##### edition  (gez) — Text of the EOTC printed Bible; cp. also http://mermru.com/bibles/42/432/verses/
=== chapter 1 ===
[Chapter 1]
1 አመ፡ ሣልስ፡ ዓመተ፡ መንግሥቱ፡ ለኢይዋቄም፡ ንጉሠ፡ ይሁዳ፡ ናቡከደነጾር፡ ንጉሠ፡ ባቢሎን፡ ኢየሩሳሌም፡ ወቀተላ።
2 ወአግብአ፡ እግዚአብሔር፡ ውስተ፡ እዴሁ፡ ለኢዮአቂም፡ ንጉሠ፡ ይሁዳ፡ ወንዋየ፡ ቤተ፡ እግዚአብሐየር፡ ወወሰደ፡ ብሔረ፡ ሰናኦር፡ ቤተ፡ አምላኩ፡ ወንዋየ፡ አቡሁ፡ ወቤተ፡ መዝገበ፡ አምላኩ።
3 ወይቤሎ፡ ንጉሥ፡ ለአዝፌኔዝ፡ ሊቀ፡ ኅጥዋኒሁ፡ ያምጽእ፡ እምደቂቀ፡ እስራኤል፡ እምእለ፡ ተፄወዉ፡ ያምጽእ፡ እምዘመደ፡ መንግሥት።
4 ቢዘ፡ ወራዙት፡ እለ፡ አልቦሙ፡ ነውረ፡ ዘለሓይ፡ ገጾሙ፡ ወያአምሩ፡ ኵሎ፡ ጥበበ፡ ወይሌብዉ፡ ምክረ፡ ወይኄልዩ፡ እለ፡ ቦሙ፡ ኀይለ፡ ይቁሙ፡ ውስተ፡ ጽርሐ፡ ንጉሥ፡ ቅድሜሁ፡ ወይምርህዎሙ፡ መጽሐፈ፡ ዘነገረ፡ ፋርስ።
5 ወአዘዘ፡ ሎሙ፡ ንጉሥ፡ ሲሳዮሙ፡ ኵሎ፡ አሚረ፡ የሀብዎሙ፡ እማእደ፡ ንጉሥ፡ ዘዘዕለቶሙ፡ ወእምነ፡ ወይን፡ ዘይሰቲ፡ ውእቱ፡ ወየኀርሥዎሙ፡ ሠለስተ፡ ዓመተ፡ ወእምዝ፡ ይቁሙ፡ ቅድመ፡ ንጉሥ።
6 ወሀለዉ፡ ምስሌሆሙ፡ እምደቂቀ፡ ይሁዳ፡ ዳንኤል፡ ወአናንያ፡ ወአዛርያ፡ ወሚሳኤል።
7 ወወለጦሙ፡ አስማቲሆሙ፡ ሊቀ፡ ኅጽዋን፡ ለዳንኤል፡ በልጣሳር፡ ወለአናንያ፡ ሲድራቅ፡ ወለሚሳኤል፡ ሚሳቅ፡ ወለአዛርያ፡ አብድናጎ።
8 ወአጥብዐ፡ ዳንኤል፡ በልቡ፡ ከመ፡ ኢይብላዕ፡ እማእደ፡ ንጉሥ፡ ወከመ፡ አይስተይ፡ እምወይኑ፡ ወአስተብቊዖ፡ ለሊቀ፡ ኅጽዋን፡ ከመ፡ ኢያብልዖ።
9 ወወሀቦ፡ እግዚአብሔር፡ ለዳንኤል፡ ሣህለ፡ ወምሕረተ፡ በቅድመ፡ ሊቀ፡ ኅጽዋን።
10 ወይቤሎ፡ ሊቀ፡ ኅጽዋን፡ ለዳንኤል። እፈርሆ፡ አነ፡ ለእግዚእየ፡ ለንጉሥ፡ እስመ፡ አዘዘ፡ ሲሳየክሙ፡ ወዘትሰትዩ፡ እመ፡ ርእየክሙ፡ ድግዱጋኒክሙ፡ እምደቅ፡ እለ፡ ቢጽክሙ፡ ኢይኰንነኒ፡ ንጉሥ፡ ርእስየ።
11 ወይቤሎ፡ ዳንኤል፡ ለአሜስድ፡ ዘሤመ፡ ሊቀ፡ ኅጽዋን፡ ዲበ፡ ዳንኤል፡ ወአናንያ፡ ወአዛርያ፡ ወሚሳኤል።
12 ወ፡ አመክሮሙ፡ ለአግብርቲከ፡ ዐሡረ፡ ዕለተ፡ ወሀበነ፡ እምፍሬ፡ ምድር፡ ወንብላዕ፡ ወማየ፡ ንስተይ።
13 ወትርአይ፡ ነፍስትነ፡ ወነፍስቶሙ፡ ለደቅ፡ እለ፡ ይሴስዩ፡ እማእደ፡ ንጉሥ፡ ወዘከመ፡ ርኢኮ፡ ግብር፡ ምስለ፡ አግብርቲከ።
14 ወሰምዖሙ፡ ወአመከሮሙ፡ ዐሡረ፡ ዕለተ።
15 ወኀሊፎ፡ ዐሡር፡ ዕለትኀየሰ፡ ነፍስቶሙ፡ ወሠነየ፡ ራእዮሙ፡ እምእልክቱ፡ ደቅ፡ እለ፡ ይሴሰዩ፡ እማእደ፡ ንጉሥ።
16 ወእምዝ፡ ይነሥእ፡ አሜስድ፡ ሲሳዮሙ፡ ወወይነ፡ ዘይሰትዩ፡ ወይሁቦሙ፡ ርአ፡ ምድር።
17 ለአርባዕቱ፡ ደቅ፡ ወወሀቦሙ፡ እግዚአብሔር፡ ጥበበ፡ ወአእምሮ፡ ወልቡና፡ በኵሉ፡ መጽሐፍ፡ ወዳንኤል፡ ጠቢብ፡ በኵሉ፡ ራእ፡ ወፍካሬ፡ ሕልም።
18 ወወእምዝ፡ ተፈጺሞ፡ መዋዕል፡ ዘአዘዘ፡ ንጉሥ፡ አምጽእዎሙ፡ ኀቤሁ፡ ወአብኦሙ፡ ሊቀ፡ ኅጽዋን፡ ቅድመ፡ ንጉሥ፡ ናቡከደነጾር።
19 ወተናገሮሙ፡ ንጉሥ፡ ወኢተረክበ፡ በውስተ፡ ኵሉ፡ ከመ፡ ዳንኤል፡ ወአናንያ፡ ወአዛር፡ ወሚሳኤል፡ ወቆሙ፡ ቅድመ፡ ንጉሥ።
20 ወበኵሉ፡ ነገረ፡ ትበብ፡ ወምክር፡ ዘኀሠሠ፡ ንጉሥ፡ በኀቤሆሙ፡ ረከበ፡ ተዕሥርተ፡ እምኵሉ፡ ሰብአ፡ ሥራይ፡ ወሰብአ፡ ሰገል፡ እለ፡ ውስተ፡ መንግሥቱ።
21 ወነበረ፡ ዳንኤል፡ እስከ፡ አሐቲ፡ ዓመተ፡ መንግሥቱ፡ ለቂሮስ፡ ንጉሥ።
=== chapter 2 ===
[Chapter 2]
1 በካልእ፡ ዓመት፡ ዘመንግሥቱ፡ ሐለመ፡ ናቡከደነጾር፡ ሕልመ፡ ወደንገጸት፡ መንፈሱ፡ ወረስዐ፡ ሕልሞ።
2 ወአዘዘ፡ ንጉሥ፡ ይጸውዑ፡ ሰብአ፡ ሥራይ፡ ወሰብአ፡ ሰገል፡ ወጠቢባነ፡ ወለባውያነ፡ ወማዕምራነ፡ ወይንግርዎ፡ ሕልሞ፡ ለንጉሥ፡ ወመጽኡ፡ ወቆሙ፡ ቅድመ፡ ንጉሥ።
3 ወይቤሎሙ፡ ንጉሥ፡ ሐለምኩ፡ ሕልመ፡ ወደንገፀት፡ ነፍስየ፡ ወረሳዕኩ፡ ሕልምየ።
4 ወተናገርዎ፡ ጠቢባን፡ ለንጉሥ፡ በሱርስት፡ ወይቤልዎ፡ ንጉሥ፡ ለዓለም፡ ሕየው፡ አንተ፡ ንግሮሙ፡ ለአግብርቲከ፡ ሕልመከ፡ ወናየድዓከ፡ ፍካሬሁ።
5 ወተሠጥዎሙ፡ ንጉሥ፡ ወይቤሎሙ፡ ለጠቢባን፡ ተረስአኒ፡ ነገሩ፡ ወእምከመ፡ ኢታየድዑኒ፡ ሕልምየ፡ ወኢትፈክሩ፡ ሊተ፡ ትመውቱ፡ ወትትበረበሩ፡ ንዋየክሙ።
6 ወእመሰ፡ አይዳዕክሙኒ፡ ሕልምየ፡ ወፈከርክሙ፡ ሊተሂ፡ ትነሥኡ፡ ፍተክሙ፡ ወዓስበክሙ፡ ወብዙኃ፡ አከብረክሙ፡ ወዳዕሙ፡ ንግሩኒ፡ ሕልምየ፡ ወፈከሩ፡ ሊተ።
7 ወአውሥእዎ፡ ዳግመ፡ ወይቤልዎ፡ ንጉሥ፡ ይንግሮሙ፡ ለአግብርቲሁ፡ ሕልሞ፡ ወፍካሬሁሰ፡ ንሕነ፡ ንነግሮ።
8 ወተሰጥዎሙ፡ ንጉሥ፡ ወይቤሎሙ፡ አማን፡ አእመርኩ፡ አነ፡ ከመ፡ ታስተሐፍሩኒ፡ እስመ፡ ተረስዓኒ፡ ነገሩ።
9 ወእምከመ፡ ይእዜ፡ ኢትነግሩኒ፡ ሕልምየ፡ አእመርኩ፡ አነ፡ ከመ፡ ተሐሥሡ፡ ሊተ፡ ዘትፈጥሩ፡ ነገረ፡ ሐሰት፡ ቅድሜየ፡ ወአይድዑኒ፡ ሕልምየ፡ ዘእንበለ፡ ይኅልፍ፡ ጊዜሁ፡ ወአአምር፡ ከመ፡ ፍካሬሁኒ፡ ትነግሩኒ።
10 ወእሥኡ፡ ካዕበ፡ ጠቢባን፡ በቅድመ፡ ንጉሥ፡ ወይቤሉ፡ አልቦ፡ ሰብእ፡ በዲበ፡ ምድር፡ ዘይክል፡ አእምሮ፡ ነገሩ፡ ለንጉሥ፡ ወአልቦ፡ ንጉሥ፡ ዓቢይ፡ ወመልአክ፡ ዘይሴአል፡ ዘከመዝ፡ ነገር፡ በኀበ፡ ጠቢባን፡ ወሰብአ፡ ሰገል፡ ወሰብአ፡ ሥራይ።
11 እስመ፡ ዕፁብ፡ ዝነገር፡ ዘይሴአል፡ ንጉሥ፡ ወአልቦ፡ ባዕድ፡ ዘይነግሮ፡ ለንጉሥ፡ ሕልሞ፡ ዘእንበለ፡ አማልክት፡ እለ፡ ኢኮነ፡ ንብረቶሙ፡ ምስለ፡ ኵሉ፡ ዘሥጋ።
12 ወሶቤሃ፡ ንጉሥ፡ ተምዓ፡ ዓቢየ፡ መዓተ፡ ወይቤ፡ ቅትልዎሙ፡ ለኵሎሙ፡ ጠቢባነ፡ ባቢሎን።
13 ወጽአ፡ ትእዛዝ፡ እምኀበ፡ ንጉሥ፡ ወአኀዙ፡ ይቅትልዎሙ፡ ወኃሠሥዎሙ፡ ለዳንኤል፡ ወለአዕርክቲሁ፡ ይቅትልዎሙ።
14 ወተናገሮ፡ ዳንኤል፡ ለአርዮክ፡ ሊቀ፡ መበስላኒሁ፡ ለንጉሥ፡ ዘወጽአ፡ ይቅትሎሙ፡ ለጠቢባነ፡ ባቢሎን።
15 ወተስእሎ፡ ወይቤሎ፡ ለአርዮክ፡ መልአከ፡ ንጉሥ፡ በእንተ፡ ምንት፡ ወጽአ፡ ትእዛዝ፡ ዕፁብ፡ እምኀበ፡ ንጉሥ፡ ወነገሮ፡ አርዮክ፡ ለዳንኤል።
16 ወቦአ፡ ዳንኤል፡ ወአስተብቊዖ፡ ከመ፡ የዐድሞ፡ እስከ፡ ሠሉስ፡ ዕለት፡ ወይንግሮ፡ ሕልሞ፡ ለንጉሥ፡ ወይፈክር፡ ሎቱ።
17 ወቦአ፡ ዳንኤል፡ ቤቶ፡ ወነገሮሙ፡ ለአእርክቲሁ፡ አንናያ፡ ወአዛርያ፡ ወሚሳኤል፡ ዘ፡ ነገረ።
18 ወሰአሉ፡ ሣህለ፡ እምኀበ፡ አምላከ፡ ሰማይ፡ በእንተ፡ ዘኅቡዕ፡ ከመ፡ ኢይሙቱ፡ ዳንኤል፡ ወአእርክቲሁ፡ ምስለ፡ ኵሎሙ፡ ጠቢባነ፡ ባቢሎን።
19 ወእምዝ፡ ተከሥተ፡ ሎቱ፡ ለዳንኤል፡ በራዕየ፡ ሌሊት፡ ወአእኰቶ፡ ዳንኤል፡ ለአምላከ፡ ሰማይ።
20 ወይቤ፡ ይትባረክ፡ ስመ፡ እግዚአብሔር፡ ለዓለም፡ ወእስከ፡ ለዓለም፡ እስመ፡ ሎቱ፡ ውእቱ፡ ጥበብ፡ ወምክር፡ ወኃይል።
21 ወውእቱ፡ ይዌልጥ፡ ዓመታተ፡ ወመዋዕለ፡ ወያነብር፡ ነገሥተ፡ ወይስእር፡ ወይሁቦሙ፡ ጥበበ፡ ለጠቢባን፡ ወምክረ፡ ለመካርያን።
22 ወውእቱ፡ ይከሥት፡ ዘዕሙቅ፡ ወኅቡዕ፡ ወየአምር፡ ኵሎ፡ ዘውስተ፡ ጽልመት፡ ወኀቤሁ፡ ሀሎ፡ ብርሃን።
23 አንተ፡ አምላከ፡ አበዊነ፡ እገኒ፡ ለከ፡ ወእሴብሐከ፡ እስመ፡ ወሀብከኒ፡ ጥበበ፡ ወአእምሮ፡ ወነገርከኒ፡ ዘአስተብቋዕኩከ፡ ወአይዳዕከኒ፡ ሕልሞ፡ ለንጉሥ፡ ወፍካሬሁ።
24 ወሖረ፡ ዳንኤል፡ ኀበ፡ አርዮክ፡ ዘአዘዞ፡ ንጉሥ፡ ከመ፡ ይቅትሎሙ፡ ለጠቢባነ፡ ባቢሎን፡ ወይቤሎ፡ ዳንኤል፡ ኢትቅትሎሙ፡ ለጠቢባነ፡ ባቢሎን፡ አብዓኒ፡ ቅድመ፡ ንጉሥ፡ ወአነ፡ እነግሮ፡ ለንጉሥ፡ ፍካሬሁ፡ ወሕልሞ።
25 ወሶቤሃ፡ ፍጡነ፡ አብዖ፡ ለዳንኤል፡ አርዮክ፡ ቅድመ፡ ንጉሥ፡ ወይቤ፡ ረከብኩ፡ ብእሴ፡ እምደቂቀ፡ ፄዋ፡ ይሁዳ፡ ዘይነግሮ፡ ለንጉሥ፡ ሕልሞ፡ ወፍካሬሁ።
26 ወተሠጥዎ፡ ንጉሥ፡ ወይቤሎ፡ ለዳንኤል፡ ዘስሙ፡ ብልጣሶር፡ ትክልኑ፡ ትንግረኒ፡ ሕልምየ፡ ዘርኢኩ፡ ወፍካሬሁኒ።
27 ወአውሥአ፡ ዳንኤል፡ ቅድመ፡ ንጉሥ፡ ወይቤ፡ ዝ፡ ነገር፡ ዘይሴአል፡ ንጉሥ፡ ኢኮነ፡ ለጠቢባን፡ ወኢለማዕምራን፡ ወኢለሰብአ፡ ሰገል፡ ወኢለሰብአ፡ ሥራይ፡ ኢይክሉ፡ ይንግሩ፡ ነገሮ፡ ለንጉሥ።
28 ዳዕሙ፡ ሀሎ፡ አምላክ፡ ውስተ፡ ሰማይ፡ ዘይከሥት፡ ዘኅቡዕ፡ ወውእቱ፡ አርአዮ፡ ለንጉሥ፡ ናቡከደነፆር፡ ዘሀሎ፡ ይኩን፡ በደኃሪ፡ መዋዕል፡ ከመዝ፡ ውእቱ፡ ሕልምከ፡ ዘርኢከ፡ ወራእየ፡ ርእስከ፡ በውስተ፡ ምስካብከ፡ ንጉሥ።
29 እስመ፡ ሐለይከ፡ ምንተ፡ ይከውን፡ እምድኅሬከ፡ ወዘይከሥት፡ ኅቡዓ፡ አርአየከ፡ ዘሀሎ፡ ይኩን።
30 ወአነሂ፡ አኮ፡ በጥበብየ፡ እምኵሉ፡ ዕጓለ፡ እመሕያው፡ ዘተከሥተ፡ ሊተ፡ ዘኅቡዕ፡ ዳዕሙ፡ ከመ፡ እንግሮ፡ ለንጉሥ፡ ፍካሬሁ፡ ከመ፡ ታእምር፡ ዘሐለይከ፡ በልብከ።
31 አንተ፡ ንጉሥ፡ ርኢከ፡ ወናሁ፡ ምስል፡ አሐዱ፡ ዓቢይ፡ ወገጹ፡ ይኔጽር፡ ቅድሜከ፡ ወግሩም፡ ራዕዩ፡ ለውእቱ፡ ምስል።
32 ርእሱ፡ ዘወርቅ፡ ጽሩይ፡ እደዊሁ፡ ወእንግድዓሁ፡ ወመዝራዕቱ፡ ዘብሩር፡ ከርሡ፡ ወሐቌሁ፡ ዘብርት።
33 አቊያጺሁ፡ ዘሐፂን፡ ወእምኔሁ፡ መንፈቀ፡ እገሪሁ፡ ዘሐፂን፡ ወመንፈቀ፡ እገሪሁ፡ ልሕኩት።
34 ወእንዘ፡ ትኔጽር፡ ተበትከ፡ ዕን፡ ዓቢይ፡ እምደብር፡ ዘእንበለ፡ እድ፡ ወወረደ፡ ዲበ፡ እገሪሁ፡ ዘሐፂን፡ ወዘልሕኵት፡ ወሐረፆ፡ ለዝሉፉ።
