##### edition  (gez) — The following is a preliminary division of the Epistle to the Romans into textparts which are present in manuscripts, not taking into consideration the different recensions.
=== part Prescription ===
[Prescription]
ለብሔረ፡ ሮሜ፡
መልእክት፡ ቀዳማዊ፡ ኀበ፡ ሰብአ፡ ሮሜ፡
=== part Introduction ===
[Introduction to the epistle]
=== part Epistle ===
[Epistle]
=== chapter 1 ===
[ምዕራፍ 1]
በእንተ፡ ጽዋዔሁ
1 እምጳውሎስ፡ ገብሩ፡ ለእግዚእነ፡ ኢየሱስ፡ ክርስቶስ። ወሐዋርያ፡ ዘተጸውዐ፡ ወተፈልጠ፡ ለትምህርተ፡ ወንጌለ፡ እግዚአብሔር።
2 ዘአቅደመ፡ ነጊረ፡ በአፈ፡ ነቢያቲሁ፡ ወበመጻሕፍቲሁ፡ ቅዱሳት።
3 በእንተ፡ ወልዱ፡ ዘተወልደ። ወመጽአ፡ እምዘርዐ፡ ዳዊት፡ በሥጋ፡ ሰብእ።
4 ወአርአየ፡ ከመ፡ ወልደ፡ እግዚአብሔር፡ ውእቱ፡ በኀይሉ፡ ወበመንፈሱ፡ ቅዱስ። ከመ፡ ተንሥአ፡ እምዉታን፡ ኢየሱስ፡ ክርስቶስ፡ እግዚእነ።
5 ዘቦቱ፡ ረከብነ፡ ጸጋ፡ ወተሠየምነ፡ ሐዋርያተ። ከመ፡ ናስምዖሙ፡ ለአሕዛብ፡ ወይእመኑ፡ በስሙ።
6 ከመ፡ አንትሙኒ፡ ይእዜ፡ ኮንክሙ፡ ጽዉዓነ፡ በኢየሱስ፡ ክርስቶስ።
በእንተ፡ ጽዉዓን፡ ወበእንተ፡ ሃይማኖቶሙ
7 ለኵሎሙ፡ እለ፡ ሀለዉ፡ ብሔረ፡ ሮሜ። ፍቁራኒሁ፡ ለእግዚአብሔር፡ ወኅሩያኒሁ፡ ወቅዱሳኒሁ። ሰላም፡ ለክሙ፡ ወጸጋ፡ እግዚአብሔር፡ አቡነ፡ ወእግዚእነ፡ ኢየሱስ፡ ክርስቶስ።
8 አቀድም፡ አእኲቶቶ፡ ለእግዚአብሔር፡ በኢየሱስ፡ ክርስቶስ፡ በእንተ፡ ኵልክሙ። እስመ፡ ተሰምዐት፡ ሃይማኖትክሙ፡ ውስተ፡ ኵሉ፡ ዓለም።
9 ወእግዚአብሔር፡ ሰማዕትየ፡ ዘኪያሁ፡ አመልክ፡ በኵሉ፡ መንፈስየ። ወበትምህርተ፡ ወልዱ፡ ከመ፡ እዜከረክሙ፡ በጸሎትየ፡ ዘልፈ።
10 ወእስእል፡ ከመ፡ ይሠርሐኒ፡ እግዚአብሔር፡ በፈቃዱ፡ እምጻእ፡ ኀቤክሙ።
11 እስመ፡ እፈቅድ፡ እርአይክሙ። ወከመ፡ ትርከቡ፡ ጸጋሁ፡ ለመንፈስ፡ ቅዱስ፡ በእንተ፡ ዝ፡ ከመ፡ ይትፈሣሕ፡ ልብክሙ፡ እስመ፡ ኀበርክሙ፡ አሚነ፡ ምስሌየ።
በእንተ፡ ጻሕቀ፡ መምህራን፡ ወዕሴቶሙ
12 ወእፈቅድ፡ ባሕቱ፡ ታእምሩ፡ አኀዊነ፡ ከመ፡ ዘልፈ፡ እፈቅድ፡ እምጻእ፡ ኀቤክሙ። ወይሰአነኒ፡ እስከ፡ ይእዜ።
13 ወለእመኒ፡ ቦ፡ ከመ፡ እርከብ፡ ዕሴትየ፡ በላዕሌክሙ። ከመ፡ በላዕለ፡ አሕዛብኒ፡ ወበላዕለ፡ አረሚኒ። ወበላዕለ፡ ሐቃልኒ፡ ወለጠቢባንኒ፡ ወለአብዳንኒ።
14 እስመ፡ ይደልወኒ፡ ለኵሉ፡ ሰብእ፡ እምሀር።
15 ወዓዲ፡ ፈድፋደ፡ እጽሕቅ፡ ለክሙ፡ ለእለ፡ ብሔረ፡ ሮሜ፡ እምሀርክሙ።
16 እስመ፡ ኢየኀፍር፡ ምህሮ፡ ወንጌሉ። እስመ፡ ኀይሉ፡ ለእግዚአብሔር፡ ውእቱ። ዘያሐይዎሙ፡ ለኵሎሙ፡ እለ፡ የአምኑ፡ ቦቱ። ለአይሁዳዊ፡ ቀዳማዊ፡ ወለአረማዊኒ፡ ደኃራዊ።
17 ወቦቱ፡ ያስተርኢ፡ ጽድቀ፡ እግዚአብሔር፡ ወርትዑ። እስመ፡ ያጸድቆሙ፡ ለእለ፡ የአምኑ፡ ቦቱ፡ በአሚን። እስመ፡ ከማሁ፡ ይብል፡ መጽሐፍ፡ ጻድቅአ፡ በአሚን፡ የሐዩ።
በእንተ፡ መቅሠፍት፡ ዘይመጽእ፡ ላዕለ፡ ኃጥኣን
18 ወይመጽእ፡ መቅሠፍተ፡ እግዚአብሔር፡ እምሰማይ። ላዕለ፡ ኵሉ፡ ሰብእ፡ ኃጥእ፡ ወዐማፂ። እለ፡ የአምርዋ፡ ለጽድቅ፡ ወይመይጥዋ፡ በዐመፃሆሙ።
19 እስመ፡ አእምሮ፡ እግዚአብሔር፡ ክሡት፡ በኀቤሆሙ። ወአርአየ፡ እግዚአብሔር፡ ላዕሌሆሙ።
20 ወዘኢያስተርኢ፡ እግዚአብሔር፡ እምፍጥረተ፡ ዓለም። ይትዐወቅ፡ በፍጥረቱ፡ በኀልዮ፡ ወበአእምሮ። ወከመ፡ ዝ፡ ይትአመር፡ ኀይሉ፡ ወመለኮቱ፡ ዘለዓለም።
21 ከመ፡ ኢይርከቡ፡ በዘይትዋሥኡ፡ እስመ፡ እንዘ፡ የአምርዎ፡ ለእግዚአብሔር። አኮ፡ ከመ፡ እግዚአብሔር፡ ዘአእኰትዎ፡ ወሰብሕዎ። ዘእንበለ፡ ዘሐሰውዎ፡ ወረኵሱ፡ በኅሊናሆሙ፡ ወተጸለለ፡ ልቦሙ።
22 ወእንዘ፡ ይፈቅዱ፡ ይጥብቡ፡ አብዱ።
23 እስመ፡ ወለጡ፡ ስብሐቲሁ፡ ለእግዚአብሔር፡ ዘኢይመውት። ወአምሳለ፡ ርእየተ፡ ሰብእ፡ መዋቲ፡ ረሰዩ። ወከመ፡ እንስሳ፡ ወከመ፡ አራዊት፡ ወከመ፡ አዕዋፍ።
24 ወበእንተ፡ ዝ፡ አግብኦሙ፡ ወኀደጎሙ። ከመ፡ ያርኵሱ፡ ርእሶሙ፡ ለሊሆሙ፡ ወያኅስሩ፡ ነፍስቶሙ።
25 እስመ፡ ሐሰተ፡ ረሰይዎ፡ ለጽድቀ፡ እግዚአብሔር። ወአምለኩ፡ ወተፃአፅኡ፡ ተግባሮ፡ ወኀደግዎ፡ ለፈጣሬ፡ ኵሉ። ዘውእቱ፡ አምላክ፡ ቡሩክ፡ ለዓለመ፡ ዓለም፡ አሜን።
በእንተ፡ እኩይ፡ መቅሠፍት
26 ወበእንተ፡ ዝ፡ ወሀቦሙ፡ እግዚአብሔር፡ መቅሠፍተ፡ እኩየ። ወአንስቲያሆሙኒ፡ ኀደጋ፡ ፍጥረቶን፡ ወተመሰላ፡ በዘኢኮነ፡ ፍጥረቶን።
27 ወከማሁ፡ ዕደዊሆሙኒ፡ ኀደጉ፡ አንስቲያሆሙ፡ ወነዱ፡ በፍትወቶሙ። ወገብኡ፡ በበይናቲሆሙ፡ ብእሲ፡ ላዕለ፡ ብእሲ፡ ኀሳሮሙ፡ ገብሩ። ወባሕቱ፡ ይረክቡ፡ ፍዳሆሙ፡ ወይገብእ፡ ጌጋዮሙ፡ ዲበ፡ ርእሶሙ።
28 ወበከመ፡ ኢኀለይዎ፡ ለእግዚአብሔር፡ በልቦሙ። ከማሁ፡ እግዚአብሔርኒ፡ ወሀቦሙ፡ ልበ፡ እበድ። ከመ፡ ይግበሩ፡ ዘንተ፡ ዘኢይደሉ።
29 እንዘ፡ እሙንቱ፡ ጽጉባነ፡ ኵሉ፡ ዐመፃ፡ ወእከይ፡ ወፁግ፡ ወትዕግልት። ወጽጉባነ፡ ቅንአት፡ ሐማይያን፡ ቀታልያን፡ ጒሕላውያን፡ መስተመይናን። ዝኁራን፡ እኩያነ፡ ልማድ፡ ወግዕዝ።
30 ሐማይያን፡ መስተሣልቃን፡ መስተሐብባን፡ ዕቡያን፡ ዝሉፋን። ዐላውያን፡ ሐሳውያን፡ ጸላእያነ፡ እግዚእ፡ ሥሑጻን።
31 አብዳን፡ ወዝንጉዓን፡ ወመስተኃሥሣን፡ ለእከይ።
32 ወአልቦሙ፡ ምሕረት፡ እንዘ፡ ለሊሆሙ። የአምሩ፡ ኵነኔሁ፡ ለእግዚአብሔር። ከመ፡ ይደልዎ፡ ሞት፡ ለዘገብረ፡ ዘንተ፡ ከመ፡ ዝ። አኮ፡ ባሕቲቶሙ፡ ዘይገብርዎ፡ ዓዲ፡ ለባዕድኒ፡ ይዌሕክዎ፡ ያግብእዎ።
=== chapter 2 ===
[ምዕራፍ 2]
በእንተ፡ ዘይግእዝ፡ ቢጾ
1 ዕጓለ፡ እመሕያው፡ በምንትኑ፡ ዘትትዋሥኦ፡ ለመኰንነ፡ ጽድቅ። ሶበ፡ አንተ፡ ዝኰ፡ ዘትግእዝ፡ በላዕለ፡ ባዕድ። ሶበ፡ ለሊከ፡ ትገብሮ፡ ዝኰ፡ ዘትጸልእ፡ በላዕለ፡ ቢጽከ። አኮኑ፡ ርእሰከ፡ ትግእዝ፡ እስመ፡ ለሊከ፡ ትገብሮ።
2 ነአምር፡ ከመ፡ ጽድቅ፡ ኵነኔሁ፡ ለእግዚአብሔር። ዘያመጽእ፡ መቅሠፍተ፡ ላዕለ፡ እለ፡ ይገብሩ፡ ዘንተ፡ ከመ፡ ዝ።
3 ኀልዮ፡ እስኩ፡ ዕጓለ፡ እመሕያው፡ ለዝንቱ። ለእመ፡ ብከ፡ ኀበ፡ ታመሥጥ፡ እምኵነኔሁ፡ ለእግዚአብሔር። ሶበ፡ ለሊከ፡ ትገብሮ፡ ለዝኩ፡ ዘትግእዝ፡ በላዕለ፡ ባዕድ፡ ወዘትጸልእ።
4 ትትሔዘብኑ፡ ታስተአብዶ፡ በብዝኀ፡ ምሕረቱ። ወበትዕግሥቱ፡ ወበኦሆ፡ ብሂሎቱ፡ ላዕሌከ። ኢተአምርኑ፡ ከመ፡ ምሕረቱ፡ ለእግዚአብሔር፡ ኪያከ፡ ያገርር፡ ኀበ፡ ንስሓ።
5 ወባሕቱ፡ በአምጣነ፡ ታጸንዕ፡ ልበከ፡ ወኢትኔስሕ። ትዘግብ፡ ለከ፡ መቅሠፍተ፡ ለአመ፡ ይበጽሐከ፡ ኵነኔሁ፡ ለእግዚአብሔር።
6 እስመ፡ ውእቱ፡ ይፈድዮ፡ ለኵሉ፡ በከመ፡ ምግባሩ፡ በኵነኔ፡ ጽድቁ።
በእንተ፡ ተዐጋሥያን፡ ወከሓድያን
7 ወለእለሰ፡ ተዐገሡ፡ በምግባረ፡ ሠናይ፡ የኀሥሡ፡ ክብረ፡ ወስብሐተ። ውእቱኒ፡ ይሁቦሙ፡ ሕይወተ፡ ዘለዓለም።
8 ወለእለሰ፡ ከሓድያን፡ ወዐላውያነ፡ ጽድቅ፡ ወመፍቀርያነ፡ ዐመፃ። ፍዳሆሙ፡ መቅሠፍት፡ ወመንሱት፡ ወቊጥዐ፡ ወገዓር፡ ወምንዳቤ።
9 ለነፍሰ፡ ኵሉ፡ ሰብእ፡ ዘእኩይ፡ ምግባሩ። እመኒ፡ አይሁዳዊ፡ ወእመኒ፡ አረማዊ።
10 ክብር፡ ወስብሐት፡ ወሰላም፡ ለኵሉ፡ ዘሠናይ፡ ምግባሩ። እመኒ፡ አይሁዳዊ፡ ወእመኒ፡ አረማዊ።
11 እስመ፡ ኢያደሉ፡ እግዚአብሔር፡ ለገጸ፡ ሰብእ።
12 እስመ፡ ኵሎሙ፡ እለ፡ ፈድፈደ፡ እምሕግ፡ አበሳሆሙ፡ ፈድፈደ፡ እምሕግ፡ ኵነኔሆሙ። ወኵሎሙ፡ እለ፡ ዘእንበለ፡ ሕግ፡ አበሳሆሙ፡ ዘእንበለ፡ ሕግ፡ ኵነኔሆሙ።
በእንተ፡ እለ፡ ይፈቅዱ፡ ይጽድቁ፡ በአጽምዖ፡ መጻሕፍት
13 ቦኑ፡ በአጽምዖ፡ መጻሕፍት፡ ይጸድቁ፡ በቅድመ፡ እግዚአብሔር። አኮኑ፡ ዳእሙ፡ በገቢሮቱ፡ ይጸድቁ።
14 አሕዛብኒ፡ እለ፡ አልቦሙ፡ ሕግ፡ ይሠርዑ፡ ሎሙ፡ ሕገ። ወየሐግጉ፡ ሎሙ፡ ለሊሆሙ፡ ወይገብሩ፡ ዘበሕጎሙ።
15 ወያሬእዩ፡ ገቢረ፡ ሕግ፡ እንዘ፡ ጽሑፍ፡ ውእቱ፡ ውስተ፡ ልቦሙ። ወይትዐወቅ፡ እምግባሮሙ፡ ወያርስሐስሖሙ፡ ልቦሙ፡ ወይቀልዮሙ። ወየአምሩ፡ ከመ፡ አልቦ፡ ዘይብሉ፡ ወዘይወቅሱ።
