##### edition  (gez) — Text of the EOTC printed Bible
=== chapter 1 ===
[ምዕራፍ 1]
1 ቀዳሚሁ፡ ቃል፡ ውእቱ። ወውእቱ፡ ቃል፡ ኀበ፡ እግዚአብሔር፡ ውእቱ። ወእግዚአብሔር፡ ውእቱ፡ ቃል።
2 ወዝንቱ፡ ቀዳሚሁ፡ እምቀዲሙ፡ ኀበ፡ እግዚአብሔር፡ ውእቱ።
3 ወኵሉ፡ ቦቱ፡ ኮነ፡ ወዘእንበሌሁስ፡ አልቦ፡ ዘኮነ፡ ወኢ፡ ምንትኒ፡ እምዘኮነ።
4 ወዘሂ፡ ኮነ፡ በእንቲኣሁ፡ ቦቱ፡ ሕይወት፡ ውእቱ። ወሕይወትሰ፡ ብርሃኑ፡ ለዕጓለ፡ እመሕያው፡ ውእቱ።
5 ወብርሃንሰ፡ ዘውስተ፡ ጽልመት፡ ያበርህ፡ ወያርኢ፡ ወጽልመትኒ፡ ኢይረክቦ፡ ወኢይቀርቦ።
6 ወሀሎ፡ አሐዱ፡ ብእሲ፡ ዘተፈነወ፡ እምኀበ፡ እግዚአብሔር፡ ዘስሙ፡ ዮሐንስ።
7 ወውእቱ፡ መጽአ፡ ሰማዕተ፡ ይኩን፡ በእንተ፡ ብርሃን፡ ከመ፡ ኵሉ፡ ይእመን፡ ቦቱ።
8 ወለሊሁሰ፡ ኢኮነ፡ ብርሃነ፡ ዳእሙ፡ ሰማዕተ፡ ይኩን፡ በእንተ፡ ብርሃን።
9 ወብርሃነ፡ ጽድቅሰ፡ ዘያበርህ፡ ለኵሉ፡ ሰብእ፡ ዘመጽአ፡ ውስተ፡ ዓለም።
10 ወውስተ፡ ዓለም፡ ሀሎ፡ ወዓለምኒ፡ ቦቱ፡ ኮነ፡ ወዓለምሰ፡ ኢያእመሮ።
11 ውስተ፡ ዚኣሁ፡ መጽአ፡ ወእሊኣሁሰ፡ ኢተወክፍዎ።
12 ወለእለሰ፡ ተወክፍዎ፡ ወሀቦሙ፡ ሥልጣነ፡ ውሉደ፡ እግዚአብሔር፡ ይኩኑ፡ ለእለ፡ አምኑ፡ በስሙ።
13 እለ፡ ኢኮኑ፡ እምነ፡ ዘሥጋ፡ ወደም፡ ወኢ፡ እምሥምረተ፡ ብእሲ፡ ወብእሲት። አላ፡ እምእግዚአብሔር፡ ተወልዱ።
14 ወውእቱ፡ ቃል፡ ሥጋ፡ ኮነ፡ ወኀደረ፡ ላዕሌነ፡ ወሠወሮ፡ እምኔነ። ወርኢነ፡ ስብሐቲሁ፡ ከመ፡ ስብሐተ፡ አሐዱ፡ ዋሕድ፡ ለአቡሁ፡ ዘምሉእ፡ ጸጋ፡ ወጽድቀ፡ ወሞገሰ።
15 ዮሐንስ፡ ሰማዕቱ፡ በእንቲኣሁ፡ ከልሐ፡ ወይቤ። ዝ፡ ውእቱ፡ ዘእቤለክሙ፡ አነ፡ በእንቲኣሁ፡ ይመጽእ፡ እምድኅሬየ። ብእሲ፡ ዘሀሎ፡ እምቅድሜየ፡ እስመ፡ ውእቱ፡ ቀደመኒ።
16 እስመ፡ እምተረፈ፡ ዚኣሁ፡ ነሣእነ፡ ንሕነ፡ ኵልነ። ጸጋ፡ ህየንተ፡ ጸጋ፡ በዲበ፡ ጸጋ።
17 እስመ፡ ኦሪት፡ በሙሴ፡ ተውህበት፡ ለነ። ጸጋሰ፡ ወጽድቅ፡ በኢየሱስ፡ ክርስቶስ፡ ኮነ፡ ለነ።
18 ለእግዚአብሔርሰ፡ አልቦ፡ ዘርእዮ፡ ግሙራ። አላ፡ ወልድ፡ ዋሕድ፡ ዘሀሎ፡ ውስተ፡ ሕፅነ፡ አቡሁ፡ ውእቱ፡ ነገረነ።
በእንተ፡ ስምዑ፡ ለዮሐንስ፡ መጥምቅ
19 ወዝንቱ፡ ውእቱ፡ ስምዑ፡ ለዮሐንስ፡ አመ፡ ለአኩ፡ ኀቤሁ፡ አይሁድ። እምኢየሩሳሌም፡ ካህናተ፡ ወሌዋውያነ፡ ከመ፡ ይሰአልዎ፡ ወይበልዎ፡ መኑ፡ አንተ።
20 ወአምነ፡ ወኢክሕደ፡ ከመ፡ ኢኮነ፡ ውእቱ፡ ክርስቶስሃ።
21 ወይቤልዎ፡ መኑ፡ አንተ፡ ኤልያስኑ፡ አንተ፡ ወይቤ፡ ኢኮንኩ። ወይቤልዎ፡ ነቢይኑ፡ አንተ፡ ወይቤ፡ አልቦ።
22 ወይቤልዎ፡ መኑመ፡ አንተ፡ እንከ፡ ከመ፡ ናይድዖሙ፡ ወናጠይቆሙ። ለእለ፡ ለአኩነ፡ ወፈነዉነ፡ መነ፡ ትብል፡ ርእሰከ።
23 ወይቤ፡ አንሰ፡ ቃለ፡ ዐዋዲ፡ ዘይሰብክ፡ በገዳም። ወይብል፡ ጺሑአ፡ ፍኖቶ፡ ለእግዚአብሔር፡ በከመ፡ ይቤ፡ ኢሳይያስ፡ ነቢይ።
24 ወእለሰ፡ ተፈነዉ፡ እምፈሪሳውያን፡ እሙንቱ።
25 ወተስእልዎ፡ ወይቤልዎ፡ በእፎ፡ እንከ፡ ታጠምቅ። ለእመ፡ ኢኮንከ፡ ክርስቶስሃ፡ ወኢ፡ ኤልያስሃ፡ ወኢ፡ ነቢየ።
26 ወአውሥአ፡ ዮሐንስ፡ ወይቤሎሙ፡ አንሰ፡ አጠምቀክሙ፡ በማይ። ወማእከሌክሙ፡ ሀሎ፡ ይቀውም፡ ዘኢተአምርዎ፡ አንትሙ።
27 ዘይመጽእ፡ እምድኅሬየ፡ ውእቱ፡ ዘሀሎ፡ እምቅድሜየ። ዘኢይደልወኒ፡ እፍታሕ፡ ቶታነ፡ አሣእኒሁ፡ እምእገሪሁ። ወውእቱ፡ ያጠምቀክሙ፡ በመንፈስ፡ ቅዱስ፡ ወበእሳት።
28 ወከመ፡ ዝ፡ ኮነ፡ በቢታንያ፡ በቤተራባ፡ በማዕዶተ፡ ዮርዳኖስ፡ በኀበ፡ ሀሎ፡ ዮሐንስ፡ ያጠምቅ።
29 ወአመ፡ ሳኒታ፡ ርእዮ፡ ዮሐንስ፡ ለእግዚእ፡ ኢየሱስ፡ እንዘ፡ ይመጽእ፡ ኀቤሁ። ወይቤ፡ ነዋ፡ በግዑ፡ ለእግዚአብሔር፡ ዘያአትት፡ ወያሴስል፡ ኀጢአተ፡ ዓለም።
30 ዝንቱ፡ ውእቱ፡ ዘእቤለክሙ፡ አነ፡ በእንቲኣሁ፡ ይመጽእ፡ እምድኅሬየ። ብእሲ፡ ዘሀሎ፡ እምቅድሜየ፡ እስመ፡ እምቅድሜየ፡ ውእቱ፡ ኮነ።
31 ወአንሰ፡ ኢየአምሮ፡ ዳእሙ፡ ከመ፡ ያእምርዎ፡ እስራኤል። በእንተ፡ ዝ፡ መጻእኩ፡ አነ፡ ከመ፡ አጥምቅ፡ በማይ።
32 ወነገረ፡ ስምዖ፡ ዮሐንስ፡ ወይቤ፡ ርኢኩ፡ መንፈስ፡ ቅዱስ፡ እንዘ፡ ይወርድ፡ እምሰማይ። ከመ፡ እንተ፡ ርግብ፡ ወይነብር፡ ዲቤሁ።
33 ወአንሰ፡ ኢየአምሮ፡ ወባሕቱ፡ ዘፈነወኒ፡ ከመ፡ አጥምቅ፡ በማይ። ውእቱ፡ ይቤለኒ፡ ዲበ፡ ዘርኢከ፡ ይወርድ፡ መንፈስ፡ ቅዱስ። ወይነብር፡ ዲቤሁ፡ ውእቱኬ፡ ዘያጠምቅ፡ በመንፈስ፡ ቅዱስ።
34 ወለልየ፡ ርኢኩ፡ ወአነ፡ ሰማዕቱ፡ ከመ፡ ዝንቱ፡ ውእቱ፡ ወልዱ፡ ለእግዚአብሔር።
በእንተ፡ ቀዳማውያን፡ አርድእተ፡ እግዚእ፡ ኢየሱስ
35 ወበሳኒታ፡ ካዕበ፡ እንዘ፡ ይቀውም፡ ዮሐንስ፡ ወክልኤቱ፡ እምአርዳኢሁ።
36 ርእዮ፡ እግዚእ፡ ኢየሱስ፡ እንዘ፡ የሐውር፡ ወይቤ። ነዋ፡ በግዑ፡ ለእግዚአብሔር፡ ዘያአትት፡ ወያሴስል፡ ኀጢአተ፡ ዓለም።
37 ወሰምዕዎ፡ ክልኤሆሙ፡ አርዳኢሁ፡ እንዘ፡ ይብል፡ ከመ፡ ዝ፡ ወተለውዎ፡ ለእግዚእ፡ ኢየሱስ።
38 ወተመይጦ፡ ኢየሱስ፡ ርእዮሙ፡ እንዘ፡ ይተልውዎ፡ ወይቤሎሙ፡ ምንተ፡ ተኀሥሡ።
39 ወይቤልዎ፡ ረቢ፡ ዘበትርጓሜሁ፡ ሊቅ፡ ብሂል፡ አይቴ፡ ተኀድር።
40 ወይቤሎሙ፡ ንዑ፡ ትርአዩ፡ ኀበ፡ አኀድር፡ ወሖሩ፡ ወርእዩ፡ ኀበ፡ የኀድር። ወወዐሉ፡ ኀቤሁ፡ ይእተ፡ ዕለተ፡ እስከ፡ ዐሥሩ፡ ሰዓት።
