##### edition  (gez)
=== part Introduction ===
[Introduction to Revelation]
=== part Revelation ===
[Revelation]
=== chapter 1 ===
[ምዕራፍ 1]
በእንተ፡ ምጽአተ፡ እግዚእ
1 ራእዩ፡ ለዮሐንስ፡ ዘከመ፡ ርእዮ፡ ለኢየሱስ፡ ክርስቶስ። ዘወሀቦ፡ እግዚአብሔር፡ ከመ፡ ያርእዮሙ፡ ለአግብርቲሁ፡ ዘሀለዎ፡ ይኩን፡ ፍጡነ፡ ወዘይከውን፡ እምድኅረዝ። ወፈነወ፡ ምስለ፡ መልአኩ፡ ኀበ፡ ዮሐንስ፡ ገብሩ።
2 ዘኮነ፡ ስምዐ፡ በእንተ፡ ቃለ፡ እግዚአብሔር። ወበእንተ፡ ስምዑ፡ ለኢየሱስ፡ ክርስቶስ፡ ወበእንተ፡ ኵሉ፡ ዘርእየ።
3 ወብፁዕ፡ ውእቱ፡ ዘያነብቦ፡ ወዘይሰምዕ፡ ቃለ፡ ተነብዮቱ፡ ለዝንቱ፡ መጽሐፍ። ወዘየዐቅብ፡ ዘጽሑፍ፡ ውስቴቱ፡ እስመ፡ ቅሩብ፡ ዘመኑ።
4 ዘጸሐፈ፡ ዮሐንስ፡ ለሰብዑ፡ አብያተ፡ ክርስቲያናት፡ እለ፡ ውስተ፡ እስያ። ሞገሱ፡ ለክሙ፡ ወሰላሙ፡ እምኀበ፡ ዘሀሎ፡ ወይሄሉ፡ ዘመጽአ፡ ወዘይመጽእ። ወእምነ፡ ሰብዐቱ፡ መንፈስ፡ ዘቅድመ፡ መንበሩ፡ ለኢየሱስ፡ ክርስቶስ።
5 ዘውእቱ፡ ስምዕ፡ መሃይምን። ወውእቱ፡ ቀደመ፡ በኵረ፡ ከዊነ፡ እምነ፡ ምዉታን፡ ዘተንሥአ። ወውእቱ፡ መኰንኖሙ፡ ለነገሥተ፡ ምድር። ውእቱ፡ ዘአፍቀረክሙ፡ ወኀፀበክሙ፡ እምኀጣውኢክሙ፡ በደሙ።
6 ወረሰየክሙ፡ ውስተ፡ መንግሥተ፡ ቅድሳተ፡ አቡሁ፡ እግዚአብሔር። ዘሎቱ፡ ስብሐት፡ ወኀይል፡ ለዓለመ፡ ዓለም፡ አሜን።
7 ናሁ፡ ይመጽእ፡ በደመና፡ ሰማይ። ወትሬእዮ፡ ኵላ፡ ዐይን፡ ወእልክቱሂ፡ እለ፡ ወግእዎ። ወይበክዩ፡ በእንቲኣሁ፡ ኵሎሙ፡ አሕዛበ፡ ምድር፡ እወ፡ ወአማን።
8 አነ፡ ውእቱ፡ አልፋ፡ ወኦ። ይቤ፡ እግዚአብሔር፡ ዘሀሎ፡ ወይሄሉ፡ ዘመጽአ፡ ወዘይመጽእ። ዘውእቱ፡ ይመልክ፡ ኵሎ።
በእንተ፡ ሰብዑ፡ መኀትው፡ ወዘማእከሎሙ
9 ወአነ፡ ዮሐንስ፡ እኁክሙ፡ ወሱታፌክሙ፡ በሕማምክሙ፡ ወበመንግሥትክሙ፡ ወበትዕግሥትክሙ። በእንተ፡ ትዕግሥቱ፡ ለኢየሱስ፡ ክርስቶስ። ወእንዘ፡ ሀሎኩ፡ ውስተ፡ ደሴት፡ እንተ፡ ስማ፡ ፍጥሞ። በእንተ፡ ቃለ፡ እግዚአብሔር፡ ወበእንተ፡ ስምዑ፡ ለኢየሱስ።
10 መጽአ፡ ላዕሌየ፡ መንፈስ፡ በዕለተ፡ እሑድ። ወሰማዕኩ፡ ቃለ፡ ዐቢየ፡ እምድኅሬየ፡ ከመ፡ ቃለ፡ ቀርን።
11 ወይቤለኒ፡ ጸሐፍ፡ እንከ፡ ዘትሬኢ፡ ወዘትሰምዕ፡ ውስተ፡ መጽሐፍ። ወፈኑ፡ ለአብያተ፡ ክርስቲያናት፡ ሰብዐቱ፡ እለ፡ ውስተ፡ እስያ። ዘኤፌሶን፡ ወዘሴሜርኔስ፡ ወዘጴርጋሞን፡ ወዘትያጥሮን፡ ወዘሰርዴስ፡ ወዘፊልድልፍያ፡ ወዘሎዶቅያ።
12 ወተመየጥኩ፡ እርአይ፡ ዝኰ፡ ቃለ፡ ዘይትናገር፡ ምስሌየ። ወሶበ፡ ተመየጥኩ፡ ናሁ፡ እሬኢ፡ ሰብዑ፡ መኀትወ፡ ዘወርቅ።
13 ወማእከለ፡ ሰብዑ፡ መኀትወ፡ ይነብር፡ ከመ፡ ወልደ፡ ዕጓለ፡ እመሕያው። ወይለብስ፡ ልብሰ፡ ጶዴር፡ ወቅኑት፡ ውስተ፡ ሐቌሁ፡ በቅናት፡ ዘወርቅ።
14 ወጸዐዳ፡ ርእሰ፡ ወሥዕርቱ፡ ከመ፡ ፀምር፡ ጸዐዳ። ወአዕይንቲሁ፡ ከመ፡ ነደ፡ እሳት።
15 ወእገሪሁ፡ ከመ፡ ብርተ፡ ሊባኖስ፡ ዘአርሰንዎ፡ በእሳት። ወቃሉ፡ ከመ፡ ቃለ፡ ማይ፡ ብዙኀ።
16 ወውስተ፡ እዴሁ፡ ዘየማን፡ ሰብዐቱ፡ ኮከብ። ወይወፅእ፡ እምነ፡ አፉሁ፡ ሰይፍ፡ በሊሕ፡ ዘክልኤ፡ አፉሁ። ወገጹ፡ ከመ፡ ፀሓይ፡ ብሩህ፡ ዘያስተርኢ፡ በኀይሉ።
17 ወሶበ፡ ርኢክዎ፡ ወደቁ፡ ውስተ፡ እገሪሁ። ወኮንኩ፡ ከመ፡ በድን። ወአኀዘኒ፡ በየማኑ፡ ወአንሥአኒ፡ ወይቤለኒ፡ ኢትፍራህ። አነ፡ ውእቱ፡ ቀዳማዊ፡ ወደኃራዊ፡ ዘሕያው።
18 ወአንሰ፡ ኮንኩ፡ ከመ፡ በድን፡ ወይቤለኒ። ናሁ፡ ሕያው፡ አነ፡ ለዓለመ፡ ዓለም። ወኀቤየ፡ ሀሎ፡ መራኁተ፡ ሞት፡ ወሲኦል።
በእንተ፡ ሰብዐቱ፡ አብያተ፡ ክርስቲያናት፡ ወመላእክቲሆሙ
19 ጸሐፍ፡ እንከ፡ ዘትሬኢ፡ ዘህልው፡ ወዘሀለዎ፡ ይኩን፡ እምድኅረዝ። ወፍካሬሆሙሰ፡ ለሰብዐቱ፡ ከዋክብት፡ እለ፡ ርኢከ፡ ውስተ፡ የማኑ። ወሰብዐቱ፡ መኀትው፡ እለ፡ ወርቅ። ዝንቱ፡ ሰብዐቱ፡ ከዋክብት፡ መላእክት፡ እሙንቱ። እለ፡ ሰብዐቱ፡ አብያተ፡ ክርስቲያናት። ወእልክቱኒ፡ ሰብዐቱ፡ መኀትው፡ ሰብዑ፡ አብያተ፡ ክርስቲያናት፡ እማንቱ።
=== chapter 2 ===
[ምዕራፍ 2]
1 ወጸሐፍ፡ ሎቱ፡ ለመልአከ፡ ቤተ፡ ክርስቲያን፡ ዘኤፌሶን። ከመ፡ ዝ፡ ይቤለከ፡ አኃዜ፡ ኵሉ፡ ዘያጸንዕ፡ ሰብዐተ፡ ከዋክብተ፡ በየማኑ። ወዘየሐውር፡ በማእከለ፡ ሰቡዑ፡ መኀትው፡ ዘወርቅ። ርኢኩ፡ ግብረከ፡ ወጻማከ፡ ወትዕግሥተከ።
2 ወከመ፡ ኢትክል፡ ጸዊሮቶሙ፡ ለእኩያን። እለ፡ ይብሉ፡ ርእሶሙ፡ ሐዋርያተ፡ ወኢኮኑ። ወረከብካሆሙ፡ ከመ፡ ሐሰዉ።
3 ወተዐገሥከ፡ ወጾርከ፡ በእንተ፡ ስምየ፡ ወኢተቈጣዕከ።
4 ወባሕቱ፡ ቦ፡ ዘአኀይሰከ፡ እስመ፡ ኀደገ፡ አፍቅሮተከ፡ ዘቀዲሙ።
5 ወተዘከር፡ በበይነ፡ ምንት፡ ወደቀ፡ ነስሕ፡ እንከ፡ ወእመ፡ አኮሰ፡ እመጽእ፡ ወአድለቀልቃ፡ ለማኅቶትከ፡ እምነ፡ መካና፡ እመ፡ ኢነሳሕከ። ወከመ፡ ቀዲሙ፡ ግብረከ፡ እመ፡ ኢገበርከ።
6 ወዝንቱሰ፡ ብከ፡ እስመ፡ ትጸልእ፡ ምግባሮሙ፡ ለኒቆላውያን። በከመ፡ አነ፡ እጸልእ፡ ዘቦ፡ እዝን፡ ሰሚዐ፡ ለይስማዕ።
7 ምንተ፡ ይቤ፡ መንፈስ፡ ቅዱስ፡ ለአብያተ፡ ክርስቲያናት። ወለዘሞአሰ፡ እሁቦ፡ ይብላዕ፡ እምውስተ፡ ዕፀ፡ ሕይወት፡ ዘሀሎ፡ ውስተ፡ ገነቱ፡ ለአምላኪየ።
8 ወጸሐፍ፡ ሎቱ፡ ለመልአከ፡ ቤተ፡ ክርስቲያን፡ ዘሴሜርኔስ። ከመ፡ ዝ፡ ይቤ፡ ዘውእቱ፡ ቀዳማዊ፡ ወውእቱ፡ ደኃራዊ፡ ዘሞተ፡ ወሐይወ።
9 አእምር፡ ሕማመከ፡ ወኀጣይኢከ፡ ወባሕቱ፡ ብዑል፡ አንተ። ወፅርፈቶሙ፡ ለእለ፡ ይብሉ፡ አይሁድ፡ ንሕነ፡ ወኢኮኑ። አላ፡ ማኅበሩ፡ ለሰይጣን፡ እሙንቱ። ኢትፍራህ፡ ምንተኒ፡ በእንተ፡ ዘሀለወከ፡ ትሕምም።
10 እስመ፡ ናሁ፡ ሰይጣን፡ ይወዲ፡ እምኔክሙ፡ ውስተ፡ ሞቅሕ። ከመ፡ ትትዐቀፉ፡ ወተሐሙ፡ ዐሡረ፡ መዋዕለ። ወኩን፡ መሃይምነ፡ እስከ፡ ለሞት። ወእሁበከ፡ አክሊለ፡ ዘሕይወት። ዘቦ፡ እዝን፡ ሰሚዐ፡ ለይስማዕ። ምንተ፡ ይቤ፡ መንፈስ፡ ቅዱስ፡ ለአብያተ፡ ክርስቲያናት።
11 ወዘሰ፡ ሞአ፡ ኢይመውት፡ ዳግመ፡ ሞተ።
12 ወጸሐፍ፡ ሎቱ፡ ለመልአከ፡ ቤተ፡ ክርስቲያን፡ ዘጴርጋሞን።
13 ከመ፡ ዝ፡ ይቤ፡ ዘቦ፡ ሰይፍ፡ በሊሕ፡ ዘክልኤ፡ አፉሁ። አአምር፡ ኀበ፡ ታነብር፡ እዴከ፡ መንበሩ፡ ለሰይጣን። ወታጸንዕ፡ ስምየ፡ ወኢክሕድከ፡ ሃይማኖትየ። ወበመዋዕል፡ ዘቀተልዎ፡ በኀቤክሙ፡ ለጻድቅየ፡ መሃይምን፡ በኀበ፡ ይነብር፡ ሰይጣን።
14 ወባሕቱ፡ ቦ፡ ዘአኀይሰከ፡ እስመ፡ ሀለዉ፡ ዝየ። እለ፡ ያጸንዑ፡ ትምህርቶ፡ ለበለዓም፡ መምህሩ፡ ለባላቅ። ወይወድዩ፡ ዕቅፍተ፡ ቅድሜሆሙ፡ ለደቂቀ፡ እስራኤል። ከመ፡ ይብልዑ፡ ዝቡሐ፡ ለአማልክት፡ ወይዘምዉ።
15 ወእሉኒ፡ ሀለዉ፡ ኀቤከ፡ እለ፡ ያጸንዑ፡ ትምህርቶሙ፡ ለኒቆላውያን።
16 ወይእዜኒ፡ ነስሕ፡ ወእመ፡ አኮሰ፡ እመጽእ፡ ወእጸብኦሙ፡ ፍጡነ፡ በሰይፈ፡ አፉየ። ዘቦ፡ እዝን፡ ሰሚዐ፡ ለይስማዕ። ምንተ፡ ይቤ፡ መንፈስ፡ ቅዱስ፡ ለአብያተ፡ ክርስቲያናት።
17 ለዘሞአ፡ እሁቦ፡ መና፡ ዘኅቡእ፡ ወእሁቦ፡ መጽሐፈ፡ ብርሃን። ወውስተ፡ ውእቱ፡ መጽሐፍ፡ ጽሑፍ፡ ስም፡ ሐዲስ። ዘአልቦ፡ ዘየአምሮ፡ ዘእንበለ፡ ዘነሥኦ።
18 ወጸሐፍ፡ ሎቱ፡ ለመልአከ፡ ቤተ፡ ክርስቲያን፡ ዘትያጥሮን። ከመ፡ ዝ፡ ይቤ፡ ወልደ፡ እግዚአብሔር። ዘአዕይንቲሁ፡ ከመ፡ ነደ፡ እሳት። ወእገሪሁ፡ ከመ፡ ርስነ፡ ብርተ፡ ሊባኖስ።
19 አአምር፡ ግብረከ፡ ወተፋቅሮተከ፡ ወሃይማኖተከ፡ ወመልእክተከ፡ ወትዕግሥተከ። ወግብርከኒ፡ ደኃሪት፡ ትበዝኅ፡ እምነ፡ ቀዳሚት።
20 ወባሕቱ፡ ቦ፡ ዘአኀይሰከ፡ እስመ፡ አርመምከ፡ ላቲ፡ ለኤልዛቤል፡ ብእሲት። እንተ፡ ትብል፡ ርእሳ፡ ነቢይት፡ ወኢኮነት። ወትሜህር፡ በዘታስሕቶሙ፡ ወታዜምዎሙ፡ ለአግብርትየ። ከመ፡ ይብልዑ፡ ዝቡሐ፡ ለአማልክት።
21 ወወሀብክዋ፡ መዋዕለ፡ በዘትኔስሕ፡ ወአበየት፡ ነስሖ፡ እምነ፡ ዝሙታ።
22 ወናሁ፡ አገብኣ፡ ውስተ፡ ዘቀዳሚ፡ ምስካባ። ወለእለ፡ ዘመዉ፡ ምስሌሃ፡ ውስተ፡ ዐቢይ፡ ሥቃይ፡ አመ፡ ኢነስሐት፡ እምነ፡ ምግባራ።
23 ወእቀትል፡ ደቂቃ፡ በሞት፡ ወየአምሩ፡ ኵሉ፡ አብያተ፡ ክርስቲያናት። ከመ፡ አነ፡ ውእቱ፡ ዘእፈትን፡ ልበ፡ ወኩልያተ። ወእፈድየክሙ፡ ለለ፡ አሐዱ፡ አሐዱ፡ እምኔክሙ፡ በከመ፡ ምግባሪክሙ።
24 ወለክሙኒ፡ እብል፡ ለእለ፡ ተረፍክሙ፡ ውስተ፡ ትያጥሮን። ለእለ፡ አልብክሙ፡ ዝንቱ፡ ትምህርት። ለእለ፡ ኢተአምርዋ፡ ለጕሕሉተ፡ ሰይጣን። ዘይብል፡ እወዲ፡ ላዕሌክሙ፡ ክልኤ፡ ክበደ።
25 ወባሕቱ፡ ዘብክሙ፡ አጽንዑ፡ እስከ፡ አመ፡ እሣሀል።
26 ወለዘሞአ፡ ወዐቀበ፡ ግብርየ፡ ለዝሉፉ፡ እሁቦ፡ ሥልጣነ፡ ላዕለ፡ አሕዛብ።
26 ወይርዕዮሙ፡ በበትረ፡ ኀጺን፡ ወከመ፡ ንዋየ፡ ለብሓ፡ ይቀጠቅጦሙ።
28 በከመ፡ አነ፡ ነሣእኩ፡ እምኀበ፡ አቡየ። ወእሁቦ፡ ኮከበ፡ ጽባሕ። ዘቦ፡ እዝን፡ ሰሚዐ፡ ለይስማዕ።
29 ምንተ፡ ይቤ፡ መንፈስ፡ ቅዱስ፡ ለአብያተ፡ ክርስቲያናት።
=== chapter 3 ===
[ምዕራፍ 3]
1 ወጸሐፍ፡ ሎቱ፡ ለመልአከ፡ ቤተ፡ ክርስቲያን፡ ዘሰርዴሲሶን። ከመ፡ ዝ፡ ይቤ፡ ዘቦ፡ ሰብዐቱ፡ መንፈስ፡ ዘእምኀበ፡ እግዚአብሔር፡ ወሰብዐቱ፡ ኮከብ።
2 አአምር፡ ግብረከ፡ ከመ፡ ስምከ፡ ሕያው። ወምዉት፡ እንተ፡ ትጋህ፡ እንከ። ወአጽንዖሙ፡ ለእለ፡ አልጸቁ፡ ይሙቱ። እስመ፡ ኢረከብኩ፡ ግብረከ፡ ፍጹመ፡ በቅድመ፡ አምላኪየ።
3 ወተዘከር፡ እፎ፡ ነሣእከ፡ ወሰማዕከ፡ ነስሕ፡ እንከ። ወእመሰ፡ ኢተጋህከ፡ እበጽሐከ፡ ግብተ፡ ከመ፡ ሰራቂ። ወኢተአምር፡ በአይ፡ ሰዓት፡ እመጽእ፡ ላዕሌከ።
