##### edition  (gez) — Text of the EOTC printed Bible
=== chapter 1 ===
[ምዕራፍ 1]
በእንተ፡ ትዕግሥት
1 እምያዕቆብ፡ ገብረ፡ እግዚአብሔር፡ ወእግዚእነ፡ ኢየሱስ፡ ክርስቶስ። ለዐሠርቱ፡ ወክልኤቱ፡ ሕዝበ፡ ድዮስጶራ፡ ሰላም፡ ለክሙ።
2 ኦ፡ አኀው፡ ኩኑ፡ በኵሉ፡ ፍሥሓ። ሶበ፡ መንሱት፡ ይመጽአክሙ፡ ዘዘ፡ ዚኣሁ።
3 እንዘ፡ ተአምሩ፡ ከመ፡ መከራሃ፡ ለሃይማኖትክሙ፡ ትዕግሥተ፡ ይገብር፡ ለክሙ።
4 ወትዕግሥትሰ፡ ግብር፡ ፍጹም፡ ባቲ። ከመ፡ ትኩኑ፡ ፍጹማነ፡ ወጥዑያነ፡ እንዘ፡ አልቦ፡ ዘተኀጥኡ።
በእንተ፡ ሥርዐተ፡ ጸሎት
5 ወእመሰ፡ ቦ፡ ዘኀጥኣ፡ ለጥበብ፡ ለይስአል፡ ኀበ፡ ወሃቢ፡ እግዚአብሔር። ዘይሁብ፡ ለኵሉ፡ በስፉሕ፡ እንዘ፡ ኢይትዔየር፡ ወኢይዘረኪ፡ ወይትወሀብ፡ ሎቱ።
6 ወይስአል፡ እንዘ፡ ይትአመን፡ ወኢይናፍቅ፡ እስመ፡ ዘይናፍቅሰ፡ ይከውን፡ ከመ፡ ሞገደ፡ ባሕር። እንተ፡ ይዘብጣ፡ ነፋስ፡ ወያነውኃ።
7 ወኢይምሰሎ፡ ለውእቱ፡ ብእሲ፡ ከመ፡ ዘይነሥእ፡ ምንተኒ፡ እምኀበ፡ እግዚአብሔር።
8 እስመ፡ ብእሲ፡ ዘክልኤ፡ ልቡ፡ ህዉክ፡ ውእቱ፡ በኵሉ፡ ፍኖቱ።
9 ለይትመካሕ፡ እኁነ፡ ነዳይ፡ በተልዕሎቱ።
10 ወባዕልሰ፡ በተትሕቶቱ፡ እስመ፡ ከመ፡ ፍሬ፡ ሣዕር፡ የኀልፍ።
11 ወእምከመ፡ ሠረቀ፡ ፀሓይ፡ ምስለ፡ ላህቡ። ያየብሶ፡ ለሣዕር፡ ወፍሬሁኒ፡ ይወድቅ፡ ወሥነ፡ ራእዩኒ፡ ይትሀጐል። ከማሁኬ፡ ባዕልኒ፡ በፍናዊሁ፡ ይጸመሒ።
በእንተ፡ ትዕግሥት፡ ወመከራ
12 ወብፁዕ፡ ብእሲ፡ ዘይትዔገሣ፡ ለእኪት። እስመ፡ ተመኪሮ፡ ይነሥእ፡ አክሊለ፡ ሕይወት። ዘአሰፈዎሙ፡ እግዚአብሔር፡ ለእለ፡ ያፈቅርዎ።
13 ወእመ፡ ቦ፡ ዘይትሜከር፡ ኢይበል፡ እግዚአብሔር፡ ያሜክረኒ። እስመ፡ እግዚአብሔር፡ ኢያሜክር፡ ለእኪት። ወውእቱሰ፡ ኢያሜክር፡ ወኢ፡ መነሂ።
14 አላ፡ አሐዱ፡ አሐዱ፡ ይትሜከር፡ በፍትወተ፡ እንቲኣሁ። ወይወፅእ፡ ኀቤሃ፡ ወይደነግፅ።
15 ወፍትወትሰ፡ እምከመ፡ ፀንሰት፡ ትወልዳ፡ ለኀጢአት። ወኀጢአትኒ፡ እምከመ፡ ተፈጸመት፡ ትወልዳ፡ ለሞት።
