πλεῖσται κλονέοντο φάλαγγες
Iliad 15.449	Ἕκτορι καὶ Τρώεσσι χαριζόμενος· τάχα δʼ αὐτῷ
Iliad 15.450	ἦλθε κακόν, τό οἱ οὔ τις ἐρύκακεν ἱεμένων περ.
Iliad 15.451	αὐχένι γάρ οἱ ὄπισθε πολύστονος ἔμπεσεν ἰός·
Iliad 15.452	ἤριπε δʼ ἐξ ὀχέων, ὑπερώησαν δέ οἱ ἵπποι
Iliad 15.453	κείνʼ ὄχεα κροτέοντες. ἄναξ δʼ ἐνόησε τάχιστα
Iliad 15.454	Πουλυδάμας, καὶ πρῶτος ἐναντίος ἤλυθεν ἵππων.
Iliad 15.455	τοὺς μὲν ὅ γʼ Ἀστυνόῳ Προτιάονος υἱέϊ δῶκε,
Iliad 15.456	πολλὰ δʼ ἐπότρυνε σχεδὸν ἴσχειν εἰσορόωντα
Iliad 15.457	ἵππους· αὐτὸς δʼ αὖτις ἰὼν προμάχοισιν ἐμίχθη.
Iliad 15.458	Τεῦκρος δʼ ἄλλον ὀϊστὸν ἐφʼ Ἕκτορι χαλκοκορυστῇ
Iliad 15.459	αἴνυτο, καί κεν ἔπαυσε μάχης ἐπὶ νηυσὶν Ἀχαιῶν,
Iliad 15.460	εἴ μιν ἀριστεύοντα βαλὼν ἐξείλετο θυμόν.
Iliad 15.461	ἀλλʼ οὐ λῆθε Διὸς πυκινὸν νόον, ὅς ῥʼ ἐφύλασσεν
Iliad 15.462	Ἕκτορʼ, ἀτὰρ Τεῦκρον Τελαμώνιον εὖχος ἀπηύρα,
Iliad 15.463	ὅς οἱ ἐϋστρεφέα νευρὴν ἐν ἀμύμονι τόξῳ
Iliad 15.464	ῥῆξʼ ἐπὶ τῷ ἐρύοντι· παρεπλάγχθη δέ οἱ ἄλλῃ
Iliad 15.465	ἰὸς χαλκοβαρής, τόξον δέ οἱ ἔκπεσε χειρός.
Iliad 15.466	Τεῦκρος δʼ ἐρρίγησε, κασίγνητον δὲ προσηύδα·
Iliad 15.467	ὢ πόποι ἦ δὴ πάγχυ μάχης ἐπὶ μήδεα κείρει
Iliad 15.468	δαίμων ἡμετέρης, ὅ τέ μοι βιὸν ἔκβαλε χειρός,
Iliad 15.469	νευρὴν δʼ ἐξέρρηξε νεόστροφον, ἣν ἐνέδησα
Iliad 15.470	πρώϊον, ὄφρʼ ἀνέχοιτο θαμὰ θρῴσκοντας ὀϊστούς.
Iliad 15.471	τὸν δʼ ἠμείβετʼ ἔπειτα μέγας Τελαμώνιος Αἴας·
Iliad 15.472	ὦ πέπον ἀλλὰ βιὸν μὲν ἔα καὶ ταρφέας ἰοὺς
Iliad 15.473	κεῖσθαι, ἐπεὶ συνέχευε θεὸς Δαναοῖσι μεγήρας·
Iliad 15.474	αὐτὰρ χερσὶν ἑλὼν δολιχὸν δόρυ καὶ σάκος ὤμῳ
Iliad 15.475	μάρναό τε Τρώεσσι καὶ ἄλλους ὄρνυθι λαούς.
Iliad 15.476	μὴ μὰν ἀσπουδί γε δαμασσάμενοί περ ἕλοιεν
Iliad 15.477	νῆας ἐϋσσέλμους, ἀλλὰ μνησώμεθα χάρμης.
Iliad 15.478	ὣς φάθʼ, ὃ δὲ τόξον μὲν ἐνὶ κλισίῃσιν ἔθηκεν,
Iliad 15.479	αὐτὰρ ὅ γʼ ἀμφʼ ὤμοισι σάκος θέτο τετραθέλυμνον,
Iliad 15.480	κρατὶ δʼ ἐπʼ ἰφθίμῳ κυνέην εὔτυκτον ἔθηκεν
Iliad 15.481	ἵππουριν, δεινὸν δὲ λόφος καθύπερθεν ἔνευεν·
Iliad 15.482	εἵλετο δʼ ἄλκιμον ἔγχος ἀκαχμένον ὀξέϊ χαλκῷ,
Iliad 15.483	βῆ δʼ ἰέναι, μάλα δʼ ὦκα θέων Αἴαντι παρέστη.
Iliad 15.484	Ἕκτωρ δʼ ὡς εἶδεν Τεύκρου βλαφθέντα βέλεμνα,
Iliad 15.485	Τρωσί τε καὶ Λυκίοισιν ἐκέκλετο μακρὸν ἀΰσας·
Iliad 15.486	Τρῶες καὶ Λύκιοι καὶ Δάρδανοι ἀγχιμαχηταὶ
Iliad 15.487	ἀνέρες ἔστε φίλοι, μνήσασθε δὲ θούριδος ἀλκῆς
Iliad 15.488	νῆας ἀνὰ γλαφυράς· δὴ γὰρ ἴδον ὀφθαλμοῖσιν
Iliad 15.489	ἀνδρὸς ἀριστῆος Διόθεν βλαφθέντα βέλεμνα.
Iliad 15.490	ῥεῖα δʼ ἀρίγνωτος Διὸς ἀνδράσι γίγνεται ἀλκή,
Iliad 15.491	ἠμὲν ὁτέοισιν κῦδος ὑπέρτερον ἐγγυαλίξῃ,
Iliad 15.492	ἠδʼ ὅτινας μινύθῃ τε καὶ οὐκ ἐθέλῃσιν ἀμύνειν,
Iliad 15.493	ὡς νῦν Ἀργείων μινύθει μένος, ἄμμι δʼ ἀρήγει.
Iliad 15.494	ἀλλὰ μάχεσθʼ ἐπὶ νηυσὶν ἀολλέες· ὃς δέ κεν ὑμέων
Iliad 15.495	βλήμενος ἠὲ τυπεὶς θάνατον καὶ πότμον ἐπίσπῃ
Iliad 15.496	τεθνάτω· οὔ οἱ ἀεικὲς ἀμυνομένῳ περὶ πάτρης
Iliad 15.497	τεθνάμεν· ἀλλʼ ἄλοχός τε σόη καὶ παῖδες ὀπίσσω,
Iliad 15.498	καὶ οἶκος καὶ κλῆρος ἀκήρατος, εἴ κεν Ἀχαιοὶ
Iliad 15.499	οἴχωνται σὺν νηυσὶ φίλην ἐς πατρίδα γαῖαν.
Iliad 15.500	ὣς εἰπὼν ὄτρυνε μένος καὶ θυμὸν ἑκάστου.
Iliad 15.501	Αἴας δʼ αὖθʼ ἑτέρωθεν ἐκέκλετο οἷς ἑτάροισιν·
Iliad 15.502	αἰδὼς Ἀργεῖοι· νῦν ἄρκιον ἢ ἀπολέσθαι
Iliad 15.503	ἠὲ σαωθῆναι καὶ ἀπώσασθαι κακὰ νηῶν.
Iliad 15.504	ἦ ἔλπεσθʼ ἢν νῆας ἕλῃ κορυθαίολος Ἕκτωρ
Iliad 15.505	ἐμβαδὸν ἵξεσθαι ἣν πατρίδα γαῖαν ἕκαστος;
Iliad 15.506	ἦ οὐκ ὀτρύνοντος ἀκούετε λαὸν ἅπαντα
Iliad 15.507	Ἕκτορος, ὃς δὴ νῆας ἐνιπρῆσαι μενεαίνει;
Iliad 15.508	οὐ μὰν ἔς γε χορὸν κέλετʼ ἐλθέμεν, ἀλλὰ μάχεσθαι.
Iliad 15.509	ἡμῖν δʼ οὔ τις τοῦδε νόος καὶ μῆτις ἀμείνων
Iliad 15.510	ἢ αὐτοσχεδίῃ μῖξαι χεῖράς τε μένος τε.
Iliad 15.511	βέλτερον ἢ ἀπολέσθαι ἕνα χρόνον ἠὲ βιῶναι
Iliad 15.512	ἢ δηθὰ στρεύγεσθαι ἐν αἰνῇ δηϊοτῆτι
Iliad 15.513	ὧδʼ αὔτως παρὰ νηυσὶν ὑπʼ ἀνδράσι χειροτέροισιν.
Iliad 15.514	ὣς εἰπὼν ὄτρυνε μένος καὶ θυμὸν ἑκάστου.
Iliad 15.515	ἔνθʼ Ἕκτωρ μὲν ἕλε Σχεδίον Περιμήδεος υἱὸν
Iliad 15.516	ἀρχὸν Φωκήων, Αἴας δʼ ἕλε Λαοδάμαντα
Iliad 15.517	ἡγεμόνα πρυλέων Ἀντήνορος ἀγλαὸν υἱόν·
Iliad 15.518	Πουλυδάμας δʼ Ὦτον Κυλλήνιον ἐξενάριξε
Iliad 15.519	Φυλεΐδεω ἕταρον, μεγαθύμων ἀρχὸν Ἐπειῶν.
Iliad 15.520	τῷ δὲ Μέγης ἐπόρουσεν ἰδών· ὃ δʼ ὕπαιθα λιάσθη
Iliad 15.521	Πουλυδάμας· καὶ τοῦ μὲν ἀπήμβροτεν· οὐ γὰρ Ἀπόλλων
Iliad 15.522	εἴα Πάνθου υἱὸν ἐνὶ προμάχοισι δαμῆναι·
Iliad 15.523	αὐτὰρ ὅ γε Κροίσμου στῆθος μέσον οὔτασε δουρί.
Iliad 15.524	δούπησεν δὲ πεσών· ὃ δʼ ἀπʼ ὤμων τεύχεʼ ἐσύλα.
Iliad 15.525	τόφρα δὲ τῷ ἐπόρουσε Δόλοψ αἰχμῆς ἐῢ εἰδὼς
Iliad 15.526	Λαμπετίδης, ὃν Λάμπος ἐγείνατο φέρτατον υἱὸν
Iliad 15.527	Λαομεδοντιάδης εὖ εἰδότα θούριδος ἀλκῆς,
Iliad 15.528	ὃς τότε Φυλεΐδαο μέσον σάκος οὔτασε δουρὶ
Iliad 15.529	ἐγγύθεν ὁρμηθείς· πυκινὸς δέ οἱ ἤρκεσε θώρηξ,
Iliad 15.530	τόν ῥʼ ἐφόρει γυάλοισιν ἀρηρότα· τόν ποτε Φυλεὺς
Iliad 15.531	ἤγαγεν ἐξ Ἐφύρης, ποταμοῦ ἄπο Σελλήεντος.
Iliad 15.532	ξεῖνος γάρ οἱ ἔδωκεν ἄναξ ἀνδρῶν Εὐφήτης
Iliad 15.533	ἐς πόλεμον φορέειν δηΐων ἀνδρῶν ἀλεωρήν·
Iliad 15.534	ὅς οἱ καὶ τότε παιδὸς ἀπὸ χροὸς ἤρκεσʼ ὄλεθρον.
Iliad 15.535	τοῦ δὲ Μέγης κόρυθος χαλκήρεος ἱπποδασείης
Iliad 15.536	κύμβαχον ἀκρότατον νύξʼ ἔγχεϊ ὀξυόεντι,
Iliad 15.537	ῥῆξε δʼ ἀφʼ ἵππειον λόφον αὐτοῦ· πᾶς δὲ χαμᾶζε
Iliad 15.538	κάππεσεν ἐν κονίῃσι νέον φοίνικι φαεινός.
Iliad 15.539	εἷος ὃ τῷ πολέμιζε μένων, ἔτι δʼ ἔλπετο νίκην,
Iliad 15.540	τόφρα δέ οἱ Μενέλαος ἀρήϊος ἦλθεν ἀμύντωρ,
Iliad 15.541	στῆ δʼ εὐρὰξ σὺν δουρὶ λαθών, βάλε δʼ ὦμον ὄπισθεν·
Iliad 15.542	αἰχμὴ δὲ στέρνοιο διέσσυτο μαιμώωσα
Iliad 15.543	πρόσσω ἱεμένη· ὃ δʼ ἄρα πρηνὴς ἐλιάσθη.
Iliad 15.544	τὼ μὲν ἐεισάσθην χαλκήρεα τεύχεʼ ἀπʼ ὤμων
Iliad 15.545	συλήσειν· Ἕκτωρ δὲ κασιγνήτοισι κέλευσε
Iliad 15.546	πᾶσι μάλα, πρῶτον δʼ Ἱκεταονίδην ἐνένιπεν
Iliad 15.547	ἴφθιμον Μελάνιππον. ὃ δʼ ὄφρα μὲν εἰλίποδας βοῦς
Iliad 15.548	βόσκʼ ἐν Περκώτῃ δηΐων ἀπὸ νόσφιν ἐόντων·
Iliad 15.549	αὐτὰρ ἐπεὶ Δαναῶν νέες ἤλυθον ἀμφιέλισσαι,
Iliad 15.550	ἂψ εἰς Ἴλιον ἦλθε, μετέπρεπε δὲ Τρώεσσι,
Iliad 15.551	ναῖε δὲ πὰρ Πριάμῳ, ὃ δέ μιν τίεν ἶσα τέκεσσι·
Iliad 15.552	τόν ῥʼ Ἕκτωρ ἐνένιπεν ἔπος τʼ ἔφατʼ ἔκ τʼ ὀνόμαζεν·
Iliad 15.553	οὕτω δὴ Μελάνιππε μεθήσομεν; οὐδέ νυ σοί περ
Iliad 15.554	ἐντρέπεται φίλον ἦτορ ἀνεψιοῦ κταμένοιο;
Iliad 15.555	οὐχ ὁράᾳς οἷον Δόλοπος περὶ τεύχεʼ ἕπουσιν;
Iliad 15.556	ἀλλʼ ἕπευ· οὐ γὰρ ἔτʼ ἔστιν ἀποσταδὸν Ἀργείοισι
Iliad 15.557	μάρνασθαι, πρίν γʼ ἠὲ κατακτάμεν ἠὲ κατʼ ἄκρης
Iliad 15.558	Ἴλιον αἰπεινὴν ἑλέειν κτάσθαι τε πολίτας.
Iliad 15.559	ὣς εἰπὼν ὃ μὲν ἦρχʼ, ὃ δʼ ἅμʼ ἕσπετο ἰσόθεος φώς·
Iliad 15.560	Ἀργείους δʼ ὄτρυνε μέγας Τελαμώνιος Αἴας·
Iliad 15.561	ὦ φίλοι ἀνέρες ἔστε, καὶ αἰδῶ θέσθʼ ἐνὶ θυμῷ,
Iliad 15.562	ἀλλήλους τʼ αἰδεῖσθε κατὰ κρατερὰς ὑσμίνας.
Iliad 15.563	αἰδομένων δʼ ἀνδρῶν πλέονες σόοι ἠὲ πέφανται·
Iliad 15.564	φευγόντων δʼ οὔτʼ ἂρ κλέος ὄρνυται οὔτέ τις ἀλκή.
Iliad 15.565	ὣς ἔφαθʼ, οἳ δὲ καὶ αὐτοὶ ἀλέξασθαι μενέαινον,
Iliad 15.566	ἐν θυμῷ δʼ ἐβάλοντο ἔπος, φράξαντο δὲ νῆας
Iliad 15.567	ἕρκεϊ χαλκείῳ· ἐπὶ δὲ Ζεὺς Τρῶας ἔγειρεν.
Iliad 15.568	Ἀντίλοχον δʼ ὄτρυνε βοὴν ἀγαθὸς Μενέλαος·
Iliad 15.569	Ἀντίλοχʼ οὔ τις σεῖο νεώτερος ἄλλος Ἀχαιῶν,
Iliad 15.570	οὔτε ποσὶν θάσσων οὔτʼ ἄλκιμος ὡς σὺ μάχεσθαι·
Iliad 15.571	εἴ τινά που Τρώων ἐξάλμενος ἄνδρα βάλοισθα.
Iliad 15.572	ὣς εἰπὼν ὃ μὲν αὖτις ἀπέσσυτο, τὸν δʼ ὀρόθυνεν·
Iliad 15.573	ἐκ δʼ ἔθορε προμάχων, καὶ ἀκόντισε δουρὶ φαεινῷ
Iliad 15.574	ἀμφὶ ἓ παπτήνας· ὑπὸ δὲ Τρῶες κεκάδοντο
Iliad 15.575	ἀνδρὸς ἀκοντίσσαντος· ὃ δʼ οὐχ ἅλιον βέλος ἧκεν,
Iliad 15.576	ἀλλʼ Ἱκετάονος υἱὸν ὑπέρθυμον Μελάνιππον
Iliad 15.577	νισόμενον πόλεμον δὲ βάλε στῆθος παρὰ μαζόν.
Iliad 15.578	δούπησεν δὲ πεσών, τὸν δὲ σκότος ὄσσε κάλυψεν.
Iliad 15.579	Ἀντίλοχος δʼ ἐπόρουσε κύων ὥς, ὅς τʼ ἐπὶ νεβρῷ
Iliad 15.580	βλημένῳ ἀΐξῃ, τόν τʼ ἐξ εὐνῆφι θορόντα
Iliad 15.581	θηρητὴρ ἐτύχησε βαλών, ὑπέλυσε δὲ γυῖα·
Iliad 15.582	ὣς ἐπὶ σοὶ Μελάνιππε θόρʼ Ἀντίλοχος μενεχάρμης
Iliad 15.583	τεύχεα συλήσων· ἀλλʼ οὐ λάθεν Ἕκτορα δῖον,
Iliad 15.584	ὅς ῥά οἱ ἀντίος ἦλθε θέων ἀνὰ δηϊοτῆτα.
Iliad 15.585	Ἀντίλοχος δʼ οὐ μεῖνε θοός περ ἐὼν πολεμιστής,
Iliad 15.586	ἀλλʼ ὅ γʼ ἄρʼ ἔτρεσε θηρὶ κακὸν ῥέξαντι ἐοικώς,
Iliad 15.587	ὅς τε κύνα κτείνας ἢ βουκόλον ἀμφὶ βόεσσι
Iliad 15.588	φεύγει πρίν περ ὅμιλον ἀολλισθήμεναι ἀνδρῶν·
Iliad 15.589	ὣς τρέσε Νεστορίδης, ἐπὶ δὲ Τρῶές τε καὶ Ἕκτωρ
Iliad 15.590	ἠχῇ θεσπεσίῃ βέλεα στονόεντα χέοντο·
Iliad 15.591	στῆ δὲ μεταστρεφθείς, ἐπεὶ ἵκετο ἔθνος ἑταίρων.
Iliad 15.592	Τρῶες δὲ λείουσιν ἐοικότες ὠμοφάγοισι
Iliad 15.593	νηυσὶν ἐπεσσεύοντο, Διὸς δʼ ἐτέλειον ἐφετμάς,
Iliad 15.594	ὅ σφισιν αἰὲν ἔγειρε μένος μέγα, θέλγε δὲ θυμὸν
Iliad 15.595	Ἀργείων καὶ κῦδος ἀπαίνυτο, τοὺς δʼ ὀρόθυνεν.
Iliad 15.596	Ἕκτορι γάρ οἱ θυμὸς ἐβούλετο κῦδος ὀρέξαι
Iliad 15.597	Πριαμίδῃ, ἵνα νηυσὶ κορωνίσι θεσπιδαὲς πῦρ
Iliad 15.598	ἐμβάλοι ἀκάματον, Θέτιδος δʼ ἐξαίσιον ἀρὴν
Iliad 15.599	πᾶσαν ἐπικρήνειε· τὸ γὰρ μένε μητίετα Ζεὺς
Iliad 15.600	νηὸς καιομένης σέλας ὀφθαλμοῖσιν ἰδέσθαι.
Iliad 15.601	ἐκ γὰρ δὴ τοῦ μέλλε παλίωξιν παρὰ νηῶν
Iliad 15.602	θησέμεναι Τρώων, Δαναοῖσι δὲ κῦδος ὀρέξειν.
Iliad 15.603	τὰ φρονέων νήεσσιν ἔπι γλαφυρῇσιν ἔγειρεν
Iliad 15.604	Ἕκτορα Πριαμίδην μάλα περ μεμαῶτα καὶ αὐτόν.
Iliad 15.605	μαίνετο δʼ ὡς ὅτʼ Ἄρης ἐγχέσπαλος ἢ ὀλοὸν πῦρ
Iliad 15.606	οὔρεσι μαίνηται βαθέης ἐν τάρφεσιν ὕλης·
Iliad 15.607	ἀφλοισμὸς δὲ περὶ στόμα γίγνετο, τὼ δέ οἱ ὄσσε
Iliad 15.608	λαμπέσθην βλοσυρῇσιν ὑπʼ ὀφρύσιν, ἀμφὶ δὲ πήληξ
Iliad 15.609	σμερδαλέον κροτάφοισι τινάσσετο μαρναμένοιο
Iliad 15.610	Ἕκτορος· αὐτὸς γάρ οἱ ἀπʼ αἰθέρος ἦεν ἀμύντωρ
Iliad 15.611	Ζεύς, ὅς μιν πλεόνεσσι μετʼ ἀνδράσι μοῦνον ἐόντα
Iliad 15.612	τίμα καὶ κύδαινε. μινυνθάδιος γὰρ ἔμελλεν
Iliad 15.613	ἔσσεσθʼ· ἤδη γάρ οἱ ἐπόρνυε μόρσιμον ἦμαρ
Iliad 15.614	Παλλὰς Ἀθηναίη ὑπὸ Πηλεΐδαο βίηφιν.
Iliad 15.615	καί ῥʼ ἔθελεν ῥῆξαι στίχας ἀνδρῶν πειρητίζων,
Iliad 15.616	ᾗ δὴ πλεῖστον ὅμιλον ὅρα καὶ τεύχεʼ ἄριστα·
Iliad 15.617	ἀλλʼ οὐδʼ ὧς δύνατο ῥῆξαι μάλα περ μενεαίνων·
Iliad 15.618	ἴσχον γὰρ πυργηδὸν ἀρηρότες, ἠΰτε πέτρη
Iliad 15.619	ἠλίβατος μεγάλη πολιῆς ἁλὸς ἐγγὺς ἐοῦσα,
Iliad 15.620	ἥ τε μένει λιγέων ἀνέμων λαιψηρὰ κέλευθα
Iliad 15.621	κύματά τε τροφόεντα, τά τε προσερεύγεται αὐτήν·
Iliad 15.622	ὣς Δαναοὶ Τρῶας μένον ἔμπεδον οὐδὲ φέβοντο.
Iliad 15.623	αὐτὰρ ὃ λαμπόμενος πυρὶ πάντοθεν ἔνθορʼ ὁμίλῳ,
Iliad 15.624	ἐν δʼ ἔπεσʼ ὡς ὅτε κῦμα θοῇ ἐν νηῒ πέσῃσι
Iliad 15.625	λάβρον ὑπαὶ νεφέων ἀνεμοτρεφές· ἣ δέ τε πᾶσα
Iliad 15.626	ἄχνῃ ὑπεκρύφθη, ἀνέμοιο δὲ δεινὸς ἀήτη
Iliad 15.627	ἱστίῳ ἐμβρέμεται, τρομέουσι δέ τε φρένα ναῦται
Iliad 15.628	δειδιότες· τυτθὸν γὰρ ὑπʼ ἐκ θανάτοιο φέρονται·
Iliad 15.629	ὣς ἐδαΐζετο θυμὸς ἐνὶ στήθεσσιν Ἀχαιῶν.
Iliad 15.630	αὐτὰρ ὅ γʼ ὥς τε λέων ὀλοόφρων βουσὶν ἐπελθών,
Iliad 15.631	αἵ ῥά τʼ ἐν εἱαμενῇ ἕλεος μεγάλοιο νέμονται
Iliad 15.632	μυρίαι, ἐν δέ τε τῇσι νομεὺς οὔ πω σάφα εἰδὼς
Iliad 15.633	θηρὶ μαχέσσασθαι ἕλικος βοὸς ἀμφὶ φονῇσιν·
Iliad 15.634	ἤτοι ὃ μὲν πρώτῃσι καὶ ὑστατίῃσι βόεσσιν
Iliad 15.635	αἰὲν ὁμοστιχάει, ὃ δέ τʼ ἐν μέσσῃσιν ὀρούσας
Iliad 15.636	βοῦν ἔδει, αἳ δέ τε πᾶσαι ὑπέτρεσαν· ὣς τότʼ Ἀχαιοὶ
Iliad 15.637	θεσπεσίως ἐφόβηθεν ὑφʼ Ἕκτορι καὶ Διὶ πατρὶ
Iliad 15.638	πάντες, ὃ δʼ οἶον ἔπεφνε Μυκηναῖον Περιφήτην,
Iliad 15.639	Κοπρῆος φίλον υἱόν, ὃς Εὐρυσθῆος ἄνακτος
Iliad 15.640	ἀγγελίης οἴχνεσκε βίῃ Ἡρακληείῃ.
Iliad 15.641	τοῦ γένετʼ ἐκ πατρὸς πολὺ χείρονος υἱὸς ἀμείνων
Iliad 15.642	παντοίας ἀρετάς, ἠμὲν πόδας ἠδὲ μάχεσθαι,
Iliad 15.643	καὶ νόον ἐν πρώτοισι Μυκηναίων ἐτέτυκτο·
Iliad 15.644	ὅς ῥα τόθʼ Ἕκτορι κῦδος ὑπέρτερον ἐγγυάλιξε.
Iliad 15.645	στρεφθεὶς γὰρ μετόπισθεν ἐν ἀσπίδος ἄντυγι πάλτο,
Iliad 15.646	τὴν αὐτὸς φορέεσκε ποδηνεκέʼ ἕρκος ἀκόντων·
Iliad 15.647	τῇ ὅ γʼ ἐνὶ βλαφθεὶς πέσεν ὕπτιος, ἀμφὶ δὲ πήληξ
Iliad 15.648	σμερδαλέον κονάβησε περὶ κροτάφοισι πεσόντος.
Iliad 15.649	Ἕκτωρ δʼ ὀξὺ νόησε, θέων δέ οἱ ἄγχι παρέστη,
Iliad 15.650	στήθεϊ δʼ ἐν δόρυ πῆξε, φίλων δέ μιν ἐγγὺς ἑταίρων
Iliad 15.651	κτεῖνʼ· οἳ δʼ οὐκ ἐδύναντο καὶ ἀχνύμενοί περ ἑταίρου
Iliad 15.652	χραισμεῖν· αὐτοὶ γὰρ μάλα δείδισαν Ἕκτορα δῖον.
Iliad 15.653	εἰσωποὶ δʼ ἐγένοντο νεῶν, περὶ δʼ ἔσχεθον ἄκραι
Iliad 15.654	νῆες ὅσαι πρῶται εἰρύατο· τοὶ δʼ ἐπέχυντο.
Iliad 15.655	Ἀργεῖοι δὲ νεῶν μὲν ἐχώρησαν καὶ ἀνάγκῃ
Iliad 15.656	τῶν πρωτέων, αὐτοῦ δὲ παρὰ κλισίῃσιν ἔμειναν
Iliad 15.657	ἁθρόοι, οὐδὲ κέδασθεν ἀνὰ στρατόν· ἴσχε γὰρ αἰδὼς
Iliad 15.658	καὶ δέος· ἀζηχὲς γὰρ ὁμόκλεον ἀλλήλοισι.
Iliad 15.659	Νέστωρ αὖτε μάλιστα Γερήνιος οὖρος Ἀχαιῶν
Iliad 15.660	λίσσεθʼ ὑπὲρ τοκέων γουνούμενος ἄνδρα ἕκαστον·
Iliad 15.661	ὦ φίλοι ἀνέρες ἔστε καὶ αἰδῶ θέσθʼ ἐνὶ θυμῷ
Iliad 15.662	ἄλλων ἀνθρώπων, ἐπὶ δὲ μνήσασθε ἕκαστος
Iliad 15.663	παίδων ἠδʼ ἀλόχων καὶ κτήσιος ἠδὲ τοκήων,
Iliad 15.664	ἠμὲν ὅτεῳ ζώουσι καὶ ᾧ κατατεθνήκασι·
Iliad 15.665	τῶν ὕπερ ἐνθάδʼ ἐγὼ γουνάζομαι οὐ παρεόντων
Iliad 15.666	ἑστάμεναι κρατερῶς, μὴ δὲ τρωπᾶσθε φόβον δέ.
Iliad 15.667	ὣς εἰπὼν ὄτρυνε μένος καὶ θυμὸν ἑκάστου.
Iliad 15.668	τοῖσι δʼ ἀπʼ ὀφθαλμῶν νέφος ἀχλύος ὦσεν Ἀθήνη
Iliad 15.669	θεσπέσιον· μάλα δέ σφι φόως γένετʼ ἀμφοτέρωθεν
Iliad 15.670	ἠμὲν πρὸς νηῶν καὶ ὁμοιΐου πολέμοιο.
Iliad 15.671	Ἕκτορα δὲ φράσσαντο βοὴν ἀγαθὸν καὶ ἑταίρους,
Iliad 15.672	ἠμὲν ὅσοι μετόπισθεν ἀφέστασαν οὐδὲ μάχοντο,
Iliad 15.673	ἠδʼ ὅσσοι παρὰ νηυσὶ μάχην ἐμάχοντο θοῇσιν.
Iliad 15.674	οὐδʼ ἄρʼ ἔτʼ Αἴαντι μεγαλήτορι ἥνδανε θυμῷ
Iliad 15.675	ἑστάμεν ἔνθά περ ἄλλοι ἀφέστασαν υἷες Ἀχαιῶν·
Iliad 15.676	ἀλλʼ ὅ γε νηῶν ἴκριʼ ἐπῴχετο μακρὰ βιβάσθων,
Iliad 15.677	νώμα δὲ ξυστὸν μέγα ναύμαχον ἐν παλάμῃσι
Iliad 15.678	κολλητὸν βλήτροισι δυωκαιεικοσίπηχυ.
Iliad 15.679	ὡς δʼ ὅτʼ ἀνὴρ ἵπποισι κελητίζειν ἐῢ εἰδώς,
Iliad 15.680	ὅς τʼ ἐπεὶ ἐκ πολέων πίσυρας συναείρεται ἵππους,
Iliad 15.681	σεύας ἐκ πεδίοιο μέγα προτὶ ἄστυ δίηται
Iliad 15.682	λαοφόρον καθʼ ὁδόν· πολέες τέ ἑ θηήσαντο
Iliad 15.683	ἀνέρες ἠδὲ γυναῖκες· ὃ δʼ ἔμπεδον ἀσφαλὲς αἰεὶ
Iliad 15.684	θρῴσκων ἄλλοτʼ ἐπʼ ἄλλον ἀμείβεται, οἳ δὲ πέτονται·
Iliad 15.685	ὣς Αἴας ἐπὶ πολλὰ θοάων ἴκρια νηῶν
Iliad 15.686	φοίτα μακρὰ βιβάς, φωνὴ δέ οἱ αἰθέρʼ ἵκανεν,
Iliad 15.687	αἰεὶ δὲ σμερδνὸν βοόων Δαναοῖσι κέλευε
Iliad 15.688	νηυσί τε καὶ κλισίῃσιν ἀμυνέμεν. οὐδὲ μὲν Ἕκτωρ
Iliad 15.689	μίμνεν ἐνὶ Τρώων ὁμάδῳ πύκα θωρηκτάων·
Iliad 15.690	ἀλλʼ ὥς τʼ ὀρνίθων πετεηνῶν αἰετὸς αἴθων
Iliad 15.691	ἔθνος ἐφορμᾶται ποταμὸν πάρα βοσκομενάων
Iliad 15.692	χηνῶν ἢ γεράνων ἢ κύκνων δουλιχοδείρων,
Iliad 15.693	ὣς Ἕκτωρ ἴθυσε νεὸς κυανοπρῴροιο
Iliad 15.694	ἀντίος ἀΐξας· τὸν δὲ Ζεὺς ὦσεν ὄπισθε
Iliad 15.695	χειρὶ μάλα μεγάλῃ, ὄτρυνε δὲ λαὸν ἅμʼ αὐτῷ.
Iliad 15.696	αὖτις δὲ δριμεῖα μάχη παρὰ νηυσὶν ἐτύχθη·
Iliad 15.697	φαίης κʼ ἀκμῆτας καὶ ἀτειρέας ἀλλήλοισιν
Iliad 15.698	ἄντεσθʼ ἐν πολέμῳ, ὡς ἐσσυμένως ἐμάχοντο.
Iliad 15.699	τοῖσι δὲ μαρναμένοισιν ὅδʼ ἦν νόος· ἤτοι Ἀχαιοὶ
Iliad 15.700	οὐκ ἔφασαν φεύξεσθαι ὑπʼ ἐκ κακοῦ, ἀλλʼ ὀλέεσθαι,
Iliad 15.701	Τρωσὶν δʼ ἔλπετο θυμὸς ἐνὶ στήθεσσιν ἑκάστου
Iliad 15.702	νῆας ἐνιπρήσειν κτενέειν θʼ ἥρωας Ἀχαιούς.
Iliad 15.703	οἳ μὲν τὰ φρονέοντες ἐφέστασαν ἀλλήλοισιν·
Iliad 15.704	Ἕκτωρ δὲ πρυμνῆς νεὸς ἥψατο ποντοπόροιο
Iliad 15.705	καλῆς ὠκυάλου, ἣ Πρωτεσίλαον ἔνεικεν
Iliad 15.706	ἐς Τροίην, οὐδʼ αὖτις ἀπήγαγε πατρίδα γαῖαν.
Iliad 15.707	τοῦ περ δὴ περὶ νηὸς Ἀχαιοί τε Τρῶές τε
Iliad 15.708	δῄουν ἀλλήλους αὐτοσχεδόν· οὐδʼ ἄρα τοί γε
Iliad 15.709	τόξων ἀϊκὰς ἀμφὶς μένον οὐδʼ ἔτʼ ἀκόντων,
Iliad 15.710	ἀλλʼ οἵ γʼ ἐγγύθεν ἱστάμενοι ἕνα θυμὸν ἔχοντες
Iliad 15.711	ὀξέσι δὴ πελέκεσσι καὶ ἀξίνῃσι μάχοντο
Iliad 15.712	καὶ ξίφεσιν μεγάλοισι καὶ ἔγχεσιν ἀμφιγύοισι.
Iliad 15.713	πολλὰ δὲ φάσγανα καλὰ μελάνδετα κωπήεντα
Iliad 15.714	ἄλλα μὲν ἐκ χειρῶν χαμάδις πέσον, ἄλλα δʼ ἀπʼ ὤμων
Iliad 15.715	ἀνδρῶν μαρναμένων· ῥέε δʼ αἵματι γαῖα μέλαινα.
Iliad 15.716	Ἕκτωρ δὲ πρύμνηθεν ἐπεὶ λάβεν οὐχὶ μεθίει
Iliad 15.717	ἄφλαστον μετὰ χερσὶν ἔχων, Τρωσὶν δὲ κέλευεν·
Iliad 15.718	οἴσετε πῦρ, ἅμα δʼ αὐτοὶ ἀολλέες ὄρνυτʼ ἀϋτήν·
Iliad 15.719	νῦν ἡμῖν πάντων Ζεὺς ἄξιον ἦμαρ ἔδωκε
Iliad 15.720	νῆας ἑλεῖν, αἳ δεῦρο θεῶν ἀέκητι μολοῦσαι
Iliad 15.721	ἡμῖν πήματα πολλὰ θέσαν, κακότητι γερόντων,
Iliad 15.722	οἵ μʼ ἐθέλοντα μάχεσθαι ἐπὶ πρυμνῇσι νέεσσιν
Iliad 15.723	αὐτόν τʼ ἰσχανάασκον ἐρητύοντό τε λαόν·
Iliad 15.724	ἀλλʼ εἰ δή ῥα τότε βλάπτε φρένας εὐρύοπα Ζεὺς
Iliad 15.725	ἡμετέρας, νῦν αὐτὸς ἐποτρύνει καὶ ἀνώγει.
Iliad 15.726	ὣς ἔφαθʼ, οἳ δʼ ἄρα μᾶλλον ἐπʼ Ἀργείοισιν ὄρουσαν.
Iliad 15.727	Αἴας δʼ οὐκέτʼ ἔμιμνε· βιάζετο γὰρ βελέεσσιν·
Iliad 15.728	ἀλλʼ ἀνεχάζετο τυτθόν, ὀϊόμενος θανέεσθαι
Iliad 15.729	θρῆνυν ἐφʼ ἑπταπόδην, λίπε δʼ ἴκρια νηὸς ἐΐσης.
Iliad 15.730	ἔνθʼ ἄρʼ ὅ γʼ ἑστήκει δεδοκημένος, ἔγχεϊ δʼ αἰεὶ
Iliad 15.731	Τρῶας ἄμυνε νεῶν, ὅς τις φέροι ἀκάματον πῦρ·
Iliad 15.732	αἰεὶ δὲ σμερδνὸν βοόων Δαναοῖσι κέλευε·
Iliad 15.733	ὦ φίλοι ἥρωες Δαναοὶ θεράποντες Ἄρηος
Iliad 15.734	ἀνέρες ἔστε φίλοι, μνήσασθε δὲ θούριδος ἀλκῆς.
Iliad 15.735	ἠέ τινάς φαμεν εἶναι ἀοσσητῆρας ὀπίσσω,
Iliad 15.736	ἦέ τι τεῖχος ἄρειον, ὅ κʼ ἀνδράσι λοιγὸν ἀμύναι;
Iliad 15.737	οὐ μέν τι σχεδόν ἐστι πόλις πύργοις ἀραρυῖα,
Iliad 15.738	ᾗ κʼ ἀπαμυναίμεσθʼ ἑτεραλκέα δῆμον ἔχοντες·
Iliad 15.739	ἀλλʼ ἐν γὰρ Τρώων πεδίῳ πύκα θωρηκτάων
Iliad 15.740	πόντῳ κεκλιμένοι ἑκὰς ἥμεθα πατρίδος αἴης·
Iliad 15.741	τὼ ἐν χερσὶ φόως, οὐ μειλιχίῃ πολέμοιο.
Iliad 15.742	ἦ, καὶ μαιμώων ἔφεπʼ ἔγχεϊ ὀξυόεντι.
Iliad 15.743	ὅς τις δὲ Τρώων κοίλῃς ἐπὶ νηυσὶ φέροιτο
Iliad 15.744	σὺν πυρὶ κηλείῳ, χάριν Ἕκτορος ὀτρύναντος,
Iliad 15.745	τὸν δʼ Αἴας οὔτασκε δεδεγμένος ἔγχεϊ μακρῷ·
Iliad 15.746	δώδεκα δὲ προπάροιθε νεῶν αὐτοσχεδὸν οὖτα.
Iliad 16.1	ὣς οἳ μὲν περὶ νηὸς ἐϋσσέλμοιο μάχοντο·
Iliad 16.2	Πάτροκλος δʼ Ἀχιλῆϊ παρίστατο ποιμένι λαῶν
Iliad 16.3	δάκρυα θερμὰ χέων ὥς τε κρήνη μελάνυδρος,
Iliad 16.4	ἥ τε κατʼ αἰγίλιπος πέτρης δνοφερὸν χέει ὕδωρ.
Iliad 16.5	τὸν δὲ ἰδὼν ᾤκτιρε ποδάρκης δῖος Ἀχιλλεύς,
Iliad 16.6	καί μιν φωνήσας ἔπεα πτερόεντα προσηύδα·
Iliad 16.7	τίπτε δεδάκρυσαι Πατρόκλεες, ἠΰτε κούρη
Iliad 16.8	νηπίη, ἥ θʼ ἅμα μητρὶ θέουσʼ ἀνελέσθαι ἀνώγει
Iliad 16.9	εἱανοῦ ἁπτομένη, καί τʼ ἐσσυμένην κατερύκει,
Iliad 16.10	δακρυόεσσα δέ μιν ποτιδέρκεται, ὄφρʼ ἀνέληται·
Iliad 16.11	τῇ ἴκελος Πάτροκλε τέρεν κατὰ δάκρυον εἴβεις.
Iliad 16.12	ἠέ τι Μυρμιδόνεσσι πιφαύσκεαι, ἢ ἐμοὶ αὐτῷ,
Iliad 16.13	ἦέ τινʼ ἀγγελίην Φθίης ἐξέκλυες οἶος;
Iliad 16.14	ζώειν μὰν ἔτι φασὶ Μενοίτιον Ἄκτορος υἱόν,
Iliad 16.15	ζώει δʼ Αἰακίδης Πηλεὺς μετὰ Μυρμιδόνεσσι;
Iliad 16.16	τῶν κε μάλʼ ἀμφοτέρων ἀκαχοίμεθα τεθνηώτων.
Iliad 16.17	ἦε σύ γʼ Ἀργείων ὀλοφύρεαι, ὡς ὀλέκονται
Iliad 16.18	νηυσὶν ἔπι γλαφυρῇσιν ὑπερβασίης ἕνεκα σφῆς;
Iliad 16.19	ἐξαύδα, μὴ κεῦθε νόῳ, ἵνα εἴδομεν ἄμφω.
Iliad 16.20	τὸν δὲ βαρὺ στενάχων προσέφης Πατρόκλεες ἱππεῦ·
Iliad 16.21	ὦ Ἀχιλεῦ Πηλῆος υἱὲ μέγα φέρτατʼ Ἀχαιῶν
Iliad 16.22	μὴ νεμέσα· τοῖον γὰρ ἄχος βεβίηκεν Ἀχαιούς.
Iliad 16.23	οἳ μὲν γὰρ δὴ πάντες, ὅσοι πάρος ἦσαν ἄριστοι,
Iliad 16.24	ἐν νηυσὶν κέαται βεβλημένοι οὐτάμενοί τε.
Iliad 16.25	βέβληται μὲν ὃ Τυδεΐδης κρατερὸς Διομήδης,
Iliad 16.26	οὔτασται δʼ Ὀδυσεὺς δουρικλυτὸς ἠδʼ Ἀγαμέμνων,
Iliad 16.27	βέβληται δὲ καὶ Εὐρύπυλος κατὰ μηρὸν ὀϊστῷ.
Iliad 16.28	τοὺς μέν τʼ ἰητροὶ πολυφάρμακοι ἀμφιπένονται
Iliad 16.29	ἕλκεʼ ἀκειόμενοι· σὺ δʼ ἀμήχανος ἔπλευ Ἀχιλλεῦ.
Iliad 16.30	μὴ ἐμέ γʼ οὖν οὗτός γε λάβοι χόλος, ὃν σὺ φυλάσσεις
Iliad 16.31	αἰναρέτη· τί σευ ἄλλος ὀνήσεται ὀψίγονός περ
Iliad 16.32	αἴ κε μὴ Ἀργείοισιν ἀεικέα λοιγὸν ἀμύνῃς;
Iliad 16.33	νηλεές, οὐκ ἄρα σοί γε πατὴρ ἦν ἱππότα Πηλεύς,
Iliad 16.34	οὐδὲ Θέτις μήτηρ· γλαυκὴ δέ σε τίκτε θάλασσα
Iliad 16.35	πέτραι τʼ ἠλίβατοι, ὅτι τοι νόος ἐστὶν ἀπηνής.
Iliad 16.36	εἰ δέ τινα φρεσὶ σῇσι θεοπροπίην ἀλεείνεις
Iliad 16.37	καί τινά τοι πὰρ Ζηνὸς ἐπέφραδε πότνια μήτηρ,
Iliad 16.38	ἀλλʼ ἐμέ περ πρόες ὦχʼ, ἃμα δʼ ἄλλον λαὸν ὄπασσον
Iliad 16.39	Μυρμιδόνων, ἤν πού τι φόως Δαναοῖσι γένωμαι.
Iliad 16.40	δὸς δέ μοι ὤμοιιν τὰ σὰ τεύχεα θωρηχθῆναι,
Iliad 16.41	αἴ κʼ ἐμὲ σοὶ ἴσκοντες ἀπόσχωνται πολέμοιο
Iliad 16.42	Τρῶες, ἀναπνεύσωσι δʼ Ἀρήϊοι υἷες Ἀχαιῶν
Iliad 16.43	τειρόμενοι· ὀλίγη δέ τʼ ἀνάπνευσις πολέμοιο.
Iliad 16.44	ῥεῖα δέ κʼ ἀκμῆτες κεκμηότας ἄνδρας ἀϋτῇ
Iliad 16.45	ὤσαιμεν προτὶ ἄστυ νεῶν ἄπο καὶ κλισιάων.
Iliad 16.46	ὣς φάτο λισσόμενος μέγα νήπιος· ἦ γὰρ ἔμελλεν
Iliad 16.47	οἷ αὐτῷ θάνατόν τε κακὸν καὶ κῆρα λιτέσθαι.
Iliad 16.48	τὸν δὲ μέγʼ ὀχθήσας προσέφη πόδας ὠκὺς Ἀχιλλεύς·
Iliad 16.49	ὤ μοι διογενὲς Πατρόκλεες οἷον ἔειπες·
Iliad 16.50	οὔτε θεοπροπίης ἐμπάζομαι ἥν τινα οἶδα,
Iliad 16.51	οὔτέ τί μοι πὰρ Ζηνὸς ἐπέφραδε πότνια μήτηρ·
Iliad 16.52	ἀλλὰ τόδʼ αἰνὸν ἄχος κραδίην καὶ θυμὸν ἱκάνει,
Iliad 16.53	ὁππότε δὴ τὸν ὁμοῖον ἀνὴρ ἐθέλῃσιν ἀμέρσαι
Iliad 16.54	καὶ γέρας ἂψ ἀφελέσθαι, ὅ τε κράτεϊ προβεβήκῃ·
Iliad 16.55	αἰνὸν ἄχος τό μοί ἐστιν, ἐπεὶ πάθον ἄλγεα θυμῷ.
Iliad 16.56	κούρην ἣν ἄρα μοι γέρας ἔξελον υἷες Ἀχαιῶν,
Iliad 16.57	δουρὶ δʼ ἐμῷ κτεάτισσα πόλιν εὐτείχεα πέρσας,
Iliad 16.58	τὴν ἂψ ἐκ χειρῶν ἕλετο κρείων Ἀγαμέμνων
Iliad 16.59	Ἀτρεΐδης ὡς εἴ τινʼ ἀτίμητον μετανάστην.
Iliad 16.60	ἀλλὰ τὰ μὲν προτετύχθαι ἐάσομεν· οὐδʼ ἄρα πως ἦν
Iliad 16.61	ἀσπερχὲς κεχολῶσθαι ἐνὶ φρεσίν· ἤτοι ἔφην γε
Iliad 16.62	οὐ πρὶν μηνιθμὸν καταπαυσέμεν, ἀλλʼ ὁπότʼ ἂν δὴ
Iliad 16.63	νῆας ἐμὰς ἀφίκηται ἀϋτή τε πτόλεμός τε.
Iliad 16.64	τύνη δʼ ὤμοιιν μὲν ἐμὰ κλυτὰ τεύχεα δῦθι,
Iliad 16.65	ἄρχε δὲ Μυρμιδόνεσσι φιλοπτολέμοισι μάχεσθαι,
Iliad 16.66	εἰ δὴ κυάνεον Τρώων νέφος ἀμφιβέβηκε
Iliad 16.67	νηυσὶν ἐπικρατέως, οἳ δὲ ῥηγμῖνι θαλάσσης
Iliad 16.68	κεκλίαται, χώρης ὀλίγην ἔτι μοῖραν ἔχοντες
Iliad 16.69	Ἀργεῖοι, Τρώων δὲ πόλις ἐπὶ πᾶσα βέβηκε
Iliad 16.70	θάρσυνος· οὐ γὰρ ἐμῆς κόρυθος λεύσσουσι μέτωπον
Iliad 16.71	ἐγγύθι λαμπομένης· τάχα κεν φεύγοντες ἐναύλους
Iliad 16.72	πλήσειαν νεκύων, εἴ μοι κρείων Ἀγαμέμνων
Iliad 16.73	ἤπια εἰδείη· νῦν δὲ στρατὸν ἀμφιμάχονται.
Iliad 16.74	οὐ γὰρ Τυδεΐδεω Διομήδεος ἐν παλάμῃσι
Iliad 16.75	μαίνεται ἐγχείη Δαναῶν ἀπὸ λοιγὸν ἀμῦναι·
Iliad 16.76	οὐδέ πω Ἀτρεΐδεω ὀπὸς ἔκλυον αὐδήσαντος
Iliad 16.77	ἐχθρῆς ἐκ κεφαλῆς· ἀλλʼ Ἕκτορος ἀνδροφόνοιο
Iliad 16.78	Τρωσὶ κελεύοντος περιάγνυται, οἳ δʼ ἀλαλητῷ
Iliad 16.79	πᾶν πεδίον κατέχουσι μάχῃ νικῶντες Ἀχαιούς.
Iliad 16.80	ἀλλὰ καὶ ὧς Πάτροκλε νεῶν ἄπο λοιγὸν ἀμύνων
Iliad 16.81	ἔμπεσʼ ἐπικρατέως, μὴ δὴ πυρὸς αἰθομένοιο
Iliad 16.82	νῆας ἐνιπρήσωσι, φίλον δʼ ἀπὸ νόστον ἕλωνται.
Iliad 16.83	πείθεο δʼ ὥς τοι ἐγὼ μύθου τέλος ἐν φρεσὶ θείω,
Iliad 16.84	ὡς ἄν μοι τιμὴν μεγάλην καὶ κῦδος ἄρηαι
Iliad 16.85	πρὸς πάντων Δαναῶν, ἀτὰρ οἳ περικαλλέα κούρην
Iliad 16.86	ἂψ ἀπονάσσωσιν, ποτὶ δʼ ἀγλαὰ δῶρα πόρωσιν.
Iliad 16.87	ἐκ νηῶν ἐλάσας ἰέναι πάλιν· εἰ δέ κεν αὖ τοι
Iliad 16.88	δώῃ κῦδος ἀρέσθαι ἐρίγδουπος πόσις Ἥρης,
Iliad 16.89	μὴ σύ γʼ ἄνευθεν ἐμεῖο λιλαίεσθαι πολεμίζειν
Iliad 16.90	Τρωσὶ φιλοπτολέμοισιν· ἀτιμότερον δέ με θήσεις·
Iliad 16.91	μὴ δʼ ἐπαγαλλόμενος πολέμῳ καὶ δηϊοτῆτι
Iliad 16.92	Τρῶας ἐναιρόμενος προτὶ Ἴλιον ἡγεμονεύειν,
Iliad 16.93	μή τις ἀπʼ Οὐλύμποιο θεῶν αἰειγενετάων
Iliad 16.94	ἐμβήῃ· μάλα τούς γε φιλεῖ ἑκάεργος Ἀπόλλων·
Iliad 16.95	ἀλλὰ πάλιν τρωπᾶσθαι, ἐπὴν φάος ἐν νήεσσι
Iliad 16.96	θήῃς, τοὺς δʼ ἔτʼ ἐᾶν πεδίον κάτα δηριάασθαι.
Iliad 16.97	αἲ γὰρ Ζεῦ τε πάτερ καὶ Ἀθηναίη καὶ Ἄπολλον
Iliad 16.98	μήτέ τις οὖν Τρώων θάνατον φύγοι ὅσσοι ἔασι,
Iliad 16.99	μήτέ τις Ἀργείων, νῶϊν δʼ ἐκδῦμεν ὄλεθρον,
Iliad 16.100	ὄφρʼ οἶοι Τροίης ἱερὰ κρήδεμνα λύωμεν.
Iliad 16.101	ὣς οἳ μὲν τοιαῦτα πρὸς ἀλλήλους ἀγόρευον,
Iliad 16.102	Αἴας δʼ οὐκ ἔτʼ ἔμιμνε· βιάζετο γὰρ βελέεσσι·
Iliad 16.103	δάμνα μιν Ζηνός τε νόος καὶ Τρῶες ἀγαυοὶ
Iliad 16.104	βάλλοντες· δεινὴν δὲ περὶ κροτάφοισι φαεινὴ
Iliad 16.105	πήληξ βαλλομένη καναχὴν ἔχε, βάλλετο δʼ αἰεὶ
Iliad 16.106	κὰπ φάλαρʼ εὐποίηθʼ· ὃ δʼ ἀριστερὸν ὦμον ἔκαμνεν
Iliad 16.107	ἔμπεδον αἰὲν ἔχων σάκος αἰόλον· οὐδὲ δύναντο
Iliad 16.108	ἀμφʼ αὐτῷ πελεμίξαι ἐρείδοντες βελέεσσιν.
Iliad 16.109	αἰεὶ δʼ ἀργαλέῳ ἔχετʼ ἄσθματι, κὰδ δέ οἱ ἱδρὼς
Iliad 16.110	πάντοθεν ἐκ μελέων πολὺς ἔρρεεν, οὐδέ πῃ εἶχεν
Iliad 16.111	ἀμπνεῦσαι· πάντῃ δὲ κακὸν κακῷ ἐστήρικτο.
Iliad 16.112	ἔσπετε νῦν μοι Μοῦσαι Ὀλύμπια δώματʼ ἔχουσαι,
Iliad 16.113	ὅππως δὴ πρῶτον πῦρ ἔμπεσε νηυσὶν Ἀχαιῶν.
Iliad 16.114	Ἕκτωρ Αἴαντος δόρυ μείλινον ἄγχι παραστὰς
Iliad 16.115	πλῆξʼ ἄορι μεγάλῳ αἰχμῆς παρὰ καυλὸν ὄπισθεν,
Iliad 16.116	ἀντικρὺ δʼ ἀπάραξε· τὸ μὲν Τελαμώνιος Αἴας
Iliad 16.117	πῆλʼ αὔτως ἐν χειρὶ κόλον δόρυ, τῆλε δʼ ἀπʼ αὐτοῦ
Iliad 16.118	αἰχμὴ χαλκείη χαμάδις βόμβησε πεσοῦσα.
Iliad 16.119	γνῶ δʼ Αἴας κατὰ θυμὸν ἀμύμονα ῥίγησέν τε
Iliad 16.120	ἔργα θεῶν, ὅ ῥα πάγχυ μάχης ἐπὶ μήδεα κεῖρε
Iliad 16.121	Ζεὺς ὑψιβρεμέτης, Τρώεσσι δὲ βούλετο νίκην·
Iliad 16.122	χάζετο δʼ ἐκ βελέων. τοὶ δʼ ἔμβαλον ἀκάματον πῦρ
Iliad 16.123	νηῒ θοῇ· τῆς δʼ αἶψα κατʼ ἀσβέστη κέχυτο φλόξ.
Iliad 16.124	ὣς τὴν μὲν πρυμνὴν πῦρ ἄμφεπεν· αὐτὰρ Ἀχιλλεὺς
Iliad 16.125	μηρὼ πληξάμενος Πατροκλῆα προσέειπεν·
Iliad 16.126	ὄρσεο διογενὲς Πατρόκλεες ἱπποκέλευθε·
Iliad 16.127	λεύσσω δὴ παρὰ νηυσὶ πυρὸς δηΐοιο ἰωήν·
Iliad 16.128	μὴ δὴ νῆας ἕλωσι καὶ οὐκέτι φυκτὰ πέλωνται·
Iliad 16.129	δύσεο τεύχεα θᾶσσον, ἐγὼ δέ κε λαὸν ἀγείρω.
Iliad 16.130	ὣς φάτο, Πάτροκλος δὲ κορύσσετο νώροπι χαλκῷ.
Iliad 16.131	κνημῖδας μὲν πρῶτα περὶ κνήμῃσιν ἔθηκε
Iliad 16.132	καλάς, ἀργυρέοισιν ἐπισφυρίοις ἀραρυίας·
Iliad 16.133	δεύτερον αὖ θώρηκα περὶ στήθεσσιν ἔδυνε
Iliad 16.134	ποικίλον ἀστερόεντα ποδώκεος Αἰακίδαο.
Iliad 16.135	ἀμφὶ δʼ ἄρʼ ὤμοισιν βάλετο ξίφος ἀργυρόηλον
Iliad 16.136	χάλκεον, αὐτὰρ ἔπειτα σάκος μέγα τε στιβαρόν τε·
Iliad 16.137	κρατὶ δʼ ἐπʼ ἰφθίμῳ κυνέην εὔτυκτον ἔθηκεν
Iliad 16.138	ἵππουριν· δεινὸν δὲ λόφος καθύπερθεν ἔνευεν.
Iliad 16.139	εἵλετο δʼ ἄλκιμα δοῦρε, τά οἱ παλάμηφιν ἀρήρει.
Iliad 16.140	ἔγχος δʼ οὐχ ἕλετʼ οἶον ἀμύμονος Αἰακίδαο
Iliad 16.141	βριθὺ μέγα στιβαρόν· τὸ μὲν οὐ δύνατʼ ἄλλος Ἀχαιῶν
Iliad 16.142	πάλλειν, ἀλλά μιν οἶος ἐπίστατο πῆλαι Ἀχιλλεὺς
Iliad 16.143	Πηλιάδα μελίην, τὴν πατρὶ φίλῳ πόρε Χείρων
Iliad 16.144	Πηλίου ἐκ κορυφῆς, φόνον ἔμμεναι ἡρώεσσιν.
Iliad 16.145	ἵππους δʼ Αὐτομέδοντα θοῶς ζευγνῦμεν ἄνωγε,
Iliad 16.146	τὸν μετʼ Ἀχιλλῆα ῥηξήνορα τῖε μάλιστα,
Iliad 16.147	πιστότατος δέ οἱ ἔσκε μάχῃ ἔνι μεῖναι ὁμοκλήν.
Iliad 16.148	τῷ δὲ καὶ Αὐτομέδων ὕπαγε ζυγὸν ὠκέας ἵππους
Iliad 16.149	Ξάνθον καὶ Βαλίον, τὼ ἅμα πνοιῇσι πετέσθην,
Iliad 16.150	τοὺς ἔτεκε Ζεφύρῳ ἀνέμῳ Ἅρπυια Ποδάργη
Iliad 16.151	βοσκομένη λειμῶνι παρὰ ῥόον Ὠκεανοῖο.
Iliad 16.152	ἐν δὲ παρηορίῃσιν ἀμύμονα Πήδασον ἵει,
Iliad 16.153	τόν ῥά ποτʼ Ἠετίωνος ἑλὼν πόλιν ἤγαγʼ Ἀχιλλεύς,
Iliad 16.154	ὃς καὶ θνητὸς ἐὼν ἕπεθʼ ἵπποις ἀθανάτοισι.
Iliad 16.155	Μυρμιδόνας δʼ ἄρʼ ἐποιχόμενος θώρηξεν Ἀχιλλεὺς
Iliad 16.156	πάντας ἀνὰ κλισίας σὺν τεύχεσιν· οἳ δὲ λύκοι ὣς
Iliad 16.157	ὠμοφάγοι, τοῖσίν τε περὶ φρεσὶν ἄσπετος ἀλκή,
Iliad 16.158	οἵ τʼ ἔλαφον κεραὸν μέγαν οὔρεσι δῃώσαντες
Iliad 16.159	δάπτουσιν· πᾶσιν δὲ παρήϊον αἵματι φοινόν·
Iliad 16.160	καί τʼ ἀγεληδὸν ἴασιν ἀπὸ κρήνης μελανύδρου
Iliad 16.161	λάψοντες γλώσσῃσιν ἀραιῇσιν μέλαν ὕδωρ
Iliad 16.162	ἄκρον ἐρευγόμενοι φόνον αἵματος· ἐν δέ τε θυμὸς
Iliad 16.163	στήθεσιν ἄτρομός ἐστι, περιστένεται δέ τε γαστήρ·
Iliad 16.164	τοῖοι Μυρμιδόνων ἡγήτορες ἠδὲ μέδοντες
Iliad 16.165	ἀμφʼ ἀγαθὸν θεράποντα ποδώκεος Αἰακίδαο
Iliad 16.166	ῥώοντʼ· ἐν δʼ ἄρα τοῖσιν ἀρήϊος ἵστατʼ Ἀχιλλεύς,
Iliad 16.167	ὀτρύνων ἵππους τε καὶ ἀνέρας ἀσπιδιώτας.
Iliad 16.168	πεντήκοντʼ ἦσαν νῆες θοαί, ᾗσιν Ἀχιλλεὺς
Iliad 16.169	ἐς Τροίην ἡγεῖτο Διῒ φίλος· ἐν δὲ ἑκάστῃ
Iliad 16.170	πεντήκοντʼ ἔσαν ἄνδρες ἐπὶ κληῗσιν ἑταῖροι·
Iliad 16.171	πέντε δʼ ἄρʼ ἡγεμόνας ποιήσατο τοῖς ἐπεποίθει
Iliad 16.172	σημαίνειν· αὐτὸς δὲ μέγα κρατέων ἤνασσε.
Iliad 16.173	τῆς μὲν ἰῆς στιχὸς ἦρχε Μενέσθιος αἰολοθώρηξ
Iliad 16.174	υἱὸς Σπερχειοῖο διιπετέος ποταμοῖο·
Iliad 16.175	ὃν τέκε Πηλῆος θυγάτηρ καλὴ Πολυδώρη
Iliad 16.176	Σπερχειῷ ἀκάμαντι γυνὴ θεῷ εὐνηθεῖσα,
Iliad 16.177	αὐτὰρ ἐπίκλησιν Βώρῳ Περιήρεος υἷι,
Iliad 16.178	ὅς ῥʼ ἀναφανδὸν ὄπυιε πορὼν ἀπερείσια ἕδνα.
Iliad 16.179	τῆς δʼ ἑτέρης Εὔδωρος ἀρήϊος ἡγεμόνευε
Iliad 16.180	παρθένιος, τὸν ἔτικτε χορῷ καλὴ Πολυμήλη
Iliad 16.181	Φύλαντος θυγάτηρ· τῆς δὲ κρατὺς ἀργεϊφόντης
Iliad 16.182	ἠράσατʼ, ὀφθαλμοῖσιν ἰδὼν μετὰ μελπομένῃσιν
Iliad 16.183	ἐν χορῷ Ἀρτέμιδος χρυσηλακάτου κελαδεινῆς.
Iliad 16.184	αὐτίκα δʼ εἰς ὑπερῷʼ ἀναβὰς παρελέξατο λάθρῃ
Iliad 16.185	Ἑρμείας ἀκάκητα, πόρεν δέ οἱ ἀγλαὸν υἱὸν
Iliad 16.186	Εὔδωρον πέρι μὲν θείειν ταχὺν ἠδὲ μαχητήν.
Iliad 16.187	αὐτὰρ ἐπεὶ δὴ τόν γε μογοστόκος Εἰλείθυια
Iliad 16.188	ἐξάγαγε πρὸ φόως δὲ καὶ ἠελίου ἴδεν αὐγάς,
Iliad 16.189	τὴν μὲν Ἐχεκλῆος κρατερὸν μένος Ἀκτορίδαο
Iliad 16.190	ἠγάγετο πρὸς δώματʼ, ἐπεὶ πόρε μυρία ἕδνα,
Iliad 16.191	τὸν δʼ ὃ γέρων Φύλας εὖ ἔτρεφεν ἠδʼ ἀτίταλλεν
Iliad 16.192	ἀμφαγαπαζόμενος ὡς εἴ θʼ ἑὸν υἱὸν ἐόντα.
Iliad 16.193	τῆς δὲ τρίτης Πείσανδρος ἀρήϊος ἡγεμόνευε
Iliad 16.194	Μαιμαλίδης, ὃς πᾶσι μετέπρεπε Μυρμιδόνεσσιν
Iliad 16.195	ἔγχεϊ μάρνασθαι μετὰ Πηλεΐωνος ἑταῖρον.
Iliad 16.196	τῆς δὲ τετάρτης ἦρχε γέρων ἱππηλάτα Φοῖνιξ,
Iliad 16.197	πέμπτης δʼ Ἀλκιμέδων Λαέρκεος υἱὸς ἀμύμων.
Iliad 16.198	αὐτὰρ ἐπεὶ δὴ πάντας ἅμʼ ἡγεμόνεσσιν Ἀχιλλεὺς
Iliad 16.199	στῆσεν ἐῢ κρίνας, κρατερὸν δʼ ἐπὶ μῦθον ἔτελλε·
Iliad 16.200	Μυρμιδόνες μή τίς μοι ἀπειλάων λελαθέσθω,
Iliad 16.201	ἃς ἐπὶ νηυσὶ θοῇσιν ἀπειλεῖτε Τρώεσσι
Iliad 16.202	πάνθʼ ὑπὸ μηνιθμόν, καί μʼ ᾐτιάασθε ἕκαστος·
Iliad 16.203	σχέτλιε Πηλέος υἱὲ χόλῳ ἄρα σʼ ἔτρεφε μήτηρ,
Iliad 16.204	νηλεές, ὃς παρὰ νηυσὶν ἔχεις ἀέκοντας ἑταίρους·
Iliad 16.205	οἴκαδέ περ σὺν νηυσὶ νεώμεθα ποντοπόροισιν
Iliad 16.206	αὖτις, ἐπεί ῥά τοι ὧδε κακὸς χόλος ἔμπεσε θυμῷ.
Iliad 16.207	ταῦτά μʼ ἀγειρόμενοι θάμʼ ἐβάζετε· νῦν δὲ πέφανται
Iliad 16.208	φυλόπιδος μέγα ἔργον, ἕης τὸ πρίν γʼ ἐράασθε.
Iliad 16.209	ἔνθά τις ἄλκιμον ἦτορ ἔχων Τρώεσσι μαχέσθω.
Iliad 16.210	ὣς εἰπὼν ὄτρυνε μένος καὶ θυμὸν ἑκάστου.
Iliad 16.211	μᾶλλον δὲ στίχες ἄρθεν, ἐπεὶ βασιλῆος ἄκουσαν.
Iliad 16.212	ὡς δʼ ὅτε τοῖχον ἀνὴρ ἀράρῃ πυκινοῖσι λίθοισι
Iliad 16.213	δώματος ὑψηλοῖο βίας ἀνέμων ἀλεείνων,
Iliad 16.214	ὣς ἄραρον κόρυθές τε καὶ ἀσπίδες ὀμφαλόεσσαι.
Iliad 16.215	ἀσπὶς ἄρʼ ἀσπίδʼ ἔρειδε, κόρυς κόρυν, ἀνέρα δʼ ἀνήρ·
Iliad 16.216	ψαῦον δʼ ἱππόκομοι κόρυθες λαμπροῖσι φάλοισι
Iliad 16.217	νευόντων, ὡς πυκνοὶ ἐφέστασαν ἀλλήλοισι.
Iliad 16.218	πάντων δὲ προπάροιθε δύʼ ἀνέρε θωρήσσοντο
Iliad 16.219	Πάτροκλός τε καὶ Αὐτομέδων ἕνα θυμὸν ἔχοντες
Iliad 16.220	πρόσθεν Μυρμιδόνων πολεμιζέμεν. αὐτὰρ Ἀχιλλεὺς
Iliad 16.221	βῆ ῥʼ ἴμεν ἐς κλισίην, χηλοῦ δʼ ἀπὸ πῶμʼ ἀνέῳγε
Iliad 16.222	καλῆς δαιδαλέης, τήν οἱ Θέτις ἀργυρόπεζα
Iliad 16.223	θῆκʼ ἐπὶ νηὸς ἄγεσθαι ἐῢ πλήσασα χιτώνων
Iliad 16.224	χλαινάων τʼ ἀνεμοσκεπέων οὔλων τε ταπήτων.
Iliad 16.225	ἔνθα δέ οἱ δέπας ἔσκε τετυγμένον, οὐδέ τις ἄλλος
Iliad 16.226	οὔτʼ ἀνδρῶν πίνεσκεν ἀπʼ αὐτοῦ αἴθοπα οἶνον,
Iliad 16.227	οὔτέ τεῳ σπένδεσκε θεῶν, ὅτε μὴ Διὶ πατρί.
Iliad 16.228	τό ῥα τότʼ ἐκ χηλοῖο λαβὼν ἐκάθηρε θεείῳ
Iliad 16.229	πρῶτον, ἔπειτα δʼ ἔνιψʼ ὕδατος καλῇσι ῥοῇσι,
Iliad 16.230	νίψατο δʼ αὐτὸς χεῖρας, ἀφύσσατο δʼ αἴθοπα οἶνον.
Iliad 16.231	εὔχετʼ ἔπειτα στὰς μέσῳ ἕρκεϊ, λεῖβε δὲ οἶνον
Iliad 16.232	οὐρανὸν εἰσανιδών· Δία δʼ οὐ λάθε τερπικέραυνον·
Iliad 16.233	Ζεῦ ἄνα Δωδωναῖε Πελασγικὲ τηλόθι ναίων
Iliad 16.234	Δωδώνης μεδέων δυσχειμέρου, ἀμφὶ δὲ Σελλοὶ
Iliad 16.235	σοὶ ναίουσʼ ὑποφῆται ἀνιπτόποδες χαμαιεῦναι,
Iliad 16.236	ἠμὲν δή ποτʼ ἐμὸν ἔπος ἔκλυες εὐξαμένοιο,
Iliad 16.237	τίμησας μὲν ἐμέ, μέγα δʼ ἴψαο λαὸν Ἀχαιῶν,
Iliad 16.238	ἠδʼ ἔτι καὶ νῦν μοι τόδʼ ἐπικρήηνον ἐέλδωρ·
Iliad 16.239	αὐτὸς μὲν γὰρ ἐγὼ μενέω νηῶν ἐν ἀγῶνι,
Iliad 16.240	ἀλλʼ ἕταρον πέμπω πολέσιν μετὰ Μυρμιδόνεσσι
Iliad 16.241	μάρνασθαι· τῷ κῦδος ἅμα πρόες εὐρύοπα Ζεῦ,
Iliad 16.242	θάρσυνον δέ οἱ ἦτορ ἐνὶ φρεσίν, ὄφρα καὶ Ἕκτωρ
Iliad 16.243	εἴσεται ἤ ῥα καὶ οἶος ἐπίστηται πολεμίζειν
Iliad 16.244	ἡμέτερος θεράπων, ἦ οἱ τότε χεῖρες ἄαπτοι
Iliad 16.245	μαίνονθʼ, ὁππότʼ ἐγώ περ ἴω μετὰ μῶλον Ἄρηος.
Iliad 16.246	αὐτὰρ ἐπεί κʼ ἀπὸ ναῦφι μάχην ἐνοπήν τε δίηται,
Iliad 16.247	ἀσκηθής μοι ἔπειτα θοὰς ἐπὶ νῆας ἵκοιτο
Iliad 16.248	τεύχεσί τε ξὺν πᾶσι καὶ ἀγχεμάχοις ἑτάροισιν.
Iliad 16.249	ὣς ἔφατʼ εὐχόμενος, τοῦ δʼ ἔκλυε μητίετα Ζεύς.
Iliad 16.250	τῷ δʼ ἕτερον μὲν ἔδωκε πατήρ, ἕτερον δʼ ἀνένευσε·
Iliad 16.251	νηῶν μέν οἱ ἀπώσασθαι πόλεμόν τε μάχην τε
Iliad 16.252	δῶκε, σόον δʼ ἀνένευσε μάχης ἐξαπονέεσθαι.
Iliad 16.253	ἤτοι ὃ μὲν σπείσας τε καὶ εὐξάμενος Διὶ πατρὶ
Iliad 16.254	ἂψ κλισίην εἰσῆλθε, δέπας δʼ ἀπέθηκʼ ἐνὶ χηλῷ,
Iliad 16.255	στῆ δὲ πάροιθʼ ἐλθὼν κλισίης, ἔτι δʼ ἤθελε θυμῷ
Iliad 16.256	εἰσιδέειν Τρώων καὶ Ἀχαιῶν φύλοπιν αἰνήν.
Iliad 16.257	οἳ δʼ ἅμα Πατρόκλῳ μεγαλήτορι θωρηχθέντες
Iliad 16.258	ἔστιχον, ὄφρʼ ἐν Τρωσὶ μέγα φρονέοντες ὄρουσαν.
Iliad 16.259	αὐτίκα δὲ σφήκεσσιν ἐοικότες ἐξεχέοντο
Iliad 16.260	εἰνοδίοις, οὓς παῖδες ἐριδμαίνωσιν ἔθοντες
Iliad 16.261	αἰεὶ κερτομέοντες ὁδῷ ἔπι οἰκίʼ ἔχοντας
Iliad 16.262	νηπίαχοι· ξυνὸν δὲ κακὸν πολέεσσι τιθεῖσι.
Iliad 16.263	τοὺς δʼ εἴ περ παρά τίς τε κιὼν ἄνθρωπος ὁδίτης
Iliad 16.264	κινήσῃ ἀέκων, οἳ δʼ ἄλκιμον ἦτορ ἔχοντες
Iliad 16.265	πρόσσω πᾶς πέτεται καὶ ἀμύνει οἷσι τέκεσσι.
Iliad 16.266	τῶν τότε Μυρμιδόνες κραδίην καὶ θυμὸν ἔχοντες
Iliad 16.267	ἐκ νηῶν ἐχέοντο· βοὴ δʼ ἄσβεστος ὀρώρει.
Iliad 16.268	Πάτροκλος δʼ ἑτάροισιν ἐκέκλετο μακρὸν ἀΰσας·
Iliad 16.269	Μυρμιδόνες ἕταροι Πηληϊάδεω Ἀχιλῆος
Iliad 16.270	ἀνέρες ἔστε φίλοι, μνήσασθε δὲ θούριδος ἀλκῆς,
Iliad 16.271	ὡς ἂν Πηλεΐδην τιμήσομεν, ὃς μέγʼ ἄριστος
Iliad 16.272	Ἀργείων παρὰ νηυσὶ καὶ ἀγχέμαχοι θεράποντες,
Iliad 16.273	γνῷ δὲ καὶ Ἀτρεΐδης εὐρὺ κρείων Ἀγαμέμνων
Iliad 16.274	ἣν ἄτην, ὅ τʼ ἄριστον Ἀχαιῶν οὐδὲν ἔτισεν.
Iliad 16.275	ὣς εἰπὼν ὄτρυνε μένος καὶ θυμὸν ἑκάστου,
Iliad 16.276	ἐν δʼ ἔπεσον Τρώεσσιν ἀολλέες· ἀμφὶ δὲ νῆες
Iliad 16.277	σμερδαλέον κονάβησαν ἀϋσάντων ὑπʼ Ἀχαιῶν.
Iliad 16.278	Τρῶες δʼ ὡς εἴδοντο Μενοιτίου ἄλκιμον υἱὸν
Iliad 16.279	αὐτὸν καὶ θεράποντα σὺν ἔντεσι μαρμαίροντας,
Iliad 16.280	πᾶσιν ὀρίνθη θυμός, ἐκίνηθεν δὲ φάλαγγες
Iliad 16.281	ἐλπόμενοι παρὰ ναῦφι ποδώκεα Πηλεΐωνα
Iliad 16.282	μηνιθμὸν μὲν ἀπορρῖψαι, φιλότητα δʼ ἑλέσθαι·
Iliad 16.283	πάπτηνεν δὲ ἕκαστος ὅπῃ φύγοι αἰπὺν ὄλεθρον.
Iliad 16.284	Πάτροκλος δὲ πρῶτος ἀκόντισε δουρὶ φαεινῷ
Iliad 16.285	ἀντικρὺ κατὰ μέσσον, ὅθι πλεῖστοι κλονέοντο,
Iliad 16.286	νηῒ πάρα πρυμνῇ μεγαθύμου Πρωτεσιλάου,
Iliad 16.287	καὶ βάλε Πυραίχμην, ὃς Παίονας ἱπποκορυστὰς
Iliad 16.288	ἤγαγεν ἐξ Ἀμυδῶνος ἀπʼ Ἀξιοῦ εὐρὺ ῥέοντος·
Iliad 16.289	τὸν βάλε δεξιὸν ὦμον· ὃ δʼ ὕπτιος ἐν κονίῃσι
Iliad 16.290	κάππεσεν οἰμώξας, ἕταροι δέ μιν ἀμφεφόβηθεν
Iliad 16.291	Παίονες· ἐν γὰρ Πάτροκλος φόβον ἧκεν ἅπασιν
Iliad 16.292	ἡγεμόνα κτείνας, ὃς ἀριστεύεσκε μάχεσθαι.
Iliad 16.293	ἐκ νηῶν δʼ ἔλασεν, κατὰ δʼ ἔσβεσεν αἰθόμενον πῦρ.
Iliad 16.294	ἡμιδαὴς δʼ ἄρα νηῦς λίπετʼ αὐτόθι· τοὶ δὲ φόβηθεν
Iliad 16.295	Τρῶες θεσπεσίῳ ὁμάδῳ· Δαναοὶ δʼ ἐπέχυντο
Iliad 16.296	νῆας ἀνὰ γλαφυράς· ὅμαδος δʼ ἀλίαστος ἐτύχθη.
Iliad 16.297	ὡς δʼ ὅτʼ ἀφʼ ὑψηλῆς κορυφῆς ὄρεος μεγάλοιο
Iliad 16.298	κινήσῃ πυκινὴν νεφέλην στεροπηγερέτα Ζεύς,
Iliad 16.299	ἔκ τʼ ἔφανεν πᾶσαι σκοπιαὶ καὶ πρώονες ἄκροι
Iliad 16.300	καὶ νάπαι, οὐρανόθεν δʼ ἄρʼ ὑπερράγη ἄσπετος αἰθήρ,
Iliad 16.301	ὣς Δαναοὶ νηῶν μὲν ἀπωσάμενοι δήϊον πῦρ
Iliad 16.302	τυτθὸν ἀνέπνευσαν, πολέμου δʼ οὐ γίγνετʼ ἐρωή·
Iliad 16.303	οὐ γάρ πώ τι Τρῶες ἀρηϊφίλων ὑπʼ Ἀχαιῶν
Iliad 16.304	προτροπάδην φοβέοντο μελαινάων ἀπὸ νηῶν,
Iliad 16.305	ἀλλʼ ἔτʼ ἄρʼ ἀνθίσταντο, νεῶν δʼ ὑπόεικον ἀνάγκῃ.
Iliad 16.306	ἔνθα δʼ ἀνὴρ ἕλεν ἄνδρα κεδασθείσης ὑσμίνης
Iliad 16.307	ἡγεμόνων. πρῶτος δὲ Μενοιτίου ἄλκιμος υἱὸς
Iliad 16.308	αὐτίκʼ ἄρα στρεφθέντος Ἀρηϊλύκου βάλε μηρὸν
Iliad 16.309	ἔγχεϊ ὀξυόεντι, διὰ πρὸ δὲ χαλκὸν ἔλασσε·
Iliad 16.310	ῥῆξεν δʼ ὀστέον ἔγχος, ὃ δὲ πρηνὴς ἐπὶ γαίῃ
Iliad 16.311	κάππεσʼ· ἀτὰρ Μενέλαος ἀρήϊος οὖτα Θόαντα
Iliad 16.312	στέρνον γυμνωθέντα παρʼ ἀσπίδα, λῦσε δὲ γυῖα.
Iliad 16.313	Φυλεΐδης δʼ Ἄμφικλον ἐφορμηθέντα δοκεύσας
Iliad 16.314	ἔφθη ὀρεξάμενος πρυμνὸν σκέλος, ἔνθα πάχιστος
Iliad 16.315	μυὼν ἀνθρώπου πέλεται· περὶ δʼ ἔγχεος αἰχμῇ
Iliad 16.316	νεῦρα διεσχίσθη· τὸν δὲ σκότος ὄσσε κάλυψε.
Iliad 16.317	Νεστορίδαι δʼ ὃ μὲν οὔτασʼ Ἀτύμνιον ὀξέϊ δουρὶ
Iliad 16.318	Ἀντίλοχος, λαπάρης δὲ διήλασε χάλκεον ἔγχος·
Iliad 16.319	ἤριπε δὲ προπάροιθε. Μάρις δʼ αὐτοσχεδὰ δουρὶ
Iliad 16.320	Ἀντιλόχῳ ἐπόρουσε κασιγνήτοιο χολωθεὶς
Iliad 16.321	στὰς πρόσθεν νέκυος· τοῦ δʼ ἀντίθεος Θρασυμήδης
Iliad 16.322	ἔφθη ὀρεξάμενος πρὶν οὐτάσαι, οὐδʼ ἀφάμαρτεν,
Iliad 16.323	ὦμον ἄφαρ· πρυμνὸν δὲ βραχίονα δουρὸς ἀκωκὴ
Iliad 16.324	δρύψʼ ἀπὸ μυώνων, ἀπὸ δʼ ὀστέον ἄχρις ἄραξε·
Iliad 16.325	δούπησεν δὲ πεσών, κατὰ δὲ σκότος ὄσσε κάλυψεν.
Iliad 16.326	ὣς τὼ μὲν δοιοῖσι κασιγνήτοισι δαμέντε
Iliad 16.327	βήτην εἰς Ἔρεβος Σαρπηδόνος ἐσθλοὶ ἑταῖροι
Iliad 16.328	υἷες ἀκοντισταὶ Ἀμισωδάρου, ὅς ῥα Χίμαιραν
Iliad 16.329	θρέψεν ἀμαιμακέτην πολέσιν κακὸν ἀνθρώποισιν.
Iliad 16.330	Αἴας δὲ Κλεόβουλον Ὀϊλιάδης ἐπορούσας
Iliad 16.331	ζωὸν ἕλε βλαφθέντα κατὰ κλόνον· ἀλλά οἱ αὖθι
Iliad 16.332	λῦσε μένος πλήξας ξίφει αὐχένα κωπήεντι.
Iliad 16.333	πᾶν δʼ ὑπεθερμάνθη ξίφος αἵματι· τὸν δὲ κατʼ ὄσσε
Iliad 16.334	ἔλλαβε πορφύρεος θάνατος καὶ μοῖρα κραταιή.
Iliad 16.335	Πηνέλεως δὲ Λύκων τε συνέδραμον· ἔγχεσι μὲν γὰρ
Iliad 16.336	ἤμβροτον ἀλλήλων, μέλεον δʼ ἠκόντισαν ἄμφω·
Iliad 16.337	τὼ δʼ αὖτις ξιφέεσσι συνέδραμον. ἔνθα Λύκων μὲν
Iliad 16.338	ἱπποκόμου κόρυθος φάλον ἤλασεν, ἀμφὶ δὲ καυλὸν
Iliad 16.339	φάσγανον ἐρραίσθη· ὃ δʼ ὑπʼ οὔατος αὐχένα θεῖνε
Iliad 16.340	Πηνέλεως, πᾶν δʼ εἴσω ἔδυ ξίφος, ἔσχεθε δʼ οἶον
Iliad 16.341	δέρμα, παρηέρθη δὲ κάρη, ὑπέλυντο δὲ γυῖα.
Iliad 16.342	Μηριόνης δʼ Ἀκάμαντα κιχεὶς ποσὶ καρπαλίμοισι
Iliad 16.343	νύξʼ ἵππων ἐπιβησόμενον κατὰ δεξιὸν ὦμον·
Iliad 16.344	ἤριπε δʼ ἐξ ὀχέων, κατὰ δʼ ὀφθαλμῶν κέχυτʼ ἀχλύς.
Iliad 16.345	Ἰδομενεὺς δʼ Ἐρύμαντα κατὰ στόμα νηλέϊ χαλκῷ
Iliad 16.346	νύξε· τὸ δʼ ἀντικρὺ δόρυ χάλκεον ἐξεπέρησε
Iliad 16.347	νέρθεν ὑπʼ ἐγκεφάλοιο, κέασσε δʼ ἄρʼ ὀστέα λευκά·
Iliad 16.348	ἐκ δʼ ἐτίναχθεν ὀδόντες, ἐνέπλησθεν δέ οἱ ἄμφω
Iliad 16.349	αἵματος ὀφθαλμοί· τὸ δʼ ἀνὰ στόμα καὶ κατὰ ῥῖνας
Iliad 16.350	πρῆσε χανών· θανάτου δὲ μέλαν νέφος ἀμφεκάλυψεν.
Iliad 16.351	οὗτοι ἄρʼ ἡγεμόνες Δαναῶν ἕλον ἄνδρα ἕκαστος.
Iliad 16.352	ὡς δὲ λύκοι ἄρνεσσιν ἐπέχραον ἢ ἐρίφοισι
Iliad 16.353	σίνται ὑπʼ ἐκ μήλων αἱρεύμενοι, αἵ τʼ ἐν ὄρεσσι
Iliad 16.354	ποιμένος ἀφραδίῃσι διέτμαγεν· οἳ δὲ ἰδόντες
Iliad 16.355	αἶψα διαρπάζουσιν ἀνάλκιδα θυμὸν ἐχούσας·
Iliad 16.356	ὣς Δαναοὶ Τρώεσσιν ἐπέχραον· οἳ δὲ φόβοιο
Iliad 16.357	δυσκελάδου μνήσαντο, λάθοντο δὲ θούριδος ἀλκῆς.
Iliad 16.358	Αἴας δʼ ὃ μέγας αἰὲν ἐφʼ Ἕκτορι χαλκοκορυστῇ
Iliad 16.359	ἵετʼ ἀκοντίσσαι· ὃ δὲ ἰδρείῃ πολέμοιο
Iliad 16.360	ἀσπίδι ταυρείῃ κεκαλυμμένος εὐρέας ὤμους
Iliad 16.361	σκέπτετʼ ὀϊστῶν τε ῥοῖζον καὶ δοῦπον ἀκόντων.
Iliad 16.362	ἦ μὲν δὴ γίγνωσκε μάχης ἑτεραλκέα νίκην·
Iliad 16.363	ἀλλὰ καὶ ὧς ἀνέμιμνε, σάω δʼ ἐρίηρας ἑταίρους.
Iliad 16.364	ὡς δʼ ὅτʼ ἀπʼ Οὐλύμπου νέφος ἔρχεται οὐρανὸν εἴσω
Iliad 16.365	αἰθέρος ἐκ δίης, ὅτε τε Ζεὺς λαίλαπα τείνῃ,
Iliad 16.366	ὣς τῶν ἐκ νηῶν γένετο ἰαχή τε φόβος τε,
Iliad 16.367	οὐδὲ κατὰ μοῖραν πέραον πάλιν. Ἕκτορα δʼ ἵπποι
Iliad 16.368	ἔκφερον ὠκύποδες σὺν τεύχεσι, λεῖπε δὲ λαὸν
Iliad 16.369	Τρωϊκόν, οὓς ἀέκοντας ὀρυκτὴ τάφρος ἔρυκε.
Iliad 16.370	πολλοὶ δʼ ἐν τάφρῳ ἐρυσάρματες ὠκέες ἵπποι
Iliad 16.371	ἄξαντʼ ἐν πρώτῳ ῥυμῷ λίπον ἅρματʼ ἀνάκτων,
Iliad 16.372	Πάτροκλος δʼ ἕπετο σφεδανὸν Δαναοῖσι κελεύων
Iliad 16.373	Τρωσὶ κακὰ φρονέων· οἳ δὲ ἰαχῇ τε φόβῳ τε
Iliad 16.374	πάσας πλῆσαν ὁδούς, ἐπεὶ ἂρ τμάγεν· ὕψι δʼ ἀέλλη
Iliad 16.375	σκίδναθʼ ὑπὸ νεφέων, τανύοντο δὲ μώνυχες ἵπποι
Iliad 16.376	ἄψορρον προτὶ ἄστυ νεῶν ἄπο καὶ κλισιάων.
Iliad 16.377	Πάτροκλος δʼ ᾗ πλεῖστον ὀρινόμενον ἴδε λαόν,
Iliad 16.378	τῇ ῥʼ ἔχʼ ὁμοκλήσας· ὑπὸ δʼ ἄξοσι φῶτες ἔπιπτον
Iliad 16.379	πρηνέες ἐξ ὀχέων, δίφροι δʼ ἀνακυμβαλίαζον.
Iliad 16.380	ἀντικρὺ δʼ ἄρα τάφρον ὑπέρθορον ὠκέες ἵπποι
Iliad 16.381	ἄμβροτοι, οὓς Πηλῆϊ θεοὶ δόσαν ἀγλαὰ δῶρα,
Iliad 16.382	πρόσσω ἱέμενοι, ἐπὶ δʼ Ἕκτορι κέκλετο θυμός·
Iliad 16.383	ἵετο γὰρ βαλέειν· τὸν δʼ ἔκφερον ὠκέες ἵπποι.
Iliad 16.384	ὡς δʼ ὑπὸ λαίλαπι πᾶσα κελαινὴ βέβριθε χθὼν
Iliad 16.385	ἤματʼ ὀπωρινῷ, ὅτε λαβρότατον χέει ὕδωρ
Iliad 16.386	Ζεύς, ὅτε δή ῥʼ ἄνδρεσσι κοτεσσάμενος χαλεπήνῃ,
Iliad 16.387	οἳ βίῃ εἰν ἀγορῇ σκολιὰς κρίνωσι θέμιστας,
Iliad 16.388	ἐκ δὲ δίκην ἐλάσωσι θεῶν ὄπιν οὐκ ἀλέγοντες·
Iliad 16.389	τῶν δέ τε πάντες μὲν ποταμοὶ πλήθουσι ῥέοντες,
Iliad 16.390	πολλὰς δὲ κλιτῦς τότʼ ἀποτμήγουσι χαράδραι,
Iliad 16.391	ἐς δʼ ἅλα πορφυρέην μεγάλα στενάχουσι ῥέουσαι
Iliad 16.392	ἐξ ὀρέων ἐπικάρ, μινύθει δέ τε ἔργʼ ἀνθρώπων·
Iliad 16.393	ὣς ἵπποι Τρῳαὶ μεγάλα στενάχοντο θέουσαι.
Iliad 16.394	Πάτροκλος δʼ ἐπεὶ οὖν πρώτας ἐπέκερσε φάλαγγας,
Iliad 16.395	ἂψ ἐπὶ νῆας ἔεργε παλιμπετές, οὐδὲ πόληος
Iliad 16.396	εἴα ἱεμένους ἐπιβαινέμεν, ἀλλὰ μεσηγὺ
Iliad 16.397	νηῶν καὶ ποταμοῦ καὶ τείχεος ὑψηλοῖο
Iliad 16.398	κτεῖνε μεταΐσσων, πολέων δʼ ἀπετίνυτο ποινήν.
Iliad 16.399	ἔνθʼ ἤτοι Πρόνοον πρῶτον βάλε δουρὶ φαεινῷ
Iliad 16.400	στέρνον γυμνωθέντα παρʼ ἀσπίδα, λῦσε δὲ γυῖα·
Iliad 16.401	δούπησεν δὲ πεσών· ὃ δὲ Θέστορα Ἤνοπος υἱὸν
Iliad 16.402	δεύτερον ὁρμηθείς· ὃ μὲν εὐξέστῳ ἐνὶ δίφρῳ
Iliad 16.403	ἧστο ἀλείς· ἐκ γὰρ πλήγη φρένας, ἐκ δʼ ἄρα χειρῶν
Iliad 16.404	ἡνία ἠΐχθησαν· ὃ δʼ ἔγχεϊ νύξε παραστὰς
Iliad 16.405	γναθμὸν δεξιτερόν, διὰ δʼ αὐτοῦ πεῖρεν ὀδόντων,
Iliad 16.406	ἕλκε δὲ δουρὸς ἑλὼν ὑπὲρ ἄντυγος, ὡς ὅτε τις φὼς
Iliad 16.407	πέτρῃ ἔπι προβλῆτι καθήμενος ἱερὸν ἰχθὺν
Iliad 16.408	ἐκ πόντοιο θύραζε λίνῳ καὶ ἤνοπι χαλκῷ·
Iliad 16.409	ὣς ἕλκʼ ἐκ δίφροιο κεχηνότα δουρὶ φαεινῷ,
Iliad 16.410	κὰδ δʼ ἄρʼ ἐπὶ στόμʼ ἔωσε· πεσόντα δέ μιν λίπε θυμός.
Iliad 16.411	αὐτὰρ ἔπειτʼ Ἐρύλαον ἐπεσσύμενον βάλε πέτρῳ
Iliad 16.412	μέσσην κὰκ κεφαλήν· ἣ δʼ ἄνδιχα πᾶσα κεάσθη
Iliad 16.413	ἐν κόρυθι βριαρῇ· ὃ δʼ ἄρα πρηνὴς ἐπὶ γαίῃ
Iliad 16.414	κάππεσεν, ἀμφὶ δέ μιν θάνατος χύτο θυμοραϊστής.
Iliad 16.415	αὐτὰρ ἔπειτʼ Ἐρύμαντα καὶ Ἀμφοτερὸν καὶ Ἐπάλτην
Iliad 16.416	Τληπόλεμόν τε Δαμαστορίδην Ἐχίον τε Πύριν τε
Iliad 16.417	Ἰφέα τʼ Εὔιππόν τε καὶ Ἀργεάδην Πολύμηλον
Iliad 16.418	πάντας ἐπασσυτέρους πέλασε χθονὶ πουλυβοτείρῃ.
Iliad 16.419	Σαρπηδὼν δʼ ὡς οὖν ἴδʼ ἀμιτροχίτωνας ἑταίρους
Iliad 16.420	χέρσʼ ὕπο Πατρόκλοιο Μενοιτιάδαο δαμέντας,
Iliad 16.421	κέκλετʼ ἄρʼ ἀντιθέοισι καθαπτόμενος Λυκίοισιν·
Iliad 16.422	αἰδὼς ὦ Λύκιοι· πόσε φεύγετε; νῦν θοοὶ ἔστε.
Iliad 16.423	ἀντήσω γὰρ ἐγὼ τοῦδʼ ἀνέρος, ὄφρα δαείω
Iliad 16.424	ὅς τις ὅδε κρατέει καὶ δὴ κακὰ πολλὰ ἔοργε
Iliad 16.425	Τρῶας, ἐπεὶ πολλῶν τε καὶ ἐσθλῶν γούνατʼ ἔλυσεν.
Iliad 16.426	ἦ ῥα, καὶ ἐξ ὀχέων σὺν τεύχεσιν ἆλτο χαμᾶζε.
Iliad 16.427	Πάτροκλος δʼ ἑτέρωθεν ἐπεὶ ἴδεν ἔκθορε δίφρου.
Iliad 16.428	οἳ δʼ ὥς τʼ αἰγυπιοὶ γαμψώνυχες ἀγκυλοχεῖλαι
Iliad 16.429	πέτρῃ ἐφʼ ὑψηλῇ μεγάλα κλάζοντε μάχωνται,
Iliad 16.430	ὣς οἳ κεκλήγοντες ἐπʼ ἀλλήλοισιν ὄρουσαν.
Iliad 16.431	τοὺς δὲ ἰδὼν ἐλέησε Κρόνου πάϊς ἀγκυλομήτεω,
Iliad 16.432	Ἥρην δὲ προσέειπε κασιγνήτην ἄλοχόν τε·
Iliad 16.433	ὤ μοι ἐγών, ὅ τέ μοι Σαρπηδόνα φίλτατον ἀνδρῶν
Iliad 16.434	μοῖρʼ ὑπὸ Πατρόκλοιο Μενοιτιάδαο δαμῆναι.
Iliad 16.435	διχθὰ δέ μοι κραδίη μέμονε φρεσὶν ὁρμαίνοντι,
Iliad 16.436	ἤ μιν ζωὸν ἐόντα μάχης ἄπο δακρυοέσσης
Iliad 16.437	θείω ἀναρπάξας Λυκίης ἐν πίονι δήμῳ,
Iliad 16.438	ἦ ἤδη ὑπὸ χερσὶ Μενοιτιάδαο δαμάσσω.
Iliad 16.439	τὸν δʼ ἠμείβετʼ ἔπειτα βοῶπις πότνια Ἥρη·
Iliad 16.440	αἰνότατε Κρονίδη ποῖον τὸν μῦθον ἔειπες.
Iliad 16.441	ἄνδρα θνητὸν ἐόντα πάλαι πεπρωμένον αἴσῃ
Iliad 16.442	ἂψ ἐθέλεις θανάτοιο δυσηχέος ἐξαναλῦσαι;
Iliad 16.443	ἔρδʼ· ἀτὰρ οὔ τοι πάντες ἐπαινέομεν θεοὶ ἄλλοι.
Iliad 16.444	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Iliad 16.445	αἴ κε ζὼν πέμψῃς Σαρπηδόνα ὃν δὲ δόμον δέ,
Iliad 16.446	φράζεο μή τις ἔπειτα θεῶν ἐθέλῃσι καὶ ἄλλος
Iliad 16.447	πέμπειν ὃν φίλον υἱὸν ἀπὸ κρατερῆς ὑσμίνης·
Iliad 16.448	πολλοὶ γὰρ περὶ ἄστυ μέγα Πριάμοιο μάχονται
Iliad 16.449	υἱέες ἀθανάτων, τοῖσιν κότον αἰνὸν ἐνήσεις.
Iliad 16.450	ἀλλʼ εἴ τοι φίλος ἐστί, τεὸν δʼ ὀλοφύρεται ἦτορ,
Iliad 16.451	ἤτοι μέν μιν ἔασον ἐνὶ κρατερῇ ὑσμίνῃ
Iliad 16.452	χέρσʼ ὕπο Πατρόκλοιο Μενοιτιάδαο δαμῆναι·
Iliad 16.453	αὐτὰρ ἐπὴν δὴ τόν γε λίπῃ ψυχή τε καὶ αἰών,
Iliad 16.454	πέμπειν μιν θάνατόν τε φέρειν καὶ νήδυμον ὕπνον
Iliad 16.455	εἰς ὅ κε δὴ Λυκίης εὐρείης δῆμον ἵκωνται,
Iliad 16.456	ἔνθά ἑ ταρχύσουσι κασίγνητοί τε ἔται τε
Iliad 16.457	τύμβῳ τε στήλῃ τε· τὸ γὰρ γέρας ἐστὶ θανόντων.
Iliad 16.458	ὣς ἔφατʼ, οὐδʼ ἀπίθησε πατὴρ ἀνδρῶν τε θεῶν τε·
Iliad 16.459	αἱματοέσσας δὲ ψιάδας κατέχευεν ἔραζε
Iliad 16.460	παῖδα φίλον τιμῶν, τόν οἱ Πάτροκλος ἔμελλε
Iliad 16.461	φθίσειν ἐν Τροίῃ ἐριβώλακι τηλόθι πάτρης.
Iliad 16.462	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες,
Iliad 16.463	ἔνθʼ ἤτοι Πάτροκλος ἀγακλειτὸν Θρασύμηλον,
Iliad 16.464	ὅς ῥʼ ἠῢς θεράπων Σαρπηδόνος ἦεν ἄνακτος,
Iliad 16.465	τὸν βάλε νείαιραν κατὰ γαστέρα, λῦσε δὲ γυῖα.
Iliad 16.466	Σαρπηδὼν δʼ αὐτοῦ μὲν ἀπήμβροτε δουρὶ φαεινῷ
Iliad 16.467	δεύτερον ὁρμηθείς, ὃ δὲ Πήδασον οὔτασεν ἵππον
Iliad 16.468	ἔγχεϊ δεξιὸν ὦμον· ὃ δʼ ἔβραχε θυμὸν ἀΐσθων,
Iliad 16.469	κὰδ δʼ ἔπεσʼ ἐν κονίῃσι μακών, ἀπὸ δʼ ἔπτατο θυμός.
Iliad 16.470	τὼ δὲ διαστήτην, κρίκε δὲ ζυγόν, ἡνία δέ σφι
Iliad 16.471	σύγχυτʼ, ἐπεὶ δὴ κεῖτο παρήορος ἐν κονίῃσι.
Iliad 16.472	τοῖο μὲν Αὐτομέδων δουρικλυτὸς εὕρετο τέκμωρ·
Iliad 16.473	σπασσάμενος τανύηκες ἄορ παχέος παρὰ μηροῦ
Iliad 16.474	ἀΐξας ἀπέκοψε παρήορον οὐδʼ ἐμάτησε·
Iliad 16.475	τὼ δʼ ἰθυνθήτην, ἐν δὲ ῥυτῆρσι τάνυσθεν·
Iliad 16.476	τὼ δʼ αὖτις συνίτην ἔριδος πέρι θυμοβόροιο.
Iliad 16.477	ἔνθʼ αὖ Σαρπηδὼν μὲν ἀπήμβροτε δουρὶ φαεινῷ,
Iliad 16.478	Πατρόκλου δʼ ὑπὲρ ὦμον ἀριστερὸν ἤλυθʼ ἀκωκὴ
Iliad 16.479	ἔγχεος, οὐδʼ ἔβαλʼ αὐτόν· ὃ δʼ ὕστερος ὄρνυτο χαλκῷ
Iliad 16.480	Πάτροκλος· τοῦ δʼ οὐχ ἅλιον βέλος ἔκφυγε χειρός,
Iliad 16.481	ἀλλʼ ἔβαλʼ ἔνθʼ ἄρα τε φρένες ἔρχαται ἀμφʼ ἁδινὸν κῆρ.
Iliad 16.482	ἤριπε δʼ ὡς ὅτε τις δρῦς ἤριπεν ἢ ἀχερωῒς
Iliad 16.483	ἠὲ πίτυς βλωθρή, τήν τʼ οὔρεσι τέκτονες ἄνδρες
Iliad 16.484	ἐξέταμον πελέκεσσι νεήκεσι νήϊον εἶναι·
Iliad 16.485	ὣς ὃ πρόσθʼ ἵππων καὶ δίφρου κεῖτο τανυσθεὶς
Iliad 16.486	βεβρυχὼς κόνιος δεδραγμένος αἱματοέσσης.
Iliad 16.487	ἠΰτε ταῦρον ἔπεφνε λέων ἀγέληφι μετελθὼν
Iliad 16.488	αἴθωνα μεγάθυμον ἐν εἰλιπόδεσσι βόεσσι,
Iliad 16.489	ὤλετό τε στενάχων ὑπὸ γαμφηλῇσι λέοντος,
Iliad 16.490	ὣς ὑπὸ Πατρόκλῳ Λυκίων ἀγὸς ἀσπιστάων
Iliad 16.491	κτεινόμενος μενέαινε, φίλον δʼ ὀνόμηνεν ἑταῖρον·
Iliad 16.492	Γλαῦκε πέπον πολεμιστὰ μετʼ ἀνδράσι νῦν σε μάλα χρὴ
Iliad 16.493	αἰχμητήν τʼ ἔμεναι καὶ θαρσαλέον πολεμιστήν·
Iliad 16.494	νῦν τοι ἐελδέσθω πόλεμος κακός, εἰ θοός ἐσσι.
