##### edition  (gez) — the printed EOTC Bible version
=== chapter 1 ===
[Chapter 1]
1 ወኮነ፡ አመ፡ ሠላሳ፡ ክረምት፡ በራብዕ፡ ወርኅ፡ በኃሙስ፡ ሠርቅ፡ ወሀሎኩ፡ ማእከለ፡ ፄዋ፡ በፈለገ፡ ኮቦር፡ ተርኅዉ፡ ሰማያት፡ ወርኢኩ፡ ራእየ፡ እግዚአብሔር።
2 በኃሙስ፡ ሠርቅ፡ ዘውእቱ፡ ኃምሲተ፡ ዓመት፡ እምአመ፡ ተፄወወ፡ ኢኮንያን፡ ንጉሥ።
3 ወኮነ፡ ቃለ፡ እግዚአብሔር፡ ኀበ፡ ሕዝቅኤል፡ ወልደ፡ ቡዝ፡ ካህን፡ በብሔረ፡ ፋርስ፡ በፈለገ፡ ኮቦር። ወመጽአ፡ እደ፡ እግዚአብሔር፡ ላዕሌየ።
4 ወርኢኩ፡ መንፈስ፡ መጽአ፡ እምሰሜን፡ ወደመና፡ ዓቢይ፡ ወፀዳል፡ ቦቱ፡ ዐውዶ፡ ወእሳት፡ ይበርቅ፡ እምኔሁ፡ ወእማእከሉ፡ ከመ፡ ርእየተ፡ እለ፡ ቄጥሩ፡ እማእከለ፡ እሳት።
5 ወእማእከሉ፡ ከመ፡ አምሳለ፡ ፬፡ እንስሳ፡ ወከመዝ፡ ራእዮሙ። ቦሙ፡ ገጸ፡ ሰብእኒ፡ ውስቴቶሙ።
6 ወለለ፩፡ ፬፡ ገጹ፡ ወ፬፡ ክነፊሁ።
7 ወርቱዕ፡ እገሪሆሙ፡ ወቦሙ፡ ካፍ፡ ከመ፡ ካፈ፡ ላህም፡ ወይበርቅ፡ እምኔሁ፡ ወይሰርር፡ ከመ፡ አፍሐመ፡ ብርት፡ ርሱን።
8 ወእደ፡ ሰብእ፡ ታሕተ፡ ክነፊሆሙ፡ ውስተ፡ ፬፡ ገበዋቲሆሙ፡ ወገጾሙ፡ ወክነፊሆሙ፡ ለአርባዕቲሆሙ፡ ኅቡር።
9 ወእኅዝ፡ ክነፊሆሙ፡ ለኵሎሙ፡ ለለ፩፩፡ ወሶበ፡ የሐውሩ፡ ርቱዓ፡ የሐውሩ፡ ወኢይትመየጡ፡ ወለለ፩፩፡ ቅድመ፡ ገጹ፡ የሐውር።
10 ወከመዝ፡ ራእዮሙ፡ ገጸ፡ ሰብእ፡ ወገጸ፡ አንበሳ፡ በየማኖሙ፡ ለአርባዕቲሆሙ፡ ወገጸ፡ ላህም፡ ወገጸ፡ ንስር፡ በፀጋሞሙ፡ ለአርባዕቲሆሙ።
11 ወስፉሕ፡ ክነፊሆሙ፡ እመልዕልት፡ ወይዴረጉ፪፡ ወበ፪፡ ይከድኑ፡ ነፍስቶሙ
12 ወ፩፩፡ ቅድመ፡ ገጹ፡ የሐውሩ፡ ኀበ፡ ሀሎ፡ መንፈስ፡ ይተልዉ፡ ወኢይትመየጡ።
13 ወአርአያ፡ እንስሳ፡ ከመ፡ ርእየተ፡ አፍሐመ፡ እሳት፡ ዘይነድድ፡ ወከመ፡ መኃትው፡ ዘየኀቱ፡ ማእከለ፡ ውእቱ፡ እንስሳ፡ ወብርሃነ፡ እሳት፡ ወእምውእቱ፡ እሳት፡ ይወፅእ፡ መብረቅ።
14 ወይረውጹ፡ እሙንቱ፡ እንስሳ፡ ወይሰወጡ፡ ከመ፡ ርእየተ፡ ባዜቃ።
15 ወነጸርኩ፡ ወርኢኩ፡ አሐደ፡ ሠረገላ፡ ዲበ፡ ምድር፡ ታሕቴሆሙ፡ ለ፬፡ እንስሳ
16 ወራእዮሙ፡ ለሠረገላት፡ ከመ፡ ርእየተ፡ ተርሴስ፡ ወአምሳል፩፡ ለአርባዕቲሆሙ፡ ወግብሮሙ፡ ከመ፡ መንኰራኵር፡ በውስተ፡ መንኰራኵር።
17 በውስተ፡ ፬፡ ገባዋቲሆሙ፡ የሐውሩ፡ ወኢይመይጡ፡ ዘባኖሙ፡ ሶበ፡ የሐውሩ፡ ወልዑላን፡ እሙንቱ።
18 ወርኢኩ፡ ዘባኖሙ፡ ምሉእ፡ አዕይንተ፡ ዐውዶሙ፡ ለአርባዕቲሆሙ፡ ወሶበ፡ የሐውሩ፡ የሐውሩ፡ ሠረገላት፡ ምስሌሆሙ።
19 ወሶበ፡ ይትነሥኡ፡ እንስሳ፡ እምድር፡ ይትነሥኡ፡ ሠረገላትኒ፡ ምስሌሆሙ።
20 ወኀበ፡ ሀሎ፡ ደመና፣፡ ህየ፡ ሀሎ፡ መንፈስ፡ ወየሐውሩ፡ እንስሳኒ፡ ወሠረገላትኒ፡ ይትነሥኡ፡ ምስሌሆሙ፡ እስመ፡ መንፈሰ፡ ሕይወት፡ ቦሙ፡ ውስተ፡ ውእቶሙ፡ ሠረገላት።
21 ወሶበ፡ የሐውሩ፡ የሐውሩ፡ ወእመ፡ ቆሙ፡ ይቀውሙ፡ ወሶበ፡ ይትነሥኡ፡ እምድር፡ ይትነሥኡ፡ ሠረገላት፡ ምስሌሆሙ፡ እስመ፡ መንፈሰ፡ ሕይወት፡ ቦሙ፡ ውስተ፡ እሙንቱ፡ ሠረገላት።
22 ወአርአያ፡ ዘመልዕልተ፡ ርእሶሙ፡ ለእሙንቱ፡ እንስሳ፡ ከመ፡ ሰማይ፡ ዘኅብረ፡ በረድ፡ ስፉሕ፡ ዲበ፡ ክነፊሆሙ፡ እምላዕሉ።
23 ወመትሕተ፡ ውእቱ፡ ሰማይ፡ ስፉሕ፡ ክነፊሆሙ፡ ወእኁዝ፡ ፩በ፩፡ ወበ፪፪፡ ይከድኑ፡ ነፍስቶሙ።
24 ወሰማዕኩ፡ ድምፀ፡ ክነፊሆሙ፡ ሶበ፡ የሐውሩ፡ ከመ፡ ድምፀ፡ ማይ፡ ብዙኅ፡ ወከመ፡ ድምፀ፡ ሠራዊት፡ ወከመ፡ ቃለ፡ ትዕይንት፡ ሶበ፡ የሐውሩ፡ ወሶበ፡ ይቀውሙ፡ ያስተጋብኡ፡ ክነፊሆሙ።
25 ወኮነ፡ ቃል፡ እመልዕልተ፡ ውእቱ፡ ሰማይ፡ ዘዲበ፡ ርእሶሙ፡ ሶበ፡ ይቀውሙ፡ ያስተጋብኡ፡ ክነፊሆሙ።
26 ወእመልዕልተ፡ ሰማይ፡ ዘዲበ፡ ርእሶሙ፡ ከመ፡ ርእየተ፡ እብነ፡ ሰንፔር፡ አምሳለ፡ መንበር፡ ወዲበ፡ አርአያ፡ መንበር፡ ከመ፡ ርእየተ፡ ብእሲ፡ መልዕልቶ።
27 ወርኢኩ፡ ከመ፡ ርእየተ፡ እለ፡ ቄጥሩ፡ ወከመ፡ ርእየተ፡ እሳት፡ እንተ፡ ውሥጡ፡ ወዐውዱ፡ አርአያ፡ ሐቌሁ፡ ወላዕሉ፡ ወአርአያ፡ ሐቌሁ፡ ወታሕቱ፡ ከመ፡ ርእየተ፡ እሳት፡ ወብርሃን፡ ቦቱ፡ በዐውዱ።
28 ከመ፡ ርእየተ፡ ቀስተ፡ ደመና፡ ዘአመ፡ ክረምት፡ ወከመ፡ ርእተ፡ መብረቅ፡ ዐውዱ።
=== chapter 2 ===
[Chapter 2]
1 ወከመዝ፡ አርአያ፡ አምሳለ፡ ስብሐቲሁ፡ ለእግዚአብሔር። ወርእይየ፡ ወደቁ፡ በገጽየ፡ ወሰማዕኩ፡ ቃለ፡ ዘይብለኒ፡ አንተ፡ ወልደ፡ እጓለ፡ እመሕያው፡ ቁም፡ በእገሪከ፡ ወእነግረከ።
2 ወመጽአ፡ መንፈስ፡ ላዕሌየ፡ ሶበ፡ ይትናገረኒ፡ ወአንሥአኒ፡ ወአቀመኒ፡ በእገርየ፡ ወሰማዕክዎ፡ ይብለኒ።
3 አንተ፡ ወልደ፡ እጓለ፡ እመሕያው፡ ናሁ፡ እፌንወከ፡ ኀበ፡ ቤተ፡ እስራኤል፡ እለ፡ አምረሩኒ፡ እሙንቱ፡ ወአበዊሆሙኒ፡ ወዐለዉኒ፡ እስከ፡ ዮም።
4 ደቂቆሙ፡ ለጽኑዓነ፡ ገጽ፡ ወእኩያነ፡ ልብ፡ ወእፌንወከ፡ ኀቤሆሙ። ወበሎሙ፡ ከመዝ፡ ይቤ፡ እግዚአብሔር፡ እግዚእ።
5 እመ፡ ይሰምዑ፡ ወይፈርሁ፡ እስመ፡ ቤተ፡ መሪራን፡ እሙንቱ፡ ወየአምሩ፡ ከመ፡ ነቢይ፡ አንተ፡ በማእከሎሙ።
6 ወአንተ፡ ወልደ፡ እጓለ፡ እመሕያው፡ ኢትፍራህ፡ እምኔሆሙ፡ ወኢትደንግፅ፡ እምቃሎሙ፡ እስመ፡ ይረውዱከ፡ ወይቀውሙ፡ በላዕሌከ፡ ወየዐግቱከ፡ ወትነብር፡ ማእከለ፡ አቃርብት። ወኢትፍራህ፡ እምቃሎሙ፡ ወኢትደንግፅ፡ እምገጾሙ፡ እስመ፡ ቤተ፡ መሪራን፡ እሙንቱ።
7 ወትነግሮሙ፡ ቃልየ፡ እመ፡ ይሰምዑ፡ ወይደነግፁ፡ እስመ፡ ቤተ፡ መሪራን፡ እሙንቱ።
8 ወአንተ፡ ወልደ፡ እጓለ፡ እመሕያው፡ ስማዕ፡ ዘእነግረከ፡ ወኢትኩን፡ መሪረ፡ ከመ፡ ቤተ፡ መሪራን። ወአብቁ፡ አፉከ፡ ወብላዕ፡ ዘአነ፡ እሁበከ።
9 ወርኢኩ፡ እድ፡ መጽአ፡ ኀቤየ፡ ወውስቴቱ፡ መጽሐፍ፡ ወከሠታ፡ በቅድሜየ፡ ወጽሕፍት፡ ይእቲ፡ ውሥጣኒ፡ ወአፍአሃኒ፡ ወይብል፡ መጽሐፉ፡ ላሕ፡ ወብካይ፡ ወወይሌ።
=== chapter 3 ===
[Chapter 3]
1 ወይቤለኒ፡ ወልደ፡ እጓለ፡ እመሕያው፡ ብላዕ፡ ዛተ፡ መጽሐፈ፡ ወሑር፡ በሎሙ፡ ለደቂቀ፡ እስራኤል።
2 ወከሠተ፡ አፉየ፡ ወአብልዐንያ፡ ለይእቲ፡ መጽሐፍ።
3 ወይቤለኒ፡ ወልደ፡ እጓለ፡ እመሕያው፡ አፉከ፡ ይብላዕ፡ ወከርሥከ፡ ይጽገብ፡ እምዛቲ፡ መጽሐፍ፡ እንተ፡ ወሀብኩከ። ወበላዕክዋ፡ ወኮነተኒ፡ ከመ፡ መዐር፡ ጥዑም፡ ውስተ፡ አፉየ።
4 ወይቤለኒ፡ ወልደ፡ እጓለ፡ እመሕያው፡ ሑር፡ ባእ፡ ቤተ፡ እስራኤል፡ ወንግሮሙ፡ ቃልየ።
5 እስመ፡ አኮ፡ ኀበ፡ ሕዝብ፡ ዘዕሙቅ፡ ከናፍሪሁ፡ ወክቡድ፡ ልሳኑ፡ ዘእፌንወከ፡ ዘእንበለ፡ ኀበ፡ ቤተ፡ እስራኤል።
6 ወአኮ፡ ኀበ፡ ብዙኃን፡ አሕዛብ፡ እለ፡ ካልእ፡ ነገሮሙ፡ ወካልእ፡ ልሳኖሙ፡ ወአኮ፡ ዘዕፁብ፡ ልሳኑ፡ ወዘኢተአምር፡ ነገሮ፡ ሶበሰ፡ ኀቤሆሙ፡ ፈነውኩከ፡ እምሰምዑከ።
7 ወቤተ፡ እስራኤልሰ፡ ኢሰምዑከ፡ እስመ፡ ኪያየ፡ ኢሰምዑ፡ እስመ፡ ኵሉ፡ ቤተ፡ እስራኤል፡ እኩያን፡ ወጽኑዓነ፡ ልብ።
8 ወናሁ፡ አጽናዕክዎ፡ ለገጽከ፡ በቅድመ፡ ገጾሙ፡ ወአጸንዕ፡ ኃይለከ፡ እምኃይሎሙ።
9 ወትጸንዕ፡ ወትረ፡ እምኰኵሕ። ወኢትፍርሆሙ፡ ወኢትደንግፅ፡ እምገጾሙ፡ እስመ፡ ቤተ፡ መሪራን፡ እሙንቱ።
10 ወይቤለኒ፡ ወልደ፡ እጓለ፡ እመሕያው፡ ኵሎ፡ ነገረ፡ ዘነገርኩከ፡ ዕቀቦ፡ በልብከ፡ ወስምዖ፡ በእዝንከ።
11 ወሑር፡ ወባእ፡ ኀበ፡ ፄዋ፡ ሕዝብከ፡ ወበሎሙ፡ ከመዝ፡ ይቤ፡ እግዚአብሔር፡ እግዚእ፡ እመ፡ ይሰምዑ፡ ወእመ፡ ይፈርሁ።
12 ወነሥአኒ፡ መንፈስ፡ ወሰማዕኩ፡ በድኅሬየ፡ ድምፀ፡ ድልቅልቅ፡ ዓቢይ፡ ብሩክ፡ ስብሐተ፡ እግዚአብሔር፡ እምኀበ፡ ሀሎ።
13 ወሰማዕኩ፡ ድምፀ፡ ክነፊሆሙ፡ ለእልክቱ፡ እንስሳ፡ እንዘ፡ ይሰርሩ፡ ወይትጓድኡ፡ ፩፡ በካልኡ፡ ወድምፀ፡ ሠረገላ፡ ምስሌሆሙ፡ ወድምፀ፡ ድልቅልቅ፡ ዓቢይ።
14 ወነሥአኒ፡ መንፈስ፡ ወሰረረ፡ ብየ፡ ወሖርኩ፡ በኃይለ፡ መንፈስየ፡ ወመጽአ፡ እደ፡ እግዚአብሔር፡ ጽኑዕ፡ ዲቤየ።
15 ወአብአኒ፡ ኀበ፡ ፄዋ፡ ወበጻሕኩ፡ ኀበ፡ ኵሎሙ፡ እለ፡ ይነብሩ፡ ፈለገ፡ ኮቦር። ወነበርኩ፡ ህየ፡ ሰቡዓ፡ መዋዕለ፡ እንዘ፡ አንሶሱ፡ ማእከሎሙ።
16 ወእምድኅረ፡ ሰቡዕ፡ መዋዕል፡ ነበበኒ፡ እግዚአብሔር፡ ወይቤለኒ።
17 ወልደ፡ እጓለ፡ እመሕያው፡ ሰብአ፡ ዐይን፡ ረሰይኩከ፡ ለቤተ፡ እስራኤል፡ ትስማዕ፡ ቃለ፡ እምአፉየ፡ ወትገሥጾሙ፡ በቃልየ።
18 እምከመ፡ እቤሎ፡ ለኃጥእ፡ ሞተ፡ ትመውት፡ ወኢነገርኮ፡ ከመ፡ ይትመየጥ፡ እምፍኖቱ፡ እኩይ፡ ወይሕየው፡ ወውእቱ፡ ኃጥእ፡ ይመውት፡ በኃጢአቱ፡ ወደሞ፡ እትኀሠሥ፡ እምእዴከ።
19 ወእመሰ፡ ገሠጽኮ፡ ለኃጥእ፡ ወኢተመይጠ፡ እምኃጢአቱ፡ ወእምፍኖቱ፡ እኩይ፡ ይመውት፡ በጌጋዩ፡ ወአንተሰ፡ አድኀንከ፡ ነፍሰከ።
20 ወእመ፡ ተመይጠ፡ ጻድቅ፡ እምጽድቁ፡ ወገብረ፡ ኃጢአተ፡ እንዘ፡ አርእዮ፡ መቅሠፍትየ፡ ቅድመ፡ ገጹ፡ ሞተ፡ ይመውት፡ በጌጋዩ፡ እስመ፡ ኢነገርኮ፡ ወኢይዜከር፡ ጽድቆ፡ ዘገብረ፡ ወእትኀሠሥ፡ ደሞ፡ እምእዴከ።
21 ወእመሰ፡ ገሠጽኮ፡ ለጻድቅ፡ ከመ፡ ኢየአብስ፡ ወኢአበሰ፡ ውእቱኒ፡ ጻድቅ፡ ሕይወተ፡ የሐዩ፡ ወአንተኒ፡ አድኀንከ፡ ነፍሰከ።
22 ወመጽአ፡ እደ፡ እግዚአብሔር፡ ላዕሌየ፡ ወይቤለኒ፡ ተንሥእ፡ ወሑር፡ ገዳመ፡ ወበህየ፡ እነግረከ።
23 ወተንሣእኩ፡ ወሖርኩ፡ ገዳመ፡ ወረከብኩ፡ በህየ፡ ስብሐተ፡ እግዚአብሔር፡ ይቀውም፡ ከመ፡ ርእየተ፡ ስብሐት፡ ዘርኢኩ፡ በፈለገ፡ ኮቦር። ወወደቁ፡ በገጽየ።
24 ወመጽአ፡ መንፈስ፡ ኀቤየ፡ ወአቀመኒ፡ በእገርየ፡ ወይቤለኒ፡ ባእ፣፡ ተዐጸው፡ ማእከለ፡ ቤትከ።
25 ወአንተ፡ ወልደ፡ እጓለ፡ እመሕያው፡ ናሁ፡ ሞቃሕኩከ፡ ወአሰርኩከ፡ ወኢትወፅእ፡ እማእከሎሙ።
26 ወአአስር፡ ልሳነከ፡ ወትከውን፡ በሀመ፡ ወኢትክል፡ ተናገሮ፡ እስመ፡ ቤተ፡ መሪራን፡ እሙንቱ።
27 ወሶበ፡ ነበብኩከ፡ እከሥት፡ አፉከ፡ ወትብሎሙ፡ ከመዝ፡ ይቤ፡ እግዚአብሔር፡ እግዚእ፡ ዘይሰምዕ፡ ይስማዕ፡ ወዘየአቢ፡ ይእበይ፡ እስመ፡ ቤተ፡ መሪራን፡ እሙንቱ።
=== chapter 4 ===
[Chapter 4]
1 ወአንተኒ፡ ወልደ፡ እጓለ፡ እመሕያው፡ ንሣእ፡ ለከ፡ ግንፋለ፡ ወአንበሮ፡ ቅድመ፡ ገጽከ፡ ወሠዐል፡ ውስቴቱ፡ ሀገረ፡ ኢየሩሳሌም።
2 ምስለ፡ ጥቅማ፡ ወተሐንጽ፡ ውስቴታ፡ ኀበ፡ ይትቃተሉ፡ ወተሐፅራ፡ በተዓይን፡ ወትፌኑ፡ አሕፃ፡ ዘይትቃተል፡ ዐውዳ።
3 ወንሣእ፡ ለከ፡ ጤገነ፡ ኃፂን፡ ወትሬስዮ፡ አረፍተ፡ ኃፂን፡ ማእከሌከ፡ ወማእከለ፡ ሀገር፡ ወይመይጥ፡ ገጸከ፡ ኀቤሃ፡ ወትትዐገት፡ ወተዐግታ፡ ወዝንቱ፡ ትእምርት፡ ለደቂቀ፡ እስራኤል።
4 ወትሰክብ፡ በገቦከ፡ ዘፀጋም፡ ወታነብር፡ ኃጢአቶሙ፡ ለደቂቀ፡ እስራኤል፡ ውስቴቱ፡ በኍልቈ፡ መዋዕል፡ ዘሰከብከ፡ ወትነሥእ፡ ኃጢአቶሙ።
5 ወአነ፡ ወሀብኩከ፡ ክልኤሆን፡ ጌጋዮሙ፡ በኍልቈ፡ ውእቱ፡ መዋዕል፡ ፫፻ወ፺፡ ዕለተ፡ ወትንሥእ፡ ኃጢአተ፡ ቤተ፡ እስራኤል።
6 ወፈጺመከ፡ ዘንተ፡ ትሰክብ፡ በገቦከ፡ ዘየማን፡ ወትንሥእ፡ ኃጢአተ፡ ቤተ፡ ይሁዳ፡ ፵ዕለተ፡ ወረሰይኩ፡ ለከ፡ ዕለተ፡ ከመ፡ ዓመት።
7 ወታስተዴሉ፡ ገጸከ፡ ለአመ፡ የዐግትዋ፡ ለኢየሩሳሌም፡ ወታጸንዕ፡ መዝራዕተከ፡ ወትትኔበይ፡ ላዕሌሃ።
8 ወናሁ፡ አአስረከ፡ ከመ፡ ኢትትመየጥ፡ በገቦከ፡ እምገቦከ፡ እስከ፡ የኀልቅ፡ መዋዕለ፡ ዕጽወትከ።
9 ወትነሥእ፡ ለከ፡ ስርናየ፡ ወብርስነ፡ ወሰገመ፡ ወዓተረ፡ ወትወድዮ፡ ዲበ፡ ፩ጻሕበ፡ ልሕኵት፡ ወትገብሮሙ፡ ለከ፡ ኅብስተ፡ በኍልቈ፡ ውእቱ፡ መዋዕል፡ ዘትሰክብ፡ በገቦከ፡ ፫፻ወ፺፡ ዕለተ፡ ወትሴሰዮ።
10 ወዘበላዕከ፡ እክል፡ በመዳልው፡ ፳፡ ሰቅል፡ ለለዕለትከ፡ ሰርከ፡ ሰርከ፡ ትሴሰዮ።
11 ወማየ፡ ትሰቲ፡ ፮፡ እዴሃ፡ ለኢን፡ ሰርከ፡ ሰርከ፡ ትሰቲ።
12 ወዳፍንተ፡ ሰገም፡ ትሴሰይ፡ ወታበስሎ፡ ውስተ፡ ኵስሐ፡ ሰብእ፡ ወትደፍኖ፡ በቅድሜሆሙ።
13 ወትብሎሙ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ ከመዝ፡ ይበልዑ፡ ኵስሖሙ፡ ደቂቀ፡ እስራኤል፡ በውስተ፡ አሕዛብ፡ ዘእዘርዎሙ፡ ህየ።
14 ወእቤ፡ ሐሰ፡ ለከ፡ እግዚኦ፡ አምላከ፡ እስራኤል፡ ኢተገመነት፡ ነፍስየ፡ በርኵስ፡ ወበማውታ፡ ወብላዓ፡ አርዌ፡ ኢበላዕኩ፡ እምአመ፡ ተወለድኩ፡ እስከ፡ ይእዜ፡ ወኢቦአ፡ ኵሉ፡ ሥጋ፡ ርኩስ፡ ውስተ፡ አፉየ።
15 ወይቤለኒ፡ ናሁ፡ ወሀብኩከ፡ ጽፍዓ፡ ላህም፡ ህየንተ፡ ጽፍዓ፡ ሰብእ፡ ወግበር፡ ቦቱ፡ ኅብስተከ።
16 ወይቤለኒ፡ ወልደ፡ እጓለ፡ እመሕያው፡ ናሁ፡ አጠፍእ፡ እክለ፡ እምኢየሩሳሌም፡ ወይበልዑ፡ ኅብስተ፡ በመዳልው፡ ወይሰትዩ፡ ማዮሙ፡ በመስፈርት፡ ወይሰትዩ፡ ሙሱነ።
17 ወይፄነሱ፡ እክለ፡ ወማየ፡ ወይትቃተሉ፡ ቢጽ፡ ምስለ፡ እኁሁ፡ ወይትመሰዉ፡ በኃጢአቶሙ።
=== chapter 5 ===
[Chapter 5]
1 ወአንተ፡ ወልደ፡ እጓለ፡ እመሕያው፡ ንሣእ፡ ለከ፡ ኲናተ፡ በሊኀ፡ ዘይበልኅ፡ እመላጼ፡ ቀራጺ፣፡ ተሣየጥ፡ ለከ፡ ወተላጸይ፡ ባቲ፡ ርእሰከ፡ ወጽሕመከ። ወትነሥእ፡ ለከ፡ እብነ፡ መዳልው፡ ወትደልዎ።
2 ሣልስተ፡ እዴሁ፡ ታውዒ፡ በማእከለ፡ ሀገር፡ በእሳት፡ ሶበ፡ ፈጸምከ፡ መዋዕለ፡ ዕጽወትከ፡ ወሣልስተ፡ ትጌምድ፡ በኲናት፡ በዐውዳ፡ ወሣልስተ፡ ትዘሩ፡ በነፋስ። ወአተሉ፡ መጥባሕትየ፡ ድኅሬሆሙ።
3 ወትነሥእ፡ እምህየ፡ ኅዳጣነ፡ በኍልቍ፡ ወትከድኖሙ፡ ክዳነከ።
4 ወዓዲ፡ ትነሥእ፡ እምውስቴቶሙ፡ ወትዌርዎሙ፡ ማእከለ፡ እሳት፡ ወታውዕዮሙ፡ በእሳት። ወይወፅእ፡ እሳት፡ እምኔሃ። ወትብሎሙ፡ ለኵሉ፡ ቤተ፡ እስራኤል።
5 ከመዝ፡ ይቤ፡ እግዚአብሔር፡ አዶናይ፡ በማእከለ፡ አሕዛብ፡ አንበርክዋ፡ ለኢየሩሳሌም፡ ወለአድያሚሃ።
6 እስመ፡ አምረረት፡ ሕግየ፡ ለሕዝብ፡ ኃጥኣን፡ ወሥርዓትየ፡ ለበሐውርት፡ ዘዐውዳ፡ እስመ፡ ኀደጉ፡ ሕግየ፡ ወኢገብሩ፡ በሥርዓትየ።
7 ከመዝ፡ ይቤ፡ እግዚአብሔር፡ እስመ፡ ምክንያት፡ ኮንክሙ፡ ለአሕዛብ፡ እለ፡ ዐውድክሙ፡ ወኢገበርክሙ፡ በሕግየ፡ ወኢሖርክሙ፡ በሥርዓትየ፡ ወኢገበርክሙ፡ በሕገ፡ አሕዛብ፡ እለ፡ ዐውድክሙ።
8 ከመዝ፡ ይቤ፡ እግዚአብሔር፡ አዶናይ፡ ናሁ፡ አነ፡ እኴንነኪ፡ በማእከሌኪ፡ በቅድመ፡ አሕዛብ።
9 ወእገብር፡ ላዕሌኪ፡ ዘኢገበርኩ፡ ወኢይገብር፡ ዘከማሁ፡ በከመ፡ ኵሉ፡ ርኵስኪ።
10 በእንተ፡ ዝንቱ፡ አበው፡ ይበውዑ፡ ውሉዶሙ፡ በማእከሌኪ፡ ወውሉድ፡ ይበልዑ፡ አበዊሆሙ። ወእትቤቀለኪ፡ ወእዘርዎሙ፡ ውስተ፡ ኵሉ፡ ነፋሳት፡ ለእለ፡ ተርፉ፡ ውስቴትኪ።
11 በእንተ፡ ዝንቱ፡ ሕያው፡ አነ፡ ይቤ፡ እግዚአብሔር፡ አዶናይ፡ ሶበ፡ አኮ፡ መቅደስየ፡ ዘአርኰስኪ፡ በኵሉ፡ ኃሣርኪ፡ ወበኵሉ፡ ርኵስኪ፡ ከማሁ፡ አነኒ፡ እገድፈኪ፡ ወዐይንየሂ፡ ኢይምሕከኪ፡ ወአነሂ፡ ኢይሠሀለኪ።
12 ሣልስትኪ፡ በብድብድ፡ የኀልቁ፡ ወበረኃብ፡ ይመውቱ፡ በማእከሌኪ፡ ወለሣልስትኪ፡ እዘርዎሙ፡ ውስተ፡ ኵሉ፡ ነፋሳት፡ ወሣልስትኪ፡ ይወድቁ፡ በኵናት፡ በዐውድኪ፡ ወእተልዎሙ፡ በመጥባሕት፡ በድኅሬሆሙ።
13 ወእሤልጥ፡ መዐትየ፡ ወመቅሠፍትየ፡ ላዕሌሆሙ፡ ወተአምሪ፡ ከመ፡ አነ፡ እግዚአብሔር፡ ዘነበብኩ፡ በቅንአትየ፡ ሶበ፡ ሠለጥኩ፡ መዐትየ፡ በላዕሌሆሙ።
14 ወአጠፍአኪ፡ ምስለ፡ አዋልድኪ፡ በዐውድኪ፡ በቅድመ፡ ኵሉ፡ ኃላፊት።
15 ወትትመነደቢ፡ ወትደነግፂ፡ በኀበ፡ አሕዛብ፡ እለ፡ ዐውድኪ፣፡ ሶበ፡ ተበቀልኩኪ፡ በመዐትየ፡ ወበመቅሠፍትየ።
16 አነ፡ እግዚአብሔር፡ ዘነበኩ፡ ከመ፡ እፌኑ፡ አሕፃየ፡ ዘረኃብ፡ ላዕሌሆሙ፣፡ ወእፌንዎሙ፡ ያኅልቁክሙ፡ በረኃብ፡ ወአጠፍእ፡ እክለኪ።
17 ወእፌኑ፡ ረኃበ፡ ላዕሌኪ፡ ወአርዌ፡ እኩየ፡ ወእቀሥፈኪ፣፡ ወይመጽእ፡ ላዕሌኪ፡ ብድብድ፡ ወኲናት፣፡ ወደመ፡ አመጽእ፡ ላዕሌኪ፡ ወየዐግቱኪ። አነ፡ እግዚአብሔር፡ ዘነበብኩ።
=== chapter 6 ===
[Chapter 6]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ አጽንዕ፡ ገጸከ፡ ላዕለ፡ አድባረ፡ እስራኤል፡ ወተነበይ፡ ሎሙ።
3 ወበሎሙ፡ ለአድባረ፡ እስራኤል፡ ስምዑ፡ ቃለ፡ እግዚአብሔር፡ ከመዝ፡ ይቤ፡ አዶናይ፡ እግዚአብሔር፡ ለአድባር፡ ወለአውግር፣፡ ለከሪር፡ ወለቈላት፡ ናሁ፡ አነ፡ አመጽእ፡ ላዕሌክሙ፡ ኲናተ፡ ወእሤርዎሙ፡ ለዓበይትክሙ።
4 ወይትቀጠቀጥ፡ ምሥዋዓቲክሙ፡ ወምሕራማቲክሙ፣፡ ወእነፅኆሙ፡ ለአብድንቲክሙ፡ በቅድመ፡ ጣዖትክሙ።
5 ወይወድቅ፡ አብድንቲሆሙ፡ ለደቂቀ፡ እስራኤል፡ በቅድመ፡ አማልክቲሆሙ፡ ወእዘሩ፡ አዕፅምቲሆሙ፡ ዐውደ፡ ምሥዋዓቲክሙ፡ በኵሉ፡ በሐውርቲክሙ።
6 ወይጠፍእ፡ አህጉሪክሙ፡ ወመዝበረ፡ ይከውን፡ ማኅፈድክሙ፡ ከመ፡ ይደምሰስ፡ ምሥዋዓቲክሙ፡ ወይትቀጠቀጡ፡ አማልክቲክሙ፡ ወይትአተት፡ ምሕራማቲክሙ፡ ወይሠዐር፡ ምግባራቲክሙ።
7 ወይወድቅ፡ አብድንቲክሙ፡ በማእከሌክሙ፡ ወተአምሩ፡ ከመ፡ አነ፡ ውእቱ፡ እግዚአብሔር።
8 ወአተርፍ፡ እለ፡ ድኅኑ፡ እምኲናት፡ እምውስቴትክሙ፡ በውስተ፡ አሕዛብ፡ ሶበ፡ ዘረውኩክሙ፡ በውስተ፡ በሐውርት።
9 ወይዜከሩኒ፡ እለ፡ ድኅኑ፡ እምውስቴትክሙ፡ በውስተ፡ አሕዛብ፡ እለ፡ ተፄወዉ፡ ህየ። መሐልኩ፡ ለልቦሙ፡ ከመ፡ አማስኖ፡ ዘዘመወ፡ ወርኅቀ፡ እምኔየ፡ ወለአዕይንቲሆሙኒ፡ ዘዘመዋ፡ ወተለዋ፡ ጣዖተ። ወይጠባሕ፡ ገጾሙ፡ በእንተ፡ እከየ፡ ምግባሮሙ፡ በኵሉ፡ አማልክቲሆሙ።
10 ወየአምሩ፡ ከመ፡ አነ፡ እግዚአብሔር፡ ወአኮ፡ ለከንቱ፡ ዘነበብኩ፡ በእንተ፡ ዝንቱ፡ ኵሉ፡ እከዮሙ።
11 ከመዝ፡ ይቤ፡ እግዚአብሔር፡ ጥፋሕ፡ በእደዊከ፡ ወአጽሕስ፡ በእገሪከ፡ ወበል፡ አሌ፣፡ አሌ፡ ላዕለ፡ ኵሉ፡ አማልክቲሆሙ፡ ለቤተ፡ እስራኤል። በኵናት፡ ወበረኃብ፡ ወበብድብድ፡ ይወድቁ።
12 ዘርኅቀኒ፡ ይመውት፡ በብድብድ፣፡ ወዘቀርበኒ፡ ይወድቅ፡ በኲናት፡ ወዘተርፈኒ፡ የኀልቅ፡ በረኃብ፡ ውስተ፡ ሀገር። ወእሤልጥ፡ መዐትየ፡ በላዕሌሆሙ።
13 ወየአምሩ፡ ከመ፡ አነ፡ እግዚአብሔር፣፡ ሶበ፡ ወድቁ፡ አብድንቲሆሙ፡ በማእከለ፡ አማልክቲሆሙ፡ ዐውደ፡ ምሥዋዓቲሆሙ፡ ወበኵሉ፡ አውግር፡ ነዋኃት፡ ወበኵሉ፡ አርእስተ፡ አድባር፡ ወታሕተ፡ ጽላሎተ፡ ዕፅ፡ ወታሕተ፡ ኵሉ፡ ቈጽል፡ ኀበ፡ ዐጠኑ፡ መዐዛ፡ ሠናየ፡ ለኵሉ፡ ጣዖቶሙ።
14 ወእትነሣእ፡ ላዕሌሆሙ፡ ወአጠፍኣ፡ ለምድሮሙ፡ ወእሤርዎሙ፡ እምብሔረ፡ ዴብላታ፡ በኵሉ፡ በሐውርቲሆሙ፣፡ ወየአምሩ፡ ከመ፡ አነ፡ ውእቱ፡ እግዚአብሔር።
=== chapter 7 ===
[Chapter 7]
1 ወነበበኒ፡ እግዚአብሔር፡ ወይቤለኒ።
2 አንተ፡ ወልደ፡ እጓለ፡ እመሕያው፡ ከመዝ፡ ይቤ፡ እግዚአብሔር፡ አዶናይ፡ ለምድረ፡ እስራኤል፡ ናሁ፡ በጽሐ፡ ዕድሜ፡ ወኀለፈ፡ ለ፬፡ አጽናፈ፡ ምድር።
3 ወጽሐ፡ ዕድሜ፡ ወዐደወ፡ ኀቤኪ፡ ወእፌኑ፡ መዐትየ፡ ላዕሌኪ፡ አነ፡ ወእትቤቀለኪ፡ በፍኖትኪ፣፡ ወአገብእ፡ ዲቤኪ፡ ኵሎ፡ ኃሣረኪ።
4 ወዐይንየ፡ ኢትምሕከኪ፡ ወኢይሠሀለኪ፡ ወአገብእ፡ ላዕሌኪ፡ ፍኖተኪ፡ ወርኵስኪ፡ ይከውን፡ በማእከሌኪ፡ ወተአምሪ፡ ከመ፡ አነ፡ እግዚአብሔር።
5 ከመዝ፡ ይቤ፡ አዶናይ፡ እግዚአብሔር፡ እኪት፡ አሐቲ፣፡ እኪት፡ በጽሐት።
6 ወበጽሐ፡ ዕድሜሃ፡ ኀቤኪ፡ ወተንሥአት፡ ወናሁ፡ መጽአት።
7 ወተፀፍረት፡ ላዕለ፡ ዘትነብር፡ ውስተ፡ ምድር፡ ወበጽሐ፡ ዕድሜሃ፡ ወቀርበ፡ ዕለቱ፣፡ አኮ፡ በሁከት፡ ወአኮ፡ በሕማም።
8 አልጸቀ፡ ይእዜ፡ ከመ፡ እክዐው፡ መዐትየ፡ ላዕሌኪ፡ ወእሠልጥ፡ መቅሠፍትየ፡ ዲቤኪ፣፡ ወእኴንነኪ፡ በፍኖትኪ፡ ወአገብእ፡ ላዕሌኪ፡ ኵሎ፡ (ፍኖተኪ፡ ወ)፡ ርኵሰኪ።
9 ወኢይሠሀለኪ፡ ወዐይንየ፡ ኢትምሕከኪ፡ እስመ፡ አገብእ፡ ዲቤኪ፡ ፍኖተኪ፡ ወይከውን፡ ርኵስኪ፡ በማእከሌኪ፣፡ ወተአምሪ፡ ከመ፡ አነ፡ ውእቱ፡ እግዚአብሔር፡ ዘእቀሥፍ።
10 ናሁ፡ በጽሐ፡ ዕድሜሁ፡ ወነያ፡ ዕለተ፡ እግዚአብሔር፡ ወፅአት፡ ወተፀፍረት፡ ወሠረፀት፡ በትር፡ ወተንሥአት፡ ጽዕለታ።
11 ወተቀጥቀጠ፡ ምርጉዘ፡ ኃጥእ፣፡ አኮ፡ በሁከት፡ ወአኮ፡ በጕጕእ።
12 በጽሐ፡ ዕድሜሃ፡ ወነያ፡ ዕለታ። ዘተሣየጠ፡ ኢይትፌሣሕ፡ ወዘሤጠ፡ ኢይቴክዝ፡ እስመ፡ መቅሠፍታ፡ መልአ፡ ላዕለ፡ ኵለንታሃ።
13 ወኢይሰወጥ፡ እንከ፡ ዘተሣየጠ፡ ኀበ፡ ዘሤጠ፡ ወዓዲ፡ ውስተ፡ ሕይወት፡ የሐዩ፡ እስመ፡ ርእየ፡ ኵለንታሃ፡ ወኢተሰውጠ፡ እንከ፡ ወሕይወቱ፡ ለሰብእ፡ ቅድመ፡ አዕይንቲሁ።
14 ንፍኁ፡ ቀርነ፡ ወስብኩ፡ ለኵሎሙ፡ ወአልቦ፡ ዘይጸብእ፡ እስመ፡ መቅሠፍትየ፡ ላዕሌሆሙ።
15 ቀትል፡ በኲናት፡ እምአፍአሃ፡ ወረኃብ፡ ወበብድብድ፡ እምውሥጣ። ዘገዳም፡ ይወድቅ፡ በኲናት፣፡ ወዘውስተ፡ ሀገር፡ የኀልቅ፡ በረኃብ፡ ወበብድብድ።
16 ወይድኅኑ፡ እለ፡ ጐዩ፡ እምውስቴቶሙ፡ ወይነብሩ፡ ውስተ፡ አድባር፡ ከመ፡ ርግብ፡ ዘይትሜሀር፡ ሰሪረ። ወእቀትለክሙ፡ ለኵልክሙ፡ በኃጢአትክሙ።
17 ወይደክማ፡ እደወ፡ ኵልክሙ፡ ወይበኈብኁ፡ እገሪክሙ፡ በመግል።
18 ወትቀንቱ፡ ሠቀ፡ ወይደፍነክሙ፡ ድንጋፄ፡ ወኃፍረት፡ ውስተ፡ ገጽክሙ፡ ወውስተ፡ ርእስክሙ፡ ብርሐት፡ ለኲልክሙ።
19 ብሩሮሙ፡ ይዘረው፡ ውስተ፡ መርሕብ፡ ወወርቆሙኒ፡ ይከውን፡ ምኑነ። ወኢያድኀኖሙ፡ ወርቆሙ፡ ወብሩሮሙ፡ በዕለተ፡ መዐቱ፡ ለእግዚአብሔር፡ ነፍሶሙ፡ ኢትጸግብ፡ ወከርሦሙኒ፡ ኢትመልእ፡ በእንተ፡ መቅሠፍተ፡ ኃጢአቶሙ፡ ኮነቶሙ።
20 ኅሬሁ፡ ለዓለም፡ ለትዝኅርቶሙ፡ ረሰይዎ፡ ወገብሩ፡ ሎሙ፡ ምስለ፡ ለርኵሶሙ፡ እምውስቴቱ። ወበእንተ፡ ዝንቱ፡ አኅሠርክዎሙ።
21 ወአገብኦ፡ ውስተ፡ እደ፡ ነኪር፡ ወይበረብርዎ፣፡ ወየኀበልይዎ፡ ኃጥኣነ፡ ምድር፡ ወያረኵስዎ።
22 ወእመይጥ፡ ገጽየ፡ እምኔሆሙ፡ እስመ፡ አርኰሱ፡ ሥርዓትየ፡ ወይበውኡ፡ ላዕሌሆሙ፡ ወይደብይዎሙ፡ ወያኀሥርዎሙ።
23 እስመ፡ ከመ፡ መልአት፡ ምድር፡ አሕዛበ፡ መልአት፡ ሀገር፡ ኃጢአተ።
24 ወአመጽእ፡ እኩያነ፡ አሕዛበ፡ ወይወርስዎሙ፡ አብያቲሆሙ፡ ወእመይጥ፡ ትዕቢተ፡ ኃይሎሙ፡ ወያረኵሱ፡ መቅደሶሙ።
25 ወይመጽእ፡ ዘየዐርቅ፡ ወየኀሥሥ፡ ሰላመ፡ ወኢይረክብ።
26 ዘእንበለ፡ ወይቤ፡ በዲበ፡ ወይሌ፡ ወድንጋፄ፡ በዲበ፡ ድንጋፄ፡ ወየኀሥሡ፡ ራእየ፡ እምነቢይ፡ ወትትገደፍ፡ ኦሪት፡ እምካህን፡ ወትትረሳዕ፡ ምክር፡ እምሊቃናት።
27 ወይላሑ፡ ንጉሥ፡ ወመላእክት፡ ይለብሱ፡ ኃሣረ፡ ወይደክማ፡ እደዊሆሙ፡ ለአሕዛበ፡ ምድር። ወእሬስዮሙ፡ በከመ፡ ፍኖቶሙ፡ ወእትቤቀሎሙ፡ በኵነኔሆሙ፣፡ ወየአምሩ፡ ከመ፡ አነ፡ እግዚአብሔር።
=== chapter 8 ===
[Chapter 8]
1 ወኮነ፡ አመ፡ ሳድስ፡ ዓመት፡ በሳድስ፡ ወርኅ፡ በኃምስ፡ ሠርቅ፡ እንዘ፡ ሀሎኩ፡ እነብር፡ ውስተ፡ ቤትየ፡ ወረበናተ፡ አይሁድ፡ ቅድሜየ። ወመጽአ፡ እደ፡ እግዚአብሔር፡ አዶናይ፡ ዲቤየ።
2 ወርኢኩ፡ አምሳለ፡ ብእሲ፡ እምሐቌሁ፡ እስከ፡ ታሕቱ፡ እሳት፡ ወእምሐቌሁ፡ እስከ፡ ላዕሉ፡ ከመ፡ ርእየተ፡ አውራስ፡ አምሳለ፡ እለ፡ ቄጥሩ።
3 ወአንሥአኒ፡ ከመ፡ ዘእድ፡ ወአኀዘኒ፡ በድማሕየ፡ ወአንሥአኒ፡ መንፈስ፡ ማእከለ፡ ሰማይ፡ ወምድር፡ ወወሰደኒ፡ ኢየሩሳሌም፡ በራእየ፡ እግዚአብሔር፡ ወአብጽሐኒ፡ ኀበ፡ አንቀጽ፡ ውሣጢ፡ ዘይኔጽር፡ መንገለ፡ ደቡብ፡ ኀበ፡ ሀሎ፡ ምስል፡ ዘውእቱ፡ ቅንአት።
4 ወረከብኩ፡ በህየ፡ ስብሐተ፡ እግዚአብሔር፡ አምላከ፡ እስራኤል፡ ዘከመ፡ ርኢኩ፡ ቀዲሙ፡ በገዳም።
5 ወይቤለኒ፡ ወልደ፡ እጓለ፡ እመሕያው፡ ነጽር፡ በአዕይንቲከ፡ መንገለ፡ ደቡብ። ወነጸርኩ፡ መንገለ፡ ደቡብ፡ ወርኢኩ፡ ኀበ፡ ኆኅተ፡ ምሥዋዕ፡ ምስለ፡ ዘውእቱ፡ ቅንአት፡ ወእምህየ፡ ያበውእ፡ ለመንገለ፡ ጽባሕ።
6 ወይቤለኒ፡ ወልደ፡ እጓለ፡ እመሕያው፡ ርኢከኑ፡ ዘይገብሩ፡ እሉ፡ ኃጢአተ፡ ዓቢየ፡ ዘይገብሩ፡ ቤተ፡ እስራኤል፡ በዝየ፡ ከመ፡ ይዕልዉ፡ ቅድሳትየ፡ ወዓዲ፡ ትሬኢ፡ ዘየዐቢ፡ ኃጢአተ።
7 ወአብአኒ፡ ኆኅተ፡ ዐጸድ፡ ወረከብኩ፡ ስቍረተ፡ ውስተ፡ አረፍት።
8 ወይቤለኒ፡ ወልደ፡ እጓለ፡ እመሕያው፡ ክሪ፡ ውስተ፡ አረፍት። ወከረይኩ፡ ውስተ፡ አረፍተ፡ ወረከብኩ፡ ኆኅተ።
9 ወይቤለኒ፡ ባእ፡ ወርኢ፡ ኃጢአቶሙ፡ ዘይገብሩ፡ ወእከዮሙ፡ በዝየ።
10 ወቦእኩ፡ ወርኢኩ፡ አምሳለ፡ ኵሉ፡ ዘይትሐወስ፡ አዕዋፍ፡ ወእንስሳ፡ ከንቱ፡ ወርኩስ፡ ወኵሉ፡ ጣዖቶሙ፡ ለቤተ፡ እስራኤል፡ ሥዑል፡ ውስተ፡ ዐውዱ፡ ለአረፍት።
11 ወ፸፡ ብእሲ፡ እምረበናተ፡ እስራኤል፣፡ ወአዛንያስ፡ ወልደ፡ ሳፋን፡ ይቀውም፡ ማእከሎሙ፡ በቅድሜሆሙ፣፡ ወኵሎሙ፡ ይጸውሩ፡ ማዕጠንተ፣፡ ወየዐርግ፡ ጢሰ፡ ዕጣኑ።
12 ወይቤለኒ፡ ወልደ፡ እጓለ፡ እመሕያው፡ ርኢከኑ፡ ዘይገብሩ፡ ረበናተ፡ ቤተ፡ እስራኤል፡ ኵሎሙ፡ ቦኡ፡ ውስተ፡ ውሣጥያቲሆሙ፡ በኅቡእ፡ ወይቤሉ፡ ኢይሬኢ፡ እግዚአብሔር፡ ወኀደጋ፡ እግዚአብሔር፡ ለምድር።
13 ወይቤለኒ፡ ነዓኬ፡ ትርአይ፡ ዘየዐቢ፡ ኃጢአተ፡ ዘይገብሩ።
14 ወአብአኒ፡ አንቀጸ፡ ዐጸደ፡ ቤተ፡ እግዚአብሔር፡ ዘይኔጽር፡ ሰሜነ፡ ወረከብኩ፡ በህየ፡ አንስት፡ ይነብራ፡ ወያስቆቅዋሁ፡ ለተሙዝ።
15 ወይቤለኒ፡ ርኢኬ፡ ወልደ፡ እጓለ፡ እመሕያው፡ ወዓዲ፡ ትሬኢ፡ ዘየዐቢ፡ ኃጢአቶሙ።
16 ወአብአኒ፡ ዐጸደ፡ ቤተ፡ እግዚአብሔር፡ ውሣጢ፡ ወቅድመ፡ ኆኅተ፡ መቅደስ፡ ዘእግዚአብሔር፡ ማእከለ፡ ኤላም፡ ወማእከለ፡ ምሥዋዕ፡ ፳ወ፭፡ ዕደው፡ ዘባኖሙ፡ መንገለ፡ ቤተ፡ እግዚአብሔር፡ ወገጾሙ፡ መንገለ፡ ጽባሕ፡ ወይሰግዱ፡ ለፀሐይ።
17 ወይቤለኒ፡ ርኢከኑ፡ ወልደ፡ እጓለ፡ እመሕያው፡ ታስተቃልልኑ፡ ለቤተ፡ ይሁዳ፡ ዘንተ፡ ኃጢአቶሙ፡ ዘይገብሩ፡ በዝየ፡ እስመ፡ መልእዋ፡ ለምድር፡ ጣዖቶሙ፡ ወዐለዉኒ፡ ወአምዕዑኒ። ወናሁ፡ አንኁ፡ ዐጽቆሙ፡ ወይሣለቁ።
18 ወአነሂ፡ እትቤቀሎሙ፡ በመዐትየ፡ ወኢይሠሀሎሙ፡ ወዐይንየ፡ ኢትምሕኮሙ፡ ወየአወይዉ፡ ውስተ፡ እዝንየ፡ በዓቢይ፡ ቃል፡ ወኢይሰምዖሙ።
=== chapter 9 ===
[Chapter 9]
1 ወከልሐ፡ ውስተ፡ እዝንየ፡ በዓቢይ፡ ቃል፡ ወይቤ፡ አልጸቀ፡ መቅሠፍታ፡ ለዛቲ፡ ሀገር። ወኵሉ፡ ለለ፩፡ በንዋየ፡ ሐቅል፡ ዘያሐጕሉ፡ ባቲ።
2 ወናሁ፡ መጽኡ፡ ፮ዕደው፡ እምፍኖተ፡ አንቀጽ፡ ልዕልት፡ ዘይኔጽር፡ ሰሜነ፡ ወኵሎሙ፡ ጕድብ፡ ውስተ፡ እደዊሆሙ። ወ፩፡ ብእሲ፡ ይቀውም፡ ማእከሎሙ፡ ዘይለብስ፡ ጶዴረ፡ ወቅናተ፡ ሰንፔር፡ ውስተ፡ ሐቌሁ፡ ወቦኡ፡ ወቆሙ፡ ኀበ፡ ምሥዋዕ፡ ዘብርት።
3 ወዐርገ፡ ስብሐተ፡ አምላከ፡ እስራኤል፡ እምኪሩብ፡ ወቦአ፡ ቤተ። ወጸውዖ፡ ለብእሲ፡ ዘይለብስ፡ ጶዴረ፡ ዘቦ፡ ቅናተ፡ ሰነፔር፡ ውስተ፡ ሐቌሁ።
4 ወይቤሎ፡ እግዚአብሔር፡ ባእ፡ ማእከለ፡ ሀገር፡ ማእከለ፡ ኢየሩሳሌም፡ ወጸሐፍ፡ ሔትዮተ፡ ውስተ፡ ፍጽሞሙ፡ ለዕደው፡ እለ፡ ንህኩ፡ ወተከዙ፡ በእንተ፡ ዝንቱ፡ ኵሉ፡ ኃጢአተ፡ ዘኮነ፡ በማእከሎሙ።
