##### edition  (gez) — Text of the EOTC printed Bible
=== chapter 1 ===
[Chapter 1]
1 በእንተ፡ ዘረከቦሙ፡ መቃቢስ፡ ለአይሁድ፡ በመሰጴጦምያ፡ ዘሶርያ፡ ወቀተሎሙ፡ በቍላ፡ ቲሆሙ፡ እስከ፡ ዓውደ፡ ለኢየሩሳሌም፡ እምኢያቦቅ፡ ወእምጥፍዓ፡ ለገረግ፡ ቅድስት።
2 እስመ፡ ተዓነዩ፡ እምሰማርያ፡ እሰ፡ ዓውደ፡ ለኢየሩሳሌም፡ ወኵሉ፡ አድያሚሃ፡ ወቀተሉ፡ በአፈ፡ ሐፂን፡ እስከ፡ ኢያትረፉ፡ ዘእንበለ፡ ኅዳጣን፡ እስመ፡ ኀብሩ፡ ኤዶማውያን፡ ወሶር፡ ያውያን፡ ወአማሌቃውያን፡ ምስለ፡ ሞዓባዊ፡ መቃብሰ፡ ዘአጥፍአ፡ ሀገረ፡ ኢየሩሳሌም።
3 ወሶበ፡ አበሱ፡ ደቂቀ፡ እስራኤል፡ ፈነወ፡ ሎሙ፡ ሞዓባዊ፡ መቃቢስሃ፡ ወቀተሎሙ፡ ለኵ፡ ሎሙ፡ በመጥባሕት።
4 ወበእንተዝ፡ ነገር፡ ወውዑ፡ ፀረ፡ እግዚአብሔር፡ ላዕለ፡ ሀገሩ፡ ቅድስት፡ ወተሰካተዩ፡ በማዕሌቶሙ።
5 ወተዓነዩ፡ ኤዶማውያን፡ ወኤሎፍሊ፡ ወአኀዘ፡ ይትበቀሉ፡ ሀገረ፡ እግዚአብሔር፡ እስመ፡ ለሊሁ፡ ፈነዎሙ፡ በእንተ፡ ዘተዓየሩ፡ ቃለ፡ እግዚአብሔር።
6 ወውእቱሰ፡ መቃቢስ፡ ሀገሩ፡ ሬማት፡ ዘሞዓብ፡ ወተንሥአ፡ በኃይል፡ እምሀገሩ፡ ወተሰካተየ፡ ምስለ፡ እለ፡ ምስሌሁ።
7 ወተዓየኑ፡ ቍላተ፡ ጌላቡሄ፡ ዘመስጴጦምያ፡ እስከ፡ ሶርያ፡ ከመ፡ ያጥፍኡ፡ ሀገረ፡ እግዚአብሔር፡ ወእምህየ፡ ሰአለ፡ ኤሎፍላውያነ፡ ወአማሌቃውያነ፡ ወወሀቦሙ፡ ብዙኃ፡ ወርቀ፡ ወብሩረ፡ ወአፍራሰ፡ ወሠረገላተ፡ ከመ፡ ይኩኑ፡ ምስሌሁ፡ ውስተ፡ ማዕሌት።
8 ወመጽኡ፡ ኅቡረ፡ ወኵዓትዋ፡ ለሀገረ፡ ወከዓዉ፡ ደሞሙ፡ ከመ፡ ማይ፡ ለእለ፡ ይነብሩ፡ ውስቴታ።
9 ወረስይዋ፡ ለኢየሩሳሌም፡ ከመ፡ ልገተ፡ ዓቃቤ፡ ቀምሕ፡ ወገብረ፡ ውስቴታ፡ ኵስሐ፡ ወዝብለ፡ ወኵሎ፡ ዘኢይሠምር፡ እግዚአብሔር፡ ምግባረ፡ ፁግ፡ ወአርኩሱ፡ ሀገረ፡ እግዚአብሔር፡ እንተ፡ ምልዕት፡ ጽድቀ፡ ወቅድሳተ።
10 ወረሰዩ፡ አብድንቲሆሙ፡ ለአግብርቲከ፡ መብልዓ፡ ለአዕዋፈ፡ ሰማይ፡ ወሥጋሆሙኒ፡ ለጻድቃኒከ፡ ለአራዊተ፡ ገዳም።
11 ወተአገሉ፡ ዕቢረ፡ ወእጓለ፡ ማውታ፡ ወለፅኑሳትኒ፡ አውፅኡ፡ ዘውስተ፡ ከርሦን፡ እስከ፡ ይትመዓዕ፡ እግዚአብሔር፡ ዘይፈትን፡ ልበ፡ ወኵልያተ፡ እስመ፡ ዘእንበለ፡ ፍርሃተ፡ እግዚአብሔር፡ ገብሩ፡ በከመ፡ መሐሮሙ፡ ሰይጣን።
12 ወተመይጡ፡ ውስተ፡ አድዋሌሆሙ፡ እንዝ፡ ይትፌሥሑ፡ በእንተ፡ ዘገብሩ፡ እኩየ፡ ላዕለ፡ ሕዝበ፡ እግዚአብሔር፡ ወነሥአ፡ ፄዋ፡ ወምህርካ፡ ዘማህርኩ፡ እምቅድስት፡ ሀገር።
13 ወሶበ፡ አተዉ፡ ወገብዑ፡ ውስተ፡ ማኅደሪሆሙ፡ ወገብሩ፡ ፍስሐ፡ ወፋሕለ፡ ወማዕሌተ።
=== chapter 2 ===
[Chapter 2]
1 ወከመዝ፡ ይቤሎ፡ ነቢይ፡ ረዓይ፡ ዘይብልዎ፡ ይእዜሰ፡ ተፈሣሕ፡ ኅዳጠ፡ በብርሃነ፡ ሰዓት፡ ወሀለዎ፡ ይትበቀለከ፡ እግዚአብሔር፡ ቅዱስ፡ እስራኤል፡ በዘኢተሐዘብከ፡ ገጽ።
2 ተብለነ፡ ረዋጽያነ፡ አፍራስየ፡ ወበእንተዝ፡ አመሥጥ፡ በበዲር።
3 ወአንሰ፡ እብአከ፡ እምአንስርት፡ ይረውፁ፡ እለ፡ ይዴግኑከ፡ ወኢታመሥጥ፡ እመንሱት፡ ወመዓተ፡ እግዚአብሔር፡ ዘላዕሌከ።
4 ወትብልኑ፡ እለብስ፡ ሐፂነ፡ ወኢይክለኒ፡ ሂጵተ፡ ቀስት፡ ወደርብዮ፡ ኵያንው፡ ወአክኮኪ፡ ከማሁ፡ በደርብዮ፡ ሐፂን፡ ዘኢትቤቀለከ፡ ይቤ፡ እግዚአብሔር፡ ቅዱሰ፡ እስራኤል፡ አላ፡ አመጽእ፡ እኪተ፡ ሕማመ፡ ውስተ፡ ልብከ፡ ዘየአኪ፡ እምሄጳተ፡ ቀስት፡ ወደርብዮ፡ ኵናት፡ ወደዌ፡ ሲሕ፡ ወአበቅ።
5 ወአመጽእ፡ እኪተ፡ ሕማመ፡ ውስተ፡ ልብከ፡ ወተኃጥእ፡ ዘይረድአከ፡ ወኢትረክብ፡ እስመ፡ ወሀከ፡ መዓትየ፡ ወኢታመሥጥ፡ እምእዴየ፡ እስከ፡ አጥፍዕ፡ እምድር፡ ዝክረከ።
6 ወተአምረኒ፡ ከመ፡ አነ፡ እግዚአብሔር፡ ፈጣሪከ፡ ሶበ፡ አገብሮ፡ ለዝንቱ፡ ነገር፡ ፍጡነ፡ ከመ፡ ቅጽበተ፡ ዓይን፡ እስመ፡ አንተ፡ አግዘፍከ፡ ክሣድከ፡ ወአልዓልከ፡ ርእሰከ፡ ዲበ፡ ሀገርየ፡ እስመ፡ አንተ፡ ከመ፡ ሣዕር፡ ዘቅድመ፡ ገጸ፡ ነፋስ፡ ዘይበልዖ፡ እሳት፡ በቅድመ፡ አዕይን፡ ትየ፡ ወከመ፡ ሐመድ፡ ዘይነሥእዎ፡ ነፋሳት፡ ወአውሎ፡ እምቅድመ፡ ገጸ፡ ምድር፡ ከማሁ፡ አንተ፡ በኀቤየ።
7 እስመ፡ ወሀኮ፡ መዓትየ፡ ወኢያእመርከ፡ ፈጣሬ፡ ዚአከ፡ ወአነሂ፡ ኢትኄየዮ፡ ለኵሉ፡ ዘዚአከ፡ ወኢያተርፍ፡ ዘያስተአዝብ፡ በኵሉ፡ አድባሪከ።
8 ወይእዜኒ፡ ነስሕ፡ እምነ፡ ኵሉ፡ እኩይ፡ ዘገበርከ፡ ወለእመ፡ ነሳሕከ፡ ወተጋነይከ፡ በቅድመ፡ እግዚአብሔር፡ በአንብዕ፡ ወበብካይ፡ ወሰአልከ፡ ኀቤሁ፡ በንጹሕ፡ ልብ፡ ይትዓደዋ፡ እግዚአብሔር፡ ለኃጢአትከ፡ በኵሉ፡ ዘአበስከ፡ በቅድሜሁ።
9 ወውእተ፡ ጊዜ፡ በከየ፡ መቃቢስ፡ ቅድመ፡ እግዚአብሔር፡ በእንተ፡ ኃጢአቱ፡ ወለብሰ፡ ሐመደ፡ እስመ፡ ተምዕዖ፡ እግዚአብሔር።
10 ወአእመረ፡ ከመ፡ ኢያጐነዲ፡ እግዚአብሔር፡ እኪተ፡ ዘነበበ፡ በአፈ፡ ነቢዩ፡ እስመ፡ ትጉሕ፡ አዕይንቲሁ፡ ወኢይነውም፡ ወክሡት፡ ዕዘኒሁ፡ ወኢይጸመም፡ ወኢትሔሱ፡ ቃለ፡ ዘነበበ፡ ወይገብራ፡ በአሐቲ፡ ጊዜ፡ ከመ፡ ቅጽበተ፡ ዓይን።
11 ወገደፈ፡ አልባሲሁ፡ ወለብሰ፡ ሠቅ፡ ጸጕር፡ ወወደየ፡ ሐመደ፡ ዲበ፡ ርእሱ፡ ወበከየ፡ ወገዓረ፡ ቅድመ፡ እግዚአብሔር፡ አምላኩ፡ በእንተ፡ ዘገብረ፡ እኩየ።
=== chapter 3 ===
[Chapter 3]
1 ወነበቦ፡ ነቢይ፡ እስመ፡ ቀሩብ፡ ሬማት፡ ዘሞዓብ፡ ለሶርያ።
2 ወከረየ፡ ምድረ፡ ወቦአ፡ እስከ፡ ክሣዱ፡ ወበከየ፡ ብካየ፡ መሪረ፡ ወነስሐ፡ በእንተ፡ ዘገብረ፡ ኃጢአተ፡ በቅድመ፡ እግዚአብሔር።
3 ወከመዝ፡ ይቤሎ፡ ለነቢይ፡ እግዚአብሔር፡ ኀበ፡ ምድር፡ ይሁዳ፡ ግባዕ፡ ኀበ፡ ምድረ፡ ሬማት፡ ኀበ፡ መቃቢስ፡ መኰንነ፡ ሞዓብ፡ ወበሉ፡ ከመዝ፡ ይቤ፡ እግዚአብሔር፡ እስመ፡ አኮ፡ ዘገበርካሁ፡ አንተ፡ ለዝንቱ፡ ከመ፡ ኢትበልዕ፡ በፅንዓ፡ ኃይልየ፡ ወበትዕይንትየ፡ አጥፋዕክዋ፡ ለሀገር፡ ቅድስት፡ አላ፡ አነ፡ ውእቱ፡ እግዚአብሔር፡ መላኬ፡ ዚአከ፡ ለልየ፡ በፈቃድየ፡ ፈነውኩከ፡ ከመ፡ ታጥፍእ፡ ሀገርየ።
4 እስመ፡ እምዕዓተኒ፡ በኵሉ፡ ስስዕታ፡ ወዝሙታ፡ ወጽልሑታ።
5 ወአነፂ፡ ተሐየይክዋ፡ ወመጠውክዋ፡ ውስተ፡ እዴከ፡ ወአኮ፡ በእንቲአከ፡ ዘአግዘፍከ፡ ክሣደከ፡ ወትቤ፡ አነ፡ ሮድክዋ፡ ለሀገር፡ በጽንዓ፡ እዴየ፡ ወይእዜኒ፡ በእንተ፡ ደቂቅከ፡ እለ፡ ወለድኮ፡ ተዓደዋ፡ እግዚአብሔር፡ ለኃጢአትከ።
6 ወይእዜኒ፡ ነስሕ፡ በኵሉ፡ ልብከ፡ ወጥባዕ፡ ወኢትኩን፡ ንፉቀ፡ እስመ፡ እለ፡ ይናፍቁ፡ ኢያጠብዑ፡ ለንስሐ።
7 ወብፁዓንሰ፡ እለ፡ ይኔስሑ፡ በኵሉ፡ ልቦሙ፡ ወኢይትመየጡ፡ ኀበ፡ ጹግ፡ ወኃጢአት፡ በኵሉ፡ ዘይኔስሑ፡ በእንተ፡ እከዮሙ።
8 ወይጠብዑ፡ በብካይ፡ ወበአንብዕ፡ ወበስኢል፡ ብዙኅ፡ ወበሰጊድ፡ ኀበ፡ እግዚአብሔር፡ ዘፈ፡ ጠሮሙ፡ እስመ፡ ይቤሎሙ፡ ለነሳሕያን፡ አንትሙ፡ እምድኅረ፡ ስሕትክሙ፡ ወነሳሕክሙ፡ እሊዓየ፡ አንትሙ።
9 ወለዕቡይኒ፡ ይቤሎ፡ እምድኅረ፡ ስሕተ፡ ሶበ፡ ገብዓ፡ ኀቤሁ፡ በንስሐ፡ በእንተ፡ ድንጋፄከ፡ ወበፍርሃትከ፡ እትዓደዋ፡ ለኃጢአትከ፡ እስመ፡ አነ፡ እግዚአብሔር፡ መሳኬ፡ ዚአከ፡ ዘእፈዱ፡ ኃጢአተ፡ አብ፡ ላዕለ፡ ውሉድ፡ እስከ፡ ሣልስ፡ ወእስከ፡ ራብዕ፡ ትውልድ፡ ወለእለሰ፡ ያፈቅሩኒ፡ ወየዓቅቡ፡ ትእዛዝየ፡ እገብር፡ ምሕረተ፡ ምስሌሆሙ፡ እስከ፡ ))፡ ትውልድ።
10 ወይእዜኒ፡ በእንተ፡ እሉ፡ ደቂቅከ፡ እለ፡ ወለድከ፡ አዓቅብ፡ ኪዳንየ፡ ዘምስሌከ፡ ወእትዌከፍ፡ ንስሐ፡ ዘገበርኩ፡ በእንተ፡ እከየ፡ ምግባሪከ፡ ይቤ፡ እግዚአብሔር፡ ቅዱስ፡ እስራኤል፡ ዘክሉይመልክ።
11 ወውእተ፡ ጊዜ፡ ወጽአ፡ እምግብ፡ ወሰገደ፡ ለነቢይ፡ እንዘ፡ ይብል፡ ከመዝ፡ ወከመዝ፡ ለይረሰየኒ፡ እግዚአብሔር፡ ከመ፡ ኢይትፈለጥ፡ እምኔከ፡ አላ፡ ረሰየኒ፡ ዘፍቀድከ፡ እስመ፡ አነ፡ አምዓዕክዎ፡ ለእግዚአብሔር፡ ወኢሖርኩ፡ በትእዛኡ፡ ከመ፡ አበውየ፡ እስመ፡ ንሕነሰ፡ አልብነ፡ ሕግ፡ ወለሊከ፡ ተአምር፡ ከመ፡ ናመልክ፡ ጣዖተ፡ በከመ፡ መሐሩነ፡ አበዊነ።
12 ወአነሰ፡ ኢሰማዕኩ፡ ቃለ፡ ነቢያቲሁ፡ ለእግዚአብሔር፡ እሰከ፡ ይእዜ፡ እስመ፡ ኃጥእ፡ አነ፡ ዘሖርኩ፡ በኃጢአትየ፡ ወበትዕቢተ፡ ልብየ፡ ወበግዝፈተ፡ ክሣድየ፡ ዘአምዓዕኩ፡ ትእዛዘ፡ እግዚአብሔር፡ ወኢሖርኩ፡ በትእዛዙ፡ ወኵነኔሁ፡ ዘአዘዘኒ።
13 ወአውሥአ፡ ነቢይ፡ ወይቤሎ፡ አእመርኩ፡ ከመ፡ ይእዜ፡ ተወክፈ፡ ንስሐከ፡ እስመ፡ አልቦ፡ እምቅድሜክሙ፡ ዘይትአመና፡ ለኣጢአቱ፡ እምዘመድክሙ።
14 ወእምይእዜሰ፡ ኅድግ፡ አምልኮተ፡ ጣዖት፡ ወተመይጥ፡ ውስተ፡ አእምሮ፡ እግዚአብሔር፡ ከመ፡ ይኩን፡ ንስሐከ፡ ዘበአማን፡ ወሰገደ፡ ታሕተ፡ እገሪሁ፡ ለነቢይ፡ ወአንሥአ፡ ነቢይ፡ ወአዘዞ፡ ኵሎ፡ ዘይደሉ፡ ምግባረ፡ ሠናይ።
15 ወገብረ፡ በከመ፡ አዘዞ፡ እግዚአብሔር፡ ወገብአ፡ ውስተ፡ ቤቱ።
16 ወውእቱኒ፡ መቃቢስ፡ አርትዓ፡ ለነፍሱ፡ ውአሰሰለ፡ እምቤቱ፡ ኵሎ፡ ሰገለ፡ ወጠዖተ፡ ወማርያነ፡ ወመጥዓውያን፡ ወመሰግላን።
17 ወደቂቀ፡ ፂዋኒ፡ እለ፡ አምጽኦሙ፡ እምኢየሩሳሌም፡ የሐትቶሙ፡ ሠርከ፡ ወነግሃ፡ ኵሎ፡ ትእዛዘ፡ እግዚአብሔር፡ ወሕጎ፡ ወሥርዓቶ፡ በከመ፡ ይገብሩ፡ አበዊሆሙ።
18 ወሤመ፡ እምደቂቀ፡ ፄዋ፡ እምጠቢባን፡ ውስተ፡ ቤቱ።
19 ወካዕበ፡ እምንዑሳን፡ እምጠቢባኒሆሙ፡ ሢመ፡ በዋዕያነ፡ ውስተ፡ ምስካቡ፡ እለ፡ የዓቅቡ፡ ንዑሳነ፡ ደቂቆ፡ መሐዘኒሆሙ፡ ከመ፡ ይምሐርዎሙ፡ ፍኖተ፡ እግዚአብሔር፡ በከመ፡ ገብሩ፡ ደቂቀ፡ እስራኤል፡ ሕጎ፡ ወሥርዓቶ፡ ወኵነኔንሁ፡ ወፍትሐ፡ ወኵሎ፡ ምሕራማቲሆሙ፡ ዘይትሔረሙ፡ ሞዓባውያን፡ ይሰምዕ፡ እምደቂቀ፡ ፄዋ።
20 ወይሥዕር፡ ምሕራማቲሆሙ፡ ወኵሉ፡ ሠገላቲሆሙ፡ ወኵሉ፡ ጣዖታቲሆሙ፡ ወኵሉ፡ መዋጽሕቲሆሙ፡ ወምሥዋዒሆሙ፡ እምነ፡ ስቡሐኒሆሙ፡ እመነ፡ ሐራጊተ፡ መራዕይሁ፡ ወእምነ፡ መቍዓለ፡ ጠሊ፡ ዘይሠውዕ፡ ለአማልክቲሁ፡ ሠርክ፡ ወነግሂ።
21 ወይሠውዕ፡ ሎሙ፡ ወያመልኮሙ፡ በኵሉ፡ ግብር፡ ቀትረ፡ ወሰዓተ፡ ወይሰእሎሙ፡ ወይትአመኖሙ፡ ወይገብር፡ ፈቃዶሙ፡ በኵሉ፡ ዘነገርዎ፡ ገነውት፡ አማልክቲሁ።
