##### edition  (gez)
=== part Introduction ===
[Introduction to the epistle]
=== part Epistle ===
[Epistle]
=== chapter 1 ===
[ምዕራፍ 1]
በእንተ፡ ማኅበረ፡ እግዚአብሔር፡ ዘብሔረ፡ ቆሮንቶስ
1 እምጳውሎስ፡ ዘተሠይመ፡ ሐዋርያሁ፡ ለእግዚእነ፡ ኢየሱስ፡ ክርስቶስ፡ በፈቃደ፡ እግዚአብሔር። ወስቴንስ፡ እኁነ።
2 ለማኅበረ፡ እግዚአብሔር፡ ዘብሔረ፡ ቆሮንቶስ። እለ፡ ተቀደሱ፡ በኢየሱስ፡ ክርስቶስ፡ ወተሰምዩ፡ ቅዱሳነ። ወለኵሎሙ፡ እለ፡ ይጼውዑ፡ ስሞ፡ ለእግዚእነ፡ ኢየሱስ፡ ክርስቶስ፡ ውስተ፡ ኵሉ፡ በሓውርቲሆሙ። ወለነሂ፡ ምስሌሆሙ።
3 ጸጋ፡ ወሰላም፡ እምኀበ፡ እግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ።
4 ዘልፈ፡ አአኵቶ፡ ለእግዚአብሔር፡ በእንቲኣክሙ። ወበእንተ፡ ጸጋሁ፡ ለእግዚአብሔር፡ ዘተውህበ፡ ለክሙ፡ በኢየሱስ፡ ክርስቶስ።
5 እስመ፡ ብዕልክሙ፡ ቦቱ፡ በኵሉ፡ ቃል፡ ወበኵሉ፡ ጥበብ።
6 በከመ፡ ጸንዐ፡ ላዕሌክሙ፡ ስምዑ፡ ለክርስቶስ።
7 ከመ፡ ኢትኀጥኡ፡ ኵሎ፡ ጸጋ፡ ወትኩኑ፡ ፍጹማነ። እንዘ፡ ትሴፈዉ፡ ምጽአቶ፡ ለእግዚእነ፡ ኢየሱስ፡ ክርስቶስ።
8 ዘያጸንዐክሙ፡ ለዝሉፉ፡ ዘእንበለ፡ ነውር፡ በዕለተ፡ እግዚእነ፡ ኢየሱስ፡ ክርስቶስ።
9 ጻድቅ፡ እግዚአብሔር፡ ዘጸውዐክሙ፡ ትኩኑ፡ ሱቱፋነ፡ ወልዱ፡ ኢየሱስ፡ ክርስቶስ፡ እግዚእነ።
በእንተ፡ ዘኢይደሉ፡ ተጋእዞ
10 አስተበቊዐክሙ፡ አኀዊነ፡ በስሙ፡ ለእግዚእነ፡ ኢየሱስ፡ ክርስቶስ። ከመ፡ ትበሉ፡ ኵልክሙ፡ አሐደ፡ ቃለ፡ ወኢትተክዙ። ወትኩኑ፡ ፍጹማነ፡ ወኢትትፋለጡ። ወሀልዉ፡ በአሐዱ፡ ምክር፡ ወበአሐዱ፡ ልብ።
11 ነገሩኒ፡ በእንቲኣክሙ፡ አኀዊነ፡ እምቤተ፡ ቀለዮጳ፡ ከመ፡ ትትካሐዱ፡ ወትትጋአዙ።
12 ወናሁ፡ እነግረክሙ፡ ዘትብሉ፡ በበይናቲክሙ። አነ፡ ዘጳውሎስ፡ ወአነ፡ ዘአጵሎስ፡ ወአነ፡ ዘኬፋ፡ ወአነ፡ ዘክርስቶስ።
13 ተናፈቀኑ፡ ክርስቶስ። ወቦኑ፡ ጳውሎስ፡ ተሰቅለ፡ በእንቲኣክሙ፡ ወበስመ፡ ጳውሎስኑ፡ ተጠመቅሙ።
14 ኣአኵቶ፡ ለእግዚአብሔር፡ ዘኢያጥመቁ፡ እምውስቴትክሙ፡ ዘእንበለ፡ ቀርስጶስ፡ ወጋይዮስ። ከመ፡ አልቦ፡ ዘይብል፡ በስመ፡ ዚኣሁ፡ ተጠመቅነ።
15 ወባሕቱ፡ አጥመቁ፡ ቤተ፡ እስጢፋኖስ። ወኢየአምር፡ እንከ፡ ለእመ፡ ቦ፡ ባዕድ፡ ዘአጥመቁ።
16 እስመ፡ ኢፈነወኒ፡ ክርስቶስ፡ ለአጥምቆ፡ ዳእሙ፡ ለምህሮ።
በእንተ፡ ነገረ፡ መስቀል
17 ወኢኮነ፡ በጥበበ፡ ነገር፡ ከመ፡ ኢንስዐር፡ መስቀሎ፡ ለክርስቶስ።
18 እስመ፡ ነገረ፡ መስቀሉሰ፡ እበድ፡ ውእቱ፡ በኀበ፡ ህጉላን። ወበኀቤነሰ፡ ለእለ፡ ድኅነ፡ ኀይለ፡ እግዚአብሔር፡ ውእቱ።
19 እስመ፡ ከመ፡ ዝ፡ ይቤ፡ መጽሐፍ። አነ፡ ኣሀጕል፡ ጥበቢሆሙ፡ ለጠቢባን። ወእሜንን፡ ምክሮሙ፡ ለመካርያን።
20 መኑ፡ እንከ፡ ጠቢብ፡ ወመኑ፡ እንከ፡ ጸሓፊ። ወመኑ፡ ዘየኀሥሦ፡ ለዝ፡ ዓለም። አኮኑ፡ አእበዳ፡ እግዚአብሔር፡ ለጥበበ፡ ዝ፡ ዓለም።
21 እስመ፡ በጥበቡ፡ ለእግዚአብሔር፡ ዘኢየአምርዎ፡ ዓለም፡ በጥበቢሆሙ። መከረ፡ እግዚአብሔር፡ ከመ፡ ያድኅኖሙ፡ ለእለ፡ የአምኑ፡ በእበደ፡ ሥጋ።
22 እስመ፡ አይሁድኒ፡ ተኣምረ፡ ይሴአሉ፡ ወጽርእኒ፡ ጥበበ፡ የኀሥሡ።
23 ወንሕነሰ፡ ንሰብክ፡ ክርስቶስሃ፡ ዘተሰቅለ፡ እንዘ፡ ንብል። ለአይሁድኒ፡ ይመስሎሙ፡ ዘንጌጊ፡ ወለአረሚኒ፡ ይመስሎሙ፡ ዘነአብድ።
24 ወለነሰ፡ ለእለ፡ ድኅነ፡ እምአይሁድ፡ ወእምአረሚኒ። ክርስቶስ፡ ኀይለ፡ እግዚአብሔር፡ ውእቱ፡ ወጥበበ፡ እግዚአብሔር፡ ውእቱ።
25 እስመ፡ እበድ፡ ዘበእንተ፡ እግዚአብሔር፡ ይጠብብ፡ እምዕጓለ፡ እመሕያው። ወድካም፡ ዘእንበይነ፡ እግዚአብሔር፡ ይጸንዕ፡ እምዕጓለ፡ እመሕያው።
በእንተ፡ ጽዋዔ፡ ምእመናን
26 ርእዩ፡ እንከ፡ አኀዊነ፡ ዘከመ፡ ጸውዐክሙ። እስመ፡ ኢኮንክሙ፡ ጠቢባነ፡ ብዙኃነ፡ በሥጋ፡ ወኢኮንክሙ፡ ኀያላነ፡ ብዙኃነ። ወኢኮንክሙ፡ በዘመድ፡ ኄራነ፡ ብዙኃነ።
27 ወባሕቱ፡ አብዳኒሁ፡ ለዝ፡ ዓለም፡ ኀረየ፡ እግዚአብሔር፡ ከመ፡ ያስተኀፍሮሙ፡ ለጠቢባን። ወድኩማኒሁ፡ ለዝ፡ ዓለም፡ ኀረየ፡ ከመ፡ ያስተኀፍሮሙ፡ ለጽኑዓን።
28 ወለእለ፡ አልቦሙ፡ አዝማድ፡ ወለምኑናን፡ ኀረዮሙ፡ እግዚአብሔር። ወለእለ፡ ኢሀለዉ፡ ከመ፡ ያስተኀፍሮሙ፡ ለእለ፡ ሀለዉ።
29 ከመ፡ ኢይትመካሕ፡ ኵሉ፡ ዘሥጋ፡ በቅድመ፡ እግዚአብሔር።
30 ወአንትሙሂ፡ እምኀቤሁ፡ በኢየሱስ፡ ክርስቶስ። ወቦቱ፡ ረከብነ፡ ጥበበ፡ እምእግዚአብሔር፡ ወጽድቀ፡ ወቅድሳተ፡ ወመድኀኒተ።
31 ከመ፡ ይኩን፡ በከመ፡ ይቤ፡ መጽሐፍ። ወዘሰ፡ ይትሜካሕ፡ በእግዚአብሔር፡ ለይትመካሕ።
=== chapter 2 ===
[ምዕራፍ 2]
በእንተ፡ አርእዮ፡ መንፈስ፡ ቅዱስ፡ ወኀይል
1 ወአነሂ፡ ሶበ፡ መጻእኩ፡ ኀቤክሙ፡ አኀዊነ። አኮ፡ በኂጣን፡ ወበተጥባበ፡ ነገር፡ ዘመጻእኩ፡ እምሀርክሙ፡ ትምህርተ፡ እግዚአብሔር።
2 ወኢሐዘብኩ፡ እስማዕ፡ በላዕሌክሙ፡ ካልአ፡ ነገረ። ዘእንበለ፡ ኢየሱስ፡ ክርስቶስ፡ ዘተሰቅለ።
3 ወአነሂ፡ በድካም፡ ወበፍርሀት፡ ወበረዓድ፡ መጻእኩ።
4 ወቃልየኒ፡ ወትምህርትየኒ፡ ኢኮነ፡ በተየውሆ፡ ወበኂጣነ፡ ተጥባበ፡ ነገረ፡ ሰብእ። ዳእሙ፡ በአርእዮ፡ መንፈስ፡ ቅዱስ፡ ወኀይል።
5 ከመ፡ ኢይኩን፡ ሃይማኖትክሙ፡ በጥበበ፡ ሰብእ፡ ዘእንበለ፡ በኀይለ፡ እግዚአብሔር።
በእንተ፡ ጥበብ፡ ዘበአማን
6 ጥበበ፡ ንነግሮሙ፡ ለጠቢባን። ወአኮ፡ ጥበበ፡ ዝ፡ ዓለም፡ ወኢ፡ ጥበበ፡ መላእክተ፡ ዝንቱ፡ ዓለም። ዘሀለዎሙ፡ ይሰዐሩ፡ ዘንነግሮሙ።
7 ዘእንበለ፡ ጥበበ፡ እግዚአብሔር፡ ዘንነግር። ዘኅቡእ፡ ወክቡት፡ ጥበብ፡ ዘበአማን፡ ዘአቅደመ፡ እግዚአብሔር፡ ሐድሶቶ፡ ወአጽንዖቶ። እምቅድመ፡ ይትፈጠር፡ ዓለም፡ ዘሠርዐ፡ እግዚአብሔር፡ ለክብረ፡ ዚኣነ።
8 ዘኢየአምርዎ፡ መላእክተ፡ ዝ፡ ዓለም። ወሶበሰኬ፡ አእመሩ፡ እምኢሰቀልዎ፡ ለእግዚአ፡ ስብሐት።
9 አኮኑ፡ ከመ፡ ዝ፡ ይቤ፡ መጽሐፍ። ዘዐይን፡ ኢርእየ፡ ወእዝን፡ ኢሰምዐ፡ ወውስተ፡ ልበ፡ ሰብእ፡ ዘኢተሐለየ። ዘአስተዳለወ፡ እግዚአብሔር፡ ለእለ፡ ያፈቅርዎ።
10 ዘከሠተ፡ ለነ፡ እግዚአብሔር፡ በመንፈሱ። እስመ፡ መንፈስ፡ ቅዱስ፡ የኀሥሥ፡ ኵሎ፡ መዐምቅቲሁ፡ ለእግዚአብሔር።
11 መኑ፡ ብእሲ፡ ዘየአምር፡ ዘውስተ፡ ልበ፡ ሰብእ። ዘእንበለ፡ መንፈሱ፡ ለሰብእ፡ ዘላዕሌሁ። ከማሁኬ፡ ለእግዚአብሔርኒ፡ አልቦ፡ ዘየአምር፡ ኅሊናሁ፡ ዘእንበለ፡ መንፈሱ፡ ለእግዚአብሔር።
12 ወንሕነሰኬ፡ ኢኮነ፡ ዘነሣእነ፡ መንፈሰ፡ ዝ፡ ዓለም። ወባሕቱ፡ ነሣእነ፡ መንፈሰ፡ ዘእምኀበ፡ እግዚአብሔር። ከመ፡ ናእምር፡ ዘወሀበነ፡ እግዚአብሔር፡ ጸጋ።
13 ወዝንቱኒ፡ ነገርነ፡ ኢኮነ፡ ትምህርተ፡ ዕጓለ፡ እመሕያው። ወኢኮነ፡ ጥበበ፡ ነገር፡ ዘእንበለ፡ ትምህርተ፡ መንፈስ፡ ቅዱስ። ወጥበብ፡ መንፈሳዊ፡ ለመንፈሳውያን፡ እለ፡ ይፌክሩ፡ ዘመንፈስ።
14 ወሰብእሰ፡ ዘነፍስ፡ ኢይኤድሞ፡ ዘመንፈስ። ወኢይትዌከፎ፡ እስመ፡ እበደ፡ ይመስሎ። ወኢይክል፡ ያእምር፡ ከመ፡ በመንፈስ፡ ቅዱስ፡ ይትሐተት።
15 ወዘሰ፡ ቦ፡ መንፈስ፡ ቅዱስ፡ ኵሎ፡ ይትኀሠሥ። ወሎቱሰ፡ አልቦ፡ ዘይትኀሠሦ።
16 መኑ፡ የአምር፡ ኅሊናሁ፡ ለእግዚአብሔር፡ ወመኑ፡ መማክርቲሁ። ንሕነሰኬ፡ ኅሊናሁ፡ ለክርስቶስ፡ ብነ።
=== chapter 3 ===
[ምዕራፍ 3]
በእንተ፡ ጥንተ፡ ትምህርት
1 ወአንሰ፡ አኀውየ፡ ኢክህልኩ፡ ምህሮተክሙ፡ ከመ፡ ዘመንፈሳውያን። ዘእንበለ፡ ከመ፡ ዘበሕገ፡ ሥጋ፡ ወደም።
2 ወከመ፡ ዘለሕፃናት፡ በሃይማኖተ፡ ክርስቶስ፡ ሐሊበ፡ ወጋዕኩክሙ። ወአኮ፡ መብልዐ፡ ጽኑዐ፡ ዘአብላዕኩክሙ። እስመ፡ ዓዲክሙ፡ ኢጸናዕክሙ፡ በሕገ፡ ዘሥጋ፡ ወደም፡ ሀለውክሙ።
3 ወእመሰ፡ ትትቃንኡ፡ ወትትጋአዙ፡ አኮኑ፡ ዘሥጋ፡ ወደም፡ አንትሙ። ወከመ፡ ዕጓለ፡ እመሕያው፡ ተሐውሩ።
4 እስመ፡ ቦ፡ እምውስቴትክሙ፡ ዘይብል፡ አነ፡ ዘጳውሎስ። ወካልእ፡ ይብል፡ አነ፡ ዘአጵሎስ።
