##### edition ed1 (gez)
=== book 1 ===
[Book of the Watchers]
=== chapter 1 ===
ቃለ ፡ በረከት ፡ ዘሄኖክ ፡ ዘከመ ፡ ባረከ ፡ ኅሩያነ ፡ ወጻድቃነ ፡ እለ ፡ ሀለዉ ፡ ይኩኑ ፡ በዕለተ ፡ ምንዳቤ ፡ ለአሰስሎ ፡ ኲሉ ፡ እኩያን ፡ ወረሲዓን ። ወአውሥአ ፡ ወይቤ ፡ ሄኖክ ፡ ብእሲ ፡ ጻድቅ ፡ ዘእምኀበ ፡ እግዚአብሔር ፡ እንዘ ፡ አዕይንቲሁ ፡ ክሡታት ፡ ወይሬኢ ፡ ራእየ ፡ ቅዱሰ ፡ ዘበሰማያት ፡ ዘአርአዩኒ ፡ መላእክት ፡ ወሰማዕኩ ፡ እምኀቤሆሙ ፡ ኲሎ ፡ ወአእመርኩ ፡ አነ ፡ ዘእሬኢ ፡ ወአኮ ፡ ለዝ ፡ ትውልድ ፡ አላ ፡ ለዘይመጽእ ፡ ትውልድ ፡ ርኁቃን ። በእንተ ፡ ኅሩያን ፡ እቤ ፡ ወአውሣእኩ ፡ በእንቲአሆሙ ፡ ምስለ ፡ ዘይወፅእ ፡ ቅዱስ ፡ ወዐቢይ ፡ እማኅደሩ ፡ ወአምላከ ፡ ዓለም ። ወእምህየ ፡ ይከይድ ፡ ዲበ ፡ ሲና ፡ ደብር ፡ ወያስተርኢ ፡ በትዕይንቱ ፡ ወያስተርኢ ፡ በጽንዐ ፡ ኀይሉ ፡ እምሰማይ ። ወይፈርህ ፡ ኲሉ ፡ ወያድለቀልቁ ፡ ትጉሃን ፡ ወይነሥኦሙ ፡ ፍርሀት ፡ ወረዓድ ፡ ዐቢይ ፡ እስከ ፡ አጽናፈ ፡ ምድር ። ወይደነግፁ ፡ አድባር ፡ ነዋኃን ፡ ወይቴሐቱ ፡ አውግር ፡ ነዋኃት ፡ ወይትመሰዉ ፡ ከመ ፡ መዓረ ፡ ግራ ፡ እምላህብ ። ወትሠጠም ፡ ምድር ፡ ወኲሉ ፡ ዘውስተ ፡ ምድር ፡ ይትሐጐል ፡ ወይከውን ፡ ፍትሕ ፡ ላዕለ ፡ ኲሉ ፡ ወላዕለ ፡ ጻድቃን ፡ ኲሎሙ ። ለጻድቃንሰ ፡ ሰላመ ፡ ይገብር ፡ ሎሙ ፡ ወየዐቅቦሙ ፡ ለኅሩያን ፡ ወይከውን ፡ ሣህል ፡ ላዕሌሆሙ ፡ ወይከውኑ ፡ ኲሎሙ ፡ ዘአምላክ ፡ ወይሤርሑ ፡ ወይትባረኩ ፡ ወይሀርህ ፡ ሎሙ ፡ ብርሃነ ፡ አምላክ ። ወናሁ ፡ መጽአ ፡ በትእልፈት ፡ ቅዱሳን ፡ ከመ ፡ ይግበር ፡ ፍትሐ ፡ ላዕሌሆሙ ፡ ወያሐጒሎሙ ፡ ለረሲዓን ፡ ወይትዋቀስ ፡ ኲሎ ፡ ዘሥጋ ፡ በእንተ ፡ ኲሉ ፡ ዘገብሩ ፡ ወረሰዩ ፡ ላዕሌሁ ፡ ኃጥአን ፡ ወረሲዓን ።
=== chapter 2 ===
ጠየቁ ፡ ኲሎ ፡ ዘውስተ ፡ ሰማይ ፡ ግብረ ፡ እፎ ፡ ኢይመይጡ ፡ ፍናዊሆሙ ፡ ብርሃናት ፡ ዘውስተ ፡ ሰማይ ፡ ከመ ፡ ኲሉ ፡ ይሠርቅ ፡ ወየዐርብ ፡ ሥሩዕ ፡ ኲሉ ፡ በበዘመኑ ፡ ወኢይትዐደዉ ፡ እምትእዛዞሙ ። ርእይዋ ፡ ለምድር ፡ ወለብዉ ፡ በእንተ ፡ ምግባር ፡ ዘይትገበር ፡ ላዕሌሃ ፡ እምቀዳሚ ፡ እስከ ፡ ተፍጻሜቱ ፡ ከመ ፡ እይትመየጥ ፡ ኲሉ ፡ ግብሩ ፡ ለአምላክ ፡ እንዘ ፡ ያስተርኢ ። ርእይዎ ፡ ለሐጋይ ፡ ወለክረምት ፡ ከመ ፡ ኲላ ፡ ምድር ፡ መልአት ፡ ማየ ፡ ወደመና ፡ ወጠል ፡ ወዝናም ፡ የዐርፍ ፡ ላዕሌሃ ።
=== chapter 3 ===
ጠየቁ ፡ ወርኢኩ ፡ ከመ ፡ ኲሉ ፡ ዐፀው ፡ እፎ ፡ ያስተርእዩ ፡ ከመ ፡ ይቡስ ፡ ወኲሉ ፡ አቊጽሊሆሙ ፡ ንጉፋት ፡ ዘእንበለ ፡ ፲ወ፬ዐፀው ፡ ዘኢይትነገፍኡ ፡ እለ ፡ ይጸንሑ ፡ እምብሉይ ፡ እስከ ፡ ይመጽእ ፡ ሐዲስ ፡ እም፪ወእም፫ክረምት ።
=== chapter 4 ===
ወዳግመ ፡ ጠየቁ ፡ መዋዕለ ፡ ሐጋይ ፡ ከመ ፡ ኮነ ፡ ፀሐይ ፡ ላእሌሃ ፡ በቅድሜሃ ፡ ወአንትሙሰ ፡ ተኀሥሡ ፡ ምጽላለ ፡ ወጽላሎተ ፡ በእንተ ፡ ዋዕየ ፡ ፀሐይ ፡ ወምድርኒ ፡ ትውዒ ፡ እሙቀተ ፡ ሐሩር ፡ ወአንትሙሰ ፡ ኢትክሉ ፡ ከይዶታ ፡ ለምድር ፡ ወኢኰኲሐ ፡ በእንተ ፡ ዋእያ ።
=== chapter 5 ===
ጠየቁ ፡ እፎ ፡ ዕፀው ፡ በሐመልማለ ፡ አቊጽል ፡ ይትክደኑ ፡ ወይፈርዩ ፡ ወለብዉ ፡ በእንተ ፡ ኲሉ ፡ ወአእምሩ ፡ በከመ ፡ ገብረ ፡ ለክሙ ፡ እሎንተ ፡ ኲሎሙ ፡ ዘሕያው ፡ ለዓለም ። ወምግባሩ ፡ ቅድሜሁ ፡ ለለዓመት ፡ ዘይከውን ፡ ወኲሉ ፡ ምግባሩ ፡ ይትቀነዩ ፡ ሎቱ ፡ ወኢይትመየጡ ፡ አላ ፡ በከመ ፡ ሠርዐ ፡ አምላክ ፡ ከመዝ ፡ ይትገበር ፡ ኲሉ ። ወርእዩ ፡ እፎ ፡ አብህርት ፡ ወአፍላግ ፡ ኅቡረ ፡ ይፌጽሙ ፡ ግብሮሙ ። ወአንትሙሰ ፡ ኢተዐገሥክሙ ፡ ወኢገበርክሙ ፡ ትእዛዘ ፡ እግዚእ ፡ እላ ፡ ተዐደውክሙ ፡ ወሐመይክሙ ፡ ዓቢያተ ፡ ወድሩካተ ፡ ቃላተ ፡ በአፍ ፡ ርኩስት ፡ ዘዚአክሙ ፡ ላዕለ ፡ ዕበየ ፡ ዚአሁ ፤ ይቡሳነ ፡ ልብ ፡ ኢትከውነክሙ ፡ ሰላም ። ወበእንተዝ ፡ አንትሙ ፡ መዋዕሊክሙ ፡ ትረግሙ ፡ ወዓመታተ ፡ ሕይወትክሙ ፡ ተሐጒሉ ፡ ወይበዝኅ ፡ መርገም ፡ ዘለዓለም ፡ ወኢይከውነክሙ ፡ ሣህል ። በውእቱ ፡ መዋዕል ፡ ትሁቡ ፡ ሰላመ ፡ ዚአክሙ ፡ በርግመት ፡ ዘለዓለም ፡ ለኲሉ ፡ ጻድቃን ፡ ወኪያክሙ ፡ ይረግሙ ፡ ኃጥኣን ፡ ዘልፈ ፡ ወለክሙ ፡ ኅቡረ ፡ ምስለ ፡ ኃጥኣን ። ወለኅሩያንሰ ፡ ይከውን ፡ ብርሃን ፡ ወፍሥሓ ፡ ወሰላም ፡ ወእሙንቱ ፡ ይወርስዋ ፡ ለምድር ፡ ወለክሙሰ ፡ ረሲዓን ፡ ይከውነክሙ ፡ ርግመት ። ወአመሂ ፡ ይትወሀቦሙ ፡ ለኅሩያን ፡ ጥበብ ፡ ወኲሎሙ ፡ እሎንቱ ፡ የሐይዉ ፡ ወኢይደግሙ ፡ አበሳ ፡ ኢበረሲዕ ፡ ወኢበትዕቢት ፡ አላ ፡ ይገንዩ ፡ ዘቦሙ ፡ ጥበብ ፡ ኢይደግሙ ፡ አብሶ ። ወኢይትኴነኑ ፡ ኲሎ ፡ መዋእለ ፡ ሕይወቶሙ ፡ ወኢይመውቱ ፡ በመቅሠፍት ፡ ወኢበመዓት ፡ አላ ፡ ኊልቈ ፡ መዋዕለ ፡ ሕይወቶሙ ፡ ይፌጽሙ ፡ ወይልህቅ ፡ ሕይወቶሙ ፡ በሰላም ፡ ወዓመታተ ፡ ፍሥሓሆሙ ፡ ይበዝኅ ፡ በሐሤት ፡ ወበሰላም ፡ ዘለዓለም ፡ ውስተ ፡ ኲሉ ፡ መዋእለ ፡ ሕይወቶሙ ።
=== chapter 6 ===
ወኮነ ፡ እምዘ ፡ በዝኁ ፡ ውሉደ ፡ ሰብእ ፡ በእማንቱ ፡ መዋእል ፡ ተወልደ ፡ ሎሙ ፡ አዋልድ ፡ ሠናያት ፡ ወላህያት ። ወርእዩ ፡ ኪያሆን ፡ መላእክት ፡ ውሉደ ፡ ሰማያት ፡ ወፈተውዎን ፡ ወይቤሉ ፡ በበይናቲሆሙ ፡ ንዑ ፡ ንኅረይ ፡ ለነ ፡ አንስተ ፡ እምውሉደ ፡ ሰብእ ፡ ወንለድ ፡ ለነ ፡ ውሉደ ። ወይቤሎሙ ፡ ስምያዛ ፡ ዘውእቱ ፡ መልአኮሙ ፡ እፈርህ ፡ ዮጊ ፡ ኢትፈቅዱ ፡ ይትገበር ፡ ዝንቱ ፡ ግብር ፡ ወእከውን ፡ አነ ፡ ባሕቲትየ ፡ ፈዳዪሃ ፡ ለዛቲ ፡ ኅጢአት ፡ ዐባይ ። ወአውሥኡ ፡ ሎቱ ፡ ኲሎሙ ፡ ወይቤሉ ፡ መሐላ ፡ ንምሐል ፡ ኲልነ ፡ ወንትዋገዝ ፡ በበይናቲነ ፡ ከመ ፡ ኢንሚጣ ፡ ለዛቲ ፡ ምክር ፡ ወንግበራ ፡ ለዛቲ ፡ ምክር ፡ ግብረ ። አሜሃ ፡ መሐሉ ፡ ኲሎሙ ፡ ኅቡረ ፡ ወአውገዙ ፡ ኲሎሙ ፡ በበይናቲሆሙ ፡ ቦቱ ፡ ወኮኑ ፡ ኲሎሙ ፡ ፪፻ ። ወወረዱ ፡ ውስተ ፡ አርዲስ ፡ ዝውእቱ ፡ ድማሑ ፡ ለደብረ ፡ አርሞን ፡ ወጸውዕዎ ፡ ለደብረ ፡ አርሞን ፡ እስመ ፡ መሐሉ ፡ ቦቱ ፡ ወአውገዙ ፡ በበይናቲሆሙ ። ወዝንቱ ፡ አስማቲሆሙ ፡ ለመላእክቲሆሙ ፡ ስምያዛ ፡ ዘውእቱ ፡ መልአኮሙ ፡ ኡራኪበራሜኤል ፡ አኪበኤል ፡ ጣሚኤል ፡ ራሙኤል ፡ ዳንኤል ፡ ኤዜቄኤል ፡ ሰራቁያል ፡ አሳኤል ፡ አርምርስ ፡ በጥረአል ፡ አናንኢ ፡ ዘቄቤ ፡ ሰምሳዌኤል ፡ ሰርተኤል ፡ ጡርኤል ፡ ዮምያኤል ፡ አራዝያል ። እሉ ፡ እሙንቱ ፡ ሀበይቶሙ ፡ ለ፪፻መላእክት ፡ ወባዕዳን ፡ ኲሉ ፡ ምስሌሆሙ ።
=== chapter 7 ===
ወነሥኡ ፡ ሎሙ ፡ አንስትያ ፡ ወኀረየ ፡ ኲሉ ፡ ለለርእሱ ፡ አሐተ ፡ አሐተ ፡ ወወጠኑ ፡ ይባኡ ፡ ኀቤሆን ፡ ወተደመሩ ፡ ምስሌሆን ፡ ወመሐርዎን ፡ ሥራያተ ፡ ወስብዓታተ ፡ ወመቲረ ፡ ሥርው ፡ ወዕፀው ፡ አመርዎን ። ወእማንቱሰ ፡ ፀንሳ ፡ ወወለዳ ፡ ረዓይተ ፡ ዐበይተ ፡ ወቆሞሙ ፡ በበ ፡ ፴፻ ፡ በእመት ። እሉ ፡ በልዑ ፡ ኲሎ ፡ ፃማ ፡ ሰብእ ፡ እስከ ፡ ስእንዎሙ ፡ ሴስዮተ ፡ ሰብእ ። ወተመይጡ ፡ ረዓይት ፡ ላዕሌሆሙ ፡ ይብልዕዎሙ ፡ ለሰብእ ። ወወጠኑ ፡ የአብሱ ፡ በአዕዋፍ ፡ ወዲበ ፡ አራዊት ፡ ወበዘይትሐወስ ፡ ወበዓሣት ፡ ወሥጋሆሙ ፡ በበይናቲሆሙ ፡ ይትባልዑ ፡ ወደመ ፡ ይስትዩ ፡ እምኔሃ ። አሜሃ ፡ ምድር ፡ ሰከየቶሙ ፡ ለዐማፅያን ።
=== chapter 8 ===
ወአዛዝኤል ፡ መሐሮሙ ፡ ለሰብእ ፡ ገቢረ ፡ አስይፍት ፡ ወመጥባሕት ፡ ወወልታ ፡ ወድርዓ ፡ እንግድዓ ፡ ወአርአዮሙ ፡ ዘእምድኅሬሆሙ ፡ ወምግባረሆሙ ፡ አውቃፋተ ፡ ወሠርጐ ፡ ወተኲሕሎተ ፡ ወአሠንዮ ፡ ቀራንብት ፡ ወእብነ ፡ እምኲሉ ፡ እብን ፡ ክቡረ ፡ ወኅሩየ ፡ ወኲሎ ፡ ጥምዓታተ ፡ ኅብር ፡ ወተውላጠ ፡ ዓለም ። ወኮነ ፡ ርስዐት ፡ ዓቢይ ፡ ወብዙኅ ፡ ዘምዎ ፤ ወስሕቱ ፡ ወማሰና ፡ ኲሉ ፡ ፍናዊሆሙ ። አሜዛራክ ፡ መሀረ ፡ ኲሎ ፡ መሳብዕያነ ፡ ወመታርያነ ፡ ሥርዋት ፤ አርማሮስ ፡ ፈትሐ ፡ ስብዓታተ ፤ ወበረቅዓል ፡ ረዓይያነ ፡ ከዋክብት ፤ ወኮከብኤል ፡ ትእምርታተ ፤ ወጥምኤል ፡ መሀረ ፡ ራእየ ፡ ኮከብ ፤ ወአስራድኤል ፡ መሀረ ፡ ሩፀተ ፡ ወርኅ ። ወበኅጒለተ ፡ ሰብእ ፡ ጸርሑ ፡ ወበጽሐ ፡ ቃሎሙ ፡ ሰማየ ።
=== chapter 9 ===
ወአሜሃ ፡ ሐወጹ ፡ ሚካኤል ፡ ወገብርኤል ፡ ወሱርያን ፡ ወኡርያን ፡ እምሰማይ ፡ ወርእዩ ፡ ብዙኃ ፡ ደመ ፡ ዘይትከዐው ፡ በዲበ ፡ ምድር ፡ ወኲሎ ፡ ዓመፃ ፡ ዘይትገበር ፡ በዲበ ፡ ምድር ። ወይቤሉ ፡ በበይናቲሆሙ ፡ ቃለ ፡ ጽራኃቲሆሙ ፡ ዕራቃ ፡ ጸርኀት ፡ ምድር ፡ እስከ ፡ አንቀጸ ፡ ሰማይ ። ወይእዜኒ ፡ ለክሙ ፡ ኦቅዱሳነ ፡ ሰማይ ፡ ይሰክዩ ፡ ነፍሳተ ፡ ሰብእ ፡ እንዘ ፡ ይብሉ ፡ አብኡ ፡ ለነ ፡ ፍትሐ ፡ ኀበ ፡ ልዑል ። ወይቤሉ ፡ ለእግዚኦሙ ፡ ለንጉሥ ፡ እስመ ፡ እግዚኦሙ ፡ ለአጋእዝት ፡ ወአምላኮሙ ፡ ለአማልክት ፡ ወንጉሦሙ ፡ ለነገሥት ፡ ወመንበረ ፡ ስብሐቲከ ፡ ውስተ ፡ ኲሎ ፡ ትውልደ ፡ ዓለም ፡ ወስምከ ፡ ቅዱስ ፡ ወስቡሕ ፡ ውስተ ፡ ኲሉ ፡ ትውልደ ፡ ዓለም ፡ ወቡሩክ ፡ ወስቡሕ ፡ አንተ ። ገበርከ ፡ ኲሎ ፡ ወሥልጣነ ፡ ኲሉ ፡ ምስሌከ ፡ ወኲሉ ፡ ክሡት ፡ ቅድሜከ ፡ ወግሁድ ፤ ወአንተ ፡ ትሬኢ ፡ ኲሎ ፡ ወአልቦ ፡ ዘይትከሀል ፡ ይትኀባእ ፡ እምኔከ ። ርኢኬ ፡ ዘገብረ ፡ አዛዝኤል ፡ ዘከመ ፡ መሀረ ፡ ኲሎ ፡ ዓመፃ ፡ በዲበ ፡ ምድር ፡ ወአግሀደ ፡ ኅቡኣተ ፡ ዓለም ፡ እለ ፡ ይትገበራ ፡ በሰማያት ። ወአመረ ፡ ስብዐታተ ፡ ስምያዛ ፡ ዘአንተ ፡ ወሀብኮ ፡ ሥልጣነ ፡ ይኰንን ፡ እለ ፡ ምስሌሁ ፡ ኅቡረ ። ወሖሩ ፡ ኀበ ፡ አዋልደ ፡ ሰብእ ፡ ኅቡረ ፡ ወሰከቡ ፡ ምስሌሆን ፡ ምስለ ፡ እልኩ ፡ አንስት ፡ ወረኲሱ ፡ ወአግሀዱ ፡ ሎን ፡ እሎንተ ፡ ኃጣውአ ። ወአንስትሰ ፡ ወለዳ ፡ ረዓይተ ፡ ወበዝ ፡ መልአት ፡ ኲላ ፡ ምድር ፡ ደመ ፡ ወዐመፃ ። ወይእዜኒ ፡ ናሁ ፡ ይጸርሑ ፡ ነፍሳት ፡ እለ ፡ ሞቱ ፡ ወይሰክዩ ፡ እስከ ፡ አንቀጸ ፡ ሰማይ ፡ ወዐርገ ፡ ገዓሮሙ ፡ ወኢይክሉ ፡ ወፂአ ፡ እምቅድመ ፡ ገጸ ፡ ዐመፃ ፡ ዘይትገበር ፡ በዲበ ፡ ምድር ። ወአንተ ፡ ተአምር ፡ ኲሎ ፡ ዘእንበለ ፡ ይኩን ፤ ወአንተ ፡ ተአምር ፡ ዘንተ ፡ ወዘዚአሆሙ ፡ ወአልቦ ፡ ዘትነግረነ ፡ ወምንት ፡ መፍትው ፡ ንረስዮሙ ፡ በእንተ ፡ ዝንቱ ።
=== chapter 10 ===
ወአሜሃ ፡ ልዑል ፡ ዐቢይ ፡ ወቅዱስ ፡ ተናገረ ፡ ወፈነዎ ፡ ለአርስየላልዩር ፡ ኀበ ፡ ወልደ ፡ ላሜክ ፡ ወይቤሎ ። በሎ ፡ በስመ ፡ ዚአየ ፡ ኅባእ ፡ ርእሰከ ፡ ወአግህድ ፡ ሎቱ ፡ ፍጻሜ ፡ ዘይመጽእ ፡ እስመ ፡ ትትሐጐል ፡ ምድር ፡ ኲላ ፡ ወማየ ፡ አይኅ ፡ ይመጽእ ፡ ሀሎ ፡ ዲበ ፡ ኲላ ፡ ምድር ፡ ወይትኀጐል ፡ ዘሀሎ ፡ ውስቴታ ። ወይእዜኒ ፡ መሀሮ ፡ ከመ ፡ ይንፍጽ ፡ ወይንበር ፡ ዘርኡ ፡ ለኲሉ ፡ ምድር ። ወይቤሎ ፡ ካዕበ ፡ እግዚእ ፡ ለሩፋኤል ፡ እስሮ ፡ ለአዛዝኤል ፡ በእዴሁ ፡ ወእገሪሁ ፡ ወደዮ ፡ ውስተ ፡ ጽልመት ፡ ወአብቅዋ ፡ ለገዳም ፡ እንተ ፡ ሀለወት ፡ በዱዳኤል ፡ ወደዮ ፡ ህየ ። ወደይ ፡ ላዕሌሁ ፡ አዕባነ ፡ ጠዋያተ ፡ ወበሊኃተ ፡ ወክድኖ ፡ ጽልመተ ፡ ወህየ ፡ ይኅድር ፡ ለዓለም ፡ ወክድኖ ፡ ለገጹ ፡ ከመ ፡ እይርአይ ፡ ብርሃነ ። ወበዕለት ፡ ዐባይ ፡ እንተ ፡ ኲነኔ ፡ ከመ ፡ ይትፈነው ፡ ውስተ ፡ ዋዕይ ። ወአሕይዋ ፡ ለምድር ፡ እንተ ፡ አማሰኑ ፡ መላእክት ፡ ወሕይወታ ፡ ለምድር ፡ አይድዕ ፡ ከመ ፡ አሐይዋ ፡ ለምድር ፡ ወኢይትኃጐሉ ፡ ኲሎሙ ፡ ውሉደ ፡ ሰብእ ፡ በምሥጢረ ፡ ኲሉ ፡ ዘቀተሉ ፡ ትጉሃን ፡ ወመሀሩ ፡ ለውሉዶሙ ። ወማሰነት ፡ ኲላ ፡ ምድር ፡ በትምህርተ ፡ ግብሩ ፡ ለአዛዝኤል ፡ ወላዕሌሁ ፡ ጸሐፍ ፡ ኲሎ ፡ ኀጢአተ ። ወለገብርኤል ፡ ይቤሎ ፡ እግዚአብሔር ፡ ሑር ፡ ዲቤሆሙ ፡ ለመንዝራን ፡ ወለምኑናን ፡ ወዲበ ፡ ውሉደ ፡ ዘማ ፡ ወአኅጒሎሙ ፡ ለውሉደ ፡ ዘማ ፡ ወለውሉደ ፡ ትጉሃን ፡ እምሰብእ ፡ ወአውፅኦሙ ፡ ወፈንዎሙ ፡ በበይናቲሆሙ ፡ እሙንቱ ፡ ወለሊሆሙ ፡ በቀትል ፡ ይትኀጐሉ ፡ እስመ ፡ ኑኃ ፡ መዋዕል ፡ አልቦሙ ። ወኲሎሙ ፡ ይስእሉከ ፡ ወኢይከውን ፡ ለአበዊሆሙ ፡ በእንቲአሆሙ ፡ እስመ ፡ ይሴፈዉ ፡ ሕይወተ ፡ ዘለዓለም ፡ ወከመ ፡ ይሕየዉ ፡ እምኔሆሙ ፡ ፭፻ክራማተ ። ወለሚካኤል ፡ ይቤሎ ፡ እግዚአብሔር ፡ አይድዕ ፡ ለስምያዛ ፡ ወለካልኣን ፡ እለ ፡ ምስሌሁ ፡ እለ ፡ ኀብሩ ፡ ምስለ ፡ አንስት ፡ ከመ ፡ ይማስኑ ፡ ምስሌሆን ፡ በኲሉ ፡ ርኲሰ ፡ ዚአሆን ። ሶበ ፡ ይትራገዙ ፡ ኲሉ ፡ ውሉዶሙ ፡ ወሶበ ፡ ይሬእዩ ፡ ሐጒሎሙ ፡ ለፍቁራኒሆሙ ፡ እስሮሙ ፡ ለ፸ትውልድ ፡ በመትሕተ ፡ አውግረ ፡ ምድር ፡ እስከ ፡ ዕለተ ፡ ኲነኔሆሙ ፡ ወተፍጻሜቶሙ ፡ እስከ ፡ ይትፌጸም ፡ ኲነኔ ፡ ዘለዓለመ ፡ ዓለም ። ወበውእቱ ፡ መዋዕል ፡ ይወስድዎሙ ፡ ውስተ ፡ መትሕተ ፡ እሳት ፡ በፃዕር ፡ ወበቤተ ፡ ሞቅሕ ፡ ይትዓፀዉ ፡ ለዓለመ ፡ ዓለም ። ወሶቤሃ ፡ ይውዒ ፡ ወይማስን ፡ እምይእዜ ፡ ምስሌሆሙ ፡ ኅቡረ ፡ ይትአሰሩ ፡ እስከ ፡ ተፍጻሜተ ፡ ትውልደ ፡ ትውልድ ። ወአኅጒሎሙ ፡ ለኲሎሙ ፡ ነፍሳተ ፡ ተውኔት ፡ ወለውሉዶሙ ፡ ለትጉሃን ፡ እስመ ፡ ገፍዕዎሙ ፡ ለሰብእ ። አኅጒል ፡ ኲሎ ፡ ግፍዐ ፡ እምገጸ ፡ ምድር ፡ ወኲሉ ፡ ምግባር ፡ እኩይ ፡ ይኅልቅ ፡ ወያስተርኢ ፡ ተክለ ፡ ጽድቅ ፡ ወርትዕ ፡ ወይከውን ፡ ለበረከት ፡ ግብር ፤ ጽድቅ ፡ ወርትዕ ፡ ለዓለም ፡ በፍሥሓ ፡ ይተክሉ ። ወይእዜኒ ፡ ኲሎሙ ፡ ጻድቃን ፡ ይገንዩ ፡ ወይከውኑ ፡ ሕያዋነ ፡ እስከ ፡ ይወልዱ ፡ ፲፻ ፡ ወኲሎ ፡ መዋዕለ ፡ ውርዙቶሙ ፡ ወሰንበተ ፡ ዚአሆሙ ፡ ይፌጽሙ ፡ በሰላም ። ወበእማንቱ ፡ መዋዕል ፡ ትትገበር ፡ ኲላ ፡ ምድር ፡ በጽድቅ ፡ ወኲለንታሃ ፡ ትተከል ፡ ዕፀወ ፡ ወትመልዕ ፡ በረከተ ። ወኲሎ ፡ ዕፀወ ፡ ኃሤት ፡ ይተክሉ ፡ ዲቤሃ ፡ ወይተክሉ ፡ ዲቤሃ ፡ እውያነ ፡ ወወይን ፡ ዘይተከል ፡ ዲቤሃ ፡ ይገብር ፡ ፍሬ ፡ ለጽጋብ ፤ ወኲሉ ፡ ዘርእ ፡ ዘይዘራእ ፡ ዲቤሃ ፡ አሐቲ ፡ መስፈርት ፡ ትገብር ፡ እልፈ ፡ ወአሐቲ ፡ መስፈርተ ፡ ኤልያስ ፡ ትገብር ፡ ፲ምክያዳተ ፡ ዘይት ። ወአንተ ፡ አንጽሓ ፡ ለምድር ፡ እምኲሉ ፡ ግፍዕ ፤ ወእምኲሉ ፡ ዐመፃ ፤ ወእምኲሉ ፡ ኀጢአት ፤ ወእምኲሉ ፡ ረሲዕ ፤ ወእምኲሉ ፡ ርኲስ ፡ ዘይትገበር ፡ በዲበ ፡ ምድር ፤ አኅልቆሙ ፡ እምዲበ ፡ ምድር ። ወይኩኑ ፡ ኲሉ ፡ ውሉደ ፡ ሰብእ ፡ ጻድቃነ ፡ ወይኩኑ ፡ ኲሉ ፡ አሕዛብ ፡ ያምልኩ ፡ ወይባርኩ ፡ ኪያየ ፡ ወኲሎሙ ፡ ሊተ ፡ ይሰግዱ ። ወትነጽሕ ፡ ምድር ፡ እምኲሉ ፡ ሙስና ፡ ወእምኲሉ ፡ ኃጢአት ፤ ወእምኲሉ ፡ መቅሠፍት ፤ ወእምኲሉ ፡ ፃዕር ፤ ወኢይደግም ፡ ከመ ፡ እፈኑ ፡ ዲቤሃ ፡ አይኃ ፡ ለትውልደ ፡ ትውልድ ፡ ወእስከ ፡ ለዓለም ።
=== chapter 11 ===
ወበእማንቱ ፡ መዋዕል ፡ እፈትሕ ፡ መዛግብተ ፡ በረከት ፡ እለ ፡ በሰማይ ፡ ከመ ፡ አውርዶሙ ፡ ዲበ ፡ ምድር ፡ ዲበ ፡ ግብሮሙ ፡ ወዲበ ፡ ፃማሆሙ ፡ ለውሉደ ፡ ሰብእ ። ሰላም ፡ ወርትዐ ፡ ሱቱፋነ ፡ ይከውኑ ፡ በኲሉ ፡ መዋዕለ ፡ ዓለም ፡ ወበኲሉ ፡ ትውልደ ፡ ዓለም ።
=== chapter 12 ===
ወእምቅድመ ፡ ኲሉ ፡ ነገር ፡ ተከብተ ፡ ሄኖክ ፡ ወአልቦ ፡ ዘየአምሮ ፡ እምውሉደ ፡ ሰብእ ፡ በኀበ ፡ ተከብተ ፡ ወኅበ ፡ ሀሎ ፡ ወምንተ ፡ ኮነ ። ወኲሉ ፡ ግብሩ ፡ ምስለ ፡ ቅዱሳን ፡ ወምስለ ፡ ትጉሃን ፡ በመዋዕለ ፡ ዚአሁ ። ወአነ ፡ ሄኖክ ፡ ኮንኩ ፡ እባርኮ ፡ ለእግዚእ ፡ ዐቢይ ፡ ወለንጉሠ ፡ ዓለም ፡ ወናሁ ፡ ትጉሃን ፡ ይጼውዑኒ ፡ ሊተ ፡ ለሄኖክ ፡ ጸሓፊ ፡ ወይቤሉኒ ። ሄኖክ ፡ ጸሓፌ ፡ ጽድቅ ፡ ሑር ፡ አይድዕ ፡ ለትጉሃነ ፡ ሰማይ ፡ እለ ፡ ኀደጉ ፡ ሰማየ ፡ ልዑለ ፡ ወምቅዋመ ፡ ቅዱሰ ፡ ዘለዓለም ፡ ወምስለ ፡ አንስት ፡ ማሰኑ ፡ ወገብሩ ፡ ዘከመ ፡ ይገብሩ ፡ ውሉደ ፡ ሰብእ ፡ ወነሥኡ ፡ ሎሙ ፡ አንስተ ፡ ወማሰኑ ፡ ዐቢየ ፡ ሙስና ፡ በዲበ ፡ ምድር ። ወኢይከውን ፡ ሎሙ ፡ በዲበ ፡ ምድር ፡ ሰላም ፡ ወኅድገተ ፡ ኀጢአት ፡ እስመ ፡ ኢይትፌሥሑ ፡ በውሉዶሙ ። ቀትለ ፡ ፍቁራኒሆሙ ፡ ይሬእዩ ፡ ወዲበ ፡ ሐጒለ ፡ ውሉዶሙ ፡ ይግዕሩ ፡ ወይስእሉ ፡ ለዓለም ፡ ወኢይከውን ፡ ሎሙ ፡ ምሕረት ፡ ወኢሰላም ።
=== chapter 13 ===
ወሄኖክ ፡ ኀሊፎ ፡ ይቤሎ ፡ ለአዛዝኤል ፡ ኢይከውነከ ፡ ሰላም ፡ ዐቢይ ፡ ኲነኔ ፡ ወፅአ ፡ ላዕሌከ ፡ ይእሥርከ ። ወሣኅት ፡ ወስእለት ፡ ወምሕረት ፡ ኢይከውነከ ፡ በእንተ ፡ ዘመሀርከ ፡ ግፍዐ ፡ ወበእንተ ፡ ኲሉ ፡ ምግባረ ፡ ጽርፈት ፤ ወግፍዕ ፤ ወኀጢአት ፤ ዘአርአይከ ፡ ለውሉደ ፡ ሰብእ ። አሜሃ ፡ ሐዊርየ ፡ ነገርክዎሙ ፡ ለኲሎሙ ፡ ኅቡረ ፤ ወእሙንቱ ፡ ፈርሁ ፡ ኲሎሙ ፡ ፍርሃት ፡ ወረዓድ ፡ ነሥኦሙ ። ወተስእሉኒ ፡ ተዝካረ ፡ ስእለት ፡ ከመ ፡ እጽሐፍ ፡ ሎሙ ፡ ከመ ፡ ይኩኖሙ ፡ ኅድገተ ፡ ወከመ ፡ አነ ፡ አዕርግ ፡ ተዝካረ ፡ ስእለቶሙ ፡ ኀበ ፡ እግዚአብሔር ፡ ሰማየ ። እስመ ፡ ኢይክሉ ፡ እሙንቱ ፡ እምይእዜ ፡ ተናግሮ ፡ ወኢያነሥኡ ፡ አዕይንቲሆሙ ፡ ውስተ ፡ ሰማይ ፡ እምኃፍረተ ፡ አበሳሆሙ ፡ ዘተኰነኑ ። ወአሜሃ ፡ ጸሐፍኩ ፡ ተዝካረ ፡ ስእለቶሙ ፡ ወአስተብቊዖቶሙ ፡ በእንተ ፡ መንፈሶሙ ፡ ወለለ ፡ ፩ምግባሮሙ ፡ ወበእንተ ፡ ዘይስእሉ ፡ ከመ ፡ ይኩኖሙ ፡ ስርየተ ፡ ወኑኀተ ። ወሐዊርየ ፡ ነበርኩ ፡ ዲበ ፡ ማያተ ፡ ዳን ፡ በዳን ፡ እንተ ፡ ይእቲ ፡ እምየማነ ፡ ዓረበ ፡ አርሞን ፡ ወእነብብ ፡ ተዝካረ ፡ ስእለቶሙ ፡ እስከ ፡ ደቀስኩ ። ወናሁ ፡ ሕልም ፡ መጽአኒ ፡ ወራእያት ፡ ዲቤየ ፡ ወድቁ ፡ ወርኢኩ ፡ ራእየ ፡ መቅሠፍት ፡ እንግር ፡ ለውሉደ ፡ ሰማይ ፡ ወእዛለፎሙ ። ወነቂሕየ ፡ መጻእኩ ፡ ኀቤሆሙ ፡ ወኲሎሙ ፡ ጉቡዓነ ፡ ይነብሩ ፡ እንዘ ፡ ይላሕዉ ፡ በኡብልስያኤል ፡ ዘሀለወት ፡ ማእከለ ፡ ሊባኖስ ፡ ወሴኔሴር ፡ እንዘ ፡ ግልቡባን ፡ ገጾሙ ። ወተናገርኩ ፡ በቅድሜሆሙ ፡ ኲሎ ፡ ራእያተ ፡ ዘርኢኩ ፡ በንዋምየ ፡ ወወጠንኩ ፡ እትናገር ፡ ውእተ ፡ ቃላተ ፡ ጽድቅ ፡ ወእዝልፍ ፡ ለትጉሃነ ፡ ሰማይ ።
=== chapter 14 ===
ዝመጽሐፍ ፡ ቃለ ፡ ጽድቅ ፡ ወዘለፋ ፡ ትጉሃን ፡ እለ ፡ እምዓለም ፡ በከመ ፡ አዘዘ ፡ ቅዱስ ፡ ወዐቢይ ፡ በይእቲ ፡ ራእይ ፡ አነ ፡ ርኢኩ ፡ በንዋምየ ፡ ዘአነ ፡ ይእዜ ፡ እነግር ፡ በልሳን ፡ ዘሥጋ ፡ ወበመንፈስየ ፡ ዘወሀበ ፡ ዐቢይ ፡ አፈ ፡ ለሰብእ ፡ ይትናገሩ ፡ ቦቱ ፡ ወይለብዉ ፡ በልብ ። ከመ ፡ ፈጠረ ፡ ወወሀበ ፡ ለሰብእ ፡ ይለብዉ ፡ ቃለ ፡ አእምሮ ፡ ወሊተኒ ፡ ፈጠረ ፡ ወወሀበኒ ፡ እዛለፎሙ ፡ ለትጉሃን ፡ ውሉደ ፡ ሰማይ ። አነ ፡ ስእለተክሙ ፡ ጸሐፍኩ ፡ ወበራእይየ ፡ ከመዝ ፡ ያስተርኢ ፡ እስመ ፡ ስእለትክሙ ፡ ኢትከውነክሙ ፡ ውስተ ፡ ኲሉ ፡ መዋዕለ ፡ ዓለም ፡ ወኲነኔ ፡ ፍጽምት ፡ ላዕሌክሙ ፡ ወኢይከውነክሙ ። ወእምይእዜ ፡ ኢተዓርጉ ፡ ውስተ ፡ ሰማይ ፡ እስከ ፡ ኲሉ ፡ ዓለም ፡ ወውስተ ፡ ምድር ፡ ተነግረ ፡ ይእሥርክሙ ፡ በኲሉ ፡ መዋዕለ ፡ ዓለም ። ወእምቅድመ ፡ ዝንቱ ፡ ርኢክሙ ፡ ኅጒለ ፡ ውሉድክሙ ፡ ፍቁራን ፤ ወአልብክሙ ፡ ጥራያኒሆሙ ፡ አላ ፡ ይወድቁ ፡ ቅድሜክሙ ፡ በሰይፍ ። ወስእለትክሙ ፡ በእንቲአሆሙ ፡ ኢይከውን ፡ ወበእንቲአክሙኒ ፡ ወአንትሙሂ ፡ እንዘ ፡ ትበክዩ ፡ ወታስተበቊዑ ፡ ወኢትትናገሩ ፡ ወኢምንተኒ ፡ ቃለ ፡ እምውስተ ፡ መጽሐፍ ፡ ዘጸሐፍኩ ። ወሊተ ፡ ከመዝ ፡ ራእይ ፡ አስተርአየኒ ፤ ናሁ ፡ ደመናት ፡ በራእይ ፡ ይጼውዑኒ ፤ ወጊሜ ፡ ይጼውዐኒ ፤ ወሩፀተ ፡ ከዋክብት ፡ ወመባርቅት ፡ ያጐጒዑኒ ፡ ወያጽዕቁኒ ፡ ወነፋሳት ፡ በራእይ ፡ ያሰርሩኒ ፡ ወያጔጒዑኒ ። ወነሥኡኒ ፡ ላዕለ ፡ ውስተ ፡ ሰማይ ፡ ወቦእኩ ፡ እስከ ፡ እቀርብ ፡ ኀበ ፡ ጥቅም ፡ ዘኅንጽት ፡ በእብነ ፡ በረድ ፡ ወልሳነ ፡ እሳት ፡ የዓውዳ ፡ ወወጠነ ፡ ያፍርሀኒ ። ወቦእኩ ፡ ውስተ ፡ ልሳነ ፡ እሳት ፡ ወቀረብኩ ፡ ኀበ ፡ ቤት ፡ ዓቢይ ፡ ዘሕኑጽ ፡ በአዕባነ ፡ በረድ ፤ ወአረፍተ ፡ ውእቱ ፡ ቤት ፡ ከመ ፡ ጸፍጸፈ ፡ ሰሌዳ ፡ በአዕባን ፡ ዘእምበረድ ፡ ወምድሩ ፡ በረድ ። ጠፈሩ ፡ ከመ ፡ ሩፀተ ፡ ከዋክብት ፡ ወመባርቅት ፤ ወማእከሎሙ ፡ ኪሩቤል ፡ ዘእሳት ፡ ወሰማዮሙ ፡ ማይ ። ወእሳት ፡ ዘይነድድ ፡ በዓውደ ፡ አረፍቱ ፡ ወኆኅቱ ፡ ይውዒ ፡ በእሳት ። ወቦእኩ ፡ ውስተ ፡ ውእቱ ፡ ቤት ፡ ወምውቅ ፡ ከመ ፡ እሳት ፡ ወቈሪር ፡ ከመ ፡ በረድ ፡ ወኢምንተኒ ፡ ፍግዓ ፡ ወሕይወት ፡ አልቦ ፡ ውስቴቱ ፤ ፍርሃት ፡ ከደነኒ ፡ ወረዓድ ፡ አኀዘኒ ። ወእንዘ ፡ እትሀወክ ፡ ወእርዕድ ፡ ወደቁ ፡ በገጽየ ፡ ወእሬኢ ፡ በራእይ ። ወናሁ ፡ ካልእ ፡ ቤት ፡ ዘየዐቢ ፡ እምዝኩ ፡ ወኲሉ ፡ ኆኅቱ ፡ ርኁት ፡ በቅድሜየ ፡ ወኅኑጽ ፡ በልሳነ ፡ እሳት ። ወበኲሉ ፡ ይራደፍድ ፡ በስብሐት ፡ ወበክብር ፡ ወዕበይ ፡ እስከ ፡ ኢይክል ፡ ዜንዎተክሙ ፡ በእንተ ፡ ስብሐቲሁ ፡ ወበእንተ ፡ ዐበዩ ። ወምድሩሰ ፡ እሳት ፡ ወመልዕልቴሁ ፡ መብረቅ ፡ ወምርዋፀ ፡ ከዋክብት ፡ ወጠፈሩኒ ፡ እሳት ፡ ዘይነድድ ። ወነጸርኩ ፡ ወርኢኩ ፡ ውስቴቱ ፡ መንበረ ፡ ልዑለ ፤ ወራእዩ ፡ ከመ ፡ አስሐትያ ፡ ወክበቡ ፡ ከመ ፡ ፀሐይ ፡ ዘያበርህ ፡ ወቃለ ፡ ኪሩቤል ። ወእመትሕተ ፡ መንበሩ ፡ ዐቢይ ፡ ይወፅእ ፡ አፍላገ ፡ እሳት ፡ ዘይነድድ ፤ ወኢይክሉ ፡ ርእዮቶ ። ወዐቢየ ፡ ስብሐት ፡ ይነብር ፡ ላዕሌሁ ፡ ወዐጽፉሰ ፡ ዘይበርህ ፡ እምፀሐይ ፡ ወይፀዐዱ ፡ እምኲሉ ፡ በረድ ። ወኢይክል ፡ ወኢመኑሂ ፡ እመላእክት ፡ በዊአ ፤ ወራእየ ፡ ገጹ ፡ ለክቡር ፡ ወስቡሕ ፡ ኢይክል ፡ ወኢመኑሂ ፡ ዘሥጋ ፡ ይርአይ ፡ ኪያሁ ። እሳተ ፡ እሳት ፡ ዘይነድድ ፡ በዓውዱ ፡ ወእሳት ፡ ዐቢይ ፡ ይቀውም ፡ ቅድሜሁ ፡ ወአልቦ ፡ ዘይቀርብ ፡ ኀቤሁ ፡ እምእለ ፡ ዓውዱ ፡ ትእልፊተ ፡ ትእልፊት ፡ ቅድሜሁ ፡ ወውእቱሰ ፡ ኢይፈቅድ ፡ ምክረ ፡ ቅድስተ ። ወቅዱሳን ፡ እለ ፡ ይቀርቡ ፡ ኀቤሁ ፡ ኢይርኅቁ ፡ ሌሊተ ፡ ወመዓልተ ፡ ወኢይትአተቱ ፡ እምኔሁ ። ወአነ ፡ ሀለውኩ ፡ እስከ ፡ ዝንቱ ፡ ዲበ ፡ ገጽየ ፡ ግልባቤ ፡ እንዘ ፡ እርዕዱ ፡ ወእግዚእ ፡ በአፉሁ ፡ ጸውዐኒ ፡ ወይቤለኒ ፡ ቅረብ ፡ ዝየ ፡ ሄኖክ ፡ ወለቃልየ ፡ ቅዱስ ። ወአንሥአኒ ፡ ወአቅረበኒ ፡ እስከ ፡ ኆኅት ፤ ወአንሰ ፡ ገጽየ ፡ ታሕተ ፡ እኔጽር ።
=== chapter 15 ===
ወአውሥአኒ ፡ ወይቤለኒ ፡ በቃሉ ፡ ስማዕ ፡ ኢትፍራህ ፡ ሄኖክ ፡ ብእሲ ፡ ጻድቅ ፡ ወጸሓፌ ፡ ጽድቅ ፡ ቅረብ ፡ ዝየ ፡ ወስማዕ ፡ ቃልየ ። ወሑር ፡ በሎሙ ፡ ለትጉሃነ ፡ ሰማይ ፡ እለ ፡ ፈነዉከ ፡ ትስአል ፡ በእንቲአሆሙ ፡ አንትሙ ፡ መፍትው ፡ ትስአሉ ፡ በእንተ ፡ ሰብእ ፡ ወአኮ ፡ ሰብእ ፡ በእንቲአክሙ ። በእንተ ፡ ምንት ፡ ኅደግሙ ፡ ሰማየ ፡ ልዑለ ፡ ወቅዱሰ ፡ ዘለዓለም ፡ ወምስለ ፡ አንስት ፡ ሰከብክሙ ፡ ወምስለ ፡ አዋልደ ፡ ሰብእ ፡ ረኰስክሙ ፡ ወነሣእክሙ ፡ ለክሙ ፡ አንስተ ፡ ወከመ ፡ ውሉደ ፡ ምድር ፡ ገበርክሙ ፡ ወወለድክሙ ፡ ውሉደ ፡ ረዓይተ ። ወአንትሙሰ ፡ መንፈሳውያን ፡ ቅዱሳን ፡ ሕያዋነ ፡ ሕይወት ፡ ዘለዓለም ፡ በዲበ ፡ አንስት ፡ ረኰስክሙ ፡ ወበደመ ፡ ሥጋ ፡ አውለድክሙ ፡ ወበደመ ፡ ሰብእ ፡ ፈተውክሙ ፡ ወገበርክሙ ፡ ከመ ፡ እሙንቱ ፡ ይገብሩ ፡ ሥጋ ፡ ወደመ ፡ እለ ፡ እሙንቱ ፡ ይመውቱ ፡ ወይትኃጐሉ ። ወበእንተዝ ፡ ወሀብክዎሙ ፡ አንስትያ ፡ ከመ ፡ ይዝርኡ ፡ ላዕሌሆን ፡ ወይትወለዱ ፡ ውሉዱ ፡ በላዕሌሆን ፡ ከመ ፡ ከማሁ ፡ ይትገበር ፡ ግብር ፡ በዲበ ፡ ምድር ። ወአንትሙሰ ፡ ቀዳሚ ፡ ኮንክሙ ፡ መንፈሳውያነ ፡ ሕያዋነ ፡ ሕይወት ፡ ዘለዓለም ፡ ዘኢይመውት ፡ ለኲሉ ፡ ትውልደ ፡ ዓለም ። ወበእንተ ፡ ዝንቱ ፡ ኢረሰይኩ ፡ ለክሙ ፡ አንስቲያ ፡ እስመ ፡ መንፈሳውያንሰ ፡ ውስተ ፡ ሰማይ ፡ ማኅደሪሆሙ ። ወይእዜኒ ፡ ረዓይት ፡ እለ ፡ ተወልዱ ፡ እምነፍስት ፡ ወሥጋ ፡ መናፍስተ ፡ እኩያነ ፡ ይሰመዩ ፡ በዲበ ፡ ምድር ፡ ወውስተ ፡ ምድር ፡ ይከውን ፡ ማኅደሪሆሙ ። ወነፍሳት ፡ እኩያን ፡ ወፅኡ ፡ እምሥጋሆሙ ፡ እስመ ፡ እመልዕልት ፡ ተፈጥሩ ፡ እምቅዱሳን ፡ ትጉሃን ፡ ኮኑ ፡ ቀዳሚቶሙ ፡ ወቀዳሚ ፡ መሰረት ፡ መንፈሰ ፡ እኩየ ፡ ይከውኑ ፡ በዲበ ፡ ምድር ፡ ወመንፈሰ ፡ እኩያን ፡ ይሰመዩ ። ወመናፍስተ ፡ ሰማይ ፡ ውስተ ፡ ሰማይ ፡ ይከውን ፡ ማኅደሪሆሙ ፤ ወመናፍስተ ፡ ምድር ፡ እለ ፡ ተወልዱ ፡ በዲበ ፡ ምድር ፡ ውስተ ፡ ምድር ፡ ማኅደሪሆሙ ። ወመንፈሰ ፡ ረዓይት ፡ ደመናተ ፡ እለ ፡ ይገፍዑ ፤ ይማስኑ ፤ ወይወድቁ ፤ ወይትበዐሱ ፤ ወያደቅቁ ፡ ዲበ ፡ ምድር ፤ ወኀዘነ ፡ ይገብሩ ፤ ወኢምንተኒ ፡ ዘይበልዑ ፡ እክለ ፤ ወኢይጸምዑ ፡ ወኢይትዓወቁ ። ወኢይትነሥኡ ፡ እሎንቱ ፡ ነፍሳት ፡ ዲበ ፡ ውሉደ ፡ ሰብእ ፡ ወዲበ ፡ አንስት ፡ እስመ ፡ ወፅኡ ፡ አመ ፡ መዋዕለ ፡ ቀትል ፡ ወሙስና ።
=== chapter 16 ===
ወሞተ ፡ ረዓይትኒ ፡ እንተ ፡ ኀበ ፡ ወፅኡ ፡ መንፈሳት ፡ እምነፍስት ፡ ሥጋሆሙ ፡ ለይኩን ፡ ዘይማስን ፡ ዘእንበለ ፡ ኲነኔ ፤ ከማሁ ፡ ይማስኑ ፡ እስከ ፡ ዕለተ ፡ ኲነኔ ፡ ዐባይ ፡ እምዓለም ፡ ዐቢይ ፡ ይትፌጸም ፡ እምትጉሃን ፡ ወረሲዓን ። ወይእዜኒ ፡ ለትጉሃን ፡ እለ ፡ ፈነዉከ ፡ ትስአል ፡ በእንቲአሆሙ ፡ እለ ፡ ቀዲሙ ፡ በሰማይ ፡ ሀለዉ ። ወእእዜኒ ፡ አንትሙሰ ፡ በሰማይ ፡ ሀለውክሙ ፡ ወኅቡኣት ፡ ዓዲ ፡ እተከሥቱ ፡ ለክሙ ፡ ወምኑነ ፡ ምሥጢረ ፡ አእመርክሙ ፡ ወዘንተ ፡ ዜነውክሙ ፡ ለአንስት ፡ በጽንዐ ፡ ልብክሙ ፡ ወበዝንቱ ፡ ምሥጢር ፡ ያበዝኃ ፡ አንስት ፡ ወሰብእ ፡ እኪተ ፡ በዲበ ፡ ምድር ። በሎሙ ፡ እንከሰ ፡ አልብክሙ ፡ ሰላም ።
=== chapter 17 ===
ወነሥኡኒ ፡ ውስተ ፡ ፩መካን ፡ ኀበ ፡ ሀለዉ ፡ ህየ ፡ ከመ ፡ እሳት ፡ ዘይነድድ ፡ ወሶበ ፡ ይፈቅዱ ፡ ያስተርእዩ ፡ ከመ ፡ ሰብእ ። ወወሰደኒ ፡ ውስተ ፡ መካን ፡ ዘዐውሎ ፡ ወውስተ ፡ ደብር ፡ ዘከተማ ፡ ርእሱ ፡ ይበጽሕ ፡ ውስተ ፡ ሰማይ ። ወርኢኩ ፡ መካናተ ፡ ብሩሃነ ፡ ወነጐድጓድ ፡ ውስተ ፡ አጽናፍ ፤ ኀበ ፡ ዕመቁ ፡ ቀስተ ፡ እሳት ፤ ወሐፅ ፤ ወምጒንጳቲሆሙ ፤ ወሰይፈ ፡ እሳት ፤ ወመባርቅት ፡ ኲሉ ። ወነሥኡኒ ፡ እስከ ፡ ማየ ፡ ሕይወት ፡ ዘይትነገር ፡ ወእስከ ፡ እሳተ ፡ ዓረብ ፡ ዘውእቱ ፡ ይእኅዝ ፡ ኲሎ ፡ ዕርበተ ፡ ፀሐይ ። ወመጻእኩ ፡ እስከ ፡ ፈለገ ፡ እሳት ፡ ዘይውኅዝ ፡ እሳቱ ፡ ከመ ፡ ማይ ፡ ወይትከዐው ፡ ውስተ ፡ ባሕር ፡ ዐቢይ ፡ ዘመንገለ ፡ ዓረብ ። ወርኢኩ ፡ ኲሎ ፡ ዐበይተ ፡ አፍላገ ፡ ወእስከ ፡ ዐቢይ ፡ ጽልመት ፡ በጻሕኩ ፡ ወሖርኩ ፡ ኀበ ፡ ኲሉ ፡ ዘሥጋ ፡ ያንሶሱ ። ወርኢኩ ፡ አድባረ ፡ ቆባራት ፡ እለ ፡ ክረምት ፡ ወምክዓወ ፡ ማይ ፡ ዘኲሉ ፡ ቀላይ ። ወርኢኩ ፡ አፉሆሙ ፡ ለኲሎሙ ፡ አፍላገ ፡ ምድር ፡ ወአፉሃ ፡ ለቀላይ ።
=== chapter 18 ===
ወርኢኩ ፡ መዛግብተ ፡ ኲሉ ፡ ነፋሳት ፡ ወርኢኩ ፡ ከመ ፡ ቦሙ ፡ አሰርገወ ፡ ኲሎ ፡ ፍጥረተ ፡ ወመሰረታቲሃ ፡ ለምድር ። ወርኢኩ ፡ እብነ ፡ ማእዘንተ ፡ ምድር ፡ ወርኢኩ ፡ ፬ነፋሳተ ፡ እለ ፡ ይፀውርዋ ፡ ለምድር ፡ ወለጽንዐ ፡ ሰማይ ። ወርኢኩ ፡ ከመ ፡ ነፋሳት ፡ ይረብብዋ ፡ ለልዕልና ፡ ሰማይ ፤ ወእሙንቱ ፡ ይቀውሙ ፡ ማእከለ ፡ ሰማይ ፡ ወምድር ፡ እሙንቱ ፡ ውእቶሙ ፡ አዕማደ ፡ ሰማይ ። ወርኢኩ ፡ ነፋሳተ ፡ እለ ፡ ይመይጥዋ ፡ ለሰማይ ፡ እለ ፡ ያዐርቡ ፡ ለክበበ ፡ ፀሐይ ፡ ወኲሎ ፡ ከዋክብተ ። ወርኢኩ ፡ ዘዲበ ፡ ምድር ፡ ነፋሳተ ፡ ዘይፀውሩ ፡ ደመናተ ፤ ወርኢኩ ፡ ፍናወ ፡ መላእክት ፤ ርኢኩ ፡ ውስተ ፡ ጽንፈ ፡ ምድር ፡ ጽንዐ ፡ ዘሰማይ ፡ መልዕልተ ። ወኅለፍኩ ፡ መንገለ ፡ አዜብ ፡ ወይነድድ ፡ መዓልተ ፡ ወሌሊተ ፡ ኀበ ፡ ፯አድባር ፡ ዘእምእብን ፡ ክቡር ፡ ፫መንገለ ፡ ጽባሕ ፡ ወ፫መንገለ ፡ አዜብ ። ወመንገለ ፡ ጽባሕሰ ፡ ዘእምእብነ ፡ ኅብር ፡ ወ፩ሰ ፡ ዘእምእብነ ፡ ባሕርይ ፡ ወ፩ኒ ፡ ዘእምእብነ ፡ ፈውስ ፡ ወዘመንገለ ፡ አዜብ ፡ እምነ ፡ እብን ፡ ቀይሕ ። ወማእከላይሰ ፡ ይጐድእ ፡ እስከ ፡ ሰማይ ፡ ከመ ፡ መንበሩ ፡ ለእግዚአብሔር ፡ ዘእምእብነ ፡ ፔካ ፡ ወድማሁ ፡ ለመንበር ፡ ዘእምእብነ ፡ ሰንፔር ። ወእሳተ ፡ ዘይነድድ ፡ ርኢኩ ፡ ወዘሀሎ ፡ ውስተ ፡ ኲሉ ፡ አድባር ። ወርኢኩ ፡ ህየ ፡ መካነ ፡ ማዕዶቱ ፡ ለዐቢይ ፡ ምድር ፡ ህየ ፡ ይትጋብኡ ፡ ማያት ። ወርኢኩ ፡ ንቅዐተ ፡ ምድር ፡ ዕሙቀ ፡ በአእማዲሁ ፡ ለእሳተ ፡ ሰማይ ፡ ወርኢኩ ፡ በውስቴቶሙ ፡ አዕማደ ፡ ሰማይ ፡ ዘእ ፡ ሳት ፡ ዘይወርዱ ፡ ወአልቦሙ ፡ ኊልቊ ፡ ወኢመንገለ ፡ መልዕልት ፡ ወኢመንገለ ፡ ዕመቅ ። ወዲበ ፡ ውእቱ ፡ ንቅዐት ፡ ርኢኩ ፡ መካነ ፡ ወኢጽንዐ ፡ ሰማይ ፡ ላዕሌሁ ፡ ወኢመሠረተ ፡ ምድር ፡ በታሕቱ ፡ ወኢማይ ፡ አልቦ ፡ ላዕሌሁ ፡ ወኢአዕዋፍ ፡ አላ ፡ መካነ ፡ በድው ፡ ውእቱ ። ወግሩመ ፡ ርኢኩ ፡ በህየ ፡ ፯ከዋክብተ ፡ ከመ ፡ ዐበይት ፡ አድባር ፡ ዘይነድዱ ፡ ወከመ ፡ መንፈስ ፡ ዘይሴአለኒ ። ይቤ ፡ መልአክ ፡ ዝውእቱ ፡ መካነ ፡ ተፍጻሜቱ ፡ ለሰማይ ፡ ወለምድር ፤ ቤተ ፡ ሞቅሕ ፡ ኮኖሙ ፡ ዝንቱ ፡ ለከዋክብተ ፡ ሰማይ ፡ ወለኀይለ ፡ ሰማይ ። ወከዋክብት ፡ እለ ፡ ያንኰረኲሩ ፡ ዲበ ፡ እሳት ፡ ወእሉ ፡ ውእቶሙ ፡ እለ ፡ ኀለፉ ፡ ትእዛዘ ፡ እግዚአብሔር ፡ እምቅድመ ፡ ጽባሖሙ ፡ እስመ ፡ ኢመጽኡ ፡ በጊዜሆሙ ። ወተምዕዖሙ ፡ ወአሠሮሙ ፡ እስከ ፡ ጊዜ ፡ ተፍጻሜተ ፡ ኀጢአቶሙ ፡ በዓመተ ፡ ምሥጢር ።
=== chapter 19 ===
ወይቤለኒ ፡ ኡርኤል ፡ በዝየ ፡ ተደሚሮሙ ፡ መላ ፡ እክት ፡ ምስለ ፡ አንስት ፡ ይቀውሙ ፡ መናፍስቲሆሙ ፡ ወብዙኃ ፡ ራእየ ፡ ከዊኖሙ ፡ አርኰስዎሙ ፡ ለሰብእ ፡ ወያስሕትዎሙ ፡ ለሰብእ ፡ ከመ ፡ ይሡዑ ፡ ለአጋንንት ፡ ከመ ፡ አማልክት ፡ እስመ ፡ በዕለት ፡ ዐባይ ፡ ኲነኔ ፡ በዘይትኴነኑ ፡ እስከ ፡ ይትፌጸሙ ። ወአንስቲያሆሙኒ ፡ አስሒቶን ፡ መላእክተ ፡ ሰማይ ፡ ከመ ፡ ሰላማውያን ፡ ይከውና ። ወአነ ፡ ሄኖክ ፡ ርኢኩ ፡ አርአያ ፡ ባሕቲትየ ፡ አጽናፈ ፡ ኲሉ ፡ ወአልቦ ፡ ዘርእየ ፡ እምሰብእ ፡ ከመ ፡ አነ ፡ ርኢኩ ።
=== chapter 20 ===
ወዝንቱ ፡ ውእቱ ፡ አስማ ፡ ቲሆሙ ፡ ለእለ ፡ ይተግሁ ፡ ቅዱሳን ፡ መላእክት ። ኡርኤል ፡ ፩እምነ ፡ መላእክት ፡ ቅዱሳን ፡ እስመ ፡ ዘረዓም ፡ ወዘረዓድ ። ሩፋኤል ፡ ፩እምነ ፡ መላእክት ፡ ቅዱሳን ፡ ዘመናፍስተ ፡ ሰብእ ። ራጉኤል ፡ ፩እምነ ፡ መላእክት ፡ ቅዱሳን ፡ ዘይትቤቀሎ ፡ ለዓለም ፡ ወለብርሃናት ። ሚካኤል ፡ ፩እምነ ፡ መላእክት ፡ ቅዱሳን ፡ እስመ ፡ በዲበ ፡ ሠናይቱ ፡ ለሰብእ ፡ ተአዛዚ ፡ ዲበ ፡ ሕዝብ ። ሰረቃኤል ፡ ፩እምነ ፡ መላእክት ፡ ቅዱሳን ፡ ዘዲበ ፡ መናፍስተ ፡ እጓለ ፡ እመሕያው ፡ ዘመናፍስተ ፡ ያኅጥኡ ። ገብርኤል ፡ ፩እምነ ፡ መላእክት ፡ ቅዱሳን ፡ ዘዲበ ፡ አኪስት ፡ ወዘዲበ ፡ ገነት ፡ ወዘኪሩቤል ።
=== chapter 21 ===
ወኦድኩ ፡ እስከ ፡ መካን ፡ ኀበ ፡ አልቦ ፡ ዘይትገበር ። ወርኢኩ ፡ በህየ ፡ ግብረ ፡ ግሩመ ፡ ኢሰማየ ፡ ልዑለ ፡ ወኢምድረ ፡ ሱርርተ ፡ አላ ፡ መካነ ፡ በድው ፡ ዘድልው ፡ ወግፉም ። ወህየ ፡ ርኢኩ ፡ ፯ከዋክብተ ፡ ሰማይ ፡ እሱራን ፡ በላዕሌሁ ፡ ኅብረ ፡ ከመ ፡ አድባር ፡ ዐበይት ፡ ወከመ ፡ ዘእሳት ፡ እንዘ ፡ ይነድዱ ። ውእተ ፡ ጊዜ ፡ እቤ ፡ በእንተ ፡ አይ ፡ ኅጢአት ፡ ተአሥሩ ፡ ወበእንተ ፡ ምንት ፡ ዝየ ፡ ተገድፉ ። ወይቤለኒ ፡ ኡርኤል ፡ ፩እምነ ፡ መላእክት ፡ ቅዱሳን ፡ ዘምስሌየ ፡ ውእቱ ፡ ይመርሀኒ ፡ ወይቤ ፡ ሄኖክ ፡ በእንተ ፡ መኑ ፡ ትሴአል ፡ ወበእንተ ፡ መኑ ፡ ትጤይቅ ፡ ወትስእል ፡ ወትጽህቅ ። እሉ ፡ ውእቶሙ ፡ እምነ ፡ ከዋክብት ፡ እለ ፡ ኀለፉ ፡ ትእዛዘ ፡ እግዚአብሔር ፡ ልዑል ፡ ወተአሥሩ ፡ በዝየ ፡ እስከ ፡ ይትፌጸም ፡ ትእልፊተ ፡ ዓለም ፡ ኊልቈ ፡ መዋዕለ ፡ ኃጢአቶሙ ። ወእምህየ ፡ ሖርኩ ፡ ካልአ ፡ መካነ ፡ እምዝ ፡ ዘይጌርም ፡ ወርኢኩ ፡ ግብረ ፡ ግሩመ ፡ እሳት ፡ ዐቢይ ፡ በህየ ፡ ዘይነድድ ፡ ወያንበለብል ፡ ወመምተርት ፡ ቦቱ ፡ ወሰኑ ፡ እስከ ፡ ቀላይ ፡ ፍጹም ፡ አዕማደ ፡ እሳት ፡ ዐበይት ፡ ዘያወርድዎሙ ፡ ወኢአምጣኖ ፡ ወኢዕበዮ ፡ እክህልኩ ፡ ነጽሮ ፡ ወስእንኩ ፡ ነጽሮ ፡ ዐይኑ ። ውእተ ፡ ጊዜ ፡ እቤ ፡ እፎ ፡ ግሩም ፡ ዝንቱ ፡ መካን ፡ ወሕማም ፡ ለነጽሮ ። ውእተ ፡ ጊዜ ፡ አውሥአኒ ፡ ኡርኤል ፡ ፩እመላእክት ፡ ቅዱሳን ፡ ዘምስሌየ ፡ ሀለወ ፡ አውሥአኒ ፡ ወይቤለኒ ፡ ሄኖክ ፡ ምንት ፡ ውእቱ ፡ ፍርሃትከ ፡ ከመዝ ፡ ወድንጋፄከ ፡ በእንተዝ ፡ ግሩም ፡ መካን ፡ ወቅድመ ፡ ገጹ ፡ ለዝ ፡ ሕማም ። ወይቤለኒ ፡ ዝመካን ፡ ቤተ ፡ ሞቅሖሙ ፡ ለመላእክት ፡ ወበህየ ፡ ይትአኅዙ ፡ እስከ ፡ ለዓለም ።
=== chapter 22 ===
ወእምህየ ፡ ሖርኩ ፡ ካልአ ፡ መካነ ፡ ወአርአየኒ ፡ በምዕራብ ፡ ደብረ ፡ ዐቢየ ፡ ወነዋኀ ፡ ወኰኲሕ ፡ ጽኑዕ ፡ ወ፬መካናት ፡ ሠናያት ። ወበውስቴቱ ፡ ዘቦቱ ፡ ዕሙቅ ፡ ወርኂብ ፡ ወልሙጽ ፡ ጥቀ ፡ ከመ ፡ ልሙጽ ፡ ዘያንኰረኲር ፡ ወዕሙቅ ፡ ወጽልመት ፡ ለነጽሮ ። ውእተ ፡ ጊ ፡ ዜ ፡ አውሥአኒ ፡ ሩፋኤል ፡ ፩እመላእክት ፡ ቅዱሳን ፡ ዘሀለወ ፡ ምስሌየ ፡ ወይቤለኒ ፡ እላ ፡ መካናት ፡ ሠናያት ፡ ከመ ፡ ይትጋብኡ ፡ ዲቤሆን ፡ መናፍስት ፡ ነፍሶሙ ፡ ለምውታን ፡ ሎሙ ፡ እሎንቱ ፡ ተፈጥሩ ፡ ዝየ ፡ ያስተጋብኡ ፡ ኲሎ ፡ ነፍሰ ፡ ውሉደ ፡ ሰብእ ። ወእሙንቱ ፡ መካናት ፡ ኀበ ፡ ያነብርዎሙ ፡ ገብሩ ፡ እስከ ፡ ዕለተ ፡ ኲነኔሆሙ ፡ ወእስከ ፡ አመ ፡ ዕድሜሆሙ ፤ ወዕድሜ ፡ ውእቱ ፡ ዐቢይ ፡ እስከ ፡ አመ ፡ ኲነኔ ፡ ዐቢይ ፡ በላዕሌሆሙ ። ወርኢኩ ፡ መናፍስተ ፡ ውሉደ ፡ ሰብእ ፡ እንዘ ፡ ምውታን ፡ ውእቶሙ ፡ ወቃሎሙ ፡ ይበጽሕ ፡ እስከ ፡ ሰማይ ፡ ወይሰኪ ። ይእተ ፡ ጊዜ ፡ ተስእልክዎ ፡ ለሩፋኤል ፡ መልአክ ፡ ዘሀሎ ፡ ምስሌየ ፡ ወእቤሎ ፡ ዝመንፈስ ፡ ዘመኑ ፡ ውእቱ ፡ ዘከመዝ ፡ ቃሉ ፡ ይበጽሕ ፡ ወይሰኪ ። ወአውሥአኒ ፡ ወይቤለኒ ፡ እንዘ ፡ ይብል ፡ ዝንቱ ፡ መንፈስ ፡ ውእቱ ፡ ዘይወፅእ ፡ እምአቤል ፡ ዘቀተሎ ፡ ቃየል ፡ እኁሁ ፡ ወይሰኪ ፡ ኪያሁ ፡ እስከ ፡ ሶበ ፡ ይትኃጐል ፡ ዘርኡ ፡ እምገጸ ፡ ምድር ፡ ወእምዘርአ ፡ ሰብእ ፡ ይማስን ፡ ዘርኡ ። ወበእንተዝ ፡ ውእተ ፡ ጊዜ ፡ ተስእልኩ ፡ በእንቲአሁ ፡ ወበእንተ ፡ ኲነኔ ፡ ኲሉ ፡ ወእቤ ፡ በእንተ ፡ ምንት ፡ ተፈልጠ ፡ ፩እምነ ፡ ፩ ። ወአውሥአኒ ፡ ወይቤለኒ ፡ እሉ ፡ ፫ተገብሩ ፡ ከመ ፡ ይፍልጡ ፡ መንፈሶሙ ፡ ለምውታን ፤ ወከመዝ ፡ ተፈልጠ ፡ ነፍሶሙ ፡ ለጻድቃን ፤ ዝውእቱ ፡ ነቅዐ ፡ ማይ ፡ በላዕሌሁ ፡ ብርሃን ። በከመ ፡ ከማሁ ፡ ተፈጥረ ፡ ለኃጥአን ፡ ሶበ ፡ ይመውቱ ፡ ወይትቀበሩ ፡ ውስተ ፡ ምድር ፡ ወኲነኔ ፡ ኢኮነ ፡ በላዕሌሆሙ ፡ በሕይወቶሙ ። ወበዝየ ፡ ይትፈለጣ ፡ ነፍሳቲሆሙ ፡ ዲበ ፡ ዛቲ ፡ ዐባይ ፡ ፃዕር ፡ እስከ ፡ አመ ፡ ዐባይ ፡ ዕለት ፡ እንተ ፡ ኲነኔ ፡ ወመቅሠፍት ፡ ወፃዕር ፡ ለእለ ፡ ይረግሙ ፡ እስከ ፡ ለዓለም ፡ ወበቀል ፡ ለነፍሶሙ ፡ ወበህየ ፡ የአሥሮሙ ፡ እስከ ፡ ለዓለም ። ወእመኒ ፡ ውእቱ ፡ እምቅድመ ፡ ዓለም ፡ ወከመዝ ፡ ተፈልጠ ፡ ለነፍሶሙ ፡ ለእለ ፡ ይሰክዩ ፡ ወለእለ ፡ ያርእዩ ፡ በእንተ ፡ ሕጒለት ፡ አመ ፡ ተቀትሉ ፡ በመዋዕለ ፡ ኃጥኣን ። ከመዝ ፡ ተፈጥረ ፡ ለነፍሶሙ ፡ ለሰብእ ፡ እለ ፡ ኢኮኑ ፡ ጻድቃነ ፡ አላ ፡ ኃጥኣነ ፡ እለ ፡ ፍጹማነ ፡ አበሳ ፡ ወምስለ ፡ አባስያን ፡ ይከውኑ ፡ ከማሆሙ ፡ ወነፍሶሙሰ ፡ ኢትትቀተል ፡ በዕለተ ፡ ኲነኔ ፡ ወኢይትነሥኡ ፡ እምዝየ ። ውእተ ፡ ጊዜ ፡ ባረክዎ ፡ ለእግዚአ ፡ ስብሐት ፡ ወእቤ ፡ ቡሩክ ፡ ውእቱ ፡ እግዚእየ ፡ እግዚአ ፡ ስብሐት ፡ ወጽድቅ ፡ ዘኲሎ ፡ ይመልክ ፡ እስከ ፡ ለዓለም ።
=== chapter 23 ===
ወእምህየ ፡ ሖርኩ ፡ ካልአ ፡ መካነ ፡ መንገለ ፡ ዓረብ ፡ እስከ ፡ አጽናፈ ፡ ምድር ። ወርኢኩ ፡ እሳተ ፡ ዘይነድድ ፡ ወይረውፅ ፡ እንዘ ፡ ኢያዐርፍ ፡ ወኢይነትግ ፡ እምሩጸቱ ፡ መዓልተ ፡ ወሌሊተ ፡ አላ ፡ ከማሁመ ። ወተስእልኩ ፡ እንዘ ፡ እብል ፡ ዝንቱ ፡ ምንት ፡ ውእቱ ፡ ዘአልቦ ፡ ዕረፍት ። ውእተ ፡ ጊዜ ፡ አውሥአኒ ፡ ራጉኤል ፡ ፩እምነ ፡ መላእክት ፡ ቅዱሳን ፡ ዘሀሎ ፡ ምስሌየ ፡ ወይቤለኒ ፡ ዝንቱ ፡ ዘርኢከ ፡ ሩጸተ ፡ ዘመንገለ ፡ ዐረብ ፡ እሳት ፡ ዘይነድድ ፡ ውእቱ ፡ ኲሉ ፡ ብርሃናተ ፡ ሰማይ ።
=== chapter 24 ===
ወእምህየ ፡ ሖርኩ ፡ ካልአ ፡ መካነ ፡ ምድር ፡ ወአርአየኒ ፡ ደብረ ፡ እሳት ፡ ዘያንበለብል ፡ መዓልተ ፡ ወሌሊተ ። ወሖርኩ ፡ መንገሌሁ ፡ ወርኢኩ ፡ ፯አድባረ ፡ ክቡራነ ፡ ወኲሉ ፡ ፩እምነ ፡ ፩እንዘ ፡ ይትዌለጥ ፡ ወአዕባነ ፡ ክቡራነ ፡ ወሠናያነ ፡ ወኲሉ ፡ ክቡር ፤ ወስብሕ ፡ ራእዮሙ ፡ ወሠናይ ፡ ገጾሙ ፡ ፫መንገለ ፡ ጽባሕ ፡ ወጽኑዓን ፡ ፩ዲበ ፡ ፩ወ፫መንገለ ፡ ሰሜን ፡ ወጽኑዓን ፡ ፩ዲበ ፡ ፩ወቈላተ ፡ ዕሙቃተ ፡ ወጠዋያተ ፡ አሐቲ ፡ ለአሐቲ ፡ እይትቃረባ ። ወሳብዕ ፡ ደብር ፡ ማእከሎሙ ፡ ለእሎንቱ ፡ ወኑኆሙሰ ፡ ይትማሰሉ ፡ ኲሎሙ ፡ ከመ ፡ መንበረ ፡ አትሮንስ ፡ ወየዐውድዎ ፡ ዕፀወ ፡ መዐዛ ። ወሀሎ ፡ ውስቴቶሙ ፡ ዕፅ ፡ አልቦ ፡ ግሙራ ፡ አመ ፡ ፄነወኒ ፡ ወኢ ፡ ፩እምውስቴቶሙ ፡ ወባዕዳንሂ ፡ ዘከማሁ ፡ ኢኮነ ፡ ዘይምዕዝ ፡ እምኲሉ ፡ መዐዛ ፡ ወቈጽሉ ፡ ወጽጌሁ ፡ ወዕፁ ፡ ኢይጸመሂ ፡ ለዓለም ፡ ወፍሬሁኒ ፡ ሠናይ ፤ ወፍሬሁሰ ፡ ከመ ፡ አስካለ ፡ በቀልት ። ወውእተ ፡ ጊዜ ፡ እቤ ፡ ነዋ ፡ ዝንቱ ፡ ሠናይ ፡ ዕፅ ፡ ወሠናይ ፡ ለርእይ ፡ ወአዳም ፡ ቈጽሉ ፡ ወፍሬሆኒ ፡ ሞገስ ፡ ጥቀ ፡ ለርእየ ፡ ገጽ ። ወውእተ ፡ ጊዜ ፡ አውሥአኒ ፡ ሚካኤል ፡ ፩እምነ ፡ መላእክት ፡ ቅዱሳን ፡ ወክቡራን ፡ ዘምስሌየ ፡ ሀሎ ፡ ውእቱ ፡ ዘዲቤሆሙ ።
=== chapter 25 ===
ወይቤለኒ ፡ ሄኖክ ፡ ምንተ ፡ ትሴአለኒ ፡ በእንተ ፡ መዐዛሁ ፡ ለዝ ፡ ዕፅ ፡ ወትጤይቅ ፡ ከመ ፡ ታእምር ። ወውእተ ፡ ጊዜ ፡ አውሣእክዎ ፡ አነ ፡ ሄኖክ ፡ እንዘ ፡ እብል ፡ በእንተ ፡ ኲሉ ፡ እፈቅድ ፡ አእምር ፡ ወፈድፋደሰ ፡ በእንተዝ ፡ ዕፅ ። ወአውሥአኒ ፡ እንዘ ፡ ይብል ፡ ዝንቱ ፡ ደብር ፡ ዘርኢከ ፡ ነዊኀ ፡ ዘርእሱ ፡ ይመስል ፡ መንበሮ ፡ ለእግዚእ ፡ መንበሩ ፡ ውእቱ ፡ ኀበ ፡ ይነብር ፡ ቅዱስ ፡ ወዐቢይ ፡ እግዚአ ፡ ስብሐት ፡ ንጉሥ ፡ ዘለዓለም ፡ ሶበ ፡ ይወርድ ፡ የሐውጻ ፡ ለምድር ፡ በሠናይ ። ወዝንቱኒ ፡ ዕፀ ፡ መዐዛ ፡ ሠናይ ፡ ወኢ፩ ፡ ዘሥጋ ፡ አልቦ ፡ ሥልጣን ፡ ከመ ፡ ይግሥሦ ፡ እስከ ፡ አመ ፡ ዐቢይ ፡ ኲነኔ ፡ አመ ፡ ይትቤቀል ፡ ኲሎ ፡ ወይትፌጸም ፡ እስከ ፡ ለዓለም ፡ ዝኩ ፡ ለጻድቃን ፡ ወለትሑታን ፡ ይትወሀብ ። እምፍሬ ፡ ዚአሁ ፡ ይትወሀብ ፡ ለኅሩያን ፡ ሕይወት ፡ መንገለ ፡ መስዕ ፡ ይተከል ፡ ውስተ ፡ መካን ፡ ቅዱስ ፡ መንገለ ፡ ቤቱ ፡ ለእግዚእ ፡ ንጉሥ ፡ ዘለዓለም ። ውእተ ፡ ጊዜ ፡ ይትፌሥሑ ፡ በፍሥሓ ፡ ወይትሐሠዩ ፡ ውስተ ፡ ቅዱስ ፡ ያበውኡ ፡ ሎቱ ፡ መዐዛ ፡ በበአዕፅምቲሆሙ ፡ ወሕይወተ ፡ ብዙኃ ፡ የሐይዉ ፡ በዲበ ፡ ምድር ፡ በከመ ፡ ሐይዉ ፡ አበዊከ ፡ ወበመዋዕሊሆሙ ፡ ኀዘን ፡ ወሕማም ፡ ወጻማ ፡ ወመቅሠፍት ፡ እይገሥሦሙ ። ውእተ ፡ ጊዜ ፡ ባረክዎ ፡ ለእግዚአ ፡ ስብሐት ፡ ንጉሥ ፡ ዘለዓለም ፡ እስመ ፡ አስተዳለወ ፡ ከመዝ ፡ ለሰብእ ፡ ጻድቃን ፡ ወከመዝ ፡ ፈጠረ ፡ ወይቤ ፡ የሀብዎሙ ።
=== chapter 26 ===
ወእምህየ ፡ ሖርኩ ፡ ማእከለ ፡ ምድር ፡ ወርኢኩ ፡ መካነ ፡ ቡሩከ ፡ ወጥሉለ ፡ ዘቦቱ ፡ አዕፅቅ ፡ ዘይነብር ፡ ወይሠርፅ ፡ እምዕፅ ፡ ዘተመትረ ። ወበህየ ፡ ርኢኩ ፡ ደብረ ፡ ቅዱሰ ፡ ወመትሕተ ፡ ደብር ፡ ማይ ፡ ዘመንገለ ፡ ጽባሑ ፡ ወውኅዘቱ ፡ መንገለ ፡ ሰሜን ። ወርኢኩ ፡ መንገለ ፡ ጽባሕ ፡ ካልአ ፡ ደብረ ፡ ዘይነውኅ ፡ ከመዝ ፡ ወማእከሎሙ ፡ ቈላ ፡ ዕሙቅ ፡ ወአልቦ ፡ ራኅብ ፡ ወላቲኒ ፡ የሐውር ፡ ማይ ፡ መንገለ ፡ ደብር ፡ ወመንገለ ፡ ዐረቡ ፡ ለዝ ፡ ካልእ ፡ ደብር ፡ ወይቴሐቶ ፡ ሎቱ ፡ ወአልቦ ፡ ኑኅ ፡ ወቈላ ፡ ታሕቱ ፡ ማእከሎሙ ፡ ወካልአት ፡ ቈላት ፡ ዕሙቃት ፡ ወይቡሳት ፡ መንገለ ፡ ጽንፈ ፡ ሠለስቲሆሙ ። ወኲሉ ፡ ቈላቱ ፡ ዕሙቃት ፡ ወአልቦን ፡ ራኅብ ፡ እምኰኲሕ ፡ ጽኑዕ ፤ ወዕፅ ፡ ይተከል ፡ በላዕሌሆሙ ። ወአንከርኩ ፡ በእንተ ፡ ኰኲሕ ፡ ወአንከርኩ ፡ በእንተ ፡ ቈላ ፡ ወጥቀ ፡ አንከርኩ ።
=== chapter 27 ===
ውእተ ፡ ጊዜ ፡ እቤ ፡ በእንተ ፡ ምንት ፡ ዛቲ ፡ ምድር ፡ ቡርክት ፡ ወኲለንታሃ ፡ ዕፀወ ፡ ምልዕት ፡ ወዛቈላ ፡ ርግምት ፡ ማእከሎሙ ። ውእተ ፡ ጊዜ ፡ አውሥአኒ ፡ ኡራኤል ፡ ፩እመላእክት ፡ ቅዱሳን ፡ ዘሀሎ ፡ ምስሌየ ፡ ወይቤለኒ ፡ ዛቈላ ፡ ርግምት ፡ ለርጉማን ፡ እስከ ፡ ለዓለም ፤ ዝየ ፡ ይትጋብኡ ፡ ኲሎሙ ፡ እለ ፡ ይብሉ ፡ በአፉሆሙ ፡ ላዕለ ፡ እግዚአብሔር ፡ ቃለ ፡ ዘኢይደሉ ፡ ወበእንተ ፡ ስብሐተ ፡ ዚአሁ ፡ ይትናገሩ ፡ ዕፁባተ ፡ ዝየ ፡ ያስተጋብእዎሙ ፡ ወዝየ ፡ ምኲናኖሙ ። ወበደኃሪ ፡ መዋዕል ፡ ይከውን ፡ ላዕሌሆሙ ፡ አርአያ ፡ ኲነኔ ፡ ዘበጽድቅ ፡ በቅድመ ፡ ጻድቃን ፡ ለዓለም ፡ ኲሎ ፡ መዋዕለ ፡ በዝየ ፡ ይባርክዎ ፡ መሀርያን ፡ ለእግዚአ ፡ ስብሐት ፡ ንጉሥ ፡ ዘለዓለም ። ወበመዋዕለ ፡ ኲነኔሆሙ ፡ ይባርክዎ ፡ በምሕረት ፡ በከመ ፡ ከፈሎሙ ። ውእተ ፡ ጊዜ ፡ አነኒ ፡ ባረክዎ ፡ ለእግዚአ ፡ ስብሐት ፡ ወነገርኩ ፡ ሎቱ ፡ ወዘከርኩ ፡ በከመ ፡ ይደሉ ፡ ለዕበዩ ።
=== chapter 28 ===
ወእምህየ ፡ ሖርኩ ፡ መንገለ ፡ ጽባሕ ፡ ማእከላ ፡ ለደብረ ፡ መድበራ ፡ ወርኢክዎ ፡ ገዳመ ፡ ባሕቲቶ ። ወባሕቱ ፡ ምሉእ ፡ ዕፀወ ፡ እምነ ፡ ዝንቱ ፡ ዘርእ ፡ ወማይ ፡ እምላዕሉ ፡ ይፈለፍል ፡ በላዕሉ ። ያስተርኢ ፡ አስራብ ፡ ከመ ፡ ብዙኅ ፡ ዘይሰርብ ፡ ከመ ፡ መንገለ ፡ መስዕ ፡ መንገለ ፡ ዐረብ ፡ ወእምኲለሄኒ ፡ የዐርግ ፡ ወእምህየኒ ፡ ማይ ፡ ወጠል ።
=== chapter 29 ===
ወሖርኩ ፡ ውስተ ፡ መካን ፡ ካልእ ፡ እምነ ፡ መድበራ ፡ መንገለ ፡ ጽባሑ ፡ ለውእቱ ፡ ደብር ፡ ቀረብኩ ። ወበህየ ፡ ርኢኩ ፡ ዕፀወ ፡ ኲነኔ ፡ ፈድፋደ ፡ ቈስቈሰ ፡ መዐዛ ፡ ለስኂን ፡ ወከርቤ ፡ ወዕፀወኒ ፡ ኢይትማሰሉ ።
=== chapter 30 ===
ወላዕሌሁ ፡ ላዕለ ፡ እላንቱ ፡ ላዕለ ፡ ደብረ ፡ ጽባሕ ፡ ወአኮ ፡ ርኁቅ ፡ ወርኢኩ ፡ መካነ ፡ ካልአ ፡ ቈላተ ፡ ማይ ፡ ከመ ፡ ዘኢይትዌዳዕ ፡ ወርኢኩ ፡ ዕፀ ፡ ሠናየ ፡ ወመዐዛሁ ፡ ከመ ፡ ዘሰኪኖን ። ወመንገለ ፡ ክነፊሆሙ ፡ ለቈላት ፡ እሎንቱ ፡ ርኢኩ ፡ ቀናንሞስ ፡ ዘመዐዛ ፡ ወዲበ ፡ እልክቱ ፡ ቀረብኩ ፡ ዘመንገለ ፡ ጽባሕ ።
=== chapter 31 ===
ወርኢኩ ፡ ካልአ ፡ ደብረ ፡ ዘቦቱ ፡ ዕፀው ፡ ወይወፅእ ፡ ማይ ፡ ወይወፅእ ፡ እምኔሁ ፡ ከመ ፡ ኔቄጥሮ ፡ ዘስሙ ፡ ሳሪራ ፡ ወከልበኔን ። ወዲበ ፡ ውእቱ ፡ ደብር ፡ ርኢኩ ፡ ደብረ ፡ ካልአ ፡ ወውስቴቱ ፡ ዕፀው ፡ ዘዓልዋ ፡ ወእልኩ ፡ ዕፀው ፡ ምሉአን ፡ ዘከመ ፡ ከርካዕ ፡ ወጽኑዕ ። ወሶበ ፡ ይነሥእዎ ፡ ለውእቱ ፡ ፍሬ ፡ ይኔይስ ፡ እምኲሉ ፡ አፈው ።
=== chapter 32 ===
ወእምድኅረ ፡ እሉ ፡ አፈው ፡ ለመስዕ ፡ እንዘ ፡ እኔጽር ፡ መልዕልተ ፡ አድባር ፡ ርኢኩ ፡ ፯አድባረ ፡ ምሉዓነ ፡ ሰንበልት ፡ ቅድወ ፡ ወዕፀወ ፡ መዐዛ ፡ ወቀናንሞን ፡ ወፐፐረ ። ወእምህየ ፡ ሖርኩ ፡ መልዕልተ ፡ ርእሶሙ ፡ ለእልኩ ፡ አድባ ፡ ር ፡ እንዘ ፡ ርኁቅ ፡ ውእቱ ፡ ለጽባሕ ፡ ወኀለፍኩ ፡ እንተ ፡ ዲበ ፡ ባሕረ ፡ ኤርትራ ፡ ወእምኔሁ ፡ ርኁቀ ፡ ኮንኩ ፡ ወኀለፍኩ ፡ መልዕልቶ ፡ ለመልአክ ፡ ዙጥኤል ። ወመጻእኩ ፡ ውስተ ፡ ገነተ ፡ ጽድቅ ፡ ወርኢኩ ፡ ካሐካሐቲሆሙ ፡ ለእልክቱ ፡ ዕፀው ፡ ዕፀወ ፡ ብዙኃነ ፡ ወዐቢያነ ፡ ይበቊሉ ፡ በህየ ፡ ወእንዘ ፡ ፄናሆሙ ፡ ሠናይ ፡ ዐቢያን ፡ ወስኖሙ ፡ ብዙኅ ፡ ወስቡሓን ፡ ወዕፀ ፡ ጥበብ ፡ ዘእምኔሁ ፡ በሊዖሙ ፡ የአምርዋ ፡ ለጥበብ ፡ ዐባይ ። ወይመስል ፡ ሐመረ ፡ ጽራእ ፡ ወፍሬሁ ፡ ከመ ፡ አስካለ ፡ ወይን ፡ ጥቀ ፡ ሠናይ ፡ ወፄናሁ ፡ ለውእቱ ፡ ዕፅ ፡ የሐውር ፡ ወይበጽሕ ፡ ነዊኃ ። ወእቤ ፡ ሠናይ ፡ ዝዕፅ ፡ ወከመ ፡ ሠናይ ፡ ወፍሡሕ ፡ ርእየቱ ። ወአውሥአኒ ፡ መልአክ ፡ ቅዱስ ፡ ሩፋኤል ፡ ዘምስሌየ ፡ ሀሎ ፡ ወይቤለኒ ፡ ዝውእቱ ፡ ዕፀ ፡ ጥበብ ፡ ዘእምኔሁ ፡ በልዑ ፡ አቡከ ፡ አረጋዊ ፡ ወእምከ ፡ እቤራዊት ፡ እለ ፡ ቀደሙከ ፡ ወአእመርዋ ፡ ለጥበብ ፡ ወተፈትሐ ፡ አዕይንቲሆሙ ፡ ወአእመሩ ፡ ከመ ፡ ዕራቃኒሆሙ ፡ ሀለዉ ፡ ወተሰዱ ፡ እምገነት ።
=== chapter 33 ===
ወእምህየ ፡ ሖርኩ ፡ እስከ ፡ አጽናፈ ፡ ምድር ፡ ወርኢኩ ፡ በህየ ፡ አራዊተ ፡ ዐበይተ ፡ ወይትዌለጥ ፡ ፩እምካልኡ ፤ ወአዕዋፍሂ ፡ ይትዌለጥ ፡ ገጾም ፡ ወስኖሙ ፡ ወቃሎሙሂ ፡ ይትዌለጥ ፡ ፩እምካልኡ ። ወበጽባሖሙ ፡ ለእሉ ፡ አራዊት ፡ ርኢኩ ፡ አጽናፈ ፡ ምድር ፡ በኀበ ፡ ሰማይ ፡ ያዐርፍ ፡ ወኀዋኅው ፡ ሰማይ ፡ ርኋተ ። ወርኢኩ ፡ እፎ ፡ ይወፅኡ ፡ ከዋክብተ ፡ ሰማይ ፡ ወኈለቁ ፡ ዘእምነ ፡ ይወፅኡ ፡ ኀዋኅው ፡ ወጸሐፍኩ ፡ ኲሎ ፡ ሙጻኦሙ ፡ ለለ፩በኊልቆሙ ፤ ወአስማቲሆሙ ፤ በደርጎሙ ፤ ወምንባሮሙ ፤ ወጊዜሆሙ ፤ ወአውራኂሆሙ ፤ በከመ ፡ አርአየኒ ፡ መልአክ ፡ ኡርኤል ፡ ዘምስሌየ ፡ ሀሎ ። ወኲሎ ፡ አርአየኒ ፡ ሊተ ፡ ወጸሐፎ ፤ ወዓዲ ፡ አስማቲሆሙ ፡ ጸሐፈ ፡ ሊተ ፡ ወትእዛዛቲሆሙ ፡ ወምግባራቲሆሙ ።
=== chapter 34 ===
ወእምህየ ፡ ሖርኩ ፡ መንገለ ፡ መስዕ ፡ በአጽናፈ ፡ ምድር ፡ ወበህየ ፡ ርኢኩ ፡ መንክረ ፡ ዐቢየ ፡ ወስቡሐ ፡ በአጽናፊሃ ፡ ለኲላ ፡ ምድር ። ወበህየ ፡ ርኢኩ ፡ ኀዋኅው ፡ ሰማይ ፡ ፍቱሐተ ፡ በሰማይ ፡ ፫በበ፩እምኔሆሙ ፡ ይወጽኡ ፡ ነፋሳት ፡ በመንገለ ፡ መስዕ ፡ ሶበ ፡ ይነፍሕ ፡ ቊር ፡ ወበረድ ፡ ወአስሐትያ ፡ ወሐመዳ ፡ ወጠል ፡ ወዝናም ። ወእምአሐቲ ፡ ኆኅት ፡ በሠናይ ፡ ይነፍኅ ፡ ወሶበ ፡ በ፪ሆሙ ፡ ኀዋኅው ፡ ይነፍኁ ፡ በኀይል ፡ ወበፃዕር ፡ ይከውን ፡ ዲበ ፡ ምድር ፡ ወበኀይል ፡ ይነፍኁ ።
=== chapter 35 ===
ወእምህየ ፡ ሖርኩ ፡ መንገለ ፡ ዐረብ ፡ በአጽናፈ ፡ ምድር ፡ ወርኢኩ ፡ በህየ ፡ ፫ኀዋኅው ፡ ርኋተ ፡ በከመ ፡ ርኢኩ ፡ በምሥራቅ ፡ በአምጣነ ፡ ኀዋኅው ፡ ወበአምጣነ ፡ ሙፃኣቱ ።
=== chapter 36 ===
ወእምህየ ፡ ሖርኩ ፡ መንገለ ፡ አዜብ ፡ በአጽናፈ ፡ ምድር ፡ ወበህየ ፡ ርኢኩ ፡ ፫ኀዋኅው ፡ ሰማይ ፡ ርኋተ ፡ ወይወፅእ ፡ እምህየ ፡ አዜብ ፡ ወጠል ፡ ወዝናም ፡ ወነፋስ ። ወእምህየ ፡ ሖርኩ ፡ መንገለ ፡ ጽባሕ ፡ በአጽናፈ ፡ ሰማይ ፡ ወበህየ ፡ ርኢኩ ፡ ፫ኀዋኅው ፡ ሰማይ ፡ ርኋተ ፡ መንገለ ፡ ጽባሕ ፡ ወላዕሌሆሙ ፡ ኀዋኅው ፡ ንዑሳን ። በበ ፡ ፩እምእልኩ ፡ ኀዋኅው ፡ ንዑሳን ፡ የኀልፉ ፡ ከዋክብተ ፡ ሰማይ ፡ ወየሐውሩ ፡ ምዕራበ ፡ በፍኖት ፡ እንተ ፡ ተርእየት ፡ ሎሙ ። ወሶበ ፡ ርኢኩ ፡ ባረኩ ፡ ወበኲሉ ፡ ጊዜ ፡ እባርኮ ፡ ለእግዚአ ፡ ስብሐት ፡ ዘገብረ ፡ ተአምራተ ፡ ዐቢያነ ፡ ወስቡሓነ ፡ ከመ ፡ ያርኢ ፡ ዕበየ ፡ ግብሩ ፡ ለመላእክቲሁ ፡ ወለነፍሳተ ፡ ሰብእ ፡ ከመ ፡ ይሰብሑ ፡ ግብሮ ፡ ወኲሉ ፡ ተግባሩ ፡ ከመ ፡ ይርአዩ ፡ ግብረ ፡ ኀይሉ ፡ ወይሰብሕዎ ፡ ለግብረ ፡ እደዊሁ ፡ ዐቢይ ፡ ወይባርክዎ ፡ እስከ ፡ ለዓለም ።
=== book 2 ===
[Book of the Parables]
=== chapter 37 ===
ራእይ ፡ ዘርእየ ፡ ካልአ ፡ ራእየ ፡ ጥበብ ፡ ዘርእየ ፡ ሄኖክ ፡ ወልደ ፡ ያሬድ ፡ ወልደ ፡ መላልኤል ፡ ወልደ ፡ ቃይናን ፡ ወልደ ፡ ሄኖስ ፡ ወልደ ፡ ሴት ፡ ወልደ ፡ አዳም ። ወዝርእሱ ፡ ለነገረ ፡ ጥበብ ፡ ዘአንሣእኩ ፡ እትናገር ፡ ወእብል ፡ ለእለ ፡ የኀድሩ ፡ ዲበ ፡ የብስ ፡ ስምዑ ፡ ቀደምት ፡ ወርእዩ ፡ ደኃርያን ፡ ነገረ ፡ ቅዱሰ ፡ እለ ፡ እነግር ፡ ቅድመ ፡ እግዚአ ፡ መናፍስት ። እሉ ፡ ቀዳሚ ፡ ይኀይስ ፡ ብሂል ፡ ወደኃርያንሂ ፡ ኢንከልእ ፡ ርእሳ ፡ ለጥበብ ። እስከ ፡ ይእዜ ፡ ኢተውህበኒ ፡ እምቅድመ ፡ እግዚአ ፡ መናፍስት ፡ ዘነሣእኩ ፡ ጥበበ ፡ በከመ ፡ ሀለይኩ ፡ በከመ ፡ ፈቀደ ፡ እግዚአ ፡ መናፍስት ፡ ዘተውህበኒ ፡ እምኔሁ ፡ ክፍለ ፡ ሕይወት ፡ ዘለዓለም ። ወኮኑ ፡ ብየ ፡ ፫ምሳሌ ፡ ወአነ ፡ አንሣእኩ ፡ እንዘ ፡ እብሎሙ ፡ ለእለ ፡ የኅድሩ ፡ የብሰ ።
=== chapter 38 ===
ምሳሌ ፡ ቀዳሚ ፡ ሶበ ፡ ያስተርኢ ፡ ማኅበረ ፡ ጻድቃን ፡ ወይትኴነኑ ፡ ኃጥኣን ፡ በኀጢአቶሙ ፡ ወእምገጸ ፡ የብስ ፡ ይትሀወኩ ። ወሶበ ፡ ያስተርኢ ፡ ጻድቅ ፡ በገጾሙ ፡ ለጻድቃን ፡ እለ ፡ ኅሩያን ፡ ተግባሮሙ ፡ ስቁል ፡ በእግዚአ ፡ መናፍስት ፡ ወያስተርኢ ፡ ብርሃን ፡ ለጻድቃን ፡ ወለኅሩያን ፡ እለ ፡ የኀድሩ ፡ ዲበ ፡ የብስ ፡ አይቴ ፡ ማኅደረ ፡ ኃጥኣን ፡ ወአይቴ ፡ ምዕራፎሙ ፡ ለእለ ፡ ክህድዎ ፡ ለእግዚአ ፡ መናፍስት ፡ እምኀየሶሙ ፡ ሶበ ፡ ኢተወልዱ ። ወሶበ ፡ ይትከሠታ ፡ ኅቡኣቲሆሙ ፡ ለጻድቃን ፡ ይትኴነኑ ፡ ኃጥኣን ፡ ወይትሀወኩ ፡ ረሲዓን ፡ እምገጸ ፡ ጻድቃን ፡ ወኅሩያን ። ወእምይእዜ ፡ ኢይከውኑ ፡ አዚዛነ ፡ ወኢልዑላነ ፡ እለ ፡ ይእኅዝዋ ፡ ለምድር ፡ ወኢይክሉ ፡ ርእየ ፡ ገጸ ፡ ቅዱሳን ፡ እስመ ፡ ለእግዚአ ፡ መናፍስት ፡ ተርእየ ፡ ብርሃኑ ፡ ለገጸ ፡ ቅዱሳን ፡ ወጻድቃን ፡ ወኅሩያን ። ወነገሥት ፡ አዚዛን ፡ በውእቱ ፡ ጊዜ ፡ ይትኃጐሉ ፡ ወይትወሀቡ ፡ ውስተ ፡ እደ ፡ ጻድቃን ፡ ወቅዱሳን ። ወእምህየ ፡ አልቦ ፡ ዘያስተምህር ፡ ኀበ ፡ እግዚአ ፡ መናፍስት ፡ እስመ ፡ ተወድአ ፡ እንቲአሆሙ ፡ ሕይወት ።
=== chapter 39 ===
ወይከውን ፡ በዝንቱ ፡ መዋዕል ፡ ይወርዱ ፡ ደቂቅ ፡ ኅሩያን ፡ ወቅዱሳን ፡ እምልዑላን ፡ ሰማያት ፡ ወ፩ ፡ ይከውን ፡ ዘርኦሙ ፡ ምስለ ፡ ውሉደ ፡ ሰብእ ። በውእቱ ፡ መዋዕል ፡ ነሥአ ፡ ሄኖክ ፡ መጻሕፍተ ፡ ቅንዐት ፡ ወመዐት ፡ ወመጻሕፍተ ፡ ጒጒዓ ፡ ወሀውክ ፡ ወምሕረት ፡ ኢይከውን ፡ ላዕሌሆሙ ፡ ይቤ ፡ እግዚአ ፡ መናፍስት ። ወበውእቱ ፡ ጊዜ ፡ መሠጠኒ ፡ ደመና ፡ ወዐውሎ ፡ ነፋስ ፡ እምገጻ ፡ ለምድር ፡ ወአንበረኒ ፡ ውስተ ፡ ጽንፈ ፡ ሰማያት ። ወበህየ ፡ ርኢኩ ፡ ራእየ ፡ ካልአ ፡ ማኅደሪሆሙ ፡ ለጻድቃን ፡ ወምስካባቲሆሙ ፡ ለቅዱሳን ። በህየ ፡ ርእያ ፡ አዕይንትየ ፡ ማኅደሪሆሙ ፡ ምስለ ፡ መላእክት ፡ ወምስካባቲሆሙ ፡ ምስለ ፡ ቅዱሳን ፡ ወይስእሉ ፡ ወያስተበቊዑ ፡ ወይጼልዩ ፡ በእንተ ፡ ውሉደ ፡ ሰብእ ፡ ወጽድቅ ፡ ከመ ፡ ማይ ፡ ይውሕዝ ፡ በቅድሜሆሙ ፡ ወምሕረት ፡ ከመ ፡ ጠል ፡ ውስተ ፡ ምድር ፤ ከመዝ ፡ ውእቱ ፡ ማእከሎሙ ፡ ለዓለመ ፡ ዓለም ። ወበውእቱ ፡ መዋዕል ፡ ርእያ ፡ አዕይንትየ ፡ መካነ ፡ ኅሩያን ፡ ዘጽድቅ ፡ ወዘሃይማኖት ፡ ወጽድቅ ፡ ይከውን ፡ በመዋዕሊሆሙ ፡ ወጻድቃን ፡ ወኅሩያን ፡ ኊልቊ ፡ አልቦሙ ፡ ቅድሜሁ ፡ ለዓለመ ፡ ዓለም ። ወርኢኩ ፡ ማኅደሪሆሙ ፡ መትሕተ ፡ አክናፈ ፡ እግዚአ ፡ መናፍስት ፡ ወኲሎሙ ፡ ጻድቃን ፡ ወኅሩያን ፡ በቅድሜሁ ፡ ይትለሐዩ ፡ ከመ ፡ ብርሃነ ፡ እሳት ፡ ወአፉሆሙ ፡ ይመልእ ፡ በረከተ ፡ ወከናፍሪሆሙ ፡ ይሴብሑ ፡ ስሞ ፡ ለእግዚአ ፡ መናፍስት ፡ ወጽድቅ ፡ ቅድሜሁ ፡ ኢየኀልቅ ። ህየ ፡ ፈቀድኩ ፡ እኅድር ፡ ወፈተወቶ ፡ ነፍስየ ፡ ለውእቱ ፡ ማኅደር ፡ በህየ ፡ ኮነ ፡ ክፍልየ ፡ ቅድመ ፡ እስመ ፡ ከመዝ ፡ ጸንዐ ፡ በእንቲአየ ፡ በቅድመ ፡ እግዚአ ፡ መናፍስት ። ወበውእቶን ፡ መዋዕል ፡ ሰባሕኩ ፡ ወአልዓልኩ ፡ ስሞ ፡ ለእግዚአ ፡ መናፍስት ፡ በረከተ ፡ ወስብሐተ ፡ እስመ ፡ ውእቱ ፡ አጽንዐኒ ፡ በበረከት ፡ ወስብሐት ፡ በከመ ፡ ፈቃዱ ፡ ለእግዚአ ፡ መናፍስት ። ወጒንዱየ ፡ ርእያ ፡ አዕይንትየ ፡ በውእቱ ፡ መካን ፡ ወባረክዎ ፡ እንዘ ፡ እብል ፡ ቡሩክ ፡ ውእቱ ፡ ወይትባረክ ፡ እምቅድም ፡ ወእስከ ፡ ለዓለም ። ወበቅድሜሁ ፡ አቦ ፡ ማኅለቅት ፡ ውእቱ ፡ ያአምር ፡ ዘእንበለ ፡ ይትፈጠር ፡ ዓለም ፡ ምንት ፡ ውእቱ ፡ ዓለም ፡ ወለትውልደ ፡ ትውልድ ፡ ዘይከውን ። ይባርኩከ ፡ እለ ፡ ኢይነውሙ ፡ ወይቀውሙ ፡ በቅድመ ፡ ስብሐቲከ ፡ ወይባርኩከ ፡ ወይሴብሑ ፡ ወያሌዕሉ ፡ እንዘ ፡ ይብሉ ፡ ቅዱስ ፡ ቅዱስ ፡ ቅዱስ ፡ እግዚአ ፡ መናፍስት ፡ ይመልእ ፡ ምድረ ፡ መንፈሳት ። ወበህየ ፡ ርእያ ፡ አዕይንትየ ፡ ኲሎ ፡ እለ ፡ ኢይነውሙ ፡ ይቀውሙ ፡ ቅድሜሁ ፡ ወይባርኩ ፡ ወይብሉ ፡ ቡሩክ ፡ አንተ ፡ ወቡሩክ ፡ ስሙ ፡ ለእግዚእ ፡ ለዓለመ ፡ ዓለም ። ወተወለጠ ፡ ገጽየ ፡ እስከ ፡ ስእንኩ ፡ ነጽሮ ።
=== chapter 40 ===
ወርኢኩ ፡ እምድኅረዝ ፡ አእላፈ ፡ አእላፍት ፡ ወትእልፊተ ፡ ትእልፊት ፡ ወአልቦሙ ፡ ኊልቊ ፡ ወሐሳብ ፡ እለ ፡ ይቀውሙ ፡ ቅድመ ፡ ስብሐተ ፡ እግዚአ ፡ መናፍስት ። ርኢኩ ፡ ወበ፬ክነፊሁ ፡ ለእግዚአ ፡ መናፍስት ፡ ርኢኢኩ ፡ ፬ገጸ ፡ ካልአ ፡ እምእለ ፡ ይቀውሙ ፡ ወአስማቲሆሙ ፡ አእመርኩ ፡ ዘአይድዐኒ ፡ አስማቲሆሙ ፡ መልአክ ፡ ዘመጽአ ፡ ምስሌየ ፡ ወኲሎ ፡ ኅቡኣተ ፡ አርአየኒ ። ወሰማዕኩ ፡ ቃሎሙ ፡ ለእልኩ ፡ ፬ገጽ ፡ እንዘ ፡ ይሴብሑ ፡ ቅድመ ፡ እግዚአ ፡ ስብሐት ። ቃል ፡ ቀዳማዊ ፡ ይባርኮ ፡ ለእግዚአ ፡ መናፍስት ፡ ለዓለመ ፡ ዓለም ። ወቃለ ፡ ካልአ ፡ ሰማዕኩ ፡ እንዘ ፡ ይባርኮ ፡ ለኅሩይ ፡ ወለኅሩያን ፡ እለ ፡ ስቁላን ፡ በእግዚአ ፡ መናፍስት ። ወሣልሰ ፡ ቃለ ፡ ሰማዕኩ ፡ እንዘ ፡ ይስእሉ ፡ ወይጼልዩ ፡ በእንተ ፡ እለ ፡ የኀድሩ ፡ ውስተ ፡ የብስ ፡ ወያስተበቊዑ ፡ በስሙ ፡ ለእግዚአ ፡ መናፍስት ። ወቃለ ፡ ራብዐ ፡ ሰማዕኩ ፡ እንዘ ፡ ይሰድዶሙ ፡ ለሰይጣናት ፡ ወኢየኀድጎሙ ፡ ይባኡ ፡ ኀበ ፡ እግዚአ ፡ መናፍስት ፡ ከመ ፡ ያስተዋድይዎሙ ፡ ለእለ ፡ የኀድሩ ፡ ዲበ ፡ የብስ ። ወእምድኅረዝ ፡ ተስእልክዎ ፡ ለመልአከ ፡ ሰላም ፡ ዘየሐውር ፡ ምስሌየ ፡ ዘውእቱ ፡ አርአየኒ ፡ ኲሎ ፡ ዘኅቡእ ፡ ወእቤሎ ፡ መኑ ፡ ውእቶሙ ፡ እሉ ፡ ፬ገጽ ፡ ዘርኢኩ ፡ ወእለ ፡ ሰማዕኩ ፡ ቃሎሙ ፡ ወጸሐፍክዎሙ ። ወይቤለኒ ፡ ዝቀዳማዊ ፡ ውእቱ ፡ መሐሪ ፡ ወርኁቀ ፡ መዓት ፡ ቅዱስ ፡ ሚካኤል ፤ ወካልእ ፡ ዘዲበ ፡ ኲሉ ፡ ሕማም ፡ ወዲበ ፡ ኲሉ ፡ ቊስል ፡ ዘውሉደ ፡ ሰብእ ፡ ውእቱ ፡ ሩፋኤል ፤ ወሣልስ ፡ ዘዲበ ፡ ኲሉ ፡ ኃይል ፡ ውእቱ ፡ ቅዱስ ፡ ገብርኤል ፤ ወራብዕ ፡ ዘዲበ ፡ ንስሓ ፡ ወለተስፋ ፡ እለ ፡ ይወርሱ ፡ ሕይወተ ፡ ዘለዓለም ፡ ውእቱ ፡ ፋኑኤል ። ወእሉ ፡ ፬መላእክቲሁ ፡ ለእግዚአብሔር ፡ ልዑል ፡ ወ፬ቃለ ፡ ሰማዕኩ ፡ በውእቶን ፡ መዋዕል ።