16 አመ፡ የሐትቶሙ፡ እግዚአብሔር፡ ለዕጓለ፡ እመሕያው፡ ዘየኀብኡ፡ ወዘይከብቱ። በከመ፡ መሀርኩ፡ በእንተ፡ ኢየሱስ፡ ክርስቶስ።
በእንተ፡ ዘለባዕድ፡ ይሜህር፡ ወዘለሊሁ፡ ኤይገብር
17 ወሶበ፡ አንተ፡ አይሁዳዊ፡ ዘተዐርፍ፡ በኦሪትከ፡ ወትትሜካሕ፡ በእግዚአብሔር።
18 ወተአምር፡ ፈቃዶ፡ ወትፈልጥ፡ ዘይኄይስ። ወምሁር፡ አንተ፡ ኦሪተ።
19 ወትትአመን፡ በርእስከ፡ ከመ፡ አንተ፡ መርሖሙ፡ ለዕዉራን። ወብርሃኖሙ፡ ለእለ፡ ውስተ፡ ጽልመት።
20 ወመጥበቢሆሙ፡ ለአብዳን፡ ወመምህሮሙ፡ ለሕፃናት። ወትትሜሰል፡ ጻድቀ፡ ወተአምር፡ ሕገ፡ ኦሪት፡ በዘትጸድቅ።
21 ወእፎኑ፡ እንከ፡ ዘኢትሜህር፡ ርእሰከ፡ ዘለባዕድ፡ ትሜህር።
22 ኢትስርቁ፡ ትብል፡ ወለሊከ፡ ትሰርቅ። ኢትዘምዉ፡ ትብል፡ ወለሊከ፡ ትዜሙ። ወተሐውር፡ ኀበ፡ ብእሲተ፡ ብእሲ። ወታስቈርር፡ ጣዖተ፡ ወለሊከ፡ ትሰርቅ፡ ቤተ፡ መቅደስ።
23 ወትትሜካሕ፡ በኦሪት፡ ወለሊከ፡ ዐላዊሃ፡ ለኦሪት። ወታስተሐቅሮ፡ ለእግዚአብሔር።
24 ወናሁ፡ በእንቲኣክሙ፡ ይፀርፉ፡ አሕዛብ፡ ላዕለ፡ ስመ፡ እግዚአብሔር፡ በከመ፡ ጽሑፍ።
በእንተ፡ ግዝረት፡ ወይህድና
25 ግዝረትሰ፡ ትበቊዐከ፡ ለእመ፡ ገበርከ፡ ሕገገ፡ ኦሪት። ወእመሰ፡ ኢገበርከ፡ ሕገገ፡ ኦሪት፡ ግዝረትከ፡ ቊልፈተ፡ ትከውነከ።
26 ወለእመሰ፡ እንዘ፡ ቈላፍ፡ አንተ፡ ወዐቀብከ፡ ሕገገ፡ ኦሪት። ቊልፈትከ፡ ግዝረተ፡ ትከውነከ።
27 ወይኄይሰከ፡ ቊልፈትከ፡ ትንበር፡ እንተ፡ ተፈጥረት፡ ምስሌከ። እምትትገዘር፡ ወትዕሉ፡ ሕገ፡ ኦሪት። ወይኄይሰከ፡ እምኔከ፡ እምግዙር፡ ዘተዐሉ፡ ሕገ፡ ኦሪት። ዝኩ፡ ቈላፍ፡ ዘይገብር፡ ሕገ፡ ኦሪት።
28 ቦኑ፡ ለዐይነ፡ ሰብእ፡ ይትየሀዱ። ወቦኑ፡ ለአድልዎ፡ ይትገዘሩ፡ አኮኑ፡ በክዱን፡ ይትየሀዱ።
29 ወግዝረትሰ፡ ግዝረተ፡ ጽላሌ፡ ልብ፡ በመንፈስ፡ ወአኮ፡ በትምህርተ፡ መጽሐፍ። ከመ፡ ትትአኰት፡ በኀበ፡ እግዚአብሔር፡ እምትትአኰት፡ በኀበ፡ ዕጓለ፡ እመሕያው።
=== chapter 3 ===
[ምዕራፍ 3]
ተስእሎ፡ በእንተ፡ ረባሐ፡ ተይህዶ፡ ወግዝረት
1 ምንትኑ፡ እንከ፡ ረባሑ፡ ለተይህዶ። ወምንትኑ፡ ሥላጤሃ፡ ለግዝረት።
2 ብዙኅ፡ በኵሉ፡ ምግባር። ወቅድመ፡ ውእቱ፡ ተአምኖ፡ በቃለ፡ እግዚአብሔር።
3 ወእመኒ፡ ቦ፡ እለ፡ ኢየአምኑ፡ ኢ፡ አሚነ፡ ዚኣሆሙኑ፡ ይከልእ፡ ባዕደ። ከመ፡ ኢይእመን፡ በእግዚአብሔር፡ ሐሰ።
4 እስመ፡ እግዚአብሔር፡ ጻድቅ፡ ወኵሉ፡ ሰብእ፡ ሐሳዊ። እስመ፡ ከመ፡ ዝ፡ ይብል፡ መጽሐፍ። ከመ፡ ትጽደቅ፡ በነቢብከ፡ ወትማእ፡ በኵነኔከ።
5 ወእመሰ፡ በዐመፃ፡ ዚኣየኑ፡ ይቀውም፡ ጽድቀ፡ እግዚአብሔር። ምንተ፡ እንከ፡ ንብል፡ ይዔምፅኑ፡ እግዚአብሔር። ሶበ፡ ያመጽእ፡ መቅሠፍተ፡ ላዕለ፡ ሰብእ። ሐሰ፡ ወዘኒ፡ እነብብ፡ ሕገ፡ ሰብእ፡ እነብብ።
በእንተ፡ ኰንኖቱ፡ ዓለመ
6 ወእፎኑመ፡ እንከ፡ ይኴንን፡ እግዚአብሔር፡ ዓለመ።
7 ወእመሰ፡ ጽድቅ፡ ውእቱ፡ ቃለ፡ እግዚአብሔር። ወበሐሰተ፡ ዚኣየ፡ ተዐውቀ፡ ዕበዩ፡ ወስብሐቲሁ። ለምንት፡ እንከ፡ ይኴንነኒ፡ ከመ፡ ኃጥእ።
8 ቦኑ፡ እንጋ፡ ንሕነ፡ ዘከመ፡ ይፀርፉ፡ ላዕሌነ፡ እለ፡ ይፀርፉ፡ ወይትሔዘቡነ። ከመ፡ ንሕነ፡ ንብል፡ ንግበር፡ እኩየ፡ ከመ፡ ንርከብ፡ ሠናየ። ወሎሙሰ፡ ጽኑሕ፡ ደይኖሙ።
9 ምንተ፡ እንከ፡ ንብል። ናሁ፡ ወዳእነ፡ ግእዝናሆሙ፡ ለአይሁዳዊ፡ ወለአረማዊ። እስመ፡ ኵሎሙ፡ ስሕቱ።
በእንተ፡ ተኀጥኦተ፡ ጻድቅ፡ ወጠቢብ
10 በከመ፡ ይብል፡ መጽሐፍ፡ አልቦ፡ ጻድቅ፡ ወአልቦ፡ ጠቢብ።
11 ወአልቦ፡ ዘየኀሥሦ፡ ለእግዚአብሔር።
12 ኵሉ፡ ዐረየ፡ ወኅቡረ፡ ዐለወ። አልቦ፡ ዘይገብራ፡ ለሠናይት፡ አልቦ፡ ወኢ፡ አሐዱ።
13 ከመ፡ መቃብር፡ ክሡት፡ ጐራዒቶሙ። ወጓሕለዉ፡ በልሳናቲሆሙ።
14 ሕምዘ፡ አርዌ፡ ምድር፡ ታሕተ፡ ከናፍሪሆሙ። መሪር፡ አፉሆሙ፡ ወምሉእ፡ መርገመ።
15 በሊኅ፡ እገሪሆሙ፡ ለክዒወ፡ ደም።
16 ኀሳር፡ ወቅጥቃጤ፡ ውስተ፡ ፍኖቶሙ።
17 ወኢየአምርዋ፡ ለፍኖተ፡ ሰላም።
18 ወአልቦ፡ ፍርሀተ፡ እግዚአብሔር፡ ቅድመ፡ አዕይንቲሆሙ።
በእንተ፡ እለ፡ የዐቅቡ፡ ኦሪተ
19 ነአምር፡ ከመ፡ ኵሉ፡ ዘይብል፡ ኦሪት፡ ለእለ፡ ውስተ፡ ኦሪት። ይቤሎሙ፡ ከመ፡ ይትፈጸም፡ ኵሉ፡ አፍ። ወይኩን፡ ግሩረ፡ ኵሉ፡ ዓለም፡ ለእግዚአብሔር።
20 እስመ፡ ኢይጸድቅ፡ ኵሉ፡ ዘነፍስ፡ በገቢረ፡ ሕገገ፡ ኦሪት፡ በቅድመ፡ እግዚአብሔር። እስመ፡ እምኦሪት፡ ተዐውቀት፡ ኀጢአት።
21 ይእዜሰኬ፡ አስተርአየት፡ ጽድቀ፡ እግዚአብሔር፡ እንዘ፡ ኢይትገበር፡ ሕገገ፡ ኦሪት።
22 ኦሪት፡ ወነቢያት፡ ኮንዎ፡ ሰማዕተ። ከመ፡ በአሚን፡ በኢየሱስ፡ ክርስቶስ፡ ይጸድቁ፡ በኀበ፡ እግዚአብሔር፡ ኵሎሙ፡ እለ፡ የአምኑ፡ ቦቱ።
23 ኢፈለጠ፡ ወኢሌለየ፡ እስመ፡ ኵሎሙ፡ አበሱ፡ ወጌገዩ። ወኀደጉ፡ ስብሐተ፡ እግዚአብሔር።
24 ወጽድቅሰኬ፡ በከንቱ፡ ኮነ። በጸጋ፡ ዚኣሁ፡ ረከቡ፡ ሕይወተ፡ በኢየሱስ፡ ክርስቶስ።
25 እስመ፡ ወድአ፡ እግዚአብሔር፡ ወገብሮ፡ ስርየተ፡ ለአሚን፡ በደሙ። ከመ፡ ያርኢ፡ ጽድቆ፡ በላዕለ፡ እለ፡ አበሱ፡ እምትካት።
26 በትዕግሥቱ፡ ለእግዚአብሔር፡ ወበኦሆ፡ ብሂሎቱ። ከመ፡ ያእምርዎ፡ ዮም፡ ከመ፡ ጻድቅ፡ ውእቱ። ወያጸድቆሙ፡ ለእለ፡ የአምኑ፡ በአሚን፡ በኢየሱስ።
በእንተ፡ እለ፡ ይትሜክሑ፡ በሕግ
27 በምንትኑ፡ እንከ፡ ይትሜክሑ፡ ወበአይኑ፡ ሕግ፡ ይገብሩ። አልቦ፡ ባዕድ፡ ሕግ፡ ዘእንበለ፡ አሚን።
28 እስመ፡ ነአምር፡ ከመ፡ ይጸድቅ፡ ሰብእ፡ በአሚን። እንዘ፡ ኢይገብር፡ ሕገገ፡ ኦሪት።
29 ቦኑ፡ ለባሕቲቶሙ፡ ለአይሁድ፡ እግዚአብሔር። አኮኑ፡ ለሕዝብኒ፡ ወለአሕዛብኒ።
30 እስመ፡ አሐዱ፡ ውእቱ፡ እግዚአብሔር፡ ዘያጸድቆ፡ ለግዙር፡ በአሚን።
31 ወለዘሂ፡ ቈላፍ፡ በአሚን፡ ዳእሙ፡ ያጸድቆ። ሰዐርናሁ፡ እንከ፡ ሕገገ፡ ኦሪት፡ በእንተ፡ አሚን፡ ሐሰ። አኮ፡ ዘንስዕር፡ ሕገ፡ አላ፡ ንሠርዕ።
=== chapter 4 ===
[ምዕራፍ 4]
በእንተ፡ አብርሃም
1 ምንተ፡ እንከ፡ ንብል፡ በእንተ፡ አብርሃም፡ አቡሆሙ፡ ለቀደምት። ረከበኑ፡ ዘንተ፡ በምግባረ፡ ሥጋ።
2 ሶበሰኬ፡ አብርሃም፡ በምግባሩ፡ ጸድቀ። እምኮኖ፡ ምዝጋና፡ ወአኮ፡ ለመንገለ፡ እግዚአብሔር።
3 ወእፎኑመ፡ ይብል፡ መጽሐፍ፡ አምነ፡ አብርሃም፡ በእግዚአብሔር፡ ወኮኖ፡ ጽድቀ።
4 ወዘሰ፡ ተቀንየ፡ ኢይከውኖ፡ ዐስበ፡ ከመ፡ ዘጸገውዎ፡ አላ፡ ከመ፡ ዘይደልዎ።
5 ወዘሰ፡ ኢተቀንየ፡ ለእመ፡ ተአመነ፡ በዘያጸድቆ፡ ለኃጥእ፡ ይትኌለቆ፡ ጽድቀ፡ አሚኖቱ።
በእንተ፡ ብፁዓን
6 በከመ፡ ነገረ፡ ዳዊት፡ በዘያበፅዕ፡ ሰብአ። ወበዘሂ፡ ይትኌለቆ፡ ጽድቀ፡ በኀበ፡ እግዚአብሔር። እንዘ፡ ኢይገብር፡ ሕገገ፡ ኦሪት።
7 ወይቤ፡ ብፁዓን፡ እለ፡ ተኀድገ፡ ሎሙ፡ ኀጢአቶሙ።
8 ወብፁዕ፡ ብእሲ፡ ዘኢኈለቈ፡ ሎቱ፡ እግዚአብሔር፡ ጌጋዮ።
9 ምንተ፡ እንከ፡ ገቢሮሙ፡ ያበፅዑ፡ ዘተገዝረኑ፡ ዳእሙ፡ ያበፅዕ። ወቈላፍሰ፡ አልቦኑ፡ ፍኖት፡ ኀበ፡ ያበፅዕ። አኮኑ፡ ይቤ፡ መጽሐፍ፡ ጽድቀ፡ አብርሃም፡ ወአብፅዐ።
10 ወማእዜኑ፡ ጸድቀ፡ አብርሃም፡ ተገዚሮኑ። ወሚመ፡ ዘእንበለ፡ ይትገዘር።
11 አኮኬ፡ ተገዚሮ፡ አላ፡ ዘእንበለ፡ ይትገዘር። ወግዝረትሰ፡ ማዕተበ፡ ጽድቅ፡ ትኩኖ፡ ወሀቦ፡ ኪያሃ፡ ትእምርተ። ከመ፡ ይትዐወቅ፡ በላዕሌሁ፡ ከመ፡ በአሚን፡ አጽደቆ፡ እግዚአብሔር፡ ለአብርሃም። እንዘ፡ ኢኮነ፡ ግዙረ፡ ውእተ፡ ዕለተ። ከመ፡ ይኩን፡ ውእቱ፡ አባሆሙ፡ ለኵሎሙ፡ ለእለ፡ የአምኑ፡ ዘእንበለ፡ ይትገዘሩ። ከመ፡ ያእምሩ፡ ከመ፡ በአሚን፡ ይጸድቁ፡ እሙንቱሂ። ከመ፡ ጸድቀ፡ አብርሃም፡ በአሚን።
12 ወከመ፡ ይኩን፡ አባሆሙ፡ ለግዙራን። ወአኮ፡ ለግዙራን፡ ለባሕቲቶሙ። ወለእለሂ፡ ዓዲ፡ ይተልዉ፡ አሠረ፡ ሃይማኖቱ፡ ለአቡነ፡ አብርሃም፡ እንዘ፡ ኢኮኑ፡ ግዙራነ። በከመ፡ ውእቱ፡ አቡነ፡ አብርሃም፡ አምነ፡ እንዘ፡ ቈላፍ፡ ውእቱ።
በእንተ፡ ተስፋ፡ አብርሃም፡ ወዘርዑ
13 ወአኮ፡ በእንተ፡ ሕገገ፡ ኦሪት፡ ዘረከበ፡ ተስፋ፡ አብርሃም፡ ወዘርዑ፡ ከመ፡ ይረስ፡ ዓለመ። አላ፡ ዳእሙ፡ ረከበ፡ ዘንተ፡ በጽድቀ፡ ሃይማኖቱ፡ በቃለ፡ እግዚአብሔር፡ ወአሚን፡ ቦቱ።