5 ምንትኑ፡ ጳውሎስ፡ ወምንትኑ፡ አጵሎስ። አኮኑ፡ ሰብእ፡ እሙንቱ፡ ወበላዕሌሆሙ፡ አመንክሙ።
6 ወለለ፡ አሐዱ፡ አሐዱ፡ በከመ፡ ወሀቦ፡ እግዚአብሔር። አነ፡ ተከልኩ፡ ወአጵሎስ፡ ሠቀየ፡ ወእግዚአብሔር፡ አልሀቀ።
7 ወይእዜኒ፡ ኢ፡ ዘተከለ፡ ወኢ፡ ዘሠቀየ፡ አልቦ፡ ዘበቊዐ። ዘእንበለ፡ ዳእሙ፡ እግዚአብሔር፡ ዘአልሀቀ።
8 ዘሂ፡ ተከለ፡ ወዘሂ፡ ሠቀየ፡ አሐዱ፡ እሙንቱ። ወኵሎሙ፡ ዐስቦሙ፡ ይነሥኡ፡ በአምጣነ፡ ጻማሆሙ።
በእንተ፡ አርድእት
9 እስመ፡ ነኀብር፡ በግብረ፡ እግዚአብሔር፡ ወላእካነ፡ እግዚአብሔር፡ ንሕነ። ወአንትሙሰ፡ ሕንጻ፡ እግዚአብሔር፡ አንትሙ።
10 ወበከመ፡ ጸጋሁ፡ ለእግዚአብሔር፡ ዘወሀበኒ። አስተናደፍኩ፡ መሠረተ፡ ከመ፡ ጠቢብ፡ ሊቀ፡ ጸረብት። ወባሕቱ፡ ካልእ፡ ውእቱ፡ ዘይሔድሳ፡ ለሕንጸት። ወኵሉ፡ ለይትዐቀብ፡ ዘከመ፡ የሐንጽ።
11 ወካልእሰ፡ መሠረተ፡ አልቦ፡ ዘይክል፡ ሣርሮ፡ ዘእንበለ፡ ዘተሣረረ። ወመሠረቱሂ፡ ኢየሱስ፡ ክርስቶስ፡ ውእቱ።
12 ወእመ፡ ቦ፡ ዘየሐንጽ፡ ዲበ፡ ዝንቱ፡ መሠረት። ወርቀ፡ ወብሩረ፡ ወእብነ፡ ክቡረ፡ ወዕፀ፡ ወሣዕረ፡ ወብርዐ።
13 ለለ፡ አሐዱ፡ ይትከሠት፡ ምግባሩ። ወዕለቱ፡ ያዐውቆ፡ አመ፡ ከሠቶ፡ እሳት። ወለለ፡ አሐዱ፡ እሳት፡ ያሜክር፡ ምግባሮ።
14 ወዘሰ፡ ጸንዐ፡ ወቆመ፡ ምግባሩ፡ ውእቱኬ፡ ዘይነሥእ፡ ዕሤቶ።
15 ወዘሰ፡ ውዕየ፡ ምግባሩ፡ የሀጕል፡ ዐስቦ። ወውእቱ፡ የሐዩ፡ ከመ፡ ዘይድኅን፡ እምእሳት። አእምሮ፡ ኩነተ፡ እግዚአብሔር
16 ኢተአምሩኑ፡ ከመ፡ ታቦቱ፡ ለእግዚአብሔር፡ አንትሙ። ወመንፈሰ፡ እግዚአብሔር፡ ላዕሌክሙ።
17 ወዘሰ፡ አማሰነ፡ ቤተ፡ እግዚአብሔር፡ ሎቱኒ፡ ያማስኖ፡ እግዚአብሔር። ወቤቱሰ፡ ለእግዚአብሔር፡ አንትሙ፡ ውእቱ። ወቅዱሳን፡ አንትሙ፡ ወኢታርኵሱ፡ ቤቶ፡ ለእግዚአብሔር።
18 ወኢታስሕቱ፡ ርእሰክሙ። ወዘይኄሊ፡ እምውስቴትክሙ፡ ከመ፡ ጠቢብ፡ ውእቱ፡ በዝ፡ ዓለም። አብደ፡ ለይረሲ፡ ርእሶ፡ ከመ፡ ይኩን፡ ጠቢበ።
19 እስመ፡ እበድ፡ ውእቱ፡ በኀበ፡ እግዚአብሔር፡ ጥበቡ፡ ለዝ፡ ዓለም። እስመ፡ ከመ፡ ዝ፡ ይቤ፡ መጽሐፍ። ዘይእኅዞሙ፡ ለጠቢባን፡ ትምይንቶሙ።
20 ወካዕበ፡ ይቤ፡ የአምር፡ እግዚአብሔር፡ ኅሊናሆሙ፡ ለጠቢባን። ከመ፡ ከንቱ፡ ውእቱ።
21 ወበእንተ፡ ዝንቱ፡ ኢይተመካሕ፡ እንከ፡ አሐዱሂ፡ እምዕጓለ፡ እመሕያው። እስመ፡ ኵሉ፡ ዘዚኣክሙ።
22 እመኒ፡ ጳውሎስ፡ ወእመኒ፡ አጵሎስ፡ ወእመኒ፡ ጴጥሮስ። ወእመኒ፡ ዓለም፡ ወእመኒ፡ ሕይወት፡ ወእመኒ፡ ሞት። ወእመኒ፡ ዘኮነ፡ ወእመኒ፡ ዘይከውን፡ ኵሉ፡ ዘዚኣክሙ።
23 ወአንትሙሰ፡ ዘክርስቶስ፡ ወክርስቶስኒ፡ ዘእግዚአብሔር።
=== chapter 4 ===
[ምዕራፍ 4]
በእንተ፡ አግብርተ፡ ክርስቶስ
1 ከመ፡ ዝኬ፡ የኀሊ፡ ሰብእ፡ በእንቲኣነ፡ ከመ፡ አግብርተ፡ ክርስቶስ፡ ንሕነ። ወከመ፡ መገብተ፡ ሥርዐቱ፡ ለእግዚአብሔር።
2 ወበዝየ፡ እንከ፡ ይትፈቀድ፡ ከመ፡ ይትረከብ፡ ኄር፡ ወምእመን፡ እመገብት።
3 ወሊተሰ፡ ኀሳር፡ ውእቱ፡ ወተመንኖ፡ በኀቤክሙ፡ ለእመ፡ ታጸድቁኒ፡ ወለእመኒ፡ ተአኵቱኒ። ከመ፡ ኄር፡ በኀበ፡ ሰብእ፡ መዋቲ፡ ወለልየ፡ ኢይፈትሕ፡ ለርእስየ።
4 ወአልቦ፡ ዘያርሰሐስሐኒ፡ ወኢ፡ ዘይትዐወቀኒ። ወባሕቱ፡ ወበዝየኒ፡ ኢያጸድቅ፡ ርእስየ፡ እስመ፡ እግዚአብሔር፡ የሐትተኒ።
5 ወለምንትኑ፡ ተሐትቱ፡ ይእዜ፡ ለኄርኒ፡ ወለጻድቅኒ፡ ዘእንበለ፡ ይብጻሕ፡ ጊዜሁ። እስመ፡ ይመጽእ፡ እግዚእነ፡ ዘያበርህ፡ ኀቡአተ፡ ዘውስተ፡ ጽልመት። ወይከሥት፡ ኅሊናተ፡ ልብ። ውእተ፡ አሚረ፡ ይነሥእ፡ ኵሉ፡ ዕሴቶ፡ እምኀበ፡ እግዚአብሔር።
6 ወዘኒ፡ ሕማመ፡ ነሣእነ፡ አነሂ፡ ወአጵሎስሂ፡ በእንቲኣክሙ፡ አኀዊነ። ከመ፡ ትትመሀሩ፡ አንትሙሂ፡ ወኢትፃኡ፡ እምቃለ፡ መጻሕፍት። ከመ፡ ኢትትዐበዩ፡ ላዕለ፡ ቢጽክሙ። ከመ፡ ኢ፡ መፍትው፡ ተዝኅሮ
7 መኑ፡ የሐትትከ፡ ወምንተ፡ ኮንከ፡ ዘኢነሣእከ፡ እምካልእከ።
8 ወእመ፡ ዘብከ፡ ነሣእከ፡ እምካልእከ። ለምንትኑ፡ ትዜኀር፡ ወትትዔበይ፡ ከመ፡ ዘኢነሥአ።
9 ወቦኑ፡ ዘጸገብክሙ፡ ወብዕልክሙ፡ ወነገሥክሙ፡ ዘእንበሌነ። ወርቱዕሰ፡ ንሕነኒ፡ ንንግሥ፡ ምስሌክሙ፡ እመ፡ መለክሙ፡ ወነገሥክሙ።
10 ወይመስለኒሰ፡ ከመ፡ ረሰየነ፡ እግዚአብሔር፡ ለሐዋርያቲሁ፡ ደኃርተ፡ ከመ፡ ዘድልዋን፡ ለሞት። እስመ፡ ሥላቀ፡ ኮነ፡ ለዓለም፡ ለሰብእ፡ ወለመላእክትኒ።
11 ንሕነሰ፡ አብዳን፡ በእንተ፡ ክርስቶስ። ወአንትሙሰ፡ ጠቢባን፡ በክርስቶስ፡ ወንሕነሰ፡ ድኩማን።
12 ወአንትሙሰ፡ ጽኑዓን፡ ወአንትሙሰ፡ ክቡራን። ወንሕነሰ፡ ትሑታን፡ እስከ፡ ዛቲ፡ ዕለት።
13 ወንሕነሰ፡ ርኁባን፡ ወጽሙኣን፡ ወዕሩቃን፡ ወፈላስያን። ወአልብነ፡ መካን፡ ወንትኰራዕ፡ ወንሠርሕ፡ እንዘ፡ ንትቀነይ፡ በግብረ፡ እደዊነ።
14 ይረግሙነ፡ ወንሕነ፡ ንድኅሮሙ። ይሰድዱነ፡ ወንሕነ፡ ንባርኮሙ፡ ወንትዔገሦሙ። ይፀርፉ፡ ላዕሌነ፡ ወናስተበቊዖሙ።
15 ወከመ፡ ኳሄላ፡ ኮነ፡ ውስተ፡ ዓለም፡ ወምኑናነ፡ በኀበ፡ ኵሉ።
16 ወአኮ፡ ዘጸሐፍኩ፡ ለክሙ፡ ዘንተ፡ ከመ፡ እዛለፍክሙ። ዳእሙ፡ ከመ፡ እገሥጽክሙ፡ ወእምሀርክሙ። ከመ፡ ውሉድየ፡ ወፍቁራንየ፡ ወቤዛክሙ፡ አነ፡ ለኵልክሙ፡ ወኢኀፈርክሙኒ።
17 ወእመኒ፡ አእላፍ፡ አምህርተ፡ ብክሙ፡ በክርስቶስ። አበዊክሙሰ፡ ኢኮኑ፡ ብዙኃነ። እስመ፡ አነ፡ ወለድኩክሙ፡ በትምህርተ፡ ክርስቶስ፡ ኢየሱስ።
በእንተ፡ ተመስሎተ፡ መምህራን
18 አስተበቊዐክሙ፡ አኀዊነ፡ ኪያየ፡ ተመሰሉ።
19 ወበእንተ፡ ዝ፡ ፈነውክዎ፡ ለክሙ፡ ለጢሞቴዎሰ። ዘውእቱ፡ ወልድየ፡ ወፍቁርየ፡ ምእመን፡ በእግዚአብሔር። ያዘክርክሙ፡ ፍናውየ፡ በክርስቶስ፡ በከመ፡ መሀርኩ፡ በኵለሄ፡ ወበኵሉ፡ አብያተ፡ ክርስቲያናት።
20 ወናሁ፡ ሀለዉ፡ እለ፡ ተዐበዩ፡ እምኔክሙ፡ በእንተ፡ ዘኢመጻእኩ፡ ኀቤክሙ።
21 እመጽእኬ፡ እንከ፡ ፍጡነ፡ እመ፡ ፈቀደ፡ እግዚአብሔር። ወኢየኀሥሥ፡ ነገረ፡ ዕቡያን፡ ዳእሙ፡ ኣኀሥሥ፡ ኀይሎሙ።
22 እስመ፡ ኢኮነ፡ መንግሥተ፡ እግዚአብሔር፡ በነገር፡ ዘእንበለ፡ በኀይል።
23 እፎኑ፡ ትፈቅዱ፡ እምጻእ፡ ኀቤክሙ፡ በበትርኑ፡ ወሚመ፡ በተፋቅሮ፡ ወበየውሀተ፡ ልብ።
=== chapter 5 ===
[ምዕራፍ 5]
በእንተ፡ ግብር፡ ዘኢይደሉ
1 እስመ፡ ይሰማዕ፡ በላዕሌክሙ፡ ዝሙት። ወዝሙትኒ፡ ዘከመ፡ ዝ፡ ዘኢይገብርዎ፡ አረሚ፡ ጥቀ። ሀሎአ፡ ዘአውሰበ፡ ብእሲተ፡ አቡሁ።
2 ወአንትሙሰ፡ ምስለ፡ ዝኒ፡ ዕቡያን፡ ወበእንተ፡ ዝ፡ ለምንት፡ ፈድፋደ፡ ኢላሐውክምዎ። ከመ፡ ይእትት፡ እምኔክሙ፡ ዘገብረ፡ ዘንተ።
3 ወአንሰ፡ እመ፡ ኢሀለውኩ፡ በሥጋየ፡ ምስሌክሙ፡ በመንፈስየ፡ ሀሎኩ፡ ምስሌክሙ። ወናሁ፡ እኴንኖ፡ ከመ፡ ዘሀሎኩ፡ ለዘገብሮ፡ ለዝንቱ፡ ግብር።
4 አንገሊገክሙ፡ በስመ፡ እግዚእነ፡ ኢየሱስ፡ ክርስቶስ፡ ምስለ፡ መንፈስየ። ወምስለ፡ ኀይለ፡ እግዚእነ፡ ኢየሱስ፡ ክርስቶስ።
5 መጥውዎ፡ ለሰይጣን፡ ከመ፡ ይሥርዎ፡ ሥጋሁ። ወትድኀን፡ መንፈሱ፡ በዕለተ፡ እግዚእነ፡ ኢየሱስ።
በእንተ፡ ብሑእ
6 ኢኮነኬ፡ ትዝኅርትክሙ፡ ሠናየ። እንዘ፡ ተአምሩ፡ ከመ፡ ኅዳጥ፡ ብሑእ፡ ብዙኀ፡ ሐሪጸ፡ ያብሕእ። አንጽሑ፡ እንከ፡ ብሑአ፡ ብሉየ፡ እምኔክሙ።
7 ከመ፡ ትኩኑ፡ ለሐዲስ፡ ሐሪጽ፡ እስመ፡ ዓዲክሙ፡ ናእት፡ አንትሙ። አኮኑ፡ በፋሲካነ፡ ተሰቅለ፡ ክርስቶስ።
8 ወይእዜኒ፡ ግበሩ፡ በዓለክሙ። ወአኮ፡ በብሑእ፡ ብሉይ፡ ወአኮ፡ በብሑእ፡ እኩይ፡ ዘኀጢአት። አላ፡ በብሑእ፡ ዘቅድሳት፡ ወዘጽድቅ።
9 ጸሐፍኩ፡ ለክሙ፡ ውስተ፡ ዝንቱ፡ መጽሐፍ፡ ከመ፡ ኢትደመሩ፡ ምስለ፡ ዘማውያን።
10 ወአኮ፡ ዝሙተ፡ ዝ፡ ዓለም፡ ባሕቲቱ፡ ሀለዉ። ዓዲ፡ መስተዐግላን፡ ወኀያድያን፡ ወእለሂ፡ ያመልኩ፡ ጣዖተ። ወእመ፡ አኮሰ፡ ይደልወክሙ፡ ትፃኡ፡ እምዝንቱ፡ ዓለም።
በእንተ፡ ምኵናን
11 ወይእዜኒ፡ ጸሐፍኩ፡ ለክሙ፡ ከመ፡ ኢትደመሩ፡ ምስለ፡ ዘማውያን። ወእመ፡ ቦ፡ እምአኀው፡ ዘያጣዑ። አው፡ ዐማፂ፡ አው፡ ኀያዲ፡ አው፡ ረጋሚ፡ አው፡ ሰካሪ፡ አው፡ መስተዐግል። ወምስለ፡ ዘከመ፡ ዝ፡ አትትሐወሉ።