Iliad 16.495	πρῶτα μὲν ὄτρυνον Λυκίων ἡγήτορας ἄνδρας
Iliad 16.496	πάντῃ ἐποιχόμενος Σαρπηδόνος ἀμφιμάχεσθαι·
Iliad 16.497	αὐτὰρ ἔπειτα καὶ αὐτὸς ἐμεῦ πέρι μάρναο χαλκῷ.
Iliad 16.498	σοὶ γὰρ ἐγὼ καὶ ἔπειτα κατηφείη καὶ ὄνειδος
Iliad 16.499	ἔσσομαι ἤματα πάντα διαμπερές, εἴ κέ μʼ Ἀχαιοὶ
Iliad 16.500	τεύχεα συλήσωσι νεῶν ἐν ἀγῶνι πεσόντα.
Iliad 16.501	ἀλλʼ ἔχεο κρατερῶς, ὄτρυνε δὲ λαὸν ἅπαντα.
Iliad 16.502	ὣς ἄρα μιν εἰπόντα τέλος θανάτοιο κάλυψεν
Iliad 16.503	ὀφθαλμοὺς ῥῖνάς θʼ· ὃ δὲ λὰξ ἐν στήθεσι βαίνων
Iliad 16.504	ἐκ χροὸς ἕλκε δόρυ, προτὶ δὲ φρένες αὐτῷ ἕποντο·
Iliad 16.505	τοῖο δʼ ἅμα ψυχήν τε καὶ ἔγχεος ἐξέρυσʼ αἰχμήν.
Iliad 16.506	Μυρμιδόνες δʼ αὐτοῦ σχέθον ἵππους φυσιόωντας
Iliad 16.507	ἱεμένους φοβέεσθαι, ἐπεὶ λίπον ἅρματʼ ἀνάκτων.
Iliad 16.508	Γλαύκῳ δʼ αἰνὸν ἄχος γένετο φθογγῆς ἀΐοντι·
Iliad 16.509	ὠρίνθη δέ οἱ ἦτορ ὅ τʼ οὐ δύνατο προσαμῦναι.
Iliad 16.510	χειρὶ δʼ ἑλὼν ἐπίεζε βραχίονα· τεῖρε γὰρ αὐτὸν
Iliad 16.511	ἕλκος, ὃ δή μιν Τεῦκρος ἐπεσσύμενον βάλεν ἰῷ
Iliad 16.512	τείχεος ὑψηλοῖο, ἀρὴν ἑτάροισιν ἀμύνων.
Iliad 16.513	εὐχόμενος δʼ ἄρα εἶπεν ἑκηβόλῳ Ἀπόλλωνι·
Iliad 16.514	κλῦθι ἄναξ ὅς που Λυκίης ἐν πίονι δήμῳ
Iliad 16.515	εἲς ἢ ἐνὶ Τροίῃ· δύνασαι δὲ σὺ πάντοσʼ ἀκούειν
Iliad 16.516	ἀνέρι κηδομένῳ, ὡς νῦν ἐμὲ κῆδος ἱκάνει.
Iliad 16.517	ἕλκος μὲν γὰρ ἔχω τόδε καρτερόν, ἀμφὶ δέ μοι χεὶρ
Iliad 16.518	ὀξείῃς ὀδύνῃσιν ἐλήλαται, οὐδέ μοι αἷμα
Iliad 16.519	τερσῆναι δύναται, βαρύθει δέ μοι ὦμος ὑπʼ αὐτοῦ·
Iliad 16.520	ἔγχος δʼ οὐ δύναμαι σχεῖν ἔμπεδον, οὐδὲ μάχεσθαι
Iliad 16.521	ἐλθὼν δυσμενέεσσιν. ἀνὴρ δʼ ὤριστος ὄλωλε
Iliad 16.522	Σαρπηδὼν Διὸς υἱός· ὃ δʼ οὐ οὗ παιδὸς ἀμύνει.
Iliad 16.523	ἀλλὰ σύ πέρ μοι ἄναξ τόδε καρτερὸν ἕλκος ἄκεσσαι,
Iliad 16.524	κοίμησον δʼ ὀδύνας, δὸς δὲ κράτος, ὄφρʼ ἑτάροισι
Iliad 16.525	κεκλόμενος Λυκίοισιν ἐποτρύνω πολεμίζειν,
Iliad 16.526	αὐτός τʼ ἀμφὶ νέκυι κατατεθνηῶτι μάχωμαι.
Iliad 16.527	ὣς ἔφατʼ εὐχόμενος, τοῦ δʼ ἔκλυε Φοῖβος Ἀπόλλων.
Iliad 16.528	αὐτίκα παῦσʼ ὀδύνας ἀπὸ δʼ ἕλκεος ἀργαλέοιο
Iliad 16.529	αἷμα μέλαν τέρσηνε, μένος δέ οἱ ἔμβαλε θυμῷ.
Iliad 16.530	Γλαῦκος δʼ ἔγνω ᾗσιν ἐνὶ φρεσὶ γήθησέν τε
Iliad 16.531	ὅττί οἱ ὦκʼ ἤκουσε μέγας θεὸς εὐξαμένοιο.
Iliad 16.532	πρῶτα μὲν ὄτρυνεν Λυκίων ἡγήτορας ἄνδρας
Iliad 16.533	πάντῃ ἐποιχόμενος Σαρπηδόνος ἀμφιμάχεσθαι·
Iliad 16.534	αὐτὰρ ἔπειτα μετὰ Τρῶας κίε μακρὰ βιβάσθων
Iliad 16.535	Πουλυδάμαντʼ ἔπι Πανθοΐδην καὶ Ἀγήνορα δῖον,
Iliad 16.536	βῆ δὲ μετʼ Αἰνείαν τε καὶ Ἕκτορα χαλκοκορυστήν,
Iliad 16.537	ἀγχοῦ δʼ ἱστάμενος ἔπεα πτερόεντα προσηύδα·
Iliad 16.538	Ἕκτορ νῦν δὴ πάγχυ λελασμένος εἰς ἐπικούρων,
Iliad 16.539	οἳ σέθεν εἵνεκα τῆλε φίλων καὶ πατρίδος αἴης
Iliad 16.540	θυμὸν ἀποφθινύθουσι· σὺ δʼ οὐκ ἐθέλεις ἐπαμύνειν.
Iliad 16.541	κεῖται Σαρπηδὼν Λυκίων ἀγὸς ἀσπιστάων,
Iliad 16.542	ὃς Λυκίην εἴρυτο δίκῃσί τε καὶ σθένεϊ ᾧ·
Iliad 16.543	τὸν δʼ ὑπὸ Πατρόκλῳ δάμασʼ ἔγχεϊ χάλκεος Ἄρης.
Iliad 16.544	ἀλλὰ φίλοι πάρστητε, νεμεσσήθητε δὲ θυμῷ,
Iliad 16.545	μὴ ἀπὸ τεύχεʼ ἕλωνται, ἀεικίσσωσι δὲ νεκρὸν
Iliad 16.546	Μυρμιδόνες, Δαναῶν κεχολωμένοι ὅσσοι ὄλοντο,
Iliad 16.547	τοὺς ἐπὶ νηυσὶ θοῇσιν ἐπέφνομεν ἐγχείῃσιν.
Iliad 16.548	ὣς ἔφατο, Τρῶας δὲ κατὰ κρῆθεν λάβε πένθος
Iliad 16.549	ἄσχετον, οὐκ ἐπιεικτόν, ἐπεί σφισιν ἕρμα πόληος
Iliad 16.550	ἔσκε καὶ ἀλλοδαπός περ ἐών· πολέες γὰρ ἅμʼ αὐτῷ
Iliad 16.551	λαοὶ ἕποντʼ, ἐν δʼ αὐτὸς ἀριστεύεσκε μάχεσθαι·
Iliad 16.552	βὰν δʼ ἰθὺς Δαναῶν λελιημένοι· ἦρχε δʼ ἄρά σφιν
Iliad 16.553	Ἕκτωρ χωόμενος Σαρπηδόνος. αὐτὰρ Ἀχαιοὺς
Iliad 16.554	ὦρσε Μενοιτιάδεω Πατροκλῆος λάσιον κῆρ·
Iliad 16.555	Αἴαντε πρώτω προσέφη μεμαῶτε καὶ αὐτώ·
Iliad 16.556	Αἴαντε νῦν σφῶϊν ἀμύνεσθαι φίλον ἔστω,
Iliad 16.557	οἷοί περ πάρος ἦτε μετʼ ἀνδράσιν ἢ καὶ ἀρείους.
Iliad 16.558	κεῖται ἀνὴρ ὃς πρῶτος ἐσήλατο τεῖχος Ἀχαιῶν
Iliad 16.559	Σαρπηδών· ἀλλʼ εἴ μιν ἀεικισσαίμεθʼ ἑλόντες,
Iliad 16.560	τεύχεά τʼ ὤμοιιν ἀφελοίμεθα, καί τινʼ ἑταίρων
Iliad 16.561	αὐτοῦ ἀμυνομένων δαμασαίμεθα νηλέϊ χαλκῷ.
Iliad 16.562	ὣς ἔφαθʼ, οἳ δὲ καὶ αὐτοὶ ἀλέξασθαι μενέαινον.
Iliad 16.563	οἳ δʼ ἐπεὶ ἀμφοτέρωθεν ἐκαρτύναντο φάλαγγας
Iliad 16.564	Τρῶες καὶ Λύκιοι καὶ Μυρμιδόνες καὶ Ἀχαιοί,
Iliad 16.565	σύμβαλον ἀμφὶ νέκυι κατατεθνηῶτι μάχεσθαι
Iliad 16.566	δεινὸν ἀΰσαντες· μέγα δʼ ἔβραχε τεύχεα φωτῶν.
Iliad 16.567	Ζεὺς δʼ ἐπὶ νύκτʼ ὀλοὴν τάνυσε κρατερῇ ὑσμίνῃ,
Iliad 16.568	ὄφρα φίλῳ περὶ παιδὶ μάχης ὀλοὸς πόνος εἴη.
Iliad 16.569	ὦσαν δὲ πρότεροι Τρῶες ἑλίκωπας Ἀχαιούς·
Iliad 16.570	βλῆτο γὰρ οὔ τι κάκιστος ἀνὴρ μετὰ Μυρμιδόνεσσιν
Iliad 16.571	υἱὸς Ἀγακλῆος μεγαθύμου δῖος Ἐπειγεύς,
Iliad 16.572	ὅς ῥʼ ἐν Βουδείῳ εὖ ναιομένῳ ἤνασσε
Iliad 16.573	τὸ πρίν· ἀτὰρ τότε γʼ ἐσθλὸν ἀνεψιὸν ἐξεναρίξας
Iliad 16.574	ἐς Πηλῆʼ ἱκέτευσε καὶ ἐς Θέτιν ἀργυρόπεζαν·
Iliad 16.575	οἳ δʼ ἅμʼ Ἀχιλλῆϊ ῥηξήνορι πέμπον ἕπεσθαι
Iliad 16.576	Ἴλιον εἰς εὔπωλον, ἵνα Τρώεσσι μάχοιτο.
Iliad 16.577	τόν ῥα τόθʼ ἁπτόμενον νέκυος βάλε φαίδιμος Ἕκτωρ
Iliad 16.578	χερμαδίῳ κεφαλήν· ἣ δʼ ἄνδιχα πᾶσα κεάσθη
Iliad 16.579	ἐν κόρυθι βριαρῇ· ὃ δʼ ἄρα πρηνὴς ἐπὶ νεκρῷ
Iliad 16.580	κάππεσεν, ἀμφὶ δέ μιν θάνατος χύτο θυμοραϊστής.
Iliad 16.581	Πατρόκλῳ δʼ ἄρʼ ἄχος γένετο φθιμένου ἑτάροιο,
Iliad 16.582	ἴθυσεν δὲ διὰ προμάχων ἴρηκι ἐοικὼς
Iliad 16.583	ὠκέϊ, ὅς τʼ ἐφόβησε κολοιούς τε ψῆράς τε·
Iliad 16.584	ὣς ἰθὺς Λυκίων Πατρόκλεες ἱπποκέλευθε
Iliad 16.585	ἔσσυο καὶ Τρώων, κεχόλωσο δὲ κῆρ ἑτάροιο.
Iliad 16.586	καί ῥʼ ἔβαλε Σθενέλαον Ἰθαιμένεος φίλον υἱὸν
Iliad 16.587	αὐχένα χερμαδίῳ, ῥῆξεν δʼ ἀπὸ τοῖο τένοντας.
Iliad 16.588	χώρησαν δʼ ὑπό τε πρόμαχοι καὶ φαίδιμος Ἕκτωρ.
Iliad 16.589	ὅσση δʼ αἰγανέης ῥιπὴ ταναοῖο τέτυκται,
Iliad 16.590	ἥν ῥά τʼ ἀνὴρ ἀφέῃ πειρώμενος ἢ ἐν ἀέθλῳ
Iliad 16.591	ἠὲ καὶ ἐν πολέμῳ δηΐων ὕπο θυμοραϊστέων,
Iliad 16.592	τόσσον ἐχώρησαν Τρῶες, ὤσαντο δʼ Ἀχαιοί.
Iliad 16.593	Γλαῦκος δὲ πρῶτος Λυκίων ἀγὸς ἀσπιστάων
Iliad 16.594	ἐτράπετʼ, ἔκτεινεν δὲ Βαθυκλῆα μεγάθυμον
Iliad 16.595	Χάλκωνος φίλον υἱόν, ὃς Ἑλλάδι οἰκία ναίων
Iliad 16.596	ὄλβῳ τε πλούτῳ τε μετέπρεπε Μυρμιδόνεσσι.
Iliad 16.597	τὸν μὲν ἄρα Γλαῦκος στῆθος μέσον οὔτασε δουρὶ
Iliad 16.598	στρεφθεὶς ἐξαπίνης, ὅτε μιν κατέμαρπτε διώκων·
Iliad 16.599	δούπησεν δὲ πεσών· πυκινὸν δʼ ἄχος ἔλλαβʼ Ἀχαιούς,
Iliad 16.600	ὡς ἔπεσʼ ἐσθλὸς ἀνήρ· μέγα δὲ Τρῶες κεχάροντο,
Iliad 16.601	στὰν δʼ ἀμφʼ αὐτὸν ἰόντες ἀολλέες· οὐδʼ ἄρʼ Ἀχαιοὶ
Iliad 16.602	ἀλκῆς ἐξελάθοντο, μένος δʼ ἰθὺς φέρον αὐτῶν.
Iliad 16.603	ἔνθʼ αὖ Μηριόνης Τρώων ἕλεν ἄνδρα κορυστὴν
Iliad 16.604	Λαόγονον θρασὺν υἱὸν Ὀνήτορος, ὃς Διὸς ἱρεὺς
Iliad 16.605	Ἰδαίου ἐτέτυκτο, θεὸς δʼ ὣς τίετο δήμῳ.
Iliad 16.606	τὸν βάλʼ ὑπὸ γναθμοῖο καὶ οὔατος· ὦκα δὲ θυμὸς
Iliad 16.607	ᾤχετʼ ἀπὸ μελέων, στυγερὸς δʼ ἄρα μιν σκότος εἷλεν.
Iliad 16.608	Αἰνείας δʼ ἐπὶ Μηριόνῃ δόρυ χάλκεον ἧκεν·
Iliad 16.609	ἔλπετο γὰρ τεύξεσθαι ὑπασπίδια προβιβῶντος.
Iliad 16.610	ἀλλʼ ὃ μὲν ἄντα ἰδὼν ἠλεύατο χάλκεον ἔγχος·
Iliad 16.611	πρόσσω γὰρ κατέκυψε, τὸ δʼ ἐξόπιθεν δόρυ μακρὸν
Iliad 16.612	οὔδει ἐνισκίμφθη, ἐπὶ δʼ οὐρίαχος πελεμίχθη
Iliad 16.613	ἔγχεος· ἔνθα δʼ ἔπειτʼ ἀφίει μένος ὄβριμος Ἄρης.
Iliad 16.614	αἰχμὴ δʼ Αἰνείαο κραδαινομένη κατὰ γαίης
Iliad 16.615	ᾤχετʼ, ἐπεί ῥʼ ἅλιον στιβαρῆς ἀπὸ χειρὸς ὄρουσεν.
Iliad 16.616	Αἰνείας δʼ ἄρα θυμὸν ἐχώσατο φώνησέν τε·
Iliad 16.617	Μηριόνη τάχα κέν σε καὶ ὀρχηστήν περ ἐόντα
Iliad 16.618	ἔγχος ἐμὸν κατέπαυσε διαμπερές, εἴ σʼ ἔβαλόν περ.
Iliad 16.619	τὸν δʼ αὖ Μηριόνης δουρικλυτὸς ἀντίον ηὔδα·
Iliad 16.620	Αἰνεία χαλεπόν σε καὶ ἴφθιμόν περ ἐόντα
Iliad 16.621	πάντων ἀνθρώπων σβέσσαι μένος, ὅς κέ σευ ἄντα
Iliad 16.622	ἔλθῃ ἀμυνόμενος· θνητὸς δέ νυ καὶ σὺ τέτυξαι.
Iliad 16.623	εἰ καὶ ἐγώ σε βάλοιμι τυχὼν μέσον ὀξέϊ χαλκῷ,
Iliad 16.624	αἶψά κε καὶ κρατερός περ ἐὼν καὶ χερσὶ πεποιθὼς
Iliad 16.625	εὖχος ἐμοὶ δοίης, ψυχὴν δʼ Ἄϊδι κλυτοπώλῳ.
Iliad 16.626	ὣς φάτο, τὸν δʼ ἐνένιπε Μενοιτίου ἄλκιμος υἱός·
Iliad 16.627	Μηριόνη τί σὺ ταῦτα καὶ ἐσθλὸς ἐὼν ἀγορεύεις;
Iliad 16.628	ὦ πέπον οὔ τοι Τρῶες ὀνειδείοις ἐπέεσσι
Iliad 16.629	νεκροῦ χωρήσουσι· πάρος τινὰ γαῖα καθέξει.
Iliad 16.630	ἐν γὰρ χερσὶ τέλος πολέμου, ἐπέων δʼ ἐνὶ βουλῇ·
Iliad 16.631	τὼ οὔ τι χρὴ μῦθον ὀφέλλειν, ἀλλὰ μάχεσθαι.
Iliad 16.632	ὣς εἰπὼν ὃ μὲν ἦρχʼ, ὃ δʼ ἅμʼ ἕσπετο ἰσόθεος φώς.
Iliad 16.633	τῶν δʼ ὥς τε δρυτόμων ἀνδρῶν ὀρυμαγδὸς ὀρώρει
Iliad 16.634	οὔρεος ἐν βήσσῃς, ἕκαθεν δέ τε γίγνετʼ ἀκουή,
Iliad 16.635	ὣς τῶν ὄρνυτο δοῦπος ἀπὸ χθονὸς εὐρυοδείης
Iliad 16.636	χαλκοῦ τε ῥινοῦ τε βοῶν τʼ εὐποιητάων,
Iliad 16.637	νυσσομένων ξίφεσίν τε καὶ ἔγχεσιν ἀμφιγύοισιν.
Iliad 16.638	οὐδʼ ἂν ἔτι φράδμων περ ἀνὴρ Σαρπηδόνα δῖον
Iliad 16.639	ἔγνω, ἐπεὶ βελέεσσι καὶ αἵματι καὶ κονίῃσιν
Iliad 16.640	ἐκ κεφαλῆς εἴλυτο διαμπερὲς ἐς πόδας ἄκρους.
Iliad 16.641	οἳ δʼ αἰεὶ περὶ νεκρὸν ὁμίλεον, ὡς ὅτε μυῖαι
Iliad 16.642	σταθμῷ ἔνι βρομέωσι περιγλαγέας κατὰ πέλλας
Iliad 16.643	ὥρῃ ἐν εἰαρινῇ, ὅτε τε γλάγος ἄγγεα δεύει·
Iliad 16.644	ὣς ἄρα τοὶ περὶ νεκρὸν ὁμίλεον, οὐδέ ποτε Ζεὺς
Iliad 16.645	τρέψεν ἀπὸ κρατερῆς ὑσμίνης ὄσσε φαεινώ,
Iliad 16.646	ἀλλὰ κατʼ αὐτοὺς αἰὲν ὅρα καὶ φράζετο θυμῷ,
Iliad 16.647	πολλὰ μάλʼ ἀμφὶ φόνῳ Πατρόκλου μερμηρίζων,
Iliad 16.648	ἢ ἤδη καὶ κεῖνον ἐνὶ κρατερῇ ὑσμίνῃ
Iliad 16.649	αὐτοῦ ἐπʼ ἀντιθέῳ Σαρπηδόνι φαίδιμος Ἕκτωρ
Iliad 16.650	χαλκῷ δῃώσῃ, ἀπό τʼ ὤμων τεύχεʼ ἕληται,
Iliad 16.651	ἦ ἔτι καὶ πλεόνεσσιν ὀφέλλειεν πόνον αἰπύν.
Iliad 16.652	ὧδε δέ οἱ φρονέοντι δοάσσατο κέρδιον εἶναι
Iliad 16.653	ὄφρʼ ἠῢς θεράπων Πηληϊάδεω Ἀχιλῆος
Iliad 16.654	ἐξαῦτις Τρῶάς τε καὶ Ἕκτορα χαλκοκορυστὴν
Iliad 16.655	ὤσαιτο προτὶ ἄστυ, πολέων δʼ ἀπὸ θυμὸν ἕλοιτο.
Iliad 16.656	Ἕκτορι δὲ πρωτίστῳ ἀνάλκιδα θυμὸν ἐνῆκεν·
Iliad 16.657	ἐς δίφρον δʼ ἀναβὰς φύγαδʼ ἔτραπε, κέκλετο δʼ ἄλλους
Iliad 16.658	Τρῶας φευγέμεναι· γνῶ γὰρ Διὸς ἱρὰ τάλαντα.
Iliad 16.659	ἔνθʼ οὐδʼ ἴφθιμοι Λύκιοι μένον, ἀλλὰ φόβηθεν
Iliad 16.660	πάντες, ἐπεὶ βασιλῆα ἴδον βεβλαμμένον ἦτορ
Iliad 16.661	κείμενον ἐν νεκύων ἀγύρει· πολέες γὰρ ἐπʼ αὐτῷ
Iliad 16.662	κάππεσον, εὖτʼ ἔριδα κρατερὴν ἐτάνυσσε Κρονίων.
Iliad 16.663	οἳ δʼ ἄρʼ ἀπʼ ὤμοιιν Σαρπηδόνος ἔντεʼ ἕλοντο
Iliad 16.664	χάλκεα μαρμαίροντα, τὰ μὲν κοίλας ἐπὶ νῆας
Iliad 16.665	δῶκε φέρειν ἑτάροισι Μενοιτίου ἄλκιμος υἱός.
Iliad 16.666	καὶ τότʼ Ἀπόλλωνα προσέφη νεφεληγερέτα Ζεύς·
Iliad 16.667	εἰ δʼ ἄγε νῦν φίλε Φοῖβε, κελαινεφὲς αἷμα κάθηρον
Iliad 16.668	ἐλθὼν ἐκ βελέων Σαρπηδόνα, καί μιν ἔπειτα
Iliad 16.669	πολλὸν ἀπὸ πρὸ φέρων λοῦσον ποταμοῖο ῥοῇσι
Iliad 16.670	χρῖσόν τʼ ἀμβροσίῃ, περὶ δʼ ἄμβροτα εἵματα ἕσσον·
Iliad 16.671	πέμπε δέ μιν πομποῖσιν ἅμα κραιπνοῖσι φέρεσθαι
Iliad 16.672	ὕπνῳ καὶ θανάτῳ διδυμάοσιν, οἵ ῥά μιν ὦκα
Iliad 16.673	θήσουσʼ ἐν Λυκίης εὐρείης πίονι δήμῳ,
Iliad 16.674	ἔνθά ἑ ταρχύσουσι κασίγνητοί τε ἔται τε
Iliad 16.675	τύμβῳ τε στήλῃ τε· τὸ γὰρ γέρας ἐστὶ θανόντων.
Iliad 16.676	ὣς ἔφατʼ, οὐδʼ ἄρα πατρὸς ἀνηκούστησεν Ἀπόλλων.
Iliad 16.677	βῆ δὲ κατʼ Ἰδαίων ὀρέων ἐς φύλοπιν αἰνήν,
Iliad 16.678	αὐτίκα δʼ ἐκ βελέων Σαρπηδόνα δῖον ἀείρας
Iliad 16.679	πολλὸν ἀπὸ πρὸ φέρων λοῦσεν ποταμοῖο ῥοῇσι
Iliad 16.680	χρῖσέν τʼ ἀμβροσίῃ, περὶ δʼ ἄμβροτα εἵματα ἕσσε·
Iliad 16.681	πέμπε δέ μιν πομποῖσιν ἅμα κραιπνοῖσι φέρεσθαι,
Iliad 16.682	ὕπνῳ καὶ θανάτῳ διδυμάοσιν, οἵ ῥά μιν ὦκα
Iliad 16.683	κάτθεσαν ἐν Λυκίης εὐρείης πίονι δήμῳ.
Iliad 16.684	Πάτροκλος δʼ ἵπποισι καὶ Αὐτομέδοντι κελεύσας
Iliad 16.685	Τρῶας καὶ Λυκίους μετεκίαθε, καὶ μέγʼ ἀάσθη
Iliad 16.686	νήπιος· εἰ δὲ ἔπος Πηληϊάδαο φύλαξεν
Iliad 16.687	ἦ τʼ ἂν ὑπέκφυγε κῆρα κακὴν μέλανος θανάτοιο.
Iliad 16.688	ἀλλʼ αἰεί τε Διὸς κρείσσων νόος ἠέ περ ἀνδρῶν·
Iliad 16.689	ὅς τε καὶ ἄλκιμον ἄνδρα φοβεῖ καὶ ἀφείλετο νίκην
Iliad 16.690	ῥηϊδίως, ὅτε δʼ αὐτὸς ἐποτρύνῃσι μάχεσθαι·
Iliad 16.691	ὅς οἱ καὶ τότε θυμὸν ἐνὶ στήθεσσιν ἀνῆκεν.
Iliad 16.692	ἔνθα τίνα πρῶτον τίνα δʼ ὕστατον ἐξενάριξας
Iliad 16.693	Πατρόκλεις, ὅτε δή σε θεοὶ θάνατον δὲ κάλεσσαν;
Iliad 16.694	Ἄδρηστον μὲν πρῶτα καὶ Αὐτόνοον καὶ Ἔχεκλον
Iliad 16.695	καὶ Πέριμον Μεγάδην καὶ Ἐπίστορα καὶ Μελάνιππον,
Iliad 16.696	αὐτὰρ ἔπειτʼ Ἔλασον καὶ Μούλιον ἠδὲ Πυλάρτην·
Iliad 16.697	τοὺς ἕλεν· οἳ δʼ ἄλλοι φύγαδε μνώοντο ἕκαστος.
Iliad 16.698	ἔνθά κεν ὑψίπυλον Τροίην ἕλον υἷες Ἀχαιῶν
Iliad 16.699	Πατρόκλου ὑπὸ χερσί, περὶ πρὸ γὰρ ἔγχεϊ θῦεν,
Iliad 16.700	εἰ μὴ Ἀπόλλων Φοῖβος ἐϋδμήτου ἐπὶ πύργου
Iliad 16.701	ἔστη τῷ ὀλοὰ φρονέων, Τρώεσσι δʼ ἀρήγων.
Iliad 16.702	τρὶς μὲν ἐπʼ ἀγκῶνος βῆ τείχεος ὑψηλοῖο
Iliad 16.703	Πάτροκλος, τρὶς δʼ αὐτὸν ἀπεστυφέλιξεν Ἀπόλλων
Iliad 16.704	χείρεσσʼ ἀθανάτῃσι φαεινὴν ἀσπίδα νύσσων.
Iliad 16.705	ἀλλʼ ὅτε δὴ τὸ τέταρτον ἐπέσσυτο δαίμονι ἶσος,
Iliad 16.706	δεινὰ δʼ ὁμοκλήσας ἔπεα πτερόεντα προσηύδα·
Iliad 16.707	χάζεο διογενὲς Πατρόκλεες· οὔ νύ τοι αἶσα
Iliad 16.708	σῷ ὑπὸ δουρὶ πόλιν πέρθαι Τρώων ἀγερώχων,
Iliad 16.709	οὐδʼ ὑπʼ Ἀχιλλῆος, ὅς περ σέο πολλὸν ἀμείνων.
Iliad 16.710	ὣς φάτο, Πάτροκλος δʼ ἀνεχάζετο πολλὸν ὀπίσσω
Iliad 16.711	μῆνιν ἀλευάμενος ἑκατηβόλου Ἀπόλλωνος.
Iliad 16.712	Ἕκτωρ δʼ ἐν Σκαιῇσι πύλῃς ἔχε μώνυχας ἵππους·
Iliad 16.713	δίζε γὰρ ἠὲ μάχοιτο κατὰ κλόνον αὖτις ἐλάσσας,
Iliad 16.714	ἦ λαοὺς ἐς τεῖχος ὁμοκλήσειεν ἀλῆναι.
Iliad 16.715	ταῦτʼ ἄρα οἱ φρονέοντι παρίστατο Φοῖβος Ἀπόλλων
Iliad 16.716	ἀνέρι εἰσάμενος αἰζηῷ τε κρατερῷ τε
Iliad 16.717	Ἀσίῳ, ὃς μήτρως ἦν Ἕκτορος ἱπποδάμοιο
Iliad 16.718	αὐτοκασίγνητος Ἑκάβης, υἱὸς δὲ Δύμαντος,
Iliad 16.719	ὃς Φρυγίῃ ναίεσκε ῥοῇς ἔπι Σαγγαρίοιο·
Iliad 16.720	τῷ μιν ἐεισάμενος προσέφη Διὸς υἱὸς Ἀπόλλων·
Iliad 16.721	Ἕκτορ τίπτε μάχης ἀποπαύεαι; οὐδέ τί σε χρή.
Iliad 16.722	αἴθʼ ὅσον ἥσσων εἰμί, τόσον σέο φέρτερος εἴην·
Iliad 16.723	τώ κε τάχα στυγερῶς πολέμου ἀπερωήσειας.
Iliad 16.724	ἀλλʼ ἄγε Πατρόκλῳ ἔφεπε κρατερώνυχας ἵππους,
Iliad 16.725	αἴ κέν πώς μιν ἕλῃς, δώῃ δέ τοι εὖχος Ἀπόλλων.
Iliad 16.726	ὣς εἰπὼν ὃ μὲν αὖτις ἔβη θεὸς ἂμ πόνον ἀνδρῶν,
Iliad 16.727	Κεβριόνῃ δʼ ἐκέλευσε δαΐφρονι φαίδιμος Ἕκτωρ
Iliad 16.728	ἵππους ἐς πόλεμον πεπληγέμεν. αὐτὰρ Ἀπόλλων
Iliad 16.729	δύσεθʼ ὅμιλον ἰών, ἐν δὲ κλόνον Ἀργείοισιν
Iliad 16.730	ἧκε κακόν, Τρωσὶν δὲ καὶ Ἕκτορι κῦδος ὄπαζεν.
Iliad 16.731	Ἕκτωρ δʼ ἄλλους μὲν Δαναοὺς ἔα οὐδʼ ἐνάριζεν·
Iliad 16.732	αὐτὰρ ὃ Πατρόκλῳ ἔφεπε κρατερώνυχας ἵππους.
Iliad 16.733	Πάτροκλος δʼ ἑτέρωθεν ἀφʼ ἵππων ἆλτο χαμᾶζε
Iliad 16.734	σκαιῇ ἔγχος ἔχων· ἑτέρηφι δὲ λάζετο πέτρον
Iliad 16.735	μάρμαρον ὀκριόεντα τόν οἱ περὶ χεὶρ ἐκάλυψεν,
Iliad 16.736	ἧκε δʼ ἐρεισάμενος, οὐδὲ δὴν χάζετο φωτός,
Iliad 16.737	οὐδʼ ἁλίωσε βέλος, βάλε δʼ Ἕκτορος ἡνιοχῆα
Iliad 16.738	Κεβριόνην νόθον υἱὸν ἀγακλῆος Πριάμοιο
Iliad 16.739	ἵππων ἡνίʼ ἔχοντα μετώπιον ὀξέϊ λᾶϊ.
Iliad 16.740	ἀμφοτέρας δʼ ὀφρῦς σύνελεν λίθος, οὐδέ οἱ ἔσχεν
Iliad 16.741	ὀστέον, ὀφθαλμοὶ δὲ χαμαὶ πέσον ἐν κονίῃσιν
Iliad 16.742	αὐτοῦ πρόσθε ποδῶν· ὃ δʼ ἄρʼ ἀρνευτῆρι ἐοικὼς
Iliad 16.743	κάππεσʼ ἀπʼ εὐεργέος δίφρου, λίπε δʼ ὀστέα θυμός.
Iliad 16.744	τὸν δʼ ἐπικερτομέων προσέφης Πατρόκλεες ἱππεῦ·
Iliad 16.745	ὢ πόποι ἦ μάλʼ ἐλαφρὸς ἀνήρ, ὡς ῥεῖα κυβιστᾷ.
Iliad 16.746	εἰ δή που καὶ πόντῳ ἐν ἰχθυόεντι γένοιτο,
Iliad 16.747	πολλοὺς ἂν κορέσειεν ἀνὴρ ὅδε τήθεα διφῶν
Iliad 16.748	νηὸς ἀποθρῴσκων, εἰ καὶ δυσπέμφελος εἴη,
Iliad 16.749	ὡς νῦν ἐν πεδίῳ ἐξ ἵππων ῥεῖα κυβιστᾷ.
Iliad 16.750	ἦ ῥα καὶ ἐν Τρώεσσι κυβιστητῆρες ἔασιν.
Iliad 16.751	ὣς εἰπὼν ἐπὶ Κεβριόνῃ ἥρωϊ βεβήκει
Iliad 16.752	οἶμα λέοντος ἔχων, ὅς τε σταθμοὺς κεραΐζων
Iliad 16.753	ἔβλητο πρὸς στῆθος, ἑή τέ μιν ὤλεσεν ἀλκή·
Iliad 16.754	ὣς ἐπὶ Κεβριόνῃ Πατρόκλεες ἆλσο μεμαώς.
Iliad 16.755	Ἕκτωρ δʼ αὖθʼ ἑτέρωθεν ἀφʼ ἵππων ἆλτο χαμᾶζε.
Iliad 16.756	τὼ περὶ Κεβριόναο λέονθʼ ὣς δηρινθήτην,
Iliad 16.757	ὥ τʼ ὄρεος κορυφῇσι περὶ κταμένης ἐλάφοιο
Iliad 16.758	ἄμφω πεινάοντε μέγα φρονέοντε μάχεσθον·
Iliad 16.759	ὣς περὶ Κεβριόναο δύω μήστωρες ἀϋτῆς
Iliad 16.760	Πάτροκλός τε Μενοιτιάδης καὶ φαίδιμος Ἕκτωρ
Iliad 16.761	ἵεντʼ ἀλλήλων ταμέειν χρόα νηλέϊ χαλκῷ.
Iliad 16.762	Ἕκτωρ μὲν κεφαλῆφιν ἐπεὶ λάβεν οὐχὶ μεθίει·
Iliad 16.763	Πάτροκλος δʼ ἑτέρωθεν ἔχεν ποδός· οἳ δὲ δὴ ἄλλοι
Iliad 16.764	Τρῶες καὶ Δαναοὶ σύναγον κρατερὴν ὑσμίνην.
Iliad 16.765	ὡς δʼ Εὖρός τε Νότος τʼ ἐριδαίνετον ἀλλήλοιιν
Iliad 16.766	οὔρεος ἐν βήσσῃς βαθέην πελεμιζέμεν ὕλην
Iliad 16.767	φηγόν τε μελίην τε τανύφλοιόν τε κράνειαν,
Iliad 16.768	αἵ τε πρὸς ἀλλήλας ἔβαλον τανυήκεας ὄζους
Iliad 16.769	ἠχῇ θεσπεσίῃ, πάταγος δέ τε ἀγνυμενάων,
Iliad 16.770	ὣς Τρῶες καὶ Ἀχαιοὶ ἐπʼ ἀλλήλοισι θορόντες
Iliad 16.771	δῄουν, οὐδʼ ἕτεροι μνώοντʼ ὀλοοῖο φόβοιο.
Iliad 16.772	πολλὰ δὲ Κεβριόνην ἀμφʼ ὀξέα δοῦρα πεπήγει
Iliad 16.773	ἰοί τε πτερόεντες ἀπὸ νευρῆφι θορόντες,
Iliad 16.774	πολλὰ δὲ χερμάδια μεγάλʼ ἀσπίδας ἐστυφέλιξαν
Iliad 16.775	μαρναμένων ἀμφʼ αὐτόν· ὃ δʼ ἐν στροφάλιγγι κονίης
Iliad 16.776	κεῖτο μέγας μεγαλωστί, λελασμένος ἱπποσυνάων.
Iliad 16.777	ὄφρα μὲν Ἠέλιος μέσον οὐρανὸν ἀμφιβεβήκει,
Iliad 16.778	τόφρα μάλʼ ἀμφοτέρων βέλεʼ ἥπτετο, πῖπτε δὲ λαός·
Iliad 16.779	ἦμος δʼ Ἠέλιος μετενίσετο βουλυτὸν δέ,
Iliad 16.780	καὶ τότε δή ῥʼ ὑπὲρ αἶσαν Ἀχαιοὶ φέρτεροι ἦσαν.
Iliad 16.781	ἐκ μὲν Κεβριόνην βελέων ἥρωα ἔρυσσαν
Iliad 16.782	Τρώων ἐξ ἐνοπῆς, καὶ ἀπʼ ὤμων τεύχεʼ ἕλοντο,
Iliad 16.783	Πάτροκλος δὲ Τρωσὶ κακὰ φρονέων ἐνόρουσε.
Iliad 16.784	τρὶς μὲν ἔπειτʼ ἐπόρουσε θοῷ ἀτάλαντος Ἄρηϊ
Iliad 16.785	σμερδαλέα ἰάχων, τρὶς δʼ ἐννέα φῶτας ἔπεφνεν.
Iliad 16.786	ἀλλʼ ὅτε δὴ τὸ τέταρτον ἐπέσσυτο δαίμονι ἶσος,
Iliad 16.787	ἔνθʼ ἄρα τοι Πάτροκλε φάνη βιότοιο τελευτή·
Iliad 16.788	ἤντετο γάρ τοι Φοῖβος ἐνὶ κρατερῇ ὑσμίνῃ
Iliad 16.789	δεινός· ὃ μὲν τὸν ἰόντα κατὰ κλόνον οὐκ ἐνόησεν,
Iliad 16.790	ἠέρι γὰρ πολλῇ κεκαλυμμένος ἀντεβόλησε·
Iliad 16.791	στῆ δʼ ὄπιθεν, πλῆξεν δὲ μετάφρενον εὐρέε τʼ ὤμω
Iliad 16.792	χειρὶ καταπρηνεῖ, στρεφεδίνηθεν δέ οἱ ὄσσε.
Iliad 16.793	τοῦ δʼ ἀπὸ μὲν κρατὸς κυνέην βάλε Φοῖβος Ἀπόλλων·
Iliad 16.794	ἣ δὲ κυλινδομένη καναχὴν ἔχε ποσσὶν ὑφʼ ἵππων
Iliad 16.795	αὐλῶπις τρυφάλεια, μιάνθησαν δὲ ἔθειραι
Iliad 16.796	αἵματι καὶ κονίῃσι· πάρος γε μὲν οὐ θέμις ἦεν
Iliad 16.797	ἱππόκομον πήληκα μιαίνεσθαι κονίῃσιν,
Iliad 16.798	ἀλλʼ ἀνδρὸς θείοιο κάρη χαρίεν τε μέτωπον
Iliad 16.799	ῥύετʼ Ἀχιλλῆος· τότε δὲ Ζεὺς Ἕκτορι δῶκεν
Iliad 16.800	ᾗ κεφαλῇ φορέειν, σχεδόθεν δέ οἱ ἦεν ὄλεθρος.
Iliad 16.801	πᾶν δέ οἱ ἐν χείρεσσιν ἄγη δολιχόσκιον ἔγχος
Iliad 16.802	βριθὺ μέγα στιβαρὸν κεκορυθμένον· αὐτὰρ ἀπʼ ὤμων
Iliad 16.803	ἀσπὶς σὺν τελαμῶνι χαμαὶ πέσε τερμιόεσσα.
Iliad 16.804	λῦσε δέ οἱ θώρηκα ἄναξ Διὸς υἱὸς Ἀπόλλων.
Iliad 16.805	τὸν δʼ ἄτη φρένας εἷλε, λύθεν δʼ ὑπὸ φαίδιμα γυῖα,
Iliad 16.806	στῆ δὲ ταφών· ὄπιθεν δὲ μετάφρενον ὀξέϊ δουρὶ
Iliad 16.807	ὤμων μεσσηγὺς σχεδόθεν βάλε Δάρδανος ἀνὴρ
Iliad 16.808	Πανθοΐδης Εὔφορβος, ὃς ἡλικίην ἐκέκαστο
Iliad 16.809	ἔγχεΐ θʼ ἱπποσύνῃ τε πόδεσσί τε καρπαλίμοισι·
Iliad 16.810	καὶ γὰρ δὴ τότε φῶτας ἐείκοσι βῆσεν ἀφʼ ἵππων
Iliad 16.811	πρῶτʼ ἐλθὼν σὺν ὄχεσφι διδασκόμενος πολέμοιο·
Iliad 16.812	ὅς τοι πρῶτος ἐφῆκε βέλος Πατρόκλεες ἱππεῦ
Iliad 16.813	οὐδὲ δάμασσʼ· ὃ μὲν αὖτις ἀνέδραμε, μίκτο δʼ ὁμίλῳ,
Iliad 16.814	ἐκ χροὸς ἁρπάξας δόρυ μείλινον, οὐδʼ ὑπέμεινε
Iliad 16.815	Πάτροκλον γυμνόν περ ἐόντʼ ἐν δηϊοτῆτι.
Iliad 16.816	Πάτροκλος δὲ θεοῦ πληγῇ καὶ δουρὶ δαμασθεὶς
Iliad 16.817	ἂψ ἑτάρων εἰς ἔθνος ἐχάζετο κῆρʼ ἀλεείνων.
Iliad 16.818	Ἕκτωρ δʼ ὡς εἶδεν Πατροκλῆα μεγάθυμον
Iliad 16.819	ἂψ ἀναχαζόμενον βεβλημένον ὀξέϊ χαλκῷ,
Iliad 16.820	ἀγχίμολόν ῥά οἱ ἦλθε κατὰ στίχας, οὖτα δὲ δουρὶ
Iliad 16.821	νείατον ἐς κενεῶνα, διὰ πρὸ δὲ χαλκὸν ἔλασσε·
Iliad 16.822	δούπησεν δὲ πεσών, μέγα δʼ ἤκαχε λαὸν Ἀχαιῶν·
Iliad 16.823	ὡς δʼ ὅτε σῦν ἀκάμαντα λέων ἐβιήσατο χάρμῃ,
Iliad 16.824	ὥ τʼ ὄρεος κορυφῇσι μέγα φρονέοντε μάχεσθον
Iliad 16.825	πίδακος ἀμφʼ ὀλίγης· ἐθέλουσι δὲ πιέμεν ἄμφω·
Iliad 16.826	πολλὰ δέ τʼ ἀσθμαίνοντα λέων ἐδάμασσε βίηφιν·
Iliad 16.827	ὣς πολέας πεφνόντα Μενοιτίου ἄλκιμον υἱὸν
Iliad 16.828	Ἕκτωρ Πριαμίδης σχεδὸν ἔγχεϊ θυμὸν ἀπηύρα,
Iliad 16.829	καί οἱ ἐπευχόμενος ἔπεα πτερόεντα προσηύδα·
Iliad 16.830	Πάτροκλʼ ἦ που ἔφησθα πόλιν κεραϊξέμεν ἁμήν,
Iliad 16.831	Τρωϊάδας δὲ γυναῖκας ἐλεύθερον ἦμαρ ἀπούρας
Iliad 16.832	ἄξειν ἐν νήεσσι φίλην ἐς πατρίδα γαῖαν
Iliad 16.833	νήπιε· τάων δὲ πρόσθʼ Ἕκτορος ὠκέες ἵπποι
Iliad 16.834	ποσσὶν ὀρωρέχαται πολεμίζειν· ἔγχεϊ δʼ αὐτὸς
Iliad 16.835	Τρωσὶ φιλοπτολέμοισι μεταπρέπω, ὅ σφιν ἀμύνω
Iliad 16.836	ἦμαρ ἀναγκαῖον· σὲ δέ τʼ ἐνθάδε γῦπες ἔδονται.
Iliad 16.837	ἆ δείλʼ, οὐδέ τοι ἐσθλὸς ἐὼν χραίσμησεν Ἀχιλλεύς,
Iliad 16.838	ὅς πού τοι μάλα πολλὰ μένων ἐπετέλλετʼ ἰόντι·
Iliad 16.839	μή μοι πρὶν ἰέναι Πατρόκλεες ἱπποκέλευθε
Iliad 16.840	νῆας ἔπι γλαφυρὰς πρὶν Ἕκτορος ἀνδροφόνοιο
Iliad 16.841	αἱματόεντα χιτῶνα περὶ στήθεσσι δαΐξαι.
Iliad 16.842	ὥς πού σε προσέφη, σοὶ δὲ φρένας ἄφρονι πεῖθε.
Iliad 16.843	τὸν δʼ ὀλιγοδρανέων προσέφης Πατρόκλεες ἱππεῦ·
Iliad 16.844	ἤδη νῦν Ἕκτορ μεγάλʼ εὔχεο· σοὶ γὰρ ἔδωκε
Iliad 16.845	νίκην Ζεὺς Κρονίδης καὶ Ἀπόλλων, οἵ με δάμασσαν
Iliad 16.846	ῥηιδίως· αὐτοὶ γὰρ ἀπʼ ὤμων τεύχεʼ ἕλοντο.
Iliad 16.847	τοιοῦτοι δʼ εἴ πέρ μοι ἐείκοσιν ἀντεβόλησαν,
Iliad 16.848	πάντές κʼ αὐτόθʼ ὄλοντο ἐμῷ ὑπὸ δουρὶ δαμέντες.
Iliad 16.849	ἀλλά με μοῖρʼ ὀλοὴ καὶ Λητοῦς ἔκτανεν υἱός,
Iliad 16.850	ἀνδρῶν δʼ Εὔφορβος· σὺ δέ με τρίτος ἐξεναρίζεις.
Iliad 16.851	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν·
Iliad 16.852	οὔ θην οὐδʼ αὐτὸς δηρὸν βέῃ, ἀλλά τοι ἤδη
Iliad 16.853	ἄγχι παρέστηκεν θάνατος καὶ μοῖρα κραταιὴ
Iliad 16.854	χερσὶ δαμέντʼ Ἀχιλῆος ἀμύμονος Αἰακίδαο.
Iliad 16.855	ὣς ἄρα μιν εἰπόντα τέλος θανάτοιο κάλυψε·
Iliad 16.856	ψυχὴ δʼ ἐκ ῥεθέων πταμένη Ἄϊδος δὲ βεβήκει
Iliad 16.857	ὃν πότμον γοόωσα λιποῦσʼ ἀνδροτῆτα καὶ ἥβην.
Iliad 16.858	τὸν καὶ τεθνηῶτα προσηύδα φαίδιμος Ἕκτωρ·
Iliad 16.859	Πατρόκλεις τί νύ μοι μαντεύεαι αἰπὺν ὄλεθρον;
Iliad 16.860	τίς δʼ οἶδʼ εἴ κʼ Ἀχιλεὺς Θέτιδος πάϊς ἠϋκόμοιο
Iliad 16.861	φθήῃ ἐμῷ ὑπὸ δουρὶ τυπεὶς ἀπὸ θυμὸν ὀλέσσαι;
Iliad 16.862	ὣς ἄρα φωνήσας δόρυ χάλκεον ἐξ ὠτειλῆς
Iliad 16.863	εἴρυσε λὰξ προσβάς, τὸν δʼ ὕπτιον ὦσʼ ἀπὸ δουρός.
Iliad 16.864	αὐτίκα δὲ ξὺν δουρὶ μετʼ Αὐτομέδοντα βεβήκει
Iliad 16.865	ἀντίθεον θεράποντα ποδώκεος Αἰακίδαο·
Iliad 16.866	ἵετο γὰρ βαλέειν· τὸν δʼ ἔκφερον ὠκέες ἵπποι
Iliad 16.867	ἄμβροτοι, οὓς Πηλῆϊ θεοὶ δόσαν ἀγλαὰ δῶρα.
Iliad 17.1	οὐδʼ ἔλαθʼ Ἀτρέος υἱὸν ἀρηΐφιλον Μενέλαον
Iliad 17.2	Πάτροκλος Τρώεσσι δαμεὶς ἐν δηϊοτῆτι.
Iliad 17.3	βῆ δὲ διὰ προμάχων κεκορυθμένος αἴθοπι χαλκῷ,
Iliad 17.4	ἀμφὶ δʼ ἄρʼ αὐτῷ βαῖνʼ ὥς τις περὶ πόρτακι μήτηρ
Iliad 17.5	πρωτοτόκος κινυρὴ οὐ πρὶν εἰδυῖα τόκοιο·
Iliad 17.6	ὣς περὶ Πατρόκλῳ βαῖνε ξανθὸς Μενέλαος.
Iliad 17.7	πρόσθε δέ οἱ δόρυ τʼ ἔσχε καὶ ἀσπίδα πάντοσʼ ἐΐσην,
Iliad 17.8	τὸν κτάμεναι μεμαὼς ὅς τις τοῦ γʼ ἀντίος ἔλθοι.
Iliad 17.9	οὐδʼ ἄρα Πάνθου υἱὸς ἐϋμμελίης ἀμέλησε
Iliad 17.10	Πατρόκλοιο πεσόντος ἀμύμονος· ἄγχι δʼ ἄρʼ αὐτοῦ
Iliad 17.11	ἔστη, καὶ προσέειπεν ἀρηΐφιλον Μενέλαον·
Iliad 17.12	Ἀτρεΐδη Μενέλαε διοτρεφὲς ὄρχαμε λαῶν
Iliad 17.13	χάζεο, λεῖπε δὲ νεκρόν, ἔα δʼ ἔναρα βροτόεντα·
Iliad 17.14	οὐ γάρ τις πρότερος Τρώων κλειτῶν τʼ ἐπικούρων
Iliad 17.15	Πάτροκλον βάλε δουρὶ κατὰ κρατερὴν ὑσμίνην·
Iliad 17.16	τώ με ἔα κλέος ἐσθλὸν ἐνὶ Τρώεσσιν ἀρέσθαι,
Iliad 17.17	μή σε βάλω, ἀπὸ δὲ μελιηδέα θυμὸν ἕλωμαι.
Iliad 17.18	τὸν δὲ μέγʼ ὀχθήσας προσέφη ξανθὸς Μενέλαος·
Iliad 17.19	Ζεῦ πάτερ οὐ μὲν καλὸν ὑπέρβιον εὐχετάασθαι.
Iliad 17.20	οὔτʼ οὖν παρδάλιος τόσσον μένος οὔτε λέοντος
Iliad 17.21	οὔτε συὸς κάπρου ὀλοόφρονος, οὗ τε μέγιστος
Iliad 17.22	θυμὸς ἐνὶ στήθεσσι περὶ σθένεϊ βλεμεαίνει,
Iliad 17.23	ὅσσον Πάνθου υἷες ἐϋμμελίαι φρονέουσιν.
Iliad 17.24	οὐδὲ μὲν οὐδὲ βίη Ὑπερήνορος ἱπποδάμοιο
Iliad 17.25	ἧς ἥβης ἀπόνηθʼ, ὅτε μʼ ὤνατο καί μʼ ὑπέμεινε
Iliad 17.26	καί μʼ ἔφατʼ ἐν Δαναοῖσιν ἐλέγχιστον πολεμιστὴν
Iliad 17.27	ἔμμεναι· οὐδέ ἕ φημι πόδεσσί γε οἷσι κιόντα
Iliad 17.28	εὐφρῆναι ἄλοχόν τε φίλην κεδνούς τε τοκῆας.
Iliad 17.29	ὥς θην καὶ σὸν ἐγὼ λύσω μένος εἴ κέ μευ ἄντα
Iliad 17.30	στήῃς· ἀλλά σʼ ἔγωγʼ ἀναχωρήσαντα κελεύω
Iliad 17.31	ἐς πληθὺν ἰέναι, μηδʼ ἀντίος ἵστασʼ ἐμεῖο
Iliad 17.32	πρίν τι κακὸν παθέειν· ῥεχθὲν δέ τε νήπιος ἔγνω.
Iliad 17.33	ὣς φάτο, τὸν δʼ οὐ πεῖθεν· ἀμειβόμενος δὲ προσηύδα·
Iliad 17.34	νῦν μὲν δὴ Μενέλαε διοτρεφὲς ἦ μάλα τείσεις
Iliad 17.35	γνωτὸν ἐμὸν τὸν ἔπεφνες, ἐπευχόμενος δʼ ἀγορεύεις,
Iliad 17.36	χήρωσας δὲ γυναῖκα μυχῷ θαλάμοιο νέοιο,
Iliad 17.37	ἀρητὸν δὲ τοκεῦσι γόον καὶ πένθος ἔθηκας.
Iliad 17.38	ἦ κέ σφιν δειλοῖσι γόου κατάπαυμα γενοίμην
Iliad 17.39	εἴ κεν ἐγὼ κεφαλήν τε τεὴν καὶ τεύχεʼ ἐνείκας
Iliad 17.40	Πάνθῳ ἐν χείρεσσι βάλω καὶ Φρόντιδι δίῃ.
Iliad 17.41	ἀλλʼ οὐ μὰν ἔτι δηρὸν ἀπείρητος πόνος ἔσται
Iliad 17.42	οὐδʼ ἔτʼ ἀδήριτος ἤτʼ ἀλκῆς ἤτε φόβοιο.
Iliad 17.43	ὣς εἰπὼν οὔτησε κατʼ ἀσπίδα πάντοσʼ ἐΐσην·
Iliad 17.44	οὐδʼ ἔρρηξεν χαλκός, ἀνεγνάμφθη δέ οἱ αἰχμὴ
Iliad 17.45	ἀσπίδʼ ἐνὶ κρατερῇ· ὃ δὲ δεύτερος ὄρνυτο χαλκῷ
Iliad 17.46	Ἀτρεΐδης Μενέλαος ἐπευξάμενος Διὶ πατρί·
Iliad 17.47	ἂψ δʼ ἀναχαζομένοιο κατὰ στομάχοιο θέμεθλα
Iliad 17.48	νύξʼ, ἐπὶ δʼ αὐτὸς ἔρεισε βαρείῃ χειρὶ πιθήσας·
Iliad 17.49	ἀντικρὺ δʼ ἁπαλοῖο διʼ αὐχένος ἤλυθʼ ἀκωκή,
Iliad 17.50	δούπησεν δὲ πεσών, ἀράβησε δὲ τεύχεʼ ἐπʼ αὐτῷ.
Iliad 17.51	αἵματί οἱ δεύοντο κόμαι Χαρίτεσσιν ὁμοῖαι
Iliad 17.52	πλοχμοί θʼ, οἳ χρυσῷ τε καὶ ἀργύρῳ ἐσφήκωντο.
Iliad 17.53	οἷον δὲ τρέφει ἔρνος ἀνὴρ ἐριθηλὲς ἐλαίης
Iliad 17.54	χώρῳ ἐν οἰοπόλῳ, ὅθʼ ἅλις ἀναβέβροχεν ὕδωρ,
Iliad 17.55	καλὸν τηλεθάον· τὸ δέ τε πνοιαὶ δονέουσι
Iliad 17.56	παντοίων ἀνέμων, καί τε βρύει ἄνθεϊ λευκῷ·
Iliad 17.57	ἐλθὼν δʼ ἐξαπίνης ἄνεμος σὺν λαίλαπι πολλῇ
Iliad 17.58	βόθρου τʼ ἐξέστρεψε καὶ ἐξετάνυσσʼ ἐπὶ γαίῃ·
Iliad 17.59	τοῖον Πάνθου υἱὸν ἐϋμμελίην Εὔφορβον
Iliad 17.60	Ἀτρεΐδης Μενέλαος ἐπεὶ κτάνε τεύχεʼ ἐσύλα.
Iliad 17.61	ὡς δʼ ὅτε τίς τε λέων ὀρεσίτροφος ἀλκὶ πεποιθὼς
Iliad 17.62	βοσκομένης ἀγέλης βοῦν ἁρπάσῃ ἥ τις ἀρίστη·
Iliad 17.63	τῆς δʼ ἐξ αὐχένʼ ἔαξε λαβὼν κρατεροῖσιν ὀδοῦσι
Iliad 17.64	πρῶτον, ἔπειτα δέ θʼ αἷμα καὶ ἔγκατα πάντα λαφύσσει
Iliad 17.65	δῃῶν· ἀμφὶ δὲ τόν γε κύνες τʼ ἄνδρές τε νομῆες
Iliad 17.66	πολλὰ μάλʼ ἰύζουσιν ἀπόπροθεν οὐδʼ ἐθέλουσιν
Iliad 17.67	ἀντίον ἐλθέμεναι· μάλα γὰρ χλωρὸν δέος αἱρεῖ·
Iliad 17.68	ὣς τῶν οὔ τινι θυμὸς ἐνὶ στήθεσσιν ἐτόλμα
Iliad 17.69	ἀντίον ἐλθέμεναι Μενελάου κυδαλίμοιο.
Iliad 17.70	ἔνθά κε ῥεῖα φέροι κλυτὰ τεύχεα Πανθοΐδαο
Iliad 17.71	Ἀτρεΐδης, εἰ μή οἱ ἀγάσσατο Φοῖβος Ἀπόλλων,
Iliad 17.72	ὅς ῥά οἱ Ἕκτορʼ ἐπῶρσε θοῷ ἀτάλαντον Ἄρηϊ
Iliad 17.73	ἀνέρι εἰσάμενος Κικόνων ἡγήτορι Μέντῃ·
Iliad 17.74	καί μιν φωνήσας ἔπεα πτερόεντα προσηύδα·
Iliad 17.75	Ἕκτορ νῦν σὺ μὲν ὧδε θέεις ἀκίχητα διώκων
Iliad 17.76	ἵππους Αἰακίδαο δαΐφρονος· οἳ δʼ ἀλεγεινοὶ
Iliad 17.77	ἀνδράσι γε θνητοῖσι δαμήμεναι ἠδʼ ὀχέεσθαι
Iliad 17.78	ἄλλῳ γʼ ἢ Ἀχιλῆϊ, τὸν ἀθανάτη τέκε μήτηρ.
Iliad 17.79	τόφρα δέ τοι Μενέλαος ἀρήϊος Ἀτρέος υἱὸς
Iliad 17.80	Πατρόκλῳ περιβὰς Τρώων τὸν ἄριστον ἔπεφνε
Iliad 17.81	Πανθοΐδην Εὔφορβον, ἔπαυσε δὲ θούριδος ἀλκῆς.
Iliad 17.82	ὣς εἰπὼν ὃ μὲν αὖτις ἔβη θεὸς ἂμ πόνον ἀνδρῶν,
Iliad 17.83	Ἕκτορα δʼ αἰνὸν ἄχος πύκασε φρένας ἀμφὶ μελαίνας·
Iliad 17.84	πάπτηνεν δʼ ἄρʼ ἔπειτα κατὰ στίχας, αὐτίκα δʼ ἔγνω
Iliad 17.85	τὸν μὲν ἀπαινύμενον κλυτὰ τεύχεα, τὸν δʼ ἐπὶ γαίῃ
Iliad 17.86	κείμενον· ἔρρει δʼ αἷμα κατʼ οὐταμένην ὠτειλήν.
Iliad 17.87	βῆ δὲ διὰ προμάχων κεκορυθμένος αἴθοπι χαλκῷ
Iliad 17.88	ὀξέα κεκλήγων φλογὶ εἴκελος Ἡφαίστοιο
Iliad 17.89	ἀσβέστῳ· οὐδʼ υἱὸν λάθεν Ἀτρέος ὀξὺ βοήσας·
Iliad 17.90	ὀχθήσας δʼ ἄρα εἶπε πρὸς ὃν μεγαλήτορα θυμόν·
Iliad 17.91	ὤ μοι ἐγὼν εἰ μέν κε λίπω κάτα τεύχεα καλὰ
Iliad 17.92	Πάτροκλόν θʼ, ὃς κεῖται ἐμῆς ἕνεκʼ ἐνθάδε τιμῆς,
Iliad 17.93	μή τίς μοι Δαναῶν νεμεσήσεται ὅς κεν ἴδηται.
Iliad 17.94	εἰ δέ κεν Ἕκτορι μοῦνος ἐὼν καὶ Τρωσὶ μάχωμαι
Iliad 17.95	αἰδεσθείς, μή πώς με περιστήωσʼ ἕνα πολλοί·
Iliad 17.96	Τρῶας δʼ ἐνθάδε πάντας ἄγει κορυθαίολος Ἕκτωρ.
Iliad 17.97	ἀλλὰ τί ἤ μοι ταῦτα φίλος διελέξατο θυμός;
Iliad 17.98	ὁππότʼ ἀνὴρ ἐθέλῃ πρὸς δαίμονα φωτὶ μάχεσθαι
Iliad 17.99	ὅν κε θεὸς τιμᾷ, τάχα οἱ μέγα πῆμα κυλίσθη.
Iliad 17.100	τώ μʼ οὔ τις Δαναῶν νεμεσήσεται ὅς κεν ἴδηται
Iliad 17.101	Ἕκτορι χωρήσαντʼ, ἐπεὶ ἐκ θεόφιν πολεμίζει.
Iliad 17.102	εἰ δέ που Αἴαντός γε βοὴν ἀγαθοῖο πυθοίμην,
Iliad 17.103	ἄμφω κʼ αὖτις ἰόντες ἐπιμνησαίμεθα χάρμης
Iliad 17.104	καὶ πρὸς δαίμονά περ, εἴ πως ἐρυσαίμεθα νεκρὸν
Iliad 17.105	Πηλεΐδῃ Ἀχιλῆϊ· κακῶν δέ κε φέρτατον εἴη.
Iliad 17.106	εἷος ὁ ταῦθʼ ὅρμαινε κατὰ φρένα καὶ κατὰ θυμὸν
Iliad 17.107	τόφρα δʼ ἐπὶ Τρώων στίχες ἤλυθον· ἦρχε δʼ ἄρʼ Ἕκτωρ.
Iliad 17.108	αὐτὰρ ὅ γʼ ἐξοπίσω ἀνεχάζετο, λεῖπε δὲ νεκρὸν
Iliad 17.109	ἐντροπαλιζόμενος ὥς τε λὶς ἠϋγένειος,
Iliad 17.110	ὅν ῥα κύνες τε καὶ ἄνδρες ἀπὸ σταθμοῖο δίωνται
Iliad 17.111	ἔγχεσι καὶ φωνῇ· τοῦ δʼ ἐν φρεσὶν ἄλκιμον ἦτορ
Iliad 17.112	παχνοῦται, ἀέκων δέ τʼ ἔβη ἀπὸ μεσσαύλοιο·
Iliad 17.113	ὣς ἀπὸ Πατρόκλοιο κίε ξανθὸς Μενέλαος.
Iliad 17.114	στῆ δὲ μεταστρεφθεὶς ἐπεὶ ἵκετο ἔθνος ἑταίρων
Iliad 17.115	παπταίνων Αἴαντα μέγαν Τελαμώνιον υἱόν.
Iliad 17.116	τὸν δὲ μάλʼ αἶψʼ ἐνόησε μάχης ἐπʼ ἀριστερὰ πάσης
Iliad 17.117	θαρσύνονθʼ ἑτάρους καὶ ἐποτρύνοντα μάχεσθαι·
Iliad 17.118	θεσπέσιον γάρ σφιν φόβον ἔμβαλε Φοῖβος Ἀπόλλων·
Iliad 17.119	βῆ δὲ θέειν, εἶθαρ δὲ παριστάμενος ἔπος ηὔδα.
Iliad 17.120	Αἶαν δεῦρο πέπον, περὶ Πατρόκλοιο θανόντος
Iliad 17.121	σπεύσομεν, αἴ κε νέκυν περ Ἀχιλλῆϊ προφέρωμεν
Iliad 17.122	γυμνόν· ἀτὰρ τά γε τεύχεʼ ἔχει κορυθαίολος Ἕκτωρ.
Iliad 17.123	ὣς ἔφατʼ, Αἴαντι δὲ δαΐφρονι θυμὸν ὄρινε·
Iliad 17.124	βῆ δὲ διὰ προμάχων, ἅμα δὲ ξανθὸς Μενέλαος.
Iliad 17.125	Ἕκτωρ μὲν Πάτροκλον ἐπεὶ κλυτὰ τεύχεʼ ἀπηύρα,
Iliad 17.126	ἕλχʼ ἵνʼ ἀπʼ ὤμοιιν κεφαλὴν τάμοι ὀξέϊ χαλκῷ,
Iliad 17.127	τὸν δὲ νέκυν Τρῳῇσιν ἐρυσσάμενος κυσὶ δοίη.
Iliad 17.128	Αἴας δʼ ἐγγύθεν ἦλθε φέρων σάκος ἠΰτε πύργον·
Iliad 17.129	Ἕκτωρ δʼ ἂψ ἐς ὅμιλον ἰὼν ἀνεχάζεθʼ ἑταίρων,
Iliad 17.130	ἐς δίφρον δʼ ἀνόρουσε· δίδου δʼ ὅ γε τεύχεα καλὰ
Iliad 17.131	Τρωσὶ φέρειν προτὶ ἄστυ, μέγα κλέος ἔμμεναι αὐτῷ.
Iliad 17.132	Αἴας δʼ ἀμφὶ Μενοιτιάδῃ σάκος εὐρὺ καλύψας
Iliad 17.133	ἑστήκει ὥς τίς τε λέων περὶ οἷσι τέκεσσιν,
Iliad 17.134	ᾧ ῥά τε νήπιʼ ἄγοντι συναντήσωνται ἐν ὕλῃ
Iliad 17.135	ἄνδρες ἐπακτῆρες· ὃ δέ τε σθένεϊ βλεμεαίνει,
Iliad 17.136	πᾶν δέ τʼ ἐπισκύνιον κάτω ἕλκεται ὄσσε καλύπτων·
Iliad 17.137	ὣς Αἴας περὶ Πατρόκλῳ ἥρωϊ βεβήκει.
Iliad 17.138	Ἀτρεΐδης δʼ ἑτέρωθεν ἀρηΐφιλος Μενέλαος
Iliad 17.139	ἑστήκει, μέγα πένθος ἐνὶ στήθεσσιν ἀέξων.
Iliad 17.140	Γλαῦκος δʼ Ἱππολόχοιο πάϊς Λυκίων ἀγὸς ἀνδρῶν
Iliad 17.141	Ἕκτορʼ ὑπόδρα ἰδὼν χαλεπῷ ἠνίπαπε μύθῳ·
Iliad 17.142	Ἕκτορ εἶδος ἄριστε μάχης ἄρα πολλὸν ἐδεύεο.
Iliad 17.143	ἦ σʼ αὔτως κλέος ἐσθλὸν ἔχει φύξηλιν ἐόντα.
Iliad 17.144	φράζεο νῦν ὅππως κε πόλιν καὶ ἄστυ σαώσῃς
Iliad 17.145	οἶος σὺν λαοῖς τοὶ Ἰλίῳ ἐγγεγάασιν·
Iliad 17.146	οὐ γάρ τις Λυκίων γε μαχησόμενος Δαναοῖσιν
Iliad 17.147	εἶσι περὶ πτόλιος, ἐπεὶ οὐκ ἄρα τις χάρις ἦεν
Iliad 17.148	μάρνασθαι δηΐοισιν ἐπʼ ἀνδράσι νωλεμὲς αἰεί.
Iliad 17.149	πῶς κε σὺ χείρονα φῶτα σαώσειας μεθʼ ὅμιλον
Iliad 17.150	σχέτλιʼ, ἐπεὶ Σαρπηδόνʼ ἅμα ξεῖνον καὶ ἑταῖρον
Iliad 17.151	κάλλιπες Ἀργείοισιν ἕλωρ καὶ κύρμα γενέσθαι,
Iliad 17.152	ὅς τοι πόλλʼ ὄφελος γένετο πτόλεΐ τε καὶ αὐτῷ
Iliad 17.153	ζωὸς ἐών· νῦν δʼ οὔ οἱ ἀλαλκέμεναι κύνας ἔτλης.
Iliad 17.154	τὼ νῦν εἴ τις ἐμοὶ Λυκίων ἐπιπείσεται ἀνδρῶν
Iliad 17.155	οἴκαδʼ ἴμεν, Τροίῃ δὲ πεφήσεται αἰπὺς ὄλεθρος.
Iliad 17.156	εἰ γὰρ νῦν Τρώεσσι μένος πολυθαρσὲς ἐνείη
Iliad 17.157	ἄτρομον, οἷόν τʼ ἄνδρας ἐσέρχεται οἳ περὶ πάτρης
Iliad 17.158	ἀνδράσι δυσμενέεσσι πόνον καὶ δῆριν ἔθεντο,
Iliad 17.159	αἶψά κε Πάτροκλον ἐρυσαίμεθα Ἴλιον εἴσω.
Iliad 17.160	εἰ δʼ οὗτος προτὶ ἄστυ μέγα Πριάμοιο ἄνακτος
Iliad 17.161	ἔλθοι τεθνηὼς καί μιν ἐρυσαίμεθα χάρμης,
Iliad 17.162	αἶψά κεν Ἀργεῖοι Σαρπηδόνος ἔντεα καλὰ
Iliad 17.163	λύσειαν, καί κʼ αὐτὸν ἀγοίμεθα Ἴλιον εἴσω·
Iliad 17.164	τοίου γὰρ θεράπων πέφατʼ ἀνέρος, ὃς μέγʼ ἄριστος
Iliad 17.165	Ἀργείων παρὰ νηυσὶ καὶ ἀγχέμαχοι θεράποντες.
Iliad 17.166	ἀλλὰ σύ γʼ Αἴαντος μεγαλήτορος οὐκ ἐτάλασσας
Iliad 17.167	στήμεναι ἄντα κατʼ ὄσσε ἰδὼν δηΐων ἐν ἀϋτῇ,
Iliad 17.168	οὐδʼ ἰθὺς μαχέσασθαι, ἐπεὶ σέο φέρτερός ἐστι.
Iliad 17.169	τὸν δʼ ἄρʼ ὑπόδρα ἰδὼν προσέφη κορυθαίολος Ἕκτωρ·
Iliad 17.170	Γλαῦκε τί ἢ δὲ σὺ τοῖος ἐὼν ὑπέροπλον ἔειπες;
Iliad 17.171	ὢ πόποι ἦ τʼ ἐφάμην σὲ περὶ φρένας ἔμμεναι ἄλλων
Iliad 17.172	τῶν ὅσσοι Λυκίην ἐριβώλακα ναιετάουσι·
Iliad 17.173	νῦν δέ σευ ὠνοσάμην πάγχυ φρένας οἷον ἔειπες,
Iliad 17.174	ὅς τέ με φῂς Αἴαντα πελώριον οὐχ ὑπομεῖναι.
Iliad 17.175	οὔ τοι ἐγὼν ἔρριγα μάχην οὐδὲ κτύπον ἵππων·
Iliad 17.176	ἀλλʼ αἰεί τε Διὸς κρείσσων νόος αἰγιόχοιο,
Iliad 17.177	ὅς τε καὶ ἄλκιμον ἄνδρα φοβεῖ καὶ ἀφείλετο νίκην
Iliad 17.178	ῥηϊδίως, ὁτὲ δʼ αὐτὸς ἐποτρύνει μαχέσασθαι.
Iliad 17.179	ἀλλʼ ἄγε δεῦρο πέπον, παρʼ ἔμʼ ἵστασο καὶ ἴδε ἔργον,
Iliad 17.180	ἠὲ πανημέριος κακὸς ἔσσομαι, ὡς ἀγορεύεις,
Iliad 17.181	ἦ τινα καὶ Δαναῶν ἀλκῆς μάλα περ μεμαῶτα
Iliad 17.182	σχήσω ἀμυνέμεναι περὶ Πατρόκλοιο θανόντος.
Iliad 17.183	ὣς εἰπὼν Τρώεσσιν ἐκέκλετο μακρὸν ἀΰσας·
Iliad 17.184	Τρῶες καὶ Λύκιοι καὶ Δάρδανοι ἀγχιμαχηταί,
Iliad 17.185	ἀνέρες ἔστε φίλοι, μνήσασθε δὲ θούριδος ἀλκῆς,
Iliad 17.186	ὄφρʼ ἂν ἐγὼν Ἀχιλῆος ἀμύμονος ἔντεα δύω
Iliad 17.187	καλά, τὰ Πατρόκλοιο βίην ἐνάριξα κατακτάς.
Iliad 17.188	ὣς ἄρα φωνήσας ἀπέβη κορυθαίολος Ἕκτωρ
Iliad 17.189	δηΐου ἐκ πολέμοιο· θέων δʼ ἐκίχανεν ἑταίρους
Iliad 17.190	ὦκα μάλʼ οὔ πω τῆλε ποσὶ κραιπνοῖσι μετασπών,
Iliad 17.191	οἳ προτὶ ἄστυ φέρον κλυτὰ τεύχεα Πηλεΐωνος.
Iliad 17.192	στὰς δʼ ἀπάνευθε μάχης πολυδακρύου ἔντεʼ ἄμειβεν·
Iliad 17.193	ἤτοι ὃ μὲν τὰ ἃ δῶκε φέρειν προτὶ Ἴλιον ἱρὴν
Iliad 17.194	Τρωσὶ φιλοπτολέμοισιν, ὃ δʼ ἄμβροτα τεύχεα δῦνε
Iliad 17.195	Πηλεΐδεω Ἀχιλῆος ἅ οἱ θεοὶ Οὐρανίωνες
Iliad 17.196	πατρὶ φίλῳ ἔπορον· ὃ δʼ ἄρα ᾧ παιδὶ ὄπασσε
Iliad 17.197	γηράς· ἀλλʼ οὐχ υἱὸς ἐν ἔντεσι πατρὸς ἐγήρα.
Iliad 17.198	τὸν δʼ ὡς οὖν ἀπάνευθεν ἴδεν νεφεληγερέτα Ζεὺς
Iliad 17.199	τεύχεσι Πηλεΐδαο κορυσσόμενον θείοιο,
Iliad 17.200	κινήσας ῥα κάρη προτὶ ὃν μυθήσατο θυμόν·
Iliad 17.201	ἆ δείλʼ οὐδέ τί τοι θάνατος καταθύμιός ἐστιν
Iliad 17.202	ὃς δή τοι σχεδὸν εἶσι· σὺ δʼ ἄμβροτα τεύχεα δύνεις
Iliad 17.203	ἀνδρὸς ἀριστῆος, τόν τε τρομέουσι καὶ ἄλλοι·
Iliad 17.204	τοῦ δὴ ἑταῖρον ἔπεφνες ἐνηέα τε κρατερόν τε,
Iliad 17.205	τεύχεα δʼ οὐ κατὰ κόσμον ἀπὸ κρατός τε καὶ ὤμων
Iliad 17.206	εἵλευ· ἀτάρ τοι νῦν γε μέγα κράτος ἐγγυαλίξω,
Iliad 17.207	τῶν ποινὴν ὅ τοι οὔ τι μάχης ἐκνοστήσαντι
Iliad 17.208	δέξεται Ἀνδρομάχη κλυτὰ τεύχεα Πηλεΐωνος.
Iliad 17.209	ἦ καὶ κυανέῃσιν ἐπʼ ὀφρύσι νεῦσε Κρονίων.
Iliad 17.210	Ἕκτορι δʼ ἥρμοσε τεύχεʼ ἐπὶ χροΐ, δῦ δέ μιν Ἄρης
Iliad 17.211	δεινὸς ἐνυάλιος, πλῆσθεν δʼ ἄρα οἱ μέλεʼ ἐντὸς
Iliad 17.212	ἀλκῆς καὶ σθένεος· μετὰ δὲ κλειτοὺς ἐπικούρους
Iliad 17.213	βῆ ῥα μέγα ἰάχων· ἰνδάλλετο δέ σφισι πᾶσι
Iliad 17.214	τεύχεσι λαμπόμενος μεγαθύμου Πηλεΐωνος.
Iliad 17.215	ὄτρυνεν δὲ ἕκαστον ἐποιχόμενος ἐπέεσσι
Iliad 17.216	Μέσθλην τε Γλαῦκόν τε Μέδοντά τε Θερσίλοχόν τε
Iliad 17.217	Ἀστεροπαῖόν τε Δεισήνορά θʼ Ἱππόθοόν τε
Iliad 17.218	Φόρκυν τε Χρομίον τε καὶ Ἔννομον οἰωνιστήν·
Iliad 17.219	τοὺς ὅ γʼ ἐποτρύνων ἔπεα πτερόεντα προσηύδα·
Iliad 17.220	κέκλυτε μυρία φῦλα περικτιόνων ἐπικούρων·
Iliad 17.221	οὐ γὰρ ἐγὼ πληθὺν διζήμενος οὐδὲ χατίζων
Iliad 17.222	ἐνθάδʼ ἀφʼ ὑμετέρων πολίων ἤγειρα ἕκαστον,
Iliad 17.223	ἀλλʼ ἵνα μοι Τρώων ἀλόχους καὶ νήπια τέκνα
Iliad 17.224	προφρονέως ῥύοισθε φιλοπτολέμων ὑπʼ Ἀχαιῶν.
Iliad 17.225	τὰ φρονέων δώροισι κατατρύχω καὶ ἐδωδῇ
Iliad 17.226	λαούς, ὑμέτερον δὲ ἑκάστου θυμὸν ἀέξω.
Iliad 17.227	τώ τις νῦν ἰθὺς τετραμμένος ἢ ἀπολέσθω
Iliad 17.228	ἠὲ σαωθήτω· ἣ γὰρ πολέμου ὀαριστύς.
Iliad 17.229	ὃς δέ κε Πάτροκλον καὶ τεθνηῶτά περ ἔμπης
Iliad 17.230	Τρῶας ἐς ἱπποδάμους ἐρύσῃ, εἴξῃ δέ οἱ Αἴας,
Iliad 17.231	ἥμισυ τῷ ἐνάρων ἀποδάσσομαι, ἥμισυ δʼ αὐτὸς
Iliad 17.232	ἕξω ἐγώ· τὸ δέ οἱ κλέος ἔσσεται ὅσσον ἐμοί περ.
Iliad 17.233	ὣς ἔφαθʼ, οἳ δʼ ἰθὺς Δαναῶν βρίσαντες ἔβησαν
Iliad 17.234	δούρατʼ ἀνασχόμενοι· μάλα δέ σφισιν ἔλπετο θυμὸς
Iliad 17.235	νεκρὸν ὑπʼ Αἴαντος ἐρύειν Τελαμωνιάδαο
Iliad 17.236	νήπιοι· ἦ τε πολέσσιν ἐπʼ αὐτῷ θυμὸν ἀπηύρα.
Iliad 17.237	καὶ τότʼ ἄρʼ Αἴας εἶπε βοὴν ἀγαθὸν Μενέλαον·
Iliad 17.238	ὦ πέπον ὦ Μενέλαε διοτρεφὲς οὐκέτι νῶϊ
Iliad 17.239	ἔλπομαι αὐτώ περ νοστησέμεν ἐκ πολέμοιο.
Iliad 17.240	οὔ τι τόσον νέκυος περιδείδια Πατρόκλοιο,
Iliad 17.241	ὅς κε τάχα Τρώων κορέει κύνας ἠδʼ οἰωνούς,
Iliad 17.242	ὅσσον ἐμῇ κεφαλῇ περιδείδια μή τι πάθῃσι,
Iliad 17.243	καὶ σῇ, ἐπεὶ πολέμοιο νέφος περὶ πάντα καλύπτει
Iliad 17.244	Ἕκτωρ, ἡμῖν δʼ αὖτʼ ἀναφαίνεται αἰπὺς ὄλεθρος.
Iliad 17.245	ἀλλʼ ἄγʼ ἀριστῆας Δαναῶν κάλει, ἤν τις ἀκούσῃ.
Iliad 17.246	ὣς ἔφατʼ, οὐδʼ ἀπίθησε βοὴν ἀγαθὸς Μενέλαος,
Iliad 17.247	ἤϋσεν δὲ διαπρύσιον Δαναοῖσι γεγωνώς·
Iliad 17.248	ὦ φίλοι Ἀργείων ἡγήτορες ἠδὲ μέδοντες
Iliad 17.249	οἵ τε παρʼ Ἀτρεΐδῃς Ἀγαμέμνονι καὶ Μενελάῳ
Iliad 17.250	δήμια πίνουσιν καὶ σημαίνουσιν ἕκαστος
Iliad 17.251	λαοῖς· ἐκ δὲ Διὸς τιμὴ καὶ κῦδος ὀπηδεῖ.
Iliad 17.252	ἀργαλέον δέ μοί ἐστι διασκοπιᾶσθαι ἕκαστον
Iliad 17.253	ἡγεμόνων· τόσση γὰρ ἔρις πολέμοιο δέδηεν·
Iliad 17.254	ἀλλά τις αὐτὸς ἴτω, νεμεσιζέσθω δʼ ἐνὶ θυμῷ
Iliad 17.255	Πάτροκλον Τρῳῇσι κυσὶν μέλπηθρα γενέσθαι.
Iliad 17.256	ὣς ἔφατʼ, ὀξὺ δʼ ἄκουσεν Ὀϊλῆος ταχὺς Αἴας·
Iliad 17.257	πρῶτος δʼ ἀντίος ἦλθε θέων ἀνὰ δηϊοτῆτα,
Iliad 17.258	τὸν δὲ μετʼ Ἰδομενεὺς καὶ ὀπάων Ἰδομενῆος
Iliad 17.259	Μηριόνης ἀτάλαντος Ἐνυαλίῳ ἀνδρειφόντῃ.
Iliad 17.260	τῶν δʼ ἄλλων τίς κεν ᾗσι φρεσὶν οὐνόματʼ εἴποι,
Iliad 17.261	ὅσσοι δὴ μετόπισθε μάχην ἤγειραν Ἀχαιῶν;
Iliad 17.262	Τρῶες δὲ προὔτυψαν ἀολλέες· ἦρχε δʼ ἄρʼ Ἕκτωρ.
Iliad 17.263	ὡς δʼ ὅτʼ ἐπὶ προχοῇσι διιπετέος ποταμοῖο
Iliad 17.264	βέβρυχεν μέγα κῦμα ποτὶ ῥόον, ἀμφὶ δέ τʼ ἄκραι
Iliad 17.265	ἠϊόνες βοόωσιν ἐρευγομένης ἁλὸς ἔξω,
Iliad 17.266	τόσσῃ ἄρα Τρῶες ἰαχῇ ἴσαν. αὐτὰρ Ἀχαιοὶ
Iliad 17.267	ἕστασαν ἀμφὶ Μενοιτιάδῃ ἕνα θυμὸν ἔχοντες
Iliad 17.268	φραχθέντες σάκεσιν χαλκήρεσιν· ἀμφὶ δʼ ἄρά σφι
Iliad 17.269	λαμπρῇσιν κορύθεσσι Κρονίων ἠέρα πολλὴν
Iliad 17.270	χεῦʼ, ἐπεὶ οὐδὲ Μενοιτιάδην ἔχθαιρε πάρος γε,
Iliad 17.271	ὄφρα ζωὸς ἐὼν θεράπων ἦν Αἰακίδαο·
Iliad 17.272	μίσησεν δʼ ἄρα μιν δηΐων κυσὶ κύρμα γενέσθαι
Iliad 17.273	Τρῳῇσιν· τὼ καί οἱ ἀμυνέμεν ὦρσεν ἑταίρους.
Iliad 17.274	ὦσαν δὲ πρότεροι Τρῶες ἑλίκωπας Ἀχαιούς·
Iliad 17.275	νεκρὸν δὲ προλιπόντες ὑπέτρεσαν, οὐδέ τινʼ αὐτῶν
Iliad 17.276	Τρῶες ὑπέρθυμοι ἕλον ἔγχεσιν ἱέμενοί περ,
Iliad 17.277	ἀλλὰ νέκυν ἐρύοντο· μίνυνθα δὲ καὶ τοῦ Ἀχαιοὶ
Iliad 17.278	μέλλον ἀπέσσεσθαι· μάλα γάρ σφεας ὦκʼ ἐλέλιξεν
Iliad 17.279	Αἴας, ὃς περὶ μὲν εἶδος, περὶ δʼ ἔργα τέτυκτο
Iliad 17.280	τῶν ἄλλων Δαναῶν μετʼ ἀμύμονα Πηλεΐωνα.
Iliad 17.281	ἴθυσεν δὲ διὰ προμάχων συῒ εἴκελος ἀλκὴν
Iliad 17.282	καπρίῳ, ὅς τʼ ἐν ὄρεσσι κύνας θαλερούς τʼ αἰζηοὺς
Iliad 17.283	ῥηϊδίως ἐκέδασσεν, ἑλιξάμενος διὰ βήσσας·
Iliad 17.284	ὣς υἱὸς Τελαμῶνος ἀγαυοῦ φαίδιμος Αἴας
Iliad 17.285	ῥεῖα μετεισάμενος Τρώων ἐκέδασσε φάλαγγας
Iliad 17.286	οἳ περὶ Πατρόκλῳ βέβασαν, φρόνεον δὲ μάλιστα
Iliad 17.287	ἄστυ πότι σφέτερον ἐρύειν καὶ κῦδος ἀρέσθαι.
Iliad 17.288	ἤτοι τὸν Λήθοιο Πελασγοῦ φαίδιμος υἱὸς
Iliad 17.289	Ἱππόθοος ποδὸς ἕλκε κατὰ κρατερὴν ὑσμίνην
Iliad 17.290	δησάμενος τελαμῶνι παρὰ σφυρὸν ἀμφὶ τένοντας
Iliad 17.291	Ἕκτορι καὶ Τρώεσσι χαριζόμενος· τάχα δʼ αὐτῷ
Iliad 17.292	ἦλθε κακόν, τό οἱ οὔ τις ἐρύκακεν ἱεμένων περ.
Iliad 17.293	τὸν δʼ υἱὸς Τελαμῶνος ἐπαΐξας διʼ ὁμίλου
Iliad 17.294	πλῆξʼ αὐτοσχεδίην κυνέης διὰ χαλκοπαρῄου·
Iliad 17.295	ἤρικε δʼ ἱπποδάσεια κόρυς περὶ δουρὸς ἀκωκῇ
Iliad 17.296	πληγεῖσʼ ἔγχεΐ τε μεγάλῳ καὶ χειρὶ παχείῃ,
Iliad 17.297	ἐγκέφαλος δὲ παρʼ αὐλὸν ἀνέδραμεν ἐξ ὠτειλῆς
Iliad 17.298	αἱματόεις· τοῦ δʼ αὖθι λύθη μένος, ἐκ δʼ ἄρα χειρῶν
Iliad 17.299	Πατρόκλοιο πόδα μεγαλήτορος ἧκε χαμᾶζε
Iliad 17.300	κεῖσθαι· ὃ δʼ ἄγχʼ αὐτοῖο πέσε πρηνὴς ἐπὶ νεκρῷ
Iliad 17.301	τῆλʼ ἀπὸ Λαρίσης ἐριβώλακος, οὐδὲ τοκεῦσι
Iliad 17.302	θρέπτρα φίλοις ἀπέδωκε, μινυνθάδιος δέ οἱ αἰὼν
Iliad 17.303	ἔπλεθʼ ὑπʼ Αἴαντος μεγαθύμου δουρὶ δαμέντι.
Iliad 17.304	Ἕκτωρ δʼ αὖτʼ Αἴαντος ἀκόντισε δουρὶ φαεινῷ·
Iliad 17.305	ἀλλʼ ὃ μὲν ἄντα ἰδὼν ἠλεύατο χάλκεον ἔγχος
Iliad 17.306	τυτθόν· ὃ δὲ Σχεδίον μεγαθύμου Ἰφίτου υἱὸν
Iliad 17.307	Φωκήων ὄχʼ ἄριστον, ὃς ἐν κλειτῷ Πανοπῆϊ
Iliad 17.308	οἰκία ναιετάασκε πολέσσʼ ἄνδρεσσιν ἀνάσσων,
Iliad 17.309	τὸν βάλʼ ὑπὸ κληῗδα μέσην· διὰ δʼ ἀμπερὲς ἄκρη
Iliad 17.310	αἰχμὴ χαλκείη παρὰ νείατον ὦμον ἀνέσχε·
Iliad 17.311	δούπησεν δὲ πεσών, ἀράβησε δὲ τεύχεʼ ἐπʼ αὐτῷ.
Iliad 17.312	Αἴας δʼ αὖ Φόρκυνα δαΐφρονα Φαίνοπος υἱὸν
Iliad 17.313	Ἱπποθόῳ περιβάντα μέσην κατὰ γαστέρα τύψε·
Iliad 17.314	ῥῆξε δὲ θώρηκος γύαλον, διὰ δʼ ἔντερα χαλκὸς
Iliad 17.315	ἤφυσʼ· ὃ δʼ ἐν κονίῃσι πεσὼν ἕλε γαῖαν ἀγοστῷ.
Iliad 17.316	χώρησαν δʼ ὑπό τε πρόμαχοι καὶ φαίδιμος Ἕκτωρ·
Iliad 17.317	Ἀργεῖοι δὲ μέγα ἴαχον, ἐρύσαντο δὲ νεκροὺς
Iliad 17.318	Φόρκυν θʼ Ἱππόθοόν τε, λύοντο δὲ τεύχεʼ ἀπʼ ὤμων.
Iliad 17.319	ἔνθά κεν αὖτε Τρῶες ἀρηϊφίλων ὑπʼ Ἀχαιῶν
Iliad 17.320	Ἴλιον εἰσανέβησαν ἀναλκείῃσι δαμέντες,
Iliad 17.321	Ἀργεῖοι δέ κε κῦδος ἕλον καὶ ὑπὲρ Διὸς αἶσαν
Iliad 17.322	κάρτεϊ καὶ σθένεϊ σφετέρῳ· ἀλλʼ αὐτὸς Ἀπόλλων
Iliad 17.323	Αἰνείαν ὄτρυνε δέμας Περίφαντι ἐοικὼς
Iliad 17.324	κήρυκι Ἠπυτίδῃ, ὅς οἱ παρὰ πατρὶ γέροντι
Iliad 17.325	κηρύσσων γήρασκε φίλα φρεσὶ μήδεα εἰδώς·
Iliad 17.326	τῷ μιν ἐεισάμενος προσέφη Διὸς υἱὸς Ἀπόλλων·
Iliad 17.327	Αἰνεία πῶς ἂν καὶ ὑπὲρ θεὸν εἰρύσσαισθε
Iliad 17.328	Ἴλιον αἰπεινήν; ὡς δὴ ἴδον ἀνέρας ἄλλους
Iliad 17.329	κάρτεΐ τε σθένεΐ τε πεποιθότας ἠνορέῃ τε
Iliad 17.330	πλήθεΐ τε σφετέρῳ καὶ ὑπερδέα δῆμον ἔχοντας·
Iliad 17.331	ἡμῖν δὲ Ζεὺς μὲν πολὺ βούλεται ἢ Δαναοῖσι
Iliad 17.332	νίκην· ἀλλʼ αὐτοὶ τρεῖτʼ ἄσπετον οὐδὲ μάχεσθε.
Iliad 17.333	ὣς ἔφατʼ, Αἰνείας δʼ ἑκατηβόλον Ἀπόλλωνα
Iliad 17.334	ἔγνω ἐς ἄντα ἰδών, μέγα δʼ Ἕκτορα εἶπε βοήσας·
Iliad 17.335	Ἕκτόρ τʼ ἠδʼ ἄλλοι Τρώων ἀγοὶ ἠδʼ ἐπικούρων
Iliad 17.336	αἰδὼς μὲν νῦν ἥδε γʼ ἀρηϊφίλων ὑπʼ Ἀχαιῶν
Iliad 17.337	Ἴλιον εἰσαναβῆναι ἀναλκείῃσι δαμέντας.
Iliad 17.338	ἀλλʼ ἔτι γάρ τίς φησι θεῶν ἐμοὶ ἄγχι παραστὰς
Iliad 17.339	Ζῆνʼ ὕπατον μήστωρα μάχης ἐπιτάρροθον εἶναι·
Iliad 17.340	τώ ῥʼ ἰθὺς Δαναῶν ἴομεν, μηδʼ οἵ γε ἕκηλοι
Iliad 17.341	Πάτροκλον νηυσὶν πελασαίατο τεθνηῶτα.
Iliad 17.342	ὣς φάτο, καί ῥα πολὺ προμάχων ἐξάλμενος ἔστη·
Iliad 17.343	οἳ δʼ ἐλελίχθησαν καὶ ἐναντίοι ἔσταν Ἀχαιῶν.
Iliad 17.344	ἔνθʼ αὖτʼ Αἰνείας Λειώκριτον οὔτασε δουρὶ
Iliad 17.345	υἱὸν Ἀρίσβαντος Λυκομήδεος ἐσθλὸν ἑταῖρον.
Iliad 17.346	τὸν δὲ πεσόντʼ ἐλέησεν ἀρηΐφιλος Λυκομήδης,
Iliad 17.347	στῆ δὲ μάλʼ ἐγγὺς ἰών, καὶ ἀκόντισε δουρὶ φαεινῷ,
Iliad 17.348	καὶ βάλεν Ἱππασίδην Ἀπισάονα ποιμένα λαῶν
Iliad 17.349	ἧπαρ ὑπὸ πραπίδων, εἶθαρ δʼ ὑπὸ γούνατʼ ἔλυσεν,
Iliad 17.350	ὅς ῥʼ ἐκ Παιονίης ἐριβώλακος εἰληλούθει,
Iliad 17.351	καὶ δὲ μετʼ Ἀστεροπαῖον ἀριστεύεσκε μάχεσθαι.
Iliad 17.352	τὸν δὲ πεσόντʼ ἐλέησεν ἀρήϊος Ἀστεροπαῖος,
Iliad 17.353	ἴθυσεν δὲ καὶ ὃ πρόφρων Δαναοῖσι μάχεσθαι·
Iliad 17.354	ἀλλʼ οὔ πως ἔτι εἶχε· σάκεσσι γὰρ ἔρχατο πάντῃ
Iliad 17.355	ἑσταότες περὶ Πατρόκλῳ, πρὸ δὲ δούρατʼ ἔχοντο.
Iliad 17.356	Αἴας γὰρ μάλα πάντας ἐπῴχετο πολλὰ κελεύων·
Iliad 17.357	οὔτέ τινʼ ἐξοπίσω νεκροῦ χάζεσθαι ἀνώγει
Iliad 17.358	οὔτέ τινα προμάχεσθαι Ἀχαιῶν ἔξοχον ἄλλων,
Iliad 17.359	ἀλλὰ μάλʼ ἀμφʼ αὐτῷ βεβάμεν, σχεδόθεν δὲ μάχεσθαι.
Iliad 17.360	ὣς Αἴας ἐπέτελλε πελώριος, αἵματι δὲ χθὼν
Iliad 17.361	δεύετο πορφυρέῳ, τοὶ δʼ ἀγχιστῖνοι ἔπιπτον
Iliad 17.362	νεκροὶ ὁμοῦ Τρώων καὶ ὑπερμενέων ἐπικούρων
Iliad 17.363	καὶ Δαναῶν· οὐδʼ οἳ γὰρ ἀναιμωτί γε μάχοντο,
Iliad 17.364	παυρότεροι δὲ πολὺ φθίνυθον· μέμνηντο γὰρ αἰεὶ
Iliad 17.365	ἀλλήλοις ἀνʼ ὅμιλον ἀλεξέμεναι φόνον αἰπύν.
Iliad 17.366	ὣς οἳ μὲν μάρναντο δέμας πυρός, οὐδέ κε φαίης
Iliad 17.367	οὔτέ ποτʼ ἠέλιον σῶν ἔμμεναι οὔτε σελήνην·
Iliad 17.368	ἠέρι γὰρ κατέχοντο μάχης ἐπί θʼ ὅσσον ἄριστοι
Iliad 17.369	ἕστασαν ἀμφὶ Μενοιτιάδῃ κατατεθνηῶτι.
Iliad 17.370	οἳ δʼ ἄλλοι Τρῶες καὶ ἐϋκνήμιδες Ἀχαιοὶ
Iliad 17.371	εὔκηλοι πολέμιζον ὑπʼ αἰθέρι, πέπτατο δʼ αὐγὴ
Iliad 17.372	ἠελίου ὀξεῖα, νέφος δʼ οὐ φαίνετο πάσης
Iliad 17.373	γαίης οὐδʼ ὀρέων· μεταπαυόμενοι δὲ μάχοντο
Iliad 17.374	ἀλλήλων ἀλεείνοντες βέλεα στονόεντα
Iliad 17.375	πολλὸν ἀφεσταότες. τοὶ δʼ ἐν μέσῳ ἄλγεʼ ἔπασχον
Iliad 17.376	ἠέρι καὶ πολέμῳ, τείροντο δὲ νηλέϊ χαλκῷ
Iliad 17.377	ὅσσοι ἄριστοι ἔσαν· δύο δʼ οὔ πω φῶτε πεπύσθην
Iliad 17.378	ἀνέρε κυδαλίμω Θρασυμήδης Ἀντίλοχός τε
Iliad 17.379	Πατρόκλοιο θανόντος ἀμύμονος, ἀλλʼ ἔτʼ ἔφαντο
Iliad 17.380	ζωὸν ἐνὶ πρώτῳ ὁμάδῳ Τρώεσσι μάχεσθαι.
Iliad 17.381	τὼ δʼ ἐπιοσσομένω θάνατον καὶ φύζαν ἑταίρων
Iliad 17.382	νόσφιν ἐμαρνάσθην, ἐπεὶ ὣς ἐπετέλλετο Νέστωρ
Iliad 17.383	ὀτρύνων πόλεμον δὲ μελαινάων ἀπὸ νηῶν.
Iliad 17.384	τοῖς δὲ πανημερίοις ἔριδος μέγα νεῖκος ὀρώρει
Iliad 17.385	ἀργαλέης· καμάτῳ δὲ καὶ ἱδρῷ νωλεμὲς αἰεὶ
Iliad 17.386	γούνατά τε κνῆμαί τε πόδες θʼ ὑπένερθεν ἑκάστου
Iliad 17.387	χεῖρές τʼ ὀφθαλμοί τε παλάσσετο μαρναμένοιιν
Iliad 17.388	ἀμφʼ ἀγαθὸν θεράποντα ποδώκεος Αἰακίδαο.
Iliad 17.389	ὡς δʼ ὅτʼ ἀνὴρ ταύροιο βοὸς μεγάλοιο βοείην
Iliad 17.390	λαοῖσιν δώῃ τανύειν μεθύουσαν ἀλοιφῇ·
Iliad 17.391	δεξάμενοι δʼ ἄρα τοί γε διαστάντες τανύουσι
Iliad 17.392	κυκλόσʼ, ἄφαρ δέ τε ἰκμὰς ἔβη, δύνει δέ τʼ ἀλοιφὴ
Iliad 17.393	πολλῶν ἑλκόντων, τάνυται δέ τε πᾶσα διὰ πρό·
Iliad 17.394	ὣς οἵ γʼ ἔνθα καὶ ἔνθα νέκυν ὀλίγῃ ἐνὶ χώρῃ
Iliad 17.395	εἵλκεον ἀμφότεροι· μάλα δέ σφισιν ἔλπετο θυμὸς
Iliad 17.396	Τρωσὶν μὲν ἐρύειν προτὶ Ἴλιον, αὐτὰρ Ἀχαιοῖς
Iliad 17.397	νῆας ἔπι γλαφυράς· περὶ δʼ αὐτοῦ μῶλος ὀρώρει
Iliad 17.398	ἄγριος· οὐδέ κʼ Ἄρης λαοσσόος οὐδέ κʼ Ἀθήνη
Iliad 17.399	τόν γε ἰδοῦσʼ ὀνόσαιτʼ, οὐδʼ εἰ μάλα μιν χόλος ἵκοι·
Iliad 17.400	τοῖον Ζεὺς ἐπὶ Πατρόκλῳ ἀνδρῶν τε καὶ ἵππων
Iliad 17.401	ἤματι τῷ ἐτάνυσσε κακὸν πόνον· οὐδʼ ἄρα πώ τι
Iliad 17.402	ᾔδεε Πάτροκλον τεθνηότα δῖος Ἀχιλλεύς·
Iliad 17.403	πολλὸν γὰρ ῥʼ ἀπάνευθε νεῶν μάρναντο θοάων
Iliad 17.404	τείχει ὕπο Τρώων· τό μιν οὔ ποτε ἔλπετο θυμῷ
Iliad 17.405	τεθνάμεν, ἀλλὰ ζωὸν ἐνιχριμφθέντα πύλῃσιν
Iliad 17.406	ἂψ ἀπονοστήσειν, ἐπεὶ οὐδὲ τὸ ἔλπετο πάμπαν
Iliad 17.407	ἐκπέρσειν πτολίεθρον ἄνευ ἕθεν, οὐδὲ σὺν αὐτῷ·
Iliad 17.408	πολλάκι γὰρ τό γε μητρὸς ἐπεύθετο νόσφιν ἀκούων,
Iliad 17.409	ἥ οἱ ἀπαγγέλλεσκε Διὸς μεγάλοιο νόημα.
Iliad 17.410	δὴ τότε γʼ οὔ οἱ ἔειπε κακὸν τόσον ὅσσον ἐτύχθη
Iliad 17.411	μήτηρ, ὅττί ῥά οἱ πολὺ φίλτατος ὤλεθʼ ἑταῖρος.
Iliad 17.412	οἳ δʼ αἰεὶ περὶ νεκρὸν ἀκαχμένα δούρατʼ ἔχοντες
Iliad 17.413	νωλεμὲς ἐγχρίμπτοντο καὶ ἀλλήλους ἐνάριζον·
Iliad 17.414	ὧδε δέ τις εἴπεσκεν Ἀχαιῶν χαλκοχιτώνων·
Iliad 17.415	ὦ φίλοι οὐ μὰν ἧμιν ἐϋκλεὲς ἀπονέεσθαι
Iliad 17.416	νῆας ἔπι γλαφυράς, ἀλλʼ αὐτοῦ γαῖα μέλαινα
Iliad 17.417	πᾶσι χάνοι· τό κεν ἧμιν ἄφαρ πολὺ κέρδιον εἴη
Iliad 17.418	εἰ τοῦτον Τρώεσσι μεθήσομεν ἱπποδάμοισιν
Iliad 17.419	ἄστυ πότι σφέτερον ἐρύσαι καὶ κῦδος ἀρέσθαι.