41 ወአሐዱ፡ ውእቱ፡ እንድርያስ፡ እኁሁ፡ ለስምዖን፡ ጴጥሮስ። እምክልኤቱ፡ እለ፡ ሰምዑ፡ በኀበ፡ ዮሐንስ፡ ወተለውዎ፡ ለእግዚእ፡ ኢየሱስ።
42 ወለሊሁ፡ አቅደመ፡ ውእቱ፡ ረኪበ፡ እኅዋሁ፡ ስምዖንሃ፡ ወይቤሎ። ረከብናሁ፡ ለማስያስ፡ ዘበትርጓሜሁ፡ ይብልዎ፡ ክርስቶስ።
43 ወውእቱ፡ ወሰዶ፡ ኀበ፡ እግዚእ፡ ኢየሱስ፡ ወሶበ፡ ርእዮ፡ እግዚእ፡ ኢየሱስ፡ ይቤሎ። አንተኑ፡ ስምዖን፡ ወልደ፡ ዮና፡ አንተኬ፡ ትሰመይ፡ ኬፋ፡ ዘበትርጓሜሁ፡ ጴጥሮስ።
44 ወበሳኒታ፡ ፈቀደ፡ ይሑር፡ ገሊላ። ወረከቦ፡ እግዚእ፡ ኢየሱስ፡ ለፊልጶስ፡ ወይቤሎ፡ ትልወኒ።
45 ወውእቱሰ፡ ፊልጶስ፡ ዘቤተሳይዳ፡ እምሀገረ፡ እንድርያስ፡ ወጴጥሮስ።
46 ወረከቦ፡ ፊልጶስ፡ ለናትናኤል፡ ወይቤሎ። ረከብናሁ፡ ለኢየሱስ፡ ወልደ፡ ዮሴፍ፡ ዘእምናዝሬት። ዘጸሐፈ፡ ሙሴ፡ ውስተ፡ ኦሪት፡ ወነቢያትኒ፡ ተነበዩ፡ በእንቲኣሁ።
47 ወይቤሎ፡ ናትናኤል፡ ቦኑ፡ ይትከሀል፡ እምናዝሬት፡ ከመ፡ ይፃእ፡ ብእሲ፡ ኄር። ወይቤሎ፡ ፊልጶስ፡ ነዐ፡ ትርአይ።
48 ወሶበ፡ ርእዮ፡ እግዚእ፡ ኢየሱስ፡ ለናትናኤል፡ እንዘ፡ ይመጽእ፡ ኀቤሁ፡ ይቤ። በእንቲኣሁ፡ ነዋ፡ ዘበአማን፡ እስራኤላዊ፡ ዘአልቦ፡ ጽልሑተ፡ ውስተ፡ ልቡ።
49 ወይቤሎ፡ ናትናኤል፡ በአይቴ፡ ተአምረኒ፡ ወአውሥአ፡ እግዚእ፡ ኢየሱስ፡ ወይቤሎ። እምቅድመ፡ ይጸውዕከ፡ ፊልጶስ፡ ርኢኩከ፡ በታሕተ፡ ዕፀ፡ በለስ።
50 ወአውሥአ፡ ናትናኤል፡ ወይቤሎ። ረቢ፡ አማን፡ አንተ፡ ውእቱ፡ ወልደ፡ እግዚአብሔር፡ ወንጉሠ፡ እስራኤል፡ አንተ።
51 ወአውሥአ፡ እግዚእ፡ ኢየሱስ፡ ወይቤሎ። እስመ፡ እመ፡ እቤለከሁ፡ ርኢኩከ፡ በታሕተ፡ ዕፀ፡ በለስ፡ ተአምን። እምይእዜሰ፡ ዘየዐቢ፡ እምዝ፡ ትሬኢ።
52 ወይቤሎሙ፡ አማን፡ አማን፡ እብለክሙ። እምይእዜሰ፡ ትሬእዩ፡ እንዘ፡ ይትረኀዋ፡ ሰማያት። ወመላእክተ፡ እግዚአብሔር፡ እንዘ፡ የዐርጉ፡ ወይወርዱ፡ ኀበ፡ ወልደ፡ ዕጓለ፡ እመሕያው።
=== chapter 2 ===
[ምዕራፍ 2]
በእንተ፡ ከብካብ፡ በቃና፡ ዘገሊላ
1 ወአመ፡ ሣልስት፡ ዕለት፡ ከብካብ፡ ኮነ፡ በቃና፡ ዘገሊላ። ወሀለወት፡ ህየ፡ እሙ፡ ለእግዚእ፡ ኢየሱስ።
2 ወጸውዕዎ፡ ለእግዚእ፡ ኢየሱስ፡ ወለአርዳኢሁ፡ ውስተ፡ ከብካብ።
3 ወሶበ፡ ኀልቀ፡ ወይኖሙ፡ ትቤሎ፡ እሙ፡ ለእግዚእ፡ ኢየሱስ፡ ወይንኬ፡ አልቦሙ።
4 ወይቤላ፡ እግዚእ፡ ኢየሱስ፡ ምንት፡ ብየ፡ ምስሌኪ። ኦ፡ ብእሲቶ፡ ዓዲ፡ ኢበጽሐ፡ ጊዜየ።
5 ወትቤሎሙ፡ እሙ፡ ለእለ፡ ይትለአኩ፡ ኵሎ፡ ዘይቤለክሙ፡ ግበሩ።
6 ወሀለዋ፡ ህየ፡ መሣብክት፡ ስድስቱ፡ እለ፡ እብን። በዘያጥህሩ፡ ቦቶን፡ አይሁድ፡ ንቡራት፡ ህየ። ወያገምራ፡ በበ፡ ክልኤቱ፡ ወበበ፡ ሠለስቱ፡ መስፈርት፡ ዘቀሡት።
7 ወይቤሎሙ፡ እግዚእ፡ ኢየሱስ፡ ምልእዎንኬ፡ ለእላ፡ መሣብክት፡ ማየ። ወመልእዎን፡ እስከ፡ አፉሆን፡ ወእስከ፡ ላዕሎን።
8 ወይቤሎሙ፡ ቅድሑኬ፡ ይእዜ፡ ወሰዱ፡ ወሀብዎ፡ ለሊቀ፡ ምርፋቅ፡ ወወሰዱ፡ ወወሀብዎ።
9 ወጥዒሞ፡ አንከረ፡ ሊቀ፡ ምርፋቅ፡ ውእተ፡ ማየ፡ ዘኮነ፡ ወይነ። ወኢያእመረ፡ እምኀበ፡ አምጽእዎ። ወገዛእትሰ፡ እለ፡ ቀድሕዎ፡ የአምሩ፡ ውእተ፡ ማየ፡ ዘኮነ፡ ወይነ። እስመ፡ እሙንቱ፡ መልኡ፡ ማየ፡ ወጸውዖ፡ ሊቀ፡ ምርፋቅ፡ ለመርዓዊ።
10 ወይቤሎ፡ ኵሉ፡ ሰብእ፡ ዘይሤኒ፡ ወይነ፡ ያቀድም፡ እስትዮ። ወእምድኅረ፡ ሰክሩ፡ ያሰቲ፡ ዘይቴሐት። ወአንተሰ፡ ዘይሤኒ፡ ወይነ፡ ዐቀብከ፡ ወአስተደኀርከ፡ እስከ፡ ይእዜ።
11 ወዝንቱ፡ ቀዳሜ፡ ተኣምር፡ ዘገብረ፡ እግዚእ፡ ኢየሱስ፡ በቃና፡ ዘገሊላ። ወአርአየ፡ ስብሐቲሁ፡ ወአምኑ፡ ቦቱ፡ አርዳኢሁ።
ዘከመ፡ ዐርገ፡ እግዚእ፡ ኢየሱስ፡ ኢየሩሳሌም
12 ወእምድኅረ፡ ዝንቱ፡ ኅዱር፡ ቅፍርናሆም፡ ውእቱ፡ ወእሙ፡ ወአኀዊሁ፡ ወአርዳኢሁ። ወነበሩ፡ ህየ፡ ኅዳጠ፡ መዋዕለ፡ ወአኮ፡ ብዙኀ።
13 ወቀርበ፡ በዓለ፡ ፋሲካሆሙ፡ ለአይሁድ፡ ወዐርገ፡ እግዚእ፡ ኢየሱስ፡ ኢየሩሳሌም።
በእንተ፡ ዘተሰዱ፡ ሠየጥ፡ እምኵራብ
14 ወረከበ፡ በምኵራብ፡ እለ፡ ይሠይጡ፡ አልሕምተ፡ ወአባግዐ፡ ወአርጋበ። ወመወልጣነ፡ እንዘ፡ ይነብሩ።
15 ወገብረ፡ መቅሠፍተ፡ ጥብጣቤ፡ ዘሐብል። ወሰደደ፡ ኵሎ፡ እምኵራብ፡ አባግዐኒ፡ ወአልሕምተኒ፡ ወዘረወ፡ ወርቆሙ፡ ለመወልጣን። ወገፍትዐ፡ ማእዳቲሆሙ፡ ወመናብርቲሆሙ፡ ለእለ፡ ይሠይጡ፡ ርግበ፡ ገንጰለ።
16 ወይቤሎሙ፡ ለእለ፡ ይሠይጡ፡ አርጋበ፡ አሰስሉ፡ ወአውፅኡ፡ ዘንተ፡ እም፡ ዝየ። ወኢትረስዩ፡ ቤተ፡ አቡየ፡ ቤተ፡ ምሥያጥ።
17 ወተዘከሩ፡ አርዳኢሁ፡ ከመ፡ ጽሑፍ፡ ውእቱ፡ ዘይብል፡ ቅንአተ፡ ቤትከ፡ በልዐኒ።
18 ወአውሥእዎ፡ አይሁድ፡ ወይቤልዎ፡ ምንተ፡ ትእምርተ፡ ታርኢ፡ ዘዘንተ፡ ትገብር።
19 ወአውሥአ፡ እግዚእ፡ ኢየሱስ፡ ወይቤሎሙ። ንሥትዎ፡ ለዝንቱ፡ ቤተ፡ መቅደስ፡ ወበሠሉስ፡ ዕለት፡ አነሥኦ።
20 ወይቤልዎ፡ አይሁድ፡ በአርብዓ፡ ወስድስቱ፡ ዓመት፡ ተሐንጸ፡ ዝንቱ፡ ቤተ፡ መቅደስ። ወአንተሰ፡ በሠሉስ፡ መዋዕል፡ ታነሥኦ።
21 ወውእቱሰ፡ በእንተ፡ ቤተ፡ ሥጋሁ፡ ይቤሎሙ።
22 ወአመ፡ ተንሥአ፡ እምነ፡ ምዉታን፡ ተዘከሩ፡ አርዳኢሁ፡ ከመ፡ በእንተ፡ ዝ፡ ይቤሎሙ። ወአምኑ፡ በቃለ፡ መጻሕፍት፡ ወበቃለ፡ እግዚእ፡ ኢየሱስ፡ ዘይቤሎሙ።
በእንተ፡ ቀዳሚት፡ ፋሲካ፡ ዘእግዚእ፡ ኢየሱስ