5 ወይቤሎሙ፡ ለእሉ፡ እንዘ፡ እሰምዕ፡ ባኡ፡ ውስተ፡ ሀገር፡ ድኅሬሁ፡ ወግዝሙ፡ ወኢትምሐክ፡ ዐይንክሙ። ወኢትምሐኩ።
6 ልሂቀ፡ ወወሬዛ፡ ድንግለ፡ ወሕፃናተ፡ ወአንስተ፡ ቅትሉ፡ ወደምስሱ። ወለኵሎሙ፡ እለ፡ ቦሙ፡ ሔትዮት፡ ኢትቅረብዎሙ፡ ወቅድሙ፡ እምቅዱሳንየ፡ ወቅድሙ፡ እምረበናትየ፡ እለ፡ ውስተ፡ ቤትየ።
7 ወይቤሎሙ፡ አርኵስዎ፡ ለዝ፡ ቤት፡ ወምልኡ፡ ውስተ፡ ፍኖት፡ ቅቱላነ፡ እንዘ፡ ትወፅኡ፡ ግዝሙ።
8 ወሶበ፡ ገዘሙ፡ ወደቁ፡ በገጽየ፡ ወአውየውኩ፡ ወእቤ፡ አሌ፡ ሊተ፡ አዶናይ፡ እግዚአብሔር፣፡ ታጠፍኦሙኑ፡ ለእለ፡ ተርፉ፡ እስራኤል፡ ዘከዐውከ፡ መዐተከ፡ ላዕለ፡ ኢየሩሳሌም።
9 ወይቤለኒ፡ ዐብየት፡ ኃጢአቶሙ፡ ለቤተ፡ እስራኤል፡ ወይሁዳ፡ ፈድፋደ፡ እስመ፡ ከመ፡ መልአት፡ ምድር፡ አሕዛበ፡ ብዙኃነ፡ ከማሁ፡ መልአት፡ ኢየሩሳሌም፡ ዓመፃ፡ ወርኵሰ። ወይቤሎ፡ ኀደጋ፡ እግዚአብሔር፡ ለምድሩ፡ ወኢይኔጽሮሙ።
10 ወዐይንየ፡ ኢትምሕኮሙ፡ ወኢይምሕሮሙ፡ ወእፈድዮሙ፡ በከመ፡ ፍኖቶሙ፡ ዲበ፡ ርእሶሙ።
11 ወመጽአ፡ ዝኩ፡ ብእሲ፡ ዘይለብስ፡ ጶዴረ፡ ወቅናት፡ ውስተ፡ ሐቌሁ፡ ወተሠጥወ፡ ወይቤ፡ ገበርኩ፡ በከመ፡ አዘዝከኒ።
=== chapter 10 ===
[Chapter 10]
1 ወነጸርኩ፡ ወርኢኩ፡ መልዕልተ፡ ሰማይ፡ ዘዲበ፡ ርሶሙ፡ ለኪሩብ፡ ከመ፡ አምሳለ፡ ሰንፔር፡ ወዲቤሁ፡ ከመ፡ መንበር።
2 ወይቤሎ፡ ለብእሲ፡ ዘይለብስ፡ ጶዴረ፡ ባእ፡ ማእከለ፡ ሠረገላ፡ ዘታሕተ፡ ኪሩብ፡ ወምላእ፡ እዴከ፡ አፍሐመ፡ እሳት፡ እማእከለ፡ ኪሩብ፡ ወዝርዎ፡ ውስተ፡ ሀገር። ወቦአ፡ በቅድሜየ።
3 ወይቀውሙ፡ ኪሩብ፡ እምየማነ፡ ቤት፡ ሶበ፡ ይበውእ፡ ውእቱ፡ ብእሲ፡ ወመልአ፡ ደመና፡ ዐጸደ፡ ውሣጤ።
4 ወተንሥአ፡ ስብሐተ፡ እግዚአብሔር፡ እምኪሩብ፡ ወቦአ፡ ቤተ፡ ወመልአ፡ ቤተ፡ ደመና፡ ወመልአ፡ ዐጸደ፡ ፀዳለ፡ ስብሐቲሁ፡ ለእግዚአብሔር።
5 ወይሰማዕ፡ ድምፀ፡ ክነፊሆሙ፡ ለኪሩብ፡ እስከ፡ ጸናፊ፡ ዐጸድ፡ ከመ፡ ቃለ፡ እግዚአብሔር፡ ሶበ፡ ይነብብ፡ ሰዳይ።
6 ወእምዝ፡ ሶበ፡ አዘዞ፡ ለዝኩ፡ ብእሲ፡ ዘይለብስ፡ ልብሰ፡ ቅድሳት፡ ወይቤሎ፡ ንሣእ፡ እሳተ፡ እማእከለ፡ ሠረገላ፡ ዘማእከለ፡ ኪሩብ፡ ወቦአ፡ ወቆመ፡ ኀበ፡ ሠረገላ።
7 ወአንሥአ፡ እዴሁ፡ ኪሩብ፡ እማእከለ፡ እሳት፡ ዘሀሎ፡ ማእከለ፡ ኪሩቤል፡ ወነሥአ፡ ወመጠዎ፡ ለዝኩ፡ ዘይለብስ፡ ልብሰ፡ ቅድሳት፡ ውስተ፡ እዴሁ፡ ወነሥአ፡ ወወፅአ።
8 ወርኢክዎሙ፡ ለኪሩቤል፡ አምሳለ፡ እደ፡ ሰብእ፡ ታሕተ፡ ክነፊሆሙ።
9 ወነጸርኩ፡ ወርኢኩ፡ መንኰራኵረ፡ ፬፡ ይቀውም፡ ኀበ፡ ኪሩብ፡ ፩፡ መንኰራኵር፡ ታሕተ፡ ፩፡ ኪሩብ፣፡ ወአርአያሁ፡ ለሠረገላ፡ ከመ፡ ተርሴስ።
10 ወአርአያ፡ ፩፡ ለአርባዕቲሆሙ፡ ከመ፡ ዘይከውን፡ መንኰራኵር፡ ማእከለ፡ መንኰራኵር።
11 ወሶበ፡ የሐውሩ፡ እንተ፡ ፬፡ ገጾሙ፡ የሐውሩ፡ ወኢይትመየጡ፡ ሶበ፡ የሐውሩ፡ ብሔረ፡ ኀበ፡ አንጸረ፡ ቀዳማዊ፡ የሐውሩ፡ ወኢይትመየጡ፡ ሶበ፡ የሐውሩ።
12 ወዘባናቲሆሙ፡ ወኵሉ፡ ነፍስቶሙ፡ ወክነፊሆሙ፡ ወእደዊሆሙ፡ ወሠረገላቲሆሙኒ፡ ምሉእ፡ አዕይንተ፡ ዐውዶሙ፡ ለ፬፡ ሠረገላቲሆሙ።
13 ወሰመይዎሙ፡ ለ፬፡ ሠረገላቲሆሙ፡ ጌርጌል፡ እንዘ፡ እሰምዕ።
14 ወ፬፡ ገጹ፡ ለለ፩፩፡ አሐዱ፡ ገጸ፡ ኪሩብ፡ ወካልእ፡ ገጸ፡ ሰብእ፣፡ ወሣልስ፡ ገጸ፡ አንበሳ፣፡ ወራብዕ፡ ገጸ፡ ንስር።
15 ወይሰርሩ፡ እሙንቱ፡ ኪሩቤል፡ ዘእንስሳ፡ ዘርኢኩ፡ በፈለገ፡ ኮቦር።
16 ወሶበ፡ የሐውሩ፡ ኪሩብ፡ የሐውሩ፡ ሠረገላትኒ፡ እንዘ፡ እኁዛን፡ ምስሌሆሙ። ወሶበ፡ ያነሥኡ፡ ኪሩብ፡ ክነፊሆሙ፡ ከመ፡ ይስርሩ፡ እምድር፡ ኢይትመየጡ፡ ሠረገላቲሆሙ፡ ምስሌሆሙ፡ እኁዛን።
17 ወእመኒ፡ ቆሙ፡ ይቀውም፣፡ ወእመኒ፡ ሰረሩ፡ ይሰርር፡ ምስሌሆሙ፡ እስመ፡ መንፈሰ፡ ሕይወት፡ ቦሙ።
18 ወወፅአ፡ ስብሐተ፡ እግዚአብሔር፡ እምቤት፡ ወተፅዕነ፡ ዲበ፡ ኪሩብ።
19 ወአንሥኡ፡ ክነፊሆሙ፡ ኪሩብ፡ ወሰረሩ፡ እምድር፡ በቅድሜየ፡ ሶበ፡ ወፅኡ፡ ወሠረገላትኒ፡ ምስሌሆሙ። ወቆሙ፡ ኀበ፡ አንቀጸ፡ ዴዴ፡ ጸናፊ፡ ዘቤተ፡ እግዚአብሔር፡ ዘመንጸር፣፡ ወስብሐተ፡ እግዚአብሔር፡ ሀሎ፡ ምስሌሆሙ፡ መልዕልቴሆሙ።
20 ዝክቱ፡ እንስሳ፡ ዘርኢኩ፡ በመትሕቱ፡ ለአምላከ፡ እስራኤል፡ በፈለገ፡ ኮቦር፡ ወአእመርኩ፡ ከመ፡ ኪሩቤል፡ እሙንቱ።
21 ዐርባዕቱ፡ ክነፊሁ፡ ወ፬ገጹ፡ ለለ፩፣፡ ወአምሳለ፡ እደ፡ ሰብእ፡ ታሕተ፡ ክነፊሆሙ።
22 ወይትማሰል፡ ገጾሙ፡ ወከመዝ፡ ገጾሙ፡ ዘርኢኩ፡ በመትሕተ፡ ስብሐቲሁ፡ ለአምላከ፡ እስራኤል፡ በፈለገ፡ ኮቦር፡ ወከመዝ፡ ርእየቶሙ፣፡ ወኵሎሙ፡ ቅድመ፡ ገጾሙ፡ የሐውሩ።
=== chapter 11 ===
[Chapter 11]
1 ወነሥአኒ፡ መንፈስ፡ ወወሰደኒ፡ ኀበ፡ አንቀጸ፡ ቤተ፡ እግዚአብሔር፡ ዘይኔጽር፡ መንገለ፡ ጽባሕ። ወረከብኩ፡ ቅድመ፡ ኆኅተ፡ ዴዴ፡ ፳ወ፭፡ ዕደወ፡ ወርኢክዎ፡ በማእከሎሙ፡ ለኢኮንያን፡ ወልደ፡ አዙር፡ ወፈላጥያ፡ ወልደ፡ ቤንዩ፡ ሊቆሙ፡ ለሕዝብ።
2 ወይቤለኒ፡ ወልደ፡ እጓለ፡ እመሕያው፣፡ እሉ፡ ሰብእ፡ እለ፡ ከንቶ፡ ይሔልዩ፡ ወእኩየ፡ ይመክሩ፡ በዝንቱ፡ ሀገር።
3 ወይብሉ፡ አኮኑ፡ ይትሐነጹ፡ ግብተ፡ አብያት፡ ዛቲ፡ ይእቲ፡ ጽሕርት፡ ወንሕነ፡ ሥጋ።
4 በበይነ፡ ዝንቱ፡ ተነበይ፡ ሎሙ፣፡ ተነበይ፡ ወልደ፡ እጓለ፡ እመሕያው።
5 ወመጽአ፡ ዲቤየ፡ መንፈሰ፡ እግዚአብሔር፡ ወይቤለኒ፡ በል፡ ከመዝ፡ ይቤ፡ እግዚአብሔር፡ ከመዝ፡ ትቤሉ፡ ቤተ፡ እስራኤል፡ ወአነ፡ አእምር፡ ጌጋያ፡ ለነፍስክሙ።
6 ወአብዛኅክሙ፡ አብድንቲክሙ፡ በዛቲ፡ ሀገር፡ ወመላእክሙ፡ ውስተ፡ ፍናዊሃ፡ ቅቱላነ።
7 በበይነ፡ ዝንቱ፡ ከመዝ፡ ይቤ፡ አዶናይ፡ እግዚአብሔር፡ አብድንቲክሙአ፡ ዘተቀትሉ፡ በማእከላ፡ ሥጋ፡ እሙንቱ፣፡ ወይእቲ፡ ጽሕርት፣፡ ወአወዕአክሙ፡ እማእከላ።
8 ኲናተ፡ ትፈርሁ፡ ወኲናተ፡ አመጽእ፡ ላዕሌክሙ፡ ይቤ፡ አዶናይ፡ እግዚአብሔር።
9 ወአወፅአክሙ፡ እማእከላ፡ ወእሜጥወክሙ፡ ውስተ፡ እደ፡ ፀር፡ ወእትቤቀለክሙ።
10 ወትወድቁ፡ በኲናት፣፡ ወውስተ፡ አድባረ፡ እስራኤል፡ እኴንነክሙ፣፡ ወተአምሩ፡ ከመ፡ አነ፡ ውእቱ፡ እግዚአብሔር።
11 ይእቲ፡ ኢትከውነክሙ፡ ጽሕርተ፡ ወአንትሙ፡ ኢትከውኑ፡ ሥጋ፡ በማእከላ፡ ውስተ፡ አድባረ፡ እስራኤል፡ እኴንነክሙ።
12 ወተአምሩ፡ ከመ፡ አነ፡ ውእቱ፡ እግዚአብሔር፡ በሕግየ፡ ዘኢሖርክሙ፡ ወኵነኔየ፡ ዘኢገበርክሙ፡ ወበሕገ፡ አሕዛብ፡ እለ፡ ዐውድክሙ፡ ገበርክሙ።
13 ወእምዝ፡ ሶበ፡ ተነበይኩ፣፡ ሞተ፡ ፈላጥያ፡ ወልደ፡ ቤንዩ፡ ወወደቁ፡ በገጽየ፡ ወአውየውኩ፡ በዓቢይ፡ ቃል፡ ወእቤ፡ አሌ፡ ሊተ፡ አዶናይ፡ እግዚአብሔር፣፡ ከመ፡ ታጥፍኦሙ፡ ለእለ፡ ተርፉ፡ እስራኤል፡ ትገብር፡ አንተ።
14 ወነበበኒ፡ እግዚአብሔር፡ ወይቤለኒ።
15 ወልደ፡ እጓለ፡ እመሕያው፣፡ አኃዊከኒ፡ ወአኃዊከ፡ ወሰብእ፡ መዋርስቲከ፡ ወኵሉ፡ ቤተ፡ እስራኤል፡ የኀልቁ፡ እለ፡ ይብልዎሙ፡ ሰብአ፡ ኢየሩሳሌም፡ ነዋኀ፡ ረኀቁ፡ እምእግዚአብሔር፡ እስመ፡ ለነ፡ ተውህበት፡ ምድረ፡ ርስትነ።
16 በእንተ፡ ዝንቱ፡ በል፡ ከመዝ፡ ይቤ፡ አዶናይ፡ እግዚአብሔር፡ እስመ፡ እገድፎሙ፡ ውስተ፡ አሕዛብ፡ ወእዘርዎሙ፡ ውስተ፡ ኵሉ፡ ምድር፡ ወእከውኖሙ፡ መቅደሶሙ፡ ኅዳጠ፡ ውስተ፡ በሐውርት፡ ኀበ፡ ይበውኡ፡ ህየ።
17 በእንተ፡ ዝንቱ፡ በል፡ ከመዝ፡ ይቤ፡ አዶናይ፡ እግዚአብሔር፡ እትሜጠዎሙ፡ እምአሕዛብ፡ ወአስተጋብኦሙ፡ እምበሐውርት፡ ኀበ፡ ዘረውክዎሙ፡ ወእሁቦሙ፡ ምድረ፡ እስራኤል።
18 ወይበውኡ፡ ህየ፡ ወያአትቱ፡ ኵሎ፡ ጣዖታ፡ ወኵሎ፡ ጌጋየ፡ እምውስቴታ።
19 ወእሁቦሙ፡ ካልአ፡ ልበ፣፡ ወአሁቦሙ፡ መንፈሰ፡ ሐዲሰ፣፡ ወአአትት፡ ልበ፡ እብን፡ እምሥጋሆሙ፡ ወእሁቦሙ፡ ልበ፡ ዘሥጋ።
20 ከመ፡ ይሑሩ፡ በትእዛዝየ፡ ወይዕቀቡ፡ ሥርዓትየ፡ ወይግበርዎ፡ ወይኩኑኒ፡ ሕዝብየ፡ ወአነ፡ እከውኖሙ፡ አምላኮሙ።
21 ወእመሰ፡ ሖሩ፡ በልበ፡ ጣዖቶሙ፡ ወበኃጢአቶሙ፡ በከመ፡ ልቦሙ፡ ወበፍናዊሆሙ፡ እገብር፡ ሎሙ፡ ዲበ፡ ርእሶሙ፡ ይቤ፡ አዶናይ፡ እግዚአብሔር።
22 ወአንሥኡ፡ ኪሩብ፡ ክነፊሆሙ፡ ወሠረገላቲሆሙኒ፡ ምስሌሆሙ፣፡ ወስብሐተ፡ አምላከ፡ እስራኤል፡ ዲቤሆሙ፡ መልዕልቶሙ።
23 ወዐርገ፡ ስብሐተ፡ እግዚአብሔር፡ እማእከለ፡ ሀገር፡ ወቆመ፡ ዲበ፡ ደብር፡ ዘቅድመ፡ ሀገር።
24 ወነሥአኒ፡ መንፈስ፡ ወወሰደኒ፡ ብሔረ፡ ፋርስ፡ ኀበ፡ ተፄወዉ፡ በራእየ፡ መንፈሰ፡ እግዚአብሔር። ወዐርገ፡ እምላዕሌየ፡ ራእይ፡ ዘርኢኩ።
25 ወነገርክዎሙ፡ ለእለ፡ ተፄወዉ፡ ኵሎ፡ ነገሮ፡ ለእግዚአብሔር፡ ዘአርአየኒ።
=== chapter 12 ===
[Chapter 12]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ ማእከለ፡ ቤተ፡ መሪራን፡ ትነብር፡ አንተ፡ እለ፡ ቦሙ፡ አዕይንት፡ በዘይሬእዩ፡ ወኢይሬእዩ፡ ወእዝን፡ ቦሙ፡ በዘይሰምዑ፡ ወኢይሰምዑ፡ እስመ፡ ቤተ፡ መሪራን፡ እሙንቱ።
3 ወአንተ፡ ወልደ፡ እጓለ፡ እመሕያው፡ ግበር፡ ለከ፡ ንዋየ፡ ፄዋ፡ ወተፄወው፡ መዓልተ፡ በቅድሜሆሙ፡ ወተፄወው፡ ወዓልተ፡ በቅድሜሆሙ፡ ወተፄወው፡ መዓልተ፡ በቅድሜሆሙ፡ ወተፄወው፡ እምብሔርከ፡ ውስተ፡ ካልእ፡ ብሔር፡ በቅድሜሆሙ፡ ከመ፡ ይርአዩ፡ እስመ፡ ቤተ፡ መሪራን፡ እሙንቱ።
4 ወትወስድ፡ ንዋየከ፡ ከመ፡ ንዋየ፡ ፄዋ፡ መዓልተ፡ እንዘ፡ ይሬእዩ፡ በአዕይንቲሆሙ፡ ወትወፅእ፡ አንተ፡ ፍና፡ ሰርክ፡ በቅድሜሆሙ፡ ከመ፡ ይወፅእ፡ ፄዋ።
5 ወክሪ፡ አረፍተ፡ ወፃእ፡ እንተ፡ ህየ።
6 በቅድሜሆሙ። ወጹር፡ በመታክፍቲከ፡ ንዋየከ፡ ወትወፅእ፡ እንዘ፡ ትትኀባእ፡ ተገልቢበከ፡ ገጸከ፣፡ ወኢትኔጽር፡ ምድረ፡ እስመ፡ ትእምርተ፡ ረሰይኩከ፡ ለቤተ፡ እስራኤል።
7 ወገበርኩ፡ ከማሁ፡ በከመ፡ ኵሉ፡ ዘአዘዘኒ፡ ወአውፃእኩ፡ ንዋይየ፡ መዓልተ፡ ከመ፡ ንዋየ፡ ፄዋ፣፡ ወፍና፡ ሰርክ፡ ከረይኩ፡ ሊተ፡ ውስተ፡ አረፍት፡ በእዴየ፡ ወወፃእኩ፡ እንዘ፡ እትኀባእ፡ ወጾርኩ፡ ንዋይየ፡ በመታክፍትየ፡ በቅድሜሆሙ።
8 ወነበበኒ፡ እግዚአብሔር፡ በጽባሕ፡ ወይቤለኒ።
9 ወልደ፡ እጓለ፡ እመሕያው፣፡ ኢይቤሉከኑ፡ ቤተ፡ እስራኤል፡ ቤተ፡ መሪራን፡ ምንተ፡ ትገብር።
10 በሎሙ፡ ከመዝ፡ ይቤ፡ አዶናይ፡ እግዚአብሔር፡ ለመልአክ፡ ወለመስፍን፡ ዘኢየሩሳሌም፡ ወለኵሉ፡ ቤተ፡ እስራኤል፡ እለ፡ በማእከሎሙ።
11 በል፡ አነ፡ ትእምርትክሙ፡ በከመ፡ ገበርኩ፡ ከማሁ፡ ይከውን፡ ላዕሌሆሙ። ወይፄወዉ፡ በፄዋ፡ ወይወስድዎሙ።
12 ወይወፅእ፡ መልአክ፡ ዘማእከሎሙ፣፡ ውስተ፡ መትከፍት፡ ይጸወር፣፡ ተኀቢኦ፡ አረፍተ፡ ሰቍሮ፡ ተገልቢቦ፡ ገጾ፡ ከመ፡ ኢይርአይ፡ በአዕይንቲሁ፡ ወከመ፡ ኢይንጽር፡ ምድረ።
13 ወእሰፍሕ፡ መሥገርትየ፡ ላዕሌሁ፡ ወይሠገር፡ በማዕገትየ፡ ወእወስዶ፡ ባቢሎን፡ ብሔረ፡ ፋርስ፣፡ ወኢይሬኢ፡ ብሔረ፡ ወይመውት፡ በህየ።
14 ወለኵሎሙ፡ እለ፡ ዐውዱ፣፡ እለ፡ ይረድእዎ፡ ወለኵሎሙ፡ እለ፡ ይትዌከፍዎ፡ እዘርዎሙ፡ ውስተ፡ ኵሉ፡ ነፋሳት፡ ወእዘሩ፡ ኲናተ፡ በድኅሬሆሙ።
15 ወየአምሩ፡ ከመ፡ አነ፡ እግዚአብሔር፣፡ ሶበ፡ ዘረውክዎሙ፡ ውስተ፡ አሕዛብ፡ ወእዘርዎሙ፡ ውስተ፡ በሐውርት።
16 ወአተርፍ፡ ኅዳጣነ፡ ዕደወ፡ በኍልቍ፡ እምኵናት፡ ወእምረኃብ፡ ወእምብድብድ፡ ከመ፡ ይንግሩ፡ ኵሎ፡ ኃጢአቶሙ፡ ለአሕዛብ፡ እለ፡ ቦኡ፡ ውስቴቶሙ፡ ህየ፣፡ ወየአምሩ፡ ከመ፡ አነ፡ እግዚአብሔር።
17 ወነበበኒ፡ እግዚአብሔር፡ ወይቤለኒ።
18 ወልደ፡ እጓለ፡ እመሕያው፡ እክለከ፡ ብላዕ፡ በሁከት፡ ወማየከኒ፡ በፍርሃት፡ ወበድንጋፄ፡ ስተይ።
19 ወበሎሙ፡ ለሕዝበ፡ ምድር፡ ከመዝ፡ ይቤ፡ አዶናይ፡ እግዚአብሔር፡ ለእለ፡ ይነብሩ፡ ኢየሩሳሌም፡ ውስተ፡ ምድረ፡ እስራኤል፡ እክሎሙአ፡ በተፅናስ፡ ይብልዑ፡ ወማዮሙኒ፡ በሙስና፡ ይስተዩ፡ ከመ፡ ትማስን፡ ምድር፡ በምልአ፡ እስመ፡ በዓመፃ፡ ሀለዉ፡ ኵሎሙ፡ እለ፡ ይነብሩ፡ ውስቴታ።
20 ወአህጉሪሆሙኒ፡ እለ፡ ይነብራ፡ ይማስና፡ ወምድሮሙኒ፡ በድወ፡ ትከውን፣፡ ወየአምሩ፡ ከመ፡ አነ፡ ውእቱ፡ እግዚአብሔር።
21 ወነበበኒ፡ እግዚአብሔር፡ ወይቤለኒ።
22 ወልደ፡ እጓለ፡ እመሕያው፡ ምንት፡ ዘይሜስሉ፡ በብሔረ፡ እስራኤል፡ ዘይብሉ፡ ጕንዱይ፡ መዋዕል፡ ወጠፍአ፡ ራእይ።
23 ወበበይነ፡ ዝንቱ፡ በሎሙ፡ ከመዝ፡ ይቤ፡ አዶናይ፡ እግዚአብሔር፡ እሥዕራ፡ ለዛቲ፡ ምሳሌ፡ ወኢሜስልዎ፡ እንከ፡ ውስተ፡ እስራኤል፣፡ ወበሎሙ፡ አልጸቀ፡ መዋዕል፡ ወነገረ፡ ኵሉ፡ ራእይ።
24 እስመ፡ ኢይከውን፡ ኵሉ፡ ራእይ፡ ከንቶ፡ ወሰገል፡ ተኀድገ፡ በማእከለ፡ ቤተ፡ እስራኤል።
25 እስመ፡ አነ፡ እግዚአብሔር፡ ዘእነብብ፡ ወእነግር፡ ቃልየ፡ ወእገብርሂ፣፡ ወኢያጐነዲ፡ እንከ፡ በመዋዕሊክሙ፡ እስመ፡ ቤተ፡ መሪራን፡ አንትሙ። ዘነገርኩ፡ ቃልየ፡ እገብር፡ ይቤ፡ እግዚአብሔር፡ አዶናይ።
26 ወእምዝ፡ ነበበኒ፡ እግዚአብሔር፡ ወይቤለኒ።
27 ወልደ፡ እጓለ፡ እመሕያው፡ ናሁ፡ ቤተ፡ እስራኤል፡ መሪራን፡ ወይቤሉ፡ ራእይ፡ ዘውእቱ፡ ይሬኢ፡ ለጕንዱይ፡ መዋዕል፡ ወለነዋኅ፡ ዓመታት፡ ይትኔበይዝ።
28 በእንተ፡ ዝንቱ፡ በሎሙ፡ ከመዝ፡ ይቤ፡ አዶናይ፡ እግዚአብሔር፡ ኢይርኅቅ፡ ኵሉ፡ ቃልየ፡ ዘነበብኩ፡ ወእነግርሂ፡ ቃልየ፡ ወእገብር፡ ይቤ፡ አዶናይ፡ እግዚአብሔር።
=== chapter 13 ===
[Chapter 13]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ ተነበይ፡ ላዕለ፡ ነቢያተ፡ እስራኤል፡ እለ፡ ይትኔበዩ፡ ወበሎሙ፡ ለነቢያት፡ እለ፡ ይትኔበዩ፡ እምልቦሙ፡ ወበሎሙ፡ ስምዑ፡ ቃለ፡ እግዚአብሔር።
3 ከመዝ፡ ይቤ፡ አዶናይ፡ እግዚአብሔር፡ አሌ፡ ሎሙ፡ ለእለ፡ ይትኔበዩ፡ እምልቦሙ፡ ዘኢርእዩ፡ ግሙራ።
4 ከመ፡ ቈናጽል፡ ውስተ፡ በድው፡ ነቢያቲከ፡ እስራኤል፡ ይከውኑ።
5 ወኢዐረግሙ፡ ውስተ፡ ቅጽር፡ ዘተነሥተ፡ ከመ፡ ትሕንጹ፡ ጥቅመ፡ ዘውስተ፡ ቤተ፡ እስራኤል፣፡ ወከመ፡ ትቁሙ፡ ውስተ፡ ጸብእ፡ በዕለተ፡ እግዚአብሔር።
6 ሐሰተ፡ ይሬእዩ፡ ወያሰግሉ፡ ከንቶ፡ ወይብሉ፡ ይቤ፡ እግዚአብሔር፣፡ ዘኢለአኮሙ፡ እግዚአብሔር፡ ወይእኅዙ፡ ለአቅሞ፡ ነገር።
7 አኮኑ፡ ራእየ፡ ሐሰት፡ ርኢክሙ፡ ወሰገለ፡ ከንቶ፡ ነገርክሙ፡ ወትቤሉ፡ ይቤ፡ እግዚአብሔር፣፡ ወአነ፡ እግዚአብሔር፡ ኢነበብኩ።
8 ወበበይነ፡ ዝንቱ፡ በሎሙ፡ ከመዝ፡ ይቤ፡ እግዚአብሔር፡ አዶናይ፡ እስመ፡ ትቤሉ፡ ነገረክሙ፡ ሐሰተ፡ ወሰገለክሙ፡ ከንቶ፡ በበይነ፡ ዝንቱ፡ ነየ፡ አነ፡ ላዕሌክሙ፡ ይቤ፡ አዶናይ፡ እግዚአብሔር።
9 ወአነሥእ፡ እዴየ፡ ዲበ፡ ነቢያት፡ እለ፡ ይትኔበዩ፡ ሐሰተ፡ ወእለ፡ ይነግሩ፡ ከንቶ። ወኢሀለዉ፡ ውስተ፡ ምክረ፡ ሕዝብየ፡ ወኢውስተ፡ መጽሐፈ፡ ቤተ፡ እስራኤል፡ ኢይጸሐፉ፣፡ ወውስተ፡ ምድረ፡ እስራኤል፡ ኢይበውኡ፡ ወየአምሩ፡ ከመ፡ አነ፡ ውእቱ፡ እግዚአብሔር፡ አዶናይ።
10 እስመ፡ አስሐትዎሙ፡ ለሕዝብየ፡ ወይቤልዎሙ፡ ሰላም፡ ወአልቦ፡ ሰላም፡ ወዝንቱ፡ የሐንጽ፡ አረፍተ፣፡ ወእሙንቱ፡ ይመርግዎ፡ ትወድቅ።
11 በሎሙ፡ ለእለ፡ ይመርግዋ፡ ትወድቅ፡ ወይመጽእ፡ ዝናም፡ ከመ፡ አይኅ፡ ወአወርድ፡ እብነ፡ ጾላዕት፡ ውስተ፡ መስእርቲሆሙ፡ ወይወድቁ፡ ወዐውሎ፡ ኃይል፡ ያነቅዓ።
12 ወትወድቅ፡ አረፍቶሙ፡ ወኢይብሉክሙ፡ አይቴመ፡ ምርግክሙ፡ ዘመረግሙ።
13 በበይነ፡ ዝንቱ፡ ከመዝ፡ ይቤ፡ አዶናይ፡ እግዚአብሔር፡ እነፅኆሙ፡ በዐውሎ፡ ዘየሐፍሶሙ፡ በመዐትየ፡ ወዝናም፡ ዘያሠጥሞሙ፡ በመቅሠፍትየ፡ ይመጽኦሙ፡ ወአወርድ፡ በዲቤሆሙ፡ እብነ፡ ጾላዕት፡ በመዐትየ፡ ከመ፡ እቀጥቅጦሙ።
14 ወአንኅላ፡ ለይእቲ፡ አረፍት፡ እንተ፡ መረጉ፡ ወትወድቅ። ወአሰክባ፡ ውስተ፡ ምድር፡ ወይትከሠት፡ መሠረታቲሃ፡ ወትወድቅ፡ ወተኀልቁ፡ በማእከላ፡ ወተአምሩ፡ ከመ፡ አነ፡ ውእቱ፡ እግዚአብሔር።
15 ወእሤልጥ፡ መዐትየ፡ ላዕለ፡ አረፍት፡ ወትወድቅ፡ ላዕለ፡ እለ፡ ገየርዋ። ወእብለክሙ፡ ኢዐለወት፡ አረፍት፡ ወኢእለ፡ ገየርዋ።
16 ነቢያተ፡ እስራኤል፡ እለ፡ ተነበዩ፡ ለኢየሩሳሌም፡ ወርእዩ፡ ላቲ፡ ሰላመ፣፡ ወአልቦ፡ ሰላም፡ ይቤ፡ አዶናይ፡ እግዚአብሔር።
17 ወአንተ፡ ወልደ፡ እጓለ፡ እመሕያው፡ አጽንዕ፡ ገጸከ፡ ዲበ፡ አዋልደ፡ ሕዝብከ፡ እለ፡ ይትኔበያ፡ እምልቦን፣፡ ወተነበይ፡ ሎቶን።
18 ወበሎን፡ ከመዝ፡ ይቤ፡ እግዚአብሔር፡ አዶናይ፡ አሌ፡ ሎቶን፡ ለእለ፡ ይሰፍያ፡ መተርእስተ፡ ለኵሉ፡ ኵርናዓ፡ እድ፡ ወይገብራ፡ ጽጋዓ፡ ለኵሉ፡ ርእስ፡ እለ፡ ይቀውሙ፡ ከመ፡ ይገፍትዓ፡ ነፍሰ። ወተገፍትዐ፡ ነፍሰ፡ ሕዝብየ፡ ወያሐይዉ፡ ነፍሶሙ።
19 ወያረኵስዎሙ፡ ለሕዝብየ፡ በእንተ፡ ሐፍሶሙ፡ ምልአ፡ ሕፍነ፡ ስገም፡ ወበእንተ፡ ቀርነ፡ ኅብስት፡ ከመ፡ ይቅትሉ፡ ነፍሰ፡ ዘኢይደልዎ፡ መዊት፡ ወከመ፡ ያሕይዉ፡ ነፍሰ፡ ዘኢይደልዎ፡ ሐይው፡ ወታወሥእዎሙ፡ ለሕዝብ፡ እለ፡ ያጸምዑ፡ ነገረ፡ ከንቶ።
20 በበይነ፡ ዝንቱ፡ ከመዝ፡ ይቤ፡ እግዚአብሔር፡ አዶናይ፡ ናሁ፡ አነ፡ ላዕለ፡ መተርአስትክሙ፡ ዘቦቱ፡ ትገፍትዑ፡ ነፍሰ፡ በህየ፡ ወእሠጥጦን፡ በታሕተ፡ ኵርናዓቲክሙ፡ ወእፌኑ፡ ነፍሶሙ፡ ለእለ፡ ገፍራዕክምዎሙ፡ ወእዘርዎሙ።
21 ወእሠጥጥ፡ ጽጋዓቲክሙ፡ ወአድኅን፡ ሕዝብየ፡ እምእዴክሙ፡ ወኢይገብኡ፡ እንከ፡ ውስተ፡ እዴክሙ፡ ትገፍትዕዎሙ፡ ወተአምሩ፡ ከመ፡ አነ፡ ውእቱ፡ እግዚአብሔር።
22 እስመ፡ ሜጥክሙ፡ ልበ፡ ጻድቅ፡ በዓመፃ፡ ዘአነ፡ ኢሜጥክዎ፡ ከመ፡ ታጽንዑ፡ እደ፡ ኃጥእ፡ በዘኢይትመየጥ፡ ለግሙራ፡ እምፍኖቱ፡ እኩይ፡ ወይሕየው።
23 በበይነ፡ ዝንቱ፡ ኢትኔጽሩ፡ ሐሰተ፡ ወኢታሰግሉ፡ ከንቶ፡ እንከ፣፡ ወአድኅን፡ ሕዝብየ፡ እምእዴክሙ፡ ወተአምሩ፡ ከመ፡ አነ፡ ውእቱ፡ እግዚአብሔር።
=== chapter 14 ===
[Chapter 14]
1 ወመጽኡ፡ ኀቤየ፡ ዕደው፡ እምረበናተ፡ እስራኤል፡ ወነበሩ፡ ቅድሜየ።
2 ወነበበኒ፡ እግዚአብሔር፡ ወይቤለኒ።
3 ወልደ፡ እጓለ፡ እመሕያው፡ እሉ፡ ዕደው፡ ሐለዩ፡ ወበልቦሙ፡ አጥብዑ፡ ለመቅሠፍተ፡ ኃጢአቶሙ፡ ወረሰይዋ፡ ቅድመ፡ ገጾሙ፡ ቦኑ፡ አውሥኦ፡ አውሥኦሙ።
4 በእንተ፡ ዝንቱ፡ ንግሮሙ፡ ወበሎሙ፡ ከመዝ፡ ይቤ፡ አዶናይ፡ እግዚአብሔር፡ ብእሲ፡ ብእሲ፡ እምቤተ፡ እስራኤል፡ ዘሐለየ፡ በልቡ፡ ወአጥብዐ፡ ለመቅሠፍተ፡ ኃጢአቱ፡ ወረሰዮ፡ ቅድመ፡ ገጹ፡ ወመጽአ፡ ኀበ፡ ነቢይ፣፡ አነ፡ እግዚአብሔር፡ አወሥኦ፡ ዘሐለየ፡ በልቡ።
5 ከመ፡ ያስሕቶሙ፡ ለቤተ፡ እስራኤል፡ ዘከመ፡ ልቦሙ፡ ወርኵሶሙ፡ ዘተናከሩኒ፡ በሕሊናሆሙ።
6 በበይነ፡ ዝንቱ፡ በሎሙ፡ ለቤተ፡ እስራኤል፡ ከመዝ፡ ይቤ፡ አዶናይ፡ እግዚአብሔር፡ ነስሑ፡ ወተመየጡ፡ እምጌጋይክሙ፡ ወእምኵሉ፡ ኃጢአትክሙ፡ ወሚጡ፡ ገጸክሙ።
7 ብእሲ፡ ብእሲ፡ እምቤተ፡ እስራኤል፡ ወእምፈላስያን፡ እለ፡ ፈለሱ፡ ውስተ፡ እስራኤል፣፡ እለ፡ ተናከሩኒ፡ ወሐለዩ፡ በልቦሙ፡ ያጥብዑ፡ ለመቅሠፍተ፡ ኃጢአቶሙ፡ ወረሰዮ፡ ቅድመ፡ ገጹ፡ ወመጽአ፡ ኀበ፡ ነቢይ፡ ይስአሎ፡ በእንቲአየ፣፡ አነ፡ እግዚአብሔር፡ አወሥኦ፡ ዘይሔሊ፡ በልቡ።
8 ወአጸንዕ፡ ገጽየ፡ ዲበ፡ ውእቱ፡ ብእሲ፡ ወእሬስዮ፡ ከመ፡ ይጥፋእ፡ ወአአትቶ፡ እማእከለ፡ ሕዝብየ፣፡ ወተአምሩ፡ ከመ፡ አነ፡ ውእቱ፡ እግዚአብሔር።
9 ወነቢይኒ፡ እመ፡ ስሕተ፡ ወነበበ፣፡ አነ፡ አስሐትክዎ፡ ለውእቱ፡ ነቢይ፡ ወአነሥእ፡ እዴየ፡ ላዕሌሁ፡ ወአጠፍኦ፡ እማእከለ፡ ሕዝብየ፡ እስራኤል።
10 ወይነሥኡ፡ ኃጢአቶሙ፡ በከመ፡ ኃጢአቱ፡ ለውእቱ፡ ዘተስእለ፡ ከመ፡ ዘውእቱ፡ ነቢይ።
11 ከመ፡ ኢይስሐቱ፡ እንከ፡ ቤተ፡ እስራኤል፡ እምኔየ፡ ወከመ፡ ኢይርኰሱ፡ እንከ፡ በኵሉ፡ ጌጋዮሙ፡ ወይከውኑኒ፡ ሕዝብየ፡ ወአነሂ፡ እከውኖሙ፡ አምላኮሙ፡ ይቤ፡ አዶናይ፡ እግዚአብሔር።
12 ወነበበኒ፡ እግዚአብሔር፡ ወይቤለኒ።
13 ወልደ፡ እጓለ፡ እመሕያው፣፡ ምድር፡ እመ፡ አበሰት፡ ሊተ፡ ወስሕተት፡ ወጌገየት፡ አነሥእ፡ እዴየ፡ ላዕሌሃ፡ ወእቀጠቅጥ፡ ኃይለ፡ እክል፡ ወእፌኑ፡ ላዕሌሃ፡ ረኃበ፡ ወአጠፍእ፡ እምኔሃ፡ ሰብአ፡ ወእንስሳ።
14 ወለእመ፡ ሀለዉ፡ እሉ፡ ፫ዕደው፡ ማእከላ፡ ኖኅ፡ ወዳንኤል፡ ወወኢዮብ፡ እሙንቱ፡ በጽድቆሙ፡ ያድኅኑ፡ ነፍሶሙ፡ ይቤ፡ አዶናይ፡ እግዚአብሔር።
15 ወለእመኒ፡ አርዌ፡ እኩየ፡ ፈኖኩ፡ ላዕሌሃ፡ ለይእቲ፡ ምድር፡ ወቀሠፍክዋ፡ ወአጠፍኣ፡ ወኢይተርፍ፡ ዘያንሶሱ፡ ቅድመ፡ ውእቱ፡ አርዌ።
16 ወሀለዉ፡ እሉ፡ ፫ዕደው፡ ማእከላ፣፡ ሕያው፡ አነ፡ ይቤ፡ አዶናይ፡ እግዚአብሔር፡ ከመ፡ ኢያድኅኑ፡ ደቂቆሙ፡ ወአዋልዲሆሙ፡ ዘእንበለ፡ ባሕቲቶሙ፡ ዘይድኅኑ፣፡ ወይጠፍእ፡ ይእቲ፡ ምድር።
17 ወእመኒ፡ ኲናተ፡ ፈኖኩ፡ ዲቤሃ፡ ለይእቲ፡ ምድር፡ ወአዘዝኩ፡ ትምጻእ፡ ላዕለ፡ ይእቲ፡ ምድር፡ ኲናተ፡ ወአጥፋእኩ፡ ሰብአ፡ ወእንስሳ።
18 ወሀለዉ፡ እሉ፡ ፫፡ ዕደው፡ ማእከላ፣፡ ሕያው፡ አነ፡ ይቤ፡ አዶናይ፡ እግዚአብሔር፣፡ ከመ፡ ኢያድኅኑ፡ ደቂቆሙ፡ ወአዋልዲሆሙ፡ ዘእንበለ፡ ባሕቲቶሙ፡ ዘይድኅኑ።
19 ወለእመኒ፡ ብድብደ፡ ፈኖኩ፡ ላዕለ፡ ውእቱ፡ ብሔር፡ ወከዐውኩ፡ መዐትየ፡ ላዕሌሆሙ፡ በደም፡ ከመ፡ አጥፍእ፡ እምኔሃ፡ ሰብአ፡ ወእንስሳ።
20 ወሀለዉ፡ ኖኅ፡ ወዳንኤል፡ ወኢዮብ፡ ማእከላ፣፡ ሕያው፡ አነ፡ ይቤ፡ አዶናይ፡ እግዚአብሔር፡ ከመ፡ ኢያድኅኑ፡ ደቂቆሙ፡ ወአዋልዲሆሙ፡ ዘእንበለ፡ ባሕቲቶሙ፡ እሙንቱ፡ ዳእሙ፡ ያድኅኑ፡ ነፍሶሙ፡ በጽድቆሙ።
21 ከመዝ፡ ይቤ፡ እግዚአብሔር፡ አዶናይ፡ ወእመኒ፡ ፬መቅሠፍተ፡ እኩያነ፡ ፈኖኩ፣፡ ኲናተ፡ ወረኀበ፡ ወብድብደ፡ ወአርዌ፡ እኩየ፡ ፈኖኩ፡ ላዕለ፡ ኢየሩሳሌም፡ ከመ፡ አጥፍእ፡ እምኔሃ፡ ሰብአ፡ ወእንስሳ።
22 ወተርፉ፡ ውስቴታ፡ እለ፡ ድኅኑ፡ እምኔሃ፣፡ እለ፡ ያወፅኡ፡ ደቂቀ፡ ወአዋልደ፡ ወይወፅኡ፡ ኀቤክሙ፡ ወትሬእዩ፡ ፍናዊሆሙ፡ ወምግባሪሆሙ፡ ወትኔስሑ፡ በእንተ፡ እኪት፡ ዘአመጽእ፡ ላእለ፡ ኢየሩሳሌም፡ ወኵሉ፡ እኩይ፡ ዘአመጽእ፡ ላዕሌሃ።
23 ወይናዝዙክሙ፡ ሶበ፡ ትሬእዩ፡ ፍናዊሆሙ፡ ወምግባሪሆሙ፣፡ ወተአምሩ፡ ከመ፡ አኮ፡ ለከንቱ፡ ዘገበርኩ፡ ኵሎ፡ ዘረሰይክዋ፡ ይቤ፡ አዶናይ፡ እግዚአብሔር።
=== chapter 15 ===
[Chapter 15]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፣፡ ምንተ፡ ይከውን፡ ዕፀ፡ ወይን፡ እምኵሉ፡ አዕጹቀ፡ ዕፀወ፡ ገዳም።
3 ይነሥኡኑ፡ ምውስቴቱ፡ ዕፀ፡ ዘይሬስዩ፡ ለመልእክት፡ ወይነሥኡኑ፡ እምውስቴቱ፡ ለመትከል፡ በዘይሰቅሉ፡ ቦቱ፡ ኵሎ፡ ንዋየ።
4 ዘእንበለ፡ ዳእሙ፡ ለእሳት፡ ይትወሀብ፡ ዘያነድዱ፡ ዘመልዕልተ፡ ፪ጽነፊሁ፡ ዘያኀልቆ፡ እሳት፡ ወየሐምድ፡ ለዝላፉ። ቦሁ፡ ዘይበቍዕ፡ ለምግባር።
5 ወኢበግዘፊሁ፡ ኢይከውን፡ ለምግባር፣፡ ዘእንበለ፡ ዳእሙ፡ ለእሳት፡ ዘይበልዕ፡ ወይጠፍእ፡ ይከውንሁ፡ እንከ፡ ለምግባር።
6 በበይነ፡ ዝንቱ፡ በሎሙ፡ ከመዝ፡ ይቤ፡ እግዚአብሔር፡ አዶናይ፡ ከመ፡ ዕፀ፡ ወይን፡ እምውስተ፡ ዕፀ፡ ገዳም፡ ዘረሰይክዎ፡ ለእሳት፡ ዘያነድዱ፣፡ ከማሁ፡ ረሰይክዎሙ፡ ለእለ፡ ይነብሩ፡ ኢየሩሳሌም።
7 ወአጸንዕ፡ ገጽየ፡ ላዕሌሆሙ፡ ይወፅኡ፡ እምእሳት፡ ወእሳት፡ ትበልዖሙ፣፡ ወተአምሩ፡ ከመ፡ አነ፡ ውእቱ፡ እግዚአብሔር፡ ሶበ፡ አጽናዕኩ፡ ገጽየ፡ ላዕሌሆሙ።
8 ወአጠፍኣ፡ ለምድር፡ እስመ፡ ጌገዩ፡ ጌጋየ፡ ይቤ፡ አዶናይ፡ እግዚአብሔር።
=== chapter 16 ===
[Chapter 16]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ አስምዕ፡ ላቲ፡ ለኢየሩሳሌም፡ ኃጢአታ።
3 ወበላ፡ ከመዝ፡ ይቤ፡ አዶናይ፡ እግዚአብሔር፡ ለኢየሩሳሌም፡ ሥርውኪ፡ ወዘመድኪ፡ እምድረ፡ ከነዓን፡ አቡኪ፡ አሞሬዎን፡ ወእምኪ፡ ኬጥያ።
4 ወአመ፡ ወለዱኪ፡ ኢጸመሙ፡ አጥባተኪ፡ ወበማይ፡ ኢሐፀቡኪ፡ ወበጼው፡ ኢሮቱኪ፡ ወውስተ፡ ሕፅን፡ ኢሐፀኑኪ።
5 ወኢመሐከተኪ፡ ዐይንየ፡ ከመ፡ እግበር፡ ላዕሌኪ፡ አሐተ፡ እምእላንቱ፡ ኵሎን፡ ኢመሐኩኪ። ወገደፉኪ፡ ውስተ፡ ገጸ፡ ገዳም፡ ወተጽዕረት፡ ነፍስኪ፡ እምአመ፡ ወለዱኪ።
6 ወኀለፍኩ፡ እንተ፡ ኀቤኪ፡ ወርኢኩኪ፡ ትሰክቢ፡ ውስተ፡ ደምኪ፡ ወእቤለኪ፡ እምደምኪ፡ ሕየዊ።
7 ወብዝኂ፡ ወረሰይኩኪ፡ ሠርፀ፡ ገዳም፡ ወልህቂ፡ ወዐበይኪ፡ ወቦእኪ፡ ውስተ፡ አህጉረ፡ አህጉር። ወልህቀ፡ አጥባትኪ፡ ወበዝኀ፡ ሥዕርትኪ፡ ወኮንኪ፡ ብእሲተ፡ ወኮንኪ፡ ዕርቅተ፡ ወተኀፍሪ።
8 ወኀለፍኩ፡ እንተ፡ ኀቤኪ፡ ወርኢኩኪ፡ ከመ፡ በጽሐ፡ ጊዜኪ፡ ወጊዜ፡ እለ፡ የኀድሩ፡ ውስቴትኪ። ወሰፋሕኩ፡ እደውየ፡ ላዕሌኪ፡ ወከደንኩ፡ ኃፍረተኪ፡ ወመሐልኩ፡ ለኪ፡ ወቦእኩ፡ ኀቤኪ፡ በሕግ፡ ይቤ፡ አዶናይ፡ እግዚአብሔር። ወኮንኪ፡ ሊተ።
9 ወሐፀብኩኪ፡ በማይ፡ ወሐፀብኩ፡ ደመኪ፡ ወቀባእኩኪ፡ ቅብአ።
10 ወአልበስኩኪ፡ ዓስቀ፡ ወወሀብኩኪ፡ አሣእነ፡ ጸሊመ፡ ወሜላተ፡ ወሲራየ።
11 ወአሠርጎኩኪ፡ ሠርጐ፡ ወወደይኩ፡ አውቃፋተ፡ ውስተ፡ እደውኪ፡ ወባዝግና፡ ውስተ፡ ክሳድኪ።
12 ወአእኑገ፡ ውስተ፡ እዘንኪ፡ ወአክሊለ፡ ምክሕ፡ ውስተ፡ ርእስኪ።
13 ወአሠርጎኩኪ፡ ወርቀ፡ ወብሩረ፡ ወመዋጥሐኪ፡ ሜላተ፡ ወሲራየ፡ ወዓስቀ። ወኀረስኩኪ፡ በስንዳሌ፡ ወመዐረ፡ ወቅብአ፡ ተሴሰይኪ፡ ወበላዕኪ፡ ወሰባሕኪ፡ ወሠነይኪ፡ ጥቀ፡ ፈድፋደ፣፡ ወረሰይኩኪ፡ ድሉተ፡ ለመንግሥት።
14 ወተሰምዐ፡ ስምኪ፡ ውስተ፡ ኵሉ፡ አሕዛብ፡ ወሠነይኪ፡ እስመ፡ ፍጹም፡ ውእቱ፡ ላህይኪ፡ ዘረሰይኩ፡ ለኪ፡ ሥንኪ፡ ይቤ፡ አዶናይ፡ እግዚአብሔር።
15 ወተወከልኪ፡ በሥንኪ፡ ወዘመውኪ፡ በስምኪ፡ ወአፈድፈድኪ፡ ዝሙተኪ፡ በኵሉ፡ ኃላፌ፡ ፍኖት።
16 ወነሣእኪ፡ እምልብስኪ፡ ወገበርኪ፡ ለኪ፡ አማልክተ፡ ርፍዕ፡ ወዘመውኪ፡ ቦሙ፣፡ ወኢቦእኪ፡ ወኢይከውንሂ፡ እንከ።
17 ወነሣእኪ፡ ሠርጐ፡ ምክሕኪ፡ ወርቅየ፡ ወብሩርየ፡ ዘወሀብኩኪ፡ ወገበርኪ፡ አምሳለ፡ ዕደው፡ ወዘመውኪ፡ ቦሙ።
18 ወነሣእኪ፡ አልባሰ፡ ዓስቅ፡ ወአልበስኪዮሙ፡ ወቅብእየ፡ ወዕጣንየ፡ አንበርኪ፡ ቅድመ፡ ገጾሙ።
19 ወእክልየ፡ ዘሴሰይኩኪ፡ ስንዳሌ፡ ወቅብአ፡ ወመዐረ፡ ዘአብላዕኩኪ፡ ሠራዕኪ፡ ቅድሜሆሙ፡ ለመዐዛ፡ ሠናይ።
20 ወእምዝ፡ ይቤ፡ አዶናይ፡ እግዚአብሔር፡ ነሣእኪ፡ አዋልደኪ፡ ወደቂቀኪ፡ ዘወለድኪ፡ ሊተ፡ ወሦዕኪ፡ ሎሙ፡ ወቀተልኪዮሙ።
21 ታስተንእሲኑ፡ ዘዘመውኪ፡ ወሦዕኪ፡ ደቂቅየ፡ ወአባእኪ፡ ሎሙ።
22 ዝንቱ፡ እኩይ፡ እምኵሉ፡ ዝሙትኪ፡ ወርኵስኪ፡ ወኢተዘከርኪ፡ መዋዕለ፡ ንእስኪ፡ አመ፡ ዕራቅኪ፡ አንቲ፡ ወተኀፍሪ፡ ወጽንቅቅት፡ አንቲ፡ በደምኪ፡ ሐዮኪ።