=== chapter 41 ===
ወእምድኅረዝ ፡ ርኢኩ ፡ ኲሎ ፡ ኅብኣቲሆሙ ፡ ለሰማያት ፡ ወመንግሥት ፡ እፎ ፡ ትትከፈል ፡ ወተግባረ ፡ ሰብእ ፡ ከመ ፡ በመዳልው ፡ ይደለዉ ። በህየ ፡ ርኢኩ ፡ ማኅደሪሆሙ ፡ ለኅሩያን ፡ ወማኅደሪሆሙ ፡ ለቅዱሳን ፡ ወርእያ ፡ አዕይንትየ ፡ በህየ ፡ ኲሎሙ ፡ ኃጥኣን ፡ እንዘ ፡ ይሰደዱ ፡ እምህየ ፡ እለ ፡ ይክህድዎ ፡ ለስመ ፡ እግዚአ ፡ መናፍስት ፡ ወይስሕብዎሙ ፡ ወቀዊም ፡ አልቦሙ ፡ በመቅሠፍት ፡ እንተ ፡ ትወጽእ ፡ እምእግዚአ ፡ መናፍስት ። ወበህየ ፡ ርእያ ፡ አዕይንትየ ፡ ኅቡአተ ፡ መባርቅት ፡ ወነጐድጓድ ፡ ወኅቡአተ ፡ ነፋሳት ፡ እፎ ፡ ይትከፈሉ ፡ ከመ ፡ ይንፍሑ ፡ ዲበ ፡ ምድር ፡ ወኅቡአተ ፡ ደመናት ፡ ወጠል ፡ ወበህየ ፡ ርኢኩ ፡ እምኀበ ፡ ይወጽእ ፡ በውእቱ ፡ መካን ፡ ወእምህየ ፡ ይጸግቡ ፡ ፀበለ ፡ ምድር ። ወበህየ ፡ ርኢኩ ፡ መዛግብተ ፡ ዕፅዋነ ፡ ወእምኔሆሙ ፡ ይትከፈሉ ፡ ነፋሳት ፡ ወመዝገበ ፡ በረድ ፡ ወመዝገበ ፡ ጊሜ ፡ ወዘደመናት ፡ ወደመና ፡ ዚአሁ ፡ እምላዕለ ፡ ምድር ፡ የኅድር ፡ እምቅድመ ፡ ዓለም ። ወርኢኩ ፡ መዛግብተ ፡ ፀሐይ ፡ ወዘወርኅ ፡ እምአይቴ ፡ ይወጽኡ ፡ ወአይቴ ፡ ይገብኡ ፡ ወግብአቶሙ ፡ ስብሕ ፤ ወእፎ ፡ ይከብር ፡ ፩እምካልኡ ፡ ወምኋሮሙ ፡ ብዑል ፡ ወኢየኀልፉ ፡ ምኋረ ፡ ወኢይዌስኩ ፡ ወኢየሐፅፁ ፡ እምኋረ ፡ ዚአሆሙ ፡ ወሃይማኖቶሙ ፡ የዐቅቡ ፡ ፩ ፡ ምስለ ፡ ካልኡ ፡ በመሐላ ፡ ዘነበሩ ። ወይወፅእ ፡ ቅድመ ፡ ፀሐይ ፡ ወይገብር ፡ ፍኖቶ ፡ በትእዛዘ ፡ እግዚአ ፡ መናፍስት ፡ ወይጸንዕ ፡ ስሙ ፡ ለዓለመ ፡ ዓለም ። ወእምድኅረዝ ፡ ፍኖት ፡ ዘኅቡእ ፡ ወዘክሡት ፡ ዘወርኅ ፡ ወምኋረ ፡ ፍኖቱ ፡ ይፌጽም ፡ በውእቱ ፡ መካን ፡ በመዓልት ፡ ወበሌሊት ፡ ፩ ፡ ለካልኡ ፡ ይኔጽር ፡ በቅድመ ፡ እግዚአ ፡ መናፍስት ፡ ወየአኲቱ ፡ ወይሴብሑ ፡ ወኢያዐርፉ ፡ እስመ ፡ አኰቴቶሙ ፡ ዕረፍት ፡ ውእቱ ፡ ሎሙ ። እስመ ፡ ለፀሐይ ፡ ብሩህ ፡ ብዙኅ ፡ ምያጤ ፡ ቦቱ ፡ ለበረከት ፡ ወለመርገም ፡ ወምርዋጸ ፡ ፍኖቱ ፡ ለወርኅ ፡ ለጻድቃን ፡ ብርሃን ፡ ወለኃጥኣን ፡ ጽልመት ፡ በስሙ ፡ ለእግዚእ ፡ ዘፈጠረ ፡ ማእከለ ፡ ብርሃን ፡ ወማእከለ ፡ ጽልመት ፡ ወከፈለ ፡ መንፈሶሙ ፡ ለሰብእ ፡ ወአጽንዐ ፡ መንፈሶሙ ፡ ለጻድቃን ፡ በስመ ፡ ጽድቀ ፡ ዚአሁ ። እስመ ፡ መልአክ ፡ ኢይከልእ ፡ ወሥልጣን ፡ ኢይክል ፡ ከሊአ ፡ እስመ ፡ መኰንን ፡ ለኲሎሙ ፡ ይሬኢ ፡ ወእሎንተ ፡ ኲሎሙ ፡ በቅድሜሁ ፡ ውእቱ ፡ ይኴንን ።
=== chapter 42 ===
ጥበብ ፡ መካነ ፡ ኢረከበት ፡ ኀበ ፡ ተኀድር ፡ ወሀለወት ፡ ማኅደራ ፡ ውስተ ፡ ሰማያት ። መጽአት ፡ ጥበብ ፡ ከመ ፡ ትኅድር ፡ ውስተ ፡ ውሉደ ፡ ሰብእ ፡ ወኢረከበት ፡ ማኅደረ ፤ ጥበብ ፡ ውስተ ፡ መካና ፡ ገብአት ፡ ወተፅዕነት ፡ ማእከለ ፡ መላእክት ። ወዐመፃ ፡ ወፅአት ፡ እመዛግብቲሃ ፡ ዘኢፈቀደት ፡ ረከበት ፡ ወኀደረት ፡ ውስቴቶሙ ፡ ከመ ፡ ዝናም ፡ በበድው ፡ ወከመ ፡ ጠል ፡ በምድር ፡ ጽምእት ።
=== chapter 43 ===
ወርኢኩ ፡ ካልአ ፡ መባርቅተ ፡ ወከዋክብተ ፡ ሰማይ ፡ ወርኢኩ ፡ ከመ ፡ ይጼውዖሙ ፡ ለኲሎሙ ፡ በበአስማቲሆሙ ፡ ወይሰምዕዎ ። ወርኢክዎ ፡ በመዳልወ ፡ ጽድቅ ፡ ከመ ፡ ይደለዉ ፡ በብርሃናቲሆሙ ፡ በራኅበ ፡ መካናቲሆሙ ፡ ወዕለተ ፡ ኩነቶሙ ፡ ወሚጠቶሙ ፤ መብረቅ ፡ መብረቀ ፡ ይወልድ ፤ ወሚጠቶሙ ፡ በኊልቈ ፡ መላእክት ፡ ወሃይማኖቶሙ ፡ የዐቅቡ ፡ በበይናቲሆሙ ። ወተስእልክዎ ፡ ለመልአክ ፡ ዘየሐውር ፡ ምስሌየ ፡ ዘአርአየኒ ፡ ዘኅቡእ ፡ ምንት ፡ እሎንቱ ። ወይቤለኒ ፡ ምስለ ፡ ዘዚአሆሙ ፡ አርአየከ ፡ እግዚአ ፡ መናፍስት ፡ እሉ ፡ እሙንቱ ፡ አስማቲሆሙ ፡ ለጻድቃን ፡ እለ ፡ የኅድሩ ፡ ዲበ ፡ የብስ ፡ ወየአምኑ ፡ በስሙ ፡ ለእግዚአ ፡ መናፍስት ፡ ለዓለመ ፡ ዓለም ።
=== chapter 44 ===
ወካልኣተ ፡ ርኢኩ ፡ በእንተ ፡ መብረቅ ፡ እፎ ፡ ይቀውሙ ፡ እምከዋክብት ፡ ወይከውኑ ፡ መብረቀ ፡ ወኢይክሉ ፡ ኀዲገ ፡ ምስሌሆሙ ።
=== chapter 45 ===
ወዝካልእ ፡ ምሳሌ ፡ ዲበ ፡ እለ ፡ ይክህዱ ፡ ስሞ ፡ ለማኅደረ ፡ ቅዱሳን ፡ ወለእግዚአ ፡ መናፍስት ። እሰማየ ፡ የዐርጉ ፡ ወኢምድረ ፡ ይበጽሑ ፡ ከመዝ ፡ ይከውን ፡ ክፍለ ፡ ኃጥኣን ፡ እለ ፡ ይክሕዱ ፡ ስሞ ፡ ለእግዚአ ፡ መናፍስት ፡ እለ ፡ ከመዝ ፡ ይትዐቀብ ፡ ለዕለተ ፡ ሥራኅ ፡ ወምንዳቤ ። በይእቲ ፡ ዕለት ፡ ይነብር ፡ በመንበረ ፡ ስብሐት ፡ ኅሩይ ፡ ወየኀሪ ፡ ምግባሪሆሙ ፡ ወምዕራፎሙ ፡ ኊልቊ ፡ አልቦሙ ፡ ወመንፈሶሙ ፡ በማእከሎሙ ፡ ትጸንዕ ፡ ሶበ ፡ ርእይዎ ፡ ለኅሩየ ፡ ዚአየ ፡ ወለእለ ፡ ሰከዩ ፡ ስምየ ፡ ቅዱሰ ፡ ወስቡሐ ። ወበይእቲ ፡ ዕለት ፡ አነብሮ ፡ በማእከሎሙ ፡ ለኅሩየ ፡ ዚአየ ፡ ወእዌልጣ ፡ ለሰማይ ፡ ወእገብራ ፡ ለበረከት ፡ ወብርሃን ፡ ዘለዓለም ። ወእዌልጣ ፡ ለየብስ ፡ ወእገብራ ፡ ለበረከት ፡ ወለኅሩያነ ፡ ዚአየ ፡ አነብሮሙ ፡ ውስቴታ ፡ ወእለ ፡ ይገብሩ ፡ ኀጢአተ ፡ ወጌጋየ ፡ እይከይዱ ፡ ውስቴታ ። እስመ ፡ አነ ፡ ርኢክዎሙ ፡ ወአጽገብክዎሙ ፡ በሰላም ፡ ለጻድቃንየ ፡ ወአንበርክዎሙ ፡ ቅድሜየ ፡ ወቀርበት ፡ ኀቤየ ፡ ኲነኔ ፡ ለኃጥኣን ፡ ከመ ፡ ኣህጒሎሙ ፡ እምገጸ ፡ ምድር ።
=== chapter 46 ===
ወበህየ ፡ ርኢኩ ፡ ዘሎቱ ፡ ርእሰ ፡ መዋዕል ፡ ወርእሱ ፡ ከመ ፡ ፀምር ፡ ጸዐዳ ፡ ወምስሌሁ ፡ ካልእ ፡ ዘገጹ ፡ ከመ ፡ ርእየተ ፡ ሰብእ ፡ ወምሉእ ፡ ጸጋ ፡ ገጹ ፡ ከመ ፡ ፩እመላእክት ፡ ቅዱሳን ። ወተስእልክዎ ፡ ለ፩እመላእክት ፡ ዘየሐውር ፡ ምስሌየ ፡ ወኲሎ ፡ ኅቡኣተ ፡ ዘአርአየኒ ፡ በእንተ ፡ ዝኩ ፡ ወልደ ፡ ሰብእ ፡ መኑ ፡ ውእቱ ፡ ወእምአይቴ ፡ ይከውን ፡ ውእቱ ፡ በእንተ ፡ ምንት ፡ ምስለ ፡ ርእሰ ፡ መዋዕል ፡ የሐውር ። ወአውሥአኒ ፡ ወይቤለኒ ፡ ዝንቱ ፡ ውእቱ ፡ ወልደ ፡ ሰብእ ፡ ዘሎቱ ፡ ኮነ ፡ ጽድቅ ፡ ወጽድቅ ፡ ምስሌሁ ፡ ኃደረ ፡ ወኲሎ ፡ መዛግብተ ፡ ዘኅቡእ ፡ ውእቱ ፡ ይከሥት ፡ እስመ ፡ እግዚአ ፡ መናፍስት ፡ ኪያሁ ፡ ኀረየ ፡ ወዘክፍሉ ፡ ኲሎ ፡ ሞአ ፡ በቅድመ ፡ እግዚአ ፡ መናፍስት ፡ በርትዕ ፡ ለዓለም ። ወዝንቱ ፡ ወልደ ፡ ሰብእ ፡ ዘርኢከ ፡ ያነሥኦሙ ፡ ለነገሥት ፡ ወለኀያላን ፡ እምስካባቲሆሙ ፡ ወለጽኑዓን ፡ እመናብርቲሆሙ ፡ ወይፈትሕ ፡ ልጓማተ ፡ ጽኑዓን ፡ ወያደቅቅ ፡ አስናነ ፡ ኃጥኣን ። ወይገፈትዖሙ ፡ ለነገሥት ፡ እመናብርቲሆሙ ፡ ወእመንግሥቶሙ ፡ እስመ ፡ እያሌዕልዎ ፡ ወኢይሴብሕዎ ፡ ወኢይገንዩ ፡ እምአይቴ ፡ ተውህበት ፡ ሎሙ ፡ መንግሥት ። ወገጸ ፡ ጽኑዓን ፡ ይገፈትዕ ፡ ወይመልኦሙ ፡ ኀፍረት ፡ ወጽልመት ፡ ይከውኖሙ ፡ ማኅደሪሆሙ ፡ ወዕፄያት ፡ ይከውኖሙ ፡ ምስካቦሙ ፡ ወኢይሴፈዉ ፡ ከመ ፡ ይትነሥኡ ፡ እምስካባቲሆሙ ፡ እስመ ፡ ኢያሌዕሉ ፡ ስሞ ፡ ለእግዚአ ፡ መናፍስት ። ወእሙንቱ ፡ ኮኑ ፡ እለ ፡ ይኴንኑ ፡ ከዋክብተ ፡ ሰማይ ፡ ወያሌዕሉ ፡ እደዊሆሙ ፡ ውስተ ፡ ልዑል ፡ ወይከይዱ ፡ ዲበ ፡ የብስ ፡ ወየኀድሩ ፡ ውስቴታ ፡ ወኲሉ ፡ ተግባሮሙ ፡ ዐመፃ ፡ ወያርእዩ ፡ ተግባሮሙ ፡ ዐመፃ ፡ ወኀይሎሙ ፡ ዲበ ፡ ብዕሎሙ ፡ ወሃይማኖቶሙ ፡ ኮነ ፡ ለአማልክት ፡ እለ ፡ ገብሩ ፡ በእደዊሆሙ ፡ ወክሕድዎ ፡ ለስሙ ፡ ለእግዚአ ፡ መናፍስት ። ወይሰደዱ ፡ እምአብያተ ፡ ምስትጉቡአ ፡ ዚአሁ ፡ ወለመሃይምናን ፡ እለ ፡ ስቁላን ፡ በስሙ ፡ ለእግዚአ ፡ መናፍስት ።
=== chapter 47 ===
ወበውእቱ ፡ መዋዕል ፡ ዐርገት ፡ ጸሎተ ፡ ጻድቃን ፡ ወደመ ፡ ጻድቅ ፡ እምነ ፡ ምድር ፡ ቅድመ ፡ እግዚአ ፡ መናፍስት ። በእሉ ፡ መዋዕል ፡ የኀብሩ ፡ ቅዱሳን ፡ እለ ፡ ይነብሩ ፡ መልዕልተ ፡ ሰማያት ፡ በ፩ቃል ፡ ወያስተበቊዑ ፡ ወይጼልዩ ፡ ወይሴብሑ ፡ ወያአኲቱ ፡ ወይባርኩ ፡ ለስሙ ፡ ለእግዚአ ፡ መናፍስት ፡ በእንተ ፡ ደመ ፡ ጻድቃን ፡ ዘተክዕወ ፡ ወጸሎቶሙ ፡ ለጻድቃን ፡ ከመ ፡ ኢትፀራእ ፡ በቅድመ ፡ እግዚአ ፡ መናፍስት ፡ ከመ ፡ ይትገበር ፡ ሎሙ ፡ ኲነኔ ፡ ወትዕግሥት ፡ ኢይኩን ፡ ሎሙ ፡ ለዓለም ። ወበእማንቱ ፡ መዋዕል ፡ ርኢክዎ ፡ ለርእሰ ፡ መዋዕል ፡ ሶበ ፡ ነበረ ፡ በመንበረ ፡ ስብሐቲሁ ፡ ወመጻሕፍተ ፡ ሕያዋን ፡ በቅድሜሁ ፡ ተከሥቱ ፡ ወኲሉ ፡ ኀይሉ ፡ ዘመልዕልተ ፡ ሰማያት ፡ ወዐውደ ፡ ዚአሁ ፡ ይቀውሙ ፡ ቅድሜሁ ። ወልቦሙ ፡ ለቅዱሳን ፡ ትመልእ ፡ ፍሥሐ ፡ እስመ ፡ በጽሐ ፡ ኊልቋ ፡ ለጽድቅ ፡ ወጸሎቶሙ ፡ ለጻድቃን ፡ ተሰምዐ ፡ ወደሙ ፡ ለጻድቅ ፡ በቅድመ ፡ እግዚአ ፡ መናፍስት ፡ ተፈቅደ ።
=== chapter 48 ===
ወበውእቱ ፡ መካን ፡ ርኢኩ ፡ ነቅዐ ፡ ጽድቅ ፡ ወኢይትኌለቊ ፡ ወበዐውዱ ፡ የዐውዶ ፡ ብዙኅ ፡ አንቅዕተ ፡ ጥበብ ፡ ወኲሎሙ ፡ ጽሙኣን ፡ ይሰትዩ ፡ እምኔሆሙ ፡ ወይትመልኡ ፡ ጥበበ ፡ ወማኅደሪሆሙ ፡ ምስለ ፡ ጻድቃን ፡ ወቅዱሳን ፡ ወኅሩያን ። ወበይእቲ ፡ ሰዓት ፡ ተጸውዐ ፡ ዝኩ ፡ ወልደ ፡ ሰብእ ፡ በኀበ ፡ እግዚአ ፡ መናፍስት ፡ ወስሙ ፡ መቅድመ ፡ ርእሰ ፡ መዋዕል ። ወዘእንበለ ፡ ይትፈጠር ፡ ፀሐይ ፡ ወተአምር ፡ ዘእንበለ ፡ ይትገበሩ ፡ ከዋክብተ ፡ ሰማይ ፡ ወስሙ ፡ ተጸውዐ ፡ በቅድመ ፡ እግዚአ ፡ መናፍስት ። ውእቱ ፡ ይከውን ፡ በትረ ፡ ለጻድቃን ፡ ወቅዱሳን ፡ ከመ ፡ ቦቱ ፡ ይትመርጐዙ ፡ ወኢይደቁ ፡ ወውእቱ ፡ ብርሃነ ፡ አሕዛብ ፡ ወውእቱ ፡ ይከውን ፡ ተስፋ ፡ ለእለ ፡ የሐሙ ፡ በልቦሙ ። ይወድቁ ፡ ወይሰግዱ ፡ ቅድሜሁ ፡ ኲሎሙ ፡ እለ ፡ የኀድሩ ፡ ዲበ ፡ የብስ ፡ ወይባርክዎ ፡ ወይሴብሕዎ ፡ ወይዜምሩ ፡ ሎቱ ፡ ለስመ ፡ እግዚአ ፡ መናፍስት ። ወበእንተዝ ፡ ኮነ ፡ ኅሩየ ፡ ወኅቡአ ፡ በቅድሜሁ ፡ እምቅድመ ፡ ይትፈጠር ፡ ዓለም ፡ ወእስከ ፡ ለዓለም ፡ በቅድሜሁ ። ወከሠቶ ፡ ለቅዱሳን ፡ ወለጻድቃን ፡ ጥበቡ ፡ ለእግዚአ ፡ መናፍስት ፡ እስመ ፡ ዐቀበ ፡ ክፍሎሙ ፡ ለጻድቃን ፡ እስመ ፡ ጸልእዎ ፡ ወመነንዎ ፡ ለዝ ፡ ዓለም ፡ ዘዐመፃ ፡ ወኲሎ ፡ ምግባሮ ፡ ወፍናዊሁ ፡ ጸልኡ ፡ በስሙ ፡ ለእግዚአ ፡ መናፍስት ፡ እስመ ፡ በስመ ፡ ዚአሁ ፡ ይድኅኑ ፡ ወፈቃዴ ፡ ኮነ ፡ ለሕይወቶሙ ። ወበውእቱ ፡ መዋዕል ፡ ኮኑ ፡ ትሑታነ ፡ ገጽ ፡ ነገሥተ ፡ ምድር ፡ ወጽኑዓን ፡ እለ ፡ ይእኅዝዋ ፡ ለየብስ ፡ በእንተ ፡ ምግባረ ፡ እደዊሆሙ ፡ እስመ ፡ በዕለተ ፡ ጻዕቆሙ ፡ ወጻሕቦሙ ፡ ኢያድኅኑ ፡ ነፍሶሙ ። ወውስተ ፡ እደዊሆሙ ፡ ለኅሩያነ ፡ ዚአየ ፡ እወድዮሙ ፡ ከመ ፡ ሣዕር ፡ ውስተ ፡ እሳት ፡ ወከመ ፡ ዐረር ፡ ውስተ ፡ ማይ ፡ ከመዝ ፡ ይውዕዩ ፡ እምቅድመ ፡ ገጸ ፡ ጻድቃን ፡ ወይሰጠሙ ፡ እምቅድመ ፡ ገጸ ፡ ቅዱሳን ፡ ወኢይትረከብ ፡ ሎሙ ፡ አሰር ። ወበዕለተ ፡ ጻሕበ ፡ ዚአሆሙ ፡ ዕረፍት ፡ ትከውን ፡ በዲበ ፡ ምድር ፡ ወበቅድሜሁ ፡ ይወድቁ ፡ ወኢይትነሥኡ ፡ ወአልቦ ፡ ዘይትሜጠዎሙ ፡ በእደዊሁ ፡ ወያነሥኦሙ ፡ እስመ ፡ ክሕድዎ ፡ ለእግዚአ ፡ መናፍስት ፡ ወለመሲሑ ፡ ወይትባረክ ፡ ስሙ ፡ ለእግዚአ ፡ መናፍስት ።
=== chapter 49 ===
እስመ ፡ ጥበብ ፡ ተክዕወ ፡ ከመ ፡ ማይ ፡ ወስብሐት ፡ ኢተኀልቅ ፡ ቅድሜሁ ፡ ለዓለመ ፡ ዓለም ። እስመ ፡ ኀያል ፡ ውእቱ ፡ በኲሉ ፡ ኅቡኣተ ፡ ጽድቅ ፡ ወዐመፃ ፡ ከመ ፡ ጽላሎት ፡ የኀልፍ ፡ ወምቅዋም ፡ አልቦ ፡ እስመ ፡ ቆመ ፡ ኅሩይ ፡ በቅድመ ፡ እግዚአ ፡ መናፍስት ፡ ወስብሐቲሁ ፡ ለዓለመ ፡ ዓለም ፡ ወኀይሉ ፡ ለትውልደ ፡ ትውልድ ። ወቦቱ ፡ የኀድር ፡ መንፈሰ ፡ ጥበብ ፡ ወመንፈሰ ፡ ዘያሌቡ ፡ ወመንፈሰ ፡ ትምህርት ፡ ወኀይል ፡ ወመንፈሰ ፡ እለ ፡ ኖሙ ፡ በጽድቅ ። ወውእቱ ፡ ይኴንን ፡ ዘኅቡኣት ፡ ወነገረ ፡ በክ ፡ እልቦ ፡ ዘይክል ፡ ብሂለ ፡ በቅድሜሁ ፡ እስመ ፡ ኅሩይ ፡ ውእቱ ፡ በቅድመ ፡ እግዚአ ፡ መናፍስት ፡ በከመ ፡ ውእቱ ፡ ፈቀደ ።
=== chapter 50 ===
ወበእማንቱ ፡ መዋዕል ፡ ሚጠት ፡ ትከውን ፡ ለቅዱሳን ፡ ወለኅሩያን ፡ ወብርሃነ ፡ መዋዕ ፡ ዲቤሆሙ ፡ የኀድር ፡ ወስብሐት ፡ ወክብር ፡ ለቅዱሳን ፡ ይትመየጥ ። ወበዕለት ፡ እንተ ፡ ጻሕብ ፡ ትዘገብ ፡ እኪት ፡ ላዕለ ፡ ኃጥኣን ፡ ወይመውኡ ፡ ጻድቃን ፡ በስሙ ፡ ለእግዚአ ፡ መናፍስት ፡ ወያርኢ ፡ ለካልኣን ፡ ከመ ፡ ይነስሑ ፡ ወይኅድጉ ፡ ምግባረ ፡ እደዊሆሙ ። ወኢይከውን ፡ ሎሙ ፡ ክብር ፡ በቅድመ ፡ እግዚአ ፡ መናፍስት ፡ ወበስሙ ፡ ይድኅኑ ፡ ወእግዚአ ፡ መናፍስት ፡ ይምሕሮሙ ፡ እስመ ፡ ብዙኅ ፡ ምሕረቱ ። ወጻድቅ ፡ ውእቱ ፡ በኲነኔሁ ፡ ወበቅድመ ፡ ስብሐቲሁ ፡ ወዐመፃ ፡ እትቀውም ፡ በኲነኔሁ ፡ ዘኢይኔስሕ ፡ በቅድሜሁ ፡ ይትሐጐል ። ወእምይእዜሰ ፡ ኢይምሕሮሙ ፡ ይቤ ፡ እግዚአ ፡ መናፍስት ።
=== chapter 51 ===
ወበእማንቱ ፡ መዋዕል ፡ ታገብእ ፡ ምድር ፡ ማኅፀንታ ፡ ወሲኦል ፡ ታገብእ ፡ ማኅፀንታ ፡ ዘተመጠወት ፡ ወኀጒል ፡ ያገብእ ፡ ዘይፈዲ ። ወየኀሪ ፡ ጻድቃነ ፡ ወቅዱሳነ ፡ እምኔሆሙ ፡ እስመ ፡ ቀርበት ፡ ዕለት ፡ ከመ ፡ እሙንቱ ፡ ይድኀኑ ። ወኅሩይ ፡ በእማንቱ ፡ መዋዕል ፡ ዲበ ፡ መንበሩ ፡ ይነብር ፡ ወኲሉ ፡ ኅቡኣተ ፡ ጥበብ ፡ እምሕሊና ፡ አፉሁ ፡ ይወፅእ ፡ እስመ ፡ እግዚአ ፡ መናፍስት ፡ ወሀቦ ፡ ወሰብሖ ። ወበእማንቱ ፡ መዋዕል ፡ ይዘፍኑ ፡ አድባር ፡ ከመ ፡ ሐራጊት ፡ ወአውግርኒ ፡ ያንፈርዕፅ ፡ ከመ ፡ መሐስዕ ፡ ጽጉባነ ፡ ሐሊብ ፡ ወይከውኑ ፡ ኲሎሙ ፡ መላእክተ ፡ በሰማይ ። ገጾሙ ፡ ይበርህ ፡ በፍሥሐ ፡ እስመ ፡ በእማንቱ ፡ መዋዕል ፡ ኅሩይ ፡ ተንሥአ ፡ ወምድር ፡ ትትፌሣሕ ፡ ወጻድቃን ፡ ዲቤሃ ፡ የኀድሩ ፡ ወኅሩያን ፡ ውስቴታ ፡ የሐውሩ ፡ ወያንሶስዉ ።
=== chapter 52 ===
ወእምድኅረ ፡ እማንቱ ፡ መዋዕል ፡ በውእቱ ፡ መካን ፡ ኀበ ፡ ርኢኩ ፡ ኲሎ ፡ ራእያተ ፡ ዘኅቡእ ፡ እስመ ፡ ተመሠጥኩ ፡ በነኰርኳረ ፡ ነፋስ ፡ ወወሰዱኒ ፡ ውስተ ፡ ዐረብ ። በህየ ፡ ርእያ ፡ አዕይንትየ ፡ ኅቡኣተ ፡ ሰማይ ፡ ኲሎ ፡ ዘይከውን ፡ ሀሎ ፡ በዲበ ፡ ምድር ፡ ደብረ ፡ ሐፂን ፤ ወደብረ ፡ ፀሪቅ ፤ ወደብረ ፡ ብሩር ፤ ወደብረ ፡ ወርቅ ፤ ወደብረ ፡ ነጠብጣብ ፤ ወደብረ ፡ ዐረር ። ወተስእልክዎ ፡ ለመልአክ ፡ ዘየሐውር ፡ ምስሌየ ፡ እንዘ ፡ እብል ፡ ምንት ፡ ውእቱ ፡ እሉ ፡ እሙንቱ ፡ እለ ፡ በኅቡዕ ፡ ርኢኩ ። ወይቤለኒ ፡ እሉ ፡ ኲሎሙ ፡ ዘርኢከ ፡ ለሥልጣነ ፡ መሲሑ ፡ እሙንቱ ፡ ይከውኑ ፡ ከመ ፡ የአዝዝ ፡ ወይትኀየል ፡ ዲበ ፡ ምድር ። ወአውሥአኒ ፡ እንዘ ፡ ይብል ፡ ውእቱ ፡ መልአከ ፡ ሰላም ፡ ጽናሕ ፡ ንስቲተ ፡ ወትሬኢ ፡ ወይትከሠት ፡ ለከ ፡ ኲሉ ፡ ዘኅቡእ ፡ ዘተከለ ፡ እግዚአ ፡ መናፍስት ። ወእሎንቱ ፡ አድባር ፡ ዘርኢከ ፡ ደብረ ፡ ሐፂን ፤ ወደብረ ፡ ፀሪቅ ፤ ወደብረ ፡ ብሩር ፤ ወደብረ ፡ ወርቅ ፤ ወደብረ ፡ ነጠብጣብ ፤ ወደብረ ፡ ዐረር ፤ እሉ ፡ ኲሎሙ ፡ ቅድሜሁ ፡ ለኅሩይ ፡ ይከውኑ ፡ ከመ ፡ መዓረ ፡ ግራ ፡ ዘቅድመ ፡ ገጸ ፡ እሳት ፡ ወከመ ፡ ማይ ፡ ዘይወርድ ፡ እምላዕሉ ፡ ዲበ ፡ እማንቱ ፡ አድባር ፡ ወይከውኑ ፡ ድኩማነ ፡ በቅድመ ፡ እገሪሁ ። ወይከውን ፡ በእማንቱ ፡ መዋዕል ፡ ኢይድኅኑ ፡ ኢበወርቅ ፡ ወኢበብሩር ፡ ወኢይክሉ ፡ ድኂነ ፡ ወጐይየ ። ወኢይከውን ፡ ሐፂን ፡ ለፀብእ ፡ ወኢልብስ ፡ ለድርዐ ፡ እንግድዓ ፡ እይበቊዕ ፡ ብርት ፡ ወኢናዕክ ፡ ኢይበቊዕ ፡ ወኢይትኌለቊ ፡ ወዐረር ፡ እይትፈቀድ ። እሉ ፡ ኲሎሙ ፡ ይትከሐዱ ፡ ወይትኀጐሉ ፡ ሀለዉ ፡ እምገጸ ፡ ምድር ፡ ሶበ ፡ ያስተርኢ ፡ ኅሩይ ፡ በቅድመ ፡ ገጹ ፡ ለአግዚአ ፡ መናፍስት ።
=== chapter 53 ===
ወበህየ ፡ ርእያ ፡ አዕይንትየ ፡ ቈላ ፡ ዕሙቀ ፡ ወርኅው ፡ አፉሁ ፡ ወኲሎሙ ፡ እለ ፡ የኀድሩ ፡ ዲበ ፡ የብስ ፡ ወባሕር ፡ ወደሰያት ፡ አምኃ ፡ ወአስትዓ ፡ ወጋዳ ፡ ያመጽኡ ፡ ሎቱ ፡ ወዝክቱሰ ፡ ቈላ ፡ ዕሙቅ ፡ ኢይመልእ ። ወጌጋየ ፡ እደዊሆሙ ፡ ይገብሩ ፡ ወኲሎ ፡ ዘይጻምዉ ፡ ለጌጋይ ፡ ኃጥአን ፡ ይበልዑ ፡ ወእምገጹ ፡ ለእግዚአ ፡ መናፍስት ፡ ይትኀጐሉ ፡ ኃጥአን ፡ ወእምገጻ ፡ ለምድረ ፡ ዚአሁ ፡ ይትቀወሙ ፡ ወኢየኀልቁ ፡ ለዓለመ ፡ ዓለም ። እስመ ፡ ርኢክዎሙ ፡ ለመላእክተ ፡ መቅሠፍት ፡ እንዘ ፡ የሐውሩ ፡ ወያስተዳልዉ ፡ ኲሎ ፡ መባዕላተ ፡ ለሰይጣን ። ወተስእልክዎ ፡ ለመአከ ፡ ሰላም ፡ ዘየሐውር ፡ ምስሌየ ፡ እሎንተ ፡ መባዕላተ ፡ ለመኑ ፡ ያስተዳልውዎሙ ። ወይቤለኒ ፡ እሎንተ ፡ ያስተዳልውዎሙ ፡ ለነገሥት ፡ ወለኀያላን ፡ ዘዝንቱ ፡ ምድር ፡ ከመ ፡ ቦቱ ፡ ይትሐጐሉ ። ወእምድኅረ ፡ ዝንቱ ፡ ያስተርኢ ፡ ጻድቅ ፡ ወኅሩይ ፡ ቤተ ፡ ምስትጉቡአ ፡ ዚአሁ ፡ እምይእዜ ፡ ኢይትከልኡ ፡ በስሙ ፡ ለእግዚአ ፡ መናፍስት ። ወእሉ ፡ አድባር ፡ ይከውኑ ፡ በቅድመ ፡ ገጹ ፡ ከመ ፡ ምድር ፡ ወአውግር ፡ ይከውኑ ፡ ከመ ፡ ነቅዐ ፡ ማይ ፡ ወያዐርፉ ፡ ጻድቃን ፡ እም ፡ ጻማ ፡ ኃጥኣን ።
=== chapter 54 ===
ወነጸርኩ ፡ ወተመየጥኩ ፡ ካልአ ፡ ገጸ ፡ ምድር ፡ ወርኢኩ ፡ ህየ ፡ ቈላ ፡ ዕሙቀ ፡ እንዘ ፡ ትነድድ ፡ እሳት ። ወአምጽእዎሙ ፡ ለነገሥት ፡ ወለኀያላን ፡ ወወደይዎሙ ፡ ውስተ ፡ ዕሙቅ ፡ ቈላ ። ወበህየ ፡ ርእያ ፡ አዕይንትየ ፡ ዘመባዕላቲሆሙ ፡ እንዘ ፡ ይገብርዎሙ ፡ መዓሠርተ ፡ ኀፂን ፡ ዘአልቦ ፡ መድሎት ። ወተስእልክዎ ፡ ለመልአከ ፡ ሰላም ፡ ዘየሐውር ፡ ምስሌየ ፡ እንዘ ፡ እብ ፡ እሉ ፡ ማእሥራተ ፡ መባዕላት ፡ ለመኑ ፡ ይዴለዉ ። ወይቤለኒ ፡ እሉ ፡ ይዴለዉ ፡ ለትዕይንተ ፡ አዛዝኤል ፡ ከመ ፡ ይትመጠውዎሙ ፡ ወይደይዎሙ ፡ መትሕተ ፡ ኲሉ ፡ ደይን ፡ ወአእባነ ፡ ጠዋያተ ፡ ይከድኑ ፡ መላትሒሆሙ ፡ በከመ ፡ አዘዘ ፡ እግዚአ ፡ መናፍስት ። ሚካኤል ፡ ወገብርኤል ፡ ሩፋኤል ፡ ወፋኑኤል ፡ ውእቶሙ ፡ ያጸንዕዎሙ ፡ በይእቲ ፡ ዕለት ፡ ዐባይ ፡ በውስተ ፡ ዕቶነ ፡ እሳት ፡ ዘይነድድ ፡ ይወድይዎሙ ፡ ውእተ ፡ ዕለተ ፡ ከመ ፡ ይትበቀል ፡ እምኔሆሙ ፡ እግዚአ ፡ መናፍስት ፡ በዐመፃሆሙ ፡ በእንተ ፡ ዘኮኑ ፡ ላእካነ ፡ ለሰይጣን ፡ ወአስሐትዎሙ ፡ ለእለ ፡ የኀድሩ ፡ ዲበ ፡ የብስ ። ወበውእቱ ፡ መዋዕል ፡ ይወጽእ ፡ መቅሠፍቱ ፡ ለእግዚአ ፡ መናፍስት ፡ ወይትረኀዉ ፡ ኲሉ ፡ መዛግብተ ፡ ማያት ፡ ዘመልዕልተ ፡ ሰማያት ፡ ወዲበ ፡ አንቅዕት ፡ እለ ፡ መትሕተ ፡ ሰማያት ፡ ወዘመትሕተ ፡ ምድር ። ወይዴመሩ ፡ ኲሎሙ ፡ ማያት ፡ ምስለ ፡ ማያት ፡ ዘመልዕልተ ፡ ሰማያት ፡ ማይሰ ፡ ዘመልዕልተ ፡ ሰማይ ፡ ተባዕታይ ፡ ውእቱ ፡ ወማይ ፡ ዘመትሕተ ፡ ምድር ፡ አንስታይ ፡ ይእቲ ። ወይደመሰሱ ፡ ኲሉ ፡ እለ ፡ የኀድሩ ፡ ዲበ ፡ የብስ ፡ ወእለ ፡ የኀድሩ ፡ መትሕተ ፡ አጽናፈ ፡ ሰማይ ። ወበእንተዝ ፡ አእመርዋ ፡ ለዐመፃሆሙ ፡ እንተ ፡ ገብሩ ፡ በዲበ ፡ ምድር ፡ ወበእንተዝ ፡ ይትኀጐሉ ።
=== chapter 55 ===
ወእምድኅረዝ ፡ ነስሐ ፡ ርእሰ ፡ መዋዕል ፡ ወይቤ ፡ በከ ፡ አሕጐልክዎሙ ፡ ለኲሎሙ ፡ እለ ፡ ይነብሩ ፡ ዲበ ፡ የብስ ። ወመሐለ ፡ በስሙ ፡ ዐቢይ ፡ ከመ ፡ እምይእዜ ፡ ኢይገብር ፡ ከመዝ ፡ ለኲሎሙ ፡ እለ ፡ ይነብሩ ፡ ዲበ ፡ የብስ ፡ ወትእምርተ ፡ እወዲ ፡ በሰማያት ፡ ወይከውን ፡ ማእከሌየ ፡ ወማእከሎሙ ፡ ሃይማኖተ ፡ እስከ ፡ ለዓለም ፡ መጠነ ፡ መዋዕለ ፡ ሰማይ ፡ ዲበ ፡ ምድር ። ወእምዝ ፡ በትእዛዝየ ፡ ውእቱ ፡ ሶበ ፡ ፈቀድኩ ፡ ከመ ፡ አጽንዖሙ ፡ በእደ ፡ መላእክት ፡ በዕለተ ፡ ምንዳቤ ፡ ወሕማም ፡ ቅድመዝ ፡ መዓትየ ፡ ወመቅሠፍትየ ፡ የኀድር ፡ ላዕሌሆሙ ፡ መዓትየ ፡ ወመቅሠፍትየ ፡ ይቤ ፡ እግዚአብሔር ፡ እግዚአ ፡ መናፍስት ። ነገሥት ፡ ኀያላን ፡ እለ ፡ ተኀድሩ ፡ ውስተ ፡ የብስ ፡ ሀለወክሙ ፡ ትርአይዎ ፡ ለኅሩየ ፡ ዚአየ ፡ ከመ ፡ ይነብር ፡ በመንበረ ፡ ስብሐትየ ፡ ወይኴንኖ ፡ ለአዛዝኤል ፡ ወለኲሎሙ ፡ ማኅበረ ፡ ዚአሁ ፡ ወለትዕይንተ ፡ ዚአሁ ፡ ኲሎሙ ፡ በስሙ ፡ ለእግዚአ ፡ መናፍስት ።
=== chapter 56 ===
ወርኢኩ ፡ በህየ ፡ ትዕይንተ ፡ መላእክት ፡ ዘመቅሠፍት ፡ እንዘ ፡ የሐውሩ ፡ ወእኁዛን ፡ መሣግረ ፡ ኀፂን ፡ ወብርት ። ወተስእልክዎ ፡ ለመልአከ ፡ ሰላም ፡ ዘየሐውር ፡ ምስሌየ ፡ እንዘ ፡ እብል ፡ ለመኑ ፡ የሐውፉ ፡ እለ ፡ ይእኅዙ ። ወይቤለኒ ፡ ፩፩ ፡ ለኅሩያነ ፡ ዚአሆሙ ፡ ወለፍቁራነ ፡ ዚአሆሙ ፡ ከመ ፡ ይትወደዩ ፡ ውስተ ፡ ንቅዐተ ፡ ማዕምቅት ፡ ዘቈላ ። ወአሜሃ ፡ ይመልእ ፡ ውእቱ ፡ ቈላ ፡ እምነ ፡ ኅሩያን ፡ ወፍቁራነ ፡ ዚአሆሙ ፡ ወይትዌዳዕ ፡ ዕለተ ፡ ሕይወቶሙ ፡ ወዕለተ ፡ ስሕተቶሙ ፡ እምይእዜ ፡ ኢይትኌለቊ ። ወበእማንቱ ፡ መዋዕል ፡ ይትጋብኡ ፡ መላእክት ፡ ወይወድዩ ፡ አርእስቲሆሙ ፡ ለምሥራቅ ፡ ለኀበ ፡ ሰብአ ፡ ጳርቴ ፡ ወሜድ ፡ የሐውስዎሙ ፡ ለነገሥት ፡ ወይበውእ ፡ ላዕሌሆሙ ፡ መንፈሰ ፡ ሀውክ ፡ ወየሀውክዎሙ ፡ እመናብርቲሆሙ ፡ ወይወፅኡ ፡ ከመ ፡ አናብስት ፡ እምስካባቲሆሙ ፡ ወከመ ፡ አዝእብት ፡ ርኁባን ፡ ማእከለ ፡ መርዔተ ፡ ዚአሆሙ ። ወየዐርጉ ፡ ወይከይድዎ ፡ ለምድረ ፡ ኅሩያነ ፡ ዚአሆሙ ፡ ወትከውን ፡ ምድረ ፡ ኅሩያነ ፡ ዚአሁ ፡ በቅድሜሆሙ ፡ ምክያደ ፡ ወአሰረ ። ወሀገረ ፡ ጻድቃነ ፡ ዚአየ ፡ ይከውን ፡ ማዕቅፈ ፡ ለአፍራሲሆሙ ፡ ወያነሥኡ ፡ በበይናቲሆሙ ፡ ቀትለ ፡ ወትጸንዕ ፡ የማኖሙ ፡ ዲቤሆሙ ፡ ወኢያአምሮ ፡ ብእሲ ፡ ለካልኡ ፡ ወለእኁሁ ፡ ወኢወልድ ፡ ለአቡሁ ፡ ወለእሙ ፡ እስከ ፡ ይከውን ፡ ኊልቈ ፡ አብድንት ፡ እሞቶሙ ፡ ወመቅሠፍቶሙ ፡ ወኢይከውን ፡ በከ ። ወበእማንቱ ፡ መዋዕል ፡ ትፈትሕ ፡ አፉሃ ፡ ሲኦ ፡ ል ፡ ወይሠጠሙ ፡ ውስቴታ ፡ ወሐጒሎሙ ፡ ሲኦል ፡ ትውኅጦሙ ፡ ለኃጥኣን ፡ እምገጸ ፡ ኅሩያን ።
=== chapter 57 ===
ወኮነ ፡ እምድኅረዝ ፡ ርኢኩ ፡ ካልአ ፡ ትዕይንተ ፡ ሠረገላት ፡ እንዘ ፡ ይጼአኑ ፡ ሰብእ ፡ ዲቤሆሙ ፡ ወይመጽኡ ፡ ዲበ ፡ ነፋስ ፡ እምሥራቅ ፡ ወእምዕራብ ፡ እስከ ፡ መንፈቀ ፡ ዕለት ። ወተሰምዐ ፡ ቃለ ፡ ድምፀ ፡ ሰረገላቲሆሙ ፡ ወሶበ ፡ ኮነ ፡ ዝሀውክ ፡ ቅዱሳን ፡ እምሰማይ ፡ አእመሩ ፡ ወዐምደ ፡ ምድር ፡ ተሐውሰ ፡ እመንበሩ ፡ ወተሰምዐ ፡ እምአጽናፈ ፡ ምድር ፡ እስከ ፡ አጽናፈ ፡ ሰማይ ፡ በአሐቲ ፡ ዕለት ። ወይወድቁ ፡ ኲሎሙ ፡ ወይሰግዱ ፡ ለእግዚአ ፡ መናፍስት ፡ ወዝንቱ ፡ ውእቱ ፡ ተፍጻሜተ ፡ ካልእ ፡ ምሳሌ ።
=== chapter 58 ===
ወአኀዝኩ ፡ እበል ፡ ሣልሰ ፡ ምሳሌ ፡ በእንተ ፡ ጻድቃን ፡ ወበእንተ ፡ ኅሩያን ። ብፁዓን ፡ አንትሙ ፡ ጻድቃን ፡ ወኅሩያን ፡ እስመ ፡ ስብሕ ፡ ክፍልክሙ ። ወይከውኑ ፡ ጻድቃን ፡ በብርሃነ ፡ ፀሐይ ፡ ወኅሩያን ፡ በብርሃነ ፡ ሕይወት ፡ ዘለዓለም ፡ ወማኅለቅት ፡ አልቦቱ ፡ ለመዋዕለ ፡ ሕይወቶሙ ፡ ወለቅዱሳን ፡ ኊልቈ ፡ መዋዕል ፡ አልቦሙ ። ወየኀሥሥዎ ፡ ለብርሃን ፡ ወይረክብ ፡ ጽድቀ ፡ በኀበ ፡ እግዚአ ፡ መናፍስት ፤ ሰላም ፡ ለጻድቃን ፡ በኀበ ፡ እግዚአ ፡ ዓለም ። ወእምድኅረዝ ፡ ይትበሀል ፡ ለቅዱሳን ፡ ከመ ፡ ይኅሥሡ ፡ በሰማይ ፡ ኅቡኣተ ፡ ጽድቅ ፡ ክፍለ ፡ ሃይማኖት ፡ እስመ ፡ ሠረቀ ፡ ከመ ፡ ፀሐይ ፡ ዲበ ፡ የብስ ፡ ወጽልመት ፡ ኀለፈ ። ወብርሃን ፡ ዘኢይትኌለቊ ፡ ይከውን ፡ ወበኊልቈ ፡ መዋዕል ፡ ኢይበውኡ ፡ እስመ ፡ ቀዳሚ ፡ ተሐጒለ ፡ ጽልመት ፡ ወብርሃን ፡ ይጸንዕ ፡ በቅድመ ፡ እግዚአ ፡ መናፍስት ፡ ወብርሃነ ፡ ርትዕ ፡ ትጸንዕ ፡ ለዓለም ፡ በቅድመ ፡ እግዚአ ፡ መናፍስት ።
=== chapter 59 ===
ወበእማንቱ ፡ መዋዕል ፡ ርእያ ፡ አዕይንትየ ፡ ኅቡኣተ ፡ መባርቅት ፡ ወብርሃናተ ፡ ወኲነኔሆሙ ፡ ወይበርቁ ፡ ለበረከት ፡ ወለመርገም ፡ በከመ ፡ ፈቀደ ፡ እግዚአ ፡ መናፍስት ። ወበህየ ፡ ርኢኩ ፡ ኅቡኣተ ፡ ነጐድጓድ ፡ ወሶበ ፡ ይደቅቅ ፡ በመልዕልተ ፡ ሰማይ ፡ ወቃሎሙ ፡ ይሰማዕ ፡ ወማኅደራተ ፡ የብስ ፡ አስተርአዩኒ ፡ ወቃል ፡ ዘነጐድጓድ ፡ ለሰላም ፡ ወለበረከት ፡ ወለእመ ፡ ለረጊም ፡ በቃለ ፡ እግዚአ ፡ መናፍስት ። ወእምድኅረዝ ፡ ተርእየ ፡ ሊተ ፡ ኲሉ ፡ ኅቡኣቲሆሙ ፡ ለብርሃናት ፡ ወለመባርቅት ፡ ለበረከት ፡ ወለጽጋብ ፡ ይበርቁ ።
=== chapter 60 ===
በዓመት ፡ ፭፻ ፡ ወበወርኅ ፡ ሳብዕ ፡ እምዐሡሩ ፡ ወረቡዑ ፡ ለወርኅ ፡ በሕይወተ ፡ ሄኖክ ፡ በውእቱ ፡ አምሳል ፡ ርኢኩ ፡ ከመ ፡ ታድለቀልቅ ፡ ሰማየ ፡ ሰማያት ፡ ድልቅልቀ ፡ ዐቢየ ፡ ወኀይሉ ፡ ለዑል ፡ ወመላእክት ፡ አእላፈ ፡ አእላፋት ፡ ወትእልፊተ ፡ ትእልፊት ፡ ተሀውኩ ፡ ዐቢየ ፡ ሁከተ ። ወሶቤሃ ፡ ርኢኩ ፡ ርእሰ ፡ መዋዕል ፡ ዲበ ፡ መንበረ ፡ ስብሐቲሁ ፡ ይነብር ፡ ወመላእክት ፡ ወጻድቃን ፡ ዐውዶ ፡ ይቀውሙ ። ወሊተ ፡ ረዐድ ፡ ዐቢይ ፡ ነሥአኒ ፡ ወፍርሀት ፡ አኀዘኒ ፡ ወሐቌየ ፡ ተቀጽዐ ፡ ወተፈትሐ ፡ ወኲለንታየ ፡ ተመስወ ፡ ወወደቁ ፡ በገጽየ ። ወፈነወ ፡ ቅዱስ ፡ ሚካኤል ፡ ካልአ ፡ መልአከ ፡ ቅዱሰ ፡ ፩እምነ ፡ መላእክት ፡ ቅዱሳን ፡ ወአንሥአኒ ፡ ወሶበ ፡ አንሥአኒ ፡ መንፈስየ ፡ ገብአት ፡ እስመ ፡ ኢክህልኩ ፡ ተዐግሦ ፡ እምርእየ ፡ ዝኩ ፡ ኀይል ፡ ወኪያሁ ፡ ሀውክ ፡ ወአንቀልቅሎ ፡ ሰማይ ። ወይቤለኒ ፡ ቅዱስ ፡ ሚካኤል ፡ በእንተ ፡ ምንት ፡ ራእይ ፡ ዘከመዝ ፡ ተሀውኮ ፤ እስከ ፡ ዮም ፡ ሀለወት ፡ ዕለተ ፡ ምሕረቱ ፡ ወሀሎ ፡ መሓሪ ፡ ወርኁቀ ፡ መዐት ፡ ላዕለ ፡ እለ ፡ የኀድሩ ፡ ዲበ ፡ የብስ ። ወሶበ ፡ ትመጽእ ፡ ዕለት ፡ ወኀይል ፡ ወመቅሠፍት ፡ ወኲነኔ ፡ እንተ ፡ አስተዳለወ ፡ እግዚአ ፡ መናፍስት ፡ ለእለ ፡ ይሰግዱ ፡ ለኲነኔ ፡ ጽድቅ ፡ ወለእለ ፡ ይክሕዱ ፡ ለኲነኔ ፡ ጽድቅ ፡ ወለእለ ፡ ያነሥኡ ፡ ስሞ ፡ በከ ፡ ወተደለወት ፡ ይእቲ ፡ ዕለት ፡ ለኅሩያን ፡ መሀላ ፡ ወለኃጥኣን ፡ ሐተታ ። ወይትከፈሉ ፡ በይእቲ ፡ ዕለት ፡ ፪አናብርት ፡ አንበሪ ፡ አንስቲያዊት ፡ ዘስማ ፡ ሌዋታን ፡ ከመ ፡ ትኅድር ፡ በልጐተ ፡ ባሕር ፡ መልዕልተ ፡ አንቅዕተ ፡ ማያት ። ወለተባዕታይ ፡ ስሙ ፡ ብሔሞት ፡ ዘይእኅዝ ፡ በእንግድዓሁ ፡ በበድው ፡ ዘኢያስተርኢ ፡ ወስሙ ፡ ዴንዳይን ፡ በምሥራቀ ፡ ገነት ፡ በኀበ ፡ ይነብሩ ፡ ኅሩያን ፡ ወጻድቃን ፡ በኀበ ፡ ተመጠወ ፡ እምሔውየ ፡ ዘውእቱ ፡ ሳብዕ ፡ እምነ ፡ አዳም ፡ ቀዳሚሆሙ ፡ ለሰብእ ፡ ዘገብረ ፡ እግዚአ ፡ መናፍስት ። ወተስእልክዎ ፡ ለዝኩ ፡ ካልእ ፡ መልአክ ፡ ከመ ፡ ያርእየኒ ፡ ኀይሎሙ ፡ ለእልክቱ ፡ አናብርት ፡ እፎ ፡ ተሌለዩ ፡ በአሐቲ ፡ ዕለት ፡ ወተወድዩ ፡ ፩በልጐተ ፡ ባሕር ፡ ወ፩በየብሰ ፡ በድው ። ወይቤለኒ ፡ አንተ ፡ ወልደ ፡ ሰብእ ፡ በዝየ ፡ ትፈቅድ ፡ ታእምር ፡ ዘኅቡእ ። ወይቤለኒ ፡ ካልእ ፡ መልአክ ፡ ዘየሐውር ፡ ምስሌየ ፡ ወዘበኅቡእ ፡ ያርእየኒ ፡ ዘቀዳሚ ፡ ወዘደኃሪ ፤ በሰማይ ፡ በውስተ ፡ ላዕሉ ፤ ወበውስተ ፡ የብስ ፡ በማዕምቅ ፤ ወበአጽናፈ ፡ ሰማይ ፤ ወበመሠረተ ፡ ሰማይ ፤ ወበመዛግብተ ፡ ነፋሳት ። ወእፎ ፡ ይትከፈሉ ፡ መናፍስት ፡ ወእፎ ፡ ይደሉ ፡ ወእፎ ፡ ይትኌለቁ ፡ አንቅዕት ፡ ወነፋሳት ፡ በኀይለ ፡ መንፈስ ፡ ወኀይሎሙ ፡ ለብርሃነ ፡ ወርኅ ፡ ወከመ ፡ ኀይለ ፡ ጽድቅ ፡ ወክፍላተ ፡ ከዋክብት ፡ በበስሞሙ ፡ ወኲሉ ፡ ክፍል ፡ ይትከፈል ። ወነጐድጓድ ፡ በበሙዳቃቲሆሙ ፡ ወለኲሉ ፡ ክፍል ፡ ዘይትከፈል ፡ ከመ ፡ ይብርቅ ፡ በመብረቅ ፡ ወትዕይንቶሙ ፡ ከመ ፡ ፍጡነ ፡ ይስምዑ ። እስመ ፡ ቦቱ ፡ ለነጐድጓድ ፡ ምዕራፋት ፡ በትዕግሥት ፡ ለቃለ ፡ ዚአሁ ፡ ተውህበ ፡ ወኢይትሌለዩ ፡ ኢነጐድጓድ ፡ ወኢመብረቅ ፡ ወኢ፩በመንፈስ ፡ ክልኤሆሙ ፡ የሐውሩ ፡ ወኢይትሌለዩ ። እስመ ፡ ሶበ ፡ ይበርቅ ፡ መብረቅ ፡ ነጐድጓድ ፡ ቃሎ ፡ ይሁብ ፡ ወመንፈስ ፡ በጊዜሃ ፡ ያዐርፍ ፡ ወዕሩየ ፡ ይከፍል ፡ ማእከሎሙ ፡ እስመ ፡ መዝገበ ፡ ጊዜያቲሆሙ ፡ ዘኆፃ ፡ ውእቱ ፡ ወ፩፩እምኔሆሙ ፡ በጊዜሁ ፡ በልጓም ፡ ይትአኀዙ ፡ ወይትመየጡ ፡ በኀይለ ፡ መንፈስ ፡ ወይትነዳዕ ፡ ከመዝ ፡ በከመ ፡ ብዝኀ ፡ አድዋለ ፡ ምድር ። ወመንፈሰ ፡ ባሕር ፡ ተባዕታይ ፡ ውእቱ ፡ ወጽኑዕ ፡ ወበከመ ፡ ኀይለ ፡ ጽንዐታ ፡ በልጓም ፡ ያገብኣ ፡ ወከመዝ ፡ ትትነዳዕ ፡ ወትዘራእ ፡ በኲሉ ፡ አድባረ ፡ ምድር ። ወመንፈሰ ፡ አስሐትያ ፡ መልአከ ፡ ዚአሁ ፡ ውእቱ ፡ ወመንፈሰ ፡ በረድ ፡ መልአክ ፡ ኄር ፡ ውእቱ ። ወመንፈሰ ፡ ሐመዳ ፡ ኀደገ ፡ በእንተ ፡ ኀይለ ፡ ዚአሁ ፡ ወመንፈስ ፡ ቦቱ ፡ ባሕቲቱ ፡ ወዘየዐርግ ፡ እምኔሁ ፡ ከመ ፡ ጢስ ፡ ውእቱ ፡ ወስሙ ፡ ደደክ ። ወመንፈሰ ፡ ጊሜ ፡ ኢይትኀበር ፡ ምስሌሆሙ ፡ ውስተ ፡ መዛግብቲሆሙ ፡ አላ ፡ መዝገብ ፡ ቦቱ ፡ ለባሕቲቱ ፡ እስመ ፡ ምኋረ ፡ ዚአሁ ፡ በስብሐት ፡ ወበብርሃን ፡ ወበጽልመት ፡ ወበክረምት ፡ ወበሐጋይ ፡ ወመዝገበ ፡ ዚአሃ ፡ ብርሃን ፡ ወመልአካ ፡ ውእቱ ። ወመንፈሰ ፡ ጠል ፡ ማኅደሩ ፡ በአጽናፈ ፡ ሰማይ ፡ ወድሩግ ፡ ውእቱ ፡ ምስለ ፡ መዛግብተ ፡ ዝናም ፡ ወምኋረ ፡ ዚአሁ ፡ በክረምት ፡ ወበሐጋይ ፡ ወደመና ፡ ዚአሁ ፡ ወደመና ፡ ጊሜ ፡ ኅብር ፡ ወ፩ለካልኡ ፡ ይሁብ ። ወመንፈሱ ፡ ለዝናም ፡ ሶበ ፡ ይትሐወስ ፡ እምነ ፡ መዝገበ ፡ ዚአሁ ፡ ይመጽኡ ፡ መላእክት ፡ ወያርኊ ፡ መዝገበ ፡ ወያወፅእዎ ፡ ወሶበ ፡ ይዘራእ ፡ ዲበ ፡ ኲሉ ፡ የብስ ፡ ወሶበ ፡ ይትኀበር ፡ በኲሉ ፡ ጊዜ ፡ ምስለ ፡ ማይ ፡ ዘዲበ ፡ የብስ ። እስመ ፡ ኮኑ ፡ ማያት ፡ ለእለ ፡ የኀድሩ ፡ ዲበ ፡ የብስ ፡ እስመ ፡ ሲሳያ ፡ ለየብስ ፡ እምኀበ ፡ ልዑል ፡ ዘበሰማይ ፡ ውእቱ ፡ እስመ ፡ በእንተዝ ፡ መስፈርት ፡ ቦቱ ፡ ለዝናም ፡ ወመላእክት ፡ ይትሜጠውዎ ። እሎንተ ፡ ኲሎሙ ፡ ርኢኩ ፡ እስከ ፡ ገነተ ፡ ጻድቃን ። ወይቤለኒ ፡ መልአከ ፡ ሰላም ፡ ዘምስሌየ ፡ ይሄሉ ፡ እሉ ፡ ፪አናብርት ፡ ላዕለ ፡ ዕበይ ፡ ዘእግዚአብሔር ፡ ድልዋን ፡ ይሴሰዩ ፡ ከመ ፡ መቅሠፍቱ ፡ ለእግዚአብሔር ፡ በከ ፡ ኢይኩን ፡ ወይትቀተሉ ፡ ደቂቅ ፡ ምስለ ፡ እማቲሆሙ ፡ ወውሉድ ፡ ምስለ ፡ አበዊሆሙ ። ሶበ ፡ ታዐርፍ ፡ መቅሠፍቱ ፡ ለእግዚአ ፡ መናፍስት ፡ ዲቤሆሙ ፡ ታዐርፍ ፡ ከመ ፡ ኢትምጻእ ፡ መቅሠፍቱ ፡ ለእግዚአ ፡ መናፍስት ፡ በከ ፡ ዲበ ፡ እሉ ፡ ድኅረ ፡ ትከውን ፡ ኲነኔ ፡ በምሕረቱ ፡ ወበትዕግሥቱ ።
=== chapter 61 ===
ወርኢኩ ፡ በእማንቱ ፡ መዋዕል ፡ ተውህበ ፡ ለእልኩ ፡ መላእክት ፡ አኅባል ፡ ነዊኃን ፡ ወነሥኡ ፡ ሎሙ ፡ ክንፈ ፡ ወሠረሩ ፡ ወሖሩ ፡ መንገለ ፡ መስዕ ። ወተስእልክዎ ፡ ለመልአክ ፡ እንዘ ፡ እብል ፡ ለምንት ፡ ነሥኡ ፡ እሎንቱ ፡ አኅባለ ፡ ነዊኃነ ፡ ወሖሩ ፡ ወይቤለኒ ፡ ሖፉ ፡ ከመ ፡ ይመጥኑ ። ወይቤለኒ ፡ መልአክ ፡ ዘምስሌየ ፡ የሐውር ፡ እሉ ፡ እሙንቱ ፡ አምጣነ ፡ ጻድቃን ፡ ወመኣሥረ ፡ ጻድቃን ፡ ያመጽኡ ፡ ከመ ፡ ይትመርጐዙ ፡ በስሙ ፡ ለእግዚአ ፡ መናፍስት ፡ ለዓለመ ፡ ዓለም ። ይዌጥኑ ፡ ወየኀድሩ ፡ ኅሩያን ፡ ምስለ ፡ ኅሩያን ፡ ወእሉ ፡ አምጣናት ፡ እለ ፡ ይትወሀቡ ፡ ለሃይማኖት ፡ ወያጸንዑ ፡ ቃለ ፡ ጽድቅ ። ወእሉ ፡ አምጣናት ፡ ይከሥቱ ፡ ኩሎ ፡ ኅቡኣታ ፡ ለዕመቀ ፡ ምድር ፡ ወእለ ፡ ተኀጒሉ ፡ እምበድው ፡ ወእለ ፡ ተበልዑ ፡ እምዐሣተ ፡ ባሕር ፡ ወእምአራዊት ፡ ከመ ፡ ይግብኡ ፡ ወይትመርጐዙ ፡ በዕለተ ፡ ኅሩይ ፡ እስመ ፡ አልቦ ፡ ዘይትሐጐል ፡ በቅድመ ፡ እግዚአ ፡ መናፍስት ፡ ወአልቦ ፡ ዘይክል ፡ ተሐጒሎተ ። ወነሥኡ ፡ ትእዛዘ ፡ እለ ፡ በመልዕልተ ፡ ሰማያት ፡ ኲሎሙ ፡ ወኀይል ፡ ፩ወቃል ፡ ፩ወብርሃን ፡ ፩ከመ ፡ እሳት ፡ ተውህበ ፡ ሎሙ ። ወለውእቱ ፡ መቅድመ ፡ ቃል ፡ ይባርክዎ ፡ ወያሌዕልዎ ፡ ወይሴብሕዎ ፡ በጥበብ ፡ ወይጠበብ ፡ በነገር ፡ ወበመንፈሰ ፡ ሕይወት ። ወእግዚአ ፡ መናፍስት ፡ ዲበ ፡ መንበረ ፡ ስብሐቲሁ ፡ አንበሮ ፡ ለኅሩይ ፡ ወይኴንን ፡ ኲሎ ፡ ግብሮሙ ፡ ለቅዱሳን ፡ በመልዕልተ ፡ ሰማይ ፡ ወበመዳልው ፡ ይደሉ ፡ ምግባሮሙ ። ወሶበ ፡ ያሌዕል ፡ ገጾ ፡ ከመ ፡ ይኰንን ፡ ፍኖቶሙ ፡ እንተ ፡ ኅቡኣት ፡ በነገረ ፡ ስሙ ፡ ለእግዚአ ፡ መናፍስት ፡ ወአሰረ ፡ ዚአሆሙ ፡ በፍኖተ ፡ ኲነኔ ፡ ጽድቅ ፡ ዘእግዚአብሔር ፡ ልዑል ፡ ወይትናገሩ ፡ ኲሎሙ ፡ በ፩ቃል ፡ ወይባርኩ ፡ ወይሴብሑ ፡ ወያሌዕሉ ፡ ወይዌድሱ ፡ በስሙ ፡ ለእግዚአ ፡ መናፍስት ። ወይጼውዕ ፡ ኲሎ ፡ ኀይለ ፡ ሰማያት ፡ ወኲሎ ፡ ቅዱሳነ ፡ ዘመልዕልት ፡ ወኀይለ ፡ እግዚአብሔር ፡ ኪሩቤ ፡ ወሱራፌል ፡ ወኦፍኒን ፡ ወኲሉ ፡ መላእክተ ፡ ኀይል ፡ ወኲሉ ፡ መላእክተ ፡ አጋእዝት ፡ ወኅሩይ ፡ ወካልእ ፡ ኀይል ፡ እለ ፡ ውስተ ፡ የብስ ፡ ዲበ ፡ ማይ ፡ በይእቲ ፡ ዕለት ፡ ወይነሥኡ ፡ ፩ቃለ ፡ ወይባርኩ ፡ ወይሴብሑ ፡ ወይዌድሱ ፡ ወያሌዕሉ ፡ በመንፈሰ ፡ ሃይማኖት ፡ ወበመንፈሰ ፡ ጥበብ ፡ ወትዕግሥት ፡ ወበመንፈሰ ፡ ምሕረት ፡ ወበመንፈሰ ፡ ኲነኔ ፡ ወሰላም ፡ ወበመንፈሰ ፡ ኂሩት ፡ ወይብሉ ፡ ኲሎሙ ፡ በ፩ቃል ፡ ቡሩክ ፡ ውእቱ ፡ ወይትባረክ ፡ ስሙ ፡ ለእግዚአ ፡ መናፍስት ፡ ለዓለም ፡ ወእስከ ፡ ለዓለም ። ይባርክዎ ፡ ኲሎሙ ፡ እለ ፡ ኢይነውሙ ፡ በመልዕልተ ፡ ሰማይ ፤ ይባርክዎ ፡ ኲሎሙ ፡ ቅዱሳኑ ፡ እለ ፡ ውስተ ፡ ሰማይ ፡ ወኲሎሙ ፡ ኅሩያን ፡ እለ ፡ የኀድሩ ፡ ውስተ ፡ ገነተ ፡ ሕይወት ፡ ወኲሉ ፡ መንፈሰ ፡ ብርሃን ፡ ዘትክል ፡ ባርኮቶ ፡ ወሰብሖቶ ፡ ወአልዕሎቶ ፡ ወቀድሶቶ ፡ ለስምከ ፡ ቅዱስ ፡ ወኲሉ ፡ ዘሥጋ ፡ ዘፈድፋደ ፡ እምኀይል ፡ ትሴብሕ ፡ ወትባርክ ፡ ለስምከ ፡ ለዓለመ ፡ ዓለም ። እስመ ፡ ብዙኅ ፡ ምሕረቱ ፡ ለእግዚአ ፡ መናፍስት ፡ ወርኁቀ ፡ መዓት ፡ ወኲሎ ፡ ግብሮ ፡ ወኲሎ ፡ ኀይሎ ፡ በአምጣነ ፡ ገብረ ፡ ከሠተ ፡ ለጻድቃን ፡ ወለኅሩያን ፡ በስሙ ፡ ለእግዚአ ፡ መናፍስት ።
=== chapter 62 ===
ወከመዝ ፡ አዘዘ ፡ እግዚእ ፡ ለነገሥት ፡ ወለአዚዛን ፡ ወለልዑላን ፡ ወለእለ ፡ የኀድርዋ ፡ ለምድር ፡ ወይብል ፡ ክሥቱ ፡ አዕይንቲክሙ ፡ ወአንሥኡ ፡ አቅርንቲክሙ ፡ እመ ፡ ትክሉ ፡ አእምሮቶ ፡ ለኅሩይ ። ወነበረ ፡ እግዚአ ፡ መናፍስት ፡ ዲበ ፡ መንበረ ፡ ስብሐቲሁ ፡ ወመንፈሰ ፡ ጽድቅ ፡ ተክዕወ ፡ ዲቤሁ ፡ ወነገረ ፡ አፉሁ ፡ ይቀትል ፡ ኲሎ ፡ ኃጥአነ ፡ ወኲሎ ፡ ዐማፅያነ ፡ ወእምገጹ ፡ ይትኀጐሉ ። ወይቀውሙ ፡ በይእቲ ፡ ዕለት ፡ ኲሎሙ ፡ ነገሥት ፡ ወአዚዛን ፡ ወልዑላን ፡ ወእለ ፡ ይእኅዝዋ ፡ ለየብስ ፡ ወይሬእይዎ ፡ ወያአምርዎ ፡ ከመ ፡ ይነብር ፡ ዲበ ፡ መንበረ ፡ ስብሐቲሁ ፡ ወጻድቃን ፡ በጽድቅ ፡ ቅድሜሁ ፡ ይትኴነኑ ፡ ወነገረ ፡ በክ ፡ አልቦ ፡ ዘይትበሀል ፡ በቅድሜሁ ። ወይመጽእ ፡ ዲቤሆሙ ፡ ሕማም ፡ ከመ ፡ ብእሲት ፡ እንተ ፡ ውስተ ፡ ማሕመም ፡ ወየዐፅባ ፡ ወሊድ ፡ ሶበ ፡ ይመጽእ ፡ ወልዳ ፡ በአፈ ፡ ማኅፀን ፡ ወተዐፅብ ፡ በወሊድ ። ወይሬእዩ ፡ መንፈቆሙ ፡ ለመንፈቆሙ ፡ ወይደነግፅ ፡ ወያቴሕቱ ፡ ገጾሙ ፡ ወይእኅዞሙ ፡ ሕማም ፡ ሶበ ፡ ይሬእይዎ ፡ ለዝኩ ፡ ወልደ ፡ ብእሲት ፡ እንዘ ፡ ይነብር ፡ ዲበ ፡ መንበረ ፡ ስብሐቲሁ ። ወይሴብሕዎ ፡ ወይባርክዎ ፡ ወያሌዕልዎ ፡ ነገሥት ፡ አዚዛን ፡ ወኲሎሙ ፡ እለ ፡ ይእኅዝዋ ፡ ለምድር ፡ ለዘይመልክ ፡ ኲሎ ፡ ዘኅቡእ ። እስመ ፡ እምቅድም ፡ ኅቡአ ፡ ኮነ ፡ ወልደ ፡ እጓለ ፡ እመሕያው ፡ ወዐቀቦ ፡ ልዑል ፡ በቅድመ ፡ ኀይሉ ፡ ወከሠቶ ፡ ለኅሩያን ። ወይዘራእ ፡ ማኅበረ ፡ ቅዱሳን ፡ ወኅሩያን ፡ ወይቀውሙ ፡ በቅድሜሁ ፡ ኲሎሙ ፡ ኅሩያን ፡ በይእቲ ፡ ዕለት ። ወይወድቁ ፡ ኲሎሙ ፡ ነገሥት ፡ አዚዛን ፡ ወልዑላን ፡ ወእለ ፡ ይመልክዋ ፡ ለየብስ ፡ በቅድሜሁ ፡ በገጾሙ ፡ ወይሰግዱ ፡ ወይሴፈውዎ ፡ ለዝኩ ፡ ወልደ ፡ እጓለ ፡ እመሕያው ፡ ወያስተበቊዕዎ ፡ ወይስእሉ ፡ ምሕረተ ፡ እምኀቤሁ ። ወያጔጒዖሙ ፡ እንከ ፡ ውእቱ ፡ እግዚአ ፡ መናፍስት ፡ ከመ ፡ ያፍጥኑ ፡ ወይፃኡ ፡ እምቅድመ ፡ ገጹ ፡ ወገጾሙ ፡ ይመልእ ፡ ኀፍረተ ፡ ወጽልመተ ፡ ይትዌሰክ ፡ ገጾሙ ። ወይትሜጠውዎሙ ፡ መላእክተ ፡ መቅሠፍት ፡ ከመ ፡ ይትፈደዩ ፡ እምኔሆሙ ፡ ዘገፍእዎሙ ፡ ለደቂቁ ፡ ወለኅሩያነ ፡ ዚአሁ ። ወይከውኑ ፡ አርአያ ፡ ለጻድቃን ፡ ወለኅሩያነ ፡ ዚአሁ ፡ ቦሙ ፡ ይትፌሥሑ ፡ እስመ ፡ መዐቱ ፡ ለእግዚአ ፡ መናፍስት ፡ ዲቤሆሙ ፡ ታአርፍ ፡ ወመጥባሕቱ ፡ ለእግዚአ ፡ መናፍስት ፡ ትሰክር ፡ እምኔሆሙ ። ወጻድቃን ፡ ወኅሩያን ፡ ይድኅኑ ፡ በይእቲ ፡ ዕለት ፡ ወገጾሙ ፡ ለኃጥኣን ፡ ወለዐማፅያን ፡ ኢይሬእዩ ፡ እምይእዜ ። ወእግዚአ ፡ መናፍስት ፡ ዲቤሆሙ ፡ የኀድር ፡ ወምስለ ፡ ዝኩ ፡ ወልደ ፡ እጓለ ፡ እመሕያው ፡ የኀድሩ ፡ ወይበልዑ ፡ ወይሰክቡ ፡ ወይትነሥኡ ፡ ለዓለመ ፡ ዓለም ። ወተንሥኡ ፡ ጻድቃን ፡ ወኅሩያን ፡ እምድር ፡ ወኀደጉ ፡ አትሕቶ ፡ ገጾሙ ፡ ወለብሱ ፡ ልብሰ ፡ ሕይወት ። ወውእቱ ፡ ይከውን ፡ ልብሰ ፡ ሕይወት ፡ በኀበ ፡ እግዚአ ፡ መናፍስት ፡ ወአልባሲክሙኒ ፡ ኢይበልዩ ፡ ወስብሐቲክሙ ፡ ኢየኀልቅ ፡ በቅድመ ፡ እግዚአ ፡ መናፍስት ።
=== chapter 63 ===
በእማንቱ ፡ መዋዕል ፡ ያስተበቊዑ ፡ ነገሥት ፡ አዚዛን ፡ እለ ፡ ይእኅዝዋ ፡ ለየብስ ፡ እመላእክተ ፡ መቅሠፍቱ ፡ በኀበ ፡ ሀለዉ ፡ ምጥዋነ ፡ ከመ ፡ የሀቦሙ ፡ ዕረፍተ ፡ ንስቲተ ፡ ወከመ ፡ ይደቁ ፡ ወይስግዱ ፡ በቅድመ ፡ እግዚአ ፡ መናፍስት ፡ ወይትአመኑ ፡ ኀጢአቶሙ ፡ በቅድሜሁ ። ወይባርክዎ ፡ ወይሴብሕዎ ፡ ለእግዚአ ፡ መናፍስት ፡ ወይብሉ ፡ ቡሩክ ፡ ውእቱ ፡ እግዚአ ፡ መናፍስት ፡ ወእግዚአ ፡ ነገሥት ፡ እግዚኦሙ ፡ ለአዚዛን ፡ ወእግዚኡ ፡ ለባዕል ፡ ወእግዚአ ፡ ስብሐት ፡ ወእግዚአ ፡ ጥበብ ፡ ወይበርህ ፡ ኲሉ ፡ ኅቡእ ። ወኀይልከ ፡ ለትውልደ ፡ ትውልድ ፡ ወስብሐቲከ ፡ ለዓለመ ፡ ዓለም ፡ ዕሙቅ ፡ ውእቱ ፡ ኅቡኣተ ፡ ዚአከ ፡ ኲሉ ፡ ወኊልቊ ፡ አልቦ ፡ ወጽድቀ ፡ ዚአከ ፡ ሐሳብ ፡ አልቦ ። ይእዜ ፡ አእመርነ ፡ ከመ ፡ ንሰብሖ ፡ ወንባርኮ ፡ ለእግዚአ ፡ ነገሥት ፡ ወለዘይነግሥ ፡ ዲበ ፡ ኲሎሙ ፡ ነገሥት ። ወይብሉ ፡ መኑ ፡ ወሀበነ ፡ ዕረፍተ ፡ ከመ ፡ ንሰብሖ ፡ ወናእኲቶ ፡ ወንባርኮ ፡ ወንእመን ፡ ቅድመ ፡ ስብሐቲሁ ። ወይእዜኒ ፡ ንስቲተ ፡ ዕረፍተ ፡ ንትሜነይ ፡ ወኢንረክብ ፡ ንሰደድ ፡ ወኢንእኅዝ ፡ ወብርሃን ፡ እምቅድሜነ ፡ ኀለፈ ፡ ወጽልመት ፡ ምንባሪነ ፡ ለዓለመ ፡ ዓለም ። እስመ ፡ በቅድሜሁ ፡ ኢአመነ ፡ ወኢሰባሕነ ፡ በስሙ ፡ ለእግዚአ ፡ ነገሥት ፡ ወኢሰባሕናሁ ፡ ለእግዚእ ፡ በኲሉ ፡ ተግባሩ ፡ ወተስፋነ ፡ ኮነ ፡ ዲበ ፡ በትረ ፡ መንግሥትነ ፡ ወስብሐቲነ ። ወበዕለተ ፡ ስራሕነ ፡ ወምንዳቤነ ፡ ኢያድኅነነ ፡ ወኢንረክብ ፡ ዕረፍተ ፡ ንእመን ፡ እስመ ፡ መሃይምን ፡ ውእቱ ፡ እግዚእነ ፡ በኲሉ ፡ ምግባሩ ፡ ወበኲሉ ፡ ኲነኔሁ ፡ ወጽድቁ ፡ ወገጸ ፡ ኲነኔሁ ፡ ኢይነሥኡ ። ወነኀልፍ ፡ እምገጹ ፡ በእንተ ፡ ምግባሪነ ፡ ወኲሉ ፡ ኀጢአትነ ፡ በጽድቅ ፡ ተኈለቈ ። ይእዜ ፡ ይቤልዎሙ ፡ ትፀግብ ፡ ነፍስነ ፡ እምንዋየ ፡ ዐመፃ ፡ ወኢትከልእ ፡ ወሪዶተነ ፡ እምላህባ ፡ ለክበደ ፡ ሲኦል ። ወእምድኅረዝ ፡ ይመልእ ፡ ገጾሙ ፡ ጽልመተ ፡ ወኀፍረተ ፡ በቅድመ ፡ ዝኩ ፡ ወልደ ፡ እጓለ ፡ እመሕያው ፡ ወእምቅድመ ፡ ገጹ ፡ ይሰደዱ ፡ ወሰይፍ ፡ የኀድር ፡ ቅድመ ፡ ገጹ ፡ ማእከሎሙ ። ወከመዝ ፡ ይቤ ፡ እግዚአ ፡ መናፍስት ፡ ዝንቱ ፡ ውእቱ ፡ ሥርዐቶሙ ፡ ወኲነኔሆሙ ፡ ለአዚዛን ፡ ወለነገሥት ፡ ወለልዑላን ፡ ወለእለ ፡ ይእኅዝዋ ፡ ለየብስ ፡ በቅድመ ፡ እግዚአ ፡ መናፍስት ።
=== chapter 64 ===
ወካልአ ፡ ገጻተ ፡ ርኢኩ ፡ በውእቱ ፡ መካን ፡ ኅቡኣተ ። ሰማዕኩ ፡ ቃሎ ፡ ለመልአክ ፡ እንዘ ፡ ይብል ፡ እሉ ፡ እሙንቱ ፡ መላእክት ፡ እለ ፡ ወረዱ ፡ እምሰማይ ፡ ዲበ ፡ ምድር ፡ ወዘኅቡእ ፡ ከሠቱ ፡ ለውሉደ ፡ ሰብእ ፡ ወአስሐትዎሙ ፡ ለውሉደ ፡ ሰብእ ፡ ከመ ፡ ይግበሩ ፡ ኀጢአተ ።
=== chapter 65 ===
ወበእማንቱ ፡ መዋዕል ፡ ርእየ ፡ ኖኅ ፡ ምድረ ፡ ከመ ፡ አድነነት ፡ ወከመ ፡ ቅሩብ ፡ ሐጒላ ። ወአንሥአ ፡ እገሪሁ ፡ እምህየ ፡ ወሖረ ፡ እስከ ፡ አጽናፈ ፡ ምድር ፡ ወጸርኀ ፡ ለእምሔዉ ፡ ሄኖክ ፡ ወይቤ ፡ ኖኅ ፡ በቃል ፡ መሪር ፡ ስምዐኒ ፡ ስምዐኒ ፡ ስምዐኒ ፡ ሥልሰ ። ወይቤሎ ፡ ንግረኒ ፡ ምንት ፡ ውእቱ ፡ ዘይትገበር ፡ በዲበ ፡ ምድር ፡ እስመ ፡ ከመዝ ፡ ሰርሐት ፡ ምድር ፡ ወአንቀልቀለት ፡ ዮጊ ፡ አነ ፡ እትኀጐል ፡ ምስሌሃ ። ወበድኅረ ፡ ውእቱ ፡ ጊዜ ፡ ኮነ ፡ ሀውክ ፡ ዐቢይ ፡ ዲበ ፡ ምድር ፡ ወተሰምዐ ፡ ቃል ፡ እምሰማይ ፡ ወወደቁ ፡ በገጽየ ። ወመጽአ ፡ ሄኖክ ፡ እምሔውየ ፡ ወቆመ ፡ ኀቤየ ፡ ወይቤለኒ ፡ ለምንት ፡ ጸራኅከ ፡ ኀቤየ ፡ ጽራኀ ፡ መሪረ ፡ ወብካየ ። ወትእዛዝ ፡ ወፅአ ፡ እምኀበ ፡ ገጸ ፡ እግዚእ ፡ ዲበ ፡ እለ ፡ የኀድሩ ፡ ውስተ ፡ የብስ ፡ ከመ ፡ ውእቱ ፡ ይኩን ፡ ኅልቀቶሙ ፡ እስመ ፡ አእመሩ ፡ ኲሎ ፡ ኅቡኣተ ፡ መላእክት ፡ ወኲሎ ፡ ግፍዐ ፡ ሰይጣናት ፡ ወኲሎ ፡ ኀይሎሙ ፡ ኅቡአ ፡ ወኲሎ ፡ ኀይሎሙ ፡ ለእለ ፡ ይገብሩ ፡ ሥራያተ ፡ ወኀይሎሙ ፡ ለኅብራት ፡ ወኀይሎሙ ፡ ለእለ ፡ ይሠብኩ ፡ ሥብኮ ፡ ኲሉ ፡ ምድር ። ወእስኩ ፡ እፎ ፡ ይትወለድ ፡ ብሩር ፡ እምጸበለ ፡ ምድር ፡ ወእፎ ፡ ይከውን ፡ ነጠብጣብ ፡ ዲበ ፡ ምድር ። እስመ ፡ ዐረር ፡ ወናእክ ፡ ኢይትወለድ ፡ እምድር ፡ ከመ ፡ ቀዳሚ ፡ ነቅዕ ፡ ውእቱ ፡ ዘይወልዶሙ ፡ ወመልአክ ፡ ዘይቀውም ፡ ውስቴታ ፡ ወይበድር ፡ ውእቱ ፡ መልአክ ። ወእምድኅረዝ ፡ አኀዘኒ ፡ እምሔውየ ፡ ሄኖክ ፡ በእዴሁ ፡ ወአንሥአኒ ፡ ወይቤለኒ ፡ ሑር ፡ እስመ ፡ ተስእልክዎ ፡ ለእግዚአ ፡ መናፍስት ፡ በእንተዝ ፡ ሀውክ ፡ ዘዲበ ፡ ምድር ። ወይቤለኒ ፡ በእንተ ፡ ዐመፃሆሙ ፡ ተፈጸመት ፡ ኲነኔሆሙ ፡ ወኢይትኌለቊ ፡ በቅድሜየ ፡ በእንተ ፡ አውራኅ ፡ ዘኀሠሡ ፡ ወአእመሩ ፡ ከመ ፡ ምድር ፡ ትትሐጐል ፡ ወእለ ፡ የኀድሩ ፡ ዲቤሃ ። ወለእሉ ፡ ምግባእ ፡ አልቦሙ ፡ ለዓለም ፡ እስመ ፡ አርአይዎሙ ፡ ዘኅቡእ ፡ ወእለ ፡ ተኰነኑ ፡ ወአኮ ፡ ለከ ፡ አንተ ፡ ወልድየ ፡ አእመረ ፡ እግዚአ ፡ መናፍስት ፡ እስመ ፡ ንጹሕ ፡ ወኄር ፡ አንተ ፡ እምዝ ፡ ሒስ ፡ ዘኅቡኣት ። ወአጽንዖ ፡ ለስምከ ፡ በማዕከለ ፡ ቅዱሳን ፡ ወየዐቅበከ ፡ እምእለ ፡ የኀድሩ ፡ ዲበ ፡ የብስ ፡ ወአጽንዖ ፡ ለዘርእከ ፡ በጽድቅ ፡ ለነገሥት ፡ ወለስብሐት ፡ ዐቢያት ፡ ወእምዘርእከ ፡ ይወፅእ ፡ ነቅዐ ፡ ጻድቃን ፡ ወቅዱሳን ፡ ወኊልቊ ፡ አልቦሙ ፡ ለዓለም ።
=== chapter 66 ===
ወእምድኅረዝ ፡ አርአየኒ ፡ መላእክተ ፡ መቅሠፍት ፡ እለ ፡ ድልዋን ፡ ከመ ፡ ይምጽኡ ፡ ወይፍትሑ ፡ ኲሎ ፡ ኀይለ ፡ ማይ ፡ ዘመትሕተ ፡ ምድር ፡ ከመ ፡ ይኩን ፡ ለኲነኔ ፡ ወለሐጒል ፡ ለኲሎሙ ፡ እለ ፡ ይነብሩ ፡ ወየኀድሩ ፡ ዲበ ፡ የብስ ። ወአዘዘ ፡ እግዚአ ፡ መናፍስት ፡ መላእክተ ፡ እለ ፡ ይወፅኡ ፡ ከመ ፡ እያንሥኡ ፡ እደወ ፡ ወይዕቀቡ ፡ እስመ ፡ እልክቱ ፡ መላእክት ፡ ዲበ ፡ ኀይለ ፡ ማያት ፡ ሀለዉ ። ወወፃእኩ ፡ እምቅድመ ፡ ገጸ ፡ ሄኖክ ።
=== chapter 67 ===
ወበእማንቱ ፡ መዋዕል ፡ ኮነ ፡ ቃለ ፡ እግዚአብሔር ፡ ኀቤየ ፡ ወይቤለኒ ፡ ኖኅ ፡ ናሁ ፡ ክፍልከ ፡ ዐርገ ፡ ኀቤየ ፡ ክፍል ፡ ዘአልቦቱ ፡ ሒስ ፡ ክፍለ ፡ ፍቅር ፡ ወርትዕ ። ወይእዜኒ ፡ ይገብሩ ፡ መላእክት ፡ ዕፀወ ፡ ወሶበ ፡ ወፅኡ ፡ ለውእቱ ፡ መልእክት ፡ እወዲ ፡ እዴየ ፡ ዲቤሃ ፡ ወአዐቅባ ፡ ወትከውን ፡ እምኔሃ ፡ ዘርአ ፡ ሕይወት ፡ ወተውላጠ ፡ ይባእ ፡ ከመ ፡ ኢይንበር ፡ የብስ ፡ ዕራቆ ። ወአጸንዖ ፡ ለዘርእከ ፡ በቅድሜየ ፡ ለዓለመ ፡ ዓለም ፤ ወእዘርኦሙ ፡ ለእለ ፡ የኀድሩ ፡ ምስሌከ ፡ ውስተ ፡ ገጸ ፡ የብስ ፡ ወይትባረክ ፡ ወይትባዛኅ ፡ ቅድመ ፡ የብስ ፡ በስሙ ፡ ለእግዚእ ። ወየዐፅውዎሙ ፡ ለእልክቱ ፡ መላእክት ፡ እለ ፡ አርአይዋ ፡ ለዐመፃ ፡ ውስተ ፡ ይእቲ ፡ ቈላ ፡ እንተ ፡ ትነድድ ፡ እንተ ፡ አርአየኒ ፡ ቀዳሚ ፡ እምሔውየ ፡ ሄኖክ ፡ በዐረብ ፡ በኀበ ፡ አድባረ ፡ ወርቅ ፡ ወብሩር ፡ ወሐፂን ፡ ወነጠብጣብ ፡ ወናእክ ። ወርኢክዋ ፡ ለይእቲ ፡ ቈላ ፡ እንተ ፡ ሀውክ ፡ ዐቢይ ፡ ባቲ ፡ ወተሀውኮ ፡ ማያት ። ወዝንቱ ፡ ኲሉ ፡ ሶበ ፡ ተገብረ ፡ እምውእቱ ፡ ነጠብጣበ ፡ እሳት ፡ ወሀውኮሙ ፡ ዘየሀውኮሙ ፡ በውእቱ ፡ መካን ፡ ተወልደ ፡ ፄና ፡ ተይ ፡ ወተኀብረ ፡ ምስለ ፡ እልኩ ፡ ማያት ፡ ወይእቲ ፡ ቈላ ፡ እንተ ፡ መላእክት ፡ እለ ፡ አስሐቱ ፡ ትነድድ ፡ መትሕተ ፡ ይእቲ ፡ ምድር ። ወእንተ ፡ ቈላተ ፡ ዚአሃ ፡ አፍላገ ፡ እሳት ፡ ይወፅኡ ፡ በኀበ ፡ ይትኴነኑ ፡ እልክቱ ፡ መላእክት ፡ እለ ፡ አስሐትዎሙ ፡ ለእለ ፡ የኀድሩ ፡ ዲበ ፡ የብስ ። ወይከውኑ ፡ እልክቱ ፡ ማያት ፡ በእማንቱ ፡ መዋዕል ፡ ለነገሥት ፡ ወለአዚዛን ፡ ወለልዑላን ፡ ወለእለ ፡ የኀድሩ ፡ ዲበ ፡ የብስ ፡ ለፈውሰ ፡ ነፍስ ፡ ወሥጋ ፡ ወለኲነኔ ፡ መንፈስ ፡ ወተውኔተ ፡ ይመልእ ፡ መንፈሶሙ ፡ ከመ ፡ ይትኰነኑ ፡ ሥጋሆሙ ፡ እስመ ፡ ክህድዎ ፡ ለእግዚአ ፡ መናፍስት ፡ ወይሬእዩ ፡ ኲነኔሆሙ ፡ እንተ ፡ ኲሉ ፡ ዕለት ፡ ወኢየአምኑ ፡ በስሙ ። ወከመ ፡ ብዙኀ ፡ ውዕየ ፡ ሥጋሆሙ ፡ ከመዝ ፡ ቦሙ ፡ ተውላጥ ፡ ለመንፈስ ፡ ለዓለመ ፡ ዓለም ፡ እስመ ፡ አልቦ ፡ በቅድመ ፡ እግዚአ ፡ መናፍስት ፡ ዘይትናገር ፡ በነገረ ፡ በክ ። እስመ ፡ ትመጽእ ፡ ኲነኔ ፡ ዲቤሆሙ ፡ እስመ ፡ የአምኑ ፡ በተውኔተ ፡ ሥጋሆሙ ፡ ወመንፈሰ ፡ እግዚእ ፡ ይክህዱ ። ወኪያሁ ፡ ማያት ፡ በውእቱ ፡ መዋዕል ፡ ቦሙ ፡ ተውላጥ ፡ እስመ ፡ ሶበ ፡ ይትኴነኑ ፡ እልኩ ፡ መላእክት ፡ በውእቱ ፡ መዋዕል ፡ ይትዌለጥ ፡ ዋዕዮሙ ፡ ለእልክቱ ፡ አንቅዕተ ፡ ማያት ፡ ወሶበ ፡ የዐርጉ ፡ መላእክት ፡ ይትዌለጥ ፡ ዝኩ ፡ ማይ ፡ ዘአንቅዕት ፡ ወይቈርር ። ወሰማዕክዎ ፡ ለቅዱስ ፡ ሚካኤል ፡ እንዘ ፡ ያወሥእ ፡ ወይብል ፡ ዛቲ ፡ ኲነኔ ፡ እንተ ፡ ይትኴነኑ ፡ መላእክት ፡ ሰማዕት ፡ ይእቲ ፡ ለነገሥት ፡ ወለአዚዛን ፡ ወለእለ ፡ ይእኅዝዋ ፡ ለየብስ ። እስመ ፡ እሉ ፡ ማያተ ፡ ኲነኔ ፡ ለፈውሰ ፡ ዚአሆሙ ፡ ለመላእክት ፡ ወለሞተ ፡ ሥጋሆሙ ፡ ወኢይሬእዩ ፡ ወኢየአምኑ ፡ ከመ ፡ ይትመየጡ ፡ እሙንቱ ፡ ማያት ፡ ወይከውኑ ፡ እሳተ ፡ ዘይነድድ ፡ ለዓለም ።
=== chapter 68 ===
ወእምድኅረዝ ፡ ወሀበኒ ፡ ትእምርተ ፡ ኲሎሙ ፡ ኅብኣት ፡ በመጽሐፍ ፡ እምሔውየ ፡ ሄኖክ ፡ ወምሳልያተ ፡ ዘተውህባ ፡ ሎቱ ፡ ወደመሮሙ ፡ ሊተ ፡ በነገረ ፡ መጽሐፍ ፡ ዘምሳሌ ። ወበይእቲ ፡ ዕለት ፡ አውሥኦ ፡ ቅዱስ ፡ ሚካኤል ፡ እንዘ ፡ ይብል ፡ ለሩፋኤል ፡ ኀይሉ ፡ ለመንፈስ ፡ ይመስጠኒ ፡ ወያምዕዐኒ ፡ ወበእንተ ፡ ዕፀቡ ፡ ለኲነኔ ፡ እንተ ፡ ኅቡኣት ፡ ለኲነኔ ፡ መላእክት ፡ መኑ ፡ ውእቱ ፡ ዘይክል ፡ ተዐግሦተ ፡ ዕፁበ ፡ ለእንተ ፡ ተገብረት ፡ ኲነኔ ፡ ወነበረት ፡ ወይትመሰዉ ፡ በቅድሜሃ ። ወአውሥአ ፡ ካዕበ ፡ ወይቤሎ ፡ ቅዱስ ፡ ሚካኤል ፡ ለሩፋኤል ፡ መኑ ፡ ውእቱ ፡ ዘኢያረኀርኅ ፡ ልቦ ፡ ዲቤሃ ፡ ወኢይትሀወክ ፡ ኲልያቲሁ ፡ እምዛቲ ፡ ቃል ፤ ኲነኔ ፡ ወፅአት ፡ ዲቤሆሙ ፡ እምኔሆሙ ፡ ዘአውፅእዎሙ ፡ ከመዝ ። ወኮነ ፡ ሶበ ፡ ቆመ ፡ በቅድመ ፡ እግዚአ ፡ መናፍስት ፡ ወከመዝ ፡ ይቤሎ ፡ ቅዱስ ፡ ሚካኤል ፡ ለሩፋኤል ፡ ወኢይከውን ፡ ሎሙ ፡ በውስተ ፡ ዐይነ ፡ እግዚእ ፡ እስመ ፡ እግዚአ ፡ መናፍስት ፡ ተምዕዖሙ ፡ እስመ ፡ በአምሳለ ፡ እግዚእ ፡ ይገብሩ ። በእንተዝ ፡ ይመጽእ ፡ ላዕሌሆሙ ፡ ኲነኔ ፡ ዘኅቡእ ፡ ለዓለመ ፡ ዓለም ፡ እስመ ፡ ኢመልአክ ፡ ወኢብእሲ ፡ ኢይትሜጠው ፡ መክፈልቶ ፡ አላ ፡ እሙንቱ ፡ ባሕቲቶሙ ፡ ተመጠዉ ፡ ኲነኔ ፡ ዚአሆሙ ፡ ለዓለመ ፡ ዓለም ።
=== chapter 69 ===
ወእምድኅረዝ ፡ ኲነኔ ፡ ያደነግፅዎሙ ፡ ወያምዕዕዎሙ ፡ እስመ ፡ ዘንተ ፡ አርአዩ ፡ ለእለ ፡ የኀድሩ ፡ ዲበ ፡ የብስ ። ወነዋ ፡ አስማቲሆሙ ፡ ለእልክቱ ፡ መላእክት ፡ ወዝንቱ ፡ ውእቱ ፡ አስማቲሆሙ ፡ ቀዳማየ ፡ ዚአሆሙ ፡ ስምያዛ ፤ ወካልኡ ፡ አርስጢቂፋ ፤ ወሣልስ ፡ አርሜን ፤ ወራብዕ ፡ ከከባኤል ፤ ወኃምስ ፡ ጡርኤል ፤ ወሳድስ ፡ ሩምያል ፤ ወሳብዕ ፡ ዳንኤል ፤ ወሳምን ፡ ኑቃኤል ፤ ወታስዕ ፡ በራቅኤል ፤ ወዓሥር ፡ አዛዝኤል ፤ ፲ወ፩አርምርስ ፤ ፲ወ፪በጠርያል ፤ ፲ወ፫በሰሳኤል ፤ ፲ወ፬አናንኤል ፤ ፲ወ፭ጡርያል ፤ ፲ወ፯ሲማፒሲኤል ፤ ፲ወ፯ይተርኤል ፤ ፲ወ፰ቱማኤል ፤ ፲ወ፱ጠርኤል ፤ ፳ሩማኤል ፤ ፳ወ፩ዒዜዜኤል ። ወእሉ ፡ እሙንቱ ፡ አርእስተ ፡ መላእክቲሆሙ ፡ ወአስማቲሆሙ ፡ ለመኰንነ ፡ ፻ዚአሆሙ ፤ ወመኰንነ ፡ ፶ዚአሆሙ ፤ ወመኰንነ ፡ ፲ዚአሆሙ ። ስሙ ፡ ለቀዳማዊ ፡ ይቁን ፡ ወዝንቱ ፡ ዘአስሐተ ፡ ኲሎሙ ፡ ደቂቀ ፡ መላእክት ፡ ቅዱሳን ፡ ወአውረዶሙ ፡ ዲበ ፡ የብስ ፡ ወአስሐቶሙ ፡ በአዋልደ ፡ ሰብእ ። ወካልእ ፡ ስሙ ፡ አስብኤል ፡ ዝንቱ ፡ አመሮሙ ፡ ምክረ ፡ እኩየ ፡ ለደቂቀ ፡ መላእክት ፡ ቅዱሳን ፡ ወአስሐቶሙ ፡ ከመ ፡ ያማስኑ ፡ ሥጋሆሙ ፡ በአዋልደ ፡ ሰብእ ። ወሣልስ ፡ ስሙ ፡ ጋድርኤል ፡ ዝውእቱ ፡ ዘአርአየ ፡ ኲሎ ፡ ዝብጠታተ ፡ ሞት ፡ ለውሉደ ፡ ሰብእ ፡ ወውእቱ ፡ አስሐታ ፡ ለሔዋን ፡ ወውእቱ ፡ አርአየ ፡ ንዋየ ፡ ሞት ፡ ለደቂቀ ፡ ሰብእ ፡ ወድርዐ ፡ ወወልታ ፡ ወሰይፈ ፡ ለቀትል ፡ ወኲሎ ፡ ንዋየ ፡ ሞት ፡ ለውሉደ ፡ ሰብእ ። ወእምነ ፡ እዴሁ ፡ ወፅአ ፡ ዲቤሆሙ ፡ ለእለ ፡ የኀድሩ ፡ ዲበ ፡ የብስ ፡ እምይእቲ ፡ ጊዜ ፡ ወእስከ ፡ ለዓለም ። ወራብዕ ፡ ስሙ ፡ ፔኔሙዕ ፡ ዝንቱ ፡ አርአየ ፡ ለውሉደ ፡ ሰብእ ፡ መሪረ ፡ ወመዐርዒረ ፡ ወአርአዮሙ ፡ ኲሎ ፡ ኅቡኣተ ፡ ጥበቦሙ ። ውእቱ ፡ አለበዎሙ ፡ ለሰብእ ፡ መጽሐፈ ፡ ወበማየ ፡ ሕመት ፡ ወክርታስ ፡ ወበእንተዝ ፡ ብዙኃን ፡ እለ ፡ ስሕቱ ፡ እምዓለም ፡ ወእስከ ፡ ለዓለም ፡ ወእስከ ፡ ዛቲ ፡ ዕለት ። እስመ ፡ ኢተወልደ ፡ ሰብእ ፡ ለዝ ፡ ከመዝ ፡ በቀለም ፡ ወበማየ ፡ ሕመት ፡ ያጽንዑ ፡ ሃይማኖቶሙ ። እስመ ፡ ኢተፈጥረ ፡ ሰብእ ፡ ዘእንበለ ፡ ከመ ፡ መላእክት ፡ ከመ ፡ ይንበሩ ፡ ጻድቃነ ፡ ወንጹሓነ ፡ ወሞት ፡ ዘኲሎ ፡ ያማስን ፡ እምኢገሰሶሙ ፡ አላ ፡ በዝ ፡ አእምሮቶሙ ፡ ይትኀጐሉ ፡ ወበዝንቱ ፡ ኀይል ፡ ይበልዐኒ ። ወኃምስ ፡ ስሙ ፡ ከስድያዕ ፡ ዝንቱ ፡ አርአየ ፡ ለውሉደ ፡ ሰብእ ፡ ኲሎ ፡ ዝብጠታተ ፡ እኩየ ፡ ዘነፍሳት ፡ ወዘአጋንንት ፡ ወዝብጠታተ ፡ ጻእጻእ ፡ በማኅፀን ፡ ከመ ፡ ይደቅ ፡ ወዝብጠታተ ፡ ነፍስ ፡ ንስከተ ፡ አርዌ ፡ ወዝብጠተ ፡ ዘይከውን ፡ በቀትር ፡ ወልዳ ፡ ለአርዌ ፡ ዘስሙ ፡ ተባዕት ። ወዝንቱ ፡ ውእቱ ፡ ኊልቁ ፡ ለክስብኤል ፡ ርእሰ ፡ መሐላ ፡ ዘአርአየ ፡ ለቅዱሳን ፡ ሶበ ፡ የኀድር ፡ ልዑል ፡ በስብሐት ፡ ወስሙ ፡ ቤቃ ። ወዝንቱ ፡ ይቤሎ ፡ ለቅዱስ ፡ ሚካኤል ፡ ያርእዮሙ ፡ ስመ ፡ ኅቡአ ፡ ከመ ፡ ይርአይዎ ፡ ለውእቱ ፡ ስም ፡ ኅቡእ ፡ ወከመ ፡ ይዝክርዎ ፡ በመሐላ ፡ ከመ ፡ ይርዐዱ ፡ እምውእቱ ፡ ስም ፡ ወመሐላ ፡ እለ ፡ አርአዩ ፡ ለውሉደ ፡ ሰብእ ፡ ኲሎ ፡ ዘኅቡእ ። ወዝንቱ ፡ ኀይሉ ፡ ለዝ ፡ መሐላ ፡ እስመ ፡ ኀያል ፡ ውእቱ ፡ ወጽኑዕ ፡ ወአንበሮ ፡ ለዝ ፡ መሐላ ፡ አካዕ ፡ በእዴሁ ፡ ለቅዱስ ፡ ሚካኤል ። ወእሉ ፡ እሙንቱ ፡ ኅቡኣቲሁ ፡ ለዝ ፡ መሐላ ፡ ወጸንዑ ፡ በመሐላሁ ፡ ወሰማይ ፡ ተሰቅለ ፡ ዘእንበለ ፡ ይትፈጠር ፡ ዓለም ፡ ወእስከ ፡ ለዓለም ። ወቦቱ ፡ ምድር ፡ ተሳረረት ፡ ዲበ ፡ ማይ ፡ ወእምነ ፡ ኅቡኣተ ፡ አድባር ፡ ይመጽኣ ፡ ላህያት ፡ ለሕያዋን ፡ ማያት ፡ እምፍጥረተ ፡ ዓለም ፡ ወእስከ ፡ ለዓለም ። ወበውእቱ ፡ መሐላ ፡ ተፈጥረት ፡ ባሕር ፡ ወመሠረታ ፡ ለጊዜ ፡ መዐት ፡ አንበረ ፡ ላቲ ፡ ኆፃ ፡ ወኢተኀልፍ ፡ እምፍጥረተ ፡ ዓለም ፡ ወእስከ ፡ ለዓለም ። ወበውእቱ ፡ መሐላ ፡ ቀላያት ፡ ጸንዑ ፡ ወቆሙ ፡ ወኢይትሐወሱ ፡ እመካኖሙ ፡ እምዓለም ፡ ወእስከ ፡ ለዓለም ። ወበውእቱ ፡ መሐላ ፡ ፀሐይ ፡ ወወርኅ ፡ ይፌጽሙ ፡ ምኋሮሙ ፡ ወኢየኀልፉ ፡ እምትእዛዞሙ ፡ እምዓለም ፡ ወእስከ ፡ ለዓለም ። ወበውእቱ ፡ መሐላ ፡ ከዋክብት ፡ ይፌጽሙ ፡ ምኋሮሙ ፡ ወአስማቲሆሙ ፡ ይጼውዕ ፡ ወያወሥእዎ ፡ እምዓለም ፡ ወእስከ ፡ ለዓለም ። ወከመዝ ፡ ለማይ ፡ ነፍሳቲሆሙ ፡ ለነፋሳት ፡ ወለኲሎሙ ፡ መንፈሳት ፡ ወፍናዋቲሆሙ ፡ እምኲሉ ፡ ኅብራተ ፡ መናፍስት ። ወበህየ ፡ ይትዐቀብ ፡ መዛግብተ ፡ ቃሉ ፡ ለነጐድጓድ ፡ ወብርሃኑ ፡ ለመብረቅ ፡ ወበህየ ፡ ይትዐቀብ ፡ መዛግብተ ፡ በረድ ፡ ወአስሐትያ ፡ ወመዛግብተ ፡ ጊሜ ፡ ወመዛግብተ ፡ ዝናም ፡ ወጠል ። ወኲሎሙ ፡ እሙንቱ ፡ የአምኑ ፡ ወያአኲቱ ፡ በቅድመ ፡ እግዚአ ፡ መናፍስት ፡ ወይሴብሑ ፡ በኲሉ ፡ ኀይሎሙ ፡ ወሲሳዮሙ ፡ በኲሉ ፡ አኰቴት ፡ ይእቲ ፡ ወያአኲቱ ፡ ወይሴብሑ ፡ ወያሌዕሉ ፡ በስሙ ፡ ለእግዚአ ፡ መናፍስት ፡ ለዓለመ ፡ ዓለም ። ወዲቤሆሙ ፡ ጸንዐ ፡ ዝመሐላ ፡ ወይትዐቀቡ ፡ ቦቱ ፡ ወፍናዊሆሙ ፡ ይትዐቀቡ ፡ ወምኋራቲሆሙ ፡ ኢይማስን ። ወኮኖሙ ፡ ፍሥሐ ፡ ዐቢየ ፡ ወባረኩ ፡ ወሰብሑ ፡ ወአልዐሉ ፡ በእንተ ፡ ዘተከሥተ ፡ ሎሙ ፡ ስሙ ፡ ለውእቱ ፡ ወልደ ፡ እጓለ ፡ እመሕያው ። ወነበረ ፡ ዲበ ፡ መንበረ ፡ ስብሐቲሁ ፡ ወርእሱ ፡ ለኲነኔ ፡ ተውህበ ፡ ሎቱ ፡ ለወልደ ፡ እጓለ ፡ እምሕያው ፡ ወያኀልፍ ፡ ወያማስን ፡ ኃጥኣነ ፡ እምገጻ ፡ ለምድር ፡ ወእለ ፡ አስሐትዎ ፡ ለዓለም ። በሰናስል ፡ ይትአሠሩ ፡ ወበማኅበሮሙ ፡ ዘሙስና ፡ ይትዐፀዉ ፡ ወኲሉ ፡ ምግባሮሙ ፡ የኀልፍ ፡ እምቅድመ ፡ ገጸ ፡ ምድር ። ወእምይእዜሰ ፡ ኢይከውን ፡ ዘይማስን ፡ እስመ ፡ ውእቱ ፡ ወልደ ፡ ብእሲ ፡ ተርእየ ፡ ወነበረ ፡ ዲበ ፡ መንበረ ፡ ስብሐቲሁ ፡ ወኲሉ ፡ እኩይ ፡ እምቅድመ ፡ ገጹ ፡ የኀልፍ ፡ ወየሐውር ፡ ወነገፉ ፡ ለውእቱ ፡ ወልደ ፡ ብእሲ ፡ ይጸንዕ ፡ በቅድመ ፡ እግዚአ ፡ መናፍስት ። ዝውእቱ ፡ ምሳሌ ፡ ሣልስ ፡ ዘሄኖክ ።