35 ወእምዝ፡ ተሐርፀ፡ በምዕር፡ ልሕኵቱሂ፡ ወሐፂኑሂ፡ ወብርቱሂ፡ ወብሩሩሂ፡ ወወርቁሂ፡ ወኮነ፡ ከመ፡ ፀበለ፡ ዓውድ፡ ዘማዕረር፡ ዘይነሥኦ፡ ነፋስ፡ ኵሎ፡ ወኢተዓውቀ፡ መካኑ፡ ወዝኩ፡ ዕብን፡ ዘቀጥቀጦ፡ ለምስል፡ ኮነ፡ ደብረ፡ ዓቢየ፡ ወመልዓ፡ ኵሎ፡ ምድረ።
36 ዝውእቱ፡ ሕልምከ፡ ወፍካሬሁኒ፡ እነግር፡ ቅድመ፡ ንጉሥ።
37 አንተ፡ ንጉሥ፡ ንጉሠ፡ ነገሥት፡ ዘወሀበከ፡ አምላከ፡ ሰማይ፡ መንግሥተ፡ ጽኑዓ፡ ወኃይለ፡ ወክብረ፡ በኵሉ፡ ምድር።
38 ወበኵሉ፡ በሐውርት፡ ኀበ፡ ይነብሩ፡ ደቂቀ፡ ዕጓለ፡ እመሕያው፡ ወአርዌ፡ ገዳም፡ ወአዕዋፈ፡ ሰማይ፡ ወዓሣተ፡ ባሕር፡ ወሀበከ፡ ውስተ፡ እዴከ፡ ወሤመከ፡ እግዚአ፡ ለኵሉ፡ አንተ፡ ውእቱ፡ ርእሱ፡ ዘወርቅ።
39 ወእምድኅሬከ፡ ይቀውም፡ ካልዕ፡ ንጉሥ፡ ዘይቴሕት፡ እምኔከ፡ ወውእቱ፡ ዝኩ፡ ዘብሩር፡ ወዝኩሰ፡ ዘብርት፡ ሣልስ፡ መንግሥት፡ ዘይኴንን፡ ኵሎ፡ ምድረ።
40 ወራብዕ፡ መንግሥት፡ ጽኑዕ፡ ውእቱ፡ ከመ፡ ሐፂን፡ ወበከመ፡ ሐፂን፡ ያደክሞ፡ ለኵሉ፡ ወያደቅቆ፡ ከማሁ፡ ይመውዖ፡ ለኵሉ፡ ወያገርሮ።
41 ወዝኒ፡ ዘርኢከ፡ እገሪሁ፡ ወአፃብዒሁ፡ መንፈቁ፡ ልሕኵት፡ ወመንፈቁ፡ ሐፂን፡ እስመ፡ መንግሥቱ፡ ንፉቅ፡ ውእቱ፡ ወእምጕንዱ፡ ለሐፂን፡ ውስቴቱ፡ በከመ፡ ርኢከ፡ ሐፂን፡ ኢድሙር፡ ምስለ፡ ልሕኵት።
42 ወአፃብዓ፡ እገሪሁኒ፡ መንፈቁ፡ ሐፂን፡ ወመንፈቁ፡ ልሕኵት፡ መንፈቀ፡ መንግሥቱ፡ ጽኑዕ፡ ወመንፈቀ፡ መንግሥቱ፡ ይትቀጠቀጥ።
43 ወዝኒ፡ ዘርኢከ፡ ሐፂን፡ ወልሕኵት፡ እንዘ፡ ኢድሙር፡ ከማሁ፡ ሕውሳን፡ እሙንቱ፡ ለዘርዓ፡ ዕጓለ፡ እመሕያው፡ ወኢኮኑ፡ ድሙራነ፡ ዝንቱ፡ ምስለ፡ ዝኩ፡ በከመ፡ ርኢከ፡ ኢይዴመር፡ ሐፂን፡ ምስለ፡ ልሕኵት።
44 ወበመዋዕሊሆሙ፡ ለእሙንቱ፡ ነገሥት፡ ይመጽእ፡ አምላከ፡ ሰማይ፡ ወይነሥእ፡ መንግሥተ፡ ዘለዓለም፡ ዘኢየኀልቅ፡ ወዘኢይትወሀብ፡ ለካልዕ፡ ሕዝብ፡ ወመንግሥቱ፡ ይመውዕ፡ ወያገርር፡ ኵሎ፡ ነገሥተ፡ ወውእቱ፡ ይቀውም፡ ለዓለም።
45 ወዘከመ፡ ርኢከ፡ እምደብር፡ ተበትከ፡ ወወረደ፡ ዕብን፡ ዘእንበለ፡ እድ፡ ወሐረፀ፡ ልሕኵቶሂ፡ ወሐፂኖሂ፡ ወብሩሮሂ፡ ወወርቆሂ፡ አምላክ፡ ዓቢይ፡ አርአዮ፡ ለንጉሥ፡ ዘሀሎ፡ ይኩን፡ ከመዝ፡ ወእሙን፡ ሕልሙ፡ ወርቱዕ፡ ፍካሬሁ።
46 ወሶቤሃ፡ ሰገደ፡ ንጉሥ፡ ናቡደነፆር፡ በገጹ፡ ወለዳንኤልኒ፡ አክበሮ፡ ፈድፋደ፡ ወወሀቦ፡ አምኃ፡ ወመሐና።
47 ወተሰጥዎ፡ ንጉሥ፡ ለዳንኤል፡ ወይቤሎ፡ አማን፡ አምላክክሙ፡ አምላከ፡ አማልክት፡ ውእቱ፡ ወእግዚአ፡ አጋዕዝት፡ ወንጉሠ፡ ነገሥት፡ ዘይከሥት፡ ዘኅቡዕ፡ እስመ፡ ክህልከ፡ አእምሮ፡ ዘንተ፡ ዘክዱን።
48 ወአዕበዮ፡ ንጉሥ፡ ለዳንኤል፡ ወብዙኃ፡ ፈተቶ፡ ወወሀቦ፡ አብያተ፡ ወሤሞ፡ ለኵሉ፡ በሐውርተ፡ ባቢሎን፡ መልአከ፡ ወመኰንነ፡ ለኵሉ፡ ጠቢባነ፡ ባቢሎን።
49 ወሰአለ፡ ዳንኤል፡ በኀበ፡ ንጉሥ፡ ወሤሞሙ፡ ለሲድራቅ፡ ወሚሳቅ፡ ወአብደናጎ፡ ላዕለ፡ ኵሉ፡ ግብረ፡ በሐውርተ፡ ባቢሎን፡ ወዳንኤልሰ፡ ውስተ፡ ዓጸደ፡ መንግሥት።
=== chapter 3 ===
[Chapter 3]
1 ወአመ፡ ዐሠርቱ፡ ወሰመንቱ፡ ዓመተ፡ መንግሥቱ፡ ለናቡከደነፆር፡ ንጉሥ፡ ገብረ፡ ምስለ፡ ዘወርቅ፡ ኑኁ፡ ፷፡ በእመት፡ ወግድሙ፡ ስድስ፡ በእመት፡ ወአቀሞ፡ ውስተ፡ ሐቅለ፡ ዱራ፡ በሀገረ፡ ባቢሎን።
2 ወናቡከደነፆር፡ ንጉሥ፡ ለአከ፡ ያስተጋብዑ፡ መኳንንተ፡ ወመላእክተ፡ ወመሳፍንተ፡ ወመገብተ፡ ወዓበይተ፡ ወነገሥተ፡ ወኵሎ፡ ምስል፡ ዘአቀሞ፡ ናቡከደነፆር፡ ንጉሥ።
3 ወተጋብዑ፡ መኳንንት፡ ወመላእክት፡ ወመሳፍንት፡ ወመገብት፡ ዓበይት፡ ወሐበይት፡ ወነገሥት፡ ወመላእክተ፡ በሐውርት፡ ለመድቅሐ፡ ውእቱ፡ ምስል፡ ዘአቀመ፡ ናቡከደነፆር፡ ንጉሥ፡ ወቆሙ፡ ቅድመ፡ ምስል።
4 ወከልሐ፡ ዓዋዲ፡ በሕቁ፡ ለክሙ፡ ይብሉክሙ፡ አሕዛብ፡ ወሕዝብ፡ ወበሐውርት።
5 እምከመ፡ ሰማዕክሙ፡ ቃለ፡ ቀርን፡ ወዕንዚራ፡ ወመሰንቆ፡ ወብዕዛ፡ ወማኅሌተ፡ ወኵሎ፡ ንዋየ፡ ተውኔት፡ ግነዩ፡ ወስግዱ፡ ለምስል፡ ዘወርቅ፡ ዘአቀመ፡ ናቡከደነፆር፡ ንጉሥ።
6 ለዘኢገነየ፡ ወለዘኢሰገደ፡ በጊዜሃ፡ ይወድይዎ፡ ውስተ፡ ዕቶነ፡ እሳት፡ ዘይነድድ።
7 ወእምዝ፡ ሶበ፡ ሰምዑ፡ አሕዛብ፡ ቃለ፡ ቀርን፡ ወዕንዚራ፡ ወመሰንቆ፡ ወብዕዛ፡ ወማኅሌተ፡ ወንዋየ፡ ተውኔት፡ ገነዩ፡ ኵሉ፡ አሕዛብ፡ ወሕዝብ፡ ወበሐውርት፡ ወሰገዱ፡ ለምስል፡ ዘወርቅ፡ ዘአቀመ፡ ናቡከደነፆር፡ ንጉሥ።
8 ወእምዝ፡ መጽኡ፡ ሰብአ፡ ፋርስ፡ ወአስተዋደይዎሙ፡ ለአይሁድ፡ ኀበ፡ ናቡከደነፆር፡ ንጉሥ።
9 ወይቤልዎ፡ ለንጉሥ፡ ለዓለም፡ ሕየው።
10 አንተ፡ ንጉሥ፡ አዘዝከ፡ በቃልከ፡ ትእዛዘ፡ ለኵሉ፡ አሕዛብ፡ እምከመ፡ ሰምዑ፡ ቃለ፡ ቀርን፡ ወዕንዚራ፡ ወማኅሌተ፡ ወመሰንቆ፡ ወከበሮ፡ ወኵሎ፡ ተውኔተ፡ ይግነዩ፡ ወይስግዱ፡ ለምስል።
11 ወለዘኢገነየ፡ ወለዘኢሰገደ፡ ለምስል፡ ዘወርቅ፡ ይደይዎ፡ ውስተ፡ ዕቶነ፡ እሳት፡ ዘይነድድ።
12 ወይእዜኒ፡ ሀለዉ፡ ሠለስቱ፡ ዕደው፡ አይሁድ፡ እለ፡ ሤምኮሙ፡ ለግብረ፡ በሐውርተ፡ ባቢሎን፡ ሲድራቅ፡ ወሚሳቅ፡ ወአብደናጎ፡ እለ፡ አበዩ፡ ትእዛዘከ፡ ኦ፡ ንጉሥ፡ ወኢያምለኩ፡ አምላከከ፡ ወኢሰገዱ፡ ለምስል፡ ዘወርቅ፡ ዘገበርከ።
13 ወሶቤሃ፡ ተምዐ፡ ናቡከደነፆር፡ ንጉሥ፡ ወአዘዘ፡ በመዓት፡ ያምጽእዎሙ፡ ለሲድራቅ፡ ወሚሳቅ፡ ወአብደናጎ፡ ወመጽኡ፡ ቅድመ፡ ንጉሥ።
14 ወተሠጥዎሙ፡ ናቡከደነፆር፡ ንጉሥ፡ ወይቤሎሙ፡ አማንክሙኑ፡ ሲድራቅ፡ ወሚሳቅ፡ ወአብደናጎ፡ ዘኢታመልኩ፡ አምላኪየ፡ ወኢትሰግዱ፡ ለምስል፡ ዘወርቅ፡ ዘገበርኩ።
15 ወይእዜኒ፡ እመ፡ ጥቡዓን፡ አንትሙ፡ እምከመ፡ ሰማዕክሙ፡ ቃለ፡ ቀርን፡ ወዕንዚራ፡ ወመሰንቆ፡ ወማኅሌተ፡ ወከበሮ፡ ወብዕዛ፡ ወኵሎ፡ ተውኔተ፡ እስኩ፡ ለእመ፡ ኢትሰግዱ፡ ለምስል፡ ዘወርቅ፡ ዘገበርኩ፡ ወእምከመ፡ ኢትሰግዱ፡ ለምስል፡ በጊዜሃ፡ ይወድዩክሙ፡ ውስተ፡ ዕቶነ፡ እሳት፡ ዘይነድድ፡ ወመኑ፡ ውእቱ፡ እግዚአብሔር፡ ዘያድኅነክሙ፡ እምእዴየ፡ ሎቱ፡ ስብሐት።
16 ወአውሥእዎ፡ ሲድራቅ፡ ወሚሳቅ፡ ወአብደናጎ፡ ለናቡከደነፆር፡ ንጉሥ፡ ወይቤልዎ፡ ኢንፈቅድ፡ ንሕነሰ፡ ከመ፡ ንሰጠውከ፡ በዝ፡ ነገር።
17 ሀሎ፡ አምላክነ፡ ውስተ፡ ሰማይ፡ ዘናመልክ፡ ንሕነ፡ ወይክል፡ አድኅኖተነ፡ እምእዴከ፡ ወእምዕቶነ፡ እሳት፡ ዘይነድድ፡ ወያነግፈነ፡ እምእዴከ፡ ንጉሥ።
18 ከመ፡ ታእምር፡ ኦ፡ ንጉሥ፡ አምላክከሂ፡ ኢናመልክ፡ ወለምስልሂ፡ ዘወርቅ፡ ዘአቀምከ፡ ኢንሰግድ።
19 ወሶቤሃ፡ ተምዓ፡ ናቡከደነፆር፡ በሕቁ፡ ወተወለጠ፡ ርእየተ፡ ገጹ፡ በላዕለ፡ ሲድራቅ፡ ወሚቅ፡ ወአብደናጎ፡ ወአዘዘ፡ ያንድድ፡ እቶነ፡ እሳት፡ ምስብዒተ፡ እስከ፡ በሕቁ፡ ይውዒ።
20 ወአዘዘ፡ ዕደወ፡ ጽኑዓነ፡ ወኃያላነ፡ ይእሥርዎሙ፡ ለሲድራቅ፡ ወሚሳቅ፡ ወአብደናጎ፡ ወይውርውዎሙ፡ ውስተ፡ ዕቶነ፡ እሳት፡ ዘይነድድ።
21 ወሶቤሃ፡ እሙንቱ፡ ዕደው፡ አሠርዎሙ፡ ምስለ፡ ድርማንቃቲሆሙ፡ ወምስለ፡ አሣእኒሆሙ፡ ወምስለ፡ አልባሰ፡ አቊያጺሆሙ፡ ወምስለ፡ አክሊላቲሆሙ፡ ወምስለ፡ አልባሲሆሙ፡ ወወረውዎሙ፡ ውስተ፡ ዕቶነ፡ እሳት፡ ዘይነድድ፡ እስመ፡ ኀየለ፡ ቃለ፡ ንጉሥ።
22 ወአንደዱ፡ እሳተ፡ ዕቶን፡ በሕቁ።
23 ወወረዱ፡ እሉ፡ ሠለስቱ፡ ደቂቅ፡ ሲድራቅ፡ ወሚሳቅ፡ ወአብደናጎ፡ ማዕከለ፡ ዕቶነ፡ እሳት፡ ዘይነድድ፡ እንዘ፡ ዕሡራን፡ እደዊሆሙ፡ ወእገሪሆሙ።
24 ወአንሶሰዉ፡ ማዕከለ፡ እሳት፡ ወአዕኰቱ፡ እግዚአብሔርሃ፡ ወባረክዎ።
25 ወቆመ፡ አዛርያ፡ ወጸለየ፡ ከመዝ፡ ወከሠተ፡ አፉሁ፡ ማዕከለ፡ እሳት፡ ወይቤ።
26 ይትባረክ፡ እግዚአብሔር፡ አምላከ፡ አበዊነ፡ እኩት፡ ወስቡሕ፡ ስምከ፡ ለዓለም።
27 እስመ፡ ጻድቅ፡ አንተ፡ እግዚኦ፡ በኵሉ፡ ዘአምጻእከ፡ ላዕሌነ፡ ዕሙን፡ ኵሉ፡ ግብርከ፡ ወርቱዕ፡ ኵሉ፡ ፍናዊከ፡ ወጽድቅ፡ ኵሉ፡ ኵነኔከ።
28 ወገበር፡ ፍጥሐ፡ ወርትዐ፡ በኵሉ፡ ዘገበርከ፡ ለነ፡ ወዲበ፡ ሀገረ፡ አበዊነ፡ ኢየሩሳሌም፡ ቅድስት፡ እስመ፡ በኵነኔ፡ ጽድቅከ፡ አምጻእከ፡ ዘ፡ ኵሎ፡ በእንተ፡ ኃጢአትነ።
29 እስመ፡ አበስነ፡ ወጌገይነ፡ ዘኃደግናከ፡ አመፅነ፡ በኵሉ፡ ወኢሰማዕነ፡ ትእዛዝከ።
30 ኢዓቀብነ፡ ወኢገበርነ፡ በከመ፡ አዘዝከነ፡ ከመ፡ ይኩን፡ ሠናየ፡ ላዕሌነ።
31 ኵሎ፡ ዘአምጻእከ፡ ላዕሌነ፡ ወኵሎ፡ ዘገበርከ፡ ዲቤነ፡ በኵነኔ፡ ጽድቅከ፡ ገበርከ።
32 ወመጠውከነ፡ ውስተ፡ እደ፡ ፀርነ፡ ኃጥአን፡ ወዓላውያን፡ እለ፡ ርኁቃን፡ ወግሁሣን፡ እምኔከ፡ ወንጉሥ፡ ዓማፂ፡ ወእኵይ፡ እምኵሉ፡ ምድር።
33 ወይእዜኒ፡ አኮ፡ ድልወት፡ ለነ፡ ንክሥት፡ አፉነ፡ ኃፍረት፡ ወዝንጓጔ፡ ኮኖሙ፡ ለአግብርቲለ፡ ለእለ፡ ይፈርሁከ።
34 ወኢትመጥወነ፡ ለግሙራ፡ በእንተ፡ ስምከ፡ ወኢትሚጥ፡ ኪዳነከ።
35 ወኢታርኅቅ፡ ምሕረተከ፡ እምኔነ፡ በእንተ፡ አብርሃም፡ ፍቁርከ፡ ወበእንተ፡ ይስሐቅ፡ ቊልዔከ፡ ወበእንተ፡ እስራኤል፡ ቅዱስከ።
36 እለ፡ ተናገርኮሙ፡ ወትቤሎሙ፡ ከመ፡ ታብዝኅ፡ ዘርዖሙ፡ ከመ፡ ኮከበ፡ ሰማይ፡ ወከመ፡ ኆፃ፡ ዘድንጋገ፡ ባሕር።
37 እስመ፡ ውሑዳን፡ ጥቀ፡ እሙንቱ፡ እምኵሉ፡ አሕዛብ፡ ወኮነ፡ ሕሡራነ፡ በኵሉ፡ ምድር፡ ዮም፡ በእንተ፡ ኃጢአትነ።
38 አልቦ፡ በዝ፡ መዋዕል፡ መልአክ፡ ኢ፡ ነቢይ፡ ወኢ፡ ንጉሥ፡ ወኢ፡ ቊርባን፡ ወኢ፡ መሥዋዕት፡ ወኢ፡ ኀበ፡ ያጸንሕሑ፡ ዕጣነ፡ ወኢ፡ ብሔር፡ ኀበ፡ እለ፡ ይፈርዩ፡ በቅድሜከ፡ ይርከቡ፡ ሣህለከ።
39 ዘእንበለ፡ በነፍስ፡ የዋህ፡ ወበመንፈስ፡ ትሑት፡ ተወከፍ፡ ለነ።
