##### edition  (gez)
=== part Introduction ===
[Introduction]
=== part Epistle ===
[Epistle]
=== chapter 1 ===
[ምዕራፍ 1]
ዘከመ፡ ኢይደሉ፡ ዛውዐ፡ ነገር
1 እምጳውሎስ፡ ሐዋርያሁ፡ ለእግዚእነ፡ ኢየሱስ፡ ክርስቶስ። በትእዛዘ፡ እግዚአብሔር፡ መድኀኒነ፡ ወኢየሱስ፡ ክርስቶስ፡ ተስፋነ።
2 ለጢሞቴዎስ፡ ወልድየ፡ ዘአፈቅር፡ በሃይማኖት። ሰላም፡ ለከ፡ ወሣህል፡ ወጸጋሁ፡ ለእግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ።
3 በከመ፡ አስተብቋዕኩከ፡ ትንበር፡ ኤፌሶን፡ አመ፡ አሐውር፡ መቄዶንያ። ከመ፡ ትገሥጾሙ፡ ከመ፡ ኢያምጽኡ፡ ካልአ፡ ትምህርተ።
4 ወኢያምጽኡ፡ መሐድምተ፡ ወዛውዐ፡ ነገር፡ ዘይፈጥሩ፡ በዘያስሕቱ። ወያመጽኡ፡ ተኃሥሦ፡ ወየኀድጉ፡ ሕገ፡ እግዚአብሔር፡ ዘሃይማኖት።
በእንተ፡ ፍቅር
5 ወማኅለቅቱሰ፡ ለትእዛዝ፡ ተፋቅሮ፡ በንጹሕ፡ ልብ፡ ወበሠናይ፡ ግእዝ። ወሃይማኖት፡ ዘአልቦ፡ ኑፋቄ።
6 እስመ፡ ቦ፡ እለ፡ አውከኩ፡ ወገብኡ፡ ውስተ፡ ነገረ፡ ከንቱ።
7 ወእንዘ፡ ይፈቅዱ፡ መምህራነ፡ ይኩኑ፡ ኢየአምሩ፡ ዘለሊሆሙ፡ ይነብቡ።
8 ነአምር፡ ከመ፡ ሠናይ፡ ውእቱ፡ ኦሪት፡ ለዘይገብሮ፡ በሕጉ።
በእንተ፡ ሕግ
9 ወነአምር፡ ዘኒ፡ ከመ፡ አኮ፡ ለጻድቃን፡ ዘይሠራዕ። ዘእንበለ፡ ለኃጥኣን፡ ወለጽልሕዋን፡ ወለዝሉፋን። ወለውፁኣን፡ እምጽድቅ፡ ወለርኩሳነ፡ ልብ። ወቀተልተ፡ አበዊሆሙ፡ ወእሞሙ፡ ወቀተልተ፡ አዝማዲሆሙ፡ ወቀተልተ፡ ነፍስ።
10 ዘማውያን፡ ወእለ፡ የሐውሩ፡ ብእሲተ፡ ብእሲ። ሰረቅተ፡ ሰብእ፡ ሐሳውያን፡ ወእለ፡ ይምሕሉ፡ በሐሰት። ወቦ፡ ባዕድኒ፡ ዓዲ፡ በዘይትቃወምዋ፡ ለትምህርተ፡ ሕይወት።
11 ዘወንጌለ፡ ስብሐቲሁ፡ ለብፁዕ፡ እግዚአብሔር፡ ዘአነ፡ ተአመንኩ፡ ቦቱ።
አኰቴት፡ በእንተ፡ ጽዋዔሁ
12 አአኵቶ፡ ለዘተአመነኒ፡ ወአጽንዐኒ፡ በክርስቶስ፡ ኢየሱስ፡ እግዚእነ። እስመ፡ ምእመነ፡ ረሰየኒ፡ ለመልእክቱ።