14 ሶበሰኬ፡ ዘገብረ፡ ዳእሙ፡ ሕገገ፡ ኦሪት፡ ይነሥእ፡ ተስፋ፡ ወይወርስ፡ ዓለመ። እምኢበቊዖ፡ ለአብርሃም፡ አሚኖቱ፡ ወእምኢረከበ፡ ተስፋሁ።
15 እስመ፡ ሕገገ፡ ኦሪት፡ መቅሠፍተ፡ ያመጽእ፡ ዲበ፡ ዘዐለዎ። ወኀበ፡ አልቦ፡ ኦሪት፡ ወኢ፡ ሕግ፡ አልቦ፡ አበሳ፡ ወኀጢአት።
16 ወበእንተ፡ ዝ፡ በአሚን፡ ረሰየ፡ እግዚአብሔር፡ ጸዲቀ። ከመ፡ ይኩን፡ እሙነ፡ ዘአሰፈዎ፡ እግዚአብሔር፡ ለአብርሃም፡ ወለዘርዑ። ከመ፡ ያእምሩ፡ ከመ፡ አኮ፡ በገቢረ፡ ሕገገ፡ ኦሪት፡ ዘይጸድቁ፡ ዘእንበለ፡ ዳእሙ፡ በአሚን።
17 በከመ፡ አምነ፡ አብርሃም፡ አበ፡ ኵልነ፡ ዘይቤሎ፡ እግዚአብሔር። እሬስየከ፡ አባሆሙ፡ ለብዙኃን፡ አሕዛብ፡ እለ፡ የአምኑ፡ በእግዚአብሔር። ዘያነሥኦሙ፡ ለምዉታን፡ ወይሬስዮሙ፡ ለእለ፡ ኢሀለዉ፡ ከመ፡ ዘሀለዉ።
18 ወተአመነ፡ አብርሃም፡ ከመ፡ ይከውን፡ አባሆሙ፡ ለብዙኃን፡ አሕዛብ። ከመ፡ አሰፈዎ፡ እግዚአብሔር፡ ወይቤሎ፡ ከማሁ፡ ይከውን፡ ዘርዕከ።
በእንተ፡ ጽንዐ፡ ሃይማኖቱ፡ ለአብርሃም
19 ወተአመነ፡ አብርሃም፡ ወኢናፈቀ፡ እንዘ፡ ይሬኢ፡ ርእሶ፡ ከመ፡ ልሂቅ፡ ውእቱ። ወከመ፡ ነፍስተ፡ በድን፡ ሥጋሁ፡ እስመ፡ ምእት፡ ክረምቱ።
20 ወሳራሂ፡ ከመ፡ ምዉት፡ ይእቲ፡ ማሕፀና። ወኢናፈቀ፡ ወኢቀብጸ፡ በዘአሰፈዎ፡ እግዚአብሔር።
21 ወተአመነ፡ በኵሉ፡ ልቡ፡ ከመ፡ ይክል፡ ገቢረ፡ ሎቱ፡ እግዚአብሔር። ወአእኵቶ፡ ወእንበይነ፡ ዝ፡ ጽድቀ፡ ኮኖ።
22 ወአኮ፡ እንበይነ፡ ባሕቲቱ፡ ዘተጽሕፈ፡ ዝንቱ።
23 አኮኑ፡ በእንቲኣነሂ፡ እለ፡ አመነ፡ በዘአንሥኦ፡ ለእግዚእነ፡ እምዉታን።
24 ዘተሰቅለ፡ በእንተ፡ ኀጢአትነ። ወተንሥአ፡ ከመ፡ ያጽድቀነ፡ ወከመ፡ ያንሥአነ።
=== chapter 5 ===
[ምዕራፍ 5]
በእንተ፡ ጽድቀ፡ ሃይማኖት
1 ጽደቁ፡ እንከ፡ በአሚን። ወንርከብ፡ ሰላመ፡ በኀበ፡ እግዚአብሔር፡ በእግዚእነ፡ ኢየሱስ፡ ክርስቶስ።
2 ዘበእንቲኣሁ፡ ተመራሕነ፡ በሃይማኖት፡ ውስተ፡ ዛቲ፡ ጸጋሁ። እንተ፡ ባቲ፡ ቆምነ፡ ወውእቱ፡ ምክሕነ። ወባቲ፡ ንሴፎ፡ ስብሐተ፡ እግዚአብሔር።
3 ወአኮ፡ በባሕቲታ፡ ዓዲ፡ ንትሜካሕ፡ በሕማምነሂ። እስመ፡ ነአምር፡ ከመ፡ ሕማም፡ ይፌጽም፡ ትዕግሥተ፡ ላዕሌነ።
4 ወትዕግሥትሰ፡ መከራ፡ ወበመከራ፡ ይትረከብ፡ ተስፋ።
5 ወተስፋኒ፡ ኢያስተኃፍር። እስመ፡ ፍቅረ፡ እግዚአብሔር፡ መልአ፡ ውስተ፡ ልብነ፡ በመንፈስ፡ ቅዱስ፡ ዘወሀበነ።
በእንተ፡ ምጽአተ፡ ክርስቶስ፡ ለሞት
6 ክርስቶስኒ፡ መጽአ፡ በዕድሜሁ፡ ይሙት፡ በእንተ፡ ኀጢአትነ። እንዘ፡ ኃጥኣን፡ ንሕነ።
7 እንበይነ፡ እኩያንሰ፡ እምዕፁብኒ፡ ጥቀ፡ ኢይትረከብ፡ ዘይትሀበል፡ ይሙት። ወእንበይነ፡ ኄራንሰ፡ እንዳዒ፡ እንጋ። ለእመ፡ ቦ፡ ዘይትረከብ፡ ዘያጠብዕ፡ ይሙት።
8 ናሁ፡ ርእዩ፡ መጠነ፡ አፍቀረነ፡ እግዚአብሔር። እንዘ፡ ኃጥኣን፡ ንሕነ፡ ክርስቶስ፡ ሞተ፡ በእንቲኣነ።
9 እፎ፡ እንከ፡ ፈድፋደ፡ ለእመ፡ ጸደቅነ፡ ያነጽሐነ፡ በደሙ። ወያድኅነነ፡ እመንሱት፡ ዘይመጽእ።
10 ወሶበ፡ እንዘ፡ ፀሩ፡ ንሕነ፡ ለእግዚአብሔር፡ ተሣሀለነ፡ በሞተ፡ ወልዱ። እፎ፡ እንከ፡ ይሣሀለነ፡ ፈድፋደ፡ እምከመ፡ ተዐረቀነ። ወተሣሀለነ፡ ያሐይወነ፡ በሕይወተ፡ ወልዱ።
11 አኮ፡ በእንተ፡ ዝንቱ፡ ባሕቲቱ። ዓዲ፡ ንትሜካሕ፡ በኀበ፡ እግዚአብሔር። በእንተ፡ እግዚእነ፡ ኢየሱስ፡ ክርስቶስ፡ ዘበእንቲኣሁ፡ ረከብነ፡ ሣህሎ።
በእንተ፡ ኀጢአት፡ ዘቦአት፡ ውስተ፡ ዓለም
12 ወበእንተ፡ ዝ፡ በከመ፡ በጌጋየ፡ አሐዱ፡ ብእሲ፡ ቦአት፡ ኀጢአት፡ ውስተ፡ ዓለም። ወበእንተ፡ ይእቲ፡ ኀጢአት፡ መጽአ፡ ሞት፡ ላዕለ፡ ኵሉ፡ ሰብእ። ወተኈለቈት፡ ኀጢአት፡ ላዕለ፡ ኵሉ።
13 እስከ፡ አመ፡ መጽአት፡ ኦሪት፡ ሀለወት፡ ኀጢአት፡ ውስተ፡ ዓለም። እንዘ፡ ኢትትዐወቅ፡ ምንት፡ ይእቲ፡ እስመ፡ ኢትትኌለቊ፡ ኀጢአት። እስመ፡ ዓዲሁ፡ ኢመጽአ፡ ውእተ፡ አሚረ፡ ሕገገ፡ ኦሪት።
14 ወባሕቱ፡ ኰነኖሙ፡ ሞት፡ እምአዳም፡ እስከ፡ ሙሴ፡ ለእለሂ፡ አበሱ። ወለእለሂ፡ ኢአበሱ፡ በእንተ፡ ይእቲ፡ ኀጢአቱ፡ ለአዳም። እስመ፡ ኵሉ፡ በአምሳለ፡ አዳም፡ ተፈጥረ። እስመ፡ አዳም፡ አምሳሉ፡ ውእቱ፡ ለዘሀለዎ፡ ይምጻእ።
15 ወባሕቱ፡ አኮ፡ በአምጣነ፡ ጌጋይነ፡ ዘኮነነ፡ ሐሳበ፡ ጸጋሁ፡ ለእግዚአብሔር። ወሶበ፡ በጌጋየ፡ አሐዱ፡ ብእሲ፡ ሞቱ፡ ብዙኃን። እፎ፡ እንከ፡ ፈድፋደ፡ በጸጋሁ፡ ለእግዚአብሔር፡ ወበሀብቱ፡ ዘጸገወነ። በእንተ፡ አሐዱ፡ ብእሲ፡ ዘውእቱ፡ ኢየሱስ፡ ክርስቶስ። ይፈደፍድ፡ ሕይወት፡ ላዕለ፡ ብዙኃን።
16 ወአኮ፡ በአምጣነ፡ ኀጢአቱ፡ ለአሐዱ፡ ብእሲ። ዘኮነነ፡ ሐሳበ፡ ጸጋሁ፡ ለእግዚአብሔር። ወሶበ፡ ኵነኔ፡ ኀጢአት፡ እምላዕለ፡ አሐዱ፡ ብእሲ፡ ወፂኣ፡ ኵሉ፡ ተቀሥፈ፡ ባቲ። እፎ፡ እንከ፡ ፈድፋደ፡ ያነጽሐነ፡ ጸጋሁ፡ እምጌጋይነ። ወይሁበነ፡ ሕይወተ፡ ዘለዓለም።
በእንተ፡ ሕይወት፡ ዘኮነት፡ በክርስቶስ
17 ወሶበ፡ ኀጢአቱ፡ ለአሐዱ፡ ብእሲ፡ አንገሠቶ፡ ለሞት። ወበአበሳ፡ አሐዱ፡ ብእሲ፡ ቀነየነ፡ ሞት። እፎ፡ እንከ፡ ጸጋሁ፡ ለአሐዱ፡ ብእሲ፡ ኢየሱስ፡ ክርስቶስ። ወሀብቱ፡ ያጸድቀነ፡ ወያነግሦ፡ ለነ፡ ለሕይወት፡ ዘለዓለም።
18 ወበከመ፡ በጌጋየ፡ አሐዱ፡ ብእሲ፡ ተኰነነ፡ ኵሉ፡ ዓለም። ከማሁ፡ ካዕበ፡ በጽድቀ፡ አሐዱ፡ ብእሲ፡ ይጸድቅ፡ ኵሉ፡ ዕጓለ፡ እመሕያው።
19 ወበከመ፡ በእንተ፡ ዐሊወ፡ አሐዱ፡ ብእሲ፡ ብዙኃን፡ ኮኑ፡ ኃጥኣነ። ከማሁ፡ ካዕበ፡ በተአዝዞቱ፡ ለአሐዱ፡ ብእሲ፡ ብዙኃን፡ ኮኑ፡ ጻድቃነ። ኦሪትሰኬ፡ ለምክንያት፡ መጽአት፡ ወተበውአት፡ ከመ፡ ታብዝኃ፡ ለኀጢአት። ወኀበ፡ በዝኀት፡ ኀጢአት፡ ህየ፡ ፈድፈደት፡ ጸጋሁ፡ ለእግዚአብሔር።
20 ወበከመ፡ አንገሠቶ፡ ኀጢአት፡ ለሞት። ከማሁ፡ ታነግሦ፡ ለጽድቅ፡ ጸጋሁ፡ ለእግዚአብሔር፡ ውስተ፡ ሕይወት፡ ዘለዓለም። በእንተ፡ እግዚእነ፡ ኢየሱስ፡ ክርስቶስ።
=== chapter 6 ===
[ምዕራፍ 6]
በእንተ፡ ጥሙቃን
1 ምንተ፡ እንከ፡ ንብል፡ ንግበርኑ፡ ኀጢአተ። ከመ፡ ይፈድፍድ፡ ጸጋሁ፡ ለእግዚአብሔር፡ ሐሰ።
2 አኮኑ፡ ወዳእነ፡ ሞትነ፡ እምኀጢአትነ። እፎ፡ እንከ፡ ንክል፡ ሐይወ፡ ባቲ።
3 ወዘንተ፡ ባሕቱ፡ አእምሩ፡ ኵልክሙ። ከመ፡ እለ፡ ተጠመቅነ፡ በእግዚእነ፡ ኢየሱስ፡ ክርስቶስ፡ ውስተ፡ ሞቱ፡ ተጠመቅነ።
4 ወተቀበርነ፡ ምስሌሁ፡ ውስተ፡ ጥምቀት፡ በሞቱ። ከመ፡ በከመ፡ ውእቱ፡ ክርስቶስ፡ ተንሥአ፡ እምዉታን፡ በስብሐተ፡ አቡሁ። ከማሁ፡ ንሕነኒ፡ ናንሶሱ፡ ውስተ፡ ሐዳስ፡ ሕይወት።
5 ወእመሰኬ፡ ተመሰልናሁ፡ በሞቱ፡ ንትሜሰሎ፡ በሕይወቱሂ።
6 ወዘንተ፡ ባሕቱ፡ አእምሩ፡ ከመ፡ ብሉይ፡ ብእሲነ፡ ውእቱ፡ ዘተሰቅለ፡ ምስሌሁ። ከመ፡ ይስዐሮ፡ ለነፍስተ፡ ኀጢአት። ወኢይገብእ፡ ዳግመ፡ ይትቀነይ፡ ለኀጢአት።
7 እስመ፡ ዘሞተሰ፡ ድኅነ፡ እምገቢረ፡ ኀጢአት።
በእንተ፡ እለ፡ ይትሜሰልዎ፡ ለክርስቶስ
8 ወእምከመሰ፡ ሞትነ፡ ምስሌሁ፡ ለክርስቶስ፡ ንትአመን፡ ከመሂ፡ ነሐዩ፡ ምስሌሁ።
9 ተአምሩ፡ ከመ፡ ተንሥአ፡ ክርስቶስ፡ እምዉታን። ወኢይመውት፡ እንከ፡ ዳግመ፡ ወኢይረክቦ፡ እንከ፡ ሞት።
10 ወዘኒ፡ ሞተ፡ ምዕረ፡ ሞተ፡ ወበሞቱ፡ ሰዐራ፡ ለኀጢአት። ወዘኒ፡ ሐይወ፡ ለእግዚአብሔር፡ ሐይወ።
11 ወከማሁ፡ አንትሙኒ፡ ረስዩ፡ ርእሰክሙ፡ ምዉታነ፡ ለኀጢአት። ወሕያዋነ፡ ኩኑ፡ ለፈቃደ፡ እግዚአብሔር፡ በእንተ፡ እግዚእነ፡ ኢየሱስ፡ ክርስቶስ።
12 ወኢታንግሥዋ፡ ለኀጢአት፡ ላዕለ፡ ዝንቱ፡ ሥጋክሙ፡ ወነፍስትክሙ፡ መዋቲ። ወኢትበልዎ፡ ኦሆ፡ ለፍትወቱ።
13 ወኢትረስይዎ፡ ለነፍስትክሙ፡ ንዋየ፡ ሐቅል፡ ለዐመፃ፡ ወለኀጢአት። አላ፡ ረስዩ፡ ርእሰክሙ፡ ለእግዚአብሔር፡ ከመ፡ ዘተንሥአ፡ እምዉታን። ወለነፍስትክሙ፡ ለእግዚአብሔር፡ ንዋየ፡ ሐቅል፡ ለጽድቅ።
14 ወኀጢአትሰ፡ ኢትኴንነክሙ፡ እንከ፡ እስመ፡ ወፃእክሙ፡ እምገቢረ፡ ሕገገ፡ ኦሪት። ወገባእክሙ፡ ውስተ፡ ጸጋ፡ እግዚአብሔር።
በእንተ፡ ምሥጢረ፡ ተአዝዞ
15 ምንተ፡ እንከ፡ ንብል፡ ንግበርኑ፡ ኀጢአተ። እስመ፡ ወፃእነ፡ እምገቢረ፡ ሕገገ፡ ኦሪት። ወገባእነ፡ ውስተ፡ ጸጋ፡ እግዚአብሔር፡ ሐሰ።