12 ምንት፡ ተልሐፊየ፡ አኮኑ፡ ምስለ፡ እለ፡ በአፍኣ፡ ይትኴነኑ። ወአንትሙሰ፡ ኰንንዎሙ፡ ለእለ፡ ውስጥ፡ እለ፡ ምስሌክሙ፡ ወፍትሑ፡ ላዕሌሆሙ። ወለእለ፡ አፍኣስ፡ ይኴንኖሙ፡ እግዚአብሔር፡ ወይፈትሕ፡ ላዕሌሆሙ።
13 ወባሕቱ፡ አእትቱ፡ እምላዕሌክሙ፡ እኩየ።
=== chapter 6 ===
[ምዕራፍ 6]
በእንተ፡ ዘኢይደሉ፡ ተዋቅሦ፡ በኀበ፡ ዐማፅያን
1 ወኢትትኀበሉ፡ እንከ፡ ትትዋቀሡ፡ በኀበ፡ ጸኣልያን። ቦኑ፡ ዘይክል፡ ይትዋቀሥ፡ ምስለ፡ ካልኡ፡ በኀበ፡ ዐማፅያን፡ አኮኑ፡ በኀበ፡ ኄራን። ወለእመ፡ ቦ፡ ዘቦ፡ ተስናን፡ ምስለ፡ ቢጹ፡ ለይትዋቀሥ፡ በኀበ፡ ቅዱሳን። ወአኮ፡ በኀበ፡ ጸኣልያን፡ ወዐማፅያን።
2 ወኢተአምሩኑ፡ ከመ፡ ቅዱሳን፡ ይኴንንዎሙ፡ ለዓለም። ወእመሰኬ፡ አንትሙ፡ ትኴንንዎሙ፡ ለዓለም፡ ኢይደልወክሙ፡ ትኰንኑ፡ ዘንተ፡ ትሑተ፡ ምኵናነ።
3 ወኢተአምሩኑ፡ ከመ፡ መላእክተ፡ ጥቀ፡ ንኴንን፡ ኅድጉሰ፡ ዘዝ፡ ዓለም።
4 ወባሕቱ፡ ለእመ፡ ቦ፡ ዘቦ፡ ተስናነ፡ ዝ፡ ዓለም። ቢጽ፡ ትሑታን፡ ዘቤተ፡ ክርስቲያን፡ ዘአንበሩ፡ ሎሙ፡ ይስምዕዎሙ።
5 ወዘኒ፡ ዘእብለክሙ፡ እንዘ፡ እዛለፈክሙ፡ ከመ፡ ዝኑ። አልቦ፡ ጠቢብ፡ እምውስቴትክሙ፡ ወዘይክል፡ ዐሪቀ፡ አኀው፡ ምስለ፡ ቢጾሙ።
6 ወዓዲ፡ እኅወ፡ ምስለ፡ እኁሁ፡ እስከ፡ ታስተሳንኑ፡ ወትትጋአዙ፡ በኀበ፡ አረሚ።
7 ወአእምሩ፡ እንከ፡ ከመ፡ እምጥንቱ፡ ኀሳረ፡ ይከውነክሙ። እምከመ፡ ጋእዝ፡ ወተስናነ፡ ብክሙ፡ ኀጢአተ፡ ወጌጋየ፡ ይከውነክሙ። እፎ፡ እንከ፡ ኢየሀይዱክሙ፡ ወኢይገፍዑክሙ።
8 ወዓዲ፡ አንትሙ፡ ዐማፅያን፡ ወኀያድያን። ወከመ፡ ዝኑ፡ ትኤብሱ፡ ላዕለ፡ ቢጽክሙ።
በእንተ፡ እለ፡ ኢይሬእይዋ፡ ለመንግሥተ፡ ሰማያት
9 ኢተአምሩኑ፡ ከመ፡ ዐማፅያን፡ ወሀያድያን፡ ኢይሬእይዋ፡ ለመንግሥተ፡ እግዚአብሔር። ኢያስሕቱክሙ፡ ኢ፡ ዘማውያን፡ ወኢ፡ እለ፡ ያጣዕዉ። ወኢ፡ እለ፡ የሐውሩ፡ ወኢ፡ እለ፡ የሐውርዎሙ።
10 ወኢ፡ ሰራቅያን፡ ወኢ፡ ተዐጋልያን፡ ወኢ፡ ሰካርያን፡ ወኢ፡ ጸኣልያን። ወኢ፡ ሀያድያን፡ ኢይወርስዋ፡ ለመንግሥተ፡ እግዚአብሔር።
11 አንትሙ፡ እንከ፡ መኑ፡ አንትሙ፡ እንዘ፡ ከማሁ፡ አንትሙ። ወባሕቱ፡ ኀፀቡክሙ፡ ወቀደሱክሙ። ወአጽደቁክሙ፡ በስሙ፡ ለእግዚእነ፡ ኢየሱስ፡ ክርስቶስ፡ ወበመንፈሱ፡ ለአምላክነ።
12 ብየ፡ ሥልጣነ፡ ላዕለ፡ ኵሉ፡ ዘኮነ። ወአኮ፡ ኵሉ፡ ዘይበቊዐኒ፡ ወኵሉ፡ ይትከሀለኒ። ወአልቦ፡ ዘእሬሲ፡ ይሠልጥ፡ በላዕሌየ፡ መኑሂ።
13 መብልዕ፡ ለከርሥ፡ ወከርሥኒ፡ ለመብልዕ፡ ወእግዚአብሔር፡ ይስዕሮሙ፡ ለክልኤሆሙ። ወሥጋክሙሰ፡ ኢኮነ፡ ለዝሙት፡ አላ፡ ለእግዚአብሔር። ወእግዚአብሔር፡ ለሥጋክሙ።
14 ወእግዚአብሔር፡ ዘአንሥኦ፡ ለኢየሱስ፡ ክርስቶስ፡ እግዚእነ፡ እምዉታን። ያነሥአነ፡ ኪያነሂ፡ በኀይሉ።
15 ኢተአምሩኑ፡ ከመ፡ አባሉ፡ ለክርስቶስ፡ ሥጋክሙ። ትነሥኡኑ፡ አባሎ፡ ለክርስቶስ፡ ወትሬስይዎ፡ አባለ፡ ዘማ፡ ሐሰ።
16 ኢተአምሩኑ፡ ከመ፡ ዘተደመረ፡ ምስለ፡ ዘማ፡ አሐደ፡ ሥጋ፡ ይከውን፡ ምስሌሃ። እስመ፡ ከማሁ፡ ይቤ፡ መጽሐፍ፡ ለይኩኑ፡ ክልኤሆሙ፡ አሐደ፡ ሥጋ።
17 ወዘሰ፡ ተደመረ፡ ምስለ፡ እግዚአብሔር፡ አሐደ፡ መንፈሰ፡ ይከውን፡ ምስሌሁ። ጕዩ፡ እምዝሙት።
18 እስመ፡ ኵሉ፡ ዘኀጢአተ፡ ይገብር፡ ሰብእ፡ አፍኣ፡ እምሥጋሁ፡ ይገብር። ወዘሰ፡ ይዜሙ፡ ለሊሁ፡ በሥጋሁ፡ ይኤብስ።
19 ኢተአምሩኑ፡ ከመ፡ ማኅደሩ፡ ለመንፈስ፡ ቅዱስ፡ አንትሙ። ዘኅዱር፡ ላዕሌክሙ፡ ዘነሣእክሙ፡ እምኀበ፡ እግዚአብሔር።
20 ወኢኮንክሙ፡ ለርእስክሙ፡ በሤጥ፡ ተሣየጠክሙ። ሰብሕዎ፡ ለእግዚአብሔር፡ በሥጋክሙ።
=== chapter 7 ===
[ምዕራፍ 7]
በእንተ፡ አውሥኦተ፡ መልእክት
1 ወበእንተሰ፡ ዘጸሐፍክሙ፡ ሊተ። ይኄይሶ፡ ለብእሲ፡ ኢቀሪበ፡ አንስት።
2 ወከመሰ፡ ኢትዘምዉ፡ ኵሉ፡ ብእሲ፡ ይንበር፡ በብእሲቱ። ወኵላ፡ ብእሲት፡ ትንበር፡ በምታ።
3 ለብእሲትኒ፡ ዘበርቱዕ፡ ይግበር፡ ላቲ፡ ምታ። ወከማሁ፡ ብእሲትኒ፡ ለምታ።
4 ብእሲትኒ፡ ኢኮነት፡ ብውሕተ፡ ላዕለ፡ ርእሳ፡ ዘእንበለ፡ ዳእሙ፡ ለምታ። ወከማሁ፡ ብእሲኒ፡ ኢኮነ፡ ብዉሐ፡ ላዕለ፡ ርእሱ፡ ዘእንበለ፡ ዳእሙ፡ ለብእሲቱ።
5 ወኢትትገሐሡ፡ አሐዱ፡ እምካልኡ። ዘእንበለ፡ ዳእሙ፡ በዘተበዋሕክሙ፡ በዕድሜሁ፡ ከመ፡ ታስተርክቡ፡ ለጸሎትክሙ። ወካዕበ፡ ተሀልዉ፡ ኅቡረ፡ ከመ፡ ኢይጽባእክሙ፡ ሰይጣን። እስመ፡ ድኩም፡ ቱስሕተ፡ ነፍስትክሙ።
6 ወዘኒ፡ ዘእብለክሙ፡ አኮ፡ ዘእኤዝዘክሙ።
7 እስመ፡ እፈቅድ፡ ኵሉ፡ ሰብእ፡ ይኩን፡ ከማየ። ወባሕቱ፡ ኵሉ፡ በዘእግዚአብሔር፡ ጸገዎ፡ የሀሉ። ቦ፡ ዘከመ፡ ዝ፡ ግዕዙ፡ ወቦ፡ ዘካልእ፡ ግዕዙ።
8 ወባሕቱ፡ እብሎሙ፡ ለእለ፡ ኢያውሰቡ፡ ወለመዐስብኒ። ይኄይሶሙ፡ ለእመ፡ ነበሩ፡ ከማየ።
9 ወለእመሰ፡ ኢይክሉ፡ ተዐግሦ፡ ለያውስቡ። እስመ፡ ይኄይስ፡ አውስቦ፡ እምዋዕይ፡ በፍትወት።
10 ወለእለሂ፡ አውሰቡ፡ እኤዝዞሙ፡ በትእዛዘ፡ እግዚአብሔር። ወአኮ፡ በትእዛዘ፡ ርእስየ።
11 ብእሲትኒ፡ ኢትትኀደግ፡ ምስለ፡ ምታ፡ ወእመኒ፡ ተኀድገት፡ ትንበር፡ በከ። ወእመ፡ አኮ፡ ትትዐረቅ፡ ምስለ፡ ምታ፡ ወብእሲኒ፡ ኢይኅድግ፡ ብእሲቶ።
12 ወባዕደሰ፡ እነግር፡ ለልየ፡ ወአኮ፡ ዘእምኀበ፡ እግዚእነ። ለእመ፡ ቦ፡ እምአኀዊነ፡ ዘቦ፡ ብእሲት፡ እንተ፡ ኢተአምን፡ ወታፈቅር፡ ምታ። ወትፈቅድ፡ ትንበር፡ ምስሌሁ፡ ኢይኅድግ፡ ብእሲቶ።
13 ወእመኒ፡ ብእሲት፡ ባቲ፡ ምት፡ ዘኢየአምን፡ ወያፈቅር፡ ብእሲቶ። ወይፈቅድ፡ ይንበር፡ ምስሌሃ፡ ኢትኅድግ፡ ምታ፡ ወኢይትኃደጉ።
14 እስመ፡ ይትቄደስ፡ ብእሲኒ፡ ዘኢየአምን፡ በእንተ፡ ብእሲቱ። ወትትቄደስ፡ ብእሲትኒ፡ እንተ፡ ኢተአምን፡ በእንተ፡ ምታ። ወእመ፡ አኮሰ፡ ርኩሳነ፡ ይከውኑ፡ ውሉዶሙ፡ ወይእዜሰ፡ ቅዱሳን፡ እሙንቱ።
15 ወእመሰ፡ ዘኢየአምን፡ ይፈቅድ፡ ይኅድግ፡ ለይኅድግ። እስመ፡ እኁነ፡ ወእኅትነ፡ ኢይትቀነዩ፡ ለዘከመ፡ ዝ። እስመ፡ ጸውዖሙ፡ እግዚአብሔር፡ ለሰላም።
16 እስመ፡ ኢተአምር፡ ብእሲት፡ ለእመ፡ ታድኅኖ፡ ለምታ። ወኢየአምር፡ ብእሲ፡ ለእመ፡ ያድኅና፡ ለብእሲቱ።
17 ወባሕቱ፡ ኵሉ፡ በከመ፡ ከፈሎ፡ እግዚአብሔር። ወኵሉ፡ በከመ፡ ጸውዖ፡ እግዚአብሔር፡ ከማሁ፡ የሀሉ። ወከመ፡ ዝ፡ ንኤዝዝ፡ ለኵሉ፡ አብያተ፡ ክርስቲያናት።
18 ለእመ፡ ቦ፡ ዘተጸውዐ፡ እንዘ፡ ግዙር፡ ውእቱ፡ ኢይንሣእ፡ ቊልፈተ። ወእመሰ፡ ቈላፍ፡ ተጸውዐ፡ ኢይትገዘር፡ እንከ።
19 ተገዝሮሂ፡ ኢይበቊዕ፡ ወኢተገዝሮሂ፡ ኢያሠልጥ። ዘእንበለ፡ ዳእሙ፡ ዐቂበ፡ ትእዛዘ፡ እግዚአብሔር።
20 ወኵሉ፡ ዘከመ፡ ተጸውዐ፡ ከማሁ፡ ለየሀሉ።
21 ወእመኒ፡ ገብር፡ አንተ፡ ወቦእከ፡ ኢያሕዝንከ። ወእመሰ፡ ይተከሀለከ፡ ንሣእ፡ ግዕዛነከ።
22 እስመ፡ ገብር፡ ዘይጼዋዕ፡ አግዓዛይ፡ ውእቱ፡ በኀበ፡ እግዚአብሔር። ወከማሁ፡ አግዓዛይኒ፡ ለእመ፡ ተጸውዐ፡ ገብረ፡ ክርስቶስ፡ ውእቱ።
23 በሤጥ፡ ተሣየጠክሙ፡ ኢትኩኑ፡ አግብርተ፡ ሰብእ።
24 ወኵልክሙ፡ አኀዊነ፡ በዘተጸዋዕክሙ፡ ከማሁ፡ ሀልዉ፡ በእግዚአብሔር።
በእንተ፡ ዐቂበ፡ ድንግለና
25 ወእንበይነ፡ ደናግልኒ፡ ኢኮነ፡ ትእዛዘ፡ እግዚአብሔር፡ ዘእብለክሙ። ዳእሙ፡ እነግረክሙ፡ በምክርየ፡ እምከመሰ፡ ተሣሀለኒ፡ እግዚአብሔር፡ ከመ፡ እኩን፡ ምእመነ።
26 ወባሕቱ፡ ይመስለኒሰ፡ ከመ፡ ዝ፡ እስመ፡ ይኄይስ፡ በግብር፡ ይትፈቀድ፡ ዝንቱ። ይኄይሶ፡ ለሰብእ፡ ከመ፡ ዝ፡ የሀሉ።
27 እምከመ፡ ሀሎከ፡ ምስለ፡ ብእሲትከ፡ ኢትፍቅድ፡ ተኀድጎ፡ ምስሌሃ። ወእመሰ፡ አልብከ፡ ብእሲተ፡ ኢትፍቅድ፡ አንስተ። ወእመሰ፡ አውሰብከ፡ ኢጌገይከ።
28 እመኒ፡ አውሰበት፡ ድንግል፡ ብእሴ፡ ኢይከውና፡ ኀጢአተ። እስመ፡ እሙንቱ፡ ከመ፡ ዝ፡ ወእለሰ፡ አውሰቡ፡ መቅሠፍተ፡ ኀሠሡ፡ ለርእሶሙ።
