##### edition  (gez)
በእንተ፡ እግዝእት፡ ወደቂቃ
1 እምነ፡ ቀሲስ፡ ለኅሪት፡ ወለእግዝእት፡ ወለደቂቃ፡ ለእንተ፡ አነ፡ አፈቅራ፡ በጽድቅ። ወበእንተ፡ ዛቲ፡ ጽድቅ፡ አኮ፡ አነ፡ ባሕቲትየ፡ ዘአፈቅራ። አላ፡ እለኒ፡ የአምርዋ፡ ለጽድቅ፡ ኵሎሙ።
2 ወበእንተ፡ ዛቲ፡ ጽድቅ፡ እንተ፡ ትነብር፡ ኀቤነ። ወትሄሉ፡ ምስሌነ፡ ወምስሌነ፡ ይእቲ፡ ለዓለም።
3 ሞገስ፡ ወምሕረት፡ ወሰላም፡ እምኀበ፡ እግዚአብሔር፡ አብ። ወእምኀበ፡ ኢየሱስ፡ ክርስቶስ፡ ወልዱ፡ ለአብ፡ እግዚአብሔር፡ ምስለ፡ ጽድቅ፡ ወተፋቅሮ፡ የሀሉ፡ ምስሌክሙ።
4 ተፈሣሕኩ፡ ጥቀ፡ እስመ፡ ረከብኩ፡ እምደቂቅኪ፡ እለ፡ የሐውሩ፡ በጽድቅ። በከመ፡ ነሣእነ፡ ትእዛዞ፡ እምኀበ፡ አብ።
5 ወይእዜኒ፡ እስእለኪ፡ ኦ፡ እግዝእት። ወአኮ፡ ትእዛዘ፡ ሐዲሰ፡ ዘእጽሕፍ፡ ለኪ። አላ፡ ትእዛዘ፡ ብሊተ፡ እንተ፡ ብነ፡ ትካት፡ ከመ፡ ንትፋቀር፡ በበይናቲነ።
በእንተ፡ ተፈልጦ፡ እመናፍቃን
6 ወዛቲ፡ ይእቲ፡ ተፋቅሮትነ፡ ከመ፡ ንሑር፡ በትእዛዙ፡ ለእግዚአብሔር። ወዛቲ፡ ይእቲ፡ ትእዛዝ፡ ከመ፡ ንሑር፡ ባቲ፡ እንተ፡ ሰማዕክሙ፡ ትካት።
7 እስመ፡ ብዙኃን፡ መስሕታን፡ እለ፡ መጽኡ፡ ውስተ፡ ዓለም። ኢየአምኑ፡ በኢየሱስ፡ ክርስቶስ፡ ከመ፡ መጽአ፡ በሥጋ። ወዝ፡ ውእቱ፡ መስሐቲ፡ ሐሳዌ፡ መሲሕ።
8 ዑቁ፡ ርእሰክሙ፡ ኢትህጐሉ፡ ዘገበርክሙ። አላ፡ ከመ፡ ዐስበ፡ ፍጹመ፡ ትንሥኡ።
9 ኵሉ፡ ዘይናፍቅ፡ ወኢይነብር፡ በትምህርቱ፡ ለክርስቶስ። ኢሀሎ፡ እግዚአብሔር፡ ምስሌሁ። ወዘሰ፡ ይነብር፡ በትምህርቱ፡ ለክርስቶስ፡ በአብ፡ ወበወልድ፡ ሀሎ።
10 ወዘኒ፡ ይመጽእ፡ ኀቤክሙ፡ ወዘንተ፡ ትምህርተ፡ ኢያመጽእ። ኢታብእዎ፡ ቤተክሙ፡ ወበሓሂ፡ ጥቀ፡ ኢትበልዎ።
11 እስመ፡ ዘይቤሎ፡ በሓ፡ ይሳተፎ፡ በምግባሩ፡ እኩይ።
12 ወብዙኅ፡ ብየ፡ ዘእጽሕፍ፡ ለክሙ። ወኢፈቀድኩ፡ በክርታስ፡ ወበማየ፡ ሕመት፡ እጽሐፍ፡ ለክሙ። እስመ፡ እትአመን፡ ከመ፡ እመጽእ፡ ኀቤክሙ። ወአፈ፡ በአፍ፡ እትናገረክሙ፡ ከመ፡ ፍጹመ፡ ይኩን፡ ፍሥሓክሙ።
13 ይኤምኁኪ፡ ደቂቀ፡ እኅትኪ፡ ኅሪት፡ ሞገስ፡ ወተፋቅሮ፡ ምስሌክሙ፡ አሜን።