23 ወእምዝ፡ እምድኅረ፡ ኵሉ፡ እከይኪ፡ አሌ፡ ለኪ፡ አሌ፡ ለኪ፡ ይቤ፡ አዶናይ፡ እግዚአብሔር።
24 ሐነጽኪ፡ ለኪ፡ ቤተ፡ ኀበ፡ ትዜምዊ፡ ወገበርኪ፡ ለኪ፡ መንበረ፡ ውስተ፡ ኵሉ፡ መርሕብ።
25 ወውስተ፡ ኵሉ፡ ርእሰ፡ ፍኖት፡ ሐነጽኪ፡ ለኪ፡ ኀበ፡ ትዜምዊ፣፡ ወአርኰስኪ፡ ሥነኪ፡ ወቀፈጽኪ፡ አቍያጸኪ፡ ለኵሉ፡ ኃላፌ፡ ፍኖት፡ ወአብዛኅኪ፡ ዝሙተኪ።
26 ወዘመውኪ፡ በደቂቀ፡ ግብጽ፡ ቅሩባንኪ፡ እለ፡ ዓቢይ፡ ነፍስቶሙ፣፡ ወዘልፈ፡ ትዜምዊ፡ ምስሌሆሙ፡ ወአቅናእክኒ።
27 ወአነሥእ፡ እዴየ፡ ላዕሌኪ፡ ወእሥዕር፡ ሕገኪ፡ ወእሜጥወኪ፡ ለነፍሰ፡ ጸላእትኪ፣፡ አዋልደ፡ ኢሎፍሊ፡ እለ፡ ሜጣኪ፡ እምፍኖትኪ፡ ወአስሐታኪ።
28 ወዘመውኪ፡ ፈድፋደ፡ ኀበ፡ ደቂቀ፡ አሶር፣፡ ወምስለ፡ ከመዝ፡ ዓዲ፡ ኢጸገብኪ፡ ወኢአከለኪ፡ ዝሙትኪ።
29 ወአብዛኅኪ፡ ዝሙተኪ፡ ኀበ፡ ምድረ፡ ከነዓን፡ ወከላውዴዎን፣፡ ወምስለ፡ ከመዝ፡ ዓዲ፡ ኢጸገብኪ።
30 ምንተ፡ እሬስዮን፡ ለአዋልድኪ፡ ይቤ፡ እግዚአብሔር፡ አዶናይ፡ እስመ፡ ገበርኪ፡ ኵሎ፡ ዘንተ፡ ግብረ፡ ብእሲት፡ ዘማ፡ ወዘመውኪ፡ ትሥልስተ፡ ምስለ፡ አዋልድኪ።
31 ወሐነጽኪ፡ ኀበ፡ ትዜምዊ፡ ውስተ፡ ርእሰ፡ ኵሉ፡ ፍኖት፡ ወገበርኪ፡ ምንባራተኪ፡ ውስተ፡ ኵሉ፡ መርሕብ። ወከመ፡ ዘማኒ፡ ኢኮንኪ፡ አንቲ፡ እንተ፡ ታስተጋብእ፡ ደነሰ።
32 ተመሰልኪ፡ ብእሲተ፡ እንተ፡ ትነሥእ፡ ሀብሀበ፡ በውስተ፡ ምታ።
33 ወትዴንሶሙ፡ ለመሐዛኒሃ፡ እለ፡ ትዜሙ፡ ምስሌሆሙ። ወአንቲሰ፡ ወሀብኪ፡ ደነሰኪ፡ ለኵሎሙ፡ መሐዛንኪ፡ ወአሐለይኪዮሙ፡ ይምጽኡ፡ ኀቤኪ፡ ወይመግቡኪ፡ በዝሙትኪ።
34 ወፈድፋደ፡ ተገፍትዐ፡ ዝሙትኪ፡ እምኵሉ፡ አንስት፡ እለ፡ ዘመዋ፡ ምስሌኪ፡ እስመ፡ ደነስኪ፡ ወኢያደነሱኪ፡ ወኮንኪ፡ አንቲ፡ ዕሉተ፡ ወአፍለቂ።
35 በበይነ፡ ዝንቱ፡ ስምዒ፡ ዘማ፡ ቃለ፡ እግዚአብሔር።
36 ከመዝ፡ ይቤ፡ አዶናይ፡ እግዚአብሔር፡ እስመ፡ ዘሮኪ፡ ወርቅየ፡ ወቀፈጽኪ፡ ኃፍረተኪ፡ በዝሙትኪ፡ ለመሐዛንኪ፡ በኵሉ፡ ፍትወተ፡ ኃጢአትኪ፡ ወበደመ፡ ደቂቅኪ፡ ዘወሀብኪዮሙ።
37 በበይነ፡ ዝንቱ፡ ናሁ፡ አነ፡ አስተጋብኦሙ፡ ለኵሎሙ፡ መሐዛንኪ፡ ላዕሌኪ፡ እለ፡ ተደመርኪ፡ ምስሌሆሙ፣፡ ወለኵሎሙ፡ እለ፡ አፍቀርኪዮሙ፡ ምስለ፡ ኵሉ፡ እለ፡ ጸላእኪዮሙ። ወአስተጋብኦሙ፡ ላዕሌኪ፡ ወየዐግቱኪ፣፡ ወእቀፍጽ፡ ኃሣረኪ፡ በቅድሜሆሙ፡ ወይሬእዩኪ፡ ኵሎሙ፡ ኃፍረተኪ።
38 ወእትቤቀለኪ፡ በቀለ፡ ዘማት፡ ወእለ፡ ይቀትላ፡ ነፍሰ፣፡ ወአነብረኪ፡ ውስተ፡ ደመ፡ መዓት፡ ወቅንአት።
39 ወእሜጥወኪ፡ ውስተ፡ እደዊሆሙ፡ ወያንኅሉ፡ ቤተ፡ ዝሙትኪ፡ ወይነሥቱ፡ መናብርተኪ፡ ወይሰልቡኪ፡ አልባሰኪ፡ ወሠርጐ፡ ምክሕኪ፣፡ ወየኀድጉኪ፡ ዕራቀኪ፡ ወተኀሥሪ።
40 ወይትጋብኡ፡ አሕዛብ፡ ላዕሌኪ፡ ወይዌግሩኪ፡ በእብን፡ ወይረግዙኪ፡ በመጣብሒሆሙ።
41 ወያውዕዩ፡ በእሳት፡ አብያተኪ፡ ወይትቤቀሉኪ፡ በቅድመ፡ ብዙኃት፡ አንስት። ወአኀደገኪ፡ ዝሙተኪ፡ ወኢትዴንሲ፡ እንከ።
42 ወእፌኑ፡ መዐትየ፡ ላዕሌኪ፡ ወአነፍስ፡ ቅንአትየ፡ እምኔኪ፡ ወአዐርፍ፡ ወኢይሔልየኪ፡ እንከ።
43 እስመ፡ ኢተዘከርኪ፡ መዋዕለ፡ ንእስኪ፡ ወአቅናእክኒ፡ በኵሉ፡ ዝንቱ። ወአነ፡ አገብእ፡ ፍኖተኪ፡ ዲበ፡ ርእስኪ፡ ይቤ፡ አዶናይ፡ እግዚአብሔር፡ ወከመዝ፡ ገበርኪ፡ ኃጢአተ፡ ዲበ፡ ኵሉ፡ ጌጋይኪ።
44 ዝንቱ፡ ውእቱ፡ ኵሉ፡ ዘነበቡ፡ ላዕሌኪ፡ ወመሰሉ፡ ወይቤሉ፡ በከመ፡ እም፡ ከማሁ፡ ወለታ።
45 ወለተ፡ እምኪ፡ አንቲ፡ እንተ፡ ጸግበቶ፡ ለምታ፡ ወለደቂቃኒ፡ ወእኅተ፡ አኃትኪ፡ እለ፡ ኀደጋ፡ እምታቲሆን፡ ወውሉዶን። እምክንሂ፡ ኬጥያ፡ ወአቡክን፡ አሞሬዎን።
46 ወእኅትክን፡ እንተ፡ ትልህቅ፡ ሰማርያ፡ ይእትኒ፡ ወአዋልዲሃኒ፡ እለ፡ ይነብራ፡ በፅግምክን፡ ወእኅትክን፡ እንተ፡ ትንእስ፡ እንተ፡ ትነብር፡ በይምንክን፡ ሰዶም፡ ወአዋልዲሃኒ።
47 ወበፍኖቶንሂ፡ ኢሖርኪ፡ ወበከመ፡ ኃጢአቶንሂ፡ ኢገበርኪ፡ ንስቲተ፡ ወአፈድፈድኪ፡ በኵሉ፡ ፍኖትኪ።
48 ሕያው፡ አነ፡ ይቤ፡ አዶናይ፡ እግዚአብሔር፡ ከመ፡ ኢገብረት፡ ሰዶም፡ እኅጥኪ፡ ወአዋልዲሃ፡ በከመ፡ ገበርኪ፡ አንቲ፡ ወአዋልድኪ።
49 ዘእንበለ፡ ዝንቱ፡ ዳእሙ፡ ኃጢአታ፡ ለሰዶም፡ እኅትኪ፡ ተዝኅረት፡ ወከረያ፡ ጽጋብ፡ ወፈግዐት፡ በጽጋብ፡ ምስለ፡ አዋልዲሃ፡ ዘንተ፡ ዳእሙ፡ ገብረት፡ ይእቲኒ፡ ወአዋልዲሃኒ፣፡ ወኢተወክፋ፡ እደ፡ ነዳይ፡ ወምስኪን።
50 ወአዕበዩ፡ አፉሆሙ፡ ወገብሩ፡ ኃጢአቶሙ፡ በቅድሜየ፣፡ ወአእተትክዎሙ፡ ዘከመ፡ ርኢኩ።
51 ወሰማርያ፡ መንፈቀ፡ ኃጢአትኪ፡ ኢአበሰት፡ ወአፈድፈድኪ፡ ኃጢአተኪ፡ እምኔሆን፡ ወአጽደቂዮን፡ ለአኃትኪ፡ በኵሉ፡ ኃጢአትኪ፡ ዘገበርኪ።
52 ወአንቲ፡ ትትፈደዪ፡ ሞተኪ፡ በዘመራዕኪዮን፡ ለአኃትኪ፡ በኃጢአትኪ፡ ዘአበስኪ፡ ፈድፋደ፡ እምኔሆን፡ ወአጽደቂዮን፡ እምኔኪ። ወአንቲ፡ ተኀፍሪ፡ ወንሥኢ፡ ኃሣረኪ፡ እስመ፡ አጽደቂዮን፡ ለአኃትኪ።
53 ወእመይጥ፡ እከዮን፣፡ እከየ፡ ሰዶም፡ ወአዋልዲሃ። ወእመይጥ፡ እከየ፡ ሰማርያ፡ ወአዋልዲሃ፣፡ ወእመይጥ፡ እከየኪ፡ እማእከሎን።
54 ከመ፡ ትትፈደዪ፡ መቅሠፍተኪ፡ ወተኀሥሪ፡ በኵሉ፡ ምግባርኪ፡ ዘአምዐዕክኒ።
55 ወአኃትኪኒ፡ ሰዶም፡ ወአዋልዲሃኒ፡ ይገብኣ፡ ከመ፡ ቀዲሙ፡ ወሰማርያ፡ ወአዋልዲሃ፡ ወአንቲኒ፡ ወአዋልድኪኒ፡ ትገብኣ፡ ከመ፡ ቀዲሙ።
56 እስመ፡ ሰዶም፡ እኅጥኪ፡ ሰምዐት፡ እምአፉኪ፡ በመዋዕለ፡ ትዝኅርትኪ።
57 ዘእንበለ፡ ይትከሠት፡ እከይኪ፡ በከመ፡ ይእዜ፡ ጽዕልተ፡ ኮንኪ፡ ለአዋልደ፡ ሶርያ፡ ወለኵሎን፡ እለ፡ ዐውዳ፡ አዋልደ፡ ኢሎፍሊ፡ እለ፡ ዐገታኪ፡ ዐውደኪ።
58 በኃጢአትኪ፡ ወበጌጋይኪ፡ በዘአንቲ፡ መሀርኪዮን፡ ይቤ፡ አዶናይ፡ እግዚአብሔር።
59 ከመዝ፡ ይቤ፡ አዶናይ፡ እግዚአብሔር፣፡ ወእገብር፡ ላዕሌኪ፡ በከመ፡ ገበርኪ፡ ወዐሎኪ፡ ሥርዓትየ።
60 ወእዜከር፡ አነ፡ ኪዳንየ፡ ዘምስሌኪ፡ ዘአመ፡ ንእስኪ፡ ወአቀውም፡ ለኪ፡ ኪዳነ፡ ዘለዓለም።
61 ወትዜከሪ፡ ፍኖተኪ፡ ወተኀሥሪ፡ እስመ፡ አሕየስኪዮን፡ ለአኃትኪ፡ እለ፡ ይልህቃኪ፡ ወእለሂ፡ ይንእሳኪ፡ ወረሰይኪዮን፡ አዋልደኪ፡ ወአኮ፡ ከመ፡ ሥርዓትኪ።
62 ወአቀውም፡ አነ፡ ኪዳንየ፡ ምስሌኪ፡ ወተአምሪ፡ ከመ፡ አነ፡ እግዚአብሔር።
63 ወትዜከሪ፡ ወትትኀፈሪ፣፡ ወኢትከሥቲ፡ እንከ፡ አፊኪ፡ በቅድመ፡ ኃሣርኪ፡ አመ፡ አኅደጉኪ፡ ኵሎ፡ ምግባረኪ፡ ይቤ፡ አዶናይ፡ እግዚአብሔር።
=== chapter 17 ===
[Chapter 17]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ መስል፡ ምሳሌ፡ ነገር፡ ለቤተ፡ እስራኤል።
3 ወበሎሙ፡ ከመዝ፡ ይቤ፡ አዶናይ፡ እግዚአብሔር፡ ዝኩአ፡ ንስር፡ ዓቢይአ፡ ዘዓቢይ፡ ክነፊሁ፡ ወምሉእ፡ ጽፈሪሁ፡ ቦአ፡ ውስተ፡ ሊባኖስ፡ ወነሥአ፡ ኅሩየ፡ ቄድሮስ።
4 ወመተሮ፡ ማእከሎ፡ ኀበ፡ ለምለሙ፡ ወወሰዶ፡ ብሔረ፡ ከነዓን፡ ወአንበሮ፡ ውስተ፡ ሀገረ፡ ጥቅም።
5 ወነሥአ፡ እምዘርአ፡ ምድር፡ ወዘርአ፡ ውስተ፡ ገዳም፣፡ ወአብቈለ፡ ኀበ፡ ማይ፡ ብዙኅ፣፡ ወአንበሮ፡ ከመ፡ ያስተርኢ።
6 ወበቈለ፡ ወኮነ፡ ዐጸደ፡ ወይን፡ ዕቡረ፡ ወንስቲተ፡ ርእየ፡ አዕጹቂሁ፡ ወጕንዱሂ፡ ዘታሕቴሁ። ወኮነ፡ ዐጸደ፡ ወይን፡ ወገብረ፡ አዕጹቂሁ፡ ወአንኀ፡ ዐዕጹቂሁ።
7 ወመጽአ፡ ካልእ፡ ንስር፡ ዓቢይ፡ ዘየዐቢ፡ ክነፊሁ፡ ወብዙኅ፡ ጽፈሪሁ፡ ወተፀፍረ፡ ቦቱ፡ ዝኩ፡ ዐጸደ፡ ወይን፡ ወጕንዱሂ፡ ኀቤሁ፣፡ ወአዕጹቂሁኒ፡ ፈነዎ፡ ይስቅዮ፡ ምስለ፡ ተክሉ።
8 በገዳም፡ ናይ፡ በኀበ፡ ማይ፡ ብዙኅ፡ ወተሰቅየት፡ ከመ፡ ትሥርፅ፡ ወትፍረይ፡ ወትኩን፡ ዐጸደ፡ ወይን፡ ዓቢየ።
9 በበይነ፡ ዝንቱ፡ በል፡ ከመዝ፡ ይቤ፡ አዶናይ፡ እግዚአብሔር፡ ለእመ፡ ይረትዕ፡ ይየብስ፡ ወይነቅዝ፡ ፍሬሁ፡ ወይየብስ፡ ኵሉ፡ ዘበቈለ፡ ውስቴቱ፡ ወአኮ፡ በመዝራዕት፡ ዓቢይ፡ ወአኮ፡ በሕዝብ፡ ብዙኅ፡ ከመ፡ እምልሓ፡ ምስለ፡ ሥረዊሃ።
10 ወናሁ፡ ትነውኅ። ወኢትረትዕ፡ ወእምከመ፡ ረከባ፡ ነፋስ፡ ውዑይ፡ ትየብስ፡ ወተሐርር።
11 ወነበበኒ፡ እግዚአብሔር፡ ወይቤለኒ።
12 ወልደ፡ እጓለ፡ እመሕያው፡ በሎሙ፡ ለቤተ፡ እስራኤል፡ እለ፡ አምረሩኒ፡ ኢተአምሩኑአ፡ ምንትኑ፡ ዝንቱ፡ ወበሎሙ፡ ናሁ፡ መጽአ፡ ንጉሠ፡ ባቢሎን፡ ዲበ፡ ኢየሩሳሌም፡ ወፄወዎ፡ ለንጉሣ፡ ወለመላእክቲሃ፡ ወወሰዶሙ፡ ብሔሮ፡ ባቢሎን።
13 ወይነሥእ፡ እምውሉደ፡ መንግሥት፡ ወይትካየድ፡ ኪዳነ፡ ምስሌሁ፡ ወያበውኦ፡ ውስተ፡ መሐላ፡ ወይነሥኦሙ፡ ለመሳፍንተ፡ ብሔር።
14 ወያነብሮሙ፡ ውስተ፡ መንግሥት፡ ድኩም፡ ከመ፡ ኢይትዐበዩ፡ እንከ፡ ለዝሉፉ፡ ከመ፡ ይዕቀቡ፡ መሐላሆሙ፡ ወይግበሩ።
15 ወይርኀቅ፡ እምኔሁ፡ ወፈነወ፡ ሐዋርያተ፡ ብሔረ፡ ግብጽ፡ ከመ፡ የሀብዎ፡ አፍራሰ፡ ወሠራዊተ፡ ብዙኀ። ለእመ፡ ይድኅንሁ፡ ወይመውእ፡ ዘአፅረረ፡ ወገብረ፡ ማዕሌተ፡ ይድኅንሁ፡ ዘዐለወ፡ መሐላሁ።
16 ሕያው፡ አነ፡ ይቤ፡ አዶናይ፡ እግዚአብሔር፡ ከመ፡ በብሔረ፡ ንጉሦሙ፡ ዘአንገሡ፡ ዘአስተሐቀረ፡ መሐላየ፡ ወዐለወ፡ ኪዳንየ፡ ምስሌሁ፡ በማእከለ፡ ባቢሎን፡ ይመውት።
17 ወአኮ፡ በኃይል፡ ዓቢይ፡ ወአኮ፡ በብዙኅ፡ አሕዛብ፡ ዘይገብር፡ ምስሌሁ፡ ፈርዖን፡ ቀትለ፡ በሐፁር፡ ወበጥቅም፡ ከመ፡ ይትአተት፡ ነፍስ።
18 ወአስተሐቀረ፡ መሐላሁ፡ ወዐለወ፡ ኪዳኖ። ወናሁ፡ ወጠውኩ፡ እዴሁ፡ ወኵሎ፡ ዘንተ፡ ገብረ፡ ላዕሌሁ፡ በዘኢይድኅን።
19 በበይነ፡ ዝንቱ፡ በሎሙ፡ ከመዝ፡ ይቤ፡ አዶናይ፡ እግዚአብሔር፡ ሕያው፡ አነ፣፡ በከመ፡ አስተሐቀረ፡ መሐላየ፡ ወዐለወ፡ ኪዳንየ፡ ከማሁ፡ አገብእ፡ ላዕለ፡ ድማሁ።
20 ወእሰፍሕ፡ ላዕሌሁ፡ መሥገርትየ፡ ወይሠገር፡ በውስተ፡ ሐፁርየ። ወእወስዶ፡ ባቢሎን፡ ወእትዋቀሥ፡ ምስሌሁ፡ በህየ፡ በእንተ፡ ጌጋዩ፡ ዘዐመፀኒ።
21 ወኵሎሙ፡ እለ፡ እምሠጡ፡ በኵናት፡ ይመውቱ፡ ወለእለ፡ ተርፉ፡ እዘርዎሙ፡ ውስተ፡ ኵሉ፡ ነፋሳት፡ ወየአምሩ፡ ከመ፡ አነ፡ ውእቱ፡ እግዚአብሔር፡ ዘነበብኩ።
22 ከመዝ፡ ይቤ፡ አዶናይ፡ እግዚአብሔር፡ አነሥእ፡ አነ፡ እምውስተ፡ ኅሩይ፡ አርዝ፡ እምውስተ፡ ርእሱ፡ ወእሁብ፡ እምርእሱ፡ ሠርፀ፡ ወልበ፡ ወእተክል፡ አነ፡ ወአበቍል፡ ውስተ፡ ደብር፡ ነዋኅ።
23 ወእተክሎ፡ ውስተ፡ ደብረ፡ እስራኤል፡ ልዑል፣፡ ወእተክል፡ ወይፈሪ፡ ወይገብር፡ አዕጹቂሁ፡ ጽጌ፡ ወይከውን፡ አርዘ፡ ዓቢየ። ወየዐርፍ፡ ታሕቴሁ፡ ኵሉ፡ አዕዋፍ፡ ወኵሉ፡ ዘይሰርር፡ ያጸልል፡ ራሕተ፡ አዕጹቂሁ።
24 ወየአምር፡ ኵሉ፡ ዕፀወ፡ ገዳም፡ ከመ፡ አነ፡ እግዚአብሔር፡ ዘአኀፅሮ፡ ለዕፅ፡ ነዋኅ፡ ወአነውኆ፡ ለዕፅ፡ ኃፂር፣፡ ወአየብስ፡ ዕፅ፡ ርጡበ፡ ወአረጥብ፡ ዕፀ፡ ይቡሰ። አነ፡ እግዚአብሔር፡ ዘነበብኩ፡ ወገበርኩ።
=== chapter 18 ===
[Chapter 18]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ ምንት፡ በኀቤክሙ፡ ዝንቱ፡ ምሳሌ፡ ዘይብሉ፡ ደቂቀ፡ እስራኤል፡ አበው፡ በልዑ፡ ቆዓ፡ ወደቂቅ፡ ፀርሱ፡ ስነኒሆሙ።
3 ሕያው፡ አነ፡ ይቤ፡ እግዚአብሔር፡ አዶናይ፡ ከመ፡ ኢይብልዋ፡ ዳግመ፡ ለዛቲ፡ ምሳሌ፡ በውስተ፡ እስራኤል።
4 እስመ፡ ነፍሰ፡ ኵሉ፡ ዚአየ፡ ውእቱ፡ ከመ፡ ነፍሰ፡ አብ፡ ከማሁ፡ ነፍሰ፡ ውሉድ፡ ዚአየ፡ ውእቱ። ነፍስ፡ እንተ፡ አበሰት፡ ይእቲ፡ ትመውት።
5 ወብእሲሰ፡ ጻድቅ፡ ዘይገብር፡ ጽድቀ፡ ወርትዓ።
6 ወኢበልዐ፡ በውስተ፡ አድባር፡ ወኢያንሥአ፡ አዕይንቲሁ፡ ኀበ፡ ሕሊናሆሙ፡ ለቤተ፡ እስራኤል፣፡ ወኢያርኰሰ፡ ብእሲተ፡ ቢጹ፡ ወኢቀርበ፡ ብእሲተ፡ ትክት።
7 ወኢዐመፀ፡ ቢጾ፡ ወአግብአ፡ አኅዘ፡ ዕዳሁ፡ ወኢሄደ፡ ወኢተዐገለ፡ ወወሀበ፡ እምእክሉ፡ ለነዳይ፡ ወአልበሰ፡ እምልብሱ፡ ለዕሩቅ።
8 ወኢለቅሐ፡ ወርቆ፡ በርዴ፡ ወኢነሥአ፡ ዘዓመፃ፡ ወሜጠ፡ እዴሁ፡ እምኃጢአት፣፡ ወገብረ፡ ፍትሐ፡ ወጽድቀ፡ ማእከለ፡ ብእሲ፡ ወቢጹ።
9 ወሖረ፡ በትእዛዝየ፡ ወዐቀበ፡ ሕግየ፡ ወገብረ፡ ጽድቀ፡ ጻድቅ፡ ውእቱ፣፡ ሕይወተ፡ የሐዩ፡ ይቤ፡ አዶናይ፡ እግዚአብሔር።
10 ወለእመ፡ ወለደ፡ ወልደ፡ ኃጥአ፡ ወቀታሌ፡ ነፍስ፡ ዘይገብር፡ ዓመፃ።
11 ወኢሖረ፡ በፍኖተ፡ አቡሁ፡ ጻድቅ፡ ወበልዐ፡ በውስተ፡ አድባር፡ ወአርኰሰ፡ ብእሲተ፡ ቢጹ።
12 ወተዐገለ፡ ነዳየ፡ ወምስኪነ፡ ወሄደ፡ ወዐመፀ፣፡ ወኢያግብአ፡ አኅዘ፡ ዕዳሁ፡ ወሜጠ፡ አዕይንቲሁ፡ መንገለ፡ ጣዖት፡ ወገብረ፡ ዓመፃ።
13 ወለቅሐ፡ በርዴ፡ ወአስተናድአ፡ (ወነሥአ፡ ዘስርቅ፡ )፡ ዘከመዝ፡ ኢየሐዩ፡ ሕይወተ፡ በኵሉ፡ ዝንቱ፡ ኃጢአቱ፡ ዘገብረ፡ ሞተ፡ ይመውት፡ ወይገብእ፡ ደሙ፡ ላዕሌሁ።
14 ወለእመ፡ ወለደ፡ ወልደ፡ ወርእየ፡ ኵሎ፡ ኃጢአተ፡ አቡሁ፡ ዘገብረ፡ ወፈርሀ፡ ወኢገብረ፡ ከማሁ።
15 ወኢበልዐ፡ ውስተ፡ አድባር፡ ወኢያንሥአ፡ አዕይንቲሁ፡ መንገለ፡ ሕሊናሆሙ፡ ለቤተ፡ እስራኤል፡ ወኢያርኰሰ፡ ብእሲተ፡ ቢጹ።
16 ወኢተዐገለ፡ ሰብአ፡ ወአግብአ፡ አኅዘ፡ ዕዳሁ፡ ወኢያስተናድአ፡ ወኢሄደ፣፡ ወአብልዐ፡ እምእክሉ፡ ለርኁብ፡ ወአልበሰ፡ እምልብሱ፡ ለዕሩቅ።
17 ወሜጠ፡ እዴሁ፡ እምዓመፃ፡ ወኢነሥአ፡ ርዴ፡ ወንዋየ፡ ዓመፃ፡ ወገብረ፡ ጽድቀ፡ ወሖረ፡ በትእዛዝየ፣፡ ኢይመውት፡ በኃጢአተ፡ አቡሁ፡ አላ፡ ሐይወ፡ የሐዩ።
18 ወአቡሁሰ፡ ለእመ፡ ገፍዐ፡ ወዐመፀ፡ ወሄደ፡ ወተዐገለ፡ ወገብረ፡ ዘኢይከውን፡ በማእከለ፡ ሕዝቡ፣፡ ይመውት፡ በጌጋዩ።
19 ወትብሉ፡ በእፎ፡ ኢይትፈደይ፡ ወልድ፡ በኃጢአተ፡ አቡሁ፡ እስመ፡ ገብረ፡ ወልድ፡ ጽድቀ፡ ወምጽዋተ፡ ወዐቀበ፡ ኵሎ፡ ሕግየ፡ ወገብሮ፡ ሕይወተ፡ የሐዩ።
20 ወነፍስ፡ እንተ፡ አበሰት፡ ትመውት፡ ወወልድ፡ ኢይትፈደይ፡ በኃጢአተ፡ አቡሁ፣፡ ወአብ፡ በኃጢአተ፡ ወልድ፡ ኢይትፈደይ። ጽድቁ፡ ለጻድቅ፡ ለርእሱ፡ ወኃጢአቱ፡ ለኃጥእ፡ ላዕሌሁ።
21 ወለእመ፡ ተመይጠ፡ ኃጥእ፡ እምኵሉ፡ ኃቲአቱ፡ ዘገብረ፡ ወዐቀበ፡ ኵሎ፡ ትእዛዝየ፡ ወገብረ፡ ጽድቀ፡ ወምጽዋተ፡ ሕይወተ፡ የሐዩ፡ ወኢይመውት።
22 ወኵሎ፡ ኃጢአቶ፡ ዘገብረ፡ ኢይዜከር፡ ሎቱ፡ ዳእሙ፡ በጽድቁ፡ ዘገብረ፡ የሐዩ፡ ቦቱ።
23 ቦኑ፡ ፈቂደ፡ እፈቅድ፡ ከመ፡ ይሙት፡ ኃጥእ፡ ይቤ፡ አዶናይ፡ እግዚአብሔር፡ ዳእሙ፡ ከመ፡ ይትመየጥ፡ እምፍኖቱ፡ እኩይ፡ ወይሕየው።
24 ወእመ፡ ተመይጠ፡ ጻድቅ፡ እምጽድቁ፡ ወገብረ፡ ኃጢአተ፣፡ ይመውት፡ በኵሉ፡ ጌጋዩ፡ ዘገብረ፡ ውእቱ፡ ኃጥእ፡ ኵሎ፡ ጽድቆ፡ ዘገብረ፡ ኢይዜከር፡ ሎቱ፡ ወበአበሳሁ፡ ዘአበሰ፡ ቦቱ፡ ይመውት።
25 ወትብሉ፡ ኢኮነ፡ ርቱዓ፡ ፍኖተ፡ እግዚአብሔር። ስምዑኬ፡ ቤተ፡ ስእራኤል፡ ፍኖትየኑ፡ ኢኮነ፡ ርቱዓ፡ አኮኑ፡ ፍኖትክሙ፡ ኢኮነ፡ ርቱዓ።
26 እምከመ፡ ተመይጠ፡ ጻድቅ፡ እምጽድቁ፡ ወገብረ፡ ኃጢአተ፡ ይመውት፡ በጌጋዩ፡ ዘገብረ፡ ቦቱ።
27 ወእመ፡ ተመይጠ፡ ኃጥእ፡ እምኃጢአቱ፡ ዘገብረ፡ ወገብረ፡ ጽድቀ፡ ወርትዓ፡ ዘከመዝ፡ ነፍስ፡ የሐዩ።
28 ወርእየ፡ ወተመይጠ፡ እምኵሉ፡ ኃጢአቱ፡ ዘገብረ፡ ሕይወተ፡ የሐዩ፡ ወኢይመውት።
29 ወይብሉ፡ ቤተ፡ እስራኤል፡ ኢኮነ፡ ርቱዓ፡ ፍኖተ፡ እግዚአብሔር። ቦኑ፡ ፍኖትየ፡ ኢኮነ፡ ርቱዓ፡ ቤተ፡ እስራኤል፡ አኮኑ፡ ፍኖርክሙ፡ ኢኮነ፡ ርቱዓ።
30 በበይነ፡ ዝንቱ፡ ለኵልክሙ፡ በከመ፡ ፍኖትክሙ፡ እኴንነክሙ፡ ቤተ፡ እስራኤል፡ ይቤ፡ አዶናይ፡ እግዚአብሔር። ተመየጡ፡ ወነስሑ፡ እምኃጢአትክሙ፣፡ ወኢይመጽአክሙ፡ መቅሠፍተ፡ ኃጢአትክሙ።
31 ወግድፉ፡ እምላዕሌክሙ፡ ኵሎ፡ ጌጋየክሙ፡ ዘአበስክሙ፡ ሊተ፡ ወግበሩ፡ ለክሙ፡ ልበ፡ ሐዲሰ፡ ወመንፈሰ፡ ሐዲሰ፡ ወለምንት፡ ትመውቱ፡ ቤተ፡ እስራኤል።
32 እስመ፡ ኢይፈቅድ፡ ለክሙ፡ ሞተ፡ ትሙቱ፡ ይቤ፡ አዶናይ፡ እግዚአብሔር፡ ዘእንበለ፡ ከመ፡ ትነስሑ፡ ወትሕየዉ።
=== chapter 19 ===
[Chapter 19]
1 ወአንተ፡ ወልደ፡ እጓለ፡ እመሕያው፡ አስቆቅዎ፡ ለመልአከ፡ እስራኤል።
2 ወበል፡ ምንት፡ ባቲ፡ እምከ፡ አንበሳዊት፡ በማእከለ፡ አናብስት፡ ትነብር፡ ወማእከለ፡ አናብስት፡ አልሀቀት፡ አጐሊሃ።
3 ወአስረረት፡ ፩እምእጐሊሃ፡ ወኮነ፡ አንበሳ፡ ወተምህረ፡ ወሢጠ፡ ወመሠጠ፡ ወበልዐ፡ ሰብአ።
4 ወሰምዑ፡ አሕዛብ፡ በእንቲአሁ፣፡ በኃሣሮሙ፡ አኀዝዎ፡ ወወሰድዎ፡ ሞቂሖሙ፡ ብሔረ፡ ግብጽ።
5 ወሶበ፡ ርእየት፡ ከመ፡ ነሥእዎ፡ እምኔሃ፣፡ ጠፍአ፡ ኃይላ፡ ወነሥአት፡ ካልአ፡ እምእጐሊሃ፡ ወረሰየቶ፡ አንበሳ።
6 ወልህቀ፡ በማእከለ፡ አናብስት፡ ወኮነ፡ አንበሳ፡ ወተምህረ፡ መሢጠ፡ ወበልዐ፡ ሰብአ።
7 ወይትረዐይ፡ ተአሚኖ፡ ወአጥፍአ፡ አህጉሪሆሙ፡ ወአማሰነ፡ ብሔሮሙ፡ ወአኅለቆሙ፡ እምድምፀ፡ ጣሕሩ።
8 ወፈነዉ፡ አሕዛብ፡ ላዕሌሁ፡ ይዕግትዎ፡ እምበሐውርቲሆሙ፡ ወሰፍሑ፡ ላዕሌሁ፡ መሣግሪሆሙ፡ ወተሠግረ፡ በመሥገርቶሙ።
9 ወሞቅሕዎ፡ በመዋቅሕት፡ ወበድብዕኵል፡ ወወሰድዎ፡ ኀበ፡ ንጉሠ፡ ባቢሎን፡ ወአብእዎ፡ ውስተ፡ ቤተ፡ ሞቅሕ፡ ከመ፡ ኢይሰማዕ፡ ቃሉ፡ ውስተ፡ አድባረ፡ እስራኤል።
10 እምከ፡ ከመ፡ ዐጸደ፡ ወይን፡ ወከመ፡ ጽጌ፡ ሮማን፡ ዘበቈለ፡ ኀበ፡ ማይ፡ ወሠረፀት፡ ወፈረየት፡ እምብዙኅ፡ ማይ።
11 ወወፅአ፡ እምውስቴታ፡ በትር፡ ጽኑዕ፡ ለሕዝበ፡ ምስፍና፡ ወኖኀ፡ ቆማ፡ በማእከለ፡ በቀልት። ወተርእየ፡ ኑኃ፡ በማእከለ፡ አዕጹቂሃ።
12 ወተሰብረት፡ በመዐት፡ ወወድቀት፡ ውስተ፡ ምድር፣፡ ወነፋስ፡ ውዑይ፡ አይበሰ፡ መሠንያ። ወየብሰ፡ በትረ፡ ኃይላ፡ ወበልዐታ፡ እሳት።
13 ወይእዜኒ፡ ትክልት፡ ውስተ፡ በድው፡ ብሔር፡ ኀበ፡ አልቦ፡ ማይ።
14 ወወፅአት፡ እሳት፡ እምይእቲ፡ በትር፡ ወእምውስተ፡ መሠንያ፡ ወበልዐታ፣፡ ወኢያትረፈት፡ ውስቴታ፡ በትረ፡ ጽንዕተ፡ በትረ፡ ምስፍና። ሕዝብ፡ ምስለ፡ ሰቆቃው፡ ኮነ፡ ለብካይ።
=== chapter 20 ===
[Chapter 20]
1 ወእምዝ፡ አመ፡ ሳብዕት፡ ዓመት፣፡ በኃምስ፡ ወርኅ፡ አመ፡ ዐሡረ፡ ሠርቅ፡ መጽኡ፡ ኀቤየ፡ ዕደው፡ እምረበናተ፡ ቤተ፡ እስራኤል፡ ይሰአልዎ፡ ለእግዚአብሔር፡ ወነበሩ፡ ቅድመ፡ ገጽየ።
2 ወነበበኒ፡ እግዚአብሔር፡ ወይቤለኒ።
3 ወልደ፡ እጓለ፡ እመሕያው፡ ንግሮሙ፡ ለረበናተ፡ ቤተ፡ እስራኤል፡ ወበሎሙ፡ ከመዝ፡ ይቤ፡ አዶናይ፡ እግዚአብሔር፡ ትሴአሉኒሁ፡ መጻእክሙ፡ ሕያው፡ አነ፡ ከመ፡ ኢይሠጠወክሙ፡ ይቤ፡ አዶናይ፡ እግዚአብሔር።
4 ዳእሙ፡ ተዋቅሦ፡ እትዋቀሠክሙ፡ ወልደ፡ እጓለ፡ እመሕያው፡ ኃጢአተ፡ አበዊሆሙ፡ አስምዕ፡ ሎሙ።
5 ወበሎሙ፡ ከመዝ፡ ይቤ፡ አዶናይ፡ እግዚአብሔር፡ እምአመ፡ ኀረይክዎ፡ ለቤተ፡ እስራኤል፡ ወአስተርአይክዎ፡ ለዘርአ፡ ቤተ፡ ያዕቆብ፡ ወተአመርኩ፡ ሎሙ፡ በብሔረ፡ ግብጽ፡ ወተወከፍክዎሙ፡ በእዴየ፡ ይቤ፡ እግዚአብሔር፡ አነ፡ አምላክክሙ።
6 ውእተ፡ አሚረ፡ አልዐልክዎሙ፡ በእዴየ፡ ከመ፡ አውፅኦሙ፡ እምድረ፡ ግብጽ፡ ውስተ፡ ምድር፡ ዘአስተዳለውኩ፡ ሎሙ፣፡ ምድረ፡ ዘያውኅዝ፡ ሐሊበ፡ ወመዐረ፡ እንተ፡ ትጥዕም፡ እምኵሉ፡ ምድር።
7 ወእቤሎሙ፡ ግድፉ፡ ኵልክሙ፡ ርኵሰክሙ፡ እምቅድመ፡ አዕይንቲክሙ፡ ወኢትርኰሱ፡ በጣዖቶሙ፡ ለግብጽ፡ አነ፡ እግዚአብሔር፡ አምላክክሙ።
8 ወዐለዉኒ፡ ወአበዩ፡ ሰሚዖትየ፡ ወኢገደፉ፡ ርኵሰ፡ እምአዕይንቲሆሙ፡ ወኢኀደጉ፡ ጣዖቶሙ፡ ለግብጽ። ወእቤ፡ እሰውጥ፡ መዐትየ፡ ላዕሌሆሙ፡ ከመ፡ እሠልጥ፡ መቅሠፍትየ፡ ላዕሌሆሙ፡ በማእከለ፡ ግብጽ።
9 ወገበርኩ፡ ከመ፡ ስምየ፡ ዘመልዕልተ፡ ኵሉ፡ ኢይርኰስ፡ በቅድመ፡ አሕዛብ፡ እለ፡ ሀለዉ፡ ማእከሎሙ፣፡ እለ፡ አስተርአይኩ፡ በኀቤሆሙ፡ ወበቅድሜሆሙ፡ ከመ፡ አውፅኦሙ፡ እምድረ፡ ግብጽ።
10 ወአውፃእክዎሙ፡ ውስተ፡ ገዳም።
11 ወወሀብክዎሙ፡ ሕግየ፣፡ ወሥርዓትየ፡ ነገርክዎሙ፡ ዘይገብሮ፡ ሰብእ፡ ወየሐዩ፡ ቦቱ።
12 ወወሀብክዎሙ፡ ሰንበታትየ፡ ዘይከውኖሙ፡ ትእምርተ፡ በማእከሌየ፡ ወበማእከሎሙ፡ ከመ፡ አርእዮሙ፡ ከመ፡ አነ፡ እግዚአብሔር፡ ዘእቄድሶሙ።
13 ወእቤሎሙ፡ ለቤተ፡ እስራኤል፡ በገዳም፡ በትእዛዝየ፡ ሑሩ። ወኢሖሩ፡ ወዐለዉ፡ ሕግየ፡ ዘአመ፡ ገብሮ፡ ሰብእ፡ የሐዩ፡ ቦቱ፡ ወአርኰሱ፡ ሰንበታትየ፡ ፈድፋደ፡ ወእቤ፡ እክዑ፡ መዐትየ፡ ላዕሌሆሙ፡ በገዳም፡ ወአጠፍኦሙ።
14 ወገበርኩ፡ ከመ፡ ኢያርኵሱ፡ ስምየ፡ ዘላዕለ፡ ኵሉ፡ በቅድመ፡ አሕዛብ፡ ዘአውፃእክዎሙ፡ በቅድመ፡ አዕይንቲሆሙ።
15 ወአነ፡ አንሣእኩ፡ እዴየ፡ ላዕሌሆሙ፡ በገዳም፡ ለዝሉፉ፡ ከመ፡ ኢያብኦሙ፡ ውስተ፡ ይእቲ፡ ምድር፡ እንተ፡ ወሀብክዎሙ፡ ምድረ፡ እንተ፡ ታውኅዝ፡ ሐሊበ፡ ወመዐረ፡ እንተ፡ ትጥዕም፡ እምኵሉ፡ ምድር።
16 ሶበ፡ ዐለዉ፡ ሕግየ፡ ወኢሖሩ፡ በትእዛዝየ፡ ወአርኰሱ፡ ሰንበታትየ፡ ወሖሩ፡ በሕሊና፡ ልቦሙ።
17 ወመሐከቶሙ፡ ዐይንየ፡ ከመ፡ ኢይደምስሶሙ፡ ወኢገበርኩ፡ በዘአኅልቆሙ፡ በገዳም።
18 ወእቤሎሙ፡ ለደቂቆሙ፡ በገዳም፡ ኢትሑሩ፡ በግዕዘ፡ አበዊክሙ፡ ወኢትዕቀቡ፡ ሥርዓቶሙ፣፡ ወኢትደመሩ፡ በጌጋዮሙ፡ ወኢትርኰሱ።
19 አነ፡ እግዚአብሔር፡ አምላክክሙ፡ በትእዛዝየ፡ ሑሩ፡ ወሕገ፡ ዚአየ፡ ዕቀቡ፡ ወግበርዎ።
20 ወቀድሱ፡ ሰንበታትየ፡ ወይኩን፡ ትእምርተ፡ ማእከሌየ፡ ወማእከሌክሙ፡ ከመ፡ ታእምሩ፡ ከመ፡ አነ፡ ውእቱ፡ እግዚአብሔር፡ አምላክክሙ።
21 ወአምረሩኒ፡ ደቂቆሙ፡ ወኢሖሩ፡ በትእዛዝየ፡ ወዐለዉኒ፡ ወኢዐቀቡ፡ ሕግየ፡ ወኢገብርዎ፡ ዘአመ፡ ገብሮ፡ ሰብእ፡ የሐዩ፡ ቦቱ፣፡ ወአርኰሱ፡ ሰንታትየ፡ ወእቤ፡ እክዑ፡ መዐትየ፡ ላዕሌሆሙ፡ ወእሠልጥ፡ መቅሠፍትየ፡ በገዳም፡ ዲቤሆሙ።
22 ወገበርኩ፡ ከመ፡ ኢይርኰስ፡ ስምየ፡ ዘእምኵሉ፡ የዐቢ፡ በቅድመ፡ አሕዛብ፡ ዘአውፃእክዎሙ፡ በቅድመ፡ አዕይንቲሆሙ።
23 ወአንሣንኩ፡ እዴየ፡ ላዕሌሆሙ፡ በገዳም፡ ከመ፡ እዝርዎሙ፡ ውስተ፡ አሕዛብ፡ ወእዝርዎሙ፡ ውስተ፡ በሐውርት።
24 እስመ፡ ኢገብሩ፡ ሕግየ፡ ወኀዸጉ፡ ትእዛዝየ፡ ወአርኰሱ፡ ሰንበታትየ፣፡ ወአትለዉ፡ ዐይኖሙ፡ ድኅረ፡ ሕሊና፡ አበዊሆሙ።
25 ወአነ፡ ወሀብክዎሙ፡ ሕገ፡ ዘኢኮነ፡ ሠናየ፡ ወኵነኔ፡ ዘኢየሐይዉ፡ ቦቱ።
26 ወአርኰስክዎሙ፡ በመባኦሙ፡ ሶበ፡ አምጽኡ፡ ሊተ፡ ኵሎ፡ ዘይፈትሕ፡ ማሕፀነ፡ ከመ፡ አማስኖሙ፡ ከመ፡ ያእምሩ፡ ከመ፡ አነ፡ ውእቱ፡ እግዚአብሔር።
27 በእንተ፡ ዝንቱ፡ በሎሙ፡ ለቤተ፡ እስራኤል፡ ወልደ፡ እጓለ፡ እመሕያው፡ ወበሎሙ፡ ከመዝ፡ ይቤ፡ እግዚአብሔር፡ አዶናይ፡ እስመ፡ ከመዝ፡ አምዕዑኒ፡ አበዊክሙ፡ በጌጋዮሙ፡ ዘአበሱ፡ ሊተ።
28 ወአባእክዎሙ፡ ውስተ፡ ምድር፡ እንተ፡ አንሣእኩ፡ እዴየ፡ ከመ፡ አሀቦሙ። ወርእዩ፡ ኵሎ፡ ወግረ፡ ነዋኀ፡ ወኵሎ፡ ዕፀ፡ ዘቦ፡ ጽላሎት፡ ወዘብሑ፡ ወዘመዉ፡ በህየ፡ ለአማልክቲሆሙ፡ ወሦዑ፡ መሥዋዕተ፡ ወዐጠኑ፡ በህየ፡ ለመዐዛ፡ ሠናይ፡ ወአውጽሑ፡ በህየ፡ ሞጻሕቶሙ።
29 ወእቤሎሙ፡ ምንት፡ ውእቱ፡ ባማ፡ ዘተሐውሩ፡ አንትሙ፡ ህየ፡ ወሰመይዎ፡ ስሞ፡ ባማ፡ እስከ፡ ዮም፡ ወእስከ፡ ዛቲ፡ ዕለት።
30 በእንተ፡ ዝንቱ፡ በሎሙ፡ ለቤተ፡ እስራኤል፡ ከመዝ፡ ይቤ፡ አዶናይ፡ እግዚአብሔር፡ በኃጢአተ፡ አበዊክሙ፡ ረኰስክሙ፡ አንትሙ፡ ወዘመውክሙ፡ ወተሎክሙ፡ ርኵሶሙ።
31 በአብኦ፡ ደቂቅክሙ፡ ውስተ፡ እሳት፡ አንትሙ፡ ረኰስክሙ፡ በኵሉ፡ ሕሊናክሙ፡ እስከ፡ ዮም፡ ወእስከ፡ ዛቲ፡ ዕለት። ወአነሁ፡ አወሥአክሙ፡ ቤተ፡ እስራኤል፡ ሕያው፡ አነ፡ ይቤ፡ እግዚአብሔር፡ ከመ፡ ኢያወሥአክሙ፡ ወትሔልይዎ፡ በመንፈስክሙ፡ ለዝንቱ።
32 ወኢትከውኑ፡ በከመ፡ ትብሉ፡ ንከውን፡ ከመ፡ አሕዛብ፡ ወከመ፡ ሕዝበ፡ በሐውርት፡ ከመ፡ ታምልኩ፡ ዕፀ፡ ወእብነ።
33 በእንተዝ፡ ሕያው፡ አነ፡ ይቤ፡ አዶናይ፡ እግዚአብሔር፡ ከመ፡ በእድ፡ ጽንዕት፡ ወበመዝራዕት፡ ልዑል፡ ወበመዐት፡ ክዕው፡ እነግሥ፡ ላዕሌክሙ።
34 ወአወፅአክሙ፡ እምአሕዛብ፡ ወእትሜጠወክሙ፡ እምበሐውርት፡ ኀበ፡ ተዘሮክሙ፡ ውስቴቶሙ፡ በእድ፡ ጽንዕት፡ ወበመዝራዕት፡ ልዑል፡ ወበመዐት፡ ክዕው።
35 ወእወስደክሙ፡ ውስተ፡ ገዳም፡ ዘአሕዛብ፡ ወእትዋቀሠክሙ፡ በህየ፡ ገጸ፡ በገጽ።
36 ከመ፡ ተዋቀሥክዎሙ፡ ለአበዊክሙ፡ በገዳም፡ ዘግብጽ፣፡ ከማሁ፡ እኴንነክሙ፡ ይቤ፡ እግዚአብሔር፡ እግዚእ።
37 ወአኀልፈክሙ፡ ታሕተ፡ በትርየ፡ ወእወስደክሙ፡ በኍልቍ።
38 ወእሤሩ፡ እምውስቴትክሙ፡ ኃጥአነ፡ ወእለ፡ የአብዩ፣፡ እስመ፡ አወፅኦሙ፡ እምኀበ፡ ፈለሱ፡ ወብሔረ፡ እስራኤልኒ፡ ኢይበውኡ። ወየአምሩ፡ ከመ፡ አነ፡ እግዚአብሔር።
39 ወአንትሙ፡ ቤተ፡ እስራኤል፣፡ ከመዝ፡ ይቤ፡ አዶናይ፡ እግዚአብሔር፡ ኵልክሙ፡ ኅድጉ፡ ጌጋየክሙ፡ ወእምዝ፡ ስምዑኒ፡ እንከ፡ ወኢታርኵሱ፡ ስምየ፡ በመባእክሙ፡ ወበጌጋይክሙ።
40 እስመ፡ በውስተ፡ ደብረ፡ መቅደስየ፡ ወደብር፡ ነዋኅ፡ ዘእስራኤል፡ ይቤ፡ እግዚአብሔር፡ እግዚእ፡ በህየ፡ ይትቀነዩ፡ ሊተ፡ ኵሉ፡ ቤተ፡ እስራኤል፡ ለግሙራ። ወበህየ፡ እትዌከፎሙ፡ ወበህየ፡ እሔውጽ፡ ቀዳምያቲክሙ፡ ወቀዳምያተ፡ ዘትፈልጡ፡ በኵሉ፡ ቅድሳቲክሙ።
41 በመዐዛ፡ ሠናይ፡ እትዌከፈክሙ፡ አመ፡ አውፃእኩክሙ፡ እምአሕዛብ፡ ወእመይጠክሙ፡ እምበሐውርት፡ ኀበ፡ ተዘሮክሙ፡ ውስቴቶሙ፡ ወእትቄደስ፡ ብክሙ፡ በቅድመ፡ አዕይንቲሆሙ፡ ለአሕዛብ።
42 ወተአምሩ፡ ከመ፡ አነ፡ ውእቱ፡ እግዚአብሔር፡ አመ፡ አባእኩክሙ፡ ምድረ፡ እስራኤል፡ ውስተ፡ ምድር፡ እንተ፡ አንሣእኩ፡ እዴየ፡ ከመ፡ አሀባ፡ ለአበዊክሙ።
43 ወትዜከሩ፡ በህየ፡ ፍናዊክሙ፡ ወጌጋየክሙ፡ በዘረኰስክሙ፣፡ ወትሬእዩ፡ በገጽክሙ፡ ወትትኀፈሩ፡ በኵሉ፡ እከይክሙ።
44 ወተአምሩ፡ ከመ፡ አነ፡ ውእቱ፡ እግዚአብሔር፡ ሶበ፡ ገበርኩ፡ ላዕሌክሙ፡ ዘንተ፡ ከመ፡ ኢይርኰስ፡ ስምየ፡ በከመ፡ ፍኖትክሙ፡ እኩይ፡ ወበከመ፡ ምግባሪክሙ፡ ሕሡም፡ ቤተ፡ እስራኤል፡ ይቤ፡ አዶይ፡ እግዚአብሔር።
45 ወነበበኒ፡ እግዚአብሔር፡ ወይቤለኒ።
46 ወልደ፡ እጓለ፡ እመሕያው፡ አጽንዕ፡ ገጸከ፡ ላዕለ፡ ቴማን፡ ወነጽር፡ መንገለ፡ ዳሮም፡ ወተነበይ፡ ላዕለ፡ ዖመ፡ በድወ፡ ናጌብ።
47 ወበሎ፡ ለዖመ፡ ናጌብ፡ ስማዕ፡ ቃለ፡ እግዚአብሔር። ከመዝ፡ ይቤ፡ አዶናይ፡ እግዚአብሔር፡ ናሁ፡ አነ፡ አነድድ፡ እሳተ፡ ውስቴትከ፡ ወትበልዕ፡ ኵሎ፡ ዕፀ፡ ወሐመልሚለ፡ በውስቴትከ፡ ወኵሎ፡ ዕፀ፡ ይቡሰ፡ ወኢይጠፍእ፡ ነበልባሉ፡ ዘነደ፡ ወይውዒ፡ በውስቴታ፡ ኵሉ፡ ገጽ፡ ዘእምደቡብ፡ እስከ፡ ሰሜን።
48 ወየአምር፡ ኵሉ፡ ዘነፍስ፡ ከመ፡ አነ፡ ውእቱ፡ እግዚአብሔር፣፡ አንደድክዎ፡ ወኢይጠፍእ።
49 ወእቤ፡ ሐሰ፡ ለከ፡ እግዚኦ፡ እግዚኦ፣፡ እሙንቱሰ፡ ይብሉኒ፡ አኮኑ፡ ምሳሌ፡ ውእቱ፡ ዝንቱ፡ ዘይብሉ።
=== chapter 21 ===
