##### edition  (gez)
=== chapter 1 ===
[Chapter 1]
1 ወፀንዐ፡ ሰሎሞን፡ ወልደ፡ ዳዊት፡ በመንግሥቱ፡ ወእግዚአብሄር፡ አምላኩ፡ ምስሌሁ፡ ወአልዓሎ፡ ወአክበሮ፡ ፈድፋደ።
2 ወይቤ፡ ሰሎሞን፡ ለኵሉ፡ እስራኤል፡ ለርኡሳነ፡ ዓሠርቱ፡ ምእት፡ ወለርኡሳነ፡ ምእት፡ ወለመኳንንት፡ ወለኵሎሙ፡ መላእክት፡ በቅድመ፡ ኵሉ፡ እስራኤል፡ ለመላእክተ፡ አበው፡ ንሑር፡ ውስተ፡ ገባኦን።
3 ወሖረ፡ ሰሎሞን፡ ወኵሉ፡ ማኅበረ፡ እስራኤል፡ ምስሌሁ፡ ውስተ፡ መካን፡ ልዑል፡ ዘውስተ፡ ገባኦን፡ ኀበ፡ ሀለወት፡ ህየ፡ ደብተራ፡ ቤተ፡ ስምዕ፡ ዘእግዚአብሄር፡ እንተ፡ ገብረ፡ ሙሴ፡ ቊልዔሁ፡ ለእግዚአብሄር፡ በገዳም።
4 አላ፡ ታቦተ፡ እግዚአብሄር፡ አዕረገ፡ ዳዊት፡ እምሀገረ፡ ቀርያታርም፡ እስመ፡ አስተዳለወ፡ ላቲ፡ ዳዊት፡ ቤተ፡ በኢየሩሳሌም።
5 ወቤተ፡ ምሥዋዕ፡ እንተ፡ ብርት፡ ዘገብረ፡ ባስልኤል፡ ወልደ፡ ኡርያ፡ ወልዱ፡ ለሁር፡ ህየ፡ ሀሎ፡ ቅድመ፡ ደብተራ፡ እግዚአብሄር፡ ወኃሠሣ፡ ሰሎሞን፡ ወኵሉ፡ ማኅበረ፡ እስራኤል፡ ለታቦተ፡ እግዚአብሄር።
6 ወአዕረጋ፡ ሰሎሞን፡ ህየ፡ ውስተ፡ ቤተ፡ ምሥዋዕ፡ ዘብርት፡ በቅድመ፡ እግዚአብሄር፡ ዘሀሎ፡ ውስተ፡ ምሥዋዕ፡ ወአዕረገ፡ ላዕሌሁ፡ ኵርባናተ፡ ዓሠርተ፡ ምእተ።
7 ወበይእቲ፡ ሌሊት፡ አስተርአዮ፡ እግዚአብሄር፡ ለሰሎሞን፡ ወይቤሎ፡ ሰአል፡ እምኔየ፡ ዘእሁበከ።
8 ወይቤሎ፡ ሰሎሞን፡ ለእግዚአብሄር፡ አንተ፡ እግዚኦ፡ ገበርከ፡ ምስለ፡ ዳዊት፡ አቡየ፡ ዐቢየ፡ ምሕረተ፡ ወአንገሥከኒ፡ እምድኅሬሁ።
9 ወይእዜኒ፡ እግዚኦ፡ አምላኪየ፡ ይኩን፡ እሙነ፡ ነገረ፡ ዚአከ፡ ላዕለ፡ ዳዊት፡ አቡየ፡ እስመ፡ አንተ፡ አንገሥከኒ፡ ላዕለ፡ ሕዝብ፡ ብዙኅ፡ ዘከመ፡ ኆፃ፡ ባሕር።
10 ወይእዜኒ፡ እግዚኦ፡ ጥበበ፡ ወልቡና፡ ሀበኒ፡ በጸአትየ፡ ወበበአትየ፡ በቅድመ፡ ዝንቱ፡ ሕዝብ፡ እስመ፡ አልቦ፡ ዘይክል፡ ኰንኖ፡ ዘንተ፡ ሕዝበ፡ ዓቢየ።
11 ወይቤሎ፡ እግዚአብሄር፡ ለሰሎሞን፡ ህየንተ፡ ዘሐይለከ፡ በልብከ፡ ወዓርገ፡ ዝንቱ፡ ውስተ፡ ልብከ፡ ወኢሰአልከኒ፡ ብዕለ፡ ወንዋየ፡ ወኢ፡ ክብረ፡ ወኢ፡ ነፍሰ፡ ጸላእትከ፡ ወብዙኀ፡ መዋዕለ፡ ኢሰአልከኒ።
12 ወሰአልከኒ፡ ጥበበ፡ ወልቡና፡ ከመ፡ ትኰንኖ፡ ለዝንቱ፡ ሕዝብየ፡ ዘአንገሥኩከ፡ በላዕሌሆሙ፡ ጥበበ፡ ወልቡና፡ እሁበከ፡ ወብዕለ፡ ወንዋየ፡ ወክብረ፡ እሁበከ፡ ዘኢተውህበ፡ ከማከ፡ ለነገሥት፡ ቀደምት፡ ለእለ፡ እምድኅሬከኒ፡ ከመዝ፡ ኢይትወሀቦሙ።
13 ወወረደ፡ ሰሎሞን፡ እምባማ፡ ዘገባኦን፡ ውስተ፡ ኢየሩሳሌም፡ እምቅድመ፡ ደብተር፡ ስምዕ፡ ወነግሠ፡ ሰሎሞን፡ ላዕለ፡ እስራኤል።
14 ወአስተጋብአ፡ ሰሎሞን፡ ሠረገላተ፡ ወመስተፅዕናነ፡ ወኮነ፡ መክብቦሙ፡ ለዓሠርቱ፡ እልፍ፡ ወአርባዕቱ፡ ምእት፡ ሠረገላት፡ ወአፍራስኒ፡ አሐዱ፡ እልፍ፡ ወዕስራ፡ ምእት፡ ወአንበሮሙ፡ ውስተ፡ አህጉር፡ ለሠረገላት፡ ወለሕዝብሰ፡ ምስለ፡ ንጉሥ፡ ውስተ፡ ኢየሩሳሌም።
15 ወአንበረ፡ ሰሎሞን፡ ወርቀ፡ ቀብሩረ፡ ከመ፡ እብን፡ በኢየሩሳሌም፡ ወዕፀወ፡ አርዝ፡ በብሔረ፡ ይሁዳ፡ በከመ፡ ሰጋልው፡ በውስተ፡ አፍላግ፡ ብዙኅ።
16 ወሙፃአ፡ አፍራሲሁ፡ ለሰሎሞን፡ እምድረ፡ ግብዕ፡ እምነቴቁሔ፡ ነጋድያኒሁ፡ ወዝ፡ ውእቱ፡ ግብሩ፡ ወአስትአሁ፡ ለንጉሥ፡ ሰሎሞን፡ እምዓበይተ፡ ሀገር፡ ከመ፡ ይሑሩ፡ ወይሣየጡ።
17 ወዓርጉ፡ ወአምጽኡ፡ ግብዕ፡ አሐደ፡ ሠረገላ፡ በስድስቱ፡ ምእት፡ መፍዴ፡ ብሩር፡ ወፈረሰ፡ አሐደ፡ በምእት፡ ወኃምሳ፡ ወከመዝ፡ ኵሉ፡ ነገሥት፡ ኬጥያውያን፡ ወነገሥተ፡ ሶርያ፡ በበዕብሬቶሙ፡ ያመጽኡ፡ ሎቱ።
=== chapter 2 ===
[Chapter 2]
1 ወይቤ፡ ሰሎሞን፡ ከመ፡ ይሕንፅ፡ ቤተ፡ ለስመ፡ እግዚአብሄር፡ ወይሕንጽ፡ ቤተ፡ ለመንግሥተ፡ ዚአሁ።
2 ወአስተጋብአ፡ ሰሎሞን፡ ሰብዐተ፡ እልፈ፡ እደወ፡ ፀረብተ፡ ወሰምንተ፡ እልፈ፡ ወቀርተ፡ እብን፡ በውስተ፡ ደብር፡ ወእለ፡ ይነድእዎሙ፡ ሠላሳ፡ ምእት፡ ወስድስቱ፡ ምእት።
3 ወፈነወ፡ ሰሎሞን፡ ኀበ፡ ኪራም፡ ናጉሠ፡ ጢሮስ፡ ወይቤ፡ በከመ፡ ገበርከ፡ ምስለ፡ ዳዊት፡ አቡየ፡ ወፈነውከ፡ ሎቱ፡ ዕፀወ፡ ዘግባት፡ ከመ፡ ይሕንዕ፡ ቤተ፡ ከመ፡ ይንበር፡ ውስቴቱ።
4 ወነየ፡ አነ፡ ወልዱ፡ እቤ፡ እሕንፅ፡ ቤተ፡ ለስመ፡ እግዚአብሄር፡ አምላኪየ፡ ወከመ፡ እቀድስ፡ ሎቱ፡ ወከመ፡ እዕጥን፡ ዕጣነ፡ በቅድሜሁ፡ ወምሥያመ፡ በኵሉ፡ ጊዜ፡ በበነግህ፡ ወበበሠርክ፡ ወበበሰናብት፡ ወበበሠርቀ፡ ወርኅ፡ ወበበዓላተ፡ እግዚአብሄር፡ አምላክነ፡ እስከ፡ ለዓለም፡ ዝንቱ፡ ውእቱ፡ በውስተ፡ እስራኤል።
5 ወቤትኒ፡ ዘአነ፡ አሐንዕ፡ ዓቢይ፡ ውእቱ፡ እስመ፡ ዓቢይ፡ ውእቱ፡ እግዚአብሄር፡ አምላክነ፡ እምኵሉ፡ አማልክት።
6 ወመኑ፡ ዘይክል፡ ሐኒፀ፡ ሎቱ፡ ቤተ፡ እስመ፡ ሰማይ፡ ወሰማይየ፡ ሰማያት፡ ኢይክሉ፡ ጸዊረ፡ ስብሐተ፡ ዚአሁ፡ ወመኑ፡ አነ፡ ከመ፡ እክል፡ ሐኒፀ፡ ሎቱ፡ ቤተ፡ ዘእንበለ፡ ከመ፡ እዕጥን፡ ሎቱ፡ ዕጣነ፡ በቅድሜሁ።
7 ወይእዜኒ፡ ፈኑ፡ ሊተ፡ ብእሴ፡ ጠቢበ፡ ዘየአምር፡ ወዘይክል፡ ለቢጠ፡ በወርቅ፡ ወበብሩር፡ ወበብርት፡ ወበሐፂን፡ ወበኅብረ፡ ሜላት፡ ወበኅብረ፡ ለይ፡ ወበያክት፡ ወዘየአምር፡ ወይክል፡ ገሊፈ፡ ምስለ፡ ጠቢባን፡ እለ፡ ሀለዉ፡ ምስሌየ፡ ውስተ፡ ይሁዳ፡ ወኢየሩሳሌም፡ ዘቸስተዳለወ፡ ዳዊት፡ አቡየ።
8 ወፈኑ፡ ሊተ፡ ዕፀ፡ ዘግባ፡ እምሊባኖስ፡ ወሕቊ፡ ወጳውቄና፡ እስመ፡ አነ፡ አአምር፡ ወእጤይቅ፡ ከመ፡ አግብርቲከ፡ የአምሩ፡ ገዚመ፡ ዕፀው፡ እምውስተ፡ ሊባኖስ።
9 ወናሁ፡ አግብርቲከ፡ ምስለ፡ አግብርትየ፡ ከመ፡ ይሑሩ፡ ወያስተዳልዉ፡ ሊተ፡ ዕፀወ፡ ብዙኅ፡ እስመ፡ ቤተ፡ ዘአነ፡ አሐንፅ፡ ዓቢይ፡ ወክቡር።
10 ወናሁ፡ ወሀብኩከ፡ ለእለ፡ ይትቀነዩ፡ ወለእለ፡ ይገዝሙ፡ ዕፀወ፡ ሲሳዮሙ፡ ሥርናየ፡ በጸጋ፡ ለአግብርቲከ፡ ክልኤተ፡ እልፈ፡ በመስፈርተ፡ ቆሮስ፡ ወሰገመ፡ ክልኤተ፡ እልፈ፡ በመስፈርተ፡ ቆሮስ፡ ወወይነ፡ ክልኤተ፡ እልፈ፡ በመስፈርተ፡ ኔባል፡ ወዘይተኒ፡ ክልኤተ፡ እልፈ፡ በመስፈርተ፡ ባዶስ።
11 ወጸሐፈ፡ ኪራም፡ ንጉሠ፡ ጢሮስ፡ ወፈነወ፡ ኀበ፡ ሰሎሞን፡ እንዘ፡ ይብል፡ አፍቂሮ፡ ወኃሪዮ፡ ኪያከ፡ እግዚአብሄር፡ ወሕዝበ፡ ዚአሁ፡ ሤመከ፡ ላዕሌሆሙ፡ ንጉሠ።
12 ወይቤ፡ ኪራም፡ ነጉሠ፡ ጢሮስ፡ ይትባረክ፡ እግዚአብሄር፡ አምላከ፡ እስራኤል፡ ዘገብረ፡ ሰማየ፡ ወምድረ፡ ዘወሀቦ፡ ለዳዊት፡ ንጉሥ፡ ወልደ፡ ጠቢበ፡ ወለባዌ፡ ወዘየአምር፡ ጥበበ፡ ወልቡና፡ ከመ፡ ይሕንፅ፡ ቤተ፡ ለስመ፡ እግዚአብሄር፡ ወቤተ፡ መንግሥተ፡ ዚአሁ።
13 ወይእዜኒ፡ ፈኖኩ፡ ለከ፡ ብእሴ፡ ጠቢበ፡ ዘየአምር፡ ጥበበ፡ ወልባዌ፡ ኪራምሃ፡ ቊልዔየ።
14 ወዘመዳ፡ ለእሙ፡ እምአዋልደ፡ ዳን፡ ወአቡሁኒ፡ ብእሲ፡ እምጢሮስ፡ ወየአምር፡ ተቀንዮ፡ ወለቢጠ፡ በወርቅ፡ ወበብሩር፡ ወበብርት፡ ወበሐፂን፡ ወበእብን፡ ወበፅፀው፡ ወይክል፡ አኒመ፡ ሜላት፡ በምክንት፡ ወአልባስ፡ ክቡር፡ ወአልባሰ፡ ለይወይክል፡ ገሊፈ፡ አምሳል፡ ወይሔሊ፡ ወይሌቡ፡ ኵሎ፡ ግብረ፡ ዘአንተ፡ መጠውኮ፡ ለተቀንዮ፡ ምስለ፡ ጠቢባኒከ፡ ወጠበብተ፡ ዳዊት፡ እግዚእየ፡ አቡከ።
15 ወይእዜኒ፡ ሥርናየ፡ ወሰገመ፡ ወዘይተ፡ ወወይነ፡ ዘይቤ፡ እግዚእየ፡ ከመ፡ ይፈኑ፡ ለአግብርቲሁ፡ መጠኑ።
16 ወንሕነሂ፡ ንገዝም፡ ዕፀወ፡ እምሊባኖስ፡ ወኵሎ፡ ከመ፡ ዘያፈትዉከ፡ ወናመጽኦሙ፡ ወንገብሮሙ፡ አርማሰ፡ እንተ፡ ባሕር፡ እስከ፡ ብሔረ፡ ኢዮጴ፡ ወአንተ፡ ትትሜጠዎሙ፡ እምህየ፡ ወታበጽሖሙ፡ ኀበ፡ ኢየሩሳሌም።
17 ወአስተጋብአ፡ ሰሎሞን፡ ንጉሥ፡ ኵሎ፡ እደወ፡ ፈላስያነ፡ እለ፡ ውስተ፡ ምድረ፡ እስራኤል፡ እለ፡ ኢተሐሰቡ፡ ወኢተኈለቁ፡ ምስለ፡ ዘኈለቈ፡ ዳዊት፡ አቡሁ፡ ወተረክበ፡ መክብቦሙ፡ ዓሠርቱ፡ እልፍ፡ ወኃምስቱ፡ እልፍ፡ ወሠላሳ፡ ምእት፡ ወስድስቱ፡ ምእት።
18 ወረሰየ፡ እምውስቴቶሙ፡ ሰብዐተ፡ እልፈ፡ ፀወርተ፡ ወሰመንተ፡ እልፈ፡ ወቀርተ፡ እብን፡ ወሠላሳ፡ ምእተ፡ ወስድስተ፡ ምእተ፡ እለ፡ ይነድእዎሙ፡ ወይቀንይዎሙ፡ ለሕዝብ።
=== chapter 3 ===
[Chapter 3]
1 ወአኃዘ፡ ሰሎሞን፡ ንጉሥ፡ ከመ፡ ይሕንፅ፡ ቤተ፡ ለስመ፡ እግዚአብሄር፡ በኢየሩሳሌም፡ በደብረ፡ አሞርያ፡ በኀበ፡ አስተርአዮ፡ እግዚአብሄር፡ ለዳዊት፡ አቡሁ፡ ውስተ፡ መካነ፡ ዘአስተዳለወ፡ ዳዊት፡ በዓው፡ ኦርና፡ ኢያቡሳዊ።
2 ወአኃዘ፡ ሰሎሞን፡ ከመ፡ ይሕንፅ፡ ቤተ፡ ለስመ፡ እግዚአብሄር፡ አምላኩ፡ በካልእ፡ ወርኅ፡ በራብዕ፡ ዓመተ፡ መንግሥቱ፡ ለሶሎሞን።
3 ወከመዝ፡ አኃዘ፡ ሰሎሞን፡ ከመ፡ ይሕንፅ፡ ቤተ፡ ለስመ፡ እግዚአብሄር፡ አምላኩ፡ ኑኁ፡ በአምጣነ፡ እመተ፡ ኬንያ፡ መስፈርተ፡ ቀዳማይ፡ አምጣነ፡ ምድሩ፡ ስሳ፡ በእመት፡ ቆሙ፡ ወራኅቡ፡ ዕሥራ፡ በእመት።
4 ወኤላምኒ፡ አንፃረ፡ ቤተ፡ ዘገጸ፡ ኑኁ፡ ራኅቡ፡ ለቤተ፡ ዕሥራ፡ በእመት፡ ወቆሙኒ፡ ምእት፡ ወዕሠራ፡ በእመት፡ ወለበጦ፡ እንተ፡ ውስጡ፡ በወርቅ፡ ጽሩይ።
5 ወለቤትሰ፡ ዓቢይ፡ አውደዶ፡ ወአጽንዖ፡ በዕፀወ፡ ዘግባት፡ ወለበጦ፡ ሎቱኒ፡ በወርቅ፡ ጽሩይ፡ ወገለፈ፡ ላዕሌሁ፡ በቀልተ፡ ወአስካለ።
6 ወአሠርገዎ፡ ለውእቱ፡ ቤተ፡ እምዕንቊ፡ ክቡር፡ ለክብር፡ ወበወርቅ፡ ጽሩይ፡ እምወርቅ፡ ዘእምፓሩሄም።
7 ወአልበጦ፡ ለውእቱ፡ ቤተ፡ ወለአረፋቲሁ፡ ወለአናቅጺሁ፡ ወለመሳክዊሁ፡ ወለኅዋኅዊሁ፡ በወርቅ፡ ጽሩይ፡ ወገለፈ፡ በላዕሌሁ፡ ለውእቱ፡ አረፍት፡ አምሳለ፡ ኪሩቤል።
8 ወገብረ፡ ሎቱ፡ ለቤተ፡ ቅድስተ፡ ቅዱሳን፡ ወኑኁ፡ ለውእቱ፡ ቤት፡ ዕሥራ፡ በእመት፡ ወርኅቡ፡ ዕሥራ፡ በእመት፡ ወአለበጦሙ፡ በወርቅ፡ ጽሩይ፡ ለኪሩቤል፡ በመካልየ፡ ወርቅ፡ ስድስቱ፡ ምእት።
9 ወመክብበ፡ ቅትራቲሁ፡ ለለአሐዱ፡ ኃማሳ፡ ዲናረ፡ ወርቅ፡ ወለጽርሑኒ፡ አልበጦ፡ በወርቅ፡ ንጹሕ።
10 ወገብረ፡ ውስተ፡ ቤተ፡ ቅድስተ፡ ቅዱሳን፡ ክልኤተ፡ ኪሩቤለ፡ እምዕፅ፡ ወገለፎሙ፡ ወቀፈሎሙ፡ በወርቅ።
11 ወኑኀ፡ ክነፊሆሙ፡ ለኪሩቤል፡ ዕሥራ፡ በእመት፡ ወአሐዱ፡ ክንፉ፡ ለኪሩብ፡ ኑኁ፡ ኃምስቱ፡ በእመት፡ እስከ፡ ይለክፍ፡ አረፍተ፡ ቤተ፡ ወካልእ፡ ክንፉ፡ ለኪሩብ፡ ኑኁ፡ ኃምስቱ፡ በእመት፡ እስከ፡ ይለክፍ፡ አረፍተ፡ ቤተ።
12 ሣልስ፡ ክንፈ፡ ኪሩብ፡ ኑኁ፡ ኃምስቱ፡ በእመት፡ እስከ፡ ይለክፍ፡ አረፍተ፡ ቤተ፡ ወራብዕ፡ ክንፈ፡ ኪሩብ፡ ኃምስቱ፡ በእመት፡ እስከ፡ ይለክፍ፡ ክንፈ፡ ኪሩብ፡ ካልእ።
13 ወክነፊሆሙሰ፡ ለኪሩቤል፡ ስፉሐን፡ ወርቡባን፡ ወይትላከፉ፡ በበይናቲሆሙ፡ ወእሙንቱሰ፡ ኪሩቤል፡ ይቀውሙ፡ በእገሪሆሙ፡ ወገጾሙሰ፡ ይኔጽር፡ መንገለ፡ ቤተ፡ እግዚአብሄር።
14 ወገብረ፡ መንጦላዕተ፡ እምያክንት፡ ወእሜላት፡ ወእምለይ፡ ወእምሲራይ፡ ወአእነመ፡ ላዕሌሁ፡ ለውእቱ፡ መንጦላዕት፡ አምሳለ፡ ኪሩቤል።
15 ወገብረ፡ አንፃረ፡ ቤተ፡ ችግዚአብሄር፡ ክልኤተ፡ አዕማደ፡ ወሠላሳ፡ ወስድስቱ፡ በእመት፡ ኑኁ፡ ወአርእስቲሆሙ፡ ለእሙንቱ፡ አዕማድ፡ በበኃምስቱ፡ በእመት።
16 ወገብረ፡ ሲራሲሮተ፡ በውስተ፡ ዳቤር፡ ወአንበሮ፡ መልዕልተ፡ አርእስቲሆሙ፡ ለእልክቱ፡ አዕማድ፡ ወገብረ፡ ምእተ፡ ሮማናተ፡ ወአንበሮሙ፡ መልዕልተ፡ ሲራሲሮት።
17 ወዓቀሞሙ፡ ለአዕማድ፡ አንፃረ፡ ቤተ፡ እግዚአብሄር፡ አሐዱ፡ መንገለ፡ የማን፡ ወአሐዱ፡ መንገለ፡ ጸጋም፡ ወሰመዮ፡ ስሞ፡ ለዓምድ፡ ዘመንገለ፡ የማን፡ ርትዕ፡ ወሰመዮ፡ ስሞ፡ ለዓምድ፡ ዘመንገለ፡ ጸጋም፡ ጽንዕ።
=== chapter 4 ===
[Chapter 4]
1 ወገብረ፡ ቤተ፡ ምስዋዕ፡ ዘብርት፡ ኑኁ፡ ዕሥራ፡ በእመት፡ ወራኅቡ፡ ዕሥራ፡ በእመት፡ ወቆሙ፡ ዕሥራ፡ በእመት።
2 ወካዕበ፡ ገብረ፡ ባሕረ፡ እንተ፡ ብርት፡ ስብክተ፡ ዓሠርቱ፡ በእመት፡ አምጣና፡ ወክዑብ፡ ኵለንታሃ፡ ወዐውዳ፡ ሠላሳ፡ በእመት።
3 ወአምሳለ፡ አልሕምት፡ መትሕተ፡ ዓውዳ፡ ወይሜግብዋ፡ ወየዓውድዋ፡ ዓሠርቱ፡ በመስፈርተ፡ እመት፡ ክበበ፡ ባሕር፡ ወክልኤ፡ ዖታ፡ አልሕምት፡ ግቡራን፡ ግብረ፡ ስብኮ።
4 ወገብሩ፡ ሎሙ፡ ዓሠርተ፡ ወክልኤተ፡ አልሕምተ፡ ወሠለስቱ፡ ይኔጽሩ፡ መንገለ፡ ዓረብ፡ ወሠለስቱ፡ ይኔጽሩ፡ መንገለ፡ ሰሜን፡ ወሠለስቱ፡ ይኔጽሩ፡ መንገለ፡ ደቡብ፡ ወሠለስቱ፡ ይኔጽሩ፡ መንገለ፡ ጽባሕ፡ ወባሕርሰ፡ ስብክት፡ ንብርት፡ መልዕልቴሆሙ፡ ወድኅሬሆሙ፡ ለእልክቱ፡ አልሕምት፡ ይኔጽር፡ ውስጣ።
5 ወስዝር፡ ግዙፋ፡ ለይእቲ፡ ባሕር፡ እንተ፡ ብርት፡ ወከንፈራ፡ ከመ፡ ከንፈረ፡ ጽዋዕ፡ ወግሉፍ፡ ላዕሌሃ፡ አምሳለ፡ ሠርፀ፡ ሰንከሩር፡ ወታገምር፡ ሠላሳ፡ ምእተ፡ ቀሱተ፡ ወገብራ፡ ወፈጸማ።
6 ወገብረ፡ ካዕበ፡ ምሕፃባተ፡ ዓሠርተ፡ ወአንበረ፡ ኃምስተ፡ በየማን፡ ወኃምስተ፡ በጸጋም፡ ከመ፡ ይሕፅቡ፡ ውስቴቶሙ፡ ግብረ፡ መሥዋዕት፡ ወአእዳው፡ ወለባሕርኒ፡ ከመ፡ ይትሐፀቡ፡ ውስቴታ፡ ካህናት።
7 ወዓዲ፡ ገብረ፡ ዓሠርተ፡ መኃትወ፡ ዘወርቅ፡ በከመ፡ ሥርዓቶሙ፡ ወአንበሮሙ፡ ውስተ፡ ቤተ፡ እግዚአብሄር፡ ለኃምስቱ፡ በየማን፡ ወለኃምስቱ፡ በጸጋም።
8 ወገብረ፡ ዓሠርተ፡ ማእዳተ፡ ዘወርቅ፡ ወአንበረ፡ ውስተ፡ ቤተ፡ እግዚአብሄር፡ ዘሐነፀ፡ ኃምስተ፡ በየማን፡ ወኃምስተ፡ በጸጋም፡ ወገብረ፡ ካዕበ፡ ጽዋዓተ፡ ወርቅ፡ ምእተ።
9 ወገብረ፡ ካዕበ፡ ዓፀደ፡ ለካህናት፡ ወዓፀደ፡ ዓቢየ፡ ወገብረ፡ ሎቱ፡ ኃዋኅወ፡ ወመሳክወ፡ ቅቡዓነ፡ ብርት።
10 ወለባሕርኒ፡ አንበራ፡ ውስተ፡ ማዕዘንተ፡ ቤት፡ መንገለ፡ የማን፡ ዘመንገለ፡ ጽባሕ።
11 ወገብረ፡ ኪራም፡ ፍያላተ፡ ወጻሕራተ፡ ወመዳምሃተ፡ ዘቤተ፡ ምሥዋዕ፡ ወኵሉ፡ ንዋየ፡ ግብረ፡ ዚአሁ፡ ወገብረ፡ ወፈጸመ፡ ኪራም፡ ኵሎ፡ ግብረ፡ ቅኔ፡ ዘገብረ፡ ለንጉሥ፡ ሰሎሞን፡ ውስተ፡ ቤተ፡ እግዚአብሄር።
12 ወገብረ፡ ክልኤተ፡ አዕማደ፡ ወመልዕልቴሆሙ፡ ግላተ፡ ዘኮታሪት፡ መልዕልተ፡ አርእስቲሆሙ፡ ለእልክቱ፡ አዕማድ፡ ወገብረ፡ ካዕበ፡ ክልኤተ፡ መሣግረ፡ ከመ፡ ይክድና፡ አርእስተ፡ ኮታሪት፡ እለ፡ ሀለዋ፡ ንቡራተ፡ መልዕልተ፡ አርእስቲሆን፡ ለእልክቱ፡ ክልኤቱ፡ አዕማድ።
13 ወገብረ፡ ካዕበ፡ አርባዕተ፡ ምእተ፡ ጸናጽለ፡ ዘወርቅ፡ ዘአውደደ፡ ዲቤሆሙ፡ ለእልክቱ፡ መሣግር፡ ወክልኤተ፡ ምእተ፡ ዖታ፡ ሮማን፡ ዘወርቅ፡ ወአንበሮሙ፡ ውስተ፡ አሐዱ፡ እምእልክቱ፡ መሳግር፡ ከመ፡ ይክድን፡ እልክተ፡ ክልኤተ፡ ግላተ፡ ወኮታሪተ፡ እለ፡ ሀለዋ፡ መልዕልተ፡ እልክቱ፡ አዕማድ።
14 ወገብረ፡ ካዕበ፡ ሜኮኖተ፡ ዓሠርተ፡ ወገብረ፡ ምሕፃባተ፡ ካዕበ፡ መልዕልቴሆሙ፡ ለክልኤቱ፡ ሜኮኖት።
15 ውእንታክተ፡ አሐተ፡ ባሕረ፡ ወዓሠርተ፡ ወክልኤተ፡ አልሕምተ፡ እለ፡ የቀውሙ፡ መትሕቴሃ።
16 ወምሕፃባተ፡ እግር፡ ወምሕፃባተ፡ እደው፡ ወፃሕራተ፡ ወመኆስሰ፡ ሥጋ፡ ወኵሎ፡ ግብረ፡ ዘገብረ፡ ኪራም፡ ወአዕረገ፡ ሎቱ፡ ለሰሎሞን፡ ንጉሥ፡ ለቤተ፡ እግዚአብሄር፡ ብርተ፡ ንጹሐ።
17 በደወለ፡ ዮርዳኖስ፡ በህየ፡ ሰበኮሙ፡ ንጉሥ፡ በግዘፈ፡ ምድር፡ በማእከለ፡ ሰኮት፡ ወበማእከለ፡ ሴድራ።
18 ወገብረ፡ ሰሎሞን፡ ዘንተ፡ ኵሎ፡ ንዋያተ፡ ወገብረ፡ ብዙኀ፡ ፈድፋደ፡ ወዘኢይትኌለቊ፡ ብዙኀ፡ ብርተ።
19 ወገብረ፡ ሰሎሞን፡ ኵሎ፡ ንዋያተ፡ ቤተ፡ እግዚአብሄር፡ ወቤተ፡ ምሥዋዕ፡ ዘወርቅ፡ ወማእዳተ፡ ወመልዕልቴሆሙ፡ ኅብስተ፡ ገጽ።
20 ወተቅዋመ፡ ማኀትው፡ ወመኃትወ፡ እለ፡ ይበርሃ፡ በከመ፡ ሕግ፡ ወሥርዓት፡ አንፃረ፡ ዳቤር፡ እምወርቅ፡ ጽሩይ፡ ወንጡፍ።
21 ወተቅዋማተ፡ መኀትው፡ ወመኃትወ፡ እለ፡ መልዕልቴሆሙ፡ ወጽዋዓተ፡ ወምቅራባተ፡ ወአጽሕልተ፡ ግብር፡ ዘወርቅ፡ ጽሩይ፡ ወንጡፍ።
22 ወኆኅተ፡ ቤተ፡ እግዚአብሔር፡ ውሳጢተ፡ ወማዕፆ፡ ቤት፡ እንተ፡ ታበውእ፡ ውስተ፡ ቅድሳተ፡ ቅዱሳን፡ በውስተ፡ ቤት፡ ወቤተ፡ ምሥዋዕ፡ ዘቀርቅ፡ ወተፈጸመ፡ ኵሉ፡ ግብር፡ ወቅኔ፡ ዘገብረ፡ ሰሎሞን፡ ለቤተ፡ እግዚአብሔር።
=== chapter 5 ===
[Chapter 5]
1 ወአብአ፡ ሰሎሞን፡ ንጉሥ፡ ቅድሳተ፡ ዳዊት፡ አቡሁ፡ ወርቀኒ፡ ወብሩረኒ፡ ወኵሎ፡ ንዋየ፡ ብሩር፡ ዘአብአ፡ ዳዊት፡ ለመዛግብተ፡ ቤተ፡ እግዚአብሔር።
2 ወአሜሃ፡ አስተጋብአ፡ ንጉሥ፡ ሰሎሞን፡ ኵሎ፡ መላህቅተ፡ እስራኤል፡ ወኵሎ፡ መላእክተ፡ ነገድ፡ ወኵሎ፡ መሳፍንተ፡ አበው፡ ዘደቂቀ፡ እስራኤል፡ በኢየሩሳሌም፡ ከመ፡ ያዕርጉ፡ ታቦተ፡ ትእዛዙ፡ ለእግዚአብሔር፡ እምሀገረ፡ ዳዊት፡ እንተ፡ ስማ፡ ጽዮን።
3 ወተጋብኡ፡ ኀበ፡ ንጉሥ፡ ሰሎሞን፡ ኵሎሙ፡ እደወ፡ እስራኤል፡ በበዓል፡ ወዝንቱ፡ ውእቱ፡ ወርኅ፡ ሳብዕ።
4 ወመጽኡ፡ ኵሎሙ፡ መላህቅተ፡ እስራኤል፡ ወነሥእዋ፡ ኵሎሙ፡ ሌዋውያን፡ ለታቦት።
5 ወአዕረግዋ፡ ለይእቲ፡ ታቦት፡ ወለደብተራ፡ ስምዕ፡ ወለኵሉ፡ ንዋያተ፡ ግብር፡ ዘቅድሳት፡ ዘሀሎ፡ ውስተ፡ ደብተራ፡ ወአዕረግዋ፡ ካህናት፡ ወሌዋውያን።
6 ወሰሎሞን፡ ንጉሥ፡ ወኵሎሙ፡ ማኅበረ፡ እስራኤል፡ ወኵሎሙ፡ ፈራህያነ፡ እግዚአብሔር፡ በቅድመ፡ ቤተ፡ እግዚአብሔር፡ ከመ፡ ይሡዑ፡ አልሕምተ፡ ወአባግዐ፡ ወአጣሌ፡ ዘአልቦ፡ ኍልቊ፡ ወመስፈርት፡ ወአልቦሙ፡ ሐሳብ፡ እምብዝኆሙ።
7 ወአብእዋ፡ ካህናት፡ ለታቦተ፡ ትእዛዘ፡ እግዚአብሔር፡ ውስተ፡ መካና፡ ዘአስተዳለዉ፡ ላቲ፡ በዳቤር፡ ውስተ፡ ቅድስተ፡ ቅዱሳን፡ መትሕተ፡ ክነፊሆሙ፡ ለኪሩቤል።
8 ወሀለዉ፡ እሙንቱ፡ ኪሩቤል፡ ስፉሐን፡ ክነፊሆሙ፡ መልዕልቴሃ፡ ለይእቲ፡ መካነ፡ ታቦተ፡ ትእዛዙ፡ ለእግዚአብሔር፡ ወይከድንዋ፡ ኪሩቤል፡ ታቦተ፡ እግዚአብሔር፡ ዲበ፡ ፍጽማ፡ ለይእቲ፡ ታቦት፡ እምላዕሉ።
9 ወእኁዝ፡ በፍጽማ፡ ወይትናጸራ፡ አርእስቲሆን፡ ወሙባኦን፡ እምቤተ፡ ቅድሳት፡ አንፃረ፡ ዳቤር፡ ወኢይትኔጸራ፡ አፍኣ፡ ወሀለዋ፡ ህየ፡ እስከ፡ ዛቲ፡ ዕለት።
10 ወአልቦ፡ ዘሀሎ፡ ውስተ፡ ይእቲ፡ ታቦት፡ ዘእንበለ፡ ክልኤቱ፡ አብላቅ፡ ዘአንበረ፡ ሙሴ፡ በደብረ፡ ኮሬብ፡ ዘውስቴቶሙ፡ ሠርዐ፡ እግዚአብሔር፡ ለደቂቀ፡ እስራኤል፡ አመ፡ ይወጽኡ፡ እምድረ፡ ግብጽ።
11 ወኮነ፡ እምድኅረ፡ ወፅኡ፡ ካህናት፡ እምቤተ፡ ቅድሳት፡ እስመ፡ ኵሎሙ፡ ካህናት፡ እለ፡ ተረክቡ፡ በህየ፡ ተቀደሱ፡ ወኮኑ፡ ስሙያነ፡ ውስተ፡ ዕብሬት።
12 ወሌዋውያንሰ፡ መዘምራን፡ ኵሎሙ፡ ደቂቀ፡ አሳፍ፡ ወኤማን፡ ወኤዶትም፡ ወደቆሙ፡ ወአኃዊሆሙ፡ እለ፡ ይለብሱ፡ አልባሰ፡ ሢራይ፡ በጸናጽል፡ ወበከበሮ፡ ወበብፅዛ፡ ወበመሰንቆ፡ ይቀውሙ፡ መንገለ፡ ጽባሕ፡ ዘቤተ፡ ምሥዋዕ፡ ወምስሌሆሙኒ፡ ካህናት፡ ምእት፡ ወዕሥራ፡ ይነፍሑ፡ በአቅርንት።
13 ወኮነ፡ ቃል፡ ዓቢይ፡ ወድምፅ፡ ሶበ፡ ይነፍሑ፡ በእሉ፡ አቅርንት፡ ወሶበ፡ ዘመሩ፡ ኵሎሙ፡ ዓረዩ፡ በአሐቲ፡ ቃል፡ ከመ፡ ይግነዩ፡ ወይሰብሕዎ፡ ለእግዚአብሔር፡ ወአልዓሉ፡ ቃሎሙ፡ በእሉ፡ አቅርንት፡ ወበብፅዛ፡ ወበጸናጽል፡ ወበመኃልይ፡ እንዘ፡ ይብሉ፡ ግነዩ፡ ለእግዚአብሔር፡ እስመ፡ ኄር፡ እስመ፡ ለዓለም፡ ምሕረቱ፡ ወቤተ፡ እግዚአብሔርሰ፡ መልአት፡ ደመና፡ ወስብሐተ፡ እግዚአብሔር፡ ከደና።
14 ወኢክህሉ፡ ዳግመ፡ ቀዊመ፡ ካህናት፡ ከመ፡ ይትለአኩ፡ እምቅድመ፡ ውእቱ፡ ደመና፡ እስመ፡ መልአ፡ ስብሐተ፡ እግዚአብሔር፡ አምላከ፡ እስራኤል።
=== chapter 6 ===
[Chapter 6]
1 አሜሃ፡ ይቤ፡ ሰሎሞን፡ እግዚአብሔር፡ ነበበ፡ ወይቤ፡ ከመ፡ ይኅድር፡ ውስተ፡ አውሎ።
2 ወአንሰ፡ ሐነጽኩ፡ ለስመ፡ ዚአሁ፡ ቤተ፡ መቅደስ፡ ወድልወ፡ ለማኅደሩ፡ ለዓለም።
3 ወሜጠ፡ ገጾ፡ ንጉሥ፡ ሰሎሞን፡ ወባረከ፡ ኵሎ፡ ማኅበረ፡ እስራኤል፡ እንዘ፡ ይቀውሙ።
4 ወይቤ፡ ይትባረክ፡ እግዚአብሔር፡ አምላከ፡ እስራኤል፡ ዘተናገረ፡ በአፈ፡ ዚአሁ፡ ኀበ፡ ዳዊት፡ ወበእደወ፡ ዚአሁ፡ ፈጸመ፡ እንዘ፡ ይብል።
5 እምፅለት፡ እንተ፡ ዓርጉ፡ ሕዝብ፡ ዚአየ፡ እምድረ፡ ግብፅ፡ ኢኀረይኩ፡ በሀገረ፡ እምኵሉ፡ ነገደ፡ እስራኤል፡ ከመ፡ ይሕንጹ፡ ሊተ፡ ቤተ፡ ከመ፡ ይኩን፡ ስምየ፡ በህየ፡ ወኢኃረይኩ፡ ብእሴ፡ ከመ፡ ይኩን፡ መጋቤ፡ ላዕለ፡ ሕዝበ፡ ዚአየ፡ እስራኤል።
6 ወኀረይኩ፡ በኢየሩሳሌም፡ ከመ፡ ይሕንፁ፡ ሊተ፡ ቤተ፡ ከመ፡ ይሰመይ፡ ስምየ፡ በህየ፡ ወኃረይክዎ፡ ለዳዊት፡ ከመ፡ ይኩን፡ ንጉሠ፡ ላዕለ፡ ሕዝብየ፡ እስራኤል።
7 ወሐለየ፡ ወዓርገ፡ ውስተ፡ ልበ፡ ዳዊት፡ አቡየ፡ ከመ፡ ይሕንፅ፡ ቤተ፡ ለስመ፡ እግዚአብሔር፡ አምላከ፡ እስራኤል።
8 ወይቤ፡ እግዚአብሔር፡ ኀበ፡ ዳዊት፡ አቡየ፡ እስመ፡ ሐለይከ፡ ወዓርገ፡ ውስተ፡ ልብከ፡ ከመ፡ ትሕንፅ፡ ቤተ፡ ለስመ፡ ዚአየ፡ ሠናየ፡ ገበርከ፡ እስመ፡ ሐለይከ፡ በልብከ።
9 ወባሕቱ፡ አንተ፡ ኢተሐንጽ፡ ሊተ፡ ቤተ፡ ለስምየ፡ አላ፡ ወልድከ፡ ዘወጽአ፡ እምቌከ፡ ውእቱ፡ የሐንጽ፡ ሊተ፡ ቤተ፡ ለስምየ።
10 ወአቀመ፡ እግዚአብሔር፡ ቃለ፡ ዚአሁ፡ ወተናገረ፡ ወተንሣእኩ፡ ህየንተ፡ ዳዊት፡ አቡየ፡ ወነበርኩ፡ ዲበ፡ መንበረ፡ ዳዊት፡ ንጉሠ፡ እስራኤል፡ በከመ፡ ነበበ፡ እግዚአብሔር፡ ወሐነጽኩ፡ ቤተ፡ ለስመ፡ እግዚአብሔር፡ አምላከ፡ እስራኤል።
11 ወአንበርኩ፡ ህየ፡ ታቦተ፡ እንተ፡ ሀለወ፡ ውስቴታ፡ ትእዛዝ፡ ወኪዳነ፡ እግዚአብሔር፡ ዘተካየዶሙ፡ ለእስራኤል፡ ሕዝቡ።
12 ወቆሙ፡ አንፃረ፡ ቤተ፡ ምሥዋዕ፡ ዘእግዚአብሔር፡ በቅድመ፡ ኵሉ፡ ማኅበረ፡ እስራኤል፡ ወሰፍሐ፡ እደዊሁ።
13 ወገብረ፡ ሰሎሞን፡ መዓርገ፡ ዘብርት፡ ወአቀሞ፡ ማእከለ፡ ዓፀደ፡ ቤተ፡ እግዚአብሔር፡ ኃምስቱ፡ በእመት፡ ኑኁ፡ ወኃምስቱ፡ በእመት፡ ግድሙ፡ ወኃምስቱ፡ በእመት፡ ቆሙ፡ ወቆመ፡ መልዕልቴሁ፡ ወሰገደ፡ በብረኪሁ፡ በቅድመ፡ ኵሉ፡ ማኅበረ፡ እስራኤል፡ ወሰፍሐ፡ እደዊሁ፡ ወአልዓለ፡ ውስተ፡ ሰማይ።
14 ወይቤ፡ እግዚኦ፡ አምላከ፡ እስራኤል፡ አልቦ፡ ዘይመስለከ፡ አምላክ፡ በሰማይ፡ ወበምድር፡ ዘታቀውም፡ ወተዓቅብ፡ ኪዳነከ፡ ወሣህለከ፡ ለአግብርቲከ፡ እለ፡ የሐውሩ፡ በቅድሜከ፡ በኵሉ፡ ልቦሙ።
15 ወአቀምከ፡ ለዳዊት፡ ገብርከ፡ አቡየ፡ ዘተናገርከ፡ ወነበብከ፡ እንዘ፡ ትብል፡ በአፉከ፡ ወበእደዊከ፡ ፈጸምከ፡ በከመ፡ ዛቲ፡ ዕለት።
