##### edition  ()
=== quotation ===
ይቤ፡ ሄኖክ፡ በእንተ፡ ነገረ፡ ነፋሳት፡ ርኢኩ፡ ዐሥሩ፡ ወክልኤ፡ ሐዋሕወ፡ ርሕዋተ፡ ለኲሎሙ፡ ነፋሳተ፡ እለ፡ እምኔሆሙ፡ ይወፅኡ፡ ነፋሳተ፡ ወይነፍሱ፡ ዲበ፡ ምድር። ሠለስቱ፡ እምኔሆሙ፡ ርሕዋት፡ በገጸ፡ ሰማይ። ወሠለስቱ፡ በምዕራብ፡ ወሠለስቱ፡ በየማነ፡ ሰማይ፡ ወሠለስቱ፡ በፀጋም፡ ሠለስቱ፡ ቀዳምያተ፡ እለ፡ መንገለ፡ መስዕ፡ ወሠለስቱ፡ በድኅረ፡ እሉ፡ በፀጋም፡ ለመንገለ፡ አዜብ። ወሠለስቱ፡ በዐረብ፡ ለአርባዕቱ፡ እምኔሆሙ፡ ይወፅእ፡ ነፋሳተ፡ በረከት፡ ወሰላም፡ ወእምእልኩ፡ እማንቱ፡ ይወፅኡ፡ ነፋሳተ፡ መቅሠፍት፡ ሶበ፡ ይትፌነዉ፡ ይደመስስዋ፡ ለኲላ፡ ምድር፡ ወማይ፡ ዘዲቤሃ፡ ወኵሉ፡ እለ፡ የሐድሩ፡ ዲቤሃ። ወኲሉ፡ ዘሀሎ፡ ውስተ፡ ማይ፡ ወዲበ፡ የብስ፡ ይወፅእ፡ ቀዳማይ፡ ነፋስ፡ እምእልክቱ፡ ኃዋሕው፡ ዘስሙ፡ ጽባሓይ፡ በቀዳሚት፡ ኅኆት፡ኆኀት፡ እንተ፡ መንገለ፡ ጽባሕ፡ ወታጸንን፡ ለአዜብ፡ ይወፅእ፡ እምኔሃ፡ ድምሳሴ፡ የብስ፡ ወሞቀ፡ ወኀጒል፡ ወበክልእቱ፡ ኆኅት። ወእማእከላዪት፡ ይወፅእ፡ ርትዕ፡ ወይወፅእ፡ እምኔሃ፡ ዝናም፡ ወፍሬ፡ ወሰላም፡ ወጠል። ወበሣልስ፡ ኆኅት፡ እንተ፡ መንገለ፡ መስዕ፡ ይወፅእ፡ ቊር፡ ወየብስ። ወእምድኅረ፡ እሉ፡ ነፋሳት፡ በመንገለ፡ አዜብ፡ ይወፅእ፡ በሠለስቱ፡ ኆኅት፡ ቀዳማይ፡ በቀዳማይ፡ ኆኅት፡ እምኔሆሙ፡ እንተ፡ ታጸንን፡ መንገለ፡ ምስራቅ፡ ይወፅእ፡ ነፋሳተ፡ ሞቅ። ወበኆኅት፡ እንተ፡ ኀቤሃ፡ ማእከላዪት፡ ይወፅእ፡ እምኔሃ፡ መዐዛ፡ ሠናይ፡ ወጠል፡ ወዝናም፡ ወሰላም፡ ወሕይወት። ወበሣልስ፡ ኆኅት፡ እንተ፡ መንገለ፡ ምዕራብ፡ ይወጽእ፡ እምኔሃ፡ ጠል፡ ወዝናም፡ ወአናኲዕ፡ ወድምሳሴ። ወእምድኅረ፡ እሉ፡ ነፋስ፡ ዘምንገለ፡ዘመንገለ፡ መስዕ፡ ዘስሙ፡ ባሕር፡ ወዘወፅአ፡ እምሠብዐቱ፡ ኆኅት፡ እንተ፡ መንገለ፡ ምስራቅ፡ መንገለ፡ አዜብ፡ ይወፅእ፡ እምኔሃ፡ ጠል፡ ወዝናም፡ ኣናኳዕ፡ ወድምሳሴ። ወእማእከላዪት፡ ኆኅት፡ ርትዕ፡ ይወፅእ፡ ሕይወት፡ ዝናም፡ ጠል፡ ወሰላም። ወበሣልስት፡ ኆኅት፡ እንተ፡ መንገለ፡ ምዕራብ፡ እንተ፡ ታጸንን፡ ለመስዕ፡ ይወፅእ፡ እምኔሃ፡ ጊሜ፡ ወአስሐትያ፡ ወሐመዳ፡ ወዝናም፤ ወጠል፡ ወኣናኳዕ። ወእምድኅረ፡ እሉ፡ ኣርባዕቱ፡ ነፋሳት፡ እለ፡ መንገለ፡ ምዕራብ፡ ቀዳሚት፡ ኆኅት፡ እንት፡ መንገለ፡ መስዕ። ወእምኔሆሙ፡ ይወፅእ፡ ጠል፡ ወኣስሐትያ፡ ወቊር፡ ወሐመዳ፡ ደደክ፡ ወእምነ፡ ኆኅት፡ ማእከላይ፡ ይወፅእ፡ ጠል፡ ወዝናም፡ ወሰላም፡ ወበረከት፡ ወበደኃሪት፡ ኆኅት፡ እንተ፡ መንገለ፡ አዜብ፡ ይወፅእ፡ እምኔሃ፡ የብስ፡ ወድምሳሴ፡ ወወዕይ፡ወዋዕይ፡ ወኀጒል። ወተፈጸሙ፡ ዐሥሩ፡ ወክልኤ፡ ኀዋኅው።
=== summary ===
ወእምእሉ፡ ዐሥሩ፡ ወክልኤ፡ ኃዋኅው፡ ነፋስ፡ እሉ፡ ይነፍኁ፡ ዲበ፡ ምድር፡ አሐቲ፡ እንተ፡ ፍና፡ ጽባሕ፡ እምሠላስ፡ ኃዋሕወ፡ ነፋስ፡ ማእከላዪት፡ ትነፍሕ፡ ጠል፡ ወበረከት፡ ዝናም፡ ወሰላም። ወከማሁ፡ ማእከላዪት፡ ዘመንገለ፡ ዐረብ፡ ትነፍሕ፡ ጠል፡ ወበረከት፡ ዝናም፡ ወሰላም። ወከማሁ፡ ዘመንገለ፡ መስዕ፡ ማእከላዪት፡ ኆኀት፡ ትነፍሕ፡ ጠል፡ ወበረከት፡ ዝናም፡ ወሰላም። ወከማሁ፡ ዘመንገለ፡ አዜብ፡ ማእከላዪት፡ ኆኀት፡ ትነፍሕ፡ ጠል፡ ወበረከት፡ ዝናም፡ ወሰላም። ዘእንበለ፡ እሉ፡ አርባዕቱ፡ አልቦ፡ ሠናየ፡ እምዐሥሩ፡ ወክልኤ፡ ኃዋኀወ፡ ነፋስ፡ ወካልኣንሰ፡ ሰመንቱ፡ ይነፍሑ፡ ዲበ፡ ምድር፡ ለመቅሠፍት፡ ወለድምሳሴ፡ ወለአናኳዕ፡ ወአልቦ፡ ሠናየ፡ እምኔሆሙ፡ እስከ፡ ዓለም።