40 ከመ፡ ዘመሥዋዕተ፡ ሐራጊት፡ ወአልህምት፡ ወከመ፡ ዘአዕላፍ፡ አባግዕ፡ ስቡሐና፡ ከማሁ፡ ይኩን፡ መሥዋዕቲነ፡ በቅድሜከ፡ ዮም፡ ወፍጹመ፡ ይኩን፡ በኀቤከ፡ ከመ፡ ኢይትኃፈሩ፡ ኵሎሙ፡ እለ፡ ይትዌከሉከ።
41 ወይእዜኒ፡ ንተልወከ፡ በኵሉ፡ ልብነ፡ ወንፈርሃከ፡ ወነኃሥሥ፡ ገጸከ፡ ዳዕሙ፡ ኢታስተሐፍረነ።
42 ወግበር፡ ምስሌነ፡ በከመ፡ ተመይጦትከ፡ ወበከመ፡ ብዝኃ፡ ምሕረትከ፡ አድኅነነ፡ በተአምሪከ፡ ሀብ፡ ስብሐተ፡ ለስምከ፡ እግዚኦ።
43 ይትኃፈሩ፡ ኵሎሙ፡ እለ፡ አርአይዎሙ፡ ሥቃየ፡ ለአግብርቲከ፡ ወይትሐፈሩ፡ በኵሉ፡ ትዕግልቶሙ፡ ወይትቀጥቀጥ፡ ኃይሎሙ።
44 ወያእምሩ፡ ከመ፡ አንተ፡ እግዚአብሔር፡ አምላክ፡ ባሕቲትከ፡ ስሕ፡ በኵሉ፡ ምድር፡ ወበኵሉ፡ ዓለም።
45 ወኢኃደጉ፡ አስተዋድዮቶሙ፡ ወአልያን፡ ኀበ፡ ንጉሥ።
46 ወውስተ፡ እሳቱ፡ ወደዩ፡ ተየ፡ ወፒሳ፡ ወሰጠጵዮነ፡ ወቀለምጼዳ።
47 ወተለዓለ፡ ነበልባል፡ እምዕቶን፡ ፵፡ ወ
48 ወያንሶሱ፡ ወያውዒ፡ ዘረከቡ፡ ኀበ፡ ዕቶኖሙ፡ ለከለዳውያን።
49 ወወረደ፡ መልአከ፡ እግዚአብሔር፡ ምስለ፡ እለ፡ አዛርያ፡ ውስተ፡ ዕቶነ፡ እሳት፡ ዘይነድድ፡ ወዘበጦ፡ ለነበልባለ፡ እሳት።
50 ወረሰዮ፡ ለነበልባለ፡ እሳት፡ ከመ፡ ነፋስ፡ ቈሪር፡ ወኢለከፎሙ፡ ወኢምንትኒ፡ ወኢሰሐጦሙ፡ ወኢያጽዓቆሙ፡ ወኢያመንደቦሙ።
51 ወሶቤሃ፡ እሙንቱ፡ ሠለስቲሆሙ፡ ኅቡረ፡ በአሐዱ፡ ልብ፡ ወበአሐዱ፡ አፍ፡ ሰብሑ፡ ወአዕኰትዎ፡ ወባረክዎ፡ ለእግዚአብሔር፡ በውስተ፡ ዕቶነ።
52 ወይቤሉ፡ ይትባረክ፡ እግዚአብሔር፡ አምላከ፡ አበዊነ፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም፡ ወይትባረክ፡ ስመ፡ ስብሐቲሁ፡ ቅዱስ፡ ስቡሕኒ፡ ውእቱ፡ ወልዑልኒ፡ ውእቱ፡ በኵሉ፡ ዓለም።
53 ቡሩክ፡ አንተ፡ በጽርሐ፡ ቅድሳተ፡ ስብሐቲከ፡ ስቡሕኒ፡ አንተ፡ ወእኵት፡ አንተ፡ ለዓለም።
54 ቡሩክ፡ አንረ፡ ዘትሬኢ፡ ቀላያተ፡ ነቢረከ፡ ላዕለ፡ ኪሩቤል፡ ስቡሕኒ፡ አንተ፡ ወልዑል፡ አንተ፡ ለዓለም።
55 ቡሩክ፡ አንተ፡ በዲበ፡ መንበረ፡ መንግሥትከ፡ ስቡሕኒ፡ አንተ፡ ወቡሩክ፡ አንተ፡ ለዓለም።
56 ቡሩክ፡ አንተ፡ በመልዕልተ፡ ሰማያት፡ ስቡሕኒ፡ አንተ፡ ወክቡር፡ አንተ፡ ለዓለም።
57 ይባርክዎ፡ ኵሉ፡ ግብረ፡ እግዚእ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
58 ይባርክዎ፡ ሰማያት፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
59 ይባርክዎ፡ መላእክተ፡ እግዚእ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
60 ይባርክዎ፡ ኵሉ፡ ማያት፡ ዘመልዕልተ፡ ሰማያት፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
61 ይባርክዎ፡ ኵሉ፡ ኃይለ፡ እግዚእ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
62 ይባርክዎ፡ ፀሐይ፡ ወወርኅ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
63 ይባርክዎ፡ ከዋክብተ፡ ሰማይ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
64 ይባርክዎ፡ ጠል፡ ወዝናም፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
65 ይባርክዎ፡ ኵሉ፡ መንፈስ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
66 ይባርክዎ፡ እሳት፡ ወላህብ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
67 ይባርክዎ፡ ሌሊት፡ ወመዓልት፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
68 ይባርክዎ፡ ጠል፡ ወዓውል፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
69 ይባርክዎ፡ ቊር፡ ወአስሐትያ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
70 ይባርክዎ፡ በርህ፡ ወጽልመት፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
71 ይባርክዎ፡ ደደክ፡ ወመርቄ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
72 ይባርክዎ፡ በረድ፡ ወጊሜ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
73 ይባርክዎ፡ መብረቅ፡ ወደመና፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
74 ትባርኮ፡ ምድር፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
75 ይባርክዎ፡ አድባር፡ ወአውግር፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
76 ይባርክዎ፡ ኵሉ፡ ዘይበቊል፡ ውስተ፡ ምድር፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
77 ይባርክዎ፡ ቀላያት፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
78 ይባርክዎ፡ ባሕር፡ ወአፍላግ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
79 ይባርክዎ፡ አንበር፡ ወኵሉ፡ ዘይትሐወስ፡ ውስተ፡ ማይ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
80 ይባርክዎ፡ ኵሉ፡ አዕዋፈ፡ ሰማይ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
81 ይባርክዎ፡ ኵሉ፡ አራዊት፡ ወእንስሳ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
82 ይባርክዎ፡ ደቂቀ፡ ዕጓለ፡ እመሕያው፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
83 ይባርክዎ፡ እስራኤል፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
84 ይባርክዎ፡ ካህናተ፡ እግዚእ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
85 ይባርክዎ፡ አግብርተ፡ እግዚእ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
86 ይባርክዎ፡ መንፈስ፡ ወነፍሰ፡ ጻድቃን፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
87 ይባርክዎ፡ ጻድቃን፡ ወትሑታነ፡ ልብ፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
88 ይባርክዎ፡ አናንያ፡ ወአዛርያ፡ ወሚሳኤል፡ ለእግዚአብሔር፡ ስቡሕኒ፡ ውእቱ፡ ወልዑልኒ፡ ውእቱ፡ ለዓለም።
89 እስመ፡ አድኃነነ፡ እምእደ፡ ሲኦል፡ ወእሞት፡ ባልሐነ፡ ወእምዕቶነ፡ እሳት፡ ዘይነድድ፡ አንገፈነ፡ ወአውፅዓነ፡ እማዕከለ፡ ነበልባል፡ ግነዩ፡ ለእግዚአብሔር፡ እስመ፡ ኄር።
90 ባርክዎ፡ ለእግዚአብሔር፡ ኵልእሙ፡ እለ፡ ትፈርህዎ፡ ለእግዚአብሔር፡ ወግነዩ፡ ለአምላከ፡ አማልክት፡ ሰብሕዎ፡ ወግነዩ፡ ሎቱ፡ እስመ፡ ለኵሉ፡ ዓለም፡ ምሕረቱ።
91 ወሰምዖሙ፡ ለናቡከደነፆር፡ እንዘ፡ ይሴብሑ፡ አንከረ፡ ወተንሥአ፡ ፍጡነ፡ ወይቤሎሙ፡ ለመገብቱ፡ አኮኑ፡ ሠለስተ፡ ዕደወ፡ ወደይነ፡ ማዕከለ፡ ዕቶነ፡ እሳት፡ ዕሡራነ፡ ወይቤልዎ፡ እወ፡ ንጉሥ።
92 ወይቤ፡ ንጉሥ፡ አንሰ፡ እሬኢ፡ ዝየ፡ አርባዕተ፡ ዕደው፡ ፍቱሐነ፡ ወያንሶስዉ፡ ማዕከለ፡ እሳት፡ ወአልቦ፡ ዘለከፎሙ፡ ወገጹ፡ ለራብዓይ፡ ከመ፡ ወልደ፡ እግዚአብሔር፡ ይመስል።
93 ወእምዝ፡ ሖረ፡ ናቡከደነፆር፡ ኀበ፡ ኆኅተ፡ እሳት፡ ዘይነድድ፡ ወይቤ፡ ሲድራቅ፡ ወሚሳቅ፡ ወአብደናጎ፡ አግብርተ፡ እግዚአብሔር፡ ልዑል፡ ንዑ፡ ፃዑ፡ ወወጽኡ፡ ሲድራቅ፡ ወሚሳቅ፡ ወአብደናጎ፡ እማዕከለ፡ እሳት።
94 ወተጋብዑ፡ መላእክት፡ ወመገብት፡ ወመኳንንት፡ ወኃያላኑ፡ ለንጉሥ፡ ወርእይዎሙ፡ ለእሙንቱ፡ ዕደው፡ ከመ፡ ኢቀረቦሙ፡ እሳት፡ ሥጋሆሙ፡ ወኢለከፎሙ፡ ስእርተ፡ ርእሶሙ፡ ወኢተወለጠ፡ ርእየተ፡ ገጾሙ፡ ወአልቦ፡ ላዕሌሆሙ፡ ፄና፡ ዘእሳት።
95 ወሰገደ፡ ንጉሥ፡ ለእግዚአብሔር፡ በቅድሜሆሙ፡ አውሥአ፡ ናቡከደነፆር፡ ወይቤ፡ ይትባረክ፡ እግዚአብሔር፡ አምላከ፡ ሲድራቅ፡ ወሚሳቅ፡ ወአብደናጎ፡ ዘፈነወ፡ መልአኮ፡ ወአድኃነ፡ ነፍሰ፡ አግብርቲሁ፡ እለ፡ ተወከሉ፡ ቦቱ፡ ወሜጡ፡ ቃለ፡ ንጉሥ፡ ወወሀቡ፡ ነፍሶሙ፡ ለእሳት፡ ከመ፡ ኢያምልኩ፡ ወኢይስግዱ፡ ለካልዕ፡ አምላክ፡ ዘእንበለ፡ አምላኮሙ።
96 ወአነሂ፡ አዘዝኩ፡ ለኵሉ፡ አሕዛብ፡ ወነገድ፡ ወበሐውርት፡ እመቦ፡ ዘጸረፈ፡ ወዘነበበ፡ ሕሡመ፡ ላዕለ፡ አምላከ፡ ሲድራቅ፡ ወሚሳቅ፡ ወአብደናጎ፡ ይትኰነን፡ ነፍሱ፡ ወይትበርበር፡ ቤቱ፡ እስመ፡ አልቦ፡ ካልዕ፡ አምላክ፡ ዘያድኅን፡ ከመዝ።
97 ወሶቤሃ፡ ሤሞሙ፡ ንጉሥ፡ ለሲድራቅ፡ ወሚሳቅ፡ ወአብደናጎ፡ ላዕለ፡ ግብረ፡ በሐውርተ፡ ባቢሎን፡ ወአዕበዮሙ፡ ወአኰነኖሙ፡ ላዕለ፡ ኵሉ፡ አይሁድ፡ እለ፡ ውስተ፡ መንግሥቱ፡ ሀለዉ።
98 ይቤ፡ ናቡከደነፆር፡ ንጉሥ፡ ለኵሉ፡ አሕዛብ፡ ወነገድ፡ ወበሐውርት፡ ወለኵሉ፡ ምድር፡ ሰላም፡ ይብዛኅ፡ ለክሙ።