4 ወባሕቱ፡ ብከ፡ ኅዳጣን፡ ሰብእ፡ ውስተ፡ ሰርዴስ። እለ፡ ኢገመኑ፡ አልባሲሆሙ፡ ምስለ፡ አንስት፡ ወየሐውሩ፡ ምስሌከ፡ በንጽሕ።
5 ወለዘሞአሰ፡ ከመ፡ ዝ፡ ልብስ፡ ንጹሕ፡ ይደልዎ። ወኢይደመሰስ፡ ስሙ፡ እምነ፡ መጽሐፈ፡ ሕይወት። ወአአምኖ፡ በስሙ፡ በቅድመ፡ አቡየ፡ ወበቅድመ፡ መላእክቲሁ። ዘቦ፡ እዝን፡ ሰሚዐ፡ ለይስማዕ።
6 ምንተ፡ ይቤ፡ መንፈስ፡ ቅዱስ፡ ለአብያተ፡ ክርስቲያናት።
7 ወጸሐፍ፡ ሎቱ፡ ለመልአከ፡ ቤተ፡ ክርስቲያን፡ ዘፊልድልፍያ። ከመ፡ ዝ፡ ይቤ፡ ቅዱስ፡ ወጻድቅ። ዘኀቤሁ፡ ይነብር፡ ኵሉ፡ መራኁተ፡ ቤተ፡ ዳዊት። ወአልቦ፡ ዘያርኁ፡ ወአልቦ፡ ዘየዐጹ፡ ዘእንበሌሁ።
8 አአምር፡ ግብረከ፡ ወናሁ፡ ወሀብኩከ፡ ቅድሜከ፡ ኆኅተ፡ ርኁተ። ወአልቦ፡ ዘይክል፡ ዐጺዎታ፡ እስመ፡ ውኁድ፡ ኀይልከ። ወዐቀብከ፡ ቃልየ፡ ወኢክሕድከ፡ ስምየ።
9 ወናሁ፡ አነ፡ እሁበከ፡ እምነ፡ ማኅበሩ፡ ለሰይጣን። ወእምነ፡ እለ፡ ይብሉ፡ ርእሶሙ፡ አይሁድ፡ ንሕነ። ወኢኮኑ፡ ወይሔስዉ፡ ወይሰግዱ፡ ቅድመ፡ እገሪከ። ወየአምሩ፡ ከመ፡ አነ፡ አፍቀርኩከ።
10 እስመ፡ ዐቀብከ፡ ቃልየ፡ ወትዕግሥትየ። ወበእንተ፡ ዝንቱ፡ አነኒ፡ ዐቀብኩከ፡ እምነ፡ ሰዓተ፡ መንሱት። እንተ፡ ሀለወት፡ ትምጻእ፡ ውስተ፡ ኵሉ፡ ዓለም። ከመ፡ ታመክሮሙ፡ ለእለ፡ ይነብሩ፡ ውስተ፡ ምድር።
11 ወናሁ፡ እመጽእ፡ ፍጡነ። ወአጽንዕ፡ ዘብከ፡ ከመ፡ አልቦ፡ ዘይነሥእ፡ አክሊለከ።
12 ወለዘሞአሰ፡ እሬስዮ፡ ዐምደ፡ ውስተ፡ መቅደሱ፡ ለአምላኪየ። ወኢይወፅእ፡ እንከ፡ አፍኣ፡ ወእጽሕፍ፡ ላዕሌሁ፡ ስሞ፡ ለአምላኪየ። ወስመ፡ ሀገሩ፡ ሐዳስ፡ ኢየሩሳሌም። እንተ፡ ትወርድ፡ እምሰማይ፡ እምኀበ፡ አምላኪየ። ወስምየኒ፡ ሐዲሰ፡ ዘቦ፡ እዝን፡ ሰሚዐ፡ ለይስማዕ።
13 ምንተ፡ ይቤ፡ መንፈስ፡ ቅዱስ፡ ለአብያተ፡ ክርስቲያናት።
14 ወጸሐፍ፡ ሎቱ፡ ለመልአከ፡ ቤተ፡ ክርስቲያን፡ ዘሎዶቅያ። ከመ፡ ዝ፡ ይቤ፡ ዘውእቱ፡ አሚን፡ ወውእቱ፡ ስምዕ፡ መሃይምን፡ ወጻድቅ። ወውእቱ፡ እምቅድመ፡ ኵሉ፡ ዘፈጠረ፡ እግዚአብሔር።
15 ኣእምር፡ ግብረከ፡ ከመ፡ ኢኮንከ፡ ቈሪረ፡ ወኢኮንከ፡ ምዉቀ። ወርቱዕሰ፡ ትኩን፡ ቈሪረ፡ ወእመ፡ አኮ፡ ምዉቀ።
16 እስመ፡ ማእከላይ፡ አንተ። ወትብል፡ ብዑል፡ አነ፡ ወብዕልኩ፡ ወአልቦ፡ ዘእፈቅድ፡ ምንተኒ፡ እምኀቤከ።
17 ወለሊከ፡ ተአምር፡ ከመ፡ ነዳይ፡ ወምስኪን፡ አንተ፡ ወዕሩቅ፡ ወዕዉር፡ አንተ።
18 ወይእዜኒ፡ እብለከ፡ ትንሣእ፡ እምኀቤየ፡ ወርቀ፡ ዚኣየ። ዘንጡፍ፡ ወጽሩይ፡ በእሳት፡ ከመ፡ ትብዐል፡ ብየ። ወልብሰኒ፡ ዘዚኣየ፡ ትልበስ፡ ዘንጹሕ፡ ከመ፡ ትትከደን፡ ዕርቃነከ። ወበፈውሰ፡ ዚኣየ፡ ትትኰሐል፡ አዕይንቲከ፡ ከመ፡ ትርአይ።
19 አንሰ፡ ለእለ፡ አፈቅር፡ እጌሥጽ፡ ወእሜህር፡ ቅናእ፡ እንከ፡ ለንስሓ።
20 ወናሁ፡ ቆምኩ፡ ኀበ፡ ኆኅት፡ ወእጐደጕድ። ወእመ፡ ቦ፡ ዘሰምዐኒ፡ ቃልየ፡ ወአርኀወኒ፡ እበውእ፡ ሶቤሃ። ወአዐርፍ፡ ምስሌሁ፡ ወውእቱኒ፡ ምስሌየ።
21 ወለዘሞአ፡ እሁቦ፡ ይንበር፡ ምስሌየ፡ ውስተ፡ መንበርየ። በከመ፡ አነ፡ ሞእኩ፡ ወነበርኩ፡ ምስለ፡ አቡየ፡ ውስተ፡ መንበሩ። ዘቦ፡ እዝን፡ ሰሚዐ፡ ለይስማዕ።
22 ምንተ፡ ይቤ፡ መንፈስ፡ ቅዱስ፡ ለአብያተ፡ ክርስቲያናት።
=== chapter 4 ===
[ምዕራፍ 4]
በእንተ፡ መንበር፡ ወአርባዕቱ፡ እንስሳ
1 ወእምድኅረ፡ ዝንቱ፡ ርኢኩ፡ ኆኅተ፡ ርኁተ፡ ውስተ፡ ሰማይ። ወቀዳማየ፡ ቃለ፡ ሰማዕኩ፡ ከመ፡ ቃለ፡ መጥቅዕ። ይትናገር፡ ምስሌየ፡ ወይቤለኒ። ዕርግ፡ ዝየ፡ ወአነ፡ አርእየከ፡ ዘሀለወ፡ ይኩን፡ እምድኅረ፡ ዝንቱ።
2 ወበጊዜሃ፡ ኮንኩ፡ በመንፈስ። ወናሁ፡ ርኢኩ፡ መንበር፡ ውስተ፡ ሰማይ፡ ይነብር።
3 ወዘዲቤሁ፡ ይነብር፡ ይመስል፡ ኀብሩ፡ ከመ፡ ዕንቈ፡ ኢያሰጲድ፡ ወሰርዲኖ። ወካህናት፡ እለ፡ ዐውዱ፡ ለውእቱ፡ መንበር፡ ይመስል፡ ኅብሮሙ፡ ከመ፡ መረግድ።
4 ወበዐውዱ፡ ለውእቱ፡ መንበር፡ ዕሥራ፡ ወአርባዕቱ፡ መናብርት። ወዲበ፡ ውእቶን፡ መናብርት፡ ይነብሩ፡ ዕሥራ፡ ወአርባዕቱ፡ ሊቃናት። ወይለብሱ፡ ጸዐድወ፡ አልባሰ። ወዲበ፡ አርእስቲሆሙ፡ አክሊላት፡ ዘወርቅ።
5 ወእምነ፡ ውእቱ፡ መንበር፡ ይወፅእ፡ መብረቅ፡ ወፀዓዕ፡ ወነጐድጓድ። ወቅድሜሁ፡ ለውእቱ፡ መንበር፡ የኀትዉ፡ ሰብዑ፡ መኀትው። ዘውእቱ፡ መንፈስ፡ ቅዱስ፡ ዘእግዚአብሔር።
6 ወቅድሜሁ፡ ለውእቱ፡ መንበር፡ ባሕር፡ ከመ፡ እንተ፡ በረድ። ወእምገበዋቲሁ፡ ለውእቱ፡ መንበር፡ አርባዕቱ፡ እንስሳሁ። ወምሉኣን፡ እሙንቱ፡ አዕይንተ፡ እምቅድም፡ ወእምድኅር።
7 ወቀዳማዊ፡ ይመስል፡ ከመ፡ አንበሳ። ወካልኡ፡ ይመስል፡ ከመ፡ ላሕም። ወሣልሱ፡ ይመስል፡ ከመ፡ ገጸ፡ ዕጓለ፡ እመሕያው።
8 ወራብዑ፡ ይመስል፡ ከመ፡ ንስር፡ ዘይሰርር። ወለእሉ፡ አርባዕቱ፡ እንስሳሁ፡ ለለ፡ አሐዱ፡ አሐዱ፡ እምኔሆሙ፡ በበ፡ ስድስቱ፡ ክነፊሆሙ። ወእንተ፡ ኵለንታሆሙ፡ ምሉኣን፡ እሙንቱ፡ አዕይንተ። ወአልቦሙ፡ ዕረፍት፡ መዓልተ፡ ወሌሊተ። እንዘ፡ ይብሉ፡ ቅዱስ፡ ቅዱስ፡ ቅዱስ፡ እግዚአብሔር፡ አምላከ፡ አማልክት፡ ዘሀሎ፡ ወይሄሉ።
9 ወሶበ፡ ከመ፡ ዝ፡ ይብሉ፡ እልክቱ፡ እንስሳሁ። ወይሁቡ፡ ስብሐተ፡ ወክብረ፡ ወአኰቴተ፡ ለዝክቱ። ዘይነብር፡ ዲበ፡ መንበር፡ ዘሕያው፡ ለዓለመ፡ ዓለም።
10 ወሰገዱ፡ ሎቱ፡ ቅድሜሁ፡ ለዝክቱ፡ ዘይነብር፡ ዲበ፡ መንበር። እልክቱ፡ ዕሥራ፡ ወአርባዕቱ፡ ሊቃናት፡ ለዝክቱ፡ ዘሕያው፡ ለዓለመ፡ ዓለም።
11 ወይወስዱ፡ አክሊላቲሆሙ፡ ቅድመ፡ መንበሩ፡ ወይብልዎ። ለከ፡ ይደሉ፡ እግዚኦ፡ አምላክነ፡ ስብሐት፡ ወክብር፡ ወኀይል። እስመ፡ አንተ፡ ፈጠርከ፡ ኵሎ፡ ወበፈቃደ፡ ዚኣከ፡ ይሄሉ፡ ኵሉ፡ ዘተፈጥረ።
=== chapter 5 ===
[ምዕራፍ 5]
በእንተ፡ መጽሐፍ፡ ኅትምት
1 ወእምዝ፡ ርኢኩ፡ ውስተ፡ የማኑ፡ ለውእቱ፡ ዘይነብር፡ ዲበ፡ መንበር። መጽሐፈ፡ ጽሕፈተ፡ እንተ፡ ውስጣ፡ ወእንተ፡ አፍኣሃ። ወኅትምተ፡ በሰብዐቱ፡ ማኅተም።
2 ወርኢኩ፡ መልአከ፡ ዐቢይ፡ ይጸርሕ፡ ወይብል፡ በቃል፡ ዐቢይ። ለመኑ፡ ይደልዎ፡ ይክሥታ፡ ለዛቲ፡ መጽሐፍ፡ ወይፍታሕ፡ ማኅተሚሃ።
3 ወአልቦ፡ ዘክህለ፡ ከሢቶታ፡ ለይእቲ፡ መጽሐፍ። ወኢ፡ ርእዮታ፡ ኢ፡ በሰማይ፡ ወኢ፡ በምድር።
4 ወብዙኃን፡ እለ፡ በከዩ፡ ወአነሂ፡ ምስሌሆሙ። እስመ፡ አልቦ፡ ዘተረክበ፡ ዘይደልዎ፡ ይክሥታ፡ ለይእቲ፡ መጽሐፍ፡ ወይርአያ።
5 ወይቤለኒ፡ አሐዱ፡ እምውስተ፡ እልክቱ፡ ሊቃናት፡ ኢትብኪ። ናሁ፡ ሞአ፡ አንበሳ፡ ዘእምነገደ፡ ይሁዳ፡ ዘእምውስተ፡ ሥርዉ፡ ለዳዊት። ከመ፡ ይፍትሓ፡ ለይእቲ፡ መጽሐፍ፡ ወለማኅተሚሃ።
6 ወርኢኩ፡ ማእከለ፡ ዝኩ፡ መንበር፡ ወእልክቱ፡ አርባዕቱ፡ እንስሳሁ። ወማእከለ፡ እልክቱ፡ ዕሥራ፡ ወአርባዕቱ፡ ሊቃናት። ይቀውም፡ በግዕ፡ ከመ፡ ዘርጉዝ፡ ውእቱ። ወቦ፡ ሰብዐቱ፡ አቅርንት፡ ወሰብዐቱ፡ አዕይንት። ወዝንቱ፡ ውእቱ፡ መንፈሱ፡ ለእግዚአብሔር፡ ዘተፈነወ፡ ውስተ፡ ኵላ፡ ምድር።
7 ወመጽአ፡ ወመጠዋ፡ እምነ፡ የማኑ፡ ለዝክቱ፡ ዘይነብር፡ ዲበ፡ መንበር።
8 ወሶበ፡ ተመጠዋ፡ ለይእቲ፡ መጽሐፍ፡ ሰገዱ፡ ሎቱ፡ ቅድሜሁ፡ ለውእቱ፡ በግዕ። እልክቱ፡ ዕሥራ፡ ወአርባዕቱ፡ ሊቃናት፡ ወእልክቱ፡ አርባዕቱ፡ እንስሳሁ። ወያጸንዑ፡ ኵሎሙ፡ ጽዋዓተ፡ ወርቅ፡ ዘምሉእ፡ ዕጣነ፡ ወመሰንቆ፡ መዝሙር። ወዝ፡ ውእቱ፡ ጸሎቶሙ፡ ለቅዱሳን።
9 ወይዜምሩ፡ በመዝሙር፡ ሐዲስ፡ ወይብሉ። ይደልወከ፡ ትንሥኣ፡ ለዛቲ፡ መጽሐፍ፡ ወትፍታሕ፡ ማኅተሚሃ። እስመ፡ ተቀተልከ፡ ወተሣየጥከ፡ በደምከ፡ ለእግዚአብሔር። እምነ፡ ኵሉ፡ ሕዝብ፡ ወአሕዛብ፡ ወነገድ፡ ወበሓውርት።
10 ወረሰይከ፡ እምኔሆሙ፡ ለመንግሥተ፡ እግዚአብሔር፡ ካህናተ፡ ወነገሥተ። ከመ፡ ይምልኩ፡ ኵሎ፡ ምድረ።
11 ወሰማዕኩ፡ ቃለ፡ መላእክት፡ ብዙኃን፡ በዐውዱ፡ ለውእቱ፡ መንበር፡ ወዘእንስሳሁኒ፡ ወዘእልክቱኒ፡ ሊቃናት። ወኍልቆሙሰ፡ እልፍ፡ ወአእላፍ፡ ወትእልፊተ፡ አእላፋት፡ ዘእልፍ፡ አግዓዚ።
12 ወይብሉ፡ በቃል፡ ዐቢይ፡ ይደልዎ፡ ለውእቱ፡ በግዕ፡ ዘተቀትለ። ከመ፡ ይንሣእ፡ ኀይለ፡ ወብዕለ፡ ወጥበበ፡ ወጽንዐ። ወመንግሥተ፡ ወክብረ፡ ወስብሐተ፡ ወበረከተ።
13 ወኵሉ፡ ዘተፈጥረ፡ ዘበሰማይ፡ ወዘበምድር፡ ወዘታሕተ፡ ምድር። ወዘውስተ፡ ባሕር፡ ወኵሉ፡ ዘውስቴቶሙ፡ ይብሉ። ስብሐት፡ ወክብር፡ ወኀይል፡ ወበረከት። ለዘይነብር፡ ዲበ፡ መንበሩ፡ ወለበግዑ፡ ለዓለመ፡ ዓለም፡ አሜን።
14 ወይብሉ፡ እልክቱ፡ አርባዕቱ፡ እንስሳሁ፡ አሜን፡ ወሰገዱ፡ ሎቱ፡ እልክቱ፡ ሊቃናት።
=== chapter 6 ===
[ምዕራፍ 6]
በእንተ፡ አርባዕቱ፡ አፍራስ፡ ወዘይጼዐንዎሙ
1 ወሶበ፡ ፈትሐ፡ ዝክቱ፡ በግዕ፡ አሐደ፡ ማኅተመ፡ እምነ፡ ሰብዐቱ፡ ማኅተሚሃ። ይቤለነ፡ አሐዱ፡ እምነ፡ እልክቱ፡ አርባዕቱ፡ እንስሳሁ። ነዐ፡ ርኢ፡ ወሰማዕኩ፡ ቃሎ፡ ከመ፡ ነጐድጓድ።
2 ወርኢኩ፡ ናሁ፡ ፈረስ፡ ጸዐዳ፡ ይወፅእ፡ ወዘይጼዐኖ፡ ቀስተ፡ ያጸንዕ። ወወሀብዎ፡ አክሊለ፡ ወወፅአ፡ ከመ፡ ይማእ፡ ወሞአ።
3 ወሶበ፡ ፈትሐ፡ ካልአ፡ ማኅተመ። ይቤለኒ፡ ካልእ፡ እምውስተ፡ እንስሳሁ፡ ነዐ፡ ርኢ።
4 ወወፅአ፡ ካልእ፡ ፈረስ፡ ቀይሕ፡ ወአዘዝዎ፡ ለዘይጼዐኖ። ከመ፡ ይንሣእ፡ ሰላመ፡ እምነ፡ ምድር፡ ከመ፡ ይትቃተሉ፡ በበይናቲሆሙ። ወመጠውዎ፡ ዐቢየ፡ መጥባሕተ።
5 ወሶበ፡ ፈትሐ፡ ሣልሰ፡ ማኅተመ። ይቤለኒ፡ ሣልስ፡ እምውስተ፡ እንስሳሁ፡ ነዐ፡ ትርአይ። ወወፅአ፡ ፈረስ፡ ጸሊም፡ ወዘይጼዐኖ፡ መዳልወ፡ ያጸንዕ።