16 ኢያስሕቱክሙ፡ አኀዊነ፡ ፍቁራን።
17 ኵሉ፡ ሀብት፡ ሠናይ፡ ወኵሉ፡ ፍት፡ ፍጹም። እምላዕሉ፡ ይእቲ፡ ትወርድ፡ እምኀበ፡ አቡሃ፡ ለብርሃን። ውእቱ፡ ዘአልቦ፡ ተውላጥ፡ ኀቤሁ፡ ወአልቦ፡ ምንትኒ፡ ዘያመሥጥ፡ እምእዴሁ።
18 እስመ፡ በፈቃዱ፡ ወለደነ፡ በቃለ፡ ጽድቁ፡ ከመ፡ ንኩን፡ ቀደምተ፡ ለፍጥረቱ።
በእንተ፡ ትዕግሥት፡ ወዐቂበ፡ ሕግ
19 ወይእዜኒ፡ አኀዊነ፡ ኩኑ፡ ወይኩን፡ ኵሉ፡ ብእሲ፡ ፍጡነ፡ ለሰሚዕ። ወጕንዱየ፡ ለነቢብ፡ ወጕንዱየ፡ ለመዓት።
20 እስመ፡ መዓቱ፡ ለብእሲ፡ ጽድቀ፡ እግዚአብሔር፡ ኢያገብሮ።
21 ወይእዜኒ፡ ኅድግዋ፡ ለኵላ፡ ርስሐት፡ ወለኵላ፡ እኪት። ወበየውሀት፡ ተቀበልዎ፡ ለቃል፡ ዘተዘርዐ፡ ውስተ፡ ልብክሙ። ዘይክል፡ አድኅኖታ፡ ለነፍስክሙ።
22 ወኩኑ፡ ገባርያኒሃ፡ ለሕግ፡ ወአኮ፡ ለአጽምዖ። ባሕቲቱ፡ ኀልይዎ፡ እስኩ፡ ለሊክሙ።
23 እመ፡ ቦ፡ ዘያጸምዖ፡ ለቃል፡ ወኢይገብሮ። ይመስል፡ ከመ፡ ብእሲ፡ ዘይሬኢ፡ ፍጥረተ፡ ገጹ፡ በመጽሔት።
24 ወጠይቆ፡ ርእሶ፡ ኀለፈ፡ ወረስዐ፡ ዘከመ፡ እፎ፡ ውእቱ።
25 ወዘሰ፡ ሐወጸ፡ ውስተ፡ ሕግ፡ ፍጹም፡ ዘያግዕዝ፡ ወተዐገሠ። ኢኮነ፡ ራስዐ፡ ዘሰምዐ፡ አላ፡ ገባሬ፡ ሕግ፡ ውእቱ። ብፁዕ፡ ዝንቱ፡ በምግባሩ።
በእንተ፡ ሥርዐተ፡ ሕርመት
26 ወእመ፡ ቦ፡ ዘይመስሎ፡ ከመ፡ ዘይትሔረም፡ ለእግዚአብሔር። ወኢያለጕሞ፡ ለልሳኑ፡ ወአስሐቶ፡ ለልቡ። ለዘከማሁ፡ ከንቱ፡ ሕርመቱ።
27 ወሕርመትሰ፡ ንጽሕት፡ እንተ፡ እምኀበ፡ እግዚአብሔር፡ አብ። ዛቲ፡ ይእቲ፡ ከመ፡ ትዕቀቡ፡ ዕጓለ፡ ማውታ፡ ወዕቤራተ፡ በተጽናሶሙ። ወትዕቀቡ፡ ርእሰክሙ፡ እምዓለም፡ ዘእንበለ፡ ሕብቃቄ።
=== chapter 2 ===
[ምዕራፍ 2]
በእንተ፡ ተዐቅቦ፡ እምአድልዎ
1 አኀዊነ፡ ኢትኩን፡ ለገጸ፡ ሰብእ፡ ሃይማኖትክሙ። እንተ፡ በእግዚእነ፡ ኢየሱስ፡ ክርስቶስ፡ ዘሎቱ፡ ስብሐት።
2 ከመ፡ እመ፡ ቦአ፡ ውስተ፡ ማኅበርክሙ፡ ብእሲ፡ ዘኅልቀተ፡ ወርቅ፡ ወዘአልባስ፡ ንጹሕ። ወቦአ፡ ነዳይ፡ በአልባስ፡ ርሱሕ።