Iliad 17.420	ὣς δέ τις αὖ Τρώων μεγαθύμων αὐδήσασκεν·
Iliad 17.421	ὦ φίλοι, εἰ καὶ μοῖρα παρʼ ἀνέρι τῷδε δαμῆναι
Iliad 17.422	πάντας ὁμῶς, μή πώ τις ἐρωείτω πολέμοιο.
Iliad 17.423	ὣς ἄρα τις εἴπεσκε, μένος δʼ ὄρσασκεν ἑκάστου.
Iliad 17.424	ὣς οἳ μὲν μάρναντο, σιδήρειος δʼ ὀρυμαγδὸς
Iliad 17.425	χάλκεον οὐρανὸν ἷκε διʼ αἰθέρος ἀτρυγέτοιο·
Iliad 17.426	ἵπποι δʼ Αἰακίδαο μάχης ἀπάνευθεν ἐόντες
Iliad 17.427	κλαῖον, ἐπεὶ δὴ πρῶτα πυθέσθην ἡνιόχοιο
Iliad 17.428	ἐν κονίῃσι πεσόντος ὑφʼ Ἕκτορος ἀνδροφόνοιο.
Iliad 17.429	ἦ μὰν Αὐτομέδων Διώρεος ἄλκιμος υἱὸς
Iliad 17.430	πολλὰ μὲν ἂρ μάστιγι θοῇ ἐπεμαίετο θείνων,
Iliad 17.431	πολλὰ δὲ μειλιχίοισι προσηύδα, πολλὰ δʼ ἀρειῇ·
Iliad 17.432	τὼ δʼ οὔτʼ ἂψ ἐπὶ νῆας ἐπὶ πλατὺν Ἑλλήσποντον
Iliad 17.433	ἠθελέτην ἰέναι οὔτʼ ἐς πόλεμον μετʼ Ἀχαιούς,
Iliad 17.434	ἀλλʼ ὥς τε στήλη μένει ἔμπεδον, ἥ τʼ ἐπὶ τύμβῳ
Iliad 17.435	ἀνέρος ἑστήκῃ τεθνηότος ἠὲ γυναικός,
Iliad 17.436	ὣς μένον ἀσφαλέως περικαλλέα δίφρον ἔχοντες
Iliad 17.437	οὔδει ἐνισκίμψαντε καρήατα· δάκρυα δέ σφι
Iliad 17.438	θερμὰ κατὰ βλεφάρων χαμάδις ῥέε μυρομένοισιν
Iliad 17.439	ἡνιόχοιο πόθῳ· θαλερὴ δʼ ἐμιαίνετο χαίτη
Iliad 17.440	ζεύγλης ἐξεριποῦσα παρὰ ζυγὸν ἀμφοτέρωθεν.
Iliad 17.441	μυρομένω δʼ ἄρα τώ γε ἰδὼν ἐλέησε Κρονίων,
Iliad 17.442	κινήσας δὲ κάρη προτὶ ὃν μυθήσατο θυμόν·
Iliad 17.443	ἆ δειλώ, τί σφῶϊ δόμεν Πηλῆϊ ἄνακτι
Iliad 17.444	θνητῷ, ὑμεῖς δʼ ἐστὸν ἀγήρω τʼ ἀθανάτω τε;
Iliad 17.445	ἦ ἵνα δυστήνοισι μετʼ ἀνδράσιν ἄλγεʼ ἔχητον;
Iliad 17.446	οὐ μὲν γάρ τί πού ἐστιν ὀϊζυρώτερον ἀνδρὸς
Iliad 17.447	πάντων, ὅσσά τε γαῖαν ἔπι πνείει τε καὶ ἕρπει.
Iliad 17.448	ἀλλʼ οὐ μὰν ὑμῖν γε καὶ ἅρμασι δαιδαλέοισιν
Iliad 17.449	Ἕκτωρ Πριαμίδης ἐποχήσεται· οὐ γὰρ ἐάσω.
Iliad 17.450	ἦ οὐχ ἅλις ὡς καὶ τεύχεʼ ἔχει καὶ ἐπεύχεται αὔτως;
Iliad 17.451	σφῶϊν δʼ ἐν γούνεσσι βαλῶ μένος ἠδʼ ἐνὶ θυμῷ,
Iliad 17.452	ὄφρα καὶ Αὐτομέδοντα σαώσετον ἐκ πολέμοιο
Iliad 17.453	νῆας ἔπι γλαφυράς· ἔτι γάρ σφισι κῦδος ὀρέξω
Iliad 17.454	κτείνειν, εἰς ὅ κε νῆας ἐϋσσέλμους ἀφίκωνται
Iliad 17.455	δύῃ τʼ ἠέλιος καὶ ἐπὶ κνέφας ἱερὸν ἔλθῃ·
Iliad 17.456	ὣς εἰπὼν ἵπποισιν ἐνέπνευσεν μένος ἠΰ.
Iliad 17.457	τὼ δʼ ἀπὸ χαιτάων κονίην οὖδας δὲ βαλόντε
Iliad 17.458	ῥίμφα φέρον θοὸν ἅρμα μετὰ Τρῶας καὶ Ἀχαιούς.
Iliad 17.459	τοῖσι δʼ ἐπʼ Αὐτομέδων μάχετʼ ἀχνύμενός περ ἑταίρου
Iliad 17.460	ἵπποις ἀΐσσων ὥς τʼ αἰγυπιὸς μετὰ χῆνας·
Iliad 17.461	ῥέα μὲν γὰρ φεύγεσκεν ὑπʼ ἐκ Τρώων ὀρυμαγδοῦ,
Iliad 17.462	ῥεῖα δʼ ἐπαΐξασκε πολὺν καθʼ ὅμιλον ὀπάζων.
Iliad 17.463	ἀλλʼ οὐχ ᾕρει φῶτας ὅτε σεύαιτο διώκειν·
Iliad 17.464	οὐ γάρ πως ἦν οἶον ἐόνθʼ ἱερῷ ἐνὶ δίφρῳ
Iliad 17.465	ἔγχει ἐφορμᾶσθαι καὶ ἐπίσχειν ὠκέας ἵππους.
Iliad 17.466	ὀψὲ δὲ δή μιν ἑταῖρος ἀνὴρ ἴδεν ὀφθαλμοῖσιν
Iliad 17.467	Ἀλκιμέδων υἱὸς Λαέρκεος Αἱμονίδαο·
Iliad 17.468	στῆ δʼ ὄπιθεν δίφροιο καὶ Αὐτομέδοντα προσηύδα·
Iliad 17.469	Αὐτόμεδον, τίς τοί νυ θεῶν νηκερδέα βουλὴν
Iliad 17.470	ἐν στήθεσσιν ἔθηκε, καὶ ἐξέλετο φρένας ἐσθλάς;
Iliad 17.471	οἷον πρὸς Τρῶας μάχεαι πρώτῳ ἐν ὁμίλῳ
Iliad 17.472	μοῦνος· ἀτάρ τοι ἑταῖρος ἀπέκτατο, τεύχεα δʼ Ἕκτωρ
Iliad 17.473	αὐτὸς ἔχων ὤμοισιν ἀγάλλεται Αἰακίδαο.
Iliad 17.474	τὸν δʼ αὖτʼ Αὐτομέδων προσέφη Διώρεος υἱός·
Iliad 17.475	Ἀλκίμεδον τίς γάρ τοι Ἀχαιῶν ἄλλος ὁμοῖος
Iliad 17.476	ἵππων ἀθανάτων ἐχέμεν δμῆσίν τε μένος τε,
Iliad 17.477	εἰ μὴ Πάτροκλος θεόφιν μήστωρ ἀτάλαντος
Iliad 17.478	ζωὸς ἐών; νῦν αὖ θάνατος καὶ μοῖρα κιχάνει.
Iliad 17.479	ἀλλὰ σὺ μὲν μάστιγα καὶ ἡνία σιγαλόεντα
Iliad 17.480	δέξαι, ἐγὼ δʼ ἵππων ἀποβήσομαι, ὄφρα μάχωμαι.
Iliad 17.481	ὣς ἔφατʼ, Ἀλκιμέδων δὲ βοηθόον ἅρμʼ ἐπορούσας
Iliad 17.482	καρπαλίμως μάστιγα καὶ ἡνία λάζετο χερσίν,
Iliad 17.483	Αὐτομέδων δʼ ἀπόρουσε· νόησε δὲ φαίδιμος Ἕκτωρ,
Iliad 17.484	αὐτίκα δʼ Αἰνείαν προσεφώνεεν ἐγγὺς ἐόντα·
Iliad 17.485	Αἰνεία Τρώων βουληφόρε χαλκοχιτώνων
Iliad 17.486	ἵππω τώδʼ ἐνόησα ποδώκεος Αἰακίδαο
Iliad 17.487	ἐς πόλεμον προφανέντε σὺν ἡνιόχοισι κακοῖσι·
Iliad 17.488	τώ κεν ἐελποίμην αἱρησέμεν, εἰ σύ γε θυμῷ
Iliad 17.489	σῷ ἐθέλεις, ἐπεὶ οὐκ ἂν ἐφορμηθέντε γε νῶϊ
Iliad 17.490	τλαῖεν ἐναντίβιον στάντες μαχέσασθαι Ἄρηϊ.
Iliad 17.491	ὣς ἔφατʼ, οὐδʼ ἀπίθησεν ἐῢς πάϊς Ἀγχίσαο.
Iliad 17.492	τὼ δʼ ἰθὺς βήτην βοέῃς εἰλυμένω ὤμους
Iliad 17.493	αὔῃσι στερεῇσι· πολὺς δʼ ἐπελήλατο χαλκός.
Iliad 17.494	τοῖσι δʼ ἅμα Χρομίος τε καὶ Ἄρητος θεοειδὴς
Iliad 17.495	ἤϊσαν ἀμφότεροι· μάλα δέ σφισιν ἔλπετο θυμὸς
Iliad 17.496	αὐτώ τε κτενέειν ἐλάαν τʼ ἐριαύχενας ἵππους
Iliad 17.497	νήπιοι, οὐδʼ ἄρʼ ἔμελλον ἀναιμωτί γε νέεσθαι
Iliad 17.498	αὖτις ἀπʼ Αὐτομέδοντος. ὃ δʼ εὐξάμενος Διὶ πατρὶ
Iliad 17.499	ἀλκῆς καὶ σθένεος πλῆτο φρένας ἀμφὶ μελαίνας·
Iliad 17.500	αὐτίκα δʼ Ἀλκιμέδοντα προσηύδα πιστὸν ἑταῖρον·
Iliad 17.501	Ἀλκίμεδον μὴ δή μοι ἀπόπροθεν ἰσχέμεν ἵππους,
Iliad 17.502	ἀλλὰ μάλʼ ἐμπνείοντε μεταφρένῳ· οὐ γὰρ ἔγωγε
Iliad 17.503	Ἕκτορα Πριαμίδην μένεος σχήσεσθαι ὀΐω,
Iliad 17.504	πρίν γʼ ἐπʼ Ἀχιλλῆος καλλίτριχε βήμεναι ἵππω
Iliad 17.505	νῶϊ κατακτείναντα, φοβῆσαί τε στίχας ἀνδρῶν
Iliad 17.506	Ἀργείων, ἤ κʼ αὐτὸς ἐνὶ πρώτοισιν ἁλοίη.
Iliad 17.507	ὣς εἰπὼν Αἴαντε καλέσσατο καὶ Μενέλαον·
Iliad 17.508	Αἴαντʼ Ἀργείων ἡγήτορε καὶ Μενέλαε
Iliad 17.509	ἤτοι μὲν τὸν νεκρὸν ἐπιτράπεθʼ οἵ περ ἄριστοι
Iliad 17.510	ἀμφʼ αὐτῷ βεβάμεν καὶ ἀμύνεσθαι στίχας ἀνδρῶν,
Iliad 17.511	νῶϊν δὲ ζωοῖσιν ἀμύνετε νηλεὲς ἦμαρ·
Iliad 17.512	τῇδε γὰρ ἔβρισαν πόλεμον κάτα δακρυόεντα
Iliad 17.513	Ἕκτωρ Αἰνείας θʼ, οἳ Τρώων εἰσὶν ἄριστοι.
Iliad 17.514	ἀλλʼ ἤτοι μὲν ταῦτα θεῶν ἐν γούνασι κεῖται·
Iliad 17.515	ἥσω γὰρ καὶ ἐγώ, τὰ δέ κεν Διὶ πάντα μελήσει.
Iliad 17.516	ἦ ῥα, καὶ ἀμπεπαλὼν προΐει δολιχόσκιον ἔγχος,
Iliad 17.517	καὶ βάλεν Ἀρήτοιο κατʼ ἀσπίδα πάντοσʼ ἐΐσην·
Iliad 17.518	ἣ δʼ οὐκ ἔγχος ἔρυτο, διὰ πρὸ δὲ εἴσατο χαλκός,
Iliad 17.519	νειαίρῃ δʼ ἐν γαστρὶ διὰ ζωστῆρος ἔλασσεν.
Iliad 17.520	ὡς δʼ ὅτʼ ἂν ὀξὺν ἔχων πέλεκυν αἰζήϊος ἀνὴρ
Iliad 17.521	κόψας ἐξόπιθεν κεράων βοὸς ἀγραύλοιο
Iliad 17.522	ἶνα τάμῃ διὰ πᾶσαν, ὃ δὲ προθορὼν ἐρίπῃσιν,
Iliad 17.523	ὣς ἄρʼ ὅ γε προθορὼν πέσεν ὕπτιος· ἐν δέ οἱ ἔγχος
Iliad 17.524	νηδυίοισι μάλʼ ὀξὺ κραδαινόμενον λύε γυῖα.
Iliad 17.525	Ἕκτωρ δʼ Αὐτομέδοντος ἀκόντισε δουρὶ φαεινῷ·
Iliad 17.526	ἀλλʼ ὃ μὲν ἄντα ἰδὼν ἠλεύατο χάλκεον ἔγχος·
Iliad 17.527	πρόσσω γὰρ κατέκυψε, τὸ δʼ ἐξόπιθεν δόρυ μακρὸν
Iliad 17.528	οὔδει ἐνισκίμφθη, ἐπὶ δʼ οὐρίαχος πελεμίχθη
Iliad 17.529	ἔγχεος· ἔνθα δʼ ἔπειτʼ ἀφίει μένος ὄβριμος Ἄρης.
Iliad 17.530	καί νύ κε δὴ ξιφέεσσʼ αὐτοσχεδὸν ὁρμηθήτην
Iliad 17.531	εἰ μή σφωʼ Αἴαντε διέκριναν μεμαῶτε,
Iliad 17.532	οἵ ῥʼ ἦλθον καθʼ ὅμιλον ἑταίρου κικλήσκοντος·
Iliad 17.533	τοὺς ὑποταρβήσαντες ἐχώρησαν πάλιν αὖτις
Iliad 17.534	Ἕκτωρ Αἰνείας τʼ ἠδὲ Χρομίος θεοειδής,
Iliad 17.535	Ἄρητον δὲ κατʼ αὖθι λίπον δεδαϊγμένον ἦτορ
Iliad 17.536	κείμενον· Αὐτομέδων δὲ θοῷ ἀτάλαντος Ἄρηϊ
Iliad 17.537	τεύχεά τʼ ἐξενάριξε καὶ εὐχόμενος ἔπος ηὔδα·
Iliad 17.538	ἦ δὴ μὰν ὀλίγον γε Μενοιτιάδαο θανόντος
Iliad 17.539	κῆρ ἄχεος μεθέηκα χερείονά περ καταπέφνων.
Iliad 17.540	ὣς εἰπὼν ἐς δίφρον ἑλὼν ἔναρα βροτόεντα
Iliad 17.541	θῆκʼ, ἂν δʼ αὐτὸς ἔβαινε πόδας καὶ χεῖρας ὕπερθεν
Iliad 17.542	αἱματόεις ὥς τίς τε λέων κατὰ ταῦρον ἐδηδώς.
Iliad 17.543	ἂψ δʼ ἐπὶ Πατρόκλῳ τέτατο κρατερὴ ὑσμίνη
Iliad 17.544	ἀργαλέη πολύδακρυς, ἔγειρε δὲ νεῖκος Ἀθήνη
Iliad 17.545	οὐρανόθεν καταβᾶσα· προῆκε γὰρ εὐρύοπα Ζεὺς
Iliad 17.546	ὀρνύμεναι Δαναούς· δὴ γὰρ νόος ἐτράπετʼ αὐτοῦ.
Iliad 17.547	ἠΰτε πορφυρέην ἶριν θνητοῖσι τανύσσῃ
Iliad 17.548	Ζεὺς ἐξ οὐρανόθεν τέρας ἔμμεναι ἢ πολέμοιο
Iliad 17.549	ἢ καὶ χειμῶνος δυσθαλπέος, ὅς ῥά τε ἔργων
Iliad 17.550	ἀνθρώπους ἀνέπαυσεν ἐπὶ χθονί, μῆλα δὲ κήδει,
Iliad 17.551	ὣς ἣ πορφυρέῃ νεφέλῃ πυκάσασα ἓ αὐτὴν
Iliad 17.552	δύσετʼ Ἀχαιῶν ἔθνος, ἔγειρε δὲ φῶτα ἕκαστον.
Iliad 17.553	πρῶτον δʼ Ἀτρέος υἱὸν ἐποτρύνουσα προσηύδα
Iliad 17.554	ἴφθιμον Μενέλαον· ὃ γάρ ῥά οἱ ἐγγύθεν ἦεν·
Iliad 17.555	εἰσαμένη Φοίνικι δέμας καὶ ἀτειρέα φωνήν·
Iliad 17.556	σοὶ μὲν δὴ Μενέλαε κατηφείη καὶ ὄνειδος
Iliad 17.557	ἔσσεται εἴ κʼ Ἀχιλῆος ἀγαυοῦ πιστὸν ἑταῖρον
Iliad 17.558	τείχει ὕπο Τρώων ταχέες κύνες ἑλκήσουσιν.
Iliad 17.559	ἀλλʼ ἔχεο κρατερῶς, ὄτρυνε δὲ λαὸν ἅπαντα.
Iliad 17.560	τὴν δʼ αὖτε προσέειπε βοὴν ἀγαθὸς Μενέλαος·
Iliad 17.561	Φοῖνιξ ἄττα γεραιὲ παλαιγενές, εἰ γὰρ Ἀθήνη
Iliad 17.562	δοίη κάρτος ἐμοί, βελέων δʼ ἀπερύκοι ἐρωήν·
Iliad 17.563	τώ κεν ἔγωγʼ ἐθέλοιμι παρεστάμεναι καὶ ἀμύνειν
Iliad 17.564	Πατρόκλῳ· μάλα γάρ με θανὼν ἐσεμάσσατο θυμόν.
Iliad 17.565	ἀλλʼ Ἕκτωρ πυρὸς αἰνὸν ἔχει μένος, οὐδʼ ἀπολήγει
Iliad 17.566	χαλκῷ δηϊόων· τῷ γὰρ Ζεὺς κῦδος ὀπάζει.
Iliad 17.567	ὣς φάτο, γήθησεν δὲ θεὰ γλαυκῶπις Ἀθήνη,
Iliad 17.568	ὅττί ῥά οἱ πάμπρωτα θεῶν ἠρήσατο πάντων.
Iliad 17.569	ἐν δὲ βίην ὤμοισι καὶ ἐν γούνεσσιν ἔθηκε,
Iliad 17.570	καί οἱ μυίης θάρσος ἐνὶ στήθεσσιν ἐνῆκεν,
Iliad 17.571	ἥ τε καὶ ἐργομένη μάλα περ χροὸς ἀνδρομέοιο
Iliad 17.572	ἰσχανάᾳ δακέειν, λαρόν τέ οἱ αἷμʼ ἀνθρώπου·
Iliad 17.573	τοίου μιν θάρσευς πλῆσε φρένας ἀμφὶ μελαίνας,
Iliad 17.574	βῆ δʼ ἐπὶ Πατρόκλῳ, καὶ ἀκόντισε δουρὶ φαεινῷ.
Iliad 17.575	ἔσκε δʼ ἐνὶ Τρώεσσι Ποδῆς υἱὸς Ἠετίωνος
Iliad 17.576	ἀφνειός τʼ ἀγαθός τε· μάλιστα δέ μιν τίεν Ἕκτωρ
Iliad 17.577	δήμου, ἐπεί οἱ ἑταῖρος ἔην φίλος εἰλαπιναστής·
Iliad 17.578	τόν ῥα κατὰ ζωστῆρα βάλε ξανθὸς Μενέλαος
Iliad 17.579	ἀΐξαντα φόβον δέ, διὰ πρὸ δὲ χαλκὸν ἔλασσε·
Iliad 17.580	δούπησεν δὲ πεσών· ἀτὰρ Ἀτρεΐδης Μενέλαος
Iliad 17.581	νεκρὸν ὑπʼ ἐκ Τρώων ἔρυσεν μετὰ ἔθνος ἑταίρων.
Iliad 17.582	Ἕκτορα δʼ ἐγγύθεν ἱστάμενος ὄτρυνεν Ἀπόλλων
Iliad 17.583	Φαίνοπι Ἀσιάδῃ ἐναλίγκιος, ὅς οἱ ἁπάντων
Iliad 17.584	ξείνων φίλτατος ἔσκεν Ἀβυδόθι οἰκία ναίων·
Iliad 17.585	τῷ μιν ἐεισάμενος προσέφη ἑκάεργος Ἀπόλλων·
Iliad 17.586	Ἕκτορ τίς κέ σʼ ἔτʼ ἄλλος Ἀχαιῶν ταρβήσειεν;
Iliad 17.587	οἷον δὴ Μενέλαον ὑπέτρεσας, ὃς τὸ πάρος γε
Iliad 17.588	μαλθακὸς αἰχμητής· νῦν δʼ οἴχεται οἶος ἀείρας
Iliad 17.589	νεκρὸν ὑπʼ ἐκ Τρώων, σὸν δʼ ἔκτανε πιστὸν ἑταῖρον
Iliad 17.590	ἐσθλὸν ἐνὶ προμάχοισι Ποδῆν υἱὸν Ἠετίωνος.
Iliad 17.591	ὣς φάτο, τὸν δʼ ἄχεος νεφέλη ἐκάλυψε μέλαινα,
Iliad 17.592	βῆ δὲ διὰ προμάχων κεκορυθμένος αἴθοπι χαλκῷ.
Iliad 17.593	καὶ τότʼ ἄρα Κρονίδης ἕλετʼ αἰγίδα θυσσανόεσσαν
Iliad 17.594	μαρμαρέην, Ἴδην δὲ κατὰ νεφέεσσι κάλυψεν,
Iliad 17.595	ἀστράψας δὲ μάλα μεγάλʼ ἔκτυπε, τὴν δὲ τίναξε,
Iliad 17.596	νίκην δὲ Τρώεσσι δίδου, ἐφόβησε δʼ Ἀχαιούς.
Iliad 17.597	πρῶτος Πηνέλεως Βοιώτιος ἦρχε φόβοιο.
Iliad 17.598	βλῆτο γὰρ ὦμον δουρὶ πρόσω τετραμμένος αἰεὶ
Iliad 17.599	ἄκρον ἐπιλίγδην· γράψεν δέ οἱ ὀστέον ἄχρις
Iliad 17.600	αἰχμὴ Πουλυδάμαντος· ὃ γάρ ῥʼ ἔβαλε σχεδὸν ἐλθών.
Iliad 17.601	Λήϊτον αὖθʼ Ἕκτωρ σχεδὸν οὔτασε χεῖρʼ ἐπὶ καρπῷ
Iliad 17.602	υἱὸν Ἀλεκτρυόνος μεγαθύμου, παῦσε δὲ χάρμης·
Iliad 17.603	τρέσσε δὲ παπτήνας, ἐπεὶ οὐκέτι ἔλπετο θυμῷ
Iliad 17.604	ἔγχος ἔχων ἐν χειρὶ μαχήσεσθαι Τρώεσσιν.
Iliad 17.605	Ἕκτορα δʼ Ἰδομενεὺς μετὰ Λήϊτον ὁρμηθέντα
Iliad 17.606	βεβλήκει θώρηκα κατὰ στῆθος παρὰ μαζόν·
Iliad 17.607	ἐν καυλῷ δʼ ἐάγη δολιχὸν δόρυ, τοὶ δὲ βόησαν
Iliad 17.608	Τρῶες· ὃ δʼ Ἰδομενῆος ἀκόντισε Δευκαλίδαο
Iliad 17.609	δίφρῳ ἐφεσταότος· τοῦ μέν ῥʼ ἀπὸ τυτθὸν ἅμαρτεν·
Iliad 17.610	αὐτὰρ ὃ Μηριόναο ὀπάονά θʼ ἡνίοχόν τε
Iliad 17.611	Κοίρανον, ὅς ῥʼ ἐκ Λύκτου ἐϋκτιμένης ἕπετʼ αὐτῷ·
Iliad 17.612	πεζὸς γὰρ τὰ πρῶτα λιπὼν νέας ἀμφιελίσσας
Iliad 17.613	ἤλυθε, καί κε Τρωσὶ μέγα κράτος ἐγγυάλιξεν,
Iliad 17.614	εἰ μὴ Κοίρανος ὦκα ποδώκεας ἤλασεν ἵππους·
Iliad 17.615	καὶ τῷ μὲν φάος ἦλθεν, ἄμυνε δὲ νηλεὲς ἦμαρ,
Iliad 17.616	αὐτὸς δʼ ὤλεσε θυμὸν ὑφʼ Ἕκτορος ἀνδροφόνοιο·
Iliad 17.617	τὸν βάλʼ ὑπὸ γναθμοῖο καὶ οὔατος, ἐκ δʼ ἄρʼ ὀδόντας
Iliad 17.618	ὦσε δόρυ πρυμνόν, διὰ δὲ γλῶσσαν τάμε μέσσην.
Iliad 17.619	ἤριπε δʼ ἐξ ὀχέων, κατὰ δʼ ἡνία χεῦεν ἔραζε.
Iliad 17.620	καὶ τά γε Μηριόνης ἔλαβεν χείρεσσι φίλῃσι
Iliad 17.621	κύψας ἐκ πεδίοιο, καὶ Ἰδομενῆα προσηύδα·
Iliad 17.622	μάστιε νῦν εἷός κε θοὰς ἐπὶ νῆας ἵκηαι·
Iliad 17.623	γιγνώσκεις δὲ καὶ αὐτὸς ὅ τʼ οὐκέτι κάρτος Ἀχαιῶν.
Iliad 17.624	ὣς ἔφατʼ, Ἰδομενεὺς δʼ ἵμασεν καλλίτριχας ἵππους
Iliad 17.625	νῆας ἔπι γλαφυράς· δὴ γὰρ δέος ἔμπεσε θυμῷ.
Iliad 17.626	οὐδʼ ἔλαθʼ Αἴαντα μεγαλήτορα καὶ Μενέλαον
Iliad 17.627	Ζεύς, ὅτε δὴ Τρώεσσι δίδου ἑτεραλκέα νίκην.
Iliad 17.628	τοῖσι δὲ μύθων ἦρχε μέγας Τελαμώνιος Αἴας·
Iliad 17.629	ὢ πόποι ἤδη μέν κε καὶ ὃς μάλα νήπιός ἐστι
Iliad 17.630	γνοίη ὅτι Τρώεσσι πατὴρ Ζεὺς αὐτὸς ἀρήγει.
Iliad 17.631	τῶν μὲν γὰρ πάντων βέλεʼ ἅπτεται ὅς τις ἀφήῃ
Iliad 17.632	ἢ κακὸς ἢ ἀγαθός· Ζεὺς δʼ ἔμπης πάντʼ ἰθύνει·
Iliad 17.633	ἡμῖν δʼ αὔτως πᾶσιν ἐτώσια πίπτει ἔραζε.
Iliad 17.634	ἀλλʼ ἄγετʼ αὐτοί περ φραζώμεθα μῆτιν ἀρίστην,
Iliad 17.635	ἠμὲν ὅπως τὸν νεκρὸν ἐρύσσομεν, ἠδὲ καὶ αὐτοὶ
Iliad 17.636	χάρμα φίλοις ἑτάροισι γενώμεθα νοστήσαντες,
Iliad 17.637	οἵ που δεῦρʼ ὁρόωντες ἀκηχέδατʼ, οὐδʼ ἔτι φασὶν
Iliad 17.638	Ἕκτορος ἀνδροφόνοιο μένος καὶ χεῖρας ἀάπτους
Iliad 17.639	σχήσεσθʼ, ἀλλʼ ἐν νηυσὶ μελαίνῃσιν πεσέεσθαι.
Iliad 17.640	εἴη δʼ ὅς τις ἑταῖρος ἀπαγγείλειε τάχιστα
Iliad 17.641	Πηλεΐδῃ, ἐπεὶ οὔ μιν ὀΐομαι οὐδὲ πεπύσθαι
Iliad 17.642	λυγρῆς ἀγγελίης, ὅτι οἱ φίλος ὤλεθʼ ἑταῖρος.
Iliad 17.643	ἀλλʼ οὔ πῃ δύναμαι ἰδέειν τοιοῦτον Ἀχαιῶν·
Iliad 17.644	ἠέρι γὰρ κατέχονται ὁμῶς αὐτοί τε καὶ ἵπποι.
Iliad 17.645	Ζεῦ πάτερ ἀλλὰ σὺ ῥῦσαι ὑπʼ ἠέρος υἷας Ἀχαιῶν,
Iliad 17.646	ποίησον δʼ αἴθρην, δὸς δʼ ὀφθαλμοῖσιν ἰδέσθαι·
Iliad 17.647	ἐν δὲ φάει καὶ ὄλεσσον, ἐπεί νύ τοι εὔαδεν οὕτως.
Iliad 17.648	ὣς φάτο, τὸν δὲ πατὴρ ὀλοφύρατο δάκρυ χέοντα·
Iliad 17.649	αὐτίκα δʼ ἠέρα μὲν σκέδασεν καὶ ἀπῶσεν ὀμίχλην,
Iliad 17.650	ἠέλιος δʼ ἐπέλαμψε, μάχη δʼ ἐπὶ πᾶσα φαάνθη·
Iliad 17.651	καὶ τότʼ ἄρʼ Αἴας εἶπε βοὴν ἀγαθὸν Μενέλαον·
Iliad 17.652	σκέπτεο νῦν Μενέλαε διοτρεφὲς αἴ κεν ἴδηαι
Iliad 17.653	ζωὸν ἔτʼ Ἀντίλοχον μεγαθύμου Νέστορος υἱόν,
Iliad 17.654	ὄτρυνον δʼ Ἀχιλῆϊ δαΐφρονι θᾶσσον ἰόντα
Iliad 17.655	εἰπεῖν ὅττι ῥά οἱ πολὺ φίλτατος ὤλεθʼ ἑταῖρος.
Iliad 17.656	ὣς ἔφατʼ, οὐδʼ ἀπίθησε βοὴν ἀγαθὸς Μενέλαος,
Iliad 17.657	βῆ δʼ ἰέναι ὥς τίς τε λέων ἀπὸ μεσσαύλοιο,
Iliad 17.658	ὅς τʼ ἐπεὶ ἄρ κε κάμῃσι κύνας τʼ ἄνδρας τʼ ἐρεθίζων,
Iliad 17.659	οἵ τέ μιν οὐκ εἰῶσι βοῶν ἐκ πῖαρ ἑλέσθαι
Iliad 17.660	πάννυχοι ἐγρήσσοντες· ὃ δὲ κρειῶν ἐρατίζων
Iliad 17.661	ἰθύει, ἀλλʼ οὔ τι πρήσσει· θαμέες γὰρ ἄκοντες
Iliad 17.662	ἀντίον ἀΐσσουσι θρασειάων ἀπὸ χειρῶν,
Iliad 17.663	καιόμεναί τε δεταί, τάς τε τρεῖ ἐσσύμενός περ·
Iliad 17.664	ἠῶθεν δʼ ἀπονόσφιν ἔβη τετιηότι θυμῷ·
Iliad 17.665	ὣς ἀπὸ Πατρόκλοιο βοὴν ἀγαθὸς Μενέλαος
Iliad 17.666	ἤϊε πόλλʼ ἀέκων· περὶ γὰρ δίε μή μιν Ἀχαιοὶ
Iliad 17.667	ἀργαλέου πρὸ φόβοιο ἕλωρ δηΐοισι λίποιεν.
Iliad 17.668	πολλὰ δὲ Μηριόνῃ τε καὶ Αἰάντεσσʼ ἐπέτελλεν·
Iliad 17.669	Αἴαντʼ Ἀργείων ἡγήτορε Μηριόνη τε
Iliad 17.670	νῦν τις ἐνηείης Πατροκλῆος δειλοῖο
Iliad 17.671	μνησάσθω· πᾶσιν γὰρ ἐπίστατο μείλιχος εἶναι
Iliad 17.672	ζωὸς ἐών· νῦν αὖ θάνατος καὶ μοῖρα κιχάνει.
Iliad 17.673	ὣς ἄρα φωνήσας ἀπέβη ξανθὸς Μενέλαος,
Iliad 17.674	πάντοσε παπταίνων ὥς τʼ αἰετός, ὅν ῥά τέ φασιν
Iliad 17.675	ὀξύτατον δέρκεσθαι ὑπουρανίων πετεηνῶν,
Iliad 17.676	ὅν τε καὶ ὑψόθʼ ἐόντα πόδας ταχὺς οὐκ ἔλαθε πτὼξ
Iliad 17.677	θάμνῳ ὑπʼ ἀμφικόμῳ κατακείμενος, ἀλλά τʼ ἐπʼ αὐτῷ
Iliad 17.678	ἔσσυτο, καί τέ μιν ὦκα λαβὼν ἐξείλετο θυμόν.
Iliad 17.679	ὣς τότε σοὶ Μενέλαε διοτρεφὲς ὄσσε φαεινὼ
Iliad 17.680	πάντοσε δινείσθην πολέων κατὰ ἔθνος ἑταίρων,
Iliad 17.681	εἴ που Νέστορος υἱὸν ἔτι ζώοντα ἴδοιτο.
Iliad 17.682	τὸν δὲ μάλʼ αἶψʼ ἐνόησε μάχης ἐπʼ ἀριστερὰ πάσης
Iliad 17.683	θαρσύνονθʼ ἑτάρους καὶ ἐποτρύνοντα μάχεσθαι,
Iliad 17.684	ἀγχοῦ δʼ ἱστάμενος προσέφη ξανθὸς Μενέλαος·
Iliad 17.685	Ἀντίλοχʼ εἰ δʼ ἄγε δεῦρο διοτρεφὲς ὄφρα πύθηαι
Iliad 17.686	λυγρῆς ἀγγελίης, ἣ μὴ ὤφελλε γενέσθαι.
Iliad 17.687	ἤδη μὲν σὲ καὶ αὐτὸν ὀΐομαι εἰσορόωντα
Iliad 17.688	γιγνώσκειν ὅτι πῆμα θεὸς Δαναοῖσι κυλίνδει,
Iliad 17.689	νίκη δὲ Τρώων· πέφαται δʼ ὤριστος Ἀχαιῶν
Iliad 17.690	Πάτροκλος, μεγάλη δὲ ποθὴ Δαναοῖσι τέτυκται.
Iliad 17.691	ἀλλὰ σύ γʼ αἶψʼ Ἀχιλῆϊ θέων ἐπὶ νῆας Ἀχαιῶν
Iliad 17.692	εἰπεῖν, αἴ κε τάχιστα νέκυν ἐπὶ νῆα σαώσῃ
Iliad 17.693	γυμνόν· ἀτὰρ τά γε τεύχεʼ ἔχει κορυθαίολος Ἕκτωρ.
Iliad 17.694	ὣς ἔφατʼ, Ἀντίλοχος δὲ κατέστυγε μῦθον ἀκούσας·
Iliad 17.695	δὴν δέ μιν ἀμφασίη ἐπέων λάβε, τὼ δέ οἱ ὄσσε
Iliad 17.696	δακρυόφι πλῆσθεν, θαλερὴ δέ οἱ ἔσχετο φωνή.
Iliad 17.697	ἀλλʼ οὐδʼ ὧς Μενελάου ἐφημοσύνης ἀμέλησε,
Iliad 17.698	βῆ δὲ θέειν, τὰ δὲ τεύχεʼ ἀμύμονι δῶκεν ἑταίρῳ
Iliad 17.699	Λαοδόκῳ, ὅς οἱ σχεδὸν ἔστρεφε μώνυχας ἵππους.
Iliad 17.700	τὸν μὲν δάκρυ χέοντα πόδες φέρον ἐκ πολέμοιο
Iliad 17.701	Πηλεΐδῃ Ἀχιλῆϊ κακὸν ἔπος ἀγγελέοντα.
Iliad 17.702	οὐδʼ ἄρα σοὶ Μενέλαε διοτρεφὲς ἤθελε θυμὸς
Iliad 17.703	τειρομένοις ἑτάροισιν ἀμυνέμεν, ἔνθεν ἀπῆλθεν
Iliad 17.704	Ἀντίλοχος, μεγάλη δὲ ποθὴ Πυλίοισιν ἐτύχθη·
Iliad 17.705	ἀλλʼ ὅ γε τοῖσιν μὲν Θρασυμήδεα δῖον ἀνῆκεν,
Iliad 17.706	αὐτὸς δʼ αὖτʼ ἐπὶ Πατρόκλῳ ἥρωϊ βεβήκει,
Iliad 17.707	στῆ δὲ παρʼ Αἰάντεσσι θέων, εἶθαρ δὲ προσηύδα·
Iliad 17.708	κεῖνον μὲν δὴ νηυσὶν ἐπιπροέηκα θοῇσιν
Iliad 17.709	ἐλθεῖν εἰς Ἀχιλῆα πόδας ταχύν· οὐδέ μιν οἴω
Iliad 17.710	νῦν ἰέναι μάλα περ κεχολωμένον Ἕκτορι δίῳ·
Iliad 17.711	οὐ γάρ πως ἂν γυμνὸς ἐὼν Τρώεσσι μάχοιτο.
Iliad 17.712	ἡμεῖς δʼ αὐτοί περ φραζώμεθα μῆτιν ἀρίστην,
Iliad 17.713	ἠμὲν ὅπως τὸν νεκρὸν ἐρύσσομεν, ἠδὲ καὶ αὐτοὶ
Iliad 17.714	Τρώων ἐξ ἐνοπῆς θάνατον καὶ κῆρα φύγωμεν.
Iliad 17.715	τὸν δʼ ἠμείβετʼ ἔπειτα μέγας Τελαμώνιος Αἴας·
Iliad 17.716	πάντα κατʼ αἶσαν ἔειπες ἀγακλεὲς ὦ Μενέλαε·
Iliad 17.717	ἀλλὰ σὺ μὲν καὶ Μηριόνης ὑποδύντε μάλʼ ὦκα
Iliad 17.718	νεκρὸν ἀείραντες φέρετʼ ἐκ πόνου· αὐτὰρ ὄπισθε
Iliad 17.719	νῶϊ μαχησόμεθα Τρωσίν τε καὶ Ἕκτορι δίῳ
Iliad 17.720	ἶσον θυμὸν ἔχοντες ὁμώνυμοι, οἳ τὸ πάρος περ
Iliad 17.721	μίμνομεν ὀξὺν Ἄρηα παρʼ ἀλλήλοισι μένοντες.
Iliad 17.722	ὣς ἔφαθʼ, οἳ δʼ ἄρα νεκρὸν ἀπὸ χθονὸς ἀγκάζοντο
Iliad 17.723	ὕψι μάλα μεγάλως· ἐπὶ δʼ ἴαχε λαὸς ὄπισθε
Iliad 17.724	Τρωϊκός, ὡς εἴδοντο νέκυν αἴροντας Ἀχαιούς.
Iliad 17.725	ἴθυσαν δὲ κύνεσσιν ἐοικότες, οἵ τʼ ἐπὶ κάπρῳ
Iliad 17.726	βλημένῳ ἀΐξωσι πρὸ κούρων θηρητήρων·
Iliad 17.727	ἕως μὲν γάρ τε θέουσι διαρραῖσαι μεμαῶτες,
Iliad 17.728	ἀλλʼ ὅτε δή ῥʼ ἐν τοῖσιν ἑλίξεται ἀλκὶ πεποιθώς,
Iliad 17.729	ἄψ τʼ ἀνεχώρησαν διά τʼ ἔτρεσαν ἄλλυδις ἄλλος.
Iliad 17.730	ὣς Τρῶες εἷος μὲν ὁμιλαδὸν αἰὲν ἕποντο
Iliad 17.731	νύσσοντες ξίφεσίν τε καὶ ἔγχεσιν ἀμφιγύοισιν·
Iliad 17.732	ἀλλʼ ὅτε δή ῥʼ Αἴαντε μεταστρεφθέντε κατʼ αὐτοὺς
Iliad 17.733	σταίησαν, τῶν δὲ τράπετο χρώς, οὐδέ τις ἔτλη
Iliad 17.734	πρόσσω ἀΐξας περὶ νεκροῦ δηριάασθαι.
Iliad 17.735	ὣς οἵ γʼ ἐμμεμαῶτε νέκυν φέρον ἐκ πολέμοιο
Iliad 17.736	νῆας ἔπι γλαφυράς· ἐπὶ δὲ πτόλεμος τέτατό σφιν
Iliad 17.737	ἄγριος ἠΰτε πῦρ, τό τʼ ἐπεσσύμενον πόλιν ἀνδρῶν
Iliad 17.738	ὄρμενον ἐξαίφνης φλεγέθει, μινύθουσι δὲ οἶκοι
Iliad 17.739	ἐν σέλαϊ μεγάλῳ· τὸ δʼ ἐπιβρέμει ἲς ἀνέμοιο.
Iliad 17.740	ὣς μὲν τοῖς ἵππων τε καὶ ἀνδρῶν αἰχμητάων
Iliad 17.741	ἀζηχὴς ὀρυμαγδὸς ἐπήϊεν ἐρχομένοισιν·
Iliad 17.742	οἳ δʼ ὥς θʼ ἡμίονοι κρατερὸν μένος ἀμφιβαλόντες
Iliad 17.743	ἕλκωσʼ ἐξ ὄρεος κατὰ παιπαλόεσσαν ἀταρπὸν
Iliad 17.744	ἢ δοκὸν ἠὲ δόρυ μέγα νήϊον· ἐν δέ τε θυμὸς
Iliad 17.745	τείρεθʼ ὁμοῦ καμάτῳ τε καὶ ἱδρῷ σπευδόντεσσιν·
Iliad 17.746	ὣς οἵ γʼ ἐμμεμαῶτε νέκυν φέρον. αὐτὰρ ὄπισθεν
Iliad 17.747	Αἴαντʼ ἰσχανέτην, ὥς τε πρὼν ἰσχάνει ὕδωρ
Iliad 17.748	ὑλήεις πεδίοιο διαπρύσιον τετυχηκώς,
Iliad 17.749	ὅς τε καὶ ἰφθίμων ποταμῶν ἀλεγεινὰ ῥέεθρα
Iliad 17.750	ἴσχει, ἄφαρ δέ τε πᾶσι ῥόον πεδίον δὲ τίθησι
Iliad 17.751	πλάζων· οὐδέ τί μιν σθένεϊ ῥηγνῦσι ῥέοντες·
Iliad 17.752	ὣς αἰεὶ Αἴαντε μάχην ἀνέεργον ὀπίσσω
Iliad 17.753	Τρώων· οἳ δʼ ἅμʼ ἕποντο, δύω δʼ ἐν τοῖσι μάλιστα
Iliad 17.754	Αἰνείας τʼ Ἀγχισιάδης καὶ φαίδιμος Ἕκτωρ.
Iliad 17.755	τῶν δʼ ὥς τε ψαρῶν νέφος ἔρχεται ἠὲ κολοιῶν
Iliad 17.756	οὖλον κεκλήγοντες, ὅτε προΐδωσιν ἰόντα
Iliad 17.757	κίρκον, ὅ τε σμικρῇσι φόνον φέρει ὀρνίθεσσιν,
Iliad 17.758	ὣς ἄρʼ ὑπʼ Αἰνείᾳ τε καὶ Ἕκτορι κοῦροι Ἀχαιῶν
Iliad 17.759	οὖλον κεκλήγοντες ἴσαν, λήθοντο δὲ χάρμης.
Iliad 17.760	πολλὰ δὲ τεύχεα καλὰ πέσον περί τʼ ἀμφί τε τάφρον
Iliad 17.761	φευγόντων Δαναῶν· πολέμου δʼ οὐ γίγνετʼ ἐρωή.
Iliad 18.1	ὣς οἳ μὲν μάρναντο δέμας πυρὸς αἰθομένοιο,
Iliad 18.2	Ἀντίλοχος δʼ Ἀχιλῆϊ πόδας ταχὺς ἄγγελος ἦλθε.
Iliad 18.3	τὸν δʼ εὗρε προπάροιθε νεῶν ὀρθοκραιράων
Iliad 18.4	τὰ φρονέοντʼ ἀνὰ θυμὸν ἃ δὴ τετελεσμένα ἦεν·
Iliad 18.5	ὀχθήσας δʼ ἄρα εἶπε πρὸς ὃν μεγαλήτορα θυμόν·
Iliad 18.6	ὤ μοι ἐγώ, τί τʼ ἄρʼ αὖτε κάρη κομόωντες Ἀχαιοὶ
Iliad 18.7	νηυσὶν ἔπι κλονέονται ἀτυζόμενοι πεδίοιο;
Iliad 18.8	μὴ δή μοι τελέσωσι θεοὶ κακὰ κήδεα θυμῷ,
Iliad 18.9	ὥς ποτέ μοι μήτηρ διεπέφραδε καί μοι ἔειπε
Iliad 18.10	Μυρμιδόνων τὸν ἄριστον ἔτι ζώοντος ἐμεῖο
Iliad 18.11	χερσὶν ὕπο Τρώων λείψειν φάος ἠελίοιο.
Iliad 18.12	ἦ μάλα δὴ τέθνηκε Μενοιτίου ἄλκιμος υἱὸς
Iliad 18.13	σχέτλιος· ἦ τʼ ἐκέλευον ἀπωσάμενον δήϊον πῦρ
Iliad 18.14	ἂψ ἐπὶ νῆας ἴμεν, μηδʼ Ἕκτορι ἶφι μάχεσθαι.
Iliad 18.15	εἷος ὃ ταῦθʼ ὥρμαινε κατὰ φρένα καὶ κατὰ θυμόν,
Iliad 18.16	τόφρά οἱ ἐγγύθεν ἦλθεν ἀγαυοῦ Νέστορος υἱὸς
Iliad 18.17	δάκρυα θερμὰ χέων, φάτο δʼ ἀγγελίην ἀλεγεινήν·
Iliad 18.18	ὤ μοι Πηλέος υἱὲ δαΐφρονος ἦ μάλα λυγρῆς
Iliad 18.19	πεύσεαι ἀγγελίης, ἣ μὴ ὤφελλε γενέσθαι.
Iliad 18.20	κεῖται Πάτροκλος, νέκυος δὲ δὴ ἀμφιμάχονται
Iliad 18.21	γυμνοῦ· ἀτὰρ τά γε τεύχεʼ ἔχει κορυθαίολος Ἕκτωρ.
Iliad 18.22	ὣς φάτο, τὸν δʼ ἄχεος νεφέλη ἐκάλυψε μέλαινα·
Iliad 18.23	ἀμφοτέρῃσι δὲ χερσὶν ἑλὼν κόνιν αἰθαλόεσσαν
Iliad 18.24	χεύατο κὰκ κεφαλῆς, χαρίεν δʼ ᾔσχυνε πρόσωπον·
Iliad 18.25	νεκταρέῳ δὲ χιτῶνι μέλαινʼ ἀμφίζανε τέφρη.
Iliad 18.26	αὐτὸς δʼ ἐν κονίῃσι μέγας μεγαλωστὶ τανυσθεὶς
Iliad 18.27	κεῖτο, φίλῃσι δὲ χερσὶ κόμην ᾔσχυνε δαΐζων.
Iliad 18.28	δμῳαὶ δʼ ἃς Ἀχιλεὺς ληΐσσατο Πάτροκλός τε
Iliad 18.29	θυμὸν ἀκηχέμεναι μεγάλʼ ἴαχον, ἐκ δὲ θύραζε
Iliad 18.30	ἔδραμον ἀμφʼ Ἀχιλῆα δαΐφρονα, χερσὶ δὲ πᾶσαι
Iliad 18.31	στήθεα πεπλήγοντο, λύθεν δʼ ὑπὸ γυῖα ἑκάστης.
Iliad 18.32	Ἀντίλοχος δʼ ἑτέρωθεν ὀδύρετο δάκρυα λείβων
Iliad 18.33	χεῖρας ἔχων Ἀχιλῆος· ὃ δʼ ἔστενε κυδάλιμον κῆρ·
Iliad 18.34	δείδιε γὰρ μὴ λαιμὸν ἀπαμήσειε σιδήρῳ.
Iliad 18.35	σμερδαλέον δʼ ᾤμωξεν· ἄκουσε δὲ πότνια μήτηρ
Iliad 18.36	ἡμένη ἐν βένθεσσιν ἁλὸς παρὰ πατρὶ γέροντι,
Iliad 18.37	κώκυσέν τʼ ἄρʼ ἔπειτα· θεαὶ δέ μιν ἀμφαγέροντο
Iliad 18.38	πᾶσαι ὅσαι κατὰ βένθος ἁλὸς Νηρηΐδες ἦσαν.
Iliad 18.39	ἔνθʼ ἄρʼ ἔην Γλαύκη τε Θάλειά τε Κυμοδόκη τε
Iliad 18.40	Νησαίη Σπειώ τε Θόη θʼ Ἁλίη τε βοῶπις
Iliad 18.41	Κυμοθόη τε καὶ Ἀκταίη καὶ Λιμνώρεια
Iliad 18.42	καὶ Μελίτη καὶ Ἴαιρα καὶ Ἀμφιθόη καὶ Ἀγαυὴ
Iliad 18.43	Δωτώ τε Πρωτώ τε Φέρουσά τε Δυναμένη τε
Iliad 18.44	Δεξαμένη τε καὶ Ἀμφινόμη καὶ Καλλιάνειρα
Iliad 18.45	Δωρὶς καὶ Πανόπη καὶ ἀγακλειτὴ Γαλάτεια
Iliad 18.46	Νημερτής τε καὶ Ἀψευδὴς καὶ Καλλιάνασσα·
Iliad 18.47	ἔνθα δʼ ἔην Κλυμένη Ἰάνειρά τε καὶ Ἰάνασσα
Iliad 18.48	Μαῖρα καὶ Ὠρείθυια ἐϋπλόκαμός τʼ Ἀμάθεια
Iliad 18.49	ἄλλαι θʼ αἳ κατὰ βένθος ἁλὸς Νηρηΐδες ἦσαν.
Iliad 18.50	τῶν δὲ καὶ ἀργύφεον πλῆτο σπέος· αἳ δʼ ἅμα πᾶσαι
Iliad 18.51	στήθεα πεπλήγοντο, Θέτις δʼ ἐξῆρχε γόοιο·
Iliad 18.52	κλῦτε κασίγνηται Νηρηΐδες, ὄφρʼ ἐῢ πᾶσαι
Iliad 18.53	εἴδετʼ ἀκούουσαι ὅσʼ ἐμῷ ἔνι κήδεα θυμῷ.
Iliad 18.54	ὤ μοι ἐγὼ δειλή, ὤ μοι δυσαριστοτόκεια,
Iliad 18.55	ἥ τʼ ἐπεὶ ἂρ τέκον υἱὸν ἀμύμονά τε κρατερόν τε
Iliad 18.56	ἔξοχον ἡρώων· ὃ δʼ ἀνέδραμεν ἔρνεϊ ἶσος·
Iliad 18.57	τὸν μὲν ἐγὼ θρέψασα φυτὸν ὣς γουνῷ ἀλωῆς
Iliad 18.58	νηυσὶν ἐπιπροέηκα κορωνίσιν Ἴλιον εἴσω
Iliad 18.59	Τρωσὶ μαχησόμενον· τὸν δʼ οὐχ ὑποδέξομαι αὖτις
Iliad 18.60	οἴκαδε νοστήσαντα δόμον Πηλήϊον εἴσω.
Iliad 18.61	ὄφρα δέ μοι ζώει καὶ ὁρᾷ φάος ἠελίοιο
Iliad 18.62	ἄχνυται, οὐδέ τί οἱ δύναμαι χραισμῆσαι ἰοῦσα.
Iliad 18.63	ἀλλʼ εἶμʼ, ὄφρα ἴδωμι φίλον τέκος, ἠδʼ ἐπακούσω
Iliad 18.64	ὅττί μιν ἵκετο πένθος ἀπὸ πτολέμοιο μένοντα.
Iliad 18.65	ὣς ἄρα φωνήσασα λίπε σπέος· αἳ δὲ σὺν αὐτῇ
Iliad 18.66	δακρυόεσσαι ἴσαν, περὶ δέ σφισι κῦμα θαλάσσης
Iliad 18.67	ῥήγνυτο· ταὶ δʼ ὅτε δὴ Τροίην ἐρίβωλον ἵκοντο
Iliad 18.68	ἀκτὴν εἰσανέβαινον ἐπισχερώ, ἔνθα θαμειαὶ
Iliad 18.69	Μυρμιδόνων εἴρυντο νέες ταχὺν ἀμφʼ Ἀχιλῆα.
Iliad 18.70	τῷ δὲ βαρὺ στενάχοντι παρίστατο πότνια μήτηρ,
Iliad 18.71	ὀξὺ δὲ κωκύσασα κάρη λάβε παιδὸς ἑοῖο,
Iliad 18.72	καί ῥʼ ὀλοφυρομένη ἔπεα πτερόεντα προσηύδα·
Iliad 18.73	τέκνον τί κλαίεις; τί δέ σε φρένας ἵκετο πένθος;
Iliad 18.74	ἐξαύδα, μὴ κεῦθε· τὰ μὲν δή τοι τετέλεσται
Iliad 18.75	ἐκ Διός, ὡς ἄρα δὴ πρίν γʼ εὔχεο χεῖρας ἀνασχὼν
Iliad 18.76	πάντας ἐπὶ πρύμνῃσιν ἀλήμεναι υἷας Ἀχαιῶν
Iliad 18.77	σεῦ ἐπιδευομένους, παθέειν τʼ ἀεκήλια ἔργα.
Iliad 18.78	τὴν δὲ βαρὺ στενάχων προσέφη πόδας ὠκὺς Ἀχιλλεύς·
Iliad 18.79	μῆτερ ἐμή, τὰ μὲν ἄρ μοι Ὀλύμπιος ἐξετέλεσσεν·
Iliad 18.80	ἀλλὰ τί μοι τῶν ἦδος ἐπεὶ φίλος ὤλεθʼ ἑταῖρος
Iliad 18.81	Πάτροκλος, τὸν ἐγὼ περὶ πάντων τῖον ἑταίρων
Iliad 18.82	ἶσον ἐμῇ κεφαλῇ; τὸν ἀπώλεσα, τεύχεα δʼ Ἕκτωρ
Iliad 18.83	δῃώσας ἀπέδυσε πελώρια θαῦμα ἰδέσθαι
Iliad 18.84	καλά· τὰ μὲν Πηλῆϊ θεοὶ δόσαν ἀγλαὰ δῶρα
Iliad 18.85	ἤματι τῷ ὅτε σε βροτοῦ ἀνέρος ἔμβαλον εὐνῇ.
Iliad 18.86	αἴθʼ ὄφελες σὺ μὲν αὖθι μετʼ ἀθανάτῃς ἁλίῃσι
Iliad 18.87	ναίειν, Πηλεὺς δὲ θνητὴν ἀγαγέσθαι ἄκοιτιν.
Iliad 18.88	νῦν δʼ ἵνα καὶ σοὶ πένθος ἐνὶ φρεσὶ μυρίον εἴη
Iliad 18.89	παιδὸς ἀποφθιμένοιο, τὸν οὐχ ὑποδέξεαι αὖτις
Iliad 18.90	οἴκαδε νοστήσαντʼ, ἐπεὶ οὐδʼ ἐμὲ θυμὸς ἄνωγε
Iliad 18.91	ζώειν οὐδʼ ἄνδρεσσι μετέμμεναι, αἴ κε μὴ Ἕκτωρ
Iliad 18.92	πρῶτος ἐμῷ ὑπὸ δουρὶ τυπεὶς ἀπὸ θυμὸν ὀλέσσῃ,
Iliad 18.93	Πατρόκλοιο δʼ ἕλωρα Μενοιτιάδεω ἀποτίσῃ.
Iliad 18.94	τὸν δʼ αὖτε προσέειπε Θέτις κατὰ δάκρυ χέουσα·
Iliad 18.95	ὠκύμορος δή μοι τέκος ἔσσεαι, οἷʼ ἀγορεύεις·
Iliad 18.96	αὐτίκα γάρ τοι ἔπειτα μεθʼ Ἕκτορα πότμος ἑτοῖμος.
Iliad 18.97	τὴν δὲ μέγʼ ὀχθήσας προσέφη πόδας ὠκὺς Ἀχιλλεύς·
Iliad 18.98	αὐτίκα τεθναίην, ἐπεὶ οὐκ ἄρʼ ἔμελλον ἑταίρῳ
Iliad 18.99	κτεινομένῳ ἐπαμῦναι· ὃ μὲν μάλα τηλόθι πάτρης
Iliad 18.100	ἔφθιτʼ, ἐμεῖο δὲ δῆσεν ἀρῆς ἀλκτῆρα γενέσθαι.
Iliad 18.101	νῦν δʼ ἐπεὶ οὐ νέομαί γε φίλην ἐς πατρίδα γαῖαν,
Iliad 18.102	οὐδέ τι Πατρόκλῳ γενόμην φάος οὐδʼ ἑτάροισι
Iliad 18.103	τοῖς ἄλλοις, οἳ δὴ πολέες δάμεν Ἕκτορι δίῳ,
Iliad 18.104	ἀλλʼ ἧμαι παρὰ νηυσὶν ἐτώσιον ἄχθος ἀρούρης,
Iliad 18.105	τοῖος ἐὼν οἷος οὔ τις Ἀχαιῶν χαλκοχιτώνων
Iliad 18.106	ἐν πολέμῳ· ἀγορῇ δέ τʼ ἀμείνονές εἰσι καὶ ἄλλοι.
Iliad 18.107	ὡς ἔρις ἔκ τε θεῶν ἔκ τʼ ἀνθρώπων ἀπόλοιτο
Iliad 18.108	καὶ χόλος, ὅς τʼ ἐφέηκε πολύφρονά περ χαλεπῆναι,
Iliad 18.109	ὅς τε πολὺ γλυκίων μέλιτος καταλειβομένοιο
Iliad 18.110	ἀνδρῶν ἐν στήθεσσιν ἀέξεται ἠΰτε καπνός·
Iliad 18.111	ὡς ἐμὲ νῦν ἐχόλωσεν ἄναξ ἀνδρῶν Ἀγαμέμνων.
Iliad 18.112	ἀλλὰ τὰ μὲν προτετύχθαι ἐάσομεν ἀχνύμενοί περ,
Iliad 18.113	θυμὸν ἐνὶ στήθεσσι φίλον δαμάσαντες ἀνάγκῃ·
Iliad 18.114	νῦν δʼ εἶμʼ ὄφρα φίλης κεφαλῆς ὀλετῆρα κιχείω
Iliad 18.115	Ἕκτορα· κῆρα δʼ ἐγὼ τότε δέξομαι ὁππότε κεν δὴ
Iliad 18.116	Ζεὺς ἐθέλῃ τελέσαι ἠδʼ ἀθάνατοι θεοὶ ἄλλοι.
Iliad 18.117	οὐδὲ γὰρ οὐδὲ βίη Ἡρακλῆος φύγε κῆρα,
Iliad 18.118	ὅς περ φίλτατος ἔσκε Διὶ Κρονίωνι ἄνακτι·
Iliad 18.119	ἀλλά ἑ μοῖρα δάμασσε καὶ ἀργαλέος χόλος Ἥρης.
Iliad 18.120	ὣς καὶ ἐγών, εἰ δή μοι ὁμοίη μοῖρα τέτυκται,
Iliad 18.121	κείσομʼ ἐπεί κε θάνω· νῦν δὲ κλέος ἐσθλὸν ἀροίμην,
Iliad 18.122	καί τινα Τρωϊάδων καὶ Δαρδανίδων βαθυκόλπων
Iliad 18.123	ἀμφοτέρῃσιν χερσὶ παρειάων ἁπαλάων
Iliad 18.124	δάκρυʼ ὀμορξαμένην ἁδινὸν στοναχῆσαι ἐφείην,
Iliad 18.125	γνοῖεν δʼ ὡς δὴ δηρὸν ἐγὼ πολέμοιο πέπαυμαι·
Iliad 18.126	μὴ δέ μʼ ἔρυκε μάχης φιλέουσά περ· οὐδέ με πείσεις.
Iliad 18.127	τὸν δʼ ἠμείβετʼ ἔπειτα θεὰ Θέτις ἀργυρόπεζα·
Iliad 18.128	ναὶ δὴ ταῦτά γε τέκνον ἐτήτυμον οὐ κακόν ἐστι
Iliad 18.129	τειρομένοις ἑτάροισιν ἀμυνέμεν αἰπὺν ὄλεθρον.
Iliad 18.130	ἀλλά τοι ἔντεα καλὰ μετὰ Τρώεσσιν ἔχονται
Iliad 18.131	χάλκεα μαρμαίροντα· τὰ μὲν κορυθαίολος Ἕκτωρ
Iliad 18.132	αὐτὸς ἔχων ὤμοισιν ἀγάλλεται· οὐδέ ἕ φημι
Iliad 18.133	δηρὸν ἐπαγλαϊεῖσθαι, ἐπεὶ φόνος ἐγγύθεν αὐτῷ.
Iliad 18.134	ἀλλὰ σὺ μὲν μή πω καταδύσεο μῶλον Ἄρηος
Iliad 18.135	πρίν γʼ ἐμὲ δεῦρʼ ἐλθοῦσαν ἐν ὀφθαλμοῖσιν ἴδηαι·
Iliad 18.136	ἠῶθεν γὰρ νεῦμαι ἅμʼ ἠελίῳ ἀνιόντι
Iliad 18.137	τεύχεα καλὰ φέρουσα παρʼ Ἡφαίστοιο ἄνακτος.
Iliad 18.138	ὣς ἄρα φωνήσασα πάλιν τράπεθʼ υἷος ἑοῖο,
Iliad 18.139	καὶ στρεφθεῖσʼ ἁλίῃσι κασιγνήτῃσι μετηύδα·
Iliad 18.140	ὑμεῖς μὲν νῦν δῦτε θαλάσσης εὐρέα κόλπον
Iliad 18.141	ὀψόμεναί τε γέρονθʼ ἅλιον καὶ δώματα πατρός,
Iliad 18.142	καί οἱ πάντʼ ἀγορεύσατʼ· ἐγὼ δʼ ἐς μακρὸν Ὄλυμπον
Iliad 18.143	εἶμι παρʼ Ἥφαιστον κλυτοτέχνην, αἴ κʼ ἐθέλῃσιν
Iliad 18.144	υἱεῖ ἐμῷ δόμεναι κλυτὰ τεύχεα παμφανόωντα.
Iliad 18.145	ὣς ἔφαθʼ, αἳ δʼ ὑπὸ κῦμα θαλάσσης αὐτίκʼ ἔδυσαν·
Iliad 18.146	ἣ δʼ αὖτʼ Οὔλυμπον δὲ θεὰ Θέτις ἀργυρόπεζα
Iliad 18.147	ἤϊεν ὄφρα φίλῳ παιδὶ κλυτὰ τεύχεʼ ἐνείκαι.
Iliad 18.148	τὴν μὲν ἄρʼ Οὔλυμπον δὲ πόδες φέρον· αὐτὰρ Ἀχαιοὶ
Iliad 18.149	θεσπεσίῳ ἀλαλητῷ ὑφʼ Ἕκτορος ἀνδροφόνοιο
Iliad 18.150	φεύγοντες νῆάς τε καὶ Ἑλλήσποντον ἵκοντο.
Iliad 18.151	οὐδέ κε Πάτροκλόν περ ἐϋκνήμιδες Ἀχαιοὶ
Iliad 18.152	ἐκ βελέων ἐρύσαντο νέκυν θεράποντʼ Ἀχιλῆος·
Iliad 18.153	αὖτις γὰρ δὴ τόν γε κίχον λαός τε καὶ ἵπποι
Iliad 18.154	Ἕκτωρ τε Πριάμοιο πάϊς φλογὶ εἴκελος ἀλκήν.
Iliad 18.155	τρὶς μέν μιν μετόπισθε ποδῶν λάβε φαίδιμος Ἕκτωρ
Iliad 18.156	ἑλκέμεναι μεμαώς, μέγα δὲ Τρώεσσιν ὁμόκλα·
Iliad 18.157	τρὶς δὲ δύʼ Αἴαντες θοῦριν ἐπιειμένοι ἀλκὴν
Iliad 18.158	νεκροῦ ἀπεστυφέλιξαν· ὃ δʼ ἔμπεδον ἀλκὶ πεποιθὼς
Iliad 18.159	ἄλλοτʼ ἐπαΐξασκε κατὰ μόθον, ἄλλοτε δʼ αὖτε
Iliad 18.160	στάσκε μέγα ἰάχων· ὀπίσω δʼ οὐ χάζετο πάμπαν.
Iliad 18.161	ὡς δʼ ἀπὸ σώματος οὔ τι λέοντʼ αἴθωνα δύνανται
Iliad 18.162	ποιμένες ἄγραυλοι μέγα πεινάοντα δίεσθαι,
Iliad 18.163	ὥς ῥα τὸν οὐκ ἐδύναντο δύω Αἴαντε κορυστὰ
Iliad 18.164	Ἕκτορα Πριαμίδην ἀπὸ νεκροῦ δειδίξασθαι.
Iliad 18.165	καί νύ κεν εἴρυσσέν τε καὶ ἄσπετον ἤρατο κῦδος,
Iliad 18.166	εἰ μὴ Πηλεΐωνι ποδήνεμος ὠκέα Ἶρις
Iliad 18.167	ἄγγελος ἦλθε θέουσʼ ἀπʼ Ὀλύμπου θωρήσσεσθαι
Iliad 18.168	κρύβδα Διὸς ἄλλων τε θεῶν· πρὸ γὰρ ἧκέ μιν Ἥρη.
Iliad 18.169	ἀγχοῦ δʼ ἱσταμένη ἔπεα πτερόεντα προσηύδα·
Iliad 18.170	ὄρσεο Πηλεΐδη, πάντων ἐκπαγλότατʼ ἀνδρῶν·
Iliad 18.171	Πατρόκλῳ ἐπάμυνον, οὗ εἵνεκα φύλοπις αἰνὴ
Iliad 18.172	ἕστηκε πρὸ νεῶν· οἳ δʼ ἀλλήλους ὀλέκουσιν
Iliad 18.173	οἳ μὲν ἀμυνόμενοι νέκυος πέρι τεθνηῶτος,
Iliad 18.174	οἳ δὲ ἐρύσσασθαι ποτὶ Ἴλιον ἠνεμόεσσαν
Iliad 18.175	Τρῶες ἐπιθύουσι· μάλιστα δὲ φαίδιμος Ἕκτωρ
Iliad 18.176	ἑλκέμεναι μέμονεν· κεφαλὴν δέ ἑ θυμὸς ἄνωγε
Iliad 18.177	πῆξαι ἀνὰ σκολόπεσσι ταμόνθʼ ἁπαλῆς ἀπὸ δειρῆς.
Iliad 18.178	ἀλλʼ ἄνα μηδʼ ἔτι κεῖσο· σέβας δέ σε θυμὸν ἱκέσθω
Iliad 18.179	Πάτροκλον Τρῳῇσι κυσὶν μέλπηθρα γενέσθαι·
Iliad 18.180	σοὶ λώβη, αἴ κέν τι νέκυς ᾐσχυμμένος ἔλθῃ.
Iliad 18.181	τὴν δʼ ἠμείβετʼ ἔπειτα ποδάρκης δῖος Ἀχιλλεύς·
Iliad 18.182	Ἶρι θεὰ τίς γάρ σε θεῶν ἐμοὶ ἄγγελον ἧκε;
Iliad 18.183	τὸν δʼ αὖτε προσέειπε ποδήνεμος ὠκέα Ἶρις·
Iliad 18.184	Ἥρη με προέηκε Διὸς κυδρὴ παράκοιτις·
Iliad 18.185	οὐδʼ οἶδε Κρονίδης ὑψίζυγος οὐδέ τις ἄλλος
Iliad 18.186	ἀθανάτων, οἳ Ὄλυμπον ἀγάννιφον ἀμφινέμονται.
Iliad 18.187	τὴν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 18.188	πῶς τὰρ ἴω μετὰ μῶλον; ἔχουσι δὲ τεύχεʼ ἐκεῖνοι·
Iliad 18.189	μήτηρ δʼ οὔ με φίλη πρίν γʼ εἴα θωρήσσεσθαι
Iliad 18.190	πρίν γʼ αὐτὴν ἐλθοῦσαν ἐν ὀφθαλμοῖσιν ἴδωμαι·
Iliad 18.191	στεῦτο γὰρ Ἡφαίστοιο πάρʼ οἰσέμεν ἔντεα καλά.
Iliad 18.192	ἄλλου δʼ οὔ τευ οἶδα τεῦ ἂν κλυτὰ τεύχεα δύω,
Iliad 18.193	εἰ μὴ Αἴαντός γε σάκος Τελαμωνιάδαο.
Iliad 18.194	ἀλλὰ καὶ αὐτὸς ὅ γʼ ἔλπομʼ ἐνὶ πρώτοισιν ὁμιλεῖ
Iliad 18.195	ἔγχεϊ δηϊόων περὶ Πατρόκλοιο θανόντος.
Iliad 18.196	τὸν δʼ αὖτε προσέειπε ποδήνεμος ὠκέα Ἶρις·
Iliad 18.197	εὖ νυ καὶ ἡμεῖς ἴδμεν ὅ τοι κλυτὰ τεύχεʼ ἔχονται·
Iliad 18.198	ἀλλʼ αὔτως ἐπὶ τάφρον ἰὼν Τρώεσσι φάνηθι,
Iliad 18.199	αἴ κέ σʼ ὑποδείσαντες ἀπόσχωνται πολέμοιο
Iliad 18.200	Τρῶες, ἀναπνεύσωσι δʼ ἀρήϊοι υἷες Ἀχαιῶν
Iliad 18.201	τειρόμενοι· ὀλίγη δέ τʼ ἀνάπνευσις πολέμοιο.
Iliad 18.202	ἣ μὲν ἄρʼ ὣς εἰποῦσʼ ἀπέβη πόδας ὠκέα Ἶρις,
Iliad 18.203	αὐτὰρ Ἀχιλλεὺς ὦρτο Διῒ φίλος· ἀμφὶ δʼ Ἀθήνη
Iliad 18.204	ὤμοις ἰφθίμοισι βάλʼ αἰγίδα θυσσανόεσσαν,
Iliad 18.205	ἀμφὶ δέ οἱ κεφαλῇ νέφος ἔστεφε δῖα θεάων
Iliad 18.206	χρύσεον, ἐκ δʼ αὐτοῦ δαῖε φλόγα παμφανόωσαν.
Iliad 18.207	ὡς δʼ ὅτε καπνὸς ἰὼν ἐξ ἄστεος αἰθέρʼ ἵκηται
Iliad 18.208	τηλόθεν ἐκ νήσου, τὴν δήϊοι ἀμφιμάχωνται,
Iliad 18.209	οἵ τε πανημέριοι στυγερῷ κρίνονται Ἄρηϊ
Iliad 18.210	ἄστεος ἐκ σφετέρου· ἅμα δʼ ἠελίῳ καταδύντι
Iliad 18.211	πυρσοί τε φλεγέθουσιν ἐπήτριμοι, ὑψόσε δʼ αὐγὴ
Iliad 18.212	γίγνεται ἀΐσσουσα περικτιόνεσσιν ἰδέσθαι,
Iliad 18.213	αἴ κέν πως σὺν νηυσὶν ἄρεω ἀλκτῆρες ἵκωνται·
Iliad 18.214	ὣς ἀπʼ Ἀχιλλῆος κεφαλῆς σέλας αἰθέρʼ ἵκανε·
Iliad 18.215	στῆ δʼ ἐπὶ τάφρον ἰὼν ἀπὸ τείχεος, οὐδʼ ἐς Ἀχαιοὺς
Iliad 18.216	μίσγετο· μητρὸς γὰρ πυκινὴν ὠπίζετʼ ἐφετμήν.
Iliad 18.217	ἔνθα στὰς ἤϋσʼ, ἀπάτερθε δὲ Παλλὰς Ἀθήνη
Iliad 18.218	φθέγξατʼ· ἀτὰρ Τρώεσσιν ἐν ἄσπετον ὦρσε κυδοιμόν.
Iliad 18.219	ὡς δʼ ὅτʼ ἀριζήλη φωνή, ὅτε τʼ ἴαχε σάλπιγξ
Iliad 18.220	ἄστυ περιπλομένων δηΐων ὕπο θυμοραϊστέων,
Iliad 18.221	ὣς τότʼ ἀριζήλη φωνὴ γένετʼ Αἰακίδαο.
Iliad 18.222	οἳ δʼ ὡς οὖν ἄϊον ὄπα χάλκεον Αἰακίδαο,
Iliad 18.223	πᾶσιν ὀρίνθη θυμός· ἀτὰρ καλλίτριχες ἵπποι
Iliad 18.224	ἂψ ὄχεα τρόπεον· ὄσσοντο γὰρ ἄλγεα θυμῷ.
Iliad 18.225	ἡνίοχοι δʼ ἔκπληγεν, ἐπεὶ ἴδον ἀκάματον πῦρ
Iliad 18.226	δεινὸν ὑπὲρ κεφαλῆς μεγαθύμου Πηλεΐωνος
Iliad 18.227	δαιόμενον· τὸ δὲ δαῖε θεὰ γλαυκῶπις Ἀθήνη.
Iliad 18.228	τρὶς μὲν ὑπὲρ τάφρου μεγάλʼ ἴαχε δῖος Ἀχιλλεύς,
Iliad 18.229	τρὶς δὲ κυκήθησαν Τρῶες κλειτοί τʼ ἐπίκουροι.
Iliad 18.230	ἔνθα δὲ καὶ τότʼ ὄλοντο δυώδεκα φῶτες ἄριστοι
Iliad 18.231	ἀμφὶ σφοῖς ὀχέεσσι καὶ ἔγχεσιν. αὐτὰρ Ἀχαιοὶ
Iliad 18.232	ἀσπασίως Πάτροκλον ὑπʼ ἐκ βελέων ἐρύσαντες
Iliad 18.233	κάτθεσαν ἐν λεχέεσσι· φίλοι δʼ ἀμφέσταν ἑταῖροι
Iliad 18.234	μυρόμενοι· μετὰ δέ σφι ποδώκης εἵπετʼ Ἀχιλλεὺς
Iliad 18.235	δάκρυα θερμὰ χέων, ἐπεὶ εἴσιδε πιστὸν ἑταῖρον
Iliad 18.236	κείμενον ἐν φέρτρῳ δεδαϊγμένον ὀξέϊ χαλκῷ,
Iliad 18.237	τόν ῥʼ ἤτοι μὲν ἔπεμπε σὺν ἵπποισιν καὶ ὄχεσφιν
Iliad 18.238	ἐς πόλεμον, οὐδʼ αὖτις ἐδέξατο νοστήσαντα.
Iliad 18.239	Ἠέλιον δʼ ἀκάμαντα βοῶπις πότνια Ἥρη
Iliad 18.240	πέμψεν ἐπʼ Ὠκεανοῖο ῥοὰς ἀέκοντα νέεσθαι·
Iliad 18.241	ἠέλιος μὲν ἔδυ, παύσαντο δὲ δῖοι Ἀχαιοὶ
Iliad 18.242	φυλόπιδος κρατερῆς καὶ ὁμοιΐου πολέμοιο.
Iliad 18.243	Τρῶες δʼ αὖθʼ ἑτέρωθεν ἀπὸ κρατερῆς ὑσμίνης
Iliad 18.244	χωρήσαντες ἔλυσαν ὑφʼ ἅρμασιν ὠκέας ἵππους,
Iliad 18.245	ἐς δʼ ἀγορὴν ἀγέροντο πάρος δόρποιο μέδεσθαι.
Iliad 18.246	ὀρθῶν δʼ ἑσταότων ἀγορὴ γένετʼ, οὐδέ τις ἔτλη
Iliad 18.247	ἕζεσθαι· πάντας γὰρ ἔχε τρόμος, οὕνεκʼ Ἀχιλλεὺς
Iliad 18.248	ἐξεφάνη, δηρὸν δὲ μάχης ἐπέπαυτʼ ἀλεγεινῆς.
Iliad 18.249	τοῖσι δὲ Πουλυδάμας πεπνυμένος ἦρχʼ ἀγορεύειν
Iliad 18.250	Πανθοΐδης· ὃ γὰρ οἶος ὅρα πρόσσω καὶ ὀπίσσω·
Iliad 18.251	Ἕκτορι δʼ ἦεν ἑταῖρος, ἰῇ δʼ ἐν νυκτὶ γένοντο,
Iliad 18.252	ἀλλʼ ὃ μὲν ἂρ μύθοισιν, ὃ δʼ ἔγχεϊ πολλὸν ἐνίκα·
Iliad 18.253	ὅ σφιν ἐϋφρονέων ἀγορήσατο καὶ μετέειπεν·
Iliad 18.254	ἀμφὶ μάλα φράζεσθε φίλοι· κέλομαι γὰρ ἔγωγε
Iliad 18.255	ἄστυδε νῦν ἰέναι, μὴ μίμνειν ἠῶ δῖαν
Iliad 18.256	ἐν πεδίῳ παρὰ νηυσίν· ἑκὰς δʼ ἀπὸ τείχεός εἰμεν.
Iliad 18.257	ὄφρα μὲν οὗτος ἀνὴρ Ἀγαμέμνονι μήνιε δίῳ
Iliad 18.258	τόφρα δὲ ῥηΐτεροι πολεμίζειν ἦσαν Ἀχαιοί·
Iliad 18.259	χαίρεσκον γὰρ ἔγωγε θοῇς ἐπὶ νηυσὶν ἰαύων
Iliad 18.260	ἐλπόμενος νῆας αἱρησέμεν ἀμφιελίσσας.
Iliad 18.261	νῦν δʼ αἰνῶς δείδοικα ποδώκεα Πηλεΐωνα·
Iliad 18.262	οἷος κείνου θυμὸς ὑπέρβιος, οὐκ ἐθελήσει
Iliad 18.263	μίμνειν ἐν πεδίῳ, ὅθι περ Τρῶες καὶ Ἀχαιοὶ
Iliad 18.264	ἐν μέσῳ ἀμφότεροι μένος Ἄρηος δατέονται,
Iliad 18.265	ἀλλὰ περὶ πτόλιός τε μαχήσεται ἠδὲ γυναικῶν.
Iliad 18.266	ἀλλʼ ἴομεν προτὶ ἄστυ, πίθεσθέ μοι· ὧδε γὰρ ἔσται·
Iliad 18.267	νῦν μὲν νὺξ ἀπέπαυσε ποδώκεα Πηλεΐωνα
Iliad 18.268	ἀμβροσίη· εἰ δʼ ἄμμε κιχήσεται ἐνθάδʼ ἐόντας
Iliad 18.269	αὔριον ὁρμηθεὶς σὺν τεύχεσιν, εὖ νύ τις αὐτὸν
Iliad 18.270	γνώσεται· ἀσπασίως γὰρ ἀφίξεται Ἴλιον ἱρὴν
Iliad 18.271	ὅς κε φύγῃ, πολλοὺς δὲ κύνες καὶ γῦπες ἔδονται
Iliad 18.272	Τρώων· αἲ γὰρ δή μοι ἀπʼ οὔατος ὧδε γένοιτο.
Iliad 18.273	εἰ δʼ ἂν ἐμοῖς ἐπέεσσι πιθώμεθα κηδόμενοί περ,
Iliad 18.274	νύκτα μὲν εἰν ἀγορῇ σθένος ἕξομεν, ἄστυ δὲ πύργοι
Iliad 18.275	ὑψηλαί τε πύλαι σανίδες τʼ ἐπὶ τῇς ἀραρυῖαι
Iliad 18.276	μακραὶ ἐΰξεστοι ἐζευγμέναι εἰρύσσονται·
Iliad 18.277	πρῶϊ δʼ ὑπηοῖοι σὺν τεύχεσι θωρηχθέντες
Iliad 18.278	στησόμεθʼ ἂμ πύργους· τῷ δʼ ἄλγιον, αἴ κʼ ἐθέλῃσιν
Iliad 18.279	ἐλθὼν ἐκ νηῶν περὶ τείχεος ἄμμι μάχεσθαι.
Iliad 18.280	ἂψ πάλιν εἶσʼ ἐπὶ νῆας, ἐπεί κʼ ἐριαύχενας ἵππους
Iliad 18.281	παντοίου δρόμου ἄσῃ ὑπὸ πτόλιν ἠλασκάζων·
Iliad 18.282	εἴσω δʼ οὔ μιν θυμὸς ἐφορμηθῆναι ἐάσει,
Iliad 18.283	οὐδέ ποτʼ ἐκπέρσει· πρίν μιν κύνες ἀργοὶ ἔδονται.
Iliad 18.284	τὸν δʼ ἄρʼ ὑπόδρα ἰδὼν προσέφη κορυθαίολος Ἕκτωρ·
Iliad 18.285	Πουλυδάμα σὺ μὲν οὐκέτʼ ἐμοὶ φίλα ταῦτʼ ἀγορεύεις,
Iliad 18.286	ὃς κέλεαι κατὰ ἄστυ ἀλήμεναι αὖτις ἰόντας.
Iliad 18.287	ἦ οὔ πω κεκόρησθε ἐελμένοι ἔνδοθι πύργων;
Iliad 18.288	πρὶν μὲν γὰρ Πριάμοιο πόλιν μέροπες ἄνθρωποι
Iliad 18.289	πάντες μυθέσκοντο πολύχρυσον πολύχαλκον·
Iliad 18.290	νῦν δὲ δὴ ἐξαπόλωλε δόμων κειμήλια καλά,
Iliad 18.291	πολλὰ δὲ δὴ Φρυγίην καὶ Μῃονίην ἐρατεινὴν
Iliad 18.292	κτήματα περνάμενʼ ἵκει, ἐπεὶ μέγας ὠδύσατο Ζεύς.
Iliad 18.293	νῦν δʼ ὅτε πέρ μοι ἔδωκε Κρόνου πάϊς ἀγκυλομήτεω
Iliad 18.294	κῦδος ἀρέσθʼ ἐπὶ νηυσί, θαλάσσῃ τʼ ἔλσαι Ἀχαιούς,
Iliad 18.295	νήπιε μηκέτι ταῦτα νοήματα φαῖνʼ ἐνὶ δήμῳ·
Iliad 18.296	οὐ γάρ τις Τρώων ἐπιπείσεται· οὐ γὰρ ἐάσω.
Iliad 18.297	ἀλλʼ ἄγεθʼ ὡς ἂν ἐγὼ εἴπω, πειθώμεθα πάντες.
Iliad 18.298	νῦν μὲν δόρπον ἕλεσθε κατὰ στρατὸν ἐν τελέεσσι,
Iliad 18.299	καὶ φυλακῆς μνήσασθε, καὶ ἐγρήγορθε ἕκαστος·
Iliad 18.300	Τρώων δʼ ὃς κτεάτεσσιν ὑπερφιάλως ἀνιάζει,
Iliad 18.301	συλλέξας λαοῖσι δότω καταδημοβορῆσαι·
Iliad 18.302	τῶν τινὰ βέλτερόν ἐστιν ἐπαυρέμεν ἤ περ Ἀχαιούς.
Iliad 18.303	πρῶϊ δʼ ὑπηοῖοι σὺν τεύχεσι θωρηχθέντες
Iliad 18.304	νηυσὶν ἔπι γλαφυρῇσιν ἐγείρομεν ὀξὺν Ἄρηα.
Iliad 18.305	εἰ δʼ ἐτεὸν παρὰ ναῦφιν ἀνέστη δῖος Ἀχιλλεύς,
Iliad 18.306	ἄλγιον αἴ κʼ ἐθέλῃσι τῷ ἔσσεται· οὔ μιν ἔγωγε
Iliad 18.307	φεύξομαι ἐκ πολέμοιο δυσηχέος, ἀλλὰ μάλʼ ἄντην
Iliad 18.308	στήσομαι, ἤ κε φέρῃσι μέγα κράτος, ἦ κε φεροίμην.
Iliad 18.309	ξυνὸς Ἐνυάλιος, καί τε κτανέοντα κατέκτα.
Iliad 18.310	ὣς Ἕκτωρ ἀγόρευʼ, ἐπὶ δὲ Τρῶες κελάδησαν
Iliad 18.311	νήπιοι· ἐκ γάρ σφεων φρένας εἵλετο Παλλὰς Ἀθήνη.
Iliad 18.312	Ἕκτορι μὲν γὰρ ἐπῄνησαν κακὰ μητιόωντι,
Iliad 18.313	Πουλυδάμαντι δʼ ἄρʼ οὔ τις ὃς ἐσθλὴν φράζετο βουλήν.
Iliad 18.314	δόρπον ἔπειθʼ εἵλοντο κατὰ στρατόν· αὐτὰρ Ἀχαιοὶ
Iliad 18.315	παννύχιοι Πάτροκλον ἀνεστενάχοντο γοῶντες.
Iliad 18.316	τοῖσι δὲ Πηλεΐδης ἁδινοῦ ἐξῆρχε γόοιο
Iliad 18.317	χεῖρας ἐπʼ ἀνδροφόνους θέμενος στήθεσσιν ἑταίρου
Iliad 18.318	πυκνὰ μάλα στενάχων ὥς τε λὶς ἠϋγένειος,
Iliad 18.319	ᾧ ῥά θʼ ὑπὸ σκύμνους ἐλαφηβόλος ἁρπάσῃ ἀνὴρ
Iliad 18.320	ὕλης ἐκ πυκινῆς· ὃ δέ τʼ ἄχνυται ὕστερος ἐλθών,
Iliad 18.321	πολλὰ δέ τʼ ἄγκεʼ ἐπῆλθε μετʼ ἀνέρος ἴχνιʼ ἐρευνῶν
Iliad 18.322	εἴ ποθεν ἐξεύροι· μάλα γὰρ δριμὺς χόλος αἱρεῖ·
Iliad 18.323	ὣς ὃ βαρὺ στενάχων μετεφώνεε Μυρμιδόνεσσιν·
Iliad 18.324	ὢ πόποι ἦ ῥʼ ἅλιον ἔπος ἔκβαλον ἤματι κείνῳ
Iliad 18.325	θαρσύνων ἥρωα Μενοίτιον ἐν μεγάροισι·
Iliad 18.326	φῆν δέ οἱ εἰς Ὀπόεντα περικλυτὸν υἱὸν ἀπάξειν
Iliad 18.327	Ἴλιον ἐκπέρσαντα, λαχόντα τε ληΐδος αἶσαν.
Iliad 18.328	ἀλλʼ οὐ Ζεὺς ἄνδρεσσι νοήματα πάντα τελευτᾷ·
Iliad 18.329	ἄμφω γὰρ πέπρωται ὁμοίην γαῖαν ἐρεῦσαι
Iliad 18.330	αὐτοῦ ἐνὶ Τροίῃ, ἐπεὶ οὐδʼ ἐμὲ νοστήσαντα
Iliad 18.331	δέξεται ἐν μεγάροισι γέρων ἱππηλάτα Πηλεὺς
Iliad 18.332	οὐδὲ Θέτις μήτηρ, ἀλλʼ αὐτοῦ γαῖα καθέξει.
Iliad 18.333	νῦν δʼ ἐπεὶ οὖν Πάτροκλε σεῦ ὕστερος εἶμʼ ὑπὸ γαῖαν,
Iliad 18.334	οὔ σε πρὶν κτεριῶ πρίν γʼ Ἕκτορος ἐνθάδʼ ἐνεῖκαι
Iliad 18.335	τεύχεα καὶ κεφαλὴν μεγαθύμου σοῖο φονῆος·
Iliad 18.336	δώδεκα δὲ προπάροιθε πυρῆς ἀποδειροτομήσω
Iliad 18.337	Τρώων ἀγλαὰ τέκνα σέθεν κταμένοιο χολωθείς.
Iliad 18.338	τόφρα δέ μοι παρὰ νηυσὶ κορωνίσι κείσεαι αὔτως,
Iliad 18.339	ἀμφὶ δὲ σὲ Τρῳαὶ καὶ Δαρδανίδες βαθύκολποι
Iliad 18.340	κλαύσονται νύκτάς τε καὶ ἤματα δάκρυ χέουσαι,
Iliad 18.341	τὰς αὐτοὶ καμόμεσθα βίηφί τε δουρί τε μακρῷ
Iliad 18.342	πιείρας πέρθοντε πόλεις μερόπων ἀνθρώπων.
Iliad 18.343	ὣς εἰπὼν ἑτάροισιν ἐκέκλετο δῖος Ἀχιλλεὺς
Iliad 18.344	ἀμφὶ πυρὶ στῆσαι τρίποδα μέγαν, ὄφρα τάχιστα
Iliad 18.345	Πάτροκλον λούσειαν ἄπο βρότον αἱματόεντα.
Iliad 18.346	οἳ δὲ λοετροχόον τρίποδʼ ἵστασαν ἐν πυρὶ κηλέῳ,
Iliad 18.347	ἐν δʼ ἄρʼ ὕδωρ ἔχεαν, ὑπὸ δὲ ξύλα δαῖον ἑλόντες.
Iliad 18.348	γάστρην μὲν τρίποδος πῦρ ἄμφεπε, θέρμετο δʼ ὕδωρ·
Iliad 18.349	αὐτὰρ ἐπεὶ δὴ ζέσσεν ὕδωρ ἐνὶ ἤνοπι χαλκῷ,
Iliad 18.350	καὶ τότε δὴ λοῦσάν τε καὶ ἤλειψαν λίπʼ ἐλαίῳ,
Iliad 18.351	ἐν δʼ ὠτειλὰς πλῆσαν ἀλείφατος ἐννεώροιο·
Iliad 18.352	ἐν λεχέεσσι δὲ θέντες ἑανῷ λιτὶ κάλυψαν
Iliad 18.353	ἐς πόδας ἐκ κεφαλῆς, καθύπερθε δὲ φάρεϊ λευκῷ.
Iliad 18.354	παννύχιοι μὲν ἔπειτα πόδας ταχὺν ἀμφʼ Ἀχιλῆα
Iliad 18.355	Μυρμιδόνες Πάτροκλον ἀνεστενάχοντο γοῶντες·
Iliad 18.356	Ζεὺς δʼ Ἥρην προσέειπε κασιγνήτην ἄλοχόν τε·
Iliad 18.357	ἔπρηξας καὶ ἔπειτα βοῶπις πότνια Ἥρη
Iliad 18.358	ἀνστήσασʼ Ἀχιλῆα πόδας ταχύν· ἦ ῥά νυ σεῖο
Iliad 18.359	ἐξ αὐτῆς ἐγένοντο κάρη κομόωντες Ἀχαιοί.
Iliad 18.360	τὸν δʼ ἠμείβετʼ ἔπειτα βοῶπις πότνια Ἥρη·
Iliad 18.361	αἰνότατε Κρονίδη ποῖον τὸν μῦθον ἔειπες.
Iliad 18.362	καὶ μὲν δή πού τις μέλλει βροτὸς ἀνδρὶ τελέσσαι,
Iliad 18.363	ὅς περ θνητός τʼ ἐστὶ καὶ οὐ τόσα μήδεα οἶδε·
Iliad 18.364	πῶς δὴ ἔγωγʼ, ἥ φημι θεάων ἔμμεν ἀρίστη,
Iliad 18.365	ἀμφότερον γενεῇ τε καὶ οὕνεκα σὴ παράκοιτις
Iliad 18.366	κέκλημαι, σὺ δὲ πᾶσι μετʼ ἀθανάτοισιν ἀνάσσεις,
Iliad 18.367	οὐκ ὄφελον Τρώεσσι κοτεσσαμένη κακὰ ῥάψαι;
Iliad 18.368	ὣς οἳ μὲν τοιαῦτα πρὸς ἀλλήλους ἀγόρευον·
Iliad 18.369	Ἡφαίστου δʼ ἵκανε δόμον Θέτις ἀργυρόπεζα
Iliad 18.370	ἄφθιτον ἀστερόεντα μεταπρεπέʼ ἀθανάτοισι
Iliad 18.371	χάλκεον, ὅν ῥʼ αὐτὸς ποιήσατο κυλλοποδίων.
Iliad 18.372	τὸν δʼ εὗρʼ ἱδρώοντα ἑλισσόμενον περὶ φύσας
Iliad 18.373	σπεύδοντα· τρίποδας γὰρ ἐείκοσι πάντας ἔτευχεν
Iliad 18.374	ἑστάμεναι περὶ τοῖχον ἐϋσταθέος μεγάροιο,
Iliad 18.375	χρύσεα δέ σφʼ ὑπὸ κύκλα ἑκάστῳ πυθμένι θῆκεν,
Iliad 18.376	ὄφρά οἱ αὐτόματοι θεῖον δυσαίατʼ ἀγῶνα
Iliad 18.377	ἠδʼ αὖτις πρὸς δῶμα νεοίατο θαῦμα ἰδέσθαι.
Iliad 18.378	οἳ δʼ ἤτοι τόσσον μὲν ἔχον τέλος, οὔατα δʼ οὔ πω
Iliad 18.379	δαιδάλεα προσέκειτο· τά ῥʼ ἤρτυε, κόπτε δὲ δεσμούς.
Iliad 18.380	ὄφρʼ ὅ γε ταῦτʼ ἐπονεῖτο ἰδυίῃσι πραπίδεσσι,
Iliad 18.381	τόφρά οἱ ἐγγύθεν ἦλθε θεὰ Θέτις ἀργυρόπεζα.
Iliad 18.382	τὴν δὲ ἴδε προμολοῦσα Χάρις λιπαροκρήδεμνος
Iliad 18.383	καλή, τὴν ὤπυιε περικλυτὸς ἀμφιγυήεις·
Iliad 18.384	ἔν τʼ ἄρα οἱ φῦ χειρὶ ἔπος τʼ ἔφατʼ ἔκ τʼ ὀνόμαζε·
Iliad 18.385	τίπτε Θέτι τανύπεπλε ἱκάνεις ἡμέτερον δῶ
Iliad 18.386	αἰδοίη τε φίλη τε; πάρος γε μὲν οὔ τι θαμίζεις.
Iliad 18.387	ἀλλʼ ἕπεο προτέρω, ἵνα τοι πὰρ ξείνια θείω.
Iliad 18.388	ὣς ἄρα φωνήσασα πρόσω ἄγε δῖα θεάων.
Iliad 18.389	τὴν μὲν ἔπειτα καθεῖσεν ἐπὶ θρόνου ἀργυροήλου
Iliad 18.390	καλοῦ δαιδαλέου· ὑπὸ δὲ θρῆνυς ποσὶν ἦεν·
Iliad 18.391	κέκλετο δʼ Ἥφαιστον κλυτοτέχνην εἶπέ τε μῦθον·
Iliad 18.392	Ἥφαιστε πρόμολʼ ὧδε· Θέτις νύ τι σεῖο χατίζει.
Iliad 18.393	τὴν δʼ ἠμείβετʼ ἔπειτα περικλυτὸς ἀμφιγυήεις·
Iliad 18.394	ἦ ῥά νύ μοι δεινή τε καὶ αἰδοίη θεὸς ἔνδον,
Iliad 18.395	ἥ μʼ ἐσάωσʼ ὅτε μʼ ἄλγος ἀφίκετο τῆλε πεσόντα
Iliad 18.396	μητρὸς ἐμῆς ἰότητι κυνώπιδος, ἥ μʼ ἐθέλησε
Iliad 18.397	κρύψαι χωλὸν ἐόντα· τότʼ ἂν πάθον ἄλγεα θυμῷ,
Iliad 18.398	εἰ μή μʼ Εὐρυνόμη τε Θέτις θʼ ὑπεδέξατο κόλπῳ
Iliad 18.399	Εὐρυνόμη θυγάτηρ ἀψορρόου Ὠκεανοῖο.
Iliad 18.400	τῇσι παρʼ εἰνάετες χάλκευον δαίδαλα πολλά,
Iliad 18.401	πόρπας τε γναμπτάς θʼ ἕλικας κάλυκάς τε καὶ ὅρμους
Iliad 18.402	ἐν σπῆϊ γλαφυρῷ· περὶ δὲ ῥόος Ὠκεανοῖο
Iliad 18.403	ἀφρῷ μορμύρων ῥέεν ἄσπετος· οὐδέ τις ἄλλος
Iliad 18.404	ᾔδεεν οὔτε θεῶν οὔτε θνητῶν ἀνθρώπων,
Iliad 18.405	ἀλλὰ Θέτις τε καὶ Εὐρυνόμη ἴσαν, αἵ μʼ ἐσάωσαν.
Iliad 18.406	ἣ νῦν ἡμέτερον δόμον ἵκει· τώ με μάλα χρεὼ
Iliad 18.407	πάντα Θέτι καλλιπλοκάμῳ ζῳάγρια τίνειν.
Iliad 18.408	ἀλλὰ σὺ μὲν νῦν οἱ παράθες ξεινήϊα καλά,
Iliad 18.409	ὄφρʼ ἂν ἐγὼ φύσας ἀποθείομαι ὅπλά τε πάντα.
Iliad 18.410	ἦ, καὶ ἀπʼ ἀκμοθέτοιο πέλωρ αἴητον ἀνέστη
Iliad 18.411	χωλεύων· ὑπὸ δὲ κνῆμαι ῥώοντο ἀραιαί.
Iliad 18.412	φύσας μέν ῥʼ ἀπάνευθε τίθει πυρός, ὅπλά τε πάντα
Iliad 18.413	λάρνακʼ ἐς ἀργυρέην συλλέξατο, τοῖς ἐπονεῖτο·
Iliad 18.414	σπόγγῳ δʼ ἀμφὶ πρόσωπα καὶ ἄμφω χεῖρʼ ἀπομόργνυ
Iliad 18.415	αὐχένα τε στιβαρὸν καὶ στήθεα λαχνήεντα,
Iliad 18.416	δῦ δὲ χιτῶνʼ, ἕλε δὲ σκῆπτρον παχύ, βῆ δὲ θύραζε
Iliad 18.417	χωλεύων· ὑπὸ δʼ ἀμφίπολοι ῥώοντο ἄνακτι
Iliad 18.418	χρύσειαι ζωῇσι νεήνισιν εἰοικυῖαι.
Iliad 18.419	τῇς ἐν μὲν νόος ἐστὶ μετὰ φρεσίν, ἐν δὲ καὶ αὐδὴ
Iliad 18.420	καὶ σθένος, ἀθανάτων δὲ θεῶν ἄπο ἔργα ἴσασιν.
Iliad 18.421	αἳ μὲν ὕπαιθα ἄνακτος ἐποίπνυον· αὐτὰρ ὃ ἔρρων
Iliad 18.422	πλησίον, ἔνθα Θέτις περ, ἐπὶ θρόνου ἷζε φαεινοῦ,
Iliad 18.423	ἔν τʼ ἄρα οἱ φῦ χειρὶ ἔπος τʼ ἔφατʼ ἔκ τʼ ὀνόμαζε·
Iliad 18.424	τίπτε Θέτι τανύπεπλε ἱκάνεις ἡμέτερον δῶ
Iliad 18.425	αἰδοίη τε φίλη τε; πάρος γε μὲν οὔ τι θαμίζεις.
Iliad 18.426	αὔδα ὅ τι φρονέεις· τελέσαι δέ με θυμὸς ἄνωγεν,
Iliad 18.427	εἰ δύναμαι τελέσαι γε καὶ εἰ τετελεσμένον ἐστίν.
Iliad 18.428	τὸν δʼ ἠμείβετʼ ἔπειτα Θέτις κατὰ δάκρυ χέουσα·
Iliad 18.429	Ἥφαιστʼ, ἦ ἄρα δή τις, ὅσαι θεαί εἰσʼ ἐν Ὀλύμπῳ,
Iliad 18.430	τοσσάδʼ ἐνὶ φρεσὶν ᾗσιν ἀνέσχετο κήδεα λυγρὰ
Iliad 18.431	ὅσσʼ ἐμοὶ ἐκ πασέων Κρονίδης Ζεὺς ἄλγεʼ ἔδωκεν;
Iliad 18.432	ἐκ μέν μʼ ἀλλάων ἁλιάων ἀνδρὶ δάμασσεν
Iliad 18.433	Αἰακίδῃ Πηλῆϊ, καὶ ἔτλην ἀνέρος εὐνὴν
Iliad 18.434	πολλὰ μάλʼ οὐκ ἐθέλουσα. ὃ μὲν δὴ γήραϊ λυγρῷ
Iliad 18.435	κεῖται ἐνὶ μεγάροις ἀρημένος, ἄλλα δέ μοι νῦν·
Iliad 18.436	υἱὸν ἐπεί μοι δῶκε γενέσθαί τε τραφέμεν τε
Iliad 18.437	ἔξοχον ἡρώων· ὃ δʼ ἀνέδραμεν ἔρνεϊ ἶσος·
Iliad 18.438	τὸν μὲν ἐγὼ θρέψασα φυτὸν ὣς γουνῷ ἀλωῆς
Iliad 18.439	νηυσὶν ἐπιπροέηκα κορωνίσιν Ἴλιον εἴσω
Iliad 18.440	Τρωσὶ μαχησόμενον· τὸν δʼ οὐχ ὑποδέξομαι αὖτις
Iliad 18.441	οἴκαδε νοστήσαντα δόμον Πηλήϊον εἴσω.
Iliad 18.442	ὄφρα δέ μοι ζώει καὶ ὁρᾷ φάος ἠελίοιο
Iliad 18.443	ἄχνυται, οὐδέ τί οἱ δύναμαι χραισμῆσαι ἰοῦσα.
Iliad 18.444	κούρην ἣν ἄρα οἱ γέρας ἔξελον υἷες Ἀχαιῶν,
Iliad 18.445	τὴν ἂψ ἐκ χειρῶν ἕλετο κρείων Ἀγαμέμνων.