6 ወሰማዕኩ፡ ቃለ፡ በማእከሎሙ፡ ለእልክቱ፡ አርባዕቱ፡ እንስሳሁ፡ ከመ፡ ቃለ፡ ንስር። ወይብል፡ መስፈርተ፡ ሥርናይ፡ በዲናር። ወሠለስቱ፡ መስፈርተ፡ ሰገም፡ በዲናር። ወወይንሰ፡ ወቅብዕ፡ ኢየዐብሩ።
7 ወሶበ፡ ፈትሐ፡ ራብዐ፡ ማኅተመ። ይቤለኒ፡ ራብዕ፡ እምነ፡ እንስሳሁ፡ ነዐ፡ ትርአይ።
8 ወወፅአ፡ ፈረስ፡ ሐመልሚል፡ ወዘይጼዐኖ፡ ሞት፡ ስሙ፡ ወሲኦል፡ ትተልዎ። ወወሀብዎ፡ ሥልጣነ፡ ላዕለ፡ ራብዕተ፡ እዴሃ፡ ለምድር። ከመ፡ ያስተቃትሎሙ፡ በኀጺን፡ ወበረኃብ፡ ወበሞት፡ ወበአራዊተ፡ ምድር።
በእንተ፡ እለ፡ ተቀትሉ፡ በእንተ፡ ቃለ፡ እግዚአብሔር
9 ወሶበ፡ ፈትሐ፡ ኀምሰ፡ ማኅተመ። ርኢኩ፡ ታሕተ፡ ምሥዋዕ፡ ነፍሶሙ፡ ለእለ፡ ተቀትሉ፡ በእንተ፡ ቃለ፡ እግዚአብሔር። ወበእንተ፡ ዘዐቀቡ፡ ሕጎ።
10 ወጸርሑ፡ በቃል፡ ዐቢይ፡ ወይቤሉ። እስከ፡ ማእዜኑ፡ እግዚኦ፡ ቅዱስ፡ ወጻድቅ። ኢትትቤቀሎሙኑ፡ ወኢትኴንኖሙ፡ በእንተ፡ ደምነ፡ እምእለ፡ ይነብሩ፡ ዲበ፡ ምድር።
11 ወወሀብዎሙ፡ አልባሰ፡ ብሩሀ፡ ለለ፡ አሐዱ፡ እምኔሆሙ። ወይቤልዎሙ፡ ከመ፡ ያዕርፉ፡ ዓዲ፡ ኅዳጠ፡ መዋዕለ። እስከ፡ አመ፡ ይትፌጸሙ፡ እለ፡ ከማሆሙ፡ አግብርተ፡ እግዚአብሔር። ወአኀዊሆሙ፡ እለ፡ ሀለዎሙ፡ ይትቀተሉ፡ ከማሆሙ።
በእንተ፡ ድልቅልቅ፡ ዐቢይ
12 ወሶበ፡ ፈትሐ፡ ሳድሰ፡ ማኅተመ፡ ኮነ፡ ካዕበ፡ ዐቢይ፡ ድልቅልቅ። ወጸልመ፡ ፀሓይ፡ ወወርኅኒ፡ ከመ፡ ደም፡ ኮነ፡ ኵለንታሁ።
13 ወከዋክብትኒ፡ ወድቁ፡ እምሰማይ። ከመ፡ ቈጽለ፡ በለስ፡ ሶበ፡ ይዘብጦ፡ ዐቢይ፡ ነፋስ።
14 ወሰማይኒ፡ ተጠውመት፡ ከመ፡ ክርታስ፡ ዘይጠወም። አድባርኒ፡ ወደሰያት፡ ሰሰሉ፡ ኵሉ።
15 ወነገሥተ፡ ምድርኒ፡ ወመሳፍንት፡ ወመላእክት፡ ወአብዕልት፡ ወዐበይት። ወኵሉ፡ ገብር፡ ወአግዓዚ፡ ተኀብኡ፡ ውስተ፡ በአታት፡ ወውስተ፡ አድባር።
16 ወይቤልዎሙ፡ ለአድባር፡ ወነጸዋልዕት፡ ደቁ፡ ላዕሌነ። ወክድኑነ፡ እምገጸ፡ ዘይነብር፡ ዲበ፡ መንበር፡ ወእምነ፡ መዓተ፡ በግዑ።
17 እስመ፡ በጽሐት፡ ዕለተ፡ መዓቱ፡ ዐባይ፡ ወመኑ፡ ይክል፡ ተቃውሞታ።
=== chapter 7 ===
[ምዕራፍ 7]
በእንተ፡ እለ፡ ይትኀተሙ፡ በማኅተመ፡ እግዚአብሔር
1 ወእምድኅረ፡ ዝንቱ፡ ርኢኩ፡ አርባዕቱ፡ መላእክት። ይቀውሙ፡ ውስተ፡ አርባዕቱ፡ መዓዝኒሃ፡ ለምድር። ከመ፡ የአኀዙ፡ ከመ፡ ኢይንፋኅ፡ ነፋስ፡ ውስተ፡ ምድር። ወኢ፡ ውስተ፡ ባሕር፡ ወኢ፡ ውስተ፡ ዕፀታት።
2 ወርኢኩ፡ ወነጸርኩ፡ ወመጽአ፡ ካልእ፡ መልአክ፡ እምነ፡ ጽባሕ። ወይጸውር፡ ማኅተመ፡ እግዚአብሔር፡ ዘሕያው፡ ለዓለም። ወይቤሎሙ፡ በዐቢይ፡ ቃል፡ ለእልክቱ፡ አርባዕቱ፡ መላእክት። እለ፡ ተውህበ፡ ሎሙ፡ ይቅሥፍዋ፡ ለምድር፡ ወለባሕር።
3 ወባሕቱ፡ ይቤሎሙ፡ ኢታሕምሙ፡ ምዕረሰ፡ ኢ፡ ምድረ፡ ወኢ፡ ባሕረ። ወኢ፡ ዕፀታተ፡ እስከ፡ ይትኀተሙ፡ አግብርተ፡ እግዚአብሔር፡ ውስተ፡ ፍጽሞሙ።
4 ወሰማዕኩ፡ ኍልቆሙ፡ ለእለ፡ ተኀትሙ፡ ዐሠርቱ፡ ወአርባዕቱ፡ እልፍ፡ ወአርብዐ፡ ምእት። እለ፡ ተኀትሙ፡ እምውስተ፡ ኵሉ፡ ደቂቀ፡ እስራኤል።
5 እለ፡ እምውስተ፡ ሕዝበ፡ ይሁዳ፡ ፼ወ፳፻። ወእለ፡ እምውስተ፡ ሕዝበ፡ ሮቤል፡ ፼ወ፳፻። ወእለ፡ እምውስተ፡ ሕዝበ፡ ስምዖን፡ ፼ወ፳፻። ወእለ፡ እምውስተ፡ ሕዝበ፡ ሌዊ፡ ፼ወ፳፻። ወእለ፡ እምውስተ፡ ሕዝበ፡ ጋድ፡ ፼ወ፳፻።
6 ወእለ፡ እምውስተ፡ ሕዝበ፡ አሴር፡ ፼ወ፳፻። ወእለ፡ እምውስተ፡ ሕዝበ፡ ንፍታሌም፡ ፼ወ፳፻። ወእለ፡ እምውስተ፡ ሕዝበ፡ ምናሴ፡ ፼ወ፳፻።
7 ወእለ፡ እምውስተ፡ ሕዝበ፡ ይሳኮር፡ ፼ወ፳፻።
8 ወእለ፡ እምውስተ፡ ሕዝበ፡ ዛብሎን፡ ፼ወ፳፻። ወእለ፡ እምውስተ፡ ሕዝበ፡ ዮሴፍ፡ ፼ወ፳፻። ወእለ፡ እምውስተ፡ ሕዝበ፡ ብንያም፡ ፼ወ፳፻። ወእሉ፡ እንከ፡ እሙንቱ፡ እለ፡ ተኀትሙ።
9 ወእምድኅረ፡ ዝ፡ ርኢኩ፡ ሰብአ፡ ብዙኃነ፡ ዘአልቦ፡ ዘይክል፡ ኈልቆቶሙ። እምነ፡ ኵሉ፡ ሕዝብ፡ ወአሕዛብ፡ ወነገድ፡ ወበሓውርት፡ ይቀውሙ፡ ቅድመ፡ መንበሩ፡ ወቅድመ፡ በግዑ። ወይለብሱ፡ አልባሰ፡ ብሩሀ፡ ወያጸንዑ፡ ውስተ፡ እደዊሆሙ፡ ጸበርተ።
10 ወይጸርሑ፡ በቃል፡ ዐቢይ፡ ወይብሉ። ፍርቃን፡ ለአምላክነ፡ ለዘይነብር፡ ዲበ፡ መንበሩ፡ ወለበግዑ።
11 ወይቀውሙ፡ ኵሎሙ፡ መላእክት፡ ወሊቃናት፡ ዐውደ፡ መንበሩ። ወእልክቱኒ፡ አርባዕቱ፡ እንስሳሁ፡ ሰገዱ፡ በገጾሙ፡ ቅድመ፡ መንበሩ፡ ለእግዚአብሔር።
12 ወይብሉ፡ አሜን፡ ሎቱ፡ ስብሐት፡ ወባርኮት፡ ወጥበብ፡ ወአኰቴት። ወኀይል፡ ወጽንዕ፡ ለአምላክነ፡ ለዓለመ፡ ዓለም፡ አሜን።
13 ወይቤለኒ፡ አሐዱ፡ እምነ፡ ሊቃናት። እሉ፡ እለ፡ ይለብሱ፡ አልባሰ፡ ብሩሀ፡ እምአይቴ፡ መጽኡ።
14 ወእቤሎ፡ እግዚኦ፡ አንተ፡ ተአምር፡ ወይቤለኒ። እሉ፡ እሙንቱ፡ እለ፡ መጽኡ፡ እምዐቢይ፡ ሕማም። ወኀፀቡ፡ አልባሲሆሙ፡ ወአንጽሑ፡ በደመ፡ በግዑ።
15 ወበበይነ፡ ዝንቱ፡ በጽሑ፡ ቅድመ፡ መንበሩ፡ ለእግዚአብሔር። ወይሴብሕዎ፡ መዓልተ፡ ወሌሊተ፡ በውስተ፡ መቅደሱ። ወየዐርፍ፡ ኀቤሆሙ፡ ውእቱ፡ ዘይነብር፡ ዲበ፡ መንበሩ፡ ወይጼልል፡ ላዕሌሆሙ።
16 ኢይርኀቡኒ፡ ወኢይጸምኡኒ፡ ወፀሓየ፡ ሐሩርኒ፡ ኢይረክቦሙ።
17 እስመ፡ በግዑ፡ ዘቅድመ፡ መንበሩ፡ ይሬዕዮሙ። ወይመርሖሙ፡ ውስተ፡ ነቅዐ፡ ማየ፡ ሕይወት። ወያሴስል፡ እግዚአብሔር፡ አንብዐ፡ እምአዕይንቲሆሙ።
=== chapter 8 ===
[ምዕራፍ 8]
በእንተ፡ ዘነሥአ፡ ማዕጠንተ፡ ወርቅ
1 ወሶበ፡ ፈትሐ፡ ሳብዐ፡ ማኅተመ። አርመመ፡ ኵሉ፡ ዘበሰማይ፡ እስከ፡ መንፈቀ፡ ሰዓት።
2 ወእምዝ፡ ርኢኩ፡ ሰብዐተ፡ መላእክተ፡ እለ፡ ይቀውሙ፡ ቅድመ፡ እግዚአብሔር። ወወሀብዎሙ፡ ለእልክቱ፡ መላእክት፡ ሰብዐተ፡ መጣቅዕተ።
3 ወመጽአ፡ ካልእ፡ መልአክ፡ ወቆመ፡ ቅድመ፡ ምሥዋዕ፡ ወያጸንዕ፡ ማዕጠንተ፡ ወርቅ። ወወሀብዎ፡ ብዙኀ፡ ዕጣናተ፡ ከመ፡ የሀብ፡ ለጸሎተ፡ ኵሎሙ፡ ቅዱሳን። በዲበ፡ ምሥዋዕ፡ ዘወርቅ፡ ዘቅድመ፡ መንበሩ።
4 ወዐርገ፡ ጢሱ፡ ለውእቱ፡ ዕጣን፡ ምስለ፡ ጸሎቶሙ፡ ለቅዱሳን። እምውስተ፡ እዴሁ፡ ለውእቱ፡ መልአክ፡ ቅድመ፡ እግዚአብሔር።
5 ወነሥአ፡ ውእቱ፡ መልአክ፡ ማዕጠንተ፡ እምኀበ፡ እሳት፡ ዘምሥዋዕ። ወአውረደ፡ ውስተ፡ ምድር። ኮነ፡ ነጐድጓድ፡ ወፀዓዕ፡ ወመብረቅ፡ ወድልቅልቅ።
6 ወእልክቱኒ፡ ሰብዐቱ፡ መላእክት፡ እለ፡ ያጸንዑ፡ ሰብዐተ፡ መጣቅዕተ። ተደለዉ፡ ከመ፡ ይጥቅዑ፡ ቦሙ።
በእንተ፡ አርባዕቱ፡ መላእክት፡ ወመጣቅዕቲሆሙ
7 ወሶበ፡ ጠቅዐ፡ ቀዳማዊ፡ መልአክ፡ ኮነ፡ በረድ፡ ወእሳት፡ ምስለ፡ ደም፡ ድሙር። ወወረደ፡ ውስተ፡ ምድር፡ ወውዕየ፡ ሣልስተ፡ እዴሃ፡ ለምድር። ወውዕዩ፡ ኵሉ፡ ዕፅ፡ ወሐመልማል።
8 ወሶበ፡ ጠቅዐ፡ ካልእ፡ መልአክ፡ ወረደ፡ ውስተ፡ ባሕር። እሳት፡ ዐቢይ፡ ዘመጠነ፡ ደብር፡ እንዘ፡ ይነድድ። ወኮነ፡ ደመ፡ ሣልስተ፡ እዴሃ፡ ለባሕር።
9 ወሞተ፡ ሣልስተ፡ እዴሁ፡ ለዘሀሎ፡ ውስተ፡ ባሕር፡ ዘተፈጥረ፡ ዘቦ፡ መንፈሰ፡ ሕይወት። ወሣልስተ፡ እዴሆን፡ ለአሕማር፡ ማሰና።
10 ወሶበ፡ ጠቅዐ፡ ሣልስ፡ መልአከ። ወረደ፡ እምሰማይ፡ ኮከብ፡ ዐቢይ፡ እንዘ፡ ይነድድ፡ ከመ፡ እሳት። ወወረደ፡ ውስተ፡ ሣልስተ፡ እዴሆሙ፡ ለአፍላግ፡ ወለአንቅዕተ፡ ማያት።
11 ወስሙ፡ ለውእቱ፡ ኮከብ፡ እጉስታር። ወኮነ፡ እጉስታር፡ ሣልስተ፡ እዴሆሙ፡ ለማያት፡ ምስለ፡ ዐውሎ። ወብዙኅ፡ ሰብእ፡ ዘሞተ፡ እምነ፡ ምረሮሙ፡ ለማያት።
12 ወሶበ፡ ጠቅዐ፡ ራብዕ፡ መልአክ፡ ተቀሥፈት፡ ፀሓይ። ወጸልመ፡ ሣልስተ፡ እዴሃ፡ ለወርኅ፡ ወሣልስተ፡ እዴሆሙ፡ ለከዋክብት፡ ከመ፡ ኢይብርሁ። ወሣልስተ፡ እዴሆሙ፡ ለዕለት፡ ወለሌሊት።
13 ወሰማዕኩ፡ አሐዱ፡ ንስር፡ ይሰርር፡ ማእከለ፡ ሰማይ፡ ወምድር። ወይብል፡ በዐቢይ፡ ቃል፡ አሌ፡ ሎሙ፡ አሌ፡ ሎሙ፡ ለእለ፡ ይነብሩ፡ ዲበ፡ ምድር። እምነ፡ ዘተርፈ፡ ቃለ፡ መጥቅዖሙ፡ ለሠለስቱ፡ መላእክት፡ እለ፡ ሀለዎሙ፡ ይጥቅዑ።
=== chapter 9 ===
[ምዕራፍ 9]
በእንተ፡ ኀምስ፡ ወሳድስ፡ መልአክ
1 ወሶበ፡ ጠቅዐ፡ ኀምስ፡ መልአክ፡ ወረደ፡ ኮከብ፡ እምሰማይ፡ ዲበ፡ ምድር።
2 ወተውህበ፡ ሎቱ፡ መራኁተ፡ አንቅዕተ፡ ቀላያት። ወዐርገ፡ ጢስ፡ እምነ፡ ቀላይ፡ ከመ፡ ጢሰ፡ እቶን፡ ዐቢይ። ወከደኖ፡ ለፀሓይ፡ ወኮነ፡ ከመ፡ ደመና፡ ውእቱ፡ ጢሰ፡ ቀላይ።
3 ወእምነ፡ ውእቱ፡ ጢስ፡ ወፅአ፡ አንበጣ፡ ውስተ፡ ምድር። ወወሀብዎሙ፡ ሥልጣነ፡ ይኩኑ፡ ከመ፡ ዐቃርብት፡ ውስተ፡ ምድር።
4 ወአዘዝዎሙ፡ ከመ፡ ኢያማስኑ፡ ሣዕረ፡ ወኢ፡ ሐመልማለ፡ ወኢ፡ ኵሎ፡ ዕፀ። ዘእንበለ፡ ለሰብእ፡ እለ፡ አልቦሙ፡ ማኅተመ፡ እግዚአብሔር፡ ውስተ፡ ፍጽሞሙ።
5 ወአዘዝዎሙ፡ ከመ፡ ኢይቅትልዎሙ። ዳእሙ፡ ከመ፡ ያሕምምዎሙ፡ ኀምስተ፡ አውራኀ። ወሕማሞሙሰ፡ ከመ፡ ሕማመ፡ ዐቅራብ፡ ሶበ፡ ይነድፍ፡ ሰብአ።
6 ወበውእቶን፡ መዋዕል፡ የኀሥሥ፡ ሰብእ፡ መዊተ፡ ወኢይረክብ። ወይፈቱ፡ ይሙት፡ ወይትኀጣእ፡ እምኔሁ፡ መዊት።
7 ወከመ፡ ዝ፡ ውእቱ፡ ራእዮሙ፡ ለእልክቱ፡ አናብጥ። ከመ፡ አፍራስ፡ ዘድልዋን፡ ለጸብእ፡ ይመስሉ። ወውስተ፡ ርእሶሙ፡ ቦሙ፡ ቀጸላ፡ በአምሳለ፡ ወርቅ። ወገጾሙ፡ ከመ፡ ገጸ፡ ሰብእ።
8 ወሥዕርቶሙ፡ ከመ፡ ሥዕርተ፡ አንስት። ወስነኒሆሙ፡ ከመ፡ ስነነ፡ አናብስት።
9 ወቦሙ፡ ጌራ፡ ከመ፡ ጌራ፡ ኀጺን። ወድምፀ፡ እገሪሆሙ፡ ከመ፡ ድምፀ፡ ሠረገላ፡ ብዙኀ። ዘያረውጹ፡ አፍራስ፡ ውስተ፡ ቀትል።
10 ዘቦሙ፡ ዘነብ፡ ከመ፡ ዘነበ፡ ዐቅራብ፡ ወረስተ፡ ዘነቦሙ። ቦሙ፡ ቅንዋት፡ በዘቦቱ፡ ይነድፍዎሙ፡ ለሰብእ፡ ኀምስተ፡ አውራኀ።
11 ወቦሙ፡ ንጉሥ፡ መልአከ፡ ቀላይ። ወስሙ፡ በዕብራይስጥ፡ አብዶን፡ ወበጽርእ፡ አጵልዮን። ወበቅብጥ፡ አርማቅጦን፡ ወበዓረብ፡ ሰናሴር፡ ወበግዕዝ፡ ማኅጐሊ።