22 ወኢያስትት፡ እምቃሎሙ፡ በኵሉ፡ ዘነገርዎ፡ እስመ፡ ይመስሎ፡ በኵሉ፡ ዘአድኀንዎ።
23 ውእቱሰ፡ መቃቢሰ፡ ዘዚአሆሙ፡ ፍኖተ፡ ኀደገ።
24 ወእምከመ፡ ሰምዓ፡ ዘረዓይ፡ ነገረ፡ ዘይብልዎ፡ ነቢይ፡ ወዓሠነየ፡ ፍኖቶ፡ ውስተ፡ ንስሐ፡ ወኵሉ፡ ቤቱ፡ አሠነዩ፡ ፍኖቶሙ፡ እምደቂቀ፡ እስራኤል፡ በውእቱ፡ መዋዕል፡ እስመ፡ ደቂቀ፡ እስራኤልሰ፡ አሐተ፡ ጊዜ፡ ያምዕዕዎ። ወጊዜ፡ ይቀሥፎሙ፡ የአምርዎ፡ ወየዓወይዉ፡ ኀበ፡ እግዚአብሔር።
25 ወሶበ፡ ርእዮሙ፡ ከመ፡ ኃሠሩ፡ በታሕተ፡ እደዊሆሙ፡ ለዕለ፡ ይሣቅይዎሙ፡ ወይግዕሩ፡ በቅድሜሁ፡ ውእተ፡ አሚረ፡ ይምሕሮሙ፡ ተዘኪሮ፡ ኪዳነ፡ አበዊሆሙ፡ ሶበ፡ የዓወይዉ፡ ኀቤሁ፡ በእንተ፡ አብርሃም፡ ወይስሐቅ፡ ወያዕቆብ፡ አበዊሆሙ።
26 ወሶአ፡ አድኃኖሙ፡ ይረስእዎ፡ ለዘአድኀኖሙ፡ ወይገብዑ፡ ውስተ፡ አምልኮ፡ ጣዖት።
27 ወውእተ፡ አሚረ፡ ይፌኑ፡ ቦሙ፡ አሕዛበ፡ እለ፡ ይሣቅይዎሙ፡ ወሶበ፡ ሣቀይዎሙ፡ ወአሕመምዎሙ፡ የዓወይዉ፡ ኀበ፡ እግዚአብሔር፡ ወውእተ፡ ጊዜ፡ ይምሕሮሙ፡ ወይሣሃሎሙ፡ እስመ፡ ያፈቅሮሙ፡ እስመ፡ ግብረ፡ እደዊሁ፡ እምንቱ።
28 ወካዕበ፡ ሶበ፡ ይጸንሖሙ፡ ይገብዑ፡ ከመ፡ ያምዕዕዎ፡ በአምላኮ፡ ጣዖት፡ ዘዓውዶሙ፡ ወግብረ፡ እደዊሆሙ፡ እኩይ።
29 ወውእቱኒ፡ ያነሥእ፡ ሎሙ፡ ሕዝበ፡ ኤሎፍሊ፡ ወሞዓብ፡ ወምድያም፡ ወሶርያ፡ ወግብፅ፡ ወይበክዩ፡ ወየዓወይዉ፡ ሶበ፡ ምዕዎሙ፡ ፀሮሙ፡ ወአሕመምዎሙ፡ ወአገብርዎሙ፡ ወቀነይዎሙ፡ ወያነሥእ፡ ሎሙ፡ መሳፍንተ፡ ከመ፡ ያድኅንዎሙ፡ መሳፍንት።
=== chapter 4 ===
[Chapter 4]
1 ወቦ፡ ዘአመ፡ ሆሤዕ።
2 ወቦ፡ ዘአመ፡ ጌዴዎን።
3 ወቦ፡ ዘአመ፡ ሶምሶን፡ ወባርቅ፡ ወዲቦራ፡ ወዮዲት፡ እመሂ፡ በአንስት፡ ወእመሂ፡ በታባዕት፡ ያነሥእ፡ ሎሙ፡ መሳፍንተ፡ ከመ፡ ያድኅኖሙ፡ እምእለ፡ ይሣቅይዎሙ፡ ወከመ፡ ያድኅን፡ ዎሙ፡ እምእደ፡ ኵሉ፡ ፀሮሙ።
4 ወበከመ፡ ፈቀደ፡ ያድኅኖሙ፡ እግዚአብሔር፡ እምእለ፡ ይሣቅይዎሙ።
5 ወትትፌሥሑ፡ ፈድፋደ፡ በኵሉ፡ ዘዓሠነየ፡ ሎሙ፡ በዘርዓ፡ ምድሮሙ፡ ወአስተባዝኆ፡ እንስሳሆሙ፡ ወበኵሉ፡ መራዕይ፡ ዘውስተ፡ ሐቅል፡ ወዘገዳም።
6 ወይባርክ፡ ሎሙ፡ እንስሳሆሙ፡ ወአትክልቲሆሙ፡ ወኵሉ፡ ዘአኀዙ፡ ዘቤትኒ፡ ወዘገዳምኒ፡ ይባርክ፡ ሎሙ፡ ወኢያውኅድ፡ እንስሳሆሙ፡ እስመ፡ በአዕይንቲሁ፡ ይነጽሮሙ፡ ወፈድፋደ፡ ያፈቅሮሙ፡ እስመ፡ ትውልደ፡ ጻድቃን፡ እሙንቱ።
7 ወሶበ፡ ለሊሆሙ፡ ኮኑ፡ እኩያነ፡ በምግባሮሙ፡ ይሜጥዎሙ፡ ውስተ፡ ዕደ፡ ፀሮሙ።
8 ወአመ፡ ይቀትሎሙ፡ ውስተ፡ አሚረ፡ የኃሥሥዎ፡ ወይትመየጡ፡ ወይገይሡ፡ ኀበ፡ እግዚ፡ አብሔር፡ ፈጣሪሆሙ።
9 ወሶበ፡ ተመይጡ፡ በኵሉ፡ ልቦሙ፡ ይሠሪ፡ ሎሙ፡ ወዘቀዳሜ፡ አበሳሆሙ፡ ኢይዜከር፡ ሎሙ፡ እስመ፡ የአምሮሙ፡ ከመ፡ ሥጋ፡ ወደም፡ እሙንቱ፡ ወቦሙ፡ መስሕት፡ ሕሊና፡ ዝንቱ፡ ዓለም፡ ወአጋንንት።
10 ወውእቱ፡ መቃቢስ፡ እምከመ፡ ሰምዓ፡ ዘንተ፡ ነገረ፡ ዘሠርዓ፡ እግዚአብሔር፡ በደብረ፡ መቅደሱ፡ ተጋደለ፡ በንስሐ።
11 ወኢያስተተ፡ ገቢር፡ እምዘርእየ፡ ወሰምዓ፡ ዘንተ፡ ነገረ፡ ወበእንተ፡ ኵሉ፡ ኂሩት፡ ዘይገ፡ ብሩ፡ ደቂቀ፡ እስራኤል፡ እስመ፡ ተሣሃሎሙ፡ እግዚአብሔር፡ ወአመ፡ ይቀሥፎሙ፡ እግዚአብሔር፡ ሶበ፡ ተዓደዉ፡ ትእዛዘ፡ ይበክዩ፡ ወየዓወይዉ፡ ወካዕበ፡ ይሣሃሎሙ፡ ወይገብሩ፡ ትእዛዞ።
12 ወከማሁ፡ መቃቢስኒ፡ ያረትዕ፡ ፍናዊሁ፡ ወየዓቅብ፡ ትእዛዞ፡ ወየሐውር፡ በትእዛዙ፡ ለእግ፡ ዚአብሔር፡ አምላከ፡ እስራኤል።
13 ውእተ፡ አሚረ፡ እምዘሰምዓ፡ ወበኵሉ፡ ዘይትሜክሁ፡ ደቂቀ፡ እስራኤል፡ ከማሁ፡ ይትሜ፡ ካህ፡ በዓቂበ፡ ትእዛዙ፡ ለእግዚአብሔር።
14 ወይሠርዕ፡ ቤቶ፡ ወደቂቆ፡ ከመ፡ ይሑሩ፡ በኵሉ፡ ፍናዊሁ፡ ወትእዛዛቲሁ፡ ለእግዚአብሔር።
15 ወኀርመተ፡ አይሁድኒ፡ ዘይትኄረሙ፡ ውእቱኒ፡ ይትኄረም፡ ወትእዛዛትኒ፡ ዘየዓቅቡ፡ አይሁድ፡ በዘሰምዓ፡ ከማሁ፡ ይገብር፡ ወመባልዕተኒ፡ ዘይትኄረሙ፡ አይሁድ፡ ይትኄረም፡ እንዘ፡ ውእቱ፡ ካልዕ፡ ሕዝቡ፡ ሞዓባዊ።
16 ወአሥራተኒ፡ ይዔሥር፡ ወበኵረ፡ አባግዒሁ፡ ወአልህምቲሁ፡ ወአዕዱጊሁ፡ ወኵሎ፡ ዘአጥርየ፡ ይሁብ፡ ወመሥዋዕትኒ፡ ዘይሠውዑ፡ አይሁድ፡ ከማሁ፡ ይሠውዕ፡ አንጺሮ፡ መንገለ፡ ገጸ፡ ለኢየሩሳሌም።
17 ወዘበእንተ፡ ብፅዓት፡ ወዘበእንተ፡ ኃጢአት፡ ወዘፈቃድ፡ ወመሥዋዕተ፡ መድኃኒት፡ ወመሥዋዕተ፡ ዘዘልፍ።
18 ወቀዳሜ፡ ፍሬያት፡ ወሞጻሕተኒ፡ ዘያወጽሑ፡ አይሁድ፡ ከማሁ፡ ያወጽሕ፡ ወይሁብ፡ ለሌ፡ ዋሲ፡ ዘሢመ፡ ወኵሎ፡ ዘይገብሩ፡ አይሁድ፡ ከማሁ፡ ይገብር፡ ወጽዒጠ፡ ዕጣን።
19 ወገብረ፡ መራናታ፡ ወሚሎናት፡ ወጠረጴዛት፡ ወደባትራተ፡ ወባሕርያተ፡ ወሖፃዳት፡ ወክ፡ ብዓ፡ ውጉዐ፡ ለማሕቶተ፡ ቅድሳት፡ ወመንጦላዕት፡ ከመ፡ ይገብሩ፡ በውስተ፡ ቅዱሳተ፡ ቅዱሳን፡ እስራኤል፡ እመ፡ አሥመርዎ፡ ለእግዚአብሔር።
20 እስመ፡ ነበሩ፡ በሕጉ፡ ወበሥርዓቱ፡ ወእመ፡ ኢተሐየዮሙ፡ እግዚአብሔር፡ ወኢያግብ፡ ዖሙ፡ ውስተ፡ ዕደ፡ ፀሮሙ፡ ከማሁ፡ ያሠኒ፡ መካቢስ፡ በኵሉ፡ ፍናዊሁ።
21 ወይጼሊ፡ በኵሉ፡ ጊዜ፡ ኀበ፡ እግዚአብሔር፡ አምላከ፡ እስራኤል፡ ከመ፡ ይኩኖ፡ መርሐ፡ ወኢይፍልጦ፡ እማኅበረ፡ እስራኤል፡ እለ፡ ኃረየ፡ ወገብር፡ ፈቃደ።
22 ወካዕበ፡ ይጼሊ፡ ከመ፡ የሀቦ፡ ዘርዓ፡ በጽዮን፡ ወአብያተ፡ በኢየሩሳሌም፡ ወከመ፡ ያድኅኖ፡ እመንሱት፡ እንተ፡ ነበበ፡ በአፈ፡ ነቢይ፡ ወከመ፡ ይትወከፍ፡ ንስሐሁ፡ በኵሉ፡ ዘነስሐ።
23 ወበክየ፡ ቅድመ፡ እግዚአብሔር፡ በአንብዓ፡ ወከመ፡ እያጥፍዕ፡ ዘርአ፡ እምድር፡ ወከመ፡ ይዕቀቦ፡ በበዓቱ፡ ወበፀአቱ።
24 ወእምአሕዛበ፡ ሞዓብኒ፡ እለ፡ እምታሕተ፡ እዴሁ፡ ለመቃቢስ፡ አስተሐወዙ፡ ከመ፡ ይእምኑ፡ እስመ፡ ርትዕት፡ ፍኖተ፡ የሐውር፡ መልአኮሙ፡ ወይኔጽሩ፡ ፍትሐ፡ ወይገብሩ፡ ፈቃዶ፡ ወያስተሐቆሩ፡ ፍትሐ፡ አህጉሪሆሙ፡ ወተሰናነ፡ ብሔሮሙ፡ ወይሬእዩ፡ ከመ፡ ዘይረትዕ፡ ወይኄይስ፡ ፈድፋደ፡ ዘመቃቢስ።
25 ወይመጽኡ፡ ኀቤሁ፡ ወይሰምዑ፡ ፍትሐ፡ ጽድቁ፡ ወኂሩቱ፡ ለመቃቢስ።
26 ወቦቱ፡ ብዝኅ፡ ጥሪት፡ ወአግብርት፡ ወአዕማት፡ ወአዕዱግ፡ ወአግማል፡ ወቦቱ፡ አፍራስ፡ እለ፡ ያለብሱ፡ ኀፂነ
27 ወእምአመሰ፡ ያመልኮ፡ ለእግዚአብሔር፡ ሶበሰ፡ የሐውር፡ ውስተ፡ ፀብዕ፡ አልቦ፡ ዘሞዖ፡ ዘእንበለ፡ ለሊሁ፡ ዘሞዓ።
28 ወእሙንቱ፡ ይመጽኡ፡ በኃይለ፡ አማልክቲሆሙ፡ ከመ፡ ይጽብዕዎ፡ ወይረግምዎ፡ በስመ፡ አማልክቲሆሙ፡ ወአልቦ፡ ዘይመውዕዎ፡ እስመ፡ ረሰየ፡ ትውክልቶ፡ ላዕለ፡ እግዚአብሔር፡ አምላኩ።
29 ወነበረ፡ እንዘ፡ ይገብር፡ ከመዝ፡ ወእንዘ፡ ይመውዕ፡ ፀሮ፡ ወያገብእ፡ አሕዛበ፡ ታሕተ፡ እዴሁ።
30 ወይትቤቀል፡ በእንተ፡ ግፉዓን፡ ወያጸድቅ፡ ፍትሐ፡ እጓለ፡ ማውታ።
31 ወይትዌከፎሙ፡ ለዕቤራት፡ ወለእጓለ፡ ማውታ፡ በተጽናሶሙ፡ ወያጸግቦሙ፡ ለርኁባን፡ እምሲሳዩ፡ ወያለብሶሙ፡ ለዕሩቃን፡ እምልብሱ።
32 ወይትፌሣሕ፡ በተግባሩ፡ ወበግብረ፡ እደዊሁ፡ ወይሁብ፡ እምዘቦ፡ እንዘ፡ ኢይከልዕ፡ ወአሥራተ፡ ይሁብ፡ ለቤተ፡ እግዚአብሔር፡ ወዘንተ፡ እንዘ፡ ይገብር፡ መቃቢስ፡ አዕረፈ፡ በሠናይ።
=== chapter 5 ===
[Chapter 5]
1 ወኀደገ፡ ዕጐሊሁ፡ ውሉደ፡ ንዑሳነ፡ ወልህቁ፡ በከመ፡ ሠርዖሙ፡ አቡሆሙ፡ ወዓቀቡ፡ ሥርዓተ፡ ቤቶሙ፡ ወኵሎ፡ ዘዚአሆሙ፡ የዓቅዑ፡ ወኢያግዕሩ፡ ነደየ፡ ወእጓለ፡ ማውታ፡ ወዕቤረ።
2 ወይፈርህዎ፡ ለእግዚአብሔር፡ ወይመጸውቱ፡ ንዋዮሙ፡ ለነዳያን፡ ወይትመሐፀኑ፡ በኵሉ፡ ዘአማኅፀኖሙ፡ አቡሆሙ፡ ወይናዝዙ፡ ዕቤረ፡ ወእጓለ፡ ማውታ፡ በተፅናሶሙ፡ ወይከውንዎሙ፡ አበ፡ ወእመ፡ ወያነግፍዎሙ፡ እምእደ፡ ገፋዕያኒሆሙ፡ ወይናዝዝዎሙ፡ በኵሉ፡ ዘረከቦሙ፡ ሁከት፡ ወኀዘን።
3 ወነበሩ፡ እንዘ፡ ከመዝ፡ ይግብሩ
5 ዓመተ።
4 ወእምድኅሬሁ፡ መጽአ፡ ጺሩጻይዳን፡ ንጉሥ፡ ከለዳውያን፡ ወአጥፍአ፡ ኵሎ፡ ሀገሮሙ፡ ወፄወውዎሙ፡ ለደቂቀ፡ መቃቢስ፡ ወአጥፍአ፡ ኵሉ፡ ብሔሮሙ።
5 ወማኅረከ፡ ኵሉ፡ ንዋዮሙ፡ ወኪያሆሙኒ፡ አኃዝዎሙ፡ ወወሰድዎሙ፡ ውስተ፡ ብሔሮሙ፡ መምላክያነ፡ ጣዖት፡ እለ፡ ኢየሐውሩ፡ በትእዛዙ፡ ወበኵነኔሁ፡ ለእግዚአብሔር፡ አላ፡ ውስተ፡ ኵሉ፡ እኩይ፡ ወዝሙት፡ ወርኩስ፡ ወስስዕት፡ ወጽርፈት፡ ወኢተዘክሮ፡ አምላኮሙ።
6 ወኢይበልዑ፡ ኵሎ፡ ማውታ፡ ወደመ፡ ወብልዓ፡ አርዌ፡ ወብትከ፡ ወኵሎ፡ ዘኢይሠምር፡ እግዚአብሔር፡ ወአልቦ፡ ሕግ፡ እምኵሉ፡ ትእዛዛተ፡ ጽድቅ፡ ዘጽሑፍ፡ ውስተ፡ ኦሪት።
7 ወኢያእምርዎ፡ ለእግዚአብሔር፡ ከመ፡ ውእቱ፡ ፈጣሪሆሙ፡ ወመድኃኒሆሙ፡ ዘአውጽ፡ ኦሙ፡ እምከርሠ፡ እሞሙ፡ ወሴሰዮሙ፡ በዘይደሉ።
8 ወአልቦሙ፡ ሕግ፡ በውስተ፡ ፍትሕ፡ እለ፡ የሐውሩ፡ ውስተ፡ ፁግ፡ ወትዕግልት፡ ወዝሙት፡ ወርኩስ፡ እንዘ፡ ያወስቡ፡ ብእሲተእ፡ አቡሆሙ፡ ወእኅተ፡ እሞሙ። ወይገብሩ፡ ክውሎ፡ እኩየ፡ ወያወስቡ፡ እኅቶሙ፡ ወአዝማዲሆሙ፡ ወአልቦሙ፡ ሕግ።
9 ወኵሉ፡ ፍኖቶሙ፡ ዳኅፅ፡ ወጽልመት፡ ወርኩስ፡ ወዝሙት።
10 ወእሙንቱሰ፡ ደቂቀ፡ መቃቢስ፡ ይትዓቀቡ፡ በኵሉ፡ ዘዚአሆሙ፡ ትኅርምት፡ ወኢይበልዑ፡ ማውታ፡ ወብትከ፡ ወኵሎ፡ ርኵሶሙ፡ ወኃጢአቶሙ፡ ለደቂቀ፡ ከለዳውያን፡ እስመ፡ እኩይ፡ ወብዙኅ፡ ምግባሪሆሙ፡ ዘኢትጽሕፈ፡ ውስተ፡ ዝንቱ፡ መጽሐፍ፡ ዘይገብሩ፡ ደቂቀ፡ አረባማያን፡ ኃጥአን፡ ወዓላውያን፡ መናፍቃን፡ ወጽልሕዋን፡ ወምሉዓን፡ ጺዕ፡ ወርኵስ፡ ወትዕግልት።
11 ወአልቦ፡ ላዕሌሆሙ፡ ክሉ፡ ዘይሠምር፡ እግዚአብሔር፡ ፈጣሪሆሙ።
12 ወካዕበ፡ ያመልኩ፡ ጣዖተ፡ ዘስሙ፡ ብኤል፡ ፌጎር፡ ወያመልክዎ፡ ወይትአመንዎ፡ ከመ፡ እግዚአብሔር፡ ፈጣሪሆሙ፡ እስመ፡ ጽሙም፡ ወበሐም፡ ውእቱ፡ ወአልቦ፡ ዘይሬኢ፡ ወዘይሰምዕ፡ እስመ፡ ግልፎ፡ ግብረ፡ እደ፡ ሰብእ፡ ውእቱ፡ ዘሰበኮ፡ ነሀቤ፡ ወርቅ፡ ወብሩር፡ ግብረ፡ ግብረ፡ እጓለ፡ እመሕያው፡ ዘአልቦ፡ አእመሮ፡ ወእስትንፋስ።