Iliad 18.446	ἤτοι ὃ τῆς ἀχέων φρένας ἔφθιεν· αὐτὰρ Ἀχαιοὺς
Iliad 18.447	Τρῶες ἐπὶ πρύμνῃσιν ἐείλεον, οὐδὲ θύραζε
Iliad 18.448	εἴων ἐξιέναι· τὸν δὲ λίσσοντο γέροντες
Iliad 18.449	Ἀργείων, καὶ πολλὰ περικλυτὰ δῶρʼ ὀνόμαζον.
Iliad 18.450	ἔνθʼ αὐτὸς μὲν ἔπειτʼ ἠναίνετο λοιγὸν ἀμῦναι,
Iliad 18.451	αὐτὰρ ὃ Πάτροκλον περὶ μὲν τὰ ἃ τεύχεα ἕσσε,
Iliad 18.452	πέμπε δέ μιν πόλεμον δέ, πολὺν δʼ ἅμα λαὸν ὄπασσε.
Iliad 18.453	πᾶν δʼ ἦμαρ μάρναντο περὶ Σκαιῇσι πύλῃσι·
Iliad 18.454	καί νύ κεν αὐτῆμαρ πόλιν ἔπραθον, εἰ μὴ Ἀπόλλων
Iliad 18.455	πολλὰ κακὰ ῥέξαντα Μενοιτίου ἄλκιμον υἱὸν
Iliad 18.456	ἔκτανʼ ἐνὶ προμάχοισι καὶ Ἕκτορι κῦδος ἔδωκε.
Iliad 18.457	τοὔνεκα νῦν τὰ σὰ γούναθʼ ἱκάνομαι, αἴ κʼ ἐθέλῃσθα
Iliad 18.458	υἱεῖ ἐμῷ ὠκυμόρῳ δόμεν ἀσπίδα καὶ τρυφάλειαν
Iliad 18.459	καὶ καλὰς κνημῖδας ἐπισφυρίοις ἀραρυίας
Iliad 18.460	καὶ θώρηχʼ· ὃ γὰρ ἦν οἱ ἀπώλεσε πιστὸς ἑταῖρος
Iliad 18.461	Τρωσὶ δαμείς· ὃ δὲ κεῖται ἐπὶ χθονὶ θυμὸν ἀχεύων.
Iliad 18.462	τὴν δʼ ἠμείβετʼ ἔπειτα περικλυτὸς ἀμφιγυήεις·
Iliad 18.463	θάρσει· μή τοι ταῦτα μετὰ φρεσὶ σῇσι μελόντων.
Iliad 18.464	αἲ γάρ μιν θανάτοιο δυσηχέος ὧδε δυναίμην
Iliad 18.465	νόσφιν ἀποκρύψαι, ὅτε μιν μόρος αἰνὸς ἱκάνοι,
Iliad 18.466	ὥς οἱ τεύχεα καλὰ παρέσσεται, οἷά τις αὖτε
Iliad 18.467	ἀνθρώπων πολέων θαυμάσσεται, ὅς κεν ἴδηται.
Iliad 18.468	ὣς εἰπὼν τὴν μὲν λίπεν αὐτοῦ, βῆ δʼ ἐπὶ φύσας·
Iliad 18.469	τὰς δʼ ἐς πῦρ ἔτρεψε κέλευσέ τε ἐργάζεσθαι.
Iliad 18.470	φῦσαι δʼ ἐν χοάνοισιν ἐείκοσι πᾶσαι ἐφύσων
Iliad 18.471	παντοίην εὔπρηστον ἀϋτμὴν ἐξανιεῖσαι,
Iliad 18.472	ἄλλοτε μὲν σπεύδοντι παρέμμεναι, ἄλλοτε δʼ αὖτε,
Iliad 18.473	ὅππως Ἥφαιστός τʼ ἐθέλοι καὶ ἔργον ἄνοιτο.
Iliad 18.474	χαλκὸν δʼ ἐν πυρὶ βάλλεν ἀτειρέα κασσίτερόν τε
Iliad 18.475	καὶ χρυσὸν τιμῆντα καὶ ἄργυρον· αὐτὰρ ἔπειτα
Iliad 18.476	θῆκεν ἐν ἀκμοθέτῳ μέγαν ἄκμονα, γέντο δὲ χειρὶ
Iliad 18.477	ῥαιστῆρα κρατερήν, ἑτέρηφι δὲ γέντο πυράγρην.
Iliad 18.478	ποίει δὲ πρώτιστα σάκος μέγα τε στιβαρόν τε
Iliad 18.479	πάντοσε δαιδάλλων, περὶ δʼ ἄντυγα βάλλε φαεινὴν
Iliad 18.480	τρίπλακα μαρμαρέην, ἐκ δʼ ἀργύρεον τελαμῶνα.
Iliad 18.481	πέντε δʼ ἄρʼ αὐτοῦ ἔσαν σάκεος πτύχες· αὐτὰρ ἐν αὐτῷ
Iliad 18.482	ποίει δαίδαλα πολλὰ ἰδυίῃσι πραπίδεσσιν.
Iliad 18.483	ἐν μὲν γαῖαν ἔτευξʼ, ἐν δʼ οὐρανόν, ἐν δὲ θάλασσαν,
Iliad 18.484	ἠέλιόν τʼ ἀκάμαντα σελήνην τε πλήθουσαν,
Iliad 18.485	ἐν δὲ τὰ τείρεα πάντα, τά τʼ οὐρανὸς ἐστεφάνωται,
Iliad 18.486	Πληϊάδας θʼ Ὑάδας τε τό τε σθένος Ὠρίωνος
Iliad 18.487	Ἄρκτόν θʼ, ἣν καὶ Ἄμαξαν ἐπίκλησιν καλέουσιν,
Iliad 18.488	ἥ τʼ αὐτοῦ στρέφεται καί τʼ Ὠρίωνα δοκεύει,
Iliad 18.489	οἴη δʼ ἄμμορός ἐστι λοετρῶν Ὠκεανοῖο.
Iliad 18.490	ἐν δὲ δύω ποίησε πόλεις μερόπων ἀνθρώπων
Iliad 18.491	καλάς. ἐν τῇ μέν ῥα γάμοι τʼ ἔσαν εἰλαπίναι τε,
Iliad 18.492	νύμφας δʼ ἐκ θαλάμων δαΐδων ὕπο λαμπομενάων
Iliad 18.493	ἠγίνεον ἀνὰ ἄστυ, πολὺς δʼ ὑμέναιος ὀρώρει·
Iliad 18.494	κοῦροι δʼ ὀρχηστῆρες ἐδίνεον, ἐν δʼ ἄρα τοῖσιν
Iliad 18.495	αὐλοὶ φόρμιγγές τε βοὴν ἔχον· αἳ δὲ γυναῖκες
Iliad 18.496	ἱστάμεναι θαύμαζον ἐπὶ προθύροισιν ἑκάστη.
Iliad 18.497	λαοὶ δʼ εἰν ἀγορῇ ἔσαν ἀθρόοι· ἔνθα δὲ νεῖκος
Iliad 18.498	ὠρώρει, δύο δʼ ἄνδρες ἐνείκεον εἵνεκα ποινῆς
Iliad 18.499	ἀνδρὸς ἀποφθιμένου· ὃ μὲν εὔχετο πάντʼ ἀποδοῦναι
Iliad 18.500	δήμῳ πιφαύσκων, ὃ δʼ ἀναίνετο μηδὲν ἑλέσθαι·
Iliad 18.501	ἄμφω δʼ ἱέσθην ἐπὶ ἴστορι πεῖραρ ἑλέσθαι.
Iliad 18.502	λαοὶ δʼ ἀμφοτέροισιν ἐπήπυον ἀμφὶς ἀρωγοί·
Iliad 18.503	κήρυκες δʼ ἄρα λαὸν ἐρήτυον· οἳ δὲ γέροντες
Iliad 18.504	εἵατʼ ἐπὶ ξεστοῖσι λίθοις ἱερῷ ἐνὶ κύκλῳ,
Iliad 18.505	σκῆπτρα δὲ κηρύκων ἐν χέρσʼ ἔχον ἠεροφώνων·
Iliad 18.506	τοῖσιν ἔπειτʼ ἤϊσσον, ἀμοιβηδὶς δὲ δίκαζον.
Iliad 18.507	κεῖτο δʼ ἄρʼ ἐν μέσσοισι δύω χρυσοῖο τάλαντα,
Iliad 18.508	τῷ δόμεν ὃς μετὰ τοῖσι δίκην ἰθύντατα εἴποι.
Iliad 18.509	τὴν δʼ ἑτέρην πόλιν ἀμφὶ δύω στρατοὶ ἥατο λαῶν
Iliad 18.510	τεύχεσι λαμπόμενοι· δίχα δέ σφισιν ἥνδανε βουλή,
Iliad 18.511	ἠὲ διαπραθέειν ἢ ἄνδιχα πάντα δάσασθαι
Iliad 18.512	κτῆσιν ὅσην πτολίεθρον ἐπήρατον ἐντὸς ἔεργεν·
Iliad 18.513	οἳ δʼ οὔ πω πείθοντο, λόχῳ δʼ ὑπεθωρήσσοντο.
Iliad 18.514	τεῖχος μέν ῥʼ ἄλοχοί τε φίλαι καὶ νήπια τέκνα
Iliad 18.515	ῥύατʼ ἐφεσταότες, μετὰ δʼ ἀνέρες οὓς ἔχε γῆρας·
Iliad 18.516	οἳ δʼ ἴσαν· ἦρχε δʼ ἄρά σφιν Ἄρης καὶ Παλλὰς Ἀθήνη
Iliad 18.517	ἄμφω χρυσείω, χρύσεια δὲ εἵματα ἕσθην,
Iliad 18.518	καλὼ καὶ μεγάλω σὺν τεύχεσιν, ὥς τε θεώ περ
Iliad 18.519	ἀμφὶς ἀριζήλω· λαοὶ δʼ ὑπολίζονες ἦσαν.
Iliad 18.520	οἳ δʼ ὅτε δή ῥʼ ἵκανον ὅθι σφίσιν εἶκε λοχῆσαι
Iliad 18.521	ἐν ποταμῷ, ὅθι τʼ ἀρδμὸς ἔην πάντεσσι βοτοῖσιν,
Iliad 18.522	ἔνθʼ ἄρα τοί γʼ ἵζοντʼ εἰλυμένοι αἴθοπι χαλκῷ.
Iliad 18.523	τοῖσι δʼ ἔπειτʼ ἀπάνευθε δύω σκοποὶ εἵατο λαῶν
Iliad 18.524	δέγμενοι ὁππότε μῆλα ἰδοίατο καὶ ἕλικας βοῦς.
Iliad 18.525	οἳ δὲ τάχα προγένοντο, δύω δʼ ἅμʼ ἕποντο νομῆες
Iliad 18.526	τερπόμενοι σύριγξι· δόλον δʼ οὔ τι προνόησαν.
Iliad 18.527	οἳ μὲν τὰ προϊδόντες ἐπέδραμον, ὦκα δʼ ἔπειτα
Iliad 18.528	τάμνοντʼ ἀμφὶ βοῶν ἀγέλας καὶ πώεα καλὰ
Iliad 18.529	ἀργεννέων οἰῶν, κτεῖνον δʼ ἐπὶ μηλοβοτῆρας.
Iliad 18.530	οἳ δʼ ὡς οὖν ἐπύθοντο πολὺν κέλαδον παρὰ βουσὶν
Iliad 18.531	εἰράων προπάροιθε καθήμενοι, αὐτίκʼ ἐφʼ ἵππων
Iliad 18.532	βάντες ἀερσιπόδων μετεκίαθον, αἶψα δʼ ἵκοντο.
Iliad 18.533	στησάμενοι δʼ ἐμάχοντο μάχην ποταμοῖο παρʼ ὄχθας,
Iliad 18.534	βάλλον δʼ ἀλλήλους χαλκήρεσιν ἐγχείῃσιν.
Iliad 18.535	ἐν δʼ Ἔρις ἐν δὲ Κυδοιμὸς ὁμίλεον, ἐν δʼ ὀλοὴ Κήρ,
Iliad 18.536	ἄλλον ζωὸν ἔχουσα νεούτατον, ἄλλον ἄουτον,
Iliad 18.537	ἄλλον τεθνηῶτα κατὰ μόθον ἕλκε ποδοῖιν·
Iliad 18.538	εἷμα δʼ ἔχʼ ἀμφʼ ὤμοισι δαφοινεὸν αἵματι φωτῶν.
Iliad 18.539	ὡμίλευν δʼ ὥς τε ζωοὶ βροτοὶ ἠδʼ ἐμάχοντο,
Iliad 18.540	νεκρούς τʼ ἀλλήλων ἔρυον κατατεθνηῶτας.
Iliad 18.541	ἐν δʼ ἐτίθει νειὸν μαλακὴν πίειραν ἄρουραν
Iliad 18.542	εὐρεῖαν τρίπολον· πολλοὶ δʼ ἀροτῆρες ἐν αὐτῇ
Iliad 18.543	ζεύγεα δινεύοντες ἐλάστρεον ἔνθα καὶ ἔνθα.
Iliad 18.544	οἳ δʼ ὁπότε στρέψαντες ἱκοίατο τέλσον ἀρούρης,
Iliad 18.545	τοῖσι δʼ ἔπειτʼ ἐν χερσὶ δέπας μελιηδέος οἴνου
Iliad 18.546	δόσκεν ἀνὴρ ἐπιών· τοὶ δὲ στρέψασκον ἀνʼ ὄγμους,
Iliad 18.547	ἱέμενοι νειοῖο βαθείης τέλσον ἱκέσθαι.
Iliad 18.548	ἣ δὲ μελαίνετʼ ὄπισθεν, ἀρηρομένῃ δὲ ἐῴκει,
Iliad 18.549	χρυσείη περ ἐοῦσα· τὸ δὴ περὶ θαῦμα τέτυκτο.
Iliad 18.550	ἐν δʼ ἐτίθει τέμενος βασιλήϊον· ἔνθα δʼ ἔριθοι
Iliad 18.551	ἤμων ὀξείας δρεπάνας ἐν χερσὶν ἔχοντες.
Iliad 18.552	δράγματα δʼ ἄλλα μετʼ ὄγμον ἐπήτριμα πῖπτον ἔραζε,
Iliad 18.553	ἄλλα δʼ ἀμαλλοδετῆρες ἐν ἐλλεδανοῖσι δέοντο.
Iliad 18.554	τρεῖς δʼ ἄρʼ ἀμαλλοδετῆρες ἐφέστασαν· αὐτὰρ ὄπισθε
Iliad 18.555	παῖδες δραγμεύοντες ἐν ἀγκαλίδεσσι φέροντες
Iliad 18.556	ἀσπερχὲς πάρεχον· βασιλεὺς δʼ ἐν τοῖσι σιωπῇ
Iliad 18.557	σκῆπτρον ἔχων ἑστήκει ἐπʼ ὄγμου γηθόσυνος κῆρ.
Iliad 18.558	κήρυκες δʼ ἀπάνευθεν ὑπὸ δρυῒ δαῖτα πένοντο,
Iliad 18.559	βοῦν δʼ ἱερεύσαντες μέγαν ἄμφεπον· αἳ δὲ γυναῖκες
Iliad 18.560	δεῖπνον ἐρίθοισιν λεύκʼ ἄλφιτα πολλὰ πάλυνον.
Iliad 18.561	ἐν δʼ ἐτίθει σταφυλῇσι μέγα βρίθουσαν ἀλωὴν
Iliad 18.562	καλὴν χρυσείην· μέλανες δʼ ἀνὰ βότρυες ἦσαν,
Iliad 18.563	ἑστήκει δὲ κάμαξι διαμπερὲς ἀργυρέῃσιν.
Iliad 18.564	ἀμφὶ δὲ κυανέην κάπετον, περὶ δʼ ἕρκος ἔλασσε
Iliad 18.565	κασσιτέρου· μία δʼ οἴη ἀταρπιτὸς ἦεν ἐπʼ αὐτήν,
Iliad 18.566	τῇ νίσοντο φορῆες ὅτε τρυγόῳεν ἀλωήν.
Iliad 18.567	παρθενικαὶ δὲ καὶ ἠΐθεοι ἀταλὰ φρονέοντες
Iliad 18.568	πλεκτοῖς ἐν ταλάροισι φέρον μελιηδέα καρπόν.
Iliad 18.569	τοῖσιν δʼ ἐν μέσσοισι πάϊς φόρμιγγι λιγείῃ
Iliad 18.570	ἱμερόεν κιθάριζε, λίνον δʼ ὑπὸ καλὸν ἄειδε
Iliad 18.571	λεπταλέῃ φωνῇ· τοὶ δὲ ῥήσσοντες ἁμαρτῇ
Iliad 18.572	μολπῇ τʼ ἰυγμῷ τε ποσὶ σκαίροντες ἕποντο.
Iliad 18.573	ἐν δʼ ἀγέλην ποίησε βοῶν ὀρθοκραιράων·
Iliad 18.574	αἳ δὲ βόες χρυσοῖο τετεύχατο κασσιτέρου τε,
Iliad 18.575	μυκηθμῷ δʼ ἀπὸ κόπρου ἐπεσσεύοντο νομὸν δὲ
Iliad 18.576	πὰρ ποταμὸν κελάδοντα, παρὰ ῥοδανὸν δονακῆα.
Iliad 18.577	χρύσειοι δὲ νομῆες ἅμʼ ἐστιχόωντο βόεσσι
Iliad 18.578	τέσσαρες, ἐννέα δέ σφι κύνες πόδας ἀργοὶ ἕποντο.
Iliad 18.579	σμερδαλέω δὲ λέοντε δύʼ ἐν πρώτῃσι βόεσσι
Iliad 18.580	ταῦρον ἐρύγμηλον ἐχέτην· ὃ δὲ μακρὰ μεμυκὼς
Iliad 18.581	ἕλκετο· τὸν δὲ κύνες μετεκίαθον ἠδʼ αἰζηοί.
Iliad 18.582	τὼ μὲν ἀναρρήξαντε βοὸς μεγάλοιο βοείην
Iliad 18.583	ἔγκατα καὶ μέλαν αἷμα λαφύσσετον· οἳ δὲ νομῆες
Iliad 18.584	αὔτως ἐνδίεσαν ταχέας κύνας ὀτρύνοντες.
Iliad 18.585	οἳ δʼ ἤτοι δακέειν μὲν ἀπετρωπῶντο λεόντων,
Iliad 18.586	ἱστάμενοι δὲ μάλʼ ἐγγὺς ὑλάκτεον ἔκ τʼ ἀλέοντο.
Iliad 18.587	ἐν δὲ νομὸν ποίησε περικλυτὸς ἀμφιγυήεις
Iliad 18.588	ἐν καλῇ βήσσῃ μέγαν οἰῶν ἀργεννάων,
Iliad 18.589	σταθμούς τε κλισίας τε κατηρεφέας ἰδὲ σηκούς.
Iliad 18.590	ἐν δὲ χορὸν ποίκιλλε περικλυτὸς ἀμφιγυήεις,
Iliad 18.591	τῷ ἴκελον οἷόν ποτʼ ἐνὶ Κνωσῷ εὐρείῃ
Iliad 18.592	Δαίδαλος ἤσκησεν καλλιπλοκάμῳ Ἀριάδνῃ.
Iliad 18.593	ἔνθα μὲν ἠΐθεοι καὶ παρθένοι ἀλφεσίβοιαι
Iliad 18.594	ὀρχεῦντʼ ἀλλήλων ἐπὶ καρπῷ χεῖρας ἔχοντες.
Iliad 18.595	τῶν δʼ αἳ μὲν λεπτὰς ὀθόνας ἔχον, οἳ δὲ χιτῶνας
Iliad 18.596	εἵατʼ ἐϋννήτους, ἦκα στίλβοντας ἐλαίῳ·
Iliad 18.597	καί ῥʼ αἳ μὲν καλὰς στεφάνας ἔχον, οἳ δὲ μαχαίρας
Iliad 18.598	εἶχον χρυσείας ἐξ ἀργυρέων τελαμώνων.
Iliad 18.599	οἳ δʼ ὁτὲ μὲν θρέξασκον ἐπισταμένοισι πόδεσσι
Iliad 18.600	ῥεῖα μάλʼ, ὡς ὅτε τις τροχὸν ἄρμενον ἐν παλάμῃσιν
Iliad 18.601	ἑζόμενος κεραμεὺς πειρήσεται, αἴ κε θέῃσιν·
Iliad 18.602	ἄλλοτε δʼ αὖ θρέξασκον ἐπὶ στίχας ἀλλήλοισι.
Iliad 18.603	πολλὸς δʼ ἱμερόεντα χορὸν περιίσταθʼ ὅμιλος
Iliad 18.604	τερπόμενοι· μετὰ δέ σφιν ἐμέλπετο θεῖος ἀοιδὸς
Iliad 18.605	φορμίζων· δοιὼ δὲ κυβιστητῆρε κατʼ αὐτοὺς
Iliad 18.606	μολπῆς ἐξάρχοντες ἐδίνευον κατὰ μέσσους.
Iliad 18.607	ἐν δʼ ἐτίθει ποταμοῖο μέγα σθένος Ὠκεανοῖο
Iliad 18.608	ἄντυγα πὰρ πυμάτην σάκεος πύκα ποιητοῖο.
Iliad 18.609	αὐτὰρ ἐπεὶ δὴ τεῦξε σάκος μέγα τε στιβαρόν τε,
Iliad 18.610	τεῦξʼ ἄρα οἱ θώρηκα φαεινότερον πυρὸς αὐγῆς,
Iliad 18.611	τεῦξε δέ οἱ κόρυθα βριαρὴν κροτάφοις ἀραρυῖαν
Iliad 18.612	καλὴν δαιδαλέην, ἐπὶ δὲ χρύσεον λόφον ἧκε,
Iliad 18.613	τεῦξε δέ οἱ κνημῖδας ἑανοῦ κασσιτέροιο.
Iliad 18.614	αὐτὰρ ἐπεὶ πάνθʼ ὅπλα κάμε κλυτὸς ἀμφιγυήεις,
Iliad 18.615	μητρὸς Ἀχιλλῆος θῆκε προπάροιθεν ἀείρας.
Iliad 18.616	ἣ δʼ ἴρηξ ὣς ἆλτο κατʼ Οὐλύμπου νιφόεντος
Iliad 18.617	τεύχεα μαρμαίροντα παρʼ Ἡφαίστοιο φέρουσα.
Iliad 19.1	Ἠὼς μὲν κροκόπεπλος ἀπʼ Ὠκεανοῖο ῥοάων
Iliad 19.2	ὄρνυθʼ, ἵνʼ ἀθανάτοισι φόως φέροι ἠδὲ βροτοῖσιν·
Iliad 19.3	ἣ δʼ ἐς νῆας ἵκανε θεοῦ πάρα δῶρα φέρουσα.
Iliad 19.4	εὗρε δὲ Πατρόκλῳ περικείμενον ὃν φίλον υἱὸν
Iliad 19.5	κλαίοντα λιγέως· πολέες δʼ ἀμφʼ αὐτὸν ἑταῖροι
Iliad 19.6	μύρονθʼ· ἣ δʼ ἐν τοῖσι παρίστατο δῖα θεάων,
Iliad 19.7	ἔν τʼ ἄρα οἱ φῦ χειρὶ ἔπος τʼ ἔφατʼ ἔκ τʼ ὀνόμαζε·
Iliad 19.8	τέκνον ἐμὸν τοῦτον μὲν ἐάσομεν ἀχνύμενοί περ
Iliad 19.9	κεῖσθαι, ἐπεὶ δὴ πρῶτα θεῶν ἰότητι δαμάσθη·
Iliad 19.10	τύνη δʼ Ἡφαίστοιο πάρα κλυτὰ τεύχεα δέξο
Iliad 19.11	καλὰ μάλʼ, οἷʼ οὔ πώ τις ἀνὴρ ὤμοισι φόρησεν.
Iliad 19.12	ὡς ἄρα φωνήσασα θεὰ κατὰ τεύχεʼ ἔθηκε
Iliad 19.13	πρόσθεν Ἀχιλλῆος· τὰ δʼ ἀνέβραχε δαίδαλα πάντα.
Iliad 19.14	Μυρμιδόνας δʼ ἄρα πάντας ἕλε τρόμος, οὐδέ τις ἔτλη
Iliad 19.15	ἄντην εἰσιδέειν, ἀλλʼ ἔτρεσαν. αὐτὰρ Ἀχιλλεὺς
Iliad 19.16	ὡς εἶδʼ, ὥς μιν μᾶλλον ἔδυ χόλος, ἐν δέ οἱ ὄσσε
Iliad 19.17	δεινὸν ὑπὸ βλεφάρων ὡς εἰ σέλας ἐξεφάανθεν·
Iliad 19.18	τέρπετο δʼ ἐν χείρεσσιν ἔχων θεοῦ ἀγλαὰ δῶρα.
Iliad 19.19	αὐτὰρ ἐπεὶ φρεσὶν ᾗσι τετάρπετο δαίδαλα λεύσσων
Iliad 19.20	αὐτίκα μητέρα ἣν ἔπεα πτερόεντα προσηύδα·
Iliad 19.21	μῆτερ ἐμὴ τὰ μὲν ὅπλα θεὸς πόρεν οἷʼ ἐπιεικὲς
Iliad 19.22	ἔργʼ ἔμεν ἀθανάτων, μὴ δὲ βροτὸν ἄνδρα τελέσσαι.
Iliad 19.23	νῦν δʼ ἤτοι μὲν ἐγὼ θωρήξομαι· ἀλλὰ μάλʼ αἰνῶς
Iliad 19.24	δείδω μή μοι τόφρα Μενοιτίου ἄλκιμον υἱὸν
Iliad 19.25	μυῖαι καδδῦσαι κατὰ χαλκοτύπους ὠτειλὰς
Iliad 19.26	εὐλὰς ἐγγείνωνται, ἀεικίσσωσι δὲ νεκρόν,
Iliad 19.27	ἐκ δʼ αἰὼν πέφαται, κατὰ δὲ χρόα πάντα σαπήῃ.
Iliad 19.28	τὸν δʼ ἠμείβετʼ ἔπειτα θεὰ Θέτις ἀργυρόπεζα·
Iliad 19.29	τέκνον μή τοι ταῦτα μετὰ φρεσὶ σῇσι μελόντων.
Iliad 19.30	τῷ μὲν ἐγὼ πειρήσω ἀλαλκεῖν ἄγρια φῦλα
Iliad 19.31	μυίας, αἵ ῥά τε φῶτας ἀρηϊφάτους κατέδουσιν·
Iliad 19.32	ἤν περ γὰρ κεῖταί γε τελεσφόρον εἰς ἐνιαυτόν,
Iliad 19.33	αἰεὶ τῷ γʼ ἔσται χρὼς ἔμπεδος, ἢ καὶ ἀρείων.
Iliad 19.34	ἀλλὰ σύ γʼ εἰς ἀγορὴν καλέσας ἥρωας Ἀχαιοὺς
Iliad 19.35	μῆνιν ἀποειπὼν Ἀγαμέμνονι ποιμένι λαῶν
Iliad 19.36	αἶψα μάλʼ ἐς πόλεμον θωρήσσεο, δύσεο δʼ ἀλκήν.
Iliad 19.37	ὣς ἄρα φωνήσασα μένος πολυθαρσὲς ἐνῆκε,
Iliad 19.38	Πατρόκλῳ δʼ αὖτʼ ἀμβροσίην καὶ νέκταρ ἐρυθρὸν
Iliad 19.39	στάξε κατὰ ῥινῶν, ἵνα οἱ χρὼς ἔμπεδος εἴη.
Iliad 19.40	αὐτὰρ ὃ βῆ παρὰ θῖνα θαλάσσης δῖος Ἀχιλλεὺς
Iliad 19.41	σμερδαλέα ἰάχων, ὦρσεν δʼ ἥρωας Ἀχαιούς.
Iliad 19.42	καί ῥʼ οἵ περ τὸ πάρος γε νεῶν ἐν ἀγῶνι μένεσκον
Iliad 19.43	οἵ τε κυβερνῆται καὶ ἔχον οἰήϊα νηῶν
Iliad 19.44	καὶ ταμίαι παρὰ νηυσὶν ἔσαν σίτοιο δοτῆρες,
Iliad 19.45	καὶ μὴν οἳ τότε γʼ εἰς ἀγορὴν ἴσαν, οὕνεκʼ Ἀχιλλεὺς
Iliad 19.46	ἐξεφάνη, δηρὸν δὲ μάχης ἐπέπαυτʼ ἀλεγεινῆς.
Iliad 19.47	τὼ δὲ δύω σκάζοντε βάτην Ἄρεος θεράποντε
Iliad 19.48	Τυδεΐδης τε μενεπτόλεμος καὶ δῖος Ὀδυσσεὺς
Iliad 19.49	ἔγχει ἐρειδομένω· ἔτι γὰρ ἔχον ἕλκεα λυγρά·
Iliad 19.50	κὰδ δὲ μετὰ πρώτῃ ἀγορῇ ἵζοντο κιόντες.
Iliad 19.51	αὐτὰρ ὃ δεύτατος ἦλθεν ἄναξ ἀνδρῶν Ἀγαμέμνων
Iliad 19.52	ἕλκος ἔχων· καὶ γὰρ τὸν ἐνὶ κρατερῇ ὑσμίνῃ
Iliad 19.53	οὖτα Κόων Ἀντηνορίδης χαλκήρεϊ δουρί.
Iliad 19.54	αὐτὰρ ἐπεὶ δὴ πάντες ἀολλίσθησαν Ἀχαιοί,
Iliad 19.55	τοῖσι δʼ ἀνιστάμενος μετέφη πόδας ὠκὺς Ἀχιλλεύς·
Iliad 19.56	Ἀτρεΐδη ἦ ἄρ τι τόδʼ ἀμφοτέροισιν ἄρειον
Iliad 19.57	ἔπλετο σοὶ καὶ ἐμοί, ὅ τε νῶΐ περ ἀχνυμένω κῆρ
Iliad 19.58	θυμοβόρῳ ἔριδι μενεήναμεν εἵνεκα κούρης;
Iliad 19.59	τὴν ὄφελʼ ἐν νήεσσι κατακτάμεν Ἄρτεμις ἰῷ
Iliad 19.60	ἤματι τῷ ὅτʼ ἐγὼν ἑλόμην Λυρνησσὸν ὀλέσσας·
Iliad 19.61	τώ κʼ οὐ τόσσοι Ἀχαιοὶ ὀδὰξ ἕλον ἄσπετον οὖδας
Iliad 19.62	δυσμενέων ὑπὸ χερσὶν ἐμεῦ ἀπομηνίσαντος.
Iliad 19.63	Ἕκτορι μὲν καὶ Τρωσὶ τὸ κέρδιον· αὐτὰρ Ἀχαιοὺς
Iliad 19.64	δηρὸν ἐμῆς καὶ σῆς ἔριδος μνήσεσθαι ὀΐω.
Iliad 19.65	ἀλλὰ τὰ μὲν προτετύχθαι ἐάσομεν ἀχνύμενοί περ
Iliad 19.66	θυμὸν ἐνὶ στήθεσσι φίλον δαμάσαντες ἀνάγκῃ·
Iliad 19.67	νῦν δʼ ἤτοι μὲν ἐγὼ παύω χόλον, οὐδέ τί με χρὴ
Iliad 19.68	ἀσκελέως αἰεὶ μενεαινέμεν· ἀλλʼ ἄγε θᾶσσον
Iliad 19.69	ὄτρυνον πόλεμον δὲ κάρη κομόωντας Ἀχαιούς,
Iliad 19.70	ὄφρʼ ἔτι καὶ Τρώων πειρήσομαι ἀντίον ἐλθὼν
Iliad 19.71	αἴ κʼ ἐθέλωσʼ ἐπὶ νηυσὶν ἰαύειν· ἀλλά τινʼ οἴω
Iliad 19.72	ἀσπασίως αὐτῶν γόνυ κάμψειν, ὅς κε φύγῃσι
Iliad 19.73	δηΐου ἐκ πολέμοιο ὑπʼ ἔγχεος ἡμετέροιο.
Iliad 19.74	ὣς ἔφαθʼ, οἳ δʼ ἐχάρησαν ἐϋκνήμιδες Ἀχαιοὶ
Iliad 19.75	μῆνιν ἀπειπόντος μεγαθύμου Πηλεΐωνος.
Iliad 19.76	τοῖσι δὲ καὶ μετέειπεν ἄναξ ἀνδρῶν Ἀγαμέμνων
Iliad 19.77	αὐτόθεν ἐξ ἕδρης, οὐδʼ ἐν μέσσοισιν ἀναστάς·
Iliad 19.78	ὦ φίλοι ἥρωες Δαναοὶ θεράποντες Ἄρηος
Iliad 19.79	ἑσταότος μὲν καλὸν ἀκούειν, οὐδὲ ἔοικεν
Iliad 19.80	ὑββάλλειν· χαλεπὸν γὰρ ἐπισταμένῳ περ ἐόντι.
Iliad 19.81	ἀνδρῶν δʼ ἐν πολλῷ ὁμάδῳ πῶς κέν τις ἀκούσαι
Iliad 19.82	ἢ εἴποι; βλάβεται δὲ λιγύς περ ἐὼν ἀγορητής.
Iliad 19.83	Πηλεΐδῃ μὲν ἐγὼν ἐνδείξομαι· αὐτὰρ οἱ ἄλλοι
Iliad 19.84	σύνθεσθʼ Ἀργεῖοι, μῦθόν τʼ εὖ γνῶτε ἕκαστος.
Iliad 19.85	πολλάκι δή μοι τοῦτον Ἀχαιοὶ μῦθον ἔειπον
Iliad 19.86	καί τέ με νεικείεσκον· ἐγὼ δʼ οὐκ αἴτιός εἰμι,
Iliad 19.87	ἀλλὰ Ζεὺς καὶ Μοῖρα καὶ ἠεροφοῖτις Ἐρινύς,
Iliad 19.88	οἵ τέ μοι εἰν ἀγορῇ φρεσὶν ἔμβαλον ἄγριον ἄτην,
Iliad 19.89	ἤματι τῷ ὅτʼ Ἀχιλλῆος γέρας αὐτὸς ἀπηύρων.
Iliad 19.90	ἀλλὰ τί κεν ῥέξαιμι; θεὸς διὰ πάντα τελευτᾷ.
Iliad 19.91	πρέσβα Διὸς θυγάτηρ Ἄτη, ἣ πάντας ἀᾶται,
Iliad 19.92	οὐλομένη· τῇ μέν θʼ ἁπαλοὶ πόδες· οὐ γὰρ ἐπʼ οὔδει
Iliad 19.93	πίλναται, ἀλλʼ ἄρα ἥ γε κατʼ ἀνδρῶν κράατα βαίνει
Iliad 19.94	βλάπτουσʼ ἀνθρώπους· κατὰ δʼ οὖν ἕτερόν γε πέδησε.
Iliad 19.95	καὶ γὰρ δή νύ ποτε Ζεὺς ἄσατο, τόν περ ἄριστον
Iliad 19.96	ἀνδρῶν ἠδὲ θεῶν φασʼ ἔμμεναι· ἀλλʼ ἄρα καὶ τὸν
Iliad 19.97	Ἥρη θῆλυς ἐοῦσα δολοφροσύνῃς ἀπάτησεν,
Iliad 19.98	ἤματι τῷ ὅτʼ ἔμελλε βίην Ἡρακληείην
Iliad 19.99	Ἀλκμήνη τέξεσθαι ἐϋστεφάνῳ ἐνὶ Θήβῃ.
Iliad 19.100	ἤτοι ὅ γʼ εὐχόμενος μετέφη πάντεσσι θεοῖσι·
Iliad 19.101	κέκλυτέ μευ πάντές τε θεοὶ πᾶσαί τε θέαιναι,
Iliad 19.102	ὄφρʼ εἴπω τά με θυμὸς ἐνὶ στήθεσσιν ἀνώγει.
Iliad 19.103	σήμερον ἄνδρα φόως δὲ μογοστόκος Εἰλείθυια
Iliad 19.104	ἐκφανεῖ, ὃς πάντεσσι περικτιόνεσσιν ἀνάξει,
Iliad 19.105	τῶν ἀνδρῶν γενεῆς οἵ θʼ αἵματος ἐξ ἐμεῦ εἰσί.
Iliad 19.106	τὸν δὲ δολοφρονέουσα προσηύδα πότνια Ἥρη·
Iliad 19.107	ψευστήσεις, οὐδʼ αὖτε τέλος μύθῳ ἐπιθήσεις.
Iliad 19.108	εἰ δʼ ἄγε νῦν μοι ὄμοσσον Ὀλύμπιε καρτερὸν ὅρκον,
Iliad 19.109	ἦ μὲν τὸν πάντεσσι περικτιόνεσσιν ἀνάξειν
Iliad 19.110	ὅς κεν ἐπʼ ἤματι τῷδε πέσῃ μετὰ ποσσὶ γυναικὸς
Iliad 19.111	τῶν ἀνδρῶν οἳ σῆς ἐξ αἵματός εἰσι γενέθλης.
Iliad 19.112	ὣς ἔφατο· Ζεὺς δʼ οὔ τι δολοφροσύνην ἐνόησεν,
Iliad 19.113	ἀλλʼ ὄμοσεν μέγαν ὅρκον, ἔπειτα δὲ πολλὸν ἀάσθη.
Iliad 19.114	Ἥρη δʼ ἀΐξασα λίπεν ῥίον Οὐλύμποιο,
Iliad 19.115	καρπαλίμως δʼ ἵκετʼ Ἄργος Ἀχαιικόν, ἔνθʼ ἄρα ᾔδη
Iliad 19.116	ἰφθίμην ἄλοχον Σθενέλου Περσηϊάδαο.
Iliad 19.117	ἣ δʼ ἐκύει φίλον υἱόν, ὃ δʼ ἕβδομος ἑστήκει μείς·
Iliad 19.118	ἐκ δʼ ἄγαγε πρὸ φόως δὲ καὶ ἠλιτόμηνον ἐόντα,
Iliad 19.119	Ἀλκμήνης δʼ ἀπέπαυσε τόκον, σχέθε δʼ Εἰλειθυίας.
Iliad 19.120	αὐτὴ δʼ ἀγγελέουσα Δία Κρονίωνα προσηύδα·
Iliad 19.121	Ζεῦ πάτερ ἀργικέραυνε ἔπος τί τοι ἐν φρεσὶ θήσω·
Iliad 19.122	ἤδη ἀνὴρ γέγονʼ ἐσθλὸς ὃς Ἀργείοισιν ἀνάξει
Iliad 19.123	Εὐρυσθεὺς Σθενέλοιο πάϊς Περσηϊάδαο
Iliad 19.124	σὸν γένος· οὔ οἱ ἀεικὲς ἀνασσέμεν Ἀργείοισιν.
Iliad 19.125	ὣς φάτο, τὸν δʼ ἄχος ὀξὺ κατὰ φρένα τύψε βαθεῖαν·
Iliad 19.126	αὐτίκα δʼ εἷλʼ Ἄτην κεφαλῆς λιπαροπλοκάμοιο
Iliad 19.127	χωόμενος φρεσὶν ᾗσι, καὶ ὤμοσε καρτερὸν ὅρκον
Iliad 19.128	μή ποτʼ ἐς Οὔλυμπόν τε καὶ οὐρανὸν ἀστερόεντα
Iliad 19.129	αὖτις ἐλεύσεσθαι Ἄτην, ἣ πάντας ἀᾶται.
Iliad 19.130	ὣς εἰπὼν ἔρριψεν ἀπʼ οὐρανοῦ ἀστερόεντος
Iliad 19.131	χειρὶ περιστρέψας· τάχα δʼ ἵκετο ἔργʼ ἀνθρώπων.
Iliad 19.132	τὴν αἰεὶ στενάχεσχʼ ὅθʼ ἑὸν φίλον υἱὸν ὁρῷτο
Iliad 19.133	ἔργον ἀεικὲς ἔχοντα ὑπʼ Εὐρυσθῆος ἀέθλων.
Iliad 19.134	ὣς καὶ ἐγών, ὅτε δʼ αὖτε μέγας κορυθαίολος Ἕκτωρ
Iliad 19.135	Ἀργείους ὀλέκεσκεν ἐπὶ πρυμνῇσι νέεσσιν,
Iliad 19.136	οὐ δυνάμην λελαθέσθʼ Ἄτης ᾗ πρῶτον ἀάσθην.
Iliad 19.137	ἀλλʼ ἐπεὶ ἀασάμην καί μευ φρένας ἐξέλετο Ζεύς,
Iliad 19.138	ἂψ ἐθέλω ἀρέσαι, δόμεναί τʼ ἀπερείσιʼ ἄποινα·
Iliad 19.139	ἀλλʼ ὄρσευ πόλεμον δὲ καὶ ἄλλους ὄρνυθι λαούς.
Iliad 19.140	δῶρα δʼ ἐγὼν ὅδε πάντα παρασχέμεν ὅσσά τοι ἐλθὼν
Iliad 19.141	χθιζὸς ἐνὶ κλισίῃσιν ὑπέσχετο δῖος Ὀδυσσεύς.
Iliad 19.142	εἰ δʼ ἐθέλεις, ἐπίμεινον ἐπειγόμενός περ Ἄρηος,
Iliad 19.143	δῶρα δέ τοι θεράποντες ἐμῆς παρὰ νηὸς ἑλόντες
Iliad 19.144	οἴσουσʼ, ὄφρα ἴδηαι ὅ τοι μενοεικέα δώσω.
Iliad 19.145	τὸν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 19.146	Ἀτρεΐδη κύδιστε ἄναξ ἀνδρῶν Ἀγάμεμνον
Iliad 19.147	δῶρα μὲν αἴ κʼ ἐθέλῃσθα παρασχέμεν, ὡς ἐπιεικές,
Iliad 19.148	ἤ τʼ ἐχέμεν παρὰ σοί· νῦν δὲ μνησώμεθα χάρμης
Iliad 19.149	αἶψα μάλʼ· οὐ γὰρ χρὴ κλοτοπεύειν ἐνθάδʼ ἐόντας
Iliad 19.150	οὐδὲ διατρίβειν· ἔτι γὰρ μέγα ἔργον ἄρεκτον·
Iliad 19.151	ὥς κέ τις αὖτʼ Ἀχιλῆα μετὰ πρώτοισιν ἴδηται
Iliad 19.152	ἔγχεϊ χαλκείῳ Τρώων ὀλέκοντα φάλαγγας.
Iliad 19.153	ὧδέ τις ὑμείων μεμνημένος ἀνδρὶ μαχέσθω.
Iliad 19.154	τὸν δʼ ἀπαμειβόμενος προσέφη πολύμητις Ὀδυσσεύς·
Iliad 19.155	μὴ δʼ οὕτως, ἀγαθός περ ἐών, θεοείκελʼ Ἀχιλλεῦ
Iliad 19.156	νήστιας ὄτρυνε προτὶ Ἴλιον υἷας Ἀχαιῶν
Iliad 19.157	Τρωσὶ μαχησομένους, ἐπεὶ οὐκ ὀλίγον χρόνον ἔσται
Iliad 19.158	φύλοπις, εὖτʼ ἂν πρῶτον ὁμιλήσωσι φάλαγγες
Iliad 19.159	ἀνδρῶν, ἐν δὲ θεὸς πνεύσῃ μένος ἀμφοτέροισιν.
Iliad 19.160	ἀλλὰ πάσασθαι ἄνωχθι θοῇς ἐπὶ νηυσὶν Ἀχαιοὺς
Iliad 19.161	σίτου καὶ οἴνοιο· τὸ γὰρ μένος ἐστὶ καὶ ἀλκή.
Iliad 19.162	οὐ γὰρ ἀνὴρ πρόπαν ἦμαρ ἐς ἠέλιον καταδύντα
Iliad 19.163	ἄκμηνος σίτοιο δυνήσεται ἄντα μάχεσθαι·
Iliad 19.164	εἴ περ γὰρ θυμῷ γε μενοινάᾳ πολεμίζειν,
Iliad 19.165	ἀλλά τε λάθρῃ γυῖα βαρύνεται, ἠδὲ κιχάνει
Iliad 19.166	δίψά τε καὶ λιμός, βλάβεται δέ τε γούνατʼ ἰόντι.
Iliad 19.167	ὃς δέ κʼ ἀνὴρ οἴνοιο κορεσσάμενος καὶ ἐδωδῆς
Iliad 19.168	ἀνδράσι δυσμενέεσσι πανημέριος πολεμίζῃ,
Iliad 19.169	θαρσαλέον νύ οἱ ἦτορ ἐνὶ φρεσίν, οὐδέ τι γυῖα
Iliad 19.170	πρὶν κάμνει πρὶν πάντας ἐρωῆσαι πολέμοιο.
Iliad 19.171	ἀλλʼ ἄγε λαὸν μὲν σκέδασον καὶ δεῖπνον ἄνωχθι
Iliad 19.172	ὅπλεσθαι· τὰ δὲ δῶρα ἄναξ ἀνδρῶν Ἀγαμέμνων
Iliad 19.173	οἰσέτω ἐς μέσσην ἀγορήν, ἵνα πάντες Ἀχαιοὶ
Iliad 19.174	ὀφθαλμοῖσιν ἴδωσι, σὺ δὲ φρεσὶ σῇσιν ἰανθῇς.
Iliad 19.175	ὀμνυέτω δέ τοι ὅρκον ἐν Ἀργείοισιν ἀναστὰς
Iliad 19.176	μή ποτε τῆς εὐνῆς ἐπιβήμεναι ἠδὲ μιγῆναι·
Iliad 19.177	ἣ θέμις ἐστὶν ἄναξ ἤ τʼ ἀνδρῶν ἤ τε γυναικῶν·
Iliad 19.178	καὶ δὲ σοὶ αὐτῷ θυμὸς ἐνὶ φρεσὶν ἵλαος ἔστω.
Iliad 19.179	αὐτὰρ ἔπειτά σε δαιτὶ ἐνὶ κλισίῃς ἀρεσάσθω
Iliad 19.180	πιείρῃ, ἵνα μή τι δίκης ἐπιδευὲς ἔχῃσθα.
Iliad 19.181	Ἀτρεΐδη σὺ δʼ ἔπειτα δικαιότερος καὶ ἐπʼ ἄλλῳ
Iliad 19.182	ἔσσεαι. οὐ μὲν γάρ τι νεμεσσητὸν βασιλῆα
Iliad 19.183	ἄνδρʼ ἀπαρέσσασθαι ὅτε τις πρότερος χαλεπήνῃ.
Iliad 19.184	τὸν δʼ αὖτε προσέειπεν ἄναξ ἀνδρῶν Ἀγαμέμνων·
Iliad 19.185	χαίρω σεῦ Λαερτιάδη τὸν μῦθον ἀκούσας·
Iliad 19.186	ἐν μοίρῃ γὰρ πάντα διίκεο καὶ κατέλεξας.
Iliad 19.187	ταῦτα δʼ ἐγὼν ἐθέλω ὀμόσαι, κέλεται δέ με θυμός,
Iliad 19.188	οὐδʼ ἐπιορκήσω πρὸς δαίμονος. αὐτὰρ Ἀχιλλεὺς
Iliad 19.189	μιμνέτω αὐτόθι τεῖος ἐπειγόμενός περ Ἄρηος·
Iliad 19.190	μίμνετε δʼ ἄλλοι πάντες ἀολλέες, ὄφρά κε δῶρα
Iliad 19.191	ἐκ κλισίης ἔλθῃσι καὶ ὅρκια πιστὰ τάμωμεν.
Iliad 19.192	σοὶ δʼ αὐτῷ τόδʼ ἐγὼν ἐπιτέλλομαι ἠδὲ κελεύω·
Iliad 19.193	κρινάμενος κούρητας ἀριστῆας Παναχαιῶν
Iliad 19.194	δῶρα ἐμῆς παρὰ νηὸς ἐνεικέμεν, ὅσσʼ Ἀχιλῆϊ
Iliad 19.195	χθιζὸν ὑπέστημεν δώσειν, ἀγέμεν τε γυναῖκας.
Iliad 19.196	Ταλθύβιος δέ μοι ὦκα κατὰ στρατὸν εὐρὺν Ἀχαιῶν
Iliad 19.197	κάπρον ἑτοιμασάτω ταμέειν Διί τʼ Ἠελίῳ τε.
Iliad 19.198	τὸν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 19.199	Ἀτρεΐδη κύδιστε ἄναξ ἀνδρῶν Ἀγάμεμνον
Iliad 19.200	ἄλλοτέ περ καὶ μᾶλλον ὀφέλλετε ταῦτα πένεσθαι,
Iliad 19.201	ὁππότε τις μεταπαυσωλὴ πολέμοιο γένηται
Iliad 19.202	καὶ μένος οὐ τόσον ᾖσιν ἐνὶ στήθεσσιν ἐμοῖσι.
Iliad 19.203	νῦν δʼ οἳ μὲν κέαται δεδαϊγμένοι, οὓς ἐδάμασσεν
Iliad 19.204	Ἕκτωρ Πριαμίδης, ὅτε οἱ Ζεὺς κῦδος ἔδωκεν,
Iliad 19.205	ὑμεῖς δʼ ἐς βρωτὺν ὀτρύνετον· ἦ τʼ ἂν ἔγωγε
Iliad 19.206	νῦν μὲν ἀνώγοιμι πτολεμίζειν υἷας Ἀχαιῶν
Iliad 19.207	νήστιας ἀκμήνους, ἅμα δʼ ἠελίῳ καταδύντι
Iliad 19.208	τεύξεσθαι μέγα δόρπον, ἐπὴν τεισαίμεθα λώβην.
Iliad 19.209	πρὶν δʼ οὔ πως ἂν ἔμοιγε φίλον κατὰ λαιμὸν ἰείη
Iliad 19.210	οὐ πόσις οὐδὲ βρῶσις ἑταίρου τεθνηῶτος
Iliad 19.211	ὅς μοι ἐνὶ κλισίῃ δεδαϊγμένος ὀξέϊ χαλκῷ
Iliad 19.212	κεῖται ἀνὰ πρόθυρον τετραμμένος, ἀμφὶ δʼ ἑταῖροι
Iliad 19.213	μύρονται· τό μοι οὔ τι μετὰ φρεσὶ ταῦτα μέμηλεν,
Iliad 19.214	ἀλλὰ φόνος τε καὶ αἷμα καὶ ἀργαλέος στόνος ἀνδρῶν.
Iliad 19.215	τὸν δʼ ἀπαμειβόμενος προσέφη πολύμητις Ὀδυσσεύς·
Iliad 19.216	ὦ Ἀχιλεῦ Πηλῆος υἱὲ μέγα φέρτατʼ Ἀχαιῶν,
Iliad 19.217	κρείσσων εἰς ἐμέθεν καὶ φέρτερος οὐκ ὀλίγον περ
Iliad 19.218	ἔγχει, ἐγὼ δέ κε σεῖο νοήματί γε προβαλοίμην
Iliad 19.219	πολλόν, ἐπεὶ πρότερος γενόμην καὶ πλείονα οἶδα.
Iliad 19.220	τώ τοι ἐπιτλήτω κραδίη μύθοισιν ἐμοῖσιν.
Iliad 19.221	αἶψά τε φυλόπιδος πέλεται κόρος ἀνθρώποισιν,
Iliad 19.222	ἧς τε πλείστην μὲν καλάμην χθονὶ χαλκὸς ἔχευεν,
Iliad 19.223	ἄμητος δʼ ὀλίγιστος, ἐπὴν κλίνῃσι τάλαντα
Iliad 19.224	Ζεύς, ὅς τʼ ἀνθρώπων ταμίης πολέμοιο τέτυκται.
Iliad 19.225	γαστέρι δʼ οὔ πως ἔστι νέκυν πενθῆσαι Ἀχαιούς·
Iliad 19.226	λίην γὰρ πολλοὶ καὶ ἐπήτριμοι ἤματα πάντα
Iliad 19.227	πίπτουσιν· πότε κέν τις ἀναπνεύσειε πόνοιο;
Iliad 19.228	ἀλλὰ χρὴ τὸν μὲν καταθάπτειν ὅς κε θάνῃσι
Iliad 19.229	νηλέα θυμὸν ἔχοντας ἐπʼ ἤματι δακρύσαντας·
Iliad 19.230	ὅσσοι δʼ ἂν πολέμοιο περὶ στυγεροῖο λίπωνται
Iliad 19.231	μεμνῆσθαι πόσιος καὶ ἐδητύος, ὄφρʼ ἔτι μᾶλλον
Iliad 19.232	ἀνδράσι δυσμενέεσσι μαχώμεθα νωλεμὲς αἰεὶ
Iliad 19.233	ἑσσάμενοι χροῒ χαλκὸν ἀτειρέα. μηδέ τις ἄλλην
Iliad 19.234	λαῶν ὀτρυντὺν ποτιδέγμενος ἰσχαναάσθω·
Iliad 19.235	ἥδε γὰρ ὀτρυντὺς κακὸν ἔσσεται ὅς κε λίπηται
Iliad 19.236	νηυσὶν ἐπʼ Ἀργείων· ἀλλʼ ἀθρόοι ὁρμηθέντες
Iliad 19.237	Τρωσὶν ἐφʼ ἱπποδάμοισιν ἐγείρομεν ὀξὺν Ἄρηα.
Iliad 19.238	ἦ, καὶ Νέστορος υἷας ὀπάσσατο κυδαλίμοιο
Iliad 19.239	Φυλεΐδην τε Μέγητα Θόαντά τε Μηριόνην τε
Iliad 19.240	καὶ Κρειοντιάδην Λυκομήδεα καὶ Μελάνιππον·
Iliad 19.241	βὰν δʼ ἴμεν ἐς κλισίην Ἀγαμέμνονος Ἀτρεΐδαο.
Iliad 19.242	αὐτίκʼ ἔπειθʼ ἅμα μῦθος ἔην, τετέλεστο δὲ ἔργον·
Iliad 19.243	ἑπτὰ μὲν ἐκ κλισίης τρίποδας φέρον, οὕς οἱ ὑπέστη,
Iliad 19.244	αἴθωνας δὲ λέβητας ἐείκοσι, δώδεκα δʼ ἵππους·
Iliad 19.245	ἐκ δʼ ἄγον αἶψα γυναῖκας ἀμύμονα ἔργα ἰδυίας
Iliad 19.246	ἕπτʼ, ἀτὰρ ὀγδοάτην Βρισηΐδα καλλιπάρῃον.
Iliad 19.247	χρυσοῦ δὲ στήσας Ὀδυσεὺς δέκα πάντα τάλαντα
Iliad 19.248	ἦρχʼ, ἅμα δʼ ἄλλοι δῶρα φέρον κούρητες Ἀχαιῶν.
Iliad 19.249	καὶ τὰ μὲν ἐν μέσσῃ ἀγορῇ θέσαν, ἂν δʼ Ἀγαμέμνων
Iliad 19.250	ἵστατο· Ταλθύβιος δὲ θεῷ ἐναλίγκιος αὐδὴν
Iliad 19.251	κάπρον ἔχων ἐν χερσὶ παρίστατο ποιμένι λαῶν.
Iliad 19.252	Ἀτρεΐδης δὲ ἐρυσσάμενος χείρεσσι μάχαιραν,
Iliad 19.253	ἥ οἱ πὰρ ξίφεος μέγα κουλεὸν αἰὲν ἄωρτο,
Iliad 19.254	κάπρου ἀπὸ τρίχας ἀρξάμενος Διὶ χεῖρας ἀνασχὼν
Iliad 19.255	εὔχετο· τοὶ δʼ ἄρα πάντες ἐπʼ αὐτόφιν εἵατο σιγῇ
Iliad 19.256	Ἀργεῖοι κατὰ μοῖραν ἀκούοντες βασιλῆος.
Iliad 19.257	εὐξάμενος δʼ ἄρα εἶπεν ἰδὼν εἰς οὐρανὸν εὐρύν·
Iliad 19.258	ἴστω νῦν Ζεὺς πρῶτα θεῶν ὕπατος καὶ ἄριστος
Iliad 19.259	Γῆ τε καὶ Ἠέλιος καὶ Ἐρινύες, αἵ θʼ ὑπὸ γαῖαν
Iliad 19.260	ἀνθρώπους τίνυνται, ὅτις κʼ ἐπίορκον ὀμόσσῃ,
Iliad 19.261	μὴ μὲν ἐγὼ κούρῃ Βρισηΐδι χεῖρʼ ἐπένεικα,
Iliad 19.262	οὔτʼ εὐνῆς πρόφασιν κεχρημένος οὔτέ τευ ἄλλου.
Iliad 19.263	ἀλλʼ ἔμενʼ ἀπροτίμαστος ἐνὶ κλισίῃσιν ἐμῇσιν.
Iliad 19.264	εἰ δέ τι τῶνδʼ ἐπίορκον ἐμοὶ θεοὶ ἄλγεα δοῖεν
Iliad 19.265	πολλὰ μάλʼ, ὅσσα διδοῦσιν ὅτίς σφʼ ἀλίτηται ὀμόσσας.
Iliad 19.266	ἦ, καὶ ἀπὸ στόμαχον κάπρου τάμε νηλέϊ χαλκῷ.
Iliad 19.267	τὸν μὲν Ταλθύβιος πολιῆς ἁλὸς ἐς μέγα λαῖτμα
Iliad 19.268	ῥῖψʼ ἐπιδινήσας βόσιν ἰχθύσιν· αὐτὰρ Ἀχιλλεὺς
Iliad 19.269	ἀνστὰς Ἀργείοισι φιλοπτολέμοισι μετηύδα·
Iliad 19.270	Ζεῦ πάτερ ἦ μεγάλας ἄτας ἄνδρεσσι διδοῖσθα·
Iliad 19.271	οὐκ ἂν δή ποτε θυμὸν ἐνὶ στήθεσσιν ἐμοῖσιν
Iliad 19.272	Ἀτρεΐδης ὤρινε διαμπερές, οὐδέ κε κούρην
Iliad 19.273	ἦγεν ἐμεῦ ἀέκοντος ἀμήχανος· ἀλλά ποθι Ζεὺς
Iliad 19.274	ἤθελʼ Ἀχαιοῖσιν θάνατον πολέεσσι γενέσθαι.
Iliad 19.275	νῦν δʼ ἔρχεσθʼ ἐπὶ δεῖπνον, ἵνα ξυνάγωμεν Ἄρηα.
Iliad 19.276	ὣς ἄρʼ ἐφώνησεν, λῦσεν δʼ ἀγορὴν αἰψηρήν.
Iliad 19.277	οἳ μὲν ἄρʼ ἐσκίδναντο ἑὴν ἐπὶ νῆα ἕκαστος,
Iliad 19.278	δῶρα δὲ Μυρμιδόνες μεγαλήτορες ἀμφεπένοντο,
Iliad 19.279	βὰν δʼ ἐπὶ νῆα φέροντες Ἀχιλλῆος θείοιο.
Iliad 19.280	καὶ τὰ μὲν ἐν κλισίῃσι θέσαν, κάθισαν δὲ γυναῖκας,
Iliad 19.281	ἵππους δʼ εἰς ἀγέλην ἔλασαν θεράποντες ἀγαυοί.
Iliad 19.282	Βρισηῒς δʼ ἄρʼ ἔπειτʼ ἰκέλη χρυσέῃ Ἀφροδίτῃ
Iliad 19.283	ὡς ἴδε Πάτροκλον δεδαϊγμένον ὀξέϊ χαλκῷ,
Iliad 19.284	ἀμφʼ αὐτῷ χυμένη λίγʼ ἐκώκυε, χερσὶ δʼ ἄμυσσε
Iliad 19.285	στήθεά τʼ ἠδʼ ἁπαλὴν δειρὴν ἰδὲ καλὰ πρόσωπα.
Iliad 19.286	εἶπε δʼ ἄρα κλαίουσα γυνὴ ἐϊκυῖα θεῇσι·
Iliad 19.287	Πάτροκλέ μοι δειλῇ πλεῖστον κεχαρισμένε θυμῷ
Iliad 19.288	ζωὸν μέν σε ἔλειπον ἐγὼ κλισίηθεν ἰοῦσα,
Iliad 19.289	νῦν δέ σε τεθνηῶτα κιχάνομαι ὄρχαμε λαῶν
Iliad 19.290	ἂψ ἀνιοῦσʼ· ὥς μοι δέχεται κακὸν ἐκ κακοῦ αἰεί.
Iliad 19.291	ἄνδρα μὲν ᾧ ἔδοσάν με πατὴρ καὶ πότνια μήτηρ
Iliad 19.292	εἶδον πρὸ πτόλιος δεδαϊγμένον ὀξέϊ χαλκῷ,
Iliad 19.293	τρεῖς τε κασιγνήτους, τούς μοι μία γείνατο μήτηρ,
Iliad 19.294	κηδείους, οἳ πάντες ὀλέθριον ἦμαρ ἐπέσπον.
Iliad 19.295	οὐδὲ μὲν οὐδέ μʼ ἔασκες, ὅτʼ ἄνδρʼ ἐμὸν ὠκὺς Ἀχιλλεὺς
Iliad 19.296	ἔκτεινεν, πέρσεν δὲ πόλιν θείοιο Μύνητος,
Iliad 19.297	κλαίειν, ἀλλά μʼ ἔφασκες Ἀχιλλῆος θείοιο
Iliad 19.298	κουριδίην ἄλοχον θήσειν, ἄξειν τʼ ἐνὶ νηυσὶν
Iliad 19.299	ἐς Φθίην, δαίσειν δὲ γάμον μετὰ Μυρμιδόνεσσι.
Iliad 19.300	τώ σʼ ἄμοτον κλαίω τεθνηότα μείλιχον αἰεί.
Iliad 19.301	ὣς ἔφατο κλαίουσʼ, ἐπὶ δὲ στενάχοντο γυναῖκες
Iliad 19.302	Πάτροκλον πρόφασιν, σφῶν δʼ αὐτῶν κήδεʼ ἑκάστη.
Iliad 19.303	αὐτὸν δʼ ἀμφὶ γέροντες Ἀχαιῶν ἠγερέθοντο
Iliad 19.304	λισσόμενοι δειπνῆσαι· ὃ δʼ ἠρνεῖτο στεναχίζων·
Iliad 19.305	λίσσομαι, εἴ τις ἔμοιγε φίλων ἐπιπείθεθʼ ἑταίρων,
Iliad 19.306	μή με πρὶν σίτοιο κελεύετε μηδὲ ποτῆτος
Iliad 19.307	ἄσασθαι φίλον ἦτορ, ἐπεί μʼ ἄχος αἰνὸν ἱκάνει·
Iliad 19.308	δύντα δʼ ἐς ἠέλιον μενέω καὶ τλήσομαι ἔμπης.
Iliad 19.309	ὣς εἰπὼν ἄλλους μὲν ἀπεσκέδασεν βασιλῆας,
Iliad 19.310	δοιὼ δʼ Ἀτρεΐδα μενέτην καὶ δῖος Ὀδυσσεὺς
Iliad 19.311	Νέστωρ Ἰδομενεύς τε γέρων θʼ ἱππηλάτα Φοῖνιξ
Iliad 19.312	τέρποντες πυκινῶς ἀκαχήμενον· οὐδέ τι θυμῷ
Iliad 19.313	τέρπετο, πρὶν πολέμου στόμα δύμεναι αἱματόεντος.
Iliad 19.314	μνησάμενος δʼ ἁδινῶς ἀνενείκατο φώνησέν τε·
Iliad 19.315	ἦ ῥά νύ μοί ποτε καὶ σὺ δυσάμμορε φίλταθʼ ἑταίρων
Iliad 19.316	αὐτὸς ἐνὶ κλισίῃ λαρὸν παρὰ δεῖπνον ἔθηκας
Iliad 19.317	αἶψα καὶ ὀτραλέως, ὁπότε σπερχοίατʼ Ἀχαιοὶ
Iliad 19.318	Τρωσὶν ἐφʼ ἱπποδάμοισι φέρειν πολύδακρυν Ἄρηα.
Iliad 19.319	νῦν δὲ σὺ μὲν κεῖσαι δεδαϊγμένος, αὐτὰρ ἐμὸν κῆρ
Iliad 19.320	ἄκμηνον πόσιος καὶ ἐδητύος, ἔνδον ἐόντων,
Iliad 19.321	σῇ ποθῇ· οὐ μὲν γάρ τι κακώτερον ἄλλο πάθοιμι,
Iliad 19.322	οὐδʼ εἴ κεν τοῦ πατρὸς ἀποφθιμένοιο πυθοίμην,
Iliad 19.323	ὅς που νῦν Φθίηφι τέρεν κατὰ δάκρυον εἴβει
Iliad 19.324	χήτεϊ τοιοῦδʼ υἷος· ὃ δʼ ἀλλοδαπῷ ἐνὶ δήμῳ
Iliad 19.325	εἵνεκα ῥιγεδανῆς Ἑλένης Τρωσὶν πολεμίζω·
Iliad 19.326	ἠὲ τὸν ὃς Σκύρῳ μοι ἔνι τρέφεται φίλος υἱός,
Iliad 19.327	εἴ που ἔτι ζώει γε Νεοπτόλεμος θεοειδής.
Iliad 19.328	πρὶν μὲν γάρ μοι θυμὸς ἐνὶ στήθεσσιν ἐώλπει
Iliad 19.329	οἶον ἐμὲ φθίσεσθαι ἀπʼ Ἄργεος ἱπποβότοιο
Iliad 19.330	αὐτοῦ ἐνὶ Τροίῃ, σὲ δέ τε Φθίην δὲ νέεσθαι,
Iliad 19.331	ὡς ἄν μοι τὸν παῖδα θοῇ ἐνὶ νηῒ μελαίνῃ
Iliad 19.332	Σκυρόθεν ἐξαγάγοις καί οἱ δείξειας ἕκαστα
Iliad 19.333	κτῆσιν ἐμὴν δμῶάς τε καὶ ὑψερεφὲς μέγα δῶμα.
Iliad 19.334	ἤδη γὰρ Πηλῆά γʼ ὀΐομαι ἢ κατὰ πάμπαν
Iliad 19.335	τεθνάμεν, ἤ που τυτθὸν ἔτι ζώοντʼ ἀκάχησθαι
Iliad 19.336	γήραΐ τε στυγερῷ καὶ ἐμὴν ποτιδέγμενον αἰεὶ
Iliad 19.337	λυγρὴν ἀγγελίην, ὅτʼ ἀποφθιμένοιο πύθηται.
Iliad 19.338	ὣς ἔφατο κλαίων, ἐπὶ δὲ στενάχοντο γέροντες,
Iliad 19.339	μνησάμενοι τὰ ἕκαστος ἐνὶ μεγάροισιν ἔλειπον·
Iliad 19.340	μυρομένους δʼ ἄρα τούς γε ἰδὼν ἐλέησε Κρονίων,
Iliad 19.341	αἶψα δʼ Ἀθηναίην ἔπεα πτερόεντα προσηύδα·
Iliad 19.342	τέκνον ἐμόν, δὴ πάμπαν ἀποίχεαι ἀνδρὸς ἑῆος.
Iliad 19.343	ἦ νύ τοι οὐκέτι πάγχυ μετὰ φρεσὶ μέμβλετʼ Ἀχιλλεύς;
Iliad 19.344	κεῖνος ὅ γε προπάροιθε νεῶν ὀρθοκραιράων
Iliad 19.345	ἧσται ὀδυρόμενος ἕταρον φίλον· οἳ δὲ δὴ ἄλλοι
Iliad 19.346	οἴχονται μετὰ δεῖπνον, ὃ δʼ ἄκμηνος καὶ ἄπαστος.
Iliad 19.347	ἀλλʼ ἴθι οἱ νέκτάρ τε καὶ ἀμβροσίην ἐρατεινὴν
Iliad 19.348	στάξον ἐνὶ στήθεσσʼ, ἵνα μή μιν λιμὸς ἵκηται.
Iliad 19.349	ὣς εἰπὼν ὄτρυνε πάρος μεμαυῖαν Ἀθήνην·
Iliad 19.350	ἣ δʼ ἅρπῃ ἐϊκυῖα τανυπτέρυγι λιγυφώνῳ
Iliad 19.351	οὐρανοῦ ἐκκατεπᾶλτο διʼ αἰθέρος. αὐτὰρ Ἀχαιοὶ
Iliad 19.352	αὐτίκα θωρήσσοντο κατὰ στρατόν· ἣ δʼ Ἀχιλῆϊ
Iliad 19.353	νέκταρ ἐνὶ στήθεσσι καὶ ἀμβροσίην ἐρατεινὴν
Iliad 19.354	στάξʼ, ἵνα μή μιν λιμὸς ἀτερπὴς γούναθʼ ἵκοιτο·
Iliad 19.355	αὐτὴ δὲ πρὸς πατρὸς ἐρισθενέος πυκινὸν δῶ
Iliad 19.356	ᾤχετο, τοὶ δʼ ἀπάνευθε νεῶν ἐχέοντο θοάων.
Iliad 19.357	ὡς δʼ ὅτε ταρφειαὶ νιφάδες Διὸς ἐκποτέονται
Iliad 19.358	ψυχραὶ ὑπὸ ῥιπῆς αἰθρηγενέος Βορέαο,
Iliad 19.359	ὣς τότε ταρφειαὶ κόρυθες λαμπρὸν γανόωσαι
Iliad 19.360	νηῶν ἐκφορέοντο καὶ ἀσπίδες ὀμφαλόεσσαι
Iliad 19.361	θώρηκές τε κραταιγύαλοι καὶ μείλινα δοῦρα.
Iliad 19.362	αἴγλη δʼ οὐρανὸν ἷκε, γέλασσε δὲ πᾶσα περὶ χθὼν
Iliad 19.363	χαλκοῦ ὑπὸ στεροπῆς· ὑπὸ δὲ κτύπος ὄρνυτο ποσσὶν
Iliad 19.364	ἀνδρῶν· ἐν δὲ μέσοισι κορύσσετο δῖος Ἀχιλλεύς.
Iliad 19.365	τοῦ καὶ ὀδόντων μὲν καναχὴ πέλε, τὼ δέ οἱ ὄσσε
Iliad 19.366	λαμπέσθην ὡς εἴ τε πυρὸς σέλας, ἐν δέ οἱ ἦτορ
Iliad 19.367	δῦνʼ ἄχος ἄτλητον· ὃ δʼ ἄρα Τρωσὶν μενεαίνων
Iliad 19.368	δύσετο δῶρα θεοῦ, τά οἱ Ἥφαιστος κάμε τεύχων.
Iliad 19.369	κνημῖδας μὲν πρῶτα περὶ κνήμῃσιν ἔθηκε
Iliad 19.370	καλὰς ἀργυρέοισιν ἐπισφυρίοις ἀραρυίας·
Iliad 19.371	δεύτερον αὖ θώρηκα περὶ στήθεσσιν ἔδυνεν.
Iliad 19.372	ἀμφὶ δʼ ἄρʼ ὤμοισιν βάλετο ξίφος ἀργυρόηλον
Iliad 19.373	χάλκεον· αὐτὰρ ἔπειτα σάκος μέγα τε στιβαρόν τε
Iliad 19.374	εἵλετο, τοῦ δʼ ἀπάνευθε σέλας γένετʼ ἠΰτε μήνης.
Iliad 19.375	ὡς δʼ ὅτʼ ἂν ἐκ πόντοιο σέλας ναύτῃσι φανήῃ
Iliad 19.376	καιομένοιο πυρός, τό τε καίεται ὑψόθʼ ὄρεσφι
Iliad 19.377	σταθμῷ ἐν οἰοπόλῳ· τοὺς δʼ οὐκ ἐθέλοντας ἄελλαι
Iliad 19.378	πόντον ἐπʼ ἰχθυόεντα φίλων ἀπάνευθε φέρουσιν·
Iliad 19.379	ὣς ἀπʼ Ἀχιλλῆος σάκεος σέλας αἰθέρʼ ἵκανε
Iliad 19.380	καλοῦ δαιδαλέου· περὶ δὲ τρυφάλειαν ἀείρας
Iliad 19.381	κρατὶ θέτο βριαρήν· ἣ δʼ ἀστὴρ ὣς ἀπέλαμπεν
Iliad 19.382	ἵππουρις τρυφάλεια, περισσείοντο δʼ ἔθειραι
Iliad 19.383	χρύσεαι, ἃς Ἥφαιστος ἵει λόφον ἀμφὶ θαμειάς.
Iliad 19.384	πειρήθη δʼ ἕο αὐτοῦ ἐν ἔντεσι δῖος Ἀχιλλεύς,
Iliad 19.385	εἰ οἷ ἐφαρμόσσειε καὶ ἐντρέχοι ἀγλαὰ γυῖα·
Iliad 19.386	τῷ δʼ εὖτε πτερὰ γίγνετʼ, ἄειρε δὲ ποιμένα λαῶν.
Iliad 19.387	ἐκ δʼ ἄρα σύριγγος πατρώϊον ἐσπάσατʼ ἔγχος
Iliad 19.388	βριθὺ μέγα στιβαρόν· τὸ μὲν οὐ δύνατʼ ἄλλος Ἀχαιῶν
Iliad 19.389	πάλλειν, ἀλλά μιν οἶος ἐπίστατο πῆλαι Ἀχιλλεύς,
Iliad 19.390	Πηλιάδα μελίην, τὴν πατρὶ φίλῳ πόρε Χείρων
Iliad 19.391	Πηλίου ἐκ κορυφῆς φόνον ἔμμεναι ἡρώεσσιν·
Iliad 19.392	ἵππους δʼ Αὐτομέδων τε καὶ Ἄλκιμος ἀμφιέποντες
Iliad 19.393	ζεύγνυον· ἀμφὶ δὲ καλὰ λέπαδνʼ ἕσαν, ἐν δὲ χαλινοὺς
Iliad 19.394	γαμφηλῇς ἔβαλον, κατὰ δʼ ἡνία τεῖναν ὀπίσσω
Iliad 19.395	κολλητὸν ποτὶ δίφρον. ὃ δὲ μάστιγα φαεινὴν
Iliad 19.396	χειρὶ λαβὼν ἀραρυῖαν ἐφʼ ἵπποιιν ἀνόρουσεν
Iliad 19.397	Αὐτομέδων· ὄπιθεν δὲ κορυσσάμενος βῆ Ἀχιλλεὺς
Iliad 19.398	τεύχεσι παμφαίνων ὥς τʼ ἠλέκτωρ Ὑπερίων,
Iliad 19.399	σμερδαλέον δʼ ἵπποισιν ἐκέκλετο πατρὸς ἑοῖο·
Iliad 19.400	Ξάνθέ τε καὶ Βαλίε τηλεκλυτὰ τέκνα Ποδάργης
Iliad 19.401	ἄλλως δὴ φράζεσθε σαωσέμεν ἡνιοχῆα
Iliad 19.402	ἂψ Δαναῶν ἐς ὅμιλον ἐπεί χʼ ἕωμεν πολέμοιο,
Iliad 19.403	μηδʼ ὡς Πάτροκλον λίπετʼ αὐτόθι τεθνηῶτα.
Iliad 19.404	τὸν δʼ ἄρʼ ὑπὸ ζυγόφι προσέφη πόδας αἰόλος ἵππος
Iliad 19.405	Ξάνθος, ἄφαρ δʼ ἤμυσε καρήατι· πᾶσα δὲ χαίτη
Iliad 19.406	ζεύγλης ἐξεριποῦσα παρὰ ζυγὸν οὖδας ἵκανεν·
Iliad 19.407	αὐδήεντα δʼ ἔθηκε θεὰ λευκώλενος Ἥρη·
Iliad 19.408	καὶ λίην σʼ ἔτι νῦν γε σαώσομεν ὄβριμʼ Ἀχιλλεῦ·
Iliad 19.409	ἀλλά τοι ἐγγύθεν ἦμαρ ὀλέθριον· οὐδέ τοι ἡμεῖς
Iliad 19.410	αἴτιοι, ἀλλὰ θεός τε μέγας καὶ Μοῖρα κραταιή.
Iliad 19.411	οὐδὲ γὰρ ἡμετέρῃ βραδυτῆτί τε νωχελίῃ τε
Iliad 19.412	Τρῶες ἀπʼ ὤμοιιν Πατρόκλου τεύχεʼ ἕλοντο·
Iliad 19.413	ἀλλὰ θεῶν ὤριστος, ὃν ἠΰκομος τέκε Λητώ,
Iliad 19.414	ἔκτανʼ ἐνὶ προμάχοισι καὶ Ἕκτορι κῦδος ἔδωκε.
Iliad 19.415	νῶϊ δὲ καί κεν ἅμα πνοιῇ Ζεφύροιο θέοιμεν,
Iliad 19.416	ἥν περ ἐλαφροτάτην φάσʼ ἔμμεναι· ἀλλὰ σοὶ αὐτῷ
Iliad 19.417	μόρσιμόν ἐστι θεῷ τε καὶ ἀνέρι ἶφι δαμῆναι.
Iliad 19.418	ὣς ἄρα φωνήσαντος Ἐρινύες ἔσχεθον αὐδήν.
Iliad 19.419	τὸν δὲ μέγʼ ὀχθήσας προσέφη πόδας ὠκὺς Ἀχιλλεύς·
Iliad 19.420	Ξάνθε τί μοι θάνατον μαντεύεαι; οὐδέ τί σε χρή.
Iliad 19.421	εὖ νυ τὸ οἶδα καὶ αὐτὸς ὅ μοι μόρος ἐνθάδʼ ὀλέσθαι
Iliad 19.422	νόσφι φίλου πατρὸς καὶ μητέρος· ἀλλὰ καὶ ἔμπης
Iliad 19.423	οὐ λήξω πρὶν Τρῶας ἅδην ἐλάσαι πολέμοιο.
Iliad 19.424	ἦ ῥα, καὶ ἐν πρώτοις ἰάχων ἔχε μώνυχας ἵππους.
Iliad 20.1	ὣς οἳ μὲν παρὰ νηυσὶ κορωνίσι θωρήσσοντο
Iliad 20.2	ἀμφὶ σὲ Πηλέος υἱὲ μάχης ἀκόρητον Ἀχαιοί,
Iliad 20.3	Τρῶες δʼ αὖθʼ ἑτέρωθεν ἐπὶ θρωσμῷ πεδίοιο·
Iliad 20.4	Ζεὺς δὲ Θέμιστα κέλευσε θεοὺς ἀγορὴν δὲ καλέσσαι
Iliad 20.5	κρατὸς ἀπʼ Οὐλύμποιο πολυπτύχου· ἣ δʼ ἄρα πάντῃ
Iliad 20.6	φοιτήσασα κέλευσε Διὸς πρὸς δῶμα νέεσθαι.
Iliad 20.7	οὔτέ τις οὖν ποταμῶν ἀπέην νόσφʼ Ὠκεανοῖο,
Iliad 20.8	οὔτʼ ἄρα νυμφάων αἵ τʼ ἄλσεα καλὰ νέμονται
Iliad 20.9	καὶ πηγὰς ποταμῶν καὶ πίσεα ποιήεντα.
Iliad 20.10	ἐλθόντες δʼ ἐς δῶμα Διὸς νεφεληγερέταο
Iliad 20.11	ξεστῇς αἰθούσῃσιν ἐνίζανον, ἃς Διὶ πατρὶ
Iliad 20.12	Ἥφαιστος ποίησεν ἰδυίῃσι πραπίδεσσιν.
Iliad 20.13	ὣς οἳ μὲν Διὸς ἔνδον ἀγηγέρατʼ· οὐδʼ ἐνοσίχθων
Iliad 20.14	νηκούστησε θεᾶς, ἀλλʼ ἐξ ἁλὸς ἦλθε μετʼ αὐτούς,
Iliad 20.15	ἷζε δʼ ἄρʼ ἐν μέσσοισι, Διὸς δʼ ἐξείρετο βουλήν·
Iliad 20.16	τίπτʼ αὖτʼ ἀργικέραυνε θεοὺς ἀγορὴν δὲ κάλεσσας;
Iliad 20.17	ἦ τι περὶ Τρώων καὶ Ἀχαιῶν μερμηρίζεις;
Iliad 20.18	τῶν γὰρ νῦν ἄγχιστα μάχη πόλεμός τε δέδηε.
Iliad 20.19	τὸν δʼ ἀπαμειβόμενος προσέφη νεφεληγερέτα Ζεύς·
Iliad 20.20	ἔγνως ἐννοσίγαιε ἐμὴν ἐν στήθεσι βουλὴν
Iliad 20.21	ὧν ἕνεκα ξυνάγειρα· μέλουσί μοι ὀλλύμενοί περ.
Iliad 20.22	ἀλλʼ ἤτοι μὲν ἐγὼ μενέω πτυχὶ Οὐλύμποιο
Iliad 20.23	ἥμενος, ἔνθʼ ὁρόων φρένα τέρψομαι· οἳ δὲ δὴ ἄλλοι
Iliad 20.24	ἔρχεσθʼ ὄφρʼ ἂν ἵκησθε μετὰ Τρῶας καὶ Ἀχαιούς,
Iliad 20.25	ἀμφοτέροισι δʼ ἀρήγεθʼ ὅπῃ νόος ἐστὶν ἑκάστου.
Iliad 20.26	εἰ γὰρ Ἀχιλλεὺς οἶος ἐπὶ Τρώεσσι μαχεῖται
Iliad 20.27	οὐδὲ μίνυνθʼ ἕξουσι ποδώκεα Πηλεΐωνα.
Iliad 20.28	καὶ δέ τί μιν καὶ πρόσθεν ὑποτρομέεσκον ὁρῶντες·
Iliad 20.29	νῦν δʼ ὅτε δὴ καὶ θυμὸν ἑταίρου χώεται αἰνῶς
Iliad 20.30	δείδω μὴ καὶ τεῖχος ὑπέρμορον ἐξαλαπάξῃ.
Iliad 20.31	ὣς ἔφατο Κρονίδης, πόλεμον δʼ ἀλίαστον ἔγειρε.
Iliad 20.32	βὰν δʼ ἴμεναι πόλεμον δὲ θεοὶ δίχα θυμὸν ἔχοντες·
Iliad 20.33	Ἥρη μὲν μετʼ ἀγῶνα νεῶν καὶ Παλλὰς Ἀθήνη
Iliad 20.34	ἠδὲ Ποσειδάων γαιήοχος ἠδʼ ἐριούνης
Iliad 20.35	Ἑρμείας, ὃς ἐπὶ φρεσὶ πευκαλίμῃσι κέκασται·
Iliad 20.36	Ἥφαιστος δʼ ἅμα τοῖσι κίε σθένεϊ βλεμεαίνων
Iliad 20.37	χωλεύων, ὑπὸ δὲ κνῆμαι ῥώοντο ἀραιαί.
Iliad 20.38	ἐς δὲ Τρῶας Ἄρης κορυθαίολος, αὐτὰρ ἅμʼ αὐτῷ
Iliad 20.39	Φοῖβος ἀκερσεκόμης ἠδʼ Ἄρτεμις ἰοχέαιρα
Iliad 20.40	Λητώ τε Ξάνθός τε φιλομειδής τʼ Ἀφροδίτη.
Iliad 20.41	εἷος μέν ῥʼ ἀπάνευθε θεοὶ θνητῶν ἔσαν ἀνδρῶν,
Iliad 20.42	τεῖος Ἀχαιοὶ μὲν μέγα κύδανον, οὕνεκʼ Ἀχιλλεὺς
Iliad 20.43	ἐξεφάνη, δηρὸν δὲ μάχης ἐπέπαυτʼ ἀλεγεινῆς·
Iliad 20.44	Τρῶας δὲ τρόμος αἰνὸς ὑπήλυθε γυῖα ἕκαστον
Iliad 20.45	δειδιότας, ὅθʼ ὁρῶντο ποδώκεα Πηλεΐωνα
Iliad 20.46	τεύχεσι λαμπόμενον βροτολοιγῷ ἶσον Ἄρηϊ.
Iliad 20.47	αὐτὰρ ἐπεὶ μεθʼ ὅμιλον Ὀλύμπιοι ἤλυθον ἀνδρῶν,
Iliad 20.48	ὦρτο δʼ Ἔρις κρατερὴ λαοσσόος, αὖε δʼ Ἀθήνη
Iliad 20.49	στᾶσʼ ὁτὲ μὲν παρὰ τάφρον ὀρυκτὴν τείχεος ἐκτός,
Iliad 20.50	ἄλλοτʼ ἐπʼ ἀκτάων ἐριδούπων μακρὸν ἀΰτει.
Iliad 20.51	αὖε δʼ Ἄρης ἑτέρωθεν ἐρεμνῇ λαίλαπι ἶσος
Iliad 20.52	ὀξὺ κατʼ ἀκροτάτης πόλιος Τρώεσσι κελεύων,
Iliad 20.53	ἄλλοτε πὰρ Σιμόεντι θέων ἐπὶ Καλλικολώνῃ.
Iliad 20.54	ὣς τοὺς ἀμφοτέρους μάκαρες θεοὶ ὀτρύνοντες
Iliad 20.55	σύμβαλον, ἐν δʼ αὐτοῖς ἔριδα ῥήγνυντο βαρεῖαν·
Iliad 20.56	δεινὸν δὲ βρόντησε πατὴρ ἀνδρῶν τε θεῶν τε
Iliad 20.57	ὑψόθεν· αὐτὰρ νέρθε Ποσειδάων ἐτίναξε
Iliad 20.58	γαῖαν ἀπειρεσίην ὀρέων τʼ αἰπεινὰ κάρηνα.
Iliad 20.59	πάντες δʼ ἐσσείοντο πόδες πολυπίδακος Ἴδης
Iliad 20.60	καὶ κορυφαί, Τρώων τε πόλις καὶ νῆες Ἀχαιῶν.
Iliad 20.61	ἔδεισεν δʼ ὑπένερθεν ἄναξ ἐνέρων Ἀϊδωνεύς,
Iliad 20.62	δείσας δʼ ἐκ θρόνου ἆλτο καὶ ἴαχε, μή οἱ ὕπερθε
Iliad 20.63	γαῖαν ἀναρρήξειε Ποσειδάων ἐνοσίχθων,
Iliad 20.64	οἰκία δὲ θνητοῖσι καὶ ἀθανάτοισι φανείη
Iliad 20.65	σμερδαλέʼ εὐρώεντα, τά τε στυγέουσι θεοί περ·
Iliad 20.66	τόσσος ἄρα κτύπος ὦρτο θεῶν ἔριδι ξυνιόντων.
Iliad 20.67	ἤτοι μὲν γὰρ ἔναντα Ποσειδάωνος ἄνακτος
Iliad 20.68	ἵστατʼ Ἀπόλλων Φοῖβος ἔχων ἰὰ πτερόεντα,
Iliad 20.69	ἄντα δʼ Ἐνυαλίοιο θεὰ γλαυκῶπις Ἀθήνη·
Iliad 20.70	Ἥρῃ δʼ ἀντέστη χρυσηλάκατος κελαδεινὴ
Iliad 20.71	Ἄρτεμις ἰοχέαιρα κασιγνήτη ἑκάτοιο·
Iliad 20.72	Λητοῖ δʼ ἀντέστη σῶκος ἐριούνιος Ἑρμῆς,
Iliad 20.73	ἄντα δʼ ἄρʼ Ἡφαίστοιο μέγας ποταμὸς βαθυδίνης,
Iliad 20.74	ὃν Ξάνθον καλέουσι θεοί, ἄνδρες δὲ Σκάμανδρον.
Iliad 20.75	ὣς οἳ μὲν θεοὶ ἄντα θεῶν ἴσαν· αὐτὰρ Ἀχιλλεὺς
Iliad 20.76	Ἕκτορος ἄντα μάλιστα λιλαίετο δῦναι ὅμιλον
Iliad 20.77	Πριαμίδεω· τοῦ γάρ ῥα μάλιστά ἑ θυμὸς ἀνώγει
Iliad 20.78	αἵματος ἆσαι Ἄρηα ταλαύρινον πολεμιστήν.
Iliad 20.79	Αἰνείαν δʼ ἰθὺς λαοσσόος ὦρσεν Ἀπόλλων
Iliad 20.80	ἀντία Πηλεΐωνος, ἐνῆκε δέ οἱ μένος ἠΰ·
Iliad 20.81	υἱέϊ δὲ Πριάμοιο Λυκάονι εἴσατο φωνήν·
Iliad 20.82	τῷ μιν ἐεισάμενος προσέφη Διὸς υἱὸς Ἀπόλλων·
Iliad 20.83	Αἰνεία Τρώων βουληφόρε ποῦ τοι ἀπειλαὶ
Iliad 20.84	ἃς Τρώων βασιλεῦσιν ὑπίσχεο οἰνοποτάζων
Iliad 20.85	Πηλεΐδεω Ἀχιλῆος ἐναντίβιον πολεμίξειν;
Iliad 20.86	τὸν δʼ αὖτʼ Αἰνείας ἀπαμειβόμενος προσέειπε·
Iliad 20.87	Πριαμίδη τί με ταῦτα καὶ οὐκ ἐθέλοντα κελεύεις
Iliad 20.88	ἀντία Πηλεΐωνος ὑπερθύμοιο μάχεσθαι;
Iliad 20.89	οὐ μὲν γὰρ νῦν πρῶτα ποδώκεος ἄντʼ Ἀχιλῆος
Iliad 20.90	στήσομαι, ἀλλʼ ἤδη με καὶ ἄλλοτε δουρὶ φόβησεν
Iliad 20.91	ἐξ Ἴδης, ὅτε βουσὶν ἐπήλυθεν ἡμετέρῃσι,
Iliad 20.92	πέρσε δὲ Λυρνησσὸν καὶ Πήδασον· αὐτὰρ ἐμὲ Ζεὺς
Iliad 20.93	εἰρύσαθʼ, ὅς μοι ἐπῶρσε μένος λαιψηρά τε γοῦνα.
Iliad 20.94	ἦ κʼ ἐδάμην ὑπὸ χερσὶν Ἀχιλλῆος καὶ Ἀθήνης,
Iliad 20.95	ἥ οἱ πρόσθεν ἰοῦσα τίθει φάος ἠδʼ ἐκέλευεν
Iliad 20.96	ἔγχεϊ χαλκείῳ Λέλεγας καὶ Τρῶας ἐναίρειν.
Iliad 20.97	τὼ οὐκ ἔστʼ Ἀχιλῆος ἐναντίον ἄνδρα μάχεσθαι·
Iliad 20.98	αἰεὶ γὰρ πάρα εἷς γε θεῶν ὃς λοιγὸν ἀμύνει.
Iliad 20.99	καὶ δʼ ἄλλως τοῦ γʼ ἰθὺ βέλος πέτετʼ, οὐδʼ ἀπολήγει
Iliad 20.100	πρὶν χροὸς ἀνδρομέοιο διελθέμεν. εἰ δὲ θεός περ
Iliad 20.101	ἶσον τείνειεν πολέμου τέλος, οὔ κε μάλα ῥέα
Iliad 20.102	νικήσειʼ, οὐδʼ εἰ παγχάλκεος εὔχεται εἶναι.
Iliad 20.103	τὸν δʼ αὖτε προσέειπεν ἄναξ Διὸς υἱὸς Ἀπόλλων·
Iliad 20.104	ἥρως ἀλλʼ ἄγε καὶ σὺ θεοῖς αἰειγενέτῃσιν
Iliad 20.105	εὔχεο· καὶ δὲ σέ φασι Διὸς κούρης Ἀφροδίτης
Iliad 20.106	ἐκγεγάμεν, κεῖνος δὲ χερείονος ἐκ θεοῦ ἐστίν·
Iliad 20.107	ἣ μὲν γὰρ Διός ἐσθʼ, ἣ δʼ ἐξ ἁλίοιο γέροντος.
Iliad 20.108	ἀλλʼ ἰθὺς φέρε χαλκὸν ἀτειρέα, μηδέ σε πάμπαν
Iliad 20.109	λευγαλέοις ἐπέεσσιν ἀποτρεπέτω καὶ ἀρειῇ.
Iliad 20.110	ὣς εἰπὼν ἔμπνευσε μένος μέγα ποιμένι λαῶν,
Iliad 20.111	βῆ δὲ διὰ προμάχων κεκορυθμένος αἴθοπι χαλκῷ.
Iliad 20.112	οὐδʼ ἔλαθʼ Ἀγχίσαο πάϊς λευκώλενον Ἥρην
Iliad 20.113	ἀντία Πηλεΐωνος ἰὼν ἀνὰ οὐλαμὸν ἀνδρῶν·
Iliad 20.114	ἣ δʼ ἄμυδις στήσασα θεοὺς μετὰ μῦθον ἔειπε·
Iliad 20.115	φράζεσθον δὴ σφῶϊ Ποσείδαον καὶ Ἀθήνη
Iliad 20.116	ἐν φρεσὶν ὑμετέρῃσιν, ὅπως ἔσται τάδε ἔργα.
Iliad 20.117	Αἰνείας ὅδʼ ἔβη κεκορυθμένος αἴθοπι χαλκῷ
Iliad 20.118	ἀντία Πηλεΐωνος, ἀνῆκε δὲ Φοῖβος Ἀπόλλων.
Iliad 20.119	ἀλλʼ ἄγεθʼ, ἡμεῖς πέρ μιν ἀποτρωπῶμεν ὀπίσσω
Iliad 20.120	αὐτόθεν· ἤ τις ἔπειτα καὶ ἡμείων Ἀχιλῆϊ
Iliad 20.121	παρσταίη, δοίη δὲ κράτος μέγα, μηδέ τι θυμῷ
Iliad 20.122	δευέσθω, ἵνα εἰδῇ ὅ μιν φιλέουσιν ἄριστοι
Iliad 20.123	ἀθανάτων, οἳ δʼ αὖτʼ ἀνεμώλιοι οἳ τὸ πάρος περ
Iliad 20.124	Τρωσὶν ἀμύνουσιν πόλεμον καὶ δηϊοτῆτα.
Iliad 20.125	πάντες δʼ Οὐλύμποιο κατήλθομεν ἀντιόωντες
Iliad 20.126	τῆσδε μάχης, ἵνα μή τι μετὰ Τρώεσσι πάθῃσι
Iliad 20.127	σήμερον· ὕστερον αὖτε τὰ πείσεται ἅσσά οἱ αἶσα
Iliad 20.128	γιγνομένῳ ἐπένησε λίνῳ ὅτε μιν τέκε μήτηρ.
Iliad 20.129	εἰ δʼ Ἀχιλεὺς οὐ ταῦτα θεῶν ἐκ πεύσεται ὀμφῆς
Iliad 20.130	δείσετʼ ἔπειθʼ, ὅτε κέν τις ἐναντίβιον θεὸς ἔλθῃ
Iliad 20.131	ἐν πολέμῳ· χαλεποὶ δὲ θεοὶ φαίνεσθαι ἐναργεῖς.
Iliad 20.132	τὴν δʼ ἠμείβετʼ ἔπειτα Ποσειδάων ἐνοσίχθων·
Iliad 20.133	Ἥρη μὴ χαλέπαινε παρʼ ἐκ νόον· οὐδέ τί σε χρή.
Iliad 20.134	οὐκ ἂν ἔγωγʼ ἐθέλοιμι θεοὺς ἔριδι ξυνελάσσαι
Iliad 20.135	ἡμέας τοὺς ἄλλους, ἐπεὶ ἦ πολὺ φέρτεροί εἰμεν·
Iliad 20.136	ἀλλʼ ἡμεῖς μὲν ἔπειτα καθεζώμεσθα κιόντες
Iliad 20.137	ἐκ πάτου ἐς σκοπιήν, πόλεμος δʼ ἄνδρεσσι μελήσει.
Iliad 20.138	εἰ δέ κʼ Ἄρης ἄρχωσι μάχης ἢ Φοῖβος Ἀπόλλων,
Iliad 20.139	ἢ Ἀχιλῆʼ ἴσχωσι καὶ οὐκ εἰῶσι μάχεσθαι,
Iliad 20.140	αὐτίκʼ ἔπειτα καὶ ἄμμι παρʼ αὐτόθι νεῖκος ὀρεῖται
Iliad 20.141	φυλόπιδος· μάλα δʼ ὦκα διακρινθέντας ὀΐω
Iliad 20.142	ἂψ ἴμεν Οὔλυμπον δὲ θεῶν μεθʼ ὁμήγυριν ἄλλων
Iliad 20.143	ἡμετέρῃς ὑπὸ χερσὶν ἀναγκαίηφι δαμέντας.
Iliad 20.144	ὣς ἄρα φωνήσας ἡγήσατο κυανοχαίτης
Iliad 20.145	τεῖχος ἐς ἀμφίχυτον Ἡρακλῆος θείοιο
Iliad 20.146	ὑψηλόν, τό ῥά οἱ Τρῶες καὶ Παλλὰς Ἀθήνη
Iliad 20.147	ποίεον, ὄφρα τὸ κῆτος ὑπεκπροφυγὼν ἀλέαιτο,
Iliad 20.148	ὁππότε μιν σεύαιτο ἀπʼ ἠϊόνος πεδίον δέ.
Iliad 20.149	ἔνθα Ποσειδάων κατʼ ἄρʼ ἕζετο καὶ θεοὶ ἄλλοι,
Iliad 20.150	ἀμφὶ δʼ ἄρʼ ἄρρηκτον νεφέλην ὤμοισιν ἕσαντο·
Iliad 20.151	οἳ δʼ ἑτέρωσε καθῖζον ἐπʼ ὀφρύσι Καλλικολώνης
Iliad 20.152	ἀμφὶ σὲ ἤϊε Φοῖβε καὶ Ἄρηα πτολίπορθον.
Iliad 20.153	ὣς οἳ μέν ῥʼ ἑκάτερθε καθήατο μητιόωντες
Iliad 20.154	βουλάς· ἀρχέμεναι δὲ δυσηλεγέος πολέμοιο
Iliad 20.155	ὄκνεον ἀμφότεροι, Ζεὺς δʼ ἥμενος ὕψι κέλευε.
Iliad 20.156	τῶν δʼ ἅπαν ἐπλήσθη πεδίον καὶ λάμπετο χαλκῷ
Iliad 20.157	ἀνδρῶν ἠδʼ ἵππων· κάρκαιρε δὲ γαῖα πόδεσσιν
Iliad 20.158	ὀρνυμένων ἄμυδις. δύο δʼ ἀνέρες ἔξοχʼ ἄριστοι
Iliad 20.159	ἐς μέσον ἀμφοτέρων συνίτην μεμαῶτε μάχεσθαι
Iliad 20.160	Αἰνείας τʼ Ἀγχισιάδης καὶ δῖος Ἀχιλλεύς.
Iliad 20.161	Αἰνείας δὲ πρῶτος ἀπειλήσας ἐβεβήκει
Iliad 20.162	νευστάζων κόρυθι βριαρῇ· ἀτὰρ ἀσπίδα θοῦριν
Iliad 20.163	πρόσθεν ἔχε στέρνοιο, τίνασσε δὲ χάλκεον ἔγχος.
Iliad 20.164	Πηλεΐδης δʼ ἑτέρωθεν ἐναντίον ὦρτο λέων ὣς
Iliad 20.165	σίντης, ὅν τε καὶ ἄνδρες ἀποκτάμεναι μεμάασιν
Iliad 20.166	ἀγρόμενοι πᾶς δῆμος· ὃ δὲ πρῶτον μὲν ἀτίζων
Iliad 20.167	ἔρχεται, ἀλλʼ ὅτε κέν τις ἀρηϊθόων αἰζηῶν
Iliad 20.168	δουρὶ βάλῃ ἐάλη τε χανών, περί τʼ ἀφρὸς ὀδόντας
Iliad 20.169	γίγνεται, ἐν δέ τέ οἱ κραδίῃ στένει ἄλκιμον ἦτορ,
Iliad 20.170	οὐρῇ δὲ πλευράς τε καὶ ἰσχία ἀμφοτέρωθεν
Iliad 20.171	μαστίεται, ἑὲ δʼ αὐτὸν ἐποτρύνει μαχέσασθαι,
Iliad 20.172	γλαυκιόων δʼ ἰθὺς φέρεται μένει, ἤν τινα πέφνῃ
Iliad 20.173	ἀνδρῶν, ἢ αὐτὸς φθίεται πρώτῳ ἐν ὁμίλῳ·
Iliad 20.174	ὣς Ἀχιλῆʼ ὄτρυνε μένος καὶ θυμὸς ἀγήνωρ
Iliad 20.175	ἀντίον ἐλθέμεναι μεγαλήτορος Αἰνείαο.
Iliad 20.176	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες,
Iliad 20.177	τὸν πρότερος προσέειπε ποδάρκης δῖος Ἀχιλλεύς·
Iliad 20.178	Αἰνεία τί σὺ τόσσον ὁμίλου πολλὸν ἐπελθὼν
Iliad 20.179	ἔστης; ἦ σέ γε θυμὸς ἐμοὶ μαχέσασθαι ἀνώγει
Iliad 20.180	ἐλπόμενον Τρώεσσιν ἀνάξειν ἱπποδάμοισι
Iliad 20.181	τιμῆς τῆς Πριάμου; ἀτὰρ εἴ κεν ἔμʼ ἐξεναρίξῃς,
Iliad 20.182	οὔ τοι τοὔνεκά γε Πρίαμος γέρας ἐν χερὶ θήσει·
Iliad 20.183	εἰσὶν γάρ οἱ παῖδες, ὃ δʼ ἔμπεδος οὐδʼ ἀεσίφρων.
Iliad 20.184	ἦ νύ τί τοι Τρῶες τέμενος τάμον ἔξοχον ἄλλων
Iliad 20.185	καλὸν φυταλιῆς καὶ ἀρούρης, ὄφρα νέμηαι
Iliad 20.186	αἴ κεν ἐμὲ κτείνῃς; χαλεπῶς δέ σʼ ἔολπα τὸ ῥέξειν.
Iliad 20.187	ἤδη μὲν σέ γέ φημι καὶ ἄλλοτε δουρὶ φοβῆσαι.
Iliad 20.188	ἦ οὐ μέμνῃ ὅτε πέρ σε βοῶν ἄπο μοῦνον ἐόντα
Iliad 20.189	σεῦα κατʼ Ἰδαίων ὀρέων ταχέεσσι πόδεσσι
Iliad 20.190	καρπαλίμως; τότε δʼ οὔ τι μετατροπαλίζεο φεύγων.
Iliad 20.191	ἔνθεν δʼ ἐς Λυρνησσὸν ὑπέκφυγες· αὐτὰρ ἐγὼ τὴν
Iliad 20.192	πέρσα μεθορμηθεὶς σὺν Ἀθήνῃ καὶ Διὶ πατρί,
Iliad 20.193	ληϊάδας δὲ γυναῖκας ἐλεύθερον ἦμαρ ἀπούρας
Iliad 20.194	ἦγον· ἀτὰρ σὲ Ζεὺς ἐρρύσατο καὶ θεοὶ ἄλλοι.