16 ወኢተአምሩኑ፡ ከመ፡ ለዘተአዘዝክሙ። ወለዘሂ፡ ኦሆ፡ ትቤሉ፡ አግብርቲሁ፡ አንትሙ። ወውስተ፡ ዘኀበርክሙ፡ ሎቱ፡ አቅነይክሙ፡ ርእሰክሙ። እመሂ፡ ለኀጢአት፡ ኦሆ፡ ትብልዋ። ወኀበርክሙ፡ ተአብሱ፡ አግብርቲሁ፡ አንትሙ፡ ትከውኑ፡ ለሞት። ወእመሂ፡ ለጽድቅ፡ ኦሆ፡ ትብልዋ። ወኀበርክሙ፡ ውስተ፡ ሠናይ፡ አግብርተ፡ እግዚአብሔር፡ አንትሙ።
17 እኩት፡ እግዚአብሔር፡ እንዘ፡ አግብርተ፡ ኀጢአት፡ አንትሙ። ተአዘዝክሙ፡ በኵሉ፡ ልብክሙ፡ ለዘተውህበ፡ ለክሙ፡ አርአያሁ፡ ለዘትትሜሀሩ።
18 ወይእዜሰ፡ ተግዕዝክሙ፡ እምኀጢአት፡ ወተቀነይክሙ፡ ለጽድቅ።
19 ሕገ፡ ሰብእ፡ እብለክሙ፡ እስመ፡ ድኩም፡ ቱስሕተ፡ ነፍስትክሙ። ዑቁ፡ በከመ፡ ቀዲሙ፡ አቅነይክሙ፡ ርእሰክሙ፡ ለኀጢአት፡ ወለርኩስ፡ ወለጣዖት። ከማሁ፡ ይእዜኒ፡ አቅንዩ፡ ነፍስተክሙ፡ ለጽድቅ፡ ወለቅድሳት።
20 እስመ፡ አመ፡ ተቀነይክሙ፡ ለኀጢአት፡ ግዑዛነ፡ ኮንክሙ፡ እምጽድቅ።
21 ወበውእቱ፡ ፍሬክሙ፡ ዘአሜሁ፡ ናሁ፡ ይእዜ፡ ትትኀፈሩ፡ ቦቱ። እስመ፡ ድኅሬሁ፡ ሎቱ፡ ሞት።
22 ወይእዜሰ፡ ተግዕዝክሙ፡ እምኀጢአት፡ ወአቅነይክሙ፡ ርእሰክሙ፡ ለጽድቅ። ወፈረይክሙ፡ ለቅድሳት፡ ወማኅለቅቱሰ፡ ሕይወት፡ ዘለዓለም።
23 እስመ፡ ተግባራሰ፡ ለኀጢአት፡ ወረባኀ፡ ዚኣሃ፡ ሞት። ወለጸጋ፡ እግዚአብሔርሰ፡ ሕይወት፡ ዘለዓለም፡ በእግዚእነ፡ ኢየሱስ፡ ክርስቶስ።
=== chapter 7 ===
[ምዕራፍ 7]
በእንተ፡ ኵነኔ፡ ኦሪት
1 ኢተአምሩኑ፡ አኀዊነ፡ ሕገ፡ ንነግረክሙ፡ ትለብዉ። እስመ፡ ሕገ፡ ኦሪት፡ ይቀንዮ፡ ለሰብእ፡ አምጣነ፡ ሕያው፡ ውእቱ።
2 ከመ፡ ብእሲት፡ እምከመ፡ ባቲ፡ ምት። አምጣነ፡ ሕያው፡ ሀሎ፡ ብእሲሃ፡ እስርት፡ ይእቲ፡ በሕግ። ወእምከመሰ፡ ሞተ፡ ምታ፡ ተስዕረት፡ እምሕገ፡ ብእሲሃ።
3 ወእመሰ፡ እንዘ፡ ሕያው፡ ብእሲሃ፡ ቀርበት፡ ካልአ፡ ብእሴ፡ ዝሙተ፡ ይከውና። ወለእመሰ፡ ሞተ፡ ምታ፡ ተስዕረት፡ እምሕግ። ወኢትከውን፡ ዘማዊተ፡ ለእመ፡ ኮነት፡ ለካልእ፡ ብእሲ።
4 ወይእዜኒ፡ አኀዊነ፡ ሞትክሙ፡ እምኦሪት፡ በእንተ፡ ሥጋሁ፡ ለክርስቶስ። ከመ፡ ትኩኑ፡ ለዳግም፡ ዘተንሥአ፡ እምዉታን። ከመ፡ ትፍረዩ፡ ለእግዚአብሔር፡ ፍሬ፡ ጽድቅ።
5 ወአመሰ፡ በሕገ፡ ሰብእ፡ ንገብር። ጸንዐ፡ ላዕሌነ፡ መቅሠፍት፡ በስኢነ፡ ሕገገ፡ ኦሪት፡ ወፈረይነ፡ ለሞት።
6 ወይእዜሰ፡ ተስዕርነ፡ እምኦሪት፡ ወኀደግነ፡ ዘቀዲሙ፡ ትምህርተነ። ከመ፡ ንትቀነይ፡ በሕገ፡ መንፈስ፡ ወአኮ፡ በብሉይ፡ መጽሐፍ።
በእንተ፡ ኀዲጎተ፡ ኦሪት
7 ምንተ፡ እንከ፡ ንብል፡ ኀጢአትኑ፡ ይእቲ፡ ኦሪት፡ ሐሰ። ወባሕቱ፡ እምኢያእመርክዋ፡ ለኀጢአት፡ ሶበ፡ ኢመጽአት፡ ኦሪት። ወለፍትወትኒ፡ እምኢያእመርክዋ፡ ግሙራ፡ ሶበ፡ ኢትቤ፡ ኦሪት፡ ኢትፍቱ።
8 ወምክንያተ፡ ኮነታ፡ ይእቲ፡ ትእዛዝ፡ ለኀጢአት። ወአምጽአት፡ ላዕሌየ፡ ኵሎ፡ ፍትወታተ። ወቀዲሙሰ፡ ዘእንበለ፡ ትምጻእ፡ ኦሪት፡ ምዉት፡ ይእቲ፡ ኀጢአት።
9 ወአነሂ፡ ሐዮኩ፡ ትካት፡ ዘእንበለ፡ ትምጻእ፡ ኦሪት። ወሶበ፡ መጽአት፡ ትእዛዘ፡ ኦሪት፡ ሐይወት፡ ኀጢአት። ወአንሰ፡ ሞትኩ።
10 ወኮነተኒ፡ ቀታሊተ፡ እንታክቲ፡ ትእዛዘ፡ ሕይወት።
11 እስመ፡ ኮነታ፡ ምክንያተ፡ ይእቲ፡ ትእዛዝ፡ ለኀጢአት። ወበእንቲኣሃ፡ አስሐተተኒ፡ ወቀተለተኒ።
12 ወይእዜኒ፡ ኦሪትሰ፡ ቅድስት፡ ይእቲ። ወትእዛዛኒ፡ ጽድቅ፡ ውእቱ፡ ወሠናይ፡ ወበረከት።
13 እብል፡ እንከ፡ ቦኑ፡ ሊተ፡ ይከውነኒ፡ ቀታሌ፡ ዝኩ፡ ዘሠናየ፡ አሐስብ፡ ሐሰ። ዳእሙ፡ ኀጢአት፡ ሶበ፡ ተዐውቀት፡ ከመ፡ ይእቲ፡ ኀጢአት። አብዝኀት፡ ላዕሌየ፡ ሞተ። አኮኑ፡ ከመ፡ ይትዐወቅ፡ ኃጥእ፡ ወከመ፡ ትትአመር፡ ኀጢአት። እምውእቱ፡ ትእዛዝ፡ መጽአት፡ ኦሪት፡ ከመ፡ ትፍልጥ፡ ሠናየ፡ እምእኩይ።
በእንተ፡ ሕገ፡ መንፈስ
14 ነአምር፡ ከመ፡ ሕገ፡ ኦሪትሰ፡ ለመንፈስ። ወአንሰ፡ በሥጋ፡ ወደም፡ ሥዩጥ፡ ለኀጢአት።
15 እስመ፡ ዘኢየአምር፡ እገብር፡ ወዘእፈቅድ፡ ኢይገብር፡ ኪያሁ። ምንተኒ፡ ዳእሙ፡ ዝኰ፡ ዘእጸልእ፡ ኪያሁ፡ ክመ፡ እገብሮ።
16 ወእመሰኬ፡ ዘኢይፈቅድ፡ እገብር፡ ሰማዕቱ፡ አነ፡ ለዝኩ፡ ሕገገ፡ ኦሪት። ከመ፡ ለሠናይ፡ መጽአ።
17 ወይእዜሰኬ፡ ኢኮንኩ፡ አነ፡ ገባሪሁ፡ ለውእቱ። አላ፡ ኀጢአት፡ እንተ፡ ኀደረት፡ ላዕሌየ፡ ይእቲ፡ ትገብሮ።
18 ወአአምር፡ ከመ፡ ኢየኀድር፡ ላዕሌየ፡ ሠናይ፡ በእንተ፡ ሥጋየ። ፈቂደ፡ ገቢረ፡ ሠናይሰ፡ ሀሎ፡ ኀቤየ፡ ወምግባረ፡ ሠናይሰ፡ አልብየ።
19 ወአኮሰ፡ ዘእገብር፡ ኪያሁ፡ ዘእፈቅድ። ዳእሙ፡ ዝኰ፡ እኩየ፡ ዘእጸልእ፡ ኪያሁ፡ እገብር።
በእንተ፡ ድካመ፡ ዐቅመ፡ ሰብእ
20 ወእመሰኬ፡ ዘኢይፈቅድ፡ እገብር፡ ኢኮንኩኬ፡ አነ፡ ዘእገብሮ።
21 አላ፡ ኀጢአት፡ እንተ፡ ኀደረት፡ ላዕሌየ፡ ይእቲ፡ ትገብሮ። ወረከብክዎ፡ ለዝኩ፡ ሕግ፡ ዘፈቀደ፡ ሊተ፡ እግበር፡ ሠናየ። ውእቱ፡ አምጽአ፡ ላዕሌየ፡ እኩየ።
22 ሐዋዝ፡ ውእቱ፡ ሕገ፡ እግዚአብሔር፡ ዘውስተ፡ ልብየ።
23 ወባሕቱ፡ እረክብ፡ ካልአ፡ ሕገ፡ ኀጢአት፡ ውስተ፡ አባልየ። ወተጻብኡ፡ ወተቃተሉ፡ ምስለ፡ ዝኩ፡ ሕገ፡ እግዚአብሔር፡ ዘውስተ፡ ልብየ። ወኀየለ፡ ዝኩ፡ ሕገ፡ ኀጢአት፡ ዘውስተ፡ አባልየ። ወፄወወኒ፡ መንገሌሁ።
24 ትሑት፡ ብእሲ፡ አነ። መኑ፡ እምአድኀነኒ፡ እምዝንቱ፡ ነፍስትየ፡ መዋቲ።
25 እኩት፡ እግዚአብሔር፡ በእንተ፡ እግዚእነ፡ ኢየሱስ፡ ክርስቶስ። አንሰ፡ ሎቱ፡ እትቀነይ፡ በልብየኒ፡ ወበኅሊናየ፡ ለሕገ፡ እግዚአብሔር። ወበነፍስትየኒ፡ ለሕገ፡ ኀጢአት።
=== chapter 8 ===
[ምዕራፍ 8]
በእንተ፡ ስኢነ፡ ሕገገ፡ ኦሪት
1 ወአልቦሙ፡ እንከ፡ ኵነኔ፡ ለእለ፡ የኀድጉ፡ ምግባረ፡ ሥጋ፡ በኢየሱስ፡ ክርስቶስ።
2 እስመ፡ ሕገ፡ መንፈስ፡ ዘሕይወት፡ ዘተውህበ፡ በኢየሱስ፡ ክርስቶስ። ውእቱ፡ አግዐዘነ፡ እምሕገ፡ ኀጢአት፡ ወሞት።
3 ወሶበ፡ ተስእኖ፡ ለሕገ፡ ኦሪት፡ ላዕለ፡ ሞት፡ በእንተ፡ ድካመ፡ ሥጋ። ፈነወ፡ እግዚአብሔር፡ ወልዶ፡ በአምሳለ፡ ነፍስተ፡ ኀጢአት። ወኰነና፡ ለይእቲ፡ ኀጢአት፡ በነፍስቱ።
4 ከመ፡ ያጽድቀነ፡ ኪያነ፡ ወከመ፡ ይረሲ፡ ለነ። ከመ፡ ዘፈጸመ፡ ገቢሮቶ፡ ለሕገ፡ ኦሪት፡ ለእለ፡ በሕገ፡ መንፈስ፡ የሐውሩ። ወአኮ፡ ለእለ፡ በሕገ፡ ነፍስቶሙ፡ ይገብሩ።
5 እስመ፡ ኵሎሙ፡ እለ፡ ለግዕዘ፡ ነፍስቶሙ፡ ይገብሩ፡ ዘዝንቱ፡ ዓለም፡ ይኄልዩ። ወእለሰ፡ ዘመንፈስ፡ ይኄልዩ፡ ዘመንፈስ።
በእንተ፡ ኅሊና፡ ሥጋ፡ ወኅሊና፡ መንፈስ
6 ወኅሊናሁሰ፡ ለነፍስትነ፡ ሞተ፡ ያመጽእ፡ ላዕሌነ። ወኅሊናሁሰ፡ ለመንፈስ፡ ሰላመ፡ ወሕይወተ፡ ይሁበነ።
7 እስመ፡ ኅሊናሁ፡ ለነፍስትነ፡ ፀሩ፡ ለእግዚአብሔር፡ ውእቱ። እስመ፡ ኢይገርር፡ ለሕገ፡ እግዚአብሔር፡ ወኢሂ፡ ይክሎ።
8 እስመ፡ ኵሎሙ፡ እለ፡ ለግዕዘ፡ ነፍስቶሙ፡ ይገብሩ። ለእግዚአብሔር፡ አድልዎ፡ ኢይክሉ።
9 ወአንትሙሰ፡ አኮ፡ ለግዕዘ፡ ነፍስትክሙ፡ ዘትገብሩ፡ ዘእንበለ፡ ለሕገ፡ መንፈስ። እስመ፡ መንፈሰ፡ እግዚአብሔር፡ ኅዱር፡ ላዕሌክሙ። ወዘሰ፡ አልቦ፡ መንፈሰ፡ ክርስቶስ፡ ላዕሌሁ፡ ውእቱ፡ ዘኢኮነ፡ ዚኣሁ።
10 ወእመሰ፡ ክርስቶስ፡ ምስሌክሙ፡ ምዉተ፡ ረስዩ፡ ነፍስተክሙ፡ ለምግባረ፡ ኀጢአት። ወሕያወ፡ ረስዩ፡ መንፈሰክሙ፡ ለምግባረ፡ ጽድቅ።
11 እመሰ፡ መንፈሱ፡ ለዘአንሥኦ፡ ለኢየሱስ፡ እምዉታን። ኅዱር፡ ላዕሌክሙ፡ ውእቱ፡ ዘአንሥኦ፡ እምዉታን፡ ለኢየሱስ። ያሐይዋ፡ ለነፍስትክሙኒ፡ በውእቱ፡ መንፈሱ፡ ዘየኀድር፡ ላዕሌክሙ።
በእንተ፡ ዘኢይደሉ፡ አዝልፎ፡ ምግባረ፡ ሥጋ
12 ወይእዜኒ፡ አኀዊነ፡ ኢ፡ ርቱዕ፡ ንግበር፡ ለግዕዘ፡ ነፍስትነ፡ እንዘ፡ ሀሎነ፡ በነፍስትነ።
13 እስመ፡ ኵሎሙ፡ እለ፡ ለግዕዘ፡ ነፍስቶሙ፡ ይገብሩ፡ ምዉታን፡ በላዕሉ፡ እሙንቱ። ወእመሰ፡ በምግባረ፡ መንፈስ፡ ቀተልክምዎ፡ ለምግባረ፡ ነፍስትክሙ፡ ተሐይዉ፡ ለዓለም።
14 እስመ፡ ኵሎሙ፡ እለ፡ ይገብሩ፡ ዘመንፈሰ፡ እግዚአብሔር፡ ውሉደ፡ እግዚአብሔር፡ እሙንቱ።
15 ወዘአኮ፡ ካዕበ፡ ነሣእክሙ፡ መንፈሰ፡ ቅኔ፡ በዘትፈርሁ። አላ፡ ነሣእክሙ፡ መንፈሰ፡ ዘይሁበክሙ፡ ትርሲተ፡ ወልድ።
16 ወትጸርሑ፡ ሎቱ፡ ወትብልዎ፡ አባ፡ ወአቡየ። ውእቱ፡ መንፈስ፡ ቅዱስ፡ ሰማዕቱ፡ ለመንፈስነ፡ ከመ፡ ውሉደ፡ እግዚአብሔር፡ ንሕነ።
17 ወእምከመሰ፡ ውሉደ፡ እግዚአብሔር፡ ንሕነ፡ ወራስያኒሁ፡ ንሕነ። ወእምከመሂ፡ ወራስያነ፡ እግዚአብሔር፡ ንሕነ፡ መዋርስቲሁኬ፡ ለክርስቶስ፡ ንሕነ። ወእምከመሰ፡ ዐረይነ፡ ሕማመ፡ ንዔሪ፡ ክብረ፡ ምስሌሁ።
