##### edition  (gez)
=== part Introduction ===
[Introduction]
=== part Epistle ===
[Epistle]
=== chapter 1 ===
[ምዕራፍ 1]
በከመ፡ ይደሉ፡ ከዊነ፡ አርአያ፡ ለአኀው
1 እምጳውሎስ፡ ወስልዋኖስ፡ ወጢሞቴዎስ፡ ለቤተ፡ ክርስቲያን፡ ዘተሰሎንቄ። ምእመናን፡ በእግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ። ሰላም፡ ለክሙ፡ ወጸጋ፡ እግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ።
2 ነአኵቶ፡ ለእግዚአብሔር፡ ዘልፈ፡ በእንቲኣክሙ፡ ወንዜክረክሙ፡ ወትረ፡ በጸሎትነ።
3 ወንዜክር፡ በቅድመ፡ እግዚአብሔር፡ አቡነ፡ ግብረ፡ ሃይማኖትክሙ። ወጽንዐ፡ ፍቅርክሙ፡ ወትዕግሥተ፡ ተስፋክሙ፡ በእግዚእነ፡ ኢየሱስ፡ ክርስቶስ።
4 ወነአምር፡ አኀዊነ፡ ፍቁራን፡ ዘከመ፡ ኀረየክሙ፡ እግዚአብሔር።
5 እስመ፡ ኢኮነ፡ ትምህርትነ፡ ኀቤክሙ፡ በነገር፡ ባሕቲቱ። ዓዲ፡ በኀይልኒ፡ ወበመንፈስ፡ ቅዱስ፡ ወበስኢል፡ ምእመን። ወአንትሙሂ፡ ተአምሩ፡ ዘከመ፡ ኮነ፡ በኀቤክሙ፡ በእንቲኣክሙ።
6 ወናሁ፡ ኪያነ፡ ተመሰልክሙ፡ ወተወከፍክሙ፡ ቃለ፡ እግዚአብሔር። በብዙኀ፡ ሕማም፡ ምስለ፡ ፍሥሓ፡ በመንፈስ፡ ቅዱስ።
7 ወኮንክምዎሙ፡ አርአያ፡ ለእለ፡ አምኑ፡ ኵሎሙ፡ እለ፡ በመቄዶንያ፡ ወአካይያ።
8 እስመ፡ እምኀቤክሙ፡ ተምህሩ፡ ቃለ፡ እግዚእነ፡ ወሰምዑ። ወአኮ፡ በመቄዶንያ፡ ወአካይያ፡ ባሕቲቱ። ዓዲ፡ በኵሉ፡ በሓውርት፡ ተሰምዐት፡ ሃይማኖትክሙ፡ በእግዚአብሔር። ወኢንፈቅድ፡ ንሕነ፡ ምንተኒ፡ ንንግር፡ በእንቲኣክሙ።
9 ለሊሆሙ፡ የአምሩ፡ ዘከመ፡ ቦእነ፡ ኀቤክሙ። ወዘከመ፡ ተመየጥክሙ፡ ኀበ፡ እግዚአብሔር፡ እምአምልኮ፡ ጣዖት። ከመ፡ ትትቀነዩ፡ ለአምላክ፡ ሕያው፡ ወጻድቅ።