Iliad 20.195	ἀλλʼ οὐ νῦν ἐρύεσθαι ὀΐομαι, ὡς ἐνὶ θυμῷ
Iliad 20.196	βάλλεαι· ἀλλά σʼ ἔγωγʼ ἀναχωρήσαντα κελεύω
Iliad 20.197	ἐς πληθὺν ἰέναι, μηδʼ ἀντίος ἵστασʼ ἐμεῖο,
Iliad 20.198	πρίν τι κακὸν παθέειν· ῥεχθὲν δέ τε νήπιος ἔγνω.
Iliad 20.199	τὸν δʼ αὖτʼ Αἰνείας ἀπαμείβετο φώνησέν τε·
Iliad 20.200	Πηλεΐδη μὴ δὴ ἐπέεσσί με νηπύτιον ὣς
Iliad 20.201	ἔλπεο δειδίξεσθαι, ἐπεὶ σάφα οἶδα καὶ αὐτὸς
Iliad 20.202	ἠμὲν κερτομίας ἠδʼ αἴσυλα μυθήσασθαι.
Iliad 20.203	ἴδμεν δʼ ἀλλήλων γενεήν, ἴδμεν δὲ τοκῆας
Iliad 20.204	πρόκλυτʼ ἀκούοντες ἔπεα θνητῶν ἀνθρώπων·
Iliad 20.205	ὄψει δʼ οὔτʼ ἄρ πω σὺ ἐμοὺς ἴδες οὔτʼ ἄρʼ ἐγὼ σούς.
Iliad 20.206	φασὶ σὲ μὲν Πηλῆος ἀμύμονος ἔκγονον εἶναι,
Iliad 20.207	μητρὸς δʼ ἐκ Θέτιδος καλλιπλοκάμου ἁλοσύδνης·
Iliad 20.208	αὐτὰρ ἐγὼν υἱὸς μεγαλήτορος Ἀγχίσαο
Iliad 20.209	εὔχομαι ἐκγεγάμεν, μήτηρ δέ μοί ἐστʼ Ἀφροδίτη·
Iliad 20.210	τῶν δὴ νῦν ἕτεροί γε φίλον παῖδα κλαύσονται
Iliad 20.211	σήμερον· οὐ γάρ φημʼ ἐπέεσσί γε νηπυτίοισιν
Iliad 20.212	ὧδε διακρινθέντε μάχης ἐξαπονέεσθαι.
Iliad 20.213	εἰ δʼ ἐθέλεις καὶ ταῦτα δαήμεναι, ὄφρʼ ἐῢ εἰδῇς
Iliad 20.214	ἡμετέρην γενεήν, πολλοὶ δέ μιν ἄνδρες ἴσασι·
Iliad 20.215	Δάρδανον αὖ πρῶτον τέκετο νεφεληγερέτα Ζεύς,
Iliad 20.216	κτίσσε δὲ Δαρδανίην, ἐπεὶ οὔ πω Ἴλιος ἱρὴ
Iliad 20.217	ἐν πεδίῳ πεπόλιστο πόλις μερόπων ἀνθρώπων,
Iliad 20.218	ἀλλʼ ἔθʼ ὑπωρείας ᾤκεον πολυπίδακος Ἴδης.
Iliad 20.219	Δάρδανος αὖ τέκεθʼ υἱὸν Ἐριχθόνιον βασιλῆα,
Iliad 20.220	ὃς δὴ ἀφνειότατος γένετο θνητῶν ἀνθρώπων·
Iliad 20.221	τοῦ τρισχίλιαι ἵπποι ἕλος κάτα βουκολέοντο
Iliad 20.222	θήλειαι, πώλοισιν ἀγαλλόμεναι ἀταλῇσι.
Iliad 20.223	τάων καὶ Βορέης ἠράσσατο βοσκομενάων,
Iliad 20.224	ἵππῳ δʼ εἰσάμενος παρελέξατο κυανοχαίτῃ·
Iliad 20.225	αἳ δʼ ὑποκυσάμεναι ἔτεκον δυοκαίδεκα πώλους.
Iliad 20.226	αἳ δʼ ὅτε μὲν σκιρτῷεν ἐπὶ ζείδωρον ἄρουραν,
Iliad 20.227	ἄκρον ἐπʼ ἀνθερίκων καρπὸν θέον οὐδὲ κατέκλων·
Iliad 20.228	ἀλλʼ ὅτε δὴ σκιρτῷεν ἐπʼ εὐρέα νῶτα θαλάσσης,
Iliad 20.229	ἄκρον ἐπὶ ῥηγμῖνος ἁλὸς πολιοῖο θέεσκον.
Iliad 20.230	Τρῶα δʼ Ἐριχθόνιος τέκετο Τρώεσσιν ἄνακτα·
Iliad 20.231	Τρωὸς δʼ αὖ τρεῖς παῖδες ἀμύμονες ἐξεγένοντο
Iliad 20.232	Ἶλός τʼ Ἀσσάρακός τε καὶ ἀντίθεος Γανυμήδης,
Iliad 20.233	ὃς δὴ κάλλιστος γένετο θνητῶν ἀνθρώπων·
Iliad 20.234	τὸν καὶ ἀνηρείψαντο θεοὶ Διὶ οἰνοχοεύειν
Iliad 20.235	κάλλεος εἵνεκα οἷο ἵνʼ ἀθανάτοισι μετείη.
Iliad 20.236	Ἶλος δʼ αὖ τέκεθʼ υἱὸν ἀμύμονα Λαομέδοντα·
Iliad 20.237	Λαομέδων δʼ ἄρα Τιθωνὸν τέκετο Πρίαμόν τε
Iliad 20.238	Λάμπόν τε Κλυτίον θʼ Ἱκετάονά τʼ ὄζον Ἄρηος·
Iliad 20.239	Ἀσσάρακος δὲ Κάπυν, ὃ δʼ ἄρʼ Ἀγχίσην τέκε παῖδα·
Iliad 20.240	αὐτὰρ ἔμʼ Ἀγχίσης, Πρίαμος δʼ ἔτεχʼ Ἕκτορα δῖον.
Iliad 20.241	ταύτης τοι γενεῆς τε καὶ αἵματος εὔχομαι εἶναι.
Iliad 20.242	Ζεὺς δʼ ἀρετὴν ἄνδρεσσιν ὀφέλλει τε μινύθει τε
Iliad 20.243	ὅππως κεν ἐθέλῃσιν· ὃ γὰρ κάρτιστος ἁπάντων.
Iliad 20.244	ἀλλʼ ἄγε μηκέτι ταῦτα λεγώμεθα νηπύτιοι ὣς
Iliad 20.245	ἑσταότʼ ἐν μέσσῃ ὑσμίνῃ δηϊοτῆτος.
Iliad 20.246	ἔστι γὰρ ἀμφοτέροισιν ὀνείδεα μυθήσασθαι
Iliad 20.247	πολλὰ μάλʼ, οὐδʼ ἂν νηῦς ἑκατόζυγος ἄχθος ἄροιτο.
Iliad 20.248	στρεπτὴ δὲ γλῶσσʼ ἐστὶ βροτῶν, πολέες δʼ ἔνι μῦθοι
Iliad 20.249	παντοῖοι, ἐπέων δὲ πολὺς νομὸς ἔνθα καὶ ἔνθα.
Iliad 20.250	ὁπποῖόν κʼ εἴπῃσθα ἔπος, τοῖόν κʼ ἐπακούσαις.
Iliad 20.251	ἀλλὰ τί ἢ ἔριδας καὶ νείκεα νῶϊν ἀνάγκη
Iliad 20.252	νεικεῖν ἀλλήλοισιν ἐναντίον ὥς τε γυναῖκας,
Iliad 20.253	αἵ τε χολωσάμεναι ἔριδος πέρι θυμοβόροιο
Iliad 20.254	νεικεῦσʼ ἀλλήλῃσι μέσην ἐς ἄγυιαν ἰοῦσαι
Iliad 20.255	πόλλʼ ἐτεά τε καὶ οὐκί· χόλος δέ τε καὶ τὰ κελεύει.
Iliad 20.256	ἀλκῆς δʼ οὔ μʼ ἐπέεσσιν ἀποτρέψεις μεμαῶτα
Iliad 20.257	πρὶν χαλκῷ μαχέσασθαι ἐναντίον· ἀλλʼ ἄγε θᾶσσον
Iliad 20.258	γευσόμεθʼ ἀλλήλων χαλκήρεσιν ἐγχείῃσιν.
Iliad 20.259	ἦ ῥα καὶ ἐν δεινῷ σάκει ἤλασεν ὄβριμον ἔγχος
Iliad 20.260	σμερδαλέῳ· μέγα δʼ ἀμφὶ σάκος μύκε δουρὸς ἀκωκῇ.
Iliad 20.261	Πηλεΐδης δὲ σάκος μὲν ἀπὸ ἕο χειρὶ παχείῃ
Iliad 20.262	ἔσχετο ταρβήσας· φάτο γὰρ δολιχόσκιον ἔγχος
Iliad 20.263	ῥέα διελεύσεσθαι μεγαλήτορος Αἰνείαο
Iliad 20.264	νήπιος, οὐδʼ ἐνόησε κατὰ φρένα καὶ κατὰ θυμὸν
Iliad 20.265	ὡς οὐ ῥηΐδιʼ ἐστὶ θεῶν ἐρικυδέα δῶρα
Iliad 20.266	ἀνδράσι γε θνητοῖσι δαμήμεναι οὐδʼ ὑποείκειν.
Iliad 20.267	οὐδὲ τότʼ Αἰνείαο δαΐφρονος ὄβριμον ἔγχος
Iliad 20.268	ῥῆξε σάκος· χρυσὸς γὰρ ἐρύκακε, δῶρα θεοῖο·
Iliad 20.269	ἀλλὰ δύω μὲν ἔλασσε διὰ πτύχας, αἳ δʼ ἄρʼ ἔτι τρεῖς
Iliad 20.270	ἦσαν, ἐπεὶ πέντε πτύχας ἤλασε κυλλοποδίων,
Iliad 20.271	τὰς δύο χαλκείας, δύο δʼ ἔνδοθι κασσιτέροιο,
Iliad 20.272	τὴν δὲ μίαν χρυσῆν, τῇ ῥʼ ἔσχετο μείλινον ἔγχος.
Iliad 20.273	δεύτερος αὖτʼ Ἀχιλεὺς προΐει δολιχόσκιον ἔγχος,
Iliad 20.274	καὶ βάλεν Αἰνείαο κατʼ ἀσπίδα πάντοσʼ ἐΐσην
Iliad 20.275	ἄντυγʼ ὕπο πρώτην, ᾗ λεπτότατος θέε χαλκός,
Iliad 20.276	λεπτοτάτη δʼ ἐπέην ῥινὸς βοός· ἣ δὲ διὰ πρὸ
Iliad 20.277	Πηλιὰς ἤϊξεν μελίη, λάκε δʼ ἀσπὶς ὑπʼ αὐτῆς.
Iliad 20.278	Αἰνείας δʼ ἐάλη καὶ ἀπὸ ἕθεν ἀσπίδʼ ἀνέσχε
Iliad 20.279	δείσας· ἐγχείη δʼ ἄρʼ ὑπὲρ νώτου ἐνὶ γαίῃ
Iliad 20.280	ἔστη ἱεμένη, διὰ δʼ ἀμφοτέρους ἕλε κύκλους
Iliad 20.281	ἀσπίδος ἀμφιβρότης· ὃ δʼ ἀλευάμενος δόρυ μακρὸν
Iliad 20.282	ἔστη, κὰδ δʼ ἄχος οἱ χύτο μυρίον ὀφθαλμοῖσι,
Iliad 20.283	ταρβήσας ὅ οἱ ἄγχι πάγη βέλος. αὐτὰρ Ἀχιλλεὺς
Iliad 20.284	ἐμμεμαὼς ἐπόρουσεν ἐρυσσάμενος ξίφος ὀξὺ
Iliad 20.285	σμερδαλέα ἰάχων· ὃ δὲ χερμάδιον λάβε χειρὶ
Iliad 20.286	Αἰνείας, μέγα ἔργον, ὃ οὐ δύο γʼ ἄνδρε φέροιεν,
Iliad 20.287	οἷοι νῦν βροτοί εἰσʼ· ὃ δέ μιν ῥέα πάλλε καὶ οἶος.
Iliad 20.288	ἔνθά κεν Αἰνείας μὲν ἐπεσσύμενον βάλε πέτρῳ
Iliad 20.289	ἢ κόρυθʼ ἠὲ σάκος, τό οἱ ἤρκεσε λυγρὸν ὄλεθρον,
Iliad 20.290	τὸν δέ κε Πηλεΐδης σχεδὸν ἄορι θυμὸν ἀπηύρα,
Iliad 20.291	εἰ μὴ ἄρʼ ὀξὺ νόησε Ποσειδάων ἐνοσίχθων·
Iliad 20.292	αὐτίκα δʼ ἀθανάτοισι θεοῖς μετὰ μῦθον ἔειπεν·
Iliad 20.293	ὢ πόποι ἦ μοι ἄχος μεγαλήτορος Αἰνείαο,
Iliad 20.294	ὃς τάχα Πηλεΐωνι δαμεὶς Ἄϊδος δὲ κάτεισι
Iliad 20.295	πειθόμενος μύθοισιν Ἀπόλλωνος ἑκάτοιο
Iliad 20.296	νήπιος, οὐδέ τί οἱ χραισμήσει λυγρὸν ὄλεθρον.
Iliad 20.297	ἀλλὰ τί ἢ νῦν οὗτος ἀναίτιος ἄλγεα πάσχει
Iliad 20.298	μὰψ ἕνεκʼ ἀλλοτρίων ἀχέων, κεχαρισμένα δʼ αἰεὶ
Iliad 20.299	δῶρα θεοῖσι δίδωσι τοὶ οὐρανὸν εὐρὺν ἔχουσιν;
Iliad 20.300	ἀλλʼ ἄγεθʼ ἡμεῖς πέρ μιν ὑπὲκ θανάτου ἀγάγωμεν,
Iliad 20.301	μή πως καὶ Κρονίδης κεχολώσεται, αἴ κεν Ἀχιλλεὺς
Iliad 20.302	τόνδε κατακτείνῃ· μόριμον δέ οἵ ἐστʼ ἀλέασθαι,
Iliad 20.303	ὄφρα μὴ ἄσπερμος γενεὴ καὶ ἄφαντος ὄληται
Iliad 20.304	Δαρδάνου, ὃν Κρονίδης περὶ πάντων φίλατο παίδων
Iliad 20.305	οἳ ἕθεν ἐξεγένοντο γυναικῶν τε θνητάων.
Iliad 20.306	ἤδη γὰρ Πριάμου γενεὴν ἔχθηρε Κρονίων·
Iliad 20.307	νῦν δὲ δὴ Αἰνείαο βίη Τρώεσσιν ἀνάξει
Iliad 20.308	καὶ παίδων παῖδες, τοί κεν μετόπισθε γένωνται.
Iliad 20.309	τὸν δʼ ἠμείβετʼ ἔπειτα βοῶπις πότνια Ἥρη·
Iliad 20.310	ἐννοσίγαιʼ, αὐτὸς σὺ μετὰ φρεσὶ σῇσι νόησον
Iliad 20.311	Αἰνείαν ἤ κέν μιν ἐρύσσεαι ἦ κεν ἐάσῃς
Iliad 20.312	Πηλεΐδῃ Ἀχιλῆϊ δαμήμεναι, ἐσθλὸν ἐόντα.
Iliad 20.313	ἤτοι μὲν γὰρ νῶϊ πολέας ὠμόσσαμεν ὅρκους
Iliad 20.314	πᾶσι μετʼ ἀθανάτοισιν ἐγὼ καὶ Παλλὰς Ἀθήνη
Iliad 20.315	μή ποτʼ ἐπὶ Τρώεσσιν ἀλεξήσειν κακὸν ἦμαρ,
Iliad 20.316	μηδʼ ὁπότʼ ἂν Τροίη μαλερῷ πυρὶ πᾶσα δάηται
Iliad 20.317	καιομένη, καίωσι δʼ ἀρήϊοι υἷες Ἀχαιῶν.
Iliad 20.318	αὐτὰρ ἐπεὶ τό γʼ ἄκουσε Ποσειδάων ἐνοσίχθων,
Iliad 20.319	βῆ ῥʼ ἴμεν ἄν τε μάχην καὶ ἀνὰ κλόνον ἐγχειάων,
Iliad 20.320	ἷξε δʼ ὅθʼ Αἰνείας ἠδʼ ὃ κλυτὸς ἦεν Ἀχιλλεύς.
Iliad 20.321	αὐτίκα τῷ μὲν ἔπειτα κατʼ ὀφθαλμῶν χέεν ἀχλὺν
Iliad 20.322	Πηλεΐδῃ Ἀχιλῆϊ· ὃ δὲ μελίην εὔχαλκον
Iliad 20.323	ἀσπίδος ἐξέρυσεν μεγαλήτορος Αἰνείαο·
Iliad 20.324	καὶ τὴν μὲν προπάροιθε ποδῶν Ἀχιλῆος ἔθηκεν,
Iliad 20.325	Αἰνείαν δʼ ἔσσευεν ἀπὸ χθονὸς ὑψόσʼ ἀείρας.
Iliad 20.326	πολλὰς δὲ στίχας ἡρώων, πολλὰς δὲ καὶ ἵππων
Iliad 20.327	Αἰνείας ὑπερᾶλτο θεοῦ ἀπὸ χειρὸς ὀρούσας,
Iliad 20.328	ἷξε δʼ ἐπʼ ἐσχατιὴν πολυάϊκος πολέμοιο,
Iliad 20.329	ἔνθά τε Καύκωνες πόλεμον μέτα θωρήσσοντο.
Iliad 20.330	τῷ δὲ μάλʼ ἐγγύθεν ἦλθε Ποσειδάων ἐνοσίχθων,
Iliad 20.331	καί μιν φωνήσας ἔπεα πτερόεντα προσηύδα·
Iliad 20.332	Αἰνεία, τίς σʼ ὧδε θεῶν ἀτέοντα κελεύει
Iliad 20.333	ἀντία Πηλεΐωνος ὑπερθύμοιο μάχεσθαι,
Iliad 20.334	ὃς σεῦ ἅμα κρείσσων καὶ φίλτερος ἀθανάτοισιν;
Iliad 20.335	ἀλλʼ ἀναχωρῆσαι ὅτε κεν συμβλήσεαι αὐτῷ,
Iliad 20.336	μὴ καὶ ὑπὲρ μοῖραν δόμον Ἄϊδος εἰσαφίκηαι.
Iliad 20.337	αὐτὰρ ἐπεί κʼ Ἀχιλεὺς θάνατον καὶ πότμον ἐπίσπῃ,
Iliad 20.338	θαρσήσας δὴ ἔπειτα μετὰ πρώτοισι μάχεσθαι·
Iliad 20.339	οὐ μὲν γάρ τίς σʼ ἄλλος Ἀχαιῶν ἐξεναρίξει.
Iliad 20.340	ὣς εἰπὼν λίπεν αὐτόθʼ, ἐπεὶ διεπέφραδε πάντα.
Iliad 20.341	αἶψα δʼ ἔπειτʼ Ἀχιλῆος ἀπʼ ὀφθαλμῶν σκέδασʼ ἀχλὺν
Iliad 20.342	θεσπεσίην· ὃ δʼ ἔπειτα μέγʼ ἔξιδεν ὀφθαλμοῖσιν,
Iliad 20.343	ὀχθήσας δʼ ἄρα εἶπε πρὸς ὃν μεγαλήτορα θυμόν·
Iliad 20.344	ὢ πόποι ἦ μέγα θαῦμα τόδʼ ὀφθαλμοῖσιν ὁρῶμαι·
Iliad 20.345	ἔγχος μὲν τόδε κεῖται ἐπὶ χθονός, οὐδέ τι φῶτα
Iliad 20.346	λεύσσω, τῷ ἐφέηκα κατακτάμεναι μενεαίνων.
Iliad 20.347	ἦ ῥα καὶ Αἰνείας φίλος ἀθανάτοισι θεοῖσιν
Iliad 20.348	ἦεν· ἀτάρ μιν ἔφην μὰψ αὔτως εὐχετάασθαι.
Iliad 20.349	ἐρρέτω· οὔ οἱ θυμὸς ἐμεῦ ἔτι πειρηθῆναι
Iliad 20.350	ἔσσεται, ὃς καὶ νῦν φύγεν ἄσμενος ἐκ θανάτοιο.
Iliad 20.351	ἀλλʼ ἄγε δὴ Δαναοῖσι φιλοπτολέμοισι κελεύσας
Iliad 20.352	τῶν ἄλλων Τρώων πειρήσομαι ἀντίος ἐλθών.
Iliad 20.353	ἦ, καὶ ἐπὶ στίχας ἆλτο, κέλευε δὲ φωτὶ ἑκάστῳ·
Iliad 20.354	μηκέτι νῦν Τρώων ἑκὰς ἕστατε δῖοι Ἀχαιοί,
Iliad 20.355	ἀλλʼ ἄγʼ ἀνὴρ ἄντʼ ἀνδρὸς ἴτω, μεμάτω δὲ μάχεσθαι.
Iliad 20.356	ἀργαλέον δέ μοί ἐστι καὶ ἰφθίμῳ περ ἐόντι
Iliad 20.357	τοσσούσδʼ ἀνθρώπους ἐφέπειν καὶ πᾶσι μάχεσθαι·
Iliad 20.358	οὐδέ κʼ Ἄρης, ὅς περ θεὸς ἄμβροτος, οὐδέ κʼ Ἀθήνη
Iliad 20.359	τοσσῆσδʼ ὑσμίνης ἐφέποι στόμα καὶ πονέοιτο·
Iliad 20.360	ἀλλʼ ὅσσον μὲν ἐγὼ δύναμαι χερσίν τε ποσίν τε
Iliad 20.361	καὶ σθένει, οὔ μʼ ἔτι φημὶ μεθησέμεν οὐδʼ ἠβαιόν,
Iliad 20.362	ἀλλὰ μάλα στιχὸς εἶμι διαμπερές, οὐδέ τινʼ οἴω
Iliad 20.363	Τρώων χαιρήσειν, ὅς τις σχεδὸν ἔγχεος ἔλθῃ.
Iliad 20.364	ὣς φάτʼ ἐποτρύνων· Τρώεσσι δὲ φαίδιμος Ἕκτωρ
Iliad 20.365	κέκλεθʼ ὁμοκλήσας, φάτο δʼ ἴμεναι ἄντʼ Ἀχιλῆος·
Iliad 20.366	Τρῶες ὑπέρθυμοι μὴ δείδιτε Πηλεΐωνα.
Iliad 20.367	καί κεν ἐγὼ ἐπέεσσι καὶ ἀθανάτοισι μαχοίμην,
Iliad 20.368	ἔγχεϊ δʼ ἀργαλέον, ἐπεὶ ἦ πολὺ φέρτεροί εἰσιν.
Iliad 20.369	οὐδʼ Ἀχιλεὺς πάντεσσι τέλος μύθοις ἐπιθήσει,
Iliad 20.370	ἀλλὰ τὸ μὲν τελέει, τὸ δὲ καὶ μεσσηγὺ κολούει.
Iliad 20.371	τοῦ δʼ ἐγὼ ἀντίος εἶμι καὶ εἰ πυρὶ χεῖρας ἔοικεν,
Iliad 20.372	εἰ πυρὶ χεῖρας ἔοικε, μένος δʼ αἴθωνι σιδήρῳ.
Iliad 20.373	ὣς φάτʼ ἐποτρύνων, οἳ δʼ ἀντίοι ἔγχεʼ ἄειραν
Iliad 20.374	Τρῶες· τῶν δʼ ἄμυδις μίχθη μένος, ὦρτο δʼ ἀϋτή.
Iliad 20.375	καὶ τότʼ ἄρʼ Ἕκτορα εἶπε παραστὰς Φοῖβος Ἀπόλλων·
Iliad 20.376	Ἕκτορ μηκέτι πάμπαν Ἀχιλλῆϊ προμάχιζε,
Iliad 20.377	ἀλλὰ κατὰ πληθύν τε καὶ ἐκ φλοίσβοιο δέδεξο,
Iliad 20.378	μή πώς σʼ ἠὲ βάλῃ ἠὲ σχεδὸν ἄορι τύψῃ.
Iliad 20.379	ὣς ἔφαθʼ, Ἕκτωρ δʼ αὖτις ἐδύσετο οὐλαμὸν ἀνδρῶν
Iliad 20.380	ταρβήσας, ὅτʼ ἄκουσε θεοῦ ὄπα φωνήσαντος.
Iliad 20.381	ἐν δʼ Ἀχιλεὺς Τρώεσσι θόρε φρεσὶν εἱμένος ἀλκὴν
Iliad 20.382	σμερδαλέα ἰάχων, πρῶτον δʼ ἕλεν Ἰφιτίωνα
Iliad 20.383	ἐσθλὸν Ὀτρυντεΐδην πολέων ἡγήτορα λαῶν,
Iliad 20.384	ὃν νύμφη τέκε νηῒς Ὀτρυντῆϊ πτολιπόρθῳ
Iliad 20.385	Τμώλῳ ὕπο νιφόεντι Ὕδης ἐν πίονι δήμῳ·
Iliad 20.386	τὸν δʼ ἰθὺς μεμαῶτα βάλʼ ἔγχεϊ δῖος Ἀχιλλεὺς
Iliad 20.387	μέσσην κὰκ κεφαλήν· ἣ δʼ ἄνδιχα πᾶσα κεάσθη,
Iliad 20.388	δούπησεν δὲ πεσών, ὃ δʼ ἐπεύξατο δῖος Ἀχιλλεύς·
Iliad 20.389	κεῖσαι Ὀτρυντεΐδη πάντων ἐκπαγλότατʼ ἀνδρῶν·
Iliad 20.390	ἐνθάδε τοι θάνατος, γενεὴ δέ τοί ἐστʼ ἐπὶ λίμνῃ
Iliad 20.391	Γυγαίῃ, ὅθι τοι τέμενος πατρώϊόν ἐστιν
Iliad 20.392	Ὕλλῳ ἐπʼ ἰχθυόεντι καὶ Ἕρμῳ δινήεντι.
Iliad 20.393	ὣς ἔφατʼ εὐχόμενος, τὸν δὲ σκότος ὄσσε κάλυψε.
Iliad 20.394	τὸν μὲν Ἀχαιῶν ἵπποι ἐπισσώτροις δατέοντο
Iliad 20.395	πρώτῃ ἐν ὑσμίνῃ· ὃ δʼ ἐπʼ αὐτῷ Δημολέοντα
Iliad 20.396	ἐσθλὸν ἀλεξητῆρα μάχης Ἀντήνορος υἱὸν
Iliad 20.397	νύξε κατὰ κρόταφον, κυνέης διὰ χαλκοπαρῄου.
Iliad 20.398	οὐδʼ ἄρα χαλκείη κόρυς ἔσχεθεν, ἀλλὰ διʼ αὐτῆς
Iliad 20.399	αἰχμὴ ἱεμένη ῥῆξʼ ὀστέον, ἐγκέφαλος δὲ
Iliad 20.400	ἔνδον ἅπας πεπάλακτο· δάμασσε δέ μιν μεμαῶτα.
Iliad 20.401	Ἱπποδάμαντα δʼ ἔπειτα καθʼ ἵππων ἀΐξαντα
Iliad 20.402	πρόσθεν ἕθεν φεύγοντα μετάφρενον οὔτασε δουρί.
Iliad 20.403	αὐτὰρ ὃ θυμὸν ἄϊσθε καὶ ἤρυγεν, ὡς ὅτε ταῦρος
Iliad 20.404	ἤρυγεν ἑλκόμενος Ἑλικώνιον ἀμφὶ ἄνακτα
Iliad 20.405	κούρων ἑλκόντων· γάνυται δέ τε τοῖς ἐνοσίχθων·
Iliad 20.406	ὣς ἄρα τόν γʼ ἐρυγόντα λίπʼ ὀστέα θυμὸς ἀγήνωρ·
Iliad 20.407	αὐτὰρ ὃ βῆ σὺν δουρὶ μετʼ ἀντίθεον Πολύδωρον
Iliad 20.408	Πριαμίδην. τὸν δʼ οὔ τι πατὴρ εἴασκε μάχεσθαι,
Iliad 20.409	οὕνεκά οἱ μετὰ παισὶ νεώτατος ἔσκε γόνοιο,
Iliad 20.410	καί οἱ φίλτατος ἔσκε, πόδεσσι δὲ πάντας ἐνίκα
Iliad 20.411	δὴ τότε νηπιέῃσι ποδῶν ἀρετὴν ἀναφαίνων
Iliad 20.412	θῦνε διὰ προμάχων, εἷος φίλον ὤλεσε θυμόν.
Iliad 20.413	τὸν βάλε μέσσον ἄκοντι ποδάρκης δῖος Ἀχιλλεὺς
Iliad 20.414	νῶτα παραΐσσοντος, ὅθι ζωστῆρος ὀχῆες
Iliad 20.415	χρύσειοι σύνεχον καὶ διπλόος ἤντετο θώρηξ·
Iliad 20.416	ἀντικρὺ δὲ διέσχε παρʼ ὀμφαλὸν ἔγχεος αἰχμή,
Iliad 20.417	γνὺξ δʼ ἔριπʼ οἰμώξας, νεφέλη δέ μιν ἀμφεκάλυψε
Iliad 20.418	κυανέη, προτὶ οἷ δʼ ἔλαβʼ ἔντερα χερσὶ λιασθείς.
Iliad 20.419	Ἕκτωρ δʼ ὡς ἐνόησε κασίγνητον Πολύδωρον
Iliad 20.420	ἔντερα χερσὶν ἔχοντα λιαζόμενον ποτὶ γαίη
Iliad 20.421	κάρ ῥά οἱ ὀφθαλμῶν κέχυτʼ ἀχλύς· οὐδʼ ἄρʼ ἔτʼ ἔτλη
Iliad 20.422	δηρὸν ἑκὰς στρωφᾶσθʼ, ἀλλʼ ἀντίος ἦλθʼ Ἀχιλῆϊ
Iliad 20.423	ὀξὺ δόρυ κραδάων φλογὶ εἴκελος· αὐτὰρ Ἀχιλλεὺς
Iliad 20.424	ὡς εἶδʼ, ὣς ἀνεπᾶλτο, καὶ εὐχόμενος ἔπος ηὔδα·
Iliad 20.425	ἐγγὺς ἀνὴρ ὃς ἐμόν γε μάλιστʼ ἐσεμάσσατο θυμόν,
Iliad 20.426	ὅς μοι ἑταῖρον ἔπεφνε τετιμένον· οὐδʼ ἂν ἔτι δὴν
Iliad 20.427	ἀλλήλους πτώσσοιμεν ἀνὰ πτολέμοιο γεφύρας.
Iliad 20.428	ἦ, καὶ ὑπόδρα ἰδὼν προσεφώνεεν Ἕκτορα δῖον·
Iliad 20.429	ἆσσον ἴθʼ ὥς κεν θᾶσσον ὀλέθρου πείραθʼ ἵκηαι.
Iliad 20.430	τὸν δʼ οὐ ταρβήσας προσέφη κορυθαίολος Ἕκτωρ·
Iliad 20.431	Πηλεΐδη μὴ δὴ ἐπέεσσί με νηπύτιον ὣς
Iliad 20.432	ἔλπεο δειδίξεσθαι, ἐπεὶ σάφα οἶδα καὶ αὐτὸς
Iliad 20.433	ἠμὲν κερτομίας ἠδʼ αἴσυλα μυθήσασθαι.
Iliad 20.434	οἶδα δʼ ὅτι σὺ μὲν ἐσθλός, ἐγὼ δὲ σέθεν πολὺ χείρων.
Iliad 20.435	ἀλλʼ ἤτοι μὲν ταῦτα θεῶν ἐν γούνασι κεῖται,
Iliad 20.436	αἴ κέ σε χειρότερός περ ἐὼν ἀπὸ θυμὸν ἕλωμαι
Iliad 20.437	δουρὶ βαλών, ἐπεὶ ἦ καὶ ἐμὸν βέλος ὀξὺ πάροιθεν.
Iliad 20.438	ἦ ῥα, καὶ ἀμπεπαλὼν προΐει δόρυ, καὶ τό γʼ Ἀθήνη
Iliad 20.439	πνοιῇ Ἀχιλλῆος πάλιν ἔτραπε κυδαλίμοιο
Iliad 20.440	ἦκα μάλα ψύξασα· τὸ δʼ ἂψ ἵκεθʼ Ἕκτορα δῖον,
Iliad 20.441	αὐτοῦ δὲ προπάροιθε ποδῶν πέσεν. αὐτὰρ Ἀχιλλεὺς
Iliad 20.442	ἐμμεμαὼς ἐπόρουσε κατακτάμεναι μενεαίνων,
Iliad 20.443	σμερδαλέα ἰάχων· τὸν δʼ ἐξήρπαξεν Ἀπόλλων
Iliad 20.444	ῥεῖα μάλʼ ὥς τε θεός, ἐκάλυψε δʼ ἄρʼ ἠέρι πολλῇ.
Iliad 20.445	τρὶς μὲν ἔπειτʼ ἐπόρουσε ποδάρκης δῖος Ἀχιλλεὺς
Iliad 20.446	ἔγχεϊ χαλκείῳ, τρὶς δʼ ἠέρα τύψε βαθεῖαν.
Iliad 20.447	ἀλλʼ ὅτε δὴ τὸ τέταρτον ἐπέσσυτο δαίμονι ἶσος,
Iliad 20.448	δεινὰ δʼ ὁμοκλήσας ἔπεα πτερόεντα προσηύδα·
Iliad 20.449	ἐξ αὖ νῦν ἔφυγες θάνατον κύον· ἦ τέ τοι ἄγχι
Iliad 20.450	ἦλθε κακόν· νῦν αὖτέ σʼ ἐρύσατο Φοῖβος Ἀπόλλων,
Iliad 20.451	ᾧ μέλλεις εὔχεσθαι ἰὼν ἐς δοῦπον ἀκόντων.
Iliad 20.452	ἦ θήν σʼ ἐξανύω γε καὶ ὕστερον ἀντιβολήσας,
Iliad 20.453	εἴ πού τις καὶ ἔμοιγε θεῶν ἐπιτάρροθός ἐστι.
Iliad 20.454	νῦν αὖ τοὺς ἄλλους ἐπιείσομαι, ὅν κε κιχείω.
Iliad 20.455	ὣς εἰπὼν Δρύοπʼ οὖτα κατʼ αὐχένα μέσσον ἄκοντι·
Iliad 20.456	ἤριπε δὲ προπάροιθε ποδῶν· ὃ δὲ τὸν μὲν ἔασε,
Iliad 20.457	Δημοῦχον δὲ Φιλητορίδην ἠΰν τε μέγαν τε
Iliad 20.458	κὰγ γόνυ δουρὶ βαλὼν ἠρύκακε. τὸν μὲν ἔπειτα
Iliad 20.459	οὐτάζων ξίφεϊ μεγάλῳ ἐξαίνυτο θυμόν·
Iliad 20.460	αὐτὰρ ὃ Λαόγονον καὶ Δάρδανον υἷε Βίαντος
Iliad 20.461	ἄμφω ἐφορμηθεὶς ἐξ ἵππων ὦσε χαμᾶζε,
Iliad 20.462	τὸν μὲν δουρὶ βαλών, τὸν δὲ σχεδὸν ἄορι τύψας.
Iliad 20.463	Τρῶα δʼ Ἀλαστορίδην, ὃ μὲν ἀντίος ἤλυθε γούνων,
Iliad 20.464	εἴ πώς εὑ πεφίδοιτο λαβὼν καὶ ζωὸν ἀφείη
Iliad 20.465	μηδὲ κατακτείνειεν ὁμηλικίην ἐλεήσας,
Iliad 20.466	νήπιος, οὐδὲ τὸ ᾔδη ὃ οὐ πείσεσθαι ἔμελλεν·
Iliad 20.467	οὐ γάρ τι γλυκύθυμος ἀνὴρ ἦν οὐδʼ ἀγανόφρων,
Iliad 20.468	ἀλλὰ μάλʼ ἐμμεμαώς· ὃ μὲν ἥπτετο χείρεσι γούνων
Iliad 20.469	ἱέμενος λίσσεσθʼ, ὃ δὲ φασγάνῳ οὖτα καθʼ ἧπαρ·
Iliad 20.470	ἐκ δέ οἱ ἧπαρ ὄλισθεν, ἀτὰρ μέλαν αἷμα κατʼ αὐτοῦ
Iliad 20.471	κόλπον ἐνέπλησεν· τὸν δὲ σκότος ὄσσε κάλυψε
Iliad 20.472	θυμοῦ δευόμενον· ὃ δὲ Μούλιον οὖτα παραστὰς
Iliad 20.473	δουρὶ κατʼ οὖς· εἶθαρ δὲ διʼ οὔατος ἦλθʼ ἑτέροιο
Iliad 20.474	αἰχμὴ χαλκείη· ὃ δʼ Ἀγήνορος υἱὸν Ἔχεκλον
Iliad 20.475	μέσσην κὰκ κεφαλὴν ξίφει ἤλασε κωπήεντι,
Iliad 20.476	πᾶν δʼ ὑπεθερμάνθη ξίφος αἵματι· τὸν δὲ κατʼ ὄσσε
Iliad 20.477	ἔλλαβε πορφύρεος θάνατος καὶ μοῖρα κραταιή.
Iliad 20.478	Δευκαλίωνα δʼ ἔπειθʼ, ἵνα τε ξυνέχουσι τένοντες
Iliad 20.479	ἀγκῶνος, τῇ τόν γε φίλης διὰ χειρὸς ἔπειρεν
Iliad 20.480	αἰχμῇ χαλκείῃ· ὃ δέ μιν μένε χεῖρα βαρυνθεὶς
Iliad 20.481	πρόσθʼ ὁρόων θάνατον· ὃ δὲ φασγάνῳ αὐχένα θείνας
Iliad 20.482	τῆλʼ αὐτῇ πήληκι κάρη βάλε· μυελὸς αὖτε
Iliad 20.483	σφονδυλίων ἔκπαλθʼ, ὃ δʼ ἐπὶ χθονὶ κεῖτο τανυσθείς.
Iliad 20.484	αὐτὰρ ὃ βῆ ῥʼ ἰέναι μετʼ ἀμύμονα Πείρεω υἱὸν
Iliad 20.485	Ῥίγμον, ὃς ἐκ Θρῄκης ἐριβώλακος εἰληλούθει·
Iliad 20.486	τὸν βάλε μέσσον ἄκοντι, πάγη δʼ ἐν νηδύϊ χαλκός,
Iliad 20.487	ἤριπε δʼ ἐξ ὀχέων· ὃ δʼ Ἀρηΐθοον θεράποντα
Iliad 20.488	ἂψ ἵππους στρέψαντα μετάφρενον ὀξέϊ δουρὶ
Iliad 20.489	νύξʼ, ἀπὸ δʼ ἅρματος ὦσε· κυκήθησαν δέ οἱ ἵπποι.
Iliad 20.490	ὡς δʼ ἀναμαιμάει βαθέʼ ἄγκεα θεσπιδαὲς πῦρ
Iliad 20.491	οὔρεος ἀζαλέοιο, βαθεῖα δὲ καίεται ὕλη,
Iliad 20.492	πάντῃ τε κλονέων ἄνεμος φλόγα εἰλυφάζει,
Iliad 20.493	ὣς ὅ γε πάντῃ θῦνε σὺν ἔγχεϊ δαίμονι ἶσος
Iliad 20.494	κτεινομένους ἐφέπων· ῥέε δʼ αἵματι γαῖα μέλαινα.
Iliad 20.495	ὡς δʼ ὅτε τις ζεύξῃ βόας ἄρσενας εὐρυμετώπους
Iliad 20.496	τριβέμεναι κρῖ λευκὸν ἐϋκτιμένῃ ἐν ἀλωῇ,
Iliad 20.497	ῥίμφά τε λέπτʼ ἐγένοντο βοῶν ὑπὸ πόσσʼ ἐριμύκων,
Iliad 20.498	ὣς ὑπʼ Ἀχιλλῆος μεγαθύμου μώνυχες ἵπποι
Iliad 20.499	στεῖβον ὁμοῦ νέκυάς τε καὶ ἀσπίδας· αἵματι δʼ ἄξων
Iliad 20.500	νέρθεν ἅπας πεπάλακτο καὶ ἄντυγες αἳ περὶ δίφρον,
Iliad 20.501	ἃς ἄρʼ ἀφʼ ἱππείων ὁπλέων ῥαθάμιγγες ἔβαλλον
Iliad 20.502	αἵ τʼ ἀπʼ ἐπισσώτρων· ὃ δὲ ἵετο κῦδος ἀρέσθαι
Iliad 20.503	Πηλεΐδης, λύθρῳ δὲ παλάσσετο χεῖρας ἀάπτους.
Iliad 21.1	ἀλλʼ ὅτε δὴ πόρον ἷξον ἐϋρρεῖος ποταμοῖο
Iliad 21.2	Ξάνθου δινήεντος, ὃν ἀθάνατος τέκετο Ζεύς,
Iliad 21.3	ἔνθα διατμήξας τοὺς μὲν πεδίον δὲ δίωκε
Iliad 21.4	πρὸς πόλιν, ᾗ περ Ἀχαιοὶ ἀτυζόμενοι φοβέοντο
Iliad 21.5	ἤματι τῷ προτέρῳ, ὅτε μαίνετο φαίδιμος Ἕκτωρ·
Iliad 21.6	τῇ ῥʼ οἵ γε προχέοντο πεφυζότες, ἠέρα δʼ Ἥρη
Iliad 21.7	πίτνα πρόσθε βαθεῖαν ἐρυκέμεν· ἡμίσεες δὲ
Iliad 21.8	ἐς ποταμὸν εἰλεῦντο βαθύρροον ἀργυροδίνην,
Iliad 21.9	ἐν δʼ ἔπεσον μεγάλῳ πατάγῳ, βράχε δʼ αἰπὰ ῥέεθρα,
Iliad 21.10	ὄχθαι δʼ ἀμφὶ περὶ μεγάλʼ ἴαχον· οἳ δʼ ἀλαλητῷ
Iliad 21.11	ἔννεον ἔνθα καὶ ἔνθα ἑλισσόμενοι περὶ δίνας.
Iliad 21.12	ὡς δʼ ὅθʼ ὑπὸ ῥιπῆς πυρὸς ἀκρίδες ἠερέθονται
Iliad 21.13	φευγέμεναι ποταμὸν δέ· τὸ δὲ φλέγει ἀκάματον πῦρ
Iliad 21.14	ὄρμενον ἐξαίφνης, ταὶ δὲ πτώσσουσι καθʼ ὕδωρ·
Iliad 21.15	ὣς ὑπʼ Ἀχιλλῆος Ξάνθου βαθυδινήεντος
Iliad 21.16	πλῆτο ῥόος κελάδων ἐπιμὶξ ἵππων τε καὶ ἀνδρῶν.
Iliad 21.17	αὐτὰρ ὃ διογενὴς δόρυ μὲν λίπεν αὐτοῦ ἐπʼ ὄχθῃ
Iliad 21.18	κεκλιμένον μυρίκῃσιν, ὃ δʼ ἔσθορε δαίμονι ἶσος
Iliad 21.19	φάσγανον οἶον ἔχων, κακὰ δὲ φρεσὶ μήδετο ἔργα,
Iliad 21.20	τύπτε δʼ ἐπιστροφάδην· τῶν δὲ στόνος ὄρνυτʼ ἀεικὴς
Iliad 21.21	ἄορι θεινομένων, ἐρυθαίνετο δʼ αἵματι ὕδωρ.
Iliad 21.22	ὡς δʼ ὑπὸ δελφῖνος μεγακήτεος ἰχθύες ἄλλοι
Iliad 21.23	φεύγοντες πιμπλᾶσι μυχοὺς λιμένος εὐόρμου
Iliad 21.24	δειδιότες· μάλα γάρ τε κατεσθίει ὅν κε λάβῃσιν·
Iliad 21.25	ὣς Τρῶες ποταμοῖο κατὰ δεινοῖο ῥέεθρα
Iliad 21.26	πτῶσσον ὑπὸ κρημνούς. ὃ δʼ ἐπεὶ κάμε χεῖρας ἐναίρων,
Iliad 21.27	ζωοὺς ἐκ ποταμοῖο δυώδεκα λέξατο κούρους
Iliad 21.28	ποινὴν Πατρόκλοιο Μενοιτιάδαο θανόντος·
Iliad 21.29	τοὺς ἐξῆγε θύραζε τεθηπότας ἠΰτε νεβρούς,
Iliad 21.30	δῆσε δʼ ὀπίσσω χεῖρας ἐϋτμήτοισιν ἱμᾶσι,
Iliad 21.31	τοὺς αὐτοὶ φορέεσκον ἐπὶ στρεπτοῖσι χιτῶσι,
Iliad 21.32	δῶκε δʼ ἑταίροισιν κατάγειν κοίλας ἐπὶ νῆας.
Iliad 21.33	αὐτὰρ ὃ ἂψ ἐπόρουσε δαϊζέμεναι μενεαίνων.
Iliad 21.34	ἔνθʼ υἷι Πριάμοιο συνήντετο Δαρδανίδαο
Iliad 21.35	ἐκ ποταμοῦ φεύγοντι Λυκάονι, τόν ῥά ποτʼ αὐτὸς
Iliad 21.36	ἦγε λαβὼν ἐκ πατρὸς ἀλωῆς οὐκ ἐθέλοντα
Iliad 21.37	ἐννύχιος προμολών· ὃ δʼ ἐρινεὸν ὀξέϊ χαλκῷ
Iliad 21.38	τάμνε νέους ὄρπηκας, ἵνʼ ἅρματος ἄντυγες εἶεν·
Iliad 21.39	τῷ δʼ ἄρʼ ἀνώϊστον κακὸν ἤλυθε δῖος Ἀχιλλεύς.
Iliad 21.40	καὶ τότε μέν μιν Λῆμνον ἐϋκτιμένην ἐπέρασσε
Iliad 21.41	νηυσὶν ἄγων, ἀτὰρ υἱὸς Ἰήσονος ὦνον ἔδωκε·
Iliad 21.42	κεῖθεν δὲ ξεῖνός μιν ἐλύσατο πολλὰ δʼ ἔδωκεν
Iliad 21.43	Ἴμβριος Ἠετίων, πέμψεν δʼ ἐς δῖαν Ἀρίσβην·
Iliad 21.44	ἔνθεν ὑπεκπροφυγὼν πατρώϊον ἵκετο δῶμα.
Iliad 21.45	ἕνδεκα δʼ ἤματα θυμὸν ἐτέρπετο οἷσι φίλοισιν
Iliad 21.46	ἐλθὼν ἐκ Λήμνοιο· δυωδεκάτῃ δέ μιν αὖτις
Iliad 21.47	χερσὶν Ἀχιλλῆος θεὸς ἔμβαλεν, ὅς μιν ἔμελλε
Iliad 21.48	πέμψειν εἰς Ἀΐδαο καὶ οὐκ ἐθέλοντα νέεσθαι.
Iliad 21.49	τὸν δʼ ὡς οὖν ἐνόησε ποδάρκης δῖος Ἀχιλλεὺς
Iliad 21.50	γυμνὸν ἄτερ κόρυθός τε καὶ ἀσπίδος, οὐδʼ ἔχεν ἔγχος,
Iliad 21.51	ἀλλὰ τὰ μέν ῥʼ ἀπὸ πάντα χαμαὶ βάλε· τεῖρε γὰρ ἱδρὼς
Iliad 21.52	φεύγοντʼ ἐκ ποταμοῦ, κάματος δʼ ὑπὸ γούνατʼ ἐδάμνα·
Iliad 21.53	ὀχθήσας δʼ ἄρα εἶπε πρὸς ὃν μεγαλήτορα θυμόν·
Iliad 21.54	ὢ πόποι ἦ μέγα θαῦμα τόδʼ ὀφθαλμοῖσιν ὁρῶμαι·
Iliad 21.55	ἦ μάλα δὴ Τρῶες μεγαλήτορες οὕς περ ἔπεφνον
Iliad 21.56	αὖτις ἀναστήσονται ὑπὸ ζόφου ἠερόεντος,
Iliad 21.57	οἷον δὴ καὶ ὅδʼ ἦλθε φυγὼν ὕπο νηλεὲς ἦμαρ
Iliad 21.58	Λῆμνον ἐς ἠγαθέην πεπερημένος· οὐδέ μιν ἔσχε
Iliad 21.59	πόντος ἁλὸς πολιῆς, ὃ πολέας ἀέκοντας ἐρύκει.
Iliad 21.60	ἀλλʼ ἄγε δὴ καὶ δουρὸς ἀκωκῆς ἡμετέροιο
Iliad 21.61	γεύσεται, ὄφρα ἴδωμαι ἐνὶ φρεσὶν ἠδὲ δαείω
Iliad 21.62	ἢ ἄρʼ ὁμῶς καὶ κεῖθεν ἐλεύσεται, ἦ μιν ἐρύξει
Iliad 21.63	γῆ φυσίζοος, ἥ τε κατὰ κρατερόν περ ἐρύκει.
Iliad 21.64	ὣς ὅρμαινε μένων· ὃ δέ οἱ σχεδὸν ἦλθε τεθηπὼς
Iliad 21.65	γούνων ἅψασθαι μεμαώς, περὶ δʼ ἤθελε θυμῷ
Iliad 21.66	ἐκφυγέειν θάνατόν τε κακὸν καὶ κῆρα μέλαιναν.
Iliad 21.67	ἤτοι ὃ μὲν δόρυ μακρὸν ἀνέσχετο δῖος Ἀχιλλεὺς
Iliad 21.68	οὐτάμεναι μεμαώς, ὃ δʼ ὑπέδραμε καὶ λάβε γούνων
Iliad 21.69	κύψας· ἐγχείη δʼ ἄρʼ ὑπὲρ νώτου ἐνὶ γαίῃ
Iliad 21.70	ἔστη ἱεμένη χροὸς ἄμεναι ἀνδρομέοιο.
Iliad 21.71	αὐτὰρ ὃ τῇ ἑτέρῃ μὲν ἑλὼν ἐλλίσσετο γούνων,
Iliad 21.72	τῇ δʼ ἑτέρῃ ἔχεν ἔγχος ἀκαχμένον οὐδὲ μεθίει·
Iliad 21.73	καί μιν φωνήσας ἔπεα πτερόεντα προσηύδα·
Iliad 21.74	γουνοῦμαι σʼ Ἀχιλεῦ· σὺ δέ μʼ αἴδεο καί μʼ ἐλέησον·
Iliad 21.75	ἀντί τοί εἰμʼ ἱκέταο διοτρεφὲς αἰδοίοιο·
Iliad 21.76	πὰρ γὰρ σοὶ πρώτῳ πασάμην Δημήτερος ἀκτὴν
Iliad 21.77	ἤματι τῷ ὅτε μʼ εἷλες ἐϋκτιμένῃ ἐν ἀλωῇ,
Iliad 21.78	καί μʼ ἐπέρασσας ἄνευθεν ἄγων πατρός τε φίλων τε
Iliad 21.79	Λῆμνον ἐς ἠγαθέην, ἑκατόμβοιον δέ τοι ἦλφον.
Iliad 21.80	νῦν δὲ λύμην τρὶς τόσσα πορών· ἠὼς δέ μοί ἐστιν
Iliad 21.81	ἥδε δυωδεκάτη, ὅτʼ ἐς Ἴλιον εἰλήλουθα
Iliad 21.82	πολλὰ παθών· νῦν αὖ με τεῇς ἐν χερσὶν ἔθηκε
Iliad 21.83	μοῖρʼ ὀλοή· μέλλω που ἀπεχθέσθαι Διὶ πατρί,
Iliad 21.84	ὅς με σοὶ αὖτις δῶκε· μινυνθάδιον δέ με μήτηρ
Iliad 21.85	γείνατο Λαοθόη θυγάτηρ Ἄλταο γέροντος
Iliad 21.86	Ἄλτεω, ὃς Λελέγεσσι φιλοπτολέμοισιν ἀνάσσει
Iliad 21.87	Πήδασον αἰπήεσσαν ἔχων ἐπὶ Σατνιόεντι.
Iliad 21.88	τοῦ δʼ ἔχε θυγατέρα Πρίαμος, πολλὰς δὲ καὶ ἄλλας·
Iliad 21.89	τῆς δὲ δύω γενόμεσθα, σὺ δʼ ἄμφω δειροτομήσεις,
Iliad 21.90	ἤτοι τὸν πρώτοισι μετὰ πρυλέεσσι δάμασσας
Iliad 21.91	ἀντίθεον Πολύδωρον, ἐπεὶ βάλες ὀξέϊ δουρί·
Iliad 21.92	νῦν δὲ δὴ ἐνθάδʼ ἐμοὶ κακὸν ἔσσεται· οὐ γὰρ ὀΐω
Iliad 21.93	σὰς χεῖρας φεύξεσθαι, ἐπεί ῥʼ ἐπέλασσέ γε δαίμων.
Iliad 21.94	ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσι·
Iliad 21.95	μή με κτεῖνʼ, ἐπεὶ οὐχ ὁμογάστριος Ἕκτορός εἰμι,
Iliad 21.96	ὅς τοι ἑταῖρον ἔπεφνεν ἐνηέα τε κρατερόν τε.
Iliad 21.97	ὣς ἄρα μιν Πριάμοιο προσηύδα φαίδιμος υἱὸς
Iliad 21.98	λισσόμενος ἐπέεσσιν, ἀμείλικτον δʼ ὄπʼ ἄκουσε·
Iliad 21.99	νήπιε μή μοι ἄποινα πιφαύσκεο μηδʼ ἀγόρευε·
Iliad 21.100	πρὶν μὲν γὰρ Πάτροκλον ἐπισπεῖν αἴσιμον ἦμαρ
Iliad 21.101	τόφρά τί μοι πεφιδέσθαι ἐνὶ φρεσὶ φίλτερον ἦεν
Iliad 21.102	Τρώων, καὶ πολλοὺς ζωοὺς ἕλον ἠδʼ ἐπέρασσα·
Iliad 21.103	νῦν δʼ οὐκ ἔσθʼ ὅς τις θάνατον φύγῃ ὅν κε θεός γε
Iliad 21.104	Ἰλίου προπάροιθεν ἐμῇς ἐν χερσὶ βάλῃσι
Iliad 21.105	καὶ πάντων Τρώων, περὶ δʼ αὖ Πριάμοιό γε παίδων.
Iliad 21.106	ἀλλὰ φίλος θάνε καὶ σύ· τί ἦ ὀλοφύρεαι οὕτως;
Iliad 21.107	κάτθανε καὶ Πάτροκλος, ὅ περ σέο πολλὸν ἀμείνων.
Iliad 21.108	οὐχ ὁράᾳς οἷος καὶ ἐγὼ καλός τε μέγας τε;
Iliad 21.109	πατρὸς δʼ εἴμʼ ἀγαθοῖο, θεὰ δέ με γείνατο μήτηρ·
Iliad 21.110	ἀλλʼ ἔπι τοι καὶ ἐμοὶ θάνατος καὶ μοῖρα κραταιή·
Iliad 21.111	ἔσσεται ἢ ἠὼς ἢ δείλη ἢ μέσον ἦμαρ
Iliad 21.112	ὁππότε τις καὶ ἐμεῖο Ἄρῃ ἐκ θυμὸν ἕληται
Iliad 21.113	ἢ ὅ γε δουρὶ βαλὼν ἢ ἀπὸ νευρῆφιν ὀϊστῷ.
Iliad 21.114	ὣς φάτο, τοῦ δʼ αὐτοῦ λύτο γούνατα καὶ φίλον ἦτορ·
Iliad 21.115	ἔγχος μέν ῥʼ ἀφέηκεν, ὃ δʼ ἕζετο χεῖρε πετάσσας
Iliad 21.116	ἀμφοτέρας· Ἀχιλεὺς δὲ ἐρυσσάμενος ξίφος ὀξὺ
Iliad 21.117	τύψε κατὰ κληῗδα παρʼ αὐχένα, πᾶν δέ οἱ εἴσω
Iliad 21.118	δῦ ξίφος ἄμφηκες· ὃ δʼ ἄρα πρηνὴς ἐπὶ γαίῃ
Iliad 21.119	κεῖτο ταθείς, ἐκ δʼ αἷμα μέλαν ῥέε, δεῦε δὲ γαῖαν.
Iliad 21.120	τὸν δʼ Ἀχιλεὺς ποταμὸν δὲ λαβὼν ποδὸς ἧκε φέρεσθαι,
Iliad 21.121	καί οἱ ἐπευχόμενος ἔπεα πτερόεντʼ ἀγόρευεν·
Iliad 21.122	ἐνταυθοῖ νῦν κεῖσο μετʼ ἰχθύσιν, οἵ σʼ ὠτειλὴν
Iliad 21.123	αἷμʼ ἀπολιχμήσονται ἀκηδέες· οὐδέ σε μήτηρ
Iliad 21.124	ἐνθεμένη λεχέεσσι γοήσεται, ἀλλὰ Σκάμανδρος
Iliad 21.125	οἴσει δινήεις εἴσω ἁλὸς εὐρέα κόλπον·
Iliad 21.126	θρῴσκων τις κατὰ κῦμα μέλαιναν φρῖχʼ ὑπαΐξει
Iliad 21.127	ἰχθύς, ὅς κε φάγῃσι Λυκάονος ἀργέτα δημόν.
Iliad 21.128	φθείρεσθʼ εἰς ὅ κεν ἄστυ κιχείομεν Ἰλίου ἱρῆς
Iliad 21.129	ὑμεῖς μὲν φεύγοντες, ἐγὼ δʼ ὄπιθεν κεραΐζων.
Iliad 21.130	οὐδʼ ὑμῖν ποταμός περ ἐΰρροος ἀργυροδίνης
Iliad 21.131	ἀρκέσει, ᾧ δὴ δηθὰ πολέας ἱερεύετε ταύρους,
Iliad 21.132	ζωοὺς δʼ ἐν δίνῃσι καθίετε μώνυχας ἵππους.
Iliad 21.133	ἀλλὰ καὶ ὧς ὀλέεσθε κακὸν μόρον, εἰς ὅ κε πάντες
Iliad 21.134	τίσετε Πατρόκλοιο φόνον καὶ λοιγὸν Ἀχαιῶν,
Iliad 21.135	οὓς ἐπὶ νηυσὶ θοῇσιν ἐπέφνετε νόσφιν ἐμεῖο.
Iliad 21.136	ὣς ἄρʼ ἔφη, ποταμὸς δὲ χολώσατο κηρόθι μᾶλλον,
Iliad 21.137	ὅρμηνεν δʼ ἀνὰ θυμὸν ὅπως παύσειε πόνοιο
Iliad 21.138	δῖον Ἀχιλλῆα, Τρώεσσι δὲ λοιγὸν ἀλάλκοι.
Iliad 21.139	τόφρα δὲ Πηλέος υἱὸς ἔχων δολιχόσκιον ἔγχος
Iliad 21.140	Ἀστεροπαίῳ ἐπᾶλτο κατακτάμεναι μενεαίνων
Iliad 21.141	υἱέϊ Πηλεγόνος· τὸν δʼ Ἀξιὸς εὐρυρέεθρος
Iliad 21.142	γείνατο καὶ Περίβοια Ἀκεσσαμενοῖο θυγατρῶν
Iliad 21.143	πρεσβυτάτη· τῇ γάρ ῥα μίγη ποταμὸς βαθυδίνης.
Iliad 21.144	τῷ ῥʼ Ἀχιλεὺς ἐπόρουσεν, ὃ δʼ ἀντίος ἐκ ποταμοῖο
Iliad 21.145	ἔστη ἔχων δύο δοῦρε· μένος δέ οἱ ἐν φρεσὶ θῆκε
Iliad 21.146	Ξάνθος, ἐπεὶ κεχόλωτο δαϊκταμένων αἰζηῶν,
Iliad 21.147	τοὺς Ἀχιλεὺς ἐδάϊζε κατὰ ῥόον οὐδʼ ἐλέαιρεν.
Iliad 21.148	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες,
Iliad 21.149	τὸν πρότερος προσέειπε ποδάρκης δῖος Ἀχιλλεύς·
Iliad 21.150	τίς πόθεν εἰς ἀνδρῶν ὅ μευ ἔτλης ἀντίος ἐλθεῖν;
Iliad 21.151	δυστήνων δέ τε παῖδες ἐμῷ μένει ἀντιόωσι.
Iliad 21.152	τὸν δʼ αὖ Πηλεγόνος προσεφώνεε φαίδιμος υἱός·
Iliad 21.153	Πηλεΐδη μεγάθυμε τί ἦ γενεὴν ἐρεείνεις;
Iliad 21.154	εἴμʼ ἐκ Παιονίης ἐριβώλου τηλόθʼ ἐούσης
Iliad 21.155	Παίονας ἄνδρας ἄγων δολιχεγχέας· ἥδε δέ μοι νῦν
Iliad 21.156	ἠὼς ἑνδεκάτη ὅτε Ἴλιον εἰλήλουθα.
Iliad 21.157	αὐτὰρ ἐμοὶ γενεὴ ἐξ Ἀξιοῦ εὐρὺ ῥέοντος
Iliad 21.158	Ἀξιοῦ, ὃς κάλλιστον ὕδωρ ἐπὶ γαῖαν ἵησιν,
Iliad 21.159	ὃς τέκε Πηλεγόνα κλυτὸν ἔγχεϊ· τὸν δʼ ἐμέ φασι
Iliad 21.160	γείνασθαι· νῦν αὖτε μαχώμεθα φαίδιμʼ Ἀχιλλεῦ.
Iliad 21.161	ὣς φάτʼ ἀπειλήσας, ὃ δʼ ἀνέσχετο δῖος Ἀχιλλεὺς
Iliad 21.162	Πηλιάδα μελίην· ὃ δʼ ἁμαρτῇ δούρασιν ἀμφὶς
Iliad 21.163	ἥρως Ἀστεροπαῖος, ἐπεὶ περιδέξιος ἦεν.
Iliad 21.164	καί ῥʼ ἑτέρῳ μὲν δουρὶ σάκος βάλεν, οὐδὲ διὰ πρὸ
Iliad 21.165	ῥῆξε σάκος· χρυσὸς γὰρ ἐρύκακε δῶρα θεοῖο·
Iliad 21.166	τῷ δʼ ἑτέρῳ μιν πῆχυν ἐπιγράβδην βάλε χειρὸς
Iliad 21.167	δεξιτερῆς, σύτο δʼ αἷμα κελαινεφές· ἣ δʼ ὑπὲρ αὐτοῦ
Iliad 21.168	γαίῃ ἐνεστήρικτο λιλαιομένη χροὸς ἆσαι.
Iliad 21.169	δεύτερος αὖτʼ Ἀχιλεὺς μελίην ἰθυπτίωνα
Iliad 21.170	Ἀστεροπαίῳ ἐφῆκε κατακτάμεναι μενεαίνων.
Iliad 21.171	καὶ τοῦ μέν ῥʼ ἀφάμαρτεν, ὃ δʼ ὑψηλὴν βάλεν ὄχθην,
Iliad 21.172	μεσσοπαγὲς δʼ ἄρʼ ἔθηκε κατʼ ὄχθης μείλινον ἔγχος.
Iliad 21.173	Πηλεΐδης δʼ ἄορ ὀξὺ ἐρυσσάμενος παρὰ μηροῦ
Iliad 21.174	ἆλτʼ ἐπί οἱ μεμαώς· ὃ δʼ ἄρα μελίην Ἀχιλῆος
Iliad 21.175	οὐ δύνατʼ ἐκ κρημνοῖο ἐρύσσαι χειρὶ παχείῃ.
Iliad 21.176	τρὶς μέν μιν πελέμιξεν ἐρύσσασθαι μενεαίνων,
Iliad 21.177	τρὶς δὲ μεθῆκε βίης· τὸ δὲ τέτρατον ἤθελε θυμῷ
Iliad 21.178	ἆξαι ἐπιγνάμψας δόρυ μείλινον Αἰακίδαο,
Iliad 21.179	ἀλλὰ πρὶν Ἀχιλεὺς σχεδὸν ἄορι θυμὸν ἀπηύρα.
Iliad 21.180	γαστέρα γάρ μιν τύψε παρʼ ὀμφαλόν, ἐκ δʼ ἄρα πᾶσαι
Iliad 21.181	χύντο χαμαὶ χολάδες· τὸν δὲ σκότος ὄσσε κάλυψεν
Iliad 21.182	ἀσθμαίνοντʼ· Ἀχιλεὺς δʼ ἄρʼ ἐνὶ στήθεσσιν ὀρούσας
Iliad 21.183	τεύχεά τʼ ἐξενάριξε καὶ εὐχόμενος ἔπος ηὔδα·
Iliad 21.184	κεῖσʼ οὕτως· χαλεπόν τοι ἐρισθενέος Κρονίωνος
Iliad 21.185	παισὶν ἐριζέμεναι ποταμοῖό περ ἐκγεγαῶτι.
Iliad 21.186	φῆσθα σὺ μὲν ποταμοῦ γένος ἔμμεναι εὐρὺ ῥέοντος,
Iliad 21.187	αὐτὰρ ἐγὼ γενεὴν μεγάλου Διὸς εὔχομαι εἶναι.
Iliad 21.188	τίκτέ μʼ ἀνὴρ πολλοῖσιν ἀνάσσων Μυρμιδόνεσσι
Iliad 21.189	Πηλεὺς Αἰακίδης· ὃ δʼ ἄρʼ Αἰακὸς ἐκ Διὸς ἦεν.
Iliad 21.190	τὼ κρείσσων μὲν Ζεὺς ποταμῶν ἁλιμυρηέντων,
Iliad 21.191	κρείσσων αὖτε Διὸς γενεὴ ποταμοῖο τέτυκται.
Iliad 21.192	καὶ γὰρ σοὶ ποταμός γε πάρα μέγας, εἰ δύναταί τι
Iliad 21.193	χραισμεῖν· ἀλλʼ οὐκ ἔστι Διὶ Κρονίωνι μάχεσθαι,
Iliad 21.194	τῷ οὐδὲ κρείων Ἀχελώϊος ἰσοφαρίζει,
Iliad 21.195	οὐδὲ βαθυρρείταο μέγα σθένος Ὠκεανοῖο,
Iliad 21.196	ἐξ οὗ περ πάντες ποταμοὶ καὶ πᾶσα θάλασσα
Iliad 21.197	καὶ πᾶσαι κρῆναι καὶ φρείατα μακρὰ νάουσιν·
Iliad 21.198	ἀλλὰ καὶ ὃς δείδοικε Διὸς μεγάλοιο κεραυνὸν
Iliad 21.199	δεινήν τε βροντήν, ὅτʼ ἀπʼ οὐρανόθεν σμαραγήσῃ.
Iliad 21.200	ἦ ῥα, καὶ ἐκ κρημνοῖο ἐρύσσατο χάλκεον ἔγχος,
Iliad 21.201	τὸν δὲ κατʼ αὐτόθι λεῖπεν, ἐπεὶ φίλον ἦτορ ἀπηύρα,
Iliad 21.202	κείμενον ἐν ψαμάθοισι, δίαινε δέ μιν μέλαν ὕδωρ.
Iliad 21.203	τὸν μὲν ἄρʼ ἐγχέλυές τε καὶ ἰχθύες ἀμφεπένοντο
Iliad 21.204	δημὸν ἐρεπτόμενοι ἐπινεφρίδιον κείροντες·
Iliad 21.205	αὐτὰρ ὃ βῆ ῥʼ ἰέναι μετὰ Παίονας ἱπποκορυστάς,
Iliad 21.206	οἵ ῥʼ ἔτι πὰρ ποταμὸν πεφοβήατο δινήεντα,
Iliad 21.207	ὡς εἶδον τὸν ἄριστον ἐνὶ κρατερῇ ὑσμίνῃ
Iliad 21.208	χέρσʼ ὕπο Πηλεΐδαο καὶ ἄορι ἶφι δαμέντα.
Iliad 21.209	ἔνθʼ ἕλε Θερσίλοχόν τε Μύδωνά τε Ἀστύπυλόν τε
Iliad 21.210	Μνῆσόν τε Θρασίον τε καὶ Αἴνιον ἠδʼ Ὀφελέστην·
Iliad 21.211	καί νύ κʼ ἔτι πλέονας κτάνε Παίονας ὠκὺς Ἀχιλλεύς,
Iliad 21.212	εἰ μὴ χωσάμενος προσέφη ποταμὸς βαθυδίνης
Iliad 21.213	ἀνέρι εἰσάμενος, βαθέης δʼ ἐκ φθέγξατο δίνης·
Iliad 21.214	ὦ Ἀχιλεῦ, περὶ μὲν κρατέεις, περὶ δʼ αἴσυλα ῥέζεις
Iliad 21.215	ἀνδρῶν· αἰεὶ γάρ τοι ἀμύνουσιν θεοὶ αὐτοί.
Iliad 21.216	εἴ τοι Τρῶας ἔδωκε Κρόνου παῖς πάντας ὀλέσσαι,
Iliad 21.217	ἐξ ἐμέθεν γʼ ἐλάσας πεδίον κάτα μέρμερα ῥέζε·
Iliad 21.218	πλήθει γὰρ δή μοι νεκύων ἐρατεινὰ ῥέεθρα,
Iliad 21.219	οὐδέ τί πῃ δύναμαι προχέειν ῥόον εἰς ἅλα δῖαν
Iliad 21.220	στεινόμενος νεκύεσσι, σὺ δὲ κτείνεις ἀϊδήλως.
Iliad 21.221	ἀλλʼ ἄγε δὴ καὶ ἔασον· ἄγη μʼ ἔχει ὄρχαμε λαῶν.
Iliad 21.222	τὸν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 21.223	ἔσται ταῦτα Σκάμανδρε διοτρεφές, ὡς σὺ κελεύεις.
Iliad 21.224	Τρῶας δʼ οὐ πρὶν λήξω ὑπερφιάλους ἐναρίζων,
Iliad 21.225	πρὶν ἔλσαι κατὰ ἄστυ καὶ Ἕκτορι πειρηθῆναι
Iliad 21.226	ἀντιβίην, ἤ κέν με δαμάσσεται, ἦ κεν ἐγὼ τόν.
Iliad 21.227	ὣς εἰπὼν Τρώεσσιν ἐπέσσυτο δαίμονι ἶσος·
Iliad 21.228	καὶ τότʼ Ἀπόλλωνα προσέφη ποταμὸς βαθυδίνης·
Iliad 21.229	ὢ πόποι ἀργυρότοξε Διὸς τέκος οὐ σύ γε βουλὰς
Iliad 21.230	εἰρύσαο Κρονίωνος, ὅ τοι μάλα πόλλʼ ἐπέτελλε
Iliad 21.231	Τρωσὶ παρεστάμεναι καὶ ἀμύνειν, εἰς ὅ κεν ἔλθῃ
Iliad 21.232	δείελος ὀψὲ δύων, σκιάσῃ δʼ ἐρίβωλον ἄρουραν.
Iliad 21.233	ἦ, καὶ Ἀχιλλεὺς μὲν δουρικλυτὸς ἔνθορε μέσσῳ
Iliad 21.234	κρημνοῦ ἀπαΐξας· ὃ δʼ ἐπέσσυτο οἴδματι θύων,
Iliad 21.235	πάντα δʼ ὄρινε ῥέεθρα κυκώμενος, ὦσε δὲ νεκροὺς
Iliad 21.236	πολλούς, οἵ ῥα κατʼ αὐτὸν ἅλις ἔσαν, οὓς κτάνʼ Ἀχιλλεύς
Iliad 21.237	τοὺς ἔκβαλλε θύραζε μεμυκὼς ἠΰτε ταῦρος
Iliad 21.238	χέρσον δέ· ζωοὺς δὲ σάω κατὰ καλὰ ῥέεθρα,
Iliad 21.239	κρύπτων ἐν δίνῃσι βαθείῃσιν μεγάλῃσι.
Iliad 21.240	δεινὸν δʼ ἀμφʼ Ἀχιλῆα κυκώμενον ἵστατο κῦμα,
Iliad 21.241	ὤθει δʼ ἐν σάκεϊ πίπτων ῥόος· οὐδὲ πόδεσσιν
Iliad 21.242	εἶχε στηρίξασθαι· ὃ δὲ πτελέην ἕλε χερσὶν
Iliad 21.243	εὐφυέα μεγάλην· ἣ δʼ ἐκ ῥιζῶν ἐριποῦσα
Iliad 21.244	κρημνὸν ἅπαντα διῶσεν, ἐπέσχε δὲ καλὰ ῥέεθρα
Iliad 21.245	ὄζοισιν πυκινοῖσι, γεφύρωσεν δέ μιν αὐτὸν
Iliad 21.246	εἴσω πᾶσʼ ἐριποῦσʼ· ὃ δʼ ἄρʼ ἐκ δίνης ἀνορούσας
Iliad 21.247	ἤϊξεν πεδίοιο ποσὶ κραιπνοῖσι πέτεσθαι
Iliad 21.248	δείσας· οὐδέ τʼ ἔληγε θεὸς μέγας, ὦρτο δʼ ἐπʼ αὐτῷ
Iliad 21.249	ἀκροκελαινιόων, ἵνα μιν παύσειε πόνοιο
Iliad 21.250	δῖον Ἀχιλλῆα, Τρώεσσι δὲ λοιγὸν ἀλάλκοι.
Iliad 21.251	Πηλεΐδης δʼ ἀπόρουσεν ὅσον τʼ ἐπὶ δουρὸς ἐρωή,
Iliad 21.252	αἰετοῦ οἴματʼ ἔχων μέλανος τοῦ θηρητῆρος,
Iliad 21.253	ὅς θʼ ἅμα κάρτιστός τε καὶ ὤκιστος πετεηνῶν·
Iliad 21.254	τῷ ἐϊκὼς ἤϊξεν, ἐπὶ στήθεσσι δὲ χαλκὸς
Iliad 21.255	σμερδαλέον κονάβιζεν· ὕπαιθα δὲ τοῖο λιασθεὶς
Iliad 21.256	φεῦγʼ, ὃ δʼ ὄπισθε ῥέων ἕπετο μεγάλῳ ὀρυμαγδῷ.
Iliad 21.257	ὡς δʼ ὅτʼ ἀνὴρ ὀχετηγὸς ἀπὸ κρήνης μελανύδρου
Iliad 21.258	ἂμ φυτὰ καὶ κήπους ὕδατι ῥόον ἡγεμονεύῃ
Iliad 21.259	χερσὶ μάκελλαν ἔχων, ἀμάρης ἐξ ἔχματα βάλλων·
Iliad 21.260	τοῦ μέν τε προρέοντος ὑπὸ ψηφῖδες ἅπασαι
Iliad 21.261	ὀχλεῦνται· τὸ δέ τʼ ὦκα κατειβόμενον κελαρύζει
Iliad 21.262	χώρῳ ἔνι προαλεῖ, φθάνει δέ τε καὶ τὸν ἄγοντα·
Iliad 21.263	ὣς αἰεὶ Ἀχιλῆα κιχήσατο κῦμα ῥόοιο
Iliad 21.264	καὶ λαιψηρὸν ἐόντα· θεοὶ δέ τε φέρτεροι ἀνδρῶν.
Iliad 21.265	ὁσσάκι δʼ ὁρμήσειε ποδάρκης δῖος Ἀχιλλεὺς
Iliad 21.266	στῆναι ἐναντίβιον καὶ γνώμεναι εἴ μιν ἅπαντες
Iliad 21.267	ἀθάνατοι φοβέουσι, τοὶ οὐρανὸν εὐρὺν ἔχουσι,
Iliad 21.268	τοσσάκι μιν μέγα κῦμα διιπετέος ποταμοῖο
Iliad 21.269	πλάζʼ ὤμους καθύπερθεν· ὃ δʼ ὑψόσε ποσσὶν ἐπήδα
Iliad 21.270	θυμῷ ἀνιάζων· ποταμὸς δʼ ὑπὸ γούνατʼ ἐδάμνα
Iliad 21.271	λάβρος ὕπαιθα ῥέων, κονίην δʼ ὑπέρεπτε ποδοῖιν.
Iliad 21.272	Πηλεΐδης δʼ ᾤμωξεν ἰδὼν εἰς οὐρανὸν εὐρύν·
Iliad 21.273	Ζεῦ πάτερ ὡς οὔ τίς με θεῶν ἐλεεινὸν ὑπέστη
Iliad 21.274	ἐκ ποταμοῖο σαῶσαι· ἔπειτα δὲ καί τι πάθοιμι.
Iliad 21.275	ἄλλος δʼ οὔ τις μοι τόσον αἴτιος Οὐρανιώνων,
Iliad 21.276	ἀλλὰ φίλη μήτηρ, ἥ με ψεύδεσσιν ἔθελγεν·
Iliad 21.277	ἥ μʼ ἔφατο Τρώων ὑπὸ τείχεϊ θωρηκτάων
Iliad 21.278	λαιψηροῖς ὀλέεσθαι Ἀπόλλωνος βελέεσσιν.
Iliad 21.279	ὥς μʼ ὄφελʼ Ἕκτωρ κτεῖναι ὃς ἐνθάδε γʼ ἔτραφʼ ἄριστος·
Iliad 21.280	τώ κʼ ἀγαθὸς μὲν ἔπεφνʼ, ἀγαθὸν δέ κεν ἐξενάριξε·
Iliad 21.281	νῦν δέ με λευγαλέῳ θανάτῳ εἵμαρτο ἁλῶναι
Iliad 21.282	ἐρχθέντʼ ἐν μεγάλῳ ποταμῷ ὡς παῖδα συφορβόν,
Iliad 21.283	ὅν ῥά τʼ ἔναυλος ἀποέρσῃ χειμῶνι περῶντα.
Iliad 21.284	ὣς φάτο, τῷ δὲ μάλʼ ὦκα Ποσειδάων καὶ Ἀθήνη
Iliad 21.285	στήτην ἐγγὺς ἰόντε, δέμας δʼ ἄνδρεσσιν ἐΐκτην,
Iliad 21.286	χειρὶ δὲ χεῖρα λαβόντες ἐπιστώσαντʼ ἐπέεσσι.
Iliad 21.287	τοῖσι δὲ μύθων ἦρχε Ποσειδάων ἐνοσίχθων·
Iliad 21.288	Πηλεΐδη μήτʼ ἄρ τι λίην τρέε μήτέ τι τάρβει·
Iliad 21.289	τοίω γάρ τοι νῶϊ θεῶν ἐπιταρρόθω εἰμὲν
Iliad 21.290	Ζηνὸς ἐπαινήσαντος ἐγὼ καὶ Παλλὰς Ἀθήνη·
Iliad 21.291	ὡς οὔ τοι ποταμῷ γε δαμήμεναι αἴσιμόν ἐστιν,
Iliad 21.292	ἀλλʼ ὅδε μὲν τάχα λωφήσει, σὺ δὲ εἴσεαι αὐτός·
Iliad 21.293	αὐτάρ τοι πυκινῶς ὑποθησόμεθʼ αἴ κε πίθηαι·
Iliad 21.294	μὴ πρὶν παύειν χεῖρας ὁμοιΐου πολέμοιο
Iliad 21.295	πρὶν κατὰ Ἰλιόφι κλυτὰ τείχεα λαὸν ἐέλσαι
Iliad 21.296	Τρωϊκόν, ὅς κε φύγῃσι· σὺ δʼ Ἕκτορι θυμὸν ἀπούρας
Iliad 21.297	ἂψ ἐπὶ νῆας ἴμεν· δίδομεν δέ τοι εὖχος ἀρέσθαι.
Iliad 21.298	τὼ μὲν ἄρʼ ὣς εἰπόντε μετʼ ἀθανάτους ἀπεβήτην·
Iliad 21.299	αὐτὰρ ὃ βῆ, μέγα γάρ ῥα θεῶν ὄτρυνεν ἐφετμή,
Iliad 21.300	ἐς πεδίον· τὸ δὲ πᾶν πλῆθʼ ὕδατος ἐκχυμένοιο,
Iliad 21.301	πολλὰ δὲ τεύχεα καλὰ δαὶ κταμένων αἰζηῶν
Iliad 21.302	πλῶον καὶ νέκυες· τοῦ δʼ ὑψόσε γούνατʼ ἐπήδα
Iliad 21.303	πρὸς ῥόον ἀΐσσοντος ἀνʼ ἰθύν, οὐδέ μιν ἴσχεν
Iliad 21.304	εὐρὺ ῥέων ποταμός· μέγα γὰρ σθένος ἔμβαλʼ Ἀθήνη.
Iliad 21.305	οὐδὲ Σκάμανδρος ἔληγε τὸ ὃν μένος, ἀλλʼ ἔτι μᾶλλον
Iliad 21.306	χώετο Πηλεΐωνι, κόρυσσε δὲ κῦμα ῥόοιο
Iliad 21.307	ὑψόσʼ ἀειρόμενος, Σιμόεντι δὲ κέκλετʼ ἀΰσας·
Iliad 21.308	φίλε κασίγνητε σθένος ἀνέρος ἀμφότεροί περ
Iliad 21.309	σχῶμεν, ἐπεὶ τάχα ἄστυ μέγα Πριάμοιο ἄνακτος
Iliad 21.310	ἐκπέρσει, Τρῶες δὲ κατὰ μόθον οὐ μενέουσιν.
Iliad 21.311	ἀλλʼ ἐπάμυνε τάχιστα, καὶ ἐμπίπληθι ῥέεθρα
Iliad 21.312	ὕδατος ἐκ πηγέων, πάντας δʼ ὀρόθυνον ἐναύλους,
Iliad 21.313	ἵστη δὲ μέγα κῦμα, πολὺν δʼ ὀρυμαγδὸν ὄρινε
Iliad 21.314	φιτρῶν καὶ λάων, ἵνα παύσομεν ἄγριον ἄνδρα
Iliad 21.315	ὃς δὴ νῦν κρατέει, μέμονεν δʼ ὅ γε ἶσα θεοῖσι.
Iliad 21.316	φημὶ γὰρ οὔτε βίην χραισμησέμεν οὔτέ τι εἶδος
Iliad 21.317	οὔτε τὰ τεύχεα καλά, τά που μάλα νειόθι λίμνης
Iliad 21.318	κείσεθʼ ὑπʼ ἰλύος κεκαλυμμένα· κὰδ δέ μιν αὐτὸν
Iliad 21.319	εἰλύσω ψαμάθοισιν ἅλις χέραδος περιχεύας
Iliad 21.320	μυρίον, οὐδέ οἱ ὀστέʼ ἐπιστήσονται Ἀχαιοὶ
Iliad 21.321	ἀλλέξαι· τόσσην οἱ ἄσιν καθύπερθε καλύψω.
Iliad 21.322	αὐτοῦ οἱ καὶ σῆμα τετεύξεται, οὐδέ τί μιν χρεὼ
Iliad 21.323	ἔσται τυμβοχόης, ὅτε μιν θάπτωσιν Ἀχαιοί.
Iliad 21.324	ἦ, καὶ ἐπῶρτʼ Ἀχιλῆϊ κυκώμενος ὑψόσε θύων
Iliad 21.325	μορμύρων ἀφρῷ τε καὶ αἵματι καὶ νεκύεσσι.
Iliad 21.326	πορφύρεον δʼ ἄρα κῦμα διιπετέος ποταμοῖο
Iliad 21.327	ἵστατʼ ἀειρόμενον, κατὰ δʼ ᾕρεε Πηλεΐωνα·
Iliad 21.328	Ἥρη δὲ μέγʼ ἄϋσε περιδείσασʼ Ἀχιλῆϊ
Iliad 21.329	μή μιν ἀποέρσειε μέγας ποταμὸς βαθυδίνης,
Iliad 21.330	αὐτίκα δʼ Ἥφαιστον προσεφώνεεν ὃν φίλον υἱόν·
Iliad 21.331	ὄρσεο κυλλοπόδιον ἐμὸν τέκος· ἄντα σέθεν γὰρ
Iliad 21.332	Ξάνθον δινήεντα μάχῃ ἠΐσκομεν εἶναι·
Iliad 21.333	ἀλλʼ ἐπάμυνε τάχιστα, πιφαύσκεο δὲ φλόγα πολλήν.
Iliad 21.334	αὐτὰρ ἐγὼ Ζεφύροιο καὶ ἀργεστᾶο Νότοιο
Iliad 21.335	εἴσομαι ἐξ ἁλόθεν χαλεπὴν ὄρσουσα θύελλαν,
Iliad 21.336	ἥ κεν ἀπὸ Τρώων κεφαλὰς καὶ τεύχεα κήαι
Iliad 21.337	φλέγμα κακὸν φορέουσα· σὺ δὲ Ξάνθοιο παρʼ ὄχθας
Iliad 21.338	δένδρεα καῖʼ, ἐν δʼ αὐτὸν ἵει πυρί· μὴ δέ σε πάμπαν
Iliad 21.339	μειλιχίοις ἐπέεσσιν ἀποτρεπέτω καὶ ἀρειῇ·
Iliad 21.340	μὴ δὲ πρὶν ἀπόπαυε τεὸν μένος, ἀλλʼ ὁπότʼ ἂν δὴ
Iliad 21.341	φθέγξομʼ ἐγὼν ἰάχουσα, τότε σχεῖν ἀκάματον πῦρ.
Iliad 21.342	ὣς ἔφαθʼ, Ἥφαιστος δὲ τιτύσκετο θεσπιδαὲς πῦρ.
Iliad 21.343	πρῶτα μὲν ἐν πεδίῳ πῦρ δαίετο, καῖε δὲ νεκροὺς
Iliad 21.344	πολλούς, οἵ ῥα κατʼ αὐτὸν ἅλις ἔσαν, οὓς κτάνʼ Ἀχιλλεύς·
Iliad 21.345	πᾶν δʼ ἐξηράνθη πεδίον, σχέτο δʼ ἀγλαὸν ὕδωρ.
Iliad 21.346	ὡς δʼ ὅτʼ ὀπωρινὸς Βορέης νεοαρδέʼ ἀλωὴν
Iliad 21.347	αἶψʼ ἀγξηράνῃ· χαίρει δέ μιν ὅς τις ἐθείρῃ·
Iliad 21.348	ὣς ἐξηράνθη πεδίον πᾶν, κὰδ δʼ ἄρα νεκροὺς
Iliad 21.349	κῆεν· ὃ δʼ ἐς ποταμὸν τρέψε φλόγα παμφανόωσαν.
Iliad 21.350	καίοντο πτελέαι τε καὶ ἰτέαι ἠδὲ μυρῖκαι,
Iliad 21.351	καίετο δὲ λωτός τε ἰδὲ θρύον ἠδὲ κύπειρον,
Iliad 21.352	τὰ περὶ καλὰ ῥέεθρα ἅλις ποταμοῖο πεφύκει·
Iliad 21.353	τείροντʼ ἐγχέλυές τε καὶ ἰχθύες οἳ κατὰ δίνας,
Iliad 21.354	οἳ κατὰ καλὰ ῥέεθρα κυβίστων ἔνθα καὶ ἔνθα
Iliad 21.355	πνοιῇ τειρόμενοι πολυμήτιος Ἡφαίστοιο.
Iliad 21.356	καίετο δʼ ἲς ποταμοῖο ἔπος τʼ ἔφατʼ ἔκ τʼ ὀνόμαζεν·
Iliad 21.357	Ἥφαιστʼ, οὔ τις σοί γε θεῶν δύνατʼ ἀντιφερίζειν,
Iliad 21.358	οὐδʼ ἂν ἐγὼ σοί γʼ ὧδε πυρὶ φλεγέθοντι μαχοίμην.
Iliad 21.359	λῆγʼ ἔριδος, Τρῶας δὲ καὶ αὐτίκα δῖος Ἀχιλλεὺς
Iliad 21.360	ἄστεος ἐξελάσειε· τί μοι ἔριδος καὶ ἀρωγῆς;
Iliad 21.361	φῆ πυρὶ καιόμενος, ἀνὰ δʼ ἔφλυε καλὰ ῥέεθρα.
Iliad 21.362	ὡς δὲ λέβης ζεῖ ἔνδον ἐπειγόμενος πυρὶ πολλῷ
Iliad 21.363	κνίσην μελδόμενος ἁπαλοτρεφέος σιάλοιο
Iliad 21.364	πάντοθεν ἀμβολάδην, ὑπὸ δὲ ξύλα κάγκανα κεῖται,
Iliad 21.365	ὣς τοῦ καλὰ ῥέεθρα πυρὶ φλέγετο, ζέε δʼ ὕδωρ·
Iliad 21.366	οὐδʼ ἔθελε προρέειν, ἀλλʼ ἴσχετο· τεῖρε δʼ ἀϋτμὴ
Iliad 21.367	Ἡφαίστοιο βίηφι πολύφρονος. αὐτὰρ ὅ γʼ Ἥρην
Iliad 21.368	πολλὰ λισσόμενος ἔπεα πτερόεντα προσηύδα·
Iliad 21.369	Ἥρη τίπτε σὸς υἱὸς ἐμὸν ῥόον ἔχραε κήδειν
Iliad 21.370	ἐξ ἄλλων; οὐ μέν τοι ἐγὼ τόσον αἴτιός εἰμι
Iliad 21.371	ὅσσον οἱ ἄλλοι πάντες, ὅσοι Τρώεσσιν ἀρωγοί.
Iliad 21.372	ἀλλʼ ἤτοι μὲν ἐγὼν ἀποπαύσομαι εἰ σὺ κελεύεις,
Iliad 21.373	παυέσθω δὲ καὶ οὗτος· ἐγὼ δʼ ἐπὶ καὶ τόδʼ ὀμοῦμαι,
Iliad 21.374	μή ποτʼ ἐπὶ Τρώεσσιν ἀλεξήσειν κακὸν ἦμαρ,
Iliad 21.375	μὴ δʼ ὁπότʼ ἂν Τροίη μαλερῷ πυρὶ πᾶσα δάηται
Iliad 21.376	καιομένη, καίωσι δʼ ἀρήϊοι υἷες Ἀχαιῶν.
Iliad 21.377	αὐτὰρ ἐπεὶ τό γʼ ἄκουσε θεὰ λευκώλενος Ἥρη,
Iliad 21.378	αὐτίκʼ ἄρʼ Ἥφαιστον προσεφώνεεν ὃν φίλον υἱόν·
Iliad 21.379	Ἥφαιστε σχέο τέκνον ἀγακλεές· οὐ γὰρ ἔοικεν
Iliad 21.380	ἀθάνατον θεὸν ὧδε βροτῶν ἕνεκα στυφελίζειν.
Iliad 21.381	ὣς ἔφαθʼ, Ἥφαιστος δὲ κατέσβεσε θεσπιδαὲς πῦρ,
Iliad 21.382	ἄψορρον δʼ ἄρα κῦμα κατέσσυτο καλὰ ῥέεθρα.
Iliad 21.383	αὐτὰρ ἐπεὶ Ξάνθοιο δάμη μένος, οἳ μὲν ἔπειτα
Iliad 21.384	παυσάσθην, Ἥρη γὰρ ἐρύκακε χωομένη περ·
Iliad 21.385	ἐν δʼ ἄλλοισι θεοῖσιν ἔρις πέσε βεβριθυῖα
Iliad 21.386	ἀργαλέη, δίχα δέ σφιν ἐνὶ φρεσὶ θυμὸς ἄητο·
Iliad 21.387	σὺν δʼ ἔπεσον μεγάλῳ πατάγῳ, βράχε δʼ εὐρεῖα χθών,
Iliad 21.388	ἀμφὶ δὲ σάλπιγξεν μέγας οὐρανός. ἄϊε δὲ Ζεὺς
Iliad 21.389	ἥμενος Οὐλύμπῳ· ἐγέλασσε δέ οἱ φίλον ἦτορ
Iliad 21.390	γηθοσύνῃ, ὅθʼ ὁρᾶτο θεοὺς ἔριδι ξυνιόντας.
Iliad 21.391	ἔνθʼ οἵ γʼ οὐκέτι δηρὸν ἀφέστασαν· ἦρχε γὰρ Ἄρης
Iliad 21.392	ῥινοτόρος, καὶ πρῶτος Ἀθηναίῃ ἐπόρουσε
Iliad 21.393	χάλκεον ἔγχος ἔχων, καὶ ὀνείδειον φάτο μῦθον·
Iliad 21.394	τίπτʼ αὖτʼ ὦ κυνάμυια θεοὺς ἔριδι ξυνελαύνεις
Iliad 21.395	θάρσος ἄητον ἔχουσα, μέγας δέ σε θυμὸς ἀνῆκεν;
Iliad 21.396	ἦ οὐ μέμνῃ ὅτε Τυδεΐδην Διομήδεʼ ἀνῆκας
Iliad 21.397	οὐτάμεναι, αὐτὴ δὲ πανόψιον ἔγχος ἑλοῦσα
Iliad 21.398	ἰθὺς ἐμεῦ ὦσας, διὰ δὲ χρόα καλὸν ἔδαψας;
Iliad 21.399	τώ σʼ αὖ νῦν ὀΐω ἀποτισέμεν ὅσσα ἔοργας.
Iliad 21.400	ὣς εἰπὼν οὔτησε κατʼ αἰγίδα θυσσανόεσσαν
Iliad 21.401	σμερδαλέην, ἣν οὐδὲ Διὸς δάμνησι κεραυνός·
Iliad 21.402	τῇ μιν Ἄρης οὔτησε μιαιφόνος ἔγχεϊ μακρῷ.
Iliad 21.403	ἣ δʼ ἀναχασσαμένη λίθον εἵλετο χειρὶ παχείῃ
Iliad 21.404	κείμενον ἐν πεδίῳ μέλανα τρηχύν τε μέγαν τε,
Iliad 21.405	τόν ῥʼ ἄνδρες πρότεροι θέσαν ἔμμεναι οὖρον ἀρούρης·
Iliad 21.406	τῷ βάλε θοῦρον Ἄρηα κατʼ αὐχένα, λῦσε δὲ γυῖα.
Iliad 21.407	ἑπτὰ δʼ ἐπέσχε πέλεθρα πεσών, ἐκόνισε δὲ χαίτας,
Iliad 21.408	τεύχεά τʼ ἀμφαράβησε· γέλασσε δὲ Παλλὰς Ἀθήνη,
Iliad 21.409	καί οἱ ἐπευχομένη ἔπεα πτερόεντα προσηύδα·
Iliad 21.410	νηπύτιʼ οὐδέ νύ πώ περ ἐπεφράσω ὅσσον ἀρείων
Iliad 21.411	εὔχομʼ ἐγὼν ἔμεναι, ὅτι μοι μένος ἰσοφαρίζεις.
Iliad 21.412	οὕτω κεν τῆς μητρὸς ἐρινύας ἐξαποτίνοις,
Iliad 21.413	ἥ τοι χωομένη κακὰ μήδεται οὕνεκʼ Ἀχαιοὺς
Iliad 21.414	κάλλιπες, αὐτὰρ Τρωσὶν ὑπερφιάλοισιν ἀμύνεις.
Iliad 21.415	ὣς ἄρα φωνήσασα πάλιν τρέπεν ὄσσε φαεινώ·
Iliad 21.416	τὸν δʼ ἄγε χειρὸς ἑλοῦσα Διὸς θυγάτηρ Ἀφροδίτη
Iliad 21.417	πυκνὰ μάλα στενάχοντα· μόγις δʼ ἐσαγείρετο θυμόν.
Iliad 21.418	τὴν δʼ ὡς οὖν ἐνόησε θεὰ λευκώλενος Ἥρη,
Iliad 21.419	αὐτίκʼ Ἀθηναίην ἔπεα πτερόεντα προσηύδα·
Iliad 21.420	ὢ πόποι αἰγιόχοιο Διὸς τέκος Ἀτρυτώνη
Iliad 21.421	καὶ δʼ αὖθʼ ἡ κυνάμυια ἄγει βροτολοιγὸν Ἄρηα
Iliad 21.422	δηΐου ἐκ πολέμοιο κατὰ κλόνον· ἀλλὰ μέτελθε.
Iliad 21.423	ὣς φάτʼ, Ἀθηναίη δὲ μετέσσυτο, χαῖρε δὲ θυμῷ,
Iliad 21.424	καί ῥʼ ἐπιεισαμένη πρὸς στήθεα χειρὶ παχείῃ
Iliad 21.425	ἤλασε· τῆς δʼ αὐτοῦ λύτο γούνατα καὶ φίλον ἦτορ.
Iliad 21.426	τὼ μὲν ἄρʼ ἄμφω κεῖντο ἐπὶ χθονὶ πουλυβοτείρῃ,
Iliad 21.427	ἣ δʼ ἄρʼ ἐπευχομένη ἔπεα πτερόεντʼ ἀγόρευε·
Iliad 21.428	τοιοῦτοι νῦν πάντες ὅσοι Τρώεσσιν ἀρωγοὶ
Iliad 21.429	εἶεν, ὅτʼ Ἀργείοισι μαχοίατο θωρηκτῇσιν,
Iliad 21.430	ὧδέ τε θαρσαλέοι καὶ τλήμονες, ὡς Ἀφροδίτη
Iliad 21.431	ἦλθεν Ἄρῃ ἐπίκουρος ἐμῷ μένει ἀντιόωσα·
Iliad 21.432	τώ κεν δὴ πάλαι ἄμμες ἐπαυσάμεθα πτολέμοιο
Iliad 21.433	Ἰλίου ἐκπέρσαντες ἐϋκτίμενον πτολίεθρον.
Iliad 21.434	ὣς φάτο, μείδησεν δὲ θεὰ λευκώλενος Ἥρη.
Iliad 21.435	αὐτὰρ Ἀπόλλωνα προσέφη κρείων ἐνοσίχθων·
Iliad 21.436	Φοῖβε τί ἢ δὴ νῶϊ διέσταμεν; οὐδὲ ἔοικεν
Iliad 21.437	ἀρξάντων ἑτέρων· τὸ μὲν αἴσχιον αἴ κʼ ἀμαχητὶ
Iliad 21.438	ἴομεν Οὔλυμπον δὲ Διὸς ποτὶ χαλκοβατὲς δῶ.
Iliad 21.439	ἄρχε· σὺ γὰρ γενεῆφι νεώτερος· οὐ γὰρ ἔμοιγε
Iliad 21.440	καλόν, ἐπεὶ πρότερος γενόμην καὶ πλείονα οἶδα.
Iliad 21.441	νηπύτιʼ ὡς ἄνοον κραδίην ἔχες· οὐδέ νυ τῶν περ
Iliad 21.442	μέμνηαι ὅσα δὴ πάθομεν κακὰ Ἴλιον ἀμφὶ
Iliad 21.443	μοῦνοι νῶϊ θεῶν, ὅτʼ ἀγήνορι Λαομέδοντι
Iliad 21.444	πὰρ Διὸς ἐλθόντες θητεύσαμεν εἰς ἐνιαυτὸν
Iliad 21.445	μισθῷ ἔπι ῥητῷ· ὃ δὲ σημαίνων ἐπέτελλεν.
Iliad 21.446	ἤτοι ἐγὼ Τρώεσσι πόλιν πέρι τεῖχος ἔδειμα
Iliad 21.447	εὐρύ τε καὶ μάλα καλόν, ἵνʼ ἄρρηκτος πόλις εἴη·
Iliad 21.448	Φοῖβε σὺ δʼ εἰλίποδας ἕλικας βοῦς βουκολέεσκες
Iliad 21.449	Ἴδης ἐν κνημοῖσι πολυπτύχου ὑληέσσης.
Iliad 21.450	ἀλλʼ ὅτε δὴ μισθοῖο τέλος πολυγηθέες ὧραι
Iliad 21.451	ἐξέφερον, τότε νῶϊ βιήσατο μισθὸν ἅπαντα
Iliad 21.452	Λαομέδων ἔκπαγλος, ἀπειλήσας δʼ ἀπέπεμπε.
Iliad 21.453	σὺν μὲν ὅ γʼ ἠπείλησε πόδας καὶ χεῖρας ὕπερθε
Iliad 21.454	δήσειν, καὶ περάαν νήσων ἔπι τηλεδαπάων·
Iliad 21.455	στεῦτο δʼ ὅ γʼ ἀμφοτέρων ἀπολεψέμεν οὔατα χαλκῷ.
Iliad 21.456	νῶϊ δὲ ἄψορροι κίομεν κεκοτηότι θυμῷ
Iliad 21.457	μισθοῦ χωόμενοι, τὸν ὑποστὰς οὐκ ἐτέλεσσε.
Iliad 21.458	τοῦ δὴ νῦν λαοῖσι φέρεις χάριν, οὐδὲ μεθʼ ἡμέων
Iliad 21.459	πειρᾷ ὥς κε Τρῶες ὑπερφίαλοι ἀπόλωνται
Iliad 21.460	πρόχνυ κακῶς σὺν παισὶ καὶ αἰδοίῃς ἀλόχοισι
Iliad 21.461	τὸν δʼ αὖτε προσέειπεν ἄναξ ἑκάεργος Ἀπόλλων·
Iliad 21.462	ἐννοσίγαιʼ οὐκ ἄν με σαόφρονα μυθήσαιο
Iliad 21.463	ἔμμεναι, εἰ δὴ σοί γε βροτῶν ἕνεκα πτολεμίξω
Iliad 21.464	δειλῶν, οἳ φύλλοισιν ἐοικότες ἄλλοτε μέν τε
Iliad 21.465	ζαφλεγέες τελέθουσιν ἀρούρης καρπὸν ἔδοντες,
Iliad 21.466	ἄλλοτε δὲ φθινύθουσιν ἀκήριοι. ἀλλὰ τάχιστα
Iliad 21.467	παυώμεσθα μάχης· οἳ δʼ αὐτοὶ δηριαάσθων.
Iliad 21.468	ὣς ἄρα φωνήσας πάλιν ἐτράπετʼ· αἴδετο γάρ ῥα
Iliad 21.469	πατροκασιγνήτοιο μιγήμεναι ἐν παλάμῃσι.
Iliad 21.470	τὸν δὲ κασιγνήτη μάλα νείκεσε πότνια θηρῶν
Iliad 21.471	Ἄρτεμις ἀγροτέρη, καὶ ὀνείδειον φάτο μῦθον·
Iliad 21.472	φεύγεις δὴ ἑκάεργε, Ποσειδάωνι δὲ νίκην
Iliad 21.473	πᾶσαν ἐπέτρεψας, μέλεον δέ οἱ εὖχος ἔδωκας·
Iliad 21.474	νηπύτιε τί νυ τόξον ἔχεις ἀνεμώλιον αὔτως;
Iliad 21.475	μή σευ νῦν ἔτι πατρὸς ἐνὶ μεγάροισιν ἀκούσω
Iliad 21.476	εὐχομένου, ὡς τὸ πρὶν ἐν ἀθανάτοισι θεοῖσιν,
Iliad 21.477	ἄντα Ποσειδάωνος ἐναντίβιον πολεμίζειν.