[Chapter 21]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ በበይነ፡ ዝንቱ፡ ተነበይ፡ ወአጽንዕ፡ ገጸከ፡ ላዕለ፡ ኢየሩሳሌም፡ ወነጽር፡ መንገለ፡ መቅደሶሙ፡ ወተነበይ፡ ለምድረ፡ እስራኤል።
3 ወበላ፡ ለምድረ፡ እስራኤል፡ ከመዝ፡ ይቤ፡ እግዚአብሔር፡ ናሁ፡ አነ፡ አንሥእ፡ እዴየ፡ ላዕሌኪ፡ ወአወፅኣ፡ ለመጥባሕትየ፡ እምነ፡ ቀቀባ፡ ወእሤሩ፡ እምኔኪ፡ ጻድቀ፡ ወኃጥአ።
4 እስመ፡ እሤሩ፡ እምውስቴትኪ፡ ጻድቀ፡ ወዓማፄ፡ በእንተ፡ ዝንቱ፡ ናሁ፡ (አንሥእ፡ እዴየ፡ ወ)፡ አወፅእ፡ መጥባሕትየ፡ ላዕለ፡ ኵሉ፡ ዘነፍስ፡ እምናጌብ፡ እስከ፡ ሰሜን።
5 ወየአምር፡ ኵሉ፡ ዘነፍስ፡ ከመ፡ አነ፡ እግዚአብሔር፣፡ ወአነሣእኩ፡ እዴየ፡ ወኢይትመየጥ፡ እንከ።
6 ወአንተ፡ ወልደ፡ እጓለ፡ እመሕያው፡ ብኪ፡ በእንተ፡ ቅጥቃጤ፡ ሐቌያት፡ ወገዐር፡ በሕማም፡ በቅድመ፡ አዕይንቲሆሙ።
7 ወለእመ፡ ይቤሉከ፡ ምንት፡ ያበክየከ፡ በሎሙ፡ በእንተ፡ ዜና፡ ዘይመጽእ፡ ወይትቀጠቀጥ፡ ልበ፡ ኵሉ፡ ወይደክም፡ እደ፡ ኵሉ፡ ወይትቀጻዕ፡ ኵሉ፡ ዘነፍስ፡ ወኵሉ፡ መንፈስ፡ ወውስተ፡ ኵሉ፡ አብራክ፡ ይበኈብኍ፡ መግል። ናሁ፡ ይበጽሕ፡ ወይከውንሂ፡ ይቤ፡ እግዚአብሔር፡ እግዚእ።
8 ወነበበኒ፡ እግዚአብሔር፡ ወይቤለኒ።
9 ወልደ፡ እጓለ፡ እመሕያው፡ ተነበይ፡ ወበል፡ ከመዝ፡ ይቤ፡ አዶናይ፡ እግዚአብሔር፡ ወበል፡ ኲናት፡ ኲናት፡ ብልኂ፡ ወተኀብረቲ።
10 ከመ፡ ትርግዚ፡ ወትቅትሊ፡ ወብልኂ፡ ከመ፡ ትብርቂ፡ ወአጥብዒ፡ ከመ፡ ትቅትሊ፡ ወከመ፡ ታውድቂ፡ ኵሎ፡ ዕፀ።
11 ወወሀባ፡ ለጽኑዕ፡ ከመ፡ የአኀዝ፡ በእዴሁ። ወበልኀጥ፡ ኲናት፡ ወአስተዳለውዋ፡ ከመ፡ ይመጥዋ፡ ውስተ፡ እደ፡ ዘይረግዝባቲ።
12 ወውዕ፡ ወአውዩ፡ ወልደ፡ እጓለ፡ እመሕያው፡ እስመ፡ ከመዝ፡ ይከውን፡ ላዕለ፡ ሕዝብየ፡ ወላዕለ፡ ኵሉ፡ መኳንንተ፡ እስራኤል፡ ወያፈልስዎሙ፡ በኲናት፡ ለሕዝብየ። በበይነ፡ ዝንቱ፡ ጥፋሕ፡ በእደዊከ።
13 እስመ፡ ጸድቀት። ወምንተ፡ ኮኑ፡ ሕዝብየ፡ ዘርኅቁ፡ ወኢሀለዉ፡ ይቤ፡ እግዚአብሔር፡ እግዚእ።
14 ወአንተ፡ ወልደ፡ እጓለ፡ እመሕያው፡ ተነበይ፡ ወጥፋሕ፡ እዴከ፡ በዲበ፡ እዴከ፡ ወአመክዕባ፡ ለኲናት፡ ወሠልሳ፡ ለኲናተ፡ አብድንት፣፡ ይእቲ፡ ኵናተ፡ ቀትል፡ ዓቢይ። ወታደነግዖሙ።
15 ከመ፡ ይጥፋእ፡ ልቦሙ፡ ወይበዝኁ፡ ድዉያን፡ በኀበ፡ ኲሉ፡ አናቅጽ፡ ወትትወሀቡ፡ ለቀትል፡ በኲናት፡ ወትበርቅ፡ ቀትል።
16 ወተመልሳ፡ መንገለ፡ የማን፡ ወትበርቅ፡ በሕቁ፣፡ ወበመንገለ፡ ፀጋም፡ በኀበ፡ ተመይጠ፡ ገጽከ።
17 ወአነሂ፡ እጠፍሕ፡ እዴየ፡ በዲበ፡ እዴየ፡ ወእፌኑ፡ መዐትየ፡ አነ፡ እግዚአብሔር፡ ዘነበብኩ።
18 ወነበበኒ፡ እግዚአብሔር፡ ወይቤለኒ።
19 ወልደ፡ እጓለ፡ እመሕያው፡ ግበር፡ ለከ፡ ክልኤ፡ ፍናወ፡ እንተ፡ ኀበ፡ ትበውእ፡ ኵናቱ፡ ለንጉሠ፡ ባቢሎን። ወእም፩፡ ብሔር፡ ይፃኣ፡ ክልኤሆን፡ ወእደ፡ ውስተ፡ ርእሰ፡ ፍኖተ፡ ሀገር፡ ወእምርእሰ፡ ፍኖቱ፡ ግበር።
20 እንተ፡ ኀበ፡ ትበውእ፡ ኲናት፡ ውስተ፡ ራቦት፡ ዘደቂቀ፡ አሞን፡ ወላዕለ፡ ይሁዳ፡ ወላዕለ፡ ኢየሩሳሌም፡ ማእከላ።
21 እስመ፡ ይቀውም፡ ምጉሠ፡ ባቢሎን፡ ውስተ፡ ርእሰ፡ ፍኖት፣፡ ውስተ፡ ጽንፈ፡ ክልኤሆን፡ ፍናው፡ ከመ፡ ያስግል፡ ሰገለ፡ ወከመ፡ ያንሥእ፡ በትሮ፡ ወከመ፡ ይሰአሎሙ፡ ለሱራፊኑ።
22 ወኮኑ፡ ሰገሉ፡ መንገለ፡ የማኑ፡ ዘላዕለ፡ ኢየሩሳሌም፡ ከመ፡ ይሕፅራ፡ ወይክሥታ፡ ወያዕቢ፡ ቃለ፡ በውውዓ፡ ከመ፡ ይክዐው፡ መራደ፣፡ ወከመ፡ ይሕንጽ፡ ዳይቀ፡ ወይፍጽም፡ አናቅጺሃ፡ ወየኀብሮ፡ መሬተ፡ በመሬት፡ ወየሐንጽ፡ እንተ፡ ኀበ፡ ይነድፍ።
23 ወውእቱ፡ ያሰግል፡ ሎሙ፡ ሰገለ፡ በቅድሜሆሙ፡ ወይዜከር፡ ፯፡ ሱባዔያተ፣፡ ኃጢአቶሙ፡ ተዘኪሮ።
24 በበይነ፡ ዝንቱ፡ ከመዝ፡ ይቤ፡ እግዚአብሔር፡ አዶናይ፡ እስመ፡ አዘከርክሙ፡ ኃጢአተክሙ፡ አመ፡ ተከሥተ፡ ጌጋይክሙ፡ ከመ፡ ያስተርኢ፡ አበሳክሙ፡ በኵሉ፡ ጽልሑትክሙ፡ ወበኵሉ፡ ኃጢአትክሙ፣፡ እስመ፡ ተዘከርክሙ፡ ዘቦቱ፡ ትሠግሩ።
25 ወአንተ፡ ርኩስ፡ ወጽልሕው፡ መስፍነ፡ እስራኤል፡ ዘበጽሐ፡ ዕለትከ፡ ወጊዜ፡ ዕድሜሃ፡ ለኃጢአትከ።
26 ከመዝ፡ ይቤ፡ አዶናይ፡ እግዚአብሔር፡ አአትት፡ መንጸፍተኪ፡ ወአሴስል፡ አክሊለኪ፡ አኮኑ፡ አንቲ፡ እንተ፡ አኅፀርኪዮ፡ ለነዋኅ፡ ወአናኅኪዮ፡ ለኃፂር።
27 ጌጋየ፡ ወአበሳ፡ ወኃጢአተ፡ እሬስዮ፡ ላቲ፡ ወይእቲኒ፡ ኢኮነት፡ ከመዝ፡ እስከ፡ ይመጽእ፡ እንተ፡ ይደልዎ፡ ኵነኔ፡ ወአገብኦ።
28 ወአንተ፡ ወልደ፡ እጓለ፡ እመሕያው፡ ተነበይ፡ ወበል፡ ከመዝ፡ ይቤ፡ እግዚአብሔር፡ ለደቂቀ፡ አሞን፡ በእንተ፡ ጽዕለቶሙ፡ ወበል፡ ሰይፍ፣፡ ሰይፍ፡ ተመልሐት፡ ለቀቲል፡ ወመልሕዋ፡ ከመ፡ ትቅትል፡ ወታኅልቅ፡ ተንሥኢ፡ ወምልሲ።
29 በራእይ፡ ዘከንቱ፡ ወበሰገልኪ፡ ዘሐሰት፡ ከመ፡ ይእስሩኪ፡ በክሳዶሙ፡ ለቅቱላን፡ ኃጥኣን፡ በጽሐት፡ ዕለቶሙ፡ በጊዜ፡ ዕድሜሃ፡ ለኃጢአቶሙ።
30 ትሰወጥ፡ ኀበ፡ ቀቀባ፡ ወኢትኅደር፡ ውስተዝ፡ ብሔር፡ በብሔርከ፡ እኴንነከ።
31 ወእክዑ፡ መዐትየ፡ ላዕሌከ፡ በእሳተ፡ መቅሰፍትየ፡ እነፍኅ፡ ላዕሌከ፡ ወአገብአከ፡ ውስተ፡ እደ፡ ዕደው፡ ፀር፡ እለ፡ ያማስኑ፡ ወይቀትሉ።
32 ወያውዕዩከ፡ ወይትከዐው፡ ደምከ፡ በማእከለ፡ ብሔርከ። ወኢይዜከሩከ፡ እስመ፡ አነ፡ እግዚአብሔር፡ ነበብኩ።
=== chapter 22 ===
[Chapter 22]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ ተዋቀሣ፡ ለሀገር፡ በደም።
3 ወንግራ፡ ኵሎ፡ ጌጋያ፡ ወበላ፡ ከመዝ፡ ይቤ፡ አዶናይ፡ እግዚአብሔር፡ ሀገር፡ እንተ፡ ትክዑ፡ ደመ፡ በማእከላ፡ ከመ፡ ትብጽሓ፡ ዕለታ፡ ወትገብር፡ ላቲ፡ ጣዖተ፡ ከመ፡ ትርኰስ።
4 ወደሞሙ፡ ለእለ፡ ከዐዉ፡ ላዕሌሃ። ወትወድቂ፡ ወረኰስኪ፡ በጣዖትኪ፡ ዘገበርኪ፡ ወአቅረብኪ፡ መዋዕለኪ፡ ወአብጻሕኪ፡ ዕድሜ፡ ዓመትኪ። በበይነ፡ ዝንቱ፡ ረሰይኩኪ፡ ጽዕለተ፡ በኀበ፡ አሕዛብ፡ ወስላቀ፡ ለኵሉ፡ በሐውርት።
5 ዘቅሩብኪ፡ ወዘርኁቅኪ፡ ወይስሕቁ፡ ላዕሌኪ፡ እስመ፡ ረኰስኪ፡ ርኵስተ፡ ስም፡ ወአብዛኅኪ፡ ኃጢአተኪ።
6 ወናሁ፡ መኳንንቲሆሙ፡ ለቤተ፡ እስራኤል፡ ኵሎሙ፡ ምስለ፡ እንተ፡ አዝማዲሆሙ፡ ተደመሩ፡ በውስቴትኪ፡ ከመ፡ ይክዐዉ፡ ደመ።
7 እመ፡ ወአበ፡ ጸዐሉ፡ ወይጼዕልዎሙ፡ ለአዝማዲሆሙ፡ ወይሣቅዩ፡ ፈላሴ፡ ወይገፍዑ፡ በውስቴትኪ፡ ወይትዔገሉ፡ እቤረ፡ ወእጓለ፡ ማውታ፡ ውስቴትኪ።
8 ወመነኑ፡ ቅድሳትየ፡ ወአርኰሱ፡ ሰንበታትየ።
9 ዕደው፡ ሰረቅት፡ ሀለዉ፡ ውስቴትኪ፡ ከመ፡ ይክዐዉ፡ ደመ፡ በውስቴትኪ፡ ወበውስተ፡ አድባርኪ፡ ይብልዑ፡ ወይገብሩ፡ ዘኢይከውን፡ ማእከሌኪ።
10 ወከሠቱ፡ ኃፍረተ፡ አብ፡ በውስቴትኪ፡ ወሰከቡ፡ ምስለ፡ ትክት፡ በውስቴትኪ።
11 ወኵሎሙ፡ ምስለ፡ አንስትያ፡ ቢጾሙ፡ ይሰክቡ፣፡ ወኵሎሙ፡ ያረኵሱ፡ መራዕወ፡ ደቂቆሙ፡ በኃጢአት፡ ወኵሎሙ፡ ይሰክቡ፡ ምስለ፡ አኃቲሆሙ፡ እምአቡሆሙ፡ በውስቴትኪ።
12 ወይነሥኡ፡ ሕልያነ፡ በውስቴትኪ፡ ከመ፡ ይክዐዉ፡ ደመ፡ ወያስተናድኡ፡ ወይነሥኡ፡ ዘስርቅ፡ በውስቴትኪ። ወሠለጥኪ፡ ማኅለቅቶ፡ ለእከይኪ፡ ወለትዕግልትኪ፡ ወኪያየሰ፡ ረሳዕክኒ፡ ይቤ፡ እግዚአብሔር።
13 ወናሁ፡ ጠፋሕኩ፡ እዴየ፡ በእዴየ፡ በምግባርኪ፡ ዘገበርኪ፡ ወበደምኪ፡ ዘኮነ፡ በማእከሌኪ።
14 ለእመ፡ ይትዔገሥ፡ ልብኪ፡ ወእመ፡ ይጸንዓ፡ እደውኪ፡ በመዋዕል፡ ዘእገብር፡ ማእከሌኪ፡ አነ፡ እግዚአብሔር፡ ዘነበብኩ፡ ወገበርኩ።
15 ወእዘርወኪ፡ ውስተ፡ አሕዛብ፡ ወእዘርወኪ፡ ውስተ፡ በሐውርት፡ ወአኀልቅ፡ ርኵሰኪ፡ በውስቴትኪ።
16 ወእወርስ፡ እምውስቴትኪ፡ በቅድመ፡ አዕይንቲሆሙ፡ ለአሕዛብ፣፡ ወየአምሩ፡ ከመ፡ አነ፡ ውእቱ፡ እግዚአብሔር።
17 ወነበበኒ፡ እግዚአብሔር፡ ወይቤለኒ።
18 ወልደ፡ እጓለ፡ እመሕያው፡ ናሁ፡ ኮኑኒ፡ ቤተ፡ እስራኤል፡ ድሙራነ፡ ኵሎሙ፡ ብርተ፡ ወዓረረ፡ ወኃፂነ፡ ወናዕከ፡ ማእከለ፡ ከዉር፡ ጽሙረ፡ ብሩረ፡ ኮኑ።
19 በበይነ፡ ዝንቱ፡ በል፡ ከመዝ፡ ይቤ፡ እግዚአብሔር፡ እግዚእ፡ አዶናይ፡ እስመ፡ ኮንክሙ፡ ኵልክሙ፡ ፩ትእሲተ፡ ወናሁ፡ አነ፡ አስተጋብኦሙ፡ ውስተ፡ ኢየሩሳሌም።
20 በከመ፡ ያስተጋብእዎ፡ ለብሩር፡ ወለፀሪቅ፡ ወለኃፂን፡ ወለዓረር፡ ወለናዕክ፡ ወይወድይዎ፡ ማእከለ፡ ከውር፡ ወያበኵሑ፡ እሳተ፡ ዲቤሁ፡ ከመ፡ ይሰብክዎ፡ ከማሁ፡ አስተጋብአክሙ፡ በመዐትየ፡ ወእሰብከክሙ።
21 ወአበኵሕ፡ እሳተ፡ መዐትየ፡ ላዕሌክሙ፡ ወትሰበኩ፡ በማእከላ።
22 ከመ፡ ይሰበክ፡ ብሩር፡ ማእከለ፡ ከውር፡ ከማሁ፡ ትሰበኩ፡ በማእከላ፣፡ ወተአምሩ፡ ከመ፡ አነ፡ ውእቱ፡ እግዚአብሔር፡ ዘከዐውኩ፡ መዐትየ፡ ላዕሌክሙ።
23 ወነበበኒ፡ እግዚአብሔር፡ ወይቤለኒ።
24 ወልደ፡ እጓለ፡ እመሕያው፡ በላ፡ አንቲ፡ ምድር፡ እንተ፡ ኢትዘንሚ፡ ወኢይወርድ፡ ጠል፡ ላዕሌኪ፡ በዕለተ፡ መንሱታ።
25 እለ፡ ነቢያቲሃ፡ በማእከላ፡ ይጥሕሩ፡ ከመ፡ አንበሳ፡ ወይመሥጡ፡ ወየሀይዱ፡ ወይበልዑ፡ ወይትዔገሉ፡ ወይውሕጥዋ፡ ለነፍስ፡ ወይነሥኡ፡ ሕልያነ። ወበዝኃ፡ መበለታቲሃ፡ በማእከሌሃ።
26 ወካህናቲሃኒ፡ ዐለዉ፡ ሕግየ፡ ወአርኰሱ፡ ቅድሳትየ፡ ማእከለ፡ መቅደስየ፡ ወኢተግሕሡ፡ እምርኵስ። ወኢያእመሩ፡ ማእከለ፡ ንጹሕ፡ ወርኩስ፣፡ ወይከድኑ፡ አዕይንቲሆሙ፡ እምሰንበታትየ፡ ሁለ፡ ረሰዩኒ፡ ማእከሎሙ።
27 ወመላእክቲሃኒ፡ በማእከላ፡ ከመ፡ ተኵላት፡ መሠጥ፡ ይመሥጡ፡ ከመ፡ ይክዐዉ፡ ደመ፡ ወይሂዱ፡ ወይትዐገሉ።
28 ወነቢያቲሆሙኒ፡ ይቀብእዎሙ፡ ወይሬእዩ፡ ሎሙ፡ ከንቶ፡ ወያሰግሉ፡ ሐሰተ፡ ወይብሉ፡ ከመዝ፡ ይቤ፡ እግዚአብሔር፡ ወእግዚአብሔርሰ፡ ኢነበቦሙ።
29 ወሕዝበ፡ ምድር፡ ተዐግሎ፡ ተዐገሉ፡ ነዳየ፡ ወይገፍዑ፡ ምስኪነ፡ ወኢይፈትሑ፡ ጽድቀ፡ ለፈላሲ፡ ወየኀሥሡ፡ ዕደወ፡ እለ፡ ይመይጥዋ፡ ለርትዕ።
30 ወአኀሥሥ፡ እምኔሆሙ፡ ብእሴ፡ ዘየሐንጽ፡ አረፍተ፡ ወይቀውም፡ ኀበ፡ ዘተነሥተ፣፡ ወይቀውም፡ በቅድሜየ፡ በእከዮሙ፡ አመ፡ ዕድሜሃ፡ ለምድር፡ ከመ፡ ኢያጥፍኣ፡ ለምድር፡ ለዝሉፉ፡ ወኢረከብኩ።
31 ወከዐውኩ፡ መዐትየ፡ ዲቤሃ፡ በእሳተ፡ መቅሠፍትየ፡ ከመ፡ እፍድዮሙ፡ በከመ፡ ምግባሮሙ፣፡ ዲበ፡ ርእሶሙ፡ አገብእ፡ ሎሙ፡ ይቤ፡ እግዚአብሔር።
=== chapter 23 ===
[Chapter 23]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፣፡ ክልኤቲ፡ አንስት፡ አዋልደ፡ አሐቲ፡ ብእሲት፡ እማንቱ።
3 ወዘመዋ፡ በብሔረ፡ ግብጽ፡ እንዘ፡ ደናግል፡ እማንቱ፡ ወዘመዋ፡ ወበህየ፡ ወድቃ፡ አጥባቲሆን፡ ወበህየ፡ ሰበርዎን።
4 ወአስማቲሆን፡ እንተ፡ ትልህቅ፡ ሐላ፡ ወእንተ፡ ትንእስ፡ ሐሊባ፡ እኅታ። ወአውሰብክዎን፡ ወወለዳ፡ ሊተ፡ አዋልደ፡ ወደቂቀ። ወአስማቲሆን፡ ለሐላ፡ ሰማርያ፡ ወለሐሊባ፡ ኢየሩሳሌም።
5 ወዘመወት፡ ሐላ፡ እምኔየ፡ ወተለወቶሙ፡ ለመሐዛኒሃ፣፡ ለፋርስ፡ እለ፡ ይቀርብዋ።
6 በአልባሰ፡ ደርከኖ፡ ተላቢሶሙ፡ መሳፍንት፡ ወመኳንንት፡ ወወራዙት፡ ኵሎሙ፡ ኅሩያን፡ መስተፅዕናነ፡ አፍራስ።
7 ወወሀበቶሙ፡ ወዘመወት፡ ምስሌሆሙ፡ ለደቂቀ፡ ፋርስ፡ ኅሩያን፡ ኵሎሙ፡ ወምስለ፡ ኵሎሙ፡ እለ፡ አፍቀረቶሙ፣፡ ወረኵሰት፡ ቦሙ።
8 ወኢኀደገት፡ ዝሙታ፡ ዘእምብሔረ፡ ግብጽ፡ እስመ፡ ምስሌሃ፡ ይሰክቡ፡ እምንእሳ፡ ወእሙንቱ፡ ሰበርዋ፡ ወከዐዉ፡ ዝንየቶሙ፡ ዲቤሃ።
9 በበየነ፡ ዝንቱ፡ አግባእክዋ፡ ውስተ፡ እደ፡ መሐዛኒሃ፣፡ ውስተ፡ እዴሆሙ፡ ለደቂቀ፡ ፋርስ፡ እለ፡ አፍቀረት።
10 ወእሙንቱ፡ ቀፈጽዋ፡ ኃፍረታ፡ ወነሥኡ፡ ደቂቃ፡ ወአዋልዲሃ፡ ወቀተልዋ፡ በኲናት፡ ኪያሃኒ። ወኮነት፡ ነገረ፡ ለአንስት፡ ወገብሩ፡ በቀለ፡ ላዕሌሃ፡ ወበላዕለ፡ አዋልዲሃ።
11 ወርእየት፡ ሐሊባ፡ እኅታ፡ ወረኵሰት፡ በዝሙታ፡ እምኔሃ፡ ወአፈድፈደት፡ ዝሙታ፡ እምእኅታ።
12 ምስለ፡ ደቂቀ፡ ፋርስ፡ ወአፍቀረት፡ መሳፍንቲሆሙ፡ ወመኳንንቲሆሙ፡ እለ፡ ይቀርብዋ፡ በአልባሰ፡ ሲራይ፣፡ መስተፅዕናነ፡ አፍራስ፡ ኵሎሙ፡ ወራዙት፡ ኅሩያን።
13 ወርኢኩ፡ ከመ፡ ረኵሳ፡ ወአሐቲ፡ ፍኖቶን፡ ለክልኤሆን።
14 ወዳግሚት፡ ዘመወት፡ ወርእየት፡ አምሳለ፡ ዕደወ፡ ፋርስ፡ ሥዑላን፡ ውስተ፡ አረፍት።
15 ወአርአያ፡ ከለዳውያን፡ ሥዑላን፡ በኰራፒታ፡ ወቅኑታነ፡ ዐስቅ፡ ውስተ፡ ሐቌሆሙ፡ ወአልባሰ፡ ርፍዕ፡ ውስተ፡ ርእሶሙ፡ ወትሥልስት፡ ገጾሙ፣፡ ወኵሎሙ፡ ይመስሉ፡ ደቂቀ፡ ባቢሎን፡ እለ፡ ብሔረ፡ ፋርስ፡ ሀገሮሙ።
16 ወአንሥአት፡ ዐናይ፡ መንገሌሆሙ፡ ወነጸረቶሙ፣፡ ወፈነወት፡ ሀዋርያተ፡ ኀቤሆሙ፡ ብሔረ፡ ፋርስ።
17 ወመጽኡ፡ ኀቤሃ፡ ደቂቀ፡ ባቢሎን፡ ወይሰክቡ፡ ምስሌሃ፡ ውስተ፡ ምስካባ፡ ወያረኵስዋ፡ በዝሙቶሙ፣፡ ወረኵሰት፡ ቦሙ፡ ወጠለቀት፡ ነፍሳ፡ እምኔሆሙ።
18 ወከሠተት፡ ዝሙታ፡ ወከሠተት፡ ኃፍረታ። ወነቀበተኒ፡ ነፍየ፡ እምኔሃ፡ በከመ፡ ነቀበታ፡ ነፍስየ፡ ለእኅታ።
19 ወአብዛኅኪ፡ ዝሙተኪ፡ ከመ፡ ለተዘክሮ፡ መዋዕለ፡ ንእስኪ፡ ዘአመ፡ ዘሞኪ፡ በግብጽ።
20 ወአፍቀርኪዮሙ፡ ለደቂቀ፡ ፋርስ፡ እለ፡ መጠነ፡ አድግ፡ ነፍስቶሙ፡ ወከመ፡ እስኪተ፡ ፈረስ፡ እስኪቶሙ።
21 ወእትመየጣ፡ ለኃጢአተ፡ ንእስኪ፡ ዘገበርኪ፡ በብሔረ፡ ግብጽ፣፡ በማኅደርኪ፡ ዘአመ፡ ንኡስ፡ አጥባትኪ።
22 በእንተ፡ ዝንቱ፡ ሐሊባ፡ ከመዝ፡ ይቤ፡ እግዚአብሔር፡ ናሁ፡ አነ፡ አነሥኦሙ፡ ለመሐዛንኪ፡ ላዕሌኪ፡ እለ፡ ጠለቀት፡ ነፍስኪ፡ እምኔሆሙ፡ ወአመጽኦሙ፡ ዲቤኪ፡ ወየዐግቱኪ።
23 ደቂቀ፡ ባቢሎን፡ ወኵሎሙ፡ ፋርስ፡ እለ፡ ፋቁድ፡ ወሱሔ፡ ወቁዓ፡ ወኵሎሙ፡ ደቂቀ፡ ፋርስ፡ ምስሌሆሙ፣፡ ወራዙት፡ ኅሩያን፡ ወዓበይት፡ መኳንንት፣፡ ወኵሎሙ፡ በትሥልስት፡ መስተፅዕናነ፡ አፍራስ፡ እለ፡ አስመዩ።
24 ኵሎሙ፡ ይመጽኡ፡ ኀቤኪ፡ እመንገለ፡ ደቡብ፡ በሠረገላ፡ ወበመንኰራኵር፡ ምስለ፡ ብዙኃን፡ ሠራዊተ፡ አሕዛብ፣፡ ሰብአ፡ ሐፅ፡ ወኲናት፡ ወጌራ፡ ኃፂን፡ ወያነብሩ፡ መዓቅበ፡ ዲቤኪ፡ እንተ፡ ዐውድኪ።
25 ወእሁብ፡ ኵነኔ፡ ቅድመ፡ ገጾሙ፡ ወይትቤቀሉኪ፡ በኵነኔሆሙ። ወእፌኑ፡ ቅንአትየ፡ ዲቤኪ፡ ወይገብሩ፡ ላዕሌኪ፡ በመዐት። ወይሰቍሩ፡ አንፈኪ፡ ወይሰጕዑ፡ እዝነኪ፣፡ ወለእለ፡ ተርፉ፡ እምውስቴትኪ፡ ያወድቅዎሙ፡ በኲናት። ወይነሥእዎሙ፡ ለደቂቅኪ፡ ወአዋልድኪ፣፡ ወለእለ፡ ተርፉ፡ ትበልዖሙ፡ እሳት።
26 ወይሰልቡኪ፡ አልባሰኪ፡ ወይበረብሩ፡ ሠርጐ፡ ምክሕኪ።
27 ወእመይጥ፡ ኃጢአተኪ፡ እምኔኪ፡ ወዝሙተኪ፡ ዘእምብሔረ፡ ግብጽ፡ ወኢታነሥኢ፡ እንከ፡ አዕይንተኪ፡ ኀቤሆሙ፡ ወኢትዜከርዮሙ፡ እንከ፡ ለግብጽ።
28 በበይነ፡ ዝንቱ፡ ከመዝ፡ ይቤ፡ እግዚአብሔር፡ አዶናይ፡ ናሁ፡ አነ፡ አገብአኪ፡ ውስተ፡ እደ፡ ጸላእትኪ፡ እለ፡ ጠለቀት፡ ነፍስኪ፡ እምኔሆሙ።
29 ወይገብሩ፡ ዲቤኪ፡ ዘትጸልኢ፡ ወይበረብሩኪ፡ ኵሎ፡ ፃማኪ፡ ወተግባረኪ፡ ወየኀድጉኪ፡ ዕራቀኪ፡ ወትትኀፈሪ፡ ወይቀፍጹ፡ ኃፍረተኪ፡ ወኃሣረ፡ ዝሙትኪ።
30 ወእገብር፡ ላዕሌኪ፡ ዘንተ፡ ኵሎ፣፡ እስመ፡ ዘሞኪ፡ ወተለውኪዮሙ፡ ለአሕዛብ፡ ወረኰስኪ፡ በጌጋዮሙ።
31 ወሖርኪ፡ በፍኖተ፡ እኅትኪ፡ ወአገብእ፡ ጽዋዐ፡ እኅትኪ፡ ውስተ፡ እዴኪ።
32 ከመዝ፡ ይቤ፡ እግዚአብሔር፡ ጽዋዐ፡ እኅትኪ፡ ትሰትዪ፡ ዝኰ፡ ዕሙቀ፡ ወርሒበ፡ ወትከውኒ፡ ሰሐቀ፡ ወሥላቀ፡ በኀበ፡ ብዙኃን፡ እለ፡ ይገብሩ፡ ስታየ፡ ወይክዕዉ።
33 ወይመልኡ፡ ጽዋዐኪ፡ ሙሱነ፡ ወያማስኑ፡ ወትሰትዪ፡ ጽዋዐ፡ እኅትኪ፡ ሰማርያ።
34 ወትጸውቢዮ፡ ወእሥዕር፡ በዓላተኪ፡ ወአሥርኅተኪ፡ እስመ፡ አነ፡ ነበብኩ፡ ይቤ፡ አዶናይ፡ እግዚአብሔር።
35 በበይነ፡ ዝንቱ፡ ከመዝ፡ ይቤ፡ እግዚአብሔር፡ እስመ፡ ረሳዕክኒ፡ ወአግባእክኒ፡ ድኅረ፡ ዘባንኪ፣፡ ንሥኢ፡ አንቲ፡ ኃጢአተኪ፡ ወዝሙተኪ።
36 ወይቤለኒ፡ እግዚአብሔር፡ ተዋቀሦን፡ ወልደ፡ እጓለ፡ እመሕያው፡ ለሐሊባ፡ ወለሐላ፡ ወንግሮን፡ ኃጢአቶን።
37 ዘከመ፡ ዘመዋ፡ ወደም፡ ውስተ፡ እዴሆን፣፡ ወፈተዋ፡ ዝሙቶን፡ ወደቂቆንሂ፡ ገብራ፡ መብልዐ፡ ዘወለዳ፡ ሊተ።
38 ወከመዝ፡ ገብራ፡ ሊተ፡ ወአርኰሳ፡ መቅደስየ፡ ውእተ፡ አሚረ፡ ወሠዐራ፡ ሰንበታትየ።
39 ወዘብሓ፡ ደቂቆን፡ ለአማልክቲሆን፡ ወይበውኣ፡ ቤተ፡ መቅደስየ፡ ውእተ፡ አሚረ፡ ከመ፡ ያርኵሳሁ፡ ወከመዝ፡ ይገብራ፡ በማእከለ፡ ቤትየ።
40 ወዕደውኒ፡ እለ፡ ይመጽኡ፡ እምርኁቅ፣፡ ሐዋርያት፡ እለ፡ ተፈነዉ፡ ኀቤሆን፣፡ ወእምከመ፡ በጽሑ፡ ኀቤሆን፡ ይትሐፀባ፡ ወይትኰሐላ፡ አዕይንቲሆን፡ ወይሠረገዋ።
41 ወይነብራ፡ ውስተ፡ ዓራተ፡ ምስካቦን፡ ወሥሩዕ፡ ማእድ፡ ቅድሜሆን። ወይትፌሥሑ፡ በቅብእየ፡ ወበዕጣንየ።
42 ወይቃንዩ፡ በቃለ፡ አውታረ፡ መሰንቆየ፡ ወኀበ፡ ዕደው፡ እለ፡ ይቀድሑ፡ ወኀበ፡ ብዙኅ፡ ሰብእ፡ እለ፡ አተዉ፡ እምሐቅል። ወይወድያ፡ አውቃፋተ፡ ውስተ፡ እደዊሆን፡ ወአክሊለ፡ ምክሕ፡ ውስተ፡ ርእሶን።
43 ወእቤ፡ በእሉ፡ አኮኑ፡ ይዜምዋ፡ ወይገብራ፡ ከመ፡ ዘማ፡ ወለሊሃ፡ ዘመወት።
44 ወይበውኡ፡ ኀቤሃ፡ ከመ፡ ዘይበውእ፡ ኀበ፡ ብእሲት፡ ዘማ፣፡ ከማሁ፡ ይበውኡ፡ ኀበ፡ ሐላ፡ ወሐሊባ፡ ከመ፡ ይግበሩ፡ ኃጢአተ።
45 ወዕደው፡ ጻድቃን፡ እሙንቱ፡ እለ፡ ይትቤቀልዎን፡ በቀለ፡ ዘማ፡ ወበቀለ፡ ደም፣፡ እስመ፡ ዘማት፡ እማንቱ፡ ወደም፡ ውስተ፡ እደዊሆን።
46 እስመ፡ ከመዝ፡ ይቤ፡ አዶናይ፡ እግዚአብሔር፡ አመጽእ፡ ላዕሌሆን፡ ሠራዊተ፡ ወእፌኑ፡ ዲቤሆን፡ ሀከከ፡ ወይበረብርዎን።
47 ወይዌግርዎን፡ በእብን፡ አሕዛብ፡ ወይረግዝዎን፡ በመጣብሒሆሙ። ወለደቂቆን፡ ወለአዋልዲሆን፡ ይቀትልዎን፡ ወያውዕዩ፡ አብያቲሆን፡ በእሳት።
48 ወአአትት፡ ኃጢአተ፡ እምብሔር፡ ወይትቀሠፋ፡ ኵሎን፡ አንስት፡ ወኢይገብራ፡ እንከ፡ ኃጢአተ።
49 ወይገብእ፡ ጌጋይክሙ፡ ላዕሌክሙ፡ ወትትፈደዩ፡ ኃጢአተ፡ ሕሊናክሙ፡ ወተአምሩ፡ ከመ፡ አነ፡ ውእቱ፡ እግዚአብሔር።
=== chapter 24 ===
[Chapter 24]
1 ወነበበኒ፡ እግዚአብሔር፡ በታስዕ፡ ዓመት፣፡ በዐሥር፡ ወርኅ፣፡ በዐሡረ፡ ሠርቅ፡ ወይቤለኒ።
2 ወልደ፡ እጓለ፡ እመሕያው፡ ጸሐፍ፡ ለከ፡ ስመ፡ ዛቲ፡ ዕለት፣፡ እስመ፡ ይበጽሕ፡ ንጉሠ፡ ባቢሎን፡ ዲበ፡ ኢየሩሳሌም፡ ከመ፡ ዛቲ፡ ዕለት፡ ዮም።
3 ወንግር፡ ምሳሌ፡ ዲበ፡ ቤተ፡ ዘአምረሩኒ፡ ወመስል፡ ወበሎሙ፡ ከመዝ፡ ይቤ፡ እግዚአብሔር፡ እግዚእ፡ አፍልሕ፡ ጽሕርተ፡ ወደይ፡ ማየ፡ ውስቴታ።
4 ወአስተጋብእ፡ ውስቴታ፡ ግማዳተ፡ ዘኵሉ፡ አባል፡ ሠናየ፡ አገዳ፡ ወመዝራዕተ፡ ዘምሉእ፡ ሥጋ።
5 እምነ፡ መራዕይ፡ ሠናየ፡ ወስቡሐ፡ ወአንድድ፡ አዕጽምተ፡ ታሕቴሁ። ወአፍልሖ፡ ወይፍላሕ፡ በሕቁ፡ ወይብሰል፡ አዕጽምቲሁኒ፡ በማእከላ።
6 በበይነ፡ ዝንቱ፡ ከመዝ፡ ይቤ፡ አዶናይ፡ እግዚአብሔር፡ አሌላ፡ ለሀገረ፡ ደም፣፡ ጽሕርት፡ ዝሕልት፡ እንተ፡ ኢኀብረትዋ፡ ዛሕላ፡ ወያወፅኡ፡ በበአባሉ፡ ወኢበጽሐ፡ ኀቤሃ፡ መክፈልታ።
7 እስመ፡ ደማ፡ ማእከሌሃ፡ ሀሎ፡ ወአንበርክዎ፡ ዲበ፡ ሌዎጴጤርያ፡ ወኢያሦጥክዎ፡ ውስተ፡ ምድር፡ ከመ፡ ኢይድፍንዎ፡ በመሬት።
8 ከመ፡ ይዕርግ፡ መዐት፡ ወይትበቀል፡ በቀለ። ወወደይኩ፡ ዞማ፡ ዲበ፡ ሌዎጴጤርያ፡ ከመ፡ ኢይድፍንዎ።
9 በበይነ፡ ዝንቱ፡ ከመዝ፡ ይቤ፡ አዶናይ፡ እግዚአብሔር፡ አሌላ፡ ለሀገረ፡ ደም፡ ወአነ፡ አዐቢ፡ ዕፀወ፡ ትንታጋቲሃ።
10 ወአበዝኅ፡ ዕፀወ፡ ወአነድድ፡ እሳተ፡ ይሕርር፡ ሥጋሃ፡ እስከ፡ የኀልቅ፡ ዞማ፡ ወይትቀጥቀጥ፡ አዕጽምቲሃ።
11 ወአነብራ፡ ዲበ፡ አፍሐም፡ እስከ፡ ይነፍር፡ ወእስከ፡ ይሰቈር፡ ጽሕርቱ፡ ወይትመሰው፡ ማእከለ፡ ርኵሳ፡ ወየኀልቅ፡ ዛሕላ።
12 ወኢያወፅእ፡ ብዙኅ፡ ዛሕል፡ እምኔሃ።
13 ወይትኀፈር፡ ዛሕላ፡ ወይፈልሕ፡ ርኵስኪ፡ እስመ፡ ረኰስኪ። ወምንተ፡ ኢነጻሕኪ፡ እምርኵስኪ፡ እስከ፡ እፌጽም፡ መዐትየ፡ ላዕሌኪ።
14 አነ፡ እግዚአብሔር፡ ዘነበብኩ፡ ወአመጽእሂ፡ ወእገብርሂ፣፡ ኢየኀድግ፡ ወኢይሠሀል። በከመ፡ ፍናውኪ፡ ወበከመ፡ ሕሊናኪ፡ እኴንነኪ፡ ይቤ፡ አዶናይ፡ እግዚአብሔር። በበይነ፡ ዝንቱ፡ አነ፡ እኴንነኪ፡ በከመ፡ ደምኪ፡ ወበጌጋይኪ፡ እትቤቀለኪ፡ ርኵስት፡ ስምኪ፡ ወብዙኀ፡ ታመርሪ።
15 ወነበበኒ፡ እግዚአብሔር፡ ወይቤለኒ።
16 ወልደ፡ እጓለ፡ እመሕያው፣፡ ናሁ፡ አነ፡ እነሥእ፡ እምኔከ፡ ፍትወተ፡ አዕይንቲከ፡ በብድብድ፡ ኢታስቆቁ፡ ወኢትብኪ።
17 ወኢይምጻእከ፡ አንብዕ፡ በእንተ፡ ገዓረ፡ ደመ፡ ሙታን፡ ዘውስተ፡ ሐቌከ። ወኢትላሑ፡ ወኢታውፅእ፡ አክሊለከ፣፡ ወአሣእኒከ፡ እምውስተ፡ እግርከ፡ ኢታውፅእ፣፡ ወኢትክድን፡ ከናፍሪከ፡ ወኢትሴሰይ፡ እክለ፡ ዕደው።
18 ወነገርክዎሙ፡ ለሕዝብ፡ በጽባሕ፣፡ ወብእሲትየ፡ ሞተት፡ በሰርክ፣፡ ወገበርኩ፡ በጽባሕ፡ በከመ፡ ተአዘዝኩ።
19 ወይቤሉኒ፡ ሕዝብ፡ ኢትነግረነኑ፡ ምንትኑ፡ ውእቱ፡ ዘትገብር፡ አንተ።
20 ወእቤሎሙ፡ እግዚአብሔር፡ ነበበኒ፡ ወይቤለኒ።
21 በሎሙ፡ ለቤተ፡ እስራኤል፡ ከመዝ፡ ይቤ፡ እግዚአብሔር፡ ናሁ፡ አነ፡ አረኵሶ፡ ለመቅደስየ፣፡ ትዕቢተ፡ ኃይልክሙ፡ ወፍትወተ፡ አዕይንቲክሙ፣፡ ዝኰ፡ ዘትምሕክ፡ ነፍስክሙ። ደቂቅክሙኒ፡ ወአዋልዲክሙኒ፡ ዘተርፉ፡ ይወድቁ፡ በኵናት።
22 ወትገብሩ፡ በከመ፡ ገበርኩ። ወኢትከድኑ፡ አፉክሙ፡ ወኢትበልዑ፡ ሲሳየ፡ ዕደው።
23 ወአክሊልክሙ፡ በርእስክሙ፡ ወአሣእኒክሙ፡ ዘውስተ፡ እገሪክሙ። ኢትበክዩ፡ ወኢተአወይዉ፣፡ ዳእሙ፡ ትትመሰዉ፡ በኃጢአትክሙ። ወኵልክሙ፡ ትናዝዙ፡ ቢጸክሙ።
24 ወይከውነክሙ፡ ሕዝቅኤል፡ ትእምርተ፣፡ ኵሎ፡ ዘገብረ፡ ትገብሩ፡ ወኵሎ፡ ዘከመ፡ ረሰይኩ፡ ትገብሩ፡ አመ፡ በጽሐ፡ ዝንቱ፣፡ ወተአምሩ፡ ከመ፡ አነ፡ ውእቱ፡ እግዚአብሔር፡ አዶናይ።
25 ወአንተ፡ ወልደ፡ እጓለ፡ እመሕያው፣፡ አኮኑ፡ አመ፡ ነሣእኩ፡ እምኔሆሙ፡ ኃይሎሙ፡ ወትፍሥሕተ፡ ምክሖሙ፡ ወፍትወተ፡ አዕይንቲሆሙ፡ ዘትምሕክ፡ ነፍሶሙ፣፡ ደቂቆሙ፡ ወአዋልዲሆሙ።
26 ውእተ፡ ዕለተ፡ ዘድኅነ፡ ይበጽሕ፡ ኀቤከ፡ ለአስምዖ፡ አእዛን።
27 ውእተ፡ አሚረ፡ ይከሥት፡ አፉከ፡ ዘድኅነ፡ ወትትናገር፡ ወኢትከውን፡ እንከ፡ በሀመ፡ ወትከውን፡ ሎሙ፡ ትእምርተ፡ ወየአምሩ፡ ከመ፡ አነ፡ እግዚአብሔር።
=== chapter 25 ===
[Chapter 25]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ አጽንዕ፡ ገጸከ፡ መንገለ፡ ደቂቀ፡ አሞን፡ ወተነበይ፡ ሎሙ።
3 ወበሎሙ፡ ለደቂቀ፡ አሞን፡ ስምዑ፡ ቃለ፡ እግዚአብሔር፡ አዶናይ። ከመዝ፡ ይቤ፡ አዶናይ፡ እግዚአብሔር፡ እስመ፡ ተፈሣሕክሙ፡ በእንተ፡ መቅደስየ፡ እስመ፡ ረኵሰ፡ ወበእንተ፡ ምድረ፡ እስራኤል፡ እስመ፡ ማሰነት፡ ወበእንተ፡ ቤተ፡ ይሁዳ፡ እስመ፡ ተፄወዉ።
4 በበይነ፡ ዝንቱ፡ ናሁ፡ አነ፡ አገብአክሙ፡ ለደቂቀ፡ ቄዴም፡ ከመ፡ ይትካፈሉክሙ፡ ወያነብሩ፡ ደባትሪሆሙ፡ ውስቴትኪ፡ ወይተክሉ፡ ማኅደሪሆሙ፡ ኀቤኪ፡ ወእሙንቱ፡ ይበልዑ፡ ፍሬኪ፡ ወውእቶሙ፡ ይሰትዩ፡ ሐሊበኪ።
5 ወእሬስያ፡ ለሀገረ፡ ራባት፡ ምርዓየ፡ አግማል፡ ወለደቂቀ፡ አሞን፡ ምርዓየ፡ አባግዕ፣፡ ወተአምሩ፡ ከመ፡ አነ፡ ውእቱ፡ እግዚአብሔር።
6 እስመ፡ ከመዝ፡ ይቤ፡ እግዚአብሔር፡ አዶናይ፡ እስመ፡ ጠፋሕክሙ፡ በእደዊክሙ፡ ወአጽሐስክሙ፡ በእገሪክሙ፡ ወተኀሥየት፡ ነፍስክሙ፡ በእንተ፡ ምድረ፡ እስራኤል።
7 ወበእንተ፡ ዝንቱ፡ ናሁ፡ አነ፡ አነሥእ፡ ዲቤኪ፡ እዴየ፡ ወእሬስየኪ፡ በርበረ፡ ለአሕዛብ፡ ወእዘርወኪ፡ ውስተ፡ በሐውርት፡ ወአጠፍአኪ፡ እምውስተ፡ አሕዛብ፡ ወእደመስሰኪ፣፡ ወተአምሪ፡ ከመ፡ አነ፡ ውእቱ፡ እግዚአብሔር።
8 ከመዝ፡ ይቤ፡ እግዚአብሔር፡ አዶናይ፡ እስመ፡ ይቤሉ፡ ሞአብ፡ ወሴይር፡ ናሁ፡ ከመ፡ ኵሉ፡ አሕዛብ፡ ቤተ፡ ይሁዳ።
9 ወበበይነ፡ ዝንቱ፡ ናሁ፡ አነ፡ እነሥት፡ መትከፍታ፡ ለሞአብ፡ እምነ፡ አህጉር፡ ወእምአህጉረ፡ ምኵናኑ፡ ወእምድሩ፡ ኅሪት፡ ዘቤተ፡ ሐሴሞት፡ ወበአልቤዓን፡ ወቀርትማኅ።
10 ለደቂቀ፡ ቄዴም፡ ላዕለ፡ ደቂቀ፡ አሞን፡ ወሀብክዎ፡ ርስቶ፡ ከመ፡ ኢይርከቡ፡ ዝክረ፡ ደቂቀ፡ አሞን፡ በውስተ፡ አሕዛብ።
11 ወበሞአብ፡ እገብር፡ በቀለ፣፡ ወየአምሩ፡ ከመ፡ አነ፡ ውእቱ፡ እግዚአብሔር።
12 ከመዝ፡ ይቤ፡ አዶናይ፡ እግዚአብሔር፡ እስመ፡ ገብረት፡ ኤዶምያስ፡ አመ፡ ተበቀለቶሙ፡ በቀለ፡ ለቤተ፡ ይሁዳ፡ ወተቀየምዎሙ፡ ወተበቀልዎሙ፡ በቀለ።
13 በእንተ፡ ዝንቱ፡ ከመዝ፡ ይቤ፡ አዶናይ፡ እግዚአብሔር፡ አነሥእ፡ እዴየ፡ ላዕለ፡ ኤዶምያስ፡ ወአጠፍእ፡ እምውስቴታ፡ ሰብአ፡ ወእንስሳ፡ ወእሬስያ፡ በድወ፡ ወእለሂ፡ እምቴማን፡ ወእምዴዳን፡ ይወድቁ፡ በኵናት።
14 ወእትቤቀሎሙ፡ ለኤዶምያስ፡ በእደ፡ ሕዝብየ፡ እስራኤል፣፡ ወይገብሩ፡ ላዕለ፡ ኤዶምያስ፡ በከመ፡ መዐትየ፡ ወበከመ፡ መቅሠፍትየ፣፡ ወየአምሩ፡ በቀልየ፡ ይቤ፡ አዶናይ፡ እግዚአብሔር።
15 ከመዝ፡ ይቤ፡ አዶናይ፡ እግዚአብሔር፡ እስመ፡ ገብሩ፡ ኢሎፍሊ፡ በቀለ፡ ወአቀሙ፡ በቀሎሙ፡ ወተፈሥሐት፡ ነፍሶሙ፡ ከመ፡ ይጥፍኡ፡ ለዓለም።
16 በበይነ፡ ዝንቱ፡ ከመዝ፡ ይቤ፡ አዶናይ፡ እግዚአብሔር፡ ናሁ፡ አነ፡ አነሥእ፡ እዴየ፡ ዲበ፡ ኢሎፍሊ፡ ወአጠፍኦሙ፡ ለመኳንንት፡ ወእደመስሶሙ፡ ለእለ፡ ተርፉ፡ እምሰብአ፡ ጰራልያ።
17 ወእገብር፡ ላዕሌሆሙ፡ በቀለ፡ ዓቢየ፣፡ ወየአምሩ፡ ከመ፡ አነ፡ ውእቱ፡ እግዚአብሔር፡ አዶናይ፡ ሶበ፡ ተበቀልክዎሙ።
=== chapter 26 ===
[Chapter 26]
1 ወኮነ፡ አመ፡ ዐሠርቱ፡ ወአሐዱ፡ ዓመት፣፡ በሠርቀ፡ ወርኅ፡ ነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፣፡ እስመ፡ ትቤ፡ ሶር፡ ዲበ፡ ኢየሩሳሌም፡ እንቋዕ፡ ተቀጥቀጠት፡ ወተሐጕለት፣፡ ወአሕዛቢሃኒ፡ ገብኡ፡ ኀቤየ፡ ወኀልቀት፡ ምልእት።
3 በበይነ፡ ዝንቱ፡ ከመዝ፡ ይቤ፡ አዶናይ፡ እግዚአብሔር፡ ናሁ፡ አነ፡ ላዕሌኪ፡ ሶር፣፡ ወአመጽእ፡ ዲቤኪ፡ ብዙኃነ፡ አሕዛበ፡ ከመ፡ ታዐርግ፡ ባሕር፡ ማዕበላ።
4 ወያንኅሉ፡ አረፋቲሃ፡ ለሶር፡ ወይነሥቱ፡ ማኅፈደኪ፡ ወአኀልቆ፡ ለመሬትኪ፡ እምኔኪ፡ ወእሬስያ፡ ከመ፡ ኰኵሕ፡ ልሙፅ።
5 ወይረብቡ፡ መሣግሪሆሙ፡ ማእከለ፡ ባሕር፡ እስመ፡ አነ፡ ነበብኩ፡ ይቤ፡ እግዚአብሔር፡ እግዚእ። ወትከውን፡ በርበረ፡ ለአሕዛብ።
6 ወይቀትልዎን፡ በኲናት፡ ለአዋልዲሃ፡ በውስተ፡ ገዳም፣፡ ወየአምሩ፡ ከመ፡ አነ፡ ውእቱ፡ እግዚአብሔር።
7 ከመዝ፡ ይቤ፡ አዶናይ፡ እግዚአብሔር፡ ናሁ፡ አነ፡ አመጽእ፡ ላዕሌኪ፡ ሶር፡ ናቡከደነፆርሃ፡ ንጉሠ፡ ባቢሎን፡ እመንገለ፡ ደቡብ፡ ንጉሠ፡ ነገሥት፡ ውእቱ፡ ምስለ፡ አፍራስ፡ ወሠረገላት፡ ወመስተፅዕናን፡ ወተዓይነ፡ አሕዛብ፡ ብዙኃን፡ ፈድፋደ።
