##### edition  (gez) — Text of the EOTC printed Bible
=== chapter 1 ===
[Chapter 1]
1 ይትፌሥሐ፡ ደስያተ፡ ግብፅ፡ በደኃሪ፡ መዋዕል፡ በእንተ፡ ዘይመጽእ፡ ዲቤሆን፡ ኄር፡ ወየዋህ፡ ዘይትቤቀል፡ በእንተ፡ ዘገፍዓ፡ ወአስሐተ፡ ሰብልያኖስ፡ ዘይጻረራ፡ ለፍኖተ፡ ፈጣሪሁ።
2 ወውእቱ፡ ይትቤቀሎ፡ ወያገብእ፡ ክብሮ፡ ውስተ፡ መሬት፡ ወኃሣር፡ እስመ፡ ተዓበየ፡ በሕሊናሁ።
3 ወይቤ፡ መኑ፡ ይትሌዓል፡ እምኔየ፡ እስመ፡ አነ፡ አበውዕ፡ ውስተ፡ ልበ፡ አብሕርት፡ ወአዓርግ፡ ውስተ፡ መልዕልት፡ ወኢሬኢ፡ ቀላያተ፡ ወዕፀብጦሙ፡ ከመ፡ ዕጕለ፡ ዖፍ፡ ለደቂቀ፡ አዳም።
4 ወአልቦ፡ ዘይከልዓኒ፡ እምእዴየ፡ እስመ፡ አነ፡ ኢትኄየሎሙ፡ ለእለ፡ ይነብሩ፡ ዲበ፡ ምድር፡ ለእመ፡ ይገብሩ፡ ፈቃደ፡ እግዚአብሔር፡ እስመ፡ እትመከነይ፡ አነ፡ በእንቲአሆሙ፡ ከመ፡ አግኀሦሙ፡ እምፍኖተ፡ እግዚአብሔር፡ ርትዕት።
5 ወአገብኦሙ፡ ውስተ፡ ፍኖተ፡ ዚአየ፡ መብዕስ፡ ከመ፡ ይሑሩ፡ ምስሌየ፡ ውስተ፡ ኃጕል።
6 ወበእንተዝ፡ እለ፡ አፍቀርዎ፡ ወአቀቡ፡ ትእዛዞ፡ ይፀልዑ፡ ኪያየ፡ ወአለሰ፡ ስሕቱ፡ እምእግዚኦሙ፡ ይመጽኡ፡ ኀቤየ፡ ወያፈቅሩ፡ ኪያየ፡ ወየዓቅቡ፡ ኪዳንየ፡ ወይገብሩ፡ ትእዛዝየ፡ በከመ፡ አነ፡ አዘዝክዎሙ፡ እስመ፡ አነ፡ አሐሥም፡ ልቦሙ፡ ወአጠዊ፡ ሕሊናሆሙ፡ ከመ፡ ኢይትመየጡ፡ ኀበ፡ እግዚአብሔር፡ ፈጣሪሆሙ።
7 ወሶበ፡ አርእዮሙ፡ ንዋየ፡ ዓለም፡ አስሕት፡ ልቦሙ፡ እምፍኖት፡ ርትዕት፡ ወሶበ፡ አርእዮሙ፡ ላህያተ፡ አንስተ፡ ወደናግለ፡ ወበእላንቱኒ፡ አግኅሦሙ፡ እምፍኖት፡ ርትዕት።
8 ወሶበ፡ አርእዮሙ፡ አዕባነ፡ ህንደኬ፡ ዘያንጸባርቁ፡ ወአዕባነ፡ ወርቅ፡ ወብሩር፡ ወበዝኒ፡ አግኅሦሙ፡ እምፍኖት፡ ርትዕት፡ ከመ፡ ይትመየጡ፡ ውስተ፡ ዘዚአየ፡ ምግባር።
9 ወሶበ፡ አርእዮሙ፡ አልባሰ፡ ቀጠንት፡ ወቢሶሳት፡ ወሲራያት፡ ወዲባጋተ፡ ወአጌያተ፡ ወበዝየኒ፡ እመይጦሙ፡ እምፍኖተ፡ ርትእት፡ ወአገብኦሙ፡ ውስተ፡ ዘዚአየ፡ ሕሊናት፡ ወሶበ፡ አርእዮሙ፡ ጥረታተ፡ ወከመ፡ ኆፃ፡ እንስሳተ፡ ወበዝኒ፡ እመይጦሙ፡ ውስተ፡ ዘዚአየ፡ ምግባራት።
10 ወሶበ፡ አርእዮሙ፡ ቅኀዓታት፡ ዘበትዕቢት፡ ወዘበእንተ፡ አንስት፡ ወዘበዕልዕ፡ ወመዓት፡ ወበዝኒ፡ ኵሉ፡ እመይጦሙ፡ ውስተ፡ ዘዚአየ፡ ፍኖት።
11 ወሶበ፡ አርእዮሙ፡ ትእምርታተ፡ ወእበውዕ፡ ውስተ፡ ልበ፡ ካልዓኒሆሙ፡ ወእቶስሕ፡ ውስተ፡ ልቦሙ፡ ነገራተ፡ ትእምርታተ፡ ዘዚአሆሙ፡ ወአርእይየ፡ ትእምርተ፡ ቃሎሙ፡ አዕበድክዎሙ።
12 ወለእለ፡ ርሰይክዎሙ፡ ማኅደርየ፡ አርእዮሙ፡ ተአምርታተ፡ እመሂ፡ በሩፀተ፡ ከዋክብት፡ አው፡ በሥረተ፡ ደመናት፡ አው፡ በንደተ፡ እሳት፡ አውበንቃወ፡ አዕዋፍ፡ ወአራዊት፡ ወበዝንቱ፡ ኵሉ፡ እሬሲ፡ ሎሙ፡ ትእምርተ፡ ውስተ፡ አልባቢሆሙ፡ እስመ፡ ማኅደርየ፡ እሙንቱ።
13 ወይትናገሩ፡ ወይሁብዎሙ፡ ትእምርተ፡ ለቢጾሙ፡ ወአቀድሞሙ፡ ወእከውን፡ ትእም፡ ርተ፡ በከመ፡ ነገርዎሙ፡ እሙንቱ፡ ማርያኒሆሙ።
14 ወአገብር፡ ሎሙ፡ ትእምርተ፡ ቃሎሙ፡ ከመ፡ ይስሐቱ፡ እለ፡ ሐተትዎሙ፡ ወየሀብዎሙ፡ አሰበ፡ ወይዜንዉ፡ ለቢጾሙ፡ ከመ፡ ይበሉ፡ አልቦ፡ ማዕምራን፡ ከመ፡ እገሌ፡ ወእገሊት፡ እለ፡ ይከውኖሙ፡ በከመ፡ ተናገሩ፡ ወየአምሩ፡ ትንቢተ፡ ወይፈልጡ፡ ሥናየ፡ ወእኩየ፡ ወኵሉ፡ በከመ፡ ነበቡ፡ ይከውኖሙ፡ ወበከመ፡ ቃሎሙ፡ ይትገበር፡ ሎሙ።
15 ወዘንተ፡ ሶበ፡ ይብሉ፡ እትፌሣሕ፡ አነ፡ ከመ፡ ይብዝኁ፡ እለ፡ ይትኀጐል፡ ወይፈድፍዱ፡ እለ፡ ይስሕቱ፡ ብየ፡ ከመ፡ ይትኀጐሉ፡ ምስሌየ፡ ደቂቁ፡ ለአዳም፡ እስመ፡ ብእንተ፡ አቡሆሙ፡ አዳም፡ አውድቀኒ፡ እግዚአብሔር፡ እመንበርየ፡ በብሂልየ፡ ኢይሰግድ፡ ለዞይቲሐት፡ ሊተ።
16 ወአነሂ፡ እትማልዖሙ፡ ውስተ፡ ኃጕል፡ ለኵሎሙ፡ ደቂቁ፡ እለ፡ የሐውሩ፡ በትእዛዝየ፡ ወብየ፡ ማዕኰት፡ እምኀበ፡ ዘፈጠረኒ፡ ከመ፡ እለ፡ አስሐትክዎሙ፡ ይትወደዩ፡ ምስሌየ፡ ውስተ፡ እሳት።
17 ወአነሂ፡ አስተምህርኩ፡ ኀበ፡ እግዚእየ፡ ሶበ፡ አንሀ፡ መዓቶ፡ ላዕሌየ፡ ወአዘዘ፡ ከመ፡ ይዕሥሩኒ፡ ወይደዩኒ፡ ውስተ፡ ገሃነም፡ ወውስተ፡ ማዕምቅተ፡ ሲኦል፡ ወሶበ፡ አዘዘ፡ ከመዝ፡ ፈጣሪየ፡ አነሂ፡ አስተምሕርኩ፡ ቅድሜሁ፡ እንዘ፡ እብል፡ እግዚእየ፡ እስመ፡ ተማእከኒ፡ ወበመቅሠፍትከ፡ ገሠጽከኒ፡ ወበመዓትከ፡ ቀሠፍከኒ፡ አብሐኒ፡ አሐተ፡ ካል፡ አንብብ፡ በቅድሜከ።
18 ወአውሥአኒ፡ ወይቤለኒ፡ እግዚእየ፡ ንብብ፡ ወእሰምዓከ፡ ወሶቤሃ፡ አኃዝኩ፡ ወአስተ፡ ብቋዕኩ፡ ኀቤሁ፡ እንዘ፡ እብል፡ እምከመ፡ ተሰደድኩ፡ እመንበርየ፡ እለ፡ አስሐትክዎሙ፡ ይኩኑ፡ ምስሌየ፡ ውስተ፡ ዘአሥቀይ፡ አነ።
19 ወእለሰ፡ አበዩኒ፡ ወኢስሕቱ፡ ብየ፡ ወኢዓቀቡ፡ ትእዛዝየ፡ ከመ፡ ይግበሩ፡ ትእዛዘከ፡ ወይ፡ ፈጽም፡ ፈቃደከ፡ ወይዕቀቡ፡ ቃለከ፡ ወሶበ፡ አበዩኒ፡ ዘከመ፡ አነ፡ መሐርክዎሙ፡ ወኢስሕቱ፡ ብየ፡ ዘከመ፡ አስሐትክዎሙ፡ ወኢስሕቱ፡ ብየ፡ ዘከመ፡ አስሐትክዎሙ፡ እሙንቱ፡ ይኩን፡ ለመንግሥትከ፡ ወይንሥኡ፡ አክሊለ፡ ዘሊተ፡ ወሀብከኒ፡ አመ፡ ታፈቅረኒ።
20 ወለኵሎሙ፡ ሥልጣናት፡ እለ፡ ተሰዱ፡ ምስሌየ፡ ወእለ፡ ተሰምዩ፡ ሰይጣናት፡ ሀቦሙ፡ አክ፡ ሊለ፡ ዚአሆሙ፡ ወአንብሮሙ፡ በየማንከ፡ ውስተ፡ መንበረ፡ ዚአየ፡ አንተ፡ ብድወት፡ እም፡ ነየ፡ ወእመላክትየ።