12 ወበዝ፡ ኀለፈት፡ አሐቲ፡ ሕማም፡ ወተርፈ፡ ክልኤ፡ ሕማም።
13 ወሶበ፡ ጠቅዐ፡ ሳድስ፡ መልአክ። ሰማዕኩ፡ ቃለ፡ አሐደ፡ እምነ፡ አቅርንተ፡ ምሥዋዕ፡ ዘወርቅ። ዘቅድመ፡ መንበሩ፡ ለእግዚአብሔር።
14 ወይቤሎ፡ ለዝክቱ፡ ሳድስ፡ መልአክ፡ ዘያጸንዕ፡ መጥቅዐ። ፍትሖሙ፡ ለእልክቱ፡ አርባዕቱ፡ መላእክት። እለ፡ እሡራን፡ ውስተ፡ ፈለገ፡ ኤፍራጥስ፡ ዐቢይ።
15 ወሶበ፡ ፈትሖሙ፡ ለእልክቱ፡ አርባዕቱ፡ መላእክት። እለ፡ ድልዋን፡ ለሰዓት፡ ወለዕለት፡ ወለወርኅ፡ ወለዓመት። ከመ፡ ይቅትሉ፡ ሣልስተ፡ እዴሆሙ፡ ለዕጓለ፡ እመሕያው።
16 ወኍልቈ፡ አፍራሲሆሙ፡ ምክዕቢተ፡ እልፍ፡ እምአእላፍ።
17 ወከመ፡ ዝ፡ ርእየተ፡ አፍራሲሆሙ። ወዘእለ፡ ይጼዐንዎሙ፡ ቦሙ፡ ጌራ፡ ዘእሳት፡ ዘኅብረ፡ ደርከኖ። ወአርእስተ፡ አፍራሲሆሙ፡ ከመ፡ አርእስተ፡ አናብስት። ወይወፅእ፡ እምነ፡ አፉሆሙ፡ እሳት፡ ወጢስ፡ ወተይ።
18 ወእምነ፡ ዝንቱ፡ ሠለስቱ፡ ሕማም፡ ሞተ፡ ሣልስተ፡ እዴሁ፡ ለዕጓለ፡ እመሕያው። እምነ፡ እሳት፡ ወጢስ፡ ወተይ፡ ዘይወፅእ፡ እምነ፡ አፉሆሙ።
19 እስመ፡ ሥልጣነ፡ አፍራሲሆሙ፡ ውስተ፡ አፉሆሙ። ወአዝናቢሆሙ፡ ከመ፡ አራዊተ፡ ምድር። ወቦሙ፡ ህየ፡ አርእስት፡ በዘቦቱ፡ ይነስኩ፡ ሰብአ፡ ኀምስተ፡ አውራኀ።
20 ወዘተርፈ፡ ሰብእ፡ ድኅነ፡ እምነ፡ ውእቱ፡ መቅሠፍት። ወቦ፡ እለ፡ ተኰነኑ፡ በአምልኮ፡ ግብረ፡ እደዊሆሙ፡ እስመ፡ ኢነስሑ። አላ፡ አቅነዩ፡ ርእሶሙ፡ እንዘ፡ ይሰግዱ፡ ለአጋንንት። ወለአማልክት፡ ዘወርቅ፡ ወዘብሩር፡ ወዘብርት፡ ወዘዕፅ፡ ወዘእብን። እለ፡ ኢይሬእዩ፡ ወኢይሰምዑ፡ ወኢየሐውሩ።
21 ወኢነስሑ፡ ዓዲ፡ እምነ፡ ቀትሎሙ፡ ወእምነ፡ ሥራያቲሆሙ። ወእምነ፡ ዝሙቶሙ፡ ወእምነ፡ ስርቆሙ።
=== chapter 10 ===
[ምዕራፍ 10]
በእንተ፡ መልአክ፡ አኃዜ፡ መጽሐፍ
1 ወእምዝ፡ ወረደ፡ ካልእ፡ መልአክ፡ ዐቢይ፡ እምሰማይ። ወይትዐጸፍ፡ ደመና፡ ውስተ፡ ርእሱ። ወብሩህ፡ ገጹ፡ ከመ፡ ፀሓይ። ወእገሪሁ፡ ከመ፡ አዕማደ፡ እሳት።
2 ወውስተ፡ እዴሁ፡ ያጸንዕ፡ መጽሐፈ፡ ክሥተ። ወኬደ፡ በእግሩ፡ እንተ፡ የማን፡ ውስተ፡ ባሕር፡ ወእንተ፡ ፀጋም፡ ላዕለ፡ ምድር።
3 ወጸርሐ፡ በቃል፡ ዐቢይ፡ ከመ፡ አንበሳ፡ ዘይጥሕር። ወሶበ፡ ጸርሐ፡ ተናገሩ፡ ሰብዐቱ፡ ነጐድጓድ፡ በበ፡ ቃላቲሆሙ፡ በበይነ፡ ዘሀለዎ፡ ይጸሐፍ።
4 ወሰማዕኩ፡ ቃለ፡ ዘይቤሉ፡ ሰብዐቱ፡ ነጐድጓድ፡ ወፈቀድኩ፡ እጽሐፎ። ወእምዝ፡ መጽአ፡ ቃል፡ እምሰማይ፡ ዘይብል። ኅትም፡ ዘነበቡ፡ ሰብዐቱ፡ ነጐድጓድ፡ ወኢትጽሐፍ።
5 ወውእቱሰ፡ መልአክ፡ ዘርኢኩ፡ ዘኬደ፡ ውስተ፡ ባሕር፡ ወውስተ፡ ምድር። አልዐለ፡ እዴሁ፡ እንተ፡ የማን፡ ውስተ፡ ሰማይ።
6 ወመሐለ፡ በዘሕያው፡ ለዓለመ፡ ዓለም፡ ዘፈጠረ፡ ሰማየ፡ ወኵሎ፡ ዘውስቴቱ። ወምድረ፡ ወኵሎ፡ ዘውስቴታ፡ ወባሕረ፡ ወኵሎ፡ ዘውስቴቱ። ወአልቦ፡ እንከ፡ መዋዕል።
7 ዘእንበለ፡ መዋዕለ፡ ቃሉ፡ ለሳብዕ፡ መልአክ፡ ዘሀለዎ፡ ይጥቃዕ። ወቦቱ፡ የኀልቅ፡ ምሥጢሩ፡ ለእግዚአብሔር፡ ዘአሰፈዎሙ፡ ለአግብርቲሁ፡ ወለነቢያቲሁ።
8 ወውእቱ፡ ቃል፡ ዘሰማዕኩ፡ እምሰማይ፡ ተናገረ፡ ካዕበ፡ ምስሌየ። ወይቤለኒ፡ ሑር፡ ንሥኣ፡ ለእንታክቲ፡ መጽሐፍ፡ ክሥት። እንተ፡ ውስተ፡ እዴሁ፡ ለዝክቱ፡ መልአክ። ዘኬደ፡ ውስተ፡ ባሕር፡ ወውስተ፡ ምድር።
9 ወሖርኩ፡ ኀበ፡ ውእቱ፡ መልአክ። ወእቤሎ፡ ከመ፡ የሀበንያ፡ ለይእቲ፡ መጽሐፍ። ወይቤለኒ፡ ንሥኣ፡ ወብልዓ፡ ወለትምረራ፡ ለከርሥከ። ወበውስተ፡ አፉከሰ፡ ጥዕምተ፡ ለትኩንከ፡ ከመ፡ መዓር።
10 ወነሣእክዋ፡ ለይእቲ፡ መጽሐፍ፡ እምነ፡ እዴሁ፡ ለውእቱ፡ መልአክ። ወበላዕክዋ፡ ወኮነተኒ፡ ጥዕምተ፡ በውስተ፡ አፉየ። ወሶበ፡ ውኅጥክዋ፡ አምረረታ፡ ለከርሥየ። ወይቤለኒ፡ ሀለወከ፡ ካዕበ፡ ትትነበይ። ለአሕዛብ፡ ወለሕዝብ፡ ወለበሓውርት፡ ወለነገሥት፡ ብዙኃን።
=== chapter 11 ===
[ምዕራፍ 11]
በእንተ፡ ክልኤቱ፡ ጻድቃን፡ ወነቢያት
1 ወመጠወኒ፡ ሕለተ፡ ወርቅ፡ ዘመጠነ፡ በትር። ወይቤለኒ፡ ንሣእ፡ ወመጥን፡ ቤተ፡ መቅደሱ፡ ለእግዚአብሔር። ወምሥዋዖ፡ ወኀበሂ፡ ይሰግዱ፡ ሎቱ።
2 ወዐጸድሰ፡ ጸናፌ፡ ኅድግ፡ ወኢትመጥን። እስመ፡ ተውህበት፡ ለአሕዛብ፡ በዛ፡ ሀገር፡ ቅድስት። ወይትካየድዋ፡ አርብዓ፡ ወክልኤተ፡ አውራኀ።
3 ወእኤዝዞሙ፡ ለክልኤቱ፡ ጻድቃንየ። ከመ፡ ይትነበዩ፡ መዋዕለ፡ ዐሠርተ፡ ወክልኤተ፡ ምእተ፡ ወስሳ፡ እንዘ፡ ሠቀ፡ ይለብሱ።
4 ወእሉ፡ እሙንቱ፡ ክልኤ፡ ዕፀ፡ ዘይት። ወክልኤ፡ መኀትው፡ እለ፡ ቅድመ፡ እግዚአብሔር፡ እለ፡ ሥዩማን፡ ላዕለ፡ ምድር።
5 ወለዘፈቀደ፡ ይስሐጦሙ፡ እምውስተ፡ ጸላእቶሙ። ትወፅእ፡ እሳት፡ እምነ፡ አፉሆሙ፡ ወታጠፍኦሙ፡ ለጸላእቶሙ። ወከመ፡ ዝ፡ ይመውቱ፡ እለ፡ ይስሕጥዎሙ።
6 እስመ፡ እሙንቱ፡ ሥሉጣን፡ ላዕለ፡ ሰማይ። ከመ፡ ይዕጽውዋ፡ ከመ፡ ኢይዝንም፡ ዝናም፡ ላዕለ፡ ምድር፡ በመዋዕለ፡ ትንቢቶሙ። ወዓዲ፡ ሥሉጣን፡ እሙንቱ፡ ላዕለ፡ ማይ፡ ከመ፡ ይረስይዎ፡ ደመ። ወያሕምምዋ፡ ለምድር፡ በኵሉ፡ መቅሠፍት፡ መጠነ፡ ፈቀዱ።
7 ወሶበ፡ ፈጸሙ፡ ስምዖሙ፡ ወትንቢቶሙ። አርዌ፡ ዘዐርገ፡ እምቀላይ፡ ተባአሰ፡ ምስሌሆሙ፡ ወሞኦሙ፡ ወቀተሎሙ።
8 ወአንበረ፡ በድኖሙ፡ ውስተ፡ ሀገር፡ ዐባይ፡ እንተ፡ ስማ፡ ፍጥሞ። ዘኅቡእ፡ ሰዶም፡ ወግብጽ፡ ኀበ፡ ተጸልበ፡ እግዚኦሙ።
9 ወይሬእይዎ፡ አሕዛብ፡ ወሕዝብ፡ ወነገድ፡ ወበሓውርት፡ ለበድኖሙ፡ ሠሉሰ፡ መዋዕለ፡ ወመንፈቀ። ወኢያበውሑ፡ ይቅብርዎ፡ ውስተ፡ መቃብር፡ ለበድኖሙ።
10 ወይትፌሥሑ፡ ላዕሌሆሙ፡ እለ፡ ይነብሩ፡ ዲበ፡ ምድር። ወይጻገዉ፡ በበይናቲሆሙ፡ አምኃ፡ ወይብሉ። እስመ፡ እሉ፡ ክልኤቱ፡ ነቢያት፡ አሕመምዎሙ፡ ለእለ፡ ይነብሩ፡ ዲበ፡ ምድር።
11 ወእምድኅረ፡ ሠሉስ፡ መዋዕል፡ ወመንፈቅ። ትመጽእ፡ መንፈሰ፡ ሕይወት፡ እምኀበ፡ እግዚአብሔር፡ ወትበውእ፡ ውስቴቶሙ። ወይትነሥኡ፡ ወይቀውሙ፡ በእገሪሆሙ፡ ወኮነ፡ ፍርሀት፡ ዐቢይ፡ ላዕለ፡ እለ፡ ይሬእይዎሙ።
12 ወመጽአ፡ ቃል፡ እምሰማይ፡ ወይቤሎሙ፡ ዕርጉ፡ ዝየ። ወእምዝ፡ ዐርጉ፡ ውስተ፡ ሰማይ፡ በደመና፡ ወርእይዎሙ፡ ጸላእቶሙ።
13 ወበይእቲ፡ ሰዓት፡ ኮነ፡ ዐቢይ፡ ድልቅልቅ። ወወድቀ፡ ዐሠርተ፡ እዴሃ፡ ለይእቲ፡ ሀገር። ወሞቱ፡ በውእቱ፡ ድልቅልቅ፡ ሰብዓ፡ ምእት፡ ነፍስ። ወደንገፁ፡ እለ፡ ተርፉ፡ ወሰብሕዎ፡ ወአእኰትዎ፡ ለአምላከ፡ ሰማይ።
14 ወበዝ፡ ኀለፈት፡ ካልእት፡ ሕማም፡ ወተርፈት፡ ሣልሲት፡ ሕማም።
በእንተ፡ ሳብዕ፡ መልአክ
15 ወሶበ፡ ጠቅዐ፡ ሳብዕ፡ መልአክ፡ መጽአ፡ ቃል፡ ዐቢይ፡ እምሰማይ። ዘይብል፡ ኮነት፡ መንግሥተ፡ ዓለም፡ ለእግዚአብሔር፡ ወለመሲሑ፡ ወይነግሥ፡ ለዓለመ፡ ዓለም።
16 ወእልክቱኒ፡ ዕሥራ፡ ወአርባዕቱ፡ ሊቃናት። እለ፡ ይነብሩ፡ ቅድመ፡ እግዚአብሔር፡ በበ፡ መናብርቲሆሙ። ሰገዱ፡ በገጾሙ፡ ቅድመ፡ እግዚአብሔር።
17 ወይቤሉ፡ ነአኵተከ፡ እግዚኦ። እግዚአብሔር፡ ዘኵሎ፡ ትመልክ፡ ዘሀሎከ፡ ወትሄሉ። እስመ፡ አንሣእከ፡ ኀይለከ፡ ዐቢየ፡ ወነሣእከ፡ መንግሥተ።
18 ወአሕዛብሰ፡ ተምዕዑ፡ እስመ፡ በጽሖሙ፡ መዓትከ፡ ወዘመኖሙ፡ ለሙታን፡ በዘይትኴነኑ። ወከመ፡ ተሀቦሙ፡ ዕሴቶሙ፡ ለአግብርቲከ። ለነቢያት፡ ወለቅዱሳን፡ ወለእለ፡ ይፈርሁ፡ ስመከ፡ ለንኡሶሙ፡ ወለዐቢዮሙ። ወከመ፡ ትኰንኖሙ፡ ለእለ፡ ያማስንዋ፡ ለምድር።
19 ወእምዝ፡ ተርኅወ፡ መቅደሱ፡ ለእግዚአብሔር፡ ዘውስተ፡ ሰማይ። ወአስተርአየት፡ ታቦተ፡ ሕጉ፡ ለእግዚአብሔር፡ እንተ፡ ውስተ፡ መቅደሱ። ወመጽአ፡ መብረቅ፡ ወቃለ፡ ነጐድጓድ፡ ወድልቅልቅ፡ ወበረድ፡ ዐቢይ።
=== chapter 12 ===
[ምዕራፍ 12]
በእንተ፡ ክልኤቱ፡ ተአምራት
1 ወአስተርአየ፡ ተኣምር፡ ዐቢይ፡ በውስተ፡ ሰማይ። ብእሲት፡ እንተ፡ ትለብስ፡ ፀሓየ፡ ወወርኀ፡ ታሕተ፡ እገሪሃ። ወዲበ፡ ርእሳኒ፡ አክሊል፡ ዘዐሠርቱ፡ ወክልኤቱ፡ ከዋክብት።
2 ወፅንስት፡ ይእቲ፡ ብእሲት፡ ወትግዕር፡ ወተሐምም፡ ለወሊድ።
3 ወአስተርአየ፡ ካልእ፡ ተኣምር፡ በውስተ፡ ሰማይ። አርዌ፡ ዐቢይ፡ ወቀይሕ፡ ዘሰብዐቱ፡ አርእስቲሁ፡ ወዐሠርቱ፡ አቅርንቲሁ። ወውስተ፡ አርእስቲሁ፡ ሰብዐቱ፡ ቀጸላ።
4 ወበዘነቡ፡ ይስሕብ፡ ሣልስተ፡ እዴሆሙ፡ ለከዋክብተ፡ ሰማይ። ወያወርዶሙ፡ ውስተ፡ ምድር። ወቆመ፡ ውእቱ፡ አርዌ፡ አንጻረ፡ ይእቲ፡ ብእሲት። ከመ፡ ሶበ፡ ወለደት፡ ይብላዕ፡ ሕፃና።
5 ወወለደት፡ ወልደ፡ ተባዕተ፡ ዘውእቱ፡ ይርዕዮሙ፡ ለኵሉ፡ አሕዛብ፡ በበትረ፡ ኀጺን። ወመሰጥዎ፡ ለውእቱ፡ ሕፃን፡ ወወሰድዎ፡ ኀበ፡ እግዚአብሔር፡ ወኀበ፡ መንበሩ።
6 ወጐየት፡ ይእቲ፡ ብእሲት፡ ውስተ፡ ገዳም። ወውስተ፡ መካን፡ ዘአስተዳለወ፡ ላቲ፡ እግዚአብሔር። ከመ፡ ትትዐቀብ፡ በህየ፡ በኵሉ፡ መዋዕል፡ ዐሠርተ፡ ወክልኤተ፡ ምእተ፡ ወተስዓ፡ ዕለተ።
7 ወጸብእዎ፡ በሰማይ፡ ለውእቱ፡ አርዌ፡ ሚካኤል፡ ወመላእክቲሁ። ወተጻብኦሙ፡ ውእቱ፡ አርዌ፡ ምስለ፡ መላእክቲሁ።
8 ወስእኖሙ፡ ወኢረከበ፡ እንከ፡ መካነ፡ በውስተ፡ ሰማይ።
9 ወወድቀ፡ ውስተ፡ ምድር፡ ውእቱ፡ አርዌ፡ ዐቢይ። ወአርዌሰ፡ ዐቢይ፡ ውእቱ፡ ቀዲሙ፡ ዘአስሐቶ፡ ለኵሉ፡ ዓለም፡ ዘስሙ፡ ሰይጣን። ወወድቀ፡ ውስተ፡ ምድር፡ ወመላእክቲሁ፡ ወድቁ፡ ምስሌሁ፡ ውስተ፡ ምድር።
10 ወሰማዕኩ፡ ቃለ፡ ዐቢየ፡ በውስተ፡ ሰማይ፡ ዘይብል። ኮነት፡ መድኀኒት፡ ወኀይል፡ ወመንግሥት፡ ለአምላክነ፡ ወሥልጣን፡ ለመሲሑ። እስመ፡ ወድቀ፡ መስተዋዳይ፡ ዘአስተዋደዮሙ፡ ለአበዊነ፡ ቅድመ፡ እግዚአብሔር፡ መዓልተ፡ ወሌሊተ።
