##### edition  () — All excerpts are taken from .
=== part Introduction ===
[Introduction]
=== part Epistle ===
[Epistle]
=== chapter 1 ===
[ምዕራፍ 1]
መልእክተ፡ ብፅዓን፡ ወአስተብቍዖ
1 እምጳውሎስ፡ ሙቁሑ፡ ለኢየሱስ፡ ክርስቶስ፡ ወጢሞቴዎስ፡ እኁነ። ለፊልሞና፡ ዘናፈቅር፡ ዘየኀብር፡ ግብረ፡ ምስሌነ፡ ወለአብፍምያ፡ እኅትነ።
2 ወለአክርጳ፡ ወልዱ፡ ዘይገብር፡ ምስሌነ። ወለእለ፡ ምስሌሆሙ፡ እለ፡ ውስተ፡ ቤተ፡ ክርስቲያን።
3 ሰላም፡ ለክሙ፡ ወጸጋ፡ እግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ።
4 አአኵቶ፡ ለአምላክየ፡ ዘልፈ፡ ወእዜከረከ፡ በጸሎትየ።
5 እምአመ፡ ሰማዕኩ፡ ሃይማኖተከ፡ ወፍቅረከ፡ ዘበእግዚእነ፡ ኢየሱስ፡ ክርስቶስ፡ ወዘኵሎሙ፡ ቅዱሳን።
6 ከመ፡ ጽኑዐ፡ ይኩን፡ ሱታፌ፡ ሃይማኖትከ፡ በምግባረ፡ ሠናይ። ወበአእምሮ፡ ኵሉ፡ ሠናይ፡ ዘበኢየሱስ፡ ክርስቶስ።
7 ተፈሣሕኩ፡ ወተሐሠይኩ፡ በእንተ፡ ተፋቅሮትከ። እስመ፡ አዕረፈት፡ ነፍሶሙ፡ ለቅዱሳን፡ በኀቤከ፡ እኁየ።
8 ወብየ፡ በእንተ፡ ዝንቱ፡ ሞገስ፡ ዐቢይ፡ በክርስቶስ። ከመ፡ አአዝዝከ፡ ትእዛዘ፡ ጽድቅ።
9 ወበተፋቅሮ፡ አስተበቊዐከ፡ አስተብቊዖተ፡ አነ፡ ጳውሎስ። እስመ፡ ልሂቅ፡ አነ፡ ዘከመ፡ ተአምር። ወይእዜኒ፡ ዓዲ፡ ሙቁሑ፡ ለኢየሱስ፡ ክርስቶስ።
በእንተ፡ አናሲሞስ
10 አነ፡ አስተበቊዐከ፡ በእንተ፡ ወልድየ፡ ዘወለድክዎ፡ በመዋቅሕትየ፡ ዘውእቱ፡ አናሲሞስ።
11 ዘቀዲሙሰ፡ ኢበቊዐከ፡ ወይእዜሰ፡ ለከሂ፡ ወሊተሂ፡ ባቍዐ፡ ኮነ፡ ጥቀ።
12 ወናሁ፡ ፈነውክዎ፡ ኀቤከ፡ ተወከፎ፡ ከመ፡ ወልድየ።
13 ወፈቀድኩሰ፡ አንብሮ፡ ኀቤየ፡ ከመ፡ ይትለአከኒ፡ ህየንቴከ፡ በመዋቅሕትየ፡ ዘበወንጌል።
14 ወኢፈቀድኩ፡ ምንተኒ፡ እግበር፡ ዘእንበለ፡ ታእምር። ከመ፡ ኢይኩን፡ በአገብሮ፡ ሠናያቲከ፡ ዳእሙ፡ በፈቃደ፡ ልብከ።
15 ወዮጊ፡ በበይነ፡ ዝንቱ፡ ኀደገከ፡ ለሰዓት፡ ከመ፡ ይኩንከ፡ ለዓለም።
16 አኮ፡ እንከ፡ ከመ፡ ገብር፡ አላ፡ ዘይኄይስ፡ እምገብር። እመሰ፡ ኮነ፡ ሊተ፡ እኁየ፡ እፎ፡ ፈድፋደ፡ ይኄይስ፡ በኀቤከ። በሥጋሁኒ፡ በዘይደልዎ፡ ይርዳእከ፡ ወበሃይማኖትኒ፡ ዘበእግዚእነ።
17 ወእመሰ፡ እኁየ፡ አንተ፡ ተወከፎ፡ ከማየ።
18 ወእመሂ፡ ቦ፡ ዘአበሰ፡ ለከ፡ አው፡ እመ፡ ቦ፡ ዘይፈድየከ፡ ላዕሌየ፡ ረሲ።
19 አነ፡ ጳውሎስ፡ ጸሐፍኩ፡ በእዴየ። አነ፡ እፈዲ፡ በእንቲኣሁ፡ ከመሰ፡ ኢይበልከ፡ ርእሰከኒ፡ ትመጡ። ይደልወኒ፡ እወ፡ እኁየ።
20 እትፌሣሕ፡ ብከ፡ በእግዚእነ፡ አዕርፈኒ፡ ካዕበ። ወአስተፋስሓ፡ ለነፍስየ፡ በክርስቶስ።
21 ወተአሚንየ፡ በተአዝዞትከ፡ ጸሐፍኩ፡ ለከ። አእሚርየ፡ ከመ፡ ትወስከ፡ እምዘአዘዝኩከ።
22 ወምስለ፡ ዝኒ፡ አስተዳሉ፡ ሊተ፡ ማኅደረ። እስመ፡ እትአመን፡ በጸሎትክሙ፡ ከመ፡ ይሠርሐኒ፡ እግዚአብሔር፡ ወይጸግወኒ፡ ኪያክሙ።
ማኅተመ፡ መልእክት
23 አምኀከ፡ ኤጳፍራስ፡ ዘተፄወወ፡ ምስሌየ፡ በኢየሱስ፡ ክርስቶስ።
24 ወማርቆስ፡ ወአርስጥሮኮስ፡ ወዴማስ፡ ወሉቃስ፡ እለ፡ ነኀብር፡ ግብረ።
25 ጸጋሁ፡ ለእግዚእነ፡ ኢየሱስ፡ ክርስቶስ፡ ምስለ፡ መንፈስክሙ፡ አሜን።