13 እንዘ፡ ቀዲሙ፡ ጸራፊ፡ አነ፡ ወሰዳዲ፡ ወጸአሊ። ወባሕቱ፡ ተሣሀለኒ፡ እስመ፡ በኢያእምሮ፡ ገበርኩ፡ በኢ፡ አሚን።
14 ወፈድፈደ፡ ጸጋሁ፡ ለእግዚአብሔር፡ በላዕሌየ። በሃይማኖቱ፡ ወፍቅሩ፡ ለኢየሱስ፡ ክርስቶስ፡ እግዚእነ።
15 እሙን፡ ነገሩ፡ ወርቱዕ፡ ይትወከፍዎ፡ በኵሉ። እስመ፡ ኢየሱስ፡ ክርስቶስ፡ መጽአ፡ ውስተ፡ ዓለም። ከመ፡ ያድኅኖሙ፡ ለኃጥኣን፡ ዘአነ፡ ቀዳሚሆሙ።
16 ወባሕቱ፡ ተሣሀለኒ፡ ከመ፡ ያርኢ፡ ተኣምራቲሁ፡ በላዕሌየ፡ ኢየሱስ፡ ክርስቶስ፡ ወብዝኀ፡ ትዕግሥቱ። ወእኩኖሙ፡ አርአያ፡ ለእለ፡ የአምኑ፡ ቦቱ፡ ለሕይወት፡ ዘለዓለም።
17 ንጉሥ፡ ዘለዓለም፡ ዘኢይመውት፡ ወኢያስተርኢ፡ አምላክ፡ ባሕቲቱ። ዘሎቱ፡ ክብር፡ ወስብሐት፡ ለዓለመ፡ ዓለም፡ አሜን።
አማሕፅኖ፡ በእንተ፡ ትእዛዝ
18 ዘንተ፡ ትእዛዘ፡ አማሕፀንኩከ፡ ኦ፡ ወልድየ፡ ጢሞቴዎስ፡ በከመ፡ ተነብዮ፡ ዘላዕሌከ። ከመ፡ ትጽናዕ፡ በኵሉ፡ ገድል፡ ሠናይ።
19 እንዘ፡ ብከ፡ ሃይማኖት፡ ወሠናይ፡ ግዕዝ። እስመ፡ ሀለዉ፡ እለ፡ አውከኩ፡ እምሃይማኖት፡ ወተሰብሩ።
20 እለ፡ ሄሜኔዎስ፡ ወእለ፡ እስክንድሮስ። እለ፡ መጠውክዎሙ፡ ለሰይጣን፡ ይትኰነኑ፡ ኢይልመዱ፡ ፀሪፈ።
=== chapter 2 ===
[ምዕራፍ 2]
ዘከመ፡ ይደሉ፡ ጸልዮ፡ ለኵሉ
1 አስተበቊዐከ፡ ቀዳሜ፡ ኵሉ፡ ትግበር፡ ጸሎተ፡ ወስኢለ፡ ወተጋንዮ።
2 ወበእንተ፡ ዝ፡ ጸልዩ፡ ላዕለ፡ ኵሉ፡ ሰብእ፡ ወላዕለ፡ ኵሉ፡ ነገሥት፡ ወመኳንንት። ከመ፡ በኅዱእ፡ ወበጽምው፡ ይኩን፡ ንብረትነ፡ በኵሉ፡ ጽድቅ፡ ወንጽሕ።
3 ዝኬ፡ ሠናይ፡ ወኅሩይ፡ በቅድመ፡ እግዚአብሔር፡ መድኀኒነ።
4 እስመ፡ ውእቱ፡ ይፈቅድ፡ ኵሉ፡ ሰብእ፡ ይሕየው፡ ወያእምርዋ፡ ለጽድቅ።
5 አሐዱ፡ እግዚአብሔር፡ ወአሐዱ፡ ኅሩይ፡ ማእከለ፡ እግዚአብሔር፡ ወሰብእ፡ ኢየሱስ፡ ክርስቶስ። ዘኮነ፡ ሰብአ፡ ዘመጠወ፡ ርእሶ፡ ቤዛ፡ ኵሉ።
6 ወኮነ፡ ሰማዕተ፡ በዕድሜሁ፡ ዘሎቱ፡ ተሠየምኩ፡ ሐዋርያ፡ ወዐዋዴ።
7 እሙነ፡ እብል፡ ወኢይሔሱ፡ ተሠየምኩ፡ መምህረ፡ ለአሕዛብ፡ በሃይማኖት፡ ወበጽድቅ።