11 ወሞእዎ፡ እሙንቱ፡ በእንተ፡ ደመ፡ በግዑ፡ ወበእንተ፡ ቃለ፡ ጽድቆሙ። እስመ፡ ኢያብደሩ፡ ነፍሶሙ፡ እስከ፡ ለሞት።
12 ወበእንቲኣሆሙ፡ ተፈሥሑ፡ ሰማያት፡ ወእለ፡ ይነብሩ፡ ውስቴቶን። አሌላ፡ ለምድር፡ ወለባሕር፡ እስመ፡ ወረደ፡ ሰይጣን፡ ወስቴቶሙ፡ ምስለ፡ ዐቢይ፡ ሕምዙ። እስመ፡ የአምር፡ ከመ፡ ውኁድ፡ መዋዕል፡ ተርፎ።
13 ወሶበ፡ ርእየ፡ ዝክቱ፡ አርዌ፡ ከመ፡ ወድቀ፡ ውስተ፡ ምድር። ዴገና፡ ለእንታክቲ፡ ብእሲት፡ እንተ፡ ወለደት፡ ሕፃነ፡ ተባዕተ።
14 ወተውህባ፡ ለይእቲ፡ ብእሲት፡ ክልኤ፡ ክንፍ፡ ከመ፡ ዘዐቢይ፡ ንስር። ከመ፡ ትስርር፡ ውስተ፡ ገዳም። ወውስተ፡ መካን፡ ኀበ፡ ትትዐቀብ፡ በኵሉ፡ መዋዕል። ዘመነ፡ ወአዝማነ፡ ወመንፈቀ፡ ዘመን፡ እምቅድመ፡ ገጹ፡ ለውእቱ፡ አርዌ። ወሰረረ፡ ወዴገና፡ ውእቱ፡ አርዌ።
15 ወአውፅአ፡ እምነ፡ አፉሁ፡ ውእቱ፡ አርዌ፡ ማየ፡ ብዙኀ። እንተ፡ ድኅሬሃ፡ ለይእቲ፡ ብእሲት። ከመ፡ ፈለግ፡ ዐቢይ፡ ከመ፡ ይንሥኣ፡ ውሒዙ።
16 ወረድአታ፡ ምድር፡ ለይእቲ፡ ብእሲት። ወአርኀወት፡ አፉሃ፡ ምድር፡ ወሰረበቶ፡ ለውእቱ፡ ውሒዝ። ዘአውሐዘ፡ ውእቱ፡ አርዌ፡ እምነ፡ አፉሁ። ወኢያእመረ፡ ከመ፡ ተውህበ፡ ላቲ፡ ክንፍ።
17 ወተምዕዐ፡ ውእቱ፡ አርዌ፡ ላዕለ፡ ይእቲ፡ ብእሲት። ወሖረ፡ ይጽብኦሙ፡ ለእለ፡ ተርፉ፡ ውሉዳ። ወለእለ፡ የዐቅቡ፡ ትእዛዘ፡ እግዚአብሔር፡ ወይሄልዉ፡ በጽድቁ፡ ለኢየሱስ።
18 ወቆመ፡ ውእቱ፡ አርዌ፡ ላዕለ፡ ኆጻ፡ ባሕር።
=== chapter 13 ===
[ምዕራፍ 13]
በእንተ፡ ሠለስቱ፡ አራዊት
1 ወወፅአ፡ ካልእ፡ አርዌ፡ እምነ፡ ባሕር። ዘዐሠርቱ፡ አቅርንቲሁ፡ ወሰብዐቱ፡ አርእስቲሁ። ወውስተ፡ አቅርንቲሁ፡ ዐሠርቱ፡ ቀጸላ። ወውስተ፡ አርእስቲሁ፡ ስመ፡ ፅርፈት።
2 ወይመስል፡ ውእቱ፡ አርዌ፡ ነምረ። ወእገሪሁ፡ ከመ፡ ድብ፡ ወአፉሁ፡ ከመ፡ አንበሳ። ወወሀቦ፡ ዝክቱ፡ አርዌ፡ ቀዳማዊ፡ ኀይሎ፡ ወመንበሮ፡ ወዕበየ፡ ሥልጣኑ።
3 ወአሐቲ፡ እምነ፡ አርእስቲሁ፡ እንተ፡ ተረግዘት፡ በሞት። ወቊስለ፡ ሞቱሰ፡ ሐይወ፡ ወአንከረቶ፡ ኵላ፡ ምድር። ወተለውዎ፡ ለውእቱ፡ አርዌ።
4 ወሰገዱ፡ ሎቱ፡ ለዝክቱ፡ አርዌ፡ ቀዳማዊ። እስመ፡ ወሀቦ፡ ለዝንቱ፡ አርዌ፡ ሥልጣኖ። ወሰገዱ፡ ሎቱ፡ ለውእቱ፡ አርዌ፡ እንዘ፡ ይብሉ። መኑ፡ ይመስሎ፡ ለዝንቱ፡ አርዌ፡ ወመኑ፡ ይክል፡ ጸቢኦቶ።
5 ወተውህበ፡ ሎቱ፡ አፍ፡ ከመ፡ ይንብብ፡ ዐቢያተ፡ ፅርፈታተ። ወተውህበ፡ ሎቱ፡ ሥልጣን፡ ይግበር፡ ተአምረ፡ ዘፈቀደ፡ አርብዓ፡ ወክልኤተ፡ አውራኀ።
6 ወእምዝ፡ ፈትሐ፡ አፉሁ፡ ከመ፡ ይፅርፍ፡ ላዕለ፡ እግዚአብሔር። ወላዕለ፡ ስሙ፡ ወላዕለ፡ ጽርሐ፡ መቅደሱ፡ ዘበሰማይ።
7 ወተውህቦ፡ ከመ፡ ይግበር፡ ጸብዐ፡ ምስለ፡ ቅዱሳን። ወይማኦሙ፡ ወተውህቦ፡ ሥልጣነ፡ ላዕለ፡ ኵሉ፡ አሕዛብ፡ ወሕዝብ፡ ወበሓውርት፡ ወነገድ።
8 ወሰገዱ፡ ሎቱ፡ ኵሎሙ፡ እለ፡ ይነብሩ፡ ዲበ፡ ምድር። እለ፡ ኢኮኑ፡ ጽሑፋነ፡ አስማቲሆሙ፡ ውስተ፡ መጽሐፈ፡ ሕይወት። ዘበግዑ፡ ዘተቀትለ፡ ዘእምፍጥረተ፡ ዓለም።
9 ዘቦ፡ እዝን፡ ሰሚዐ፡ ለይስማዕ። ወተፄወወኒ፡ ኅሊናየ።
10 ወዘሰ፡ ቀተለ፡ በመጥባሕት፡ ሀለዎ፡ ይሙት፡ በመጥባሕት። ወዝየ፡ ውእቱ፡ ትዕግሥቶሙ፡ ወሃይማኖቶሙ፡ ለቅዱሳን፡ ብፅዕት። ወኢ፡ አንክሮቱ፡ ለሰይጣን።
11 ወእምዝ፡ ወፅአ፡ ካልእ፡ አርዌ፡ እምነ፡ ምድር፡ ዘክልኤቱ፡ አቅርንቲሁ። ወይመስል፡ ከመ፡ በግዕ፡ ወይነብብ፡ ከመ፡ አርዌ።
12 ወበሥልጣኑ፡ ለቀዳማዊ፡ አርዌ፡ ይገብር፡ ኵሎ፡ በቅድሜሁ። ወይሬስያ፡ ለምድር፡ ወእለሂ፡ ይነብሩ፡ ውስቴታ፡ ይስግዱ፡ ሎቱ። ለቀዳማዊ፡ አርዌ፡ ዘሐይወ፡ እምቊስለ፡ ሞቱ።
13 ወይገብር፡ ተኣምራተ፡ ዐበይተ። ከመ፡ ያውርድ፡ እምሰማይ፡ እሳተ፡ ውስተ፡ ምድር፡ በቅድመ፡ ዕጓለ፡ እመሕያው።
14 ወያስሕቶሙ፡ ለእለ፡ ይነብሩ፡ ዲበ፡ ምድር። በእንተ፡ ተኣምር፡ ዘተውህበ፡ ሎቱ፡ ይግበር፡ በቅድመ፡ ውእቱ፡ አርዌ። ወይቤሎሙ፡ ለእለ፡ ይነብሩ፡ ውስተ፡ ምድር። ከመ፡ ይግበሩ፡ አምሳሎ፡ ለዝንቱ፡ አርዌ፡ ዘቈስለ፡ በመጥባሕት፡ ወሐይወ።
15 ወተውህበ፡ ሎቱ፡ ይደይ፡ ውስቴቱ፡ መንፈሰ፡ ለአምሳለ፡ ዝንቱ፡ አርዌ። ከመ፡ ይንብብ፡ ምስሉ፡ ለውእቱ፡ አርዌ። ወገብሮሙ፡ ለኵሎሙ፡ እለ፡ ኢሰገዱ፡ ለአምሳለ፡ ዝንቱ፡ አርዌ፡ ከመ፡ ይሙቱ።
16 ወይገብር፡ ኵሉ፡ ንኡሱ፡ ወዐቢዩ፡ አብዕልት፡ ወነዳያን፡ አግብርት፡ ወአግዓዝያን። ከመ፡ ይጽሐፉ፡ ውስተ፡ እደዊሆሙ፡ እንተ፡ የማን። ወእመ፡ አኮ፡ ውስተ፡ ፍጽሞሙ።
17 ወከመ፡ አልቦ፡ ዘይክል፡ ሠይጠ፡ ወተሣይጦ። እንበለ፡ እለ፡ ጽሑፋን፡ እሙንቱ፡ ትእምርተ፡ ስሙ፡ ለውእቱ፡ አርዌ። አው፡ ዘኍልቈ፡ ስሙ፡ ወዘሰ፡ ጠቢብ፡ ውእቱ። ወዘቦ፡ ልብ፡ የአምር፡ ኍላቌሁ፡ ለውእቱ፡ አርዌ። እስመ፡ አምጣነ፡ ዕጓለ፡ እመሕያው፡ ውእቱ። ወኍላቄሁኒ፡ ስድስቱ፡ ምእት፡ ወስሳ፡ ወስድስቱ።
=== chapter 14 ===
[ምዕራፍ 14]
በእንተ፡ በግዕ፡ ወማኅበራት
1 ወእምዝ፡ ቆመ፡ ዝክቱ፡ በግዕ፡ ላዕለ፡ ደብረ፡ ጽዮን። ወምስሌሁ፡ ፲ወ፬፼ወ፵፻፡ እለ፡ ጽሑፍ፡ ውስተ፡ ፍጽሞሙ፡ ስሙ። ወስመ፡ አቡሁ፡ ወስመ፡ ቅዱስ፡ መንፈሱ።
2 ወመጽአ፡ ቃል፡ እምሰማይ። ከመ፡ ቃለ፡ ማይ፡ ብዙኅ፡ ወቃለ፡ ነጐድጓድ፡ ዐቢይ። ወከመ፡ ቃለ፡ መሰናቁት፡ ሶበ፡ ይሰነቅዉ፡ በበ፡ መሰንቆታቲሆሙ።
3 ወየሐልዩ፡ ማሕሌተ፡ ሐዲሰ፡ ቅድመ፡ መንበሩ። ወቅድመ፡ እልክቱ፡ አርባዕቱ፡ እንስሳሁ፡ ወእልክቱኒ፡ ሊቃናት። ወአልቦ፡ ዘይክል፡ አእምሮታ፡ ለይእቲ፡ ማሕሌት። ዘእንበለ፡ እልክቱ፡ ፲ወ፬፼ወ፵፻፡ እለ፡ ተቤዘዉ፡ እምነ፡ ምድረ፡ ግብጽ።
4 እለ፡ ንጹሓን፡ እሙንቱ፡ እምአንስት፡ በከመ፡ ተወልዱ፡ እሙንቱ። እለ፡ ተለውዎ፡ ለበግዑ፡ ኀበ፡ ሖረ። እለ፡ ቀደሙ፡ ተቤዝዎ፡ እምነ፡ ዕጓለ፡ እመሕያው፡ ለእግዚአብሔር፡ ወለበግዑ።
5 ወኢተረክበ፡ ሐሰት፡ ውስተ፡ አፉሆሙ። እስመ፡ ንጹሓን፡ እሙንቱ፡ እምኀጢአት።
በእንተ፡ አርባዕቱ፡ መላእክት፡ ዐዋድያን
6 ወእምዝ፡ መጽአ፡ ካልእ፡ መልአክ፡ እንዘ፡ ይሰርር፡ ማእከለ፡ ሰማይ፡ ወምድር። ወይጸውር፡ ወንጌለ፡ ዘለዓለም፡ ከመ፡ ይስብክ፡ ሎሙ፡ ለእለ፡ ይነብሩ፡ ዲበ፡ ምድረ። ወለኵሎሙ፡ አሕዛብ፡ ወሕዝብ፡ ወነገድ፡ ወበሓውርት።
7 እንዘ፡ ይብል፡ በቃል፡ ዐቢይ፡ ፍርህዎ፡ ለእግዚአብሔር። ወሰብሕዎ፡ እስመ፡ በጽሐት፡ ሰዓተ፡ ደይኑ፡ ዐቢይ። ወስግዱ፡ ሎቱ፡ ለዘገብረ፡ ሰማየ፡ ወምድረ፡ ወባሕረ፡ ወአፍላገ፡ ወአንቅዕተ፡ ማያት።
8 ወካልእ፡ መልአክ፡ ተለዎ፡ እንዘ፡ ይብል፡ ወድቀት፡ ባቢሎን፡ ሀገር፡ ዐባይ። እምነ፡ ወይነ፡ መንሱታ፡ ወዝሙታ፡ ዘአስተየት፡ ለኵሉ፡ አሕዛብ።
9 ወሣልስ፡ መልአክ፡ ተለዎ፡ እንዘ፡ ይበል፡ በቃል፡ ዐቢይ። ዘሰገደ፡ ለዝክቱ፡ አርዌ፡ ወለምስሉ። ወዘጽሑፍ፡ ትእምርተ፡ ስሙ፡ ውስተ፡ ፍጽሙ፡ አው፡ ውስተ፡ እዴሁ።
10 ይስተይ፡ ውእቱኒ፡ ወይነ፡ መዓቱ፡ ለእግዚአብሔር። ዘቅዱሕ፡ ውስተ፡ ጽዋዐ፡ መዓቱ፡ ዘኢኮነ፡ ቱሱሐ። ወይትኰነን፡ በእሳት፡ ወተይ፡ በቅድመ፡ መላእክቲሁ፡ ወበቅድመ፡ በግዑ።
11 ወዐርገ፡ ጢሰ፡ ደይኖሙ፡ ለዓለመ፡ ዓለም። ወአልቦሙ፡ ዕረፍት፡ መዓልተ፡ ወሌሊተ። ወዘንተ፡ ኵነኔ፡ ይረክቡ፡ እለ፡ ይሰግዱ፡ ለውእቱ፡ አርዌ፡ ወለምስሉ። ወእለ፡ ይጽሕፉ፡ ትእምርተ፡ ስሙ።
12 ወዝ፡ ውእቱ፡ ትዕግሥቶሙ፡ ለቅዱሳን። እለ፡ የዐቅቡ፡ ትእዛዘ፡ እግዚአብሔር፡ ወሃይማኖቶ፡ ለኢየሱስ።
13 ወመጽአ፡ ቃለ፡ እምሰማይ፡ ዘይብል። ጸሐፍ፡ ይእዜ፡ ብፁዓን፡ እለ፡ ሞቱ፡ በእንተ፡ እግዚአብሔር። እወ፡ ከማሁ፡ ይቤ፡ መንፈስ፡ ቅዱስ፡ ከመ፡ ያዕርፉ፡ እምነ፡ ጻማሆሙ። ወይተልዎሙ፡ ግብሮሙ፡ ወይወስዶሙ፡ ኀበ፡ ነቅዐ፡ ማየ፡ ሕይወት።
በእንተ፡ በዓለ፡ ማዕጸድ
14 ወመጽአት፡ ደመና፡ ብርህት። ወውስተ፡ ይእቲ፡ ደመና፡ ይነብር፡ ወልደ፡ ዕጓለ፡ እመሕያው። ወአክሊለ፡ ወርቅ፡ ዲበ፡ ርእሱ። ወማዕጸድ፡ በሊሕ፡ ውስተ፡ እዴሁ።
15 ወወፅአ፡ ካልእ፡ መልአክ፡ እምነ፡ መቅደሱ፡ ለእግዚአብሔር። ወይጸርሕ፡ ሎቱ፡ በቃል፡ ዐቢይ፡ ለዘይነብር፡ ውስተ፡ ደመና። ወይብል፡ ፈኑ፡ ማዕጸደከ፡ በሊሐ። ወዕጽድ፡ እስመ፡ በጽሐት፡ ሰዓት፡ ለዐጺድ። እስመ፡ የብሰ፡ ማእረረ፡ ምድረ።
16 ወእምዝ፡ አልዐለ፡ ማዕጸዶ። ውእቱ፡ ዘይነብር፡ ውስተ፡ ደመና፡ ላዕለ፡ ምድር፡ ወተዐጽደት፡ ምድር።
17 ወወፅአ፡ ካልእ፡ መልአክ፡ እምነ፡ መቅደሱ፡ ዘውስተ፡ ሰማይ። ወይጸውር፡ ውእቱኒ፡ ማዕጸደ፡ በሊሐ።
18 ወካልእ፡ መልአክ፡ ተለዎ፡ እምነ፡ ምሥዋዕ። ዘውእቱ፡ ሥሉጥ፡ ላዕለ፡ እሳት። ጸውዖ፡ በቃል፡ ዐቢይ፡ ለዝክቱ፡ ዘይጸውር፡ ማዕጸደ፡ በሊሐ። ወይቤሎ፡ ፈኑ፡ ማዕጸደከ፡ በሊሐ። ወቅሥም፡ አስካሎ፡ ለዐጸደ፡ ወይና፡ ለምድር፡ እስመ፡ ዐቢይ፡ አስካሉ።
19 ወነሥአ፡ ውእቱ፡ መልአክ፡ ማዕጸዶ። ወአውረደ፡ ውስተ፡ ምድር፡ ወቀሠመ፡ ቦቱ፡ ዐጸደ፡ ወይና፡ ለምድር። ወወደዮ፡ ውስተ፡ ምክያደ፡ መዓቱ፡ ለእግዚአብሔር፡ ዐቢይ።
20 ወአኬድዎ፡ በምክያድ፡ በአፍኣ፡ እምነ፡ ሀገር። ወወፅአ፡ ደም፡ እምነ፡ ውእቱ፡ ምክያድ። ወበጽሐ፡ እስከ፡ ኀበ፡ ልጓመ፡ ፈረስ። ወውሕዘ፡ እስከ፡ ዐሠርቱ፡ ወስድስቱ፡ ምዕራፍ።
=== chapter 15 ===
[ምዕራፍ 15]
በእንተ፡ ባሕረ፡ ማኅው
1 ወአስተርአየ፡ ተኣምር፡ ዐቢይ፡ በሰማይ። ሰብዐቱ፡ መላእክት፡ እለ፡ ይጸውሩ፡ ሰብዐተ፡ መቅሠፍተ። በዘቦቱ፡ የኀልቅ፡ መዓቱ፡ ለእግዚአብሔር።