16 ወይእዜኒ፡ እግዚኦ፡ አምላከ፡ እስራኤል፡ ዕቀብ፡ ወአጽንዕ፡ ለገብርከ፡ ዳዊት፡ አቡየ፡ ዘተናገርከ፡ እንዘ፡ ትብል፡ ኢየኀልቅ፡ ብእሲ፡ እምቅድመ፡ ገጽየ፡ እምኔከ፡ ብእሲ፡ ዘይነብር፡ ዲበ፡ መንበረ፡ መንግሥተ፡ እስራኤል፡ ወባሕቱ፡ ለእመ፡ ዓቀቡ፡ ደቂቅከ፡ ፍናውየ፡ ከመ፡ ይሑሩ፡ በሕግየ፡ በከመ፡ ሖርከ፡ አንተ፡ በቅድሜየ።
17 ወይእዜኒ፡ እግዚኦ፡ አምላከ፡ እስራኤል፡ ይኩን፡ ቃልከ፡ እሙነ፡ ዘተናገርከ፡ ለዳዊት፡ ገብርከ።
18 ወእመሰ፡ አማን፡ ጥቀ፡ የኀድር፡ እግዚአብሔር፡ ምስለ፡ እጓለ፡ እመሕያው፡ ዲበ፡ ምድር፡ እመሰ፡ እግዚኦ፡ ሰማይ፡ ወሰማየ፡ ሰማያት፡ ኢይክሉ፡ ጸዊረ፡ ስብሐቲከ፡ ወምንትኑ፡ እንከ፡ ውእቱ፡ ዝንቱ፡ ቤት፡ ዘአነ፡ ሐነጽኩ።
19 ወነጽር፡ ኀበ፡ ጸሎተ፡ ገብርከ፡ ወኀበ፡ ስእለትየ፡ እግዚኦ፡ አምላኪየ፡ ከመ፡ ትስማዕ፡ ጸሎትየ፡ ወስእለተ፡ ገብርከ፡ በዛቲ፡ ዕለት።
20 ከመ፡ ይኩና፡ ብሩሃተ፡ ወክሡታተ፡ አዕይንቲከ፡ በዝንቱ፡ ቤት፡ መዓልተ፡ ወሌሊተ፡ ውስተ፡ ዝንቱ፡ ቤት፡ ዘአንተ፡ ትቤ፡ ከመ፡ ይሰመይ፡ ስምየ፡ በላዕሌሆሙ፡ ከመ፡ ትስማዕ፡ ጸሎተ፡ ገብርከ፡ ዘይጼሊ፡ ኀቤከ፡ ውስተ፡ ዝንቱ፡ መካን።
21 ወስማዕ፡ ጸሎተ፡ ገብርከ፡ ወስእለተ፡ ሕዝብከ፡ እስራኤል፡ ዘይጼልዩ፡ ውስተ፡ ዝንቱ፡ መካን፡ ወአንተኒ፡ እግዚኦ፡ ስማዕ፡ እምሰማይ፡ እምድልው፡ ማኅደርከ፡ ወስምዖሙ፡ ጸሎቶሙ፡ ወመሐሬ፡ ወሠራዬ፡ ኩን፡ ሎሙ።
22 ወእመቦ፡ ዘአበሰ፡ ብእሲ፡ ላዕለ፡ ቢጹ፡ ወእመቦ፡ ዘአንሥአ፡ ላዕሌሁ፡ መንሱተ፡ ከመ፡ ያመንስዎ፡ ወመጽአ፡ ወጸለየ፡ ወሰአለ፡ ቅድመ፡ ውእቱ፡ ቤተ፡ ምሥዋዕ፡ ወውስተ፡ ውእቱ፡ ቤት።
23 አንተኒ፡ እግዚኦ፡ ስማዕ፡ እምሰማየ፡ ሰማያት፡ ወግበር፡ ፍትሐ፡ ለአግብርቲከ፡ ከመ፡ ትፍድዮ፡ ለዐማፂ፡ ወከመ፡ ታግብእ፡ ላዕለ፡ ርእሱ፡ በከመ፡ ፍናዊሁ፡ ወከመ፡ ታጽድቆ፡ ለጻድቅ፡ ወከመ፡ ትዕሥዮ፡ ለለ፡ አሐዱ፡ በከመ፡ ጽድቁ።
24 ወለእመ፡ ተሰብሩ፡ ሕዝብከ፡ እስራኤል፡ እምቅድመ፡ ፀሮሙ፡ ወእመኒ፡ ቦ፡ ዘአበሱ፡ ለከ፡ ወተመይጡ፡ ወገነዩ፡ ወጸለዩ፡ ወሰአሉ፡ በቅድሜከ፡ በዝንቱ፡ ቤት።
25 ወአንተኒ፡ እግዚኦ፡ ስማዕ፡ እምሰማይ፡ ወመሐሬ፡ ኩን፡ ወሥረይ፡ አበሳ፡ ሕዝብከ፡ እስራኤል፡ ወምርሖሙ፡ ውስተ፡ ምድር፡ እንተ፡ አውረስኮሙ፡ ሎሙ፡ ወለአበዊሆሙ።
26 ወለእመ፡ አብኰረት፡ ሰማይ፡ ዝናመ፡ ወአበየት፡ አውርዶ፡ ዝናም፡ ውስተ፡ ምድር፡ ለእመ፡ አበሱ፡ ለከ፡ ወጸለዩ፡ ውስተ፡ ዝንቱ፡ ቤት፡ ወሰብሑ፡ ለስምከ፡ ወተመይጡ፡ ወነስሑ፡ በእንተ፡ ኃጢአቶሙ፡ እስመ፡ አኅሠርኮሙ።
27 ወአንተኒ፡ እግዚኦ፡ ስማዕ፡ እምሰማይ፡ ወመሐሬ፡ ኩን፡ ወሥረይ፡ አበሳሆሙ፡ ለአግብርቲከ፡ ወለሕዝብከ፡ እስራኤል፡ እስመ፡ ተናገርኮሙ፡ ፍኖተ፡ ርትዕተ፡ ከመ፡ ይሑሩ፡ ባቲ፡ ወትፌኑ፡ ወትሁብ፡ ዝናመ፡ ላዕለ፡ ምድር፡ እንተ፡ አውረስኮሙ፡ ለሕዝብከ።
28 ወለእመቦ፡ ዘመጽአት፡ እኪት፡ ወረኃብ፡ ላዕለ፡ ምድር፡ ወለእመ፡ መጽአት፡ ሞት፡ ወእመ፡ አኮ፡ ደዌ፡ ወእመ፡ አኮ፡ አናኵዕ፡ ወእመ፡ አኮ፡ አንበጣ፡ ወእመ፡ አኮ፡ ደጎብያ፡ እመ፡ በጽሐ፡ ወእመ፡ አልጸቀ፡ ወአመንደበ፡ ጸላኢ፡ አንፃረ፡ አህጉረ፡ ሕዝብከ፡ በከመ፡ ኵሉ፡ ምንዳቤ፡ ወሕማም፡ ዘይበጽሖሙ።
29 ወኵሉ፡ እንከ፡ ጸሎት፡ ወኵሉ፡ ስእለት፡ ዘተፈነወ፡ እምኃበ፡ ኵሉ፡ ሰብእ፡ ወእምኃበ፡ ኵሉ፡ ሕዝብከ፡ እስራኤል፡ ወእመቦ፡ ዘተጠየቀ፡ ብእሲ፡ ደዌሁ፡ ወሕማሙ፡ ወመጽአ፡ ወሰፍሐ፡ እደዊሁ፡ ውስተ፡ ዝንቱ፡ ቤት።
30 ወአንተኒ፡ እግዚኦ፡ ስማዕ፡ እምሰማይ፡ ወእምድልው፡ ማኅደርከ፡ ወፈውሶ፡ ወዕሥዮ፡ ለብእሲ፡ በከመ፡ ፍናዊሁ፡ ወበከመ፡ ጠየቀ፡ ሕሊናሁ፡ እስመ፡ አንተ፡ ባሕቲትከ፡ እግዚኦ፡ ተአምር፡ ወትጤይቅ፡ ኵሎ፡ ሕሊናሆሙ፡ ለደቂቀ፡ እጓለ፡ እመሕያው።
31 ከመ፡ ይፍርሁ፡ ትእዛዘከ፡ ወፍናዊከ፡ በኵሉ፡ መዋዕለ፡ ሕይወቶሙ፡ ውስተ፡ ምድር፡ እንተ፡ አውረስከ፡ ለአበዊሆሙ።
32 ወኵሉ፡ ነገድ፡ ዘኢኮነ፡ እምሕዝብከ፡ እስራኤል፡ ወእመቦ፡ ዘበጽሐ፡ እምብሔር፡ ርኁቅ፡ በእንተ፡ ስምከ፡ ዓቢይ፡ ወበእዴከ፡ ጽንዕት፡ ወበመዝራዕትከ፡ ልዑል፡ ወለእመ፡ በጽሑ፡ ወቦኡ፡ ወጸለዩ፡ ውስተ፡ ዝንቱ፡ ቤት።
33 ወአንተኒ፡ እግዚኦ፡ ስምዖሙ፡ እምሰማይ፡ ወእምድልው፡ ማኅደርከ፡ ወግበር፡ ሎቱ፡ በከመ፡ ኵሉ፡ ዘሰአለ፡ ኀቤከ፡ ውእቱ፡ ነኪር፡ ከመ፡ ያእምሩ፡ ኵሎሙ፡ አሕዛበ፡ ምድር፡ ስመከ፡ ወከመ፡ ይፍርሁከ፡ በከመ፡ ሕዝብከ፡ እስራኤል፡ ከመ፡ ያእምሩ፡ ወከመ፡ ይእመኑ፡ ከመ፡ ተጸውዐ፡ ስምከ፡ በላዕለ፡ ዝንቱ፡ ቤት፡ ዘአነ፡ ሐነጽኩ።
34 ወእመሰ፡ ወጽኡ፡ ሕዝብከ፡ ለጸቢዐ፡ ተዓይነ፡ ፀሮሙ፡ በፍኖት፡ ዘአንተ፡ ትፌንዎሙ፡ ከመ፡ ይሑሩ፡ ባቲ፡ ወጸለዩ፡ ኀቤከ፡ በከመ፡ ፍና፡ ዛቲ፡ ሀገር፡ ዘአንተ፡ ኃረይከ፡ በላዕሌሃ፡ ከመ፡ ይጸዋፅ፡ ስምከ፡ በላዕለ፡ ዝንቱ፡ ቤት፡ ዘአነ፡ ሐነጽኩ፡ ለስምከ።
35 ወአንተኒ፡ እግዚኦ፡ ስምዖሙ፡ እምሰማይ፡ ስእለቶሙ፡ ወጸሎቶሙ፡ ወግበር፡ ፍትሖሙ።
36 እመሰ፡ አበሱ፡ ለከ፡ እስመ፡ አልቦ፡ ሰብእ፡ ዘኢይኤብስ፡ ወትቀትሎሙ፡ ወትሜጥዎሙ፡ ውስተ፡ እደ፡ ጸላእቶሙ፡ ወይፄውውዎሙ፡ ፀሮሙ፡ ውስተ፡ ምድር፡ ርኅቅተ፡ ወእመኒ፡ ቅርብት።
37 ወተመይጡ፡ በአልባቢሆሙ፡ ውስተ፡ ምድሮሙ፡ እንተ፡ ውስቴታ፡ ተወልዱ፡ ወእመሰ፡ ተመይጡ፡ ወተማህለሉ፡ ለከ፡ በብሔር፡ ኀበ፡ ፀወውዎሙ፡ እንዘ፡ ይብሉ፡ አበስነ፡ ወዐመፅነ፡ ወኢዐቀብነ፡ ትእዛዘከ።
38 ወተመይጡ፡ ኀቤከ፡ በኵሉ፡ ልቦሙ፡ ወበኵሉ፡ ነፍሶሙ፡ በብሔር፡ ኀበ፡ ፀወውዎሙ፡ ወጸለዩ፡ ውስተ፡ ፍና፡ ብሔሮሙ፡ እንተ፡ መጠውከ፡ ለአበዊሆሙ፡ ወኃረይከ፡ ሀገረ፡ ወቤተ፡ እንተ፡ ሐነጽኩ፡ ለስምከ።
39 አንተኒ፡ ስማዕ፡ እግዚኦ፡ እምሰማይ፡ ወእምድልው፡ ማኅደርከ፡ ወስማዕ፡ ጸሎቶሙ፡ ወስእለቶሙ፡ ወግበር፡ ፍትሐ፡ ወመሐሬ፡ ኩን፡ ለሕዝብከ፡ እለ፡ አበሱ፡ ለከ።
40 ወይእዜኒ፡ እግዚኦ፡ ይኩና፡ አዕይንቲከ፡ ክሡታተ፡ ወአዕዛኒከ፡ ለአጽምዖ፡ ጸሎት፡ እንተ፡ ትትፌኖ፡ ውስተ፡ ዛቲ፡ መካን።
41 ወይእዜኒ፡ እግዚኦ፡ አምላኪየ፡ ተንሥእ፡ ውስተ፡ ዕረፍትከ፡ አንተ፡ ወታቦተ፡ መቅደስከ፡ ወካህናቲከ፡ ይለብሱ፡ ጽድቀ፡ ወጻድቃኒከ፡ ትፍሥሕተ፡ ይትፌሥሑ።
42 እግዚኦ፡ አምላኪየ፡ ኢትሚጥ፡ ገጸከ፡ እመሲሕከ፡ ወተዘከራ፡ ለምሕረተ፡ ዳዊት፡ ገብርከ።
=== chapter 7 ===
[Chapter 7]
1 ወሶበ፡ ፈጸመ፡ ሰሎሞን፡ ዘንተ፡ ጸሎተ፡ ወረደ፡ እሳት፡ እምሰማይ፡ ወበልዐ፡ ወአኅለቀ፡ ኵሎ፡ ቊርባናተ፡ ወኵሎ፡ መሥዋዕተ፡ ወስብሐተ፡ እግዚአብሔር፡ መልአ፡ ውስተ፡ ውእቱ፡ ቤት።
2 ወኢክህሉ፡ እንከ፡ ዳግመ፡ ካህናት፡ በዊአ፡ ውስተ፡ ቤተ፡ እግዚአብሔር፡ በይእቲ፡ ዕለት፡ እስመ፡ ስብሐተ፡ እግዚአብሔር፡ መልአ፡ ውስተ፡ ውእቱ፡ ቤት።
3 ወኵሎሙ፡ ደቂቀ፡ እስራኤል፡ ርእይዋ፡ ለይእቲ፡ እሳት፡ እንዘ፡ ትወርድ፡ ወስብሐተ፡ እግዚአብሔር፡ ላዕለ፡ ውእቱ፡ ቤት፡ ወወድቁ፡ በገጾሙ፡ ውስተ፡ ምድር፡ ውስተ፡ መካን፡ ዘስሙ፡ ሊቶስጥሮስ፡ ዘበትርጓሜሁ፡ ጸፍጸፍ፡ ብሂል፡ ወሰገዱ፡ በህየ፡ ወሰብሕዎ፡ ለእግዚአብሔር፡ እንዘ፡ ይብሉ፡ እስመ፡ ኄር፡ እስመ፡ ለዓለም፡ ምሕረቱ።
4 ወሰሎሞን፡ ንጉሥ፡ ወኵሎሙ፡ ሕዝበ፡ እስራኤል፡ ሦዑ፡ መሥዋዕተ፡ በቅድመ፡ እግዚአብሔር።
5 ወሦዐ፡ ሰሎሞን፡ በይእቲ፡ ዕለት፡ መሥዋዕተ፡ አልሕምት፡ ክልኤተ፡ እልፈ፡ ወዕሥራ፡ ምእተ፡ ወአባግዐ፡ ዓሠርተ፡ ወክልኤተ፡ እልፈ፡ ወገብረ፡ ወሐደሰ፡ ቤተ፡ እግዚአብሔር፡ ሰሎሞን፡ ንጉሥ፡ ወኵሎሙ፡ ሕዝበ፡ እስራኤል።
6 ወካህናትኒ፡ ይቀውሙ፡ ወየዐቅቡ፡ በበምቅዋማቲሆሙ፡ ወሌዋውያንሰ፡ ዘበአርጋኖን፡ ዘበትርጓሜሁ፡ እንዚራ፡ ብሂል፡ ይፌንዉ፡ ማኅሌተ፡ ለእግዚአብሄር፡ ዘገብረ፡ ዳዊት፡ ንጉሥ፡ ከመ፡ ይግነዩ፡ በቅድመ፡ እግዚአብሔር፡ እስመ፡ ኄር፡ እስመ፡ ለዓለም፡ ምሕረቱ፡ በማኅሌት፡ በስብሐት፡ ወበመዝሙር፡ ዘዳዊት፡ ወበእደዊሆሙ፡ ካህናትኒ፡ ይነፍሑ፡ ቀርነ፡ በአንፃሪሆሙ፡ ወኵሎሙ፡ እስራኤል፡ ይቀውም።
7 ወገብረ፡ ወቀደሰ፡ ሰሎሞን፡ ውስተ፡ ዓፀደ፡ ቤተ፡ እግዚአብሔር፡ እስመ፡ በህየ፡ ገብረ፡ ጽንሐሐ፡ ወመቋዕልተ፡ ወመሥዋዕተ፡ መድኃኒት፡ እስመ፡ ቤተ፡ ምሥዋዕ፡ ዘብርት፡ ዘገብረ፡ ሰሎሞን፡ ኢክህለ፡ ከመ፡ ያግብሮ፡ ለጽንሐሕ፡ ወለቊርባን፡ ወለመቋዕልት።
8 ወገብረ፡ ሰሎሞን፡ በዓለ፡ በውእቱ፡ መዋዕል፡ ሰቡዐ፡ ዕለት፡ ወኵሉ፡ እስራኤል፡ ምስሌሁ፡ ግቡአን፡ ወኮነ፡ ማኅበር፡ ዓቢይ፡ ፈድፋደ፡ እምብዋአ፡ ኤማት፡ እስከ፡ ፈለግ፡ ዘግብፅ።
9 ወበሳኒታ፡ በሳምን፡ ዕለት፡ ገብረ፡ ሰሎሞን፡ ሙፃአ፡ እስመ፡ ተሐደሰ፡ ወተቀደሰ፡ ቤተ፡ ምስዋዕ፡ ወገብረ፡ ሰሎሞን፡ በውእቱ፡ መዋዕል፡ በዓለ፡ ሰቡዐ፡ ዕለተ።
10 ወአመ፡ ዕሥራ፡ ወሠሉሱ፡ ለወርኅ፡ ሳብዕ፡ ፈነዎሙ፡ ለሕዝብ፡ ኀበ፡ ማኅደሪሆሙ፡ ወአተዉ፡ እንዘ፡ ይተፌሥሑ፡ ወይትኃሠዩ፡ በልብ፡ ፍሡሕ፡ ወአዳም፡ ወዲበ፡ ሠናይቱ፡ እንተ፡ ገብረ፡ እግዚአብሔር፡ ለዳዊት፡ ወለሰሎሞን፡ ወለሕዝበ፡ እስራኤል።
11 ወሐነፀ፡ ወፈጸመ፡ ሰሎሞን፡ ቤተ፡ እግዚአብሔር፡ ወቤተ፡ መንግሥቴ፡ ወኵሎ፡ ዘሐለየ፡ ወዘአደሞ፡ ለሰሎሞን፡ በነፍሱ፡ ከመ፡ ይግበር፡ ቤተ፡ እግዚአብሔር፡ ወቤቶ፡ ወሠርኀ፡ ሎቱ።
12 ወበህየ፡ ተራከቦ፡ ወአስተርአዮ፡ እግዚአብሔር፡ ለሰሎሞን፡ በይእቲ፡ ሌሊት፡ ወይቤሎ፡ ሰማዕኩ፡ ጸሎተከ፡ ወኃረይኩ፡ ሊተ፡ ዘንተ፡ መካነ፡ ከመ፡ ይኩነኒ፡ ቤተ፡ ምሥዋዕ።
13 ወእመሰ፡ ዓፀውክዎ፡ ለሰማይ፡ ወከላእከዎ፡ ኢያውርድ፡ ዝናመ፡ ውስተ፡ ምድር፡ እመኒ፡ አዘዝክዎ፡ ለአንበጣ፡ ከመ፡ ይብላዕ፡ ኵሎ፡ ዕፀወ፡ ዘይፈሪ፡ ወለእመኒ፡ ፈነውኩ፡ ሞተ፡ ላዕለ፡ ሕዝብየ።
14 ወተመይጡ፡ ወተዘከሩ፡ ሕዝብየ፡ ዘተሰምየ፡ ስምየ፡ በላዕሌሆሙ፡ ወጸለዩ፡ ኀቤየ፡ ወኀሠሡ፡ ገጽየ፡ ወተመይጡ፡ እምፍኖተ፡ እከዮሙ፡ ወአነኒ፡ እሰምዖሙ፡ እምሰማይ፡ ማኅደርየ፡ ወመሐሬ፡ እከውን፡ ወሠራዬ፡ ለአበሳሆሙ፡ ወእፌውሶሙ፡ ወአሐዩ፡ ምድሮሙ።
15 ወይእዜኒ፡ አዕይንትየ፡ ይከውና፡ ክሡታተ፡ ወንቁሐተ፡ ወዕዘንየኒ፡ ያጸምኣ፡ ጸሎተ፡ እንተ፡ ትትፌኖ፡ ውስተ፡ ዝንቱ፡ መካን።
16 ወይእዜኒ፡ ኃረይክዎ፡ ወቀደስክዎ፡ ለዝንቱ፡ ቤት፡ ከመ፡ ይሰመይ፡ ስምየ፡ በህየ፡ እስከ፡ ለዓለም፡ ወበህየኒ፡ ይከውና፡ አዕይንትየ፡ ወልብየ፡ በኵሉ፡ መዋዕል።
17 ወአንተኒ፡ ለእመ፡ ሖርከ፡ በቅድሜየ፡ በከመ፡ ሖረ፡ ዳዊት፡ አቡከ፡ ወገበርከ፡ ኵሎ፡ ዘአዘዝኩከ፡ ሕግየ፡ ወኵነኔየኒ፡ ለእመ፡ ዓቀብከ።
18 አቀውም፡ ወአጸንዕ፡ መንበረ፡ መንግሥትከ፡ በከመ፡ ተካየድክዎ፡ ለዳዊት፡ አቡከ፡ እንዘ፡ እብል፡ ኢየኃልቅ፡ እምኔከ፡ ብእሲ፡ ዘይከውን፡ ሰፋኔ፡ ላዕለ፡ ሕዝብየ፡ እስራኤል።
19 ወለእመ፡ ተመየጥከሙ፡ አንትሙ፡ ወኃደግሙ፡ ወረሳዕክሙ፡ ትእዛዝየ፡ ወሕግየ፡ ዘመጠውኩክሙ፡ ወሖርክሙ፡ ወአምለክሙ፡ ወተለውክሙ፡ አማልክተ፡ ነኪር፡ ወሰገድክሙ፡ ሎሙ።
20 አነኒ፡ አፈልሰክሙ፡ እምድር፡ እንተ፡ አውረስክዎሙ፡ ለአበዊክሙ፡ ወለዝንቱ፡ ቤት፡ ዘቀደስክዎ፡ ለስምየ፡ እገድፎ፡ እምቅድመ፡ ገጽየ፡ ወእሬስዮ፡ ነገረ፡ ወአምሳለ፡ ለኵሉ፡ አሕዛብ፡ ወዜና፡ ለኵሉ፡ በሐውርት።
21 ወለዝንቱኒ፡ ቤት፡ ክቡር፡ ኃላፌ፡ ፍኖት፡ ዘይሬእዮ፡ ይደነግፅ፡ ወይብል፡ በእንተ፡ ምንት፡ ገብረ፡ እግዚአብሔር፡ ላዕለ፡ ዝንቱ፡ ቤት፡ ወላዕለ፡ ዛቲ፡ ከመዝ።
22 ወያወሥኡ፡ ወይብሉ፡ እስመ፡ ረስዕዎ፡ ለእግዚአብሔር፡ አምላከ፡ አበዊሆሙ፡ ዘአውጽኦሙ፡ እምድረ፡ ግብፅ፡ ወተለዉ፡ ወአምለኩ፡ አማልክተ፡ ነኪር፡ ወሰገዱ፡ ወተቀንዩ፡ ሎሙ፡ ወበእንተዝ፡ አምጽአ፡ ላዕሌሆሙ፡ ዘንተ፡ ኵሎ፡ እኩየ።
=== chapter 8 ===
[Chapter 8]
1 ወኮነ፡ እምድኅረ፡ ዕሥራ፡ ዓመት፡ ሐነፀ፡ ሰሎሞን፡ ቤተ፡ እግዚአብሔር፡ ወቤተ፡ መንግሥቱ።
2 ወአህጉሪሁኒ፡ እለ፡ ወሀቦ፡ ኪራም፡ ንጉሠ፡ ጢሮስ፡ ለሰሎሞን፡ ሐነፀ፡ ወአኅደሮሙ፡ ህየ፡ ለደቂቀ፡ እስራኤል።
3 ወበጽሐ፡ ሰሎሞን፡ እስከ፡ ደወለ፡ ኤማት፡ ወሳባዕ፡ ወአጽንዐ።
4 ወሐነፃ፡ ለታድምር፡ በገዳም፡ ወኵሎን፡ አህጉረ፡ ጽኑዓተ፡ ሐነፀ፡ በብሔረ፡ ኤማት።
5 ወሐነፀ፡ ካዕበ፡ ቤቴሮን፡ ላዕላይተ፡ ወቤቴሮን፡ ታሕታይተ፡ አህጉረ፡ ጽኑዓተ፡ ወገብረ፡ ሎቶን፡ አረፍተ፡ ወአናቅጸ፡ ወመናሥግተ።
6 ዓዲ፡ ካዕበ፡ ገብረ፡ በብሔረ፡ በላዖት፡ ወለኵሎን፡ አህጉር፡ ጽኑዓት፡ እለ፡ ኮንዎ፡ ለሰሎሞን፡ ወለኵሎን፡ አህጉረ፡ ሠረገላት፡ ወለኵሎን፡ አህጉረ፡ አፍራስ፡ ወከኵሉ፡ ዘሐለየ፡ ወዘፈቀደ፡ ሰሎሞን፡ ከመ፡ ኵሉ፡ ዘሐለየ፡ ከመ፡ ይሕንፅ፡ በኢየሩሳሌም፡ ወበሊባኖስ፡ ወበኵሉ፡ መንግሥቱ፡ ፈጸመ።
7 ወለኵሎሙ፡ ሕዝብ፡ እለ፡ ተርፉ፡ እምኬጤዎን፡ ወእምአሞሬዎን፡ ወእምፌርዜዎን፡ ወእምኤዌዎን፡ ወእምኢያቡሌዎን፡ እለ፡ ኢኮነ፡ ኍልቆሙ፡ እምደቂቀ፡ እስራኤል።
8 ወእለ፡ ተወልዱ፡ እምደቂቆሙ፡ ወእምእለ፡ ተርፉ፡ እምደቂቆሙ፡ እምድኅሬሆሙ፡ ውስተ፡ ምድሮሙ፡ እለ፡ ኢቀተልዎሙ፡ ደቂቀ፡ እስራኤል፡ ወአዕረጎሙ፡ ሰሎሞን፡ ወአዘዞሙ፡ የሀቡ፡ ግብረ፡ እስከ፡ ዛቲ፡ ዕለት።
9 ወእምደቂቀ፡ እስራኤል፡ ኢነሥአ፡ ሎቱ፡ ሰሎሞን፡ አግብርተ፡ በመንግሥቱ፡ እስመ፡ እደው፡ ጸናዕት፡ መስተቃትላን፡ እሙንቱ፡ መላእክተ፡ ሠረገላት፡ ወመስተፅዕናን።
10 ወእሉ፡ እሙንቱ፡ መላእክተ፡ ትእዛዛቲሁ፡ ለሰሎሞን፡ ንጉሥ፡ ክልኤቱ፡ ምእት፡ ወኃምሳ፡ እለ፡ ይቀውሙ፡ በላዕለ፡ ግብር፡ በላዕለ፡ ኵሉ፡ አሕዛብ።
11 ወለወለተ፡ ፈርዖነሂ፡ አዕረጋ፡ ሰሎሞን፡ እምሀገረ፡ ዳዊት፡ ወአብኣ፡ ውስተ፡ ቤት፡ ዘሐነፀ፡ ላቲ፡ እስመ፡ ይቤ፡ ሰሎሞን፡ ንጉሥ፡ ኢተኀድር፡ ብእሲትየ፡ ውስተ፡ ሀገረ፡ ዳዊት፡ ንጉሠ፡ እስራኤል፡ እስመ፡ ቅድስት፡ ይእቲ፡ እስመ፡ ቦአት፡ ህየ፡ ታቦተ፡ እግዚአብሔር።
12 ወአሜሃ፡ አዕረገ፡ ሰሎሞን፡ ጽንሐሐ፡ ለእግዚአብሔር፡ በላዕለ፡ ቤተ፡ ምሥዋዕ፡ ዘእግዚአብሔር፡ ዘሐነፀ፡ አንፃረ፡ ቤተ፡ እግዚአብሔር።
13 ወበከመ፡ ቃል፡ ዘለለዕለት፡ ከመ፡ ያዕርጉ፡ መሥዋዕተ፡ በከመ፡ አዘዘ፡ ሙሴ፡ በበሰናብት፡ ወበበአውራኅ፡ ወበበበዓላት፡ ሥልሰ፡ ለለዓመት፡ ወበበበዓለ፡ ናእት፡ ወበበበዓላት፡ ሰናብት፡ ወበበበዓለ፡ መጸለት።
14 ወአቀመ፡ በከመ፡ ትእዛዘ፡ ዳዊት፡ አቡሁ፡ በበዕብሬቶሙ፡ ለካህናት፡ ወበከመ፡ መልእክቶሙ፡ ወሌዋውያንሰ፡ በላዕለ፡ ምቅዋማቲሆሙ፡ ይሴብሕዎ፡ ለእግዚአብሔር፡ ወይትለአኩ፡ በቅድመ፡ ካህናት፡ በከመ፡ ኵሉ፡ ቃል፡ ዘለለዕለት፡ ወአቀብተ፡ አናቅጽኒ፡ በከመ፡ ክፍለቶሙ፡ ወበአናቅጺሆሙ፡ እስመ፡ ከመዝ፡ ይእቲ፡ ትእዛዞሙ፡ ዘኅበ፡ ዳዊት፡ ብእሴ፡ እግዚአብሔር።
15 ወኢኀደገ፡ ወኢምንትኒ፡ እምትእዛዘ፡ ዳዊት፡ ንጉሥ፡ በእንተ፡ ካህናት፡ ወበእንተ፡ ሌዋውያን፡ በኵሉ፡ ዘኮነ፡ ቃል፡ ወላዕለ፡ መዛግብት።
16 ወተደለወ፡ ወተፈጸመ፡ ኵሉ፡ ቅኔ፡ እምአመ፡ ዕለት፡ አኃዘ፡ ሰሎሞን፡ እስከ፡ አመ፡ ፈጸመ፡ ቤተ፡ እግዚአብሔር።
17 ወአሜሃ፡ ሖረ፡ ሰሎሞን፡ ውስተ፡ ደወለ፡ ጋስዮን፡ ጋቤር፡ ወኅበ፡ ኤላም፡ እንተ፡ መልዕልተ፡ ጽንፈ፡ ባሕር፡ እንተ፡ ብሔር፡ ኤዶምያስ።
18 ወፈነወ፡ ሎቱ፡ ኪራም፡ በእደ፡ አግብርቲሁ፡ አሕማረ፡ ወእለ፡ የአምሩ፡ ባሕረ፡ ወሖረ፡ ወነገዱ፡ ምስለ፡ አግብርቲሁ፡ ለሰሎሞን፡ ብሔረ፡ ሴፌር፡ ወነሥኡ፡ ወኣእተዉ፡ እምህየ፡ አርባዕተ፡ ምእተ፡ ወኃምሳ፡ መክሊተ፡ ወርቅ፡ ወአምጽኡ፡ ኀበ፡ ሰሎሞን፡ ንጉሥ።
=== chapter 9 ===
[Chapter 9]
1 ወንግሥተ፡ ሳባ፡ ሰምዓት፡ ዜናሁ፡ ለሰሎሞን፡ ወመጽአት፡ ከመ፡ ታእምር፡ ስመ፡ እግዚአብሔር፡ ወከመ፡ ታመክሮ፡ ለሰሎሞን፡ በአስተማስሎ፡ በኢየሩሳሌም፡ በኃይል፡ ጽኑዕ፡ ፈድፋደ፡ ወምስሌሃኒ፡ አግማል፡ ይፀውሩ፡ አፈወ፡ ወወርቀ፡ ብዙኀ፡ ወዕንቈ፡ ክቡረ፡ ወበጽሐት፡ ኀበ፡ ሰሎሞን፡ ወተናገረቶ፡ ኵሎ፡ ዘውስተ፡ ልባ።
2 ወሰሎሞንሂ፡ ካዕበ፡ ዜነዋ፡ ወፈከረ፡ ላቲ፡ ኵሎ፡ ቃላቲሃ፡ ወኢኃደገ፡ ሰሎሞን፡ ቃለ፡ እምነገሩ፡ ዘኢዜነዋ፡ በእንቲአሁ።
3 ወርእያ፡ ንግሥተ፡ ሳባ፡ ጥበቢሁ፡ ለሰሎሞን፡ ወቤተ፡ ዘሐነፀ፡ ወመባልዕተ፡ ወማዕዳተ፡ ወመናብርተ፡ አግብርቲሁ፡ ወፆታ፡ ላእካኒሁ፡ ወአልባሲሆሙ፡ ለእለ፡ ይቀውሙ፡ ኀቤሁ፡ ወመላብሲሆሙ።
4 ወጽንሐሐ፡ ዘአዕረገ፡ ሰሎሞን፡ ውስተ፡ ቤተ፡ እግዚአብሔር፡ እምነጽሮጹ፡ ደንገፀት።
5 ወአውሥአቶ፡ ወትቤሎ፡ ለንጉሥ፡ ሰሎሞን፡ እሙነ፡ ኮነ፡ ቃል፡ ዘሰማዕኩ፡ በብሔርየ፡ በእንተ፡ ቃልከ፡ ወበእንተ፡ ጥበብከ።
6 ወኢአመንኩ፡ ቃላተ፡ ሰብእ፡ እስከ፡ ለልየ፡ መጻእኩ፡ ወበአዕይንትየ፡ ርኢኩ፡ ወናሁ፡ ኢዜንዉኒ፡ መንፈቀ፡ ብዝኀ፡ ጥበብከ፡ ወወሰከኒ፡ ዜና፡ ዲበ፡ ዜና፡ ዘሰማዕኩ፡ በምድርየ።
7 ብፁዓን፡ እሙንቱ፡ እደወ፡ ወብፁዓን፡ አግብርት፡ እለ፡ ይቀውሙ፡ ቅድሜከ፡ በኵሉ፡ ጊዜ፡ ወዘይሰምዑ፡ ኵሎ፡ ጥበብከ።
8 ወይኩን፡ ብሩከ፡ እግዚአብሔር፡ አምላክከ፡ ዘሠምረ፡ ብከከመ፡ የሀብከ፡ ወያንብርከ፡ ዲበ፡ መንበረ፡ ዚአሁ፡ ከመ፡ ትኩን፡ ንጉሠ፡ ላዕለ፡ ሕዝብከ፡ እስራኤል፡ እስመ፡ አፍቀሮሙ፡ እግዚአብሔር፡ አምላክከ፡ ለሕዝበ፡ እስራኤል፡ ከመ፡ ያቅሞሙ፡ ለዓለመ፡ ዓለም፡ ወሤመከ፡ ላዕሌሆሙ፡ ወአንገሠከ፡ ከመ፡ ትግበር፡ ፍትሐ፡ ወጽድቀ።
9 ወወሀበቶ፡ ንግሥተ፡ ሳባ፡ ለንጉሥ፡ ሰሎሞን፡ ምእተ፡ ወዕሥራ፡ መክሊተ፡ ወርቅ፡ ወአፈወ፡ ብዙኀ፡ ወፅንቈ፡ ክቡረ፡ ወአልቦ፡ ዘይመስሎ፡ ለውእቱ፡ አፈው፡ ዘወሀበቶ፡ ንግሥተ፡ ሳባ፡ ለሰሎሞን፡ ንጉሥ።
10 ወአግብርተ፡ ሰሎሞን፡ ወአግብርተ፡ ኪራም፡ አምጽኡ፡ ሎቱ፡ ለሰሎሞን፡ ንጉሥ፡ ወርቀ፡ እምብሔረ፡ ሳፌር፡ ወዕፀወ፡ ሕቊ፡ ወዕንቈ፡ ክቡረ።
11 ወገብረ፡ ሰሎሞን፡ ንጉሥ፡ እልክተ፡ ዕፀወ፡ ሕቊ፡ መዓርገ፡ ለቤተ፡ እግዚአብሔር፡ ወመዓርገ፡ ለቤተ፡ መንግሥቱ፡ ወዓዲ፡ ገብረ፡ እምእልክቱ፡ ዕፀወ፡ ሕቊ፡ መሰናቊተ፡ ወናብሊሳተ፡ ለመኃልይ፡ ወኢተገብረ፡ ዘከመዝ፡ በቀደምቶሙ፡ ከመ፡ ገብረ፡ ሰሎሞን፡ ንጉሥ፡ በምድረ፡ ይሁዳ።
12 ወሰሎሞን፡ ንጉሥ፡ ወሀባ፡ ለንግሥተ፡ ሳባ፡ ኵሎ፡ መፍቅዳ፡ ዘሰአለቶ፡ ዘእንበለ፡ ዘአምጽአት፡ አምኃሁ፡ ለንጉሥ፡ ሰሎሞን፡ ወተመይጠት፡ ብሔራ።
13 ወኮነ፡ መክብበ፡ ወርቅ፡ ዘአምጽኡ፡ ሎቱ፡ ለሰሎሞን፡ በአሐቲ፡ ዓመት፡ ስድስቱ፡ ምእት፡ ወስሳ፡ ወስድስቱ፡ መካልየ፡ ወርቅ።
14 ዘእንበለ፡ አደው፡ እለ፡ ጽሑፋን፡ ወሰየጥ፡ እለ፡ ይነግዱ፡ ወያመጽኡ፡ ሎቱ፡ ወዘእንበለ፡ ኵሉ፡ ነገሥተ፡ ዓረብያ፡ ወመሳፍንተ፡ ምድር፡ ዘያመጽኡ፡ ወርቀኒ፡ ወብሩረኒ፡ ለንጉሥ፡ ሰሎሞን።
15 ወገብረ፡ ሰሎሞን፡ ሠለስተ፡ ምእተ፡ ኲያንወ፡ ዘወርቅ፡ ዝብጦ፡ ወለለአሐዱ፡ እምኵሉ፡ ኲያንው፡ ስድስቱ፡ ምእት፡ ዲናረ፡ ወርቅ፡ ጽሩይ።
16 ወሠለስቱ፡ ምእት፡ ወላትወ፡ ዝብጦ፡ ዘወርቅ፡ ወድልወቱ፡ ለለአሐዱ፡ ወልታ፡ ሠለስቱ፡ ምእት፡ ዲናር፡ ወአንበሮሙ፡ ሰሎሞን፡ ውስተ፡ ቤተ፡ ኦም፡ ዘሊባኖስ።
17 ወገብረ፡ ሰሎሞን፡ መንበረ፡ መንግሥቱ፡ ዓቢየ፡ ዘቀርነ፡ ነጌ፡ ወለበጦ፡ በወርቅ፡ ጽሩይ፡ ወፍቱን።
18 ወስድስቱ፡ መዓርጉ፡ ለውእቱ፡ መንበር፡ ዘልቡጥ፡ ወቅቡዕ፡ በወርቅ፡ ወገብረ፡ ምዕራፈ፡ መዛርዕ፡ በለፌ፡ ወበለፌ፡ ለውእቱ፡ መንበረ፡ መንግሥቱ፡ ወገብረ፡ ክልኤተ፡ አናብስተ፡ ወይቀውሙ፡ መንገለ፡ እልክቱ፡ ምዕራፋተ፡ መዛርዕ።
19 ወዓሠርቱ፡ ወክልኤቱ፡ አናብስት፡ ይቀውሙ፡ ህየ፡ መልዕልተ፡ እልክቱ፡ ስድስቱ፡ መዓርጋት፡ በለፌኒ፡ ወበለፌኒ፡ ወኢተገብረ፡ ከመዝ፡ በኵሎሙ፡ መንግሥታት።
20 ወኵሉ፡ ንዋየ፡ ስቴሁ፡ ለንጉሥ፡ ሰሎሞን፡ ዘወርቅ፡ ወኵሉ፡ ንዋየ፡ ቅኔኒ፡ ዘቤተ፡ ኦም፡ ዘሊባኖስ፡ ዘወርቅ፡ ጽሩይ፡ ወተርፈ፡ ወፋድፈደ፡ ወአልቦ፡ ሐሳብ፡ ወኢኍልቊ፡ በመዋዕሊሁ፡ ለሰሎሞን፡ ንጉሥ፡ ብሩር።
21 እስመ፡ ሐመሩ፡ ለንጉሥ፡ ሰሎሞን፡ ይነግድ፡ ኀበ፡ ብሔረ፡ ተርሴስ፡ ምስለ፡ አግብርቲሁ፡ ለኪራም፡ ምእረ፡ በሠለስቱ፡ ዓመት፡ የአቱ፡ ውእቱ፡ ሐመር፡ እምብሔር፡ ተርሴስ፡ ወያመጽእ፡ ብዙኅ፡ ንዋየ፡ ለንጉሥ፡ ወርቀ፡ ወብሩረ፡ ወአቅርንተ፡ ነጌ።
22 ወገብረ፡ ወተለዓለ፡ ሰሎሞን፡ እምኵሎሙ፡ ነገሥት፡ በብዕልኒ፡ ወበጥበብኒ።
23 ወኵሎሙ፡ ነገሥተ፡ ምድርኒ፡ የኃሥሡ፡ ይርአዩ፡ ገጾ፡ ለሰሎሞን፡ ከመ፡ ይስምዑ፡ ጥበቦ፡ ዘወሀቦ፡ እግዚአብሔር፡ ውስተ፡ ልቡ።
24 ወእልክቱ፡ ነገሥት፡ በበዚአሆሙ፡ ያመጽኡ፡ ሎቱ፡ አምኃ፡ ንዋያተ፡ ወርቅ፡ ወብሩር፡ ወአልባሳተ፡ ወቀጠንተ፡ ወአፈወ፡ ዘይትፈተው፡ ወዘይተ፡ ወመባልዕተ፡ ጥዑማተ፡ ወአፍራሰ፡ ወአብቅለ፡ በበዓመት።
25 ወኮና፡ ሎቱ፡ ለሰሎሞን፡ አርባዕቱ፡ እልፍ፡ አፍራስ፡ አእኑስ፡ ወክልኤቱ፡ እልፍ፡ አፍራስ፡ አትቡዕ፡ ወአንበሮሙ፡ ሰሎሞን፡ ወከፈሎሙ፡ ውስተ፡ አዕፃዳት፡ ወሠረገላት፡ ምስሌሁ፡ ለንጉሥ፡ በኢየሩሳሌም።
26 ወኮነ፡ ሰፋኔ፡ ላዕለ፡ ኵሉ፡ ነገሥተ፡ ምድር፡ እምደወለ፡ ተከዚ፡ እስከ፡ ምድረ፡ ኢሎፍሊ፡ ወእስከ፡ ደወለ፡ ግብፅ።
27 ወአንበረ፡ ንጉሥ፡ ሰሎሞን፡ ወርቀ፡ ወብሩቀ፡ ውስተ፡ ኢየሩሳሌም፡ ከመ፡ እብን፡ ወዕፀወ፡ ዘግባት፡ ከመ፡ ዕፀ፡ በለስ፡ ዘውስተ፡ ሐቅል፡ ብዙኅ።
28 ወምምጽአ፡ አፍራሲሁ፡ ለሰሎሞን፡ እምብሔረ፡ ግብፅ፡ ወእምኵሉ፡ በሐውርት።
29 ወእለ፡ ተርፉ፡ ቃላተ፡ ሰሎሞን፡ ቀደምት፡ ወደኃርት፡ ነዮሙ፡ ጽሑፋት፡ በቃለ፡ ናታን፡ ነቢይ፡ ወበቃለ፡ አኪያ፡ ሴሎናዊ፡ ወበራእየ፡ ኢዮሄል፡ ራአዪሁ፡ ዘይሬኢ፡ ለኢዮርብዓም፡ ወልደ፡ ናባጥ።
30 ወነግሠ፡ ሰሎሞን፡ ንጉሥ፡ ላዕለ፡ ኵሎሙ፡ እስራኤል፡ አርባዓ፡ ዓመተ።
31 ወኖመ፡ ሰሎሞን፡ ወቀበርዎ፡ ውስተ፡ ሀገረ፡ ዳዊት፡ አቡሁ፡ ወነግሠ፡ ሮብዓም፡ ወልዱ፡ እምድኅሬሁ።
=== chapter 10 ===
[Chapter 10]
1 ወሖረ፡ ሮብዓም፡ ኀበ፡ ሴኬም፡ እስመ፡ ህየ፡ መጽኡ፡ ኵሎሙ፡ እስራኤል፡ ከመ፡ ያንግሥዎ።
2 ወኮነ፡ ሶበ፡ ሰምዐ፡ ኢዮርብዓም፡ ወልደ፡ ናባጥ፡ እንዘ፡ ውእቱ፡ ሀለወ፡ ብሔረ፡ ግብፅ፡ እምአመ፡ ተኃጥአ፡ እምገጸ፡ ሰሎሞን፡ ንጉሥ፡ ወተመይጠ፡ ኢዮርብዓም፡ እምብሔረ፡ ግብፅ።