21 ወይሰብሑከ፡ በከመ፡ ፈቀድከ፡ ወይኩኑ፡ ከማየ፡ ወከመ፡ መላእክትየ፡ ወይሰብሑከ፡ በከመ፡ ፈቀድከ፡ እስመ፡ ተሥዕረ፡ ሥልጣንየ፡ ወተለዓለ፡ ሥልጣነ፡ ዚአሆሙ፡ እስመ፡ ጽላዕከኒ፡ ወአፍቀርኮሙ፡ ለእለ፡ ተፈጥሩ፡ እመሬት፡ ወሐመድ።
22 ወአውሥአኒ፡ እግዚእየ፡ ወይቤለኒ፡ በከመ፡ ፈቀድከ፡ እንዘ፡ ኢይፈቅዱ፡ ለምባርየ፡ ይኩኑከ፡ በከመ፡ ቃልከ፡ እስመ፡ እንዘ፡ ይሬእዩ፡ ወይሰምዑ፡ አስሐተኮሙ፡ አንተ።
23 ወሊተኒ፡ ኢየኃዝነኒ፡ ተኃጕሎቶሙ፡ ሶበ፡ ይመጽኡ፡ ኀቤከ፡ ኀዲጎሙ፡ ትእዛዝየ፡ ወቃለ፡ መጻሕፍትየ፡ ወለእመ፡ አንተ፡ አስሐትኮሙ፡ ይትኰነኑ፡ ምስሌከ፡ አደይን።
24 ወአልብክሙ፡ ኑፃዕ፡ እስከ፡ ለዓለመ፡ ዓለም፡ ወእለ፡ ስሕቱ፡ ብከ፡ ውስተ፡ ኵነኔ፡ ደይን፡ አላ፡ ትሣቀዩ፡ ውስተ፡ እሳት፡ እስከ፡ ለዓለመ፡ ዓለም።
=== chapter 2 ===
[Chapter 2]
1 ወእለሰ፡ ስዕንከ፡ አንተ፡ ከመ፡ ኢዮብ፡ ገብርየ፡ አነ፡ አወርሶሙ፡ መንብረ፡ ዚአከ፡ በክብር፡ ለእለ፡ አንተ፡ ለእንኪ፡ አስሕቶ፡ መንግሥተ፡ ሰማያት፡ አዓሥዮሙ፡ ይቤ፡ እግዚአብሔር፡ ዘኵሎ፡ ይመልክ።
2 ወአንሰ፡ አጠበቦሙ፡ በኵሉ፡ ለደቂቀ፡ አዳም፡ ወኢየኃድጎሙ፡ ይቁሙ፡ ውስተ፡ ሠናይ፡ ምግባር፡ ለእመ፡ ክህልከ፡ አስሕቶቶሙ፡ እስመ፡ አነ፡ እጠበቦሙ፡ በኵሉ፡ ለደቂቀ፡ አዳም፡ ወአስተጥዕም፡ ሎሙ፡ ውስተ፡ ፍትወተ፡ ዓለም።
3 ወእመኒ፡ በፍትወተ፡ መባልዕት፡ ወበፍትወተ፡ ስታይ፡ ወአፍቀሮ፡ አራዝ፡ ወእመሂ፡ በአፍቅሮ፡ ነገር፡ ወውሂብ፡ ወበነሢእ።
4 ወለ፡ እመኒ፡ በአፍቅሮ፡ ነጽሮ፡ ወበአፍቅሮ፡ ሰሚዕ፡ ወአፍቅሮ፡ ሐዊር፡ ወገሢሦ፡ ወአመኒ፡ በአብዝኆ፡ ነገር፡ በትዕቢት፡ ወአፍቅሮ፡ ንዋም፡ ወሕልም።
5 ወእመኒ፡ በአብዝኆ፡ ስታይ፡ ወሰካር፡ ወእመሂ፡ በርእየተ፡ ላህያት፡ አንስተ፡ ዝዓለም፡ ወፂና፡ መዓዛተ፡ ያስሕቶሙ።
6 ወእመሂ፡ በሐሚተ፡ ቢጾሙ፡ በፅልዕ፡ ወእመሂ፡ በርዕየተ፡ ላህያት፡ አንስተ፡ ዝዓለም፡ ወፂና፡ መዓዛተ፡ ያስሕቶሙ።
7 ወበዝንቱ፡ ኵሉ፡ አነ፡ እትቃረኖሙ፡ ከመ፡ ኢይክኃሉ፡ ድኂነ፡ ወአግኅሦሙ፡ እምፍኖተ፡ እግዚአብሔር፡ ከመ፡ ይባቡ፡ ምስሌየ፡ ውስተ፡ ኃጕል፡ ዘበእንቲአሆሙ፡ ተሰደድኩ፡ እመንበርየ።
8 ወይቤ፡ ነቢይ፡ አንተ፡ ኃጕል፡ ወመኅጐሊ፡ ከመዝኑ፡ ትትዔበይ፡ ላዕለ፡ ልሕኵተ፡ እግዚ፡ አብሔር፡ ሶበ፡ አንተ፡ በለውከ፡ ትእዛዘ፡ እግዚአብሔር፡ በትዕቢትከ፡ ወበግዝፈተ፡ ልብከ፡ ወበአምዕዖ፡ ፈጣሪከ፡ ወኢሰብሖ፡ አምላክከ።
9 ወሶበ፡ ተምዓከ፡ ውእቱ፡ ፈጣሪከ፡ ገደፈከ፡ በእንተ፡ እከየ፡ ምግባሪከ፡ ወለምንት፡ ትትማልዖ፡ ለምስኪን፡ ዘፈጠሮ፡ አምላኩእመሬት፡ ወሐመድ፡ ወገብር፡ በከመ፡ ፈቃደ፡ ወአንበሮ፡ ለስብሐቲሁ።
10 ወሶበ፡ አንተ፡ መንፈሳዊ፡ ተዓበይከ፡ በብሂለ፡ አምላክ፡ ዘፈጠረከ፡ እምነበልባለ፡ እሳት፡ ወነፋስ።
11 ወሶበ፡ አንተ፡ ትትሜካህ፡ ነጸረ፡ እግዚአብሔር፡ እከየ፡ ምግባሪከ፡ ወፈጠረ፡ ዘማሬ፡ ህየንተ፡ ዘአኮ፡ ከመ፡ ይስብሕ፡ ስሞ፡ ዘእንበለ፡ እንትጎ፡ እስመ፡ አንተ፡ ምስለ፡ አጋንንቲከ፡ ዓለውከ፡ ትእዛዘ፡ እግዚአብሔር።
12 ወአዳምኒ፡ ምስለ፡ ደቂቁ፡ ከመ፡ ይሰብሑ፡ ስመ፡ እግዚአብሔር፡ ህየንተ፡ ስብሐተ፡ ዚአከ፡ ምስለ፡ ሠራዊትከ፡ እለ፡ መነነ፡ እግዚአብሔር፡ በእንተ፡ ትዕቢትከ፡ እስመ፡ አንተ፡ አዕበየከ፡ ርእሰከ፡ እምኵሎሙ፡ መላእክት፡ እምእለ፡ ከማከ፡ ሠራዊተ፡ መላእክት።
13 ወበእንተዝ፡ ነሠተከ፡ እግዚአብሔር፡ እምኵሎሙ፡ ሊቃነ፡ መላእክት፡ እለ፡ ከማከ፡ ወሠራዊትከኒ፡ እለ፡ ተፈጥሩ፡ ምስሌከ፡ በ
1 ምክር፡ ስሕትክሙ፡ እምስብሐተ፡ እግዚ፡ አብሔር፡ በእንተ፡ ግዝፈተ፡ አልባቢክሙ፡ ወትዕቢተ፡ ሕሊናክሙ፡ ዘአልቦ፡ ባቍዕ፡ ወተዓበይክሙ፡ ላዕለ፡ ፈጠረክሙ፡ ወአኮ፡ ላዕለ፡ ባዕድ።
14 ወበእንተዝ፡ ከመ፡ ይስባሕ፡ በትሑታን፡ ፈጠሮ፡ ለአዳም፡ እምነ፡ መሬተ፡ ምድር፡ ወወሀቦ፡ ሕገ፡ ወትእዛዘ፡ ከመ፡ ኢይብልዕ፡ እምፍሬ፡ ዕፅ።
15 ወሤሞ፡ ላዕለ፡ ኵሉ፡ ዘፈጠረ፡ ወአለበዎ፡ እንዘ፡ ይብል፡ ብላዕ፡ እምኵሉ፡ ዕፅ፡ ዘውስተ፡ ገነት፡ ወእምአሐቲ፡ ዕፅ፡ ሦከ፡ ሞት፡ ኢትብላዕ፡ እምኔሃ፡ ከመ፡ ኢታምጽኦ፡ ሞተ፡ ላዕለ፡ ርእሰከ።
16 ወሶበ፡ ሰማዕካ፡ ለዛቲቃል፡ ቂዕከ፡ ኅምዘ፡ እምዘአፉከ፡ ላዕለ፡ ሔዋን፡ ዓፅመ፡ ገቦሁ፡ ለአዳም።
17 ወተፈየትኮ፡ ለበግዕ፡ ንጹሕ፡ በህብል፡ እኩይ፡ ከመ፡ ተረሰዮ፡ ከማከ፡ ተዓደዊ፡ ትእዛዘ።
18 ወሶበ፡ አስሐትካ፡ ለሔዋን፡ እንተ፡ ተፈጥረት፡ ከመ፡ ርግብ፡ የዋሕ፡ እንተ፡ ኢተአምር፡ ዚአከ፡ አስሐትካ፡ በጠዋይ፡ ቃልከ፡ ወበከዋው፡ ነገርከ፡ ወአምድኅረ፡ እስሐትካ፡ ለይእቲ፡ ቀዳሚት፡ ልሁኵት፡ ወይእቲ፡ ሐዊራ፡ አስሐተቶ፡ ለልሕኵተ፡ እግዚአብሔር፡ ቀዳማዊ፡ ብእሲ፡ ዘተፈጥረ፡ እመሬት።
19 ወበትዕቢተ፡ ዚአከ፡ ቶሳሕካሁ፡ ውስተ፡ ዘኢኮነ፡ ሁከተ፡ ወረሰይካሁ፡ ከመ፡ ይዕሉ፡ ቃለ፡ ፈጣሪሁ፡ ወበትዕቢተ፡ ዚአከ፡ አውዓይካሁ፡ ለነዳይ።
20 ወበእከየ፡ ዚአከ፡ አርኃቃሁ፡ እምፍቅረ፡ አምላኩ፡ ወበምክንያተ፡ ዚአከ፡ አውፆዕካሁ፡ እምገነተ፡ ትፍሥሕት፡ ወበዕቅፍት፡ ዚአከ፡ አኀደጋሁ፡ እምበልዓ፡ ገነት።