99 ተአምረ፡ ወመንክረ፡ ዘገብረ፡ ሊተ፡ እግዚአብሔር፡ ልዑል፡ አደመኒ፡ ቅድሜየ፡ እንግርክሙ።
100 እስመ፡ ዓቢይ፡ ወጽኑዕ፡ ውእቱ፡ መንግሥቱ፡ መንግሥት፡ ዘለዓለም፡ ወምኵናኑኒ፡ ለትውልደ፡ ትውልድ።
=== chapter 4 ===
[Chapter 4]
1 አነ፡ ናቡከደነፆር፡ እንዘ፡ እትፌሣሕ፡ በቤትየ፡ ወእዴሎ፡ ሐለምኩ፡ ሕልመ፡ ወገረመኒ።
2 ወደንገፀኒ፡ ልብየ፡ በውስተ፡ ምስካብየ፡ እምራእየ፡ ርእስየ፡ ተሀውከኒ፡ ሕሊናየ።
3 ወአነ፡ አዘዝኩ፡ ይባዑ፡ ኀቤየ፡ ኵሎሙ፡ ጠቢባነ፡ ባቢሎን፡ ከመ፡ ይንግሩኒ፡ ፍካሬሁ፡ ለሕልምየ።
4 ወመጽኡ፡ ሰብአ፡ ሰገል፡ ወሰብአ፡ ሥራይ፡ ወማዕምራን፡ ወመፈክራን፡ ወነገርክዎሙ፡ አነ፡ ሕልምየ፡ ቅድሜሆሙ፡ ወኢይድዑኒ፡ ፍካሬሁ።
5 እስከ፡ አመ፡ ቦአ፡ ዳንኤል፡ ዘስሙ፡ ብልጣሶር፡ በስመ፡ አምላኪየ፡ ዘመንፈሰ፡ እግዚአብሔር፡ ቅዱስ፡ ላዕሌሁ።
6 ወእቤ፡ ብልጣሶር፡ መልአኮሙ፡ ለአጶይደን፡ ወአነ፡ አእመርኩ፡ ከመ፡ መንፈሰ፡ እግዚአብሔር፡ ዲቤከ፡ ወኵሉ፡ ዘኅቡዕ፡ ኢይሰዓነከ፡ ስማዕ፡ ነገረ፡ ሕልምየ፡ ዘርኢኩ፡ ወንግረኒ፡ ፍካሬሁ።
7 ርኢኩ፡ በውስተ፡ ምስካብየ፡ ወናሁ፡ ዕፅ፡ ዓቢይ፡ በውስተ፡ ማዕከለ፡ ምድር፡ ወነዊህ፡ ጥቀ።
8 ወዓቢይ፡ ዕፁ፡ ወጽኑዕ፡ ወበጽሐ፡ ቆሙ፡ እስከ፡ ሰማይ፡ ወአዕፁቂሁ፡ እስከ፡ አጽናፈ፡ ምድር።
9 ወሠናይ፡ ቆጽሉ፡ ወፍሬሁኒ፡ ብዙኅ፡ ወኵሉ፡ ይሴሰይ፡ እምኔሁ፡ ወያጸልሉ፡ ታሕቴሁ፡ አራዊተ፡ ገዳም፡ ወይነብሩ፡ ውስተ፡ አዕፁቂሁ፡ አዕዋፈ፡ ሰማይ፡ ወእምኔሁ፡ ይበልዕ፡ ኵሉ፡ ዘሥጋ።
10 ወርኢኩ፡ በራእየ፡ ሌሊት፡ በውስተ፡ ምሳካብየ፡ ወናሁ፡ ኤር፡ ቅዱስ፡ እምሰማይ፡ ወረደ፡ ወከልሐ፡ በኃይል።
11 ወከመዝ፡ ይቤ፡ ግዝምዎ፡ ለዝንቱ፡ ዕፅ፡ ወምትሩ፡ አዕፁቂሁ፡ ወንግፉ፡ ቈፅሎ፡ ወዝርዉ፡ ፍሬሁ፡ ወይትሐወኩ፡ አራዊት፡ ዘታሕቴሁ፡ ወአዕዋፍኒ፡ ዘውስተ፡ አዕፁቂሁ።
12 ዳዕሙ፡ ሥርዎ፡ ወጉንዶ፡ ኅድጉ፡ ውስተ፡ ምድር፡ በመዋቅሕተ፡ ሐፂን፡ ወብርት፡ ውስተ፡ ሐመልማል፡ ዘአፍአ፡ ወበጠለ፡ ሰማይ፡ ይንበር፡ ወምስለ፡ አራዊት፡ መክፈልቱ፡ ይኩን፡ ውስተ፡ ሣዕረ፡ ገዳም።
13 ወይትወለጥ፡ ልቡ፡ እምሰብእ፡ ወልበ፡ አርዌ፡ ይትወሀቦ።
14 ወሰብዐቱ፡ ዓመት፡ የኃልፍ፡ ላዕሌሁ፡ በኵነኔ፡ ልዑል፡ ወበቃለ፡ ቅዱስ፡ ትእዛዝ፡ ከመ፡ ያእምሩ፡ ኵሉ፡ ሕያዋን፡ ከመ፡ እግዚአብሔር፡ ይኴንን፡ መንግሥተ፡ ዕጓለ፡ እመሕያው፡ ወለዘፈቀደ፡ ይሁቦ፡ ወበትዕቢቱ፡ ለሰብእ፡ የኀሥሮ።
15 ከመዝ፡ ሕልምየ፡ ዘሐለምኩ፡ አነ፡ ናቡከደነፆር፡ ንጉሥ፡ ወአንተሰ፡ ብልጣሶር፡ ንግረኒ፡ ፍካሬሁ፡ እስመ፡ ኵሎሙ፡ ጠቢባነ፡ መንግሥትየ፡ ስዕኑ፡ ነጊሮትየ፡ ፍካሬሁ፡ ወአንተሰ፡ ዳንኤል፡ ትክል፡ ነጊሮትየ፡ ፍካሬሁ፡ እስመ፡ መንፈሰ፡ እግዚአብሔር፡ ቅዱስ፡ ላዕሌከ።
16 ወሶቤሃ፡ ዳንኤል፡ ዘስሙ፡ ብልጣሶር፡ ሐለየ፡ መጠነ፡ አሐቲ፡ ሰዓት፡ ወተሰጥወ፡ ብልጣሶር፡ ወይቤ፡ እግዚእየ፡ ይኩን፡ ሕልምከ፡ ላዕለ፡ ጸላዕትከ፡ ወፍካሬሁኒ፡ ለፀርከ።
17 ዕፅ፡ ዘርኢከ፡ ዓቢይ፡ ወጽኑዕ፡ ወበጽሐ፡ ኑኁ፡ ሰማየ፡ ወስፍሑ፡ እስከ፡ አጽናፈ፡ ምድር።
18 ወቈጽሉኑ፡ ፅፉቅ፡ ወፍሬሁኒ፡ ብዙኅ፡ ወኵሉ፡ ይሴሰይ፡ እምኔሁ፡ ወይነብሩ፡ ታሕቴሁ፡ አራዊተ፡ ገዳም፡ ወያጸልሉ፡ ኀበ፡ አዕፁቂሁ፡ አዕዋፈ፡ ሰማይ።
19 አንተ፡ ውእቱ፡ ንጉሥ፡ ዘዓበይከ፡ ወጸናዕከ፡ ወፈድፈደ፡ ዕበይከ፡ ወበጽ፡ እስከ፡ ሰማይ፡ ወኵነኔከ፡ እስከ፡ አጽናፈ፡ ምድር።
20 ወዝኒ፡ ዘርኢከ፡ ንጉሥ፡ ኤር፡ ቅዱስ፡ ወረደ፡ እምሰማይ፡ ወይቤ፡ ግዝምዎ፡ ለዝ፡ ዕፅ፡ ወዳዕሙ፡ ሥርዎ፡ ወጉንዶ፡ ኅድጉ፡ ውስተ፡ ምድር፡ ወበመዋቅሕተ፡ ሐፂን፡ ወብርት፡ ውስተ፡ ሐመልማል፡ ዘአፍአ፡ ይንበር፡ በጠለ፡ ሰማይ፡ ወምስለ፡ አራዊተ፡ ገዳም፡ መክፈልቱ፡ ይኩን፡ ወውስተ፡ ሣዕረ፡ ገዳም፡ ይትረአይ፡ እስከ፡ የኃልፍ፡ ሰብዐቱ፡ ዓመት፡ ላዕሌሁ።
21 ዝ፡ ውእቱ፡ ፍካሬሁ፡ ንጉሥ፡ ኵነኔ፡ ልዑል፡ በጽሖ፡ ለእግዚእየ፡ ንጉሥ።
22 ወይሰድዱከ፡ እምሰብእ፡ ወትነብር፡ ምስለ፡ አራዊተ፡ ገዳም፡ ወትትረአይ፡ ሣዕረ፡ ከመ፡ ላህም፡ ወትነብር፡ ኀበ፡ ጠለ፡ ሰማይ፡ ወሰብዐቱ፡ ዓመት፡ የኀልፍ፡ ላዕሌከ፡ እስከ፡ ተአምር፡ ከመ፡ ልዑል፡ ይኴንን፡ መንግሥተ፡ ዕጓለ፡ እመሕያው፡ ወለዘፈቀደ፡ ይሁቦ።
23 ወዝኒ፡ ዘይቤ፡ ኅድጉ፡ ሥርዎ፡ ወጕንዶ፡ ለዕፅ፡ ውስተ፡ ምድር፡ መንግሥትከ፡ ለከ፡ ይፀንሐከ፡ እስከ፡ ተአምር፡ ኵነኔ፡ ዘእምሰማይ።
24 በእንተዝ፡ ንጉሥ፡ ያሥምርከ፡ ምክርየ፡ በምጽዋት፡ ወበጽድቅ፡ ትድኅን፡ ወኃጢአትከኒ፡ በምሒረ፡ ነዳይ፡ እስከ፡ ይሠሪ።
25 ዝ፡ ኵሉ፡ በጽሖ፡ ለናቡከደነፆር፡ ንጉሥ።
26 እምድኅረ፡ ዐሠርቱ፡ ወክልኤቱ፡ ወርኅ፡ መጽአ፡ ወበጽሐ፡ ኀበ፡ ጽርሐ፡ መንግሥቱ፡ ዘባቢሎን።
27 እንዘ፡ ያንሶሱ፡ ተሰጥወ፡ ንጉሥ፡ ወይቤ፡ አኮኑ፡ ዛቲ፡ ባቢሎን፡ ዓባይ፡ እንተ፡ ሐመፅኩ፡ ለቤተ፡ መንግሥትየ፡ በጽንዓ፡ ኃይልየ፡ ወለትርሢተ፡ ክብርየ።
28 እንዘ፡ ዓዲሁ፡ ቃል፡ ውስተ፡ አፈ፡ ንጉሥ፡ መጽአ፡ ቃል፡ እምሰማይ፡ ለከ፡ ይብለከ፡ ናቡከደነፆር፡ ንጉሥ፡ ኀለፈት፡ መንግሥትከ፡ እምኔከ።
29 ወይሰድዱከ፡ እምሰብእ፡ ወትነብር፡ ምስለ፡ አራዊተ፡ ገዳም፡ ወትትረአይ፡ ሣዕረ፡ ከመ፡ ላህም፡ ወየኃልፍ፡ ላዕሌከ፡ ሰብዐቱ፡ ዓመት፡ እስከ፡ ተአምር፡ ከመ፡ ልዑል፡ ይኴንን፡ መንግሥተ፡ ዕጓለ፡ እመሕያው፡ ወለዘፈቀደ፡ ይሁቦ።
30 ወውእተ፡ ጊዜ፡ በጽሖ፡ ለናቡከደነፆር፡ ዝ፡ ነገር፡ ወሰደድዎ፡ እምሰብእ፡ ወተርእየ፡ ሣዕረ፡ ከመ፡ ላህም፡ ወተሤረየ፡ ሥጋሁ፡ እምጠለ፡ ሰማይ፡ እስከ፡ ልሕቀ፡ ስእርቱ፡ ከመ፡ ዘአንበሳ፡ ወጽፈሪሁኒ፡ ከመ፡ ዘንስር።
31 ወእምድኅረ፡ እማንቱ፡ መዋዕል፡ አነ፡ ናቡከደነፆር፡ አንሣዕኩ፡ አዕይንትየ፡ ውስተ፡ ሰማይ፡ ወገብዓኒ፡ ልብየ፡ ወባረክዎ፡ ለልዑል፡ ወአዕኰትክዎ፡ ለዘሕያው፡ ለዓለም፡ ወመንግሥቱኒ፡ ለትውልደ፡ ትውልድ።
32 ወኵሎሙ፡ እለ፡ ይነብሩ፡ ውስተ፡ ምድር፡ ከመ፡ ወኢምንት፡ እሙንቱ፡ ወይገብር፡ በከመ፡ ፈቀደ፡ በኃይለ፡ ሰማይ፡ ወበዘሂ፡ ይነብር፡ ዲበ፡ ምድር፡ ወአልቦ፡ ዘይትቃወማ፡ ለእዴሁ፡ ወይቤሎ፡ ምንተ፡ ገበርከ።
33 ይእተ፡ ጊዜ፡ ገብዓኒ፡ ልብየ፡ ወመጻዕኩ፡ ውስተ፡ ክብረ፡ መንግሥትየ፡ ወተሠውጠ፡ ሕሊናየ፡ ወራእይየ፡ ወኃሠሡኒ፡ መገብትየ፡ ወመላእክትየ፡ ጸናዕኩ፡ በውስተ፡ መንግሥትየ፡ ወተወሰኩ፡ ዕበየ፡ ፈድፋደ።
34 ወይእዜኒ፡ አነ፡ ናቡከደነፆር፡ እሴብሖ፡ ወአእኵቶ፡ ለእግዚአብሔር፡ ወአልዕሎ፡ ለንጉሠ፡ ሰማይ፡ እስመ፡ ጽድቅ፡ ኵሉ፡ ግብሩ፡ ወርቱዕ፡ ፍናዊሁ፡ መንግሥቱ፡ ለዘለዓለም፡ ወምኵናኑኒ፡ ለትውልደ፡ ትውልድ፡ ወለኵሎሙ፡ እለ፡ የሐውሩ፡ በትዕቢት፡ ይክል፡ አኅሥሮቶሙ።
=== chapter 5 ===
[Chapter 5]
1 ወብልጣሶር፡ ንጉሥ፡ ገብረ፡ ምስሐ፡ ለመገብቱ፡ ወአስተጋብአ፡ ዐሠርቱ፡ ምእት፡ ብእሴ፡ ወአስተየ፡ ወይነ፡ ለዐሠርቱ፡ ምእት፡ ዕደው።
2 ወእንዘ፡ ይሰቲ፡ ወይነ፡ ብልጣሶር፡ ሰኪሮ፡ ይቤ፡ ያምጽኡ፡ ንዋየ፡ ወርቅ፡ ወብሩር፡ ዘአምጽኦ፡ ናቡከደነፆር፡ አቡየ፡ እምቤተ፡ መቅደስ፡ ዘኢየሩሳሌም፡ ወይስተዩ፡ ቦቱ፡ ንጉሥ፡ ወመገብቱ፡ ወአንስቲያሁ፡ ወዕቊባቲሁ።
3 ወአምጽኡ፡ ንዋየ፡ ወርቅ፡ ወብሩር፡ ዘአውጽኡ፡ እምቤተ፡ መቅደስ፡ ዘኢየሩሳሌም፡ ወሰትዩ፡ ቦቱ፡ ወይነ፡ ንጉሥ፡ ወመገብቱ፡ ወአንስቲያሁ፡ ወዕቊባቲሁ።
4 ወአእኰቱ፡ አማልክቲሆሙ፡ ዘወርቅ፡ ወዘብሩር፡ ወዘብርት፡ ወዘሐፂን፡ ወዘዕፅ፡ ወዘልሕኵት።
5 ወበይእቲ፡ ሰዓት፡ ወጽአት፡ አፅባዕተ፡ እደ፡ ሰብእ፡ ወጸሐፈት፡ ቅድመ፡ ኆኅት፡ ኀበ፡ ምረገ፡ ዓረፍት፡ ዘቤተ፡ ንጉሥ፡ ወርእየ፡ ንጉሥ፡ አፅባዕተ፡ እደ፡ ሰብእ፡ እንዘ፡ ትጽሕፍ።
6 ወሶቤሃ፡ ጸልመ፡ ገጹ፡ ለንጉሥ፡ ወደንገፆ፡ ልቡ፡ ወተፈትሐ፡ መሌሊተ፡ ሐቌሁ፡ ወተጐድዐ፡ ብረኪሁ።
7 ወዓውየወ፡ ንጉሥ፡ በቃሉ፡ ከመ፡ ያምጽኡ፡ ሎቱ፡ መሠርያነ፡ ወሰብአ፡ ሰገል፡ ወይቤሎሙ፡ ለጠቢባነ፡ ባቢሎን፡ ዘአንበቦ፡ ለዝንቱ፡ መጽሐፍ፡ ወነገረኒ፡ ፍካሬሁ፡ አለብሶ፡ ሜላተ፡ ወአዓንቆ፡ ባዝግና፡ ወርቅ፡ ውስተ፡ ክሣዱ፡ ወእሠይሞ፡ መኰንነ፡ በውስተ፡ ሣልስተ፡ እደ፡ መንግሥትየ።
8 ወቦኡ፡ ኵሎሙ፡ ጠቢባነ፡ ባቢሎን፡ ወስዕኑ፡ አንብቦ፡ መጽሐፍ፡ ወፍካሬሁኒ፡ ኢነገርዎ፡ ለንጉሥ።
9 ወደንገፀ፡ ብልጣሶር፡ ንጉሥ፡ ወጸልመ፡ ገጹ፡ ወደንገፁ፡ መገብቱሂ።
10 ወቦአት፡ ንግሥት፡ ቤተ፡ ምሳሕ፡ ወትቤሎ፡ ለንጉሥ፡ ለዓለም፡ ሕየው፡ ኢይደንግፅከ፡ ልብከ፡ ወኢይጽልም፡ ገጽከ።
11 ሀሎ፡ አሐዱ፡ ብእሲ፡ ውስተ፡ መንግሥትከ፡ ዘቦ፡ ላዕሌሁ፡ መንፈሰ፡ እግዚአብሔር፡ ቅዱስ፡ ወበመዋዕለ፡ አቡከኒ፡ ተረክበ፡ ላዕሌሁ፡ ጥበብ፡ ወነገሮ፡ ሕልዎ፡ ወፍካሬሁ፡ ወሤሞ፡ ንጉሥ፡ ናቡከደነፆር፡ አቡከ፡ መልአከ፡ ጠቢባን፡ ወማዕምራን፡ ወሰብአ፡ ሰገል፡ ወሰብአ፡ ሥራይ።
12 እስመ፡ ፈድፈደ፡ መንፈስ፡ ዘላዕሌሁ፡ ወጥበብ፡ ዘውስተ፡ ፍካሬ፡ ሕልም፡ ወይነግር፡ ዘኅቡዕ፡ ወይፈትሕ፡ ዘሥውር፡ ዝውእቱ፡ ዳንኤል፡ ወንጉሥ፡ ሰመዮ፡ ብልጣሶር፡ ወይእዜኒ፡ ለአክ፡ ይጸውዕዎ፡ ለከ፡ ወይነግረከ፡ ፍካሬሁ።
13 ወሶቤሃ፡ ጸውእዎ፡ ወቦአ፡ ዳንኤል፡ ቅድመ፡ ንጉሥ፡ ወይቤሎ፡ ንጉሥ፡ ለዳንኤል፡ አንተኑ፡ ዳንኤል፡ ዘእምደቂቀ፡ ፄዋ፡ ይሁዳ፡ ዘአምጽአ፡ ንጉሥ፡ እምይሁዳ።