23 ወእንዘ፡ ሀሎ፡ እግዚእ፡ ኢየሱስ፡ ኢየሩሳሌም፡ በበዓለ፡ ፋሲካ። ብዙኃን፡ አምኑ፡ ቦቱ፡ ሶበ፡ ርእዩ፡ ተኣምረ፡ ዘገብረ።
24 ወውእቱሰ፡ እግዚእ፡ ኢየሱስ፡ ኢየአምኖሙ፡ እስመ፡ የአምሮ፡ በኵሉ፡ ለለ፡ አሐዱ።
25 ወኢይፈቅድ፡ ይንግርዎ፡ ግዕዞ፡ ለሰብእ፡ እስመ፡ ለሊሁ፡ የአምሮ፡ ለሰብእ።
=== chapter 3 ===
[ምዕራፍ 3]
በእንተ፡ እግዚእ፡ ኢየሱስ፡ ወኒቆዲሞስ
1 ወሀሎ፡ አሐዱ፡ ብእሲ፡ እምፈሪሳውያን፡ ዘስሙ፡ ኒቆዲሞስ፡ መልአኮሙ፡ ለአይሁድ።
2 ወውእቱ፡ መጽአ፡ ኀበ፡ እግዚእ፡ ኢየሱስ፡ ቀዲሙ፡ ሌሊተ፡ ወይቤሎ። ረቢ፡ ነአምር፡ ከመ፡ እምኀበ፡ እግዚአብሔር፡ መጻእከ፡ ከመ፡ ትኩን፡ መምህረ። እስመ፡ አልቦ፡ ዘይክል፡ ይግበር፡ ዘንተ፡ ተኣምረ፡ ዘአንተ፡ ትገብር፡ ዘእንበለ፡ ዘእግዚአብሔር፡ ምስሌሁ።
3 ወአውሥአ፡ እግዚእ፡ ኢየሱስ፡ ወይቤሎ፡ አማን፡ አማን፡ እብለከ። ዘኢተወልደ፡ ዳግመ፡ ኢይሬእያ፡ ለመንግሥተ፡ እግዚአብሔር።
4 ወይቤሎ፡ ኒቆዲሞስ፡ እፎ፡ ይክል፡ ብእሲ፡ ዳግመ፡ ተወልዶ፡ እምድኅረ፡ ልህቀ። ይክልኑ፡ በዊአ፡ ወገቢኦ፡ ውስተ፡ ከርሠ፡ እሙ፡ ወይትወለድ፡ ዳግመ።
5 ወአውሥአ፡ እግዚእ፡ ኢየሱስ፡ ወይቤሎ፡ አማን፡ አማን፡ እብለከ። ዘኢተወልደ፡ ዳግመ፡ እማይ፡ ወእመንፈስ፡ ቅዱስ፡ ኢይክል፡ በዊአ፡ ውስተ፡ መንግሥተ፡ እግዚአብሔር።
6 እስመ፡ ዘተወልደ፡ እምሥጋ፡ ሥጋ፡ ውእቱ። ወዘተወልደ፡ እመንፈስ፡ መንፈሰ፡ ውእቱ።
7 ወበእንተ፡ ዝንቱ፡ ኢታንክር፡ እስመ፡ እቤለከ፡ ሀለወክሙ፡ ትትወለዱ፡ ዳግመ።
8 እስመ፡ መንፈስ፡ ኀበ፡ ፈቀደ፡ ይነፍኅ፡ ወቃሎ፡ ትሰምዕ። ወኢተአምር፡ እምኀበ፡ ይመጽእ፡ ወኀበሂ፡ የሐውር። ከማሁኬ፡ ውእቱ፡ ኵሉ፡ ዘይትወለድ፡ እመንፈስ፡ ቅዱስ።
9 ወአውሥአ፡ ኒቆዲሞስ፡ ወይቤሎ፡ እፎ፡ ይትከሀል፡ ዝንቱ፡ ይኩን።
10 ወአውሥአ፡ እግዚእ፡ ኢየሱስ፡ ወይቤሎ። አንተ፡ ሊቆሙ፡ ለእስራኤል፡ ወዘንተ፡ ነገረ፡ ኢተአምር።
11 አማን፡ አማን፡ እብለከ፡ ከመ፡ ዘነአምር፡ ንነግር፡ ወበዘርኢነ፡ ሰማዕተ፡ ንከውን። ወስምዐነሰ፡ ተአብዩነ፡ ነሢአ።
12 ወሶበ፡ እንዘ፡ ዘበምድር፡ እነግረክሙ፡ ኢተአምኑኒ። እፎ፡ እንከ፡ ተአምኑኒ፡ እመ፡ ነገርኩክሙ፡ ዘበሰማያት።
13 ወአልቦ፡ ዘዐርገ፡ ውስተ፡ ሰማይ፡ ዘእንበለ፡ ዘወረደ፡ እምሰማይ፡ ወልደ፡ ዕጓለ፡ እመሕያው። ዘውእቱ፡ ይነብር፡ ውስተ፡ ሰማይ።
14 ወበከመ፡ ሙሴ፡ ሰቀሎ፡ ለአርዌ፡ ምድር፡ በገዳም። ከማሁ፡ ሀለዎ፡ ለወልደ፡ ዕጓለ፡ እመሕያው፡ ይሰቀል።
15 ከመ፡ ኵሉ፡ ዘየአምን፡ ቦቱ፡ ኢይትሀጐል፡ አላ፡ የሐዩ፡ ለዓለም።
16 እስመ፡ ከመ፡ ዝ፡ አፍቀሮ፡ እግዚአብሔር፡ ለዓለም። እስከ፡ ወልዶ፡ ዋሕዶ፡ መጠወ፡ ወወሀበ፡ ቤዛ፡ ለኵሉ። ከመ፡ ኵሉ፡ ዘየአምን፡ ቦቱ፡ ኢይትሀጐል፡ አላ፡ ይረክብ፡ ሕይወተ፡ ዘለዓለም።
17 እስመ፡ ኢፈነዎ፡ እግዚአብሔር፡ ለወልዱ፡ ውስተ፡ ዓለም፡ ከመ፡ ይኰንኖ፡ ለዓለም። ዘእንበለ፡ ከመ፡ ያሕይዎ፡ ለዓለም፡ በእንቲኣሁ።
18 ዘየአምን፡ ቦቱ፡ ኢይትኴነን፡ ወዘሰ፡ ኢየአምን፡ ቦቱ፡ ወድአ፡ ተኰነነ። እስመ፡ ኢአምነ፡ በስመ፡ ወልደ፡ እግዚአብሔር፡ ዋሕድ።
19 ወዝ፡ ውእቱ፡ ኵነኔሁ፡ እስመ፡ ብርሃን፡ መጽአ፡ ውስተ፡ ዓለም። ወአብደረ፡ ሰብእ፡ ጽልመተ፡ እምብርሃን፡ እስመ፡ እኩይ፡ ምግባሩ።
20 እስመ፡ ኵሉ፡ ዘእኩይ፡ ምግባሩ፡ ይጸልእ፡ ብርሃነ። ወኢይመጽእ፡ ኀበ፡ ብርሃን፡ ከመ፡ ኢይትከሠቶ፡ ምግባሩ፡ እስመ፡ እኩይ፡ ውእቱ።
21 ወዘሰ፡ ጽድቀ፡ ይገብር፡ ይመጽእ፡ ኀበ፡ ብርሃን፡ ከመ፡ ያስተርኢ፡ ምግባሩ። እስመ፡ በእንተ፡ እግዚአብሔር፡ ይገብር።
በእንተ፡ ዳግማዊ፡ ስምዑ፡ ለዮሐንስ
22 ወእምዝ፡ ሖረ፡ እግዚእ፡ ኢየሱስ፡ ምስለ፡ አርዳኢሁ፡ ውስተ፡ ምድረ፡ ይሁዳ። ወህየ፡ ነበረ፡ ምስሌሆሙ፡ እንዘ፡ ያጠምቅ።
23 ወሀሎ፡ ዮሐንስኒ፡ ያጠምቅ፡ በሄኖን፡ በቅሩበ፡ ሳሌም፡ በማዕዶተ፡ ኢየሩሳሌም። እስመ፡ ቦቱ፡ ህየ፡ ብዙኅ፡ ማያት፡ ወይመጽኡ፡ ኀቤሁ፡ ብዙኃን፡ ሰብእ፡ ወያጠምቆሙ።
24 እስመ፡ ዓዲሁ፡ ኢተወድየ፡ ዮሐንስ፡ ውስተ፡ ቤተ፡ ሞቅሕ።
25 ወእምዝ፡ ኮነ፡ ተኀሥሦ፡ ማእከለ፡ አርዳኢሁ፡ ለዮሐንስ፡ ምስለ፡ አይሁድ፡ በእንተ፡ አጥህሮ።
26 ወሖሩ፡ ኀበ፡ ዮሐንስ፡ ወይቤልዎ፡ ረቢ፡ ዝኩ፡ ዘምስሌከ፡ ሀሎ፡ በማዕዶተ፡ ዮርዳኖስ። ዘአንተ፡ ሰማዕተ፡ ኮንከ፡ በእንቲኣሁ፡ ናሁ፡ ሀሎ፡ ውእቱሂ፡ ያጠምቅ። ወኵሉ፡ የሐውር፡ ኀቤሁ።
27 ወአውሥአ፡ ዮሐንስ፡ ወይቤ፡ ኢይክል፡ ሰብእ፡ ነሢአ፡ ጸጋ፡ ለሊሁ። ወኢ፡ ምንተኒ፡ እመ፡ ኢተውህበ፡ ሎቱ፡ እምሰማይ።
28 አንትሙ፡ ለሊክሙ፡ ሰማዕትየ፡ ከመ፡ እቤለክሙ፡ አንሰ፡ ኢኮንኩ፡ ክርስቶስሃ። ዳእሙ፡ ተፈነውኩ፡ ቅድሜሁ፡ እስብክ።
29 ዘቦቱ፡ መርዓት፡ መርዓዊ፡ ውእቱ። ወዐርኩሰ፡ ለመርዓዊ፡ ዘይቀውም፡ ወይሰምዖ። ፍሥሓ፡ ይትፌሣሕ፡ በእንተ፡ ቃለ፡ መርዓዊ፡ ወመርዓት። ወፍሥሓ፡ ዚኣየሰ፡ ናሁ፡ ተፈጸመት።
30 ወእንቲኣሁሰ፡ ትበዝኅ፡ ወእንቲኣየሰ፡ ተሠልጠት።
31 እስመ፡ ዘእምላዕሉ፡ መጽአ፡ መልዕልተ፡ ኵሉ፡ ውእቱ። ወዘእምድርሰ፡ ምድራዊ፡ ውእቱ፡ ወዘበምድር፡ ይነግር። ወዘሰ፡ እምሰማይ፡ መጽአ፡ መልዕልተ፡ ኵሉ፡ ውእቱ።
32 ወበዘርእየ፡ ወበዘሰምዐ፡ ሰማዕተ፡ ይከውን፡ ወስምዖሰ፡ አልቦ፡ ዘይትዌክፎ።
33 ወለዘሰ፡ ተወክፎ፡ ስምዖ፡ ዐተቦ፡ እግዚአብሔር፡ እስመ፡ ጻድቅ፡ ውእቱ።