21 ወሐሰተ፡ ዚአከ፡ አጽማዕከሁ፡ እምስታየ፡ ገነተ፡ እስመ፡ አንተ፡ ተፃረርካሁ፡ እምትካት፡ ለየዋህ፡ ልሕኵት፡ ከመ፡ ታወርደ፡ ውስተ፡ ሞተ፡ ዚአከ፡ ሲኦል፡ ወከመ፡ ታውጽኦ፡ እምፍቅረ፡ አምላኩ፡ ዘአምጽኦ፡ እምኀበ፡ ኢሀሎ፡ ውስተ፡ ሀልዎ፡ ዘበአማን።
22 ወእንዘ፡ መሬታዊ፡ ረሰዮ፡ መንፈሳዊ፡ ወነባቢ፡ ዘይሴብሕ፡ ወይዜምር፡ ለአምላኩ፡ በነፍሱ፡ ወበሥጋሁ፡ ወበሕሊናሁ።
23 ወፈጠረ፡ ሎቱ
=== chapter 3 ===
[Chapter 3]
1 ወለከሰ
2 ወለአድምሰ፡ ትውህቡ
3 ወካዕበ፡ ቦሙ፡ ተሐዋስያን፡ ሕሊናተ፡ ከመ፡ ሞገዳተ፡ ባሕር፡ ወከመ፡ ነፋስ፡ ዓውሎ፡ ዘይነሥእ፡ ፀበለ፡ እምነ፡ ምድር፡ ወከመ፡ ሞገደ፡ ባሕር፡ ዘይዘብጣ፡ ነፋስ፡ ወከመ፡ ነጠብጣበ፡ ዝናም፡ ዘኢይትኋለቍ፡ ከማሁ፡ ሕሊናሁ፡ ለአዳም፡ እምብዝኃ፡ ሕሊናተ፡ ዘውስተ፡ ልቡ፡ ዘኢይትኋለቍ።
4 ወለከሰ፡ አሐቲ፡ ሕሊና፡ ወአልቦ፡ ባዕድ፡ እስመ፡ ኢኮንከ፡ ዘሥጋ።
5 ወአንተሰ፡ አማሰንኮ፡ ለዘ
6 ወመጽአተ፡ ወአስሐተቶ፡ ለቀዳማዊ፡ ልሕኵቱ፡ ለእግዚአብሔር፡ በበሊዓ፡ ዕፅ፡ ወአምጽአት፡ ሞተ፡ ላዕሌሃ፡ ወላዕለ፡ ደቂቃ፡ በእንተ፡ ዘተዓደወት፡ ትእዛዘ፡ ፈጣሪሃ።
7 ወበኵነኔ፡ ጽድቁ፡ ለእግዚአብሔር፡ ወጽኡ፡ እምገነት፡ ወኢያርኃቆሙ፡ ተባኢሶ፡ እምገነት፡ አላ፡ ናዘዞሙ፡ በምድር፡ እንተ፡ ሰደዶሙ፡ በውሉዶሙ፡ ወበፍሬ፡ ከርሦሙ፡ ወበፍሬ፡ ምድሮሙ።
8 ወሶበ፡ አውፃዕካሆሙ፡ በቅንዓት፡ እምገነት፡ ወሀቦሙ፡ እግዚአብሔር፡ እምዕፀ፡ ገነት፡ ሐመልሚላተ፡ ሰበዎተ፡ ከመ፡ ይትከሉ፡ ወይትናዘዙ፡ በፍሬ፡ ገነት፡ ወበፍሬሃ፡ ለምድር፡ ዘወሀቦሙ፡ እግዚአብሔር።
9 ከመ፡ ይትናዘዙ፡ ወየሐደሱ፡ ልቦሙ፡ ፈድፋደ፡ በርእየ፡ ውሉደ፡ ወበርእየ፡ ገነት፡ ወበፍሬሃ፡ ለምድር፡ ዘአብቈለት፡ ምድረ፡ እምሐመድ፡ ወሶበ፡ ይበልዑ፡ ኪያሁ፡ ይትናዘዙ፡ ፈድፋደ፡ እምኃዘን፡ እንተ፡ አውፃዕካሆሙ፡ እምገነተ።
10 ወይትናዘዙ፡ በአልባቢሆሙ፡ በእንተ፡ ውሉድ፡ ወበፍሬ፡ ምድር፡ እስመ፡ የአምር፡ እግዚ፡ አብሔር፡ ናዝዞ፡ ልሕኵቱ።
11 ወይሔድስ፡ ልቦሙበእክል፡ ወበማይ፡ እስመ፡ ሰዱዳነ፡ ኮኑ፡ ውስተ፡ ዛቲ፡ ምድረ፡ ሦክ፡ ወአሜከላ።
=== chapter 4 ===
[Chapter 4]
1 ወሀሎ፡ እግዚኡ፡ ለአዳም፡ ከመ፡ ይትቤዘዎ፡ ኪያከኒ፡ ያስተኃፍረከ፡ ወያነግፎ፡ ለበግዕ፡ እምእደ፡ ተኵላ።
2 ወባሕቱ፡ ተንሥእ፡ እለ፡ ቀነይከ፡ ወትትማላዕ፡ ምስሌከ፡ ውስተ፡ ኃጕል።
3 ወለሰ፡ ዓቀቡ፡ ሕጎ፡ ለእግዚአብሔር፡ አምላኮሙ፡ ይትፌሥሁ፡ ምስለ፡ ፈጣሪሆሙ፡ እለ፡ ሠወሮሙ፡ እግዚአብሔር፡ እምግባሪከ፡ እኩይ፡ ከመ፡ ይረስዮሙ፡ መክፈልተ፡ ዚአሁ፡ ወከመ፡ ይሰብሕዎ፡ ምስለ፡ መላእክቲሁ፡ ቅዱሳን፡ እለ፡ ኢተዓደውዎ፡ ከማከ፡ ለሕገ፡ አምላኮሙ።
4 ወአንተሰ፡ በትዕቢትከ፡ ነሥአከ፡ መንበረ፡ ልዑል፡ እግዚአብሔር፡ ዘወሀበክ፡ እምኵሎሙ፡ እለ፡ ከማከ፡ ከመ፡ ትሰብሕ፡ ምስለ፡ መላእክቲሁ።
5 ወአንተሰ፡ አበይከ፡ ወተሰመይከ፡ ተሰመዩ፡ አጋንንተ። ወእለሰ፡ ያፈቅርዎ፡ ለእግዚአብሔር፡ ይከውኑ፡ ሎቱ፡ ሕዝበ፡ ከመ፡ መላእክት፡ ቅዱሳን፡ ወዘእንበለ፡ ጽርዓት፡ ይሰፍሑ፡ ክነፊሆሙ፡ ኪሩቤል፡ ወሱራፌል፡ እለ፡ ይሴብሕዎ።
6 ወእለሰ፡ ያፈቅርዎ፡ ለእግዚአብሔር፡ ይከውን፡ ሎቱ፡ ሕዝበ፡ ከመ፡ መላእክት፡ ቅዱሳን፡ ወዘእንበለ፡ ጽርዓት፡ ይሰፍሑ፡ ክነፊሆሙ፡ ኪሩቤል፡ ወሱራፌል፡ እለ፡ ይሴብሕዎ።
7 ወአንተሰ፡ በሐኪትከ፡ ወበትዕቢትከ፡ እኀጕልከ፡ ስብሐቲከ፡ ዘአዘዘከ፡ ከመ፡ ትሰብሖ፡ በኵሉ፡ ጊዜ፡ ምስለ፡ ነገድከ፡ ወኵሉ፡ ማኅበርከ፡ እለ፡ ተፈጥሩ፡ ምስሌከ፡ በኅበርከ።
8 ወሶበ፡ አንተ፡ ረሣእከ፡ ስብሐቲሁ፡ ለዘፈጠርከ፡ እንዘ፡ ይመስለከ፡ ዘኢይክል፡ ገቢረ፡ ዘከማከ፡ ከመ፡ ኢይንትግ፡ ስብሐቲሁ፡ ለእግዚአብሔር፡ ዘፈጠረከ፡ ዓሥራየ፡ ነገደ፡ ሶበ፡ አንተ፡ ተፈለጥከ፡ እማኅበረ፡ አኃዊከ፡ ከመ፡ ኢይንትግ፡ ስብሐቲሁ፡ ለዘፈጠርከ፡ እግዚአብሔር።
9 ወአንተሰ፡ በትዕቢተ፡ ልብከ፡ ተሀከይከ፡ በስብሐቲሁ፡ ለዘፈጠረከ፡ ውእቱኒ፡ ተምዓከ፡ ወተሣለቀ፡ ላዕሌከ፡ ወዓሠረከ፡ ውስተ፡ ረዓደ፡ ገሀነም፡ ምስለ፡ አጋንንቲከ።
10 ወነሥአ፡ ምሬተ፡ እምድር፡ በእደዊሁ፡ ቅድስት፡ ወቲስሐ፡ ማየ፡ ወእሳተ፡ ወነፋሰ፡ ወፈ፡ ጠሮ፡ ለአዳም፡ በዘዚአሁ፡ አርአያ፡ ወአምሳል።
11 ወሤሞ፡ ውስተ፡ ኵሉ፡ ግብረ፡ እደዊሁ፡ ከመ፡ ይምላዕ፡ ውስተ፡ ንትጋ፡ ዚአከ፡ ስብሐቲሁ፡ ወተደመረ፡ ስብሐቲሁ፡ ለመሬታዊ፡ ምስለ፡ ስብሐቲሆሙ፡ ለሰማያውያን፡ ወኮነ፡ ዕሩየ፡ ስብሐቲሆሙ።
12 ወአንተሰ፡ በትዕቢትከ፡ ወበግዝፈተ፡ ክሣድከ፡ ተሰደድከ፡ ወአኅጐልከ፡ ርእሰከ፡ እምስብሐተ፡ እግዚአብሔር፡ ዘፈጠርከ።
13 አእምርኪ፡ ከመ፡ ኢሐፀ፡ ስብሐቲሁ፡ እስመ፡ ገብረ፡ ዘይሴብሖ፡ በምክረ፡ ፈቃዱ፡ ከመ፡ ኢይሕፅፅ፡ ስብሐቲሁ፡ ለእግዚአብሔር።
14 እስመ፡ ውስቱ፡ የአምር፡ ኵሎ፡ እምቅድመ፡ ይኩን፡ ወአስመረሰ፡ እምቅድመ፡ ይፍጥርከ፡ ከመ፡ ተዓለ፡ ትእዛዞ፡ ወሶበ፡ አዕለውኮ፡ ለአዳም፡ ገብሮ፡ በአርአያሁ፡ ወበአምሳሊሁ፡ እስመ፡ እምቅድመ፡ ዓለም፡ ምክር፡ ኅቡዕ፡ ሀሎ፡ ኀቤሁ።