8 ወውእቱ፡ ይቀትሎን፡ ለአዋልድኪ፡ እለ፡ ሐቅል፡ በኲናት፡ ወያነብር፡ ላዕሌኪ፡ መዓቅበ፡ ወየሐፅረኪ፣፡ ወየሐንጽ፡ ጥቅመ፡ ዐውድኪ፡ ወየዐግቱኪ፡ በንዋየ፡ ሐቅል፡ ወይደረቢ፡ በኰያንዊሁ።
9 አረፍተኪ፡ ወማሕፈደኪ፡ ያንኅል፡ በመጣብሒሁ።
10 ወይደፍነኪ፡ ጸበል፡ እምብዝኀ፡ አፍራሲሁ፣፡ ወእምድምፀ፡ አፍራሲሁ፡ ወመንኰራኵረ፡ ሠረገላቲሁ፡ ያንቀለቅል፡ አረፋትኪ፡ ወይበውኦን፡ ለአናቅጽኪ፡ ከመ፡ ዘይበውእ፡ አዕጻደ፡ ሐቅል፡ በንዋየ፡ ሐቅሉ።
11 ወያከይድ፡ አፍራሲሁ፡ መርሕበኪ፡ ወይቀትሎሙ፡ ለአሕዛብኪ፡ በመጥባሕት፡ ወይነፅኆ፡ ውስተ፡ ምድር፡ ለጽንዐ፡ ኃይልኪ።
12 ወይበረብሩኪ፡ ንዋየኪ፡ ወይመሀርኩ፡ መራዕየኪ፡ ወያንኅሉ፡ አረፋተኪ፡ ወይነሥቱ፡ አብያተኪ፡ መፍትወ። ወእብነኪ፡ ወዕፀወኪ፡ ወመሬተኪ፡ ውስተ፡ ቀላየ፡ ባሕር፡ ይዌርዉ።
13 ወይሥዕር፡ ኵሎ፡ ዕንዚራተኪ፡ ወኢይሰማዕ፡ እንከ፡ ድምፀ፡ ማኅሌትኪ።
14 ወእሬስየኪ፡ ከመ፡ ኰኵሕ፡ ንጹሕ፡ ኀበ፡ ይረብቡ፡ መሣግረ፡ ትከውኒ፡ ወኢትትሐነጺ፡ እንከ፣፡ እስመ፡ አነ፡ ነበብኩ፡ ይቤ፡ እግዚአብሔር፡ አዶናይ።
15 ከመዝ፡ ይቤ፡ አዶናይ፡ እግዚአብሔር፡ በእንተ፡ ሶር፡ አኮኑ፡ እምድምፀ፡ ድቀትኪ፡ ተመንደቡ፡ ቅቱላንኪ፣፡ አመ፡ መልሐ፡ መጥባሕቶ፡ በማእከሌኪ፡ አድቅለቃ፡ ደሰያት።
16 ወይወርዱ፡ እመናብርቲሆሙ፡ ኵሎሙ፡ መላእክተ፡ ባሕር፡ ወያአትቱ፡ ጌራቲሆሙ፡ እምርእሶሙ፡ ወይሰልቡ፡ አልባሰ፡ ዐስቆሙ። ወድንጋፄ፡ ይደንግፁ፡ እንዘ፡ ይነብሩ፡ ውስተ፡ ምድር፡ ወይትሐዘቡ፡ ሞቶሙ፡ ወይበክዩኪ።
17 ወያስቆቅዉኪ፡ ወይብሉኪ፡ እፎ፡ ጠፍአት፡ ወተሥዕረት፡ እምባሕር፡ ሀገር፡ ክብርት፣፡ እንተ፡ ኮነት፡ ጽንዕተ፡ ውስተ፡ ባሕር፡ ወእለሂ፡ ይነብርዋ፡ እንተ፡ አፍርሀት፡ ኵሎ፡ ሰብአ።
18 ወይፈርሁ፡ ደሰያት፡ እምአመ፡ ወደቂ፡ ወይደነግፃ፡ ደሰያት፡ እምነ፡ ፀአትኪ።
19 እስመ፡ ከማሁ፡ ይቤ፡ አዶናይ፡ እግዚአብሔር፡ አመ፡ ኮንኪ፡ ሀገረ፡ መዝበረ፡ ከመ፡ አህጉር፡ ዘአልቦ፡ ዘይነብሮን፣፡ አመ፡ አምጻእኩ፡ ዲቤኪ፡ ቀላየ፡ ወይደፍነኪ፡ ማይ፡ ብዙኅ።
20 ወአገብአኪ፡ ኀበ፡ እለ፡ ይወርዱ፡ ውስተ፡ ዐዘቅት፡ ኀበ፡ ሕዝብ፡ ዘለዓለም፡ ወአነብረኪ፡ ታሕተ፡ ምድር፡ ከመ፡ መዝብር፡ እምዓለም፡ ምስለ፡ እለ፡ ይወርዱ፡ ውስተ፡ ግብ፡ ከመ፡ ኢትንበሪ፡ ወኢትቁሚ፡ ላዕለ፡ ምድረ፡ ሕይወትኪ።
21 ወእሁበኪ፡ ለሞት፡ ወኢትሄልዊ፡ እንከ፡ ወየኀሥሡኪ፡ ወኢይረክቡኪ፡ እንከ፡ ለዓለም፡ ይቤ፡ አዶናይ፡ እግዚአብሔር።
=== chapter 27 ===
[Chapter 27]
1 ወነበበኒ፡ እግዚአብሔር፡ ወይቤለኒ።
2 አንተ፡ ወልደ፡ እጓለ፡ እመሕያው፡ አንሥእ፡ ለከ፡ ሰቆቃወ፡ ላዕለ፡ ሶር።
3 ወበላ፡ ለሶር፣፡ ለእንተ፡ ትነብር፡ ውስተ፡ ፍኖተ፡ ባሕር፡ ማዕረብቶሙ፡ ለአሕዛብ፡ እለ፡ ውስተ፡ ደሰያት፡ ብዙኃት፡ ከመዝ፡ ይቤ፡ እግዚአብሔር፡ ለሶር፡ አንቲ፡ ትብሊ፡ ለልየ፡ ረሰይኩ፡ ሊተ፡ ሥንየ።
4 ውስተ፡ ልበ፡ ባሕር፡ ደወልኪ፣፡ ሐናጽያንኪ፡ አሠነዩ፡ ለኪ፡ ሥነ።
5 ዘእምሳኔር፡ ሐነጹ፡ ለኪ፡ ሰሌዳተ፡ አርዝ፡ በሰሌዳት፡ ዘቄጵሮስ፣፡ እምነ፡ ሊባኖስ፡ ነሥኡ፡ ይግበሩ፡ ለኪ፡ አዕማደ፡ ኢላጡኑስ።
6 እምብሔረ፡ ባሳን፡ ገብሩ፡ ሐዳፈኪ፡ ወመቅደሰኪ፡ ገብሩ፡ ዘቀርነ፡ ነጌ፡ ወአብያተ፡ ጽኑዐ፡ ዘእምደሰያት፡ ኬጤን።
7 ዐስቅ፡ ወሜላት፡ ኮነ፡ ለኪ፡ እምግብጽ፡ ለመንጸፍኪ፡ ወለትርሲትኪ፡ ከመ፡ ይኩን፡ ለኪ፡ ትእምርተ፡ ወሜላተ፡ ወደርከኖ፣፡ እምደሰያተ፡ ኤሌሲ፡ ይግበሩ፡ ለኪ፡ መዋጥሐ።
8 ይግበሩ፡ ለኪ፡ እለ፡ ይነብሩ፡ ሲዶና፡ ወአሬዌድ፡ ሐዳፍያንኪ። ወጠቢባንኪ፡ ሶር፡ እለ፡ ሀለዉ፡ ውስቴትኪ፣፡ ወእሙንቱ፡ ሐዳፍያንኪ።
9 ሊቃናተ፡ ጌባል፡ ወጠቢባኒሃ፡ ኮኑ፡ ለኪ፡ እለ፡ ያጸንዑ፡ ቤደቀኪ። ወኵሉ፡ አሕማረ፡ ባሕር፡ ወእለ፡ ይቀድፉ፡ ኮኑኪ፡ ዐረባ፡ ዐረብኪ።
10 ፉጥ፡ ወሉድ፡ ወፋርስ፡ እሙንቱኬ፡ ሠራዊትኪ፡ ዕደው፡ መስተቃትላን፣፡ ወልታ፡ ወጌራ፡ ይሰቅሉ፡ ውስቴትኪ፡ ወእሙንቱ፡ ወሀቡ፡ ትርሲተኪ።
11 ደቂቀ፡ አሬዌድ፡ ሠራዊትኪ፡ የዐግቱ፡ ዲበ፡ አረፍትኪ፡ ወገማዲም፡ ያነብሩ፡ መዓቅበኪ፡ ወሰቀሉ፡ ንዋየ፡ ሐቅሎሙ፡ ውስተ፡ ማኅፈድኪ፡ ዐውደኪ፡ ውስተ፡ ማኅደርኪ፣፡ እሙንቱ፡ ገብሩ፡ ለኪ፡ ሥነኪ።
12 ተርሴስ፡ እሙንቱ፡ ማዕረብትኪ፡ እምኵሉ፡ ብዝኀ፡ ኀይልኪ፣፡ ወርቀ፡ ወብሩረ፡ ወኃፂነ፡ ወዓረረ፡ ወናዕከ፡ ወሀቡ፡ ውስተ፡ ምሥያጥኪ።
13 ዮዎን፡ ወቶቤል፡ ወሞስስ፡ እሙንቱ፡ ሠየጥኪ፡ በነፍሰ፡ ሰብእ፣፡ ወበንዋየ፡ ብርት፡ ሰረዩ፡ ለኪ፡ ተግባረኪ።
14 ወእምቤተ፡ ቴርጋማ፡ አፍራሰ፡ ወመስተፅዕናነ፡ ወአብቅለ፡ አምጽኡ፡ ውስተ፡ ምሥያጥኪ።
15 ወደቂቀ፡ ዴዳን፡ ሠየጥኪ፣፡ ወደሰያት፡ ብዙኃት፡ እሙንቱ፡ ሠየጥኪ፡ በቀርነ፡ ነጌ፣፡ ወእለ፡ መጽኡ፡ ህየ፡ ይሁቡኪ፡ ደነሰኪ።
16 አራም፡ ማዕረብትኪ፡ እምብዝኀ፡ ተግባርኪ፡ ወትትጌበሪ፡ ምስለ፡ እለ፡ ተደመሩ፡ ምስሌኪ፣፡ ወያመጽኡ፡ ለኪ፡ ዝሉፈ፡ ወሜላተ፡ ወዐስቀ፡ ወሢራየ፡ ወረአሙተ፡ ወከረከንድ፡ እሙንቱ፡ ሠየጥኪ።
17 ወይሁዳ፡ ወእስራኤል፡ እሙንቱ፡ ሠየጥኪ፡ ወይሠይጡ፡ ለኪ፡ ስርናየ፡ ወሰሊሆተ፡ ወመዐረ፡ ቅድወ፡ ወቅብአ፡ ወርጢነ፡ ወሀቡኪ፡ በዘይዴመሩ፡ ምስሌኪ።
18 ደማስቆ፡ መስተገብራንኪ፡ እምብዝኀ፡ ኃይልኪ፡ ወይነ፡ እምኬሬቦን፡ ወፀምረ፡ ንጹሐ።
19 ዳን፡ ወዳዋን፡ ወአሲል፡ አምጽኡ፡ ለኪ፡ ኃፂን፡ ግቡረ፡ ውስተ፡ ምሥያጥኪ፣፡ አበሜ፡ ወቀናንሞ።
20 ዴዳን፡ ሠየጥኪ፡ በአልባሰ፡ ክብር፡ ምስለ፡ እንስሳ፡ ኅሩይ፡ ወሠረገላሆሙ።
21 ዐረብ፡ ወኵሎሙ፡ መላእክተ፡ ቄዳር፡ እሙንቱ፡ ሠየጥኪ፡ በእደ፡ ዚአኪ፡ አግማለ፡ ወአባግዐ፡ ወአጣሌ፡ በዘይሣየጡኪ።
22 ሠየጠ፡ ሴባዕ፡ ወራግማ፡ እሙንቱ፡ ሠየጥኪ፡ በቅድው፡ አፈዋት፡ ወዕንቍ፡ ሠናይ፣፡ ወወርቀ፡ አምጽኡ፡ ውስተ፡ ምሥያጥኪ።
23 ሰንአ፡ ካራ፡ ወዘናሖ፡ ወኢዴን፡ እሙንቱ፡ ሠየጥኪ፡ አሶር፡ ወከሌሜድ፡ ሠየጥኪ።
24 ወያመጽኡ፡ ተግባሮሙ፡ ዕሱቀ፡ ደርከኖ፡ ገርሖሙ፡ ወለኅሩያኒሆሙ፡ የሐምይዎሙ፡ በአሕባል።
25 አሕማረ፡ ተርሴስ፡ ይትለአኩኪ፡ ዕፀ፡ ቅጵርስና፡ ምስሌሆሙ፡ ለተግባርኪ፡ ዘይበዝኅ፡ ሤጥኪ፡ ኀበ፡ ተደመሩ፡ ምስሌኪ፡ ወጸገብኪ፡ ወሰባሕኪ፡ ፈድፋደ፡ ውስተ፡ ልበ፡ ባሕር።
26 ማእከለ፡ ማይ፡ ብዙኅ፡ አኅለፉኪ፡ ረዳእያንኪ፣፡ ነፋሰ፡ ጽባሕ፡ ሰበረኪ፡ በውስተ፡ ልበ፡ ባሕር።
27 ወኮነ፡ ኃይልኪ፡ ወዓሳብኪ፡ ወእለ፡ ተደመሩ፡ ምስሌኪ፡ ይቀድፉኪ፡ ወሐዳፍያንኪ፡ ወእለ፡ ያጸንዑ፡ ቤዴቀኪ፣፡ እለ፡ ተደመሩ፡ ምስሌኪ፡ ድሙራንኪ፡ ወኵሎሙ፡ ዕደው፡ መስተቃትላን፡ እለ፡ ውስቴትኪ፡ ይወድቁ፡ ውስተ፡ ልበ፡ ባሕር፡ በዕለተ፡ ድቀትኪ።
28 እምቃለ፡ አውያትኪ፡ አምርሕትኪ፡ ፍርሃተ፡ ይፈርሁ።
29 ወይወርዱ፡ እምአሕማራቲሆሙ፡ ውስተ፡ ባሕር፡ ኵሎሙ፡ እለ፡ ይቀድፉ፡ ወመስተፅዕናን፡ ወእለ፡ ሐዳፍ፡ በባሕር፡ ውስተ፡ ምድር፡ ይቀውሙ።
30 ወይዌውዑ፡ በቃሎሙ፡ በእንቲአኪ፡ ወየአወይዉ፡ መሪረ፣፡ ወይወድዩ፡ መሬተ፡ ውስተ፡ አርእስቲሆሙ፡ ወሐመደ፡ ይነጽፉ።
31 ወይቄርሑ፡ ርእሶሙ፡ በእንቲአኪ፡ ወይቀንቱ፡ ሠቀ፡ ወይበክዩኪ፡ መሪረ፡ ወይላሕዉኪ፡ መሪረ፡ ላሐ።
32 ወያስቆቅዉኪ፡ ሰቆቃወ፡ መኑ፡ ከመ፡ ጢሮስ፡ እንተ፡ ተሀውከት፡ ማእከለ፡ ባሕር።
33 ሚመጠነ፡ ትረክቢ፡ ዓስበኪ፡ በውስተ፡ ባሕር፡ አጽገብኪ፡ አሕዛበ፡ ብዙኃነ፡ በብዙኅ፡ ብዕልኪ፡ ወእለ፡ ተደመሩ፡ ምስሌኪ፡ አብዐልኪዮሙ፡ ለነገሥተ፡ ምድር፡ ለኵሎሙ።
34 ወይእዜኒ፡ ትትቀጠቀጢ፡ ውስተ፡ ባሕር፣፡ ውስተ፡ ቀላየ፡ ማይ፡ ወእለ፡ ተደመሩ፡ ምስሌኪ፡ ወኵሎሙ፡ ተዓይንኪ፡ በማእከሌኪ።
35 ይወድቁ፡ ኵሎሙ፡ እለ፡ ይቀድፉኪ፡ ወኵሎሙ፡ እለ፡ ይነብሩ፡ ደሰያተ፡ በከዩኪ፣፡ ወነገሥቶሙኒ፡ ድንጋፄ፡ ደንገፁ፡ ወአንብዐ፡ ገጾሙ።
36 ሠየጠ፡ አሕዛብ፡ ተፋጸዩኪ፡ ወትትሐጐሊ፡ ወኢትሄልዊ፡ እንከ፡ ለዓለም።
=== chapter 28 ===
[Chapter 28]
1 ወነበበኒ፡ እግዚአብሔር፡ ወይቤለኒ።
2 አንተ፡ ወልደ፡ እጓለ፡ እመሕያው፡ በሎ፡ ለመልአከ፡ ጢሮስ፡ ከመዝ፡ ይቤ፡ እግዚአብሔር፡ እግዚእ፡ እስመአ፡ ተዐበየ፡ ልብከ፡ ወትቤ፡ እግዚአብሔር፡ አነ፣፡ ከመ፡ ይነብር፡ እግዚአብሔር፡ ማእከለ፡ ባሕር፡ እነብር፡ አነ፣፡ እንዘ፡ ሰብእ፡ አንተ፡ ወኢኮንከ፡ እግዚአብሔር፣፡ ወረሰይከ፡ ልብከ፡ ከመ፡ ልበ፡ እግዚአብሔር።
3 አንተኑ፡ ትጠብብ፡ እምዳንኤል፡ ወጠቢባንሂ፡ ኢመሀሩከ፡ በጥበቦሙ።
4 በጥበብከኑ፡ ወበአእምሮትከ፡ ገበርከ፡ ለከ፡ ዘንተ፡ ኃይለ፡ ወአጥረይከ፡ ለከ፡ ወርቀ፡ ወብሩረ፡ ውስተ፡ መዛግብቲከ።
5 ወእመ፡ አኮ፡ በምክርከ፡ ወተግባርከ፡ አብዛኅከ፡ ኃይለከ፡ ወአዕበይከ፡ ልበከ፡ በኃይልከ።
6 በበይነ፡ ዝንቱ፡ ከመዝ፡ ይቤ፡ እግዚአብሔር፡ እስመ፡ ረሰይከ፡ ልበከ፡ ከመ፡ ልበ፡ እግዚአብሔር።
7 በበይነ፡ ዝንቱ፡ ናሁ፡ አነ፡ አመጽእ፡ ላዕሌከ፡ ነኪራነ፡ አሕዛበ፡ እኩያነ፡ ወይደራበዩከ፡ በኵያንዊሆሙ፡ በዲበ፡ ሥነ፡ ሥርዓትከ፡ ወይነፅኅዋ፡ ለሥንከ፡ ውስተ፡ ሞት።
8 ወያወርዱከ፡ (ወይቀትሉከ፣)፡ ወትመውት፡ (በኃፂን)፡ ወይዌርዉ፡ በድነከ፡ ውስተ፡ ልበ፡ ባሕር።
9 እስኩ፡ በሎሙ፡ ለእለ፡ ይቀትሉከ፡ እግዚአብሔር፡ አነ፡ እንዘ፡ ሰብእ፡ አንተ፡ ወኢኮንከ፡ እግዚአብሔር።
10 ወብዙኃን፡ እለ፡ ይረግዙከ፡ ወትመውት፡ ሞተ፡ ቈላፋን፡ ወይቀትሉከ፡ ቈላፋን፡ ወትመውት፡ በእዴሆሙ፡ እስመ፡ አነ፡ ነበብኩ፡ ይቤ፡ እግዚአብሔር።
11 ወነበበኒ፡ እግዚአብሔር፡ ወይቤለኒ፡ ወልደ፡ እጓለ፡ እመሕያው፡ ብክዮ፡ ወአስቆቅዎ፡ ለንጉሠ፡ ጢሮስ።
12 ወበሎ፡ ከመዝ፡ ይቤ፡ እግዚአብሔር፡ ትመስል፡ አንተ፡ ፍቱሐ፡ ማኅተመ፡ ዘተኬነውዎ፡ ጠበብት፡ ወምኩሐ፡ ሥን።
13 ወተፈጋዕከ፡ በአዕጻዳተ፡ ቀምሕከ፡ ውስተ፡ ኤዶም፡ ገነተ፡ እግዚአብሔር፡ በኀበ፡ ተደለውከ፡ ወተሠርገውከ፡ ኵሎ፡ ዕንቈ፡ ሰርድዮን፡ ወጳዝዮን፡ ወመረግድ፡ ወያክንት፡ ቀይሕ፡ ወጸሊም፡ ወኢያስጲድ፡ ወሰርዲኖን፡ ወአኬጤን፡ ወአሜተስጦን፡ ወከርሴምቶን፡ ወቢረሌ፡ ወአንክዮን፡ ወመላእከ፡ ወርቀ፡ መዛግብቲከ፡ ወመሣይምቲከ፡ እምአመ፡ ተፈጠርከ።
14 ኀበ፡ ኪሩብ፡ ሤምኩከ፡ ውስተ፡ ደወለ፡ እግዚአብሔር፡ ቅዱስ፡ ዘተወለድከ፡ ማእከለ፡ አእባነ፡ እሳተ፡ ቀይሕ።
15 ወተወለድከ፡ አንተ፡ በመዋዕሊከ፡ ዘአልቦ፡ ነውር፣፡ አንተ፡ በፍኖትከ፡ እምአመ፡ ተፈጠርከ፡ እስከ፡ አመ፡ ተረከበ፡ ጌጋይ፡ ላዕሌከ።
16 እምብዝኀ፡ ተግባርከ፡ መላእከ፡ ዓመፃ፡ ውስተ፡ አብያቲከ፡ ወአበስከ፡ ወቈሰልከ፡ በደብረ፡ እግዚአብሔር፡ ወያወፅአከ፡ እማእከለ፡ እብነ፡ ቀይሓት፡ ኪሩብ።
17 ወተዝኅረ፡ ልብከ፡ በሥንከ፡ ወማሰነት፡ ሥርዓትከ፡ ምስለ፡ ላህይከ። በብዝኀ፡ ኃጢአትከ፡ ነፃኅኩከ፡ ውስተ፡ ምድር፡ ወአዘዝኩ፡ ይሥጥሑከ፡ በቅድመ፡ ነገሥት፡ ከመ፡ ይሣለቁከ።
18 በብዝኀ፡ ጌጋይከ፡ ወዓመፃከ፡ ዘገበርከ፡ ወአርኰስከ፡ መቅደሰከ፡ ወአወፅእ፡ እሳተ፡ እማእከሌከ፡ እንተ፡ ትበልዐከ፡ ወእሬስየከ፡ ሐመደ፡ ውስተ፡ ምድርከ፡ በቅድመ፡ ኵሎሙ፡ እለ፡ ይኔጽሩከ።
19 ወኵሎሙ፡ አሕዛብ፡ እለ፡ የአምሩከ፡ ይበክዩከ። እስመ፡ ተሐጐልከ፡ ወኢትሄሉ፡ እንከ፡ ለዓለም።
20 ወነበበኒ፡ እግዚአብሔር፡ ወይቤለኒ።
21 ወልደ፡ እጓለ፡ እመሕያው፡ አጽንዕ፡ ገጸከ፡ ዲበ፡ ሲዶና፡ ወተነበይ፡ ዛቲ።
22 ወበላ፡ ከመዝ፡ ይቤ፡ አዶናይ፡ እግዚአብሔር፡ ናሁ፡ አነ፡ ላዕሌኪ፡ ሲዶና፡ ወእሴባሕ፡ ብኪ፣፡ ወተአምሪ፡ ከመ፡ አነ፡ ውእቱ፡ እግዚአብሔር፡ ሶበ፡ ተበቀልኩኪ፡ ወእትቄደስ፡ ብኪ።
23 ወእፌኑ፡ ላዕሌኪ፡ ሞተ፡ ወደመ፡ ውስተ፡ መርሕብኪ፡ ወይወድቁ፡ ውስተ፡ ማእከላ፡ ቅቱላን፡ በኵናት፡ በውስተ፡ ዐውድኪ፣፡ ወተአምሪ፡ ከመ፡ አነ፡ ውእቱ፡ እግዚአብሔር።
24 ወአልቦ፡ እንከ፡ በውስተ፡ እስራኤል፡ ሦክ፡ ወአሜከላ፡ ወመሪር፡ ሕማም፡ እምኵሉ፡ እለ፡ ዐውዶሙ፡ ወእለ፡ አኅሠርዎሙ፣፡ ወየአምሩ፡ ከመ፡ አነ፡ ውእቱ፡ እግዚአብሔር፡ አዶናይ።
25 ከመዝ፡ ይቤ፡ አዶናይ፡ እግዚአብሔር፡ ሶበ፡ አስተጋባእክዎሙ፡ ለቤተ፡ እስራኤል፡ እምአሕዛብ፡ ኀበ፡ ዘረውክዎሙ፡ ህየ፡ ወእትቄደስ፡ ቦሙ፡ በቅድመ፡ አሕዛብ፡ ወሕዝብ፡ ወይነብሩ፡ ውስተ፡ ምድሮሙ፡ እንተ፡ ወሀብክዎ፡ ለቍልዔየ፡ ያዕቆብ።
26 ወይነብሩ፡ ውስቴታ፡ ተአሚኖሙ፡ ወየሐንጹ፡ አብያተ፡ ወወይነ፡ ይተክሉ፡ ወይነብሩ፡ ተአሚኖሙ፡ ሶበ፡ ተበቀልክዎሙ፡ ለእለ፡ አኅሠርዎሙ፡ እለ፡ ዐውዶሙ፣፡ ወየአምሩ፡ ከመ፡ አነ፡ ውእቱ፡ እግዚአብሔር፡ አምላኮሙ፡ ወአምላከ፡ አበዊሆሙ።
=== chapter 29 ===
[Chapter 29]
1 አመ፡ ዐሠርቱ፡ ዓመት፣፡ በዐሥር፡ ወርኅ፣፡ አመ፡ ዐሡሩ፡ ወሰኑዩ፡ ለሠርቅ፡ ነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ አጽንዕ፡ ገጸከ፡ ዲበ፡ ፈርዖን፡ ንጉሠ፡ ግብጽ፡ ወተነበይ፡ ላዕሌሁ፡ ወላዕለ፡ ኵሉ፡ ግብጽ።
3 ወበሎሙ፡ ወንግሮሙ፡ ከመዝ፡ ይቤ፡ እግዚአብሔር፡ ናሁ፡ አነ፡ አመጽእ፡ ላዕሌከ፡ ፈርዖን፡ ንጉሠ፡ ግብጽ፡ ከይሴ፡ ዓቢየ፡ ዘይነብር፡ ላዕለ፡ አፍላጊሁ፡ ዘይብል፡ ዚአየ፡ ውእቱ፡ አፍላግ፡ ወአነ፡ ገበርክዎሙ።
4 ወአነ፡ እወዲ፡ መሥገርተ፡ ውስተ፡ መላትሒከ፡ ወአስተጣግዖሙ፡ ለዓሣተ፡ ፈለግከ፡ በቅሣርከ፡ ወአወፅአከ፡ እማእከለ፡ ፈለግከ፣፡ ወኵሉ፡ ዓሣተ፡ ፈለግከ፡ ይገብኡ፡ በቅርፈትከ።
5 ወእነፅኀከ፡ ፍጡነ፡ ወትትነፃኅ፡ ውስተ፡ ገጸ፡ ገዳም፡ ወኵሉ፡ ዓሣተ፡ ፈለግከ፣፡ ትወድቅ፡ ወኢትትጋባእ፡ እንከ፡ ወይገድፉከ፡ ለአርዌ፡ ገዳም፡ ወለአዕዋፈ፡ ሰማይ፡ ወሀብኩከ፡ ይብልዑከ።
6 ወየአምሩ፡ ኵሎሙ፡ እለ፡ ይነብሩ፡ በግብጽ፡ ከመ፡ አነ፡ ውእቱ፡ እግዚአብሔር። እስመ፡ ኮንክሙ፡ በትረ፡ ብርዕ፡ ለቤተ፡ እስራኤል።
7 እንተ፡ አመ፡ አስመኩ፡ ዲቤሃ፡ ትሠፀር፡ ውስተ፡ እደ፡ ኵሉ፣፡ ወሶበ፡ አስመኩ፡ ዲቤሃ፡ ትትቀጠቀጥ፡ ኵሉ፡ መትከፍት፡ ወይሰበር፡ ሐቌ፡ ኵሎሙ።
8 በበይነ፡ ዝንቱ፡ ከመዝ፡ ይቤ፡ እግዚአብሔር፡ ናሁ፡ አነ፡ አመጽእ፡ ላዕሌከ፡ ኵናተ፡ ወአጠፍእ፡ ሰብአ፡ እምኔከ፡ ወእንስሳ።
9 ወትከውን፡ ምድረ፡ ግብጽ፡ በዳ፡ በወድወ፣፡ ወየአምሩ፡ ከመ፡ አነ፡ ውእቱ፡ እግዚአብሔር። እስመ፡ ትቤ፡ ዚአየ፡ ውእቱ፡ አፍላግ፡ ወአነ፡ ፈጠርክዎሙ።
10 በበይነ፡ ዝንቱ፡ ናሁ፡ አነ፡ እመጽእ፡ ላዕሌከ፡ ወላዕለ፡ ኵሉ፡ አፍላግከ፡ ወእሬስያ፡ ለምድረ፡ ግብጽ፡ በድወ፡ በእንተ፡ ኲናት፡ ወብድብድ፡ እምነ፡ መግደሎ፡ ወሴዌኔ፡ እስከ፡ ደወለ፡ ኢትዮጵያ።
11 ወኢየኀልፍ፡ እንተ፡ ህየ፡ እግረ፡ ሰብእ፡ ወእንስሳ፣፡ ወኢየኀድርዋ፡ እስከ፡ ፵፡ ዓመት።
12 ወእሬስያ፡ ለምድራ፡ በድወ፡ በማእከለ፡ ሀገር፡ እንተ፡ መዝበረት፡ ወአህጉሪሃኒ፡ ይንኅል፡ በማእከለ፡ አህጉር፡ እለ፡ መዝበራ፡ ወአማሰና፡ ፵፡ ዓመተ። ወእዘርዎሙ፡ ለግብጽ፡ ውስተ፡ አሕዛብ፡ ወእነፅኆሙ፡ ውስተ፡ ምድር፡ ወውስተ፡ በሐውርት።
13 ከመዝ፡ ይቤ፡ እግዚአብሔር፡ እግዚእ፡ ወእምድኅረ፡ ፵ዓመት፡ አስተጋብኦሙ፡ ለግብጽ፡ እምነ፡ አሕዛብ፡ ኀበ፡ ተዘርዉ፡ ህየ።
14 ወእመይጥ፡ ፄዋ፡ ግብጽ፡ ወአነብሮሙ፡ ብሔረ፡ ፍቶሬስ፣፡ ውስተ፡ ምድር፡ እምኀበ፡ ነሥእዎሙ፣፡ ወየኀሥሩ፡ ቀደምቶሙ፡ እምኵሉ፡ ቀደምት።
15 ወይከውኑ፡ መንግሥተ፡ ንኡሰ፡ ከመ፡ ኢይትዐበዩ፡ ላዕለ፡ አሕዛብ፡ ወእሬስዮሙ፡ ውሑዳነ፡ ከመ፡ ኢይብዝኁ፡ ውስተ፡ አሕዛብ።
16 ወኢይሄልዉ፡ እንከ፡ ውስተ፡ ቤተ፡ እስራኤል፡ በተወክሎ፡ እንተ፡ ትዜከር፡ ኃጢአተ፡ እስመ፡ ተለውዎሙ፣፡ ወየአምሩ፡ ከመ፡ አነ፡ ውእቱ፡ አዶናይ፡ እግዚአብሔር።
17 ወአመ፡ ፳ወ፯፡ ዓመት፣፡ አመ፡ ርእሰ፡ ሠርቀ፡ ወርኅ፡ ቀዳሚ፡ ነበበኒ፡ እግዚአብሔር፡ ወይቤለኒ።
18 ወልደ፡ እጓለ፡ እመሕያው፣፡ ናቡከደነፆር፡ ንጉሠ፡ ባቢሎን፡ ኰነኖሙ፡ ለሠራዊቱ፡ ዓቢየ፡ ኵነኔ፡ በጢሮስ፣፡ ውስተ፡ ኵሉ፡ ርእስ፡ ብርሐት፡ ወተመልጦ፡ ኵሉ፡ መትከፍት፡ ወአልቦ፡ ዓስብ፡ ወተኀየላ፡ ለጢሮስ፡ ወቀነያ፡ ወኰነና።
19 በበይነ፡ ዝንቱ፡ ከመዝ፡ ይቤ፡ እግዚአብሔር፡ ናሁ፡ እሁቦ፡ ለናቡከደነፆር፡ ንጉሠ፡ ባቢሎን፡ ምድረ፡ ግብጽ፡ ወይነሥእ፡ ብዙኀ፡ ወይመሀርክ፡ ምህርካ፡ ወይበረብር፡ በርበራ። ወይሁቦሙ፡ ዓስቦሙ፡ ለሠራዊቱ።
20 ለእለ፡ ተቀንዩ፡ ሎቱ፡ ወተልእክዎ፡ ውስተ፡ ጢሮስ፡ ወሀብክዎ፡ ምድረ፡ ግብጽ፡ በእንተ፡ ኵሉ፡ ዘገብሩ፡ ብየ። ከመዝ፡ ይቤ፡ እግዚአብሔር፡ እግዚእ።
21 ውእተ፡ አሚረ፡ ይበቍል፡ ቀርን፡ ለኵሉ፡ ቤተ፡ እስራኤል፡ ወእሁበከ፡ አፈ፡ ክሡተ፡ በማእከሎሙ፣፡ ወየአምሩ፡ ከመ፡ አነ፡ ውእቱ፡ እግዚአብሔር።
=== chapter 30 ===
[Chapter 30]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ ተነበይ፡ ወበል፡ ከመዝ፡ ይቤ፡ አዶናይ፡ እግዚአብሔር፡ አዕለት።
3 እንተ፡ አልጸቀት፣፡ ዕለት፡ እግዚአብሔር፣፡ ዕለተ፡ ደመና፡ በጽሐት፡ ማኅለቅቶሙ፡ ለአሕዛብ።
4 ወትመጽእ፡ መጥባሕት፡ ዲበ፡ ግብጽ፡ ወይከውን፡ ሀከክ፡ ውስተ፡ ኢትዮጵያ፣፡ ወይወድቁ፡ ቅቱላን፡ ውስተ፡ ግብጽ፡ ወይነሥእዋ፡ ብዝኃ፡ ወይወድቁ፡ መሠረታቲሃ።
5 ኩስ፡ ወፉጥ፡ ወሉድ፡ ወኵሎሙ፡ እለ፡ ተደመሩ፣፡ ወደቂቀ፡ ምድረ፡ ዐረብ፡ ወደቂቀ፡ ምድረ፡ ቀርጤ፡ ይወድቁ፡ በውስቴታ፡ በመጥባሕት።
6 ከመዝ፡ ይቤ፡ እግዚአብሔር፡ ይወድቁ፡ አጽዋኒሆሙ፡ ለግብጽ፡ ወይጸድፍ፡ ኃይላ፡ ወየኀሥር፡ እመግደሎ፡ እስከ፡ ሴዌኔስ፡ ወይወድቁ፡ በመጥባሕት፡ ውስቴታ፡ ይቤ፡ አዶናይ፡ እግዚአብሔር።
7 ወትጠፍእ፡ በማእከለ፡ በሐውርት፡ መዝበር፡ ወአህጉሪሃኒ፡ ማእከለ፡ አህጉር፡ መዝበረ፡ ይሄልዋ።
8 ወየአምሩ፡ ከመ፡ አነ፡ ውእቱ፡ እግዚአብሔር፡ አመ፡ ፈኖኩ፡ እሳተ፡ ዲበ፡ ግብጽ፡ ወይትቀጠቀጡ፡ ኵሎሙ፡ እለ፡ ይረድእዋ፡ በውስቴታ።
9 ውእተ፡ አሚረ፡ ይመጽኡ፡ መላእክት፡ ርዉጸ፡ ከመ፡ ያጠፍእዎሙ፡ ለኢትዮጵያ፡ ወየትሀወኩ፡ በዕለተ፡ ግብጽ፡ እስመ፡ በጽሐት።
10 ከመዝ፡ ይቤ፡ እግዚአብሔር፡ እግዚእ፡ አጠፍኦሙ፡ ለኵሎሙ፡ ግብጽ፡ በእደ፡ ናቡከደነፆር፡ ንጉሠ፡ ባቢሎን።
11 ውእቱ፡ ወሕዝቡ፡ የአክዩ፡ እምአሕዛብ፡ ወይትፌነዉ፡ ከመ፡ ያጥፍእዋ፡ ለምድር። ወይደራበይዎሙ፡ በኰያንዊሆሙ፡ ለግብጽ፡ ወትመልእ፡ ምድር፡ አብድንተ።
12 ወእሬስዮ፡ ለአፍላጊሆሙ፡ በድወ፡ ወእሜጡ፡ ብሔሮሙ፡ ውስተ፡ እደ፡ እኩያን፡ ወአጠፍኣ፡ ለምድር፡ ወለኵሉ፡ ዘውስቴታ፡ በእደ፡ ፀር። አነ፡ እግዚአብሔር፡ ነበብኩ።
13 እስመ፡ ከመዝ፡ ይቤ፡ እግዚአብሔር፡ እግዚእ፡ ወአጠፍእ፡ ርኵሶሙ፡ ወእሥዕር፡ መኳንንተ፡ እምነ፡ ሜምፍ፡ ወመላእክተ፡ ምድረ፡ ግብጽ፡ ኢይሄልዉ፡ እንከ። ወእፌኑ፡ ፍርሃተ፡ ላዕለ፡ ምድረ፡ ግብጽ።
14 ወአጠፍኣ፡ ለፋቶሪስ፡ ወእፌኑ፡ እሳተ፡ ላዕለ፡ ጣናን፡ ወእገብር፡ በቀለ፡ ላዕለ፡ ዲዮስጶልን።
15 ወእክዑ፡ መዐትየ፡ ላዕለ፡ ሰይን፡ ኃይሎሙ፡ ለግብጽ፡ ወአኀልቆሙ፡ ለኵሎሙ፡ ሜምፍ።
16 ወእፌኑ፡ እሳተ፡ ላዕለ፡ ግብጽ፡ ወሁከተ፡ ትትሀወክ፡ ሴይስ፡ ዘሴዋኔ፡ ወትከውን፡ በድወ፡ ሜምፍ።
17 ወወራዙተ፡ ሀገረ፡ ሔልዩ፡ ወቡባስሂ፡ ይወድቁ፡ በመጥባሕት፣፡ ወለአንስቶሙኒ፡ ይፄውውዎን።
18 ወበጣፍኔስ፡ ትጸልም፡ መዓልት፡ አመ፡ ቀጥቀጥክዎሙ፡ በህየ፡ አሕዛበ፡ ግብጽ። ወየኀልቅ፡ በህየ፡ ኃሣረ፡ ኃይላ፡ ወለዛቲኒ፡ ይከድና፡ ደመና፡ ወይፄውውዎን፡ ለአዋልዲሃ።
19 ወእገብር፡ ፍትሐ፡ ላዕለ፡ ግብጽ፣፡ ወየአምሩ፡ ከመ፡ አነ፡ ውእቱ፡ እግዚአብሔር።
20 ወኮነ፡ በዓመት፡ ዐሥር፡ ወአሐዱ፣፡ በቀዳሚ፡ ወርኅ፣፡ አመ፡ ሳብዕ፡ ሠርቅ፡ ነበበኒ፡ እግዚአብሔር፡ ወይቤለኒ።
21 ወልደ፡ እጓለ፡ እመሕያው፡ ቀጥቀጥክዎ፡ መዝራዕቶ፡ ለፈርዖን፡ ንጉሠ፡ ግብጽ፡ ወናሁ፡ ኢፀመምዎ፡ ሥራየ፡ ከመ፡ ይትፈወስ፡ ወኢቀብእዎ፡ ሥራየ፡ ቤት፡ ከመ፡ ይርከብ፡ ኃይለ፡ በዘያነሥእ፡ መጥባሕቶ።
22 ወበእንተ፡ ዝንቱ፡ ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ ላዕለ፡ ፈርፆን፡ ንጉሠ፡ ግብጽ፡ እቀጠቅጥ፡ መዝራዕተ፡ ኃይሉ፡ ለፈርዖን፡ ንጉሠ፡ ግብጽ፡ ዝኩ፡ ግዙፍ፡ በዘይትቀጠቀጥ፡ ወአነግፎ፡ መጥባሕቶ፡ እምእዴሁ።
23 ወእዘርዎሙ፡ ለግብጽ፡ ውስተ፡ አሕዛብ፡ ወእነፅሆሙ፡ ውስተ፡ በሐውርት።
24 ወአጸንዕ፡ መዝራዕቶ፡ ለንጉሠ፡ ባቢሎን፡ ወእሜጥዎ፡ ኲናትየ፡ ውስተ፡ እዴሁ፡ ወይደረብያ፡ ላዕለ፡ ግብጽ፡ ወይመሀርክ፡ ምህርካሃ፡ ወይሰልብ፡ ሰሊባ።
25 ወአጸንዕ፡ መዝራዕቶ፡ ለንጉሠ፡ ባቢሎን፣፡ ወይወድቅ፡ መዝራዕቱ፡ ለፈርዖን። ወየአምሩ፡ ከመ፡ አነ፡ ውእቱ፡ እግዚአብሔር፡ አመ፡ መጠውክዎ፡ ኲናትየ፡ ለንጉሠ፡ ባቢሎን፡ ወያነሥኣ፡ ላዕለ፡ ምድረ፡ ግብጽ።
26 ወእዘርዎሙ፡ ለግብጽ፡ ውስተ፡ አሕዛብ፡ ወእነፅኆሙ፡ ውስተ፡ በሐውርት፣፡ ወየአምሩ፡ ኵሎሙ፡ ከመ፡ አነ፡ ውእቱ፡ እግዚአብሔር።
=== chapter 31 ===
[Chapter 31]
1 ወአመ፡ ፲ወ፩፡ ዓመት፡ በሣልስ፡ ወርኅ፣፡ አመ፡ ርእሰ፡ ሠርቀ፡ ወርኅ፡ ነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ በሎ፡ ለፈርዖን፡ ንጉሠ፡ ግብጽ፡ ወለብዝኁ፡ መነ፡ ትትሜሰል፡ በኑኅከ።
3 ናሁ፡ አሶር፡ አርዝ፡ በውስተ፡ ሊባኖስ፡ ወሠናይ፡ ሠርፁ፡ ወጽፉቅ፡ ቈጽሉ፡ ወነዊኅ፡ ቆሙ፣፡ ወይበጽሕ፡ ደመናተ፡ ርእሱ።
4 ማይ፡ ሐፀኖ፡ ወቀላይ፡ አልሀቆ፡ ወአፍላግ፡ የሐውሩ፡ ዐውደ፡ ተክሉ፡ ወፈነወት፡ ወኃይዝቲሃ፡ ውስተ፡ ኵሉ፡ ዕፀወ፡ ገዳም።
5 ወበበይነ፡ ዝንቱ፡ ተለዐለ፡ ቆሙ፡ እምኵሉ፡ ዕፀወ፡ ገዳም፡ ወበዝኁ፡ አዕጹቂሁ፡ ወኖኀ፡ ሠርፁ፡ ዘተሰፍሐ፡ እምብዝኀ፡ ማይ።
6 ወውስተ፡ አዕጹቂሁ፡ ተዋለዳ፡ ኵሉ፡ አዕዋፈ፡ ሰማይ፡ ወበታሕቴሁ፡ ተዋለዳ፡ ኵሉ፡ አርዌ፡ ገዳም፡ ወነበሩ፡ ኵሉ፡ አሕዛብ፡ ታሕተ፡ ጽላሎቱ።
7 ወኮነ፡ ላህየ፡ ቆሙ፡ እምብዝኀ፡ አዕጹቂሁ፡ እስመ፡ በቈለ፡ ሥረዊሁ፡ ውስተ፡ ማይ፡ ብዙኅ።
8 ወኢይትዔረዮ፡ ዕፀ፡ ቄጵርስስ፡ ዘውስተ፡ ገነተ፡ እግዚአብሔር፡ ወዕፀ፡ ጴጥሮስ፡ ዘአልቦ፡ ዘይመስሎ፡ አዕጹቂሁ፡ ወኢላጤ፡ ኢይከውን፡ ከመ፡ ሠርፁ። ኵሉ፡ ዕፅ፡ ዘውስተ፡ ገነተ፡ እግዚአብሔር፡ ኢይመስሎ፡ ለሥኑ።
9 እምብዝኅ፡ ሠርፁ። ወቀንኡ፡ ዲቤሁ፡ ኵሉ፡ ዕፀ፡ ገነተ፡ ትፍሥሕት፡ ዘእግዚአብሔር።
10 በበይነ፡ ዝንቱ፡ ከመዝ፡ ይቤ፡ እግዚአብሔር፡ እግዚእ፡ እስመ፡ ኖኅ፡ ቆምከ፡ ወበጽሐ፡ ርእስከ፡ ማእከለ፡ ደመናት፡ ወርኢኩ፡ ትዕቢቶ።
11 ወመጠውክዎ፡ ውስተ፡ እደ፡ መልአከ፡ አሕዛብ፡ ወቀተሎ።
12 ወሠረውዎ፡ ፀር፡ እኩያን፡ አሕዛብ፡ ወነፅኅዎ፡ ውስተ፡ አድባር፡ ወወድቁ፡ አዕጹቂሁ፡ ውስተ፡ ኵሉ፡ ቈላት፡ ወተቀጥቀጠ፡ ዕፀዊሁ፡ ውስተ፡ ኵሉ፡ ምድረ፡ ገዳም፡ ወወረዱ፡ እምጽላሎቱ፡ ኵሎሙ፡ ሠራዊተ፡ አሕዛብ፡ ወገፍትዕዎ።
13 ይኅድሩ፡ ኵሉ፡ አዕዋፈ፡ ሰማይ፡ በድቀቱ፣፡ ወመጽኡ፡ ኵሉ፡ አራዊተ፡ ገዳም፡ ውስተ፡ ጕንዱ።
14 ከመ፡ ኢይኑኅ፡ ቆሙ፡ ለኵሉ፡ ዕፀው፡ በኀበ፡ ማይ፣፡ ወኢይብጻሕ፡ ርእሱ፡ እስከ፡ ደመናት፡ ወኢይቁሙ፡ በኑኆሙ፡ ምስሌሆሙ፡ ኵሎሙ፡ እለ፡ ይሰትይዎ፡ ለውእቱ፡ ማይ። ወኵሎሙ፡ ሞቱ፡ በምድር፡ ዕሙቅ፡ ማእከለ፡ እጓለ፡ እመሕያው፡ እለ፡ ይወርዱ፡ ውስተ፡ ግብ።
15 ከመዝ፡ ይቤ፡ እግዚአብሔር፡ በዕለተ፡ ወረደ፡ ውስተ፡ ሲኦል፡ አልሐውክዋ፡ ለቀላይ፣፡ ወከደንክዋ፡ ቀላየ፡ ወአቀምኩ፡ ኵሎ፡ ማየ፡ ወአጸልም፡ ዲቤሁ፡ ሊባኖስ፡ ወድቀ፡ ኵሉ፡ ዕፀወ፡ ገዳም፡ ላዕሌሁ።
16 ወእምድምፀ፡ ድቀቱ፡ አንቀልቀሉ፡ አሕዛብ፡ ወአጽደፍዎ፡ ውስተ፡ ሲኦል፡ ምስለ፡ እለ፡ ይወርዱ፡ ውስተ፡ ግብ፡ ወገሠጽዎ፡ በታሕተ፡ ምድር፡ ኵሉ፡ ዕፀ፡ ትፍሥሕተ፡ ወኅሩያነ፡ ሊባኖስ፡ ኵሉ፡ ዘይሰቀይ፡ ማየ።
17 እስመ፡ እሙንቱኒ፡ ወረዱ፡ ውስተ፡ ሲዖል፡ ምስሌሁ፡ ቅቱላነ፡ በኲናት፡ ወዘርኡሂ፡ እለ፡ ይነብሩ፡ ታሕተ፡ ጽላሎቱ፡ ተሐጕሉ፡ በማእከለ፡ አሕዛብ።
18 መነ፡ ትመስል፡ በክብር፡ ወበዕበይ፡ ውስተ፡ ዕፀወ፡ ገነተ፡ ትፍሥሕት፡ ረድ፡ ወተወጣሕ፡ ምስለ፡ ዕፀወ፡ ትፍግዕት፡ በውስተ፡ ምድር፡ ታሕቲት፡ ወትሰክብ፡ ማእከለ፡ ቈላፋን፡ እለ፡ ቅቱላን፡ በኲናት። ከማሁኬ፡ ፈርዖን፡ ወኵሉ፡ ብዝኅ፡ ኃይሉ፡ ይቤ፡ እግዚአብሔር፡ እግዚእ።
=== chapter 32 ===
[Chapter 32]
1 ወኮነ፡ በዐሠርቱ፡ ወክልኤቱ፡ ዓመት፣፡ በዐሡር፡ ወርኅ፣፡ አመ፡ ሠርቀ፡ ወርኅ፡ ነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እአመሕያው፡ አስቆቅዎ፡ ለፈርዖን፡ ንጉሠ፡ ግብጽ፡ ወበሎ፡ አንበሳ፡ አሕዛብ፡ ትመስል፡ አንተ፡ ወከመ፡ ከይሲ፡ ዘውስተ፡ ባሕር፡ ወትወግኦሙ፡ ለአፍላግከ፡ ወተሐምጎሙ፡ በእገሪከ፡ ወትከይዶሙ፡ በሰኰናከ።
3 ከመዝ፡ ይቤ፡ እግዚአብሔር፡ እሰፍሕ፡ ላዕሌከ፡ መሥገርትየ፡ በማእከለ፡ ብዙኃን፡ ማኅበረ፡ አሕዛብ፡ ወአወፅአከ፡ በመሥገርትየ።
4 ወእነፅኀከ፡ ውስተ፡ ገዳም፡ ርሒብ፡ ወአነብር፡ ዲቤከ፡ ኵሎ፡ አዕዋፈ፡ ሰማይ፡ ወአጸግቦሙ፡ እምኔከ፡ ለኵሎሙ፡ አራዊተ፡ ገዳም።
5 ወአነብር፡ በድነከ፡ ውስተ፡ አድባር፡ ወአረውዮሙ፡ እምደምከ።
6 ወእመልእ፡ ቈላተ፡ ምድር፡ እምነ፡ ጸውብከ፡ እምብዝኅከ፡ በውስተ፡ አድባር፡ ወእመልእ፡ ቈላተ፡ እምኔከ።
7 ወእምከመ፡ ጠፋእከ፡ እከድና፡ ለሰማይ፡ ወአጸልም፡ ከዋክብቲሃ፡ ወእገለብባ፡ ለፀሐይ፡ በደመና፡ ወወርኅኒ፡ ኢያርኢ፡ ብርሃኖ።
8 ወኵሎ፡ ብርሃነ፡ ዘያስተርኢ፡ በሰማይ፡ አጸልም፡ ላዕሌከ፡ ወእፌኑ፡ ጽልመተ፡ ለብሔርከ፡ ይቤ፡ እግዚአብሔር፡ እግዚእ።
9 ወእዌህክ፡ ዲቤከ፡ ልበ፡ ብዙኃን፡ አሕዛብ፡ ከመ፡ ይሰዱ፡ ፄዋከ፡ ብሔረ፡ አሕዛብ፡ ዘኢተአምር።
10 ወይትጋብኡ፡ ዲቤከ፡ አሕዛብ፡ ብዙኃን፡ ወነገሥቶሙኒ፡ ይደነግፁ፡ ወይጌርሞሙ፡ ሶበ፡ ሰረረት፡ ኲናትየ፡ ውስተ፡ ገጾሙ፡ ለእለ፡ ይዳደቅዋ። ወይደነግፅ፡ በድቀትከ፡ ኵሉ፡ ብእሲ፡ ለርእሱ።
11 እስመ፡ ከመዝ፡ ይቤ፡ እግዚአብሔር፡ ኲናተ፡ ንጉሠ፡ ባቢሎን፡ ትመጽአከ።
12 መጥባሕቶሙ፡ ለእለ፡ ያርብሕ፣፡ ወይነፅኅዎ፡ ለኃይልከ፡ ኵሎሙ፡ አሕዛብ፡ እኩያን፡ ወትጠፍእ፡ ጽዕለተ፡ ግብጽ፡ ወትትቀጠቀጥ፡ ኵሉ፡ ኃይላ።
13 ወእቀትል፡ ኵሉ፡ እንስሳሃ፡ እምላዕለ፡ ማይ፡ ብዙኅ፡ ወኢየሀውኮ፡ እግረ፡ ሰብእ፡ ወኢይከይዶ፡ ሰኰና፡ እንስሳ።