14 ሰማዕኩ፡ በእንቲአከ፡ ከመ፡ መንፈሰ፡ እግዚአብሔር፡ ላዕሌከ፡ ጥበብ፡ ወምክር፡ ወፍካሬ፡ ፈድፋደ፡ ተረክበ፡ ላዕሌከ።
15 ወይእዜኒ፡ ቦኡ፡ ቅድሜየ፡ ጠቢባን፡ ወሰብአ፡ ሰገል፡ ወማዕምራን፡ ያንብቡ፡ ዘ፡ መጽሐፈ፡ ወያይድዑኒ፡ ፍካሬሁ፡ ወስዕኑ፡ አንብቦቶ፡ ወፍካሬሁ።
16 ወሰማዕኩ፡ አነ፡ በእንቲአከ፡ ከመ፡ ትክል፡ ፈክሮ፡ ወይእዜኒ፡ እመ፡ ክህልከ፡ አንብቦቶ፡ ለዝንቱ፡ መጽሐፍ፡ ወአይዳዕከኒ፡ ፍካሬሁ፡ ሜላተ፡ አለብሰከ፡ ወአዓንቀከ፡ ቃማ፡ ወርቅ፡ ውስተ፡ ክሣድከ፡ ወትኴንን፡ ሣልስተ፡ እደ፡ መንግሥትየ።
17 ወይቤ፡ ዳንኤል፡ ቅድመ፡ ንጉሥ፡ ሀብትከኒ፡ ለከ፡ ይኩንከ፡ ወፍተ፡ መንግሥትከሂ፡ ሀብ፡ ለባዕድ፡ ወአነ፡ አነብቦ፡ ለዝንቱ፡ መጽሐፍ፡ ወእነግረከ፡ ፍካሬሁ።
18 ኦ፡ ንጉሥ፡ እግዚአብሔር፡ ልዑል፡ ወሀቦ፡ መንግሥተ፡ ወክብረ፡ ወዕበየ፡ ወግርማ፡ ለናቡከደነፆር፡ አቡከ።
19 ወእምነ፡ ዕበዩ፡ ዘወሀቦ፡ ኵሉ፡ አሕዛብ፡ ወበሐውርት፡ ወሕዝብ፡ ይርዕዱ፡ እምኔሁ፡ ወይፈርሁ፡ እምቅድመ፡ ገጹ፡ ዘፈቀደ፡ ይቀትል፡ ወዘፈቀደ፡ ይቀሥፍ፡ ወዘፈቀደ፡ ያከብር፡ ወዘፈቀደ፡ የኀሥር።
20 ወአመ፡ አዕበየ፡ ልቦ፡ ወአጽዐ፡ ነፍሶ፡ ከመ፡ ይትዓበይ፡ ወድቀ፡ እምዕበየ፡ መንግሥቱ፡ ወኃሠረ፡ እምክብሩ።
21 ወተሰደ፡ እምሰብእ፡ ወነበረ፡ ምስለ፡ ሐለስትዮታት፡ ወተርእየ፡ ሣዕረ፡ ከመ፡ ላህም፡ ወተሴረየ፡ ነፍስቱ፡ እምጠለ፡ ሰማይ፡ እስከ፡ አእመረ፡ ከመ፡ ልዑል፡ ይኴንን፡ መንግሥተ፡ ዕጓለ፡ እመሕያው፡ ወለዘፈቀደ፡ ይሁብ።
22 ወአንተኒ፡ ወልዱ፡ ብልጣሶር፡ ኢያትሐትከ፡ ልበከ፡ ቅድመ፡ እግዚአብሔር፡ ወዘንተ፡ ኵሎ፡ ኢያእመርከ።
23 ወተዓበይከ፡ ላዕለ፡ እግዚአብሔር፡ አምላክከ፡ አምላከ፡ ሰማይ፡ ወንዋየ፡ ቤቱ፡ አምጻእከ፡ ቅድሜከ፡ አንተ፡ ወመገብትከ፡ ወአንስቲያከ፡ ወዕቊባቲከ፡ ሰተይክሙ፡ ቦቱ፡ ወይነ፡ ወአማልክቲከ፡ ዘወርቅ፡ ወዘብሩር፡ ወብርት፡ ወዘሐፂን፡ ወዕፅ፡ ወዕብን፡ እለ፡ ኢይሰምዑ፡ ወኢይሬዕዩ፡ ወኢየአምሩ፡ አእኰትከ፡ ወለእግዚአብሔርሰ፡ ዘውስተ፡ እሁ፡ መንፈስከ፡ ወኵሉ፡ ፍናዊከ፡ ኢያዕኰትኮ።
24 ወበእንተዝ፡ እምኀቤሁ፡ ፈነወ፡ አፅባዕተ፡ እድ።
25 ወዝ፡ መጽሐፍ፡ ዘተአዘዘ፡ ማኔ፡ ቴቄል፡ ፋሬስ።
26 ወከመዝ፡ ፍካሬሁ፡ ማኔ፡ ብሂል፡ ሰፈራ፡ እግዚአብሔር፡ ለመንግሥትከ፡ ወሠለጣ።
27 ቴቄል፡ ደለዋ፡ በመዳልው፡ ወተረክበት፡ ሕፅፅተ።
28 ፋሬስ፡ ተሥዕረት፡ መንግሥትከ፡ ወተውህበት፡ ከሜዶን፡ ወፋርስ።
29 ወአዘዘ፡ ብልጣሶር፡ ያልብስዎ፡ ሜላተ፡ ለዳንኤል፡ ወአልበስዎ፡ ወአዕነቅዎ፡ ቃማ፡ ወርቅ፡ ዲበ፡ ክሣዱ፡ ወሰበኩ፡ ሎቱ፡ ከመ፡ ይኩን፡ ሣልስተ፡ እደ፡ መንግሥቱ።
30 ወበይእቲ፡ ሌሊት፡ ሞተ፡ ብልጣሶር፡ ንጉሠ፡ ከላውዴዎን።
31 ወዳርዮስ፡ ሜዶናዊ፡ ነግሠ፡ ህየንቴሁ፡ እንዘ፡ ስድሳ፡ ወክልኤቱ፡ ክረምቱ።
=== chapter 6 ===
[Chapter 6]
1 ወአደሞ፡ ዳንኤል፡ በቅድሜሁ፡ ለዳርዮስ፡ ወሤመ፡ በውስተ፡ መንግሥቱ፡ ምእተ፡ ወ፳፡ መሳፍንተ፡ ከመ፡ የሀልዉ፡ ውስተ፡ ኵሉ፡ መንግሥቱ።
2 ወእለ፡ ይትሌዓሉ፡ እምኔሆሙ፡ ሠለስቱ፡ ነገሥት፡ ወአሐዱ፡ እምኔሆሙ፡ ዳንኤል፡ ከመ፡ ኀቤሁ፡ ያግብዑ፡ ነገሥት፡ ናሥታ፡ ወኢያጽብዎ፡ ለንጉሥ፡ ወኢበምንትኒ።
3 ወዳንኤል፡ የዓቢ፡ እምኔሆሙ፡ እስመ፡ ፈድፈደ፡ መንፈስ፡ ዘላዕሌሁ፡ ወሤሞ፡ ንጉሥ፡ ላዕለ፡ ኵሉ፡ መንግሥቱ።
4 ወኃሠሡ፡ ሎቱ፡ ምክንያተ፡ ለዳንኤል፡ መገብት፡ ወመኳንንት፡ በዘያስተዋድይዎ፡ ወኢረከቡ፡ ምክንያተ፡ ለዳንኤል፡ ወኢምንተኒ፡ ወኢጌጋየ፡ እስመ፡ ምዕመን፡ ውእቱ።
5 ወይቤሉ፡ መገብት፡ ኢንረክብ፡ ሎቱ፡ ምክንያተ፡ ለዳንኤል፡ ዘእበለ፡ በሕገ፡ አምላኩ።
6 ወእምዝ፡ ተጋብዑ፡ መገብት፡ ወመኳንንት፡ ኀበ፡ ንጉሥ፡ ወይቤልዎ፡ ሕየው፡ ንጉሥ፡ ዳርዮስ፡ ለዓለም።
7 ወተማከሩ፡ ምክረ፡ መላእክት፡ ወመሳፍንት፡ ወመገብት፡ ኵሎሙ፡ እለ፡ ውስተ፡ መንግሥትከ፡ ወዓደሙ፡ ዕድሜ፡ ከመ፡ አልቦ፡ ዘይስእል፡ ኀበ፡ ኵሉ፡ አማልክት፡ ወሰብእ፡ እስከ፡ ሠሉስ፡ ዕለት፡ ዘእንበለ፡ ኀቤከ፡ ንጉሥ፡ ላዕለ፡ ኵሉ፡ መንግሥትከ፡ ወእመ፡ አኮ፡ ይደይዎ፡ ውስተ፡ ግበ፡ አናብስት።
8 ይእዜኒ፡ ንጉሥ፡ አዝዝ፡ ዕድሜ፡ ወጸሐፍ፡ ከመ፡ ኢይዕበዩ፡ ፋርስ፡ ወሜዶን፡ ሥርዓተከ።
9 ወሶቤሃ፡ አዘዘ፡ ዳርዮስ፡ ይጽሐፉ፡ ዘንተ፡ ሥርዓተ።
10 ወአእሚሮ፡ ዳንኤል፡ ከመ፡ ተአዘዘ፡ ዝንቱ፡ ሥርዓት፡ ቦአ፡ ቤቶ፡ ወአርኃወ፡ መሳክወ፡ ጽርሑ፡ አንፃረ፡ ኢየሩሳሌም፡ በጊዜ፡ ሠለስቱ፡ ሰዓት፡ ዘዕለት፡ ሰገደ፡ ጸለየ፡ ወተጋነየ፡ ለእግዚአብሔር፡ በከመ፡ ያለምድ፡ ቅድመ።
11 ወለዓይኒ፡ ግብር፡ ያስተሐይፅዎ፡ ዘልፈ፡ እሙንቱ፡ ዕደው፡ ወረከብዎ፡ ለዳንኤል፡ እንዘ፡ ያስተበቊ፡ ለአምላኩ፡ ወይጼሊ።
12 ወሖሩ፡ ወይቤልዎ፡ ለንጉሥ፡ አኮኑ፡ አንተ፡ አደምከ፡ ከመ፡ ኢይስዓል፡ ኵሉ፡ ሰብእ፡ ኀበ፡ ኵሉ፡ አማልክት፡ ወሰብእ፡ እስከ፡ ሠላስ፡ ዕለት፡ ዘእንበለ፡ ኀቤከ፡ ንጉሥ፡ እመቦ፡ ዘተረክበ፡ ይደይዎ፡ ውስተ፡ ግበ፡ አናብስት፡ ወይቤ፡ ንጉሥ፡ እሙን፡ ዝነገር፡ ወኢይትነሠት፡ ሥርዓተ፡ ፋርስ፡ ወሜዶን።
13 ወአውሥኡ፡ ወይቤሉ፡ ቅድመ፡ ንጉሥ፡ ናሁ፡ ዳንኤል፡ ዘእምደቂቀ፡ ፄዋ፡ ይሁዳ፡ ዓበየ፡ ወኢሰምዓ፡ ትእዛዝከ፡ ወጊዜ፡ ሠለስቱ፡ ሰዓት፡ ዘዕለት፡ ሰአለ፡ ኀበ፡ አምላኩ፡ ስዕለቶ።
14 ወሰሚዖ፡ ንጉሥ፡ ዘንተ፡ ነገረ፡ ተከዘ፡ ጥቀ፡ ወተበአሰ፡ ከመ፡ ያድኅኖ፡ ለዳንኤል፡ እምነግህ፡ እስከ፡ ሠርክ፡ ፈቀደ፡ ያድኅኖ፡ ወስዕነ።
15 ወይቤሉ፡ እሙንቱ፡ ዕደው፡ ሶቤሃ፡ ለንጉሥ፡ አእምር፡ ንጉሥ፡ ከመ፡ ዕድሜ፡ ፋርስ፡ ወሜዶን፡ ዘዓደሙ፡ ወሠርዑ፡ ዓበየ።
16 ወእምዝ፡ አዘዘ፡ ንጉሥ፡ ያምጽእዎ፡ ለዳንኤል፡ ወይደይዎ፡ ውስተ፡ ግበ፡ አናብስት፡ ወይቤሎ፡ ንጉሥ፡ ለዳንኤል፡ አምላክከ፡ ዘኪያሁ፡ ታመልክ፡ ዘልፈ፡ ለያድኅከ።
17 ወወረውዎ፡ ወአምጽኡ፡ ዕብነ፡ ወከደኑ፡ ዲበ፡ አፈ፡ ግብ፡ ወኃተመ፡ ንጉሥ፡ በሕልቀቱ፡ ወበሕልቀተ፡ መገብቱ፡ ከመ፡ አልቦ፡ ዘይትሜየን፡ ላዕለ፡ ዳንኤል።
18 ወአተወ፡ ንጉሥ፡ ቤቶ፡ ወኖመ፡ ዘእንበለ፡ ይደረር፡ ወኢያብዑ፡ ሎቱ፡ ዘይበልዕ፡ ወዓበዮ፡ ንዋም፡ ወዓፀወ፡ እግዚአብሔር፡ አፉሆሙ፡ ለአናብስት፡ ወኢሠሐጥዎ፡ ለዳንኤል።
19 ወእምዝ፡ ጌሠ፡ ንጉሥ፡ በጽባሕ፡ ቅድመ፡ ጎሕ፡ ወሮፀ፡ ኀበ፡ ግበ፡ አናብስት።
20 ወበጺሖ፡ ኀበ፡ ግብ፡ ከልሐ፡ በዓቢይ፡ ቃል፡ ወይቤ፡ ዳንኤል፡ ገብረ፡ እግዚአብሔር፡ ሕያው፡ አምላክከ፡ ዘኪያሁ፡ ታመልክ፡ ዘልፈ፡ ክህለኑ፡ አድኅኖተከ፡ እምአፈ፡ አናብስት።
21 ወይቤሎ፡ ዳንኤል፡ ለንጉሥ፡ ንጉሥ፡ ለዓለም፡ ሕየው።
22 አምላኪየ፡ ፈነወ፡ መልአኮ፡ ወፈጸመ፡ አፈ፡ አናብስት፡ ወአድኃነኒ፡ ወኢሠሐጡኒ፡ ወኢክህሉኒ፡ እስመ፡ ተረክቡ፡ ሊተ፡ ጽድቅ፡ በቅድሜሁ፡ ወቅድሜከኒ፡ ኦ፡ ንጉሥ፡ ኢገበርኩ፡ እኩየ።
23 ወሶቤሃ፡ ተፈሥሑ፡ ንጉሥ፡ ጥቀ፡ በእንቲአሁ፡ ወአዘዘ፡ ያውጽእዎ፡ ለዳንኤል፡ እምግበ፡ አናብስት፡ ወወጽአ፡ ዳንኤል፡ እምግብ፡ ወኢተነክየ፡ ምንተኒ፡ ወኢተረክበ፡ ሕሱም፡ ላዕሌሁ፡ እስመ፡ ተአመነ፡ በአምላኩ።
24 ወይቤ፡ ንጉሥ፡ ያምጽእዎሙ፡ ለእሙንቱ፡ ዕደው፡ እለ፡ አስተዋደይዎ፡ ለዳንኤል፡ ወወደይዎሙ፡ ውስተ፡ ግበ፡ አናብስት፡ ለእሙንቱ፡ ወለደቂቆሙ፡ ወለአንስቲያሆሙ፡ ወዘእንበለ፡ ይብጽሑ፡ ምድረ፡ ግብ፡ አኃዝዎሙ፡ አናብስት፡ ወቀጥቀጥዎሙ፡ ኵሎ፡ አዕፅምቲሆሙ።
25 ወእምዝ፡ ጸሐፈ፡ ዳርዮስ፡ ንጉሥ፡ ለኵሉ፡ አሕዛብ፡ ወሕዝብ፡ ወበሐውርት፡ ወለኵሉ፡ እለ፡ ይነብሩ፡ ውስተ፡ ምድር፡ ሰላም፡ ይብዛኅ፡ ለክሙ፡ እምቅድመ፡ ገጽየ።
26 አዘዝኩ፡ ለኵሉ፡ መኳንንት፡ ዘውስተ፡ መንግሥት፡ ከመ፡ ይፍርሁ፡ ወይርዓዱ፡ እምቅድመ፡ ገጹ፡ ለአምላከ፡ ዳንኤል፡ እስመ፡ ውእቱ፡ አምላክ፡ ሕያው፡ ዘይሄሉ፡ ለዓለም፡ ዘኢይማስን፡ መንግሥቱ፡ ወምኵናኑኒ፡ ለዝሉፉ።
27 ያድኅነሂ፡ ወይረድእሂ፡ ወይገብር፡ ተአምራተ፡ ወመንክራተ፡ በሰማይ፡ ወበምድር፡ ዘአድኃኖ፡ ለዳንኤል፡ እምአፈ፡ አናብስት።
28 ወዓብየ፡ ዳንኤል፡ በመንግሥተ፡ ዳርዮስ፡ ወበመንግሥተ፡ ቂሮስ፡ ፋርሳዊ።
=== chapter 7 ===
[Chapter 7]
1 ራእይ፡ በቀዳማዊ፡ ዓመተ፡ መንግሥቱ፡ በበልጣሰር፡ ንጉሠ፡ ከለዴዎን፡ ሐለመ፡ ዳንኤል፡ ሕልመ፡ ወርእየ፡ ርእሶ፡ በውስተ፡ ምስካቡ፡ ወጸሐፈ፡ ሕለሞ።
2 አነ፡ ደንኤል፡ ሐለምኩ፡ ወርኢሉ፡ አርባዕተ፡ ነፋሳተ፡ ነፍኁ፡ ወሰተ፡ ባሕር፡ ዐቢይ።
3 ወዐርጉ፡ አራዊት፡ ወበይት፡ እምባሕር፡ ኅቡረ።
4 ወቀዳማዊ፡ ከመ፡ አንበሳዊት፡ ወባቲ፡ ክንፈ፡ ወክነፊሃኒ፡ ከመዘ፡ ንስር፡ ወርኢክዋ፡ እንከ፡ ተመልኀ፡ ክነፊሃ፡ ወተንሥአት፡ ወቆመትበእግረ፡ ሰብእ፡ ዲበ፡ ምድር፡ ወልበ፡ ሰብእ፡ ተውህበ፡ ላቲ።
5 ወመጽአ፡ ካልእ፡ አርዌ፡ ወይመስል፡ ድበ፡ ወቆመ፡ አሐዱ፡ ገጹወሠለስቱ፡ ገበዋቲሃ፡ ውስተ፡ አፉሃ፡ ማእከለ፡ አስናኒሃ፡ ወከመዝ፡ እቤላ፡ ተንሥኢ፡ ብልዒ፡ ሥጋ፡ ብዙኀ።
6 ወእምድኅረ፡ ዝንቱ፡ ርኢኩ፡ ካልአ፡ አርዌ፡ ከመ፡ ነምር፡ ወላዕሌሃ፡ ኀምስቱ፡ ክንፈ፡ ዖፍ፡ ወአርባዕቱ፡ አርእስቲሃ፡ ለአርዌሁ፡ ወተውህበ፡ ሎቱ፡ መባሕት።
7 ወድኅሬሁ፡ ሎቱ፡ ርኢኩ፡ ራብዕ፡ ወመደንግፅ፡ ወኀያል፡ ጥቀ፡ ወስነኒሁ፡ ዘኀጺን፡ ይበልዕ፡ ወየሐርጽ፡ ወዘተርፈ፡ ይከይድ፡ በእግሩ፡ ወውአቱ፡ የዐቢ፡ እምኵሉ፡ አራዊት፡ ዘቅድሜሁ፡ ዐሠርቱ፡ አቅርንቲሁ።