2 ወእምዝ፡ ርኢኩ፡ ባሕረ፡ እንተ፡ ትመስል፡ ከመ፡ ማኅው። ወድምርት፡ ይእቲ፡ በእሳት። ወእልክቱ፡ እለ፡ ሞእዎ፡ ለዝክቱ፡ አርዌ፡ ወለምስሉ፡ ወለኍልቈ፡ ስሙ። ይቀውሙ፡ ላዕለ፡ ይእቲ፡ ባሕር፡ ወይጸውሩ፡ መሰንቆ፡ መዝሙር፡ ዘእግዚአብሔር።
3 ወይሴብሕዎ፡ ለእግዚአ፡ ኵሉ። በከመ፡ ሰብሐ፡ ሙሴ፡ ገብረ፡ እግዚአብሔር፡ በስብሐተ፡ በግዑ። ወይብሉ፡ ዐቢይ፡ ወመድምም፡ ግብርከ፡ እግዚኦ። እግዚአብሔር፡ ዘኵሎ፡ ትመልክ። ጽድቅ፡ ወርትዕ፡ ፍናዊከ፡ ዘነገሥከ፡ ላዕለ፡ ኵሉ፡ አሕዛብ።
4 ወመኑ፡ ዘኢይፈርሀከ፡ ወኢይሴብሕ፡ ለስምከ። እስመ፡ ባሕቲትከ፡ ጻድቅ፡ አንተ። ወሥሉጥ፡ አንተ፡ ላዕለ፡ ኵሉ፡ አሕዛብ። ወይሰግዱ፡ ቅድሜከ፡ እግዚኦ፡ ኵሉ፡ ተግባርከ፡ እስመ፡ አስተርአየ፡ ኵነኔከ።
5 ወእምድኅረ፡ ዝንቱ፡ ተርኅወ፡ መቅደስ፡ ዘደብተራ፡ ስምዕ፡ ዘውስተ፡ ሰማይ።
6 ወወፅኡ፡ እልክቱ፡ ሰብዐቱ፡ መላእክት። እለ፡ ይጸውሩ፡ ሰብዐተ፡ መቅሠፍተ፡ እምነ፡ መቅደሱ። ወይለብሱ፡ አልባሰ፡ ንጹሐ፡ ወብሩሀ። ወቅኑታን፡ እሙንቱ፡ በቅናተ፡ ወርቅ፡ እንተ፡ መንገለ፡ እንግድዓቲሆሙ።
7 ወአሐዱ፡ እምነ፡ እልክቱ፡ አርባዕቱ፡ እንስሳሁ። መጠዎሙ፡ ለእልክቱ፡ ሰብዐቱ፡ መላእክት፡ ሰብዐተ፡ ጽዋዓተ፡ ወርቅ። ምሉኣነ፡ መዓቱ፡ ለእግዚአብሔር፡ ዘሕያው፡ ለዓለመ፡ ዓለም።
8 ወእምዝ፡ መልአ፡ መቅደሱ፡ ጢሰ፡ መዓቱ፡ ለእግዚአብሔር፡ እምስብሐቲሁ፡ ወእምኀይሉ። ወአልቦ፡ ዘይክል፡ በዊአ፡ ውስተ፡ መቅደሱ። እስከ፡ ኀልቀ፡ ሰብዐቱ፡ መቅሠፍት፡ ዘሰብዐቱ፡ መላእክት።
=== chapter 16 ===
[ምዕራፍ 16]
በእንተ፡ ሰብዐቱ፡ መቅሠፍታት
1 ወይቤሎሙ፡ ቃል፡ እምሰማይ፡ እምነ፡ መቅደሱ፡ ለእልክቱ፡ ሰብዐቱ፡ መላእክት። ሑሩ፡ ወከዐዉ፡ ጽዋዐ፡ መዓቱ፡ ለእግዚአብሔር፡ ውስተ፡ ኵላ፡ ምድር።
2 ወሖረ፡ መልአክ፡ ቀዳማዊ፡ ወከዐወ፡ ጽዋዖ፡ ውስተ፡ ምድር። ወመጽአ፡ ላዕለ፡ እልክቱ፡ ሰብእ። እለ፡ ጸሐፉ፡ ትእምርቶ፡ ለዝክቱ፡ አርዌ፡ ወሰገዱ፡ ለምስሉ። ወመጽአ፡ ላዕሌሆሙ፡ ጸልእ፡ እኩይ።
3 ወከዐወ፡ ካልእ፡ መልአክ፡ ጽዋዖ፡ ውስተ፡ ባሕር። ወኮነት፡ ባሕር፡ ደመ፡ ወሞተ፡ ኵሉ፡ ነፍሰ፡ ሕይወት፡ ዘውስተ፡ ባሕር።
4 ወከዐወ፡ ሣልስ፡ መልአክ፡ ጽዋዖ፡ ውስተ፡ አፍላግ፡ ወውስተ፡ አንቅዕተ፡ ማያት። ወኮነ፡ ደመ፡ ኵሉ፡ አንቅዕተ፡ ማያት።
5 ወይቤ፡ መልአከ፡ አንቅዕተ፡ ማያት። ጻድቅ፡ አንተ፡ እግዚኦ፡ ወራትዕ፡ ዘሀሎከ፡ ወትሄሉ፡ ወከመ፡ ዝ፡ ኰነንከ።
6 እስመ፡ ከዐዉ፡ ደመ፡ ቅዱሳኒከ፡ ወነቢያቲከ። ወአስተይካሆሙ፡ ደሞሙ፡ እስመ፡ ይደልዎሙ።
7 ወሰማዕኩ፡ ቃለ፡ ዘይቤ፡ በውስተ፡ ምሥዋዕ። እወ፡ እግዚኦ፡ እግዚአብሔር፡ ዘኵሎ፡ ትመልክ፡ ጽድቅ፡ ወርቱዕ፡ ኵነኔከ።
8 ወከዐወ፡ ራብዕ፡ መልአክ፡ ጽዋዖ፡ ውስተ፡ ፀሓይ። ወተውህበ፡ ሎቱ፡ ሐሩር፡ ከመ፡ ያውዕዮ፡ ለሰብእ፡ በእሳት።
9 ወውዕየ፡ ሰብእ፡ በዐቢይ፡ ሐሩር። እስከ፡ ይፀርፉ፡ ላዕለ፡ ስመ፡ እግዚአብሔር። ዘውእቱ፡ ሥሉጥ፡ ላዕለ፡ እልክቱ፡ መቅሠፍታት። ወኢነስሑ፡ ከመ፡ ያእኵትዎ።
10 ወከዐወ፡ ኀምስ፡ መልአክ፡ ጽዋዖ፡ ላዕለ፡ መንበሩ። ወላዕለ፡ መንግሥቱ፡ ለዝክቱ፡ አርዌ። ወጸልመት፡ መንግሥቱ፡ እስከ፡ ይሜጽሩ፡ ልሳናቲሆሙ፡ ሰብእ፡ በሕማም።
11 ወእስከ፡ ይፀርፉ፡ ላዕለ፡ እግዚአ፡ ሰማይ፡ እምነ፡ ሕማመ፡ አጽልእቲሆሙ። ወኢነስሑ፡ እምነ፡ ግብሮሙ።
12 ወከዐወ፡ ሳድስ፡ መልአክ፡ ጽዋዖ፡ ውስተ፡ ፈለግ፡ ዐቢይ፡ ዘኤፍራጥስ። ወየብሰ፡ ማዩ፡ ከመ፡ ትደሎ፡ ፍኖቶሙ፡ ለነገሥት፡ እለ፡ እምነ፡ ምሥራቀ፡ ፀሓይ።
13 ወእምዝ፡ ወፅኡ፡ እምነ፡ አፉሁ፡ ለዝንቱ፡ አርዌ፡ ቀዳማዊ። ወእምአፉሁ፡ ለአንበሳ፡ ወእምአፉሁ፡ ለሐሳዌ፡ ነቢይ፡ ሠለስቱ፡ አጋንንት፡ ርኩሳን።
14 ወከመ፡ ቈርነናዓት፡ እሙንቱ፡ መንፈሰ፡ አጋንንት። ወይገብሩ፡ ተኣምራተ፡ ወይወፅኡ፡ ላዕለ፡ ኵሉ፡ ነገሥት፡ እለ፡ ውስተ፡ ኵሉ፡ ዓለም። ወያስተጋብእዎሙ፡ ይትቃተሉ፡ በዕለት፡ ዐባይ፡ እንተ፡ እግዚአብሔር፡ ዘኵሎ፡ ይመልክ።
15 ወናሁ፡ እመጽእ፡ ግብተ፡ ከመ፡ ሰራቂ። ወብፁዕ፡ ዘይተግህ፡ ወየዐቅብ፡ አልባሲሁ። ከመ፡ ኢይሑር፡ ዕራቆ፡ ወኢያስተርኢ፡ ኀፍረቱ።
16 ወአስተጋብኦሙ፡ ውስተ፡ መካን፡ ዘስሙ፡ አርማጌዶን፡ በዕብራይስጥ።
17 ወከዐወ፡ ሳብዕ፡ መልአክ፡ ጽዋዖ፡ ውስተ፡ ነፋስ። ወወፅአ፡ ቃል፡ ዐቢይ፡ እምነ፡ መቅደሱ፡ ወእምኀበ፡ መንበሩ፡ ዘይብል፡ ኀልቀ።
18 ወእምዝ፡ ኮነ፡ መብረቅ፡ ወቃለ፡ ነጐድጓድ። ወመጽአ፡ ዐቢይ፡ ድልቅልቅ። ዘኢኮነ፡ ከማሁ፡ እምአመ፡ ተፈጥረ፡ ዕጓለ፡ እመሕያው፡ ውስተ፡ ምድር። ወኢይከውንሂ፡ ዘከማሁ፡ ድልቅልቅ፡ ዐቢይ።
19 ወኮነት፡ ሀገር፡ ዐባይ፡ ሠለስተ፡ መክፈልተ። ወአህጉረ፡ አሕዛብኒ፡ ወድቃ። ወለባቢሎንኒ፡ ዐባይ፡ ተዘከርዋ፡ ቅድመ፡ እግዚአብሔር። ከመ፡ ይመጥውዋ፡ ጽዋዐ፡ ሕምዘ፡ ወይነ፡ መዓቱ፡ ለእግዚአብሔር።
20 ወጠፍአ፡ ኵሎን፡ ደስያት፡ ወአድባርኒ፡ ኢተረክቡ።
21 ወወረደ፡ እምሰማይ፡ ላዕለ፡ ሰብእ፡ ዐቢይ፡ በረድ፡ ዘመጠነ፡ መካልይ። ወፀረፉ፡ ሰብእ፡ ላዕለ፡ ስመ፡ እግዚአብሔር፡ በእንተ፡ ውእቱ፡ መቅሠፍተ፡ በረድ። እስመ፡ ዐቢይ፡ ውእቱ፡ መቅሠፍቱ፡ ጥቀ።
=== chapter 17 ===
[ምዕራፍ 17]
በእንተ፡ ብእሲት፡ ዘትጼዐን፡ ላዕለ፡ አርዌ
1 ወመጽአ፡ አሐዱ፡ እምነ፡ እልክቱ፡ ሰብዐቱ፡ መላእክት። እለ፡ ይጸውሩ፡ ሰብዐተ፡ ጽዋዓተ። ወይቤለኒ፡ ነዐ፡ አርኢከ፡ ደይና፡ ለእንታክቲ፡ ዘማ፡ ዐባይ። እንተ፡ ትነብር፡ ውስተ፡ ሰማያተ፡ ብዙኅ።
2 እንተ፡ ምስሌሃ፡ ዘመዉ፡ ነገሥተ፡ ምድር። ወሰክሩ፡ እለ፡ ይነብሩ፡ ዲበ፡ ምድር፡ እምነ፡ ወይነ፡ ዝሙታ።
3 ወእምዝ፡ ወሰደኒ፡ መንፈስ፡ ገዳመ። ወርኢኩ፡ ብእሲተ፡ ትጼዐን፡ ላዕለ፡ አርዌ፡ ቀይሕ። ዘምሉእ፡ አስማተ፡ ፅርፈት። ዘሰብዐቱ፡ አርእስቲሁ፡ ወዐሠርቱ፡ አቅርንቲሁ።
4 ወትለብስ፡ ይእቲ፡ ብእሲት፡ ልብሰ፡ ወርቅ፡ ዘቦ፡ ሜላት። ወዘቦ፡ ለይ፡ ወዕንቊ፡ ክቡር፡ ወባሕርያት። ወትጸውር፡ ውስተ፡ እዴሃ፡ ጽዋዐ፡ ወርቅ፡ ዘምሉእ፡ ርኩሰ፡ ወግማኔ፡ ዝሙታ።
5 ወጽሑፍ፡ ውስተ፡ ፍጽማ፡ አስማተ፡ ምሥጢራ፡ ለባቢሎን፡ ዐባይ። ዘይብል፡ እሞን፡ ለዘማት፡ ወዘርኵሳ፡ ለምድር።
6 ወስክርት፡ ይእቲ፡ ብእሲት፡ እምደሞሙ፡ ለቅዱሳን። ወእምደሞሙ፡ ለጻድቃኒሁ፡ ለኢየሱስ። ወአንከርክዋ፡ ወሶበ፡ ርኢክዋ፡ ዐቢየ፡ ተደመምኩ።
7 ወይቤለኒ፡ ዝክቱ፡ መልአክ፡ ምንተ፡ ታነክር። አነ፡ እነግረከ፡ ምሥጢራ፡ ለዛቲ፡ ብእሲት። ወለዝክቱ፡ አርዌ፡ ዘይጸውራ፡ ዘሰብዐቱ፡ አርእስቲሁ፡ ወዐሠርቱ፡ አቅርንቲሁ።
8 ወዝክቱኒ፡ አርዌ፡ ዘርኢከ፡ ሀለወ፡ ወኢሀለወ። ወሀለዎ፡ ይዕርግ፡ እምነ፡ ቀላይ፡ ወየሐውር፡ ለሙስና። ወይዴመሙ፡ በእንቲኣሁ፡ እለ፡ ይነብሩ፡ ዲበ፡ ምድር። እለ፡ ኢኮነ፡ ጽሑፈ፡ አስማቲሆሙ፡ ውስተ፡ መጽሐፈ፡ ሕይወት፡ ዘእምፍጥረተ፡ ዓለም። ሶበ፡ ርእይዎ፡ ለውእቱ፡ አርዌ፡ ከመ፡ ሀለወ፡ ወኢሀለወ።
9 ወዘቦ፡ ልብ፡ ወጥበብ፡ የአምሮ፡ ለዝንቱ። ወለዝንቱሰ፡ አርዌ፡ ዘርኢከ፡ ወሰብዐቱ፡ አርእስቲሁ። ዝንቱ፡ ሰብዐቱ፡ አርእስት፡ ሰብዐቱ፡ አድባር፡ እሙንቱ። እለ፡ ዲቤሆሙ፡ ትነብር፡ ዛቲ፡ ብእሲት።
10 ወሰብዐቱ፡ አድባር፡ ሰብዐቱ፡ ነገሥት፡ እሙንቱ። ወኀምስቱ፡ ወድቁ፡ ወአሐዱ፡ ባሕቲቱ፡ ሀለወ፡ ወአሐዱ፡ ኢመጽአ፡ ዓዲ። ወሶበ፡ መጽአ፡ ይነብር፡ ኅዳጠ፡ መዋዕለ።
11 ወዝክቱኒ፡ አርዌ፡ ዘሀለወ፡ ወኢሀለወ፡ ሳምኖሙ፡ ውእቱ። ወምስለ፡ እሉ፡ ሰብዐቱ፡ ውእቱ፡ የሐውር፡ ለሙስና።
12 ወእሉሰ፡ ዐሠርቱ፡ አቅርንቲሁ፡ ዘርኢከ፡ ዐሠርቱ፡ ነገሥት፡ እሙንቱ። እለ፡ ዓዲ፡ ኢጸንዐት፡ መንግሥቶሙ። ወባሕቱ፡ ከመ፡ ነገሥት፡ ሥልጣን፡ ቦሙ፡ ለአሐቲ፡ ሰዓት። ወይትነሥኡ፡ ምስለ፡ ዝኩ፡ አርዌ።
13 ወአሐዱ፡ ምክሮሙ፡ ወኀይሎሙ። ወሥልጣኖሙ፡ አግብኡ፡ ለዝክቱ፡ አርዌ።
14 ወይጻብኡ፡ ምስለ፡ በግዑ፡ ወይመውኦሙ፡ በግዑ። እስመ፡ እግዚአ፡ አጋእዝት፡ ውእቱ፡ ወንጉሠ፡ ነገሥት፡ ውእቱ። ወእለ፡ ምስሌሁኒ፡ ስሙያን፡ ወኅሩያን፡ ወመሃይምናን፡ እሙንቱ።
15 ወዝንቱ፡ ማያት፡ ዘርኢከ፡ ዘኀቤሆሙ፡ ትነብር፡ ዛቲ፡ ብእሲት፡ ዘማ። አሕዛብ፡ ወሕዝብ፡ ወበሓውርት፡ ወሰብእ፡ እሙንቱ።
16 ወዝንቱ፡ ዐሠርቱ፡ አቅርንቲሁ፡ ወዝንቱኒ፡ አርዌ፡ ዘርኢከ። ይጸንሕዋ፡ እሙንቱ፡ ለዛቲ፡ ዘማ፡ ወያማስንዋ፡ ወያዐርቅዋ። ወይበልዕዋ፡ ሥጋሃ፡ ወኪያሃሰ፡ ያውዕይዋ፡ በእሳት።
17 እስመ፡ እግዚአብሔር፡ ወደየ፡ ውስተ፡ ልቦሙ፡ ከመ፡ ይኅበሩ፡ በአሐዱ፡ ምክር። ወያግብኡ፡ መንግሥቶሙ፡ ለዝክቱ፡ አርዌ። እስከ፡ አመ፡ ይትፌጸም፡ ቃለ፡ እግዚአብሔር።
18 ወዛቲ፡ ብእሲት፡ እንተ፡ ርኢካ፡ ሀገር፡ ዐባይ፡ ይእቲ። እንተ፡ ትነግሥ፡ ላዕለ፡ መንግሥታተ፡ ምድር።
=== chapter 18 ===
[ምዕራፍ 18]
በእንተ፡ ድቀተ፡ ባቢሎን
1 ወእምድኅረ፡ ዝንቱ፡ ወረደ፡ ካልእ፡ መልአክ፡ እምሰማይ። ወቦ፡ ዐቢይ፡ ሥልጣን። ወበርሀት፡ ምድር፡ እምብርሃነ፡ ገጹ፡ ወእምስብሐቲሁ።
2 ወጸርሐ፡ በዐቢይ፡ ቃል፡ ወይቤ፡ ወድቀት፡ ባቢሎን፡ ሀገር፡ ዐባይ። ወኮነት፡ ማኅደረ፡ ለአጋንንት፡ ኀበ፡ ይነብር፡ ኵሉ፡ ጋኔን፡ ርኩስ። ወምንባረ፡ ኵሉ፡ ዖፍ፡ ርኩስ፡ ወጽሉእ። ወምንባረ፡ ኵሉ፡ አርዌ፡ ርኩስ።
3 እስመ፡ እምነ፡ ሕምዘ፡ ወይነ፡ ዝሙታ፡ ወድቁ፡ ኵሎሙ፡ አሕዛብ። ወነገሥተ፡ ምድርኒ፡ እለ፡ ዘመዉ፡ ምስሌሃ። ወሠየጠ፡ ምድርኒ፡ እለ፡ በልዑ፡ እምነ፡ ኀይለ፡ ነፈርዐፃ።