34 ወዘእግዚአብሔር፡ ፈነዎ፡ ቃለ፡ እግዚአብሔር፡ ይነግር። እስመ፡ አኮ፡ በመስፈርት፡ ዘይሁብ፡ እግዚአብሔር፡ መንፈሶ።
35 አብሰ፡ ያፈቅር፡ ወልዶ፡ ወኵሎ፡ ኵነኔሁ፡ አወፈዮ፡ ውስተ፡ እዴሁ።
36 ዘየአምን፡ በወልድ፡ ቦ፡ ሕይወት፡ ዘለዓለም። ወዘሰ፡ ኢየአምን፡ በወልድ፡ ኢይሬእያ፡ ለሕይወት። አላ፡ መቅሠፍተ፡ መዓቱ፡ ለእግዚአብሔር፡ ይነብር፡ ላዕሌሁ።
=== chapter 4 ===
[ምዕራፍ 4]
በእንተ፡ እግዚእ፡ ኢየሱስ፡ ወሳምራዊት
1 ወአእሚሮ፡ እግዚእነ፡ ከመ፡ ሰምዑ፡ ፈሪሳውያን። ከመ፡ በዝኁ፡ አርዳኢሁ፡ ለእግዚእ፡ ኢየሱስ፡ ወአብዝኁ፡ አጥምቆ፡ እምዮሐንስ።
2 ወባሕቱ፡ ለሊሁሰ፡ እግዚእ፡ ኢየሱስ፡ ኢያጥመቀ፡ ዳእሙ፡ አርዳኢሁ።
3 ወኀደጋ፡ ለምድረ፡ ይሁዳ፡ ወሖረ፡ ካዕበ፡ ገሊላ። ወእንዘ፡ ሀለዎ፡ ይኅልፍ፡ እንተ፡ ሰማርያ።
4 በጽሐ፡ ሀገረ፡ ሳምር፡ እንተ፡ ስማ፡ ሲካር። ቅሩበ፡ ዐጸደ፡ ወይን፡ ዘወሀቦ፡ ያዕቆብ፡ ለዮሴፍ፡ ወልዱ።
5 ወሀሎ፡ ህየ፡ ዐዘቅተ፡ ማይ፡ ዘያዕቆብ።
6 ወደኪሞ፡ እግዚእ፡ ኢየሱስ፡ በሐዊረ፡ ፍኖት፡ ነበረ፡ ህየ፡ ኀበ፡ ውእቱ፡ ዐዘቅት። ወቀትር፡ ሶቤሃ፡ ጊዜ፡ ስሱ፡ ሰዓት።
7 ወናሁ፡ መጽአት፡ ብእሲት፡ እምሰማርያ፡ ከመ፡ ትቅዳሕ፡ ማየ። ወይቤላ፡ እግዚእ፡ ኢየሱስ፡ አስትይኒ፡ ማየ።
8 እስመ፡ አርዳኢሁሰ፡ ሖሩ፡ ሀገረ፡ ከመ፡ ይሣየጡ፡ ሲሳዮሙ።
9 ወትቤሎ፡ ይእቲ፡ ብእሲት፡ ሳምራዊት፡ እፎኑ፡ እንዘ፡ አይሁዳዊ፡ አንተ። ተስእል፡ እምኀቤየ፡ ትስተይ፡ ማየ፡ እንዘ፡ ሳምራዊት፡ አነ። እስመ፡ ኢየኀብሩ፡ ሕርመተ፡ አይሁድ፡ ምስለ፡ ሳምራውያን፡ ወኢይትሐወሱ፡ ወኢይዴመሩ።
10 ወአውሥኣ፡ እግዚእ፡ ኢየሱስ፡ ወይቤላ፡ ሶበሰ፡ ተአምሪ፡ ጸጋሁ፡ ለእግዚአብሔር። ወመኑ፡ ውእቱ፡ ዘይስእለኪ፡ ወይብለኪ፡ አስትይኒ፡ ማየ። አንቲኒ፡ ዓዲ፡ እምሰአልኪዮ፡ ወውእቱኒ፡ እምወሀበኪ፡ ማየ፡ ሕይወት።
11 ወትቤሎ፡ ይእቲ፡ ብእሲት። እግዚእየ፡ ማሕየብኒ፡ አልብከ፡ ወዐዘቅቱኒ፡ ዕሙቀ፡ ውእቱ። እምአይቴ፡ እንከ፡ ለከ፡ ማየ፡ ሕይወት።
12 አንተኑ፡ ተዐቢ፡ እምያዕቆብ፡ አቡነ፡ ዘወሀበነ፡ ዘንተ፡ ዐዘቅተ። ወውእቱኒ፡ ሰትየ፡ እምኔሃ፡ ወአንስቲያሁኒ፡ ወደቂቁኒ፡ ወእንስሳሁኒ፡ ወጥሪቱኒ።
13 ወአውሥኣ፡ እግዚእ፡ ኢየሱስ፡ ወይቤላ፡ ኵሉ፡ ዘይሰቲ፡ እምዝ፡ ማይ፡ ይጸምእ፡ ዳግመ።
14 ወዘሰ፡ ይሰቲ፡ እማይ፡ ዘእሁቦ፡ አነ፡ ኢይጸምእ፡ ለዓለም። አላ፡ ውእቱ፡ ማይ፡ ዘእሁቦ፡ አነ፡ ይከውን፡ ውስቴቱ፡ ነቅዐ፡ ማይ። ዘይፈለፍል፡ ለሕይወት፡ ዘለዓለም።
15 ወትቤሎ፡ ይእቲ፡ ብእሲት፡ እግዚእየ፡ ሀበኒዮ፡ እምውእቱ፡ ማይ። ከመ፡ ኢይጽማእ፡ ወኢይምጻእ፡ ዝየ፡ ዳግመ፡ እቅዳሕ፡ ማየ።
16 ወይቤላ፡ እግዚእ፡ ኢየሱስ፡ ሑሪኬ፡ ጸውዒ፡ ምተኪ፡ ወንዒ፡ ዝየ።
17 ወአውሥአቶ፡ ይእቲ፡ ብእሲት፡ ወትቤሎ፡ አልብየ፡ ምተ። ወይቤላ፡ እግዚእ፡ ኢየሱስ፡ ሠናየ፡ ትቤሊ፡ አልብየ፡ ምት።
18 ቀዲሙሰ፡ ኀምስቱ፡ ዕደው፡ ነበሩ፡ ምስሌኪ። ወይእዜሰ፡ ዘሀሎ፡ ምስሌኪ፡ ኢኮነ፡ ምተኪ፡ ወዘንተሰ፡ አማነ፡ ትቤሊ።
19 ወትቤሎ፡ ይእቲ፡ ብእሲት፡ እግዚእየ፡ እሬእየከ፡ ከመ፡ ነቢይ፡ አንተ።
20 አበዊነሰ፡ በዝንቱ፡ ደብር፡ ሰገዱ። ወአንትሙሰ፡ ትብሉ፡ ከመ፡ በኢየሩሳሌም፡ መካን፡ ውእቱ፡ ኀበ፡ ይሰግዱ።
21 ወይቤላ፡ እግዚእ፡ ኢየሱስ፡ እመንኒ፡ ብእሲቶ፡ ከመ፡ ትመጽእ፡ ሰዓት። ወይበጽሕ፡ ጊዜሁ፡ አመ፡ ኢ፡ በዝንቱ፡ ደብር፡ ወኢ፡ በኢየሩሳሌም። ዘኢይሰግዱ፡ ለአብ፡ አላ፡ በዝንቱ፡ መካን፡ ይሰግዱ።
22 አንትሙሰ፡ ትሰግዱ፡ ለዘኢተአምሩ፡ ወንሕነሰ፡ ንሰግድ፡ ለዘነአምር። እስመ፡ መድኀኒት፡ እምነ፡ አይሁድ፡ ውእቱ።
23 ወባሕቱ፡ ትመጽእ፡ ሰዓት፡ ወይእዜ፡ ይእቲ። አመ፡ እለ፡ በርቱዕ፡ በአማን፡ ሰጋድያን፡ ይሰግዱ፡ ለአብ፡ በመንፈስ፡ ወበጽድቅ። እስመ፡ አብኒ፡ ዘከመ፡ ዝ፡ የኀሥሥ፡ እለ፡ ይሰግዱ፡ ሎቱ።
24 እስመ፡ እግዚአብሔር፡ መንፈስ፡ ውእቱ። ወእለሂ፡ ይሰግዱ፡ ሎቱ፡ በመንፈስ፡ ወበጽድቅ፡ ሀለዎሙ፡ ይስግዱ፡ ሎቱ።
25 ወትቤሎ፡ ይእቲ፡ ብእሲት፡ ነአምር፡ ከመ፡ ይመጽእ፡ ማስያስ፡ ዘይብልዎ፡ ክርስቶስ። ወአመ፡ መጽአ፡ ውእቱ፡ ይነግረነ፡ ኵሎ።
26 ወይቤላ፡ እግዚእ፡ ኢየሱስ፡ አነ፡ ውእቱ፡ ዘእትናገረኪ።
27 ወእምዝ፡ መጽኡ፡ አርዳኢሁ፡ ወአንከርዎ፡ እስመ፡ ምስለ፡ ብእሲት፡ ይትናገር። ወባሕቱ፡ አልቦ፡ ዘይቤሎ፡ ምንተ፡ ተኀሥሥ፡ ወምንተ፡ ትትናገር፡ ምስሌሃ።
28 ወኀደገት፡ ቀሡታ፡ ይእቲ፡ ብእሲት፡ ወአተወት፡ ሀገረ፡ ወነገረት፡ ለሰብአ፡ ቤታ።
29 ወትቤ፡ ንዑ፡ ትርአዩ፡ ብእሴ፡ ዘነገረኒ፡ ኵሎ፡ ዘገበርኩ። እንዳዒ፡ ለእመ፡ ውእቱ፡ ክርስቶስ።
30 ወወፅኡ፡ እምሀገር፡ ወሖሩ፡ ኀቤሁ።
31 ወእምዝ፡ ይቤልዎ፡ አርዳኢሁ፡ ረቢ፡ ብላዕ፡ እክለ።
32 ወይቤሎሙ፡ እግዚእ፡ ኢየሱስ፡ አንሰ፡ ብየ፡ መብልዕ፡ ዘእበልዕ፡ ዘኢተአምሩ፡ አንትሙ።
33 ወተባሀሉ፡ አርዳኢሁ፡ በበይናቲሆሙ። ቦኑ፡ እንጋ፡ ሰብእ፡ ዘአምጽአ፡ ሎቱ፡ ዘይበልዕ፡ ወሚመ፡ ዛቲ፡ ብእሲት።
34 ወይቤሎሙ፡ እግዚእ፡ ኢየሱስ። ሊተሰ፡ መብልዕየ፡ ውእቱ፡ ከመ፡ እግበር፡ ፈቃዶ፡ ለአቡየ። ለዘፈነወኒ፡ ወከመ፡ እፈጽም፡ ግብሮ።