10 እንዘ፡ ትሴፈውዎ፡ ለወልዱ፡ እምሰማያት። ዘተንሥአ፡ እምዉታን፡ ኢየሱስ፡ ክርስቶስ። ወውእቱ፡ ያድኅነነ፡ እመንሱት፡ ዘይመጽእ።
=== chapter 2 ===
[ምዕራፍ 2]
በእንተ፡ ምሂር፡ በተየውሆ
1 ለሊክሙ፡ ተአምሩ፡ አኀዊነ፡ ዘከመ፡ ገበርነ፡ ለክሙ። ወኢኮነ፡ በከንቱ፡ በዊኦትነ፡ ኀቤክሙ።
2 ዳእሙ፡ ሐመምነ፡ ወተጽእልነ፡ ዘከመ፡ ተአምሩ፡ በፊልጵስዩስ። ወአሜሃ፡ ነገርናክሙ፡ በብዙኅ፡ ጻማ፡ ትምህርተ፡ ክርስቶስ፡ በሞገሱ፡ ለአምላክነ።
3 እስመ፡ ኢኮነ፡ ትምህርትነ፡ ዘስሒት፡ ወኢ፡ ዘርኩስ፡ ወኢኮነ፡ ዘጽልሑት።
4 ዳእሙ፡ በዘአመከረነ፡ እግዚአብሔር፡ ወተአመነነ፡ በትምህርተ፡ ወንጌሉ። ከማሁ፡ ንነግር፡ ወአኮ፡ ከመ፡ ዘለሰብእ፡ ያደሉ። ዘእንበለ፡ ለእግዚአብሔር፡ ዘአመከረነ፡ ልበነ።
5 ወእምአመ፡ ኮነ፡ ኢየዋህናክሙ፡ በቃል፡ በከመ፡ ተአምሩ። ወኢተዐገልናክሙ፡ በምክንያት፡ ስምዕነ፡ እግዚአብሔር፡ በዝንቱ።
6 ወኢንፈቅድ፡ ያድሉ፡ ለነ፡ ሰብእ፡ ኢ፡ አንትሙ፡ ወኢ፡ ባዕድ። እንዘ፡ ንክል፡ አክብዶ፡ ከመ፡ ሐዋርያተ፡ ክርስቶስ።
7 ዳእሙ፡ ኮነ፡ ከመ፡ ሕፃናት፡ በማእከሌክሙ። ወከመ፡ ሐፃኒት፡ እንተ፡ ተሐዝል፡ ደቂቃ።
8 ከማሁ፡ ንሕነኒ፡ ናፈቅረክሙ፡ ወንጽሕቅ፡ ለክሙ፡ ከመ፡ ንመጡክሙ። ወአኮ፡ ባሕቲቶ፡ ወንጌለ፡ እግዚአብሔር፡ ዓዲ፡ ነፍሰነሂ፡ እስመ፡ ፍቁራነ፡ ኮንክሙነ።
9 ወተዘከሩ፡ አኀዊነ፡ ጻማነ፡ ወሥራሐነ፡ መዓልተ፡ ወሌሊተ። ኮነ፡ ንትጌበር፡ ከመ፡ ኢናክብድ፡ ላዕለ፡ አሐዱሂ፡ እምውስቴትክሙ።
10 ወለሊክሙ፡ ሰማዕትነ፡ ወእግዚአብሔር፡ ዘከመ፡ ሰበክነ፡ ለክሙ፡ ትምህርተ፡ ወንጌሉ፡ ለእግዚአብሔር፡ በጽድቅ። ወበርትዕ፡ ወበንጽሕ፡ በኀበ፡ ኵሎሙ፡ እለ፡ የአምኑ።
11 ዘከመ፡ ተአምሩ፡ ለለ፡ አሐዱ፡ እምውስቴትክሙ። ከመ፡ አብ፡ ለወልዱ፡ ናስተበቊዐክሙ፡ ወንናዝዘክሙ።
12 ወናሰምዕ፡ ለክሙ፡ ከመ፡ ትሑሩ፡ ወትሩጹ፡ በዘይደልወክሙ፡ ለኀበ፡ እግዚአብሔር። ዘጸውዐክሙ፡ ውስተ፡ መንግሥተ፡ ስብሐቲሁ።