29 ወአንሰ፡ እስመ፡ እምሕከክሙ፡ ዘእብለክሙ፡ ዘኒ። ወባሕቱ፡ ከመ፡ ዝ፡ ይረትዕ፡ አኀዊነ። እስመ፡ አልጸቀ፡ ይኅልፍ፡ ኵሉ፡ ንብረተ፡ ዝ፡ ዓለም። ወይእዜኒ፡ እለኒ፡ አውሰቡ፡ ይከውኑ፡ ከመ፡ ዘኢያውሰቡ።
30 ወእለኒ፡ ይበክዩ፡ ከመ፡ ዘኢበክዩ፡ ወእለኒ፡ ይትፌሥሑ፡ ከመ፡ ዘኢተፈሥሑ። ወእለኒ፡ ተደለዉ፡ ከመ፡ ዘኢተደለዉ። ወእለኒ፡ ይሣየጡ፡ ከመ፡ ዘኢተሣየጡ። ወእለኒ፡ ይመልኩ፡ ከመ፡ ዘኢመለኩ።
31 ወእለኒ፡ ይበልዑ፡ ከመ፡ ዘኢበልዑ፡ ወእለኒ፡ ይሰትዩ፡ ከመ፡ ዘኢሰትዩ። እስመ፡ ኵሉ፡ ተድላ፡ ዝ፡ ዓለም፡ የኀልፍ።
32 አንሰ፡ እፈቅድ፡ ለክሙ፡ ዘእንበለ፡ ሐዘን፡ ተሀልዉ። እስመ፡ ዘኢያውሰበ፡ ይኄልዮ፡ ለእግዚአብሔር፡ በዘያሠምሮ፡ ለእግዚአብሔር።
33 ወዘሰ፡ አውሰበ፡ ይኄሊ፡ ንብረተ፡ ዝንቱ፡ ዓለም፡ በዘያሠምራ፡ ለብእሲቱ።
34 ወባሕቱ፡ ተናፈቀ፡ ወብእሲትኒ፡ መዐስብት። ወድንግልኒ፡ እንተ፡ ኢያውሰበት፡ ትኄልዮ፡ ለእግዚአብሔር። ከመ፡ ይትቀደስ፡ ሥጋሃኒ፡ ወነፍሳኒ። ወእንተሰ፡ አውሰበት፡ ትኄሊ፡ ንብረተ፡ ዝ፡ ዓለም፡ በዘታደሉ፡ ለምታ።
35 ወዘኒ፡ ዘእብለክሙ፡ በዘይበቊዐክሙ፡ ወአኮ፡ ከመ፡ አሥግርክሙ። ዳእሙ፡ ከመ፡ ዕሩየ፡ ይኩን፡ ንብረትክሙ፡ ወትፀመድዎ፡ ለእግዚአብሔር፡ ዘእንበለ፡ ኑፋቄ።
36 ወእመሰ፡ ቦ፡ ዘይኄሊ፡ ከመ፡ ዘየኀፍር፡ በእንተ፡ ድንግልናሁ። አመ፡ ልህቀ፡ ከመ፡ ዝ፡ ርቱዕ፡ ይኩን፡ ዘፈቀደ፡ ይግበር። ወአልቦ፡ ኀጢአት፡ ለእመ፡ አውሰበ።
37 ወዘሰ፡ አጥብዐ፡ በልቡ፡ ወአልቦ፡ ሁከት፡ ብዉሕ፡ ሎቱ፡ ወኢያገብርዎ፡ ዘፈቀደ፡ ይግበር። ወእመኒ፡ አጥብዐ፡ ይዕቀብ፡ ድንግልናሁ፡ በልቡ፡ ሠናየ፡ ገብረ።
38 ወዘኒ፡ አውሰበ፡ ድንግለ፡ ሠናየ፡ ገብረ፡ ወዘሰ፡ ኢያውሰበ፡ እንተ፡ ትኄይስ፡ ገብረ።
39 ብእሲትኒ፡ እስርት፡ ይእቲ፡ አምጣነ፡ ሕያው፡ ምታ። ወእመሰ፡ ሞተ፡ ምታ፡ አግዓዛይት፡ ይእቲ፡ ዘፈቀደት፡ ታውስብ፡ ወባሕቱ፡ እምእመናን።
40 ወእመሰ፡ አጥብዐት፡ ለእግዚአብሔር፡ ብፅዕት፡ ይእቲ፡ ለእመ፡ ነበረት፡ በምክርየ። ወሊተሰ፡ ይመስለኒ፡ መንፈሰ፡ እግዚአብሔር፡ ብየ።
=== chapter 8 ===
[ምዕራፍ 8]
በእንተ፡ አእምሮተ፡ እግዚአብሔር
1 ወበእንተኒ፡ እለ፡ ይዘብሑ፡ ለአማልክት፡ ነአምር፡ ከመ፡ ኵልነ፡ ብነ፡ ልብ። ወአእምሮሰ፡ ያስተዔቢ፡ ወተፋቅሮ፡ የሐንጽ።
2 ወእመ፡ ቦ፡ ዘይብል፡ አእመርኩ። ዓዲ፡ ኢያእመረ፡ ዘይደልዎ፡ ያእምር።
3 ወዘሰ፡ ያፈቅሮ፡ ለእግዚአብሔር፡ ውእቱኬ፡ ዘበአማን፡ አእመረ።
4 ወበእንተሰ፡ መባልዕት፡ ዘይዘብሑ፡ ለአማልክት። ነአምር፡ ከመ፡ ከንቱ፡ እሙንቱ፡ በውስተ፡ ዓለም። ወአልቦ፡ አምላክ፡ ዘእንበለ፡ አሐዱ፡ እግዚአብሔር።
5 እስመ፡ ቦ፡ እለ፡ ይብልዎሙ፡ አማልክት። እመኒ፡ ዘውስተ፡ ሰማይ፡ ወእመኒ፡ ዘውስተ፡ ምድር። ወእለሰ፡ ብዙኃን፡ አማልክቲሆሙ፡ ብዙኃን፡ አጋንንቲሆሙ።
6 ወለነሰኬ፡ አሐዱ፡ እግዚአብሔር፡ አብ፡ ዘኵሉ፡ እምኔሁ፡ ወንሕነኒ፡ ቦቱ። ወአሐዱ፡ እግዚእነ፡ ኢየሱስ፡ ክርስቶስ፡ ዘኵሉ፡ በእንቲኣሁ፡ ወንሕነኒ፡ ቦቱ።
7 ወባሕቱ፡ አኮ፡ ኵሉ፡ ዘየአምሮ፡ ሀለዉ፡ እለ፡ በልማደ፡ አማልክት፡ እስከ፡ ዮም። ይበልዑ፡ ዘይዘብሑ፡ ለአማልክት፡ ወይረኵሱ፡ በኢ፡ ያጥብዖቶሙ።
8 ወመብልዕሰ፡ ኢያሠልጠነ፡ በኀበ፡ እግዚአብሔር፡ በሊዕኒ፡ ኢያረብሐነ፡ ወኢያነክየነ።
9 ወባሕቱ፡ ዑቁ፡ ባዕድ፡ ኢይስሐት፡ በርእየ፡ ዚኣክሙ።
10 ለእመ፡ ቦ፡ ዘርእየከ፡ አንተ፡ ዘተአምን፡ እንዘ፡ ትረፍቅ፡ ውስተ፡ ቤተ፡ አማልክት። ያጠብዕ፡ ሶቤሃ፡ ዝኩ፡ ዘቀዳሚ፡ ንፉቅ፡ ልቡ፡ ወይበልዕ፡ ዝቡሐ፡ ለአማልክት።
11 ወይመውት፡ ዝኩ፡ ድኩመ፡ ልብ፡ በርእየ፡ ዚኣከ፡ እኁነ፡ ዘበእንቲኣሁ፡ ሞተ፡ ክርስቶስ።
12 ወለእመ፡ ከመ፡ ዝ፡ ትኤብሱ፡ ላዕለ፡ ቢጽክሙ። ወታወድቁ፡ ልቦሙ፡ ለድኩማን፡ ለክርስቶስኬ፡ አበስክሙ።
13 ወእመሰ፡ እንበይነ፡ መብልዕ፡ ይስሕት፡ ቢጽየ። ኢይበልዕ፡ ሥጋ፡ ለዝሉፉ፡ ከመ፡ ኢያስሕት፡ ቢጽየ።
=== chapter 9 ===
[ምዕራፍ 9]
በእንተ፡ ርእሱ፡ ወበርናባስ
1 ኢኮንኩኑ፡ አግዓዜ፡ ወኢኮንኩኑ፡ ሐዋርያ። አኮኑ፡ እግዚእነ፡ ኢየሱስ፡ ክርስቶስ፡ ዘርኢኩ። ወኢኮንክሙኑ፡ አንትሙ፡ ግብርየ፡ በእግዚእነ።
2 ወእመኒ፡ ለባዕዳን፡ ኢኮንኩ፡ ሐዋርያሆሙ፡ ለክሙሰ፡ አነ፡ ሐዋርያክሙ። እስመ፡ ማኅተማ፡ ለመጽሐፍየ፡ አንትሙ፡ ውእቱ፡ በእግዚእነ።
3 ወከመ፡ ዝ፡ ቅስትየ፡ ለእለ፡ ይትዋቀሡኒ።
4 ቦኑ፡ ኢይከውነነ፡ ንብላዕሂ፡ ወንስተይሂ፡ ወትትልወነ፡ እኅትነ፡ እምአንስት።
5 ከመ፡ ኵሉ፡ ሐዋርያት፡ ወከመ፡ አኀዊሁ፡ ለእግዚእነ፡ ወከመ፡ ኬፋ።
6 ሊተኑ፡ ዳእሙ፡ ወለበርናባስ፡ አሕረሙ፡ ለነ፡ ሥራሐ።
በእንተ፡ ፅሙዳን፡ ወምርካቦሙ
7 ወዘኒ፡ ይፀመድ፡ ከመ፡ ይርከብ፡ ሲሳዮ፡ መኑ፡ ዘይተክል፡ ወይነ። ወኢይበልዕ፡ ቀምሖ፡ ወመኑ፡ ዘይርዒ፡ መርዔቶ፡ ወኢይሰቲ፡ ሐሊባ።
8 ቦኑ፡ ለአድልዎ፡ ለሰብእ፡ እብል፡ አኮኑ፡ ኦሪትኒ። ይቤ፡ ከመ፡ ዝ፡ መጽሐፈ፡ ሙሴ፡ ኢትፍጽሞ፡ አፉሁ፡ ለላሕም፡ ሶበ፡ ታከይድ፡ እክለከ።
9 ላሕምኑ፡ እንከ፡ አጽሐቆ፡ ለእግዚአብሔር፡ ዘዘንተ፡ ይጽሕፍ። አላ፡ አርአየ፡ ከመ፡ በእንቲኣነ፡ ይቤ፡ ወበእንቲኣነ፡ ጸሐፈ።
10 እስመ፡ ርቱዕ፡ ዘኒ፡ የሐርስ፡ እንዘ፡ ይሴፎ፡ ምርካቦ፡ የሐርስ። ወዘኒ፡ ያከይድ፡ እክለ፡ እንዘ፡ ይሴፎ፡ ምርካቦ፡ ያከይድ።
11 ወእመሰ፡ ንሕነ፡ ዘራዕነ፡ ለክሙ፡ ዘመንፈስ፡ ቅዱስ፡ ዐቢይኑ፡ ውእቱ። ሶበ፡ ንሕነ፡ ነአርር፡ ለክሙ፡ ዘሥጋ፡ ሰብእ።
12 ወእመሰ፡ ባዕድ፡ ይቀድመነ፡ በሢመተ፡ ዚኣነ። ለሊክሙ፡ ተአምሩ፡ ዘይኄይሰክሙ፡ ወአንሰ፡ ዘኒ፡ ኢፈቀድክዎ። ወባሕቱ፡ በኵሉ፡ እትዔገሥ፡ ከመ፡ ኢያዕቅፍ፡ ትምህርቶ፡ ለክርስቶስ።
በእንተ፡ ሲሳዮሙ፡ ለሥዩማነ፡ ቤተ፡ እግዚአብሔር
13 ኢተአምሩኑ፡ ከመ፡ ገነውተ፡ አማልክት፡ ይሴሰዩ፡ መባኦሙ፡ ለአማልክት። ወእለኒ፡ ይፀመዱ፡ ምሥዋዐ፡ ይትካፈሉ፡ መሥዋዕተ። ወለሥዩማነ፡ ቤተ፡ እግዚአብሔር፡ መባአ፡ ቤተ፡ እግዚአብሔር፡ ምርካቦሙ።
14 ወእግዚእነሂ፡ ከማሁ፡ አዘዘ፡ ለእለ፡ ይሜህሩ፡ ትምህርተ፡ ወንጌል። በውእቱ፡ ምህሮ፡ ወንጌል፡ ይኩኖሙ፡ ምርካቦሙ፡ ለሕይወቶሙ።
15 ወአንሰ፡ ዘኒ፡ ኢፈቀድክዎ፡ ወአኮ፡ ዘንተ፡ ብሂልየ፡ እርከብ፡ ዘጸሐፍኩ፡ ዘንተ። ወሊተሰ፡ ይኄይሰኒ፡ መዊት፡ እምይትበሃነነኒ፡ ምዝጋናየ።
16 ወእመኒ፡ መሀርኩ፡ ኢይከውነኒ፡ ምዝጋና፡ እስመ፡ በትእዛዝ፡ ገበርኩ። ወእመኒ፡ ኢመሀርኩ፡ አሌ፡ ሊተ።
17 ወእመሰ፡ ዘእምፈቃድየ፡ ገበርክዎ፡ ለዝንቱ፡ እምረከብኩ፡ ዐስብየ።
18 ወእመሰ፡ ዘበግብር፡ ምግበ፡ በዘአመገቡኒ፡ ተልእኩ። ምንት፡ እንከ፡ ዕሴትየ፡ ለእመ፡ መሀርኩ፡ እሬሲ። ከመ፡ እምሀር፡ ዘእንበለ፡ ዐስብ፡ ዘአልብየ፡ ምርካብ፡ በውስተ፡ ሢመትየ።
19 እስመ፡ እንዘ፡ አግዓዚ፡ አነ፡ እምኵሉ፡ አቅነይኩ፡ ርእስየ፡ ለኵሉ። ከመ፡ አስተጋብኦሙ፡ ለብዙኃን፡ ኀበ፡ ሃይማኖት።
20 ወኮንክዎሙ፡ ለአይሁድ፡ ከመ፡ አይሁዳዊ፡ ከመ፡ አስተጋብኦሙ፡ ለአይሁድ። ወኮንክዎሙ፡ ለእለ፡ ውስተ፡ ሕገ፡ ኦሪት፡ ከመ፡ ዘውስተ፡ ሕገ፡ ኦሪት። ከመ፡ አስተጋብኦሙ፡ ለእለ፡ ውስተ፡ ሕገ፡ ኦሪት።
21 ወኮንክዎሙ፡ ለእለ፡ አልቦሙ፡ ሕግ፡ ከመ፡ ዘአልቦ፡ ሕግ። እንዘ፡ ኢኮንኩ፡ ራስዐ፡ ውስተ፡ ሕገ፡ እግዚአብሔር። ዳእሙ፡ ውስተ፡ ሕገ፡ ክርስቶስ፡ ሀሎኩ፡ ከመ፡ እርብሖሙ፡ ለእለ፡ አልቦሙ፡ ሕግ።
22 ወኮንክዎሙ፡ ለድኩማን፡ ከመ፡ ድኩም፡ ከመ፡ እርብሖሙ፡ ለድኩማን፡ ለኵሉ፡ በግእዘ፡ ኵሉ፡ ተለውኩ። ወገበርኩ፡ ከመ፡ አስተጋብኦሙ፡ ለኵሎሙ፡ መንገሌየ፡ ወአድኅኖሙ፡ ዘእንበለ፡ ዕቅፍት።
23 ወኵሎ፡ እገብር፡ በእንተ፡ ትምህርተ፡ ወንጌል፡ ከመ፡ እኩን፡ ሱታፎ።
በእንተ፡ እለ፡ ይትባደሩ፡ በውስተ፡ ጸብእ
24 ኢተአምሩኑ፡ ከመ፡ እለ፡ ይተባደሩ፡ በውስተ፡ ጸብእ፡ ኵሎሙ፡ ይረውጹ። ወቦ፡ ለዘይከውኖ፡ ምዝጋና፡ ለዘበደረ፡ ከማሁኬ፡ ሩጹ፡ ወብድሩ፡ ከመ፡ ትርከቡ።