3 ወትኔጽርዎ፡ ለዘይለብስ፡ ንጹሐ፡ ወትብልዎ፡ አንተሰ፡ ንበር፡ ዝየ፡ ውስተ፡ ምሥናይ። ወለነዳይሰ፡ ትብልዎ፡ ቁም፡ ከሃከ፡ አንተሰ። ወእመ፡ አኮ፡ ንበር፡ ታሕተ፡ መከየደ፡ እገሪነ።
4 አኮኑ፡ እንከ፡ አድሎክሙ፡ ለሊክሙ፡ ወኮንክሙ፡ መደልዋነ፡ ለኅሊና፡ እኩይ።
5 ስምዑ፡ አኀዊነ፡ ፍቁራን፡ አኮኑ፡ እግዚአብሔር፡ ኀረዮሙ፡ ለነዳያነ፡ ዝ፡ ዓለም። ወአብዕልትሰ፡ ከመ፡ በሃይማኖቶሙ፡ ይወርስዋ፡ ለመንግሥት። እንተ፡ አሰፈዎሙ፡ ለእለ፡ ያፈቅርዎ።
6 ወአንትሙሰ፡ አስተሐቀርክምዎሙ፡ ለነዳያን። አኮኑ፡ እሙንቱ፡ አብዕልት፡ እለ፡ ይትዔገሉክሙ፡ ወይስሕቡክሙ፡ ውስተ፡ ተስናናት፡ ወአዕዋዳት።
7 ወእሙንቱ፡ ይፀርፉ፡ ላዕለ፡ ስሙ፡ ዐቢይ፡ ዘተሰምየ፡ ላዕሌክሙ።
በእንተ፡ ፍቅር
8 ወእመሰ፡ ትፌጽሙ፡ ሕገ፡ በከመ፡ ይብል፡ መጽሐፍ። አፍቅር፡ ቢጸከ፡ ከመ፡ ነፍስከ፡ ሠናየ፡ ትገብሩ።
9 ወእመሰ፡ ገጸ፡ ትነሥኡ፡ ኀጢአተ፡ ትገብሩ። ወይዛለፍክሙ፡ ሕግ፡ ከመ፡ ከሓዲ።
10 ወዘሰ፡ ይገብሮ፡ ለኵሉ፡ ሕግ፡ ወይስሕት፡ በአሐቲ፡ ኮነ፡ መአብሰ፡ በኵሉ።
11 እስመ፡ ዘይቤ፡ ኢትሑር፡ ኀበ፡ ብእሲተ፡ ብእሲ፡ ይቤ፡ ኢትቅትል፡ ነፍሰ። ወእመሰ፡ ኢተሐውር፡ ኀበ፡ ብእሲተ፡ ብእሲ፡ ወባሕቱ፡ ትቀትል፡ ነፍሰ፡ ኮንከ፡ ውፁአ፡ እምሕግ።
12 ከመ፡ ዝ፡ ንግሩ፡ ወከመ፡ ዝ፡ ግበሩ፡ ከመ፡ ዘበሕገ፡ ግዕዛን፡ ሀለውክሙ፡ ትትኰነኑ።
13 እስመ፡ በደይንሰ፡ አልቦ፡ ምሒር፡ ለዘኢገብረ፡ ምሕረተ። ወይትሜካሕ፡ ባሕቱ፡ በዕለተ፡ ደይን፡ ዘገብረ፡ ምሕረተ።
በእንተ፡ ሃይማኖት፡ ወምግባር
14 ምንተ፡ ይበቊዕ፡ አኀዊነ፡ ለእመ፡ ቦ፡ ዘይብል፡ ሃይማኖት፡ ብየ፡ ወምግባረ፡ ሠናይ፡ አልብየ። ቦኑ፡ ትክል፡ ሃይማኖቱ፡ አድኅኖቶ።
15 ለእመ፡ ቦ፡ እምአኀዊነ፡ አው፡ እምአኃቲነ። እለ፡ ዕሩቃን፡ እሙንቱ፡ አው፡ ኅጡኣን፡ ለሲሳየ፡ ዕለቶሙ።
16 ወቦ፡ ዘይቤሎሙ፡ እምኔክሙ፡ ሑሩ፡ በሰላም፡ ሰኀኑ፡ ወትጸግቡ። ወኢወሀቦሙ፡ ዘይፈቅዱ፡ ለተጽናሶሙ፡ ምንተ፡ ይበቊዖሙ።