13 ወኢይበልዕ፡ ወኢይሰቲ።
14 ወኢይቀትል፡ ወኢያሐዩ።
15 ወኢይተክል፡ ወኢይምሑ።
16 ኢየሐስም፡ ወኢያሤኒ።
17 ኢያነጹ፡ ወኢያብዕል።
18 ኢይቀሥፍ፡ ወኢይሠሃል፡ አላ፡ ባሕቱ፡ ዕቅፍት፡ ይከውን፡ ለአስሕቶ፡ ዓብዳን፡ ሕዝበ፡ ከለዳውያን።
=== chapter 6 ===
[Chapter 6]
1 ወገብረ፡ ዕቡይ፡ ጺሩጻይዳን፡ ፀረ፡ እግዚአብሔር፡ ካህናተ፡ ሐሰት፡ ወገሃነውተ፡ አማልክት።
2 ወይሠውዑ፡ ሎሙ፡ ወያወጽሑ፡ ሎሙ።
3 ወይመስሎ፡ ከመ፡ እሙንቱ፡ ዘይበልዑ፡ ወይሰትዩ።
4 ወይሁቦሙ፡ ለእለ፡ ጸብሐት፡ አልህምተ፡ ወአባግዓ፡ ወሐራጊተ፡ ወአጠሊ። ወይሠውዑ፡ ሠርከ፡ ወነግህ፡ ወይበልዕ፡ እምይእቲ፡ መሥዋዕት፡ ርኩሰት።
5 ወአኮ፡ ለሊሆሙ፡ ባሕቲቶሙ፡ ዘይገብርዎ፡ አላ፡ ለአብእኒ፡ ይዌህክዎሙ፡ ወያጌብርዎሙ፡ ከመ፡ ይሡዑ፡ ለአማልክቲሆሙ።
6 ወሶበ፡ እይዎሙ፡ ለደቂቀ፡ መቃቢስ፡ ከመ፡ ሠናያን፡ እሙንቱ፡ ወያመልክዎ፡ ለእግዚአብሔር፡ ፈጣሪሆሙ፡ ፈቀዱ፡ እሙንቱ፡ ገነውተ፡ አማልክተ፡ ያስሕትዎሙ፡ ከመ፡ ይሡዑ፡ ወይብልዑ፡ እምይእቲ፡ መሥዋዕት፡ ርኵሰት። ወአበይዎሙ፡ እሉ፡ ቡሩካን።
7 ወስእንዎሙ፡ ኦሁ፡ አብሎቶሙ፡ እስመ፡ ትእዛዘ፡ አቡሆሙ፡ የዓክቡ፡ ወይፀንዑ፡ በገቢረ፡ ሠናይ፡ ወይፈርህዎ፡ ለእግዚአብሔር፡ ፈድፋደ።
8 ወሶበ፡ ሐመይዎሙ፡ ወፀረፉ፡ ላዕሌሆሙ፡ ወተዓገልዎሙ።
9 ወነገርዎ፡ ለጺሩጻይዳን፡ ንጉሥ፡ ከመ፡ አብየ፡ ሰጊደ፡ ወሠዊዓ፡ ለአማልክቲሁ።
10 ወበእንተዝ፡ ተምዓ፡ ንጉሥ፡ ወኀዘነ፡ ወአዘዘ፡ ያምጽእዎም፡ ወአምጽእዎሙ፡ ወአቀም፡ ዎሙ፡ ቅድሜሁ፡ ወይቤሎሙ፡ ሡዑ፡ ወስግዱ፡ ለአማልክትየ።
11 ወአውሥኡ፡ ወይቤልዎ፡ ንሕነሰ፡ ኢንሰጠወከ፡ በዝነገር፡ ወኢንሠውዕ፡ ለአማልክቲከ፡ ርኩሳን።
12 ወገረሞሙ፡ በብዙኅ፡ ግብር፡ ወኢክህሎሙ፡ እስመ፡ አጥብዑ፡ ልቦሙ፡ ለእግዚአብሔር።
13 ወአንደደ፡ እሳት፡ ወወደዮሙ፡ ወመጠዉ፡ ነፍሶሙ፡ ለእግዚአብሔር።
14 ወአስተርአይዎ፡ ሕያዋኒሆሙ፡ እምድኅረ፡ ሞቱ፡ እንዘ፡ እኅዙ፡ አሰይፍቲሆሙ፡ ምሉ፡ ሐተ፡ እንዘ፡ ይነውም፡ ውስተ፡ ዓራተ፡ መንግሥቱ፡ በሌሊት፡ ወፈርሃ፡ ፈድፋደ።
15 ወይቤሎሙ፡ ምንተ፡ እግበር፡ ለክሙ፡ አጋዕዝትየ፡ ብቍዑኒ፡ ወኢትንሥእዋ፡ ለነፍስየ፡ ከመ፡ እግበር፡ ኵሎ፡ ዘአዘዝክሙኒ፡ ወአፍርህዎ፡ ፈድፋደ።
16 ወነገርዎ፡ ኵሎ፡ ዘይደሉ፡ እንዘ፡ ይብሉ፡ ተዘከር፡ ከመ፡ እግዚአብሔር፡ ፈጠሪከ፡ ውእቱ፡ ወሀሎ፡ ዘይሥዕረከ፡ እምዝ፡ ትዕቢትከ፡ ወያወርደከ፡ ውስተ፡ ገሃነም፡ መትሕተ፡ ምስለ፡ ዲያብሎስ፡ አቡከ፡ ወበህየ፡ ትፌጽም፡ ክውሎ፡ ኵነኔከ፡ በከመ፡ አውዓይከነ፡ በእሳት፡ እንዘ፡ አልቦ፡ ዘአበሰነ፡ ላዕሌከ፡ ወእንዘ፡ ናመልኮ፡ ለእግዚአብሔር፡ ፈጣሪነ፡ ወንሰግድ፡ ሎቱ፡ በፈሪሆቱ፡ ለእግዚአብሔር።
17 እስመ፡ ውእቱ፡ ፈጣሪ፡ ኵሉ፡ ዘገብረ፡ ሰማየ፡ ወምድረ፡ ወባሕረ፡ ዘኵሎ፡ ዘውስቴታ።
18 ፀሐየ፡ ወወርኀ፡ ወከዋክብተ፡ ወኵሎ፡ ፍጥረተ፡ ዘፈጠረ፡ እግዚአብሔር፡ ለሊሁ።
19 ወአልቦ፡ ባዕደ፡ አምላክ፡ ዘእንበሌሁ፡ በሰማይ፡ በላዕሉ፡ ወበምድር፡ ባታሕቱ፡ ዘይክል፡ ኵሎ፡ ወአልቦ፡ ዘይሠዓኖ፡ ዘይቀትል፡ ወያሐዩ፡ ዘይቀሥፍ፡ ወይሣሃል።
20 ወአልቦ፡ ዘይመሥጥ፡ እምእዴሁ፡ እስመ፡ መላኬ፡ ሰማይ፡ ወምድር፡ ውእቱ።
21 ወአልቦ፡ ዘይትዓደው፡ እምትእዛዙ፡ እምዘውእቱ፡ ፈጠሮ፡ ዘእንበለ፡ አንተ፡ ወምዕላይ፡ ወእለ፡ ከማከ፡ መምዕልያን፡ እለ፡ አዖረ፡ አቡከ፡ ሰይጣን፡ ልቦሙ፡ እሙንቱ፡ ወአንተ፡ ወአማልክቲከ፡ ትወርዱ፡ ኅቡረ፡ ውስተ፡ ገሃነመ፡ እንተ፡ አልባቲ፡ ሙፃዕ፡ እስከ፡ ለዓለም።
22 እስመ፡ ኢኮንከ፡ አንተ፡ ባሕቲትከ፡ ዘትገብር፡ ዘንተ፡ አላ፡ ሰይጣን፡ መምህረከ፡ ዘመሀረከ፡ ዘንተ፡ ምግባረ፡ እኩየ፡ ከመ፡ ታሕሥም፡ ላዕሌነ።
23 ወኢያእመርኮ፡ ለእግዚአብሔር፡ ፈጣሪከ፡ ወተፌሲ፡ ርእሰከ፡ ከመ፡ እግዚአብሔር፡ ፈጣሪከ።
24 ወትትዔበይ፡ በግብረ፡ እደዊከ፡ ወበጣዖትከ፡ እስከ፡ የኃሥረከ፡ እግዚአብሔር፡ ወያወርደከ፡ መፍሕተ፡ ገሃነም፡ ወይትቤቀለከ፡ በእንተ፡ ኵሉ፡ አበሳ፡ ወኃጢአት፡ ዘገበርከ፡ በዲበ፡ ምድር።
=== chapter 7 ===
[Chapter 7]
1 አሌ፡ ለከ፡ እንተ፡ ወእለ፡ ከማከ፡ እለ፡ ኢተአምርዎ፡ ለእግዚአብሔር፡ ዘፈጠርክሙ፡ ወኢተአምሩ፡ ትእዛዞ፡ ወቃሎ፡ እስመ፡ ሀለወክሙ፡ ትነሥሑ፡ ኀበ፡ ዘኢይበቍዕ፡ ንስሐ፡ ሶበ፡ ተቀሠፍክሙ፡ በፃዕረ፡ ሲኦል።
2 ወአልብክሙ፡ ሙፃዕ፡ እምኔሃ፡ እስከ፡ ለዓለም፡ አንተ፡ ወአማልክቲከ፡ ወእለ፡ ትሠውዑ፡ ወትሰግዱ፡ ሎሙ፡ ከመ፡ እግዚአብሔር፡ ፈጣሪክሙ፡ ለእለ፡ አልቦሙ፡ ነፍሰ፡ ወእስትንፋስ፡ ወእለ፡ ኢይትቤከሉ፡ ለዘአሕሰመ፡ ሎሙ፡ ወኢያሤንዩ፡ ለዘአሠነየ፡ ሎሙ።
3 እስመ፡ ግብረ፡ እደ፡ ሰብእ፡ እሙንቱ፡ እለ፡ ይትናገር፡ ሰይጣን፡ በውስቴቶሙ፡ ለአስሕቶ፡ ልብ፡ ዘከማከ፡ ዓብዳን፡ ከመ፡ ያወርድክሙ፡ ውስተ፡ ገሃነም፡ ዘእሳት፡ ለክሙኒ፡ ወለገነውተ፡ አማልክቲክሙ፡ ወለእለ፡ ይትዔዘዙክሙ፡ አጋንንት፡ ለክሙ።
4 እስመ፡ ኢተአምሩ፡ ከመ፡ አልቦ፡ ዘይበቍዓክሙ፡ ትጌግዩ፡ ወትስሕቱ።
5 ወእምኔክሙሰ፡ ይኄይሱ፡ እንስሳ፡ እለ፡ ፈጠሮሙ፡ እግዚአብሔር፡ ለሲሳይክሙ፡ ወአራ፡ ዊትኒ፡ ወከለባትኒ፡ እስመ፡ እሙንቱ፡ አልቦሙ፡ ኵነኔ፡ ዳግመ፡ ዘእንበለ፡ አሐቲ፡ ሞት።
6 ወአንትሙሰ፡ ትመውቱ፡ ወትትኳነኑ፡ ዳግመ፡ በረዓድ፡ ገሃነመ፡ እንተ፡ አልባቲ፡ ሙፃዕ፡ እስከ፡ ለዓለም።
7 ወዘንተ፡ ብሂሎሙ፡ ኃለፉ፡ ወተሠወሩ፡ እምኔሁ።
8 ወውእቱሰ፡ ጺሩጻይዳን፡ ኮነ፡ በፍርሃት፡ ዓቢይ፡ ወረዓድ፡ ወኢኃደጎ፡ እስከ፡ ይጸብሕ።
9 ወእምዝ፡ ሖረ፡ ኀበ፡ ገደፈ፡ አብድንቲሆሙ፡ ለጻድቃን፡ ወኢረከቦሙ፡ እስመ፡ ፈቀደ፡ ይቀ፡ ብሮሙ፡ ወስዕኖሙ፡ እስመ፡ እግዚአብሔር፡ ሠወሮሙ፡ ከመ፡ ኢይትኃሥሥ፡ እምሥጋ፡ ሆሙ።
=== chapter 8 ===
[Chapter 8]
1 ወሖረ፡ በትዕቢተ፡ ወበትምይንተ፡ ልብ።
2 ወዖደ፡ በሐውርተ፡ አሕዛብ፡ እለ፡ ዓውጹ፡ እስመ፡ ተብህለ፡ በመንግሥቱ፡ ከመ፡ ሐፂን፡ ዘርእየ፡ ዳንኤል፡ ነቢይ።
3 ወየሐውር፡ በኵሉ፡ ዕበድ፡ ወእኩይ፡ ወሁከት።
4 ወዘነገርነ፡ ቀዲሙ፡ የሐርጽ፡ ወያነጕዕ፡ ወይበልዕ።
5 ወዘተርፈ፡ ይከይድ፡ በእግሩ፡ እስመ፡ ጸያቂ፡ ውእቱ፡ ከመ፡ አቡሁ፡ ዲያብሎስ፡ ግዘፈ፡ ክሣድ።
6 ወኢያአምሮ፡ ለእግዚአብሔር፡ ከመ፡ ውእቱ፡ ፈጣሪሁ፡ እለ፡ ይብል፡ መዋዕልየ፡ ኮነ፡ ከመ፡ መዋዕለ፡ ሰማይ።
7 ወየሐሰብ፡ በልቡ፡ ከመ፡ እምኔሁ፡ ይሠርክ፡ ፀሐይ።
8 ወይተነሣእ፡ በጎድ፡ ወየኃድር፡ በብሔረ፡ ዛብሎን፡ ወያነሥእ፡ ፀብዓ፡ ወመቄዶንያ፡ ወይነ፡ ሥእ፡ ሲሳየ፡ እምሰማርያ፡ ወይሁብዎ፡ አሰበእምሶርያ።
9 ወየኃድር፡ እስከ፡ ደወለ፡ ቄዳር፡ ወይሰፍሕ፡ እስከ፡ ሲዶና፡ ወያገብዕ፡ ግብረ፡ በአካይያ፡ ወያሌዕል፡ ክሣደ፡ እስከ፡ ባሕረ፡ ተከዜ፡ ወይትመየጥ፡ ወይሰፍሕ፡ መልእክቶ፡ እስከ፡ ባሕረ፡ ሕንደኬ።
10 ወከመዝ፡ ያሌዕል፡ ክሣደ፡ እስከ፡ ሰማይ።
11 ወአልቦ፡ አትሕቶ፡ ርእሰ፡ አላ፡ በኵሉ፡ እከይ፡ ወትዝኅርት።
12 ወኵሉ፡ ፍኖቱ፡ ውስተ፡ ደሕፅ፡ ወጽልመት፡ ወትዝኅርት፡ ወዕልወት፡ ወቅጥቃጤ፡ ወክዒወ፡ ደም።
13 ወኵሉ፡ ፍሞቱ፡ ዘይጸልእ፡ እግዚአብሔር፡ ይገብር፡ በከመ፡ መሐሮ፡ ሰብላንዮስ፡ መም፡ ህሩ፡ ለእከይ፡ ወትዕግልት፡ ወጹግ፡ ወያግዕር፡ ዕጓለ፡ ማውታ፡ ወኢይምህክ፡ ነደየ።
14 ወነገሥተ፡ አሕዛብኒ፡ አግብኦሙ፡ ታሕተ፡ እዴሁ፡ ወቀተሎሙ።
15 ወመላእክተ፡ ፀርኒ፡ ኵነነ፡ ወአሕዛበ፡ ብዙኃነ፡ አግረረ፡ ወአገበሮሙ፡ በከመ፡ ፈቀደ።
16 ወኢኃደገ፡ ወአልቦ፡ ዘኢመሠጠ፡ እምባሕረ፡ ተርሴስ፡ እስከ፡ ባሕረ፡ ኢያሪኮ።
17 ወይሰግድ፡ ለጣዖት፡ ወይበልዕ፡ ማውታ፡ ወደመ፡ ወብትከ፡ ወዝቡሐ፡ ለአማልክት፡ ወአ፡ ልቦ፡ ፍትሕ፡ አላ፡ በኵሉ፡ ፍናዊሁ፡ ዘእንበለ፡ ፍትሕ፡ ወመዓት፡ ወቍጥዓ፡ ወሀከክ፡ እስመ፡ ኮነ፡ መደንግጾ፡ ለአሕዛብ፡ እለ፡ እምታሕተ፡ እዴሁ፡ ወያጌብሮሙ፡ ግብረ፡ በከመ፡ ፈቀደ።
18 ወአልቦ፡ ፍርሃተ፡ እግዚአብሔር፡ ቅዶመ፡ አዕይንቲሆሙ፡ እስመ፡ ኵሎ፡ ዘአደሞ፡ ይገ፡ ብር፡ ቅድሜሁ፡ ወየሐውር፡ በትምይንት፡ ቅድመ፡ እግዚአብሔር፡ ፈጣሪሁ።
19 ወኢይሬስዮ፡ ከመ፡ አምላኩ፡ ወእግዚአብሔር፡ ይፈድዮ፡ በከመ፡ ገብረ፡ እኩየ፡ ላዕለ፡ ቢጹ፡ አመ፡ ዕለተ፡ ይእኅዞ፡ በመዓቱ።
20 ወይትቤቀሎ፡ በጊዜሃ፡ በከመ፡ ሠረዎሙ፡ ለኃጥአን፡ እለ፡ እምቅድሜሆሙ፡ እስመ፡ ይቤ፡ አነ፡ እግዚአብሔር፡ ዘእትቤቀሎሙ፡ ለዕቡያን፡ እለ፡ ኢየሐወሩ፡ በትእዛዝየ፡ ወከመ፡ እሠሩ፡ እምድር፡ ዝክሮሙ።
21 ወይትፈደዩ፡ እኩያን፡ በከመ፡ ገብሩ፡ እኩየ።
22 ወለገብርያነ፡ ሠናይሰ፡ ትትልዎሙ፡ ሠናይት፡ እምኀበ፡ እግዚአብሔር።
23 ወበከመ፡ ኢያሱ፡ አኀለቆሙ፡ ለነገሥተ፡ ከነዓን፡ በአሐቲ፡ ጊዜ፡ ለ
5 ነገሥት፡ በውስተ፡ አሐቲ፡ በዓት፡ ወበጸሎቱ፡ ዓቀመ፡ ፀሐየ፡ በገባዖን፡ ከመ፡ ያኅልቆሙ፡ ለሠራዊተ፡ ዚአሆሙ፡ ወከተለ፡ በአሐቲ፡ ጊዜ፡ መጠነ
2 ))፡ እስመ፡ ቆመ፡ ፀሐይ፡ ማዕከለ፡ ሰማይ፡ እስከ፡ ያኃልቆሙ፡ ለሠራዊተ፡ ከናኔዎን፡ ወኤዊዎን፡ ወኬጤዎን፡ ወፌሬዜዎን፡ ወኢያቡሴዎን፡ ወሎሙኒ፡ ቀተሎሙ፡ ወአሠረ፡ እገሪሆሙ፡ ውስተ፡ ክሣውዲሆሙ፡ ወቀተሎሙ፡ በአፈ፡ ሐፂን፡ ወውሰት፡ በዓት፡ ወከደነ፡ ዕብነ፡ ዲቤሆሙ።
24 ከመዝ፡ ይረክቦሙ፡ ለእለ፡ አምዕዕዎ፡ ለእግዚአብሔር፡ በእከየምግባሮሙ።
=== chapter 9 ===
[Chapter 9]
1 ወአንተኒ፡ ኦሰብእ፡ ወአኮ፡ እግዚአብሔር፡ ለምንት፡ ትትዒበይ፡ ዘዮምኪ፡ ሰብእ፡ ወጌሠመ፡ መሬት፡ ወሐመድ፡ ወትከውን፡ ዕፄ፡ ወዕፄያት፡ ውስተ፡ መቃብሪከ።
2 ወዓዲ፡ ሲኦል፡ ትተልወከ፡ ወለእለ፡ ይገብሩ፡ ምግባረ፡ ዚአከ፡ እስመ፡ ለከሰ፡ መምህርከ፡ ሰብልያኖስ፡ ዘአግብኦ፡ ዲበ፡ ርእሱ፡ ኃጢአተ፡ ኵሉ፡ ዓለም፡ በእንተ፡ ዘአስሐቶ፡ ለአቡነ፡ አዳም፡ በትዕቢቱ።