=== chapter 70 ===
ወኮነ ፡ እምድኅረዝ ፡ ተለዐለ ፡ ስሙ ፡ ሕያው ፡ በኀቤሁ ፡ ለውእቱ ፡ ወልደ ፡ እጓለ ፡ እመሕያው ፡ በኀበ ፡ እግዚአ ፡ መናፍስት ፡ እምእለ ፡ የኀድሩ ፡ ዲበ ፡ የብስ ። ወተለዐለ ፡ በሠረገላተ ፡ መንፈስ ፡ ወወፅአ ፡ ስም ፡ በማእከሎሙ ። ወእምይእቲ ፡ ዕለት ፡ ኢተስሕብኩ ፡ በማእከሎሙ ፡ ወአንበረኒ ፡ በማእከለ ፡ ፪መናፍስት ፡ በማእከለ ፡ መስዕ ፡ ወዐረብ ፡ በኀበ ፡ ነሥኡ ፡ አኅባላተ ፡ መላእክት ፡ ከመ ፡ ይስፍሩ ፡ ሊተ ፡ መካነ ፡ ለኅሩያን ፡ ወለጻድቃን ። ወበህየ ፡ ርኢኩ ፡ አበወ ፡ ቀደምተ ፡ ወጻድቃነ ፡ እለ ፡ እምዓለም ፡ በውእቱ ፡ መካን ፡ የኀድሩ ።
=== chapter 71 ===
ወኮነ ፡ እምድኅረዝ ፡ ከመ ፡ ትትከበት ፡ መንፈስየ ፡ ወትዕርግ ፡ ውስተ ፡ ሰማያት ፡ ርኢክዎሙ ፡ ለውሉዶሙ ፡ ለመላእክት ፡ ይከይዱ ፡ ዲበ ፡ ላህበ ፡ እሳት ፡ ወአልባሲሆሙ ፡ ፀዐዳ ፡ ወዐጽፎሙኒ ፡ ወብርሃነ ፡ ገጾሙ ፡ ከመ ፡ በረድ ። ወርኢኩ ፡ ፪አፍላገ ፡ እሳት ፡ ወብርሃነ ፡ ዝኩ ፡ እሳት ፡ ከመ ፡ ያክንት ፡ ያበርህ ፡ ወወደቁ ፡ በገጽየ ፡ ቅድመ ፡ እግዚአ ፡ መናፍስት ። ወሚካኤል ፡ መልአክ ፡ ፩እምአርእስተ ፡ መላእክት ፡ አኀዘኒ ፡ እዴየ ፡ ዘየማን ፡ ወአንሥአኒ ፡ ወአውፅአኒ ፡ ኀበ ፡ ኲሉ ፡ ኅቡኣተ ፡ ምሕረት ፡ ወኅቡኣተ ፡ ጽድቅ ። ወአርአየኒ ፡ ኲሎ ፡ ኅቡኣተ ፡ አጽናፈ ፡ ሰማይ ፡ ወኲሎ ፡ መዛግብተ ፡ ከዋክብት ፡ ወብርሃናት ፡ ኲሎሙ ፡ እምኀበ ፡ ወፅኡ ፡ ለገጸ ፡ ቅዱሳን ። ወከበቶ ፡ መንፈስ ፡ ለሄኖክ ፡ ውስተ ፡ ሰማየ ፡ ሰማያት ፤ ወርኢኩ ፡ በህየ ፡ ማእከለ ፡ ዝኩ ፡ ብርሃን ፡ ከመ ፡ ቦቱ ፡ ዘይትነደቅ ፡ እምእብነ ፡ አስሐትያ ፡ ወማእከለ ፡ እሙንቱ ፡ አእባን ፡ ልሳናተ ፡ እሳት ፡ ሕያው ። ወርእየት ፡ መንፈስየ ፡ ዐውደ ፡ ዘየዐውዶ ፡ ለውእቱ ፡ ቤት ፡ እሳት ፡ እም ፡ ፬አጽናፊሁ ፡ ለውእቱ ፡ አፍላግ ፡ ምሉኣነ ፡ እሳት ፡ ሕያው ፡ ወየዐውድዎ ፡ ለውእቱ ፡ ቤት ። ወዐውዱ ፡ ሱራፌል ፡ ወኪሩቤል ፡ ወኦፍኒን ፡ እሉ ፡ እሙንቱ ፡ እለ ፡ እይነውሙ ፡ ወየዐቅቡ ፡ መንበረ ፡ ስብሐተ ፡ ዚአሁ ። ወርኢኩ ፡ መላእክተ ፡ እለ ፡ ኢይትኈለቁ ፡ አእላፈ ፡ አእላፋት ፡ ወትእልፊተ ፡ አእላፋት ፡ የዐውድዎ ፡ ለውእቱ ፡ ቤት ፡ ወሚካኤል ፡ ወሩፋኤል ፡ ወገብርኤል ፡ ወፋኑኤል ፡ ወመላእክት ፡ ቅዱሳን ፡ እለ ፡ መልዕልተ ፡ ሰማያት ፡ ይበውኡ ፡ ወይወፅኡ ፡ በውእቱ ፡ ቤት ። ወወፅኡ ፡ እምነ ፡ ውእቱ ፡ ቤት ፡ ሚካኤል ፡ ወገብርኤል ፡ ሩፋኤል ፡ ወፋኑኤል ፡ ወብዙኃን ፡ ቅዱሳን ፡ መላእክት ፡ እለ ፡ አልቦሙ ፡ ኊልቊ ። ወምስሌሆሙ ፡ ርእሰ ፡ መዋዕል ፡ ወርእሱ ፡ ከመ ፡ ፀምር ፡ ፀዐዳ ፡ ወንጹሕ ፡ ወልብሱ ፡ ዘኢይተረጐም ። ወወደቁ ፡ በገጽየ ፡ ወኲሉ ፡ ሥጋየ ፡ ተመስወ ፡ ወመንፈስየ ፡ ተወለጠ ፡ ወጸራኅኩ ፡ በቃል ፡ ዐቢይ ፡ በመንፈሰ ፡ ኀይል ፡ ወባረኩ ፡ ወሰባሕኩ ፡ ወአልዐልኩ ። ወእላ ፡ በረከታት ፡ እለ ፡ ወፅአ ፡ እምነ ፡ አፉየ ፡ ኮና ፡ ሥሙራተ ፡ በቅድመ ፡ ዝኩ ፡ ርእሰ ፡ መዋዕል ። ወመጽአ ፡ ውእቱ ፡ ርእሰ ፡ መዋዕል ፡ ምስለ ፡ ሚካኤል ፡ ወገብርኤል ፡ ሩፋኤል ፡ ወፋኑኤል ፡ ወአእላፍ ፡ ወትእልፊተ ፡ አእላፋት ፡ መላእክት ፡ እለ ፡ አልቦሙ ፡ ኊልቊ ። ወመጽአ ፡ ኀቤየ ፡ ውእቱ ፡ መልአክ ፡ ወበቃሉ ፡ አምኀኒ ፡ ወይቤለኒ ፡ አንተ ፡ ውእቱ ፡ ወልደ ፡ ብእሲ ፡ ዘተወለድከ ፡ ለጽድቅ ፡ ወጽድቅ ፡ ላዕሌከ ፡ ኀደረ ፡ ወጽድቁ ፡ ለርእሰ ፡ መዋዕል ፡ ኢየኀድገከ ። ወይቤለኒ ፡ ይጼውዕ ፡ ለከ ፡ ሰላመ ፡ በስሙ ፡ ለዓለም ፡ ዘይከውን ፡ እስመ ፡ እምህየ ፡ ወፅአ ፡ ሰላም ፡ እምፍጥረተ ፡ ዓለም ፡ ወከመዝ ፡ ይከውን ፡ ለከ ፡ ለዓለም ፡ ወለዓለመ ፡ ዓለም ። ወኲሉ ፡ ዘይከውን ፡ ወየሐውር ፡ ዲበ ፡ ፍኖትከ ፡ እንዘ ፡ ጽድቅ ፡ እየኀድገከ ፡ ለዓለም ፡ ምስሌከ ፡ ይከውን ፡ ማኅደሮሙ ፡ ወምስሌከ ፡ ክፍሎሙ ፡ ወእምኔከ ፡ ኢይትሌለዩ ፡ ለዓለም ፡ ወለዓለመ ፡ ዓለም ። ወከመዝ ፡ ይከውን ፡ ኑኀ ፡ መዋዕል ፡ ምስለ ፡ ውእቱ ፡ ወልደ ፡ እጓለ ፡ እመሕያው ፡ ወሰላም ፡ ይከውን ፡ ለጻድቃን ፡ ወፍኖቱ ፡ ርቱዕ ፡ ለጻድቃን ፡ በስመ ፡ እግዚአ ፡ መናፍስት ፡ ለዓለመ ፡ ዓለም ።
=== book 3 ===
[Book of the Luminaries]
=== chapter 72 ===
መጽሐፈ ፡ ሚጠተ ፡ ብርሃናተ ፡ ሰማይ ፡ ፩፩ ፡ ዘከመ ፡ ሀለዉ ፡ በበሕዘቢሆሙ ፡ ፩፩ ፡ በበሥልጣኖሙ ፡ ወበበዘመኖሙ ፡ ፩፩ ፡ በበስሞሙ ፡ ወሙላዳቲሆሙ ፡ ወበበአውራኂሆሙ ፡ እለ ፡ አርአየኒ ፡ ኡርኤል ፡ መልአክ ፡ ቅዱስ ፡ ዘሀሎ ፡ ምስሌየ ፡ ዘውእቱ ፡ መራሒሆሙ ፡ ወኲሎ ፡ መጽሐፎሙ ፡ በከመ ፡ ውእቱ ፡ አርአየኒ ፡ ወበከመ ፡ ኲሉ ፡ ዓመተ ፡ ዓለም ፡ ወእስከ ፡ ለዓለም ፡ እስከ ፡ ይትገበር ፡ ግብር ፡ ሐዲስ ፡ ዘይነብር ፡ እስከ ፡ ለዓለም ። ወዝንቱ ፡ ውእቱ ፡ ትእዛዝ ፡ ቀዳማዊ ፡ ዘብርሃናት ፡ ፀሐይ ፡ ብርሃን ፡ ሙፃኡ ፡ በኀዋኅው ፡ ሰማይ ፡ እለ ፡ መንገለ ፡ ጽባሕ ፡ ወምዕራቢሁ ፡ በኀዋኅው ፡ ሰማይ ፡ ዘምዕራብ ። ወርኢኩ ፡ ስሱ ፡ ኀዋኅው ፡ እለ ፡ እምኀበ ፡ ይወፅእ ፡ ፀሐይ ፡ ወስሱ ፡ ኀዋኅው ፡ ኀበ ፡ የዐርብ ፡ ፀሐይ ፡ ወወርኅ ፡ በውእቶን ፡ ኀዋኅው ፡ ይሠርቅ ፡ ወየዐርብ ፡ ወመራሒሆሙ ፡ ለከዋክብት ፡ ምስለ ፡ እለ ፡ ይመርሕዎሙ ፡ ፮በጽባሕ ፡ ወ፯በምዕራበ ፡ ፀሐይ ፡ ወኩሎሙ ፡ ፩፩እምድኅረ ፡ ካልኡ ፡ ርቱዕ ፡ ወመሳክው ፡ ብዙኃት ፡ እምየማኑ ፡ ወእምፀጋሙ ፡ ለዝኩ ፡ ኆኅት ። ወቀዳሚ ፡ ይወፅእ ፡ ብርሃን ፡ ዘየዐቢ ፡ ዘስሙ ፡ ፀሐይ ፡ ወክበቡ ፡ ከመ ፡ ክበበ ፡ ሰማይ ፡ ወኲለንታሁ ፡ ምሉእ ፡ እሳተ ፡ ዘያበርህ ፡ ወያውዒ ። ሰረገላተ ፡ በኀበ ፡ የዐርግ ፡ ነፋስ ፡ ይነፍሕ ፤ ወየዐርብ ፡ ፀሐይ ፡ እምሰማይ ፡ ወይገብእ ፡ እንተ ፡ መስዕ ፡ ከመ ፡ ይሑር ፡ ምሥራቀ ፡ ወይትመራሕ ፡ ከመ ፡ ይባእ ፡ ኀበ ፡ ዝኩ ፡ ኆኅት ፡ ወያበርህ ፡ በገጸ ፡ ሰማይ ። ከመዝ ፡ ይወፅእ ፡ በወርኅ ፡ ቀዳማዊ ፡ በኆኅት ፡ ዐባይ ፡ ወይወፅእ ፡ እንተ ፡ ይእቲ ፡ ራብዕት ፡ እምእልኩ ፡ ኀዋኅው ፡ ፷እለ ፡ መንገለ ፡ ምሥራቀ ፡ ፀሐይ ። ወበይእቲ ፡ ራብዕት ፡ ኆኅት ፡ እንተ ፡ እምኔሃ ፡ ይወፅእ ፡ ፀሐይ ፡ በወርኅ ፡ ቀዳማዊ ፡ ባቲ ፡ ዐሥሩ ፡ ወክልኤ ፡ መሳክው ፡ ርኋት ፡ ዘእምኔሆን ፡ ይወፅእ ፡ ላህብ ፡ ሶበ ፡ ይትረኀዉ ፡ እምዘመነ ፡ ዚአሆሙ ። ሶበ ፡ ይሠርቅ ፡ ፀሐይ ፡ እምሰማይ ፡ ይወፅእ ፡ እንተ ፡ ይእቲ ፡ ራብዕት ፡ ኆኅት ፡ ፴ጽባሐ ፡ ወበራብዕት ፡ ኆኅት ፡ እንተ ፡ ምዕራበ ፡ ሰማይ ፡ ርቱዐ ፡ ይወርድ ። ወበእማንቱ ፡ መዋዕል ፡ ትነውኅ ፡ ዕለት ፡ እምዕለት ፡ ወተኀጽር ፡ ሌሊት ፡ እምሌሊት ፡ እስከ ፡ ፴ጽባሕ ። ወበይእቲ ፡ ዕለት ፡ ትነውኅ ፡ ካዕበተ ፡ ዕለት ፡ እምሌሊት ፡ ወትከውን ፡ ዕለት ፡ ጥንቁቀ ፡ ፲ክፍለ ፡ ወትከውን ፡ ሌሊት ፡ ፰ክፍለ ። ወይወፅእ ፡ ፀሐይ ፡ እምዝኩ ፡ ራብዕ ፡ ኆኅት ፡ ወየዐርብ ፡ በራብዕት ፡ ወይገብእ ፡ ውስተ ፡ ኃምስት ፡ ኆኅት ፡ እንተ ፡ ጽባሕ ፡ ፴ጽባሐ ፡ ወይወፅእ ፡ እምኔሃ ፡ ወየዐርብ ፡ ውስተ ፡ ኃምስት ፡ ኆኅት ። አሜሃ ፡ ይነውኅ ፡ ዕለት ፡ ፳እደ ፡ ወትከውን ፡ ዕለት ፡ ፲ወ፩ክፍለ ፡ ወተኀጽር ፡ ሌሊት ፡ ወትከውን ፡ ፯ክፍለ ። ወይገብእ ፡ ፀሐይ ፡ ለጽባሕ ፡ ወይበውእ ፡ ውስተ ፡ ሳድስት ፡ ኆኅት ፡ ወይወፅእ ፡ ወየዐርብ ፡ በሳድስት ፡ ኆኅት ፡ ፴ወ፩ጽባሐ ፡ በእንተ ፡ ትእምርተ ፡ ዚአሃ ። ወበይእቲ ፡ ዕለት ፡ ትነውኅ ፡ ዕለት ፡ እምሌሊት ፡ ወትከውን ፡ ዕለት ፡ ካዕበተ ፡ ሌሊት ፡ ወትከውን ፡ ዕለት ፡ ፲ወ፪ክፍለ ፡ ወተኀጽር ፡ ሌሊት ፡ ወትከውን ፡ ፷ክፍለ ። ወይትነሣእ ፡ ፀሐይ ፡ ከመ ፡ ትኅጽር ፡ ዕለት ፡ ወትኑኅ ፡ ሌሊት ፡ ወይገብእ ፡ ፀሐይ ፡ ለጽባሕ ፡ ወይበውእ ፡ ውስተ ፡ ሳድስት ፡ ኆኅት ፡ ወይሠርቅ ፡ እምኔሃ ፡ ወየዐርብ ፡ ፴ጽባሐ ። ወሶበ ፡ ተፈጸመ ፡ ፴ጽባሕ ፡ ተሐፅፅ ፡ መዓልት ፡ ፩ክፍለ ፡ ጥንቁቀ ፡ ወትከውን ፡ ዕለት ፡ ፲ወ፩ክፍለ ፡ ወሌሊት ፡ ፯ክፍለ ። ወይወፅእ ፡ ፀሐይ ፡ እምነ ፡ ምዕራብ ፡ እምይእቲ ፡ ሳድስት ፡ ኆኅት ፡ ወየሐውር ፡ ምሥራቀ ፡ ወይሠርቅ ፡ በኃምስ ፡ ኆኅት ፡ ፴ጽባሐ ፡ ወየዐርብ ፡ በምዕራብ ፡ ካዕበ ፡ በኃምስ ፡ ኆኅት ፡ እንተ ፡ ምዕራብ ። በይእቲ ፡ ዕለት ፡ ተሐፅፅ ፡ ዕለት ፡ ፪ክፍለ ፡ ወትከውን ፡ ዕለት ፡ ፲ክፍለ ፡ ወሌሊት ፡ ፰ክፍለ ። ወይወጽእ ፡ ፀሐይ ፡ እምይእቲ ፡ ኃምስ ፡ ኆኅት ፡ ወየዐርብ ፡ በኃምስ ፡ ኆኅት ፡ እንተ ፡ ምዕራብ ፡ ወይሠርቅ ፡ በራብዕት ፡ ኆኅት ፡ በእንተ ፡ ትእምርተ ፡ ዚአሃ ፡ ፴ወ፩ጽባሐ ፡ ወየዐርብ ፡ በምዕራብ ። በይእቲ ፡ ዕለት ፡ ይትዔረይ ፡ መዓልት ፡ ምስለ ፡ ሌሊት ፡ ወይከውን ፡ ዕሩየ ፡ ወትከውን ፡ ሌሊት ፡ ፱ክፍለ ፡ ወመዓልት ፡ ፱ክፍለ ። ወይወፅእ ፡ ፀሐይ ፡ እምይእቲ ፡ ኆኅት ፡ ወየዐርብ ፡ በምዕራብ ፡ ወይገብእ ፡ በጽባሕ ፡ ወይወፅእ ፡ በሣልስት ፡ ኆኅት ፡ ፴ጽባሐ ፡ ወየዐርብ ፡ በምዕራብ ፡ በሣልስት ፡ ኆኅት ። ወበይእቲ ፡ ዕለት ፡ ትነውኅ ፡ ሌሊት ፡ እምዕለት ፡ እስከ ፡ ፴ጽባሕ ፡ ወተኀጽር ፡ ዕለት ፡ እምዕለት ፡ እስከ ፡ ፴ዕለት ፡ ወትከውን ፡ ሌሊት ፡ ፲ክፍለ ፡ ጥንቁቀ ፡ ወመዓልት ፡ ፰ክፍለ ። ወይወፅእ ፡ ፀሐይ ፡ እምይእቲ ፡ ሣልስት ፡ ኆኅት ፡ ወየዐርብ ፡ በሣልስት ፡ ኆኅት ፡ በዐረብ ፡ ወይገብእ ፡ ውስተ ፡ ምሥራቅ ፡ ወይወፅእ ፡ ፀሐይ ፡ ውስተ ፡ ካልእ ፡ ኆኅተ ፡ ምሥራቅ ፡ ፴ጽባሐ ፡ ወከመዝ ፡ የዐርብ ፡ በካልእ ፡ ኆኅት ፡ በምዕራበ ፡ ሰማይ ። ወበይእቲ ፡ ዕለት ፡ ትከውን ፡ ሌሊት ፡ ፲ወ፩ክፍለ ፡ ወዕለት ፡ ፯ክፍለ ። ወይወፅእ ፡ ፀሐይ ፡ በይእቲ ፡ ዕለት ፡ እምይእቲ ፡ ካልእት ፡ ኆኅት ፡ ወየዐርብ ፡ በምዕራብ ፡ በካልእ ፡ ኆኅት ፡ ወይገብእ ፡ በምሥራቅ ፡ በአሐቲ ፡ ኆኅት ፡ ፴ወ፩ጽባሐ ፡ ወየዐርብ ፡ በምዕራብ ፡ በአሐቲ ፡ ኆኅት ። ወበይእቲ ፡ ዕለት ፡ ትነውኅ ፡ ሌሊት ፡ ወትከውን ፡ ካዕበታ ፡ ለመዓልት ፡ ወትከውን ፡ ሌሊት ፡ ፲ወ፪ ፡ ክፍለ ፡ ጥንቁቀ ፡ ወመዓት ፡ ፯ክፍለ ። ወፈጸመ ፡ ፀሐይ ፡ አርእስቲሁ ፡ ወዳግመ ፡ የዐውድ ፡ ዲበ ፡ እሉ ፡ አርእስቲሁ ፡ ወይበውእ ፡ በውእቱ ፡ ኆኅት ፡ ፴ጽባሐ ፡ ወበምዕራብኒ ፡ በአንጻሪሁ ፡ የዐርብ ። ወበይእቲ ፡ ዕለት ፡ ተኀጽር ፡ ሌሊት ፡ እምኑኃ ፡ ፩እደ ፡ ዝውእቱ ፡ ክፍል ፡ ፩ወትከውን ፡ ፲ወ፩ክፍለ ፡ ወመዓልት ፡ ፯ክፍለ ። ወገብአ ፡ ፀሐይ ፡ ወቦአ ፡ ውስተ ፡ ካልእ ፡ ኆኅት ፡ እንተ ፡ ምሥራቅ ፡ ወይገብእ ፡ ዲበ ፡ ዝኩ ፡ አርእስቲሁ ፡ ፴ጽባሐ ፡ ይሠርቅ ፡ ወየዐርብ ። ወበይእቲ ፡ ዕለት ፡ ተኀጽር ፡ ሌሊት ፡ እምኑኃ ፡ ወትከውን ፡ ሌሊት ፡ ፲ክፍለ ፡ ወመዓልት ፡ ፰ክፍለ ። ወበይእቲ ፡ ዕለት ፡ ይወፅእ ፡ ፀሐይ ፡ እምይእቲ ፡ ካልእት ፡ ኆኅት ፡ ወየዐርብ ፡ በምዕራብ ፡ ወይገብእ ፡ ምሥራቀ ፡ ወይሠርቅ ፡ በሣልስ ፡ ኆኅት ፡ ፴ወ፩ጽባሐ ፡ ወየዐርብ ፡ በምዕራበ ፡ ሰማይ ። ወበይእቲ ፡ ዕለት ፡ ተሐፅፅ ፡ ሌሊት ፡ ወትከውን ፡ ፱ክፍለ ፡ ወዕለት ፡ ትከውን ፡ ፱ክፍለ ፡ ወይትዔረይ ፡ ሌሊት ፡ ምስለ ፡ መዓልት ፡ ወይከውን ፡ ዓመት ፡ ጥንቁቀ ፡ መዋዕለ ፡ ፫፻ወ፷ወረብዐ ። ወኑኃ ፡ ለዕለት ፡ ወለሌሊት ፡ ወኅጸራ ፡ ለዕለት ፡ ወለሌሊት ፡ በምኋረ ፡ ፀሐይ ፡ ውእቱ ፡ ይትሌለይ ። በእንቲአሁ ፡ ይነውኅ ፡ ምኋሪሁ ፡ ዕለት ፡ እምዕለት ፡ ወሌሊት ፡ እምሌሊት ፡ ይቀርብ ። ወዝውእቱ ፡ ትእዛዙ ፡ ወምኋሩ ፡ ለፀሐይ ፡ ወምግባኡ ፡ ሶበ ፡ ይገብእ ፡ ለእንተ ፡ ፷ይገብእ ፡ ወይወፅእ ፡ ዘውእቱ ፡ ብርሃን ፡ ዐቢይ ፡ ዘለዓለም ፡ ዘይሰመይ ፡ ፀሐየ ፡ ለዓለመ ፡ ዓለም ። ወዝንቱ ፡ ውእቱ ፡ ዘይወፅእ ፡ ብርሃን ፡ ዐቢይ ፡ ዘይሰመይ ፡ በአርአያ ፡ ዚአሁ ፡ በከመ ፡ አዘዘ ፡ እግዚእ ። ወከመዝ ፡ ይወፅእ ፡ ወይበውእ ፡ ወኢየሐፅፅ ፡ ወኢየዐርፍ ፡ አላ ፡ ይረውጽ ፡ መዓልተ ፡ ወሌሊተ ፡ በሰረገላ ፡ ወብርሃነ ፡ ዚአሁ ፡ ፯እደ ፡ ያበርህ ፡ እምዘወርኅ ፡ ወአምጣኒሆሙ ፡ ለ፪ኤሆሙ ፡ ዘውግ ።
=== chapter 73 ===
ወድኅሬሁ ፡ ለዝ ፡ ትእዛዝ ፡ ርኢኩ ፡ ካልአ ፡ ትእዛዘ ፡ ለብርሃን ፡ ንኡስ ፡ ዘስሙ ፡ ወርኅ ። ወክበቡ ፡ ከመ ፡ ክበበ ፡ ሰማይ ፡ ወሰረገላ ፡ ዚአሁ ፡ በኀበ ፡ ይጼአን ፡ ነፋስ ፡ ይነፍኅ ፡ ወበመስፈርት ፡ ይትወሀብ ፡ ሎቱ ፡ ብርሃን ። ወበኲሉ ፡ ወርኅ ፡ ሙጻኢሁ ፡ ወሙባኢሁ ፡ ይትዌለጥ ፡ ወመዋዕሊሁ ፡ ከመ ፡ መዋዕለ ፡ ፀሐይ ፡ ወሶበ ፡ ይኤሪ ፡ ከዊነ ፡ ብርሃኑ ፡ ይከውን ፡ ብርሃኑ ፡ ሳብዓየ ፡ እደ ፡ እምብርሃነ ፡ ፀሐይ ፡ ወከመዝ ፡ ይሠርቅ ። ወርእሱ ፡ ዘመንገለ ፡ ጽባሕ ፡ ይወጽእ ፡ በ፴ጽባሕ ፡ ወበይእቲ ፡ ዕለት ፡ ያስተርኢ ፡ ወይከውን ፡ ለክሙ ፡ ርእሰ ፡ ወርኅ ፡ ፴ጽባሐ ፡ ምስለ ፡ ጸሐይ ፡ በኆኅት ፡ እንተ ፡ ይወጽእ ፡ ፀሐይ ። ወመንፈቁ ፡ ርኁቅ ፡ ፯እደ፩ ፡ ወኲሉ ፡ ክበበ ፡ ዚአሁ ፡ በክ ፡ ዘአልቦ ፡ ብርሃን ፡ ዘእንበለ ፡ ሳብዒት ፡ እደ ፡ ዚአሁ ፡ እም ፡ ፲ወ፬እደ ፡ ብርሃኑ ። ወበዕለተ ፡ ይነሥእ ፡ ሳብዓየ ፡ እደ ፡ ወመንፈቀ ፡ ብርሃኑ ፡ ይከውን ፡ ብርሃኑ ፡ ፯ወ፯እደ ፡ አሐቲ ፡ ወመንፈቃ ፡ የዐርብ ፡ ምስለ ፡ ጸሐይ ። ወሶበ ፡ ይሠርቅ ፡ ጸሐይ ፡ ይሠርቅ ፡ ወርኅ ፡ ምስሌሁ ፡ ወይነሥእ ፡ መንፈቀ ፡ እደ ፡ ብርሃን ፡ ወበይእቲ ፡ ሌሊት ፡ በርእሰ ፡ ጽባሐ ፡ ዚአሁ ፡ በቅድመ ፡ ዕለቱ ፡ ለወርኅ ፡ የዐርብ ፡ ወርኅ ፡ ምስለ ፡ ጸሐይ ፡ ወይጸልም ፡ በይእቲ ፡ ሌሊት ፡ ፯ወ፯እደ ፡ ወንፍቃ ። ወይሠርቅ ፡ በይእቲ ፡ ዕለት ፡ ሳብዓየ ፡ እደ ፡ ጥንቁቀ ፡ ወይወጽእ ፡ ወይጸንን ፡ እምሥራቀ ፡ ጸሐይ ፡ ወያበርህ ፡ በተረፈ ፡ ዕለቱ ፡ ፯ወ፯እደ ።
=== chapter 74 ===
ወካልአ ፡ ምኋረ ፡ ወትእዛዘ ፡ ርኢኩ ፡ ሎቱ ፡ እንተ ፡ በውእቱ ፡ ትእዛዝ ፡ ይገብር ፡ ምኋሮ ፡ ዘአውራኅ ። ወኲሎ ፡ አርአየኒ ፡ ኡርኤል ፡ መልአክ ፡ ቅዱስ ፡ ዘውእቱ ፡ መራኂሆሙ ፡ ለኲሎሙ ፡ ወምንባሪሆሙ ፡ ጸሐፍኩ ፡ በከመ ፡ አርአየኒ ፡ ወጸሐፍኩ ፡ አውራኂሆሙ ፡ በከመ ፡ ሀለዉ ፡ ወርእየ ፡ ብርሃኖሙ ፡ እስከ ፡ ተፈጸመ ፡ ፲ወ፭መዋዕል ። በ፩ ፡ ፯፯እድ ፡ ይፌጽም ፡ ኲሎ ፡ ብርሃኖ ፡ በምሥራቅ ፡ ወበበ ፡ ፯፯እድ ፡ ይፌጽም ፡ ኲሎ ፡ ጽልመቶ ፡ በምዕራብ ። ወበአውራኅ ፡ እሙራት ፡ ይዌልጥ ፡ ምዕራባተ ፡ ወበአውራኅ ፡ እሙራት ፡ የሐውር ፡ ምኋሪሁ ፡ ፩፩ ። ወበ፪ወርኅ ፡ የዐርብ ፡ ምስለ ፡ ጸሐይ ፡ በእሉ ፡ ፪ኀዋኅው ፡ እለ ፡ በማእከል ፡ በሣልስ ፡ ወበራብዕ ፡ ኆኅት ። ይወጽእ ፡ ፯መዋዕለ ፡ ወየአውድ ፡ ወይገብእ ፡ ካዕበ ፡ በኆኅት ፡ እንተ ፡ ይወጽእ ፡ ፀሐይ ፤ ወበውእቱ ፡ ይፌጽም ፡ ኲሎ ፡ ብርሃኖ ፡ ወይጸንን ፡ እምጸሐይ ፡ ወይበውእ ፡ ሰሙነ ፡ መዋዕለ ፡ በሳድስት ፡ ኆኅት ፡ እንተ ፡ እምኔሃ ፡ ይወጽእ ፡ ጸሐይ ። ወሶበ ፡ ይወጽእ ፡ ጸሐይ ፡ እምራብዕት ፡ ኆኅት ፡ ይወጽእ ፡ ሰቡዐ ፡ መዋዕለ ፡ እስከ ፡ ይወጽእ ፡ እምነ ፡ ኃምስት ፡ ወካዕበ ፡ ይገብእ ፡ ሰብዐ ፡ መዋዕለ ፡ በኆኅት ፡ ራብዕ ፡ ወይፌጽም ፡ ኲሎ ፡ ብርሃኖ ፡ ወይጸንን ፡ ወይበውእ ፡ በቀዳሚት ፡ ኆኅት ፡ ሰሙነ ፡ መዋዕለ ። ወካዕበ ፡ ይገብእ ፡ ሰቡዐ ፡ መዋዕለ ፡ በራብዕት ፡ ኆኅት ፡ እንተ ፡ እምኔሃ ፡ ይወጽእ ፡ ጸሐይ ። ከመዝ ፡ ርኢኩ ፡ ምንባሮሙ ፡ በከመ ፡ ሥርዐተ ፡ አውራኂሆሙ ፡ ይሠርቅ ፡ ወየዐርብ ፡ ጸሐይ ። ወበእማንቱ ፡ መዋዕል ፡ ይትዌሰክ ፡ ፭ዓመት ፡ ወይበጽሖ ፡ ለጸሐይ ፡ ፴መዋዕል ፡ ወኲሎሙ ፡ መዋዕላት ፡ ይበጽሕዎ ፡ ለ፩ዓመት ፡ እምእልኩ ፡ ፭ዓመት ፡ ተመሊኦሙ ፡ ይከውኑ ፡ ፫፻ወ፷ወ፬መዋዕለ ። ወይበጽሕ ፡ ምብጻሒሆሙ ፡ ለጸሐይ ፡ ወለከዋክብት ፡ ስሱ ፡ መዋዕል ፡ እም፭ዓመታት ፡ በበስሱ ፡ ይበጽሖሙ ፡ ፴ዕለት ፡ ወየሐጽጽ ፡ እምፀሐይ ፡ ወእምከዋክብት ፡ ወርኅ ፡ ፴መዋዕለ ። ወወርኅ ፡ ያመጽኦሙ ፡ ለዓመታት ፡ ጥንቁቀ ፡ ኲሎሙ ፡ ከመ ፡ ምንባሮሙ ፡ ለዓለም ፡ ኢይበድሩ ፡ ወኢይዴኀሩ ፡ አሐተ ፡ ዕለተ ፡ አላ ፡ ይዌልጡ ፡ ዓመተ ፡ በጽድቅ ፡ ጥንቁቀ ፡ በበ ፡ ፫፻ወ፮ወ፬መዋዕል ። ለ፫ዓም ፡ መዋዕሊሁ ፡ ፲፻ወ፺ወ፪ ፡ ወለ፭ዓመት ፡ ፲ወ፰፻ወ፳መዋዕል ፡ ከመ ፡ ይኩን ፡ ለ፰ዓመት ፡ ፳ወ፱፻ወ፲ወ፪መዋዕል ። ለወርኅ ፡ ለባሕቲቱ ፡ ይበጽሕ ፡ መዋዕሊሁ ፡ ለ፫ዓም ፡ ፲፻ወ፰ወ፪መዋዕል ፡ ወለ፭ዓመት ፡ የሐፅፅ ፡ ፶መዋዕለ ፡ እስመ ፡ በጸአቱ ፡ ይትዌሰክ ፡ ዲበ ፡ ፰ወ፪መዋዕል ። ወይከውን ፡ ለ፭ዓም ፡ ፲ወ፯፻ወ፸መዋዕል ፡ ከመ ፡ ይኩን ፡ ለወርኅ ፡ ለ፰ዓመት ፡ መዋዕሊሁ ፡ ፳፻ወ፰፻ወ፴ወ፪መዋዕል ። እስመ ፡ ሕፀፅ ፡ ለ፰ዓመት ፡ መዋዕሊሁ ፡ ፹ ፡ ወኲሎሙ ፡ መዋዕል ፡ ዘሐፀፀ ፡ እም፰ዓም ፡ መዋዕለ ፡ ፹ ። ወይትፌጸም ፡ ዓመት ፡ በጽድቅ ፡ በከመ ፡ መንበረ ፡ ዚአሆሙ ፡ ወመንበረ ፡ ጸሐይ ፡ እለ ፡ ይሠርቁ ፡ እምነ ፡ ኆኅት ፡ እለ ፡ እምኔሆሙ ፡ ይሠርቅ ፡ ወየዐርብ ፡ መዋዕለ ፡ ፴ ።
=== chapter 75 ===
ወመራኅያኒሆሙ ፡ ለአርእስተ ፡ አእላፍ ፡ እለ ፡ ዲበ ፡ ኲሉ ፡ ፍጥረት ፡ ወዲበ ፡ ኲሉ ፡ ከዋክብት ፡ ወምስለ ፡ ፬እለ ፡ ይትዌሰኩ ፡ ወኢይትሌለዩ ፡ እምንባሮሙ ፡ በከመ ፡ ኲሉ ፡ ሐሳበ ፡ ዓመት ፡ ወእሉ ፡ ይትቀነዩ ፡ ፬መዋዕለ ፡ እለ ፡ እይትሐሰቡ ፡ በሐሳበ ፡ ዓመት ። ወበእንቲአሆሙ ፡ ይጌግዩ ፡ ቦሙ ፡ ሰብእ ፡ እስመ ፡ እሙንቱ ፡ ብርሃናት ፡ ይትቀነዩ ፡ በጽድቅ ፡ በምንባረ ፡ ዓለም ፡ ፩በቀዳሚ ፡ ኆኅት ፡ ወ፩በሣልስ ፡ ኆኅት ፡ ወ፩በራብዕ ፡ ኆኅት ፡ ወ፩በሳድስ ፡ ኆኅት ፡ ወይትፌጸም ፡ ጥንቃዌ ፡ ዓለም ፡ በበ ፡ ፫፻ወ፰ወ፬መንበረ ፡ ዓለም ። እስመ ፡ ለትእምርት ፡ ወለአዝማን ፡ ወለዓመታት ፡ ወለመዋዕል ፡ አርአየኒ ፡ ኡርኤል ፡ መልአክ ፡ ዘአንበሮ ፡ እግዚአ ፡ ስብሐት ፡ ዘለዓለም ፡ ዲበ ፡ ኲሎሙ ፡ ብርሃናተ ፡ ሰማይ ፡ በሰማይ ፡ ወበዓለም ፡ ከመ ፡ ይምልኩ ፡ በገጸ ፡ ሰማይ ፡ ወይትረአዩ ፡ ዲበ ፡ ምድር ፡ ወይኩኑ ፡ መራኅያነ ፡ ለመዓልት ፡ ወለሌሊት ፡ ፀሐይ ፡ ወወርኅ ፡ ወከዋክብት ፡ ወኲሉ ፡ ቅንየታት ፡ እለ ፡ የአውዱ ፡ በኲሎሙ ፡ ሰረገላተ ፡ ሰማይ ። ከመዝ ፡ ፲ወ፪ኀዋኅው ፡ ርኋተ ፡ አርአየኒ ፡ ኡርኤል ፡ በክበበ ፡ ሰረገላት ፡ ዘጸሐይ ፡ በሰማይ ፡ እለ ፡ እምኔሆሙ ፡ ይወጽኡ ፡ እገሪሃ ፡ ለጸሐይ ፡ ወእምኔሆሙ ፡ ይወጽእ ፡ ሞቅ ፡ ዲበ ፡ ምድር ፡ ሶበ ፡ ይትረኀዉ ፡ በአዝማን ፡ እለ ፡ እሙራን ፡ ቦሙ ። ወለነፋሳት ፡ ወለመንፈሰ ፡ ጠል ፡ ሶበ ፡ ይትረኀዉ ፡ በአዝማን ፡ ርኋተ ፡ በሰማያት ፡ ዲበ ፡ አጽናፍ ። ፲ወ፪ኀዋኅው ፡ ርኢኩ ፡ በሰማይ ፡ በአጽናፈ ፡ ምድር ፡ እለ ፡ እምኔሆሙ ፡ ይወጽኡ ፡ ፀሐይ ፡ ወወርኅ ፡ ወከዋክብት ፡ ወኲሉ ፡ ግብራተ ፡ ሰማይ ፡ እምነ ፡ ምሥራቅ ፡ ወእምነ ፡ ምዕራብ ። ወመሳክው ፡ ርኋት ፡ ብዙኃት ፡ እምፀጋሙ ፡ ወእምየማኑ ፡ ወአሐቲ ፡ መስኮት ፡ በዘመነ ፡ ዚአሃ ፡ ታመውቅ ፡ ሞቀ ፡ ዘከመ ፡ እልኩ ፡ ኀዋኅው ፡ እለ ፡ ይወጽኡ ፡ እምኔሆሙ ፡ ከዋክብት ፡ በከመ ፡ አዘዞሙ ፡ ወእለ ፡ ቦሙ ፡ የዐርቡ ፡ በከመ ፡ ኊልቆሙ ። ወርኢኩ ፡ ሰረገላተ ፡ በሰማይ ፡ እንዘ ፡ ይረውፁ ፡ በዓለም ፡ እመልዕልቶሙ ፡ ወእመትሕቶሙ ፡ ለእልኩ ፡ ኀዋኅው ፡ እለ ፡ ቦሙ ፡ ይትመየጡ ፡ ከዋክብት ፡ እለ ፡ ኢየዐርቡ ። ወ፩የዐብዮሙ ፡ ለኲሎሙ ፡ ወውእቱ ፡ የአውድ ፡ ለኲሉ ፡ ዓለም ።
=== chapter 76 ===
ወበአጽናፈ ፡ ምድር ፡ ርኢኩ ፡ ፲ወ፪ኀዋኅው ፡ ርኋተ ፡ ለኲሎሙ ፡ ነፋሳት ፡ እለ ፡ እምኔሆሙ ፡ ይወጽኡ ፡ ነፋሳት ፡ ወይነፍሱ ፡ ዲበ ፡ ምድር ። ፫እምኔሆሙ ፡ ርኋት ፡ በገጸ ፡ ሰማይ ፡ ወ፫በምዕራብ ፡ ወ፫በየማነ ፡ ሰማይ ፡ ወ፫በፀጋም ። ወ፫ቀዳምያት ፡ እለ ፡ መንገለ ፡ ጽባሕ ፡ ወ፫መንገለ ፡ መስዕ ፡ ወ፫በድኅር ፡ እለ ፡ በጸጋም ፡ ለመንገለ ፡ አዜብ ፡ ወ፫በዓረብ ። በ፬እምኔሆሙ ፡ ይወጽኡ ፡ ነፋሳተ ፡ በረከት ፡ ወሰላም ፡ ወእምእልኩ ፡ ፰ይወጽኡ ፡ ነፋሳተ ፡ መቅሠፍት ፡ ሶበ ፡ ይትፌነዉ ፡ ይደመስስዋ ፡ ለኲላ ፡ ምድር ፡ ወለማይ ፡ ዘዲቤሃ ፡ ወለኲሎሙ ፡ እለ ፡ የኀድፉ ፡ ዲቤሃ ፡ ወኲሉ ፡ ዘሀሎ ፡ ውስተ ፡ ማይ ፡ ወዲበ ፡ የብስ ። ወይወጽእ ፡ ቀዳማይ ፡ ነፋስ ፡ እምእልኩ ፡ ኀዋኅው ፡ ዘስሙ ፡ ጽባሓይ ፡ በቀዳሚት ፡ ኆኅት ፡ እንተ ፡ መንገለ ፡ ጽባሕ ፡ እንተ ፡ ታጸንን ፡ ለአዜብ ፡ ይወጽእ ፡ እምኔሃ ፡ ድምሳሴ ፡ የብስ ፡ ወሞቅ ፡ ወሐጒል ። ወበካልእት ፡ ኆኅት ፡ ማእከላይት ፡ ይወጽእ ፡ ርትዕ ፡ ወይወጽእ ፡ እምኔሃ ፡ ዝናም ፡ ወፍሬ ፡ ወሰላም ፡ ወጠል ፤ ወበሣልስት ፡ ኆኅት ፡ እንተ ፡ መንገለ ፡ መስዕ ፡ ይወጽእ ፡ ቊር ፡ ወየብስ ። ወእምድኅረ ፡ እሉ ፡ ነፋሳት ፡ በመንገለ ፡ አዜብ ፡ ይወጽእ ፡ በ፫ኆኅት ፤ ቀዳምያት ፡ በቀዳሚት ፡ ኆኅት ፡ እምኔሆን ፡ እንተ ፡ ትጸንን ፡ ለመንገለ ፡ ምሥራቅ ፡ ይወጽእ ፡ ነፋሰ ፡ ሞቅ ። ወበኆኅት ፡ እንተ ፡ ኀቤሃ ፡ ማእከላይት ፡ ይወጽእ ፡ እምኔሃ ፡ መዐዛ ፡ ሠናይ ፡ ወጠል ፡ ወዝናም ፡ ወሰላም ፡ ወሕይወት ። ወበሣልስት ፡ ኆኅት ፡ እንተ ፡ መንገለ ፡ ምዕራብ ፡ ይወጽእ ፡ እምኔሃ ፡ ጠል ፡ ወዝናም ፡ ወአናኲዕ ፡ ወድምሳሴ ። ወእምድኅረ ፡ እሉ ፡ ነፋሳት ፡ ዘመንገለ ፡ መስዕ ፡ [ ፡ ዘስሙ ፡ ባሕር ፡ ] ፡ እም ፡ [ ፡ ፫ ፡ ] ፡ ሳብዓይ ፡ ኆኅት ፡ እንተ ፡ መንገለ ፡ ምሥራቅ ፡ ዘታጸንን ፡ መንገለ ፡ አዜብ ፡ ይወጽእ ፡ እምኔሃ ፡ ጠል ፡ ወዝናም ፡ አናኲዕ ፡ ወድምሳሴ ። ወእማእከላይት ፡ ኆኅት ፡ ርትዕት ፡ ይወጽእ ፡ እምኔሃ ፡ ዝናም ፡ ወጠል ፡ ወሕይወት ፡ ወሰላም ፡ ወበሣልስት ፡ ኆኅት ፡ እንተ ፡ መንገለ ፡ ምዕራብ ፡ እንተ ፡ ታጸንን ፡ ለመስዕ ፡ ይወጽእ ፡ እምኔሃ ፡ ጊሜ ፡ ወአስሐትያ ፡ ወሐመዳ ፡ ወዝናም ፡ ወጠል ፡ ወአናኲዕ ። ወእምድኅረ ፡ እሉ ፡ [ ፬ ፡ ] ፡ ነፋሳት ፡ እለ ፡ መንገለ ፡ ምዕራብ ፡ በቀዳሚት ፡ ኆኅት ፡ እንት ፡ ታጸንን ፡ ለመንገለ ፡ መስዕ ፡ ወእምኔሃ ፡ ይወጽእ ፡ ጠል ፡ ወዝናም ፡ ወአስሐትያ ፡ ወቊር ፡ ወሐመዳ ፡ ወደደክ ። ወእምነ ፡ ኆኅት ፡ ማእከላይት ፡ ይወጽእ ፡ ጠል ፡ ወዝናም ፡ ሰላም ፡ ወበረከት ፡ ወበደኃሪት ፡ ኆኅት ፡ እንተ ፡ መንገለ ፡ አዜብ ፡ ይወጽእ ፡ እምኔሃ ፡ የብስ ፡ ወድምሳሴ ፡ ዋዕይ ፡ ወሐጒል ። ወተፈጸማ ፡ ፲ወ፪ኀዋኅው ፡ ዘ፬ኀዋኅው ፡ ሰማይ ፡ ወኩሎ ፡ ትእዛዞሙ ፡ ወኲሎ ፡ መቅሠፍቶሙ ፡ ወሰላሞሙ ፡ አርአይኩከ ፡ ወልድየ ፡ ማቱሳላ ።
=== chapter 77 ===
ይጼውዕዎ ፡ ለነፋስ ፡ ቀዳማዊ ፡ ጽባሓዊ ፡ እስመ ፡ ቀዳማዊ ፡ ውእቱ ፡ ወይጼውዕዎ ፡ ለካልእ ፡ አዜብ ፡ እስመ ፡ ልዑል ፡ ህየ ፡ ይወርድ ፡ ወፈድፋደ ፡ ህየ ፡ ይወርድ ፡ ቡሩክ ፡ ለዓለም ። ወለነፋስ ፡ ዘእምዕራብ ፡ ስሙ ፡ ንቱግ ፡ እስመ ፡ በህየ ፡ የሐፅፅ ፡ ኲሉ ፡ ብርሃናተ ፡ ሰማይ ፡ ወይወርዱ ። ወራብዕ ፡ ነፋስ ፡ ዘስሙ ፡ መስዕ ፡ ይትከፈል ፡ ፫ክፍለ ፡ ፩እምኔሆሙ ፡ ማኅደር ፡ ለሰብእ ፡ ወካልእ ፡ ለአብሕርተ ፡ ማያት ፡ ወበቀላያት ፡ ወበኦም ፡ ወበአፍላግ ፡ ወበጽልመት ፡ ወበጊሜ ፡ ወሣልስ ፡ ክፍል ፡ በገነተ ፡ ጽድቅ ። ፯አድባረ ፡ ነዋኃነ ፡ ርኢኩ ፡ እለ ፡ ይነውኁ ፡ እምኲሉ ፡ አድባር ፡ እለ ፡ ውስተ ፡ ምድር ፡ ወእምኔሆሙ ፡ ይወጽእ ፡ አስሐትያ ፡ ወየኀልፍ ፡ ወየሐውር ፡ መዋዕል ፡ ወዘመን ፡ ወዓመት ። ፯አፍላገ ፡ ዲበ ፡ ምድር ፡ ርኢኩ ፡ ዐበይተ ፡ እምኲሎሙ ፡ አፍላግ ፡ ፩እምኔሆሙ ፡ ይመጽእ ፡ እምዓረብ ፡ ውስተ ፡ ባሕር ፡ ዐቢይ ፡ ይክዑ ፡ ማዮ ። ወእልክቱ ፡ ፪ይመጽኡ ፡ እመስዕ ፡ እስከ ፡ ባሕር ፡ ወይክዕዉ ፡ ማዮሙ ፡ በባሕረ ፡ ኤርትራ ፡ እምሥራቅ ። ወእለ ፡ ተርፉ ፡ ፬ይወጽኡ ፡ በገቦ ፡ መስዕ ፡ እስከ ፡ ባሕረ ፡ ዚአሆሙ ፡ ባሕረ ፡ ኤርትራ ፡ ወ፪በባሕር ፡ ዐቢይ ፡ ይሰወጡ ፡ በህየ ፡ ወይቤሉ ፡ መድበራ ። ሰቡዐ ፡ ደሰያተ ፡ ዐበይተ ፡ ርኢኩ ፡ በባሕር ፡ ወበምድር ፡ ፪በምድር ፡ ወ፭በባሕር ፡ ዐቢይ ።
=== chapter 78 ===
አስማቱ ፡ ለፀሐይ ፡ ከመዝ ፡ ፩ኦርያሬስ ፡ ወካልኡ ፡ ቶማስ ። ወለወርኅ ፡ ፬አስማት ፡ ቦቱ ፡ ፩ስሙ ፡ አሶንያ ፡ ወካልእ ፡ እብላ ፡ ወሣልስ ፡ ብናሴ ፡ ወራብዕ ፡ ኤራዕ ። እሉ ፡ እሙንቱ ፡ ፪ብርሃናት ፡ ዐበይት ፡ ክበቦሙ ፡ ከመ ፡ ክበበ ፡ ሰማይ ፡ ወአምጣኒሆሙ ፡ ለክልኤሆሙ ፡ ዕሩያን ። በክበበ ፡ ፀሐይ ፡ ፯ክፍለ ፡ ብርሃን ፡ ዘይትዌሰክ ፡ ቦቱ ፡ እምወርኅ ፡ ወበመስፈርት ፡ ትትወደይ ፡ እስከ ፡ የኀልፍ ፡ ሳብዕ ፡ ክፍለ ፡ ፀሐይ ። ወየዐርቡ ፡ ወይበውኡ ፡ ውስተ ፡ ኀዋኅው ፡ ምዕራብ ፡ ወየዐውዱ ፡ እንተ ፡ መስዕ ፡ ወእንተ ፡ ኀዋኅው ፡ ምሥራቅ ፡ ይወጽኡ ፡ ዲበ ፡ ገጸ ፡ ሰማይ ። ወሶበ ፡ ይትነሣእ ፡ ወርኅ ፡ ያስተርኢ ፡ በሰማይ ፡ ወመንፈቀ ፡ ሳብዕ ፡ እደ ፡ ብርሃን ፡ ይከውን ፡ ቦቱ ፡ ወበዐሡር ፡ ወረቡዕ ፡ ይፌጽም ፡ ኲሎ ፡ ብርሃኖ ። ወ፫ትኅምስተ ፡ ብርሃን ፡ ይትወደይ ፡ ውስቴታ ፡ እስከ ፡ ዐሡር ፡ ወኃምስ ፡ ይትፌጸም ፡ ብርሃነ ፡ ዚአሁ ፡ ለትእምርተ ፡ ዓመት ፡ ወይከውን ፡ ፫ትኅምስተ ፡ ወይከውን ፡ ወርኅ ፡ በመንፈቀ ፡ ሳብዕት ፡ እድ ። ወበሕፀፀ ፡ ዚአሁ ፡ በቀዳሚት ፡ ዕለት ፡ የሐፅፅ ፡ ፲ወ፬እደ ፡ ብርሃነ ፡ ዚአሁ ፡ ወበሳኒታ ፡ የሐፅፅ ፡ ፲ወ፫እደ ፡ ወበሣልስ ፡ የሐፅፅ ፡ ፲ወ፪እደ ፡ ወበራብዕ ፡ የሐፅፅ ፡ ፲ወ፩ክፍለ ፡ ወበኃምስ ፡ የሐፅፅ ፡ ፲ክፍለ ፡ ወበሳድስ ፡ የሐፅፅ ፡ ፱ክፍለ ፡ ወበሳብዕ ፡ የሐፅፅ ፡ ፰ክፍለ ፡ ወበሳምን ፡ የሐፅፅ ፡ ፯ክፍለ ፡ ወበታስዕ ፡ የሐፅፅ ፡ ፮ክፍለ ፡ ወበዓሥር ፡ የሐፅፅ ፡ ፭ክፍለ ፡ ወበ ፡ ፲ወ፩የሐፅፅ ፡ ፬ክፍለ ፡ ወበ ፡ ፲ወ፪የሐ ፡ ፅፅ ፡ ፫ክፍለ ፡ ወበ ፡ ፲ወ፫የሐ ፡ ፅፅ ፡ ፪ወበ ፡ ፲ወ፬የሐፅፅ ፡ መንፈቀ ፡ ፯እድ ፡ ወኲሉ ፡ ብርሃኑ ፡ በ፲ወ፭ዕለት ፡ ይትዌዳዕ ፡ ዘተርፈ ፡ እምኲሉ ። ወበአውራኅ ፡ እሙራት ፡ ይከውን ፡ በበ ፡ ፳ወ፱መዋዕል ፡ ለወርኅ ፡ ወቦ ፡ ጊዜ ፡ ፳ወ፰ ። ወካልእተ ፡ ሥርዐተ ፡ አርአየኒ ፡ ኡርኤል ፡ ሶበ ፡ ይትወደይ ፡ ብርሃን ፡ ውስተ ፡ ወርኅ ፡ ወእምኀበ ፡ ይትወደይ ፡ እምፀሐይ ። ኲሎ ፡ ዘመነ ፡ ዘተሐውር ፡ ወርኅ ፡ በብርሃነ ፡ ዚአሃ ፡ ትወዲ ፡ በቅድመ ፡ ፀሐይ ፡ እስከ ፡ ፲ወ፬መዋዕል ፡ ይትፌጸም ፡ ብርሃና ፡ ውስተ ፡ ሰማይ ፡ ወሶበ ፡ ይውዒ ፡ ኲሉ ፡ ይትፌጸም ፡ ብርሃኑ ፡ ውስተ ፡ ሰማይ ። ወቀዳሚት ፡ ዕለት ፡ ሠርቀ ፡ ትሰመይ ፡ እስመ ፡ በይእቲ ፡ ዕለት ፡ ይትነሣእ ፡ ላዕሌሃ ፡ ብርሃን ። ወይትፌጸም ፡ ጥንቁቀ ፡ በዕለተ ፡ ይወርድ ፡ ፀሐይ ፡ ውስተ ፡ ዓረብ ፡ ወእምነ ፡ ምሥራቅ ፡ የዐርግ ፡ በሌሊት ፡ ወያበርህ ፡ ወርኅ ፡ በኲሉ ፡ ሌሊት ፡ እስከ ፡ ይሠርቅ ፡ ፀሓይ ፡ በቅድሜሁ ፡ ወይትረአይ ፡ ወርኅ ፡ በቅድመ ፡ ጸሐይ ። እምኀበ ፡ ይወጽእ ፡ ብርሃኑ ፡ ለወርኅ ፡ እምህየ ፡ ካዕበ ፡ የሐፅፅ ፡ እስከ ፡ ይትዌዳዕ ፡ ኲሉ ፡ ብርሃኑ ፡ ወየኀልፍ ፡ መዋዕለ ፡ ወርኅ ፡ ወይነብር ፡ ክበቡ ፡ በከ ፡ ዘእንበለ ፡ ብርሃን ። ወ፫ወርኀ ፡ ይገብር ፡ ፴መዋዕለ ፡ በዘመነ ፡ ዚአሁ ፡ ወ፫ወርኀ ፡ ይገብር ፡ በበ ፡ ፳ወ፱መዋዕል ፡ እለ ፡ ቦሙ ፡ ይገብር ፡ ታሕፃፂተ ፡ ዚአሁ ፡ በዘመን ፡ ቀዳማዊ ፡ ወበኆኅት ፡ ቀዳማዊ ፡ በመዋዕል ፡ ፻ወ፸ወ፯ ። ወበዘመነ ፡ ሙፃኡ ፡ ፫ወርኀ ፡ ያስተርኢ ፡ በበ ፡ ፴መዋዕል ፡ ወ፫ወርኀ ፡ ያስተርኢ ፡ በበ ፡ ፳ወ፱መዋዕል ። በሌሊት ፡ ያስተርኢ ፡ በበ ፡ ፳ ፡ ከመ ፡ ብእሲ ፡ ወመዓልተ ፡ ከመ ፡ ሰማይ ፡ እስመ ፡ ካልእ ፡ ምንትኒ ፡ አልባቲ ፡ ዘእንበለ ፡ ብርሃነ ፡ ዚአሃ ።
=== chapter 79 ===
ወይእዜኒ ፡ ወልድየ ፡ ማቱሳላ ፡ አርአይኩከ ፡ ኲሎ ፡ ወተፈጸመ ፡ ኲሉ ፡ ሥርዐተ ፡ ከዋክብት ፡ ዘሰማይ ። ወአርአየኒ ፡ ኲሎ ፡ ሥርዐቶሙ ፡ ለእሉ ፡ እንተ ፡ በኲሉ ፡ መዋዕል ፡ ወበኲሉ ፡ ዘመን ፡ ዘበኲሉ ፡ ሥልጣን ፡ ወበኲሉ ፡ ዓመት ፡ ወበሙፃኡ ፡ ወበትእዛዙ ፡ በኲሉ ፡ ወርኅ ፡ ወበኲሉ ፡ ሰንበታት ። ወኅፀፀ ፡ ወርኅ ፡ ዘይትገበር ፡ በሳድስት ፡ ኆኅት ፡ እስመ ፡ በዛቲ ፡ ኆኅት ፡ ሳድስት ፡ ይትፌጸም ፡ ብርሃነ ፡ ዚአሁ ፡ ወእምኔሁ ፡ ይከውን ፡ ርእሰ ፡ ወርኅ ። ወታኅፃፂት ፡ ዘይትገበር ፡ በኆኅት ፡ ቀዳሚት ፡ በዘመነ ፡ ዚአሁ ፡ እስከ ፡ ይትፌጸም ፡ መዋዕል ፡ ፻ወ፸ወ፯ወበሥርዐተ ፡ ሰንበት ፡ ፳ወ፭ወ፪መዋዕል ። ወዘየሐፅፅ ፡ እምፀሐይ ፡ ወበሥርዐተ ፡ ከዋክብት ፡ ኀሙሰ ፡ መዋዕለ ፡ በዘመን ፡ ፩ጥንቁቀ ፡ ወሶበ ፡ ይትፌጸም ፡ ዝመካን ፡ ዘትሬኢ ። ከመዝ ፡ አርአያ ፡ ወአምሳል ፡ እምኲሉ ፡ ብርሃን ፡ ዘአርአየኒ ፡ ኡርኤል ፡ መልአክ ፡ ዐቢይ ፡ ዘውእቱ ፡ መራኂሆሙ ።
=== chapter 80 ===
ወበውእቱ ፡ መዋዕል ፡ አውሥአኒ ፡ ኡርኤል ፡ ወይቤለኒ ፡ ነዋ ፡ አርአይኩከ ፡ ኲሎ ፡ ኦሄኖክ ፡ ወኲሎ ፡ ከሠትኩ ፡ ለከ ፡ ትርአዮ ፡ ለዝ ፡ ፀሐይ ፡ ወለዝ ፡ ወርኅ ፡ ወለእለ ፡ ይመርሕዎሙ ፡ ለከዋክብተ ፡ ሰማይ ፡ ወለኲሎሙ ፡ እለ ፡ ይመይጥዎሙ ፡ ግብሮሙ ፡ ወአዝማኖሙ ፡ ወሙፃኢሆሙ ። ወበመዋዕለ ፡ ኃጥአን ፡ ክራማት ፡ የሐፅራ ፡ ወዘርአ ፡ ዚአሆሙ ፡ ይከውን ፡ ደኀራዌ ፡ በምድሮሙ ፡ ወበሙፋሮሙ ፡ ወኲሉ ፡ ግብር ፡ ዘዲበ ፡ ምድር ፡ ይትመየጥ ፡ ወኢያስተርኢ ፡ በዘመኑ ፡ ወዝናም ፡ ይትከላእ ፡ ወሰማይ ፡ ታቀውም ። ወበውእቱ ፡ አዝማን ፡ ፍሬ ፡ ምድር ፡ ደኃራዌ ፡ ይከውን ፡ ወኢይበቊል ፡ በዘመኑ ፡ ወፍሬ ፡ ዕፅ ፡ ይትከላእ ፡ በዘመነ ፡ ዚአሁ ። ወወርኅ ፡ ይዌልጥ ፡ ሥርአቶ ፡ ወኢይትረአይ ፡ በዘመነ ፡ ዚአሁ ። ወበእማንቱ ፡ መዋዕል ፡ ይትረአይ ፡ ሰማይ ፡ ወይበጽሕ ፡ ዐባር ፡ በጽንፈ ፡ ሰረገላት ፡ ዐቢይ ፡ በምዕራብ ፡ ወይበርህ ፡ ፈድፋደ ፡ እምሥርዐተ ፡ ብርሃን ። ወይስሕቱ ፡ ብዙኃን ፡ አርእስቲሆሙ ፡ ለከዋክብተ ፡ ትእዛዝ ፡ ወእሉ ፡ ይመይጡ ፡ ፍናዊሆሙ ፡ ወግብሮሙ ፡ ወኢይትረአዩ ፡ በአዝማነ ፡ ዚአሆሙ ፡ እለ ፡ ተአዘዙ ፡ ሎሙ ። ወኲሉ ፡ ሥርዐተ ፡ ከዋክብት ፡ ይትዐፀዉ ፡ ላዕለ ፡ ኃጥኣን ፡ ወሕሊናሆሙ ፡ ለእለ ፡ ይነብሩ ፡ ዲበ ፡ ምድር ፡ ይስሕቱ ፡ ዲቤሆሙ ፡ ወይትመየጡ ፡ እምኲሉ ፡ ፍናዊሆሙ ፡ ወይስሕቱ ፡ ወይመስዎሙ ፡ አማልክተ ። ወይበዝኅ ፡ ላዕሌሆሙ ፡ እከይ ፡ ወመቅሠፍት ፡ ይመጽእ ፡ ዲቤሆሙ ፡ ከመ ፡ ያኅጒሎሙ ፡ ለኲሎሙ ።
=== chapter 81 ===
ወይቤለኒ ፡ ኦሄኖክ ፡ ነጽር ፡ መጽሐፈ ፡ ዘጸፍጸፈ ፡ ሰማይ ፡ ወአንብብ ፡ ዘጽሑፍ ፡ ዲቤሆሙ ፡ ወአእምር ፡ ኲሎ ፡ ፩፩ ። ወነጸርኩ ፡ ኲሎ ፡ ዘጸፍጸፈ ፡ ሰማይ ፡ ወአንበብኩ ፡ ኲሎ ፡ ዘጽሑፍ ፡ ወአእመርኩ ፡ ኲሎ ፡ ወአንበብክዋ ፡ ለመጽሐፍ ፡ ወኲሎ ፡ ዘጽሑፍ ፡ ውስቴታ ፡ ኲሎ ፡ ምግባሮሙ ፡ ለሰብእ ፡ ወኲሎ ፡ ውሉደ ፡ ሥጋ ፡ ዘዲበ ፡ ምድር ፡ እስከ ፡ ትውልደ ፡ ዓለም ። ወእምዝ ፡ ሶቤሃ ፡ ባረክዎ ፡ ለእግዚእ ፡ ለንጉሠ ፡ ስብሐት ፡ ዘለዓለም ፡ በከመ ፡ ገብረ ፡ ኲሎ ፡ ግብረ ፡ ዓለም ፡ ወሰባሕክዎ ፡ ለእግዚእ ፡ በእንተ ፡ ትእግሥቱ ፡ ወባረኩ ፡ ዲበ ፡ ውሉደ ፡ ዓለም ። ወይእተ ፡ ጊዜ ፡ እቤ ፡ ብፁዕ ፡ ብእሲ ፡ ዘይመውት ፡ እንዘ ፡ ጻድቅ ፡ ወኄር ፡ ወኲሉ ፡ መጽሐፈ ፡ ዐመፃ ፡ ዘኢተጽሕፈ ፡ ዲቤሁ ፡ ወኢተረክበ ፡ ጌጋይ ፡ ላዕሌሁ ። ወእሙንቱ ፡ ፫ቅዱሳን ፡ አቅረቡኒ ፡ ወአንበሩኒ ፡ ውስተ ፡ ምድር ፡ በቅድመ ፡ ኆኅተ ፡ ቤትየ ፡ ወይቤሉኒ ፡ አይድዕ ፡ ኲሎ ፡ ለማቱሳላ ፡ ወልድከ ፡ ወአርኢ ፡ ለኲሎሙ ፡ ውሉድከ ፡ ከመ ፡ ኢይጸድቅ ፡ ኲሉ ፡ ዘሥጋ ፡ በቅድመ ፡ እግዚእ ፡ እስመ ፡ ውእቱ ፡ ፈጠሮሙ ። ፩ዓመተ ፡ ነኀድገከ ፡ በኀበ ፡ ውሉድከ ፡ እስከ ፡ ካዕበ ፡ ትዔዝዝ ፡ ከመ ፡ ትምሀሮሙ ፡ ለውሉድከ ፡ ወትጽሐፍ ፡ ሎሙ ፡ ወታስምዕ ፡ ሎሙ ፡ ለኲሎሙ ፡ ውሉድከ ፤ ወበካልእ ፡ ዓም ፡ ይነሥኡከ ፡ እማእከሎሙ ። ይጽናዕ ፡ ልብከ ፡ እስመ ፡ ኄራን ፡ ለኄራን ፡ ያየድዑ ፡ ጽድቀ ፡ ጻድቅ ፡ ምስለ ፡ ጻድቅ ፡ ይትፌሣሕ ፡ ወይትአምኁ ፡ በበይናቲሆሙ ። ወኃጥእ ፡ ምስለ ፡ ኃጥእ ፡ ይመውት ፡ ወምዩጥ ፡ ምስለ ፡ ምዩጥ ፡ ይሠጠም ። ወእለ ፡ ይገብሩ ፡ ጽድቀ ፡ ይመውቱ ፡ በእንተ ፡ ምግባረ ፡ ሰብእ ፡ ወይትጋብኡ ፡ በእንተ ፡ ምግባሮሙ ፡ ለረሲዓን ። ወበእማንቱ ፡ መዋዕል ፡ ፈጸሙ ፡ እንዘ ፡ ይትናገሩ ፡ ምስሌየ ፡ ወቦእኩ ፡ ኀበ ፡ ሰብእየ ፡ እንዘ ፡ እባርኮ ፡ ለእግዚአ ፡ ዓለማት ።
=== chapter 82 ===
ወይእዜኒ ፡ ወልድየ ፡ ማቱሳላ ፡ ኲሎ ፡ እላንተ ፡ ለከ ፡ እነግር ፡ ወእጽሕፍ ፡ ለከ ፡ ወኲሎ ፡ ከሠትኩ ፡ ለከ ፡ ወወሀብኩከ ፡ መጻሕፍቲሆሙ ፡ ለእሉ ፡ ኲሎሙ ፤ ዕቀብ ፡ ወልድየ ፡ ማቱሳላ ፡ መጻሕፍተ ፡ እዴሁ ፡ ለአቡከ ፡ ወከመ ፡ ተሀብ ፡ ለትውልደ ፡ ዓለም ። ጥበበ ፡ ወሀብኩ ፡ ለከ ፡ ወለውሉድከ ፡ ወለእለ ፡ ይከውኑ ፡ ለከ ፡ ውሉደ ፡ ከመ ፡ የሀቡ ፡ ለውሉዶሙ ፡ ለትውልዳት ፡ እስከ ፡ ለዓለም ፡ ለዛ ፡ ጥበብ ፡ ዲበ ፡ ሕሊናሆሙ ። ወኢይነውሙ ፡ እለ ፡ ይሌብውዋ ፡ ወያፀምኡ ፡ በእዝኖሙ ፡ ከመ ፡ ይትመሀርዋ ፡ ለዛ ፡ ጥበብ ፡ ወትደልዎሙ ፡ እመባልዕት ፡ ሠናያት ፡ ለእለ ፡ ይበልዑ ። ብፁዓን ፡ ጻድቃን ፡ ኲሎሙ ፡ ብፁዓን ፡ ኲሎሙ ፡ እለ ፡ የሐውሩ ፡ በፍኖተ ፡ ጽድቅ ፡ ወአልቦሙ ፡ ኀጢአት ፡ ከመ ፡ ኃጥኣን ፡ በኊልቈ ፡ ኲሉ ፡ መዋዕሊሆሙ ፡ ለዘየሐውር ፡ ፀሐይ ፡ በሰማይ ፡ በአናቅጽ ፡ ይበውእ ፡ ወይወጽእ ፡ ፴ዕለተ ፡ ምስለ ፡ አርእስተ ፡ ፲፻ ፡ ዝሥርዐቶሙ ፡ ለከዋክብት ፡ ምስለ ፡ ፬እለ ፡ ይትዌሰኩ ፡ ወይሌልዩ ፡ ማእከለ ፡ ፬ክፍለ ፡ ዓመት ፡ እለ ፡ ይመርሕዎሙ ፡ ወምስሌሆሙ ፡ ይበውኡ ፡ ፬መዋዕለ ። በእንቲአሆሙ ፡ ይጌግዩ ፡ ሰብእ ፡ ወኢየሐስብዎሙ ፡ በሐሳበ ፡ ኵሉ ፡ ዓለም ፡ እስመ ፡ ይጌግይዎሙ ፡ ወኢየአምርዎሙ ፡ ሰብእ ፡ ጥንቁቀ ። እስመ ፡ ሀለዉ ፡ በሐሳበ ፡ ዓመት ፡ ወአማን ፡ ልኩዓን ፡ እሙንቱ ፡ ለዓለም ፡ ፩በቀዳሚት ፡ ኆኅት ፡ ወ፩በሣልሲት ፡ ወ፩በራብዕት ፡ ወ፩በሳድስት ፡ ወይትፌጸም ፡ ዓመት ፡ በመዋዕል ፡ ፫፻ወ፰ወ፬ ። ወአማን ፡ ነገሩ ፡ ወጥንቁቅ ፡ ሐሳብ ፡ ዘልኩዕ ፡ እስመ ፡ ለብርሃናት ፡ ወለአውራኅ ፡ ወለበዓላት ፡ ወለክራማት ፡ ወለመዋዕል ፡ አርአየኒ ፡ ወነፍሐ ፡ ዲቤየ ፡ ኡርኤል ፡ ዘአዘዞ ፡ ሊተ ፡ እግዚአ ፡ ኲሉ ፡ ፍጥረተ ፡ ዓለም ፡ በኀይለ ፡ ሰማይ ። ወሥልጣን ፡ ቦቱ ፡ በሌሊት ፡ ወበመዓልት ፡ ውስተ ፡ ሰማይ ፡ ከመ ፡ ያርኢ ፡ ብርሃነ ፡ ዲበ ፡ ሰብእ ፡ ፀሐየ ፡ ወወርኀ ፡ ወከዋክብተ ፡ ወኲሎሙ ፡ ሥልጣናተ ፡ ሰማይ ፡ እለ ፡ ይትመየጡ ፡ በክበቦሙ ። ወዛቲ ፡ ይእቲ ፡ ሥርዐተ ፡ ከዋክብት ፡ እለ ፡ የዐርብ ፡ በመካናቲሆሙ ፡ ወበአዝማኒሆሙ ፡ ወበበዓላቲሆሙ ፡ ወበአውራኂሆሙ ። ወእሉ ፡ አስማቲሆሙ ፡ ለእለ ፡ ይመርሕዎሙ ፡ ለእለ ፡ የዐቅብ ፡ ወይበውኡ ፡ በአዝማነ ፡ ዚአሆሙ ፡ ወበሥርዐታቲሆሙ ፡ ወበጊዜያቲሆሙ ፡ ወበአውራኂሆሙ ፡ ወበሥልጣናቲሆሙ ፡ ወበምቅዋማቲሆሙ ። ፬መራኅያኒሆሙ ፡ ይበውኡ ፡ ቀዳሚ ፡ እለ ፡ ይሌልዩ ፡ ፬ክፍለ ፡ ዓመት ፡ ወእምድኅሬሆሙ ፡ ፲ወ፪መራኅያን ፡ ዘሥርዐታት ፡ እለ ፡ ይሌልይዎሙ ፡ ለአውራኅ ፡ ወለዓመት ፡ ፫፻ወ፷ወ፬ምስለ ፡ አርእስተ ፡ ፲፻እለ ፡ ይፈልጥዎሙ ፡ ለመዋዕል ፡ ወለ ፡ ፬እለ ፡ ይትዌሰኩ ፡ ዲቤሆሙ ፡ እለ ፡ ይፈልጡ ፡ መራኅያን ፡ ፬መክፈልተ ፡ ዓመታት ። ወእሙንቱ ፡ አርእስተ ፡ ፲፻ማእከለ ፡ መራሒ ፡ ወተመራሒ ፡ ይትዌሰክ ፡ ፩በድኅረ ፡ ምቅዋም ፡ ወመራህያኒሆሙ ፡ ይፈልጡ ። ወእሉ ፡ አስማቲሆሙ ፡ ለመራኅያን ፡ እለ ፡ ይፈልጡ ፡ ፬መክፈልተ ፡ ዓመት ፡ እለ ፡ ሥሩዓን ፡ ምልክኤል ፡ ወህልእምሜሌክ ፡ ወሜልኤየል ፡ ወናሬል ። ወአስማቲሆሙ ፡ ለእለ ፡ ይመርሕዎሙ ፡ አድናርኤል ፡ ወኢየሱሳኤል ፡ ወኢይሉሚኤል ፡ እሉ ፡ ፫እለ ፡ ይተልዉ ፡ ድኅሬሆሙ ፡ ለመራሕያነ ፡ ሥርዐታት ፡ ወ፩ዘይተሉ ፡ ድኅረ ፡ ፫መራኅያነ ፡ ሥርዐታት ፡ እለ ፡ ይተልዉ ፡ ድኅረ ፡ እልክቱ ፡ መራሕያነ ፡ ምቅዋማት ፡ እለ ፡ ይፈልጡ ፡ ፬ክፍለ ፡ ዓመት ። በቅድመ ፡ ዓመት ፡ ቀዳማዊ ፡ ይሠርቅ ፡ ወይመልክ ፡ ምልክያል ፡ ዘይሰመይ ፡ ስሙ ፡ ተመዓኒ ፡ ወፀሐየ ፡ ወኲሎሙ ፡ መዋዕላት ፡ ዘበሥልጣነ ፡ ዚአሁ ፡ እለ ፡ ይመልክ ፡ ፺ወ፩ዕለት ። ወእሉ ፡ ትእምርተ ፡ መዋዕል ፡ እለ ፡ ሀለዉ ፡ ያስተርእዩ ፡ ዲበ ፡ ምድር ፡ በመዋዕለ ፡ ሥልጣነ ፡ ዚአሁ ፡ ሐፍ ፡ ወሞቅ ፡ ወሐዘን ፡ ወኲሎሙ ፡ ዕፀው ፡ ይፈርዩ ፡ ወቈጽል ፡ ይወጽእ ፡ በኲሉ ፡ ዕፀው ፡ ወማእረረ ፡ ሥርናይ ፡ ወጽጌ ፡ ረዳ ፡ ወኲሉ ፡ ጽጌያት ፡ ይጸግዩ ፡ በገዳም ፡ ወዕፀወ ፡ ክረምት ፡ ይየብሱ ። ወእሉ ፡ አስማቲሆሙ ፡ ለመራኅያን ፡ እለ ፡ መትሕቴሆሙ ፡ ብርክኤል ፡ ዘልብሳኤል ፡ ወካልእ ፡ ዘይትዌሰክ ፡ ርእሰ ፡ ፲፻ስሙ ፡ ሄሎያሴፍ ፡ ወተፈጸመ ፡ መዋዕለ ፡ ሥልጣኑ ፡ ለዝ ። ካልእ ፡ መራኂ ፡ ዘድኅረሆሙ ፡ ህልዕምሜሌክ ፡ ዘይጼውዕዎ ፡ ስሞ ፡ ፀሐየ ፡ ብሩሐ ፡ ወኲሉ ፡ መዋዕለ ፡ ብርሃኑ ፡ ፺ወ፩ዕለት ። ወእሉ ፡ ትእምርተ ፡ መዋዕ ፡ በዲበ ፡ ምድር ፡ ሐሩር ፡ ወየብስ ፡ ወዕፀው ፡ ያወጽኡ ፡ ፍሬሆሙ ፡ ርሱነ ፡ ወብሱለ ፡ ወይሁብ ፡ ፍሬሆሙ ፡ ይየብስ ፡ ወአባግዕ ፡ ይታለዋ ፡ ወይጸንሳ ፡ ወያስተጋብኡ ፡ ኲሎ ፡ ፍሬ ፡ ምድር ፡ ወኲሎ ፡ ዘሀሎ ፡ ውስተ ፡ ገራውህ ፡ ወምክያደ ፡ ወይን ፡ ወይከውን ፡ በመዋዕለ ፡ ሥልጣኑ ። ወእሉ ፡ እሙንቱ ፡ ስሞሙ ፡ ወሥርዐቶሙ ፡ ወመራኅያኒሆሙ ፡ እለ ፡ መትሕቴሆሙ ፡ ለእሉ ፡ አርእስተ ፡ ፲፻ጌዳኤል ፡ ወኬኤል ፡ ወሄኤል ፡ ወስሙ ፡ ለዘይትዌሰክ ፡ ምስሌሆሙ ፡ ርእሰ ፡ ፲፻አስፋኤል ፡ ወተፈጸመ ፡ መዋዕለ ፡ ሥልጣነ ፡ ዚአሁ ።
=== book 4 ===
[Book of the Dream Visions]
=== chapter 83 ===
ወይእዜኒ ፡ አርእየከ ፡ ወልድየ ፡ ማቱሳላ ፡ ኲሎ ፡ ራእያተ ፡ እለ ፡ ርኢኩ ፡ በቅድሜከ ፡ እነግር ። ክልኤተ ፡ ራእያተ ፡ ርኢኩ ፡ እንበለ ፡ እንሣእ ፡ ብእሲተ ፡ ወ፩ሂ ፡ እምኔሆሙ ፡ ኢይትማሰል ፡ ምስለ ፡ ካልኡ ፡ ቀዳማየ ፡ አመ ፡ እትሜሐር ፡ መጽሐፈ ፡ ወካልአ ፡ ዘእንበለ ፡ እንሣእ ፡ እመከ ፡ ርኢኩ ፡ ራእየ ፡ ጽኑዐ ፡ ወበእንቲአሆሙ ፡ አስተብቋዕክዎ ፡ ለእግዚእ ። ስኩበ ፡ ኮንኩ ፡ በቤተ ፡ መላልኤል ፡ እምሔውየ ፡ ርኢኩ ፡ በራእይ ፡ ሰማይ ፡ ይትነፃኅ ፡ ወይትሐየድ ፡ ወይወድቅ ፡ ዲበ ፡ ምድር ። ወሶበ ፡ ይወድቅ ፡ ዲበ ፡ ምድር ፡ ርኢክዋ ፡ ለምድር ፡ ከመ ፡ ትትወሐጥ ፡ ውስተ ፡ ቀላይ ፡ ዐቢይ ፡ ወአድባር ፡ ዲበ ፡ አድባር ፡ ይሰቀሉ ፡ ወአውግር ፡ ዲበ ፡ አውግር ፡ ይሠጠሙ ፡ ወዕፀው ፡ ነዋኃን ፡ ይትገዘሙ ፡ እምጒንዳቲሆሙ ፡ ወይትገደፉ ፡ ወይሠጠሙ ፡ ውስተ ፡ ቀላይ ። ወእምኔሁ ፡ ወድቀ ፡ ነገር ፡ ውስተ ፡ አፉየ ፡ ወአንሣእኩ ፡ እጽራሕ ፡ ወእቤ ፡ ተሐጒለት ፡ ምድር ። ወመላልኤል ፡ እምሔውየ ፡ አንሥአኒ ፡ እንዘ ፡ አነ ፡ እሰክብ ፡ ኀቤሁ ፡ ወይቤለኒ ፡ ምንት ፡ ከመዝ ፡ ትጸርሕ ፡ ወልድየ ፡ ወለምንት ፡ ከመዝ ፡ ተዐወዩ ። ወነገርክዎ ፡ ኲሎ ፡ ራእየ ፡ ዘርኢኩ ፡ ወይቤለኒ ፡ ከመ ፡ ጽኑዕ ፡ ርኢከ ፡ ወልድየ ፡ ወኀየለ ፡ ርእየ ፡ ሕልምከ ፡ ኅቡአተ ፡ ኲሉ ፡ ኀጢአተ ፡ ምድር ፡ ወትሰጠም ፡ ሀለወት ፡ ውስተ ፡ ቀላይ ፡ ወተሐጒል ፡ ሐጒለ ፡ ዐቢየ ። ወይእዜኒ ፡ ወልድየ ፡ ተንሥእ ፡ ወአስተብቊዖ ፡ ለእግዚአ ፡ ስብሐት ፡ እስመ ፡ መሀይምን ፡ አንተ ፡ ከመ ፡ ይትርፍ ፡ ትራፍ ፡ ዲበ ፡ ምድር ፡ ወኢይደምስሳ ፡ ለኲላ ፡ ምድር ። ወልድየ ፡ እምሰማይ ፡ ይሄሉ ፡ ዝኲሉ ፡ ዲበ ፡ ምድር ፡ ወዲበ ፡ ምድር ፡ ይከውን ፡ ሐጒል ፡ ዐቢይ ። ወእምኔሁ ፡ ተንሣእኩ ፡ ወጸለይኩ ፡ ወአስተብቋዕኩ ፡ ወጸሎትየ ፡ ጸሐፍኩ ፡ ለትውልደ ፡ ዓለም ፡ ወኲሎ ፡ አርእየከ ፡ ወልድየ ፡ ማቱሳላ ። ወሶበ ፡ ወጻእኩ ፡ ታሕተ ፡ ወርኢክዎ ፡ ለሰማይ ፡ ወለፀሐይ ፡ ይወጽእ ፡ እምሥራቅ ፡ ወወርኅ ፡ ይወርድ ፡ እምዕራብ ፡ ወውሑዳት ፡ ከዋክብት ፡ ወኲሉ ፡ ዘአእመረ ፡ ዲበ ፡ ቀዳሚ ፡ ወባረክዎ ፡ ለእግዚአ ፡ ኲነኔ ፡ ወሎቱ ፡ ወሀብኩ ፡ ዕበየ ፡ እስመ ፡ አውፅአ ፡ ፀሐየ ፡ እመሣክወ ፡ ምሥራቅ ፡ ወዐርገ ፡ ወሠረቀ ፡ ዲበ ፡ ገጸ ፡ ሰማይ ፡ ወተንሥአ ፡ ወየሐውር ፡ ፍኖተ ፡ እንተ ፡ ተርእየት ፡ ሎቱ ።
=== chapter 84 ===
ወአልዓልኩ ፡ እደውየ ፡ በጽድቅ ፡ ወባረክዎ ፡ ለቅዱስ ፡ ወለዐቢይ ፡ ወነገርኩ ፡ በመንፈሰ ፡ አፉየ ፡ ወበልሳነ ፡ ሥጋ ፡ እንተ ፡ ገብረ ፡ አምላክ ፡ ለውሉደ ፡ ሰብእ ፡ ከመ ፡ ይትናገሩ ፡ ባቲ ፡ ወወሀቦሙ ፡ መንፈሰ ፡ ወልሳነ ፡ ወአፈ ፡ ከመ ፡ ይትናገሩ ፡ ቦቱ ። ቡሩክ ፡ አንተ ፡ እግዚኦ ፡ ንጉሥ ፡ ወዐቢይ ፡ ወኀያል ፡ በዕበየ ፡ ዚአከ ፡ እግዚአ ፡ ኲሉ ፡ ፍጥረተ ፡ ሰማይ ፡ ንጉሠ ፡ ነገሥት ፡ ወአምላከ ፡ ኲሉ ፡ ዓለም ፡ ወመለኮትከ ፡ ወመንግሥትከ ፡ ወዕበይከ ፡ ይነብር ፡ ለዓለም ፡ ወለዓለመ ፡ ዓለም ፡ ወለኲሉ ፡ ትውልደ ፡ ትውልድ ፡ ስልጣንከ ፡ ወኲሎሙ ፡ ሰማያት ፡ መንበርከ ፡ ለዓለም ፡ ወኲላ ፡ ምድር ፡ መከየደ ፡ እገሪከ ፡ ለዓለም ፡ ወለዓለመ ፡ ዓለም ። እስመ ፡ አንተ ፡ ገበርከ ፡ ወኲሎ ፡ አንተ ፡ ትመልክ ፡ ወኢይጸንዐከ ፡ ግብር ፡ ወኢ፩ ፡ ወኢአሐቲ ፡ ጥበብ ፡ ኢተኀልፈከ ፡ ወኢትትመየጥ ፡ እመንበርታ ፡ ምንባሪከ ፡ ወኢእምገጽከ ፡ ወአንተ ፡ ኲሎ ፡ ተአምር ፡ ወትሬኢ ፡ ወትሰምዕ ፡ ወአልቦ ፡ ዘይትኀባእ ፡ እምኔከ ፡ እስመ ፡ ኲሎ ፡ ትሬኢ ። ወይእዜኒ ፡ መላእክተ ፡ ሰማያቲከ ፡ ይኤብሱ ፡ ወዲበ ፡ ሥጋ ፡ ሰብእ ፡ ትከውን ፡ መዐትከ ፡ እስከ ፡ ዕለተ ፡ ዐባይ ፡ ኲነኔ ። ወይእዜኒ ፡ አምላክ ፡ ወእግዚእ ፡ ወንጉሥ ፡ ዐቢይ ፡ አስተበቊዕ ፡ ወእስእል ፡ ከመ ፡ ታቅም ፡ ሊተ ፡ ስእለትየ ፡ ከመ ፡ ታትርፍ ፡ ሊተ ፡ ደኃሪተ ፡ ውስተ ፡ ምድር ፡ ወኢታጥፍእ ፡ ኲሎ ፡ ሥጋ ፡ ሰብእ ፡ ወኢታዕርቃ ፡ ለምድር ፡ ወይከውን ፡ ሐጒል ፡ ለዓለም ። ወይእዜኒ ፡ እግዚእየ ፡ አጥፍእ ፡ እምዲበ ፡ ምድር ፡ ሥጋ ፡ አምዕዐተከ ፡ ወሥጋ ፡ ጽድቅ ፡ ወርትዕ ፡ አቅም ፡ ለተክለ ፡ ዘርእ ፡ ለዓለም ፡ ወኢትሰውር ፡ ገጸከ ፡ እምስእለተ ፡ ገብርከ ፡ እግዚኦ ።
=== chapter 85 ===
ወእምድኅረዝ ፡ ካልአ ፡ ሕልመ ፡ ርኢኩ ፡ ወኲሎ ፡ አርእየከ ፡ ወልድየ ። ወአንሥአ ፡ ሄኖክ ፡ ወይቤ ፡ ለወልዱ ፡ ማቱሳላ ፡ ለከ ፡ እብለከ ፡ ወልድየ ፡ ስማዕ ፡ ነገርየ ፡ ወአጽንን ፡ እዝነከ ፡ ለርእየ ፡ ሕልመ ፡ አብከ ። እንበለ ፡ እንሥአ ፡ ለእምከ ፡ እድና ፡ ርኢኩ ፡ በራእይ ፡ በምስካብየ ፡ ወናሁ ፡ ወጽአ ፡ ላህም ፡ እምድር ፡ ወኮነ ፡ ዝኩ ፡ ላህም ፡ ፀዐዳ ፡ ወእምድኅረሁ ፡ ወጽአት ፡ ጣዕዋ ፡ አንስቲያዊት ፡ አሐ ፡ ቲ ፡ ወምስሌሃ ፡ ወጽአ ፡ ካልእ ፡ ጣዕዋ ፡ ወ፩እምኔሆሙ ፡ ኮነ ፡ ጸሊመ ፡ ወ፩ቀይሐ ። ወጐድኦ ፡ ዝኩ ፡ ጸሊም ፡ ጣዕዋ ፡ ለቀይሕ ፡ ወተለዎ ፡ ዲበ ፡ ምድር ፡ ወኢክህልኩ ፡ እምሶቤሃ ፡ ርእዮቶ ፡ ለዝኩ ፡ ቀይሕ ፡ ጣዕዋ ። ወዝኩ ፡ ጣዕዋ ፡ ጸሊም ፡ ልህቀ ፡ ወመጽአት ፡ ምስሌሁ ፡ እንትኩ ፡ ጣዕዋ ፡ አንስቲያዊት ፡ ወርኢኩ ፡ እምኔሁ ፡ ዘይወጽኡ ፡ አልህምተ ፡ ብዙኃነ ፡ እንዘ ፡ ይመስልዎ ፡ ወይተልዉ ፡ ድኅረሁ ። ወእንታክቲ ፡ ዕጐልት ፡ አንስቲያዊት ፡ እንታክቲ ፡ ቀዳሚት ፡ ወጽአት ፡ እምቅድመ ፡ ገጸ ፡ ዝኩ ፡ ላህም ፡ ቀዳሚ ፡ ኀሠሠቶ ፡ ለውእቱ ፡ ጣዕዋ ፡ ቀይሕ ፡ ወኢረከበቶ ፡ ወአውየወት ፡ ሶቤሃ ፡ አውያተ ፡ ዐበይተ ፡ ወኀሠሠቶ ። ወርኢኩ ፡ እስከ ፡ መጽአ ፡ ዝኩ ፡ ላህም ፡ ቀዳማዊ ፡ ኀቤሃ ፡ ወአርመማ ፡ ወእምይእቲ ፡ ጊዜ ፡ ኢጸርሐት ። ወእምድኅረዝ ፡ ወለደት ፡ ካልአ ፡ ላህመ ፡ ጸዐዳ ፡ ወእምድኅረሁ ፡ ወለደት ፡ አልህምተ ፡ ብዙኃነ ፡ ወዕጐተ ፡ ጸሊማነ ። ወርኢኩ ፡ በንዋምየ ፡ ዝኩ ፡ ሶር ፡ ጸዐዳ ፡ ወከመዝ ፡ ልህቀ ፡ ወኮነ ፡ ሶረ ፡ ጸዐዳ ፡ ዐቢየ ፡ ወእምኔሁ ፡ ወጽኡ ፡ አልህምት ፡ ብዙኃን ፡ ጸዐዳ ፡ ወይመስልዎ ። ወወጠኑ ፡ እንዘ ፡ ይወልዱ ፡ አልህምተ ፡ ብዙኃነ ፡ ጸዐዳ ፡ ወእለ ፡ ይመስዎሙ ፡ ወተለዎ ፡ ፩ለካልኡ ።
=== chapter 86 ===
ወካዕበ ፡ ርኢኩ ፡ በአዕይንትየ ፡ እንዘ ፡ እነውም ፡ ወርኢኩ ፡ ሰማየ ፡ መልዕልተ ፡ ወነዋ ፡ ፩ኮከብ ፡ ወድቀ ፡ እምሰማይ ፡ ወይትሌዐል ፡ ወይበልዕ ፡ ወይትረዐይ ፡ ማእከለ ፡ እልኩ ፡ አልህምት ። ወእምዝ ፡ ርኢኩ ፡ አልህምተ ፡ ዐቢያነ ፡ ወጸሊማነ ፡ ወናሁ ፡ ኲሎሙ ፡ ወለጡ ፡ ምዕያሞሙ ፡ ወምርዓዮሙ ፡ ወአጣዕዋሆሙ ፡ ወአኀዙ ፡ የዓውይዉ ፡ ፩ምስለ ፡ ካልኡ ። ወካዕበ ፡ ርኢኩ ፡ በራእይ ፡ ወነጸርክዎ ፡ ለሰማይ ፡ ወነዋ ፡ ርኢኩ ፡ ከዋክብተ ፡ ብዙኃነ ፡ ወወረዱ ፡ ወተገድፉ ፡ እምሰማይ ፡ ኀበ ፡ ዝኩ ፡ ኮከብ ፡ ቀዳማዊ ፡ ወማእከለ ፡ እልኩ ፡ ጣዕዋ ፡ ወአልህምት ፡ ኮኑ ፡ ምስሌሆሙ ፡ ይትረዐዩ ፡ ማእከሎሙ ። ወነጸርክዎሙ ፡ ወርኢኩ ፡ ወነዋ ፡ ኲሎሙ ፡ አውፅኡ ፡ ኀፍረታቲሆሙ ፡ ከመ ፡ አፍራስ ፡ ወአኀዙ ፡ ይዕርጉ ፡ ዲበ ፡ እጐላተ ፡ አልህምት ፡ ወፀንሳ ፡ ኲሎን ፡ ወወለዳ ፡ ነጌያተ ፡ ወአግማለ ፡ ወአዕዱገ ። ወኲሎሙ ፡ አልህምት ፡ ፈርሕዎሙ ፡ ወደንገፅ ፡ እምኔሆሙ ፡ ወአኀዙ ፡ እንዘ ፡ ይኔዝሩ ፡ በስነኒሆሙ ፡ ወይውሕጡ ፡ ወይወግኡ ፡ በአቅርንቲሆሙ ። ወአኀዙ ፡ እንከ ፡ ይብልዕዎሙ ፡ ለእኩ ፡ አልህምት ፡ ወነዋ ፡ ኲሎሙ ፡ ውሉደ ፡ ምድር ፡ አኀዙ ፡ ይርዐዱ ፡ ወያድለቅልቁ ፡ እምኔሆሙ ፡ ወይንፍጹ ።
=== chapter 87 ===
ወካዕበ ፡ ርኢክዎሙ ፡ ወአኀዙ ፡ እንዘ ፡ ይወግኦ ፡ ፩ለካልኡ ፡ ወይውኅጦ ፡ ፩ለካልኡ ፡ ወምድር ፡ አኀዘት ፡ ትጽራሕ ። ወአንሣእኩ ፡ አዕይንትየ ፡ ካዕበ ፡ ውስተ ፡ ሰማይ ፡ ወርኢኩ ፡ በራእይ ፡ ወነዋ ፡ ወጽኡ ፡ እምሰማይ ፡ ከመ ፡ አምሳለ ፡ ሰብእ ፡ ጸዐዳ ፡ ወ፩ወጽአ ፡ እምውእቱ ፡ መካን ፡ ወ፫ምስሌሁ ። ወእሙንቱ ፡ ፫እለ ፡ ወጽኡ ፡ ድኅረ ፡ አኀዙኒ ፡ በእዴየ ፡ ወአንሥኡኒ ፡ እምትውልደ ፡ ምድር ፡ ወአልዐሉኒ ፡ ዲበ ፡ መካን ፡ ነዋኅ ፡ ወአርአዩኒ ፡ ማኅፈደ ፡ ነዋኀ ፡ እምድር ፡ ወኮነ ፡ ሕፁፀ ፡ ኲሉ ፡ አውግር ። ወይቤሉኒ ፡ ንበር ፡ ዝየ ፡ እስከ ፡ ትሬኢ ፡ ኲሎ ፡ ዘይመጽእ ፡ ዲበ ፡ እሉ ፡ ነጌያት ፡ ወአግማል ፡ ወአዕዱግ ፡ ወዲበ ፡ ከዋክብት ፡ ወዲበ ፡ አልህምታት ፡ ኲሎሙ ።
=== chapter 88 ===
ወርኢኩ ፡ ፩እምእኩ ፡ ፬እለ ፡ ወጽኡ ፡ እምቀዳሚ ፡ ወአኀዞ ፡ ለዝኩ ፡ ኮከብ ፡ ቀዳማዊ ፡ ዘወድቀ ፡ እምሰማይ ፡ ወአሠሮ ፡ እደዊሁ ፡ ወእገሪሁ ፡ ወወደዮ ፡ ውስተ ፡ ማዕምቅ ፡ ወዝኩ ፡ ማዕምቅ ፡ ጸቢብ ፡ ወዕሙቅ ፡ ወዕፅብ ፡ ወጽልመት ። ወ፩እምእሉ ፡ መልሐ ፡ ሰይፎ ፡ ወወሀቦሙ ፡ ለእኩ ፡ ነጌያት ፡ ወአግማል ፡ ወአዕዱግ ፡ ወአኀዘ ፡ እንዘ ፡ ይጐድኦ ፡ ፩ለካልኡ ፡ ወኲላ ፡ ምድር ፡ አድለቅለቀት ፡ ዲቤሆሙ ። ወሶበ ፡ ርኢኩ ፡ በራእይ ፡ ወነዋ ፡ እንከ ፡ ፩እምእልክቱ ፡ ፬እለ ፡ ወጽኡ ፡ ወገረ ፡ እምሰማይ ፡ ወአስተጋብአ ፡ ወነሥአ ፡ ኲሎ ፡ ከዋክብተ ፡ ዐቢያነ ፡ እለ ፡ ኀፍረቶሙ ፡ ከመ ፡ ኀፍረተ ፡ አፍራስ ፡ ወአሠሮሙ ፡ ለኲሎሙ ፡ በእደዊሆሙ ፡ ወበእገሪሆሙ ፡ ወወደዮሙ ፡ በንቅዐተ ፡ ምድር ።
=== chapter 89 ===