በእንተ፡ ተወክፎተ፡ ቃል፡ ዘእግዚአብሔር
13 በእንተ፡ ዝ፡ ንሕነሂ፡ ዘልፈ፡ ነአኵቶ፡ ለእግዚአብሔር። እስመ፡ ተወከፍክሙ፡ ቃለ፡ ትእዛዙ፡ ለእግዚአብሔር። ወአኮ፡ ቃለ፡ ዜና፡ ሰብእ፡ አላ፡ አማን፡ ከማሁ፡ ቃለ፡ እግዚአብሔር። ወይረድአክሙሂ፡ በገቢር፡ ለእለ፡ ተአመንክሙ።
14 ወአንትሙ፡ አኀዊነ፡ ተመሰልክሙ፡ በቤተ፡ ክርስቲያኑ፡ ለእግዚአብሔር። እለ፡ በይሁዳ፡ ምእመናን፡ በኢየሱስ፡ ክርስቶስ። እስመ፡ ሐመምክሙ፡ አንትሙሂ፡ እምሕዝብክሙ። በከመ፡ ሐሙ፡ እሙንቱሂ፡ እምአይሁድ። እለ፡ ቀተልዎ፡ ለእግዚእነ፡ ኢየሱስ፡ ክርስቶስ።
15 ወለነቢያቲሂ፡ እለ፡ እምውስቴቶሙ፡ ሰደድዎሙ። ወኪያነሂ፡ ወኢያሠምርዎ፡ ለእግዚአብሔር፡ ወይትቃረኑ፡ ምስለ፡ ኵሉ፡ ሰብእ።
16 ወይከልኡነ፡ ኢንንግር፡ ለአሕዛብ፡ በዘየሐይዉ፡ ከመ፡ ይትፈጸሞሙ፡ ኀጢአቶሙ፡ ለዝሉፉ። ወናሁ፡ በጽሖሙ፡ መቅሠፍቶሙ፡ ዘለዓለም።
በእንተ፡ አዘክሮተ፡ ፍቅር
17 ወንሕነሰ፡ አኀዊነ፡ ከመ፡ ዕጓለ፡ ማውታ፡ ኮነ፡ እምኔክሙ፡ በዝ፡ መዋዕል፡ ለገጽ፡ ዳእሙ፡ ወአኮሰ፡ እምልብ። ወፈድፋደ፡ ጽሕቅነ፡ ንርአይ፡ ገጸክሙ።
18 ወብዙኀ፡ ፈቀድኩ፡ እምጻእ፡ ኀቤክሙ፡ ለልየ፡ ጳውሎስ፡ ምዕረ። ወካዕበ፡ ወአዕቀፈኒ፡ ሰይጣን።
19 መኑ፡ ተስፋነ፡ ወፍሥሓነ፡ ወአክሊለ፡ ምክሕነ። አኮኑ፡ አንትሙ፡ በቅድመ፡ እግዚእነ፡ ኢየሱስ፡ ክርስቶስ፡ በምጽአቱ።
20 እስመ፡ አንትሙ፡ ክብርነ፡ ወፍሥሓነ።
=== chapter 3 ===
[ምዕራፍ 3]
ዘከመ፡ ኢይደሉ፡ ቀቢጸ፡ ተስፋ
1 ወስኢነነ፡ ተዐግሦ፡ አብደርነ፡ ንንበር፡ አቴና፡ አሐተኔ፡ ባሕቲተነ።
2 ወፈነውናሁ፡ ለጢሞቴዎስ፡ እኁነ፡ ላእከ፡ እግዚአብሔር፡ ወረድኤትነ፡ በትምህርተ፡ ክርስቶስ። ከመ፡ ያጽንዕክሙ፡ ወያስተብቊዕክሙ፡ በእንተ፡ ሃይማኖትክሙ።