17 ከማሁ፡ ሃይማኖትኒ፡ እንተ፡ አልባቲ፡ ምግባረ፡ ሠናይ፡ ምዉት፡ ይእቲ፡ ለሊሃ።
18 እመ፡ ቦ፡ ዘይቤለከ፡ አንተ፡ ሃይማኖት፡ ብከ፡ ወአነ፡ ምግባረ፡ ሠናይ፡ ብየ። አርእየኒኬ፡ ሃይማኖተከ፡ ዘእንበለ፡ ምግባሪከ። ወአንሰ፡ አርእየከ፡ እምነ፡ ምግባርየ፡ ሃይማኖትየ።
19 አንተሰ፡ ተአምን፡ ከመ፡ አሐዱ፡ ውእቱ፡ እግዚአብሔር፡ ሠናየ፡ ትገብር። ከማሁሰ፡ አጋንንትኒ፡ የአምኑ፡ ወይደነግፁ።
20 ትፈቅድኑ፡ ታእምር፡ ኦ፡ ብእሲ፡ አብድ። ከመ፡ ሃይማኖት፡ ዘእንበለ፡ ምግባር፡ ምዉት፡ ይእቲ።
21 አኮኑ፡ አብርሃም፡ አቡነ፡ በምግባሩ፡ ጸድቀ። ሶበ፡ አዕረጎ፡ ለይስሐቅ፡ ወልዱ፡ ውስተ፡ ምሥዋዕ።
22 ትሬኢኑ፡ ከመ፡ ሃይማኖት፡ ትረድኦ፡ ለገቢር። ወበምግባሩ፡ መልአት፡ ወፍጽምተ፡ ኮነት፡ ሃይማኖቱ።
23 ወተፈጸመ፡ ዘይብል፡ መጽሐፍ፡ አምነ፡ አብርሃም፡ በእግዚአብሔር። ወተኈለቈ፡ ጽድቀ፡ ወፍቁረ፡ እግዚአብሔር፡ ተሰምየ።
24 ትሬኢኑ፡ ከመ፡ በምግባሩ፡ ይጸድቅ፡ ሰብእ። ወአኮ፡ በሃይማኖቱ፡ ባሕቲታ።
25 ወከማሁ፡ ረአብኒ፡ ዘማ፡ በምግባሪሃ፡ ጸድቀት፡ ሶበ፡ ተቀበለቶሙ፡ ለሰብአ፡ ዐይን። ወእንተ፡ ካልእት፡ ፍኖት፡ አውፅአቶሙ።
26 በከመ፡ ሥጋ፡ ዘአልቦ፡ መንፈስ፡ ምዉት፡ ውእቱ። ከማሁ፡ ሃይማኖትኒ፡ እንተ፡ አልባቲ፡ ምግባረ፡ ሠናይ፡ ምዉት፡ ይእቲ።
=== chapter 3 ===
[ምዕራፍ 3]
በእንተ፡ ተዐቅቦ፡ እምነ፡ ስሒት
1 ወኢይኩኑ፡ እምውስቴትክሙ፡ ብዙኃን፡ መምህራን፡ አኀዊነ። ተአምሩ፡ ከመ፡ እንተ፡ ተዐቢ፡ ደይነ፡ ንነሥእ።
2 እስመ፡ ብዙኀ፡ ንስሕት፡ ኵልነ። ወዘሰ፡ ኢይስሕት፡ በቃሉ፡ ፍጹም፡ ውእቱ፡ ወይክል፡ ወድየ፡ ልጓም፡ ለኵሉ፡ ሥጋሁ።
3 ወናሁ፡ ለአፍራስኒ፡ ንወዲ፡ ሎቶን፡ ልጓመ፡ ውስተ፡ አፉሆን። ከመ፡ ኦሆ፡ ይበላነ፡ ወንመይጦን፡ ኵሎ፡ ሥጋሆን።
4 ወናሁ፡ ለአሕማርኒ፡ ዘመጠነ፡ ዝ፡ አካሎን። ወበኀይለ፡ ነፋስ፡ ሶበ፡ ይትነድኣ፡ ወይትመየጣ። ይመይጦን፡ ብእሲ፡ በኀዳፍ፡ እንዘ፡ መጠነ፡ ዝ፡ ናእሱ። ወያበውኦን፡ ውስተ፡ መርሶ፡ ኀበ፡ ፈቀደ።