15 በከመ፡ ይቤ፡ ሰሎሞን፡ እምቅድመ፡ አውግር፡ ወለደኒ፡ ወእምቅድመ፡ ይጣዕጣዕ፡ ዓለም፡ ፈጠረኒ፡ ወእምቅድመ፡ ይሣረር፡ መሠረታተ፡ ምድር።
16 ወእምቅድመ፡ ያስተዋድድ፡ ምቅዋመ፡ አድባር፡ ወአውግር፡ ወዘእንበለ፡ ይጽናዕ፡ ፍናዊሁ፡ ለዓለም፡ ወዘእንበለ፡ ይብራህ፡ ብርሃነ፡ ፀሐይ፡ ወወርኅ፡ ወዘእንበለ፡ ይኩን፡ ዑደተ፡ ከዋክብት፡ ወአዝማን።
17 ወዘእንበለ፡ ተባርዮ፡ ሌሊት፡ ወመዓልት፡ ወዘእንበለ፡ ይኩን፡ መናስግተ፡ ባሕር፡ ወዘእንበለ፡ ይኩን፡ ኵሉ፡ ዘኮነ።
18 ወዘእንበለ፡ ያስተርኢ፡ ዘይእዜ፡ ያስተርኢ፡ ወዘእንበለ፡ ይሰመይ፡ ኵሉ፡ ስም፡ ዘይሰመይ፡ ይእዜ፡ ኢአንተ፡ ወኢአለ፡ ከማከ፡ ህልው፡ ውስተ፡ ሕሊና፡ እግዚአብሔር፡ ወአዳም፡ ገብሩ።
19 ሶበ፡ አንተ፡ ዐለውከ፡ ከመ፡ ይስባሕ፡ ስሙ፡ ቅዱስ፡ ወሶበ፡ ተዓበይከ፡ አንተ፡ ፈጠሮ፡ ለአዳም፡ ገብሩ፡ ከመ፡ ይስባሕ፡ በትሑት፡ ግብሩን፡ ዘፈጠሮ፡ እመሬት።
20 እስመ፡ ጸሎተ፡ ነዳያን፡ ይሰምዕ፡ እግዚአብሔር፡ እምርኁቅ፡ ወስብሐት፡ ትሑታን፡ ያፈ፡ ቅር፡ እግዚአብሔር።
21 ወነገረ፡ ዕቡያን፡ ይትሔየይ፡ እግዚአብሔር፡ እስመ፡ ኢይፈቅድ፡ ኃይለ፡ ፈረስ፡ ወኢይሠምር፡ በአቍያጸ፡ ብእሲ፡ ይሠምር፡ እግዚአብሔር፡ በእለ፡ ይፈርህዎ።
22 ወይበክዩ፡ ወአውይው፡ በእንተ፡ ኃጢአቶሙ፡ ዘገብሩ።
23 ወአንተሰ፡ ስእንከ፡ ገንየ፡ በንስሐ።
24 ወውእቱሰ፡ መሬት፡ ገብአ፡ በንስሐ፡ እንአ፡ ይበኪ፡ ወያስቆቁ፡ በእንተ፡ ኃጢአቱ፡ ቅድመ፡ እግዚአብሔር፡ ፈጣሪሁ።
25 ወአንተሰ፡ በትዕቢተ፡ ልብከ፡ ወበግዝፈተ፡ ክሣድከ፡ ኢያእመርካ፡ ለፍኖተ፡ ሰላም፡ ወኢለንስሐ፡ ወሰዕንከ፡ ተጋንዮ፡ ቅድመ፡ እግዚአብሔር፡ ፈጣሪከ፡ በንስሐ፡ ወበብካይ፡ ወበአንብዕ።
26 ወውእቱሰ፡ መሬት፡ ወሐመድ፡ ወነዳይ፡ ገብዓ፡ በብካይ፡ ወበአንብዕ፡ ውስተ፡ ንስሐ፡ ወፍኖተ፡ ሰላ፡ ወትሕትና
27 ወአንተሰ፡ ኢያትሐትከ፡ ርእሰከ፡ ወኢቀፈተ፡ ልብከ፡ ለዘፈጠርከ።
28 ወውእቱሰ፡ አትሒቶ፡ ርእሰ፡ ገነየ፡ በዘአበሰ፡ ወኢተዓበየ።
29 ወለውእቱኒ፡ ስሕተት፡ አኮ፡ ውእቱ፡ ዘፈጠሮ፡ እለ፡ እምኀቤከ፡ እስመ፡ አንተ፡ ፈጠርከ፡ ወአሥረፅካ፡ ለዕልወት፡ ወተማላዕካሁ፡ ምስሌከ፡ ውስተ፡ ኃጕለ፡ ኢአከ፡ በትዕቢትከ።
30 የአምርኪ፡ ለሊሁ፡ ከመ፡ ኮነ፡ በትዕቢተ፡ ልብከ፡ እስመ፡ እምቅድመ፡ ይፈጥርክሙ፡ ለክልኤክሙ፡ አእመረክሙ፡ ወአእመረ፡ ፍናዊክሙ።
31 ወለውእቱሰ፡ ዘአልቦ፡ ተኬንዎ፡ ትዕቢት፡ አግብዖ፡ በንስሐ፡ ወበብካይ፡ ወበአንብዕ።
32 ወአንተሰ፡ በትዕቢተ፡ ልብከ፡ ስዕንከ፡ ገንየ፡ በንስሐ፡ እስመ፡ ዘይዔብስ፡ ወይትጋነይ፡ አእከየ፡ ትዕቢቶ፡ እምዘቀዲሙ፡ አበሳሁ፡ ወዘሰ፡ ይኤብስ፡ ወይትጋነይ፡ ወይበኪ፡ ቅድመ፡ እግዚአብሔር፡ ፈጣሪሁ።
33 ወውእቱከ፡ ዘበአማን፡ ነስሐ፡ ወፍኖተ፡ መድኃኒቱ፡ ረከበ፡ ከመ፡ ያራኅርኅ፡ ልበ፡ እግዚኡ፡ ወተጋነየ፡ ቅድመ፡ ሊቁ፡ ወእግዚኡ፡ ያነሐሲ፡ እምእንተ፡ ቀዲሙ፡ መከራ፡ ከመ፡ ይትመዓዕ፡ ላዕለ፡ ገብሩ፡ እስመ፡ ተጋነየ፡ ቅድሜሁ፡ በብዙኅ፡ ንስሐ፡ ወሰጊድ፡ ወእንተ፡ ቀዳሜ፡ ጌጋዩ፡ የኃድግ፡ ሎቱ።
34 ወለእመ፡ ኢገብአ፡ ውስተ፡ እንተ፡ ቀዳሚ፡ አበሳሁ፡ ወዝንቱሰ፡ ፍጹም፡ ንስሐሁ፡ ለእመ፡ ገብረ፡ ዘንተ፡ ወአዳምሰ፡ ኢረሥዓ፡ ሐለዮ፡ አምላኩ፡ ወተጋነየ፡ በንስሐ፡ ለዘፈጠሮ።
35 ወአንተኒ፡ ግነይ፡ ኀቤሁ፡ ወነስሕ፡ ለዘፈጠርከ፡ ወኢታንኅ፡ አበሳ፡ ላዕሌሁ፡ ወላዕለ፡ ግብረ፡ እደዊሁን፡ እስመ፡ እግዚኦሙ፡ ዘፈጠሮሙ፡ የአምር፡ ድካሞሙ፡ እስመ፡ ዘሥጋ፡ ወደም፡ እሙንቱ።
36 ወነፍሶሙኒ፡ እምከመ፡ ወፅዓት፡ ሥጋሆሙ፡ ይከውን፡ ሐመደ፡ እስከ፡ አመ፡ ዕለት፡ አንተ፡ ባቲ፡ ፈቀደ።
=== chapter 5 ===
[Chapter 5]
1 አእምሮ፡ ለዘፈጠርከ፡ ወኢትርሥዖ፡ ለዘአፅንዓከ፡ ወአድኃነከ፡ ቅዱሰ፡ እስራኤል፡ እስመ፡ እንዘ፡ መሬት፡ አንተ፡ ረሰየከ፡ በአርአያሁ፡ ወበአምሳሌሁ፡ ወሤመከ፡ ውስተ፡ ገነት፡ ከመ፡ ትትፈጋዕ፡ ወትትገብራ፡ ለምድር።
2 ወሶበ፡ አለውከ፡ ትእዛዞ፡ አውፅአከ፡ እምህየ፡ ውስተ፡ ዛቲ፡ ምድር፡ ይብስት፡ ምድረ፡ ሦክ፡ ወአሜከላ፡ አንተ፡ ረገማ፡ በእንቲአከ።
3 እስመ፡ አንተ፡ ምድር፡ ወይእቲ፡ ምድር፡ ወአንተ፡ ሐመድ፡ ወይእቲ፡ ሐመድ፡ ወአንተ፡ መሬት፡ ወይእቲ፡ መሬት፡ ወትሴሰይ፡ እምኔሃ፡ ወትገብአ፡ ኀቤሃ፡ ወትከውን፡ ሐመደ፡ እስከ፡ አመ፡ ፈቀደ፡ ከመ፡ ያንሥእከ፡ ወያሐትተከ፡ ኵሎ፡ ዘገበርከ፡ አበሰ፡ ወኃጢአተ።
4 ውእተ፡ ጊዜ፡ አእምር፡ ዘታውሥእ፡ ወትዘከር፡ በዝየ፡ ዘገበርከ፡ እኩየ፡ ወሠናየ፡ ወድሉ፡ ወምክር፡ ለእመ፡ ይበዝኅ፡ እኩይ፡ ወለእመ፡ ይበዝኅ፡ ሠናይ።
5 ወለእመ፡ አብዛኅኮ፡ ለሠናይ፡ ሠናይ፡ ለከ፡ ከመ፡ ትትፈሣሕ፡ ወትትኃሠይ፡ በትንሣኤ፡ ሙታን።
6 ወለእመ፡ አብዛኅኮ፡ ለእከይ፡ አሊ፡ ለከ፡ እስመ፡ ትትፈደይ፡ ብበከ፡ ግብረ፡ እደዊከ፡ ወበከመ፡ እከየ፡ ሕሊናከ፡ ወበከመ፡ ትፀውጎ፡ ለእኁከ፡ ወበከመ፡ ኢትፈርሆ፡ ለእግዚአብሔር፡ ትት፡ ፈደይ፡ በከመ፡ ምግባሪከ።
7 ወበከመ፡ ትሔስዎ፡ ለቢጽከ፡ ወትምሐል፡ በሐሰት፡ ስመ፡ እግዚአብሔር፡ ትትፈደይ፡ በከመ፡ ምግባሪከ።
8 እስመ፡ ትረሰዮ፡ ሐሰተ፡ ለቃልከ፡ ከመ፡ ይኩን፡ እሙነ፡ በአስተማሰሎ፡ ለቢጽከ፡ ወአንተሰ፡ ተአምር፡ ከመ፡ ሐሰተ፡ ትነብብ።