3 ከመ፡ ኢታንቀልቅሉ፡ ወኢይቅብጽ፡ አሐዱሂ፡ እምውስቴትክሙ፡ በዛቲ፡ ሕማምክሙ። ተአምሩ፡ ለሊክሙ፡ ከመ፡ ዝንቱ፡ ዳእሙ፡ ይጸንሐነ።
4 ወአመ፡ ሀሎኩ፡ ኀቤክሙ፡ ዘንተ፡ ክመ፡ አቅደምኩ፡ ወነገርኩክሙ። ከመ፡ ሀለወነ፡ ንሕምም፡ ወይሣቅዩነ። ወበከመ፡ አመርናክሙ፡ ኮነ፡ ውእቱ።
በእንተ፡ ሐውጾ፡ አርድእት፡ በላእካን
5 ወበእንተ፡ ዝ፡ አነሂ፡ ስኢንየ፡ ተዐግሦ፡ ፈነውኩ፡ ጢሞቴዎስሃ። ከመ፡ አእምር፡ ሃይማኖተክሙ። እመ፡ ቦ፡ ከመ፡ አመከርክሙ፡ ዘያሜክር። ወለከንቱ፡ ይከውን፡ ጻማነ፡ ዘበእንቲኣክሙ።
6 ወይእዜሰ፡ እምአመ፡ በጽሐ፡ ጢሞቴዎስ፡ ኀቤነ፡ እምኀቤክሙ። ወዜነወነ፡ ሃይማኖተክሙ፡ ወተፋቅሮተክሙ፡ ወከመሂ፡ ትዜክሩነ፡ በሠናይ፡ ዘልፈ። ወትፈትዉ፡ ትርአዩነ፡ በከመ፡ ንፈቱ፡ ንሕነሂ፡ ርእዮተክሙ።
7 በእንተ፡ ዝ፡ ተፈሣሕነ፡ አኀዊነ፡ በእንተ፡ ኵሉ፡ ሕማምነ፡ ወምንዳቤነ፡ ዘበእንተ፡ ሃይማኖትክሙ።
8 እስመ፡ ይእዜ፡ ነሐዩ፡ እምከመ፡ አንትሙ፡ ቆምክሙ፡ በእግዚእነ።
ጸሎተ፡ መምህራን፡ ኵሎ፡ ጊዜ
9 አየ፡ አኰቴተ፡ ንክል፡ ዐስዮቶ፡ ለእግዚአብሔር። ህየንተ፡ ኵሉ፡ ፍሥሓነ፡ ዘተፈሣሕነ፡ በእንቲኣክሙ። ዘእንበለ፡ ከመ፡ ንጸሊ፡ ኀበ፡ አምላክነ፡ መዓልተ፡ ወሌሊተ።
10 ወፈድፋደሰ፡ ንጼሊ፡ ከመ፡ ንርአይ፡ ገጸክሙ፡ ወይትፈጸም፡ ሕጸጸ፡ ሃይማኖትክሙ።
11 ወእግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ፡ ያርትዕ፡ ፍኖተነ፡ ኀቤክሙ።
12 ወለክሙሂ፡ ያብዝኅ፡ ወያፈድፍድ፡ ተፋቅሮተክሙ፡ በበይናቲክሙ፡ ወምስለ፡ ኵሉ፡ ለለ፡ አሐዱ። በከመ፡ ንሕነ፡ ናፈቅረክሙ፡ ለክሙ።
13 ወይጽናዕ፡ ልብክሙ፡ በንጽሕ፡ ወበቅድሳት፡ ለቅድመ፡ እግዚአብሔር፡ አቡነ። አመ፡ ምጽአተ፡ እግዚእነ፡ ኢየሱስ፡ ክርስቶስ፡ ምስለ፡ ኵሎሙ፡ ቅዱሳን።
=== chapter 4 ===
[ምዕራፍ 4]
በእንተ፡ ርኂቅ፡ እምዘዘ፡ ዚኣሁ፡ ፈቃደ፡ ሥጋ