3 እስመ፡ ዘአበየ፡ ሰጊደ፡ ለግብረ፡ አምላኩ፡ በአዕብዮ፡ ርእሱ፡ ወበግዝፈት፡ ክሣዱ።
4 ወአንተኒ፡ በከመ፡ መምህርከ፡ አበይከ፡ ሰፊደ፡ ለእግዚአብሔር፡ አምላክከ።
5 ውአንተኒ፡ ተሐውር፡ በከመ፡ ሖሩ፡ ቀደምትከ፡ እለ፡ ኢየአምርዎ፡ ለእግዚአብሔር፡ አምላኮሙ።
6 ወተበቀሎሙ፡ ወወረዱ፡ ውስተ፡ ሲኦል፡ በእንተ፡ እከየ፡ ምግባሮሙ፡ ዘገብሩ፡ በዲብነ፡ ምድር።
7 ወእንተኒ፡ ከማሆሙ፡ ትወርድ፡ ውስተ፡ ገሃነም።
8 ይመስለከኑ፡ ዘታመሥጥ፡ እምእዴሁ፡ ለእግዚአብሔር፡ እስመ፡ መዓቶ፡ ወሀከ፡ ወተሀከ፡ ይከ፡ አምልኮቶ፡ እግዚአብሔር፡ ዘወሀበከ፡ ሥልጣነ፡ ላዕለ
5 መንግሥታት።
9 ወፈተነከ፡ እመ፡ ትገብር፡ ፈቃዶ፡ ወእመ፡ አልቦ፡ ወእመሰ፡ ዓሠነይከ፡ ፍኖተከ፡ በዲበ፡ ምድር፡ ያሤኒ፡ እግዚአብሔር፡ ፍናዊከ፡ ወኵሎ፡ ዘወደይከ፡ እዴከ፡ ይሤኒ፡ ወይባርክ፡ ለከ፡ ወኵሎ፡ ፀረከ፡ ወጸላእትከ፡ ያገርር፡ ለከ።
10 ወትትፌሣሕ፡ በፀዓትከ፡ ወበበአትከ፡ ወበፍሬ፡ ከርሥከ፡ ወበመዛግብቲከ፡ ወበመራዕይከ፡ ወኀበ፡ ዘአንፀርከ፡ በአፃብዒከ፡ ወሀለይከ፡ በልብከ፡ ኵሉ፡ ይትኤዘዝ፡ ለከ፡ እስመ፡ እምኀበብ፡ እግዚአብሔር፡ ትበውሐ፡ ለከ፡ ከመዝ፡ ትግበር፡ ወትሕንጽ፡ ወትትክል፡ ወትንሥት።
11 ወእመሰ፡ አበይከ፡ ሰሚዓ፡ ቃሉ፡ ወሕጉ፡ ለእግዚአብሔር፡ ወኢሖርከ፡ በኵነኔሁ፡ አልብከ፡ ኀበ፡ ታመሥጥ፡ እምእዴሁ፡ ለእግዚአብሔር፡ ከመ፡ ኵሎሙ፡ ዓላውያን፡ እለ፡ እምቅድሜከ፡ እለ፡ ኢያመልክዎ፡ ለእግዚአብሔር፡ በንጹሕ፡ ወኢትወከሉ፡ በኵነኔሁ፡ ርቱዕ፡ እስመ፡ ጽድቅ፡ ኵሉ፡ ኵነኔሁ።
12 ወአልቦ፡ ዘይሴወር፡ እምቅድመ፡ እምአዕይንቲሁ፡ ወኵሉ፡ ክሡተ፡ ወጽጡህ፡ በቅድሜሁ።
13 አሐዜ፡ ሥልጣነ፡ ነገሥተ፡ ውእቱ፡ ወገፍታዒ፡ መነብርት፡ ኃያላን፡ ውእቱ።
14 ወመልዓሌ፡ ትሑታን፡ ውእቱ፡ ወመንሥኤ፡ ውዱቃን፡ ውእቱ።
15 ወፈታሑ፡ ዕሡራን፡ ውእቱ፡ ወመንሥኤ፡ ምውታን፡ ውእቱ፡ ወለእለ፡ በልየ፡ ሥጋሆሙ፡ ወኮነ፡ ከመ፡ ሐመድ፡ ያነቅሖሙ፡ በጊዜ፡ ፈቀደ፡ እስመ፡ ጠለ፡ ምሕረት፡ ውእቱ፡ እምኀቤሁ።
16 ወለእለ፡ ገብሩ፡ እኩየ፡ ያነሥ፡ ኦሙ፡ ውእተ፡ ትንሣኤ፡ ደይን፡ እስመ፡ አምዕዕዎ፡ ወይትበቀሎሙ።
17 ወዲበ፡ ምድርኒ፡ ያማስን፡ ዘርኦሙ፡ እስመ፡ ዓላውያን፡ ሕጉ፡ ወሥርዓቱ፡ ለእግዚአ፡ ብሔር፡ እሙንቱ።
18 ወኢይፈቅዱ፡ የሀልዉ፡ ኃጥአን፡ ውስተ፡ ምክሮሙ፡ ለጻድቃን፡ እስመ፡ ዕፁብ፡ ፍኖ፡ ቶሙ፡ ለጻድቃን፡ እምፍኖቶሙ፡ ለኃጥአን።
19 ወበከመ፡ ልዑል፡ ሰማይ፡ እምድር፡ ከማሁ፡ ርኁቅ፡ ፍኖቶሙ፡ ለጻድቃን፡ እምፍኖቶሙ፡ ለኃጥአን።
20 ወፍኖቶሙሰ፡ ለኃጥአን፡ ምግባረ፡ ጹግ፡ ወትዕግልት፡ ወዓመፃ፡ ወዝሙት፡ ወጽልሑት፡ ወስስዕት፡ ወሐይደ፡ ንዋዩ፡ ባዕደ፡ ወስካር፡ በዓመፃ።
21 ወረዊጽ፡ ውስተ፡ ከዕወተ፡ ደም፡ ወአማስኖ፡ ውስተ፡ ዘኢይበቍዕ፡ ወስአንብዓ፡ ዕጓለ፡ ማውታ፡ ወበሊዓ፡ ማውታ፡ ወደም፡ ወበሊዓ፡ ሥጋ፡ ሐራውያን፡ ወገመል፡ ወሐዊር፡ ውስተ፡ ብእሲት፡ ሐራሰ፡ ወትክት፡ ዘእንበለ፡ ተነጽሕ።
22 ወዝንቱ፡ ኵሉ፡ ምግባሮሙ፡ ለኃጥአን፡ ስፍሕት፡ ፍኖተ፡ ወርብብት፡ መርበብተ፡ ሰይጣን፡ እንተ፡ ትወስድ፡ ውስተ፡ ኃጐል፡ ወኵነኔ፡ ዘለዓለም።
23 ወፍኖቶሙሰ፡ ለጻድቃን፡ ፀባብ፡ ወመቅዓን፡ እንተ፡ ትወስድ፡ ውስተ፡ ሕይወት፡ ትሕትና፡ ወየሃውት፡ ፍቅረ፡ ወሰላም፡ ጾም፡ ወጸሎት፡ ወንጽሐ፡ ሥጋ፡ ወተዓቅቦ፡ እመባልዕት፡ ዘኢይበቍዕ፡ ማውታ፡ ወብትክ፡ ወዝሙት፡ ወሐዊረ፡ ብእሲተ፡ ብእሲ።
24 ወይትዓቀቡ፡ እምኵሉ፡ ምግባር፡ ርስሑ፡ ወመባልዕት፡ ርኵሳት፡ እለ፡ ኢእዝዙ፡ ውስተ፡ ሕግ፡ ወእምግባር፡ ርሱሕ፡ ዘኢይሠምሮ፡ እግዚአብሔር፡ እስመ፡ ዘንተ፡ ኵሉ፡ ይግብሩ፡ ኃጥአን።
25 ወጻድቃንሰ፡ ይትገሃሡ፡ እምኵሉ፡ ፍናዋት፡ እኵያተ፡ ዘኢይሠምሮ፡ እግዚአብሔር።
26 ወይፈቅሮሙ፡ ወይትመሐፀኖሙ፡ ወያድኅኖሙ፡ እምኵሉ፡ ምንዳቤሆሙ።
27 ወለኃጥአንሰ፡ ሰይጣን፡ ይቀንዮሙ፡ እስመ፡ የዓቅቡ፡ ሕጎ፡ ወሥርዓቶ፡ ወኵሎ፡ ዘያፈቅር።
=== chapter 10 ===
[Chapter 10]
1 ወአንትሙኒ፡ ነገሥት፡ ወመኳንንት፡ ኢትሑሩ፡ በፍኖተ፡ ዚአሁ፡ አላ፡ ፍርህዎ፡ ለእግዚ፡ አብሔር፡ ዘፈጠርክሙ፡ ወዓቀበክሙ፡ እስከ፡ ይእዜ።
2 ወሖሩ፡ በትእዛዙ፡ ወኵነኔሁ፡ ለእግዚአብሔር፡ ዘክሎ፡ ይመልክ።
3 እስመ፡ ባላት፡ ወልደ፡ ሶፎር፡ ሶበ፡ መጽኡ፡ ደቂቀ፡ እስራኤል፡ መንገለ፡ አማሌቅ፡ ከመ፡ ይትዋረሱ፡ ምድረ፡ ከናኔዎን፡ ወኬጤዎን፡ ወፌሬዜዎን።
4 ወይቤሎ፡ ለበለዓም፡ አነ፡ ከመ፡ ትርግም፡ ሊተ፡ እስመ፡ ዘአንተ፡ ረገምከ፡ ርጉም፡ ውእቱ፡ ወዘአንተ፡ ባረከ፡ ቡሩክ፡ ውእቱ፡ ወአነ፡ እሁበከ፡ ብዙኃ፡ ወርቀ፡ ወብሩር፡ ዘያከብረከ፡ ከመ፡ ትርግም፡ ሊተ።
5 ወበለዓም፡ መጽአ፡ እንዘ፡ ይሴፎ፡ አስበ፡ ዓመፃሁ፡ ወአርአዮ፡ ባላቅ፡ ወልደ፡ ሶፎር፡ ኀበ፡ ተዓነዩ፡ ደቂቀ፡ እስራኤል።
6 ወገብረ፡ መቃስመ፡ ወሦዓ፡ መሥዋዕተ፡ ወጠብሐ፡ አባግዓ፡ ወአልሕምተ፡ እምነ፡ ስቡሐኒሆሙ፡ ወፈቀደ፡ ይርግሞሙ፡ ለደቂቀ፡ እስራኤል።
7 ወኢፈቅደ፡ እግዚአብሔር፡ ከመ፡ ይርግሞሙ፡ አላ፡ ሚጣ፡ ለመርገም፡ ውስተ፡ በረከተ፡ በቃለ፡ ዚአሁ።
8 ወይቤ፡ እለ፡ ይባርኩከ፡ ቡሩካነ፡ ይኩኑ፡ ወእለ፡ ይረግሙከ፡ ርጉማነ፡ ይኩኑ፡ እስመ፡ አንተ፡ ሕዝብ፡ ዘእግዚአብሔር፡ ኃረዮ፡ ወእንተ፡ ማኅደሩ፡ ለፍቁር፡ ዘይመጽእ፡ እምአርያም።
9 ወእምዝ፡ ኃዘነ፡ ወተምዓ፡ ወተቈጥዓ፡ ባላቅ፡ ወልደ፡ ሶፎር፡ ሶበ፡ ባረኮ፡ ባረኮሙ፡ በቅድሜሁ፡ ወአዘዘ፡ ከመ፡ ይርግሞሙ።
10 ወይቤሎ፡ በለዓም፡ ኢይረግም፡ አነ፡ ዘእግዚአብሔር፡ ባረኮሙ፡ እስመ፡ ሕዝብ፡ ዘኃረየ፡ እግዚአብሔር፡ መጽአ፡ ውስተ፡ ዝንቱ፡ ምድር።
11 ወይቤሎ፡ ለበለዓም፡ ባላቅ፡ ወልደ፡ ሶፎር፡ አነ፡ ፈቀድኩ፡ ከመ፡ ትርግሞሙ፡ ሊተ፡ ወኢረገምኮ፡ ወአንተ፡ ባርኮ፡ ባረኮሙ፡ በቅድሜየ፡ ወአንሰ፡ ምልዓ፡ ቢትኒ፡ ወርቀ፡ ወብሩር፡ እምወሀብኩከ፡ ሶበ፡ ትቤ፡ ሀበኒ፡ ወረገምኮ፡ ሊተ፡ ወአንተሰ፡ ባርኮ፡ ባረኮሙ፡ ወኢያሠነይከ፡ ሊተ፡ ወአነሂ፡ ኢያሤኒ፡ ለከ።
12 ወይቤ፡ በለዓም፡ አንሰ፡ ኢይክል፡ ተዓውሮ፡ ወተአድዎ፡ ቃለ፡ እግዚአብሔር፡ አላ፡ ዘወደየ፡ እግዚአብሔር፡ ቃለ፡ ውስተ፡ አፉየ፡ ኪያሁ፡ እነብብ።
13 ወአንሰ፡ ኢያበድር፡ ንዋየ፡ እምነፍስየ፡ እስመ፡ ለእመ፡ አፍቀርኩ፡ ንዋየ፡ ይትመዓዓኒ፡ እግዚአብሔር፡ ከመ፡ ኢይርግም፡ ሕዝበ፡ ቡሩከ።
14 እስመ፡ ይቤሎ፡ እግዚአብሔር፡ ለያዕቆብ፡ አቡሆሙ፡ እለ፡ ይባርኩከ፡ ቡሩካነ፡ ለይኩን፡ ወእለ፡ ይረግሙከ፡ ርጉማነ፡ ለይኩኑ፡ እስመ፡ ኵሎ፡ ዘይባርከከ፡ ቡሩክ፡ ውእቱ።
15 ወዘሰ፡ ይረግመከ፡ ዘእንበለ፡ ፍትሕ፡ ርጉም፡ ውእቱ፡ ዓሠኒ፡ ምግባሪከ፡ ወፍኖተከ፡ ከመ፡ ይሠምር፡ ብከ፡ እግዚአብሔር።
16 ወኢትኩን፡ ከመ፡ ቀዳሜ፡ ሕዝብ፡ እለ፡ አምዕዕዎ፡ ለእግዚአብሔር፡ በእከዮሙ፡ ወውእቱ፡ ተሐየዮሙ፡ ወቦ፡ እለ፡ ደምሰሶሙ፡ በማየ፡ አይህ።
17 ወቦ፡ እለ፡ አጥፍኦሙ፡ በእደ፡ ፀሮሙ፡ ወአምጽአ፡ ፀር፡ ሕዝበ፡ እኩያነ፡ እለ፡ አሕመ፡ ምዎሙ፡ ወፄወውሙ፡ ለነገሥቶሙ፡ ምስለ፡ ነቢያቲሆሙ፡ ወሌዋውያኒሆሙ።
18 ወአብጽሕዎሙ፡ ኀበ፡ ነከር፡ ብሔር፡ እንተ፡ ኢየአምሩ፡ ወፅወውዎሙ፡ ወማኀርክዎሙ፡ ወቀሠፍዎሙ፡ ወአማሰኑ፡ ብሔሮሙ።
19 ወረሰይዋ፡ ለኢየሩሳሌም፡ ከመ፡ ገራኀተ፡ እስመ፡ ነሠቱ፡ ጥቆማ፡ ወቅጽራ፡ ለቅድስት፡ ሀገር።
20 ወተጼወዉ፡ ካህናት፡ ወተጸርዓ፡ ሕግ፡ ወወድቁ፡ እደው፡ በኵናት።
21 ወተጼወዋ፡ ዕቤራተ፡ ወኢበከያ፡ ላዕለ፡ አምታቲሆን፡ እለ፡ ሞቱ፡ እስመ፡ ተጸወዋ፡ ወሀለዋ፡ ላዕለ፡ ርእሶን።
22 ወበከዩ፡ ሕፃናት፡ ወተኃፍሩ፡ አዕሩግ፡ ወኢመሐሩ፡ ገጸ፡ አረጋዊ፡ ወዘሲበት።
23 ወኢእለ፡ ውስተ፡ ሰብሰብ፡ ወኢደናግለ፡ ወአማሰኑ፡ ኵሎ፡ ዘረከቡ፡ እምውስተ፡ አህጉሪ፡ ሆሙ፡ ወአፍለስዎሙ፡ ብሔረ፡ ነኪር፡ ኀበ፡ ኢየአምሩ፡ እስመ፡ ሶበ፡ ፈቀደ፡ እግዚአብሔር፡ ተምዓ፡ ላዕለ፡ ሕዝበ፡ ዚአሁ፡ ያቀድም፡ ነሢተ፡ መቅደሱ።
24 ወበእንተዝ፡ ሶበ፡ ተሐየዮሙ፡ እግዚአብሔር፡ ለደቂቀ፡ እስራኤል፡ ረስያ፡ እግዚአብሔር፡ ለኢየሩሳሌም፡ ትትሐረስ፡ ከመ፡ ገራህት፡ እስመ፡ ኵሉ፡ ጊዜ፡ ያምዕዕዎ፡ ለፈጣሪሆሙ።
25 ወውእቱሰ፡ ኢያጠፍዖሙ፡ በምንትኒ፡ በምዕር፡ እስመ፡ ይምህኮሙ፡ በእንተ፡ አበዊ፡ ሆሙ፡ ወአኮ፡ በእንተ፡ ርእሶሙ፡ ዘይምህኮሙ፡ አላ፡ እስመ፡ ያፈቅሮሙ፡ ለአበዊሆሙ፡ ለአብርሃም፡ ወለይስሐቅ፡ ወለያዕቆብ፡ እለ፡ ነግሡ፡ በጽድቅ፡ ወሖሩ፡ ድሜሁ፡ በርትዕ፡ ለፈጠሮሙ።
26 ወውእቱኒ፡ ሢሞሙ፡ ምክዕቢተ፡ ክብር፡ ዘበሰማይኒ፡ ወዘበምድርኒ
2 መንግሥተ፡ አድምዑ።
27 ወከማሁ፡ አንትሙኒ፡ ነገሥት፡ ወመኳንንት፡ እለ፡ ሀለዉክሙ፡ ውስተ፡ ዝንቱ፡ ዓለም፡ ኃላፊ፡ ተዘከርዎሙ፡ ለእለ፡ እምቅድሜክሙ፡ እለ፡ ሖሩ፡ በንጹሕ፡ ከመ፡ ወረሱ፡ መንግሥተ፡ ሰማያት፡ ወሠነየ፡ ስሞሙ፡ ለትውልደ፡ ትውልድ።
28 ወአንተኒ፡ ከመ፡ ያርትዕ፡ መንግሥተከ፡ ወያሠኒ፡ ሰመከ፡ በከመ፡ እለ፡ እምቅድሜከ፡ ሠናያን፡ ነገሥት፡ እለ፡ አሥመርዎ፡ ለእግዚአብሔር፡ በሥነ፡ ሕይወቶሙ።
=== chapter 11 ===
[Chapter 11]
1 ተዘከሮ፡ ለሙሴ፡ ብእሴ፡ እግዚአብሔር፡ በጸሎቱ፡ ወበትሕትናሁ፡ እንዘ፡ ይርኢ፡ ዘመጠነ፡ ሕዝቦ፡ ኢተምዕዓ፡ ወኢያኅጐለ፡ አላ፡ ለእለ፡ ሐመይዎ፡ እኁሁ፡ ወውእቱ፡ ለእለ፡ ፈቀደ፡ እግዚአብሔር፡ ያጠፍዖሙ፡ በምዕር፡ አስተስረየ፡ ሎሙ፡ ኀበ፡ እግዚአብሔር፡ በየዋሃት፡ እንዘ፡ ይብል፡ መሐር፡ እግዚአብሔር፡ ሕዝበከ፡ ወኢትትሐይ፡ እስመ፡ አበሱ፡ ሕዝብከ፡ በቅድሜከ።
2 ወሊተሰ፡ ለኃጥእ፡ ገብርከ፡ ተሣሃለኒ፡ እስመ፡ አበስኩ፡ አቅድሜከ፡ ወለእሙንቱኒ፡ ሥረይ፡ ሎሙ፡ እስመ፡ መሐሪ፡ አንተ፡ ወመስተሣህል።