9 ወለእለሰ፡ ምስሌከ፡ ትቀውም፡ ከመ፡ ጽድቅ፡ ቃልከ፡ እንዘ፡ ታስተአምኖሙ፡ ወታበዝኅ፡ ነገረ፡ ኀበ፡ ዘኢኮነ፡ እሙነ፡ ጽድክ፡ ቃልከ፡ ወትትፈደይ፡ በከመ፡ ምግባሪከ፡ ወበከመ፡ አንተ፡ ትብል፡ እሁበከ፡ ኀበ፡ ዘኢትሁቦ፡ ለቢጽከ፡ ወዘትሔሰዎ፡ ለካልዕከ።
10 ወሶበ፡ ትብል፡ በንጹሕ፡ ልብከ፡ እሑብ፡ ያጸንሑከ፡ አጋንንት፡ ከመ፡ ከለባት፡ ወያረሥዑከ፡ ኵሎ፡ እመኒ፡ ነሣእከ፡ ወፈቀድከ፡ ከመ፡ ተሀብ፡ ያፈትወከ፡ ንዋየ፡ ዓለም፡ ከመ፡ ትዝግብ፡ ለዘኢይበቍዓከ፡ ወለዘኢትበልዕ፡ እስመ፡ ይቤ፡ ይዘግቡ፡ ወኢየአምሩ፡ ለዘያስተጋብዑ።
11 ወካዕበ፡ ይቤ፡ ሐሳውያን፡ ደቂቀ፡ እጓለ፡ እመሕያው፡ ይዔምፁ፡ መዳልወ፡ ወእሙንቱሰ፡ እምከንቱ፡ ውስተ፡ ከንቱ፡ ክመ።
12 ኦሰብእ፡ ኢትለፈውዋ፡ ለዓመፃ፡ በዐምፆ፡ መዳልው፡ ወበዓምፆ፡ መስፍርት፡ ወበቀሲጠ፡ ንዋየ፡ ባዕድ፡ ወደምሮ፡ ኀበ፡ ንዋይክሙ፡ በዓመፃ፡ ወበተዓደዎ፡ ንዋየ፡ ቢጽክሙ፡ ወኵሎ፡ በዘታረብሁ፡ ለርእስክሙ፡ ወአኮ፡ ለቢጽክሙ።
13 ወዘንተሂ፡ ለእመ፡ ገብርክሙ፡ ትትፈደዩ፡ በከመ፡ ምግባሪክሙ።
14 እሰብእ፡ ኢትትአመንዋ፡ ለሐይድ፡ አላ፡ በዘይረትዕ፡ በግብረ፡ እደዊክሙ፡ ትሴሰዩ፡ ወኢትፍቅዱ፡ ፃማ፡ ባዕድ፡ ከመ፡ ትብልዑ፡ በሐይድ፡ ወመሢጥ፡ ዘእንበለ፡ ፍትሕ፡ ወርትዕ።
15 ወዘኢያጸግበክሙ፡ ሶበ፡ ትበልዑ፡ ወዘኢይረብሐብክሙ፡ ሶበ፡ ትዘግቡ፡ አላ፡ ተኀድግዎ፡ ለባዕድ፡ ሶበ፡ ትመውቱ።
16 ወብዕልክሙኒ፡ ለእመ፡ በዝኃ፡ ፈታዕብዩ፡ ልበክሙ፡ ይኄይስ፡ ኅዳጥ፡ ዘበጽድቅ፡ እምብዙኅ፡ ብዕለ፡ ኃጥአን፡ እስመ፡ ብዕሎሙ፡ ለኃጥአን፡ ከመ፡ ጢስ፡ ዘይወጽእ፡ እምአፈ፡ እቶን፡ ወይነሥአ፡ ነፋስ።
=== chapter 6 ===
[Chapter 6]
1 ወተዘከሩ፡ ዕለተ፡ ሞትክሙ፡ ወሐልደዋ፡ ለእንተ፡ ትመጽአክሙ፡ አመ፡ ትወጽእ፡ ነፍስ፡ ክሙ፡ እምሥጋክሙ፡ ወአመ፡ ተኃድጉ፡ ለባዕድ፡ ብዕለክሙ፡ ወትሐውሩ፡ ፍኖተ፡ ኀበ፡ ኢተአምሩ።
2 ወእለ፡ ይትሜጠዉክሙኒ፡ ፀዋጋን፡ እሙንቱ፡ ወኅሡማን፡ በራዕዮሙ፡ ወመፍርሃን፡ በግርማሆሙ፡ ወኢይሰምዑ፡ ቃለክሙ፡ ወኢተሰምዑ፡ ቃሎሙ።
3 ወሶበሂ፡ ለአልክምዎሙ፡ ኢይሠጠውክሙ፡ በእንተ፡ ዘኢገብርክሙ፡ ፈቃደ፡ እግዚአብ፡ ሔር፡ አምላክክሙ፡ ወበእንተዝኪ፡ ይፈርሁክሙ፡ ፈድፋደ።
4 ወእለሰ፡ ገብሩ፡ ፈቃዶ፡ ለእግዚአብሔር፡ አልቦሙ፡ ፍርሃት፡ እስመ፡ እሙንቱ፡ ይፈርህ፡ ዎሙ፡ ወለነፍስ፡ ኃጥአንሰ፡ ይሣለቅዎሙ፡ አጋንንት።
5 ወለነፍሳተ፡ ጻድቃንሰ፡ ይትፌሥሑ፡ በይባቤ፡ መላእክት፡ እስመ፡ ያስተፌሥሖሙ፡ ፈድፋደ፡ በእንተ፡ ዘመነንዎ፡ ለዝንቱ፡ ዓለም፡ ወለነፍሳተ፡ ኃጥአንሰ፡ ይትሜጠውዎሙ፡ መላእክተ፡ ጸዋጋን።
6 ወለነፍሳተ፡ ጻድቃንሰ፡ ወሔራን፡ ይትሜጠውዎሙ፡ መላእክተ፡ ምሕረት፡ እስመ፡ እምኀበ፡ እግዚአብሔር፡ ይትፌነዉ፡ ከመ፡ ይናዝዝዎሙ፡ ለነፍሳተ፡ ጻድቃን፡ ወለነፍሳተ፡ ኃጥአንሰ፡ እስመ፡ እምኀበ፡ ዲያብሎስ፡ ይትፌነዉ፡ መላእክት፡ ፀዋጋን፡ ከመ፡ ይሳለቅዎን፡ ለነፍሳተ፡ ኃጥአን።
7 አሌ፡ ለክሙ፡ ኃጥአን፡ ብኩ፡ ላዕለ፡ ርእስክሙ፡ እምቅድመ፡ ትብጻሕክሙ፡ ዕለተ፡ ሞትክሙ፡ እስመ፡ እምድኅረ፡ ሞትክሙሰ፡ ኢይገብዕ፡ መዋዕሌክሙ፡ ዘኃለፈ።
8 አላ፡ ዘእንበለ፡ ይኅልፍ፡ መዋዕሊክሙ፡ ነስሑ፡ በዘሀሎክሙ፡ ከመ፡ ትኩኑ፡ ዘእንበለ፡ ደዌ፡ ወሕማም፡ አመ፡ ትበጽሑ፡ ቅድመ፡ እግዚአብሔር፡ በፍሥሐ።
9 ወኢይከውን፡ ላዕሌክሙ፡ ነውር፡ እኩ፡ ወሕንቋቌ፡ ወአፍቅሮ፡ ተድላ፡ ወመባልዕት፡ ከመ፡ ኢይስሐብክሙ፡ ውስተ፡ ፍትወተ፡ ከንቱ፡ ዘያርኅቅ፡ እምእግዚአብሔር፡ እስመ፡ ነፍስ፡ ጽግብት፡ ዘእንበለ፡ ዓቅም፡ ኢትዜከር፡ ስመ፡ እግዚአብሔር፡ ወኢየኃድር፡ ላዕሌሃ፡ መንፈሰ፡ ሕይወት፡ አላ፡ የኃድር፡ ላዕሌሃ፡ መንፈስ፡ ዲያብሎስ።
10 በከመ፡ ይቤ፡ ሙሴ፡ በልዓ፡ ያዕቆብ፡ ወፀግበ፡ ወሰብሐ፡ ወገዝፈ፡ ወርኀበ፡ ወኀደጎ፡ እግዚአብሔር፡ ፈጣሪሁ።
11 ወርኅከ፡ እምእግዚአብሔር፡ ሕይወቱ፡ እስመ፡ ምልዓተ፡ ከርሥ፡ ዘእንበለ፡ ዓቅም፡ ከመ፡ ሃለሌ፡ ፈረስ፡ ወከመ፡ ሐራውያን፡ ዘገዳም፡ በሊዕ፡ ወሰትይ፡ ዘእንበለ፡ ዓቅም፡ ወዝሙት።
12 ወዘሰ፡ ኢይመልዕ፡ ከርሦ፡ በመሠረተ፡ እግዚአብሔር፡ ፅኑዕ፡ ወከመ፡ ዓረፍተ፡ አድማስ፡ ወከመ፡ ንድቅ፡ ጽኑዕ፡ ዘቦቱ፡ ቅጽር፡ እስመ፡ ይቤ፡ ይጐይይ፡ ረሲዕ፡ እንዘ፡ አልቦ፡ ዘይሰ፡ ድደ።
13 ወጽድቅሰ፡ ከመ፡ አንበሳ፡ ውኩል።
14 ወእለሰ፡ ኢያፈቅርዎ፡ ለእግዚአብሔር፡ ቃሎኒ፡ ኢየዓቅቡ፡ ወልቦሙኒ፡ ኢኮነ፡ ርቱዓ።
15 ወእግዚአብሔር፡ ይሁቦሙ፡ ድንጋፄ፡ ወኀዘን፡ እንዘ፡ ሀለዉ፡ በዲበ፡ ምድር፡ ክመ፡ ኢያዕርፉ፡ በፍርሃት፡ ወበረዓድ፡ ወበመሢጠ፡ ንዋዮሙ፡ ወበምንዳቤያት፡ ብዙኅ፡ ዘአልቦ፡ ኊልቍ፡ ወበሰናስል፡ ዘውስተ፡ እደዊሆሙ፡ እምእደ፡ አጋዕዝቲሆሙ።
16 ወበሕማማት፡ ዘዘዚአሆሙ፡ ዘያደነግፁ፡ ከመ፡ ኢይኩኑ፡ ዕሩፋነ፡ ወኢበሰላም፡ ንብረ፡ ቶሙ።
=== chapter 7 ===
[Chapter 7]
1 ወእለሰ፡ ተወከሉ፡ በእግዚአብሔር፡ አልቦሙ፡ ድንጋፄ፡ ወፍርሃት፡ በከመ፡ ይቤ፡ ዳዊት፡ በእግዚአብሔር፡ ተወከልኩ፡ ኢይፈርህ፡ እጓለ፡ እመሕያው፡ ምንተ፡ ይሬስየኒ።