1 ወይእዜኒ፡ አኀዊነ፡ ንነግረክሙ፡ ወናስተበቊዐክሙ፡ በእግዚእነ፡ ኢየሱስ፡ ክርስቶስ። ከመ፡ ተአዘዝክሙ፡ በኀቤነ፡ በዘይደሉ። ከመ፡ ትሑሩ፡ ወታሥምርዎ፡ ለእግዚአብሔር፡ ወበከመ፡ ሖርክሙ። ዓዲ፡ ከመ፡ ታብዝኁ፡ ወታፈድፍዱ፡ በዝንቱ።
2 ወተአምሩ፡ ዘከመ፡ አዘዝናክሙ፡ በእግዚእነ፡ ኢየሱስ፡ ክርስቶስ።
3 እስመ፡ ዝ፡ ውእቱ፡ ትእዛዙ፡ ለእግዚአብሔር። ወፈቃዱ፡ ተቀድሶትክሙ፡ ውእቱ፡ ወከመ፡ ትትዐቀቡ፡ ወትርሐቁ፡ እምዝሙት።
4 ወያእምር፡ ኵሉ፡ ለለ፡ አሐዱ፡ ንዋዮ፡ ወያጥርዮ፡ በቅድሳት፡ ወክብር።
5 ወኢትትመንሰዉ፡ በፍትወት፡ ከመ፡ አረሚ፡ እለ፡ ኢየአምርዎ፡ ለእግዚአብሔር።
6 ወኢትትሃበሉ፡ ትግበሩ፡ ዘንተ፡ ወኢትትዐበዩ፡ ወኢትትዐገሉ፡ ቢጸክሙ፡ በኵሉ። እስመ፡ መስተበቅል፡ እግዚአብሔር፡ በእንተ፡ ዝንቱ፡ ኵሉ። በከመ፡ አቅደምኩ፡ ነጊሮተክሙ፡ ወአስማዕኩ፡ ለክሙ።
7 እስመ፡ ኢጸውዐነ፡ እግዚአብሔር፡ ለርኩስ፡ ዘእንበለ፡ ለቅድሳት።
8 ወይእዜኒ፡ ዘክሕደሰ፡ ለያእምር፡ ከመ፡ አኮ፡ ለሰብእ፡ ዘይክሕድ። ዘእንበለ፡ ለእግዚአብሔር፡ ዘወሀበክሙ፡ መንፈሰ፡ ቅዱሰ።
9 ወበእንተሰ፡ አፍቅሮ፡ ቢጽክሙ፡ ኢትፈቅዱ፡ ንጽሐፍ፡ ለክሙ። ለሊክሙ፡ ምሁራን፡ በኀበ፡ እግዚአብሔር፡ ከመ፡ ትትፋቀሩ፡ በበይናቲክሙ።
10 ወከማሁ፡ ትግበሩ፡ ዓዲ፡ ምስለ፡ ኵሎሙ፡ አኀዊክሙ፡ እለ፡ በኵሉ፡ መቄዶንያ።
11 ወናስተበቊዐክሙ፡ አኀዊነ፡ ትብዝኁ፡ ወትፈድፍዱ፡ ከመ፡ ትኩኑ፡ የዋሃነ። ወትትገበሩ፡ ተግባረክሙ፡ ወትትቀነዩ፡ በእደዊክሙ፡ ዘከመ፡ አዘዝናክሙ።
12 ከመ፡ ትሑሩ፡ በኂሩት፡ ለቅድመ፡ እለ፡ አፍኣ። ወኢ፡ ትጽሐቁ፡ ወኢ፡ ኀበ፡ መኑሂ።
ዘከመ፡ ኢይደሉ፡ ሐዘን፡ ዘቀቢጸ፡ ተስፋ
13 ወንፈቅድ፡ ታእምሩ፡ አኀዊነ፡ በእንተ፡ እለ፡ ኖሙ። ከመ፡ ኢይደሉ፡ ትተክዙ፡ በላዕሌሆሙ፡ ከመ፡ ኵሉ፡ ሰብእ፡ እለ፡ ቅቡጻን፡ ተስፋሆሙ።