3 ወለአኩ፡ ወጸውዕዎ፡ ወመጽአ፡ ኢዮርብዓም፡ ወኵሉ፡ ማኅበረ፡ እስራኤል፡ ኀበ፡ ንጉሥ፡ ሮብዓም።
4 ወተናገሩ፡ እንዘ፡ ይብሉ፡ አቡከ፡ አክበደ፡ ኵነኔ፡ ላዕሌነ፡ ወአንተኒ፡ ዮም፡ ኅድግ፡ እምክበደ፡ ቅኔ፡ አቡከ፡ መሪር፡ ወእምኔሁ፡ ጽኑዕ፡ ዘአንበረ፡ በላዕሌነ፡ አቅልል፡ ወንትቀነይ፡ ለከ።
5 ወይቤሎሙ፡ ሑሩ፡ እስከ፡ ሠሉስ፡ መዋዕል፡ ወተመየጡ፡ ኀቤየ፡ ወሖሩ፡ ኵሎሙ፡ ሕዝበ፡ እስራኤል።
6 ወዓደመ፡ ሮብዓም፡ ንጉሥ፡ መላሕቅተ፡ ኵሎ፡ እለ፡ ዘልፈ፡ ይቀውሙ፡ ቅድሜሁ፡ ለሰሎሞን፡ አቡሁ፡ አመ፡ ሕያው፡ ውእቱ፡ ወይቤሎሙ፡ እፎ፡ አንትሙ፡ ትፈቅዱ፡ ወእፎ፡ ያስተርእዩክሙ፡ ከመ፡ አውሥኦሙ፡ ለእሉ፡ ሕዝብ፡ ቃለ።
7 ወአውሥእዎ፡ ወይቤልዎ፡ እመሰ፡ በዛቲ፡ ዕለት፡ ኄረ፡ ኮንከ፡ ለዝንቱ፡ ሕዝብ፡ ወተናገርኮሙ፡ ቃለ፡ ሠናየ፡ ይከውኑከ፡ አግብርተ፡ በኵሉ፡ መዋዕል።
8 ወኃደገ፡ ሮብዓም፡ ምክሮሙ፡ ለመላህቅተ፡ ዘአምከርዎ፡ ወተማከረ፡ ምስለ፡ ደቂቅ፡ እለ፡ ተሐፅኑ፡ ምስሌሁ፡ ወእለ፡ ይቀውሙ፡ ቅድሜሁ።
9 ወይቤሎሙ፡ ምንትኑ፡ ታምክሩኒ፡ አንትሙ፡ ከመ፡ አውሥኦሙ፡ ቃለ፡ ለእሉ፡ ሕዝብ፡ ዘተናገሩኒ፡ እንዘ፡ ይብሉ፡ አቅልል፡ ለነ፡ እምቅኔ፡ ዘአንበረ፡ አቡከ፡ በላዕሌነ።
10 ወአውሥእዎ፡ ደቂቅ፡ እለ፡ ተሐፅኑ፡ ምስሌሁ፡ ወይቤልዎ፡ ከመዝ፡ በሎሙ፡ ለእሉ፡ ሕዝብ፡ ዘተናገሩከ፡ እንዘ፡ ይብሉ፡ አቡከ፡ አክበደ፡ ላዕሌነ፡ ቅኔ፡ ወአንተኒ፡ አስሕተነ፡ ወከመዝ፡ አውሥኦሙ፡ ወበሎሙ፡ ነአስ፡ አጽባዕትየ፡ ትገዝፍ፡ ወትጸንዕ፡ እምሐቌ፡ አቡየ።
11 ወይእዜኒ፡ አቡየ፡ አክበደ፡ አርዑተ፡ ግብር፡ ላዕሌክሙ፡ ወአነኒ፡ እዌስክ፡ ላዕለ፡ ቅኔክሙ፡ አቡየ፡ ገሠፀክሙ፡ በመቅሠፍት፡ ወአነኒ፡ እጌሥፀክሙ፡ በአቃርብት።
12 ወመጽአ፡ ኢዮርብዓም፡ ወኵሉ፡ ሕዝብ፡ ኀበ፡ ሮብዓም፡ ንጉሥ፡ በሣልስት፡ ዕለት፡ በከመ፡ ዓደሞሙ፡ ንጉሥ፡ እንዘ፡ ይብል፡ ግብኡ፡ ኀቤየ፡ በሣልስት።
13 ወአውሥኦሙ፡ ንጉሥ፡ ቃላተ፡ ዕፁባተ፡ ወኃደገ፡ ሮብዓም፡ ንጉሥ፡ ምክሮሙ፡ ለመላሕቅት።
14 ወአውሥኦሙ፡ ለሕዝብ፡ ወይቤሎሙ፡ በከመ፡ ምክረ፡ ወራዙት፡ እንዘ፡ ይብል፡ አቡየ፡ አክበደ፡ ላዕሌክሙ፡ ቅኔ፡ ወአነኒ፡ እዌስክ፡ ላዕሌሁ፡ አቡየ፡ ቀሠፈክሙ፡ በመቅሠፍት፡ ወአነኒ፡ እጌሥፀክሙ፡ በአቃርብት።
15 ወኢሰምዐ፡ ሮብዓም፡ ቃላተ፡ ሕዝብ፡ እስመ፡ ኮነት፡ ዕልወት፡ እምኀበ፡ እግዚአብሔር፡ ቃሎ፡ ዘነበበ፡ በእዴሁ፡ ለአኪያ፡ ሴሎናዊ፡ በእንተ፡ ኢዮርብዓም፡ ወልደ፡ ናባጥ፡ ወበእንተ፡ ኵሉ፡ እስራኤል።
16 እስመ፡ ኢሰምዖሙ፡ ንጉሥ፡ ወአውሥኡ፡ ኵሉ፡ ሕዝብ፡ ወይቤልዎ፡ ለንጉሥ፡ ምንትኑ፡ መክፈልት፡ ምስለ፡ ዳዊት፡ ወምንትኑ፡ ርስትነ፡ ምስለ፡ ወልደ፡ ዕሤይ፡ እትዉ፡ እስራኤል፡ ውስተ፡ ማኅደሪክሙ፡ ወይእዜኒ፡ ርኢ፡ ቤተከ፡ ዳዊት፡ ወሖሩ፡ ኵሉ፡ እስራኤል፡ በበማኅደሪሆሙ።
17 ወእደወ፡ እስራኤልኒ፡ እለ፡ የኃድሩ፡ ውስተ፡ አህጉረ፡ ይሁዳ፡ አንገሡ፡ ላዕሌሆሙ፡ ሮብዓምሃ።
18 ወፈነዎ፡ ንጉሥ፡ ሮብዓም፡ ለአዶኒራም፡ ርኡሰ፡ ግብር፡ ወወገርዎ፡ ደቂቀ፡ እስራኤል፡ በእብን፡ ወሞተ፡ ወሮብዓም፡ ንጉሥ፡ ጐጒዐ፡ ከመ፡ ይዕርግ፡ ውስተ፡ ሠረገላ፡ ከመ፡ ይጒየይ፡ ኢየሩሳሌም።
19 ወዓለውዎ፡ ሕዝበ፡ እስራኤል፡ ለቤተ፡ ዳዊት፡ እስከ፡ ዛቲ፡ ዕለት።
=== chapter 11 ===
[Chapter 11]
1 ወቦአ፡ ሮብዓም፡ ውስተ፡ ኢየሩሳሌም፡ ወአስተጋብአ፡ ኵሎ፡ ሕዝበ፡ ይሁዳ፡ ወሕዝበ፡ ብንያም፡ ወኮነ፡ መክብቦሙ፡ ለዓሠርቱ፡ ወሰመንቱ፡ እልፍ፡ ወራዙት፡ ጽኑዓን፡ ወመስተቃትላን፡ ወተቃተሎሙ፡ ለሕዝበ፡ እስራኤል፡ ከመ፡ ይግብእ፡ ወያግርር፡ ወይክብብ፡ መንግሥቶ፡ ለሮብዓም።
2 ወኮነ፡ ቃለ፡ እግዚአብሔር፡ ኀበ፡ ሳምያ፡ ብእሴ፡ እግዚአብሔር፡ እንዘ፡ ይብል።
3 በሎ፡ ለሮብዓም፡ ወልደ፡ ሰሎሞን፡ ወበሎሙ፡ ለኵሎሙ፡ ሕዝበ፡ ይሁዳ፡ ወብንያም፡ እንዘ፡ ትብል፡ ከመዝ፡ ይቤ፡ እግዚአብሔር።
4 ኢትዕርጉ፡ ወኢትሑሩ፡ ወኢትትቃተልዎሙ፡ ለአኃዊክሙ፡ ግብኡ፡ ወተመየጡ፡ አሐዱ፡ አሐዱ፡ ውስተ፡ ማኅደሪክሙ፡ እስመ፡ እምኀቤየ፡ ዝንቱ፡ ነገር።
5 ወሰምዑ፡ ቃለ፡ እግዚአብሔር፡ ወተመይጡ፡ ወገብኡ፡ ወኢሖሩ፡ ኀበ፡ ኢዮርብዓም።
6 ወሮብዓምኒ፡ ወልደ፡ ሰሎሞን፡ ንጉሥ፡ ነበረ፡ ውስተ፡ ኢየሩሳሌም፡ ወሐወፀ፡ አህጉረ፡ ጽኑዓተ፡ በብሔረ፡ ይሁዳ።
7 ወሐነፃ፡ ለቤተ፡ ልሔም፡ ወለኤጣም፡ ሀገር፡ ወለቴቁኤ።
8 ወለቤተ፡ ሱራ፡ ወለሱለኮን፡ ወለአዶላም።
9 ወለጌት፡ ወለመሪሳን፡ ወለዚፍ፡ ሀገር።
10 ወለአዶራኢም፡ ወለለኪስ፡ ወለአዜቃ፡ ሀገር።
11 ወለሰራአ፡ ወለኤሎን፡ ወለኬብሮን፡ እንተ፡ ይሁዳ፡ ወብንያም፡ አህጉር፡ ጽኑዓት።
12 ወአልበጠ፡ ኵሎ፡ አረፋቲሆን፡ ወሤመ፡ መሳፍንተ፡ ወአንበረ፡ ውስቴቶሙ፡ መዛግብተ፡ እክል፡ ወወይን፡ ወዘይት፡ በበሀገር።
13 ወአንበረ፡ ህየ፡ ኲናታተ፡ ወአርማሐ፡ ወአስተጻንዖሙ፡ ፈድፋደ፡ ወኮንዎ፡ ሎቱ፡ ሕዝበ፡ ይሁዳ፡ ወሕዝበ፡ ብንያም።
14 ወካህናትኒ፡ ወሌዋውያን፡ እለ፡ በኵሉ፡ እስራኤል፡ ተጋብኡ፡ ኀቤሁ፡ እምኵሉ፡ በሐውርት።
15 እስመ፡ ኃደጉ፡ ሌዋውያን፡ ምዕራፈ፡ ማኅደሪሆሙ፡ ወሖረ፡ ኀበ፡ ሕዝበ፡ ይሁዳ፡ በኢየሩሳሌም፡ እስመ፡ ሰደዶሙ፡ ኢዮርብዓም፡ ወደቂቁ፡ ከመ፡ ኢይትቀነዩ፡ ለእግዚአብሔር።
16 ወሤመ፡ ሎቱ፡ ካህናተ፡ አውግር፡ ወለአምሳል፡ ወለዘከንቱ፡ ወለአምሳለ፡ ላሕም፡ ዘገብረ፡ ኢዮርብዓም።
17 ወአውጽኦሙ፡ እምነገደ፡ ኵሉ፡ እስራኤል፡ እለ፡ ሐለዩ፡ በልቦሙ፡ ከመ፡ ይኅሥሥዎ፡ ለእግዚአብሔር፡ አምላከ፡ እስራኤል፡ ወቦኡ፡ ኢየሩሳሌም፡ ከመ፡ ይሡዑ፡ ለእግዚአብሔር፡ አምላከ፡ አበዊሆሙ።
18 ወአፅንዑ፡ መንግሥተ፡ ይሁዳ፡ ወአፅንዕዎ፡ ለሮብዓም፡ ወልደ፡ ሰሎሞን፡ እስከ፡ ሠለስቱ፡ ዓመት፡ እስመ፡ ሖረ፡ በፍናወ፡ ዳዊት፡ ወሰሎሞን፡ አቡሁ፡ ሠለስተ፡ ዓመተ።
19 ወነሥአ፡ ሎቱ፡ ሮብዓም፡ ንጉሥ፡ ብእሲተ፡ እንተ፡ ስማ፡ ሞላት፡ ወለተ፡ ኢያሬሙት፡ ወልዱ፡ ለዳዊት፡ ወአብያኤል፡ ወለተ፡ ኤልያብ፡ ወልደ፡ ዕሤይ።
20 ወወለደት፡ ሎቱ፡ ደቂቀ፡ ሰማርያን፡ ወይዙሳ፡ ወለዛላም።
21 ወእምድኅረ፡ ዝንቱ፡ ነሥአ፡ ሎቱ፡ ብእሲተ፡ እንተ፡ ስማ፡ መአካ፡ ወለተ፡ አቤሴሎም፡ ወወለደት፡ ሎቱ፡ አብያሃ፡ ወኢያቲሃ፡ ወዚዛሃ፡ ወሰሎሚትሃ።
22 ወአፍቀራ፡ ሮብዓም፡ ለመአካ፡ ወለተ፡ አቤሴሎም፡ እምኵሎን፡ አንስትያሁ፡ ወእምኵሎን፡ ዕቁባቲሁ፡ እስመ፡ ዓሥሩ፡ ወሰማኒ፡ አንስተ፡ ነሥአ፡ ወዕቁባቲሁ፡ ስሳ፡ ወወለደ፡ ውሉደ፡ ዕሥራ፡ ወሰመንተ፡ አትቡዐ፡ ወአዋልደ፡ ስሳ።
23 ወሤሞ፡ ሮብዓም፡ ንጉሥ፡ መልአከ፡ ለአብያ፡ ወልደ፡ መአካ፡ ወሰፈነ፡ ላዕለ፡ አኃዊሁ፡ እስመ፡ ያፈቅሮ፡ እስመ፡ ሐለየ፡ ከመ፡ ያንግሦ።
24 ወአብየ፡ ወዓብየ፡ እምኵሉ፡ ደቂቁ፡ ወሐነፀ፡ በኵሉ፡ በሐውርተ፡ ይሁዳ፡ ወብንያም፡ አህጉረ፡ ጽኑዓተ፡ ወአንበረ፡ ውስቴቶሙ፡ እክለ፡ ብዙኀ፡ ፈድፋደ፡ ወነሥአ፡ ብዙኃተ፡ አንስተ።
=== chapter 12 ===
[Chapter 12]
1 ወኮነ፡ እምድኅረ፡ ጸንዓት፡ መንግሥቱ፡ ለሮብዓም፡ ወተጠዓጥዓ፡ ሎቱ፡ ረስዐ፡ ትእዛዘ፡ እግዚአብሔር፡ ወኵሉ፡ እስራኤል፡ ምስሌሁ።
2 ወኮነ፡ በኃምስ፡ ዓመተ፡ መንግሥቱ፡ ለሮብዓም፡ መጽአ፡ ሱስቀም፡ ንጉሠ፡ ግብፅ፡ ውስተ፡ ኢየሩሳሌም፡ እስመ፡ አበሱ፡ ቅድመ፡ እግዚአብሔር።
3 በዓሠርቱ፡ ወክልኤቱ፡ ምእት፡ ሠረገላ፡ ወበስድስቱ፡ እልፍ፡ አፍራስ፡ ወአልቦሙ፡ ኍልቊ፡ ለዘመጽኡ፡ ምስሌሁ፡ እምብሔረ፡ ግብፅ፡ ወእም፡ በሐውርተ፡ ልብያስ፡ ወሞጣግልያን፡ ወሰብአ፡ ኢትዮጵያ።
4 ወአኃዝዎን፡ ለአህጉር፡ ጽኑዓት፡ እለ፡ ሀለዋ፡ ውስተ፡ ይሁዳ፡ ወበጽሑ፡ እስከ፡ ኢየሩሳሌም።
5 ወመጽአ፡ ሰማዕያስ፡ ነቢይ፡ ኀበ፡ ሮብዓም፡ ንጉሥ፡ ወኀበ፡ መላእክተ፡ ይሁዳ፡ እለ፡ ጉቡአን፡ ውስተ፡ ኢየሩሳሌም፡ እምገጸ፡ ሱስቀም፡ ንጉሠ፡ ግብፅ፡ ወይቤሎሙ፡ ከመዝ፡ ይቤ፡ እግዚአብሔር፡ አንትሙኒ፡ ወአነኒ፡ ኃደጉክሙ፡ ውስተ፡ እዴሁ፡ ለሱስቀም፡ ንጉሠ፡ ግብፅ።
6 ወኃፍሩ፡ መላእክተ፡ እስራኤል፡ ወንጉሦሙ፡ ወይቤሉ፡ ጻድቅ፡ እግዚአብሔር።
7 ወሶበ፡ ርእየ፡ እግዚአብሔር፡ ከመ፡ ተመይጡ፡ ወነስሑ፡ ኮነ፡ ቃለ፡ እግዚአብሔር፡ ኀበ፡ ሰማዕያስ፡ ነቢይ፡ እንዘ፡ ብል፡ እመ፡ ተመይጡ፡ ኢያኃልቆሙ፡ ወእሁቦሙ፡ ሣሕተ፡ ንሰቲተ፡ ለመድኃኒት፡ ወኢያንጠበጥብ፡ መዓትየ፡ ላዕለ፡ ኢየሩሳሌም።
8 ከመ፡ ይኩኑኒ፡ አግብርተ፡ ወያእምሩ፡ ቅኔየ፡ ወቅኔ፡ ነገሥተ፡ ምድር።
9 ወዓርገ፡ ሱስቀም፡ ንጉሠ፡ ግብፅ፡ ላዕለ፡ ኢየሩሳሌም፡ ወነሥአ፡ መዛግብተ፡ ዘሀሎ፡ ውስተ፡ ቤተ፡ እግዚአብሔር፡ ወመዛግብተ፡ ዘሀሎ፡ ውስተ፡ ቤተ፡ ንጉሥ፡ ወነሥአ፡ ኵሎ፡ ወላትወ፡ ወርቅ፡ እለ፡ ገብረ፡ ሰሎሞን።
10 ወገብረ፡ ሮብዓም፡ ህየንቴሆሙ፡ ወላትወ፡ ብርት፡ ወሤመ፡ ላዕሌሆሙ፡ ሮብዓም፡ ንጉሥ፡ መላእክተ፡ እለ፡ ይቀውሙ፡ ወየዓቅቡ፡ አናቅጸ፡ ንጉሥ።
11 ወኮነ፡ አመ፡ ቦአ፡ ንጉሥ፡ ውስተ፡ ቤተ፡ እግዚአብሔር፡ ይበውኡ፡ ምስሌሁ፡ መላእክት፡ እለ፡ ይቀውሙ፡ ወየዓቅቡ፡ አናቅጸ፡ ንጉሥ።
12 ወሶበ፡ ተመይጠ፡ ርኅቀ፡ እምኔሁ፡ መዓተ፡ እግዚአብሔር፡ ወኢያኅለቆሙ፡ ለዝሉፉ፡ እስመ፡ ውስተ፡ ይሁዳ፡ ተረክበ፡ ቃል፡ ሠናይ።
13 ወፀንዐ፡ ሮብዓም፡ በኢየሩሳሌም፡ ወነግሠ፡ እንዘ፡ ወልደ፡ አርባዓ፡ ወአሐዱ፡ ዓመት፡ ውእቱ፡ ሮብዓም፡ አመ፡ አንገሥዎ፡ ወዓሠርቱ፡ ወሰብዓተ፡ ዓመተ፡ ነግሠ፡ በኢየሩሳሌም፡ ውስተ፡ ሀገር፡ እንተ፡ ኃረያ፡ እግዚአብሔር፡ ወተሰምየ፡ በህየ፡ እምኵሉ፡ ነገደ፡ እስራኤል፡ ወስማ፡ ለእሙ፡ ንዑማ፡ አሞናዊት።
14 ወገብረ፡ እኪተ፡ ወኢያርትዐ፡ ልቦ፡ ከመ፡ ይኅሥሦ፡ ለእግዚአብሔር።
15 ወቃላተ፡ ሮብዓምኒ፡ ቀደምት፡ ወደኃርት፡ አኮኑ፡ ጽሑፋት፡ እማንቱ፡ በቃላተ፡ ሰማዕያስ፡ ነቢይ፡ ወኡዳ፡ ዘይሬኢ፡ ኵሎ፡ ምግባሮ፡ ወይትቃተሎ፡ ሮብዓም፡ ለኢዮርብዓም፡ በኵሉ፡ መዋዕል።
16 ወኖመ፡ ሮብዓም፡ ወተቀብረ፡ ምስለ፡ አበዊሁ፡ ውስተ፡ ሀገረ፡ ዳዊት፡ ወነግሠ፡ አብያ፡ ወልዱ፡ እምድኅሬሁ።
=== chapter 13 ===
[Chapter 13]
1 አመ፡ ዓሡሩ፡ ወሰሙኑ፡ ዓመተ፡ መንግሥቱ፡ ለኢዮርብዓም፡ ንጉሠ፡ እስራኤል፡ ነግሠ፡ አብያ፡ ላዕለ፡ ይሁዳ።
2 ወስድስተ፡ ዓመተ፡ ነግሠ፡ በኢየሩሳሌም፡ ወስማ፡ ለእሙ፡ መአካ፡ ወለተ፡ ኡርሄል፡ እንተ፡ እምብሔረ፡ ገባኦን፡ ወኮነ፡ ቀትል፡ ማእከለ፡ አብያ፡ ንጉሠ፡ ይሁዳ፡ ወማእከለ፡ ኢዮርብዓም፡ ንጉሠ፡ እስራኤል።
3 ወተቃተሎ፡ አብያ፡ በእደው፡ ጸናዕት፡ ወመስተቃትላን፡ በአርባዓ፡ እልፍ፡ እደው፡ ጸናዕት፡ ወኢዮርብዓምኒ፡ ተቃተሎ፡ በሰማንያ፡ እልፍ፡ እደው፡ ጸናዕት፡ ወመስተቃትላን።
4 ወቆመ፡ አብያ፡ ላዕለ፡ ደብረ፡ ሳምሮን፡ ዘሀሎ፡ ውስተ፡ ደብረ፡ ኤፍሬም፡ ወይቤ፡ ስምዑኒ፡ ኢዮርብዓም፡ ወኵሉ፡ እስራኤል።
5 አኮኑ፡ ለክሙ፡ አእምሮ፡ እስመ፡ እግዚአብሔር፡ አምላከ፡ እስራኤል፡ አቀመ፡ ንጉሠ፡ ላዕለ፡ እስራኤል፡ ለዓለም፡ ለዳዊት፡ ወለደቂቁ፡ በኪዳን።
6 ወተንሥአ፡ ኢዮርብዓም፡ ወልደ፡ ናባጥ፡ ገብሩ፡ ለሰሎሞን፡ ወልደ፡ ዳዊት፡ ወተግኅሠ፡ ወተፈልጠ፡ እምእግዚኡ።
7 ወተጋብኡ፡ ምስሌሁ፡ እደው፡ እኩያን፡ ወደቂቀ፡ ረሲዓን፡ ወተንሥአ፡ ወሖረ፡ ኀበ፡ ሮብዓም፡ ወልደ፡ ሰሎሞን፡ ወሮብዓምኒ፡ ወሬዛ፡ ወኢኮነ፡ ጥቡዐ፡ በልቡ፡ ወኢጸንዐ፡ በቅድሜሁ።
8 ወይእዜኒ፡ አንትሙ፡ ትቤሉ፡ ትጽንዑ፡ ወትትብዑ፡ መንገለ፡ መንግሥተ፡ እግዚአብሔር፡ ዘበእዴሆሙ፡ ሀለወ፡ ለደቂቀ፡ ዳዊት፡ ወአንትሙኒ፡ ሕዝብ፡ ብዙኃን፡ ፈድፋደ፡ ወምስሌክሙ፡ አልሕምት፡ ዘወርቅ፡ ዘገብረ፡ ለክሙ፡ ኢዮርብዓም፡ አማልክተ።
9 ወአውጻአክሙ፡ እምኔክሙ፡ ካህናተ፡ እግዚአብሔር፡ ደቂቀ፡ አሮን፡ ወሌዋውያን፡ አበይክሙ፡ ወረሰይክሙ፡ ለክሙ፡ ካህናተ፡ እምአሕዛበ፡ ምድር፡ ወኵሉ፡ ዘሖረ፡ ይመልእ፡ እዴሁ፡ ለጣዕዋ፡ ላሕም፡ ወስድስቱ፡ ጣዕዋ፡ ላሕም፡ ወእምአልሕምት፡ ወአባግዕ፡ ስድስቱ፡ ወኮኑ፡ ካህናተ፡ ለዘኢኮኑ፡ አማልክተ።
10 ወንሕነሰ፡ ለእግዚአብሔር፡ አምላክነ፡ ኢንረስዖ፡ ወካህቲሁኒ፡ ለእግዚአብሔር፡ ይትለአክዎ።
11 ደቂቀ፡ አሮን፡ ወሌዋውያን፡ በበዕብሬቶሙ፡ የዓጥኑ፡ ለእግዚአብሔር፡ ጽንሐሐ፡ በበነግህ፡ ወበበሠርክ፡ ወዕጣነ፡ ወምሥያመ፡ ኅብስት፡ ላዕለ፡ ማእድ፡ ንጽሕት፡ ወተቅዋመ፡ ማኅቶት፡ ዘወርቅ፡ ወመኃትወ፡ እለ፡ የኀትዋ፡ በበነግህ፡ ወበበሠርክ፡ እስመ፡ ንሕነ፡ ነዓቅብ፡ ቤተ፡ እግዚአብሔር፡ አምላከ፡ አበዊነ፡ ወአንትሙሰ፡ ረሳዕክምዎ።
12 ወናሁ፡ ምስሌነ፡ ፍጽመነ፡ እግዚአብሔር፡ ወካህናቲሁኒ፡ ወአቅርንትኒ፡ እለ፡ ይጸርሑ፡ ወያሰምዑ፡ ላዕሌክሙ፡ ወደቂቀ፡ እስራኤልሰ፡ ይተልውዎ፡ ለእግዚአብሔር፡ አምላከ፡ አበዊሆሙ፡ ወይትራከቡ።
13 ወኢዮርባዓምኒ፡ ተመይጠ፡ ከመ፡ ይዕግት፡ ወይምጽኦሙ፡ እንተ፡ ድኅሬሆሙ፡ ወኮነ፡ በአንጻረ፡ ትዕይንቶሙ፡ ለይሁዳ፡ ወዓገተ፡ ድኅሬሆሙ።
14 ወተመይጡ፡ ይሁዳ፡ ወቀትል፡ እምድኅሬሆሙ፡ ወእምቅድሜሆሙ፡ ወጸርሑ፡ ኀበ፡ እግዚአብሔር፡ ወካህናትኒ፡ ይነፍሑ፡ በአቅርንት።
15 ወጸርሑ፡ እደወ፡ ይሁዳ፡ ወሶበ፡ ጸርሑ፡ እደወ፡ ይሁዳ፡ እግዚአብሔር፡ ቀተሎ፡ ለኢዮርብዓም፡ ወለኵሎሙ፡ ሕዝበ፡ እስራኤል፡ በቅድመ፡ አብያ፡ ንጉሠ፡ ይሁዳ፡ ወቅድመ፡ ሕዝቡ።
16 ወጐዩ፡ ሕዝበ፡ እስራኤል፡ እምገጸ፡ ይሁዳ፡ ወመጠዎሙ፡ እግዚአብሔር፡ ውስተ፡ እዴሆሙ።
17 ወቀተለ፡ ወአውደቀ፡ እምኔሆሙ፡ አብያ፡ ንጉሠ፡ ይሁዳ፡ ወሕዝቡኒ፡ ምስሌሁ፡ ወኮነ፡ ድቀት፡ ዓቢይ፡ ወወድቁ፡ ቅቱላን፡ እምሕዝበ፡ እስራኤል፡ ኃምሳ፡ እልፍ፡ እደው፡ ጸናዕት፡ ወመስተቃትላን።
18 ወኃሥሩ፡ ወተትሕቱ፡ ደቂቀ፡ እስራኤል፡ በይእቲ፡ ዕለት፡ ወጸንዑ፡ ደቂቀ፡ ይሁዳ፡ እስመ፡ ተወከሉ፡ በእግዚአብሔር፡ አምላከ፡ አበዊሆሙ።
19 ወሰደደ፡ አብያ፡ ድኅሬሁ፡ ለኢዮርብዓም፡ ወነሥአ፡ እምኔሁ፡ አህጉረ፡ ቤቴል፡ ወአዕፃዳቲሃ፡ ወለአፍሬን፡ ወለአዋልዲሃ።
20 ወኢረከበ፡ ኢዮርብዓም፡ ኃይለ፡ እምአሜሃ፡ በኵሉ፡ መዋዕለ፡ አብያ፡ ንጉሠ፡ ይሁዳ፡ ወቀተሎ፡ እግዚአብሔር፡ ወሞተ።
21 ወጸንዐ፡ አብያ፡ ወነሥአ፡ ሎቱ፡ ዓሠርተ፡ ወአርባዕተ፡ አንስተ፡ ወተወልዱ፡ ሎቱ፡ ዕሥራ፡ ወክልኤቱ፡ ደቅ፡ ወዓሥር፡ ወክልኤ፡ አዋልድ።
22 ወእለ፡ ተርፉ፡ ቃላተ፡ አብያ፡ ንጉሠ፡ ይሁዳ፡ ወምግባሩ፡ ወቃላቲሁ፡ ነዮን፡ ጽሑፋት፡ በመጽሐፈ፡ እደ፡ ነቢይ።
23 ወኖመ፡ አብያ፡ ምስለ፡ አበዊሁ፡ ወተቀብረ፡ ውስተ፡ ሀገረ፡ ዳዊት።
=== chapter 14 ===
[Chapter 14]
1 ወነግሠ፡ አሣ፡ ወልዱ፡ እምድኅሬሁ፡ ወበመዋዕሊሁ፡ ለአሣ፡ ሀድአት፡ ወአርመመት፡ ምድረ፡ ይሁዳ፡ ዓሠርተ፡ ዓመተ።
2 ወገብረ፡ ሠናየ፡ ወረትዐ፡ በቅድመ፡ እግዚአብሔር፡ አምላኩ።
3 ወነሠተ፡ ቤተ፡ ምሥዋዐ፡ ነኪር፡ ወዘአውግር፡ ወቀጥቀጠ፡ ኵሎ፡ ግልፎሆሙ፡ ወገዘመ፡ ኵሎ፡ አእዋሚሆሙ።
4 ወይቤሎሙ፡ ለሕዝበ፡ ይሁዳ፡ ከመ፡ ይኅሥሥዎ፡ ለእግዚአብሔር፡ አምላከ፡ አበዊሆሙ፡ ወከመ፡ ይግበሩ፡ ሕገ፡ እግዚአብሔር፡ ወትእዛዛቲሁ።
5 ወአግኃሠ፡ ወነሠተ፡ እምኵሉ፡ አህጉረ፡ ይሁዳ፡ ኵሎ፡ አብያተ፡ መሥዋዕት፡ ዘነኪር፡ ወግልፎሆሙ፡ ወነበራ፡ በሰላም፡ ኵሎን፡ አህጉር፡ ጽኑዓት፡ ወምድረ፡ ይሁዳ፡ እስመ፡ አርመመት፡ ምድር፡ ወአዕረፈት።
6 ወአልቦ፡ ዘይትቃተሎሙ፡ በውእቱ፡ መዋዕል፡ እስመ፡ እግዚአብሔር፡ አዕረፎሙ።
7 ወይቤሎሙ፡ ለሕዝበ፡ ይሁዳ፡ ንሕንጽ፡ እላንተ፡ አህጉረ፡ ወንግበር፡ ሎቶን፡ አረፋተ፡ ወማኅፈደ፡ ወአናቅጸ፡ ወመናግሥተ፡ እለ፡ ቦሙ፡ ንሰፍና፡ ለምድር፡ እስመ፡ በከመ፡ ኃሠሥናሁ፡ ለእግዚአብሔር፡ አምላክነ፡ ውእቱኒ፡ ኃሠሠነ፡ ወአዕረፈነ፡ እምዓውድነ፡ ወተመጠወነ።
8 ወኮኑ፡ ሎቱ፡ ለአሣ፡ ሠራዊት፡ ጽኑዓን፡ ወመስተቃትላን፡ እለ፡ ይክሉ፡ ፀዊረ፡ ወልታ፡ ወኲናት፡ በምድረ፡ ይሁዳ፡ ሠላሳ፡ እልፍ፡ ወበምድረ፡ ብንያም፡ ወጻፍያን፡ ወነዳፍያን፡ ዕሥራ፡ ወኃምስቱ፡ እልፍ፡ እሉ፡ ኵሎሙ፡ እደው፡ ጸናፅት፡ ወመስተቃትላን።
9 ወወፅአ፡ ላዕሌሁ፡ ዝሪ፡ ንጉሠ፡ ኢትዮጵያ፡ በሠራዊት፡ ጽኑዓን፡ በምእት፡ እልፍ፡ ወበሠለስቱ፡ ምእት፡ ሠረገላት፡ ወበጽሀሐ፡ እስከ፡ ብሔረ፡ ማሬሳ።
10 ወወፅአ፡ አሣ፡ ንጉሠ፡ ይሁዳ፡ ለቀበላሁ፡ ወተዓየነ፡ ለተቃትሎ፡ ውስተ፡ ፈለግ፡ ዘአንጻረ፡ ደቡቡ፡ ለውእቱ፡ ፈለገ፡ ብሔረ፡ ማሬሳ።
11 ወጸርሐ፡ አሣ፡ ኀበ፡ እግዚአብሔር፡ አምላኩ፡ እንዘ፡ ይብል፡ እግዚኦ፡ ኢይሰአን፡ በኀቤከ፡ አድኅኖ፡ በብዙኅኒ፡ ወበኅዳጥኒ፡ አጽንዓነ፡ እግዚኦ፡ አምላክነ፡ እስመ፡ ብከ፡ ተወከልነ፡ ወበስምከ፡ መጻእነ፡ ላዕሌሆሙ፡ ላዕለ፡ እሉ፡ ሠራዊት፡ ዘአልቦ፡ ኍልቊ፡ እግዚኦ፡ አምላክነ፡ ኢይጽንዓነ፡ ሰብእ፡ በቅድሜከ።
12 ወቀተሎሙ፡ እግዚአብሔር፡ ለሕዝበ፡ ኢትዮጵያ፡ በቅድመ፡ ንጉሥ፡ አሣ፡ ወበቅድመ፡ ሕዝበ፡ ይሁዳ፡ ወተሰብሩ፡ ወጐዩ፡ ሰብአ፡ ኢትዮጵያ።
13 ወሰደዶሙ፡ አሣ፡ ንጉሥ፡ ወሕዝቡኒ፡ ድኅሬሆሙ፡ እስከ፡ ብሔረ፡ ጌዶር፡ ወድቁ፡ ወተቀትሉ፡ ሰብአ፡ ኢትዮጵያ፡ እስከ፡ ኃጥኡ፡ ዝክረ፡ እስመ፡ ተቀጥቀጡ፡ በቅድመ፡ እግዚአብሔር፡ ወበቅድመ፡ ኃይሉ፡ ወማህረክዎሙ፡ ምህርካ፡ ብዙኀ፡ ወጠፍኡ።
14 ወኀልቁ፡ አዕፃዳቲሆሙ፡ እለ፡ አድያማተ፡ ጌዶር፡ እስመ፡ ኮነ፡ ድንጋፄ፡ እምኀበ፡ እግዚአብሔር፡ ላዕሌሆሙ፡ ወበርበሩ፡ ኵሎ፡ አህጉሪሆሙ፡ ወማህረኩ፡ ኵሎ፡ እንስሳሆሙ፡ ወኵሎ፡ ዘአጥረዩ፡ ሎሙ፡ ነሥኡ።
15 ወእስከ፡ ተዓይነ፡ ጥሪቶሙ፡ ዘእምዜናውያን፡ ወአኃለቁ፡ ወነሥኡ፡ ብዙኀነ፡ መራዕየ፡ አባግዕ፡ ወአጣሊ፡ ወአግማለ፡ ወተመይጡ፡ ብሔረ፡ ኢየሩሳሌም።
=== chapter 15 ===
[Chapter 15]
1 ወአዛርያስ፡ ወልደ፡ አዳድ፡ መልአ፡ ላዕሌሁ፡ መንፈሰ፡ እግዚአብሔር።
2 ወወፅአ፡ ለቀበላ፡ አሣ፡ ንጉሥ፡ ወኵሉ፡ ሕዝበ፡ ይሁዳ፡ ወብንያም፡ ወይቤ፡ ስምዑኒ፡ አሣ፡ ወኵሉ፡ ሕዝበ፡ ይሁዳ፡ ወብንያም፡ እግዚአብሔር፡ ምስሌክሙ፡ ሀሎ፡ ሶበ፡ አንትሙ፡ ኮንክሙ፡ ምስሌሁ፡ ወእመኒ፡ ኃሠሥክምዎ፡ ይትረከብ፡ ለክሙ፡ ወእመኒ፡ ረሳዕክምዎ፡ ይገድፈክሙ።
3 ወብዙኀት፡ እማንቱ፡ መዋዕሊሁ፡ ለእስራኤል፡ ወእምአሜሃ፡ ኢያምለክዎ፡ ለአምላክ፡ ዘበአማን፡ ወአልቦ፡ አምላክ፡ ዘበኀቤሆሙ፡ ወአልቦ፡ ካህን፡ ዘይርዕዮሙ፡ ወአልቦ፡ ሕግ።
4 ወይትመየጥ፡ ቦሙ፡ እግዚአብሔር፡ አምላከ፡ እስራኤል፡ ወይትራከቦሙ።
5 ወበውእቱ፡ መዋዕል፡ አልቦ፡ ሰላም፡ ለዘይወፅእ፡ ወለዘይበውእ፡ እስመ፡ መዓተ፡ እግዚአብሔር፡ ላዕለ፡ ኵሎሙ፡ እለ፡ የኃድሩ፡ ውስተ፡ በሐውርት።
6 ወይትቃተሉሕዝብ፡ ለሕዝብ፡ ወሀገር፡ ለሀገር፡ እስመ፡ አደንገፆሙ፡ እግዚአብሔር፡ በኵሉ፡ ምንዳቤ።
7 ወአንትሙሰ፡ ጽንዑ፡ ወኢይድክማ፡ እደዊክሙ፡ እስመ፡ ብክሙ፡ ዕሤተ፡ ምግባሪክሙ።
8 ወሶመ፡ ሰምዐ፡ አሣ፡ እሎንተ፡ ቃላተ፡ ወዘንተ፡ ትንቢተ፡ አዛርያስ፡ ነቢይ፡ ጸንዐ፡ ወአውጽአ፡ ኵሎ፡ ርኵሰ፡ እምኵሉ፡ አህጉረ፡ ይሁዳ፡ ወብንያም፡ ወእምኵሉ፡ አህጉር፡ ዘአኃዘ፡ እምደብረ፡ ኤፍሬም፡ ወሐደሰ፡ ምሥዋዐ፡ ቤተ፡ እገዚአብሔር፡ ዘሀሎ፡ አንፃረ፡ ቤተ፡ እግዚአብሔር።
9 ወአስተጋብአ፡ ሕዝበ፡ ይሁዳ፡ ወብንያም፡ ወፈላስያን፡ እለ፡ የኃድሩ፡ ምስሌሁ፡ እምሕዝበ፡ ኤፍሬም፡ ወምናሴ፡ ወእምህዝበ፡ ስምዖን፡ እስመ፡ ገብኡ፡ ወተፃፈቁ፡ ኀቤሁ፡ ብዙኀን፡ እም፡ እስራኤል፡ ሶበ፡ ርእዩ፡ ከመ፡ እግዚአብሔር፡ አምላኩ፡ ምስሌሁ።
10 ወተጋብኡ፡ ውስተ፡ ኢየሩሳሌም፡ በሣልስ፡ ወርኅ፡ በዓሥር፡ ወኃምስ፡ ዓመተ፡ መንግሥቱ፡ ለአሣ፡ ንጉሠ፡ ይሁዳ።
11 ወሦዐ፡ አሜሃ፡ በይእቲ፡ ዕለት፡ ለእግዚአብሔር፡ እምህርካ፡ ዘአምጽአ፡ ሰብዓተ፡ ምእተ፡ አልሕምተ፡ ወሰብዓተ፡ ምእተ፡ አባግዐ፡ ወሰብዓተ፡ ምእተ፡ አጣሌ።
12 ወሖረ፡ በኪዳን፡ ከመ፡ ይኅሥሦ፡ ለእግዚአብሔር፡ አምላከ፡ አበዊሁ፡ እምኵሉ፡ ልቡ፡ ወእምኵሉ፡ ሕሊናሁ።
13 ወኵሉ፡ ዘኢየኃሥሦ፡ ለእግዚአብሔር፡ አምላከ፡ እስራኤል፡ ለይሙት፡ እም፡ ወሬዛ፡ እስከ፡ ልኂቅ፡ ወእምብእሲ፡ እስከ፡ ብእሲት።
14 ወመሐሉ፡ በእግዚአብሔር፡ በቃል፡ ዓቢይ፡ ወበአቅርንት፡ ወበብዕዛ።
15 ወተፈሥሑ፡ ኵሉ፡ ይሁዳ፡ በእንተ፡ መሐላ፡ እስመ፡ እምኵሉ፡ ልቦሙ፡ ኃሠሥዎ፡ ወተራከቦሙ፡ ወአዕረፎሙ፡ እግዚአብሔር፡ እምዓውዶሙ።
16 ወለመአካ፡ እሙ፡ አግኃሣ፡ እምኵናና፡ ከመ፡ ኢትስግድ፡ ለአስጣርጤስ፡ ወቀጥቀጦ፡ ለውእቱ፡ ምስል፡ ወአውዓዮ፡ በውስተ፡ ፈለገ፡ ቄድሮስ።
17 ወባሕቱ፡ ኢሰሰሉ፡ አውግር፡ ዓዲሁ፡ ሀለዉ፡ ውስተ፡ ይሁዳ፡ ወውስተ፡ እስራኤል፡ ዘእንበለ፡ ባሕቲቱ፡ ልቡ፡ ለአሣ፡ ኮነ፡ ፍጹመ፡ በኀበ፡ እግዚአብሔር፡ በኵሉ፡ መዋዕሊሁ።
18 ወአብአ፡ ንዋየ፡ ቅድሳት፡ ዘዳዊት፡ አቡሁ፡ ወቅድሳተ፡ ቤተ፡ እግዚአብሔር፡ አምላኩ፡ ዘወርቅ፡ ወዘብሩር።
19 ወአልባ፡ ዘተቃተሎ፡ ለንጉሥ፡ አሣ፡ እስከ፡ ሠላሳ፡ ወኃምስቱ፡ ዓመተ፡ መንግሥቱ።
=== chapter 16 ===
[Chapter 16]
1 ወበሠላሳ፡ ወስድስቱ፡ ዓመተ፡ መንግሥቱ፡ ለአሣ፡ ዓርገባኦስ፡ ንጉሠ፡ እስራኤል፡ ላዕለ፡ ይሁዳ፡ ወሐነፃ፡ ለራማ፡ ከመ፡ ኢይርከብ፡ ሙባኣ፡ ወሙፃኣ፡ አሣ፡ ንጉሠ፡ ይሁዳ።
2 ወነሥአ፡ አሣ፡ ወርቀ፡ ወብሩረ፡ እመዛግብተ፡ ቤተ፡ እግዚአብሔር፡ ወእመዛግብተ፡ ቤተ፡ ንጉሥ፡ ወፈነወ፡ ለወልደ፡ አዴር፡ ንጉሠ፡ ሶርያ፡ ዘይነብር፡ ብሔረ፡ ደማስቆ፡ እንዘ፡ ይብል።
3 ወሢም፡ ኪዳነ፡ ማእከሌየ፡ ወማእከሌከ፡ ወማእከለ፡ አቡየ፡ ወማእከለ፡ አቡከ፡ ወናሁ፡ ፈኖኩ፡ ለከ፡ ወርቀ፡ ወብሩረ፡ ከም፡ ትምጻእ፡ ወትሁኮ፡ እምኔየ፡ ለባኦስ፡ ንጉሠ፡ እስራኤል፡ ከመ፡ ይትሀወክ፡ ወይትገኃሥ፡ እምኔየ።
4 ወሰምዖ፡ ወልደ፡ አዴር፡ ለንጉሥ፡ አሣ፡ ወፈነወ፡ መላእክቲሁ፡ ጸናዕተ፡ ላዕለ፡ አህጉረ፡ እስራኤል፡ ወቀተለ፡ ብሔረ፡ አእዮን፡ ወብሔረ፡ ዳን፡ ወብሔረ፡ አብሊማኢን፡ ወኵሎ፡ አድያመ፡ ንፍታሌም።