4 ወመጽአ፡ ካልእ፡ ቃል፡ እምሰማይ፡ ዘይብል። ፃኡ፡ ሕዝብየ፡ እምኔሃ፡ ከመ፡ ኢትትካፈልዋ፡ ኀጢአታ፡ ወኢይርከብክሙ፡ መቅሠፍታ።
5 እስመ፡ ተለዋ፡ ኀጣውኢሃ፡ እስከ፡ ሰማይ። ወተዘከረ፡ ላቲ፡ እግዚአብሔር፡ ዐመፃሃ።
6 ወተበቀልዋ፡ በከመ፡ ይእቲ፡ ተበቀለት፡ ካዕበተ፡ ምክዕቢት፡ ዘከመ፡ ገብረት። ወበጽዋዕ፡ ዘቀድሐት፡ ቀድሑ፡ ላቲ፡ ካዕበቶ።
7 ወአምጣነ፡ ገፍዐት፡ ወፈግዐት፡ ከማሁ፡ ሣቀይዋ፡ ወአልሐውዋ። እስመ፡ ትቤ፡ በልባ፡ እነግሥ፡ ለዝሉፉ። ወኢይከውን፡ መበለተ፡ ወኢይሬኢ፡ ላሐ።
8 ወበእንተ፡ ዝንቱ፡ በአሐቲ፡ ሰዓት፡ ይመጽእ፡ ላዕሌሃ፡ መቅሠፍታ፡ ሞት፡ ወላሕኒ፡ ወረኃብኒ። ወያውዕይዋ፡ በእሳት፡ እስመ፡ ጽኑዕ፡ ውእቱ፡ እግዚአብሔር፡ ዘይትቤቀላ።
9 ወይበክዩ፡ ላዕሌሃ፡ ነገሥተ፡ ምድር። ወይሬእይዋ፡ እለ፡ ዘመዉ፡ ወፈግዑ፡ ምስሌሃ።
10 ወሶበ፡ ርእዩ፡ ጢሰ፡ እሳታ፡ እምርሑቅ፡ ቆሙ፡ በእንተ፡ ፍርሀተ፡ ሥቃያ። ወይቤሉ፡ አሌ፡ ላ፡ አሌ፡ ላ፡ ለሀገር፡ ባቢሎን፡ ዐባይ፡ ለሀገር፡ ጽንዕት። እስመ፡ በጽሐት፡ ሰዓተ፡ ደይና።
11 ወይበክይዋ፡ ሠየጠ፡ ምድርኒ፡ ወይላሕውዋ። እስመ፡ አልቦሙ፡ ዘይሣየጥ፡ ገራውሂሆሙ።
12 ወርቀ፡ ወብሩረ፡ ወዕንቈ፡ ክቡረ፡ ወባሕርየ፡ ወሜላተ፡ ወአዝመረ፡ ወለየ። ወሰንሰሪቆተ፡ ወኵሎ፡ ዕፀ፡ ሕቊ። ወኵሎ፡ ንዋየ፡ ዘቀርነ፡ ነጌ። ወኵሎ፡ ሠርጐ፡ ዘቦ፡ ዕንቊ፡ ክቡር። ወብርተ፡ ወኀጺነ፡ ወባላቀ።
13 ወቀናንሞ፡ ወአባሞ፡ ወዕጣነ፡ ወሜሮነ፡ ወስኂነ፡ ወወይነ። ወቅብዐ፡ ወሥንዳሌ፡ ወሥርናየ፡ ወእንስሳ፡ ወአባግዐ፡ ወአፍራሰ፡ ወሪዶነ። ወፄዋ፡ ወነፍሰ፡ ሰብእ።
14 ወአቅማሐትኪ፡ ተኀድገ፡ እምኔኪ፡ ወኵሉ፡ ስብሐትኪ፡ ወብርሃንኪ፡ ደመነ። ወኢይረክብዎ፡ እንተ፡ ሠየጥኪ፡ ለዝንቱ፡ በውስቴትኪ።
15 ወይቀውሙ፡ እምርሑቅ፡ በእንተ፡ ፍርሀተ፡ ሥቃይኪ፡ ወይበክዩኪ፡ ወይላሕዉኪ።
16 ወይብሉ፡ አሌላ፡ አሌላ፡ ለሀገር፡ ዐባይ፡ እንተ፡ ትለብስ፡ ሜላተ፡ ወአዝመረ፡ ወለየ። እንተ፡ ተገብረት፡ በወርቅ፡ ወበዕንቊ፡ ክቡር፡ ወበባሕርይ። እስመ፡ በአሐቲ፡ ሰዓት፡ ትማስን፡ ብዕላ።
17 ወኵሉ፡ ዘሐዳፍ፡ ወኵሉ፡ ኪነተ፡ አሕማር፡ ወኖትያት። ወኵሎሙ፡ እለ፡ ይትቀነዩ፡ በውስተ፡ ባሕር፡ እምርሑቅ፡ ቆሙ።
18 ወጸርሑ፡ ሶበ፡ ርእዩ፡ ውዕየተ፡ ሀገራ። ወይቤሉ፡ መኑ፡ ይመስላ፡ ለዛቲ፡ ሀገር፡ ዐባይ።
19 ወወደዩ፡ መሬተ፡ ውስተ፡ አርእስቲሆሙ፡ ወይጸርሑ። ወይበክይዋ፡ ወይላሕውዋ፡ ወይብሉ፡ አሌላ፡ አሌላ፡ ለሀገር፡ ዐባይ። እንተ፡ እምኔሃ፡ ብዕሉ፡ ኵሎሙ፡ እለ፡ ቦሙ፡ አሕማር፡ እምነ፡ ክብራ። እስመ፡ በአሐቲ፡ ሰዓት፡ ማሰነት።
20 ለይትፌሣሕ፡ ላዕሌሃ፡ ሰማይ፡ ወቅዱሳን፡ ነቢያት፡ ወሐዋርያት። እስመ፡ ተበቀለ፡ እግዚአብሔር፡ በቀለክሙ።
21 ወነሥአ፡ አሐዱ፡ መልአክ፡ ኀያል፡ ወጽኑዕ። እብነ፡ ዐቢየ፡ ከመ፡ ማሕረጽ፡ ወወገረ፡ ውስተ፡ ባሕር። ወይቤ፡ ከመ፡ ዝ፡ ትትገደፍ፡ ባቢሎን፡ ሀገር፡ ዐባይ፡ ወኢትትረከብ፡ እንከ።
22 ወኢይሰማዕ፡ በውስቴታ፡ ቃለ፡ መሰናቁት፡ ወእንዚራ፡ ወማሕሌት። ወቃለ፡ ቀርን፡ ኢይሰማዕ፡ በውስቴታ። ወኵሉ፡ ኬንያ፡ ወኵሉ፡ ኪን፡ ኢይትረከብ፡ በውስቴታ። ወኢ፡ ብርሃነ፡ ማኅቶት፡ ወኢ፡ ቃለ፡ መርዓዊ፡ ወመርዓት፡ ኢይሰማዕ፡ በውስቴታ።
23 እስመ፡ ሠየጥኪ፡ መሳፍንተ፡ ምድር። እለ፡ አስሐትኪዮሙ፡ በሥራያትኪ፡ ለኵሉ፡ አሕዛበ፡ ምድር።
24 ወተረክበ፡ በላዕሌኪ፡ ደመ፡ ነቢያት፡ ወዘቅዱሳን። ወዘኵሎሙ፡ እለ፡ ተቀትሉ፡ በውስተ፡ ምድር፡ በእንተ፡ ስሙ፡ ለክርስቶስ።
=== chapter 19 ===
[ምዕራፍ 19]
በእንተ፡ ፍትሐ፡ እግዚአብሔር፡ ወመርዐ፡ በግዑ
1 ወእምድኅረ፡ ዝንቱ፡ ተሰምዐ፡ ቃል፡ ዐቢይ፡ እምሰማይ፡ ከመ፡ ዘብዙኅ፡ ሰብእ። ወይብሉ፡ ሃሌ፡ ሉያ፡ እስመ፡ ስብሐት፡ ወፍርቃን፡ ወኀይል፡ ለአምላክነ።
2 እስመ፡ ጽድቅ፡ ወርትዕ፡ ኵነኔሁ፡ እስመ፡ ኰነና፡ ለዐባይ፡ ዘማ። እንተ፡ አማሰነት፡ ምድረ፡ በዝሙታ። ወተበቀለ፡ ደመ፡ ኵሎሙ፡ አግብርቲሁ፡ እምእዴሃ።
3 ወይብሉ፡ ዳግመ፡ ሃሌ፡ ሉያ።
4 ወዐርገ፡ ጢስ፡ ዘለዓለም፡ ዓለም። ወሰገዱ፡ እልክቱ፡ ዕሥራ፡ ወአርባዕቱ፡ ሊቃናት። ወእልክቱኒ፡ አርባዕቱ፡ እንስሳሁ፡ ለእግዚአብሔር። ዘይነብር፡ ዲበ፡ መንብሩ፡ ቅዱስ። ወይብሉ፡ አሜን፡ ሃሌ፡ ሉያ።
5 ወወፅአ፡ ቃል፡ እምሰማይ፡ እምውስተ፡ መንበሩ፡ ዘይብል። ሰብሑ፡ ለአምላክነ፡ ኵልክሙ፡ አግብርቲሁ። ወእለ፡ ትፈርህዎ፡ ንኡስክሙ፡ ወዐቢይክሙ።
6 ወእምዝ፡ ሰማዕኩ፡ ቃለ፡ ከመ፡ ዘብዙኅ፡ ሰብእ። ወከመ፡ ቃለ፡ ማይ፡ ብዙኅ። ወከመ፡ ቃለ፡ ነጐድጓድ፡ ዐቢይ። እንዘ፡ ይብሉ፡ ሃሌ፡ ሉያ። እስመ፡ ነግሠ፡ እግዚአብሔር፡ ዘኵሎ፡ ይመልክ።
7 ለንትፈሣሕ፡ ወንትሐሠይ፡ ወነሀብ፡ ሎቱ፡ ስብሐተ። እስመ፡ በጽሐ፡ መርዓ፡ በግዑ፡ ወብእሲትነ፡ ድሉት፡ ይእቲ።
8 ወተወህባ፡ ላቲ፡ ከመ፡ ትልበስ፡ ሜላተ፡ ብርሃን፡ ንጹሐ። እስመ፡ ውእቱ፡ ሜላት፡ ጽድቆሙ፡ ለቅዱሳን።
9 ወይቤለኒ፡ ጸሐፍ፡ ብፁዓን፡ እለ፡ ተጸውዑ፡ ውስተ፡ በዓለ፡ መርዓ፡ በግዑ። እስመ፡ ዝንቱ፡ ቃለ፡ ጽድቅ፡ ዘእግዚአብሔር፡ ውእቱ።
10 ወወደቁ፡ ኀበ፡ እግሪሁ፡ ወሰገድኩ፡ ሎቱ። ወይቤለኒ፡ ዑቅ፡ ዮጊ፡ ኢትስግድ፡ ሊተ። እስመ፡ አነሂ፡ ገብር፡ ዘከማከ። ወዘምስሌከ፡ ወምስለ፡ አኀዊከ፡ እለ፡ የዐቅቡ፡ ሕጎ፡ ለኢየሱስ። ወባሕቱ፡ ለእግዚአብሔር፡ ንስግድ፡ ኵልነ። እስመ፡ ሕጉ፡ ለኢየሱስ፡ መንፈሰ፡ ተነብዮ።
በእንተ፡ ፈረስ፡ ጸዐዳ፡ ወዘይጼዐኖ
11 ወእምዝ፡ ተርኅወ፡ ሰማይ፡ ወወፅአ፡ ፈረስ፡ ጸዐዳ። ወዘይጼዐኖ፡ ስሙ፡ መሃይምን፡ ወጻድቅ። ወበጽድቅ፡ ይኴንን፡ ወይጸብእ።
12 ወአዕይንቲሁ፡ ከመ፡ ነደ፡ እሳት። ወዲበ፡ ርእሱ፡ አክሊል። ወጽሑፍ፡ ውስተ፡ ቀጸላሁ፡ አስማት። ዘአልቦ፡ ዘየአምሮ፡ ዘእንበለ፡ ውእቱ፡ ባሕቲቱ።
13 ወይለብስ፡ ልብሰ፡ ዘንዙኅ፡ በደም። ወሰመዩ፡ ስሞ፡ ቃለ፡ እግዚአብሔር።
14 ወሐራ፡ ሰማይ፡ ይተልውዎ፡ በአፍራስ፡ ጸዐድወ። ወይለብሱ፡ ሜላተ፡ ብርሃን፡ ንጹሐ።
15 ወይወፅእ፡ እምነ፡ አፉሁ፡ ሰይፍ፡ በሊሕ፡ ዘቦቱ፡ ይቀሥፎሙ፡ ለአሕዛብ። ወውእቱ፡ ይርዕዮሙ፡ በበትረ፡ ኀጺን። ወውእቱ፡ ይከይዳ፡ ለምክያደ፡ ወይነ፡ ሕምዘ፡ መዓቱ፡ ለእግዚአብሔር፡ ዘኵሎ፡ ይመልክ።
16 ወጽሑፍ፡ ላዕለ፡ ልብሱ፡ ወውስተ፡ ገቦሁ፡ ስም። ዘይብል፡ ንጉሠ፡ ነገሥተ፡ ወእግዚአ፡ አጋእዝት።
17 ወእምዝ፡ ቆመ፡ አሐዱ፡ መልአክ፡ ውስተ፡ ፀሓይ። ወይጸርሕ፡ በቃል፡ ዐቢይ፡ ወይቤ። ለኵሉ፡ አዕዋፍ፡ ዘይሰርር፡ ውስተ፡ ማእከለ፡ ሰማይ። ንዑ፡ ተጋብኡ፡ ውስተ፡ በዓሊ፡ ለእግዚአብሔር፡ ዐቢይ።
18 ከመ፡ ትብልዑ፡ ሥጋ፡ ነገሥት፡ ወሥጋ፡ መላእክት። ወሥጋ፡ ጽኑዓን፡ ወሥጋ፡ አፍራስ፡ ወለእለ፡ ይጼዐንዎሙ። ወሥጋ፡ ኵሉ፡ አግዓዚ፡ ወገብር፡ ወዘንኡስ፡ ወዘዐቢይ።
19 ወእምዝ፡ መጽአ፡ ዝክቱ፡ አርዌ። ወነገሥተ፡ ምድር፡ ወሰራዊቶሙ፡ ተጋብኡ፡ ምስሌሁ። ከመ፡ ይጽብዕዎ፡ ለውእቱ፡ ዘይጼዐን፡ ላዕለ፡ ፈረስ፡ ጸዐዳ፡ ወለሰራዊቱ።
20 ወእምዝ፡ አኀዝዎ፡ ለዝኩ፡ አርዌ፡ ወለሐሳዌ፡ ነቢዩ። ዘገብረ፡ ተኣምራተ፡ በቅድሜሁ፡ በዘያስሕቶሙ። ለእለ፡ ጸሐፉ፡ ማኅተመ፡ ስሙ፡ ለውእቱ፡ አርዌ፡ ወሰገዱ፡ ሎቱ፡ ወለምስሉ። ወወደይዎሙ፡ ሕያዋኒሆሙ፡ ውስተ፡ ዐዘቅተ፡ እሳት፡ ዘይነድድ፡ በተይ።
21 ወለእለሰ፡ ተርፉ፡ ቀተልዎሙ፡ በሰይፍ። ዝክቱ፡ ዘይጼዐን፡ ላዕለ፡ ፈረስ፡ ጸዐዳ። እንተ፡ ይወፅእ፡ እምአፉሁ፡ ሰይፍ፡ በሊሕ። ወጸግቡ፡ ኵሉ፡ አዕዋፈ፡ ሰማይ፡ እምነ፡ ሥጋሆሙ።
=== chapter 20 ===
[ምዕራፍ 20]
በእንተ፡ ሙቃሔ፡ ሰይጣን
1 ወእምዝ፡ ወረደ፡ ካልእ፡ መልአክ፡ እምሰማይ። ወይጸውር፡ መራኁተ፡ ፀሓይ፡ ወዐበይት፡ መዋቅሕት፡ ውስተ፡ እዴሁ።
2 ወአኀዞ፡ ለዝክቱ፡ አርዌ፡ ዘውእቱ፡ ቀዳማዊ። ወውእቱ፡ ጋኔን፡ ሰይጣን።
3 ወአሰሮ፡ ፲፻፡ ዓመተ፡ ወአውደቆ፡ ውስተ፡ ማዕምቅ። ወዐጸወ፡ ላዕሌሁ፡ በማኅተም። ከመ፡ ኢያስሕት፡ አሕዛበ፡ እስከ፡ ይትፈጸም፡ ዝንቱ፡ ፲፻፡ ዓመት። ወእምድኅረ፡ ዝንቱ፡ ሀለዎ፡ ይትፈታሕ፡ ኅዳጠ፡ መዋዕለ።
4 ወእምዝ፡ ርኢኩ፡ መናብርተ። ወነበረ፡ ላዕሌሆሙ፡ ወልደ፡ ዕጓለ፡ እመሕያው። ወአግብአ፡ ሎሙ፡ ፍትሐ፡ በእንተ፡ ነፍሶሙ። ለእለ፡ ተቀትሉ፡ በእንተ፡ ስሙ፡ ለኢየሱስ፡ ወበእንተ፡ ቃለ፡ እግዚአብሔር። ወእለሰ፡ ኢሰገዱ፡ ለዝክቱ፡ አርዌ፡ ወኢ፡ ለምስሉ። ወኢጸሐፉ፡ ትእምርቶ፡ ውስተ፡ ፍጽሞሙ፡ ወኢ፡ ውስተ፡ እደዊሆሙ። እሙንቱ፡ የሐይዉ፡ ወይነግሡ፡ ምስለ፡ ክርስቶስ፡ ፲፻፡ ዓመተ።
5 ወባዕዳንሰ፡ ምዉታን፡ ኢይትነሥኡ። እስከ፡ አመ፡ ይትፌጸም፡ ዝንቱ፡ ፲፻፡ ዓመተ።
6 ወዛቲ፡ ይእቲ፡ ቀዳሚት፡ ሕይወት። ብፁዕ፡ ወቅዱስ፡ ውእቱ፡ ዘረከበ፡ ክፍለ፡ በይእቲ፡ ዕለት፡ እንተ፡ ትቀድም፡ መጺአ። እስመ፡ አልቦ፡ እንከ፡ ዳግመ፡ ሥልጣነ፡ ሞት፡ ላዕለ፡ እሉ። እስመ፡ ይከውኑ፡ ካህናቲሁ፡ ለእግዚአብሔር፡ ወለክርስቶስ። ወይነግሡ፡ ምስሌሁ፡ ፲፻፡ ዓመተ።
7 ወሶበ፡ ኀልቀ፡ ፲፻፡ ዓመት፡ ይትፈታሕ፡ ሰይጣን፡ እምነ፡ ሞቅሑ።
8 ወይወፅእ፡ ያስሕቶሙ፡ ለአሕዛብ፡ እለ፡ ውስተ፡ አርባዕቱ፡ መዓዝኒሃ፡ ለምድር። ወያስተጋብኦሙ፡ ለጎግ፡ ወለማጎግ፡ ከመ፡ ያስተቃትሎሙ። ወኍልቆሙሰ፡ ከመ፡ ኆጻ፡ ባሕር።
9 ወዐርጉ፡ ውስተ፡ ስፍሓ፡ ለምድር። ወዐገትዋ፡ ለትዕይንቶሙ፡ ለቅዱሳን፡ ወለሀገር፡ ቅድስት። ወእምዝ፡ ወረደት፡ እሳት፡ እምሰማይ፡ እምኀበ፡ እግዚአብሔር፡ ወበልዐቶሙ።