14 ከማሁ፡ የዐርፍ፡ ማዮሙ፡ ይእተ፡ አሚረ፡ ወይውኅዙ፡ አፍላጊሆሙ፡ ከመ፡ ቅብእ፡ ይቤ፡ አዶናይ፡ እግዚአብሔር።
15 አመ፡ ፈኖኩ፡ ሞተ፡ ዲበ፡ ግብጽ፡ ወትማስን፡ ምድር፡ በምልኣ፣፡ አመ፡ ዘረውክዎሙ፡ ለኵሎሙ፡ እለ፡ ይነብሩ፡ ውስቴታ፣፡ ወየአምሩ፡ ከመ፡ አነ፡ ውእቱ፡ እግዚአብሔር።
16 ሰቆቃው፡ ውእቱ፡ ወያስቆቅውዎ፣፡ ወያስቆቅዋሁ፡ አዋልደ፡ አሕዛብ፡ ለግብጽ፡ ወይበክያሁ፡ ለኵሉ፡ ኃይሉ፡ ይቤ፡ እግዚአብሔር።
17 ወአመ፡ ፲ወ፪፡ ዓመት፣፡ አመ፡ ዐሡሩ፡ ወኃሙሱ፡ ለሠርቅ፣፡ በቀዳሚ፡ ወርኅ፡ አመ፡ ገሀሁ፡ ነበበኒ፡ እግዚአብሔር፡ ወይቤለኒ።
18 ወልደ፡ እጓለ፡ እመሕያው፡ ብክዮ፡ ለኃይለ፡ ግብጽ፡ ወያወርዳሃ፡ ኪያሃ፡ አዋልደ፡ አሕዛብ፡ ዓበይት፡ ውስተ፡ ምድር፡ ወይዌርዋሃ፡ ውስተ፡ በርቢር፡ ምስለ፡ እለ፡ ይወርዱ፡ ውስተ፡ ግበበ፡ ምድር።
19 እምነ፡ መኑ፡ ትኄይሲ፡ ረዲ፡ ወስክቢ፡ ምስለ፡ ቈላፋን።
20 ማእከለ፡ ቅቱላን፡ በኲናት፡ እለ፡ ወድቁ፡ ምስሌሁ፡ ወይነፅኅዎ፡ ለኵሉ፡ ኃይሉ።
21 ወይቤልዎ፡ መላእክተ፡ እለ፡ ያርብሕ፡ ማእከለ፡ ቀላየ፡ ግብ፡ እለ፡ ይትራድእዎ፡ ረዱ፡ ወስክቡ፡ ምስለ፡ ቈላፋን፡ ማእከለ፡ ቅቱላን፡ በኲናት።
22 ህየ፡ አሶር፡ ወኵሉ፡ ተዓይኒሁ፡ ቅቱላን፡ ወኵሎሙ፡ ተመውኡ፡ ወወረውዎሙ፡ ውስተ፡ ቀላየ፡ ግብ፡ ወተዓይኒሁኒ፡ ዐውደ፡ መቃብሩ፡ ኵሎሙ፡ ቅቱላን፡ ወእለ፡ ወድቁ፡ በኲናት።
23 እለ፡ ወሀቡ፡ መቃብሪሆሙ፡ መትሕተ፡ ዐዘቅት፡ ማኅበረ፡ ዐውደ፡ መቃብሩ፡ ኵሎሙ፡ እለ፡ ወድቁ፡ በቅትለተ፡ ኲናት፣፡ እለ፡ አግብኡ፡ ፍርሃቶሙ፡ ውስተ፡ ምድረ፡ ሕይወት።
24 ወህየ፡ ኤላም፡ ወኵሉ፡ ኃይሉ፡ ዐውደ፡ መቃብሩ፡ ወኵሎሙ፡ ቅቱላን፣፡ እለ፡ ወድቁ፡ በኲናት፡ ወእለሂ፡ ወረዱ፡ ቈላፋን፡ ውስተ፡ ቀላየ፡ ምድር፣፡ እለ፡ አግብኡ፡ ፍርሃቶሙ፡ በምድረ፡ ሕይወት፡ ወረከቡ፡ መቅሠፍቶሙ፡ ምስለ፡ እለ፡ ይወርዱ፡ ውስተ፡ ግብ።
25 ማእከለ፡ ቅቱላን።
26 በህየ፡ ተውህቡ፡ ማስሕ፡ ወቶቤል፡ ወኵሎሙ፡ ሠራዊቶሙ፡ ዐውደ፡ መቃብሩ፣፡ ኵሎሙ፡ ቅቱላኒሁ፡ ወኵሎሙ፡ ቈላፋን፡ ቅቱላን፡ በኲናት፡ እለ፡ አግብኡ፡ ፍርሃቶሙ፡ ውስተ፡ ምድረ፡ ሕይወት።
27 ወኢኖሙ፡ ምስለ፡ እለ፡ ያርብሕ፡ እለ፡ ወድቁ፡ ቈላፋን፣፡ እለ፡ ወረዱ፡ ውስተ፡ ሲኦል፡ በንዋየ፡ ሐቅሎሙ፡ ወአንበሩ፡ መጣብሒሆሙ፡ በትርአስቲሆሙ፡ ወገብአት፡ ኃጢአቶሙ፡ ውስተ፡ ዓፅሞሙ፡ እስመ፡ ፈርሁ፡ እለ፡ ያርብሕ፡ ውስተ፡ ምድረ፡ ሕይወት።
28 ወአንተኒ፡ ትትቀጠቀጥ፡ በማእከለ፡ ቈላፋን፡ ወትሰክብ፡ ምስለ፡ ቅቱላን፡ በመጥባሕት።
29 ህየ፡ ኤዶም፡ መነገሥታ፣፡ ወኲሎሙ፡ መላእክቲሃ፡ ርእይዎሙ፡ ምስለ፡ ሠራዊታ፡ ኀበ፡ ተቀትሉ፡ በኲናት፡ ወሰከቡ፡ ምስለ፡ ቅቱላን፡ እለ፡ ይወርዱ፡ ውስተ፡ ግብ።
30 ወህየ፡ ኵሎሙ፡ መላእክተ፡ ደቡብ፡ ወኵሎሙ፡ መሳፍንተ፡ ሲዶና፡ እለ፡ ወረዱ፡ ምስለ፡ ቈላፋን፡ በፍርሃቶሙ፡ ወኖሙ፡ ምስለ፡ ኃይሎሙ፡ ቈላፋን፡ ምስለ፡ ቅቱላን፡ በኲናት፣፡ ወነሥኡ፡ መቅሠፍቶሙ፡ ምስለ፡ እለ፡ ይወርዱ፡ ውስተ፡ ግብ።
31 ኪያሆሙ፡ ይሬኢ፡ ፈርዖን፡ ወይትናዘዝ፡ በእንተ፡ ኵሉ፡ ኃይሎሙ፣፡ ቅቱላን፡ በመጥባሕት፣፡ ፈርዖን፡ ወኵሉ፡ ኃይሉ፡ ይቤ፡ አዶናይ፡ እግዚአብሔር።
32 እስመ፡ ወሀብኩ፡ ፍርሃተ፡ ውስተ፡ ምድረ፡ ሕይወት፡ ወይሰክብ፡ ማእከለ፡ ቈላፋን፡ ቅቱላን፡ በመጥባሕት፣፡ ፈርዖን፡ ወኵሉ፡ ብዘቢሁ፡ ይቤ፡ እግዚአብሔር፡ እግዚእ።
=== chapter 33 ===
[Chapter 33]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ ንግሮሙ፡ ለደቂቀ፡ ሕዝብከ፡ ወበሎሙ፡ ብሔር፡ ኀበ፡ አመጽእ፡ ኲናተ፡ ወይነሥኡ፡ ሕዝበ፡ ምድር፡ አሐደ፡ ብእሴ፡ እምኔሆሙ፡ ወረሰይዎ፡ መርሐ።
3 ወርእየ፡ ኲናተ፡ ትመጽእ፡ ለብሔር፡ ወነፍኀ፡ በቀርን፡ ትእምርተ፡ ለሠራዊት።
4 ወሰምዐ፡ ዘይሰምዕ፡ ቃለ፡ ቀርን፡ ወኢተግሕሠ፣፡ ወመጽአ፡ ኲናት፡ ወረከቦ፣፡ ይገብእ፡ ደሙ፡ ዲበ፡ ርእሱ።
5 እስመ፡ ሰምዐ፡ ቃለ፡ ቀርን፡ ወኢተግሕሠ፡ ወደሙ፡ ይሰወጥ፡ ዲቤሁ፡ ወዝኩሰ፡ እስመ፡ ተግሕሠ፡ አድኀነ፡ ነፍሶ።
6 ወሰብአ፡ ዐይን፡ ለእመ፡ ርእየ፡ ኲናተ፡ ትመጽእ፡ ወኢተአምረ፡ በቃለ፡ ቀርን፡ ወኢተግሕሠ፡ ሕዝብ፣፡ ወትመጽእ፡ ኲናት፡ ወትነሥእ፡ ነፍሶሙ፡ ይጠፍኡ፡ በእንተ፡ ኃጢአቶሙ፡ ወእትኀሠሥ፡ ደሞሙ፡ እምነ፡ ሰብአ፡ ዐይን።
7 ወአንተ፡ ወልደ፡ እጓለ፡ እመሕያው፣፡ ሰብአ፡ ዐይን፡ ረሰይኩከ፡ ለደቂቀ፡ እስራኤል፡ ከመ፡ ትስማዕ፡ ቃለ፡ እምአፉየ፡ ወታስተዐቅቦሙ፡ እምኔየ።
8 እምከመ፡ እቤሎ፡ ለኃጥእ፡ ሞተ፡ ትመውት፣፡ ወኢትቤሎ፡ ለኃጥእ፡ ይኅድግ፡ ፍኖቶ፡ እኩየ፣፡ ውእቱሂ፡ ኃጥእ፡ ይመውት፡ በኃጢአቱ፡ ወደሞ፡ እትኀሠሥ፡ እምእዴከ።
9 ወአንተሰ፡ እምከመ፡ ነገርኮ፡ ለኃጥእ፡ ይሠሥድግ፡ ፍኖቶ፡ ወኢተመይጠ፡ እምፍኖቱ፣፡ ውእቱ፡ ይመውት፡ በኃጢአቱ፡ ወአንተ፡ አድኀንከ፡ ነፍሰከ።
10 ወአንተ፡ ወልደ፡ እጓለ፡ እመሕያው፡ በሎሙ፡ ለቤተ፡ እስራኤል፡ ከመዝ፡ ትብሉ፡ ኃጢአትነ፡ ወጌጋይነ፡ ዲቤነ፡ ውእቱ፡ ወቦቱ፡ ንማስን፡ ወእፎ፡ እንከ፡ ነሐዩ።
11 በሎሙ፡ ሕያው፡ አነ፡ ይቤ፡ አዶናይ፡ እግዚአብሔር፡ ከመ፡ ኢይፈቅድ፡ ይሙት፡ ኃጥእ፣፡ ዳእሙ፡ ከመ፡ ይነስሕ፡ ወይኅድግ፡ ፍኖቶ፡ እኪተ፡ ወየሐዩ። ተመየጡ፡ ተመየጡ፡ እምፍኖትክሙ፡ እኩይ፡ ወለምት፡ ትመውቱ፡ ቤተ፡ እስራኤል።
12 ወአንተ፡ ወልደ፡ እጓለ፡ እመሕያው፡ በሎሙ፡ ለደቂቀ፡ ሕዝብከ፡ ጽድቁ፡ ለጻድቅ፡ ኢያድኅኖ፡ አመ፡ ይጌጊ፡ ወኃጢአቱ፡ ለኃጥእ፡ ኢያሐምሞ፡ አመ፡ ይኔስሕ፡ እምጌጋዩ፡ ወጻድቅኒ፡ ኢይድኅን፡ እምከመ፡ አሰበ።
13 ሶበ፡ እቤሎ፡ ለጻድቅ፡ ሕይወተ፡ ተሐዩ፡ ለእመ፡ ተአመነ፡ በጽድቁ፡ ወገብረ፡ ኃጢአተ፣፡ ኵሎ፡ ጽድቆ፡ ኢይዜከር፡ ሎቱ፡ በኃጢአቱ፡ ዘገብረ፡ ይመውት።
14 ወእምከመ፡ እቤሎ፡ ለኃጥእ፡ ሞተ፡ ትመውት፣፡ ወነስሐ፡ እምኃጢአቱ፡ ወገብረ፡ ጽድቀ፡ ወርትዐ።
15 ወአግብአ፡ አኅዞ፡ ወፈደየ፡ ዘሄደ፡ ወበሕገ፡ ሕይወት፡ ሖረ፡ ወኢገብረ፡ ኃጢአተ፡ ሕይወተ፡ የሐዩ፡ ወኢይመውት፡ በኃጢአቱ፡ ዘአበሰ።
16 ወኢይዜከር፡ ሎቱ፡ ኵሎ፡ ጌጋዩ፡ እስመ፡ ገብረ፡ ጽድቀ፡ ወርትዐ፡ ወቦቱ፡ የሐዩ።
17 ወይብሉ፡ ደቂቀ፡ ሕዝብከ፡ ኢኮነ፡ ርቱዐ፡ ፍኖተ፡ እግዚአብሔር። ወፍኖተ፡ ዚአሆሙ፡ ኢኮነ፡ ርቱዐ።
18 እምከመ፡ ተመይጠ፡ ጻድቅ፡ እምጽድቁ፡ ወገብረ፡ ኃጢአተ፣፡ ይመውት፡ ቦቱ።
19 ወለእመ፡ ተመይጠ፡ ኃጥእ፡ እምኃጢአቱ፡ ወገብረ፡ ጽድቀ፡ ወርትዐ፣፡ የሐዩ፡ ቦቱ።
20 ወዝ፡ ውእቱ፡ ዘይብሉ፡ ኢኮነ፡ ርቱዐ፡ ፍኖተ፡ እግዚአብሔር። ወእኴንነክሙ፡ በከመ፡ ፍኖትክሙ፡ ለኵልክሙ፡ ቤተ፡ እስራኤል።
21 ወኮነ፡ አመ፡ ፲ወ፪፡ ዓመት፣፡ በዐሥራይ፡ ወርኅ፡ ወአመ፡ ኃሙሱ፡ ለሠርቅ፡ እምዘ፡ ተፄወውነ፣፡ መጽአ፡ ኀቤየ፡ ዘድኅነ፡ እምኢየሩሳሌም፡ ወይቤለኒ፡ ተቀትለት፡ ሀገር።
22 ወመጽአ፡ እደ፡ እግዚአብሔር፡ ኀቤየ፡ ፍና፡ ሰርክ፡ ዘእንበለ፡ ይምጻእ፡ ውእቱ፡ ዘድኅነ፡ ወከሠተ፡ አፉየ፡ እስከ፡ መጽአ፡ ኀቤየ፡ በጽባሕ። ወአብቂዎ፡ አፉየ፡ ኢተጋብአ፡ እንከ።
23 ወነበበኒ፡ እግዚአብሔር፡ ወይቤለኒ።
24 ወልደ፡ እጓለ፡ እመሕያው፣፡ እለ፡ ይነብሩ፡ ውስተ፡ መዝበረ፡ ምድረ፡ እስራኤል፡ ይቤሉ፡ አብርሃም፡ ፩፡ ውእቱ፡ ኰነና፡ ለምድር፡ ወንሕነ፡ ንበዝኅ፡ ወለነ፡ ተውህበት፡ ምድር፡ ንኰንና።
25 በበይነ፡ ዝንቱ፡ በሎሙ፡ ከመዝ፡ ይቤ፡ እግዚአብሔር፡ አዶናይ፡ ምስለ፡ ደም፡ ትበልዑ፡ ወታነሥኡ፡ ዐይነክሙ፡ ኀበ፡ ጣዖትክሙ፡ ወትቀትሉ፡ ነፍሰ፣፡ ወትወርሱኑ፡ ምድረ።
26 ቀዊመክሙ፡ በኲናትክሙ፡ ወገበርክሙ፡ ጣዖተ፡ ወአርኰስክሙ፡ ብእሲተ፡ ቢጽክሙ፣፡ ወትወርሱኑ፡ ምድረ።
27 በበይነ፡ ዝንቱ፡ በሎሙ፡ ከመዝ፡ ይቤ፡ አዶናይ፡ እግዚአብሔር፡ ሕያው፡ አነ፣፡ ዳእሙ፡ እለ፡ በሙስናት፡ በመጣብሕ፡ ይወድቁ፣፡ ወእለሂ፡ ውስተ፡ ገጸ፡ ገዳም፡ ለአርዌ፡ ገዳም፡ ይትወሀቡ፡ ሎሙ፡ ሲሳዮሙ፣፡ ወእለሂ፡ ውስተ፡ ጥቅም፡ ወእለ፡ ውስተ፡ በአታት፡ በብድብድ፡ ይመውቱ።
28 ወእሬስያ፡ ለምድር፡ በድወ፡ ወየኃልቅ፡ ጽዕለተ፡ ኃይላ፣፡ ወይማስኑ፡ አድባረ፡ እስራኤል፡ ወአልቦ፡ ዘየሐውሮሙ።
29 ወየአምሩ፡ ከመ፡ አነ፡ ውእቱ፡ እግዚአብሔር። ወእሬስያ፡ በድወ፡ ለምድሮሙ፡ ወተኀሥር፡ በእንተ፡ ጣዖቶሙ፡ ዘገብሩ።
30 ወአንተሂ፡ ወልደ፡ እጓለ፡ እመሕያው፣፡ ይብሉ፡ ደቂቀ፡ ሕዝብከ፡ በእንቲአከ፡ በኀበ፡ አረፍት፡ ወበዴዴያተ፡ አብያት፡ ወይትናገር፡ ብእሲ፡ ምስለ፡ ቢጹ፡ ወይቤሉ፡ ንዑ፡ ንሑር፡ ወንስማዕ፡ ዘይቤ፡ እግዚአብሔር።
31 ወይመጽኡ፡ ኀቤከ፡ ኅቡረ፡ ሕዝብ፡ ወይነብሩ፡ ቅድሜከ፡ ሕዝብየ፡ ወያጸምዑ፡ ቃለከ፡ ወኢይገብርዎ፣፡ እስመ፡ ሐሰት፡ ውስተ፡ አፉሆሙ፡ ወጣዖተ፡ ይተሉ፡ ልቦሙ።
32 ወኮንኮሙ፡ ከመ፡ ቃለ፡ መዝሙር፡ ዘሐዋዝ፡ ቃለ፡ ቃናሁ፣፡ ወይሰምዑ፡ ቃለከ፡ ወኢይገብርዎ።
33 ወሶበ፡ መጽአ፡ ይብሉ፡ ናሁ፡ መጽአ፣፡ ወየአምሩ፡ ከመ፡ ነቢይ፡ አንተ፡ በማእከሎሙ።
=== chapter 34 ===
[Chapter 34]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ ተነበይ፡ ለኖሎተ፡ እስራኤል፣፡ ተነበይ፡ ሎሙ፡ ወበሎሙ፡ ለኖሎት፡ ከመዝ፡ ይቤ፡ እግዚአብሔር፡ አሌ፡ ሎሙ፡ ለኖሎተ፡ እስእራኤል፡ ርእሶሙኑ፡ ይርዕዩ፡ ኖሎት፡ አኮኑ፡ አባግዐ፡ ይርዕዩ።
3 ሐሊቦሂ፡ ትሰትዩ፡ ወፀምሮሂ፡ ትለብሱ፡ ወዘሰብሐሂ፡ ትጠብሑ፡ ወአባግዕየ፡ ኢትርዕዩ።
4 ዘደክመ፡ ኢትጼንዑ፡ ወዘቈስለ፡ ኢትፌውሱ፡ ወዘተሰብረ፡ ኢተአሥሩ፡ ወዘተኀጥአ፡ ኢትረድኡ፡ ወዘተገድፈ፡ ኢተኀሥሡ፡ ወዘጸንዐ፡ ትቀንዩ፡ ወታሰርሑ።
5 ወተዘርዉ፡ አባግዕየ፡ በኀጢአ፡ ኖሎት፡ ወኮና፡ መብልዐ፡ ለኵሉ፡ አራዊተ፡ ገዳም።
6 ወተዘርዋ፡ አባግዕየ፡ ውስተ፡ ኵሉ፡ አድባር፡ ወውስተ፡ ኵሉ፡ አውግር፡ ነዋኃት፣፡ ወውስተ፡ ገጸ፡ ኵሉ፡ ምድር፡ ተዘርዋ፡ አባግዕየ፡ ወአልቦ፡ ዘየኀሥሦን፡ ወአልቦ፡ ዘይመይጦን።
7 በበይነ፡ ዝንቱ፡ ስምዑ፡ ኖሎት፡ ቃለ፡ እግዚአብሔር።
8 ሕያው፡ አነ፡ ይቤ፡ አዶናይ፡ እግዚአብሔር፡ እስመ፡ ተማህረካ፡ አባግዕየ፡ ወኮና፡ አባግዕየ፡ መብልዐ፡ ለአራዊተ፡ ገዳም፡ በኀጢአ፡ ኖሎት፡ ወኢየኀሥሡ፡ ኖሎት፡ አባግዕየ፡ ወረዐዩ፡ ርእሶሙ፡ ኖሎት፡ ወኢርዕዩ፡ አባግዕየ።
9 በበይነ፡ ዝንቱ፡ ስምዑ፡ ኖሎት፡ ቃለ፡ እግዚአብሔር።
10 ከመዝ፡ ይቤ፡ አዶናይ፡ እግዚአብሔር፡ ናሁ፡ አነ፡ ላዕለ፡ ኖሎት፡ ወእትኀሠሥ፡ አባግዕየ፡ እምእደ፡ ኖሎት፡ ወእሥዕሮሙ፡ ከመ፡ ኢይርዐይዎን፡ ወኢይርዕይዎን፡ ኖሎት፡ እንከ፡ ወአድኅን፡ አባግዕየ፡ እምአፉሆሙ፡ ወኢይከውና፡ ሲሳዮሙ።
11 ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ አኀሥሥ፡ አባግዕየ፡ ወአስተፋቅዶን።
12 ከመ፡ የኀሥሥ፡ ኖላዊ፡ መርዔቶ፡ በዕለተ፡ ቆባር፡ ወደመና፡ ማእከለ፡ አባግዒሁ፡ ዘተፈልጠ፣፡ ከማሁ፡ አኀሥሥ፡ አባግዕየ፡ ወአስተጋብኦን፡ እምኵሉ፡ በሐውርት፡ ኀበ፡ ተዘርዋ፡ ህየ፡ በዕለተ፡ ደመና፡ ወቆባር።
13 ወአወፅኦሙ፡ እምአሕዛብ፡ ወአስተጋብኦሙ፡ እምበሐውርት፣፡ ወእወስዶሙ፡ ብሔሮሙ፡ ወእርዕዮሙ፡ ውስተ፡ አድባረ፡ እስራኤል፡ ወውስተ፡ ቈላት፡ ወውስተ፡ ኵሉ፡ በሐውርተ፡ ምድር።
14 ወውስተ፡ ጺኦት፡ ሠናይ፡ እርዕዮሙ፡ ውስተ፡ ደብረ፡ እስራኤል፡ በዋኅ። ወይከውኖሙ፡ ኅዝአቶሙ፡ ህየ፡ ወይበይታ፡ ህየ፡ ወየዐርፉ፡ ህየ፡ ውስተ፡ ሠናይ፡ ትፍሥሕት፣፡ ወይትረዐዩ፡ ውስተ፡ ጺኦት፡ ጥሉል፡ ውስተ፡ አድባረ፡ እስራኤል።
15 ለልየ፡ እርዕዮሙ፡ ለአባግዕየ፡ ወአነ፡ አዐርፎሙ፣፡ ወየአምሩ፡ ከመ፡ አነ፡ ውእቱ፡ እግዚአብሔር። ከመዝ፡ ይቤ፡ እግዚአብሔር፡ እግዚእ።
16 ዘተገድፈ፡ አኀሥሥ፡ ወዘተኀጥአ፡ እረድእ፡ ወዘቈስለ፡ እፌውስ፡ ወዘደክመ፡ አጸንዕ፡ ወዘጸንዐሂ፡ አዐቅብ፡ ወእርዕዮሙ፡ በፍትሕ።
17 ወአንትሙ፡ አባግዕየ፡ ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ አስተዋቅሥ፡ ማእከለ፡ በግዕ፡ ወበግዕ፡ ወማእከለ፡ በሐኵ፡ ወደቤላ።
18 ኢአከለክሙኑ፡ ዘረዐይክሙ፡ ውስተ፡ ሠናይ፡ ጺኦት፡ ወዘተርፈሂ፡ ሣዕሮ፡ ትከይዱ፡ በእገሪክሙ፡ ወጽሩየሂ፡ ማየ፡ ትሰትዩ፡ ወዘተርፈሂ፡ ተሐምግዎ፡ በእገሪክሙ።
19 ወትርዕዩ፡ አባግዕየ፡ ዘኬድክሙ፡ በእገሪክሙ፡ ወታሰትይዎሙ፡ ማየ፡ ዘሐመግሙ፡ በእገሪክሙ።
20 በበይነ፡ ዝንቱ፡ ከመዝ፡ ይቤ፡ አዶናይ፡ እግዚአብሔር፡ ናሁ፡ አነ፡ አስተዋቅሥ፡ ማእከለ፡ በግዕ፡ ጽኑዕ፡ ወማእከለ፡ በግዕ፡ ድኩም።
21 ተሐዝሉ፡ በገቦክሙ፡ ወትሰከሙ፡ በመታክፍቲክሙ፡ ወትወግኡ፡ በአቅርንቲክሙ፡ ወታጠውቅዎ፡ ለኵሉ፡ ድኩም።
22 ወአድኅን፡ አባግዕየ፡ ወኢይከውና፡ ምህርካ፡ ወአስተዋቅሥ፡ ማእከለ፡ በግዕ፡ ወበግዕ።
23 ወእሠይም፡ ኖላዌ፡ አሐደ፡ ወይርዕዮሙ፡ ገብርየ፡ ዳዊት፡ ወይከውኖሙ፡ ኖላዊሆሙ።
24 አነ፡ እግዚአብሔር፡ እከውኖሙ፡ አምላኮሙ፡ ወዳዊትነ፡ ገብርየ፡ በማእከሎሙ፡ መልአኮሙ። አነ፡ እግዚአብሔር፡ ነበብኩ።
25 ወእሠርዕ፡ ሎሙ፡ ሥርዓተ፡ ሰላም፡ ወአጠፍእ፡ አርዌ፡ እኩየ፡ እምድር፡ ወይነብሩ፡ ገዳመ፡ በተዐምኖ፡ ወይበይቱ፡ ውስተ፡ ዖም።
26 ወአሐፅር፡ ዐውደ፡ ደብርየ፡ ወእሁበክሙ፡ ዝናመ፡ ክረምት፡ በረከተ።
27 ወይፈሪ፡ ዕፀ፡ ገዳም፡ ወትሁብ፡ ምድር፡ ኃይላ፡ ወይነብሩ፡ ብሔሮሙ፡ በሰላም፡ ተአሚኖሙ፣፡ ወየአምሩ፡ ከመ፡ አነ፡ ውእቱ፡ እግዚአብሔር፡ አመ፡ ሰበርኩ፡ አርዑተ፡ ዘዲበ፡ ክሳዶሙ፡ ወአድኅኖሙ፡ እምእደ፡ እለ፡ ይቀንይዎሙ።
28 ወኢይከውኑ፡ ምህርካ፡ እንከ፡ ለአሕዛብ፡ ወኢይበልዖሙ፡ እንከ፡ አርዌ፡ ገዳም። ወይነብሩ፡ ተአሚኖሙ፡ ወአልቦ፡ ዘይጌርሞሙ።
29 ወአቀውም፡ ሎሙ፡ ተክለ፡ ሰላም፡ ወኢይመውቱ፡ እንከ፡ በረኃብ፡ በውስተ፡ ምድር፡ ወኢያመነዝዝዎሙ፡ እንከ፡ አሕዛብ።
30 ወየአምሩ፡ ከመ፡ አነ፡ ውእቱ፡ እግዚአብሔር፡ አምላኮሙ፣፡ ወእሙንቱ፡ ይከውኑኒ፡ ሕዝብየ፡ ቤተ፡ እስራኤል፡ ይቤ፡ እግዚአብሔር፡ እግዚእ።
31 አንትሙ፡ አባግዐ፡ መርዔትየ፡ ወአነ፡ እግዚአብሔር፡ አምላክክሙ፡ ይቤ፡ እግዚአሔር፡ እግዚእ።
=== chapter 35 ===
[Chapter 35]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ ሚጥ፡ ገጸከ፡ ኀበ፡ ደብረ፡ ሴይር፡ ወተነበይ፡ ሎቱ፡ ወበሎ።
3 ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ አንሥእ፡ እዴየ፡ ላዕሌከ፡ ደብረ፡ ሴይር፡ ወእሬስየከ፡ በዳ፡ ወትማስን።
4 ወእሬስዮን፡ በድወ፡ ለአህጉሪከ፡ ወትከውን፡ በዳ፣፡ ወተአምር፡ ከመ፡ አነ፡ ውእቱ፡ እግዚአብሔር።
5 እስመ፡ ኮንከ፡ ፀረ፡ ለዓለም፡ ወቀነይኮሙ፡ ለቤተ፡ እስራኤል፡ በእደ፡ መጥባሕት፡ በመዋዕለ፡ ምንዳቤሆሙ፡ ለጊዜ፡ ዓመፃ፡ ደኃሪት።
6 በእንተ፡ ዝንቱ፡ ሕያው፡ አነ፡ ይቤ፡ እግዚአብሔር፡ እግዚእ፡ ከመ፡ እሬስየከ፡ ለደም፡ ወደም፡ ይዴግነከ።
7 ወእሬስዮ፡ በዳ፡ ለደብረ፡ ሴይር፡ ወይማስን፡ ወይጸብእ፡ ወአጠፍእ፡ እምኔሁ፡ ዘየሐውር።
8 ወአበዝኅ፡ አብድንተ፡ ውስተ፡ አህጉሪከ፡ ወቆላትከ፣፡ ወውስተ፡ ኵሉ፡ ገዳም፡ ይወድቁ፡ ቅቱላን፡ በመጥባሕት፡ በውስቴትከ።
9 ወእሬስየከ፡ በዳ፡ ዘለዓለም፡ ወአልቦ፡ ዘይነብር፡ ውስተ፡ አህጉሪከ፡ እንከ፣፡ ወተአምር፡ ከመ፡ አነ፡ ውእቱ፡ እግዚአብሔር።
10 እስመ፡ ትቤ፡ ክልኤ፡ አሕዛብ፡ ወክልኤ፡ በሐውርት፡ ዚአየ፡ ውእቱ፡ ወእወርሶሙ፣፡ ወእግዚአብሔር፡ ህየ፡ ሀሎ።
11 በእንተ፡ ዝንቱ፡ ሕያው፡ አነ፡ ይቤ፡ እግዚአብሔር፡ እግዚእ፣፡ ወአነ፡ እሬስየከ፡ በከመ፡ መዐትከ፡ ወበከመ፡ ቅንአትከ፡ ዘገበርከ፡ እምጽልእከ፡ ወእትዐወቀከ፡ አመ፡ ኰነንኩከ።
12 ወተአምር፡ ከመ፡ አነ፡ ውእቱ፡ እግዚአብሔር። ወሰማዕኩ፡ ዘትቤ፡ ቃለ፡ ፅርፈትከ፡ እስመ፡ አድባረ፡ እስራኤል፡ ወአሕቃላቲሁ፡ ወሀቡ፡ ለነ፡ ንብልዖ።
13 ወሰማዕኩ፡ አነ፡ ከመ፡ አዕበይከ፡ አፉከ፡ ላዕሌየ።
14 ከመዝ፡ ይቤ፡ እግዚአብሔር፡ እግዚእ፡ አመ፡ ይትፌሣሕ፡ ኵሉ፡ ምድር፡ ኪያከ፡ አማስነከ።
15 ከመ፡ ተፈሣሕከ፡ በርስቶሙ፡ ለቤተ፡ እስራኤል፡ እስመ፡ መዝበረ፡ ከማሁ፡ እሬስየከ፡ መዝበረ፡ ትከውን፡ ደብረ፡ ሴይር፡ ወትጠፍእ፡ ኵላ፡ ኤዶምያስ፣፡ ወተምአምር፡ ከመ፡ አነ፡ ውእቱ፡ እግዚአብሔር፡ አምላኮሙ።
=== chapter 36 ===
[Chapter 36]
1 ወአንተ፡ ወልደ፡ እጓለ፡ እመሕያው፡ ተነበይ፡ ሎሙ፡ ለአድባረ፡ እስራኤል፡ ወበሎሙ፡ ለአድባረ፡ እስራኤል፡ ስምዑ፡ ቃለ፡ እግዚአብሔር።
2 ከመዝ፡ ይቤ፡ እግዚአብሔር፡ እግዚእ፡ እስመ፡ ይቤሉክሙ፡ ፀርክሙ፡ እንቋዕ፡ መዝበሩ፡ ለዓለም፡ ወኰነናሆሙ።
3 በእንተ፡ ዝንቱ፡ ተነበይ፡ ወበል፡ ከመዝ፡ ይቤ፡ እግዚአብሔር፡ እግዚእ፡ እስመ፡ አኅሠርሩክሙ፡ እለ፡ ዐውድክሙ፡ ከመ፡ ይኰንኑክሙ፡ አሕዛብ፡ እለ፡ ተርፉ፡ ወኮንክሙ፡ ነገረ፡ ለልሳን፡ ወጽዕለተ፡ ለአሕዛብ።
4 በእንተ፡ ዝንቱ፡ ስምዑ፡ ቃለ፡ እግዚአብሔር፡ አድባረ፡ እስራኤል። ከመዝ፡ ይቤ፡ እግዚአብሔር፡ ለአድባር፡ ወለአውግር፡ ወለአፍላግ፡ ወለቈላት፡ እለ፡ መዝበሩ፡ ወማሰኑ፡ ወለአህጉርኒ፡ እለ፡ ተኀድጋ፡ ወኮና፡ በርበረ፡ ወኬድዎን፡ አሕዛብ፡ እለ፡ ተርፉ፡ ዐውዶሙ።
5 በበይነ፡ ዝንቱ፡ ከመዝ፡ ይቤ፡ እግዚአብሔር፡ እግዚእ፡ ዳእሙ፡ በእሳተ፡ መዐትየ፡ ነበብኩ፡ ላዕለ፡ አሕዛብ፡ እለ፡ ተርፉ፡ ወዲበ፡ ኵሉ፡ ኤዶምያስ፡ እስመ፡ ረሰዩ፡ ሎሙ፡ ምድርየ፡ ይኰንኑ፡ ሎሙ፡ በፍሥሐ፡ ልብ፡ ወአኅሠርዋ፡ ለነፍሶሙ፡ ወአማሰኑ፡ ፄዋሆሙ።
6 በእንተ፡ ዝንቱ፡ ተነበይ፡ ላዕለ፡ ምድረ፡ እስራኤል፡ ወበሎሙ፡ ለአድባር፡ ወለአውግር፡ ወለከሪር፡ ወለቈላት፡ ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ ነበብኩ፡ በመዐትየ፡ ወበቅንአትየ፡ በእንተ፡ ዘጸዐሉ፡ አሕዛብ፡ ከመ፡ ይምጽኡክሙ።
7 በበይነ፡ ዝንቱ፡ አነ፡ አነሥእ፡ እዴየ፡ በላዕለ፡ አሕዛብ፡ እለ፡ ዐውድክሙ፡ ወይነሥኡ፡ ኃሣሮሙ፡ እሙንቱ።
8 ወለክሙሰ፡ አድባረ፡ እስራኤል፡ አስካለ፡ ቀምሕክሙ፡ ይበልዑ፡ ሕዝብየ፡ እስመ፡ ይሴፈዉ፡ ይምጽኡ።
9 እሰመ፡ ናሁ፡ አነ፡ ለክሙ፡ ወእኔጽር፡ ላዕሌክሙ፡ ወየሐርሱክሙ፡ ወይዘርኡክሙ።
10 ወአበዝኅ፡ ለክሙ፡ ሰብእ፡ ለኵሉ፡ ቤተ፡ እስራኤል፡ ለዝሉፉ፡ ወይነብርዎን፡ ለአህጉሪሆሙ፡ ወይትሐነጻ፡ እለ፡ መዝበራ።
11 ወእመልኦን፡ ሰብአ፡ ወእንስሳ፣፡ ወአነብረክሙ፡ ከመ፡ ትካት፡ ወአሤኒ፡ ለክሙ፡ ከመ፡ ቀዲሙ፡ ወተአምሩ፡ ከመ፡ አነ፡ ውእቱ፡ እግዚአብሔር።
12 ወአወልድ፡ ለክሙ፡ ሰብአ፡ ለሕዝብየ፡ እስራኤል፡ ወይወርሱክሙ፡ ወእሙንቱ፡ ይከውኑ፡ መኳንንቲክሙ፡ ወኢይቀትሉ፡ ውሉደክሙ።
13 ከመዝ፡ ይቤ፡ እግዚአብሔር፡ እግዚእ፡ እስመ፡ ይቤሉኪ፡ በላዒተ፡ ሰብእ፡ አንቲ፡ ወአጥፋእኪ፡ ውሉደኪ፡ በውስተ፡ ሕዝብኪ።
14 በእንተ፡ ዝንቱ፡ ኢትበልዒ፡ እንከ፡ ሰብአ፡ ወኢይመክኑ፡ እንከ፡ ሕዝብኪ፡ ይቤ፡ እግዚአብሔር፡ እግዚእ።
15 ወኢይሰማዕ፡ እንከ፡ በላዕሌክሙ፡ ጽዕለተ፡ አሕዛብ፡ ወኃሣሮሙ፡ ለሕዝብ፡ ኢይመጽአክሙ፡ ወኢይመክኑ፡ እንከ፡ ሕዝብኪ፡ ይቤ፡ እግዚአብሔር፡ እግዚእ።
16 ወኮነ፡ ቃለ፡ እግዚአብሔር፡ ኀቤየ፡ ወይቤለኒ።
17 ወልደ፡ እጓለ፡ እመሕያው፣፡ ቤተ፡ እስራኤል፡ ነበሩ፡ ውስተ፡ ምድሮሙ፡ ወአርኰስዋ፡ ለምድሮሙ፡ በፍኖቶሙ፡ ወበርኵሶሙ፡ ወበጣዖቶሙ፡ ከመ፡ ርኵሰ፡ ትክት፡ ኮነ፡ ፍኖቶሙ፡ ቅድመ፡ ገጽየ።
18 ወሦጥኩ፡ መዐትየ፡ ላዕሌሆሙ፡ በእንተ፡ ደም፡ ዘከዐዉ፡ ውስተ፡ ምድር፡ ወአርኰስዋ፡ በታዖቶሙ።
19 ወዘረውክዎሙ፡ ውስተ፡ አሕዛብ፡ ወአኅሠርክዎሙ፡ ውስተ፡ በሐውርት፡ ወኰነንክዎሙ፡ በከመ፡ ፍኖቶሙ፡ ወበከመ፡ ጌጋዮሙ።
20 ወቦሙ፡ ውስተ፡ አሕዛብ፡ ወበህየ፡ በዊኦሙ፡ አርኰሱ፡ ስምየ፡ ቅዱሰ፡ እስመ፡ ይቤልዎሙ፡ ሕዝበ፡ እግዚአብሔር፡ እሙንቱ፣፡ ወወፅኡ፡ እምድሮሙ።
21 ወመሐክዎሙ፡ በእንተ፡ ስምየ፡ ቅዱስ፡ ዘአርኰሱ፡ ቤተ፡ እስራኤል፡ በውስተ፡ አሕዛብ፡ ኀበ፡ ቦኡ፡ ህየ።
22 በበይነ፡ ዝንቱ፡ በሎሙ፡ ለቤተ፡ እስራኤል፡ ከመዝ፡ ይቤ፡ እግዚአብሔር፡ እግዚእ፡ አኮአ፡ ለክሙ፡ ቤተ፡ እስራኤል፡ ዘእገብር፡ ዳእሙ፡ በእንተ፡ ስምየ፡ ቅዱስ፡ ዘአርኰስክሙ፡ በውስተ፡ አሕዛብ፡ ኀበ፡ ቦእክሙ፡ ህየ።
23 ወአቄድስ፡ ስምየ፡ ዓቢየ፡ ዘረኵሰ፡ በውስተ፡ አሕዛብ፣፡ ዘአርኰስክሙ፡ በውስተ፡ ማእከሎሙ፣፡ ወየአምሩ፡ አሕዛብ፡ ከመ፡ አነ፡ ውእቱ፡ እግዚአብሔር፡ ይቤ፡ አዶናይ፡ እግዚአብሔር፡ እግዚእ፡ ሶበ፡ ተቀደስኩ፡ በማእከሌክሙ፡ በቅድመ፡ አዕይንቲሆሙ።
24 ወእነሥአክሙ፡ እምአሕዛብ፡ ወአስተጋብአክሙ፡ እምኵሉ፡ በሐውርት፡ ወአገብአክሙ፡ ውስተ፡ ምድርክሙ።
25 ወእነዝኀክሙ፡ በማይ፡ ንጹሕ፡ ወትነጽሑ፡ እምኵሉ፡ ረኵስክሙ፣፡ ወአነጽሐክሙ፡ እምኵሉ፡ ጣዖትክሙ።
26 ወእሁበክሙ፡ ልበ፡ ሐዲሰ፡ ወመንፈሰ፡ ሐዲስ፡ እወዲ፡ ላዕሌክሙ፡ ወአወፅእ፡ ልበ፡ እብን፡ እምሥጋክሙ፡ ወእሁበክሙ፡ ልበ፡ ዘሥጋ።
27 ወእሁብ፡ መንፈስየ፡ ላዕሌክሙ፡ ወእሬስየክሙ፡ ከመ፡ ትሑሩ፡ በሥርዓትየ፡ ወትዕቀቡ፡ ኵነኔየ፡ በሥርዓትየ፡ ወትዕቀቡ፡ ኵነኔየ፡ ወትግበርዎ።
28 ወትነብሩ፡ ውስተ፡ ምድር፡ እንተ፡ ወሀብክዎሙ፡ ለአበዊክሙ፡ ወትከውኑኒ፡ ሕዝብየ፡ ወአነሂ፡ እከውነክሙ፡ አምላክክሙ።
29 ወአድኅነክሙ፡ እምኵሉ፡ ርኵስክሙ፡ ወእጼውዖ፡ ለስርናይ፡ ወአሠምሮ፣፡ ወኢያመጽእ፡ ለክሙ፡ ረኃበ።
30 ወአሠምር፡ ፍሬ፡ ዕፀው፡ ወማእረረ፡ ገራውህ፡ ከመ፡ ኢትኩኑ፡ ጽዕለተ፡ አሕዛብ፡ በውስተ፡ ረኃብ።
31 ወትዜከሩ፡ ፍናዊክሙ፡ እኩያተ፡ ወምግባሪክሙ፡ ዘኢኮነ፡ ሠናየ፡ ወአኀሥረክሙ፡ በቅድሜሆሙ፡ በጌጋይክሙ፡ ወበርኵስክሙ።
32 ወአኮ፡ በእንቲአክሙ፡ ዘእገብር፡ ይቤ፡ እግዚአብሔር፡ እግዚእ፡ ዘይትዐወቀክሙ። ተኀፍሩ፡ ወተኃሥሩ፡ እምፍኖትክሙ፡ ቤተ፡ እስራኤል።
33 ከመዝ፡ ይቤ፡ እግዚአብሔር፡ እግዚእ፡ አመ፡ አጽረይኩክሙ፡ እምኵሉ፡ ኃጢአትክሙ፡ አነብረክሙ፡ ውስተ፡ አህጉር፡ ወይትሐነጽ፡ መዝበር።
34 ወየሐርሱ፡ ምድረ፡ ዘማሰነ፡ እስመ፡ ሙስንተ፡ ኮነት፡ በቅድመ፡ ኵሉ፡ ኃላፊት።
35 ወይብሉ፡ እንታክቲ፡ ምድር፡ ሙስንት፡ ከመ፡ ገነተ፡ ትፍስሕት፡ ኮነት፣፡ ወአህጉር፡ ዘመዝበራ፡ ወዘማሰና፡ ወተከርያ፡ ተጸዊኖን፡ ነበራ።
36 ወየአምሩ፡ አሕዛብ፡ ኵሎሙ፡ እለ፡ ተርፉ፡ ዐውደክሙ፡ ከመ፡ አነ፡ ውእቱ፡ እግዚአብሔር፣፡ ሐነጽኩ፡ እለ፡ መዝበራ፡ ወተከልኩ፡ እለ፡ ማሰና። አነ፡ እግዚአብሔር፡ ነበብኩሂ፡ ወነገርኩ።
37 ከመዝ፡ ይቤ፡ እግዚአብሔር፡ እግዚእ፡ ዘንተ፡ ዳእሙ፡ አኀሥሥ፡ ለቤተ፡ እስራኤል፡ ዘእገብር፡ ሎሙ፣፡ አበዝኆሙ፡ ከመ፡ አባግዐ፡ ሰብእ።
38 ወከመ፡ አባግዐ፡ ቅዱሳን፡ ወከመ፡ አባግዐ፡ ኢየሩሳሌም፡ በበዓላቲሃ። ከማሁ፡ ይከውና፡ አህጉር፡ እለ፡ መዝበራ፣፡ ይመልኣ፡ አባግዐ፡ ሰብእ፣፡ ወየአምሩ፡ ከመ፡ አነ፡ ውእቱ፡ እግዚአብሔር።
=== chapter 37 ===
[Chapter 37]
1 ወኮነ፡ ላዕሌየ፡ እደ፡ እግዚአብሔር፡ ወአውፅአኒ፡ በመንፈሰ፡ እግዚአብሔር፡ ወአንበረኒ፡ በማእከለ፡ ገዳም፣፡ ወምሉእ፡ ህየ፡ አዕፅምተ፡ ሰብእ።
2 ወአዖደኒ፡ ውስቴቶሙ፡ ምዕዋዳተ፡ ውስተ፡ ገዳም፡ ኀበ፡ ሀለዉ፡ ይቡሳት፡ ጥቀ።
3 ወይቤለኒ፡ ወልደ፡ እጓለ፡ ሕመሕያው፣፡ የሐይዉኑ፡ እሉ፡ አዕፅምት፡ ወእቤ፡ እግዚኦ፡ እግዚኦ፡ አንተ፡ ተአምር።
4 ወይቤለኒ፡ ተነበይ፡ ለዝ፡ አዕፅምት፡ ወበሎሙ፡ ስምዑ፡ አዕፅምት፡ ይቡሳን፡ ቃለ፡ እግዚአብሔር።
5 ከመዝ፡ ይቤ፡ እግዚአብሔር፡ እግዚእ፡ ለዝ፡ አዕፅምት፡ ናሁ፡ አነ፡ አመጽእ፡ መንፈሰ፡ ሕይወት፡ ላዕሌክሙ።
6 ወእሁበክሙ፡ ሥርወ፡ ወአለብሰክሙ፡ ሥጋ፡ ወእሰፍሕ፡ ላዕሌክሙ፡ ማእሰ፡ ወእወዲ፡ ውስቴትክሙ፡ መንፈሰ፡ ወተሐይዉ፣፡ ወተአምሩ፡ ከመ፡ አነ፡ ውእቱ፡ እግዚአብሔር።
7 ወተነበይኩ፡ በከመ፡ አዘዘኒ፡ ወመጽአ፡ ድምፀ፡ ቃል፡ ሶበ፡ ተነበይኩ፣፡ ወናሁ፡ ድልቅልቅ፡ አስተጋብኦሙ፡ ለአዕፅምት፡ ወተጋብኡ፡ አዕፅምት፡ ኀበ፡ አዕፅምት፡ ውስተ፡ መለያልዩ፡ ዘዘዚአሁ።
8 ወነጸርኩ፡ ወርኢኩ፡ ሥርወ፡ ላዕሌሆሙ፡ ወበቈለ፡ ሥጋሆሙ፡ ወዐርገ፡ ማእስ፡ ዲቤሆሙ፡ ወአልቦ፡ መንፈስ፡ ላዕሌሆሙ።
9 ወይቤለኒ፡ ወልደ፡ እጓለ፡ እመሕያው፡ ተነበይ፡ ወበላ፡ ለመንፈስ፡ ከመዝ፡ ይቤ፡ እግዚአብሔር፡ እም፬ነፋሳት፡ ትምጻእ፡ ወትንፋኅ፡ ላዕለ፡ እሉ፡ አብድንት፡ ወይሕየዉ።
10 ወተነበይኩ፡ በከመ፡ አዘዘኒ፡ ወቦአ፡ መንፈስ፡ ላዕሌሆሙ፡ ወሐይዉ፡ ወቆሙ፡ በእገሪሆሙ፡ ብዙኃን፡ ሠራዊት፡ ጥቀ።
11 ወነበበኒ፡ እግዚአብሔር፡ ወይቤለኒ፡ ወልደ፡ እጓለ፡ እመሕያው፡ ዝኵሉ፡ አዕፅምት፡ ዘቤተ፡ እስራኤል፡ ውእቱ፡ ወይብሉ፡ እሙንቱ፡ የብሱ፡ አዕፅምቲነ፡ ወተሐጕለ፡ ተስፋነ፡ ወማሰነ።
12 በእንተ፡ ዝንቱ፡ ተነበይ፡ ወበል፡ ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ እከሥት፡ መቃብሪክሙ፡ ወአበውአክሙ፡ ውስተ፡ ምድረ፡ እስራኤል።
13 ወተአምሩ፡ ከመ፡ አነ፡ ውእቱ፡ እግዚአብሔር፣፡ ሶበ፡ አርኀውኩ፡ መቃብሪክሙ፡ ከመ፡ አውፅእክሙ፡ እምውስተ፡ ዝኅርክሙ፡ ለሕዝብየ።
14 ወእሁብ፡ መንፈስየ፡ ላዕሌክሙ፡ ወተሐይዉ፡ ወትገብኡ፡ ውስተ፡ ምድርክሙ፣፡ ወተአምሩ፡ ከመ፡ አነ፡ ውእቱ፡ እግዚአብሔር። ወእገብር፡ ዘነበብኩ፡ ይቤ፡ እግዚአብሔር፡ እግዚእ።
15 ወነበበኒ፡ እግዚአብሔር፡ ወይቤለኒ።
16 ወልደ፡ እጓለ፡ እመሕያው፡ ንሣእ፡ ለከ፡ ፩በትረ፡ ወጸሐፍ፡ ውስቴታ፡ ይሁዳ፡ ወደቂቀ፡ እስራኤል፡ እለ፡ የኀብርዎ። ወንሣእ፡ ለከ፡ ካልእተ፡ በትረ፡ ወትጽሕፎ፡ ለዮሴፍ፡ በትረ፡ ኤፍሬም፣፡ ወለኵሉ፡ ደቂቀ፡ እስራኤል፡ እለ፡ ተወሰኩ፡ ኀቤሁ።
17 ወትፀምሮን፡ ለክልኤሆን፡ ወተአስሮን፡ ወትሬስዮን፡ አሐደ፡ በትረ፡ ወየሀልዋ፡ ውስተ፡ እዴከ።
18 ወሶበ፡ ይብሉከ፡ ደቂቀ፡ ሕዝብከ፡ ኢትነግረነኑ፡ ምንት፡ ከመዝ።
19 በሎሙ፡ ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ እነሥእ፡ በትረ፡ ዮሴፍ፡ ዘውስተ፡ እደ፡ ኤፍሬም፡ ወሕዝበ፡ እስራኤል፡ ዘኀቤሁ፡ ወእሁቦሙ፡ ውስተ፡ ሕዝበ፡ ይሁዳ፡ ወይከውኑ፡ አሐደ፡ በትረ፡ ውስተ፡ እደ፡ ይሁዳ።
20 ወይኩና፡ ውስተ፡ እዴከ፡ አብትር፡ እለ፡ ጸሐፍከ፡ በቅድሜሆሙ።