8 ወእፈቅድ፡ ለኵሉ፡ ሰብእ፡ ይጸልዩ፡ በኵሉ፡ ገጸ፡ መካን። ወያንሥኡ፡ እደዊሆሙ፡ በንጽሕ፡ ዘእንበለ፡ ነጐርጓር፡ ወኑፋቄ።
9 ወከማሁ፡ አንስትኒ፡ ይትረሰያ፡ በጸሎት፡ በፈሪሀ፡ እግዚአብሔር። ወበኀፍረት፡ ወበልቡና፡ ወበአንጽሖ፡ ርእሶን፡ እምዝሙት። አኮ፡ በሐብላተ፡ ወርቅ፡ ወበባሕርይ፡ ወአልባስ፡ ቅድው፡ በዕጹብ፡ ሤጡ። ወአኮ፡ በተፀፍሮ፡ ሥዕርቶን።
10 ዘእንበለ፡ በዘይደልዎን፡ ለአንስት፡ ቀዲሙ፡ አምልኮ፡ እግዚአብሔር፡ በትምህርተ፡ ጽድቅ፡ ወበምግባረ፡ ሠናይ።
በእንተ፡ ሥርዐተ፡ ትምህርት
11 ብእሲት፡ በጽምው፡ ትትመሀር፡ ወትትአዘዝ፡ በኵሉ፡ የውሀት። ወብእሲትሰ፡ ትምሀር፡ ኢናበውሓ፡ ወኢትመብል፡ ላዕለ፡ ብእሲ።
12 ዳእሙ፡ በጽምው፡ ተሀሉ።
13 እስመ፡ አዳም፡ ቀደመ፡ ተፈጥሮ፡ ወእምድኅሬሁ፡ ሔዋን።
14 ወአዳምሰ፡ ኢስሕተ፡ አላ፡ ብእሲት፡ ስሕተት፡ ወዐለወት።
15 ወባሕቱ፡ ተሐዩ፡ በእንተ፡ ውሉዳ። ለእመ፡ ነበሩ፡ በሃይማኖት፡ ወበተፋቅሮ፡ ወበቅድሳት፡ ወበአንጽሖ፡ ርእሶሙ፡ በአእምሮ።
=== chapter 3 ===
[ምዕራፍ 3]
በእንተ፡ ሢመተ፡ ክህነት
1 እሙን፡ ነገር፡ ዘይፈቅድ፡ ይሠየም፡ ጳጳሰ፡ ሠናየ፡ ግብረ፡ ፈተወ።
2 ወባሕቱ፡ ርቱዕ፡ ይሠየም፡ ጳጳስ፡ ዘኢያደሉ፡ ለገጽ። ዘአልቦ፡ ምክንያት፡ ዘአሐተ፡ ብእሲተ፡ አውሰበ፡ ብእሲ፡ ንቁሕ፡ ወጠቢብ፡ ወመፍቀሬ፡ ነገድ። ዘአንጽሐ፡ ርእሶ፡ መምህር፡ ወመገሥጽ።
3 ዘኢያበዝኅ፡ ሰትየ፡ ወይን፡ ዘኢያፈጥን፡ እዴሁ፡ ለዘቢጥ፡ ባቊዕ፡ ዘኢይትገአዝ፡ ዘኢያፈቅር፡ ንዋየ።
4 ዘሠናይ፡ ሥርዐተ፡ ቤቱ። ዘቦ፡ ውሉድ፡ ዘይትኤዘዙ፡ በኵሉ፡ ንጽሕ።
5 ወዘሰ፡ ኢይክል፡ ሠሪዐ፡ ቤቱ፡ እፎኑ፡ ያስተሐምም፡ ቤተ፡ እግዚአብሔር።
6 ወኢይኩን፡ ዘእምሐዲስ፡ ተክል፡ ከመ፡ ኢይትዐበይ። ወኢይጸለል፡ ወኢይደቅ፡ ውስተ፡ መሥገርተ፡ ሰይጣን።
7 ወዓዲ፡ ርቱዕ፡ ዘሰብእ፡ አፍኣ፡ ይንእድዎ። ከመ፡ ኢይደቅ፡ ውስተ፡ ጽእለት፡ ወመሥገርተ፡ ሰይጣን።
በእንተ፡ ሢመተ፡ ዲቁና