8 ወነጸርኩ፡ አቅርንቲሁ፡ ወናሁ፡ ካልእ፡ ቀርን፡ ንኡስ፡ በቈለ፡ በማእከሎሙ፡ ወሠለስቱ፡ አቅርንቲሁ፡ እለ፡ ቅድሜሁ፡ ተመልኀ፡ እምቅድመ፡ ገጹ፡ ወውስቴቱ፡ አዕይንት፡ ከመ፡ አዕይንተ፡ ሰብእ፡ ውስተ፡ ውእቱ፡ ቀርን፡ ወአፉሁ፡ ይነብብ፡ ዐቢያተ።
9 ወርኢኩ፡ እስከ፡ አንበሩ፡ መናብርተ፡ ወነበረ፡ ብሉየ፡ መዋዕል፡ ወልብሱ፡ ጻዕዳ፡ ከመ፡ በረድ፡ ወሥዕርተ፡ ርእሱ፡ ከመ፡ ፀምር፡ ወመንበሩሂ፡ እሳት፡ ዘይነድድ፡ ወሰረገላቲሁኒ፡ አፍሓም፡ ዘያንበለብል።
10 ወፈለገ፡ እሳት፡ ይውሕዝ፡ ቅድሜሁ፡ አእላፈ፡ አእላፍ፡ ይትለአክዎ፡ ወምእልፊት፡ አእላፍ፡ ይቀውሙ፡ ቅድሜሁ፡ ወነበረ፡ ዐውደ፡ ወከሠቱ፡ መጻሕፍተ።
11 ወርኢኩ፡ ሶቤሃ፡ እምቃለ፡ ነገሩ፡ ዐቢይ፡ ዘይነብብ፡ ዝኩ፡ ቀርን፡ እስከ፡ ተአተተ፡ ዝኩ፡ አርዌ፡ ወጠፍአ፡ ወወሀቡ፡ ሥጋሁ፡ ያውዕዩ፡ በእሳት።
12 ወቆመ፡ ርእሶሙ፡ ለእልክቱ፡ አራዊት፡ ወተውህበ፡ ሎሙ፡ ነዋኅ፡ ሕይወት፡ እስከ፡ ዕድሜሆሙ።
13 ወርኢኩ፡ በራእየ፡ ሌሊት፡ ወናሁ፡ መጽአ፡ በደመና፡ ሰማይ፡ ከመ፡ ወልደ፡ እጓለ፡ እመ፡ ሕያው፡ ወበጽሐ፡ ኀበ፡ ብሉየ፡ መዋዕል።
14 ወተውህበ፡ ሎቱ፡ ምኵናን፡ ወክብር፡ ወመንግሥት፡ ወኵሎሙ፡ አሕዛብ፡ ወበሓውርት፡ ወነገድ፡ ተቀንዩ፡ ሎቱ፡ ወምኵናኑሂ፡ ምኵናን፡ ዘለዓለመ፡ ዓለም፡ ዘኢየኀልቅ፡ ወመንግሥቱሂ፡ ዘኢይማስን።
15 ወርዕደኒ፡ መንፈስየ፡ አነ፡ ዳንኤል፡ ወደንገፀኒ፡ ልብየ፡ እምራእየ፡ ርእስየ።
16 ወሖርኩ፡ ወተጠየቅዎ፡ ለአሐዱ፡ እምእለ፡ ይቀውሙ፡ ወነገረኒ፡ ወአይድዐኒ፡ ፍካሬሁ፡ ጥዩቀ፡ ኵሎ፡ ነገሮ።
17 እሉ፡ አርባዕቱ፡ አራዊት፡ ዐበይት፡ አርባዕቱ፡ ነገሥት፡ እሙንቱ፡ ይትነሥኡ፡ ዲበ፡ ምድር፡ ወየአትቱ።
18 ወይገብእ፡ መንግሥት፡ ለቅዱሳነ፡ ልዑል፡ ወይነብርዋ፡ ለዓለመ፡ ዓለም።
19 ወተጠየቁ፡ በእንተ፡ ራብዕ፡ አርዌ፡ እስመ፡ ነኪር፡ ውእቱ፡ እምኵሉ፡ አራዊት፡ ወግሩም፡ ውእቱ፡ ጥቀ፡ ወስነነኒሁ፡ ዘኀጺን፡ ወጽፍሪሁኒ፡ ዘኀጺን፡ ወይበልዕሂ፡ ወየሐርጽሂ፡ ወዘተርፈ፡ ይከይድ፡ በእግሩ።
20 ወበእንተ፡ ዐሠርቱ፡ አቅርንቲሁ፡ ዘውስተ፡ ርእሱ፡ ወዝኩሂ፡ ካልእ፡ ዘበቈለ፡ ወመልኆሙ፡ ለዐሠርቱ፡ እለ፡ እምቅድሜሆሙ፡ አቅርንት፡ ዝኩ፡ ዘአዕይንት፡ ወኡፉሁ፡ ይነብብ፡ ዐቢያተ፡ ወርእሱሂ፡ ዐቢይ፡ እምቢጹ።
21 ርኢክዎ፡ ለውእቱ፡ ቀርን፡ ይትቃተሎሙ፡ ለቅዱሳን፡ ወሞኦሙ።
22 እስከ፡ መጽአ፡ ብሉየ፡ መዋዕል፡ ወፈትሀ፡ ሎሙ፡ ለቅዱሳነ፡ ልዑል፡ ወበጽሐ፡ ዕድሜሁ፡ ወአጽንዑ፡ መንግሥቶሙ፡ ለቅዱሳን።
23 ወይቤ፡ አርዌ፡ ራብዕ፡ መንግሥት፡ ይእቲ፡ ውስተ፡ ምድር፡ እንተ፡ ተዐቢ፡ እምኵሉ፡ መንግሥታት፡ ወትበልዕ፡ ኵሎ፡ መንግሥታተ፡ ምድር፡ ወይከይዳ፡ ወይመትራ።
24 ወዐሠርቱሂ፡ አቅርንት፡ ዐሠርቱ፡ መንግሥታት፡ ዘይትነሣእ፡ ዲበ፡ ምድር፡ ወእምድኅሬሁ፡ ይትነሣእ፡ ክልእ፡ ንጉሥ፡ ለእኩያን፡ እለ፡ ቅድሜሁ፡ ወያኀስሮሙ፡ ለዐሠርቱ፡ ነገሥት።
25 ወይነብብ፡ በነገረ፡ ልዑል፡ ወያስሕቶሙ፡ ለቅዱሳነ፡ ልዑል፡ ወይኄሊ፡ ይወልጥ፡ መዋዕለ፡ ወሕገ፡ ወይትወሀብ፡ ሎቱ፡ እስከ፡ ዕድሜሁ፡ ውስተ፡ እዴሁ፡ ወዓመት፡ ወመንፈቀ፡ ዓመት።
26 ወነበረ፡ ዐውደ፡ ወይስዐሮ፡ ለመልአክ፡ ከመ፡ ያማስን፡ ለግሙራ።
27 ወመንግሥት፡ ወምኵናን፡ ወዕበየ፡ መንግሥት፡ ዘመትሕተ፡ ሰማይ፡ ተውህበ፡ ለቅዱሳነ፡ ልዑል፡ ወመንግሥቱሂ፡ መንግሥት፡ ዘለዓለመ፡ ዓለም፡ ወኵሉ፡ መኳንንት፡ ይትቀነዩ፡ ሎቱ፡ ወይትኤዘዙ፡ ሎቱ፡ እስከ፡ ዝየ፡ ወአሜሁ፡ ማኅለቅተ፡ ሕዝብ።
28 ወአነ፡ ዳንኤል፡ ኅሊናየ፡ ይትሀወከኒ፡ ጥቀ፡ በሕቁ፡ ወተወለጠኒ፡ ራእይ፡ ወዐቀብኩ፡ ነገሮ፡ ውስተ፡ ልብየ።
=== chapter 8 ===
[Chapter 8]
1 አመ፡ ዐሠርቱ፡ ዓመተ፡ መንግሥቱ፡ ለበልጣሳር፡ ንጉሥ፡ አሰተርአይኒ፡ ራእይ፡ አነ፡ ዳንኤል፡ እምድኅረ፡ አስተርአይኒ፡ ዘቀዳሚ።
2 ወሀለውኩ፡ ውስተ፡ ሱሶስ፡ ዘበሪ፡ እንተ፡ ብሔረ፡ ኤሌም፡ ወሀለውኩ፡ ውስተ፡ ኡባል።
3 ወአንሣእኩ፡ ዐይንየ፡ ወርኢኩ፡ መጽአ፡ አሐዱ፡ ብሕኵ፡ ወቆመ፡ ቅድመ፡ ኡባል፡ ወነዋኅት፡ አቅርንቲሁ፡ ወአሐዱ፡ ይነውኅ፡ እምካልኡ፡ ወዘይነውኅ፡ ድኅረ፡ በቈለ።
4 ወርኢክዎ፡ ለውእቱ፡ ብሕኵ፡ ይወግዕ፡ በአቅርንቲሁ፡ ለመንገለ፡ ባሕር፡ ወሰሜን፡ ወደቡብ፡ ወኢይቀውም፡ ኵሉ፡ አራዊት፡ ቅድሜሁ፡ ወአልቦ፡ ዘያመሥጥ፡ እምእዴሁ፡ ወገብረ፡ ዘከመ፡ ይፈቅድ፡ ዐቢየ።
5 ወአነ፡ ዳንኤል፡ ሀለውኩ፡ ውስተ፡ ሱሶስ፡ ወእኄሊ፡ ወመጽአ፡ አሐዱ፡ ደቤላ፡ ዘጠሊ፡ እምደቡብ፡ ላዕለ፡ ኵሉ፡ ገጸ፡ ምድር፡ ወአልቦ፡ ዘለከፋ፡ ለምድር፡ ወቦ፡ ቀርነ፡ ማእከለ፡ አቅርንቲሁ፡ ውስቱ፡ ዳቤላ።
6 ወሖረ፡ ኀበ፡ ዝኵ፡ ብሕኵ፡ ዘቦ፡ አቅርንት፡ ዘርኢኩ፡ ኀበ፡ ኡባል፡ ወርጸ፡ ኀቤሁ፡ በኀይል።
7 ወርኢክዎ፡ በጽሐ፡ ኀበ፡ ዝኵ፡ ወአብደ፡ ላዕሌሁ፡ ወአውደቆ፡ ለብሕኵ፡ ወቀጥቀጦ፡ ክልኤሆሙ፡ አቅርንቲሁ፡ ወአልቦ፡ ኀይለ፡ ዝኵ፡ ብሕኵ፡ ከመ፡ ይቁም፡ ቅድሜሁ፡ ወነፅኆ፡ ውስተ፡ ምድር፡ ወኬዶ፡ ወአልቦ፡ ዘያድኅኖ፡ እምእዴሁ፡ ለውእቱ፡ ብሕኵ።
8 ወዝኵ፡ ደቤላ፡ ዘጠሊ፡ አብደ፡ ጥቀ፡ ወሶበ፡ ገደሎ፡ ሰበሮ፡ ዝኵ፡ ቀርኖ፡ ወዐቢየ፡ ወበቈለ፡ አርባዕቱ፡ መትሕቶ፡ ለአርባዕቱ፡ ነፋሳት፡ ዘሰማይ።
9 ወእምውስተ፡ አሐዱ፡ እምኔሆሙ፡ በቈለ፡ ቀርን፡ ጽኑዕ፡ ወዐቢይ፡ ጥቀ፡ ለመንገለ፡ ሰሜን፡ ወጽባሕ፡ ለኀበ፡ ኀይል።
10 ወዐቢይ፡ እስከ፡ ኀይለ፡ ሰማይ፡ ወወድቀ፡ ውስተ፡ ምድር፡ እምኀይለ፡ ሰማይ፡ ወእምከዋክብተ፡ ሰማይ፡ ወኬዶን።
11 እስከ፡ ማእከለ፡ ሰርዌ፡ ከመ፡ ያድኅን፡ ፄዋሁ፡ ወባሕቱ፡ ይትሀወኩ፡ መሣውዕት፡ ወኮነ፡ ወተሰልጠ፡ ወማሰነ፡ መቅደስ።
12 ወተውህበ፡ ላዕለ፡ መሥዋዕተ፡ ኀጢአት፡ ወተገድፈት፡ ውስተ፡ ምድር፡ ወገብረ፡ ወተሰልጠ።
13 ወሰማዕኩ፡ አሐዱ፡ መልአክ፡ ይነግር፡ ወይቤ፡ አሐዱ፡ ቅዱስ፡ ይነብብ፡ ለፌልሙንጢ፡ እስከ፡ ማእዜኑ፡ ይቁም፡ ራእይ፡ መስዋዕት፡ እንተ፡ ተነሥተት፡ ወኀጢአት፡ እንተ፡ አማሰነት፡ ተውህበት፡ ወመቅደስ፡ ወኀይል፡ ተከይደ።
14 ወይቤሎ፡ እስከ፡ ሰርክ፡ ወነግህ፡ ወዕሥራ፡ ወሠለስቱ፡ ምእት፡ መዋዕል፡ ወይነጽሕ፡ መቅደስ።
15 ወእምዝ፡ ሶበ፡ ርኢኩ፡ አነ፡ ዳንኤል፡ ዘራእየ፡ ኀሠሥኩ፡ ራእየ፡ ወመጽአ፡ ወቆመ፡ ቅድሜየ፡ ከመ፡ ራእየ፡ ብእሲ።
16 ወሰማዕኩ፡ ቃለ፡ ብእሲ፡ በማእከለ፡ ኡባል፡ ወጸውዐ፡ ወይቤ፡ ገብርኤል፡ አለብዎ፡ ዝኩ፡ ራእየ።
17 ወመጽአ፡ ወቆመ፡ ጠቃ፡ ኀበ፡ እቀውም፡ አነ፡ ወመጺኦ፡ ደንገፅኩ፡ ወወደቁ፡ በገጽየ፡ ወይቤለኒ፡ ለበውከኑ፡ ወልደ፡ እጓለ፡ እመ፡ ሕያው፡ ዓዲ፡ ኢኀልቀ፡ ዕድሜሁ፡ ለራእይ።
18 ወሶበ፡ ነበበኒ፡ ደንገፅኩ፡ ወወደቁ፡ በገጽየ፡ ውስተ፡ ምድር፡ ወአኀዘኒ፡ ወአቀመኒ፡ በእግርየ።
19 ወይቤለኒ፡ ናሁ፡ እነግረከ፡ ዜከውን፡ በደኃሪ፡ መቅሠፍት፡ እስመ፡ ዓዲ፡ ማኅለቅተ፡ ዕድሜሁ።
20 ብሕኵ፡ ዘርኢከ፡ ዘቦ፡ አቅርንተ፡ ንጉሠ፡ ፋርስ፡ ወሜዶን፡ ውእቱ።
21 ወደቤላ፡ ዘጠሊ፡ ንጉሠ፡ ኤሊኖን፡ ውእቱ፡ ቀርኑ፡ የዐቢ፡ ዘማእከለ፡ አቅርንቲሁ፡ ውእቱ፡ ንጉሥ፡ ቀዳማዊ።
22 ወዘተቀጥቀጠ፡ ኀበ፡ ቆሙ፡ አርባዕቱ፡ አቅርንት፡ ታሕቴሆሙ፡ አራባዕቱ፡ ነገሥት፡ ይትነሥኡ፡ ወአኮ፡ በኀይሎሙ።
23 ወበደኃሪታ፡ ለመንግሥቶሙ፡ ትትፈጸም፡ ኀጢአቶሙ፡ ወይትነሣእ፡ ንጉሥ፡ ዘኢየኀፍር፡ ገጸ፡ ወኢየአምር፡ ምሳሌ።
24 ወጽኑዕ፡ ኀይሉ፡ ወያማስን፡ ዕጹባተ፡ ወያረትዕ፡ ወገብረ፡ ወያጠፍኦሙ፡ ለጽኑዓን፡ ወለቅዱሳን፡ ሕዝብ።
25 ወያረትዕ፡ አርዑተ፡ ክሳድ፡ ወትምንይት፡ ውስተ፡ እዴሁ፡ ወይትዔበይ፡ በልቡ፡ ወበጕሕሉት፡ ያኀልቆሙ፡ ለብዙኃን፡ ወዲበ፡ መልአከ፡ መላእክት፡ ይይቀውም፡ ወዘእንበለ፡ እድ፡ ይትቀጠቀጥ፡ እደ።
26 ወራእየ፡ ሰርክ፡ ወነግህ፡ ዘተብህለ፡ እሙን፡ ውእቱ፡ ወአንተ፡ ኅትሞ፡ ለዝ፡ ራእይ፡ ለብዙኅ፡ መዋዕል።
27 ወአነ፡ ዳንኤል፡ ደዌኩ፡ ወሰከብኩ፡ መዋዕለ፡ ወተንሣእኩ፡ ወገበርኩ፡ ግብረ፡ ንጉሥ፡ ወአንከርኩ፡ ዘራእየ፡ ወአልቦ፡ ዘያእምሮ።
=== chapter 9 ===
[Chapter 9]
1 በቀዳሚ፡ ዓመተ፡ ወልደ፡ ሱኤር፡ ዘእምዘርእ፡ ሜዶን፡ ዘነግሠ፡ መንግሥተ፡ ከሌዴዎን።
2 አነ፡ ዳንኤል፡ አእመርኩ፡ እምውስተ፡ መጻሕፍት፡ ኍልቈ፡ ዓመት፡ ዘኮነ፡ ቃለ፡ እግዚአብሔር፡ ኀበ፡ እርሚያስ፡ ነቢይ፡ በዘ፡ ይሰለጥ፡ ሙስናሃ፡ ለኢየሩሳሌም፡ ሰብዓ፡ ዓመት።
3 ወሜጥኩ፡ ገጽየ፡ ኀበ፡ እግዚአ፡ ብሔር፡ አምላኪየ፡ ከመ፡ እኅሥሥ፡ ጸሎተ፡ ወሣህለ፡ በጾም፡ ወበሠቅ፡ ወበሐመድ።
4 ወጸለይኩ፡ ኀበ፡ እግዚአሔር፡ አምላኪየ፡ ወገነይኩ፡ ወእቤ፡ እግዚኦ፡ አምላክ፡ ዐቢይ፡ ወስቡሕ፡ ዘተዐቅበ፡ ኪዳነከ፡ ወምሕረተከ፡ ለእለ፡ ያፈቅሩከ፡ ወለእለ፡ የዐቅቡ፡ ትእዛዘከ።
5 አበስነ፡ ወዐመፅነ፡ ወጌገይነ፡ ወዐለውነ፡ ወተግሕሥነ፡ እምትእዛዝከ፡ ወእምፍትሕከ።
6 ወኢሰማናሆሙ፡ ለነቢያት፡ አግብርቲከ፡ እለ፡ ነገርዎሙ፡ በስምከ፡ ለነገሥትነ፡ ወለመላእክቲነ፡ ወአበዊነ፡ ወለኵሉ፡ አሕዛበ፡ ምድር።
7 ወለከ፡ እግዚኦ፡ ጽድቅ፡ ወለነ፡ ኀፍረት፡ ወለገጽነ፡ በዛቲ፡ ዕለት፡ ለሰብአ፡ ይሁዳ፡ ወለእለ፡ ይነብሩ፡ ኢየሩሳሌም፡ ወለኵሉ፡ እስራኤል፡ ለርሑቃን፡ ወለቅሩባን፡ በኵሉ፡ ምድር፡ ኀበ፡ ዘረውኮሙ፡ ህየ፡ በማዕሌቶሙ፡ ዘዐለዉከ።