21 ወትብሎሙ፡ ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ አነሥኦሙ፡ ለኵሎሙ፡ ቤተ፡ እስራኤል፡ እማእከሎሙ፡ ለሕዝብ፡ እለ፡ ቦኡ፡ ህየ፡ ወአስተጋብኦሙ፡ እምኵሉ፡ እለ፡ ዐውዶሙ፡ ወእወስዶሙ፡ ምድረ፡ እስራኤል።
22 ወእሬስዮሙ፡ አሐደ፡ ሕዝበ፡ በምድርየ፡ ወበደወለ፡ እስራኤል። ወአሐደ፡ ይከውን፡ መልአኮሙ፡ ወይነግሥ፣፡ ወኢይትናፈቁ፡ እንከ፡ ለክልኤ፡ ሕዝብ፡ ወኢይነግሡ፡ ሎሙ፡ ፪፡ ነገሥት።
23 ከመ፡ ኢይርኰሱ፡ በጣዖቶሙ፡ ወበኃሣሮሙ፡ ወበኵሉ፡ ኃጢአቶሙ። ወአድኅኖሙ፡ እምኵሉ፡ ጌጋዮሙ፡ ዘቦቱ፡ ስሕቱ፡ ወአጸርዮሙ፣፡ ወይከውኑኒ፡ ሕዝብየ፡ ወአነሂ፡ እከውኖሙ፡ አምላኮሙ።
24 ወገብርየ፡ ዳዊት፡ ንጉሥ፡ በማእከሎሙ፣፡ ወይከውን፡ ፩ኖላዊ፡ ለኵሎሙ፣፡ እስመ፡ የሐውሩ፡ በትእዛዝየ፡ ወየዐቅቡ፡ ኵነኔየ፡ ወይገብርዎ።
25 ወይነብሩ፡ ውስተ፡ ምድሮሙ፡ ዘወሀብክዎ፡ ለገብርየ፡ ያዕቆብ፡ ኀበ፡ ነበሩ፡ ህየ፡ አበዊሆሙ፣፡ ይነብሩ፡ ውስቴታ፡ እሙንቱኒ፡ ወደቂቆሙኒ፡ ወደቂቀ፡ ደቂቆሙኒ፡ እስከ፡ ለዓለም፡ ወዳዊት፡ ገብርየ፡ መልአኮሙ፡ ለዓለም።
26 ወእሠርዕ፡ ሎሙ፡ ሥርዓተ፡ ሰላም፣፡ ሕገ፡ ዘለዓለም፡ ይከውን፡ ምስሌሆሙ። ወእሠይም፡ ቅድሳትየ፡ ማእከሎሙ፡ ለዓለም።
27 ወይከውን፡ ማኅደርየ፡ ኀቤሆሙ፣፡ ወእከውኖሙ፡ አምላኮሙ፡ ወእሙንቱኒ፡ ይከውኑኒ፡ ሕዝብየ።
28 ወየአምሩ፡ አሕዛብ፡ ከመ፡ አነ፡ ውእቱ፡ እግዚአብሔር፡ ዘእቄድሶሙ፡ ለእስራኤል፡ ሶበ፡ ነበረ፡ ቤተ፡ መቅደስየ፡ በማእከሌሆሙ፡ ለዓለም።
=== chapter 38 ===
[Chapter 38]
1 ወነበበኒ፡ እግዚአብሔር፡ ወይቤለኒ።
2 ወልደ፡ እጓለ፡ እመሕያው፡ አጽንዕ፡ ገጸከ፡ ላዕለ፡ ጎግ፡ ወምድረ፡ ማጎግ፡ መልአከ፡ ሮስ፡ ሜሴክ፡ ወቶቤል፡ ወተነበይ፡ ላዕሌሁ።
3 ወበሎ፡ ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ ላዕሌከ፡ ጎግ፡ መልአከ፡ ሮስሜሴክ፡ ወቶቤል።
4 ወአስተጋብአከ፡ ወእወዲ፡ ልጓመ፡ ውስተ፡ መላትሒከ፣፡ ወአንጎግወከ፡ ምስለ፡ ሠራዊትከ፡ አፍራሰ፡ ወመስተፅዕናነ፡ እለ፡ አልባሰ፡ ሐፂን፡ ወኵሉ፡ ተዓይን፡ ብዙኅ፡ ይእኅዙ፡ ንዋየ፡ ሐቅል፡ ወወልታ፣፡ ወኵሎሙ፡ እለ፡ ያጸንዑ፡ ኲናተ።
5 ፋርስ፡ ወፉጥ፡ ወኢትዮጵያ፡ እሙንቱ፡ ኵሎሙ፡ ሰብአ፡ ጌራ፡ ወወልታ።
6 ጎሜር፡ ወኵሉ፡ እለ፡ ምስሌሁ፡ ቴርጎም፡ ጽንፈ፡ ደቡብ፡ ወኵሎሙ፡ እለ፡ ዐውዶሙ፡ ወብዙኃን፡ አሕዛብ፡ ምስሌከ።
7 አጥብዕ፡ ወተደሎ፡ አንተ፡ ወኵሉ፡ ተዓይኒከ፡ ምስሌከ፡ ወትከውነኒ፡ ዕቁበ።
8 እምብዙኅ፡ መዋዕል፡ ታስተዳሉ፡ ወትመጽእ፡ እምጽንፈ፡ ዓመት፡ ወትበጽሕ፡ ውስተ፡ ምድር፡ እንተ፡ ጠፍአት፡ በኲናተ፡ አሕዛብ፣፡ እለ፡ ተጋብኡ፡ ብዙኃን፡ ውስተ፡ ምድር፡ እስራኤል፡ እንተ፡ ማሰነት፡ ኵለንታሃ፣፡ ወከመዝ፡ ይመጽኡ፡ እምአሕዛብ፡ ወይነብሩ፡ በሰላም፡ ኵሎሙ።
9 ወተዐርግ፡ ከመ፡ ዝናም፡ ወትመጽእ፡ ከመ፡ ደመና፡ ትክድና፡ ለምድር፣፡ ወትወድቅ፡ አንተ፡ ወብዙኃን፡ አሕዛብ፡ ምስሌከ።
10 ከመዝ፡ ይቤ፡ እግዚአብሔር፡ እግዚእ፡ ወይከውን፡ ይእተ፡ አሚረ፡ ወይሔሊ፡ ነገረ፡ ልብከ፡ ወትመክር፡ ምክረ፡ እኩየ።
11 ወትብል፡ አዐርግ፡ ውስተ፡ ምድር፡ ግድፍት፣፡ አሐውር፡ ኀበ፡ ዕሩፋን፣፡ ወያረምሙ፡ ወይነብሩ፡ በሰላም፡ ኵሎሙ፡ እለ፡ ይነብሩ፡ ውስተ፡ ምድር፡ እንተ፡ አልባቲ፡ አረፍት፡ ወኢመዓጹት፡ ወኢመናስግት።
12 እበረብሮሙ፡ በርበረ፡ ወእመሀርኮሙ፡ ምህርካሆሙ፡ ውስተ፡ ምድር፡ እንተ፡ ማሰነት፡ ትመይጥ፡ እዴከ፡ ወኀበ፡ ይነብሩ፡ አሕዛብ፡ ወሕዝብኒ፡ እለ፡ ተጋብኡ፡ ብዙኃን፡ እምበሐውርት፡ ወገብሩ፡ ሎሙ፡ ጥሪተ፣፡ እለ፡ ይነብሩ፡ ውስተ፡ ኅንብርተ፡ ምድር።
13 ሳባዕ፡ ወዴዳን፡ ወእለ፡ ይትናገዱ፡ ተርሴስ፡ ወኵሎሙ፡ አዕጻዳቲሆሙ፡ ይብሉከ፡ ትበረብረነኑ፡ በርበረ፡ መጻእከ፡ አንተ፡ ወትማህርክ፡ ምህርካ፡ አስተጋባእከ፡ ተዓይኒከ፡ ወትንሣእ፡ ወርቀ፡ ወብሩረ፡ ወትሰድ፡ ጥሪተ፡ ይኩንከ፡ ሕብልያ፡ ዘሐብለይከ።
14 በእንተ፡ ዝንቱ፡ ተነበይ፡ ወልደ፡ እጓለ፡ እመሕያው፡ ወበሎ፡ ለጎግ፡ ከመዝ፡ ይቤ፡ እግዚአብሔር፡ እግዚእ፡ አኮኑ፡ በእንታክቲ፡ ዕለት፡ አመ፡ ይነብሩ፡ ሕዝብየ፡ እስራኤል፡ በሰላም፡ ትትነሣእ።
15 ወትመጽእ፡ እምብሔርከ፣፡ እምጽንፈ፡ ደቡብ፡ ወብዙኃን፡ አሕዛብ፡ ምስሌከ፡ መስተፅዕናነ፡ አፍራስ፡ ኵሎሙ፣፡ ብዙኅ፡ ተዓይን፡ ወብዙኅ፡ ሠራዊት።
16 ወተዐርግ፡ ኀበ፡ ሕዝብየ፡ እስራኤል፡ ከመ፡ ደመና፡ ትከድና፡ ለምድር። በደኃሪ፡ መዋዕል፡ ይከውን፡ ወአዐርገከ፡ ዲበ፡ ምድርየ፡ ከመ፡ ያእምሩኒ፡ ኵሉ፡ አሕዛብ፡ ሶበ፡ ተቀደስኩ፡ ብከ፡ ጎግ፡ በቅድሜሆሙ።
17 ከመዝ፡ ይቤ፡ እግዚአብሔር፡ እግዚእ፡ ለጎግ፡ አንተኑ፡ ዘበእንቲአከ፡ ነበብኩ፡ በቀዳሚ፡ መዋዕል፡ በእደ፡ አግብርትየ፡ ነቢያተ፡ እስራኤል፡ እለ፡ ተነበዩ፡ በእማንቱ፡ መዋዕል፡ ወዓመት፡ ወእወስደከ፡ ላዕሌሆሙ።
18 ወይከውን፡ ይእተ፡ አሚረ፣፡ አመ፡ ይመጽእ፡ ጎግ፡ ውስተ፡ ምድረ፡ እስራኤል፡ ይቤ፡ እግዚአብሔር፡ እግዚእ፣፡ ተዐርግ፡ መቅሠፍትየ፡ በመዐትየ፡ ወበቅንአትየ።
19 በእሳተ፡ መዐትየ፡ ነበብኩ፡ ይእተ፡ አሚረ፡ ይከውን፡ ዓቢይ፡ ድልቅልቅ፡ ውስተ፡ በሐውርተ፡ እስራኤል።
20 ወያድለቀልቁ፡ እምቅድመ፡ ገጹ፡ ዓሣተ፡ ባሕርኒ፡ ወአዕዋፈ፡ ሰማይኒ፡ ወአራዊተ፡ ገዳም፡ ወኵሉ፡ አራዊት፡ ዘይትሐወስ፡ ዲበ፡ ምድር፡ ወኵሉ፡ ሰብእ፡ ዘዲበ፡ ገጸ፡ ምድር፡ ወይነቅዕ፡ አድባር፡ ወይነቅዑ፡ አውግር፡ ወይወድቅ፡ ኵሉ፡ አረፍተ፡ ውስተ፡ ምድር።
21 ወእጼውዕ፡ ላዕሌሁ፡ ኵሎ፡ ፍርሃተ፡ ኲናት፡ ይቤ፡ እግዚአብሔር፡ እግዚእ፡ ኲናተ፡ ብእሲ፡ ላዕለ፡ እኁሁ፡ ይከውን።
22 ወእኴንኖ፡ በሞተ፡ ብድብድ፡ ወበደም፡ ወእደፍኖ፡ በዝናም፡ ወበእብነ፡ በረድ፣፡ ወእሳተ፡ ወተየ፡ አዘንም፡ ላዕሌሁ፡ ወዲበ፡ ኵሉ፡ እለ፡ ምስሌሁ፡ ወላዕለ፡ ኵሉ፡ አሕዛብ፡ ብዙኅ፡ ዘምስሌሁ።
23 ወአዐቢ፡ ወእትቄደስ፡ ወእሴባሕ፡ ወአስተርኢ፡ በቅድመ፡ ብዙኃን፡ አሕዛብ፣፡ ወየአምሩ፡ ከመ፡ አነ፡ ውእቱ፡ እግዚአብሔር።
=== chapter 39 ===
[Chapter 39]
1 ወአንተ፡ ወልደ፡ እጓለ፡ እመ፡ ሕያው፡ ተነበይ፡ ላዕለ፡ ጎግ፡ ወበሎ፡ ከመዝ፡ ይቤ፡ እግዚአብሔር፡ እግዚእ፡ ናሁ፡ አነ፡ ላዕሌከ፡ ጎግ፡ መልአከ፡ ሮስ፡ ሜሴክ፡ ወቶቤል።
2 ወአስተጋብአከ፡ ወእመርሐከ፡ እምነ፡ አጽናፈ፡ ደቡብ፡ ወእወስደከ፡ ብሔረ፡ እስራኤል።
3 ወአገድፈከ፡ ቀስተከ፡ እምእዴከ፡ ዘፀጋም፡ ወአሕፃከ፡ እምእዴከ፡ ዘየማን፡ ወእነፅኀከ።
4 ውስተ፡ አድባረ፡ እስራኤል፡ ወትወድቅ፡ አንተ፡ ወኵሉ፡ እለ፡ ምስሌከ፣፡ ወአሕዛብኒ፡ እለ፡ ምስሌከ፡ ይትወሀቡ፡ ለብዙኃን፡ አንስርት፡ ወለኵሉ፡ አዕዋፍ፡ ወለኵሉ፡ አራዊተ፡ ገዳም፡ ወሀብኩከ፡ ይብልዑከ።
5 ወትወድቅ፡ ውስተ፡ ገጸ፡ ገዳም፡ እስመ፡ አነ፡ ነበብኩ፡ ይቤ፡ እግዚአብሔር።
6 አነ፡ እፌኑ፡ እሳተ፡ ላዕለ፡ ጎግ፡ ወይነብራ፡ ደሰያት፡ በሰላም፣፡ ወየአምሩ፡ ከመ፡ አነ፡ ውእቱ፡ እግዚአብሔር።
7 ወይትዐወቅ፡ ስምየ፡ ቅዱስ፡ በማእከለ፡ ሕዝብየ፡ እስራኤል፡ ወኢይረኵስ፡ እንከ፡ ስምየ፡ ቅዱስ፡ ወየአምሩ፡ አሕዛብ፡ ከመ፡ አነ፡ ውእቱ፡ እግዚአብሔር፡ ቅዱሰ፡ እስራኤል።
8 ናሁ፡ መጽአ፡ ወተአምሩ፡ ከመ፡ ይከውን፡ ይቤ፡ እግዚአብሔር፡ እግዚእ። ዛቲ፡ ዕለት፡ እንተ፡ ነገርኩ።
9 ወይወፅኡ፡ እለ፡ ይነብሩ፡ አህጉረ፡ እስራኤል፡ ወያውዕዩ፡ ወላትወ፡ ወረምሐ፡ ወምጕንጳ፡ ወአቅስስተ፡ ወአሕፃ፡ ወአብትረ፡ ዘእድ፡ ወኰያንወ፡ ያነድዱ፡ በእሳት፡ ፯ዓመተ።
10 ወኢይነሥኡ፡ ዕፀወ፡ ገዳም፡ ወኢይገዝሙ፡ እምውስተ፡ ዖም፣፡ ዳእሙ፡ ንዋየ፡ ሐቅል፡ ያነድዱ፡ በእሳት፡ ወይበረብርዎሙ፡ ለእለ፡ በርበርዎሙ፡ ወየሐበልይዎሙ፡ ለእለ፡ ሐብለይዎሙ፡ ይቤ፡ እግዚአብሔር፡ እግዚእ።
11 ወይከውን፡ ይእተ፡ አሚረ፡ እሁቦ፡ ለጎግ፡ ብሔረ፡ ዘያሰሚ፡ በውስተ፡ እስራኤል፡ ለመቃብሪሁ፡ ወለብዙኅ፡ ሰብእ፡ እለ፡ መጽኡ፡ መንገለ፡ ባሕር፡ ወየሐንጹ፡ ጥቅመ።
12 ወይከርዩ፡ ህየ፡ በርቢረ፡ ለጎግ፡ ወለኵሉ፡ ሰብኡ፡ ወይሰመይ፡ ምድረ፡ ብዙኅ፡ ሰብአ፡ ጎግ።
13 ወይድኅይዎሙ፡ ቤተ፡ እስራኤል፡ ፯፡ ወርኀ፡ ከመ፡ ትንጻሕ፡ ምድር፡ ወይፍሕርዎሙ፡ ኵሉ፡ አሕዛበ፡ ምድር፡ ወይከውን፡ ለክሙ፡ ለስም፡ አመ፡ ተሰባሕኩ፡ ይቤ፡ እግዚአብሔር፡ እግዚእ።
14 ወበኵሉ፡ ጊዜ፡ የሐውሩ፡ ኀበ፡ እለ፡ ይትጋብኡ፡ ውስተ፡ ምድር፡ ይቅብሩ፡ ዘተርፈ፡ ውስተ፡ ገጸ፡ ምድር፡ ወያነጽሕዋ፡ በሳብዕ፡ ወርኅ፡ ወየኀሡ።
15 ኵሉ፡ ዘየሐውሩ፡ ውስተ፡ ምድር፡ ወእመ፡ ረከቡ፡ ዓፅመ፡ ሰብእ፣፡ ይነድቁ፡ ላዕሌሁ፡ ትእምርተ፡ እስከ፡ ይቀብርዎ፡ ከረይተ፡ መቃብር፡ ውስተ፡ በርቢሩ፡ ለጎግ፡ ወብዙኅ፡ ሰብኡ።
16 ወስመ፡ ሀገርኒ፡ ብዝኅተ፡ ሰብእ። ወትነጽሕ፡ ምድር።
17 ወአንተ፡ ወልደ፡ እጓለ፡ እመሕያው፡ ከመዝ፡ ይቤ፡ እግዚአብሔር፡ እግዚእ፡ በል፡ ለኵሉ፡ አዕዋፍ፡ ዘይሰርር፡ ወለኵሉ፡ አራዊተ፡ ገዳም፡ ተጋብኡ፡ ንዑ፡ እምኵሉ፡ አድያም፡ ውስተ፡ መሥዋዕትየ፡ ዘጠባሕኩ፡ ለክሙ፣፡ መሥዋዕተ፡ ዓቢየ፡ ውስተ፡ አድባረ፡ እስራኤል፡ ወብልዑ፡ ሥጋ፡ ወስተዩ፡ ደመ።
18 ወትብልዑ፡ ሥጋ፡ ያርብሕ፡ ወትስተዩ፡ ደመ፡ መላእክተ፡ ምድር፡ ዳቤላት፡ ወአብሐኵ፡ ወአስዋር፣፡ ወአስዋሪሁኒ፡ መጋዝዕት።
19 ወብልዑ፡ ሥቡሐ፡ እስከ፡ ያጠልቀክሙ፡ ወስተዩ፡ ደመ፡ እስከ፡ ያሰክረክሙ፡ እምነ፡ መሥዋዕትየ፡ ዘጠባሕኩ፡ ለክሙ።
20 ወጽገቡ፡ እምውስተ፡ ማእድየ፡ ሥጋ፡ አፍራስ፡ ወመስተፅዕናን፡ ወያርብሕ፡ ወኵሉ፡ ዕደው፡ መስተፅዕናን፡ ይቤ፡ እግዚአብሔር፡ እግዚእ።
21 ወእሁብ፡ ክብርየ፡ ለክሙ፣፡ ወይሬእዩ፡ ኵሉ፡ አህዛብ፡ ፍትሕየ፡ ዘገበርኩ፡ ወእዴየ፡ ዘአምጻእኩ፡ ላዕሌሆሙ።
22 ወየአምሩ፡ ቤተ፡ እስራኤል፡ ከመ፡ አነ፡ ውእቱ፡ እግዚአብሔር፡ አምላኮሙ፡ እምይእቲ፡ ዕለት፡ ወለዝሉፉ።
23 ወየአምሩ፡ ኵሉ፡ አሕዛብ፡ ከመ፡ ተፄወዉ፡ ቤተ፡ እስራኤል፡ በኃጢአቶሙ፣፡ እስመ፡ ክሕዱኒ፡ ወሜጥኩ፡ ገጽየ፡ እምኔሆሙ፡ ወአግባእክዎሙ፡ ውስተ፡ እደ፡ ፀሮሙ፡ ወወድቁ፡ ኵሎሙ፡ በኲናት።
24 በከመ፡ ርኵሶሙ፡ ወበከመ፡ ጌጋዮሙ፡ ገበርኩ፡ ሎሙ፡ ወሜጥኩ፡ ገጽየ፡ እምኔሆሙ።
25 በበይነ፡ ዝንቱ፡ ከመዝ፡ ይቤ፡ እግዚአብሔር፡ እግዚእ፡ ይእዜ፡ እመይጥ፡ ፄዋ፡ ያዕቆብ፡ ወእሠሀሎሙ፡ ለቤተ፡ እስራኤል፡ ወእቀንእ፡ በእንተ፡ ስምየ፡ ቅዱስ።
26 ወይነሥኡ፡ ኃሣሮሙ፡ ወዓመፃሆሙ፡ ዘዐመፁ፡ አመ፡ ይነብሩ፡ ብሔሮሙ፡ በሰላም፡ ወአልቦ፡ ዘይጌርሞሙ።
27 አመ፡ ሜጥክዎሙ፡ እምአሕዛብ፡ ወአስተጋባእክዎሙ፡ እምበሐውርተ፡ አሕዛብ፡ ወእትቄደስ፡ ቦሙ፡ በቅድመ፡ ብዙኃን፡ አሕዛብ።
28 ወየአምሩ፡ ከመ፡ አነ፡ ውእቱ፡ እግዚአብሔር፡ አምላኮሙ፡ ሶበ፡ አስተርአይክዎሙ፡ በውስተ፡ አሕዛብ፣፡ ወኢያተርፍ፡ እንከ፡ እምኔሆሙ፡ ህየ።
29 ወኢይመይጥ፡ እንከ፡ ገጽየ፡ እምኔሆሙ፣፡ እስመ፡ ከዐውኩ፡ መዐትየ፡ ላዕለ፡ ቤተ፡ እስራኤል፡ ይቤ፡ እግዚአብሔር፡ እግዚእ።
=== chapter 40 ===
[Chapter 40]
1 ወእምዝ፡ አመ፡ ፳ወ፭፡ ዓመት፡ እምዘ፡ ተፄወውነ፣፡ በቀዳሚ፡ ዓመት፣፡ አመ፡ ፲፡ ለሠርቅ፣፡ በ፲ወ፬፡ ዓመት፡ እምዘ፡ ተቀትለት፡ ሀገር፡ ወውእተ፡ አሚረ፡ ኮነ፡ እደ፡ እግዚአብሔር፡ ላዕሌየ።
2 ወወሰደኒ፡ በራእየ፡ እግዚአብሔር፡ ውስተ፡ ምድረ፡ እስራኤል፡ ወአንበረኒ፡ ውስተ፡ ደብር፡ ነዋኅ፡ ጥቀ፡ ወውስቴቱ፡ ከመ፡ ሀገር፡ ሕኑጽ፡ አንጻርየ።
3 ወአብአኒ፡ ህየ፡ ወረከብኩ፡ ብእሴ፡ ዘርእየቱ፡ ከመ፡ ርእየተ፡ ብርት፡ ርሱን፡ ወሐብለ፡ ዓጌ፡ ውስተ፡ እዴሁ፡ ወህለት፣፡ ዘዓቅም፡ ይቀውም፡ ውስተ፡ አንቀጽ።
4 ወይቤለኒ፡ ውእቱ፡ ብእሲ፡ ርኢ፡ ወልደ፡ እጓለ፡ እመሕያው፡ ወነጽር፡ በአዕይንቲከ፡ ወስማዕ፡ በእዘኒከ፡ ወዕቀብ፡ በልብከ፡ ኵሎ፡ ዘአነ፡ አርእየከ፡ እስመ፡ ከመ፡ አርኢከ፡ መጻእከ፡ ዝየ፡ ወኵሎ፡ ዘርኢከ፡ ንግሮሙ፡ ለቤተ፡ እስራኤል።
5 ወናሁ፡ ሐፁር፡ እንተ፡ አፍአሁ፡ ለዐውደ፡ ቤት፡ የዐውድ፡ ወህለት፡ ዘዓቅም፡ ውስተ፡ እዴሁ፡ ዘስድስ፡ በእመት፡ ወስዝር፡ ወመጠነ፡ ራሕበ፡ ሕንጻ፡ ወጠንቀቀ፡ በህለት፣፡ ወቆሞኒ፡ ዐረቀ፡ በህለት።
6 ወቦአ፡ አንቀጽ፡ ዘይኔጽር፡ ጽባሐ፡ ወዐርገ፡ በመዓርግ፡ ወመጠነ፡ ኤላመ፡ ዘአንቀጽ፡ ፩ህለት፡ ርሕቡ፡ ወኤላም፡ ፩ህለት፡ ርሕቡ።
7 ወትሔ፡ ጠንቀቀ፡ በህለት፡ ኑኆ፡ ወግድሞ፣፡ ወማእከለ፡ ትሔያት፡ ፭፡ በእመት።
8 ወአኤል፡ ዘኆኅት፡ ቅሩበ፡ ኤላም፡ ዘአንቀጽ፡ ውሣጢ፡ ፩ህለት።
9 ወሰፈረ፡ ኤላመ፡ ዘአንቀጽ፡ ፰፡ በእመት፣፡ ወኤላው፡ ካዕበ፡ እመት፡ ወኤላም፡ ዘአንቀጽ፡ እምውሣጢ።
10 ወትሔ፡ ዘአንቀጽ፡ ዘመንገለ፡ ጽባሕ፡ ፫፡ እምለፌ፡ ወ፡ ፫፡ እምለፌ፣፡ ፩ዓቅም፡ ለ፫ቲሆሙ፣፡ ወ፩፡ መስፈርት፡ ለኤላም፡ እምለፌ፡ ወእምለፌ።
11 ወሰፈረ፡ ርሕበ፡ ኆኅተ፡ አንቀጽ፡ ዕሥር፡ በእመት፣፡ ወኑኀ፡ አንቀጽ፡ ፲ወ፫በእመት።
12 ወእመት፡ ይጠወም፡ ውስተ፡ ገጸ፡ ትሔ፣፡ አሐቲ፡ እመት፡ ጥቅሙ፡ እምለፌሂ፡ ወእምለፌሂ፡ ወትሔ፡ ስሱ፡ በእመት፡ እምለፌ፣፡ ወስድስ፡ በእመት፡ እምለፌ።
13 ወሰፈረ፡ አንቀጸ፡ እምኀበ፡ አረፍተ፡ ትሔ፡ ኀበ፡ አረፍት፣፡ ርሕቡ፡ ፳ወ፭፡ በእመት፡ አንቀጽ፡ ቅድመ፡ አንቀጽ።
14 ወገብረ፡ ኤላመ፡ ፰፡ በእመት፡ ኀበ፡ አኤል፡ ዐጸደ፡ አንቀጽ፡ ዐውደ፡ ዐውዱ።
15 ወላዕለ፡ ገጸ፡ አንቀጽ፡ ውሣጢ፡ ላዕለ፡ ገጸ፡ ኤላም፡ ዘአንቀጽ፡ ውሣጢ፡ ፶፡ በእመት።
16 ወመሳክው፡ ኅቡአ፡ ውስተ፡ ትሔያት፡ ወኀበ፡ ኤል፡ በውሣጤ፡ አንቀጽ፡ ዐውደ፡ ወከማሁ፡ ለኤላሙት፡ የዐውድ፡ መሳክው፡ በውሣጢ፡ ወኀበ፡ ኤል፡ ፀበራት።
17 ወአብአኒ፡ ውስተ፡ ዐጸድ፡ ጸናፊ፡ ወናሁ፡ ሕዋራት፡ ወርጉፍ፡ ግቡር፡ ለዐጸድ፡ ዐውደ፡ ፴፡ ሕዋራት፡ ኀበ፡ ርጉፍ።
18 ወጸፍጸፍ፡ ኀበ፡ መትከፍተ፡ ሀዋህው፡ በአምጣነ፡ ኑኀ፡ ዴዴሁ፡ ርጉፍ፡ እምታሕቴሁ።
19 ወመጠነ፡ ርሕበ፡ ዐጸዱ፡ እምነ፡ መድረከ፡ ኆኅት፡ ጸናፊ፡ ዘመንገለ፡ ውሣጢ፡ እስከ፡ መድረከ፡ ኆኅት፡ ዘይኔጽ፡ አፍአ፡ ፻በእመት፡ ዘመንገለ፡ ጽባሕ፡ ወሰሜን።
20 ወአንቀጽ፡ ዘገጹ፡ መንገለ፡ ሰሜን፡ ለዐጸድ፡ ጸናፊ፡ ሰፈረ፡ ኑኆ፡ ወርሕቦ።
21 ወትሔ፡ እምለፌ፡ ሥልስ፡ ወእምለፌ፡ ሥልስ። ወኤላው፡ ወኤላማው፡ ኮነ፡ በዓቅመ፡ አንቀጽ፡ ቀዳማዊ፡ ፶፡ በእመት፡ ኑኃ፣፡ ወግድማ፳ወ፭።
22 ወመሳክዊሁ፡ ወኤላው፡ ወኤላሙ፡ ወፀበራቲሁ፡ በከመ፡ አንቀጽ፡ ዘይኔጽር፡ ጽባሐ። ወበመዓርግ፡ ፯፡ የዓርጉ፡ ላዕሌሁ፣፡ ወኤላም፡ ቅድሜሆሙ።
23 ወአንቀጸ፡ ዐጸድ፡ ውሣጢ፡ ይትናጸር፡ ምስለ፡ አንቀጽ፡ ሰሜናዊ፡ ከመ፡ ዴዴ፡ ዘይኔጽር፡ ጽባሐ። ወሰፈረ፡ ዐጸደ፡ እምዴዴ፡ እስከ፡ ዴዴ፡ ፻፡ በእመት።
24 ወወሰደኒ፡ መንገለ፡ ደቡብ፡ ወናሁ፡ አንቀጽ፡ ፍኖተ፡ ደቡብ፡ ወሰፈረ፡ ትሔ፡ ወኤላወ፡ ወኤላማወ፡ በከመ፡ አምጣኒሁ፡ ለዝኩ።
25 ወመሳክዊሁ፡ ወኤላማው፡ የዐውድ፡ በከመ፡ መሳክዊሁ፡ ፶፡ በእመት፡ ኑኁ፣፡ ወግድሙ፡ ፳ወ፭፡ በእመት።
26 ወ፯፡ መዓርጊሁ፡ በዘየዐርጉ፡ ወኤላማው፡ ቅድሜሆሙ፡ ወፀበራቲሃ፡ አሐቲ፡ እምለፌ፡ ወአሐቲ፡ እምለፌ፡ ኀበ፡ ኤላው።
27 ወኆኅታ፡ ለዐጸድ፡ ውሣጤ፡ ፍኖተ፡ ደቡብ። ወሰፈረ፡ እምኆኅት፡ እስከ፡ ኆኅት፡ ፍኖተ፡ ደቡብ፡ ፻በእመት።
28 ወአብአኒ፡ ውሣጤ፡ ዐጸድ፡ እንተ፡ አንቀጽ፡ ደቡባዊ፡ ወሰፈረ፡ ዴዴሁ፡ በአምጣነ፡ እሉ።
29 ወትሔ፡ ወኤላው፡ ወኤላማው፡ በአምጣነ፡ እሉ፡ ወመሳክው፡ ቦቱ፡ ለኤላማው፡ የዐውድ፡ ፶በእመት፡ ኑኁ፣፡ ወግድሙ፡ ፳ወ፭፡ በእመት።
30 ወኤላሙት፡ የአውድ፡ ፳ወ፭፡ በእመት፡ ኑኁ፣፡ ወርሕቡ፡ ፭፡ በእመት።
31 ወኤላም፡ ውስተ፡ ዐጸድ፡ ጸናፊ፣፡ ወፀበራት፡ ውስተ፡ ኤላው፡ ወ፰፡ መዓርጊሁ።
32 ወአብአኒ፡ ዐጸደ፡ ውሣጢ፡ ፍኖተ፡ ጽባሕ፡ ወሰፈረ፡ አንቀጸ፡ በአምጣነ፡ እሉ።
33 ወትሔ፡ ወኤላው፡ ወኤላማው፡ ከማሁ፡ አምጣኒሁ፡ መሳክዊሁኒ፡ ወኤላማው፡ የዐውድ፡ ፶፡ በእመት፡ ኑኁ፣፡ ወግድሙ፡ ፳ወ፭፡ በእመት።
34 ወኤላማው፡ ለዐጸድ፡ ጸናፊ፡ ወፀበራት፡ ውስተ፡ ኤላው፡ ለፌሂ፡ ወለፌሂ፣፡ ወ፰መዓርጊሁ፡ በዘየዐርጉ።
35 ወአብአኒ፡ አንቀጸ፡ ሰሜናዌ፡ ወሰፈረ፡ ወከማሁ፡ አምጣኒሁ።
36 ወትሔ፡ ወኤላው፡ ወኤላማው፡ ወመሳክው፡ ቦቱ፡ የዐውድ፣፡ ወ፶፡ በእመት፡ ኑኁ፣፡ ወግድሙ፡ ፳ወ፭፡ በእመት።
37 ወኤላው፡ በዐጸድ፡ ጸናፊ፡ ወፀበራቲሁ፡ ለኤላው፡ ለፌኒ፡ ወለፌኒ፡ ወ፰፡ መዓርጊሁ፡ በዘየዐርጉ።
38 ወሕዋር፡ በኤላም፡ ዘሀዋህው፣፡ ህየ፡ የሐፅቡ፡ መሥዋዕተ።
39 ወውስተ፡ ኤላም፡ ዘዴዴ፡ ፪፡ ማእዳት፡ እምለፌ፡ ወ፪፡ ማእዳት፡ እምለፌ፡ ከመ፡ ይሕርዱ፡ ኀቤሆሙ፡ መሥዋዕተ፡ ዘበእንተ፡ ኃጢአት፡ ወንስሐ።
40 ወመንገለ፡ መትከፍት፡ ዘአፍአ፡ ለዴዴ፡ አንቀጽ፡ ሰሜናዊ፡ ፪፡ ማእዳት፣፡ ወውስተ፡ መትከፍት፡ ደኃሪት፡ ዘኤላም፡ ዘዴዴ፡ ፪፡ ማእዳት።
41 አርባዕቱ፡ ማእዳት፡ እምለፌ፡ ወ፬፡ ማእዳት፡ እምለፌ፡ ውስተ፡ መትከፍተ፡ አንቀጽ። ፰፡ ማእዳት፡ ዲቤሆሙ፡ ይጠብሑ።
42 ወአርባዕቱ፡ ማእዳት፡ ዘቍርባን፡ ዘእብን፡ ውቅሮ፣፡ ኑኁ፡ እመት፡ ወመንፈቅ፣፡ ወግድሙ፡ እመት፡ ወመንፈቅ፣፡ ወቆሙ፡ እመት፡ ፩። ዲቤሆሙ፡ ያነብሩ፡ ንዋዮሙ፡ በዘይጠብሑ፡ መሥዋዕተ፡ ወቍርባነ።
43 ወከናፍር፡ ፩፡ ስዝር፡ ሙባኒም፡ እንተ፡ ውሥጥ፡ የዐውድ፡ ዐውደ፣፡ ወውስተ፡ ማእድ፡ ሥጋ፡ ዘመሥዋዕት።
44 ወእምአፍአሁ፡ ለዴዴ፡ ውሣጢ፡ ሕዋራተ፡ ሻሪም፣፡ ውስተ፡ ዐጸድ፡ ውሣጢ፡ ዘኀበ፡ መትከፍተ፡ አንቀጽ፡ ሰሜናዊ፡ ወገጾሙ፡ መንገለ፡ ደቡብ፡ ፩ኀበ፡ መትከፍተ፡ አንቀጽ፡ ጽባሐዊ፡ ዘመንገለ፡ ሰሜን፡ ገጽ።
45 ወይቤለኒ፡ ዛቲ፡ ኤስኬዴሬ፡ እንተ፡ ትኔጽር፡ ደቡበ፡ ለካህናት፡ እለ፡ የዐቅቡ፡ ቤተ።
46 ወኤስኬዴሬ፡ እንተ፡ ትኔጽር፡ ሰሜነ፡ ለካህናት፡ እለ፡ የዐቅቡ፡ ምሥዋዐ። እሙንቱ፡ ደቂቀ፡ ሳዶቅ፡ እለ፡ ይቀርብዎ፡ ለእግዚአብሔር፡ እምደቂቀ፡ ሌዊ፡ ይትለአክዎ።
47 ወሰፈረ፡ ዐጸደ፡ ፻፡ በእመት፡ ኑኁ፣፡ ወግድሙ፡ ፻፡ በእመት፡ እም፡ ፬ገጹ፣፡ ወምሥዋዕ፡ ቅድመ፡ ቤቱ።
48 ወአብአኒ፡ ውስተ፡ ኤላም፡ ዘቤት። ወሰፈሮ፡ ለአኤል፡ ዘኤላም፡ ፭፡ በእመት፡ እምለፌ፡ ወ፭፡ በእመት፡ እምለፌ፡ ወግድመ፡ አንቀጽ፡ ፫፡ እመት፡ እምለፌ፡ ወ፫፡ እመት፡ እምለፌ።
49 ወኑኁ፡ ለኤላም፡ ፳፡ በእመት፣፡ ወግድሙ፡ ፲ወ፩፡ በእመት፡ ወበመዓርግ፡ የዐርጉ፡ ውስቴቱ፣፡ ወአዕማድ፡ ውስተ፡ ኤላም፡ አሐቲ፡ እምለፌ፡ ወአሐቲ፡ እምለፌ።
=== chapter 41 ===
[Chapter 41]
1 ወአብአኒ፡ ውስተ፡ ጽርሕ፣፡ ወመጠኖ፡ ለኤላም፡ ስድስ፡ በእመት፡ ርሕቡ፡ እምለፌ፣፡ ወስድስ፡ በእመት፡ ርሕቡ፡ እምለፌ።
2 ወግድመ፡ ዴዴሁ፡ ፲፡ በእመት፣፡ ወኤጴሜስ፡ ዘኆኅት፡ ፭፡ በእመት፡ እምለፌ፣፡ ወ፭፡ በእመት፡ እምለፌ። ወሰፈረ፡ ኑኆ፡ ፵፡ በእመት፣፡ ወግድሙ፡ ፳፡ በእመት።
3 ወቦአ፡ ውሣጤ፡ ወሰፈሮ፡ ለአኤል፡ ዘኆኅት፡ ካዕበ፡ በእመት፣፡ ወኆኅቱሂ፡ ስድስ፡ በእመት፣፡ ወኤጴማዳስ፡ ዘኆኅት፡ ፯፡ በእመት።
4 ወሰፈረ፡ ኑኆ፡ ፳፡ በእመት፡ ወግድሞ፡ ፳፡ በእመት፡ ቅድመ፡ ጽርሑ፡ ወይቤለኒ፡ ዝንቱ፡ ቅዱሰ፡ ቅዱሳን።
5 ወሰፈረ፡ አረፍተ፡ ቤቱ፡ ፮፡ በእመት፣፡ ወግድመ፡ ገቦሁ፡ ርብዕ፡ በእመት፡ የዐውዶ፡ ለቤት፡ ዐውደ።
6 ወገበዋቲሁኒ፡ ገቦ፡ ኀበ፡ ገቦ፡ ሠላሳ፡ ወሥልስ፡ ዕጹፍ፡ ወእቱት፡ አረፍተ፡ ቤቱ፡ ለገባዋት፡ እለ፡ የዐውዱ፡ ከመ፡ ይኩኑ፡ እኁዛነ፡ ወኢይልክፉ፡ አረፍተ፡ ቤት።
7 ወግድሙ፡ የዐውድ፡ መልዕልተ፡ መልዕልቶሙ፡ ለገባዋት፣፡ እስመ፡ ዐውደ፡ ቤት፡ ለዐሪግ፡ የዐውዶ፡ ለቤት፡ ከመ፡ ይርሐብ፡ እምላዕሉ፡ ወእምታሕቱ፡ የዐርጉ፡ አጽራሒሁ፡ እምነ፡ ማእከሉ፡ ለተሥላሱ።
8 ወርኢኩ፡ ልዕልናሁ፡ ለቤት፡ ዐውደ፡ ዘየዐውድ፡ እመሠረተ፡ ገበዋቲሁ፡ ዕሩይ፡ በህለት፡ ፮፡ በእመት።
9 ወርሕበ፡ ገቦ፡ ዘአፍአ፡ ፭፡ በእመት፡ ወለሙናሐ፡ ቤት፡ ዘገበዋተ፡ ቤት።
10 ወማእከለ፡ ኤስኬዴሬያት፡ ርሕቡ፡ ፳፡ በእመት፡ ዘየዐውዶ፡ ለቤት፡ ዐውደ።
11 ወኆኅተ፡ ኤስኬዴሬ፡ ለሙናሕ፡ አሐቲ፡ ኆኅት፡ መንገለ፡ ሰሜን፣፡ ወአሐቲ፡ ኆኅት፡ መንገለ፡ ደቡብ፣፡ ወግድመ፡ ማዩ፡ ፭በእመት፡ ርሕበ፡ ዐውዱ፡ የዐውድ።
12 ወደሪዞን፡ ዘቅድመ፡ አጶሊጱ፡ ዘመንገለ፡ ባሕር፡ ግድሙ፡ ፸፡ በእመት፡ ወአረፍቱ፡ ለደሪዞን፡ ፭በእመት፡ ርሕቡ፡ የዐውድ፣፡ ወኑኁ፡ ፺፡ በእመት።
13 ወመጠነ፡ ቤተ፡ ኑኁ፡ ፻በእመት፣፡ ወባዕድኒ፡ ደሪዞን፡ ወአረፍቱኒ፡ ፻፡ በእመት።
14 ኑኁ፡ ወግድሙ፡ ቅድመ፡ ቤት፣፡ ወባዕድኒ፡ ዘጽባሒሁ፡ ፻፡ በእመት።
15 ወመጠነ፡ ኑኁ፡ ለደሪዞን፡ ዘቅድመ፡ አጶሊጱ፡ ወዘድኅረ፡ ውእቱ፡ ቤት፡ ወአቴዎቄሕ፡ እምለፌ፡ ወእምለፌ፡ ኑኁ፡ ፻፡ በእመት። ወጽርሕ፡ ውሣጢ፡ ወኤላመ፡ ጸናፊ፡ ዐጸድ።
16 መናብርት፡ ወመሳክው፡ ኅቡኣት፡ ወሠቅሠቅ፡ ዐውዱ፡ ለ፫ቲሆሙ፡ ቅድመ፡ ሳፍ፣፡ ወቤቱሂ፡ ወምድሩሂ፡ ወጥቅሙሂ፡ በሰሌዳተ፡ ዕፅ፡ የዐውድ።
17 እስከ፡ መሳክዊሁ፡ ወመሳክዊሁ፡ ሜክሱት፡ እስከ፡ መልዕልተ፡ አንቀጽ፡ ወእስከ፡ ቤት፡ ውሣጢ። ወበአፍአ፡ ወኀበ፡ ኵሉ፡ አረፍት፡ የዐውድ፡ በውሣጢ፡ ወአፍአ።
18 ወግሉፍ፡ ኪሩቤም፡ ወፀበራት፡ ወፀበርት፡ ማእከለ፡ ኪሩብ፡ ወኪሩብ፣፡ ወ፪፡ ገጻት፡ ለኪሩብ።
19 ገጸ፡ ሰብእ፡ ኀበ፡ ፀበርት፡ እምለፌ፣፡ ወገጸ፡ አንበሳ፡ ኀበ፡ ፀበርት፡ እምለፌ፣፡ ግሉፍ፡ ኵሉ፡ ዐውደ፡ ቤት፡ የዐውድ።
20 እምድር፡ እስከ፡ መልዕልተ፡ አንቀጽ፡ ኪሩቤን፡ ወፀበራት፡ ግሉፋን።
21 በአረፍተ፡ ጽርሕ፡ ወመቅደሰ፡ ሚዙዛት፡ ርብዕ፣፡ ወገጸ፡ መቅደሰ፡ ራእዩ፡ ከመ፡ ገጹ።
22 ወምሥዋዕ፡ ዘዕፅ፡ ፫፡ በእመት፡ ቆሙ፣፡ ወኑኁ፡ ካዕብ፡ በእመት፡ ወማዕዘንት፡ ቦቱ፡ ወአረፍቱኒ፡ ወኑኁ፡ ዘዕፅ። ወይቤለኒ፡ ዛቲ፡ ማእድ፡ እንተ፡ ቅድመ፡ እግዚአብሔር።
23 ወ፪ኆኅተ፡ ጽርሑ፣፡ ወለመቅደስ፡ ፪ሀዋህዊሁ።
24 ወበበ፪፡ መዓጽዊሁ፡ ፪መዓጹት፡ ለ፩ኆኅት፡ ወ፪፡ መዓጹት፡ ለደኃሪ፡ ኆኅት።
25 ወግሉፍ፡ ላዕለ፡ ሀዋህወ፡ መቅደስ፡ ኪሩቤም፡ ወፀበራት፡ ከመ፡ ግልፈቱ፡ ለአረፍት፡ ወግዘፈ፡ ዕፅ፡ ላዕለ፡ ገጸ፡ ኤላም፡ እምጸናፊ።
26 ወመሳክው፡ ኅቡኣት። ወፀበራት፡ እምለፌ፡ ወእምለፌ፡ ኀበ፡ መታክፈ፡ ኤላም፡ ወገቦ፡ ቤት፡ ወሐኡቢም።
=== chapter 42 ===
[Chapter 42]
1 ወወሰደኒ፡ ኀበ፡ ዐጸድ፡ ጸናፊ፡ መንገለ፡ ፍኖተ፡ ሰሜን፡ ወአብአኒ፡ ውስተ፡ ኤስኬዴሬ፡ ዘቅድመ፡ አጶሊጱ፡ ወዘቅድመ፡ ደሪዞን፡ ኀበ፡ ሰሜን።
2 ኀበ፡ ገጽ፡ ዘኑኁ፡ ፻፡ በእመት፡ አንቀጸ፡ ሰሜን፣፡ ወርሕቡ፡ ፶፡ በእመት።
3 ቅድመ፡ ፳፡ እመት፡ ዘዐጸድ፡ ውሣጢ፡ ወቅድመ፡ ጸፍጸፍ፡ ዘዐጸድ፡ ጸናፊ፣፡ አቲቅ፡ ኀበ፡ ገጸ፡ አቲቅ፡ በበ፫።
4 ወበቅድመ፡ ኤስኬዴሬ፡ ሜሄሌኬ፡ ፲፡ በእመት፡ ርሕቡ፣፡ ኀበ፡ ውሣጤ፡ ፍኖት፡ ፩፡ እመት፡ ወአንቀጾሙ፡ ለገጸ፡ ሰሜን።
5 ወኤስኬዴሬ፡ ሉዓላዊት፡ ቄጼሩት፡ ኪዮኪሉ፡ አቲቂም፡ ሜሄኑሕ፡ እምታሕታዊት፡ ወእማእከላዊት፡ ሕንጻ።
6 እስመ፡ ምሥልስት፡ እማንቱ፡ ወአልቦን፡ አዕማድ፡ ከመ፡ አዕማደ፡ ዐጸድ። በእንተ፡ ዝንቱ፡ ንኤጼል፡ እምታሕታውያት፡ ወእማእከላውያት፡ እምድር።
7 ወጌዴር፡ ዘጸናፊ፡ ከመ፡ ኤስኬዴሬ፡ እንተ፡ ፍኖተ፡ ዐጸድ፡ ጸናፊ፡ ኀበ፡ ገጸ፡ ኤስኬዴሬ፡ ኑኁ፡ ፶በእመት።
8 እስመ፡ ኑኁ፡ ለኤስኬዴሬ፡ ዘዐጸድ፡ ጸናፊ፡ ፶፡ እመት፡ ወኑኅ፡ ላዕለ፡ ገጸ፡ ጽርሕ፡ ፻፡ በእመት።
9 ወእመትሕቴሃ፡ ለዛቲ፡ ኤስኬዴሬ፡ ምብዋእ፡ እምጽባሕ፡ ዘያበውእ፡ ህየ፡ እምዐጸድ፡ ጸናፊ።
10 ውስተ፡ ርሕበ፡ ጌዴር፡ ዘዐጸደ፡ ፍኖተ፡ ጽባሕ፡ ኀበ፡ ገጸ፡ አጶሊጱ፡ ወኀበ፡ ገጸ፡ ደሪዞን፡ ኮነት፡ ኤስኬዴሬ።
11 ወፍኖት፡ ቅድሜሆሙ፡ ከመ፡ አርአያ፡ ኤስኬዴሬ፡ ዘመንገለ፡ ሰሜን፡ በከመ፡ ኑኆን፡ ከማሁ፡ ርሕቦን፡ ወኵሉ፡ ሙፃኢሆሙ፡ ወሥርዓቶሙ፡ ወኬፌቴሔን።
12 ከመ፡ ሀዋህወ፡ ኤስኬዴሬ፡ ዘመንገለ፡ ደቡብ፡ አንቀጽ፡ ዘቀዳሚ፡ ዘመንገለ፡ ፍኖት፡ ዘገጸ፡ ጌዴርት፡ ሐጊናህ፡ ፍኖተ፡ ጽባሕ፡ ዘያበውእ።
13 ወይቤለኒ፡ ኤስኬዴሬ፡ ሰሜናዊ፡ ወኤስኬዴሬ፡ ደቡባዊ፡ ዘኀበ፡ ገጸ፡ አጶሊጱ፡ ዘቅድሳት፡ ውእቱ፡ ኀበ፡ ይበልዑ፡ ካህናት፡ እለ፡ ቅሩባን፡ ለእግዚአብሔር፡ ቅዱሰ፡ ቅዱሳን፡ ህየ፡ ያነብሩ፡ ቅድስተ፡ ቅዱሳን፡ መሥዋዕቶሙ፡ ዘኃጢአት፡ ወንስሐ፡ እስመ፡ መካን፡ ቅዱስ።
14 ሶበ፡ ይበውኡ፡ ካህናት፡ ኢይፃኡ፡ እመቅደስ፡ ኀበ፡ ዐጸድ፡ ጸናፊ፡ ወህየ፡ ያነብሩ፡ አልባሲሆሙ፡ ዘተልእኩ፡ ቦሙ፡ እስመ፡ ቅዱሳን፡ ህየ፡ ይለብሱ፡ አልባሲሆሙ፡ ካልኣን፡ ወይቀርቡ፡ ኀበ፡ ሕዝብ።
15 ወፈጸመ፡ መጥኖ፡ ቤት፡ ውሣጤ። ወአውፅአኒ፡ ፍኖተ፡ አንቀጽ፡ ዘገጹ፡ መንገለ፡ ጽባሕ፡ ወመጠነ፡ ዐውደ፡ ዐውዱ።
16 ወመጠነ፡ ነፋሰ፡ ጽባሕ፡ በህለት፡ ዘዓቅም፡ ፭፻፡ ህለት፡ በህለተ፡ መስፈርት፡ ዐውዶ።
17 ወመጠነ፡ ነፋሰ፡ ሰሜን፡ ፭፻፡ በህለት፡ ዘዓቅም፡ ዐውደ።
18 ወነፋሰ፡ ደቡብ፡ መጠነ፡ ፭፻፡ በህለተ፡ ዓቅም፡ ዐውደ።
19 ወኀበ፡ ነፋሰ፡ ባሕር፡ ወመጠነ፡ ፭፻፡ ህለተ፡ በህለተ፡ ዓቅም።
20 ለ፬፡ ነፋሳት፡ መጠኖሙ። አረፍቶሙ፡ ዐውደ፡ ኑኁ፡ ፭፻፣፡ ወግድሙ፡ ፭፻፡ ከመ፡ ይክፍል፡ ማእከለ፡ ቅዱስ፡ ወዘኢኮነ፡ ቅዱሰ።
=== chapter 43 ===
[Chapter 43]
1 ወወሰደኒ፡ ውስተ፡ አንቀጽ፡ ዘገጸ፡ ፍኖተ፡ ጽባሕ።
2 ወናሁ፡ ስብሐተ፡ አምላከ፡ እስራኤል፡ መጽአ፡ እምፍኖተ፡ ጽባሕ፡ ወቃሉ፡ ከመ፡ ቃለ፡ ማይ፡ ብዙኅ፣፡ ወምድር፡ በርሀት፡ እምስብሐቲሁ።
3 ወከመ፡ አምሳለ፡ ራእይ፡ ዘርኢኩ፡ ሶበ፡ መጽአ፡ ያማስን፡ ሀገረ፣፡ ወአርአያ፡ አምሳል፡ ዘርኢኩ፡ በፈለገ፡ ኮቦር፡ ወወደቁ፡ በገጽየ።
4 ወስብሐተ፡ እግዚአብሔር፡ ቦአ፡ ውስተ፡ ቤት፡ ፍኖተ፡ አንቀጽ፡ ዘገጹ፡ መንገለ፡ ጽባሕ።
5 ወነሥአኒ፡ መንፈስ፡ ወአብአኒ፡ ውስተ፡ ዐጸድ፡ ውሣጢ፡ ወናሁ፡ መልአ፡ ስብሐተ፡ እግዚአብሔር፡ ውስተ፡ ቤት።
6 ወሰማዕኩ፡ እንዘ፡ ይትናገረኒ፡ እምቤት፡ ወብእሲ፡ ይቀውም፡ ሀሎ፡ ኀቤየ።
7 ወይቤለኒ፡ ወልደ፡ እጓለ፡ እመሕያው፣፡ መካነ፡ መንበርየ፡ ወመካነ፡ መከየደ፡ እገርየ፡ ዘአኀድር፡ በህየ፡ ማእከለ፡ ደቂቀ፡ እስራኤል፡ ለዓለም። ወኢያርኵሱ፡ እንከ፡ ቤተ፡ እስራኤል፡ ስመ፡ መቅደስየ፡ እሙንቱ፡ ወነገሥቶሙ፡ በበድኖሙ፡ ወበዘምዎቶሙ፡ ወበርኵሰ፡ ነገሥቶሙ።