በእንተ፡ መንግሥተ፡ ሰማያት
18 ወባሕቱ፡ ኀልይዋ፡ ለዛቲኒ፡ ከመ፡ ኢኮነት፡ መጠነ፡ ሤጣ፡ ለእንታክቲ፡ ክብር። ወስብሐት፡ እንተ፡ ለዓለም፡ ሕማሙ፡ ለዝ፡ ዓለም።
19 እስመ፡ ተስፋሁ፡ ለዓለም፡ ምጽአቶ፡ ለወልደ፡ እግዚአብሔር፡ ይጸንሕ።
20 እስመ፡ ለከንቱ፡ ተቀንየ፡ ዓለም፡ በኢያእምሮ።
21 ወባሕቱ፡ ቦቱ፡ ተስፋ፡ ከመ፡ ይፃእ፡ እምዘቀነዮ። ወይግባእ፡ ውስተ፡ ስብሐተ፡ ግዕዛኖሙ፡ ለደቂቀ፡ እግዚአብሔር።
22 ነአምር፡ ከመ፡ ኵሉ፡ ዓለም፡ ሕሙም፡ ወትኩዝ፡ እስከ፡ ይእዜ።
23 ወአኮ፡ ዓለም፡ ባሕቲቱ፡ ዓዲ፡ ንሕነሂ፡ ንቴክዝ። እለ፡ ነሣእነ፡ ቀዳሚሁ፡ ለመንፈስ፡ ቅዱስ። እስመ፡ ንሴፎ፡ ትርሲተ፡ ውሉድ፡ ንርከብ፡ መድኀኒተ፡ ነፍስነ። እስመ፡ በአሚን፡ ድኅነ።
24 ወተሰፍዎሰ፡ ለዘያስተርኢ፡ ኢኮነ፡ ተስፋ። ወዘሰ፡ ይሬኢ፡ እፎ፡ ይሴፎ፡ ወይጸንሕ።
25 ወእምከመሰ፡ ንሴፎ፡ ዘኢያስተርኢ። ይትዐወቅ፡ ትዕግሥትነ፡ ከመ፡ ተሰፈውናሁ።
በእንተ፡ ረድኤት
26 ወቆምነ፡ በእንቲኣሁ፡ ወይረድአነ፡ ለነ፡ ድካመነ፡ በመንፈስ፡ ቅዱስ። ወምንትኑ፡ ውእቱ፡ እንከ፡ ጸሎትነ፡ ለእመ፡ ኢነአምር፡ ተስፋነ። ወባሕቱ፡ መንፈስ፡ ለሊሁ፡ ይትዋቀሥ፡ ለነ፡ በእንተ፡ ሕማምነ፡ ወምንዳቤነ።
27 ወውእቱ፡ የሐትቶ፡ ለልብነ፡ ወየአምር፡ ዘይኄሊ፡ መንፈስ። ወይተዋቀሥ፡ በኀበ፡ እግዚአብሔር፡ በእንተ፡ ቅዱሳን።
28 ነአምር፡ ከመ፡ ይረድኦሙ፡ እግዚአብሔር። ለእለ፡ ያፈቅርዎ፡ ውስተ፡ ኵሉ፡ ምግባረ፡ ሠናይ።
29 እስመ፡ ለእለ፡ ቀደመ፡ ወኀረየ፡ ወአእመሮሙ፡ ኪያሆሙ። ሠርዐ፡ ይኩኑ፡ በአምሳለ፡ ወልዱ። ከመ፡ ይኩን፡ ውእቱ፡ በኵረ፡ በላዕለ፡ ብዙኃን፡ አኀው።
30 ወለእለሰ፡ ሠርዐ፡ ኪያሆሙ፡ ጸውዐ። ወለእለሰ፡ ጸውዐ፡ ኪያሆሙ፡ አጽደቀ። ወለእለ፡ አጽደቀ፡ ኪያሆሙ፡ አክበረ።
31 ምንተ፡ እንከ፡ ንብል፡ እንበይነ፡ ዝ። ለእመ፡ እግዚአብሔር፡ ምስሌነ፡ መኑ፡ ይክለነ።
32 ወልዶ፡ ጥቀ፡ ኢምሕከ፡ እምኔነ፡ አላ፡ መጠዎ፡ በእንተ፡ ኵልነ። ወምንትኑ፡ ውእቱ፡ እንከ፡ ዘኢይጼግወነ፡ ኵሎ።
33 ወመኑ፡ ውእቱ፡ እንከ፡ ዘይትዋቀሦሙ፡ ለኅሩያነ፡ እግዚአብሔር።
34 ለእመ፡ ለሊሁ፡ ያጸድቅ፡ መኑ፡ ዘይኴንን። ክርስቶስ፡ ኢየሱስ፡ ሞተ፡ ወተንሥአ፡ እምዉታን። ወሀሎ፡ ይነብር፡ በየማነ፡ እግዚአብሔር፡ ወይትዋቀሥ፡ በእንቲኣነ።
በእንተ፡ ሰማዕታት
35 መኑ፡ ያኀድገነ፡ ፍቅሮ፡ ለክርስቶስ፡ ሕማምኑ፡ ምንዳቤኑ፡ ተሰዶኑ። ረኃብኑ፡ ዕርቃንኑ፡ መጥባሕትኑ፡ ጻዕርኑ።
36 በከመ፡ ይቤ፡ መጽሐፍ፡ በእንቲኣከ፡ ይቀትሉነ፡ ኵሎ፡ አሚረ። ወኮነ፡ ከመ፡ አባግዕ፡ ዘይጠብሑ።
37 ወባሕቱ፡ በእንተ፡ ዝ፡ ንመውኦ፡ ለኵሉ፡ እስመ፡ ውእቱ፡ አፍቀረነ።
38 እትአመን፡ ባሕቱ፡ ከመ፡ አልቦ፡ ዘያኀድገነ፡ ፍቅሮ፡ ለእግዚአብሔር፡ በኢየሱስ፡ ክርስቶስ፡ እግዚእነ። ኢ፡ ሞት፡ ወኢ፡ ሕይወት፡ ኢ፡ መላእክት፡ ወኢ፡ ቀደምት። ኢ፡ ዘሀሎ፡ ወኢ፡ ዘይመጽእ።
39 ኢ፡ ዘኀይል፡ ወኢ፡ ዘልዑል፡ ወኢ፡ ዘጸድፍ። ወኢ፡ ዳግም፡ ልደት፡ ዘመትሕት። አልቦ፡ ዘይክል፡ አኅድጎተነ፡ ፍቅረ፡ ክርስቶስ።
=== chapter 9 ===
[ምዕራፍ 9]
በእንተ፡ ልደቱ፡ ለክርስቶስ፡ እምአበው
1 አማነ፡ እብለክሙ፡ በእንተ፡ ክርስቶስ፡ ወኢይሔሱ። ወስምዕየ፡ መንፈስ፡ ቅዱስ፡ ዘውስተ፡ ልብየ።
2 ከመ፡ እቴክዝ፡ ወአሐምም፡ ልብየ፡ ፈድፋደ፡ በኵሉ፡ ጊዜ።
3 ወእጼሊ፡ ከመ፡ አነ፡ እትዐለል፡ እምክርስቶስ። በእንተ፡ አኀውየ፡ ወአዝማድየ፡ እለ፡ በሥጋ።
4 እሉ፡ እሙንቱ፡ እስራኤል፡ እስራኤላውያን። እለ፡ ሎሙ፡ ትርሲተ፡ ወልድ። ወሎሙ፡ ክብር፡ ወሎሙ፡ ሥርዐት። ወሎሙ፡ ሕግ፡ ወሎሙ፡ አሰፈወ።
5 ወእሙንቱ፡ አበዊነ፡ ወእምላዕሌሆሙ፡ ተወልደ፡ ክርስቶስ፡ በሥጋ፡ ሰብእ። ዘውእቱ፡ አምላክ፡ ቡሩክ፡ ለዓለመ፡ ዓለም፡ አሜን።
6 አኮኑ፡ ኢተሐሰወ፡ ቃለ፡ እግዚአብሔር። ወአኮ፡ ኵሎሙ፡ እስራኤል፡ እስራኤላውያን።
በእንተ፡ ተሰምዮ፡ ዘርዐ፡ አብርሃም
7 ወአኮ፡ ኵሎሙ፡ ዘርዐ፡ አብርሃም፡ ዘኮንዎ፡ ውሉደ፡ እምይስሐቅ። ዳእሙ፡ ይሰመይ፡ ለከ፡ ዘርዕ፡ ይቤሎ።
8 እስመ፡ አኮ፡ ውሉደ፡ ሥጋ፡ እሙንቱ። አላ፡ ውሉደ፡ እግዚአብሔር፡ እለ፡ ይከውንዎ፡ ዘርዐ። እለ፡ አሰፈወ፡ ይኩንዎ፡ ውሉደ።
9 እስመ፡ አሰፈዎ፡ ወይቤሎ። አመ፡ ከመ፡ ዮም፡ እገብእ፡ ኀቤከ፡ ወትረክብ፡ ሳራ፡ ወልደ።
10 ወአኮ፡ ባሕቲታ፡ ዓዲ፡ ርብቃኒ፡ ፀንሰት፡ መንታ፡ ለይስሐቅ፡ አቡነ።
11 ወዘእንበለ፡ ይትወለዱ፡ ወይግበሩ፡ ሠናየ፡ ወእኩየ። ከመ፡ ይትዐወቅ፡ በምንት፡ እንከ፡ ኀርዮቱ፡ ለእግዚአብሔር፡ እምውስቴቶሙ።
12 ከመ፡ ያእምሩ፡ ከመ፡ ኢኮነ፡ በምግባሩ፡ ለሰብእ። ዘእንበለ፡ ዳእሙ፡ ዘውእቱ፡ ጸውዐ፡ ወይቤላ፡ ለርብቃ፡ ዘየዐቢ፡ ይትቀነይ፡ ለዘይንእስ።
13 እስመ፡ ከማሁ፡ ጽሑፍ፡ ያዕቆብሃ፡ አፍቀርኩ፡ ወኤሳውሃ፡ ጸላእኩ።
በእንተ፡ ኢ፡ መፍትው፡ ሐቲተ፡ ፍትሑ፡ ለእግዚአብሔር
14 ምንተ፡ እንከ፡ ንብል፡ ይዔምፅኑ፡ እግዚአብሔር፡ ሐሰ።
15 ወይቤሎ፡ እግዚአብሔር፡ ለሙሴ። ለዘሂ፡ መሐርክዎ፡ እምሕሮ፡ ወለዘሂ፡ ተሣሀልክዎ፡ እሣሀሎ።
16 ናሁኬ፡ ኢኮነ፡ ለዘበደረ፡ ወለዘሮጸ። ዘእንበለ፡ ዳእሙ፡ ለዘእግዚአብሔር፡ ምሕሮ።
17 ወይቤሎ፡ እግዚአብሔር፡ በመጽሐፍ፡ ለፈርዖን። በእንተ፡ ዝ፡ እንሣእኩከ፡ ከመ፡ አርኢ፡ ኀይልየ፡ በላዕሌከ። ወይሰማዕ፡ ስምየ፡ በኵሉ፡ ምድር።
18 ናሁኬ፡ ለዘፈቀደ፡ ይምሕር፡ ወለዘፈቀደ፡ ያዐጽብ።
19 ምንተ፡ ትብል፡ ተሐይሶኑ፡ ለእግዚአብሔር። ቦኑ፡ ዘይትቃወማ፡ ለምክሩ።
20 ዕጓለ፡ እመሕያው፡ ምንትኑ፡ አንተ፡ ዘትትዋሥኦ፡ ለእግዚአብሔር። ይክልኑ፡ ብሂሎቶ፡ ግብር፡ ለገባሪሁ። ኢትግበረኒ፡ ከመ፡ ዝ።
21 ኢኮነኑ፡ ብዉሐ፡ ለብሓዊ፡ ይግበር፡ እምአሐዱ፡ ጽቡር። ንዋየ፡ መንፈቆ፡ ለክብር፡ ወመንፈቆ፡ ለኀሳር።
22 ወእመኒ፡ ፈቀደ፡ እግዚአብሔር፡ ያርኢ፡ መቅሠፍተ፡ ኀይሉ። ያመጽእ፡ መላእክተ፡ መዓቱ፡ አርእዮ፡ ትዕግሥቶ፡ እለ፡ ድልዋን፡ ለአማስኖ።
23 ወከመ፡ ያርኢ፡ ካዕበ፡ ብዕለ፡ ስብሐቲሁ። ያመጽእ፡ መላእክተ፡ ምሕረቱ፡ እለ፡ ድልዋን፡ ለሣህል። ላዕለ፡ እለ፡ ጸውዐ፡ ወአቅደመ፡ አእምሮ።
በእንተ፡ ጽዉዓን
24 ወንሕነ፡ እሙንቱ፡ እለ፡ ጸውዐነ፡ ውስተ፡ ክብሩ። ወአስተጋብአነ፡ አኮ፡ እምአይሁድ፡ ባሕቲቶሙ፡ ዓዲ፡ እምአረሚኒ።
25 በከመ፡ ይቤ፡ ሆሴዕ፡ ነቢይ። እሬስዮ፡ ሕዝብየ፡ ለዘኢኮነ፡ ሕዝብየ። ወእሬስያ፡ ፍቅርትየ፡ ለእንተ፡ ኢኮነት፡ ፍቅርትየ።
26 ወይከውኑ፡ ውሉደ፡ እግዚአብሔር፡ ሕያው፡ በብሔር። ኀበ፡ ይቤልዎሙ፡ ኢኮንክሙ፡ ሕዝበ፡ እግዚአብሔር።
27 ኢሳይያስኒ፡ ከልሐ፡ ወይቤ፡ በእንተ፡ እስራኤል። ለእመ፡ ኮነ፡ ኊልቆሙ፡ ለደቂቀ፡ እስራኤል፡ ከመ፡ ኆጻ፡ ባሕር፡ እለ፡ ተርፉ፡ ይድኅኑ።
28 እስመ፡ ኅሉቀ፡ ወምቱረ፡ ነገረ፡ ይነግር፡ እግዚአብሔር። ውስተ፡ ዓለም፡ ዘሀለዎ፡ ይግበር።
29 ወበከመ፡ አቅደመ፡ ኢሳይያስ፡ ብሂለ። ሶበ፡ አኮ፡ እግዚአብሔር፡ ጸባኦት፡ ዘአትረፈ፡ ለነ፡ ዘርዐ። ከመ፡ ሰዶም፡ እምኮነ፡ ወከመ፡ ገሞራ፡ እመሰልነ።
በእንተ፡ ጽድቀ፡ ሃይማኖት
30 ምንተ፡ እንከ፡ ንብል፡ አረሚ፡ ጥቀ። እለ፡ ኢኀሠሥዋ፡ ለጽድቅ፡ ረከብዋ፡ ለጽድቅ፡ ወጸድቁ፡ በአሚን።
31 ወእስራኤልሰ፡ እንዘ፡ ይዴግንዋ፡ ለኦሪቶሙ፡ ስእኑ፡ ጸዲቀ። እስመ፡ ኢፈጸሙ፡ ገቢረ፡ ሕገገ፡ ኦሪቶሙ።
32 በእንተ፡ ምንት፡ እስመ፡ ኢኮነ፡ ጽድቆሙ፡ በአሚን። ዘእንበለ፡ ዳእሙ፡ በገቢረ፡ ሕገገ፡ ኦሪት።
33 ወአዕቀፈቶሙ፡ እብነ፡ ዕቅፍት፡ እስመ፡ ከማሁ፡ ይቤ፡ መጽሐፍ። ናሁ፡ ኣነብር፡ ውስተ፡ ጽዮን፡ እብነ፡ ዕቅፍት፡ ወእብነ፡ ጌጋይ። ወዘአምነ፡ ባቲ፡ ኢይትኀፈር፡ ለዓለም።
=== chapter 10 ===
[ምዕራፍ 10]
በእንተ፡ ፈቃዱ፡ ለጳውሎስ
1 አኀውየ፡ ሊተሰኬ፡ ፈቃደ፡ ልብየኒ፡ ወጸሎትየኒ፡ ከመ፡ ይሕየዉ፡ እስራኤል።
2 እስመ፡ አነ፡ ማሕተቶሙ፡ ከመ፡ ይቅንኡ፡ ለእግዚአብሔር። ወአኮሰ፡ በአእምሮቶሙ።
3 እስመ፡ ኢየአምርዋ፡ ለጽድቀ፡ እግዚአብሔር። ወፈቀዱ፡ በጽድቀ፡ ርእሶሙ፡ ይቁሙ። ወለጽድቀ፡ እግዚአብሔርሰ፡ ስእኑ፡ ገንየ።