3 ወከመዝ፡ አስተሥርየ፡ ሎሙ፡ ለአለ፡ ሐመይዎ።
4 ወበእንተ፡ ዝንቱ፡ ተአምየ፡ የዋሃ።
5 ወአፍቀሮ፡ እግዚአብሔር፡ ፈድፋደ፡ እምኬሎሙ፡ ድፈቂቀ፡ ሌዋውያን፡ አኃዊሁ፡ ወአስ፡ ተማሰሎ፡ ከመ፡ እግዚአብሔር፡ በኀቤሆሙ፡ እስመ፡ ለካህናትኒ፡ ይሰይሞሙ።
6 ወለእለ፡ ተዓደወ፡ ደቂቀ፡ ቆሬ፡ እሥጠሞሙ፡ መተሕተ፡ ምድር፡ ወአውረዶሙ፡ ውስተ፡ ሲኦል፡ ሕያዋኒሆሙ፡ በነፍስ፡ ወበሥጋ፡ ምስለ፡ ደባትሪሆሙ፡ ወእንስሳሆሙ፡ ወኵሉ፡ ቃሉ፡ በከመ፡ ነበበ፡ ይትገበር፡ ሎቱ፡ ከመ፡ እግዚአብሔር፡ እስመ፡ አፍቀሮ፡ ለእግዚአብ፡ ሔር፡ አምላኩ፡ ወኢተዓደወ፡ እምትእዛዙ።
7 ወከማሁ፡ አንተሂ፡ ለእመ፡ ኢተዓደውከ፡ ትእዛዘ፡ እግዚአብሔር፡ ይገብር፡ ለከ፡ እግዚአ፡ ብሔር፡ ፈቃደከ፡ ወይሠምር፡ ቃለከ፡ ወየዓቅብ፡ መንግሥተከ።
8 ወደቂቀ፡ ቆሬ፡ ወዓሳፍ፡ እለ፡ ተዓደዉ፡ እምትእዛዙ፡ ለሙሴ፡ ወአንጐርጐሩ፡ ላዕሌሁ፡ በእንተ፡ ዘይቤሎሙ፡ አርትዑ፡ ነፍስክሙ፡ ለእግዚአብሔር።
9 ወይቤልዎ፡ ኢኮነኑ፡ ንሕነሰ፡ ደቂከ፡ ሌዊ፡ ዘንገብር፡ ግብረ፡ ክህነት፡ በውስተ፡ ደብተራ፡ ዘመርውል።
10 ወነሥኡ፡ መዓጥኒሆሙ፡ ከመ፡ ይዕጥኑ፡ ወሖሩ፡ ወዓጠኑ፡ ወኢተወከፈ፡ እግዚአብሔር፡ ጸሎቶሙ፡ ወበእሳተ፡ መዓጥኒሆሙ፡ ወዕዩ፡ ወተመስዉ፡ ከመ፡ ሰምዕ፡ ዘይትመሰው፡ በእሳተ፡ ወኢተርፈ
1 እምውስቴቶሙ፡ ወኢአፅምቲሆሙ፡ ወኢአልባሆሙ፡ ዘእንበለ፡ ማዕጠንት፡ ዘብርት፡ ዘአግብኡ፡ ውስተ፡ ቤተ፡ እግዚአብሔር፡ ዘበትእዛዘ፡ እግዚአብሔር፡ እስመ፡ ይቤ፡ ተቀደሰ፡ መዓጥኒሆሙ፡ በውዕየት፡ ሥጋሆሙ።
11 ወበእንተዝ፡ ይቤሎሙ፡ እግዚአብሔር፡ ለሙሴ፡ ወለአሮን፡ አስተጋብዑ፡ መዓጥኒሆሙ፡ ውስተ፡ ደብተብራ፡ ወይኩን፡ ለቤትየ፡ ግበሪሃ፡ ወኵሉ፡ ዘሠራዕኩ፡ ላቱ፡ እምአፍኣ፡ እስከ፡ ውሥጥ።
12 ወዓሠነየ፡ ግበሪሃ፡ ለቅድስት፡ ደብተራ፡ ምስሐለ፡ ወኆፃደተ፡ ወኪሩበ፡ ወአብሕርተ።
13 ወመቅድሐ፡ ወመሣውረ፡ ወመዋድደ፡ ወዓፀደ፡ ገድገድኒ፡ ለደብተራ፡ ጻሕራተ፡ ወመሥ፡ ዋዕተ፡ ዘይሠውዑ፡ በውስተ፡ ደብተራ፡ መርጡል።
14 ወመሥዋዕተ፡ ዘፈቃድ፡ ወመሥዋዕተ፡ ዘመድኃኒት፡ ወመሥዋዕተ፡ ብፅዓት፡ ወዘበእንተ፡ ኃጢአት፡ ወመሥዋዕተ፡ ዘበሕጉ።
15 ወኵሎ፡ ዘአዘዞ፡ ለሙሴ፡ በውስተ፡ ደብተራ፡ መርጡል፡ ከመ፡ ይግበሩ፡ ባቲ፡ አዘዞሙ።
16 ወኢያስተቱ፡ ተቀንዮ፡ ለአምላኮሙ፡ ከመ፡ ይስባሕ፡ ስሙ፡ በላዕሌሆሙ፡ በውስተ፡ ደብተራ፡ ሕጉ፡ ለእግዚአብሔር፡ አምላኮሙ፡ ዘአሰፈዎሙ፡ ከመ፡ የሃቦሙ፡ ርስተ፡ አበዊሆሙ፡ ምድረ፡ አንተ፡ ትውኅዘ፡ ሐሊበ፡ ወመዓረ፡ ዘመሐለ፡ ሎቱ፡ ለአብርሃም።
17 ወተካየደ፡ ለይስሐቅ፡ ወዓቀመ፡ ሰምዓ፡ ለያዕቆብ።
18 ወለሙሴ፡ ወለአሮን፡ በውስተ፡ ደብተራ፡ ሰምዕ።
19 ወለሳሙኤል፡ ወለኤልያስ፡ በኢየሩሳሌም፡ በውስተ፡ ደብተራ፡ በቤተ፡ መቅደስ፡ በኀበ፡ ሐነጸ፡ ሰሎሞን፡ እስከ፡ ይከውን፡ ቤተ፡ እግዚአብሔር፡ ወምዕራፈ፡ ስሙ፡ ለልዑል፡ ወማሕደሮ፡ ለቅዱስ፡ እስራኤል።
20 እስመ፡ ምሰአል፡ ወምስትሥራየ፡ ኃጢአተ፡ ይእቲ፡ በኀበ፡ ያስተርኢ፡ ለካህናቲሁ፡ ለእለ፡ የሐውሩ፡ በየዋሃተ።
21 ወኀበ፡ ይሰምዕ፡ ጸሎቶሙ፡ ለእለ፡ ይገብሩ፡ ፈቃደ።
22 አኀበ፡ ይሠራዕ፡ ሕጉ፡ ለእግዚአብሔር፡ ቅዱስ፡ እስራኤል።
23 ወበኀበ፡ ይትገበር፡ ጽንሐሐ፡ መሥዋዕት፡ ወዕጣን፡ ለመዓዛ፡ ሠናይ፡ ለእግዚአብሔር፡ ቅዱስ፡ እስራኤል።
24 ወይትናገር፡ በመልዕልተ፡ ምስሐል፡ በደብተራ፡ መርጡል፡ ወያስተርኢ፡ ስብሐቲሁ፡ ለእግዚአብሔር፡ ለኅሩያኒሁ፡ ደቂቀ፡ ያዕቆብ፡ ወቅዱሳኒሁ፡ እለ፡ የሐውሩ፡ በትእዛዙ፡ ወኵነኔሁ፡ ለእግዚአብሔር።
25 ወእለሰ፡ ይትዔየሩ፡ ይከውኑ፡ ከመ፡ ደቂቀ፡ ቆሬ፡ እለ፡ ውኅጠቶሙ፡ ምድር፡ ወከማሁ፡ ኃጥአን፡ ሀለዎሙ፡ ይትወደዩ፡ ውስተ፡ ኵነኔ፡ ነደ፡ እሳት፡ እንተ፡ አልባቲ፡ ሙፆዕ፡ እስከ፡ ለዓለም።
=== chapter 12 ===
[Chapter 12]
1 አሌ፡ ለክሙ፡ ኃያላነ፡ እስራኤል፡ እለ፡ ኢየዓቀብኩሙ፡ ዘአዘዝክሙ፡ በውስተ፡ ደብተራ፡ ወኢገበርክሙ፡ ፈቃደ፡ ዘእንበለ፡ ፈቃደ፡ ርእሰክሙ፡ ትዕቢት፡ ወትዝኅርት፡ ወዝሙት፡ ወስስዕት፡ ወስካር፡ ወስታይ፡ ወመሐሊ፡ በሐሰተ።
2 ወበእንተዝኬ፡ ይነደድ፡ መዓትየ፡ ላዕሌክሙ፡ ከመ፡ ሐሠር፡ ዘቅድመ፡ ገጸ፡ እሳት፡ ወከመ፡ እሳት፡ ዘያነድድ፡ አድባረ፡ ወከመ፡ ነፋስ፡ ዓውሎ፡ ዘያነሥኦ፡ ለፀበል፡ ድኩም፡ እምድር፡ ወይዘርዎ፡ መልዕልተ፡ አየረ፡ ኃበ፡ ዘኢይትረክብ፡ ዓሠሩ፡ እምነ፡ ምግባሩ።
3 ወከማሁ፡ አጠፍዖሙ፡ ለኵሎሙ፡ እለ፡ ይገብርዋ፡ ለእኪት፡ እምቅድመ፡ ገጽየ፡ ይቤ፡ እግዚአብሔር፡ ቅዱስ፡ እስራኤል፡ ወተዘከርዎ፡ ለእግዚአብሔር፡ ዘኵሎ፡ ይመልክ፡ ወአልቦ፡ ዘይሠዓኖ።
4 ወያፈቅሮሙ፡ ለአለ፡ ያፈቅርዎ፡ ወይሠሪ፡ ሎሙ፡ ኃጢአቶሙ፡ ወአበሳሆሙ፡ ለእለ፡ የሐውሩ፡ በትእዛዙ፡ ወኢትኩኑ፡ ድንፅዋነ፡ ወድንዙዛነ፡ ልብ፡ ለኢአሜን።
5 ወአርትዑ፡ ነፍስክሙ፡ ለአግዚአብሔር፡ ወተመሰሎ፡ ቦቱ፡ ከመ፡ ታድኅኑ፡ ነፍስክሙ፡ ወአድኅንክሙ፡ እምእደ፡ ፀርክሙ፡ አመ፡ ዕለተ፡ ምንዳቤክሙ።
6 ወሶበ፡ ተጼውዑኒ፡ አብለክሙ፡ ነዋ፡ ሀሎኩ፡ ምስሌክሙ፡ ወአድኅነክሙ፡ እምእደ፡ ፀርክሙ፡ ወኢይትሔየይክሙ፡ አመ፡ ዕለተ፡ ምንዳቤክሙ፡ እስመ፡ ተወከልክሙ፡ ብየ፡ ወገብርክሙ፡ ትእዛዝየ፡ ወኢተዓደውክሙ፡ እምሕግየ፡ ወአፍቀርክሙ፡ ዘአነ፡ አፍቀር፡ ይቤ፡ እግዚአብሔር፡ ዘኵሎ፡ ይመልክ።
7 ወለእለ፡ ያፈቅርዎ፡ ያፈክሮሙ፡ ወለእለ፡ የዓቅቡ፡ ትእዛዞ፡ ይትመሐፀኖሙ፡ እስመ፡ መሐሪ፡ ወመስተሥሕል፡ ውእቱ።
8 ወየበዝኅ፡ መይጠ፡ መዓቱ፡ ወኢያነድድ፡ በኵሉ፡ መቅሠፍቱ፡ እስመ፡ መሐሪ፡ ውእቱ፡ እስመ፡ የአምሮሙ፡ ከመ፡ ሥጋ፡ ወደም፡ እሙንቱ፡ ወእምከመ፡ ወጽአት፡ ነፍሰቶሙ፡ እምሥጋሆሙ፡ ይገብዑ፡ ውስተ፡ መሬቶሙ።
9 ወኢየአምሩ፡ ሀበ፡ ሀለዉ፡ እስከ፡ አመ፡ ፈቀዶ፡ እግዚአብሔር፡ ከመ፡ ያምጽኦሙ፡ እምኀበ፡ ኢሀለዉ፡ እስመ፡ ፈጠሮሙ፡ እምኀበ፡ ኡሀለዉ፡ ወካእበ፡ ውእቱ፡ ነሥአ፡ ነፍሶሙ፡ ወአግብአ፡ መሬተ፡ ውስተ፡ መርስቱ።
10 ወካዕበ፡ ውእቱ፡ ያመጽኦሙ፡ እምኀበ፡ ኢሀለዉ፡ ውስተ፡ ሀለዎ፡ ፈቃዱ።
11 ወጺሩጻይዳንሰ፡ ዓላዊሁ፡ ለእግዚአብሔር፡ አብዝኃ፡ ተዓብዮ፡ ቅድመ፡ እግዚአብሔር፡ ወሶበ፡ ኃደጎ፡ እስከ፡ አመ፡ ጊዜ፡ ፈቀዶ፡ አዕበየ፡ ርእሶ።
12 ወይቤ፡ ኮነ፡ መዋዕልየ፡ ከመ፡ መዋዕለ፡ ሰማይ፡ ወአነ፡ ውእቱ፡ ዘአሠርቅ፡ ፀሐየ፡ ዘኢይመውት፡ እስከ፡ ለዓለም።
13 ወዘንተ፡ ቃለ፡ እንዘ፡ ኢይፌጽም፡ ወረዶ፡ መልአከ፡ ሞት፡ ዘስሙ፡ ጥልምያኮስ፡ ወዘበጦ፡ ልቦ፡ ወሞተ፡ በጊዜሃ፡ ወተአጐለ፡ እምስነ፡ ንብረቱ፡ ወእምብዝኃ፡ ትዕቢቱ፡ ወእምእከየ፡ ምግባሩ፡ እስመ፡ ኢያእኰቶ፡ ለፈጣሪሁ።
14 ወሠራዊተ፡ ንጉሠ፡ ከለዳውያንሰ፡ እንዘ፡ ሀለዉ፡ አፍአ፡ ሀገሩ፡ ወትዕይንት፡ እንዘ፡ ይፈቅዱ፡ ፀቢዖቶ፡ ወሶበ፡ ሞተ፡ ወፅኡ፡ ወአጥፍዑ፡ ብሔሮ፡ ወማህረኩ፡ ኵሎ፡ እንሳስሁ፡ ወኢያትረፉ፡ እስከ፡ አኢያስተአዝብ፡ ውስተ፡ ዓረፍት።
15 ወኵሎ፡ ንዋዮ፡ ማህረኩ፡ ወቈሳቍሰ፡ ነሥኡ፡ ወአውዓዩ፡ በእሳት፡ ሀገሮ፡ ወአተዉ፡ ውስተ፡ ብሔሮሙ።
=== chapter 13 ===
[Chapter 13]
1 ወእሙንቱሰ
5 መቃብያን፡ ደቂቁ፡ ለመቃቢስ፡ እለ፡ አምኑ፡ ወመጠዉ፡ ነፍሶሙ፡ ለሞት፡ አቢዮሙ፡ በፈዓ፡ መሥዋዕተ፡ ጣዖት።
2 ወመጢዉ፡ ነፍሶሙ፡ ለእሳት፡ ከመ፡ ይድኃኑ፡ እምእሳት፡ ዘበሰማያት፡ እእሚሮሙ፡ ከመ፡ ዝንቱ፡ ዓለምየ፡ የኃልፍ።
3 ወይቤሊ፡ ወኢይነብር፡ ተድላ፡ ለዝሉፍ፡ እስመ፡ አእመሩ፡ ከመ፡ የአኪ፡ ትዕይርተ፡ እግዚአብሔር፡ እምትዕይርተ፡ እጓለ፡ እመሕያው፡ ወየአኪ፡ መዓቱ፡ አእግዚአብሔር፡ እመዓቱ፡ ለንጉሥ።
4 ወይኄይስ፡ አሐቲ፡ ዕለት፡ ተፈሥሖ፡ በአዕፃዳተ፡ ገነት፡ እምአዕላፍ፡ ዓመታት፡ ሐይው፡ በዲበ፡ ምድር፡ ወለነዋህ፡ መዋዕል፡ ይኄይስ፡ አሐተ፡ ሰዓተ፡ ሣህለ፡ ዚአከ፡ እግዚኦ።
5 ወምንትኪ፡ መዋዕለኒ፡ ለሰብእ፡ አኮኑ፡ ከመ፡ ጽላሎት፡ የኃልፍ፡ ወከመ፡ ሰምዕ፡ ዘቅድመ፡ ገጸ፡ እሳት።
6 ወአንተሰ፡ እግዚኦ፡ ለዓለም፡ ትነብር፡ ወዓመቲከኒ፡ ዘኢየኃልቅ፡ ወዝክርከኒ፡ ለትውልደ፡ ትውልድ።
7 ወዘንተ፡ ኵሎ፡ ወዘይመስሎ፡ ሐለዩ፡ ደቂቀ፡ መቃቢስ፡ ወአብደሩ፡ ወአብደሩ፡ ተወክሎ፡ በእግዚአብሔር፡ ወአበዩ፡ በሊዓ፡ መሥዋዕተ፡ ርኵሰት።
8 ወበእንተዝ፡ መጠዉ፡ ሥጋሆሙ፡ ለስምዕ፡ በእንተ፡ እግዚአብሔር፡ አእሚሮሙ፡ ከመ፡ ይትነሥኡ፡ ምውታን፡ ወአእሚሮሙ፡ ከመ፡ ይከውን፡ ፍትሕ፡ እምድኅረ፡ ትንሣኤ።
9 ወእለ፡ ኢተአምሩ፡ ወኢተአምኑ፡ ትንሣኤ፡ ሙታን፡ አእምሩ፡ እንከ፡ እምአሎ
5 ዕደው፡ ሠናያነ፡ ዘውግ፡ እለ፡ ኅቡረ፡ መጠዉ፡ ነፍሶሙ፡ ለሞት፡ አእሚሮሙ፡ ከመ፡ ትሤኒዩኃሪት፡ ሕይወቶሙ፡ እምዛቲ፡ ምድራዊት፡ ኃላፊተ።
10 ወርእዮሙ፡ ከመ፡ ኵሎ፡ የኃልፍ፡ ወመጠዉ፡ ነፍሶሙ፡ ለሞት፡ ከመ፡ እምኀበ፡ እግዚ፡ አብሔር፡ ይርከቡ፡ ምዝጋና፡ በእንተ፡ ዘአምንዎ፡ ወኢሰገዱ፡ ለጣዖት፡ ወኢበልዑሰ፡ መሥዋዕት፡ ምዉት፡ ወርኵሰት።
11 ወበእንተዝ፡ አእሚሮሙ፡ ከመ፡ ያስተፌሥሖሙ፡ በደኃሪት፡ ዕለት፡ በነፍስ፡ ወሥጋ፡ እስመ፡ እንዘ፡ ቦሙ፡ ብእሲት፡ ወውሉድ፡ ኢያእመሩ፡ ጣዕማ፡ ለዛ፡ ዓለም፡ ወምረራ፡ ለሞት፡ ወመጠዉ፡ ነፍሶሙ፡ ለሞት፡ አእሚሮሙ፡ ከመ፡ ይከውን፡ ትንሣኤ፡ በደኃሪት፡ ዕለት፡ በነፍስ፡ ወበሥጋ።
12 ወአእሚሮሙ፡ ከመ፡ ይነግሡ፡ እለ፡ ዓቀቡ፡ ሥርዓቶ፡ ለእግዚአብሔር፡ በዓለም፡ ዘይመጽእ፡ ለትውልደ፡ ትውልድ፡ ወለነዋህ፡ መዋዕለ፡ ኀበ፡ አልቦ፡ ሕማም፡ ወኀዘን።
13 ቦ፡ አልቦ፡ ሕማም፡ ወኀዘን፡ ወአልቦ፡ ሞት፡ ወምስለ፡ እለ፡ አምኑ፡ በቃለ፡ እግዚአብሔር፡ ኄራን፡ ነገሥት፡ ወመኳንንት፡ ወመጠዉ፡ ነፍሶሙ፡ ለሞት፡ ከመ፡ ሰምዕ፡ ማዕከለ፡ እሳት፡ እንዘ፡ ይሬእዩ፡ በሕሊና፡ ልቦሙ፡ ዘደኀሪ።