8 ሶበ፡ ይሬስዩ፡ መድረኮሙ፡ ኀበ፡ መድረክየ፡ ወራግዛቲሆሙ፡ ቅሩበ፡ ራግዛትየ፡ ወአረፍት፡ ማእከሌየ፡ ወማእከሌሆሙ። ወአርኰሱ፡ ስመ፡ መቅደስየ፡ በግማኔሆሙ፡ ዘገብሩ። ወአኅለቅዎሙ፡ በመዐትየ።
9 ወይእዜኒ፡ ያርኅቁ፡ ዝሙቶሙ፡ ወርኵሰ፡ ነገሥቶሙ፡ እምኔየ፡ ወአኀድር፡ ማእከሎሙ፡ ለዓለም።
10 ወአንተ፡ ወልደ፡ እጓለ፡ እመሕያው፡ ንግሮሙ፡ ለቤተ፡ እስራኤል፡ ዘንተ፡ ቤተ፣፡ ወይኅድጉ፡ ግብሮሙ፡ ወኃጢአቶሙ።
11 ወእሙንቱ፡ ይረክቡ፡ መቅሠፍቶሙ፡ በእንተ፡ ኵሉ፡ ዘገብሩ። ወሥዕሎ፡ ለዝንቱ፡ ቤት፡ ወትርሢቶ፡ ወአናቅጺሁ፡ ወሙፃአቲሁ፡ ወሙባአቲሁ፣፡ ወኵሎ፡ ግብሮ፡ ታርእዮሙ፡ ወትጽሕፎ፡ በቅድሜሆሙ፡ ይዕቀቡ፡ ትእዛዞ፡ ወኵሎ፡ ሥርዓቶ፡ ወይግበርዎ።
12 ወሠዐል፡ ቤቶ፡ ወሥርዓተ፡ ቤት፡ ዘዲበ፡ ርእሰ፡ ደብር፡ ወኵሉ፡ አጽናፈ፡ ዐውዱ፡ ዘየዐውድ፡ ቅዱሰ፡ ቅዱሳን፡ ከመዝ፡ ውእቱ፡ ሕጉ፡ ለቤት።
13 ወእሉ፡ አምጣነ፡ ምሥዋዕ፡ በእመታት፡ እመቱሂ፡ እመት፡ ወስዝር፣፡ ወሔቅ፡ እመት፡ ወእመት፡ ርሕቡ፣፡ ወጽንፉ፡ ኀበ፡ ከናፍር፡ የዐውድ፡ ስዝር፡ ፩፡ ወዝቆሙ፡ ለምሥዋዕ።
14 እምሔቀ፡ ምድር፡ እስከ፡ አሐዜራሕ፡ ዘታሕቲት፡ ፪፡ እመት፣፡ ወግድሙ፡ ፩፡ እመት፡ ወእመደብ፡ ንኡስ፡ እስከ፡ መደብ፡ ዓቢይ፡ ፬፡ እመት፣፡ ወርሕቡ፡ እመት።
15 ወሐሔሬኤል፡ ፬፡ እመት፡ ወእምሐሔሬኤል፡ እስከ፡ ላዕሉ፡ አቅርንት፡ ፬።
16 ወሐሔሬኤል፡ ፲ወ፪፡ ኑኁ፡ በ፲ወ፪፡ ግድሙ፡ ርቡዕ፡ ኀበ፡ ፬፡ ርቡዓቲሁ።
17 ወአሐዜራሕ፡ ፲ወ፬፡ ኑኁ፡ በ፲ወ፬፡ ርሕብ፡ ኀበ፡ ፬፡ ርቡዓቲሃ፡ ወጽንፍ፡ የዐውድ፡ ኪያሃ፡ መንፈቀ፡ እመት። ወመደብ፡ ላቲ፡ እመት፡ ዘየዐውድ፡ ወመልዕልቴሁ፡ ገጸ፡ ጽባሕ።
18 ወይቤለኒ፡ ወልደ፡ እጓለ፡ እመሕያው፣፡ ከመዝ፡ ይቤ፡ አዶናይ፡ እግዚአብሔር፡ አምላክ፡ ከመዝ፡ ሥርዓቱ፡ ለምሥዋዕ፡ አመ፡ ይገብርዎ፡ ለአዕርጎ፡ መሥዋዕቶሙ፡ ወይነዝኁ፡ ላዕሌሁ፡ ደመ።
19 ወትሁቦሙ፡ ለካህናት፡ ለሌዋውያን፡ እለ፡ እምዘርአ፡ ሳዶቅ፣፡ እለ፡ ይቀርቡ፡ ኀቤየ፡ ይቤ፡ እግዚአብሔር፡ አዶናይ፡ ከመ፡ ይትለአኩኒ፣፡ ላህመ፡ ፩፡ እምነ፡ መራዕይ፡ በእንተ፡ ኃጢአት።
20 ወትነሥእ፡ እምነ፡ ደሙ፡ ወትወድዮ፡ ውስተ፡ ፬፡ አቅርንተ፡ ምሥዋዕ፡ ኀበ፡ ፬፡ ገጻተ፡ መደብ፡ ወውስተ፡ ጽንፈ፡ ዐውዱ፣፡ ወታነጽሕ፡ ኪያሁ፡ ወታስተሰሪ፡ ሎቱ።
21 ወትነሥእ፡ ላህመ፡ ዘኃጢአት፡ ወያውዕይዎ፡ በአፍአ፡ ዘቤት፡ አፍአሁ፡ ለመቅደስ።
22 ወበሳኒታ፡ ዕለት፡ ታቄርብ፡ ሐርጌ፡ እምነ፡ አጣሊ፡ ንጹሐ፡ በእንተ፡ ኃጢአት፡ ወያነጽሑ፡ ምሥዋዐ፡ በከመ፡ አንጽሑ፡ በላህም።
23 ወሶበ፡ ፈጸምከ፡ አንጽሖ፡ ታቄርብ፡ ሦረ፡ ወልደ፡ ላህም፡ ንጹሐ፡ ወበሐኰ፡ እምነ፡ አባግዕ፡ ንጹሐ።
24 ወታቄርቦሙ፡ ቅድመ፡ እግዚአብሔር። ወይወድዩ፡ ካህናት፡ ላዕሌሆሙ፡ ጼወ፡ ወያዐርጉ፡ ኪያሆሙ፡ መሥዋዕተ፡ ለእግዚአብሔር።
25 ሰቡዐ፡ መዋዕለ፡ ትገብር፡ ሐርጌ፡ ዘበእንተ፡ ኃጢአት፡ ለዕለት፣፡ ወሦረ፡ ወልደ፡ ላህም፡ ንጹሐ፡ ወበሐኰ፡ እምነ፡ አባግዕ፡ ንጹሓን፡ ይገብሩ።
26 ሰቡዐ፡ መዋዕለ፡ ያስተስርዩ፡ ለምሥዋዕ፡ ወያንጽሕዎ፡ ወይምልኡ፡ እዴሁ።
27 ወይፈጽሙ፡ መዋዕለ፡ ወይከውን፡ በዕለት፡ ሳምንት፣፡ ወእምድኅሬሁ፡ ይግበሩ፡ ካህናት፡ ላዕለ፡ ምሥዋዕ፡ መሥዋዕተክሙ፡ ወሰላመክሙ፡ ወእሠጠወክሙ፡ ይቤ፡ አዶናይ፡ እግዚአብሔር።
=== chapter 44 ===
[Chapter 44]
1 ወሜጠኒ፡ ፍኖተ፡ አንቀጽ፡ ዘመቅደስ፡ ጸናፊ፡ ዘይኔጽር፡ ጽባሐ፡ እንዘ፡ ዕጽው፡ ውእቱ።
2 ወይቤለኒ፡ እግዚአብሔር፡ ዛቲ፡ አንቀጽ፡ ዕጹታ፡ ትነብር፡ ወኢትትረኀው፡ ወአልቦ፡ ዘይበውእ፡ እንተ፡ ህየ፡ እስመ፡ እግዚአብሔር፡ አምላክ፡ እስራኤል፡ ቦአ፡ ውስቴታ፡ ወትነብር፡ እንዘ፡ ዕጹታ።
3 ወይእቲ፡ ለመኰንን፡ ወመልአክ፡ ውእቱ፡ ይነብር፡ ውስቴቱ፡ ለበሊዐ፡ ኅብስት፡ በቅድመ፡ እግዚአብሔር። እምፍኖተ፡ ኤላም፡ ዘአንቀጽ፡ ይበውእ፡ ወእምፍኖቱ፡ ይወፅእ።
4 ወአብአኒ፡ ፍኖተ፡ አንቀጽ፡ ሰሜናዊ፡ ኀበ፡ ገጸ፡ ቤት። ወርኢኩ፡ ህየ፡ መልአ፡ ስብሐተ፡ እግዚአብሔር፡ ውስተ፡ ቤት፡ ወወደቁ፡ በገጽየ።
5 ወይቤለኒ፡ እግዚአብሔር፡ ወልደ፡ እጓለ፡ እመሕያው፡ ዕቀብ፡ በልብከ፡ ወርኢ፡ በአዕይንቲከ፡ ወስማዕ፡ በእዝንከ፡ ኵሎ፡ ዘአነ፡ እነግረከ፡ በኵሉ፡ ሥርዓተ፡ ቤተ፡ እግዚአብሔር፡ ወበኵሉ፡ ሕጉ፡ ወረሲ፡ ልበከ፡ ለሙባአ፡ ቤት፡ በኵሉ፡ ሙፃአ፡ መቅደስ።
6 ወበሎሙ፡ ለመሪራን፡ ቤተ፡ እስራኤል፡ ከመዝ፡ ይቤ፡ አዶናይ፡ እግዚአብሔር፡ አከለክሙ፡ ኵሉ፡ ርኵስክሙ፡ ቤተ፡ እስራኤል።
7 ዘአባእክሙ፡ ውሉደ፡ ነኪር፡ ቈላፋነ፡ ልብ፡ ወቈላፋነ፡ ሥጋ፡ ከመ፡ የሀልዉ፡ በመቅደስየ፡ ለአርኵሶተ፡ ቤትየ፡ ሶበ፡ ታቄርቡ፡ ኅብስትየ፡ ወሥብሐ፡ ወደመ፡ ወኀደግሙ፡ ሕግየ፡ በኵሉ፡ ግማኔክሙ።
8 ወኢዐቀብክሙ፡ ትእዛዘ፡ መቅደስየ፡ ወኢትሠይሙ፡ እለ፡ የዐቅቡ፡ ትእዛዘ፡ መቅደስየ፡ ለክሙ።
9 ከመዝ፡ ይቤ፡ አዶናይ፡ እግዚአብሔር፡ ኵሉ፡ ደቂቀ፡ ነኪር፡ ቈላፈ፡ ልብ፡ ወቈላፈ፡ ነፍስት፡ ኢይባእ፡ ውስተ፡ መቅደስየ፡ ኵሉ፡ ውሉደ፡ ነኪር፡ ዘማእከለ፡ ደቂቀ፡ እስራኤል።
10 ዘእንበለ፡ ሌዋውያን፡ ዘርኅቁ፡ እምኔየ፡ በጌጋየ፡ እስራኤል፣፡ እለ፡ ርኅቁ፡ እምኔየ፡ ድኅረ፡ ርኵሶሙ፡ ወነሥኡ፡ ኃጢአቶሙ።
11 ወይኩኑ፡ ውስተ፡ መቅደስየ፡ ላእካነ፡ እለ፡ የዐቅቡ፡ አናቅጸ፡ ቤት፡ ወይትለአኩ፡ ለቤት፡ እሙንቱ፡ ይጠብሑ፡ መሥዋዕተ፡ ወመሥዋዕተ፡ ሕዝብ፣፡ ወእሙንቱ፡ ይቀውሙ፡ በቅድሜሆሙ፡ ወይትለአክዎሙ።
12 እስመ፡ ተልእኩ፡ ሎሙ፡ ለቅደመ፡ ርኵሶሙ፡ ወኮኑ፡ ለቤተ፡ እስራኤል፡ ደዌ፡ ኃጢአት። በእንተዝ፡ አንሣእኩ፡ እደውየ፡ ላዕሌሆሙ፡ ይቤ፡ አዶናይ፡ እግዚአብሔር፡ ወነሥኡ፡ ኃጢአቶሙ።
13 ወኢይቅረቡ፡ ኀቤየ፡ ለተክህኖ፡ ሊተ፡ ወለቀሪብ፡ ኀበ፡ ኵሉ፡ ቅድሳትየ፡ ወኀበ፡ ኵሉ፡ ቅድስተ፡ ቅዱሳን። ወነሥኡ፡ ኃሣሮሙ፡ ወግማኔሆሙ፡ ዘገብሩ።
14 ወረሰይኩ፡ ኪያሆሙ፡ ዓቀብተ፡ ትእዛዛተ፡ ቤት፡ ለኵሉ፡ ግበሪሁ፡ ወለኵሉ፡ ዘይትገበር፡ ውስቴቱ።
15 ካህናት፡ ሌዋውያን፡ ደቂቀ፡ ሳዶቅ፡ እለ፡ የዐቅቡ፡ ትእዛዘ፡ መቅደስየ፡ ሶበ፡ አበሱ፡ ደቂቀ፡ እስራኤል፡ እምኀቤየ፡ እሙንቱ፡ ይቀርቡ፡ ኀቤየ፡ ከመ፡ ይትለአኩኒ፡ ወይቁሙ፡ ቅድሜየ፡ ከመ፡ ያቅርቡ፡ ሊተ፡ ሥብሐ፡ ወደመ፡ ይቤ፡ አዶናይ፡ እግዚአብሔር።
16 እሙንቱ፡ ይባኡ፡ ውስተ፡ መቅደስየ፡ ወእሙንቱ፡ ይቀርቡ፡ ኀበ፡ ማእድየ፡ ከመ፡ ይትለአኩኒ፡ ወይዕቀቡ፡ ትእዛዝየ።
17 ሶበ፡ ይበውኡ፡ ውስተ፡ አንቀጽ፡ ውሣጢ፡ ልብሰ፡ ዓጌ፡ ይለብሱ፡ ወኢየሀሉ፡ ዲቤሆሙ፡ ፀምር፡ ሶበ፡ ይትለአኩ፡ ውስተ፡ አንቀጸ፡ ዐጸድ፡ ውሣጤ፡ ወበቤት።
18 ወሰበን፡ ዘዓጌ፡ ይኩን፡ ላዕለ፡ ርእሶሙ፡ ወድርማንቅ፡ ዘዓጌ፡ ይኩን፡ ላዕለ፡ ሐቌሆሙ፡ ወኢይቅንቱ፡ ማእሰ።
19 ወሶበ፡ ይወፅኡ፡ ውስተ፡ ዐጸድ፡ ጸናፊ፡ ኀበ፡ ዐጸድ፡ ዘአፍአ፡ ኀበ፡ ሕዝብ፡ ያውርዱ፡ አልባሲሆሙ፡ ዘተልእኩ፡ ቦሙ፡ ወያንብሩ፡ ኪያሆሙ፡ ውስተ፡ ኤስኬዴሬ፡ ቅዱስ፡ ወይለብሱ፡ አልባሰ፡ ካልኣተ፡ ወኢይቀድሱ፡ ሕዝበ፡ በአልባሲሆሙ።
20 ወርእሶሙ፡ ኢይቅርጹ፡ ወኢይሥጥጡ፡ አልባሲሆሙ፣፡ ተከድኖ፡ ይትከደኑ፡ አርእስቲሆሙ።
21 ወይነ፡ ኢይስተዩ፡ ኵሉ፡ ካህን፡ ሶበ፡ ይበውእ፡ ውስተ፡ ዐጸድ፡ ውሣጢ።
22 ወመበለተ፡ ወእንተ፡ አውፅእዋ፡ ኢያውስቡ፡ ሎሙ፡ አንስተ፣፡ ዘእንበለ፡ ዳእሙ፡ ድንግለ፡ እምዘርአ፡ ቤተ፡ እስራኤል፡ ወመበለተ፡ እንተ፡ ኮነት፡ መበለተ፡ እምካህን፡ ይንሥኡ።
23 ወለሕዝብየ፡ ይምሀሩ፡ በማእከለ፡ ቅዱስ፡ ወማእከለ፡ ሁል፣፡ ማእከለ፡ ርኩስ፡ ወማእከለ፡ ንጹሕ፡ ያይድዕዎሙ።
24 ወዲበ፡ ቅሥት፡ እሙንቱ፡ ይቀውሙ፡ ለፍትሕ፡ ከመ፡ ፍትሕየ፡ ይፍትሑ፡ ሕግየ፡ ወሥርዓትየ፡ በኵሉ፡ በዓላትየ፡ የዐቅቡ፡ ወሰንበታትየ፡ ይቀድሱ።
25 ወኀበ፡ ዘሞተ፡ ሰብእ፡ ኢይባኡ፡ ለተገምኖ፡ እመኒ፡ ለአብ፡ ወለእም፡ ወለወልድ፡ ወለወለት፣፡ ለእኁ፡ ወለእኅት፡ እንተ፡ ኢኮነት፡ ለብእሲ፡ ይረኵሱ።
26 ወእምድኅረ፡ ነጽሐ፣፡ ሰቡዐ፡ መዋዕለ፡ ይኌልቁ፡ ሎቱ።
27 ወበዕለተ፡ ይበውእ፡ ውስተ፡ መቅደስ፣፡ ውስተ፡ ዐጸድ፡ ውሣጢ፡ ለተልእኮ፡ ውስተ፡ ቅድስት፡ ያቀርብ፡ ዘኃጢአት፡ ይቤ፡ አዶናይ፡ እግዚአብሔር።
28 ወኢትከውን፡ ሎሙ፡ ርስት። አነ፡ መክፈልቶሙ፣፡ ወመክፈልተ፡ ኢትሁብዎሙ፡ ውስተ፡ እስራኤል፡ ወአነ፡ መክፈልቶሙ።
29 ዘመባእ፡ ወዘኃጢአት፡ ወንስሐ፡ እሙንቱ፡ ይበልዑ፡ ወኵሉ፡ ዘየሐርሙ፡ ውስተ፡ እስራኤል፡ ሎሙ፡ ይኩን።
30 ወቀዳሚያተ፡ ኵሉ፡ ፍሬክሙ፡ ወኵሉ፡ መባእክሙ፡ ዘታቀርቡ፡ ይኩን፡ ለካህናት፡ ወቀዳሚተ፡ ማእረርክሙ፡ ወኵሎ፡ መባአክሙ፡ ትሁቡ፡ ለካህን፡ ከመ፡ ይኩን፡ በረከተ፡ ውስተ፡ ቤትከ።
31 ወኵሎ፡ ርኩሰ፡ ወብላዐ፡ አርዌ፡ እምውስተ፡ አዕዋፍ፡ ወእንስሳ፡ ኢይብልዑ፡ ካህናት።
=== chapter 45 ===
[Chapter 45]
1 ወሶበ፡ ትከፍሉ፡ ምድረ፡ በመክፈልት፣፡ ታበውኡ፡ መባአ፡ ለእግዚአብሔር፡ ቅዱስ፡ እምነ፡ ምድር፡ ኑኁ፡ ፪፼ወ፶፻፣፡ ወርሕቡ፡ ፼፡ ቅዱስ፡ ውእቱ፡ በኵሉ፡ ደወሉ፡ ዘዐውዱ።
2 ወይኩን፡ እምዝቱ፡ ኀበ፡ ቅዱስ፡ ፭፻በ፭፻፡ ርቡዐ፡ በዐውዱ፣፡ ወ፶፡ እመት፡ ዘይፈልጥ፡ ሎቱ፡ ዐውደ፡ እምዐውዱ።
3 ወእምነ፡ ዝንቱ፡ መስፈርት፡ ትሰፍር፡ ኑኁ፡ ፪፼ወ፶፻፣፡ ወርሕቡ፼፡ ዘውስቴቱ፡ መቅደስ፡ ቅድስተ፡ ቅዱሳን።
4 ቅዱስ፡ እምነ፡ ምድር፡ ውእቱ፡ ለካህናት፡ እለ፡ ይትለአኩ፡ ለመቅደስ፡ ይኩን፡ እለ፡ ቅሩባን፡ ለመልእክተ፡ እግዚአብሔር፡ ወይኩን፡ ሎሙ፡ መካነ፡ ለአብያቲሆሙ፡ ወመቅደሰ፡ ለቅድሳት።
5 ወ፪፼ወ፶፻፡ ኑኁ፣፡ ወ፼፡ ርሕቡ፡ ይኩን፡ ለሌዋውያን፡ እለ፡ ይትለአኩ፡ ለቤት፡ ለርስት፡ ፳፡ ለነቢር።
6 ወመአኀዘ፡ ሀገር፡ ትሁብ፡ ፶፻፡ ርሕቡ፣፡ ወኑኁ፡ ፪፼ወ፶፻፡ ምስለ፡ መባእ፡ ዘቅዱስ፡ ለኵሉ፡ ቤተ፡ እስራኤል፡ ይኩን።
7 ወለመኰንን፡ እምለፌ፡ ወእምለፌ፡ ለመባእ፡ ቅዱስ፣፡ ወለመአኀዘ፡ ሀገር፡ ኀበ፡ ገጸ፡ መባእ፡ ቅዱስ፣፡ ወኀበ፡ ገጸ፡ መአኀዘ፡ ሀገር፡ እመንገለ፡ ባሕር፡ ባሕረ፣፡ ወእመንገለ፡ ጽባሕ፡ ጽባሐ፡ ወኑኁ፡ አምሳለ፡ ፩፡ እመክፈልታት፡ እምደወለ፡ ባሕር፡ እስከ፡ ደወለ፡ ጽባሕ።
8 ምድር፡ ይኩን፡ ሎቱ፡ ለእኂዝ፡ ውስተ፡ እስራኤል፡ ወኢየዐምፁ፡ እንከ፡ መኳንንቲሆሙ፡ ለሕዝብየ፣፡ ወምድረ፡ ይሁቡ፡ ለቤተ፡ እስራኤል፡ ለለነገዶሙ።
9 ከመዝ፡ ይቤ፡ እግዚአብሔር፡ አዶናይ፡ አከለክሙ፡ መኳንንተ፡ እስራኤል፡ ዓመፃ፡ ወግፍዐ፡ አሰስሉ፣፡ ፍትሐ፡ ወጽድቀ፡ ግበሩ፡ አርኅቁ፡ ተዐግሎተክሙ፡ እምላዕለ፡ ሕዝብየ፡ ይቤ፡ አዶናይ፡ እግዚአብሔር።
10 መዳልወ፡ ጽድቅ፡ ወኢፈ፡ ጽድቅ፡ ወባተ፡ ዘጽድቅ፡ ይኩን፡ ለክሙ።
11 ኢፍ፡ ወባት፡ ዕሩይ፡ ፩፡ ይኩን፡ ለነሢእ፡ ዓሥራቱ፡ ለሆሜር፡ ባት፡ ወዐሥር፡ እዴሁ፡ ለሆሜር፡ ኢፍ፡ ኀበ፡ ሆሜር፡ ይኩን፡ መስፈርቱ።
12 ወሰቅል፡ ፳፡ አቦሊ፣፡ ወ፳፡ ሰቅል፡ ፳፭፡ ሰቅል፡ ፲ወ፭፡ ሰቅል፡ ምናነ፡ ይኩን፡ ለክሙ።
13 ወዝንቱ፡ ዘታበውኡ፡ ሳድሲተ፡ ኢፍ፡ እምሆሜር፡ ዘእምስርናይ፣፡ ወምክዕቢተ፡ ስሱ፡ ኢፍ፡ እምሆሜር፡ ሰገም።
14 ወመስፈርተ፡ ቅብእ፡ ባት፡ ዘቅብእ፡ ዓሥራቲሁ፡ ቆሮስ፡ ውእቱ፡ ዓሥራቲሁ፡ ለባት፡ እምቆሮስ፡ ተዐሥሩ፡ እስመ፡ ፲፡ ባት፡ ፩ቆሮስ፡ ወ፩፡ ሆሜር፡ ውእቱ።
15 ወአሐቲ፡ በግዕት፡ እምነ፡ አባግዕ፡ እም፡ ፪፻፡ እምነ፡ ጥሪተ፡ እስራኤል፡ ለቍርባን፡ ወለመሥዋዕት፡ ወለሰላም፡ ወለአስተስርዮ፡ ላዕሌሆሙ፡ ይቤ፡ አዶናይ፡ እግዚአብሔር።
16 ኵሉ፡ ሕዝበ፡ ምድር፡ ያበውኡ፡ ዘንተ፡ ለመኰንን፡ ዘእስራኤል።
17 ወላዕለ፡ መኰንን፡ ይኩን፡ መሥዋዕት፡ ወቍርባን፡ ወሞጻሕት፡ በበዓላት፡ ወበሠርቀ፡ አውራኅ፡ ወበሰናብት፡ በኵሉ፡ በዓላቲሆሙ፡ ለቤተ፡ እስራኤል። ውእቱ፡ ይገብር፡ ዘኃጢአት፡ ወቍርባነ፡ ወመሥዋዕተ፡ ወዘሰላም፡ ለአስተስርዮ፡ በእንተ፡ ቤተ፡ እስራኤል።
18 ከመዝ፡ ይቤ፡ እግዚአብሔር፡ አዶናይ፡ በቀዳሚ፡ ወርኅ፣፡ አመ፡ ርእሰ፡ ሠርቅ፡ ትነሥኡ፡ ላህመ፡ እመራዕይ፡ ዘአልቦ፡ ነውር፡ በዘታነጽሑ፡ መቅደሰ።
19 ወይነሥእ፡ ካህን፡ እምደሙ፡ ዘኃጢአት፡ ወይነዝኅ፡ ውስተ፡ ፬፡ መዓዝኒሁ፡ ለቤት፡ በውስተ፡ ፬፡ ገጻቲሁ፡ ለአሐዝራሕ፡ ዘምሥዋዕ፡ ወውስተ፡ መዓዝኒሁ፡ ለአንቀጸ፡ ዐጸድ፡ ውሣጢ።
20 ወከማሁ፡ ትገብሩ፡ በሰቡዐ፡ ሠርቅ፡ እምብእሲ፡ ሺጊሕ፡ ወሚፌቲ፡ ወታስተስርዩ፡ ለቤት።
21 በቀዳሚ፡ ወርኅ፣፡ አመ፡ ዐሡሩ፡ ወረቡዑ፡ ለሠርቅ፡ ይኩን፡ ለክሙ፡ ፋሲካ፡ በዓለ፡ ሰቡዐ፡ መዋዕለ፡ ናዕተ፡ ትበልዑ።
22 ወይገብር፡ መኰንን፡ በውእቱ፡ ዕለት፡ በእንተ፡ ርእሱ፡ ወበእንተ፡ ኵሉ፡ ሕዝበ፡ ምድር፡ ላህመ፡ ዘኃጢአት።
23 ወሱባዔ፡ መዋዕል፡ ዘበዓል፡ ይገብር፡ መሥዋዕተ፡ ለእግዚአብሔር፡ ፯፡ አልህምተ፡ ወ፯፡ ሐራጊተ፡ እለ፡ አልቦሙ፡ ነውር፡ ለለዕለት፡ ሰቡዐ፡ መዋዕለ፣፡ ወለኃጢአት፡ ሐርጌ፡ እምውስተ፡ አጣሊ፡ ለለዕለት።
24 ወቍርባነ፡ ኢፍ፡ ለላህም፡ ወኢፍ፡ ለሐርጌ፡ ይገብር፣፡ ወቅብአ፡ ኢነ፡ ለኢፍ።
25 ወበወርኅ፡ ሳብዕ፣፡ አመ፡ ፲ወ፭፡ ለሠርቅ፣፡ በዓለ፡ ይገብር፡ ከማሁ፡ ሰቡዐ፡ መዋዕለ፡ ዘኃጢአት፡ ወመሥዋዕተ፡ ወቍርባነ፡ ወቅብአ።
=== chapter 46 ===
[Chapter 46]
1 ከመዝ፡ ይቤ፡ እግዚአብሔር፡ እግዚእ፡ አንቀጽ፡ ዘዐጸድ፡ ውሣጢ፡ ዘይኔጽር፡ ጽባሐ፡ ዕጽወ፡ ይንበር፡ ፮፡ መዋዕለ፡ ግብር፡ ወበዕለተ፡ ሰንበት፡ ይትረኀው፡ ወበዕለተ፡ ሠርቅ፡ ይትረው።
2 ወይባእ፡ ንጉሥ፡ ፍኖተ፡ ኤላም፡ እምጸናፊ፡ ዴዴ፡ ወይቁም፡ ቅድመ፡ ኆኅት፡ ወይገብሩ፡ ካህናት፡ መሥዋዕቶ፡ ወዘመድኃኒት፡ ወይስግድ፡ ውስተ፡ መድረክ፡ ኆኅት፡ ወይፃእ፡ ወኢይትዐጸው፡ ኆኅት፡ እስከ፡ ሠርክ።
3 ወይሰግዱ፡ ሕዝበ፡ ምድር፡ ቅድመ፡ ይእቲ፡ ኆኅት፡ በበሰናብት፡ ወበበሠርቀ፡ ወርኅ፡ ቅድመ፡ እግዚአብሔር።
4 ወያበውእ፡ መባአ፡ ለእግዚአብሔር፡ መኰንን፡ በዕለተ፡ ሰንበት፡ ፮፡ አባግዐ፡ ንጹሓነ፡ ወሐርጌ፡ ንጹሐ፡ እለ፡ አልቦሙ፡ ነውር።
5 ወቍርባነ፡ ኢፍ፡ ለሐርጌ፡ ወለአባግዕ፡ መባአ፡ ሀብተ፡ እዴሁ፡ ወቅብአ፡ ኢነ፡ ለኢፍ።
6 ወበዕለተ፡ ሠርቅኒ፡ ላህመ፡ እጓለ፡ ንጹሐ፡ ወ፮፡ አባግዐ፡ ወሐርጌ፡ ንጹሓነ፡ ይኩኑ።
7 ወኢፈ፡ ለላህም፡ ወኢፈ፡ ለሐርጌ፡ ይገብር፡ ቍርባነ፡ ወለአባግዕ፡ በከመ፡ ይረክብ፡ እዴሁ፣፡ ወቅብአ፡ ኢነ፡ ለኢፍ።
8 ወሶበ፡ ይበውእ፡ ንጉሥ፣፡ ፍኖተ፡ ኤላም፡ ዘአንቀጽ፡ ይበውእ፡ ወበፍኖቱ፡ ይፃእ።
9 ወሶበ፡ ይበውኡ፡ ሕዝበ፡ ምድር፡ ቅድመ፡ እግዚአብሔር፡ በበዓላት፣፡ ዘይበውእ፡ እንተ፡ አንቀጽ፡ ሰሜናዊ፡ ለሰጊድ፣፡ ይወፅእ፡ ፍኖተ፡ አንቀጽ፡ ደቡባዊ፡ ወዘይበውእ፡ ፍኖተ፡ አንቀጽ፡ ደቡባዊ፣፡ ይወጽእ፡ ፍኖተ፡ አንቀጽ፡ ሰሜናዊ፡ ወኢይትመየጥ፡ ፍኖተ፡ አንቀጽ፡ ዘቦአ፡ ውስቴቱ፣፡ እስመ፡ ኀበ፡ አንጸረ፡ ይወፅእ።
10 ወንጉሥሰ፡ ይበውእ፡ ሶበ፡ ይበውኡ፡ ማእከሎሙ፣፡ ወሶበ፡ ይወፅኡ፡ ይወዕእ።
11 ወበበዓላት፡ ወበዕድሜያት፡ ይኩን፡ ቍርባን፡ ኢፍ፡ ለላህም፡ ወኢፍ፡ ለሐርጌ፡ ወለአባግዕ፡ ቍርባነ፡ እዴሁ፡ ወቅብእ፡ ኢን፡ ለኢፍ።
12 ወሶበ፡ ይገብር፡ መኰንን፡ መሥዋዕተ፡ ፈቃድ፡ አው፡ ዘመድኃኒት፡ ዘበፈቃድ፡ ለእግዚአብሔር፣፡ ያርኅዉ፡ ሎቱ፡ አንቀጸ፡ ዘይኔጽር፡ ጽባሐ፡ ወይገብር፡ መሥዋዕቶ፡ ወዘመድኃኒቱ፡ በከመ፡ ይገብር፡ በዕለተ፡ ሰንበት፡ ወይወፅእ፡ ወይትዐጸው፡ ኆኅት፡ ወፂኦ።
13 ወመሐስአ፡ ዘመዓት፡ ትገብር፡ መሥዋዕት፡ ለእግዚአብሔር፡ ኵሎ፡ አሚረ፣፡ በነግህ፡ ይገብሩ።
14 ወቍርባን፡ ትገብር፡ ላዕሌሁ፡ በነግህ፡ ሳድሲተ፡ እዴሁ፡ ለኢፍ፣፡ ወቅብአ፡ ሣልሲተ፡ ኢን፡ ለሮስ፡ ስንዳሌ፡ መሥዋዕተ፡ ለእግዚአብሔር፡ ሕግ፡ ዘለዓለም፡ ዘዘልፍ።
15 ወይገብሩ፡ መሐስአ፡ ወቍርባነ፡ ወቅብአ፡ በበነግህ፡ መሥዋዕተ፡ ዘዘልፍ።
16 ከመዝ፡ ይቤ፡ አዶናይ፡ እግዚአብሔር፡ ሶበ፡ ይሁብ፡ መኰንን፡ ሀብተ፡ ለብእሲ፡ እምውሉዱ፣፡ ርስቱ፡ ውእቱ፡ ለውሉዱ፡ ትከውን፡ እኅዘቶሙ፡ ይእቲ፡ ርስቱ።
17 ወለእመ፡ ወሀበ፡ ሀብተ፡ እምርስቱ፡ ለ፩፡ እምአግብርቲሁ፡ ትከውን፡ ሎቱ፡ እስከ፡ ዓመተ፡ ኅድገት፡ ወትትመየጥ፡ ለመኰንን፡ አላ፡ ርስተ፡ ውሉድ፡ ትከውን፡ ሎሙ።
18 ወኢይንሣእ፡ መኰንን፡ እምርስተ፡ ሕዝብ፡ በትዕግልቶሙ፡ እምእኅዘቶሙ፡ እምርስቱ፡ ያስተዋርስ፡ ለውሉዱ፡ ከመ፡ ኢይዘረው፡ ሕዝብየ፡ ብእሲ፡ እምርስቱ።
19 ወአብአኒ፡ እንተ፡ ሙባእ፡ ዘዲበ፡ መትከፍተ፡ አንቀጽ፡ ኀበ፡ ኤስኬዴሬ፡ ቅዱስ፡ ዘካህናት፡ ዘይኔጽር፡ ሰሜነ፡ ወናሁ፡ ህየ፡ መካን፡ በገቦሆሙ፡ መንገለ፡ ባሕር።
20 ወይቤለኒ፡ ዝንቱ፡ መካብ፡ ዘያበስሉ፡ ህየ፡ ካህናት፡ ዘንስሐ፡ ወዘኃጢአት፡ ዘይገብሩ፡ ኅብስተ፡ ቍርባን፡ ከመ፡ ኢይፃእ፡ ኀበ፡ ዐጸድ፡ ጸናፊ፡ ለቀድሶ፡ ሕዝብ።
21 ወአውፅአኒ፡ ውስተ፡ ዐጸድ፡ ጸናፊ፡ ወወሰደኒ፡ ኀበ፡ ፬፡ መዓዝነ፡ ዐጸድ፡ ወናሁ፡ ዐጸድ፡ በማዕዘንተ፡ ዐጸድ፣፡ ዐጸድ፡ በመዓዝነ፡ ዐጸድ፡ ውስተ፡ ፬፡ መዓዝነ፡ ዐጸድ።
22 አዕጻዳተ፡ ቄጡሩት፡ ፵፡ ኑኃ፡ ወ፴፡ ግድማ፡ መስፈርት፡ ፩፡ ለ፬ቲሆሙ።
23 ወጣውር፡ የዐውድ፡ ቦሙ፡ ዐውዶ፡ ለ፬፡ ቲሆሙ፡ ወኀበ፡ ያበስሉ፡ ገብሩ፡ እምታሕተ፡ ሐጤሩት።
24 ወይቤለኒ፡ እሉ፡ ቤተ፡ መበስላን፡ እለ፡ ያበስሉ፡ ህየ፡ ላእካነ፡ ቤተ፡ እግዚአብሔር፡ መሥዋዕቶሙ፡ ለሕዝብ።
=== chapter 47 ===
[Chapter 47]
1 ወሜጠኒ፡ ኀበ፡ ኆኅተ፡ ቤት፡ ወናሁ፡ ማይ፡ ይወፅእ፡ እምታሕተ፡ አንቀጸ፡ ቤት፡ ጽባሐዊ፡ እስመ፡ ገጸ፡ ቤት፡ ዘጽባህ፣፡ ወማያት፡ ይወርዱ፡ እምታሕተ፡ መትከፍተ፡ ቤት፡ ዘየማን፡ እምደቡበ፡ ምሥዋዕ።
2 ወአውፅአኒ፡ ኆኅት፡ አንቀጽ፡ ሰሜናዊ፡ ወአዖዶኒ፡ ፍኖተ፡ ጸናፊ፡ ኀበ፡ አንቀጽ፡ ጸናፊ፡ ፍኖተ፡ ዘይኔጽር፡ ጽባሐ፡ ወናሁ፡ ማይ፡ ይውኅዝ፡ እመትከፍት፡ ዘየማን።
3 ወመጽአ፡ ብእሴ፡ ቃዴም፡ ወመስፈርት፡ ውስተ፡ እዴሁ፡ ወሰፈረ፡ ፲፻፡ በእመት፣፡ ወአዕደወኒ፡ ውስተ፡ ማይ፡ እስከ፡ ሜኢፌሳይም።
4 ወሰፈረ፡ ፲፻፡ ወአዕደወኒ፡ ውስተ፡ ማይ፡ እስከ፡ ብርክ፡ ወሰፈረ፡ ፲፻፡ ወአዕደወኒ፡ እስከ፡ ሐቌ።
5 ወሰፈረ፡ ፲፻፡ ፈለገ፡ ዘኢይክል፡ ለዐዲው፡ እስመ፡ ዓቢይ፡ ውኂዝ፡ ሚሻሁ፣፡ ውኂዝ፡ ዘኢየዐድውዎ።
6 ወይቤለኒ፡ ርኢከኑ፡ ወልደ፡ እጓለ፡ እመሕያው፡ ወወሰደኒ፡ ወሜጠኒ፡ ኀበ፡ ድንጋገ፡ ፈለግ።
7 ወሶበ፡ ሜጠኒ፣፡ ወናሁ፡ ውስተ፡ ድንጋገ፡ ፈለግ፡ ብዙኅ፡ ዕፀው፡ ጥቀ፡ እምለፌሂ፡ ወእምለፌሂ።
8 ወይቤለኒ፡ ዝማይ፡ ይወፅእ፡ ኀበ፡ ገሊላ፡ ጽባሐዊ፡ ወይወርድ፡ ላዕለ፡ ዐረብ፡ ወይበጽሕ፡ ኀበ፡ ባሕር፡ ወይፌውሶ፡ ለማይ።
9 ወኵሉ፡ ነፍሰ፡ እንስሳ፡ የሐዩ፡ ኀበ፡ ኵሉ፡ ዘይበውእ፡ ህየ፡ አፍላግ፡ ወይመልእ፡ ዓሣት፡ ውስቴቱ፡ እስመ፡ ይበውኡ፡ እሉ፡ ማያት፡ ወይፌውሱ፡ ወየሐዩ፡ ኵሉ፡ ዘይመጽእ፡ ህየ፡ ፈለግ።
10 ወይቀውሙ፡ መሠግራን፡ እምነ፡ ኤንገዲ፡ እስከ፡ ኢንዔጌሌም፡ ወይረብቡ፡ መሣግሪሆሙ፣፡ ወዓሣቲሁኒ፡ ከመ፡ ዓሣተ፡ ባሕር፡ ዓቢይ፡ ወብዙኅ፡ ፈድፋደ፡ ጥቀ።
11 እለሰ፡ ሀለዉ፡ ውስተ፡ ድንጋጉ፡ ወውስተ፡ ዓምዓሙ፡ ኢይትፌወሱ፣፡ ባሕቱ፡ ይትወሀቡ፡ ለጼው።
12 ወይወፅእ፡ ድንጋገ፡ ፈለግ፡ ለፌሂ፡ ወለፌሂ። ኵሉ፡ ዕፅ፡ ዘይበልዑ፡ ኢይትነገፍ፡ ቈጽሉ፡ ወኢይየብስ፡ በላዕሌሁ፡ ፍሬሁ፡ ሐዲስ፡ ይትረከብ፡ ኵሎ፡ ጊዜ፡ እስመ፡ ማዩ፡ እምነ፡ መቅደስ፡ ይወፅእ፡ ወይከውን፡ ፍሬሁ፡ ለሲሳይ፡ ወቈጽሉ፡ ለፈውስ።
13 ከመዝ፡ ይቤ፡ እግዚአብሔር፡ እግዚእ፡ ዝብሔር፡ መክፈልተ፡ ርስቶሙ፡ ለ፲ወ፪ሕዝብ፡ ደቂቀ፡ እስራኤል፣፡ ለዮሴፍ፡ ፪፡ ሐብል።
14 ወተዋረሱ፡ ኪያሃ፡ ብእሲ፡ ምስለ፡ ቢጹ፡ እስመ፡ አንሣእኩ፡ እዴየ፡ ከመ፡ አሀቦሙ፡ ለአበዊሆሙ፡ ወትከፍሉ፡ ዘንተ፡ ምድረ፡ ለክሙ።
15 ወዝደወለ፡ ምድር፡ ዘመንገለ፡ ሰሜን፡ እምነ፡ ባሕር፡ ዓቢይ፡ ፍኖተ፡ ሔቴሌን፡ ለበዊእ፡ ጼዳዳ።
16 ወሔማት፡ ወኬሩታ፡ ወሴክሪም፡ ዘማእከለ፡ ደወለ፡ ደማስቆ፡ ወማእከለ፡ ደወለ፡ ኤማት፡ ሐፃር፡ ሐቲኩን፡ ዘኀበ፡ ደወለ፡ ሐዊራን።
17 ወይከውን፡ ደወል፡ እምነ፡ ባሕር፡ ሐፃር፡ ኤኖን፡ ደወለ፡ ደማስቆ፡ ወሰሜን፡ ሰሜናዊ፡ ወደወለ፡ ኤማት፡ ዘመንገለ፡ ሰሜን።
18 ወዘመንገለ፡ ጽባሕ፡ እማእከለ፡ ሐዊራን፡ ወእማእከለ፡ ደማስቆ፡ ወእማእከለ፡ ገለዓድ፡ ወእማእከለ፡ ምድረ፡ እስራኤል፡ ዮርዳኖስ፡ እምደወል፡ ላዕለ፡ ባሕር፡ ጽባሐዊ፡ ትሜጥኑ፡ ዘመንገለ፡ ጽባሕ።
19 ወዘመንገለ፡ ደቡበ፡ ቴማን፡ እምፊንቆን፡ እስከ፡ ባሕረ፡ ሜሪቦት፡ ቃዴስ፡ ዘተሰፍሐ፡ ኀበ፡ ባሕር፡ ዓቢይ፡ ወዘመንገለ፡ ቴማን፡ ደቡባዊ።
20 ወዘመንገለ፡ ባሕር፡ ዓቢይ፡ ውሱን፡ እስከ፡ ቅድመ፡ ለበዊአ፡ ኤማት።
21 ዝንቱ፡ ዘመንገለ፡ ባሕር፡ ወትትካፈሉ፡ ዘንተ፡ ምድረ፡ ፲ወ፪፡ ሕዝበ፡ እስራኤል።
22 ወትትዐፀውዋ፡ ርስተ፡ ለክሙ፡ ወለፈላስያን፡ በማእከሌክሙ፡ እለ፡ ወለዱ፡ ደቂቀ፡ በማእከሌክሙ፣፡ ወይኩኑክሙ፡ ከመ፡ ዘውስተ፡ እስራኤል፡ ፍጥረቶሙ። ምስሌክሙ፡ ይትዐፀዉ፡ ርስተ፡ ማእከለ፡ ነገደ፡ እስራኤል።
23 ወይሄሉ፡ ውስተ፡ ነገድ፡ ዘፈለሰ፡ ፈላሲ፡ ኀቤሁ፡ ህየ፡ ትከፍልዎ፡ ይቤ፡ አዶናይ፡ እግዚአብሔር።
=== chapter 48 ===
[Chapter 48]
1 ወዝውእቱ፡ አስማቲሆሙ፡ ለነገድ፡ እምወሰን፡ ሰሜናዊ፡ ኀበ፡ እደ፡ ፍኖተ፡ ሔቴሌን፡ ለሙፃአ፡ ኤማት። ኀበ፡ ሐፃረ፡ ኤናን፡ ደወለ፡ ደማስቆ፡ ሰሜናዊ፡ ኀበበ፡ እደ፡ ኤማት። ወይከውን፡ ሎቱ፡ እመንገለ፡ ጽባሕ፡ እስከ፡ ባሕር፡ ለዳን፡ አሐቲ።
2 ወእምነ፡ ወሰነ፡ ዳን፡ ጽባሐዊ፡ እስከ፡ ባሕር፡ ለአሴር፡ አሐቲ።
3 ወእምወሰነ፡ አሴር፡ እመንገለ፡ ጽባሕ፡ እስከ፡ ባሕር፡ ለንፍታሌም፡ አሐቲ።
4 ወእምወሰነ፡ ንፍታሌም፡ እምጽባሒሁ፡ እስከ፡ ባሕር፡ ለምናሴ፡ አሐቲ።
5 ወእምወሰነ፡ ምናሴ፡ እምጽባሒሁ፡ እስከ፡ ባሕር፡ ለኤፍሬም፡ አሐቲ።
6 ወእምወሰነ፡ ኤፍሬም፡ እምጽባሒሁ፡ እስከ፡ ባሕር፡ ለሮቤል፡ አሐቲ።
7 ወእምወሰነ፡ ሮቤል፡ እምጽባሒሁ፡ እስከ፡ ባሕር፡ ለይሁዳ፡ አሐቲ።
8 ወእምወሰነ፡ ይሁዳ፡ እመንገለ፡ ጽባሕ፡ እስከ፡ መንገለ፡ ባሕር፡ ይከውን፡ መባአ፡ ዘትፈልጡ፡ ፪፼ወ፶፻ግድሙ፣፡ ወኑኁ፡ ከመ፩፡ እመክፈልታት፡ እመንገለ፡ ጽባሕ፡ እስከ፡ መንገለ፡ ባሕር፡ ወይከውን፡ መቅደስ፡ በማእከሉ።
9 ቀዳሚያት፡ ዘትፈልጡ፡ ለእግዚአብሔር፡ ኑኁ፡ ፪፼ወ፶፻፣፡ ወግድሙ፼።
10 ወለእሉ፡ ይከውን፡ ቀዳምያተ፡ መቅደስ፡ ለካህናት፡ በገጸ፡ ሰሜን፡ ፪፼ወ፶፻፡ ወርሕቡ፡ ዘመንገለ፡ ባሕር፼፣፡ ወርሕቡ፡ ዘመንገለ፡ ጽባሕ፼፡ ወዘመንገለ፡ ደቡብ፪፼ወ፶፻፡ ወይከውን፡ መቅደሰ፡ እግዚአብሔር፡ ማእከሉ።
11 ለካህናት፡ እለ፡ ተቀደሱ፡ እምደቂቀ፡ ሳዶቅ፣፡ እለ፡ የዐቅቡ፡ ሕገ፡ ወኢስሕቱ፡ በጌጋዮሙ፡ ለደቂቀ፡ እስራኤል፡ ከመ፡ አበሱ፡ ሌዋውያን።
12 ወይከውን፡ ሎሙ፡ ቀዳምያት፡ ዘይበውኡ፡ እምቀዳምያተ፡ ምድር፣፡ ቅዱሰ፡ ቅዱሳን፡ ቅሩበ፡ ደወለ፡ ሌዋውያን።
13 ወሌዋውያንኒ፡ ቅሩብ፡ ደወሎሙ፡ ለካህናት፡ ፪፼ወ፶፻ኑኁ፣፡ ወግድሙ፡ ፼፡ ለኵሉ፡ ኑኁ፡ ፪፼ወ፶፻፡ ወርሕቡ፼።
14 ወኢይሣየጡ፡ እምኔሁ፡ ወኢይወልጡ፣፡ ወኢይበልጥ፡ ቀዳምያተ፡ ምድር፡ እስመ፡ ቅዱስ፡ ውእቱ፡ ለእግዚአብሔር።
15 ወ፶፻፡ ዘተርፈ፡ በርሕብ፡ እምገጸ፪፼ወ፶፻፡ ሁል፡ ውእቱ፡ ለሀገር፡ ለነቢር፡ ወለጺኦት፣፡ ወትከውን፡ ሀገር፡ በማእከላ።
16 ወዝውእቱ፡ መስፈርቱ፡ ለገጸ፡ ሰሜን፡ ፵ወ፭፻፡ ወለመንገለ፡ ደቡብ፡ ፵ወ፭፻፣፡ ወለገጸ፡ ጽባሕ፡ ፵ወ፭፻፡ ወዘመንገለ፡ ባሕር፡ ፵ወ፭፻።
17 ወይከውን፡ ጺኦታ፡ ለሀገር፡ ሰሜናዊ፡ ፪፻ወ፶፣፡ ወደቡባዊ፡ ፪፻ወ፶።
18 ወዘተርፈ፡ በኑኁ፡ ቅሩበ፡ ቀዳምያት፡ ቅዱስ፡ ፼ለጽባሕ፣፡ ወ፼ለገጸ፡ ባሕር፡ ይከውን፡ ምስለ፡ ቀዳምያት፡ ቅዱሰ፡ ወይከውን፡ እትወቱ፡ ለኅብስት፡ ለእለ፡ ይነድቁ፡ ሀገረ።
19 ወይገብርዋ፡ ለሀገር፡ ኵሉ፡ ነገደ፡ እስራኤል።
20 ኵሉ፡ ቀዳምያት፡ ፪፼ወ፶፻፡ በ፪፼ወ፶፻። ርብዕተ፡ ትገብሩ፡ ቀዳምያተ፡ ለቅድስት፡ እምነ፡ መአኅዝተ፡ ሀገር።
21 ወዘተርፈ፡ እምዝ፡ ለመኰንን፡ እምለፌ፡ ወእምለፌ፡ እምነ፡ ቀዳምያት፡ ቅዱስ፣፡ ወመአኅዝተ፡ ሀገር፡ ኀበ፡ ገጸ፡ ፪፼ወ፶፻፡ ቀዳምያት፡ እስከ፡ ወሰን፡ ጽባሐዊ፡ ወባሕር፡ ላዕለ፡ ፪፼ወ፶፻፡ ቀዳምያት፡ እስከ፡ ወሰን፡ ዘባሕር፡ ቅሩበ፡ መክፈልተ፡ ንጉሥ። ይከውን፡ ቀዳምያተ፡ ቅዱሰ፡ ወመቅደሰ፡ ቤት፡ ማእከሉ።
22 ወመክፈልተ፡ ሌዋውያን፡ ወመክፈልተ፡ ሀገር፡ በማእከል፡ ለመኰንን፡ ይኩን፡ ማእከለ፡ ብሔረ፡ ይሁዳ፣፡ ወማእከለ፡ ብሔረ፡ ብንያም፡ ለመኰንን፡ ይኩን።
23 ወዘተርፈ፡ ነገድ፡ እመንገለ፡ ጽባሕ፡ እስከ፡ ባሕር፡ ዘብንያም፡ አሐቲ።
24 ወእመንገለ፡ ደወለ፡ ብንያም፡ ዘመንገለ፡ ጽባሕ፡ እስከ፡ ባሕር፡ ለስምዖን፡ አሐቲ።
25 ወእመንገለ፡ ደወለ፡ ስምዖን፡ ዘመንገለ፡ ጽባሕ፡ እስከ፡ ባሕር፡ ለይሳኮር፡ አሐቲ።
26 ወእምነ፡ ደወለ፡ ይሳኮር፡ ዘመንገለ፡ ጽባሕ፡ እስከ፡ ባሕር፡ ለዛብሎን፡ አሐቲ።
27 ወእምነ፡ ደወለ፡ ዛብሎን፡ ዘመንገለ፡ ጽባሕ፡ እስከ፡ ባሕር፡ ለጋድ፡ አሐቲ።
28 ወእምደወለ፡ ጋድ፡ ዘኀበ፡ ገጸ፡ ደቡብ፡ ቴማን፡ ይከውን፡ ደወል፡ እምታማር፡ ማየ፡ ማሪሞት፡ ቃዴስ፡ ይወርሱ፡ እስከ፡ ባሕር፡ ዓቢይ።
29 ወዛቲ፡ ምድር፡ እንተ፡ ታስተካፍልዎሙ፡ ለሕዝበ፡ እስራኤል፡ ከመዝ፡ ይትካፈሉ፡ ይቤ፡ እግዚአብሔር፡ እግዚእ።
30 ወከመዝ፡ ሙፃአ፡ ሀገር፡ ሰሜናዊ፡ ፵ወ፭፻፡ በመስፈርት።
31 ውኆኅተ፡ ሀገር፡ ይሰመይ፡ በስመ፡ ሕዝበ፡ እስራኤል። ፫፡ አናቅጽ፡ እምገጸ፡ ሰሜን፡ አንቀጸ፡ ሮቤል፡ አሐቲ፣፡ አንቀጸ፡ ይሁዳ፡ አሐቲ፣፡ አንቀጸ፡ ሌዊ፡ አሐቲ።
32 ወገጸ፡ ጽባሕ፡ ፵ወ፭፻፡ ወ፫፡ አናቅጽ፡ አንቀጸ፡ ዮሴፍ፡ አሐቲ፣፡ አንቀጸ፡ ብንያም፡ አሐቲ፣፡ ወአንቀጸ፡ ዳን፡ አሐቲ።
33 ወገጸ፡ ደቡብ፡ ፵ወ፭፻፡ አምጣኒሁ፡ ወ፫፡ አናቅጽ፡ አንቀጸ፡ ስምዖን፡ አሐቲ፣፡ አንቀጸ፡ ይሳኮር፡ አሐቲ፣፡ አንቀጸ፡ ዛብሎን፡ አሐቲ።
34 ወገጸ፡ ባሕር፡ አምጣኒሁ፵ወ፶፻፡ ወ፫አናቅጺሁ፡ ኆኅተ፡ ጋድ፡ አሐቲ፣፡ ኆኅተ፡ አሴር፡ አሐቲ፣፡ ኆኅተ፡ ንፍታሌም፡ አሐቲ።
35 ወዐውዱኒ፡ ፼ወ፹፻። ወስመ፡ ሀገራ፡ እምዮም፡ እግዚአብሔር፡ ህየ።