ወ ፡ ፩እምእልኩ ፡ ፬ሖረ ፡ ኀበ ፡ እልኩ ፡ አልህምት ፡ ጸዐዳ ፡ ወመሀሮ ፡ ምሥጢረ ፡ እንዘ ፡ ይርዕድ ፡ ውእቱ ፡ ላህም ፡ ተወልደ ፡ ወኮነ ፡ ሰብአ ፡ ወፀረበ ፡ ሎቱ ፡ መስቀረ ፡ ዐቢየ ፡ ወነበረ ፡ ዲቤሃ ፡ ወ፫አልህምት ፡ ነበሩ ፡ ምስሌሁ ፡ በይእቲ ፡ መስቀር ፡ ወተከድነ ፡ ላዕሌሆሙ ። ወአልዐልኩ ፡ ካዕበ ፡ አዕይንትየ ፡ መንገለ ፡ ሰማይ ፡ ወርኢኩ ፡ ናህሰ ፡ ልዑለ ፡ ወ፯አስራብ ፡ ዲቤሁ ፡ ወእልኩ ፡ አስራብ ፡ ያውኅዙ ፡ በ፩ዐፀድ ፡ ማየ ፡ ብዙኀ ። ወርኢኩ ፡ ካዕበ ፡ ወነዋ ፡ አንቅዕታት ፡ ተርኊ ፡ ዲበ ፡ ምድር ፡ በውእቱ ፡ ዐጸድ ፡ ዐቢይ ፡ ወአኀዘ ፡ ውእቱ ፡ ማይ ፡ ይፍላኅ ፡ ወይትነሣእ ፡ ዲበ ፡ ምድር ፡ ወኢያርአዮ ፡ ለውእቱ ፡ ዐፀድ ፡ እስከ ፡ ኲሉ ፡ ምድሩ ፡ ተከድነ ፡ በማይ ። ወበዝኀ ፡ ዲቤሁ ፡ ማይ ፡ ወጽልመት ፡ ወጊሜ ፡ ወእሬኢ ፡ መልዕልቶ ፡ ለዝኩ ፡ ማይ ፡ ወተለዐለ ፡ ውእቱ ፡ ማይ ፡ መልዕልቶ ፡ ለውእቱ ፡ ዐጸድ ፡ ወይክዑ ፡ መልዕልቶ ፡ ለዐጸድ ፡ ወቆመ ፡ ዲበ ፡ ምድር ። ወኲሎሙ ፡ አልህምት ፡ እለ ፡ ውእቱ ፡ ዐጸድ ፡ ተጋብኡ ፡ እስከነ ፡ ርኢክዎሙ ፡ ይሠጠሙ ፡ ወይትወሐጡ ፡ ወይትሐጐሉ ፡ በውእቱ ፡ ማይ ። ወውእቱ ፡ መስቀር ፡ ይፀቢ ፡ ዲበ ፡ ማይ ፡ ወኲሎሙ ፡ አልህምት ፡ ወነጌያት ፡ ወአግማል ፡ ወአዕዱግ ፡ ተሰጥሙ ፡ ውስተ ፡ ምድር ፡ ወኲሉ ፡ እንስሳ ፡ ወኢክህልኩ ፡ ርእዮቶሙ ፡ ወእሙንቱ ፡ ስእኑ ፡ ወጺአ ፡ ወተኀጒሉ ፡ ወተሰጥሙ ፡ ውስተ ፡ ቀላይ ። ወካዕበ ፡ ርኢኩ ፡ በራእይ ፡ እስከ ፡ ሰሰሉ ፡ እልኩ ፡ አስራብ ፡ እምዝኩ ፡ ናህስ ፡ ልዑል ፡ ወንቅዐተ ፡ ምድር ፡ ዐረየ ፡ ወመዓምቃት ፡ ካልአት ፡ ተፈትሑ ። ወአኀዘ ፡ ማይ ፡ ይረድ ፡ ውስቴቶሙ ፡ እስከነ ፡ ተከሥተ ፡ ምድር ፡ ወውእቱ ፡ መስቀር ፡ ነበረ ፡ ዲበ ፡ ምድር ፡ ወተግኅሠት ፡ ጽልመት ፡ ወኮነ ፡ ብርሃን ። ወውእቱ ፡ ላህም ፡ ጸዐዳ ፡ ዘኮነ ፡ ብእሴ ፡ ወጽአ ፡ እምዝኩ ፡ መስቀር ፡ ወ፫አልህምት ፡ ምስሌሁ ፡ ወኮነ ፡ ፩ዝኩ ፡ እም ፡ ፫አልህምት ፡ ፀዐዳ ፡ ይመስሎ ፡ ለዝኩ ፡ ላህም ፡ ወ፩እምኔሆሙ ፡ ቀይሕ ፡ ከመ ፡ ደም ፡ ወ፩ጸሊም ፡ ወውእቱ ፡ ዝኩ ፡ ላህም ፡ ጸዐዳ ፡ ኀለፈ ፡ እምኔሆሙ ። ወአኀዙ ፡ ይለዱ ፡ አራዊተ ፡ ገዳም ፡ ወአዕዋፍ ፡ ወኮነ ፡ እምኔሆሙ ፡ ዘእምኲሎሙ ፡ ኅብረ ፡ አሕዛብ ፡ አናብስተ ፡ ወአናምርተ ፡ ወአካልብተ ፡ ወአዝእብተ ፡ ወአጽዕብተ ፡ ወሐራውያ ፡ ገዳም ፡ ወቈናጽለ ፡ ወግሔያተ ፡ ወሐንዘረ ፡ ወሲሲተ ፡ ወአውስተ ፡ ወሆባየ ፡ ወፎንቃሰ ፡ ወቋዓተ ፡ ወተወልደ ፡ ማእከሎሙ ፡ ላህም ፡ ጸዐዳ ። ወአኀዙ ፡ ይትናሰኩ ፡ በበይናቲሆሙ ፡ ፩ምስለ ፡ ካልኡ ፡ ወዝኩ ፡ ላህም ፡ ጸዐዳ ፡ ዘተወልደ ፡ ማእከሎሙ ፡ ወለደ ፡ አድገ ፡ ገዳም ፡ ወላህመ ፡ ጸዐዳ ፡ ምስሌሁ ፡ ወበዝኀ ፡ አድገ ፡ ገዳም ። ወውእቱ ፡ ላህም ፡ ዘተወልደ ፡ እምኔሁ ፡ ወለደ ፡ ሐራውያ ፡ ገዳም ፡ ጸሊመ ፡ ወበግዐ ፡ ፀዐዳ ፡ ወውእቱ ፡ ሐራውያ ፡ ገዳም ፡ ወለደ ፡ አኅርወ ፡ ብዙኃነ ፡ ወውእቱ ፡ በግዕ ፡ ወለደ ፡ ፲ወ፪አባግዐ ። ወሶበ ፡ ልህቁ ፡ እልክቱ ፡ ፲ወ፪አባግዕ ፡ ለ፩እምኔሆሙ ፡ መጠውዎ ፡ ለአዕዱግ ፡ ወእሉ ፡ አዕዱግ ፡ ካዕበ ፡ መጠውዎ ፡ ለዝኩ ፡ በግዕ ፡ ለአዝእብት ፡ ወልህቀ ፡ ዝኩ ፡ በግዕ ፡ ማእከለ ፡ አዝእብት ። ወእግዚእ ፡ አምጽኦሙ ፡ ለ፲ወ፩አባግዕ ፡ ከመ ፡ ይኅድሩ ፡ ምስሌሁ ፡ ወይትረዐዩ ፡ ምስሌሁ ፡ ማእከለ ፡ አዝእብት ፡ ወበዝኁ ፡ ወኮኑ ፡ መራዕየ ፡ ብዙኃነ ፡ ዘአባግዕ ። ወወጠኑ ፡ አዝእብት ፡ እንዘ ፡ ይፈርሕዎሙ ፡ ወአጥወቅዎሙ ፡ እስከ ፡ ያሐልቁ ፡ ደቂቆሙ ፡ ወገደፉ ፡ ደቂቆሙ ፡ በውኂዘ ፡ ማይ ፡ ብዙኅ ፡ ወእልኩ ፡ አባግዕ ፡ ወጠኑ ፡ ይጽርሑ ፡ በእንተ ፡ ደቂቆሙ ፡ ወይሰክዩ ፡ ኀበ ፡ እግዚኦሙ ። ወበግዕ ፡ ዘድኅነ ፡ እምነ ፡ አዝእብት ፡ ነፍጸ ፡ ወኀለፈ ፡ ውስተ ፡ አዕዱገ ፡ ገዳም ፡ ወርኢክዎሙ ፡ ለአባግዕ ፡ እንዘ ፡ የዐወይዉ ፡ ወይጸርሑ ፡ ወይስእልዎ ፡ ለእግዚኦሙ ፡ በኲሉ ፡ ኃይሎሙ ፡ እስከ ፡ ወረደ ፡ ዝኩ ፡ እግዚአ ፡ አባግዕ ፡ ኀበ ፡ ቃሎሙ ፡ ለአባግዕ ፡ እምጽርሕ ፡ ልዑል ፡ ወበጽሐ ፡ ኀቤሆሙ ፡ ወርእዮሙ ። ወጸውዖ ፡ ለዝኩ ፡ በግዕ ፡ ዘተኀጥአ ፡ እምአዝእብት ፡ ወተናገሮ ፡ በእንተ ፡ አዝእብት ፡ ከመ ፡ ያስምዕ ፡ ላዕሌሆሙ ፡ ከመ ፡ ኢይግሥሥዎሙ ፡ ለአባግዕ ። ወሖረ ፡ በግዕ ፡ ኀበ ፡ አዝእብት ፡ በቃለ ፡ እግዚእ ፡ ወካልእ ፡ በግዕ ፡ ተራከቦ ፡ ለውእቱ ፡ በግዕ ፡ ወሖረ ፡ ምስሌሁ ፡ ወቦኡ ፡ ክልኤሆሙ ፡ ኅቡረ ፡ ውስተ ፡ ማኅበሮሙ ፡ ለእልኩ ፡ አዝእብት ፡ ወተናገርዎሙ ፡ ወአስምዑ ፡ ዲቤሆሙ ፡ ከመ ፡ እምይእዜ ፡ ኢይግሥሥዎሙ ፡ ለአባግዕ ። ወእምኔሁ ፡ ርኢክዎሙ ፡ ለአዝእብት ፡ ወእፎ ፡ ጸንዑ ፡ ፈድፋደ ፡ ዲበ ፡ አባግዕ ፡ በኲሉ ፡ ኀይሎሙ ፡ ወአባግዕ ፡ ጸርሑ ። ወእግዚኦሙ ፡ መጽአ ፡ ኀቤሆሙ ፡ ለአባግዕ ፡ ወአኀዘ ፡ ይዝብጦሙ ፡ ለእልኩ ፡ አዝእብት ፡ ወአዝእብት ፡ አኀዙ ፡ የዐውይዉ ፡ ወአባግዕ ፡ አርመሙ ፡ ወእምሶቤሃ ፡ ኢጸርሑ ። ወርኢክዎሙ ፡ ለአባግዕ ፡ እስከ ፡ ወጽኡ ፡ እምአዝእብት ፡ ወአዝእብት ፡ ተጸለሉ ፡ አዕይንቲሆሙ ፡ ወወጽኡ ፡ እንዘ ፡ ይተልውዎሙ ፡ ለአባግዕ ፡ እልኩ ፡ አዝእብት ፡ በኲሉ ፡ ኀይሎሙ ። ወእግዚኦሙ ፡ ለአባግዕ ፡ ሖረ ፡ ምስሌሆሙ ፡ እንዘ ፡ ይመርሆሙ ፡ ወኲሎሙ ፡ አባግዒሁ ፡ ተለውዎ ፡ ወገጹ ፡ ስቡሕ ፡ ወግሩም ፡ ራእዩ ፡ ወክብር ። ወአዝእብትሰ ፡ አኀዙ ፡ ይትልውዎሙ ፡ ለእልኩ ፡ አባግዕ ፡ እስከ ፡ ተራከብዎሙ ፡ በአሐቲ ፡ አይገ ፡ ማይ ። ወውእቱ ፡ አይገ ፡ ማይ ፡ ተሰጠ ፡ ወቆመ ፡ ማይ ፡ እምዝየ ፡ ወእምዝየ ፡ በቅድመ ፡ ገጾሙ ፡ ወእግዚኦሙ ፡ እንዘ ፡ ይመርሖሙ ፡ ወቆመ ፡ ማእከሎሙ ፡ ወማእከለ ፡ አዝእብት ። ወዓዲሆሙ ፡ እልኩ ፡ አዝእብት ፡ ኢርእይዎሙ ፡ ለአባግዕ ፡ ወሖሩ ፡ ማእከለ ፡ ዝኩ ፡ አይገ ፡ ማይ ፡ ወአዝእብት ፡ ተለውዎሙ ፡ ለአባግዕ ፡ ወሮጹ ፡ ድኅረሆሙ ፡ እልኩ ፡ አዝእብት ፡ በውእቱ ፡ አይገ ፡ ማይ ። ወሶበ ፡ ርእይዎ ፡ ለእግዚኦሙ ፡ ለአባግዕ ፡ ገብኡ ፡ ከመ ፡ ይጒየዩ ፡ እምቅድመ ፡ ገጹ ፡ ወዝኩ ፡ አይገ ፡ ማይ ፡ ተጋብአ ፡ ወኮነ ፡ ከመ ፡ ፍጥረቱ ፡ ፍጡነ ፡ ወመልአ ፡ ማይ ፡ ወተለዐለ ፡ እስከ ፡ ከደኖሙ ፡ ለእልኩ ፡ አዝእብት ። ወርኢኩ ፡ እስከ ፡ ተሐጒሉ ፡ ኲሎሙ ፡ አዝእብት ፡ እለ ፡ ተለውዎሙ ፡ ለእልኩ ፡ አባግዕ ፡ ወተሰጥሙ ። ወአባግዕሰ ፡ ኀለፉ ፡ እምዝኩ ፡ ማይ ፡ ወወጽኡ ፡ ውስተ ፡ በድው ፡ ኀበ ፡ አልቦ ፡ ማይ ፡ ወሣዕር ፡ ወአኀዙ ፡ ይክሥቱ ፡ አዕይንቲሆሙ ፡ ወይርአዩ ፡ ወርኢኩ ፡ እግዚኦሙ ፡ ለአባግዕ ፡ ይርእዮሙ ፡ ወይሁቦሙ ፡ ማየ ፡ ወሣዕረ ፡ ወዝኩ ፡ በግዕ ፡ እንዘ ፡ የሐውር ፡ ወይመርሖሙ ። ወዐርገ ፡ ዝኩ ፡ በግዕ ፡ ዲበ ፡ ድማሑ ፡ ለዝኩ ፡ ኰኲሕ ፡ ነዋኅ ፡ ወእግዚኦሙ ፡ ለአባግዕ ፡ ፈነዎ ፡ ኀቤሆሙ ። ወእምኔሁ ፡ ርኢክዎ ፡ ለእግዚአ፡ አባግዕ ፡ ዘቆመ ፡ ቅድሜሆሙ ፡ ወራእዩ ፡ ግሩም ፡ ወኀያል ፡ ወኲሎሙ ፡ እልኩ ፡ አባግዕ ፡ ርእይዎ ፡ ወፈርሁ ፡ እምገጹ ። ወኲሎሙ ፡ እልኩ ፡ ይፈርሁ ፡ ወይርዕዱ ፡ እምኔሁ ፡ ወይጸርሑ ፡ ድኅሬሁ ፡ ለዝኩ ፡ በግዕ ፡ ምስሌሁ ፡ ዘሀሎ ፡ ለካልእ ፡ በግዕ ፡ ዘኮነ ፡ ማእከሎሙ ፡ እስመ ፡ ኢንክል ፡ ቅድመ ፡ እግዚእነ ፡ ወኢነጽሮቶ ። ወገብአ ፡ ዝኩ ፡ በግዕ ፡ ዘይመርሖሙ ፡ ወዐርገ ፡ በድማሐ ፡ ዝኩ ፡ ኰኲሕ ፡ ወአባግዕ ፡ አኀዙ ፡ ይጸለሉ ፡ አዕይንቲሆሙ ፡ ወይስሐቱ ፡ እምፍኖት ፡ እንተ ፡ አርአዮሙ ፡ ወዝኩ ፡ በግዕ ፡ ኢያእመረ ። ወእግዚኦሙ ፡ ለአባግዕ ፡ ተምዐ ፡ ዲቤሆሙ ፡ ዐቢየ ፡ መዐተ ፡ ወአእመረ ፡ ዝኩ ፡ በግዕ ፡ ወወረደ ፡ እምነ ፡ ድማሑ ፡ ለኰኲሕ ፡ ወመጽአ ፡ ኀበ ፡ አባግዕ ፡ ወረከበ ፡ መብዝኅቶሙ ፡ ዘጽሉል ፡ አዕይንቲሆሙ ፡ ወእለ ፡ ስሕቱ ፡ እምፍኖቱ ። ወሶበ ፡ ርእይዎ ፡ ፈርሁ ፡ ወርዕዱ ፡ እምቅድመ ፡ ገጹ ፡ ወፈቀዱ ፡ ከመ ፡ ይግብኡ ፡ ለዐጸደ ፡ ዚአሆሙ ። ወዝኩ ፡ በግዕ ፡ ነሥአ ፡ ምስሌሁ ፡ ባዕዳነ ፡ አባግዐ ፡ ወቦአ ፡ ኀበ ፡ እልኩ ፡ አባግዕ ፡ እለ ፡ ስሕቱ ፡ ወእምዝ ፡ አኀዘ ፡ ይቅትሎሙ ፡ ወአባግዕ ፡ ፈርሁ ፡ እምገጹ ፡ ወአግብኦሙ ፡ ውእቱ ፡ በግዕ ፡ ለእልኩ ፡ አባግዕ ፡ እለ ፡ ስሕቱ ፡ ወገብኡ ፡ ውስተ ፡ አዕጻዲሆሙ ። ወርኢኩ ፡ በህየ ፡ ራእየ ፡ እስከ ፡ ውእቱ ፡ በግዕ ፡ ኮነ ፡ ብእሴ ፡ ወሐነጸ ፡ ቤተ ፡ ለእግዚአ ፡ አባግዕ ፡ ወለኲሎሙ ፡ አባግዕ ፡ አቀሞሙ ፡ በውእቱ ፡ ቤት ። ወርኢኩ ፡ እስከ ፡ ሰከበ ፡ ውእቱ ፡ በግዕ ፡ ዘተራከቦ ፡ ለዝኩ ፡ በግዕ ፡ ዘመርሖሙ ፡ ለአባግዕ ፡ ወርኢኩ ፡ እስከ ፡ ተኀጒሉ ፡ ኲሎሙ ፡ አባግዕ ፡ ዐቢያን ፡ ወንኡሳን ፡ ተንሥኡ ፡ ህየንቴሆሙ ፡ ወቦኡ ፡ ውስተ ፡ መርዔት ፡ ወቀርቡ ፡ ኀበ ፡ ፈለገ ፡ ማይ ። ወዝኩ ፡ በግዕ ፡ ዘይመርሆሙ ፡ ዘኮነ ፡ ብእሴ ፡ ተሌለየ ፡ እምኔሆሙ ፡ ወሰከበ ፡ ወኲሎሙ ፡ አባግዕ ፡ ኀሠሥዎ ፡ ወጸርሑ ፡ ዲቤሁ ፡ ዐቢየ ፡ ጽራሐ ። ወርኢኩ ፡ እስከ ፡ አርመሙ ፡ እምጽራሑ ፡ ለዝኩ ፡ በግዕ ፡ ወኀለፍዎ ፡ ለዝኩ ፡ ውኂዘ ፡ ማይ ፡ ወቆሙ ፡ አባግዕ ፡ ኲሎሙ ፡ እለ ፡ ይመርሕዎሙ ፡ ተክሎሙ ፡ ለእለ ፡ ሰከብ ፡ ወመርሕዎሙ ። ወርኢኩ ፡ አባግዕ ፡ እስከ ፡ ይበውኡ ፡ ውስተ ፡ መካን ፡ ሠናይ ፡ ወምድር ፡ ሐዋዝ ፡ ወስብሕት ፡ ወርኢኩ ፡ እልኩ ፡ አባግዕ ፡ እስከ ፡ ጸግቡ ፡ ወውእቱ ፡ ቤት ፡ ማእከሎሙ ፡ በምድር ፡ ሐዋዝ ። ወቦ ፡ ኀበ ፡ ይትከሠታ ፡ አዕይንቲሆሙ ፡ ወቦ ፡ ኀበ ፡ ይጼለላ ፡ እስከ ፡ ተንሥአ ፡ ካልእ ፡ በግዕ ፡ ወመርሆሙ ፡ ወአግብኦሙ ፡ ለኲሎሙ ፡ ወተከሥታ ፡ አዕይንቲሆሙ ። ወአኀዙ ፡ አክላብ ፡ ወቈናጽል ፡ ወሐራውያ ፡ ሐቅል ፡ ይብልዕዎሙ ፡ ለእልኩ ፡ አባግዕ ፡ እስከ ፡ ተንሥአ ፡ ካልእ ፡ በግዕ ፡ [እግዚአ ፡ አባግዕ ፡ ] ፡ ፩እምኔሆሙ ፡ ሐርጌ ፡ ዘይመርሆሙ ። ወዝኩ ፡ ሐርጌ ፡ አኀዘ ፡ ይውጋዕ ፡ እምዝየ ፡ ወእምዝየ ፡ እልክተ ፡ አክላበ ፡ ወቈናጽለ ፡ ወሐራውያ ፡ ገዳም ፡ እስከ ፡ ለኲሎሙ ፡ አኅጐሎሙ ። ወውእቱ ፡ በግዕ ፡ ተፈትሐ ፡ አዕይንቲሁ ፡ ወርእየ ፡ ዝኰ ፡ ሐርጌ ፡ ዘማእከለ ፡ አባግዕ ፡ ዘኀደገ ፡ ስብሐቶ ፡ ወአኀዘ ፡ ይጒድዖሙ ፡ ለእሙንቱ ፡ አባግዕ ፡ ወኬዶሙ ፡ ወሖረ ፡ ዘእንበለ ፡ ተድላ ። ወእግዚኦሙ ፡ ለአባግዕ ፡ ፈነዎ ፡ ለበግዕ ፡ ኀበ ፡ ካልእ ፡ በግዕ ፡ ወአንሥኦ ፡ ከመ ፡ ይኩን ፡ ሐርጌ ፡ ወይምርሆሙ ፡ ለአባግዕ ፡ ህየንተ ፡ ዝኩ ፡ በግዕ ፡ ዘኀደገ ፡ ስብሐቲሁ ። ወሖረ ፡ ኀቤሁ ፡ ወተናገሮ ፡ ለባሕቲቱ ፡ ወአንሥኦ ፡ ለውእቱ ፡ ሐርጌ ፡ ወገብሮ ፡ መኰንነ ፡ ወመራሔ ፡ ለአባግዕ ፡ ወበኲሉዝ ፡ እልኩ ፡ አክላብ ፡ ያጽዕቅዎሙ ፡ ለአባግዕ ። ወሐርጌ ፡ ቀዳማዊ ፡ ሰደዶ ፡ ለዝኩ ፡ ሐርጌ ፡ ደኃራዊ ፡ ወተንሥአ ፡ ዝኩ ፡ ሐርጌ ፡ ደኀራዊ ፡ ወነፍጸ ፡ እምቅድመ ፡ ገጹ ፡ ወርኢኩ ፡ እስከ ፡ አውደቅዎ ፡ እልኩ ፡ አክላብ ፡ ለሐ ፡ ርጌ ፡ ቀዳማዊ ። ወተንሥአ ፡ ዝኩ ፡ ሐርጌ ፡ ደኀራዊ ፡ ወመርሖሙ ፡ ለአባግዕ ፡ ንኡሳን ፡ ወዝኩ ፡ ሐርጌ ፡ ወለደ ፡ አባግዐ ፡ ብዙኃነ ፡ ወሰከበ ፡ ወበግዕ ፡ ንዑስ ፡ ኮነ ፡ ሐርጌ ፡ ህየንቴሁ ፡ ወኮነ ፡ መኰንነ ፡ ወመራሔ ፡ ለእልክቱ ፡ አባግዕ ። ወልህቁ ፡ ወበዝኁ ፡ እልኩ ፡ አባግዕ ፡ ወኲሎሙ ፡ አክላብ ፡ ወቈናጽል ፡ ወሐራውያ ፡ ገዳም ፡ ፈርሁ ፡ ወነፍጹ ፡ እምኔሁ ፡ ወውእቱ ፡ ሐርጌ ፡ ጐድአ ፡ ወቀተለ ፡ ኲሎ ፡ አራዊተ ፡ ወኢክህሉ ፡ ዳግመ ፡ እልኩ ፡ አራዊት ፡ ማእከለ ፡ አባግዕ ፡ ወምንተኒ ፡ ግሙሩ ፡ ኢመ ፡ ሠጡ ፡ እምኔሆሙ ። ወዝኩ ፡ ቤት ፡ ኮነ ፡ ዐቢየ ፡ ወርኂበ ፡ ወተሐንጸ ፡ ለእልኩ ፡ አባግዕ ፡ ማኅፈድ ፡ ነዋኅ ፡ ዲበ ፡ ዝኩ ፡ ቤት ፡ ለእግዚአ ፡ አባግዕ ፡ ወተትሕተ ፡ ዝኩ ፡ ቤት ፡ ወማኅፈድሰ ፡ ተለዐለ ፡ ወኮነ ፡ ነዋኀ ፡ ወእግዚአ ፡ አባግዕ ፡ ቆመ ፡ ዲበ ፡ ውእቱ ፡ ማኅፈድ ፡ ወማእደ ፡ ምልእተ ፡ አቅረቡ ፡ በቅድሜሁ ። ወርኢክዎሙ ፡ ካዕበ ፡ ለእልኩ ፡ አባግዕ ፡ ካዕበ ፡ ከመ ፡ ስሕቱ ፡ ወሖሩ ፡ በብዙኅ ፡ ፍናዋት ፡ ወኀደጉ ፡ ዝኰ ፡ ቤተ ፡ ዚአሆሙ ፡ ወእግዚኦሙ ፡ ለአባግዕ ፡ ጸውዐ ፡ እምውስቴቶሙ ፡ ለአባግዕ ፡ ወለአኮሙ ፡ ኀበ ፡ አባግዕ ፡ ወአባግዕ ፡ አኀዙ ፡ ይቅትልዎሙ ። ወ፩እምኔሆሙ ፡ ድኅነ ፡ ወኢተቀትለ ፡ ወቀነጸ ፡ ወጸርሐ ፡ ዲበ ፡ አባግዕ ፡ ወፈቀዱ ፡ ይቅትልዎ ፡ ወእግዚአ ፡ አባግዕ ፡ አድኀኖ ፡ እምእዴሆሙ ፡ ለአባግዕ ፡ ወአዕረጎ ፡ ኀቤየ ፡ ወአንበሮ ። ወካልኣነ ፡ አባግዐ ፡ ብዙኃነ ፡ ፈነወ ፡ ኀቤሆሙ ፡ ለእልኩ ፡ አባግዕ ፡ ያስምዑ ፡ ወየዐውይዉ ፡ ዲቤሆሙ ። ወእምኔሁ ፡ ርኢኩ ፡ ሶበ ፡ ኀደጉ ፡ ቤቶ ፡ ለእግዚአ ፡ አባግዕ ፡ ወማኅፈዶ ፡ እምኲሉ ፡ ስሕቱ ፡ ወተጸለላ ፡ አዕይንቲሆሙ ፤ ወርኢኩ ፡ እግዚአ ፡ አባግዕ ፡ ከመ ፡ ገብረ ፡ ቀትለ ፡ ብዙኀ ፡ ዲቤሆሙ ፡ በበመራዕይሆሙ ፡ እስከ ፡ ይጼውዕዎ ፡ እልኩ ፡ አባግዕ ፡ ለዝኩ ፡ ቀትል ፡ ወአግብኡ ፡ መካኖ ። ወኀደጎሙ ፡ ውስተ ፡ እደ ፡ አናብስት ፡ ወአናምርት ፡ ወአዝእብት ፡ ወአጽዕብት ፡ ወውስተ ፡ እደ ፡ ቈናጽል ፡ ወዲበ ፡ ኲሉ ፡ አራዊት ፡ ወአኀዙ ፡ እልክቱ ፡ አራዊተ ፡ ገዳም ፡ ይምስጥዎሙ ፡ ለእልኩ ፡ አባግዕ ። ወርኢኩ ፡ ከመ ፡ ኀደጎ ፡ ለዝኩ ፡ ቤተ ፡ ዚአሆሙ ፡ ወማኅፈዶሙ ፡ ወወደዮሙ ፡ ለኲሎሙ ፡ ውስተ ፡ እደ ፡ አናብስት ፡ ከመ ፡ ይምስጥዎሙ ፡ ወከመ ፡ ይብልዕዎሙ ፡ ውስተ ፡ እደዊሆሙ ፡ ለኲሎሙ ፡ አራዊት ። ወአነ ፡ አኀዝኩ ፡ እጽራሕ ፡ በኲሉ ፡ ኀይልየ ፡ ወእጸውዖ ፡ ለእግዚአ ፡ አባግዕ ፡ ወአርእዮ ፡ በእንተ ፡ አባግዕ ፡ እስመ ፡ ተበልዑ ፡ እምኲሎሙ ፡ አራዊተ ፡ ገዳም ። ወውእቱ ፡ አርመመ ፡ እንዘ ፡ ይሬኢ ፡ ወተፈሥሐ ፡ እስመ ፡ ተበልዑ ፡ ወተውሕጡ ፡ ወተሐይዱ ፡ ወኀደጎሙ ፡ ውስተ ፡ እደ ፡ ኲሎሙ ፡ አራዊት ፡ ለመብልዕ ። ወጸውዐ ፡ ፸ኖላውያነ ፡ ወገደፎሙ ፡ ለእልኩ ፡ አባግዕ ፡ ከመ ፡ ይርዐይዎሙ ፡ ወይቤ ፡ ለኖላውያን ፡ ወለፀማዶሙ ፡ ኲሉ ፡ ፩፩እምኔክሙ ፡ እምይእዜ ፡ ይርዐይዎሙ ፡ ለአባግዕ ፡ ወኲሎ ፡ ዘእኤዝዘክሙ ፡ አነ ፡ ግበሩ ። ወእሜጥወክሙ ፡ አነ ፡ በኊልቊ ፡ ወእነግረክሙ ፡ ዘይትሐጐል ፡ እምኔሆሙ ፡ ወኪያሆሙ ፡ አሕጒሉ ፡ ወመጠወ ፡ ሎሙ ፡ እልክተ ፡ አባግዐ ። ወለካልእ ፡ ጸውዖ ፡ ወይቤሎ ፡ ለቡ ፡ ወርኢ ፡ ኲሎ ፡ ዘይገብሩ ፡ ኖሎት ፡ ዲበ ፡ እሉ ፡ አባግዕ ፡ እስመ ፡ ያሐጒሉ ፡ እምውስቴቶሙ ፡ ፈድፋደ ፡ እምዘ ፡ አዘዝክዎሙ ። ወኲሎ ፡ ጽጋበ ፡ ወሐጒለ ፡ ዘይትገበር ፡ በኖሎት ፡ ጸሐፍ ፡ ሚመጠነ ፡ ያኀጒልዎሙ ፡ በትእዛዝየ ፡ ወሚመጠነ ፡ ያሐጒሉ ፡ በርእሶሙ ፡ ወኲሎ ፡ ሐጒሎሙ ፡ ለለ ፡ ፩፩ ፡ ኖላዊ ፡ ጸሐፍ ፡ ዲቤሆሙ ። ወበኊልቊ ፡ አንብብ ፡ በቅድሜየ ፡ ወሚመጠነ ፡ ያሐጒሉ ፡ በርእሶሙ ፡ ወሚመጠነ ፡ ይሜጥውዎሙ ፡ ለሐጒል ፡ ከመ ፡ ይኩን ፡ ሊተ ፡ ዝንቱ ፡ ስምዐ ፡ ዲቤሆሙ ፡ ከመ ፡ አእምር ፡ ኲሎ ፡ ግብሮሙ ፡ ለኖላውያን ፡ ከመ ፡ እመጥዎሙ ፡ ወእርአይ ፡ ዘይገብሩ ፡ ለእመ ፡ ይነብሩ ፡ በትእዛዝየ ፡ ዘአዘዝክዎሙ ፡ ወእመ ፡ አልቦ ። ወኢያእምሩ ፡ ወኢታርእዮሙ ፡ ወኢትዝልፎሙ ፡ አላ ፡ ጸሐፍ ፡ ኲሎ ፡ ሐጒሎሙ ፡ ለኖላውያን ፡ በበጊዜሁ ፡ ለለ ፡ ፩፩ ፡ ወአዕርግ ፡ ኀቤየ ፡ ኲሎ ። ወርኢኩ ፡ እስከ ፡ ሶበ ፡ እልኩ ፡ ኖላውያን ፡ ይርዐዩ ፡ በጊዜሁ ፡ ወአኀዙ ፡ ይቅትሉ ፡ ወያሕጒሉ ፡ ብዙኃነ ፡ እምትእዛዞሙ ፡ ወኀደጉ ፡ እልክተ ፡ አባግዐ ፡ ውስተ ፡ እደ ፡ አናብስት ። ወበልዑ ፡ ወውሕጡ ፡ መብዝኅቶሙ ፡ ለእልኩ ፡ አባግዕ ፡ አናብስት ፡ ወአናምርት ፡ ወሐራውያ ፡ ገዳም ፡ በልዑ ፡ ምስሌሆሙ ፡ ወአውዐይዎ ፡ ለዝኩ ፡ ማኅፈድ ፡ ወከረይዎ ፡ ለዝኩ ፡ ቤት ። ወኀዘንኩ ፡ ብዙኃ ፡ ጥቀ ፡ በእንተ ፡ ማኅፈድ ፡ እስመ ፡ ተከርየ ፡ ውእቱ ፡ ቤት ፡ ዘአባግዕ ፡ ወእምኔሁ ፡ እክህልኩ ፡ ርእዮቶሙ ፡ ለእልኩ ፡ አባግዕ ፡ ለእመ ፡ ይበውኡ ፡ ኀበ ፡ ዝኩ ፡ ቤት ። ወኖላውያን ፡ ወፀማዶሙ ፡ መጠውዎሙ ፡ ለእልኩ ፡ አባግዕ ፡ ለኲሉ ፡ አራዊት ፡ ከመ ፡ ይብልዕዎሙ ፡ ወኲሉ ፡ ፩፩እምኔሆሙ ፡ በጊዜሁ ፡ በኊልቊ ፡ ይትሜጠው ፡ ወኲሉ ፡ ፩፩እምኔሆሙ ፡ ለካልኡ ፡ በመጽሐፍ ፡ ይጽሕፍ ፡ ሚመጠነ ፡ ያሐጒል ፡ እምኔሆሙ ፡ [ለካልኡ ፡ በመጽሐፍ ፡ ] ። ወፈድፋደ ፡ እምሥርዐቶሙ ፡ ፩፩ ፡ ይቀትል ፡ ወያሐጒል ፡ ወአነ ፡ አኀዝኩ ፡ እብኪ ፡ ወአዐውዩ ፡ ብዙኀ ፡ ጥቀ ፡ በእንተ ፡ እልኩ ፡ አባግዕ ። ወከመዝ ፡ በራእይ ፡ ርኢክዎ ፡ ለዝኩ ፡ ዘይጽሕፍ ፡ እፎ ፡ ይጽሕፍ ፡ ፩ዘይትሐጐል ፡ እምነ ፡ እልኩ ፡ ኖላውያን ፡ በኲሉ ፡ ዕለት ፡ ወያዐርግ ፡ ወያዐርፍ ፡ ወያርኢ ፡ ኲሎ ፡ ኪያሁ ፡ መጽሐፈ ፡ ለእግዚአ ፡ አባግዕ ፡ ኲሎ ፡ ዘገብሩ ፡ ወኲሎ ፡ ዘአዕተተ ፡ ፩፩እምኔሆሙ ፡ ወኲሎ ፡ ዘመጠዉ ፡ ለሐጒል ። ወመጽሐፍ ፡ ተነበ ፡ በቅድመ ፡ እግዚአ ፡ አባግዕ ፡ ወነሥአ ፡ መጽሐፈ ፡ በእዱ ፡ ወአንበባ ፡ ወኀተማ ፡ ወአንበራ ። ወእምኔሁ ፡ ርኢኩ ፡ እንዘ ፡ ይርዕዩ ፡ ኖሎት ፡ ፲ወ፪ሰዓተ ፡ ወናሁ ፡ ፫እምእልኩ ፡ አባግዕ ፡ ገብኡ ፡ ወመጽኡ ፡ ወቦኡ ፡ ወአኀዙ ፡ እንዘ ፡ የሐንጹ ፡ ኲሎ ፡ ዘወድቀ ፡ እምውእቱ ፡ ቤት ፡ ወሐራውያ ፡ ገዳም ፡ ከልእዎሙ ፡ ወኢክህሉ ። ወአኀዙ ፡ ካዕበ ፡ ይሕንጹ ፡ ከመ ፡ ቀዳሚ ፡ ወአንሥእዎ ፡ ለውእቱ ፡ ማኅፈድ ፡ ወይሰመይ ፡ ማኅፈደ ፡ ነዋኀ ፡ ወአኀዙ ፡ ካዕበ ፡ እንዘ ፡ ያነብሩ ፡ ቅድመ ፡ ማኅፈድ ፡ ማእደ ፡ ወኲሉ ፡ ኅብስት ፡ ዘዲቤሁ ፡ ርኩስ ፡ ወኢኮነ ፡ ንጹሐ ። ወዲበ ፡ ኲሉ ፡ እሉ ፡ አባግዕ ፡ ጽሉላን ፡ አዕይንቲሆሙ ፡ ወኢይሬእዩ ፡ ወኖሎቶሙኒ ፡ ከማሁ ፡ ወይሜጥውዎሙ ፡ ለኖሎቶሙኒ ፡ ለሐጒል ፡ ፈድፋደ ፡ ወበእገሪሆሙ ፡ ኬድዎሙ ፡ ለአባግዕ ፡ ወበልዕዎሙ ። ወእግዚአ ፡ አባግዕ ፡ አርመመ ፡ እስከነ ፡ ተዘርዘሩ ፡ ኲሉ ፡ አባግዕ ፡ ገዳመ ፡ ወተደመሩ ፡ ምስሌሆሙ ፡ ወኢያድኀንዎሙ ፡ እምእደ ፡ አራዊት ። ወዝኩ ፡ ዘይጽሕፍ ፡ መጽሐፈ ፡ አዕረጎ ፡ ወአርአዮ ፡ ወአንበበ ፡ ኀበ ፡ አብያተ ፡ እግዚአ ፡ አባግዕ ፡ ወያስተበቊዖ ፡ በእንቲአሆሙ ፡ ወይስእሎ ፡ እንዘ ፡ ያርእዮ ፡ ኲሎ ፡ ግብረ ፡ ኖሎቶሙ ፡ ወያሰምዕ ፡ በቅድሜሁ ፡ ዲበ ፡ ኲሉ ፡ ኖላውያን ። ወነሢኦ ፡ አንበረ ፡ ኀቤሁ ፡ ኪያሁ ፡ መጽሐፈ ፡ ወወጽአ ።
=== chapter 90 ===
ወርኢኩ ፡ እስከ ፡ ዘመን ፡ ከመ ፡ ከመዝ ፡ ይርዕዩ ፡ ፴ወ፯ኖላውያን ፡ ወፈጸሙ ፡ ኲሎሙ ፡ በበጊዜሆሙ ፡ ከመ ፡ ቀዳምያን ፡ ወባዕዳን ፡ ተመጠውዎሙ ፡ ውስተ ፡ እደዊሆሙ ፡ ከመ ፡ ይርይዎሙ ፡ በበጊዜሆሙ ፡ ኲሉ ፡ ኖላውያን ፡ በበጊዜሁ ። ወእምዝ ፡ ርኢኩ ፡ በራእይ ፡ ኲሉ ፡ አዕዋፈ ፡ ሰማይ ፡ መጽኡ ፡ አንስርት ፡ ወአውስት ፡ ወሆባይ ፡ ወቋዓት ፡ ወአንስርት ፡ ይመርሕዎሙ ፡ ለኲሎሙ ፡ አዕዋፍ ፡ ወአኀዙ ፡ ይብልዕዎሙ ፡ ለእልኩ ፡ አባግዕ ፡ ወይከርዩ ፡ አዕይንቲሆሙ ፡ ወይብልዕዎ ፡ ለሥጋሆሙ ። ወአባግዕ ፡ ጸርሑ ፡ እስመ ፡ ተበልዑ ፡ ሥጋሆሙ ፡ እምነ ፡ አዕዋፍ ፡ ወአነ ፡ ጸራሕኩ ፡ ወዐውየውኩ ፡ በንዋምየ ፡ ዲበ ፡ ውእቱ ፡ ኖላዊ ፡ ዘይርዕዮሙ ፡ ለአባግዕ ። ወርኢኩ ፡ እስከ ፡ ተበልዑ ፡ እልኩ ፡ አባግዕ ፡ እምአክላብ ፡ ወእምአንስርት ፡ ወእምሆባይ ፡ ወኢኀደጉ ፡ ሎሙ ፡ ሥጋ ፡ ግሙራ ፡ ወኢማእሰ ፡ ወኢሥርወ ፡ እስከ ፡ ቆመ ፡ ባሕቲቶሙ ፡ አዕጽምቲሆሙ ፡ አዕጽምቲሆሙኒ ፡ ወድቁ ፡ ዲበ ፡ ምድር ፡ ወንእሱ ፡ አባግዕ ። ወርኢኩ ፡ እስከ ፡ ዘመን ፡ ይርዕዩ ፡ ፳ወ፫ኖላውያን ፡ ወፈጸሙ ፡ በበጊዜሆሙ ፡ ፶ወ፰ጊዜያተ ። ወንኡሳንሰ ፡ መሐስዓት ፡ ተወልዱ ፡ እምእልኩ ፡ አባግዕ ፡ ጸዓድው ፡ ወአኀዙ ፡ አዕይንቲሆሙ ፡ ይክሥቱ ፡ ወይርአዩ ፡ ወይጽርሑ ፡ ኀበ ፡ አባግዕ ። ወአባግዕ ፡ ኢጸርሕዎሙ ፡ ወኢያፅምኡ ፡ ዘነገርዎሙ ፡ አላ ፡ ፈድፋደ ፡ ተጸመሙ ፡ ወተጸለሉ ፡ አዕይንቲሆሙ ፡ ፈድፋደ ፡ ወኀያለ ። ወርኢኩ ፡ በራእይ ፡ ቋዓተ ፡ ከመ ፡ ሠረሩ ፡ ዲበ ፡ እልኩ ፡ መሐስዕ ፡ ወአኀዝዎ ፡ ለ፩እምእልኩ ፡ መሐስዕ ፡ ወቀጥቀጥዎሙ ፡ ለአባግዕ ፡ ወበልዕዎሙ ። ወርኢኩ ፡ እስከ ፡ ወጽአ ፡ ሎሙ ፡ አቅርነት ፡ ለእልኩ ፡ መሐስዕ ፡ ወቋዓት ፡ ያወድቅዎሙ ፡ ለአቅርንቲሆሙ ፡ ወርኢኩ ፡ እስከ ፡ በቈለ ፡ ፩ቀርን ፡ ዐቢይ ፡ ፩እምእልኩ ፡ አባግዕ ፡ ወተከሥታ ፡ አዕይንቲሆሙ ። ወርእየ ፡ ቦሙ ፡ ወተፈትሐ ፡ አዕይንቲሆሙ ፡ ወጸርሐ ፡ ሎሙ ፡ ለአባግዕ ፡ ወዳቤላት ፡ ርእይዎ ፡ ወሮጹ ፡ ኲሎሙ ፡ ኀቤሁ ። ወምስለዝ ፡ ኩሉ ፡ እልኩ ፡ አንስርት ፡ ወአውስት ፡ ወቋዓት ፡ ወሆባይ ፡ እስከ ፡ ይእዜ ፡ ይመስጥዎሙ ፡ ለአባግዕ ፡ ወይሠርፉ ፡ ዲቤሆሙ ፡ ወይበልዕዎሙ ፡ ወአባግዕሰ ፡ ያረምሙ ፡ ወዳቤላት ፡ የዐወይዉ ፡ ወይጸርሑ ። ወእልኩ ፡ ቋዓት ፡ ይትጋደሉ ፡ ወይትበአሱ ፡ ምስሌሁ ፡ ወፈቀዱ ፡ ያእትቱ ፡ ቀርኖ ፡ ወኢክህልዎ ። ወርኢክዎሙ ፡ እስከ ፡ መጽኡ ፡ ኖላውያን ፡ ወአንስርት ፡ ወእልኩ ፡ አውስት ፡ ወሆባይ ፡ ወጸርሑ ፡ ለቋዓት ፡ ከመ ፡ ይቀጥቅጥዎ ፡ ለቀርኑ ፡ ለዝኩ ፡ ዳቤላ ፡ ወተበአሱ ፡ ምስሌሁ ፡ ወተቃተሉ ፡ ወውእቱ ፡ ይትበአስ ፡ ምስሌሆሙ ፡ ወጸርሐ ፡ ከመ ፡ ትምጽኦ ፡ ረድኤቱ ። ወርኢኩ ፡ እስከ ፡ መጽአ ፡ ዝኩ ፡ ብእሲ ፡ ዘጸሐፈ ፡ አስማቲሆሙ ፡ ለኖሎት ፡ ወያዐርግ ፡ ቅድሜሁ ፡ ለእግዚአ ፡ አባግዕ ፡ ወውእቱ ፡ ረድኦ ፡ ወአርአዮ ፡ ኲሎ ፡ ወረደ ፡ ረድኤቱ ፡ ለዝኩ ፡ ዳቤላ ። ወርኢኩ ፡ እስከ ፡ መጽአ ፡ ኀቤሆሙ ፡ ዝኩ ፡ እግዚአ ፡ አባግዕ ፡ በመዐት ፡ ወእለ ፡ ርእይዎ ፡ ኲሎሙ ፡ ነፍጹ ፡ ወወድቁ ፡ ኲሎሙ ፡ ውስተ ፡ ጽላሎቱ ፡ እምቅድመ ፡ ገጹ ። ኲሎሙ ፡ አንስርት ፡ ወአውስት ፡ ወቋዓት ፡ ወሆባይ ፡ ተጋብኡ ፡ ወአምጽኡ ፡ ምስሌሆሙ ፡ ኲሎ ፡ አባግዐ ፡ ገዳም ፡ ወመጽኡ ፡ ኲሎሙ ፡ ኅብረ ፡ ወተራድኡ ፡ ከመ ፡ ይቀጥቅጥዎ ፡ ለዝኩ ፡ ቀርነ ፡ ዳቤላ ። ወርኢክዎ ፡ ለዝኩ ፡ ብእሲ ፡ ዘይጽሕፍ ፡ መጽሐፈ ፡ በቃለ ፡ እግዚእ ፡ እስከ ፡ ፈትሖ ፡ ለውእቱ ፡ መጽሐፈ ፡ ሐጒል ፡ ዘአሕጐሉ ፡ እልኩ ፡ ፲ወ፪ኖሎት ፡ ደኃርያን ፡ ወአርአየ ፡ ከመ ፡ ፈድፋደ ፡ እምቅድሜሆሙ ፡ አሕጐሉ ፡ ቅድመ ፡ እግዚአ ፡ አባግዕ ። ወርኢኩ ፡ እስከ ፡ መጽአ ፡ ኀቤሆሙ ፡ እግዚአ ፡ አባግዕ ፡ ወነሥአ ፡ በእዱ ፡ በትረ ፡ መዐት ፡ ወዘበጣ ፡ ለምድር ፡ ወተሰጠት ፡ ምድር ፡ ወኲሎሙ ፡ አራዊት ፡ ወአዕዋፈ ፡ ሰማይ ፡ ወድቁ ፡ እምእልኩ ፡ አባግዕ ፡ ወተሠጥሙ ፡ በምድር ፡ ወተከድነት ፡ ዲቤሆሙ ። ወርኢኩ ፡ እስከ ፡ ተውህበ ፡ ለአባግዕ ፡ ሰይፍ ፡ ዐቢይ ፡ ወወጽኡ ፡ አባግዕ ፡ ዲበ ፡ እሉ ፡ አራዊተ ፡ ገዳም ፡ ከመ ፡ ይቅትልዎሙ ፡ ወኲሎሙ ፡ አራዊት ፡ ወአዕዋፈ ፡ ሰማይ ፡ ነፍጹ ፡ እምቅድመ ፡ ገጾሙ ። ወርኢኩ ፡ እስከ ፡ መንበር ፡ ተሐንጸ ፡ በምድር ፡ ሐዋዝ ፡ ወነበረ ፡ ዲቤሁ ፡ እግዚአ ፡ አባግዕ ፡ ወነሥአ ፡ ኲሎ ፡ መጻሕፍተ ፡ ኅቱማተ ፡ ወፈትሖን ፡ ለእማንቱ ፡ መጻሕፍት ፡ በቅድመ ፡ እግዚአ ፡ አባግዕ ። ወጸውዖሙ ፡ እግዚእ ፡ ለእኩ ፡ ፯ጸዓድው ፡ ቀዳማውያን ፡ ወአዘዘ ፡ ከመ ፡ ያምጽኡ ፡ ቅድሜሁ ፡ እምኮከብ ፡ ቀዳማዊ ፡ ዘይቀድም ፡ እምነ ፡ እልኩ ፡ ከዋክብት ፡ እለ ፡ ኀፍረቶሙ ፡ ከመ ፡ ኀፍረተ ፡ አፍራስ ፡ ወለኮከብ ፡ ቀዳማዊ ፡ ዘወድቀ ፡ ቅድመ ፡ ወአምጽእዎሙ ፡ ለኲሎሙ ፡ ቅድሜሁ ። ወይቤሎ ፡ ለዝኩ ፡ ብእሲ ፡ ዘይጽሕፍ ፡ በቅድሜሁ ፡ ዘውእቱ ፡ ፩እምነ ፡ ፯ጸዓድው ፡ ወይቤሎ ፡ ንሥኦሙ ፡ ለእሉ ፡ ፸ኖሎት ፡ እለ ፡ መጠውክዎሙ ፡ አባግዐ ፡ ወነሢኦሙ ፡ ቀተሉ ፡ ብዙኀ ፡ እምዘ ፡ አዘዝክዎሙ ፡ እሙንቱ ። ወናሁ ፡ ኲሎሙ ፡ እሡራን ፡ ርኢኩ ፡ ወቆሙ ፡ ቅድሜሁ ፡ ኲሎሙ ። ወኲነኔ ፡ ኮነ ፡ ቅድመ ፡ እምከዋክብት ፡ ወተኰነኑ ፡ ወኮኑ ፡ ኀጥኣነ ፡ ወሖሩ ፡ መካነ ፡ ኲነኔ ፡ ወወደይዎሙ ፡ ውስተ ፡ ዕሙቅ ፡ ወምሉእ ፡ እሳተ ፡ ወይልህብ ፡ ወምሉእ ፡ ዐምደ ፡ እሳት ። ወእልኩ ፡ ፸ኖላውያን ፡ ተኰነኑ ፡ ወኮኑ ፡ ኃጥኣነ ፡ ወተወድዩ ፡ እሙንቱ ፡ ውስተ ፡ ዝኩ ፡ ማዕምቀ ፡ እሳት ። ወርኢኩ ፡ በውእቱ ፡ ጊዜ ፡ ከመ ፡ ተርኅው ፡ ፩ማዕምቅ ፡ ከማሁ ፡ በማእከለ ፡ ምድር ፡ ዘምሉዕ ፡ እሳተ ፡ ወአምጽእዎሙ ፡ ለእልኩ ፡ አባግዕ ፡ ጽሉላን ፡ ወተኰነኑ ፡ ኲሎሙ ፡ ወኮኑ ፡ ኃጥኣነ ፡ ወተወድዩ ፡ ውስተ ፡ ዝኩ ፡ ዕመቀ ፡ እሳት ፡ ወውዕዩ ፡ ወዝንቱ ፡ ማዕምቅ ፡ ኮነ ፡ በየማኑ ፡ ለዝኩ ፡ ቤት ። ወርኢክዎሙ ፡ ለእልኩ ፡ አባግዕ ፡ እንዘ ፡ ይውዕዩ ፡ ወአዕፅምቲሆሙ ፡ ይውዒ ። ወቆምኩ ፡ እርአይ ፡ እስከ ፡ ጠምዖ ፡ ለዝኩ ፡ ቤት ፡ ብሉይ ፡ ወአውጽእዎሙ ፡ ለኲሎሙ ፡ አዕማድ ፡ ወኲሉ ፡ ተክሉ ፡ ወስኑ ፡ ለውእቱ ፡ ቤት ፡ ተጠውመ ፡ ምስሌሁ ፡ ወአውጽእዎ ፡ ወወደይዎ ፡ በ፩መካን ፡ በየማነ ፡ ምድር ። ወርኢኩ ፡ እግዚአ ፡ አባግዕ ፡ እስከ ፡ አምጽአ ፡ ቤተ ፡ ሐዲሰ ፡ ወዐቢየ ፡ ወልዑለ ፡ እምነ ፡ ዝኩ ፡ ቀዳማይ ፡ ወአቀሞ ፡ ውስተ ፡ መካነ ፡ ቀዳሚት ፡ እንተ ፡ ተጠብለለት ፡ ወኲሎሙ ፡ አዕማደ ፡ ዚአሃ ፡ ሐዲሳን ፡ ወስና ፡ ሐዲስ ፡ ወዐቢይ ፡ እምቀዳሚት ፡ ብሊት ፡ እንተ ፡ አውጽአ ፡ ወኲሎሙ ፡ አባግዕ ፡ ማእከላ ። ወርኢክዎሙ ፡ ለኲሎሙ ፡ አባግዕ ፡ እለ ፡ ተርፉ ፡ ወኲሎሙ ፡ እንስሳ ፡ ዘዲበ ፡ ምድር ፡ ወኲሎሙ ፡ አዕዋፈ ፡ ሰማይ ፡ ይወድቁ ፡ ወይሰግዱ ፡ ለእልኩ ፡ አባግዕ ፡ ወያስተበቊዕዎሙ ፡ ወይሰምዕዎሙ ፡ በኲሉ ፡ ቃል ። ወእምኔሁ ፡ እልኩ ፡ ፫እለ ፡ ይለብሱ ፡ ጸዐዳ ፡ ወአኀዙኒ ፡ በእዴየ ፡ እለ ፡ ቀዲሙ ፡ አዕረጉኒ ፡ ወእዴሁ ፡ ለውእቱ ፡ ዳቤላ ፡ እንዘ ፡ ትእኅዘኒ ፡ አዕረጉኒ ፡ ወአንበሩኒ ፡ ማእከሎሙ ፡ ለእልኩ ፡ አባግዕ ፡ እንበለ ፡ ትኩን ፡ ኲነኔ ። ወእልኩ ፡ አባግዕ ፡ ኮኑ ፡ ኲሎሙ ፡ ጸዐዳ ፡ ወጸጒረ ፡ ዚአሆሙ ፡ ዐቢይ ፡ ወንጹሕ ። ወኲሎሙ ፡ እለ ፡ ተሐጒሉ ፡ ወተዘርዘሩ ፡ ወኲሉ ፡ አራዊተ ፡ ገዳም ፡ ወኲሉ ፡ አዕዋፈ ፡ ሰማይ ፡ ተጋብኡ ፡ በውእቱ ፡ ቤት ፡ ወእግዚኦሙ ፡ ለአባግዕ ፡ ተፈሥሐ ፡ ዐቢየ ፡ ፍሥሐ ፡ እስመ ፡ ኮኑ ፡ ኲሎሙ ፡ ኔራነ ፡ ወገብኡ ፡ ውስተ ፡ ቤቱ ። ወርኢኩ ፡ እስከ ፡ አስከብዎ ፡ ለውእቱ ፡ ሰይፍ ፡ ዘተውህበ ፡ ለአባግዕ ፡ ወአግብእዎ ፡ ውስተ ፡ ቤቱ ፡ ወኀተማ ፡ ቅድመ ፡ ገጹ ፡ ለእግዚእ ፡ ወኲሎሙ ፡ አባግዕ ፡ ተዐጽዉ ፡ በውእቱ ፡ ቤት ፡ ወኢያግመሮሙ ። ወአዕይንቲሆሙ ፡ ለኲሎሙ ፡ ተከሥታ ፡ ወይኔጽሩ ፡ ሠናየ ፡ ወ፩እምኔሆሙ ፡ ዘኢይሬኢ ፡ አልቦ ፡ በማእከሎሙ ። ወርኢኩ ፡ ከመ ፡ ኮነ ፡ ውእቱ ፡ ቤት ፡ ዐቢየ ፡ ወርኂበ ፡ ወምሉእ ፡ ፈድፋደ ። ወርኢኩ ፡ ከመ ፡ ተወልደ ፡ ፩ላህም ፡ ጸዐዳ ፡ ወአቅርንቲሁ ፡ ዐበይት ፡ ወኲሎሙ ፡ አራዊተ ፡ ገዳም ፡ ወኲሉ ፡ አዕዋፈ ፡ ሰማይ ፡ ይፈርህዎ ፡ ወያስተበቊዕዎ ፡ በኲሉ ፡ ጊዜ ። ወርኢኩ ፡ እስከ ፡ ተወለጠ ፡ ኲሉ ፡ አዝማዲሆሙ ፡ ወኮኑ ፡ ኲሎሙ ፡ አልህምተ ፡ ጸዓድወ ፡ ወቀዳማዊ ፡ በማእከሎሙ ፡ ኮነ ፡ ነገረ ፡ ወውእቱ ፡ ነገር ፡ ኮነ ፡ አርዌ ፡ ዐቢየ ፡ ወቦ ፡ ውስተ ፡ ርእሱ ፡ አቅርንት ፡ ዐቢያት ፡ ወጸሊማት ፡ ወእግዚአ ፡ አባግዕ ፡ ተፈሥሐ ፡ ዲቤሆሙ ፡ ወዲበ ፡ ኲሎሙ ፡ አልህምት ። ወአነ ፡ ሰከብኩ ፡ ማእከሎሙ ፡ ወነቃሕኩ ፡ ወርኢኩ ፡ ኲሎ ። ወዝንቱ ፡ ውእቱ ፡ ራእይ ፡ ዘርኢኩ ፡ እንዘ ፡ እሰክብ ፤ ወነቃሕኩ ፡ ወባረክዎ ፡ ለእግዚአ ፡ ጽድቅ ፡ ወሎቱ ፡ ወሀብኩ ፡ ስብሐተ ። ወእምኔሁ ፡ በከይኩ ፡ ዐቢየ ፡ ብካየ ፡ ወአንብዕየ ፡ ኢቆመ ፡ እስከ ፡ ኢክህልኩ ፡ ተዕግሦተ ፡ ሶበ ፡ እሬኢ ፡ ይወርዱ ፡ ዲበ ፡ ዝኩ ፡ ዘርኢኩ ፡ እስመ ፡ ኲሉ ፡ ይመጽእ ፡ ወይትፌጸም ፡ ወኲሉ ፡ በበ ፡ ክፍሉ ፡ ምግባረ ፡ ሰብእ ፡ ተርእየ ፡ ሊተ ። ወበይእቲ ፡ ሌሊት ፡ ተዘከርክዎ ፡ ለሕልምየ ፡ ቀዳማዊ ፡ ወበእንቲአሁ ፡ በከይኩ ፡ ወተሀወኩ ፡ እስመ ፡ ርኢኩ ፡ ውእተ ፡ ራእየ ።
=== chapter 91 ===
ወይእዜኒ ፡ ወልድየ ፡ ማቱሳላ ፡ ጸውዕ ፡ ሊተ ፡ ኲሎ ፡ አኀዊከ ፡ ወአስተጋብእ ፡ ሊተ ፡ ኲሎ ፡ ደቂቀ ፡ እምከ ፡ እስመ ፡ ቃል ፡ ይጼውዐኒ ፡ ወመንፈስ ፡ ተክዕወ ፡ በላዕሌየ ፡ ከመ ፡ አርኢክሙ ፡ ኲሎ ፡ ዘይበጽሐክሙ ፡ እስከ ፡ ለዓለም ። ወእምኔሁ ፡ ሖረ ፡ ማቱሳላ ፡ ወጸውዖሙ ፡ ለኲሎሙ ፡ አኀዊሁ ፡ ኀቤሁ ፡ ወአስተጋብኦሙ ፡ ለአዝማደ ፡ ዚአሁ ። ወተናገሮሙ ፡ ለኲሎሙ ፡ ውሉዱ ፡ ጽድቀ ፡ ወይቤ ፡ ስምዑ ፡ ደቂቅየ ፡ ኲሎ ፡ ነገረ ፡ አብክሙ ፡ ወአፅምኡ ፡ በርትዕ ፡ ቃለ ፡ አፉየ ፡ እስመ ፡ አሰምዕ ፡ ዲቤክሙ ፡ ወእነግረክሙ ፡ ፍቁራንየ ፡ አፍቅርዋ ፡ ለርትዕ ፡ ወባቲ ፡ ሑሩ ። ወኢትቅረቡ ፡ ኀበ ፡ ርትዕ ፡ በ፪ልብ ፡ ወኢትኅበሩ ፡ ምስለ ፡ እለ ፡ በ፪ልብ ፡ አላ ፡ ሑሩ ፡ በጽድቅ ፡ ደቂቅየ ፡ ወይእቲ ፡ ትመርሐክሙ ፡ በፍናዋት ፡ ኄራት ፡ ወጽድቅ ፡ ይከውን ፡ ለክሙ ፡ ሱታፌ ። እስመ ፡ አአምር ፡ ከመ ፡ ይጸንዕ ፡ ህላዌ ፡ ግፍዕ ፡ ዲበ ፡ ምድር ፡ ወይትፌጸም ፡ መቅሠፍት ፡ ዐቢይ ፡ ዲበ ፡ ምድር ፡ ወትትፌጸም ፡ ኲላ ፡ ዐመፃ ፡ ወትትገዘም ፡ እምሥረዊሃ ፡ ወኲሉ ፡ ሕንጻ ፡ የሐልፍ ። ወትደግም ፡ ካዕበ ፡ ዐመፃ ፡ ወትትፌጸም ፡ ዲበ ፡ ምድር ፡ ኲሉ ፡ ግብረ ፡ ዐመፃ ፡ ወግብረ ፡ ግፍዕ ፡ ወአበሳ ፡ ካዕበተ ። ወእመኒ ፡ ትልህቅ ፡ ዐመፃ ፡ ወኀጢአት ፡ ወጽርፈት ፡ ወግፍዕ ፡ ወኲሉ ፡ ግብር ፡ ወትልህቅ ፡ ዕልወት ፡ ወአበሳ ፡ ወርኲስ ፡ መቅሠፍት ፡ ዐቢይ ፡ ይከውን ፡ እምሰማይ ፡ ዲበ ፡ እሉ ፡ ኲሎሙ ፡ ወይወጽእ ፡ እግዚእ ፡ ቅዱስ ፡ በመዐት ፡ ወበመቅሠፍት ፡ ከመ ፡ ይግበር ፡ ኲነኔ ፡ ዲበ ፡ ምድር ። በእማንቱ ፡ መዋዕል ፡ ትትገዘም ፡ ግፍዕ ፡ እምነ ፡ ሥረዊሃ ፡ ወአሥራወ ፡ ዐመፃ ፡ ምስለ ፡ ጒሕሉት ፡ ወይትሐጐሉ ፡ እምታሕተ ፡ ሰማይ ። ወኲሉ ፡ ይትወሀብ ፡ ምስለ ፡ አሕዛብ ፡ ማኅፈድ ፡ በእሳት ፡ ትነድድ ፡ ወያወጽእዎሙ ፡ እምኲሉ ፡ ምድር ፡ ወይትገደፉ ፡ በኲነኔ ፡ እሳት ፡ ወይትኀጐሉ ፡ በመዐት ፡ ወበኲነኔ ፡ ኀያል ፡ እንተ ፡ ለዓለም ። ወይትነሣእ ፡ ጻድቅ ፡ እምንዋም ፡ ወይትነሣእ ፡ ጥበብ ፡ ወይትወሀብ ፡ ሎሙ ። ወእምኔሁ ፡ ይትገዘሙ ፡ አሥራወ ፡ ዐመፃ ፡ ወኃጥኣን ፡ ይትኀጐሉ ፡ በሰይፍ ፡ እምጽፉፋን ፡ ይትገዘሙ ፡ በኲሉ ፡ መካን ፡ ወእለ ፡ ይሔልይዋ ፡ ለግፍዕ ፡ ወእለ ፡ ይገብርዋ ፡ ለጽርፈት ፡ ይትኀጐሉ ፡ በመጥባሕት ። ወእምድኅረዝ ፡ ትከውን ፡ ካልእት ፡ ሰንበት ፡ ሳምኒት ፡ እንተ ፡ ጽድቅ ፡ ወይትወሀብ ፡ ላቲ ፡ ሰይፍ ፡ ከመ ፡ ይትገበር ፡ ኲነኔ ፡ ወጽድቅ ፡ እምእለ ፡ ይገፍዑ ፡ ወይትሜጠዉ ፡ ኃጥኣን ፡ በእደዊሆሙ ፡ ለጻድቃን ። ወበተፍጻሜታ ፡ ያጠርዩ ፡ አብያተ ፡ እምጽድቀ ፡ ዚአሆሙ ፡ ወይትሐነጽ ፡ ቤት ፡ ለንጉሥ ፡ ዐቢይ ፡ ለስብሐት ፡ እስከ ፡ ለዓለም ። ወእምድኅረዝ ፡ በሰንበት ፡ ታስዕ ፡ ባቲ ፡ ኲነኔ ፡ ጽድቅ ፡ ትትከሠት ፡ ለኲሉ ፡ ዓለም ፡ ወኲሉ ፡ ተግባረ ፡ ረሲዓን ፡ ይወጽእ ፡ እምዲበ ፡ ኲሉ ፡ ምድር ፡ ወይጸሐፍ ፡ ለሐጒል ፡ ዓለም ፡ ወኲሉ ፡ ሰብእ ፡ ይኔጽሩ ፡ ለፍኖተ ፡ ርትዕ ። ወእምድኅረ ፡ ዝንቱ ፡ በሰንበት ፡ ዓሥርት ፡ ፯እድ ፡ ባቲ ፡ ኲነኔ ፡ እንተ ፡ ለዓለም ፡ ወትትገበር ፡ እምትጉሃን ፡ ወሰማይ ፡ ዘለዓለም ፡ ዐቢይ ፡ ዘይበቊል ፡ እማእከሎሙ ፡ ለመላእክት ። ወሰማይ ፡ ቀዳማይ ፡ ይወጽእ ፡ ወየኀልፍ ፡ ወሰማይ ፡ ሐዲስ ፡ ይትረአይ ፡ ወኲሉ ፡ ኃይላተ ፡ ሰማያት ፡ ያበርሁ ፡ ለዓለም ፡ ፯ምክዕቢተ ። ወእምድኅረዝ ፡ ሰንበታት ፡ ብዙኃት ፡ እለ ፡ አልቦን ፡ ኊልቊ ፡ ለዓለም ፡ በኂሩት ፡ ወበጽድቅ ፡ ይከውኑ ፡ ወኀጢአት ፡ እምህየ ፡ ኢትትበሀል ፡ እስከ ፡ ለዓለም ። ወይእዜኒ ፡ እብለክሙ ፡ ደቂቅየ ፡ ወአርእየክሙ ፡ ፍናዋተ ፡ ጽድቅ ፡ ወፍናዋተ ፡ ግፍዕኒ ፡ ወአርእየክሙ ፡ ካዕበ ፡ ከመ ፡ ታእምሩ ፡ ዘይመጽእ ። ወይእዜኒ ፡ ስምዑ ፡ ደቂቅየ ፡ ወሑሩ ፡ በፍናዋተ ፡ ጽድቅ ፡ ወኢትሑሩ ፡ በፍናዋተ ፡ ግፍዕ ፡ እስመ ፡ ይትሐጐሉ ፡ ለዓለም ፡ ኲሎሙ ፡ እለ ፡ የሐውሩ ፡ በፍኖተ ፡ ዐመፃ ።
=== book 5 ===
[Book of the Epistle]
=== chapter 92 ===
ዘተጽሕፈ ፡ እምሄኖክ ፡ ጸሓፊ ፡ ዝኲሉ ፡ ትምህርተ ፡ ጥበብ ፡ እምኲሉ ፡ ሰብእ ፡ ስቡሕ ፡ ወመኰንነ ፡ ኲሉ ፡ ምድር ፡ ለኲሎሙ ፡ ውሉድየ ፡ እለ ፡ የኀድሩ ፡ ዲበ ፡ ምድር ፡ ወለትውልድ ፡ ደኀራውያን ፡ እለ ፡ ይገብሩ ፡ ርትዐ ፡ ወሰላመ ። እትኅዝን ፡ መንፈስክሙ ፡ በአዝማን ፡ እስመ ፡ መዋዕለ ፡ ወሀበ ፡ ቅዱስ ፡ ዐቢይ ፡ ለኲሉ ። ወይትነሣእ ፡ ጻድቅ ፡ እምንዋም ፡ ይትነሣእ ፡ ወየኀልፍ ፡ በፍኖተ ፡ ጽድቅ ፡ ወኲሉ ፡ ፍኖቱ ፡ ወምኋሪሁ ፡ ዘበኂሩት ፡ ወበሣህል ፡ ዘለዓለም ። ይሠሀሎ ፡ ለጻድቅ ፡ ወሎቱ ፡ ይሁብ ፡ ርትዐ ፡ ዘለዓለም ፡ ወይሁብ ፡ ሥልጣነ ፡ ወይከውን ፡ በኂሩት ፡ ወበጽድቅ ፡ ወየሐውር ፡ በብርሃን ፡ ዘለዓለም ። ወኀጢአት ፡ በጽልመት ፡ ትትሐጐል ፡ እስከ ፡ ለዓለም ፡ ወኢትትረአይ ፡ እንከ ፡ እምይእቲ ፡ ዕለት ፡ እስከ ፡ ለዓለም ።
=== chapter 93 ===
ወእምድኅረዝ ፡ ኮነ ፡ ሄኖክ ፡ ወአኀዘ ፡ ይትናገር ፡ እመ ፡ ጻሕፍት ። ወይቤ ፡ ሄኖክ ፡ በእንተ ፡ ውሉደ ፡ ጽድቅ ፡ ወበእንተ ፡ ኅሩያነ ፡ ዓለም ፡ ወበእንተ ፡ ተክለ ፡ ጽድቅ ፡ ወርትዕ ፡ እሎንተ ፡ እብለክሙ ፡ ወአየድዐክሙ ፡ ደቂቅየ ፡ አነ ፡ ውእቱ ፡ ሄኖክ ፡ በዘአስተርአየኒ ፡ እምራእየ ፡ ሰማይ ፡ ወእምቃለ ፡ ቅዱሳን ፡ መላእክት ፡ አእመርኩ ፡ ወእምጸፍጸፈ ፡ ሰማይ ፡ ለበውኩ ። ወአኀዘ ፡ እንከ ፡ ይትናገር ፡ ሄኖክ ፡ እመጻሕፍት ፡ ወይቤ ፡ አነ ፡ ሳብዕ ፡ ተወለድኩ ፡ በቀዳሚት ፡ ሰንበት ፡ እስከ ፡ አመ ፡ ኲነኔ ፡ ወጽድቅ ፡ ተዐገሠ ። ወትቀውም ፡ እምድኅሬየ ፡ በካልእት ፡ ሰንበት ፡ ዐ ፡ ባይ ፡ እኪት ፡ ወጒሕሉት ፡ በቈለት ፡ ወባቲ ፡ ትከውን ፡ ፍጻሜ ፡ ቀዳሚት ፡ ወባቲ ፡ ይድኅን ፡ ብእሲ ፡ ወእምድኅረ ፡ ተፈጸመ ፡ ትልህቅ ፡ ዐመጻ ፡ ወሥርዐተ ፡ ይገብር ፡ ለኃጥአን ። ወእምድኅረዝ ፡ በሣልስት ፡ ሰንበት ፡ በተፍጻሜታ ፡ ይትኀረይ ፡ ብእሲ ፡ ለተክለ ፡ ኲነኔ ፡ ጽድቅ ፡ ወእምድኅሬሁ ፡ ይመጽእ ፡ ተክለ ፡ ጽድቅ ፡ ለዓለም ። ወእምድኅረዝ ፡ በራብዕት ፡ ሰንበት ፡ በተፍጻሜታ ፡ ራእያተ ፡ ቅዱሳን ፡ ወጻድቃን ፡ ይትረአዩ ፡ ወሥርዐት ፡ ለትውልደ ፡ ትውልድ ፡ ወዐጸድ ፡ ይትገበር ፡ ሎሙ ። ወእምድኅረዝ ፡ በሰንበት ፡ ኃምስ ፡ በተፍጻሜታ ፡ ቤተ ፡ ስብሐት ፡ ወመንግሥት ፡ ይትሐነጽ ፡ እስከ ፡ ለዓለም ። ወእምድኅረዝ ፡ በሳድስት ፡ ሰንበት ፡ እለ ፡ ይከውኑ ፡ ውስቴታ ፡ ጽሉላን ፡ ኲሎሙ ፡ ወይትረሳዕ ፡ ልቦሙ ፡ ለኲሎሙ ፡ እምጥበብ ፡ ወባቲ ፡ የዐርግ ፡ ብእሲ ፡ ወበተፍጻሜታ ፡ ይውዒ ፡ ቤተ ፡ መንግሥት ፡ በእሳት ፡ ወባቲ ፡ ይዘረው ፡ ኲሉ ፡ ዘመደ ፡ ሥርው ፡ ኅሩይ ። ወእምድኅረዝ ፡ በሳብዕ ፡ ሰንበት ፡ ትትነሣእ ፡ ትውልድ ፡ ዕሉት ፡ ወብዙኅ ፡ ምግባራቲሃ ፡ ወኲሉ ፡ ምግባራቲሃ ፡ ዕልወት ። ወበተፍጻሜታ ፡ ይትዐሰዩ ፡ ኅሩያን ፡ ጻድቃን ፡ እምተክለ ፡ ጽድቅ ፡ ዘለዓለም ፡ እለ ፡ ይትወሀብ ፡ ሎሙ ፡ ፯ምክዕቢታተ ፡ ትምህርት ፡ ለኲሉ ፡ ፍጥረተ ፡ ዚአሁ ። እስመ ፡ መኑ ፡ ውእቱ ፡ ኲሉ ፡ ውሉደ ፡ ሰብእ ፡ ዘይክል ፡ ሰሚዐ ፡ ቃሎ ፡ ለቅዱስ ፡ ወኢይትሀወክ ፡ ወመኑ ፡ ዘይክል ፡ ከመ ፡ የሐሊ ፡ ሕሊናሁ ፡ ወመኑ ፡ ዘይክል ፡ ነጽሮታ ፡ ለኲሉ ፡ ምግባረ ፡ ሰማይ ። ወምንት ፡ ውእቱ ፡ ዘይክል ፡ አእምሮ ፡ ግብረ ፡ ሰማይ ፡ ወከመ ፡ ይርአይ ፡ ነፍሶ ፡ ወእመ ፡ አኮ ፡ መንፈሶ ፡ ወይክል ፡ ነጊረ ፡ ወእመ ፡ አኮ ፡ ዐሪገ ፡ ወይሬኢ ፡ ኲሎ ፡ አክናፊሆሙ ፡ ወይሔዮሙ ፡ ወእመ ፡ አኮ ፡ ይገብር ፡ ከማሆሙ ። ወመኑ ፡ ውእቱ ፡ ኲሉ ፡ ብእሲ ፡ ዘይክል ፡ አእምሮተ ፡ እፎ ፡ ውእቱ ፡ ራኅባ ፡ ወኑኃ ፡ ለምድር ፡ ወለመኑ ፡ ተርእየ ፡ አምጣነ ፡ ኲሎሙ ። ወእመ ፡ ቦቱ ፡ ኲሉ ፡ ብእሲ ፡ ዘይክል ፡ አእምሮተ ፡ ኑኃ ፡ ለሰማይ ፡ ወእፎ ፡ ውእቱ ፡ ልዕልናሃ ፡ ወዲበ ፡ ምንት ፡ ጸንዐት ፡ ወሚመጠን ፡ ውእቱ ፡ ኊልቆሙ ፡ ለከዋክብት ፡ ወበአይቴ ፡ የዐርፉ ፡ ኲሎሙ ፡ ብርሃናት ።
=== chapter 94 ===
ወይእዜኒ ፡ እብለክሙ ፡ ደቂቅየ ፡ አፍቅርዋ ፡ ለጽድቅ ፡ ወባቲ ፡ ሑሩ ፡ እስመ ፡ ፍናዋተ ፡ ጽድቅ ፡ ይደሉ ፡ ይትወከፍዎሙ ፡ ወፍናዋተ ፡ ዐመፃ ፡ ፍጡነ ፡ ይትሐጐሉ ፡ ወየሐፅፁ ። ወለሰብእ ፡ እሙራን ፡ እምትውልድ ፡ ይትከሠቱ ፡ ፍናዋተ ፡ ግፍዕ ፡ ወሞት ፡ ወይርኅቁ ፡ እምኔሆሙ ፡ ወኢይተልውዎሙ ። ወይእዜኒ ፡ ለክሙ ፡ እብል ፡ ለጻድቃን ፡ ኢትሑሩ ፡ በፍኖት ፡ እኩይ ፡ ወግፍዕ ፡ ወኢበፍናዋተ ፡ ሞት ፡ ወኢትቅረብ ፡ ኀቤሆሙ ፡ ከመ ፡ እትትሐጐሉ ። አላ ፡ ፍቅዱ ፡ ወኅረዩ ፡ ለክሙ ፡ ጽድቀ ፡ ወሕይወተ ፡ ኅሪተ ፡ ወሑሩ ፡ በፍናዋተ ፡ ሰላም ፡ ከመ ፡ ትሕየዉ ፡ ወትደለዉ ። ወትእኅዙ ፡ በሕሊና ፡ ልብክሙ ፡ ወኢይደምሰስ ፡ ነገርየ ፡ እምልብክሙ ፡ እስመ ፡ አአምር ፡ ከመ ፡ ያሜክርዎሙ ፡ ኃጥኣን ፡ ለሰብእ ፡ ከመ ፡ ይግበሩ ፡ ጥበበ ፡ እኩየ ፡ ወኲሉ ፡ መካን ፡ ኢይትረከብ ፡ ላቲ ፡ ወኲሉ ፡ መከራ ፡ ኢየሐፅፅ ። አሌ ፡ ሎሙ ፡ ለእለ ፡ የሐንጽዋ ፡ ለዐመፃ ፡ ወለግፍዕ ፡ ወይሳርርዋ ፡ ለጒሕሉት ፡ እስመ ፡ ፍጡነ ፡ ይትነሠቱ ፡ ወአልቦሙ ፡ ሰላም ። አሌ ፡ ሎሙ ፡ ለእለ ፡ የሐንጹ ፡ አብያቶሙ ፡ በኀጢአት ፡ እስመ ፡ እምኲሉ ፡ መሰረቶሙ ፡ ይትነሠቱ ፡ ወበሰይፍ ፡ ይወድቁ ፡ ወእለ ፡ ያጠርይዎ ፡ ለወርቅ ፡ ወለብሩር ፡ በኲነኔ ፡ ፍጡነ ፡ ይትሐጐሉ ። አሌ ፡ ለክሙ ፡ አብዕልት ፡ እስመ ፡ ዲበ ፡ ብዕልክሙ ፡ ተወከልክሙ ፡ ወእምነ ፡ ብዕልክሙ ፡ ትወጽኡ ፡ እስመ ፡ ለልዑል ፡ ኢተዘከርክምዎ ፡ በመዋዕለ ፡ ብዕልክሙ ። ገበርክምዋ ፡ ለጽርፈት ፡ ወለዐመፃ ፡ ወድልዋነ ፡ ኮንክሙ ፡ ለዕለተ ፡ ክዕወተ ፡ ደም ፡ ወለዕለተ ፡ ጽልመት ፡ ወለዕለተ ፡ ኲነኔ ፡ ዐባይ ። ከመዝ ፡ እብል ፡ አነ ፡ ወአየድዐክሙ ፡ ከመ ፡ ይገፈትዐክሙ ፡ ዘፈጠረክሙ ፡ ወዲበ ፡ ድቀትክሙ ፡ ኢይከውን ፡ ምሕረት ፡ ወፈጣሪክሙ ፡ ይትፌሣሕ ፡ በሐጒልክሙ ። ወጻድቃነ ፡ ዚአክሙ ፡ በእማንቱ ፡ መዋዕል ፡ ይከውኑ ፡ ጽእለተ ፡ ለኃጥኣን ፡ ወለረሲዓን ።
=== chapter 95 ===
መኑ ፡ ይሁበኒ ፡ አዕይንትየ ፡ ከመ ፡ ይኩና ፡ ደመና ፡ ማይ ፡ ወእብኪ ፡ ዲቤክሙ ፡ ወእክዐው ፡ አንብዕየ ፡ ከመ ፡ ደመና ፡ ማይ ፡ ወአዕርፍ ፡ እምኀዘነ ፡ ልብየ ። መኑ ፡ ወሀበክሙ ፡ ከመ ፡ ትግበሩ ፡ ጽልዐ ፡ ወእከየ ፡ ወይርከብክሙ ፡ ለኃጥኣን ፡ ኲነኔ ። ኢትፍርሁ ፡ ጻድቃን ፡ እምኃጥአን ፡ እስመ ፡ ካዕበ ፡ ያገብኦሙ ፡ እግዚአብሔር ፡ ውስተ ፡ እዴክሙ ፡ ከመ ፡ ትግበሩ ፡ ላዕሌሆሙ ፡ ኲነኔ ፡ በከመ ፡ ፈቀድክሙ ። አሌ ፡ ለክሙ ፡ እለ ፡ ታወግዙ ፡ ግዘታተ ፡ ከመ ፡ ኢትፍትሑ ፡ ወፈውስ ፡ ርኁቅ ፡ እምኔክሙ ፡ በእንተ ፡ ኀጢአተ ፡ ዚአክሙ ። አሌ ፡ ለክሙ ፡ እለ ፡ ትፈድዩ ፡ እኩየ ፡ ለቢጽክሙ ፡ እስመ ፡ ትትፈደዩ ፡ በከመ ፡ ምግባሪክሙ ። አሌ ፡ ለክሙ ፡ ለሰማዕታተ ፡ ሐሰት ፡ ወለእለ ፡ ይደልውዋ ፡ ለዐመፃ ፡ እስመ ፡ ፍጡነ ፡ ትትሐጐሉ ። አሌ ፡ ለክሙ ፡ ለኃጥኣን ፡ እስመ ፡ ለጻድቃን ፡ ትሰድድዎሙ ፡ እስመ ፡ አንትሙ ፡ ትትሜጠዉ ፡ ወትሰደዱ ፡ እለ ፡ ዐመፃ ፡ ወይጸንዕ ፡ በላዕሌክሙ ፡ አርኡተ ፡ ዚአሆሙ ።
=== chapter 96 ===
ተሰፈዉ ፡ ጻድቃን ፡ እስመ ፡ ፍጡነ ፡ ይትሐጐሉ ፡ ኃጥኣን ፡ እም ፡ ቅድሜክሙ ፡ ወሥልጣን ፡ ይከውን ፡ ለክሙ ፡ ዲቤሆሙ ፡ በከመ ፡ ፈቀድክሙ ። ወበዕለተ ፡ ምንዳቤሆሙ ፡ ለኃጥኣን ፡ ይትሌዐሉ ፡ ወይትነሥኡ ፡ ከመ ፡ አንስርት ፡ እጒለ ፡ ዚአክሙ ፡ ወፈድፋደ ፡ እምነ ፡ አውስት ፡ ይከውን ፡ ምጽላሊክሙ ፡ ወተዐርጉ ፡ ወትበውኡ ፡ በንድለታተ ፡ ምድር ፡ ወበንቅዐታተ ፡ ኰኲሕ ፡ ለዓለም ፡ ከመ ፡ ግሔ ፡ እምቅድመ ፡ ዐማፅያን ፡ ወይንዕኩ ፡ ዲቤክሙ ፡ ወይበክዩ ፡ ከመ ፡ ጼዴናታት ። ወአንትሙሰ ፡ ኢትፍርሁ ፡ እለ ፡ ሐመምክሙ ፡ እስመ ፡ ፈውስ ፡ ይከውነክሙ ፡ ወብርሃን ፡ ብሩህ ፡ ያበርህ ፡ ለክሙ ፡ ወቃለ ፡ ዕረፍት ፡ ትሰምዑ ፡ እምሰማይ ። አሌ ፡ ለክሙ ፡ ኃጥኣን ፡ እስመ ፡ ብዕክሙ ፡ ያመስለክሙ ፡ ጻድቃነ ፡ ወልብክሙ ፡ ይዘልፈክሙ ፡ ከመ ፡ ኃጥኣን ፡ አንትሙ ፡ ወዝንቱ ፡ ነገር ፡ ይከውን ፡ ዲቤክሙ ፡ ሰማዕተ ፡ ለተዝካረ ፡ እከያት ። አሌ ፡ ለክሙ ፡ እለ ፡ ትበልዑ ፡ ሥብሐ ፡ ስርናይ ፡ ወትሰትዩ ፡ ኀይለ ፡ ሥርወ ፡ ነቅዕ ፡ ወትከይድዎሙ ፡ ለትሑታን ፡ በኀይልክሙ ። አሌ ፡ ለክሙ ፡ እለ ፡ ትሰትዩ ፡ ማየ ፡ በኲሉ ፡ ጊዜ ፡ እስመ ፡ ፍጡነ ፡ ትትፈደዩ ፡ ወትትዌድኡ ፡ ወትየብሱ ፡ እስመ ፡ ኀደግሙ ፡ ነቅዐ ፡ ሕይወት ። አሌ ፡ ለክሙ ፡ እለ ፡ ትገብሩ ፡ ዐመፃ ፡ ወጒሕሉተ ፡ ወጽርፈተ ፡ ተዝካረ ፡ ይከውን ፡ ዲቤክሙ ፡ ለእከይ ። አሌ ፡ ለክሙ ፡ ኀያላን ፡ እለ ፡ በኀይል ፡ ትኰርዕዎ ፡ ለጻድቅ ፡ እስመ ፡ ትመጽእ ፡ ዕለተ ፡ ኀጒልክሙ ፤ በእማንቱ ፡ መዋዕል ፡ ይመጽኣ ፡ ለጻድቃን ፡ መዋዕል ፡ ብዙኃት ፡ ወኄራት ፡ በዕለተ ፡ ኲነኔ ፡ ዚአክሙ ።
=== chapter 97 ===
ተአመኑ ፡ ጻድቃን ፡ እስመ ፡ ለጽእለት ፡ ይከውኑ ፡ ኃጥኣን ፡ ወይትኀጐሉ ፡ በዕለተ ፡ ዐመፃ ። እሙረ ፡ ይከውን ፡ ለክሙ ፡ እስመ ፡ ልዑል ፡ ይዜከር ፡ ሐጒለክሙ ፡ ወይትፌሥሑ ፡ መላእክት ፡ ዲበ ፡ ሐጒለ ፡ ዚአክሙ ። ምንተ ፡ ትግበሩ ፡ ሀለወክሙ ፡ ኀጥኣን ፡ ወአይቴ ፡ ትጐይዩ ፡ በይእቲ ፡ ዕለት ፡ እንተ ፡ ኲነኔ ፡ ሶበ ፡ ትሰምዑ ፡ ቃለ ፡ ጸሎቶሙ ፡ ለጻድቃን ። ወአንትሙ ፡ ኢትከውኑ ፡ ከማሆሙ ፡ እለ ፡ ሰማዕተ ፡ ይከውን ፡ ዲቤክሙ ፡ ዝንቱ ፡ ነገር ፡ ሱቱፋነ ፡ ኮንክሙ ፡ ለኃጥኣን ። ወበእማንቱ ፡ መዋዕል ፡ ትበጽሕ ፡ ጸሎቶሙ ፡ ለጻድቃን ፡ ኀበ ፡ እግዚእ ፡ ወለክሙ ፡ ይበጽሕ ፡ መዋዕለ ፡ ኲነኔክሙ ። ወይትነበብ ፡ ኲሉ ፡ ነገረ ፡ ዐመፃክሙ ፡ ቅድመ ፡ ዐቢይ ፡ ወቅዱስ ፡ ወይትኀፈር ፡ ገጽክሙ ፡ ወይትገደፍ ፡ ኲሉ ፡ ተግባር ፡ ዘጸንዐ ፡ በዐመፃ ። አሌ ፡ ለክሙ ፡ ኃጥኣን ፡ እለ ፡ ማእከለ ፡ ባሕር ፡ ወዲበ ፡ የብስ ፡ እለ ፡ ዝክሮሙ ፡ እኩይ ፡ ዲቤክሙ ። አሌ ፡ ለክሙ ፡ እለ ፡ ታጠርዩ ፡ ብሩረ ፡ ወወርቀ ፡ ዘኢኮነ ፡ በጽድቅ ፡ ወትብሉ ፡ ብዕልነ ፡ ብዕለ ፡ ወኮነ ፡ ለነ ፡ ንዋይ ፡ ወአጥረይነ ፡ ኲሎ ፡ ዘፈቀድነ ። ወይእዜኒ ፡ ንግበር ፡ ዘሐለይነ ፡ እስመ ፡ ብሩረ ፡ አስተጋባእነ ፡ ወመላእነ ፡ መዛግብቲነ ፡ ወከመ ፡ ማይ ፡ ብዙኅ ፡ ሐረስተ ፡ አብያቲነ ። ወከመ ፡ ማይ ፡ ይውኅዝ ፡ ሐሰትክሙ ፡ እስመ ፡ ኢይነብር ፡ ለክሙ ፡ ብዕል ፡ አላ ፡ ፍጡነ ፡ የዐርግ ፡ እምኔክሙ ፡ እስመ ፡ ኲሎ ፡ በዐመፃ ፡ አጥረይክሙ ፡ ወአንትሙ ፡ ለመርገም ፡ ዐቢይ ፡ ትትወሀብ ።
=== chapter 98 ===
ወይእዜኒ ፡ አነ ፡ እምሕል ፡ ለክሙ ፡ ለጠቢባን ፡ ወለአብዳን ፡ እስመ ፡ ብዙኀ ፡ ትሬእዩ ፡ ዲበ ፡ ምድር ። እስመ ፡ ሥነ ፡ ትወድዩ ፡ ላዕሌክሙ ፡ አንትሙ ፡ ዕደው ፡ ፈድፋደ ፡ እምአንስት ፡ ወኅብረ ፡ ፈድፋደ ፡ እምድንግል ፡ በመንግሥት ፡ ወበዕበይ ፡ ወበሥልጣን ፡ ወበብሩር ፡ ወወርቅ ፡ ወሜላት ፡ ወክብር ፡ ወመባልዕት ፡ ከመ ፡ ማይ ፡ ይትከዐዉ ። በእንተዝ ፡ ትምህርት ፡ ወጥበብ ፡ አልቦሙ ፡ ወቦቱ ፡ ይትሐጐሉ ፡ ኅቡረ ፡ ምስለ ፡ ንዋያቲሆሙ ፡ ወምስለ ፡ ኲሉ ፡ ስብሐቶሙ ፡ ወክብሮሙ ፡ ወበጽእለት ፡ ወበቀትል ፡ ወበንዴት ፡ ዐቢይ ፡ ትትወደይ ፡ መንፈሶሙ ፡ ውስተ ፡ እቶነ ፡ እሳት ። መሐልኩ ፡ ለክሙ ፡ ኃጥኣን ፡ ከመ ፡ ኢኮነ ፡ ደብር ፡ ገብረ ፡ ወኢይከውን ፡ ወኢወግር ፡ ለብእሲት ፡ አመተ ፡ ከመዝ ፡ ኀጢአትኒ ፡ ኢተፈነወት ፡ ዲበ ፡ ምድር ፡ አላ ፡ ሰብእ ፡ እምርእሶሙ ፡ ፈጠርዋ ፡ ወለመርገም ፡ ዐቢይ ፡ ይከውኑ ፡ እለ ፡ ገብርዋ ። ወምክነት ፡ ለብእሲት ፡ ኢተውህበት ፡ አላ ፡ በእንተ ፡ ግብረ ፡ እደዊሃ ፡ ትመውት ፡ ዘእንበለ ፡ ውሉድ ። መሐልኩ ፡ ለክሙ ፡ ኃጥኣን ፡ በቅዱስ ፡ ወዐቢይ ፡ እስመ ፡ ኲሉ ፡ ግብርክሙ ፡ እኩይ ፡ ክሡት ፡ ውእቱ ፡ በሰማያት ፡ ወአልብክሙ ፡ ግብረ ፡ ግፍዕ ፡ ክዱን ፡ ወኢኅቡእ ። ወኢታምስሉ ፡ በመንፈስክሙ ፡ ወኢትበሉ ፡ በልብክሙ ፡ እስመ ፡ ኢታአምሩ ፡ ወኢትሬእዩ ፡ ኲሎ ፡ ኀጢአተ ፡ በሰማይ ፡ ይጸሐፍ ፡ ሀሎ ፡ በኲሉ ፡ ዕለት ፡ በቅድሜሁ ፡ ለልዑል ። እምይእዜ ፡ ተአምሩ ፡ እስመ ፡ ኲሉ ፡ ግፍዕክሙ ፡ ዘትገፍዑ ፡ ይጸሐፍ ፡ በኲሉ ፡ ዕለት ፡ እስከ ፡ ዕለተ ፡ ኲነኔክሙ ። አሌ ፡ ለክሙ ፡ አብዳን ፡ እስመ ፡ ትትሐጐሉ ፡ በእበድክሙ ፡ ወለጠቢባን ፡ እትሰምዕዎሙ ፡ ወሠናይ ፡ ኢይረክበክሙ ። ወይእ ፡ ዜኒ ፡ አእምሩ ፡ ከመ ፡ ድልዋን ፡ አንትሙ ፡ ለዕለተ ፡ ሐጒል ፡ ወኢትሰፈዉ ፡ ከመ ፡ ተሐይዉ ፡ ኃጥኣን ፡ አላ ፡ ተሐውሩ ፡ ወትመውቱ ፡ እስመ ፡ ኢተአምሩ ፡ ቤዛ ፡ እስመ ፡ ተደለውክሙ ፡ ለዕለተ ፡ ኲነኔ ፡ ዐባይ ፡ ወለዕለተ ፡ ምንዳቤ ፡ ወኀሳር ፡ ዐቢይ ፡ ለመንፈስክሙ ። አሌ ፡ ለክሙ ፡ ግዙፋነ ፡ ልብ ፡ እለ ፡ ትገብሩ ፡ እኩየ ፡ ወትበልዑ ፡ ደመ ፡ እምአይቴ ፡ አንትሙ ፡ ትበልዑ ፡ በሠናይ ፡ ወትሰትዩ ፡ ወትጸግብ ፡ እስመ ፡ እምኲሉ ፡ ሠናይ ፡ ዘአፈድፈደ ፡ እግዚእነ ፡ ልዑል ፡ ዲበ ፡ ምድር ፡ ወአልብክሙ ፡ ሰላም ። አሌ ፡ ለክሙ ፡ እለ ፡ ታፈቅርዋ ፡ ለግብረ ፡ ዐመፃ ፡ ለምንት ፡ ለክሙ ፡ ትሴፈውዋ ፡ ለሠናይት ፡ አእምፉ ፡ ከመ ፡ ሀለወክሙ ፡ ትትወሀቡ ፡ በእዴሆሙ ፡ ለጻድቃን ፡ ወይመትሩ ፡ ክሣውዲክሙ ፡ ወይቀትሉክሙ ፡ ወኢይምሕሩክሙ ። አሌ ፡ ለክሙ ፡ እለ ፡ ትትፌሥሑ ፡ በምንዳቤሆሙ ፡ ለጻድቃን ፡ እስመ ፡ መቃብር ፡ ኢይትከረይ ፡ ለክሙ ። አሌ ፡ ለክሙ ፡ እለ ፡ ታበጥሉ ፡ ነገረ ፡ ጻድቃን ፡ እስመ ፡ ኢይከውን ፡ ለክሙ ፡ ተስፋ ፡ ሕይወት ። አሌ ፡ ለክሙ ፡ እለ ፡ ትጽሕፉ ፡ ነገረ ፡ ሐሰት ፡ ወነገረ ፡ ረሲዓን ፡ እስመ ፡ ውእቶሙ ፡ ይጽሕፉ ፡ ሐሰቶሙ ፡ ከመ ፡ ይስምዕዋ ፡ ወኢይርስእዋ ፡ ለእበድ ፡ ወኢይከውን ፡ ሎሙ ፡ ሰላም ፡ አላ ፡ ሞተ ፡ ይመውቱ ፡ ፍጡነ ።
=== chapter 99 ===
አሌ ፡ ሎሙ ፡ ለእለ ፡ ይገብሩ ፡ ርስዕናተ ፡ ወለነገረ ፡ ሐሰት ፡ ይሴብሑ ፡ ወያከብሩ ፡ ተሐጐልክሙ ፡ ወአልብክሙ ፡ ሕይወት ፡ ሠናይት ። አሌ ፡ ለክሙ ፡ እለ ፡ ትዌልጥዎን ፡ ለነገራተ ፡ ርትዕ ፡ ወሥርዐተ ፡ እንተ ፡ ለዓለም ፡ የዐልዉ ፡ ወይሬስዩ ፡ ርእሶሙ ፡ ዘኢኮኑ ፡ ኃጥኣነ ፡ ዲበ ፡ ምድር ፡ ሀለዉ ፡ ይትከየዱ ። በእማንቱ ፡ መዋዕል ፡ ተደለዉ ፡ ጻድቃን ፡ ከመ ፡ ትንሥኡ ፡ ጸሎታቲክሙ ፡ በተዝካር ፡ ወአንበርክምዎሙ ፡ ሰማዕተ ፡ በቅድመ ፡ መላእክት ፡ ከመ ፡ ያንብርዎ ፡ ለኀጢአተ ፡ ኃጥኣን ፡ በቅድመ ፡ ልዑል ፡ ለተዝካር ። በእማንቱ ፡ መዋዕል ፡ ይትሀወኩ ፡ አሕዛብ ፡ ወይትነሥኡ ፡ አዝማደ ፡ አሕዛብ ፡ በዕለት ፡ እንተ ፡ ሐጒል ። ወበእማንቱ ፡ መዋዕል ፡ እለ ፡ ይጼነሱ ፡ ይወጽኡ ፡ ወይመስጡ ፡ ደቂቆሙ ፡ ወይገድፍዎሙ ፡ ለደቂቆሙ ፡ ወእምኔሆሙ ፡ ይድኅፅ ፡ ውሉዶሙ ፡ ወእንዘ ፡ ይጠብዉ ፡ ይገድፍዎሙ ፡ ወኢይገብኡ ፡ ኀቤሆሙ ፡ ወኢይምሕርዎሙ ፡ ለፍቁራኒሆሙ ። ካዕበ ፡ አነ ፡ እምሕል ፡ ለክሙ ፡ ለኃጥኣን ፡ እስመ ፡ ለዕለተ ፡ ደም ፡ ዘኢየኀድዕ ፡ ተደለወት ፡ ኀጢአት ። ወይሰግዱ ፡ ለእብን ፡ ወእለ ፡ ይገልፉ ፡ ምስለ ፡ ዘወርቅ ፡ ወዘብሩር ፡ ወዘዕፅ ፡ ወዘልሕኲት ፡ ወእለ ፡ ይሰግዱ ፡ ለነፍሳት ፡ ርኩሳት ፡ ወአጋንንት ፡ ወለኲሉ ፡ ጣዖት ፡ ወበምሕራማት ፡ ወኲሉ ፡ ረድኤት ፡ እይትረከብ ፡ እምኔሆሙ ። ወይትረስዑ ፡ በእንተ ፡ እበደ ፡ ልቦሙ ፡ ወይጼለላ ፡ አዕይንቲሆሙ ፡ በፍርሀተ ፡ ልቦሙ ፡ ወበርእየ ፡ አሕላሞሙ ። ቦሙ ፡ ይረስዑ ፡ ወይፈርሁ ፡ እስመ ፡ ኲሎ ፡ ግብሮሙ ፡ በሐሰት ፡ ገብሩ ፡ ወሰገዱ ፡ ለእብን ፡ ወይትሐጐሉ ፡ በምዕር ። ወበእማንቱ ፡ መዋዕል ፡ ብፁዓን ፡ ኲሎሙ ፡ እለ ፡ ይትሜጠዉ ፡ ነገረ ፡ ጥበብ ፡ ወየአምርዎ ፡ ወይገብርዎን ፡ ለፍናዋተ ፡ ልዑል ፡ ወየሐውሩ ፡ በፍኖተ ፡ ጽድቅ ፡ ወኢይረስዑ ፡ ምስለ ፡ እለ ፡ ይረስዑ ፡ እስመ ፡ እሙንቱ ፡ ይድኅኑ ። አሌ ፡ ለክሙ ፡ እለ ፡ ትሰፍኋ ፡ ለእኪት ፡ ለቢጽክሙ ፡ እስመ ፡ በሲኦል ፡ ትትቀተሉ ። አሌ ፡ ለክሙ ፡ እለ ፡ ትገብርዋ ፡ ለመሠረተ ፡ ኀጢአት ፡ ወጒሕሉት ፡ ወእለ ፡ ያመርሩ ፡ ዲበ ፡ ምድር ፡ እስመ ፡ ቦቱ ፡ ይትዌድኡ ። አሌ ፡ ለክሙ ፡ እለ ፡ ትነድቁ ፡ አብያቲክሙ ፡ በጻማ ፡ ባዕድ ፡ ወኲሉ ፡ መንድቆሙ ፡ ግንፋል ፡ ወእብነ ፡ ኀጢአት ፡ እብለክሙ ፡ ከመ ፡ አልብክሙ ፡ ሰላም ። አሌ ፡ ሎሙ ፡ ለእለ ፡ ይሜንኑ ፡ መሥፈርተ ፡ ወርስተ ፡ አበዊሆሙ ፡ እንተ ፡ ለዓለም ፡ ወያተልዉ ፡ ነፍሶሙ ፡ ድኅረ ፡ ጣዖት ፡ እስመ ፡ እይከውን ፡ ሎሙ ፡ ዕረፍት ። አሌ ፡ ሎሙ ፡ ለእለ ፡ ይገብርዋ ፡ ለዐመፃ ፡ ወይረድእዋ ፡ ለግፍዕ ፡ ወይቀትሉ ፡ ቢጾሙ ፡ እስከ ፡ ዕለተ ፡ ኲነኔ ፡ ዐባይ ። እስመ ፡ ያወድቅ ፡ ስብሐቲክሙ ፡ ወይወዲ ፡ እከየ ፡ ውስተ ፡ ልብክሙ ፡ ወያነሥእ ፡ መንፈሰ ፡ መዐቱ ፡ ከመ ፡ ያሕጒልክሙ ፡ ለኲልክሙ ፡ በሰይፍ ፤ ወኲሎሙ ፡ ጻድቃን ፡ ወቅዱሳን ፡ ይዜከሩ ፡ ኀጢአተ ፡ ዚአክሙ ።
=== chapter 100 ===
ወበእማንቱ ፡ መዋዕል ፡ በ፩መካን ፡ አበው ፡ ምስለ ፡ ውሉዶሙ ፡ ይትጓድዑ ፡ ወአኀው ፡ ምስለ ፡ ቢጾሙ ፡ ይወድቁ ፡ በሞት ፡ እስከ ፡ ይውኅዝ ፡ ከመ ፡ ተከዚ ፡ እምደመ ፡ ዚአሆሙ ። እስመ ፡ ብእሲ ፡ ኢይከልእ ፡ እዴሁ ፡ እምውሉዱ ፡ ወእምውሉደ ፡ ውሉዱ ፡ ምሒረ ፡ ከመ ፡ ይቅትሎ ፡ ወኃጥእ ፡ ኢይከልእ ፡ እዴሁ ፡ እምነ ፡ እኁሁ ፡ ክብር ፡ እምጎሕ ፡ እስከ ፡ ተዐርብ ፡ ፀሐይ ፡ ወይትቃተሉ ። ወየሐውር ፡ ፈረስ ፡ እስከ ፡ እንግድዓሁ ፡ ውስተ ፡ ደመ ፡ ኃጥኣን ፡ ወሰረገላ ፡ እስከ ፡ መልዕልታ ፡ ትሠጠም ። ወበእማንቱ ፡ መዋዕል ፡ መላእክት ፡ ይወርዱ ፡ ውስተ ፡ ምኅባኣት ፡ ወያገብእዎሙ ፡ በ፩መካን ፡ ለኲሎሙ ፡ እለ ፡ ይረድእዋ ፡ ለኀጢአት ፡ ወይትነሣእ ፡ ልዑል ፡ በይእቲ ፡ ዕለት ፡ ከመ ፡ ይግበር ፡ ኲነኔ ፡ ዐቢየ ፡ እምኲሎሙ ፡ ኃጥኣን ። ወዐቀብተ ፡ ይሁብ ፡ ዲበ ፡ ኲሎሙ ፡ ጻድቃን ፡ ወቅዱሳን ፡ እመላእክት ፡ ቅዱሳን ፡ የዐቅብዎሙ ፡ ከመ ፡ ብንተ ፡ ዐይን ፡ እስከ ፡ ይትዌዳዕ ፡ ኲሉ ፡ እከይ ፡ ወኲሉ ፡ ኀጢአት ፡ ወእመኒ ፡ ይነውሙ ፡ ጻድቃን ፡ ንዋመ ፡ ነዋኀ ፡ ወአልቦሙ ፡ ዘይፈርሁ ። ወእሙነ ፡ ይሬእዩ ፡ ሰብእ ፡ ጠቢባን ፡ ወይሌብዉ ፡ ውሉደ ፡ ምድር ፡ ኲሎ ፡ ነገረ ፡ ዛቲ ፡ መጽሐፍ ፡ ወየአምሩ ፡ ከመ ፡ ኢይክል ፡ ብዕሎሙ ፡ አድኅኖቶሙ ፡ በሙዳቀ ፡ ኀጢአቶሙ ። አሌ ፡ ለክሙ ፡ ኃጥኣን ፡ ሶበ ፡ ታመነድብዎሙ ፡ ለጻድቃን ፡ በዕለተ ፡ ጻሕብ ፡ ኀያል ፡ ወታነድድዎሙ ፡ በእሳት ፡ ወትትፈደዩ ፡ በከመ ፡ ምግባሪክሙ ። አሌ ፡ ለክሙ ፡ ግፍቱዓነ ፡ ልብ ፡ እለ ፡ ትተግሁ ፡ ከመ ፡ ትለብውዎ ፡ ለእኩይ ፡ ወሀለወ ፡ ይርከብክሙ ፡ ፍርሀት ፡ ወአልቦ ፡ ዘይረድአክሙ ። አሌ ፡ ለክሙ ፡ ኃጥኣን ፡ እስመ ፡ ዲበ ፡ ቃለ ፡ አፉክሙ ፡ ወዲበ ፡ ተግባረ ፡ እደዊክሙ ፡ እለ ፡ ግብረ ፡ ረሳዕክሙ ፡ በዋዕየ ፡ ላህበ ፡ እሳት ፡ ትውዕዩ ። ወይእዜኒ ፡ አእምሩ ፡ ከመ ፡ መላእክት ፡ ይትኀሠሡ ፡ ምግባሪክሙ ፡ በሰማይ ፡ እምፀሐይ ፡ ወእምወርኅ ፡ ወእምከዋክብት ፡ በእንተ ፡ ኀጢአተ ፡ ዚአክሙ ፡ እስመ ፡ በዲበ ፡ ምድር ፡ ትገብሩ ፡ ኀበ ፡ ጻድቃን ፡ ኲነኔ ። ወያሰምዕ ፡ ላዕሌክሙ ፡ ኲሎ ፡ ደመና ፡ ወጊሜ ፡ ወጠለ ፡ ወዝናመ ፡ እስመ ፡ ሀለዉ ፡ ኲሎሙ ፡ ይትከልኡ ፡ እምኔክሙ ፡ ከመ ፡ ኢይረዱ ፡ ዲቤክሙ ፡ ወኢይሔልዩ ፡ ኀበ ፡ ኀጢአትክሙ ። ወይእዜኒ ፡ ሀቡ ፡ አምኃ ፡ ለዝናም ፡ ከመ ፡ ኢትትከላእ ፡ ወሪደ ፡ ዲቤክሙ ፡ ወጠል ፡ እመ ፡ ተመጠወ ፡ እምኔክሙ ፡ ወርቀ ፡ ወብሩረ ። ሶበ ፡ ይወድቅ ፡ ዲቤክሙ ፡ አስሐትያ ፡ ወሐመዳ ፡ ወቊረ ፡ ዚአሆሙ ፡ ወኲሉ ፡ ነፋሳተ ፡ ሐመዳ ፡ ወኲሉ ፡ ፃዕራተ ፡ ዚአሆሙ ፡ በእማንቱ ፡ መዋዕል ፡ ኢትክሉ ፡ ቀዊመ ፡ ቅድሜሆሙ ።
=== chapter 101 ===
ጠይቅዋ ፡ ለሰማይ ፡ ኲልክሙ ፡ ውሉደ ፡ ሰማይ ፡ ወኲሎ ፡ ግብረ ፡ ልዑል ፡ ወፍርሁ ፡ እምኔሁ ፡ ወኢትግበሩ ፡ እኩየ ፡ በቅድሜሁ ። እመ ፡ ዐፀወ ፡ መስኮተ ፡ ሰማይ ፡ ወከልአ ፡ ዝናመ ፡ ወጠለ ፡ ከመ ፡ እይረድ ፡ ዲበ ፡ ምድር ፡ በእንቲአክሙ ፡ ሚሀለወክሙ ፡ ትግበሩ ። ወእመ ፡ ፈነወ ፡ መዐቶ ፡ ዲቤክሙ ፡ ወዲበ ፡ ኲሉ ፡ ምግባሪክሙ ፡ አኮ ፡ አንትሙ ፡ እለ ፡ ታስተበቊዕዎ ፡ እስመ ፡ ትትናገሩ ፡ ዲበ ፡ ጽድቀ ፡ ዚአሁ ፡ ዐቢያተ ፡ ወጽኑዓተ ፡ ወአልብክሙ ፡ ሰላም ። ወኢትሬእይዎሙኑ ፡ ለነገሥተ ፡ አሕማር ፡ እፎ ፡ ይትሀወኩ ፡ እሞገድ ፡ ወያንቀለቅሉ ፡ እምነፋሳት ፡ አሕማሮሙ ፡ ወይትመነደብ ። ወበእንተ ፡ ዝንቱ ፡ ይፈርሁ ፡ እስመ ፡ ኲሉ ፡ ንዋዮሙ ፡ ሠናይ ፡ ይወጽእ ፡ ውስተ ፡ ባሕር ፡ ምስሌሆሙ ፡ ወሠናየ ፡ ኢይሄልዩ ፡ በልቦሙ ፡ እስመ ፡ ባሕር ፡ ይውሕጦሙ ፡ ወይትሐጐሉ ፡ ውስቴታ ። አኮኑ ፡ ኲሉ ፡ ባሕር ፡ ወኲሉ ፡ ማያቲሃ ፡ ወኲሉ ፡ ሑሰታ ፡ ግብረ ፡ ልዑል ፡ ውእቱ ፡ ወውእቱ ፡ ኲሎ ፡ ግብረታ ፡ ሐተመ ፡ ወአሠረ ፡ ኲለንታሃ ፡ በኆፃ ። ወበተግሣጹ ፡ ትየብስ ፡ ወትፈርህ ፡ ወኲሉ ፡ ዓሣቲሃ ፡ ይመውቱ ፡ ወኲሉ ፡ ዘሀሎ ፡ ውስቴታ ፡ ወአንትሙ ፡ ኃጥኣን ፡ እለ ፡ ውስተ ፡ ምድር ፡ ኢትፈርህዎ ። አኮኑ ፡ ውእቱ ፡ ገብረ ፡ ሰማየ ፡ ወምድረ ፡ ወኲሎ ፡ ዘሀሎ ፡ ውስቴቶሙ ፡ ወመኑ ፡ ወሀበ ፡ ትምህርተ ፡ ወጥበበ ፡ ለኲሎሙ ፡ እለ ፡ ይትሐወሱ ፡ ዲበ ፡ ምድር ፡ ወለእለ ፡ ውስተ ፡ ባሕር ። አኮኑ ፡ ውእቶሙ ፡ ነገሥተ ፡ አሕማር ፡ ይፈርህዎ ፡ ለባሕር ፡ ወኃጥኣንሰ ፡ ለልዑል ፡ ኢይፈርህዎ ።
=== chapter 102 ===
በእማንቱ ፡ መዋዕል ፡ ለእመ ፡ ወደየ ፡ ዲቤክሙ ፡ ዕፅበ ፡ እሳተ ፡ አይቴ ፡ ትነፍጹ ፡ ወበአይቴ ፡ ትድኅኑ ፡ ወሶበ ፡ ይወዲ ፡ ቃሎ ፡ ዲቤክሙ ፡ አኮኑ ፡ ትትመሐከዉ ፡ ወትፈርሁ ። ወኲሎሙ ፡ ብርሃናት ፡ ይትሀወኩ ፡ በፍርሀት ፡ ዐቢይ ፡ ወኲላ ፡ ምድር ፡ ትትመሐከው ፡ ወትርዕድ ፡ ወትጔጒዕ ። ወኲሎሙ ፡ መላእክት ፡ ይፌጽሙ ፡ ትእዛዞሙ ፡ ወይፈቅዱ ፡ ከመ ፡ ይትኃብኡ ፡ እምቅድመ ፡ ዐቢየ ፡ ስብሐት ፡ ወይርዕዱ ፡ ደቂቀ ፡ ምድር ፡ ወይትሀወኩ ፡ ወአንትሙ ፡ ኃጥኣን ፡ ርጉማን ፡ ለዓለም ፡ ወአልብክሙ ፡ ሰላም ። እትፍርሁ ፡ አንትሙ ፡ ነፍሳተ ፡ ጻድቃን ፡ ወተሰፈዉ ፡ ዕለተ ፡ ሞትክሙ ፡ በጽድቅ ። ወኢትኅዝኑ ፡ እስመ ፡ ወረደት ፡ ነፍስክሙ ፡ ውስተ ፡ ዐቢይ ፡ ምንዳቤ ፡ ወገዓር ፡ ወናእክ ፡ ወውስተ ፡ ሲኦል ፡ በሐዘን ፡ ወኢረከበ ፡ ሥጋክሙ ፡ በሕይወትክሙ ፡ በከመ ፡ ኂሩትክሙ ፡ አላ ፡ እንከ ፡ በዕለት ፡ እንተ ፡ ባቲ ፡ ኮንክሙ ፡ ኃጥኣነ ፡ ወበዕለተ ፡ መርገም ፡ ወመቅሠፍት ። ወሶበ ፡ ትመውቱ ፡ ይብሉ ፡ በላዕሌክሙ ፡ ኃጥኣን ፡ ከመ ፡ ሞትነ ፡ ሞቱ ፡ ጻድቃን ፡ ወምንት ፡ ኮነ ፡ በቊዔቶሙ ፡ በምግባሮሙ ። ነዋ ፡ ከማነ ፡ ሞቱ ፡ በኀዘን ፡ ወበጽልመት ፡ ወምንት ፡ ፈድፋዶሙ ፡ እምኔነ ፡ እምይእዜ ፡ ተዐረይነ ። ወምንተ ፡ ይነሥኡ ፡ ወምንተ ፡ ይሬእዩ ፡ ለዓለም ፡ እስመ ፡ እሙንቱሂ ፡ ነዋ ፡ ሞቱ ፡ ወእምይእዜ ፡ ለዓለም ፡ ኢይሬእዩ ፡ ብርሃነ ። እብለክሙ ፡ አንትሙ ፡ ኃጥኣን ፡ አከለክሙ ፡ በሊዕ ፡ ወሰትይ ፡ ወአዕርቆተ ፡ ሰብእ ፡ ወሐይድ ፡ ወኀጢአት ፡ ወአጥርዮተ ፡ ንዋይ ፡ ወርእዮተ ፡ መዋዕል ፡ ሠናይ ። ርኢክምዎሙኑ ፡ ለጻድቃን ፡ እፎ ፡ ኮነ ፡ ተፍጻሜቶሙ ፡ ሰላመ ፡ እስመ ፡ ኲሉ ፡ ግፍዕ ፡ ኢተረክበ ፡ በላዕሌሆሙ ፡ እስከ ፡ ዕለተ ፡ ሞቶሙ ። ወተሐጒሉ ፡ ወኮኑ ፡ ከመ ፡ ዘኢኮኑ ፡ ወወረዱ ፡ ውስተ ፡ ሲኦል ፡ ነፍሳቲሆሙ ፡ በምንዳቤ ።
=== chapter 103 ===
ወይእዜኒ ፡ አነ ፡ እምሕል ፡ ለክሙ ፡ ለጻድቃን ፡ በዐቢይ ፡ ስብሐቱ ፡ ወክብሩ ፡ ወበክቡር ፡ መንግሥቱ ፡ ወበዕበዩ ፡ እምሕል ፡ ለክሙ ፤ እስመ ፡ አነ ፡ አአምር ፡ ዘንተ ፡ ምሥጢረ ፡ ወአንበብኩ ፡ በጸፍጸፈ ፡ ሰማይ ፡ ወርኢኩ ፡ ጽሕፈተ ፡ ቅዱሳን ፡ ወረከብኩ ፡ ጽሑፈ ፡ ውስቴቱ ፡ ወልኩዐ ፡ በእንቲአሆሙ ። እስመ ፡ ኲሉ ፡ ሠናይ ፡ ወፍሥሓ ፡ ወክብር ፡ ተደለወ ፡ ሎሙ ፡ ወተጽሕፈ ፡ ለመናፍስቲሆሙ ፡ ለእለ ፡ ሞቱ ፡ በጽድቅ ፡ ወበብዙኅ ፡ ሠናይ ፡ ይትወሀብ ፡ ለክሙ ፡ ተክለ ፡ ጻማክሙ ፡ ወክፍልክሙ ፡ ፈድፋደ ፡ እምክፍለ ፡ ሕያዋን ። ወየሐይዉ ፡ መንፈስክሙ ፡ ለእለ ፡ ሞትክሙ ፡ በጽድቅ ፡ ወይትፌሥሑ ፡ ወይትሐሠዩ ፡ መናፍስቲሆሙ ፡ ወተዝካሮሙ ፡ እምቅድመ ፡ ገጹ ፡ ለዐቢይ ፡ ለኲሉ ፡ ትውልደ ፡ ዓለም ፡ ወይእዜኒ ፡ ኢትፍርህዎ ፡ ለኀሣሮሙ ። አሌ ፡ ለክሙ ፡ ኃጥኣን ፡ ሶበ ፡ ትመውቱ ፡ በኀጢአትክሙ ፡ ወይብሉ ፡ እሉ ፡ እለ ፡ ከማክሙ ፡ ዲቤክሙ ፡ ብፁዓን ፡ እሙንቱ ፡ ኃጥኣን ፡ ኲሎ ፡ መዋዕሎሙ ፡ ርእዩ ። ወይእዜኒ ፡ ሞቱ ፡ በሠናይ ፡ ወበብዕል ፡ ወምንዳቤ ፡ ወቀትለ ፡ እርእዩ ፡ በሕይወቶሙ ፡ ወበስብሐት ፡ ሞቱ ፡ ወኲነኔ ፡ ኢተገብረ ፡ ሎሙ ፡ በሕይወቶሙ ። ተአምርዎሙ ፡ እስመ ፡ ውስተ ፡ ሲኦል ፡ ያወርድዎሙ ፡ ለነፍሳቲሆሙ ፡ ወእኩያተ ፡ ይከውና ፡ ወምንዳቤሆሙ ፡ ዐቢየ ። ወበጽልመት ፡ ወበመርበብት ፡ ወበላህብ ፡ ዘይነድድ ፡ ኀበ ፡ ኲነኔ ፡ ዐባይ ፡ ትበውእ ፡ መንፈስክሙ ፡ ወኲነኔ ፡ ዐባይ ፡ ትከውን ፡ ለኲሉ ፡ ትውልድ ፡ እስከ ፡ ለዓለም ፤ አሌ ፡ ለክሙ ፡ እስመ ፡ አልብክሙ ፡ ሰላም ። እትበልዎሙ ፡ ለጻድቃን ፡ ወለኄራን ፡ እለ ፡ ሀለዉ ፡ ውስተ ፡ ሕይወት ፡ በመዋዕለ ፡ ስራሕነ ፡ ጻማ ፡ ጻመውነ ፡ ወኲሎ ፡ ስራሐ ፡ ርኢነ ፡ ወእከያተ ፡ ብዙኀ ፡ ረከብነ ፡ ወተወዳዕነ ፡ ወውሕድነ ፡ ወንዕሰት ፡ መንፈስነ ። ወተሐጐልነ ፡ ወአልቦ ፡ ዘረድአነ ፡ በነገር ፡ ወበምግባር ፡ ስእነ ፡ ወኢምንተኒ ፡ ኢረከብነ ፡ ወተፅዕርነ ፡ ወተሐጐልነ ፡ ወኢተሰፈውነ ፡ ከመ ፡ ንርአይ ፡ ሕይወተ ፡ ዕለተ ፡ እምዕለት ። ወተሰፈውነ ፡ ንኩን ፡ ርእስ ፡ ወኮነ ፡ ዘነበ ፤ ጻመውነ ፡ እንዘ ፡ ንትጌበር ፡ ወኢሰለጥነ ፡ ዲበ ፡ ጻማነ ፡ ወኮነ ፡ መባልዕተ ፡ ለኃጥኣን ፡ ወዐማፅያን ፡ አክበዱ ፡ ላዕሌነ ፡ አርዑተ ፡ ዚአሆሙ ። ወተሰልጡ ፡ ዲቤነ ፡ እለ ፡ ይጸልዑነ ፡ ወእለ ፡ ይድጒጹነ ፡ ወለእለ ፡ ይጸልዑነ ፡ አትሐትነ ፡ ክሳደነ ፡ ወኢመሐፉነ ። ወፈቀድነ ፡ ንሑር ፡ እምኔሆሙ ፡ ከመ ፡ ንንፍጽ ፡ ወናዕርፍ ፡ ወኢረከብነ ፡ ኀበ ፡ ንጐይይ ፡ ወንድኅን ፡ እምኔሆሙ ። ወሰከይናሆሙ ፡ ኀበ ፡ መላእክት ፡ በምንዳቤነ ፡ ወጸራሕነ ፡ ዲበ ፡ እለ ፡ ይበልዑነ ፡ ወጽራሐ ፡ ዚአነ ፡ ኢይሬእዩ ፡ ወኢይፈቅዱ ፡ ከመ ፡ ይስምዑ ፡ ቃለነ ። ወይረድእዎሙ ፡ ለእለ ፡ የሀይዱነ ፡ ወይበልዑነ ፡ ወለእለ ፡ አውሐዱነ ፡ ወየኀብኡ ፡ ግፍዖሙ ፡ ወኢያወጽኡ ፡ እምኔነ ፡ አርኡቶሙ ፡ አላ ፡ ይበልዑነ ፡ ወይዘርዝሩነ ፡ ወይቀትሉነ ፡ ወየኀብኡ ፡ ቀትለነ ፡ ወኢተዘከሩ ፡ ከመ ፡ አንሦኡ ፡ እደዊሆሙ ፡ ላዕሌነ ።
=== chapter 104 ===
እምሕል ፡ ለክሙ ፡ ጻድቃን ፡ እስመ ፡ በሰማይ ፡ ይዜከሩ ፡ መላእክት ፡ በእንቲአክሙ ፡ ለሠናይ ፡ በቅድመ ፡ ስብሐቲሁ ፡ ለዐቢይ ፤ አስማቲክሙ ፡ ይጸሐፍ ፡ በቅድመ ፡ ስብሐቲሁ ፡ ለዐቢይ ። ተሰፈዉ ፡ እስመ ፡ በቀዳሚ ፡ ኀሰርክሙ ፡ በእከይ ፡ ወበስራሕ ፡ ወይእዜኒ ፡ ትበርሁ ፡ ከመ ፡ ብርሃናተ ፡ ሰማይ ፡ ወትትረአዩ ፡ ወኆኅተ ፡ ሰማይ ፡ ይትረኀዉ ፡ ለክሙ ። ወጽራሐ ፡ ዚአክሙ ፡ ኲነኔ ፡ ጽርሑ ፡ ወያስተርኢ ፡ ለክሙ ፡ እስመ ፡ እምነ ፡ መላእክት ፡ ይትኀሠሥ ፡ ኲሎ ፡ ምንዳቤክሙ ፡ ወእምኲሎሙ ፡ እለ ፡ አርድእዎሙ ፡ ለእለ ፡ የሀይዱክሙ ። ተሰፈዉ ፡ ወኢትኅድጉ ፡ ተስፋክሙ ፡ እስመ ፡ ትከውን ፡ ለክሙ ፡ ፍሥሓ ፡ ዐባይ ፡ ከመ ፡ መላእክተ ፡ ሰማይ ። እንተ ፡ ሀለወክሙ ፡ ትግበሩ ፡ አኮ ፡ ትትኀብኡ ፡ ሀለወክሙ ፡ በዕለተ ፡ ኲነኔ ፡ ዐባይ ፡ ወኢትትረከቡ ፡ ከመ ፡ ኃጥኣን ፡ ወኲነኔ ፡ እንተ ፡ ለዓለም ፡ ትከውን ፡ እምኔክሙ ፡ ለኲሉ ፡ ትውልደ ፡ ዓለም ። ወይእዜኒ ፡ እትፍርሁ ፡ ጻድቃን ፡ ሶበ ፡ ትሬእይዎሙ ፡ ለኃጥአን ፡ ይጸንዑ ፡ ወይዴለዉ ፡ በፍትወቶሙ ፡ ወኢትኩኑ ፡ ሱቱፋነ ፡ ምስሌሆሙ ፡ አላ ፡ ረኀቁ ፡ እምግፍዐ ፡ ዚአሆሙ ፡ እስመ ፡ ለሐራ ፡ ሰማይ ፡ ሀለወክሙ ፡ ትኩኑ ፡ ሱቱፋነ ። እስመ ፡ ትብሉ ፡ አንትሙ ፡ ኃጥአን ፡ ኢትኅሥሡ ፡ ወኢይጸሐፍ ፡ ኲሉ ፡ ኀጢአትነ ፡ ይጽሕፉ ፡ ሀለዉ ፡ ኲሎ ፡ ኀጢአተክሙ ፡ በኲሉ ፡ ዕለት ። ወይእዜኒ ፡ አነ ፡ አርእየክሙ ፡ እስመ ፡ ብርሃን ፡ ወጽልመት ፤ ዕለት ፡ ወሌሊት ፡ ይሬእዩ ፡ ኲሎ ፡ ኀጢአተክሙ ። እትርስዑ ፡ በልብክሙ ፡ ወኢተሐስዉ ፡ ወኢትሚጥዎ ፡ ለነገረ ፡ ርትዕ ፡ ወኢታሐስውዎ ፡ ለነገረ ፡ ቅዱስ ፡ ወዐቢይ ፡ ወኢትሰብሕዎ ፡ ለጣዖትክሙ ፡ እስመ ፡ ኢኮነት ፡ ኲላ ፡ ሐሰትክሙ ፡ ወኲሉ ፡ ርስዓንክሙ ፡ ለጽድቅ ፡ አላ ፡ ለኀጢአት ፡ ዐባይ ። ወይእዜኒ ፡ አነ ፡ አአምሮ ፡ ለዝ ፡ ምሥጢር ፡ እስመ ፡ ነገረ ፡ ርትዕ ፡ ይመይጡ ፡ ወየዐልዉ ፡ ብዙኃን ፡ ኃጥኣን ፡ ወይትናገሩ ፡ ነገራተ ፡ እኩያተ ፡ ወይሔስዉ ፡ ወይፈጥሩ ፡ ፍጥረተ ፡ ዐቢያተ ፡ ወመጻሕፍተ ፡ ይጽሕፉ ፡ ዲበ ፡ ነገራቲሆሙ ። ወሶበሰ ፡ ኲሎ ፡ ነገርየ ፡ ይጽሕፉ ፡ በርትዕ ፡ ዲበ ፡ ልሳናቲሆሙ ፡ ወኢይዌልጡ ፡ ወኢያሐፅፅ ፡ እምነገራትየ ፡ አላ ፡ ኲሎ ፡ በርትዕ ፡ ይጽሕፉ ፡ ኲሎ ፡ ዘቀዳሚ ፡ አስማዕኩ ፡ በእንቲአሆሙ ። ወካልአ ፡ ምሥጢረ ፡ አአምር ፡ እስመ ፡ ለጻድቃን ፡ ወለጠቢባን ፡ ይትወሀባ ፡ መጻሕፍታት ፡ ለፍሥሓ ፡ ወለርትዕ ፡ ወለጥበብ ፡ ብዙኅ ። ወሎሙ ፡ ይትወሀባ ፡ መጻሕፍት ፡ ወየአምኑ ፡ ቦሙ ፡ ወይትፌሥሑ ፡ ቦሙ ፡ ወይትዐሠዩ ፡ ኲሎሙ ፡ ጻድቃን ፡ እለ ፡ እምኔሆሙ ፡ አእመሩ ፡ ኲሎ ፡ ፍናዋተ ፡ ርትዕ ።