14 ወእምከመሰ፡ ንትአመን፡ ከመ፡ ሞተ፡ ክርስቶስ፡ ወተንሥአ። ከማሁ፡ ያነሥኦሙ፡ እግዚአብሔር፡ ለምዉታን፡ በኢየሱስ፡ ወያመጽኦሙ፡ ምስሌሁ።
15 ወዘንተ፡ ንነግረክሙ፡ በቃለ፡ እግዚአብሔር፡ ንሕነ፡ ሕያዋን። እለ፡ ንተርፍ፡ አመ፡ ምጽአተ፡ እግዚእነ፡ ኢንበጽሖሙ፡ ለምዉታን።
16 እስመ፡ ይኤዝዝ፡ እግዚእነ፡ ምስለ፡ ሊቀ፡ መላእክት። ወንፍኀተ፡ ቀርን፡ ዘእግዚአብሔር፡ ዘይወርድ፡ እምሰማይ። ወይትነሥኡ፡ ምዉታን፡ መቅድመ፡ እለ፡ ሞቱ፡ በሃይማኖተ፡ ክርስቶስ።
17 ወእምዝ፡ ንሕነ፡ እለ፡ ሕያዋን፡ እለ፡ ንተርፍ፡ ንትመሠጥ፡ በደመና፡ ምስሌሆሙ፡ ኅቡረ። ከመ፡ ንትቀበሎ፡ ለእግዚእነ፡ ውስተ፡ አየር። ወንሄሉ፡ እንከ፡ ዘልፈ፡ ኀበ፡ እግዚእነ።
18 ወይእዜኒ፡ መሀሩ፡ ቢጸክሙ፡ ዘንተ፡ ነገረ።
=== chapter 5 ===
[ምዕራፍ 5]
በእንተ፡ ነገረ፡ ምጽአት
1 ወበእንተሰ፡ ዕድሜሁ፡ ወዕለቱ፡ ወጊዜሁ፡ አኀዊነ፡ ኢትፈቅዱ፡ ንጽሐፍ፡ ለክሙ።
2 ለሊክሙ፡ ተአምሩ፡ ጥዩቀ፡ ከመ፡ ዕለተ፡ እግዚእነ፡ ከመ፡ ምጽአተ፡ ሰራቂ፡ ሌሊተ። ከማሁ፡ ይከውን፡ ምጽአቱ።
3 አመ፡ ይብሉ፡ እለ፡ ይክሕዱ፡ ኪያሁ፡ ከመ፡ ውስተ፡ ዳኅን፡ ወሰላም፡ እሙንቱ። ወህየ፡ ግብተ፡ ይመጽኦሙ፡ ተሠርዎ። ከመ፡ ፅንስት፡ እንተ፡ ይመጽኣ፡ ማሕምም፡ ወኢይክሉ፡ አምስጦ።
4 ወአንትሙሰ፡ አኀዊነ፡ ኢሀለውክሙ፡ ውስተ፡ ጽልመት። ከመ፡ ይርከብክሙ፡ ውእቱ፡ ዕለት፡ ከመ፡ ሰራቂ።
5 እስመ፡ ኵልክሙ፡ ውሉደ፡ ብርሃን፡ አንትሙ፡ ወውሉደ፡ መዓልት። ወኢኮንክሙ፡ ውሉደ፡ ሌሊት፡ ወኢ፡ ውሉደ፡ ጽልመት።
6 ወኢንኑም፡ እንከ፡ ከመ፡ እልኩ። አላ፡ ንንቃሕ፡ በኅሊናነ፡ ወንትጋህ፡ ወንጥበብ።
7 እስመ፡ እለ፡ ይነውሙ፡ ሌሊተ፡ ይነውሙ። ወእለሂ፡ ይሰክሩ፡ ሌሊተ፡ ይሰክሩ።
8 ወንሕነሰ፡ እንዘ፡ ውሉደ፡ መዓልት፡ ንሕነ። ንንቃሕ፡ ወንልበስ፡ ልብሰ፡ ኀጺን፡ ዘሃይማኖት፡ ወዘተፋቅሮ። ወንትቀጸል፡ ጌራ፡ ተስፋ፡ መድኀኒት።