25 ወኵሉ፡ ዘይትጋደል፡ ይትዔገሥ፡ ወእሉሰ፡ ይጸንዑ። ከመ፡ ይንሥኡ፡ አክሊለ፡ ዕሴተ፡ ምዝጋናሆሙ፡ ኀላፌ፡ ዘይማስን።
26 ወንሕነሰ፡ ንትዔገሥ፡ ወንጸንዕ፡ ከመ፡ ንንሣእ፡ አክሊለ፡ ዘኢየኀልፍ። አንሰኬ፡ ከመ፡ ዝ፡ እትጋደል፡ ወእትባደር።
27 ወአጠውቃ፡ ለነፍስየ፡ ወአገርሮ፡ ለሥጋየ፡ ወእትዐቀብ። ከመ፡ አነ፡ ለርእስየ፡ ምኑነ፡ ኢይኩን፡ ዘለባዕድ፡ እሜህር።
=== chapter 10 ===
[ምዕራፍ 10]
በእንተ፡ ዜና፡ አበው
1 ወእፈቅድ፡ ለክሙ፡ ታእምሩ፡ አኀዊነ። እስመ፡ ለኵሎሙ፡ አበዊነ፡ ጸለሎሙ፡ ደመና። ወኵሎሙ፡ ኀለፉ፡ ማእከለ፡ ባሕር።
2 ወለኵሎሙ፡ አጥመቆሙ፡ ሙሴ፡ በደመና፡ ወበባሕር።
3 ወኵሎሙ፡ ተሴሰዩ፡ እከለ፡ ዘመንፈስ፡ ቅዱስ።
4 ወኵሎሙ፡ ሰትዩ፡ ስቴ፡ መንፈሳዌ። ዘውእቱ፡ ዘሰትዩ፡ እምኰኵሕ፡ መንፈሳዊት፡ እንተ፡ ተሐውር፡ ድኅሬሆሙ። ወኰኵሕሰ፡ ክርስቶስ፡ ውእቱ።
5 ወአኮ፡ ለኵሎሙ፡ ዘኀረዮሙ፡ እግዚአብሔር። ወመብዝኅቶሙ፡ ተነጽሑ፡ በገዳም።
6 ወዝኒ፡ ዘረከቦሙ፡ ከመ፡ ይኩኑክሙ፡ እሙንቱ፡ አርአያ። ከመ፡ አንትሙኒ፡ ኢትፍትዉ፡ እኩየ፡ ከመ፡ ፈተዉ፡ እሙንቱ።
7 ወኢታምልኩ፡ ጣዖተ፡ በከመ፡ አምለኩ፡ እሙንቱ። በከመ፡ ይቤ፡ መጽሐፍ፡ ነበሩ፡ ሕዝብ፡ ይበልዑ፡ ወይሰትዩ፡ ወተንሥኡ፡ ይዝፍኑ።
8 ወኢትዘምዉ፡ ይቤልዎሙ፡ ወቦ፡ እለ፡ ዘመዉ፡ እምውስቴቶሙ። ወሞቱ፡ በአሐቲ፡ ዕለት፡ ክልኤ፡ እልፍ፡ ወዕሥራ፡ ምእት።
9 ወኢታመክርዎ፡ ለእግዚአብሔር፡ ይቤልዎሙ። ወአመከርዎ፡ ወአጥፍኦሙ፡ አርዌ፡ ምድር።
10 ወኢታንጐርጕሩ፡ ይቤልዎሙ፡ ወአንጐርጐሩ፡ ወአኅለቆሙ፡ ብድብድ።
11 ዝንቱ፡ ኵሉ፡ ዘረከቦሙ፡ ለእልክቱ፡ ምሳሌ። ተጽሕፈ፡ ለአእምሮ፡ ወለተግሣጸ፡ ዚኣነ፡ እለ፡ በደኃሪ፡ መዋዕል።
12 ወይእዜኒ፡ ዝኩ፡ ዘይትአመን፡ ርእሶ፡ ከመ፡ ይቀውም፡ ለይትዐቀብ፡ ከመ፡ ኢይደቅ።
13 ወመንሱትሰ፡ ኢይረክበክሙ፡ ዘእንበለ፡ እምሰብእ፡ ዳእሙ።
14 እኩት፡ እግዚአብሔር፡ ዘኢኀደገክሙ፡ ትትመንሰዉ። ዘእንበለ፡ ዳእሙ፡ በዘትክሉ፡ ጸዊረ፡ ወተዐግሦ። ወይረድአክሙ፡ በመከራ፡ ከመ፡ ትፃኡ፡ እመንሱት።
በእንተ፡ ርኂቅ፡ እምአማልክት
15 ወይእዜኒ፡ አኀዊነ፡ ጕዩ፡ እምአማልክት። ወፍትሑ፡ ከመ፡ ጠቢባን፡ በዘይረትዕ፡ እብለክሙ።
16 ዝንቱ፡ ጽዋዐ፡ በረከት፡ ዘንባርክ፡ አኮኑ፡ ሱታፌ፡ ደሙ፡ ለክርስቶስ፡ ውእቱ። ወዝኒ፡ ኅብስት፡ ዘንፌትት፡ አኮኑ፡ ሱታፌ፡ ሥጋሁ፡ ለክርስቶስ፡ ውእቱ።
17 ወበከመ፡ አሐዱ፡ ኅብስት፡ ከማሁ፡ አሐዱ፡ ሥጋ፡ ንሕነ፡ እንዘ፡ ብዙኃን። እስመ፡ ኵልነ፡ እምአሐዱ፡ ኅብስት፡ ንነሥእ።
18 ርእይዎሙ፡ ለእስራኤል፡ በሥጋ፡ ይበልዑ፡ መሥዋዕተ። ወይከውኑ፡ ሱቱፋኒሁ፡ ለምሥዋዕ።
19 ወምንተ፡ እንከ፡ ንብል፡ ዘሂ፡ ይዘብሑ፡ ለአማልክት፡ ከንቱ፡ ወአማልክቲሆሙኒ፡ ከንቱ።
20 ወአሕዛብኒ፡ ዘይዘብሑ፡ ለአጋንንት፡ ወአኮ፡ ለእግዚአብሔር። ወባሕቱ፡ ኢይፈቅድ፡ ለክሙ፡ ትኩኑ፡ ሱቱፋነ፡ አጋንንት።
21 ወኢትክሉ፡ ሰትየ፡ ጽዋዐ፡ እግዚአብሔር፡ ወጽዋዐ፡ አጋንንት። ወኢትክቡ፡ በሊዐ፡ ማእደ፡ እግዚአብሔር፡ ወማእደ፡ አጋንንት።
22 ናቅንኦኑ፡ እንከ፡ ለእግዚአብሔር፡ ቦኑ፡ ንጸንዕ፡ እምኔሁ።
23 ወኵሉ፡ ይከወኑኒ፡ ወኵሉሰ፡ አኮ፡ ርቱዕ። ወኵሉ፡ ብዉሕ፡ ሊተ፡ ወባሕቱ፡ አኮ፡ ኵሉ፡ ዘየሐንጽ።
24 ኢታድልዉ፡ ለርእስክሙ፡ ዘእንበለ፡ ለቢጽክሙ።
25 ወዓዲ፡ ኵሎ፡ ዘይሠይጡ፡ በምሥያጥ፡ ብልዑ፡ ወኢትሕትቱ። እስመ፡ ለእግዚአብሔር፡ ምድር፡ በምልኣ።
26 ወለእመ፡ ቦ፡ ዘጸውዐክሙ፡ ዘኢየአምን። ወፈቀድክሙ፡ ትሑሩ፡ ኵሎ፡ ዘአቅረቡ፡ ለክሙ፡ ብልዑ፡ ወኢትሕትቱ።
27 ወእመሰ፡ ቦ፡ ዘይቤለክሙ፡ እስመ፡ ዝንቱ፡ ዝቡሕ፡ ለአማልክት። ኢትብልዑ፡ እንከ፡ በእንተ፡ ዘይቤለክሙ፡ ወበእንተ፡ ትሕዝብተ፡ ቢጽክሙ።
28 እስመ፡ ቀጸቡክሙ፡ ከመ፡ ኢይግእዝዋ፡ ለግእዛንክሙ።
29 ወእመሰ፡ በአእኵቶ፡ እበልዕ፡ ለምንት፡ ይፀርፉ፡ ላዕሌየ።
30 ወእመኒ፡ በላዕክሙ፡ ወእመኒ፡ ሰተይክሙ። ወኵሎ፡ ዘገበርክሙ፡ በአኰቴተ፡ እግዚአብሔር፡ ግበሩ።
31 ወኩንዎሙ፡ አርአያ፡ ዘእንበለ፡ ዕቅፍት፡ ለአይሁድ፡ ወለአረሚ፡ ወለሕዝበ፡ እግዚአብሔር።
32 በከመ፡ በኵሉ፡ አደሉ፡ አነ፡ እስመ፡ ተድላ፡ ብዙኃን፡ አኀሥሥ፡ በዘየሐይዉ። ወአኮ፡ ተድላ፡ ርእስየ፡ ዘአኀሥሥ።
=== chapter 11 ===
[ምዕራፍ 11]
በእንተ፡ ተሊወ፡ አሠረ፡ መምህራን
1 ተመሰለ፡ ኪያየ፡ በከመ፡ አነ፡ እትሜሰሎ፡ ለክርስቶስ።
2 ወአእኵተክሙ፡ አኀውየ፡ እስመ፡ ዘልፈ፡ ትዜከሩኒ። ወዘከመ፡ መሀርኩክሙ፡ ትትሐረሙ፡ ከማሁ፡ ተዐቀቡ።
3 ወእፈቅድ፡ ባሕቱ፡ ታእምሩ፡ ከመ፡ ክርስቶስ፡ ርእሱ፡ ለኵሉ፡ ብእሲ። ወርእሳ፡ ለብእሲት፡ ምታ፡ ወርእሱ፡ ለክርስቶስ፡ እግዚአብሔር።
4 ወኵሉ፡ ብእሲ፡ ዘግልቡብ፡ ርእሱ፡ ይጼሊ። አው፡ ይትኔበይ፡ ያኀስር፡ ርእሶ።
5 ወኵላ፡ ብእሲት፡ እንዘ፡ ክሡት፡ ርእሳ፡ ትጼሊ። አው፡ ትትኔበይ፡ ታኀስር፡ ርእሳ፡ እስመ፡ ከመ፡ ሉጺት፡ ይእቲ።
6 ወእመሰ፡ ኢትትገለበብ፡ ብእሲት፡ ለትትላፀይ፡ ወእመ፡ አኮ፡ ለትትቀረፅ። ወእመሰ፡ ኀሳር፡ ውእቱ፡ ለብእሲት፡ ተላፅዮሂ፡ ወቀርኦሂ፡ ወተቀርፆሂ፡ ለትትገልበብ።
7 ወብእሲነ፡ ኢኮነ፡ ርቱዐ፡ ይትገልበብ፡ ሶበ፡ ይጼሊ። እስመ፡ አምሳሉ፡ ወአርአያሁ፡ ለእግዚአብሔር፡ ውእቱ።
8 ወብእሲትኒ፡ ክብሩ፡ ለምታ፡ ይእቲ፡ እስመ፡ ብእሲት፡ እምብእሲ፡ ወፅአት። ወአኮ፡ ብእሲ፡ ዘወፅአ፡ እምብእሲት።
9 ወብእሲሰ፡ ኢተፈጥረ፡ በእንተ፡ ብእሲት፡ አላ፡ ብእሲት፡ በእንተ፡ ብእሲ።
10 ወበእንተ፡ ዝ፡ ርቱዕ፡ ይኩን፡ ሥልጣን፡ ላዕለ፡ ርእስ፡ በእንተ፡ መልእክት።
11 ወባሕቱ፡ ይእዜኒ፡ ኢትትፈለጥ፡ ብእሲት፡ እምታ፡ ወብእሲኒ፡ ኢይኀድግ፡ ብእሲቶ። ወኵልክሙ፡ ሀልዉ፡ በእግዚእነ።
12 በከመ፡ ብእሲት፡ እምብእሲ፡ ከማሁ፡ ብእሲኒ፡ እምብእሲት። ወባሕቱ፡ ኵሉ፡ እምኀበ፡ እግዚአብሔር።
13 ኀልይዎ፡ እስኩ፡ ለሊክሙ፡ ኢይረትዕኑ፡ ትትገልበብ፡ ብእሲት፡ ሶበ፡ ትጼሊ፡ ኀበ፡ እግዚአብሔር። ወፍጥረታሂ፡ ኢያዐውቀክመኑ።
14 እስመ፡ ለብእሲኒ፡ ኀሳር፡ ውእቱ፡ ለእመ፡ አንኀ፡ ድምድማሁ።
15 ወለብእሲትኒ፡ ክብራ፡ ውእቱ፡ ለእመ፡ አንኀት፡ ሥዕርተ፡ ርእሳ። እስመ፡ ሥዕርታ፡ ለብእሲት፡ ከመ፡ ሞጣሕት፡ ተውህበ፡ ላቲ፡ ወዘይትሔዘብ፡ ለይለቡ።
16 ንሕነሰ፡ ኢንለምድ፡ ከመ፡ ዝ፡ ወኢ፡ ቤተ፡ ክርስቲያኑ፡ ለእግዚአብሔር።
በእንተ፡ ሥጋሁ፡ ወደሙ
17 ወዝኒ፡ ዘነገርኩክሙ፡ አኮ፡ ዘንእድኩክሙ፡ እስመ፡ ኢተሐውሩ፡ ለእንተ፡ ትኄይስ። ዘእንበለ፡ ዳእሙ፡ ውስተ፡ ዘይቴሐት።
18 ቀዳሜ፡ ኵሉ፡ ትትጋአዙ፡ በቤተ፡ ክርስቲያን፡ ወትትላኰዩ። ሰማዕኩ፡ ወቦ፡ ዘአአምንሂ።
19 ርቱዕኑ፡ ትትናፈቁ፡ ወትትጋአዙሂ፡ ከመ፡ ይትዐወቁ፡ ቢጽ፡ ኅሩያን፡ እምኔክሙ።
20 ወአንትሙሰ፡ እንከ፡ አመ፡ ትትጋብኡ። አኮ፡ ከመ፡ ዘይደሉ፡ ለዕለተ፡ እግዚእነ፡ ዘትበልዑ፡ ወትሰትዩ።
21 አላ፡ ትትባደሩ፡ ኀበ፡ ድራር፡ ወትበልዑ፡ እንዘ፡ በለፌ፡ ሀለዉ፡ ርኁባን። ወአንትሙሰ፡ ጽጉባን፡ ወስኩራን።
22 ቦኑ፡ አብያት፡ አልብክሙ፡ በኀበ፡ ትበልዑ፡ ወበኀበ፡ ትሰትዩ። ወሚመ፡ ቤተ፡ እግዚአብሔርኑ፡ ታስተሐቅሩ፡ ወታስተኀፍርዎሙ፡ ለነዳያን።
23 ምንተ፡ እብል፡ በዝንቱ፡ እንእደክሙኑ፡ አልቦ። እስመ፡ ዘከመ፡ ተመሀርኩ፡ በኀበ፡ እግዚአብሔር፡ መሀርኩክሙ።
24 እስመ፡ ለሊሁ፡ እግዚእነ፡ ኢየሱስ፡ ክርስቶስ፡ አመ፡ ርእሶ፡ ይእኅዝዎ፡ በይእቲ፡ ሌሊት። ነስአ፡ ኅብስተ፡ አእኰተ፡ ባረከ፡ ወፈተተ፡ ወይቤሎሙ። ንሥኡ፡ ብልዑ፡ ዝ፡ ውእቱ፡ ሥጋየ፡ ዘይትወሀብ፡ በእንቲኣክሙ። ወከመ፡ ዝ፡ ግበሩ፡ ተዝካርየ።
25 ወከማሁ፡ ጽዋዐኒ፡ እምድኅረ፡ ተደሩ፡ ይቤሎሙ። ዝ፡ ውእቱ፡ ጽዋዕ፡ ዘሐዲስ፡ ሥርዐት፡ ውእቱ፡ ደምየ። ከመ፡ ዝ፡ ግበሩ፡ ወሶበ፡ ትሰትይዎ፡ ተዘከሩኒ።
26 አምጣነ፡ ትበልዕዎ፡ ለዝንቱ፡ ኅብስተ፡ ወትሰትይዎ፡ ለዝንቱ፡ ጽዋዕ። ሞቶ፡ ለእግዚእነ፡ ትዜንዉ፡ እስከ፡ አመ፡ ይመጽእ።