=== chapter 105 ===
ወበእማንቱ ፡ መዋዕል ፡ ይቤ ፡ እግዚእ ፡ ከመ ፡ ይጸውዑ ፡ ወያስምዑ ፡ ለውሉደ ፡ ምድር ፡ በጥበቦሙ ፡ አርእዩ ፡ ሎሙ ፡ እስመ ፡ አንትሙ ፡ መራሕያኒሆሙ ፡ ወዕሤያተ ፡ ዲበ ፡ ኲላ ፡ ምድር ። እስመ ፡ አነ ፡ ወወልድየ ፡ ንዴመር ፡ ምስሌሆሙ ፡ ለዓለም ፡ በፍናዋተ ፡ ርትዕ ፡ በሕይወቶሙ ፡ ወሰላም ፡ ይከውን ፡ ለክሙ ፤ ተፈሥሑ ፡ ውሉደ ፡ ርትዕ ፡ በአማን ።
=== chapter 106 ===
ወእምድኅረ ፡ መዋዕል ፡ ነሥአ ፡ ወልድየ ፡ ማቱሳላ ፡ ለወልዱ ፡ ላሜክ ፡ ብእሲተ ፡ ወፀንሰት ፡ እምኔሁ ፡ ወወለደት ፡ ወልደ ። ወኮነ ፡ ሥጋሁ ፡ ጸዐዳ ፡ ከመ ፡ አስሐትያ ፡ ወቀይሕ ፡ ከመ ፡ ጽጌ ፡ ረዳ ፡ ወፀጒረ ፡ ርእሱ ፡ ከመ ፡ ፀምር ፡ ጸዐዳ ፡ ወድምድማሁ ፡ ወሠናይ ፡ አዕይንቲሁ ፡ ወሶበ ፡ ከሠተ ፡ አዕይንቲሁ ፡ አብርሃ ፡ ኲላ ፡ ቤተ ፡ ከመ ፡ ፀሐይ ፡ ወፈድፋደ ፡ በርሀ ፡ ኲሉ ፡ ቤት ። ወሶበ ፡ ተንሥአ ፡ እምእዴሃ ፡ ለመወልዲት ፡ ከሠተ ፡ አፉሁ ፡ ወተናገረ ፡ ለእግዚአ ፡ ጽድቅ ። ወፈርሀ ፡ ላሜክ ፡ አቡሁ ፡ እምኔሁ ፡ ወጐየ ፡ ወመጽአ ፡ ኀበ ፡ አቡሁ ፡ ማቱሳላ ። ወይቤሎ ፡ አነ ፡ ወለድኩ ፡ ወልደ ፡ ውሉጠ ፡ ኢኮነ ፡ ከመ ፡ ሰብእ ፡ አላ ፡ ይመስል ፡ ደቂቀ ፡ መላእክተ ፡ ሰማይ ፡ ወፍጥረቱ ፡ ካልእት ፡ ወኢኮነ ፡ ከማነ ፡ ወአዕይንቲሁ ፡ ከመ ፡ እገሪሁ ፡ ለጸሐይ ፡ ገጹ ፡ ስቡሕ ። ወይመስለኒ ፡ ከመ ፡ ኢኮነ ፡ እምኔየ ፡ አላ ፡ እመላእክት ፡ ውእቱ ፡ ወእፈርህ ፡ ከመ ፡ ኢይትገበር ፡ መንክር ፡ በመዋዕሊሁ ፡ ዲበ ፡ ምድር ። ወይእዜኒ ፡ ሀለውኩ ፡ አቡየ ፡ አስተበቊዐከ ፡ ወእስእል ፡ እምኀቤከ ፡ ከመ ፡ ትሑር ፡ ኀበ ፡ ሄኖክ ፡ አብነ ፡ ወትስማዕ ፡ እምኀቤሁ ፡ አማነ ፡ እስመ ፡ ውእቱ ፡ ምስለ ፡ መላእክት ፡ ምንባሩ ። ወሶበ ፡ ሰምዐ ፡ ማቱሳላ ፡ ነገረ ፡ ወልዱ ፡ መጽአ ፡ ኀቤየ ፡ ውስተ ፡ አጽናፈ ፡ ምድር ፡ እስመ ፡ ሰምዐ ፡ ከመ ፡ ህየ ፡ ሀሎኩ ፡ ወጸርሐ ፡ ወሰማዕኩ ፡ ቃሎ ፡ ወመጻእኩ ፡ ኀቤሁ ፡ ወእቤሎ ፡ ናሁ ፡ ሀለውኩ ፡ ወልድየ ፡ እስመ ፡ መጻእከ ፡ ኀቤየ ። ወአውሥአኒ ፡ ወይቤ ፡ በእንተ ፡ ነገር ፡ ዐቢይ ፡ መጻእኩ ፡ ኀቤከ ፡ ወበእንተ ፡ ራእይ ፡ ዕፅብ ፡ በዘቀረብኩ ። ወይእዜኒ ፡ አቡየ ፡ ስምዐኒ ፡ እስመ ፡ ተወልደ ፡ ለላሜክ ፡ ወልድየ ፡ ወልድ ፡ ዘኢኮነ ፡ አምሳሉ ፡ ወፍጥረቱ ፡ ከመ ፡ ፍጥረተ ፡ ሰብእ ፡ ወኅብሩ ፡ ይጸዐዱ ፡ እምአስሐትያ ፡ ወይቀይሕ ፡ እምጽጌ ፡ ረዳ ፡ ወፀጒረ ፡ ርእሱ ፡ ይጸዐዱ ፡ እምጸምር ፡ ጸዐዳ ፡ ወአዕይንቲሁ ፡ ከመ ፡ እገሪሁ ፡ ለፀሐይ ፡ ወከሠተ ፡ አዕይንቲሁ ፡ ወአብርሃ ፡ ኲላ ፡ ቤተ ። ወተንሥአ ፡ እምውስተ ፡ እዴሃ ፡ ለመወልዲት ፡ ወፈትሐ ፡ አፉሁ ፡ ወባረኮ ፡ ለእግዚአ ፡ ሰማይ ። ወፈርሐ ፡ አቡሁ ፡ ላሜክ ፡ ወጐየ ፡ ኀቤየ ፡ ወኢአምነ ፡ ከመ ፡ እምኔሁ ፡ ውእቱ ፡ አላ ፡ አምሳሎ ፡ እመላእክተ ፡ ሰማይ ፡ ወናሁ ፡ መጻእኩ ፡ ኀቤከ ፡ ከመ ፡ ታይድዐኒ ፡ ጽድቀ ። ወአውሣእኩ ፡ አነ ፡ ሄኖክ ፡ ወእቤሎ ፡ ይሔድስ ፡ እግዚእ ፡ ሐዲሳተ ፡ ዲበ ፡ ምድር ፡ ወዘንተ ፡ ወዳዕኩ ፡ ወርኢኩ ፡ በራእይ ፡ ወአይዳዕኩከ ፡ እስመ ፡ በትውልዱ ፡ ለያሬድ ፡ አቡየ ፡ አኅለፉ ፡ ነገሮ ፡ ለእግዚእ ፡ እመልዕልተ ፡ ሰማይ ። ወነዮሙ ፡ ይገብሩ ፡ ኀጢአተ ፡ ወየኀልፉ ፡ ሥርዐተ ፡ ወምስለ ፡ አንስት ፡ ተደመሩ ፡ ወምስሌሆን ፡ ይገብሩ ፡ ኀጢአተ ፡ ወአውሰብ ፡ እምኔሆን ፡ ወእምኔሆን ፡ ወለዱ ፡ ደቂቀ ። ወሐጒል ፡ ዐቢይ ፡ ይከውን ፡ ዲበ ፡ ኲሉ ፡ ምድር ፡ ወማየ ፡ አይኅ ፡ ይከውን ፡ ወሐጒል ፡ ዐቢይ ፡ በ፩ዓመት ፡ ይከውን ። ዝውእቱ ፡ ወልድ ፡ ዘተወልደ ፡ ለክሙ ፡ ውእቱ ፡ ይተርፍ ፡ ዲበ ፡ ምድር ፡ ወ፫ደቂቁ ፡ ይድኅኑ ፡ ምስሌሁ ፡ ሶበ ፡ ይመውቱ ፡ ኲሉ ፡ ሰብእ ፡ ዘዲበ ፡ ምድር ፡ ይድኅን ፡ ውእቱ ፡ ወደቂቁ ። ይወልዱ ፡ ዲበ ፡ ምድር ፡ እለ ፡ ያርብሕ ፡ አኮ ፡ ዘመንፈስ ፡ አላ ፡ ዘሥጋ ፡ ወይከውን ፡ መቅሠፍት ፡ ዐቢይ ፡ ዲበ ፡ ምድር ፡ ወትትሐፀብ ፡ ምድር ፡ እምኲሉ ፡ ሙስና ። ወይእዜኒ ፡ አይድዕ ፡ ለወልድከ ፡ ላሜክ ፡ እስመ ፡ ዘተወልደ ፡ ወልዱ ፡ ውእቱ ፡ በጽድቅ ፡ ወጸውዕ ፡ ስሞ ፡ ኖኅ ፡ እስመ ፡ ውእቱ ፡ ይከውን ፡ ለክሙ ፡ ተረፈ ፡ ወውእቱ ፡ ወደቂቁ ፡ ይድኅኑ ፡ እሙስና ፡ እንተ ፡ ትመጽእ ፡ ዲበ ፡ ምድር ፡ እምኲሉ ፡ ኀጢአት ፡ ወእምኲሉ ፡ ዐመፃ ፡ እንተ ፡ ሀለወት ፡ ትትፌጸም ፡ ዲበ ፡ ምድር ፡ በመዋዕሊሁ ። ወእምድኅረዝ ፡ ትከውን ፡ ዐመፃ ፡ ፈድፋደ ፡ እምእንተ ፡ ተፈጸመት ፡ ቀዳሚ ፡ ዲበ ፡ ምድር ፡ እስመ ፡ አአምር ፡ ምሥጢራተ ፡ ቅዱሳን ፡ እስመ ፡ ውእቱ ፡ እግዚእ ፡ አርአየኒ ፡ ወአይድዐኒ ፡ ወበጸፍጸፈ ፡ ሰማይ ፡ አንበብኩ ።
=== chapter 107 ===
ወርኢኩ ፡ ጽሑፈ ፡ በላዕሌሆሙ ፡ እስመ ፡ ትውልድ ፡ እምትውልድ ፡ ትኤብስ ፡ እስከ ፡ ትትነሣእ ፡ ትውልደ ፡ ጽድቅ ፡ ወአበሳ ፡ ትትሐጐል ፡ ወኀጢአት ፡ ትትገሐስ ፡ እምዲበ ፡ ምድር ፡ ወኲሉ ፡ ሠናይ ፡ ይመጽእ ፡ ዲቤሃ ። ወይእዜኒ ፡ ወልድየ ፡ ሑር ፡ አይድዖ ፡ ለወልድከ ፡ ላሜክ ፡ እስመዝ ፡ ወልድ ፡ ዘተወልደ ፡ ወልደ ፡ ዚአሁ ፡ ውእቱ ፡ አማን ፡ ወኢኮነ ፡ ሐሰተ ። ወሶበ ፡ ሰምዐ ፡ ማቱሳላ ፡ ነገረ ፡ አቡሁ ፡ ሄኖክ ፡ እስመ ፡ ዘኅቡእ ፡ አርአዮ ፡ ኲሎ ፡ ግብረ ፡ ወገብአ ፡ ርኢዮ ፡ ወሰመዮ ፡ ስሞ ፡ ለውእቱ ፡ ወልድ ፡ ኖኅ ፡ እስመ ፡ ውእቱ ፡ ያስተፌሥሓ ፡ ለምድር ፡ እምኲሉ ፡ ኀጒል ።
=== chapter 108 ===
ካልእ ፡ መጽሐፍ ፡ ዘጸሐፈ ፡ ሄኖክ ፡ ለወልዱ ፡ ማቱሳላ ፡ ወለእለ ፡ ይመጽኡ ፡ እምድኅሬሁ ፡ ወየዐቅብ ፡ ሥርዐተ ፡ በደኃሪ ፡ መዋዕል ። እለ ፡ ገበርክሙ ፡ ወትጸንሑ ፡ በእሉ ፡ መዋዕል ፡ እስከ ፡ ይትፌጸሙ ፡ እለ ፡ ይገብሩ ፡ እኩየ ፡ ወይትፌጸም ፡ ኀይሎሙ ፡ ለመአብሳን ፤ አንትሙሰ ፡ ጽንሑ ፡ እስክ ፡ ተሐልፍ ፡ ኀጢአት ፡ እስመ ፡ ሀሎ ፡ ስሞሙ ፡ ይደመሰስ ፡ እመጻሕፍተ ፡ ቅዱሳን ፡ ወዘርኦሙ ፡ ይትሐጐል ፡ ለዓለም ፡ ወመናፍስቲሆሙ ፡ ይትቀተሉ ፡ ወይጸርሑ ፡ ወየዐወይዉ ፡ በመካነ ፡ በድው ፡ ዘኢያስተርኢ ፡ ወበእሳት ፡ ይነድዱ ፡ እስመ ፡ ኢሀሎ ፡ ህየ ፡ ምድር ። ወርኢኩ ፡ ህየ ፡ ከመ ፡ ደመና ፡ ዘኢይትረአይ ፡ እስመ ፡ እምዕመቁ ፡ እክህልኩ ፡ ላዕለ ፡ ነጽሮ ፡ ወላህበ ፡ እሳቱ ፡ ርኢኩ ፡ እንዘ ፡ ይነድድ ፡ ስቡሕ ፡ ወይትከበቡ ፡ ከመ ፡ አድባር ፡ ስብሓን ፡ ወይትሀወኩ ፡ ለፌ ፡ ወለፌ ። ወተስእልክዎ ፡ ለ፩እመላእክት ፡ ቅዱሳን ፡ እለ ፡ ምስሌየ ፡ ወእቤሎ ፡ ምንት ፡ ውእቱ ፡ ዝስብሕ ፡ እስመ ፡ ኢኮነ ፡ ሰማየ ፡ አላ ፡ ላህበ ፡ እሳት ፡ ባሕቲቱ ፡ ዘይነድድ ፡ ወቃለ ፡ ጽራሕ ፡ ወብካይ ፡ ወአውያት ፡ ወሕማም ፡ ኀያል ። ወይቤለኒ ፡ ዝንቱ ፡ መካን ፡ ዘትሬኢ ፡ በህየ ፡ ይትወዶዩ ፡ መናፍስተ ፡ ኃጥኣን ፡ ወፅሩፋን ፡ ወእለ ፡ ይገብሩ ፡ እኩየ ፡ ወእለ ፡ ይመይጡ ፡ ኲሎ ፡ ዘነገረ ፡ እግዚአብሔር ፡ በአፈ ፡ ነቢያት ፡ እለ ፡ ሀለዉ ፡ ይትገበሩ ። እስመ ፡ ሀለዉ ፡ እምኔሆሙ ፡ ጽሑፋን ፡ ወልኩዓን ፡ ላዕለ ፡ በሰማይ ፡ ከመ ፡ ያንብብዎሙ ፡ መላእክት ፡ ወያእምሩ ፡ ዘሀሎ ፡ ይብጽሖሙ ፡ ለኃጥኣን ፡ ወለመናፍስተ ፡ ትሑታን ፡ ወእለ ፡ አሕመሙ ፡ ሥጋሆሙ ፡ ወተፈድዩ ፡ እምኀበ ፡ አምላክ ፡ ወእለ ፡ ኀስሩ ፡ እምእኩያን ፡ ሰብእ ፤ እለ ፡ አፍቀርዎ ፡ ለአምላክ ፡ ኢወርቀ ፡ ወኢብሩረ ፡ ኢያፍቀሩ ፡ ወኢኲሎ ፡ ሠናየ ፡ ዘውስተ ፡ ዓለም ፡ አላ ፡ ወሀቡ ፡ ሥጋሆሙ ፡ ለጻዕር ፤ ወእለ ፡ እምአመ ፡ ኮኑ ፡ ኢፈተዉ ፡ መባልዕተ ፡ ዘውስተ ፡ ምድር ፡ አላ ፡ ረሰዩ ፡ ርእሶሙ ፡ ከመ ፡ መንፈስ ፡ እንተ ፡ ኀለፈት ፡ ወዘንተ ፡ ዐቀቡ ፡ ወብዙኃ ፡ አመከሮሙ ፡ እግዚእ ፡ ወተረክብ ፡ መንፈሳቲሆሙ ፡ በንጽሕ ፡ ከመ ፡ ይባርክዎ ፡ ለስሙ ። ወኲሎ ፡ በረከቶሙ ፡ ነገርኩ ፡ በመጻሕፍት ፡ ወዐሰዮሙ ፡ ለአርእስቲሆሙ ፡ እስመ ፡ እሉ ፡ ተረክብ ፡ ያፈቅርዎ ፡ ለሰማይ ፡ እምእስትንፋሶሙ ፡ ዘለዓለም ፡ ወእንዘ ፡ ይትከየዱ ፡ እምእኩያን ፡ ሰብእ ፡ ወሰምዑ ፡ እምኀቤሆሙ ፡ ትዕይርተ ፡ ወጽርፈተ ፡ ወኀስሩ ፡ እንዘ ፡ ይባርኩኒ ። ወይእዜኒ ፡ እጼውዕ ፡ መናፍስቲሆሙ ፡ ለኄራን ፡ እምትውልድ ፡ እንተ ፡ ብርሃን ፡ ወእዌልጥ ፡ ለእለ ፡ ተወልዱ ፡ በጽልመት ፡ እለ ፡ በሥጋሆሙ ፡ እተፈድዩ ፡ ክብረ ፡ በከመ ፡ ይደሉ ፡ ለሃይማኖቶሙ ። ወአወጽኦሙ ፡ በብሩህ ፡ ብርሃን ፡ ለእለ ፡ ያፈቅርዎ ፡ ለስምየ ፡ ቅዱስ ፡ ወአነብር ፡ ፲፩ውስተ ፡ መንበረ ፡ ክብር ፡ ክብረ ፡ ዚአሁ ። ወይትወኀውኁ ፡ በአዝማን ፡ ዘአልቦ ፡ ኊልቊ ፡ እስመ ፡ ጽድቅ ፡ ኲነኔሁ ፡ ለአምላክ ፡ እስመ ፡ ለመሃይምናን ፡ ሃይማኖተ ፡ ይሁብ ፡ በማኅደረ ፡ ፍናዋት ፡ ርቱዓት ። ወይሬእይዎሙ ፡ ለእለ ፡ ተወልዱ ፡ በጽልመት ፡ ይትወደዩ ፡ በጽልመት ፡ እንዘ ፡ ይትወኀውኁ ፡ ጻድቃን ። ወይጸርሑ ፡ ወይሬእይዎሙ ፡ ኃጥኣን ፡ እንዘ ፡ ይበርሁ ፡ ወየሐውሩ ፡ እሙንቱሂ ፡ በኀበ ፡ ተጽሕፈ ፡ ሎሙ ፡ መዋዕል ፡ ወአዝማን ።
##### edition EOTCed (gez) — Text of the EOTC printed Bible
=== chapter 1 ===
[Chapter 1]
1 ቃለ፡ በረከት፡ ዘሄኖክ፡ በከመ፡ ባረከ፡ ኅሩያነ፡ ወጻድቃነ፡ እለ፡ ሀለዉ፡ ይኩኑ፡ በዕለተ፡ ምንዳቤ፡ ለአሰስሎ፡ ኵሉ፡ እኩያን፡ ወረሲዓን።
2 ወአውሥአ፡ ሄኖክ፡ ወይቤ፡ ብእሲ፡ ጻድቅ፡ ዘእምኀበ፡ እግዚአብሔር፡ እንዘ፡ አዕይንቲሁ፡ ክሡታት፡ ወይሬኢ፡ ራእየ፡ ቅዱስ፡ ዘበሰማያት፡ ዘአርአዩኒ፡ መላእክት፡ ወሰማዕኩ፡ ዘእምኀቤሆሙ፡ ኵሎ፡ ወአእመርኩ፡ አነ፡ ዘእሬኢ፡ ወአኮ፡ ለዝ፡ ትውልድ፡ አላ፡ ለዘይመጽኡ፡ ትውልድ፡ ርሑቃን።
3 በእንተ፡ ኅሩያን፡ እቤ፡ ወአውሣእኩ፡ በእንቲኣሆሙ፡ ምስለ፡ ዘይወፅእ፡ ቅዱስ፡ ወዐቢይ፡ እማኅደሩ።
4 ወአምላከ፡ ዓለም፡ ወእምህየ፡ ይከይድ፡ ዲበ፡ ሲና፡ ደብር፡ ወያስተርኢ፡ በትዕይንቱ፡ ወያስተርኢ፡ በጽንዐ፡ ኀይሉ፡ እምሰማይ።
5 ወይፈርሁ፡ ኵሉ፡ ወያድለቀልቁ፡ ትጉሃን፡ ወይነሥኦሙ፡ ፍርሀት፡ ወረዓድ፡ ዐቢይ፡ እስከ፡ አጽናፈ፡ ዓለም።
6 ወይደነግፁ፡ አድባር፡ ነዋኃን፡ ወይቴሐቱ፡ አውግር፡ ነዊኃን፡ ወይትመሰዉ፡ ከመ፡ መዓረ፡ ግራ፡ እምላህብ።
7 ወትሰጠም፡ ምድር፡ ወኵሉ፡ ዘውስተ፡ ምድር፡ ይትሀጐል፡ ወይከውን፡ ፍትሕ፡ ላዕለ፡ ኵሉ፡ ወላዕለ፡ ጻድቃን፡ ኵሎሙ።
8 ለጻድቃንሰ፡ ሰላመ፡ ይገብር፡ ሎሙ፡ ወየዐቅቦሙ፡ ለኅሩያን፡ ወይከውን፡ ሣህል፡ ላዕሌሆሙ፡ ወይከውኑ፡ ኵሎሙ፡ ዘአምላክ፡ ወይሤርሑ፡ ወይትባረኩ፡ ወይበርህ፡ ሎሙ፡ ብርሃነ፡ አምላክ።
9 ወናሁ፡ መጽአ፡ በትእልፊት፡ ቅዱሳን፡ ከመ፡ ይግበር፡ ፍትሐ፡ ላዕሌሆሙ፡ ወያህጕሎሙ፡ ለረሲዓን፡ ወይትዋቀሥ፡ ኵሎ፡ ዘሥጋ፡ በእንተ፡ ኵሉ፡ ዘገብሩ፡ ወረሰዩ፡ ላዕሌሁ፡ ኃጥኣን፡ ወረሲዓን።
=== chapter 2 ===
[Chapter 2]
1 ጠየቁ፡ ኵሎ፡ ዘውስተ፡ ሰማይ፡ ግብረ፡ እፎ፡ ኢይመይጡ፡ ፍናዊሆሙ፡ ብርሃናት፡ ዘውስተ፡ ሰማይ፡ ከመ፡ ኵሉ፡ ይሠርቅ፡ ወየዐርብ፡ ሥሩዕ፡ ኵሉ፡ በበ፡ ዘመኑ፡ ወኢይትዐደዉ፡ እምትእዛዞሙ።
2 ወርእይዋ፡ ለምድር፡ ወለብዉ፡ በእንተ፡ ምግባር፡ ዘይትገበር፡ ላዕሌሃ፡ እምቀዳሚ፡ እስከ፡ ተፍጻሜቱ፡ ከመ፡ ኢይትመየጡ፡ ኵሉ፡ ግብሩ፡ ለአምላክ፡ ዘያስተርኢ።
3 ወርእይዎ፡ ለሐጋይ፡ ወለክረምት፡ ከመ፡ ኵላ፡ ምድር፡ መልአት፡ ማየ፡ ወደመና፡ ወጠል፡ ወዝናም፡ የዐርፉ፡ ላዕሌሃ።
=== chapter 3 ===
[Chapter 3]
1 ጠየቁ፡ ወርኢኩ፡ ከመ፡ ኵሉ፡ ዕፀው፡ እፎ፡ ያስተርእዩ፡ ከመ፡ ይቡስ፡ ወኵሉ፡ አቍጽሊሆሙ፡ ንጉፋት፡ ዘእንበለ፡ ዐሠርቱ፡ ወአርባዕቱ፡ ዕፀው፡ ዘኢይትነገፉ፡ እለ፡ ይጸንሑ፡ እምብሉይ፡ እስከ፡ ይመጽእ፡ ሐዲስ፡ እምክልኤቱ፡ ወሠለስቱ፡ ክረምት።
=== chapter 4 ===
[Chapter 4]
1 ወዳግመ፡ ጠየቁ፡ መዋዕለ፡ ሐጋይ፡ ከመ፡ ኮነ፡ ፀሓይ፡ ላዕሌሃ፡ በቅድሜሃ፡ ወአንትሙሰ፡ ተኀሥሡ፡ ምጽላለ፡ ወጽላሎተ፡ በእንተ፡ ዋዕየ፡ ፀሓይ፡ ወምድርኒ፡ ትውዒ፡ እሙቀተ፡ ሐሩር፡ ወአንትሙሰ፡ ኢትክሉ፡ ከይዶታ፡ ለምድር፡ ወኢ፡ ኰኵሐ፡ በእንተ፡ ዋዕያ።
=== chapter 5 ===
[Chapter 5]
1 ጠየቁ፡ እፎ፡ ዕፀው፡ በሐመልማለ፡ አቍጽል፡ ይትከደኑ፡ ወይፈርዩ፡ ወለብዉ፡ በእንተ፡ ኵሉ፡ በከመ፡ ገብረ፡ ለክሙ፡ ለእሎንቱ፡ ኵሎሙ፡ ዘሕያው፡ ለዓለም።
2 ወምግባሩ፡ ቅድሜሁ፡ ለለ፡ ዓመት፡ ዘይከውን፡ ወኵሉ፡ ምግባሩ፡ ይትቀነዩ፡ ሎቱ፡ ወኢይትመየጡ፡ አላ፡ በከመ፡ ሠርዐ፡ አምላክ፡ ከመ፡ ዝ፡ ይትገበር፡ ኵሉ።
3 ወርእዩ፡ እፎ፡ አብሕርት፡ ወአፍላግ፡ ኅቡረ፡ ይፌጽሙ፡ ኵሎ፡ ግብሮሙ።
4 ወአንትሙሰ፡ ኢተዐገሥክሙ፡ ወኢገበርክሙ፡ ትእዛዘ፡ እግዚእ፡ አላ፡ ተዐደውክሙ፡ ወሐመይክሙ፡ ዐቢያተ፡ ወድሩካተ፡ ቃላተ፡ በአፍ፡ ርኵስት፡ ዘዚኣክሙ፡ ላዕለ፡ ዕበየ፡ ዚኣሁ፡ ይቡሳነ፡ ልብ፡ ኢትከውነክሙ፡ ሰላም።
5 ወበእንተ፡ ዝ፡ አንትሙ፡ መዋዕሊክሙ፡ ትረግሙ፡ ወዓመታተ፡ ሕይወትክሙ፡ ታሀጕሉ፡ ወይበዝኅ፡ መርገም፡ ዘለዓለም፡ ወኢይከውነክሙ፡ ሣህል።
6 ወበውእቱ፡ መዋዕል፡ ትሁቡ፡ ሰላመ፡ ዚኣክሙ፡ በርግመት፡ ዘለዓለም፡ ለኵሉ፡ ጻድቃን፡ ወኪያክሙ፡ ይረግሙ፡ ኃጥኣን፡ ዘልፈ፡ ወለክሙ፡ ኅቡረ፡ ምስለ፡ ኃጥኣን።
7 ወለኅሩያንሰ፡ ይከውን፡ ብርሃን፡ ወፍሥሓ፡ ወሰላም፡ ወእሙንቱ፡ ይወርስዋ፡ ለምድር፡ ወለክሙሰ፡ ረሲዓን፡ ይከውነክሙ፡ ርግመት።
8 ወእመሂ፡ ይትወሀቦሙ፡ ለኅሩያን፡ ጥበብ፡ ወኵሎሙ፡ እሎንቱ፡ የሐይዉ፡ ወኢይደግሙ፡ አብሶ፡ ኢ፡ በረሲዕ፡ ወኢ፡ በትዕቢት፡ አላ፡ ይገንዩ፡ ዘቦሙ፡ ጥበብ።
9 ወኢይደግሙ፡ አብሶ፡ ወኢይትኴነኑ፡ ኵሎ፡ መዋዕለ፡ ሕይወቶሙ፡ ወኢይመውቱ፡ በመዓት፡ ወኢ፡ በመቅሠፍት፡ አላ፡ ኍልቈ፡ መዋዕለ፡ ሕይወቶሙ፡ ይፌጽሙ፡ ወይልህቅ፡ ሕይወቶሙ፡ በሰላም፡ ወዓመታተ፡ ፍሥሓሆሙ፡ ይበዝኁ፡ በሐሤት፡ ወበሰላም፡ ዘለዓለም፡ ውስተ፡ ኵሉ፡ መዋዕለ፡ ሕይወቶሙ።
=== chapter 6 ===
[Chapter 6]
1 ወኮነ፡ እምዘ፡ በዝኁ፡ ውሉደ፡ ሰብእ፡ በእማንቱ፡ መዋዕል፡ ተወልዳ፡ ሎሙ፡ አዋልድ፡ ሠናያት፡ ወላሕያት።
2 ወርእዩ፡ ኪያሆን፡ መላእክት፡ ውሉደ፡ ሰማያት፡ ወፈተውዎን፡ ወይቤሉ፡ በበይናቲሆሙ፡ ንዑ፡ ንኅረይ፡ ለነ፡ አንስተ፡ እምውሉደ፡ ሰብእ፡ ወንለድ፡ ለነ፡ ውሉደ።
3 ወይቤሎሙ፡ ስማዝያ፡ ዘውእቱ፡ መልአኮሙ፡ እፈርህ፡ አንሰ፡ ዮጊ፡ ኢትፈቅዱ፡ ይትገበር፡ ዝንቱ፡ ግብር፡ ወእከውን፡ አነ፡ ባሕቲትየ፡ ፈዳይሃ፡ ለዛቲ፡ ኀጢአት፡ ዐባይ።
4 ወአውሥእዎ፡ ሎቱ፡ ኵሎሙ፡ ወይቤሉ፡ መሐላ፡ ንምሐል፡ ኵልነ፡ ወንትዋገዝ፡ በበይናቲነ፡ ከመ፡ ኢንሚጣ፡ ለዛቲ፡ ምክር፡ ወንግበራ፡ ለዛቲ፡ ምክር፡ ግብረ።
5 አሜሃ፡ መሐሉ፡ ኵሎሙ፡ ኅቡረ፡ ወአውገዙ፡ ኵሎሙ፡ በበይናቲሆሙ፡ ቦቱ።
6 ወኮኑ፡ ኵሎሙ፡ ክልኤተ፡ ምእተ፡ ወወረዱ፡ ውስተ፡ አርዲስ፡ ዘውእቱ፡ ድማኁ፡ ለደብረ፡ ኤርሞን፡ ወጸውዕዎ፡ ለደብረ፡ ኤርሞን፡ እስመ፡ መሐሉ፡ ቦቱ፡ ወአውገዙ፡ በበይናቲሆሙ።
7 ወዝንቱ፡ ውእቱ፡ አስማቲሆሙ፡ ለመላእክቲሆሙ፡ ስማዝያ፡ ዘውእቱ፡ መልአኮሙ፡ ኡራኪ፡ በራምኤል፡ አኪቢኤል፡ ጣሚኤል፡ ራሙኤል፡ ዳንኤል፡ ኤዜቂኤል፡ ሱሩቁያል፡ አሳኤል፡ አርምርስ፡ በጥርኤል፡ አናንኤል፡ ዘቄቤ፡ ስምሳፒኤል፡ ሰርትኤል፡ ሙርኤል፡ ዮምያኤል፡ አራዝያል።
8 እሉ፡ እሙንቱ፡ ሐበይቶሙ፡ ለክልኤቱ፡ ምእት፡ መላእክት።
=== chapter 7 ===
[Chapter 7]
1 ወባዕዳንሂ፡ ኵሉ፡ ምስሌሆሙ፡ ወነሥኡ፡ ሎሙ፡ አንስትያ፡ ወኀረየ፡ ኵሉ፡ ለለ፡ ርእሱ፡ አሐተ፡ አሐተ፡ ወወጠኑ፡ ይባኡ፡ ኀቤሆን፡ ወተደመሩ፡ ምስሌሆን፡ ወመሀርዎን፡ ሥራያተ፡ ወስብዓታተ፡ ወመቲረ፡ ሥርው፡ ወዕፀወ፡ አመርዎን።
2 ወእማንቱሰ፡ ፀንሳ፡ ወወለዳ፡ ረዓይተ፡ ዐበይተ፡ ወቆሞሙ፡ በበ፡ ሠላሳ፡ ምእት፡ በእመት።
3 እሉ፡ በልዑ፡ ኵሎ፡ ጻማ፡ ሰብእ፡ እስከ፡ ስእንዎሙ፡ ሴስዮተ፡ ሰብእ።
4 ወተመይጡ፡ ረዓይት፡ ላዕሌሆሙ፡ ይብልዕዎሙ፡ ለሰብእ።
5 ወወጠኑ፡ የአብሱ፡ በአዕዋፍ፡ ወበአራዊት፡ ወበዘይትሐወስ፡ ወበዓሣት፡ ወሥጋሆሙ፡ በበይናቲሆሙ፡ ተባልዑ፡ ወደመ፡ ሰትዩ፡ እምኔሃ።
6 ወአሜሃ፡ ሰከየቶሙ፡ ለዐማፅያን።
=== chapter 8 ===
[Chapter 8]
1 ወአዛዝኤል፡ መሀሮሙ፡ ለሰብእ፡ ገቢረ፡ አስይፍት፡ ወመጥባሕት፡ ወወልታ፡ ወድርዐ፡ እንግድዓ፡ ወአርአዮሙ፡ ለዘእምድኅሬሆሙ፡ ወምግባራቲሆሙ፡ አውቃፋተ፡ ወሠርጐ፡ ወተኵሕሎተ፡ ወአሠንዮ፡ ቀራንብት፡ ወእብነ፡ እምኵሉ፡ እብን፡ ክቡር፡ ወኅሩይ፡ ወኵሎ፡ ጥምዐታተ፡ ኅብር፡ ወተውላጠ፡ ዓለም።
2 ወኮነ፡ ርስዐት፡ ዐቢይ፡ ወዘምዎ፡ ወስሕቱ፡ ወማሰነ፡ ኵሉ፡ ፍናዊሆሙ።
3 አሜዛራክ፡ መሀረ፡ ኵሎ፡ መሳብዕያነ፡ ወመታርያነ፡ ሥርዋት፡ አርሚሮስ፡ ፈትሐ፡ ስብዓታተ፡ ወበራቅኤል፡ ረኣይያነ፡ ከዋክብት፡ ወኮከብኤል፡ ትእምርታተ፡ ወጥምኤል፡ መሀረ፡ ራእየ፡ ኮከብ፡ ወአስራድኤል፡ መሀረ፡ ሩጸተ፡ ወርኅ።
4 ወበህጕለተ፡ ሰብእ፡ ጸርሑ፡ ሰብእ፡ ወበጽሐ፡ ቃሎሙ፡ ሰማየ።
=== chapter 9 ===
[Chapter 9]
1 ወአሜሃ፡ ሐወጹ፡ ሚካኤል፡ ወገብርኤል፡ ወሱሩያል፡ ወኡርያል፡ እምሰማይ፡ ወርእዩ፡ ብዙኀ፡ ደመ፡ ዘይትከዐው፡ በዲበ፡ ምድር፡ ወኵሎ፡ ዐመፃ፡ ዘይትገበር፡ በዲበ፡ ምድር።
2 ወይቤሉ፡ በበይናቲሆሙ፡ ቃለ፡ ጽራሐቲሆሙ፡ ዕራቃ፡ ጸርሐት፡ ምድር፡ እስከ፡ አንቀጸ፡ ሰማይ።
3 ወይእዜኒ፡ ኦ፡ ቅዱሳነ፡ ሰማይ፡ ለክሙ፡ ይሰክዩ፡ ነፍሳተ፡ ሰብእ፡ እንዘ፡ ይብሉ፡ አብኡ፡ ለነ፡ ፍትሐ፡ ኀበ፡ ልዑል።
4 ወይቤሉ፡ ለእግዚኦሙ፡ ለንጉሥ፡ እስመ፡ እግዚኦሙ፡ ለአጋእዝት፡ ወአምላኮሙ፡ ለአማልክት፡ ወንጉሦሙ፡ ለነገሥት፡ ወመንበረ፡ ስብሐቲሁ፡ ውስተ፡ ኵሉ፡ ትውልድ፡ ዘለዓለም፡ ወስምከ፡ ቅዱስ፡ ወስቡሕ፡ ውስተ፡ ኵሉ፡ ትውልድ፡ ዓለም፡ ወቡሩክ፡ ወስቡሕ።
5 አንተ፡ ወገበርከ፡ ኵሎ፡ ወሥልጣነ፡ ኵሉ፡ ምስሌከ፡ ወኵሉ፡ ክሡት፡ በቅድሜከ፡ ወግሁድ፡ ወአንተ፡ ትሬኢ፡ ኵሎ፡ ወአልቦ፡ ዘይትከሀል፡ ይትኀባእ፡ እምኔከ።
6 ርኢኬ፡ ዘገብረ፡ አዛዝኤል፡ ዘከመ፡ መሀረ፡ ኵሎ፡ ዐመፃ፡ በዲበ፡ ምድር፡ ወአግሀደ፡ ኅቡኣተ፡ ዓለም፡ እለ፡ ይትገበራ፡ በሰማያት።
7 ወአመረ፡ ስብዓታተ፡ ስማዝያ፡ ዘአንተ፡ ወሀብኮ፡ ሥልጣነ፡ ከመ፡ ይኰንን፡ እለ፡ ምስሌሁ፡ ኅቡረ።
8 ወሖሩ፡ ኀበ፡ አዋልደ፡ ሰብእ፡ ኅቡረ፡ ወሰከቡ፡ ምስሌሆን፡ ለእልኩ፡ አንስት፡ ወረኵሱ፡ ወአግሀዱ፡ ሎን፡ እሎንተ፡ ኃጣውአ።
9 ወአንስትኒ፡ ወለዳ፡ ረዓይተ፡ ወበዝ፡ መልአት፡ ኵላ፡ ምድር፡ ደመ፡ ወዐመፃ።
10 ወይእዜኒ፡ ናሁ፡ ይጸርሑ፡ ነፍሳተ፡ እለ፡ ሞቱ፡ ወይሰክዩ፡ እስከ፡ አንቀጸ፡ ሰማይ፡ ወዐርገ፡ ገዐሮሙ፡ ወኢይክሉ፡ ወፂአ፡ እምቅድመ፡ ገጸ፡ ዐመፃ፡ ዘይትገበር፡ በዲበ፡ ምድር።
11 ወአንተ፡ ተአምር፡ ኵሎ፡ ዘእንበለ፡ ይኩን፡ ወአንተ፡ ተአምር፡ ዘንተ፡ ወዘዚኣሆሙ፡ ወአልቦ፡ ዘትነግረነ፡ ወምንት፡ መፍትው፡ ንረስዮሙ፡ በእንተ፡ ዝንቱ።
=== chapter 10 ===
[Chapter 10]
1 ወአሜሃ፡ ልዑል፡ ዐቢይ፡ ወቅዱስ፡ ተናገረ፡ ወፈነዎ፡ ለአርስየላልዩር፡ ኀበ፡ ወልደ፡ ላሜክ።
2 ወይቤሎ፡ በሎ፡ በስመ፡ ዚኣየ፡ ኅባእ፡ ርእሰከ፡ ወአግህድ፡ ሎቱ፡ ፍጻሜ፡ ዘይመጽእ፡ እስመ፡ ኵላ፡ ምድር፡ ትትሀጐል፡ ወማየ፡ አይኅ፡ ይመጽእ፡ ሀሎ፡ ዲበ፡ ኵላ፡ ምድር፡ ወይትሀጐል፡ ዘሀሎ፡ ውስቴታ።
3 ወይእዜኒ፡ መሀሮ፡ ከመ፡ ይንፍጽ፡ ወይንበር፡ ዘርዑ፡ በኵሉ፡ ምድር።
4 ወይቤሎ፡ ካዕበ፡ እግዚእ፡ ለሩፋኤል፡ እስሮ፡ ለአዛዝኤል፡ በእደዊሁ፡ ወበእግሪሁ፡ ወደዮ፡ ውስተ፡ ጽልመት፡ ወአብቅዋ፡ ለገዳም፡ እንተ፡ ሀለወት፡ በዱዳኤል፡ ወደዮ፡ ውስተ፡ ጽልመት፡ በህየ።
5 ወደይ፡ ላዕሌሁ፡ አእባነ፡ ጠዋያተ፡ ወበሊኃተ፡ ወክድኖ፡ ጽልመተ፡ ወህየ፡ ይኅድር፡ ለዓለም፡ ወክድኖ፡ ለገጹ፡ ከመ፡ ኢይርአይ፡ ብርሃነ።
6 ወበዐባይ፡ ዕለት፡ እንተ፡ ኵነኔ፡ ከመ፡ ይትፌነው፡ ውስተ፡ ዋዕይ።
7 ወአሕይዋ፡ ለምድር፡ እንተ፡ አማሰኑ፡ መላእክት፡ ወሕይወታ፡ ለምድር፡ አይድዕ፡ ከመ፡ አሕይዎ፡ አሕይዋ፡ ለምድር፡ ወኢይትሀጐሉ፡ ኵሎሙ፡ ውሉደ፡ ሰብእ፡ በምሥጢረ፡ ኵሉ፡ ዘቀተሉ፡ ትጉሃን፡ ወመሀሩ፡ ለውሉዶሙ።
8 ወማሰነት፡ ኵላ፡ ምድር፡ በትምህርተ፡ ግብሩ፡ ለአዛዝኤል፡ ወላዕሌሁ፡ ጸሐፍ፡ ኵሎ፡ ኀጢአተ።
9 ወለገብርኤል፡ ይቤሎ፡ እግዚአብሔር፡ ሖር፡ ዲቤሆሙ፡ ለመንዝራን፡ ወለምኑናን፡ ወዲበ፡ ውሉደ፡ ዘማ፡ ወአህጕሎሙ፡ ለውሉደ፡ ዘማ፡ ወለውሉደ፡ ትጉሃን፡ እምሰብእ፡ ወአውፅኦሙ፡ ወፈንዎሙ፡ በበይናቲሆሙ፡ ወእሙንቱ፡ በቀትል፡ ለሊሆሙ፡ ይትሀጐሉ፡ እስመ፡ ኑኀ፡ መዋዕል፡ አልቦሙ።
10 ወኵሎሙ፡ ይስእሉከ፡ ወኢይከውን፡ ለአበዊሆሙ፡ በእንቲኣሆሙ፡ እስመ፡ ይሴፈዉ፡ ሕይወተ፡ ዘለዓለም፡ ወከመ፡ ይሕየዉ፡ ሕይወተ፡ አሐዱ፡ አሐዱ፡ እምኔሆሙ፡ ኀምስተ፡ ምእተ፡ ክራማተ።
11 ወለሚካኤል፡ ይቤሎ፡ እግዚአብሔር፡ ሑር፡ አይድዕ፡ ለስምያዛ፡ ወለካልኣን፡ እለ፡ ምስሌሁ፡ እለ፡ ኀብሩ፡ ምስለ፡ አንስት፡ ከመ፡ ይማስኑ፡ ምስሌሆን፡ በኵሉ፡ ርኵሰ፡ ዚኣሆን።
12 ሶበ፡ ይትራገዙ፡ ኵሉ፡ ውሉዶሙ፡ ወሶበ፡ ይሬእዩ፡ ሀጕሎሙ፡ ለፍቁራኒሆሙ፡ እስሮሙ፡ ለሰብዓ፡ ትውልድ፡ በመትሕተ፡ አውግረ፡ ምድር፡ እስከ፡ ዕለተ፡ ኵነኔሆሙ፡ ወተፍጻሜቶሙ፡ እስከ፡ ይትፌጸም፡ ኵነኔ፡ ዘለዓለመ፡ ዓለም።
13 ወበውእቱ፡ መዋዕል፡ ይወስድዎሙ፡ ውስተ፡ መትሕተ፡ እሳት፡ በጻዕር፡ ወበቤተ፡ ሞቅሕ፡ ይትዐጸዉ፡ ለዓለመ፡ ዓለም።
14 ወሶቤሃ፡ ይውዒ፡ ወይማስን፡ እምይእዜ፡ ወእስከ፡ ለዓለም፡ ምስሌሆሙ፡ ኅቡረ፡ ወይትአሰሩ፡ እስከ፡ ተፍጻሜተ፡ ትውልደ፡ ትውልድ።
15 ወአህጕሎሙ፡ ለኵሎሙ፡ ነፍሳተ፡ ተውኔት፡ ወለውሉዶሙኒ፡ ለትጉሃን፡ እስመ፡ ገፍዕዎሙ፡ ለሰብእ።
16 ወአህጕል፡ ኵሎ፡ ግፍዐ፡ እምገጸ፡ ምድር፡ ወኵሉ፡ ምግባር፡ እኩይ፡ ይኅልቅ፡ ወያስተርኢ፡ ተክለ፡ ጽድቅ፡ ወርትዕ፡ ለዓለም፡ ወይከውን፡ ለበረከት፡ ግብር፡ ጽድቅ፡ ወርትዕ፡ ለዓለም፡ በፍሥሓ፡ ይተከሉ።
17 ወይእዜኒ፡ ኵሎሙ፡ ጻድቃን፡ ይገንዩ፡ ወይከውኑ፡ ሕያዋነ፡ እስከ፡ ይወልዱ፡ ዐሠርተ፡ ምእት፡ ወኵሎ፡ መዋዕለ፡ ውርዙቶሙ፡ ወሰንበተ፡ ዚኣሆሙ፡ ይፌጽሙ፡ በሰላም።
18 ወበእማንቱ፡ መዋዕል፡ ትትገበር፡ ኵላ፡ ምድር፡ በጽድቅ፡ ወኵለንታሃ፡ ትተከል፡ ዕፀወ፡ ወትመልእ፡ በረከተ።
19 ወኵሎ፡ ዕፀወ፡ ሐሤት፡ ይተክሉ፡ ዲቤሃ፡ ወይተክሉ፡ ዲቤሃ፡ አውያነ፡ ወወይን፡ ዘይተከል፡ ዲቤሃ፡ ይገብር፡ ፍሬ፡ ለጽጋብ፡ ወኵሉ፡ ዘርዕ፡ ዘይዘራዕ፡ ዲቤሃ፡ ወአሐቲ፡ መስፈርት፡ ትገብር፡ እልፈ፡ ወአሐቲ፡ መስፈርተ፡ ኤልያስ፡ ትገብር፡ ዐሠርተ፡ ምክያዳተ፡ ዘይት።
20 ወአንተ፡ አንጽሓ፡ ለምድር፡ እምኵሉ፡ ግፍዕ፡ ወእምኵሉ፡ ዐመፃ፡ ወእምኵሉ፡ ኀጢአት፡ ወእምኵሉ፡ ረሲዕ፡ ወእምኵሉ፡ ርኵስ፡ ዘይትገበር፡ በዲበ፡ ምድር፡ ወአኅልቆሙ፡ እምዲበ፡ ምድር።
21 ወይኩኑ፡ ኵሎሙ፡ ውሉደ፡ ሰብእ፡ ጻድቃነ፡ ወይኩኑ፡ ኵሎሙ፡ አሕዛብ፡ ያምልኩ፡ ወይባርኩ፡ ኪያየ፡ ወኵሎሙ፡ ሊተ፡ ይሰግዱ።
22 ወትነጽሕ፡ ምድር፡ እምኵሉ፡ ሙስና፡ ወእምኵሉ፡ ኀጢአት፡ ወእምኵሉ፡ መቅሠፍት፡ ወእምኵሉ፡ ጻዕር፡ ወኢይደግም፡ እንከ፡ እፈኑ፡ ዲቤሃ፡ አይኀ፡ ለትውልደ፡ ትውልድ፡ ወእስከ፡ ለዓለም።
=== chapter 11 ===
[Chapter 11]
1 ወበእማንቱ፡ መዋዕል፡ እፈትሕ፡ መዛግብተ፡ በረከት፡ እለ፡ በሰማያት፡ ከመ፡ አውርዶሙ፡ ዲበ፡ ምድር፡ ዲበ፡ ግብሮሙ፡ ወዲበ፡ ጻማሆሙ፡ ለውሉደ፡ ሰብእ።
2 ሰላም፡ ወርትዕ፡ ሱቱፋነ፡ ይከውኑ፡ በኵሉ፡ መዋዕለ፡ ዓለም፡ ወበኵሉ፡ ትውልደ፡ ዓለም።
=== chapter 12 ===
[Chapter 12]
1 እምቅድመ፡ ኵሉ፡ ነገር፡ ተከብተ፡ ሄኖክ፡ ወአልቦ፡ ዘየአምር፡ እምውሉደ፡ ሰብእ፡ በኀበ፡ ተከብተ፡ ወኀበ፡ ሀሎ፡ ወምንተ፡ ኮነ።
2 ወኵሉ፡ ግብሩ፡ ምስለ፡ ቅዱሳን፡ ወምስለ፡ ትጉሃን፡ በመዋዕለ፡ ዚኣሁ።
3 ወአነ፡ ሄኖክ፡ ኮንኩ፡ እባርኮ፡ ለእግዚእ፡ ዐቢይ፡ ወለንጉሠ፡ ዓለም፡ ወናሁ፡ ትጉሃን፡ ይጼውዑኒ፡ ሊተ፡ ለሄኖክ፡ ጸሓፊ፡ ወይቤሉኒ።
4 ሄኖክ፡ ጸሓፌ፡ ጽድቅ፡ ሑር፡ አይድዕ፡ ለትጉሃነ፡ ሰማይ፡ እለ፡ ኀደጉ፡ ሰማየ፡ ልዑለ፡ ወምቅዋመ፡ ቅዱሰ፡ ዘለዓለም፡ ወምስለ፡ አንስት፡ ማሰኑ፡ ወገብሩ፡ ዘከመ፡ ይገብሩ፡ ውሉደ፡ ሰብእ፡ ወነሥኡ፡ ሎሙ፡ አንስተ፡ ወማሰኑ፡ ዐቢየ፡ ሙስና፡ በዲበ፡ ምድር።
5 ወኢይከውን፡ ሎሙ፡ በዲበ፡ ምድር፡ ሰላም፡ ወኅድገተ፡ ኀጢአት።
6 እስመ፡ ይትፌሥሑ፡ በውሉዶሙ፡ ቀትለ፡ ፍቁራኒሆሙ፡ ይሬእዩ፡ ወዲበ፡ ሀጕለ፡ ውሉዶሙ፡ ይግዕሩ፡ ወይስእሉ፡ ለዓለም፡ ወኢይከውን፡ ሎሙ፡ ምሕረት፡ ወኢ፡ ሰላም።
=== chapter 13 ===
[Chapter 13]
1 ወሄኖክ፡ ኀሊፎ፡ ይቤሎ፡ ለአዛዝኤል፡ ኢይከውነከ፡ ሰላም፡ ዐቢይ፡ ኵነኔ፡ ወፅአ፡ ላዕሌከ፡ ይስዕርከ።
2 ወሳሕት፡ ወስእለት፡ ወምሕረት፡ ኢይከውነከ፡ በእንተ፡ ዘመሀርከ፡ ግፍዐ፡ ወበእንተ፡ ኵሉ፡ ምግባረ፡ ፅርፈት፡ ወግፍዕ፡ ወኀጢአት፡ ዘአርአይከ፡ ለውሉደ፡ ሰብእ።
3 አሜሃ፡ ሐዊርየ፡ ነገርክዎሙ፡ ለኵሎሙ፡ ኅቡረ፡ ወእሙንቱ፡ ፈርሁ፡ ኵሎሙ፡ ወፍርሀት፡ ወረዓድ፡ ነሥኦሙ።
4 ወተስእሉኒ፡ ተዝካረ፡ ስእለቶሙ፡ ከመ፡ እጽሐፍ፡ ሎሙ፡ ከመ፡ ይኩኖሙ፡ ኅድገተ፡ ወከመ፡ አነ፡ ኣዕርግ፡ ተዝካረ፡ ስእለቶሙ፡ ኀበ፡ እግዚአብሔር፡ ሰማየ።
5 እስመ፡ እሙንቱ፡ ኢይክሉ፡ እምይእዜ፡ ተናግሮ፡ ወኢያነሥኡ፡ አዕይንቲሆሙ፡ ውስተ፡ ሰማይ፡ እምኀፍረተ፡ አበሳሆሙ፡ ዘተኰነኑ።
6 ወአሜሃ፡ ጸሐፍኩ፡ ተዝካረ፡ ስእለቶሙ፡ ወአስተብቍዖቶሙ፡ በእንተ፡ መንፈሶሙ፡ ወለለ፡ አሐዱ፡ አሐዱ፡ ምግባሮሙ፡ ወበእንተ፡ ዘይስእሉ፡ ከመ፡ ይኩኖሙ፡ ስርየተ፡ ወኑኀተ።
7 ወሐዊርየ፡ ነበርኩ፡ ዲበ፡ ማያተ፡ ዳን፡ በዳን፡ እንተ፡ ይእቲ፡ እምየማነ፡ ዐረበ፡ አርሞን፡ ወእንብብ፡ ተዝካረ፡ ስእለቶሙ፡ እስከ፡ ደቀስኩ።
8 ወናሁ፡ ሕልም፡ መጽአኒ፡ ወራእያት፡ ዲቤየ፡ ወድቁ፡ ወርኢኩ፡ ራእየ፡ መቅሠፍት፡ እንግር፡ ለውሉደ፡ ሰማይ፡ ወእዝልፎሙ።
9 ወነቂህየ፡ መጻእኩ፡ ኀቤሆሙ፡ ወኵሎሙ፡ ግቡኣን፡ ይነብሩ፡ እንዘ፡ ይላሕዉ፡ ብኡብልስያኤል፡ ዘሀለወት፡ በማእከለ፡ ሊባኖስ፡ ወሴኔሴር፡ እንዘ፡ ግልቡባን፡ ገጾሙ።
10 ወተናገርኩ፡ በቅድሜሆሙ፡ ኵሎ፡ ራእያተ፡ ዘርኢኩ፡ በንዋምየ፡ ወወጠንኩ፡ እትናገር፡ ውእተ፡ ቃላተ፡ ጽድቅ፡ ወእዝልፍ፡ ለትጉሃነ፡ ሰማይ።
=== chapter 14 ===
[Chapter 14]
1 ዝ፡ መጽሐፍ፡ ቃለ፡ ጽድቅ፡ ወዘለፋ፡ ትጉሃን፡ እለ፡ እምዓለም፡ በከመ፡ አዘዘ፡ ቅዱስ፡ ወዐቢይ፡ በይእቲ፡ ራእይ።
2 አነ፡ ርኢኩ፡ በንዋምየ፡ ዘአነ፡ ይእዜ፡ እነግር፡ በልሳን፡ ዘሥጋ፡ ወበመንፈስየ፡ ዘወሀበ፡ ዐቢይ፡ አፈ፡ ለሰብእ፡ ይትናገሩ፡ ቦቱ፡ ወይለብዉ፡ በልብ።
3 ከመ፡ ፈጠረ፡ ወወሀበ፡ ለሰብእ፡ ይለብዉ፡ ቃለ፡ አእምሮ፡ ወሊተኒ፡ ፈጠረ፡ ወወሀበኒ፡ እዛለፎሙ፡ ለትጉሃን፡ ውሉደ፡ ሰማይ።
4 አነ፡ ስእለተክሙ፡ ጸሐፍኩ፡ ወበራእይየ፡ ከመ፡ ዝ፡ አስተርአየኒ፡ እስመ፡ ስእለትክሙ፡ ኢትከውነክሙ፡ ውስተ፡ ኵሉ፡ መዋዕለ፡ ዓለም፡ ወኵነኔ፡ ፍጽምት፡ ወፅአት፡ ላዕሌክሙ፡ ወኢይከውነክሙ።
5 ወእምይእዜ፡ ኢተዐርጉ፡ ውስተ፡ ሰማይ፡ እስከ፡ ኵሉ፡ ዓለም፡ ወውስተ፡ ምድር፡ ተነግረ፡ ይእስርክሙ፡ ውስተ፡ ኵሉ፡ መዋዕለ፡ ዓለም።
6 ወእምቅድመ፡ ዝንቱ፡ ርኢክሙ፡ ሀጕለ፡ ውሉድክሙ፡ ፍቁራን፡ ወአልብክሙ፡ ጥራያኒሆሙ፡ አላ፡ ይወድቁ፡ ቅድሜክሙ፡ በሰይፍ።
7 ወስእለትክሙ፡ በእንቲኣክሙ፡ ኢይከውን፡ ወበእንቲኣሆሙኒ፡ ወአንትሙሂ፡ እንዘ፡ ትበክዩ፡ ወታስቆቅዉ፡ ወኢትትናገሩ፡ ወኢምንትኒ፡ ቃለ፡ እምውስተ፡ መጽሐፍ፡ ዘጸሐፍኩ፡ ለክሙ።
8 ወሊተ፡ ከመ፡ ዝ፡ ራእይ፡ አስተርአየኒ፡ ናሁ፡ ደመናት፡ በራእይ፡ ይጼውዑኒ፡ ወጊሜ፡ ይጸውዐኒ፡ ወሩጸተ፡ ከዋክብት፡ ወመባርቅት፡ ያጔጕኡኒ፡ ወያጽዕቁኒ፡ ወነፋሳት፡ በራእይ፡ ያሰርሩኒ፡ ወያጔጕኡኒ፡ ወነሥኡኒ፡ ላዕለ፡ እስከ፡ ሰማይ።
9 ወቦእኩ፡ እስከ፡ እቀርብ፡ ኀበ፡ ጥቅም፡ ዘሕንጽት፡ በእብነ፡ በረድ፡ ወልሳነ፡ እሳት፡ የዐውዳ፡ ወወጠነ፡ ያፍርሀኒ።
10 ወቦእኩ፡ ውስተ፡ ልሳነ፡ እሳት፡ ወቀረብኩ፡ ኀበ፡ ቤት፡ ዐቢይ፡ ዘሕኑጽ፡ በአእባነ፡ በረድ፡ ወዐረፍተ፡ ውእቱ፡ ቤት፡ ከመ፡ ጸፍጸፈ፡ ሰሌዳ፡ በአእባን፡ ዘእምበረድ፡ ወምድሩ፡ በረድ።
11 ወጠፈሩ፡ ከመ፡ ሩጸተ፡ ከዋክብት፡ ወመባርቅት፡ ወማእከሎሙ፡ ኪሩቤል፡ ዘእሳት፡ ወሰማዮሙኒ፡ ማይ።
12 ወእሳት፡ ዘይነድድ፡ በዐውደ፡ ዐረፍቱ፡ ወኆኅቱ፡ ይውዒ፡ በእሳት።
13 ወቦእኩ፡ ውስተ፡ ውእቱ፡ ቤት፡ ወምዉቅ፡ ከመ፡ እሳት፡ ወቈሪር፡ ከመ፡ በረድ፡ ወኢምንትኒ፡ ፍግዐ፡ ወሕይወት፡ አልቦ፡ ውስቴቱ፡ ፍርሀት፡ ከደነኒ፡ ወረዓድ፡ አኀዘኒ።
14 ወእንዘ፡ እትሀወክ፡ ወእርዕድ፡ ወደቁ፡ በገጽየ፡ ወእሬኢ፡ በራእይ።
15 ወናሁ፡ ካልእ፡ ቤት፡ ዘየዐቢ፡ እምዝንቱ፡ ቤት፡ ወኵሉ፡ ኆኅቱ፡ ርኅው፡ በቅድሜየ፡ ወሕኑጽ፡ በልሳነ፡ እሳት።
16 ወበኵሉ፡ ይፈደፍድ፡ በስብሐት፡ ወበክብር፡ ወበዕበይ፡ እስከ፡ ኢይክል፡ ዜንዎተክሙ፡ በእንተ፡ ስብሐቲሁ፡ ወበእንተ፡ ዕበዩ።
17 ወምድሩሰ፡ እሳት፡ ወመልዕልቴሁ፡ መብረቅ፡ ወምርዋጸ፡ ከዋክብት፡ ወጠፈሩኒ፡ እሳት፡ ዘይነድድ።
18 ወነጸርኩ፡ ወርኢኩ፡ ውስቴቱ፡ መንበረ፡ ልዑለ፡ ወራእዩ፡ ከመ፡ አስሐትያ፡ ወክበቡ፡ ከመ፡ ፀሓይ፡ ዘያበርህ፡ ወቃለ፡ ኪሩቤል።
19 ወእመትሕተ፡ መንበሩ፡ ዐቢይ፡ ይወፅኡ፡ አፍላገ፡ እሳት፡ ዘይነድድ፡ ወኢይክሉ፡ ርእዮቶ።
20 ወዐቢይ፡ ስብሐት፡ ይነብር፡ ላዕሌሁ፡ ወዐጽፉሰ፡ ዘይበርህ፡ እምፀሓይ፡ ወይጸዐዱ፡ እምኵሉ፡ በረድ።
21 ወኢይክል፡ መኑሂ፡ እመላእክት፡ በዊአ፡ ወራእየ፡ ገጹ፡ ለክቡር፡ ወስቡሕ፡ ወኢይክል፡ መኑሂ፡ ዘሥጋ፡ ይርአይ፡ ኪያሁ፡ እሳተ።
22 እሳት፡ ዘይነድድ፡ በዐውዱ፡ ወእሳት፡ ዐቢይ፡ ይቀውም፡ ቅድሜሁ፡ ወአልቦ፡ ዘይቀርብ፡ ኀቤሁ፡ እምእለ፡ ዐውዱ፡ ትእልፊተ፡ ትእልፊት፡ ቅድሜሁ፡ ወውእቱሰ፡ ኢይፈቅድ፡ ምክረ፡ ቅድስተ።
23 ወቅዱሳን፡ እለ፡ ይቀርቡ፡ ኀቤሁ፡ ኢይርሕቁ፡ መዓልተ፡ ወሌሊተ፡ ወኢይትአተቱ፡ እምኔሁ።
24 ወአነ፡ ሀለውኩ፡ እስከ፡ ዝንቱ፡ ዲበ፡ ገጽየ፡ ግልባቤ፡ እንዘ፡ እርዕድ፡ ወእግዚእ፡ በአፉሁ፡ ጸውዐኒ፡ ወይቤለኒ፡ ቅረብ፡ ዝየ፡ ሄኖክ፡ ወለቃልየ፡ ቅዱስ።
25 ወአንሥአኒ፡ ወአቅረበኒ፡ ኀበ፡ ኆኅት፡ ወአንሰ፡ ገጽየ፡ ታሕተ፡ እኔጽር።
=== chapter 15 ===
[Chapter 15]
1 ወአውሥአኒ፡ ወይቤለኒ፡ በቃሉ፡ ስማዕ፡ ወኢትፍራህ፡ ሄኖክ፡ ብእሲ፡ ጻድቅ፡ ወጸሓፌ፡ ጽድቅ፡ ቅረብ፡ ዝየ፡ ወስማዕ፡ ቃልየ።
2 ወሑር፡ በሎሙ፡ ለትጉሃነ፡ ሰማይ፡ እለ፡ ተፈኖከ፡ ትስአል፡ በእንቲኣሆሙ፡ አንትሙኒ፡ መፍትው፡ ትስአሉ፡ በእንተ፡ ሰብእ፡ ወአኮ፡ ሰብእ፡ በእንቲኣክሙ።
3 በእንተ፡ ምንት፡ ኀደግሙ፡ ሰማየ፡ ልዑለ፡ ወምቅዋመ፡ ቅዱሰ፡ ዘለዓለም፡ ወምስለ፡ አንስት፡ ሰከብክሙ፡ ወምስለ፡ አዋልደ፡ ሰብእ፡ ረኰስክሙ፡ ወነሣእክሙ፡ ለክሙ፡ አንስተ፡ ወከመ፡ ውሉደ፡ ምድር፡ ገበርክሙ፡ ወወለድክሙ፡ ውሉደ፡ ረዓይተ።
4 ወአንትሙሰ፡ መንፈሳውያን፡ ቅዱሳን፡ ሕያዋነ፡ ሕይወት፡ ዘለዓለም፡ በዲበ፡ አንስት፡ ረኰስክሙ፡ ወበደመ፡ ሥጋ፡ አውለድክሙ፡ ወበደመ፡ ሰብእ፡ ፈተውክሙ፡ ወገበርክሙ፡ ከመ፡ እሙንቱ፡ ይገብሩ፡ ሥጋ፡ ወደመ፡ እለ፡ እሙንቱ፡ ይመውቱ፡ ወይትሀጐሉ።
5 ወበእንተ፡ ዝ፡ ወሀብክዎሙ፡ አንስትያ፡ ከመ፡ ይዝርዑ፡ ላዕሌሆን፡ ወይትወለዱ፡ ውሉደ፡ በላዕሌሆን፡ ከመ፡ ይትገበር፡ ግብር፡ በዲበ፡ ምድር።
6 ወአንትሙሰ፡ ቀዳሚ፡ ኮንክሙ፡ መንፈሳውያነ፡ ሕያዋነ፡ ሕይወት፡ ዘለዓለም፡ ዘኢይመውት፡ በኵሉ፡ ትውልደ፡ ዓለም።
7 ወበእንተ፡ ዝ፡ ኢረሰይኩ፡ ለክሙ፡ አንስቲያ፡ እስመ፡ መንፈሳውያንሰ፡ ውስተ፡ ሰማይ፡ ማኅደሪሆሙ።
8 ወይእዜኒ፡ ረዓይት፡ እለ፡ ተወልዱ፡ እምነፍስት፡ ወሥጋ፡ መናፍስተ፡ እኩያነ፡ ይሰመዩ፡ በዲበ፡ ምድር፡ ወውስተ፡ ምድር፡ ይከውን፡ ማኅደሪሆሙ።
9 ወነፍሳት፡ እኩያን፡ ወፅኡ፡ እምሥጋሆሙ፡ እስመ፡ እመልዕልት፡ ተፈጥሩ፡ እምቅዱሳን፡ ትጉሃን፡ ኮኑ፡ ቀዳሚቶሙ፡ ወቀዳሚ፡ መሠረት፡ መንፈሰ፡ እኩየ፡ ይከውኑ፡ በዲበ፡ ምድር፡ ወመንፈሰ፡ እኩያን፡ ይሰመዩ።
10 ወመናፍስተ፡ ሰማይ፡ ውስተ፡ ሰማይ፡ ይከውን፡ ማኅደሪሆሙ፡ ወመናፍስተ፡ ምድር፡ እለ፡ ተወልዱ፡ በዲበ፡ ምድር፡ ውስተ፡ ምድር፡ ማኅደሪሆሙ።
11 ወመንፈሰ፡ ረዓይትኒ፡ ደመናተ፡ እለ፡ ይገፍዑ፡ ይማስኑ፡ ወይወድቁ፡ ወይትበአሱ፡ ወያደቅቁ፡ በዲበ፡ ምድር፡ ወሐዘነ፡ ይገብሩ፡ ወኢምንተኒ፡ ኢይረክቡ፡ ዘይበልዑ፡ እክለ፡ ወኢይጸምኡ፡ ወኢይትዐወቁ።
12 ወኢይትነሥኡ፡ እሎንቱ፡ ነፍሳት፡ ዲበ፡ ውሉደ፡ ሰብእ፡ ወዲበ፡ አንስት፡ እስመ፡ ወፅኡ።
=== chapter 16 ===
[Chapter 16]
1 አመ፡ መዋዕለ፡ ቀትል፡ ወሙስና፡ ወሞተ፡ ረዓይትኒ፡ እንተ፡ ኀበ፡ ወፅኡ፡ መናፍስት፡ እምነፍስተ፡ ሥጋሆሙ፡ ለይኩን፡ ዘይማስን፡ ወዘእንበለ፡ ይኩን፡ ኵነኔ፡ ከማሁ፡ ይማስኑ፡ እስከ፡ ዕለተ፡ ኵነኔ፡ ዐባይ፡ እምዓለም፡ ይትፌጸም፡ እምትጉሃን፡ ወረሲዓን።
2 ወይእዜኒ፡ ለትጉሃን፡ እለ፡ ፈነውከ፡ ትስአል፡ በእንቲኣሆሙ፡ እለ፡ ቀዲሙ፡ በሰማይ፡ ሀለዉ።
3 ወይእዜኒ፡ አንትሙ፡ በሰማይ፡ ሀለውክሙ፡ ወኅቡኣት፡ ዓዲ፡ ኢተከሥቱ፡ ለክሙ፡ ወምኑነ፡ ምሥጢረ፡ አእመርክሙ፡ ወዘንተ፡ ዜነውክሙ፡ ለአንስት፡ በጽንዐ፡ ልብክሙ፡ ወበዝንቱ፡ ምሥጢር፡ ያበዝኃ፡ አንስት፡ ወሰብእ፡ እኪተ፡ ዲበ፡ ምድር።
4 በሎሙ፡ እንከሰ፡ አልብክሙ፡ ሰላም።
=== chapter 17 ===
[Chapter 17]
1 ወነሥኡኒ፡ ውስተ፡ አሐዱ፡ መካን፡ ኅበ፡ ሀለዉ፡ ህየ፡ ከመ፡ እሳት፡ ዘይነድድ፡ ወሶበ፡ ይፈቅዱ፡ ያስተርእዩ፡ ከመ፡ ሰብእ።
2 ወወሰዱኒ፡ ውስተ፡ መካን፡ ዘዐውሎ፡ ወውስተ፡ ደብር፡ ዘከተማ፡ ርእሱ፡ ይበጽሕ፡ ውስተ፡ ሰማይ።
3 ወርኢኩ፡ አርባዕተ፡ መካናተ፡ ብሩሃተ፡ ወነጐድጓድ፡ ውስተ፡ አጽናፍ፡ ወኀበ፡ ዕመቁ፡ ቀስተ፡ እሳት፡ ወሐጽ፡ ወምጕንጳቲሆሙ፡ ወሰይፈ፡ እሳት፡ ወመባርቅት፡ ኵሉ።
4 ወነሥኡኒ፡ እስከ፡ ማየ፡ ሕይወት፡ ዘይትናገር፡ ወእስከ፡ እሳተ፡ ዐረብ፡ ዘውእቱ፡ ይእኅዝ፡ ኵሎ፡ ዕርበተ፡ ፀሓይ።
5 ወመጻእኩ፡ እስከ፡ ፈለገ፡ እሳት፡ ዘይውኅዝ፡ እሳቱ፡ ከመ፡ ማይ፡ ወይትከዐው፡ ውስተ፡ ባሕር፡ ዐቢይ፡ ዘመንገለ፡ ዐረብ።
6 ወርኢኩ፡ ኵሎ፡ ዐበይተ፡ አፍላገ፡ ወእስከ፡ ዐቢይ፡ ጽልመት፡ በጻሕኩ፡ ወሖርኩ፡ ኀበ፡ ኵሉ፡ ዘሥጋ፡ ያንሶሱ።
7 ወርኢኩ፡ አድባረ፡ ቆራባት፡ እለ፡ ክረምት፡ ወምክዓወ፡ ማይ፡ ዘኵሉ፡ ቀላይ።
8 ወርኢኩ፡ አፉሆሙ፡ ለኵሎሙ፡ አፍላገ፡ ምድር፡ ወአፉሃ፡ ለቀላይ።
=== chapter 18 ===
[Chapter 18]
1 ወርኢኩ፡ መዛግብተ፡ ኵሉ፡ ነፋሳት፡ ወርኢኩ፡ ከመ፡ ቦሙ፡ አሰርገወ፡ ኵሎ፡ ፍጥረተ፡ ወመሠረታቲሃ፡ ለምድር።
2 ወርኢኩ፡ እብነ፡ ማእዘንተ፡ ምድር፡ ወርኢኩ፡ አርባዕተ፡ ነፋሳተ፡ እለ፡ ይጸውርዋ፡ ለምድር፡ ወለጽንዐ፡ ሰማይ።
3 ወርኢኩ፡ ከመ፡ ነፋሳት፡ ይረብብዋ፡ ለልዕልና፡ ሰማይ፡ ወእሙንቱ፡ ይቀውሙ፡ ማእከለ፡ ሰማይ፡ ወምድር፡ ወእሙንቱ፡ ውእቶሙ፡ አዕማደ፡ ሰማይ።
4 ወርኢኩ፡ ነፋሳተ፡ እለ፡ ይመይጥዋ፡ ለሰማይ፡ እለ፡ ያዐርቡ፡ ክበበ፡ ፀሓይ፡ ወኵሎ፡ ከዋክብተ።
5 ወርኢኩ፡ ዘዲበ፡ ምድር፡ ነፋሳተ፡ ዘይጸውሩ፡ ደመናተ፡ ወርኢኩ፡ ፍናወ፡ መላእክት፡ ወርኢኩ፡ ውስተ፡ ጽንፈ፡ ምድር፡ ጽንዐ፡ ዘሰማይ፡ መልዕልተ።
6 ወኀለፍኩ፡ መንገለ፡ አዜብ፡ ወይነድድ፡ መዓልተ፡ ወሌሊተ፡ ኀበ፡ ሰብዐቱ፡ አድባር፡ ዘእምእብን፡ ክቡር፡ ሠለስቱ፡ ዘመንገለ፡ ጽባሕ፡ ወሠለስቱ፡ ዘመንገለ፡ አዜብ።
7 ወዘመንገለ፡ ጽባሕሰ፡ ዘእምእብነ፡ ኅብር፡ ወአሐዱ፡ ዘእምእብን፡ ባሕር፡ ወአሐዱኒ፡ ዘእምእብነ፡ ፈውስ፡ ወዘመንገለ፡ አዜብ፡ እምእብን፡ ቀይሕ።
8 ወማእከላይሰ፡ ይጐድእ፡ እስከ፡ ሰማይ፡ ከመ፡ መንበሩ፡ ለእግዚአብሔር፡ ዘእምእብነ፡ ፔካ፡ ወድማኁ፡ ለመንበሩ፡ እምእብነ፡ ሰንፔር።
9 ወእሳተ፡ ዘይነድድ፡ ርኢኩ፡ ወዘሀሎ፡ ውስተ፡ ኵሉ፡ አድባር።
10 ወርኢኩ፡ ህየ፡ መካን፡ ማዕዶቱ፡ ለዐቢይ፡ ምድር፡ ህየ፡ ይትጋብኡ፡ ማያት።
11 ወርኢኩ፡ ንቅዐተ፡ ምድር፡ ዕሙቀ፡ በአዕማዲሁ፡ ለእሳተ፡ ሰማይ፡ ወርኢኩ፡ በውስቴቶሙ፡ አዕማደ፡ ሰማይ፡ ዘእሳት፡ ዘይወርዱ፡ ወአልቦሙ፡ ኍልቊ፡ ኢ፡ መንገለ፡ መልዕልት፡ ወኢ፡ መንገለ፡ ዕመቅ።
12 ወዲበ፡ ውእቱ፡ ንቅዐት፡ ርኢኩ፡ መካነ፡ ወኢ፡ ጽንዐ፡ ሰማይ፡ ላዕሌሁ፡ ወኢ፡ መሠረተ፡ ምድር፡ በታሕቴሁ፡ ወኢ፡ ማይ፡ አልቦ፡ ላዕሌሁ፡ ወኢ፡ አዕዋፈ፡ አላ፡ መካነ፡ በድው፡ ውእቱ።
13 ወግሩመ፡ ርኢኩ፡ በህየ፡ ሰብዐተ፡ ከዋክብተ፡ ከመ፡ ዐበይት፡ አድባር፡ ዘይነድዱ፡ ወከመ፡ መንፈስ፡ ዘይሴአለኒ።
14 ይቤ፡ መልአክ፡ ዝ፡ ውእቱ፡ መካነ፡ ተፍጻሜቱ፡ ለሰማይ፡ ወለምድር፡ ቤተ፡ ሞቅሕ፡ ኮኖሙ፡ ዝንቱ፡ ለከዋክብተ፡ ሰማይ፡ ወለኀይለ፡ ሰማይ።
15 ወከዋክብት፡ እለ፡ ያንኰረኵሩ፡ ዲበ፡ እሳት፡ ወእሉ፡ እሙንቱ፡ እለ፡ ኀለፉ፡ ትእዛዘ፡ እግዚአብሔር፡ እምቅድመ፡ ጽባሖሙ፡ እስመ፡ ኢመጽኡ፡ በጊዜሆሙ።
16 ወተምዕዖሙ፡ ወአሰሮሙ፡ እስከ፡ ጊዜ፡ ተፍጻሜተ፡ ኀጢአቶሙ፡ በዓመተ፡ ምሥጢር።
=== chapter 19 ===
[Chapter 19]
1 ወይቤለኒ፡ ኡርኤል፡ በዝየ፡ ተደሚሮሙ፡ መላእክት፡ ምስለ፡ አንስት፡ ይቀውሙ፡ መናፍስቲሆሙ፡ ወብዙኀ፡ ራእየ፡ ከዊኖሙ፡ አርኰስዎሙ፡ ለሰብእ፡ ወያስሕትዎሙ፡ ለሰብእ፡ ከመ፡ ይሡዑ፡ ለአጋንንት፡ ከመ፡ አማልክት፡ እስመ፡ በዕለት፡ ዐባይ፡ ኵነኔ፡ በዘይትኴነኑ፡ እስከ፡ ይትፌጸሙ።
2 ወአንስቲያሆሙኒ፡ አስሒቶን፡ መላእክተ፡ ከመ፡ ሰላማውያት፡ ይከውና።
3 ወአነ፡ ሄኖክ፡ ርኢኩ፡ አርአያ፡ ባሕቲትየ፡ አጽናፈ፡ ኵሎ፡ ወአልቦ፡ ዘርእየ፡ እምሰብእ፡ ከመ፡ አነ፡ ርኢኩ።
=== chapter 20 ===
[Chapter 20]
1 ወዝንቱ፡ ውእቱ፡ አስማቲሆሙ፡ ለእለ፡ ይተግሁ፡ ቅዱሳን፡ መላእክት።
2 ኡርኤል፡ አሐዱ፡ እመላእክት፡ ቅዱሳን፡ እስመ፡ ዘረዓም፡ ወዘረዓድ።
3 ሩፋኤል፡ አሐዱ፡ እመላእክት፡ ቅዱሳን፡ ዘመናፍስተ፡ ሰብእ።
4 ራጉኤል፡ አሐዱ፡ እመላእክት፡ ቅዱሳን፡ ዘይትቤቀሎ፡ ለዓለም፡ ወለብርሃናት።
5 ሚካኤል፡ አሐዱ፡ እመላእክት፡ ቅዱሳን፡ እስመ፡ በዲበ፡ ሠናይቱ፡ ለሰብእ፡ ተአዛዚ፡ ዲበ፡ ሕዝብ።
6 ሠረቃኤል፡ አሐዱ፡ እመላእክት፡ ቅዱሳን፡ ዘዲበ፡ መናፍስተ፡ ዕጓለ፡ እመሕያው፡ ዘመናፍስተ፡ የኀጥኡ።
7 ገብርኤል፡ አሐዱ፡ እመላእክት፡ ቅዱሳን፡ ዘዲበ፡ አኪስት፡ ወዘዲበ፡ ገነት፡ ወዘኪሩቤል።
=== chapter 21 ===
[Chapter 21]
2 ወርኢኩ፡ በህየ፡ ግብረ፡ ግሩመ፡ ኢ፡ ሰማየ፡ ልዑለ፡ ወኢ፡ ምድረ፡ ሱርርተ፡ አላ፡ መካነ፡ በድው፡ ዘድልው፡ ወግሩም።
3 ወህየ፡ ርኢኩ፡ ሰብዓተ፡ ከዋክብተ፡ ሰማይ፡ እሱራን፡ በላዕሌሁ፡ ኅቡረ፡ ከመ፡ አድባር፡ ዐበይት፡ ወከመ፡ እሳት፡ እንዘ፡ ይነድዱ።
4 ይእተ፡ ጊዜ፡ እቤ፡ በእንተ፡ አይ፡ ኀጢአት፡ ተአስሩ፡ ወበእንተ፡ ምንት፡ ዝየ፡ ተገድፉ።
5 ወይቤለኒ፡ ኡርኤል፡ አሐዱ፡ እመላእክት፡ ቅዱሳን፡ ዘምስሌየ፡ ውእቱ፡ ወይመርሐኒ፡ ወይቤ፡ ሄኖክ፡ በእንተ፡ ምንት፡ ትሴአል፡ ወበእንተ፡ መኑ፡ ትጤይቅ፡ ወትጽሕቅ።
6 እሉ፡ እሙንቱ፡ መላእክት፡ እለ፡ ኀለፉ፡ ትእዛዘ፡ እግዚአብሔር፡ ልዑል፡ ወተአስሩ፡ በዝየ፡ እስከ፡ ይትፌጸም፡ ትእልፊተ፡ ዓለም፡ ኍልቈ፡ መዋዕለ፡ ኀጢአቶሙ።
7 ወእምህየ፡ ሖርኩ፡ ካልአ፡ መካነ፡ እም፡ ዝ፡ ዘይጌርም፡ ወርኢኩ፡ ግብረ፡ ግሩመ፡ እሳት፡ ዐቢይ፡ በህየ፡ ዘይነድድ፡ ወያንበለብል፡ ወሞሠርት፡ ቦቱ፡ ወወሰኑ፡ እስከ፡ ቀላይ፡ ፍጹም፡ አዕማደ፡ እሳት፡ ዐበይት፡ ዘያወርድዎሙ፡ ወኢ፡ አምጣኖ፡ ወኢ፡ ዕበዮ፡ ኢክህልኩ፡ ነጽሮ፡ ወስእንኩ፡ ነጽሮ፡ ዐይኑ።
8 ውእተ፡ ጊዜ፡ እቤ፡ እፎ፡ ግሩም፡ ዝንቱ፡ መካን፡ ወሕማም፡ ለነጽሮ።
9 ውእተ፡ ጊዜ፡ አውሥአኒ፡ ኡርኤል፡ አሐዱ፡ እመላእክት፡ ቅዱሳን፡ ዘምስሌየ፡ ሀለወ፡ ወአውሥአኒ፡ ወይቤለኒ፡ ሄኖክ፡ ምንተ፡ ውእቱ፡ ፍርሀትከ፡ ከመ፡ ዝ፡ ወድንጋፄከ፡ በእንተ፡ ዝ፡ ግሩም፡ መካን፡ ወቅድመ፡ ገጹ፡ ለዝ፡ ሕማም።
10 ወይቤለኒ፡ ዝ፡ መካን፡ ቤተ፡ ሞቅሖሙ፡ ለመላእክት፡ ወበህየ፡ ይትአኀዙ፡ እስከ፡ ለዓለም።
=== chapter 22 ===
[Chapter 22]
1 ወእምህየ፡ ሖርኩ፡ ካልአ፡ መካነ፡ ወአርአየኒ፡ በምዕራብ፡ ደብረ፡ ዐቢየ፡ ወነዋኀ፡ ወኰኵሐ፡ ጽኑዐ።
2 ወአርባዕቱ፡ መካናት፡ ሠናያት፡ ወበውስቴቱ፡ ዕሙቅ፡ ወርሒብ፡ ወልሙጽ፡ ጥቀ፡ ከመ፡ ልሙጽ፡ ዘያንኰረኵር፡ ወዕሙቅ፡ ወጽልመት፡ ለነጽሮ።
3 ውእተ፡ ጊዜ፡ አውሥአኒ፡ ሩፋኤል፡ አሐዱ፡ እመላእክት፡ ቅዱሳን፡ ዘሀለወ፡ ምስሌየ፡ ወይቤለኒ፡ እላ፡ መካናት፡ ሠናያት፡ ከመ፡ ይትጋብኡ፡ ዲቤሆን፡ መናፍስቲሆሙ፡ ለምዉታን፡ ሎሙ፡ እሎንቱ፡ ተፈጥሩ፡ ወዝየ፡ ያስተጋብኡ፡ ነፍሳተ፡ ውሉደ፡ ሰብእ።
4 ወእላንቱ፡ መካናት፡ ኀበ፡ ያነብርዎሙ፡ ገብሩ፡ እስከ፡ ዕለተ፡ ኵነኔሆሙ፡ ወእስከ፡ አመ፡ ዕድሜሆሙ፡ ወዕድሜ፡ ዐቢይ፡ ውእቱ፡ እስከ፡ አመ፡ ኵነኔ፡ ዐቢይ፡ በላዕሌሆሙ።
5 ወርኢኩ፡ መናፍስተ፡ ውሉደ፡ ሰብእ፡ እንዘ፡ ምዉታን፡ ውእቶሙ፡ ወቃሎሙ፡ ይበጽሕ፡ እስከ፡ ሰማይ፡ ወይሰኪ።
6 ውእተ፡ ጊዜ፡ ተስእልክዎ፡ ለሩፋኤል፡ መልአክ፡ ዘሀሎ፡ ምስሌየ፡ ወእቤሎ፡ ዝ፡ መንፈስ፡ ዘመኑ፡ ውእቱ፡ ዘከመ፡ ዝ፡ ቃሉ፡ ይበጽሕ፡ እስከ፡ ሰማይ፡ ወይሰኪ።
7 ወአውሥአኒ፡ ወይቤለኒ፡ እንዘ፡ ይብል፡ ዝንቱ፡ መንፈስ፡ ውእቱ፡ ዘይወፅእ፡ እምአቤል፡ ዘቀተሎ፡ ቃኤል፡ እኁሁ፡ ወይሰኪ፡ ኪያሁ፡ እስከ፡ አመ፡ ይትሀጐሉ፡ ዘርዑ፡ እምገጸ፡ ምድር፡ ወእምዘርዐ፡ ሰብእ፡ ይማስን፡ ዘርዑ።
8 ወውእተ፡ ጊዜ፡ ተስእልክዎ፡ በእንቲኣሁ፡ ወበእንተ፡ ኵነኔ፡ ኵሉ፡ ወእቤ፡ በእንተ፡ ምንት፡ ተፈልጠ፡ አሐዱ፡ እምነ፡ አሐዱ።
9 ወአውሥአኒ፡ ወይቤለኒ፡ እሎንቱ፡ ሠለስቱ፡ ተገብሩ፡ ከመ፡ ይፍልጡ፡ መንፈሶሙ፡ ለምዉታን፡ ወከመ፡ ዝ፡ ተፈልጡ፡ ነፍሶሙ፡ ለጻድቃን፡ ዝ፡ ውእቱ፡ ነቅዐ፡ ማይ፡ ዘበላዕሌሁ፡ ብርሃን።
10 በከመ፡ ከማሁ፡ ተፈጥረ፡ ለኃጥኣን፡ ሶበ፡ ይመውቱ፡ ወይትቀበሩ፡ ውስተ፡ ምድር፡ ወኵነኔ፡ ኢኮነ፡ በላዕሌሆሙ፡ በሕይወቶሙ።
11 ወበዝየ፡ ይትፈለጣ፡ ነፍሳቲሆሙ፡ ዲበ፡ ዛቲ፡ ዐባይ፡ ጻዕር፡ እስከ፡ አመ፡ ዐባይ፡ ዕለት፡ እንተ፡ ኵነኔ፡ ወመቅሠፍት፡ ወጻዕር፡ ለእለ፡ ይረግሙ፡ እስከ፡ ለዓለም፡ ወበቀል፡ ለነፍሶሙ፡ ወበህየ፡ የአስሮሙ፡ እስከ፡ ለዓለም፡ ወእመኒ፡ ውእቱ፡ እምቅድመ፡ ዓለም።
12 ወከመ፡ ዝ፡ ተፈልጠ፡ ለነፍሶሙ፡ ለእለ፡ ይሰክዩ፡ እለ፡ ያርእዩ፡ በእንተ፡ ህጕለት፡ አመ፡ ተቀትሉ፡ በመዋዕለ፡ ኃጥኣን።
13 ወከመ፡ ዝ፡ ተፈጥሩ፡ ለነፍሶሙ፡ ለሰብእ፡ እኩያን፡ እለ፡ ኢኮኑ፡ ጻድቃነ፡ አላ፡ ኃጥኣነ፡ እለ፡ ፍጹማነ፡ አበሳ፡ ወምስለ፡ አባስያን፡ ይከውኑ፡ ከማሆሙ፡ ወነፍሶሙሰ፡ ኢትትቀተል፡ በዕለተ፡ ኵነኔ፡ ወኢይትነሥኡ፡ እም፡ ዝየ።
14 ውእተ፡ ጊዜ፡ ባረክዎ፡ ለእግዚአ፡ ስብሐት፡ ወእቤ፡ ቡሩክ፡ ውእቱ፡ እግዚእየ፡ እግዚአ፡ ስብሐት፡ ወጻድቅ፡ ዘኵሎ፡ ይመልክ፡ እስከ፡ ለዓለም።
=== chapter 23 ===
[Chapter 23]
1 ወእምህየ፡ ርኢኩ፡ ካልአ፡ መካነ፡ መንገለ፡ ዐረብ፡ እስከ፡ አጽናፈ፡ ምድር።
2 ወርኢኩ፡ እሳተ፡ ዘይነድድ፡ ወይረውጽ፡ እንዘ፡ ኢየዐርፍ፡ ወኢይነትግ፡ እምሩጸቱ፡ መዓልተ፡ ወሌሊተ፡ አላ፡ ከማሁ፡ ክመ።
3 ወተስእልኩ፡ እንዘ፡ እብል፡ ዝንቱ፡ ምንት፡ ውእቱ፡ ዘአልቦ፡ ዕረፍት።
4 ውእተ፡ ጊዜ፡ አውሥአኒ፡ ራጉኤል፡ አሐዱ፡ እመላእክት፡ ቅዱሳን፡ ዘሀሎ፡ ምስሌየ፡ ወይቤለኒ፡ ዝንቱ፡ ዘርኢከ፡ ሩጸተ፡ ዘመንገለ፡ ዐረብ፡ እሳት፡ ዘይነድድ፡ ውእቱ፡ ኵሉ፡ ብርሃናተ፡ ሰማይ።
=== chapter 24 ===
[Chapter 24]
1 ወእምህየ፡ ሖርኩ፡ ካልአ፡ መካነ፡ ምድር፡ ወአርአየኒ፡ ደብረ፡ እሳት፡ ዘያንበለብል፡ መዓልተ፡ ወሌሊተ።
2 ወሖርኩ፡ መንገሌሁ፡ ወርኢኩ፡ ሰብዓተ፡ አድባረ፡ ክቡራነ፡ ወኵሉ፡ አሐዱ፡ እምነ፡ አሐዱ፡ እንዘ፡ ይትዌለጥ፡ ወአእባነ፡ ክቡራነ፡ ወሠናያነ፡ ወኵሉ፡ ክቡር፡ ወስቡሕ፡ ራእዮሙ፡ ወሠናይ፡ ገጾሙ፡ ሠለስቱ፡ መንገለ፡ ጽባሕ፡ ወጽኑዓን፡ አሐዱ፡ ዲበ፡ አሐዱ፡ ወሠለስቱ፡ መንገለ፡ ሰሜን፡ አሐዱ፡ ዲበ፡ አሐዱ፡ ጽኑዓን፡ ወቈላት፡ ዕሙቃት፡ ወጠዋያት፡ አሐቲ፡ ለአሐቲ፡ ኢይትቃረባ።
3 ወሳብዕ፡ ደብር፡ ማእከሎሙ፡ ለእሎንቱ፡ ወኑኆሙሰ፡ ይትማሰሉ፡ ኵሎሙ፡ ከመ፡ መንበረ፡ አትራኖስ፡ ወየዐውድዎ፡ ዕፀወ፡ መዐዛ።
4 ወሀሎ፡ ውስቴቶሙ፡ ዕፅ፡ አልቦ፡ ግሙራ፡ አመ፡ ጼነወኒ፡ ወኢ፡ አሐዱ፡ እምውስቴቶሙ፡ ወባዕዳንሂ፡ ዘከማሁ፡ ኢኮነ፡ ዘይምዕዝ፡ እምኵሉ፡ መዐዛ፡ ወቈጽሉሂ፡ ወጽጌሁ፡ ወዕፁ፡ ኢይጸመሒ፡ ለዓለም፡ ወፍሬሁኒ፡ ሠናይ፡ ወፍሬሁሰ፡ ከመ፡ አስካለ፡ በቀልት።
5 ወውእተ፡ ጊዜ፡ እቤ፡ ነዋ፡ ዝንቱ፡ ሠናይ፡ ዕፅ፡ ወሠናይ፡ ለርእይ፡ ወአዳም፡ ቈጽሉ፡ ወፍሬሁኒ፡ ሞገስ፡ ጥቀ፡ ለርእየ፡ ገጽ።
6 ወውእተ፡ ጊዜ፡ አውሥአኒ፡ ሚካኤል፡ አሐዱ፡ እመላእክት፡ ቅዱሳን፡ ወክቡራን፡ ዘምስሌየ፡ ሀሎ፡ ወውእቱ፡ ዘዲቤሆሙ።
=== chapter 25 ===
[Chapter 25]
1 ወይቤለኒ፡ ሄኖክ፡ ምንተ፡ ትሴአል፡ በእንተ፡ መዐዛሁ፡ ለዝ፡ ዕፅ፡ ወትጤይቅ፡ ከመ፡ ታእምር።
2 ውእተ፡ ጊዜ፡ አውሣእክዎ፡ አነ፡ ሄኖክ፡ እንዘ፡ እብል፡ በእንተ፡ ኵሉ፡ እፈቅድ፡ ኣእምር፡ ወፈድፋደሰ፡ በእንተ፡ ዝ፡ ዕፅ።
3 ወአውሥአኒ፡ እንዘ፡ ይብል፡ ዝንቱ፡ ደብር፡ ዘርኢከ፡ ነዋኅ፡ ዘርእሱ፡ ይመስል፡ መንበሮ፡ ለእግዚእ፡ መንበሩ፡ ውእቱ፡ ኀበ፡ ይነብር፡ ቅዱስ፡ ወዐቢይ፡ እግዚአ፡ ስብሐት፡ ንጉሥ፡ ዘለዓለም፡ ሶበ፡ ይወርድ፡ የሐውጻ፡ ለምድር፡ በሠናይ።
4 ወዝንቱኒ፡ ዕፀ፡ መዐዛ፡ ሠናይ፡ ወኢ፡ አሐዱ፡ ዘሥጋ፡ አልቦ፡ ሥልጣን፡ ከመ፡ ይግስሶ፡ እስከ፡ አመ፡ ዐቢይ፡ ኵነኔ፡ አመ፡ ይትቤቀል፡ ኵሎ፡ ወይትፌጸም፡ እስከ፡ ለዓለም፡ ዝኩ፡ ለጻድቃን፡ ወለትሑታን፡ ይትወሀብ።
5 እምፍሬ፡ ዚኣሁ፡ ወይትወሀብ፡ ለኅሩያነ፡ ሕይወት፡ መንገለ፡ መስዕ፡ ይተከል፡ ውስተ፡ መካን፡ ቅዱስ፡ መንገለ፡ ቤቱ፡ ለእግዚእ፡ ንጉሥ፡ ዘለዓለም።
6 ውእተ፡ ጊዜ፡ ይትፌሥሑ፡ በፍሥሓ፡ ወይትሐሠዩ፡ ውስተ፡ ቅዱስ፡ ያበውኡ፡ ሎቱ፡ መዐዛ፡ በበ፡ አዕፅምቲሆሙ፡ ወሕይወተ፡ ብዙኀ፡ የሐይዉ፡ በዲበ፡ ምድር፡ በከመ፡ ሐይዉ፡ አበዊከ፡ ወበመዋዕሊሆሙ፡ ሐዘን፡ ወሕማም፡ ወጻማ፡ ወመቅሠፍት፡ ኢይገስሶሙ።
7 ውእተ፡ ጊዜ፡ ባረክዎ፡ ለእግዚአ፡ ስብሐት፡ ንጉሥ፡ ዘለዓለም፡ እስመ፡ አስተዳለወ፡ ከመ፡ ዝ፡ ለሰብእ፡ ጻድቃን፡ ወከመ፡ ዝ፡ ፈጠረ፡ ወይቤ፡ የሀብዎሙ።
=== chapter 26 ===
[Chapter 26]
1 ወእምህየ፡ ሖርኩ፡ ማእከለ፡ ምድር፡ ወርኢኩ፡ መካነ፡ ቡሩክ፡ ወጥሉለ፡ ዘቦቱ፡ አዕጹቅ፡ ዘይነብር፡ ወይሠርጽ፡ እምዕፅ፡ ዘተመትረ።
2 ወበህየ፡ ርኢኩ፡ ደብረ፡ ቅዱሰ፡ ወመትሕተ፡ ደብር፡ ማይ፡ ዘመንገለ፡ ጽባሑ፡ ወውሕዘቱ፡ መንገለ፡ ሰሜን።
3 ወርኢኩ፡ መንገለ፡ ጽባሕ፡ ካልአ፡ ደብረ፡ ዘይነውኅ፡ እም፡ ዝ፡ ወማእከሎሙ፡ ቈላ፡ ዕሙቅ፡ ወአልቦ፡ ራሕብ፡ ወላቲኒ፡ የሐውር፡ ማይ፡ መንገለ፡ ደብር።
4 ወመንገለ፡ ዐረቡ፡ ለዝ፡ ካልእ፡ ደብር፡ ወይቴሐቶ፡ ሎቱ፡ ወአልቦ፡ ኑኅ፡ ወቈላ፡ ታሕቱ፡ ማእከሎሙ፡ ወካልኣት፡ ቈላት፡ ዕሙቃት፡ ወይቡሳት፡ መንገለ፡ ጽንፈ፡ ሠለስቲሆሙ።
5 ወኵሉ፡ ቈላቱ፡ ዕሙቃት፡ ወአልቦን፡ ራሕብ፡ እምኰኵሕ፡ ጽኑዕ፡ ወዕፅ፡ ይተከል፡ በላዕሌሆን።
6 ወአንከርኩ፡ በእንተ፡ ኰኵሕ፡ ወአንከርኩ፡ በእንተ፡ ቈላት፡ ወጥቀ፡ አንከርኩ።
=== chapter 27 ===
[Chapter 27]
1 ውእተ፡ ጊዜ፡ እቤ፡ በእንተ፡ ምንት፡ ዛቲ፡ ምድር፡ ቡርክት፡ ወኵለንታሃ፡ ዕፀወ፡ ምልእት፡ ወዛ፡ ቈላ፡ ርግምት፡ ማእከሎሙ።
2 ውእተ፡ ጊዜ፡ አውሥአኒ፡ ኡርኤል፡ አሐዱ፡ እመላእክት፡ ቅዱሳን፡ ዘሀሎ፡ ምስሌየ፡ ወይቤለኒ፡ ዛ፡ ቈላ፡ ርግምት፡ ለርጉማን፡ እስከ፡ ለዓለም፡ ወዝየ፡ ይትጋብኡ፡ ኵሎሙ፡ እለ፡ ይብሉ፡ በአፉሆሙ፡ ላዕለ፡ እግዚአብሔር፡ ቃለ፡ ዘኢይደሉ፡ ወበእንተ፡ ስብሐተ፡ ዚኣሁ፡ ይትናገሩ፡ ዕጹባተ፡ ዝየ፡ ያስተጋብእዎሙ፡ ወዝየ፡ ምኵናኖሙ።
3 ወበደኃሪ፡ መዋዕል፡ ይከውን፡ ላዕሌሆሙ፡ አርአያ፡ ኵነኔ፡ ዘበጽድቅ፡ በቅድመ፡ ጻድቃን፡ ለዓለም፡ ወኵሎ፡ መዋዕለ፡ በዝየ፡ ይባርክዎ፡ መሓርያን፡ ለእግዚአ፡ ስብሐት፡ ንጉሥ፡ ዘለዓለም።
4 ወበመዋዕለ፡ ኵነኔሆሙ፡ ይባርክዎ፡ በምሕረቱ፡ በከመ፡ ከፈሎሙ።
5 ውእተ፡ ጊዜ፡ አነኒ፡ ባረክዎ፡ ለእግዚአ፡ ስብሐት፡ ወሎቱ፡ ነገርኩ፡ ወዘከርኩ፡ በከመ፡ ይደሉ፡ ለዕበዩ።
=== chapter 28 ===
[Chapter 28]
1 ወእምህየ፡ ሖርኩ፡ መንገለ፡ ጽባሕ፡ ማእከላ፡ ለደብረ፡ መድበራ፡ ወርኢክዎ፡ ገዳመ፡ ባሕቲቶ፡ ወባሕቱ፡ ምሉእ፡ ዕፀወ።
2 እምነ፡ ዝንቱ፡ ዘርዕ፡ ወማይ፡ ይፈለፍል፡ በላዕሉ፡ ወበላዕሉ፡ ያስተርኢ፡ አስራብ፡ ከመ፡ ብዙኅ፡ ዘይሰርብ፡ ከመ፡ መንገለ፡ መስዕ፡ መንገለ፡ ዐረብ፡ ወእምኵለሄኒ፡ የዐርግ፡ ወእምህየኒ፡ ማይ፡ ወጠል።
=== chapter 29 ===
[Chapter 29]
1 ወሖርኩ፡ ውስተ፡ መካን፡ ካልእ፡ እምነ፡ መድበራ፡ መንገለ፡ ጽባሑ፡ ለውእቱ፡ ደብር፡ ቀረብኩ።
2 ወበህየ፡ ርኢኩ፡ ዕፀወ፡ ኵነኔ፡ ፈድፋደ፡ ቈሳቊሰ፡ መዐዛ፡ ዘስኂን፡ ወከርቤ፡ ወዕፀውኒ፡ ኢይትማሰሎ።
=== chapter 30 ===
[Chapter 30]
1 ወላዕሌሁ፡ ላዕለ፡ እሎንቱ፡ ላዕለ፡ ደብረ፡ ጽባሕ፡ ወአኮ፡ ርሑቅ፡ ወርኢኩ፡ መካነ፡ ካልአ፡ ቈላተ፡ ማይ፡ ከመ፡ ዘኢይትዌዳእ።
2 ወርኢኩ፡ ዕፀ፡ ሠናየ፡ ወመዐዛሁ፡ ከመ፡ ዘሰኪኖን።
3 ወመንገለ፡ ክነፊሆሙ፡ ለቈላት፡ እሎንቱ፡ ርኢኩ፡ ቀናንሞስ፡ ዘመዐዛ፡ ወዲበ፡ እልክቱ፡ ቀረብኩ፡ ዘመንገለ፡ ጽባሕ።
=== chapter 31 ===
[Chapter 31]
1 ወርኢኩ፡ ካልአ፡ ደብረ፡ ዘበውስቴቱ፡ ዕፀው፡ ወይመጽእ፡ ማይ፡ እምኔሁ፡ ከመ፡ ኔቄጥሮ፡ ዘስሙ፡ ሳሪራ፡ ወከልበኔ።
2 ወዲበ፡ ውእቱ፡ ደብር፡ ርኢኩ፡ ደብረ፡ ካልአ፡ ወውስቴቱ፡ ዕፀው፡ ዘዓልዋ፡ ወእልኩ፡ ዕፀው፡ ምሉኣን፡ ዘከመ፡ ከርካዕ፡ ዘጽኑዕ።
3 ወሶበ፡ ይነሥእዎ፡ ለውእቱ፡ ፍሬ፡ ይኄይስ፡ እምኵሉ፡ አፈው።
=== chapter 32 ===
[Chapter 32]
1 ወእምድኅረ፡ እሉ፡ አፈው፡ ለመስዕ፡ እንዘ፡ እኔጽር፡ መልዕልተ፡ አድባር፡ ርኢኩ፡ ሰብዓተ፡ አድባረ፡ ምሉኣነ፡ ሰንበልት፡ ቅድው፡ ወዕፀወ፡ መዐዛ፡ ወቀናንሞስ፡ ወፕፕሬ።
2 ወእምህየ፡ ሖርኩ፡ መልዕልተ፡ ርእሶሙ፡ ለእልክቱ፡ አድባር፡ እንዘ፡ ርሑቅ፡ ውእቱ፡ ለጽባሕ፡ ወኀለፍኩ፡ ዲበ፡ ባሕረ፡ ኤርትራ፡ ወእምኔሁ፡ ርሑቀ፡ ኮንኩ፡ ወኀለፍኩ፡ መልዕልቶ፡ ለመልአክ፡ ዙጥኤል።
3 ወመጻእኩ፡ ውስተ፡ ገነተ፡ ጽድቅ፡ ወርኢኩ፡ ከሃ፡ ከሃቲሆሙ፡ ለእልክቱ፡ ዕፀው፡ ዕፀወ፡ ብዙኃነ፡ ወዐቢያነ፡ ይበቍሉ፡ በህየ፡ ወእንዘ፡ ጼናሆሙ፡ ሠናይ፡ ዐቢያን፡ ወሥኖሙ፡ ብዙኅ፡ ወስቡሓን፡ ወዕፀ፡ ጥበብ፡ ዘእምኔሁ፡ በሊዖሙ፡ የአምርዋ፡ ለጥበብ፡ ዐባይ።
4 ወይመስል፡ ሐመረ፡ ጽራዕ፡ ወፍሬሁኒ፡ ከመ፡ አስካለ፡ ወይን፡ ጥቀ፡ ሠናይ፡ ወጼናሁ፡ ለውእቱ፡ ዕፅ፡ የሐውር፡ ወይበጽሕ፡ ነዋኅ።
5 ወእቤ፡ ዝ፡ ዕፅ፡ ሠናይ፡ ወከመ፡ ሠናይ፡ ወፍሡሕ፡ ርእየቱ።
6 ወአውሥአኒ፡ ቅዱስ፡ ሩፋኤል፡ መልአክ፡ ዘምስሌየ፡ ሀሎ፡ ወይቤለኒ፡ ዝ፡ ውእቱ፡ ዕፀ፡ ጥበብ፡ ዘእምኔሁ፡ በልዑ፡ አቡከ፡ አረጋዊ፡ ወእምከ፡ ዕቤራይት፡ እለ፡ ቀደሙከ፡ ወአእመርዋ፡ ለጥበብ፡ ወተፈትሐ፡ አዕይንቲሆሙ፡ ወአእመሩ፡ ከመ፡ ዕራቃኒሆሙ፡ ሀለዉ፡ ወተሰዱ፡ እምገነት።
=== chapter 33 ===
[Chapter 33]
1 ወእምህየ፡ ሖርኩ፡ እስከ፡ አጽናፈ፡ ምድር፡ ወርኢኩ፡ በህየ፡ አራዊተ፡ ዐበይት፡ ወይትዌለጥ፡ አሐዱ፡ እምካልኡ፡ ወአዕዋፍሂ፡ ይትዌለጥ፡ ገጾሙ፡ ወስኖሙ፡ ወቃሎሙሂ፡ ይትዌለጥ፡ አሐዱ፡ እምካልኡ።
2 ወበጽባሖሙ፡ ለእሉ፡ አራዊት፡ ርኢኩ፡ አጽናፈ፡ ምድር፡ በኀበ፡ ሰማይ፡ የዐርፍ፡ ወኀዋኅወ፡ ርኅዋተ።
3 ወርኢኩ፡ እፎ፡ ይወፅኡ፡ ከዋክብተ፡ ሰማይ፡ ወኈለቁ፡ ዘእምኔሁ፡ ይወፅኡ፡ ኀዋኅወ፡ ወጸሐፍኩ፡ ኵሎ፡ ሙፃኦሙ፡ ለለ፡ አሐዱ፡ አሐዱ፡ በበ፡ ኍልቆሙ፡ ወአስማቲሆሙ፡ በደርጎሙ፡ ወምንባሮሙ፡ ወጊዜሆሙ፡ ወአውራኂሆሙ፡ በከመ፡ አርአየኒ፡ ኡርኤል፡ መልአክ፡ ዘምስሌየ፡ ሀሎ።
4 ወኵሎ፡ አርአየኒ፡ ሊተ፡ ወጸሐፎ፡ ወዓዲ፡ አስማቲሆሙ፡ ጸሐፈ፡ ሊተ፡ ወትእዛዛቲሆሙ፡ ወምግባራቲሆሙ።
=== chapter 34 ===
[Chapter 34]
1 ወእምህየ፡ ሖርኩ፡ መንገለ፡ መስዕ፡ በአጽናፈ፡ ምድር፡ ወበህየ፡ ርኢኩ፡ መንክረ፡ ዐቢየ፡ ወስቡሐ፡ በአጽናፊሃ፡ ለኵላ፡ ምድር።
2 ወበህየ፡ ርኢኩ፡ ኀዋኅወ፡ ሰማይ፡ ፍቱሓተ፡ በሰማይ፡ ሠለስተ፡ በበ፡ አሐዱ፡ እምኔሆሙ፡ ይወፅኡ፡ ነፋሳት፡ ወመንገለ፡ መስዕ፡ ሶበ፡ ይነፍኅ፡ ቍር፡ ወበረድ፡ ወአስሐትያ፡ ወሐመዳ፡ ወጠል፡ ወዝናም።
3 ወእምአሐቲ፡ ኆኅት፡ በሠናይ፡ ይነፍኁ፡ ወሶበ፡ በክልኤሆሙ፡ ኀዋኅው፡ ይነፍኁ፡ በኀይል፡ ወበጻዕር፡ ይከውን፡ ዲበ፡ ምድር፡ ወበኀይል፡ ይነፍኁ።
=== chapter 35 ===
[Chapter 35]
1 ወእምህየ፡ ሖርኩ፡ መንገለ፡ ዐረብ፡ በአጽናፈ፡ ምድር፡ ወርኢኩ፡ በህየ፡ ሠለስተ፡ ኀዋኅወ፡ ሰማይ፡ ርኅዋተ፡ በከመ፡ ርኢኩ፡ በምሥራቁ፡ ወበአምጣነ፡ ኀዋኅዉ፡ ወበአምጣነ፡ ሙፃኡ።
=== chapter 36 ===
[Chapter 36]
1 ወእምህየ፡ ሖርኩ፡ መንገለ፡ አዜብ፡ በአጽናፈ፡ ምድር፡ ወበህየ፡ ርኢኩ፡ ሠለስተ፡ ኀዋኅወ፡ ሰማይ፡ ርኅዋተ፡ ወይወፅእ፡ እምህየ፡ አዜብ፡ ወጠል፡ ወዝናም፡ ወነፋስ።
2 ወእምህየ፡ ሖርኩ፡ መንገለ፡ ጽባሕ፡ በአጽናፈ፡ ሰማይ፡ ወበህየ፡ ርኢኩ፡ ሠለስተ፡ ኀዋኅወ፡ ሰማይ፡ ርኅዋተ፡ መንገለ፡ ጽባሕ፡ ወበላዕሌሆሙ፡ ኀዋኅው፡ ንኡሳን።
3 በበ፡ አሐዱ፡ እምእልኩ፡ ኀዋኅው፡ ንኡሳን፡ የኀልፉ፡ ከዋክብተ፡ ሰማይ፡ ወየሐውሩ፡ ምዕራበ፡ በፍኖት፡ እንተ፡ ተርእየት፡ ሎሙ።
4 ወሶበ፡ ርኢኩ፡ ባረኩ፡ ወበኵሉ፡ ጊዜ፡ እባርኮ፡ ለእግዚአ፡ ስብሐት፡ ዘገብረ፡ ተኣምራተ፡ ዐቢያነ፡ ወስቡሓነ፡ ከመ፡ ያርኢ፡ ዕበየ፡ ግብሩ፡ ለመላእክቲሁ፡ ወለነፍሳተ፡ ሰብእ፡ ከመ፡ ይሰብሑ፡ ግብሮ፡ ወኵሉ፡ ተግባሩ፡ ከመ፡ ይርአዩ፡ ግብረ፡ ኀይሉ፡ ወይሰብሕዎ፡ ለግብረ፡ እደዊሁ፡ ዐቢይ፡ ወይባርክዎ፡ እስከ፡ ለዓለም።
=== chapter 37 ===
[Chapter 37]
1 ራእይ፡ ዘርእየ፡ ካልአ፡ ራእየ፡ ጥበብ፡ ዘርእየ፡ ሄኖክ፡ ወልደ፡ ያሬድ፡ ወልደ፡ መላልኤል፡ ወልደ፡ ቃይናን፡ ወልደ፡ ሄኖስ፡ ወልደ፡ ሴት፡ ወልደ፡ አዳም።
2 ወዝ፡ ርእሱ፡ ለነገረ፡ ጥበብ፡ ዘአንሣእኩ፡ እትናገር፡ ወእብል፡ ለእለ፡ የኀድሩ፡ ዲበ፡ የብስ፡ ስምዑ፡ ቀደምት፡ ወርእዩ፡ ደኃርያን፡ ነገረ፡ ቅዱሰ፡ እለ፡ እነግር፡ ቅድመ፡ እግዚአ፡ መናፍስት።
3 እሉ፡ ቀዳሚ፡ ይኄይስ፡ ብሂል፡ ወደኃርያንሂ፡ ኢንከልእ፡ ርእሳ፡ ለጥበብ።
4 ወእስከ፡ ይእዜ፡ ኢተውህበኒ፡ እምቅድመ፡ እግዚአ፡ መናፍስት፡ ዘነሣእኩ፡ ጥበበ፡ በከመ፡ ኀለይኩ፡ በከመ፡ ፈቀደ፡ እግዚአ፡ መናፍስት፡ ዘተውህበኒ፡ እምኔሁ፡ ክፍለ፡ ሕይወት፡ ዘለዓለም።
5 ወኮኑ፡ ብየ፡ ሠለስቱ፡ ምሳሌያት፡ ወአንሰ፡ እብሎሙ፡ ለእለ፡ የኀድሩ፡ ዲበ፡ የብስ።
=== chapter 38 ===
[Chapter 38]
1 ምሳሌ፡ ቀዳሚ፡ ሶበ፡ ያስተርኢ፡ ማኅበረ፡ ጻድቃን፡ ወይትኴነኑ፡ ኃጥኣን፡ በኀጢአቶሙ፡ ወእምገጸ፡ የብስ፡ ይትሀወኩ።