8 እግዚኦ፡ ለነ፡ ኀፍረት፡ ለገጽነ፡ ወለነገሥትነ፡ ወለመላእክቲነ፡ ወለአበዊነ፡ እስመ፡ አበስነ፡ ለከ።
9 እግዚኦ፡ አምላከ፡ ሣህል፡ ወምሕረት፡ እስመ፡ ክሕድነ።
10 ወኢሰማዕነ፡ ቃለ፡ እግዚአ፡ ብሔር፡ አምላክነ፡ ከመ፡ ንሖር፡ በሕግ፡ ዘወሀበነ፡ በቅድመ፡ ገጽነ፡ በእደ፡ አግብርቲሁ፡ ነቢያት።
11 ወኵሉ፡ እስራኤል፡ ዐለዉ፡ ሕገከ፡ ወአበዩ፡ ሰሚዐ፡ ቃለከ፡ ወመጽአ፡ መርገም፡ ላዕሌነ፡ ወመሐላ፡ ዘጽሑፍ፡ ውስተ፡ ኦሪተ፡ ሙሴ፡ ገብረ፡ እግዚአብሔር፡ እስመ፡ አበስነ፡ ሎቱ።
12 ወአቀመ፡ ቃሎ፡ ዘነበበ፡ ላዕሌነ፡ ወዲበ፡ መኳንንቲነ፡ እለ፡ ኰነኑነ፡ ወአምጽኡ፡ ላዕሌነ፡ እኪተ፡ ዐቢየ፡ ዘኢኮነ፡ ከማሁ፡ በኵሉ፡ መትሕተ፡ ሰማይ፡ ዘከመ፡ ኮነ፡ በኢየሩሳሌም።
13 በከመ፡ ጽሑፍ፡ ውስተ፡ ሕገ፡ ሙሴ፡ ኵሉዝ፡ እኩይ፡ በጽሐነ፡ ወኢተማሕለልነ፡ ለገጸ፡ እግዚአ፡ ብሔር፡ አምላክነ፡ ከመ፡ ንትመየጥ፡ እምኀጢአትነ፡ ወነኀሊ፡ ኵሎ፡ ጽድቀከ።
14 ወተግሀ፡ እግዚአ፡ ብሔር፡ አምላክነ፡ በኵሉ፡ ግብሩ፡ ዘገብረ፡ ወኢሰማዕነ፡ ቃሎ።
15 ወይእዜሂ፡ እግዚኦ፡ አምላክነ፡ ዘአውፃእኮሙ፡ ለሕዝብከ፡ እምድረ፡ ግብጽ፡ በእደ፡ ጽንዕት፡ ግበር፡ ለከ፡ ስምዐ፡ እስከዛ፡ ዕለት፡ አበስነ፡ ወጌገይነ፡ ወዐመፅነ።
16 እግዚኦ፡ በኵሉ፡ ምሕረትከ፡ ሚጥ፡ መዐተከ፡ ወመቅሠፍትከ፡ እምኔነ፡ ወእምሀገርከ፡ ኢየሩሳሌም፡ ወደብረ፡ መቅደስከ፡ እስመአበስነ፡ በጌጋይነ፡ ወዘአበዊነ፡ በኢየሩሳሌም፡ ወኀስሩ፡ ሕዝብከ፡ በኀበ፡ ኵሉ፡ አድያሚነ።
17 ወይእዜኒ፡ ስማዕ፡ እግዚኦ፡ አምላክነ፡ ጸሎተ፡ ገብርከ፡ ወስእለቶ፡ ወአብርህ፡ ገጸከ፡ ላዕለ፡ መቅደስከ፡ ዘመዝበረ፡ በእንቲአከ፡ እግዚኦ።
18 አጽምዕ፡ እዝነከ፡ አምላኪየ፡ ወስማዕ፡ ወክሥት፡ አዕይንቲከ፡ ወርኢ፡ ሙስናነ፡ ወዘሀገርከ፡ እንተ፡ ተሰምየ፡ ስምከ፡ ላዕሌሃ፡ ወአኮ፡ በጽድቅነ፡ ዘንዌሩ፡ ሣህለነ፡ ቅድሜከ፡ ዳእሙ፡ በምሕረትከ፡ ብዙኅ፡ እግዚኦ።
19 ስምዐነ፡ እግዚኦ፡ ተሣህለነ፡ እግዚኦ፡ አጽምዕ፡ እግዚኦ፡ ግበር፡ ወኢተጐንዲ፡ በእንቲአከ፡ እግዚኦ፡ አምላክን፡ እስመ፡ ተሰምየ፡ እምከ፡ ላዕለ፡ ሀገርከ፡ ወዲበ፡ ሕዝብከ።
20 ወእንዘ፡ እነግር፡ ወእጼሊ፡ ወእትናሀይ፡ ኀጢአትየ፡ ወኀጢአተ፡ ሕዝብየ፡ እስራኤል፡ ወእገድፍ፡ ሣህልየ፡ ቅድመ፡ እግዚአ፡ ብሔር፡ አምላኪየ፡ በእንተ፡ ቤተ፡ መቅደሱ፡ ወደብረ፡ መቅደሱ፡ ለአምላኪየ።
21 ወእንዘ፡ እነግር፡ ጸሎትየ፡ መጽአ፡ ብእሲ፡ ገብርኤል፡ ዘርኢኩ፡ ቀዲሙ፡ ይሰርር፡ ወገሰሰኒ፡ በጊዜ፡ መሥዋዕተ፡ ሰርክ።
22 ወአለበወኒ፡ ወተናገረ፡ ምስሌየ፡ ወይቤለኒ፡ ገብርኤል፡ ወፃእኩ፡ አለቡከ፡ ይእዜ፡ ጥበበ።
23 በቀዳሚ፡ ጸሎትከ፡ ወጽአ፡ ቃል፡ ወመጻእኩ፡ አለቡከ፡ ወእዜኑከ፡ እስመ፡ ብእሴ፡ ፍትወት፡ አንተ፡ ወኀልዮ፡ ለነገርከ፡ ወለቡ፡ ዘርኢከ።
24 ስማዕ፡ ሰንበታተ፡ ዐደሙ፡ ለሕዝብከ፡ ወለሀገር፡ ቅድስት፡ ከመ፡ ትሰልጥ፡ ኀጢአት፡ ወይትኀሐተም፡ ጌጋይ፡ ወይደመሰስ፡ አበሳ፡ ወትሰረይ፡ ዐመፃ፡ ወትምጻእ፡ ጽድቅ፡ እንተ፡ ለዓለም፡ ወይትዐተብ፡ ራእየ፡ ነቢያት፡ ወይትቀባእ፡ ቅዱሰ፡ ቅዱሳን።
25 ወታእምር፡ ወትለቡ፡ እምጸአቱ፡ ቃሉ፡ ዘታወሥእ፡ ወትሐነጽ፡ ኢየሩሳሌም፡ እስከ፡ ክርስቶስ፡ ንጉሥ፡ ሰብዐቱ፡ ሰንበታት፡ ስሳ፡ ክልኤ፡ ወይትመየጥ፡ ወየሐንጽ፡ መርሕበ፡ ወአፍረተ፡ ወይትክዖ፡ መዋዕል።
26 እምድኅረ፡ ስሳ፡ ወክልኤ፡ ሰንበታት፡ ጠፍእ፡ ቅብአት፡ ወፍትሕ፡ ወአልቦ፡ ኀቤሁ፡ ወያማስን፡ ገረ፡ ወመቅደሰ፡ ምስለ፡ ንጉሥ፡ በዘይመጽእ፡ ይሜትሩ፡ በአይኅ፡ ወለዘላፉ፡ ይትራገዙ፡ ወይትቃተሉ፡ እስከ፡ ይጠፍኡ።
27 ወይጸንዕ፡ ሰንበታት፡ በሥርዐት፡ ብዙኅ፡ ወይሰዐር፡ መሥዋዕት፡ ወይማስን፡ መኣዝኒሁ፡ ለግሙራ፡ ወፍጡነ፡ ያማስን፡ ወያጸንዕ፡ ሥራዐቶሙ፡ ለብዙኃን፡ አሀቲ፡ ሰንበት፡ ወመንፈቀ፡ ሰንበት፡ ይሰዐር፡ መሥዋዕት፡ ወሞጻሕት፡ ወያማስን፡ ርኵሶሙ፡ በውስተ፡ መቅደስ፡ ወእስከ፡ ማኅለቅተ፡ ዓመታት፡ ይትወሀብ፡ ቅድሜሁ፡ ለሙስና።
=== chapter 10 ===
[Chapter 10]
1 አመ፡ ዐሠርቱ፡ ዓመተ፡ መንግሥቱ፡ ለቂሮስ፡ ንጉሠ፡ ፋርስ፡ ተከሥተ፡ ቃለ፡ እግዚአ፡ ብሔር፡ ለዳንኤል፡ ወተሰምየ፡ ስሙ፡ ብልጣሳር፡ ወእሙን፡ ነገሩ፡ ወኀይል፡ ዐቢይ፡ ተውህበ፡ ሎቱ፡ በውስተ፡ ራእይ።
2 ወውእተ፡ አሚረ፡ አነ፡ ዳንኤል፡ ሀለውኩ፡ እላሑ፡ ሠለስተ፡ ሰንበታተ፡ መዋዕለ።
3 ኢፈቶኩ፡ እክለ፡ እብላዕ፡ ወኢቦአ፡ ውስተ፡ አፉየ፡ ሥጋ፡ ወወይን፡ ወቅብአ፡ ኢተቀባእኩ፡ እስከ፡ ተፈጸመ፡ ሠለስቱ፡ ሰንበታት፡ መዋዕል።
4 ወኮነ፡ አመ፡ ዐሠርቱ፡ ወሰማንቱ፡ ዓመት፡ በዕሥራ፡ ጽባሕ፡ በረቡዐ፡ ሠርቀ፡ ወርኅ፡ ቀዳሚ፡ ወሀለውኩ፡ አነ፡ ኀበ፡ ፈለግ፡ ዐቢይ።
5 ወነጸርኩ፡ ወርኢኩ፡ ብእሴ፡ አሐደ፡ ይለብስ፡ ጠበደን፡ ወቅኑት፡ ሐቌሁ፡ በወርቀ፡ አፈዝ።
6 ወነፍሰቱሂ፡ ከመ፡ ተርስስ፡ ወገጹሂ፡ ከመ፡ ራእየ፡ መብረቅ፡ ወአዕይንቲሁኒ፡ ከመ፡ መኃታወ፡ እሳት፡ ወእገሪሁ፡ ወእደዊሁ፡ ከመ፡ ብርት፡ ርሱን፡ ወቃለ፡ ነገሩ፡ ከመ፡ ድምፀ፡ አሕዛብ፡ ብዙኅ።
7 ወርኢኩ፡ አነ፡ ዳንኤል፡ ባሕቲትየ፡ ዘራእየ፡ ወዕደው፡ እለ፡ ምስሌየ፡ ኢርእዩ፡ ዘራእየ፡ ዳእሙ፡ ዐቢይ፡ ድንጋጼ፡ አኀዞሙ፡ ወእምፍርሀት፡ ጐዩ።
8 ወአነ፡ ባሕቲትየ፡ ተረፍኩ፡ ወርኢኩ፡ ዘራእየ፡ ዐቢየ፡ ወኢተርፈ፡ ላዕሌየ፡ ኀይልየ፡ ወክብርየ፡ ተወለጠ፡ ወበልየ፡ ወኢአኀዝኩ፡ ኅይለ።
9 ወሰማዕኩ፡ ቃለ፡ ነገሩ፡ ወሰሚዕየ፡ ቃለ፡ ነገሩ፡ ደንገፅኩ፡ ወገጽየኒ፡ ውስተ፡ ምድር።
10 ወናሁ፡ እድ፡ አኀዘኒ፡ ወአቀመኒ፡ በብረኪየ።
11 ወይቤለኒ፡ ዳንኤል፡ ብእሴ፡ ፍትወት፡ ለቡ፡ ዘነገረ፡ ዘነገርኩከ፡ አነ፡ ወቁም፡ በኀይልከ፡ እስመ፡ ይእዜ፡ ተፈነውኩ፡ ኀቤከ፡ ወሶበ፡ ይቤለኒ፡ ዘነገረ፡ ተንሣእኩ፡ ርዒድየ።
12 ወይቤለኒ፡ ኢትፍራህ፡ ዳንኤል፡ እስመ፡ እምቀዳሚት፡ ዕለት፡ ዘአግባእከ፡ ልበከ፡ ቅድመ፡ እግዚአ፡ ብሔር፡ ከመ፡ ትስራሕሂ፡ ወትለቡ፡ ለአምላክከ፡ ተሰምዐ፡ ነገርከ፡ ወአነ፡ መጻእኩ፡ በእንተ፡ ቃልከ።
13 ወመልአከ፡ ንጉሠ፡ ፋርስ፡ ይቀውም፡ ቅድሜየ፡ ወዕሥራ፡ ወአሐቲ፡ ዕለት፡ ወናሁ፡ ሚካኤል፡ አሐዱ፡ እመላእክት፡ ቀደምት፡ መጽአ፡ ርድአኒ፡ ወኪያሁ፡ ኀደጉ፡ ህየ፡ ምስለ፡ መልአከ፡ ንጉሠ፡ ፋርስ።
14 ወመጻእኩ፡ እንግርከ፡ ዘይረረክቦሙ፡ ለሕዝብከ፡ በደኀሪ፡ መዋዕል፡ እስመ፡ ርእየ፡ በዕለቱ።
15 ወሶበ፡ ነገረኒ፡ ዘነገረ፡ ሜጥኩ፡ ገጽየ፡ ውስተ፡ ምድር።
16 ወደንገፅኩ፡ ወናሁ፡ ከመ፡ አምሳለ፡ ወልደ፡ እጓለ፡ እመ፡ ሕያው፡ ወገሰሰኒ፡ ከናፍርየ፡ ወከሠትኩ፡ አፉየ፡ ወነበብኩ፡ ወእቤሎ፡ ለዘ፡ ይቀውም፡ ቅድሜየ፡ እግዚኦ፡ እምግርማከ፡ ተመስወት፡ ነፍስየ፡ በላዕሌየ፡ ወኀጣእኩ፡ ኀይለ።
17 ወእፎ፡ ይክል፡ ገብርከ፡ እግዚኦ፡ ተናግሮ፡ ምስለ፡ እግዚእየ፡ ዘንተ፡ ወአነሂ፡ እምይእዜ፡ ኢይቀውም፡ ኀይልየ፡ ወኢተርፈ፡ እምነ፡ መንፈስየ።
18 ወደገመ፡ ገሰሰኒ፡ ከመ፡ ረራእየ፡ ብእሲ፡ ወአጽንዐኒ።
19 ወይቤለኒ፡ ኢትፍራህ፡ ብእሴ፡ ፍትወት፡ አንተ፡ ሰላም፡ ብከ፡ ጽናዕ፡ ወተዐገሥ፡ ወእንዘ፡ አጽናዕከኒ።
20 ወይቤለኒ፡ ሶበ፡ ታአምር፡ ለምንት፡ መጻእኩ፡ ኀቤከ፡ ወይእዜኒ፡ እትመየጥ፡ ከመ፡ እጽብኦ፡ ለመልአከ፡ ፋርስ፡ ወወፂእየ፡ አነ፡ መጽአ፡ መልአክ፡ አርሚያን።
21 ወአዘዘኒ፡ ዘዜነውዎ፡ በመጽሐፈ፡ ጽድቅ፡ ወአልቦ፡ መኑሂ፡ ዘየአብየኒ፡ በዝንቱ፡ ዳእሙ፡ ሚካኤል፡ መልአከክሙ።
=== chapter 11 ===
[Chapter 11]
1 ወኮነ፡ በሣልስ፡ ዓመተ፡ መንግሥቱ፡ ለቂሮስ፡ ቆምኩ፡ በኀይል፡ ወበጽንዕ።
2 ወይእዜሂ፡ ጽድቀ፡ ፍትህ፡ እነግረከ፡ ናሁ፡ እስከ፡ ዓመት፡ ይትነሥኡ፡ ነገሥት፡ ውስተ፡ ፋረስ፡ ሠለስቱ፡ ወራብዖሙ፡ ይብዕል፡ ብዕለ፡ ዐቢየ፡ እኵሉ፡ ወእምድኅረ፡ አኀዘ፡ ብዕሎ፡ ይትቃወሞሙ፡ ለኵሉ፡ አረሚያን።
3 ወይትነሣእ፡ ንጉስ፡ ኀያል፡ ወይኴንን፡ ምኵናነ፡ በዙኀ፡ ወይገብር፡ ዘፈቀደ።
4 ወተንሢኦ፡ መንግሥቱ፡ ትትቀጠቀጥ፡ ወትዘረው፡ ውስተ፡ አርባዐቱ፡ ነፋሳተ፡ ሰማይ፡ ወኢውስተ፡ ደኃሪቱ፡ ወኢበከመ፡ ምኵናኑ፡ ዘኰነነ፡ እስመ፡ ትትመላኅ፡ መንግሥቲ፡ ወለባዕዳን፡ እምእሉ፡ ትትወሀብ።
5 ወይጸንዕ፡ ንጉሠ፡ አዜብ፡ ወአሐዱ፡ እመላእክቲሆሙ፡ ይጸንዕ፡ ላዕሌሆሙ፡ ወይኴንን፡ ምኵናነ፡ ብዙኀ።
6 ወእምድኅረ፡ ዓመቲሁ፡ ይዴመሩ፡ ወወለተ፡ ንጉሠ፡ አዜብ፡ ትበውእ፡ ኀበ፡ ንፉሠ፡ መስዕ፡ ከመ፡ ትግበር፡ ቀተተ፡ ምስሌሁ፡ ወኢይጸንዕ፡ ኀይለ፡ መዝራዕቱ፡ ወኢይቀውም፡ ዘርኡ፡ ወይትወሀብ፡ ላቲ፡ ወእለሂ፡ አምጽእወዘ፡ ለወለት፡ ወያጽንዖሙሂ፡ በመዋዕሊሆሙ።
7 ወይቀውም፡ እምነ፡ ፍሬ፡ ሥርዋ፡ ጽኑዕ፡ ወይመጽእ፡ ኀበ፡ ኀይል፡ ወትበውእ፡ ኀበ፡ ምስካቡ፡ ለንጉሠ፡ መስዕ፡ ወይገብር፡ ሎሙ፡ ወያጸንዖሙ።
8 ወይገፍትኦሙ፡ ለመላእክቲሆሙ፡ ምስለ፡ ስብሐቲሆሙ፡ ወኵሎ፡ ንዋየ፡ መፍትው፡ ወወርቆሙ፡ ወብሩሮሙ፡ ምስለ፡ ፄዋ፡ ወይወስድ፡ ግብጸ፡ ወውእቱ፡ ቀውም፡ በእንተ፡ ንጉሠ፡ መስዕ።
9 ወይበውእ፡ ውስተ፡ መንግሥቱ፡ ለንጉሰ፡ አዜብ፡ ወይሠወጥ፡ ብሔሮ።