Iliad 21.478	ὣς φάτο, τὴν δʼ οὔ τι προσέφη ἑκάεργος Ἀπόλλων,
Iliad 21.479	ἀλλὰ χολωσαμένη Διὸς αἰδοίη παράκοιτις
Iliad 21.480	νείκεσεν ἰοχέαιραν ὀνειδείοις ἐπέεσσι·
Iliad 21.481	πῶς δὲ σὺ νῦν μέμονας κύον ἀδεὲς ἀντίʼ ἐμεῖο
Iliad 21.482	στήσεσθαι; χαλεπή τοι ἐγὼ μένος ἀντιφέρεσθαι
Iliad 21.483	τοξοφόρῳ περ ἐούσῃ, ἐπεὶ σὲ λέοντα γυναιξὶ
Iliad 21.484	Ζεὺς θῆκεν, καὶ ἔδωκε κατακτάμεν ἥν κʼ ἐθέλῃσθα.
Iliad 21.485	ἤτοι βέλτερόν ἐστι κατʼ οὔρεα θῆρας ἐναίρειν
Iliad 21.486	ἀγροτέρας τʼ ἐλάφους ἢ κρείσσοσιν ἶφι μάχεσθαι.
Iliad 21.487	εἰ δʼ ἐθέλεις πολέμοιο δαήμεναι, ὄφρʼ ἐῢ εἰδῇς
Iliad 21.488	ὅσσον φερτέρη εἴμʼ, ὅτι μοι μένος ἀντιφερίζεις.
Iliad 21.489	ἦ ῥα, καὶ ἀμφοτέρας ἐπὶ καρπῷ χεῖρας ἔμαρπτε
Iliad 21.490	σκαιῇ, δεξιτερῇ δʼ ἄρʼ ἀπʼ ὤμων αἴνυτο τόξα,
Iliad 21.491	αὐτοῖσιν δʼ ἄρʼ ἔθεινε παρʼ οὔατα μειδιόωσα
Iliad 21.492	ἐντροπαλιζομένην· ταχέες δʼ ἔκπιπτον ὀϊστοί.
Iliad 21.493	δακρυόεσσα δʼ ὕπαιθα θεὰ φύγεν ὥς τε πέλεια,
Iliad 21.494	ἥ ῥά θʼ ὑπʼ ἴρηκος κοίλην εἰσέπτατο πέτρην
Iliad 21.495	χηραμόν· οὐδʼ ἄρα τῇ γε ἁλώμεναι αἴσιμον ἦεν·
Iliad 21.496	ὣς ἣ δακρυόεσσα φύγεν, λίπε δʼ αὐτόθι τόξα.
Iliad 21.497	Λητὼ δὲ προσέειπε διάκτορος ἀργεϊφόντης·
Iliad 21.498	Λητοῖ ἐγὼ δέ τοι οὔ τι μαχήσομαι· ἀργαλέον δὲ
Iliad 21.499	πληκτίζεσθʼ ἀλόχοισι Διὸς νεφεληγερέταο·
Iliad 21.500	ἀλλὰ μάλα πρόφρασσα μετʼ ἀθανάτοισι θεοῖσιν
Iliad 21.501	εὔχεσθαι ἐμὲ νικῆσαι κρατερῆφι βίηφιν.
Iliad 21.502	ὣς ἄρʼ ἔφη, Λητὼ δὲ συναίνυτο καμπύλα τόξα
Iliad 21.503	πεπτεῶτʼ ἄλλυδις ἄλλα μετὰ στροφάλιγγι κονίης.
Iliad 21.504	ἣ μὲν τόξα λαβοῦσα πάλιν κίε θυγατέρος ἧς·
Iliad 21.505	ἣ δʼ ἄρʼ Ὄλυμπον ἵκανε Διὸς ποτὶ χαλκοβατὲς δῶ,
Iliad 21.506	δακρυόεσσα δὲ πατρὸς ἐφέζετο γούνασι κούρη,
Iliad 21.507	ἀμφὶ δʼ ἄρʼ ἀμβρόσιος ἑανὸς τρέμε· τὴν δὲ προτὶ οἷ
Iliad 21.508	εἷλε πατὴρ Κρονίδης, καὶ ἀνείρετο ἡδὺ γελάσσας·
Iliad 21.509	τίς νύ σε τοιάδʼ ἔρεξε φίλον τέκος Οὐρανιώνων
Iliad 21.510	μαψιδίως, ὡς εἴ τι κακὸν ῥέζουσαν ἐνωπῇ;
Iliad 21.511	τὸν δʼ αὖτε προσέειπεν ἐϋστέφανος κελαδεινή·
Iliad 21.512	σή μʼ ἄλοχος στυφέλιξε πάτερ λευκώλενος Ἥρη,
Iliad 21.513	ἐξ ἧς ἀθανάτοισιν ἔρις καὶ νεῖκος ἐφῆπται.
Iliad 21.514	ὣς οἳ μὲν τοιαῦτα πρὸς ἀλλήλους ἀγόρευον·
Iliad 21.515	αὐτὰρ Ἀπόλλων Φοῖβος ἐδύσετο Ἴλιον ἱρήν·
Iliad 21.516	μέμβλετο γάρ οἱ τεῖχος ἐϋδμήτοιο πόληος
Iliad 21.517	μὴ Δαναοὶ πέρσειαν ὑπὲρ μόρον ἤματι κείνῳ.
Iliad 21.518	οἳ δʼ ἄλλοι πρὸς Ὄλυμπον ἴσαν θεοὶ αἰὲν ἐόντες,
Iliad 21.519	οἳ μὲν χωόμενοι, οἳ δὲ μέγα κυδιόωντες·
Iliad 21.520	κὰδ δʼ ἷζον παρὰ πατρὶ κελαινεφεῖ· αὐτὰρ Ἀχιλλεὺς
Iliad 21.521	Τρῶας ὁμῶς αὐτούς τʼ ὄλεκεν καὶ μώνυχας ἵππους.
Iliad 21.522	ὡς δʼ ὅτε καπνὸς ἰὼν εἰς οὐρανὸν εὐρὺν ἵκηται
Iliad 21.523	ἄστεος αἰθομένοιο, θεῶν δέ ἑ μῆνις ἀνῆκε,
Iliad 21.524	πᾶσι δʼ ἔθηκε πόνον, πολλοῖσι δὲ κήδεʼ ἐφῆκεν,
Iliad 21.525	ὣς Ἀχιλεὺς Τρώεσσι πόνον καὶ κήδεʼ ἔθηκεν.
Iliad 21.526	ἑστήκει δʼ ὃ γέρων Πρίαμος θείου ἐπὶ πύργου,
Iliad 21.527	ἐς δʼ ἐνόησʼ Ἀχιλῆα πελώριον· αὐτὰρ ὑπʼ αὐτοῦ
Iliad 21.528	Τρῶες ἄφαρ κλονέοντο πεφυζότες, οὐδέ τις ἀλκὴ
Iliad 21.529	γίγνεθʼ· ὃ δʼ οἰμώξας ἀπὸ πύργου βαῖνε χαμᾶζε
Iliad 21.530	ὀτρύνων παρὰ τεῖχος ἀγακλειτοὺς πυλαωρούς·
Iliad 21.531	πεπταμένας ἐν χερσὶ πύλας ἔχετʼ εἰς ὅ κε λαοὶ
Iliad 21.532	ἔλθωσι προτὶ ἄστυ πεφυζότες· ἦ γὰρ Ἀχιλλεὺς
Iliad 21.533	ἐγγὺς ὅδε κλονέων· νῦν οἴω λοίγιʼ ἔσεσθαι.
Iliad 21.534	αὐτὰρ ἐπεί κʼ ἐς τεῖχος ἀναπνεύσωσιν ἀλέντες,
Iliad 21.535	αὖτις ἐπανθέμεναι σανίδας πυκινῶς ἀραρυίας·
Iliad 21.536	δείδια γὰρ μὴ οὖλος ἀνὴρ ἐς τεῖχος ἅληται.
Iliad 21.537	ὣς ἔφαθʼ, οἳ δʼ ἄνεσάν τε πύλας καὶ ἀπῶσαν ὀχῆας·
Iliad 21.538	αἳ δὲ πετασθεῖσαι τεῦξαν φάος· αὐτὰρ Ἀπόλλων
Iliad 21.539	ἀντίος ἐξέθορε Τρώων ἵνα λοιγὸν ἀλάλκοι.
Iliad 21.540	οἳ δʼ ἰθὺς πόλιος καὶ τείχεος ὑψηλοῖο
Iliad 21.541	δίψῃ καρχαλέοι κεκονιμένοι ἐκ πεδίοιο
Iliad 21.542	φεῦγον· ὃ δὲ σφεδανὸν ἔφεπʼ ἔγχεϊ, λύσσα δέ οἱ κῆρ
Iliad 21.543	αἰὲν ἔχε κρατερή, μενέαινε δὲ κῦδος ἀρέσθαι.
Iliad 21.544	ἔνθά κεν ὑψίπυλον Τροίην ἕλον υἷες Ἀχαιῶν,
Iliad 21.545	εἰ μὴ Ἀπόλλων Φοῖβος Ἀγήνορα δῖον ἀνῆκε
Iliad 21.546	φῶτʼ Ἀντήνορος υἱὸν ἀμύμονά τε κρατερόν τε.
Iliad 21.547	ἐν μέν οἱ κραδίῃ θάρσος βάλε, πὰρ δέ οἱ αὐτὸς
Iliad 21.548	ἔστη, ὅπως θανάτοιο βαρείας χεῖρας ἀλάλκοι
Iliad 21.549	φηγῷ κεκλιμένος· κεκάλυπτο δʼ ἄρʼ ἠέρι πολλῇ.
Iliad 21.550	αὐτὰρ ὅ γʼ ὡς ἐνόησεν Ἀχιλλῆα πτολίπορθον
Iliad 21.551	ἔστη, πολλὰ δέ οἱ κραδίη πόρφυρε μένοντι·
Iliad 21.552	ὀχθήσας δʼ ἄρα εἶπε πρὸς ὃν μεγαλήτορα θυμόν·
Iliad 21.553	ὤ μοι ἐγών· εἰ μέν κεν ὑπὸ κρατεροῦ Ἀχιλῆος
Iliad 21.554	φεύγω, τῇ περ οἱ ἄλλοι ἀτυζόμενοι κλονέονται,
Iliad 21.555	αἱρήσει με καὶ ὧς, καὶ ἀνάλκιδα δειροτομήσει.
Iliad 21.556	εἰ δʼ ἂν ἐγὼ τούτους μὲν ὑποκλονέεσθαι ἐάσω
Iliad 21.557	Πηλεΐδῃ Ἀχιλῆϊ, ποσὶν δʼ ἀπὸ τείχεος ἄλλῃ
Iliad 21.558	φεύγω πρὸς πεδίον Ἰλήϊον, ὄφρʼ ἂν ἵκωμαι
Iliad 21.559	Ἴδης τε κνημοὺς κατά τε ῥωπήϊα δύω·
Iliad 21.560	ἑσπέριος δʼ ἂν ἔπειτα λοεσσάμενος ποταμοῖο
Iliad 21.561	ἱδρῶ ἀποψυχθεὶς προτὶ Ἴλιον ἀπονεοίμην·
Iliad 21.562	ἀλλὰ τί ἤ μοι ταῦτα φίλος διελέξατο θυμός;
Iliad 21.563	μή μʼ ἀπαειρόμενον πόλιος πεδίον δὲ νοήσῃ
Iliad 21.564	καί με μεταΐξας μάρψῃ ταχέεσσι πόδεσσιν.
Iliad 21.565	οὐκέτʼ ἔπειτʼ ἔσται θάνατον καὶ κῆρας ἀλύξαι·
Iliad 21.566	λίην γὰρ κρατερὸς περὶ πάντων ἔστʼ ἀνθρώπων.
Iliad 21.567	εἰ δέ κέ οἱ προπάροιθε πόλεος κατεναντίον ἔλθω·
Iliad 21.568	καὶ γάρ θην τούτῳ τρωτὸς χρὼς ὀξέϊ χαλκῷ,
Iliad 21.569	ἐν δὲ ἴα ψυχή, θνητὸν δέ ἕ φασʼ ἄνθρωποι
Iliad 21.570	ἔμμεναι· αὐτάρ οἱ Κρονίδης Ζεὺς κῦδος ὀπάζει.
Iliad 21.571	ὣς εἰπὼν Ἀχιλῆα ἀλεὶς μένεν, ἐν δέ οἱ ἦτορ
Iliad 21.572	ἄλκιμον ὁρμᾶτο πτολεμίζειν ἠδὲ μάχεσθαι.
Iliad 21.573	ἠΰτε πάρδαλις εἶσι βαθείης ἐκ ξυλόχοιο
Iliad 21.574	ἀνδρὸς θηρητῆρος ἐναντίον, οὐδέ τι θυμῷ
Iliad 21.575	ταρβεῖ οὐδὲ φοβεῖται, ἐπεί κεν ὑλαγμὸν ἀκούσῃ·
Iliad 21.576	εἴ περ γὰρ φθάμενός μιν ἢ οὐτάσῃ ἠὲ βάλῃσιν,
Iliad 21.577	ἀλλά τε καὶ περὶ δουρὶ πεπαρμένη οὐκ ἀπολήγει
Iliad 21.578	ἀλκῆς, πρίν γʼ ἠὲ ξυμβλήμεναι ἠὲ δαμῆναι·
Iliad 21.579	ὣς Ἀντήνορος υἱὸς ἀγαυοῦ δῖος Ἀγήνωρ
Iliad 21.580	οὐκ ἔθελεν φεύγειν, πρὶν πειρήσαιτʼ Ἀχιλῆος.
Iliad 21.581	ἀλλʼ ὅ γʼ ἄρʼ ἀσπίδα μὲν πρόσθʼ ἔσχετο πάντοσʼ ἐΐσην,
Iliad 21.582	ἐγχείῃ δʼ αὐτοῖο τιτύσκετο, καὶ μέγʼ ἀΰτει·
Iliad 21.583	ἦ δή που μάλʼ ἔολπας ἐνὶ φρεσὶ φαίδιμʼ Ἀχιλλεῦ
Iliad 21.584	ἤματι τῷδε πόλιν πέρσειν Τρώων ἀγερώχων
Iliad 21.585	νηπύτιʼ· ἦ τʼ ἔτι πολλὰ τετεύξεται ἄλγεʼ ἐπʼ αὐτῇ.
Iliad 21.586	ἐν γάρ οἱ πολέες τε καὶ ἄλκιμοι ἀνέρες εἰμέν,
Iliad 21.587	οἳ καὶ πρόσθε φίλων τοκέων ἀλόχων τε καὶ υἱῶν
Iliad 21.588	Ἴλιον εἰρυόμεσθα· σὺ δʼ ἐνθάδε πότμον ἐφέψεις
Iliad 21.589	ὧδʼ ἔκπαγλος ἐὼν καὶ θαρσαλέος πολεμιστής.
Iliad 21.590	ἦ ῥα, καὶ ὀξὺν ἄκοντα βαρείης χειρὸς ἀφῆκε,
Iliad 21.591	καί ῥʼ ἔβαλε κνήμην ὑπὸ γούνατος οὐδʼ ἀφάμαρτεν.
Iliad 21.592	ἀμφὶ δέ οἱ κνημὶς νεοτεύκτου κασσιτέροιο
Iliad 21.593	σμερδαλέον κονάβησε· πάλιν δʼ ἀπὸ χαλκὸς ὄρουσε
Iliad 21.594	βλημένου, οὐδʼ ἐπέρησε, θεοῦ δʼ ἠρύκακε δῶρα.
Iliad 21.595	Πηλεΐδης δʼ ὁρμήσατʼ Ἀγήνορος ἀντιθέοιο
Iliad 21.596	δεύτερος· οὐδʼ ἔτʼ ἔασεν Ἀπόλλων κῦδος ἀρέσθαι,
Iliad 21.597	ἀλλά μιν ἐξήρπαξε, κάλυψε δʼ ἄρʼ ἠέρι πολλῇ,
Iliad 21.598	ἡσύχιον δʼ ἄρα μιν πολέμου ἔκπεμπε νέεσθαι.
Iliad 21.599	αὐτὰρ ὃ Πηλεΐωνα δόλῳ ἀποέργαθε λαοῦ·
Iliad 21.600	αὐτῷ γὰρ ἑκάεργος Ἀγήνορι πάντα ἐοικὼς
Iliad 21.601	ἔστη πρόσθε ποδῶν, ὃ δʼ ἐπέσσυτο ποσσὶ διώκειν·
Iliad 21.602	εἷος ὃ τὸν πεδίοιο διώκετο πυροφόροιο
Iliad 21.603	τρέψας πὰρ ποταμὸν βαθυδινήεντα Σκάμανδρον
Iliad 21.604	τυτθὸν ὑπεκπροθέοντα· δόλῳ δʼ ἄρʼ ἔθελγεν Ἀπόλλων
Iliad 21.605	ὡς αἰεὶ ἔλποιτο κιχήσεσθαι ποσὶν οἷσι·
Iliad 21.606	τόφρʼ ἄλλοι Τρῶες πεφοβημένοι ἦλθον ὁμίλῳ
Iliad 21.607	ἀσπάσιοι προτὶ ἄστυ, πόλις δʼ ἔμπλητο ἀλέντων.
Iliad 21.608	οὐδʼ ἄρα τοί γʼ ἔτλαν πόλιος καὶ τείχεος ἐκτὸς
Iliad 21.609	μεῖναι ἔτʼ ἀλλήλους, καὶ γνώμεναι ὅς τε πεφεύγοι
Iliad 21.610	ὅς τʼ ἔθανʼ ἐν πολέμῳ· ἀλλʼ ἐσσυμένως ἐσέχυντο
Iliad 21.611	ἐς πόλιν, ὅν τινα τῶν γε πόδες καὶ γοῦνα σαώσαι.
Iliad 22.1	ὣς οἳ μὲν κατὰ ἄστυ πεφυζότες ἠΰτε νεβροὶ
Iliad 22.2	ἱδρῶ ἀπεψύχοντο πίον τʼ ἀκέοντό τε δίψαν
Iliad 22.3	κεκλιμένοι καλῇσιν ἐπάλξεσιν· αὐτὰρ Ἀχαιοὶ
Iliad 22.4	τείχεος ἆσσον ἴσαν σάκεʼ ὤμοισι κλίναντες.
Iliad 22.5	Ἕκτορα δʼ αὐτοῦ μεῖναι ὀλοιὴ μοῖρα πέδησεν
Iliad 22.6	Ἰλίου προπάροιθε πυλάων τε Σκαιάων.
Iliad 22.7	αὐτὰρ Πηλείωνα προσηύδα Φοῖβος Ἀπόλλων·
Iliad 22.8	τίπτέ με Πηλέος υἱὲ ποσὶν ταχέεσσι διώκεις
Iliad 22.9	αὐτὸς θνητὸς ἐὼν θεὸν ἄμβροτον; οὐδέ νύ πώ με
Iliad 22.10	ἔγνως ὡς θεός εἰμι, σὺ δʼ ἀσπερχὲς μενεαίνεις.
Iliad 22.11	ἦ νύ τοι οὔ τι μέλει Τρώων πόνος, οὓς ἐφόβησας,
Iliad 22.12	οἳ δή τοι εἰς ἄστυ ἄλεν, σὺ δὲ δεῦρο λιάσθης.
Iliad 22.13	οὐ μέν με κτενέεις, ἐπεὶ οὔ τοι μόρσιμός εἰμι.
Iliad 22.14	τὸν δὲ μέγʼ ὀχθήσας προσέφη πόδας ὠκὺς Ἀχιλλεύς·
Iliad 22.15	ἔβλαψάς μʼ ἑκάεργε θεῶν ὀλοώτατε πάντων
Iliad 22.16	ἐνθάδε νῦν τρέψας ἀπὸ τείχεος· ἦ κʼ ἔτι πολλοὶ
Iliad 22.17	γαῖαν ὀδὰξ εἷλον πρὶν Ἴλιον εἰσαφικέσθαι.
Iliad 22.18	νῦν δʼ ἐμὲ μὲν μέγα κῦδος ἀφείλεο, τοὺς δὲ σάωσας
Iliad 22.19	ῥηϊδίως, ἐπεὶ οὔ τι τίσιν γʼ ἔδεισας ὀπίσσω.
Iliad 22.20	ἦ σʼ ἂν τισαίμην, εἴ μοι δύναμίς γε παρείη.
Iliad 22.21	ὣς εἰπὼν προτὶ ἄστυ μέγα φρονέων ἐβεβήκει,
Iliad 22.22	σευάμενος ὥς θʼ ἵππος ἀεθλοφόρος σὺν ὄχεσφιν,
Iliad 22.23	ὅς ῥά τε ῥεῖα θέῃσι τιταινόμενος πεδίοιο·
Iliad 22.24	ὣς Ἀχιλεὺς λαιψηρὰ πόδας καὶ γούνατʼ ἐνώμα.
Iliad 22.25	τὸν δʼ ὃ γέρων Πρίαμος πρῶτος ἴδεν ὀφθαλμοῖσι
Iliad 22.26	παμφαίνονθʼ ὥς τʼ ἀστέρʼ ἐπεσσύμενον πεδίοιο,
Iliad 22.27	ὅς ῥά τʼ ὀπώρης εἶσιν, ἀρίζηλοι δέ οἱ αὐγαὶ
Iliad 22.28	φαίνονται πολλοῖσι μετʼ ἀστράσι νυκτὸς ἀμολγῷ,
Iliad 22.29	ὅν τε κύνʼ Ὠρίωνος ἐπίκλησιν καλέουσι.
Iliad 22.30	λαμπρότατος μὲν ὅ γʼ ἐστί, κακὸν δέ τε σῆμα τέτυκται,
Iliad 22.31	καί τε φέρει πολλὸν πυρετὸν δειλοῖσι βροτοῖσιν·
Iliad 22.32	ὣς τοῦ χαλκὸς ἔλαμπε περὶ στήθεσσι θέοντος.
Iliad 22.33	ᾤμωξεν δʼ ὃ γέρων, κεφαλὴν δʼ ὅ γε κόψατο χερσὶν
Iliad 22.34	ὑψόσʼ ἀνασχόμενος, μέγα δʼ οἰμώξας ἐγεγώνει
Iliad 22.35	λισσόμενος φίλον υἱόν· ὃ δὲ προπάροιθε πυλάων
Iliad 22.36	ἑστήκει ἄμοτον μεμαὼς Ἀχιλῆϊ μάχεσθαι·
Iliad 22.37	τὸν δʼ ὃ γέρων ἐλεεινὰ προσηύδα χεῖρας ὀρεγνύς·
Iliad 22.38	Ἕκτορ μή μοι μίμνε φίλον τέκος ἀνέρα τοῦτον
Iliad 22.39	οἶος ἄνευθʼ ἄλλων, ἵνα μὴ τάχα πότμον ἐπίσπῃς
Iliad 22.40	Πηλεΐωνι δαμείς, ἐπεὶ ἦ πολὺ φέρτερός ἐστι
Iliad 22.41	σχέτλιος· αἴθε θεοῖσι φίλος τοσσόνδε γένοιτο
Iliad 22.42	ὅσσον ἐμοί· τάχα κέν ἑ κύνες καὶ γῦπες ἔδοιεν
Iliad 22.43	κείμενον· ἦ κέ μοι αἰνὸν ἀπὸ πραπίδων ἄχος ἔλθοι·
Iliad 22.44	ὅς μʼ υἱῶν πολλῶν τε καὶ ἐσθλῶν εὖνιν ἔθηκε
Iliad 22.45	κτείνων καὶ περνὰς νήσων ἔπι τηλεδαπάων.
Iliad 22.46	καὶ γὰρ νῦν δύο παῖδε Λυκάονα καὶ Πολύδωρον
Iliad 22.47	οὐ δύναμαι ἰδέειν Τρώων εἰς ἄστυ ἀλέντων,
Iliad 22.48	τούς μοι Λαοθόη τέκετο κρείουσα γυναικῶν.
Iliad 22.49	ἀλλʼ εἰ μὲν ζώουσι μετὰ στρατῷ, ἦ τʼ ἂν ἔπειτα
Iliad 22.50	χαλκοῦ τε χρυσοῦ τʼ ἀπολυσόμεθʼ, ἔστι γὰρ ἔνδον·
Iliad 22.51	πολλὰ γὰρ ὤπασε παιδὶ γέρων ὀνομάκλυτος Ἄλτης.
Iliad 22.52	εἰ δʼ ἤδη τεθνᾶσι καὶ εἰν Ἀΐδαο δόμοισιν,
Iliad 22.53	ἄλγος ἐμῷ θυμῷ καὶ μητέρι τοὶ τεκόμεσθα·
Iliad 22.54	λαοῖσιν δʼ ἄλλοισι μινυνθαδιώτερον ἄλγος
Iliad 22.55	ἔσσεται, ἢν μὴ καὶ σὺ θάνῃς Ἀχιλῆϊ δαμασθείς.
Iliad 22.56	ἀλλʼ εἰσέρχεο τεῖχος ἐμὸν τέκος, ὄφρα σαώσῃς
Iliad 22.57	Τρῶας καὶ Τρῳάς, μὴ δὲ μέγα κῦδος ὀρέξῃς
Iliad 22.58	Πηλεΐδῃ, αὐτὸς δὲ φίλης αἰῶνος ἀμερθῇς.
Iliad 22.59	πρὸς δʼ ἐμὲ τὸν δύστηνον ἔτι φρονέοντʼ ἐλέησον
Iliad 22.60	δύσμορον, ὅν ῥα πατὴρ Κρονίδης ἐπὶ γήραος οὐδῷ
Iliad 22.61	αἴσῃ ἐν ἀργαλέῃ φθίσει κακὰ πόλλʼ ἐπιδόντα
Iliad 22.62	υἷάς τʼ ὀλλυμένους ἑλκηθείσας τε θύγατρας,
Iliad 22.63	καὶ θαλάμους κεραϊζομένους, καὶ νήπια τέκνα
Iliad 22.64	βαλλόμενα προτὶ γαίῃ ἐν αἰνῇ δηϊοτῆτι,
Iliad 22.65	ἑλκομένας τε νυοὺς ὀλοῇς ὑπὸ χερσὶν Ἀχαιῶν.
Iliad 22.66	αὐτὸν δʼ ἂν πύματόν με κύνες πρώτῃσι θύρῃσιν
Iliad 22.67	ὠμησταὶ ἐρύουσιν, ἐπεί κέ τις ὀξέϊ χαλκῷ
Iliad 22.68	τύψας ἠὲ βαλὼν ῥεθέων ἐκ θυμὸν ἕληται,
Iliad 22.69	οὓς τρέφον ἐν μεγάροισι τραπεζῆας θυραωρούς,
Iliad 22.70	οἵ κʼ ἐμὸν αἷμα πιόντες ἀλύσσοντες περὶ θυμῷ
Iliad 22.71	κείσοντʼ ἐν προθύροισι. νέῳ δέ τε πάντʼ ἐπέοικεν
Iliad 22.72	ἄρηϊ κταμένῳ δεδαϊγμένῳ ὀξέϊ χαλκῷ
Iliad 22.73	κεῖσθαι· πάντα δὲ καλὰ θανόντι περ ὅττι φανήῃ·
Iliad 22.74	ἀλλʼ ὅτε δὴ πολιόν τε κάρη πολιόν τε γένειον
Iliad 22.75	αἰδῶ τʼ αἰσχύνωσι κύνες κταμένοιο γέροντος,
Iliad 22.76	τοῦτο δὴ οἴκτιστον πέλεται δειλοῖσι βροτοῖσιν.
Iliad 22.77	ἦ ῥʼ ὃ γέρων, πολιὰς δʼ ἄρʼ ἀνὰ τρίχας ἕλκετο χερσὶ
Iliad 22.78	τίλλων ἐκ κεφαλῆς· οὐδʼ Ἕκτορι θυμὸν ἔπειθε.
Iliad 22.79	μήτηρ δʼ αὖθʼ ἑτέρωθεν ὀδύρετο δάκρυ χέουσα
Iliad 22.80	κόλπον ἀνιεμένη, ἑτέρηφι δὲ μαζὸν ἀνέσχε·
Iliad 22.81	καί μιν δάκρυ χέουσʼ ἔπεα πτερόεντα προσηύδα·
Iliad 22.82	Ἕκτορ τέκνον ἐμὸν τάδε τʼ αἴδεο καί μʼ ἐλέησον
Iliad 22.83	αὐτήν, εἴ ποτέ τοι λαθικηδέα μαζὸν ἐπέσχον·
Iliad 22.84	τῶν μνῆσαι φίλε τέκνον ἄμυνε δὲ δήϊον ἄνδρα
Iliad 22.85	τείχεος ἐντὸς ἐών, μὴ δὲ πρόμος ἵστασο τούτῳ
Iliad 22.86	σχέτλιος· εἴ περ γάρ σε κατακτάνῃ, οὔ σʼ ἔτʼ ἔγωγε
Iliad 22.87	κλαύσομαι ἐν λεχέεσσι φίλον θάλος, ὃν τέκον αὐτή,
Iliad 22.88	οὐδʼ ἄλοχος πολύδωρος· ἄνευθε δέ σε μέγα νῶϊν
Iliad 22.89	Ἀργείων παρὰ νηυσὶ κύνες ταχέες κατέδονται.
Iliad 22.90	ὣς τώ γε κλαίοντε προσαυδήτην φίλον υἱὸν
Iliad 22.91	πολλὰ λισσομένω· οὐδʼ Ἕκτορι θυμὸν ἔπειθον,
Iliad 22.92	ἀλλʼ ὅ γε μίμνʼ Ἀχιλῆα πελώριον ἆσσον ἰόντα.
Iliad 22.93	ὡς δὲ δράκων ἐπὶ χειῇ ὀρέστερος ἄνδρα μένῃσι
Iliad 22.94	βεβρωκὼς κακὰ φάρμακʼ, ἔδυ δέ τέ μιν χόλος αἰνός,
Iliad 22.95	σμερδαλέον δὲ δέδορκεν ἑλισσόμενος περὶ χειῇ·
Iliad 22.96	ὣς Ἕκτωρ ἄσβεστον ἔχων μένος οὐχ ὑπεχώρει
Iliad 22.97	πύργῳ ἔπι προὔχοντι φαεινὴν ἀσπίδʼ ἐρείσας·
Iliad 22.98	ὀχθήσας δʼ ἄρα εἶπε πρὸς ὃν μεγαλήτορα θυμόν·
Iliad 22.99	ὤ μοι ἐγών, εἰ μέν κε πύλας καὶ τείχεα δύω,
Iliad 22.100	Πουλυδάμας μοι πρῶτος ἐλεγχείην ἀναθήσει,
Iliad 22.101	ὅς μʼ ἐκέλευε Τρωσὶ ποτὶ πτόλιν ἡγήσασθαι
Iliad 22.102	νύχθʼ ὕπο τήνδʼ ὀλοὴν ὅτε τʼ ὤρετο δῖος Ἀχιλλεύς.
Iliad 22.103	ἀλλʼ ἐγὼ οὐ πιθόμην· ἦ τʼ ἂν πολὺ κέρδιον ἦεν.
Iliad 22.104	νῦν δʼ ἐπεὶ ὤλεσα λαὸν ἀτασθαλίῃσιν ἐμῇσιν,
Iliad 22.105	αἰδέομαι Τρῶας καὶ Τρῳάδας ἑλκεσιπέπλους,
Iliad 22.106	μή ποτέ τις εἴπῃσι κακώτερος ἄλλος ἐμεῖο·
Iliad 22.107	Ἕκτωρ ἧφι βίηφι πιθήσας ὤλεσε λαόν.
Iliad 22.108	ὣς ἐρέουσιν· ἐμοὶ δὲ τότʼ ἂν πολὺ κέρδιον εἴη
Iliad 22.109	ἄντην ἢ Ἀχιλῆα κατακτείναντα νέεσθαι,
Iliad 22.110	ἠέ κεν αὐτῷ ὀλέσθαι ἐϋκλειῶς πρὸ πόληος.
Iliad 22.111	εἰ δέ κεν ἀσπίδα μὲν καταθείομαι ὀμφαλόεσσαν
Iliad 22.112	καὶ κόρυθα βριαρήν, δόρυ δὲ πρὸς τεῖχος ἐρείσας
Iliad 22.113	αὐτὸς ἰὼν Ἀχιλῆος ἀμύμονος ἀντίος ἔλθω
Iliad 22.114	καί οἱ ὑπόσχωμαι Ἑλένην καὶ κτήμαθʼ ἅμʼ αὐτῇ,
Iliad 22.115	πάντα μάλʼ ὅσσά τʼ Ἀλέξανδρος κοίλῃς ἐνὶ νηυσὶν
Iliad 22.116	ἠγάγετο Τροίηνδʼ, ἥ τʼ ἔπλετο νείκεος ἀρχή,
Iliad 22.117	δωσέμεν Ἀτρεΐδῃσιν ἄγειν, ἅμα δʼ ἀμφὶς Ἀχαιοῖς
Iliad 22.118	ἄλλʼ ἀποδάσσεσθαι ὅσα τε πτόλις ἥδε κέκευθε·
Iliad 22.119	Τρωσὶν δʼ αὖ μετόπισθε γερούσιον ὅρκον ἕλωμαι
Iliad 22.120	μή τι κατακρύψειν, ἀλλʼ ἄνδιχα πάντα δάσασθαι
Iliad 22.121	κτῆσιν ὅσην πτολίεθρον ἐπήρατον ἐντὸς ἐέργει·
Iliad 22.122	ἀλλὰ τί ἤ μοι ταῦτα φίλος διελέξατο θυμός;
Iliad 22.123	μή μιν ἐγὼ μὲν ἵκωμαι ἰών, ὃ δέ μʼ οὐκ ἐλεήσει
Iliad 22.124	οὐδέ τί μʼ αἰδέσεται, κτενέει δέ με γυμνὸν ἐόντα
Iliad 22.125	αὔτως ὥς τε γυναῖκα, ἐπεί κʼ ἀπὸ τεύχεα δύω.
Iliad 22.126	οὐ μέν πως νῦν ἔστιν ἀπὸ δρυὸς οὐδʼ ἀπὸ πέτρης
Iliad 22.127	τῷ ὀαριζέμεναι, ἅ τε παρθένος ἠΐθεός τε
Iliad 22.128	παρθένος ἠΐθεός τʼ ὀαρίζετον ἀλλήλοιιν.
Iliad 22.129	βέλτερον αὖτʼ ἔριδι ξυνελαυνέμεν ὅττι τάχιστα·
Iliad 22.130	εἴδομεν ὁπποτέρῳ κεν Ὀλύμπιος εὖχος ὀρέξῃ.
Iliad 22.131	ὣς ὅρμαινε μένων, ὃ δέ οἱ σχεδὸν ἦλθεν Ἀχιλλεὺς
Iliad 22.132	ἶσος Ἐνυαλίῳ κορυθάϊκι πτολεμιστῇ
Iliad 22.133	σείων Πηλιάδα μελίην κατὰ δεξιὸν ὦμον
Iliad 22.134	δεινήν· ἀμφὶ δὲ χαλκὸς ἐλάμπετο εἴκελος αὐγῇ
Iliad 22.135	ἢ πυρὸς αἰθομένου ἢ ἠελίου ἀνιόντος.
Iliad 22.136	Ἕκτορα δʼ, ὡς ἐνόησεν, ἕλε τρόμος· οὐδʼ ἄρʼ ἔτʼ ἔτλη
Iliad 22.137	αὖθι μένειν, ὀπίσω δὲ πύλας λίπε, βῆ δὲ φοβηθείς·
Iliad 22.138	Πηλεΐδης δʼ ἐπόρουσε ποσὶ κραιπνοῖσι πεποιθώς.
Iliad 22.139	ἠΰτε κίρκος ὄρεσφιν ἐλαφρότατος πετεηνῶν
Iliad 22.140	ῥηϊδίως οἴμησε μετὰ τρήρωνα πέλειαν,
Iliad 22.141	ἣ δέ θʼ ὕπαιθα φοβεῖται, ὃ δʼ ἐγγύθεν ὀξὺ λεληκὼς
Iliad 22.142	ταρφέʼ ἐπαΐσσει, ἑλέειν τέ ἑ θυμὸς ἀνώγει·
Iliad 22.143	ὣς ἄρʼ ὅ γʼ ἐμμεμαὼς ἰθὺς πέτετο, τρέσε δʼ Ἕκτωρ
Iliad 22.144	τεῖχος ὕπο Τρώων, λαιψηρὰ δὲ γούνατʼ ἐνώμα.
Iliad 22.145	οἳ δὲ παρὰ σκοπιὴν καὶ ἐρινεὸν ἠνεμόεντα
Iliad 22.146	τείχεος αἰὲν ὑπʼ ἐκ κατʼ ἀμαξιτὸν ἐσσεύοντο,
Iliad 22.147	κρουνὼ δʼ ἵκανον καλλιρρόω· ἔνθα δὲ πηγαὶ
Iliad 22.148	δοιαὶ ἀναΐσσουσι Σκαμάνδρου δινήεντος.
Iliad 22.149	ἣ μὲν γάρ θʼ ὕδατι λιαρῷ ῥέει, ἀμφὶ δὲ καπνὸς
Iliad 22.150	γίγνεται ἐξ αὐτῆς ὡς εἰ πυρὸς αἰθομένοιο·
Iliad 22.151	ἣ δʼ ἑτέρη θέρεϊ προρέει ἐϊκυῖα χαλάζῃ,
Iliad 22.152	ἢ χιόνι ψυχρῇ ἢ ἐξ ὕδατος κρυστάλλῳ.
Iliad 22.153	ἔνθα δʼ ἐπʼ αὐτάων πλυνοὶ εὐρέες ἐγγὺς ἔασι
Iliad 22.154	καλοὶ λαΐνεοι, ὅθι εἵματα σιγαλόεντα
Iliad 22.155	πλύνεσκον Τρώων ἄλοχοι καλαί τε θύγατρες
Iliad 22.156	τὸ πρὶν ἐπʼ εἰρήνης πρὶν ἐλθεῖν υἷας Ἀχαιῶν.
Iliad 22.157	τῇ ῥα παραδραμέτην φεύγων ὃ δʼ ὄπισθε διώκων·
Iliad 22.158	πρόσθε μὲν ἐσθλὸς ἔφευγε, δίωκε δέ μιν μέγʼ ἀμείνων
Iliad 22.159	καρπαλίμως, ἐπεὶ οὐχ ἱερήϊον οὐδὲ βοείην
Iliad 22.160	ἀρνύσθην, ἅ τε ποσσὶν ἀέθλια γίγνεται ἀνδρῶν,
Iliad 22.161	ἀλλὰ περὶ ψυχῆς θέον Ἕκτορος ἱπποδάμοιο.
Iliad 22.162	ὡς δʼ ὅτʼ ἀεθλοφόροι περὶ τέρματα μώνυχες ἵπποι
Iliad 22.163	ῥίμφα μάλα τρωχῶσι· τὸ δὲ μέγα κεῖται ἄεθλον
Iliad 22.164	ἢ τρίπος ἠὲ γυνὴ ἀνδρὸς κατατεθνηῶτος·
Iliad 22.165	ὣς τὼ τρὶς Πριάμοιο πόλιν πέρι δινηθήτην
Iliad 22.166	καρπαλίμοισι πόδεσσι· θεοὶ δʼ ἐς πάντες ὁρῶντο·
Iliad 22.167	τοῖσι δὲ μύθων ἦρχε πατὴρ ἀνδρῶν τε θεῶν τε·
Iliad 22.168	ὢ πόποι ἦ φίλον ἄνδρα διωκόμενον περὶ τεῖχος
Iliad 22.169	ὀφθαλμοῖσιν ὁρῶμαι· ἐμὸν δʼ ὀλοφύρεται ἦτορ
Iliad 22.170	Ἕκτορος, ὅς μοι πολλὰ βοῶν ἐπὶ μηρίʼ ἔκηεν
Iliad 22.171	Ἴδης ἐν κορυφῇσι πολυπτύχου, ἄλλοτε δʼ αὖτε
Iliad 22.172	ἐν πόλει ἀκροτάτῃ· νῦν αὖτέ ἑ δῖος Ἀχιλλεὺς
Iliad 22.173	ἄστυ πέρι Πριάμοιο ποσὶν ταχέεσσι διώκει.
Iliad 22.174	ἀλλʼ ἄγετε φράζεσθε θεοὶ καὶ μητιάασθε
Iliad 22.175	ἠέ μιν ἐκ θανάτοιο σαώσομεν, ἦέ μιν ἤδη
Iliad 22.176	Πηλεΐδῃ Ἀχιλῆϊ δαμάσσομεν ἐσθλὸν ἐόντα.
Iliad 22.177	τὸν δʼ αὖτε προσέειπε θεὰ γλαυκῶπις Ἀθήνη·
Iliad 22.178	ὦ πάτερ ἀργικέραυνε κελαινεφὲς οἷον ἔειπες·
Iliad 22.179	ἄνδρα θνητὸν ἐόντα πάλαι πεπρωμένον αἴσῃ
Iliad 22.180	ἂψ ἐθέλεις θανάτοιο δυσηχέος ἐξαναλῦσαι;
Iliad 22.181	ἔρδʼ· ἀτὰρ οὔ τοι πάντες ἐπαινέομεν θεοὶ ἄλλοι.
Iliad 22.182	τὴν δʼ ἀπαμειβόμενος προσέφη νεφεληγερέτα Ζεύς·
Iliad 22.183	θάρσει Τριτογένεια φίλον τέκος· οὔ νύ τι θυμῷ
Iliad 22.184	πρόφρονι μυθέομαι, ἐθέλω δέ τοι ἤπιος εἶναι·
Iliad 22.185	ἔρξον ὅπῃ δή τοι νόος ἔπλετο, μὴ δʼ ἔτʼ ἐρώει.
Iliad 22.186	ὣς εἰπὼν ὄτρυνε πάρος μεμαυῖαν Ἀθήνην·
Iliad 22.187	βῆ δὲ κατʼ Οὐλύμποιο καρήνων ἀΐξασα.
Iliad 22.188	Ἕκτορα δʼ ἀσπερχὲς κλονέων ἔφεπʼ ὠκὺς Ἀχιλλεύς.
Iliad 22.189	ὡς δʼ ὅτε νεβρὸν ὄρεσφι κύων ἐλάφοιο δίηται
Iliad 22.190	ὄρσας ἐξ εὐνῆς διά τʼ ἄγκεα καὶ διὰ βήσσας·
Iliad 22.191	τὸν δʼ εἴ πέρ τε λάθῃσι καταπτήξας ὑπὸ θάμνῳ,
Iliad 22.192	ἀλλά τʼ ἀνιχνεύων θέει ἔμπεδον ὄφρά κεν εὕρῃ·
Iliad 22.193	ὣς Ἕκτωρ οὐ λῆθε ποδώκεα Πηλεΐωνα.
Iliad 22.194	ὁσσάκι δʼ ὁρμήσειε πυλάων Δαρδανιάων
Iliad 22.195	ἀντίον ἀΐξασθαι ἐϋδμήτους ὑπὸ πύργους,
Iliad 22.196	εἴ πως οἷ καθύπερθεν ἀλάλκοιεν βελέεσσι,
Iliad 22.197	τοσσάκι μιν προπάροιθεν ἀποστρέψασκε παραφθὰς
Iliad 22.198	πρὸς πεδίον· αὐτὸς δὲ ποτὶ πτόλιος πέτετʼ αἰεί.
Iliad 22.199	ὡς δʼ ἐν ὀνείρῳ οὐ δύναται φεύγοντα διώκειν·
Iliad 22.200	οὔτʼ ἄρʼ ὃ τὸν δύναται ὑποφεύγειν οὔθʼ ὃ διώκειν·
Iliad 22.201	ὣς ὃ τὸν οὐ δύνατο μάρψαι ποσίν, οὐδʼ ὃς ἀλύξαι.
Iliad 22.202	πῶς δέ κεν Ἕκτωρ κῆρας ὑπεξέφυγεν θανάτοιο,
Iliad 22.203	εἰ μή οἱ πύματόν τε καὶ ὕστατον ἤντετʼ Ἀπόλλων
Iliad 22.204	ἐγγύθεν, ὅς οἱ ἐπῶρσε μένος λαιψηρά τε γοῦνα;
Iliad 22.205	λαοῖσιν δʼ ἀνένευε καρήατι δῖος Ἀχιλλεύς,
Iliad 22.206	οὐδʼ ἔα ἱέμεναι ἐπὶ Ἕκτορι πικρὰ βέλεμνα,
Iliad 22.207	μή τις κῦδος ἄροιτο βαλών, ὃ δὲ δεύτερος ἔλθοι.
Iliad 22.208	ἀλλʼ ὅτε δὴ τὸ τέταρτον ἐπὶ κρουνοὺς ἀφίκοντο,
Iliad 22.209	καὶ τότε δὴ χρύσεια πατὴρ ἐτίταινε τάλαντα,
Iliad 22.210	ἐν δʼ ἐτίθει δύο κῆρε τανηλεγέος θανάτοιο,
Iliad 22.211	τὴν μὲν Ἀχιλλῆος, τὴν δʼ Ἕκτορος ἱπποδάμοιο,
Iliad 22.212	ἕλκε δὲ μέσσα λαβών· ῥέπε δʼ Ἕκτορος αἴσιμον ἦμαρ,
Iliad 22.213	ᾤχετο δʼ εἰς Ἀΐδαο, λίπεν δέ ἑ Φοῖβος Ἀπόλλων.
Iliad 22.214	Πηλεΐωνα δʼ ἵκανε θεὰ γλαυκῶπις Ἀθήνη,
Iliad 22.215	ἀγχοῦ δʼ ἱσταμένη ἔπεα πτερόεντα προσηύδα·
Iliad 22.216	νῦν δὴ νῶι ἔολπα Διῒ φίλε φαίδιμʼ Ἀχιλλεῦ
Iliad 22.217	οἴσεσθαι μέγα κῦδος Ἀχαιοῖσι προτὶ νῆας
Iliad 22.218	Ἕκτορα δῃώσαντε μάχης ἄατόν περ ἐόντα.
Iliad 22.219	οὔ οἱ νῦν ἔτι γʼ ἔστι πεφυγμένον ἄμμε γενέσθαι,
Iliad 22.220	οὐδʼ εἴ κεν μάλα πολλὰ πάθοι ἑκάεργος Ἀπόλλων
Iliad 22.221	προπροκυλινδόμενος πατρὸς Διὸς αἰγιόχοιο.
Iliad 22.222	ἀλλὰ σὺ μὲν νῦν στῆθι καὶ ἄμπνυε, τόνδε δʼ ἐγώ τοι
Iliad 22.223	οἰχομένη πεπιθήσω ἐναντίβιον μαχέσασθαι.
Iliad 22.224	ὣς φάτʼ Ἀθηναίη, ὃ δʼ ἐπείθετο, χαῖρε δὲ θυμῷ,
Iliad 22.225	στῆ δʼ ἄρʼ ἐπὶ μελίης χαλκογλώχινος ἐρεισθείς.
Iliad 22.226	ἣ δʼ ἄρα τὸν μὲν ἔλειπε, κιχήσατο δʼ Ἕκτορα δῖον
Iliad 22.227	Δηϊφόβῳ ἐϊκυῖα δέμας καὶ ἀτειρέα φωνήν·
Iliad 22.228	ἀγχοῦ δʼ ἱσταμένη ἔπεα πτερόεντα προσηύδα·
Iliad 22.229	ἠθεῖʼ ἦ μάλα δή σε βιάζεται ὠκὺς Ἀχιλλεὺς
Iliad 22.230	ἄστυ πέρι Πριάμοιο ποσὶν ταχέεσσι διώκων·
Iliad 22.231	ἀλλʼ ἄγε δὴ στέωμεν καὶ ἀλεξώμεσθα μένοντες.
Iliad 22.232	τὴν δʼ αὖτε προσέειπε μέγας κορυθαίολος Ἕκτωρ·
Iliad 22.233	Δηΐφοβʼ ἦ μέν μοι τὸ πάρος πολὺ φίλτατος ἦσθα
Iliad 22.234	γνωτῶν οὓς Ἑκάβη ἠδὲ Πρίαμος τέκε παῖδας·
Iliad 22.235	νῦν δʼ ἔτι καὶ μᾶλλον νοέω φρεσὶ τιμήσασθαι,
Iliad 22.236	ὃς ἔτλης ἐμεῦ εἵνεκʼ, ἐπεὶ ἴδες ὀφθαλμοῖσι,
Iliad 22.237	τείχεος ἐξελθεῖν, ἄλλοι δʼ ἔντοσθε μένουσι.
Iliad 22.238	τὸν δʼ αὖτε προσέειπε θεὰ γλαυκῶπις Ἀθήνη·
Iliad 22.239	ἠθεῖʼ ἦ μὲν πολλὰ πατὴρ καὶ πότνια μήτηρ
Iliad 22.240	λίσσονθʼ ἑξείης γουνούμενοι, ἀμφὶ δʼ ἑταῖροι,
Iliad 22.241	αὖθι μένειν· τοῖον γὰρ ὑποτρομέουσιν ἅπαντες·
Iliad 22.242	ἀλλʼ ἐμὸς ἔνδοθι θυμὸς ἐτείρετο πένθεϊ λυγρῷ.
Iliad 22.243	νῦν δʼ ἰθὺς μεμαῶτε μαχώμεθα, μὴ δέ τι δούρων
Iliad 22.244	ἔστω φειδωλή, ἵνα εἴδομεν εἴ κεν Ἀχιλλεὺς
Iliad 22.245	νῶϊ κατακτείνας ἔναρα βροτόεντα φέρηται
Iliad 22.246	νῆας ἔπι γλαφυράς, ἦ κεν σῷ δουρὶ δαμήῃ.
Iliad 22.247	ὣς φαμένη καὶ κερδοσύνῃ ἡγήσατʼ Ἀθήνη·
Iliad 22.248	οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες,
Iliad 22.249	τὸν πρότερος προσέειπε μέγας κορυθαίολος Ἕκτωρ·
Iliad 22.250	οὔ σʼ ἔτι Πηλέος υἱὲ φοβήσομαι, ὡς τὸ πάρος περ
Iliad 22.251	τρὶς περὶ ἄστυ μέγα Πριάμου δίον, οὐδέ ποτʼ ἔτλην
Iliad 22.252	μεῖναι ἐπερχόμενον· νῦν αὖτέ με θυμὸς ἀνῆκε
Iliad 22.253	στήμεναι ἀντία σεῖο· ἕλοιμί κεν ἤ κεν ἁλοίην.
Iliad 22.254	ἀλλʼ ἄγε δεῦρο θεοὺς ἐπιδώμεθα· τοὶ γὰρ ἄριστοι
Iliad 22.255	μάρτυροι ἔσσονται καὶ ἐπίσκοποι ἁρμονιάων·
Iliad 22.256	οὐ γὰρ ἐγώ σʼ ἔκπαγλον ἀεικιῶ, αἴ κεν ἐμοὶ Ζεὺς
Iliad 22.257	δώῃ καμμονίην, σὴν δὲ ψυχὴν ἀφέλωμαι·
Iliad 22.258	ἀλλʼ ἐπεὶ ἄρ κέ σε συλήσω κλυτὰ τεύχεʼ Ἀχιλλεῦ
Iliad 22.259	νεκρὸν Ἀχαιοῖσιν δώσω πάλιν· ὣς δὲ σὺ ῥέζειν.
Iliad 22.260	τὸν δʼ ἄρʼ ὑπόδρα ἰδὼν προσέφη πόδας ὠκὺς Ἀχιλλεύς·
Iliad 22.261	Ἕκτορ μή μοι ἄλαστε συνημοσύνας ἀγόρευε·
Iliad 22.262	ὡς οὐκ ἔστι λέουσι καὶ ἀνδράσιν ὅρκια πιστά,
Iliad 22.263	οὐδὲ λύκοι τε καὶ ἄρνες ὁμόφρονα θυμὸν ἔχουσιν,
Iliad 22.264	ἀλλὰ κακὰ φρονέουσι διαμπερὲς ἀλλήλοισιν,
Iliad 22.265	ὣς οὐκ ἔστʼ ἐμὲ καὶ σὲ φιλήμεναι, οὐδέ τι νῶϊν
Iliad 22.266	ὅρκια ἔσσονται, πρίν γʼ ἢ ἕτερόν γε πεσόντα
Iliad 22.267	αἵματος ἆσαι Ἄρηα ταλαύρινον πολεμιστήν.
Iliad 22.268	παντοίης ἀρετῆς μιμνήσκεο· νῦν σε μάλα χρὴ
Iliad 22.269	αἰχμητήν τʼ ἔμεναι καὶ θαρσαλέον πολεμιστήν.
Iliad 22.270	οὔ τοι ἔτʼ ἔσθʼ ὑπάλυξις, ἄφαρ δέ σε Παλλὰς Ἀθήνη
Iliad 22.271	ἔγχει ἐμῷ δαμάᾳ· νῦν δʼ ἀθρόα πάντʼ ἀποτίσεις
Iliad 22.272	κήδεʼ ἐμῶν ἑτάρων οὓς ἔκτανες ἔγχεϊ θύων.
Iliad 22.273	ἦ ῥα, καὶ ἀμπεπαλὼν προΐει δολιχόσκιον ἔγχος·
Iliad 22.274	καὶ τὸ μὲν ἄντα ἰδὼν ἠλεύατο φαίδιμος Ἕκτωρ·
Iliad 22.275	ἕζετο γὰρ προϊδών, τὸ δʼ ὑπέρπτατο χάλκεον ἔγχος,
Iliad 22.276	ἐν γαίῃ δʼ ἐπάγη· ἀνὰ δʼ ἥρπασε Παλλὰς Ἀθήνη,
Iliad 22.277	ἂψ δʼ Ἀχιλῆϊ δίδου, λάθε δʼ Ἕκτορα ποιμένα λαῶν.
Iliad 22.278	Ἕκτωρ δὲ προσέειπεν ἀμύμονα Πηλεΐωνα·
Iliad 22.279	ἤμβροτες, οὐδʼ ἄρα πώ τι θεοῖς ἐπιείκελʼ Ἀχιλλεῦ
Iliad 22.280	ἐκ Διὸς ἠείδης τὸν ἐμὸν μόρον, ἦ τοι ἔφης γε·
Iliad 22.281	ἀλλά τις ἀρτιεπὴς καὶ ἐπίκλοπος ἔπλεο μύθων,
Iliad 22.282	ὄφρά σʼ ὑποδείσας μένεος ἀλκῆς τε λάθωμαι.
Iliad 22.283	οὐ μέν μοι φεύγοντι μεταφρένῳ ἐν δόρυ πήξεις,
Iliad 22.284	ἀλλʼ ἰθὺς μεμαῶτι διὰ στήθεσφιν ἔλασσον
Iliad 22.285	εἴ τοι ἔδωκε θεός· νῦν αὖτʼ ἐμὸν ἔγχος ἄλευαι
Iliad 22.286	χάλκεον· ὡς δή μιν σῷ ἐν χροῒ πᾶν κομίσαιο.
Iliad 22.287	καί κεν ἐλαφρότερος πόλεμος Τρώεσσι γένοιτο
Iliad 22.288	σεῖο καταφθιμένοιο· σὺ γάρ σφισι πῆμα μέγιστον.
Iliad 22.289	ἦ ῥα, καὶ ἀμπεπαλὼν προΐει δολιχόσκιον ἔγχος,
Iliad 22.290	καὶ βάλε Πηλεΐδαο μέσον σάκος οὐδʼ ἀφάμαρτε·
Iliad 22.291	τῆλε δʼ ἀπεπλάγχθη σάκεος δόρυ· χώσατο δʼ Ἕκτωρ
Iliad 22.292	ὅττί ῥά οἱ βέλος ὠκὺ ἐτώσιον ἔκφυγε χειρός,
Iliad 22.293	στῆ δὲ κατηφήσας, οὐδʼ ἄλλʼ ἔχε μείλινον ἔγχος.
Iliad 22.294	Δηΐφοβον δʼ ἐκάλει λευκάσπιδα μακρὸν ἀΰσας·
Iliad 22.295	ᾔτεέ μιν δόρυ μακρόν· ὃ δʼ οὔ τί οἱ ἐγγύθεν ἦεν.
Iliad 22.296	Ἕκτωρ δʼ ἔγνω ᾗσιν ἐνὶ φρεσὶ φώνησέν τε·
Iliad 22.297	ὢ πόποι ἦ μάλα δή με θεοὶ θάνατόνδε κάλεσσαν·
Iliad 22.298	Δηΐφοβον γὰρ ἔγωγʼ ἐφάμην ἥρωα παρεῖναι·
Iliad 22.299	ἀλλʼ ὃ μὲν ἐν τείχει, ἐμὲ δʼ ἐξαπάτησεν Ἀθήνη.
Iliad 22.300	νῦν δὲ δὴ ἐγγύθι μοι θάνατος κακός, οὐδʼ ἔτʼ ἄνευθεν,
Iliad 22.301	οὐδʼ ἀλέη· ἦ γάρ ῥα πάλαι τό γε φίλτερον ἦεν
Iliad 22.302	Ζηνί τε καὶ Διὸς υἷι ἑκηβόλῳ, οἵ με πάρος γε
Iliad 22.303	πρόφρονες εἰρύατο· νῦν αὖτέ με μοῖρα κιχάνει.
Iliad 22.304	μὴ μὰν ἀσπουδί γε καὶ ἀκλειῶς ἀπολοίμην,
Iliad 22.305	ἀλλὰ μέγα ῥέξας τι καὶ ἐσσομένοισι πυθέσθαι.
Iliad 22.306	ὣς ἄρα φωνήσας εἰρύσσατο φάσγανον ὀξύ,
Iliad 22.307	τό οἱ ὑπὸ λαπάρην τέτατο μέγα τε στιβαρόν τε,
Iliad 22.308	οἴμησεν δὲ ἀλεὶς ὥς τʼ αἰετὸς ὑψιπετήεις,
Iliad 22.309	ὅς τʼ εἶσιν πεδίον δὲ διὰ νεφέων ἐρεβεννῶν
Iliad 22.310	ἁρπάξων ἢ ἄρνʼ ἀμαλὴν ἤ πτῶκα λαγωόν·
Iliad 22.311	ὣς Ἕκτωρ οἴμησε τινάσσων φάσγανον ὀξύ.
Iliad 22.312	ὁρμήθη δʼ Ἀχιλεύς, μένεος δʼ ἐμπλήσατο θυμὸν
Iliad 22.313	ἀγρίου, πρόσθεν δὲ σάκος στέρνοιο κάλυψε
Iliad 22.314	καλὸν δαιδάλεον, κόρυθι δʼ ἐπένευε φαεινῇ
Iliad 22.315	τετραφάλῳ· καλαὶ δὲ περισσείοντο ἔθειραι
Iliad 22.316	χρύσεαι, ἃς Ἥφαιστος ἵει λόφον ἀμφὶ θαμειάς.
Iliad 22.317	οἷος δʼ ἀστὴρ εἶσι μετʼ ἀστράσι νυκτὸς ἀμολγῷ
Iliad 22.318	ἕσπερος, ὃς κάλλιστος ἐν οὐρανῷ ἵσταται ἀστήρ,
Iliad 22.319	ὣς αἰχμῆς ἀπέλαμπʼ εὐήκεος, ἣν ἄρʼ Ἀχιλλεὺς
Iliad 22.320	πάλλεν δεξιτερῇ φρονέων κακὸν Ἕκτορι δίῳ,
Iliad 22.321	εἰσορόων χρόα καλόν, ὅπῃ εἴξειε μάλιστα.
Iliad 22.322	τοῦ δὲ καὶ ἄλλο τόσον μὲν ἔχε χρόα χάλκεα τεύχεα,
Iliad 22.323	καλά, τὰ Πατρόκλοιο βίην ἐνάριξε κατακτάς·
Iliad 22.324	φαίνετο δʼ ᾗ κληῗδες ἀπʼ ὤμων αὐχένʼ ἔχουσι,
Iliad 22.325	λαυκανίην, ἵνα τε ψυχῆς ὤκιστος ὄλεθρος·
Iliad 22.326	τῇ ῥʼ ἐπὶ οἷ μεμαῶτʼ ἔλασʼ ἔγχεϊ δῖος Ἀχιλλεύς,
Iliad 22.327	ἀντικρὺ δʼ ἁπαλοῖο διʼ αὐχένος ἤλυθʼ ἀκωκή·
Iliad 22.328	οὐδʼ ἄρʼ ἀπʼ ἀσφάραγον μελίη τάμε χαλκοβάρεια,
Iliad 22.329	ὄφρά τί μιν προτιείποι ἀμειβόμενος ἐπέεσσιν.
Iliad 22.330	ἤριπε δʼ ἐν κονίῃς· ὃ δʼ ἐπεύξατο δῖος Ἀχιλλεύς·
Iliad 22.331	Ἕκτορ ἀτάρ που ἔφης Πατροκλῆʼ ἐξεναρίζων
Iliad 22.332	σῶς ἔσσεσθʼ, ἐμὲ δʼ οὐδὲν ὀπίζεο νόσφιν ἐόντα,
Iliad 22.333	νήπιε· τοῖο δʼ ἄνευθεν ἀοσσητὴρ μέγʼ ἀμείνων
Iliad 22.334	νηυσὶν ἔπι γλαφυρῇσιν ἐγὼ μετόπισθε λελείμμην,
Iliad 22.335	ὅς τοι γούνατʼ ἔλυσα· σὲ μὲν κύνες ἠδʼ οἰωνοὶ
Iliad 22.336	ἑλκήσουσʼ ἀϊκῶς, τὸν δὲ κτεριοῦσιν Ἀχαιοί.
Iliad 22.337	τὸν δʼ ὀλιγοδρανέων προσέφη κορυθαίολος Ἕκτωρ·
Iliad 22.338	λίσσομʼ ὑπὲρ ψυχῆς καὶ γούνων σῶν τε τοκήων,
Iliad 22.339	μή με ἔα παρὰ νηυσὶ κύνας καταδάψαι Ἀχαιῶν,
Iliad 22.340	ἀλλὰ σὺ μὲν χαλκόν τε ἅλις χρυσόν τε δέδεξο,
Iliad 22.341	δῶρα τά τοι δώσουσι πατὴρ καὶ πότνια μήτηρ,
Iliad 22.342	σῶμα δὲ οἴκαδʼ ἐμὸν δόμεναι πάλιν, ὄφρα πυρός με
Iliad 22.343	Τρῶες καὶ Τρώων ἄλοχοι λελάχωσι θανόντα.
Iliad 22.344	τὸν δʼ ἄρʼ ὑπόδρα ἰδὼν προσέφη πόδας ὠκὺς Ἀχιλλεὺς·
Iliad 22.345	μή με κύον γούνων γουνάζεο μὴ δὲ τοκήων·
Iliad 22.346	αἲ γάρ πως αὐτόν με μένος καὶ θυμὸς ἀνήη
Iliad 22.347	ὤμʼ ἀποταμνόμενον κρέα ἔδμεναι, οἷα ἔοργας,
Iliad 22.348	ὡς οὐκ ἔσθʼ ὃς σῆς γε κύνας κεφαλῆς ἀπαλάλκοι,
Iliad 22.349	οὐδʼ εἴ κεν δεκάκις τε καὶ εἰκοσινήριτʼ ἄποινα
Iliad 22.350	στήσωσʼ ἐνθάδʼ ἄγοντες, ὑπόσχωνται δὲ καὶ ἄλλα,
Iliad 22.351	οὐδʼ εἴ κέν σʼ αὐτὸν χρυσῷ ἐρύσασθαι ἀνώγοι
Iliad 22.352	Δαρδανίδης Πρίαμος· οὐδʼ ὧς σέ γε πότνια μήτηρ
Iliad 22.353	ἐνθεμένη λεχέεσσι γοήσεται ὃν τέκεν αὐτή,
Iliad 22.354	ἀλλὰ κύνες τε καὶ οἰωνοὶ κατὰ πάντα δάσονται.
Iliad 22.355	τὸν δὲ καταθνῄσκων προσέφη κορυθαίολος Ἕκτωρ·
Iliad 22.356	ἦ σʼ εὖ γιγνώσκων προτιόσσομαι, οὐδʼ ἄρʼ ἔμελλον
Iliad 22.357	πείσειν· ἦ γὰρ σοί γε σιδήρεος ἐν φρεσὶ θυμός.
Iliad 22.358	φράζεο νῦν, μή τοί τι θεῶν μήνιμα γένωμαι
Iliad 22.359	ἤματι τῷ ὅτε κέν σε Πάρις καὶ Φοῖβος Ἀπόλλων
Iliad 22.360	ἐσθλὸν ἐόντʼ ὀλέσωσιν ἐνὶ Σκαιῇσι πύλῃσιν.
Iliad 22.361	ὣς ἄρα μιν εἰπόντα τέλος θανάτοιο κάλυψε,
Iliad 22.362	ψυχὴ δʼ ἐκ ῥεθέων πταμένη Ἄϊδος δὲ βεβήκει
Iliad 22.363	ὃν πότμον γοόωσα λιποῦσʼ ἀνδροτῆτα καὶ ἥβην.
Iliad 22.364	τὸν καὶ τεθνηῶτα προσηύδα δῖος Ἀχιλλεύς·
Iliad 22.365	τέθναθι· κῆρα δʼ ἐγὼ τότε δέξομαι ὁππότε κεν δὴ
Iliad 22.366	Ζεὺς ἐθέλῃ τελέσαι ἠδʼ ἀθάνατοι θεοὶ ἄλλοι.
Iliad 22.367	ἦ ῥα, καὶ ἐκ νεκροῖο ἐρύσσατο χάλκεον ἔγχος,
Iliad 22.368	καὶ τό γʼ ἄνευθεν ἔθηχʼ, ὃ δʼ ἀπʼ ὤμων τεύχεʼ ἐσύλα
Iliad 22.369	αἱματόεντʼ· ἄλλοι δὲ περίδραμον υἷες Ἀχαιῶν,
Iliad 22.370	οἳ καὶ θηήσαντο φυὴν καὶ εἶδος ἀγητὸν
Iliad 22.371	Ἕκτορος· οὐδʼ ἄρα οἵ τις ἀνουτητί γε παρέστη.
Iliad 22.372	ὧδε δέ τις εἴπεσκεν ἰδὼν ἐς πλησίον ἄλλον·
Iliad 22.373	ὢ πόποι, ἦ μάλα δὴ μαλακώτερος ἀμφαφάασθαι
Iliad 22.374	Ἕκτωρ ἢ ὅτε νῆας ἐνέπρησεν πυρὶ κηλέῳ.
Iliad 22.375	ὣς ἄρα τις εἴπεσκε καὶ οὐτήσασκε παραστάς.
Iliad 22.376	τὸν δʼ ἐπεὶ ἐξενάριξε ποδάρκης δῖος Ἀχιλλεύς,
Iliad 22.377	στὰς ἐν Ἀχαιοῖσιν ἔπεα πτερόεντʼ ἀγόρευεν·
Iliad 22.378	ὦ φίλοι Ἀργείων ἡγήτορες ἠδὲ μέδοντες
Iliad 22.379	ἐπεὶ δὴ τόνδʼ ἄνδρα θεοὶ δαμάσασθαι ἔδωκαν,
Iliad 22.380	ὃς κακὰ πόλλʼ ἔρρεξεν ὅσʼ οὐ σύμπαντες οἱ ἄλλοι,
Iliad 22.381	εἰ δʼ ἄγετʼ ἀμφὶ πόλιν σὺν τεύχεσι πειρηθῶμεν,
Iliad 22.382	ὄφρά κʼ ἔτι γνῶμεν Τρώων νόον ὅν τινʼ ἔχουσιν,
Iliad 22.383	ἢ καταλείψουσιν πόλιν ἄκρην τοῦδε πεσόντος,
Iliad 22.384	ἦε μένειν μεμάασι καὶ Ἕκτορος οὐκέτʼ ἐόντος.
Iliad 22.385	ἀλλὰ τί ἤ μοι ταῦτα φίλος διελέξατο θυμός;
Iliad 22.386	κεῖται πὰρ νήεσσι νέκυς ἄκλαυτος ἄθαπτος
Iliad 22.387	Πάτροκλος· τοῦ δʼ οὐκ ἐπιλήσομαι, ὄφρʼ ἂν ἔγωγε
Iliad 22.388	ζωοῖσιν μετέω καί μοι φίλα γούνατʼ ὀρώρῃ·
Iliad 22.389	εἰ δὲ θανόντων περ καταλήθοντʼ εἰν Ἀΐδαο
Iliad 22.390	αὐτὰρ ἐγὼ καὶ κεῖθι φίλου μεμνήσομʼ ἑταίρου.
Iliad 22.391	νῦν δʼ ἄγʼ ἀείδοντες παιήονα κοῦροι Ἀχαιῶν
Iliad 22.392	νηυσὶν ἔπι γλαφυρῇσι νεώμεθα, τόνδε δʼ ἄγωμεν.
Iliad 22.393	ἠράμεθα μέγα κῦδος· ἐπέφνομεν Ἕκτορα δῖον,
Iliad 22.394	ᾧ Τρῶες κατὰ ἄστυ θεῷ ὣς εὐχετόωντο.
Iliad 22.395	ἦ ῥα, καὶ Ἕκτορα δῖον ἀεικέα μήδετο ἔργα.
Iliad 22.396	ἀμφοτέρων μετόπισθε ποδῶν τέτρηνε τένοντε
Iliad 22.397	ἐς σφυρὸν ἐκ πτέρνης, βοέους δʼ ἐξῆπτεν ἱμάντας,
Iliad 22.398	ἐκ δίφροιο δʼ ἔδησε, κάρη δʼ ἕλκεσθαι ἔασεν·
Iliad 22.399	ἐς δίφρον δʼ ἀναβὰς ἀνά τε κλυτὰ τεύχεʼ ἀείρας
Iliad 22.400	μάστιξέν ῥʼ ἐλάαν, τὼ δʼ οὐκ ἀέκοντε πετέσθην.
Iliad 22.401	τοῦ δʼ ἦν ἑλκομένοιο κονίσαλος, ἀμφὶ δὲ χαῖται
Iliad 22.402	κυάνεαι πίτναντο, κάρη δʼ ἅπαν ἐν κονίῃσι
Iliad 22.403	κεῖτο πάρος χαρίεν· τότε δὲ Ζεὺς δυσμενέεσσι
Iliad 22.404	δῶκεν ἀεικίσσασθαι ἑῇ ἐν πατρίδι γαίῃ.
Iliad 22.405	ὣς τοῦ μὲν κεκόνιτο κάρη ἅπαν· ἣ δέ νυ μήτηρ
Iliad 22.406	τίλλε κόμην, ἀπὸ δὲ λιπαρὴν ἔρριψε καλύπτρην
Iliad 22.407	τηλόσε, κώκυσεν δὲ μάλα μέγα παῖδʼ ἐσιδοῦσα·
Iliad 22.408	ᾤμωξεν δʼ ἐλεεινὰ πατὴρ φίλος, ἀμφὶ δὲ λαοὶ
Iliad 22.409	κωκυτῷ τʼ εἴχοντο καὶ οἰμωγῇ κατὰ ἄστυ.
Iliad 22.410	τῷ δὲ μάλιστʼ ἄρʼ ἔην ἐναλίγκιον ὡς εἰ ἅπασα
Iliad 22.411	Ἴλιος ὀφρυόεσσα πυρὶ σμύχοιτο κατʼ ἄκρης.
Iliad 22.412	λαοὶ μέν ῥα γέροντα μόγις ἔχον ἀσχαλόωντα
Iliad 22.413	ἐξελθεῖν μεμαῶτα πυλάων Δαρδανιάων.
Iliad 22.414	πάντας δʼ ἐλλιτάνευε κυλινδόμενος κατὰ κόπρον,
Iliad 22.415	ἐξονομακλήδην ὀνομάζων ἄνδρα ἕκαστον·
Iliad 22.416	σχέσθε φίλοι, καί μʼ οἶον ἐάσατε κηδόμενοί περ
Iliad 22.417	ἐξελθόντα πόληος ἱκέσθʼ ἐπὶ νῆας Ἀχαιῶν.
Iliad 22.418	λίσσωμʼ ἀνέρα τοῦτον ἀτάσθαλον ὀβριμοεργόν,
Iliad 22.419	ἤν πως ἡλικίην αἰδέσσεται ἠδʼ ἐλεήσῃ
Iliad 22.420	γῆρας· καὶ δέ νυ τῷ γε πατὴρ τοιόσδε τέτυκται
Iliad 22.421	Πηλεύς, ὅς μιν ἔτικτε καὶ ἔτρεφε πῆμα γενέσθαι
Iliad 22.422	Τρωσί· μάλιστα δʼ ἐμοὶ περὶ πάντων ἄλγεʼ ἔθηκε.
Iliad 22.423	τόσσους γάρ μοι παῖδας ἀπέκτανε τηλεθάοντας·
Iliad 22.424	τῶν πάντων οὐ τόσσον ὀδύρομαι ἀχνύμενός περ
Iliad 22.425	ὡς ἑνός, οὗ μʼ ἄχος ὀξὺ κατοίσεται Ἄϊδος εἴσω,
Iliad 22.426	Ἕκτορος· ὡς ὄφελεν θανέειν ἐν χερσὶν ἐμῇσι·
Iliad 22.427	τώ κε κορεσσάμεθα κλαίοντέ τε μυρομένω τε
Iliad 22.428	μήτηρ θʼ, ἥ μιν ἔτικτε δυσάμμορος, ἠδʼ ἐγὼ αὐτός.
Iliad 22.429	ὣς ἔφατο κλαίων, ἐπὶ δὲ στενάχοντο πολῖται·
Iliad 22.430	Τρῳῇσιν δʼ Ἑκάβη ἁδινοῦ ἐξῆρχε γόοιο·
Iliad 22.431	τέκνον ἐγὼ δειλή· τί νυ βείομαι αἰνὰ παθοῦσα
Iliad 22.432	σεῦ ἀποτεθνηῶτος; ὅ μοι νύκτάς τε καὶ ἦμαρ
Iliad 22.433	εὐχωλὴ κατὰ ἄστυ πελέσκεο, πᾶσί τʼ ὄνειαρ
Iliad 22.434	Τρωσί τε καὶ Τρῳῇσι κατὰ πτόλιν, οἵ σε θεὸν ὣς
Iliad 22.435	δειδέχατʼ· ἦ γὰρ καί σφι μάλα μέγα κῦδος ἔησθα
Iliad 22.436	ζωὸς ἐών· νῦν αὖ θάνατος καὶ μοῖρα κιχάνει.
Iliad 22.437	ὣς ἔφατο κλαίουσʼ, ἄλοχος δʼ οὔ πώ τι πέπυστο
Iliad 22.438	Ἕκτορος· οὐ γάρ οἵ τις ἐτήτυμος ἄγγελος ἐλθὼν
Iliad 22.439	ἤγγειλʼ ὅττί ῥά οἱ πόσις ἔκτοθι μίμνε πυλάων,
Iliad 22.440	ἀλλʼ ἥ γʼ ἱστὸν ὕφαινε μυχῷ δόμου ὑψηλοῖο
Iliad 22.441	δίπλακα πορφυρέην, ἐν δὲ θρόνα ποικίλʼ ἔπασσε.
Iliad 22.442	κέκλετο δʼ ἀμφιπόλοισιν ἐϋπλοκάμοις κατὰ δῶμα
Iliad 22.443	ἀμφὶ πυρὶ στῆσαι τρίποδα μέγαν, ὄφρα πέλοιτο
Iliad 22.444	Ἕκτορι θερμὰ λοετρὰ μάχης ἐκ νοστήσαντι
Iliad 22.445	νηπίη, οὐδʼ ἐνόησεν ὅ μιν μάλα τῆλε λοετρῶν
Iliad 22.446	χερσὶν Ἀχιλλῆος δάμασε γλαυκῶπις Ἀθήνη.
Iliad 22.447	κωκυτοῦ δʼ ἤκουσε καὶ οἰμωγῆς ἀπὸ πύργου·
Iliad 22.448	τῆς δʼ ἐλελίχθη γυῖα, χαμαὶ δέ οἱ ἔκπεσε κερκίς·
Iliad 22.449	ἣ δʼ αὖτις δμῳῇσιν ἐϋπλοκάμοισι μετηύδα·
Iliad 22.450	δεῦτε δύω μοι ἕπεσθον, ἴδωμʼ ὅτινʼ ἔργα τέτυκται.
Iliad 22.451	αἰδοίης ἑκυρῆς ὀπὸς ἔκλυον, ἐν δʼ ἐμοὶ αὐτῇ
Iliad 22.452	στήθεσι πάλλεται ἦτορ ἀνὰ στόμα, νέρθε δὲ γοῦνα
Iliad 22.453	πήγνυται· ἐγγὺς δή τι κακὸν Πριάμοιο τέκεσσιν.
Iliad 22.454	αἲ γὰρ ἀπʼ οὔατος εἴη ἐμεῦ ἔπος· ἀλλὰ μάλʼ αἰνῶς
Iliad 22.455	δείδω μὴ δή μοι θρασὺν Ἕκτορα δῖος Ἀχιλλεὺς
Iliad 22.456	μοῦνον ἀποτμήξας πόλιος πεδίον δὲ δίηται,
Iliad 22.457	καὶ δή μιν καταπαύσῃ ἀγηνορίης ἀλεγεινῆς
Iliad 22.458	ἥ μιν ἔχεσκʼ, ἐπεὶ οὔ ποτʼ ἐνὶ πληθυῖ μένεν ἀνδρῶν,
Iliad 22.459	ἀλλὰ πολὺ προθέεσκε, τὸ ὃν μένος οὐδενὶ εἴκων.
Iliad 22.460	ὣς φαμένη μεγάροιο διέσσυτο μαινάδι ἴση
Iliad 22.461	παλλομένη κραδίην· ἅμα δʼ ἀμφίπολοι κίον αὐτῇ
Iliad 22.462	αὐτὰρ ἐπεὶ πύργόν τε καὶ ἀνδρῶν ἷξεν ὅμιλον
Iliad 22.463	ἔστη παπτήνασʼ ἐπὶ τείχεϊ, τὸν δὲ νόησεν
Iliad 22.464	ἑλκόμενον πρόσθεν πόλιος· ταχέες δέ μιν ἵπποι
Iliad 22.465	ἕλκον ἀκηδέστως κοίλας ἐπὶ νῆας Ἀχαιῶν.
Iliad 22.466	τὴν δὲ κατʼ ὀφθαλμῶν ἐρεβεννὴ νὺξ ἐκάλυψεν,
Iliad 22.467	ἤριπε δʼ ἐξοπίσω, ἀπὸ δὲ ψυχὴν ἐκάπυσσε.
Iliad 22.468	τῆλε δʼ ἀπὸ κρατὸς βάλε δέσματα σιγαλόεντα,
Iliad 22.469	ἄμπυκα κεκρύφαλόν τε ἰδὲ πλεκτὴν ἀναδέσμην
Iliad 22.470	κρήδεμνόν θʼ, ὅ ῥά οἱ δῶκε χρυσῆ Ἀφροδίτη
Iliad 22.471	ἤματι τῷ ὅτε μιν κορυθαίολος ἠγάγεθʼ Ἕκτωρ
Iliad 22.472	ἐκ δόμου Ἠετίωνος, ἐπεὶ πόρε μυρία ἕδνα.
Iliad 22.473	ἀμφὶ δέ μιν γαλόῳ τε καὶ εἰνατέρες ἅλις ἔσταν,
Iliad 22.474	αἵ ἑ μετὰ σφίσιν εἶχον ἀτυζομένην ἀπολέσθαι.
Iliad 22.475	ἣ δʼ ἐπεὶ οὖν ἔμπνυτο καὶ ἐς φρένα θυμὸς ἀγέρθη
Iliad 22.476	ἀμβλήδην γοόωσα μετὰ Τρῳῇσιν ἔειπεν·
Iliad 22.477	Ἕκτορ ἐγὼ δύστηνος· ἰῇ ἄρα γεινόμεθʼ αἴσῃ
Iliad 22.478	ἀμφότεροι, σὺ μὲν ἐν Τροίῃ Πριάμου κατὰ δῶμα,
Iliad 22.479	αὐτὰρ ἐγὼ Θήβῃσιν ὑπὸ Πλάκῳ ὑληέσσῃ
Iliad 22.480	ἐν δόμῳ Ἠετίωνος, ὅ μʼ ἔτρεφε τυτθὸν ἐοῦσαν
Iliad 22.481	δύσμορος αἰνόμορον· ὡς μὴ ὤφελλε τεκέσθαι.
Iliad 22.482	νῦν δὲ σὺ μὲν Ἀΐδαο δόμους ὑπὸ κεύθεσι γαίης
Iliad 22.483	ἔρχεαι, αὐτὰρ ἐμὲ στυγερῷ ἐνὶ πένθεϊ λείπεις
Iliad 22.484	χήρην ἐν μεγάροισι· πάϊς δʼ ἔτι νήπιος αὔτως,
Iliad 22.485	ὃν τέκομεν σύ τʼ ἐγώ τε δυσάμμοροι· οὔτε σὺ τούτῳ
Iliad 22.486	ἔσσεαι Ἕκτορ ὄνειαρ ἐπεὶ θάνες, οὔτε σοὶ οὗτος.
Iliad 22.487	ἤν περ γὰρ πόλεμόν γε φύγῃ πολύδακρυν Ἀχαιῶν,
Iliad 22.488	αἰεί τοι τούτῳ γε πόνος καὶ κήδεʼ ὀπίσσω
Iliad 22.489	ἔσσοντʼ· ἄλλοι γάρ οἱ ἀπουρίσσουσιν ἀρούρας.
Iliad 22.490	ἦμαρ δʼ ὀρφανικὸν παναφήλικα παῖδα τίθησι·
Iliad 22.491	πάντα δʼ ὑπεμνήμυκε, δεδάκρυνται δὲ παρειαί,
Iliad 22.492	δευόμενος δέ τʼ ἄνεισι πάϊς ἐς πατρὸς ἑταίρους,
Iliad 22.493	ἄλλον μὲν χλαίνης ἐρύων, ἄλλον δὲ χιτῶνος·
Iliad 22.494	τῶν δʼ ἐλεησάντων κοτύλην τις τυτθὸν ἐπέσχε·
Iliad 22.495	χείλεα μέν τʼ ἐδίηνʼ, ὑπερῴην δʼ οὐκ ἐδίηνε.
Iliad 22.496	τὸν δὲ καὶ ἀμφιθαλὴς ἐκ δαιτύος ἐστυφέλιξε
Iliad 22.497	χερσὶν πεπλήγων καὶ ὀνειδείοισιν ἐνίσσων·
Iliad 22.498	ἔρρʼ οὕτως· οὐ σός γε πατὴρ μεταδαίνυται ἡμῖν.
Iliad 22.499	δακρυόεις δέ τʼ ἄνεισι πάϊς ἐς μητέρα χήρην
Iliad 22.500	Ἀστυάναξ, ὃς πρὶν μὲν ἑοῦ ἐπὶ γούνασι πατρὸς
Iliad 22.501	μυελὸν οἶον ἔδεσκε καὶ οἰῶν πίονα δημόν·
Iliad 22.502	αὐτὰρ ὅθʼ ὕπνος ἕλοι, παύσαιτό τε νηπιαχεύων,
Iliad 22.503	εὕδεσκʼ ἐν λέκτροισιν ἐν ἀγκαλίδεσσι τιθήνης
Iliad 22.504	εὐνῇ ἔνι μαλακῇ θαλέων ἐμπλησάμενος κῆρ·
Iliad 22.505	νῦν δʼ ἂν πολλὰ πάθῃσι φίλου ἀπὸ πατρὸς ἁμαρτὼν
Iliad 22.506	Ἀστυάναξ, ὃν Τρῶες ἐπίκλησιν καλέουσιν·
Iliad 22.507	οἶος γάρ σφιν ἔρυσο πύλας καὶ τείχεα μακρά.
Iliad 22.508	νῦν δὲ σὲ μὲν παρὰ νηυσὶ κορωνίσι νόσφι τοκήων
Iliad 22.509	αἰόλαι εὐλαὶ ἔδονται, ἐπεί κε κύνες κορέσωνται
Iliad 22.510	γυμνόν· ἀτάρ τοι εἵματʼ ἐνὶ μεγάροισι κέονται
Iliad 22.511	λεπτά τε καὶ χαρίεντα τετυγμένα χερσὶ γυναικῶν.
Iliad 22.512	ἀλλʼ ἤτοι τάδε πάντα καταφλέξω πυρὶ κηλέῳ
Iliad 22.513	οὐδὲν σοί γʼ ὄφελος, ἐπεὶ οὐκ ἐγκείσεαι αὐτοῖς,
Iliad 22.514	ἀλλὰ πρὸς Τρώων καὶ Τρωϊάδων κλέος εἶναι.
Iliad 22.515	ὣς ἔφατο κλαίουσʼ, ἐπὶ δὲ στενάχοντο γυναῖκες.
Iliad 23.1	ὣς οἳ μὲν στενάχοντο κατὰ πτόλιν· αὐτὰρ Ἀχαιοὶ
Iliad 23.2	ἐπεὶ δὴ νῆάς τε καὶ Ἑλλήσποντον ἵκοντο,
Iliad 23.3	οἳ μὲν ἄρʼ ἐσκίδναντο ἑὴν ἐπὶ νῆα ἕκαστος,
Iliad 23.4	Μυρμιδόνας δʼ οὐκ εἴα ἀποσκίδνασθαι Ἀχιλλεύς,
Iliad 23.5	ἀλλʼ ὅ γε οἷς ἑτάροισι φιλοπτολέμοισι μετηύδα·
Iliad 23.6	Μυρμιδόνες ταχύπωλοι ἐμοὶ ἐρίηρες ἑταῖροι
Iliad 23.7	μὴ δή πω ὑπʼ ὄχεσφι λυώμεθα μώνυχας ἵππους,
Iliad 23.8	ἀλλʼ αὐτοῖς ἵπποισι καὶ ἅρμασιν ἆσσον ἰόντες
Iliad 23.9	Πάτροκλον κλαίωμεν· ὃ γὰρ γέρας ἐστὶ θανόντων.
Iliad 23.10	αὐτὰρ ἐπεί κʼ ὀλοοῖο τεταρπώμεσθα γόοιο,
Iliad 23.11	ἵππους λυσάμενοι δορπήσομεν ἐνθάδε πάντες.
Iliad 23.12	ὣς ἔφαθʼ, οἳ δʼ ᾤμωξαν ἀολλέες, ἦρχε δʼ Ἀχιλλεύς.
Iliad 23.13	οἳ δὲ τρὶς περὶ νεκρὸν ἐΰτριχας ἤλασαν ἵππους
Iliad 23.14	μυρόμενοι· μετὰ δέ σφι Θέτις γόου ἵμερον ὦρσε.
Iliad 23.15	δεύοντο ψάμαθοι, δεύοντο δὲ τεύχεα φωτῶν
Iliad 23.16	δάκρυσι· τοῖον γὰρ πόθεον μήστωρα φόβοιο.
Iliad 23.17	τοῖσι δὲ Πηλεΐδης ἁδινοῦ ἐξῆρχε γόοιο
Iliad 23.18	χεῖρας ἐπʼ ἀνδροφόνους θέμενος στήθεσσιν ἑταίρου·
Iliad 23.19	χαῖρέ μοι ὦ Πάτροκλε καὶ εἰν Ἀΐδαο δόμοισι·
Iliad 23.20	πάντα γὰρ ἤδη τοι τελέω τὰ πάροιθεν ὑπέστην
Iliad 23.21	Ἕκτορα δεῦρʼ ἐρύσας δώσειν κυσὶν ὠμὰ δάσασθαι,
Iliad 23.22	δώδεκα δὲ προπάροιθε πυρῆς ἀποδειροτομήσειν
Iliad 23.23	Τρώων ἀγλαὰ τέκνα σέθεν κταμένοιο χολωθείς.
Iliad 23.24	ἦ ῥα καὶ Ἕκτορα δῖον ἀεικέα μήδετο ἔργα
Iliad 23.25	πρηνέα πὰρ λεχέεσσι Μενοιτιάδαο τανύσσας
Iliad 23.26	ἐν κονίῃς· οἳ δʼ ἔντεʼ ἀφωπλίζοντο ἕκαστος
Iliad 23.27	χάλκεα μαρμαίροντα, λύον δʼ ὑψηχέας ἵππους,
Iliad 23.28	κὰδ δʼ ἷζον παρὰ νηῒ ποδώκεος Αἰακίδαο
Iliad 23.29	μυρίοι· αὐτὰρ ὃ τοῖσι τάφον μενοεικέα δαίνυ.
Iliad 23.30	πολλοὶ μὲν βόες ἀργοὶ ὀρέχθεον ἀμφὶ σιδήρῳ
Iliad 23.31	σφαζόμενοι, πολλοὶ δʼ ὄϊες καὶ μηκάδες αἶγες·
Iliad 23.32	πολλοὶ δʼ ἀργιόδοντες ὕες θαλέθοντες ἀλοιφῇ
Iliad 23.33	εὑόμενοι τανύοντο διὰ φλογὸς Ἡφαίστοιο·
Iliad 23.34	πάντῃ δʼ ἀμφὶ νέκυν κοτυλήρυτον ἔρρεεν αἷμα.
Iliad 23.35	αὐτὰρ τόν γε ἄνακτα ποδώκεα Πηλεΐωνα
Iliad 23.36	εἰς Ἀγαμέμνονα δῖον ἄγον βασιλῆες Ἀχαιῶν
Iliad 23.37	σπουδῇ παρπεπιθόντες ἑταίρου χωόμενον κῆρ.
Iliad 23.38	οἳ δʼ ὅτε δὴ κλισίην Ἀγαμέμνονος ἷξον ἰόντες,
Iliad 23.39	αὐτίκα κηρύκεσσι λιγυφθόγγοισι κέλευσαν
Iliad 23.40	ἀμφὶ πυρὶ στῆσαι τρίποδα μέγαν, εἰ πεπίθοιεν
Iliad 23.41	Πηλεΐδην λούσασθαι ἄπο βρότον αἱματόεντα.
Iliad 23.42	αὐτὰρ ὅ γʼ ἠρνεῖτο στερεῶς, ἐπὶ δʼ ὅρκον ὄμοσσεν·
Iliad 23.43	οὐ μὰ Ζῆνʼ, ὅς τίς τε θεῶν ὕπατος καὶ ἄριστος,
Iliad 23.44	οὐ θέμις ἐστὶ λοετρὰ καρήατος ἆσσον ἱκέσθαι
Iliad 23.45	πρίν γʼ ἐνὶ Πάτροκλον θέμεναι πυρὶ σῆμά τε χεῦαι
Iliad 23.46	κείρασθαί τε κόμην, ἐπεὶ οὔ μʼ ἔτι δεύτερον ὧδε
Iliad 23.47	ἵξετʼ ἄχος κραδίην ὄφρα ζωοῖσι μετείω.
Iliad 23.48	ἀλλʼ ἤτοι νῦν μὲν στυγερῇ πειθώμεθα δαιτί·
Iliad 23.49	ἠῶθεν δʼ ὄτρυνον ἄναξ ἀνδρῶν Ἀγάμεμνον
Iliad 23.50	ὕλην τʼ ἀξέμεναι παρά τε σχεῖν ὅσσʼ ἐπιεικὲς
Iliad 23.51	νεκρὸν ἔχοντα νέεσθαι ὑπὸ ζόφον ἠερόεντα,
Iliad 23.52	ὄφρʼ ἤτοι τοῦτον μὲν ἐπιφλέγῃ ἀκάματον πῦρ
Iliad 23.53	θᾶσσον ἀπʼ ὀφθαλμῶν, λαοὶ δʼ ἐπὶ ἔργα τράπωνται.
Iliad 23.54	ὣς ἔφαθʼ, οἳ δʼ ἄρα τοῦ μάλα μὲν κλύον ἠδὲ πίθοντο.
Iliad 23.55	ἐσσυμένως δʼ ἄρα δόρπον ἐφοπλίσσαντες ἕκαστοι
Iliad 23.56	δαίνυντʼ, οὐδέ τι θυμὸς ἐδεύετο δαιτὸς ἐΐσης.
Iliad 23.57	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Iliad 23.58	οἳ μὲν κακκείοντες ἔβαν κλισίην δὲ ἕκαστος,
Iliad 23.59	Πηλεΐδης δʼ ἐπὶ θινὶ πολυφλοίσβοιο θαλάσσης
Iliad 23.60	κεῖτο βαρὺ στενάχων πολέσιν μετὰ Μυρμιδόνεσσιν
Iliad 23.61	ἐν καθαρῷ, ὅθι κύματʼ ἐπʼ ἠϊόνος κλύζεσκον·
Iliad 23.62	εὖτε τὸν ὕπνος ἔμαρπτε λύων μελεδήματα θυμοῦ
Iliad 23.63	νήδυμος ἀμφιχυθείς· μάλα γὰρ κάμε φαίδιμα γυῖα
Iliad 23.64	Ἕκτορʼ ἐπαΐσσων προτὶ Ἴλιον ἠνεμόεσσαν·
Iliad 23.65	ἦλθε δʼ ἐπὶ ψυχὴ Πατροκλῆος δειλοῖο
Iliad 23.66	πάντʼ αὐτῷ μέγεθός τε καὶ ὄμματα κάλʼ ἐϊκυῖα
Iliad 23.67	καὶ φωνήν, καὶ τοῖα περὶ χροῒ εἵματα ἕστο·
Iliad 23.68	στῆ δʼ ἄρʼ ὑπὲρ κεφαλῆς καί μιν πρὸς μῦθον ἔειπεν·
Iliad 23.69	εὕδεις, αὐτὰρ ἐμεῖο λελασμένος ἔπλευ Ἀχιλλεῦ.
Iliad 23.70	οὐ μέν μευ ζώοντος ἀκήδεις, ἀλλὰ θανόντος·
Iliad 23.71	θάπτέ με ὅττι τάχιστα πύλας Ἀΐδαο περήσω.
Iliad 23.72	τῆλέ με εἴργουσι ψυχαὶ εἴδωλα καμόντων,
Iliad 23.73	οὐδέ μέ πω μίσγεσθαι ὑπὲρ ποταμοῖο ἐῶσιν,
Iliad 23.74	ἀλλʼ αὔτως ἀλάλημαι ἀνʼ εὐρυπυλὲς Ἄϊδος δῶ.
Iliad 23.75	καί μοι δὸς τὴν χεῖρʼ· ὀλοφύρομαι, οὐ γὰρ ἔτʼ αὖτις
Iliad 23.76	νίσομαι ἐξ Ἀΐδαο, ἐπήν με πυρὸς λελάχητε.
Iliad 23.77	οὐ μὲν γὰρ ζωοί γε φίλων ἀπάνευθεν ἑταίρων
Iliad 23.78	βουλὰς ἑζόμενοι βουλεύσομεν, ἀλλʼ ἐμὲ μὲν κὴρ
Iliad 23.79	ἀμφέχανε στυγερή, ἥ περ λάχε γιγνόμενόν περ·
Iliad 23.80	καὶ δὲ σοὶ αὐτῷ μοῖρα, θεοῖς ἐπιείκελʼ Ἀχιλλεῦ,
Iliad 23.81	τείχει ὕπο Τρώων εὐηφενέων ἀπολέσθαι.
Iliad 23.82	ἄλλο δέ τοι ἐρέω καὶ ἐφήσομαι αἴ κε πίθηαι·
Iliad 23.83	μὴ ἐμὰ σῶν ἀπάνευθε τιθήμεναι ὀστέʼ Ἀχιλλεῦ,
Iliad 23.84	ἀλλʼ ὁμοῦ ὡς ἐτράφημεν ἐν ὑμετέροισι δόμοισιν,
Iliad 23.85	εὖτέ με τυτθὸν ἐόντα Μενοίτιος ἐξ Ὀπόεντος
Iliad 23.86	ἤγαγεν ὑμέτερόνδʼ ἀνδροκτασίης ὕπο λυγρῆς,
Iliad 23.87	ἤματι τῷ ὅτε παῖδα κατέκτανον Ἀμφιδάμαντος
Iliad 23.88	νήπιος οὐκ ἐθέλων ἀμφʼ ἀστραγάλοισι χολωθείς·
Iliad 23.89	ἔνθά με δεξάμενος ἐν δώμασιν ἱππότα Πηλεὺς
Iliad 23.90	ἔτραφέ τʼ ἐνδυκέως καὶ σὸν θεράποντʼ ὀνόμηνεν·
Iliad 23.91	ὣς δὲ καὶ ὀστέα νῶϊν ὁμὴ σορὸς ἀμφικαλύπτοι
Iliad 23.92	χρύσεος ἀμφιφορεύς, τόν τοι πόρε πότνια μήτηρ.
Iliad 23.93	τὸν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 23.94	τίπτέ μοι ἠθείη κεφαλὴ δεῦρʼ εἰλήλουθας
Iliad 23.95	καί μοι ταῦτα ἕκαστʼ ἐπιτέλλεαι; αὐτὰρ ἐγώ τοι
Iliad 23.96	πάντα μάλʼ ἐκτελέω καὶ πείσομαι ὡς σὺ κελεύεις.
Iliad 23.97	ἀλλά μοι ἆσσον στῆθι· μίνυνθά περ ἀμφιβαλόντε
Iliad 23.98	ἀλλήλους ὀλοοῖο τεταρπώμεσθα γόοιο.
Iliad 23.99	ὣς ἄρα φωνήσας ὠρέξατο χερσὶ φίλῃσιν
Iliad 23.100	οὐδʼ ἔλαβε· ψυχὴ δὲ κατὰ χθονὸς ἠΰτε καπνὸς
Iliad 23.101	ᾤχετο τετριγυῖα· ταφὼν δʼ ἀνόρουσεν Ἀχιλλεὺς
Iliad 23.102	χερσί τε συμπλατάγησεν, ἔπος δʼ ὀλοφυδνὸν ἔειπεν·
Iliad 23.103	ὢ πόποι ἦ ῥά τίς ἐστι καὶ εἰν Ἀΐδαο δόμοισι
Iliad 23.104	ψυχὴ καὶ εἴδωλον, ἀτὰρ φρένες οὐκ ἔνι πάμπαν·
Iliad 23.105	παννυχίη γάρ μοι Πατροκλῆος δειλοῖο
Iliad 23.106	ψυχὴ ἐφεστήκει γοόωσά τε μυρομένη τε,
Iliad 23.107	καί μοι ἕκαστʼ ἐπέτελλεν, ἔϊκτο δὲ θέσκελον αὐτῷ.
Iliad 23.108	ὣς φάτο, τοῖσι δὲ πᾶσιν ὑφʼ ἵμερον ὦρσε γόοιο·
Iliad 23.109	μυρομένοισι δὲ τοῖσι φάνη ῥοδοδάκτυλος Ἠὼς
Iliad 23.110	ἀμφὶ νέκυν ἐλεεινόν. ἀτὰρ κρείων Ἀγαμέμνων
Iliad 23.111	οὐρῆάς τʼ ὄτρυνε καὶ ἀνέρας ἀξέμεν ὕλην
Iliad 23.112	πάντοθεν ἐκ κλισιῶν· ἐπὶ δʼ ἀνὴρ ἐσθλὸς ὀρώρει
Iliad 23.113	Μηριόνης θεράπων ἀγαπήνορος Ἰδομενῆος.
Iliad 23.114	οἳ δʼ ἴσαν ὑλοτόμους πελέκεας ἐν χερσὶν ἔχοντες
Iliad 23.115	σειράς τʼ εὐπλέκτους· πρὸ δʼ ἄρʼ οὐρῆες κίον αὐτῶν.
Iliad 23.116	πολλὰ δʼ ἄναντα κάταντα πάραντά τε δόχμιά τʼ ἦλθον·
Iliad 23.117	ἀλλʼ ὅτε δὴ κνημοὺς προσέβαν πολυπίδακος Ἴδης,
Iliad 23.118	αὐτίκʼ ἄρα δρῦς ὑψικόμους ταναήκεϊ χαλκῷ
Iliad 23.119	τάμνον ἐπειγόμενοι· ταὶ δὲ μεγάλα κτυπέουσαι
Iliad 23.120	πῖπτον· τὰς μὲν ἔπειτα διαπλήσσοντες Ἀχαιοὶ
Iliad 23.121	ἔκδεον ἡμιόνων· ταὶ δὲ χθόνα ποσσὶ δατεῦντο
Iliad 23.122	ἐλδόμεναι πεδίοιο διὰ ῥωπήϊα πυκνά.
Iliad 23.123	πάντες δʼ ὑλοτόμοι φιτροὺς φέρον· ὡς γὰρ ἀνώγει
Iliad 23.124	Μηριόνης θεράπων ἀγαπήνορος Ἰδομενῆος.
Iliad 23.125	κὰδ δʼ ἄρʼ ἐπʼ ἀκτῆς βάλλον ἐπισχερώ, ἔνθʼ ἄρʼ Ἀχιλλεὺς
Iliad 23.126	φράσσατο Πατρόκλῳ μέγα ἠρίον ἠδὲ οἷ αὐτῷ.
Iliad 23.127	αὐτὰρ ἐπεὶ πάντῃ παρακάββαλον ἄσπετον ὕλην
Iliad 23.128	ἥατʼ ἄρʼ αὖθι μένοντες ἀολλέες. αὐτὰρ Ἀχιλλεὺς
Iliad 23.129	αὐτίκα Μυρμιδόνεσσι φιλοπτολέμοισι κέλευσε
Iliad 23.130	χαλκὸν ζώννυσθαι, ζεῦξαι δʼ ὑπʼ ὄχεσφιν ἕκαστον
Iliad 23.131	ἵππους· οἳ δʼ ὄρνυντο καὶ ἐν τεύχεσσιν ἔδυνον,
Iliad 23.132	ἂν δʼ ἔβαν ἐν δίφροισι παραιβάται ἡνίοχοί τε,
Iliad 23.133	πρόσθε μὲν ἱππῆες, μετὰ δὲ νέφος εἵπετο πεζῶν
Iliad 23.134	μυρίοι· ἐν δὲ μέσοισι φέρον Πάτροκλον ἑταῖροι.