2 ወሶበ፡ ያስተርኢ፡ ጻድቅ፡ በገጾሙ፡ ለጻድቃን፡ እለ፡ ኅሩያን፡ ተግባሮሙ፡ ስቁል፡ በእግዚአ፡ መናፍስት፡ ወያስተርኢ፡ ብርሃን፡ ለጻድቃን፡ ወለኅሩያን፡ እለ፡ የኀድሩ፡ ዲበ፡ የብስ፡ አይቴ፡ ማኅደረ፡ ኃጥኣን፡ ወአይቴ፡ ምዕራፎሙ፡ ለእለ፡ ክሕድዎ፡ ለእግዚአ፡ መናፍስት፡ እምኀየሶሙ፡ ሶበ፡ ኢተወልዱ።
3 ወሶበ፡ ይትከሠታ፡ ኅቡኣቲሆሙ፡ ለጻድቃን፡ ይትኴነኑ፡ ኃጥኣን፡ ወይትሀወኩ፡ ረሲዓን፡ እምገጸ፡ ጻድቃን፡ ወኅሩያን።
4 ወእምይእዜ፡ ኢይከውኑ፡ አዚዛነ፡ ወኢ፡ ልዑላነ፡ እለ፡ ይእኅዝዋ፡ ለምድር፡ ወኢይክሉ፡ ርእየ፡ ገጸ፡ ቅዱሳን፡ እስመ፡ ለእግዚአ፡ መናፍስት፡ ተርእየ፡ ብርሃኑ፡ ለገጸ፡ ቅዱሳን፡ ጻድቃን፡ ወኅሩያን።
5 ወነገሥት፡ አዚዛን፡ በውእቱ፡ ጊዜ፡ ይትሀጐሉ፡ ወይትወሀቡ፡ ውስተ፡ እደ፡ ጻድቃን፡ ወቅዱሳን።
6 ወእምህየ፡ አልቦ፡ ዘያስተምሕር፡ ሎሙ፡ ኀበ፡ እግዚአ፡ ስብሐት፡ እስመ፡ ተወድአ፡ እንቲኣሆሙ፡ ሕይወት።
=== chapter 39 ===
[Chapter 39]
1 ወይከውን፡ በዝንቱ፡ መዋዕል፡ ይወርዱ፡ ደቂቅ፡ ኅሩያን፡ ወቅዱሳን፡ እምልዑላን፡ ሰማያት፡ ወአሐደ፡ ይከውን፡ ዘርዖሙ፡ ምስለ፡ ውሉደ፡ ሰብእ።
2 ወበውእቱ፡ መዋዕል፡ ነሥአ፡ ሄኖክ፡ መጻሕፍተ፡ ቅንአት፡ ወመዓት፡ ወመጻሕፍተ፡ ጕጕአ፡ ወሀውክ፡ ወምሕረት፡ ኢይከውን፡ ላዕሌሆሙ፡ ይቤ፡ እግዚአ፡ መናፍስት።
3 ወበውእቱ፡ ጊዜ፡ መሠጠኒ፡ ደመና፡ ወዐውሎ፡ ነፋስ፡ እምነ፡ ገጻ፡ ለምድር፡ ወአንበረኒ፡ ውስተ፡ ጽንፈ፡ ሰማያት።
4 ወበህየ፡ ርኢኩ፡ ካልአ፡ ራእየ፡ ማኅደሪሆሙ፡ ለጻድቃን፡ ወምስካባቲሆሙ፡ ለቅዱሳን።
5 ወበህየ፡ ርእያ፡ አዕይንትየ፡ ማኅደሪሆሙ፡ ምስለ፡ መላእክት፡ ወምስካባቲሆሙ፡ ምስለ፡ ቅዱሳን፡ ወይስእሉ፡ ወያስተበቍዑ፡ ወይጼልዩ፡ በእንተ፡ ውሉደ፡ ሰብእ፡ ወጽድቅ፡ ከመ፡ ማይ፡ ይውሕዝ፡ በቅድሜሆሙ፡ ወምሕረት፡ ከመ፡ ጠል፡ ውስተ፡ ምድር፡ ከመ፡ ዝ፡ ውእቱ፡ ማእከሎሙ፡ ለዓለመ፡ ዓለም።
6 ወበውእቱ፡ መዋዕል፡ ርእያ፡ አዕይንትየ፡ መካነ፡ ኅሩያን፡ ዘጽድቅ፡ ወዘሃይማኖት፡ ወጽድቅ፡ ይከውን፡ በመዋዕሊሆሙ፡ ለጻድቃን፡ ወኅሩያን፡ ኍልቊ፡ አልቦሙ፡ ቅድሜሁ፡ ለዓለመ፡ ዓለም።
7 ወርኢኩ፡ ማኅደሮሙ፡ መትሕተ፡ አክናፈ፡ እግዚአ፡ መናፍስት፡ ወኵሎሙ፡ ጻድቃን፡ ወኅሩያን፡ በቅድሜሁ፡ ይትለሐዩ፡ ከመ፡ ብርሃነ፡ እሳት፡ ወአፉሆሙ፡ ይመልእ፡ በረከተ፡ ወከናፍሪሆሙ፡ ይሴብሕ፡ ስሞ፡ ለእግዚአ፡ መናፍስት፡ ወጽድቅ፡ ቅድሜሁ፡ ኢየኀልቅ፡ ወርትዕ፡ ቅድሜሁ፡ ኢየኀልቅ።
8 ወበህየ፡ ፈቀድኩ፡ እኅድር፡ ወፈተወቶ፡ ነፍስየ፡ ለውእቱ፡ ማኅደር፡ በህየ፡ ኮነ፡ ክፍልየ፡ ቅድመ፡ እስመ፡ ከመ፡ ዝ፡ ጸንዐ፡ በእንቲኣየ፡ በቅድመ፡ እግዚአ፡ መናፍስት።
9 ወበውእቶን፡ መዋዕል፡ ሰባሕኩ፡ ወአልዐልኩ፡ ስሞ፡ ለእግዚአ፡ መናፍስት፡ በረከተ፡ ወስብሐተ፡ ወሀብኩ፡ እስመ፡ ውእቱ፡ አጽንዐኒ፡ በበረከት፡ ወስብሐት፡ በከመ፡ ፈቃዱ፡ ለእግዚአ፡ መናፍስት።
10 ወጕንዱየ፡ ርእያ፡ አዕይንትየ፡ በውእቱ፡ መካን፡ ወባረክዎ፡ ወሰባሕክዎ፡ እንዘ፡ እብል፡ ቡሩክ፡ ውእቱ፡ ወይትባረክ፡ እምቅድመ፡ ዓለም፡ ወእስከ፡ ለዓለም።
11 ወበቅድሜሁ፡ አልቦ፡ ማኅለቅት፡ ውእቱ፡ የአምር፡ ዘእንበለ፡ ይትፈጠር፡ ዓለም፡ ምንት፡ ውእቱ፡ ዓለም፡ ወለትውልደ፡ ትውልድ፡ ዘትከውን።
12 ይባርኩከ፡ እለ፡ ኢይነውሙ፡ ወይቀውሙ፡ በቅድመ፡ ስብሐቲከ፡ ወይባርኩ፡ ወይሴብሑ፡ ወያሌዕሉ፡ እንዘ፡ ይብሉ፡ ቅዱስ፡ ቅዱስ፡ ቅዱስ፡ እግዚአ፡ መናፍስት፡ ወይመልእ፡ ምድረ፡ መናፍስተ።
13 ወበህየ፡ ርእያ፡ አዕይንትየ፡ ኵሎ፡ እለ፡ ኢይነውሙ፡ ይቀውሙ፡ ቅድሜሁ፡ ወይባርኩ፡ ወይብሉ፡ ቡሩክ፡ አንተ፡ ወቡሩክ፡ ስሙ፡ ለእግዚአ፡ መናፍስት፡ ለዓለመ፡ ዓለም።
14 ወተወለጠ፡ ገጽየ፡ እስመ፡ ስእንኩ፡ ነጽሮ።
=== chapter 40 ===
[Chapter 40]
1 ወርኢኩ፡ እምድኅረዝ፡ አእላፈ፡ አእላፋት፡ ወትእልፊተ፡ አእላፋት፡ ወአልቦሙ፡ ኍልቊ፡ ወሐሳብ፡ ለእለ፡ ይቀውሙ፡ ቅድመ፡ እግዚአ፡ መናፍስት።
2 ወርኢኩ፡ ወበአርባዕቱ፡ ክነፊሁ፡ ለእግዚአ፡ መናፍስት፡ አርባዕተ፡ ገጻት፡ ካልኣተ፡ እምእለ፡ ይቀውሙ፡ ወአስማቲሆሙ፡ አእመርኩ፡ ዘአይድዐኒ፡ መልአክ፡ ዘመጽአ፡ ምስሌየ፡ ወኵሎ፡ ኅቡኣተ፡ አርአየኒ።
3 ወሰማዕኩ፡ ቃሎሙ፡ ለእልክቱ፡ ገጽ፡ አርባዕቱ፡ ገጽ፡ እንዘ፡ ይሴብሑ፡ ቅድመ፡ እግዚአ፡ መናፍስት።
4 ወቃል፡ ቀዳማዊ፡ ይባርኮ፡ ለእግዚአ፡ መናፍስት፡ ለዓለመ፡ ዓለም።
5 ወቃለ፡ ካልአ፡ ሰማዕኩ፡ እንዘ፡ ይባርኮ፡ ለኅሩይ፡ ወለኅሩያን፡ እለ፡ ስቁላን፡ ለእግዚአ፡ መናፍስት።
6 ወሣልሰ፡ ቃለ፡ ሰማዕኩ፡ እንዘ፡ ይስእሉ፡ ወይጼልዩ፡ በእንተ፡ እለ፡ የኀድሩ፡ ውስተ፡ የብስ፡ ወያስተበቍዑ፡ በስሙ፡ ለእግዚአ፡ መናፍስት።
7 ወቃለ፡ ራብዐየ፡ ሰማዕኩ፡ እንዘ፡ ይሰድዶሙ፡ ለሰይጣናት፡ ወኢየኀድጎሙ፡ ይባኡ፡ ኀበ፡ እግዚአ፡ መናፍስት፡ ከመ፡ ያስተዋድይዎሙ፡ ለእለ፡ የኀድሩ፡ ዲበ፡ የብስ።
8 ወእምድኅረ፡ ዝ፡ ተስእልክዎ፡ ለመልአከ፡ ሰላም፡ ዘየሐውር፡ ምስሌየ፡ ዘውእቱ፡ አርአየኒ፡ ኵሎ፡ ዘኅቡእ፡ ወእብሎ፡ መኑ፡ ውእቶሙ፡ እሉ፡ አርባዕቱ፡ ገጽ፡ ዘርኢኩ፡ ወእለ፡ ሰማዕኩ፡ ቃሎሙ፡ ወጸሐፍክዎሙ።
9 ወይቤለኒ፡ ዝ፡ ቃል፡ ቀዳማዊ፡ ውእቱ፡ መሓሪ፡ ወርሑቀ፡ መዓት፡ ቅዱስ፡ ሚካኤል፡ ወካልእ፡ ዘዲበ፡ ኵሉ፡ ሕማም፡ ወዲበ፡ ኵሉ፡ ቍስል፡ ዘውሉደ፡ ሰብእ፡ ውእቱ፡ ሩፋኤል፡ ወሣልስ፡ ዘዲበ፡ ኵሉ፡ ኀይል፡ ውእቱ፡ ቅዱስ፡ ገብርኤል፡ ወራብዕ፡ ዘዲበ፡ ንስሓ፡ ለተስፋ፡ እለ፡ ይወርሱ፡ ሕይወተ፡ ዘለዓለም፡ ውእቱ፡ ፋኑኤል።
10 ወእሉ፡ አርባዕቱ፡ መላእክቲሁ፡ ለእግዚአብሔር፡ ልዑል፡ ወአርባዕተ፡ ቃለ፡ ሰማዕኩ፡ በውእቶን፡ መዋዕል።
=== chapter 41 ===
[Chapter 41]
1 ወእምድኅረ፡ ዝ፡ ርኢኩ፡ ኵሎ፡ ኅቡኣቲሆሙ፡ ለሰማያት፡ ወመንግሥት፡ እፎ፡ ትትከፈል፡ ወተግባረ፡ ሰብእ፡ ከመ፡ በመዳልው፡ ይዴለው።
2 ወበህየ፡ ርኢኩ፡ ማኅደሪሆሙ፡ ለቅዱሳን፡ ወማኅደሮሙ፡ ለኅሩያን፡ ወርእያ፡ አዕይንትየ፡ በህየ፡ ኵሎሙ፡ ኃጥኣን፡ እንዘ፡ ይሰደዱ፡ እምህየ፡ እለ፡ ይክሕድዎ፡ ለስመ፡ እግዚአ፡ መናፍስት፡ ወይስሕብዎሙ፡ ወቀዊመ፡ አልቦሙ፡ በመቅሠፍት፡ እንተ፡ ትወፅእ፡ እምእግዚአ፡ መናፍስት።
3 ወበህየ፡ ርእያ፡ አዕይንትየ፡ ኅቡኣተ፡ መባርቅተ፡ ወነጐድጓድ፡ ወኅቡኣተ፡ ነፋሳተ፡ ወእፎ፡ ይትከፈሉ፡ ከመ፡ ይንፍኁ፡ ዲበ፡ ምድር፡ ወኅቡኣተ፡ ደመና፡ ወጠል፡ ወበህየ፡ ርኢኩ፡ እምኀበ፡ ይወፅእ፡ በውእቱ፡ መካን፡ ወእምህየ፡ ይጸግቡ፡ ጸበለ፡ ምድር።
4 ወበህየ፡ ርኢኩ፡ መዛግብተ፡ ዕፅዋነ፡ ወእምኔሆሙ፡ ይትከፈሉ፡ ነፋሳት፡ ወመዝገበ፡ በረድ፡ ወመዝገበ፡ ጊሜ፡ ወዘደመናት፡ ወደመና፡ ዚኣሁ፡ እምላዕለ፡ ምድር፡ የኀድር፡ እምቅድመ፡ ዓለም።
5 ወርኢኩ፡ መዛግብተ፡ ፀሓይ፡ ወዘወርኅ፡ ወእምአይቴ፡ ይወፅኡ፡ ወአይቴ፡ ይገብኡ፡ ወግብአቶሙ፡ ስቡሕ፡ ወእፎ፡ ይከብር፡ አሐዱ፡ እምካልኡ፡ ወምሕዋሮሙ፡ ብዑል፡ ወኢየኀልፉ፡ ምሕዋረ፡ ወኢይዌስኩ፡ ወኢያሐጽጹ፡ ምሕዋረ፡ ዚኣሆሙ፡ ወሃይማኖቶሙ፡ የዐቅቡ፡ አሐዱ፡ ምስለ፡ ካልኡ፡ በመሐላ፡ ዘነበሩ።
6 ወይወፅእ፡ ቅድመ፡ ፀሓይ፡ ወይገብር፡ ፍኖቶ፡ በትእዛዘ፡ እግዚአ፡ መናፍስት፡ ወይጸንዕ፡ ስሙ፡ ለዓለመ፡ ዓለም።
7 ወእምድኅረ፡ ዝ፡ ርኢኩ፡ ፍኖተ፡ ዘኅቡእ፡ ወዘክሡት፡ ዘወርኅ፡ ወምሕዋረ፡ ፍኖቱ፡ ይፌጽም፡ በውእቱ፡ መካን፡ በመዓልት፡ ወበሌሊት፡ ወአሐዱ፡ ለካልኡ፡ ይኔጽሮ፡ በቅድመ፡ እግዚአ፡ መናፍስት፡ ወየአኵቱ፡ ወይሴብሑ፡ ወኢየዐርፉ፡ እስመ፡ አኰቴቶሙ፡ ዕረፍቶሙ፡ ውእቱ፡ ሎሙ።
8 እስመ፡ ፀሓይ፡ ብሩህ፡ ብዙኅ፡ ሙያጤ፡ ቦቱ፡ ለበረከት፡ ወለመርገም፡ ወምርዋጸ፡ ፍኖቱ፡ ለወርኅ፡ ለጻድቃን፡ ብርሃን፡ ወለኃጥኣን፡ ጽልመት፡ በስሙ፡ ለእግዚአ፡ መናፍስት፡ ዘፈጠረ፡ ማእከለ፡ ብርሃን፡ ወማእከለ፡ ጽልመት፡ ወከፈለ፡ መንፈሰ፡ ለሰብእ፡ ወአጽንዐ፡ መንፈሶሙ፡ ለጻድቃን፡ በስመ፡ ጽድቀ፡ ዚኣሁ።
9 እስመ፡ መልአክ፡ ኢይከልእ፡ ወሥልጣን፡ ኢይክል፡ ከሊአ፡ እስመ፡ መኰንን፡ ለኵሎሙ፡ ይሬኢ፡ ወእሎንተ፡ ኵሎሙ፡ በቅድሜሁ፡ ውእቱ፡ ይኴንን።
=== chapter 42 ===
[Chapter 42]
1 ጥበብ፡ መካነ፡ ኢረከበት፡ ኀበ፡ ተኀድር፡ ወሀለወት፡ ማኅደራ፡ ውስተ፡ ሰማያት።
2 ወፅአት፡ ጥበብ፡ ከመ፡ ትኅድር፡ ውስተ፡ ውሉደ፡ ሰብእ፡ ወኢረከበት፡ ማኅደረ፡ ጥበብ፡ ውስተ፡ መካና፡ ገብአት፡ ወተጸዕነት፡ ማእከለ፡ መላእክት።
3 ወዐመፃ፡ ወፅአት፡ እመዛግብቲሃ፡ ዘኢፈቀደት፡ ረከበት፡ ወኀደረት፡ ውስቴቶሙ፡ ከመ፡ ዝናም፡ በበድው፡ ወከመ፡ ጠል፡ በምድር፡ ጽምእት።
=== chapter 43 ===
[Chapter 43]
1 ወርኢኩ፡ ካልኣነ፡ መባርቅተ፡ ወከዋክብተ፡ ሰማይ፡ ወርኢኩ፡ ከመ፡ ይጼውዖሙ፡ ለኵሎሙ፡ በበ፡ አስማቲሆሙ፡ ወይሰምዕዎ።
2 ወርኢክዎ፡ ለመዳልወ፡ ጽድቅ፡ ከመ፡ ይዴለው፡ በብርሃናቲሆሙ፡ በራሕበ፡ መካናቲሆሙ፡ ወዕለተ፡ ኩነቶሙ፡ ወሚጠቶሙ፡ መብረቅ፡ መብረቀ፡ ይወልድ፡ ወሚጦቶሙ፡ በኍልቈ፡ መላእክቲሆሙ፡ ወሃይማኖቶሙ፡ የዐቅቡ፡ በበይናቲሆሙ።
3 ወተስእልክዎ፡ ለመልአክ፡ ዘየሐውር፡ ምስሌየ፡ ወዘአርአየኒ፡ ዘኅቡእ፡ ወእቤሎ፡ ምንት፡ እሙንቱ፡ እሉ።
4 ወይቤለኒ፡ ምስለ፡ ዘዚኣሆሙ፡ አርአየከ፡ እግዚአ፡ መናፍስት፡ እሉ፡ እሙንቱ፡ አስማቲሆሙ፡ ለጻድቃን፡ እለ፡ የኀድሩ፡ ዲበ፡ የብስ፡ ወየአምኑ፡ በስሙ፡ ለእግዚአ፡ መናፍስት፡ ለዓለመ፡ ዓለም።
=== chapter 44 ===
[Chapter 44]
1 ወካልኣተ፡ ርኢኩ፡ በእንተ፡ መብረቅ፡ እፎ፡ ይቀውሙ፡ እምከዋክብት፡ ወይከውኑ፡ መብረቀ፡ ወኢይክሉ፡ ኀዲገ፡ ምስሌሆሙ።
=== chapter 45 ===
[Chapter 45]
1 ወዝ፡ ካልእ፡ ምሳሌ፡ ዲበ፡ እለ፡ ይክሕዱ፡ ስሞ፡ ለማኅደረ፡ ቅዱሳን፡ ወለእግዚአ፡ መናፍስት።
2 ኢ፡ ሰማየ፡ የዐርጉ፡ ወኢ፡ ምድረ፡ ይበጽሑ፡ ከመ፡ ዝ፡ ይከውን፡ ክፍለ፡ ኃጥኣን፡ እለ፡ ይክሕዱ፡ ስሞ፡ ለእግዚአ፡ መናፍስት፡ እለ፡ ከመ፡ ዝ፡ ይትዐቀቡ፡ ለዕለተ፡ ሥራሕ፡ ወምንዳቤ።
3 ወበይእቲ፡ ዕለት፡ ይነብር፡ በመንበረ፡ ስብሐት፡ ኅሩይ፡ ወየኀሪ፡ ምግባሪሆሙ፡ ወምዕራፎሙ፡ ወኍልቊ፡ አልቦሙ፡ ወመንፈሶሙ፡ በማእከሎሙ፡ ትጸንዕ፡ ሶበ፡ ርእይዎ፡ ለኅሩየ፡ ዚኣየ፡ ወለእለ፡ ይሰክዩ፡ ስምየ፡ ቅዱሰ፡ ወስቡሐ።
4 ወበይእቲ፡ ዕለት፡ ኣነብሮ፡ በማእከሎሙ፡ ወእዌልጣ፡ ለሰማይ፡ ወእገብራ፡ ለበረከት፡ ወብርሃን፡ ዘለዓለም።
5 ወእዌልጣ፡ ለየብስ፡ ወእገብራ፡ ለበረከት፡ ወለኅሩያነ፡ ዚኣየ፡ ኣነብሮሙ፡ ውስቴታ፡ ወእለሰ፡ ይገብሩ፡ ኀጢአተ፡ ወጌጋየ፡ ኢይከይዱ፡ ውስቴታ።
6 እስመ፡ አነ፡ ርኢክዎሙ፡ ወአጽገብክዎሙ፡ በሰላም፡ ለጻድቃንየ፡ ወአንበርክዎሙ፡ ቅድሜየ፡ ወቀርበት፡ ኀቤየ፡ ኵነኔየ፡ ለኃጥኣን፡ ከመ፡ ኣህጕሎሙ፡ እምገጸ፡ ምድር።
=== chapter 46 ===
[Chapter 46]
1 ወበህየ፡ ርኢኩ፡ ዘሎቱ፡ ርእሰ፡ መዋዕል፡ ወርእሱ፡ ከመ፡ ፀምር፡ ጸዐዳ፡ ወምስሌሁ፡ ካልእ፡ ዘገጹ፡ ከመ፡ ርእየተ፡ ሰብእ፡ ወምሉእ፡ ጸጋ፡ ወገጹ፡ ከመ፡ አሐዱ፡ እመላእክት፡ ቅዱሳን።
2 ወተስእልክዎ፡ ለአሐዱ፡ እመላእክት፡ ቅዱሳን፡ ዘየሐውር፡ ምስሌየ፡ ወኵሎ፡ ኅቡኣተ፡ ዘአርአየኒ፡ በእንተ፡ ዝኩ፡ ወልደ፡ ሰብእ፡ ወእቤሎ፡ መኑ፡ ውእቱ፡ ወእምአይቴ፡ ይከውን፡ ውእቱ፡ ወበእንተ፡ ምንት፡ ምስለ፡ ርእሰ፡ መዋዕል፡ የሐውር።
3 ወአውሥአኒ፡ ወይቤለኒ፡ ዝንቱ፡ ውእቱ፡ ወልደ፡ ሰብእ፡ ዘሎቱ፡ ኮነ፡ ጽድቅ፡ ወጽድቅ፡ ምስሌሁ፡ ኀደረ፡ ወኵሎ፡ መዛግብተ፡ ዘኅቡእ፡ ውእቱ፡ ይከሥት፡ እስመ፡ እግዚአ፡ መናፍስት፡ ኪያሁ፡ ኀረየ፡ ወዘክፍሎ፡ ኵሎ፡ ሞአ፡ በቅድመ፡ እግዚአ፡ መናፍስት፡ በርትዕ፡ ለዓለም።
4 ወዝንቱ፡ ወልደ፡ ሰብእ፡ ዘርኢከ፡ ያነሥኦሙ፡ ለነገሥት፡ ወለኀያላን፡ እምስካባቲሆሙ፡ ወለጽኑዓን፡ እመናብርቲሆሙ፡ ወይፈትሕ፡ ልጓማተ፡ ጽኑዓን፡ ወያደቅቅ፡ አስናነ፡ ኃጥኣን።
5 ወይገፈትዖሙ፡ ለነገሥት፡ እመናብርቲሆሙ፡ ወእመንግሥቶሙ፡ እስመ፡ ኢያሌዕልዎ፡ ወኢይሴብሕዎ፡ ወኢይገንዩ፡ ወእምአይቴ፡ ተውህበት፡ ሎሙ፡ መንግሥት።
6 ወገጸ፡ ጽኑዓን፡ ይገፈትዕ፡ ወይመልኦሙ፡ ኀፍረት፡ ወጽልመተ፡ ይከውኖሙ፡ ማኅደሪሆሙ፡ ወዕፄያት፡ ይከውንዎሙ፡ ምስካቢሆሙ፡ ወኢይሴፈዉ፡ ከመ፡ ይትነሥኡ፡ እምስካባቲሆሙ፡ እስመ፡ ኢያሌዕሉ፡ ስሞ፡ ለእግዚአ፡ መናፍስት።
7 ወእሙንቱ፡ ኮኑ፡ እለ፡ ይኴንኑ፡ ከዋክብተ፡ ሰማይ፡ ወያሌዕሉ፡ እደዊሆሙ፡ ውስተ፡ ልዑል፡ ወይከይዱ፡ ዲበ፡ የብስ፡ ወየኀድሩ፡ ውስቴታ፡ ወኵሎ፡ ተግባሮሙ፡ ዐመፃ፡ ያሬእዩ፡ ወኵሉ፡ ተግባሮሙ፡ ዐመፃ፡ ወኀይሎሙ፡ ዲበ፡ ብዕሎሙ፡ ወሃይማኖቶሙ፡ ኮነ፡ ለአማልክት፡ እለ፡ ገብሩ፡ በእደዊሆሙ፡ ወይክሕዱ፡ ስሞ፡ ለእግዚአ፡ መናፍስት።
8 ወይሰድዱ፡ እምአብያት፡ ምስትጉቡአ፡ ዚኣሁ፡ ወለመሃይምናን፡ እለ፡ ስቁላን፡ በስሙ፡ ለእግዚአ፡ መናፍስት።
=== chapter 47 ===
[Chapter 47]
1 ወበውእቱ፡ መዋዕል፡ ዐርገት፡ ጸሎተ፡ ጻድቃን፡ ወደመ፡ ጻድቅ፡ እምነ፡ ምድር፡ ቅድመ፡ እግዚአ፡ መናፍስት፡ ተፈቅደ።
2 ወበእሉ፡ መዋዕል፡ የኀብሩ፡ ቅዱሳን፡ እለ፡ ይነብሩ፡ መልዕልተ፡ ሰማያት፡ ወበአሐዱ፡ ቃል፡ ያስተበቍዑ፡ ወይጼልዩ፡ ወይሴብሑ፡ ወየአኵቱ፡ ወይባርኩ፡ በስሙ፡ ለእግዚአ፡ መናፍስት፡ በእንተ፡ ደመ፡ ጻድቃን፡ ዘተክዕወ፡ ወጸሎቶሙ፡ ለጻድቃን፡ ከመ፡ ኢትጻራዕ፡ በቅድመ፡ እግዚአ፡ መናፍስት፡ ከመ፡ ይትገበር፡ ሎሙ፡ ኵነኔ፡ ወትዕግሥት፡ ኢይኩን፡ ሎሙ፡ ለዓለም።
3 ወበእማንቱ፡ መዋዕል፡ ርኢክዎ፡ ለርእሰ፡ መዋዕል፡ ሶበ፡ ነበረ፡ በመንበረ፡ ስብሐቲሁ፡ ወመጻሕፍተ፡ ሕያዋን፡ ተከሥቱ፡ በቅድሜሁ፡ ወኵሉ፡ ኀይሉ፡ ዘመልዕልተ፡ ሰማያት፡ ዐውደ፡ ዚኣሁ፡ ይቀውሙ፡ ቅድሜሁ።
4 ወልቦሙ፡ ለቅዱሳን፡ ትመልእ፡ ፍሥሓ፡ እስመ፡ በጽሐ፡ ኍልቋ፡ ለጽድቅ፡ ወጸሎቶሙ፡ ለጻድቃን፡ ተሰምዐ፡ ወደሙ፡ ለጻድቅ፡ በቅድመ፡ እግዚአ፡ መናፍስት፡ ተፈቅደ።
=== chapter 48 ===
[Chapter 48]
1 ወበውእቱ፡ መካን፡ ርኢኩ፡ ነቅዐ፡ ጽድቅ፡ ዘኢይትኌለቍ፡ ወበዐውዱ፡ የዐውድዎ፡ ብዙኃን፡ አንቅዕተ፡ ጥበብ፡ ወኵሎሙ፡ ጽሙኣን፡ ይሰትዩ፡ እምኔሁ፡ ወይትመልኡ፡ ጥበበ፡ ወማኅደሪሆሙ፡ ምስለ፡ ጻድቃን፡ ወቅዱሳን፡ ወኅሩያን።
2 ወበይእቲ፡ ሰዓት፡ ተጸውዐ፡ ዝኩ፡ ወልደ፡ ሰብእ፡ በኀበ፡ እግዚአ፡ መናፍስት፡ ወስሙ፡ መቅድመ፡ ርእሰ፡ መዋዕል።
3 ወዘእንበለ፡ ይትፈጠር፡ ፀሓይ፡ ወተኣምር፡ ወዘእንበለ፡ ይትገበሩ፡ ከዋክብተ፡ ሰማይ፡ ተጸውዐ፡ ስሙ፡ በቅድመ፡ እግዚአ፡ መናፍስት።
4 ወውእቱ፡ ይከውን፡ በትረ፡ ለጻድቃን፡ ወለቅዱሳን፡ ከመ፡ ቦቱ፡ ይትመረጐዙ፡ ወከመ፡ ኢይደቁ፡ ወውእቱ፡ ብርሃነ፡ አሕዛብ፡ ወውእቱ፡ ይከውን፡ ተስፋ፡ ለእለ፡ የሐምሙ፡ ልቦሙ።
5 ወይወድቁ፡ ወይሰግዱ፡ ቅድሜሁ፡ ኵሎሙ፡ እለ፡ የኀድሩ፡ ውስተ፡ የብስ፡ ወይባርክዎ፡ ወይሴብሕዎ፡ ወይዜምሩ፡ ሎቱ፡ ለስመ፡ እግዚአ፡ መናፍስት።
6 ወበእንተ፡ ዝ፡ ኮነ፡ ኅሩየ፡ ወኅቡአ፡ በቅድሜሁ፡ እምቅድመ፡ ይትፈጠር፡ ዓለም።
7 ወከሠቶ፡ ለጻድቃን፡ ወለኅሩያን፡ ጥበቡ፡ ለእግዚአ፡ መናፍስት፡ እስመ፡ ዐቀበ፡ ክፍሎሙ፡ ለጻድቃን፡ እስመ፡ ጸልእዎ፡ ወመነንዎ፡ ለዝ፡ ዓለም፡ ዘዐመፃ፡ ወኵሎ፡ ምግባሮ፡ ወፍናዊሁ፡ ጸልኡ፡ በስሙ፡ ለእግዚአ፡ መናፍስት፡ እስመ፡ በስመ፡ ዚኣሁ፡ ይድኅኑ፡ ወፈቃዴ፡ ኮነ፡ ለሕይወቶሙ።
8 ወበውእቱ፡ መዋዕል፡ ኮኑ፡ ትሑታነ፡ ገጽ፡ ነገሥተ፡ ምድር፡ ወጽኑዓን፡ እለ፡ ይእኅዝዋ፡ ለየብስ፡ በእንተ፡ ግብረ፡ እደዊሆሙ፡ እስመ፡ በዕለተ፡ ጻዕቆሙ፡ ወጻሕቦሙ፡ ኢያድኅኑ፡ ነፍሶሙ።
9 ወውስተ፡ እዴሆሙ፡ ለኅሩያነ፡ ዚኣየ፡ እወድዮሙ፡ ከመ፡ ሣዕር፡ ውስተ፡ እሳት፡ ወከመ፡ አረር፡ ውስተ፡ ማይ፡ ወከመ፡ ዝ፡ ይውዕዩ፡ እምገጸ፡ ጻድቃን፡ ወይሠጠሙ፡ እምቅድመ፡ ገጸ፡ ቅዱሳን፡ ወኢይትረከብ፡ ሎሙ፡ አሠር።
10 ወበዕለተ፡ ጻሕበ፡ ዚኣሆሙ፡ ፍርሀተ፡ ትከውን፡ በዲበ፡ ምድር፡ ወበቅድሜሁ፡ ይወድቁ፡ ወኢይትነሥኡ፡ ወአልቦ፡ ዘይትሜጠዎሙ፡ በእደዊሁ፡ ወያነሥኦሙ፡ እስመ፡ ክሕድዎ፡ ለእግዚአ፡ መናፍስት፡ ወለመሲሑ፡ ወይትባረክ፡ ስሙ፡ ለእግዚአ፡ መናፍስት።
=== chapter 49 ===
[Chapter 49]
1 እስመ፡ ጥበብ፡ ተክዕው፡ ከመ፡ ማይ፡ ወስብሐት፡ ኢተኀልቅ፡ ቅድሜሁ፡ ለዓለመ፡ ዓለም።
2 እስመ፡ ኀያል፡ ውእቱ፡ በኵሉ፡ ኅቡኣተ፡ ጽድቅ፡ ወዐመፃ፡ ከመ፡ ጽላሎት፡ የኀልፍ፡ ወምቅዋም፡ አልቦ፡ እስመ፡ ቆመ፡ ኅሩይ፡ በቅድመ፡ እግዚአ፡ መናፍስት፡ ወስብሐቲሁ፡ ለዓለመ፡ ዓለም፡ ወኀይሉ፡ ለትውልደ፡ ትውልድ።
3 ወቦቱ፡ የኀድር፡ መንፈሰ፡ ጥበብ፡ ወመንፈሰ፡ ዘያሌቡ፡ ወመንፈሰ፡ ትምህርት፡ ወኀይል፡ ወመንፈሰ፡ እለ፡ ኖሙ፡ በጽድቅ።
4 ወውእቱ፡ ይኴንን፡ ዘኅቡኣት፡ ወነገረ፡ በከ፡ አልቦ፡ ዘይክል፡ ብሂለ፡ በቅድሜሁ፡ እስመ፡ ኅሩይ፡ ውእቱ፡ በቅድመ፡ እግዚአ፡ መናፍስት፡ በከመ፡ ውእቱ፡ ፈቀደ።
=== chapter 50 ===
[Chapter 50]
1 ወበእማንቱ፡ መዋዕል፡ ሚጠት፡ ትከውን፡ ለቅዱሳን፡ ወለኅሩያን፡ ወብርሃነ፡ መዋዕል፡ ዲቤሆሙ፡ የኀድር፡ ወስብሐት፡ ወክብር፡ ለቅዱሳን፡ ይትመየጥ።
2 ወበዕለት፡ እንተ፡ ጻሕብ፡ ትዘገብ፡ እኪተ፡ ለኃጥኣን፡ ወይመውኡ፡ ጻድቃን፡ በስሙ፡ ለእግዚአ፡ መናፍስት፡ ወያርኢ፡ ለካልኣን፡ ከመ፡ ይነስሑ፡ ወይኅድጉ፡ ምግባረ፡ እደዊሆሙ።
3 ወይከውን፡ ሎሙ፡ ክብር፡ በቅድመ፡ እግዚአ፡ መናፍስት፡ ወበስሙ፡ ይድኅኑ፡ ወእግዚአ፡ መናፍስት፡ ይምሕሮሙ፡ እስመ፡ ብዙኅ፡ ምሕረቱ።
4 ወጻድቅ፡ ውእቱ፡ በኵነኔሁ፡ ወበቅድመ፡ ስብሐቲሁ፡ ወዐመፃ፡ ኢትቀውም፡ በኵነኔሁ፡ ወዘኢይኔስሕ፡ በቅድሜሁ፡ ይትሀጐል።
5 ወእምይእዜሰ፡ ኢይምሕሮሙ፡ ይቤ፡ እግዚአ፡ መናፍስት።
=== chapter 51 ===
[Chapter 51]
1 ወበእማንቱ፡ መዋዕል፡ ታገብእ፡ ምድር፡ ማሕፀንታ፡ ወሲኦል፡ ታገብእ፡ ማሕፀንታ፡ ዘተመጠወት፡ ወሀጕል፡ ያገብእ፡ ዘይፈዲ።
2 ወየኀሪ፡ ጻድቃነ፡ ወቅዱሳነ፡ እምኔሆሙ፡ እስመ፡ ቀርበት፡ ዕለት፡ ከመ፡ እሙንቱ፡ ይድኅኑ።
3 ወበእማንቱ፡ መዋዕል፡ ይነብር፡ ኅሩይ፡ ዲበ፡ መንበሩ፡ ወኵሎ፡ ኅሊናተ፡ ጥበብ፡ እምኅሊና፡ አፉሁ፡ ያወፅእ፡ እስመ፡ እግዚአ፡ መናፍስት፡ ወሀቦ፡ ወሰብሖ።
4 ወበእማንቱ፡ መዋዕል፡ ይዘፍኑ፡ አድባር፡ ከመ፡ ሐራጊት፡ ወያንፈርዕፁ፡ ከመ፡ መሐስእ፡ ጽጉባነ፡ ሐሊብ፡ ወይከውኑ፡ ኵሎሙ፡ መላእክት፡ በሰማይ።
5 ወገጾሙ፡ ይበርህ፡ በፍሥሓ፡ እስመ፡ በእማንቱ፡ መዋዕል፡ ኅሩይ፡ ተንሥአ፡ ወምድር፡ ትትፌሣሕ፡ ወጻድቃን፡ ዲቤሃ፡ የኀድሩ፡ ወኅሩያን፡ ውስቴታ፡ የሐውሩ፡ ወያንሶስዉ።
=== chapter 52 ===
[Chapter 52]
1 ወእምድኅረ፡ እማንቱ፡ መዋዕል፡ በውእቱ፡ መካን፡ ኀበ፡ ርኢኩ፡ ኵሎ፡ ራእያተ፡ ኅቡኣተ፡ እስመ፡ ተመሠጥኩ፡ በነኰርኳረ፡ ነፋስ፡ ወወሰዱኒ፡ ውስተ፡ ዐረብ።
2 ወበህየ፡ ርእያ፡ አዕይንትየ፡ ኅቡኣተ፡ ሰማይ፡ ኵሎ፡ ዘይከውን፡ ሀሎ፡ በዲበ፡ ምድር፡ ደብረ፡ ኀጺን፡ ወደብረ፡ ጸሪቅ፡ ወደብረ፡ ብሩር፡ ወደብረ፡ ወርቅ፡ ወደብረ፡ ነጠብጣብ፡ ወደብረ፡ ዓረር።
3 ወተስእልክዎ፡ ለመልአክ፡ ዘየሐውር፡ ምስሌየ፡ እንዘ፡ እብል፡ ምንት፡ እሙንቱ፡ እሉ፡ እለ፡ በኅቡእ፡ ርኢኩ።
4 ወይቤለኒ፡ እሉ፡ ኵሎሙ፡ ዘርኢከ፡ ለሥልጣነ፡ መሲሑ፡ እሙንቱ፡ ይከውኑ፡ ከመ፡ የአዝዝ፡ ወይትኀየል፡ ዲበ፡ ምድር።
5 ወአውሥአኒ፡ እንዘ፡ ይብል፡ ውእቱ፡ መልአከ፡ ሰላም፡ ጽናሕ፡ ንስቲተ፡ ወትሬኢ፡ ወይትከሠት፡ ለከ፡ ኵሉ፡ ዘኅቡእ፡ ዘተከላ፡ እግዚአ፡ መናፍስት።
6 ወእሎንቱ፡ አድባር፡ ዘርኢከ፡ ደብረ፡ ኀጺን፡ ወደብረ፡ ጸሪቅ፡ ወደብረ፡ ብሩር፡ ወደብረ፡ ወርቅ፡ ወደብረ፡ ነጠብጣብ፡ ወደብረ፡ ዓረር፡ እሉ፡ ኵሎሙ፡ ቅድሜሁ፡ ለኅሩይ፡ ይከውኑ፡ ከመ፡ መዓረ፡ ግራ፡ ዘቅድመ፡ ገጸ፡ እሳት፡ ወከመ፡ ማይ፡ ዘይወርድ፡ እምላዕሉ፡ ዲበ፡ እማንቱ፡ አድባር፡ ወይከውኑ፡ ድኩማነ፡ ታሕተ፡ እገሪሁ።
7 ወይከውን፡ በእማንቱ፡ መዋዕል፡ ኢይድኅኑ፡ ኢ፡ በወርቅ፡ ወኢ፡ በብሩር፡ ወኢይክሉ፡ ድኂነ፡ ወጐይየ።
8 ወኢይከውን፡ ኀጺን፡ ለጸብእ፡ ወኢ፡ ልብስ፡ ለድርዐ፡ እንግድዓ፡ ኢይበቍዕ፡ ብርት፡ ወኢ፡ ናእክ፡ ኢይበቍዕ፡ ወኢይትኌለቍ፡ ወዓረር፡ ኢይትፈቀድ።
9 አላ፡ ኵሎሙ፡ ይትከየዱ፡ ወይትሀጐሉ፡ ሀለዎሙ፡ እምገጸ፡ ምድር፡ ሶበ፡ ያስተርኢ፡ ኅሩይ፡ በቅድመ፡ ገጹ፡ ለእግዚአ፡ መናፍስት።
=== chapter 53 ===
[Chapter 53]
1 ወበህየ፡ ርእያ፡ አዕይንትየ፡ ቈላ፡ ዕሙቀ፡ ወርኅው፡ አፉሁ፡ ወኵሎሙ፡ እለ፡ የኀድሩ፡ ዲበ፡ የብስ፡ ወባሕር፡ ወደሰያት፡ አምኃ፡ ወአስትኣ፡ ወጋዳ፡ ያመጽኡ፡ ሎቱ፡ ወዝክቱሰ፡ ቈላ፡ ዕሙቅ፡ ኢይመልእ።
2 ወጌጋየ፡ እደዊሆሙ፡ ይገብሩ፡ ወኵሎ፡ ዘይጻምዉ፡ ለጌጋይ፡ ኃጥኣን፡ ይበልዑ፡ ወእምገጹ፡ ለእግዚአ፡ መናፍስት፡ ይትሀጐሉ፡ ኃጥኣን፡ ወእምገጻ፡ ለምድረ፡ ዚኣሁ፡ ይትቃወሙ፡ ወኢየኀልቁ፡ ለዓለመ፡ ዓለም።
3 እስመ፡ ርኢክዎሙ፡ ለመላእክተ፡ መቅሠፍት፡ እንዘ፡ የሐውሩ፡ ወያስተዳልዉ፡ ኵሎሙ፡ መባዕልተ፡ ለሰይጣን።
4 ወተስእልክዎ፡ ለመልአከ፡ ሰላም፡ ዘየሐውር፡ ምስሌየ፡ ወእቤሎ፡ እሎንተ፡ መባዕልተ፡ ለመኑ፡ ያስተዳልዉ።
5 ወይቤለኒ፡ እሎንተ፡ ያስተዳልዉ፡ ለነገሥት፡ ወለኀያላነ፡ ዘዝንቱ፡ ምድር፡ ከመ፡ ቦቱ፡ ይትሀጐሉ።
6 ወእምድኅረ፡ ዝ፡ ያስተርኢ፡ ጻድቅ፡ ወኅሩይ፡ ቤተ፡ ምስትጉቡአ፡ ዚኣሁ፡ እምይእዜሰ፡ ኢይትከልኡ፡ በስሙ፡ ለእግዚአ፡ መናፍስት።
7 ወእሉ፡ አድባር፡ ይከውኑ፡ በቅድመ፡ ገጹ፡ ከመ፡ ምድር፡ ወአውግር፡ ይከውኑ፡ ከመ፡ ነቅዐ፡ ማይ፡ ወያዐርፉ፡ ጻድቃን፡ እምጻማ፡ ኃጥኣን።
=== chapter 54 ===
[Chapter 54]
1 ወተመየጥኩ፡ ወርኢኩ፡ ካልአ፡ ገጸ፡ ምድር፡ ወርኢኩ፡ በህየ፡ ቈላ፡ ዕሙቀ፡ እንዘ፡ ይነድድ፡ እሳት።
2 ወአምጽእዎሙ፡ ለነገሥት፡ ወለኀያላን፡ ወወደይዎሙ፡ ውስተ፡ ዝኩ፡ ቈላ፡ ዕሙቅ።
3 ወበህየ፡ ርእያ፡ አዕይንትየ፡ ዘመባዕልቲሆሙ፡ እንዘ፡ ይገብርዎሙ፡ ማእሰርተ፡ ኀጺን፡ ዘአልቦ፡ መድሎት።
4 ወተስእልክዎ፡ ለመልአከ፡ ሰላም፡ ዘየሐውር፡ ምስሌየ፡ እንዘ፡ እብል፡ እሉ፡ ማእሰራተ፡ መባዕላት፡ ለመኑ፡ ይዴለዉ።
5 ወይቤለኒ፡ እሉ፡ ይዴለዉ፡ ለትዕይንተ፡ አዛዝኤል፡ ከመ፡ ይትመጠውዎሙ፡ ወይደይዎሙ፡ መትሕተ፡ ኵሉ፡ ደይን፡ ወአእባነ፡ ጠዋያተ፡ ይከድኑ፡ መላትሒሆሙ፡ በከመ፡ አዘዘ፡ እግዚአ፡ መናፍስት።
6 ወሚካኤል፡ ወገብርኤል፡ ወሩፋኤል፡ ወፋኑኤል፡ ውእቶሙ፡ ያጸንዕዎሙ፡ በይእቲ፡ ዕለት፡ ዐባይ፡ ወውስተ፡ እቶነ፡ እሳት፡ ዘይነድድ፡ ይወድይዎሙ፡ ውእተ፡ ዕለተ፡ ከመ፡ ይትበቀል፡ እምኔሆሙ፡ እግዚአ፡ መናፍስት፡ በዐመፃሆሙ፡ በእንተ፡ ዘኮኑ፡ ላእከ፡ ለሰይጣን፡ ወአስሐትዎሙ፡ ለእለ፡ የኀድሩ፡ ዲበ፡ የብስ።
7 ወበውእቱ፡ መዋዕል፡ ይወፅእ፡ መቅሠፍቱ፡ ለእግዚአ፡ መናፍስት፡ ወይትረኀው፡ ኵሉ፡ መዛግብተ፡ ማያት፡ ዘመልዕልተ፡ ሰማያት፡ ወዲበ፡ አንቅዕት፡ እለ፡ መትሕተ፡ ሰማያት፡ ወዘመልዕልተ፡ ምድር።
8 ወይዴመሩ፡ ኵሎሙ፡ ማያት፡ ዘምስለ፡ ማያት፡ ዘመልዕልተ፡ ሰማያት፡ ማይሰ፡ ዘመልዕልተ፡ ሰማያት፡ ተባዕታይ፡ ውእቱ፡ ወማይሰ፡ ዘመትሕተ፡ ምድር፡ አንስታይ፡ ይእቲ።
9 ወይደመሰሱ፡ ኵሉ፡ እለ፡ የኀድሩ፡ ዲበ፡ የብስ፡ ወእለ፡ የኀድሩ፡ መትሕተ፡ አጽናፈ፡ ሰማይ።
10 ወበእንተ፡ ዝ፡ አእመርዋ፡ ለዐመፃሆሙ፡ እንተ፡ ገብሩ፡ በዲበ፡ ምድር፡ ወበእንተ፡ ዝ፡ ይትሀጐሉ።
=== chapter 55 ===
[Chapter 55]
1 ወእምድኅረ፡ ዝ፡ ነስሐ፡ ርእሰ፡ መዋዕል፡ ወይቤ፡ በከ፡ አህጐልክዎሙ፡ ለኵሎሙ፡ እለ፡ ይነብሩ፡ ውስተ፡ የብስ።
2 ወመሐለ፡ በስሙ፡ ዐቢይ፡ ከመ፡ እምይእዜ፡ ኢይገብር፡ ከመ፡ ዝ፡ ለኵሎሙ፡ እለ፡ ይነብሩ፡ ዲበ፡ የብስ፡ ወትእምርተ፡ እወዲ፡ በሰማይ፡ ወይከውን፡ ማእከሌየ፡ ወማእከሌሆሙ፡ ሃይማኖተ፡ እስከ፡ ለዓለም፡ መጠነ፡ መዋዕለ፡ ሰማይ፡ ዲበ፡ ምድር።
3 ወእም፡ ዝ፡ በትእዛዝየ፡ ውእቱ፡ ሶበ፡ ፈቀድኩ፡ ከመ፡ ኣጽንዖሙ፡ በእደ፡ መላእክት፡ በዕለተ፡ ምንዳቤ፡ ወሕማም፡ ቅድመ፡ ዝ፡ መዐትየ፡ ወመቅሠፍትየ፡ የኀድር፡ ላዕሌሆሙ፡ ይቤ፡ እግዚአብሔር፡ እግዚአ፡ መናፍስት።
4 ነገሥት፡ ኀያላን፡ እለ፡ ተኀድሩ፡ ዲበ፡ የብስ፡ ሀለወክሙ፡ ትርአይዎ፡ ለኅሩየ፡ ዚኣየ፡ አመ፡ ይነብር፡ በመንበረ፡ ስብሐቲሁ፡ ወይኴንኖ፡ ለአዛዝኤል፡ ወለኵሎሙ፡ ማኅበረ፡ ዚኣሁ፡ ወለኵሎሙ፡ ትዕይንተ፡ ዚኣሁ፡ በስሙ፡ ለእግዚአ፡ መናፍስት።
=== chapter 56 ===
[Chapter 56]
1 ወርኢኩ፡ በህየ፡ ትዕይንተ፡ መላእክት፡ ዘመቅሠፍት፡ እንዘ፡ የሐውሩ፡ ወእኁዛን፡ መሣግረ፡ ኀጺን፡ ወብርት።
2 ወተስእልክዎ፡ ለመልአከ፡ ሰላም፡ ዘየሐውር፡ ምስሌየ፡ እንዘ፡ እብል፡ ለመኑ፡ የሐውሩ፡ እለ፡ ይእኅዙ።
3 ወይቤለኒ፡ አሐዱ፡ አሐዱ፡ ለኅሩያነ፡ ዚኣሆሙ፡ ወለፍቁራነ፡ ዚኣሆሙ፡ ከመ፡ ይትወደዩ፡ ውስተ፡ ንቅዐተ፡ ማዕምቅ፡ ዘቈላ።
4 ወአሜሃ፡ ይመልእ፡ ውእቱ፡ ቈላ፡ እምነ፡ ኅሩያን፡ ወፍቁራነ፡ ዚኣሆሙ፡ ወይትዌዳእ፡ ዕለተ፡ ሕይወቶሙ፡ ወዕለተ፡ ስሕተቶሙ፡ እምይእዜ፡ ኢይትኌለቍ።
5 ወበእማንቱ፡ መዋዕል፡ ይትጋብኡ፡ መላእክት፡ ወይወድዩ፡ አርእስቲሆሙ፡ ለምሥራቅ፡ ለኀበ፡ ሰብአ፡ ጳርቴ፡ ወሜድ፡ ወየሐውስዎሙ፡ ለነገሥት፡ ወይበውእ፡ ላዕሌሆሙ፡ መንፈሰ፡ ሀውክ፡ ወየሀውክዎሙ፡ እመናብርቲሆሙ፡ ወይወፅኡ፡ ከመ፡ አናብስት፡ እምስካባቲሆሙ፡ ወከመ፡ አዝእብት፡ ርኁባን፡ ማእከለ፡ መርዔተ፡ ዚኣሆሙ።
6 ወየዐርጉ፡ ወይከይድዋ፡ ለምድር፡ ኅሩያነ፡ ዚኣሁ፡ ወትከውን፡ ምድረ፡ ኅሩያነ፡ ዚኣሁ፡ በቅድሜሆሙ፡ ምክያደ፡ ወአሠረ።
7 ወሀገረ፡ ጻድቃነ፡ ዚኣየ፡ ይከውን፡ ማዕቅፈ፡ ለአፍራሲሆሙ፡ ወያነሥኡ፡ ቀትለ፡ በበይናቲሆሙ፡ ወትጸንዕ፡ የማኖሙ፡ ዲቤሆሙ፡ ወኢየአምሮ፡ ብእሲ፡ ለካልኡ፡ ወለእኁሁ፡ ወኢ፡ ወልድ፡ ለአቡሁ፡ ወለእሙ፡ እስከ፡ ይከውን፡ ኍልቈ፡ አብድንቲሆሙ፡ እሞቶሙ፡ ወእመቅሠፍቶሙ፡ ወኢይከውን፡ በከ።
8 ወበእማንቱ፡ መዋዕል፡ ትፈትሕ፡ አፉሃ፡ ሲኦል፡ ወይሠጠሙ፡ ውስቴታ፡ ወሀጕሎሙ፡ ሲኦል፡ ትውኅጦሙ፡ ለኃጥኣን፡ እምቅድመ፡ ገጸ፡ ኅሩያን።
=== chapter 57 ===
[Chapter 57]
1 ወኮነ፡ እምድኅረዝ፡ ወርኢኩ፡ ካልእተ፡ ትዕይንተ፡ ሰረገላት፡ እንዘ፡ ይጼዐኑ፡ ሰብእ፡ ውስቴቶሙ፡ ወይመጽኡ፡ ዲበ፡ ነፋሳት፡ እምሥራቅ፡ ወእምዕራብ፡ እስከ፡ መንፈቀ፡ ዕለት።
2 ወተሰምዐ፡ ድምፀ፡ ሠረገላቲሆሙ፡ ወሶበ፡ ኮነ፡ ዝ፡ ሀውክ፡ ቅዱሳን፡ እምሰማይ፡ አእመሩ፡ ወዐምደ፡ ምድር፡ ተሐውሰ፡ እመንበሩ፡ ወተሰምዐ፡ እምአጽናፈ፡ ሰማይ፡ እስከ፡ አጽናፈ፡ ሰማይ፡ በአሐቲ፡ ዕለት።
3 ወይወድቁ፡ ኵሎሙ፡ ወይሰግዱ፡ ለእግዚአ፡ መናፍስት፡ ወዝንቱ፡ ውእቱ፡ ተፍጻሜተ፡ ካልእ፡ ምሳሌ።
=== chapter 58 ===
[Chapter 58]
1 ወአኀዝኩ፡ እብል፡ ሣልሰ፡ ምሳሌ፡ በእንተ፡ ጻድቃን፡ ወበኅሩያን።
2 ብፁዓን፡ አንትሙ፡ ጻድቃን፡ ወኅሩያን፡ እስመ፡ ስቡሕ፡ ክፍልክሙ።
3 ወይከውኑ፡ ጻድቃን፡ በብርሃነ፡ ፀሓይ፡ ወኅሩያን፡ በብርሃነ፡ ሕይወት፡ ዘለዓለም፡ ወማኅለቅተ፡ አልቦቱ፡ ለመዋዕለ፡ ሕይወቶሙ፡ ወለቅዱሳን፡ ኍልቈ፡ መዋዕል፡ አልቦሙ።
4 ወየኀሥሥዎ፡ ለብርሃን፡ ወይረክቡ፡ ጽድቀ፡ በኀበ፡ እግዚአ፡ መናፍስት፡ ወሰላም፡ ለጻድቃን፡ ይከውን፡ በኀበ፡ እግዚአ፡ ዓለም።
5 ወእምድኅረ፡ ዝ፡ ይትበሀል፡ ለቅዱሳን፡ በሰማይ፡ ከመ፡ ይኅሥሡ፡ ኅቡኣተ፡ ጽድቅ፡ ክፍለ፡ ሃይማኖት፡ እስመ፡ ሠረቀ፡ ከመ፡ ፀሓይ፡ ዲበ፡ የብስ፡ ወጽልመት፡ ኀለፈ።
6 ወብርሃን፡ ዘኢይትኌለቍ፡ ይከውን፡ ወበኍልቈ፡ መዋዕል፡ ኢይበውኡ፡ እስመ፡ ቀዳሚ፡ ተሀጕለ፡ ጽልመት፡ ወብርሃን፡ ይጸንዕ፡ በቅድመ፡ እግዚአ፡ መናፍስት፡ ወብርሃነ፡ ርትዕ፡ ትጸንዕ፡ ለዓለም፡ በቅድመ፡ እግዚአ፡ መናፍስት።
=== chapter 59 ===
[Chapter 59]
1 ወበእማንቱ፡ መዋዕል፡ ርእያ፡ አዕይንትየ፡ ኅቡኣተ፡ መባርቅት፡ ወብርሃናት፡ ወኵነኔሆሙ፡ ወይበርቁ፡ ለበረከት፡ ወለመርገም፡ በከመ፡ ፈቀደ፡ እግዚአ፡ መናፍስት።
2 ወበህየ፡ ርኢኩ፡ ኅቡኣተ፡ ነጐድጓድ፡ ወሶበ፡ ይደቅቅ፡ በመልዕልተ፡ ሰማይ፡ ቃሎሙ፡ ይሰማዕ፡ ወማኅደራተ፡ የብስ፡ አስተርአየኒ፡ ወቃል፡ ነጐድጓድ፡ ለሰላም፡ ወለበረከት፡ ወለእመ፡ ለረጊም፡ በቃለ፡ እግዚአ፡ መናፍስት።
3 ወእምድኅረ፡ ዝ፡ ተርእየ፡ ሊተ፡ ኵሉ፡ ኅቡኣቲሆሙ፡ ለብርሃናት፡ ወለመባርቅት፡ ለበረከት፡ ወለጽጋብ፡ ይበርቁ።
=== chapter 60 ===
[Chapter 60]
1 በዓመት፡ ኀምስቱ፡ ምእት፡ ወበወርኅ፡ ሳብዕ፡ እምዐሡሩ፡ ወረቡዑ፡ ለወርኅ፡ በሕይወተ፡ ሄኖክ፡ በውእቱ፡ አምሳል፡ ርኢኩ፡ ከመ፡ ታድለቀልቅ፡ ሰማየ፡ ሰማያት፡ ድልቅልቀ፡ ዐቢይ፡ ወኀይሉ፡ ለልዑል፡ ወመላእክት፡ አእላፈ፡ አእላፋት፡ ወትእልፊተ፡ ትእልፊት፡ ተሀውኩ፡ ዐቢየ፡ ሁከተ።
2 ወሶቤሃ፡ ርኢኩ፡ ርእሰ፡ መዋዕል፡ ዲበ፡ መንበረ፡ ስብሐቲሁ፡ ይነብር፡ ወመላእክት፡ ወጻድቃን፡ ዐውዶ፡ ይቀውሙ።
3 ወሊተኒ፡ ዐቢይ፡ ረዓድ፡ ነሥአኒ፡ ወፍርሀት፡ አኀዘኒ፡ ወሐቌየ፡ ተቀጽዐ፡ ወተፈትሐ፡ ወኵለንታየ፡ ተመስወ፡ ወወደቁ፡ በገጽየ።
4 ወፈነወ፡ ቅዱስ፡ ሚካኤል፡ ካልአ፡ መልአከ፡ ቅዱሰ፡ አሐደ፡ እመላእክት፡ ቅዱሳን፡ ወአንሥአኒ፡ ወሶበ፡ አንሥአኒ፡ መንፈስየ፡ ገብአት፡ እስመ፡ ኢክህልኩ፡ ተዐግሦ፡ እምርእየ፡ ዝኩ፡ ኀይል፡ ወኪያሁ፡ ሀውክ፡ ወአንቀልቅሎ፡ ሰማይ።
5 ወይቤለኒ፡ ቅዱስ፡ ሚካኤል፡ በእንተ፡ ምንት፡ ራእየ፡ ዘከመ፡ ዝ፡ ተሀውከ፡ እስከ፡ ዮም፡ ሀለወት፡ ዕለተ፡ ምሕረቱ፡ ወሀሎ፡ መሓሪ፡ ወርሑቀ፡ መዐት፡ ላዕለ፡ እለ፡ የኀድሩ፡ ዲበ፡ የብስ።
6 ወሶበ፡ ትመጽእ፡ ዕለተ፡ ኀይል፡ ወመቅሠፍት፡ ወኵነኔ፡ እንተ፡ አስተዳለወ፡ እግዚአ፡ መናፍስት፡ ለእለ፡ ይሰግዱ፡ ለኵነኔ፡ ጽድቅ፡ ወለእለ፡ ይክሕዱ፡ ለኵነኔ፡ ጽድቅ፡ ወለእለ፡ ይነሥኡ፡ ስሞ፡ በከ፡ ወተደለወት፡ ይእቲ፡ ዕለት፡ ለኅሩያን፡ መሐላ፡ ወለኃጥኣን፡ ሐተታ።
7 ወይትከፈሉ፡ በይእቲ፡ ዕለት፡ ክልኤቱ፡ አናብርት፡ አንበሪ፡ አንስቲያዊት፡ ዘስማ፡ ሌዋታን፡ ከመ፡ ትኅድር፡ በልጎተ፡ ባሕር፡ መልዕልተ፡ አንቅዕተ፡ ማያት።
8 ወለተባዕታይ፡ ስሙ፡ ብሔሞት፡ ዘይእኅዝ፡ በእንግድዓሁ፡ በበድው፡ ዘኢያስተርኢ፡ ወስሙ፡ ዴንዳይን፡ በምሥራቀ፡ ገነት፡ በኀበ፡ ይነብሩ፡ ጻድቃን፡ ወኅሩያን፡ በኀበ፡ ተመጠወ፡ እምኄውየ፡ ዘውእቱ፡ ሳብዕ፡ እምአዳም፡ ቀዳሚሆሙ፡ ለሰብእ፡ ዘገብረ፡ እግዚአ፡ መናፍስት።
9 ወተስእልክዎ፡ ለዝኩ፡ ካልእ፡ መልአክ፡ ከመ፡ ያርእየኒ፡ ኀይሎሙ፡ ለእልክቱ፡ አናብርት፡ እፎ፡ ተሌለዩ፡ በአሐቲ፡ ዕለት፡ ወተወድዩ፡ አሐዱ፡ በልጐተ፡ ባሕር፡ ወአሐዱ፡ በየብሰ፡ በድው።
10 ወይቤለኒ፡ አንተ፡ ወልደ፡ ሰብእ፡ በዝየ፡ ትፈቅድ፡ ታእምር፡ ዘኅቡእ።
11 ወይቤለኒ፡ ካልእ፡ መልአክ፡ ዘየሐውር፡ ምስሌየ፡ ወዘበኅቡእ፡ ያሬእየኒ፡ ዘቀዳሚ፡ ወዘደኃሪ፡ በሰማይ፡ በውስተ፡ ላዕሉ፡ ወበውስተ፡ የብስ፡ በማዕምቅ፡ ወበአጽናፈ፡ ሰማይ፡ ወበመሠረተ፡ ሰማይ።
12 ወበመዛግብተ፡ ነፋሳት፡ ወእፎ፡ ይትከፈሉ፡ መናፍስት፡ ወእፎ፡ ይደሉ፡ ወእፎ፡ ይትኌለቁ፡ አንቅዕተ፡ ወነፋሳት፡ በኀይለ፡ መንፈስ፡ ወኀይሎሙ፡ ለብርሃነ፡ ወርኅ፡ ወከመ፡ ኀይለ፡ ጽድቅ፡ ወክፍላተ፡ ከዋክብት፡ በበ፡ ስሞሙ፡ ወኵሉ፡ ክፍል፡ ይትከፈል።
13 ወነጐድጓድ፡ በሙዳቃቲሆሙ፡ ወለኵሉ፡ ክፍል፡ ዘይትከፈል፡ ወመብረቅ፡ ከመ፡ ይበርቅ፡ ወትዕይንቶሙ፡ ከመ፡ ይስምዑ፡ ፍጡነ።
14 እስመ፡ ቦቱ፡ ለነጐድጓድ፡ ምዕራፋት፡ በትዕግሥት፡ ለቃለ፡ ዚኣሁ፡ ተውህበ፡ ወኢይትሌለዩ፡ ኢ፡ ነጐድጓድ፡ ወኢ፡ መብረቅ፡ ወኢ፡ አሐዱ፡ አሐዱ፡ በመንፈሰ፡ ክልኤሆሙ፡ የሐውሩ፡ ወኢይትሌለዩ።
15 እስመ፡ ሶበ፡ ይበርቅ፡ መብረቅ፡ ነጐድጓድ፡ ቃሎ፡ ይሁብ፡ ወመንፈስ፡ በጊዜሃ፡ የዐርፍ፡ ወዕሩየ፡ ይከፍል፡ ማእከሎሙ፡ እስመ፡ መዝገበ፡ ጊዜያቲሆሙ፡ ዘኆፃ፡ ውእቱ፡ ወአሐዱ፡ አሐዱ፡ እምኔሆሙ፡ በጊዜሁ፡ በልጓም፡ ይትአኀዙ፡ ወይትመየጡ፡ በኀይለ፡ መንፈስ፡ ወይትነዳእ፡ ከመ፡ ዝ፡ በከመ፡ ብዝኀ፡ አድዋለ፡ ምድር።
16 ወመንፈሰ፡ ባሕር፡ ተባዕታይ፡ ውእቱ፡ ወበከመ፡ ኀይለ፡ ጽንዓታ፡ በልጓም፡ ያገብኣ፡ ወከመ፡ ዝ፡ ትትነዳእ፡ ወትዘራዕ፡ በኵሉ፡ አድባረ፡ ምድር።
17 ወመንፈሰ፡ አስሐትያ፡ መልአከ፡ ዚኣሁ፡ ውእቱ፡ ወመንፈሰ፡ በረድ፡ መልአክ፡ ኄር፡ ውእቱ።
18 ወመልአከ፡ ሐመዳ፡ ኀደገ፡ በእንተ፡ እከየ፡ ዚኣሁ፡ ወመንፈስ፡ ቦቱ፡ ለባሕቲቱ፡ ወዘየዐርግ፡ እምኔሁ፡ ከመ፡ ጢስ፡ ውእቱ፡ ወስሙ፡ ደደክ።
19 ወመንፈሰ፡ ጊሜ፡ ኢይትኀበር፡ ምስሌሆሙ፡ ውስተ፡ መዛግብቲሆሙ፡ አላ፡ መዝገብ፡ ቦቱ፡ ለባሕቲቱ፡ እስመ፡ ምሕዋረ፡ ዚኣሁ፡ በስብሐት፡ ወበብርሃን፡ ወበጽልመት፡ ወበክረምት፡ ወበሐጋይ፡ ወመዝገበ፡ ዚኣሃ፡ ብርሃን፡ ውእቱ፡ ወመልአካ፡ ውእቱ።
20 ወመንፈሰ፡ ጠል፡ ማኅደሩ፡ በአጽናፈ፡ ሰማይ፡ ወድሩግ፡ ውእቱ፡ ምስለ፡ መዛግብተ፡ ዝናም፡ ወምሕዋረ፡ ዚኣሁ፡ በክረምት፡ ወበሐጋይ፡ ወደመና፡ ዚኣሁ፡ ወደመና፡ ጊሜ፡ ኅቡር፡ ውእቱ፡ ወአሐዱ፡ ለካልኡ፡ ይሁብ።
21 ወመንፈሱ፡ ለዝናም፡ ሶበ፡ ይትሐወስ፡ እመዝገበ፡ ዚኣሁ፡ ይመጽኡ፡ መላእክት፡ ወያርኅዉ፡ መዝገበ፡ ወያወፅእዎ፡ ወሶበ፡ ይዘራዕ፡ ዲበ፡ ኵሉ፡ የብስ፡ ይትኀበር፡ ምስለ፡ ኵሉ፡ ማይ፡ ዘዲበ፡ የብስ፡ ወሶበ፡ ይትኀበር፡ በኵሉ፡ ጊዜ፡ ምስለ፡ ማይ፡ ዘዲበ፡ የብስ።
22 እስመ፡ ኮኑ፡ ማያት፡ ለእለ፡ የኀድሩ፡ ዲበ፡ የብስ፡ እስመ፡ ሲሳያ፡ ለየብስ፡ እምኀበ፡ ልዑል፡ ዘበሰማይ፡ ውእቱ፡ እስመ፡ በእንተ፡ ዝ፡ መስፈርት፡ ቦቱ፡ ለዝናም፡ ወመላእክት፡ ይትሜጠውዎ።
23 እሎንተ፡ ኵሎሙ፡ ርኢኩ፡ እስከ፡ ገነተ፡ ጻድቃን።
24 ወይቤለኒ፡ መልአከ፡ ሰላም፡ ዘምስሌየ፡ ይሄሉ፡ እሉ፡ ክልኤቱ፡ አናብርት፡ ላዕለ፡ ዕበይ፡ ዘእግዚአብሔር፡ ድልዋን፡ ይሴሰዩ፡ ከመ፡ መቅሠፍቱ፡ ለእግዚአብሔር፡ በከ፡ ወይትቀተሉ፡ ደቂቅ፡ ምስለ፡ እማንቲሆሙ፡ ወውሉድ፡ ምስለ፡ አበዊሆሙ።
25 ሶበ፡ ተዐርፍ፡ መቅሠፍቱ፡ ለእግዚአ፡ መናፍስት፡ ዲቤሆሙ፡ ከመ፡ ኢትምጻእ፡ መቅሠፍቱ፡ ለእግዚአ፡ መናፍስት፡ በከ፡ ዲበ፡ እሉ፡ ድኅረ፡ ትከውን፡ ኵነኔ፡ በምሕረቱ፡ ወበትዕግሥቱ።
=== chapter 61 ===
[Chapter 61]
1 ወርኢኩ፡ በእማንቱ፡ መዋዕል፡ ተውህቡ፡ ለእልክቱ፡ መላእክት፡ አሕባል፡ ነዊኃን፡ ወነሥኡ፡ ሎሙ፡ ክንፈ፡ ወሰረሩ፡ ወሖሩ፡ መንገለ፡ መስዕ።
2 ወተስእልክዎ፡ ለመልአክ፡ እንዘ፡ እብል፡ ለምንት፡ ነሥኡ፡ እሎንተ፡ አሕባለ፡ ነዊኃተ፡ ወሖሩ።
3 ወይቤለኒ፡ መልአክ፡ ዘምስሌየ፡ የሐውሩ፡ ከመ፡ ይመጥኑ፡ አምጣናተ፡ ጻድቃን፡ ያመጽኡ፡ ከመ፡ ይትመርጐዙ፡ ዲበ፡ ስሙ፡ ለእግዚአ፡ መናፍስት፡ ለዓለመ፡ ዓለም።
4 ወይዌጥኑ፡ ወየኀድሩ፡ ኅሩያን፡ ምስለ፡ ኅሩያን፡ ወእሉ፡ እሙንቱ፡ አምጣናት፡ እለ፡ ይትወሀቡ፡ ለሃይማኖት፡ ወያጸንዑ፡ ቃለ፡ ጽድቅ።
5 ወእሉ፡ አምጣናት፡ ይከሥቱ፡ ኵሎ፡ ኅቡኣተ፡ ለዕመቀ፡ ምድር፡ ወእለ፡ ተሀጕሉ፡ እምበድው፡ ወእለ፡ ተበልዑ፡ እምዓሣተ፡ ባሕር፡ ወእምአራዊት፡ ከመ፡ ያግብኡ፡ ወይትመረጐዙ፡ በዕለተ፡ ኅሩይ፡ እስመ፡ አልቦ፡ ዘይትሀጐል፡ በቅድመ፡ እግዚአ፡ መናፍስት፡ ወአልቦ፡ ዘይክል፡ ተሀጕሎተ።
6 ወነሥኡ፡ ትእዛዘ፡ እለ፡ በመልዕልተ፡ ሰማያት፡ ኵሎሙ፡ ወኀይል፡ ወቃል፡ አሐዱ፡ ወብርሃን፡ አሐዱ፡ ከመ፡ እሳት።
7 ወለውእቱ፡ መቅድመ፡ ቃል፡ ይባርክዎ፡ ወያሌዕልዎ፡ ወይሴብሕዎ፡ በጥበብ፡ ወይጠበቡ፡ በነገር፡ ወበመንፈሰ፡ ሕይወት።
8 ወእግዚአ፡ መናፍስት፡ ዲበ፡ መንበረ፡ ስብሐቲሁ፡ አንበሮ፡ ለኅሩይ፡ ወይኴንን፡ ኵሎ፡ ግብሮሙ፡ ለቅዱሳን፡ በመልዕልተ፡ ሰማያት፡ ወበመዳልው፡ ይደሉ፡ ምግባሮሙ፡ ለኵሎሙ።
9 ወሶበ፡ ያሌዕል፡ ገጾ፡ ከመ፡ ይኰንን፡ ፍኖቶሙ፡ እንተ፡ ኅብእት፡ በነገረ፡ ስሙ፡ ለእግዚአ፡ መናፍስት፡ ወአሠረ፡ ዚኣሆሙ፡ በፍኖተ፡ ኵነኔ፡ ጽድቅ፡ ዘእግዚአብሔር፡ ልዑል፡ ይትናገሩ፡ ኵሎሙ፡ በአሐዱ፡ ቃል፡ ወይባርኩ፡ ወይሴብሑ፡ ወያሌዕሉ፡ ወይዌድሱ፡ በስሙ፡ ለእግዚአ፡ መናፍስት።
10 ወይጼውዕ፡ ኵሉ፡ ኀይለ፡ ሰማያት፡ ወኵሎ፡ ቅዱሳነ፡ ዘመልዕልት፡ ወኀይለ፡ እግዚአብሔር፡ ኪሩቤል፡ ወሱራፌል፡ ወአፍኒን፡ ወኵሎሙ፡ መላእክተ፡ ኀይል፡ ወኵሎሙ፡ መላእክተ፡ አጋእዝት፡ ወኅሩይ፡ ወካልእ፡ ኀይል፡ እለ፡ ውስተ፡ የብስ፡ ወዲበ፡ ማይ።
11 በይእቲ፡ ዕለት፡ ይነሥኡ፡ አሐደ፡ ቃለ፡ ወይባርኩ፡ ወይሴብሑ፡ ወይዌድሱ፡ ወያሌዕሉ፡ በመንፈሰ፡ ሃይማኖት፡ ወበመንፈሰ፡ ጥበብ፡ ወበትዕግሥት፡ ወበመንፈሰ፡ ምሕረት፡ ወበመንፈሰ፡ ኵነኔ፡ ወሰላም፡ ወበመንፈሰ፡ ኂሩት፡ ወይብሉ፡ ኵሎሙ፡ በአሐዱ፡ ቃል፡ ቡሩክ፡ ወይትባረክ፡ ስሙ፡ ለእግዚአ፡ መናፍስት፡ ለዓለም፡ ወእስከ፡ ለዓለም።
12 ይባርክዎ፡ ኵሎሙ፡ ቅዱሳን፡ እለ፡ ኢይነውሙ፡ በመልዕልተ፡ ሰማይ፡ ወኵሎሙ፡ ኅሩያን፡ እለ፡ የኀድሩ፡ ውስተ፡ ገነት፡ ሕይወት፡ ወኵላ፡ መንፈሰ፡ ብርሃን፡ ዘትክል፡ ባርኮቶ፡ ወሰብሖቶ፡ ወአልዕሎቶ፡ ወቀድሶቶ፡ ለስምከ፡ ቅዱስ፡ ወኵሉ፡ ዘሥጋ፡ ዘፈድፈደ፡ እምኀይል፡ ትሴብሕ፡ ወትባርክ፡ ለስምከ፡ ለዓለመ፡ ዓለም።
13 እስመ፡ ብዙኅ፡ ምሕረቱ፡ ለእግዚአ፡ መናፍስት፡ ወርሑቀ፡ መዓት፡ ወኵሎ፡ ግብሮ፡ ወኵሎ፡ ኀይሎ፡ በአምጣነ፡ ገብረ፡ ከሠተ፡ ለጻድቃን፡ ወለኅሩያን፡ በስሙ፡ ለእግዚአ፡ መናፍስት።
=== chapter 62 ===
[Chapter 62]
1 ወከመ፡ ዝ፡ አዘዘ፡ እግዚእ፡ ለነገሥት፡ ወለአዚዛን፡ ወለልዑላን፡ ወለኀያላን፡ ወለእለ፡ የኀድርዋ፡ ለምድር፡ ወይብል፡ ክሥቱ፡ አዕይንቲክሙ፡ ወአንሥኡ፡ አቅርንቲክሙ፡ እመ፡ ትክሉ፡ አእምሮቶ፡ ለኅሩይ።
2 ወነበረ፡ እግዚአ፡ መናፍስት፡ ዲበ፡ መንበረ፡ ስብሐቲሁ፡ ወመንፈሰ፡ ጽድቅ፡ ተክዕወ፡ ዲቤሁ፡ ወነገረ፡ አፉሁ፡ ይቅትል፡ ኵሎ፡ ኃጥኣነ፡ ወኵሎ፡ ዐማፅያን፡ ወእምገጹ፡ ይትሀጐሉ።
3 ወይቀውሙ፡ በይእቲ፡ ዕለት፡ ኵሎሙ፡ ነገሥት፡ ወአዚዛን፡ ወልዑላን፡ ወእለ፡ ይእኅዝዋ፡ ለምድር፡ ወይሬእይዎ፡ ወየአምርዎ፡ ከመ፡ ይነብር፡ ዲበ፡ መንበረ፡ ስብሐቲሁ፡ ወጻድቃን፡ ይትኴነኑ፡ ቅድሜሁ፡ በጽድቅ፡ ወነገረ፡ በክ፡ አልቦ፡ ዘይትበሀል፡ በቅድሜሁ።
4 ወይመጽእ፡ ዲቤሆሙ፡ ሕማም፡ ከመ፡ ብእሲት፡ እንተ፡ ውስተ፡ ማሕምም፡ ወያዐጽባ፡ ወሊድ፡ ሶበ፡ ይመጽእ፡ ወልዳ፡ በአፈ፡ ማሕፀና፡ ወተዐጽብ፡ ለወሊድ።
5 ወይሬእይዎሙ፡ መንፈቆሙ፡ ለመንፈቆሙ፡ ወይደነግፁ፡ ወያቴሕቱ፡ ገጾሙ፡ ወይእኅዞሙ፡ ሕማም፡ ሶበ፡ ይሬእይዎ፡ ለዝኩ፡ ወልደ፡ ብእሲት፡ እንዘ፡ ይነብር፡ ዲበ፡ መንበረ፡ ስብሐቲሁ።
6 ወይሴብሕዎ፡ ወይባርክዎ፡ ወያሌዕልዎ፡ ነገሥት፡ አዚዛን፡ ወኵሎሙ፡ እለ፡ ይእኅዝዋ፡ ለምድር፡ ለዘይመልክ፡ ኵሎ፡ ዘኅቡእ።
7 እስመ፡ እምቅድም፡ ኅቡአ፡ ኮነ፡ ወልደ፡ ዕጓለ፡ እመሕያው፡ ወዐቀቦ፡ ልዑል፡ በቅድመ፡ ኀይሉ፡ ወከሠቶ፡ ለኅሩያን።
8 ወይዘራዕ፡ ማኅበረ፡ ቅዱሳን፡ ወኅሩያን፡ ወይቀውሙ፡ በቅድሜሁ፡ ኵሎሙ፡ ኅሩያን፡ በይእቲ፡ ዕለት።
9 ወይወድቁ፡ ኵሎሙ፡ ነገሥት፡ አዚዛን፡ ወልዑላን፡ ወእለ፡ ይመልክዋ፡ ለየብስ፡ በገጾሙ፡ ወይሰግዱ፡ ወይሴፈውዎ፡ ለዝኩ፡ ወልደ፡ ዕጓለ፡ እመሕያው፡ ወያስተበቍዕዎ፡ ወይስእሉ፡ ምሕረተ፡ እምኀቤሁ።
10 ወያጔጕኦሙ፡ እንከ፡ ውእቱ፡ እግዚአ፡ መናፍስት፡ ከመ፡ ያፍጥኑ፡ ወይፃኡ፡ እምቅድመ፡ ገጹ፡ ወገጾሙ፡ ይመልእ፡ ኀፍረተ፡ ወጽልመተ፡ ይትዌሰክ፡ ገጾሙ።
11 ወይትመጠውዎሙ፡ መላእክተ፡ መቅሠፍት፡ ከመ፡ ይትፈደዩ፡ እምኔሆሙ፡ ዘገፍዕዎሙ፡ ለደቂቁ፡ ወለኅሩያነ፡ ዚኣሁ።
12 ወይከውኑ፡ አርአያ፡ ለኅሩያኒሁ፡ ወጻድቃነ፡ ዚኣሁ፡ ቦሙ፡ ይትፌሥሑ፡ እስመ፡ መዓቱ፡ ለእግዚአ፡ መናፍስት፡ ዲቤሆሙ፡ ተዐርፍ፡ ወመቅሠፍቱ፡ ለእግዚአ፡ መናፍስት፡ ትሰክር፡ እምኔሆሙ።
13 ወጻድቃን፡ ወኅሩያን፡ ይድኅኑ፡ በይእቲ፡ ዕለት፡ ወገጾሙ፡ ለኃጥኣን፡ ወለዐማፅያን፡ ኢይሬእዩ፡ እምይእዜ።
14 ወእግዚአ፡ መናፍስት፡ ዲቤሆሙ፡ የዐርፍ፡ ወምስለ፡ ዝኩ፡ ወልደ፡ ዕጓለ፡ እመሕያው፡ የኀድሩ፡ ይበልዑ፡ ወይሰትዩ፡ ወይሰክቡ፡ ወይትነሥኡ፡ ለዓለመ፡ ዓለም።
15 ወተንሥኡ፡ ጻድቃን፡ ወኅሩያን፡ እምድር፡ ወኀደጉ፡ አትሕቶ፡ ገጾሙ፡ ወለብሱ፡ ልብሰ፡ ሕይወት።
16 ወውእቱ፡ ይከውን፡ ልብሰ፡ ሕይወት፡ በኀበ፡ እግዚአ፡ መናፍስት፡ ወአልባሲክሙኒ፡ ኢይበልዩ፡ ወስብሐቲክሙ፡ ኢየኀልቅ፡ በቅድመ፡ እግዚአ፡ መናፍስት።
=== chapter 63 ===
[Chapter 63]
1 ወበእማንቱ፡ መዋዕል፡ ያስተበቍዑ፡ ነገሥት፡ አዚዛን፡ እለ፡ ይእኅዝዋ፡ ለየብስ፡ እመላእክተ፡ መቅሠፍቱ፡ በኀበ፡ ሀለዉ፡ ምጥዋነ፡ ከመ፡ የሀብዎሙ፡ ዕረፍተ፡ ንስቲተ፡ ወከመ፡ ይደቁ፡ ወይስግዱ፡ በቅድመ፡ እግዚአ፡ መናፍስት፡ ወይትአመኑ፡ ኀጢአቶሙ፡ በቅድሜሁ።
2 ወይባርክዎ፡ ወይሴብሕዎ፡ ለእግዚአ፡ መናፍስት፡ ወይብሉ፡ ቡሩክ፡ ውእቱ፡ እግዚእ፡ እግዚአ፡ መናፍስት፡ ወእግዚአ፡ ነገሥት፡ እግዚኦሙ፡ ለአዚዛን፡ ወእግዚኡ፡ ለባዕል፡ ወእግዚአ፡ ስብሐት፡ ወእግዚአ፡ ጥበብ፡ ወይበርህ፡ ቦቱ፡ ኵሉ፡ ኅቡእ።
3 ኀይልከ፡ ለትውልደ፡ ትውልድ፡ ወስብሐቲከ፡ ለዓለመ፡ ዓለም፡ ዕሙቅ፡ ውእቱ፡ ኅቡኣተ፡ ዚኣከ፡ ኵሉ፡ ወኍልቊ፡ አልቦ፡ ወለጽድቀ፡ ዚኣከ፡ ሐሳብ፡ አልቦ።
4 ይእዜ፡ አእመርነ፡ ከመ፡ ንሰብሕ፡ ወንባርክ፡ ለእግዚአ፡ ነገሥት፡ ወለዘይነግሥ፡ ዲበ፡ ኵሎሙ፡ ነገሥት።
5 ወይቤሉ፡ መኑ፡ እምወሀበነ፡ ዕረፍተ፡ ከመ፡ ንሰብሖ፡ ወናእኵትቶ፡ ወንባርኮ፡ ወንእመን፡ ስብሐቲሁ።
6 ወይእዜኒ፡ ንስቲተ፡ ዕረፍተ፡ ንትሜነይ፡ ወኢንረክብ፡ ንሰደድ፡ ወኢንእኅዝ፡ ወብርሃን፡ እምቅድሜነ፡ ኀለፈ፡ ወጽልመት፡ ምንባሪነ፡ ለዓለመ፡ ዓለም።
7 እስመ፡ በቅድሜሁ፡ ኢአመነ፡ ወኢሰባሕነ፡ በስሙ፡ ለእግዚአ፡ ነገሥት፡ ወኢሰባሕናሁ፡ ለእግዚእ፡ በኵሉ፡ ተግባሩ፡ ወተስፋነ፡ ኮነ፡ ዲበ፡ በትረ፡ መንበረ፡ መንግሥትነ፡ ወስብሐቲነ።
8 በዕለተ፡ ሥራሕነ፡ ወምንዳቤነ፡ ኢያድኅነነ፡ ወኢንረክብ፡ ዕረፍተ፡ ንእመን፡ እስመ፡ መሃይምን፡ ውእቱ፡ እግዚእነ፡ በኵሉ፡ ምግባሩ፡ ወበኵሉ፡ ኵነኔሁ፡ ወጽድቁ፡ ወገጸ፡ ኵነኔሁ፡ ኢይነሥኡ።
9 ወነኀልፍ፡ እምቅድመ፡ ገጹ፡ በእንተ፡ ምግባሪነ፡ ወኵሉ፡ ኀጢአትነ፡ በጽድቅ፡ ተኈለቈ።
10 ወይእዜኒ፡ ይብልዎሙ፡ ትጽገብ፡ ነፍሰነ፡ እምንዋየ፡ ዐመፃ፡ ወኢትከልእ፡ ወሪዶተነ፡ እምላህባ፡ ለክበደ፡ ሲኦል።
11 ወእምድኅረ፡ ዝ፡ ይመልእ፡ ገጾሙ፡ ጽልመተ፡ ወኀፍረተ፡ በቅድመ፡ ዝኩ፡ ወልደ፡ ዕጓለ፡ እመሕያው፡ ወእምቅድመ፡ ገጹ፡ ይሰደዱ፡ ወሰይፍ፡ የኀድር፡ ቅድመ፡ ገጹ፡ ማእከሎሙ።
12 ወከመ፡ ዝ፡ ይቤ፡ እግዚአ፡ መናፍስት፡ ዝንቱ፡ ውእቱ፡ ሥርዐቶሙ፡ ወኵነኔሆሙ፡ ለአዚዛን፡ ወለነገሥት፡ ወለልዑላን፡ ወለእለ፡ ይእኅዝዋ፡ ለየብስ፡ በቅድመ፡ እግዚአ፡ መናፍስት።
=== chapter 64 ===
[Chapter 64]
1 ወካልኣተ፡ ገጻተ፡ ርኢኩ፡ በውእቱ፡ መካን፡ ኅቡኣተ።
2 ወሰማዕኩ፡ ቃሎ፡ ለመልአክ፡ እንዘ፡ ይብል፡ እሉ፡ እሙንቱ፡ መላእክት፡ እለ፡ ወረዱ፡ እምሰማይ፡ ዲበ፡ ምድር፡ ወዘኅቡአ፡ ከሠቱ፡ ለውሉደ፡ ሰብእ፡ ወአስሐትዎሙ፡ ለውሉደ፡ ሰብእ፡ ከመ፡ ይግበሩ፡ ኀጢአተ።
=== chapter 65 ===
[Chapter 65]
1 ወበእማንቱ፡ መዋዕል፡ ርእየ፡ ኖኅ፡ ከመ፡ አጽነነት፡ ምድር፡ ወከመ፡ ቅሩብ፡ ሀጕላ።
2 ወአንሥአ፡ እገሪሁ፡ እምህየ፡ ወሖረ፡ እስከ፡ አጽናፈ፡ ምድር፡ ወጸርሐ፡ ለእምኄዉ፡ ሄኖክ፡ ወይቤ፡ ኖኅ፡ በቃል፡ መሪር፡ ስምዐኒ፡ ስምዐኒ፡ ስምዐኒ፡ ሥልሰ።
3 ወይቤሎ፡ ንግረኒ፡ ምንት፡ ውእቱ፡ ዘይትገበር፡ በዲበ፡ ምድር፡ እስመ፡ ከመ፡ ዝ፡ ሠርሐት፡ ምድር፡ ወአንቀልቀለት፡ ዮጊ፡ አነ፡ እትሀጐል፡ ምስሌሃ።
4 ወበድኅረ፡ ውእቱ፡ ጊዜ፡ ኮነ፡ ሀውክ፡ ዐቢይ፡ ዲበ፡ ምድር፡ ወተሰምዐ፡ ቃል፡ እምሰማይ፡ ወወደቁ፡ በገጽየ።
5 ወመጽአ፡ ሄኖክ፡ እምኄውየ፡ ወቆመ፡ ኀቤየ፡ ወይቤለኒ፡ ለምንት፡ ጸራሕከ፡ ኀቤየ፡ ጽራሐ፡ መሪረ፡ ወብካየ።
6 ወትእዛዝ፡ ወፅአ፡ እምኀበ፡ ገጹ፡ ለእግዚእ፡ መናፍስት፡ ዲበ፡ እለ፡ የኀድሩ፡ ውስተ፡ የብስ፡ ከመ፡ ውእቱ፡ ይኩን፡ ኅልቀቶሙ፡ እስመ፡ አእመሩ፡ ኵሎ፡ ኅቡኣተ፡ መላእክት፡ ወኵሎ፡ ግፍዐ፡ ሰይጣናት፡ ወኵሎ፡ ኀይሎሙ፡ ኅቡአ፡ ለእለ፡ ይገብሩ፡ ሥራያተ፡ ወኀይሎሙ፡ ለኅብራት፡ ወኀይሎሙ፡ ለእለ፡ ይሰብኩ፡ ስብኮ፡ ኵሉ፡ ምድር።
7 ወእስኩ፡ እፎ፡ ይትወለድ፡ ብሩር፡ እምጸበለ፡ ምድር፡ ወእፎ፡ ይከውን፡ ነጠብጣብ፡ ዲበ፡ ምድር።
8 እስመ፡ ዓረር፡ ወናእክ፡ ኢይትወለድ፡ እምድር፡ ከመ፡ ቀዳሚ፡ ነቅዕ፡ ውእቱ፡ ዘይወልዶሙ፡ ወመልአክ፡ ዘይቀውም፡ ውስቴታ፡ ወይበድር፡ ውእቱ፡ መልአክ።
9 ወእምድኅረ፡ ዝ፡ አኀዘኒ፡ እምኄውየ፡ ሄኖክ፡ በእዴሁ፡ ወአንሥአኒ፡ ወይቤለኒ፡ ሑር፡ እስመ፡ ተስእልክዎ፡ ለእግዚአ፡ መናፍስት፡ በእንተ፡ ዝ፡ ሀውክ፡ ዘዲበ፡ ምድር።
10 ወይቤለኒ፡ በእንተ፡ ዐመፃሆሙ፡ ተፈጸመት፡ ኵነኔሆሙ፡ ወኢይትኌለቍ፡ በቅድሜየ፡ በእንተ፡ አውራኅ፡ ዘኀሠሡ፡ ወአእመሩ፡ ከመ፡ ምድር፡ ትትሀጐል፡ ወእለ፡ የኀድሩ፡ ዲቤሃ።
11 ወለእሉ፡ ምግባእ፡ አልቦሙ፡ ለዓለም፡ እስመ፡ አርአይዎሙ፡ ዘኅቡእ፡ ወእለ፡ ተኰነኑ፡ ወአኮ፡ ለከ፡ አንተ፡ ወልድየ፡ አእመረ፡ እግዚአ፡ መናፍስት፡ እስመ፡ ንጹሕ፡ ወኄር፡ አንተ፡ እም፡ ዝ፡ ኂስ፡ ዘኅቡእ።
12 ወአጽንዖ፡ ለስምከ፡ በማእከለ፡ ቅዱሳን፡ ወየዐቅበከ፡ እምእለ፡ የኀድሩ፡ ዲበ፡ የብስ፡ ወአጽንዖ፡ ለዘርዕከ፡ በጽድቅ፡ ለነገሥት፡ ወለስብሐት፡ ዐቢያት፡ ወእምዘርዕከ፡ ይወፅእ፡ ነቅዐ፡ ጻድቃን፡ ወቅዱሳን፡ ወኍልቊ፡ አልቦሙ፡ ለዓለም።
=== chapter 66 ===
[Chapter 66]
1 ወእምድኅረዝ፡ አርአየኒ፡ መላእክተ፡ መቅሠፍት፡ እለ፡ ድልዋን፡ ከመ፡ ይምጽኡ፡ ወይፍትሑ፡ ኵሎ፡ ኀይለ፡ ማይ፡ ዘመትሕተ፡ ምድር፡ ከመ፡ ይኩን፡ ለኵነኔ፡ ወለሀጕል፡ ለኵሎሙ፡ እለ፡ ይነብሩ፡ ወየኀድሩ፡ ዲበ፡ የብስ።
2 ወአዘዘ፡ እግዚአ፡ መናፍስት፡ መላእክተ፡ እለ፡ ይወፅኡ፡ ከመ፡ ኢያንሥኡ፡ እደወ፡ ወይዕቀቡ፡ እስመ፡ እልክቱ፡ መላእክት፡ ዲበ፡ ኀይለ፡ ማያት፡ ሀለዉ።
3 ወወፃእኩ፡ እምቅድመ፡ ገጸ፡ ሄኖክ።
=== chapter 67 ===
[Chapter 67]
1 ወበእማንቱ፡ መዋዕል፡ ኮነ፡ ቃለ፡ እግዚአብሔር፡ ኀቤየ፡ ወይቤለኒ፡ ኖኅ፡ ናሁ፡ ክፍልከ፡ ዐርገ፡ ኀቤየ፡ ክፍል፡ ዘአልቦቱ፡ ኂስ፡ ክፍለ፡ ፍቅር፡ ወርትዕ።
2 ወይእዜኒ፡ ይገብሩ፡ መላእክት፡ ዕፀወ፡ ወሶበ፡ ወፅኡ፡ ለውእቱ፡ መልእክት፡ እወዲ፡ እዴየ፡ ዲቤሃ፡ ወአዐቅባ፡ ወትከውን፡ እምኔሃ፡ ዘርዐ፡ ሕይወት፡ ወተውላጥ፡ ይባእ፡ ከመ፡ ኢይንበር፡ የብስ፡ ዕራቁ።
3 ወኣጸንዖ፡ ለዘርዕከ፡ በቅድሜየ፡ ለዓለመ፡ ዓለም፡ ወእዘርዖሙ፡ ለእለ፡ የኀድሩ፡ ምስሌከ፡ ውስተ፡ ገጸ፡ የብስ፡ ወይትባዛኅ፡ ወይትባረክ፡ ቅድመ፡ የብስ፡ በስሙ፡ ለእግዚአ፡ መናፍስት።
4 ወየዐጽውዎሙ፡ ለእልክቱ፡ መላእክት፡ እለ፡ አርአይዋ፡ ለዐመፃ፡ ውስተ፡ ይእቲ፡ ቈላ፡ እንተ፡ ትነድድ፡ እንተ፡ አርአየኒ፡ ቀዳሚ፡ እምኄውየ፡ ሄኖክ፡ በዐረብ፡ በኀበ፡ አድባረ፡ ወርቅ፡ ወብሩር፡ ወኀጺን፡ ወነጠብጣብ፡ ወናእክ።
5 ወርኢክዋ፡ ለይእቲ፡ ቈላ፡ እንተ፡ ሀዉክ፡ ዐቢይ፡ ባቲ፡ ወተሀውኮ፡ ማያት።
6 ወዝንቱ፡ ኵሉ፡ ሶበ፡ ተገብረ፡ እምውእቱ፡ ነጠብጣበ፡ እሳት፡ ወሀውኮሙ፡ ዘየሀውኮሙ፡ በውእቱ፡ መካን፡ ተወልደ፡ ጼና፡ ተይ፡ ወተኀብረ፡ ምስለ፡ እልኩ፡ ማያት፡ ወይእቲ፡ ቈላ፡ እንተ፡ መላእክት፡ እለ፡ አስሐቱ፡ ትነድድ፡ መትሕተ፡ ይእቲ፡ ምድር።
7 ወእንተ፡ ቈላተ፡ ዚኣሃ፡ አፍላገ፡ እሳት፡ ይወፅኡ፡ በኀበ፡ ይትኴነኑ፡ እልክቱ፡ መላእክት፡ እለ፡ አስሐትዎሙ፡ ለእለ፡ የኀድሩ፡ ዲበ፡ የብስ።
8 ወይከውኑ፡ እልክቱ፡ ማያት፡ በእማንቱ፡ መዋዕል፡ ለነገሥት፡ ወለአዚዛን፡ ወለልዑላን፡ ወለእለ፡ የኀድሩ፡ ዲበ፡ የብስ፡ ለፈውሰ፡ ነፍስ፡ ወሥጋ፡ ወለኵነኔ፡ መንፈስ፡ ወተውኔተ፡ ይመልእ፡ መንፈሶሙ፡ ከመ፡ ይትኰነኑ፡ በሥጋሆሙ፡ እስመ፡ ክሕድዎ፡ ለእግዚአ፡ መናፍስት፡ ወይሬእዩ፡ ኵነኔሆሙ፡ እንተ፡ ኵሉ፡ ዕለት፡ ወኢየአምኑ፡ በስሙ።
9 ወበከመ፡ ብዙኀ፡ ውዕየ፡ ሥጋሆሙ፡ ከመ፡ ዝ፡ ቦሙ፡ ተውላጥ፡ ለመንፈሶሙ፡ ለዓለመ፡ ዓለም፡ እስመ፡ አልቦ፡ በቅድመ፡ እግዚአ፡ መናፍስት፡ ዘይትናገር፡ በነገረ፡ በክ።
10 እስመ፡ ትመጽእ፡ ኵነኔ፡ ዲቤሆሙ፡ እስመ፡ የአምኑ፡ በተውኔተ፡ ሥጋሆሙ፡ ወመንፈሰ፡ እግዚእ፡ ይክሕዱ።
11 ወኪያሁ፡ ማያት፡ በውእቱ፡ ጊዜ፡ ቦሙ፡ ተውላጥ፡ እስመ፡ ሶበ፡ ይትኴነኑ፡ እልክቱ፡ መላእክት፡ በውእቱ፡ መዋዕል፡ ይትዌለጥ፡ ራእዮሙ፡ ለእልክቱ፡ አንቅዕተ፡ ማያት፡ ወሶበ፡ የዐርጉ፡ መላእክት፡ ይትዌለጥ፡ ዝኩ፡ ማይ፡ ዘአንቅዕት፡ ወይቈርር።
12 ወሰማዕክዎ፡ ለቅዱስ፡ ሚካኤል፡ እንዘ፡ ያወሥእ፡ ወይብል፡ ዛቲ፡ ኵነኔ፡ እንተ፡ ይትኴነኑ፡ መላእክት፡ ሰማዕት፡ ይእቲ፡ ለነገሥት፡ ወለአዚዛን፡ ወለእለ፡ ይእኅዝዋ፡ ለየብስ።
13 እስመ፡ እሉ፡ ማያተ፡ ኵነኔ፡ ለፈውሰ፡ ሥጋሆሙ፡ ለመላእክት፡ ወለሞተ፡ ሥጋሆሙ፡ ወኢይሬእዩ፡ ወኢየአምኑ፡ ከመ፡ ይትመየጡ፡ እሙንቱ፡ ማያት፡ ወይከውኑ፡ እሳተ፡ ዘይነድድ፡ ለዓለም።
=== chapter 68 ===
[Chapter 68]
1 ወእምድኅረ፡ ዝ፡ ወሀበኒ፡ ትእምርተ፡ ኵሎሙ፡ ኅቡኣት፡ በመጽሐፍ፡ እምኄውየ፡ ሄኖክ፡ ወምሳሌያተ፡ ዘተውህባ፡ ሎቱ፡ ወደመሮሙ፡ ሊተ፡ በነገረ፡ መጽሐፍ፡ ዘምሳሌ።
2 ወበይእቲ፡ ዕለተ፡ አውሥኦ፡ ቅዱስ፡ ሚካኤል፡ ለሩፋኤል፡ እንዘ፡ ይብል፡ ኀይሉ፡ ለመንፈስ፡ ይመሥጠኒ፡ ወያምዕዐኒ፡ ወበእንተ፡ ዕጸቡ፡ ለኵነኔ፡ እንተ፡ ኅቡኣት፡ መላእክት፡ መኑ፡ ውእቱ፡ ዘይክል፡ ተዐግሦተ፡ ዕጹበ፡ ለእንተ፡ ተገብረት፡ ኵነኔ፡ ወነበረት፡ ይትመሰዉ፡ በቅድሜሃ።
3 ወአውሥኦ፡ ካዕበ፡ ወይቤሎ፡ ቅዱስ፡ ሚካኤል፡ ለሩፋኤል፡ መኑ፡ ውእቱ፡ ዘኢያረኅርኅ፡ ልቦ፡ ዲቤሃ፡ ወኢይትሀወክ፡ ኵልያቲሁ፡ እምዛቲ፡ ቃል፡ ኵነኔ፡ ወፅአት፡ ዲቤሆሙ፡ እምኔሆሙ፡ ዘአውፅእዎሙ፡ ከመ፡ ዝ።
4 ወኮነ፡ ሶበ፡ ቆመ፡ በቅድመ፡ እግዚአ፡ መናፍስት፡ ከመ፡ ዝ፡ ይቤሎ፡ ቅዱስ፡ ሚካኤል፡ ለሩፋኤል፡ ኢይከውን፡ ሎሙ፡ ምሕረት፡ በውስተ፡ ዐይነ፡ እግዚእ፡ እስመ፡ እግዚአ፡ መናፍስት፡ ተምዕዖሙ፡ እስመ፡ በአምሳለ፡ እግዚእ፡ ይገብሩ።
5 በእንተ፡ ዝ፡ ይመጽእ፡ ላዕሌሆሙ፡ ኵነኔ፡ ዘኅቡእ፡ ለዓለመ፡ ዓለም፡ እስመ፡ ኢ፡ መልአክ፡ ወኢ፡ ብእሲ፡ ኢይትመጠዉ፡ መክፈልቶ፡ አላ፡ እሙንቱ፡ ባሕቲቶሙ፡ ተመጠዉ፡ ኵነኔሆሙ፡ ለዓለመ፡ ዓለም።
=== chapter 69 ===
[Chapter 69]
1 ወእምድኅረ፡ ዝ፡ ኵነኔ፡ ያደነግፅዎሙ፡ ወያምዕዕዎሙ፡ እስመ፡ ዛተ፡ አርአዩ፡ ለእለ፡ የኀድሩ፡ ዲበ፡ የብስ።
2 ወነዋ፡ አስማቲሆሙ፡ ለእልክቱ፡ መላእክት፡ ወዝ፡ ውእቱ፡ አስማቲሆሙ፡ ቀዳማየ፡ ዚኣሆሙ፡ ስምያዛ፡ ወካልኡ፡ አርስጢቄፋ፡ ወሣልስ፡ አርሜን፡ ወራብዕ፡ ኮክባኤል፡ ወኀምስ፡ ጡርኤል፡ ወሳድስ፡ ሩምያል፡ ወሳብዕ፡ ዳንኤል፡ ወሳምን፡ ኑቃኤል፡ ወታስዕ፡ በራቅኤል፡ ወዐሥር፡ አዛዝኤል፡ ዐሥር፡ ወአሐዱ፡ አርማሮስ፡ ዐሥር፡ ወካልእ፡ በጠርያል፡ ዐሥር፡ ወሣልስ፡ በሰሳኤል፡ ዐሥር፡ ወራብዕ፡ አናንኤል፡ ዐሥር፡ ወኀምስ፡ ጡርያል፡ ዐሥር፡ ወሳድስ፡ ሲማሲፒኤል፡ ዐሥር፡ ወሳብዕ፡ ይተርኤል፡ ዐሥር፡ ወሳምን፡ ቱማኤል፡ ዐሥር፡ ወታስዕ፡ ጠርኤል፡ ዕሥራ፡ ሩማኤል፡ ዕሥራ፡ ወአሐዱ፡ አዛዝኤል።
3 ወእሉ፡ እሙንቱ፡ አርእስተ፡ መላእክቲሆሙ፡ ወአስማቲሆሙ፡ መኰንነ፡ ምእተ፡ ዚኣሆሙ፡ ወመኰንነ፡ ኀምሳ፡ ዚኣሆሙ፡ ወመኰንነ፡ ዐሠርተ፡ ዚኣሆሙ።
4 ስሙ፡ ለቀዳማዊ፡ ይቆን፡ ወዝንቱ፡ ዘአስሐተ፡ ኵሎሙ፡ ደቂቀ፡ መላእክት፡ ወአውረዶሙ፡ ዲበ፡ የብስ፡ ወአስሐቶሙ፡ በአዋልደ፡ ሰብእ።
5 ወካልእ፡ ስሙ፡ አስብኤል፡ ወዝንቱ፡ አመሮሙ፡ ምክረ፡ እኩየ፡ ለደቂቀ፡ መላእክት፡ ቅዱሳን፡ ወአስሐቶሙ፡ ከመ፡ ያማስኑ፡ ሥጋሆሙ፡ በአዋልደ፡ ሰብእ።
6 ወሣልስ፡ ስሙ፡ ጋድርኤል፡ ዝ፡ ውእቱ፡ ዘአርአየ፡ ዝብጠታተ፡ ሞት፡ ለውሉደ፡ ሰብእ፡ ወውእቱ፡ አስሐታ፡ ለሔዋን፡ ወውእቱ፡ አርአየ፡ ንዋየ፡ ሞት፡ ለደቂቀ፡ ሰብእ፡ ወልታ፡ ወድርዐ፡ ወሰይፈ፡ ለቀትል፡ ወኵሎ፡ ንዋየ፡ ሞት፡ ለውሉደ፡ ሰብእ።
7 ወእምነ፡ እዴሁ፡ ወፅአ፡ ዲቤሆሙ፡ ለእለ፡ የኀድሩ፡ ዲበ፡ የብስ፡ እምይእቲ፡ ጊዜ፡ ወእስከ፡ ለዓለም።
8 ወራብዕ፡ ስሙ፡ ፔኔሙዕ፡ ዝ፡ ውእቱ፡ ዘአርአየ፡ ለውሉደ፡ ሰብእ፡ መሪረ፡ ወመዐርዒረ፡ ወአርአዮሙ፡ ኵሎ፡ ኅቡኣተ፡ ጥበቦሙ።
9 ወውእቱ፡ አለበዎሙ፡ ለሰብእ፡ መጽሐፈ፡ በማየ፡ ሕመት፡ ወክርታስ፡ ወበእንተ፡ ዝ፡ ብዙኃን፡ እለ፡ ይስሕቱ፡ እምዓለም፡ ወእስከ፡ ለዓለም፡ ወእስከ፡ ዛቲ፡ ዕለት።
10 እስመ፡ ኢተወልደ፡ ሰብእ፡ ለዘከመ፡ ዝ፡ በቀለም፡ ወበማየ፡ ሕመት፡ ያጽንዑ፡ ሃይማኖቶሙ።
11 እስመ፡ ኢተፈጥረ፡ ሰብእ፡ ዘእንበለ፡ ከመ፡ መላእክት፡ ከመ፡ ይንበሩ፡ ጻድቃነ፡ ወንጹሓነ፡ ወሞት፡ ዘኵሎ፡ ያማስን፡ እምኢገሰሶሙ፡ አላ፡ በዝ፡ አእምሮቶሙ፡ ይትሀጐሉ፡ ወበእንተ፡ ዝንቱ፡ ይበልዐኒ፡ ኀይል።
12 ወኀምስ፡ ስሙ፡ ካዕድያዕ፡ ዝንቱ፡ አርአየ፡ ለውሉደ፡ ሰብእ፡ ኵሎ፡ ዝብጠታተ፡ እኩየ፡ ዘነፍስት፡ ወዘአጋንንት፡ ወዝብጠታተ፡ ፃእፃእ፡ በማሕፀን፡ ከመ፡ ይደቅ፡ ወዝብጠታተ፡ ነፍስ፡ ንስከተ፡ አርዌ፡ ወዝብጠታተ፡ ዘይከውን፡ በቀትር፡ ወልዳ፡ ለአርዌ፡ ዘስሙ፡ ተባዕ።
13 ወዝ፡ ውእቱ፡ ኍልቁ፡ ለክስብኤል፡ ርእሰ፡ መሐላ፡ ዘአርአየ፡ ለቅዱሳን፡ ሶበ፡ የኀድር፡ ልዑል፡ በስብሐት፡ ወስሙ፡ ቤቃ።
14 ወዝንቱ፡ ይቤሎ፡ ለቅዱስ፡ ሚካኤል፡ ያርእዮሙ፡ ስሞ፡ ኅቡአ፡ ከመ፡ ይርአይዎ፡ ለውእቱ፡ ስም፡ ኅቡእ፡ ወከመ፡ ይዝክርዎ፡ በመሐላ፡ ከመ፡ ይርዓዱ፡ እምውእቱ፡ ስም፡ ወመሐላ፡ እለ፡ አርአዩ፡ ለውሉደ፡ ሰብእ፡ ኵሎ፡ ዘኅቡእ።
15 ወዝንቱ፡ ኀይሉ፡ ለዝ፡ መሐላ፡ እስመ፡ ኀያል፡ ውእቱ፡ ወጽኑዕ፡ ወአንበሮ፡ ለዝኩ፡ መሐላ፡ አካዕ፡ በእዴሁ፡ ለቅዱስ፡ ሚካኤል።
16 ወእሉ፡ እሙንቱ፡ ኅቡኣቲሁ፡ ለዝ፡ መሐላ፡ ወጸንዑ፡ በመሐላሁ፡ ወሰማይ፡ ተሰቅለ፡ ዘእንበለ፡ ይትፈጠር፡ ዓለም፡ ወእስከ፡ ለዓለም።
17 ወቦቱ፡ ምድር፡ ተሣረረት፡ ዲበ፡ ማይ፡ ወእምነ፡ ኅቡኣተ፡ አድባር፡ ይመጽኡ፡ ለሕያዋን፡ ላህያት፡ ማያት፡ እምፍጥረተ፡ ዓለም፡ ወእስከ፡ ለዓለም።
18 ወበውእቱ፡ መሐላ፡ ተፈጥረት፡ ባሕር፡ ወመሠረታ፡ ለጊዜ፡ መዓት፡ አንበረ፡ ላቲ፡ ኆፃ፡ ወኢተኀልፍ፡ እምፍጥረተ፡ ዓለም፡ ወእስከ፡ ለዓለም።
19 ወበውእቱ፡ መሐላ፡ ቀላያት፡ ጸንዑ፡ ወቆሙ፡ ወኢይትሐወሱ፡ እመካኖሙ፡ እምዓለም፡ ወእስከ፡ ለዓለም።
20 ወበውእቱ፡ መሐላ፡ ፀሓይ፡ ወወርኅ፡ ይፌጽሙ፡ ምሕዋሮሙ፡ ወኢየኀልፉ፡ እምትእዛዞሙ፡ እምዓለም፡ ወእስከ፡ ለዓለም።
21 ወበውእቱ፡ መሐላ፡ ከዋክብት፡ ይፌጽሙ፡ ምሕዋሮሙ፡ አስማቲሆሙ፡ ይጼውዕ፡ ወያወሥእዎ፡ እምዓለም፡ ወእስከ፡ ለዓለም።
22 ወከመ፡ ዝ፡ ነፍሳቲሆሙ፡ ለማያት፡ ነፍሳቲሆሙ፡ ለነፋሳት፡ ወለኵሎሙ፡ መናፍስቲሆሙ፡ ወፍናዋቲሆሙ፡ እምኵሉ፡ ኅብራተ፡ መናፍስት።
23 ወበህየ፡ ይትዐቀቡ፡ መዛግብተ፡ ቃሉ፡ ለነጐድጓድ፡ ወብርሃኑ፡ ለመብረቅ፡ ወበህየ፡ ይትዐቀቡ፡ መዛግብተ፡ በረድ፡ ወአስሐትያ፡ ወመዛግብተ፡ ጊሜ፡ ወመዛግብተ፡ ዝናም፡ ወጠል።
24 ወኵሎሙ፡ እሙንቱ፡ የአምኑ፡ ወየአኵቱ፡ በቅድመ፡ እግዚአ፡ መናፍስት፡ ወይሴብሑ፡ በኵሉ፡ ኀይሎሙ፡ ወሲሳዮሙ፡ በኵሉ፡ አኰቴት፡ ይእቲ፡ ወየአኵቱ፡ ወይሴብሑ፡ ወያሌዕሉ፡ በስሙ፡ ለእግዚአ፡ መናፍስት፡ ለዓለመ፡ ዓለም።
25 ወዲቤሆሙ፡ ጸንዐ፡ ዝ፡ መሐላ፡ ወይትዐቀቡ፡ ቦቱ፡ ወፍናዋቲሆሙ፡ ይትዐቀቡ፡ ወምሕዋራቲሆሙ፡ ኢይማስን።
26 ወኮኖሙ፡ ፍሥሓ፡ ዐቢየ፡ ወባረኩ፡ ወሰብሑ፡ ወአልዐሉ፡ በእንተ፡ ዘተከሥተ፡ ሎሙ፡ ስሙ፡ ለወልደ፡ ዕጓለ፡ እመሕያው።
27 ወነበረ፡ ዲበ፡ መንበረ፡ ስብሐቲሁ፡ ወርእሱሰ፡ ለኵነኔ፡ ተውህበ፡ ሎቱ፡ ለወልደ፡ ዕጓለ፡ እመሕያው፡ ወያኀልፍ፡ ወያማስን፡ ኃጥኣነ፡ እምገጸ፡ ለምድር፡ ወእለ፡ አስሐትዎ፡ ለዓለም።
28 በሰናስል፡ ይትአሰሩ፡ ወበማኅበሮሙ፡ ዘሙስና፡ ይትዐጸዉ፡ ወኵሉ፡ ምግባሮሙ፡ የኀልፍ፡ እምቅድመ፡ ገጻ፡ ለምድር።
29 ወእምይእዜሰ፡ ኢይከውን፡ ዘይማስን፡ እስመ፡ ወልደ፡ ብእሲ፡ ተርእየ፡ ወነበረ፡ ዲበ፡ መንበረ፡ ስብሐቲሁ፡ ወኵሉ፡ እኩይ፡ እምቅድመ፡ ገጹ፡ የኀልፍ፡ ወየሐውር፡ ወይነግሩ፡ ለውእቱ፡ ወልደ፡ ብእሲ፡ ወይጸንዕ፡ በቅድመ፡ እግዚአ፡ መናፍስት፡ ወዝ፡ ውእቱ፡ ሣልስ፡ ምሳሌ፡ ዘሄኖክ።
=== chapter 70 ===
[Chapter 70]
1 ወኮነ፡ እምድኅረ፡ ዝ፡ ተለዐለ፡ ስሙ፡ ሕያው፡ በኀቤሁ፡ ለውእቱ፡ ወልደ፡ ዕጓለ፡ እመሕያው፡ ወኀበ፡ እግዚአ፡ መናፍስት፡ እምእለ፡ የኀድሩ፡ ዲበ፡ የብስ።
2 ወተለዐለ፡ በሠረገላተ፡ መንፈስ፡ ወወፅአ፡ ስም፡ በማእከሎሙ።