በእንተ፡ አግርሮተ፡ ልሳን
5 ከማሁ፡ ልሳንኒ፡ ንስቲት፡ አባል፡ ይእቲ፡ ወታመጽእ፡ ዐቢያተ። ወናሁ፡ እሳትኒ፡ ንስቲት፡ ጥቀ፡ ዘመጠነ፡ ዝ፡ ዖመ፡ ታውዒ።
6 ወልሳንኒ፡ እሳት፡ ይእቲ፡ ለዓለም፡ ዘዐመፃ። ወናሁ፡ ልሳንኒ፡ ንስቲት፡ ተፈጥረት፡ ውስተ፡ ነፍስትነ። ወታረምፆ፡ ለሥጋነ፡ ወትሎሉ፡ ክቡተ፡ ፍጥረተነ፡ ወታውዒ፡ ጥቀ፡ እምገሃነም።
7 እስመ፡ ኵሉ፡ ፍጥረተ፡ አራዊትኒ፡ አዕዋፍኒ። ወዘይትሐወስኒ፡ ውስተ፡ ባሕር፡ ወእንስሳኒ፡ ይገርር፡ ለፍጥረተ፡ ዕጓለ፡ እመሕያው።
8 ወለልሳነ፡ ዕጓለ፡ እመሕያውሰ፡ አልቦ፡ ዘይክል፡ አግርሮታ። እኪት፡ ይእቲ፡ ወአልባ፡ ዐቅም። ወምልእት፡ ይእቲ፡ ሕምዘ፡ ዘይቀትል።
9 ባቲ፡ ንባርኮ፡ ለእግዚአብሔር፡ አብ። ወባቲ፡ ንረግሞ፡ ለዕጓለ፡ እመሕያው፡ ዘበአርአያ፡ እግዚአብሔር፡ ተፈጥረ።
10 እምአሐዱ፡ አፍ፡ ይፃእ፡ ቡራኬ፡ ወመርገም። ኢይረትዕ፡ ከመ፡ ዝ፡ አኀዊነ፡ ይኩን።
11 ይትከሀልኑ፡ ይፃእ፡ እምአሐዱ፡ ዐይን። ወእምውስተ፡ አሐቲ፡ ዐዘቅት፡ ይነቅዕኑ፡ ማይ፡ መሪር፡ ወማይ፡ ጥዑም።
12 ይክልኑ፡ አኀዊነ፡ በለስ፡ ዘይተ፡ ፈርየ። ወእመ፡ አኮ፡ ወይን፡ በለሰ፡ ፈርየ። ከማሁኬ፡ ማይኒ፡ መሪር፡ ኢይከውን፡ ጥዑመ። ወማይኒ፡ ጥዑም፡ ኢይከውን፡ መሪረ።
13 ወመኑ፡ ጠቢብ፡ እምኔክሙ፡ ወምኩር። ከመ፡ ያርኢ፡ ምግባሮ፡ በየውሀት፡ ወበጥበብ፡ እምሥነ፡ ግዕዙ።
በእንተ፡ ጥበብ፡ ዘእምላእሉ
14 ወእመሰ፡ ተቃንኦ፡ መሪር፡ ወካሕድ፡ ብክሙ፡ ውስተ፡ ልብክሙ። ኢትትመክሑ፡ ወኢተሐስውዋ፡ ለጽድቅ።
15 ኢኮነት፡ ዛቲ፡ ጥበብ፡ እንተ፡ እምላዕሉ፡ ትወርድ። አላ፡ እምድር፡ እንተ፡ እምነፍሰ፡ አጋንንት።
16 እስመ፡ ኀበ፡ ሀለወ፡ ተቃንኦ። ህየ፡ ሀለወ፡ ሀውክ፡ ወካሕድ፡ ወኵሉ፡ እከየ፡ ምግባር።
17 ወእንተሰ፡ እምላዕሉ፡ ጥበብ፡ ቀዳሚሃ፡ ንጽሕት፡ ይእቲ። እንተ፡ ታስተሰናኡ፡ ወእንተ፡ በዐቅም። ኦሆ፡ በሃሊት፡ ወምልእት፡ ምሕረተ። ወፍሬሃ፡ ሠናይ፡ ዘእንበለ፡ ኑፋቄ፡ አማኒት።