5 ወሶበ፡ ሰምዐ፡ ባኦስ፡ ኃደገ፡ ከመ፡ ኢይሕንጽዋ፡ ለራማ፡ ሀገር፡ ወአዕረፈ፡ እምገቢሮቱ።
6 ወአሣ፡ ንጉሠ፡ ይሁዳ፡ አስተጋብአ፡ ኵሎ፡ ሕዝበ፡ ይሁዳ፡ ወነሥአ፡ ወፆረ፡ ኵሎ፡ እብነ፡ ራማ፡ ወዕፀዊሃ፡ ዘሐነፀ፡ ባኦስ፡ ወአሕነፀ፡ በውእቱ፡ ዕፀው፡ ወእብን፡ ብሔረ፡ ገባኦን፡ ወብሔረ፡ መሴፋ።
7 ወበውእቱ፡ መዋዕል፡ መጽአ፡ አናኒ፡ ነቢይ፡ ኀበ፡ አሣ፡ ንጉሠ፡ ይሁዳ፡ ወይቤሎ፡ እስመ፡ ተወከልከ፡ በንጉሠ፡ ሶርያውያን፡ ወኢተወከልከ፡ በእግዚአብሔር፡ አምላክከ፡ በእንተ፡ ዝንቱ፡ ድኅኑ፡ ሠራዊተ፡ ሶርያውያን፡ እምእዴከ።
8 አኮኑ፡ ሰብአ፡ ኢትዮጵያ፡ ወሰብአ፡ ልብያስ፡ ኮኑ፡ ብዙኃነ፡ ጽኑዓነ፡ ወኃያላነ፡ ወተባዕያነ፡ ወመስተጽዕናን፡ በአፍራስ፡ ብዙኀን፡ ጥቀ፡ ወእመሰ፡ ተወከልከ፡ በእግዚአብሔር፡ አምላክከ፡ ያገብኦሙ፡ ወይሜጥዎሙ፡ ውስተ፡ እደዊከ።
9 እስመ፡ አዕይንቲሁ፡ ለእግዚአብሔር፡ ይኔጽራ፡ ውስተ፡ ኵሉ፡ ምድር፡ ከመ፡ ያጽንዕ፡ ሕሊናሆሙ፡ ለፍጹማነ፡ ልብ፡ ወይእዜኒ፡ ጽናዕ፡ በምልእት፡ ወፍጽምት፡ ልብ፡ በኀቤሁ፡ ወይእዜኒ፡ በኢያእምሮትከ፡ ጌገይከ፡ በዝንቱ፡ ቃል፡ ወእምይእዜሰ፡ ይከውን፡ ምስሌከ፡ ቀትል።
10 ወተምዐ፡ ንጉሥ፡ አሣ፡ ላዕለ፡ አናኒ፡ ነቢይ፡ ወአንበሮ፡ ውስተ፡ ቤተ፡ ሞቅሕ፡ እስመ፡ ተምዐ፡ ንጉሥ፡ አሣ፡ ላዕለ፡ አናኒ፡ ነቢይ፡ በዝንቱ፡ ቃል፡ ወበእንተዝ፡ ቀሠፎ፡ ለአሣ፡ በውእቱ፡ መዋዕል፡ ማእከለ፡ ሕዝብ።
11 ወነዮን፡ ቃላተ፡ አሣ፡ ቀደምት፡ ወደኃርት፡ ጽሑፋት፡ ውስተ፡ መጽሐፈ፡ ነገሥተ፡ ይሁዳ፡ ወእስራኤል።
12 ወደወየ፡ አሣ፡ አመ፡ ሠላስ፡ ወታስዕ፡ ዓመተ፡ መንግሥቱ፡ አገሪሁ፡ ብዙኀ፡ መዋዕለ፡ ወበደዌሁኒ፡ ኢኃሠሦ፡ ለእግዚአብሔር፡ ዘእንበለ፡ ለዓቀብተ፡ ሥራይ።
13 ወኖመ፡ አሣ፡ ምስለ፡ አበዊሁ፡ ወአዕረፈ፡ በአርባዓ፡ ወአሐዱ፡ ዓመተ፡ መንግሥቱ።
14 ወቀበርዎ፡ ውስተ፡ መቃብር፡ ዘገብረ፡ ለሊሁ፡ በሀገረ፡ ዳዊት፡ ወአስከብዎ፡ ውስተ፡ ዓራት፡ ወመልእዎ፡ እምአፈው፡ እምዘመደ፡ ዕፍረት፡ ዘይገብሩ፡ ሎቱ፡ ሙፃአ፡ ቀበር፡ ዓቢይ፡ ጥቀ።
=== chapter 17 ===
[Chapter 17]
1 ወነግሠ፡ ኢዮሳፍጥ፡ ወልዱ፡ እምድኅሬሁ፡ ወጸንዐ፡ ኢዮሳፍጥ፡ በመንግሥቱ፡ ላዕለ፡ እስራኤል።
2 ወአንበረ፡ ሠራዊት፡ ፀናዕት፡ ውስተ፡ ኵሉ፡ አህጉረ፡ ይሁዳ፡ ወውስተ፡ ኵሉ፡ በሐውርተ፡ ኤፍሬም፡ ወእለ፡ ገብኡ፡ በአሣ፡ አቡሁ።
3 ወሀሎ፡ እግዚአብሔር፡ ምስሌሁ፡ ለኢዮሳፍጥ፡ እስመ፡ ሖረ፡ በፍናወ፡ አበዊሁ፡ ቀደምት።
4 ወኢኃሠሠ፡ አማልክተ፡ ነኪር፡ ዘእንበለ፡ እግዚአብሔር፡ አምላከ፡ አበዊሁ፡ ወበትእዛዛተ፡ አቡሁ፡ ሖረ፡ ወአኮ፡ በግብረ፡ እስራኤል።
5 ወአርትዐ፡ እግዚአብሔር፡ ወአጽንዐ፡ መንግሥቶ፡ በእደዊሁ፡ ወአምጽኡ፡ ሎቱ፡ ኵሉ፡ ሕዝበ፡ ይሁዳ፡ አምኀ፡ ለኢዮሳፍጥ፡ ንጉሥ፡ ወኮነ፡ ብዙኀ፡ መዋዕል፡ ወኮነ፡ ሎቱ፡ ዓቢይ፡ ክብር፡ ወብዕል።
6 ወረትዐ፡ ልቡ፡ ውስተ፡ ፍናወ፡ እግዚአብሔር፡ ወዓዲ፡ ደምሰሶሙ፡ ለአውግር፡ ወለአእዋም፡ እምኵሉ፡ ምድረ፡ ይሁዳ።
7 ወበሣልስ፡ ዓመተ፡ መንግሥቱ፡ ፈነወ፡ መሳፍንተ፡ ወውሉደ፡ ጸናዕት፡ አብድያስሃ፡ ወዘካርያስሃ፡ ወናታሄልሃ፡ ወሚካያስሃ፡ ከመ፡ ይምሀሩ፡ በኵሉ፡ ምድረ፡ ይሁዳ።
8 ወምስሌሆሙኒ፡ ፈነወ፡ ሌዋውያነ፡ ስሙኢያስ፡ ወናትያስ፡ ወዝብድያስ፡ ወኢያስሄል፡ ወሲማራሞት፡ ወኢዮናታን፡ ወአዶንያስ፡ ወጦብያ፡ ወጦባዶንያስ፡ ሌዋውያን፡ ወምስሌሆሙ፡ ኤልሳማ፡ ወኢዮራም፡ ካህናት።
9 ወመሀሩ፡ በአህጉረ፡ ይሁዳ፡ ወምስሌሆሙኒ፡ መጽሐፈ፡ ሕጉ፡ ለእግዚአብሔር፡ ወአንሶሰዉ፡ ውስተ፡ ኵሉ፡ አህጉረ፡ ይሁዳ፡ ወመሀርዎሙ፡ ለሕዝብ።
10 ወኮነ፡ ፍርሃተ፡ እግዚአብሔር፡ ላዕለ፡ ሕዝብ፡ ወላዕለ፡ ነገሥተ፡ ምድር፡ እለ፡ አጽናፈ፡ ይሁዳ፡ ወኢተቃትልዎ፡ ለኢዮሳፍጥ።
11 ወእምኢሎፍሊ፡ ያመጽኡ፡ ሎቱ፡ ለኢዮሳፍጥ፡ ንጉሥ፡ አምኀ፡ ወርቀ፡ ወብሩረ፡ ወገብረ፡ ያመጽኡ፡ ሎቱ፡ ወሰብአ፡ ዓረብኒ፡ ያመጽኡ፡ ሎቱ፡ አባግዐ፡ አትቡዐ፡ ሰባዓ፡ ምእተ፡ ወሰብዓተ፡ ምእተ፡ ወሐራጊተ፡ ጠሊ፡ ሰብዓ፡ ምእተ፡ ወሰብዓተ፡ ምእተ።
12 ወኢዮሳፍጥ፡ እንዘ፡ ይጸንዕ፡ የሐውር፡ ወኀበ፡ ኀበ፡ ይከብር፡ ጥቀ፡ ወሐነፀ፡ አብያተ፡ ውስተ፡ በሐውርተ፡ ይሁዳ፡ ወአህጉረ፡ ጸናዕት።
13 ወገብረ፡ ብዙኀ፡ ተግባረ፡ ሎቱ፡ በይሁዳ፡ ወእደው፡ ጸናዕት፡ መስተቃትላን፡ ወጽኑዓን፡ ሀለዉ፡ ምስሌሁ፡ በኢየሩሳሌም።
14 ወዝንቱ፡ ውእቱ፡ ኍልቆሙ፡ በበቤተ፡ አበዊሆሙ፡ ለይሁዳ፡ ርኡሳነ፡ እልፍ፡ አድናስ፡ መልአክ፡ ወምስሌሁ፡ እደው፡ ጸኑዓን፡ በኃይል፡ ሠላሳ፡ እልፍ።
15 ወምስሌሆሙ፡ ኢዮአናን፡ መስፍን፡ ወምስሌሁኒ፡ ዕሥራ፡ እልፍ፡ ወሰማንያ፡ ምእት፡ እደው።
16 ወምስሌሁኒ፡ ማስያስ፡ ወልደ፡ ዝክሪ፡ ዘይፀመዶ፡ ለእግዚአብሔር፡ ወምስሌሁ፡ እደው፡ ጽናዕት፡ ዕሥራ፡ እልፍ።
17 ወእምነገደ፡ ብንያም፡ ብእሲ፡ ጽኑዕ፡ ዘስሙ፡ ኤልያዳ፡ ወምስሌሁ፡ አደው፡ ነዳፍያን፡ ወወፃፍያን፡ ዕሥራ፡ እልፍ።
18 ወምስሌሁኒ፡ ዮዛብድ፡ ወምስሌሁ፡ ዓሠርቱ፡ እልፍ፡ ወሰማንያ፡ ምእት፡ አደው፡ ጽኑዓን፡ ለተቃትሎ።
19 ወእሉ፡ ኵሎሙ፡ ይትለአክዎ፡ ለንጉሥ፡ ዘእንበለ፡ ዘአንበረ፡ ኢዮሳፍጥ፡ ውስተ፡ አህጉር፡ ጸናዕት፡ ወውስተ፡ ኵሉ፡ በሐውርተ፡ ይሁዳ።
=== chapter 18 ===
[Chapter 18]
1 ወኮኖ፡ ለኢዮሳፍጥ፡ ፈድፋደ፡ ብዕል፡ ወስብሐት፡ ወአውሰበ፡ ኢዮሳፍጥ፡ ብእሲተ፡ እምቤተ፡ አክአብ።
2 ወወረደ፡ እምድኅረ፡ ክልኤ፡ ዓመት፡ ኀበ፡ አክአብ፡ ብሔረ፡ ሰማርያ፡ ወሐረደ፡ ሎቱ፡ አክአብ፡ አልሕምተ፡ ወአባግዐ፡ ብዙኀነ፡ ወለሕዝብኒ፡ እለ፡ ምስለሁ፡ ወአምከሮ፡ ወሰአሎ፡ ከመ፡ ይዕርግ፡ ምስሌሁ፡ ውስተ፡ ራሞት፡ ዘገለዓድ።
3 ወይቤሎ፡ አክአብ፡ ንጉሠ፡ እስራኤል፡ ለኢዮሳፍጥ፡ ንጉሠ፡ ይሁዳ፡ ነዓ፡ ምስሌየ፡ ውስተ፡ ራሞት፡ ሀገር፡ እንተ፡ ብሔረ፡ ገለዓድ፡ ወአውሥአ፡ ወይቤሎ፡ አንሰ፡ ከማከ፡ ወሕዝብየ፡ ከመ፡ ሕዝብከ፡ ለተቃትሎ።
4 ወይቤሎ፡ ኢዮሳፍጥ፡ ለንጉሠ፡ እስራኤል፡ ኅሥሦ፡ እንከዮም፡ ለእግዚአብሔር።
5 ወአስተጋብአ፡ ንጉሠ፡ እስራኤል፡ ነቢያተ፡ አርባዕተ፡ ምእተ፡ እደወ፡ ወይቤሎሙ፡ እሑርኑ፡ ውስተ፡ ራሞት፡ ሀገር፡ እንተ፡ ብሔረ፡ ገለዓድ፡ ለቀትል፡ ወእመ፡ አኮ፡ እኅድግ፡ ወአውሥኡ፡ ወይቤልዎ፡ ዕርግ፡ ወሑር፡ ወይሁቦ፡ እግዚአብሔር፡ በእደዊሁ፡ ለንጉሥ።
6 ወይቤሎ፡ ኢዮሳፍጥ፡ አልቦኑ፡ ዝየ፡ ዓዲ፡ ነቢየ፡ እግዚአብሔር፡ ከመ፡ ንኅሥሥ፡ በኀቤሁ።
7 ወአውሥአ፡ ንጉሠ፡ እስራኤል፡ ወይቤሎ፡ ለኢዮሳፍጥ፡ ዓዲ፡ ሀሎ፡ አሐዱ፡ ብእሲ፡ ከመ፡ ንኅሥሦ፡ ለእግዚአብሔር፡ በእዴሁ፡ ወአንሰ፡ ጸላእክዎ፡ ለውእቱ፡ ብእሲ፡ እስመ፡ ኢይትኔበይ፡ ላዕሌየ፡ ሠናየ፡ እስመ፡ በኵሉ፡ መዋዕሊሁ፡ እኪተ፡ ይትኔበይ፡ ላዕሌየ፡ ወዝንቱ፡ ውእቱ፡ ሚክያስ፡ ወልደ፡ ኢምላእ፡ ወይቤሎ፡ ኢዮሳፍጥ፡ ኢትበል፡ ንጉሥ፡ ከመዝ።
8 ወጸውዐ፡ አክአብ፡ ንጉሠ፡ እስራኤል፡ አሐደ፡ እምሕጽዋኒሁ፡ ወይቤሎ፡ ፍጡነ፡ አምጽኦ፡ ለሚክያስ፡ ወልደ፡ ኢምላእ።
9 ወአክአብ፡ ንጉሠ፡ እስራኤል፡ ወኢዮሳፍጥ፡ ንጉሠ፡ ይሁዳ፡ ይነብሩ፡ ዲበ፡ መንበረ፡ መንግሥት፡ በዘዘዚአሆሙ፡ ወልቡሳን፡ አዕጽፍተ፡ ወይነብሩ፡ ውስተ፡ ኆኅተ፡ መርኅበ፡ አንቀጸ፡ ሰማርያ፡ ወኵሎሙ፡ ነቢያት፡ ይትኔበዩ፡ በቅድሜሁሙ።
10 ወገብረ፡ ሴዴቅያስ፡ ወልደ፡ ካህናን፡ አቅርንተ፡ ዘሐፂን፡ ወይቤ፡ ከመዝ፡ ይቤ፡ እግዚአብሔር፡ በእላንቱ፡ አቅርንት፡ ትወግኦሙ፡ ለሶርያውያን፡ እስከ፡ ታኀልቆሙ።
11 ወኵሎሙ፡ ነቢያት፡ ይትኔበዩ፡ እንዘ፡ ይብሉ፡ ዕርግ፡ ኀበ፡ ራሞት፡ እንተ፡ ገለዓድ፡ ወይሤርኀከ፡ እግዚአብሔር፡ ወይሜጥዎሙ፡ ውስተ፡ እደ፡ ንጉሥ።
12 ወዝንቱ፡ ዘሖረ፡ ሐዋርያ፡ ከመ፡ ይጸውዖ፡ ለሚክያስ፡ ተናገሮ፡ እንዘ፡ ይብል፡ ነዮሙ፡ ነቢያት፡ ተናገሩ፡ በአሐዱ፡ ቃል፡ ሠናየ፡ በእንተ፡ ንጉሥ፡ ወይኩን፡ ቃልከ፡ ከመ፡ አሐዱ፡ እምኔሆሙ፡ ወንብብ፡ ሠናያተ።
13 ወይቤ፡ ሚክያስ፡ ሕያው፡ እግዚአብሔር፡ እስመ፡ ዘይቤለኒ፡ እግዚአብሔር፡ ኪያሃ፡ እትናገር።
14 ወመጽአ፡ ኀበ፡ ንጉሥ፡ ወይቤሎ፡ ንጉሥ፡ ሚክያስ፡ እሑርኑ፡ ኀበ፡ ራሞት፡ እንተ፡ ብሔረ፡ ገለዓድ፡ ለተቃትሎ፡ ወእመ፡ አኮ፡ እኅድግ፡ ወይቤ፡ ሚክያስ፡ ነቢይ፡ ዕርግ፡ ወሑር፡ ወይሤርኀከ፡ እግዚአብሔር፡ ወይገብኡ፡ ውስተ፡ እደዊከ።
15 ወይቤሎ፡ ንጉሠ፡ እስራኤል፡ ሚ፡ መጠነ፡ አምሕለከ፡ ከመ፡ ኢትትናገረኒ፡ በጒሕሉት፡ ዳዕሙ፡ በጽድቅ፡ በስመ፡ እግዚአብሔር።
16 ወይቤ፡ ሚክያስ፡ አኮ፡ ከማሁ፡ ርኢክዎሙ፡ ለሕዝበ፡ እስራኤል፡ ዝርዋነ፡ ውስተ፡ አድባር፡ ከመ፡ አባግዕ፡ ዘአልቦ፡ ኖላዊ፡ ወይቤ፡ እግዚአብሔር፡ አልቦሙ፡ ሰፋኒ፡ ወይግብኡ፡ ኵሎሙ፡ በበማኅደሪሆሙ፡ በሰላም።
17 ወይቤሎ፡ ንጉሠ፡ እስራኤል፡ ለኢዮሳፍጥ፡ ኢይቤለከኑ፡ ከመ፡ ኢይትኔበይ፡ ላዕሌየ፡ ሠናየ፡ እመ፡ ኢኮነ፡ እኪተ።
18 ወይቤ፡ አኮ፡ ከመዝ፡ ሰምዑ፡ ቃለ፡ እግዚአብሔር፡ ርኢክዎ፡ ለእግዚአብሔር፡ እንዘ፡ ይነብር፡ ዲበ፡ መንበሩ፡ ወኵሎሙ፡ ኃይለ፡ ሰማያት፡ ይቀውሙ፡ በየማኑ፡ ወበጸጋሙ።
19 ወይቤ፡ እግዚአብሔር፡ መኑ፡ ያስሕቶ፡ ለአክአብ፡ ንጉሠ፡ እስራኤል፡ ከመ፡ ይዕርግ፡ ወይደቅ፡ በራሞት፡ ዘገለአድ፡ ወይቤ፡ ዝንቱ፡ ከመዝ፡ ወዝንቱ፡ ከመዝ።
20 ወመጽአ፡ መንፈስ፡ ወቆመ፡ ቅድሜሁ፡ ለእግዚአብሔር፡ ወይቤ፡ አነ፡ አስሕቶ፡ ወይቤሎ፡ እግዚአብሔር፡ ለመንፈስ፡ በምንት፡ ታስሕቶ።
21 ወይቤ፡ መንፈስ፡ እወጽእ፡ ወእከውን፡ መንፈስ፡ ሐሰት፡ በአፈ፡ ኵሎሙ፡ ነቢያቲሁ፡ ወይቤሎ፡ እግዚአብሔር፡ ታስሕቶ፡ ወትክል፡ ፃእ፡ ወግበር፡ ከመዝ።
22 ወናሁ፡ ይእዜ፡ ወደየ፡ እግዚአብሔር፡ ውስተ፡ ኵሉ፡ አፈ፡ ነቢያቲሁ፡ መንፈሰ፡ ሐሰት፡ ወእግዚአብሔር፡ ሐለየ፡ ላዕሌከ፡ እኪተ።
23 ወቀርበ፡ ሴዴቅያስ፡ ወልደ፡ ከነዓና፡ ወጸፍዖ፡ መልታሕቶ፡ ለሚክያስ፡ ወይቤሎ፡ አየ፡ ፍኖተ፡ ኃለፈ፡ መንፈሰ፡ እግዚአብሄር፡ ከመ፡ ይትናገር፡ ምስሌከ።
24 ወይቤሎ፡ ሚክያስ፡ ናሁ፡ ትሬኢ፡ በይእቲ፡ ዕለት፡ እንዘ፡ ትበውእ፡ እምውስጥ፡ ለውስጥ፡ ከመ፡ ትትኀባእ።
25 ወይቤ፡ ንጉሠ፡ እስራኤል፡ ንሥእዎ፡ ለሚክያስ፡ ወአግብእዎ፡ ኀበ፡ ኤሜር፡ መልአከ፡ ብሔር፡ ወኀበ፡ ኢዮአስ፡ መልአኮሙ፡ ለደቂቀ፡ ንጉሥ፡ ወበልዎሙ፡ ከመዝ።
26 ወከመዝ፡ ይቤ፡ ንጉሥ፡ አንብርዎ፡ ለዝንቱ፡ ውስተ፡ ቤተ፡ ሞቅሕ፡ ወይብላዕ፡ ኅብስተ፡ በምንዳቤ፡ ወይስተይ፡ ማየ፡ በምንዳቤ፡ እስከ፡ እትመየጥ፡ በሰላም።
27 ወይቤ፡ ሚክያስ፡ እመ፡ ተመይጠ፡ ተመየጥከ፡ በሰላም፡ ኢተናገረ፡ እግዚአብሔር፡ በላዕሌየ፡ ወይቤ፡ ስምዑ፡ ዘንተ፡ ኵልክሙ፡ አሕዛብ።
28 ወዓርጉ፡ ንጉሠ፡ እስራኤል፡ ወኢዮሳፍጥ፡ ንጉሠ፡ ይሁዳ፡ ኀበ፡ ራሞት፡ እንተ፡ ገለዓድ።
29 ወይቤሎ፡ ንጉሠ፡ እስራኤል፡ ለኢዮሳፍጥ፡ አልብሰኒ፡ አልባሰ፡ ነኪር፡ ወእበውእ፡ ውስተ፡ ቀትል፡ ወአንተ፡ ልበስ፡ አልባስየ፡ ወለብሰ፡ ንጉሠ፡ እስራኤል፡ ወቦአ፡ ውስተ፡ ቀትል።
30 ወንጉሠ፡ ሶርያሰ፡ አዘዘ፡ ኵሎሙ፡ መላእክተ፡ ሠረገላት፡ እለ፡ ምስሌሁ፡ ወይቤ፡ ኢትትቃተሉ፡ ኢምስለ፡ ንኡስ፡ ወኢምስለ፡ ዓቢይ፡ ዘእንበለ፡ ምስለ፡ ንጉሠ፡ እስራኤል፡ ባሕቲቱ።
31 ወሶበ፡ ርእይዎ፡ መላእክተ፡ ሠረገላቲሁ፡ ለኢዮሳፍጥ፡ ይቤሉ፡ ዝንቱ፡ ውእቱ፡ ንጉሠ፡ እስራኤል፡ ወዓገትዎ፡ ከመ፡ ይቅትልዎ፡ ወአውየወ፡ ኢዮሳፍጥ፡ ወእግዚአብሔር፡ አድኃኖ፡ ወሜጦሙ፡ እምኔሁ።
32 ወኮነ፡ ሶበ፡ ርእዩ፡ መላእክተ፡ ሠረገላት፡ ከመ፡ ኢኮነ፡ ውእቱ፡ ንጉሠ፡ እስራኤል፡ ተግኅሡ፡ እምኔሁ።
33 ወአሐዱ፡ ብእሲ፡ ወሰቀ፡ ቀስቶ፡ ወተሐዚቦ፡ ነደፎ፡ ወኄጶ፡ ለንጉሠ፡ እስራኤል፡ ማእከለ፡ ሰንብኡ፡ ወማእከለ፡ እንግድዓሁ፡ ወይቤሎ፡ ለሊቀ፡ አፍራስ፡ ኀበ፡ ይፄዓን፡ ሚጥ፡ እዴከ፡ ወአውጽአኒ፡ እምቀትል፡ እስመ፡ ሐመምኩ።
34 ወጸንዐ፡ ቀትል፡ በይእቲ፡ ዕለት፡ ወንጉሠ፡ እስራኤል፡ ይቀውም፡ ዲበ፡ ሠረገላሁ፡ በአንፃረ፡ ሶርያውያን፡ እስከ፡ መስየ፡ ወዓሪቦ፡ ፀሐይ፡ ሞተ።
=== chapter 19 ===
[Chapter 19]
1 ወተመይጠ፡ ኢዮሳፍጥ፡ ንጉሠ፡ ይሁዳ፡ ውስተ፡ ቤቱ፡ ኢየሩሳሌም፡ በሰላም።
2 ወወፅአ፡ ይትቀበሎ፡ ኢዩ፡ ወልደ፡ አናኒ፡ ነቢይ፡ ወይቤሎ፡ ለንጉሥ፡ ኢዮሳፍጥ፡ እመሰ፡ አንተ፡ ትትራድኦ፡ ለኃጥእ፡ ወለእመ፡ ታፈቅር፡ አንተ፡ ዘይጸልኦ፡ እግዚአብሔር፡ በእንተ፡ ዝንቱ፡ መጽአ፡ መቅሠፍተ፡ እግዚአብሔር።
3 ወባሕቱ፡ ቃላት፡ ሠናያት፡ ተረክቡ፡ በላዕሌከ፡ እስመ፡ አግኃሥከ፡ አማልክተ፡ እምድረ፡ ይሁዳ፡ ወአርታዕከ፡ ልበከ፡ ከመ፡ ትኅሥሦ፡ ለእግዚአብሔር።
4 ወኃደረ፡ ኢዮሳፍጥ፡ ውስተ፡ ኢየሩሳሌም፡ ወወፅአ፡ ካዕበ፡ ምስለ፡ ሕዝብ፡ እምቤርሳሌህ፡ እስከ፡ ደብረ፡ ኤፍሬም፡ ወሜጦሙ፡ ኀበ፡ እግዚአብሔር፡ አምላከ፡ አበዊሆሙ።
5 ወሤመ፡ መኳንንተ፡ ውስተ፡ ኵሉ፡ አህጉረ፡ ይሁዳ፡ ወውስተ፡ አጽዋን፡ በበሀገር።
6 ወይቤሎሙ፡ ለመኳንንት፡ አእምሩ፡ ዘትገብሩ፡ አንትሙ፡ እስመ፡ አኮ፡ ለሰብእ፡ ኵነኔ፡ አላ፡ ለእግዚአብሔር፡ ወምስሌክሙ፡ ቃለ፡ ፍትሕ፡ ሀሎ።
7 ወይእዜኒ፡ ይኩን፡ ፍርሃተ፡ እግዚአብሔር፡ ላዕሌክሙ፡ ወዕቀቡ፡ ወግበሩ፡ እስመ፡ ኢኮነ፡ ኀበ፡ እግዚአብሔር፡ አምላክነ፡ ዓመፃ፡ ወኢ፡ ኃፊረ፡ ገጽ፡ ወኢ፡ ነሢአ፡ ሕልያን።
8 ወዓዲ፡ በኢየሩሳሌም፡ ሤመ፡ ኢዮሳፍጥ፡ ካህናተ፡ ወሌዋውያን፡ ወሊቃናተ፡ አበወ፡ እስራኤል፡ ይፍትሑ፡ ለእግዚአብሔር፡ ወይኰንኑ፡ ኵሎ፡ ዘየኀድር፡ ውስተ፡ ኢየሩሳሌም።
9 ወከመዝ፡ ሠርዖሙ፡ ኢዮሳፍጥ፡ ወይቤ፡ ዘንተ፡ ግበሩ፡ በፍርሃተ፡ እግዚአብሔር፡ ወበርትዕ፡ ወበልብ፡ ንጹሕ።
10 ኵሉ፡ ብእሲ፡ ኢይገምፅ፡ ፍትሐ፡ ለዘመጽአ፡ ኀቤሁ፡ ለፍትሕ፡ እምአኃዊክሙ፡ እለ፡ የኀድሩ፡ ውስተ፡ በሐውርቲሆሙ፡ ማእከለ፡ ደም፡ ወደም፡ ወማእከለ፡ ሥርዓት፡ ወነገር፡ ወጽድቅ፡ ወፍትሕ፡ ወአስተጋብእዎሙ፡ ወኢተአብሱ፡ ለእግዚአብሔር፡ ከመ፡ ኢይኩን፡ መዓት፡ ላዕሌክሙ፡ ወከመዝ፡ ግበሩ፡ ወኢተአብሱ።
11 ወናሁ፡ አማርያ፡ ካህን፡ ይሰፍነክሙ፡ በኵሉ፡ ቃለ፡ እግዚአብሔር፡ ወዝብድያስ፡ ወልደ፡ ኢስማኤል፡ መስፍን፡ ለቤተ፡ ይሁዳ፡ ላዕለ፡ ኵሉ፡ ቃለ፡ ንጉሥ፡ ወጸሐፍት፡ ወሌዋውያን፡ ቅድመ፡ ገጽክሙ፡ ትጽንዑ፡ ወትግበሩ፡ ወይኩን፡ እግዚአብሔር፡ ምስለ፡ ኄር።
=== chapter 20 ===
[Chapter 20]
1 ወእምድኅረዝ፡ መጽኡ፡ ደቂቀ፡ አሞን፡ ወደቂቀ፡ ሞአብ፡ ወምስሌሆሙ፡ አሞናውያን፡ ኀበ፡ ኢዮሳፍጥ፡ ከመ፡ ይትቃተልዎ።
2 ወመጽኡ፡ ወነገርዎ፡ ለኢዮሳፍጥ፡ ወይቤልዎ፡ መጽኡ፡ ላዕሌከ፡ ብዙኀን፡ እማዕዶተ፡ ባሕር፡ ወእምሶርያ፡ ወእሙንቱሰ፡ በአሳሶን፡ ዘታማር፡ ዘጋዲ።
3 ወፈርህ፡ ኢዮሳፍጥ፡ ወአርትዐ፡ ገጾ፡ ከመ፡ ይኅሥሦ፡ ለእገዚአብሔር፡ ወሰበከ፡ ጾመ፡ በኵሉ፡ በሐውርተ፡ ይሁዳ።
4 ወመጽኡ፡ ከመ፡ ይኅሥሥዎ፡ ለእግዚአብሔር።
5 ወቆመ፡ ኢዮሳፍጥ፡ በማእከለ፡ ማኅበረ፡ ይሁዳ፡ በኢየሩሳሌም፡ በቤተ፡ እግዚአብሔር፡ ቅድመ፡ ገጸ፡ ዓፀድ፡ ሐዲስ።
6 ወይቤ፡ እግዚአብሔር፡ አምላከ፡ አበዊነ፡ አኮኑ፡ አንተ፡ በሰማይ፡ ወአንተ፡ በምድር፡ ወአንተ፡ እግዚኦሙ፡ ለኵሎሙ፡ ነገሥተ፡ አሕዛብ፡ ወውስተ፡ እዴከ፡ ኃይል፡ ወጽንዕ፡ ወአልቦ፡ በቅድሜከ፡ ዘይጸንዕ።
7 አኮኑ፡ አንተ፡ እግዚአብሔር፡ ሠረውከ፡ ኵሎ፡ ዘየኃድሩ፡ ውስተ፡ ዛቲ፡ ምድር፡ አምቅድመ፡ ገጸ፡ ሕዝብከ፡ እስራኤል፡ ወወሀብካ፡ ለዘርአ፡ አብርሃም፡ ፍቁርከ፡ ለዓለም።
8 ወኀደሩ፡ ውስቴታ፡ ወሐነፁ፡ መቅደሰ፡ ዲቤሃ፡ በስመ፡ ዚአከ።
9 ወይቤሉ፡ እመቦ፡ ዘመጽአ፡ ላዕሌነ፡ እኩይ፡ ኵነኔ፡ ሞት፡ ወረኃብ፡ ንቀውም፡ ቅድሜሁ፡ ለዝ፡ ቤት፡ እስመ፡ ስመ፡ ዚአከ፡ ላዕሌሁ፡ ለዝ፡ ቤት፡ ወንጸርሕ፡ ኀቤከ፡ አምንዳቤነ፡ ወትሰምዐነ፡ ወታድኅነነ።
10 ወናሁ፡ ይእዜኒ፡ ደቂቀ፡ አሞን፡ ወሞአብ፡ ወደቂቀ፡ ሴይር፡ እለ፡ ኢያባሕከ፡ ይኅልፉ፡ እስራኤል፡ እንተ፡ ኀቤሆሙ፡ ወጺኦሙ፡ እምድረ፡ ግብፅ፡ ወተግኅሡ፡ እምላዕሌሆሙ፡ ከመ፡ ኢይደምስስዎሙ፡ ናሁ፡ ይእዜኒ፡ እሙንቱ፡ ሰሐጡነ፡ ወመጽኡ፡ ያውፅኡነ፡ እምርስትነ፡ እንተ፡ ወሀብከነ።
11 እግዚኦ፡ አምላክነ፡ ኢትፈትሕኑ፡ ላዕሌሆሙ፡ እስመ፡ አልብነ፡ ኃይል፡ በዘንክል፡ ቀዊመ፡ ቅድመ፡ ዝንቱ፡ ሕዝብ፡ ብዙኅ፡ ዘመጽአ፡ ላዕሌነ፡ ወኢነአምር፡ ዘንገብር፡ ዘእንበለ፡ አዕይንቲነ፡ ኀቤከ።
12 ወኵሉ፡ ይሁዳ፡ ይቀውም፡ ቅድመ፡ እግዚአብሔር፡ ወአንስቲያሆሙኒ፡ ወደቂቆሙኒ።
13 ወኡዝሄል፡ ወልደ፡ ዘካርያስ፡ ወልዱ፡ ለልብአንያ፡ ወልዱ፡ ለኢያሄል፡ ወልደ፡ ምታንያስ፡ ሌዋዊ፡ እምደቂቀ፡ አሳፍ፡ ኮነ፡ ላዕሌሁ፡ መንፈሰ፡ እግዚአብሔር፡ በማእከለ፡ ማኅበር።
14 ወይቤ፡ ስምዑ፡ ኵልክሙ፡ ይሁዳ፡ ወእለ፡ ተኀድሩ፡ ኢየሩሳሌም፡ ወንጉሥ፡ ኢዮሳፍጥ፡ ከመዝ፡ ይቤ፡ እግዚአብሔር፡ አንትሙ፡ ኪያሆሙ፡ ኢትፍርሁ፡ ወኢትደንግፁ፡ እምገጸ፡ ራእዩ፡ ለዝንቱ፡ ሕዝብ፡ ብዙኅ፡ እስመ፡ አኮ፡ ዘዚአክሙ፡ ፀብዕ፡ ዘእንበለ፡ ዘእግዚአብሔር።
15 ጌሠመ፡ ረዱ፡ ላዕሌሆሙ፡ ወናሁ፡ የዓርጉ፡ ወይወርዱ፡ ውስተ፡ ምዕራገ፡ አስኢ፡ ወተራከብዎሙ፡ ውስተ፡ ጽንፈ፡ ተከዚ፡ ዘገዳመ፡ ኢያርሄል።
16 አኮ፡ አንትሙ፡ ዘትትቃተልዎሙ፡ አላ፡ አእምሩ፡ ወለብዉ፡ መድኃኒተ፡ አግዚአብሔር፡ እንተ፡ ምስሌክሙ፡ ይሁዳ፡ ወኢየሩሳሌም፡ ኢትፍርሁ፡ ወኢትደንግፁ፡ ጌሠመ፡ ትወጽኡ፡ ወትትቀበልዎሙ፡ ወእግዚአብሔር፡ ምስሌክሙ።
17 ወሰገደ፡ ኢዮሳፍጥ፡ በገጹ፡ ወኵሉ፡ ይሁዳ፡ ወእለ፡ የኀድሩ፡ ኢየሩሳሌም፡ ወድቁ፡ በቅድሜሁ፡ ለእግዚአብሔር፡ ወሰገዱ።
18 ወቆሙ፡ ሌዋውያን፡ እምደቂቀ፡ ቀአት፡ ወእምደቂቀ፡ ቆሬ፡ ይሰብሕዎ፡ ለእግዚአብሔር፡ አምላከ፡ እስራኤል፡ በቃል፡ ዓቢይ፡ ወልዑል።
19 ወጌሡ፡ በነግህ፡ ወወጽኡ፡ ውስተ፡ ገዳመ፡ ቴቁሔ፡ ወእንዘ፡ ይወጽኡ፡ ቆመ፡ ኢዮሳፍጥ፡ ወጸርሐ፡ ወይቤ፡ ስምዑኒ፡ ይሁዳ፡ እለ፡ ትነብሩ፡ ኢየሩሳሌም፡ እመንዎ፡ ለእግዚአብሔር፡ አምላክክሙ፡ ወእመንዎ፡ ለነቢይ፡ ወትረትዕ፡ ፍኖትክሙ።
20 ወተማከረ፡ ምስለ፡ ሕዝብ፡ ወአቀመ፡ መዘምራነ፡ ወእለ፡ ይሴብሑ፡ ከመ፡ ያእኵቱ፡ ወይግነዩ፡ ለቅድሳት፡ ሶበ፡ ይወጽኡ፡ አንፃረ፡ ኃይል፡ ወይቤሉ፡ ግነዩ፡ ለእግዚአብሔር፡ እስመ፡ ኄር፡ እስመ፡ ለዓለም፡ ምሕረቱ።
21 ወእምድኅረ፡ ዘመሩ፡ ወአንበሩ፡ ግናየ፡ ስብሐት፡ ወሀቦሙ፡ እግዚአብሔር፡ ጽንዐ፡ ከመ፡ ይትቃተሉ፡ ምስለ፡ ደቂቀ፡ አሞን፡ ወምስለ፡ ሰብአ፡ ሞአብ፡ በደብረ፡ ሴይር፡ ወእለ፡ ወፅኡ፡ ላዕለ፡ ይሁዳ፡ ወድቁ።
22 ወተንሥኡ፡ ደቂቀ፡ አሞን፡ ወሞአብ፡ ላዕለ፡ እለ፡ ይነብሩ፡ ውስተ፡ ደብረ፡ ሴይር፡ ከመ፡ ይደምስስዎሙ፡ ወያኅልቅዎሙ፡ ወእምድኅረ፡ ቀተልዎሙ፡ ወአኅለቅዎሙ፡ ለእለ፡ የኃድሩ፡ ውስተ፡ ሴይር፡ ተንሥኡ፡ በበይናቲሆሙ፡ ከመ፡ ይደማሰሱ፡ ወይትኃለቁ፡ በበይናቲሆሙ።
23 ወይሁዳሰ፡ በጽሐ፡ አንፃረ፡ መንገለ፡ ገዳም፡ ወርእየ፡ እልክተ፡ ሠራዊተ፡ ብዙኀነ፡ ወናሁ፡ ኵሎሙ፡ ምውታን፡ ወውዱቃን፡ ዲበ፡ ምድር፡ ወአልቦ፡ ሕያው፡ እምኔሆሙ።
24 ወበጽሐ፡ ኢዮሳፍጥ፡ ወሕዝበ፡ ዚአሁ፡ ከመ፡ ይማህርኩ፡ ምህርካ፡ ወረከቡብዙኀ፡ ምህርካ፡ ወንዋየኒ፡ ዘመፍትው፡ ወማህረኩ፡ ኵሎ፡ ወነበሩ፡ ሠሉሰ፡ መዋዕለ፡ እንዘ፡ ይማሀርኩ፡ ወያስተጋብኡ፡ ምህርካሆሙ፡ ውስተ፡ ፈለገ፡ ብረከት፡ እስመ፡ ብዙኅ፡ ውእቱ።
25 ወበራብዕት፡ ዕለት፡ ተጋብኡ፡ ውስተ፡ ፈለገ፡ በረከት፡ እስመ፡ በህየ፡ ባረክዎ፡ ወአእኰትዎ፡ ለእግዚአብሔር፡ ወበእንተዝ፡ ተሰምየ፡ ስሙ፡ ለውእቱ፡ መካን፡ ፈለገ፡ በረከት፡ እስከ፡ ዛቲ፡ ዕለት።
26 ወተመይጡ፡ ኵሎሙ፡ እደወ፡ ይሁዳ፡ ውስተ፡ ኢየሩሳሌም፡ ወኢዮሳፍጥኒ፡ ንጉሦሙ፡ ምስሌሆሙ፡ በኃሤት፡ ዓቢይ፡ እስመ፡ አስተፍሥሖሙ፡ እግዚአብሔር፡ በጸላእቶሙ።
27 ወቦኡ፡ ኢየሩሳሌም፡ በጸናጽል፡ ወበናብሊስ፡ ወበቃለ፡ ቀርን፡ ውስተ፡ ቤተ፡ እግዚአብሔር።
28 ወኮነ፡ ፍርሃተ፡ እግዚአብሔር፡ ላዕለ፡ ኵሉ፡ ነገሥተ፡ ምድር፡ እስመ፡ ሰምዑ፡ ከመ፡ ይትቃተሎሙ፡ እግዚአብሔር፡ ለጸላእተ፡ እስራኤል።
29 ወኮነ፡ ንግሡ፡ ለኢሳፍጥ፡ በሰላም፡ ወአዕረፎ፡ እግዚአብሔር፡ አምላኩ፡ እምዓውዱ።
30 ወነግሠ፡ ኢዮሳፍጥ፡ ላዕለ፡ ይሁዳ፡ ከዊኖ፡ ወልደ፡ ሠላሳ፡ ወኃምስቱ፡ ዓመት፡ አመ፡ ይነግሥ፡ ወነግሠ፡ በኢየሩሳሌም፡ ዕሥራ፡ ወኃምስተ፡ ዓመተ፡ ወስማ፡ ለእሙ፡ አዙባ፡ ወለተ፡ ሳሊ።
31 ወሖረ፡ በፍናወ፡ አቡሁ፡ አሣ፡ ወኢተግኅሠ፡ እምፍኖት፡ ርትዕት፡ በቅድመ፡ እግዚአብሔር።
32 አላ፡ ዓዲ፡ ሀለዉ፡ አውግር፡ ወዓዲሆሙ፡ ሕዝብ፡ ኢረትዐ፡ ልቦሙ፡ ኀበ፡ እግዚአብሔር፡ አምላከ፡ አበዊሆሙ።
33 ወእለ፡ ተርፉ፡ ቃላተ፡ ኢዮሳፍጥ፡ ቀደምት፡ ወደኃርት፡ ነዮን፡ ጽሑፋት፡ በቃለ፡ ኢዩ፡ ነቢይ፡ ወልደ፡ አናኒ፡ ዘጸሐፈ፡ መጽሐፈ፡ ነገሥተ፡ እስራኤል።
34 ወእምድኅረ፡ ዝንቱ፡ ተደመረ፡ ኢዮሳፍጥ፡ ንጉሠ፡ ይሁዳ፡ ምስለ፡ አካዝያስ፡ ንጉሠ፡ እስራኤል፡ ወዝንቱ፡ አበሳ፡ ዘገብረ።
35 ወኀብረ፡ ምስሌሁ፡ ከመ፡ ይግበር፡ አሕማረ፡ ከመ፡ ይሑሩ፡ ብሔረ፡ ተርሴስ፡ ወገብሩ፡ አሕማረ፡ በጋስዮን፡ ጋቤር።
36 ወተነበየ፡ ኤልኤዜር፡ ወልደ፡ ኢያድያ፡ ዘእምብሔረ፡ ማርሶስ፡ ላዕለ፡ ኢዮሳፍጥ፡ እንዘ፡ ይብል፡ በከመ፡ ተደመርከ፡ ወተዐደምከ፡ ምስለ፡ አካዝያስ፡ ንጉሠ፡ እስራኤል፡ ወረወ፡ እግዚአብሔር፡ ተግባረከ፡ ወተቀጥቀጣ፡ አሕማሪከ፡ ወኢክህላ፡ ሐዊረ፡ ብሔር፡ ተርሴስ።
37 ወኖመ፡ ኢዮሳፍጥ፡ ምስለ፡ አበዊሁ፡ ወተቀብረ፡ ውስተ፡ ሀገረ፡ ዳዊት።
=== chapter 21 ===
[Chapter 21]
1 ወነግሠ፡ ኢዮራም፡ ወልዱ፡ ህየንቴሁ።
2 ወቦቱ፡ አኃው፡ ደቂቀ፡ ኢዮሳፍጥ፡ ስድስቱ፡ ወዝንቱ፡ ውእቱ፡ አስማቲሆሙ፡ አዛርያስ፡ ወኢይሄል፡ ወዘካርያስ፡ ወአዛርያስ፡ ወሚሳኤል፡ ወሰፋጥያስ፡ ወእሉ፡ ኵሎሙ፡ ደቂቀ፡ ኢዮሳፍጥ፡ ንጉሠ፡ ይሁዳ።