14 ወይሴፈዉ፡ በዘይበርህ፡ ገጾሙ፡ ምስብዒተ፡ እምፀሐይ፡ ወከመ፡ ይትፈጽሑ፡ በፍቅረ፡ ዚአሁ፡ አመ፡ ትንሣኤ፡ ኵሉ፡ በነፍሰ፡ ወበሥጋከ።
=== chapter 14 ===
[Chapter 14]
1 ሊተሰ፡ የኃዝነኒ፡ ፈድፋደ፡ ወያቴክዘኒ፡ ወይቀልየኒ፡ ልብየ፡ በእንተ፡ አይሁድ፡ ወሳም፡ ራውያን፡ ወፈሪሳውያን፡ ወሰዱቃውያን፡ እለ፡ ኢየአምኑ፡ ትንሣኤ፡ ምውታን፡ አይሁድ፡ ይብሉ፡ ንብላዕ፡ ወንሰተይ፡ ጌሠማ፡ ንመውት፡ ወበህየ፡ አልቦ፡ ዘንሬኢ።
2 ወሳምራውያንሰ፡ ይብሉ፡ ሥጋነሰ፡ ኢይትነሣእ፡ እስመ፡ ፀበለ፡ ይከውን።
3 ወእመሰ፡ ይከውን፡ ትንሣኤ፡ ትንሣኤ፡ ነፍሳቲነ፡ ነአምን፡ እስመ፡ ነፍሰ፡ እመኒ፡ ሞተ፡ ሥጋ፡ ኢትመውት፡ እስመ፡ ከመ፡ ነፋስ፡ ይእቲ፡ እንተ፡ ኢትትረአይ፡ ወከመ፡ ድምፀ፡ ነጐድጓድ፡ ወኢይብልዋ፡ ነያ፡ ወኢታስተርኢ።
4 ወሥጋነሰ፡ ትትረአይ፡ በኵሉ፡ ወትከውን፡ ሐመደ፡ ወፀበለ፡ እስመ፡ አራዊት፡ ይበልዕዋ፡ ወዕፄያትኒ፡ ይበልዕዋ፡ በውስተ፡ መቃብር።
5 ወእሙንቱኒ፡ እለ፡ በልዕዋ፡ ይከውኑ፡ ሐመደ፡ ወኢይትረከብ፡ ዓሠሮሙ፡ እስመ፡ ከመ፡ ሣዕር፡ ይከውኑ፡ ወከመ፡ ዘኢትፈጥሩ፡ ኮኑ፡ ሐመደ።
6 ወበይእቲ፡ ይትረከቡ፡ ሥጋት፡ እለ፡ በልዩ፡ ወከመዝ፡ ይብሉ፡ ፈሪሳውያን፡ ትንሣኤ፡ ምውታንሰ፡ ነአምን፡ ወባሕቱ፡ ያለብሶሙ፡ ለነፍሳት፡ በሰማያት፡ ካልዓ፡ ሥጋ፡ ዘኢኮነ፡ ዘበምድር።
7 ወከመዝ፡ ይብሉ፡ ሰዱቃውያን፡ እምአመ፡ ወፅአት፡ ነፍስነ፡ እምሥጋነ፡ ኢንትነሣእ፡ እምውታን፡ ወአልቦሙ፡ ትንሣኤ፡ ሙታን፡ ኢለነፍስ፡ ወኢለሥጋ፡ ወእምከመ፡ ሞትነ፡ ኢንትነሣእ።
8 ወበእንተ፡ ዝንቱ፡ የዓብዱ፡ ፈድፋደ፡ ወያቲክዘኒ፡ በእንተአሆሙ፡ እስመ፡ ይትናገሩ፡ ጽርፈት፡ ላዕለ፡ እግዚአብሔር፡ ወስብሐቲሁ።
9 ወአልቦሙ፡ ተስፋ፡ ለድኂን፡ እስመ፡ ኢተአመንዎ፡ ለእግዚአብሔር፡ ለዘያጸድቆሙ፡ ወባሕቱ፡ ተስፋ፡ አልቦሙ፡ ለድኂን፡ ወትንሣኤ፡ ሙታን።
10 ወአይሁዳዊ፡ ዕውር፡ ታሰተዓብይኑ፡ ለእግዚአብሔር፡ ዘአምጽአከ፡ እምኀበ፡ ኢሀሎከ፡ ወእንዘ፡ ምራት፡ ረሰየከ፡ ሰብአ፡ ይሥዕነከሁ፡ ዘዘርዓከ፡ ዓብቍሎ፡ ነፍስከ፡ ወሥጋከ፡ በአርዓያሁ፡ ወበአምሳሌሁ።
11 ወኢትትሐሰብኪ፡ ከመዝ፡ እስመ፡ ኢታመሥጥ፡ እምእዴሁ፡ ለእግዚአብሔር፡ ትትነሣ፡ እኬ፡ እንዘ፡ ኢትፈክድ፡ ወትትኳነን፡ እንዘ፡ ኢትሠምር፡ እስመ፡ ሀብለ፡ ሲኦል፡ ውስተ፡ ክሣድከ፡ ሀለወ፡ ዘተእኅዝከ፡ ዛቲ፡ አመ፡ ዕለት፡ ሞትከ።
12 እስመ፡ በውስተ፡ ከርሠ፡ እምከ፡ ትሠርፅ፡ ለከ፡ እምጕንደ፡ ሲኦል፡ ይእቲ፡ ሀብል፡ እንተ፡ ይወድይዋ፡ ውስተ፡ ክሣድከ፡ ወሶበ፡ ትልህቅ፡ አንተ፡ ወከማሁ፡ ትልህቅ፡ ይእቲ።
13 ወሶበ፡ ትመውት፡ አንተ፡ ይወድይዋ፡ ውስተ፡ ክሣድከ፡ ወሶበ፡ ይስህብዋ፡ ጕንዳ፡ ታመጽኦሙ፡ ይእቲ።
14 ወትስህብ፡ አዕፁቂሃ፡ እስመ፡ ሀለዉ፡ ኵሎሙ፡ ኃጥአን፡ እኁዛን፡ ውስቴታ፡ ከመ፡ አህባል፡ ሀሎ፡ ውስተ፡ ክሣውዲሆሙ።
15 ወየመጽአ፡ ኵሎን፡ ነፍሳተ፡ ኃጥአን፡ እምኀበ፡ ሀለዋ፡ እምአጽናፈ፡ ሰማይ፡ ወከማሁ፡ ትስሕበከ፡ ሀብልከ፡ ከመ፡ ታምጽእ፡ ነፍሰከ፡ እምኀበ፡ ሀለዉከ፡ ወታገብዓከ፡ ውስተ፡ ፈለገ፡ ሲኦል።
16 ወሥጋከኒ፡ ተአቲቶ፡ ወዊኖ፡ ምስብዒተ፡ በከመ፡ ሥጋሁ፡ ለአቡነ፡ አዳም፡ ታነሥአከ፡ ጠለ፡ ምሕረቱ፡ ለእግዚአብሔር፡ ወበህየ፡ ትትፈደይ፡ በከመ፡ ገብርከ፡ አበሰ፡ ወኃጢአተ፡ በከመ፡ ኢአሚኖትከ።
17 ወኢይመስልከ፡ በከመ፡ ዘታስት፡ ባዕደ፡ ወትስሐት፡ ለሊከ፡ ዘትነብር፡ ውስተ፡ መቃብር፡ በስሕተትከ፡ ወትብል፡ አልቦ፡ ትንሣኤ፡ ሙታን፡ ከመ፡ ይስሕቱ፡ እንትእዛዘ፡ እግዚአብሔር።
18 ወመኑ፡ የኃድገከ፡ ውስተ፡ ሐመድ፡ ወመሬት፡ ዳዕሙ፡ ያነሥአከ፡ ከመ፡ ይፍዲከ፡ በከመ፡ ምግባሪከ፡ ዘገበርከ።
19 ወአሜሃሰ፡ ይመጽእ፡ እመሂ፡ ዘውስተ፡ ነፋሳት፡ መናፍስቲከ፡ ወእመሂ፡ ዘውስተ፡ ምድር፡ ፀበልከ፡ ወእመሂ፡ ዘውስተ፡ እሳት፡ ላህብከ።
20 ወእመሂ፡ መንፈሰ፡ ሕይወት፡ ዘተነፍሐ፡ ላዕሌከ፡ በውስተ፡ ዓፀደ፡ ጽልመት።
21 ዘትዓዕዋቀ፡ ወነፍሳተ፡ ጻድቃንሰ፡ ውስተ፡ ገነት፡ በፍሥሐ፡ ይትዓፅዋ።
22 ወአንተሰ፡ ኦአይሁዳዊ፡ ወሳምራዊ፡ ወፈሪሳዊ፡ ወሰዱቃዊ፡ እስከ፡ ጊዜ፡ ኵነኔከ፡ ትት፡ ዓሠር፡ በውስተ፡ ጽልመት።
23 ወአሜሃ፡ ትሬኢ፡ በከመ፡ ይፈድየከ፡ እግዚአብሔር፡ በከመ፡ ምግባሪከ፡ በእንተ፡ ዘአስ፡ ሐተከ፡ ሉብኦ።
24 ወትቤሎሙ፡ ኢየሐይዉ፡ ምውታን፡ ንብላዕ፡ ወንስተይ፡ እስመ፡ ጌሠመ፡ ንመውት፡ ወትብል፡ በካልከ፡ እንዘ፡ ትትነብር፡ ዲበ፡ መንበረ፡ ሙሴ፡ አልቦ፡ ትንሣኤ፡ ሙታን።
25 ወበእንተዝ፡ ስሕተከ፡ እንዘ፡ ተአምር፡ መጽሐፈ፡ ኦሪት፡ ወትሜህር፡ ቃለ፡ መጻሕፍት፡ ወእምታሰሕት፡ ሰብእ፡ እምኀሰየከ፡ ሶበ፡ ኢትምህርከ፡ ወኢያአመርከ።
26 ቃለ፡ መጻሕፍት፡ እምታዕሉ፡ ሕዝበ፡ እግዚአብሔር፡ በአከየ፡ ትምህርትከ፡ ወበዘኢይበቍዕ፡ ቃልከ።
27 ወእንተሰ፡ ትትዓሠይ፡ በከመ፡ ምግባሪከ፡ ወበከመ፡ ፍሬ፡ ከናፍሪከ፡ እስመ፡ ኢያደሉ፡ እግዚአብሔር፡ ለገጽ፡ ወለእለ፡ ይሜህሩ፡ ሠናየ፡ የዓሥዮሙ፡ እምሠናያት፡ ዘአስተደለወ፡ ለእለ፡ ይፈቅርዎ።
28 ወአንተሰ፡ አልብከ፡ ኀበ፡ ታመሥጥ፡ እምእዴሁ፡ ለዘይኳንነከ፡ ወሀሎ፡ ይፍዲከ፡ በከመ፡ ምግባሪከ፡ እስመ፡ አንተ፡ ወእለ፡ መሀርኮሙ፡ ኅቡረ፡ ትትኳነኑ።
29 አእምርኩ፡ ከመ፡ ይትነሥኡ፡ ምውታን፡ እመሂ፡ እለ፡ ዓቀቡ፡ ትእዛዞ፡ ይትነሥኡ፡ ወኢ፡ ይትሃከሎሙ፡ ቀዊም፡ እስመ፡ ትእዛዙ፡ ያወፅኦሙ፡ ወበከመ፡ ታወፅዕ፡ ምድር፡ ሣዕረ፡ ሶበ፡ ይዘብጣ፡ ዝናም።
30 ወከመ፡ ታወፅኦ፡ ርጥብት፡ ዕፅ፡ ቈፅለ፡ ሶበ፡ አርወያ፡ ለምድር፡ ዝናመ፡ ወበከመ፡ ትገብር፡ ፍሬ፡ ሥርናይ፡ አው፡ ሰብለ፡ እክል፡ ወኢይትከሃል፡ ከመ፡ ትክላዕ፡ ፍሬሃ፡ ለአመ፡ ሠምረ፡ እግዚአብሔር።
31 ወከመ፡ ፅንሰተ፡ ሶበ፡ ይመጽአ፡ ሕማማ፡ ኢትክል፡ ዓፂወ፡ ማኅፀና፡ እምከመ፡ ሰምዓት፡ ቃለ፡ እግዚአብሔር፡ አላ፡ ትወልዶሙ፡ ሶቤሃ፡ በምዕር፡ እስመ፡ ጠል፡ ዘእምኀበ፡ እግዚአብሔር፡ ይወርድ፡ ላዕሌሃ።
32 ወከማሁ፡ ምድርኒ፡ ታወፅዕ፡ ዕለተ፡ ተዘግቡ፡ ኀቤሃ፡ ኢትክል፡ ዓፂወ፡ ማኅፀና፡ እምከመ፡ ሰምዓት፡ ቃለ፡ እግዚአብሔር፡ አላ፡ ትወልዶሙ፡ ሶቤሃ፡ በምዕር፡ እስመ፡ ጠል፡ ዘእምኀበ፡ እግዚአብሔር፡ ይወርድ፡ ላዕሌሃ።
33 ወይትጋብኡ፡ ሥጋት፡ ውስተ፡ መካናቲሆሙ፡ ኀበ፡ ወድቀ፡ አብድንቲሆሙ፡ ወይትረ፡ ኃው፡ አብያተ፡ መዛግብተ፡ ነፍሳት፡ ወይገብኡ፡ ነፍሳት፡ ውስተ፡ ሥጋት፡ እምኀበ፡ ወፅአ፡ ቀዲሙ።
34 ወበንፍሐተ፡ ከርን፡ ይትነሥኡ፡ ሙታን፡ ከመ፡ ቅጽበተ፡ ዓይን፡ ወይቀውሙ፡ ቅድመ፡ እግዚአብሔር፡ ወየዓሥዮሙ፡ በከመ፡ ግብረ፡ እደዊሆሙ።
35 አሜሃ፡ ትሬኢ፡ ከመ፡ ትትነሣእ፡ እምውታን፡ ወታነክር፡ በኵሉ፡ ምግባሪከ፡ ዘገበርከ፡ አንተ፡ በዲበ፡ ምድር፡ ወሶበ፡ ትሬኢዮሙ፡ ጽሑፋነ፡ ቅድመ፡ አዕይንቲከ፡ ወይእተ፡ አሚረ፡ ትኔስሕ፡ በኀበ፡ ኢይበቍአከ።
36 ወተአምረ፡ ከመ፡ ትትነሣእ፡ እሙታን፡ ወትትፈደይ፡ በከመ፡ ምግባሪከ፡ ዘገብርከ።
=== chapter 15 ===
[Chapter 15]
1 ወእለሰ፡ አድምዑ፡ በምግባሮሙ፡ ሠናይ፡ አሜሃ፡ ይትፌሥሑ፡ ወእለሰ፡ ተሐከዩ፡ እንዘ፡ ይብሉ፡ ኢይትነሥኡ፡ ምውታን፡ አሜሃ፡ የኃዝኑ፡ ሶበ፡ ርእዩ፡ ከመ፡ ተንሥኡ፡ እሙታን፡ ምስለ፡ ምግባሮሙ፡ እኩይ፡ ዘአልቦ፡ ባቍዕ።
2 ወይኳንኖሙ፡ ውእቱ፡ ምግባሮሙ፡ ዘገብሩ፡ እንዘ፡ አልቦ፡ ዘይወቅሶሙ፡ ለሊሆሙ፡ የአምሩ፡ ርእሶሙ፡ ዘከመ፡ ይትኳነን።
3 ወይቀውሙ፡ ምቅዋመ፡ ረሲዓን፡ አመ፡ ዕለተ፡ ብካይ፡ ወኵነኔ፡ አመ፡ ዕለተ፡ ደይን፡ ወአመ፡ ዕለተ፡ እግዚአብሔር።
4 አመ፡ ዕለተ፡ ጽልመት፡ አመ፡ ዕለተ፡ ጣቃ፡ አመ፡ ዕለተ፡ ጊሚ፡ አመ፡ ዕለተ፡ ፀዓዕ፡ አመ፡ ዕለተ፡ መብረቅ።
5 አመ፡ ዕለተ፡ ፍርሃት፡ ወረዓድ፡ አመ፡ ዕለተ፡ ደደክ፡ ወመርቂ፡ አመ፡ ዕለተ፡ አሰሐትያ።
6 አመ፡ ዕለተ፡ ይትፈደይ፡ እኩይ፡ በከመ፡ ገብረእኩየ፡ ወአመ፡ ይትፈደይ፡ ንጹሕ፡ በከመ፡ ገብረ፡ ንጹሐ፡ ወአመ፡ ይትፈደይ፡ ጸዋግ፡ በከመ፡ ገብረ፡ ፁገ።
7 ወአመ፡ ኢይከብር፡ እግዚእ፡ እምገብረ፡ ወአመ፡ ኢትከብር፡ አግዓዚት፡ እምዓመት።
8 ወአመ፡ ኢይከብር፡ ንጉሥ፡ እምሰኪን፡ ወመኰንን፡ እምሕፃን፡ ወአብ፡ እምወልዱ፡ ወእም፡ እምወለታ።
9 ወአመ፡ ኢይከብር፡ ባዕል፡ እምነደይ፡ ወዕቡይ፡ እምትሑት፡ ወአአመ፡ ኢይከብር፡ ዓቢይ፡ እምንዑሰ፡ እስመ፡ ዕለተ፡ ፍትሕ፡ ይእቲ፡ ወዕለተ፡ ፍዳ፡ ወኵነኔ፡ ወእለት፡ በዘይት፡ ፈደይ፡ ኵሉ፡ በከመ፡ ገብረ።
10 ወዕለት፡ በዘይትዓሠዩ፡ ገባርያነ፡ ሠናይ፡ ወአመ፡ ይትፈደዩ፡ እኩየ፡ እለ፡ ገብሩእኪት።
11 ወዕለት፡ አመ፡ ይትፌሥሑ፡ እለ፡ ተዓሠዩ፡ ሠናየ፡ ወዕለት፡ አመ፡ የኃዝኑ፡ እለ፡ ተዓሠዩ፡ እኩየ፡ ወይሬእዩ፡ እለ፡ አሐሰዩ፡ መጻሕፍተ፡ እንዘ፡ ይብሉ፡ ኢይትነሥኡ፡ ምውታን።
12 አሜሃ፡ ይበክዩ፡ ኵሎሙ፡ ኃጥአን፡ ምድር፡ በእንተ፡ ኃጢአቶሙ፡ ዘገብሩ፡ በእንተ፡ ዘረከቦሙ፡ ኃዘን፡ ዘአልቦ፡ ኑዛዜ፡ በእንተ፡ ዘኢገብሩ፡ ሠናየ፡ በዲበ፡ ምድር።
13 ወከማሁ፡ ለኄራንሂ፡ እለ፡ ገብሩ፡ ሠናይ፡ ኢየኃልቅ፡ ፍስሐሆሙ፡ እስከ፡ ለዓለመ፡ ዓለም፡ እስመ፡ እንዘ፡ ሀለዉ፡ በዲበ፡ ምድር፡ አድምዑ፡ ገቢረ፡ ሠናይ።
14 ወኢተዓደዉ፡ ትእዛዘ፡ ፈጣሪሆሙ፡ እስመ፡ አእመሩ፡ ከመ፡ ይትነሥኡ፡ እምነ፡ ምውታን።
15 ወበእንተ፡ ዘኢተዓደዉ፡ እምትእዛዙ፡ ወይወርሱ
16 ወበሰማያትኒ፡ አውረሶሙ፡ ምድረ፡ ሕይወት፡ እንተ፡ መሐለ፡ ለአበዊሆሙ፡ አመ፡ ዕለተ፡ ትንሣኤ፡ አመ፡ ይነድዩ፡ አብዕልት።
17 ወየአወይዉ፡ ገባርያነ፡ እኪት፡ እለ፡ ኢየአምኑ፡ ትንሣኤ፡ ሙታን፡ ወሕገ፡ እግዚአብሔር፡ ወእዕለተ፡ ትንሣኤ፡ ኢተዘከሩ።
18 አሜሃ፡ ይሬእዩ፡ አንተ፡ ትረክቦሙ፡ እኪተ፡ እንተ፡ አልባቲ፡ ማኅለቅት፡ ወእንተ፡ አል፡ ባቲ፡ ፈውስ፡ ወኢኑዛዜ፡ ወበውስተ፡ ልቦሙኒ፡ ኃዘን፡ ዘአልቦ፡ ኑዛዜ፡ ወአልቦ፡ ዕረፍት።