18 ወፍሬሃኒ፡ ዘጽድቅ፡ በሰላም፡ ይዘራዕ፡ ለእለ፡ ይገብርዋ፡ ለሰላም።
=== chapter 4 ===
[ምዕራፍ 4]
በእንተ፡ ፍቁሩ፡ ለዓለም፡ ጸላኢሁ፡ ለእግዚአብሔር
1 እምአይቴ፡ ለክሙ፡ ጸብእ፡ ወቀትል። አኮኑ፡ እም፡ ዝየ፡ እምአፍቅሮ፡ ዝሙት፡ ዘይትገበር፡ ውስተ፡ አንጒዕክሙ።
2 ትፈትዉሂ፡ ወኢትረክቡ፡ ትትቃንኡሂ፡ ወትትቃተሉሂ። ወበእንተዝ፡ ኢትክሉ፡ ድኂነ፡ ትትበአሱሂ፡ ወትጻብኡሂ። ወኢትረክቡ፡ ዘተኀሥሡ፡ እስመ፡ ኢትስእሉ።
3 ትስእሉሂ፡ ወኢይሁቡክሙ፡ እስመ፡ ለእኪት፡ ትስእሉ፡ ለዝሙትክሙ፡ ከመ፡ ተሀቡ።
4 ኦ፡ ዘማውያን፡ ኢተአምሩኑ፡ ከመ፡ ፍቁሩ፡ ለዝ፡ ዓለም፡ ጸላኢሁ፡ ውእቱ፡ ለእግዚአብሔር። እስመ፡ ዘአብደረ፡ ፍቅሮ፡ ለዝ፡ ዓለም፡ ጸላኢሁ፡ ለእግዚአብሔር፡ ይከውን።
5 ወሚመ፡ ይመስለክሙኑ፡ ዘሐሰተ፡ ይብል፡ መጽሐፍ። ከመ፡ ተቃንኦ፡ ያፈቅር፡ መንፈስ፡ ዘየኀድር፡ ላዕሌክሙ።
በእንተ፡ ሞገስ፡ እንተ፡ ተዐቢ
6 ወባሕቱ፡ አምላክነ፡ እንተ፡ ተዐቢ፡ ሞገሰ፡ ይሁበነ። ወበእንተ፡ ዝንቱ፡ ይቤ፡ እስመ፡ ለዕቡያን፡ ይትሄየዮሙ፡ እግዚአብሔር። ወለእለሰ፡ ያቴሕቱ፡ ርእሶሙ፡ ይሁቦሙ፡ ሞገሰ።
7 ኦሆ፡ በልዎ፡ ለእግዚአብሔር፡ ወእንብየ፡ በልዎ፡ ለጋኔን፡ ወይጐይይ፡ እምኔክሙ።
8 ቅረብዎ፡ ለእግዚአብሔር፡ ወይቀርበክሙ። አንጽሑ፡ እደዊክሙ፡ ኃጥኣን፡ ወአንጽሑ፡ ልበክሙ፡ እለ፡ ትናፍቁ፡ ግነዩ።
9 ላሕዉ፡ ወብክዩ፡ ወለሠሐቅክሙኒ፡ ሚጥዎ፡ ውስተ፡ ላሕ። ወትፍሥሕትክሙኒ፡ ውስተ፡ ትካዝ፡ አግብእዎ።
10 አትሕቱ፡ ርእሰክሙ፡ ወያሌዕለክሙ፡ እግዚአብሔር።
በእንተ፡ ተዐቅቦ፡ እምነ፡ ሐሜት
11 ወኢትትሐመዩ፡ በበይናቲክሙ፡ አኀዊነ። እስመ፡ ዘሐመዮ፡ ለካልኡ፡ ሐመዮ፡ ለሕገ፡ እግዚአብሔር። ወዘይግእዝ፡ ካልኦ፡ ሕገ፡ እግዚአብሔር፡ ገአዘ። ወእመሰ፡ ሕጎ፡ ትግእዝ፡ ኢኮንከ፡ ገባሬ፡ ሕግ፡ አላ፡ ኮንከ፡ ገኣዚሃ፡ ለሕግ።