3 ወእምይእቲ፡ ዕለት፡ ኢተስሕብኩ፡ በማእከሎሙ፡ ወአንበረኒ፡ በማእከለ፡ ክልኤቱ፡ መናፍስት፡ በማእከለ፡ መስዕ፡ ወዐረብ፡ በኀበ፡ ነሥኡ፡ አሕባላተ፡ መላእክት፡ ከመ፡ ይስፍሩ፡ ሊተ፡ መካነ፡ ለኅሩያን፡ ወለጻድቃን።
4 ወበህየ፡ ርኢኩ፡ አበወ፡ ቀደምተ፡ ወጻድቃነ፡ እለ፡ እምዓለም፡ በውእቱ፡ መካን፡ የኀድሩ።
=== chapter 71 ===
[Chapter 71]
1 ወኮነ፡ እምድኅረ፡ ዝ፡ ከመ፡ ትትከበት፡ መንፈስየ፡ ወትዕርግ፡ ውስተ፡ ሰማየ፡ ሰማያት፡ ርኢክዎሙ፡ ለውሉዶሙ፡ ለመላእክት፡ ቅዱሳን፡ ይከይዱ፡ ዲበ፡ ላህበ፡ እሳት፡ ወአልባሲሆሙ፡ ጸዐዳ፡ ወዐጽፎሙኒ፡ ወብርሃነ፡ ገጾሙ፡ ከመ፡ በረድ።
2 ወርኢኩ፡ ክልኤተ፡ አፍላገ፡ እሳት፡ ወብርሃነ፡ ዝኩ፡ እሳት፡ ከመ፡ ያክንት፡ ያበርህ፡ ወወደቁ፡ በገጽየ፡ በቅድመ፡ እግዚአ፡ መናፍስት።
3 ወሚካኤል፡ መልአክ፡ አሐዱ፡ እምአርእስተ፡ መላእክት፡ አኀዘኒ፡ እዴየ፡ ዘየማን፡ ወአንሥአኒ፡ ወአውፅአኒ፡ ኀበ፡ ኵሉ፡ ኅቡኣተ፡ ምሕረት፡ ወኅቡኣተ፡ ጽድቅ።
4 ወአርአየኒ፡ ኵሎ፡ ኅቡኣተ፡ አጽናፈ፡ ሰማይ፡ ወኵሎ፡ መዛግብተ፡ ከዋክብት፡ ወብርሃናት፡ ኵሎሙ፡ እምኀበ፡ ይወፅኡ፡ ለገጸ፡ ቅዱሳን።
5 ወከበቶ፡ መንፈስ፡ ለሄኖክ፡ ውስተ፡ ሰማየ፡ ሰማያት፡ ወርኢኩ፡ በህየ፡ ማእከለ፡ ዝኩ፡ ብርሃን፡ ከመ፡ ቦቱ፡ ዘይትነደቅ፡ እምእብነ፡ አስሐትያ፡ ወበማእከለ፡ እሙንቱ፡ አእባን፡ ልሳናተ፡ እሳት፡ ሕያው።
6 ወርእየት፡ መንፈስየ፡ ዐውደ፡ ዘየዐውዶ፡ ለውእቱ፡ ቤት፡ እሳት፡ እምአርባዕቱ፡ አጽናፊሁ፡ ለውእቱ፡ ፈለግ፡ ምሉኣነ፡ እሳት፡ ሕያው፡ ወየዐውድዎ፡ ለውእቱ፡ ቤት።
7 በዐውዱ፡ ኪሩቤል፡ ወሱራፌል፡ ወአፍኒን፡ እሉ፡ እሙንቱ፡ እለ፡ ኢይነውሙ፡ ወየዐቅቡ፡ መንበረ፡ ስብሐቲሁ።
8 ወርኢኩ፡ መላእክተ፡ እለ፡ ኢይትኌለቁ፡ አእላፈ፡ አእላፋት፡ ወትእልፊተ፡ አእላፋት፡ ዘየዐውድዎ፡ ለውእቱ፡ ቤት፡ ወሚካኤል፡ ወገብርኤል፡ ፋኑኤል፡ ወሩፋኤል፡ ወመላእክት፡ ቅዱሳን፡ እለ፡ መልዕልተ፡ ሰማያት፡ ይበውኡ፡ ወይወፅኡ፡ በውእቱ፡ ቤት።
9 ወወፅኡ፡ እምውእቱ፡ ቤት፡ ሚካኤል፡ ወገብርኤል፡ ሩፋኤል፡ ወፋኑኤል፡ ወብዙኃን፡ ቅዱሳን፡ መላእክት፡ እለ፡ አልቦሙ፡ ኍልቊ።
10 ወምስሌሆሙ፡ ርእሰ፡ መዋዕል፡ ወርእሱ፡ ኮነ፡ ከመ፡ ፀምር፡ ጸዐዳ፡ ወንጹሕ፡ ወልብሱ፡ ዘኢይተረጐም።
11 ወወደቁ፡ በገጽየ፡ ወኵሉ፡ ሥጋየ፡ ተመስወ፡ ወመንፈስየ፡ ተወለጠ፡ ወጸራሕኩ፡ በቃል፡ ዐቢይ፡ በመንፈሰ፡ ኀይል፡ ወባረኩ፡ ወሰባሕኩ፡ ወአልዐልኩ።
12 ወእላ፡ በረከታት፡ እለ፡ ወፅኣ፡ እምአፉየ፡ ኮና፡ ሥሙራተ፡ በቅድመ፡ ዝኩ፡ ርእሰ፡ መዋዕል።
13 ወመጽአ፡ ውእቱ፡ ርእሰ፡ መዋዕል፡ ምስለ፡ ሚካኤል፡ ወገብርኤል፡ ሩፋኤል፡ ወፋኑኤል፡ ወአእላፍ፡ ወትእልፊተ፡ አእላፋት፡ መላእክት፡ እለ፡ አልቦሙ፡ ኍልቊ።
14 ወመጽአ፡ ኀቤየ፡ ውእቱ፡ መልአክ፡ ወበቃሉ፡ አምኀኒ፡ ወይቤለኒ፡ አንተ፡ ውእቱ፡ ወልደ፡ ብእሲ፡ ዘተወለድከ፡ ለጽድቅ፡ ወጽድቅ፡ ላዕሌከ፡ ኀደረ፡ ወጽድቁ፡ ለርእሰ፡ መዋዕል፡ ኢየኀድገከ።
15 ወይቤለኒ፡ ይጼውዕ፡ ለከ፡ ሰላመ፡ በስሙ፡ ለዓለመ፡ ዓለም፡ ዘይከውን፡ እስመ፡ እምህየ፡ ወፅአ፡ ሰላም፡ እምፍጥረተ፡ ዓለም፡ ወከመ፡ ዝ፡ ይከውን፡ ለከ፡ ለዓለም፡ ወለዓለመ፡ ዓለም።
16 ወኵሉ፡ ይከውን፡ ወየሐውር፡ ዲበ፡ ፍኖትከ፡ እንዘ፡ ጽድቅ፡ ኢየኀድገከ፡ ለዓለም፡ ወምስሌከ፡ ማኅደሪሆሙ፡ ወምስሌከ፡ ክፍሎሙ፡ ወእምኔከ፡ ኢይትሌለዩ፡ ለዓለም፡ ወለዓለመ፡ ዓለም።
17 ወከመ፡ ዝ፡ ይከውን፡ ኑኀ፡ መዋዕል፡ ምስለ፡ ውእቱ፡ ወልደ፡ ዕጓለ፡ እመሕያው፡ ወሰላም፡ ይከውን፡ ለጻድቃን፡ ወፍኖቱ፡ ርቱዕ፡ ለጻድቃን፡ በስመ፡ እግዚአ፡ መናፍስት፡ ለዓለመ፡ ዓለም።
=== chapter 72 ===
[Chapter 72]
1 መጽሐፈ፡ ሚጠተ፡ ብርሃናተ፡ ሰማይ፡ አሐዱ፡ አሐዱ፡ ዘከመ፡ ሀለዉ፡ በበ፡ ሕዘቢሆሙ፡ አሐዱ፡ አሐዱ፡ በበ፡ ሥልጣኖሙ፡ ወበበ፡ ዘመኖሙ፡ አሐዱ፡ አሐዱ፡ በበ፡ ስሞሙ፡ ወሙላዳቲሆሙ፡ ወበበ፡ አውራኂሆሙ፡ እለ፡ አርአየኒ፡ ኡርኤል፡ መልአክ፡ ቅዱስ፡ ዘሀሎ፡ ምስሌየ፡ ዘውእቱ፡ መራሒሆሙ፡ ወኵሎ፡ መጽሐፎሙ፡ በከመ፡ ውእቱ፡ አርአየኒ፡ ወበከመ፡ ኵሉ፡ ዓመተ፡ ዓለም፡ ወእስከ፡ ለዓለም፡ እስከ፡ ይትገበር፡ ግብር፡ ሐዲስ፡ ዘይነብር፡ እስከ፡ ለዓለም።
2 ወዝንቱ፡ ውእቱ፡ ትእዛዝ፡ ቀዳማዊ፡ ዘብርሃናት፡ ፀሓይ፡ ብርሃን፡ ሙፃኡ፡ በኀዋኅወ፡ ሰማይ፡ እለ፡ መንገለ፡ ጽባሕ፡ ወምዕራቢሁ፡ በኀዋኅወ፡ ሰማይ፡ ዘምዕራብ።
3 ወርኢኩ፡ ስሱ፡ ኀዋኅወ፡ እለ፡ እምኀበ፡ ይወፅእ፡ ፀሓይ፡ ወስሱ፡ ኀዋኅወ፡ እለ፡ ኀበ፡ የዐርብ፡ ፀሓይ፡ ወወርኅ፡ በውእቶን፡ ኀዋኅው፡ ይሠርቅ፡ ወየዐርብ፡ ወመራሕያኒሆሙ፡ ለከዋክብተ፡ ሰማይ፡ ምስለ፡ እለ፡ ይመርሕዎሙ፡ ስድስቱ፡ በጽባሕ፡ ወስድስቱ፡ በምዕራበ፡ ፀሓይ፡ ወኵሎሙ፡ አሐዱ፡ አሐዱ፡ እምድኅረ፡ ካልኡ፡ ርቱዕ፡ ወመሳክው፡ ብዙኃት፡ እምየማኑ፡ ወእምጸጋሙ፡ ለዝኩ፡ ኆኅት።
4 ወቀዳሚ፡ ይወፅእ፡ ብርሃን፡ ዘየዐቢ፡ ዘስሙ፡ ፀሓይ፡ ወክበበ፡ ዚኣሁ፡ ከመ፡ ክበበ፡ ሰማይ፡ ወኵለንታሁ፡ ምሉእ፡ እሳተ፡ ዘያበርህ፡ ወያውዒ።
5 ወሠረገላተ፡ በኀበ፡ የዐርግ፡ ነፋስ፡ ይነፍኅ፡ ወየዐርብ፡ ፀሓይ፡ እምሰማይ፡ ወይገብእ፡ እንተ፡ መስዕ፡ ከመ፡ ይሑር፡ ምሥራቀ፡ ወይትመራሕ፡ ከመ፡ ይባእ፡ ኀበ፡ ዝኩ፡ ኆኅት፡ ወያበርህ፡ በገጸ፡ ሰማይ።
6 ወከመ፡ ዝ፡ ይወፅእ፡ በወርኅ፡ ቀዳማዊ፡ በኆኅት፡ ዐባይ፡ ወይወፅእ፡ እንተ፡ ይእቲ፡ ራብዕት፡ እምእልኩ፡ ኀዋኅው፡ ስድስቱ፡ እለ፡ መንገለ፡ ምሥራቀ፡ ፀሓይ።
7 ወበይእቲ፡ ራብዕት፡ ኆኅት፡ እንተ፡ እምኔሃ፡ ይወፅእ፡ ፀሓይ፡ በወርኅ፡ ቀዳማዊ፡ ባቲ፡ ዐሡሩ፡ ወክልኤ፡ ኀዋኅው፡ ርኅዋት፡ ዘእምኔሆን፡ ይወፅእ፡ ላህብ፡ ሶበ፡ ይትረኀዉ፡ እምዘመነ፡ ዚኣሆሙ።
8 ሶበ፡ ይሠርቅ፡ ፀሓይ፡ እምሰማይ፡ ይወፅእ፡ እንተ፡ ይእቲ፡ ራብዕት፡ ኆኅት፡ ሠላሳ፡ ጽባሐ፡ ወበራብዕት፡ ኆኅት፡ እንተ፡ እምዕራበ፡ ሰማይ፡ ርቱዐ፡ ይወርድ።
9 ወበእማንቱ፡ መዋዕል፡ ትነውኅ፡ ዕለት፡ እምዕለት፡ ወተኀጽር፡ ሌሊት፡ እምሌሊት፡ እስከ፡ ሠላሳ፡ ጽባሕ።
10 ወበይእቲ፡ ዕለት፡ ትነውኅ፡ ካዕበተ፡ ዕለት፡ እምሌሊት፡ ወትከውን፡ ዕለት፡ ጥንቁቀ፡ ዐሠርተ፡ ክፍለ፡ ወትከውን፡ ሌሊት፡ ሰመንተ፡ ክፍለ።
11 ወይወፅእ፡ ፀሓይ፡ እምይእቲ፡ ራብዕት፡ ኆኅት፡ ወየዐርብ፡ በራብዕት፡ ኆኅት፡ ወይገብእ፡ ውስተ፡ ኀምስት፡ ኆኅት፡ እንተ፡ ጽባሕ፡ ሠላሳ፡ ጽባሐ፡ ወይወፅእ፡ እምኔሃ፡ ወየዐርብ፡ ውስተ፡ ኀምስት፡ ኆኅት።
12 ወአሜሃ፡ ትነውኅ፡ ዕለት፡ ክልኤተ፡ እደ፡ ወትከውን፡ ዕለት፡ ዐሠርተ፡ ወአሐደ፡ ክፍለ፡ ወተኀጽር፡ ሌሊት፡ ወትከውን፡ ሰብዐተ፡ ክፍለ።
13 ወይገብእ፡ ፀሓይ፡ ለጽባሕ፡ ወይበውእ፡ ውስተ፡ ሳድስት፡ ኆኅት፡ ወይወፅእ፡ ወየዐርብ፡ በሳድስት፡ ኆኅት፡ ሠላሳ፡ ወአሐደ፡ ጽባሐ፡ በእንተ፡ ትእምርተ፡ ዚኣሃ።
14 ወበይእቲ፡ ዕለት፡ ትነውኅ፡ ዕለት፡ እምሌሊት፡ ወትከውን፡ ዕለት፡ ካዕበተ፡ ሌሊት፡ ወትከውን፡ ዕለት፡ ዐሠርተ፡ ወክልኤተ፡ ክፍለ፡ ወተኀጽር፡ ሌሊት፡ ወትከውን፡ ስድስተ፡ ክፍለ።
15 ወይትነሣእ፡ ፀሓይ፡ ከመ፡ ትኅጽር፡ ዕለት፡ ወትኑኅ፡ ሌሊት፡ ወይገብእ፡ ፀሓይ፡ ለጽባሕ፡ ወይበውእ፡ ውስተ፡ ሳድስት፡ ኆኅት፡ ወይሠርቅ፡ እምኔሃ፡ ወየዐርብ፡ ሠላሳ፡ ጽባሕ።
16 ወሶበ፡ ተፈጸመ፡ ሠላሳ፡ ጽባሕ፡ ተሐጽጽ፡ መዓልት፡ ወትከውን፡ አሐደ፡ ክፍለ፡ ጥንቁቀ፡ ወትከውን፡ ዕለት፡ ዐሠርተ፡ ወአሐደ፡ ክፍለ፡ ወሌሊት፡ ሰብዐተ፡ ክፍለ።
17 ወይወፅእ፡ ፀሓይ፡ እምነ፡ ምዕራብ፡ እምይእቲ፡ ሳድስት፡ ኆኅት፡ ወየሐውር፡ ምሥራቀ፡ ወይሠርቅ፡ በኀምስት፡ ኆኅት፡ ሠላሳ፡ ጽባሐ፡ ወየዐርብ፡ በምዕራብ፡ ካዕበ፡ በኀምስት፡ ኆኅት፡ እንተ፡ ምዕራብ።
18 ወበይእቲ፡ ዕለት፡ ተሐጽጽ፡ ዕለት፡ ክልኤተ፡ ክፍለ፡ ወትከውን፡ ዕለት፡ ዐሠርተ፡ ክፍለ፡ ወሌሊት፡ ሰመንተ፡ ክፍለ።
19 ወይወፅእ፡ ፀሓይ፡ እምይእቲ፡ ኀምስት፡ ኆኅት፡ ወየዐርብ፡ በኀምስት፡ ኆኅት፡ እንተ፡ ምዕራብ፡ ወይሠርቅ፡ በራብዕት፡ ኆኅት፡ በእንተ፡ ትእምርተ፡ ዚኣሃ፡ ሠላሳ፡ ወአሐደ፡ ጽባሐ፡ ወየዐርብ፡ በምዕራብ።
20 ወበይእቲ፡ ዕለት፡ ይትዔረይ፡ መዓልት፡ ምስለ፡ ሌሊት፡ ወይከውን፡ ዕሩየ፡ ወትከውን፡ ሌሊት፡ ተስዓተ፡ ክፍለ፡ ወመዓልት፡ ተስዓተ፡ ክፍለ።
21 ወይወፅእ፡ ፀሓይ፡ እምይእቲ፡ ኆኅት፡ ወየዐርብ፡ በምዕራብ፡ ወይገብእ፡ ለጽባሕ፡ ወይወፅእ፡ በሣልስት፡ ኆኅት፡ ሠላሳ፡ ጽባሐ፡ ወየዐርብ፡ በምዕራብ፡ በሣልስት፡ ኆኅት።
22 ወበይእቲ፡ ዕለት፡ ትነውኅ፡ ሌሊት፡ እምሌሊት፡ እስከ፡ ሠላሳ፡ ጽባሕ፡ ወተኀጽር፡ ዕለት፡ እምዕለት፡ እስከ፡ ሠላሳ፡ ዕለት፡ ወትከውን፡ ሌሊት፡ ዐሠርተ፡ ክፍለ፡ ጥንቁቀ፡ ወመዓልት፡ ሰመንተ፡ ክፍለ።
23 ወይወፅእ፡ ፀሓይ፡ እምይእቲ፡ ሣልስት፡ ኆኅት፡ ወየዐርብ፡ በሣልስት፡ ኆኅት፡ በዐረብ፡ ወይገብእ፡ ውስተ፡ ምሥራቅ፡ ወይወፅእ፡ ፀሓይ፡ ውስተ፡ ካልእት፡ ኆኅት፡ እምሥራቅ፡ ሠላሳ፡ ጽባሐ፡ ወከመ፡ ዝ፡ የዐርብ፡ በካልእ፡ ኆኅት፡ በምዕራበ፡ ሰማይ።
24 ወበይእቲ፡ ዕለት፡ ትከውን፡ ሌሊት፡ ዐሠርተ፡ ወአሐደ፡ ክፍለ፡ ወዕለት፡ ሰብዐተ፡ ክፍለ።
25 ወይወፅእ፡ ፀሓይ፡ በይእቲ፡ ዕለት፡ እምይእቲ፡ ካልእት፡ ኆኅት፡ ወየዐርብ፡ በምዕራብ፡ በካልእ፡ ኆኅት፡ ወይገብእ፡ በምሥራቅ፡ ወይወፅእ፡ በአሐቲ፡ ኆኅት፡ ሠላሳ፡ ወአሐደ፡ ጽባሐ፡ በእንተ፡ ትእምርተ፡ ዚኣየ፡ ወየዐርብ፡ በምዕራብ፡ በአሐቲ፡ ኆኅት።
26 ወበይእቲ፡ ዕለት፡ ትነውኅ፡ ሌሊት፡ ወትከውን፡ ካዕበታ፡ ለዕለት፡ ወትከውን፡ ሌሊት፡ ዐሠርተ፡ ወክልኤተ፡ ክፍለ፡ ጥንቁቀ፡ ወመዓልት፡ ሰብዐተ፡ ክፍለ።
27 ወፈጸመ፡ ፀሓይ፡ አርእስቲሁ፡ ወዳግመ፡ የዐውድ፡ ዲበ፡ እሉ፡ አርእስቲሁ፡ ወይበውእ፡ በውእቱ፡ ኆኅት፡ ሠላሳ፡ ጽባሐ፡ ወበምዕራብኒ፡ በአንጻሪሁ፡ የዐርብ።
28 ወበይእቲ፡ ዕለት፡ ተኀጽር፡ እምኑኃ፡ አሐደ፡ እደ፡ ዝ፡ ውእቱ፡ ክፍል፡ አሐዱ፡ ወትከውን፡ ሌሊት፡ ዐሠርተ፡ ወአሐደ፡ ክፍለ፡ ወመዓልት፡ አሐደ፡ ክፍለ።
29 ወገብአ፡ ፀሓይ፡ ወቦአ፡ ውስተ፡ ካልእ፡ ኆኅት፡ እንተ፡ ምሥራቅ፡ ወይገብእ፡ ዲበ፡ ዝኩ፡ አርእስቲሁ፡ ሠላሳ፡ ጽባሐ፡ ይሠርቅ፡ ወየዐርብ።
30 ወበይእቲ፡ ዕለት፡ ተኀጽር፡ ሌሊት፡ እምኑኃ፡ ወትከውን፡ ሌሊት፡ ዐሠርተ፡ ክፍለ፡ ወመዓልት፡ ሰመንተ፡ ክፍለ።
31 ወበይእቲ፡ ዕለት፡ ይወፅእ፡ ፀሓይ፡ እምይእቲ፡ ካልእት፡ ኆኅት፡ ወየዐርብ፡ በምዕራብ፡ ወይገብእ፡ ምሥራቀ፡ ወይሠርቅ፡ በሣልስት፡ ኆኅት፡ ሠላሳ፡ ወአሐደ፡ ጽባሐ፡ በእንተ፡ ትእምርተ፡ ዚኣሃ፡ ወየዐርብ፡ በምዕራበ፡ ሰማይ።
32 ወበይእቲ፡ ዕለት፡ ተኀጽር፡ ሌሊት፡ ወትከውን፡ ተስዓተ፡ ክፍለ፡ ወዕለት፡ ትከውን፡ ተስዓተ፡ ክፍለ፡ ወይትዔረይ፡ ሌሊት፡ ምስለ፡ መዓልት፡ ወይከውን፡ ዓመት፡ ጥንቁቀ፡ መዋዕለ፡ ሠለስተ፡ ምእተ፡ ስሳ፡ ወረቡዐ።
33 ወኑኃ፡ ለዕለት፡ ወለሌሊት፡ ወሕጸራ፡ ለዕለት፡ ወለሌሊት፡ በምሕዋረ፡ ፀሓይ፡ ውእቱ፡ ይትሌለይ።
34 ወበእንቲኣሁ፡ ይነውኅ፡ ምሕዋሪሁ፡ ወዕለት፡ እምዕለት፡ ይቀርብ፡ ወሌሊት፡ እምሌሊት፡ ይቀርብ።
35 ወዝ፡ ውእቱ፡ ትእዛዙ፡ ወምሕዋሩ፡ ለፀሓይ፡ ወምግባኡ፡ ወሶበ፡ ይገብእ፡ ለእንተ፡ ስሳ፡ ይገብእ፡ ወይወፅእ፡ ወዝ፡ ውእቱ፡ ብርሃን፡ ዐቢይ፡ ዘለዓለም፡ ዘይሰመይ፡ ፀሓየ፡ ለዓለመ፡ ዓለም።
36 ወዝንቱ፡ ውእቱ፡ ዘይወፅእ፡ ብርሃን፡ ዐቢይ፡ ዘይሰመይ፡ በአርአያ፡ ዚኣሁ፡ በከመ፡ አዘዘ፡ እግዚእ።
37 ወከመ፡ ዝ፡ ይወፅእ፡ ወይበውእ፡ ኢየሐጽጽ፡ ወኢየዐርፍ፡ አላ፡ ይረውጽ፡ መዓልተ፡ ወሌሊተ፡ በሠረገላ፡ ወብርሃነ፡ ዚኣሁ፡ ሰብዐተ፡ እደ፡ ያበርህ፡ እምዘወርኅ፡ ወአምጣኒሆሙ፡ ለክልኤሆሙ፡ ዘውግ።
=== chapter 73 ===
[Chapter 73]
1 ወድኅሬሁ፡ ለዝ፡ ትእዛዝ፡ ርኢኩ፡ ካልአ፡ ትእዛዘ፡ ለብርሃን፡ ንኡስ፡ ዘስሙ፡ ወርኅ።
2 ወክበቡ፡ ከመ፡ ክበበ፡ ሰማይ፡ ወሠረገላ፡ ዚኣሁ፡ በኀበ፡ ይጼዐን፡ ነፋሰ፡ ይነፍኅ፡ ወበመስፈርት፡ ይትወሀብ፡ ሎቱ፡ ብርሃን።
3 ወበኵሉ፡ ወርኅ፡ ሙፃኢሁ፡ ወሙባኢሁ፡ ይትዌለጥ፡ ወመዋዕሊሁ፡ ከመ፡ መዋዕለ፡ ፀሓይ፡ ወሶበ፡ ይዔሪ፡ ከዊነ፡ ብርሃኑ፡ ይከውን፡ ብርሃኑ፡ ሳብዐየ፡ እደ፡ እምብርሃነ፡ ፀሓይ።
4 ወከመ፡ ዝ፡ ይሠርቅ፡ ወርእሱ፡ ዘመንገለ፡ ጽባሕ፡ ይወፅእ፡ ሠላሳ፡ በሠላሳ፡ ጽባሕ፡ ወበይእቲ፡ ዕለት፡ ያስተርኢ፡ ወይከውን፡ ለክሙ፡ ርእሰ፡ ወርኅ፡ ሠላሳ፡ ጽባሐ፡ ምስለ፡ ፀሓይ፡ በኆኅት፡ እንተ፡ ይወፅእ፡ ፀሓይ።
5 ወመንፈቁ፡ ርሑቅ፡ ሰብዐቱ፡ እድ፡ አሐዱ፡ ወኵሉ፡ ክበበ፡ ዚኣሁ፡ በክ፡ ዘአልቦቱ፡ ብርሃነ፡ ዘእንበለ፡ ሳብዒት፡ እደ፡ ዚኣሁ፡ እምዐሠርቱ፡ ወአርባዕቱ፡ እደ፡ ብርሃኑ።
6 ወበዕለተ፡ ይነሥእ፡ ሳብዐየ፡ እደ፡ መንፈቀ፡ ብርሃኑ፡ ይከውን፡ ሰብዐቱ፡ ሰብዐተ፡ እድ፡ አሐቲ፡ ወመንፈቃ።
7 የዐርብ፡ ምስለ፡ ፀሓይ፡ ወሶበ፡ ይሠርቅ፡ ፀሓይ፡ ይሠርቅ፡ ወርኅ፡ ምስሌሁ፡ ወይነሥእ፡ መንፈቀ፡ እደ፡ ብርሃን፡ ወበይእቲ፡ ሌሊት፡ በርእሰ፡ ጽባሐ፡ ዚኣሁ፡ በቅድመ፡ ዕለቱ፡ ለወርኅ፡ የዐርብ፡ ወርኅ፡ ምስለ፡ ፀሓይ፡ ወይጸልም፡ በይእቲ፡ ሌሊት፡ ሰብዐቱ፡ ወስድስቱ፡ እድ፡ ወንፍቃ።
8 ወይሠርቅ፡ በይእቲ፡ ዕለት፡ ሳብዐየ፡ እደ፡ ጥንቁቀ፡ ወይወፅእ፡ ወይጸንን፡ እምሥራቀ፡ ፀሓይ፡ ወያበርህ፡ በተረፈ፡ ዕለቱ፡ ሰብዐተ፡ ወሰብዐተ፡ እደ።
=== chapter 74 ===
[Chapter 74]
1 ወካልአ፡ ምሕዋረ፡ ወትእዛዘ፡ ርኢኩ፡ ሎቱ፡ እንተ፡ በውእቱ፡ ትእዛዝ፡ ይገብር፡ ምሕዋሮ፡ ዘአውራኅ።
2 ወኵሎ፡ አርአየኒ፡ ኡርኤል፡ መልአክ፡ ቅዱስ፡ ዘውእቱ፡ መራሒሆሙ፡ ለኵሎሙ፡ ወምንባሪሆሙ፡ ጸሐፍኩ፡ በከመ፡ አርአየኒ፡ ወጸሐፍኩ፡ አውራኂሆሙ፡ በከመ፡ ሀለዉ፡ ወርእየተ፡ ብርሃኖሙ፡ እስከ፡ ተፈጸመ፡ ዐሠርቱ፡ ወኀምስቱ፡ መዋዕል።
3 በአሐዱ፡ ሰብዐተ፡ ሰብዐተ፡ እደ፡ ይፌጽም፡ ኵሎ፡ ብርሃኖ፡ በምሥራቅ፡ ወበበ፡ ሰብዐቱ፡ ሰብዐቱ፡ እድ፡ ይፌጽም፡ ኵሎ፡ ጽልመቶ፡ በምዕራብ።
4 ወበአውራኅ፡ እሙራት፡ ይፌጽም፡ ምዕራባቲሁ፡ ወበአውራኅ፡ እሙራት፡ የሐውር፡ ምሕዋሪሁ፡ አሐደ፡ አሐደ።
5 በክልኤቱ፡ ወርኅ፡ የዐርብ፡ ምስለ፡ ፀሓይ፡ በእሉ፡ ክልኤቱ፡ ኀዋኅው፡ እለ፡ በማእከል፡ በሣልስ፡ ወበራብዕ፡ ኆኅት።
6 ይወፅእ፡ ሰብዐተ፡ መዋዕለ፡ ወየዐውድ፡ ወይገብእ፡ ካዕበ፡ በኆኅት፡ እንተ፡ ይወፅእ፡ ፀሓይ፡ ወበውእቱ፡ ይፌጽም፡ ኵሎ፡ ብርሃኖ፡ ወይጸንን፡ እምፀሓይ፡ ወይበውእ፡ ሰሙነ፡ መዋዕለ፡ በሳድስት፡ ኆኅት፡ እንተ፡ እምኔሃ፡ ይወፅእ፡ ፀሓይ።
7 ወሶበ፡ ይወፅእ፡ ፀሓይ፡ እምራብዕት፡ ኆኅት፡ ይወፅእ፡ ሰቡዐ፡ መዋዕለ፡ እስከ፡ ይወፅእ፡ እምነ፡ ኀምስት፡ ወካዕበ፡ ይገብእ፡ ሰቡዐ፡ መዋዕለ፡ በኆኅት፡ ራብዕ፡ ወይፌጽም፡ ኵሎ፡ ብርሃኖ፡ ወይጸንን፡ ወይበውእ፡ በቀዳሚት፡ ኆኅት፡ ሰሙነ፡ መዋዕለ።
8 ወካዕበ፡ ይገብእ፡ ሰቡዐ፡ መዋዕለ፡ በራብዕት፡ ኆኅት፡ እንተ፡ እምኔሃ፡ ይወፅእ፡ ፀሓይ።
9 ወከመ፡ ዝ፡ ርኢኩ፡ ምንባሮሙ፡ በከመ፡ ሥርዐተ፡ አውራኂሆሙ፡ ይሠርቅ፡ ወየዐርብ፡ ፀሐይ።
10 ወበእማንቱ፡ መዋዕል፡ ኀምስቱ፡ ዓመት፡ ወይበጽሖ፡ ለፀሓይ፡ ሠላሳ፡ መዋዕል፡ ወኵሎሙ፡ መዋዕላት፡ ይበጽሕዎ፡ ለአሐዱ፡ ዓመት፡ እምእልኩ፡ ኀምስቱ፡ ዓመት፡ ተመሊኦሙ፡ ይከውኑ፡ ሠለስተ፡ ምእተ፡ ወስሳ፡ ወረቡዐ፡ መዋዕለ።
11 ወይበጽሕ፡ ምብጻሒሆሙ፡ ለፀሓይ፡ ወለከዋክብት፡ ስሱ፡ መዋዕል፡ እምኀምስቱ፡ ዓመታት፡ በበ፡ ስሱ፡ ይበጽሖሙ፡ ሠላሳ፡ ዕለት፡ ወየሐጽጽ፡ ወርኅ፡ እምፀሓይ፡ ወእምከዋክብት፡ ሠላሳ፡ መዋዕለ።
12 ወወርኅ፡ ያመጽኦሙ፡ ለዓመታት፡ ጥንቁቀ፡ ወኵሎሙ፡ በከመ፡ ምንባሪሆሙ፡ ኢይበድሩ፡ ወኢይዴኀሩ፡ አሐተ፡ ዕለተ፡ አላ፡ ይዌልጡ፡ ዓመተ፡ በጽድቅ፡ ጥንቁቀ፡ በበ፡ ሠለስቱ፡ ምእት፡ ወስሳ፡ ወረቡዕ፡ መዋዕል።
13 ለሠለስቱ፡ ዓመት፡ መዋዕሊሁ፡ ዐሠርቱ፡ ምእት፡ ወተስዓ፡ ወክልኤቱ፡ ወለኀምስቱ፡ ዓመት፡ መዋዕሊሁ፡ ዐሠርቱ፡ ወሰመንቱ፡ ምእት፡ ወዕሥራ፡ መዋዕል፡ ከመ፡ ይኩን፡ ለሰመንቱ፡ ዓመት፡ ዕሥራ፡ ወተስዓቱ፡ ምእት፡ ወዐሠርቱ፡ ወክልኤቱ፡ መዋዕልይ።
14 ለወርኅ፡ ለባሕቲቱ፡ ይበጽሕ፡ መዋዕሊሁ፡ ለሠለስቱ፡ ዓመት፡ ዐሠርቱ፡ ምእት፡ ወስሳ፡ ወክልኤቱ፡ መዋዕል፡ ወለኀምስቱ፡ ዓመት፡ የሐጽጽ፡ ኀምሳ፡ መዋዕለ፡ እስመ፡ ይትዌሰክ፡ በፀአቱ፡ ዲበ፡ ስሳ፡ ወክልኤቱ፡ መዋዕል።
15 ወይከውን፡ ለኀምስቱ፡ ዓመት፡ ዐሠርቱ፡ ወሰብዐቱ፡ ምእት፡ ወሰብዓ፡ መዋዕል፡ ከመ፡ ይኩን፡ ለወርኅ፡ በሰመንቱ፡ ዓመት፡ መዋዕሊሁ፡ ዕሥራ፡ ምእት፡ ወሰመንቱ፡ ምእት፡ ሠላሳ፡ ወክልኤቱ፡ መዋዕል።
16 እስመ፡ ሕጸጹ፡ ለሰመንቱ፡ ዓመት፡ መዋዕሊሁ፡ ሰማንያ፡ ወኵሎሙ፡ መዋዕል፡ ዘሐጸ፡ እምሰመንቱ፡ ዓም፡ ሰማንያ።
17 ወይትፌጸም፡ ዓመት፡ በጽድቅ፡ በከመ፡ መንበረ፡ ዚኣሆሙ፡ ወመንበረ፡ ፀሓይ፡ እለ፡ ይሠርቁ፡ እምነ፡ ኆኅት፡ እለ፡ እምኔሆሙ፡ ይሠርቅ፡ ወየዐርብ፡ መዋዕለ፡ ሠላሳ።
=== chapter 75 ===
[Chapter 75]
1 ወመራሕያኒሆሙ፡ ለአርእስተ፡ አእላፍ፡ እለ፡ ዲበ፡ ኵሉ፡ ፍጥረት፡ ወዲበ፡ ኵሉ፡ ከዋክብት፡ ወምስለ፡ አርባዕቱ፡ እለ፡ ይትዌሰኩ፡ ወኢይትሌለዩ፡ እምንባሮሙ፡ በከመ፡ ኵሉ፡ ሐሳበ፡ ዓመት፡ ወእሉ፡ ይትቀነዩ፡ አርባዕተ፡ መዋዕለ፡ እለ፡ ኢይትሐሰቡ፡ በሐሳበ፡ ዓመት።
2 ወበእንቲኣሆሙ፡ ይጌግዩ፡ ቦሙ፡ ሰብእ፡ እስመ፡ እሙንቱ፡ ብርሃናት፡ ይትቀነዩ፡ በጽድቅ፡ በምንባረ፡ ዓለም፡ አሐዱ፡ በቀዳሚት፡ ኆኅት፡ ወአሐዱ፡ በሣልስት፡ ኆኅት፡ ወአሐዱ፡ በራብዕት፡ ኆኅት፡ ወአሐዱ፡ በሳድስት፡ ኆኅት፡ ወይትፌጸም፡ ጥንቃቄ፡ ዓለም፡ በበ፡ ሠለስቱ፡ ምእት፡ ወስሳ፡ ወረቡዕ፡ መንበረ፡ ዓለም።
3 እስመ፡ ለትእምርት፡ ወለአዝማን፡ ወለዓመታት፡ ወለመዋዕል፡ አርአየኒ፡ ኡርኤል፡ መልአክ፡ ዘአንበሮ፡ እግዚአ፡ ስብሐት፡ ዘለዓለም፡ ዲበ፡ ኵሎሙ፡ ብርሃናተ፡ ሰማይ፡ ወበዓለም፡ ከመ፡ ይምልኩ፡ በገጸ፡ ሰማይ፡ ወይትረአዩ፡ ዲበ፡ ምድር፡ ወይኩኑ፡ መራሕያነ፡ ለመዓልት፡ ወለሌሊት፡ ፀሓይ፡ ወወርኅ፡ ወከዋክብት፡ ወኵሎሙ፡ ቅንየታት፡ እለ፡ የዐውዱ፡ በኵሎሙ፡ ሠረገላተ፡ ሰማይ።
4 ከመ፡ ዝ፡ ዐሠርተ፡ ወክልኤተ፡ ኀዋኅወ፡ ርኅዋተ፡ አርአየኒ፡ ኡርኤል፡ ርኅዋተ፡ በክበበ፡ ሠረገላተ፡ ዘፀሓይ፡ በሰማይ፡ እለ፡ እምኔሆሙ፡ ይወፅኡ፡ እገሪሃ፡ ለፀሓይ፡ ወእምኔሆሙ፡ ይወፅእ፡ ሞቅ፡ ዲበ፡ ምድር፡ ሶበ፡ ይትረኀዉ፡ በአዝማን፡ እለ፡ እሙራን፡ ቦሙ።
5 ወለነፋሳት፡ ወለመንፈሰ፡ ጠል፡ ሶበ፡ ይትረኀዉ፡ በአዝማን፡ ርኅዋተ፡ በሰማይ፡ ዲበ፡ አጽናፍ።
6 ዐሥርተ፡ ወክልኤተ፡ ኀዋኅወ፡ ርኢኩ፡ በሰማይ፡ በአጽናፈ፡ ምድር፡ እለ፡ እምኔሆሙ፡ ይወፅኡ፡ ፀሓይ፡ ወወርኅ፡ ወከዋክብት፡ ወኵሎሙ፡ ግብራተ፡ ሰማይ፡ እምሥራቅ፡ ወእምዕራብ።
7 ወመሳክው፡ ርኅዋት፡ ብዙኃት፡ እምየማኑ፡ እምጸጋሙ፡ ወአሐቲ፡ መስኮት፡ በዘመነ፡ ዚኣሃ፡ ታመውቅ፡ ሞቀ፡ ዘከመ፡ እልኩ፡ ኀዋኅው፡ እለ፡ ይወፅኡ፡ እምኔሆሙ፡ ከዋክብት፡ በከመ፡ አዘዞሙ፡ ወእለ፡ ቦሙ፡ የዐርቡ፡ በከመ፡ ኍልቆሙ።
8 ወርኢኩ፡ ሠረገላተ፡ በሰማይ፡ እንዘ፡ ይረውጹ፡ በዓለም፡ እመልዕልቴሆሙ፡ ወእመትሕቴሆሙ፡ ለእልኩ፡ ኀዋኅው፡ እለ፡ ቦሙ፡ ይትመየጡ፡ ከዋክብት፡ እለ፡ ኢየዐርቡ።
9 ወአሐዱ፡ የዐብዮሙ፡ ለኵሎሙ፡ ወውእቱ፡ የዐውድ፡ ለኵሉ፡ ዓለም።
=== chapter 76 ===
[Chapter 76]
1 ወበአጽናፈ፡ ምድር፡ ርኢኩ፡ ዐሥሩ፡ ወክልኤ፡ ኀዋኅወ፡ ርኅዋተ፡ ለኵሎሙ፡ ነፋሳት፡ እለ፡ እምኔሆሙ፡ ይወፅኡ፡ ነፋሳት፡ ወይነፍሱ፡ ዲበ፡ ምድር።
2 ወሠለስቱ፡ እምኔሆሙ፡ ርኅዋት፡ በገጸ፡ ሰማይ፡ ወሠለስቱ፡ በምዕራብ፡ ወሠለስቱ፡ በየማነ፡ ሰማይ፡ ወሠለስቱ፡ በፀጋም።
3 ወሠለስቱ፡ ቀዳምያት፡ እለ፡ መንገለ፡ ጽባሕ፡ ወሠለስቱ፡ እለ፡ መንገለ፡ መስዕ፡ ወሠለስቱ፡ በድኅር፡ እለ፡ በፀጋም፡ ለመንገለ፡ አዜብ፡ ወሠለስቱ፡ በዐረብ።
4 በበ፡ አርባዕቱ፡ እምኔሆሙ፡ ይወፅኡ፡ ነፋሳተ፡ በረከት፡ ወሰላም፡ ወእምእልኩ፡ ሰመንቱ፡ ይወፅኡ፡ ነፋሳተ፡ መቅሠፍት፡ ወሶበ፡ ይትፌነዉ፡ ይደመስስዋ፡ ለኵላ፡ ምድር፡ ወለማይ፡ ዘዲቤሃ፡ ወለኵሎሙ፡ እለ፡ የኀድሩ፡ ዲቤሃ፡ ወለኵሉ፡ ዘሀሎ፡ ውስተ፡ ማይ፡ ወዲበ፡ የብስ።
5 ወይወፅእ፡ ቀዳማይ፡ ነፋስ፡ እምእልኩ፡ ኀዋኅው፡ ዘስሙ፡ ጽባሓይ፡ በቀዳሚት፡ ኆኅት፡ እንተ፡ መንገለ፡ ጽባሕ፡ ዘታጸንን፡ ለአዜብ፡ ይወፅእ፡ እምኔሃ፡ ድምሳሴ፡ የብስ፡ ወሞቅ፡ ወሀጕል።
6 ወበካልእት፡ ኆኅት፡ ማእከላዊት፡ ይወፅእ፡ ርትዕ፡ ወይወፅእ፡ እምኔሃ፡ ዝናም፡ ወፍሬ፡ ወሰላም፡ ወጠል፡ ወበሣልስ፡ ኆኅት፡ እንተ፡ መንገለ፡ መስዕ፡ ይወፅእ፡ ቍር፡ ወየብስ።
7 ወእምድኅረ፡ እሉ፡ ነፋሳት፡ ዘመንገለ፡ አዜብ፡ ይወፅኡ፡ በሠለስቱ፡ ኀዋኅዋት፡ ቀዳምያት፡ በቀዳሚት፡ ኆኅት፡ እምኔሆሙ፡ እንተ፡ ትጸንን፡ ለመንገለ፡ ምሥራቅ፡ ይወፅእ፡ ነፋሰ፡ ሞቅ።
8 ወበኆኅት፡ እንተ፡ ኀቤሃ፡ ማእከላዊት፡ ይወፅእ፡ እምኔሃ፡ መዐዛ፡ ሠናይ፡ ወጠል፡ ወዝናም፡ ወሰላም፡ ወሕይወት።
9 ወበሣልስ፡ ኆኅት፡ እንተ፡ መንገለ፡ ምዕራብ፡ ይወፅእ፡ እምኔሃ፡ ጠል፡ ወዝናም፡ ወአናኵዕ፡ ወድምሳሴ።
10 ወእምድኅረ፡ እሉ፡ ነፋሳት፡ ዘመንገለ፡ መስዕ፡ ዘስሙ፡ ባሕር፡ እምሠለስቱ፡ ሳብዓይ፡ ኆኅት፡ እንተ፡ መንገለ፡ ምሥራቅ፡ ዘታጸንን፡ መንገለ፡ አዜብ፡ ይወፅእ፡ እምኔሃ፡ ጠል፡ ወዝናም፡ አናኵዕ፡ ወድምሳሴ።
11 ወእማእከላዊት፡ ኆኅት፡ ርትዕት፡ ይወፅእ፡ እምኔሃ፡ ዝናም፡ ወጠል፡ ወሕይወት፡ ወሰላም፡ ወበሣልስ፡ ኆኅት፡ እንተ፡ መንገለ፡ ምዕራብ፡ እንተ፡ ታጸንን፡ ለመስዕ፡ ይወፅእ፡ እምኔሃ፡ ጊሜ፡ ወአስሐትያ፡ ወሐመዳ፡ ወዝናም፡ ወጠል፡ ወአናኵዕ።
12 ወእምድኅረ፡ እሉ፡ አርባዕቱ፡ ነፋሳት፡ እለ፡ መንገለ፡ ምዕራብ፡ በቀዳሚት፡ ኆኅት፡ እንተ፡ ታጸንን፡ ለመንገለ፡ መስዕ፡ እምኔሃ፡ ይወፅእ፡ ጠል፡ ወዝናም፡ ወአስሐትያ፡ ወቍር፡ ወሐመዳ፡ ወደደክ።
13 ወእምነ፡ ኆኅት፡ ማእከላዊት፡ ይወፅእ፡ ጠል፡ ወዝናም፡ ሰላም፡ ወበረከት፡ ወበደኃሪት፡ ኆኅት፡ እንተ፡ መንገለ፡ አዜብ፡ ይወፅእ፡ እምኔሃ፡ የብስ፡ ወድምሳሴ፡ ዋዕይ፡ ወሀጕል።
14 ወተፈጸማ፡ ዐሥሩ፡ ወክልኤ፡ ኀዋኅው፡ ዘአርባዕቱ፡ ኀዋኅወ፡ ሰማይ፡ ወኵሎ፡ ትእዛዞሙ፡ ወኵሎ፡ መቅሠፍቶሙ፡ ወኵሎ፡ ሰላሞሙ፡ አርአይኩከ፡ ወልድየ፡ ማቱሳላ።
=== chapter 77 ===
[Chapter 77]
1 ይጼውዕዎ፡ ለነፋስ፡ ቀዳማዊ፡ ጽባሓዊ፡ እስመ፡ ቀዳማዊ፡ ውእቱ፡ ወይጼውዕዎ፡ ለካልእ፡ አዜብ፡ እስመ፡ ልዑል፡ ህየ፡ ይወርድ፡ ወፈድፋደ፡ ህየ፡ ይወርድ፡ ቡሩክ፡ ዘለዓለም።
2 ወለነፋስ፡ ዘእምዕራብ፡ ስሙ፡ ንቱግ፡ እስመ፡ በህየ፡ የሐጽጹ፡ ኵሉ፡ ብርሃናተ፡ ሰማይ፡ ወይወርዱ።
3 ወራብዕ፡ ነፋስ፡ ዘስሙ፡ መስዕ፡ ይትከፈል፡ ሠለስተ፡ ክፍለ፡ ወአሐዱ፡ እምኔሆሙ፡ ማኅደር፡ ለሰብእ፡ ወካልእ፡ በአብሕርተ፡ ማያት፡ ወበቀላያት፡ ወበዖም፡ ወበአፍላግ፡ ወበጽልመት፡ ወበጊሜ፡ ወሣልስ፡ ክፍል፡ በገነተ፡ ጽድቅ።
4 ወሰብዐተ፡ አድባረ፡ ነዊኀነ፡ ርኢኩ፡ እለ፡ ይነውኁ፡ እምኵሉ፡ አድባር፡ እለ፡ ውስተ፡ ምድር፡ ወእምኔሆሙ፡ ይወፅእ፡ አስሐትያ፡ ወየኀልፍ፡ ወየሐውር፡ መዋዕል፡ ወዘመን፡ ወዓመት።
5 ወሰብዐተ፡ አፍላገ፡ ዲበ፡ ምድር፡ ርኢኩ፡ ዐበይት፡ እምኵሎሙ፡ አፍላግ፡ አሐዱ፡ እምኔሆሙ፡ ይመጽእ፡ እምዐረብ፡ ወውስተ፡ ባሕር፡ ዐቢይ፡ ይክዑ፡ ማዮ።
6 ወእልክቱ፡ ክልኤቱ፡ ይመጽኡ፡ እመስዕ፡ እስከ፡ ባሕር፡ ወይክዕዉ፡ ማዮሙ፡ በባሕረ፡ ኤርትራ፡ እምሥራቅ።
7 ወእለ፡ ተርፉ፡ አርባዕቱ፡ ይወፅኡ፡ በገቦ፡ መስዕ፡ እስከ፡ ባሕረ፡ ዚኣሆሙ፡ ባሕረ፡ ኤርትራ፡ ወክልኤቱ፡ በባሕር፡ ዐቢይ፡ ይሠወጡ፡ ወበህየ፡ ይቤሉ፡ መድበራ።
8 ሰብዐ፡ ደሰያተ፡ ዐበይተ፡ ርኢኩ፡ በባሕር፡ ወበምድር፡ ክልኤቱ፡ በምድር፡ ወኀምስቱ፡ በባሕር፡ ዐቢይ።
=== chapter 78 ===
[Chapter 78]
1 አስማቱ፡ ለፀሓይ፡ ከመ፡ ዝ፡ አሐዱ፡ ኦርያሬስ፡ ወካልኡ፡ ቶማስስ።
2 ወለወርኅ፡ አርባዕቱ፡ አስማት፡ ቦቱ፡ አሐዱ፡ ስሙ፡ አሶንያ፡ ወካልኡ፡ እብላ፡ ወሣልሱ፡ ብናሴ፡ ወራብዑ፡ ኤራዕ።
3 እሉ፡ እሙንቱ፡ ክልኤቱ፡ ብርሃናት፡ ዐበይት፡ ወክበቦሙ፡ ከመ፡ ክበበ፡ ሰማይ፡ ወአምጣኒሆሙ፡ ለክልኤሆሙ፡ ዕሩያን።
4 በክበበ፡ ፀሓይ፡ ሰብዐቱ፡ ክፍለ፡ ብርሃን፡ ዘይትዌሰክ፡ ቦቱ፡ እምወርኅ፡ ወበመስፈርት፡ ትትወደይ፡ እስከ፡ የኀልፍ፡ ሳብዕ፡ ክፍለ፡ ፀሓይ።
5 ወየዐርቡ፡ ወይበውኡ፡ ውስተ፡ ኀዋኅወ፡ ምዕራብ፡ ወየዐውዱ፡ እንተ፡ መስዕ፡ ወእንተ፡ ኀዋኅወ፡ ምሥራቅ፡ ይወፅኡ፡ ዲበ፡ ገጸ፡ ሰማይ።
6 ወሶበ፡ ይትነሣእ፡ ወርኅ፡ ያስተርኢ፡ በሰማይ፡ ወመንፈቀ፡ ሳብዕ፡ እደ፡ ብርሃን፡ ይከውን፡ ቦቱ፡ ወበዐሡር፡ ወረቡዕ፡ ይፌጽም፡ ኵሎ፡ ብርሃኖ።
7 ወሠለስቱ፡ ትኅምስተ፡ ብርሃን፡ ይትወደይ፡ ውስቴታ፡ እስከ፡ ዐሥር፡ ወኀምስ፡ ይትፌጸም፡ ብርሃነ፡ ዚኣሁ፡ ለትእምርተ፡ ዓመት፡ ወይከውን፡ ሠለስተ፡ ትኅምስተ፡ ወይከውን፡ ወርኅ፡ በመንፈቀ፡ ሳብዕተ፡ እድ።
8 ወበሕጸጸ፡ ዚኣሁ፡ በቀዳሚት፡ ዕለት፡ የሐጽጽ፡ ዐሠርተ፡ ወአርባዕተ፡ እደ፡ ብርሃነ፡ ዚኣሁ፡ ወበሣኒታ፡ የሐጽጽ፡ ዐሠርተ፡ ወሠለስተ፡ እደ፡ ወበሣልስ፡ የሐጽጽ፡ ዐሠርተ፡ ወክልኤተ፡ እደ፡ ወበራብዑ፡ የሐጽጽ፡ ዐሠርተ፡ ወአሐደ፡ ክፍለ፡ ወበኀምስ፡ የሐጽጽ፡ ዐሠርተ፡ ክፍለ፡ ወበሳድስ፡ የሐጽጽ፡ ተስዓተ፡ ክፍለ፡ ወበሳብዕ፡ የሐጽጽ፡ ሰመንተ፡ ክፍለ፡ ወበሳምን፡ የሐጽጽ፡ ሰብዐተ፡ ክፍለ፡ ወበታስዕ፡ የሐጽጽ፡ ስድስተ፡ ክፍለ፡ ወበዐሥር፡ የሐጽጽ፡ ኀምስተ፡ ክፍለ፡ ወበዐሥር፡ ወአሚር፡ የሐጽጽ፡ አርባዕተ፡ ክፍለ፡ ወበዐሥር፡ ወሰኑይ፡ የሐጽጽ፡ ሠለስተ፡ ክፍለ፡ ወበዐሥር፡ ወሠሉስ፡ የሐጽጽ፡ ክልኤተ፡ ክፍለ፡ ወበዐሥር፡ ወረቡዕ፡ የሐጽጽ፡ መንፈቀ፡ ሰብዐቱ፡ እደ፡ ወኵሉ፡ ብርሃኑ፡ በዐሥር፡ ወኀምስ፡ ዕለት፡ ይትዌዳእ፡ ዘተርፈ፡ እምኵሉ።
9 ወበአውራኅ፡ እሙራት፡ ይከውን፡ በበ፡ ዕሥራ፡ ወተሱዕ፡ መዋዕል፡ ለወርኅ፡ ወቦ፡ ጊዜ፡ በበ፡ ዕሥራ፡ ወሰሙን።
10 ወካልኣተ፡ ሥርዐተ፡ አርአየኒ፡ ኡርኤል፡ መልአክ፡ ሶበ፡ ይትወደይ፡ ብርሃን፡ ውስተ፡ ወርኅ፡ ወእምኀበ፡ ይትወደይ፡ እምፀሓይ።
11 ኵሎ፡ ዘመነ፡ ዘተሐውር፡ ወርኅ፡ ብርሃነ፡ ዚኣሃ፡ ትወዲ፡ በቅድመ፡ ፀሓይ፡ ወእስከ፡ ዐሥር፡ ወኀምስ፡ መዋዕል፡ ይትፌጸም፡ ብርሃና፡ ውስተ፡ ሰማይ፡ ወሶበ፡ ይውዒ፡ ኵሉ፡ ይትፌጸም፡ ብርሃና፡ ውስተ፡ ሰማይ።
12 ወቀዳሚት፡ ዕለት፡ ሠርቀ፡ ትሰመይ፡ እስመ፡ በይእቲ፡ ዕለት፡ ይትነሣእ፡ ላዕሌሃ፡ ብርሃን።
13 ወይትፌጸም፡ ጥንቁቀ፡ በዕለተ፡ ይወርድ፡ ፀሓይ፡ ውስተ፡ ዓረብ፡ ወእምነ፡ ምሥራቅ፡ የዐርግ፡ በሌሊት፡ ወያበርህ፡ ወርኅ፡ በኵሉ፡ ሌሊት፡ እስከ፡ ይሠርቅ፡ ፀሓይ፡ በቅድሜሁ፡ ወይትረአይ፡ ወርኅ፡ በቅድመ፡ ፀሓይ።
14 ወእምኀበ፡ ይወፅእ፡ ብርሃኑ፡ ለወርኅ፡ እምህየ፡ ካዕበ፡ የሐጽጽ፡ እስከ፡ ይትዌዳእ፡ ኵሉ፡ ብርሃን፡ ወየኀልፍ፡ መዋዕለ፡ ወርኅ፡ ወይነብር፡ ክበቡ፡ በከ፡ ዘእንበለ፡ ብርሃን።
15 ወሠለስተ፡ ወርኀ፡ ይገብር፡ ሠላሳ፡ መዋዕለ፡ ለዘመነ፡ ዚኣሁ፡ ወሠለስተ፡ ወርኀ፡ ይገብር፡ በበ፡ ዕሥራ፡ ወተሱዕ፡ መዋዕል፡ እለ፡ ቦሙ፡ ይገብር፡ ታሕጻጺተ፡ ዚኣሁ፡ በዘመን፡ ቀዳማዊ፡ ወበኆኅት፡ ቀዳማዊ፡ በመዋዕል፡ ምእት፡ ወሰብዓ፡ ወሰብዐቱ።
16 ወበዘመነ፡ ሙፃኡ፡ ሠለስተ፡ ወርኀ፡ ያስተርኢ፡ በበ፡ ሠላሳ፡ መዋዕል፡ ወሠለስተ፡ ወርኀ፡ ያስተርኢ፡ በበ፡ ዕሥራ፡ ወተሱዕ፡ መዋዕል።
17 በሌሊት፡ ያስተርኢ፡ በበ፡ ዕሥራ፡ ከመ፡ ብእሲ፡ ወመዓልተ፡ ከመ፡ ሰማይ፡ እስመ፡ ካልእ፡ ምንትኒ፡ አልባቲ፡ ዘእንበለ፡ ብርሃነ፡ ዚኣሃ።
=== chapter 79 ===
[Chapter 79]
1 ወይእዜኒ፡ ወልድየ፡ ማቱሳላ፡ አርአይኩከ፡ ኵሎ፡ ወተፈጸመ፡ ኵሉ፡ ሥርዐተ፡ ከዋክብተ፡ ሰማይ።
2 ወአርአየኒ፡ ኵሎ፡ ሥርዐቶሙ፡ ለእሉ፡ እንተ፡ በኵሉ፡ መዋዕል፡ ወበኵሉ፡ ዘመን፡ ዘበኵሉ፡ ሥልጣን፡ ወበኵሉ፡ ዓመት፡ ወበሙፃኡ፡ ወበትእዛዙ፡ ወበኵሉ፡ ወርኅ፡ ወበኵሉ፡ ሰንበታት።
3 ወሕጸጸ፡ ወርኅ፡ ዘይትገበር፡ በሳድስ፡ ኆኅት፡ እስመ፡ በዛቲ፡ ኆኅት፡ ሳድሲት፡ ይትፌጸም፡ ብርሃነ፡ ዚኣሁ፡ ወእምኔሁ፡ ይከውን፡ ርእሰ፡ ወርኅ፡ ወታሕጻጺት።
4 ዘይትገበር፡ በኆኅት፡ ቀዳሚት፡ በዘመነ፡ ዚኣሁ፡ እስከ፡ ይትፌጸም፡ መዋዕል፡ ምእት፡ ወሰብዓ፡ ወሰብዐቱ፡ በሥርዐተ፡ ሰንበት፡ ዕሥራ፡ ወኀምስቱ፡ ወክልኤ፡ መዋዕል።
5 ወዘየሐጽጽ፡ እምፀሓይ፡ ወሥርዐተ፡ ከዋክብት፡ ኀሙሰ፡ መዋዕለ፡ በዘመን፡ አሐዱ፡ ጥንቁቀ፡ ወሶበ፡ ይትፌጸም፡ ዝ፡ መካን፡ ዘትሬኢ።
6 ከመ፡ ዝ፡ አርአያ፡ ወአምሳል፡ እምኵሉ፡ ብርሃን፡ ዘአርአየኒ፡ ኡርኤል፡ መልአክ፡ ዐቢይ፡ ዘውእቱ፡ መራሒሆሙ።
=== chapter 80 ===
[Chapter 80]
1 ወበውእቱ፡ መዋዕል፡ አውሥአኒ፡ ኡርኤል፡ መልአክ፡ ወይቤለኒ፡ ነዋ፡ አርአይኩከ፡ ኵሎ፡ ኦ፡ ሄኖክ፡ ወኵሎ፡ ከሠትኩ፡ ለከ፡ ትርአዮ፡ ለዝ፡ ፀሓይ፡ ወለዝ፡ ወርኅ፡ ወለእለ፡ ይመርሕዎሙ፡ ለከዋክብተ፡ ሰማይ፡ ወለኵሎሙ፡ እለ፡ ይመይጥዎሙ፡ ግብሮሙ፡ ወአዝማኖሙ፡ ወሙፃኢሆሙ።
2 ወበመዋዕለ፡ ኃጥኣን፡ የሐጽራ፡ ክራማት፡ ወዘርዐ፡ ዚኣሆሙ፡ ይከውን፡ ደኃራዊ፡ በምድሮሙ፡ ወበሙፋሮሙ፡ ወኵሉ፡ ግብር፡ ዘዲበ፡ ምድር፡ ይትመየጥ፡ ወኢያስተርኢ፡ በዘመኑ፡ ወዝናም፡ ይትከላእ፡ ወሰማይ፡ ታቀውም።
3 ወውእቱ፡ አዝማን፡ ፍሬ፡ ምድር፡ ደኃራዌ፡ ይከውን፡ ወኢይበቍል፡ በዘመኑ፡ ወፍሬ፡ ዕፅ፡ ይትከላእ፡ በዘመነ፡ ዚኣሁ።
4 ወወርኅ፡ ይዌልጥ፡ ሥርዐቶ፡ ወኢይትረአይ፡ በዘመነ፡ ዚኣሁ።
5 ወበእማንቱ፡ መዋዕለ፡ ይትረአይ፡ ሰማይ፡ ወይበጽሕ፡ ዓባር፡ በጽንፈ፡ ሠረገላት፡ ዐቢይ፡ በምዕራብ፡ ወይበርህ፡ ፈድፋደ፡ እምሥርዐተ፡ ብርሃን።
6 ወይስሕቱ፡ ብዙኃን፡ አርእስቲሆሙ፡ ለከዋክብተ፡ ትእዛዝ፡ ወእሉ፡ ይመይጡ፡ ፍናዊሆሙ፡ ወግብሮሙ፡ ወኢይትመየጡ፡ በአዝማነ፡ ዚኣሆሙ፡ እለ፡ ተአዘዘ፡ ሎሙ።
7 ወኵሉ፡ ሥርዐተ፡ ከዋክብት፡ ይትዐጸው፡ ላዕለ፡ ኃጥኣን፡ ወኅሊናሆሙ፡ ለእለ፡ ይነብሩ፡ ዲበ፡ ምድር፡ ይስሕቱ፡ ዲቤሆሙ፡ ወይትመየጡ፡ እምኵሉ፡ ፍናዊሆሙ፡ ወይስሕቱ፡ ወያመስልዎሙ፡ አማልክተ።
8 ወይበዝኅ፡ ላዕሌሆሙ፡ እከይ፡ ወመቅሠፍት፡ ይመጽእ፡ ዲቤሆሙ፡ ከመ፡ ያህጕሎሙ፡ ለኵሎሙ።
=== chapter 81 ===
[Chapter 81]
1 ወይቤለኒ፡ ኦ፡ ሄኖክ፡ ነጽር፡ መጽሐፈ፡ ዘጸፍጸፈ፡ ሰማይ፡ ወአንብብ፡ ዘጽሑፍ፡ ዲቤሆሙ፡ ወአእምር፡ ኵሎ፡ አሐደ፡ አሐደ።
2 ወነጸርኩ፡ ኵሎ፡ ዘበጸፍጸፈ፡ ሰማይ፡ ወአንበብኩ፡ ኵሎ፡ ዘጽሑፍ፡ ወአእመርኩ፡ ኵሎ፡ ወአንበብክዋ፡ ለመጽሐፍ፡ ወኵሎ፡ ዘጽሑፍ፡ ውስቴታ፡ ኵሎ፡ ምግባሮሙ፡ ለሰብእ፡ ወኵሎ፡ ውሉደ፡ ሥጋ፡ ዘዲበ፡ ምድር፡ እስከ፡ ትውልደ፡ ዓለም።
3 ወእም፡ ዝ፡ ሶቤሃ፡ ባረክዎ፡ ለእግዚእ፡ ዐቢይ፡ ወንጉሠ፡ ስብሐት፡ ዘለዓለም፡ በከመ፡ ገብረ፡ ኵሎ፡ ግብረ፡ ዓለም፡ ወሰባሕክዎ፡ ለእግዚእ፡ በእንተ፡ ትዕግሥቱ፡ ወባረኩ፡ ወበከይኩ፡ ዲበ፡ ውሉደ፡ አዳም።
4 ወይእተ፡ ጊዜ፡ እቤ፡ ብፁዕ፡ ብእሲ፡ ዘይመውት፡ እንዘ፡ ጻድቅ፡ ወኄር፡ ወኵሉ፡ መጽሐፈ፡ ዐመፃ፡ ዘኢተጽሕፈ፡ ዲቤሁ፡ ወኢተረክበ፡ ጌጋይ፡ በላዕሌሁ፡ በዕለተ፡ ኵነኔ።
5 ወእሙንቱ፡ ሠለስቱ፡ ቅዱሳን፡ አቅረቡኒ፡ ወአንበሩኒ፡ ውስተ፡ ምድር፡ በቅድመ፡ ኆኅተ፡ ቤትየ፡ ወይቤሉኒ፡ አይድዕ፡ ኵሎ፡ ለማቱሳላ፡ ወልድከ፡ ወአርኢ፡ ለኵሎሙ፡ ውሉድከ፡ ከመ፡ ኢይጸድቅ፡ ኵሉ፡ ዘሥጋ፡ በቅድመ፡ እግዚእ፡ እስመ፡ ውእቱ፡ ፈጠሮሙ።
6 አሐደ፡ ዓመተ፡ ነኀድገከ፡ በኀበ፡ ውሉድከ፡ እስከ፡ ካዕበ፡ ትኤዝዝ፡ ከመ፡ ትምሀሮሙ፡ ለውሉድከ፡ ወትጽሐፍ፡ ሎሙ፡ ወታስምዕ፡ ለኵሎሙ፡ ውሉድከ፡ ወበካልእ፡ ዓም፡ ይነሥኡከ፡ እማእከሎሙ።
7 ወይጽናዕ፡ ልብከ፡ እስመ፡ ኄራን፡ ለኄራን፡ ያየድዑ፡ ጽድቀ፡ ጻድቅ፡ ምስለ፡ ጻድቅ፡ ይትፌሣሕ፡ ወይትአምኁ፡ በበይናቲሆሙ።
8 ወኃጥእ፡ ምስለ፡ ኃጥእ፡ ይመውት፡ ወምዩጥ፡ ምስለ፡ ምዩጥ፡ ይሰጠም።
9 ወእለ፡ ይገብሩ፡ ጽድቀ፡ ይመውቱ፡ በእንተ፡ ምግባረ፡ ሰብእ፡ ወይትጋብኡ፡ በእንተ፡ ምግባሮሙ፡ ለረሲዓን።
10 ወበእማንቱ፡ መዋዕል፡ ፈጸሙ፡ እንዘ፡ ይትናገሩ፡ ምስሌየ፡ ወቦእኩ፡ በኀበ፡ ሰብእየ፡ እንዘ፡ እባርኮ፡ ለእግዚአ፡ ዓለማት።
=== chapter 82 ===
[Chapter 82]
1 ወይእዜኒ፡ ወልድየ፡ ማቱሳላ፡ ኵሎ፡ እሎንተ፡ ለከ፡ እነግር፡ ወእጽሕፍ፡ ለከ፡ ወኵሎ፡ ከሠትኩ፡ ለከ፡ ወወሀብኩከ፡ መጻሕፍቲሆሙ፡ ለእሉ፡ ኵሎሙ፡ ወዕቀብ፡ ወልድየ፡ ማቱሳላ፡ መጻሕፍተ፡ እዴሁ፡ ለአቡከ፡ ወከመ፡ ተሀብ፡ ለትውልደ፡ ዓለም።
2 ጥበበ፡ ወሀብኩከ፡ ለከ፡ ወለውሉድከ፡ ወለእለ፡ ይከውኑ፡ ለከ፡ ውሉደ፡ ከመ፡ የሀቡ፡ ለውሉዶሙ፡ ወለትውልዳት፡ እስከ፡ ለዓለም፡ ለዛ፡ ጥበብ፡ ዲበ፡ ኅሊናሆሙ።
3 ወኢይነውሙ፡ እለ፡ ይሌብዉ፡ ወያጸምኡ፡ በእዝኖሙ፡ ከመ፡ ይትመሀርዋ፡ ለዛ፡ ጥበብ፡ ወትደልዎሙ፡ እመባልዕት፡ ሠናያት፡ ለእለ፡ ይበልዑ።
4 ብፁዓን፡ ጻድቃን፡ ኵሎሙ፡ ወብፁዓን፡ ኵሎሙ፡ እለ፡ የሐውሩ፡ በፍኖተ፡ ጽድቅ፡ ወአልቦሙ፡ ኀጢአት፡ ከመ፡ ኃጥኣን፡ በኍልቈ፡ ኵሉ፡ መዋዕሊሆሙ፡ ዘየሐውር፡ ፀሓይ፡ በሰማይ፡ በአናቅጽ፡ ይበውእ፡ ወይወፅእ፡ ሠላሳ፡ ዕለተ፡ ምስለ፡ አርእስተ፡ ዐሠርቱ፡ ምእት፡ ዝ፡ ሥርዐቶሙ፡ ለከዋክብት፡ ምስለ፡ አርባዕቱ፡ እለ፡ ይትዌሰኩ፡ እለ፡ ይሌልዩ፡ ማእከለ፡ አርባዕቱ፡ ክፍለ፡ ዓመት፡ እለ፡ ይመርሕዎሙ፡ ወምስሌሆሙ፡ ይበውኡ፡ አርባዕተ፡ መዋዕለ።
5 ወበእንቲኣሆሙ፡ ይጌግዩ፡ ሰብእ፡ ወኢየሐስብዎሙ፡ በሐሳበ፡ ኵሉ፡ ዓለም፡ እስመ፡ ይጌግይዎሙ፡ ወኢየአምርዎሙ፡ ሰብእ፡ ጥንቁቀ።
6 እስመ፡ ሀለዉ፡ በሐሳበ፡ ዓመት፡ ወአማን፡ ልኩኣን፡ እሙንቱ፡ ለዓለም፡ አሐዱ፡ በቀዳሚት፡ ኆኅት፡ ወአሐዱ፡ በሣልሲት፡ ኆኅት፡ ወአሐዱ፡ በራብዒት፡ ኆኅት፡ ወአሐዱ፡ በሳድሲት፡ ኆኅት፡ ወይትፌጸም፡ ዓመት፡ በመዋዕል፡ ሠለስቱ፡ ምእት፡ ወስሳ፡ ወረቡዕ።
7 ወአማን፡ ነገሩ፡ ወጥንቁቅ፡ ሐሳቡ፡ ዘልኩእ፡ እስመ፡ ለብርሃናት፡ ወለአውራኅ፡ ወለበዐላት፡ ወለክራማት፡ ወለመዋዕል፡ አርአየኒ፡ ወነፍኀ፡ ዲቤየ፡ ኡርኤል፡ መልአክ፡ ዘአዘዘ፡ ሊተ፡ እግዚአ፡ ኵሉ፡ ፍጥረት፡ በኀይለ፡ ሰማይ።
8 ወሥልጣን፡ ቦቱ፡ በመዓልት፡ ወበሌሊት፡ ውስተ፡ ሰማይ፡ ከመ፡ ያርኢ፡ ብርሃነ፡ ዲበ፡ ሰብእ፡ ፀሓየ፡ ወወርኀ፡ ወከዋክብተ፡ ወኵሎሙ፡ ሥልጣናተ፡ ሰማይ፡ እለ፡ ይትመየጡ፡ በክበቦሙ።
9 ወዛቲ፡ ይእቲ፡ ሥርዐተ፡ ከዋክብት፡ እለ፡ የዐርቡ፡ በመካናቲሆሙ፡ ወበአዝማናቲሆሙ፡ ወበበዓላቲሆሙ፡ ወበአውራኂሆሙ።
10 ወእሉ፡ አስማቲሆሙ፡ ለእለ፡ ይመርሕዎሙ፡ ለእለ፡ የዐቅቡ፡ ወይበውኡ፡ በአዝማነ፡ ዚኣሆሙ፡ ወበሥርዐታቲሆሙ፡ ወበጊዜያቲሆሙ፡ ወበአውራኂሆሙ፡ ወበሥልጣናቲሆሙ፡ ወበምቅዋማቲሆሙ።
11 አርባዕቱ፡ መራሕያኒሆሙ፡ ይበውኡ፡ ቀዳሚ፡ እለ፡ ይሌልዩ፡ አርባዕተ፡ ክፍለ፡ ዓመት፡ ወእምድኅሬሆሙ፡ ዐሠርቱ፡ ወክልኤቱ፡ መራሕያን፡ ዘሥርዐታት፡ እለ፡ ይሌልይዎሙ፡ ለአውራኅ፡ ወለዓመት፡ ሠለስቱ፡ ምእት፡ ወስሳ፡ ወአርባዕቱ፡ ምስለ፡ አርእስተ፡ ዐሠርቱ፡ ምእት፡ እለ፡ ይፈልጥዎሙ፡ ለመዋዕል፡ ወለአርባዕቱ፡ እለ፡ ይትዌሰኩ፡ ዲቤሆሙ፡ ወእለ፡ ይፈልጡ፡ መራሕያን፡ አርባዕተ፡ መክፈልተ፡ ዓመታት።
12 ወእሙንቱ፡ አርእስተ፡ ዐሠርቱ፡ ምእት፡ ማእከለ፡ መራሒ፡ ወተመራሒ፡ ወይትዌሰክ፡ አሐዱ፡ በድኅረ፡ ምቅዋም፡ ወመራሕያኒሆሙ፡ ይፈልጡ።
13 ወእሉ፡ አስማቲሆሙ፡ ለመራሕያን፡ እለ፡ ይፈልጡ፡ አርባዕተ፡ መክፈልተ፡ ዓመት፡ እለ፡ ሥሩዓን፡ ምልክኤል፡ ወሕልመልሜሌክ፡ ወሚልኤል፡ ወናሬል።
14 ወአስማቲሆሙ፡ ለእለ፡ ይመርሕዎሙ፡ አድናርኤል፡ ወኢየሱሳኤል፡ ወኢይሉሚኤል፡ እሉ፡ ሠለስቱ፡ እለ፡ ይተልዉ፡ ድኅሬሆሙ፡ ለመራሕያነ፡ ሥርዐታት፡ ወአሐዱ፡ ዘይተሉ፡ ድኅረ፡ ሠለስቱ፡ መራሕያነ፡ ሥርዐታት፡ እለ፡ ይተልዉ፡ ድኅረ፡ እልኩ፡ መራሕያነ፡ ምቅዋማት፡ እለ፡ ይፈልጡ፡ አርባዕተ፡ ክፍለ፡ ዓመት።
15 በቅድመ፡ ዓመት፡ ቀዳማዊ፡ ይሠርቅ፡ ወይመልክ፡ ምልክኤል፡ ዘይሰመይ፡ ስሙ፡ ተመዓኔ፡ ወፀሓየ፡ ወኵሎሙ፡ መዋዕላት፡ ዘበሥልጣነ፡ ዚኣሁ፡ ይመልክ፡ ተስዓ፡ ወአሐዱ፡ ዕለት።
16 ወእሉ፡ ትእምርታተ፡ መዋዕል፡ እለ፡ ሀለዉ፡ ያስተርእዩ፡ ዲበ፡ ምድር፡ በመዋዕለ፡ ሥልጣነ፡ ዚኣሁ፡ ሐፍ፡ ወሞቅ፡ ወሐዘን፡ ወኵሎሙ፡ ዕፀው፡ ይፈርዩ፡ ወቈጽል፡ ይወፅእ፡ በኵሉ፡ ዕፀው፡ ወማእረረ፡ ሥርናይ፡ ወጽጌ፡ ረዳ፡ ወኵሉ፡ ጽጌያት፡ ይጸግዩ፡ በገዳም፡ ወዕፀወ፡ ክረምት፡ ይየብሱ።
17 ወእሉ፡ አስማቲሆሙ፡ ለመራሕያኒሆሙ፡ እለ፡ መትሕቴሆሙ፡ ብርክኤል፡ ዘልብሳኤል፡ ወካልእ፡ ዘይትዌሰክ፡ ርእሰ፡ ዐሠርቱ፡ ምእት፡ ስሙ፡ ሄሉያሴፍ፡ ወተፈጸመ፡ መዋዕለ፡ ሥልጣኑ፡ ለዝ።
18 ወካልእ፡ መራሒ፡ ዘድኅሬሆሙ፡ ሕልመልሜሌክ፡ ዘይጼውዕዎ፡ ስሞ፡ ፀሓየ፡ ብሩሀ፡ ወኵሉ፡ መዋዕለ፡ ሥልጣኑ፡ ተስዓ፡ ወአሐዱ፡ ዕለት።
19 ወእሉ፡ ትእምርታተ፡ መዋዕል፡ ዘዲበ፡ ምድር፡ ሐሩር፡ ወየብስ፡ ወዕፀው፡ ያወፅኡ፡ ፍሬሆሙ፡ ርሱነ፡ ወብሱለ፡ ወይሁቡ፡ ፍሬሆሙ፡ ይቡሰ፡ ወአባግዕ፡ ይታለዋ፡ ወይፀንሳ፡ ወያስተጋብኡ፡ ኵሎ፡ ፍሬ፡ ምድር፡ ወኵሎ፡ ዘሀሎ፡ ውስተ፡ ገራውህ፡ ወምክያደ፡ ወይን፡ ወይከውን፡ በመዋዕለ፡ ሥልጣኑ።
20 ወእሉ፡ እሙንቱ፡ ስሞሙ፡ ወሥርዐታቲሆሙ፡ ወመራሕያኒሆሙ፡ እለ፡ መትሕቴሆሙ፡ ለእሉ፡ አርእስተ፡ ዐሠርቱ፡ ምእት፡ ጊዳኤል፡ ወኪኤል፡ ወሄኤል፡ ወስሙ፡ ለዘይትዌሰክ፡ ምስሌሆሙ፡ ርእሰ፡ ዐሠርቱ፡ ምእት፡ አስፋኤል፡ ወተፈጸመ፡ መዋዕለ፡ ሥልጣነ፡ ዚኣሁ።
=== chapter 83 ===
[Chapter 83]
1 ወይእዜኒ፡ አርእይኩከ፡ ወልድየ፡ ማቱሳላ፡ ኵሎ፡ ወኵሎ፡ ራእያተ፡ እለ፡ ርኢኩ፡ እነግር፡ በቅድሜከ።
2 ክልኤተ፡ ራእያተ፡ ርኢኩ፡ እንበለ፡ እንሣእ፡ ብእሲተ፡ ወአሐዱሂ፡ እምኔሆሙ፡ ኢይትማሰል፡ ምስለ፡ ካልኡ፡ ቀዳማየ፡ አመ፡ እትሜሀር፡ መጽሐፈ፡ ወካልአ፡ ዘእንበለ፡ እንሥኣ፡ ለእምከ፡ ርኢኩ፡ ራእየ፡ ጽኑዐ፡ ወበእንቲኣሆሙ፡ አስተብቋዕክዎ፡ ለእግዚእ።
3 ወስኩበ፡ ኮንኩ፡ በቤተ፡ መላልኤል፡ እምኄውየ፡ ርኢኩ፡ በራእይ፡ ሰማይ፡ ይትነጻሕ፡ ወይትሀየድ፡ ወይወድቅ፡ ዲበ፡ ምድር።
4 ወሶበ፡ ይወድቅ፡ ዲበ፡ ምድር፡ ርኢክዋ፡ ለምድር፡ ከመ፡ ትትወሐጥ፡ ውስተ፡ ቀላይ፡ ዐቢይ፡ ወአድባር፡ ዲበ፡ አድባር፡ ይሰቀሉ፡ ወአውግር፡ ዲበ፡ አውግር፡ ይሰጠሙ፡ ወአዕዋም፡ ነዊኀት፡ እምጕንዳቲሆሙ፡ ይትገዘሙ፡ ወይትገደፉ፡ ወይሰጠሙ፡ ውስተ፡ ቀላይ።
5 ወእምኔሁ፡ ወድቀ፡ ነገር፡ ውስተ፡ አፉየ፡ ወአንሣእኩ፡ እጽራሕ፡ ወእቤ፡ ተሀጕለት፡ ምድር።
6 ወመላልኤል፡ እምኄውየ፡ አንሥአኒ፡ እንዘ፡ አነ፡ እሰክብ፡ ወይቤለኒ፡ ለምንት፡ ከመ፡ ዝ፡ ትጸርሕ፡ ወልድየ፡ ወለምንት፡ ከመ፡ ዝ፡ ተዐወዩ።
7 ወነገርክዎ፡ ኵሎ፡ ራእየ፡ ዘርኢኩ፡ ወይቤለኒ፡ ከመ፡ ጽኑዐ፡ ርኢከ፡ ወልድየ፡ ወኀየለ፡ ራእየ፡ ሕልምከ፡ ኅቡአተ፡ ኵሉ፡ ኀጢአተ፡ ምድር፡ ወትሰጠም፡ ሀለወት፡ ውስተ፡ ቀላያት፡ ወተሀጕል፡ ሀጕለ፡ ዐቢየ።
8 ወይእዜኒ፡ ወልድየ፡ ተንሥእ፡ ወአስተብቍዖ፡ ለእግዚአ፡ ስብሐት፡ እስመ፡ መሃይምን፡ አንተ፡ ከመ፡ ይትርፍ፡ ትራፍ፡ ዲበ፡ ምድር፡ ወይደመስሳ፡ ለኵላ፡ ምድር።
9 ወልድየ፡ እምሰማይ፡ ይሄሉ፡ ኵሉ፡ ዝ፡ ዲበ፡ ምድር፡ ወዲበ፡ ምድር፡ ይከውን፡ ሀጕል፡ ዐቢይ።
10 ወእምኔሁ፡ ተንሣእኩ፡ ወጸለይኩ፡ ወአስተብቋዕኩ፡ ወጸሎትየ፡ ጸሐፍኩ፡ ለትውልደ፡ ዓለም፡ ወኵሎ፡ አርአይኩከ፡ ወልድየ፡ ማቱሳላ።
11 ወሶበ፡ ወፃእኩ፡ ታሕተ፡ ርኢክዎ፡ ለሰማይ፡ ወለፀሓይ፡ ይወፅእ፡ እምሥራቅ፡ ወወርኅ፡ ይወርድ፡ እምዕራብ፡ ወውኁዳት፡ ከዋክብት፡ ወኵሉ፡ ምድር፡ ወኵሎ፡ ዘአእመረ፡ ዲበ፡ ቀዳሚ፡ ወባረክዎ፡ ለእግዚአ፡ ኵነኔ፡ ወሎቱ፡ ወሀብኩ፡ ዕበየ፡ እስመ፡ አውፅአ፡ ፀሓየ፡ እመሳክወ፡ ምሥራቅ፡ ወአዕረገ፡ ወአሥረቀ፡ ዲበ፡ ገጸ፡ ሰማይ፡ ወተንሥአ፡ ወየሐውር፡ ፍኖት፡ እንተ፡ ተርእየት፡ ሎቱ።
=== chapter 84 ===
[Chapter 84]
1 ወአልዐልኩ፡ እደውየ፡ በጽድቅ፡ ወባረክዎ፡ ለቅዱስ፡ ወለዐቢይ፡ ወነገርኩ፡ በመንፈሰ፡ አፉየ፡ ወበልሳነ፡ ሥጋ፡ እንተ፡ ገብረ፡ አምላክ፡ ለውሉደ፡ ሰብእ፡ ከመ፡ ይትናገሩ፡ ባቲ፡ ወወሀቦሙ፡ መንፈሰ፡ ወልሳነ፡ ወአፈ፡ ከመ፡ ይትናገሩ፡ ቦቱ።
2 ቡሩክ፡ አንተ፡ እግዚኦ፡ ንጉሥ፡ ወዐቢይ፡ ወኀያል፡ በዕበየ፡ ዚኣከ፡ እግዚአ፡ ኵሉ፡ ፍጥረተ፡ ሰማይ፡ ንጉሠ፡ ነገሥት፡ ወአምላከ፡ ኵሉ፡ ዓለም፡ ወመለኮትከ፡ ወመንግሥትከ፡ ወዕበይከ፡ ይነብር፡ ለዓለም፡ ወለዓለመ፡ ዓለም፡ ወለኵሉ፡ ትውልደ፡ ትውልድ፡ ሥልጣንከ፡ ወኵሎሙ፡ ሰማያት፡ ምንባሪከ፡ ለዓለም፡ ወኵላ፡ ምድር፡ መከየደ፡ እገሪከ፡ ለዓለመ፡ ዓለም።
3 እስመ፡ አንተ፡ ገበርከ፡ ኵሎ፡ ወኵሎ፡ አንተ፡ ትመልክ፡ ወኢይጸንዐከ፡ ግብር፡ ወኢ፡ አሐዱ፡ ወኢ፡ አሐቲ፡ ጥበብ፡ ኢተኀልፈከ፡ ወኢትትመየጥ፡ እመንበርታ፡ ምንባሪከ፡ ወኢ፡ እምገጽከ፡ ወአንተ፡ ኵሎ፡ ተአምር፡ ወትሬኢ፡ ወትሰምዕ፡ ወአልቦ፡ ዘይትኀባእ፡ እምኔከ፡ እስመ፡ ኵሎ፡ ትሬኢ።
4 ወይእዜኒ፡ መላእክተ፡ ሰማያቲከ፡ ይኤብሱ፡ ወዲበ፡ ሥጋ፡ ሰብእ፡ ትከውን፡ መዓትከ፡ እስከ፡ ዕለተ፡ ዐባይ፡ ኵነኔ።
5 ወይእዜኒ፡ አምላክ፡ ወእግዚእ፡ ወንጉሥ፡ ዐቢይ፡ ኣስተበቍዕ፡ ወእስእል፡ ከመ፡ ታቅም፡ ሊተ፡ ስእለትየ፡ ከመ፡ ታትርፍ፡ ሊተ፡ ደኃሪተ፡ ውስተ፡ ምድር፡ ወኢታጥፍእ፡ ኵሎ፡ ሥጋ፡ ሰብእ፡ ወኢታዕርቃ፡ ለምድር፡ ወኢይኩን፡ ሀጕል፡ ለዓለም።
6 ወይእዜኒ፡ እግዚእየ፡ አጥፍእ፡ እምዲበ፡ ምድር፡ ሥጋ፡ እንተ፡ አምዕዐተከ፡ ወሥጋ፡ ጽድቅ፡ ወርትዕ፡ አቅም፡ ለተክለ፡ ዘርዕ፡ ለዓለም፡ ወኢትሰውር፡ ገጸከ፡ እምስእለተ፡ ገብርከ፡ እግዚኦ።
=== chapter 85 ===
[Chapter 85]
1 ወእምድኅረ፡ ዝ፡ ካልአ፡ ሕልመ፡ ርኢኩ፡ ወኵሎ፡ አርእየከ፡ ወልድየ።
2 ወአንሥአ፡ ሄኖክ፡ ወይቤሎ፡ ለወልዱ፡ ማቱሳላ፡ ለከ፡ እብለከ፡ ወልድየ፡ ስማዕ፡ ነገርየ፡ ወአጽንን፡ እዝነከ፡ ለርእየ፡ ሕልመ፡ አቡከ።
3 እንበለ፡ እንሥኣ፡ ለእምከ፡ እድና፡ ርኢኩ፡ በራእየ፡ በምስካብየ፡ ወናሁ፡ ላሕም፡ ወፅአ፡ እምድር፡ ወኮነ፡ ዝኩ፡ ላሕም፡ ጸዐዳ፡ ወእምድኅሬሁ፡ ወፅአት፡ ጣዕዋ፡ አንስቲያዊት፡ አሐቲ፡ ወምስሌሃ፡ ወፅአ፡ ካልእ፡ ጣዕዋ፡ ወአሐዱ፡ እምኔሆሙ፡ ኮነ፡ ጸሊመ፡ ወአሐዱ፡ ቀይሐ።
4 ወጐድኦ፡ ዝኩ፡ ጸሊም፡ ጣዕዋ፡ ለቀይሕ፡ ወተለዎ፡ ዲበ፡ ምድር፡ ወኢክህልኩ፡ እምሶቤሃ፡ ርእዮቶ፡ ለዝኩ፡ ቀይሕ፡ ጣዕዋ።
5 ወዝኩ፡ ጸሊም፡ ጣዕዋ፡ ልህቀ፡ ወመጽአት፡ ምስሌሁ፡ እንትኩ፡ ጣዕዋ፡ አንስትያዊት፡ ወርኢኩ፡ እምኔሁ፡ ዘይወፅኡ፡ አልሕምተ፡ ብዙኃነ፡ እንዘ፡ ይመስልዎ፡ ወይተልዉ፡ ድኅሬሁ።
6 ወእንታክቲ፡ ዕጐልት፡ አንስትያዊት፡ ቀዳሚት፡ ወፅአት፡ እምቅድመ፡ ገጹ፡ ለዝኩ፡ ላሕም፡ ቀዳማዊ፡ ወኀሠሠቶ፡ ለውእቱ፡ ጣዕዋ፡ ቀይሕ፡ ወኢረከበቶ፡ ወዐውየወት፡ ኀቤሁ፡ ዐውያተ፡ ዐቢያተ፡ ወኀሠሠቶ።
7 ወርኢኩ፡ እስከ፡ ወፅአ፡ ዝኩ፡ ላሕም፡ ቀዳማዊ፡ ኀቤሃ፡ ወአርመማ፡ ወእምይእቲ፡ ጊዜ፡ ኢጸርሐት።
8 ወእምድኅረ፡ ዝንቱ፡ ወለደት፡ ካልአ፡ ላሕመ፡ ጸዐዳ፡ ወእምድኅሬሁ፡ ወለደት፡ አልሕምተ፡ ብዙኃነ፡ ወዕጐላተ፡ ጸሊማነ።
9 ወርኢኩ፡ በንዋምየ፡ ዝኩ፡ ሦር፡ ጸዐዳ፡ ዐቢየ፡ ወከመ፡ ዝ፡ ልህቀ፡ ወኮነ፡ ሦረ፡ ጸዐዳ፡ ዐቢየ፡ ወእምኔሁ፡ ወፅኡ፡ አልሕምት፡ ብዙኃን፡ ጸዐድው፡ ወይመስልዎ።
10 ወወጠኑ፡ እንዘ፡ ይወልዱ፡ አልሕምተ፡ ብዙኃነ፡ ጸዐድወ፡ ወእለ፡ ይመስልዎሙ፡ ወተለዎ፡ አሐዱ፡ ለካልኡ።
=== chapter 86 ===
[Chapter 86]
1 ወካዕበ፡ ርኢኩ፡ በአዕይንትየ፡ እንዘ፡ እነውም፡ ወርኢኩ፡ ሰማየ፡ መልዕልተ፡ ወነዋ፡ አሐዱ፡ ኮከብ፡ ወድቀ፡ እምሰማይ፡ ወይትሌዐል፡ ወይበልዕ፡ ወይትረአይ፡ ማእከለ፡ እልኩ፡ አልሕምት።
2 ወእም፡ ዝ፡ ርኢኩ፡ አልሕምተ፡ ዐቢያነ፡ ወጸሊማነ፡ ወናሁ፡ ኵሎሙ፡ ወለጡ፡ ምዕያሞሙ፡ ወምርአዮሙ፡ ወእምጣዕዋሆሙ፡ ወአኀዙ፡ የዐውይዉ፡ አሐዱ፡ ምስለ፡ ካልኡ።
3 ወካዕበ፡ ርኢኩ፡ በራእይ፡ ወነጸርክዎ፡ ለሰማይ፡ ወነዋ፡ ርኢኩ፡ ከዋክብተ፡ ብዙኃነ፡ ወወረዱ፡ ወተገድፉ፡ እምሰማይ፡ ኀበ፡ ዝኩ፡ ኮከብ፡ ቀዳማዊ፡ ወማእከለ፡ እልኩ፡ ጣዕዋ፡ ወአልሕምተ፡ ኮኑ፡ ምስሌሆሙ፡ ይትረአዩ፡ ማእከሎሙ።
4 ወነጸርክዎሙ፡ ወነዋ፡ ኵሎሙ፡ አውፅኡ፡ ኀፍረታቲሆሙ፡ ከመ፡ አፍራስ፡ ወአኀዙ፡ ይዕርጉ፡ ዲበ፡ ዕጓላተ፡ አልሕምት፡ ወፀንሳ፡ ኵሎን፡ ወወለዳ፡ ነጌያተ፡ ወአግማለ፡ ወአእዱገ።
5 ወኵሎሙ፡ አልሕምት፡ ፈርህዎሙ፡ ወደንገፁ፡ እምኔሆሙ፡ ወአኀዙ፡ እንዘ፡ ይኔዝሩ፡ በስነኒሆሙ፡ ወይውኅጡ፡ ወይወግኡ፡ በአቅርንቲሆሙ።
6 ወአኀዙ፡ እንከ፡ ይበልዕዎሙ፡ ለእልኩ፡ አልሕምት፡ ወነዋ፡ ኵሎሙ፡ ውሉደ፡ ምድር፡ አኀዙ፡ ይርዓዱ፡ ወያድለቀልቁ፡ እምኔሆሙ፡ ወይንፍጹ።
=== chapter 87 ===
[Chapter 87]
1 ወካዕበ፡ ርኢክዎሙ፡ ወአኀዘ፡ እንዘ፡ ይወግኦ፡ አሐዱ፡ ለካልኡ፡ ወይውኅጦ፡ አሐዱ፡ ለካልኡ፡ ወምድርኒ፡ አኀዘት፡ ትጽራሕ።
2 ወአንሣእኩ፡ አዕይንትየ፡ ካዕበ፡ ውስተ፡ ሰማይ፡ ወርኢኩ፡ በራእይ፡ ወነዋ፡ ወፅኡ፡ እምሰማይ፡ ከመ፡ አምሳለ፡ ሰብእ፡ ጸዐዳ፡ ወአሐዱ፡ ወፅአ፡ እምውእቱ፡ መካን፡ ወሠለስቱ፡ ምስሌሆሙ።
3 ወእሙንቱ፡ ሠለስቱ፡ እለ፡ ወፅኡ፡ ድኅረ፡ አኀዙኒ፡ በእዴየ፡ ወአንሥኡኒ፡ እምትውልደ፡ ምድር፡ ወአልዐሉኒ፡ ዲበ፡ መካን፡ ነዋኅ፡ ወአርአዩኒ፡ ማኅፈደ፡ ነዋኀ፡ እምድር፡ ወኮነ፡ ሕጹጸ፡ ኵሉ፡ አውግር።
4 ወይቤሉኒ፡ ንበር፡ ዝየ፡ እስከ፡ ትሬኢ፡ ኵሎ፡ ዘይመጽእ፡ ዲበ፡ እሉ፡ ነጌያት፡ ወአግማል፡ ወአእዱግ፡ ወዲበ፡ ከዋክብት፡ ወዲበ፡ አልሕምት፡ ኵሎሙ።
=== chapter 88 ===
[Chapter 88]
1 ወርኢኩ፡ አሐደ፡ እምእልኩ፡ አርባዕቱ፡ እለ፡ ወፅኡ፡ እምቀዳሚ፡ ወአኀዞ፡ ለዝኩ፡ ኮከብ፡ ቀዳማዊ፡ ዘወድቀ፡ እምሰማይ፡ ወአሰሮ፡ እደዊሁ፡ ወበእገሪሁ፡ ወወደዮ፡ ውስተ፡ ማዕምቅ፡ ወዝንቱ፡ ማዕምቅ፡ ጸቢብ፡ ወዕሙቅ፡ ወዕጹብ፡ ወጽልመት።
2 ወአሐዱ፡ እምእሉ፡ መልኀ፡ ሰይፎ፡ ወወሀቦሙ፡ ለእልኩ፡ ነጌያት፡ ወአግማል፡ ወአእዱግ፡ ወአኀዘ፡ እንዘ፡ ይወግኦ፡ አሐዱ፡ ለካልኡ፡ ወኵላ፡ ምድር፡ አድለቅለቀት፡ ዲቤሆሙ።
3 ወሶበ፡ ርኢኩ፡ በራእይ፡ ነዋ፡ እንከ፡ አሐዱ፡ እምእልኩ፡ አርባዕቱ፡ እለ፡ ወፅኡ፡ ወወገረ፡ እምሰማይ፡ ወአስተጋብአ፡ ወነሥአ፡ ኵሎ፡ ከዋክብተ፡ ዐቢያነ፡ እለ፡ ኀፍረቶሙ፡ ከመ፡ ኀፍረተ፡ አፍራስ፡ ወአሰሮሙ፡ ለኵሎሙ፡ በእደዊሆሙ፡ ወበእገሪሆሙ፡ ወወደዮሙ፡ በንቅዓተ፡ ምድር።
=== chapter 89 ===
[Chapter 89]
1 ወአሐዱ፡ እምእልኩ፡ አርባዕቱ፡ ሖረ፡ ኀበ፡ ዝኩ፡ ላሕም፡ ጸዐዳ፡ ወመሀሮ፡ ምሥጢረ፡ እንዘ፡ ይርዕድ፡ ውእቱ፡ ላሕም፡ ተወልደ፡ ወኮነ፡ ሰብአ፡ ወጸረበ፡ ሎቱ፡ መስቀረ፡ ዐባየ፡ ወነበረ፡ ዲቤሃ፡ ወሠለስቱ፡ አልሕምት፡ ነበሩ፡ ምስሌሁ፡ በይእቲ፡ መስቀር፡ ወተከድነ፡ ላዕሌሆሙ።
2 ወአልዐልኩ፡ ካዕበ፡ አዕይንትየ፡ መንገለ፡ ሰማይ፡ ወርኢኩ፡ ናሕሰ፡ ልዑለ፡ ወሰብዐቱ፡ አስራብ፡ ዲቤሁ፡ ወእልኩ፡ አስራብ፡ ይውሕዙ፡ በአሐዱ፡ ዐጸድ፡ ማየ፡ ብዙኀ።
3 ወርኢኩ፡ ካዕበ፡ ወነዋ፡ አንቅዕታት፡ ተርኅዉ፡ ዲበ፡ ምድር፡ በውእቱ፡ ዐጸድ፡ ዐቢይ፡ ወአኀዘ፡ ውእቱ፡ ማይ፡ ይፍላሕ፡ ወይትነሣእ፡ ዲበ፡ ምድር፡ ወኢያርአዮ፡ ለውእቱ፡ ዐጸድ፡ እስከ፡ ኵሉ፡ ምድሩ፡ ተከድነ፡ በማይ።
4 ወበዝኀ፡ ዲቤሁ፡ ማይ፡ ወጽልመት፡ ወጊሜ፡ ወእሬኢ፡ መልዕልቶ፡ ለዝኩ፡ ማይ፡ ወተለዐለ፡ ውእቱ፡ ማይ፡ መልዕልቶ፡ ለውእቱ፡ ዐጸድ፡ ወይክዑ፡ መልዕልቶ፡ ለውእቱ፡ ዐጸድ፡ ወቆመ፡ ዲበ፡ ምድር።
5 ወኵሎሙ፡ አልሕምት፡ እለ፡ ውስተ፡ ውእቱ፡ ዐጸድ፡ ተጋብኡ፡ እስከነ፡ ርኢክዎሙ፡ ይሰጠሙ፡ ወይትወኀጡ፡ ወይትሀጐሉ፡ በውእቱ፡ ማይ።
6 ወውእቱ፡ መስቀር፡ ይደቢ፡ ዲበ፡ ማይ፡ ወኵሎሙ፡ አልሕምት፡ ወነጌያት፡ ወአግማል፡ ወአእዱግ፡ ተሰጥሙ፡ ውስተ፡ ምድር፡ ወኵሉ፡ እንስሳ፡ ወኢክህልኩ፡ ርእዮቶሙ፡ ወእሙንቱሂ፡ ስእኑ፡ ወፂአ፡ ወተሀጕሉ፡ ወተሰጥሙ፡ ውስተ፡ ቀላይ።
7 ወካዕበ፡ ርኢኩ፡ በራእይ፡ እስከ፡ ሰሰሉ፡ እልኩ፡ አስራብ፡ እምዝኩ፡ ናሕስ፡ ልዑል፡ ወንቅዓተ፡ ምድር፡ ዐረየ፡ ወማዕምቃት፡ ካልኣን፡ ተፈትሑ።
8 ወአኀዘ፡ ማይ፡ ይረድ፡ ውስቴቶሙ፡ እስከነ፡ ተከሥተ፡ ምድር፡ ወውእቱ፡ መስቀር፡ ነበረ፡ ውስተ፡ ምድር፡ ወተግሕሠት፡ ጽልመት፡ ወኮነ፡ ብርሃን።
9 ወውእቱ፡ ላሕም፡ ጸዐዳ፡ ዘኮነ፡ ብእሴ፡ ወፅአ፡ እምዝኩ፡ መስቀር፡ ወሠለስቱ፡ አልሕምት፡ ምስሌሁ፡ ወኮነ፡ አሐዱ፡ ዝኩ፡ እምሠለስቱ፡ አልሕምት፡ ጸዐዳ፡ ይመስሎ፡ ለዝኩ፡ ላሕም፡ ወአሐዱ፡ እምኔሆሙ፡ ቀይሕ፡ ከመ፡ ደም፡ ወአሐዱ፡ ጸሊም፡ ወውእቱ፡ ዝኩ፡ ላሕም፡ ጸዐዳ፡ ኀለፈ፡ እምኔሆሙ።
10 ወአኀዙ፡ ይለዱ፡ አራዊተ፡ ገዳም፡ ወአዕዋፈ፡ ወኮነ፡ እምኔሆሙ፡ ዘእምኵሎሙ፡ ኅብረ፡ አሕዛብ፡ አናብስተ፡ ወአናምርተ፡ አዝእብተ፡ ወአክልብተ፡ አጽዕብተ፡ ወሐራውያ፡ ገዳም፡ ቈናጽለ፡ ወግሔያተ፡ ሐንዘረ፡ ወሲሲተ፡ አንስርተ፡ ወአውስተ፡ ሆባየ፡ ወፎቃንሰ፡ ወቋዓተ፡ ወተወልደ፡ ማእከሎሙ፡ ላሕም፡ ጸዐዳ።
11 ወአኀዙ፡ ይትናሰኩ፡ በበይናቲሆሙ፡ አሐዱ፡ ምስለ፡ ካልኡ፡ ወዝኩ፡ ላሕም፡ ጸዐዳ፡ ዘተወልደ፡ ማእከሎሙ፡ ወለደ፡ አድገ፡ ገዳም፡ ወላሕመ፡ ጸዐዳ፡ ምስሌሁ፡ ወበዝኁ፡ አእዱገ፡ ገዳም።
12 ወውእቱ፡ ላሕም፡ ዘተወልደ፡ እምኔሁ፡ ወለደ፡ ሐራውያ፡ ገዳም፡ ጸሊመ፡ ወበግዐ፡ ጸዐዳ፡ ወውእቱ፡ ሐራውያ፡ ገዳም፡ ወለደ፡ አሕርወ፡ ብዙኃነ፡ ወውእቱ፡ በግዕ፡ ወለደ፡ ዐሠርተ፡ ወክልኤተ፡ አባግዐ።
13 ወሶበ፡ ልህቁ፡ እልክቱ፡ እሙንቱ፡ ዐሠርቱ፡ ወክልኤቱ፡ አባግዕ፡ ለአሐዱ፡ እምኔሆሙ፡ መጠውዎ፡ ለአእዱገ፡ ገዳም፡ ወእልክቱ፡ አእዱገ፡ ገዳም፡ ካዕበ፡ መጠውዎ፡ ለዝኩ፡ በግዕ፡ ለአዝእብት፡ ወልህቀ፡ ዝኩ፡ በግዕ፡ ማእከለ፡ አዝእብት።
14 ወእግዚእ፡ አምጽኦሙ፡ ለዐሠርቱ፡ ወአሐዱ፡ አባግዕ፡ ከመ፡ ይኅድሩ፡ ምስሌሁ፡ ወይትረዐዩ፡ ምስሌሁ፡ ማእከለ፡ አዝእብት፡ ወበዝኁ፡ ወኮኑ፡ መራዕየ፡ ብዙኃነ፡ ዘአባግዕ።
15 ወወጠኑ፡ አዝእብት፡ እንዘ፡ ይፈርህዎሙ፡ ወአጠቅዎሙ፡ እስከ፡ የኀልቁ፡ ደቂቆሙ፡ ወገደፉ፡ ደቂቆሙ፡ በውሒዘ፡ ማይ፡ ብዙኅ፡ ወእልኩ፡ አባግዕ፡ ወጠኑ፡ ይጽርሑ፡ በእንተ፡ ደቂቆሙ፡ ወይስክዩ፡ ኀበ፡ እግዚኦሙ።
16 ወበግዕ፡ ዘድኅነ፡ እምነ፡ አዝእብት፡ ነፍጸ፡ ወኀለፈ፡ ውስተ፡ አእዱገ፡ ገዳም፡ ወርኢክዎሙ፡ ለአባግዕ፡ እንዘ፡ የዐወይዉ፡ ወይጸርሑ፡ ወይስእልዎ፡ ለእግዚኦሙ፡ በኵሉ፡ ኀይሎሙ፡ እስከ፡ ወረደ፡ ዝኩ፡ እግዚአ፡ አባግዕ፡ ኀበ፡ ቃሎሙ፡ ለአባግዕ፡ እምጽርሕ፡ ልዑል፡ ወበጽሐ፡ ኀቤሆሙ፡ ወርእዮሙ።
17 ወጸውዖ፡ ለዝኩ፡ በግዕ፡ ዘተኀጥአ፡ እምአዝእብት፡ ወተናግሮ፡ በእንተ፡ አዝእብት፡ ከመ፡ ያስምዕ፡ ዲቤሆሙ፡ ከመ፡ ኢይግስስዎሙ፡ ለአባግዕ።
18 ወሖረ፡ ዝኩ፡ በግዕ፡ ኀበ፡ አዝእብት፡ በቃለ፡ እግዚእ፡ ወካልእ፡ በግዕ፡ ተራከቦ፡ ለውእቱ፡ በግዕ፡ ወሖረ፡ ምስሌሁ፡ ወቦኡ፡ ክልኤሆሙ፡ ኅቡረ፡ ውስተ፡ ማኅበሮሙ፡ ለእልኩ፡ አዝእብት፡ ወተናገርዎሙ፡ ወአስምዑ፡ ዲቤሆሙ፡ ከመ፡ እምይእዜ፡ ኢይግስስዎሙ፡ ለአባግዕ።
19 ወእምኔሁ፡ ርኢክዎሙ፡ ለአዝእብት፡ ወእፎ፡ ጸንዑ፡ ፈድፋደ፡ ዲበ፡ አባግዕ፡ በኵሉ፡ ኀይሎሙ፡ ወጸርሑ፡ አባግዕ።
20 ወእግዚኦሙ፡ መጽአ፡ ኀቤሆሙ፡ ለአባግዕ፡ ወአኀዘ፡ ይዝብጦሙ፡ ለእልኩ፡ አዝእብት፡ ወአዝእብት፡ አኀዙ፡ የዐውይዉ፡ ወአባግዕ፡ አርመሙ፡ ወእምሶቤሃ፡ ኢጸርሑ።
21 ወርኢክዎሙ፡ ለአባግዕ፡ እስከ፡ ወፅኡ፡ እምአዝእብት፡ ወአዝእብት፡ ተጸለሉ፡ አዕይንቲሆሙ፡ ወወፅኡ፡ እንዘ፡ ይተልውዎሙ፡ ለአባግዕ፡ እልኩ፡ አዝእብት፡ በኵሉ፡ ኀይሎሙ።
22 ወእግዚኦሙ፡ ለአባግዕ፡ ሖረ፡ ምስሌሆሙ፡ እንዘ፡ ይመርሖሙ፡ ወኵሎሙ፡ አባግዒሁ፡ ተለውዎ፡ ወገጹ፡ ስቡሕ፡ ወክቡር፡ ወግሩም፡ ራእዩ፡ ወክቡር።
23 ወአዝእብተሰ፡ አኀዙ፡ ይትልውዎሙ፡ ለእልኩ፡ አባግዕ፡ እስከ፡ ተራከብዎሙ፡ በአሐቲ፡ አይገ፡ ማይ።
24 ወውእቱ፡ አይገ፡ ማይ፡ ተሠጠ፡ ወቆመ፡ ማይ፡ እምዝየ፡ ወእምዝየ፡ በቅድመ፡ ገጾሙ፡ ወእግዚኦሙ፡ ለአባግዕ፡ ይመርሖሙ፡ ወቆመ፡ ማእከሎሙ፡ ወማእከለ፡ አዝእብት።
25 ወዓዲሆሙ፡ እልክቱ፡ አዝእብት፡ ኢርእይዎሙ፡ ለአባግዕ፡ ወሖሩ፡ ማእከለ፡ ዝኩ፡ አይገ፡ ማይ፡ ወአዝእብት፡ ተለውዎሙ፡ ለአባግዕ፡ ወሮጹ፡ ድኅሬሆሙ፡ እልክቱ፡ አዝእብት፡ በዝኩ፡ አይገ፡ ማይ።
26 ወሶበ፡ ርእይዎ፡ ለእግዚኦሙ፡ ለአባግዕ፡ ገብኡ፡ ከመ፡ ይጕየዩ፡ እምቅድመ፡ ገጹ፡ ወዝኩ፡ አይገ፡ ማይ፡ ተጋብአ፡ ወኮነ፡ ከመ፡ ፍጥረቱ፡ ፍጡነ፡ ወመልአ፡ ማይ፡ ወተለዐለ፡ እስከ፡ ከደኖሙ፡ ለእልክቱ፡ አዝእብት።
27 ወርኢኩ፡ እስከ፡ ተሀጕሉ፡ ኵሎሙ፡ አዝእብት፡ እለ፡ ተለውዎሙ፡ ለእልክቱ፡ አባግዕ፡ ወተሰጥሙ።
28 ወአባግዕሰ፡ ኀለፉ፡ እምዝኩ፡ ማይ፡ ወወፅኡ፡ ውስተ፡ በድው፡ ኀበ፡ አልቦ፡ ማይ፡ ወሣዕር፡ ወአኀዙ፡ ይክሥቱ፡ አዕይንቲሆሙ፡ ወይርአዩ፡ ወርኢኩ፡ እግዚኦሙ፡ ለአባግዕ፡ ይርዕዮሙ፡ ወይሁቦሙ፡ ማየ፡ ወሣዕረ፡ ወዝኩ፡ በግዕ፡ እንዘ፡ የሐውር፡ ይመርሖሙ።
29 ወዐርገ፡ ዲበ፡ ድማሑ፡ ለዝኩ፡ ኰኵሕ፡ ነዊኅ፡ ወእግዚኦሙ፡ ለአባግዕ፡ ፈነዎ፡ ኀቤሆሙ።
30 ወእምኔሁ፡ ርኢክዎ፡ ለእግዚአ፡ አባግዕ፡ ዘቆመ፡ ቅድሜሆሙ፡ ወራእዩ፡ ዐቢይ፡ ወግሩም፡ ወኀያል፡ ወኵሎሙ፡ እልክቱ፡ አባግዕ፡ ርእይዎ፡ ወፈርሁ፡ እምገጹ።
31 ወኵሎሙ፡ እልክቱ፡ ይፈርሁ፡ ወይርዕዱ፡ እምኔሁ፡ ወይጸርሑ፡ ድኅሬሁ፡ ለዝኩ፡ በግዕ፡ ምስሌሁ፡ ዘሀሎ፡ ለካልእ፡ በግዕ፡ ዘኮነ፡ ማእከሎሙ፡ እስመ፡ ኢንክል፡ ቀዊመ፡ ቅድመ፡ እግዚእነ፡ ወኢነጽሮቶ።
32 ወገብአ፡ ዝኩ፡ በግዕ፡ ዘይመርሖሙ፡ ወዐርገ፡ በድማኀ፡ ዝኩ፡ ኰኵሕ፡ ወአባግዕ፡ አኀዙ፡ ይጸለሉ፡ አዕይንቲሆሙ፡ ወይስሐቱ፡ እምፍኖት፡ እንተ፡ አርአዮሙ፡ ወዝኩ፡ በግዕ፡ ኢያእመረ።
33 ወእግዚኦሙ፡ ለአባግዕ፡ ተምዕዐ፡ ዐቢየ፡ መዓተ፡ ዲቤሆሙ፡ ወአእመረ፡ ዝኩ፡ በግዕ፡ ወወረደ፡ እምነ፡ ድማኁ፡ ለኰኵሕ፡ ወመጽአ፡ ኀበ፡ አባግዕ፡ ወረከበ፡ መብዝኅቶሙ፡ ዘጽሉላን፡ አዕይንቲሆሙ፡ ወእለ፡ ስሕቱ፡ እምፍኖቱ።
34 ወሶበ፡ ርእይዎ፡ ፈርሁ፡ ወርዕዱ፡ እምቅድመ፡ ገጹ፡ ወፈቀዱ፡ ከመ፡ ይግብኡ፡ ለዐጸደ፡ ዚኣሆሙ።
35 ወዝኩ፡ በግዕ፡ ነሥአ፡ ምስሌሁ፡ አባግዐ፡ ወቦኡ፡ ኀበ፡ እልክቱ፡ አባግዕ፡ እለ፡ ስሕቱ፡ ወእም፡ ዝ፡ እንዘ፡ ይቅትሎሙ፡ ወአባግዕ፡ ፈርሁ፡ እምገጹ፡ ወአግብኦሙ፡ ለእልኩ፡ አባግዕ፡ እለ፡ ስሕቱ፡ ውእቱ፡ በግዕ፡ ወገብኡ፡ ውስተ፡ አዕጻዲሆሙ።
36 ወርኢኩ፡ በህየ፡ ራእይ፡ እስከ፡ ውእቱ፡ በግዕ፡ ኮነ፡ ብእሴ፡ ወሐነጸ፡ ቤተ፡ ለእግዚአ፡ አባግዕ፡ ወለኵሎሙ፡ አባግዕ፡ አቀሞሙ፡ በውእቱ፡ ቤት።
37 ወርኢኩ፡ እስከ፡ ሰከበ፡ ውእቱ፡ በግዕ፡ ዘተራከቦ፡ ለዝኩ፡ በግዕ፡ ዘመርሖሙ፡ ለአባግዕ፡ ወርኢኩ፡ እስከ፡ ተሀጕሉ፡ ኵሎሙ፡ አባግዕ፡ ዐቢያን፡ ወንኡሳን፡ ተንሥኡ፡ ህየንቴሆሙ፡ ወቦኡ፡ ውስተ፡ መርዔት፡ ወቀርቡ፡ ኀበ፡ ፈለገ፡ ማይ።
38 ወዝኩ፡ በግዕ፡ ዘይመርሖሙ፡ ወዘኮነ፡ ብእሴ፡ ተሌለየ፡ እምኔሆሙ፡ ወሰከበ፡ ወኵሎሙ፡ አባግዕ፡ ኀሠሥዎ፡ ወጸርሑ፡ ዲቤሁ፡ ዐቢየ፡ ጽራሐ።
39 ወርኢኩ፡ እስከ፡ አርመሙ፡ እምጽራሑ፡ ለዝኩ፡ በግዕ፡ ወኀለፍዎ፡ ለዝኩ፡ ውሒዘ፡ ማይ፡ ወቆሙ፡ አባግዕ፡ ኵሎሙ፡ እለ፡ ይመርሕዎሙ፡ ተክሎሙ፡ ለእለ፡ ሰከቡ፡ ወመርሕዎሙ።
40 ወርኢኩ፡ አባግዕ፡ እስከ፡ ይበውኡ፡ ውስተ፡ መካን፡ ሠናይ፡ ወምድር፡ ሐዋዝ፡ ወስብሕት፡ ወርኢኩ፡ እልኩ፡ አባግዕ፡ እስከ፡ ጸግቡ፡ ወውእቱ፡ ቤት፡ ማእከሎሙ፡ በምድር፡ ሐዋዝ።
41 ወቦ፡ ሶበ፡ ይትከሠታ፡ አዕይንቲሆሙ፡ ወቦ፡ ኀበ፡ ይጼለሉ፡ እስከ፡ ተንሥአ፡ ካልእ፡ በግዕ፡ ወመርሖሙ፡ ወአግብኦሙ፡ ለኵሎሙ፡ ወተከሥታ፡ አዕይንቲሆሙ።
42 ወአኀዙ፡ አክላብ፡ ወቈናጽል፡ ወሐራውያ፡ ሐቅል፡ ይብልዕዎሙ፡ ለእልኩ፡ አባግዕ፡ እስከ፡ ተንሥአ፡ ካልእ፡ በግዕ፡ አሐዱ፡ እምኔሆሙ፡ ሐርጌ፡ ዘይመርሖሙ።
43 ወዝኩ፡ ሐርጌ፡ አኀዘ፡ ይውጋእ፡ እም፡ ዝየ፡ ወእም፡ ዝየ፡ እልክተ፡ አክላበ፡ ወቈናጽለ፡ ወሐራውያ፡ ገዳም፡ እስከ፡ ለኵሎሙ፡ አህጐሎሙ።
44 ወውእቱ፡ በግዕ፡ ተፈትሐ፡ አዕይንቲሁ፡ ወርእየ፡ ዝኰ፡ ሐርጌ፡ ዘማእከለ፡ አባግዕ፡ ዘኀደገ፡ ስብሐቶ፡ ወአኀዘ፡ ይጕድኦሙ፡ ለእሙንቱ፡ አባግዕ፡ ወኬዶሙ፡ ወሖረ፡ ዘእንበለ፡ ተድላ።
45 ወእግዚኦሙ፡ ለአባግዕ፡ ፈነዎ፡ ለበግዕ፡ ኀበ፡ ካልእ፡ በግዕ፡ ወአንሥኦ፡ ከመ፡ ይኩን፡ ሐርጌ፡ ወይምርሖሙ፡ ለአባግዕ፡ ህየንተ፡ ዝኩ፡ በግዕ፡ ዘኀደገ፡ ስብሐቶ።
46 ወሖረ፡ ኀቤሁ፡ ወተናገሮ፡ ለባሕቲቱ፡ ወአንሥኦ፡ ለውእቱ፡ ሐርጌ፡ ወገብሮ፡ መኰንነ፡ ወመራሔ፡ ለአባግዕ፡ ወበኵሉ፡ ዝ፡ እልክቱ፡ አክላብ፡ ያጽሕብዎሙ፡ ለአባግዕ።