Iliad 23.135	θριξὶ δὲ πάντα νέκυν καταείνυσαν, ἃς ἐπέβαλλον
Iliad 23.136	κειρόμενοι· ὄπιθεν δὲ κάρη ἔχε δῖος Ἀχιλλεὺς
Iliad 23.137	ἀχνύμενος· ἕταρον γὰρ ἀμύμονα πέμπʼ Ἄϊδος δέ.
Iliad 23.138	οἳ δʼ ὅτε χῶρον ἵκανον ὅθί σφισι πέφραδʼ Ἀχιλλεὺς
Iliad 23.139	κάτθεσαν, αἶψα δέ οἱ μενοεικέα νήεον ὕλην.
Iliad 23.140	ἔνθʼ αὖτʼ ἄλλʼ ἐνόησε ποδάρκης δῖος Ἀχιλλεύς·
Iliad 23.141	στὰς ἀπάνευθε πυρῆς ξανθὴν ἀπεκείρατο χαίτην,
Iliad 23.142	τήν ῥα Σπερχειῷ ποταμῷ τρέφε τηλεθόωσαν·
Iliad 23.143	ὀχθήσας δʼ ἄρα εἶπεν ἰδὼν ἐπὶ οἴνοπα πόντον·
Iliad 23.144	Σπερχείʼ ἄλλως σοί γε πατὴρ ἠρήσατο Πηλεὺς
Iliad 23.145	κεῖσέ με νοστήσαντα φίλην ἐς πατρίδα γαῖαν
Iliad 23.146	σοί τε κόμην κερέειν ῥέξειν θʼ ἱερὴν ἑκατόμβην,
Iliad 23.147	πεντήκοντα δʼ ἔνορχα παρʼ αὐτόθι μῆλʼ ἱερεύσειν
Iliad 23.148	ἐς πηγάς, ὅθι τοι τέμενος βωμός τε θυήεις.
Iliad 23.149	ὣς ἠρᾶθʼ ὃ γέρων, σὺ δέ οἱ νόον οὐκ ἐτέλεσσας.
Iliad 23.150	νῦν δʼ ἐπεὶ οὐ νέομαί γε φίλην ἐς πατρίδα γαῖαν
Iliad 23.151	Πατρόκλῳ ἥρωϊ κόμην ὀπάσαιμι φέρεσθαι.
Iliad 23.152	ὣς εἰπὼν ἐν χερσὶ κόμην ἑτάροιο φίλοιο
Iliad 23.153	θῆκεν, τοῖσι δὲ πᾶσιν ὑφʼ ἵμερον ὦρσε γόοιο.
Iliad 23.154	καί νύ κʼ ὀδυρομένοισιν ἔδυ φάος ἠελίοιο
Iliad 23.155	εἰ μὴ Ἀχιλλεὺς αἶψʼ Ἀγαμέμνονι εἶπε παραστάς·
Iliad 23.156	Ἀτρεΐδη, σοὶ γάρ τε μάλιστά γε λαὸς Ἀχαιῶν
Iliad 23.157	πείσονται μύθοισι, γόοιο μὲν ἔστι καὶ ἆσαι,
Iliad 23.158	νῦν δʼ ἀπὸ πυρκαϊῆς σκέδασον καὶ δεῖπνον ἄνωχθι
Iliad 23.159	ὅπλεσθαι· τάδε δʼ ἀμφὶ πονησόμεθʼ οἷσι μάλιστα
Iliad 23.160	κήδεός ἐστι νέκυς· παρὰ δʼ οἵ τʼ ἀγοὶ ἄμμι μενόντων.
Iliad 23.161	αὐτὰρ ἐπεὶ τό γʼ ἄκουσεν ἄναξ ἀνδρῶν Ἀγαμέμνων,
Iliad 23.162	αὐτίκα λαὸν μὲν σκέδασεν κατὰ νῆας ἐΐσας,
Iliad 23.163	κηδεμόνες δὲ παρʼ αὖθι μένον καὶ νήεον ὕλην,
Iliad 23.164	ποίησαν δὲ πυρὴν ἑκατόμπεδον ἔνθα καὶ ἔνθα,
Iliad 23.165	ἐν δὲ πυρῇ ὑπάτῃ νεκρὸν θέσαν ἀχνύμενοι κῆρ.
Iliad 23.166	πολλὰ δὲ ἴφια μῆλα καὶ εἰλίποδας ἕλικας βοῦς
Iliad 23.167	πρόσθε πυρῆς ἔδερόν τε καὶ ἄμφεπον· ἐκ δʼ ἄρα πάντων
Iliad 23.168	δημὸν ἑλὼν ἐκάλυψε νέκυν μεγάθυμος Ἀχιλλεὺς
Iliad 23.169	ἐς πόδας ἐκ κεφαλῆς, περὶ δὲ δρατὰ σώματα νήει.
Iliad 23.170	ἐν δʼ ἐτίθει μέλιτος καὶ ἀλείφατος ἀμφιφορῆας
Iliad 23.171	πρὸς λέχεα κλίνων· πίσυρας δʼ ἐριαύχενας ἵππους
Iliad 23.172	ἐσσυμένως ἐνέβαλλε πυρῇ μεγάλα στεναχίζων.
Iliad 23.173	ἐννέα τῷ γε ἄνακτι τραπεζῆες κύνες ἦσαν,
Iliad 23.174	καὶ μὲν τῶν ἐνέβαλλε πυρῇ δύο δειροτομήσας,
Iliad 23.175	δώδεκα δὲ Τρώων μεγαθύμων υἱέας ἐσθλοὺς
Iliad 23.176	χαλκῷ δηϊόων· κακὰ δὲ φρεσὶ μήδετο ἔργα·
Iliad 23.177	ἐν δὲ πυρὸς μένος ἧκε σιδήρεον ὄφρα νέμοιτο.
Iliad 23.178	ᾤμωξέν τʼ ἄρʼ ἔπειτα, φίλον δʼ ὀνόμηνεν ἑταῖρον·
Iliad 23.179	χαῖρέ μοι ὦ Πάτροκλε καὶ εἰν Ἀΐδαο δόμοισι·
Iliad 23.180	πάντα γὰρ ἤδη τοι τελέω τὰ πάροιθεν ὑπέστην,
Iliad 23.181	δώδεκα μὲν Τρώων μεγαθύμων υἱέας ἐσθλοὺς
Iliad 23.182	τοὺς ἅμα σοὶ πάντας πῦρ ἐσθίει· Ἕκτορα δʼ οὔ τι
Iliad 23.183	δώσω Πριαμίδην πυρὶ δαπτέμεν, ἀλλὰ κύνεσσιν.
Iliad 23.184	ὣς φάτʼ ἀπειλήσας· τὸν δʼ οὐ κύνες ἀμφεπένοντο,
Iliad 23.185	ἀλλὰ κύνας μὲν ἄλαλκε Διὸς θυγάτηρ Ἀφροδίτη
Iliad 23.186	ἤματα καὶ νύκτας, ῥοδόεντι δὲ χρῖεν ἐλαίῳ
Iliad 23.187	ἀμβροσίῳ, ἵνα μή μιν ἀποδρύφοι ἑλκυστάζων.
Iliad 23.188	τῷ δʼ ἐπὶ κυάνεον νέφος ἤγαγε Φοῖβος Ἀπόλλων
Iliad 23.189	οὐρανόθεν πεδίον δέ, κάλυψε δὲ χῶρον ἅπαντα
Iliad 23.190	ὅσσον ἐπεῖχε νέκυς, μὴ πρὶν μένος ἠελίοιο
Iliad 23.191	σκήλειʼ ἀμφὶ περὶ χρόα ἴνεσιν ἠδὲ μέλεσσιν.
Iliad 23.192	οὐδὲ πυρὴ Πατρόκλου ἐκαίετο τεθνηῶτος·
Iliad 23.193	ἔνθʼ αὖτʼ ἀλλʼ ἐνόησε ποδάρκης δῖος Ἀχιλλεύς·
Iliad 23.194	στὰς ἀπάνευθε πυρῆς δοιοῖς ἠρᾶτʼ ἀνέμοισι
Iliad 23.195	Βορέῃ καὶ Ζεφύρῳ, καὶ ὑπίσχετο ἱερὰ καλά·
Iliad 23.196	πολλὰ δὲ καὶ σπένδων χρυσέῳ δέπαϊ λιτάνευεν
Iliad 23.197	ἐλθέμεν, ὄφρα τάχιστα πυρὶ φλεγεθοίατο νεκροί,
Iliad 23.198	ὕλη τε σεύαιτο καήμεναι. ὦκα δὲ Ἶρις
Iliad 23.199	ἀράων ἀΐουσα μετάγγελος ἦλθʼ ἀνέμοισιν.
Iliad 23.200	οἳ μὲν ἄρα Ζεφύροιο δυσαέος ἀθρόοι ἔνδον
Iliad 23.201	εἰλαπίνην δαίνυντο· θέουσα δὲ Ἶρις ἐπέστη
Iliad 23.202	βηλῷ ἔπι λιθέῳ· τοὶ δʼ ὡς ἴδον ὀφθαλμοῖσι
Iliad 23.203	πάντες ἀνήϊξαν, κάλεόν τέ μιν εἰς ἓ ἕκαστος·
Iliad 23.204	ἣ δʼ αὖθʼ ἕζεσθαι μὲν ἀνήνατο, εἶπε δὲ μῦθον·
Iliad 23.205	οὐχ ἕδος· εἶμι γὰρ αὖτις ἐπʼ Ὠκεανοῖο ῥέεθρα
Iliad 23.206	Αἰθιόπων ἐς γαῖαν, ὅθι ῥέζουσʼ ἑκατόμβας
Iliad 23.207	ἀθανάτοις, ἵνα δὴ καὶ ἐγὼ μεταδαίσομαι ἱρῶν.
Iliad 23.208	ἀλλʼ Ἀχιλεὺς Βορέην ἠδὲ Ζέφυρον κελαδεινὸν
Iliad 23.209	ἐλθεῖν ἀρᾶται, καὶ ὑπίσχεται ἱερὰ καλά,
Iliad 23.210	ὄφρα πυρὴν ὄρσητε καήμεναι, ᾗ ἔνι κεῖται
Iliad 23.211	Πάτροκλος, τὸν πάντες ἀναστενάχουσιν Ἀχαιοί.
Iliad 23.212	ἣ μὲν ἄρʼ ὣς εἰποῦσʼ ἀπεβήσετο, τοὶ δʼ ὀρέοντο
Iliad 23.213	ἠχῇ θεσπεσίῃ νέφεα κλονέοντε πάροιθεν.
Iliad 23.214	αἶψα δὲ πόντον ἵκανον ἀήμεναι, ὦρτο δὲ κῦμα
Iliad 23.215	πνοιῇ ὕπο λιγυρῇ· Τροίην δʼ ἐρίβωλον ἱκέσθην,
Iliad 23.216	ἐν δὲ πυρῇ πεσέτην, μέγα δʼ ἴαχε θεσπιδαὲς πῦρ.
Iliad 23.217	παννύχιοι δʼ ἄρα τοί γε πυρῆς ἄμυδις φλόγʼ ἔβαλλον
Iliad 23.218	φυσῶντες λιγέως· ὃ δὲ πάννυχος ὠκὺς Ἀχιλλεὺς
Iliad 23.219	χρυσέου ἐκ κρητῆρος ἑλὼν δέπας ἀμφικύπελλον
Iliad 23.220	οἶνον ἀφυσσόμενος χαμάδις χέε, δεῦε δὲ γαῖαν
Iliad 23.221	ψυχὴν κικλήσκων Πατροκλῆος δειλοῖο.
Iliad 23.222	ὡς δὲ πατὴρ οὗ παιδὸς ὀδύρεται ὀστέα καίων
Iliad 23.223	νυμφίου, ὅς τε θανὼν δειλοὺς ἀκάχησε τοκῆας,
Iliad 23.224	ὣς Ἀχιλεὺς ἑτάροιο ὀδύρετο ὀστέα καίων,
Iliad 23.225	ἑρπύζων παρὰ πυρκαϊὴν ἁδινὰ στεναχίζων.
Iliad 23.226	ἦμος δʼ ἑωσφόρος εἶσι φόως ἐρέων ἐπὶ γαῖαν,
Iliad 23.227	ὅν τε μέτα κροκόπεπλος ὑπεὶρ ἅλα κίδναται ἠώς,
Iliad 23.228	τῆμος πυρκαϊὴ ἐμαραίνετο, παύσατο δὲ φλόξ.
Iliad 23.229	οἳ δʼ ἄνεμοι πάλιν αὖτις ἔβαν οἶκον δὲ νέεσθαι
Iliad 23.230	Θρηΐκιον κατὰ πόντον· ὃ δʼ ἔστενεν οἴδματι θύων.
Iliad 23.231	Πηλεΐδης δʼ ἀπὸ πυρκαϊῆς ἑτέρωσε λιασθεὶς
Iliad 23.232	κλίνθη κεκμηώς, ἐπὶ δὲ γλυκὺς ὕπνος ὄρουσεν·
Iliad 23.233	οἳ δʼ ἀμφʼ Ἀτρεΐωνα ἀολλέες ἠγερέθοντο·
Iliad 23.234	τῶν μιν ἐπερχομένων ὅμαδος καὶ δοῦπος ἔγειρεν,
Iliad 23.235	ἕζετο δʼ ὀρθωθεὶς καί σφεας πρὸς μῦθον ἔειπεν·
Iliad 23.236	Ἀτρεΐδη τε καὶ ἄλλοι ἀριστῆες Παναχαιῶν,
Iliad 23.237	πρῶτον μὲν κατὰ πυρκαϊὴν σβέσατʼ αἴθοπι οἴνῳ
Iliad 23.238	πᾶσαν, ὁπόσσον ἐπέσχε πυρὸς μένος· αὐτὰρ ἔπειτα
Iliad 23.239	ὀστέα Πατρόκλοιο Μενοιτιάδαο λέγωμεν
Iliad 23.240	εὖ διαγιγνώσκοντες· ἀριφραδέα δὲ τέτυκται·
Iliad 23.241	ἐν μέσσῃ γὰρ ἔκειτο πυρῇ, τοὶ δʼ ἄλλοι ἄνευθεν
Iliad 23.242	ἐσχατιῇ καίοντʼ ἐπιμὶξ ἵπποι τε καὶ ἄνδρες.
Iliad 23.243	καὶ τὰ μὲν ἐν χρυσέῃ φιάλῃ καὶ δίπλακι δημῷ
Iliad 23.244	θείομεν, εἰς ὅ κεν αὐτὸς ἐγὼν Ἄϊδι κεύθωμαι.
Iliad 23.245	τύμβον δʼ οὐ μάλα πολλὸν ἐγὼ πονέεσθαι ἄνωγα,
Iliad 23.246	ἀλλʼ ἐπιεικέα τοῖον· ἔπειτα δὲ καὶ τὸν Ἀχαιοὶ
Iliad 23.247	εὐρύν θʼ ὑψηλόν τε τιθήμεναι, οἵ κεν ἐμεῖο
Iliad 23.248	δεύτεροι ἐν νήεσσι πολυκλήϊσι λίπησθε.
Iliad 23.249	ὣς ἔφαθʼ, οἳ δʼ ἐπίθοντο ποδώκεϊ Πηλεΐωνι.
Iliad 23.250	πρῶτον μὲν κατὰ πυρκαϊὴν σβέσαν αἴθοπι οἴνῳ
Iliad 23.251	ὅσσον ἐπὶ φλὸξ ἦλθε, βαθεῖα δὲ κάππεσε τέφρη·
Iliad 23.252	κλαίοντες δʼ ἑτάροιο ἐνηέος ὀστέα λευκὰ
Iliad 23.253	ἄλλεγον ἐς χρυσέην φιάλην καὶ δίπλακα δημόν,
Iliad 23.254	ἐν κλισίῃσι δὲ θέντες ἑανῷ λιτὶ κάλυψαν·
Iliad 23.255	τορνώσαντο δὲ σῆμα θεμείλιά τε προβάλοντο
Iliad 23.256	ἀμφὶ πυρήν· εἶθαρ δὲ χυτὴν ἐπὶ γαῖαν ἔχευαν,
Iliad 23.257	χεύαντες δὲ τὸ σῆμα πάλιν κίον. αὐτὰρ Ἀχιλλεὺς
Iliad 23.258	αὐτοῦ λαὸν ἔρυκε καὶ ἵζανεν εὐρὺν ἀγῶνα,
Iliad 23.259	νηῶν δʼ ἔκφερʼ ἄεθλα λέβητάς τε τρίποδάς τε
Iliad 23.260	ἵππους θʼ ἡμιόνους τε βοῶν τʼ ἴφθιμα κάρηνα,
Iliad 23.261	ἠδὲ γυναῖκας ἐϋζώνους πολιόν τε σίδηρον.
Iliad 23.262	ἱππεῦσιν μὲν πρῶτα ποδώκεσιν ἀγλάʼ ἄεθλα
Iliad 23.263	θῆκε γυναῖκα ἄγεσθαι ἀμύμονα ἔργα ἰδυῖαν
Iliad 23.264	καὶ τρίποδʼ ὠτώεντα δυωκαιεικοσίμετρον
Iliad 23.265	τῷ πρώτῳ· ἀτὰρ αὖ τῷ δευτέρῳ ἵππον ἔθηκεν
Iliad 23.266	ἑξέτεʼ ἀδμήτην βρέφος ἡμίονον κυέουσαν·
Iliad 23.267	αὐτὰρ τῷ τριτάτῳ ἄπυρον κατέθηκε λέβητα
Iliad 23.268	καλὸν τέσσαρα μέτρα κεχανδότα λευκὸν ἔτʼ αὔτως·
Iliad 23.269	τῷ δὲ τετάρτῳ θῆκε δύω χρυσοῖο τάλαντα,
Iliad 23.270	πέμπτῳ δʼ ἀμφίθετον φιάλην ἀπύρωτον ἔθηκε.
Iliad 23.271	στῆ δʼ ὀρθὸς καὶ μῦθον ἐν Ἀργείοισιν ἔειπεν·
Iliad 23.272	Ἀτρεΐδη τε καὶ ἄλλοι ἐϋκνήμιδες Ἀχαιοὶ
Iliad 23.273	ἱππῆας τάδʼ ἄεθλα δεδεγμένα κεῖτʼ ἐν ἀγῶνι.
Iliad 23.274	εἰ μὲν νῦν ἐπὶ ἄλλῳ ἀεθλεύοιμεν Ἀχαιοὶ
Iliad 23.275	ἦ τʼ ἂν ἐγὼ τὰ πρῶτα λαβὼν κλισίην δὲ φεροίμην.
Iliad 23.276	ἴστε γὰρ ὅσσον ἐμοὶ ἀρετῇ περιβάλλετον ἵπποι·
Iliad 23.277	ἀθάνατοί τε γάρ εἰσι, Ποσειδάων δὲ πόρʼ αὐτοὺς
Iliad 23.278	πατρὶ ἐμῷ Πηλῆϊ, ὃ δʼ αὖτʼ ἐμοὶ ἐγγυάλιξεν.
Iliad 23.279	ἀλλʼ ἤτοι μὲν ἐγὼ μενέω καὶ μώνυχες ἵπποι·
Iliad 23.280	τοίου γὰρ κλέος ἐσθλὸν ἀπώλεσαν ἡνιόχοιο
Iliad 23.281	ἠπίου, ὅς σφωϊν μάλα πολλάκις ὑγρὸν ἔλαιον
Iliad 23.282	χαιτάων κατέχευε λοέσσας ὕδατι λευκῷ.
Iliad 23.283	τὸν τώ γʼ ἑσταότες πενθείετον, οὔδεϊ δέ σφι
Iliad 23.284	χαῖται ἐρηρέδαται, τὼ δʼ ἕστατον ἀχνυμένω κῆρ.
Iliad 23.285	ἄλλοι δὲ στέλλεσθε κατὰ στρατόν, ὅς τις Ἀχαιῶν
Iliad 23.286	ἵπποισίν τε πέποιθε καὶ ἅρμασι κολλητοῖσιν.
Iliad 23.287	ὣς φάτο Πηλεΐδης, ταχέες δʼ ἱππῆες ἄγερθεν.
Iliad 23.288	ὦρτο πολὺ πρῶτος μὲν ἄναξ ἀνδρῶν Εὔμηλος
Iliad 23.289	Ἀδμήτου φίλος υἱός, ὃς ἱπποσύνῃ ἐκέκαστο·
Iliad 23.290	τῷ δʼ ἐπὶ Τυδεΐδης ὦρτο κρατερὸς Διομήδης,
Iliad 23.291	ἵππους δὲ Τρῳοὺς ὕπαγε ζυγόν, οὕς ποτʼ ἀπηύρα
Iliad 23.292	Αἰνείαν, ἀτὰρ αὐτὸν ὑπεξεσάωσεν Ἀπόλλων.
Iliad 23.293	τῷ δʼ ἄρʼ ἐπʼ Ἀτρεΐδης ὦρτο ξανθὸς Μενέλαος
Iliad 23.294	διογενής, ὑπὸ δὲ ζυγὸν ἤγαγεν ὠκέας ἵππους
Iliad 23.295	Αἴθην τὴν Ἀγαμεμνονέην τὸν ἑόν τε Πόδαργον·
Iliad 23.296	τὴν Ἀγαμέμνονι δῶκʼ Ἀγχισιάδης Ἐχέπωλος
Iliad 23.297	δῶρʼ, ἵνα μή οἱ ἕποιθʼ ὑπὸ Ἴλιον ἠνεμόεσσαν,
Iliad 23.298	ἀλλʼ αὐτοῦ τέρποιτο μένων· μέγα γάρ οἱ ἔδωκε
Iliad 23.299	Ζεὺς ἄφενος, ναῖεν δʼ ὅ γʼ ἐν εὐρυχόρῳ Σικυῶνι·
Iliad 23.300	τὴν ὅ γʼ ὑπὸ ζυγὸν ἦγε μέγα δρόμου ἰσχανόωσαν.
Iliad 23.301	Ἀντίλοχος δὲ τέταρτος ἐΰτριχας ὁπλίσαθʼ ἵππους,
Iliad 23.302	Νέστορος ἀγλαὸς υἱὸς ὑπερθύμοιο ἄνακτος
Iliad 23.303	τοῦ Νηληϊάδαο· Πυλοιγενέες δέ οἱ ἵπποι
Iliad 23.304	ὠκύποδες φέρον ἅρμα· πατὴρ δέ οἱ ἄγχι παραστὰς
Iliad 23.305	μυθεῖτʼ εἰς ἀγαθὰ φρονέων νοέοντι καὶ αὐτῷ·
Iliad 23.306	Ἀντίλοχʼ ἤτοι μέν σε νέον περ ἐόντʼ ἐφίλησαν
Iliad 23.307	Ζεύς τε Ποσειδάων τε, καὶ ἱπποσύνας ἐδίδαξαν
Iliad 23.308	παντοίας· τὼ καί σε διδασκέμεν οὔ τι μάλα χρεώ·
Iliad 23.309	οἶσθα γὰρ εὖ περὶ τέρμαθʼ ἑλισσέμεν· ἀλλά τοι ἵπποι
Iliad 23.310	βάρδιστοι θείειν· τώ τʼ οἴω λοίγιʼ ἔσεσθαι.
Iliad 23.311	τῶν δʼ ἵπποι μὲν ἔασιν ἀφάρτεροι, οὐδὲ μὲν αὐτοὶ
Iliad 23.312	πλείονα ἴσασιν σέθεν αὐτοῦ μητίσασθαι.
Iliad 23.313	ἀλλʼ ἄγε δὴ σὺ φίλος μῆτιν ἐμβάλλεο θυμῷ
Iliad 23.314	παντοίην, ἵνα μή σε παρεκπροφύγῃσιν ἄεθλα.
Iliad 23.315	μήτι τοι δρυτόμος μέγʼ ἀμείνων ἠὲ βίηφι·
Iliad 23.316	μήτι δʼ αὖτε κυβερνήτης ἐνὶ οἴνοπι πόντῳ
Iliad 23.317	νῆα θοὴν ἰθύνει ἐρεχθομένην ἀνέμοισι·
Iliad 23.318	μήτι δʼ ἡνίοχος περιγίγνεται ἡνιόχοιο.
Iliad 23.319	ἀλλʼ ὃς μέν θʼ ἵπποισι καὶ ἅρμασιν οἷσι πεποιθὼς
Iliad 23.320	ἀφραδέως ἐπὶ πολλὸν ἑλίσσεται ἔνθα καὶ ἔνθα,
Iliad 23.321	ἵπποι δὲ πλανόωνται ἀνὰ δρόμον, οὐδὲ κατίσχει·
Iliad 23.322	ὃς δέ κε κέρδεα εἰδῇ ἐλαύνων ἥσσονας ἵππους,
Iliad 23.323	αἰεὶ τέρμʼ ὁρόων στρέφει ἐγγύθεν, οὐδέ ἑ λήθει
Iliad 23.324	ὅππως τὸ πρῶτον τανύσῃ βοέοισιν ἱμᾶσιν,
Iliad 23.325	ἀλλʼ ἔχει ἀσφαλέως καὶ τὸν προὔχοντα δοκεύει.
Iliad 23.326	σῆμα δέ τοι ἐρέω μάλʼ ἀριφραδές, οὐδέ σε λήσει.
Iliad 23.327	ἕστηκε ξύλον αὖον ὅσον τʼ ὄργυιʼ ὑπὲρ αἴης
Iliad 23.328	ἢ δρυὸς ἢ πεύκης· τὸ μὲν οὐ καταπύθεται ὄμβρῳ,
Iliad 23.329	λᾶε δὲ τοῦ ἑκάτερθεν ἐρηρέδαται δύο λευκὼ
Iliad 23.330	ἐν ξυνοχῇσιν ὁδοῦ, λεῖος δʼ ἱππόδρομος ἀμφὶς
Iliad 23.331	ἤ τευ σῆμα βροτοῖο πάλαι κατατεθνηῶτος,
Iliad 23.332	ἢ τό γε νύσσα τέτυκτο ἐπὶ προτέρων ἀνθρώπων,
Iliad 23.333	καὶ νῦν τέρματʼ ἔθηκε ποδάρκης δῖος Ἀχιλλεύς.
Iliad 23.334	τῷ σὺ μάλʼ ἐγχρίμψας ἐλάαν σχεδὸν ἅρμα καὶ ἵππους,
Iliad 23.335	αὐτὸς δὲ κλινθῆναι ἐϋπλέκτῳ ἐνὶ δίφρῳ
Iliad 23.336	ἦκʼ ἐπʼ ἀριστερὰ τοῖιν· ἀτὰρ τὸν δεξιὸν ἵππον
Iliad 23.337	κένσαι ὁμοκλήσας, εἶξαί τέ οἱ ἡνία χερσίν.
Iliad 23.338	ἐν νύσσῃ δέ τοι ἵππος ἀριστερὸς ἐγχριμφθήτω,
Iliad 23.339	ὡς ἄν τοι πλήμνη γε δοάσσεται ἄκρον ἱκέσθαι
Iliad 23.340	κύκλου ποιητοῖο· λίθου δʼ ἀλέασθαι ἐπαυρεῖν,
Iliad 23.341	μή πως ἵππους τε τρώσῃς κατά θʼ ἅρματα ἄξῃς·
Iliad 23.342	χάρμα δὲ τοῖς ἄλλοισιν, ἐλεγχείη δὲ σοὶ αὐτῷ
Iliad 23.343	ἔσσεται· ἀλλὰ φίλος φρονέων πεφυλαγμένος εἶναι.
Iliad 23.344	εἰ γάρ κʼ ἐν νύσσῃ γε παρεξελάσῃσθα διώκων,
Iliad 23.345	οὐκ ἔσθʼ ὅς κέ σʼ ἕλῃσι μετάλμενος οὐδὲ παρέλθῃ,
Iliad 23.346	οὐδʼ εἴ κεν μετόπισθεν Ἀρίονα δῖον ἐλαύνοι
Iliad 23.347	Ἀδρήστου ταχὺν ἵππον, ὃς ἐκ θεόφιν γένος ἦεν,
Iliad 23.348	ἢ τοὺς Λαομέδοντος, οἳ ἐνθάδε γʼ ἔτραφεν ἐσθλοί.
Iliad 23.349	ὣς εἰπὼν Νέστωρ Νηλήϊος ἂψ ἐνὶ χώρῃ
Iliad 23.350	ἕζετʼ, ἐπεὶ ᾧ παιδὶ ἑκάστου πείρατʼ ἔειπε.
Iliad 23.351	Μηριόνης δʼ ἄρα πέμπτος ἐΰτριχας ὁπλίσαθʼ ἵππους.
Iliad 23.352	ἂν δʼ ἔβαν ἐς δίφρους, ἐν δὲ κλήρους ἐβάλοντο·
Iliad 23.353	πάλλʼ Ἀχιλεύς, ἐκ δὲ κλῆρος θόρε Νεστορίδαο
Iliad 23.354	Ἀντιλόχου· μετὰ τὸν δʼ ἔλαχε κρείων Εὔμηλος·
Iliad 23.355	τῷ δʼ ἄρʼ ἐπʼ Ἀτρεΐδης δουρὶ κλειτὸς Μενέλαος,
Iliad 23.356	τῷ δʼ ἐπὶ Μηριόνης λάχʼ ἐλαυνέμεν· ὕστατος αὖτε
Iliad 23.357	Τυδεΐδης ὄχʼ ἄριστος ἐὼν λάχʼ ἐλαυνέμεν ἵππους.
Iliad 23.358	στὰν δὲ μεταστοιχί, σήμηνε δὲ τέρματʼ Ἀχιλλεὺς
Iliad 23.359	τηλόθεν ἐν λείῳ πεδίῳ· παρὰ δὲ σκοπὸν εἷσεν
Iliad 23.360	ἀντίθεον Φοίνικα ὀπάονα πατρὸς ἑοῖο,
Iliad 23.361	ὡς μεμνέῳτο δρόμους καὶ ἀληθείην ἀποείποι.
Iliad 23.362	οἳ δʼ ἅμα πάντες ἐφʼ ἵπποιιν μάστιγας ἄειραν,
Iliad 23.363	πέπληγόν θʼ ἱμᾶσιν, ὁμόκλησάν τʼ ἐπέεσσιν
Iliad 23.364	ἐσσυμένως· οἳ δʼ ὦκα διέπρησσον πεδίοιο
Iliad 23.365	νόσφι νεῶν ταχέως· ὑπὸ δὲ στέρνοισι κονίη
Iliad 23.366	ἵστατʼ ἀειρομένη ὥς τε νέφος ἠὲ θύελλα,
Iliad 23.367	χαῖται δʼ ἐρρώοντο μετὰ πνοιῇς ἀνέμοιο.
Iliad 23.368	ἅρματα δʼ ἄλλοτε μὲν χθονὶ πίλνατο πουλυβοτείρῃ,
Iliad 23.369	ἄλλοτε δʼ ἀΐξασκε μετήορα· τοὶ δʼ ἐλατῆρες
Iliad 23.370	ἕστασαν ἐν δίφροισι, πάτασσε δὲ θυμὸς ἑκάστου
Iliad 23.371	νίκης ἱεμένων· κέκλοντο δὲ οἷσιν ἕκαστος
Iliad 23.372	ἵπποις, οἳ δʼ ἐπέτοντο κονίοντες πεδίοιο.
Iliad 23.373	ἀλλʼ ὅτε δὴ πύματον τέλεον δρόμον ὠκέες ἵπποι
Iliad 23.374	ἂψ ἐφʼ ἁλὸς πολιῆς, τότε δὴ ἀρετή γε ἑκάστου
Iliad 23.375	φαίνετʼ, ἄφαρ δʼ ἵπποισι τάθη δρόμος· ὦκα δʼ ἔπειτα
Iliad 23.376	αἳ Φηρητιάδαο ποδώκεες ἔκφερον ἵπποι.
Iliad 23.377	τὰς δὲ μετʼ ἐξέφερον Διομήδεος ἄρσενες ἵπποι
Iliad 23.378	Τρώϊοι, οὐδέ τι πολλὸν ἄνευθʼ ἔσαν, ἀλλὰ μάλʼ ἐγγύς·
Iliad 23.379	αἰεὶ γὰρ δίφρου ἐπιβησομένοισιν ἐΐκτην,
Iliad 23.380	πνοιῇ δʼ Εὐμήλοιο μετάφρενον εὐρέε τʼ ὤμω
Iliad 23.381	θέρμετʼ· ἐπʼ αὐτῷ γὰρ κεφαλὰς καταθέντε πετέσθην.
Iliad 23.382	καί νύ κεν ἢ παρέλασσʼ ἢ ἀμφήριστον ἔθηκεν,
Iliad 23.383	εἰ μὴ Τυδέος υἷϊ κοτέσσατο Φοῖβος Ἀπόλλων,
Iliad 23.384	ὅς ῥά οἱ ἐκ χειρῶν ἔβαλεν μάστιγα φαεινήν.
Iliad 23.385	τοῖο δʼ ἀπʼ ὀφθαλμῶν χύτο δάκρυα χωομένοιο,
Iliad 23.386	οὕνεκα τὰς μὲν ὅρα ἔτι καὶ πολὺ μᾶλλον ἰούσας,
Iliad 23.387	οἳ δέ οἱ ἐβλάφθησαν ἄνευ κέντροιο θέοντες.
Iliad 23.388	οὐδʼ ἄρʼ Ἀθηναίην ἐλεφηράμενος λάθʼ Ἀπόλλων
Iliad 23.389	Τυδεΐδην, μάλα δʼ ὦκα μετέσσυτο ποιμένα λαῶν,
Iliad 23.390	δῶκε δέ οἱ μάστιγα, μένος δʼ ἵπποισιν ἐνῆκεν·
Iliad 23.391	ἣ δὲ μετʼ Ἀδμήτου υἱὸν κοτέουσʼ ἐβεβήκει,
Iliad 23.392	ἵππειον δέ οἱ ἦξε θεὰ ζυγόν· αἳ δέ οἱ ἵπποι
Iliad 23.393	ἀμφὶς ὁδοῦ δραμέτην, ῥυμὸς δʼ ἐπὶ γαῖαν ἐλύσθη.
Iliad 23.394	αὐτὸς δʼ ἐκ δίφροιο παρὰ τροχὸν ἐξεκυλίσθη,
Iliad 23.395	ἀγκῶνάς τε περιδρύφθη στόμα τε ῥῖνάς τε,
Iliad 23.396	θρυλίχθη δὲ μέτωπον ἐπʼ ὀφρύσι· τὼ δέ οἱ ὄσσε
Iliad 23.397	δακρυόφι πλῆσθεν, θαλερὴ δέ οἱ ἔσχετο φωνή.
Iliad 23.398	Τυδεΐδης δὲ παρατρέψας ἔχε μώνυχας ἵππους,
Iliad 23.399	πολλὸν τῶν ἄλλων ἐξάλμενος· ἐν γὰρ Ἀθήνη
Iliad 23.400	ἵπποις ἧκε μένος καὶ ἐπʼ αὐτῷ κῦδος ἔθηκε.
Iliad 23.401	τῷ δʼ ἄρʼ ἐπʼ Ἀτρεΐδης εἶχε ξανθὸς Μενέλαος.
Iliad 23.402	Ἀντίλοχος δʼ ἵπποισιν ἐκέκλετο πατρὸς ἑοῖο·
Iliad 23.403	ἔμβητον καὶ σφῶϊ· τιταίνετον ὅττι τάχιστα.
Iliad 23.404	ἤτοι μὲν κείνοισιν ἐριζέμεν οὔ τι κελεύω
Iliad 23.405	Τυδεΐδεω ἵπποισι δαΐφρονος, οἷσιν Ἀθήνη
Iliad 23.406	νῦν ὤρεξε τάχος καὶ ἐπʼ αὐτῷ κῦδος ἔθηκεν·
Iliad 23.407	ἵππους δʼ Ἀτρεΐδαο κιχάνετε, μὴ δὲ λίπησθον,
Iliad 23.408	καρπαλίμως, μὴ σφῶϊν ἐλεγχείην καταχεύῃ
Iliad 23.409	Αἴθη θῆλυς ἐοῦσα· τί ἢ λείπεσθε φέριστοι;
Iliad 23.410	ὧδε γὰρ ἐξερέω, καὶ μὴν τετελεσμένον ἔσται·
Iliad 23.411	οὐ σφῶϊν κομιδὴ παρὰ Νέστορι ποιμένι λαῶν
Iliad 23.412	ἔσσεται, αὐτίκα δʼ ὔμμε κατακτενεῖ ὀξέϊ χαλκῷ,
Iliad 23.413	αἴ κʼ ἀποκηδήσαντε φερώμεθα χεῖρον ἄεθλον.
Iliad 23.414	ἀλλʼ ἐφομαρτεῖτον καὶ σπεύδετον ὅττι τάχιστα·
Iliad 23.415	ταῦτα δʼ ἐγὼν αὐτὸς τεχνήσομαι ἠδὲ νοήσω
Iliad 23.416	στεινωπῷ ἐν ὁδῷ παραδύμεναι, οὐδέ με λήσει.
Iliad 23.417	ὣς ἔφαθʼ, οἳ δὲ ἄνακτος ὑποδείσαντες ὁμοκλὴν
Iliad 23.418	μᾶλλον ἐπιδραμέτην ὀλίγον χρόνον· αἶψα δʼ ἔπειτα
Iliad 23.419	στεῖνος ὁδοῦ κοίλης ἴδεν Ἀντίλοχος μενεχάρμης.
Iliad 23.420	ῥωχμὸς ἔην γαίης, ᾗ χειμέριον ἀλὲν ὕδωρ
Iliad 23.421	ἐξέρρηξεν ὁδοῖο, βάθυνε δὲ χῶρον ἅπαντα·
Iliad 23.422	τῇ ῥʼ εἶχεν Μενέλαος ἁματροχιὰς ἀλεείνων.
Iliad 23.423	Ἀντίλοχος δὲ παρατρέψας ἔχε μώνυχας ἵππους
Iliad 23.424	ἐκτὸς ὁδοῦ, ὀλίγον δὲ παρακλίνας ἐδίωκεν.
Iliad 23.425	Ἀτρεΐδης δʼ ἔδεισε καὶ Ἀντιλόχῳ ἐγεγώνει·
Iliad 23.426	Ἀντίλοχʼ ἀφραδέως ἱππάζεαι, ἀλλʼ ἄνεχʼ ἵππους·
Iliad 23.427	στεινωπὸς γὰρ ὁδός, τάχα δʼ εὐρυτέρη παρελάσσαι·
Iliad 23.428	μή πως ἀμφοτέρους δηλήσεαι ἅρματι κύρσας.
Iliad 23.429	ὣς ἔφατʼ, Ἀντίλοχος δʼ ἔτι καὶ πολὺ μᾶλλον ἔλαυνε
Iliad 23.430	κέντρῳ ἐπισπέρχων ὡς οὐκ ἀΐοντι ἐοικώς.
Iliad 23.431	ὅσσα δὲ δίσκου οὖρα κατωμαδίοιο πέλονται,
Iliad 23.432	ὅν τʼ αἰζηὸς ἀφῆκεν ἀνὴρ πειρώμενος ἥβης,
Iliad 23.433	τόσσον ἐπιδραμέτην· αἳ δʼ ἠρώησαν ὀπίσσω
Iliad 23.434	Ἀτρεΐδεω· αὐτὸς γὰρ ἑκὼν μεθέηκεν ἐλαύνειν
Iliad 23.435	μή πως συγκύρσειαν ὁδῷ ἔνι μώνυχες ἵπποι,
Iliad 23.436	δίφρους τʼ ἀνστρέψειαν ἐϋπλεκέας, κατὰ δʼ αὐτοὶ
Iliad 23.437	ἐν κονίῃσι πέσοιεν ἐπειγόμενοι περὶ νίκης.
Iliad 23.438	τὸν καὶ νεικείων προσέφη ξανθὸς Μενέλαος·
Iliad 23.439	Ἀντίλοχʼ οὔ τις σεῖο βροτῶν ὀλοώτερος ἄλλος·
Iliad 23.440	ἔρρʼ, ἐπεὶ οὔ σʼ ἔτυμόν γε φάμεν πεπνῦσθαι Ἀχαιοί.
Iliad 23.441	ἀλλʼ οὐ μὰν οὐδʼ ὧς ἄτερ ὅρκου οἴσῃ ἄεθλον.
Iliad 23.442	ὣς εἰπὼν ἵπποισιν ἐκέκλετο φώνησέν τε·
Iliad 23.443	μή μοι ἐρύκεσθον μὴ δʼ ἕστατον ἀχνυμένω κῆρ.
Iliad 23.444	φθήσονται τούτοισι πόδες καὶ γοῦνα καμόντα
Iliad 23.445	ἢ ὑμῖν· ἄμφω γὰρ ἀτέμβονται νεότητος.
Iliad 23.446	ὣς ἔφαθʼ, οἳ δὲ ἄνακτος ὑποδείσαντες ὁμοκλὴν
Iliad 23.447	μᾶλλον ἐπιδραμέτην, τάχα δέ σφισιν ἄγχι γένοντο.
Iliad 23.448	Ἀργεῖοι δʼ ἐν ἀγῶνι καθήμενοι εἰσορόωντο
Iliad 23.449	ἵππους· τοὶ δὲ πέτοντο κονίοντες πεδίοιο.
Iliad 23.450	πρῶτος δʼ Ἰδομενεὺς Κρητῶν ἀγὸς ἐφράσαθʼ ἵππους·
Iliad 23.451	ἧστο γὰρ ἐκτὸς ἀγῶνος ὑπέρτατος ἐν περιωπῇ·
Iliad 23.452	τοῖο δʼ ἄνευθεν ἐόντος ὁμοκλητῆρος ἀκούσας
Iliad 23.453	ἔγνω, φράσσατο δʼ ἵππον ἀριπρεπέα προὔχοντα,
Iliad 23.454	ὃς τὸ μὲν ἄλλο τόσον φοῖνιξ ἦν, ἐν δὲ μετώπῳ
Iliad 23.455	λευκὸν σῆμα τέτυκτο περίτροχον ἠΰτε μήνη.
Iliad 23.456	στῆ δʼ ὀρθὸς καὶ μῦθον ἐν Ἀργείοισιν ἔειπεν·
Iliad 23.457	ὦ φίλοι Ἀργείων ἡγήτορες ἠδὲ μέδοντες
Iliad 23.458	οἶος ἐγὼν ἵππους αὐγάζομαι ἦε καὶ ὑμεῖς;
Iliad 23.459	ἄλλοι μοι δοκέουσι παροίτεροι ἔμμεναι ἵπποι,
Iliad 23.460	ἄλλος δʼ ἡνίοχος ἰνδάλλεται· αἳ δέ που αὐτοῦ
Iliad 23.461	ἔβλαβεν ἐν πεδίῳ, αἳ κεῖσέ γε φέρτεραι ἦσαν·
Iliad 23.462	ἤτοι γὰρ τὰς πρῶτα ἴδον περὶ τέρμα βαλούσας,
Iliad 23.463	νῦν δʼ οὔ πῃ δύναμαι ἰδέειν· πάντῃ δέ μοι ὄσσε
Iliad 23.464	Τρωϊκὸν ἂμ πεδίον παπταίνετον εἰσορόωντι·
Iliad 23.465	ἦε τὸν ἡνίοχον φύγον ἡνία, οὐδὲ δυνάσθη
Iliad 23.466	εὖ σχεθέειν περὶ τέρμα καὶ οὐκ ἐτύχησεν ἑλίξας·
Iliad 23.467	ἔνθά μιν ἐκπεσέειν ὀΐω σύν θʼ ἅρματα ἆξαι,
Iliad 23.468	αἳ δʼ ἐξηρώησαν, ἐπεὶ μένος ἔλλαβε θυμόν.
Iliad 23.469	ἀλλὰ ἴδεσθε καὶ ὔμμες ἀνασταδόν· οὐ γὰρ ἔγωγε
Iliad 23.470	εὖ διαγιγνώσκω· δοκέει δέ μοι ἔμμεναι ἀνὴρ
Iliad 23.471	Αἰτωλὸς γενεήν, μετὰ δʼ Ἀργείοισιν ἀνάσσει
Iliad 23.472	Τυδέος ἱπποδάμου υἱὸς κρατερὸς Διομήδης.
Iliad 23.473	τὸν δʼ αἰσχρῶς ἐνένιπεν Ὀϊλῆος ταχὺς Αἴας·
Iliad 23.474	Ἰδομενεῦ τί πάρος λαβρεύεαι; αἳ δέ τʼ ἄνευθεν
Iliad 23.475	ἵπποι ἀερσίποδες πολέος πεδίοιο δίενται.
Iliad 23.476	οὔτε νεώτατός ἐσσι μετʼ Ἀργείοισι τοσοῦτον,
Iliad 23.477	οὔτέ τοι ὀξύτατον κεφαλῆς ἐκδέρκεται ὄσσε·
Iliad 23.478	ἀλλʼ αἰεὶ μύθοις λαβρεύεαι· οὐδέ τί σε χρὴ
Iliad 23.479	λαβραγόρην ἔμεναι· πάρα γὰρ καὶ ἀμείνονες ἄλλοι.
Iliad 23.480	ἵπποι δʼ αὐταὶ ἔασι παροίτεραι, αἳ τὸ πάρος περ,
Iliad 23.481	Εὐμήλου, ἐν δʼ αὐτὸς ἔχων εὔληρα βέβηκε.
Iliad 23.482	τὸν δὲ χολωσάμενος Κρητῶν ἀγὸς ἀντίον ηὔδα·
Iliad 23.483	Αἶαν νεῖκος ἄριστε κακοφραδὲς ἄλλά τε πάντα
Iliad 23.484	δεύεαι Ἀργείων, ὅτι τοι νόος ἐστὶν ἀπηνής.
Iliad 23.485	δεῦρό νυν ἢ τρίποδος περιδώμεθον ἠὲ λέβητος,
Iliad 23.486	ἴστορα δʼ Ἀτρεΐδην Ἀγαμέμνονα θείομεν ἄμφω,
Iliad 23.487	ὁππότεραι πρόσθʼ ἵπποι, ἵνα γνώῃς ἀποτίνων.
Iliad 23.488	ὣς ἔφατʼ, ὄρνυτο δʼ αὐτίκʼ Ὀϊλῆος ταχὺς Αἴας
Iliad 23.489	χωόμενος χαλεποῖσιν ἀμείψασθαι ἐπέεσσι·
Iliad 23.490	καί νύ κε δὴ προτέρω ἔτʼ ἔρις γένετʼ ἀμφοτέροισιν,
Iliad 23.491	εἰ μὴ Ἀχιλλεὺς αὐτὸς ἀνίστατο καὶ φάτο μῦθον·
Iliad 23.492	μηκέτι νῦν χαλεποῖσιν ἀμείβεσθον ἐπέεσσιν
Iliad 23.493	Αἶαν Ἰδομενεῦ τε κακοῖς, ἐπεὶ οὐδὲ ἔοικε.
Iliad 23.494	καὶ δʼ ἄλλῳ νεμεσᾶτον ὅτις τοιαῦτά γε ῥέζοι.
Iliad 23.495	ἀλλʼ ὑμεῖς ἐν ἀγῶνι καθήμενοι εἰσοράασθε
Iliad 23.496	ἵππους· οἳ δὲ τάχʼ αὐτοὶ ἐπειγόμενοι περὶ νίκης
Iliad 23.497	ἐνθάδʼ ἐλεύσονται· τότε δὲ γνώσεσθε ἕκαστος
Iliad 23.498	ἵππους Ἀργείων, οἳ δεύτεροι οἵ τε πάροιθεν.
Iliad 23.499	ὣς φάτο, Τυδεΐδης δὲ μάλα σχεδὸν ἦλθε διώκων,
Iliad 23.500	μάστι δʼ αἰὲν ἔλαυνε κατωμαδόν· οἳ δέ οἱ ἵπποι
Iliad 23.501	ὑψόσʼ ἀειρέσθην ῥίμφα πρήσσοντε κέλευθον.
Iliad 23.502	αἰεὶ δʼ ἡνίοχον κονίης ῥαθάμιγγες ἔβαλλον,
Iliad 23.503	ἅρματα δὲ χρυσῷ πεπυκασμένα κασσιτέρῳ τε
Iliad 23.504	ἵπποις ὠκυπόδεσσιν ἐπέτρεχον· οὐδέ τι πολλὴ
Iliad 23.505	γίγνετʼ ἐπισσώτρων ἁρματροχιὴ κατόπισθεν
Iliad 23.506	ἐν λεπτῇ κονίῃ· τὼ δὲ σπεύδοντε πετέσθην.
Iliad 23.507	στῆ δὲ μέσῳ ἐν ἀγῶνι, πολὺς δʼ ἀνεκήκιεν ἱδρὼς
Iliad 23.508	ἵππων ἔκ τε λόφων καὶ ἀπὸ στέρνοιο χαμᾶζε.
Iliad 23.509	αὐτὸς δʼ ἐκ δίφροιο χαμαὶ θόρε παμφανόωντος,
Iliad 23.510	κλῖνε δʼ ἄρα μάστιγα ποτὶ ζυγόν· οὐδὲ μάτησεν
Iliad 23.511	ἴφθιμος Σθένελος, ἀλλʼ ἐσσυμένως λάβʼ ἄεθλον,
Iliad 23.512	δῶκε δʼ ἄγειν ἑτάροισιν ὑπερθύμοισι γυναῖκα
Iliad 23.513	καὶ τρίποδʼ ὠτώεντα φέρειν· ὃ δʼ ἔλυεν ὑφʼ ἵππους.
Iliad 23.514	τῷ δʼ ἄρʼ ἐπʼ Ἀντίλοχος Νηλήϊος ἤλασεν ἵππους
Iliad 23.515	κέρδεσιν, οὔ τι τάχει γε, παραφθάμενος Μενέλαον·
Iliad 23.516	ἀλλὰ καὶ ὧς Μενέλαος ἔχʼ ἐγγύθεν ὠκέας ἵππους.
Iliad 23.517	ὅσσον δὲ τροχοῦ ἵππος ἀφίσταται, ὅς ῥα ἄνακτα
Iliad 23.518	ἕλκῃσιν πεδίοιο τιταινόμενος σὺν ὄχεσφι·
Iliad 23.519	τοῦ μέν τε ψαύουσιν ἐπισσώτρου τρίχες ἄκραι
Iliad 23.520	οὐραῖαι· ὃ δέ τʼ ἄγχι μάλα τρέχει, οὐδέ τι πολλὴ
Iliad 23.521	χώρη μεσσηγὺς πολέος πεδίοιο θέοντος·
Iliad 23.522	τόσσον δὴ Μενέλαος ἀμύμονος Ἀντιλόχοιο
Iliad 23.523	λείπετʼ· ἀτὰρ τὰ πρῶτα καὶ ἐς δίσκουρα λέλειπτο,
Iliad 23.524	ἀλλά μιν αἶψα κίχανεν· ὀφέλλετο γὰρ μένος ἠῢ
Iliad 23.525	ἵππου τῆς Ἀγαμεμνονέης καλλίτριχος Αἴθης·
Iliad 23.526	εἰ δέ κʼ ἔτι προτέρω γένετο δρόμος ἀμφοτέροισι,
Iliad 23.527	τώ κέν μιν παρέλασσʼ οὐδʼ ἀμφήριστον ἔθηκεν.
Iliad 23.528	αὐτὰρ Μηριόνης θεράπων ἐῢς Ἰδομενῆος
Iliad 23.529	λείπετʼ ἀγακλῆος Μενελάου δουρὸς ἐρωήν·
Iliad 23.530	βάρδιστοι μὲν γάρ οἱ ἔσαν καλλίτριχες ἵπποι,
Iliad 23.531	ἤκιστος δʼ ἦν αὐτὸς ἐλαυνέμεν ἅρμʼ ἐν ἀγῶνι.
Iliad 23.532	υἱὸς δʼ Ἀδμήτοιο πανύστατος ἤλυθεν ἄλλων
Iliad 23.533	ἕλκων ἅρματα καλὰ ἐλαύνων πρόσσοθεν ἵππους.
Iliad 23.534	τὸν δὲ ἰδὼν ᾤκτειρε ποδάρκης δῖος Ἀχιλλεύς,
Iliad 23.535	στὰς δʼ ἄρʼ ἐν Ἀργείοις ἔπεα πτερόεντʼ ἀγόρευε·
Iliad 23.536	λοῖσθος ἀνὴρ ὤριστος ἐλαύνει μώνυχας ἵππους·
Iliad 23.537	ἀλλʼ ἄγε δή οἱ δῶμεν ἀέθλιον ὡς ἐπιεικὲς
Iliad 23.538	δεύτερʼ· ἀτὰρ τὰ πρῶτα φερέσθω Τυδέος υἱός.
Iliad 23.539	ὣς ἔφαθʼ, οἳ δʼ ἄρα πάντες ἐπῄνεον ὡς ἐκέλευε.
Iliad 23.540	καί νύ κέ οἱ πόρεν ἵππον, ἐπῄνησαν γὰρ Ἀχαιοί,
Iliad 23.541	εἰ μὴ ἄρʼ Ἀντίλοχος μεγαθύμου Νέστορος υἱὸς
Iliad 23.542	Πηλεΐδην Ἀχιλῆα δίκῃ ἠμείψατʼ ἀναστάς·
Iliad 23.543	ὦ Ἀχιλεῦ μάλα τοι κεχολώσομαι αἴ κε τελέσσῃς
Iliad 23.544	τοῦτο ἔπος· μέλλεις γὰρ ἀφαιρήσεσθαι ἄεθλον
Iliad 23.545	τὰ φρονέων ὅτι οἱ βλάβεν ἅρματα καὶ ταχέʼ ἵππω
Iliad 23.546	αὐτός τʼ ἐσθλὸς ἐών· ἀλλʼ ὤφελεν ἀθανάτοισιν
Iliad 23.547	εὔχεσθαι· τό κεν οὔ τι πανύστατος ἦλθε διώκων.
Iliad 23.548	εἰ δέ μιν οἰκτίρεις καί τοι φίλος ἔπλετο θυμῷ
Iliad 23.549	ἔστί τοι ἐν κλισίῃ χρυσὸς πολύς, ἔστι δὲ χαλκὸς
Iliad 23.550	καὶ πρόβατʼ, εἰσὶ δέ τοι δμῳαὶ καὶ μώνυχες ἵπποι·
Iliad 23.551	τῶν οἱ ἔπειτʼ ἀνελὼν δόμεναι καὶ μεῖζον ἄεθλον
Iliad 23.552	ἠὲ καὶ αὐτίκα νῦν, ἵνα σʼ αἰνήσωσιν Ἀχαιοί.
Iliad 23.553	τὴν δʼ ἐγὼ οὐ δώσω· περὶ δʼ αὐτῆς πειρηθήτω
Iliad 23.554	ἀνδρῶν ὅς κʼ ἐθέλῃσιν ἐμοὶ χείρεσσι μάχεσθαι.
Iliad 23.555	ὣς φάτο, μείδησεν δὲ ποδάρκης δῖος Ἀχιλλεὺς
Iliad 23.556	χαίρων Ἀντιλόχῳ, ὅτι οἱ φίλος ἦεν ἑταῖρος·
Iliad 23.557	καί μιν ἀμειβόμενος ἔπεα πτερόεντα προσηύδα·
Iliad 23.558	Ἀντίλοχʼ, εἰ μὲν δή με κελεύεις οἴκοθεν ἄλλο
Iliad 23.559	Εὐμήλῳ ἐπιδοῦναι, ἐγὼ δέ κε καὶ τὸ τελέσσω.
Iliad 23.560	δώσω οἱ θώρηκα, τὸν Ἀστεροπαῖον ἀπηύρων
Iliad 23.561	χάλκεον, ᾧ πέρι χεῦμα φαεινοῦ κασσιτέροιο
Iliad 23.562	ἀμφιδεδίνηται· πολέος δέ οἱ ἄξιος ἔσται.
Iliad 23.563	ἦ ῥα, καὶ Αὐτομέδοντι φίλῳ ἐκέλευσεν ἑταίρῳ
Iliad 23.564	οἰσέμεναι κλισίηθεν· ὃ δʼ ᾤχετο καί οἱ ἔνεικεν,
Iliad 23.565	Εὐμήλῳ δʼ ἐν χερσὶ τίθει· ὃ δὲ δέξατο χαίρων.
Iliad 23.566	τοῖσι δὲ καὶ Μενέλαος ἀνίστατο θυμὸν ἀχεύων
Iliad 23.567	Ἀντιλόχῳ ἄμοτον κεχολωμένος· ἐν δʼ ἄρα κῆρυξ
Iliad 23.568	χειρὶ σκῆπτρον ἔθηκε, σιωπῆσαί τε κέλευσεν
Iliad 23.569	Ἀργείους· ὃ δʼ ἔπειτα μετηύδα ἰσόθεος φώς·
Iliad 23.570	Ἀντίλοχε πρόσθεν πεπνυμένε ποῖον ἔρεξας.
Iliad 23.571	ᾔσχυνας μὲν ἐμὴν ἀρετήν, βλάψας δέ μοι ἵππους
Iliad 23.572	τοὺς σοὺς πρόσθε βαλών, οἵ τοι πολὺ χείρονες ἦσαν.
Iliad 23.573	ἀλλʼ ἄγετʼ Ἀργείων ἡγήτορες ἠδὲ μέδοντες
Iliad 23.574	ἐς μέσον ἀμφοτέροισι δικάσσατε, μὴ δʼ ἐπʼ ἀρωγῇ,
Iliad 23.575	μή ποτέ τις εἴπῃσιν Ἀχαιῶν χαλκοχιτώνων·
Iliad 23.576	Ἀντίλοχον ψεύδεσσι βιησάμενος Μενέλαος
Iliad 23.577	οἴχεται ἵππον ἄγων, ὅτι οἱ πολὺ χείρονες ἦσαν
Iliad 23.578	ἵπποι, αὐτὸς δὲ κρείσσων ἀρετῇ τε βίῃ τε.
Iliad 23.579	εἰ δʼ ἄγʼ ἐγὼν αὐτὸς δικάσω, καί μʼ οὔ τινά φημι
Iliad 23.580	ἄλλον ἐπιπλήξειν Δαναῶν· ἰθεῖα γὰρ ἔσται.
Iliad 23.581	Ἀντίλοχʼ εἰ δʼ ἄγε δεῦρο διοτρεφές, ἣ θέμις ἐστί,
Iliad 23.582	στὰς ἵππων προπάροιθε καὶ ἅρματος, αὐτὰρ ἱμάσθλην
Iliad 23.583	χερσὶν ἔχε ῥαδινήν, ᾗ περ τὸ πρόσθεν ἔλαυνες,
Iliad 23.584	ἵππων ἁψάμενος γαιήοχον ἐννοσίγαιον
Iliad 23.585	ὄμνυθι μὴ μὲν ἑκὼν τὸ ἐμὸν δόλῳ ἅρμα πεδῆσαι.
Iliad 23.586	τὸν δʼ αὖτʼ Ἀντίλοχος πεπνυμένος ἀντίον ηὔδα·
Iliad 23.587	ἄνσχεο νῦν· πολλὸν γὰρ ἔγωγε νεώτερός εἰμι
Iliad 23.588	σεῖο ἄναξ Μενέλαε, σὺ δὲ πρότερος καὶ ἀρείων.
Iliad 23.589	οἶσθʼ οἷαι νέου ἀνδρὸς ὑπερβασίαι τελέθουσι·
Iliad 23.590	κραιπνότερος μὲν γάρ τε νόος, λεπτὴ δέ τε μῆτις.
Iliad 23.591	τώ τοι ἐπιτλήτω κραδίη· ἵππον δέ τοι αὐτὸς
Iliad 23.592	δώσω, τὴν ἀρόμην. εἰ καί νύ κεν οἴκοθεν ἄλλο
Iliad 23.593	μεῖζον ἐπαιτήσειας, ἄφαρ κέ τοι αὐτίκα δοῦναι
Iliad 23.594	βουλοίμην ἢ σοί γε διοτρεφὲς ἤματα πάντα
Iliad 23.595	ἐκ θυμοῦ πεσέειν καὶ δαίμοσιν εἶναι ἀλιτρός.
Iliad 23.596	ἦ ῥα καὶ ἵππον ἄγων μεγαθύμου Νέστορος υἱὸς
Iliad 23.597	ἐν χείρεσσι τίθει Μενελάου· τοῖο δὲ θυμὸς
Iliad 23.598	ἰάνθη ὡς εἴ τε περὶ σταχύεσσιν ἐέρση
Iliad 23.599	ληΐου ἀλδήσκοντος, ὅτε φρίσσουσιν ἄρουραι·
Iliad 23.600	ὣς ἄρα σοὶ Μενέλαε μετὰ φρεσὶ θυμὸς ἰάνθη.
Iliad 23.601	καί μιν φωνήσας ἔπεα πτερόεντα προσηύδα·
Iliad 23.602	Ἀντίλοχε νῦν μέν τοι ἐγὼν ὑποείξομαι αὐτὸς
Iliad 23.603	χωόμενος, ἐπεὶ οὔ τι παρήορος οὐδʼ ἀεσίφρων
Iliad 23.604	ἦσθα πάρος· νῦν αὖτε νόον νίκησε νεοίη.
Iliad 23.605	δεύτερον αὖτʼ ἀλέασθαι ἀμείνονας ἠπεροπεύειν.
Iliad 23.606	οὐ γάρ κέν με τάχʼ ἄλλος ἀνὴρ παρέπεισεν Ἀχαιῶν.
Iliad 23.607	ἀλλὰ σὺ γὰρ δὴ πολλὰ πάθες καὶ πολλὰ μόγησας
Iliad 23.608	σός τε πατὴρ ἀγαθὸς καὶ ἀδελφεὸς εἵνεκʼ ἐμεῖο·
Iliad 23.609	τώ τοι λισσομένῳ ἐπιπείσομαι, ἠδὲ καὶ ἵππον
Iliad 23.610	δώσω ἐμήν περ ἐοῦσαν, ἵνα γνώωσι καὶ οἵδε
Iliad 23.611	ὡς ἐμὸς οὔ ποτε θυμὸς ὑπερφίαλος καὶ ἀπηνής.
Iliad 23.612	ἦ ῥα, καὶ Ἀντιλόχοιο Νοήμονι δῶκεν ἑταίρῳ
Iliad 23.613	ἵππον ἄγειν· ὃ δʼ ἔπειτα λέβηθʼ ἕλε παμφανόωντα.
Iliad 23.614	Μηριόνης δʼ ἀνάειρε δύω χρυσοῖο τάλαντα
Iliad 23.615	τέτρατος, ὡς ἔλασεν. πέμπτον δʼ ὑπελείπετʼ ἄεθλον,
Iliad 23.616	ἀμφίθετος φιάλη· τὴν Νέστορι δῶκεν Ἀχιλλεὺς
Iliad 23.617	Ἀργείων ἀνʼ ἀγῶνα φέρων, καὶ ἔειπε παραστάς·
Iliad 23.618	τῆ νῦν, καὶ σοὶ τοῦτο γέρον κειμήλιον ἔστω
Iliad 23.619	Πατρόκλοιο τάφου μνῆμʼ ἔμμεναι· οὐ γὰρ ἔτʼ αὐτὸν
Iliad 23.620	ὄψῃ ἐν Ἀργείοισι· δίδωμι δέ τοι τόδʼ ἄεθλον
Iliad 23.621	αὔτως· οὐ γὰρ πύξ γε μαχήσεαι, οὐδὲ παλαίσεις,
Iliad 23.622	οὐδʼ ἔτʼ ἀκοντιστὺν ἐσδύσεαι, οὐδὲ πόδεσσι
Iliad 23.623	θεύσεαι· ἤδη γὰρ χαλεπὸν κατὰ γῆρας ἐπείγει.
Iliad 23.624	ὣς εἰπὼν ἐν χερσὶ τίθει· ὃ δʼ ἐδέξατο χαίρων,
Iliad 23.625	καί μιν φωνήσας ἔπεα πτερόεντα προσηύδα·
Iliad 23.626	ναὶ δὴ ταῦτά γε πάντα τέκος κατὰ μοῖραν ἔειπες·
Iliad 23.627	οὐ γὰρ ἔτʼ ἔμπεδα γυῖα φίλος πόδες, οὐδέ τι χεῖρες
Iliad 23.628	ὤμων ἀμφοτέρωθεν ἐπαΐσσονται ἐλαφραί.
Iliad 23.629	εἴθʼ ὣς ἡβώοιμι βίη τέ μοι ἔμπεδος εἴη
Iliad 23.630	ὡς ὁπότε κρείοντʼ Ἀμαρυγκέα θάπτον Ἐπειοὶ
Iliad 23.631	Βουπρασίῳ, παῖδες δʼ ἔθεσαν βασιλῆος ἄεθλα·
Iliad 23.632	ἔνθʼ οὔ τίς μοι ὁμοῖος ἀνὴρ γένετʼ, οὔτʼ ἄρʼ Ἐπειῶν
Iliad 23.633	οὔτʼ αὐτῶν Πυλίων οὔτʼ Αἰτωλῶν μεγαθύμων.
Iliad 23.634	πὺξ μὲν ἐνίκησα Κλυτομήδεα Ἤνοπος υἱόν,
Iliad 23.635	Ἀγκαῖον δὲ πάλῃ Πλευρώνιον, ὅς μοι ἀνέστη·
Iliad 23.636	Ἴφικλον δὲ πόδεσσι παρέδραμον ἐσθλὸν ἐόντα,
Iliad 23.637	δουρὶ δʼ ὑπειρέβαλον Φυλῆά τε καὶ Πολύδωρον.
Iliad 23.638	οἴοισίν μʼ ἵπποισι παρήλασαν Ἀκτορίωνε
Iliad 23.639	πλήθει πρόσθε βαλόντες ἀγασσάμενοι περὶ νίκης,
Iliad 23.640	οὕνεκα δὴ τὰ μέγιστα παρʼ αὐτόθι λείπετʼ ἄεθλα.
Iliad 23.641	οἳ δʼ ἄρʼ ἔσαν δίδυμοι· ὃ μὲν ἔμπεδον ἡνιόχευεν,
Iliad 23.642	ἔμπεδον ἡνιόχευʼ, ὃ δʼ ἄρα μάστιγι κέλευεν.
Iliad 23.643	ὥς ποτʼ ἔον· νῦν αὖτε νεώτεροι ἀντιοώντων
Iliad 23.644	ἔργων τοιούτων· ἐμὲ δὲ χρὴ γήραϊ λυγρῷ
Iliad 23.645	πείθεσθαι, τότε δʼ αὖτε μετέπρεπον ἡρώεσσιν.
Iliad 23.646	ἀλλʼ ἴθι καὶ σὸν ἑταῖρον ἀέθλοισι κτερέϊζε.
Iliad 23.647	τοῦτο δʼ ἐγὼ πρόφρων δέχομαι, χαίρει δέ μοι ἦτορ,
Iliad 23.648	ὥς μευ ἀεὶ μέμνησαι ἐνηέος, οὐδέ σε λήθω,
Iliad 23.649	τιμῆς ἧς τέ μʼ ἔοικε τετιμῆσθαι μετʼ Ἀχαιοῖς.
Iliad 23.650	σοὶ δὲ θεοὶ τῶνδʼ ἀντὶ χάριν μενοεικέα δοῖεν.
Iliad 23.651	ὣς φάτο, Πηλεΐδης δὲ πολὺν καθʼ ὅμιλον Ἀχαιῶν
Iliad 23.652	ᾤχετʼ, ἐπεὶ πάντʼ αἶνον ἐπέκλυε Νηλεΐδαο.
Iliad 23.653	αὐτὰρ ὃ πυγμαχίης ἀλεγεινῆς θῆκεν ἄεθλα·
Iliad 23.654	ἡμίονον ταλαεργὸν ἄγων κατέδησʼ ἐν ἀγῶνι
Iliad 23.655	ἑξέτεʼ ἀδμήτην, ἥ τʼ ἀλγίστη δαμάσασθαι·
Iliad 23.656	τῷ δʼ ἄρα νικηθέντι τίθει δέπας ἀμφικύπελλον.
Iliad 23.657	στῆ δʼ ὀρθὸς καὶ μῦθον ἐν Ἀργείοισιν ἔειπεν·
Iliad 23.658	Ἀτρεΐδη τε καὶ ἄλλοι ἐϋκνήμιδες Ἀχαιοὶ
Iliad 23.659	ἄνδρε δύω περὶ τῶνδε κελεύομεν, ὥ περ ἀρίστω,
Iliad 23.660	πὺξ μάλʼ ἀνασχομένω πεπληγέμεν· ᾧ δέ κʼ Ἀπόλλων
Iliad 23.661	δώῃ καμμονίην, γνώωσι δὲ πάντες Ἀχαιοί,
Iliad 23.662	ἡμίονον ταλαεργὸν ἄγων κλισίην δὲ νεέσθω·
Iliad 23.663	αὐτὰρ ὃ νικηθεὶς δέπας οἴσεται ἀμφικύπελλον.
Iliad 23.664	ὣς ἔφατʼ, ὄρνυτο δʼ αὐτίκʼ ἀνὴρ ἠΰς τε μέγας τε
Iliad 23.665	εἰδὼς πυγμαχίης υἱὸς Πανοπῆος Ἐπειός,
Iliad 23.666	ἅψατο δʼ ἡμιόνου ταλαεργοῦ φώνησέν τε·
Iliad 23.667	ἆσσον ἴτω ὅς τις δέπας οἴσεται ἀμφικύπελλον·
Iliad 23.668	ἡμίονον δʼ οὔ φημί τινʼ ἀξέμεν ἄλλον Ἀχαιῶν
Iliad 23.669	πυγμῇ νικήσαντʼ, ἐπεὶ εὔχομαι εἶναι ἄριστος.
Iliad 23.670	ἦ οὐχ ἅλις ὅττι μάχης ἐπιδεύομαι; οὐδʼ ἄρα πως ἦν
Iliad 23.671	ἐν πάντεσσʼ ἔργοισι δαήμονα φῶτα γενέσθαι.
Iliad 23.672	ὧδε γὰρ ἐξερέω, τὸ δὲ καὶ τετελεσμένον ἔσται·
Iliad 23.673	ἀντικρὺ χρόα τε ῥήξω σύν τʼ ὀστέʼ ἀράξω.
Iliad 23.674	κηδεμόνες δέ οἱ ἐνθάδʼ ἀολλέες αὖθι μενόντων,
Iliad 23.675	οἵ κέ μιν ἐξοίσουσιν ἐμῇς ὑπὸ χερσὶ δαμέντα.
Iliad 23.676	ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ.
Iliad 23.677	Εὐρύαλος δέ οἱ οἶος ἀνίστατο ἰσόθεος φὼς
Iliad 23.678	Μηκιστῆος υἱὸς Ταλαϊονίδαο ἄνακτος,
Iliad 23.679	ὅς ποτε Θήβας δʼ ἦλθε δεδουπότος Οἰδιπόδαο
Iliad 23.680	ἐς τάφον· ἔνθα δὲ πάντας ἐνίκα Καδμείωνας.
Iliad 23.681	τὸν μὲν Τυδεΐδης δουρὶ κλυτὸς ἀμφεπονεῖτο
Iliad 23.682	θαρσύνων ἔπεσιν, μέγα δʼ αὐτῷ βούλετο νίκην.
Iliad 23.683	ζῶμα δέ οἱ πρῶτον παρακάββαλεν, αὐτὰρ ἔπειτα
Iliad 23.684	δῶκεν ἱμάντας ἐϋτμήτους βοὸς ἀγραύλοιο.
Iliad 23.685	τὼ δὲ ζωσαμένω βήτην ἐς μέσσον ἀγῶνα,
Iliad 23.686	ἄντα δʼ ἀνασχομένω χερσὶ στιβαρῇσιν ἅμʼ ἄμφω
Iliad 23.687	σύν ῥʼ ἔπεσον, σὺν δέ σφι βαρεῖαι χεῖρες ἔμιχθεν.
Iliad 23.688	δεινὸς δὲ χρόμαδος γενύων γένετʼ, ἔρρεε δʼ ἱδρὼς
Iliad 23.689	πάντοθεν ἐκ μελέων· ἐπὶ δʼ ὄρνυτο δῖος Ἐπειός,
Iliad 23.690	κόψε δὲ παπτήναντα παρήϊον· οὐδʼ ἄρʼ ἔτι δὴν
Iliad 23.691	ἑστήκειν· αὐτοῦ γὰρ ὑπήριπε φαίδιμα γυῖα.
Iliad 23.692	ὡς δʼ ὅθʼ ὑπὸ φρικὸς Βορέω ἀναπάλλεται ἰχθὺς
Iliad 23.693	θίνʼ ἐν φυκιόεντι, μέλαν δέ ἑ κῦμα κάλυψεν,
Iliad 23.694	ὣς πληγεὶς ἀνέπαλτʼ· αὐτὰρ μεγάθυμος Ἐπειὸς
Iliad 23.695	χερσὶ λαβὼν ὤρθωσε· φίλοι δʼ ἀμφέσταν ἑταῖροι,
Iliad 23.696	οἵ μιν ἄγον διʼ ἀγῶνος ἐφελκομένοισι πόδεσσιν
Iliad 23.697	αἷμα παχὺ πτύοντα κάρη βάλλονθʼ ἑτέρωσε·
Iliad 23.698	κὰδ δʼ ἀλλοφρονέοντα μετὰ σφίσιν εἷσαν ἄγοντες,
Iliad 23.699	αὐτοὶ δʼ οἰχόμενοι κόμισαν δέπας ἀμφικύπελλον.
Iliad 23.700	Πηλεΐδης δʼ αἶψʼ ἄλλα κατὰ τρίτα θῆκεν ἄεθλα
Iliad 23.701	δεικνύμενος Δαναοῖσι παλαισμοσύνης ἀλεγεινῆς,
Iliad 23.702	τῷ μὲν νικήσαντι μέγαν τρίποδʼ ἐμπυριβήτην,
Iliad 23.703	τὸν δὲ δυωδεκάβοιον ἐνὶ σφίσι τῖον Ἀχαιοί·
Iliad 23.704	ἀνδρὶ δὲ νικηθέντι γυναῖκʼ ἐς μέσσον ἔθηκε,
Iliad 23.705	πολλὰ δʼ ἐπίστατο ἔργα, τίον δέ ἑ τεσσαράβοιον.
Iliad 23.706	στῆ δʼ ὀρθὸς καὶ μῦθον ἐν Ἀργείοισιν ἔειπεν·
Iliad 23.707	ὄρνυσθʼ οἳ καὶ τούτου ἀέθλου πειρήσεσθον.
Iliad 23.708	ὣς ἔφατʼ, ὦρτο δʼ ἔπειτα μέγας Τελαμώνιος Αἴας,
Iliad 23.709	ἂν δʼ Ὀδυσεὺς πολύμητις ἀνίστατο κέρδεα εἰδώς.
Iliad 23.710	ζωσαμένω δʼ ἄρα τώ γε βάτην ἐς μέσσον ἀγῶνα,
Iliad 23.711	ἀγκὰς δʼ ἀλλήλων λαβέτην χερσὶ στιβαρῇσιν
Iliad 23.712	ὡς ὅτʼ ἀμείβοντες, τούς τε κλυτὸς ἤραρε τέκτων
Iliad 23.713	δώματος ὑψηλοῖο βίας ἀνέμων ἀλεείνων.
Iliad 23.714	τετρίγει δʼ ἄρα νῶτα θρασειάων ἀπὸ χειρῶν
Iliad 23.715	ἑλκόμενα στερεῶς· κατὰ δὲ νότιος ῥέεν ἱδρώς,
Iliad 23.716	πυκναὶ δὲ σμώδιγγες ἀνὰ πλευράς τε καὶ ὤμους
Iliad 23.717	αἵματι φοινικόεσσαι ἀνέδραμον· οἳ δὲ μάλʼ αἰεὶ
Iliad 23.718	νίκης ἱέσθην τρίποδος πέρι ποιητοῖο·
Iliad 23.719	οὔτʼ Ὀδυσεὺς δύνατο σφῆλαι οὔδει τε πελάσσαι,
Iliad 23.720	οὔτʼ Αἴας δύνατο, κρατερὴ δʼ ἔχεν ἲς Ὀδυσῆος.
Iliad 23.721	ἀλλʼ ὅτε δή ῥʼ ἀνίαζον ἐϋκνήμιδας Ἀχαιούς,
Iliad 23.722	δὴ τότε μιν προσέειπε μέγας Τελαμώνιος Αἴας·
Iliad 23.723	διογενὲς Λαερτιάδη πολυμήχανʼ Ὀδυσσεῦ
Iliad 23.724	ἤ μʼ ἀνάειρʼ, ἢ ἐγὼ σέ· τὰ δʼ αὖ Διὶ πάντα μελήσει.
Iliad 23.725	ὣς εἰπὼν ἀνάειρε· δόλου δʼ οὐ λήθετʼ Ὀδυσσεύς·
Iliad 23.726	κόψʼ ὄπιθεν κώληπα τυχών, ὑπέλυσε δὲ γυῖα,
Iliad 23.727	κὰδ δʼ ἔβαλʼ ἐξοπίσω· ἐπὶ δὲ στήθεσσιν Ὀδυσσεὺς
Iliad 23.728	κάππεσε· λαοὶ δʼ αὖ θηεῦντό τε θάμβησάν τε.
Iliad 23.729	δεύτερος αὖτʼ ἀνάειρε πολύτλας δῖος Ὀδυσσεύς,
Iliad 23.730	κίνησεν δʼ ἄρα τυτθὸν ἀπὸ χθονός, οὐδʼ ἔτʼ ἄειρεν,
Iliad 23.731	ἐν δὲ γόνυ γνάμψεν· ἐπὶ δὲ χθονὶ κάππεσον ἄμφω
Iliad 23.732	πλησίοι ἀλλήλοισι, μιάνθησαν δὲ κονίῃ.
Iliad 23.733	καί νύ κε τὸ τρίτον αὖτις ἀναΐξαντʼ ἐπάλαιον,
Iliad 23.734	εἰ μὴ Ἀχιλλεὺς αὐτὸς ἀνίστατο καὶ κατέρυκε·
Iliad 23.735	μηκέτʼ ἐρείδεσθον, μὴ δὲ τρίβεσθε κακοῖσι·
Iliad 23.736	νίκη δʼ ἀμφοτέροισιν· ἀέθλια δʼ ἶσʼ ἀνελόντες
Iliad 23.737	ἔρχεσθʼ, ὄφρα καὶ ἄλλοι ἀεθλεύωσιν Ἀχαιοί.
Iliad 23.738	ὣς ἔφαθʼ, οἳ δʼ ἄρα τοῦ μάλα μὲν κλύον ἠδὲ πίθοντο,
Iliad 23.739	καί ῥʼ ἀπομορξαμένω κονίην δύσαντο χιτῶνας.
Iliad 23.740	Πηλεΐδης δʼ αἶψʼ ἄλλα τίθει ταχυτῆτος ἄεθλα
Iliad 23.741	ἀργύρεον κρητῆρα τετυγμένον· ἓξ δʼ ἄρα μέτρα
Iliad 23.742	χάνδανεν, αὐτὰρ κάλλει ἐνίκα πᾶσαν ἐπʼ αἶαν
Iliad 23.743	πολλόν, ἐπεὶ Σιδόνες πολυδαίδαλοι εὖ ἤσκησαν,
Iliad 23.744	Φοίνικες δʼ ἄγον ἄνδρες ἐπʼ ἠεροειδέα πόντον,
Iliad 23.745	στῆσαν δʼ ἐν λιμένεσσι, Θόαντι δὲ δῶρον ἔδωκαν·
Iliad 23.746	υἷος δὲ Πριάμοιο Λυκάονος ὦνον ἔδωκε
Iliad 23.747	Πατρόκλῳ ἥρωϊ Ἰησονίδης Εὔνηος.
Iliad 23.748	καὶ τὸν Ἀχιλλεὺς θῆκεν ἄεθλον οὗ ἑτάροιο,
Iliad 23.749	ὅς τις ἐλαφρότατος ποσσὶ κραιπνοῖσι πέλοιτο·
Iliad 23.750	δευτέρῳ αὖ βοῦν θῆκε μέγαν καὶ πίονα δημῷ,
Iliad 23.751	ἡμιτάλαντον δὲ χρυσοῦ λοισθήϊʼ ἔθηκε.
Iliad 23.752	στῆ δʼ ὀρθὸς καὶ μῦθον ἐν Ἀργείοισιν ἔειπεν·
Iliad 23.753	ὄρνυσθʼ οἳ καὶ τούτου ἀέθλου πειρήσεσθε.
Iliad 23.754	ὣς ἔφατʼ, ὄρνυτο δʼ αὐτίκʼ Ὀϊλῆος ταχὺς Αἴας,
Iliad 23.755	ἂν δʼ Ὀδυσεὺς πολύμητις, ἔπειτα δὲ Νέστορος υἱὸς
Iliad 23.756	Ἀντίλοχος· ὃ γὰρ αὖτε νέους ποσὶ πάντας ἐνίκα.
Iliad 23.757	στὰν δὲ μεταστοιχί· σήμηνε δὲ τέρματʼ Ἀχιλλεύς.
Iliad 23.758	τοῖσι δʼ ἀπὸ νύσσης τέτατο δρόμος· ὦκα δʼ ἔπειτα
Iliad 23.759	ἔκφερʼ Ὀϊλιάδης· ἐπὶ δʼ ὄρνυτο δῖος Ὀδυσσεὺς
Iliad 23.760	ἄγχι μάλʼ, ὡς ὅτε τίς τε γυναικὸς ἐϋζώνοιο
Iliad 23.761	στήθεός ἐστι κανών, ὅν τʼ εὖ μάλα χερσὶ τανύσσῃ
Iliad 23.762	πηνίον ἐξέλκουσα παρὲκ μίτον, ἀγχόθι δʼ ἴσχει
Iliad 23.763	στήθεος· ὣς Ὀδυσεὺς θέεν ἐγγύθεν, αὐτὰρ ὄπισθεν
Iliad 23.764	ἴχνια τύπτε πόδεσσι πάρος κόνιν ἀμφιχυθῆναι·
Iliad 23.765	κὰδ δʼ ἄρα οἱ κεφαλῆς χέʼ ἀϋτμένα δῖος Ὀδυσσεὺς
Iliad 23.766	αἰεὶ ῥίμφα θέων· ἴαχον δʼ ἐπὶ πάντες Ἀχαιοὶ
Iliad 23.767	νίκης ἱεμένῳ, μάλα δὲ σπεύδοντι κέλευον.
Iliad 23.768	ἀλλʼ ὅτε δὴ πύματον τέλεον δρόμον, αὐτίκʼ Ὀδυσσεὺς
Iliad 23.769	εὔχετʼ Ἀθηναίῃ γλαυκώπιδι ὃν κατὰ θυμόν·
Iliad 23.770	κλῦθι θεά, ἀγαθή μοι ἐπίρροθος ἐλθὲ ποδοῖιν.
Iliad 23.771	ὣς ἔφατʼ εὐχόμενος· τοῦ δʼ ἔκλυε Παλλὰς Ἀθήνη,
Iliad 23.772	γυῖα δʼ ἔθηκεν ἐλαφρά, πόδας καὶ χεῖρας ὕπερθεν.
Iliad 23.773	ἀλλʼ ὅτε δὴ τάχʼ ἔμελλον ἐπαΐξασθαι ἄεθλον,
Iliad 23.774	ἔνθʼ Αἴας μὲν ὄλισθε θέων, βλάψεν γὰρ Ἀθήνη,
Iliad 23.775	τῇ ῥα βοῶν κέχυτʼ ὄνθος ἀποκταμένων ἐριμύκων,
Iliad 23.776	οὓς ἐπὶ Πατρόκλῳ πέφνεν πόδας ὠκὺς Ἀχιλλεύς·
Iliad 23.777	ἐν δʼ ὄνθου βοέου πλῆτο στόμα τε ῥῖνάς τε·
Iliad 23.778	κρητῆρʼ αὖτʼ ἀνάειρε πολύτλας δῖος Ὀδυσσεύς,
Iliad 23.779	ὡς ἦλθε φθάμενος· ὃ δὲ βοῦν ἕλε φαίδιμος Αἴας.
Iliad 23.780	στῆ δὲ κέρας μετὰ χερσὶν ἔχων βοὸς ἀγραύλοιο
Iliad 23.781	ὄνθον ἀποπτύων, μετὰ δʼ Ἀργείοισιν ἔειπεν·
Iliad 23.782	ὢ πόποι ἦ μʼ ἔβλαψε θεὰ πόδας, ἣ τὸ πάρος περ
Iliad 23.783	μήτηρ ὣς Ὀδυσῆϊ παρίσταται ἠδʼ ἐπαρήγει.
Iliad 23.784	ὣς ἔφαθʼ, οἳ δʼ ἄρα πάντες ἐπʼ αὐτῷ ἡδὺ γέλασσαν.
Iliad 23.785	Ἀντίλοχος δʼ ἄρα δὴ λοισθήϊον ἔκφερʼ ἄεθλον
Iliad 23.786	μειδιόων, καὶ μῦθον ἐν Ἀργείοισιν ἔειπεν·
Iliad 23.787	εἰδόσιν ὔμμʼ ἐρέω πᾶσιν φίλοι, ὡς ἔτι καὶ νῦν
Iliad 23.788	ἀθάνατοι τιμῶσι παλαιοτέρους ἀνθρώπους.
Iliad 23.789	Αἴας μὲν γὰρ ἐμεῖʼ ὀλίγον προγενέστερός ἐστιν,
Iliad 23.790	οὗτος δὲ προτέρης γενεῆς προτέρων τʼ ἀνθρώπων·
Iliad 23.791	ὠμογέροντα δέ μίν φασʼ ἔμμεναι· ἀργαλέον δὲ
Iliad 23.792	ποσσὶν ἐριδήσασθαι Ἀχαιοῖς, εἰ μὴ Ἀχιλλεῖ.
Iliad 23.793	ὣς φάτο, κύδηνεν δὲ ποδώκεα Πηλεΐωνα.
Iliad 23.794	τὸν δʼ Ἀχιλεὺς μύθοισιν ἀμειβόμενος προσέειπεν·
Iliad 23.795	Ἀντίλοχʼ οὐ μέν τοι μέλεος εἰρήσεται αἶνος,
Iliad 23.796	ἀλλά τοι ἡμιτάλαντον ἐγὼ χρυσοῦ ἐπιθήσω.
Iliad 23.797	ὣς εἰπὼν ἐν χερσὶ τίθει, ὃ δʼ ἐδέξατο χαίρων.
Iliad 23.798	αὐτὰρ Πηλεΐδης κατὰ μὲν δολιχόσκιον ἔγχος
Iliad 23.799	θῆκʼ ἐς ἀγῶνα φέρων, κατὰ δʼ ἀσπίδα καὶ τρυφάλειαν
Iliad 23.800	τεύχεα Σαρπήδοντος, ἅ μιν Πάτροκλος ἀπηύρα.
Iliad 23.801	στῆ δʼ ὀρθὸς καὶ μῦθον ἐν Ἀργείοισιν ἔειπεν·
Iliad 23.802	ἄνδρε δύω περὶ τῶνδε κελεύομεν, ὥ περ ἀρίστω,
Iliad 23.803	τεύχεα ἑσσαμένω ταμεσίχροα χαλκὸν ἑλόντε
Iliad 23.804	ἀλλήλων προπάροιθεν ὁμίλου πειρηθῆναι.
Iliad 23.805	ὁππότερός κε φθῇσιν ὀρεξάμενος χρόα καλόν,
Iliad 23.806	ψαύσῃ δʼ ἐνδίνων διά τʼ ἔντεα καὶ μέλαν αἷμα,
Iliad 23.807	τῷ μὲν ἐγὼ δώσω τόδε φάσγανον ἀργυρόηλον
Iliad 23.808	καλὸν Θρηΐκιον, τὸ μὲν Ἀστεροπαῖον ἀπηύρων·
Iliad 23.809	τεύχεα δʼ ἀμφότεροι ξυνήϊα ταῦτα φερέσθων·
Iliad 23.810	καί σφιν δαῖτʼ ἀγαθὴν παραθήσομεν ἐν κλισίῃσιν.
Iliad 23.811	ὣς ἔφατʼ, ὦρτο δʼ ἔπειτα μέγας Τελαμώνιος Αἴας,
Iliad 23.812	ἂν δʼ ἄρα Τυδεΐδης ὦρτο, κρατερὸς Διομήδης.
Iliad 23.813	οἳ δʼ ἐπεὶ οὖν ἑκάτερθεν ὁμίλου θωρήχθησαν,
Iliad 23.814	ἐς μέσον ἀμφοτέρω συνίτην μεμαῶτε μάχεσθαι
Iliad 23.815	δεινὸν δερκομένω· θάμβος δʼ ἔχε πάντας Ἀχαιούς.
Iliad 23.816	ἀλλʼ ὅτε δὴ σχεδὸν ἦσαν ἐπʼ ἀλλήλοισιν ἰόντες,
Iliad 23.817	τρὶς μὲν ἐπήϊξαν, τρὶς δὲ σχεδὸν ὁρμήθησαν.
Iliad 23.818	ἔνθʼ Αἴας μὲν ἔπειτα κατʼ ἀσπίδα πάντοσʼ ἐΐσην
Iliad 23.819	νύξʼ, οὐδὲ χρόʼ ἵκανεν· ἔρυτο γὰρ ἔνδοθι θώρηξ·
Iliad 23.820	Τυδεΐδης δʼ ἄρʼ ἔπειτα ὑπὲρ σάκεος μεγάλοιο
Iliad 23.821	αἰὲν ἐπʼ αὐχένι κῦρε φαεινοῦ δουρὸς ἀκωκῇ.
Iliad 23.822	καὶ τότε δή ῥʼ Αἴαντι περιδείσαντες Ἀχαιοὶ
Iliad 23.823	παυσαμένους ἐκέλευσαν ἀέθλια ἶσʼ ἀνελέσθαι.
Iliad 23.824	αὐτὰρ Τυδεΐδῃ δῶκεν μέγα φάσγανον ἥρως
Iliad 23.825	σὺν κολεῷ τε φέρων καὶ ἐϋτμήτῳ τελαμῶνι.
Iliad 23.826	αὐτὰρ Πηλεΐδης θῆκεν σόλον αὐτοχόωνον
Iliad 23.827	ὃν πρὶν μὲν ῥίπτασκε μέγα σθένος Ἠετίωνος·
Iliad 23.828	ἀλλʼ ἤτοι τὸν ἔπεφνε ποδάρκης δῖος Ἀχιλλεύς,
Iliad 23.829	τὸν δʼ ἄγετʼ ἐν νήεσσι σὺν ἄλλοισι κτεάτεσσι.
Iliad 23.830	στῆ δʼ ὀρθὸς καὶ μῦθον ἐν Ἀργείοισιν ἔειπεν·
Iliad 23.831	ὄρνυσθʼ οἳ καὶ τούτου ἀέθλου πειρήσεσθε.
Iliad 23.832	εἴ οἱ καὶ μάλα πολλὸν ἀπόπροθι πίονες ἀγροί,
Iliad 23.833	ἕξει μιν καὶ πέντε περιπλομένους ἐνιαυτοὺς
Iliad 23.834	χρεώμενος· οὐ μὲν γάρ οἱ ἀτεμβόμενός γε σιδήρου
Iliad 23.835	ποιμὴν οὐδʼ ἀροτὴρ εἶσʼ ἐς πόλιν, ἀλλὰ παρέξει.
Iliad 23.836	ὣς ἔφατʼ, ὦρτο δʼ ἔπειτα μενεπτόλεμος Πολυποίτης,
Iliad 23.837	ἂν δὲ Λεοντῆος κρατερὸν μένος ἀντιθέοιο,
Iliad 23.838	ἂν δʼ Αἴας Τελαμωνιάδης καὶ δῖος Ἐπειός.
Iliad 23.839	ἑξείης δʼ ἵσταντο, σόλον δʼ ἕλε δῖος Ἐπειός,
Iliad 23.840	ἧκε δὲ δινήσας· γέλασαν δʼ ἐπὶ πάντες Ἀχαιοί.
Iliad 23.841	δεύτερος αὖτʼ ἀφέηκε Λεοντεὺς ὄζος Ἄρηος·
Iliad 23.842	τὸ τρίτον αὖτʼ ἔρριψε μέγας Τελαμώνιος Αἴας
Iliad 23.843	χειρὸς ἄπο στιβαρῆς, καὶ ὑπέρβαλε σήματα πάντων.
Iliad 23.844	ἀλλʼ ὅτε δὴ σόλον εἷλε μενεπτόλεμος Πολυποίτης,
Iliad 23.845	ὅσσόν τίς τʼ ἔρριψε καλαύροπα βουκόλος ἀνήρ,
Iliad 23.846	ἣ δέ θʼ ἑλισσομένη πέτεται διὰ βοῦς ἀγελαίας,
Iliad 23.847	τόσσον παντὸς ἀγῶνος ὑπέρβαλε· τοὶ δὲ βόησαν.
Iliad 23.848	ἀνστάντες δʼ ἕταροι Πολυποίταο κρατεροῖο
Iliad 23.849	νῆας ἔπι γλαφυρὰς ἔφερον βασιλῆος ἄεθλον.
Iliad 23.850	αὐτὰρ ὃ τοξευτῇσι τίθει ἰόεντα σίδηρον,
Iliad 23.851	κὰδ δʼ ἐτίθει δέκα μὲν πελέκεας, δέκα δʼ ἡμιπέλεκκα,
Iliad 23.852	ἱστὸν δʼ ἔστησεν νηὸς κυανοπρῴροιο
Iliad 23.853	τηλοῦ ἐπὶ ψαμάθοις, ἐκ δὲ τρήρωνα πέλειαν
Iliad 23.854	λεπτῇ μηρίνθῳ δῆσεν ποδός, ἧς ἄρʼ ἀνώγει
Iliad 23.855	τοξεύειν· ὃς μέν κε βάλῃ τρήρωνα πέλειαν,
Iliad 23.856	πάντας ἀειράμενος πελέκεας οἶκον δὲ φερέσθω·
Iliad 23.857	ὃς δέ κε μηρίνθοιο τύχῃ ὄρνιθος ἁμαρτών,
Iliad 23.858	ἥσσων γὰρ δὴ κεῖνος, ὃ δʼ οἴσεται ἡμιπέλεκκα.
Iliad 23.859	ὣς ἔφατʼ, ὦρτο δʼ ἔπειτα βίη Τεύκροιο ἄνακτος,
Iliad 23.860	ἂν δʼ ἄρα Μηριόνης θεράπων ἐῢς Ἰδομενῆος.
Iliad 23.861	κλήρους δʼ ἐν κυνέῃ χαλκήρεϊ πάλλον ἑλόντες,
Iliad 23.862	Τεῦκρος δὲ πρῶτος κλήρῳ λάχεν· αὐτίκα δʼ ἰὸν
Iliad 23.863	ἧκεν ἐπικρατέως, οὐδʼ ἠπείλησεν ἄνακτι
Iliad 23.864	ἀρνῶν πρωτογόνων ῥέξειν κλειτὴν ἑκατόμβην.
Iliad 23.865	ὄρνιθος μὲν ἅμαρτε· μέγηρε γάρ οἱ τό γʼ Ἀπόλλων·
Iliad 23.866	αὐτὰρ ὃ μήρινθον βάλε πὰρ πόδα, τῇ δέδετʼ ὄρνις·
Iliad 23.867	ἀντικρὺ δʼ ἀπὸ μήρινθον τάμε πικρὸς ὀϊστός.
Iliad 23.868	ἣ μὲν ἔπειτʼ ἤϊξε πρὸς οὐρανόν, ἣ δὲ παρείθη
Iliad 23.869	μήρινθος ποτὶ γαῖαν· ἀτὰρ κελάδησαν Ἀχαιοί.
Iliad 23.870	σπερχόμενος δʼ ἄρα Μηριόνης ἐξείρυσε χειρὸς
Iliad 23.871	τόξον· ἀτὰρ δὴ ὀϊστὸν ἔχεν πάλαι, ὡς ἴθυνεν.
Iliad 23.872	αὐτίκα δʼ ἠπείλησεν ἑκηβόλῳ Ἀπόλλωνι
Iliad 23.873	ἀρνῶν πρωτογόνων ῥέξειν κλειτὴν ἑκατόμβην.
Iliad 23.874	ὕψι δʼ ὑπὸ νεφέων εἶδε τρήρωνα πέλειαν·
Iliad 23.875	τῇ ῥʼ ὅ γε δινεύουσαν ὑπὸ πτέρυγος βάλε μέσσην,
Iliad 23.876	ἀντικρὺ δὲ διῆλθε βέλος· τὸ μὲν ἂψ ἐπὶ γαίῃ
Iliad 23.877	πρόσθεν Μηριόναο πάγη ποδός· αὐτὰρ ἣ ὄρνις
Iliad 23.878	ἱστῷ ἐφεζομένη νηὸς κυανοπρῴροιο
Iliad 23.879	αὐχένʼ ἀπεκρέμασεν, σὺν δὲ πτερὰ πυκνὰ λίασθεν.
Iliad 23.880	ὠκὺς δʼ ἐκ μελέων θυμὸς πτάτο, τῆλε δʼ ἀπʼ αὐτοῦ
Iliad 23.881	κάππεσε· λαοὶ δʼ αὖ θηεῦντό τε θάμβησάν τε.
Iliad 23.882	ἂν δʼ ἄρα Μηριόνης πελέκεας δέκα πάντας ἄειρε,
Iliad 23.883	Τεῦκρος δʼ ἡμιπέλεκκα φέρεν κοίλας ἐπὶ νῆας.
Iliad 23.884	αὐτὰρ Πηλεΐδης κατὰ μὲν δολιχόσκιον ἔγχος,
Iliad 23.885	κὰδ δὲ λέβητʼ ἄπυρον βοὸς ἄξιον ἀνθεμόεντα
Iliad 23.886	θῆκʼ ἐς ἀγῶνα φέρων· καί ῥʼ ἥμονες ἄνδρες ἀνέσταν·
Iliad 23.887	ἂν μὲν ἄρʼ Ἀτρεΐδης εὐρὺ κρείων Ἀγαμέμνων,
Iliad 23.888	ἂν δʼ ἄρα Μηριόνης, θεράπων ἐῢς Ἰδομενῆος.
Iliad 23.889	τοῖσι δὲ καὶ μετέειπε ποδάρκης δῖος Ἀχιλλεύς·
Iliad 23.890	Ἀτρεΐδη· ἴδμεν γὰρ ὅσον προβέβηκας ἁπάντων
Iliad 23.891	ἠδʼ ὅσσον δυνάμει τε καὶ ἥμασιν ἔπλευ ἄριστος·
Iliad 23.892	ἀλλὰ σὺ μὲν τόδʼ ἄεθλον ἔχων κοίλας ἐπὶ νῆας
Iliad 23.893	ἔρχευ, ἀτὰρ δόρυ Μηριόνῃ ἥρωϊ πόρωμεν,
Iliad 23.894	εἰ σύ γε σῷ θυμῷ ἐθέλοις· κέλομαι γὰρ ἔγωγε.
Iliad 23.895	ὣς ἔφατʼ, οὐδʼ ἀπίθησεν ἄναξ ἀνδρῶν Ἀγαμέμνων·
Iliad 23.896	δῶκε δὲ Μηριόνῃ δόρυ χάλκεον· αὐτὰρ ὅ γʼ ἥρως
Iliad 23.897	Ταλθυβίῳ κήρυκι δίδου περικαλλὲς ἄεθλον.
Iliad 24.1	λῦτο δʼ ἀγών, λαοὶ δὲ θοὰς ἐπὶ νῆας ἕκαστοι
Iliad 24.2	ἐσκίδναντʼ ἰέναι. τοὶ μὲν δόρποιο μέδοντο
Iliad 24.3	ὕπνου τε γλυκεροῦ ταρπήμεναι· αὐτὰρ Ἀχιλλεὺς
Iliad 24.4	κλαῖε φίλου ἑτάρου μεμνημένος, οὐδέ μιν ὕπνος
Iliad 24.5	ᾕρει πανδαμάτωρ, ἀλλʼ ἐστρέφετʼ ἔνθα καὶ ἔνθα
Iliad 24.6	Πατρόκλου ποθέων ἀνδροτῆτά τε καὶ μένος ἠΰ,
Iliad 24.7	ἠδʼ ὁπόσα τολύπευσε σὺν αὐτῷ καὶ πάθεν ἄλγεα
Iliad 24.8	ἀνδρῶν τε πτολέμους ἀλεγεινά τε κύματα πείρων·
Iliad 24.9	τῶν μιμνησκόμενος θαλερὸν κατὰ δάκρυον εἶβεν,
Iliad 24.10	ἄλλοτʼ ἐπὶ πλευρὰς κατακείμενος, ἄλλοτε δʼ αὖτε
Iliad 24.11	ὕπτιος, ἄλλοτε δὲ πρηνής· τοτὲ δʼ ὀρθὸς ἀναστὰς
Iliad 24.12	δινεύεσκʼ ἀλύων παρὰ θῖνʼ ἁλός· οὐδέ μιν ἠὼς
Iliad 24.13	φαινομένη λήθεσκεν ὑπεὶρ ἅλα τʼ ἠϊόνας τε.
Iliad 24.14	ἀλλʼ ὅ γʼ ἐπεὶ ζεύξειεν ὑφʼ ἅρμασιν ὠκέας ἵππους,
Iliad 24.15	Ἕκτορα δʼ ἕλκεσθαι δησάσκετο δίφρου ὄπισθεν,
Iliad 24.16	τρὶς δʼ ἐρύσας περὶ σῆμα Μενοιτιάδαο θανόντος
Iliad 24.17	αὖτις ἐνὶ κλισίῃ παυέσκετο, τὸν δέ τʼ ἔασκεν
Iliad 24.18	ἐν κόνι ἐκτανύσας προπρηνέα· τοῖο δʼ Ἀπόλλων
Iliad 24.19	πᾶσαν ἀεικείην ἄπεχε χροῒ φῶτʼ ἐλεαίρων
Iliad 24.20	καὶ τεθνηότα περ· περὶ δʼ αἰγίδι πάντα κάλυπτε
Iliad 24.21	χρυσείῃ, ἵνα μή μιν ἀποδρύφοι ἑλκυστάζων.
Iliad 24.22	ὣς ὃ μὲν Ἕκτορα δῖον ἀείκιζεν μενεαίνων·
Iliad 24.23	τὸν δʼ ἐλεαίρεσκον μάκαρες θεοὶ εἰσορόωντες,
Iliad 24.24	κλέψαι δʼ ὀτρύνεσκον ἐΰσκοπον ἀργεϊφόντην.