2 ወካዕበ፡ ይቤ፡ አመክሮ፡ ዱኒ፡ ፀባዒት፡ አንሰ፡ ቦቱ፡ ተወከልኩ፡ አሐተ፡ ሰአልክዎ፡ ለእግዚአብሔር፡ ወኪያሃ፡ አኃሥሥ፡ ወዘተወከለ፡ ቦቱ፡ የሐዩ፡ ለዓለም፡ ወኢይፈርህ፡ እም፡ ነገር፡ እኩይ።
3 መኑ፡ ዘተወከለ፡ በእግዚአብሔር፡ ወተኃፍረ፡ ወመኑ፡ ዘጸውዖ፡ ወተፀመሞ።
4 ወመኑ፡ ዘተሰፈወ፡ ኪያሁ፡ ወተኃፍረ፡ እስመ፡ ይቤ፡ ለዘአፍቀረኒ፡ አፈቅሮ፡ ወለዘአክ፡ በረኒ፡ አከብሮ፡ ወለዘተመይጠ፡ ኀቤየ፡ እትመሐፀኖ።
5 አድኅኑ፡ ነፍሰ፡ ዕቤር፡ ወአንግፍዎሙ፡ ከመ፡ እግዚአብሔር፡ ያድኅነክሙ፡ እምኵሉ፡ ዘይትቃወም፡ ላዕሌክሙ፡ በእኩይ፡ ወለዘርእክሙ፡ እምድኅሬክሙ፡ ያድኅኖሙ፡ እስመ፡ ትውልደ፡ ጻድቃን፡ ይትባረኩ፡ ወኢይፄነሱ፡ እከለ፡ አላ፡ ያተርፉ፡ ወይሁብ።
=== chapter 8 ===
[Chapter 8]
1 ተወከለ፡ ኢዮብ፡ በእግዚአብሔር፡ ወአድኀኖ፡ እምኵሉ፡ ምንዳቤሁ፡ ዘአምጽአ፡ ቦቱ፡ ዲያብሎስ፡ ፀረ፡ እጓለ፡ እመሕያው፡ እስመ፡ አልቦ፡ ተሕክዮ፡ ባረኮ፡ እግዚአብሔር፡ አምላኩ፡ ወኢያኅዘነ፡ ልቦ፡ በዘበጽሐ፡ ላዕሌሁ፡ ምንዳቤ፡ እለ፡ ይቤ፡ እግዚአብሔር፡ ወእግዚአብሔር፡ ነሥኦ፡ ወኮነ፡ ከመ፡ እግዚአብሔር፡ ፈቃደ፡ ወበኵሉ፡ ይኩን፡ ቡርከ፡ ስሙ፡ ለእግዚአብሔር፡ በሰማይ፡ ወምድር።
2 ወሶበ፡ ርእየ፡ እግዚአብሔር፡ ለኢዮብ፡ ከመ፡ ንጽሕት፡ ልቡ፡ ተወክፎ፡ እግዚአብሔር፡ በብዙኅ፡ ክብር።
3 ወወሀቦ፡ ብዕለ፡ ዘይበዝኅ፡ እምቀዲሙ፡ ብዕሉ፡ ወፈወሶ፡ እምቍስሉ፡ በእንተ፡ ትዕግሥቱ፡ በኵሉ፡ ዘበጽሖ፡ እስመ፡ ኮነ፡ መስተዓግሠ፡ ፈድፋደ።
4 ወከማሁ፡ አንትሙኒ፡ ለእመ፡ ኮንክሙ፡ መስተዓግሣነ፡ እምዘይትፌነዉ፡ ፀባዒት፡ ላዕሌክሙ፡ ትከውኑ፡ ብፁዓነ።
5 ተዓገሡኬ፡ ወኢታንጥዩ፡ ልበክሙ፡ እምዘበጽሐ፡ ላዕሌክሙ፡ ምንዳቤ፡ ከመ፡ እግዚአ፡ ብሔር፡ ይኩንክሙ፡ ፀወነ፡ እምእለ፡ ይትቃረኑክሙ፡ ወላዕለ፡ ውሉድክሙ፡ ወለውለደ፡ ውልድክሙ፡ እምድኅሬክሙ።
6 ተወከልዎ፡ ወይከውንክሙ፡ ፀወነ፡ ፀውዕዎ፡ ወይከውነክሙ፡ ሰማዔ፡ ተሰፈውዎ፡ ወይከው፡ ንክሙ፡ መሐሬ፡ ሰአልዎ፡ ወይከውነክሙ፡ አቢ።
7 ተዘከሩ፡ አስቴርሃ፡ ወመርደክዮስሃ፡ ውዮዲትሃ፡ ወጌዴዎንሃ፡ ወባርቅሃ፡ ወዲቦራሃ፡ ወሶምሶንሃ፡ ወዮፍታሔሃ።
8 ወባዕደንሂ፡ እለ፡ ከማሆሙ፡ አጥብኡ፡ ተወከሎ፡ በእግዚአብሔር፡ ወኢምዕዎሙ፡ ፀሮሙ።
9 እለሰ፡ ይፈቅዱ፡ ይግበሩ፡ እኪተ፡ ላዕሌሆሙ፡ ትፈድዮ፡ እኪተ፡ እስመ፡ ጽድቅ፡ እግዚአ፡ ብሔር፡ ወኢያደሉ፡ ለገጽ፡ ለኵሎሙ፡ እለ፡ ይፈርህዎ፡ ወይገብሩ፡ ጽድቀ፡ የዓቅብ፡ ነፍሳቲሆሙ፡ ወይሁቦሙ፡ ክብረ፡ ወሞገሰ።
10 ወያስተፌሥሖሙ፡ በበአቶሙ፡ ወበፀዓቶሙ፡ በሞቶሙ፡ ወበሕይወቶሙ፡ ወበንብረቶሙ፡ ወበተንሥኦቶሙ፡ እስመ፡ ውእቱ፡ ያሕዩ፡ ወይቀትል።
11 ወውእቱ፡ ይቀሥፍ፡ ወይሣሃል።
12 ወውእቱ፡ ያነዲ፡ ወያበልዕ፡ ወውእቱ፡ ያኃሥር፡ ወያከብር።
=== chapter 9 ===
[Chapter 9]
1 እመኒ፡ ዘውስተ፡ ሰማይ፡ ወእመኒ፡ ዘውስተ፡ ምድር፡ ወእመኒ፡ ዘመንፈስ፡ ወእመኒ፡ ዘሥጋ፡ ወኵሉ፡ ሎቱ፡ ወኵሉ፡ ይቀውም፡ በሥርዓቱ።
2 ወአልቦ፡ ዘይትዓደው፡ እምወሰኑ፡ ወእምትእዛዙ፡ ለፈጣሬ፡ ኵሉ፡ ዓሠረ፡ ንስር፡ ዘውስተ፡ ሰማይ፡ ወውእቱ፡ ይኤዝዝ፡ ምሕዋሪሁ፡ ኀበ፡ ፈቀደ።
3 ወፍኖተ፡ አርዌ፡ ምድር፡ ውስተ፡ ኰኵሕ፡ ውእቱ፡ ይኤዝዝ፡ ኀበ፡ ፈቀደ፡ ወፍኖተ፡ ሐመር፡ በውስተ፡ ባሕር፡ አልቦ፡ ዘየአምር፡ ፍኖቶ፡ ዘእንበለ፡ እግዚአብሔር፡ ባሕቲቱ።
4 ወመኑ፡ ዘየአምር፡ ምሕዋረ፡ ነፍሰ፡ እምከመ፡ ወፅዓት፡ እምሥጋሃ፡ ዘእንበለ፡ እግዚአብሔር፡ ባሕቲቱ፡ እመኒ፡ ነፍሰ፡ ጽድቅ፡ ወእመኒ፡ ነፍሰ፡ ኃጥእ።
5 ወኀበ፡ ተዓይልሂ፡ እመሂ፡ ዘውስተ፡ ገዳም፡ ወእመኒ፡ ዘውስተ፡ አድባር፡ ወእመኒ፡ ከመ፡ ዖፍ፡ ወእመኒ፡ ከመ፡ ጠል፡ አርሞንዔም፡ ዘይወርድ፡ ውስተ፡ መንትዕተ፡ ደብር።
6 ወእመኒ፡ ከመ፡ ነፋሰ፡ ዓውሎ፡ ወእመኒ፡ ከመ፡ መብረቅ፡ ዘያረትዕ፡ ፍናዊሁ።
7 ወእመኒ፡ ከመ፡ ከዋክብት፡ ዘያዐርሁ፡ በውስተ፡ ቀላይ፡ ወእመኒ፡ ከመ፡ ኆፃ፡ ዘድንጋገ፡ ባሕር፡ ይጠሐሉ፡ ውስተ፡ ቀላይ።
8 ወእመኒ፡ ከመ፡ ዕብነ፡ አድማስ፡ ሱርርት፡ ውስተ፡ ማዕምቅት፡ ባሕር፡ ወእመኑ፡ ከመ፡ ዕፅ፡ እንተ፡ ትክልት፡ ኀበ፡ ሙኀዘ፡ ማይ፡ ወትሁብ፡ ፍሬሃ፡ ሠናየ።
9 ወእመኒ፡ ከመ፡ ዕፀ፡ ባሕሩሰ፡ ዘያውዕዮ፡ ሐሩረ፡ ፀሐይ፡ ወይነሥኦ፡ ነፋሰ፡ ወይውሰደ፡ ኀበ፡ ካልዕ፡ መካን፡ ኀበ፡ ዘኢበቈለ፡ ወኢይትረከብ፡ ዓሠሩ።
10 ወከመ፡ ሳሕወ፡ ደመና፡ ኢይትረከብ፡ ዓሠሩ፡ መኑ፡ የአምር፡ ፍኖቶ፡ ለእግዚአብሔር፡ ወመኑ፡ ወማክርቲሁ፡ ወምስለ፡ መኑ፡ ተማከረ።
11 ወመኑ፡ ዘይተሉ፡ ዓሠረ፡ ዚአሁ፡ እስመ፡ ሕሊናሁ፡ ለእግዚአብሔር፡ ሥውር፡ እምእጓለ፡ እመሕያው።
12 ወአልቦ፡ ዘይክል፡ ሐለዮ፡ ጥበቡ፡ ወምክሩ፡ ለእግዚአብሔር፡ እስመ፡ ውእቱ፡ ሣረራ፡ ለምድር፡ ዲበ፡ ማይ፡ ወአንፅዓ፡ ዘእንበለ፡ ሰዋቅ፡ ወበኪነ፡ ጥበቡ፡ ዓመዳ፡ ለሰማይ፡ በነፋስ፡ ወረብቦ፡ ከመ፡ ሠቅ፡ ለተባዕታይ፡ ማይ።
13 ወአዘዞሙ፡ ለደመናት፡ ከመ፡ ያውርዱ፡ ዝናመ፡ ዲበ፡ ምድር፡ ወያበቍል፡ ሣዕረ፡ ወፍ፡ ሬያተ፡ ዘአልቦ፡ ኊልቍ፡ ለሲሳየ፡ እጓለ፡ እመሕያው፡ ከመ፡ ንትፈሣሕ፡ ኀቡረ፡ በእግዚአብሔር።