4 ወማኅለቅቱሰ፡ ለጽድቀ፡ ኦሪት፡ አሚን፡ በክርስቶስ፡ ውእቱ፡ ለኵሎሙ፡ እለ፡ የአምኑ፡ ቦቱ።
በእንተ፡ ዘይቤ፡ ሙሴ
5 ወሙሴሂ፡ ይቤ፡ ኵሉ፡ ዘፈጸመ፡ ገቢረ፡ ሕገገ፡ ኦሪት፡ ይጸድቅ፡ ቦቱ።
6 ወጽድቀ፡ አሚንሰ፡ ከመ፡ ዝ፡ ይብል። ኢትበል፡ በልብከ፡ መኑ፡ የዐርግ፡ ሰማየ። ክርስቶስ፡ ውእቱ፡ ዘወረደ፡ እምሰማይ።
7 ወመኑ፡ ይወርድ፡ ውስተ፡ ቀላይ። ክርስቶስ፡ ውእቱ፡ ዘተንሥአ፡ እምዉታን።
8 አኮኑ፡ ከማሁ፡ ይቤ፡ መጽሐፍ፡ ቅሩብ፡ ለከ፡ ቃል፡ ውስተ፡ አፉከ፡ ወውስተ፡ ልብከ። ወዝ፡ ውእቱ፡ ቃል፡ ዘእሜህረክሙ።
9 እምከመ፡ ተአምን፡ በአፉከ፡ ከመ፡ ክርስቶስ፡ ውእቱ፡ እግዚእ። ወተአምን፡ በልብከ፡ ከመ፡ አንሥኦ፡ እግዚአብሔር፡ እምዉታን፡ ተሐዩ።
10 ወልብኒ፡ ዘየአምን፡ ቦቱ፡ ይጸድቅ። ወአፍኒ፡ ዘየአምን፡ ቦቱ፡ የሐዩ።
11 ወይቤ፡ መጽሐፍ፡ ኵሉ፡ ዘየአምን፡ ቦቱ፡ የሐዩ።
12 ወኢፈለጠ፡ ወኢሌለየ፡ አይሁዳዌ፡ ወአረማዌ። እስመ፡ ባዕል፡ እግዚአብሔር፡ ወየአክል፡ ለኵሉ፡ ዘጸውዖ።
13 እስመ፡ ኵሉ፡ ዘጸውዐ፡ ስመ፡ እግዚአብሔር፡ የሐዩ።
በእንተ፡ እለ፡ ይጼውዑ፡ ስመ፡ እግዚአብሔር
14 ወባሕቱ፡ እፎ፡ ይጼውዕዎ፡ እንዘ፡ ኢየአምኑ፡ ቦቱ። ወእፎ፡ የአምኑ፡ በዘኢሰምዑ።
15 ወእፎኑ፡ ይሰምዑ፡ ዘኢሰበኩ፡ ሎሙ። ወእፎኑ፡ ይሰብኩ፡ ሎሙ፡ ዘኢተፈነወ፡ ሐዋርያ፡ ኀቤሆሙ። በከመ፡ ይቤ፡ መጽሐፍ፡ ሠናይ፡ እገሪሆሙ፡ ለእለ፡ ይዜንዉ፡ ሠናየ፡ ዜና።
16 ወባሕቱ፡ አኮ፡ ኵሎሙ፡ ዘሰምዑ፡ ትምህርተ፡ ወንጌል። አኮኑ፡ ኢሳይያስኒ፡ ይቤ፡ እግዚኦ፡ መኑ፡ የአምነነ፡ ቃለነ፡ ወስምዐነ። ወለመኑ፡ ተከሥተ፡ መዝራዕቱ፡ ለእግዚአብሔር።
17 ወአሚንሰ፡ እምሰሚዕ። ወእምሰሚዕ፡ አሚን፡ በቃለ፡ እግዚአብሔር፡ ክርስቶስ።
18 ወባሕቱ፡ እብል፡ ቦኑ፡ ኢሰምዑ፡ እስራኤል። አኮኑ፡ ይቤ፡ መጽሐፍ፡ ውስተ፡ ኵሉ፡ ምድር፡ ወፅአ፡ ነገሮሙ። ወእስከ፡ አጽናፈ፡ ዓለም፡ በጽሐ፡ ነቢቦሙ።
19 እስራኤልኑ፡ ዳእሙ፡ ኢሰምዑ። አኮኑ፡ ሙሴሂ፡ አቅደመ፡ ብሂሎቶሙ። አነ፡ አቀንኦሙ፡ ለሕዝብ፡ በዘኢይሌብዉ። ወአምዕዐክሙ፡ በዘኢኮነ፡ ሕዝብየ።
20 ኢሳይያስኒ፡ ተኀቢሎ፡ ይቤ፡ ረከቡኒ፡ እለ፡ ኢኀሠሡኒ። ወአስተርአይክዎሙ፡ ለእለ፡ ኢተስእሉኒ።
21 ወለእስራኤልሰ፡ ይቤሎሙ፡ ኵሎ፡ ዕለተ። አነሥእ፡ እደውየ፡ ኀበ፡ ሕዝብ፡ ዐላውየን፡ ወከሓድያን።
=== chapter 11 ===
[ምዕራፍ 11]
በእንተ፡ ሕዝበ፡ እስራኤል
1 እብል፡ እንከ፡ ገደፎሙኑ፡ እግዚአብሔር፡ ለሕዝቡ፡ ሐሰ። አኮኑ፡ አነ፡ እስራኤላዊ። አነ፡ ዘርዐ፡ አብርሃም፡ እምሕዝበ፡ ብንያም።
2 ኢገደፈ፡ እግዚአብሔር፡ ሕዝቦ፡ ዘአቅደመ፡ አእምሮ። ኢተአምሩኑ፡ ዘይቤ፡ ኤልያስ፡ አመ፡ ሰከዮሙ፡ ለእስራኤል፡ ኀበ፡ እግዚአብሔር፡ እንዘ፡ ይብል።
3 እግዚኦ፡ ነቢያቲከኒ፡ ቀተሉ፡ ወምሥዋዒከኒ፡ ነሠቱ። ወአነ፡ ባሕቲትየ፡ ተረፍኩ፡ ወየኀሥሥዋ፡ ለነፍስየ።
4 ወምንተ፡ ይቤሎ፡ ዘአስተርአዮ። አትረፍኩ፡ ሊተ፡ ሰብዓ፡ ምእተ፡ ብእሴ፡ እለ፡ ኢያምለክዎ፡ ለበዓል።
5 ከማሁኬ፡ ዮምኒ፡ በዝ፡ መዋዕል፡ እምእለ፡ ኮኑ፡ ኅሬ፡ በጸጋ። እለ፡ ተርፉ፡ አምኑ፡ በእግዚአብሔር።
በእንተ፡ ኅሬ
6 ወእመሰኬ፡ በጸጋ፡ ጸድቁ፡ ኢኮነኬ፡ በጽድቀ፡ ምግባሮሙ። ወእመ፡ አኮሰ፡ ጸጋ፡ ኢይከውን፡ ጸጋ።
7 ለእመ፡ በምግባር፡ ይጸድቁ፡ ምንተ፡ እንከ፡ የኀሥሥ፡ እስራኤል። ዘዘንተ፡ ኢያድምዐ፡ ወኅሬሰ፡ አድምዐ፡ ወእለሰ፡ ተርፉ፡ ጾሩ።
8 በከመ፡ ይቤ፡ መጽሐፍ፡ ወሀቦሙ፡ እግዚአብሔር፡ መንፈሰ፡ ድንዙዘ። ከመ፡ ኢይነጽሩ፡ በአዕይንቲሆሙ፡ ወኢይርአዩ። ወኢይስምዑ፡ በእዘኒሆሙ፡ እስከ፡ ዮም።
9 ዳዊትኒ፡ ይቤ፡ ለትኩኖሙ፡ ማእዶሙ፡ መሥገርተ። በቅድሜሆሙ፡ ለፍዳሆሙ፡ ወለዕቅፍቶሙ።
10 ይጽለማ፡ አዕይንቲሆሙ፡ ወኢይርአዩ። ወይትቀጻዕ፡ ዘባናቲሆሙ፡ በኵሉ፡ ጊዜ።
11 እብል፡ እንከ፡ ተዐቅፉኑ፡ ከመ፡ ይደቁ፡ ሐሰ። አኮኑ፡ በእንተ፡ ተዐቅፎቶሙ፡ ኮነ፡ ሕይወት፡ ላዕለ፡ አሕዛብ፡ ከመ፡ ይቅንኡ።
12 ሶበ፡ ስሒተ፡ ዚኣሆሙ፡ ሣህለ፡ ኮነ፡ ለአሕዛብ። ወጌጋየ፡ ዚኣሆሙ፡ ብዕለ፡ ኮነ፡ ለዓለም። እፎ፡ እንጋ፡ እምኮነ፡ ፍጻሜሆሙ።
በእንተ፡ ቅንአተ፡ እስራኤል፡ ወተስፋ፡ ለአሕዛብ
13 ለክሙ፡ እብል፡ ለአሕዛብ። አምጣነሰ፡ ሐዋርያሆሙ፡ አነ፡ ለአሕዛብ፡ እሴብሓ፡ ለመልእክትየ።
14 እመ፡ ቦ፡ ከመ፡ አቅንኦሙ፡ በዝንቱ፡ ለአዝማድየ፡ ወለሕዝብየ። ወአድኅን፡ እለ፡ ኮኑ፡ እምኔሆሙ።
15 እስመ፡ ፀአተ፡ ዚኣሆሙ፡ ሣህለ፡ ኮነ፡ ለዓለም። እፎ፡ ፈድፋደ፡ እምኮነ፡ ተመይጦቶሙ፡ ሕይወት፡ እምዉታን።
16 ወለእመ፡ ኮነት፡ ቀዳሚሃ፡ ቅድስተ፡ ወብሑእኒ፡ ቅዱስ፡ ከማሁ። ወለእመ፡ ኮነ፡ ሥርዋ፡ ቅዱሰ፡ ከማሁ፡ አዕጹቂሃኒ፡ ቅዱስ።
17 ወለእመ፡ ተሰብሩ፡ እምአዕጹቂሃ፡ ኪያከ፡ አውልዐ፡ ገዳም፡ ተከሉ፡ በመካኖሙ። ወኀበርከ፡ ሥርወ፡ ምስሌሆሙ፡ ወኮንከ፡ ዘይተ፡ ከማሆሙ።
በእንተ፡ ዘኢይደሉ፡ ተዝኅሮ
18 ወኢትዘኀር፡ ላዕለ፡ አዕጹቅ። ወእመሰ፡ ተዘኀርከ፡ አኮ፡ አንተ፡ ዘትጸውሮ፡ ለሥርው። አላ፡ ሥርው፡ ይጸውረከ፡ ለከ።
19 ትብልኑ፡ ተሰብሩ፡ እምአዕጹቂሃ፡ ወአነ፡ ኮንኩ፡ ዐጽቀ፡ ዘይት፡ ህየንቴሆሙ።
20 ርቱዕኑ፡ ይሰበሩ፡ እስመ፡ ኢአምኑ። ወአንተሰ፡ ቆምከ፡ እስመ፡ አመንከ፡ ፍሩሀከ። ንበር፡ እንከ፡ ወኢታዕቢ፡ ርእሰከ።
21 ሶበ፡ ለእልክቱ፡ እለ፡ ፍጥረቶሙ፡ ዘይት፡ እሙንቱ። ኢመሕኮሙ፡ እግዚአብሔር፡ ኪያከኑ፡ ይምሕከከ።
22 ርኢ፡ እንከ፡ ምሕረቶሂ፡ ወአጥብዖቶሂ፡ ለእግዚአብሔር። ለእለሰ፡ ወድቁ፡ አውቀዮሙ፡ ወለከሰ፡ መሐረከ። ለእመ፡ ነበርከ፡ በዘመሐረከ፡ ወእመ፡ አኮሰ፡ ኪያከኒ፡ ያወቅየከ።
23 ወሎሙኒ፡ ይተክሎሙ፡ ለእመ፡ አምኑ፡ ይክል፡ እግዚአብሔር፡ ተኪሎቶሙ፡ ዳግመ።
24 ኪያከ፡ ጥቀ፡ አውልዐ፡ ገዳም፡ ገዘመከ፡ እምፍጥረትከ። ወተከለከ፡ ውስተ፡ ዘኢኮነ፡ ፍጥረትከ። ወተከለከ፡ ውስተ፡ ሠናይ፡ ዘይት። እፎ፡ እንከ፡ ፈድፋደ፡ ሎሙ፡ ይክል፡ ተኪሎቶሙ፡ ውስተ፡ ፍጥረቶሙ። እለ፡ ዘይት፡ እሙንቱ፡ ቀዳሚሆሙ።
በእንተ፡ እለ፡ ይብሉ፡ ጠቢባን፡ ንሕነ
25 ወእፈቅድ፡ ለክሙ፡ አኀዊነ፡ ታእምሩ፡ ዘንተ፡ ምክረ፡ ከመ፡ ኢትበሉ፡ ጠቢባን፡ ንሕነ። እስመ፡ ዑረተ፡ ልብ፡ ረከቦሙ፡ ለእስራኤል፡ መክፈልቶሙ። እስከ፡ አመ፡ ይበውኡ፡ ኵሉ፡ አሕዛብ።
26 ወእምዝ፡ የሐይዉ፡ ኵሉ፡ እስራኤል፡ በከመ፡ ይቤ፡ መጽሐፍ። እምጽዮን፡ ይወፅእ፡ መድኅን፡ ወያአትት፡ ኀጢአተ፡ እምያዕቆብ።
27 ወቦቱ፡ ይረክቡ፡ ተስፋሆሙ፡ አመ፡ አእተትኩ፡ ሎሙ፡ ኀጢአቶሙ።
28 እመንገለ፡ ወንጌልሰ፡ ፀርነ፡ እሙንቱ፡ በእንቲኣክሙ። ወእመንገለ፡ ኅሬስ፡ አኀዊነ፡ እሙንቱ፡ በእንተ፡ አበዊነ።
29 እስመ፡ አልቦ፡ ንስሓ፡ በጸጋ፡ እግዚአብሔር።
30 በከመ፡ አንትሙ፡ ቀዲሙ፡ ዐለውክምዎ፡ ለእግዚአብሔር። ወይእዜሰ፡ ተሣሀለክሙ፡ እስመ፡ እሙንቱሂ፡ ዐለውዎ፡ በከመ፡ አንትሙ፡ ዐለውክምዎ።
31 ከማሁ፡ እሙንቱሂ፡ ዐለውዎ፡ ይእዜ፡ ከመ፡ ሎሙኒ፡ ይሣሀሎሙ።
32 እስመ፡ እግዚአብሔር፡ ዘግሖ፡ ለኵሉ፡ ውስተ፡ ኀጢአት፡ ከመ፡ ይሣሀሎ፡ ለኵሉ።
33 ኦ፡ ዕመቂሁ፡ ለብዕለ፡ ጥበቢሁ፡ ወአእምሮቱ፡ ለእግዚአብሔር። ወአልቦ፡ አሠር፡ ለፍኖቱ፡ ወአልቦ፡ ዘየአምሮ፡ ለፍትሑ።
34 ወመኑ፡ የአምር፡ ኅሊናሁ፡ ለእግዚአብሔር፡ ወመኑ፡ ተማከሮ።
35 ወመኑ፡ ለቅሖ፡ ወተፈድዮ።
36 እስመ፡ ኵሉ፡ እምኔሁ፡ ወኵሉ፡ በእንቲኣሁ፡ ወኵሉ፡ ቦቱ። ወሎቱ፡ ስብሐት፡ ለዓለመ፡ ዓለም፡ አሜን።
=== chapter 12 ===
[ምዕራፍ 12]
ምክር፡ በእንተ፡ ከመ፡ ንረሲ፡ ነፍሰነ፡ መሥዋዕተ፡ ቅዱሰ
1 አስተበቊዐክሙ፡ አኀዊነ፡ በሣህሉ፡ ለእግዚአብሔር። ረስዩ፡ ነፍስተክሙ፡ መሥዋዕተ፡ ቅዱሰ፡ ለእግዚአብሔር። ወሕያወ፡ ወሥሙረ፡ ወኅሩየ፡ ይኩን፡ ቊርባንክሙ፡ ወቅኔክሙ፡ ነባቢ።
2 ኢታፍቅርዎ፡ ለዝ፡ ዓለም፡ ወሐድሱ፡ መንፈሰ፡ ልበክሙ። ወአመክሩ፡ ዘይፈቅድ፡ እግዚአብሔር፡ ዘሠናይ፡ ወዘጽድቅ፡ ወዘፍጹም።
3 ወእነግረክሙ፡ ለኵልክሙ፡ በጸጋ፡ እግዚአብሔር፡ ዘተውህበ፡ ሊተ። ከመ፡ ኢትትዐበዩ፡ ወኢተኀልዩ፡ ትዝኅርተ። አላ፡ ኀልዩ፡ በዘታነጽሑ፡ ርእሰክሙ፡ እምዝሙት። ወኵሉ፡ በከመ፡ ከፈሎ፡ እግዚአብሔር፡ በመስፈርተ፡ ሃይማኖቱ።