3 ወወሀቦሙ፡ አቡሆሙ፡ ጥሪተ፡ ብዙኀ፡ ወርቀ፡ ወብሩረ፡ ወንዋየ፡ ሕቅል፡ ምስለ፡ አህጉር፡ ጽኑዓት፡ አረፋቲሆን፡ በምድረ፡ ይሁዳ፡ ወመንግሥተሰ፡ ወሀቦ፡ ለኢዮራም፡ ወልዱ፡ እስመ፡ በኵሩ፡ ውእቱ።
4 ወተንሥአ፡ ኢዮራም፡ በመንግሥተ፡ ይሁዳ፡ ወጸንዐ፡ ወቀተለ፡ ኵሎ፡ አኃዊሁ፡ በሰይፍ፡ ወመላእክተ፡ እስራኤል።
5 ወከዊኖ፡ ወልደ፡ ሠላሳ፡ ወክልኤቱ፡ ዓመት፡ አመ፡ ነግሠ፡ ኢዮራም፡ በመንግሥተ፡ ዚአሁ፡ ወዓሠርተ፡ ዓመተ፡ ነግሠ፡ በኢየሩሳሌም።
6 ወሖረ፡ በፍናወ፡ ነገሥተ፡ እስራኤል፡ በከመ፡ ገብሩ፡ ቤተ፡ አክአብ፡ እስመ፡ ወለተ፡ አክአብ፡ ኮነቶ፡ ብእሲተ፡ ወገብረ፡ እኪተ፡ በቅድመ፡ እግዚአብሔር።
7 ወኢፈቀደ፡ እግዚአብሔር፡ ከመ፡ ይሥሩ፡ ቤተ፡ ዳዊት፡ በእንተ፡ ኪዳን፡ ዘተካየዶ፡ ለዳዊት፡ ወበከመ፡ ይቤሎ፡ ከመ፡ የሀቦ፡ ማኅቶተ፡ መንግሥት፡ ለደቂቁ፡ እስከ፡ ለዓለም፡ በኵሉ፡ መዋዕል።
8 ወበእማንቱ፡ መዋዕል፡ ርኅቁ፡ ኤዶም፡ እምይሁዳ፡ ወአንገሡ፡ ንጉሠ፡ ላዕሌሆሙ።
9 ወሖረ፡ ኢዮራም፡ ንጉሥ፡ ምስለ፡ ኵሎሙ፡ መላእክቲሁ፡ ወኵሎሙ፡ አፍራሲሁ፡ ወኮነ፡ እምድኅረ፡ ዝንቱ፡ ተንሥአ፡ በሌሊት፡ ወቀተሎ፡ ለኤዶም፡ ዘዓገቶ፡ ወለመላእክተ፡ አፍራሲሁ፡ ወሠረገላቲሁ፡ ወተሰብሩ፡ ወጐዩ፡ አሕዛብ፡ በበተዓይኒሆሙ።
10 ወተግኅሠ፡ ኤዶም፡ እምብሔረ፡ ይሁዳ፡ እስከ፡ ዛቲ፡ ዕለት፡ ወአሜሃ፡ ተግኅሠ፡ ሊብና፡ በውእቱ፡ መዋዕል፡ እምብሔረ፡ ዚአሁ፡ እስመ፡ ረስዖ፡ ለእግዚአብሔር፡ አምላከ፡ አበዊሁ።
11 እስመ፡ ውእቱ፡ ገብረ፡ አውግረ፡ በአሀጉረ፡ ይሁዳ፡ ወአዘመዎሙ፡ ወአርኃቆሙ፡ ለእለ፡ የኃድሩ፡ ኢየሩሳሌም፡ ወለሕዝበ፡ ይሁዳኒ፡ አስሐቶሙ።
12 ወመጽሐ፡ ላዕሌሁ፡ ቃለ፡ መጽሐፍ፡ ዘይቤ፡ ኤልያስ፡ ነቢይ፡ እንዘ፡ ይብል፡ ከመዝ፡ ይቤ፡ እግዚአብሔር፡ አምላከ፡ ዳዊት፡ አቡከ፡ ህየንተ፡ ዘኢሖርከ፡ በፍናወ፡ ኢዮሳፍጥ፡ አቡከ፡ ወበፍናወ፡ አሣ፡ ንጉሠ፡ ይሁዳ።
13 ወሖርከ፡ በፍናዌ፡ ነገሥተ፡ እስራኤል፡ ወአዘመውከ፡ ሕዝበ፡ ይሁዳ፡ ወከእለኒ፡ እለ፡ ይነብሩ፡ ኢየሩሳሌም፡ በከመ፡ አዘመዎሙ፡ ቤተ፡ አክአብ፡ አኃዊከኒ፡ ደቂቀ፡ አቡከ፡ እለ፡ ይኄርዉ፡ እምኔከ፡ ቀተልከ።
14 ወናሁ፡ እግዚአብሔር፡ ይቀትለከ፡ በመቅሠፍት፡ ዓቢይ፡ በማእከለ፡ ሕዝብከ፡ ወበማእከለ፡ ደቂቅከ፡ ወበማእከለ፡ አንስቲያከ፡ ወበማእከለ፡ ኵሉ፡ ጥሪትከ።
15 ወአንተሰ፡ በደዌ፡ እኩይ፡ ወመሪር፡ በደዌ፡ ከሥር፡ እስከ፡ ይወጽእ፡ አማዑቲከ፡ እምሕማምከ፡ ዘበበዕለት፡ ትመውት።
16 ወአንሥአ፡ እግዚአብሔር፡ ላዕለ፡ ኢዮራም፡ መንፈሰ፡ ኢሎፍሊ፡ ወሰብአ፡ ዓራብያ፡ እለ፡ በአጽናፈ፡ ኢትዮጵያ።
17 ወዓርጉ፡ ወበጽሑ፡ ብሔረ፡ ይሁዳ፡ ወተኀየልዎሙ፡ ወአስተጋብኡ፡ ወነሥኡ፡ ኵሎ፡ ጥሪተ፡ ዘረከቡ፡ በብሔረ፡ ይሁዳ፡ ወለደቂቁኒ፡ ወለአዋልዲሁኒ፡ ወኢተርፈ፡ አሐዱ፡ እምደቂቁ፡ ዘእንበለ፡ አካዝያስ፡ ዘይንእስ፡ እምአኀዊሁ።
18 ወእምድኅረ፡ ዝንቱ፡ ኵሉ፡ ቀተሎ፡ እግዚአብሔር፡ በዝኩ፡ ደዌ፡ ከርሥ፡ ዘኢተረክበ፡ ሎቱ፡ ፈውስ።
19 ወኮነ፡ አመ፡ ሳድስ፡ ዕለት፡ አመ፡ በጽሐ፡ መዋዕሊሁ፡ በሰኑይ፡ ዕለት፡ እምዘደወየ፡ ወጽአ፡ አማዑቲሁ፡ እምድኅረ፡ ደዌሁ፡ ወሞተ፡ በእኩይ፡ ደዌ፡ ወኢገብሩ፡ ሕዝበ፡ ዚአሁ፡ ፀዓተ፡ ቀበር፡ ላዕሌሁ፡ በከመ፡ ፀዓተ፡ ቀበረ፡ አበዊሁ።
20 ወኮነ፡ ወልደ፡ ሠላሳ፡ ወክልኤቱ፡ ዓመት፡ ይንግሥ፡ ወሰመንተ፡ ዓመተ፡ ነግሠ፡ በኢየሩሳሌም፡ ወሖረ፡ በፍኖት፡ እንተ፡ ኢኮነት፡ ርትዕተ፡ ወተቀብረ፡ በሀገረ፡ ዳዊት፡ ወኢኮነ፡ በመቃብረ፡ ነገሥት።
=== chapter 22 ===
[Chapter 22]
1 ወአንገሥዎ፡ እለ፡ ነበሩ፡ ኢየሩሳሌም፡ ለአካዝያስ፡ ወልዱ፡ ንኡስ፡ እምድኅሬሁ፡ እስመ፡ ኵሎሙ፡ አኃዊሁ፡ መላህቅተ፡ ተቀትሉ፡ በምድረ፡ በድው፡ አመ፡ መጽኡ፡ ላዕሌሆሙ፡ ሰብአ፡ ዓራብያ፡ ወአሞዛውያን፡ ወነግሠ፡ አካዝያስ፡ ወልደ፡ ኢዮራም፡ ንጉሠ፡ ይሁዳ።
2 ወከዊኖ፡ ወልደ፡ ዕሥራ፡ ወክልኤቱ፡ ዓመት፡ ነግሠ፡ አካዝያስ፡ ወአሐተ፡ ዐመተ፡ ነግሠ፡ በኢየሩሳሌም፡ ለስማ፡ ለእሙ፡ ጎቶልያ፡ ወለተ፡ ዘንበሪ።
3 ወዝንቱ፡ ሖረ፡ በፍኖተ፡ ቤተ፡ አክአብ፡ እስመ፡ እሙ፡ መምክርተ፡ ኮነቶ፡ ከመ፡ ይኅጣእ።
4 ወገብረ፡ እኪተ፡ በቅድመ፡ እግዚአብሔር፡ በከመ፡ ቤተ፡ አክአብ፡ እስመ፡ እሙንቱ፡ ኮነዎ፡ ሐጸንተ፡ እምድኅረ፡ ሞተ፡ አቡሁ፡ ከመ፡ ይሥርውዎ።
5 ወበምክረ፡ ዚአሆሙ፡ ሖረ፡ ምስለ፡ ኢዮራም፡ ወልደ፡ አክአብ፡ ንጉሠ፡ እስራኤል፡ ውስተ፡ ፀብዕ፡ ላዕለ፡ አዛልሄል፡ ንጉሠ፡ ሶርያ፡ በብሔረ፡ ሬማት፡ ዘገለዓድ፡ ወነደፍዎ፡ ለኢዮራም፡ ወአቊሰልዎ።
6 ወተመይጠ፡ ወገብአ፡ ሀገረ፡ ኢይዝራኤል፡ ከመ፡ ይትፈወስ፡ እምቊስል፡ ዘቊሰልዎ፡ ሰብአ፡ ሶርያ፡ በብሔረ፡ ሬማት፡ እንዘ፡ ይትቃተሎ፡ ለአዛሄል፡ ንጉሠ፡ ሶርያ፡ ወአካዝያስ፡ ወልደ፡ ኢዮራም፡ ንጉሠ፡ ይሁዳ፡ ወረደ፡ ከመ፡ የሐውፆ፡ ለኢዮራም፡ ወልደ፡ አክአብ፡ ብሔረ፡ ኢይዝራኤል፡ እስመ፡ ይደዊ።
7 ወእምኀበ፡ እግዚአብሔር፡ ኮነት፡ አመክሮተ፡ አካዝያስ፡ ከመ፡ ይምጻእ፡ ኀበ፡ ኢዮራም፡ ወሶበ፡ መጽአ፡ ወጽአ፡ ኢዮራም፡ ኀበ፡ ኢዩ፡ ወልደ፡ ናሜሶ፡ መሲሑ፡ ለእግዚአብሔር፡ ከመ፡ ይሥሩ፡ ቤተ፡ አክአብ።
8 ወኮነ፡ በከመ፡ ተበቀሎ፡ ኢዩ፡ ለቤተ፡ አክአብ፡ ወረከበ፡ መላእክተ፡ ይሁዳ፡ ወአኃዊሁ፡ ለአካዝያስ፡ እንዘ፡ ይትለአክዎ፡ ለአካዝያስ፡ ንጉሠ፡ ይሁዳ፡ ወቀተሎሙ።
9 ወይቤ፡ ከመ፡ ይኅሥሦ፡ ለአካዝያስ፡ ወዴገኖ፡ ወረከቦ፡ እንዘ፡ ይትኃባእ፡ በብሔረ፡ ሰማርያ፡ ወአምጽእዎ፡ ኀበ፡ ኢዩ፡ ወቀተሎ፡ ወቀበሮ፡ እስመ፡ ይብሉ፡ ወልደ፡ ኢዮሳፍጥ፡ ውእቱ፡ ዘኃሠሦ፡ ለእግዚአብሔር፡ በኵሉ፡ ልቡ፡ ወአልቦ፡ በውስተ፡ ቤቱ፡ ለአካዝያስ፡ ዘይጸንዕ፡ በኃይል፡ በውስተ፡ መንግሠት።
10 ወጎቶልያ፡ እሙ፡ ለአካዝያስ፡ ሶበ፡ ርእየቶ፡ ከመ፡ ሞተ፡ እጓላ፡ ተንሥአት፡ ወአኅጐለት፡ ኵሎ፡ ዘርአ፡ መንግሥት፡ ዘቤተ፡ ይሁዳ።
11 ወነሥአቶ፡ ዮሳቤት፡ ወለተ፡ ንጉሥ፡ ለኢዮአስ፡ ወልደ፡ አካዝያስ፡ ወሰረቀቶ፡ ወነሥአቶ፡ ሰሪቃ፡ እማእከለ፡ ደቂቀ፡ ንጉሥ፡ እለ፡ ተቀትሉ፡ ወአንበረቶ፡ ሎቱ፡ ወለሐፂኒቱ፡ ውስተ፡ ውሣጤ፡ ቤት፡ ኀበ፡ ምስካባ፡ ወኃብአቶ፡ ዮሳቤት፡ ወለተ፡ ንጉሥ፡ ለኢዮዮአ-እኅቱ፡ ለአካዝያስ፡ ብእሲቱ፡ ለኢዮአዳ፡ ካህን፡ ወኃብአቶ፡ እምገጻ፡ ለጎቶልያ፡ ወኢቀተለቶ።
12 ወነበረ፡ ምስሌሃ፡ ኅቡአ፡ ውስተ፡ ቤተ፡ እግዚአብሔር፡ ስድስተ፡ ክረምተ፡ ወጎቶልያ፡ ነግሠት፡ ውስተ፡ ምድር።
=== chapter 23 ===
[Chapter 23]
1 ወበሳብዕ፡ ዓመት፡ ጸንዐ፡ ኢዮአዳ፡ ወነሥኦሙ፡ ለመላእክተ፡ ምእት፡ ለአዛርያስ፡ ወልደ፡ ኢዮራም፡ ወለእስማኤል፡ ወልደ፡ ኢዮአናን፡ ወለአዛርያስ፡ ወልደ፡ ኦቤድ፡ ወለማዓስያ፡ ወልደ፡ ኢዳኢ፡ ወለኤልሳፋጥ፡ ወልደ፡ ዘካርያስ፡ ምስሌሁ፡ ውስተ፡ ቤተ፡ እግዚአብሔር።
2 ወዓገትዋ፡ ለይሁዳ፡ ወአስተጋብኡ፡ ሌዋውያን፡ እምኵሉ፡ በሐውርተ፡ ይሁዳ፡ ወመላእክተ፡ አበወ፡ ዘመዶሙ፡ ለእስራኤል፡ ወመጽኡ፡ ውስተ፡ ኢየሩሳሌም።
3 ወተካየዱ፡ ኪዳነ፡ ኵሉ፡ ይሁዳ፡ በማኅበሮሙ፡ በቤተ፡ እግዚአብሔር፡ ምስለ፡ ንጉሥ፡ ወአርአዮሙ፡ ወልደ፡ ንጉሥ፡ ወይቤሎሙ፡ ናሁ፡ ወልደ፡ ንጉሥ፡ ይነግሥ፡ በከመ፡ ይቤ፡ እግዚአብሔር፡ ዲበ፡ ቤተ፡ ዳዊት።
4 ወናሁ፡ ዝንቱ፡ ነገር፡ ዘትገብሩ፡ ሣልስት፡ እዴክሙ፡ ይሑሩ፡ በሰንበት፡ ካህናት፡ ወሌዋውያን፡ ውስተ፡ ኵሉ፡ አናቅጺሃ፡ ለምብዋኢክሙ።
5 ወሣልስት፡ እዴክሙ፡ በቤተ፡ ንጉሥ፡ ወሣልስት፡ እዴክሙ፡ በአናቅጽ፡ ማእከላዊ፡ ወኵሉ፡ ሕዝብ፡ በዓፀደ፡ ቤተ፡ እግዚአብሔር።
6 ወኢይባኡ፡ ውስተ፡ ቤተ፡ እግዚአብሔር፡ እመ፡ ኢኮኑ፡ ካህናተ፡ ወሌዋውያነ፡ ወእለ፡ ይትለአክዎሙ፡ ለሌዋውያን፡ ወውእቶሙ፡ ይበውኡ፡ እስመ፡ ቅዱሳን፡ እሙንቱ።
7 ወኵሉ፡ ሕዝብ፡ ይዕቀቡ፡ ቤተ፡ እግዚአብሔር፡ ወይዕግትዎ፡ ሌዋውያን፡ ለንጉሥ፡ በዓውዱ፡ ወይቤ፡ ብእሲ፡ ወብእሲ፡ ንዋየ፡ ሐቅሉ፡ ለይፁር፡ ውስተ፡ እደዊሁ፡ ወዘገብአ፡ ውስተ፡ ቤት፡ ይመውት፡ ወየሀልዉ፡ ምስለ፡ ንጉሥ፡ እንዘ፡ ይበውእ፡ ወእንዘ፡ ይወጽእ።
8 ወገብሩ፡ ሌዋውያን፡ ወኵሉ፡ ይሁዳ፡ በከመ፡ ነገረ፡ ኢዮአዳ፡ ካህን፡ ወነሥአ፡ ሎቱ፡ በበአሐዱ፡ እደወ፡ እምርእሰ፡ ሰንበት፡ እስከ፡ ተፍጻሜተ፡ ሰንበት፡ እስመ፡ ኢሠዐረ፡ ኢዮአዳ፡ ካህን፡ በዕብሬተ፡ መዋዕሊሁ።
9 ወወሀቦ፡ ኢዮአዳ፡ አስይፍተ፡ ወወላትወ፡ ወኵያንወ፡ እለ፡ ሀለዉ፡ ውስተ፡ ቤቱ፡ ለንጉሥ፡ ዳዊት፡ ውስተ፡ ቤተ፡ እግዚአብሔር።
10 ወቆመ፡ ኵሉ፡ ሕዝብ፡ ወኵሉ፡ አሐዱ፡ አሐዱ፡ ምስለ፡ ንዋየ፡ ሐቅሉ፡ እምዓውደ፡ ቤት፡ ዘየማን፡ እስከ፡ ዓውደ፡ ቤት፡ ዘጸጋመ፡ ቤተ፡ መቅደስ፡ ወዘቤተ፡ እግዚአብሔር፡ ወዘቤተ፡ ንጉሥ።
11 ወአውጽኦ፡ ለወልደ፡ ንጉሥ፡ ወአንበረ፡ ላዕሌሁ፡ አክሊለ፡ መንግሥት፡ ወስምዕ፡ ወቀብዕዎ፡ ወአንገሥዎ፡ ኢዮአዳ፡ ወደቂቁ፡ ወይቤልዎ፡ ሕየው፡ አበ፡ ነጋሢ።
12 ወሰምዓት፡ ጎቶልያ፡ ቃለ፡ ሕዝብ፡ እለ፡ ይረውፁ፡ ወይገንዩ፡ ወይዌድስዎ፡ ለንጉሥ፡ ወቦአት፡ ቤተ፡ እግዚአብሔር፡ ኀበ፡ ንጉሥ።
13 ወርእየቶ፡ ለንጉሥ፡ እንዘ፡ ሀሎ፡ ይቀውም፡ ውስተ፡ ምቅዋሙ፡ ወውስተ፡ ምብዋኢሁ፡ ወመላእክተ፡ ወሰብአ፡ አቅርንት፡ ወመኳንንት፡ በዓውደ፡ ንጉሥ፡ ወኵሉ፡ ሕዝብ፡ ይትፌሥሑ፡ ወይነፍሑ፡ አቅርንተ፡ ወእለ፡ ይዜምሩ፡ በአርጋኖን፡ ወበእንዚራት፡ ወይሴብሑ፡ ወይዜምሩ፡ በውዳሴ፡ ሰጠጠት፡ አጽፋ፡ ጎቶልያ፡ ወአውየወት፡ ወትቤ፡ ማዕሌት፡ ማዕሌት።
14 ወወጽአ፡ ኢዮአዳ፡ ካህን፡ ወይቤሎሙ፡ ለመላእክተ፡ ምእት፡ ወለመላእክተ፡ ኃይል፡ አውጽእዋ፡ አፍኣ፡ እምቤተ፡ እግዚአብሔር፡ ወዘተለዋ፡ ድኅሬሃ፡ ይሙት፡ በመጥባሕት፡ እስመ፡ ይቤ፡ ካህን፡ ኢትሙት፡ በቤተ፡ እግዚአብሔር።
15 ወወሀብዋ፡ ፍኖተ፡ ወወጽአት፡ እንተ፡ ኆኅተ፡ አፍራስ፡ ዘቤተ፡ ንጉሥ፡ ወቀተልዋ፡ በህየ።
16 ወተካየደ፡ ኢዮአዳ፡ ካህን፡ ኪዳነ፡ ማእከሌሁ፡ ወማእከለ፡ ሕዝብ፡ ወማእከለ፡ ንጉሥ፡ ከመ፡ ይኩኑ፡ ሕዝቦ፡ ለእግዚአብሔር።
17 ወቦኡ፡ ኵሉ፡ ሕዝበ፡ ምድር፡ ውስተ፡ ቤተ፡ በዓል፡ ወደምሰስዎ፡ ለምሥዋዒሁ፡ ወለኵሎሙ፡ አማልክተ፡ ግብት፡ ሐረፅዎሙ፡ ወለማታንኒ፡ ካህነ፡ በዓል፡ ቀተልዎ፡ በቅድመ፡ ምሥዋዕ።
18 ወአስተአኀዘ፡ ኢዮአዳ፡ ኵሎ፡ ግብረ፡ ቤተ፡ እግዚአብሔር፡ በእደ፡ ካህናት፡ ወሌዋውያን፡ እለ፡ ከፈሎሙ፡ ዳዊት፡ ለቤተ፡ እግዚአብሔር።
19 ወሠርዖሙ፡ ለካህናት፡ ወለሌዋውያን፡ በበፆታሆሙ፡ ወአዕረገ፡ መሥዋዕተ፡ እግዚአብሔር፡ በከመ፡ ጽሑፍ፡ ውስተ፡ ኦሪተ፡ ሙሴ፡ በፍሥሓ፡ ወበስብሐት፡ በእደ፡ ዳዊት።
20 ወሤመ፡ ዓፀውተ፡ ዲበ፡ ኆኅተ፡ ቤተ፡ እግዚአብሔር፡ ከመ፡ ኢይባእ፡ ርኩስ፡ ውስ፡ ኵሉ፡ ግብር።
21 ወነሥኡ፡ አበወ፡ ዘመዶሙ፡ ወኃያላነ፡ ወመላእክተ፡ ሕዝብ፡ ወኵሎ፡ አሕዛበ፡ ምድር፡ ወአውረድዎ፡ ለንጉሥ፡ እምቤተ፡ እግዚአብሔር፡ ወአብእዎ፡ እንተ፡ ውሣጤ፡ አንቀጽ፡ ዘቤተ፡ እግዚአብሔር፡ ወዘቤተ፡ ንጉሥ፡ ወአንበርዎ፡ ዲበ፡ መንበረ፡ መንግሥት።
22 ወተፈሥሑ፡ ኵሉ፡ ሐዝበ፡ ምድር፡ ወብሔርኒ፡ ሀድአት፡ ወለቶጎልያኒ፡ ቀተልዋ፡ በመጥባሕት።
=== chapter 24 ===
[Chapter 24]
1 ወከዊኖ፡ ኢዮአስ፡ ወልደ፡ ሰብዓቱ፡ ዓመት፡ አመ፡ ይንገሥ፡ ወነግሠ፡ ኢዮአስ፡ አርባዓ፡ ዓመተ፡ በኢየሩሳሌም፡ ወስማ፡ ለእሙ፡ ሳብያ፡ ዘእምብሔረ፡ ቤርሳቤህ።
2 ወገብረ፡ ኢዮአስ፡ ሠናየ፡ በቅድመ፡ እግዚአብሔር፡ በኵሉ፡ መዋዕሊሁ፡ ለኢዮአዳ፡ ካህን።
3 ወነሥአ፡ ሎቱ፡ ኢዮአዳ፡ ለኢዮአስ፡ ክልኤተ፡ አንስተ፡ ወወለደ፡ ደቂቀ፡ ወአዋልደ።
4 ወኮነ፡ እምድኅረ፡ ዝንቱ፡ ዓርገ፡ ውስተ፡ ሕሊናሁ፡ ለኢዮአስ፡ ከመ፡ የሐድስ፡ ቤተ፡ እግዚአብሔር።
5 ወአስተጋብአ፡ ካህናተ፡ ወሌዋውያን፡ ወይቤሎሙ፡ ሑሩ፡ ውስተ፡ ኵሉ፡ አህጉረ፡ ይሁዳ፡ ወአስተጋብኡ፡ እምኵሉ፡ ሕዝበ፡ እስራኤል፡ ብሩረ፡ ወወርቀ፡ ዘየአክሎ፡ ለቤተ፡ እግዚአብሔር፡ ለለዓመት፡ ወጐጒዐ፡ ወተናገረ፡ ወኢያፍጠኑ፡ ሌዋውያን።
6 ወጸውዖ፡ ኢዮአስ፡ ንጉሥ፡ ለኢዮአዳ፡ መልአክ፡ ወይቤሎ፡ ለምንት፡ ኢሐወጽከ፡ ላዕለ፡ ሌዋውያን፡ ከመ፡ ያብኡ፡ እምድረ፡ ይሁዳ፡ ወእምኢየሩሳሌም፡ ዘሥሩዕ፡ እምኀበ፡ ሙሴ፡ ቊልዔሁ፡ ለእግዚአብሔር፡ ወአስተጋብኦሙ፡ ለኵሎሙ፡ እስራኤል፡ ውስተ፡ ደብተራ፡ መርጡል።
7 እስመ፡ ጎቶልያ፡ ይእቲ፡ ኃጥአት፡ ወደቂቃኒ፡ አመዝበሩ፡ ቤተ፡ እግዚአብሔር፡ ወንዋየ፡ ቅድሳት፡ ዘቤተ፡ እግዚአብሔር፡ ገብሩ፡ ለበዓሊም።
8 ወይቤ፡ ንጉሥ፡ ይገብሩ፡ ሙዳየ፡ ዘምጽዋት፡ ወያንብሩ፡ ውስተ፡ አንቀጸ፡ ቤተ፡ እግዚአብሔር፡ እንተ፡ አፍኣ።
9 ወይስብኩ፡ ሎሙ፡ ውስተ፡ ኵሉ፡ አህጉረ፡ ይሁዳ፡ ወኢየሩሳሌም፡ ያብኡ፡ ለእግዚአብሔር፡ በከመ፡ ይቤ፡ ቊልዔሁ፡ ለእግዚአብሔር፡ ላዕለ፡ እስራኤል፡ በገዳም።
10 ወወሀቡ፡ ኵሎሙ፡ መኳንንት፡ ወኵሉ፡ ሕዝብ፡ ወአብኡ፡ መባኣ፡ ወወደዩ፡ ውስተ፡ ሙዳየ፡ ምጽዋት፡ እስከ፡ መልአት።
11 ወኮነ፡ ሶበ፡ ያበውኡ፡ ሙዳየ፡ ምጽዋት፡ ኀበ፡ መገብተ፡ ንጉሥ፡ በእዴሆሙ፡ ለሌዋውያን፡ ወርእዮሙ፡ ከመ፡ ብዙኅ፡ ብሩር፡ መጽአ፡ ጸሐፊሁ፡ ለንጉሥ፡ ወመጋቢሁ፡ ካህን፡ ዓቢይ፡ ይኈልቊዎ፡ ለሙዳየ፡ ምጽዋት፡ ወያግብእዎ፡ ውስተ፡ መካኑ፡ ወከመዝ፡ ይገብሩ፡ ለለዕለት፡ ወአስተጋብኡ፡ ብሩረ፡ ብዙኀ።
12 ወወሀቦ፡ ንጉሥ፡ ለኢዮአዳ፡ ካህን፡ ወለእለ፡ ይገብሩ፡ ግብረ፡ ቤተ፡ እግዚአብሔር፡ ወእምኔሁ፡ ያወጽኡ፡ ለነደቅት፡ ወለጸረብት፡ ከመ፡ ይግበሩ፡ ግብረ፡ ቤተ፡ እግዚአብሔር።
13 ወተፈጸመ፡ ኵሉ፡ ግብር፡ በእደዊሆሙ፡ ወአቀምዎ፡ ለቤተ፡ እግዚአብሔር፡ በዲበ፡ ሥርዓቱ፡ ጽኑዕ።
14 ወፈጺሞሙ፡ አምጽኡ፡ ኀበ፡ ንጉሥ፡ ወኀበ፡ ኢዮአዳ፡ ካህን፡ ዘተርፈ፡ ብሩረ፡ ወገብርዎ፡ ንዋያተ፡ ለቤተ፡ እግዚአብሔር፡ ወንዋያተ፡ ጽንሐሐት፡ ወጽዋዓተ፡ ወርቅ፡ ወብሩረ፡ ወአዕረጉ፡ ጽንሐሐተ፡ ለቤተ፡ እግዚአብሔር፡ በኵሉ፡ መዋዕሊሁ፡ ለኢዮአዳ።
15 ወረስዐ፡ ኢዮአዳ፡ ፈጺሞ፡ መዋዕሊሁ፡ ወሞተ፡ ከዊኖ፡ ወልደ፡ ምእት፡ ወሠላሳ፡ ዓመት፡ አመ፡ ይመውት።
16 ወቀበርዎ፡ ውስተ፡ ሀገረ፡ ዳዊት፡ ምስለ፡ ነገሥት፡ እስመ፡ ገብረ፡ ሠናየ፡ ምስለ፡ እስራኤል፡ ቅድመ፡ እግዚአብሔር።
17 ወኮነ፡ እምድኅረ፡ ሞተ፡ ኢዮአዳ፡ ካህን፡ ቦኡ፡ መላእክተ፡ ይሁዳ፡ ወሰገዱ፡ ሎቱ፡ ለንጉሥ፡ ወአሜሃ፡ ሰምዖሙ፡ ንጉሥ።
18 ወኃደግዎ፡ ለእግዚአብሔር፡ አምላከ፡ አበዊሆሙ፡ ወተለዉ፡ አማልክተ፡ ግብት፡ ወኮነ፡ ዓቢይ፡ መቅሠፍት፡ ላዕለ፡ ይሁዳ፡ ወኢየሩሳሌም፡ በውእቱ፡ መዋዕል።
19 ወፈነወ፡ ኀቤሆሙ፡ ነቢያተ፡ ከመ፡ ይትመየጡ፡ ኀበ፡ እግዚአብሔር፡ ወአሰምዑ፡ ሎሙ፡ ወኢሰምዑ።
20 ወመንፈሰ፡ እግዚአብሔር፡ አጽንዖ፡ ለአዛርያስ፡ ወልደ፡ ኢዮአዳ፡ ካህን፡ ወተንሥአ፡ ላዕለ፡ ሕዝብ፡ ወይቤሎሙ፡ ከመዝ፡ ይቤ፡ እግዚአብሔር፡ ለምንት፡ ኢተሐውሩ፡ በትእዛዘ፡ እግዚአብሔር፡ ወኢትሤርኁ፡ እስመ፡ ኃደግምዎ፡ ለእግዚአብሔር፡ አምልክክሙ፡ ወውእቱኒ፡ ኃደገክሙ።
21 ወሮፁ፡ ኀቤሁ፡ ወአኀዙ፡ ይውግርዎ፡ በትእዛዘ፡ ኢዮአስ፡ ንጉሥ፡ በዓፀደ፡ ቤተ፡ እግዚአብሔር።
22 ወኢተዘከረ፡ ኢዮአስ፡ ሣህለ፡ ዘገብረ፡ አቡሁ፡ ኢዮአዳ፡ ምስሌሁ፡ ወቀተሎ፡ ለወልዱ፡ አዛርያስ፡ ወእንዘ፡ ይቀትሎ፡ ይቤ፡ ናሁ፡ እግዚአብሔር፡ ይሬኢ፡ ወውእቱ፡ ይኴንን።
23 ወኮነ፡ እምድኅረ፡ ፈጸመ፡ ዓመተ፡ ዓርጉ፡ በላዕሌሁ፡ ኃይል፡ ሠራዊት፡ ሶርያ፡ ወበጽሑ፡ በሐውርተ፡ ይሁዳ፡ ወኢየሩሳሌም፡ ወሠረዉ፡ ኵሎ፡ መላእክተ፡ እለ፡ ሀለዉ፡ ውስተ፡ ሕዝብ፡ ወኵሎ፡ ምህርካ፡ ዚአሆሙ፡ ነሥኡ፡ ወፈነዉ፡ ለንጉሠ፡ ደማስቆ።
24 እስመ፡ ባዕዳን፡ ውኁዳን፡ እደው፡ ሠራዊተ፡ ሶርያ፡ በጽሑ፡ ወእግዚአብሔር፡ መጠዎሙ፡ ውስተ፡ እደዊሆሙ፡ ለሠራዊት፡ ጽኑዓን፡ ወብዙኀን፡ ፈድፋደ፡ እስመ፡ ረስዕዎ፡ ለእግዚአብሔር፡ አምላከ፡ አበዊሆሙ፡ ወምስለ፡ ዮአስ፡ ገብረ፡ ፍትሐ።
25 ወእምድኅረዝ፡ ሖሩ፡ እምኀቤሁ፡ ኀዲጎሙ፡ ኪያሁ፡ በደዌ፡ ዓቢይ፡ ወተቀበልዎ፡ አግብርተ፡ ዚአሁ፡ በእንተ፡ ደመ፡ ወልዱ፡ ኢዮአዳ፡ ካህን፡ ወቀተልዎ፡ በላዕለ፡ ምስካበ፡ ዚአሁ፡ ወሞተ፡ ወቀበርዎ፡ ውስተ፡ ሀገረ፡ ዳዊት፡ ወኢደመርዎ፡ ውስተ፡ መቃብረ፡ ነገሥት።
26 ወእለሰ፡ ቀተልዎ፡ ዘቡድ፡ ወልደ፡ ሰማት፡ አሞናዊት፡ ወኢዮዛብድ፡ ወልደ፡ ሠማሪት፡ ሞአባዊ፡ ወደቂቁ፡ ኵሎሙ፡ ቀበርዎ፡ ወለሀውም።
27 ወንዋይ፡ ዘአስተጋብኡ፡ ሎቱ፡ ወሐድሶተ፡ ቤተ፡ እግዚአብሔር፡ ወእለኒ፡ ተርፉ፡ ቃላቲሁ፡ ናሁ፡ ጽሑፋት፡ ውስተ፡ መጽሐፈ፡ ነገሥት።
=== chapter 25 ===
[Chapter 25]
1 ወነግሠ፡ አሜስያስ፡ ወልዱ፡ እምድኅሬሁ፡ ከዊኖ፡ ወልደዕሥራ፡ ወኃምስቱ፡ ዓመት፡ አመ፡ ይንገሥ፡ ወዕሥራ፡ ወተስዓተ፡ ዓመተ፡ ነግሠ፡ በኢሩሳሌም፡ ወስማ፡ ለእሙ፡ ኢዮአዲን፡ እምሀገረ፡ ኢየሩሳሌም።
2 ወገብረ፡ ርትዐ፡ በቅድመ፡ እግዚአብሔር፡ ወአኮሰ፡ በፍጹም፡ ልብ።
3 ወኮነ፡ እምድኅረ፡ ቆመ፡ ወጸንዐ፡ መንግሥቱ፡ በእደ፡ ዚአሁ፡ ቀተሎሙ፡ ለአግብርቲሁ፡ እለ፡ ቀተልዎ፡ ለአቡሁ፡ ንጉሥ።
4 ወደቂቆሙሰ፡ ኢቀተለ፡ በከመ፡ ኪዳነ፡ ሕገ፡ እግዚአብሔር፡ በከመ፡ ጽሑፍ፡ ወበከመ፡ አዘዘ፡ እግዚአብሔር፡ እንዘ፡ ይብል፡ ኢይመውቱ፡ አበው፡ ህየንተ፡ ደቂቆሙ፡ ወኢይመውቱ፡ ደቂቅ፡ ህየንተ፡ አበዊሆሙ፡ አላ፡ አሐዱ፡ አሐዱ፡ በከመ፡ ፆሩ፡ ወበአበሳ፡ ዚአሁ፡ ይመውት።
5 ወአስተጋብአ፡ አሜስያስ፡ ንገጉሥ፡ ሠራዊተ፡ ቤተ፡ ይሁዳ፡ ወአቀሞሙ፡ በበአብያተ፡ አበዊሆሙ፡ ወሤመ፡ እምኔሆሙ፡ ርኡሳነ፡ እልፍ፡ ወርኡሳነ፡ ምእት፡ ውስተ፡ ኵሉ፡ በሐውርተ፡ ይሁዳ፡ ወኢየሩሳሌም፡ ወኆለቆሙ፡ እምአምጣነ፡ ዕሥራ፡ ዓመት፡ ወላዕለ፡ እምኔሁ፡ ወተረክበ፡ ኍልቆሙ፡ ሠላሳ፡ እልፈ፡ እደው፡ ጸናዕት፡ እለ፡ ይክሉ፡ ጸቢዐ፡ ወይፀውሩ፡ ወልታ፡ ወኲናተ።
6 ወተዓሰበ፡ እምውስተ፡ እስራኤል፡ ዓሠርተ፡ እልፈ፡ እደወ፡ ጸናዕተ፡ ፈድፋደ፡ በምእተ፡ መክሊተ፡ ብሩር።
7 ወመጽአ፡ ነቢየ፡ እግዚአብሔር፡ ኀቤሁ፡ እንዘ፡ ይብል፡ ንጉሥ፡ ኢይፃእ፡ ምስሌከ፡ ጸባዒተ፡ እስራኤል፡ እስመ፡ ኢኮነ፡ እግዚአብሔር፡ ምስለ፡ እስራኤል፡ ወምስለ፡ ኵሎሙ፡ ደቂቀ፡ ኤፍሬም።
8 ለእመ፡ ነሣእከ፡ ኵሎ፡ ሕዝበ፡ ኤፍሬም፡ ወሕዝበ፡ እስራኤል፡ ወሐለይከ፡ መዊዐ፡ እምኔሆሙ፡ ያወድቀከ፡ እግዚአብሔር፡ ቅድመ፡ ጸላእትከ፡ እስመ፡ ብውሕ፡ በኀበ፡ እግዚአብሔር፡ አጽንዖ፡ ወአውድቆ።
9 ወይቤሎ፡ አሜስያስ፡ ለነቢየ፡ እግዚአብሔር፡ ምንተ፡ እንከ፡ እገብር፡ በእንተ፡ ምእት፡ መክሊት፡ ዘወሀብኩ፡ ለሠራዊተ፡ እስራኤል፡ ወይቤሎ፡ ነቢየ፡ እግዚአብሔር፡ ኢይሰአኖ፡ ለእዚአብሔር፡ ከመ፡ የሀብከ፡ ካዕበተ፡ ፈድፋደ፡ እምእላንቱ።
10 ወሌለዮሙ፡ አሜስያስ፡ ንጉሥ፡ ለሠራዊት፡ እለ፡ መጽኡ፡ ኀቤሁ፡ እምበበሐውርተ፡ ኤፍሬም፡ ከመ፡ ይሑሩ፡ ወይግብኡ፡ ውስተ፡ ማኅደሪሆሙ፡ ወተምዑ፡ ፈድፋደ፡ ላዕለ፡ ይሁዳ፡ ወተመይጡ፡ ውስተ፡ ማኅደሪሆሙ፡ በመዓት፡ ዓቢይ።
11 ወአሜስያስ፡ ጸንዐ፡ ወአስተጋብአ፡ ሕዝበ፡ ዚአሁ፡ ወሖረ፡ ውስተ፡ አፍላገ፡ አጉሪን፡ ወቀተለ፡ በህየ፡ ደቂቀ፡ ሰዒር፡ አሐደ፡ እልፈ።
12 ወአሐደ፡ እልፈ፡ አኃዙ፡ ወፄወዉ፡ ደቂቀ፡ ይሁዳ፡ ወአምጽእዎሙ፡ ላዕለ፡ ርዕሰ፡ ቀልቀል፡ ወአጽደፍዎሙ፡ እምርእሰ፡ ውእቱ፡ ቀልቀል፡ ወኵሎሙ፡ ነቅዑ።
13 ወእደው፡ ጸናዕት፡ እለ፡ አግብአ፡ አሜስያስ፡ ከመ፡ ኢይሑሩ፡ ምስሌሁ፡ ለፀብዕ፡ ሮዱ፡ ኵሎ፡ አህጉረ፡ ይሁዳ፡ እምብሔረ፡ ሰማርያ፡ እስከ፡ ቤቴሮን፡ ወቀተሎ፡ እምኔሆሙ፡ ሠላሣ፡ ምእተ፡ ወማህረኩ፡ ምህርካ፡ ዓቢየ።
14 ወኮነ፡ እምድኅረ፡ መጽአ፡ አሜስያስ፡ ቀቲሎ፡ ብሔረ፡ ኤዶምያስ፡ ወአምጽአ፡ ምስሌሁ፡ አማልክተ፡ ደቂቀ፡ ሰዒር፡ ወአቀሞሙ፡ ሎቱ፡ ለአማልክት፡ ወአንፃረ፡ ዚአሆሙ፡ ሎሙ፡ ይስግድ፡ ወውእቱሰ፡ በርእሱ፡ ይሠውዕ፡ ሎሙ።
15 ወኮነ፡ መቅሠፍተ፡ እግዚአብሔር፡ አሜስያስ፡ ንጉሥ፡ ወፈነወ፡ ሎቱ፡ ነቢየ፡ እንዘ፡ ይብል፡ ለምንት፡ ኀሥሥከ፡ አማላክተ፡ አሕዛብ፡ እለ፡ ኢይባልሑ፡ ሕዝበ፡ ዚአሆሙ፡ እምእዴከ።
16 ወኮነ፡ እንዘ፡ ይትናገሮ፡ ዘንተ፡ ወይቤሎ፡ አሜስያስ፡ ዘአኮ፡ ሤምኩከ፡ መምክርየ፡ ተዓቀብ፡ ከመ፡ ኢትትመንደብ፡ ወአርመመ፡ ነቢይ፡ እንዘ፡ ይብል፡ አአምር፡ ከመ፡ መከረ፡ እግዚአብሔር፡ ላዕሌከ፡ ከመ፡ ይሥሩከ፡ እስመ፡ ገበርከ፡ ዘንተ፡ ወኢሰማዕከ፡ ምክረ፡ ዚአየ።
17 ወተማከረ፡ አሜስያስ፡ ንጉሠ፡ ይሁዳ፡ ወለአከ፡ ኀበ፡ ኢዮአስ፡ ወልደ፡ አካዝ፡ ወልደ፡ ኢዩ፡ ንጉሠ፡ እስራኤል፡ እንዘ፡ ይብል፡ ነዓ፡ ንትረአይ፡ ገጸ፡ በገጽ።
18 ወለአከ፡ ኢዮአስ፡ ንጉሠ፡ እስራኤል፡ ኀበ፡ አሜስያስ፡ ንጉሠ፡ ይሁዳ፡ እንዘ፡ ይብል፡ አቃኒ፡ ዘውስተ፡ ሊባኖስ፡ ለአከ፡ ኀበ፡ ዘግባ፡ ዘሊባኖስ፡ እንዘ፡ ይብል፡ ሀበኒ፡ ወለተከ፡ ለወልድየ፡ ከመ፡ ትኩኖ፡ ብእሲተ፡ ወነዮሙ፡ በጽሑ፡ አራዊተ፡ ገዳም፡ ዘውስተ፡ ሊባኖስ፡ ወኬድዎ፡ ለአቃኒ።
19 አንተ፡ ትቤ፡ ናሁ፡ ቀተልኩ፡ በሐውርተ፡ ኤዶምያስ፡ ወይትዔበየከ፡ ልብከ፡ ፈድፋደ፡ ወይእዜኒ፡ ንበር፡ ውስተ፡ ቤትከ፡ ወለምንት፡ ትትዔበይ፡ በእኪት፡ ወትወድቅ፡ አንተ፡ ወኵሉ፡ ይሁዳ፡ ምስሌከ።
20 ወኢሰምዐ፡ አሜስያስ፡ ንጉሥ፡ እስመ፡ እምኀበ፡ እግዚአብሔር፡ ኮነት፡ ዛቲ፡ ከመ፡ ያግብኦ፡ ውስተ፡ እደ፡ ጸላእቱ፡ እስመ፡ ኃሠሠ፡ አማልክተ፡ ኤዶማውያን።
21 ወዓርገ፡ ኢዮአስ፡ ንጉሠ፡ እስራኤል፡ ወተራአዩ፡ በበይናቲሆሙ፡ ውእቱኒ፡ ወአሜስያስ፡ ንጉሠ፡ ይሁዳ፡ በቤተ፡ ሳሚስ፡ እንተ፡ ደወለ፡ ይሁዳ።
22 ወወድቁ፡ ይሁዳ፡ አንፃረ፡ እስራኤል፡ ወጐዬ፡ በበይናቲሆሙ፡ ወገብኡ፡ በበማኅደሪሆሙ።
23 ወለአሜስያስ፡ ንጉሠ፡ ይሁዳ፡ ወልደ፡ ዮአስ፡ ዴገኖ፡ ኢዮአስ፡ ንጉሠ፡ እስራኤል፡ በቤተ፡ ሳሚስ፡ ወአኀዞ፡ ወአብኦ፡ ምስሌሁ፡ ኢየሩሳሌም፡ ወአስሐቦ፡ ላዕለ፡ አረፍተ፡ ኢየሩሳሌም፡ እም፡ አንቀጸ፡ ኤፍሬም፡ እስከ፡ አንቀጸ፡ ማዕዘንት፡ አርባዕቱ፡ ምእት፡ በእመት።