35 አኮኑ፡ አንትሙ፡ እለ፡ ትብሉ፡ እስከ፡ ራብዕ፡ ወርኅ፡ ማእረር። ወናሁ፡ እብለክሙ፡ አንሥኡ፡ አዕይንቲክሙ፡ ወነጽሩ፡ ኀበ፡ በሓውርት። ከመ፡ ጻዕደወ፡ ወበጽሐ፡ ማእረር።
36 እስመ፡ ዘየዐጽድኒ፡ ይነሥእ፡ ዐስቦ፡ ወያስተጋብእ፡ ፍሬ፡ ለሕይወት፡ ዘለዓለም። ከመ፡ ኅቡረ፡ ይትፈሥሑ፡ ዘሂ፡ ይዘርዕ፡ ወዘሂ፡ የአርር።
37 ወዝንቱ፡ ነገር፡ ቃለ፡ ጽድቅ፡ እሙን፡ ውእቱ። ከመ፡ ካልእ፡ ዘይዘርዕ፡ ወካልእ፡ ዘየአርር።
38 ወአንሰ፡ ፈነውኩክሙ፡ ትእርሩ፡ ዘኢጻመውክሙ፡ ዘባዕድ፡ ጻመወ። አንትሙ፡ ትበውኡ፡ ውስተ፡ ጻማሆሙ፡ ለእልክቱ።
39 ወብዙኃን፡ እምይእቲ፡ ሀገረ፡ ሳምር፡ እለ፡ አምኑ፡ ቦቱ። በእንተ፡ ዘትቤሎሙ፡ ይእቲ፡ ብእሲት፡ ዘስምዐ፡ ኮነት። እንዘ፡ ትብል፡ ነገረኒ፡ ኵሎ፡ ዘገበርኩ።
40 ወበጺሖሙ፡ ኀቤሁ፡ ኵሎሙ፡ ሳምራውያን፡ አስተብቊዕዎ፡ ከመ፡ ይንበር፡ ኀቤሆሙ። ወነበረ፡ ህየ፡ ሰኑየ፡ መዋዕለ።
41 ወብዙኃን፡ ጥቀ፡ እምኔሆሙ፡ እለ፡ አምኑ፡ ቦቱ፡ በእንተ፡ ቃሉ።
42 ወይቤልዋ፡ ለይእቲ፡ ብእሲት፡ አኮ፡ እንከ፡ በነገረ፡ ዚኣኪ፡ ዘአምነ፡ ቦቱ። አላ፡ ለሊነ፡ ሰማዕነ፡ ወጠየቅነ። ከመ፡ ዝንቱ፡ ውእቱ፡ ክርስቶስ፡ በአማን፡ መድኅነ፡ ዓለም።
43 ወእምድኅረ፡ ሰኑይ፡ መዋዕል፡ ወፅአ፡ እግዚእ፡ ኢየሱስ፡ እምህየ፡ ወሖረ፡ ገሊላ።
44 ወለሊሁ፡ እግዚእ፡ ኢየሱስ፡ ሰማዕተ፡ ኮነ፡ ከመ፡ ኢይከብር፡ ነቢይ፡ በሀገሩ።
45 ወበዊኦ፡ ካዕበ፡ ገሊላ፡ ተቀበልዎ፡ ኵሎሙ፡ ገሊላውያን። እስመ፡ ርእዩ፡ ኵሎ፡ ተኣምረ፡ ዘገብረ፡ በኢየሩሳሌም፡ አመ፡ በዓል። እስመ፡ እሙንቱሃ፡ ሖሩ፡ ለበዓል።
46 ወሖረ፡ ካዕበ፡ እግዚእ፡ ኢየሱስ፡ ውስተ፡ ቃና፡ ዘገሊላ። ኀበ፡ ረሰየ፡ ማየ፡ ወይነ።
ዘከመ፡ አሕየዎ፡ እግዚእ፡ ኢየሱስ፡ በገሊላ፡ ለወልደ፡ ገብረ፡ ንጉሥ
47 ወሀሎ፡ አሐዱ፡ ገብረ፡ ንጉሥ፡ ሰብእ፡ አብያታዊ። ወይደዊ፡ ወልዱ፡ በቅፍርናሆም። ወሰሚዖ፡ ከመ፡ መጽአ፡ እግዚእ፡ ኢየሱስ፡ እምይሁዳ፡ ውስተ፡ ገሊላ፡ ሖረ፡ ኀቤሁ። ወሰአሎ፡ ከመ፡ ይረድ፡ ወያሕዩ፡ ሎቱ፡ ወልዶ፡ እስመ፡ አልጸቀ፡ ይሙት።
48 ወይቤሎ፡ እግዚእ፡ ኢየሱስ፡ እመ፡ ተኣምረ፡ ወመንክረ፡ ኢርኢክሙ፡ ኢተአምኑ።
49 ወይቤሎ፡ ውእቱ፡ ገብረ፡ ንጉሥ፡ ሰብእ፡ አብያታዊ። እግዚኦ፡ ረድ፡ ፍጡነ፡ ዘእንበለ፡ ይሙት፡ ወልድየ።
50 ወይቤሎ፡ እግዚእ፡ ኢየሱስ፡ ሑር፡ ወልድከሰ፡ ሐይወ። ወአምነ፡ ውእቱ፡ ብእሲ፡ በቃል፡ ዘይቤሎ፡ እግዚእ፡ ኢየሱስ፡ ወሖረ።
51 ወእንዘ፡ ይወርድ፡ ተቀበልዎ፡ አግብርቲሁ። ወዜነውዎ፡ ወይቤልዎ፡ ወልድከሰ፡ ሐይወ።
52 ወተስእሎሙ፡ ሰዓታ፡ እንተ፡ ባቲ፡ ሐይወ። ወይቤልዎ፡ ትማልም፡ ጊዜ፡ ሰብዐቱ፡ ሰዓት፡ ኀደጎ፡ ፈፀንቱ።
53 ወአእመረ፡ አቡሁ፡ ከመ፡ ጊዜ፡ ይእቲ፡ ሰዓት። እንተ፡ ይቤሎ፡ እግዚእ፡ ኢየሱስ፡ ወልድከሰ፡ ሐይወ። ወአምነ፡ ቦቱ፡ ውእቱ፡ ወኵሉ፡ ሰብአ፡ ቤቱ።
54 ወዝንተ፡ ካዕበ፡ ዳግሙ፡ ለእግዚእ፡ ኢየሱስ፡ ዘገብረ፡ ተኣምረ። መጺኦ፡ እምይሁዳ፡ ውስተ፡ ገሊላ።
=== chapter 5 ===
[ምዕራፍ 5]
በእንተ፡ ምጥማቃተ፡ ዘጵሩጳጥቄ
1 ወእምድኅረ፡ ዝ፡ ኮነ፡ በበዓሎሙ፡ ለአይሁድ፡ ዐርገ፡ እግዚእ፡ ኢየሱስ፡ ኢየሩሳሌም።
2 ወቦ፡ ውስተ፡ ኢየሩሳሌም፡ ምጥማቃት፡ ዘጵሩጳጥቄ፡ ቅልንብቲራ። ወይብልዋ፡ ስማ፡ በዕብራይስጥ፡ ቤተሳይዳ፡ ዘይእቲ፡ ቤተ፡ ሣህል። ወይእቲ፡ ቀላየ፡ አባግዕ፡ ወባቲ፡ ኀምስቱ፡ ሕዋራት።
3 ወህየ፡ ይሰክቡ፡ ብዙኃን፡ ድዉያን፡ ዕዉራን፡ ወሐንካሳን። ወይቡሳን፡ ፅዉሳን፡ ወፅቡሳን፡ ወይጸንሑ፡ ሁከተ፡ ማይ።
4 እስመ፡ መልአከ፡ እግዚአብሔር፡ በጊዜ፡ ይወርድ፡ ውስተ፡ ምጥማቃት፡ ይትሀወክ፡ ማይ። ወዘይወርድ፡ ቀዲመ፡ እምድኅረ፡ ሁከተ፡ ማይ፡ ወይትኀፀብ፡ የሐዩ፡ እምኵሉ፡ ደዌ፡ ዘቦ።
በእንተ፡ መፃጕዕ፡ ዘ፴ወ፰ተ፡ ክረምተ፡ ደወየ
5 ወሀሎ፡ ህየ፡ አሐዱ፡ ብእሲ፡ ዘሠላሳ፡ ወሰመንቱ፡ ክረምት፡ እምዘ፡ ደወየ።
6 ወኪያሁ፡ ርእዮ፡ እግዚእ፡ ኢየሱስ፡ ይሰክብ፡ ውስተ፡ ዐራቱ። አእመረ፡ ከመ፡ ጐንደየ፡ ውስተ፡ ደዌሁ፡ ወይቤሎ፡ ትፈቅድኑ፡ ትሕየው።
7 ወአውሥአ፡ ውእቱ፡ ድዉይ፡ ወይቤሎ፡ እወ፡ እግዚኦ፡ አላ፡ ሰብእ፡ አልብየ። ከመ፡ ሶበ፡ ይትሀወክ፡ ማይ፡ ያውርደኒ፡ ወይደየኒ፡ ውስተ፡ ምጥማቃት። ወሶበ፡ እመጽእ፡ አነ፡ ባዕድ፡ ይቀድመኒ፡ ወሪደ።
8 ወይቤሎ፡ እግዚእ፡ ኢየሱስ፡ ተንሥእ፡ ወንሣእ፡ ዐራተከ፡ ወሑር።
9 ወሐይወ፡ ሶቤሃ፡ ውእቱ፡ ብእሲ፡ ወነሥአ፡ ዐራቶ፡ ወሖረ። ወሰንበት፡ አሜሃ፡ ይእቲ፡ ዕለት።
ዘከመ፡ አስተዋደይዎ፡ አይሁድ፡ ለእግዚእ፡ ኢየሱስ
10 ወይቤልዎ፡ አይሁድ፡ ለዘሐይወ። ሰንበት፡ ውእቱ፡ ዮም፡ ወኢይከውነከ፡ ትንሣእ፡ ወትጹር፡ ዐራተከ።
11 ወአውሥአ፡ ውእቱ፡ ብእሲ፡ ወይቤሎሙ። ዘአሕየወኒ፡ ውእቱ፡ ይቤለኒ፡ ጹር፡ ዐራተከ፡ ወሑር።
12 ወተስእልዎ፡ ወይቤልዎ። መኑ፡ ውእቱ፡ ብእሲሁ፡ ዘይቤለከ፡ ተንሥእ፡ ወጹር፡ ዐራተከ፡ ወሑር።
13 ወውእቱሰ፡ ዘሐይወ፡ ኢያእመረ፡ መኑ፡ ውእቱ፡ ዘአሕየዎ። እስመ፡ ተሰወረ፡ እግዚእ፡ ኢየሱስ፡ ማእከለ፡ ብዙኃን፡ ሰብእ፡ እለ፡ ሀለዉ፡ በውእቱ፡ መካን።
14 ወእምዝ፡ ረከቦ፡ እግዚእ፡ ኢየሱስ፡ ለውእቱ፡ ዘሐይወ። እንዘ፡ ይሜህር፡ በምኵራብ፡ ወይቤሎ። ናሁኬ፡ ሐየውከ፡ ዑቅ፡ ኢተአብስ፡ ዳግመ። ከመ፡ ዘየአኪ፡ እምዝ፡ ኢይርከብከ።