4 በከመ፡ በውስተ፡ አሐዱ፡ ነፍስትነ፡ ብዙኅ፡ መለያልይ፡ ብነ። ወዘዘ፡ ዚኣሁ፡ ምግባሩ።
5 ከማሁ፡ ኵልነ፡ እንዘ፡ ብዙኃን፡ አሐዱ፡ ሥጋ፡ ንሕነ፡ በክርስቶስ።
6 ወብክሙ፡ ጸጋ፡ እግዚአብሔር፡ ወዘዘ፡ ዚኣሁ፡ ጸጋሁ። ዘሂ፡ ይትኔበይ፡ በሐሳበ፡ ሃይማኖቱ።
7 ወዘሂ፡ ይትለአክ፡ በመልእክቱ። ወዘሂ፡ ይሜህር፡ በትምህርቱ።
8 ወዘሂ፡ ይትፌሣሕ፡ በፍሥሓሁ። ወዘሂ፡ ይሠየም፡ ከመ፡ ያሥልጥ፡ መልእክቶ። ወዘሂ፡ ይምሕር፡ በምሒሮቱ።
በእንተ፡ ምግባረ፡ ሠናይ፡ ዘዘ፡ ዚኣሁ
9 ተፋቀሩ፡ ዘእንበለ፡ ኑፋቄ። ተገሐሡ፡ እምእኩይ፡ ወትልዉ፡ ሠናየ።
10 ወአድልዉ፡ ለጽድቅ፡ አፍቅሩ፡ ቢጸክሙ፡ ወኩኑ፡ መሓርያነ።
11 ተካበሩ፡ በበይናቲክሙ፡ ወአክብሩ፡ መኳንንቲክሙ።
12 ወለጻሕቅ፡ ኢትትሐከዩ፡ ለመንፈስ፡ ተሐይዉ፡ ለእግዚአብሔር፡ ተቀነዩ። ለተስፋክሙ፡ ተፈሥሑ፡ ለሕማምክሙ፡ ተዐገሡ፡ ለጸሎትክሙ፡ ተፀመዱ።
13 ለግብረ፡ ቅዱሳን፡ ተሳተፉ። አፍቅሮ፡ ነግድ፡ አትልዉ።
14 ደኀርዎሙ፡ ለእለ፡ ይሰድዱክሙ፡ ደኀሩ፡ ወኢትርግሙ።
15 ምስለ፡ ዘይትፌሣሕ፡ ተፈሥሑ፡ ወምስለ፡ ዘይበኪ፡ ብክዩ።
በእንተ፡ ኅሊና፡ ሠናይ
16 ወከመ፡ ዝ፡ ኀልዩ፡ ምስለ፡ ቢጽክሙ። ወትዕቢትሰ፡ ኢተኀልዩ፡ ወከመ፡ ዘያቴሕት፡ ርእሶ፡ ተመሰሉ።
17 ወኢትበሉ፡ ጠቢባን፡ ንሕነ፡ ወኢትፍድይዎ፡ እኩየ፡ ለዘአሕሠመ፡ ለክሙ። ሠናየ፡ ተናገሩ፡ ምስለ፡ ቢጽክሙ።
18 ወእመሰ፡ ይትከሀለክሙ፡ ምስለ፡ ኵሉ፡ ሰብእ፡ ተአኀዉ።
19 ወኢትትበቀሉ፡ ለሊክሙ፡ አኀዊነ፡ አኅልፍዋ፡ ለመዓት።
20 እስመ፡ ከመ፡ ዝ፡ ይቤ። አነ፡ እትቤቀል፡ ወአነ፡ እትፈደይ፡ ይቤ፡ እግዚአብሔር።
21 ወእመኒ፡ ርኅበ፡ ጸላኢከ፡ አብልዖ፡ ወለእመኒ፡ ጸምአ፡ አስትዮ። ወዘንተ፡ ለእመ፡ ገበርከ፡ አፍሐመ፡ እሳት፡ ታስተጋብእ፡ ዲበ፡ ርእሱ። ወኢትማኦ፡ ለእኩይ፡ በእኩይ፡ አላ፡ ማኦ፡ ለእኩይ፡ በገቢረ፡ ሠናይ።
=== chapter 13 ===
[ምዕራፍ 13]
በእንተ፡ ተኰንኖ፡ ለመኳንንት
1 ለኵሉ፡ ነፍሰ፡ መኰንን፡ ተኰነኑ። እስመ፡ ኢይሠየም፡ መኰንን፡ ዘእንበለ፡ እምኀበ፡ እግዚአብሔር። ወእምከመሰ፡ እምኀበ፡ እግዚአብሔር፡ ውእቱ፡ ኵሉ፡ ብዉሕ፡ ሎቱ።
2 ወዘሰ፡ አበየ፡ ተኰንኖ፡ ለመኰንን፡ ትእዛዘ፡ እግዚአብሔር፡ አበየ። ወእለሰ፡ አበዩ፡ ተኰንኖ፡ ኵነኔ፡ ያመጽኡ፡ ለርእሶሙ።
3 ወመኳንንትሰ፡ ኢኮኑ፡ ግሩማነ፡ ለዘይገብር፡ ሠናየ፡ ዘእንበለ፡ ለዘእኩይ፡ ምግባሩ። ወእመሰ፡ ትፈቅድ፡ ኢትፍርሆሙ፡ ለመኳንንት፡ ግበር፡ ሠናየ። ወዓዲ፡ እሙንቱ፡ የአኵቱከ፡ እስመ፡ ላእካነ፡ እግዚአብሔር፡ እሙንቱ። ከመ፡ አንተ፡ ታሠኒ፡ ምግባሪከ።
4 ወእመሰ፡ ፈቀድከ፡ ኢትፍራህ፡ ግበር፡ ሠናየ። ወአኮ፡ ለከንቱ፡ ዘአኰነንዎሙ፡ መጥባሕተ። አላ፡ እስመ፡ ላእካኑ፡ እሙንቱ፡ ከመ፡ ይትበቀልዎ፡ ለገባሬ፡ እኪት።
5 ወይእዜኒ፡ በግብር፡ ተኰነኑ። ወአኮ፡ ዳእሙ፡ ለዘእኩይ፡ ምግባሩ፡ ዓዲ፡ ለዘሠናይኒ፡ ምግባሩ።
6 ወበእንተ፡ ዝ፡ ታገብኡ፡ ሎሙ፡ ጸባሕተ። እስመ፡ ላእካነ፡ እግዚአብሔር፡ እሙንቱ። ወለዝ፡ ግብር፡ ተሠይሙ።
7 ወለኵሉ፡ በዘይረትዕ፡ ግበሩ። ወለዘሂ፡ ጸባሕተ፡ ጸብሑ፡ ወለዘሂ፡ ዐሥራተ፡ ዐሥሩ፡ ወለዘሂ፡ ብነተ፡ በንቱ። ወለዘሂ፡ ፍርሀተ፡ ፍርሁ፡ ወለዘሂ፡ ክብረ፡ አክብሩ።
በእንተ፡ አፍቅሮ፡ ቢጽ
8 ወአልቦ፡ ዘይበቊዐክሙ፡ ዘእንበለ፡ አፍቅሮ፡ ቢጽክሙ። ወዘሰ፡ አፍቀረ፡ ቢጾ፡ ኵሎ፡ ሕገ፡ ፈጸመ፡ ገቢረ።
9 እስመ፡ ከመ፡ ዝ፡ ይቤ፡ በኦሪት። ኢትሑር፡ ብእሲተ፡ ብእሲ፡ ወኢትቅትል፡ ነፍሰ። ወኢትስርቅ፡ ወኢትኩን፡ ስምዐ፡ በሐሰት። ወኢትፍቱ፡ ወዓዲ፡ ባዕድኒ፡ ቦቱ፡ ትእዛዝ።
10 ወርእሱ፡ ለኵሉ፡ አፍቅር፡ ቢጸከ፡ ከመ፡ ነፍስከ። ዘያፈቅር፡ ቢጾ፡ ኢይገብር፡ እኩየ። ተፋቅሮሰ፡ ፍጹም፡ ሕግ፡ ውእቱ።
በእንተ፡ ሕይወት
11 ወዘኒ፡ ተአምሩ፡ ከመ፡ በጽሐ፡ ጊዜሁ፡ ለነቂሕ፡ እምንዋም። ወይእዜሰ፡ አልጸቀት፡ ሕይወትነ፡ እንተ፡ ተሰፈውናሃ።
12 ወኀለፈት፡ ሌሊት፡ ወመጽአት፡ መዓልት። ወንግድፍ፡ እምላዕሌነ፡ ምግባረ፡ ጽልመት፡ ወንልበስ፡ ወልታ፡ ብርሃን።
13 ከመ፡ ናንሶሱ፡ በምግባረ፡ ጽድቅ፡ ወአኮ፡ በተውኔት። ወበማሕሌት፡ ወበስታይ፡ ወበዝሙት፡ ወበምርዓት፡ ወአኮ፡ በተሐምሞ፡ ወበቅንአት።
14 ልበስዎ፡ ለእግዚእነ፡ ኢየሱስ፡ ክርስቶስ፡ ወኢተኀልዩ፡ ፍትወተ፡ ሥጋክሙ።
=== chapter 14 ===
[ምዕራፍ 14]
በእንተ፡ ዘድኩም፡ ሃይማኖቱ
1 ወለዘኒ፡ ድኩም፡ ሃይማኖቱ፡ ጹርዎ፡ ወአጽንዕዎ። ወኢትግበሩ፡ ለአድልዎ።
2 ዘሰ፡ የአምን፡ ከመ፡ ኵሉ፡ ብዉሕ፡ ሎቱ፡ ኵሎ፡ ለይብላዕ። ወዘሰ፡ ይናፍቅ፡ ሐምለ፡ ለይሴሰይ።
3 ወዘኒ፡ ይበልዕ፡ ኢይመንኖ፡ ለዘኢይበልዕ፡ ወዘኒ፡ ኢይበልዕ፡ ኢይግአዞ፡ ለዘይበልዕ። እስመ፡ ለኵሎሙ፡ እግዚአብሔር፡ አእመሮሙ።
4 ምንትኑ፡ አንተ፡ ዘትግእዝ፡ ነባሬ፡ ባዕድ፡ እንዘ፡ ለእግዚኡ፡ ይቀውም። እመኒ፡ ወድቀ፡ ለእግዚኡ፡ ይቀውም፡ ወይክል፡ እግዚአብሔር፡ አቅሞቶ።
5 እስመ፡ ቦ፡ ዘይትሔረም፡ እምዕለት፡ ዕለተ። ወቦ፡ ዘይትሔረም፡ በኵሉ፡ መዋዕል። ወባሕቱ፡ ለኵሉ፡ በከመ፡ አዘዞ፡ ልቡ።
6 ዘሂ፡ ተሐረመ፡ በበ፡ ዕለቱ፡ ለእግዚአብሔር፡ ተሐረመ። ወዘሂ፡ ተሐረመ፡ በኵሉ፡ መዋዕል፡ ለእግዚአብሔር፡ ተሐረመ። ወዘሂ፡ በልዐ፡ ለእግዚአብሔር፡ በልዐ፡ ወየአኵቶ፡ ለእግዚአብሔር። ወዘኒ፡ ኢበልዐ፡ ለእግዚአብሔር፡ ኢበልዐ፡ ወየአኵቶ፡ ለእግዚአብሔር።
በእንተ፡ ሐይው፡ ለእግዚአብሔር
7 ወአልቦ፡ እምውስቴትነ፡ ዘለርእሱ፡ የሐዩ፡ ወዘለርእሱ፡ ይመውት።
8 ወእመኒ፡ ሐየውነ፡ ለእግዚአብሔር፡ ነሐዩ። ወእመኒ፡ ሞትነ፡ ለእግዚአብሔር፡ ንመውት። እመኒ፡ ሐየውነ፡ ወእመኒ፡ ሞትነ፡ ለእግዚአብሔር፡ ንሕነ።
9 ወበእንተ፡ ዝ፡ ሞተ፡ ክርስቶስ፡ ወሐይወ፡ ከመ፡ ይኰንን፡ ሕያዋነ፡ ወምዉታነ።
10 ምንትኑ፡ አንተ፡ እንከ፡ ዘትግእዝ፡ ቢጸከ። ወምንትኑ፡ አንተ፡ ዘትሜንን፡ ቢጸከ። እንዘ፡ ሀለወነ፡ ኵልነ፡ ንብጻሕ፡ ቅድመ፡ ምኵናኑ፡ ለክርስቶስ።
11 እስመ፡ ከመ፡ ዝ፡ ይቤ፡ እግዚአብሔር፡ ሕያው፡ አነ። ወሊተ፡ ይሰግድ፡ ኵሉ፡ ብርክ፡ ወሊተኒ፡ ይገኒ፡ ኵሉ፡ ልሳን።
12 ናሁ፡ ተዐውቀ፡ ከመ፡ ሀለውነ፡ ኵልነ፡ ንትሐተት፡ በኀበ፡ እግዚአብሔር። ወኢንግአዝ፡ እንከ፡ ቢጸነ።
13 ወዘንተ፡ ዳእሙ፡ ነኀሊ፡ በዘኢንግእዝ፡ ቢጸነ።
በእንተ፡ ዘአልቦ፡ ሙስና፡ እንበይነ፡ መብልዕ
14 ወኣአምር፡ ወእትአመን፡ በእግዚእነ፡ ኢየሱስ። ከመ፡ አልቦ፡ ዘይማስን፡ በእንቲኣሁ፡ ለሙሱን፡ ዳእሙ፡ ኵሉ፡ ይማስን።
15 ወእመሰ፡ እንበይነ፡ መብልዕ፡ ተኀይሶ፡ ለቢጽከ፡ አልብከኬ፡ ተፋቅሮ።
16 ቦኑ፡ እንበይነ፡ መብልዕ፡ ይትሀጐል፡ ዝኩ፡ ዘበእንቲኣሁ፡ ሞተ፡ ክርስቶስ።
17 ኢትፅርፉ፡ እንከ፡ ላዕለ፡ ሠናይ፡ ዘጸገወነ፡ እግዚእነ። እስመ፡ ኢኮነ፡ መንግሥተ፡ እግዚአብሔር፡ መብልዐ፡ ወመስቴ። ዘእንበለ፡ ጽድቅ፡ ወሰላም፡ ወፍሥሓ፡ በመንፈስ፡ ቅዱስ።
18 ወዘሰ፡ ከመ፡ ዝ፡ ይትቀነይ፡ ለክርስቶስ። ሥሙር፡ በኀበ፡ እግዚአብሔር፡ ወኅሩይ፡ በኀበ፡ ሰብእ።
19 ወይእዜኒ፡ ንትልዋ፡ ለሰላም፡ በዘይትሐነጽ፡ ቢጽነ።
20 ወኢንስዐር፡ ግብረ፡ እግዚአብሔር፡ እንበይነ፡ መብልዕ። ወባሕቱ፡ ኵሉ፡ ንጹሕ፡ ለንጹሓን። ወእኩይሰ፡ ለሰብእ፡ በኑፋቄ፡ በሊዕ።
21 ይኄይስ፡ ኢ፡ በሊዐ፡ ሥጋ፡ ወኢ፡ ሰቲየ፡ ወይን፡ እምአዕቅፎ፡ ቢጽ።
22 ወእመኒ፡ ብከ፡ ሃይማኖት፡ አጽንዕ፡ ርእሰከ፡ በተአምኖትከ፡ ቅድመ፡ እግዚአብሔር። ወብፁዕ፡ ዘይዘልፍ፡ ርእሶ፡ በዘረከበ፡ አእምሮተ።
23 ወዘሰ፡ ይናፍቅ፡ ለእመ፡ በልዐ፡ ይትኴነን፡ እስመ፡ ኢኮነ፡ በአሚን። ወኵሉ፡ ዘይከውን፡ ዘእንበለ፡ አሚን፡ ኀጢአት፡ ወጌጋይ፡ ውእቱ።
=== chapter 15 ===
[ምዕራፍ 15]
በእንተ፡ አጽንዖ፡ ቢጽ
1 ወርቱዕሰ፡ አንትሙ፡ ጽኑዓን፡ ትጹርዎሙ፡ ድካሞሙ፡ ለስኡናን፡ ወኢናድሉ፡ ለርእሰነ።
2 ወኵልነ፡ ናድሉ፡ ለጽድቅ፡ ወለግብር፡ ሠናይ፡ በዘይትሐነጽ፡ ቢጽነ።
3 ክርስቶስኒ፡ አኮ፡ ለርእሱ፡ ዘአድለወ። ዳእሙ፡ በከመ፡ ይብል፡ መጽሐፍ፡ ትዕይርቶሙ፡ ለእለ፡ ይትዔየሩከ፡ ወድቀ፡ ላዕሌየ።