24 ወኵሎ፡ ወርቀ፡ ወብሩረ፡ ወኵሎ፡ ንዋየ፡ ዘተረክበ፡ ውስተ፡ ቤተ፡ እግዚአብሔር፡ በእዴሁ፡ ለአብዲዶም፡ ወመዛግብተ፡ ቤተ፡ ንጉሥ፡ ወለደቂቀ፡ ፈላስያን፡ ሜጦሙ፡ ወአግብኦሙ፡ ምስሌሁ፡ ብሔረ፡ ሰማርያ።
25 ወሐይወ፡ አሜስያስ፡ ወልደ፡ ዮአስ፡ ንጉሠ፡ ይሁዳ፡ እምድኅረ፡ ሞቱ፡ ለኢዮአስ፡ ወልደ፡ አካዝ፡ ንጉሠ፡ እስራኤል፡ ዓሠርተ፡ ወኃምስተ፡ ዓመተ።
26 ወእለ፡ ተርፉ፡ ቃላተ፡ አሜስያስ፡ ቀደምት፡ ወደኃርት፡ አኮኑ፡ ጽሑፋት፡ ውስተ፡ መጽሐፈ፡ ነገሥተ፡ እስራኤል፡ ወይሁዳ።
27 ወበውእቱ፡ መዋዕል፡ አመ፡ ርኅቀ፡ አሜስያስ፡ እምፍኖተ፡ እግዚአብሔር፡ ገብሩ፡ ላዕሌሁ፡ ማዕሌተ፡ ወጐየ፡ እምብሔረ፡ ኢየሩሳሌም፡ ለብሔረ፡ ለኪስ፡ ወለአኩ፡ ድኅሬሁ፡ ወዴገንዎ፡ ብሔረ፡ ለኪስ፡ ወቀተልዎ፡ በህየ።
28 ወአፆርዎ፡ መልዕልተ፡ አፍራስ፡ ወአብጽሕዎ፡ ወቀበርዎ፡ ምስለ፡ አበዊሁ፡ ውስተ፡ ሀገረ፡ ዳዊት።
=== chapter 26 ===
[Chapter 26]
1 ወነሥእዎ፡ ኵሎሙ፡ አሕዛበ፡ ምድር፡ ለዖዝኦን፡ ወአንገሥዎ፡ ከዊኖ፡ ወልደ፡ ዓሠርቱ፡ ወሰብዐቱ፡ ዓመት፡ ህየንተ፡ አቡሁ፡ አሜስያስ።
2 ወውእቱ፡ አሕነፀ፡ ሀገረ፡ ኤላት፡ ወውእቱኒ፡ አግብኣ፡ ውስተ፡ እደ፡ ይሁዳ፡ እምድኅረ፡ ሞተ፡ ንጉሥ፡ አቡሁ፡ ምስለ፡ አበዊሁ።
3 ከዊኖ፡ ወልደ፡ ዓሠርቱ፡ ወስድስቱ፡ ዓመት፡ አመ፡ ይነግሥ፡ ኦዝያን፡ ወኃምሳ፡ ወክልኤተ፡ ዓመተ፡ ነግሠ፡ በኢየሩሳሌም፡ ወስማ፡ ለእሙ፡ ኢየኮልያስ፡ እምሀገረ፡ ኢየሩሳሌም።
4 ወገብረ፡ ርትዐ፡ በቅድመ፡ እግዚአብሔር፡ ከመ፡ ኵሉ፡ ዘገብረ፡ አሜስያስ፡ አቡሁ።
5 ወኮነ፡ የኃሥሦ፡ ለእግዚአብሔር፡ በመዋዕሊሁ፡ ለዘካርያስ፡ ነቢይ፡ ዘያሌቡ፡ ፈሪሀ፡ እግዚአብሔር፡ ወበመዋዕሊሁኒ፡ ኃሠሦ፡ ለእግዚአብሔር፡ ወእግዚአብሔርኒ፡ ይሤርኅ፡ ሎቱ።
6 ወወፅአ፡ ወቀተሎሙ፡ ለኢሎፍሊ፡ ወአውደቀ፡ አረፋቲሃ፡ ለጌት፡ ወአረፋቲሃ፡ ለኢያቢስ፡ ወአረፋቲሃ፡ ለአዛጦን፡ ወአሕነፀ፡ አህጉረ፡ በምድረ፡ አዛጦን፡ ወበበሐውርተ፡ ኢሎፍሊ።
7 ወአጽንዖ፡ እግዚአብሔር፡ ላዕለ፡ ኢሎፍሊ፡ ወላዕለ፡ ሕዝበ፡ ዓራብያ፡ እለ፡ የኀድሩ፡ ውስተ፡ መልዕልተ፡ ኰኵሕ፡ ወላዕለ፡ አሞናውያን።
8 ወወሀቡ፡ አሞናውያን፡ አምኀ፡ ለኦዝያን፡ ንጉሥ፡ ወበጽሐ፡ ስሙ፡ እስከ፡ በሐውርተ፡ ግብፅ፡ እስመ፡ ጸንዐ፡ ፈድፋደ።
9 ወአሕነፀ፡ ኦዝያን፡ ማኅፈደ፡ በኢየሩሳሌም፡ በመልዕልተ፡ አንቀጽ፡ ዘማዕዘንት፡ ወመልዕተ፡ አንቀጸ፡ ፈለግ፡ በመልዕልተ፡ ማዕዘንት።
10 ወጸንዐ፡ ወሐነፀ፡ ማኅፈደ፡ በገዳም፡ ወወቀረ፡ ውስተ፡ ኰኵሕ፡ አግባበ፡ ብዙኀነ፡ እስመ፡ እንስሳ፡ ብዙኅ፡ ተረክበ፡ ሎቱ፡ በብሔረ፡ ሴፌል፡ ወበብሔረ፡ ሐቅል፡ ወዓቀብተ፡ ዓፀደ፡ ወይን፡ በውስተ፡ አድባር፡ ወገዳም፡ ወብሔረ፡ ቀርሜሎስ፡ እስመ፡ መፍቀሬ፡ ሐሪስ፡ ውእቱ።
11 ወኮንዎ፡ ለኦዝያን፡ ሠራዊት፡ እለ፡ ይክሉ፡ ቀትለ፡ ወይክሉ፡ ወጺአ፡ ጸብእ፡ ወተኈለቁ፡ ወኮነ፡ ኍልቆሙ፡ በእዴሁ፡ ለኢዮሄል፡ ጸሐፊ፡ ወበእደ፡ ማዓስያ፡ መኰንን፡ ወበእዴሁ፡ ለሐናንያ፡ ዓቃቤ፡ መንግሥት።
12 ወኮነ፡ ኍልቆሙ፡ ለርኡሳነ፡ አበው፡ ጽኑዓን፡ በውስተ፡ ፀብዕ፡ ዕሥራ፡ ምእተ፡ ወስድስተ፡ ምእተ።
13 ወሠራዊት፡ ጸናዕት፡ ለቀትል፡ ምስሌሆሙ፡ ሠላሳ፡ እልፍ፡ ወሰብዓ፡ ምእት፡ ወኃምስቱ፡ ምእት፡ ወእሉ፡ እሙንቱ፡ እለ፡ ይክሉ፡ ቀትለ፡ ወጽኑዓን፡ በኃይል፡ ወይክሉ፡ ረዲኦቶ፡ ለንጉሥ፡ ላዕለ፡ ፀሩ።
14 ወአስተዳለወ፡ ሎሙ፡ ኦዝያን፡ ንጉሥ፡ ለኵሉ፡ ሰብአ፡ ኃይሉ፡ ወላትወ፡ ወአርማሐ፡ ወመክድነ፡ አርእስት፡ ዘሐፂን፡ ወአድርዐ፡ ወአቅስስት፡ ወመዋጽፍተ፡ እብን።
15 ወገብረ፡ በኢየሩሳሌም፡ ሠረገላተ፡ እለ፡ በመንገን፡ ይነድፉ፡ ከመ፡ ይኩና፡ መልዕልተ፡ ማኅፈድ፡ ወመልዕልተ፡ ማዕዘንት፡ ከመ፡ ይንድፉ፡ በሐፅ፡ ወበአእባን፡ ዓበይት፡ ወተሰምዐ፡ ዜናሆሙ፡ ለእልክቱ፡ ሠረገላት፡ ወመናግንት፡ እስከ፡ ርኁቅ፡ ብሔር፡ እስመ፡ አንከሩ፡ ከመ፡ ረድኦ፡ እግዚአብሔር፡ ለዖዝያን፡ እስከ፡ ጸንዐ።
16 ወእምድኅረ፡ ፀንዐ፡ ተዓበየ፡ ልቡ፡ ከመ፡ ይሠረው፡ ወዓመፀ፡ በቅድመ፡ እግዚአብሔር፡ አምላኩ፡ ወቦአ፡ ውስተ፡ ቤተ፡ እግዚአብሔር፡ ኦዝያን፡ ከመ፡ ይዕጥን፡ ዕጣነ፡ ውስተ፡ ቤተ፡ ምሥዋዕ፡ ዘዕጣናት።
17 ወቦአ፡ እምድኅሬሁ፡ አዛርያስ፡ ካህን፡ ወምስሌሁ፡ ካህናተ፡ እግዚአብሔር፡ ሰማንያ፡ እደው፡ ጸናዕት።
18 ወተንሥኡ፡ ላዕለ፡ ኦዝያን፡ ንጉሥ፡ ወይቤልዎ፡ ካህናት፡ ኢይከውነከ፡ ኦዝያን፡ ከመ፡ ትዕጥን፡ ለእግዚአብሔር፡ አላ፡ ለካህናት፡ ለደቂቀ፡ አሮን፡ እለ፡ ተቀደሱ፡ በእግዚአብሔር፡ ከመ፡ ይዕጥኑ፡ ሎቱ።
19 ወይቤልዎ፡ ካህናት፡ ወሌዋውያን፡ ለኦዝያን፡ ንጉሥ፡ ፃዕ፡ እምቤተ፡ መቅደስ፡ እስመ፡ ርኁቅ፡ አንተ፡ እምእግዚአብሔር፡ ወኢይከውነከ፡ ዝንቱ፡ ክብር፡ በኀበ፡ እግዚአብሔር፡ አምላክ።
20 ወተምዐ፡ ኦዝያን፡ ወእንዘ፡ ሀለወት፡ ማዕጠንቅ፡ ውስተ፡ እዴሁ፡ ለኦዝያን፡ ከመ፡ ይዕጥን፡ በቤተ፡ እግዚአብሔር፡ ወእንዘ፡ ይትመዓዖሙ፡ ለካህናት፡ ናሁ፡ ወጽአት፡ ለምፅ፡ ውስተ፡ ፍጽሙ፡ ለኦዝያን፡ ንጉሥ፡ በቅድመ፡ ካህናት፡ በመልዕልተ፡ ቤተ፡ እግዚአብሔር፡ መልዕልተ፡ ምሥዋዕ፡ ዘዕጣናት።
21 ወገብኡ፡ ኀቤሁ፡ አዛርያስ፡ ካህን፡ ቀዳማዊ፡ ወሰማንያ፡ ካህናትኒ፡ ምስሌሁ፡ ወናሁ፡ ረከቡ፡ ለምፀ፡ ውስተ፡ ፍጽሙ፡ ወሰደድዎ፡ እምህየ፡ እስመ፡ ውእቱኒ፡ ጐጒአ፡ ከመ፡ ይፃእ፡ እምህየ፡ እስመ፡ ቀሠፎ፡ እግዚአብሔር።
22 ወነበረ፡ ኦዝያን፡ ውስተ፡ ለምፅ፡ እስከ፡ ዕለተ፡ ሞቱ፡ ወነበረ፡ በቤተ፡ ሐፍሶት፡ እንዘ፡ ለምጽ፡ ላዕሌሁ፡ እስመ፡ ርኁቅ፡ እምቤተ፡ እግዚአብሔር፡ ወተሠይመ፡ ኢዮአታም፡ ወልዱ፡ ላዕለ፡ መንግሥተ፡ ዚአሁ፡ ወይኴንን፡ ላዕለ፡ ኵሎሙ፡ አሕዛበ፡ ምድር።
23 ወእለ፡ ተርፉ፡ ቃላተ፡ ኦዝያን፡ ቀደምት፡ ወደኃርት፡ ጽሑፋት፡ ውስተ፡ መጽሐፈ፡ ኢሳይያስ፡ ነቢይ።
24 ወኖመ፡ ኦዝያን፡ ምስለ፡ አበዊሁ፡ ወቀበርዎ፡ ውስተ፡ ሐቅል፡ ዘኢኮነ፡ መቃብረ፡ ነገሥት፡ እስመ፡ ይቤሉ፡ ለምፅ፡ ውእቱ።
=== chapter 27 ===
[Chapter 27]
1 ወነግሠ፡ ኢዮአታም፡ ወልዱ፡ እምድኅሬሁ፡ ከዊኖ፡ ወልደ፡ ዕሥራ፡ ወኃምስቱ፡ ዓመት፡ ወዓሠርተ፡ ወሰብዓተ፡ ዓመተ፡ ነግሠ፡ በኢየሩሳሌም፡ ወስማ፡ ለእሙ፡ ኢየሩሳ፡ ወለተ፡ ሳዶቅ።
2 ወሖረ፡ በፍናወ፡ ጽድቅ፡ በቅድመ፡ እግዚአብሔር፡ በኵሉ፡ በከመ፡ ገብረ፡ ኦዝያን፡ አቡሁ፡ አላ፡ ኢቦአ፡ ውስተ፡ ቤተ፡ እግዚአብሔር፡ ወዓዲሆሙ፡ ይሰግዱ፡ ሕዝብ።
3 ወውእቱ፡ ሐነፀ፡ አናቅጸ፡ ቤተ፡ እግዚአብሔር፡ ልዑላተ፡ ወበአረፋቲሁ፡ ለኦፌል፡ ሐነጸ፡ ብዙኀነ፡ አህጉረ።
4 ወሐነፀ፡ በደወለ፡ ይሁዳ፡ በውስተ፡ አእዋም፡ ማኅደረ፡ ወማኅፈደ።
5 ወውእቱኒ፡ ተባአሰ፡ ምስለ፡ ንጉሦሙ፡ ለደቂቀ፡ አሞን፡ ወጸንዐ፡ ላዕሌሁ፡ ወይሁብ።
6 ወፀንዐ፡ ኢዮአታም፡ እስመ፡ አስተዳለወ፡ ፍናዊሁ፡ ቅድመ፡ እግዚአብሔር፡ አምላኩ።
7 ወእለ፡ ተርፉ፡ ቃላተ፡ ኢዮአታም፡ ወጸብዑኒ፡ ወምግባረ፡ ዚአሁኒ፡ ነዋ፡ ጽሑፋት፡ ውስተ፡ መጽሐፈ፡ ነገሥተ፡ ይሁዳ፡ ወእስራኤል።
8 ወኖመ፡ ኢዮአታም፡ ምስለ፡ አበዊሁ፡ ወተቀብረ፡ በሀገረ፡ ዳዊት።
=== chapter 28 ===
[Chapter 28]
1 ወነግሠ፡ አካዝ፡ ወልዱ፡ እምድኅሬሁ፡ ከዊኖ፡ ወልደ፡ ዕሥራ፡ ዓመት፡ አመ፡ ይነግሥ፡ አካዝ፡ ወዐሠርተ፡ ወስድስተ፡ ዓመተ፡ ነግሠ፡ በኢየሩሳሌም፡ ወኢሖረ፡ በፍኖት፡ ርትዕት፡ በቅድመ፡ እግዚአብሔር፡ በከመ፡ ገብረ፡ ዳዊት፡ አቡሁ።
2 ወሖረ፡ በፍናወ፡ ነገሥተ፡ እስራኤል፡ እስመ፡ ገብረ፡ ወፈጠረ፡ አምሳለ።
3 ወለውእቱኒ፡ ምስለ፡ ይሠውዕ፡ በቈላተ፡ ወልደ፡ ኄኖም፡ ወአውዓየ፡ ደቂቆ፡ እንተ፡ ማእከለ፡ እሳት፡ ለርኵሶሙ፡ ለአሕዛብ፡ እለ፡ ሠረዎሙ፡ እግዚአብሔር፡ እምቅድመ፡ ገጾሙ፡ ለደቂቀ፡ እስራኤል።
4 ወዓጠነ፡ መልዕልተ፡ አውግር፡ ወመልዕልተ፡ አንሕስት፡ ወታሕተ፡ ኵሉ፡ ዕፀ፡ ዘግባት።
5 ወመጠዎ፡ እግዚአብሔር፡ አምላኩ፡ ውስተ፡ እደ፡ ንጉሠ፡ ሶርያ፡ ወቀተሎ፡ ወማህረከ፡ እምኔሁ፡ ምህርካ፡ ዓቢየ፡ ወአብጽሖ፡ ብሔረ፡ ደማስቆ፡ ወበእደዊሁኒ፡ ለንጉሠ፡ እስራኤል፡ መጠዎ፡ ወቀተሎ፡ ወአውደቀ፡ እምኔሁ፡ ብዙኀነ።
6 ወቀተለ፡ ፋቁሔ፡ ወልደ፡ ሮሜልዩ፡ ንጉሠ፡ እስራኤል፡ በይሁዳ፡ በአሐቲ፡ ዕለት፡ ዓሠርተ፡ ወክልኤተ፡ እልፈ፡ እደወ፡ ጽኑዓነ፡ ወኃያላነ፡ እስመ፡ ኃደግዎ፡ ለእግዚአብሔር፡ አምላከ፡ አበዊሆሙ።
7 ወቀተሎ፡ አዘክሪ፡ ጽኑዐ፡ ኤፍሬም፡ ለማዓስያ፡ ወልደ፡ ንጉሥ፡ ወለኤዝራ፡ መጋቤ፡ ቤቱ፡ ወለእልቃና፡ ዓቃቤ፡ ንጉሥ።
8 ወማህረኩ፡ ደቂቀ፡ እስራኤል፡ እምአኃዊሆሙ፡ ሠላሳ፡ እልፈ፡ አንስተ፡ ወደቂቀ፡ ወአዋልደ፡ ወብዙኀ፡ ምህርካ፡ ማህረኩ፡ እምኔሆሙ፡ ወአምጽኡ፡ ምህርካሆሙ፡ ውስተ፡ ብሔረ፡ ሰማርያ።
9 ወበህየኒ፡ ሀሎ፡ ብእሲ፡ ነቢየ፡ እግዚአብሔር፡ ዘስሙ፡ አዲድ፡ ወወጽአ፡ ለቀበላ፡ ሠራዊት፡ እለ፡ በጽሑ፡ ብሔረ፡ ሰማርያ፡ ወይቤሎሙ፡ ናሁ፡ መዓተ፡ እግዚአብሔር፡ አምላከ፡ አበዊክሙ፡ ላዕለ፡ ይሁዳ፡ ወመጠዎሙ፡ ውስተ፡ እደዊክሙ፡ ወቀተልክሙ፡ እምኔሆሙ፡ በመዓት፡ ወእስከ፡ ሰማያት፡ በጽሐ።
10 ወይእዜኒ፡ ደቂቀ፡ ይሁዳ፡ ወኢየሩሳሌም፡ አንትሙ፡ ትቤሉ፡ ከመ፡ ታጥርዩ፡ ለክሙ፡ አግብርተ፡ ወአእማተ፡ አኮኑ፡ አነ፡ ሀሎኩ፡ ምስሌክሙ፡ ስምዕ፡ ለእግዚአብሔር፡ አምላክክሙ።
11 ወይእዜኒ፡ ስምዑኒ፡ ወአግብኡ፡ ፄዋ፡ ዘፄወውክሙ፡ እም፡ አኃዊክሙ፡ እስመ፡ መቅሠፍተ፡ እግዚአብሔር፡ ላዕሌክሙ።
12 ወተንሥኡ፡ መላእክተ፡ እምደቂቀ፡ ኤፍሬም፡ አዛርያ፡ ወልደ፡ አናን፡ ወበራክያስ፡ ወልደ፡ መስላሞት፡ ወሕዝቅያስ፡ ወልደ፡ ሳሌም፡ ወአሜስያ፡ ወልደ፡ አዳሌ፡ እለ፡ በጽሑ፡ እምጸባዒት፡ ወይቤልዎሙ፡ ኢታብኡ፡ ምህርካሆሙ፡ ኀቤነ፡ እስመ፡ አበሳ፡ እግዚአብሔር፡ ላዕሌነ።
13 ወአንትሙ፡ ትቤሉ፡ ከመ፡ ትወስኩ፡ አበሳ፡ በዲበ፡ አበሳክሙ፡ ወዲበ፡ ኢያእምሮትክሙ፡ ኢያእምሮ፡ እስመ፡ መዓተ፡ እግዚአብሔር፡ ላዕለ፡ እስራኤል።
14 ወኃደጉ፡ ምህርካሆሙ፡ መስተቃትላን፡ ወኵሎ፡ ፄዋሆሙ፡ በቅድመ፡ መላእክተ፡ ወበቅድመ፡ ማኅበር።
15 ወተንሥኡ፡ እደው፡ እለ፡ ስሙያን፡ አስማቲሆሙ፡ ወተወክፉ፡ እልክተ፡ ፄዋሆሙ፡ ወለኵሎሙ፡ ዕሩቃን፡ አልበስዎሙ፡ ወአሥአንዎሙ፡ እምበርበረ፡ ዚአሆሙ፡ ወከደንዎሙ፡ ወአዕረፍዎሙ፡ ወአብልዕዎሙ፡ ወአስተይዎሙ፡ ወቀብዕዎሙ፡ ወተወክፍዎሙ፡ ወአጽዐንዎሙ፡ ውስተ፡ ዕዋለ፡ አድግ፡ ለኵሎሙ፡ ድውያን፡ ወአብጽሕዎሙ፡ ውስተ፡ ሀገረ፡ ኢያሪሆ፡ እንተ፡ ተመርት፡ ኀበ፡ አኃዊሆሙ፡ ወተመይጡ፡ ወገብኡ፡ ብሔረ፡ ሰማርያ።
16 ወበውእቱ፡ ዓመት፡ ፈነወ፡ አካዝ፡ ንጉሥ፡ ኀበ፡ ንጉሠ፡ አሶር፡ ከመ፡ ይርድኦ።
17 እስመ፡ ኤዶማውያን፡ ሮዱ፡ ወቀተሉ፡ በይሁዳ፡ ወማህረኩ፡ ወነሥኡ፡ ብዙኀ፡ ፄዋ።
18 ወኢሎፍሊኒ፡ በጽሑ፡ ወሮዱ፡ አህጉረ፡ ገዳም፡ እምደወለ፡ ደቡበ፡ ይሁዳ፡ ወነሥእዋ፡ ለቤተ፡ ሳሚሳ፡ ወለኢዮሎን፡ ወለጋቤሮት፡ ወለሰካዕ፡ ወለአዕፃዳቲሃ፡ ወለታምና፡ ወለአዕፃዳቲሃ፡ ወለጋማዚእ፡ ወለአዕፃዲሃ።
19 ወኀደሩ፡ ህየ፡ እስመ፡ አትሐተ፡ እግዚአብሔር፡ ሕዝበ፡ ይሁዳ፡ በእንተ፡ አካዝ፡ ንጉሦሙ፡ እስመ፡ ርኂቀ፡ ርኅቁ፡ እምእግዚአብሔር።
20 ወመጽአ፡ ላዕሌሁ፡ ቴልጌል፡ ቴልፌልሶር፡ ንጉሠ፡ አሶር።
21 ወነሥአ፡ አካዝ፡ ንጉሥ፡ ዘሀሎ፡ ውስተ፡ ቤተ፡ እግዚአብሔር፡ ወውስተ፡ ቤተ፡ ንጉሥ፡ ወውስተ፡ ቤተ፡ መላእክት፡ ወወሀቦ፡ ለንጉሠ፡ አሶር፡ ወኢኮኖ፡ በረድኤቱ፡ አላ፡ ለአመንድቦ፡ ዚአሁ።
22 ወዓዲ፡ ደገመ፡ ርኂቀ፡ አካዝ፡ ንጉሥ፡ እምእግዚአብሔር።
23 ወይቤ፡ ንጉሥ፡ አኀሥሦሙ፡ ለአማልክት፡ ደማስቆ፡ እለ፡ ቀተሉኒ፡ ወይቤ፡ እስመ፡ አማልክተ፡ ንጉሠ፡ ሶርያ፡ እሙንቱ፡ ያጸንዕዎ፡ ወይእዜኒ፡ እሠውዕ፡ ሎሙ፡ ወእሙንቱ፡ ይትራድኡኒ፡ ወእሙንቱ፡ ኮንዎ፡ ለፁግ፡ ወለኵሉ፡ እስራኤል።
24 ወአግኀሠ፡ አካዝ፡ ኵሎ፡ ንዋየ፡ ቤተ፡ እግዚአብሔር፡ ወሰበሮሙ፡ ወዘግሐ፡ ኃዋኅወ፡ ቤተ፡ እግዚአብሔር፡ ወገብረ፡ ሎቱ፡ መካነ፡ ምሥዋዕ፡ በኵሉ፡ መዓዝን፡ ዘኢየሩሳሌም።
25 ወበኵሉ፡ ሀገር፡ ወበሀገረ፡ ይሁዳኒ፡ ገብረ፡ አውግረ፡ ከመ፡ ይዕጥን፡ ለአማልክተ፡ ነኪር፡ ወአምዕዖ፡ ለእግዚአብሔር፡ አምላከ፡ አበዊሆሙ።
26 ወእለ፡ ተርፋ፡ ቃላቲሁ፡ ወምግባራቲሁ፡ ቀደምት፡ ወደኃርት፡ ነዮን፡ ጽሑፋት፡ ውስተ፡ ወጽሐፈ፡ ነገሥተ፡ ይሁዳ፡ ወእስራኤል።
27 ወኖመ፡ አካዝ፡ ምስለ፡ አበዊሁ፡ ወተቀብረ፡ በሀገረ፡ ዳዊት፡ እስመ፡ ኢያብእዎ፡ ውስተ፡ መቃብረ፡ ነገሥተ፡ እስራኤል።
=== chapter 29 ===
[Chapter 29]
1 ወነግሠ፡ ሕዝቅያስ፡ ወልዱ፡ እምድኅሬሁ፡ ከዊኖ፡ ወልደ፡ ዕሥራ፡ ወኃምስቱ፡ ዓመት፡ ወዕሥራ፡ ወተስዓተ፡ ዓመተ፡ ነግሠ፡ በኢየሩሳሌም፡ ወስማ፡ ለእሙ፡ አብያ፡ ወለተ፡ ዘካርያስ።
2 ወሖረ፡ በፍኖት፡ ርትዕት፡ በቅድመ፡ እግዚአብሔር፡ በከመ፡ ዳዊት፡ አቡሁ።
3 ወኮነ፡ አመ፡ ጸንዐ፡ ወቆመ፡ በመንግሥቱ፡ በቀዳማይ፡ ወርኅ፡ አርኃወ፡ ኃዋኅዊሃ፡ ለቤተ፡ እግዚአብሔር፡ ወአጽንዖሙ፡ ወአሠነዮሙ።
4 ወአብኦሙ፡ ለካህናት፡ ወለሌዋውያን፡ ወአቀሞሙ፡ ውስተ፡ ቤት፡ ዘመንገለ፡ ጽባሕ፡ ወይቤሎሙ፡ ስምዑኒ፡ ሌዋውያን፡ ወይእዜኒ፡ አንጽሑ፡ ርእሰክሙ፡ ወአንጽሑ፡ ቤተ፡ እግዚአብሔር፡ አምላከ፡ አበዊክሙ፡ ወአውጽኡ፡ ርኩሰ፡ እምቤተ፡ ቅድሳት።
5 እስመ፡ ርኅቁ፡ አበዊነ፡ እምእግዚአብሔር፡ ወእኪተኒ፡ ገብሩ፡ በቅድመ፡ እግዚአብሔር፡ አምላክነ፡ ወረስዕዎ፡ ወሜጡ፡ ገጾሙ፡ እምቤተ፡ እግዚአብሔር፡ ወአጽንዑ፡ ክሳውዲሆሙ።
6 ወዓፀዉ፡ ኃዋኅወ፡ ቤተ፡ እግዚአብሔር፡ ወአጥፍኡ፡ መኀትወ፡ ወዕጣነ፡ ኢዓጠኑ፡ ወጽንሐሐኒ፡ ኢያብኡ፡ ለአምላከ፡ እስራኤል፡ ቅዱስ።
7 ተምዐ፡ እግዚአብሔር፡ ላዕለ፡ ይሁዳ፡ ወኢየሩሳሌም፡ ወመጠዎሙ፡ ለድንጋፄ፡ ወለሙስና፡ ወለሰሐቅ፡ ወለሥላቅ፡ በከመ፡ አንትሙ፡ ትሬእዩ፡ በአዕይንቲክሙ።
8 ወናሁ፡ አበዊነ፡ ቈስሉ፡ በሐፂን፡ ወደቂቅክሙኒ፡ ወአዋልዲክሙ፡ ወአንስቲያክሙ፡ ተፄወዉ፡ ውስተ፡ ብሔር፡ ዘኢኮነ፡ ዚአሆሙ፡ ወይእዜኒ፡ ሀለዉ፡ እስከ፡ ዛቲ፡ ዕለት።
9 ወይእዜሰ፡ ይኩን፡ ውስተ፡ ልብክሙ፡ ከመ፡ ትትካየዱ፡ ኪዳነ፡ እግዚአብሔር፡ አምላከ፡ እስራኤል፡ ወይሚጥ፡ መቅሠፍተ፡ መዓቱ፡ እምኔነ።
10 ወይእዜኒ፡ ኢትኅዝኑ፡ እስመ፡ ኪያክሙ፡ ኀረየ፡ እግዚአብሔር፡ ከመ፡ ትቁሙ፡ ቅድሜሁ፡ ወትትለአክዎ፡ ወከመ፡ ትኩንዎ፡ ላእካኒሁ፡ ወከመ፡ ትዕጥኑ፡ ዕጣነ፡ በቅድሜሁ።
11 ወተንሥኡ፡ ሌዋውያን፡ ለሜኤት፡ ወልደ፡ አሜሳዕ፡ ወኢዮሄል፡ ወልደ፡ አዛርያስ፡ እምደቂቀ፡ ቀዓት፡ ወእምደቂቀ፡ ሜራሪ፡ ቂሳ፡ ወልደ፡ አብዲ፡ አዛርያስ፡ ወልደ፡ ያሃሌልኤል፡ ወእምደቂቀ፡ ጌድሶን፡ ዮአት፡ ወልደ፡ ዘማት፡ ወኢዮአዳ፡ ወልደ፡ ኢዮአስ።
12 ወእምደቂቀ፡ ኤልሳፋን፡ ሣምሪ፡ ወኢዮሄል፡ ወእምደቂቀ፡ አሳፍ፡ ዘካርያስ፡ ወማታንያስ።
13 ወእምደቂቀ፡ ኤማን፡ ኢዮሄል፡ ወሴሚ፡ ወእምደቂቀ፡ ኤዱቱን፡ ሰማዕያ፡ ወኡዝሄል።
14 ወአስተጋብኡ፡ አኃዊሆሙ፡ ወቀደሱ፡ ርእሶሙበከመ፡ ትእዛዙ፡ ለንጉሥ፡ ወበትእዛዘ፡ እግዚአብሔር፡ ከመ፡ ያንጽሑ፡ ቤተ፡ እግዚአብሔር።
15 ወቦኡ፡ ካህናት፡ ውስተ፡ ቤተ፡ እግዚአብሔር፡ ከመ፡ ያንጽሑ፡ ወአውጽኡ፡ ኵሎ፡ ርኵሰ፡ ዘተረክበ፡ ውስተ፡ ቤተ፡ እግዚአብሔር፡ ወውስተ፡ ዓፀደ፡ ቤተ፡ እግዚአብሔር።
16 ወተመጠዉ፡ ሌዋውያን፡ ወአውጽኡ፡ አፍኣ፡ ርኵሰ፡ ዘተረክበ፡ ውስተ፡ ቤተ፡ እግዚአብሔር፡ ወውስተ፡ ፈለገ፡ ቄድርስ።
17 ወአኀዙ፡ በቀዳሚ፡ ዕለት፡ በዕለት፡ ሠርቅ፡ ዘቀዳሚ፡ ወርኅ፡ ከመ፡ ያንጽሑ፡ ወበሳምንት፡ ዕለት፡ ቦኡ፡ ውስተ፡ ቤተ፡ እግዚአብሔር፡ ወአንጽሑ፡ ቤተ፡ እግዚአብሔር፡ በሰሙን፡ ዕለት፡ ወበዓሠርቱ፡ ወስድስቱ፡ በቀዳሚ፡ ወርኅ፡ ፈጸሙ።
18 ወቦኡ፡ ውስጠ፡ ኀበ፡ ሕዝቅያስ፡ ንጉሥ፡ ወይቤልዎ፡ አንጻሕነ፡ ኵሎ፡ ዘውስተ፡ ቤተ፡ እግዚአብሔር፡ ወቤተ፡ ምሥዋዕኒ፡ ዘጽንሐሕ፡ ወንዋየ፡ ግብረ፡ ቤ፡ እግዚአብሔር፡ ወንዋየ፡ ምሥያም፡ ወኵሎ፡ ንዋየ፡ ግብር፡ ዘውስተ፡ ቤ፡ እግዚአብሔር።
19 ወኵሎ፡ ንዋየ፡ ዘአርኰሰ፡ አካዝ፡ ንጉሥ፡ በመንግሥቱ፡ በርኂቆቱ፡ እምእግዚአብሔር፡ ናሁ፡ አንጻሕነ፡ ወአስተዳሎነ፡ ወናሁ፡ ቅድመ፡ ምሥዋዕ፡ ዘቤተ፡ እግዚአብሔር።
20 ወጌሠ፡ ሕዝቅያስ፡ ንጉሥ፡ ወአስተጋብአ፡ ኵሎ፡ መኳንንተ፡ ቤ፡ እስራኤል፡ ወዓርገ፡ ውስተ፡ ቤተ፡ እግዚአብሔር።
21 ወአዕረገ፡ መሥዋዕተ፡ ላሕም፡ ጣዕዋ፡ ሰብዓተ፡ ወአባግዐ፡ አትቡዐ፡ ሰብዓተ፡ ወመሐስአ፡ አባግዕ፡ ሰብዓተ፡ ወመቋዕልተ፡ ጠሊ፡ ሰብዓተ፡ ወሐራጊተ፡ ጠሊ፡ ሰብዓተ፡ በእንተ፡ ኃጢአት።
22 ወበእንተ፡ ንግሠ፡ ዚአሁ፡ ወበእንተ፡ ቅድሳት፡ ወበእንተ፡ ሕዝበ፡ ዚአሁ፡ እስራኤል፡ ወይቤሎሙ፡ ለደቂቀ፡ አሮን፡ ካህናት፡ ዕርጉ፡ ውስተ፡ ቤ፡ ምሥዋዕ፡ ዘእግዚአብሔር።
23 ወአዕረጉ፡ ወሦዕዎሙ፡ ለእልክቱ፡ አልሕምት፡ ጣዕዋ፡ ወተወክፉ፡ ደሞሙ፡ ካህናት፡ ወነዝኁኌሽጸ፡ ቤተ፡ ምሥዋዕ፡ ወካዕበ፡ ሦዑ፡ እልክተ፡ ሰብዓተ፡ አባግዐ፡ አትቡዐ፡ ወነዝኁ፡ ደሞሙ፡ ውስተ፡ ምሥዋዕ፡ ወሦዑ፡ መሐስአ፡ አባግዕ፡ ወነዝኁ፡ ደሞሙ፡ ውስተ፡ ምሥዋዕ።
24 ወሦዑ፡ እልክተ፡ ሐራጊተ፡ ዘበእንተ፡ ኃጢአት፡ በቅድመ፡ ንጉሥ፡ ወበቅድመ፡ ኵሉ፡ ማኅበር፡ ወሤሙ፡ እደዊሆሙ፡ ካህናት፡ ላዕሌሆሙ።
25 ወጠብሑ፡ ወቊዓለ፡ ወተወክፉ፡ ደሞሙ፡ ወነዝኁ፡ ውስተ፡ ምሥዋዕ፡ ወአስተሥረዩ፡ በእንተ፡ ኵሉ፡ እስራኤል፡ እስመ፡ በእንተ፡ ኵሉ፡ እስራኤል፡ ይቤ፡ ንጉሥ፡ ትኩን፡ ዛቲ፡ መሥዋዕተ፡ ዘበእንተ፡ ኃጢአት።
26 ወአቀሞሙ፡ ለሌዋውያን፡ ውስተ፡ ቤተ፡ እግዚአብሔር፡ በጸናጽል፡ ወበከበሮ፡ ወበቀርን፡ በከመ፡ ትእዛዙ፡ ለዳዊት፡ ንጉሥ፡ ወጋድ፡ ምእመኑ፡ ለንጉሥ፡ ወናታን፡ ነቢይ፡ እስመ፡ በትእዛዘ፡ እግዚአብሔር፡ ሥርዓት፡ ሀሎ፡ ውስተ፡ እደዊሆሙ፡ ለነቢያት።
27 ወቆሙ፡ ሌዋውያን፡ በእንዚራተ፡ ዳዊት፡ ወካህናቲሆሙኒ፡ ይነፍሑ፡ በአቅርንት።
28 ወይቤ፡ ሕዝቅያስ፡ ንጉሥ፡ አዕርጉ፡ መሥዋዕተ፡ ዲበ፡ ጽንሐሕ፡ ወሶበ፡ አዕረጉ፡ መሥዋዕቶ፡ ቀደሙ፡ ዘምሮ፡ ለእግዚአብሔር፡ በአቅርንት፡ ምስለ፡ እንዚራ፡ ዳዊት፡ ንጉሠ፡ እስራኤል።
29 ወኵሉ፡ ማኅበር፡ ይሰግዱ፡ ወበመዝሙር፡ ይሴብሑ፡ ወበአቅርንት፡ ይነፍሑ፡ እስከ፡ ተፍጻሜተ፡ መሥዋዕት።
30 ወሶበ፡ ፈጸመ፡ አዕርጎ፡ መሥዋዕት፡ አስተብረከ፡ ንጉሥ፡ ወኵሎሙ፡ እለ፡ ሀለዉ፡ ምስሌሁ፡ ሰገዱ።
31 ወይቤ፡ ሕዝቅያስ፡ ንጉሥ፡ ለመኳንንት፡ ወለሌዋውያን፡ ከመ፡ ይሰብሕዎ፡ ለእግዚአብሔር፡ በስብሐተ፡ ዳዊት፡ ወአሳፍ፡ ነቢይ፡ ወሰብሕዎ፡ በኃሤት፡ ወአስተብሪኮሙ፡ ሰገዱ።
32 ወአውሥአ፡ ሕዝቅያስ፡ ንጉሥ፡ ወይቤ፡ ይእዜሰ፡ አርቲዐ፡ ክሙ፡ እደዊክሙ፡ ለእግዚአብሔር፡ አቅርቡ።
33 ወአምጽኡ፡ መሥዋዕተ፡ ወስብሐተ፡ ለቤተ፡ እግዚአብሔር፡ ወአዕረጉ፡ ማኅበር፡ መሥዋዕተ፡ ወስብሐተ፡ ለቤተ፡ እግዚአብሔር፡ ወኵሉ፡ ዘበንጹሕ፡ ልብ፡ ሦዑ።
34 ወኮነ፡ ኵሉ፡ ኍልቈ፡ መሥዋዕት፡ ዘአዕረጉ፡ ማኅበር፡ አልሕምት፡ ሰብዐ፡ ወሐራጊት፡ ምእተ፡ ወአባግዕ፡ ክልኤተ፡ ምእተ፡ ለመሥዋዕተ፡ እግዚአብሔር፡ ዝንቱ፡ ኵሉ፡ ዘአብኡ።
35 ወኍልቈ፡ አልሕምት፡ ጣዕዋ፡ እለ፡ ተቀደሱ፡ ስድስቱ፡ ምእት፡ ወአባግዕ፡ ሠላሳ፡ ምእት።
36 ወካህናትኒ፡ ኅዳጣን፡ ወኢይክሉ፡ አዕርጎ፡ መሥዋዕት፡ ወአጽንዕዎሙ፡ አኃዊሆሙ፡ ሌዋውያን፡ እስከ፡ ተፈጸመ፡ ኵሉ፡ ግብር፡ ወእስከ፡ ይነጽሑ፡ ካህናት፡ እስመ፡ ሌዋውያን፡ ነጽሑ፡ እምልብ፡ ፈድፋደ፡ እምካህናት።
37 ወበዝኀ፡ መሥዋዕት፡ ካዕበ፡ ወሞፃሕቶሙ፡ ወረትዐ፡ ግብር፡ በቤተ፡ እግዚአብሔር።
38 ወተፈሥሐ፡ ሕዝቅያስ፡ ወኵሉ፡ ሕዝብ፡ በእንተ፡ ዘአስተዳለወ፡ እግዚአብሔር፡ ለሕዝቡ፡ ወዘእንበለ፡ ትሕዝብት፡ ተገብረ፡ ዝንቱ፡ ግብር።
=== chapter 30 ===
[Chapter 30]
1 ወፈነወ፡ ሕዝቅያስ፡ ኀበ፡ ኵሉ፡ እስራኤል፡ ወይሁዳ፡ ወካዕበ፡ ጸሐፈ፡ መጻሕፍተ፡ ኀበ፡ ኤፍሬም፡ ወምናሴ፡ ከመ፡ ይምጽኡ፡ ውስተ፡ ቤተ፡ እግዚአብሔር፡ በኢየሩሳሌም፡ ወከመ፡ ይግበሩ፡ በዓለ፡ ፋሲካ፡ ለእግዚአብሔር፡ አምላከ፡ እስራኤል።
2 ወተማከሩ፡ ንጉሥ፡ ወመኳንንት፡ ወኵሉ፡ ማኅበር፡ እስራኤል፡ እለ፡ በኢየሩሳሌም፡ ከመ፡ ይግበሩ፡ በዓለ፡ ፋሲካ፡ በካልእ፡ ወርኅ።
3 እስመ፡ ኢክህሉ፡ ገቢሮታ፡ በውእቱ፡ መዋዕል፡ እስመ፡ ኢነጽሑ፡ ካህናት፡ ፈድፋደ፡ ወኵሉ፡ ሕዝብ፡ ኢተጋብኡ፡ በኢየሩሳሌም።
4 ወኮነ፡ አዳመ፡ ዝንቱ፡ ነገር፡ በቅድመ፡ አዕይንቲሁ፡ ለንጉሥ፡ ወበቅድመ፡ ማኅበር።
5 ወአቀመ፡ ነገረ፡ ከመ፡ ይትፈኖ፡ ትእዛዝ፡ ውስተ፡ ኵሉ፡ እስራኤል፡ እምብሔረ፡ ቤርሳቤህ፡ እስከ፡ ዳን፡ ከመ፡ ይምጽኡ፡ ይግበሩ፡ ፋሲካ፡ ለእግዚአብሔር፡ አምላከ፡ እስራኤል፡ በኢየሩሳሌም፡ እስመ፡ ብዙኀን፡ እለ፡ ኢገብሩ፡ በከመ፡ ጽሑፍ።
6 ወሖሩ፡ እንዘ፡ ይረውፁ፡ ወዘተጽሕፈ፡ እምእደ፡ ንጉሥ፡ ወመኳንንት፡ በኵሉ፡ እስራኤል፡ ወይሁዳ፡ በከመ፡ ትእዛዘ፡ ንጉሥ፡ ወይቤ፡ ደቂቀ፡ እስራኤል፡ ተመየጡ፡ ኀበ፡ እግዚአብሔር፡ አምላከ፡ አብርሃም፡ ወይስሐቅ፡ ወያዕቆብ፡ ወይመይጥ፡ እለ፡ ድኅኑ፡ ዘእምተረፈ፡ እዴሁ፡ ለንጉሥ፡ አሶር።
7 ወኢትኩኑ፡ ከመ፡ አበዊክሙ፡ ወአኃዊክሙ፡ እለ፡ ርኅቁ፡ እምእግዚአብሔር፡ አምላከ፡ አበዊሆሙ፡ ወመጠዉ፡ ርእሶሙ፡ ለሕርትምና፡ በከመ፡ አንትሙ፡ ትሬእዩ።
8 ወይእዜኒ፡ ኢታጽንዑ፡ ክሳውዲክሙ፡ በከመ፡ አበዊክሙ፡ ወሀቡ፡ ስብሐተ፡ ለእግዚአብሔር፡ አምላክክሙ፡ ወባኡ፡ በቅድሳቱ፡ ዘቀደሰ፡ እስከ፡ ለዓለም፡ ወተቀነዩ፡ ለእግዚአብሔር፡ አምላክክሙ፡ ወይመይጥ፡ እምኔክሙ፡ መቅሠፍተ፡ መዓቱ።