19 ወዕፄ፡ ዘኢይነውም፡ ወእሳት፡ ዘኢይጠፍዕ።
20 ወበአፍአ፡ ሥጋሆሙኒ፡ እሳት፡ ወተይ፡ ወመንፈስ፡ ዓውሎ፡ ወሐሰትያ፡ ወበረድ፡ ወደደክ፡ ዘይዞንም፡ ላዕሌሆሙ።
21 መቃጽሐ፡ እሳት፡ ለእለ፡ ኢየአምኑ፡ ትንሣኤ፡ ሙታን።
=== chapter 16 ===
[Chapter 16]
1 እሰኩ፡ ሐሊ፡ ለሊከ፡ ዘሀሎ፡ ውስተ፡ ሥጋከ፡ በጽፍረ፡ እደዊከ፡ ወእገሪከ፡ ወፀጕረ፡ ርእሰከ፡ እስመ፡ ለለጊዜሁ፡ ትቅርፆሙ፡ ወየዓክሉ፡ ወፂአ፡ ወበዝ፡ አእምር፡ ወለእመ፡ ሀለወከ፡ ልቡና፡ ወአእምሮ፡ ለአሜን።
2 ወእም፡ አይቴ፡ ይወፅእ፡ ትብል፡ እሉ፡ ጽፍረ፡ እደዊከ፡ ወእገሪከ፡ ወፀጕረ፡ ርእስከ፡ አኮኑ፡ እግዚአብሔር፡ ኀበ፡ ሠርዖሙ፡ ከመ፡ ይፃዑ፡ ከመ፡ ታእምር፡ አንተ፡ ትንሣኤ፡ ምውታን፡ ዘይከውን፡ ዘሥጋከ፡ በአኮ፡ በውስተ፡ ሥጋ፡ ባዕደ፡ ከመ፡ ታእምር፡ ለሊከ፡ ከመ፡ ትትነሥእ፡ እምውታን።
3 ወትትፈደይ፡ አንተ፡ በከመ፡ ምግባሪከ፡ ዘገብርከ፡ አበሳ፡ ወኃጢአተ፡ አመ፡ ትንሣኤ፡ ሙታን፡ በእንተ፡ ዘአስሐትከ፡ ሕዝበ፡ እንዘ፡ ትብል፡ አልቦ፡ ትንሣኤ፡ ሙታን።
4 ወይእዜኒ፡ ትሬእያ፡ አመ፡ ትብጽሐከ፡ ዕለተ፡ ፍዳከ፡ እስመ፡ አንተ፡ ዘዘራዕከ፡ ኢየዓቢ፡ ከመ፡ ይበቍል፡ እመሂ፡ እክል፡ ወእመሂ፡ ሥራናይ።
5 ወዓዲ፡ አንተ፡ ዘተከልከ፡ ዕፅ፡ ኢየዓቡ፡ በቍለ፡ እመሂ፡ ዕፀ፡ ወይን፡ ወእመሂ፡ ዕፀ፡ በለስ፡ ኢይትዌለጥ፡ ቍጸሊሁ፡ ወፍሬሁኒ።
6 ወእመኒ፡ ተከልከ፡ ወይነ፡ ኢይትዌለጥ፡ ከመ፡ ይኩን፡ በለስ፡ እመኒ፡ ተከልከ፡ በለይስ፡ ኢትዌለጥ፡ ከመ፡ ይኩን፡ ወይነ፡ ወእመኒ፡ ዘራዕከ፡ ሥርናየ፡ ኢይትዌለጥ፡ ከመ፡ ይኩን፡ ሰገመ።
7 ወእመኒ፡ ዘራእከ፡ ሰገመ፡ ኢይትዌለጥ፡ ከመ፡ ይኩን፡ ሥርናየ፡ እለ፡ ኵሉ፡ በዘርኡ፡ ወበበዘመዱ፡ ወበበፍሬሁ፡ ወበዕፁ፡ ወበበቍፅሉ፡ ወበበምርዉ፡ ይትቄበል፡ በረከተ፡ በጠለ፡ ምሕረት፡ ዘእምኀበ፡ እግዚአብሔር፡ ወያወፅ፡ ፍሬ።
8 ከማሁ፡ ምድርኒ፡ ታወጽኦ፡ በዘዘርአ፡ እግዚአብሔር፡ ታበቍል፡ ነፍሰ፡ ወሥጋ፡ ገባርያነ፡ ሠናይ፡ እንዘ፡ ኢይትዌለጡ፡ በገባርያነ፡ እኪት፡ ወገባርያነ፡ እኪት፡ እንዘ፡ ኢይትዌለጥ፡ በገባርያነ፡ ሠናይእለ፡ ዘዘርአ፡ እግዚአብሔር፡ ይበቍሉ፡ ነፍስ፡ ወሥጋ።
9 ወእምከመ፡ በጽሐ፡ ጊዜሑ፡ ለንፍሐተ፡ ቀርን፡ ይትነሥኡ፡ ምውታን፡ በጠለ፡ ምሕረት፡ ዘእምኀበ፡ እግዚአብሔር፡ እለ፡ ገብሩ፡ ሠናየ፡ ውስተ፡ ትንሣኤ፡ ሕይወት፡ ወዕሤቶሙ፡ ገነተ፡ ትፍሥሕት፡ ማኀድር፡ ለንጹሐን፡ ዘአስተዳለወ፡ ለኄራን፡ ኀበ፡ አልቦ፡ ደዌ፡ ወሕማም፡ ኀበ፡ ኢይመውቱ፡ እምዝ፡ ደግመ።
10 ወእለሰ፡ እኩየ፡ ገብሩ፡ ውስተ፡ ትንሣኤ፡ ደይን፡ ምስለ፡ ዲያብሎስ፡ ዘአለሐቶሙ።
11 ወአጋንንቲሁ፡ እኩያን፡ እለ፡ ኢይፈቅዱ፡ ይድኅን፡ እ፡ እምኵሉ፡ እጓለ፡ እመሕያው፡ ውስተ፡ ኵነኔ፡ ዘለዓለም።
12 መትሕት፡ ታሕቲት፡ ውስተ፡ ጸናፌ፡ ጽልመት፡ ኀበ፡ ብካይ፡ ወሐቅየስነን፡ ኀበ፡ አልቦ፡ ሣህል፡ ወምህረት፡ ወኀበ፡ አልቦ፡ ሙፃዕ፡ እስከ፡ ለዓለመ፡ ዓለም፡ እስመ፡ ኢገብሩ፡ ሠናየ፡ በሕይወቶሙ፡ በዲበ፡ ምድር፡ እንዘ፡ ሀለዉ፡ በሥጋሆሙ።
13 ወበእንተዝ፡ ይትኴነኑ፡ አመ፡ ትንሣኤ፡ ነፍሰ፡ ወሥጋ።
14 ለሌሎሙ፡ ለእለ፡ ኢየአምኑ፡ ትንሣኤ፡ ነፍስ፡ ወሥጋ፡ ኅቡረ፡ አንተ፡ ባቲ፡ ያርኢ፡ እግዚአብሔር፡ ዕበየ፡ ተአምሪሁ።
15 ወይትፈደይ፡ ኵሉ፡ ለለ
1 በከመ፡ ምግባሩ፡ ወበከመ፡ ፃማ፡ እዴሁ።
=== chapter 17 ===
[Chapter 17]
1 ወኅጠተ፡ ሥርናይኒ፡ ለእመ፡ ኢሞተት፡ ኢትበቍል፡ ወኢትፈሪ፡ እስመ፡ ለእመ፡ ሞተት፡ ኅጠተ፡ ሥርናይ፡ ትገብር፡ ሥርወ፡ ውስተ፡ ምድር፡ ወታወፅዕ፡ ቍፅለ፡ ወይከውን፡ ሰብለ፡ ወይፈሪ፡ ወተአምሩ።
2 ለሊክሙ፡ ከመ፡ ይከውን፡ ኅጠታተ፡ ብዙኃ፡ አሐቲ፡ ኅጠተ፡ ሥርናይ።
3 ወከማሁ፡ ዛቲ፡ ኅጠት፡ ትበቍል፡ እምነፋስ፡ ወማይ፡ ወመሬት፡ ወፀሐይሰ፡ ሕየንተ፡ እሳት፡ እስመ፡ ዘእንበለ፡ ፀሐይ፡ ኢይክል፡ ፈርየ፡ ሥርናይ።
4 ወነፋስኒ፡ ህየንት፡ ነድስ፡ ወዘእንበለ፡ ነፋስ፡ ኢይክል፡ ፈርየ፡ ሥርናይ፡ ወማይኒ፡ ዘያሠቅያ፡ ወያረውያ፡ ለምድር።
5 ወእምከመ፡ ረውየት፡ ሐመድ፡ ወመሬት፡ ይገብር፡ ሥርወ፡ ወይትሊዓል፡ መልዕልተ፡ ወትፈሪ፡ በአምጣነ፡ ባረካ፡ እግዚአብሔር።
6 እስመ፡ ኅጠተ፡ ሥርናይሰ፡ በአምሳለ፡ አዳም፡ ዘተነፍሐት፡ ላዕሌሁ፡ መንፈሰ፡ እግዚአብሔር፡ ነባቢት፡ ወዕፀ፡ ወይንሂ፡ ከማሁ፡ ይሠቀይ፡ በማይ፡ ወይገብር፡ ሥርወ፡ ወይነሥእ፡ ማየ፡ አህባለ፡ ሥርው፡ ደቃቅ።
7 ወየዐርጋ፡ ሰማይላዕለ፡ ውስተ፡ ከተማ፡ አቍፅል፡ እስመ፡ ጠለ፡ ምሕረት፡ እምኀበ፡ እግዚአብሔር፡ ያጠብዎን፡ ውስተ፡ ከተማ፡ አሕሩግ፡ ነዋኀተወይበስል፡ በላህበ፡ ፀሐይ፡ ወይገብር፡ ፍሬ፡ ዘእምኀበ፡ እግዚአብሔር።
8 ወትገብር፡ መዓዛ፡ ሠናየ፡ ዘያስተፌሥሕ፡ ልበ፡ ወቦቱ፡ ሶበ፡ ይበልዕዎ፡ ያጸግብ፡ በከመ፡ ማይ፡ ወኅብስተ፡ ዘኢያርህብ፡ ወኢያጸምዕ፡ ወሶበ፡ የዓፅርዋ፡ ትገብር፡ ደመ፡ አስካል።
9 ወሶበ፡ ይስትይዋ፡ ታስተፌሥሕ፡ ልበ፡ ሰብእ፡ በከመ፡ ይቤ፡ በመዝሙር፡ ወይን፡ ያስተፌሥሕ፡ ልበ፡ ሰብዕ፡ ወብእሲ፡ ሥሙር፡ ይሰክር፡ ሶበ፡ ያበቍ፡ አፉሁ፡ ወይውኅጥ፡ ወይመልዕ፡ ውስተ፡ ሰንብዑ፡ ወይትከዐው፡ ደሙ፡ ውስተ፡ ልቡ።
10 ወይሬስዮ፡ ዘእንበለ፡ ልብ፡ እስመ፡ ስካረ፡ ወይን፡ ፈድፋደ፡ የዓብድ፡ ወይሬስዮ፡ ለጸድፍ፡ ወለጐጻጕጽ፡ ከመ፡ ምድር፡ ስፍሕት፡ ወኢየአምር፡ ዕቅፍት፡ ወሦከ፡ ዘውስተ፡ እደዊሁ፡ ወእገሪሁ።
11 ወከመዝ፡ ገብረ፡ እግዚአብሔር፡ በዕፀ፡ ወይን፡ ወበፍሬሃ፡ ከመ፡ ይትአኰት፡ ሰሙ፡ ለአለ፡ ይገብሩ፡ ፈቃዶ፡ ወለእለ፡ የአምኑ፡ ትንሣኤ፡ ምውታን።
12 ወያስተፌሥሖሙ፡ በማኅደረ፡ ሕይወት፡ ለእለ፡ የአምኑ፡ ትንሣኤ፡ ምውታን።
=== chapter 18 ===
[Chapter 18]
1 ሚመጠነ፡ ስሕተተ፡ ትስሕቱ፡ አለ፡ ኢተአምኑ፡ ትንሣኤ፡ ሙታን፡ ወሶበ፡ ይወስዱክሙ፡ ኀበ፡ ኢተአምሩ፡ ይእተ፡ ጊዜ፡ ትነሥሑ፡ በኀበ፡ ኢይበቍዓክሙ፡ ወአመ፡ ይወድዩክሙ፡ ውስተ፡ ኵነኔ፡ በእንተ፡ ዘኢአመንክሙ፡ ትንሣኤ፡ ሙታን፡ በሥጋ፡ ወነፍስ፡ ኅቡረ።
2 ወትትዓሠዩ፡ በከመ፡ ገብርክሙ፡ እመሂ፡ ሠናየ፡ ወእመሂ፡ እኩየ፡ እስመ፡ አሕሰምክሙ፡ ልበ፡ ካልዓኒክሙ፡ እንዘ፡ ትብሉ፡ ንሕነ፡ ነአምን፡ ከመ፡ ኢይትነሥኡ፡ ምውታን፡ እለ፡ ኮኑ፡ ሐመደወ፡ ወመሬት።
3 ወበእንተዝ፡ የዓብዱ፡ ቢጾሙ፡ እስመ፡ አልቦ፡ ሳሕት፡ ለሞቶሙ፡ ወኢኀይል፡ ለመቅሠ፡ ፍቶሙ፡ ወበፃማሂ፡ ኢኮኑ፡ ንጉፋነ፡ እስመ፡ ሀለዎሙ፡ ይቁሙ፡ ቅድመ፡ ምኵናኑ፡ ለእግዚአብሔር።
4 ወይትኃፈሩ፡ ፈድፋደ፡ ሶበ፡ ይጌሥጾሙ፡ በመዓቱ፡ ወይትመዓዖሙ፡ በእንተ፡ ኵሉ፡ ዘገብሩ፡ እኩየ፡ እስመ፡ እንዘ፡ ኢየአምሩ፡ ፍኖተ፡ እግዚአብሔር፡ ይትናገሩ፡ እስመ፡ ለሊሆሙ፡ ኢየአምሩ፡ እምኀበ፡ መጽኡ።
5 ወኢየአምሩ፡ ኀበ፡ የሐውሩ፡ ውስተ፡ ኵነኔ፡ ነደ፡ እሳት፡ እስመ፡ በከመ፡ ጥውየተ፡ ልቦሙ፡ ይሜህሩ፡ ለቢጾሙ፡ እስመ፡ መራራን፡ እሙንቱ፡ ወጐጻጕጻን፡ በምግባሮሙ፡ ወጸዋጋን፡ ወእለ፡ ይሜህሩ፡ ጠዋየ፡ ነገረ፡ እንዘ፡ ይብሉ፡ አልቦ፡ ትንሣኤ፡ ምውታን።
6 ወይእተ፡ አሚረ፡ የአምሩ፡ ከመ፡ ይትነሥኡ፡ ምውታን፡ ወይትኴነኑ፡ በእንተ፡ ዘኢአምኑ፡ ትንሣኤ፡ ሙታን፡ ለኵሉ፡ ፍጥረተ፡ እጓለ፡ እመሕያው።
7 እስመ፡ ኵልነ፡ ፍሬ፡ አዳም፡ ወአእንተ፡ አዳም፡ ሞትነ፡ እስመ፡ ለኵልነ፡ በእንተ፡ ስሕተቱ፡ ለአቡነ፡ አዳም፡ ረከበነ፡ ኵነኔ፡ ሞት፡ እምኀበ፡ እግዚአብሔር።
8 ወካዕበ፡ ከመ፡ ንትፈደይ፡ በዘገብርነ፡ ንትነሣእ፡ ምስለ፡ ውእቱ፡ አዳም፡ አቡነ፡ እስመ፡ በኢያምሮ፡ አቡነ፡ አዳም፡ ተቀንየ፡ በዓለም፡ ለሞት።
9 ወበእንተዝ፡ ተፈደይነ፡ በተዓድዎ፡ አዳም፡ ወተመስወት፡ ሥጋነ፡ በውስተ፡ መቃብር፡ ወተቀጥቀጡ፡ አዕፅምትኒ።
10 ወሰትየት፡ ምድር፡ አንጕዓነ፡ ወማሰነ፡ ወተመሰወ፡ ላህይነ፡ በሐመድ፡ ወተደፍነ፡ ሥጋነ፡ በመሬት፡ ወቃልነ፡ ሠናይ፡ ተደፍነ፡ በውስተ፡ ምሬት።
11 ወወፅአ፡ ዕደ፡ እምአይንቲነ፡ ብሩሃት፡ ወማሰነ፡ ላህይነ፡ በውስተ፡ መካብ፡ ወኮነ፡ ፀበለ።
12 አይቴ፡ ሀለወ፡ ስነ፡ ላህዮሙ፡ ለወራዙት፡ ሠናያን፡ እለ፡ አዳም፡ ቆሞሙ፡ ወሣዕሣዕ፡ ጣዕመ፡ ቃሎሙ። አይቴ፡ ሀለወ፡ ዕበዮሙ፡ ለጽኑዓን።
13 ወአይቴ፡ ሀለወ፡ ኃይሎሙ፡ ለነገሦት፡ ወክብሮሙ፡ ለመኳንንተ፡ ወተረስዮ፡ በአፍራሰ፡ ወተሠርግዎ፡ በወርቅ፡ ወበብሩር፡ ወተረሥዮ፡ በንዋየ፡ ሐቅል፡ ዘያንፀበርቅ።
14 አይቴ፡ ሀሎጣዕመ፡ መባልዕት፡ ውስተ፡ ወይን፡ ጥዑም።
=== chapter 19 ===
[Chapter 19]
1 ኦ፡ ምድር፡ እንተ፡ አስተጋባዕኪዮሙ፡ ለነገሥት፡ ወለመኰንንት፡ ወለዓበይት፡ ወለክቡራን፡ ወለአንስት፡ ላህያት፡ ወለሠናያት፡ ደናግል።
2 ወለዕደው፡ ፅኑዓን፡ እለ፡ ቦሙ፡ ሰን፡ ወሠናያን፡ አቍያጽ፡ ወእለ፡ ቦሙ፡ አእምሮ፡ ወልቡና፡ ወእለ፡ ቦሙ፡ ሠናይ፡ ቃል፡ ከመ፡ ቃለ፡ አርጋኖን፡ ነባቢት፡ ወከመ፡ ዝብጠት፡ መሰንቆ፡ ወዕንዚራ።
3 ወእለ፡ ቦሙ፡ ሠናይ፡ ዜማ፡ እለ፡ ያስተፌሥሑ፡ ከመ፡ ስታየ፡ ወይን፡ አዳም፡ አዕይንቲሆሙ፡ ብሩሃት፡ ከመ፡ ኮከብ፡ ጽባሕ።
4 ወየማኖሙ፡ ጽኑዕ፡ ከመ፡ ዘይሁብ፡ ወይነሥኦ፡ ወየሐይጱ፡ ወእገሪሆሙ፡ ሠናያን፡ ለርእይ፡ ወለእለ፡ ይረውጻ፡ ከመ፡ መኰራኵር፡ ርቱዓት።
5 አእምኔከ፡ ሞት፡ ዘነሣእከ፡ ነፍሣቲሆሙ፡ ለሠናያን፡ ዕደው፡ እስመ፡ በፈቃደ፡ እግዚአብ፡ ሔር፡ ተፈነውከ።
6 ወአንቲኒ፡ ምድር፡ እስመ፡ አስተጋባዖኪ፡ ብዙኃት፡ ሥጋተ፡ እለ፡ እምኔኪ፡ አውፅኦሙ፡ እግዚአብሔር፡ ወአግብኦሙ፡ ኀቤኪ፡ እምኔኪ፡ ወፃዕነ፡ ወኀቤኪ፡ ግባዕነ፡ በፈካደ፡ እግዚአብሔር፡ ተፈሣሕነ፡ በፈቃደ፡ እግዚአብሔር፡ ዲቤኪ።
7 ወኮንኪ፡ መንደፈ፡ ለአብድንቲነ፡ አንሶሰውነ፡ ዲቤኪ፡ ወኖምነ፡ በውቲትኪ፡ በላዕነ፡ ፍሬኪ፡ ወበላዕኪ፡ ሥጋነ።