27 ወይእዜኒ፡ ዘበልዖ፡ ለዝንቱ፡ ኅብስት፡ ወዘሰትዮ፡ ለዝንቱ፡ ጽዋዕ፡ እንዘ፡ ኢይደልዎ፡ ዕዳ። ይትኃሠሥዎ፡ በእንተ፡ ሥጋሁ፡ ወደሙ፡ ለእግዚእነ።
28 ወይእዜኒ፡ አመኪሮ፡ ሰብእ፡ ርእሶ፡ ወአንጺሖ፡ ይብላዕ፡ እምውእቱ፡ ኅብስት። ወይስተይ፡ እምውእቱ፡ ጽዋዕ።
29 እስመ፡ ዘበልዖ፡ ወዘሰትዮ፡ እንዘ፡ ኢይደልዎ፡ ደይኖ፡ ወመቅሠፍቶ። በልዐ፡ ወሰትየ፡ ለርእሱ፡ ለእመ፡ ኢያእመረ፡ ሥጋ፡ እግዚእነ። ወኢኮነ፡ ንጹሐ፡ ነፍሱ።
30 ወበእንተ፡ ዝ፡ ብዙኃን፡ ድዉያን፡ ወሕሙማን፡ እምውስቴትክሙ። ወብዙኃን፡ ይሰክቡ፡ ግብተ።
31 ወሶበ፡ ኰነነ፡ ለሊነ፡ ርእሰነ፡ እምኢተኰነነ።
32 ወእመሰ፡ እግዚአብሔር፡ የሐትተነ፡ ወይጌሥጸነ፡ ከመ፡ ኢንዕሪ፡ ተኰንኖ፡ ምስለ፡ ዓለም።
33 ወይእዜኒ፡ አኀዊነ፡ ሶበ፡ ትሐውሩ፡ ትምስሑ፡ ተጻንሑ፡ ቢጸክሙ።
34 ወዘኒ፡ ርኅበ፡ በቤቱ፡ ለይብላዕ፡ ከመ፡ ኢትርፍቁ፡ ለኵነኔ፡ ወኢትትሐየሱ። ወባዕደሰ፡ መጺእየ፡ እሠርዐክሙ።
=== chapter 12 ===
[ምዕራፍ 12]
በእንተ፡ ሀብተ፡ መንፈስ፡ ቅዱስ
1 ወበእንተሂ፡ ዘመንፈስ፡ ቅዱስ፡ ኢንፈቅድ፡ አኀዊነ፡ ትኩኑ፡ አብዳነ፡ አላ፡ ታእምሩ።
2 ትካትኒ፡ እንዘ፡ አረሚ፡ አንትሙ፡ ተአምሩ፡ ከመ፡ አማልክተ፡ በሃማነ፡ ታመልኩ። ወአጣዖክሙ፡ ወተፃአፃእክሙ፡ ወተሐውሩ፡ ኀበ፡ ወሰዱክሙ።
3 ወበእንተ፡ ዝ፡ እሜህረክሙ። ከመ፡ አልቦ፡ ዘይነብብ፡ በመንፈሰ፡ እግዚአብሔር፡ ወይብል፡ ውጉዝ፡ ኢየሱስ።
4 ወአልቦ፡ ዘይክል፡ ብሂለ፡ እግዚእ፡ ኢየሱስ፡ ዘእንበለ፡ ዘመንፈስ፡ ቅዱስ፡ ላዕሌሁ።
5 ወመክፈልታተ፡ ሱታፌ፡ ሀብት፡ ህልው፡ እንዘ፡ አሐዱ፡ መንፈስ። ወመክፈልታተ፡ ምግባር፡ ህልው፡ እንዘ፡ አሐዱ፡ እግዚአብሔር። ዘይገብር፡ ኵሎ፡ ውስተ፡ ኵሉ።
6 እስመ፡ ለለ፡ አሐዱ፡ ዘዘ፡ ዚኣሁ፡ ጸጋሁ፡ በመንፈስ፡ ቅዱስ። ወለኵሉ፡ በመክፈልቱ፡ እንዘ፡ እግዚእ፡ ይረድእ።
7 ወለለ፡ አሐዱ፡ ይሁቦ፡ ገሃደ፡ በከመ፡ ይደልዎ፡ ወይበቊዖ።
8 ቦ፡ ለዘይሁቦ፡ ቃለ፡ ጥበብ፡ ወቦ፡ ለዘይሁቦ፡ ቃለ፡ አእምሮ፡ በመንፈስ፡ ቅዱስ።
9 ወቦ፡ ለዘይሁቦ፡ ሃይማኖተ፡ በመንፈስ፡ ቅዱስ። ወቦ፡ ለዘይሁቦ፡ ፈውሰ፡ ወአሕይዎ።
10 ወቦ፡ ለዘይሁቦ፡ ዓሦተ፡ ዘይስዕር፡ መናፍስተ። ወቦ፡ ለዘይሁቦ፡ ምግባረ፡ ረድኤት፡ ወኀይል። ወቦ፡ ለዘይሁቦ፡ ተነብዮ፡ ወቦ፡ ለዘይሀቦ፡ በመንፈስ፡ ቅዱስ፡ ፍካሬ፡ ያእምር። ወቦ፡ ለዘይሁቦ፡ ያእምር፡ ፍካሬ፡ ዘነገረ፡ በሓውርት።
11 ወለኵሉ፡ ዝንቱ፡ አሐዱ፡ ውእቱ፡ መንፈስ፡ ቅዱስ፡ ዘይረድኦሙ፡ ለኵሎሙ። ወባሕቱ፡ ለኵሎሙ፡ ይከፍሎሙ፡ በከመ፡ ፈቀደ።
12 ወበከመ፡ በአሐዱ፡ ሥጋነ፡ ብዙኅ፡ መለያልይ፡ ብነ። እንዘ፡ አሐዱ፡ ሥጋነ፡ ከማሁ፡ ክርስቶስኒ።
13 ወንሕነ፡ በአሐዱ፡ መንፈስ፡ ወበአሐዱ፡ ሥጋ፡ ተጠመቅነ፡ ኵልነ። እለሂ፡ እምአይሁድ፡ ወእለሂ፡ እምአረሚ፡ ወእመኒ፡ ነባሪ፡ ወእመኒ፡ አግዓዚ። እስመ፡ ኵልነ፡ አሐደ፡ መንፈሰ፡ ሰተይነ።
14 ወለሥጋነሂ፡ ብዙኅ፡ መለያልዩ፡ ወአኮ፡ አሐዱ።
15 እመኒ፡ ትቤ፡ እግር፡ አንሰ፡ ኢኮንኩ፡ እደ፡ ወኢኮንኩ፡ እምውስተ፡ ነፍስት። አኮ፡ ዘንተ፡ ብሂላ፡ ዘኢትከውን፡ እምውስተ፡ ነፍስት።
16 ወእመኒ፡ ትቤ፡ እዝን፡ አንሰ፡ ኢኮንኩ፡ ዐይነ፡ ወኢኮንኩ፡ እምውስተ፡ ነፍስት። አኮ፡ ዘንተ፡ ብሂላ፡ ዘኢትከውን፡ እምነፍስት።
17 ወእመሰ፡ ኵሉ፡ ነፍስትነ፡ ዐይን፡ ውእቱ፡ አይቴ፡ እምኮነ፡ እዝን። ወእመሰ፡ ኵሉ፡ ነፍስትነ፡ እዝን፡ አይቴ፡ እምኮነ፡ አፍ፡ ወአንፍ።
18 ወይእዜኒ፡ አስተናበሮ፡ እግዚአብሔር፡ ወሠርዖ፡ ለመለያልይነ። ዘዘ፡ ዚኣሁ፡ በውስተ፡ ነፍስትነ፡ በከመ፡ ውእቱ፡ ፈቀደ።
19 ወእመሰ፡ ኵሉ፡ መሌሊት፡ አሐዱ፡ አይቴ፡ እምኮነ፡ ነፍስት።
20 ወይእዜኒ፡ መሌሊቱ፡ ብዙኅ፡ ወነፍስቱ፡ አሐዱ።
21 ወኢትክል፡ ዐይን፡ ትብላ፡ ለእድ፡ ኢይፈቅደኪ። ወካዕበ፡ ኢትክል፡ ርእስ፡ ትበሎሙ፡ ለኵሎሙ፡ ኢይፈቅደክሙ።
22 ወብከ፡ መለያልይ፡ ዝኩ፡ ታስተሐቅሮ፡ ፈድፋደ፡ መፍቅድከ።
23 ወዝኩ፡ ዘታንእሶ፡ ያፈደፍድ፡ ለከ፡ ክብረ።
24 ወቶስሖ፡ እግዚአብሔር፡ ለነፍስትነ፡ ወአክበሮ፡ ፈድፋደ፡ ለመሌሊት፡ ንኡስ። ከመ፡ ኢይትዐበዩ፡ በበይናቲሆሙ፡ መለያልይነ፡ ከመ፡ ያዕሪ፡ ክብረ።
25 ወከመሰ፡ ኢይትዓበይ፡ አባልነ፡ ለእመ፡ አሐዱ፡ አባል፡ ሐመ፡ የሐምም፡ ምስሌሁ፡ ኵሉ፡ ነፍስትነ። ወእመኒ፡ ተፈሥሐ፡ አሐዱ፡ አባል፡ ይትፌሣሕ፡ ምስሌሁ፡ ኵሉ፡ ነፍስትነ።
26 አንትሙኬ፡ ሥጋሁ፡ ለክርስቶስ፡ ወአባሉ፡ በበ፡ መክፈልትክሙ።
27 ወእለሰ፡ ሤሞሙ፡ እግዚአብሔር፡ ለቤተ፡ ክርስቲያን፡ ቀዳሚ፡ ሐዋርያተ። ወዳግመ፡ ነቢያተ፡ ወሣልሰ፡ መምህራነ።
28 ወእምዝ፡ ዘትእምርት፡ ወኀይል፡ ወእምዝ፡ ዘዓሦት፡ ወረድኤት። ወአምህርት፡ ወዘነገረ፡ በሓውርት።
29 ቦኑ፡ ይከውኑ፡ ኵሎሙ፡ ሐዋርያተ፡ ወቦኑ፡ ኵሎሙ፡ ነቢያተ። ወቦኑ፡ ኵሎሙ፡ መምህራነ፡ ወቦኑ፡ ለኵሉ፡ ኀይለ፡ ትእምርት።
30 ወዘአኮ፡ ለኵሉ፡ ጸጋ፡ ዓሦት፡ ወቦኑ፡ ኵሎሙ፡ በነገረ፡ በሓውርት፡ ይነብቡ። ወቦኑ፡ ኵሎሙ፡ መፈክራን።
31 ቅንኡ፡ ለእንተ፡ ተዐቢ፡ ጸጋ፡ ወዓዲ፡ እንተ፡ ትኄይስ፡ ፍኖተ፡ እሜህረክሙ።
=== chapter 13 ===
[ምዕራፍ 13]
በእንተ፡ በቍዔተ፡ ፍቅር
1 ወእመኒ፡ አእመርኩ፡ ነገረ፡ ኵሉ፡ ሰብእ፡ ወነገረ፡ ኵሉ፡ መላእክት፡ ወተፋቅሮ፡ አልብየ። ኮንኩ፡ ከመ፡ ድምፀ፡ ብርት፡ ዘይነቁ፡ ወእመ፡ አኮ፡ ከመ፡ ከበሮ፡ ዘይዘበጥ።
2 ወእመኒ፡ ተነበይኩ፡ ወአእመርኩ፡ ኵሎ፡ ዘኅቡእ፡ ወኵሎ፡ ጥበበ። ወእመኒ፡ ብየ፡ ኵሉ፡ ሃይማኖት፡ እስከ፡ ኣፈልስ፡ አድባረ፡ ወተፋቅሮ፡ አልብየ፡ ከንቶ፡ ኮንኩ።
3 ወእመሂ፡ ወሀብኩ፡ ለምጽዋት፡ ኵሎ፡ ንዋይየ፡ ወዓዲ፡ ሥጋየኒ፡ ለውዕየተ፡ እሳት። ወተፋቅሮ፡ አልብየ፡ ወአልቦ፡ ዘረባሕኩ።
4 ተፋቅሮ፡ ያስተዔግሥ፡ ተፋቅሮ፡ ያስተማሕር። ተፋቅሮ፡ ኢያስተቃንእ፡ ወኢያስተኃፍር፡ ወኢያስተዔቢ፡ ልበ።
5 ወኢየኀሥሥ፡ ተድላ፡ ለባሕቲቱ፡ ኢያስተማዕዕ፡ ወኢያኄሊ፡ እኩየ።
6 ወኢያስተፌሥሕ፡ በግፍዕ፡ ወያስተፌሥሕ፡ በጽድቅ።
7 በኵሉ፡ ያስተማሕር፡ ወበኵሉ፡ ያስተዔግሥ፡ ወበኵሉ፡ ያስተአምን። ወበኵሉ፡ ያስተዌክል፡ ተፋቅሮ፡ ለዝሉፉ፡ ኢያኀስር፡ ወኢያወድቅ።
8 ወዘሂ፡ ተነበየ፡ ኀላፊ፡ ወይሰዐር። ወዘሂ፡ ነበበ፡ በነገረ፡ በሓውርት፡ ኀላፊ፡ ወይትፌጸም። ወዘሂ፡ ጠበበ፡ ኀላፊ፡ ወይሰዐር።
9 እስመ፡ ነአምር፡ ንስቲተ፡ ወንትኔበይ፡ ንስቲተ፡ በበ፡ ገጹ።
10 ወአመ፡ በጽሐ፡ ፍጻሜሁ፡ ሎቱ፡ ይሰዐር፡ ውእቱኒ።
11 ወአመሰ፡ ደቂቅ፡ አነ፡ ተናገርኩ፡ ከመ፡ ደቂቅ። ወኀለይኩ፡ ከመ፡ ደቂቅ፡ ወመከርኩ፡ ከመ፡ ደቂቅ። ወአመሰ፡ ልህቁ፡ ሰዐርኩ፡ ኵሎ፡ ሕገ፡ ደቂቅ።
12 ወይእዜሰ፡ ተዐውቀኒ፡ ወአስተርአየኒ፡ ክሡተ። እስመ፡ በተሐዝቦ፡ ንሬኢ፡ ከመ፡ ዘበመጽሔት፡ ወአሜሃሰ፡ ንሬኢ፡ ገጸ፡ በገጽ። ወይእዜሰ፡ ኣአምር፡ እምአሐዱ፡ ኅብር፡ ወድኅረሰ፡ ኣአምር፡ ኵሎ፡ ዘከመ፡ ተዐውቀኒ።
13 ወይእዜኒ፡ እሉ፡ ሠለስቱ፡ ዘይነብሩ፡ እሙንቱ፡ ሃይማኖት፡ ወትውክልት፡ ወተፋቅሮ። ወእምኵሉሰ፡ የዐቢ፡ ተፋቅሮ።
=== chapter 14 ===
[ምዕራፍ 14]
በእንተ፡ ተቃሕዎ፡ ዘመንፈስ
1 ዴግንዋ፡ ለተፋቅሮ፡ ወተቃሕዎ፡ ዘመንፈስ፡ ከመ፡ ትትነበዩ።
2 እስመ፡ ዘይነብብ፡ በነገረ፡ በሓውርት። አኮ፡ ለሰብእ፡ ዘይነብብ፡ ዘእንበለ፡ ለእግዚአብሔር። እስመ፡ አልቦ፡ ዘይሰምዖ፡ ዘይነብብ፡ ዳእሙ፡ በመንፈስ፡ ዘኅቡእ፡ ይትናገር።
3 ወዘሰ፡ ይትኔበይ፡ ለሰብእ፡ ይነብብ፡ በዘይጸንዕ፡ ወበዘይትፌሣሕ፡ ወበዘይትናዘዝ።
4 ወዘሰ፡ ይነብብ፡ በነገረ፡ በሓውርት፡ ርእሶ፡ የሐንጽ። ወዘሰ፡ ይትኔበይ፡ ቤተ፡ ክርስቲያን፡ የሐንጽ።
5 ወእፈቅድ፡ ትንብቡ፡ በነገረ፡ በሓውርት፡ ዓዲ፡ ፈድፋደ፡ ከመ፡ ትትነበዩ። እስመ፡ የዐቢ፡ ወይኄይስ፡ ዘይትኔበይ፡ እምዘይነብብ፡ በነገረ፡ በሓውርት፡ ዘእንበለ፡ ፍካሬ። ወለእመሰ፡ ይተረጕም፡ የሐንጽ፡ ሕዝበ።