9 እስመ፡ በተመይጦትክሙ፡ ኀበ፡ እግዚአብሔር፡ አኃዊክሙ፡ ወውሉድክሙኒ፡ ይከውኑ፡ ለምሕረት፡ በቅድመ፡ ኵሎሙ፡ እለ፡ ፄወውዎሙ፡ ወያገብኦሙ፡ ውስተ፡ ዛቲ፡ ምድር፡ እስመ፡ መሐሪ፡ ወመስተሣህለ፡ እግዚአብሔር፡ አምላክነ፡ ወኢይመይጥ፡ ገጾ፡ እምኔነ፡ ለእመ፡ ገባእነ፡ ኀቤሁ።
10 ወእለ፡ ተፈነዉ፡ በትእዛዘ፡ እግዚአብሔር፡ ወንጉሥ፡ እደው፡ እምሀገር፡ ለሀገር፡ በደብረ፡ ኤፍሬም፡ ወምናሴ፡ እስከ፡ ዛብሎን፡ ወኮኑ፡ ይስሕቁ፡ ላዕሌሆሙ፡ በአስትቶ።
11 ወእንዘ፡ የሰብኩ፡ ትእዛዛቲሁ፡ በአስሕቶ፡ ለእሉ፡ እደወ፡ አሴር፡ ወምናሴ፡ ወእምዛብሎን፡ ተደለዉ፡ ወመጽኡ፡ ውስተ፡ ኢየሩሳሌም፡ ወይሁዳኒ።
12 ወኮነት፡ እዴሁ፡ ለእግዚአብሔር፡ ላዕሌሆሙ፡ ከመ፡ የሀቦሙ፡ ልበ፡ አሐደ፡ ይምጽኡ፡ ወይግበሩ፡ ትእዛዘ፡ ንጉሥ፡ ወመኳንንትኒ፡ በቃለ፡ እግዚአብሔር።
13 ወተጋብኡ፡ ውስተ፡ ኢየሩሳሌም፡ ብዙኀን፡ አሕዛብ፡ ከመ፡ ይግበሩ፡ በዓለ፡ ፋሲካ፡ በካልእ፡ ወርኅ።
14 ወማኅበር፡ ብዙኅ፡ ተንሥኡ፡ ወአመዝበሩ፡ መሥዋዕተ፡ እለ፡ በኢየሩሳሌም፡ ወኵሎ፡ ዘየዓጥኑ፡ ለአማልክተ፡ ወአውረድዎ፡ ወገደፍዎ፡ ውስተ፡ ፈለገ፡ ቄድሮስ።
15 ወሦዑ፡ ለበዓለ፡ ፋሲካ፡ በዓሥሩ፡ ወረቡዑ፡ ለካልእ፡ ወርኅ፡ ወካህናትኒ፡ ወሌዋውያን፡ ተደለዉ፡ ወነጽሑ፡ ወአብኡ፡ መሥዋዕተ፡ በቤተ፡ እግዚአብሔር።
16 ወአቀምዎ፡ በሥርዓት፡ በከመ፡ ፍትሖሙ፡ ወበከመ፡ ትእዛዙ፡ ለሙሴ፡ ቊልዔሁ፡ ለእግዚአብሔር፡ ወካህናትኒ፡ ይትዌከፉ፡ ደመ፡ እምእዴሆሙ፡ ለሌዋውያን።
17 እስመ፡ ብዙኃን፡ እማኅበር፡ እለ፡ ኢነጽሑ፡ እሙንቱ፡ ሌዋውያን፡ ይሠውዑ፡ ለበዓለ፡ ፋሲካ፡ ኵሎሙ፡ እለ፡ ኢክህሉ፡ ነጺሐ፡ ለእግዚአብሔር።
18 እስመ፡ መብዝኅቶሙ፡ ለሕዝብ፡ ዘእምኤፍሬም፡ ወምናሴ፡ ወይሳኮር፡ ወዛብሎን፡ ኢነጽሑ፡ ወበልዑ፡ በዓለ፡ ፋሲካ፡ ዘእንበለ፡ ትእዛዘ፡ እግዚአብሔር።
19 ወጸለየ፡ ሕዝቅያስ፡ በእንቲአሆሙ፡ እንዘ፡ ይብል፡ እግዚኦ፡ ሥረይ፡ በእንተ፡ ኵሉ፡ ልብ፡ ዘኢያርትዐ፡ ኃሢሦቶ፡ ለእግዚአብሔር፡ አምላከ፡ አበዊሆሙ፡ ወአኮሰ፡ በከመ፡ ንጽሐ፡ ቅዱሳን።
20 ወሰምዖ፡ እግዚአብሔር፡ ለሕዝቅያስ፡ ወአሕየዎሙ፡ ለሕዝብ።
21 ወገብሩ፡ ደቂቀ፡ እስራኤል፡ እለ፡ ሀለዉ፡ በኢየሩሳሌም፡ በዓለ፡ ናእት፡ ሰቡዐ፡ ዕለተ፡ በፍሥሓ፡ ዓቢይ፡ እንዘ፡ ይሴብሕዎ፡ ለእግዚአብሔር፡ በኵሉ፡ ዕለት፡ ወካህናትኒ፡ ወሌዋውያን፡ በእንዚራት፡ ይሴብሕዎ፡ ለእግዚአብሔር።
22 ወተናገረ፡ ሕዝቅያስ፡ ውስተ፡ ኵሉ፡ ልቦሙ፡ ለሌዋውያን፡ ወእለ፡ ሠናየ፡ ይሌብውዎ፡ ለእግዚአብሔር፡ ወፈጸሙ፡ በዓለ፡ መጸለት፡ ሰቡዐ፡ ዕለት፡ እንዘ፡ ይሠውዑ፡ መሥዋዕተ፡ ለሕይወት፡ ወእንዘ፡ ይገንዩ፡ ለእግዚአብሔር፡ አምላከ፡ አበዊሆሙ።
23 ወተማከሩ፡ ኵሉ፡ ማኅበር፡ ይግበሩ፡ እምድኅሬሁ፡ በዓለ፡ ሳብዕተ፡ ዕለት፡ ወገብሩ፡ ዓዲ፡ በዓለ፡ ሰቡዐ፡ ዕለተ፡ በፍሥሓ።
24 እስመ፡ ሕዝቅያስ፡ እብእ፡ ለይሁዳ፡ ወለማኅበር፡ አልሕምተ፡ ዓሠርተ፡ ምእተ፡ ወአባግዐ፡ ሰብዐ፡ ምእተ፡ ወመኳንንት፡ አብኡ፡ ለሕዝብ፡ አልሕምተ፡ ዐሠርተ፡ ምእተ፡ ወአባግዐ፡ አሐደ፡ እልፈ፡ ወቅድሳተ፡ ካህናት፡ ብዙኅ፡ ወተቀደሱ፡ ካህናት፡ ብዙኀን።
25 ወተፈሥሑ፡ ኵሉ፡ ማኅበር፡ ካህናትኒ፡ ወሌዋውያንኒ፡ ወኵሉ፡ ማኅበር፡ ዘመጽኡ፡ እምእስራኤል፡ ወፈላስያን፡ እለ፡ መጽኡ፡ እምድረ፡ እስራኤል፡ ወእለ፡ የኃድሩ፡ በይሁዳ።
26 ወኮነ፡ ዓቢይ፡ ኃሤት፡ በኢየሩሳሌም፡ ወእመዋዕሊሁ፡ ለሰሎሞን፡ ንጉሥ፡ ወልደ፡ ዳዊት፡ ንጉሠ፡ እስራኤል፡ ኢተገብረ፡ ዘከመዝ፡ በዓል፡ በኢየሩሳሌም፡ ውስተ፡ እስራኤል።
27 ወተንሥኡ፡ ሌዋውያን፡ ወካህናት፡ ወባረክዎሙ፡ ለሕዝብ፡ ወተሰምዐ፡ ቃሎሙ፡ ወበጽሐ፡ ጸሎቶሙ፡ ውስተ፡ ማኅደሩ፡ ቅዱስ፡ ዘበሰማያት።
=== chapter 31 ===
[Chapter 31]
1 ወእምድኅረ፡ ተገብረ፡ ዝንቱ፡ ኵሉ፡ ወፅኡ፡ እስራኤል፡ እለ፡ ሀለዉ፡ ውስተ፡ ሀገረ፡ ይሁዳ፡ ወቀጥቀጡ፡ ኵሎ፡ አምሳለ፡ ወገዘሙ፡ ኵሎ፡ ዕፀወ፡ ገዳም፡ ወአውረዱ፡ ኵሎ፡ ልዑለ፡ ምሥዋዐ፡ እምኵሉ፡ ይሁዳ፡ ወብንያም፡ ወኤፍሬም፡ ወምናሴ፡ እስከ፡ ለዓለም፡ ወተመይጡ፡ ኵሉ፡ እስራኤል፡ አሐዱ፡ አሐዱ፡ በበርስቱ፡ ወበበአህጉሪሁ።
2 ወሠርዐ፡ ሕዝቅያስ፡ ካህናተ፡ ወሌዋውያነ፡ ዘበበዕለቱ፡ ለለአሐዱ፡ በከመ፡ ዕለተ፡ መልእክቱ፡ ዘይትለአክ፡ ለካህናት፡ ወለሌዋውያን፡ ለመሥዋዕት፡ ወለጽንሐሐ፡ መድኃኒት፡ ወከመ፡ ይሰብሑ፡ ወይግነዩ፡ ወይትለአኩ፡ በአናቅጸ፡ ዓፀደ፡ ቤተ፡ እግዚአብሔር።
3 ወሠርዐ፡ ንጉሥ፡ እምኵሉ፡ ጥሪቱ፡ ለመሥዋዕት፡ ዘይትገበር፡ በነግህ፡ ወበሠርክ፡ ወመሥዋዕተ፡ ዘይትገበር፡ በሰናብት፡ ወበሠርቀ፡ ወርኅ፡ ወበበዓላት፡ ዘጽሑፍ፡ ውስተ፡ ሕገ፡ እግዚአብሔር።
4 ወይቤሎሙ፡ ለሕዝብ፡ እለ፡ ይነብሩ፡ ኢየሩሳሌም፡ ከመ፡ የሀቡ፡ ዐሥራተ፡ ለካህናት፡ ወለሌዋውያን፡ ከመ፡ ይጽንዑ፡ በመልእክተ፡ ቤተ፡ እግዚአብሔር።
5 ወበከመ፡ ሠርዐ፡ ዘንተ፡ ሥርዓተ፡ አብዝኁ፡ ደቂቀ፡ እስራኤል፡ ወሂበ፡ ዐሥራት፡ ዘሥርናይ፡ ወዘይተ፡ ወወይነ፡ ወመዓረ፡ ወኵሎ፡ ፍሬ፡ ምድር፡ ወዓሥራተ፡ እምኵሉ፡ ያመጽኡ፡ ብዙኀ፡ ደቂቀ፡ እስራኤል፡ ወይሁዳ፡ እለ፡ ይነብሩ፡ ውስተ፡ አህጉረ፡ ይሁዳ።
6 ወካዕበ፡ አምጽኡ፡ ዐሥራተ፡ አልሕምት፡ ወአባግዕ፡ ወአጣሊ፡ ወቀደሱ፡ ለእግዚአብሔር፡ አምላኮሙ፡ ወአብኡ፡ ወገብሩ፡ ፊላቃተ።
7 ወበሣልስ፡ ወርኅ፡ አኃዙ፡ ይሣርርዎ፡ ለፊላቃት፡ ወበሳብዕ፡ ወርኅ፡ ተፈጸመ።
8 ወመጽአ፡ ሕዝቅያስ፡ ወመኳንንት፡ ወርእዩ፡ ፊላቃተ፡ ወባረክዎ፡ ለእግዚአብሔር፡ ወለሕዝቡ፡ እስራኤል።
9 ወተስእሎሙ፡ ሕዝቅያስ፡ ለካህናት፡ ወለሌዋውያን፡ በእንተ፡ ፊላቃት።
10 ወይቤሎሙ፡ አዛርያስ፡ ካህን፡ መኰንነ፡ ቤተ፡ ሳዶቅ፡ እም፡ አመ፡ አኃዙ፡ ያምጽኡ፡ መባአ፡ ወዓሥራተ፡ ውስተ፡ ቤተ፡ እግዚአብሔር፡ በላዕነ፡ ወተሰይነ፡ ወጸገብነ፡ ወአትረፍነ፡ እስመ፡ እግዚአብሔር፡ ባረከ፡ ሕዝበ፡ ወአትረፍነ፡ ዓዲ፡ ፈድፋደ፡ እም፡ ዝንቱ።
11 ወይቤ፡ ሕዝቅያስ፡ ከመ፡ ይድግሙ፡ ወያስተዳልዉ፡ ቤተ፡ ወመንጠዋልዐ፡ ለቤተ፡ እግዚአብሔር፡ ወአስተዳለዉ።
12 ወአብኡ፡ በህየ፡ መባአ፡ ወዐሥራተ፡ ዘበአማን፡ ወበላዕሌሆሙ፡ ተሠይመ፡ ሊቀ፡ ኮክንያስ፡ ሌዋዊ፡ ወሰሜኢኒ፡ እኁሁ።
13 ወኢዮሄል፡ ወአዚዛስ፡ ወአናኤት፡ ወኡሳሄል፡ ወኢያሪሞት፡ ወኢዮዛብድ፡ ወኤልሄል፡ ወሰማኪያ፡ ወሚዓት፡ ወብንያስ፡ ወደቂቁኒ፡ ይቀውሙ፡ በእደ፡ ኮክንያስ፡ ወሰሜኢ፡ እኁሁ፡ በከመ፡ አዘዞ፡ ሕዝቅያስ፡ ንጉሥ፡ ወአዛርያስኒ፡ መጋቤ፡ ቤተ፡ እግዚአብሔር።
14 ወቆሬ፡ ወልደ፡ ይምላእ፡ ሌዋዊ፡ ዓቃቤ፡ አንቀጽ፡ ዘመንገለ፡ ጽባሕ፡ መልዕልተ፡ አንሕስት፡ ከመ፡ የሀብ፡ መባአተ፡ ለቤተ፡ እግዚአብሔር፡ ወቅድሳተ፡ ቅዱሳን።
15 ወቅድስተ፡ ቅዱሳንሰ፡ በእዴሁ፡ ለኢም፡ ወብንያስ፡ ወኢያሱ፡ ወሴሚ፡ ወአማርያስ፡ ወኮክንያስ፡ ወበአህጉሪሆሙ፡ ለካህናት፡ ዘበአማን፡ ከመ፡ የሀቡ፡ በአኃ፡ በአኃዊሆሙ፡ በበዕብሬቶሙ፡ ለዓቢይኒ፡ ወለንኡስኒ።
16 ዘእንበለ፡ እለ፡ ተኈለቁ፡ እደው፡ እምውሉደ፡ ሠለስቱ፡ ዓመት፡ ወላዕሉ፡ ወበኵሉ፡ ዘይበውእ፡ ውስተ፡ ቤተ፡ እግዚአብሔር፡ ዘበበዕለት፡ ዕለት፡ በመልእክተ፡ ዕብሬቱ፡ ትእዛዛ፡ ዚአሆሙ።
17 ወዝንቱ፡ ውእቱ፡ ክፍለቶሙ፡ ለካህናት፡ በበቤተ፡ አበዊሆሙ፡ ወሌዋውያንሰ፡ በዕብሬተ፡ ዚአሆሙ፡ እምዕሥራ፡ ዓም፡ ወላዕሉ፡ በትእዛዘ፡ ክፍላተ፡ ዚአሆሙ።
18 ወበኵሉ፡ ትውልደ፡ ደቂቆሙ፡ ወአዋልዲሆሙ፡ በኵሉ፡ ብዝኆሙ፡ እስመ፡ በአሚን፡ ተቀደሱ፡ ቅዱሳተ።
19 ወደቂቀ፡ አሮን፡ እለ፡ ሎሙ፡ ኮነ፡ ክህነት፡ ወለእለኒ፡ እም፡ አህጉረ፡ ዚአሆሙ፡ ወበኵሉ፡ አህጉር፡ ወሀገር፡ ወእደው፡ እለ፡ ተሰምዩ፡ ከመ፡ የሀቡ፡ ክፍለ፡ ለኵሎሙ፡ ተባዕት፡ ለካህናትኒ፡ ወለኵሎሙ፡ እለ፡ ተኈለቁ፡ በሌዋውያን።
20 ወገብረ፡ ሕዝቅያስ፡ ከመዝ፡ በኵሉ፡ ይሁዳ፡ ወገብረ፡ ሠናያተ፡ ወሖረ፡ በፍኖት፡ ርትዕት፡ በቅድመ፡ እግዚአብሔር፡ አምላኩ።
21 ወበኵሉ፡ ግብር፡ ዘአኃዘ፡ ይግበር፡ በቤተ፡ እግዚአብሔር፡ ወበሕገ፡ እግዚአብሔር፡ ወበትእዛዛቲሁ፡ ወኃሠሦ፡ ለእግዚአብሔር፡ አምላኩ፡ በኵሉ፡ ልቡ፡ ወበኵሉ፡ ዘገብረ፡ ተሠርኀ፡ ሎቱ።
=== chapter 32 ===
[Chapter 32]
1 ወእምድኅረ፡ እላንቱ፡ ቃላት፡ ወእምዝንቱ፡ ጽድቅ፡ ዘገብረ፡ መጽኦ፡ ሰናክሬም፡ ንጉሠ፡ አሶራውያን፡ ወበጽሐ፡ ላዕለ፡ ይሁዳ፡ ወተዓየነ፡ ላዕለ፡ ሀገረ፡ ጸወናት፡ ወሐለየ፡ ወይቤ፡ ከመ፡ ያውፅኦሙ።
2 ወርእየ፡ ሕዝቅያስ፡ ከመ፡ በጽሐ፡ ሰናክሬም፡ ወገጾኒ፡ ሜጠ፡ ይጽብኣ፡ ለኢየሩሳሌም።
3 ተማከረ፡ ሕዝቅያስ፡ ምስለ፡ ሊቃናተ፡ ሕዝቡ፡ ወምስለ፡ ፅኑዓን፡ ከመ፡ ይፈፅም፡ አንቅዕተ፡ ማያተ፡ ዘሀሎ፡ አፍኣ፡ እምሀገር፡ ወሠምሩ፡ ምክረ፡ ዚአሁ።
4 ወአስተጋብአ፡ ሕዝበ፡ ብዙኀነ፡ ወፈፀመ፡ አንቅዕተ፡ ማያት፡ ወተከዜኒ፡ ወሙኃዘ፡ ማይ፡ ዘይውኅዝ፡ በማእከለ፡ ሀገር፡ ወይቤ፡ ሕዝቅያስ፡ ንጉሥ፡ አመ፡ መጽአ፡ ንጉሠ፡ አሶራውያን፡ ወረኪቦ፡ ብዙኀ፡ ማየ፡ የጸንዕ።
5 ወፀንዐ፡ ሕዝቅያስ፡ ወአሕነጸ፡ ኵሎ፡ አረፋተ፡ ንኁላተ፡ ወማኅፈደ፡ ወእምአፍኣኒ፡ ካልአ፡ አረፍተ፡ ቅፅር፡ ወአፅንዐ፡ ምዕራገ፡ ህገረ፡ ዳዊት፡ ወአስተዳለወ፡ ንዋየ፡ ሐቅል፡ ብዙኀ።
6 ወሤመ፡ መላእክተ፡ ፀብዕ፡ ላዕለ፡ ሕዝብ፡ ወተጋብኡ፡ ኀቤሁ፡ ኀበ፡ መርኅበ፡ አንቀጸ፡ ሀገር፡ እንተ፡ ፈለግ፡ ወተናገሮሙ፡ ወአትብዐ፡ አልባቢሆሙ፡ እንዘ፡ ይብል።
7 ፅንዑ፡ ወተኃየሉ፡ ወኢትደንግፁ፡ እምገጸ፡ ንጉሠ፡ አሶራውያን፡ ወእምገጸ፡ ብዙኀን፡ አሕዛብ፡ ዘምስሌሁ፡ እስመ፡ ዘምስሌነ፡ ይበዝኅ፡ እምኔሆሙ።
8 ምስሌሁሰ፡ መዛርዕ፡ እለ፡ ሥጋ፡ ወምስሌነሰ፡ እግዚአብሔር፡ አምላክነ፡ ከመ፡ ያድኅነነ፡ ወይትቃተል፡ ለነ፡ ውእቱ፡ ቀትለ፡ ዚአነ፡ ወጠብዑ፡ ሕዝብ፡ በቃለ፡ ሕዝቅያስ፡ ንጉሠ፡ ይሁዳ።
9 ወእምድኅረ፡ ዝንቱ፡ ፈነወ፡ ሰናክሬም፡ ንጉሠ፡ አሶራውያን፡ አግብርቲሁ፡ ላዕለ፡ ኢየሩሳሌም፡ ወውእቱሰ፡ ነበረ፡ ወኵሉ፡ ሠራዊተ፡ ዚአሁ፡ ላዕለ፡ ሀገረ፡ ለኪስ፡ ወፈነወ፡ ኀበ፡ ሕዝቅያስ፡ ንጉሠ፡ ይሁዳ፡ ወኀበ፡ ኵሉ፡ ሕዝበ፡ ይሁዳ፡ እለ፡ ሀለዉ፡ ኢየሩሳሌም፡ እንዘ፡ ይብል፡ ከመዝ።
10 ወይቤ፡ ሰናክሬም፡ ንጉሠ፡ አሶራውያን፡ ላዕለ፡ መኑ፡ ተወኪለክሙ፡ ነበርክሙ፡ ላዕለ፡ አጽዋኒሃ፡ ለኢየሩሳሌም።
11 አኮኑ፡ ሕዝቅያስ፡ ያስሕተክሙ፡ ከመ፡ ይመጡክሙ፡ ለመዊት፡ ወለረኃብ፡ ወለጽምእ፡ እንዘ፡ ይብል፡ እግዚአብሔር፡ አምላክክሙ፡ ይክል፡ አድኅኖተክሙ፡ እምእዴሁ፡ ለሰናክሬም፡ ንጉሠ፡ አሶራውያን።
12 አኮኑ፡ ዝንቱ፡ ውእቱ፡ ሕዝቅያስ፡ ዘነሠተ፡ ምሥዋዒሁ፡ ወአውጋሪሁ፡ ወይብል፡ ለሕዝበ፡ ይሁዳ፡ ወለእለኒ፡ ይነብሩ፡ ኢየሩሳሌም፡ እንዘ፡ ይብል፡ አንፃረ፡ ዝንቱ፡ ታቦተ፡ እግዚአብሔር፡ ከመ፡ ይስግዱ፡ ወላዕሌሁ፡ ይዕጥኑ።
13 ኢያእመርክሙኑ፡ ዘአነ፡ ገበርኩ፡ ወዘገብሩ፡ አበውየ፡ በኵሉ፡ አሕዛበ፡ ምድር፡ ወበሐውርት፡ ዘአኮ፡ በክሂል፡ ክህሉ፡ አማልክተ፡ አሕዛቢሃ፡ ለኵላ፡ ምድር፡ ከመ፡ ያድኅኑ፡ ሕዝቢሆሙ፡ እምእዴየ።
14 መኑ፡ እምኵሉ፡ አማልክተ፡ አሕዛብ፡ እለ፡ ሠረዉ፡ አበውየ፡ ዘክህሉ፡ አድኅኖ፡ ሕዘቢሆሙ፡ እምእዴየ፡ ከመ፡ ይክሀል፡ አምላክክሙ፡ አድኅኖተክሙ፡ እምእዴየ።
15 ወይእዜኒ፡ ኢያስሕትክሙ፡ ሕዝቅያስ፡ ወውኩላነ፡ ኢይረሲክሙ፡ በእላንቱ፡ ቃላት፡ ወኢትእመንዎ፡ እስመ፡ ኢይክል፡ እምውስተ፡ ኵሉ፡ አሕዛብ፡ ወነገሥት፡ ከመ፡ ያድኅን፡ ሕዝበ፡ ዚአሁ፡ እምእዴየ፡ ወእምእደዊሆሙ፡ ለአበውየ፡ እስመ፡ አምላክክሙ፡ ኢያድኅነክሙ፡ እምእዴየ።
16 ወተናገሩ፡ ካዕበ፡ አግብርቲሁ፡ ለንጉሠ፡ አሶራውያን፡ ላዕለ፡ እግዚአብሔር፡ አምላክ፡ ወላዕለ፡ ሕዝቅያስ፡ ቊልዔሁ።
17 ወጸሐፈ፡ መጽሐፈ፡ እንዘ፡ ይትኤየሮ፡ ለእግዚአብሔር፡ አምላከ፡ እስራኤል፡ እንዘ፡ ይብል፡ በእንቲአሁ፡ ከመዝ፡ በከመ፡ አማልክተ፡ ምድር፡ ኢያድኀኑ፡ ሕዘቢሆሙ፡ እምእዴየ፡ ከማሁ፡ ኢያድኅን፡ አምላከ፡ ሕዝቅያስ፡ ሕዝበ፡ ዚአሁ፡ እምእዴየ።
18 ወጸርሐ፡ በዓቢይ፡ ቃል፡ በነገረ፡ ዕብራይስጥ፡ ላዕለ፡ ሕዝበ፡ ኢየሩሳሌም፡ እለ፡ ሀለዉ፡ ዲበ፡ አረፍት፡ ከመ፡ ያፍርሆሙ፡ ወያደንግዖሙ፡ ወከመ፡ ይንሥትዋ፡ ወይሩድዋ፡ ለኢየሩሳሌም፡ ሀገር።
19 ወተናገረ፡ ላዕለ፡ አምላከ፡ ኢየሩሳሌም፡ በከመ፡ ላዕለ፡ አማልክተ፡ አሕዛበ፡ ምድር፡ እለ፡ ኮኑ፡ ግብረ፡ እደ፡ እጓለ፡ እመ፡ ሕያው።
20 ወጸለዩ፡ ሕዝቅያስ፡ ንጉሥ፡ ወኢሳይያስ፡ ወልደ፡ አሞጽ፡ ነቢይ፡ በእንተ፡ ዝንቱ፡ ትዕይርት፡ ወጸርሑ፡ ውስተ፡ ሰማይ።
21 ወፈነወ፡ እግዚአብሔር፡ መልአኮ፡ ወሠረወ፡ ኵሎ፡ ብእሴ፡ ጽኑዐ፡ ወመስተቃትለ፡ ወኵሎ፡ መላእክተ፡ ወመሳፍንተ፡ በትዕይንቱ፡ ለንጉሠ፡ አሶራውያን፡ ወተመይጠ፡ ወገብአ፡ ተኃፊሮ፡ ብሔሮ፡ ወበጽሐ፡ ቤተ፡ አምላኩ፡ ወውሉዱ፡ እለ፡ ወፅኡ፡ እምሐቌሁ፡ አውደቅዎ፡ በሰይፍ።
22 ወአድኃኖ፡ እግዚአብሔር፡ ለሕዝቅያስ፡ ወለኵሎሙ፡ እለ፡ ይነብሩ፡ ኢየሩሳሌም፡ እምእዴሁ፡ ለሰናክሬም፡ ንጉሠ፡ አሶራውያን፡ ወእምእዴሆሙ፡ ለኵሎሙ፡ አሕዛበ፡ ምድር፡ ወአፅረፎሙ፡ እምዓውዶሙ።
23 ወብዙኃን፡ አምጽኡ፡ መባኣ፡ ለእግዚአብሔር፡ በኢየሩሳሌም፡ ወብዙኀ፡ እምኀ፡ ለሕዝቅያስ፡ ንጉሠ፡ ይሁዳ፡ ወተለዓለ፡ ወከብረ፡ በቅድመ፡ አዕይንተ፡ ኵሎሙ፡ አሕዛበ፡ ምድር።
24 ወእምድኅረ፡ እማንቱ፡ መዋዕል፡ ሐመ፡ ሕዝቅያስ፡ እስከ፡ በጽሐ፡ ለመዊት፡ ወጸለየ፡ ኀበ፡ እግዚአብሔር፡ ወሰምዖ፡ ወት፡ እምርተኒ፡ ወሀቦ።
25 ወአኮ፡ ዘከመ፡ ገብረ፡ ሎቱ፡ እግዚአብሔር፡ ዘዓሠዮ፡ ለእግዚአብሔር፡ ሕዝቅያስ፡ ንጉሠ፡ ይሁዳ፡ አላ፡ ተዓበየ፡ በልቡ፡ ወመጽአ፡ ላዕሌሁ፡ መቅሠፍት፡ ወላዕለ፡ ኵሉ፡ ይሁዳ፡ ወኢየሩሳሌም።
26 ወኀሥረ፡ ሕዝቅያስ፡ በትዕቢተ፡ ልቡ፡ ወእለኒ፡ ይነብሩ፡ ኢየሩሳሌም፡ ምስሌሁ፡ ወኢያምጽአ፡ እግዚአብሔር፡ ላዕሌሆሙ፡ መቅሠፍተ፡ በመዋዕሊሁ፡ ለሕዝቅያስ።
27 ወኮኖ፡ ለሕዝቅያስ፡ ብዕል፡ ወክብር፡ ብዙኅ፡ ፈድፋደ፡ ወረሰየ፡ ሎቱ፡ መዛግብተ፡ ወርቅ፡ ወብሩር፡ ወመዛግብተ፡ ዕንቊ፡ ክቡር፡ ወብዝኀ፡ አፈው፡ ወምንባራተ፡ ንዋያት፡ ዘበሐቅል፡ ወንዋያተ፡ ዘመፍትው።
28 ወአህጉረ፡ ለእክል፡ ወለዘይት፡ ወለወይን፡ ወለቅብዕ፡ ወአዕፃዳተ፡ ወአግዋላተ፡ ለኵሉ፡ እንስሳሁ፡ ወበዓታተ፡ ለመራዕይሁ።
29 ወአህጉረ፡ እለ፡ ሐነፁ፡ ሎቱ፡ ወለጥሪተ፡ ላሕም፡ ወአባግዕ፡ ብዙኅ፡ እስመ፡ ወሀቦ፡ እግዚአብሔር፡ ጥሪተ፡ ብዙኀ፡ ፈድፋደ።
30 ወውእቱ፡ ሕዝቅያስ፡ ዓፀወ፡ ሙኀዘ፡ ማይ፡ ዘይወጽእ፡ ላዕለ፡ ወአርትዖሙ፡ መንገለ፡ ዓረብ፡ ዘሀገረ፡ ዳዊት፡ ወአርትዐ፡ ሕዝቅያስ፡ በኵሉ፡ ዘገብረ።
31 ወከማሁ፡ ሊቃናተ፡ መላእክት፡ እምብሔረ፡ ባቢሎን፡ ተፈነዉ፡ ኀቤሁ፡ ከመ፡ ያእምሩ፡ ወይጠይቁ፡ እምኔሁ፡ ትእምርተ፡ እንተ፡ ኮነት፡ ዲበ፡ ምድር፡ ወኀደጎ፡ እግዚአብሔር፡ ከመ፡ ያመክሮ፡ ወይርአይ፡ ዘውስተ፡ ልቡ።
32 ወእለ፡ ተርፉ፡ ቃላተ፡ ሕዝቅያስ፡ ወጽድቁ፡ ናሁ፡ ጽሑፋት፡ በመጽሐፈ፡ ኢሳይያስ፡ ነቢይ፡ ወልደ፡ አሞጽ፡ ወበመጽሐፈ፡ ነገሥት፡ እስራኤል፡ ወይሁዳ።
33 ወኖመ፡ ሕዝቅያስ፡ ምስለ፡ አበዊሁ፡ ወቀበርዎ፡ ውስተ፡ መቃብረ፡ ደቂቀ፡ ዳዊት፡ በክብር፡ ወበስብሐት፡ ወቀበርዎ፡ ኵሉ፡ ሰብአ፡ ይሁዳ፡ ወእለኒ፡ ይነብሩ፡ ኢየሩሳሌም።
=== chapter 33 ===
[Chapter 33]
1 ወነግሠ፡ ምናሴ፡ ወልዱ፡ እምድኅሬሁ፡ ከዊኖ፡ ወልደ፡ ዓሠርቱ፡ ወክልቱ፡ ዓመት፡ አመ፡ ያነግሥዎ፡ ወኃምሳ፡ ወኃምስተ፡ ዓመት፡ ነግሠ፡ በኢየሩሳሌም።
2 ወገብረ፡ እኪተ፡ በቅድመ፡ እግዚአብሔር፡ በኵሉ፡ ርኵሶሙ፡ ለአሕዛብ፡ እለ፡ ሠረዎሙ፡ እግዚአብሔር፡ እምቅድመ፡ ገጾሙ፡ ለደቂቀ፡ እስራኤል።
3 ወተመይጠ፡ ወሐነፀ፡ አህጉረ፡ ዘነሠተ፡ ሕዝቅያስ፡ አቡሁ፡ ወአቀመ፡ አምሳለ፡ ለበዓሊም፡ ወገብረ፡ አእዋመ፡ ወሰገደ፡ ለኵሉ፡ ኃይለ፡ ሰማይ፡ ወተቀንየ፡ ሎሙ።
4 ወአሕነፀ፡ ምሥዋዐ፡ ጣዖት፡ በቤተ፡ እግዚአብሔር፡ በኀበ፡ ይቤ፡ እግዚአብሔር፡ በኢየሩሳሌም፡ ይኩን፡ ስምየ፡ ለዓለም።
5 ወአሕነፀ፡ ምሥዋዐ፡ ለኵሉ፡ ኃይለ፡ ሰማይ፡ በክልኤሆ፡ አዕፃዳተ፡ ቤተ፡ እግዚአብሔር።
6 ወውእቱኒ፡ አውዓየ፡ ደቂቆ፡ ለጣዖት፡ በምድረ፡ ሐኖ፡ ወይ፡ ገብር፡ ግብረ፡ ሥራይ፡ ወዘማርያት፡ ያጣዕዉ፡ በከርሥ፡ ወገብረ፡ መስተቃስማነ፡ ወአብዝኀ፡ ገቢረ፡ እኪተ፡ በቅድመ፡ እግዚአብሔር፡ ከመ፡ ያምዕዖ።
7 ወአንበረ፡ ምስለ፡ ዘግልፎ፡ ወስብኮ፡ በቤተ፡ እግዚአብሔር፡ በኀበ፡ ይቤሎሙ፡ እግዚአብሔር፡ ለዳዊት፡ ወለሰሎሞን፡ ወልዱ፡ በዝንቱ፡ ቤት፡ ወበኢየሩሳሌም፡ ዘኃረይኩ፡ እምኵሉ፡ ነገደ፡ እስራኤል፡ እሢም፡ ስምየ፡ ውስቴቱ፡ ለዓለም።
8 ወኢይደግም፡ እንከ፡ አሰስሎተ፡ እግረ፡ እስራኤል፡ እምዛቲ፡ ምድር፡ እንተ፡ ወሀብክዎሙ፡ ለአበዊሆሙ፡ ወባሕቱ፡ እመሰ፡ አቀቡ፡ ወገብሩ፡ ኵሎ፡ ዘአዘዝክዎሙ፡ በከመ፡ ጽሑፍ፡ በውስተ፡ ሕግየ፡ ወትእዛዝየ፡ ወኵነኔ፡ ዚአየ፡ በእዴሁ፡ ለሙሴ።
9 ወአስሐቶሙ፡ ምናሴ፡ ለሕዝበ፡ ይሁዳ፡ ወለኵሎሙ፡ እለ፡ ይነብሩ፡ ኢየሩሳሌም፡ ከመ፡ ይግበሩ፡ ፈድፋደ፡ እኪተ፡ እምኵሎሙ፡ አሕዛበ፡ ምድር፡ እለ፡ ሠረዎሙ፡ እግዚአበረሔር፡ እምቅድመ፡ ገጾሙ፡ ለደቂቀ፡ እስራኤል።
10 ወተናገሮ፡ እግዚአብሔር፡ ለምናሴ፡ ወለሕዝበ፡ ዚአሁ፡ ወኢያጽምዕዎ።
11 ወአምጽአ፡ እግዚአብሔር፡ ላዕሌሁ፡ መላእክተ፡ ኃይሉ፡ ለንጉሠ፡ አሶራውያን፡ ወአኃዝዎ፡ ለምናሴ፡ ወሞቅሕዎ፡ በመዋቅሕተ፡ ሐፂን፡ ወነሥእዎ፡ ብሔረ፡ ባቢሎን።
12 ወሶበ፡ ተመንደበ፡ ኃሠሠ፡ ገጸ፡ እግዚአብሔር፡ አምላኩ፡ ወኃሥረ፡ ፈድፋደ፡ በቅድመ፡ ገጸ፡ እግዚአብሔር፡ አምላከ፡ አበዊሁ።
13 ወጸለየ፡ ምናሴ፡ ወልደ፡ ሕዝቅያስ፡ ንጉሥ፡ ወይቤ፡ ከመዝ።
14 እግዚኦ፡ አኃዜ፡ ኵሉ፡ ዓለም፡ አምላኮሙ፡ ለአበዊነ፡ ለአብርሃም፡ ወለይስሕቅ፡ ወለያዕቆብ፡ ወለኵሉ፡ ፍሬሆሙ፡ ለጻድቃን።
15 ዘገበርከ፡ ሰማየ፡ ወምድረ፡ ምስለ፡ ኵሉ፡ ዓለሞሙ።
16 ዘገሠፅካ፡ ለባሕር፡ በቃለ፡ ትእዛዝከ፡ ዘዐፀውከ፡ ቀላያተ፡ ወኃተምከ፡ ግሩመ፡ ውእቱኒ፡ በስቡሕ፡ ስምከ።
17 ዘኵሉ፡ ይርዕድ፡ ወያድለቀልቅ፡ እምገጸ፡ ኃይልከ።
18 እስመ፡ አልቦ፡ ጽንፍ፡ ለዕበየ፡ ስብሐቲከ፡ ግሩም፡ መቅሠፍተ፡ መዓትከ፡ ላዕለ፡ ኃጥአን።
19 አልቦ፡ ኍልቊ፡ ወአልቦ፡ መስፈርት፡ ለሣህለ፡ ትእዛዝከ፡ እስመ፡ አንተ፡ እግዚአብሔር፡ ባሕቲትከ፡ ልዑል፡ መሐሪ፡ ርኁቀ፡ መዓት፡ ወብዙኀ፡ ሣህል፡ ወመስተመይጥ፡ ላዕለ፡ ጌጋዮሙ፡ ለእጓለ፡ እመሕያው።
20 ይእዜኒ፡ እግዚኦ፡ አምላኮሙ፡ ለጻድቃን፡ እስመ፡ አኮ፡ ለጻድቅ፡ ዘገበርኮ፡ ለንስሓ፡ አኮ፡ ለአብርሃም፡ ወለይስሐቅ፡ ወለያዕቆብ፡ እለ፡ ኢአበሱ፡ ለከ፡ አላ፡ ተመየጥ፡ ንስሐ፡ ዚአየ፡ ለኃጥእ።
21 እስመ፡ አበስኩ፡ እምኍልቈ፡ ኆፃ፡ ባሕር፡ ወብዙኅ፡ ኃጢአትየ፡ አኮ፡ ድልወት፡ ሊተ፡ አንቃዕዱ፡ ወእርአይ፡ ኑኆ፡ ለሰማይ፡ እምብዝኀ፡ ጌጋይየ፡ ሠራሕኩ፡ በመዋቅሕተ፡ ሐፂን፡ ከመ፡ እስሐታ፡ ለነፍስየ፡ እምኃጢአትየ፡ ወበዝየኒ፡ ኢተስሕትኩ።
22 እስመ፡ ወሀኩ፡ መዓተከ፡ ወእኩየኒ፡ በቅድሜከ፡ ገበርኩ፡ እንዘ፡ አዐቅብ፡ ከንቶ፡ ወአበዝኅ፡ ዘኢይበቊዓኒ።
23 ወይእዜኒ፡ እሰግድ፡ በብረከ፡ ልብየ፡ እንዘ፡ እስእል፡ ምሕረተ፡ ዚአከ።
24 አበስኩ፡ እግዚኦ፡ አበስኩ፡ ወኃጢአትየኒ፡ እትአመን።
25 እትመሀለል፡ ወእስእለከ፡ ተሣሃለኒ፡ እግዚኦ፡ ተሣሃለኒ፡ ወኢትመጥወኒ፡ ለኃጢአትየ።
26 ወለዓለምሰ፡ ኢትዕቀብ፡ ሊተ፡ እከይየ፡ ወኢትትበቀለኒ፡ በማዕምቅቲሃ፡ ለምድር፡ እስመ፡ አንተ፡ እግዚኦ፡ አምላኮሙ፡ ለእለ፡ ይኔስሑ፡ ያስተርኢ፡ ኂሩትከ፡ በላዕሌየ፡ ከመ፡ እንዘ፡ አኮ፡ ድልወት፡ ሊተ፡ አድኃንከኒ፡ በብዝኀ፡ ሣህልከ፡ በኵሉ፡ ጊዜ፡ ወበኵሉ፡ መዋዕለ፡ ሕይወትየ።
27 እስመ፡ ኪያከ፡ ይሴብሑ፡ ኵሉ፡ ኃይለ፡ ሰማያት፡ ወለከ፡ ስብሐት፡ ለዓለም፡ አሜን።
28 ወሶበ፡ ርእየ፡ እግዚአብሔር፡ ከመ፡ ነስሐ፡ ምናሴ፡ እምእከየ፡ ምግባሩ፡ ዘገብረ፡ በኢያእምሮቱ፡ አናሕሰየ፡ ሎቱ።
29 ወሰምዐ፡ ጸሎቶ፡ ወተሠጥወ፡ ቃለ፡ ስእለቱ፡ ወሜጠ፡ ውስተ፡ ኢየሩሳሌም፡ በከመ፡ ሀሎ፡ ቀዲሙ፡ ውስተ፡ መንግሥቱ፡ ወአእመረ፡ ምናሴ፡ ከመ፡ እግዚአብሔር፡ ውእቱ፡ አምላኩ፡ ወተፈሥሐ፡ እግዚአብሔር፡ እስመ፡ ነስሐ፡ ምናሴ።
30 ወእምድኅረ፡ ዝንቱ፡ አሕነፀ፡ አረፍተ፡ እምሀገረ፡ ዳዊት፡ አፍአ፡ መንገለ፡ ሰሜን፡ እስከ፡ ደቡበ፡ ፈለግ፡ ወአንኀ፡ ዓውደ፡ አንቀጽ፡ እስከ፡ መካን፡ ዘይብልዋ፡ በነገረ፡ ዕብራይስጥ፡ አፍላ፡ ወአልዓለ፡ ፈድፋደ፡ ወሤመ፡ መላእክተ፡ ኃይል፡ በኵሉ፡ አህጉረ፡ ጸወናት፡ ዘይሁዳ።
31 ወአውጽአ፡ አማልክተ፡ ነኪር፡ ወግልፎ፡ እምቤተ፡ እግዚአብሔር፡ ወኵሎ፡ ምሥዋዐ፡ ዘሐነፀ፡ በውስተ፡ ቤተ፡ እግዚአብሔር፡ በኢየሩሳሌም፡ ወአፍኣ፡ እምሀገር።
32 ወአስተሣነየ፡ ቤተ፡ ለምሥዋዐ፡ እግዚአብሔር፡ ወሦዐ፡ ላዕሌሁ፡ መሥዋዕተ፡ መድኀኒተ፡ ወስብሐት፡ ወይቤ፡ ለሕዝበ፡ ይዳ፡ ከመ፡ ይትቀነዩ፡ ለእግዚአብሔር፡ አምላከ፡ እስራኤል።
33 ወባሕቱ፡ ሕዝብሰ፡ ዓዲሆሙ፡ መልዕልተ፡ አውግር፡ ይሠውዑ፡ ርኁቃን፡ ፈድፋደ፡ እምእግዚአብሔር፡ አምላኮሙ።
34 ወእለ፡ ተርፉ፡ ቃላተ፡ ምናሴ፡ ወጸሎቱ፡ እንተ፡ ኀበ፡ እግዚአብሔር፡ ወቃላተ፡ ነቢያት፡ እለ፡ ተናገርዎ፡ በስመ፡ እግዚአብሔር፡ አምላከ፡ እስራኤል፡ ነዮሙ፡ ጽሑፋት፡ ዲበ፡ ቃላተ፡ ጸሎተ፡ ዚአሁ።
35 ወበከመ፡ ሰምዖ፡ እግዚአብሔር፡ ጸሎቶ፡ ወኵሉ፡ አበሳሁ፡ ወኵሉ፡ ምግባሩ፡ ወመካናት፡ እለ፡ ቦሙ፡ ሐነፀ፡ አውግረ፡ ወአቀመ፡ በህየ፡ አእዋመ፡ ወግልፎ፡ ዘእንበለ፡ ይትመየጥ፡ ኀበ፡ እግዚአብሔር፡ ናሁ፡ ጽሑፍ፡ በቃለ፡ ነቢያት።
36 ወኖመ፡ ምናሴ፡ ምስለ፡ አበዊሁ፡ ወተቀብረ፡ በገነተ፡ ቤቱ፡ ወነግሠ፡ አሞፅ፡ ወልዱ፡ እምድኅሬሁ።
37 ወከዊኖ፡ አሞፅ፡ ወልደ፡ ዕሥራ፡ ወክልኤቱ፡ ዓመት፡ አመ፡ ያነግሥዎ፡ ወክልኤተ፡ ዓመተ፡ ነግሠ፡ በኢየሩሳሌም።