15 ወሖረ፡ ውእቱ፡ ብእሲ። ወነገሮሙ፡ ለአይሁድ፡ ከመ፡ እግዚእ፡ ኢየሱስ፡ ውእቱ፡ ዘአሕየዎ።
16 ወበእንተ፡ ዝንቱ፡ ያስተዋድይዎ፡ አይሁድ፡ ለእግዚእ፡ ኢየሱስ። ወየኀሥሡ፡ ይቅትልዎ፡ እስመ፡ ከመ፡ ዝ፡ ይገብር፡ በሰንበት።
17 ወአውሥአ፡ እግዚእ፡ ኢየሱስ፡ ወይቤሎሙ። አቡየሂ፡ እስከ፡ ይእዜ፡ ይገብር፡ ወአነሂ፡ እገብር።
18 ወበእንተ፡ ዝንቱ፡ ፈድፋደ፡ የኀሥሡ፡ አይሁድ፡ ይቅትልዎ። እስመ፡ አኮ፡ ክመ፡ ሰንበተ፡ ባሕቲቶ፡ ዘይስዕር። ዳእሙ፡ ዓዲ፡ አባሁ፡ ይሬስዮ፡ ለእግዚአብሔር፡ ወያዔሪ፡ ርእሶ፡ ምስለ፡ እግዚአብሔር።
19 ወእምዝ፡ አውሥአ፡ እግዚእ፡ ኢየሱስ፡ ወይቤሎሙ። አማን፡ አማን፡ እብለክሙ፡ ኢይክል፡ ወልድ፡ ገቢረ፡ ዘእምኀቤሁ። ወኢ፡ ምንተኒ፡ ዘእንበለ፡ ዘርእዮ፡ ለአብ፡ ይገብር። እስመ፡ ግብረ፡ ዘይገብር፡ አብ፡ ወልድኒ፡ ኪያሁ፡ ይገብር፡ በአምሳሉ።
20 እስመ፡ አብ፡ ያፈቅር፡ ወልዶ፡ ወኵሎ፡ ያሬእዮ፡ ዘውእቱ፡ ይገብር። ወዘየዐቢ፡ እምዝ፡ ያሬእዮ፡ ግብረ፡ ከመ፡ አንትሙ፡ ታንክሩ።
21 ወበከመ፡ አብ፡ ያነሥኦሙ፡ ለምዉታን፡ ወያሐይዎሙ። ከማሁ፡ ወልድኒ፡ ለዘፈቀደ፡ ያሐዩ።
22 እስመ፡ አብሰ፡ ኢይኴንን፡ ወኢ፡ መነሂ። አላ፡ ኵሎ፡ ኵነኔሁ፡ አወፈዮ፡ ለወልዱ።
23 ከመ፡ ኵሉ፡ ሰብእ፡ ያክብርዎ፡ ለወልድ፡ በከመ፡ ያከብርዎ፡ ለአብ። ወዘሰ፡ ኢያከብሮ፡ ለወልድ፡ ኢያከብሮ፡ ለአብ፡ ዘፈነዎ።
24 አማን፡ አማን፡ እብለክሙ። ዘይሰምዕ፡ ቃልየ፡ ወየአምን፡ በዘፈነወኒ፡ ይረክብ፡ ሕይወተ፡ ዘለዓለም፡ ወኢየሐውር፡ ውስተ፡ ደይን፡ አላ፡ ዐደወ፡ እሞት፡ ውስተ፡ ሕይወት።
25 አማን፡ አማን፡ እብለክሙ፡ ከመ፡ ይበጽሕ፡ ጊዜሁ። ወይእዜ፡ ውእቱ፡ ከመ፡ ምዉታን፡ ይሰምዕዎ፡ ቃሎ፡ ለወልደ፡ እግዚአብሔር። ወእለሰ፡ ሰምዕዎ፡ የሐይዉ።
26 ወበከመ፡ ለአብ፡ ቦቱ፡ ሕይወት፡ ኀቤሁ፡ ከማሁ፡ ለወልድኒ፡ ወሀቦ፡ ሕይወተ። ከመ፡ ይኩን፡ ሕይወት፡ ኀቤሁ።
27 ወወሀቦ፡ ሥልጣነ፡ ከመ፡ ይግበር፡ ፍትሐ፡ ወኵነኔ። እስመ፡ ወልደ፡ እግዚአብሔር፡ ወልደ፡ ዕጓለ፡ እመሕያው፡ ውእቱ።
28 ወበእንተ፡ ዝንቱሰ፡ ኢታንክሩ። እስመ፡ ትመጽእ፡ ሰዓት፡ በዘይሰምዕዎ፡ ቃሎ፡ ኵሎሙ፡ እለ፡ ውስተ፡ መቃብር።
29 ወይወፅኡ፡ እለ፡ ሠናየ፡ ገብሩ፡ ውስተ፡ ትንሣኤ፡ ዘለሕይወት። ወእለሰ፡ እኩየ፡ ገብሩ፡ ውስተ፡ ትንሣኤ፡ ዘለደይን።
30 ኢይክል፡ አንሰ፡ ገቢረ፡ ለልየ፡ ዘእምኀቤየ፡ ወኢ፡ ምንተኒ። አላ፡ በከመ፡ ሰማዕኩ፡ እኴንን፡ ወኵነኔየኒ፡ ጽድቅ፡ ውእቱ። እስመ፡ ኢየኀሥሥ፡ ፈቃደ፡ ዚኣየ፡ ዘእንበለ፡ ፈቃዱ፡ ለዘፈነወኒ።
31 ወእመሰ፡ ለልየ፡ ስምዐ፡ ኮንኩ፡ ለርእስየ፡ ኢኮነ፡ ጽድቀ፡ ስምዕየ።
32 ወባሕቱ፡ ካልእ፡ ውእቱ፡ ሰማዕትየ። ወአአምር፡ ከመ፡ ጽድቅ፡ ውእቱ፡ ስምዑ፡ ዘስምዐ፡ ኮነ፡ በእንቲኣየ።
33 አኮኑ፡ አንትሙ፡ ለአክሙ፡ ኀበ፡ ዮሐንስ። ወነገረክሙ፡ ስምዖ፡ በጽድቅ፡ በእንቲኣየ።
34 ወአንሰ፡ አኮ፡ ስምዐ፡ ሰብእ፡ ዘእፈቅድ፡ ወባሕቱ፡ ዘንተ፡ እብል። ከመ፡ አንትሙ፡ ትእመኑ፡ ወትድኀኑ።
35 ዝንቱ፡ ውእቱ፡ ማኅቶት፡ ዘያኀቱ፡ ወያበርህ። ወአንትሙ፡ ፈቀድክሙ፡ ትትፈሥሑ፡ በብርሃኑ፡ አሐተ፡ ሰዓተ።
36 ወአንሰ፡ ብየ፡ ሰማዕተ፡ ዘየዐቢ፡ እምስምዐ፡ ዮሐንስ። እስመ፡ ግብር፡ ዘወሀበኒ፡ አቡየ፡ ከመ፡ እግበር። ወእፈጽም፡ ውእቱ፡ ሰማዕትየ፡ ከመ፡ አብ፡ ፈነወኒ።
37 ወአቡየ፡ ዘፈነወኒ፡ ውእቱ፡ ሰማዕትየ። ወእምአመ፡ ኮንክሙ፡ ቃሎ፡ ኢሰማዕክሙ፡ ወራእዮሂ፡ ኢርኢክሙ።
38 ወቃሎሂ፡ ኢዐቀብክሙ፡ ወኢይነብር፡ ኀቤክሙ። እስመ፡ በዘውእቱ፡ ፈነወ፡ ኢአመንክሙ።
39 ኅሡ፡ ትርአዩ፡ ውስተ፡ መጻሕፍት። እስመ፡ ቦቶን፡ ይመስለክሙ፡ ዘትረክቡ፡ ሕይወተ፡ ዘለዓለም። ወእማንቱ፡ ስማዕትየ።
40 ወኢትፈቅዱ፡ ትምጽኡ፡ ኀቤየ፡ ከመ፡ ትርከቡ፡ ሕይወተ፡ ዘለዓለም።
41 አንሰ፡ ኢይፈቅድ፡ ያድሉ፡ ሊተ፡ ሰብእ።
42 ወባሕቱ፡ አእመርኩክሙ፡ ከመ፡ አልብክሙ፡ ፍቅረ፡ እግዚአብሔር፡ ላዕሌክሙ።
43 አነ፡ መጻእኩ፡ በስመ፡ አቡየ፡ ወኢተወከፍክሙኒ። ወአመ፡ መጽአ፡ ካልእ፡ በስምዐ፡ ነፍሱ፡ ኪያሁ፡ ትትዌከፉ።
44 እፎ፡ ትክሉ፡ አንትሙ፡ አሚነ፡ ዘተኀሥሡ፡ ክብረ፡ እምቢጽክሙ። ወኢተኀሥሡ፡ ክብረ፡ እምእግዚአብሔር፡ ዋሕድ።
45 ኢይምሰልክሙ፡ ዘአነ፡ አስተዋድየክሙ፡ ኀበ፡ አብ፡ ሀሎ። ሙሴ፡ ዘያስተዋድየክሙ፡ ዘኪያሁ፡ ትትዌከፉ።
46 ሶበሰ፡ አመንክምዎ፡ ለሙሴ፡ ኪያየኒ፡ እምአመንክሙኒ። እስመ፡ በእንቲኣየ፡ ጸሐፈ፡ ውእቱ።
47 ወእመሰ፡ ዘጸሐፈ፡ ሙሴ፡ ኢተአምኑ፡ እፎ፡ ቃልየ፡ ተአምኑ።
=== chapter 6 ===
[ምዕራፍ 6]
1 ወእምድኅረ፡ ዝንቱ፡ ሖረ፡ እግዚእ፡ ኢየሱስ፡ ማዕዶተ፡ ባሕረ፡ ገሊላ፡ ኀበ፡ ጥብርያዶስ።
2 ወተለውዎ፡ ብዙኃን፡ አሕዛብ። እስመ፡ ርእዩ፡ ተኣምረ፡ ዘገብረ፡ በላዕለ፡ ድዉያን።
3 ወዐርገ፡ እግዚእ፡ ኢየሱስ፡ ውስተ፡ ደብር። ወህየ፡ ነበረ፡ ምስለ፡ አርዳኢሁ።
4 ወቀርበ፡ በዓለ፡ ፋሲካሆሙ፡ ለአይሁድ።
በእንተ፡ ኀምስ፡ ኅብስት፡ ወክልኤ፡ ዓሣ
5 ወአንሥአ፡ አዕይንቲሁ፡ እግዚእ፡ ኢየሱስ። ወርእየ፡ ብዙኃነ፡ ሰብአ፡ እንዘ፡ ይመጽኡ፡ ኀቤሁ። ወይቤሎ፡ ለፊልጶስ፡ እምአይቴ፡ ንሣየጥ፡ ኅብስተ፡ ዘናበልዖሙ፡ ለእሉ።
6 ወዘንተ፡ ይቤ፡ እንዘ፡ ያሜክሮ፡ ወውእቱሰ፡ የአምር፡ ዘሀለዎ፡ ይግበር።