10 ወደቂቆሙ፡ ያስተጋብኡ፡ አሕዛበ፡ ሰራወተ፡ ብዙኀ፡ ወይመጽእ።
11 ወይትአረወይ፡ ንጉሠ፡ አዜብ፡ ወይወፅእ፡ ዌትቃተል፡ ምስለ፡ ንጉሰ፡ መስዕ፡ ወያቀውም፡ ብዙኀ፡ አሕዛበ፡ ወይገብእ፡ ውስተ፡ እዴሁ፡ ሰብኡ።
12 ወይነሥእ፡ አህዛቢሁ፡ ወያዐቢ፡ ልቦ፡ ወይቀትል፡ አእላፈ።
13 ወይሠወጥ፡ ንጉሠ፡ መስዕ፡ ወያመጽእ፡ ብዙኀ፡ ሰራዊተ፡ እምዘ፡ ቀዲሙ፡ ወእምድኅረ፡ ብዙኅ፡ መዋእል፡ መጽእ፡ መጺአ፡ በኀይል፡ ዐቢይ፡ ወበንዋይ፡ ብዙኅ።
14 ወበእማንቱ፡ መዋዕል፡ ብዙኃን፡ ይትነሥኡ፡ ላዕለ፡ ንጉሠ፡ አዜብ፡ ወደቂቀ፡ ዐመፃ፡ ሕዝብከ፡ ትነሥኡ፡ ለአቅሞ፡ ራእይ፡ ወይደክሙ።
15 ወይመጽእ፡ ንጉሰ፡ መስዕ፡ ወይክዑ፡ ኀይለ፡ ዌእኅዙ፡ ሀገረ፡ ጽዉናተ፡ ወመዝራዕታተ፡ አዜብ፡ ኢቀውም፡ ወሕዝብ፡ እምኅሩያኒሁ፡ ወአልቦ፡ ኀይለ፡ ለቀዊም።
16 ወይገብር፡ ዘመጽአ፡ ኀቤሁ፡ በከመ፡ ስምረቱ፡ ወአልቦ፡ ዘይቀውም፡ ኀቤሁ፡ ወይቀውም፡ በምድር፡ ሠናይት፡ ወይፌጽም፡ በእዴሁ።
17 ወይሬሲ፡ ገጾ፡ ለመጺእ፡ ውስተ፡ ኀይለ፡ ኵሉ፡ መንግሥቱ፡ ወመላእክት፡ ምስሌሁ፡ ወይገብር፡ ወወለተ፡ አንስትያ፡ ትትወሀብ፡ ሎቱ፡ ለጠፊኦቱ፡ ወኢትነብር፡ ወኢትከውኖ።
18 ወይመይጥ፡ ገጾ፡ ውስተ፡ ደሰያት፡ ወይእኅዝ፡ ብዙኃነ፡ ወይስዕር፡ መኳንንተ፡ ኀፍረቱ፡ ሎቱ፡ ዘእንበለ፡ ኀፍረቱ፡ ይትመየጥ፡ ሎቱ።
19 ወይመይጥ፡ ገጾ፡ ለአጽንዖተ፡ ምድሩ፡ ወይደክም፡ ወይወድቅ፡ ወኢይትረከብ።
20 ይትነሣእ፡ ወይነብር፡ በመንበሩ፡ ወይስዕር፡ ሥልጣነ፡ ወሠናየ፡ መንግሥታት፡ ወእምድኅረ፡ መዋዕል፡ ይሰበር፡ አኮ፡ በመዐት፡ ወአኮ፡ በጸብእ።
21 ወይቀውም፡ ዲበ፡ መንበሩ፡ ኅሱረ፡ ወኢይሁብዎ፡ ክብረ፡ መንግሥት፡ ወይመጽእ፡ በህድአት፡ ወይጸንዕ፡ መንግሥቱ፡ በሁከት።
22 ወእምቅድሜሁ፡ ይትቀጠቀጡ፡ መጋብያነ፡ ሕግሂ።
23 ወእምእለ፡ ይሳተፍዎ፡ ይገብሩ፡ ላዕሌሁ፡ ጽልሑተ፡ ወየዐርግ፡ ወይጸንዕ፡ በሕዝብ፡ ንኡስ።
24 ወበብሔር፡ ጥሉል፡ ይመጽእ፡ ወይገብር፡ ዘኢገብሩ፡ አበዊሁ፡ ወአበወ፡ አበዊሁ፡ ወይመሀርክ፡ ወይፄውው፡ ወይነድእ፡ እንስሳሆሙ፡ ወላዕለ፡ ጸወናቲሆሙ፡ ይኄሊ፡ ኅሊናሁ፡ እስከ፡ ጊዜሁ።
25 ወይነሥእ፡ ኀይሎ፡ ወልቡ፡ ላዕለ፡ ንጉሠ፡ አዜብ፡ በሰራዊት፡ ዐቢይ፡ ወንጉሠ፡ አዜብ፡ ይጸንዕ፡ ለተጻብኦ፡ በሰራዊት፡ ዒቢይ፡ ወጽኑዕ፡ ጥቀ፡ ወኢይጸንዕ፡ እስመ፡ ይኄልዩ፡ ኅሊና።
26 ወእለ፡ ይበልዑ፡ ውስተ፡ ማእዱ፡ ይቀጠቅጥዎ፡ ኀይሎ፡ ወይወድቁ፡ ቅቱላን፡ ብዙኃን።
27 ወክልኤሆሙ፡ ነገሥት፡ ያአክዩ፡ ልቦሙ፡ ወበአሐቲ፡ ማእድ፡ ይትናገሩ፡ ሐሰተ፡ ወኢያረትዑ፡ እስመ፡ ዓዲ፡ ኢበጽሐ፡ ዕድሜሁ።
28 ወየአቱ፡ ብሔሮ፡ ምስለ፡ ብዙኅ፡ ንዋይ፡ ወልቡሰ፡ ላዕለ፡ ሥርዐት፡ ቅድስት፡ ወይገብር፡ ወይትመየጥ፡ ኀበ፡ ምድሩ።
29 ለዕድሜ፡ ይትመየጥ፡ ወይመጽእ፡ ውስተ፡ አዜብ፡ ወኢይከውኖ፡ በቀዳሚሁ፡ ወበደኃሪቱ።
30 ወይመጽኡ፡ ቦቱ፡ ጺም፡ ወከይቲም፡ ወኔባእ፡ ወይትመዓዕ፡ ላዕለ፡ ሥርዐት፡ ቅድስት፡ ወይገብር፡ ወይትመየጥ፡ ያርኵሱ፡ መቅደሰ፡ በኀይል፡ ወይበረብሩ፡ ወያነብሩ፡ ጣዖተ፡ ዲበ፡ እለ፡ የኀድጉ፡ ሥርዐተ፡ ቅዱሰ።
31 ወዘርኦሙ፡ እምኔሁ፡ ይትነሥኡ፡ ወያረኵሱ፡ መቅደሰ።
32 ወእለ፡ ይዔምፁ፡ ሥርዐተ፡ ያመጽኡ፡ ዳኅፀ፡ ወሕዝብ፡ ዜአምር፡ አምላኮ፡ ይጸንዑ፡ ወይገብሩ።
33 ወጠቢባን፡ ሕዝብ፡ ይሌብዉ፡ ብዙኀ፡ ወይደክሙ፡ በኲናት፡ ወበእሳት፡ ወበተፄውዎ፡ ዌትበረበሩ፡ ብዙኀ፡ መዋዕለ።
34 ወደዊዮሙ፡ ይረድእዎሙ፡ ረድኤተ፡ ኅዳጠ፡ ወይትዌሰኩ፡ ላዕሌሆሙ፡ ብዙኃን፡ በዳኅፃቲሆሙ።
35 ወይደውዩ፡ እምጠቢባን፡ ከመ፡ ያርስንዎሙ፡ ወያጽርይዎሙ፡ ያንጽሕዎሙ፡ እስከ፡ ጊዜ፡ እስመ፡ ዓዲ፡ ዕድሜ።
36 ወይገብር፡ ንጉሥ፡ በከመ፡ ፈቀደ፡ ወይትዔበይ፡ ወይዜኀር፡ ላዕለ፡ ኵሉ፡ አምላክ፡ ወላዕለ፡ አምላከ፡ አማልክት፡ ይነብብ፡ በትዕቢት፡ ወይረትዕ፡ እስከ፡ የኀልቅ፡ መዐት፡ እስመ፡ ምንዳቤ፡ ተገብረት።
37 ወላዕለ፡ አምላከ፡ አበዊሁ፡ አያአምር፡ ወበፍትወተ፡ አንስት፡ ወላዕለ፡ ኵሉ፡ አምላክ፡ አያአምር፡ እስመ፡ ላዕለ፡ ኵሉ፡ ይትዔበይ።
38 ወለእግዚአብሔር፡ ዐዚዝ፡ ዲበ፡ መንበሩ፡ ይዜኀር፡ ወለእግዚአብሔር፡ ዘኢያአምርዎ፡ አበዊሁ፡ ያከብር፡ በወርቅ፡ ወበብሩር፡ ወበዕንቊ፡ ሠናይ፡ ወበፍትወት።
39 ወይገብር፡ ለአህጉር፡ ጽኑዓት፡ ምስለ፡ አምላክ፡ ነኪር፡ ዘያአምር፡ ክብረ፡ ወሥሉጣነ፡ ላዕለ፡ ብዙኃን፡ ወይከፍል፡ ምድረ፡ በሤጥ።
40 ወበጊዜ፡ ዕድሜ፡ ይጸብኦ፡ ንጉሠ፡ አዜብ፡ ወይትሀወክ፡ ላዕሌሁ፡ ንጉሠ፡ መስዕ፡ በሰረገላት፡ ወበአፍራስ፡ ወበአሕማር፡ ብዙኃት፡ ወይበውእ፡ ውስተ፡ አምዳራት፡ ወይትመየጥ፡ ወይበውእ።
41 ወይመጽእ፡ ውስተ፡ ምድር፡ ሠናይት፡ ወብዙኃን፡ ይደክሙ፡ ወእሙንቱ፡ ይድኅኑ፡ እምእደዊሁ፡ ኤዶም፡ ወሞአብ፡ ኑወሕዝብ፡ አሞን።
42 ወይፌኑ፡ እዴሁ፡ ውስተ፡ አምዳ፡ ወምድረ፡ ግብጽ፡ ኢትድኅን፡ እምእዴሁ።
43 ወይሠለጥ፡ ላዕለ፡ መዛግብት፡ ዘውቅ፡ ወብሩር፡ ወላዕለ፡ ኵሉ፡ ፍትወተ፡ ግብጽ፡ ወኖባ፡ ወኢትዮጵያ፡ ይከውንዎ፡ ረዳእያነ፡ ሎቱ።
44 ወዜና፡ ይበጽሖ፡ ወይጔጕእ፡ እምሥራቅ፡ ወእምሰሜን፡ ይወፅእ፡ በመዐት፡ ዐቢይ፡ ወይቀትል፡ ወያጠፍእ፡ ብዙኃነ።
45 ወይተክም፡ ደብተራሁ፡ ውስተ፡ መካን፡ ሠናይ፡ ማእከለ፡ ባህር፡ ወደብር፡ ሠና፡ መቅደስ፡ ወይጸንዕ፡ እስከ፡ ጊዜሁ፡ ወአልቦ፡ ረዳኤ፡ ሎቱ።
=== chapter 12 ===
[Chapter 12]
1 ወውእተ፡ አሚረ፡ ይትነሣእ፡ ሚካኤል፡ መልአክ፡ ዐቢይ፡ ዘይትቃወም፡ ለደቂቀ፡ ሕዝብከ፡ ወይከውን፡ ዐቢየ፡ ሕማመ፡ እምኔሁ፡ ወምንዳቤ፡ ዘኢኮነ፡ ከማሁ፡ እምአመ፡ ተፈጥረ፡ አሕዛብ፡ ዲበ፡ ምድር፡ እስከ፡ ዘኢኮነ፡ ከማሁ፡ እምአመ፡ ተፈጥረ፡ አሕዛብ፡ ዲበ፡ ምድር፡ እስከ፡ ውእቱ፡ አሚር፡ ወይድሕኑ፡ ሕዝብከ፡ ኵሉ፡ ዘተረክበ፡ ውስተ፡ መጽሐፍ።
2 ወብዙኃን፡ እለ፡ ይነውሙ፡ ውስተ፡ መሬተ፡ ምድር፡ ይትነሥኡ፡ ለሕወት፡ ዘለዓለም፡ ወለእልክቱሰ፡ ለኀሳር፡ ወለኀፍረት፡ ዘለዓለም።
3 ወእለ፡ ለበዉ፡ ይበርሁ፡ ከመ፡ ብርሃነ፡ ሰማይ፡ ወእምነ፡ ጻድቃን፡ ብዙኃን፡ ከመ፡ ከዋክብተ፡ ሰማይ፡ እስከ፡ ለዓለም፡ ወዓዲ።
4 ወአንተሂ፡ ዳንኤል፡ ዕጽዎ፡ ለዝ፡ ነገር፡ ወኅጽሞ፡ መጽሐፎ፡ እስከ፡ ኅልቀተ፡ ዓለም፡ ወእስመ፡ እስከ፡ ይትሜሀሩ፡ ብዙኃን፡ ወትበዝኅ፡ ጥበብ።
5 ወነጸርኩ፡ አነ፡ ዳንኤል፡ ወርኢኩ፡ ካልኣነ፡ ክልኤተ፡ ይቀውሙ፡ አሐዱ፡ እምለፌ፡ ድንጋገ፡ ፈለግ፡ ወአሐዱ፡ እምከሐ፡ ፈለግ።
6 ወይቤሎ፡ ለብእሲ፡ ዘይለብስ፡ በድነ፡ ዘሀሎ፡ መልዕልተ፡ ማየ፡ ፈለግ፡ እስከ፡ ማእዜኑ፡ ማኅለቅቱ፡ ለዘ፡ ትቤ፡ ትእምርት።
7 ወሰማዕክዎ፡ ለብእሲ፡ ዘይለብስ፡ በድነ፡ ዘሀሎ፡ ዲበ፡ ማየ፡ ፈለግ፡ ወአልዐለ፡ የማኖ፡ ወጸጋሞ፡ ውስተ፡ ሰማ፡ ወመሐለ፡ በዘ፡ ሕያው፡ ለዓለም፡ ከመ፡ በጊዜሃ፡ ወበዕድሜሁ፡ በመንፈቀ፡ ዓመት፡ አመ፡ ኀልቀ፡ ዝርወቶሙ፡ ያአምሩ፡ ዘንተ፡ ኵሎ።
8 ወአነሂ፡ ሰማዕኩ፡ ወኢጠየቁ፡ ወእቤ፡ እግዚኦ፡ ምንት፡ ድኅሪሁ፡ ለዝንቱ።
9 ወይቤለኒ፡ ዓዲ፡ ዳንኤል፡ እስመ፡ ዕጽው፡ ወኅቱም፡ ነገሩ፡ እስከ፡ ማኅለቅተ፡ ዕድሜሁ።
10 ይቤይንዎሙ፡ ዌነጽሕዎሙ፡ ወያረስንዎሙ፡ ወይትቄደሱ፡ ብዙኃን፡ ወይስሕቱ፡ ጊጉን፡ ወኢይሌበዉ፡ ዐማፅያን፡ ወይጤይቁ፡ ጠቢባን።
11 በጊዜ፡ ሣህሉ፡ ወበዕድሜሁ፡ ሣህሙ፡ እምነ፡ ዘወሐክዎ፡ ከመ፡ ይትወሀብ፡ እምነ፡ ርኵሶሙ፡ በዘ፡ ይማስኑ፡ መዋዕል፡ ዐሠርቱ፡ ወክልኤቱ፡ ምእት፡ ወተስዓ።
12 ብጹዕ፡ ዘተዐገሠ፡ ወበጽሐ፡ ዐሠርቱ፡ ወሠለስቱ፡ ምእት፡ ወሠላሳ፡ ወኀሙስ፡ መዋዕል።
13 ወአንተሰ፡ ነዐ፡ አዕርፍ፡ እስመ፡ ዓዲ፡ መዋዕለ፡ ወሰንበታተ፡ በዘ፡ ትፌጸም፡ ማኅለቅቱ፡ ወታዕርፍ፡ ወትትነሣእ፡ ውስተ፡ ርስትከ፡ በደኃሪ፡ መዋዕል።
=== chapter 13 ===
[Chapter 13]
1 ወሀሎ፡ አሐዱ፡ ብእሲ፡ ዘይነብር፡ ባቢሎን፡ ወስሙ፡ ኢዮአቄም።
2 ወአውሰበ፡ ብእሲተ፡ እንተ፡ ስማ፡ ሶሰና፡ ወለተ፡ ኪልቂዩ። ወሠናይት፡ ጥቀ፡ ወትፈርህ፡ እግዚአብሔር።
3 ወአዝማዲሃኒ፡ ጻድቃን፡ ወመሀርዋ፡ ለወለቶሙ፡ ኦሪተ፡ ሙሴ።
4 ወኢይዋቄም፡ ባዕል፡ ጥቀ፡ ወቦ፡ ዐጸድ፡ አህማል፡ ጎረ፡ ቤቱ፤ ወይመጽኡ፡ ኀቤሁ፡ ኤሁድ፡ እስመ፡ ውእቱ፡ ከብር፡ እምኵሎሙ።
5 ወአስተርአዩ፡ ክልኤቱ፡ ረበናት፡ መድልዋን፡ በውእቱ፡ ዓመት፡ እለ፡ በእንቲአሆሙ፡ ነገረ፡ እግዚአ፡ ብሔር፡ ከመ፡ እምባቢሎን፡ ወፅአት፡ ኀጢአት፡ እምረበናት፡ መድልዋን፡ እለ፡ ይብ፡ ነዐቅቦሙ፡ ለሕዝብ።
6 ወእሙንቱ፡ ይፀመዱ፡ ቤተ፡ ኢዮአቄም፡ ወይመጽኡ፡ ኀቤሁ፡ ኵሎሙ፡ እለ፡ ይትኴነኑ።
7 ወእምዝ፡ አቲዎ፡ ሕዝብ፡ ጊዜ፡ ቀትር፡ ትበውእ፡ ሶሰና፡ ወታንሶሱ፡ ውስተ፡ ዐጸደ፡ አቅማሕ፡ ዘምታ።
8 ወይሬእይዋ፡ ረበናት፡ ኵሎ፡ አሚረ፡ ሶበ፡ ትበውእ፡ ወታንሶሱ፡ ወፈተውዋ።
9 ወሜጡ፡ ልቦሙ፡ ወገፍትኡ፡ አዕይንቲሆሙ፡ ከመ፡ ኢይነጽሩ፡ ሰማየ፡ ወኢተዘከሩ፡ ኵነኔ፡ ጽድቅ።
10 ወክል
=== chapter 14 ===
[Chapter 14]
0 እምድኅረ፡ ሞተ፡ ንጉሥ፡ አስጢያግስ፡ ወተቀብረ፡ ኀበ፡ ተቀብሩ፡ አበዊሁ፡ ነሥአ፡ ቂሮስ፡ ፋርሳዊ፡ መንግሥቶ።
1 ወሀሎ፡ ዳንኤል፡ ደቀ፡ ጽርሑ፡ ለንጉሥ፡ ወይከብር፡ እምኵሎሙ፡ አዕርክቲሁ።
2 ወሀሎ፡ ምስል፡ ዘያመልክዎ