14 ወኵሎ፡ በረከታተ፡ ወፍግዓ፡ ወጽጋባተ፡ ዘይጼጉ፡ እግዚአብሔር፡ ለውለደ፡ ሰብእ፡ ከመ፡ ይጽገቡ፡ ወያእኵትዎ፡ ለእግዚአብሔር፡ ለዘወሀቦሙ፡ እምፍሬሃ፡ ለምድር።
15 ወአልበሶሙ፡ ሞጣሕተ፡ ሠናየ፡ ወኵሉ፡ ዘይትፈቀድ፡ በረከታተ፡ ወተድላ፡ ወፍግዓ፡ ዘተውህበ፡ ለእለ፡ ገብሩ፡ ፈቃደ፡ እግዚአብሔር።
16 ወበሰማያትኒ፡ ይሁቦሙ፡ ክብረ፡ ወሞገሰ፡ ወፍሥሐ፡ በኀበ፡ አስተዳለወ፡ ማኅደረ፡ አበ፡ ዊሆሙ፡ ለእለ፡ የዓቅቡ፡ ትእዛዞ፡ ለእግዚአብሔር።
17 ወሖሩ፡ በኵነኔሁ፡ ወበፍትሑ፡ ወኢተዓደዉ፡ እምትእዛዙ፡ ለዘዓቀቦሙ፡ ወሴሰዮሙ፡ ወአልሐቆሙ፡ ወአዕበዮሙ፡ ከመ፡ ይዕቀቡ፡ ሕጎ፡ ወይኅሡ፡ ሥርዓቶ፡ ወአንሰ፡ ርኢኩ፡ በላዕለ፡ ምድር፡ ዘከመ፡ ይገብር፡ እግዚአብሔር፡ ለእለ፡ ያፈቅርዎ፡ በአድክሞ፡ ፀሮሙ፡ ወበዓቂበ፡ ነፍሳቲሆሙ።
18 ወኵሎ፡ በከመ፡ ሰአልዎ፡ ይሁቡሙ፡ ወይገብር፡ ፈቃዶሙ፡ ኢትትዓደዉ፡ እምትእ፡ ዛዙ፡ ለእግዚአብሔር፡ ወግበሩ፡ ፍቃደ፡ ለእግዚአብሔር።
19 ወኢትትገኃሡ፡ እምሕጉ፡ ወእምትእዛዙ፡ ከመ፡ ኢይትመዕ፡ ላዕሌክሙ፡ ወከመ፡ ኢያ፡ ጥፍዕክሙ፡ በምዕር፡ ወኢይቅሥፍክሙ፡ በመዓቱ፡ ከመ፡ ኢትኩኑ፡ ውፁዓነ፡ እምዘነ፡ በርክሙ፡ ቀዲሙ፡ ርስተ፡ አበዊክሙ፡ ወከመ፡ ኢይኩን፡ ማኀደረክሙ፡ ውስተ፡ እሳተ፡ ገሃነም፡ ኀቤ፡ አልብክሙ፡ ሙፆዕ፡ እስከ፡ ለዓለም።
20 ወዘእንበለ፡ ትፃዕ፡ ነፍስክሙ፡ እምሥጋክሙ፡ ዕቀቡ፡ ፈቃደ፡ እግዚአብሔር፡ አምላ፡ ክክሙ፡ ከመ፡ ያሠኒ፡ ምግባሪክሙ፡ አመ፡ ትቀውሙ፡ ቅድሜሁ፡ ለእግዚአብሔር።
21 እስመ፡ መንግሥተ፡ ሰማያት፡ ወምድር፡ ሎቱ፡ ለባሕቲቱ፡ ወክሂል፡ ወነጊሥ፡ ሎቱ፡ ወም፡ ሒር፡ ወምሒክ፡ ሎቱ፡ ለባሕቲቱ።
22 እስመ፡ ውዕቱ፡ ያብዕል፡ ወያነዲ፡ ያኃሥር፡ ወያከብር።
23 ወዳዊትኒ፡ ተነበየ፡ በእንቲአሁ፡ እንዘ፡ ይብል፡ ሰብእሰ፡ ከምቶ፡ ይመስል፡ ወመዋዕሊሁ፡ ከመ፡ ጽላሎት፡ የኃልፍ።
24 ወአንተሰ፡ እግዚኦ፡ ለዓለም፡ ትነብር፡ ወዝክርከኒ፡ ለትውልደ፡ ትውልድ።
25 ወካዕበ፡ ይቤ፡ መንግሥትከሰ፡ መንግሥት፡ ዘለኵሉ፡ ዓለም፡ ወምኵናኒከኒ፡ ለትውልደ፡ ትውልድ፤ አንተ፡ ነሣእከ፡ መንግሥተ፡ እምሳኦል፡ ወአግባዕከ፡ ኀበ፡ ዳዊት።
26 ወለከሰ፡ አልቦ፡ ዘይሰይመከ፡ ወአልቦ፡ ዘይክል፡ ርእዮተከ፡ ወለሊከ፡ ትሬኢ፡ ኵሎ።
27 ወመንግሥትከሰ፡ ኢይሠዓር፡ ለትውልደ፡ ትውልድ፡ ወለዓለመ፡ ዓለም፡ ወአልቦ፡ ዘይኴንኖ፡ ውእቱሰ፡ ይኴንን፡ ኵሎ፡ ወይሬኢ፡ ኵሎ።
28 ወይፈትን፡ ልበ፡ ወኵልያተ፡ እስመ፡ ለሊሁ፡ ዘገብሮ፡ ለሰብእ፡ በአርአይሁ፡ ዘበአምሳ፡ ሌሁ፡ ከመ፡ ይኩን፡ ለስብሐቲሁ፡ ወከመ፡ ያእምሩ፡ አምልኮተ፡ ዚአሁ፡ ዘአንበለ፡ ኑፋቄ፡ በልብ፡ ርቱዕ፡ ወኢይኪን፡ ስጋድያነ፡ ለባዕዳን፡ አማልክት፡ ዘእንበለ፡ ለባሕተቱ፡ እግዚአብሔር፡ ዘፈጠሮሙ፡ ወሢሠዮሙ፡ ወአልሐቆሙ፡ ወአዕበዮሙ።
29 ወእሙንቱሰ፡ አበዩ፡ አምልኮቶ፡ ለዘፈጠሮሙ፡ ወይሰግዱ፡ ለዕፅ፡ ወለዕብን፡ ለወርቅኒ፡ ወለብሩርኒ፡ ግብረ፡ እደ፡ ሰብእ።
30 ወይሠውዑ፡ ሎሙ፡ እስከ፡ የዓርግ፡ ጢሰ፡ መሥዋዕቶሙ፡ እስከ፡ ሰማይ፡ ከመ፡ በህይብ፡ ይቁም፡ ቅድመ፡ እግዚአብሔር፡ ወይሰክዮሙ፡ በእንተ፡ ኵሎ፡ ኃጢአቶሙ፡ ዘገብሩ፡ በአምልኮ፡ ጣዖቶሙ።
31 ወኢዓቀቡ፡ ትእዛዘ፡ እግዚአብሔር፡ ዘተምሕሩ፡ አላ፡ ተምህሩ፡ ሰጊዶ፡ ለጣዖት፡ ወኵሉ፡ ምግባራተ፡ ርሱሐተ፡ ዘኢኮነ፡ መፍትወ፡ ወተጠይሮ፡ በኮከብ፡ ወሰገለ፡ ወጣዖተ፡ ወፍትወተ፡ ወኵሎ፡ ዘኢይሠምር፡ እግዚአብሔር።
32 ዘንተኬ፡ ይገብሩ፡ በኃጢአ፡ ሠናይ፡ እስመ፡ ኢፈቀዱ፡ ወድሰ፡ እግዚአብሔር፡ ከመ፡ ያድኅኑ፡ ነፍሶሙ፡ እምዓመፃ፡ ወኃጢአት፡ በዘይትአኰቱ፡ ቅድመ፡ እግዚአብሔር፡ ወመላእክቲሁ።
33 ወአነ፡ ተቃውም፡ ነፍሶሙ፡ ዕራቃ፡ ወአመ፡ ይትነሥኡ፡ ኵሎሙ፡ ህቡረ፡ በውስተ፡ ሐመድ፡ ዘሰከቡ፡ ወተቀጥቀጡ፡ አዕፅምቲሆሙ፡ ወኃደረት፡ ነፍሶሙ፡ ውስተ፡ አብያተ፡ ዘብርሃን፡ ለኄራን።
34 ወለኃጥአንሰ፡ ውስተ፡ ጽልመት፡ ወአመተርኅዉ፡ አብያት፡ ይትነሥኡ፡ ሥጋት፡ ወይ፡ ገብዑ፡ ነፍሳት፡ ውስተ፡ ሥጋት፡ እምኀበ፡ ወፅዑ፡ ቀዲሙ።
35 ወይቀውም፡ ዕሩቀኒሆሙ፡ ቅድመ፡ እግዚአብሔር፡ በከመ፡ ተወልዱ፡ ወይትከሠት፡ ምግባራቲሆሙ፡ እምንዕሶሙ፡ ወእስከ፡ አሜሃ፡ አገብሩ።
36 ወይፀውሩ፡ ኃጣውኢሆሙ፡ ዲበ፡ መታክፍቲሆሙ፡ ወይትፈደዩ፡ በከመ፡ ምግባሮሙ፡ ዘገብሩ፡ እመሂ፡ ንዑሰ፡ ወእመሂ፡ ዓቢየ።
=== chapter 10 ===
[Chapter 10]
1 ስማዕ፡ ለእመ፡ ኢተአምን፡ ትንሣኤ፡ ሙታን፡ ሚመጠነ፡ ይትነሥኡ፡ ነፍሳተ፡ ዘእንበለ፡ ይትወለዱ፡ በክረምት፡ እስመ፡ መንፈሰ፡ እግዚአብሔር፡ የአርፍ፡ ላዕሌሆሙ፡ በከመ፡ ነፍሐ፡ ቀዲሙ።
2 ወይኤዝዞሙ፡ ቀዲሙ፡ በቃሉ፡ ከመ፡ ይሙቱ።
3 ወይትነሥኡ፡ በከመ፡ ፈቃደ፡ እንዘ፡ ይበሊ፡ ሥጋሆሙ፡ ወይትኄይስ፡ ዳግሙ።
4 ወካዕበ፡ ሶበ፡ ይወርድ፡ ዝናም፡ ወያረውያ፡ ለምድር፡ የሐይዉ፡ ወየሐውሩ፡ በከመ፡ ተሠርዑ፡ ቀዳሚ።
5 እስመ፡ ይቤ፡ ወኮኑ፡ ኵሉ፡ ዘነፍሰ፡ ሕይወት፡ ዘይትሐወስ፡ በዲበ፡ ምድር፡ ወኵሎ፡ ነፍሰ፡ ሕይወት፡ ዘይጐሥእ፡ ማይ፡ እስመ፡ መንፈሰ፡ እግዚአብሔር፡ ይጼልል፡ መልዕልተ፡ ማይ፡ ወበመንፈሱ፡ ወብካሉ፡ ይትወሀብ፡ ሎሙ፡ መንፈሰ፡ ሕይወት።