7 ወአውሥአ፡ ፊልጶስ፡ ወይቤሎ። ዘክልኤቱ፡ ምእት፡ ዲናር፡ ኅብስት፡ ኢየአክሎሙ። ከመ፡ ይንሥኡ፡ በበ፡ ሕቅ፡ ለለ፡ አሐዱ፡ እምኔሆሙ።
8 ወይቤሎ፡ አሐዱ፡ እምአርዳኢሁ፡ ዘውእቱ፡ እንድርያስ፡ እኁሁ፡ ለስምዖን፡ ጴጥሮስ።
9 ሀሎ፡ ዝየ፡ ወልድ፡ ዘቦቱ፡ ኀምስ፡ ኅብስተ፡ ሰገም፡ ወክልኤቲ፡ ዓሣ። ወባሕቱ፡ ምንተ፡ ይብቊዓ፡ እማንቱ፡ ለዘመጠነ፡ ዝ፡ ሰብእ።
10 ወይቤሎሙ፡ እግዚእ፡ ኢየሱስ፡ ግበሩ፡ ምርፋቃተ፡ ለሰብእ። ወብዙኅ፡ ሣዕሩ፡ ለውእቱ፡ መካን፡ ወረፈቁ፡ ዲበ፡ ሣዕር፡ እደዊሆሙ። ወየአክሉ፡ ኍልቆሙ፡ መጠነ፡ ኀምሳ፡ ምእት፡ ብእሲ።
11 ወነሥአ፡ እግዚእ፡ ኢየሱስ፡ ውእተ፡ ኅብስተ። ወአእኰተ፡ ወፈተተ፡ ወወሀቦሙ፡ ለአርዳኢሁ። ወአርዳኢሁኒ፡ አቅረቡ፡ ለሰብእ፡ ወእምዓሣሁኒ፡ ከማሁ፡ መጠነ፡ ፈቀዱ።
12 ወእምድኅረ፡ በልዑ፡ ወጸግቡ፡ ይቤሎሙ፡ ለአርዳኢሁ። አስተጋብኡ፡ ዘተርፈ፡ ፍተታተ። ከመ፡ አልቦ፡ ዘይትገደፍ፡ ወኢ፡ ምንተኒ፡ እምኔሆን።
13 ወአስተጋብኡ፡ ወመልአ፡ ዐሠርተ፡ ወክልኤተ፡ መሣይምተ። እምኀምስቱ፡ ኅብስተ፡ ሰገም፡ ዘተርፈ፡ እምዘበልዑ፡ ወጸግቡ።
14 ወርእዮሙ፡ ሕዝብ፡ ዘገብረ፡ ተኣምረ፡ እግዚእ፡ ኢየሱስ፡ ይቤሉ። አማን፡ ነቢይ፡ ውእቱ፡ ዝንቱ፡ ዘመጽአ፡ ውስተ፡ ዓለም።
በእንተ፡ ዘከመ፡ ሖረ፡ ዲበ፡ ባሕር
15 ወአእመሮሙ፡ እግዚእ፡ ኢየሱስ። ከመ፡ ይፈቅዱ፡ ይምጽኡ፡ ይምሥጥዎ፡ ወያንግሥዎ። ወተግሕሠ፡ ውስተ፡ ደብር፡ ባሕቲቱ።
16 ወመስዮ፡ ወረዱ፡ አርዳኢሁ፡ ውስተ፡ ባሕር።
17 ወዐርጉ፡ ሐመረ፡ ወሖሩ፡ ማዕዶተ፡ ባሕር፡ ኀበ፡ ቅፍርናሆም። ወናሁ፡ ወድአ፡ ኮነ፡ ጽልመት። ወዓዲሁ፡ ኢመጽአ፡ እግዚእ፡ ኢየሱስ፡ ኀቤሆሙ።
18 ወባሕርሰ፡ ይትሀወክ፡ እስመ፡ ዐቢይ፡ ነፋስ፡ ይነፍኅ፡ ውስቴቱ።
19 ወኀሊፎሙ፡ መጠነ፡ ዕሥራ፡ ወኀምስቱ፡ ምዕራፍ፡ አው፡ ሠላሳ። ርእይዎ፡ ለእግዚእ፡ ኢየሱስ፡ እንዘ፡ የሐውር፡ ዲበ፡ ባሕር። ወቀርበ፡ ኀበ፡ ሐመር፡ ወፈርሁ።
20 ወይቤሎሙ፡ አነ፡ ውእቱ፡ ኢትፍርሁ።
21 ወእንዘ፡ ይፈቅዱ፡ ያዕርግዎ፡ ውስተ፡ ሐመር። በጽሐት፡ ሐመር፡ ሶቤሃ፡ ውስተ፡ ምድር፡ ኀበ፡ ዘፈቀዱ፡ ይሑሩ።
22 ወበሳኒታ፡ ሰብእ፡ እለ፡ ይቀውሙ፡ ማዕዶተ፡ ባሕር። ርእዮሙ፡ ከመ፡ አልቦ፡ ህየ፡ ካልእ፡ ሐመር፡ ዘእንበለ፡ አሐቲ፡ ሐመር። ወከመሂ፡ ኢዐረገ፡ እግዚእ፡ ኢየሱስ፡ ምስለ፡ አርዳኢሁ፡ ውስተ፡ ሐመር። አላ፡ አርዳኢሁ፡ ባሕቲቶሙ፡ ሖሩ።
23 ወመጽአ፡ ካልኣትኒ፡ አሕማር፡ አምጥብርያዶስ፡ ቅሩበ፡ ብሔር። ኀበ፡ በልዑ፡ ኅብስተ፡ ዘባረከ፡ እግዚእነ።
24 ወሶበ፡ ርእዩ፡ እሙንቱ፡ ሰብእ፡ ከመ፡ ኢሀሎ፡ እግዚእ፡ ኢየሱስ፡ ህየ፡ ወኢ፡ አርዳኢሁ። ዐርጉ፡ ውስተ፡ ውእቶን፡ አሕማር፡ ወበጽሑ፡ ቅፍርናሆም፡ ይኅሥሥዎ፡ ለእግዚእ፡ ኢየሱስ።
25 ወሶበ፡ ረከብዎ፡ በማዕዶተ፡ ባሕር፡ ይቤልዎ። ረቢ፡ ማእዜ፡ መጻእከ፡ ወበጻሕከ፡ ዝየ።
26 ወአውሥአ፡ እግዚእ፡ ኢየሱስ፡ ወይቤሎሙ። አማን፡ አማን፡ እብለክሙ። ከመ፡ አኮ፡ ዘተኀሥሡኒ፡ አንትሙ፡ በእንተ፡ ዘርኢክሙ፡ ተኣምራተ። አላ፡ በእንተ፡ ዘበላዕክሙ፡ ኅብስተ፡ ወጸገብክሙ።
27 ተገበሩ፡ እንከሰ፡ አኮ፡ ለመብልዕ፡ ኀላፊ። አላ፡ ለመብልዕ፡ ዘይነብር፡ ለሕይወት፡ ዘለዓለም። ዘይሁበክሙ፡ ወልደ፡ ዕጓለ፡ እመሕያው፡ እስመ፡ ለዝሰ፡ እግዚአብሔር፡ አብ፡ ኀተሞ።
28 ወይቤልዎ፡ ምንተ፡ ንሬሲ፡ ከመ፡ ንግበር፡ ግብረ፡ እግዚአብሔር።
29 ወአውሥአ፡ እግዚእ፡ ኢየሱስ፡ ወይቤሎሙ። ዝንቱ፡ ውእቱ፡ ግብረ፡ እግዚአብሔር። ከመ፡ ትእመኑ፡ በዘፈነወ፡ ውእቱ።
30 ወይቤልዎ፡ ምንተ፡ ተኣምረ፡ ትገብር። ከመ፡ ንርአይ፡ ወንእመን፡ ብከ፡ በዘገበርከ።
31 አበዊነሰ፡ መና፡ በልዑ፡ በገዳም። በከመ፡ ጽሑፍ፡ ኅብስተ፡ እምሰማይ፡ ወሀቦሙ፡ ይብልዑ።
32 ወይቤሎሙ፡ እግዚእ፡ ኢየሱስ፡ አማን፡ አማን፡ እብለክሙ። አኮ፡ ሙሴ፡ ዘወሀበክሙ፡ ውእተ፡ ኅብስተ፡ እምሰማይ። አላ፡ አቡየ፡ ወሀበክሙ፡ ኅብስተ፡ ጽድቅ፡ እምሰማይ።
33 እስመ፡ ኅብስቱ፡ ለእግዚአብሔር፡ ውእቱ፡ ዘወረደ፡ እምሰማይ። ወይሁብ፡ ሕይወተ፡ ዘለዓለም።
34 ወይቤልዎ፡ እግዚኦ፡ ሀበነ፡ በኵሉ፡ ጊዜ፡ እምውእቱ፡ ኅብስት።
35 ወይቤሎሙ፡ እግዚእ፡ ኢየሱስ፡ አነ፡ ውእቱ፡ ኅብስተ፡ ሕይወት። ዘይመጽእ፡ ኀቤየ፡ ኢይርኅብ። ወዘሂ፡ የአምን፡ ብየ፡ ኢይጸምእ፡ ለዝሉፉ።
36 ወእቤለክሙ፡ ባሕቱ፡ ርኢክሙኒሂ፡ ወኢአመንክሙኒ።
37 ወኵሉ፡ ዘወሀበኒ፡ አቡየ፡ ይመጽእ፡ ኀቤየ። ወለዘሂ፡ መጽአ፡ ኀቤየ፡ ኢይሰድዶ፡ ወኢያወፅኦ፡ አፍኣ።
38 እስመ፡ ወረድኩ፡ እምሰማይ፡ አኮ፡ ከመ፡ እግበር፡ ፈቃድየ። ዘእንበለ፡ ፈቃዱ፡ ለዘፈነወኒ።
39 ወዝንቱ፡ ውእቱ፡ ፈቃዱ፡ ለዘፈነወኒ፡ አብ። ከመ፡ ኵሉ፡ ዘወሀበኒ፡ ኢይትሀጐል፡ እምኔሆሙ። ወኢ፡ አሐዱሂ፡ አላ፡ አነ፡ አነሥኦ፡ በደኃሪት፡ ዕለት።
40 ወዝንቱ፡ ውእቱ፡ ፈቃዱ፡ ለአቡየ። ከመ፡ ኵሉ፡ ዘርእዮ፡ ለወልድ፡ ወአምነ፡ ቦቱ፡ ይረክብ፡ ሕይወተ፡ ዘለዓለም። ወአነ፡ አነሥኦ፡ በደኃሪት፡ ዕለት።
41 ወአንጐርጐሩ፡ አይሁድ፡ በእንቲኣሁ። እስመ፡ ይቤሎሙ፡ አነ፡ ውእቱ፡ ኅብስተ፡ ሕይወት፡ ዘወረደ፡ እምሰማይ።
42 ወይቤሉ፡ አኮኑ፡ ዝንቱ፡ ውእቱ፡ ኢየሱስ፡ ወልደ፡ ዮሴፍ። ዘለሊነ፡ ነአምር፡ አባሁ፡ ወእሞ። ወእፎ፡ እንከ፡ ይብለነ፡ እምሰማይ፡ ወረድኩ።