8 ወዲያቆናትኒ፡ ከማሁ፡ ንጹሓን፡ ወእስትርኩባን፡ እለ፡ አሐዱ፡ ቃሎሙ። እለ፡ ኢያበዝኁ፡ ሰትየ፡ ወይን፡ እለ፡ ኢያፈቅሩ፡ ረባሐ፡ ከንቶ።
9 እለ፡ የዐቅቡ፡ ምክረ፡ ሃይማኖቶሙ፡ በልብ፡ ንጹሕ።
10 ወሎሙኒ፡ ይቅድሙ፡ አመክሮቶሙ፡ ወእምዝ፡ ይትለአኩ፡ እምከመ፡ ኅሩያን፡ እሙንቱ።
11 ወአንስትኒ፡ ከማሁ፡ እለ፡ አንጽሓ፡ ርእሶን፡ እለ፡ ተምህራ፡ ሥርዐተ። እለ፡ ኢያስተዳጕጻ፡ ጠባባት፡ ወርቱዓት፡ ወምእመናት፡ በኵሉ፡ ወይትለአካ።
12 ወብእሲኒ፡ ዘአሐተ፡ ብእሲተ፡ አውሰበ፡ ዘቦ፡ ውሉድ፡ ዘሠናይ፡ ግእዘ፡ ቤቱ።
በእንተ፡ ሢመተ፡ ቅስና
13 ወእለሰ፡ ሠናየ፡ ይትለአኩ፡ እንተ፡ ተዐቢ፡ ሢመተ፡ ይግበሩ፡ ሎሙ። ወብዙኅ፡ ሞገሰ፡ በሃይማኖተ፡ ኢየሱስ፡ ክርስቶስ።
14 ወዘኒ፡ ዘእጽሕፍ፡ ለከ፡ እትአመን፡ ከመ፡ እበጽሐከ፡ ፍጡነ።
15 ወእመሰ፡ ጐንደይኩ፡ ከመ፡ ታእምር፡ ዘከመ፡ ትሠርዕ፡ ቤተ፡ ክርስቲያኑ፡ ለእግዚአብሔር። ሕያው፡ ዐምዳ፡ ወድዳ፡ ለጽድቅ፡ አማን፡ ዐቢይ። እስመ፡ ምክሩ፡ ለዝንቱ፡ ጽድቅ።
16 ዝኬ፡ ዘአስተርአየ፡ በሥጋ፡ ሰብእ፡ ወጸድቀ፡ በመንፈስ። ወአስተርአዮሙ፡ ለመላእክት፡ ወሰበክዎ፡ ውስተ፡ አሕዛብ። ወተአመነ፡ ውስተ፡ ዓለም፡ ወዐርገ፡ በስብሐት።
=== chapter 4 ===
[ምዕራፍ 4]
ትንቢት፡ በእንተ፡ ዐላውያን
1 ወመንፈስ፡ ገሃደ፡ ይነግር፡ ከመ፡ በደኃሪ፡ መዋዕል፡ የዐልዉ፡ ሃይማኖቶሙ፡ ብዙኃን። ወይተልውዎሙ፡ ለአጋንንት፡ እኩያን፡ ወመስሕታን፡ ወትምህርተ፡ ሰይጣን፡ ዘያናፍቅ።
2 ነባብያነ፡ ሐሰት፡ እለ፡ ንዱዳን፡ በኅሊናሆሙ።
3 እለ፡ የሐርሙ፡ አውስቦ፡ ወይከልኡ፡ መባልዕተ፡ ዘእግዚአብሔር፡ ፈጠረ፡ ለምእመናን። ከመ፡ ይሴሰዩ፡ ወያእኵቱ፡ እለ፡ የአምርዋ፡ ለጽድቅ።
4 እስመ፡ ኵሉ፡ ተግባረ፡ እግዚአብሔር፡ ሠናይ። ወአልቦ፡ ግዱፍ፡ ወኢ፡ ምንትኒ፡ ለእመ፡ ተወክፍዎ፡ እንዘ፡ የአኵቱ።
5 እስመ፡ ይትቄደስ፡ በቃለ፡ እግዚአብሔር፡ ወበጸሎት።
6 ወዘንተ፡ መሀሮሙ፡ ለአኀዊከ፡ ወትከውን፡ ኅሩየ፡ ላእከ፡ ኢየሱስ፡ ክርስቶስ። እንዘ፡ ትሴስዮሙ፡ ቃለ፡ ሃይማኖት፡ ወሠናየ፡ ትምህርተ፡ ዘተምህርከ።