6 ወይእዜኒ፡ አኀዊነ፡ አመ፡ መጻእኩ፡ ኀቤክሙ፡ ወነበብኩክሙ፡ በነገረ፡ በሓውርት፡ ዘኢተአምርዎ። አየ፡ በቊዔተ፡ ዘበቋዕኩክሙ፡ ለእመ፡ ኢተናገርኩክሙ፡ ክሡተ፡ ወገሃደ። አው፡ ዘጥበብ፡ አው፡ ዘተነብዮ፡ አው፡ ዘትምህርት።
7 ወውስተ፡ ዓለምኒ፡ ግብር፡ ዘአልቦ፡ ነፍስ። ወይሁብ፡ ቃሎ፡ ከመ፡ ንዋየ፡ ተውኔት፡ ወመሰንቆ። ወእመሰ፡ በትእምርት፡ ኢሰንቀዉ፡ ወኢነበቡ። መኑ፡ የአምር፡ ዘይብል፡ መሰንቆሁኒ፡ ወዕንዚራሁኒ።
8 ወዘሂ፡ ይነፍኅ፡ ቀርነ፡ ለእመ፡ በትእምርት፡ ዘይትዐወቅ፡ ኢነፍኀ። መኑ፡ ይትረሰይ፡ ለቀትል።
9 ከማሁ፡ አንትሙሂ፡ ለእመ፡ ተናገርክሙ፡ በነገረ፡ በሓውርት፡ ወኢተርጐምክሙ፡ ዘንተ፡ ገሃደ። መኑ፡ የአምር፡ ዘትብሉ፡ ወዘትትናገሩ፡ ትከውኑ፡ ከመ፡ ዘምስለ፡ ነፋስ፡ ትትናገሩ።
10 ወውስተ፡ ዓለም፡ ብዙኅ፡ አሕዛብ፡ ወዘዘ፡ ዚኣሆሙ፡ ቃሎሙ፡ ወተስናኖሙ። ወኵሉ፡ ይነብብ፡ በነገረ፡ ብሔሩ።
11 ወለእመ፡ ኢያእመርኩ፡ እንከ፡ ፍካሬሁ፡ ለነገረ፡ ወኀይለ፡ ቃሉ። አነ፡ እከውኖ፡ ከመ፡ በሃም፡ ለዘይትናገረኒ። ወውእቱኒ፡ ዘይትናገረኒ፡ ከመ፡ ዘይዘነግዕ፡ ይመስለኒ።
12 ከማሁኬ፡ አንትሙኒ፡ ተቃሐዉ፡ ለዘበመንፈስ፡ ቅዱስ፡ ኅሡ። ከመ፡ ትብዝኁ፡ በዘይትሐነጽ፡ ሕዝብ።
13 ወዘሂ፡ ይነብብ፡ በነገረ፡ በሓውርት፡ ለይጸሊ፡ ከመ፡ ተርጕሞቶ፡ ሎቱ።
14 ወእመሰ፡ እጼሊ፡ በነገረ፡ በሓውርት፡ መንፈስየ። ዳእሙ፡ ይጼሊ፡ ወልብየሰ፡ ዕራቁ፡ ውእቱ።
15 ምንተኑ፡ እንከ፡ እገብር፡ እጼሊ፡ በመንፈስየ፡ ወእስእል፡ በልብየኒ። ወእዜምር፡ በመንፈስየ፡ ወእዜምር፡ በልብየኒ፡ ለርእስየኒ፡ ወለቢጽየኒ።
16 እስመ፡ ለእመ፡ ተአኵት፡ በመንፈስ፡ ዝኩ፡ ዘይቀውም፡ የዋህ። እፎ፡ ይብል፡ አማን፡ ላዕለ፡ አእኲቶትከ፡ ለከ። እስመ፡ ኢየአምር፡ ዘትብል፡ ወዘከመ፡ ተአኵት።
17 ናሁ፡ አንተሰ፡ ሠናየ፡ ተአኵት፡ ለዝክቱ። እፎ፡ እንከ፡ ይትሐነጽ፡ ልቡ፡ እስመ፡ የዋህ።
18 ወኣአኵቶ፡ ለእግዚአብሔር፡ እስመ፡ እነብብ፡ በነገረ፡ በሓውርት፡ ፈድፋደ፡ እምኵልክሙ።
19 ወባሕቱ፡ በቤተ፡ ክርስቲያን፡ እፈቅድ፡ ኀምስተ፡ ቃላተ፡ እንግር፡ በልብየ፡ ከመ፡ ለባዕዳንሂ፡ እምሀር። እስመ፡ ይኄይስ፡ እምአእላፍ፡ ቃል፡ በነገረ፡ በሓውርት።
20 አኀዊነ፡ ኢትእበዱ፡ ወኢትስሐቱ፡ ምክረ፡ ወኢትኩኑ፡ ከመ፡ ሕፃናት። ወባሕቱ፡ ኩኑ፡ ከመ፡ ሕፃናት፡ እምእኩይ፡ ወፍጹማነ፡ ኩኑ፡ በአእምሮ።
21 ወበውስተ፡ ኦሪትኒ፡ ይብል። በካልእ፡ ልሳን፡ ወበካልእ፡ ከናፍር፡ እትናገሮሙ፡ ለዝ፡ ሕዝብ። ወምስለ፡ ከመ፡ ዝ፡ ኢሰምዑኒ፡ ይቤ፡ እግዚአብሔር።
22 ወይእዜኒ፡ ነገረ፡ በሓውርትሰ፡ ለትእምርት፡ ውእቱ፡ ለእለ፡ ኢየአምኑ፡ ወአኮ፡ ለእለ፡ የአምኑ። ወተነብዮሰ፡ ለእለ፡ የአምኑ፡ ወአኮ፡ ለእለ፡ ኢየአምኑ።
23 ወለእመኒ፡ ተጋብኡ፡ ኵሎሙ፡ ሕዝብ፡ ኅቡረ፡ ወነበቡ፡ ኵሎሙ፡ በነገረ፡ በሓውርት። ወመጽኡ፡ አብዳን፡ እለ፡ ኢየአምኑ፡ አኮኑ፡ የአብዱ፡ ይብልዎሙ።
24 ወእመሰ፡ ኵሎሙ፡ ይትኔበዩ፡ ወመጽኡ፡ አብዳን፡ እለ፡ ኢየአምኑ። አኮኑ፡ ኵሎሙ፡ ይዛለፍዎሙ፡ ወያስተኃፍርዎሙ።
25 ወይከሥቱ፡ ዘየኀብኡ፡ ውስተ፡ ልቦሙ። ወእምዝ፡ ይገብእ፡ ወይኔስሕ፡ ወይሰግድ፡ ወይገኒ፡ ለእግዚአብሔር። ወይነግር፡ ከመ፡ አማን፡ ሀሎ፡ እግዚአብሔር፡ ምስሌሆሙ።
በእንተ፡ ሥርዐተ፡ ተጋብኦ
26 ወይእዜኒ፡ አኀዊነ፡ ሶበ፡ ትትጋብኡ፡ ኵልክሙ፡ ብክሙ፡ መዝሙር፡ ወብክሙ፡ ትምህርት። ዘከሠተ፡ አበይኖ፡ ዘነገረ፡ በሓውርት፡ ወዘምድራሳት። ወኵሎ፡ በዘትትሐነጹ፡ ግበሩ፡ ለበቊዔት።
27 ወእመኒ፡ ቦ፡ ዘይነብብ፡ በነገረ፡ በሓውርት፡ ለይትናገሩ፡ በበ፡ ክልኤቱ፡ ወበበ፡ ሠለስቱ። ዝኒ፡ በዝኀ፡ ለይትናገሩ፡ አሐዱ፡ ወይፈክር፡ ሎቱ፡ ካልእ።
28 ወእመሰ፡ አልቦ፡ ዘይተረጕም፡ ለያርምም፡ በቤተ፡ ክርስቲያን፡ ዝኩ፡ ዘይትናገር፡ በነገረ፡ በሓውርት። ወይትናገር፡ በዘማእከሌሁ፡ ወማእከለ፡ እግዚአብሔር።
29 ወእምነቢያትኒ፡ ይትናገሩ፡ በበ፡ ክልኤቱ፡ ወበበ፡ ሠለስቱ፡ ከመ፡ ይትዐወቅ፡ ለቤተ፡ ክርስቲያን፡ ቃሎሙ።
30 ወእመሰ፡ ቦ፡ ዘአስተርአዮ፡ ወተከሥተ፡ ሎቱ፡ እንዘ፡ ንቡር፡ ለያርምም፡ ቀዳማዊ።
31 እስመ፡ ይትከሀለክሙ፡ ትትነበዩ፡ ኵልክሙ፡ በበ፡ አሐዱ፡ ከመ፡ ኵሉ፡ ይትመሀር። ወከመ፡ ኵሉ፡ ይትፈሣሕ፡ ወይጽናዕ።
32 እስመ፡ መንፈሰ፡ ነቢያት፡ ይትኤዘዝ፡ ለነቢያት።
33 እስመ፡ ኢኮነ፡ እግዚአብሔር፡ አምላከ፡ ሀከክ፡ ዘእንበለ፡ አምላከ፡ ሰላም። በከመ፡ ይትገበር፡ በኵሉ፡ ቤተ፡ ክርስቲያኖሙ፡ ለቅዱሳን።
34 ወአንስትኒ፡ ለያርምማ፡ በቤተ፡ ክርስቲያን። እስመ፡ ኢ፡ እዙዘ፡ ይትናገራ፡ ዘእንበለ፡ ከመ፡ ይትአዘዛ። እስመ፡ ከማሁ፡ ይቤ፡ ኦሪት።
35 ወእመሰ፡ ይፈቅዳ፡ ይትመሀራ፡ በአብያቲሆን፡ እምአምታቲሆን፡ ይሰአላ። እስመ፡ ኀሳር፡ ውእቱ፡ ለብእሲት፡ ተናግሮ፡ በቤተ፡ ክርስቲያን።
በእንተ፡ ዐቂበ፡ ትእዛዝ
36 እምኀቤክሙኑ፡ ዳእሙ፡ ወፅአ፡ ቃለ፡ እግዚአብሔር። ወኀበ፡ ባሕቲትክሙኑ፡ በጽሐ፡ ቃለ፡ እግዚአብሔር።
37 ወእመ፡ ቦ፡ ዘይብል፡ ርእሶ፡ ከመ፡ ነቢይ፡ ውእቱ፡ አው፡ ከመ፡ መንፈስ፡ ቅዱስ፡ ላዕሌሁ። ያእምር፡ ዘንተ፡ ዘጸሐፍኩ፡ ለክሙ፡ እስመ፡ ትእዛዘ፡ እግዚአብሔር፡ ውእቱ።
38 ወዘሰ፡ ኢየአምር፡ ኢየአምሮ።
39 ወይእዜኒ፡ አኀዊነ፡ ተቃሐዉ፡ ለተነብዮ። ወለዘኒ፡ ይነብብ፡ በነገረ፡ በሓውርት፡ ኢትክልእዎ።
40 ወኵሎ፡ ሥሩዐ፡ ወዕቁመ፡ ወውሱነ፡ ግበሩ።
=== chapter 15 ===
[ምዕራፍ 15]
በእንተ፡ አዘክሮ፡ ትምህርት
1 ወእጤይቀክሙ፡ አኀዊነ፡ ትምህርተ፡ ዘመሀርኩክሙ። ዘአመ፡ ተዐሎክሙ፡ ዘቦቱ፡ ሀለውክሙ፡ ወዘቦቱ፡ ተሐይዉ።
2 እስመ፡ በቃልየ፡ መሀርኩክሙ፡ ለእመ፡ ትዜከሩ፡ ዘመሀርኩክሙ። ወእመ፡ አኮሰ፡ ከንቱ፡ ዘአመንክሙ።
3 ናሁ፡ መሀርኩክሙ፡ ቅድመ፡ ዘከመ፡ ተመሀርኩ። እስመ፡ ክርስቶስ፡ ሞተ፡ በእንተ፡ ኀጢአትነ፡ በከመ፡ ይቤ፡ መጽሐፍ።
4 ወተቀብረሂ፡ ወተንሥአሂ፡ አመ፡ ሣልስት፡ ዕለት፡ በከመ፡ ጽሑፍ።
ዘከመ፡ አስተርአዮሙ፡ ለሐዋርያት
5 ወአስተርአዮ፡ ለጴጥሮስ፡ ወእምዝ፡ አስተርአዮሙ፡ ለዐሠርቱ፡ ወአሐዱ፡ አርዳኢሁ።
6 ወእምዝ፡ አስተርአዮሙ፡ ለዘይበዝኁ፡ እምኀምስቱ፡ ምእት፡ ቢጽ። ወመብዝኅቶሙ፡ ሀለዉ፡ እስከ፡ ይእዜ፡ ወቦ፡ እለሂ፡ ኖመ።
7 ወእምዝ፡ አስተርአዮ፡ ለያዕቆብ፡ ወለኵሎሙ፡ ሐዋርያቲሁ።
8 ወድኅረ፡ ኵሎሙ፡ አስተርአየኒ፡ ሊተ፡ ዘእመሰል፡ ፃእፃአ።
9 እስመ፡ አነ፡ እቴሐት፡ እምኵሎሙ፡ ሐዋርያቲሁ። ወእንዘ፡ ኢይደልወኒ፡ እሰመይ፡ ሐዋርያሁ፡ በእንተ፡ ዘሰደድኩ፡ ሕዝቦ።
10 ወባሕቱ፡ በጸጋ፡ እግዚአብሔር፡ ሀሎኩ፡ ኀበ፡ ዘአነ፡ ላዕሌሁ። ወጸጋሁኒ፡ ዘወሀበኒ፡ አኮ፡ ለከንቱ፡ ዘኮነኒ። ወባሕቱ፡ አነ፡ ፈድፋደ፡ እምኵሎሙ፡ ጻመውኩ። ወአኮሰ፡ አነ፡ አላ፡ ውእቱ፡ ጸጋሁ፡ ዘላዕሌየ።
11 ወአነሂ፡ ይእዜ፡ ወእሙንቱሂ፡ ከመ፡ ዝ፡ ንሜህር። ወአንትሙኒ፡ ከመ፡ ዝ፡ አመንክሙ።
በእንተ፡ ሕይወተ፡ ምዉታን
12 ወእምከመሰ፡ ንሜህር፡ ለባዕድ፡ ወንብል፡ ተንሥአ፡ ክርስቶስ፡ እምዉታን። በእፎ፡ እንከ፡ ሀለዉ፡ እምውስቴትክሙ፡ እለ፡ ይብሉ፡ ኢየሐይዉ፡ ምዉታን።
13 ወእመሰ፡ ኢየሐይዉ፡ ምዉታን፡ ክርስቶስኒ፡ ኢተንሥአ፡ እምዉታን።
14 ወእመሰኬ፡ ክርስቶስ፡ ኢተንሥአ፡ እምዉታን፡ ከንቱ፡ ውእቱ፡ ትምህርትነ። ወከንቶ፡ ተአመንክሙ፡ ቦቱ።
15 ወንሕነኒ፡ ኮነ፡ ሰማዕተ፡ ሐሰት፡ ላዕለ፡ እግዚአብሔር። እስመ፡ ንቤ፡ አንሥኦ፡ ለክርስቶስ፡ ዘኢያንሥኦኑ፡ እንከ።
16 ወእመሰ፡ ኢይትነሥኡ፡ ምዉታን፡ ክርስቶስኒ፡ ኢተንሥአ፡ እምዉታን።
17 ወእመሰ፡ ክርስቶስ፡ ኢተንሥአ፡ እምዉታን፡ ከንቱ፡ ሃይማኖትክሙ። ወዓዲክሙ፡ ሀሎክሙ፡ ውስተ፡ ኀጢአትክሙ።
18 ወእለሂ፡ ኖሙ፡ በክርስቶስ፡ ተሀጕሉኬ፡ እንከ።
19 ወእምከመሰ፡ በዝንቱ፡ ሕይወትነ፡ ባሕቲቱ፡ ተወከልነ፡ በክርስቶስ። ፈድፋደ፡ ሣህልነ፡ እምኵሉ፡ ሰብእ።