47 ወሐርጌ፡ ቀዳማዊ፡ ሰደዶ፡ ለዝኩ፡ ሐርጌ፡ ደኃራዊ፡ ወተንሥአ፡ ዝኩ፡ ሐርጌ፡ ደኃራዊ፡ ወነፍጸ፡ እምቅድመ፡ ገጹ፡ ወርኢኩ፡ እስከ፡ አውደቅዎ፡ እልኩ፡ አክላብ፡ ለሐርጌ፡ ቀዳማዊ።
48 ወተንሥአ፡ ዝኩ፡ ሐርጌ፡ ደኃራዊ፡ ወመርሖሙ፡ ለአባግዕ፡ ንኡሳን፡ ወዝ፡ ሐርጌ፡ ደኃራዊ፡ ወለደ፡ አባግዐ፡ ብዙኃነ፡ ወሰከበ፡ ወበግዕ፡ ንኡስ፡ ኮነ፡ ሐርጌ፡ ህየንቴሁ፡ ወኮነ፡ መኰንነ፡ ወመራሔ፡ ለእልክቱ፡ አባግዕ።
49 ወልህቁ፡ ወበዝኁ፡ እልክቱ፡ አባግዕ፡ ወኵሎሙ፡ እልክቱ፡ አክላብ፡ ወቈናጽል፡ ወሐራውያ፡ ገዳም፡ ፈርሁ፡ ወነፍጹ፡ እምኔሁ፡ ወውእቱ፡ ሐርጌ፡ ጐድአ፡ ወቀተለ፡ ኵሎ፡ አራዊተ፡ ወኢክህሉ፡ ዳግመ፡ እልኩ፡ አራዊት፡ ማእከለ፡ አባግዕ፡ ወኢምንተኒ፡ ግሙራ፡ ኢመሠጡ፡ እምኔሆሙ።
50 ወዝኩ፡ ቤት፡ ኮነ፡ ዐቢየ፡ ወርኂበ፡ ወተሐንጸ፡ ለእልኩ፡ አባግዕ፡ ማኅፈድ፡ ነዊኅ፡ ዲበ፡ ዝኩ፡ ቤት፡ ለእግዚአ፡ አባግዕ፡ ወተትሕተ፡ ዝኩ፡ ቤት፡ ወማኅፈድሰ፡ ተለዐለ፡ ወኮነ፡ ነዊኀ፡ ወእግዚአ፡ አባግዕ፡ ቆመ፡ ዲበ፡ ውእቱ፡ ማኅፈድ፡ ወማእደ፡ ምልእተ፡ አቅረቡ፡ በቅድሜሁ።
51 ወርኢክዎሙ፡ ካዕበ፡ ለእልክቱ፡ አባግዕ፡ ካዕበ፡ ከመ፡ ስሕቱ፡ ወሖሩ፡ በብዙኅ፡ ፍናዋት፡ ወኀደጉ፡ ዝኰ፡ ቤተ፡ ዚኣሆሙ፡ ወእግዚኦሙ፡ ለአባግዕ፡ ጸውዐ፡ እምውስቴቶሙ፡ ለአባግዕ፡ ወለአኮሙ፡ ኀበ፡ አባግዕ፡ ወአባግዕ፡ አኀዙ፡ ይቅትልዎሙ።
52 ወአሐዱ፡ እምኔሆሙ፡ ድኅነ፡ ወኢተቀትለ፡ ወቀነጸ፡ ወጸርሐ፡ ዲበ፡ አባግዕ፡ ወፈቀዱ፡ ይቅትልዎ፡ ወእግዚኦሙ፡ ለአባግዕ፡ አድኀኖ፡ እምእዴሆሙ፡ ለአባግዕ፡ ወአዕረጎ፡ ኀቤየ፡ ወአንበሮ።
53 ወካልኣነ፡ አባግዐ፡ ብዙኃነ፡ ፈነወ፡ ኀቤሆሙ፡ ለእልኩ፡ አባግዕ፡ ያስምዑ፡ ወየዐውይዉ፡ ዲቤሆሙ።
54 ወእምኔሁ፡ ርኢኩ፡ ሶበ፡ ኀደጉ፡ ቤቶ፡ ለእግዚአ፡ አባግዕ፡ ወማኅፈደ፡ ወእምኵሉ፡ ስሕቱ፡ ወተጸለለ፡ አዕይንቲሆሙ፡ ወርኢኩ፡ እግዚአ፡ አባግዕ፡ ከመ፡ ገብረ፡ ቀትለ፡ ብዙኀ፡ ዲቤሆሙ፡ በበ፡ መራዕይሆሙ፡ እስከ፡ ይጼውዕዎ፡ እልኩ፡ አባግዕ፡ ለዝኩ፡ ቀትል፡ ወአግብኡ፡ መካኖ።
55 ወኀደጎሙ፡ ውስተ፡ እደ፡ አናብስት፡ ወአናምርት፡ ወአዝእብት፡ ወአጽእብት፡ ወውስተ፡ እደ፡ ቈናጽል፡ ወዲበ፡ ኵሉ፡ አራዊት፡ ወአኀዙ፡ እልክቱ፡ አራዊተ፡ ገዳም፡ ይምሥጥዎሙ፡ ለእልኩ፡ አባግዕ።
56 ወርኢኩ፡ ከመ፡ ኀደጉ፡ ዝኰ፡ ቤተ፡ ዚኣሆሙ፡ ወማኅፈዶሙ፡ ወወደዮሙ፡ ለኵሎሙ፡ ውስተ፡ እደ፡ አናብስት፡ ከመ፡ ይምሥጥዎሙ፡ ወከመ፡ ይብልዕዎሙ፡ ውስተ፡ እደዊሆሙ፡ ለኵሎሙ፡ አራዊት።
57 ወአነ፡ አኀዝኩ፡ እጽራሕ፡ በኵሉ፡ ኀይልየ፡ ወእጸውዖ፡ ለእግዚአ፡ አባግዕ፡ ወኣርእዮ፡ በእንተ፡ አባግዕ፡ እስመ፡ ተበልዑ፡ ወተውኅጡ፡ እምኵሎሙ፡ አራዊተ፡ ገዳም።
58 ወውእቱ፡ አርመመ፡ እንዘ፡ ይሬኢ፡ ወተፈሥሐ፡ እስመ፡ ተበልዑ፡ ወተውኅጡ፡ ወተሀይዱ፡ ወኀደጎሙ፡ ውስተ፡ እደ፡ ኵሎሙ፡ አራዊት፡ ለመብልዕ።
59 ወጸውዐ፡ ሰብዐ፡ ኖላውያነ፡ ወገደፎሙ፡ ለእልኩ፡ አባግዕ፡ ከመ፡ ይርዐይዎሙ፡ ወይቤሎሙ፡ ለኖላውያን፡ ወለፀማዶሙ፡ ኵሉ፡ አሐዱ፡ አሐዱ፡ እምኔክሙ፡ እምይእዜ፡ ይርዐይዎሙ፡ ለአባግዕ፡ ወኵሎ፡ ዘእኤዝዘክሙ፡ አነ፡ ግበሩ።
60 ወእሜጥወክሙ፡ አነ፡ በኍልቍ፡ ወእነግረክሙ፡ ዘይትሀጐል፡ እምኔሆሙ፡ ወኪያሆሙ፡ አህጕሉ፡ ወመጠወ፡ ሎሙ፡ እልክተ፡ አባግዐ።
61 ወለካልእ፡ ጸውዖ፡ ወይቤሎ፡ ለቡ፡ ወርኢ፡ ኵሎ፡ ዘይገብሩ፡ ኖሎት፡ ዲበ፡ እሉ፡ አባግዕ፡ እስመ፡ ያሀጕሉ፡ እምውስቴቶሙ፡ ፈድፋደ፡ እምዘአዘዝክዎሙ።
62 ወኵሎ፡ ጽጋበ፡ ወሀጕለ፡ ዘይትገበር፡ በኖሎት፡ ጸሐፍ፡ ሚ፡ መጠነ፡ ያሀጕልዎሙ፡ በትእዛዝየ፡ ወሚ፡ መጠነ፡ ያሀጕሉ፡ በርእሶሙ፡ ወኵሎሙ፡ ለለ፡ አሐዱ፡ አሐዱ፡ ኖላዊ፡ ጸሐፍ፡ ዲቤሆሙ።
63 ወበኍልቍ፡ አንብብ፡ በቅድሜየ፡ ወሚ፡ መጠነ፡ ያሀጕሉ፡ ወሚ፡ መጠነ፡ ይሜጥውዎሙ፡ ለሀጕል፡ ከመ፡ ይኩን፡ ሊተ፡ ዝንቱ፡ ስምዐ፡ ዲቤሆሙ፡ ከመ፡ ኣእምር፡ ኵሎ፡ ግብሮሙ፡ ለኖላውያን፡ ወእመጥዎሙ፡ ወእርአይ፡ ዘይገብሩ፡ ለእመ፡ ይነብሩ፡ በትእዛዝየ፡ ዘአዘዝክዎሙ፡ ወእመ፡ አልቦ።
64 ወኢያእምሩ፡ ወኢታርእዮሙ፡ ወኢትዝልፎሙ፡ አላ፡ ጸሐፍ፡ ኵሎ፡ ሀጕሎሙ፡ ለኖላውያን፡ ለለ፡ አሐዱ፡ አሐዱ፡ ወአዕርግ፡ ኀቤየ፡ ኵሎ።
65 ወርኢኩ፡ እስከ፡ እልኩ፡ ኖላውያን፡ ይርዕዩ፡ በበ፡ ጊዜሁ፡ ወአኀዙ፡ ይቅትሉ፡ ወያህጕሉ፡ ብዙኃነ፡ እምትእዛዞሙ፡ ወኀደጉ፡ እልክተ፡ አባግዐ፡ ውስተ፡ እደ፡ አናብስት።
66 ወበልዑ፡ ወውኅጡ፡ መብዝኅቶሙ፡ ለእልኩ፡ አባግዕ፡ አናብስት፡ ወአናምርት፡ ወሐራውያ፡ ገዳም፡ በልዑ፡ ምስሌሆሙ፡ ወአውዐይዎ፡ ለዝኩ፡ ማኅፈድ፡ ወከረይዎ፡ ለዝኩ፡ ቤት፡ ዘአባግዕ።
67 ወሐዘንኩ፡ ብዙኀ፡ ጥቀ፡ በእንተ፡ ማኅፈድ፡ እስመ፡ ተከርየ፡ ውእቱ፡ ቤት፡ ዘአባግዕ፡ ወእምኔሁ፡ ኢክህልኩ፡ ርእዮቶሙ፡ ለእልኩ፡ አባግዕ፡ ለእመ፡ ይበውኡ፡ ኀበ፡ ዝኩ፡ ቤት፡ ወለእመ፡ ኢይበውኡ።
68 ወኖላውያን፡ ወፀማዶሙ፡ መጠውዎሙ፡ ለእልኩ፡ አባግዕ፡ ለኵሎሙ፡ አራዊተ፡ ገዳም፡ ከመ፡ ይብልዕዎሙ፡ ወኵሉ፡ አሐዱ፡ አሐዱ፡ እምኔሆሙ፡ በበ፡ ጊዜሁ፡ በኍልቍ፡ ይትሜጠዉ፡ ወኵሉ፡ አሐዱ፡ አሐዱ፡ እምኔሆሙ፡ ለካልኡ፡ በመጽሐፍ፡ ይጽሕፍ፡ ሚ፡ መጠነ፡ ያሀጕል፡ እምኔሆሙ፡ ለካልኡ፡ በመጽሐፍ።
69 ወፈድፋደ፡ እምሥርዐቶሙ፡ አሐደ፡ አሐደ፡ ይቀትል፡ ወያሀጕል፡ ወአነ፡ አኀዝኩ፡ እብኪ፡ ወአዕዊ፡ በብዙኀ፡ ጥቀ፡ በእንተ፡ እልኩ፡ አባግዕ።
70 ወከመ፡ ዝ፡ በራእይ፡ ርኢክዎ፡ ለዝኩ፡ ዘይጽሕፍ፡ እፎ፡ ይጽሕፍ፡ ለአሐዱ፡ ዘይትሀጐል፡ እምነ፡ እልኩ፡ ኖላውያን፡ በኵሉ፡ ዕለት፡ ወየዐርግ፡ ወየዐርፍ፡ ወያርኢ፡ ኵሎ፡ ኪያሁ፡ መጽሐፈ፡ ለእግዚአ፡ አባግዕ፡ ኵሎ፡ ዘገብሩ፡ ወኵሎ፡ ዘአእተቱ፡ አሐዱ፡ አሐዱ፡ እምኔሆሙ፡ ወኵሎ፡ ዘመጠዉ፡ ለሀጕል።
71 ወመጽሐፍ፡ ተነበ፡ በቅድመ፡ እግዚአ፡ አባግዕ፡ ወነሥኣ፡ ለመጽሐፍ፡ በእዱ፡ ወአንበባ፡ ወኀተማ፡ ወአንበራ።
72 ወእምኔሁ፡ ርኢኩ፡ እንዘ፡ ይርዕዩ፡ ኖሎት፡ ዐሠርተ፡ ወክልኤተ፡ ሰዓተ፡ ወናሁ፡ ሠለስቱ፡ እምእልኩ፡ አባግዕ፡ ገብኡ፡ ወመጽኡ፡ ወቦኡ፡ ወአኀዙ፡ እንዘ፡ የሐንጹ፡ ኵሎ፡ ዘወድቀ፡ እምውእቱ፡ ቤት፡ ወሐራውያ፡ ገዳም፡ ከልእዎሙ፡ ወኢክህሉ።
73 ወአኀዙ፡ ካዕበ፡ ይሕንጹ፡ ከመ፡ ቀዳሚ፡ ወአንሥእዎ፡ ለውእቱ፡ ማኅፈድ፡ ወይሰመይ፡ ማኅፈደ፡ ነዊኀ፡ ወርኢኩ፡ ካዕበ፡ እንዘ፡ ያነብሩ፡ ቅድመ፡ ማኅፈድ፡ ማእደ፡ ወኵሎ፡ ኅብስት፡ ዘዲቤሁ፡ ርኩስ፡ ወኢኮነ፡ ንጹሐ።
74 ወዲበ፡ ኵሉ፡ እሉ፡ አባግዕ፡ ጽሉላን፡ አዕይንቲሆሙ፡ ወኢይሬእዩ፡ ወኖሎቶሙኒ፡ ከማሁ፡ ወይሜጥውዎሙ፡ ለኖሎቶሙሂ፡ ለሀጕል፡ ፈድፋደ፡ ወበእገሪሆሙ፡ ይከይድዎሙ፡ ለአባግዕ፡ ወይበልዕዎሙ።
75 ወእግዚአ፡ አባግዕ፡ አርመመ፡ እስከነ፡ ተዘርዘሩ፡ ኵሉ፡ አባግዕ፡ ገዳመ፡ ወተደመሩ፡ ምስሌሆሙ፡ ወኢያድኀንዎሙ፡ እምእደ፡ አራዊት።
76 ወዝኩ፡ ዘይጽሕፍ፡ መጽሐፈ፡ አዕረጎ፡ ወአርአዮ፡ ወአንበበ፡ ኀበ፡ አብያተ፡ እግዚአ፡ አባግዕ፡ ወያስተበቍዖ፡ በእንቲኣሆሙ፡ ወይስእሎ፡ እንዘ፡ ያርእዮ፡ ኵሎ፡ ግብረ፡ ኖሎቶሙ፡ ወያሰምዕ፡ በቅድሜሁ፡ ዲበ፡ ኵሉ፡ ኖላውያን።
77 ወነሢኦ፡ አንበረ፡ ኀቤሁ፡ ኪያሁ፡ መጽሐፈ፡ ወወፅአ።
=== chapter 90 ===
[Chapter 90]
1 ወርኢኩ፡ እስከ፡ ዘመን፡ ከመ፡ ከመ፡ ዝ፡ ይርዕዩ፡ ሠላሳ፡ ወሰብዐቱ፡ ኖላውያን፡ ወፈጸሙ፡ ኵሎሙ፡ በበ፡ ጊዜሆሙ፡ ከመ፡ ቀዳምያን፡ ወባዕዳን፡ ተመጠውዎሙ፡ ውስተ፡ እደዊሆሙ፡ ከመ፡ ይርዐይዎሙ፡ በበ፡ ጊዜሆሙ፡ ኵሉ፡ ኖላዊ፡ በበ፡ ጊዜሁ።
2 ወእም፡ ዝ፡ በራእይ፡ ርኢኩ፡ ኵሉ፡ አዕዋፈ፡ ሰማይ፡ ወመጽኡ፡ አንስርት፡ ወአውስት፡ ወሆባይ፡ ወቋዓት፡ ወአንስርት፡ ይመርሕዎሙ፡ ለኵሎሙ፡ አዕዋፍ፡ ወአኀዙ፡ ይብልዕዎሙ፡ ለእልኩ፡ አባግዕ፡ ወይክርዩ፡ አዕይንቲሆሙ፡ ወይብልዕዎ፡ ለሥጋሆሙ።
3 ወአባግዕ፡ ጸርሑ፡ እስመ፡ ተበልዑ፡ ሥጋሆሙ፡ እምነ፡ አዕዋፍ፡ ወአነ፡ ጸራሕኩ፡ ወዐውየውኩ፡ በንዋምየ፡ ዲበ፡ ውእቱ፡ ኖላዊ፡ ዘይርዕዮሙ፡ ለአባግዕ።
4 ወርኢኩ፡ እስከ፡ ተበልዑ፡ አባግዕ፡ እምአክላብ፡ ወእምአንስርት፡ ወእምሆባይ፡ ወኢኀደጉ፡ ሎሙ፡ ሥጋ፡ ግሙራ፡ ወኢ፡ ማእሰ፡ ወኢ፡ ሥርወ፡ እስከ፡ ቆሙ፡ ባሕቲቶሙ፡ አዕፅምቲሆሙ፡ ወአዕፅምቲሆሙኒ፡ ወድቁ፡ ዲበ፡ ምድር፡ ወንእሱ፡ አባግዕ።
5 ወርኢኩ፡ እስከ፡ ዘመን፡ እስከ፡ ይርዕዩ፡ ዕሥራ፡ ወሠለስቱ፡ ኖላውያን፡ ወፈጸሙ፡ በበ፡ ጊዜሆሙ፡ ኀምሳ፡ ወሰመንተ፡ ጊዜያተ።
6 ወንኡሳን፡ መሓስዕት፡ ተወልዱ፡ እምእልኩ፡ አባግዕ፡ ጸዐድው፡ ወአኀዙ፡ ይክሥቱ፡ አዕይንቲሆሙ፡ ወይርአዩ፡ ወይጽርሑ፡ ኀበ፡ አባግዕ።
7 ወአባግዕ፡ ኢጸርሕዎሙ፡ ወኢያጽምኡ፡ ዘነገርዎሙ፡ አላ፡ ፈድፋደ፡ ተጸመሙ፡ ወተጸለሉ፡ አዕይንቲሆሙ፡ ፈድፋደ፡ ወኀያለ።
8 ወርኢኩ፡ በራእይ፡ ቋዓተ፡ ከመ፡ ሰረሩ፡ ዲበ፡ እልኩ፡ መሓስዕ፡ ወአኀዝዎ፡ ለአሐዱ፡ እምእልኩ፡ መሓስዕ፡ ወቀጥቀጥዎሙ፡ ለአባግዕ፡ ወበልዕዎሙ።
9 ወርኢኩ፡ እስከ፡ ወፅአ፡ ሎሙ፡ አቅርንት፡ ለእልኩ፡ መሓስዕ፡ ወቋዓት፡ ያውድቅዎሙ፡ ለአቅርንቲሆሙ፡ ወርኢኩ፡ እስከ፡ በቈለ፡ አሐዱ፡ ቀርን፡ ዐቢይ፡ አሐዱ፡ እምነ፡ እልኩ፡ አባግዕ፡ ወተከሥታ፡ አዕይንቲሆሙ።
10 ወርእየ፡ ቦሙ፡ ወተፈትሑ፡ አዕይንቲሆሙ፡ ወጸርሐ፡ ሎሙ፡ ለአባግዕ፡ ወዳቤላት፡ ርእይዎ፡ ወሮጹ፡ ኀቤሁ፡ ኵሎሙ።
11 ወምስለ፡ ዝ፡ ኵሉ፡ እልኩ፡ አንስርት፡ ወአውስት፡ ወቋዓት፡ ወሆባይ፡ እስከ፡ ይመሥጥዎሙ፡ ለአባግዕ፡ ወይሰርሩ፡ ዲቤሆሙ፡ ወይበልዕዎሙ፡ ወአባግዕሰ፡ ያረምሙ፡ ወዳቤላት፡ የዐወይዉ፡ ወይጸርሑ።
12 ወእልክቱ፡ ቋዓት፡ ይትጋደሉ፡ ወይትባአሱ፡ ምስሌሁ፡ ወፈቀዱ፡ ያእትቱ፡ ቀርኖ፡ ወኢክህልዎ።
13 ወርኢክዎሙ፡ እስከ፡ መጽኡ፡ ኖላውያን፡ ወአንስርት፡ ወእልኩ፡ አንስርት፡ ወሆባይ፡ ወጸርሑ፡ ቋዓት፡ ከመ፡ ይቀጥቅጥዎ፡ ለቀርነ፡ ዝኩ፡ ዳቤላ፡ ወተባአሱ፡ ምስሌሁ፡ ወተቃተሉ፡ ወውእቱ፡ ይትበአስ፡ ምስሌሆሙ፡ ወጸርሐ፡ ከመ፡ ትምጽኦ፡ ረድኤቱ።
14 ወርኢኩ፡ እስከ፡ መጽአ፡ ዝኩ፡ ብእሲ፡ ዘጸሐፈ፡ አስማቲሆሙ፡ ለኖሎት፡ ወየዐርግ፡ ቅድሜሁ፡ ለእግዚአ፡ አባግዕ፡ ወውእቱ፡ ረድኦ፡ ወአርአዮ፡ ኵሎ፡ ወወረደ፡ ረድኤቱ፡ ለዝኩ፡ ዳቤላ።
15 ወርኢኩ፡ እስከ፡ መጽአ፡ ኀቤሆሙ፡ ዝኩ፡ እግዚአ፡ አባግዕ፡ በመዓት፡ ወእለ፡ ርእይዎ፡ ኵሎሙ፡ ነፍጹ፡ ወወድቁ፡ ኵሎሙ፡ ውስተ፡ ጽላሎት፡ እምቅድመ፡ ገጹ።
16 ወኵሎሙ፡ አንስርት፡ ወአውስት፡ ወቋዓት፡ ወሆባይ፡ ተጋብኡ፡ ወአምጽኡ፡ ምስሌሆሙ፡ ኵሎ፡ አባግዐ፡ ገዳም፡ ወመጽኡ፡ ኵሎሙ፡ ኅቡረ፡ ወተራድኡ፡ ከመ፡ ይቀጥቅጥዎ፡ ለዝኩ፡ ቀርነ፡ ዳቤላ።
17 ወርኢክዎ፡ ለዝኩ፡ ብእሲ፡ ዘይጽሕፍ፡ መጽሐፈ፡ በቃለ፡ እግዚእ፡ እስከ፡ ፈትሖ፡ ለውእቱ፡ መጽሐፈ፡ ሀጕል፡ ዘአህጐሉ፡ እልኩ፡ ዐሠርቱ፡ ወክልኤቱ፡ ኖሎት፡ ደኃርያን፡ ወአርአየ፡ ከመ፡ ፈድፋደ፡ እምቅድሜሆሙ፡ አህጐሉ፡ በቅድመ፡ እግዚአ፡ አባግዕ።
18 ወርኢኩ፡ እስከ፡ መጽአ፡ ኀቤሆሙ፡ እግዚአ፡ አባግዕ፡ ወነሥአ፡ በእዱ፡ በትረ፡ መዓቱ፡ ወዘበጣ፡ ለምድር፡ ወተሠጠት፡ ምድር፡ ወኵሎሙ፡ ወአዕዋፈ፡ ሰማይ፡ ወአራዊት፡ ወድቁ፡ እምእልኩ፡ አባግዕ፡ ወተሰጥሙ፡ በምድር፡ ወተከድነት፡ ዲቤሆሙ።
19 ወርኢኩ፡ እስከ፡ ተውህበ፡ ለአባግዕ፡ ሰይፍ፡ ዐቢይ፡ ወወፅኡ፡ አባግዕ፡ ዲበ፡ እሉ፡ አራዊተ፡ ገዳም፡ ከመ፡ ይቅትልዎሙ፡ ወኵሎሙ፡ አራዊት፡ ወአዕዋፈ፡ ሰማይ፡ ነፍጹ፡ እምቅድመ፡ ገጾሙ።
20 ወርኢኩ፡ እስከ፡ መንበር፡ ተሐንጸ፡ በምድር፡ ሐዋዝ፡ ወነበረ፡ ዲቤሁ፡ እግዚአ፡ አባግዕ፡ ወነሥአ፡ ኵሎን፡ መጻሕፍተ፡ ኅቱማተ፡ ወፈትሖን፡ ለእማንቱ፡ መጻሕፍት፡ በቅድመ፡ እግዚአ፡ አባግዕ።
21 ወጸውዖሙ፡ እግዚእ፡ ለእልኩ፡ ሰብዓቱ፡ ጸዐድው፡ ቀዳማውያን፡ ወአዘዘ፡ ከመ፡ ያምጽኡ፡ ቅድሜሁ፡ እምኮከብ፡ ቀዳማዊ፡ ዘይቀድም፡ እምእልኩ፡ ከዋክብት፡ እለ፡ ኀፍረቶሙ፡ ከመ፡ ኀፍረተ፡ አፍራስ፡ ወለኮከብ፡ ቀዳማዊ፡ ዘወድቀ፡ ቅድመ፡ ወአምጽእዎሙ፡ ለኵሎሙ፡ ቅድሜሁ።
22 ወይቤሎ፡ ለዝኩ፡ ብእሲ፡ ዘይጽሕፍ፡ በቅድሜሁ፡ ዘውእቱ፡ አሐዱ፡ እምሰብዐቱ፡ ጸዐድው፡ ወይቤሎ፡ ንሥኦሙ፡ ለእሉ፡ ሰብዓ፡ ኖሎት፡ እለ፡ መጠውክዎሙ፡ አባግዐ፡ ወነሢኦሙ፡ ቀተሉ፡ ብዙኀ፡ እምዘአዘዝክዎሙ፡ እሙንቱ።
23 ወናሁ፡ ለኵሎሙ፡ እሱራን፡ ርኢክዎሙ፡ ወቆሙ፡ ቅድሜሁ፡ ኵሎሙ።
24 ወኵነኔ፡ ኮነ፡ ቅድመ፡ እምከዋክብት፡ ወተኰነኑ፡ ወኮኑ፡ ኃጥኣነ፡ ወሖሩ፡ መካነ፡ ኵነኔ፡ ወወደይዎሙ፡ ውስተ፡ ዕሙቅ፡ ወምሉእ፡ እሳተ፡ ዘይልህብ፡ ወምሉእ፡ ዐምደ፡ እሳት።
25 ወእልክቱ፡ ሰብዓ፡ ኖላውያን፡ ተኰነኑ፡ ወኮኑ፡ ኃጥኣን፡ ወተወድዩ፡ እሙንቱ፡ ውስተ፡ ዝንቱ፡ ማዕምቀ፡ እሳት።
26 ወርኢኩ፡ በውእቱ፡ ጊዜ፡ ከመ፡ ተርኅወ፡ አሐዱ፡ ማዕምቅ፡ ከማሁ፡ በማእከለ፡ ምድር፡ ዘምሉእ፡ እሳተ፡ ወአምጽእዎሙ፡ ለእልኩ፡ አባግዕ፡ ጽሉላን፡ ወተኰነኑ፡ ኵሎሙ፡ ወኮኑ፡ ኃጥኣነ፡ ወተወድዩ፡ ውስተ፡ ዝንቱ፡ ዕመቀ፡ እሳት፡ ወውዕዩ፡ ወዝንቱ፡ ማዕምቅ፡ ኮነ፡ በየማኑ፡ ለዝኩ፡ ቤት።
27 ወርኢክዎሙ፡ ለእልኩ፡ አባግዕ፡ እንዘ፡ ይውዕዩ፡ ወአዕፅምቲሆሙ፡ ይውዒ።
28 ወቆምኩ፡ እርአይ፡ እስከ፡ ጠወሞ፡ ለዝኩ፡ ቤት፡ ብሉይ፡ ወአውፅእዎሙ፡ ለኵሎሙ፡ አዕማድ፡ ወኵሉ፡ ተክሉ፡ ወሥኑ፡ ለውእቱ፡ ቤት፡ ተጠውመ፡ ምስሌሁ፡ ወአውፅእዎ፡ ወወደይዎ፡ በአሐዱ፡ መካን፡ በየማነ፡ ምድር።
29 ወርኢኩ፡ እግዚአ፡ አባግዕ፡ እስከ፡ አምጽአ፡ ቤተ፡ ሐዲሰ፡ ወዐቢየ፡ ወልዑለ፡ እምነ፡ ዝንቱ፡ ቤት፡ ቀዳማይ፡ ወአቀሞ፡ ውስተ፡ መካነ፡ ቀዳሚት፡ እንተ፡ ተጠብለለት፡ ወኵሎሙ፡ አዕማደ፡ ዚኣሃ፡ ሐዲሳን፡ ወሥና፡ ሐዲስ፡ ወዐቢይ፡ እምቀዳሚት፡ ብሊት፡ እንተ፡ አውፅኣ፡ ወኵሎሙ፡ አባግዕ፡ ማእከላ።
30 ወርኢክዎሙ፡ ለኵሎሙ፡ አባግዕ፡ እለ፡ ተርፉ፡ ወኵሎሙ፡ እንስሳ፡ ዘዲበ፡ ምድር፡ ወኵሎሙ፡ አዕዋፈ፡ ሰማይ፡ ይወድቁ፡ ወይሰግዱ፡ ለእልኩ፡ አባግዕ፡ ወያስተበቍዕዎሙ፡ ወይሰምዕዎሙ፡ በኵሉ፡ ቃል።
31 ወእምኔሁ፡ እልክቱ፡ ሠለስቱ፡ እለ፡ ይለብሱ፡ ጸዐድው፡ ወእለ፡ ቀዲሙ፡ አዕረጉኒ፡ አኀዙኒ፡ በእዴሁ፡ ወእዴሁ፡ ለውእቱ፡ ዳቤላ፡ እንዘ፡ ትእኅዘኒ፡ አዕረጉኒ፡ ወአንበሩኒ፡ ማእከሎሙ፡ ለእልኩ፡ አባግዕ፡ እንበለ፡ ትኩን፡ ኵነኔ።
32 ወእልኩ፡ አባግዕ፡ ኮኑ፡ ኵሎሙ፡ ጸዐዳ፡ ወጸጕረ፡ ዚኣሆሙ፡ ዐቢይ፡ ወንጹሕ።
33 ወኵሎሙ፡ እለ፡ ተሀጕሉ፡ ወተዘርዘሩ፡ ወኵሉ፡ አራዊተ፡ ገዳም፡ ወኵሉ፡ አዕዋፈ፡ ሰማይ፡ ተጋብኡ፡ በውእቱ፡ ቤት፡ ወእግዚኦሙ፡ ለአባግዕ፡ ተፈሥሐ፡ ዐቢየ፡ ፍሥሓ፡ እስመ፡ ኮኑ፡ ኵሎሙ፡ ኄራነ፡ ወገብኡ፡ ውስተ፡ ቤቱ።
34 ወርኢኩ፡ እስከ፡ አስከብዎ፡ ለውእቱ፡ ሰይፍ፡ ዘተውህበ፡ ለአባግዕ፡ ወአግብእዎ፡ ውስተ፡ ቤቱ፡ ወኀተማ፡ ቅድመ፡ ገጹ፡ ለእግዚእ፡ ወኵሎሙ፡ አባግዕ፡ ተዐጽው፡ በውእቱ፡ ቤት፡ ወኢያግመሮሙ።
35 ወአዕይንቲሆሙ፡ ለኵሎሙ፡ ተከሥታ፡ ወይኔጽሩ፡ ሠናየ፡ ወአሐዱ፡ እምኔሆሙ፡ ዘኢይሬኢ፡ አልቦ፡ በማእከሎሙ።
36 ወርኢኩ፡ ከመ፡ ኮነ፡ ውእቱ፡ ቤት፡ ዐቢየ፡ ወርኂበ፡ ወምሉአ፡ ፈድፋደ።
37 ወርኢኩ፡ ከመ፡ ተወልደ፡ አሐዱ፡ ላሕም፡ ጸዐዳ፡ ወአቅርንቲሁ፡ ዐበይት፡ ወኵሎሙ፡ አራዊተ፡ ገዳም፡ ወአዕዋፈ፡ ሰማይ፡ ይፈርህዎ፡ ወያስተበቍዕዎ፡ በኵሉ፡ ጊዜ።
38 ወርኢኩ፡ እስከ፡ ተወለጠ፡ ኵሉ፡ አዝማዲሆሙ፡ ወኮኑ፡ ኵሎሙ፡ አልሕምት፡ ጸዐድወ፡ ወኮነ፡ ቀዳማዊ፡ በማእከሎሙ፡ ነገረ፡ ወውእቱ፡ ነገር፡ ኮነ፡ አርዌ፡ ዐቢየ፡ ወቦ፡ ውስተ፡ ርእሱ፡ አቅርንት፡ ዐቢያት፡ ወጸሊማት፡ ወእግዚአ፡ አባግዕ፡ ተፈሥሐ፡ ዲቤሆሙ፡ ወዲበ፡ ኵሎሙ፡ አልሕምት።
39 ወአነ፡ ሰከብኩ፡ ማእከሎሙ፡ ወነቃሕኩ፡ ወርኢኩ፡ ኩሎ።
40 ወዝንቱ፡ ራእይ፡ ዘርኢኩ፡ እንዘ፡ እሰክብ፡ ወነቃሕኩ፡ ወባረክዎ፡ ለእግዚአ፡ ጽድቅ፡ ወሎቱ፡ ወሀብኩ፡ ስብሐተ።
41 ወእምኔሁ፡ በከይኩ፡ ብካየ፡ ዐቢየ፡ ወአንብዕየ፡ ኢቆመ፡ እስከ፡ ኢክህልኩ፡ ተዐግሦተ፡ ሶበ፡ እሬኢ፡ እምዘይወርዱ፡ ዲበ፡ ዝኩ፡ ዘርኢኩ፡ እስመ፡ ኵሉ፡ ይወፅእ፡ ወይትፈጸም፡ ወኵሉ፡ በበ፡ ክፍሉ፡ ምግባረ፡ ሰብእ፡ ተርእየ፡ ሊተ።
42 በይእቲ፡ ሌሊት፡ ተዘከርክዎ፡ ለሕልምየ፡ ቀዳማዊ፡ ወበእንቲኣሁ፡ በከይኩ፡ ወተሀወኩ፡ እስመ፡ ርኢኩ፡ ውእተ፡ ራእየ።
=== chapter 91 ===
[Chapter 91]
1 ወይእዜኒ፡ ወልድየ፡ ማቱሳላ፡ ጸውዕ፡ ሊተ፡ ኵሎሙ፡ አኀዊከ፡ ወአስተጋብእ፡ ሊተ፡ ኵሎ፡ ደቂቀ፡ እምከ፡ እስመ፡ ቃል፡ ይጼውዐኒ፡ ወመንፈስ፡ ተክዕወ፡ በላዕሌየ፡ ከመ፡ አርእይክሙ፡ ኵሎ፡ ዘይበጽሐክሙ፡ እስከ፡ ለዓለም።
2 ወእምኔሁ፡ ሖረ፡ ማቱሳላ፡ ወጸውዖሙ፡ ለኵሎሙ፡ አኀዊሁ፡ ኀቤሁ፡ ወአስተጋብኦሙ፡ ለአዝማደ፡ ዚኣሁ።
3 ወተናገሮሙ፡ ለኵሎሙ፡ ውሉዱ፡ ጽድቅ፡ ወይቤ፡ ስምዑ፡ ደቂቅየ፡ ኵሎ፡ ነገረ፡ አቡክሙ፡ ወአጽምኡ፡ በርትዕ፡ ቃለ፡ አፉየ፡ እስመ፡ ኣሰምዕ፡ ዲቤክሙ፡ ወእነግረክሙ፡ ፍቁራንየ፡ አፍቅርዋ፡ ለርትዕ፡ ወባቲ፡ ሑሩ።
4 ወኢትቅረቡ፡ ኀበ፡ ርትዕ፡ በክልኤ፡ ልብ፡ ወኢትኅበሩ፡ ምስለ፡ እለ፡ ክልኤ፡ ልብ፡ አላ፡ ሑሩ፡ በጽድቅ፡ ደቂቅየ፡ ወይእቲ፡ ትመርሐክሙ፡ በፍናዋት፡ ኄራት፡ ወጽድቅ፡ ይከውን፡ ለክሙ፡ ሱታፌ።
5 እስመ፡ ኣአምር፡ ከመ፡ ይጸንዕ፡ ህላዌ፡ ግፍዕ፡ ዲበ፡ ምድር፡ ወይትፌጸም፡ መቅሠፍት፡ ዐቢይ፡ ዲበ፡ ምድር፡ ወትትፌጸም፡ ኵላ፡ ዐመፃ፡ ወትትገዘም፡ እምሥረዊሃ፡ ወኵሉ፡ ሕንጻ፡ የኀልፍ።
6 ወትደግም፡ ካዕበ፡ ዐመፃ፡ ወትትፌጸም፡ ዲበ፡ ምድር፡ ወትትአኀዝ፡ ኵላ፡ ግብረ፡ ዐመፃ፡ ወግብረ፡ ግፍዕ፡ ወአበሳ፡ ካዕበተ።
7 ወእመኒ፡ ትልህቅ፡ ዐመፃ፡ ወኀጢአት፡ ወፅርፈት፡ ወግፍዕ፡ ወኵሉ፡ ግብር፡ ወትልህቅ፡ ዕልወት፡ ወአበሳ፡ ወርኵስ፡ መቅሠፍት፡ ዐቢይ፡ ይከውን፡ እምሰማይ፡ ዲበ፡ እሉ፡ ኵሎሙ፡ ወይወፅእ፡ እግዚእ፡ ቅዱስ፡ በመዓት፡ ወመቅሠፍት፡ ዐቢይ፡ ከመ፡ ይግበር፡ ኵነኔ፡ ዲበ፡ ምድር።
8 ወበእማንቱ፡ መዋዕል፡ ትትገዘም፡ ግፍዕ፡ እምነ፡ ሥረዊሃ፡ ወአሥራወ፡ ዐመፃ፡ ምስለ፡ ጕሕሉት፡ ወይትሀጐሉ፡ እምታሕተ፡ ሰማይ።
9 ወኵሉ፡ ይትወሀብ፡ ምስለ፡ አሕዛብ፡ ወማኅፈድ፡ በእሳት፡ ትነድድ፡ ወያወፅእዎሙ፡ እምኵሉ፡ ምድር፡ ወይትገደፉ፡ በኵነኔ፡ እሳት፡ ወይትሀጐሉ፡ በመዓት፡ ወበኵነኔ፡ ኀያል፡ እንተ፡ ለዓለም።
10 ወይትነሣእ፡ ጻድቅ፡ እምንዋም፡ ወይትነሣእ፡ ጥበብ፡ ወይትወሀብ፡ ሎሙ።
11 ወእምኔሁ፡ ይትገዘሙ፡ አሥራወ፡ ዐመፃ፡ ወኃጥኣን፡ ይትሀጐሉ፡ በሰይፍ፡ ወእምነ፡ ፅሩፋን፡ ይትገዘሙ፡ በኵሉ፡ መካን፡ ወእለ፡ ይኄልይዋ፡ ለግፍዕ፡ ወእለ፡ ይገብርዋ፡ ለፅርፈት፡ ይትሀጐሉ፡ በመጥባሕት።
12 ወእምድኅረ፡ ዝ፡ ትከውን፡ ካልእት፡ ሰንበት፡ ሳምኒት፡ እንተ፡ ጽድቅ፡ ወይትወሀብ፡ ላቲ፡ ሰይፍ፡ ከመ፡ ይትገበር፡ ኵነኔ፡ ጽድቅ፡ እምእለ፡ ይገፍዑ፡ ወይትመጠዉ፡ ኃጥኣን፡ ለጻድቃን።
13 በተፍጻሜታ፡ ያጠርዩ፡ አብያተ፡ እምጽድቀ፡ ዚኣሆሙ፡ ወይትሐነጽ፡ ቤት፡ ለንጉሥ፡ ዐቢይ፡ በስብሐት፡ እስከ፡ ለዓለም።
14 ወእምድኅረ፡ ዝ፡ በሰንበት፡ ታስዕት፡ ባቲ፡ ኵነኔ፡ ጽድቅ፡ ትትከሠት፡ ለኵሉ፡ ዓለም፡ ወኵሉ፡ ተግባረ፡ ረሲዓን፡ ይወፅእ፡ እምዲበ፡ ምድር፡ ወይጸሐፍ፡ ዓለም፡ ለሀጕል፡ ወኵሉ፡ ሰብእ፡ ይኔጽሩ፡ ለፍኖተ፡ ርትዕ።
15 ወእምድኅረ፡ ዝንቱ፡ በሰንበት፡ ዐሥርት፡ ሳብዓቱ፡ እድ፡ ባቲ፡ ኵነኔ፡ እንተ፡ ለዓለም፡ ወትትገበር፡ እምትጉሃን፡ ወሰማይ፡ ዘለዓለም፡ ዐቢይ፡ ዘይበቊል፡ እማእከሎሙ፡ ለመላእክት።
16 ወሰማይ፡ ቀዳማይ፡ ይወፅእ፡ ወየኀልፍ፡ ወሰማይ፡ ሐዲስ፡ ይትረአይ፡ ወኵሉ፡ ኀይላተ፡ ሰማያት፡ ያበርሁ፡ ለዓለም፡ ሰብዐተ፡ ምክዕቢተ።
17 ወእምድኅረ፡ ዝ፡ ብዙኃን፡ ሰንበታት፡ እለ፡ አልቦሙ፡ ኍልቊ፡ ለዓለም፡ በኂሩት፡ ወበጽድቅ፡ ይከውኑ፡ ወኀጢአት፡ እምህየ፡ ኢትትበሃል፡ እስከ፡ ለዓለም።
18 ወይእዜኒ፡ እብለክሙ፡ ደቂቅየ፡ ወኣርእየክሙ፡ ፍናዋተ፡ ጽድቅ፡ ወፍናዋተ፡ ግፍዕ፡ ወኣርእየክሙ፡ ካዕበ፡ ከመ፡ ታእምሩ፡ ዘይመጽእ።
19 ወይእዜኒ፡ ስምዑኒ፡ ደቂቅየ፡ ወሑሩ፡ በፍናዋተ፡ ጽድቅ፡ ወኢትሑሩ፡ በፍናዋተ፡ ግፍዕ፡ እስመ፡ ይትሀጐሉ፡ ለዓለም፡ ኵሎሙ፡ እለ፡ የሐውሩ፡ በፍኖተ፡ ዐመፃ።
=== chapter 92 ===
[Chapter 92]
1 ዘተጽሕፈ፡ እምሄኖክ፡ ጸሐፈ፡ ዝ፡ ኵሉ፡ ትምህርተ፡ ጥበብ፡ እምኵሉ፡ ሰብእ፡ ስቡሕ፡ ወመኰንነ፡ ኵሉ፡ ምድር፡ ለኵሎሙ፡ ውሉድየ፡ እለ፡ የኀድሩ፡ ዲበ፡ ምድር፡ ወለትውልድ፡ ደኃራውያን፡ እለ፡ ይገብሩ፡ ርትዐ፡ ወሰላመ።
2 ኢትሕዘን፡ መንፈሰክሙ፡ በአዝማን፡ እስመ፡ መዋዕለ፡ ወሀበ፡ ቅዱስ፡ ወዐቢይ፡ ለኵሉ።
3 ወይትነሣእ፡ ጻድቅ፡ እምንዋም፡ ይትነሣእ፡ ወየኀልፍ፡ በፍኖተ፡ ጽድቅ፡ ወኵሉ፡ ፍኖቱ፡ ወምሕዋሪሁ፡ በኂሩት፡ ወበሣህል፡ ዘለዓለም።
4 ይሠሀሎ፡ ለጻድቅ፡ ወሎቱ፡ ይሁብ፡ ርትዐ፡ ዘለዓለም፡ ወይሁብ፡ ሥልጣነ፡ ወይከውን፡ በኂሩት፡ ወበጽድቅ፡ ወየሐውር፡ ብርሃን፡ ዘለዓለም።
5 ወኀጢአት፡ በጽልመት፡ ትትሀጐል፡ እስከ፡ ለዓለም፡ ወኢትትረአይ፡ እንከ፡ እምይእቲ፡ ዕለት፡ እስከ፡ ለዓለም።
=== chapter 93 ===
[Chapter 93]
1 ወእምድኅረ፡ ዝ፡ ኮነ፡ ሄኖክ፡ ወአኀዘ፡ ይትናገር፡ እመጻሕፍት።
2 ወይቤ፡ ሄኖክ፡ በእንተ፡ ውሉደ፡ ጽድቅ፡ ወበእንተ፡ ኅሩያነ፡ ዓለም፡ ወበእንተ፡ ተክለ፡ ጽድቅ፡ ወርትዕ፡ እሎንተ፡ እብለክሙ፡ ወኣየድዐክሙ፡ ደቂቅየ፡ አነ፡ ውእቱ፡ ሄኖክ፡ ዘአስተርአየኒ፡ እምራእየ፡ ሰማይ፡ ወእምቃለ፡ ቅዱሳን፡ መላእክት፡ አእመርኩ፡ ወእምጸፍጸፈ፡ ሰማይ፡ ለበውኩ።
3 ወአኀዘ፡ እንከ፡ ይትናገር፡ ሄኖክ፡ እመጻሕፍት፡ ወይቤ፡ አነ፡ ሳብዕ፡ ተወለድኩ፡ በቀዳሚት፡ ሰንበት፡ እስከ፡ አመ፡ ኵነኔ፡ ጽድቅ፡ ተዐገሠ።
4 ወትቀውም፡ እምድኅሬየ፡ በካልእት፡ ሰንበት፡ ዐባይ፡ እኪት፡ ወጕሕሉት፡ በቈለት፡ ወባቲ፡ ትከውን፡ ፍጻሜ፡ ቀዳሚት፡ ወባቲ፡ ይድኅን፡ ብእሲ፡ ወእምድኅረ፡ ተፈጸመ፡ ትልህቅ፡ ዐመፃ፡ ወሥርዐተ፡ ይገብር፡ ለኃጥኣን።
5 ወእምድኅረ፡ ዝ፡ በሣልስት፡ ሰንበት፡ በተፍጻሜታ፡ ይትኀረይ፡ ብእሲ፡ ለተክለ፡ ኵነኔ፡ ጽድቅ፡ ወእምድኅሬሁ፡ ይወፅእ፡ ተክለ፡ ጽድቅ፡ ወርትዕ፡ ለዓለም።
6 ወእምድኅረ፡ ዝ፡ በራብዕት፡ ሰንበት፡ በተፍጻሜታ፡ ራእያተ፡ ቅዱሳን፡ ወጻድቃን፡ ይትረአዩ፡ ወሥርዐት፡ ለትውልደ፡ ትውልድ፡ ወዐጸድ፡ ይትገበር፡ ሎሙ።
7 ወእምድኅረ፡ ዝ፡ በኀምስ፡ ሰንበት፡ በተፍጻሜታ፡ ቤተ፡ ስብሐት፡ ወመንግሥት፡ ይትሐነጽ፡ እስከ፡ ለዓለም።
8 ወእምድኅረ፡ ዝ፡ በሳድስት፡ ሰንበት፡ እለ፡ ይከውኑ፡ ውስቴታ፡ ጽሉላን፡ ኵሎሙ፡ ወይትረሳዕ፡ ልቦሙ፡ ለኵሎሙ፡ እምጥበብ፡ ወባቲ፡ የዐርግ፡ ብእሲ፡ ወበተፍጻሜታ፡ ይውዒ፡ ቤተ፡ መንግሥት፡ በእሳት፡ ወባቲ፡ ይዘረዉ፡ ኵሉ፡ ዘመደ፡ ሥርወ፡ ኅሩይ።
9 ወእምድኅረ፡ ዝ፡ በሳብዕት፡ ሰንበት፡ ትትነሣእ፡ ትውልድ፡ ዕሉት፡ ወብዙኅ፡ ምግባራቲሃ፡ ወኵሉ፡ ምግባራቲሃ፡ ዕልወት።
10 ወበተፍጻሜታ፡ ይትዐሰዩ፡ ኅሩያነ፡ ጽድቅ፡ እምተክለ፡ ጽድቅ፡ ዘለዓለም፡ እለ፡ ይትወሀብ፡ ሎሙ፡ ሰብዐቱ፡ ምክዕቢታተ፡ ትምህርት፡ ለኵሉ፡ ፍጥረተ፡ ዚኣሁ።
11 እስመ፡ መኑ፡ ውእቱ፡ እምውሉደ፡ ሰብእ፡ ዘይክል፡ ሰሚዐ፡ ቃሉ፡ ለቅዱስ፡ ወኢይትሀወክ፡ ወመኑ፡ ዘይክል፡ ከመ፡ የኀሊ፡ ኅሊናሁ፡ ወመኑ፡ ዘይክል፡ ነጽሮቶ፡ ለሰማይ፡ ወኵሎ፡ ምግባራቲሃ።
12 ወምንት፡ ውእቱ፡ ዘይክል፡ አእምሮ፡ ግብረ፡ ሰማይ፡ ወከመ፡ ይርአይ፡ ነፍሶ፡ ወእመ፡ አኮ፡ መንፈሶ፡ ወይክል፡ ነጊረ፡ ወእመ፡ አኮ፡ ዐሪገ፡ ወይሬኢ፡ ኵሎ፡ አክናፊሆሙ፡ ወይኄልይዎሙ፡ ወእመ፡ አኮ፡ ይገብር፡ ከማሆሙ።
13 ወመኑ፡ ውእቱ፡ ኵሉ፡ ብእሲ፡ ዘይክል፡ አእምሮተ፡ እፎ፡ ውእቱ፡ ራሕባ፡ ወኑኃ፡ ለምድር፡ ወለመኑ፡ ተርእያ፡ አምጣነ፡ ኵሎሙ።
14 ወእፎመ፡ ቦቱ፡ ኵሉ፡ ብእሲ፡ ዘይክል፡ አእምሮተ፡ ኑኃ፡ ለሰማይ፡ ውእቱ፡ ልዕልናሃ፡ ወዲበ፡ ምንት፡ ጸንዐት፡ ወሚ፡ መጠን፡ ውእቱ፡ ኍልቆሙ፡ ለከዋክብት፡ ወበአይቴ፡ የዐርፉ፡ ኵሎሙ፡ ብርሃናት።
=== chapter 94 ===
[Chapter 94]
1 ወይእዜኒ፡ እብለክሙ፡ ደቂቅየ፡ አፍቅርዋ፡ ለጽድቅ፡ ወባቲ፡ ሑሩ፡ እስመ፡ ፍናዋተ፡ ጽድቅ፡ ይደሉ፡ ይትወከፍዎሙ፡ ወፍናዋተ፡ ዐመፃ፡ ፍጡነ፡ ይትሀጐሉ፡ ወየሐጽጹ።
2 ወለሰብእ፡ እሙራን፡ እምትውልድ፡ ይትከሠቱ፡ ፍናዋተ፡ ግፍዕ፡ ወሞት፡ ወይርሕቁ፡ እምኔሆሙ፡ ወኢይተልውዎሙ።
3 ወይእዜኒ፡ ለክሙ፡ እብለክሙ፡ ለጻድቃን፡ ኢትሑሩ፡ በፍናዋተ፡ እኩይ፡ ወግፍዕ፡ ወኢ፡ በፍናዋተ፡ ሞት፡ ወኢትቅረቡ፡ ኀቤሆሙ፡ ከመ፡ ኢትትሀጐሉ።
4 አላ፡ ፍቅዱ፡ ወኅረዩ፡ ለክሙ፡ ጽድቀ፡ ወሕይወተ፡ ኅሪተ፡ ወሑሩ፡ በፍናዋተ፡ ሰላም፡ ከመ፡ ትሕየዉ፡ ወትደለዉ።
5 ወትእኅዙ፡ በኅሊና፡ ልብክሙ፡ ወኢይደምሰስ፡ ነገርየ፡ እምልብክሙ፡ እስመ፡ ኣአምር፡ ከመ፡ ያመክርዎሙ፡ ኃጥኣን፡ ለሰብእ፡ ከመ፡ ይግበሩ፡ ጥበበ፡ እኩየ፡ ወኵሉ፡ መካን፡ ኢይትረከብ፡ ላቲ፡ ወኵሉ፡ መከራ፡ ኢየሐጽጽ።
6 አሌ፡ ሎሙ፡ ለእለ፡ የሐንጽዋ፡ ለዐመፃ፡ ወለግፍዕ፡ ወይሣርርዋ፡ ለጕሕሉት፡ እስመ፡ ፍጡነ፡ ይትነሠቱ፡ ወአልቦሙ፡ ሰላም።
7 አሌ፡ ሎሙ፡ ለእለ፡ የሐንጹ፡ አብያቲሆሙ፡ በኀጢአት፡ እስመ፡ እምኵሉ፡ መሠረቶሙ፡ ይትነሠቱ፡ ወበሰይፍ፡ ይወድቁ፡ ወእለ፡ ያጠርይዋ፡ ለወርቅ፡ ወለብሩር፡ በኵነኔ፡ ፍጡነ፡ ይትሀጐሉ።
8 አሌ፡ ለክሙ፡ አብዕልት፡ እስመ፡ ዲበ፡ ብዕልክሙ፡ ተወከልክሙ፡ ወእምነ፡ ብዕልክሙ፡ ትወፅኡ፡ እስመ፡ ኢተዘከርክምዎ፡ ለልዑል፡ በዕለተ፡ ብዕልክሙ።
9 ወገበርክምዎ፡ ለፅርፈት፡ ወለዐመፃ፡ ወድልዋነ፡ ኮንክሙ፡ ለዕለተ፡ ክዕወተ፡ ደም፡ ወለዕለተ፡ ጽልመት፡ ወለዕለተ፡ ኵነኔ፡ ዐባይ።
10 ከመ፡ ዝ፡ አነ፡ እብል፡ ወኣየድዐክሙ፡ ከመ፡ ይገፈትዐክሙ፡ ዘፈጠረክሙ፡ ወዲበ፡ ድቀትክሙ፡ ከመ፡ ኢይከውን፡ ምሕረት፡ ወፈጣሪክሙ፡ ይትፌሣሕ፡ በሀጕልክሙ።
11 ወጻድቃነ፡ ዚኣክሙ፡ ይከውኑ፡ በእማንቱ፡ መዋዕል፡ ጽእለተ፡ ለኃጥኣን፡ ወለረሲዓን።
=== chapter 95 ===
[Chapter 95]
1 መኑ፡ ይሁበኒ፡ አዕይንትየ፡ ከመ፡ ይኩና፡ ደመናተ፡ ሰማይ፡ ወእብኪ፡ ዲቤክሙ፡ ወእክዐው፡ አንብዕየ፡ ከመ፡ ደመና፡ ማይ፡ ወኣዕርፍ፡ እምሐዘነ፡ ልብየ።
2 መኑ፡ ወሀበክሙ፡ ከመ፡ ትግበሩ፡ ጽልአ፡ ወእከየ፡ ወይረክበክሙ፡ ለኃጥኣን፡ ኵነኔ።
3 ኢትፍርሁ፡ ጻድቃን፡ እምኃጥኣን፡ እስመ፡ ካዕበ፡ ያገብኦሙ፡ እግዚአብሔር፡ ውስተ፡ እዴክሙ፡ ከመ፡ ትግበሩ፡ ኵነኔ፡ ላዕሌሆሙ፡ በከመ፡ ፈቀድክሙ።
4 አሌ፡ ለክሙ፡ እለ፡ ታወግዙ፡ ግዘታተ፡ ከመ፡ ኢትፍትሑ፡ ወፈውስ፡ ርሑቅ፡ እምኔክሙ፡ በእንተ፡ ኀጢአተ፡ ዚኣክሙ።
5 አሌ፡ ለክሙ፡ እለ፡ ትፈድዩ፡ እኩየ፡ ለቢጽክሙ፡ እስመ፡ ትትፈደዩ፡ በከመ፡ ምግባሪክሙ።
6 አሌ፡ ለክሙ፡ ለሰማዕተ፡ ሐሰት፡ ወእለ፡ ትደልውዋ፡ ለዐመፃ፡ እስመ፡ ፍጡነ፡ ትትሀጐሉ።
7 አሌ፡ ለክሙ፡ ለኃጥኣን፡ እስመ፡ ለጻድቃን፡ ትሰድድዎሙ፡ እስመ፡ አንትሙ፡ ትትሜጠዉ፡ ወትሰደዱ፡ እምዐመፃ፡ ወይጸንዕ፡ በላዕሌክሙ፡ አርዑተ፡ ዚኣሆሙ።
=== chapter 96 ===
[Chapter 96]
1 ተሰፈዉ፡ ጻድቃን፡ እስመ፡ ፍጡነ፡ ይትሀጐሉ፡ ኃጥኣን፡ እምቅድሜክሙ፡ ወሥልጣን፡ ይከውን፡ ለክሙ፡ ዲቤሆሙ፡ በከመ፡ ፈቀድክሙ።
2 ወበዕለተ፡ ምንዳቤሆሙ፡ ለኃጥኣን፡ ይትሌዐሉ፡ ወይትነሥኡ፡ ከመ፡ አንስርት፡ ዕጕለ፡ ዚኣክሙ፡ ወፈድፋደ፡ እምነ፡ አውስት፡ ይከውን፡ ምጽላልክሙ፡ ወተዐርጉ፡ ወትበውኡ፡ በንድለታተ፡ ምድር፡ ወበንቅዐታተ፡ ኰኵሕ፡ ለዓለም፡ ከመ፡ ግሔ፡ እምቅድመ፡ ዐማፅያን፡ ወይንእኩ፡ ዲቤክሙ።
3 ወአንትሙ፡ ኢትከውኑ፡ ከማሆሙ፡ አላ፡ ሰማዕተ፡ ይከውን፡ ዲቤክሙ፡ ዝንቱ፡ ከመ፡ ሱቱፋነ፡ ኮንክሙ፡ ለኃጥኣን፡ ወይበክዩ፡ ከመ፡ ጼዴናታት፡ ወአንትሙሰ፡ ኢትፍርሁ፡ እለ፡ ሐመምክሙ፡ እስመ፡ ፈውስ፡ ይከውነክሙ፡ ወብርሃን፡ ብሩህ፡ ያበርህ፡ ለክሙ፡ ወቃለ፡ ዕረፍት፡ ትሰምዑ፡ እምሰማይ።
4 አሌ፡ ለክሙ፡ ኃጥኣን፡ እስመ፡ ብዕልክሙ፡ ያመስለክሙ፡ ጻድቃነ፡ ወልብክሙ፡ ይዛለፈክሙ፡ ከመ፡ ኃጥኣን፡ አንትሙ፡ ወዝንቱ፡ ነገር፡ ይከውን፡ ዲቤክሙ፡ ሰማዕተ፡ ለተዝካረ፡ እከያት።
5 አሌ፡ ለክሙ፡ እለ፡ ትበልዑ፡ ስብሐ፡ ሥርናይ፡ ወትሰትዩ፡ ኀይለ፡ ሥርወ፡ ነቅዕ፡ ወትከይድዎሙ፡ ለኃጥኣን፡ በኀይልክሙ።
6 አሌ፡ ለክሙ፡ እለ፡ ትሰትዩ፡ ማየ፡ በኵሉ፡ ጊዜ፡ እስመ፡ ፍጡነ፡ ትትፈደዩ፡ ወትትዌድኡ፡ ወትየብሱ፡ እስመ፡ ኀደግሙ፡ ነቅዐ፡ ሕይወት።
7 አሌ፡ ለክሙ፡ እለ፡ ትገብሩ፡ ዐመፃ፡ ወጕሕሉተ፡ ወፅርፈተ፡ ወዝንቱ፡ ተዝካረ፡ ይከውን፡ ዲቤክሙ፡ ለእከይ።
8 አሌ፡ ለክሙ፡ ኃጥኣን፡ እለ፡ በኀይል፡ ትኰርዕዎ፡ ለጻድቅ፡ እስመ፡ ትመጽእ፡ ዕለተ፡ ሀጕልክሙ፡ ወበእማንቱ፡ መዋዕል፡ ይመጽኣ፡ ለጻድቃን፡ መዋዕል፡ ብዙኃት፡ ወኄራት፡ በዕለተ፡ ኵነኔ፡ ዚኣክሙ።
=== chapter 97 ===
[Chapter 97]
1 ተአመኑ፡ ጻድቃን፡ እስመ፡ ለጽእለት፡ ይከውኑ፡ ኃጥኣን፡ ወይትሀጐሉ፡ በዕለተ፡ ዐመፃ።
2 እሙረ፡ ይከውን፡ ለክሙ፡ እስመ፡ ልዑል፡ ይዜክር፡ ሀጕለክሙ፡ ወይትፌሥሑ፡ መላእክት፡ ዲበ፡ ሀጕለ፡ ዚኣክሙ።
3 ምንተ፡ ትግበሩ፡ ሀለወክሙ፡ ኃጥኣን፡ ወአይቴ፡ ትጐይዩ፡ በይእቲ፡ ዕለት፡ እንተ፡ ኵነኔ፡ ሶበ፡ ትሰምዑ፡ ቃለ፡ ጸሎቶሙ፡ ለጻድቃን።
4 ወአንትሙ፡ ኢትከውኑ፡ ከማሆሙ፡ አላ፡ ሰማዕተ፡ ይከውን፡ ዲቤሆሙ፡ ዝንቱ፡ ነገር፡ ሱቱፋነ፡ ኮንክሙ፡ ለኃጥኣን።
5 ወበእማንቱ፡ መዋዕል፡ ትበጽሕ፡ ጸሎቶሙ፡ ለቅዱሳን፡ ኀበ፡ እግዚእ፡ ወለክሙ፡ ይበጽሕ፡ መዋዕለ፡ ኵነኔክሙ።
6 ወይትነበብ፡ ኵሉ፡ ነገረ፡ ዐመፃሆሙ፡ ቅድመ፡ ዐቢይ፡ ወቅዱስ፡ ወይትኀፈር፡ ገጽክሙ፡ ወይትገድፍ፡ ኵሉ፡ ተግባረ፡ ዘጸንዐ፡ በዐመፃ።
7 አሌ፡ ለክሙ፡ ኃጥኣን፡ እለ፡ ማእከለ፡ ባሕር፡ ወዲበ፡ የብስ፡ እለ፡ ዝክሮሙ፡ እኩይ፡ ዲቤክሙ።
8 አሌ፡ ለክሙ፡ እለ፡ ታጠርዩ፡ ብሩረ፡ ወወርቀ፡ ዚኢኮነ፡ በጽድቅ፡ ወትብሉ፡ ብዕልነ፡ ብዕለ፡ ወኮነ፡ ለነ፡ ንዋይ፡ ወአጥረይነ፡ ኵሎ፡ ዘፈቀድነ።
9 ወይእዜኒ፡ ንግበር፡ ዘኀለይነ፡ እስመ፡ ብሩረ፡ አስተጋባእነ፡ ወመላእነ፡ መዛግብቲነ፡ ወከመ፡ ማይ፡ ብዙኅ፡ ሐረስተ፡ አብያቲነ።
10 ወከመ፡ ማይ፡ ይውሕዝ፡ ሐሰትክሙ፡ እስመ፡ ኢይነብር፡ ለክሙ፡ ብዕል፡ አላ፡ ፍጡነ፡ የዐርግ፡ እምኔክሙ፡ እስመ፡ ኵሎ፡ በዐመፃ፡ አጥረይክሙ፡ ወአንትሙሰ፡ ለመርገም፡ ዐቢይ፡ ትትወሀቡ።
=== chapter 98 ===
[Chapter 98]
1 ወይእዜኒ፡ አነ፡ እምሕል፡ ለክሙ፡ ለጠቢባን፡ ወለአብዳን፡ እስመ፡ ብዙኀ፡ ትሬእዩ፡ በዲበ፡ ምድር።
2 እስመ፡ ሥነ፡ ትወድዩ፡ ላዕሌክሙ፡ አንትሙ፡ ዕደው፡ ፈድፋደ፡ እምአንስት፡ ወኅብረ፡ ፈድፋደ፡ እምድንግል፡ በመንግል፡ በመንግሥት፡ ወበዕበይ፡ ወበሥልጣን፡ ወበብሩር፡ ወወርቅ፡ ወሜላት፡ ወክብር፡ ወመባልዕት፡ ከመ፡ ማይ፡ ይውሕዝ።
3 ወበእንተ፡ ዝ፡ ትምህርት፡ ወጥበብ፡ አልቦሙ፡ ወቦቱ፡ ይትሀጐሉ፡ ኅቡረ፡ ምስለ፡ ንዋያቲሆሙ፡ ወምስለ፡ ኵሉ፡ ስብሐቶሙ፡ ወክብሮሙ፡ ወበጽእለት፡ ወበንዴት፡ ወበቀትለ፡ ነፍስ፡ ወበንዴት፡ ዐቢይ፡ ትትወደይ፡ መንፈሶሙ፡ ውስተ፡ እቶነ፡ እሳት።
4 መሐልኩ፡ ለክሙ፡ ኃጥኣን፡ ከመ፡ ኢኮነ፡ ደብር፡ ገብረ፡ ወኢይከውን፡ ወኢ፡ ወግር፡ ለብእሲት፡ አመተ፡ ከመ፡ ዝ፡ ኀጢአተኒ፡ ኢተፈነወት፡ ዲበ፡ ምድር፡ አላ፡ ሰብእ፡ እምርእሶሙ፡ ፈጠርዋ፡ ወለመርገም፡ ዐቢይ፡ ይከውኑ፡ እለ፡ ገብርዋ።
5 ወምክነት፡ ለብእሲት፡ ኢተውህበት፡ አላ፡ በእንተ፡ ግብረ፡ እደዊሃ፡ ትመውት፡ ዘእንበለ፡ ውሉድ።
6 መሐልኩ፡ ለክሙ፡ ኃጥኣን፡ በቅዱስ፡ ወዐቢይ፡ እስመ፡ ኵሉ፡ ግብርክሙ፡ እኩይ፡ ክሡት፡ ውእቱ፡ በሰማያት፡ ወአልብክሙ፡ ግብረ፡ ግፍዕ፡ ክዱን፡ ወኢኅቡእ።
7 ወኢታምስሉ፡ በመንፈስክሙ፡ ወኢትበሉ፡ በልብክሙ፡ እስመ፡ ኢተአምሩ፡ ወኢትሬእዩ፡ ኵሎ፡ ኀጢአተክሙ፡ ዘበሰማይ፡ ይጸሐፍ፡ ሀሎ፡ በኵሉ፡ ዕለት፡ በቅድሜሁ፡ ለልዑል።
8 ወእምይእዜ፡ ተአምሩ፡ እስመ፡ ኵሉ፡ ግፍዕክሙ፡ ዘትገፍዑ፡ ይጸሐፍ፡ በኵሉ፡ ዕለት፡ እስከ፡ ዕለተ፡ ኵነኔክሙ።
9 አሌ፡ ለክሙ፡ አብዳን፡ እስመ፡ ትትሀጐሉ፡ በእበድክሙ፡ ወለጠቢባን፡ ኢትሰምዕዎሙ፡ ወሠናይ፡ ኢይረክበክሙ።
10 ወይእዜኒ፡ አእምሩ፡ ከመ፡ ድልዋን፡ አንትሙ፡ ለዕለተ፡ ሀጕል፡ ወኢትሰፈዉ፡ ከመ፡ ትሕየዉ፡ ኃጥኣን፡ አላ፡ ተሐውሩ፡ ወትመውቱ፡ እስመ፡ ኢተአምሩ፡ ቤዛ፡ እስመ፡ ተደለውክሙ፡ ለዕለተ፡ ኵነኔ፡ ዐባይ፡ ወለዕለተ፡ ምንዳቤ፡ ወኀሳር፡ ዐቢይ፡ በመንፈስክሙ።
11 አሌ፡ ለክሙ፡ ግዙፋነ፡ ልብ፡ እለ፡ ትገብሩ፡ እኩየ፡ ወትበልዑ፡ ደመ፡ እምአይቴ፡ አንትሙ፡ ትበልዑ፡ በሠናይ፡ ወትበልዑ፡ ወትሰትዩ፡ ወትጸግቡ፡ እስመ፡ ኵሉ፡ ሠናይ፡ ዘአፈድፈደ፡ እግዚእነ፡ ልዑል፡ ዲበ፡ ምድር፡ ወአልብክሙ፡ ሰላመ።
12 አሌ፡ ለክሙ፡ እለ፡ ታፈቅርዎ፡ ለግብረ፡ ዐመፃ፡ ለምንት፡ ለክሙ፡ ትሴፈውዋ፡ ለሠናይት፡ አእምሩ፡ ከመ፡ ሀለወክሙ፡ ትትወሀቡ፡ በእደዊሆሙ፡ ለጻድቃን፡ ወይመትሩ፡ ክሳውዲክሙ፡ ወይቀትሉክሙ፡ ወኢይምሕሩክሙ።
13 አሌ፡ ለክሙ፡ እለ፡ ትትፌሥሑ፡ በምንዳቤሆሙ፡ ለጻድቃን፡ እስመ፡ መቃብር፡ ኢይትከረይ፡ ለክሙ።
14 አሌ፡ ለክሙ፡ እለ፡ ታበጥሉ፡ ነገረ፡ ጻድቃን፡ እስመ፡ ኢይከውን፡ ለክሙ፡ ተስፋ፡ ሕይወት።
15 አሌ፡ ለክሙ፡ እለ፡ ትጽሕፉ፡ ነገረ፡ ሐሰት፡ ወነገረ፡ ረሲዓን፡ እስመ፡ ውእቶሙ፡ ይጽሕፉ፡ ሐሰቶሙ፡ ከመ፡ ይስምዕዋ፡ ወኢይርስዕዋ፡ ለእበድ፡ ወኢይከውን፡ ሎሙ፡ ሰላም፡ አላ፡ ሞተ፡ ይመውቱ፡ ወኢይጐነድዩ።
=== chapter 99 ===
[Chapter 99]
1 አሌ፡ ለክሙ፡ እለ፡ ትገብሩ፡ ርስዕናተ፡ ወነገረ፡ ሐሰት፡ ይሴብሑ፡ ወያከብሩ፡ ተሀጐልክሙ፡ ወአልብክሙ፡ ሕይወት፡ ወሠናይተ።
2 አሌ፡ ለክሙ፡ እለ፡ ትዌልጥዎን፡ ለነገራተ፡ ርትዕ፡ ወሥርዐተ፡ እንተ፡ ለዓለም፡ የዐልዉ፡ ወይሬስዩ፡ ርእሶሙ፡ ዘኢኮኑ፡ ኃጥኣነ፡ ዲበ፡ ምድር፡ ሀለዉ፡ ይትከየዱ።
3 በእማንቱ፡ መዋዕል፡ ተደለዉ፡ ጻድቃን፡ ከመ፡ ትንሥኡ፡ ጸሎታቲክሙ፡ ለተዝካር፡ ወአንብርዎሙ፡ ሰማዕተ፡ በቅድመ፡ መላእክት፡ ከመ፡ ያነብርዎ፡ ለኀጢአተ፡ ኃጥኣን፡ ቅድመ፡ ልዑል፡ ለተዝካር።
4 ወበእማንቱ፡ መዋዕል፡ ይትሀወኩ፡ አሕዛብ፡ ወይትነሥኡ፡ አዝማደ፡ አሕዛብ፡ በዕለት፡ እንተ፡ ሀጕል።
5 ወበእማንቱ፡ መዋዕል፡ እለ፡ ይጼነሱ፡ ይወፅኡ፡ ወይመሥጡ፡ ደቂቆሙ፡ ወይገድፍዎሙ፡ ለደቂቆሙ፡ ወእምኔሆሙ፡ ይድኅፁ፡ ውሉዶሙ፡ ወእንዘ፡ ይጠብዉ፡ ይገድፍዎሙ፡ ወኢይገብኡ፡ ኀቤሆሙ፡ ወኢይምሕርዎሙ፡ ለፍቁራኒሆሙ።
6 ወካዕበ፡ አነ፡ እምሕል፡ ለክሙ፡ ለኃጥኣን፡ እስመ፡ ለዕለተ፡ ደም፡ ዘኢየሀድእ፡ ተደለወት፡ ኀጢአት።
7 ወይሰግዱ፡ ለእብን፡ ወእለ፡ ይገልፉ፡ ምስለ፡ ዘወርቅ፡ ወዘብሩር፡ ወዘዕፅ፡ ወዘልሕኵት፡ ወእለ፡ ይሰግዱ፡ ለነፍሳት፡ ርኩሳን፡ ወለእኩያን፡ አጋንንት፡ ወለኵሉ፡ ጣዖት፡ ወለምሕራማት፡ ወኵሉ፡ ረድኤት፡ ኢይትረከብ፡ እምኔሆሙ።
8 ወይትረስዑ፡ በእንተ፡ እበደ፡ ልቦሙ፡ ወይጼለላ፡ አዕይንቲሆሙ፡ በፍርሀተ፡ ልቦሙ፡ ወበርእየ፡ አሕላሞሙ።
9 ቦሙ፡ ይረስዑ፡ ወይፈርሁ፡ እስመ፡ ኵሎ፡ ግብሮሙ፡ በሐሰት፡ ገብሩ፡ ወሰገዱ፡ ለእብን፡ ወይትሀጐሉ፡ በምዕር።
10 ወበእማንቱ፡ መዋዕል፡ ብፁዓን፡ ኵሎሙ፡ እለ፡ ይትሜጠዉ፡ ነገረ፡ ጥበብ፡ ወየአምርዋ፡ ወይገብርዎን፡ ለፍናዋተ፡ ልዑል፡ ወየሐውሩ፡ በፍኖተ፡ ጽድቅ፡ ወኢይረስዑ፡ ምስለ፡ እለ፡ ይረስዑ፡ እስመ፡ እሙንቱ፡ ይድኅኑ።
11 አሌ፡ ለክሙ፡ እለ፡ ትሰፍሕዋ፡ ለእኪት፡ ለቢጽክሙ፡ እስመ፡ በሲኦል፡ ትትቀተሉ።
12 አሌ፡ ለክሙ፡ እለ፡ ትገብርዎ፡ ለመሠረተ፡ ኀጢአት፡ ወጕሕሉት፡ ወእለ፡ ታመርሩ፡ ዲበ፡ ምድር፡ እስመ፡ ቦቱ፡ ይትዌድኡ።
13 አሌ፡ ለክሙ፡ እለ፡ ትነድቁ፡ አብያቲክሙ፡ በጻማ፡ ባዕድ፡ ወኵሉ፡ መንድቆሙ፡ ግንፋል፡ ወእብነ፡ ኀጢአት፡ እብለክሙ፡ ከመ፡ አልብክሙ፡ ሰላመ።
14 አሌ፡ ሎሙ፡ ለእለ፡ ይሜንኑ፡ መስፈርተ፡ ወርስተ፡ አበዊሆሙ፡ እንተ፡ ለዓለም፡ ወያተልዉ፡ ነፍሶሙ፡ ድኅረ፡ ጣዖት፡ እስመ፡ ኢይከውን፡ ሎሙ፡ ዕረፍት።
15 አሌ፡ ለክሙ፡ እለ፡ ትገብርዋ፡ ለዐመፃ፡ ወትረድእዋ፡ ለግፍዕ፡ ወትቀትሉ፡ ቢጸክሙ፡ እስከ፡ ዕለተ፡ ኵነኔ፡ ዐባይ።
16 ወያወድቅ፡ ስብሐቲክሙ፡ ወይወዲ፡ እከየ፡ ውስተ፡ ልብክሙ፡ ወያነሥእ፡ መንፈሰ፡ መዓቱ፡ ያህጕልክሙ፡ ለኵልክሙ፡ በሰይፍ፡ ወኵሎሙ፡ ጻድቃን፡ ወቅዱሳን፡ ይዜክሩ፡ ኀጢአተ፡ ዚኣክሙ።
=== chapter 100 ===
[Chapter 100]
1 ወበእማንቱ፡ መዋዕል፡ በአሐዱ፡ መካን፡ አበው፡ ምስለ፡ ውሉዶሙ፡ ይትጓድኡ፡ ወአኀው፡ ምስለ፡ ቢጾሙ፡ ይወድቁ፡ በሞት፡ እስከ፡ ይውሕዝ፡ ከመ፡ ተከዚ፡ እምደመ፡ ዚኣሆሙ።
2 እስመ፡ ብእሲ፡ ኢይከልእ፡ እዴሁ፡ እምውሉዱ፡ ወእምውሉደ፡ ውሉዱ፡ ምሒረ፡ ከመ፡ ይቅትሎ፡ ወኃጥእ፡ ኢይከልእ፡ እዴሁ፡ እምነ፡ እኁሁ፡ ክቡር፡ እምጎህ፡ እስከ፡ የዐርብ፡ ፀሓይ፡ ወይትቃተሉ።
3 ወየሐውር፡ ፈረስ፡ እስከ፡ እንግድዓሁ፡ ውስተ፡ ደመ፡ ኃጥኣን፡ ወሠረገላ፡ እስከ፡ መልዕልታ፡ ትሰጠም።
4 ወበእማንቱ፡ መዋዕል፡ መላእክት፡ ይወርዱ፡ ውስተ፡ ምኅባኣት፡ ወያገብእዎሙ፡ በአሐዱ፡ መካን፡ ለኵሎሙ፡ ለእለ፡ ያረድእዋ፡ ለኀጢአት፡ ወይትነሣእ፡ ልዑል፡ በይእቲ፡ ዕለት፡ ከመ፡ ይግበር፡ ኵነኔ፡ ዐቢየ፡ እምኵሎሙ፡ ለኃጥኣን።
5 ወዐቀብተ፡ ይሁብ፡ ዲበ፡ ኵሎሙ፡ ጻድቃን፡ ወቅዱሳን፡ እመላእክት፡ ቅዱሳን፡ ወየዐቅብዎሙ፡ ከመ፡ ብንተ፡ ዐይን፡ እስከ፡ ይትዌዳእ፡ ኵሉ፡ እከይ፡ ወኵሉ፡ ኀጢአት፡ ወእመኒ፡ ይነውሙ፡ ጻድቃን፡ ንዋመ፡ ነዋኀ፡ ይነውሙ፡ ወአልቦሙ፡ ዘይፈርሁ።
6 ወእሙነ፡ ይሬእዩ፡ ሰብእ፡ ጠቢባን፡ ወይሌብዉ፡ ውሉደ፡ ምድር፡ ኵሎ፡ ነገረ፡ ዛቲ፡ መጽሐፍ፡ ወየአምሩ፡ ከመ፡ ኢይክል፡ ብዕሎሙ፡ አድኅኖቶሙ፡ በሙዳቀ፡ ኀጢአቶሙ።
7 አሌ፡ ለክሙ፡ ኃጥኣን፡ ሶበ፡ ታመነድብዎሙ፡ ለጻድቃን፡ በዕለተ፡ ጻሕብ፡ ኀያል፡ ወታነድድዎሙ፡ በእሳት፡ ወትትፈደዩ፡ በከመ፡ ምግባሪክሙ።
8 አሌ፡ ለክሙ፡ ግፍቱዓነ፡ ልብ፡ እለ፡ ትተግሁ፡ ከመ፡ ትለብውዎ፡ ለእኩይ፡ ወሀለወክሙ፡ ይርከብክሙ፡ ፍርሀት፡ ወአልቦ፡ ዘይረድአክሙ።
9 አሌ፡ ለክሙ፡ ኃጥኣን፡ እስመ፡ ዲበ፡ ቃለ፡ አፉክሙ፡ ወዲበ፡ ተግባረ፡ እደዊክሙ፡ እለ፡ ግብረ፡ ረሳዕክሙ፡ በዋዕየ፡ ላህበ፡ እሳት፡ ትውዕዩ።
10 ወይእዜኒ፡ አእምሩ፡ እስመ፡ እመላእክት፡ ይትኀሠሥ፡ ምግባሪክሙ፡ በሰማይ፡ እምፀሓይ፡ ወእምወርኅ፡ ወእምከዋክብት፡ በእንተ፡ ኀጢአተ፡ ዚኣክሙ፡ እስመ፡ በዲበ፡ ምድር፡ ትገብሩ፡ ኀበ፡ ጻድቃን፡ ኵነኔ።
11 ወያሰምዕ፡ ላዕሌክሙ፡ ኵሎ፡ ደመና፡ ወጊሜ፡ ወጠለ፡ ወዝናመ፡ እስመ፡ ሀለዉ፡ ኵሎሙ፡ ይትከልኡ፡ እምኔክሙ፡ ከመ፡ ኢይረዱ፡ ዲቤክሙ፡ ወኢይኄልዩ፡ ዲበ፡ ኀጢአትክሙ።
12 ወይእዜኒ፡ ሀቡ፡ አምኃ፡ ለዝናም፡ ከመ፡ ኢትትከላእ፡ ወሪደ፡ ዲቤክሙ፡ ወጠል፡ እመ፡ ተመጠወ፡ እምኔክሙ፡ ወርቀ፡ ወብሩረ፡ ከመ፡ ይረድ፡ ሶበ፡ ይወድቅ፡ እምኔክሙ፡ አስሐትያ፡ ወሐመዳ፡ ወቍረ፡ ዚኣሆሙ፡ ወኵሎሙ፡ ነፋሳተ፡ ሐመዳ፡ ወኵሎ፡ ጻዕራተ፡ ዚኣሆሙ፡ በእማንቱ፡ መዋዕል፡ ኢትክሉ፡ ቀዊመ፡ ቅድሜሆሙ።
=== chapter 101 ===
[Chapter 101]
1 ጠይቅዋ፡ ለሰማይ፡ ኵልክሙ፡ ውሉደ፡ ሰማይ፡ ወኵሎ፡ ግብሮ፡ ለልዑል፡ ወፍርሁ፡ እምኔሁ፡ ወኢትግበሩ፡ እኩየ፡ በቅድሜሁ።
2 እመ፡ ዐጸወ፡ መስኮተ፡ ሰማይ፡ ወከልአ፡ ዝናመ፡ ወጠለ፡ ከመ፡ ኢይረድ፡ ዲበ፡ ምድር፡ በእንቲኣክሙ፡ ሚ፡ ሀለወክሙ፡ ትግበሩ።
3 ወእመ፡ ፈነወ፡ መዓቶ፡ ዲቤክሙ፡ ወዲበ፡ ኵሉ፡ ምግባሪክሙ፡ አኮኑ፡ አንትሙ፡ ዘታስተበቍዕዎ፡ እስመ፡ ትትናገሩ፡ ዲበ፡ ጽድቀ፡ ዚኣሁ፡ ዐቢያተ፡ ወጽኑዓተ፡ ወአልብክሙ፡ ሰላም።
4 ኢትሬእይዎሙኑ፡ ለነገሥተ፡ አሕማር፡ እለ፡ ይትሀወኩ፡ እሞገድ፡ ወያንቀለቅሉ፡ እምነፋሳት፡ አሕማሮሙ፡ ወይትመነደቡ።
5 ወበእንተ፡ ዝንቱ፡ ይፈርሁ፡ እስመ፡ ኵሉ፡ ንዋዮሙ፡ ሠናይ፡ ይወፅእ፡ ውስተ፡ ባሕር፡ ምስሌሆሙ፡ ወሠናየ፡ ኢይኄልዩ፡ በልቦሙ፡ እስመ፡ ባሕር፡ ትውኅጦሙ፡ ወይትሀጐሉ፡ ውስቴታ።
6 አኮኑ፡ ኵሉ፡ ባሕር፡ ወኵሉ፡ ማያቲሃ፡ ወኵሉ፡ ሑሰታ፡ ግብረ፡ ልዑል፡ ውእቱ፡ ወውእቱ፡ ኵሎ፡ ግብረታ፡ ወማያቲሃ፡ ኀተመ፡ ወአሰረ፡ ኵለንታሃ፡ በኆጻ።
7 ወበተግሣጹ፡ ትየብስ፡ ወትፈርህ፡ ወኵሉ፡ ዓሣቲሃ፡ ይመውቱ፡ ወኵሉ፡ ዘሀሎ፡ ውስቴታ፡ ወአንትሙሰ፡ ኃጥኣን፡ እለ፡ ውስተ፡ ምድር፡ ኢትፍርህዎ።
8 አኮኑ፡ ውእቱ፡ ገብረ፡ ሰማየ፡ ወምድረ፡ ወኵሉ፡ ዘሀሎ፡ ውስቴቶሙ፡ ወመኑ፡ ወሀበ፡ ትምህርተ፡ ወጥበበ፡ ለኵሎሙ፡ እለ፡ ይትሐወሱ፡ ዲበ፡ ምድር፡ ወለእለ፡ ውስተ፡ ባሕር።
9 አኮኑ፡ ውእቶሙ፡ ነገሥተ፡ አሕማር፡ ይፈርህዎ፡ ለባሕር፡ ወኃጥኣንሰ፡ ኢይፈርህዎ፡ ለልዑል።
=== chapter 102 ===
[Chapter 102]
1 ወበእማንቱ፡ መዋዕል፡ ለእመ፡ ወደየ፡ ዲቤክሙ፡ እሳተ፡ ዕጹበ፡ በአይቴ፡ ትነፍጹ፡ ወበአይቴ፡ ትድኅኑ፡ ወሶበ፡ ይወዲ፡ ቃሎ፡ ዲቤክሙ፡ አኮኑ፡ ትትመሀከዉ፡ ወትፈርሁ።
2 ወኵሎሙ፡ ብርሃናት፡ ይትመሀከዉ፡ ወይትሀወኩ፡ በፍርሀት፡ ዐቢይ፡ ወኵላ፡ ምድር፡ ትትመሀከው፡ በፍርሀት፡ ዐቢይ፡ ወትርዕድ፡ ወትጔጕእ።
3 ወኵሎሙ፡ መላእክት፡ ይፌጽሙ፡ ትእዛዞሙ፡ ወይፈቅዱ፡ ከመ፡ ይትኀብኡ፡ እምቅድመ፡ ዐቢይ፡ ስብሐት፡ ወይርዕዱ፡ ደቂቀ፡ ምድር፡ ወይትሀወኩ፡ ወአንትሙ፡ ኃጥኣን፡ ርጉማን፡ ለዓለም፡ ወአልብክሙ፡ ሰላመ።
4 ኢትፍርሁ፡ አንትሙ፡ ነፍሳተ፡ ጻድቃን፡ ወተሰፈዉ፡ እለ፡ ሞትክሙ፡ በጽድቅ።
5 ወኢትሕዝኑ፡ እስመ፡ ወረደት፡ ነፍስክሙ፡ ውስተ፡ ዐቢይ፡ ምንዳቤ፡ ወገዓር፡ ወናእክ፡ ወውስተ፡ ሲኦል፡ በሐዘን፡ ወኢረከበ፡ ሥጋክሙ፡ በሕይወትክሙ፡ በከመ፡ ኂሩትክሙ፡ አላ፡ እንከ፡ በዕለት፡ እንተ፡ ባቲ፡ ኮንክሙ፡ ኃጥኣነ፡ ወበዕለተ፡ መርገም፡ ወመቅሠፍት።
6 ወሶበ፡ ትመውቱ፡ ይብሉ፡ ኃጥኣን፡ በላዕሌክሙ፡ ከመ፡ ሞትነ፡ ሞቱ፡ ጻድቃን፡ ወምንት፡ ኮነ፡ በቍዔቶሙ፡ በምግባሮሙ።
7 ነዋ፡ ከማነ፡ ሞቱ፡ በሐዘን፡ ወበጽልመት፡ ወምንት፡ ፍድፋዶሙ፡ እምኔነ፡ እምይእዜ፡ ተዐረይነ።
8 ወምንተ፡ ይነሥኡ፡ ወምንተ፡ ይሬእዩ፡ ለዓለም፡ እስመ፡ እሙንቱሂ፡ ነዋ፡ ሞቱ፡ ወእምይእዜ፡ ለዓለም፡ ኢይሬእዩ፡ ብርሃነ።
9 እብለክሙ፡ አንትሙ፡ ኃጥኣን፡ አከለክሙ፡ በሊዕ፡ ወሰትይ፡ ሀይድ፡ ወኀጢአት፡ ወአዕርቆተ፡ ሰብእ፡ ወአጥርዮተ፡ ንዋይ፡ ወርእዮተ፡ መዋዕል፡ ሠናያት።
10 ርኢክምዎሙኑ፡ ለጻድቃን፡ እፎ፡ ኮነ፡ ተፍጻሜቶሙ፡ ሰላመ፡ እስመ፡ ኵሉ፡ ግፍዕ፡ ኢተረክበ፡ በላዕሌሆሙ፡ እስከ፡ ዕለተ፡ ሞቶሙ።
11 ወተሀጕሉ፡ ወኮኑ፡ ከመ፡ ዘኢኮኑ፡ ወወረዱ፡ ውስተ፡ ሲኦል፡ ነፍሳቲሆሙ፡ በምንዳቤ።
=== chapter 103 ===
[Chapter 103]
1 ወይእዜኒ፡ አነ፡ እምሕል፡ ለክሙ፡ ለጻድቃን፡ በዐቢይ፡ ስብሐቱ፡ ወክብሩ፡ ወበክቡር፡ መንግሥቱ፡ ወበዕበዩ፡ እምሕል፡ ለክሙ።
2 እስመ፡ አነ፡ ኣአምር፡ ዘንተ፡ ምሥጢረ፡ ወአንበብኩ፡ በጸፍጸፈ፡ ሰማይ፡ ወርኢኩ፡ ጽሕፈተ፡ ቅዱሳን፡ ወረከብኩ፡ ጽሑፈ፡ ውስቴቶሙ፡ ወልኩዐ፡ በእንቲኣሆሙ።
3 እስመ፡ ኵሉ፡ ሠናይ፡ ወፍሥሓ፡ ወክብር፡ ተደለወ፡ ሎሙ፡ ወተጽሕፈ፡ ለመናፍስቲሆሙ፡ ለእለ፡ ሞቱ፡ በጽድቅ፡ ወበርትዕ፡ ወበብዙኅ፡ ሠናይ፡ ይትወሀብ፡ ለክሙ፡ ተክለ፡ ጻማክሙ፡ ወክፍልክሙ፡ ፈድፈደ፡ እምክፍለ፡ ሕያዋን።
4 ወየሐዩ፡ መንፈሰክሙ፡ ለእለ፡ ሞትክሙ፡ በጽድቅ፡ ወይትፌሥሑ፡ ወይትሐሠዩ፡ መናፍስቲሆሙ፡ ወተዝካሮሙ፡ እምቅድመ፡ ገጹ፡ ለዐቢይ፡ ለኵሉ፡ ትውልደ፡ ዓለም፡ ወይእዜኒ፡ ኢትፍርህዎ፡ ለኀሳሮሙ።
5 አሌ፡ ለክሙ፡ ኃጥኣን፡ ሶበ፡ ትመውቱ፡ በኀጢአትክሙ፡ ወይብሉ፡ በእንቲኣክሙ፡ እለ፡ ከማክሙ፡ ብፁዓን፡ እሙንቱ፡ ኃጥኣን፡ ኵሎ፡ መዋዕሊሆሙ፡ ርእዩ።
6 ወይእዜኒ፡ ሞቱ፡ በሠናይ፡ ወበብዕል፡ ወምንዳቤ፡ ወቀትለ፡ ኢርእዩ፡ በሕይወቶሙ፡ ወበስብሐት፡ ሞቱ፡ ወኵነኔ፡ ኢተገብረ፡ ሎሙ፡ በሕይወቶሙ።
7 ኢተአምርዎሙኑ፡ እስመ፡ ውስተ፡ ሲኦል፡ ያወርድዎሙ፡ ለነፍሳቲሆሙ፡ ወእኩያተ፡ ይከውና፡ ምንዳቤሆሙ፡ ዐቢየ።
8 ወበጽልመት፡ ወበመርበብት፡ ወበላህብ፡ ዘይነድድ፡ ኀበ፡ ኵነኔ፡ ዐባይ፡ ትበውእ፡ መንፈሰክሙ፡ ወኵነኔ፡ ዐባይ፡ ትከውን፡ ለኵሉ፡ ትውልድ፡ እስከ፡ ለዓለም፡ አሌ፡ ለክሙ፡ እስመ፡ አልብክሙ፡ ሰላመ።
9 ኢትበልዎሙ፡ ለጻድቃን፡ ወለኄራን፡ እለ፡ ሀለዉ፡ ውስተ፡ ሕይወት፡ በመዋዕለ፡ ሥራሕነ፡ ጻማ፡ ጻመውነ፡ ወኵሎ፡ ሥራሐ፡ ርኢነ፡ ወእኩያተ፡ ብዙኃተ፡ ረከብነ፡ ወተወዳእነ፡ ወውኅድነ፡ ወንእሰት፡ መንፈሰነ።
10 ወተሀጐልነ፡ ወአልቦ፡ ዘረድአነ፡ በነገር፡ ወበምግባር፡ ስእነ፡ ወኢ፡ ምንተኒ፡ ኢረከብነ፡ ወተጽዕርነ፡ ወተሀጐልነ፡ ወኢተሰፈውነ፡ ከመ፡ ንርአይ፡ ሕይወተ፡ ዕለተ፡ እምዕለት።
11 ወተሰፈውነ፡ ከመ፡ ንኩን፡ ርእሰ፡ ወኮነ፡ ዘነበ፡ ጻመውነ፡ እንዘ፡ ንትጌበር፡ ወኢሠለጥነ፡ ዲበ፡ ጻማነ፡ ወኮነ፡ መባልዕተ፡ ለኃጥኣን፡ ወዐማፅያን፡ አክበዱ፡ ላዕሌነ፡ አርዑተ፡ ዚኣሆሙ።
12 ወተሠልጡ፡ ዲቤነ፡ እለ፡ ይጸልኡነ፡ ወእለ፡ ይደጕጹነ፡ ወለእለ፡ ይጸልኡነ፡ አትሐትነ፡ ክሳደነ፡ ወኢመሐሩነ።
13 ወፈቀድነ፡ ንሑር፡ እምኔሆሙ፡ ከመ፡ ንንፍጽ፡ ወናዕርፍ፡ ወኢረከብነ፡ ኀበ፡ ንጐይይ፡ ወንድኅን፡ እምኔሆሙ።
14 ወሰከይናሆሙ፡ ኀበ፡ መላእክት፡ በምንዳቤነ፡ ወጸራሕነ፡ ዲበ፡ እለ፡ ይበልዑነ፡ ወጽራሐ፡ ዚኣነ፡ ኢይሬእዩ፡ ወኢይፈቅዱ፡ ከመ፡ ይስምዑ፡ ቃለነ።
15 ወይረድእዎሙ፡ ለእለ፡ የሀይዱነ፡ ወይበልዑነ፡ ወለእለ፡ አውኀዱነ፡ ወየኀብኡ፡ ግፍዖሙ፡ ወኢያወፅኡ፡ እምኔነ፡ አርዑቶሙ፡ እለ፡ ይበልዑነ፡ ወይዘረዝሩነ፡ ወይቀትሉነ፡ ወየኀብኡ፡ ቀትለነ፡ ወኢተዘከሩ፡ ከመ፡ ያንሥኡ፡ እደዊሆሙ፡ ላዕሌነ።
=== chapter 104 ===
[Chapter 104]
1 እምሕል፡ ለክሙ፡ ጻድቃን፡ እስመ፡ በሰማይ፡ ይዜከሩ፡ መላእክት፡ በእንቲኣክሙ፡ ለሠናይ፡ በቅድመ፡ ስብሐቲሁ፡ ለዐቢይ፡ ወአስማቲክሙ፡ ይጸሐፉ፡ በቅድመ፡ ስብሐቲሁ፡ ለዐቢይ።
2 ተሰፈዉ፡ እስመ፡ በቀዳሚ፡ ኀሰርክሙ፡ በእከይ፡ ወበሥራሕ፡ ወይእዜኒ፡ ትበርሁ፡ ከመ፡ ብርሃነ፡ ሰማይ፡ ወትትረአዩ፡ ወኆኅተ፡ ሰማይ፡ ይትረኀው፡ ለክሙ።
3 ወጽራሐ፡ ዚኣክሙ፡ ኵነኔ፡ ጽርሑ፡ ወያስተርኢ፡ ለክሙ፡ እስመ፡ እምነ፡ መላእክት፡ ይትኅሠሥ፡ ኵሎ፡ ምንዳቤክሙ፡ ወእምኵሎሙ፡ እለ፡ አርድእዎሙ፡ ለእለ፡ የሀይዱክሙ።
4 ተሰፈዉ፡ ወኢትኅድጉ፡ ተስፋክሙ፡ እስመ፡ ትከውን፡ ለክሙ፡ ፍሥሓ፡ ዐባይ፡ ከመ፡ መላእክት፡ በሰማይ።
5 እንተ፡ ሀለወክሙ፡ ትግበሩ፡ አኮ፡ ከመ፡ ትትኀብኡ፡ ሀለወክሙ፡ በዕለተ፡ ኵነኔ፡ ዐባይ፡ ወኢትትረከቡ፡ ከመ፡ ኃጥኣን፡ ወኵነኔ፡ እንተ፡ ለዓለም፡ ትከውን፡ እምኔክሙ፡ ለኵሉ፡ ትውልደ፡ ዓለም።
6 ወይእዜኒ፡ ኢትፍርሁ፡ ጻድቃን፡ ሶበ፡ ትሬእይዎሙ፡ ለኃጥኣን፡ ይጸንዑ፡ ወይዴለዉ፡ በፍትወቶሙ፡ ወኢትኩኑ፡ ሱቱፋነ፡ ምስሌሆሙ፡ አላ፡ ረሐቁ፡ እምግፍዐ፡ ዚኣሆሙ፡ እስመ፡ ለሐራ፡ ሰማይ፡ ሀለወክሙ፡ ትኩኑ፡ ሱቱፋነ።
7 እስመ፡ ትብሉ፡ አንትሙ፡ ኃጥኣን፡ ኢይትኀሠሡ፡ ወኢይጸሐፍ፡ ኵሉ፡ ኀጢአትነ፡ ይጽሐፉ፡ ሀለዉ፡ ኵሎ፡ ኀጢአተክሙ፡ በኵሉ፡ ዕለት።
8 ወይእዜኒ፡ አነ፡ ኣርእየክሙ፡ እስመ፡ ብርሃን፡ ወጽልመት፡ ዕለት፡ ወሌሊት፡ ይሬእዩ፡ ኵሎ፡ ኀጢአተክሙ።
9 ወኢትርስዑ፡ በልብክሙ፡ ወኢተሐስዉ፡ ወኢትሚጥዎ፡ ለነገረ፡ ርትዕ፡ ወኢተሐስውዎ፡ ለነገረ፡ ቅዱስ፡ ወዐቢይ፡ ወኢትሰብሕዎ፡ ለጣዖትክሙ፡ እስመ፡ ኢኮነት፡ ኵላ፡ ሐሰትክሙ፡ ወኵሉ፡ ርስዐትክሙ፡ ለጽድቅ፡ አላ፡ ለኀጢአት፡ ዐቢይ።
10 ወይእዜኒ፡ አነ፡ ኣአምሮ፡ ለዝንቱ፡ ምሥጢር፡ እስመ፡ ነገረ፡ ርትዕ፡ ይመይጡ፡ ወየዐልዉ፡ ብዙኃን፡ ኃጥኣን፡ ወይትናገሩ፡ ነገራት፡ እኩያተ፡ ወይሔስዉ፡ ወይፈጥሩ፡ ፍጥረታተ፡ ዐቢያተ፡ ወመጻሕፍተ፡ ይጽሕፉ፡ ዲበ፡ ነገራቲሆሙ።
11 ወሶበሰ፡ ኵሎ፡ ነገራትየ፡ ይጽሕፉ፡ በርትዕ፡ ዲበ፡ ልሳናቲሆሙ፡ ወኢይዌልጡ፡ ወኢየሐጽጹ፡ እምነገራትየ፡ አላ፡ ኵሎ፡ በርትዕ፡ ይጽሕፉ፡ ኵሎ፡ ዘቀዳሚ፡ አስማዕኩ፡ በእንቲኣሆሙ።
12 ወካልአ፡ ምሥጢረ፡ ኣአምር፡ እስመ፡ ለጻድቃን፡ ወለጠቢባን፡ ይትወሀባ፡ መጻሕፍት፡ ለፍሥሓ፡ ወለርትዕ፡ ወለጥበብ፡ ብዙኅ።
13 ወሎሙ፡ ይትወሀባ፡ መጻሕፍት፡ ወእሙንቱ፡ የአምኑ፡ ቦሙ፡ ወይትፌሥሑ፡ ቦሙ፡ ወይትሐሠዩ፡ ኵሎሙ፡ ጻድቃን፡ እለ፡ እምኔሆሙ፡ አእመሩ፡ ኵሎ፡ ፍናዋተ፡ ርትዕ።
=== chapter 105 ===
[Chapter 105]
1 ወበእማንቱ፡ መዋዕል፡ ይቤ፡ እግዚእ፡ ከመ፡ ይጸውዑ፡ ወያስምዑ፡ ለውሉደ፡ ሰብእ፡ በጥበቦሙ፡ አርእዩ፡ ሎሙ፡ እስመ፡ አንትሙ፡ መራሕያኒሆሙ፡ ወዕሴያተ፡ ዲበ፡ ኵሉ፡ ምድር።
2 እስመ፡ አነ፡ ወወልድየ፡ ንዴመር፡ ምስሌሆሙ፡ ለዓለም፡ በፍናዋተ፡ ርትዕ፡ በሕይወቶሙ፡ ወሰላመ፡ ይከውን፡ ለክሙ፡ ተፈሥሑ፡ ውሉደ፡ ርትዕ፡ በአማን።
=== chapter 106 ===
[Chapter 106]
1 ወእምድኅረ፡ መዋዕል፡ ነሥአ፡ ወልድየ፡ ማቱሳላ፡ ለወልዱ፡ ላሜህ፡ ብእሲተ፡ ወፀንሰት፡ እምኔሁ፡ ወወለደት፡ ወልደ።
2 ወኮነ፡ ሥጋሁ፡ ጸዐዳ፡ ከመ፡ አስሐትያ፡ ወቀይሕ፡ ከመ፡ ጽጌ፡ ረዳ፡ ወጸጕረ፡ ርእሱ፡ ከመ፡ ፀምር፡ ጸዐዳ፡ ወድምድማሁ፡ ወሠናይ፡ አዕይንቲሁ፡ ወሶበ፡ ከሠተ፡ አዕይንቲሁ፡ አብርሃ፡ ኵላ፡ ቤተ፡ ከመ፡ ፀሓይ፡ ወፈድፋደ፡ በርሀ፡ ኵሉ፡ ቤት።
3 ወሶበ፡ ተንሥአ፡ እምእዴሃ፡ ለመወለዲት፡ ከሠተ፡ አፉሁ፡ ወተናገረ፡ ስብሐቲሁ፡ ለእግዚአ፡ ጽድቅ።
4 ወፈርሀ፡ ላሜህ፡ አቡሁ፡ እምኔሁ፡ ወጐየ፡ ወመጽአ፡ ኀበ፡ አቡሁ፡ ማቱሳላ።
5 ወይቤሎ፡ አነ፡ ወለድኩ፡ ወልደ፡ ውሉጠ፡ ወኢኮነ፡ ከመ፡ ሰብእ፡ ወይመስል፡ ደቂቀ፡ መላእክተ፡ ሰማይ፡ ወፍጥረቱ፡ ካልእት፡ ወኢኮነ፡ ከማነ፡ ወአዕይንቲሁ፡ ከመ፡ እገሪሁ፡ ለፀሓይ፡ ወገጹ፡ ስቡሕ።
6 ወይመስለኒ፡ ከመ፡ ኢኮነ፡ እምኔየ፡ አላ፡ እመላእክት፡ ውእቱ፡ ወእፈርህ፡ ከመ፡ ኢይትገበር፡ መንክር፡ በመዋዕሊሁ፡ ዲበ፡ ምድር።
7 ወይእዜኒ፡ ሀሎኩ፡ አቡየ፡ ኣስተበቍዐከ፡ ወእስእል፡ እምኀቤከ፡ ከመ፡ ትሑር፡ ኀበ፡ ሄኖክ፡ አቡነ፡ ወትስማዕ፡ እምኀቤሁ፡ አማነ፡ እስመ፡ ውእቱ፡ ምስለ፡ መላእክት፡ ምንባሩ።
8 ወሶበ፡ ሰምዐ፡ ማቱሳላ፡ ነገረ፡ ወልዱ፡ መጽአ፡ ኀቤየ፡ ውስተ፡ አጽናፈ፡ ምድር፡ እስመ፡ ሰምዐ፡ ከመ፡ ህየ፡ ሀሎኩ፡ ወጸርሐ፡ ወሰማዕኩ፡ ቃሎ፡ ወመጻእኩ፡ ኀቤሁ፡ ወእቤሎ፡ ናሁ፡ ሀለውኩ፡ ወልድየ፡ እስመ፡ መጻእከ፡ ኀቤየ።
9 ወአውሥአኒ፡ ወይቤ፡ በእንተ፡ ነገር፡ ዐቢይ፡ መጻእኩ፡ ኀቤከ፡ ወበእንተ፡ ራእይ፡ ዕጹብ፡ በዘቀረብኩ።
10 ወይእዜኒ፡ አቡየ፡ ስምዐኒ፡ እስመ፡ ተወልደ፡ ለላሜህ፡ ወልድየ፡ ወልድ፡ ዘኢኮነ፡ አምሳሉ፡ ወፍጥረቱ፡ ከመ፡ ፍጥረተ፡ ሰብእ፡ ወኅብሩ፡ ይጸዐዱ፡ እምአስሐትያ፡ ወይቀይሕ፡ እምጽጌ፡ ረዳ፡ ወጸጕረ፡ ርእሱ፡ ይጸዐዱ፡ እምፀምር፡ ጸዐዳ፡ ወአዕይንቲሁ፡ ከመ፡ እገሪሁ፡ ለፀሓይ፡ ወሶበ፡ ከሠተ፡ አዕይንቲሁ፡ አብርሃ፡ ኵላ፡ ቤተ።
11 ወተንሥአ፡ እምውስተ፡ እዴሃ፡ ለመወለዲት፡ ወፈትሐ፡ አፉሁ፡ ወባረኮ፡ ለእግዚአ፡ ሰማይ።
12 ወፈርሀ፡ አቡሁ፡ ላሜህ፡ ወልድየ፡ ወጐየ፡ ኀቤየ፡ ወኢአምነ፡ ከመ፡ እምኔሁ፡ ውእቱ፡ አላ፡ አምሳሉ፡ እመላእክተ፡ ሰማይ፡ ወይቤለኒ፡ ናሁ፡ መጻእኩ፡ ኀቤከ፡ ከመ፡ ታይድዐኒ፡ ጽድቀ።
13 ወአውሣእኩ፡ አነ፡ ሄኖክ፡ በእንቲኣሁ፡ ወእቤሎ፡ ይሔድስ፡ እግዚእ፡ ሐዳሳተ፡ ዲበ፡ ምድር፡ ወይገብር፡ ወዘንተ፡ ወፃእኩ፡ ርኢኩ፡ በራእይ፡ ወአይዳዕኩከ፡ እስመ፡ ቤተ፡ ወልዱ፡ ለያሬድ፡ አቡየ፡ አኅለፉ፡ ነግሮ፡ ለእግዚእ፡ እመልዕልተ፡ ሰማይ።
14 ወነዮሙ፡ ይገብሩ፡ ኀጢአተ፡ ወየኀልፉ፡ ሥርዐተ፡ ወምስለ፡ አንስት፡ ተደመሩ፡ ወምስሌሆን፡ ይገብሩ፡ ኀጢአተ፡ ወአውሰቡ፡ እምኔሆን፡ ወእምኔሆን፡ ወለዱ፡ ደቂቀ።
15 ወሀጕል፡ ዐቢይ፡ ይከውን፡ ዲበ፡ ኵሉ፡ ምድር፡ ወማየ፡ አይኅ፡ ይከውን፡ ወሀጕል፡ ዐቢይ፡ በአሐዱ፡ ዓመት፡ ይከውን።
16 ወዝ፡ ውእቱ፡ ወልድ፡ ዘተወልደ፡ ለክሙ፡ ወውእቱ፡ ይተርፍ፡ ዲበ፡ ምድር፡ ወሠለስቱ፡ ደቂቁ፡ ይድኅኑ፡ ምስሌሁ፡ ሶበ፡ ይመውቱ፡ ኵሉ፡ ሰብእ፡ ዘዲበ፡ ምድር፡ ውእቱ፡ ይድኅን፡ ወደቂቁ።
17 ይወልዱ፡ ዲበ፡ ምድር፡ እለ፡ ያርብህ፡ አኮ፡ ዘመንፈስ፡ አላ፡ ዘሥጋ፡ ወይከውን፡ መቅሠፍት፡ ዐቢይ፡ ዲበ፡ ምድር፡ ወትትኀፀብ፡ ምድር፡ እምኵሉ፡ ሙስና።
18 ወይእዜኒ፡ አይድዕ፡ ለወልድከ፡ ላሜህ፡ እስመ፡ ዘተወልደ፡ ወልዱ፡ ውእቱ፡ በጻድቅ፡ ወጸውዕ፡ ስሞ፡ ኖኅ፡ እስመ፡ ውእቱ፡ ይከውን፡ ለክሙ፡ ተረፈ፡ ወውእቱ፡ ወደቂቁ፡ ይድኅኑ፡ እሙስና፡ እንተ፡ ትመጽእ፡ ዲበ፡ ምድር፡ እምኵሉ፡ ኀጢአት፡ ወእምኵሉ፡ ዐመፃ፡ እንተ፡ ሀለወት፡ ትትፌጸም፡ ዲበ፡ ምድር፡ በመዋዕሊሁ።
19 ወእምድኅረ፡ ዝ፡ ትከውን፡ ዐመፃ፡ ፈድፋደ፡ እምእንተ፡ ተፈጸመት፡ ቀዳሚ፡ ዲበ፡ ምድር፡ እስመ፡ ኣአምር፡ ምሥጢራተ፡ ቅዱሳን፡ እስመ፡ ውእቱ፡ እግዚእ፡ አርአየኒ፡ ወአይድዐኒ፡ ወበጸፍጸፈ፡ ሰማይ፡ አንበብኩ፡ ወለበውኩ።
=== chapter 107 ===
[Chapter 107]
1 ወርኢኩ፡ ጽሑፈ፡ በላዕሌሆሙ፡ እስመ፡ ትውልድ፡ እምትውልድ፡ ትኤብስ፡ እስከ፡ ትትነሣእ፡ ትውልደ፡ ጽድቅ፡ ወአበሳ፡ ትትሀጐል፡ ወኀጢአት፡ ትትለሐስ፡ እምዲበ፡ ምድር፡ ወኵሉ፡ ሠናይ፡ ይመጽእ፡ ዲቤሃ።
2 ወይእዜኒ፡ ወልድየ፡ ሑር፡ አይድዖ፡ ለወልድከ፡ ላሜህ፡ እስመ፡ ዝ፡ ወልድ፡ ዘተወልደ፡ ወልደ፡ ዚኣሁ፡ ውእቱ፡ አማን፡ ወኢኮነ፡ ሐሰተ።
3 ወሶበ፡ ሰምዐ፡ ማቱሳላ፡ ነገረ፡ አቡሁ፡ ሄኖክ፡ እስመ፡ በኅቡእ፡ አርአዮ፡ ኵሎ፡ ግብረ፡ ወገብአ፡ ርኢዮ፡ ወሰመዮ፡ ስሞ፡ ለዝኩ፡ ወልድ፡ ኖኅ፡ እስመ፡ ውእቱ፡ ያስተፌሥሓ፡ ለምድር፡ እምኵሉ፡ ሀጕል።
=== chapter 108 ===
[Chapter 108]
1 ካልእ፡ መጽሐፍ፡ ዘጸሐፈ፡ ሄኖክ፡ ለወልዱ፡ ማቱሳላ፡ ወለእለ፡ ይመጽኡ፡ እምድኅሬሁ፡ ወየዐቅቡ፡ ሥርዐተ፡ በደኃሪ፡ መዋዕል።
2 እለ፡ ገበርክሙ፡ ወትጸንሑ፡ በእሉ፡ መዋዕል፡ እስከ፡ ይትፌጸሙ፡ እለ፡ ይገብሩ፡ እኩየ፡ ወይትፌጸም፡ ኀይሎሙ፡ ለመአብሳን።
3 አንትሙሰ፡ ጽንሑ፡ እስከ፡ ተኀልፍ፡ ኀጢአት፡ እስመ፡ ሀሎ፡ ስሞሙ፡ ይደመሰስ፡ እመጻሕፍተ፡ ቅዱሳን፡ ወዘርዖሙ፡ ይትሀጐል፡ ለዓለም፡ ወመናፍስቲሆሙ፡ ይትቀተሉ፡ ወይጸርሑ፡ ወየዐወይዉ፡ በመካነ፡ በድው፡ ዘኢያስተርኢ፡ ወበእሳት፡ ነዱ፡ እስመ፡ ኢሀሎ፡ ህየ፡ ምድር።
4 ወርኢኩ፡ በህየ፡ ከመ፡ ደመና፡ ዘኢይትረአይ፡ እስመ፡ እምዕመቁ፡ ኢክህልኩ፡ ላዕለ፡ ነጽሮ፡ ወላህበ፡ እሳት፡ እንዘ፡ ይነድድ፡ ርኢኩ፡ ስቡሕ፡ ወይትከበቡ፡ ከመ፡ አድባር፡ ስቡሓን፡ ወይትሀወኩ፡ ለፌ፡ ወለፌ።
5 ወተስእልክዎ፡ ለአሐዱ፡ እመላእክት፡ ቅዱሳን፡ እለ፡ ምስሌየ፡ ወእቤሎ፡ ምንት፡ ውእቱ፡ ዝ፡ ስቡሕ፡ እስመ፡ ኢኮነ፡ ሰማየ፡ አላ፡ ላህበ፡ እሳት፡ ባሕቲቱ፡ ዘይነድድ፡ ወቃለ፡ ጽራሕ፡ ወብካይ፡ ወዐውያት፡ ወሕማም፡ ኀያል።
6 ወይቤለኒ፡ ዝንቱ፡ መካን፡ ዘትሬኢ፡ በህየ፡ ይትወደዩ፡ መናፍስተ፡ ኃጥኣን፡ ወጽሩዓን፡ ወእለ፡ ይገብሩ፡ ኀጢአተ፡ ወእለ፡ ይመይጡ፡ ኵሎ፡ ዘነገረ፡ እግዚአብሔር፡ በአፈ፡ ነቢያቲሁ፡ እለ፡ ሀለዉ፡ ይትገበሩ፡ ዲበ፡ ምድር።
7 እስመ፡ ሀለዉ፡ እምኔሆሙ፡ ጽሑፋን፡ ወልኩዓን፡ ላዕለ፡ በሰማይ፡ ከመ፡ ያንብብዎሙ፡ መላእክት፡ ወያእምሩ፡ ዘሀሎ፡ ይብጽሖሙ፡ ለኃጥኣን፡ ወለመናፍስት፡ ትሑታን፡ ወእለ፡ አሕመሙ፡ ሥጋሆሙ፡ ወተፈድዩ፡ ዲበ፡ አምላክ፡ ወእለ፡ ኀስሩ፡ እምእኩያን፡ ሰብእ።
8 እለ፡ ያፈቅርዎ፡ ለአምላክ፡ ወኢ፡ ወርቀ፡ ወኢ፡ ብሩረ፡ ኢያፍቀሩ፡ ወኢ፡ ኵሎ፡ ሠናየ፡ ዘውስተ፡ ዓለም፡ እለ፡ ወሀቡ፡ ሥጋሆሙ፡ ለጻዕር።
9 ወእለ፡ እምአመ፡ ኮኑ፡ ኢፈተዉ፡ መባልዕተ፡ ዘዲበ፡ ምድር፡ አላ፡ ረሰዩ፡ ርእሶሙ፡ ከመ፡ መንፈስ፡ እንተ፡ ኀለፈት፡ ወዘንተ፡ ዐቀቡ፡ ወብዙኀ፡ አመከሮሙ፡ እግዚእ፡ ወተረክቡ፡ መናፍስቲሆሙ፡ በንጽሕ፡ ከመ፡ ይባርክዎ፡ ለስሙ።
10 ወኵሎ፡ በረከቶሙ፡ ነገርኩ፡ በመጻሕፍት፡ ወዐሰዮሙ፡ ለአርእስቲሆሙ፡ እስመ፡ እሉ፡ ተረክቡ፡ ያፈቅርዎ፡ ለሰማይ፡ እምእስትንፋሶሙ፡ ዘለዓለም፡ ወእንዘ፡ ይትከየዱ፡ እምእኩያን፡ ሰብእ፡ ወሰምዑ፡ እምኀቤሆሙ፡ ትዕይርተ፡ ወፅርፈተ፡ ወኀስሩ፡ እንዘ፡ ይባርኩኒ።
11 ወይእዜኒ፡ እጼውዕ፡ መናፍስቲሆሙ፡ ለኄራን፡ እምትውልድ፡ እንተ፡ ብርሃን፡ ወእዌልጥ፡ ለእለ፡ ተወልዱ፡ በጽልመት፡ እለ፡ በሥጋሆሙ፡ ኢተፈድዩ፡ ክብረ፡ ከመ፡ ይደሉ፡ ለሃይማኖቶሙ።
12 ወኣወፅኦሙ፡ በብሩህ፡ ብርሃን፡ ለእለ፡ ያፈቅርዎ፡ ለስምየ፡ ቅዱስ፡ ወኣነብር፡ አሐደ፡ አሐደ፡ ዲበ፡ መንበረ፡ ክብረ፡ ዚኣሁ።
13 ወይትወኀውኁ፡ በአዝማን፡ ዘአልቦ፡ ኍልቊ፡ እስመ፡ ጽድቅ፡ ኵነኔሁ፡ ለአምላክ፡ እስመ፡ ለመሃይምናን፡ ሃይማኖተ፡ ይሁቦሙ፡ በማኅደረ፡ ፍናዋት፡ ርቱዓት።
14 ወይሬእይዎሙ፡ ለእለ፡ ተወልዱ፡ በጽልመት፡ ይትወደዩ፡ በጽልመት፡ እንዘ፡ ይትወኀውኁ፡ ጻድቃን።
15 ወይጸርሑ፡ ወይሬእይዎሙ፡ ኃጥኣን፡ እንዘ፡ ይበርሁ፡ ወየሐውሩ፡ እሙንቱሂ፡ በኀበ፡ ተጽሕፈ፡ ሎሙ፡ መዋዕል፡ ወአዝማን።