7 ወለመሐድምተ፡ ዕቤራትሰ፡ ርኩስ፡ እበዮ፡ ወአግርር፡ ርእሰከ፡ ለጽድቅ።
8 እስመ፡ ግዝረትሰ፡ በሥጋ፡ ለኅዳጥ፡ ዘመን፡ ትበቊዕ። ወጽድቅሰ፡ ታሠልጥ፡ በኵሉ፡ ወባቲ፡ ተስፋ፡ ሕይወት፡ በዝ፡ ዓለም፡ ወበዘይመጽእ።
9 እሙን፡ ነገሩ፡ ወርቱዕ፡ ይትወከፍዎ፡ በኵሉ።
10 እስመ፡ በእንተ፡ ዝ፡ ንሠርሕ፡ ወንጼአል። እስመ፡ ተወከልነ፡ በእግዚአብሔር፡ ሕያው፡ ወማሕየዊ፡ ለኵሉ፡ ሰብእ፡ ወፈድፋደሰ፡ ለመሃይምናን።
11 ከመ፡ ዝ፡ መሀር፡ ወገሥጽ።
12 ወአልቦ፡ ዘያስተአብዳ፡ ለውርዝትከ። ወኩኖሙ፡ አርአያ፡ ወአምሳለ፡ ለመሃይምናን፡ በቃልከ፡ ወበምግባሪከ፡ በፍቅር፡ ወበሃይማኖት፡ ወበንጽሕ።
በእንተ፡ ኢያስትቶ፡ ጸጋ፡ ምሂር
13 ወተዐቀብ፡ እስከ፡ እመጽእ፡ በአንብቦ፡ ወበምሂር፡ ወበገሥጾ፡ ወበጸልዮ።
14 ወኢታስትት፡ ጸጋሁ፡ ዘላዕሌከ፡ ዘተውህበከ፡ ምስለ፡ ተነብዮ፡ ወምስለ፡ ሢመተ፡ እዴሆሙ፡ ለጳጳሳት።
15 ዘንተ፡ አንብብ፡ ወበዝ፡ ሀሉ፡ ከመ፡ ይትዐወቅ፡ ሥላጤከ፡ በኵለሄ።
16 ዑቅ፡ እንከ፡ ርእሰከ፡ በእንተ፡ አንብቦ፡ ወዘልፈ፡ ሀሉ፡ ባቲ። ወእመሰ፡ ዘንተ፡ ገበርከ፡ ርእሰከሂ፡ ታድኅን፡ ወዘሂ፡ ይሰምዐከ።
=== chapter 5 ===
[ምዕራፍ 5]
በእንተ፡ ክብረ፡ ልሂቃን፡ ወተአዝዞቶሙ
1 ሊቃናተ፡ ኢታመጕጽ፡ ተአዘዝ፡ ከመ፡ ዘለአቡከ፡ ወለንኡሳን፡ ከመ፡ ዘለአኀዊከ።
2 ወለልሂቃትሂ፡ ከመ፡ ዘለእምከ፡ ወለንኡሳትሂ፡ ከመ፡ ዘለአኀዊከ፡ በኵሉ፡ ንጽሕ።
3 ወአክብር፡ ዕቤራተ፡ በጽድቅ።
4 ወእመ፡ ቦ፡ እምኔሆሙ፡ ዕቤር፡ እንተ፡ ባቲ፡ ውሉድ፡ አው፡ ደቂቀ፡ ውሉድ። ይትመሀሩ፡ ቅድመ፡ አሠንዮ፡ ለቤቶሙ፡ ወይሴሰዩ፡ አዝማዲሆሙ። እስመ፡ ከማሁ፡ ሠናይ፡ ወሥሙር፡ በቅድመ፡ እግዚአብሔር።
5 ወእንተሰ፡ ዕቤር፡ በአማን፡ ንጽሕት። እንተ፡ ባሕቲታ፡ ትነብር፡ እስመ፡ ትውክልታ፡ እግዚአብሔር። ወትፀመድ፡ ጸሎተ፡ ወትስእል፡ መዓልተ፡ ወሌሊተ።
6 ወእንተሰ፡ ትፌግዕ፡ ምስለ፡ ተውኔት፡ ምዉት፡ ይእቲ፡ እንዘ፡ ሕያዋ።