Iliad 24.25	ἔνθʼ ἄλλοις μὲν πᾶσιν ἑήνδανεν, οὐδέ ποθʼ Ἥρῃ
Iliad 24.26	οὐδὲ Ποσειδάωνʼ οὐδὲ γλαυκώπιδι κούρῃ,
Iliad 24.27	ἀλλʼ ἔχον ὥς σφιν πρῶτον ἀπήχθετο Ἴλιος ἱρὴ
Iliad 24.28	καὶ Πρίαμος καὶ λαὸς Ἀλεξάνδρου ἕνεκʼ ἄτης,
Iliad 24.29	ὃς νείκεσσε θεὰς ὅτε οἱ μέσσαυλον ἵκοντο,
Iliad 24.30	τὴν δʼ ᾔνησʼ ἥ οἱ πόρε μαχλοσύνην ἀλεγεινήν.
Iliad 24.31	ἀλλʼ ὅτε δή ῥʼ ἐκ τοῖο δυωδεκάτη γένετʼ ἠώς,
Iliad 24.32	καὶ τότʼ ἄρʼ ἀθανάτοισι μετηύδα Φοῖβος Ἀπόλλων·
Iliad 24.33	σχέτλιοί ἐστε θεοί, δηλήμονες· οὔ νύ ποθʼ ὑμῖν
Iliad 24.34	Ἕκτωρ μηρίʼ ἔκηε βοῶν αἰγῶν τε τελείων;
Iliad 24.35	τὸν νῦν οὐκ ἔτλητε νέκυν περ ἐόντα σαῶσαι
Iliad 24.36	ᾗ τʼ ἀλόχῳ ἰδέειν καὶ μητέρι καὶ τέκεϊ ᾧ
Iliad 24.37	καὶ πατέρι Πριάμῳ λαοῖσί τε, τοί κέ μιν ὦκα
Iliad 24.38	ἐν πυρὶ κήαιεν καὶ ἐπὶ κτέρεα κτερίσαιεν.
Iliad 24.39	ἀλλʼ ὀλοῷ Ἀχιλῆϊ θεοὶ βούλεσθʼ ἐπαρήγειν,
Iliad 24.40	ᾧ οὔτʼ ἂρ φρένες εἰσὶν ἐναίσιμοι οὔτε νόημα
Iliad 24.41	γναμπτὸν ἐνὶ στήθεσσι, λέων δʼ ὣς ἄγρια οἶδεν,
Iliad 24.42	ὅς τʼ ἐπεὶ ἂρ μεγάλῃ τε βίῃ καὶ ἀγήνορι θυμῷ
Iliad 24.43	εἴξας εἶσʼ ἐπὶ μῆλα βροτῶν ἵνα δαῖτα λάβῃσιν·
Iliad 24.44	ὣς Ἀχιλεὺς ἔλεον μὲν ἀπώλεσεν, οὐδέ οἱ αἰδὼς
Iliad 24.45	γίγνεται, ἥ τʼ ἄνδρας μέγα σίνεται ἠδʼ ὀνίνησι.
Iliad 24.46	μέλλει μέν πού τις καὶ φίλτερον ἄλλον ὀλέσσαι
Iliad 24.47	ἠὲ κασίγνητον ὁμογάστριον ἠὲ καὶ υἱόν·
Iliad 24.48	ἀλλʼ ἤτοι κλαύσας καὶ ὀδυράμενος μεθέηκε·
Iliad 24.49	τλητὸν γὰρ Μοῖραι θυμὸν θέσαν ἀνθρώποισιν.
Iliad 24.50	αὐτὰρ ὅ γʼ Ἕκτορα δῖον, ἐπεὶ φίλον ἦτορ ἀπηύρα,
Iliad 24.51	ἵππων ἐξάπτων περὶ σῆμʼ ἑτάροιο φίλοιο
Iliad 24.52	ἕλκει· οὐ μήν οἱ τό γε κάλλιον οὐδέ τʼ ἄμεινον.
Iliad 24.53	μὴ ἀγαθῷ περ ἐόντι νεμεσσηθέωμέν οἱ ἡμεῖς·
Iliad 24.54	κωφὴν γὰρ δὴ γαῖαν ἀεικίζει μενεαίνων.
Iliad 24.55	τὸν δὲ χολωσαμένη προσέφη λευκώλενος Ἥρη·
Iliad 24.56	εἴη κεν καὶ τοῦτο τεὸν ἔπος ἀργυρότοξε
Iliad 24.57	εἰ δὴ ὁμὴν Ἀχιλῆϊ καὶ Ἕκτορι θήσετε τιμήν.
Iliad 24.58	Ἕκτωρ μὲν θνητός τε γυναῖκά τε θήσατο μαζόν·
Iliad 24.59	αὐτὰρ Ἀχιλλεύς ἐστι θεᾶς γόνος, ἣν ἐγὼ αὐτὴ
Iliad 24.60	θρέψά τε καὶ ἀτίτηλα καὶ ἀνδρὶ πόρον παράκοιτιν
Iliad 24.61	Πηλέϊ, ὃς περὶ κῆρι φίλος γένετʼ ἀθανάτοισι.
Iliad 24.62	πάντες δʼ ἀντιάασθε θεοὶ γάμου· ἐν δὲ σὺ τοῖσι
Iliad 24.63	δαίνυʼ ἔχων φόρμιγγα κακῶν ἕταρʼ, αἰὲν ἄπιστε.
Iliad 24.64	τὴν δʼ ἀπαμειβόμενος προσέφη νεφεληγερέτα Ζεύς·
Iliad 24.65	Ἥρη μὴ δὴ πάμπαν ἀποσκύδμαινε θεοῖσιν·
Iliad 24.66	οὐ μὲν γὰρ τιμή γε μίʼ ἔσσεται· ἀλλὰ καὶ Ἕκτωρ
Iliad 24.67	φίλτατος ἔσκε θεοῖσι βροτῶν οἳ ἐν Ἰλίῳ εἰσίν·
Iliad 24.68	ὣς γὰρ ἔμοιγʼ, ἐπεὶ οὔ τι φίλων ἡμάρτανε δώρων.
Iliad 24.69	οὐ γάρ μοί ποτε βωμὸς ἐδεύετο δαιτὸς ἐΐσης
Iliad 24.70	λοιβῆς τε κνίσης τε· τὸ γὰρ λάχομεν γέρας ἡμεῖς.
Iliad 24.71	ἀλλʼ ἤτοι κλέψαι μὲν ἐάσομεν, οὐδέ πῃ ἔστι,
Iliad 24.72	λάθρῃ Ἀχιλλῆος θρασὺν Ἕκτορα· ἦ γάρ οἱ αἰεὶ
Iliad 24.73	μήτηρ παρμέμβλωκεν ὁμῶς νύκτάς τε καὶ ἦμαρ.
Iliad 24.74	ἀλλʼ εἴ τις καλέσειε θεῶν Θέτιν ἆσσον ἐμεῖο,
Iliad 24.75	ὄφρά τί οἱ εἴπω πυκινὸν ἔπος, ὥς κεν Ἀχιλλεὺς
Iliad 24.76	δώρων ἐκ Πριάμοιο λάχῃ ἀπό θʼ Ἕκτορα λύσῃ.
Iliad 24.77	ὣς ἔφατʼ, ὦρτο δὲ Ἶρις ἀελλόπος ἀγγελέουσα,
Iliad 24.78	μεσσηγὺς δὲ Σάμου τε καὶ Ἴμβρου παιπαλοέσσης
Iliad 24.79	ἔνθορε μείλανι πόντῳ· ἐπεστονάχησε δὲ λίμνη.
Iliad 24.80	ἣ δὲ μολυβδαίνῃ ἰκέλη ἐς βυσσὸν ὄρουσεν,
Iliad 24.81	ἥ τε κατʼ ἀγραύλοιο βοὸς κέρας ἐμβεβαυῖα
Iliad 24.82	ἔρχεται ὠμηστῇσιν ἐπʼ ἰχθύσι κῆρα φέρουσα.
Iliad 24.83	εὗρε δʼ ἐνὶ σπῆϊ γλαφυρῷ Θέτιν, ἀμφὶ δʼ ἄρʼ ἄλλαι
Iliad 24.84	εἵαθʼ ὁμηγερέες ἅλιαι θεαί· ἣ δʼ ἐνὶ μέσσῃς
Iliad 24.85	κλαῖε μόρον οὗ παιδὸς ἀμύμονος, ὅς οἱ ἔμελλε
Iliad 24.86	φθίσεσθʼ ἐν Τροίῃ ἐριβώλακι τηλόθι πάτρης.
Iliad 24.87	ἀγχοῦ δʼ ἱσταμένη προσέφη πόδας ὠκέα Ἶρις·
Iliad 24.88	ὄρσο Θέτι· καλέει Ζεὺς ἄφθιτα μήδεα εἰδώς.
Iliad 24.89	τὴν δʼ ἠμείβετʼ ἔπειτα θεὰ Θέτις ἀργυρόπεζα·
Iliad 24.90	τίπτέ με κεῖνος ἄνωγε μέγας θεός; αἰδέομαι δὲ
Iliad 24.91	μίσγεσθʼ ἀθανάτοισιν, ἔχω δʼ ἄχεʼ ἄκριτα θυμῷ.
Iliad 24.92	εἶμι μέν, οὐδʼ ἅλιον ἔπος ἔσσεται ὅττί κεν εἴπῃ.
Iliad 24.93	ὣς ἄρα φωνήσασα κάλυμμʼ ἕλε δῖα θεάων
Iliad 24.94	κυάνεον, τοῦ δʼ οὔ τι μελάντερον ἔπλετο ἔσθος.
Iliad 24.95	βῆ δʼ ἰέναι, πρόσθεν δὲ ποδήνεμος ὠκέα Ἶρις
Iliad 24.96	ἡγεῖτʼ· ἀμφὶ δʼ ἄρα σφι λιάζετο κῦμα θαλάσσης.
Iliad 24.97	ἀκτὴν δʼ ἐξαναβᾶσαι ἐς οὐρανὸν ἀϊχθήτην,
Iliad 24.98	εὗρον δʼ εὐρύοπα Κρονίδην, περὶ δʼ ἄλλοι ἅπαντες
Iliad 24.99	εἵαθʼ ὁμηγερέες μάκαρες θεοὶ αἰὲν ἐόντες.
Iliad 24.100	ἣ δʼ ἄρα πὰρ Διὶ πατρὶ καθέζετο, εἶξε δʼ Ἀθήνη.
Iliad 24.101	Ἥρη δὲ χρύσεον καλὸν δέπας ἐν χερὶ θῆκε
Iliad 24.102	καί ῥʼ εὔφρηνʼ ἐπέεσσι· Θέτις δʼ ὤρεξε πιοῦσα.
Iliad 24.103	τοῖσι δὲ μύθων ἦρχε πατὴρ ἀνδρῶν τε θεῶν τε·
Iliad 24.104	ἤλυθες Οὔλυμπον δὲ θεὰ Θέτι κηδομένη περ,
Iliad 24.105	πένθος ἄλαστον ἔχουσα μετὰ φρεσίν· οἶδα καὶ αὐτός·
Iliad 24.106	ἀλλὰ καὶ ὧς ἐρέω τοῦ σʼ εἵνεκα δεῦρο κάλεσσα.
Iliad 24.107	ἐννῆμαρ δὴ νεῖκος ἐν ἀθανάτοισιν ὄρωρεν
Iliad 24.108	Ἕκτορος ἀμφὶ νέκυι καὶ Ἀχιλλῆϊ πτολιπόρθῳ·
Iliad 24.109	κλέψαι δʼ ὀτρύνουσιν ἐΰσκοπον ἀργεϊφόντην·
Iliad 24.110	αὐτὰρ ἐγὼ τόδε κῦδος Ἀχιλλῆϊ προτιάπτω
Iliad 24.111	αἰδῶ καὶ φιλότητα τεὴν μετόπισθε φυλάσσων.
Iliad 24.112	αἶψα μάλʼ ἐς στρατὸν ἐλθὲ καὶ υἱέϊ σῷ ἐπίτειλον·
Iliad 24.113	σκύζεσθαί οἱ εἰπὲ θεούς, ἐμὲ δʼ ἔξοχα πάντων
Iliad 24.114	ἀθανάτων κεχολῶσθαι, ὅτι φρεσὶ μαινομένῃσιν
Iliad 24.115	Ἕκτορʼ ἔχει παρὰ νηυσὶ κορωνίσιν οὐδʼ ἀπέλυσεν,
Iliad 24.116	αἴ κέν πως ἐμέ τε δείσῃ ἀπό θʼ Ἕκτορα λύσῃ.
Iliad 24.117	αὐτὰρ ἐγὼ Πριάμῳ μεγαλήτορι Ἶριν ἐφήσω
Iliad 24.118	λύσασθαι φίλον υἱὸν ἰόντʼ ἐπὶ νῆας Ἀχαιῶν,
Iliad 24.119	δῶρα δʼ Ἀχιλλῆϊ φερέμεν, τά κε θυμὸν ἰήνῃ.
Iliad 24.120	ὣς ἔφατʼ, οὐδʼ ἀπίθησε θεὰ Θέτις ἀργυρόπεζα,
Iliad 24.121	βῆ δὲ κατʼ Οὐλύμποιο καρήνων ἀΐξασα,
Iliad 24.122	ἷξεν δʼ ἐς κλισίην οὗ υἱέος· ἔνθʼ ἄρα τόν γε
Iliad 24.123	εὗρʼ ἁδινὰ στενάχοντα· φίλοι δʼ ἀμφʼ αὐτὸν ἑταῖροι
Iliad 24.124	ἐσσυμένως ἐπένοντο καὶ ἐντύνοντο ἄριστον·
Iliad 24.125	τοῖσι δʼ ὄϊς λάσιος μέγας ἐν κλισίῃ ἱέρευτο.
Iliad 24.126	ἣ δὲ μάλʼ ἄγχʼ αὐτοῖο καθέζετο πότνια μήτηρ,
Iliad 24.127	χειρί τέ μιν κατέρεξεν ἔπος τʼ ἔφατʼ ἔκ τʼ ὀνόμαζε·
Iliad 24.128	τέκνον ἐμὸν τέο μέχρις ὀδυρόμενος καὶ ἀχεύων
Iliad 24.129	σὴν ἔδεαι κραδίην μεμνημένος οὔτέ τι σίτου
Iliad 24.130	οὔτʼ εὐνῆς; ἀγαθὸν δὲ γυναικί περ ἐν φιλότητι
Iliad 24.131	μίσγεσθʼ· οὐ γάρ μοι δηρὸν βέῃ, ἀλλά τοι ἤδη
Iliad 24.132	ἄγχι παρέστηκεν θάνατος καὶ μοῖρα κραταιή.
Iliad 24.133	ἀλλʼ ἐμέθεν ξύνες ὦκα, Διὸς δέ τοι ἄγγελός εἰμι·
Iliad 24.134	σκύζεσθαι σοί φησι θεούς, ἑὲ δʼ ἔξοχα πάντων
Iliad 24.135	ἀθανάτων κεχολῶσθαι, ὅτι φρεσὶ μαινομένῃσιν
Iliad 24.136	Ἕκτορʼ ἔχεις παρὰ νηυσὶ κορωνίσιν οὐδʼ ἀπέλυσας.
Iliad 24.137	ἀλλʼ ἄγε δὴ λῦσον, νεκροῖο δὲ δέξαι ἄποινα.
Iliad 24.138	τὴν δʼ ἀπαμειβόμενος προσέφη πόδας ὠκὺς Ἀχιλλεύς·
Iliad 24.139	τῇδʼ εἴη· ὃς ἄποινα φέροι καὶ νεκρὸν ἄγοιτο,
Iliad 24.140	εἰ δὴ πρόφρονι θυμῷ Ὀλύμπιος αὐτὸς ἀνώγει.
Iliad 24.141	ὣς οἵ γʼ ἐν νηῶν ἀγύρει μήτηρ τε καὶ υἱὸς
Iliad 24.142	πολλὰ πρὸς ἀλλήλους ἔπεα πτερόεντʼ ἀγόρευον.
Iliad 24.143	Ἶριν δʼ ὄτρυνε Κρονίδης εἰς Ἴλιον ἱρήν·
Iliad 24.144	βάσκʼ ἴθι Ἶρι ταχεῖα λιποῦσʼ ἕδος Οὐλύμποιο
Iliad 24.145	ἄγγειλον Πριάμῳ μεγαλήτορι Ἴλιον εἴσω
Iliad 24.146	λύσασθαι φίλον υἱὸν ἰόντʼ ἐπὶ νῆας Ἀχαιῶν,
Iliad 24.147	δῶρα δʼ Ἀχιλλῆϊ φερέμεν τά κε θυμὸν ἰήνῃ
Iliad 24.148	οἶον, μὴ δέ τις ἄλλος ἅμα Τρώων ἴτω ἀνήρ.
Iliad 24.149	κῆρύξ τίς οἱ ἕποιτο γεραίτερος, ὅς κʼ ἰθύνοι
Iliad 24.150	ἡμιόνους καὶ ἄμαξαν ἐΰτροχον, ἠδὲ καὶ αὖτις
Iliad 24.151	νεκρὸν ἄγοι προτὶ ἄστυ, τὸν ἔκτανε δῖος Ἀχιλλεύς.
Iliad 24.152	μὴ δέ τί οἱ θάνατος μελέτω φρεσὶ μὴ δέ τι τάρβος·
Iliad 24.153	τοῖον γάρ οἱ πομπὸν ὀπάσσομεν ἀργεϊφόντην,
Iliad 24.154	ὃς ἄξει εἷός κεν ἄγων Ἀχιλῆϊ πελάσσῃ.
Iliad 24.155	αὐτὰρ ἐπὴν ἀγάγῃσιν ἔσω κλισίην Ἀχιλῆος,
Iliad 24.156	οὔτʼ αὐτὸς κτενέει ἀπό τʼ ἄλλους πάντας ἐρύξει·
Iliad 24.157	οὔτε γάρ ἐστʼ ἄφρων οὔτʼ ἄσκοπος οὔτʼ ἀλιτήμων,
Iliad 24.158	ἀλλὰ μάλʼ ἐνδυκέως ἱκέτεω πεφιδήσεται ἀνδρός.
Iliad 24.159	ὣς ἔφατʼ, ὦρτο δὲ Ἶρις ἀελλόπος ἀγγελέουσα.
Iliad 24.160	ἷξεν δʼ ἐς Πριάμοιο, κίχεν δʼ ἐνοπήν τε γόον τε.
Iliad 24.161	παῖδες μὲν πατέρʼ ἀμφὶ καθήμενοι ἔνδοθεν αὐλῆς
Iliad 24.162	δάκρυσιν εἵματʼ ἔφυρον, ὃ δʼ ἐν μέσσοισι γεραιὸς
Iliad 24.163	ἐντυπὰς ἐν χλαίνῃ κεκαλυμμένος· ἀμφὶ δὲ πολλὴ
Iliad 24.164	κόπρος ἔην κεφαλῇ τε καὶ αὐχένι τοῖο γέροντος
Iliad 24.165	τήν ῥα κυλινδόμενος καταμήσατο χερσὶν ἑῇσι.
Iliad 24.166	θυγατέρες δʼ ἀνὰ δώματʼ ἰδὲ νυοὶ ὠδύροντο
Iliad 24.167	τῶν μιμνησκόμεναι οἳ δὴ πολέες τε καὶ ἐσθλοὶ
Iliad 24.168	χερσὶν ὑπʼ Ἀργείων κέατο ψυχὰς ὀλέσαντες.
Iliad 24.169	στῆ δὲ παρὰ Πρίαμον Διὸς ἄγγελος, ἠδὲ προσηύδα
Iliad 24.170	τυτθὸν φθεγξαμένη· τὸν δὲ τρόμος ἔλλαβε γυῖα·
Iliad 24.171	θάρσει Δαρδανίδη Πρίαμε φρεσί, μὴ δέ τι τάρβει·
Iliad 24.172	οὐ μὲν γάρ τοι ἐγὼ κακὸν ὀσσομένη τόδʼ ἱκάνω
Iliad 24.173	ἀλλʼ ἀγαθὰ φρονέουσα· Διὸς δέ τοι ἄγγελός εἰμι,
Iliad 24.174	ὅς σευ ἄνευθεν ἐὼν μέγα κήδεται ἠδʼ ἐλεαίρει.
Iliad 24.175	λύσασθαί σʼ ἐκέλευσεν Ὀλύμπιος Ἕκτορα δῖον,
Iliad 24.176	δῶρα δʼ Ἀχιλλῆϊ φερέμεν τά κε θυμὸν ἰήνῃ
Iliad 24.177	οἶον, μὴ δέ τις ἄλλος ἅμα Τρώων ἴτω ἀνήρ.
Iliad 24.178	κῆρύξ τίς τοι ἕποιτο γεραίτερος, ὅς κʼ ἰθύνοι
Iliad 24.179	ἡμιόνους καὶ ἄμαξαν ἐΰτροχον, ἠδὲ καὶ αὖτις
Iliad 24.180	νεκρὸν ἄγοι προτὶ ἄστυ, τὸν ἔκτανε δῖος Ἀχιλλεύς.
Iliad 24.181	μὴ δέ τί τοι θάνατος μελέτω φρεσὶ μηδέ τι τάρβος·
Iliad 24.182	τοῖος γάρ τοι πομπὸς ἅμʼ ἕψεται ἀργεϊφόντης,
Iliad 24.183	ὅς σʼ ἄξει εἷός κεν ἄγων Ἀχιλῆϊ πελάσσῃ.
Iliad 24.184	αὐτὰρ ἐπὴν ἀγάγῃσιν ἔσω κλισίην Ἀχιλῆος,
Iliad 24.185	οὔτʼ αὐτὸς κτενέει ἀπό τʼ ἄλλους πάντας ἐρύξει·
Iliad 24.186	οὔτε γάρ ἔστʼ ἄφρων οὔτʼ ἄσκοπος οὔτʼ ἀλιτήμων,
Iliad 24.187	ἀλλὰ μάλʼ ἐνδυκέως ἱκέτεω πεφιδήσεται ἀνδρός.
Iliad 24.188	ἣ μὲν ἄρʼ ὣς εἰποῦσʼ ἀπέβη πόδας ὠκέα Ἶρις,
Iliad 24.189	αὐτὰρ ὅ γʼ υἷας ἄμαξαν ἐΰτροχον ἡμιονείην
Iliad 24.190	ὁπλίσαι ἠνώγει, πείρινθα δὲ δῆσαι ἐπʼ αὐτῆς.
Iliad 24.191	αὐτὸς δʼ ἐς θάλαμον κατεβήσετο κηώεντα
Iliad 24.192	κέδρινον ὑψόροφον, ὃς γλήνεα πολλὰ κεχάνδει·
Iliad 24.193	ἐς δʼ ἄλοχον Ἑκάβην ἐκαλέσσατο φώνησέν τε·
Iliad 24.194	δαιμονίη Διόθεν μοι Ὀλύμπιος ἄγγελος ἦλθε
Iliad 24.195	λύσασθαι φίλον υἱὸν ἰόντʼ ἐπὶ νῆας Ἀχαιῶν,
Iliad 24.196	δῶρα δʼ Ἀχιλλῆϊ φερέμεν τά κε θυμὸν ἰήνῃ.
Iliad 24.197	ἀλλʼ ἄγε μοι τόδε εἰπὲ τί τοι φρεσὶν εἴδεται εἶναι;
Iliad 24.198	αἰνῶς γάρ μʼ αὐτόν γε μένος καὶ θυμὸς ἄνωγε
Iliad 24.199	κεῖσʼ ἰέναι ἐπὶ νῆας ἔσω στρατὸν εὐρὺν Ἀχαιῶν.
Iliad 24.200	ὣς φάτο, κώκυσεν δὲ γυνὴ καὶ ἀμείβετο μύθῳ·
Iliad 24.201	ὤ μοι πῇ δή τοι φρένες οἴχονθʼ, ᾗς τὸ πάρος περ
Iliad 24.202	ἔκλεʼ ἐπʼ ἀνθρώπους ξείνους ἠδʼ οἷσιν ἀνάσσεις;
Iliad 24.203	πῶς ἐθέλεις ἐπὶ νῆας Ἀχαιῶν ἐλθέμεν οἶος
Iliad 24.204	ἀνδρὸς ἐς ὀφθαλμοὺς ὅς τοι πολέας τε καὶ ἐσθλοὺς
Iliad 24.205	υἱέας ἐξενάριξε· σιδήρειόν νύ τοι ἦτορ.
Iliad 24.206	εἰ γάρ σʼ αἱρήσει καὶ ἐσόψεται ὀφθαλμοῖσιν
Iliad 24.207	ὠμηστὴς καὶ ἄπιστος ἀνὴρ ὅ γε οὔ σʼ ἐλεήσει,
Iliad 24.208	οὐδέ τί σʼ αἰδέσεται. νῦν δὲ κλαίωμεν ἄνευθεν
Iliad 24.209	ἥμενοι ἐν μεγάρῳ· τῷ δʼ ὥς ποθι Μοῖρα κραταιὴ
Iliad 24.210	γιγνομένῳ ἐπένησε λίνῳ, ὅτε μιν τέκον αὐτή,
Iliad 24.211	ἀργίποδας κύνας ἆσαι ἑῶν ἀπάνευθε τοκήων
Iliad 24.212	ἀνδρὶ πάρα κρατερῷ, τοῦ ἐγὼ μέσον ἧπαρ ἔχοιμι
Iliad 24.213	ἐσθέμεναι προσφῦσα· τότʼ ἄντιτα ἔργα γένοιτο
Iliad 24.214	παιδὸς ἐμοῦ, ἐπεὶ οὔ ἑ κακιζόμενόν γε κατέκτα,
Iliad 24.215	ἀλλὰ πρὸ Τρώων καὶ Τρωϊάδων βαθυκόλπων
Iliad 24.216	ἑσταότʼ οὔτε φόβου μεμνημένον οὔτʼ ἀλεωρῆς.
Iliad 24.217	τὴν δʼ αὖτε προσέειπε γέρων Πρίαμος θεοειδής·
Iliad 24.218	μή μʼ ἐθέλοντʼ ἰέναι κατερύκανε, μὴ δέ μοι αὐτὴ
Iliad 24.219	ὄρνις ἐνὶ μεγάροισι κακὸς πέλευ· οὐδέ με πείσεις.
Iliad 24.220	εἰ μὲν γάρ τίς μʼ ἄλλος ἐπιχθονίων ἐκέλευεν,
Iliad 24.221	ἢ οἳ μάντιές εἰσι θυοσκόοι ἢ ἱερῆες,
Iliad 24.222	ψεῦδός κεν φαῖμεν καὶ νοσφιζοίμεθα μᾶλλον·
Iliad 24.223	νῦν δʼ, αὐτὸς γὰρ ἄκουσα θεοῦ καὶ ἐσέδρακον ἄντην,
Iliad 24.224	εἶμι καὶ οὐχ ἅλιον ἔπος ἔσσεται. εἰ δέ μοι αἶσα
Iliad 24.225	τεθνάμεναι παρὰ νηυσὶν Ἀχαιῶν χαλκοχιτώνων
Iliad 24.226	βούλομαι· αὐτίκα γάρ με κατακτείνειεν Ἀχιλλεὺς
Iliad 24.227	ἀγκὰς ἑλόντʼ ἐμὸν υἱόν, ἐπὴν γόου ἐξ ἔρον εἵην.
Iliad 24.228	ἦ καὶ φωριαμῶν ἐπιθήματα κάλʼ ἀνέῳγεν·
Iliad 24.229	ἔνθεν δώδεκα μὲν περικαλλέας ἔξελε πέπλους,
Iliad 24.230	δώδεκα δʼ ἁπλοΐδας χλαίνας, τόσσους δὲ τάπητας,
Iliad 24.231	τόσσα δὲ φάρεα λευκά, τόσους δʼ ἐπὶ τοῖσι χιτῶνας.
Iliad 24.232	χρυσοῦ δὲ στήσας ἔφερεν δέκα πάντα τάλαντα,
Iliad 24.233	ἐκ δὲ δύʼ αἴθωνας τρίποδας, πίσυρας δὲ λέβητας,
Iliad 24.234	ἐκ δὲ δέπας περικαλλές, ὅ οἱ Θρῇκες πόρον ἄνδρες
Iliad 24.235	ἐξεσίην ἐλθόντι μέγα κτέρας· οὐδέ νυ τοῦ περ
Iliad 24.236	φείσατʼ ἐνὶ μεγάροις ὃ γέρων, περὶ δʼ ἤθελε θυμῷ
Iliad 24.237	λύσασθαι φίλον υἱόν. ὃ δὲ Τρῶας μὲν ἅπαντας
Iliad 24.238	αἰθούσης ἀπέεργεν ἔπεσσʼ αἰσχροῖσιν ἐνίσσων·
Iliad 24.239	ἔρρετε λωβητῆρες ἐλεγχέες· οὔ νυ καὶ ὑμῖν
Iliad 24.240	οἴκοι ἔνεστι γόος, ὅτι μʼ ἤλθετε κηδήσοντες;
Iliad 24.241	ἦ ὀνόσασθʼ ὅτι μοι Κρονίδης Ζεὺς ἄλγεʼ ἔδωκε
Iliad 24.242	παῖδʼ ὀλέσαι τὸν ἄριστον; ἀτὰρ γνώσεσθε καὶ ὔμμες·
Iliad 24.243	ῥηΐτεροι γὰρ μᾶλλον Ἀχαιοῖσιν δὴ ἔσεσθε
Iliad 24.244	κείνου τεθνηῶτος ἐναιρέμεν. αὐτὰρ ἔγωγε
Iliad 24.245	πρὶν ἀλαπαζομένην τε πόλιν κεραϊζομένην τε
Iliad 24.246	ὀφθαλμοῖσιν ἰδεῖν βαίην δόμον Ἄϊδος εἴσω.
Iliad 24.247	ἦ καὶ σκηπανίῳ δίεπʼ ἀνέρας· οἳ δʼ ἴσαν ἔξω
Iliad 24.248	σπερχομένοιο γέροντος· ὃ δʼ υἱάσιν οἷσιν ὁμόκλα
Iliad 24.249	νεικείων Ἕλενόν τε Πάριν τʼ Ἀγάθωνά τε δῖον
Iliad 24.250	Πάμμονά τʼ Ἀντίφονόν τε βοὴν ἀγαθόν τε Πολίτην
Iliad 24.251	Δηΐφοβόν τε καὶ Ἱππόθοον καὶ δῖον Ἀγαυόν·
Iliad 24.252	ἐννέα τοῖς ὃ γεραιὸς ὁμοκλήσας ἐκέλευε·
Iliad 24.253	σπεύσατέ μοι κακὰ τέκνα κατηφόνες· αἴθʼ ἅμα πάντες
Iliad 24.254	Ἕκτορος ὠφέλετʼ ἀντὶ θοῇς ἐπὶ νηυσὶ πεφάσθαι.
Iliad 24.255	ὤ μοι ἐγὼ πανάποτμος, ἐπεὶ τέκον υἷας ἀρίστους
Iliad 24.256	Τροίῃ ἐν εὐρείῃ, τῶν δʼ οὔ τινά φημι λελεῖφθαι,
Iliad 24.257	Μήστορά τʼ ἀντίθεον καὶ Τρωΐλον ἱππιοχάρμην
Iliad 24.258	Ἕκτορά θʼ, ὃς θεὸς ἔσκε μετʼ ἀνδράσιν, οὐδὲ ἐῴκει
Iliad 24.259	ἀνδρός γε θνητοῦ πάϊς ἔμμεναι ἀλλὰ θεοῖο.
Iliad 24.260	τοὺς μὲν ἀπώλεσʼ Ἄρης, τὰ δʼ ἐλέγχεα πάντα λέλειπται
Iliad 24.261	ψεῦσταί τʼ ὀρχησταί τε χοροιτυπίῃσιν ἄριστοι
Iliad 24.262	ἀρνῶν ἠδʼ ἐρίφων ἐπιδήμιοι ἁρπακτῆρες.
Iliad 24.263	οὐκ ἂν δή μοι ἄμαξαν ἐφοπλίσσαιτε τάχιστα,
Iliad 24.264	ταῦτά τε πάντʼ ἐπιθεῖτε, ἵνα πρήσσωμεν ὁδοῖο;
Iliad 24.265	ὣς ἔφαθʼ, οἳ δʼ ἄρα πατρὸς ὑποδείσαντες ὁμοκλὴν
Iliad 24.266	ἐκ μὲν ἄμαξαν ἄειραν ἐΰτροχον ἡμιονείην
Iliad 24.267	καλὴν πρωτοπαγέα, πείρινθα δὲ δῆσαν ἐπʼ αὐτῆς,
Iliad 24.268	κὰδ δʼ ἀπὸ πασσαλόφι ζυγὸν ᾕρεον ἡμιόνειον
Iliad 24.269	πύξινον ὀμφαλόεν εὖ οἰήκεσσιν ἀρηρός·
Iliad 24.270	ἐκ δʼ ἔφερον ζυγόδεσμον ἅμα ζυγῷ ἐννεάπηχυ.
Iliad 24.271	καὶ τὸ μὲν εὖ κατέθηκαν ἐϋξέστῳ ἐπὶ ῥυμῷ
Iliad 24.272	πέζῃ ἔπι πρώτῃ, ἐπὶ δὲ κρίκον ἕστορι βάλλον,
Iliad 24.273	τρὶς δʼ ἑκάτερθεν ἔδησαν ἐπʼ ὀμφαλόν, αὐτὰρ ἔπειτα
Iliad 24.274	ἑξείης κατέδησαν, ὑπὸ γλωχῖνα δʼ ἔκαμψαν.
Iliad 24.275	ἐκ θαλάμου δὲ φέροντες ἐϋξέστης ἐπʼ ἀπήνης
Iliad 24.276	νήεον Ἑκτορέης κεφαλῆς ἀπερείσιʼ ἄποινα,
Iliad 24.277	ζεῦξαν δʼ ἡμιόνους κρατερώνυχας ἐντεσιεργούς,
Iliad 24.278	τούς ῥά ποτε Πριάμῳ Μυσοὶ δόσαν ἀγλαὰ δῶρα.
Iliad 24.279	ἵππους δὲ Πριάμῳ ὕπαγον ζυγόν, οὓς ὃ γεραιὸς
Iliad 24.280	αὐτὸς ἔχων ἀτίταλλεν ἐϋξέστῃ ἐπὶ φάτνῃ.
Iliad 24.281	τὼ μὲν ζευγνύσθην ἐν δώμασιν ὑψηλοῖσι
Iliad 24.282	κῆρυξ καὶ Πρίαμος πυκινὰ φρεσὶ μήδεʼ ἔχοντες·
Iliad 24.283	ἀγχίμολον δέ σφʼ ἦλθʼ Ἑκάβη τετιηότι θυμῷ
Iliad 24.284	οἶνον ἔχουσʼ ἐν χειρὶ μελίφρονα δεξιτερῆφι
Iliad 24.285	χρυσέῳ ἐν δέπαϊ, ὄφρα λείψαντε κιοίτην·
Iliad 24.286	στῆ δʼ ἵππων προπάροιθεν ἔπος τʼ ἔφατʼ ἔκ τʼ ὀνόμαζε·
Iliad 24.287	τῆ σπεῖσον Διὶ πατρί, καὶ εὔχεο οἴκαδʼ ἱκέσθαι
Iliad 24.288	ἂψ ἐκ δυσμενέων ἀνδρῶν, ἐπεὶ ἂρ σέ γε θυμὸς
Iliad 24.289	ὀτρύνει ἐπὶ νῆας ἐμεῖο μὲν οὐκ ἐθελούσης.
Iliad 24.290	ἀλλʼ εὔχεο σύ γʼ ἔπειτα κελαινεφέϊ Κρονίωνι
Iliad 24.291	Ἰδαίῳ, ὅς τε Τροίην κατὰ πᾶσαν ὁρᾶται,
Iliad 24.292	αἴτει δʼ οἰωνὸν ταχὺν ἄγγελον, ὅς τέ οἱ αὐτῷ
Iliad 24.293	φίλτατος οἰωνῶν, καί εὑ κράτος ἐστὶ μέγιστον,
Iliad 24.294	δεξιόν, ὄφρά μιν αὐτὸς ἐν ὀφθαλμοῖσι νοήσας
Iliad 24.295	τῷ πίσυνος ἐπὶ νῆας ἴῃς Δαναῶν ταχυπώλων.
Iliad 24.296	εἰ δέ τοι οὐ δώσει ἑὸν ἄγγελον εὐρύοπα Ζεύς,
Iliad 24.297	οὐκ ἂν ἔγωγέ σʼ ἔπειτα ἐποτρύνουσα κελοίμην
Iliad 24.298	νῆας ἐπʼ Ἀργείων ἰέναι μάλα περ μεμαῶτα.
Iliad 24.299	τὴν δʼ ἀπαμειβόμενος προσέφη Πρίαμος θεοειδής·
Iliad 24.300	ὦ γύναι οὐ μέν τοι τόδʼ ἐφιεμένῃ ἀπιθήσω.
Iliad 24.301	ἐσθλὸν γὰρ Διὶ χεῖρας ἀνασχέμεν αἴ κʼ ἐλεήσῃ.
Iliad 24.302	ἦ ῥα καὶ ἀμφίπολον ταμίην ὄτρυνʼ ὃ γεραιὸς
Iliad 24.303	χερσὶν ὕδωρ ἐπιχεῦαι ἀκήρατον· ἣ δὲ παρέστη
Iliad 24.304	χέρνιβον ἀμφίπολος πρόχοόν θʼ ἅμα χερσὶν ἔχουσα.
Iliad 24.305	νιψάμενος δὲ κύπελλον ἐδέξατο ἧς ἀλόχοιο·
Iliad 24.306	εὔχετʼ ἔπειτα στὰς μέσῳ ἕρκεϊ, λεῖβε δὲ οἶνον
Iliad 24.307	οὐρανὸν εἰσανιδών, καὶ φωνήσας ἔπος ηὔδα·
Iliad 24.308	Ζεῦ πάτερ Ἴδηθεν μεδέων κύδιστε μέγιστε
Iliad 24.309	δός μʼ ἐς Ἀχιλλῆος φίλον ἐλθεῖν ἠδʼ ἐλεεινόν,
Iliad 24.310	πέμψον δʼ οἰωνὸν ταχὺν ἄγγελον, ὅς τε σοὶ αὐτῷ
Iliad 24.311	φίλτατος οἰωνῶν, καί εὑ κράτος ἐστὶ μέγιστον,
Iliad 24.312	δεξιόν, ὄφρά μιν αὐτὸς ἐν ὀφθαλμοῖσι νοήσας
Iliad 24.313	τῷ πίσυνος ἐπὶ νῆας ἴω Δαναῶν ταχυπώλων.
Iliad 24.314	ὣς ἔφατʼ εὐχόμενος, τοῦ δʼ ἔκλυε μητίετα Ζεὺς
Iliad 24.315	αὐτίκα δʼ αἰετὸν ἧκε τελειότατον πετεηνῶν
Iliad 24.316	μόρφνον θηρητῆρʼ ὃν καὶ περκνὸν καλέουσιν.
Iliad 24.317	ὅσση δʼ ὑψορόφοιο θύρη θαλάμοιο τέτυκται
Iliad 24.318	ἀνέρος ἀφνειοῖο ἐῢ κληῗσʼ ἀραρυῖα,
Iliad 24.319	τόσσʼ ἄρα τοῦ ἑκάτερθεν ἔσαν πτερά· εἴσατο δέ σφι
Iliad 24.320	δεξιὸς ἀΐξας διὰ ἄστεος· οἳ δὲ ἰδόντες
Iliad 24.321	γήθησαν, καὶ πᾶσιν ἐνὶ φρεσὶ θυμὸς ἰάνθη.
Iliad 24.322	σπερχόμενος δʼ ὃ γεραιὸς ἑοῦ ἐπεβήσετο δίφρου,
Iliad 24.323	ἐκ δʼ ἔλασε προθύροιο καὶ αἰθούσης ἐριδούπου.
Iliad 24.324	πρόσθε μὲν ἡμίονοι ἕλκον τετράκυκλον ἀπήνην,
Iliad 24.325	τὰς Ἰδαῖος ἔλαυνε δαΐφρων· αὐτὰρ ὄπισθεν
Iliad 24.326	ἵπποι, τοὺς ὃ γέρων ἐφέπων μάστιγι κέλευε
Iliad 24.327	καρπαλίμως κατὰ ἄστυ· φίλοι δʼ ἅμα πάντες ἕποντο
Iliad 24.328	πόλλʼ ὀλοφυρόμενοι ὡς εἰ θάνατον δὲ κιόντα.
Iliad 24.329	οἳ δʼ ἐπεὶ οὖν πόλιος κατέβαν, πεδίον δʼ ἀφίκοντο,
Iliad 24.330	οἳ μὲν ἄρʼ ἄψορροι προτὶ Ἴλιον ἀπονέοντο
Iliad 24.331	παῖδες καὶ γαμβροί, τὼ δʼ οὐ λάθον εὐρύοπα Ζῆν
Iliad 24.332	ἐς πεδίον προφανέντε· ἰδὼν δʼ ἐλέησε γέροντα,
Iliad 24.333	αἶψα δʼ ἄρʼ Ἑρμείαν υἱὸν φίλον ἀντίον ηὔδα·
Iliad 24.334	Ἑρμεία, σοὶ γάρ τε μάλιστά γε φίλτατόν ἐστιν
Iliad 24.335	ἀνδρὶ ἑταιρίσσαι, καί τʼ ἔκλυες ᾧ κʼ ἐθέλῃσθα,
Iliad 24.336	βάσκʼ ἴθι καὶ Πρίαμον κοίλας ἐπὶ νῆας Ἀχαιῶν
Iliad 24.337	ὣς ἄγαγʼ, ὡς μήτʼ ἄρ τις ἴδῃ μήτʼ ἄρ τε νοήσῃ
Iliad 24.338	τῶν ἄλλων Δαναῶν, πρὶν Πηλεΐωνα δʼ ἱκέσθαι.
Iliad 24.339	ὣς ἔφατʼ, οὐδʼ ἀπίθησε διάκτορος ἀργεϊφόντης.
Iliad 24.340	αὐτίκʼ ἔπειθʼ ὑπὸ ποσσὶν ἐδήσατο καλὰ πέδιλα
Iliad 24.341	ἀμβρόσια χρύσεια, τά μιν φέρον ἠμὲν ἐφʼ ὑγρὴν
Iliad 24.342	ἠδʼ ἐπʼ ἀπείρονα γαῖαν ἅμα πνοιῇς ἀνέμοιο·
Iliad 24.343	εἵλετο δὲ ῥάβδον, τῇ τʼ ἀνδρῶν ὄμματα θέλγει
Iliad 24.344	ὧν ἐθέλει, τοὺς δʼ αὖτε καὶ ὑπνώοντας ἐγείρει·
Iliad 24.345	τὴν μετὰ χερσὶν ἔχων πέτετο κρατὺς ἀργεϊφόντης.
Iliad 24.346	αἶψα δʼ ἄρα Τροίην τε καὶ Ἑλλήσποντον ἵκανε,
Iliad 24.347	βῆ δʼ ἰέναι κούρῳ αἰσυμνητῆρι ἐοικὼς
Iliad 24.348	πρῶτον ὑπηνήτῃ, τοῦ περ χαριεστάτη ἥβη.
Iliad 24.349	οἳ δʼ ἐπεὶ οὖν μέγα σῆμα παρὲξ Ἴλοιο ἔλασσαν,
Iliad 24.350	στῆσαν ἄρʼ ἡμιόνους τε καὶ ἵππους ὄφρα πίοιεν
Iliad 24.351	ἐν ποταμῷ· δὴ γὰρ καὶ ἐπὶ κνέφας ἤλυθε γαῖαν.
Iliad 24.352	τὸν δʼ ἐξ ἀγχιμόλοιο ἰδὼν ἐφράσσατο κῆρυξ
Iliad 24.353	Ἑρμείαν, ποτὶ δὲ Πρίαμον φάτο φώνησέν τε·
Iliad 24.354	φράζεο Δαρδανίδη· φραδέος νόου ἔργα τέτυκται.
Iliad 24.355	ἄνδρʼ ὁρόω, τάχα δʼ ἄμμε διαρραίσεσθαι ὀΐω.
Iliad 24.356	ἀλλʼ ἄγε δὴ φεύγωμεν ἐφʼ ἵππων, ἤ μιν ἔπειτα
Iliad 24.357	γούνων ἁψάμενοι λιτανεύσομεν αἴ κʼ ἐλεήσῃ.
Iliad 24.358	ὣς φάτο, σὺν δὲ γέροντι νόος χύτο, δείδιε δʼ αἰνῶς,
Iliad 24.359	ὀρθαὶ δὲ τρίχες ἔσταν ἐνὶ γναμπτοῖσι μέλεσσι,
Iliad 24.360	στῆ δὲ ταφών· αὐτὸς δʼ ἐριούνιος ἐγγύθεν ἐλθὼν
Iliad 24.361	χεῖρα γέροντος ἑλὼν ἐξείρετο καὶ προσέειπε·
Iliad 24.362	πῇ πάτερ ὧδʼ ἵππους τε καὶ ἡμιόνους ἰθύνεις
Iliad 24.363	νύκτα διʼ ἀμβροσίην, ὅτε θʼ εὕδουσι βροτοὶ ἄλλοι;
Iliad 24.364	οὐδὲ σύ γʼ ἔδεισας μένεα πνείοντας Ἀχαιούς,
Iliad 24.365	οἵ τοι δυσμενέες καὶ ἀνάρσιοι ἐγγὺς ἔασι;
Iliad 24.366	τῶν εἴ τίς σε ἴδοιτο θοὴν διὰ νύκτα μέλαιναν
Iliad 24.367	τοσσάδʼ ὀνείατʼ ἄγοντα, τίς ἂν δή τοι νόος εἴη;
Iliad 24.368	οὔτʼ αὐτὸς νέος ἐσσί, γέρων δέ τοι οὗτος ὀπηδεῖ,
Iliad 24.369	ἄνδρʼ ἀπαμύνασθαι, ὅτε τις πρότερος χαλεπήνῃ.
Iliad 24.370	ἀλλʼ ἐγὼ οὐδέν σε ῥέξω κακά, καὶ δέ κεν ἄλλον
Iliad 24.371	σεῦ ἀπαλεξήσαιμι· φίλῳ δέ σε πατρὶ ἐΐσκω.
Iliad 24.372	τὸν δʼ ἠμείβετʼ ἔπειτα γέρων Πρίαμος θεοειδής·
Iliad 24.373	οὕτω πῃ τάδε γʼ ἐστὶ φίλον τέκος ὡς ἀγορεύεις.
Iliad 24.374	ἀλλʼ ἔτι τις καὶ ἐμεῖο θεῶν ὑπερέσχεθε χεῖρα,
Iliad 24.375	ὅς μοι τοιόνδʼ ἧκεν ὁδοιπόρον ἀντιβολῆσαι
Iliad 24.376	αἴσιον, οἷος δὴ σὺ δέμας καὶ εἶδος ἀγητός,
Iliad 24.377	πέπνυσαί τε νόῳ, μακάρων δʼ ἔξεσσι τοκήων.
Iliad 24.378	τὸν δʼ αὖτε προσέειπε διάκτορος ἀργεϊφόντης·
Iliad 24.379	ναὶ δὴ ταῦτά γε πάντα γέρον κατὰ μοῖραν ἔειπες.
Iliad 24.380	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Iliad 24.381	ἠέ πῃ ἐκπέμπεις κειμήλια πολλὰ καὶ ἐσθλὰ
Iliad 24.382	ἄνδρας ἐς ἀλλοδαποὺς ἵνα περ τάδε τοι σόα μίμνῃ,
Iliad 24.383	ἦ ἤδη πάντες καταλείπετε Ἴλιον ἱρὴν
Iliad 24.384	δειδιότες· τοῖος γὰρ ἀνὴρ ὤριστος ὄλωλε
Iliad 24.385	σὸς πάϊς· οὐ μὲν γάρ τι μάχης ἐπιδεύετʼ Ἀχαιῶν.
Iliad 24.386	τὸν δʼ ἠμείβετʼ ἔπειτα γέρων Πρίαμος θεοειδής·
Iliad 24.387	τίς δὲ σύ ἐσσι φέριστε τέων δʼ ἔξεσσι τοκήων;
Iliad 24.388	ὥς μοι καλὰ τὸν οἶτον ἀπότμου παιδὸς ἔνισπες.
Iliad 24.389	τὸν δʼ αὖτε προσέειπε διάκτορος ἀργεϊφόντης·
Iliad 24.390	πειρᾷ ἐμεῖο γεραιὲ καὶ εἴρεαι Ἕκτορα δῖον.
Iliad 24.391	τὸν μὲν ἐγὼ μάλα πολλὰ μάχῃ ἔνι κυδιανείρῃ
Iliad 24.392	ὀφθαλμοῖσιν ὄπωπα, καὶ εὖτʼ ἐπὶ νηυσὶν ἐλάσσας
Iliad 24.393	Ἀργείους κτείνεσκε δαΐζων ὀξέϊ χαλκῷ·
Iliad 24.394	ἡμεῖς δʼ ἑσταότες θαυμάζομεν· οὐ γὰρ Ἀχιλλεὺς
Iliad 24.395	εἴα μάρνασθαι κεχολωμένος Ἀτρεΐωνι.
Iliad 24.396	τοῦ γὰρ ἐγὼ θεράπων, μία δʼ ἤγαγε νηῦς εὐεργής·
Iliad 24.397	Μυρμιδόνων δʼ ἔξειμι, πατὴρ δέ μοί ἐστι Πολύκτωρ.
Iliad 24.398	ἀφνειὸς μὲν ὅ γʼ ἐστί, γέρων δὲ δὴ ὡς σύ περ ὧδε,
Iliad 24.399	ἓξ δέ οἱ υἷες ἔασιν, ἐγὼ δέ οἱ ἕβδομός εἰμι·
Iliad 24.400	τῶν μέτα παλλόμενος κλήρῳ λάχον ἐνθάδʼ ἕπεσθαι.
Iliad 24.401	νῦν δʼ ἦλθον πεδίον δʼ ἀπὸ νηῶν· ἠῶθεν γὰρ
Iliad 24.402	θήσονται περὶ ἄστυ μάχην ἑλίκωπες Ἀχαιοί.
Iliad 24.403	ἀσχαλόωσι γὰρ οἵδε καθήμενοι, οὐδὲ δύνανται
Iliad 24.404	ἴσχειν ἐσσυμένους πολέμου βασιλῆες Ἀχαιῶν.
Iliad 24.405	τὸν δʼ ἠμείβετʼ ἔπειτα γέρων Πρίαμος θεοειδής·
Iliad 24.406	εἰ μὲν δὴ θεράπων Πηληϊάδεω Ἀχιλῆος
Iliad 24.407	εἴς, ἄγε δή μοι πᾶσαν ἀληθείην κατάλεξον,
Iliad 24.408	ἢ ἔτι πὰρ νήεσσιν ἐμὸς πάϊς, ἦέ μιν ἤδη
Iliad 24.409	ᾗσι κυσὶν μελεϊστὶ ταμὼν προύθηκεν Ἀχιλλεύς.
Iliad 24.410	τὸν δʼ αὖτε προσέειπε διάκτορος ἀργεϊφόντης·
Iliad 24.411	ὦ γέρον οὔ πω τόν γε κύνες φάγον οὐδʼ οἰωνοί,
Iliad 24.412	ἀλλʼ ἔτι κεῖνος κεῖται Ἀχιλλῆος παρὰ νηῒ
Iliad 24.413	αὔτως ἐν κλισίῃσι· δυωδεκάτη δέ οἱ ἠὼς
Iliad 24.414	κειμένῳ, οὐδέ τί οἱ χρὼς σήπεται, οὐδέ μιν εὐλαὶ
Iliad 24.415	ἔσθουσʼ, αἵ ῥά τε φῶτας ἀρηϊφάτους κατέδουσιν.
Iliad 24.416	ἦ μέν μιν περὶ σῆμα ἑοῦ ἑτάροιο φίλοιο
Iliad 24.417	ἕλκει ἀκηδέστως ἠὼς ὅτε δῖα φανήῃ,
Iliad 24.418	οὐδέ μιν αἰσχύνει· θηοῖό κεν αὐτὸς ἐπελθὼν
Iliad 24.419	οἷον ἐερσήεις κεῖται, περὶ δʼ αἷμα νένιπται,
Iliad 24.420	οὐδέ ποθι μιαρός· σὺν δʼ ἕλκεα πάντα μέμυκεν
Iliad 24.421	ὅσσʼ ἐτύπη· πολέες γὰρ ἐν αὐτῷ χαλκὸν ἔλασσαν.
Iliad 24.422	ὥς τοι κήδονται μάκαρες θεοὶ υἷος ἑῆος
Iliad 24.423	καὶ νέκυός περ ἐόντος, ἐπεί σφι φίλος περὶ κῆρι.
Iliad 24.424	ὣς φάτο, γήθησεν δʼ ὃ γέρων, καὶ ἀμείβετο μύθῳ·
Iliad 24.425	ὦ τέκος, ἦ ῥʼ ἀγαθὸν καὶ ἐναίσιμα δῶρα διδοῦναι
Iliad 24.426	ἀθανάτοις, ἐπεὶ οὔ ποτʼ ἐμὸς πάϊς, εἴ ποτʼ ἔην γε,
Iliad 24.427	λήθετʼ ἐνὶ μεγάροισι θεῶν οἳ Ὄλυμπον ἔχουσι·
Iliad 24.428	τώ οἱ ἀπεμνήσαντο καὶ ἐν θανάτοιό περ αἴσῃ.
Iliad 24.429	ἀλλʼ ἄγε δὴ τόδε δέξαι ἐμεῦ πάρα καλὸν ἄλεισον,
Iliad 24.430	αὐτόν τε ῥῦσαι, πέμψον δέ με σύν γε θεοῖσιν,
Iliad 24.431	ὄφρά κεν ἐς κλισίην Πηληϊάδεω ἀφίκωμαι.
Iliad 24.432	τὸν δʼ αὖτε προσέειπε διάκτορος ἀργεϊφόντης·
Iliad 24.433	πειρᾷ ἐμεῖο γεραιὲ νεωτέρου, οὐδέ με πείσεις,
Iliad 24.434	ὅς με κέλῃ σέο δῶρα παρὲξ Ἀχιλῆα δέχεσθαι.
Iliad 24.435	τὸν μὲν ἐγὼ δείδοικα καὶ αἰδέομαι περὶ κῆρι
Iliad 24.436	συλεύειν, μή μοί τι κακὸν μετόπισθε γένηται.
Iliad 24.437	σοὶ δʼ ἂν ἐγὼ πομπὸς καί κε κλυτὸν Ἄργος ἱκοίμην,
Iliad 24.438	ἐνδυκέως ἐν νηῒ θοῇ ἢ πεζὸς ὁμαρτέων·
Iliad 24.439	οὐκ ἄν τίς τοι πομπὸν ὀνοσσάμενος μαχέσαιτο.
Iliad 24.440	ἦ καὶ ἀναΐξας ἐριούνιος ἅρμα καὶ ἵππους
Iliad 24.441	καρπαλίμως μάστιγα καὶ ἡνία λάζετο χερσίν,
Iliad 24.442	ἐν δʼ ἔπνευσʼ ἵπποισι καὶ ἡμιόνοις μένος ἠΰ.
Iliad 24.443	ἀλλʼ ὅτε δὴ πύργους τε νεῶν καὶ τάφρον ἵκοντο,
Iliad 24.444	οἳ δὲ νέον περὶ δόρπα φυλακτῆρες πονέοντο,
Iliad 24.445	τοῖσι δʼ ἐφʼ ὕπνον ἔχευε διάκτορος ἀργεϊφόντης
Iliad 24.446	πᾶσιν, ἄφαρ δʼ ὤϊξε πύλας καὶ ἀπῶσεν ὀχῆας,
Iliad 24.447	ἐς δʼ ἄγαγε Πρίαμόν τε καὶ ἀγλαὰ δῶρʼ ἐπʼ ἀπήνης.
Iliad 24.448	ἀλλʼ ὅτε δὴ κλισίην Πηληϊάδεω ἀφίκοντο
Iliad 24.449	ὑψηλήν, τὴν Μυρμιδόνες ποίησαν ἄνακτι
Iliad 24.450	δοῦρʼ ἐλάτης κέρσαντες· ἀτὰρ καθύπερθεν ἔρεψαν
Iliad 24.451	λαχνήεντʼ ὄροφον λειμωνόθεν ἀμήσαντες·
Iliad 24.452	ἀμφὶ δέ οἱ μεγάλην αὐλὴν ποίησαν ἄνακτι
Iliad 24.453	σταυροῖσιν πυκινοῖσι· θύρην δʼ ἔχε μοῦνος ἐπιβλὴς
Iliad 24.454	εἰλάτινος, τὸν τρεῖς μὲν ἐπιρρήσσεσκον Ἀχαιοί,
Iliad 24.455	τρεῖς δʼ ἀναοίγεσκον μεγάλην κληῗδα θυράων
Iliad 24.456	τῶν ἄλλων· Ἀχιλεὺς δʼ ἄρʼ ἐπιρρήσσεσκε καὶ οἶος·
Iliad 24.457	δή ῥα τόθʼ Ἑρμείας ἐριούνιος ᾦξε γέροντι,
Iliad 24.458	ἐς δʼ ἄγαγε κλυτὰ δῶρα ποδώκεϊ Πηλεΐωνι,
Iliad 24.459	ἐξ ἵππων δʼ ἀπέβαινεν ἐπὶ χθόνα φώνησέν τε·
Iliad 24.460	ὦ γέρον ἤτοι ἐγὼ θεὸς ἄμβροτος εἰλήλουθα
Iliad 24.461	Ἑρμείας· σοὶ γάρ με πατὴρ ἅμα πομπὸν ὄπασσεν.
Iliad 24.462	ἀλλʼ ἤτοι μὲν ἐγὼ πάλιν εἴσομαι, οὐδʼ Ἀχιλῆος
Iliad 24.463	ὀφθαλμοὺς εἴσειμι· νεμεσσητὸν δέ κεν εἴη
Iliad 24.464	ἀθάνατον θεὸν ὧδε βροτοὺς ἀγαπαζέμεν ἄντην·
Iliad 24.465	τύνη δʼ εἰσελθὼν λαβὲ γούνατα Πηλεΐωνος,
Iliad 24.466	καί μιν ὑπὲρ πατρὸς καὶ μητέρος ἠϋκόμοιο
Iliad 24.467	λίσσεο καὶ τέκεος, ἵνα οἱ σὺν θυμὸν ὀρίνῃς.
Iliad 24.468	ὣς ἄρα φωνήσας ἀπέβη πρὸς μακρὸν Ὄλυμπον
Iliad 24.469	Ἑρμείας· Πρίαμος δʼ ἐξ ἵππων ἆλτο χαμᾶζε,
Iliad 24.470	Ἰδαῖον δὲ κατʼ αὖθι λίπεν· ὃ δὲ μίμνεν ἐρύκων
Iliad 24.471	ἵππους ἡμιόνους τε· γέρων δʼ ἰθὺς κίεν οἴκου,
Iliad 24.472	τῇ ῥʼ Ἀχιλεὺς ἵζεσκε Διῒ φίλος· ἐν δέ μιν αὐτὸν
Iliad 24.473	εὗρʼ, ἕταροι δʼ ἀπάνευθε καθήατο· τὼ δὲ δύʼ οἴω
Iliad 24.474	ἥρως Αὐτομέδων τε καὶ Ἄλκιμος ὄζος Ἄρηος
Iliad 24.475	ποίπνυον παρεόντε· νέον δʼ ἀπέληγεν ἐδωδῆς
Iliad 24.476	ἔσθων καὶ πίνων· ἔτι καὶ παρέκειτο τράπεζα.
Iliad 24.477	τοὺς δʼ ἔλαθʼ εἰσελθὼν Πρίαμος μέγας, ἄγχι δʼ ἄρα στὰς
Iliad 24.478	χερσὶν Ἀχιλλῆος λάβε γούνατα καὶ κύσε χεῖρας
Iliad 24.479	δεινὰς ἀνδροφόνους, αἵ οἱ πολέας κτάνον υἷας.
Iliad 24.480	ὡς δʼ ὅτʼ ἂν ἄνδρʼ ἄτη πυκινὴ λάβῃ, ὅς τʼ ἐνὶ πάτρῃ
Iliad 24.481	φῶτα κατακτείνας ἄλλων ἐξίκετο δῆμον
Iliad 24.482	ἀνδρὸς ἐς ἀφνειοῦ, θάμβος δʼ ἔχει εἰσορόωντας,
Iliad 24.483	ὣς Ἀχιλεὺς θάμβησεν ἰδὼν Πρίαμον θεοειδέα·
Iliad 24.484	θάμβησαν δὲ καὶ ἄλλοι, ἐς ἀλλήλους δὲ ἴδοντο.
Iliad 24.485	τὸν καὶ λισσόμενος Πρίαμος πρὸς μῦθον ἔειπε·
Iliad 24.486	μνῆσαι πατρὸς σοῖο θεοῖς ἐπιείκελʼ Ἀχιλλεῦ,
Iliad 24.487	τηλίκου ὥς περ ἐγών, ὀλοῷ ἐπὶ γήραος οὐδῷ·
Iliad 24.488	καὶ μέν που κεῖνον περιναιέται ἀμφὶς ἐόντες
Iliad 24.489	τείρουσʼ, οὐδέ τίς ἐστιν ἀρὴν καὶ λοιγὸν ἀμῦναι.
Iliad 24.490	ἀλλʼ ἤτοι κεῖνός γε σέθεν ζώοντος ἀκούων
Iliad 24.491	χαίρει τʼ ἐν θυμῷ, ἐπί τʼ ἔλπεται ἤματα πάντα
Iliad 24.492	ὄψεσθαι φίλον υἱὸν ἀπὸ Τροίηθεν ἰόντα·
Iliad 24.493	αὐτὰρ ἐγὼ πανάποτμος, ἐπεὶ τέκον υἷας ἀρίστους
Iliad 24.494	Τροίῃ ἐν εὐρείῃ, τῶν δʼ οὔ τινά φημι λελεῖφθαι.
Iliad 24.495	πεντήκοντά μοι ἦσαν ὅτʼ ἤλυθον υἷες Ἀχαιῶν·
Iliad 24.496	ἐννεακαίδεκα μέν μοι ἰῆς ἐκ νηδύος ἦσαν,
Iliad 24.497	τοὺς δʼ ἄλλους μοι ἔτικτον ἐνὶ μεγάροισι γυναῖκες.
Iliad 24.498	τῶν μὲν πολλῶν θοῦρος Ἄρης ὑπὸ γούνατʼ ἔλυσεν·
Iliad 24.499	ὃς δέ μοι οἶος ἔην, εἴρυτο δὲ ἄστυ καὶ αὐτούς,
Iliad 24.500	τὸν σὺ πρῴην κτεῖνας ἀμυνόμενον περὶ πάτρης
Iliad 24.501	Ἕκτορα· τοῦ νῦν εἵνεχʼ ἱκάνω νῆας Ἀχαιῶν
Iliad 24.502	λυσόμενος παρὰ σεῖο, φέρω δʼ ἀπερείσιʼ ἄποινα.
Iliad 24.503	ἀλλʼ αἰδεῖο θεοὺς Ἀχιλεῦ, αὐτόν τʼ ἐλέησον
Iliad 24.504	μνησάμενος σοῦ πατρός· ἐγὼ δʼ ἐλεεινότερός περ,
Iliad 24.505	ἔτλην δʼ οἷʼ οὔ πώ τις ἐπιχθόνιος βροτὸς ἄλλος,
Iliad 24.506	ἀνδρὸς παιδοφόνοιο ποτὶ στόμα χεῖρʼ ὀρέγεσθαι.
Iliad 24.507	ὣς φάτο, τῷ δʼ ἄρα πατρὸς ὑφʼ ἵμερον ὦρσε γόοιο·
Iliad 24.508	ἁψάμενος δʼ ἄρα χειρὸς ἀπώσατο ἦκα γέροντα.
Iliad 24.509	τὼ δὲ μνησαμένω ὃ μὲν Ἕκτορος ἀνδροφόνοιο
Iliad 24.510	κλαῖʼ ἁδινὰ προπάροιθε ποδῶν Ἀχιλῆος ἐλυσθείς,
Iliad 24.511	αὐτὰρ Ἀχιλλεὺς κλαῖεν ἑὸν πατέρʼ, ἄλλοτε δʼ αὖτε
Iliad 24.512	Πάτροκλον· τῶν δὲ στοναχὴ κατὰ δώματʼ ὀρώρει.
Iliad 24.513	αὐτὰρ ἐπεί ῥα γόοιο τετάρπετο δῖος Ἀχιλλεύς,
Iliad 24.514	καί οἱ ἀπὸ πραπίδων ἦλθʼ ἵμερος ἠδʼ ἀπὸ γυίων,
Iliad 24.515	αὐτίκʼ ἀπὸ θρόνου ὦρτο, γέροντα δὲ χειρὸς ἀνίστη
Iliad 24.516	οἰκτίρων πολιόν τε κάρη πολιόν τε γένειον,
Iliad 24.517	καί μιν φωνήσας ἔπεα πτερόεντα προσηύδα·
Iliad 24.518	ἆ δείλʼ, ἦ δὴ πολλὰ κάκʼ ἄνσχεο σὸν κατὰ θυμόν.
Iliad 24.519	πῶς ἔτλης ἐπὶ νῆας Ἀχαιῶν ἐλθέμεν οἶος
Iliad 24.520	ἀνδρὸς ἐς ὀφθαλμοὺς ὅς τοι πολέας τε καὶ ἐσθλοὺς
Iliad 24.521	υἱέας ἐξενάριξα; σιδήρειόν νύ τοι ἦτορ.
Iliad 24.522	ἀλλʼ ἄγε δὴ κατʼ ἄρʼ ἕζευ ἐπὶ θρόνου, ἄλγεα δʼ ἔμπης
Iliad 24.523	ἐν θυμῷ κατακεῖσθαι ἐάσομεν ἀχνύμενοί περ·
Iliad 24.524	οὐ γάρ τις πρῆξις πέλεται κρυεροῖο γόοιο·
Iliad 24.525	ὡς γὰρ ἐπεκλώσαντο θεοὶ δειλοῖσι βροτοῖσι
Iliad 24.526	ζώειν ἀχνυμένοις· αὐτοὶ δέ τʼ ἀκηδέες εἰσί.
Iliad 24.527	δοιοὶ γάρ τε πίθοι κατακείαται ἐν Διὸς οὔδει
Iliad 24.528	δώρων οἷα δίδωσι κακῶν, ἕτερος δὲ ἑάων·
Iliad 24.529	ᾧ μέν κʼ ἀμμίξας δώῃ Ζεὺς τερπικέραυνος,
Iliad 24.530	ἄλλοτε μέν τε κακῷ ὅ γε κύρεται, ἄλλοτε δʼ ἐσθλῷ·
Iliad 24.531	ᾧ δέ κε τῶν λυγρῶν δώῃ, λωβητὸν ἔθηκε,
Iliad 24.532	καί ἑ κακὴ βούβρωστις ἐπὶ χθόνα δῖαν ἐλαύνει,
Iliad 24.533	φοιτᾷ δʼ οὔτε θεοῖσι τετιμένος οὔτε βροτοῖσιν.
Iliad 24.534	ὣς μὲν καὶ Πηλῆϊ θεοὶ δόσαν ἀγλαὰ δῶρα
Iliad 24.535	ἐκ γενετῆς· πάντας γὰρ ἐπʼ ἀνθρώπους ἐκέκαστο
Iliad 24.536	ὄλβῳ τε πλούτῳ τε, ἄνασσε δὲ Μυρμιδόνεσσι,
Iliad 24.537	καί οἱ θνητῷ ἐόντι θεὰν ποίησαν ἄκοιτιν.
Iliad 24.538	ἀλλʼ ἐπὶ καὶ τῷ θῆκε θεὸς κακόν, ὅττί οἱ οὔ τι
Iliad 24.539	παίδων ἐν μεγάροισι γονὴ γένετο κρειόντων,
Iliad 24.540	ἀλλʼ ἕνα παῖδα τέκεν παναώριον· οὐδέ νυ τόν γε
Iliad 24.541	γηράσκοντα κομίζω, ἐπεὶ μάλα τηλόθι πάτρης
Iliad 24.542	ἧμαι ἐνὶ Τροίῃ, σέ τε κήδων ἠδὲ σὰ τέκνα.
Iliad 24.543	καὶ σὲ γέρον τὸ πρὶν μὲν ἀκούομεν ὄλβιον εἶναι·
Iliad 24.544	ὅσσον Λέσβος ἄνω Μάκαρος ἕδος ἐντὸς ἐέργει
Iliad 24.545	καὶ Φρυγίη καθύπερθε καὶ Ἑλλήσποντος ἀπείρων,
Iliad 24.546	τῶν σε γέρον πλούτῳ τε καὶ υἱάσι φασὶ κεκάσθαι.
Iliad 24.547	αὐτὰρ ἐπεί τοι πῆμα τόδʼ ἤγαγον Οὐρανίωνες
Iliad 24.548	αἰεί τοι περὶ ἄστυ μάχαι τʼ ἀνδροκτασίαι τε.
Iliad 24.549	ἄνσχεο, μὴ δʼ ἀλίαστον ὀδύρεο σὸν κατὰ θυμόν·
Iliad 24.550	οὐ γάρ τι πρήξεις ἀκαχήμενος υἷος ἑῆος,
Iliad 24.551	οὐδέ μιν ἀνστήσεις, πρὶν καὶ κακὸν ἄλλο πάθῃσθα.
Iliad 24.552	τὸν δʼ ἠμείβετʼ ἔπειτα γέρων Πρίαμος θεοειδής·
Iliad 24.553	μή πω μʼ ἐς θρόνον ἵζε διοτρεφὲς ὄφρά κεν Ἕκτωρ
Iliad 24.554	κεῖται ἐνὶ κλισίῃσιν ἀκηδής, ἀλλὰ τάχιστα
Iliad 24.555	λῦσον ἵνʼ ὀφθαλμοῖσιν ἴδω· σὺ δὲ δέξαι ἄποινα
Iliad 24.556	πολλά, τά τοι φέρομεν· σὺ δὲ τῶνδʼ ἀπόναιο, καὶ ἔλθοις
Iliad 24.557	σὴν ἐς πατρίδα γαῖαν, ἐπεί με πρῶτον ἔασας
Iliad 24.558	αὐτόν τε ζώειν καὶ ὁρᾶν φάος ἠελίοιο.
Iliad 24.559	τὸν δʼ ἄρʼ ὑπόδρα ἰδὼν προσέφη πόδας ὠκὺς Ἀχιλλεύς·
Iliad 24.560	μηκέτι νῦν μʼ ἐρέθιζε γέρον· νοέω δὲ καὶ αὐτὸς
Iliad 24.561	Ἕκτορά τοι λῦσαι, Διόθεν δέ μοι ἄγγελος ἦλθε
Iliad 24.562	μήτηρ, ἥ μʼ ἔτεκεν, θυγάτηρ ἁλίοιο γέροντος.
Iliad 24.563	καὶ δέ σε γιγνώσκω Πρίαμε φρεσίν, οὐδέ με λήθεις,
Iliad 24.564	ὅττι θεῶν τίς σʼ ἦγε θοὰς ἐπὶ νῆας Ἀχαιῶν.
Iliad 24.565	οὐ γάρ κε τλαίη βροτὸς ἐλθέμεν, οὐδὲ μάλʼ ἡβῶν,
Iliad 24.566	ἐς στρατόν· οὐδὲ γὰρ ἂν φυλάκους λάθοι, οὐδέ κʼ ὀχῆα
Iliad 24.567	ῥεῖα μετοχλίσσειε θυράων ἡμετεράων.
Iliad 24.568	τὼ νῦν μή μοι μᾶλλον ἐν ἄλγεσι θυμὸν ὀρίνῃς,
Iliad 24.569	μή σε γέρον οὐδʼ αὐτὸν ἐνὶ κλισίῃσιν ἐάσω
Iliad 24.570	καὶ ἱκέτην περ ἐόντα, Διὸς δʼ ἀλίτωμαι ἐφετμάς.
Iliad 24.571	ὣς ἔφατʼ, ἔδεισεν δʼ ὃ γέρων καὶ ἐπείθετο μύθῳ.
Iliad 24.572	Πηλεΐδης δʼ οἴκοιο λέων ὣς ἆλτο θύραζε
Iliad 24.573	οὐκ οἶος, ἅμα τῷ γε δύω θεράποντες ἕποντο
Iliad 24.574	ἥρως Αὐτομέδων ἠδʼ Ἄλκιμος, οὕς ῥα μάλιστα
Iliad 24.575	τῖʼ Ἀχιλεὺς ἑτάρων μετὰ Πάτροκλόν γε θανόντα,
Iliad 24.576	οἳ τόθʼ ὑπὸ ζυγόφιν λύον ἵππους ἡμιόνους τε,
Iliad 24.577	ἐς δʼ ἄγαγον κήρυκα καλήτορα τοῖο γέροντος,
Iliad 24.578	κὰδ δʼ ἐπὶ δίφρου εἷσαν· ἐϋξέστου δʼ ἀπʼ ἀπήνης
Iliad 24.579	ᾕρεον Ἑκτορέης κεφαλῆς ἀπερείσιʼ ἄποινα.
Iliad 24.580	κὰδ δʼ ἔλιπον δύο φάρεʼ ἐΰννητόν τε χιτῶνα,
Iliad 24.581	ὄφρα νέκυν πυκάσας δοίη οἶκον δὲ φέρεσθαι.
Iliad 24.582	δμῳὰς δʼ ἐκκαλέσας λοῦσαι κέλετʼ ἀμφί τʼ ἀλεῖψαι
Iliad 24.583	νόσφιν ἀειράσας, ὡς μὴ Πρίαμος ἴδοι υἱόν,
Iliad 24.584	μὴ ὃ μὲν ἀχνυμένῃ κραδίῃ χόλον οὐκ ἐρύσαιτο
Iliad 24.585	παῖδα ἰδών, Ἀχιλῆϊ δʼ ὀρινθείη φίλον ἦτορ,
Iliad 24.586	καί ἑ κατακτείνειε, Διὸς δʼ ἀλίτηται ἐφετμάς.
Iliad 24.587	τὸν δʼ ἐπεὶ οὖν δμῳαὶ λοῦσαν καὶ χρῖσαν ἐλαίῳ,
Iliad 24.588	ἀμφὶ δέ μιν φᾶρος καλὸν βάλον ἠδὲ χιτῶνα,
Iliad 24.589	αὐτὸς τόν γʼ Ἀχιλεὺς λεχέων ἐπέθηκεν ἀείρας,
Iliad 24.590	σὺν δʼ ἕταροι ἤειραν ἐϋξέστην ἐπʼ ἀπήνην.
Iliad 24.591	ᾤμωξέν τʼ ἄρʼ ἔπειτα, φίλον δʼ ὀνόμηνεν ἑταῖρον·
Iliad 24.592	μή μοι Πάτροκλε σκυδμαινέμεν, αἴ κε πύθηαι
Iliad 24.593	εἰν Ἄϊδός περ ἐὼν ὅτι Ἕκτορα δῖον ἔλυσα
Iliad 24.594	πατρὶ φίλῳ, ἐπεὶ οὔ μοι ἀεικέα δῶκεν ἄποινα.
Iliad 24.595	σοὶ δʼ αὖ ἐγὼ καὶ τῶνδʼ ἀποδάσσομαι ὅσσʼ ἐπέοικεν.
Iliad 24.596	ἦ ῥα, καὶ ἐς κλισίην πάλιν ἤϊε δῖος Ἀχιλλεύς,
Iliad 24.597	ἕζετο δʼ ἐν κλισμῷ πολυδαιδάλῳ ἔνθεν ἀνέστη
Iliad 24.598	τοίχου τοῦ ἑτέρου, ποτὶ δὲ Πρίαμον φάτο μῦθον·
Iliad 24.599	υἱὸς μὲν δή τοι λέλυται γέρον ὡς ἐκέλευες,
Iliad 24.600	κεῖται δʼ ἐν λεχέεσσʼ· ἅμα δʼ ἠοῖ φαινομένηφιν
Iliad 24.601	ὄψεαι αὐτὸς ἄγων· νῦν δὲ μνησώμεθα δόρπου.
Iliad 24.602	καὶ γάρ τʼ ἠΰκομος Νιόβη ἐμνήσατο σίτου,
Iliad 24.603	τῇ περ δώδεκα παῖδες ἐνὶ μεγάροισιν ὄλοντο
Iliad 24.604	ἓξ μὲν θυγατέρες, ἓξ δʼ υἱέες ἡβώοντες.
Iliad 24.605	τοὺς μὲν Ἀπόλλων πέφνεν ἀπʼ ἀργυρέοιο βιοῖο
Iliad 24.606	χωόμενος Νιόβῃ, τὰς δʼ Ἄρτεμις ἰοχέαιρα,
Iliad 24.607	οὕνεκʼ ἄρα Λητοῖ ἰσάσκετο καλλιπαρῄῳ·
Iliad 24.608	φῆ δοιὼ τεκέειν, ἣ δʼ αὐτὴ γείνατο πολλούς·
Iliad 24.609	τὼ δʼ ἄρα καὶ δοιώ περ ἐόντʼ ἀπὸ πάντας ὄλεσσαν.
Iliad 24.610	οἳ μὲν ἄρʼ ἐννῆμαρ κέατʼ ἐν φόνῳ, οὐδέ τις ἦεν
Iliad 24.611	κατθάψαι, λαοὺς δὲ λίθους ποίησε Κρονίων·
Iliad 24.612	τοὺς δʼ ἄρα τῇ δεκάτῃ θάψαν θεοὶ Οὐρανίωνες.
Iliad 24.613	ἣ δʼ ἄρα σίτου μνήσατʼ, ἐπεὶ κάμε δάκρυ χέουσα.
Iliad 24.614	νῦν δέ που ἐν πέτρῃσιν ἐν οὔρεσιν οἰοπόλοισιν
Iliad 24.615	ἐν Σιπύλῳ, ὅθι φασὶ θεάων ἔμμεναι εὐνὰς
Iliad 24.616	νυμφάων, αἵ τʼ ἀμφʼ Ἀχελώϊον ἐρρώσαντο,
Iliad 24.617	ἔνθα λίθος περ ἐοῦσα θεῶν ἐκ κήδεα πέσσει.
Iliad 24.618	ἀλλʼ ἄγε δὴ καὶ νῶϊ μεδώμεθα δῖε γεραιὲ
Iliad 24.619	σίτου· ἔπειτά κεν αὖτε φίλον παῖδα κλαίοισθα
Iliad 24.620	Ἴλιον εἰσαγαγών· πολυδάκρυτος δέ τοι ἔσται.
Iliad 24.621	ἦ καὶ ἀναΐξας ὄϊν ἄργυφον ὠκὺς Ἀχιλλεὺς
Iliad 24.622	σφάξʼ· ἕταροι δʼ ἔδερόν τε καὶ ἄμφεπον εὖ κατὰ κόσμον,
Iliad 24.623	μίστυλλόν τʼ ἄρʼ ἐπισταμένως πεῖράν τʼ ὀβελοῖσιν,
Iliad 24.624	ὄπτησάν τε περιφραδέως, ἐρύσαντό τε πάντα.
Iliad 24.625	Αὐτομέδων δʼ ἄρα σῖτον ἑλὼν ἐπένειμε τραπέζῃ
Iliad 24.626	καλοῖς ἐν κανέοισιν· ἀτὰρ κρέα νεῖμεν Ἀχιλλεύς.
Iliad 24.627	οἳ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
Iliad 24.628	αὐτὰρ ἐπεὶ πόσιος καὶ ἐδητύος ἐξ ἔρον ἕντο,
Iliad 24.629	ἤτοι Δαρδανίδης Πρίαμος θαύμαζʼ Ἀχιλῆα
Iliad 24.630	ὅσσος ἔην οἷός τε· θεοῖσι γὰρ ἄντα ἐῴκει·
Iliad 24.631	αὐτὰρ ὃ Δαρδανίδην Πρίαμον θαύμαζεν Ἀχιλλεὺς
Iliad 24.632	εἰσορόων ὄψίν τʼ ἀγαθὴν καὶ μῦθον ἀκούων.
Iliad 24.633	αὐτὰρ ἐπεὶ τάρπησαν ἐς ἀλλήλους ὁρόωντες,
Iliad 24.634	τὸν πρότερος προσέειπε γέρων Πρίαμος θεοειδής·
Iliad 24.635	λέξον νῦν με τάχιστα διοτρεφές, ὄφρα καὶ ἤδη
Iliad 24.636	ὕπνῳ ὕπο γλυκερῷ ταρπώμεθα κοιμηθέντες·
Iliad 24.637	οὐ γάρ πω μύσαν ὄσσε ὑπὸ βλεφάροισιν ἐμοῖσιν
Iliad 24.638	ἐξ οὗ σῇς ὑπὸ χερσὶν ἐμὸς πάϊς ὤλεσε θυμόν,
Iliad 24.639	ἀλλʼ αἰεὶ στενάχω καὶ κήδεα μυρία πέσσω
Iliad 24.640	αὐλῆς ἐν χόρτοισι κυλινδόμενος κατὰ κόπρον.
Iliad 24.641	νῦν δὴ καὶ σίτου πασάμην καὶ αἴθοπα οἶνον
Iliad 24.642	λαυκανίης καθέηκα· πάρος γε μὲν οὔ τι πεπάσμην.
Iliad 24.643	ἦ ῥʼ, Ἀχιλεὺς δʼ ἑτάροισιν ἰδὲ δμῳῇσι κέλευσε
Iliad 24.644	δέμνιʼ ὑπʼ αἰθούσῃ θέμεναι καὶ ῥήγεα καλὰ
Iliad 24.645	πορφύρεʼ ἐμβαλέειν, στορέσαι τʼ ἐφύπερθε τάπητας,
Iliad 24.646	χλαίνας τʼ ἐνθέμεναι οὔλας καθύπερθεν ἕσασθαι.
Iliad 24.647	αἳ δʼ ἴσαν ἐκ μεγάροιο δάος μετὰ χερσὶν ἔχουσαι,
Iliad 24.648	αἶψα δʼ ἄρα στόρεσαν δοιὼ λέχεʼ ἐγκονέουσαι.
Iliad 24.649	τὸν δʼ ἐπικερτομέων προσέφη πόδας ὠκὺς Ἀχιλλεύς·
Iliad 24.650	ἐκτὸς μὲν δὴ λέξο γέρον φίλε, μή τις Ἀχαιῶν
Iliad 24.651	ἐνθάδʼ ἐπέλθῃσιν βουληφόρος, οἵ τέ μοι αἰεὶ
Iliad 24.652	βουλὰς βουλεύουσι παρήμενοι, ἣ θέμις ἐστί·
Iliad 24.653	τῶν εἴ τίς σε ἴδοιτο θοὴν διὰ νύκτα μέλαιναν,
Iliad 24.654	αὐτίκʼ ἂν ἐξείποι Ἀγαμέμνονι ποιμένι λαῶν,
Iliad 24.655	καί κεν ἀνάβλησις λύσιος νεκροῖο γένηται.
Iliad 24.656	ἀλλʼ ἄγε μοι τόδε εἰπὲ καὶ ἀτρεκέως κατάλεξον,
Iliad 24.657	ποσσῆμαρ μέμονας κτερεϊζέμεν Ἕκτορα δῖον,
Iliad 24.658	ὄφρα τέως αὐτός τε μένω καὶ λαὸν ἐρύκω.
Iliad 24.659	τὸν δʼ ἠμείβετʼ ἔπειτα γέρων Πρίαμος θεοειδής·
Iliad 24.660	εἰ μὲν δή μʼ ἐθέλεις τελέσαι τάφον Ἕκτορι δίῳ,
Iliad 24.661	ὧδέ κέ μοι ῥέζων Ἀχιλεῦ κεχαρισμένα θείης.
Iliad 24.662	οἶσθα γὰρ ὡς κατὰ ἄστυ ἐέλμεθα, τηλόθι δʼ ὕλη
Iliad 24.663	ἀξέμεν ἐξ ὄρεος, μάλα δὲ Τρῶες δεδίασιν.
Iliad 24.664	ἐννῆμαρ μέν κʼ αὐτὸν ἐνὶ μεγάροις γοάοιμεν,
Iliad 24.665	τῇ δεκάτῃ δέ κε θάπτοιμεν δαινῦτό τε λαός,
Iliad 24.666	ἑνδεκάτῃ δέ κε τύμβον ἐπʼ αὐτῷ ποιήσαιμεν,
Iliad 24.667	τῇ δὲ δυωδεκάτῃ πολεμίξομεν εἴ περ ἀνάγκη.
Iliad 24.668	τὸν δʼ αὖτε προσέειπε ποδάρκης δῖος Ἀχιλλεύς·
Iliad 24.669	ἔσται τοι καὶ ταῦτα γέρον Πρίαμʼ ὡς σὺ κελεύεις·
Iliad 24.670	σχήσω γὰρ πόλεμον τόσσον χρόνον ὅσσον ἄνωγας.
Iliad 24.671	ὣς ἄρα φωνήσας ἐπὶ καρπῷ χεῖρα γέροντος
Iliad 24.672	ἔλλαβε δεξιτερήν, μή πως δείσειʼ ἐνὶ θυμῷ.
Iliad 24.673	οἳ μὲν ἄρʼ ἐν προδόμῳ δόμου αὐτόθι κοιμήσαντο
Iliad 24.674	κῆρυξ καὶ Πρίαμος πυκινὰ φρεσὶ μήδεʼ ἔχοντες,
Iliad 24.675	αὐτὰρ Ἀχιλλεὺς εὗδε μυχῷ κλισίης ἐϋπήκτου·
Iliad 24.676	τῷ δὲ Βρισηῒς παρελέξατο καλλιπάρῃος.
Iliad 24.677	ἄλλοι μέν ῥα θεοί τε καὶ ἀνέρες ἱπποκορυσταὶ
Iliad 24.678	εὗδον παννύχιοι μαλακῷ δεδμημένοι ὕπνῳ·
Iliad 24.679	ἀλλʼ οὐχ Ἑρμείαν ἐριούνιον ὕπνος ἔμαρπτεν
Iliad 24.680	ὁρμαίνοντʼ ἀνὰ θυμὸν ὅπως Πρίαμον βασιλῆα
Iliad 24.681	νηῶν ἐκπέμψειε λαθὼν ἱεροὺς πυλαωρούς.
Iliad 24.682	στῆ δʼ ἄρʼ ὑπὲρ κεφαλῆς καί μιν πρὸς μῦθον ἔειπεν·
Iliad 24.683	ὦ γέρον οὔ νύ τι σοί γε μέλει κακόν, οἷον ἔθʼ εὕδεις
Iliad 24.684	ἀνδράσιν ἐν δηΐοισιν, ἐπεί σʼ εἴασεν Ἀχιλλεύς.
Iliad 24.685	καὶ νῦν μὲν φίλον υἱὸν ἐλύσαο, πολλὰ δʼ ἔδωκας·
Iliad 24.686	σεῖο δέ κε ζωοῦ καὶ τρὶς τόσα δοῖεν ἄποινα
Iliad 24.687	παῖδες τοὶ μετόπισθε λελειμμένοι, αἴ κʼ Ἀγαμέμνων
Iliad 24.688	γνώῃ σʼ Ἀτρεΐδης, γνώωσι δὲ πάντες Ἀχαιοί.
Iliad 24.689	ὣς ἔφατʼ, ἔδεισεν δʼ ὃ γέρων, κήρυκα δʼ ἀνίστη.
Iliad 24.690	τοῖσιν δʼ Ἑρμείας ζεῦξʼ ἵππους ἡμιόνους τε,
Iliad 24.691	ῥίμφα δʼ ἄρʼ αὐτὸς ἔλαυνε κατὰ στρατόν, οὐδέ τις ἔγνω.
Iliad 24.692	ἀλλʼ ὅτε δὴ πόρον ἷξον ἐϋρρεῖος ποταμοῖο
Iliad 24.693	Ξάνθου δινήεντος, ὃν ἀθάνατος τέκετο Ζεύς,
Iliad 24.694	Ἑρμείας μὲν ἔπειτʼ ἀπέβη πρὸς μακρὸν Ὄλυμπον,
Iliad 24.695	Ἠὼς δὲ κροκόπεπλος ἐκίδνατο πᾶσαν ἐπʼ αἶαν,
Iliad 24.696	οἳ δʼ εἰς ἄστυ ἔλων οἰμωγῇ τε στοναχῇ τε
Iliad 24.697	ἵππους, ἡμίονοι δὲ νέκυν φέρον. οὐδέ τις ἄλλος
Iliad 24.698	ἔγνω πρόσθʼ ἀνδρῶν καλλιζώνων τε γυναικῶν,
Iliad 24.699	ἀλλʼ ἄρα Κασσάνδρη ἰκέλη χρυσῇ Ἀφροδίτῃ
Iliad 24.700	Πέργαμον εἰσαναβᾶσα φίλον πατέρʼ εἰσενόησεν
Iliad 24.701	ἑσταότʼ ἐν δίφρῳ, κήρυκά τε ἀστυβοώτην·
Iliad 24.702	τὸν δʼ ἄρʼ ἐφʼ ἡμιόνων ἴδε κείμενον ἐν λεχέεσσι·
Iliad 24.703	κώκυσέν τʼ ἄρʼ ἔπειτα γέγωνέ τε πᾶν κατὰ ἄστυ·
Iliad 24.704	ὄψεσθε Τρῶες καὶ Τρῳάδες Ἕκτορʼ ἰόντες,
Iliad 24.705	εἴ ποτε καὶ ζώοντι μάχης ἐκνοστήσαντι
Iliad 24.706	χαίρετʼ, ἐπεὶ μέγα χάρμα πόλει τʼ ἦν παντί τε δήμῳ.
Iliad 24.707	ὣς ἔφατʼ, οὐδέ τις αὐτόθʼ ἐνὶ πτόλεϊ λίπετʼ ἀνὴρ
Iliad 24.708	οὐδὲ γυνή· πάντας γὰρ ἀάσχετον ἵκετο πένθος·
Iliad 24.709	ἀγχοῦ δὲ ξύμβληντο πυλάων νεκρὸν ἄγοντι.
Iliad 24.710	πρῶται τόν γʼ ἄλοχός τε φίλη καὶ πότνια μήτηρ
Iliad 24.711	τιλλέσθην ἐπʼ ἄμαξαν ἐΰτροχον ἀΐξασαι
Iliad 24.712	ἁπτόμεναι κεφαλῆς· κλαίων δʼ ἀμφίσταθʼ ὅμιλος.
Iliad 24.713	καί νύ κε δὴ πρόπαν ἦμαρ ἐς ἠέλιον καταδύντα
Iliad 24.714	Ἕκτορα δάκρυ χέοντες ὀδύροντο πρὸ πυλάων,
Iliad 24.715	εἰ μὴ ἄρʼ ἐκ δίφροιο γέρων λαοῖσι μετηύδα·
Iliad 24.716	εἴξατέ μοι οὐρεῦσι διελθέμεν· αὐτὰρ ἔπειτα
Iliad 24.717	ἄσεσθε κλαυθμοῖο, ἐπὴν ἀγάγωμι δόμον δέ.
Iliad 24.718	ὣς ἔφαθʼ, οἳ δὲ διέστησαν καὶ εἶξαν ἀπήνῃ.
Iliad 24.719	οἳ δʼ ἐπεὶ εἰσάγαγον κλυτὰ δώματα, τὸν μὲν ἔπειτα
Iliad 24.720	τρητοῖς ἐν λεχέεσσι θέσαν, παρὰ δʼ εἷσαν ἀοιδοὺς
Iliad 24.721	θρήνων ἐξάρχους, οἵ τε στονόεσσαν ἀοιδὴν
Iliad 24.722	οἳ μὲν ἄρʼ ἐθρήνεον, ἐπὶ δὲ στενάχοντο γυναῖκες.
Iliad 24.723	τῇσιν δʼ Ἀνδρομάχη λευκώλενος ἦρχε γόοιο
Iliad 24.724	Ἕκτορος ἀνδροφόνοιο κάρη μετὰ χερσὶν ἔχουσα·
Iliad 24.725	ἆνερ ἀπʼ αἰῶνος νέος ὤλεο, κὰδ δέ με χήρην
Iliad 24.726	λείπεις ἐν μεγάροισι· πάϊς δʼ ἔτι νήπιος αὔτως
Iliad 24.727	ὃν τέκομεν σύ τʼ ἐγώ τε δυσάμμοροι, οὐδέ μιν οἴω
Iliad 24.728	ἥβην ἵξεσθαι· πρὶν γὰρ πόλις ἥδε κατʼ ἄκρης
Iliad 24.729	πέρσεται· ἦ γὰρ ὄλωλας ἐπίσκοπος, ὅς τέ μιν αὐτὴν
Iliad 24.730	ῥύσκευ, ἔχες δʼ ἀλόχους κεδνὰς καὶ νήπια τέκνα,
Iliad 24.731	αἳ δή τοι τάχα νηυσὶν ὀχήσονται γλαφυρῇσι,
Iliad 24.732	καὶ μὲν ἐγὼ μετὰ τῇσι· σὺ δʼ αὖ τέκος ἢ ἐμοὶ αὐτῇ
Iliad 24.733	ἕψεαι, ἔνθά κεν ἔργα ἀεικέα ἐργάζοιο
Iliad 24.734	ἀθλεύων πρὸ ἄνακτος ἀμειλίχου, ἤ τις Ἀχαιῶν
Iliad 24.735	ῥίψει χειρὸς ἑλὼν ἀπὸ πύργου λυγρὸν ὄλεθρον
Iliad 24.736	χωόμενος, ᾧ δή που ἀδελφεὸν ἔκτανεν Ἕκτωρ
Iliad 24.737	ἢ πατέρʼ ἠὲ καὶ υἱόν, ἐπεὶ μάλα πολλοὶ Ἀχαιῶν
Iliad 24.738	Ἕκτορος ἐν παλάμῃσιν ὀδὰξ ἕλον ἄσπετον οὖδας.
Iliad 24.739	οὐ γὰρ μείλιχος ἔσκε πατὴρ τεὸς ἐν δαῒ λυγρῇ·
Iliad 24.740	τὼ καί μιν λαοὶ μὲν ὀδύρονται κατὰ ἄστυ,
Iliad 24.741	ἀρητὸν δὲ τοκεῦσι γόον καὶ πένθος ἔθηκας
Iliad 24.742	Ἕκτορ· ἐμοὶ δὲ μάλιστα λελείψεται ἄλγεα λυγρά.
Iliad 24.743	οὐ γάρ μοι θνῄσκων λεχέων ἐκ χεῖρας ὄρεξας,
Iliad 24.744	οὐδέ τί μοι εἶπες πυκινὸν ἔπος, οὗ τέ κεν αἰεὶ
Iliad 24.745	μεμνῄμην νύκτάς τε καὶ ἤματα δάκρυ χέουσα.
Iliad 24.746	ὣς ἔφατο κλαίουσʼ, ἐπὶ δὲ στενάχοντο γυναῖκες.
Iliad 24.747	τῇσιν δʼ αὖθʼ Ἑκάβη ἁδινοῦ ἐξῆρχε γόοιο·
Iliad 24.748	Ἕκτορ ἐμῷ θυμῷ πάντων πολὺ φίλτατε παίδων,
Iliad 24.749	ἦ μέν μοι ζωός περ ἐὼν φίλος ἦσθα θεοῖσιν·
Iliad 24.750	οἳ δʼ ἄρα σεῦ κήδοντο καὶ ἐν θανάτοιό περ αἴσῃ.
Iliad 24.751	ἄλλους μὲν γὰρ παῖδας ἐμοὺς πόδας ὠκὺς Ἀχιλλεὺς
Iliad 24.752	πέρνασχʼ ὅν τινʼ ἕλεσκε πέρην ἁλὸς ἀτρυγέτοιο,
Iliad 24.753	ἐς Σάμον ἔς τʼ Ἴμβρον καὶ Λῆμνον ἀμιχθαλόεσσαν·
Iliad 24.754	σεῦ δʼ ἐπεὶ ἐξέλετο ψυχὴν ταναήκεϊ χαλκῷ,
Iliad 24.755	πολλὰ ῥυστάζεσκεν ἑοῦ περὶ σῆμʼ ἑτάροιο
Iliad 24.756	Πατρόκλου, τὸν ἔπεφνες· ἀνέστησεν δέ μιν οὐδʼ ὧς.
Iliad 24.757	νῦν δέ μοι ἑρσήεις καὶ πρόσφατος ἐν μεγάροισι
Iliad 24.758	κεῖσαι, τῷ ἴκελος ὅν τʼ ἀργυρότοξος Ἀπόλλων
Iliad 24.759	οἷς ἀγανοῖσι βέλεσσιν ἐποιχόμενος κατέπεφνεν.
Iliad 24.760	ὣς ἔφατο κλαίουσα, γόον δʼ ἀλίαστον ὄρινε.
Iliad 24.761	τῇσι δʼ ἔπειθʼ Ἑλένη τριτάτη ἐξῆρχε γόοιο·
Iliad 24.762	Ἕκτορ ἐμῷ θυμῷ δαέρων πολὺ φίλτατε πάντων,
Iliad 24.763	ἦ μέν μοι πόσις ἐστὶν Ἀλέξανδρος θεοειδής,
Iliad 24.764	ὅς μʼ ἄγαγε Τροίηνδʼ· ὡς πρὶν ὤφελλον ὀλέσθαι.
Iliad 24.765	ἤδη γὰρ νῦν μοι τόδε εἰκοστὸν ἔτος ἐστὶν
Iliad 24.766	ἐξ οὗ κεῖθεν ἔβην καὶ ἐμῆς ἀπελήλυθα πάτρης·
Iliad 24.767	ἀλλʼ οὔ πω σεῦ ἄκουσα κακὸν ἔπος οὐδʼ ἀσύφηλον·
Iliad 24.768	ἀλλʼ εἴ τίς με καὶ ἄλλος ἐνὶ μεγάροισιν ἐνίπτοι
Iliad 24.769	δαέρων ἢ γαλόων ἢ εἰνατέρων εὐπέπλων,
Iliad 24.770	ἢ ἑκυρή, ἑκυρὸς δὲ πατὴρ ὣς ἤπιος αἰεί,
Iliad 24.771	ἀλλὰ σὺ τὸν ἐπέεσσι παραιφάμενος κατέρυκες
Iliad 24.772	σῇ τʼ ἀγανοφροσύνῃ καὶ σοῖς ἀγανοῖς ἐπέεσσι.
Iliad 24.773	τὼ σέ θʼ ἅμα κλαίω καὶ ἔμʼ ἄμμορον ἀχνυμένη κῆρ·
Iliad 24.774	οὐ γάρ τίς μοι ἔτʼ ἄλλος ἐνὶ Τροίῃ εὐρείῃ
Iliad 24.775	ἤπιος οὐδὲ φίλος, πάντες δέ με πεφρίκασιν.
Iliad 24.776	ὣς ἔφατο κλαίουσʼ, ἐπὶ δʼ ἔστενε δῆμος ἀπείρων.
Iliad 24.777	λαοῖσιν δʼ ὃ γέρων Πρίαμος μετὰ μῦθον ἔειπεν·
Iliad 24.778	ἄξετε νῦν Τρῶες ξύλα ἄστυ δέ, μὴ δέ τι θυμῷ
Iliad 24.779	δείσητʼ Ἀργείων πυκινὸν λόχον· ἦ γὰρ Ἀχιλλεὺς
Iliad 24.780	πέμπων μʼ ὧδʼ ἐπέτελλε μελαινάων ἀπὸ νηῶν
Iliad 24.781	μὴ πρὶν πημανέειν πρὶν δωδεκάτη μόλῃ ἠώς.
Iliad 24.782	ὣς ἔφαθʼ, οἳ δʼ ὑπʼ ἀμάξῃσιν βόας ἡμιόνους τε
Iliad 24.783	ζεύγνυσαν, αἶψα δʼ ἔπειτα πρὸ ἄστεος ἠγερέθοντο.
Iliad 24.784	ἐννῆμαρ μὲν τοί γε ἀγίνεον ἄσπετον ὕλην·
Iliad 24.785	ἀλλʼ ὅτε δὴ δεκάτη ἐφάνη φαεσίμβροτος ἠώς,
Iliad 24.786	καὶ τότʼ ἄρʼ ἐξέφερον θρασὺν Ἕκτορα δάκρυ χέοντες,
Iliad 24.787	ἐν δὲ πυρῇ ὑπάτῃ νεκρὸν θέσαν, ἐν δʼ ἔβαλον πῦρ.
Iliad 24.788	ἦμος δʼ ἠριγένεια φάνη ῥοδοδάκτυλος Ἠώς,
Iliad 24.789	τῆμος ἄρʼ ἀμφὶ πυρὴν κλυτοῦ Ἕκτορος ἔγρετο λαός.
Iliad 24.790	αὐτὰρ ἐπεί ῥʼ ἤγερθεν ὁμηγερέες τʼ ἐγένοντο
Iliad 24.791	πρῶτον μὲν κατὰ πυρκαϊὴν σβέσαν αἴθοπι οἴνῳ
Iliad 24.792	πᾶσαν, ὁπόσσον ἐπέσχε πυρὸς μένος· αὐτὰρ ἔπειτα
Iliad 24.793	ὀστέα λευκὰ λέγοντο κασίγνητοί θʼ ἕταροί τε
Iliad 24.794	μυρόμενοι, θαλερὸν δὲ κατείβετο δάκρυ παρειῶν.
Iliad 24.795	καὶ τά γε χρυσείην ἐς λάρνακα θῆκαν ἑλόντες
Iliad 24.796	πορφυρέοις πέπλοισι καλύψαντες μαλακοῖσιν.
Iliad 24.797	αἶψα δʼ ἄρʼ ἐς κοίλην κάπετον θέσαν, αὐτὰρ ὕπερθε
Iliad 24.798	πυκνοῖσιν λάεσσι κατεστόρεσαν μεγάλοισι·
Iliad 24.799	ῥίμφα δὲ σῆμʼ ἔχεαν, περὶ δὲ σκοποὶ ἥατο πάντῃ,
Iliad 24.800	μὴ πρὶν ἐφορμηθεῖεν ἐϋκνήμιδες Ἀχαιοί.
Iliad 24.801	χεύαντες δὲ τὸ σῆμα πάλιν κίον· αὐτὰρ ἔπειτα
Iliad 24.802	εὖ συναγειρόμενοι δαίνυντʼ ἐρικυδέα δαῖτα
Iliad 24.803	δώμασιν ἐν Πριάμοιο διοτρεφέος βασιλῆος.
Iliad 24.804	ὣς οἵ γʼ ἀμφίεπον τάφον Ἕκτορος ἱπποδάμοιο.