10 ወለዝክቱኒ፡ ሰይጣን፡ ዘያስሕቶሙ፡ ወደይዎ፡ ውስተ፡ ዐዘቅተ፡ እሳት፡ ወተይ። ኀበ፡ ሀሎ፡ ዝክቱ፡ አርዌ፡ ወሐሳዌ፡ ነቢይ። ከመ፡ ይደየኑ፡ መዓልተ፡ ወሌሊተ፡ እስከ፡ ለዓለመ፡ ዓለም።
በእንተ፡ መንበር፡ ዐቢይ፡ ወጸዐዳ
11 ወእምዝ፡ ርኢኩ፡ መንበረ፡ ዐቢየ፡ ወጸዐዳ፡ ወእምዘይነብር፡ ዲቤሁ። ጐዩ፡ እምቅድመ፡ ገጹ፡ ሰማይ፡ ወምድር፡ ወኀጥኡ፡ መካነ።
12 ወእምዝ፡ መጽኡ፡ ኵሎሙ፡ ምዉታን፡ ዐቢያን፡ ወንኡሳን። ወቆሙ፡ ቅድመ፡ መንበሩ፡ ወከሠቱ፡ ኵሎ፡ መጻሕፍተ። ወለመጽሐፈ፡ ሕይወትሰ፡ እንተ፡ ባሕቲታ፡ ከሠትዋ። ወተኰነኑ፡ እልክቱ፡ ምዉታን። በከመ፡ ጽሑፍ፡ ውስተ፡ ዝንቱ፡ መጽሐፍ፡ በከመ፡ ገብሩ።
13 ወአግብአት፡ ባሕርነ፡ ኵሎ፡ ምዉታነ፡ እለ፡ ውስቴታ። ወአግብኡ፡ ሲኦል፡ ወሞት፡ ዘኀቤሆሙ፡ ምዉታነ። ወአግብአት፡ ምድርኒ፡ እለ፡ ሀለዉ፡ ውስቴታ፡ ምዉታነ። ወተኰነኑ፡ ኵሎሙ፡ በከመ፡ ምግባሮሙ።
14 ወወደይዎሙ፡ ለሲኦል፡ ወለሞት፡ ውስተ፡ ዐዘቅተ፡ እሳት፡ ዘምልእት፡ ተየ። ወሞትሰ፡ ዳግም፡ ገሃነም፡ ዘእሳት፡ ውእቱ።
15 ወለኵሉ፡ ዘኢይትረከብ፡ ጽሑፍ፡ ውስተ፡ መጽሐፈ፡ ሕይወት። ይወድይዎ፡ ውስተ፡ ገሃነም፡ ዘእሳት።
=== chapter 21 ===
[ምዕራፍ 21]
በእንተ፡ ሰማይ፡ ሐዳስ፡ ወምድር፡ ሐዳስ
1 ወእምዝ፡ ርኢኩ፡ ሰማየ፡ ሐዲሰ፡ ወምድረ፡ ሐዳስ። እስመ፡ ሰሰለ፡ ሰማይ፡ ቀዳማዊ፡ ወምድርኒ፡ ቀዳሚት፡ ወባሕርኒ፡ ተስዕረት፡ እንከ።
2 ወለሀገርኒ፡ ቅድስት፡ ሐዳስ፡ ኢየሩሳሌም። ርኢክዋ፡ ወረደት፡ እምሰማይ፡ እምኀበ፡ እግዚአብሔር። ወድሉት፡ ይእቲ፡ ከመ፡ መርዓት፡ ሥርጉት፡ ለምታ።
3 ወሰማዕኩ፡ ቃለ፡ ዐቢየ፡ እምሰማይ፡ ዘይብል። ናሁ፡ ቅድስቱ፡ ለእግዚአብሔር፡ ምስለ፡ ዕጓለ፡ እመሕያው። ኀደረት፡ ምስሌሆሙ፡ እሙንቱኒ፡ ይከውንዎ፡ ሕዝቦ። ወውእቱኒ፡ ይከውኖሙ፡ አምላኮሙ፡ ወይሄሉ፡ እግዚአብሔር፡ ምስሌሆሙ።
4 ወያሴስል፡ አንብዐ፡ እምአዕይንቲሆሙ። ወአልቦ፡ እንከ፡ ሞት፡ ወኢ፡ ላሕ፡ ወኢገዓር፡ ወኢ፡ ሕማም፡ አልቦ፡ እንከ። እስመ፡ ኀለፈ፡ ዘቀዳሚ፡ ሥርዐት፡ ወናሁ፡ ተሐደሰ፡ ኵሉ።
5 ወይቤ፡ ዘይነብር፡ ዲበ፡ መንበሩ። ናሁ፡ እገብር፡ ኵሎ፡ ሐዲሰ። ወይቤለኒ፡ ጸሐፍ፡ እስመ፡ ዝንቱ፡ ቃል፡ እሙን፡ ዘበጽድቅ፡ ይከውን።
6 አነ፡ ውእቱ፡ አልፋ፡ ወኦ። ወአነ፡ ቀዳማዊ፡ ወአነ፡ ደኃራዊ። ወአንሰ፡ ለዘጸምአ፡ እሁቦ፡ ይስተይ፡ እምነቅዐ፡ ማየ፡ ሕይወት፡ በከንቱ።
7 ወዘሰ፡ ሞአ፡ ይወርሶ፡ ለዝንቱ። ወእከውኖ፡ ሎቱ፡ አምላከ፡ ወውእቱኒ፡ ይከውነኒ፡ ወልደ።
8 ወእለሰ፡ ይፈርህዎ፡ እንዘ፡ የአምኑ፡ ወያጌምኑ፡ ሥጋሆሙ። ወይቀትሉ፡ ወይዜምዉ፡ ወይገብሩ፡ ሥራየ፡ ወያመልኩ፡ አማልክተ። ወኵሎ፡ ሐሰተ፡ ይከውን፡ ምንዳቤሆሙ፡ ገሃነም፡ ዘእሳት፡ ወተይ። ወዝንቱ፡ ውእቱ፡ ዳግም፡ ሞት።
በእንተ፡ ቅድስት፡ ሀገር፡ ወሕንፀታ
9 ወመጽአ፡ አሐዱ፡ እምነ፡ እልክቱ፡ ሰብዐቱ፡ መላእክት። እለ፡ ይጸውሩ፡ ሰብዐተ፡ ጽዋዓተ፡ እለ፡ ምሉኣን፡ ሰብዐተ፡ መቅሠፍተ፡ ደኃርያተ። ወተናገረ፡ ምስሌየ፡ ወይቤለኒ። ነዐ፡ አርኢከሃ፡ ለመርዓት፡ ብእሲተ፡ በግዑ።
10 ወወሰደኒ፡ መንፈሰ፡ ውስተ፡ ደብር፡ ዐቢይ፡ ወነዊኅ። ወአርአየኒሃ፡ ለሀገር፡ ቅድስት፡ ኢየሩሳሌም። እንተ፡ ትወርድ፡ እምሰማይ፡ እምኀበ፡ እግዚአብሔር።
11 ወስብሐተ፡ እግዚአብሔር፡ ላዕሌሃ። ወከዋክብቲሃኒ፡ ይመስሉ፡ ከመ፡ ዕንቊ፡ ክቡር። ወጽዕዱት፡ ይእቲ፡ ከመ፡ ባሕርይ።
12 ወዐባይ፡ ዐረፍታ፡ ወነዋኅ፡ ጥቅማ። ወባቲ፡ ዐሠርቱ፡ ወክልኤቱ፡ አናቅጽ። ወውስተ፡ አናቅጺሃ፡ ዐሠርቱ፡ ወክልኤቱ፡ መላእክት። ወጽሑፋን፡ አስማት፡ ዘዐሠርቱ፡ ወክልኤቱ፡ ሕዝበ፡ እስራኤል።
13 ወውስተ፡ አናቅጽ፡ ጽባሓውያን፡ ሠለስቱ። ወውስተ፡ አናቅጽ፡ ዐረባውያን፡ ሠለስቱ። ወውስተ፡ አናቅጽ፡ ሰሜናውያን፡ ሠለስቱ። ወውስተ፡ አናቅጽ፡ ደቡባውያን፡ ሠለስቱ።
14 ወዐሠርቱ፡ ወክልኤቱ፡ መሠረታቲሃ፡ ለዐረፍተ፡ ሀገራ። ወጽሑፍ፡ ውስቴቶን፡ አስማተ፡ ዐሠርቱ፡ ወክልኤቱ፡ ሐዋርያተ፡ በግዑ።
15 ወዝክቱ፡ ዘይትናገር፡ ምስሌየ፡ ይጸውር፡ ኅለተ፡ ወርቅ። በዘቦቱ፡ ይሜጥና፡ ለይእቲ፡ ሀገር፡ ወለአናቅጺሃ፡ ወለዐረፋቲሃ።
16 ወርብዕት፡ ይእቲ፡ ሀገር። በአምጣነ፡ ኑኃ፡ ወግድማ፡ ወመጠና፡ ለይእቲ፡ ሀገር፡ በውእቱ፡ ኅለት። ወኮነ፡ አምጣኒሃ፡ ዐሠርተ፡ ወክልኤተ፡ ምእት፡ ኑኃ። ወግድማ፡ ወቆማኒ፡ ዕሩይ።
17 ወእምዝ፡ መጠነ፡ ዐረፋቲሃ፡ ምእት፡ ወአርባዕ፡ ወአርባዕቱ፡ በእመተ፡ ሰብእ። ዘውእቱ፡ አሐዱ፡ በእመተ፡ መልአክ።
18 ወውስተ፡ ርእሰ፡ ዐረፍታ፡ ለይእቲ፡ ሀገር፡ በዕንቈ፡ ኢያስጲድ፡ ወበያክንት። ወትመስል፡ ሀገራ፡ ከመ፡ ዘበወርቅ፡ ንጹሕ፡ ግብረታ።
19 ወመሠረተ፡ ዐረፍተ፡ ሀገራ፡ ከመ፡ ማህው፡ ጸዐዳ። ሥርጉት፡ በኵሉ፡ ዕንቊ፡ ክቡር። ወቀዳሚት፡ መሠረት፡ በኢያስጲድ፡ ወካልእት፡ በሰንፔር። ወሣልስት፡ በኬልቄዶን፡ ወራብዕት፡ በዘመረግድ።
20 ወኀምስት፡ በሰርዶንክስ፡ ወሳድስት፡ በሰርድዮን። ወሳብዕት፡ በክርስቲሎቤ፡ ወሳምንት፡ በቢረሌ። ወታስዕት፡ በወራውሬ፡ ወዐሥርት፡ በክርስጵራስስ። ወእንተ፡ ዐሥሩ፡ ወአሐቲ፡ በያክንት። ወእንተ፡ ዐሥሩ፡ ወክልኤ፡ በአሜቴስጢኖስ።
21 ወዴዴያቲሃኒ፡ ዐሥሩ፡ ወክልኤ፡ በዐሥሩ፡ ወክልኤ፡ ባሕርይ። ወለለ፡ አሐቲ፡ ዴዴ፡ አሐቲ፡ ባሕርይ። ወጽጐ፡ ሀገራ፡ ከመ፡ ወርቅ፡ ንጹሕ። ወያጸድል፡ እንተ፡ ውሥጣ፡ ከመ፡ ማህው።
22 ወኢርኢኩ፡ ጽርሐ፡ እንተ፡ ከማሃ። እስመ፡ እግዚአብሔር፡ ዘኵሎ፡ ይመልክ፡ ውእቱ፡ ጽርሓ፡ ወበግዑ።
23 ወሀገራሰ፡ ኢትፈቅድ፡ ፀሓየ፡ ወኢ፡ ወርኀ፡ ከመ፡ ያብርሁ፡ ላቲ። እስመ፡ ብርሃነ፡ እግዚአብሔር፡ ያበርሁ፡ ላቲ። ወማኅቶታ፡ ውእቱ፡ በግዑ።
24 ወየሐውሩ፡ አሕዛብ፡ በብርሃነ፡ ዚኣሃ። ወነገሥተ፡ ምድርኒ፡ ያመጽኡ፡ አምኃ፡ እምክብሮሙ፡ ውስቴት።
25 ወኢይትዐጸዉ፡ አናቅጺሃ፡ መዓልተ፡ ወሌሊተ፡ እስመ፡ አልባቲ፡ ሌሊት።
26 ወአሕዛብኒ፡ ያመጽኡ፡ ክብሮሙ፡ ወስብሐቲሆሙ፡ ውስቴታ።
27 ወኢይበውእ፡ ውስቴታ፡ ኵሉ፡ ዘርኩስ፡ ወዘይገብር፡ ግማኔ፡ ወሐሰተ። ወዘኢኮነ፡ ጽሑፍ፡ ውስተ፡ መጽሐፈ፡ ሕይወት፡ ዘበግዑ።
=== chapter 22 ===
[ምዕራፍ 22]
በእንተ፡ ፈለገ፡ ሕይወት፡ ወዕፀ፡ ሕይወት
1 ወአርአየኒ፡ ፈለገ፡ ዘማየ፡ ሕይወት፡ ጸዐዳ፡ ከመ፡ በረድ። ወይወፅእ፡ እምነ፡ መንበሩ፡ ለእግዚአብሔር፡ ወሥልጣነ፡ በግዑ።
2 ወይውሕዝ፡ ውስተ፡ ማእከለ፡ መርኅባ። ወእምለፌኒ፡ ውእቱ፡ ፈለግ፡ ወእምከሃሁኒ፡ ዕፀ፡ ሕይወት። ወይገብር፡ ፍሬ፡ ዐሠርተ፡ ወክልኤተ፡ ለለ፡ አሐዱ፡ ወርኅ። ወቈጽለ፡ ዕፁኒ፡ ለሕይወተ፡ አሕዛብ።
3 ወአልቦ፡ እንከ፡ ርኩስ፡ ወኢ፡ ምንትኒ። ወሀለወ፡ ውስቴታ፡ መንበረ፡ እግዚአብሔር፡ ወበግዑ። ወኢይከውን፡ መዓት፡ ላዕለ፡ አግብርቲሁ፡ ለእግዚአብሔር፡ እለ፡ ያመልክዎ።
4 ወይሬእዩ፡ ገጾ፡ ወስሙ፡ ውስተ፡ ፍጽሞሙ።
5 ወአልቦ፡ እንከ፡ ሌሊት። ወኢይፈቅዱ፡ ብርሃነ፡ ማኅቶት፡ ወኢ፡ ብርሃነ፡ ፀሓይ። እስመ፡ እግዚአብሔር፡ ያበርህ፡ ላዕሌሆሙ፡ ወይነግሡ፡ ለዓለመ፡ ዓለም።
6 ወይቤለኒ፡ ዝክቱ፡ ቃለ፡ ጽድቅ፡ ወመሃይምን፡ እግዚእነ፡ ወእግዚአብሔር፡ አምላክነ። ወመንፈሰ፡ ነቢያት፡ ዘፈነወ፡ መልአኮ። ከመ፡ ያርእዮሙ፡ ለአግብርቲሁ፡ ዘሀለወ፡ ይኩን፡ ፍጡነ።
7 ወናሁ፡ እመጽእ፡ ፍጡነ። ወብፁዕ፡ ዘየዐቅብ፡ ቃለ፡ ተነብዮቱ፡ ለዝንቱ፡ መጽሐፍ።
8 ወአነ፡ ዮሐንስ፡ ዘርኢኩ፡ ወዘሰማዕኩ፡ ዘንተ። ሰገድኩ፡ ቅድመ፡ እገሪሁ፡ ለውእቱ፡ መልአክ፡ ዘአርአየንዮ፡ ለዝንቱ።
9 ወይቤለኒ፡ ኢትስግድ፡ ሊተ። ዑቅ፡ ዮጊ፡ ገብረ፡ አጋእዝቲከ፡ አነ፡ ወዘአኀዊከ፡ ነቢያት። ወዘእለ፡ የዐቅቡ፡ ቃለ፡ ዝንቱ፡ መጽሐፍ።
10 ወአንተሰ፡ ለእግዚአብሔር፡ ስግድ። ወኢትኅትም፡ ቃለ፡ ተነብዮቱ፡ ለዝንቱ፡ መጽሐፍ፡ እስመ፡ በጽሐ፡ ዘመኑ።
11 ወለዘገፍዐኒ፡ ይገፍዕዎ፡ እንከ፡ ወለዘረስሐኒ፡ ያረስሕዎ፡ እንከ። ወጻድቅ፡ ለይጽደቅ፡ ወንጹሕኒ፡ ለይንጻሕ።
በእንተ፡ ዕሴት፡ ወኵነኔ
12 ወናሁ፡ እመጽእ፡ ፍጡነ፡ ወዕሴትየኒ፡ ምስሌየ፡ ውእቱ። ከመ፡ እፍድዮ፡ ለለ፡ አሐዱ፡ ወእኰንኖ፡ በከመ፡ ምግባሩ።
13 አነ፡ ውእቱ፡ አልፋ፡ ወኦ። አነ፡ ቀዳማዊ፡ ወአነ፡ ደኃራዊ፡ ርእስ፡ ወማኅለቅት።
14 ብፁዓን፡ እለ፡ አንጽሑ፡ አልባሲሆሙ። ከመ፡ ይኩን፡ ሥልጣኖሙ፡ ላዕለ፡ ዕፀ፡ ሕይወት። ወይበውእዋ፡ እንተ፡ አናቅጺሃ፡ ለዛ፡ ሀገር።
15 ወይወፅኡ፡ አፍኣ፡ ኀምስቱ፡ አክላብ። እለ፡ ሥራይ፡ ወዘማውያን፡ ወቀታልያን፡ ወእለ፡ ያመልኩ፡ ጣዖተ። ወኵሎሙ፡ እለ፡ ያፈቅሩ፡ ግብረ፡ ሐሰት።
16 አነ፡ ኢየሱስ፡ ፈነውኩ፡ መልአክየ፡ ያስምዕ፡ ለክሙ፡ ዘንተ፡ ለአብያተ፡ ክርስቲያናት። አነ፡ ውእቱ፡ ሥርው፡ ዘእምዘመደ፡ ዳዊት፡ ኮከበ፡ ብርሃን፡ ጽባሓዊ።
17 ወመንፈስ፡ ቅዱስ፡ ዘመርዔት። ወይቤሉ፡ ለይምጻእ፡ ወዘጸምአኒ፡ ለይምጻእ። ወዘይፈቅድ፡ ለይንሣእ፡ ማየ፡ ሕይወት፡ በከንቱ።
18 ወአነ፡ ስምዑ፡ ለኵሉ፡ ዘይሰምዕ፡ ቃለ፡ ዝንቱ፡ መጽሐፍ። እመ፡ ወሰከ፡ ዲቤሁ፡ ይዌስክ፡ እግዚአብሔር፡ ላዕሌሁ፡ መቅሠፍተ፡ ዘጽሑፍ፡ ውስተ፡ ዝንቱ፡ መጽሐፍ።
19 ወእመኒ፡ አሰሰለ፡ እምውስተ፡ ቃለ፡ ዝንቱ፡ መጽሐፍ። ያሴስል፡ እግዚአብሔር፡ ክፍሎ፡ እምዕፀ፡ ሕይወት። ወእምነ፡ ሀገር፡ ቅድስት፡ ዘጽሑፍ፡ ውስተ፡ ዝንቱ፡ መጽሐፍ።
20 ወይበል፡ ዘሰምዐ፡ ዘንተ፡ እወ፡ እመጽእ፡ ፍጡነ። አሜን፡ ነዐ፡ እግዚኦ፡ ኢየሱስ።
21 ጸጋሁ፡ ለእግዚእነ፡ ኢየሱስ፡ ክርስቶስ፡ ምስለ፡ ኵልክሙ፡ አሜን።