7 ወከመ፡ ዝ፡ ገሥጽ፡ ከመ፡ ኢያድልዉ፡ ወኢያመክንዩ።
8 ወዘሰ፡ ኢይኄሊ፡ ለቤቱ፡ ወይገድፍ፡ አዝማዲሁ። ውእቱ፡ ክሕደ፡ ሃይማኖቶ፡ ወየአኪ፡ እምዘኢየአምን።
በእንተ፡ ኅርየተ፡ ዲያቆናት
9 ወለእመ፡ ኀረይከ፡ ዕቤረ፡ ኅረይ፡ እንተ፡ ስሳ፡ ክረምታ። እንተ፡ አሐደ፡ ብእሴ፡ አውሰበት።
10 እንተ፡ ይንእድዋ፡ በኵሉ፡ ምግባረ፡ ሠናይ፡ ለእመ፡ አልሀቀት፡ ውሉዳ። ወለእመ፡ ነግደ፡ ተወክፈት፡ ወለእመ፡ እግረ፡ ጻድቃን፡ ኀፀበት። ወእመ፡ ርኁበ፡ አጽገበት፡ ወኵሎ፡ ምግባረ፡ ሠናይ፡ ለእመ፡ ተለወት።
11 ወለንኡሳትሰ፡ መበለታት፡ ተገሐሦን፡ ወኢትሢሞን። ከመ፡ ኢይትፈግዓ፡ ላዕለ፡ ክርስቶስ፡ ወይፈቅዳ፡ ይግብኣ፡ ለአውስቦ።
12 ወጽኑሕ፡ ደይኖን፡ እስመ፡ ክሕዳ፡ ሃይማኖቶን፡ ቀዳሚተ።
13 ወዓዲ፡ አጽርዕተ፡ ወሐኬተ፡ ይትሜሀራ፡ እንዘ፡ የዐውዳ፡ አብያተ። ወአኮ፡ አጽርዕተ፡ ባሕቲቶ፡ አላ፡ ዓዲ፡ ከመ፡ ያብዝኃ፡ ነቢበ። ወምግባረ፡ ከንቱ፡ ይፈጥራ፡ ነገረ፡ ዘኢህልው።
14 እፈቅድ፡ እንከ፡ ለንኡሳት፡ ያውስባ፡ ወይትዋለዳ፡ ወይኩና፡ በዓልታተ፡ ቤት። ወኢይርከብ፡ ምክንያተ፡ ወኢ፡ አሐተኒ፡ በዘይጸብኦን፡ ጸላኢ፡ ከመ፡ ኢያጽእላ፡ ርእሶን።
15 እስመ፡ ቦ፡ እለ፡ ተመይጡ፡ ወተለውዎ፡ ለሰይጣን።
16 ወለእመ፡ ቦ፡ እምእመናን፡ ዘቦ፡ ዕቤር፡ ይዕቀባ። ወኢያክብድ፡ ላዕለ፡ ቤተ፡ ክርስቲያን፡ ከመ፡ ትክሀል፡ ለእለ፡ በአማን፡ ዕቤራት።
በእንተ፡ ምክዕቢተ፡ ጥበብ፡ ለቀሲሳን
17 እለሰ፡ ሠናየ፡ ተልእኩ፡ ቀሲሳን፡ ምክዕቢተ፡ ክብር፡ ይደልዎሙ። ወፈድፈደሰ፡ ለእለ፡ ይሠርሑ፡ በቃል፡ ወበምህሮ።
18 ወይብል፡ መጽሐፍ፡ ኢትፍጽሞ፡ አፉሁ፡ ለላሕም፡ ሶበ፡ ታከይድ፡ እክለከ። ወይደልዎ፡ ዐስቡ፡ ለዘይትቀነይ።
በእንተ፡ ሠሪዐ፡ ቤተ፡ ክርስቲያን
19 ላዕለ፡ ልሂቅ፡ ኢትስማዕ፡ ውዴተ። ዘእንበለ፡ ይዝልፍዎ፡ ክልኤቱ፡ ወሠለስቱ፡ ሰማዕት።
20 ወለእለሂ፡ ስሕቱ፡ በቅድመ፡ ኵሉ፡ ገሥጾሙ፡ ከመ፡ ባዕድኒ፡ ይፍራህ።