12 እስመ፡ አሐዱ፡ ውእቱ፡ ወሃቢሃ፡ ለሕግ። ወመኰንና፡ ለሕግ፡ ዘውእቱ፡ ይክል፡ አማስኖሂ፡ ወአድኅኖሂ። አንተኬ፡ ምንትኑ፡ አንተ፡ ዘትግእዞ፡ ለካልእከ።
13 ከመ፡ እለ፡ ይብሉ፡ ዮም፡ አው፡ ጌሠመ፡ ነሐውር፡ ውስተ፡ እንታክቲ፡ ሀገር። ወንነብር፡ ውስቴታ፡ ወንትጌበር፡ ወንረብሕ። ወኢየአምሩ፡ ዘይከውን፡ ጌሠመ።
በእንተ፡ ተአምኖ፡ በእግዚአብሔር
14 ምንትኑመ፡ ሕይወትክሙ፡ አኮኑ፡ ጢስ፡ አንትሙ። ዘለምዕር፡ ያስተርኢ፡ ወእምድኅሬሁ፡ ይማስን።
15 ዘእምትቤሉ፡ እመ፡ ሠምረ፡ እግዚአብሔር። ወሐየውነ፡ ንገብር፡ ዘንተ፡ አው፡ ዝክተ።
16 ወይእዜሰ፡ ትትሜክሑ፡ በምግባሪክሙ። ወኵላ፡ ትምክሕት፡ እንተ፡ ከመ፡ ዝ፡ እኪት፡ ይእቲ።
17 ወዘየአምር፡ ገቢሮታ፡ ለሠናይት፡ ወኢይገብራ፡ ኀጢአተ፡ ትከውኖ።
=== chapter 5 ===
[ምዕራፍ 5]
በእንተ፡ ተግሣጽ፡ ለአብዕልት
1 ንዑ፡ ይእዜኒ፡ አብዕልት፡ ወብክዩ። እንዘ፡ ትግዕሩ፡ ላዕለ፡ ሕርትምናክሙ፡ እንተ፡ ሀለዋ፡ ትምጻእክሙ።
2 ብዕልክሙኒ፡ ነቅዘ፡ ወአልባሲክሙኒ፡ ቈንቈነ።
3 ወርቅክሙኒ፡ ወብሩርክሙኒ፡ ዝሕለ፡ ወዛሕሉኒ፡ ስምዐ፡ ይከውን፡ ላዕሌክሙ። ወይበልዖ፡ ለሥጋክሙ፡ ከመ፡ እሳት፡ በእንተ፡ ዘገበርክሙ፡ ለደኃሪ፡ መዋዕል።
4 ናሁ፡ ዐስቦሙ፡ ለገባር፡ ለእለ፡ ሐረስዋ፡ ለምድርክሙ። ሄድክምዎሙ፡ ወዐመፅክምዎሙ፡ ዐስቦሙ፡ ወእለኒ፡ ሄድክምዎሙ፡ የዐወይዉ። ወገዓሮሙኒ፡ ለዐጸድ፡ ቦአ፡ ውስተ፡ እዘኒሁ፡ ለእግዚአብሔር፡ ጸባኦት፡ ወበጽሐ፡ ግፍዕክሙ።
5 ወፈጋዕክሙ፡ ላዕለ፡ ምድር፡ ወአስተትክሙ፡ ወተደለውክሙ፡ ወአሥባሕክሙ፡ ልበክሙ። ከመ፡ ዘያሥብሕ፡ ላሕመ፡ ለዕለተ፡ ጥብሐት።
6 ወተዐደውክሙ፡ ወቀተልክምዎ፡ ለጻድቅ፡ ዘእንበለ፡ ይትቃወመክሙ፡ ወኦሆ፡ ይብለክሙ።
በእንተ፡ ትዕግሥት፡ ብፅዕት
7 ተዐገሡ፡ እንከ፡ አኀዊነ፡ እስከ፡ ደኃሪት፡ ዕለት። አመ፡ ይመጽእ፡ እግዚእክሙ፡ ከመ፡ ሐረሳዊ፡ ዘይጸንሕ፡ ፍሬሃ፡ ለምድር፡ ክብርት። እንዘ፡ ይትዔገሣ፡ ሠርከ፡ ወነግሀ፡ እስከ፡ ትሠዊ፡ ወትፈሪ፡ ሎቱ፡ ወትትዐጸድ።