8 ሠተይነ፡ እምጠለ፡ ነቅዕኪ፡ ወሰተይኪ፡ እምነቅዓ፡ ደምነ፡ በላዕነ፡ እምአንጕዓ፡ ምድርኪ፡ ወበላዕኪ፡ እምአንጕዓ፡ አዕፅምትኒ።
9 ባላዕነ፡ እምጠዕመ፡ ሐመድ፡ ጠልኪ፡ ሠናይ፡ በከመ፡ አዘዘኪ፡ እግዚአብሔር፡ ለሲሲትነ፡ ወነሣእኪ፡ ላህየ፡ ሥጋነ፡ ወረሰይኪ፡ ፀበለ፡ በከመ፡ አዘዘኪ፡ እግዚአብሔር፡ ለሲሲትኪ።
10 ኦ፡ እምኔከ፡ ሞት፡ ዘአስተጋባዕከ፡ ብዙኃነ፡ ኃያላነ፡ ነገሥት፡ ወመኳንንት፡ ወኢፈራህከ፡ እምግርማሆሙ፡ ወእምዕበዮሙ፡ በከመ፡ አዘዘከ፡ ዘፈጠሮሙ፡ ወኢመነንከ፡ ምስኪነ።
11 ወኤምሕርከ፡ እለ፡ ሠናይ፡ ላህዮሙ፡ ወኢኀደገ፡ ኃያላነ፡ ወፅኑዓነ፡ ወኢኀደገ፡ አብዕልተ፡ ወነዳያነ፡ ኃሡማነ፡ ወሠናያነ፡ አዕሩገ፡ ወሕፃናተ፡ ዕደወ፡ ወአንስተ።
12 ወኢኀደገ፡ እለ፡ ሠናየ፡ ይሔልዩ፡ ወኢትዓደወ፡ እምትእዛዙ፡ ወኢኀደገ፡ እለ፡ እኵየ፡ ይሔልዩ። እለ፡ ኮኑ፡ ከመ፡ እንስሳ፡ በምግባሮሙ፡ ወእለ፡ ፍጹማን፡ በሥነ፡ ላህዮሙ፡ ወቃሎሙ፡ ወጣዕመ፡ ነገሮሙ።
13 ወኢኃደገ፡ እለ፡ መሪር፡ ቃሎሙ፡ ወምሉዕ፡ መርገመ፡ ውስተ፡ አፉሆሙ፡ ወአስተጋባዕከ፡ ነፍሳቲሆሙ፡ ውስተ፡ መዛግብቲከ፡ እመሂ፡ ዘብሃን፡ ውእመሂ፡ ዘጽልመት።
14 ወምድርኒ፡ አስተጋብዖት፡ ሥጋሆሙ፡ እመሂ፡ ውስተ፡ ኰኵሕ፡ ወአመሂ፡ ውስተ፡ መሬት፡ እስከ፡ አመ፡ ንፍሐተ፡ ቀርን፡ ወይትነሥኦ፡ ምውታን።
15 ወይትፈደዩ፡ ገባርያነ፡ እስከ፡ በከመ፡ ምግባሮሙ፡ ዘገብሩ፡ እስመ፡ በንፍሐተ፡ ቀርን፡ ወበትእዛዘ፡ እግዚአብሔር፡ ይትነሥኡ፡ ምውታን፡ ከመ፡ ቅጽበተ፡ ዓይን፡ ወይት፡ ፌሥሑ፡ እለ፡ ሠናየ፡ ገብሩ።
=== chapter 20 ===
[Chapter 20]
1 እመኑኒ፡ ከመ፡ ኢይትኃደግ፡ ወኢይትኃባዕ፡ ኵሉ፡ ምግባሪነ፡ ዘገበርነ፡ በዲበ፡ ምድር፡ አመ፡ ንቀውም፡ ቅድሜሁ፡ በፍርሃት፡ ወበርዓድ።
2 ወእመ፡ ኢንትማላዕ፡ ስንቀ፡ ለፍኖትነ፡ ወአመ፡ አልብነ፡ ልብሰ፡ ለእርቃነ።
3 ወእመ፡ አልብነ፡ ምርጉዝ፡ ለዕደዊነ፡ ወዓሣዕነ፡ ለእገሪነ።
4 ወአነ፡ ኢነምር፡ ፍኖቶ፡ ለኀበ፡ ይወስዱነ፡ አመኒ፡ ደኅፅ፡ ወእመኒ፡ ጐጻጕጽ፡ ወእመኒ፡ ጽልመት፡ ወእመኒ፡ ሦክ፡ ወአሜከላ፡ እመኒ፡ ቀላየ፡ ባሕር፡ ወቀላየ፡ ሲኦል።
5 ወእለሂ፡ ይወስዱነ፡ ኢነአምሮሙ፡ ወኢነሰምዕ፡ ነገሮሙ።
6 ወኢንሬኢ፡ ገጾሙ፡ እስመ፡ ጽልመት፡ እሙንቱ፡ ወውስተ፡ ጽልመት፡ ይመርሁነ።
7 በከመ፡ ይቤ፡ ዳዊት፡ ነቢይ፡ ሶበ፡ ተኀልቅ፡ ነርፍስየ፡ ባላዕሌየ፡ አንተ፡ እግዚኦ፡ ተአምር፡ ፍኖትየ፡ በዛቲ፡ ፍኖት፡ ሖርኩ፡ ኃብዑ፡ ሊተ፡ መሥገርተ፡ ወተመየጥኩ፡ መንገለ፡ የማንየ፡ ወርኢኩ፡ ወኃጣእኩ፡ ዘየአምረኒ፡ ወኀበሂ፡ አመሥጥ፡ አልብየ።
8 ወዘንተ፡ ሶበ፡ ይብል፡ እስመ፡ የአምር፡ ከመ፡ ይሣለቅዎ፡ አጋንንት፡ ወይመርህዎ፡ ኀበ፡ ዘኢየአምር፡ ፍኖተ፡ ወይትመየጥ፡ ይምነ፡ ወጽግመ፡ ወአልቦ፡ ዘይረክብ፡ ዘየአምሮ።
9 ወሊቱኒ፡ አልቦ፡ ዘየአምር፡ አላ፡ ባሕቲቱ፡ ማዕከለ፡ መላእክተ፡ ጽልመት።
10 ወመንፈሳውያን፡ መላእክተ፡ ብርሃን፡ እለ፡ ትፈነዉ፡ ኀበ፡ ኄራን፡ ከመ፡ ይትመጠዉ፡ ነፍሳቲሆሙ፡ ለጻድቃን፡ ወከመ፡ ይሰዱ፡ ኀበ፡ ዓፀደ፡ ብርሃን፡ ዘሕይወት።
11 ወእለሂ፡ ይትፌነዉ፡ መላእክተ፡ ጽልመት፡ ወአጋንንት፡ ኀበ፡ ነፍሳተ፡ ኃጥአን፡ ከመ፡ ይትቀበልዎሙ፡ ወይሰድዎሙ፡ ውስተ፡ ኵነኔ፡ ዘለዓለም፡ ዘድልወ፡ ሎሙ፡ ከመ፡ ይት፡ ፈደዩ፡ በከመ፡ ምግባሮሙ፡ ዘገብሩ።
12 አሌ፡ ሎሙ፡ ለነፍሳተ፡ ኃጥአን፡ እለ፡ ይወስድዎሙ፡ ውስተ፡ ኃጕል፡ ወአልቦ፡ ዕረፍት፡ ወአድኂን፡ ወኢአምሥጦ፡ ወኢሙፃዕ፡ እስከ፡ ለዓለም፡ እምዘረከቦሙ፡ ምንዳቤ።
13 አሌ፡ ሎሙ፡ ለኃጥአን፡ እስመ፡ በፍኖተ፡ ቃየን፡ ሖሩ፡ ወበአሰበ፡ ዓመፃሁ፡ ለበለዓም፡ ተኃጉሉ፡ ወኃጥኡ፡ ዘይገብሩን፡ እስመ፡ በነሢኦ፡ ህልያን፡ ወርዱ፡ ይመከንዩ፡ ከመ፡ ይንሥኡ፡ ንዋየ፡ ባዕድ፡ በዓመፃ፡ ዘኢኮነ፡ ንዋዮሙ።
14 እሙንቱኪ፡ ይትፈደዩ፡ በከመ፡ ምግባሮሙ፡ ዘገብሩ፡ በኵነኔ፡ ነደ፡ እሳት።
=== chapter 21 ===
[Chapter 21]
1 አይቴ፡ ሀለዉ፡ አስተጋባዕይነ፡ ንዋየ፡ ባዕድ፡ በዓመፃ፡ ዘኢኮነ፡ ንዋዮሙ፡ ወግብረ፡ እደዊሆሙ።
2 ወባሕቱ፡ እስመ፡ ይነሥኡ፡ ንዋየ፡ ባዕድ፡ ዘእንበለ፡ ሢጥ፡ ወያስተጋብኡ፡ እንዘ፡ ኢየአምሩ፡ ዕለተ፡ ሞቶሙ፡ አንተ፡ ትበጽሖሙ፡ ወየኀድጉ፡ ለባዕድ፡ ብዕሎሙ።
3 ወውሉዶሙኒ፡ ኢይትፌሥሑ፡ በብዕለ፡ አበዊሆሙ፡ እስመ፡ አብያተ፡ ኃጥአን፡ እሙንቱ፡ እመ፡ ያመነዝዝዎሙ፡ እመሂ፡ በሥርቅ፡ ወበትዕግልይ፡ እለ፡ ከማሆሙ፡ ኃጥአን፡ ከመ፡ አበዊሆሙ፡ ወእመሂ፡ በሐይድ።
4 ወአልቦ፡ ዘይበቍዖሙ፡ ንዋየ፡ እበዊሆሙ፡ እስመ፡ በዓመት፡ አስተጋብዑ፡ ሎሙ፡ ወከመ፡ ሣሕወ፡ ደመና፡ ወከመ፡ ጢስ፡ ዘይነሥኦ፡ ነፋስ፡ ወከመ፡ ፍሬ፡ ሣዕር፡ ዘይትነገፍ፡ ወከመ፡ ሰምዕ፡ ዘይትመሰው፡ በቅድመ፡ ገጾ፡ እሳት፡ ከመሁ፡ ይጠፍዕ፡ ክብሮሙ፡ ለኃጥአን።
5 በከመ፡ ይቤ፡ ዳዊት፡ ርኢክዎ፡ ለኃጥአን፡ ዓብየ፡ ወተለዓለ፡ ከመ፡ ዓርዘ፡ ሊባኖስ፡ ወሶበ፡ አገብእ፡ ኃጣእክዎ፡ ኃሠሥኩ፡ ወኢረከብኩ፡ መካኖ።
6 ወከመ፡ ዝኪ፡ ጥፍዓቶሙ፡ ለኃጥአን፡ በምዕር፡ ከመ፡ ኢይትመክሁ፡ እለ፡ ይኤምፁ፡ ቢሦሙ፡ እንዘ፡ ኢይመስሉ፡ ዘኢይመውቱ፡ በእንተ፡ ዘአስተጋብዑ፡ ንዋየ፡ ባዕድ፡ በዓ፡ መፃ።
7 ኦዓብዳን፡ ተዘከሩ፡ ከመ፡ ተኃልፉ፡ ወብዕልክሙኒ፡ የኃልፍ፡ ምስሌክሙ፡ ወእመሂ፡ በዝኃ፡ ወርቅክሙ፡ ወብሩርክሙኒ፡ ይከውን፡ ዘኀለ።
8 ወእመሂ፡ አብዛኅክሙ፡ ውሉደ፡ ይከውን፡ ብዙኃ፡ መቃብረ፡ ወእመሂ፡ አብዛኅክሙ፡ አብያተ፡ ይከውን፡ መዝበረ።
9 ወአመሂ፡ አብዛኅክሙ፡ እንስሳ፡ ይከውን፡ ምኅርካ፡ ለፀርክሙ፡ እስመ፡ ኢገበርክሙ፡ ፈቃዶ፡ ለእግዚአብሔር፡ አምላክክሙ፡ ወኵሉ፡ ዘወደይክሙ፡ እዴክሙ፡ ኢይትረከብ፡ እስመ፡ ኢኮነ፡ ቡሩከ።
10 እመሂ፡ ዘቤት፡ ወእመዚ፡ ዘገዳም፡ እመሂ፡ በአዕዖዳተ፡ ወፍር፡ ወበሐትል፡ ወበዓውደ፡ ዕክል፡ ወምክያደ፡ ወይን።
11 ወእመሂ፡ በፍሬ፡ ከርሥክሙ፡ ኢትፈሥሑ፡ አላ፡ ኃዘነ፡ ይከውነክሙ፡ እምነ፡ ኵሉ፡ ፀርክሙ፡ እስመ፡ ኢያስተባልሀክሙ፡ እግዚአብሔር፡ ምስለ፡ ኵሉ፡ ሰብአ፡ ቢትክሙ፡ እስመ፡ ኢዓቀብክሙ፡ ትእዛዛቲሁ፡ ለእግዚአብሔር።
12 ወለእለሰ፡ ዓቀቡ፡ ሕጎ፡ ወትእዛዞ፡ ወሥርዓቶ፡ ኢያስተፂንሶሙ፡ እምበረከቱ፡ ወይሆቦሙ፡ ኵሎ፡ ዘሰአልዎ፡ ወይባርክ፡ ሎሙ፡ ፍሬ፡ ምድሮሙ፡ ወፍሬ፡ ከርሦሙ።
13 ወይሬስዮሙ፡ መልዕልተ፡ ኵሉ፡ አሕዛብ፡ እለ፡ ዓውዶሙ፡ ከመ፡ ይኰንኑ፡ ወአኮ፡ ከመ፡ ይትኰነኑ፡ ወይሁቦሙ፡ ኵሎ፡ በረከተ፡ በአዕፃዳተ፡ ወፍሮሙ።
14 ወኵሎ፡ ዘወደዩ፡ እደዊሆሙ፡ ይባርክ፡ ሎሙ፡ ፍሬ፡ ተግባሮሙ፡ ወአዕፃዳተ፡ እንስሳ፡ ሆሙ፡ ወያስተፌሥሖሙ፡ በፍሬ፡ ከርሦሙ።
15 ወአያውኅድ፡ ሎሙ፡ እንስሳሆሙ፡ ወያድኅኖሙ፡ እምኵሉ፡ ምንዳቤሆሙ፡ ወደዌ፡ ወድካም፡ ወመንሱት፡ እምዘየአምሩ፡ ወኢየአምሩ።
16 ወይትቃወም፡ ሎሙ፡ በውስተ፡ ፍትሕ፡ ወያድኅኖሙ፡ እምንዳቤ፡ ወእምነገር፡ እኩይ፡ ወእምኵሉ፡ ዝይትቃወም፡ እስመ፡ በቀዳሙ፡ ግብረ፡ ደብተራ፡ እመቦ፡ ሌዋዊ፡ ዘይትመ፡ ሐፀን፡ ወየዓቅብ፡ ግብረ፡ ደብተራ፡ ወየሐውር፡ በፈቃደ፡ እግዚአብሔር፡ በቃዳሚ፡ ሕግ፡ ይሁብዎ፡ ዓሥራተ፡ በኵሉ፡ ዘበሕጉ፡ ወኵሎ፡ በኵረ፡ እምሰብእ፡ ወእስከ፡ እንስሳ።
17 ወሀገረ፡ ምስካይ፡ በኵሉ፡ አህጉሪሆሙ፡ በከመ፡ አዘዞ፡ ሙሴ፡ ለኢያሱ፡ ወልደ፡ ነዌ፡ ከመ፡ ይድኅን፡ ቀታሊ፡ ዘበኢያእምሮ፡ ቀተለ፡ ወእመኒ፡ ዘበአእምሮ።
18 እስከ፡ ያገብኡ፡ ሎቱ፡ ፍትሐ፡ ለዘይዴይኑ፡ ወለዘያጸድቁ።
19 ወበከመ፡ ብክሙ፡ ጠይቁ፡ ይቤሎሙ፡ እመቦ፡ ቀዲሙ፡ ጽልዕ፡ ምስሌሁ፡ ወይብል፡ እስመ፡ በኢያእምሮ፡ ወደቀ፡ እምእዴየ፡ ሐፂን፡ አው፡ እብን፡ አው፡ ዕፅ፡ ወሞተ፡ ውእቱ፡ ዘወደቀ፡ ላዕሌሁ፡ አዕሚረክሙ፡ አድኅንዎ፡ እስመ፡ በኢያእምሮ፡ ገብረ፡ ይድኅን።
20 ወለእመሰ፡ በአእምሮ፡ ገብረ፡ ይትፈደይ፡ በከመ፡ አበሳሁ፡ ወአልቦ፡ ዘይምህሮ፡ ወእመሰ፡ በኢያእምሮ፡ ገብረ፡ ወከተለ፡ ጠይቀክሙ፡ ኅድግዎ፡ ከመ፡ ኢይሙት፡ እስመ፡ በኢያእምሮ፡ ገብረ።
21 ወከመዝ፡ ሠርዖሙ፡ ሙሴ፡ ልደቂቀ፡ እስራኤል፡ ከመ፡ ኢይትዓደዉ፡ ትእዛዘ፡ እግዚአብ፡ ሔር፡ አላ፡ ከመ፡ ይትገኣሡ፡ እምኵሉ፡ እኩይ፡ ሠርዖሙ።
22 ወአዘዞሙኢ፡ ከመ፡ ይሑሩ፡ በኵሉ፡ ኵነኔሁ፡ ወጽድቁ፡ ፈድፋደ፡ ይርኁቁ፡ እምአግዕዎ፡ ወብትክ፡ ወማውታ፡ ወእምኵሉ፡ ዘኢይደሉ፡ ለውሉደ፡ ሰብእ፡ ከመ፡ ይግብርዎ፡ እለ፡ የሐውሩ፡ በትእዛዘ፡ እግዚአብሔር፡ ወእለ፡ ይትዔገሡ፡ እምኵሉ፡ እኩይ፡ በከመ፡ ሠርዖሙ።
23 ወአዘዞሙ፡ ከመ፡ ኢይትዓደዉ፡ እምትእዛዙ፡ እንተ፡ ሠርዓ፡ ሎሙ፡ በአርአያ፡ ዘበሰ፡ ማያት፡ እንተ፡ ይእቲ፡ ደብተራ፡ ከመ፡ ያድኅን፡ ነፍሶሙ፡ ወይርከቡ፡ ማኅደሪሆሙ፡ ምስለ፡ አበዊሆሙ፡ እለ፡ ገብሩ፡ ሠናየ።
24 እስመ፡ እለ፡ አምኑ፡ በቃለ፡ እግዚአብሔር፡ ወሖሩ፡ በትእዛዙ፡ ዝሙንቱ፡ ይሰመዩ፡ ትው፡ ልደ፡ ጻድቃን፡ እስመ፡ እምአዳም፡ ወሴት፡ እሙንቱ፡ እለ፡ ገብሩ፡ ፈቃደ፡ እግዚአብሔር፡ ኢይሜንን።
25 እስመ፡ ዘርዐ፡ አዳም፡ ንሕነ፡ ወበአርአያሁ፡ ለሐኰነ፡ ወበአምሳሊሁ፡ ፈጠርነ፡ ከመ፡ ንግ፡ በር፡ ሠናየ፡ ወኵሎ፡ ዘያሠምሮ፡ ለእግዚአብሔር።
26 ወለእመ፡ ገበርነ፡ ሠናየ፡ ንወርሳ፡ ለምድረ፡ ሕይወት፡ ምስለ፡ እለ፡ ገብሩ፡ ሠናየ፡ እስመ፡ ኢይፈልጥ፡ ወኢይሌሊ፡ ለእለ፡ ያፈቅርዎ።
27 ወፈድፋደ፡ ያፈቅሮሙ፡ ወይሰምዕ፡ ጸሎቶሙ፡ ለእለ፡ ይጼውዕዎ፡ በንጹሕ፡ ወይትዌ፡ ከፍ፡ ንስሐሆሙ፡ ለእለ፡ ይኔስሑ፡ በጥቡዕ፡ ወይሁቦሙ፡ ኃይለ፡ ወፀንዓ፡ ለእለ፡ የዓቅቡ፡ ሕጎ፡ ወሥርዓቶ፡ ወትእዛዞ።
28 ወይትፌሥሁ፡ ምስሌሁ፡ በመንግሥቱ፡ ዘለዓለም፡ እለ፡ ገብሩ፡ ፈቃዶ፡ እመሂ፡ ቀደምት፡ ወእመሂ፡ ደኃርት፡ ሎቱ፡ የዓርጉ፡ ስብሐተ፡ ምይእዜ፡ ወእስከ፡ ለዓለመ፡ ዓለም፡ አሜን።