21 አሰምዕ፡ ለከ፡ በቅድመ፡ እግዚአብሔር፡ ወኢየሱስ፡ ክርስቶስ፡ ወመላእክቲሁ፡ ኅሩያን። ከመ፡ ትዕቀብ፡ ዘንተ፡ እንዘ፡ ኢታደሉ፡ ወኢታጽድቆ፡ ለሰብእ፡ ቅድመ፡ ፍትሕ። ወኢትግበር፡ ምንተሂ፡ በዘትትሔመይ።
22 ወኢትሢም፡ ፍጡነ፡ ወኢ፡ መነሂ፡ ወኢትሳተፍ፡ በዝ፡ ውስተ፡ ኀጢአተ፡ ባዕድ።
23 ወአንጽሕ፡ እንከ፡ ርእሰከ፡ ወኢትስተይ፡ ማየ፡ ዕራቆ። ኅዳጠ፡ ወይነ፡ ቶስሕ፡ በእንተ፡ ሕማመ፡ ከብድከ፡ ወበእንተ፡ ደዌከ፡ ዘዘልፍ።
24 ቦ፡ ሰብእ፡ ዘይትዐወቅ፡ ኀጢአቱ፡ ወይትባደሮ፡ ውስተ፡ ደይን። ወቦ፡ ዘይተልዎ፡ ኀጢአቱ።
25 ወከማሁ፡ ዘሂ፡ ይገብር፡ ሠናየ፡ ይትዐወቅ። ወዘሂ፡ ካልእ፡ ምግባሩ፡ ኢይትከበት።
=== chapter 6 ===
[ምዕራፍ 6]
በእንተ፡ ሠሪዐ፡ ቤት
1 ወኵሉ፡ ነባሪ፡ ወቅኑይ፡ አክብሩ፡ አጋእዝቲክሙ፡ በኵሉ። ከመ፡ ኢይፅርፉ፡ ላዕለ፡ ስመ፡ እግዚአብሔር፡ ወላዕለ፡ ትምህርቱ።
2 ወእለሰ፡ ቦሙ፡ አጋእዝት፡ መሃይምናን፡ ኢያስተሐቅሩ። እስመ፡ አኀዊሆሙ፡ እሙንቱ፡ በሃይማኖት። ዓዲ፡ ፈድፋደ፡ ይትቀነዩ፡ ሎሙ፡ እስመ፡ ምእመናን፡ ወፍቁራን፡ እሙንቱ። ወለእሉ፡ ይትወከፉ፡ ወይትለአኩ፡ በፍሥሓ፡ ሎሙ። ከመ፡ ዝ፡ መሀር፡ ወገሥጽ፡ ወአስተብቊዖሙ።
3 ወእመሰ፡ ቦ፡ ዘይሜህር፡ ካልአ፡ ወኢይገብእ፡ ኀበ፡ ትምህርተ፡ ነገረ፡ ሕይወት። ዘውእቱ፡ ቃለ፡ እግዚእነ፡ ኢየሱስ፡ ክርስቶስ፡ ወኀበ፡ ትምህርተ፡ ጽድቅ።
4 ውእቱኬ፡ ዘይትዔበይ፡ እንዘ፡ አልቦ፡ ዘየአምር። ዘእንበለ፡ መቅሠፍተ፡ ዘየኀሥሥ፡ ወነገረ፡ ጋእዝ። ዘእምኔሁ፡ ይመጽእ፡ ተሐምሞ፡ ወተቃንኦ፡ ፀሪፍ፡ ወምክር፡ እኩይ።
5 አስተዳጕጾ፡ ሰብእ፡ ሙሱናን፡ ወውፁኣን፡ እምጽድቅ። ወይሬስይዎ፡ ለጽድቀ፡ እግዚአብሔር፡ ተግባረ።
በእንተ፡ ርኂቅ፡ እምእከይ፡ ወአፍቅሮ፡ ንዋይ
6 ተገሐሦሙ፡ ለእሉ፡ እስመ፡ ለነሰ፡ ተግባርነ፡ ዐቢይ፡ ውእቱ፡ ፈሪሀ፡ እግዚአብሔር።
7 እስመ፡ አልቦ፡ ዘአምጻእነ፡ ውስተ፡ ዓለም። ወአልቦ፡ ዘንክል፡ ነሢአ፡ እምኔሁ።
8 እምከመ፡ ረከብነ፡ ሲሳየነ፡ ወዐራዘነ፡ የአክለነ።