9 እስመ፡ ኢረሰየነ፡ እግዚአብሔር፡ ለመንሱት፡ ዘእንበለ፡ ለሕይወት፡ ወለመድኀኒት። በእግዚእነ፡ ኢየሱስ፡ ክርስቶስ፡ ዘሞተ፡ ለነ፡ ቤዛነ።
10 እመኒ፡ ንቁሓን፡ ንሕነ፡ ወእመኒ፡ ንዉማን፡ ምስሌሁ፡ ነሐዩ፡ ኵልነ።
በእንተ፡ ናዝዞተ፡ ቢጽ
11 ወይእዜኒ፡ አስተፍሥሑ፡ ቢጸክሙ፡ በእንተ፡ ዝ። ወይሕንጽ፡ አሐዱ፡ ካልኦ፡ ዘከመ፡ ትገብሩ፡ ዓዲ።
12 ወናስተበቊዐክሙ፡ አኀዊነ፡ ዑቅዎሙ፡ ለእለ፡ ይጻምዉ፡ በውስቴትክሙ። ወለእለ፡ ይቀውሙ፡ ለክሙ፡ በእንተ፡ እግዚእነ፡ ወይሜህሩክሙ።
13 አክብርዎሙ፡ ፈድፋደ፡ ወአፍቅርዎሙ፡ በእንተ፡ ምግባሮሙ፡ ወተአምኅዎሙ።
14 ወናስተበቊዐክሙ፡ አኀዊነ፡ ገሥጽዎሙ፡ ለዝሉፋን፡ ናዝዝዎሙ፡ ለሕዙናን። ጹርዎሙ፡ ለድኩማን፡ ወተዐገሡ፡ ላዕለ፡ ኵሉ።
15 ዑቁ፡ ኢትግበሩ፡ እኩየ፡ ህየንተ፡ እኪት። አላ፡ ተባደሩ፡ ዘልፈ፡ ለሠናይ፡ በበይናቲክሙ፡ ወለኵሉሂ።
ዘከመ፡ ይደሉ፡ ጸልዮ፡ ለአኀው
16 ተፈሥሑ፡ በኵሉ፡ ጊዜ፡ ወጸልዩ፡ ወትረ።
17 አእኵትዎ፡ ለእግዚአብሔር፡ አብ፡ በእንተ፡ ኵሉ፡ ግብር።
18 እስመ፡ ዝ፡ ውእቱ፡ ፈቃዱ፡ ለእግዚአብሔር፡ እምውስቴትክሙ፡ በኢየሱስ፡ ክርስቶስ።
19 መንፈሰ፡ ኢታጥፍኡ።
20 ወተነብዮ፡ ኢትመንኑ።
21 ወኵሎ፡ አመክሩ፡ ወዘሠናይ፡ አጽንዑ።
22 ወተገሐሡ፡ እምኵሉ፡ ምግባር፡ እኩይ።
23 ወእግዚአብሔር፡ አምላከ፡ ሰላም፡ ይቀድስክሙ፡ ፍጹመ። ወያጥዒክሙ፡ ነፍሰክሙ፡ ወመንፈሰክሙ፡ ወሥጋክሙ፡ በንጽሕ። እስከ፡ ምጽአተ፡ እግዚእነ፡ ኢየሱስ፡ ክርስቶስ።
24 ወዘጸውዐክሙ፡ ጻድቅ፡ ውእቱ፡ ይግበር፡ ለክሙ፡ ዘንተ።
25 ኦ፡ አኀዊነ፡ ጸልዩ፡ ለነ።
26 አምኁ፡ ኵሎ፡ አኀዊነ፡ በአምኃ፡ ቅድሳት፡ ወተአምኁ፡ በበይናቲክሙ።
27 አምሕለክሙ፡ በእግዚእነ፡ ታንብብዋ፡ ለዛቲ፡ መጽሐፍ፡ ላዕለ፡ ኵሎሙ፡ አኀዊነ፡ ቅዱሳን።
28 ጸጋሁ፡ ለእግዚእነ፡ ኢየሱስ፡ ክርስቶስ፡ ምስሌክሙ፡ አሜን።