6 ርኢኪ፡ ኦዕውረ፡ ልብ፡ ዘትብል፡ ኢይትነሥኡ፡ ምውታን፡ እስመ፡ በመንፈሱ፡ ወበቃሉ፡ ይከውኑ፡ ዘእንበለ፡ እም፡ ወአብ፡ እመ፡ ብከ፡ አእምሮ፡ ወጥበብ፡ እፎ፡ ትብል፡ ኢይት፡ ነሥኡ፡ ምውታን፡ በቃለ፡ እግዚአብሔር፡ ፈጣሪሆሙ።
7 ወአንተሰ፡ ነስሕ፡ ወግባዕ፡ ውስተ፡ እመንተከ፡ እስመ፡ በቃለ፡ እግዚአብሔር፡ የሐይዉ፡ ምውታን፡ እለ፡ ኮኑ፡ ሐመደ፡ ወፀበለ፡ ውስተ፡ ምድር።
8 ወይትነሥኡ፡ በጠለ፡ ምሕረቱ፡ ዘእምኀበ፡ እግዚአብሔር፡ በከም፡ ነበበ፡ ቃሉ፡ ቀዳሚ፡ ወውእቱ፡ ቃል፡ የዓውድ፡ ኵሎ፡ ወያነሥኦሙ፡ ለምዉታን፡ በከመ፡ ፈቀደ።
9 አእምርኪ፡ ከመ፡ ትትነሣእ፡ ወትቀውም፡ ቅድሜሁ፡ ወኢይምሰልከ፡ በከመ፡ ሕሊናከ፡ ዘትተርፍ፡ ውስተ፡ መቃብር።
10 ወአኮ፡ ከማሁ፡ ትትነሣእ፡ ወትትፈደይ፡ መጠነ፡ ገበርከ፡ በዲበ፡ ምድር፡ እመኒ፡ ሠናየ፡ ወእ፡ መኒ፡ እኩየ፡ እስመ፡ ዕለተ፡ ፍዳ፡ ይእቲ።
11 አመ፡ ትንሣኤ፡ ትትፈደይ፡ ኵሎ፡ ዘገበርከ፡ ኃጣውአ፡ ወትሠልጥ፡ መጽሐፈ፡ ዕዳከ፡ ዘተጽሕፈ፡ እምንዕስከ፡ እስከ፡ አሜሃ፡ ወአልብክሙ፡ ምክንያተ፡ በከመ፡ ግብረ፡ ዝንቱ፡ ዓለም፡ ዘታመከኒ፡ በኃጢአትከ፡ ከመ፡ ትክሀድ፡ በኃጢአት።
12 ወታቀውም፡ ከመ፡ ጽድቅ፡ በቅድሜከ፡ ለሐሰት፡ ቃልከ፡ ወትረስዮ፡ ከመ፡ ጽድቅ፡ ለውእቱ፡ ሐሰት፡ ዘነበብከ።
13 ወአልቦ፡ አመክንዮ፡ በህየ፡ እስመ፡ መንፈሰ፡ እግዚአብሔር፡ ይትናበብ፡ በላዕሌከ፡ እስመ፡ ይእቲ፡ ተአምር፡ ኵሉ፡ ምግባረ፡ እከይከ፡ ዘገበርከ፡ ወትከሥት፡ ለከ፡ ኀበ፡ እግዚአብሔር፡ ፈጣሪሃ።
14 ወበህየ፡ ተኃፍር፡ በእንተ፡ ዘገበርከ፡ ኃጢአት፡ ወእምቅድመ፡ ትብጻሕየ፡ አስተፋጥን፡ ለገቢረ፡ ንስሐ፡ በዝየ፡ ከመ፡ ኢትትኃፈር፡ በቅድመ፡ መላእክት፡ ወሰብእ፡ አመ፡ ዕለተ፡ ኵነኔ፡ አላ፡ ከመ፡ ትትወደስ፡ ምስለ፡ እለ፡ ይትዌደስ፡ በስነ፡ ምግባሮሙ።
15 ወይነሥኡ፡ አሰቦሙ፡ በኀበ፡ ዘፈጠሮሙ፡ ዘእንበለ፡ ኃፍረት፡ ምስለ፡ መላእክት፡ እለ፡ ይሴብሕዎ፡ ለእግዚአብሔር፡ ወይትፌሥሑ፡ ወእመሰ፡ ኢገብርከ፡ ሠናየ፡ በሕይወትከ፡ እንዘ፡ ሀሎከ፡ በሥጋከ፡ አልብከ፡ መክፈልት፡ ምስለ፡ ጻድቃን።
16 ወይከውን፡ ለከ፡ ንስሐ፡ በኀበ፡ ኢይበቍዓከ፡ እስመ፡ ሊተ፡ ደለውከ፡ እንዘብከ፡ አእምሮ፡ ሤጥ፡ ወምሥያጥ፡ ወእንዘ፡ ብከ፡ ንዋይ፡ ኢያፍአምከ፡ ለርኁብ።
17 ወእንዘ፡ ብከ፡ ልብሰ፡ ኢያልበስከ፡ ለዕሩቅ፡ ወእንዘ፡ ብከ፡ ሥልጣን፡ ኢበላህኮ፡ ለግፉዕ።
18 ወእንዘ፡ ብከ፡ አእምሮ፡ ኢያለብውኮ፡ ለኃጥእ፡ ከመ፡ ይትመይጥ፡ ወይነስሕ፡ ወይሥረይ፡ ሎቱ፡ እግዚአብሔር፡ ኃጢአቶ፡ አንተ፡ በኢያእምሮ፡ አበሰ፡ ቀዲሙ፡ ወእንዘ፡ ብከ፡ ኃይል፡ ኢትጋደልከ፡ እምእለ፡ ይጸብዑከ፡ ከመ፡ ትክሃል፡ መዊዓ።
19 ወእንዘ፡ ብከ፡ ፅንዕ፡ ኢጾምከ፡ ወኢጸለይከ፡ ከመ፡ ታድክም፡ ኃይለ፡ ውርዝውትከ፡ ዘበሥጋ፡ ወከመ፡ ታግርር፡ ርእሰከ፡ ለጽድቅ፡ ወአኮ፡ ለአድልዎ፡ ሥጋ፡ ዘበዓለም።
20 ወአኮ፡ ለተድላ፡ ዘበዓለም፡ ለመባልዕት፡ ጥዑማት፡ ወበስቲ፡ ሠናያን፡ ወአኮ፡ በአልባሰ፡ ቀጠንት፡ ወበተሠርግዎ፡ ወርቅ፡ ወብሩር።
21 ወበአዕባነ፡ ሕንደኬ፡ ክቡራን፡ ወጳዝዮን፡ ወበመረግድ፡ ወአኮ፡ ዝንቱ፡ ዘይደሉ፡ ሠርጐ፡ ብእሲ።
22 አላ፡ ሠርጕሰ፡ ለብእሲ፡ ንጽሕና፡ ወጥበብ፡ ወአእምሮ፡ ወተፋቅሮ፡ በንጽሕ፡ ዘእንበለ፡ ተቃንዖ፡ ወሕመሚ፡ ዘእንበለ፡ ኑፋቄ፡ ወጽልዕ፡ ወእንዘ፡ ታፈቅር፡ ቢጽከ፡ ከመ፡ ነፍስከ።
23 ወእንዘ፡ ኢትፈዲ፡ እኩየ፡ ለዘገብረ፡ ለከ፡ እኩየ፡ ከመ፡ ትባእ፡ ውስተ፡ ማኅደር፡ ዘተውህበ፡ ለዕጉሣን፡ ወከመ፡ ይዕሢከ፡ ምስሌሆሙ፡ ለእለ፡ ወረስዋ፡ ለምድር፡ ቅድስት፡ በትዕ፡ ግሥት፡ ወበአእምሮ፡ ወልቡና፡ ወበተሰፍዎ፡ መንግሥተ፡ ሰማያት፡ ለአመ፡ ትንሣኤ።
24 ወኢትበሉ፡ ኢንትነሣእእሙታን፡ እስመ፡ ዘንተ፡ እለ፡ ይብሉ፡ ወይሔልዩ፡ ያቀብዖሙ፡ ተስፋ፡ ዲያብሎስ፡ ከመ፡ ኢይድኃኑ፡ አመ፡ ትንሣኤ፡ ወየአምሩ፡ አመ፡ ትበጽሖሙ፡ ወየኀዝኑ፡ ወይትክዙ፡ በእያእምሮ፡ ዘገብሩ፡ ከመ፡ ይትሐሰቦሙ፡ ለእከይ፡ አመ፡ ትንሣኤ፡ እስመ፡ ኢአምንዎ፡ ከመ፡ ይትነሥኡ፡ በይእቲ፡ ዕለት።
25 ወበእንተዝ፡ ይትወቀሱ፡ በከም፡ እከየ፡ ምግባሮሙ፡ ዘገብሩ፡ በዲበ፡ ምድር፡ ወይሬዕይዎ፡ ለእንተ፡ ክህዱ፡ ትንሣኤ፡ ዘበሥጋ፡ ኅቡረ።
26 ወይእተ፡ አሚረ፡ ይበክዩ፡ በእንተ፡ ዘኢያሠነዩ፡ ፍኖቶሙ፡ ወሶበ፡ ይበክዩ፡ በዲበ፡ ምድር፡ እምኀየሶሙ፡ ሶበ፡ ተክህሎሙ፡ ከመ፡ ኢይኩኑ፡ በካይያነ፡ በህየ።
27 ወለ፡ እመ፡ ኢበከይነ፡ በፈቃድነ፡ ዝየ፡ ይበክዩነ፡ በህየ፡ ዘእንበለ፡ ፈቃድነ፡ ወሶበ፡ ኢያስ፡ ተዳሎነ፡ ንስሐ፡ በዝየ፡ ናስተዳሉ፡ ብካየ፡ ወገዐረ፡ በህየ፡ በኀበ፡ ኢይበቍዓነ።
28 ወአስተዳለዉ፡ ገቢረ፡ ሠናይ፡ ከመ፡ ትዕድዉ፡ እሞት፡ ውስተ፡ ሕይወት፡ ወእምዛቲ፡ ምድር፡ ኃላፊት፡ እንተ፡ በላዕሉ፡ ሰማያዊ፡ ወእምዛቲ፡ እንተ፡ በምድር፡ እንተ፡ በሰማያት፡ ብርሃን።
29 ወዕበያ፡ ለፍግዓ፡ ዘበምድር፡ ዘእንበለ፡ ዓቅም፡ ከመ፡ በህየ፡ ትትፌጻሕ፡ ፍሥሐ፡ ዘኢየ፡ ኃልቅ፡ በመንግሥተ፡ ሰማያት፡ ምስለ፡ እለ፡ የአምኑ፡ ትንሣኤ፡ ሙታን፡ እምይእዜ፡ ወእስከ፡ ለዓለመ፡ ዓለም፡ ወአሜን።