9 ወእለሰ፡ ይፈቅዱ፡ ይብዐሉ፡ ይወድቁ፡ ውስተ፡ መንሱት። ወብዙኀ፡ መሣግረ፡ ፍትወት፡ ዘእበድ፡ ዘይብእሶሙ። ወዘያሰጥሞሙ፡ ለሰብእ፡ ውስተ፡ ተሠርዎ፡ ወሞት።
10 እስመ፡ ሥርዉ፡ ለኵሉ፡ እኩይ፡ አፍቅሮ፡ ንዋይ። እስመ፡ ብዙኃን፡ እለ፡ በዛቲ፡ ስሕቱ፡ ወዐለዉ፡ ሃይማኖቶሙ። ወኀሠሡ፡ ለርእሶሙ፡ ብዙኀ፡ መቅሠፍተ።
በእንተ፡ ሠናይ
11 ወአንተሰ፡ ብእሴ፡ እግዚአብሔር፡ ጕየይ፡ እምዝ። ወዴግን፡ ጽድቀ፡ ወምሂረ፡ ወሃይማኖተ፡ ወተፋቅሮ፡ ወትዕግሥተ፡ ወትሕትና።
12 ተጋደል፡ ሠናየ፡ ገድለ፡ በሃይማኖት፡ ለተመጥዎ፡ ሕይወት፡ ዘለዓለም፡ ዘሎቱ፡ ተጸዋዕከ። ወአመንከ፡ ሠናየ፡ አሚነ፡ በቅድመ፡ ብዙኃን፡ ሰማዕት።
13 ከመ፡ ዝ፡ እኤዝዘከ፡ በቅድመ፡ እግዚአብሔር፡ ዘኵሎ፡ ምዉታነ፡ ያሐዩ። ወኢየሱስ፡ ክርስቶስ፡ ዘኮነ፡ ሰማዕተ፡ በቅድመ፡ ጲላጦስ፡ ጰንጤናዊ፡ በሠናይ፡ አሚን።
14 ከመ፡ ትዕቀብ፡ ዘንተ፡ ትእዛዘ፡ በንጽሕ፡ እንዘ፡ ኢታደሉ። እስከ፡ ምጽአቱ፡ ለእግዚእነ፡ ኢየሱስ፡ ክርስቶስ።
15 ዘያስተርኢ፡ በዕድሜሁ፡ ዘባሕቲቱ፡ ብፁዕ፡ ወኀያል፡ ንጉሠ፡ ነገሥት፡ ወእግዚአ፡ አጋእዝት።
16 ውእቱ፡ ባሕቲቱ፡ ዘኢይመውት፡ ወቦቱ፡ ብርሃን፡ ዘኢይጠፍእ፡ እምቅድመ፡ ዓለም። ዘአልቦ፡ ዘርእዮ፡ ሰብእ፡ ወአልቦ፡ ዘይክል፡ ርእዮቶ። ዘሎቱ፡ ክብር፡ ወስብሐት፡ ወኀይል፡ ለዓለመ፡ ዓለም፡ አሜን።
በእንተ፡ ትእዛዝ፡ ለአብዕልት
17 ለአብዕልተ፡ ዝንቱኒ፡ ዓለም፡ አዝዞሙ፡ ከመ፡ ኢይትዐበዩ፡ ወኢይትአመንዎ፡ ለብዕሎሙ፡ ኀላፊ። ዘእንበለ፡ በእግዚአብሔር፡ ሕያው፡ ዘውእቱ፡ ይሁበነ፡ በብዝኀ፡ ብዕሉ፡ ኵሎ፡ ከመ፡ ንትፈሣሕ።
18 ከመ፡ ይግበሩ፡ ግብረ፡ ሠናየ፡ ወይብዐሉ፡ በገቢረ፡ ጽድቅ። ወይኩኑ፡ ራትዓነ፡ ወጸጋውያነ፡ ወሱቱፋነ።
19 ወይሣርሩ፡ ለርእሶሙ፡ መሠረተ፡ ሠናየ፡ ለዘይመጽእ፡ ዓለም። ከመ፡ ይርከቡ፡ ሕይወተ፡ ዘበአማን።
20 ኦ፡ ጢሞቴዎስ፡ ዕቀብ፡ ማሕፀንተከ፡ ተገሐሦሙ፡ ለርኩሳን። እለ፡ ያመጽኡ፡ ነገረ፡ ከንቶ፡ ወያሴስልዋ፡ ለጽድቅ፡ በሐሰት።
21 እስመ፡ እሉ፡ ስሕቱ፡ እምተስፋ፡ ሃይማኖት፡ ጸጋ፡ ምስሌከ፡ አሜን።