4 ወኵሉ፡ ዘተጽሕፈ፡ ለተግሣጸ፡ ዚኣነ፡ ተጽሕፈ። ከመ፡ በትዕግሥትነ፡ ወበተወክሎ፡ መጻሕፍት፡ ንርከብ፡ ተስፋነ።
5 ወእግዚአብሔር፡ አምላከ፡ ትፍሥሕት፡ ወአቡሃ፡ ለምሕረት። የሀበነ፡ ነኀሊ፡ ዘዚኣሁ፡ ለኵልነ፡ በእንተ፡ ኢየሱስ፡ ክርስቶስ።
6 ከመ፡ ኵልነ፡ ኅቡረ፡ በአሐዱ፡ አፍ፡ ንሰብሖ፡ ለእግዚአብሔር፡ በኢየሱስ፡ ክርስቶስ፡ እግዚእነ።
በእንተ፡ ተወክፎተ፡ ቢጽ
7 ወይእዜኒ፡ ተወከፉ፡ ቢጸክሙ፡ እስመ፡ ክርስቶስ፡ ተወክፈክሙ፡ ውስተ፡ ስብሐተ፡ እግዚአብሔር።
8 እብል፡ እንከ፡ ክርስቶስ፡ ላእከ፡ ኮነ፡ ለግዝረት፡ ለጽድቀ፡ ቃለ፡ እግዚአብሔር። ወከመ፡ ያጽንዓ፡ ለተስፋ፡ አበዊነ።
9 ወአሕዛብሰ፡ ይሴብሕዎ፡ ለእግዚአብሔር፡ እስመ፡ ተሣሀሎሙ። እስመ፡ ከማሁ፡ ይቤ፡ መጽሐፍ፡ በእንተ፡ ዝ። እገኒ፡ ለከ፡ በውስተ፡ አሕዛብ፡ እግዚኦ፡ ወእዜምር፡ ለስምከ።
10 ወካዕበ፡ ይቤ፡ መጽሐፍ፡ ተፈሥሑ፡ አሕዛብ፡ ምስለ፡ ሕዝብ።
11 ወካዕበ፡ ይቤ፡ ሰብሕዎ፡ ለእግዚአብሔር፡ ኵልክሙ፡ አሕዛብ፡ ወይሴብሕዎ፡ ኵሎሙ፡ ሕዝብ።
12 ወኢሳይያስኒ፡ ይቤ፡ ይቀውም፡ ሥርወ፡ ዕሤይ። ወዘተሠይመ፡ እምኔሁ፡ ይከውን፡ ንጉሠ፡ ለአሕዛብ። ወሕዝብ፡ ይትዌከሉ፡ ቦቱ።
13 ወእግዚአብሔር፡ አምላከ፡ ተስፋ፡ ይፈጽም፡ ለክሙ፡ ኵሎ፡ ፍሥሓ፡ ወሰላመ፡ በአሚን። ከመ፡ ያብዝኅክሙ፡ በተስፋሁ፡ ለመንፈስ፡ ቅዱስ፡ ወበኀይሉ።
በእንተ፡ አንቅሆተ፡ አኀው
14 ወእትአመነክሙ፡ አነሂ፡ አኀዊነ፡ ከመ፡ ትፈጽሙ፡ በኵሉ፡ ምግባረ፡ ሠናይ። ወጽጉባን፡ አንትሙ፡ በኵሉ፡ ጥበብ፡ ወትክሉ፡ ምሂሮቶሙ፡ ለቢጽክሙ።
15 ወተኀቢልየ፡ ጸሐፍኩ፡ ለክሙ፡ እምአሐዱ፡ ገጽ። በእንተ፡ ጸጋሁ፡ ለእግዚአብሔር፡ ዘረከብኩ።
16 ከመ፡ እትለአክ፡ ለኢየሱስ፡ ክርስቶስ፡ ውስተ፡ አሕዛብ። ወከመ፡ እትቀነይ፡ ለትምህርተ፡ እግዚአብሔር። ከመ፡ ይኩን፡ መሥዋዕቶሙ፡ ለአሕዛብ፡ ሥሙረ፡ ወኅሩየ፡ በመንፈስ፡ ቅዱስ፡ በላዕሌየ።
17 ወሊተሰ፡ ኢየሱስ፡ ክርስቶስ፡ ምክሕየ፡ ለኀበ፡ እግዚአብሔር።
18 ወእትኀበል፡ እንግር፡ ዘገብረ፡ ሊተ፡ ክርስቶስ። በዘየአምኑ፡ አሕዛብ፡ በቃል፡ ወበምግባር።
19 በኀይል፡ ወበትእምርት፡ ወበመንክር፡ በኀይለ፡ መንፈስ፡ ቅዱስ። ወዘከመ፡ መሀርኩ፡ በኢየሩሳሌም፡ እስከ፡ አድያሚሃ፡ ለኢያሪሆ። ወፈጸምኩ፡ ትምህርተ፡ ክርስቶስ።
በእንተ፡ ተፈቅሮተ፡ ትምህርት
20 ወፈድፋደ፡ ተፈቅረት፡ ትምህርቱ፡ ወኢሖርኩ፡ ኀበ፡ ተሰምየ፡ ክርስቶስ። ከመ፡ ኢይሕንጽ፡ ዲበ፡ መሠረተ፡ ባዕድ።
21 በከመ፡ ይብል፡ መጽሐፍ። እለኒ፡ ኢዜነውዎሙ፡ በእንቲኣሁ፡ ያእምርዎ፡ ሀለዎሙ። ወእለኒ፡ ኢሰምዕዎ፡ ይለብውዎ።
22 ወዘልፈ፡ እፈቅድ፡ እምጻእ፡ ኀቤክሙ፡ ወይሰአነኒ።
23 ወይእዜ፡ ባሕቱ፡ እስመ፡ ሠለጥኩ፡ በዝ፡ በሓውርት። እስመ፡ እጽሕቅ፡ እምጻእ፡ ኀቤክሙ፡ እምጕንዱይ፡ ዕለት።
24 ወእንዘ፡ ኣሐውር፡ መንገለ፡ ሲባንያ፡ እሴፎ፡ አርአይክሙ፡ ኅሉፈ። ወእምኀቤክሙ፡ እትፌኖ፡ ህየ፡ እምከመ፡ ቀደምኩ፡ ወተፈሣሕኩ፡ ምስሌክሙ።
በእንተ፡ መልእክተ፡ ቅዱሳን
25 ወይእዜሰ፡ አሐውር፡ ኢየሩሳሌም፡ ለመልእክተ፡ ቅዱሳን።
26 እስመ፡ ኀብሩ፡ መቄዶንያ፡ ወአካይያ። ያስተዋፅኡ፡ ለነዳያን፡ እለ፡ በኢየሩሳሌም፡ ወለቅዱሳን። ወሠምሩ፡ እስመ፡ ርቱዕ፡ ሎሙ።
27 እምከመሰ፡ ተሳተፍዎሙ፡ ለአሕዛብ፡ በግብር፡ ዘመንፈስ፡ ቅዱስ። ርቱዕ፡ ይትለአክዎሙ፡ በዘይትፈቀድ፡ ለነፍስቶሙ።
28 ወዘንተ፡ ፈጺምየ፡ ወኀቲምየ፡ አኀልፍ፡ እንተ፡ ኀቤክሙ፡ ለሲባንያ።
29 ወእትአመን፡ ባሕቱ፡ ከመ፡ እምጻእ፡ ኀቤክሙ፡ ለፍጻሜ፡ ትምህርተ፡ ክርስቶስ።
በእንተ፡ ፍጻሜ፡ ግብር
30 ወአስተበቊዐክሙ፡ አኀዊነ፡ በእግዚእነ፡ ኢየሱስ፡ ክርስቶስ። ወበፍቅረ፡ መንፈስ፡ ቅዱስ፡ ትስአሉ፡ ሊተ፡ በጸሎትክሙ፡ ኀበ፡ እግዚአብሔር።
31 ከመ፡ ያድኅነኒ፡ እምዐላውያን፡ እለ፡ ብሔረ፡ ይሁዳ። ከመ፡ አሥምሮሙ፡ ለቅዱሳን፡ እለ፡ በኢየሩሳሌም።
32 ከመ፡ እምጻእ፡ ኀቤክሙ፡ በፍሥሓ፡ ወአዕርፍ፡ ምስሌክሙ፡ በፈቃደ፡ እግዚአብሔር።
33 ወአምላከ፡ ሰላም፡ የሀሉ፡ ምስሌክሙ፡ አሜን።
=== chapter 16 ===
[ምዕራፍ 16]
በእንተ፡ አማሕፅኖ
1 አማሕፀንኩክሙ፡ ፌቤንሃ፡ እኅተነ፡ እንተ፡ ትትለአክ፡ ለቤተ፡ ክርስቲያን፡ ዘክንክርኤስ።
2 ትትወከፍዋ፡ በእግዚእነ፡ በከመ፡ ይደልዎሙ፡ ለቅዱሳን። ወሥርዕዋ፡ ውስተ፡ ዘፈቀድክሙ፡ ለትካዝክሙ። እስመ፡ አሥለጠት፡ ለብዙኃን፡ ወሊተኒ።
3 አምኁ፡ ጵርስቅላሃ፡ ወአቂላሃ። እለ፡ ኀብሩ፡ ምስሌየ፡ በግብረ፡ ኢየሱስ፡ ክርስቶስ።
4 እለ፡ መጠዉ፡ ክሳዶሙ፡ በእንተ፡ ነፍስየ። ወአኮ፡ አነ፡ ባሕቲትየ፡ ዘአእኵቶሙ። ዓዲ፡ ኵሎሙ፡ አብያተ፡ ክርስቲያናት፡ ዘአሕዛብ።
5 ወአምኁ፡ ማኅበረ፡ እለ፡ ውስተ፡ ቤቶሙ፡ ወአምኁ፡ ኤጤኔጦን፡ እኁየ። ዘውእቱ፡ ጥንቶሙ፡ ለእስያ፡ በክርስቶስ።
6 አምኁ፡ ማርያ፡ እንተ፡ ብዙኀ፡ ሠርሐት፡ ለክሙ።
7 አምኁ፡ እንድራኒቆን፡ ወዩልያን፡ እለ፡ አዝማድየ፡ ወተፄወዉ፡ ምስሌየ። ወየአምርዎሙ፡ ሐዋርያት፡ ከመ፡ ቀዲሙኒ፡ ተልእኩ፡ ለክርስቶስ።
8 አምኁ፡ ጵልያጦን፡ እኁየ፡ በክርስቶስ።
9 አምኁ፡ ኡሩባኖን፡ ዘነኀብር፡ በግብረ፡ ክርስቶስ፡ ወስንጣክን፡ እኁየ።
10 አምኁ፡ ኤጤሌን፡ ኅሩየ፡ በክርስቶስ፡ አምኅዎሙ፡ ለእለ፡ አርስጠቦሉ።
11 አምኁ፡ ሄሮድያና፡ ዘእምአዝማድየ። አምኁ፡ እለ፡ እምውስተ፡ ቤተ፡ ንርቃሱ፡ እለ፡ በክርስቶስ።
12 አምኁ፡ እለ፡ ጢሮፊሞና፡ ወጢሮፊሞስ፡ እለ፡ ጻመዉ፡ በእግዚእነ።
13 አምኁ፡ ጠርሲዳ፡ እኅትነ፡ እንተ፡ ብዙኀ፡ ጻመወት፡ በእግዚእነ። አምኁ፡ ሮፎን፡ ኅሩዮ፡ ለእግዚእነ፡ ወእሞ፡ ወሊተኒ፡ እምየ።
14 አምኁ፡ አስቀሪጦን፡ ወአፍልሶንጳ፡ ወሄርሜን። ወጳጥሮባን፡ ወሄርማን፡ ወአኀዊነ፡ እለ፡ ምስሌሆሙ።
15 አምኁ፡ ፊሎጎን፡ ወዩልያ፡ ወኔርያ፡ ወእኅቶ፡ ወአልንጦን። ወኵሎሙ፡ ቅዱሳነ፡ እለ፡ ምስሌሆሙ።
17 አስተበቊዐክሙ፡ አኀዊነ፡ ተዐቀብዎሙ፡ ለእለ፡ ይገብሩ፡ ሀከከ። ወያመጽኡ፡ ካሕደ፡ ላዕለ፡ ትምህርትክሙ፡ ዘተመሀርክሙ። ትግበሩ፡ ባቲ፡ ወተገሐሥዎሙ።
18 እስመ፡ ለከርሦሙ፡ ይትቀነዩ፡ ወአኮ፡ ለእግዚእነ፡ ኢየሱስ፡ ክርስቶስ። ወበኂጣነ፡ ነገር፡ ወበተየውሆ፡ ያስሕትዎሙ፡ ለብዙኃን፡ የዋሃን።
19 ወነገረ፡ ዚኣክሙሰ፡ ተሰምዐ፡ በኵለሄ፡ ወእትፌሣሕ፡ በእንቲኣክሙ። ወእፈቅድ፡ ለክሙ፡ ትጥበቡ፡ ለሠናይ፡ ወትትገሐሥዎ፡ ለእኩይ።
20 ወአምላከ፡ ሰላም፡ ይቀጥቅጦ፡ ለሰይጣን፡ በታሕተ፡ እገሪክሙ፡ ፍጡነ። ጸጋሁ፡ ለእግዚእነ፡ ኢየሱስ፡ ክርስቶስ፡ የሀሉ፡ ምስሌክሙ።
21 ይኤምኀክሙ፡ ጢሞቴዎስ፡ ዘነኀብር፡ ግብረ፡ ምስሌሁ። ወሉቅዮስ፡ ወኢያሶን፡ ወሱሲ፡ ጴጥሮስ፡ እለ፡ አዝማድየ።
22 ወአማኅኩክሙ፡ አነ፡ ጤርጥዮስ፡ ዘጸሐፍክዋ፡ ለዛቲ፡ መጽሐፍ፡ በእግዚእነ።
23 አምኀክሙ፡ ጋይዮስ፡ ዘየኀድረኒ፡ በንግደትየ። ወኵሉ፡ አብያተ፡ ክርስቲያናት፡ አምኁክሙ። አርስጦስ፡ መጋቤ፡ ሀገር፡ ወቁአስጥሮስ፡ እኁነ።
24 ውእቱ፡ ዘይክል፡ ያጽንዕክሙ፡ እግዚአብሔር፡ ላዕለ፡ ስብከት፡ ዘእሰብክ፡ ባቲ። በእንተ፡ ኢየሱስ፡ ክርስቶስ፡ ዘኅቡእ፡ ሕርመታ፡ እምቅድመ፡ ዓለም።
25 ወአስተርአየ፡ በዝ፡ መዋዕል፡ እምቃለ፡ ነቢያት፡ ወበትእዛዘ፡ እግዚአብሔር፡ ዘለዓለም። ከመ፡ ይስምዑ፡ ኵሉ፡ አሕዛብ፡ ወይእመኑ፡ በኢየሱስ፡ ክርስቶስ፡ ወልደ፡ እግዚአብሔር።
26 ወያእምርዎ፡ ለእግዚአብሔር፡ ዘሎቱ፡ ስብሐት። ወውእቱ፡ ጠቢብ፡ ለዓለመ፡ ዓለም፡ አሜን።
27 ጸጋሁ፡ ለእግዚእነ፡ ኢየሱስ፡ ክርስቶስ፡ የሀሉ፡ ምስለ፡ ኵልክሙ፡ አሜን። ተፈጸመት፡ መልእክተ፡ ኀበ፡ ሰብአ፡ ሮሜ፡ ዘተጽሕፈት፡ በቆሮንቶስ። ወተፈነወት፡ በእደ፡ ፌቤን፡ እንተ፡ ትትለአኮሙ፡ ለማኅበረ፡ ክንክርኤስ።
=== part subscription ===
[Subscription]
ተፈጸመ፡ በዝየ፡ ዘሮሜ፡
ወተጽሕፈ፡ በቆሮንቶስ፡ ወተፈነወ፡ በእደ፡ ፌቤን፡ እንተ፡ ትትለአኮሙ፡ ለማኅበረ፡ ከንክራስ፡
=== part stichometry ===
[Stichometry]
ቃሉ፡ ፱፻ወ፶፡ ወምዕራፉ፡ ፲ወ፱፡ ለብሄረ፡ ሮሜ።
ቃሉ፡ ፺ወ፩፡ ወምዕራፉ፡ ፲።