38 ወገብረ፡ እኪተ፡ በቅድመ፡ እግዚአብሔር፡ በከመ፡ ገብረ፡ ምናሴ፡ አቡሁ፡ ወለኵሉ፡ አምሳል፡ ዘገብረ፡ ምናሴ፡ አቡሁ፡ ሦዐ፡ አሞፅ፡ ወተቀንየ፡ ሎሙ።
39 ወኢያትሐተ፡ ርእሶ፡ በቅድመ፡ እግዚአብሔር፡ በከመ፡ ኢያትሐተ፡ ምናሴ፡ አቡሁ፡ እስመ፡ አሞፅ፡ ወልዱ፡ አብዝኀ፡ ኃጢአተ፡ በቅድመ፡ እግዚአብሔር።
40 ወተንሥኡ፡ ላዕሌሁ፡ አግብርቲሁ፡ ወቀተልዎ፡ በውስተ፡ ቤቱ።
41 ወቀተልዎሙ፡ አሕዛበ፡ ምድር፡ ላእለ፡ ተንሥኡ፡ ላዕለ፡ ንጉሥ፡ አሞፅ።
=== chapter 34 ===
[Chapter 34]
1 ወአንገሥዎ፡ አሕዛበ፡ ምድር፡ ለኢዮስያስ፡ ወልዱ፡ እምድኅሬሁ፡ ከዊኖ፡ ወልደ፡ ሰመንቱ፡ ዓመት፡ አመ፡ ያነግሠዎ፡ ለኢዮስያስ፡ ወሠላሳ፡ ወአሐደ፡ ዓመተ፡ ነግሠ፡ በኢየሩሳሌም።
2 ወሖረ፡ በፍኖት፡ ርትዕት፡ በቅድመ፡ እግዚአብሔር፡ ወበፍኖተ፡ ዳዊት፡ አቡሁ፡ ወኢተመይጠ፡ ኢ፡ ለየማን፡ ወኢ፡ ለጸጋም።
3 ወበሳምን፡ ዓመት፡ መንግሥቱ፡ ወውእቱኒ፡ ሕፃን፡ ዓዲ፡ አኃዘ፡ ከመ፡ ይኅሥሦ፡ ለእግዚአብሔር፡ አምላከ፡ ዳዊት፡ አቡሁ፡ ወበዐሥር፡ ወክልኤ፡ ዓመተ፡ መንግሥቱ፡ አኀዘ፡ ከመ፡ ያንጽሖሙ፡ ለይሁዳ፡ ወለኢየሩሳሌም፡ እምአውግር፡ ወእምአእዋም፡ ወእምአምሳለ፡ ስብኮ።
4 ወአንኀለ፡ በቅድሜሁ፡ ምሥዋዐ፡ በዓሊም፡ ወአውግረ፡ ዘመልዕልቴሆሙ፡ ወአግዘመ፡ አእዋመ፡ ወአምሳለ፡ ግልፎ፡ ሰበረ፡ ወቀጥቀጠ፡ አምሳለ፡ ሰብእ፡ ወገደፎ፡ አንፃረ፡ መቃብሪሆሙ፡ ለእለ፡ ሦዑ፡ ሎሙ።
5 ወአዕፅምተ፡ ካህናቲሆሙኒ፡ አውዓየ፡ በእሳት፡ በመልዕልተ፡ ምሥዋዓቲሆሙ፡ ወአንጽሖሙ፡ ለይሁዳ፡ ወለኢየሩሳሌም።
6 ወለአህጉረ፡ ኤፍሬም፡ ወምናሴ፡ ወለአህጉረ፡ ስምዖን፡ ወንፍታሌም፡ ወመካናተ፡ እለ፡ ዓውዶሙ።
7 ወአንኀለ፡ አእዋመ፡ ወምሥዋዐኒ፡ ወአምሳለኒ፡ ሰበረ፡ ወቀጥቀጠ፡ ወኵሎ፡ አውግር፡ አንጽሐ፡ ወአንኀለ፡ እምድረ፡ እስራኤል፡ ወተመይጠ፡ ኢየሩሳሌም።
8 ወበዓሥር፡ ወሳምን፡ ዓመተ፡ መንግሥቱ፡ እምድኅረ፡ ፈጸመ፡ አንጽሖ፡ ምድር፡ ወቤተ፡ መንግሥት፡ ፈነዎሙ፡ ለሳፋን፡ ወልደ፡ ሴልያ፡ ወለአሜስያስ፡ መሳፍንተ፡ ሀገር፡ ወለኢዮአስ፡ ወልደ፡ ኢዮአካዝ፡ መዘክር፡ ጸሐፌ፡ ዚአሁ፡ ከመ፡ ይሕንፁ፡ ቤተ፡ እግዚአብሔር፡ አምላከ፡ ዚአሆሙ።
9 ወበጽሑ፡ ኀበ፡ ኬልቅያስ፡ ካህን፡ ዓቢይ፡ ወወሀቦሙ፡ ብሩረ፡ ዘአብኡ፡ ለቤተ፡ እግዚአብሔር፡ ዘአስተጋብኡ፡ ሌዋውያን፡ እለ፡ የዓቅቡ፡ አንቀጸ፡ እምእደ፡ ምናሴ፡ ወኤፍሬም፡ ወመላዕክት፡ ወእምኵሎሙ፡ እለ፡ ተርፉ፡ እምእስራኤል፡ ወእምደቂቀ፡ ይሁዳ፡ ወብንያም፡ ወእለኒ፡ ይነብሩ፡ ኢየሩሳሌም።
10 ወወሀቡ፡ ውስተ፡ እዴሆሙ፡ ለእለ፡ ይገብሩ፡ ግብረ፡ ቤተ፡ እግዚአብሔር፡ ወእለ፡ ተሠይሙ፡ በቤተ፡ እግዚአብሔር፡ ላዕለ፡ ግብር፡ ወወሀብዎሙ፡ ለእለ፡ ይትቀነዩ፡ ለቤተ፡ እግዚአብሔር፡ ከመ፡ ያሠንዩ፡ ወያጽንዑ፡ ቤተ፡ እግዚአብሔር።
11 ወወሀብዎሙ፡ ለነደቅት፡ ወለጸረብት፡ ከመ፡ ይሣየጡ፡ አእባነ፡ ዓበይተ፡ ወዕፀወ፡ ለጠፈረ፡ ቤት፡ ወለሠራዊት፡ ወለአረፍተ፡ አብያት፡ እለ፡ አንኀሉ፡ ነገሥተ፡ ይሁዳ።
12 ወእደወ፡ መሃይምናነ፡ ሤመ፡ ላዕሌሆሙ፡ እለ፡ ያስተፋቅድዎሙ፡ ይኤት፡ ወአብድያስ፡ ሌዋውያን፡ እምደቂቀ፡ ሜራሪ፡ ወዘካርያስ፡ ወመሰላም፡ እምደቂቀ፡ ቀዓት፡ ለፈቂድ፡ ወለኵሉ፡ ሌዋዊ፡ ለባዊ፡ ወምሁር፡ በጸናጽለ፡ ስብሐት።
13 ወዲበ፡ ፀወርት፡ ወላዕለ፡ ኵሉ፡ ግብር፡ እለ፡ ይትቀነዩ፡ በበግብሮሙ፡ ወእምሌዋውያን፡ ጸሐፍት፡ ወመኳንንት፡ ወዐቀብተ፡ አናቅጽ።
14 ወእንዘ፡ ያወፅኡ፡ ውእተ፡ ወርቀ፡ ወብሩረ፡ ዘአብኡ፡ መባአ፡ ለቤተ፡ እግዚአብሔር፡ ረከበ፡ ኬልቅያስ፡ ካህን፡ መጽሐፈ፡ ሕጉ፡ ለእግዚአብሔር፡ ዘበእዴሁ፡ ለሙሴ።
15 ወአውሥአ፡ ኬልቅያስ፡ ወይቤሎ፡ ለሳፋን፡ ጸሐፊ፡ መጽሐፈ፡ ሕግ፡ ረከብነ፡ በቤተ፡ እግዚአብሔር፡ ወመጠዎ፡ ኬልቅያስ፡ ካህን፡ ውእተ፡ መጽሐፈ፡ ለሳፋን።
16 ወአብአ፡ ሳፋን፡ ውእተ፡ መጽሐፈ፡ ኀበ፡ ንጉሥ፡ ወተናገሮ፡ ካዕበ፡ ለንጉሥ፡ ቃለ፡ እንዘ፡ ይብል፡ ኵሎ፡ ወርቀ፡ ወብሩረ፡ መባአ፡ ገብሩ፡ በእዴሆሙ፡ ለአግብርቲከ፡ እለ፡ ይገብሩ፡ ግብረ፡ ቤተ፡ እግዚአብሔር።
17 ወሰበክዎ፡ ለውእቱ፡ ብሩር፡ ዘተረክበ፡ ውስተ፡ ቤተ፡ እግዚአብሔር፡ ወወሀብዎሙ፡ ውስተ፡ እደዊሆሙ፡ ለፈቃድያን፡ ወውስተ፡ እደዊሆሙ፡ ለእለ፡ ይገብሩ፡ ግብረ፡ ቤተ፡ እግዚአብሔር።
18 ወዜነዎ፡ ሳፋን፡ ጸሐፊ፡ ለንጉሥ፡ ኢዮስያስ፡ እንዘ፡ ይብል፡ ወሀበኒ፡ መጽሐፈ፡ ሕግ፡ ኬልቅያስ፡ ካህን፡ ወአንበባ፡ ሳፋን፡ ለይእቲ፡ መጽሐፍ፡ ዘተረክበት፡ ውስተ፡ ቤተ፡ እግዚአብሔር፡ በቅድመ፡ ንጉሥ።
19 ወኮነ፡ ሶበ፡ ሰምዐ፡ ንጉሥ፡ ቃለ፡ መጽሐፍ፡ ዘሕግ፡ ሰጠጠ፡ አልባሲሁ።
20 ወአዘዞሙ፡ ንጉሥ፡ ለኬልቅያስ፡ ወለአኪቃም፡ ወልደ፡ ሳፋን፡ ወለአብያ፡ ወልደ፡ ሚልክያስ፡ ወለሳፋን፡ ጸሐፊ፡ ወለኤሴኢያ፡ ቊልዔሁ፡ እንዘ፡ ይብል።
21 ሑሩ፡ እንከ፡ ወኅሥሥዎ፡ ለእግዚአብሔር፡ በእንቲአየ፡ በወ፡ እንተ፡ ኵሎሙ፡ እለ፡ ተርፉ፡ እምእስራኤል፡ ወእምይሁዳ፡ በእንተ፡ ቃላተ፡ መጽሐፍ፡ ዘተረክበ፡ እስመ፡ መዓተ፡ እግዚአብሔር፡ ዓባይ፡ ነደት፡ ላዕሌነ፡ እስመ፡ ኢሰምዑ፡ አበዊነ፡ ቃለ፡ እግዚአብሔር፡ ይግበሩ፡ ኵሎ፡ ዘጽሑር፡ ውስተ፡ ዝንቱ፡ መጽሐፍ።
22 ወሖረ፡ ኬልቅያስ፡ ወእለኒ፡ ይቤሎሙ፡ ንጉሥ፡ ኀበ፡ ህልዳና፡ ነቢይት፡ ብእሲቱ፡ ለኤሴሌም፡ ወልዱ፡ ለተቁዓት፡ ወልዱ፡ ለአሴር፡ ዓቃቤ፡ አልባስ፡ ወይእቲኒ፡ ትነብር፡ ውስተ፡ ኢየሩሳሌም፡ ውስተ፡ መካን፡ እንተ፡ ስማ፡ ሰናኢ፡ ወተናገርዋ፡ ዘንተ።
23 ወትቤሎሙ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ ንግርዎ፡ ለብእሲ፡ ዘፈነወክሙ፡ ኀቤየ።
24 ከመዝ፡ ይቤ፡ እግዚአብሔር፡ ናሁ፡ አመጽኣ፡ ለእኪት፡ ላዕለ፡ ዝንቱ፡ መካን፡ ወላዕለ፡ እለ፡ ይነብሩ፡ ኵሎ፡ ቃላተ፡ እለ፡ ጽሑፋት፡ ውስተ፡ መጽሐፈ፡ ዘተነበ፡ በቅድመ፡ ንጉሠ፡ ይሁዳ።
25 እስመ፡ ረስዑኒ፡ ወሦዑ፡ ለአማልክተ፡ ነኪር፡ ከመ፡ ያምዕዑኒ፡ በኵሉ፡ ግብረ፡ እደዊሆሙ፡ ወነደት፡ መዓትየ፡ ላዕለ፡ ዛቲ፡ መካን፡ ወኢትጠፍእ።
26 ወለንጉሠ፡ ይሁዳኒ፡ ዘፈነወክሙ፡ ከመ፡ ትኅሥሥዎ፡ ለእግዚአብሔር፡ ከመዝ፡ በልዎ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ ቃላተ፡ እለ፡ ሰማዕከ።
27 ወደንገፀ፡ ልብከ፡ ወኃዘነ፡ ወአትሐትከ፡ ርእሰከ፡ በቅድሜየ፡ ሰሚዓከ፡ ቃላተ፡ ዚአየ፡ እለ፡ ላዕለ፡ ዝንቱ፡ መካን፡ ወላዕለ፡ እለ፡ የኃድርዋ፡ ወሰጠጥከ፡ አልባሲከ፡ ወበከይከ፡ በቅድሜየ፡ ወአነኒ፡ ሰማዕኩከ፡ ይቤ፡ እግዚአብሔር።
28 ወናሁ፡ አዓርፈከ፡ ኀበ፡ አበዊከ፡ ወትገብእ፡ ውስተ፡ መቃብሪከ፡ በሰላም፡ ወኢይሬእያ፡ አዕይንቲከ፡ ኵሎ፡ እኪተ፡ ዘሀለ፡ ወኒ፡ አምጽእ፡ ላዕለዛቲ፡ መካን፡ ወላዕለ፡ እለ፡ ይነብሩ፡ ውስቴታ፡ ወአጠየቅዎ፡ ለንጉሠሥ፡ ቃላተ፡ ዘትቤሎሙ።
29 ወፈነወ፡ ንጉሥ፡ ወአስተጋብአ፡ ኵሎ፡ ሊቃናተ፡ ይሁዳ፡ ወኢየሩሳሌም።
30 ወዓርገ፡ ንጉሠ፡ ይሁዳ፡ ውስተ፡ ቤተ፡ እግዚአብሔር፡ ወኵሉ፡ ሕዝበ፡ ይሁዳ፡ ወእለኒ፡ ይነብሩ፡ ኢየሩሳሌም፡ ወካህናትኒ፡ ወሌዋውያን፡ ወኵሉ፡ ሕዝብ፡ እምንኡስ፡ እስከ፡ ዓቢይ፡ ወአንበበ፡ በዕዘኒሆሙ፡ ኵሎ፡ ቃላተ፡ መጽሐፈ፡ ኪዳን፡ ዘእግዚአብሔር፡ ዘተረክበ፡ በቤተ፡ እግዚአብሔር።
31 ወቆመ፡ ንጉሥ፡ መልዕልተ፡ ዓምድ፡ ወተካየደ፡ ኪዳነ፡ በቅድመ፡ እግዚአብሔር፡ ከመ፡ ይሑር፡ በቅድሜሁ፡ ወይዕቀብ፡ ትእዛዛቲሁ፡ ወስምዖኒ፡ ወሕገ፡ ዚአሁ፡ በኵሉ፡ ልቡ፡ ወበኵሉ፡ ነፍሱ፡ ወኵሎን፡ ቃላተ፡ ኪዳን፡ እለ፡ ጽሑፋት፡ ውስተዝ፡ መጽሐፈ።
32 ወአቀመ፡ ለኵሎሙ፡ እለ፡ ተረክቡ፡ በብሔረ፡ ይሁዳ፡ ወበብሔረ፡ ብንያም፡ ወለእለኒ፡ ይነብሩ፡ ኢየሩሳሌም፡ ኪዳነ፡ በቤተ፡ እግዚአብሔር፡ አምላከ፡ አበዊሆሙ።
33 ወአፍለሰ፡ ኢዮስያስ፡ ንጉሥ፡ ኵሎ፡ ርኵሰ፡ እምኵሉ፡ ምድር፡ ዘኮነ፡ ለደቂቀ፡ እስራኤል፡ ወረሰዮሙ፡ ለኵሎሙ፡ እለ፡ ተረክቡ፡ በኢየሩሳሌም፡ ወበእስራኤል፡ ከመ፡ ይትቀነዩ፡ ለእግዚአብሔር፡ አምላኮሙ፡ በኵሉ፡ መዋዕሊሆሙ፡ ወኢተመይጠ፡ እምድኅረ፡ እግዚአብሔር፡ አምላከ፡ አበዊሁ።
=== chapter 35 ===
[Chapter 35]
1 ወገብረ፡ ኢዮስያስ፡ ንጉሥ፡ ፍሥሐ፡ ለእግዚአብሔር፡ አምላኩ፡ ወሦዕዎ፡ ለፍሥሕ፡ አመ፡ ዓሡር፡ ወረቡዑ፡ ለቀዳሚ፡ ወርኅ።
2 ወአቀሞሙ፡ ለካህናት፡ በበምቅዋማቲሆሙ፡ ወአዕንዖሙ፡ ለመልእክተ፡ ቤተ፡ እግዚአብሔር።
3 ወይቤሎሙ፡ ለሌዋውያን፡ ጽኑዓን፡ እለ፡ ተረክቡ፡ በኵሉ፡ እስራኤል፡ ከመ፡ ያንጽሑ፡ ወይቀድሱ፡ ርእሶሙ፡ ለእግዚአብሔር፡ ወአንበርዋ፡ ለታቦት፡ ቅድስት፡ ውስተ፡ ቤተ፡ ዘሐነፀ፡ ሰሎሞን፡ ወልደ፡ ዳዊት፡ ንጉሠ፡ እስራኤል፡ ወይቤ፡ ኢዮስያስ፡ ንጉሥ፡ አልብክሙ፡ ዘትፀውሩ፡ ውስተ፡ መታክፍቲክሙ፡ ወኢምንትኒ፡ ወይእዜኒ፡ ተለአኩ፡ ለእግዚአብሔር፡ አምላክክሙ፡ ወለሕዝበ፡ ዚአሁ፡ እስራኤል።
4 ወተደለዉ፡ በበአበዊክሙ፡ ወበበዕብሬትክሙ፡ ወበበአብያቲክሙ፡ በከመ፡ ትእዛዙ፡ ለዳዊት፡ ንጉሠ፡ እስራኤል፡ ወሰሎሞን፡ ወልዱ።
5 ወቁሙ፡ ውስተ፡ ቤተ፡ እግዚአብሔር፡ በከመ፡ ክፍላተ፡ አብያተ፡ አበዊክሙ፡ ወአኃዊክሙ፡ ወደቂቀ፡ ሕዝብክሙ፡ ወክፍላተ፡ ቤተ፡ አበዊክሙ፡ ሌዋውያን።
6 ወሡዑ፡ ፍሥሐ፡ ወአስተዳልዉ፡ ለአኃዊክሙ፡ ከመ፡ ትግበሩ፡ በከመ፡ ቃለ፡ እግዚአብሔር፡ ዘበእዴሁ፡ ለሙሴ።
7 ወጠብሐ፡ ኢዮስያስ፡ ንጉሥ፡ ለደቂቀ፡ ሕዝቡ፡ አጣሌ፡ መቊዓለ፡ ወማሐስአ፡ እምውሉደ፡ ሐራጊት፡ ኵሎ፡ ዘይከውን፡ ለፍሥሕ፡ ወእለሰ፡ ተረክቡ፡ ኮነ፡ ኍልቆሙ፡ ሠለስተ፡ እልፈ፡ ወአልሕምት፡ ሠላሳ፡ ምእት፡ ወእላንቱ፡ ዘአብአ፡ ወጠብሐ፡ ንጉሥ፡ እምጥሪቱ።
8 ወመላእክቲሁኒ፡ ጠብሑ፡ ለሕዝብ፡ ወለካህናት፡ ወለሌዋውያን፡ ወወሀብዎሙ፡ ለኬልቅያስ፡ ወለዘካርያስ፡ ወለኢዮሄል፡ መገብተ፡ ቤተ፡ እግዚአብሔር፡ ወወሀቡ፡ ለካህናት፡ ለፍሥሕ፡ ጠሌ፡ መቊዓለ፡ ወማሐስአ፡ ዕሥራ፡ ምእተ፡ ወስድስተ፡ ምእተ፡ ወአልሕምተ፡ ሠለስተ፡ ምእተ።
9 ወኬንያስ፡ ወብንያስ፡ ወሰማዕያስ፡ ወናታናሄል፡ እኁሁ፡ ወሰብንያስ፡ ወኢዮዳሄል፡ ወኢዮዛብድ፡ መገብተ፡ ሌዋውያን፡ ሐረዱ፡ ለሌዋውያን፡ ለፍሥሕ፡ አጣሌ፡ ኃምሳ፡ ምእተ፡ ወአልሕምተ፡ ኃምስተ፡ ምእተ።
10 ወረትዐ፡ መልእክቶሙ፡ ወቆሙ፡ ካህናት፡ በበምቅዋማቲሆሙ፡ ወሌዋውያንሂ፡ በክፍላተ፡ ዚአሆሙ፡ በከመ፡ ትእዛዙ፡ ለንጉሥ።
11 ወሦዑ፡ ፍሥሐ፡ ወነዝሑ፡ ካሃናት፡ ደመ፡ በእደዊሆሙ፡ ወለሌዋውያንሰ፡ ያወጽኡ፡ እምእሳት።
12 ወያስተዳልዉ፡ በጽንሐሕ፡ ከመ፡ ያወፍይዎሙ፡ ለካህናት፡ በከመ፡ ክፍለቶሙ፡ በቤተ፡ አበዊሆሙ፡ ለደቂቀ፡ ሕዝብ፡ ከመ፡ ያብኡ፡ ለእግዚአብሔር፡ በከመ፡ ጽሑፍ፡ በኦሪተ፡ ሙሴ።
13 ወከመዝ፡ ጠበሱ፡ ፍሥሐ፡ በእሳት፡ በከመ፡ ኵነኔ፡ ሙሴ፡ ወቅድሳተኒ፡ አብሰሉ፡ በመቅፁት፡ ወበጻሕራት፡ ወበአጽሕልት፡ ወተሠርኀ፡ ሎሙ፡ ወሮፁ፡ ኀበ፡ ኵሉ፡ ደቂቀ፡ ሕዝቡ።
14 ወእምድኅረዝ፡ አስተዳለዉ፡ ሎሙ፡ ወለካህናት፡ ምስሌሆሙ፡ እስመ፡ ደቂቀ፡ አሮን፡ ካህናት፡ ለአቅርቦ፡ መሥዋዕት፡ ወጽንሐሐት፡ እስከ፡ ሌሊት፡ ወሌዋውያን፡ ያስተዳልዉ፡ ሎሙ፡ ለአኃዊሆሙ፡ ለደቂቀ፡ አሮን።
15 ወመዘምራን፡ ደቂቀ፡ አሳፍ፡ በበምቅዋማቲሆሙ፡ በከመ፡ ትእዛዙ፡ ለዳዊት፡ አሳፍኒ፡ ወኤማን፡ ወኤዶትም፡ ነቢያተ፡ ንጉሥ፡ ወመላእክት፡ ወዓቀብተ፡ አናቅጽ፡ ዘኆኅት፡ ወእምአንቀጽ፡ ኢብውሕ፡ ሎሙ፡ ይእትቱ፡ እመልእክተ፡ ቅድሳት፡ አኃዊሆሙ፡ ሌዋውያን፡ ያስተዳለዉ፡ ሎሙ።
16 ወረትዐ፡ ወተደለወ፡ ኵሉ፡ መልእክተ፡ ቤተ፡ እግዚአብሔር፡ በይእቲ፡ ዕለት፡ ከመ፡ ይግበሩ፡ ፍሥሐ፡ ወከመ፡ ያዕርጉ፡ ፍሥሐ፡ ወጽንሐሐ፡ ላዕለ፡ ምሥዋዐ፡ እግዚአብሔር፡ በከመ፡ ትእዛዙ፡ ለኢዮስያስ፡ ንጉሥ።
17 ወገበሩ፡ ፍሥሐ፡ በይእቲ፡ ዕለት፡ እለ፡ ተረክቡ፡ ደቂቀ፡ እስራኤል፡ ወበዓለ፡ ናእት፡ ሰቡዐ፡ ዕለት።
18 ወኢተገብረ፡ ፍሥሕ፡ ዘይመስሎ፡ በኵሉ፡ እስራኤል፡ እመዋዕሊሁ፡ ለሳሙኤል፡ ነቢይ፡ ወኵሉ፡ ነገሥተ፡ እስራኤል፡ ኢገብሩ፡ ፍሥሐ፡ በከመ፡ ገብረ፡ ኢዮስያስ፡ ንጉሥ፡ ወካህናትኒ፡ ወሌዋውያን፡ ወኵሉ፡ ሕዝበ፡ ይሁዳ፡ ወእስራኤል፡ ዘተረክቡ፡ ወእለኒ፡ ይነብሩ፡ ኢየሩሳሌም፡ ለእግዚአብሔር።
19 ወበዓሠርቱ፡ ወሰመንቱ፡ ዓመተ፡ መንግሥቱ፡ ለኢዮስያስ፡ ተገብረ፡ ዝንቱ፡ ፍሥሕ፡ ወአውፅአ፡ ኵሎሙ፡ እለ፡ ይሬእዩ፡ በከርሥ፡ ወእለ፡ ይገብሩ፡ ግብር፡ ማርያት፡ ወተራፊን፡ ወአምሳለ፡ ወጣዖታተ፡ ቃርያሲም፡ ዘሀሎ፡ በምድረ፡ ይሁዳ፡ ወኢየሩሳሌም፡ ወአውዓየ፡ አዕፅምቲሆሙ፡ በእሳት፡ ኢዮስያስ፡ ንጉሥ፡ ከመ፡ ያቅም፡ ቃላተ፡ ሕግ፡ እለ፡ ጽሑፋት፡ ላዕለ፡ መጽሐፍ፡ ዘረከበ፡ ኬልቅያስ፡ ካህን፡ በቤተ፡ እግዚአብሔር።
20 ወአልቦ፡ ዘቆመ፡ ዘይመስሎ፡ እምቀደምት፡ ዘከነ፡ ተመይጠ፡ ኀበ፡ እግዚአብሔር፡ እምኵሉ፡ ልቡ፡ ወእምኵሉ፡ ነፍሱ፡ ወእምኵሉ፡ ኃይሉ፡ በከመ፡ ኵሉ፡ ዘጽሑፍ፡ በኦሪተ፡ ሙሴ።
21 ወእምድኅሬሁኒ፡ ኢይቀውም፡ ዘይመስሎ።
22 ወባሕቱ፡ ኢተመይጠ፡ እግዚአብሔር፡ እመቅሠፍተ፡ መዓቱ፡ ዓቢይ፡ ዘተምዐ፡ መዓተ፡ ላዕለ፡ ኵሉ፡ ይሁዳ፡ ወላዕለ፡ ኵሉ፡ ዘወሀኮ፡ ምናሴ፡ ንጉሥ።
23 ወይቤ፡ እግዚአብሔር፡ ለይሁዳኒ፡ አርኅቃ፡ እምቅድመ፡ ገጽየ፡ በከመ፡ አርኃቅዎሙ፡ ለእስራኤል፡ ወአኀድጋ፡ ለሀገረ፡ ኢየሩሳሌም፡ እንተ፡ ኃረይኩ፡ ወለቤትኒ፡ ዘእቤ፡ ከመ፡ ይኩን፡ ስምየ፡ በህየ፡ ለዓለም።
24 ወእምድኅረ፡ ዝንቱ፡ ኵሉ፡ አስተዳለወ፡ ኢዮስያስ፡ ቤተ።
25 ወዓርገ፡ ፈርዖን፡ ኒካኡ፡ ንጉሠ፡ ግብፅ፡ ላዕለ፡ ንጉሠ፡ አሶራውያን፡ እንተ፡ ፈለገ፡ ኤፍራጥስ፡ ወተንሥአ፡ ወሖረ፡ ኢዮስያስ፡ ንጉሥ፡ ለቀበላ፡ ዚአሁ።
26 ወፈነወ፡ ኀቤሁ፡ ግብፅ፡ ተናብልተ፡ እንዘ፡ ይብል፡ ምንት፡ ብየ፡ ምስሌከ፡ ንጉሠ፡ ይሁዳ፡ ወኢኮነ፡ ላዕሌከ፡ ዘመጻእኩ፡ በዛቲ፡ ዕለት፡ ከመ፡ እግበር፡ ቀትለ፡ አላ፡ እግዚአብሔር፡ ይቤለኒ፡ ከመ፡ እሑር፡ ወእብጻሕ፡ ተዓቀብኬ፡ እምእግዚአብሔር፡ ዘምስሌከ፡ ከመ፡ ኢይሥሩከ።
27 ወኢሜጠ፡ ኢዮስያስ፡ ገጾ፡ እምኔሁ፡ አላ፡ አስተጻንዐ፡ ወአኀዘ፡ ይትቃተሎ፡ ወኢሰምዐ፡ ኢዮስያስ፡ ቃለ፡ ንጉሠ፡ ግብፅ፡ ኒካኡ፡ ዘይቤሎ፡ በአፈ፡ እግዚአብሔር፡ ወመጽአ፡ ከመ፡ ይትቃተሎ፡ በፈለገ፡ መጌዶን።
28 ወነደፍዎ፡ ነደፍት፡ ለኢዮስያስ፡ ንጉሥ፡ ወይቤ፡ ኢዮስያስ፡ ንጉሥ፡ ለአግብርቲሁ፡ አውፅኡኒ፡ እስመ፡ ሐመምኩ፡ ፈድፋደ።
29 ወአውጽእዎ፡ አግብርቲሁ፡ እምሠረገላሁ፡ ወአዕረግዎ፡ ዲበ፡ ካልእ፡ ሠረገላ፡ ዘተረክበ፡ ሎቱ፡ ወአብጽሕዎ፡ ኢየሩሳሌም፡ ወበህየ፡ ሞተ፡ ወቀበርዎ፡ ምስለ፡ አበዊሁ፡ ወኵሉ፡ ሰብአ፡ ይሁዳ፡ ወኢየሩሳሌም፡ ለሀዉ፡ ላዕለ፡ ኢዮስያስ፡ ንጉሥ።
30 ወበከዮ፡ ኤርምያስ፡ ወለሀዎ፡ ለኢዮስያስ፡ ንጉሥ፡ ወይቤሉ፡ ኵሉ፡ መላእክት፡ ወሰፋንያት፡ ዛቲ፡ ምስሐግ፡ ዘኢዮስያስ፡ ንጉሥ፡ እስከ፡ ዛቲ፡ ዕለት፡ ወሠርዕዋ፡ ለይእቲ፡ ምስሐግ፡ በኵሉ፡ እስራኤል።
31 ወነያ፡ ጽሕፍት፡ ይእቲ፡ ውስተ፡ መጽሐፈ፡ ምስሐግ።
32 ወእለ፡ ተርፋ፡ ቃላተ፡ ኢዮስያስ፡ ቀደምት፡ ወደኃርት፡ ነዮን፡ ጽሑፋት፡ በመጽሐፈ፡ ነገሥተ፡ እስራኤል፡ ወይሁዳ።
=== chapter 36 ===
[Chapter 36]
1 ወነሥእዎ፡ ሕዝበ፡ ምድር፡ ለኢዮአክስ፡ ወልዱ፡ ለኢዮስያስ፡ ወቀብዕዎ፡ ወአቀምዎ፡ በኢየሩሳሌም፡ ወአንገሥዎ፡ ህየንተ፡ አቡሁ።
2 ከዊኖ፡ ወልደ፡ ዕሥራ፡ ወሠለስቱ፡ ዓመት፡ አመ፡ ያነግሥዎ፡ ለኢዮአክስ፡ ወሠለስተ፡ አውራኃ፡ ነግሠ፡ በኢየሩሳሌም፡ ወስማ፡ ለእሙ፡ አሜጥል፡ ወለተ፡ ኤርምያስ፡ ዘእምብሔረ፡ ሳቡና፡ ወገብራ፡ ለእኪት፡ በቅድመ፡ እግዚአብሔር፡ በከመ፡ ኵሉ፡ ዘገብሩ፡ አበዊሁ፡ ወፄወዎ፡ ወሞቅሖ፡ ፈርዖን፡ ኒካኡ፡ ዘብሔረ፡ ዴብላታ፡ በብሔረ፡ ኤማት፡ ከመ፡ ኢይንግሥ፡ በኢየሩሳሌም።
3 ወአብጽሖ፡ ንጉሥ፡ ብሔረ፡ ግብፅ፡ ወረሰየ፡ ላዕለ፡ ኵሉ፡ ምድር፡ ጸባሕተ፡ ምእተ፡ መክሊተ፡ ብሩር፡ ወሠላሳ፡ መክሊተ፡ ወርቅ።
4 ወሤመ፡ ፈርዖን፡ ኒካኡ፡ ለኤልያቄም፡ ወልደ፡ ኢዮስያስ፡ ንጉሠ፡ ይሁዳ፡ ህየንተ፡ አቡሁ፡ ወወለጠ፡ ንጉሠ፡ ግብፅ፡ ስሞ፡ ለኤልያቄም፡ ወሰመዮ፡ ኢዮአቄም፡ ወለኢአክስ፡ እኁሁ፡ ነሥኦ፡ ፈርዖን፡ ኒካኡ፡ ወአብጽሖ፡ ብሔረ፡ ግብፅ፡ ወሞተ፡ በህየ፡ ወብሩረኒ፡ ወወርቀኒ፡ ወሀብዎ፡ ለፈርዖን፡ ንጉሠ፡ ግብፅ፡ ወእም፡ አሜሃ፡ አኃዘት፡ ምድር፡ ታግብእ፡ ጸባሕተ፡ ብሩር፡ ለፈርዖን፡ ንጉሠ፡ ግብፅ።
5 ወአሐዱ፡ አሐዱ፡ ኵሉ፡ በሐሳበ፡ ጥሪቱ፡ ይሁብ፡ ወአስተጋብኡ፡ ወርቀ፡ ወብሩረ፡ እምኵሉ፡ ምድር፡ ከመ፡ የሀብዎ፡ ለፈርዖን፡ ኒካኡ።
6 ከዊኖ፡ ወልደ፡ ዕሥራ፡ ወኃምስቱ፡ ዓመት፡ አመ፡ ይነግሥ፡ ኢዮአቄም፡ ወዐሠርተ፡ ወአሐደ፡ ዓመተ፡ ነግሠ፡ በኢየሩሳሌም፡ ወገብረ፡ እኪተ፡ በቅድመ፡ እግዚአብሔር፡ ወስማ፡ ለእሙ፡ ዘካራ፡ ወለተ፡ ኔርያሳ፡ ዘእምብሔረ፡ ራማእ፡ ወገብረ፡ እኪተ፡ በቅድመ፡ እግዚአብሔር፡ በከመ፡ ኵሉ፡ ዘገብሩ፡ አበዊሁ።
7 ወበመዋዕሊሁ፡ መጽአ፡ ናቡከደነፆር፡ ንጉሠ፡ ባቢሎን፡ ውስተ፡ ምድረ፡ ይሁዳ፡ ወነበረ፡ እንዘ፡ ይትቀነይ፡ ሎቱ፡ ሠለስተ፡ ዓመተ።
8 ወተግኅሠ፡ እምኔሁ፡ ወፈነወ፡ እግዚአብሔር፡ ላዕሌሁ፡ ከለዳውያነ፡ ወፈያተ፡ ሶርያውያን፡ ወፈያተ፡ ብሔረ፡ ሞአብ፡ ወደቂቀ፡ አሞን፡ እለ፡ ብሔረ፡ ሰማርያ።
9 ወርኅቁ፡ እምድኅረ፡ ዝንቱ፡ ቃል፡ በከመ፡ ቃለ፡ እግዚአብሔር፡ ዘበእደዊሆሙ፡ ለአግብርቲሁ፡ ነቢያት።
10 ወባሕቱ፡ መዓተ፡ እግዚአብሔር፡ ሀለወት፡ ላዕለ፡ ይሁዳ፡ ከመ፡ ያርኅቆሙ፡ እምቅድመ፡ ገጹ፡ በእንተ፡ አበሳሁ፡ ለምናሴ፡ ወበእንተ፡ ኵሉ፡ ዘገብረ፡ ወበእንተ፡ ብዙኅ፡ ደም፡ ንጹሕ፡ ዘከዓወ፡ ኤልያቄም፡ ወመልኣ፡ ለኢየሩሳሌም፡ ደመ፡ ንጹሐ፡ ወኢፈቀደ፡ እግዚአብሔር፡ ከመ፡ ይሥርዎሙ።
11 ወዓርገ፡ ላዕሌሁ፡ ናቡከደነፆር፡ ንጉሠ፡ ባቢሎን፡ ወአሠሮ፡ በመዋቅሕተ፡ ሐፂን፡ ከመ፡ ይሰዶ፡ ብሔረ፡ ባቢሎን።
12 ወእምንዋየ፡ ቤተ፡ እግዚአብሔር፡ ወሰደ፡ ናቡከደነፆር፡ ውስተ፡ ብሔረ፡ ባቢሎን፡ ወአንበሮሙ፡ ውስተ፡ ጣዖቱ።
13 ወእለ፡ ተርፉ፡ ቃላተ፡ ኢዮአቄም፡ ወኵሉ፡ ዘገብረ፡ ነዮን፡ ጽሑፋት፡ በመጽሐፈ፡ ኢዮስያስ፡ ወበመዋዕሊሆሙ፡ ለነገሥተ፡ ይሁዳ።
14 ወኖመ፡ ኢዮአቄም፡ ምስለ፡ አበዊሁ፡ ወተቀብረ፡ በኢየሩሳሌም፡ በብሔረ፡ ጋኖዝን፡ ምስለ፡ አበዊሁ፡ ወነግሠ፡ ኢኮንያን፡ ወልዱ፡ እምድኅሬሁ።
15 ከዊኖ፡ ወልደ፡ ዓሠርቱ፡ ወሰመንቱ፡ ዓመት፡ አመ፡ ያነግሥዎ፡ ለኢኮንያን፡ ወሠለስተ፡ አውራኅ፡ ወዐሠርተ፡ ዕለተ፡ ነግሠ፡ በኢየሩሳሌ፡ ወገብረ፡ እኪተ፡ በቅድመ፡ እግዚአብሔር።
16 ወከዊኖ፡ ዓመተ፡ ፈነወ፡ ናቡከደነፆር፡ ንጉሠ፡ ባቢሎን፡ ወነሥኦ፡ ብሔረ፡ ባቢሎን፡ ምስለ፡ ንዋይ፡ ዘመፍትው፡ ዘሀሎ፡ በቤተ፡ እግዚአብሔር፡ ወአንገሦ፡ ለሴዴቅያስ፡ እኁሁ፡ ለኢዮአቄም፡ አቡሁ፡ ላዕለ፡ ይሁዳ፡ ወኢየሩሳሌም።
17 ከዊኖ፡ ወልደ፡ ዕሥራ፡ ወአሐዱ፡ ዓመት፡ ሴዴቅያስ፡ አመ፡ ያነግሥዎ፡ ወዓሠርተ፡ ወአሐደ፡ ዓመተ፡ ነግሠ፡ በኢየሩሳሌም።
18 ወገብረ፡ እኩየ፡ በቅድመ፡ እግዚአብሔር፡ አምላኩ፡ ወኢኃፈረ፡ እምቅድመ፡ ገጹ፡ ለኤርምያስ፡ ነቢይ፡ ወኢ፡ እምቃለ፡ እግዚአብሔር።
19 ወእንዘ፡ የዓሉ፡ ናቡከደነፆር፡ ንጉሠ፡ ባቢሎን፡ ዘአምሐሎ፡ በስመ፡ እግዚአብሔር፡ ወአጽንዐ፡ ክሳዶ፡ ወልቦ፡ ከመ፡ ኢይትመየጥ፡ ኀበ፡ እግዚአብሔር፡ አምላከ፡ እስራኤል።
20 ወኵሎሙ፡ ክቡራነ፡ ይሁዳ፡ ወካህናትኒ፡ ወሕዝበ፡ ምድር፡ አብዝኁ፡ ዓሊወ፡ ዕልወተ፡ በርኵሶሙ፡ ለአሕዛብ፡ ወአርኰስዎ፡ ለቤተ፡ እግዚአብሔር፡ ዘበኢየሩሳሌም።
21 ወፈነወ፡ እግዚአብሔር፡ አምላከ፡ አበዊሆሙ፡ በእደዊሆሙ፡ ለነቢያቲሁ፡ እንዘ፡ ይገይሥ፡ ኀቤሆሙ፡ ወእንዘ፡ ይፌኑ፡ ላእካኒሁ፡ እስመ፡ ይምሕክ፡ ሕዝበ፡ ዚአሁ፡ ወቅድሳተ፡ ዚአሁ።
22 ወሀለዉ፡ ይስሕቁ፡ ወይሣለቁ፡ ላዕለ፡ ላእካነሁ፡ ለእግዚአብሔር፡ ወመነኑ፡ ቃላቲሁ፡ ወይሣለቁ፡ ላዕለ፡ ነቢያቲሁ፡ እስመ፡ በጽሐ፡ መዓተ፡ እግዚአብሔር፡ ላዕለ፡ ሕዝበ፡ ዚአሁ፡ እስከ፡ ኢይትረከብ፡ ፈውስ።
23 ወአምጽአ፡ ላዕሌሆሙ፡ ንጉሠ፡ ከለዳውያን፡ ወቀተለ፡ ወራዙቲሆሙ፡ በሰይፍ፡ በቤተ፡ ቅድሳቲሆሙ፡ ወኢመሀኮ፡ ለሴዴቅያስ፡ ንጉሦሙ፡ ወለደናግሊሆሙኒ፡ ኢመሐሮን፡ ወለአእሩጊሆሙ፡ ወሰድዎሙ፡ ብሔሮሙ፡ ወኵሎ፡ አግብአ፡ እግዚአብሔር፡ ውስተ፡ እደዊሆሙ።
24 ወኵሎ፡ ንዋየ፡ ቤተ፡ እግዚአብሔር፡ ዓቢየ፡ ወንኡሰ፡ ወመዛግብተ፡ ቤተ፡ እግዚአብሔር፡ ወመዛግብተ፡ ቤተ፡ ንጉሥ፡ ወመዛግብተ፡ ቤተ፡ ዓበይቶሙ፡ ኵሎ፡ ወሰደ፡ ብሔረ፡ ባቢሎን።
25 ወአውዓዮ፡ ለቤተ፡ እግዚአብሔር፡ ወአንኀሎ፡ ለአረፍተ፡ ኢየሩሳሌም፡ ወለአዕፃዳቲሃ፡ አውዓየ፡ በእሳት፡ ወኵሎ፡ ንዋየ፡ መፍትወ፡ ወቅድወ፡ አማሰነ።
26 ወወሰደ፡ እለ፡ ተርፉ፡ ብሔረ፡ ባቢሎን፡ ወኮንዎ፡ ሎቱ፡ ወለደቂቁ፡ አግብርተ፡ እስከ፡ ንጉሦሙ፡ ለሜዶናውያን።
27 ከመ፡ ይብጻሕ፡ ቃለ፡ እግዚአብሔር፡ ዘበአፉሁ፡ ለኤርምያስ፡ ነቢይ፡ ከመ፡ ትትወከፍ፡ ምድር፡ ሰናብተ፡ ዚአሃ፡ ከመ፡ ታሰነብት፡ በኵሉ፡ መዋዕለ፡ ፂዉዋን፡ ሰንበታቲሃ፡ እስከ፡ ተፍጻሜተ፡ ሰብዓ፡ ዓመት።
28 በቀዳሚ፡ ዓመተ፡ መንግሥቱ፡ ለቂሮስ፡ ንጉሠ፡ ፋርስ፡ እምድኅረ፡ በጽሐ፡ ወተፈጸመ፡ ቃለ፡ እግዚአብሔር፡ ዘበአፉሁ፡ ለኤርምያስ፡ ነቢይ፡ አንሥአ፡ እግዚአብሔር፡ መንፈሰ፡ ቂሮስ፡ ንጉሠ፡ ፋርስ፡ ወአዘዘ፡ ይስብኩ፡ ውስተ፡ ኵሉ፡ በሐውርተ፡ ንግሠ፡ ዚአሁ፡ በመጽሐፍ፡ እንዘ፡ ይብል።
29 ከመዝ፡ ይቤ፡ ቂሮስ፡ ንጉሠ፡ ፋርስ፡ ለኵሉ፡ ነገሥተ፡ ምድር፡ ወሀበኒ፡ ወአሠልጠነኒ፡ እግዚአብሔር፡ አምላከ፡ ሰማይ፡ ወውእቱ፡ አዘዘኒ፡ ከመ፡ እሕንጽ፡ ሎቱ፡ ቤተ፡ በኢየሩሳሌም፡ በብሔረ፡ ይሁዳ፡ መኑ፡ እምኔክሙ፡ እምኵሉ፡ ሕዝበ፡ ዚአሁ፡ ዘይከውን፡ ለይኩን፡ እግዚአብሔር፡ ምስሌሁ፡ ወይሑር፡ ወይሕንጽ።