8 ተዐገሡኬ፡ አንትሙ፡ ወአጽንዑ፡ ልበክሙ። እስመ፡ ቀርበ፡ ምጽአቱ፡ ለእግዚእክሙ።
9 ወኢትግዐሩ፡ አኀዊነ፡ ላዕለ፡ ቢጽክሙ፡ ከመ፡ ኢትትኰነኑ። እስመ፡ ናሁ፡ መኰንን፡ ኀበ፡ መድረከ፡ ኆኅትክሙ፡ ይቀውም፡ ወይጸንሕ።
10 አርአያሃሰ፡ አኀዊነ፡ ለትዕግሥተ፡ ተጽናስክሙ። ብክሙ፡ ነቢያት፡ እለ፡ ተናገሩ፡ በቃሉ፡ ለእግዚአብሔር። ናሁ፡ ናስተበፅዖሙ፡ ለእለ፡ ተዐገሡ።
11 ወሰማዕክሙ፡ ትዕግሥቶ፡ ለኢዮብ። ወርኢክሙ፡ ዘከመ፡ ፈጸመ፡ ሎቱ፡ እግዚአብሔር። እስመ፡ ብዙኅ፡ ምሕረቱ፡ ለእግዚአብሔር፡ ወመስተሣህል፡ ውእቱ።
12 ወእምኵሉሰ፡ ዘይቀድም፡ አኀዊነ፡ ኢትምሐሉ፡ ኢ፡ በሰማይ፡ ወኢ፡ በምድር። ወኢ፡ በካልእ፡ መሐላ፡ ኢትምሐሉ፡ ግሙራ፡ ወኢ፡ በምንትኒ፡ አላ፡ አሐደ፡ ይኩን፡ ቃልክሙ። እመኒ፡ እወ፡ እወ፡ ወእመኒ፡ አልቦ፡ አልቦ። ከመ፡ ኢትትኰነኑ፡ ወኢትባኡ፡ ውስተ፡ ደይን።
በእንተ፡ ጸሎተ፡ ጻድቅ
13 እመ፡ ቦ፡ ዘይቴክዝ፡ ለይጸሊ፡ ወእመ፡ ቦ፡ ዘተፈሥሐ፡ ለይዘምር።
14 ወእመ፡ ቦ፡ ዘይደዊ፡ እምኔክሙ፡ ለይጸውዕ፡ ቀሳውስተ፡ እለ፡ ውስተ፡ ቤተ፡ ክርስቲያን። ወይጸልዩ፡ ላዕሌሁ፡ ወይቅብዕዎ፡ ቅብዐ፡ ጸሎት፡ በስሙ፡ ለእግዚእነ፡ ኢየሱስ፡ ክርስቶስ።
15 ወጸሎተ፡ ሃይማኖት፡ ያሐይዎ፡ ለድዉይ፡ ወያነሥኦ፡ እግዚአብሔር። ወእመኒ፡ ቦቱ፡ ኀጢአት፡ ይትኀደግ፡ ሎቱ።
16 ተኣመኑ፡ በበይናቲክሙ፡ ኀጢአትክሙ፡ ወጸልዩ፡ ላዕለ፡ ቢጽክሙ፡ ከመ፡ ትሕየዉ። ብዙኀ፡ ትረድእ፡ ጸሎቱ፡ ለጻድቅ፡ ትክል፡ ወታሰልጥ።
17 ኤልያስ፡ ዘከማነ፡ ሰብእ፡ ውእቱ፡ ወዘከመ፡ ነሐምም፡ የሐምም። ወጸሎተ፡ ጸለየ፡ ከመ፡ ኢይዝንም፡ ዝናም። ወኢዘንመ፡ ውስተ፡ ምድር፡ ሠለስተ፡ ዓመተ፡ ወስድስተ፡ አውራኀ።
18 ወካዕበ፡ ጸለየ፡ ከመ፡ ይዝንም። ወወሀበ፡ ሰማይ፡ ዝናሞ፡ ወምድርኒ፡ አብቈለት፡ ፍሬሃ።
19 አኀዊነ፡ እመ፡ ቦ፡ ዘስሕተ፡ እምኔክሙ፡ እምጽድቅ። ወእመ፡ ቦ፡ ዘሜጦ፡ እምነ፡ ጌጋዩ።
20 ለያእምር፡ ከመ፡ አድኀነ፡ ርእሶ፡ እምነ፡ ሞት፡ ወከደኖን፡ ለብዙኃት፡ ኀጣውኢሁ።