በእንተ፡ ሥርዐተ፡ ትንሣኤ
20 ወይእዜኒ፡ ክርስቶስ፡ ቀደመ፡ ተንሥኦ፡ እምኵሎሙ፡ ሰብእ፡ ምዉታን።
21 እስመ፡ በአሐዱ፡ ብእሲ፡ ኮነ፡ ሞት። ወበካልኡ፡ ብእሲ፡ ኮነ፡ ትንሣኤ፡ እምዉታን።
22 ወበከመ፡ በአሐዱ፡ አዳም፡ ኵልነ፡ ንመውት፡ ከማሁ፡ በክርስቶስ፡ ኵልነ፡ ነሐዩ።
23 ወኵሉ፡ ሰብእ፡ በበ፡ ሥርዐቱ፡ ቀዳሚ፡ ክርስቶስ፡ ውእቱ። ወተንሥአ፡ እምዉታን፡ ወእምዝ፡ እለ፡ በክርስቶስ፡ በምጽአቱ።
24 አሜሃ፡ ይከውን፡ ማኅለቅትሰ፡ አመ፡ ተወፈየ፡ እግዚአብሔር፡ አብ፡ መንግሥቶ። ወአመ፡ ተስዕረ፡ ኵሉ፡ መኰንን፡ ወኵሉ፡ ንጉሥ፡ ወኵሉ፡ ኀይል።
25 እስመ፡ ሀለዎ፡ ይንግሥ፡ እስከ፡ አመ፡ ይገብኡ፡ ኵሉ፡ ጸላእቱ፡ ታሕተ፡ እገሪሁ።
26 ወእምዝ፡ ይሰዐር፡ ደኃሪ፡ ጸላኢ፡ ዘውእቱ፡ ሞት። እንዘሂ፡ ያገርር፡ ኵሎ፡ ታሕተ፡ እገሪሁ።
27 ወአመ፡ ይቤ፡ ኵሉ፡ ይግርር፡ ሎቱ። ወባሕቱ፡ ይትዐወቅ፡ ከመ፡ ይንእስ፡ እምዘአግረረ፡ ሎቱ፡ ኵሎ።
28 ወአመ፡ ኵሎ፡ ገነየ፡ ሎቱ፡ ይእተ፡ ዕለተ። ወልድነ፡ ይገኒ፡ ለዘአግነየ፡ ሎቱ፡ ኵሎ። ከመ፡ ይኩን፡ እግዚአ፡ በኵሉ፡ ወላዕለ፡ ኵሉ።
29 ወእመ፡ አኮሰ፡ ከመ፡ ምንትኑ፡ ያጠምቁ፡ አኮኑ፡ ከመ፡ የሐይዉ፡ እምዉታን። ወእመሰኬ፡ ኢይትነሥኡ፡ ምዉታን፡ ለምንትኑ፡ እንከ፡ ያጠምቁ።
30 ወለምንትኑ፡ እንከ፡ ንሕነኒ፡ ንሠርሕ፡ ኵሎ፡ ዕለተ፡ ወንትቀተልሂ።
በእንተ፡ ምክሐ፡ ክርስቲያን
31 ወበእንተሂ፡ ምክሕነ፡ አኀዊነ፡ ዘበኢየሱስ፡ ክርስቶስ፡ እግዚእነ።
32 ቦኑ፡ ለአድልዎ፡ ለሰብእ፡ ተበአስኩ፡ ምስለ፡ አርዌ፡ በኤፌሶን። ምንተ፡ እንከ፡ ይበቊዐኒ፡ ለእመ፡ ኢየሐይዉ፡ ምዉታን።
33 ንብላዕ፡ ወንስተይ፡ ጌሠመ፡ ንመውት። ኢያስሕቱክሙ፡ አኀዊነ፡ እስመ፡ ነገር፡ እኩይ፡ ግዕዘ፡ ሠናየ፡ ያማስን።
34 ትግሁ፡ ለጽድቅ፡ ወኢትስሐቱ፡ እስመ፡ ቦ፡ ሰብእ፡ እለ፡ ኢየአምርዎ፡ ለእግዚአብሔር።
35 ወባሕቱ፡ እብለክሙ፡ ከመ፡ ትኅፈሩ፡ ሀሎ፡ ዘይብል። እፎ፡ ይትነሥኡ፡ ምዉታን፡ ወበአይ፡ ነፍስቶሙ፡ የሐይዉ።
36 ኦ፡ አብድ፡ አንተ፡ ዘትዘርዕ፡ ኢየሐዩ፡ ለእመ፡ ኢሞተ።
37 ወዝኒ፡ ዘትዘርዕ፡ አኮ፡ ዝንቱ፡ ነፍስት፡ ዘይትወለድ፡ ዘትዘርዕ። ዳእሙ፡ ዕራቃ፡ ሕጠት፡ እመኒ፡ ዘሥርናይ፡ ወእመኒ፡ ዘባዕድ።
38 ወእግዚአብሔር፡ ይሁቦ፡ ነፍስተ፡ ዘከመ፡ ፈቀደ፡ ወለለ፡ አሐዱ፡ ዘርዕ፡ ዘዘ፡ ዚኣሁ፡ ነፍስቱ። እስመ፡ ኢኮነ፡ አሐደ፡ ሥጋሁ፡ ለነፍስተ፡ ኵሉ።
39 ወካልእ፡ ዘሰብእ፡ ወካልእ፡ ሥጋ፡ እንስሳ። ወካልእ፡ ዘዖፍ፡ ሥጋሁ፡ ወካልእ፡ ነፍስተ፡ ዓሣ።
40 ወካልእ፡ ነፍስት፡ ዘበምድረ፡ ወካልእ፡ ዘበሰማይ።
41 ካልእ፡ ክብሩ፡ ለዘበሰማይ፡ ወካልእ፡ ክብሩ፡ ለዘበምድር። ካልእ፡ ክብሩ፡ ለፀሓይ፡ ወካልእ፡ ክብሩ፡ ለወርኅ። ወካልእ፡ ክብሮሙ፡ ለከዋክብት፡ ኮከብ፡ እምኮከብ፡ ይኄይስ፡ ክብሩ።
42 ከማሁኬ፡ ተንሥኦቶሙ፡ ለምዉታን፡ ይዘራዕ፡ በዘይማስን፡ ወይትነሣእ፡ በዘኢይማስን።
43 ይዘራዕ፡ በኀሳር፡ ወይትነሣእ፡ በክብር። ይዘራዕ፡ በድካም፡ ወይትነሣእ፡ በኀይል።
44 ይዘራዕ፡ በሥጋ፡ ዘነፍስ፡ ወይትነሣእ፡ በሥጋ፡ ዘመንፈስ። እስመ፡ ቦ፡ ሥጋ፡ ዘነፍስ፡ ወቦ፡ ሥጋ፡ ዘመንፈስ።
በእንተ፡ ቀዳማዊ፡ ወደኃራዊ
45 እስመ፡ ከማሁ፡ ይቤ፡ መጽሐፍ፡ ተፈጥረ፡ አዳም፡ ቀዳሚ፡ ብእሲ፡ ዘነፍስ፡ ሕያው። ወደኃራዊ፡ ብእሲ፡ ዘመንፈስ፡ የሐዩ።
46 ወአኮ፡ ቀዳሚ፡ ዘመንፈስ፡ ዘነፍስ፡ ቀደመ፡ ወእምዝ፡ ዘመንፈስ።
47 ቀዳማዊ፡ ብእሲ፡ እምድር፡ መሬታዊ። ወዳግም፡ ብእሲ፡ እምሰማይ፡ ሰማያዊ።
48 በከመ፡ ዝኩ፡ መሬታዊ፡ ከማሁ፡ መሬታውያን። ወበከመ፡ ዝኩ፡ ሰማያዊ፡ ከማሁ፡ ሰማያውያን።
49 ወበከመ፡ ለበስነ፡ አምሳሊሁ፡ ለመሬታዊ፡ ከማሁ፡ ንለብስ፡ አምሳሊሁ፡ ለሰማያዊ።
50 ወዘንተ፡ ንብለክሙ፡ አኀዊነ፡ ከመ፡ ዘሥጋ፡ ወደም፡ ኢይወርስ፡ መንግሥተ፡ እግዚአብሔር። ወዘይማስን፡ ኢይወርስ፡ ዘኢይማስን።
በእንተ፡ ኅቡእ፡ ነገር
51 ናሁ፡ ኀቡአ፡ ነገረ፡ እነግረክሙ፡ አኮ፡ ኵልነ፡ ዘንመውት።
52 ወባሕቱ፡ ኵልነ፡ ንትዌለጥ፡ በምዕር፡ ከመ፡ ቅጽበተ፡ ዐይን፡ በደኃሪ፡ ንፍኀተ፡ ቀርን። ወይነፍኁ፡ ቀርነ፡ ወይትነሥኡ፡ ምዉታን፡ እንዘ፡ ኢይትነከዩ፡ ወንሕነኒ፡ ንትዌለጥ።
53 እስመ፡ ሀለዎ፡ ለዝንቱ፡ ዘይማስን፡ ይልበስ፡ ዘኢይማስን። ወዝንቱ፡ መዋቲ፡ ይልበስ፡ ዘኢይመውት።
54 ወአመ፡ ለብሰ፡ ዝንቱ፡ መዋቲ፡ ዘኢይመውት። ውእቱ፡ አሚረ፡ ይበጽሕ፡ ቃል፡ ዘተጽሕፈ። ተሠጥመ፡ ሞት፡ ውስተ፡ ሙአት።
55 አይቴ፡ እንከ፡ ቀኖትከ፡ ሞት፡ ወአይቴ፡ መዊኦትከ፡ ሲኦል።
56 ወቀኖቱሰ፡ ለሞት፡ ኀጢአት፡ ወኀይላኒ፡ ለኀጢአት፡ ኦሪት።
57 ወለእግዚአብሔር፡ አኰቴት፡ ዘወሀበነ፡ ንማዕ፡ በእግዚእነ፡ ኢየሱስ፡ ክርስቶስ።
58 ወይእዜኒ፡ አኀዊነ፡ ፍቁራን፡ ኩኑ፡ ጽኑዓነ፡ ወድልዋን። ወኢታንቀልቅሉ፡ እምሃይማኖት፡ ወአብዝኁ፡ ገቢረ፡ ለእግዚአብሔር፡ ዘልፈ። ተአምሩ፡ ከመ፡ ኢኮነ፡ ለከንቱ፡ ዘጻመውክሙ፡ በእንተ፡ እግዚእነ።
=== chapter 16 ===
[ምዕራፍ 16]
በእንተ፡ አስተጋብኦ
1 በእንተ፡ አስተጋብኦሰ፡ ለቅዱሳን፡ በከመ፡ ሠራዕክዎሙ፡ ለቤተ፡ ክርስቲያን፡ ዘገላትያ። ከማሁ፡ አንትሙሂ፡ ግበሩ፡ በበ፡ እሑድ።
2 ኵሉ፡ ብእሲ፡ እምኔክሙ፡ ይዝግብ፡ ሎቱ፡ ዘተሠርሐ፡ ወዘረከበ፡ በቤቱ፡ ይዕቀብ። ከመ፡ ኢይኩን፡ ቅሥት፡ አመ፡ መጻእኩ።
3 ወአመ፡ በጻሕኩ፡ እፌኑ፡ ዘኀረይክሙ፡ ቦቱ፡ ምስለ፡ መልእክትየ። ከመ፡ ይትረከብ፡ ሀብትክሙ፡ በኢየሩሳሌም።
4 ወእመሰ፡ ደለወኒ፡ እሑር፡ ለልየ፡ ኣሐውር፡ ወየሐውሩ፡ ምስሌየ።
5 ወእመጽእ፡ ኀቤክሙ፡ በጺሕየ፡ መቄዶንያ።
6 ወእምህየ፡ ኀሊፍየ፡ እነብር፡ ኀቤክሙ። እለ፡ ኮና፡ መዋዕለ፡ ለእመኒ፡ እንጋ፡ እከርም፡ ኀቤክሙ። ከመ፡ አንትሙኒ፡ ትፈንዉኒ፡ ኀበ፡ ሖርኩ።
7 ወኢይፈቅድ፡ ይእዜ፡ ኅሉፈ፡ እርአይክሙ። ወባሕቱ፡ እትአመን፡ ከመ፡ እነብር፡ ኀቤክሙ፡ ዘኮነ፡ መዋዕለ፡ ለእመ፡ ፈቀደ፡ እግዚአብሔር።
8 ወእነብር፡ ኤፌሶን፡ እስከ፡ ጰንጠቆስቴ።
9 እስመ፡ ርኅው፡ ሊተ፡ ዐቢይ፡ አንቀጽ፡ ወግብር፡ ምሉእ። ወሀለዉ፡ ብዙኃን፡ መከልኣን።
10 ወአመ፡ መጽአ፡ ጢሞቴዎስ፡ ዑቅዎ፡ ከመ፡ ኢይፍራህ፡ በኀቤክሙ። እስመ፡ ግብረ፡ እግዚአብሔር፡ ይገብር፡ ከማየ።
11 ወአልቦ፡ ዘይሜንኖ፡ ወፈንውዎ፡ በሰላም፡ ይምጻእ፡ ኀቤየ። እስመ፡ እጸንሖ፡ ምስለ፡ አኀዊነ።
12 ወበእንተሰ፡ እኁነ፡ አጵሎስ፡ ብዙኀ፡ አስተብቋዕክዎ፡ ይምጻእ፡ ኀቤክሙ፡ ምስለ፡ አኀው። ወዮጊ፡ ኢፈቀደ፡ ሎቱ፡ እግዚአብሔር፡ ይምጻእ፡ ኀቤክሙ፡ ይእዜ። ወይመጽእ፡ ባሕቱ፡ አመ፡ ተክህሎ።
13 ትግሁ፡ ወቁሙ፡ በሃይማኖት፡ ተዐገሡ፡ ወአጥብዑ።
14 ወኵሎ፡ በተፋቅሮ፡ ግበሩ።
15 አስተበቊዐክሙ፡ አኀዊነ፡ ታእምሩ፡ ቤተ፡ እስጢፋኖስ፡ ወፈርዶናጥስ፡ ወአካይቆስ። ከመ፡ እሙንቱ፡ ቀዳምያኒሃ፡ ለአካይያ፡ ወለመልእክተ፡ ቅዱሳን፡ አዘዝክዎሙ።
16 ከመ፡ አንትሙኒ፡ ትትአዘዙ፡ ለዘከመ፡ እሉ። ወለኵሉ፡ ዘየኀብር፡ ግብረ፡ ወይጻሙ፡ ምስሌነ።
17 ወእትፌሣሕ፡ በምጽአቱ፡ ለእስጢፋኖስ፡ ወፈርዶናጥስ፡ ወአካይቆስ። እስመ፡ ዘአንትሙ፡ አሐጸጽክሙ፡ እሙንቱ፡ ፈጸሙ። ወአስተፍሥሕዋ፡ ለነፍስየ፡ ወለነፍስክሙ።
18 ወአእምርዎሙ፡ ለእለ፡ ከመ፡ ዝ።
19 አምኁክሙ፡ ቤተ፡ ክርስቲያናት፡ ዘእስያ። አምኁክሙ፡ በእግዚእነ፡ ፈድፋደ፡ አቂላ፡ ወጵርስቅላ። ወእለሂ፡ ምስሌሆሙ፡ እለ፡ ውስተ፡ ቤቶሙ።
20 ወአምኁክሙ፡ አኀዊነ፡ ኵሎሙ፡ ተአምኁ፡ በበይናቲክሙ፡ በአምኃ፡ ቅድሳት።
21 አማኅኩክሙ፡ ጽሒፍየ፡ ዘንተ፡ በእደ፡ ዚኣየ፡ አነ፡ ጳውሎስ።
22 ወዘሰ፡ ኢያፈቅሮ፡ ለእግዚእነ። ውጉዘ፡ ለይኩን፡ እምተስፋ፡ እግዚአብሔር፡ እስከ፡ ምጽአቱ፡ ለእግዚእነ።
23 ጸጋሁ፡ ለእግዚእነ፡ ኢየሱስ፡ ክርስቶስ፡ ምስሌክሙ።
24 ወፍቅረ፡ ዚኣየ፡ ምስለ፡ ኵልክሙ፡ በክርስቶስ፡ ኢየሱስ፡ አሜን።