43 ወአውሥአ፡ እግዚእ፡ ኢየሱስ፡ ወይቤሎሙ፡ ኢታንጐርጕሩ፡ በበይናቲክሙ።
44 አልቦ፡ ዘይክል፡ መጺአ፡ ኀቤየ፡ እመ፡ ኢሰሐቦ፡ አብ፡ ዘፈነወኒ። ወአነ፡ አነሥኦ፡ በደኃሪት፡ ዕለት።
45 ወሀሎ፡ ጽሑፍ፡ ውስተ፡ መጽሐፈ፡ ነቢያት። ከመ፡ ይከውኑ፡ ኵሎሙ፡ ምሁራነ፡ እምኀበ፡ እግዚአብሔር። ወኵሉ፡ እንከ፡ ዘሰምዐ፡ በኀበ፡ አቡየ፡ ተምሂሮ፡ ይመጽእ፡ ኀቤየ።
46 አልቦ፡ ዘርእዮ፡ ለአብ፡ ዘእንበለ፡ ዘእምኀቤሁ፡ ለእግዚአብሔር፡ ውእቱ። ወውእቱ፡ ርእዮ፡ ለአብ።
47 አማን፡ አማን፡ እብለክሙ፡ ዘየአምን፡ ብየ፡ ቦ፡ ሕይወት፡ ዘለዓለም።
48 አነ፡ ውእቱ፡ ኅብስተ፡ ሕይወት።
49 አበዊክሙሰ፡ መና፡ በልዑ፡ በገዳም፡ ወሞቱ።
50 ዝንቱ፡ ውእቱ፡ ኅብስት፡ ዘእምሰማይ፡ ወረደ። ወኵሉ፡ ዘበልዐ፡ እምኔሁ፡ ኢይመውት።
51 አነ፡ ውእቱ፡ ኅብስተ፡ ሕይወት፡ ዘወረደ፡ እምሰማይ። ወዘበልዐ፡ እምዝንቱ፡ ኅብስት፡ የሐዩ፡ ለዓለም። ወዝኒ፡ ኅብስት፡ ዘአነ፡ እሁቦ፡ ሥጋየ፡ ውእቱ፡ በእንተ፡ ሕይወት፡ ዘለዓለም።
52 ወተጋአዙ፡ አይሁድ፡ በበይናቲሆሙ፡ እንዘ፡ ይብሉ። እፎ፡ ይክል፡ ዝንቱ፡ የሀበነ፡ ሥጋሁ፡ ንብላዕ።
53 ወይቤሎሙ፡ እግዚእ፡ ኢየሱስ፡ አማን፡ አማን፡ እብለክሙ። እመ፡ ኢበላዕክሙ፡ ሥጋሁ፡ ለወልደ፡ ዕጓለ፡ እመሕያው፡ ወኢሰተይክሙ፡ ደሞ። አልብክሙ፡ ሕይወት፡ ላዕሌክሙ።
54 ዘበልዐ፡ ሥጋየ፡ ወሰትየ፡ ደምየ፡ ቦ፡ ሕይወት፡ ዘለዓለም። ወአነ፡ አነሥኦ፡ በደኃሪት፡ ዕለት።
55 እስመ፡ ሥጋየኒ፡ መብልዐ፡ ጽድቅ፡ ዘበአማነ፡ ውእቱ። ወደምየኒ፡ ስቴ፡ ሕይወት፡ ዘበአማን፡ ውእቱ።
56 ዘበልዐ፡ ሥጋየ፡ ወሰትየ፡ ደምየ፡ ይሄሉ፡ ምስሌየ። ወአነሂ፡ እሄሉ፡ ምስሌሁ።
57 ወበከመ፡ ዘፈነወኒ፡ አብ፡ ሕያው፡ ወአነሂ፡ ሕያው፡ በእንተ፡ አብ። ወዘበልዐ፡ ሥጋየ፡ የሐዩ፡ በእንቲኣየ።
58 ዝኬ፡ ውእቱ፡ ኅብስት፡ ዘእምሰማይ፡ ወረደ። ወአኮ፡ በከመ፡ በልዑ፡ አበዊክሙ፡ መና፡ ወሞቱ። ወዘበልዖሰ፡ ለዝንቱ፡ ኅብስት፡ የሐዩ፡ ለዓለም።
በእንተ፡ ዕቅፍት፡ ወዕልወት፡ ዘእምአርድእተ፡ ኢየሱስ
59 ወከመ፡ ዝ፡ ይቤሎሙ፡ በምኵራብ፡ ዘቅፍርናሆም፡ እንዘ፡ ይሜህሮሙ።
60 ወብዙኃን፡ እምአርዳኢሁ፡ እለ፡ ሰምዑ፡ ዘንተ። ወይቤሉ፡ ዕጹብ፡ ዝንቱ፡ ነገር፡ ወመኑ፡ ይክል፡ ሰሚዖቶ።
61 ወአእመሮሙ፡ እግዚእ፡ ኢየሱስ፡ በመንፈሱ። ከመ፡ አንጐርጐሩ፡ አርዳኢሁ፡ በእንተ፡ ዝንቱ። ወይቤሎሙ፡ ዝኑ፡ ያዐቅፈክሙ።
62 እፎ፡ እንከ፡ እመ፡ ርኢክምዎ፡ ለወልደ፡ ዕጓለ፡ እመሕያው። እንዘ፡ የዐርግ፡ ኀበ፡ ሀሎ፡ ቀዲሙ።
63 መንፈስ፡ ውእቱ፡ ዘየሐዩ። ወሥጋሰ፡ አልቦ፡ ዘይበቊዕ፡ ወኢ፡ ምንተኒ። ወዝኒ፡ ቃል፡ ዘአነ፡ ነገርኩክሙ፡ መንፈስ፡ ውእቱ፡ ወሕይወት፡ ውእቱ።
64 ወባሕቱ፡ ቦቱ፡ እምውስቴትክሙ፡ እለ፡ ኢየአምኑ። እስመ፡ የአምር፡ እግዚእ፡ ኢየሱስ፡ እምትካት። መኑ፡ እሙንቱ፡ እለ፡ ኢየአምኑ፡ ቦቱ። ወመኑ፡ ውእቱ፡ ዘያገብኦ።
65 ወይቤሎሙ፡ በእንተ፡ ዝንቱ፡ እብለክሙ። አልቦ፡ ዘይክል፡ መጺአ፡ ኀቤየ፡ ለእመ፡ ኢተውህበ፡ ሎቱ፡ እምኀበ፡ አብ።
66 ወበእንተ፡ ዝንቱ፡ ብዙኃን፡ እምአርዳኢሁ፡ እለ፡ ገብኡ፡ ድኅሬሆሙ። ወኢሖሩ፡ እንከ፡ ምስሌሁ።
67 ወይቤሎሙ፡ እግዚእ፡ ኢየሱስ፡ ለዐሠርቱ፡ ወክልኤቱ። አንትሙኒ፡ ትፈቅዱኑ፡ ትሑሩ።
68 ወአውሥአ፡ ስምዖን፡ ጴጥሮስ፡ ወይቤሎ፡ እግዚኦ፡ ኀበ፡ መኑ፡ ነሐውር። እንዘ፡ ቃለ፡ ሕይወት፡ ዘለዓለም፡ ብከ።
69 ወንሕነሰ፡ አመነ፡ ወአእመርነ። ከመ፡ አንተ፡ ውእቱ፡ ክርስቶስ፡ ወልዱ፡ ለእግዚአብሔር፡ ሕያው።
70 ወአውሥአ፡ እግዚእ፡ ኢየሱስ፡ ወይቤሎሙ። አኮኑ፡ አነ፡ ኀረይኩክሙ፡ ለዐሠርቱ፡ ወክልኤቱ። ወባሕቱ፡ አሐዱ፡ እምኔክሙ፡ ሰይጣን፡ ውእቱ።
71 ወዘንተሰ፡ ይቤ፡ እንበይነ፡ ይሁዳ፡ ስምዖን፡ አስቆሮታዊ። እስመ፡ ውእቱ፡ ሀለዎ፡ ያግብኦ። ወውእቱ፡ አሐዱ፡ እምዐሠርቱ፡ ወክልኤቱ።
=== chapter 7 ===
[ምዕራፍ 7]
1 ወእምድኅረ፡ ዝንቱ፡ ሖረ፡ እግዚእ፡ ኢየሱስ፡ ውስተ፡ ገሊላ። ወኢፈቀደ፡ ይሑር፡ ምድረ፡ ይሁዳ። እስመ፡ የኀሥሥዎ፡ አይሁድ፡ ይቅትልዎ።
2 ወቀርበ፡ በዓለ፡ መጸለቶሙ፡ ለአይሁድ።
3 ወይቤልዎ፡ አኀዊሁ፡ ለእግዚእ፡ ኢየሱስ፡ ፍልስ፡ እም፡ ዝየ። ወሑር፡ ብሔረ፡ ይሁዳ። ከመ፡ አርዳኢከኒ፡ ይርአዩ፡ ግብረከ፡ ዘትገብር፡ ወይእመኑ።
4 እስመ፡ አልቦ፡ ዘይገብር፡ ምንተኒ፡ ጽሚተ። ወይፈቅድ፡ ክሡተ፡ ይኩኖ። ወእመሰ፡ ዘንተ፡ ትገብር፡ አርኢ፡ ርእሰከ፡ ለዓለም።
5 እስመ፡ አኀዊሁኒ፡ ኢአምኑ፡ ቦቱ።
6 ወይቤሎሙ፡ እግዚእ፡ ኢየሱስ። ጊዜየሰ፡ ዓዲ፡ እስከ፡ ይእዜ፡ ኢበጽሐ። ወጊዜ፡ ዚኣክሙሰ፡ ዘልፈ፡ ድልው፡ ውእቱ።
7 ለክሙሰ፡ ኢይክል፡ ዓለም፡ ጸሊኦተክሙ፡ ወሊተሰ፡ ይጸልኡኒ። እስመ፡ አነ፡ ስምዕ፡ ላዕሌሆሙ፡ ወእዛለፎሙ፡ በከመ፡ እከየ፡ ምግባሮሙ።
8 አንትሙሰ፡ ዕርጉ፡ ውስተ፡ ዝንቱ፡ በዓል። ወአንሰ፡ ኢየዐርግ፡ ይእዜ፡ ውስተ፡ ዝንቱ፡ በዓል። እስመ፡ ዓዲ፡ ኢበጽሐ፡ ጊዜየ።
9 ወከመ፡ ዝ፡ ይቤሎሙ፡ ወነበረ፡ ውስተ፡ ገሊላ።
10 ወዐሪጎሙ፡ አኀዊሁ፡ ለበዓል፡ ውእተ፡ አሚረ። ዐርገ፡ ውእቱኒ፡ ጽሚተ፡ ወአኮ፡ ገሃደ።
11 ወአኀዙ፡ አይሁድ፡ ይኀሥሥዎ፡ በበዓል። ወይቤሉ፡ አይቴ፡ ውእቱ፡ ዝንቱ።
ዘከመ፡ ተናገረ፡ እግዚእ፡ ኢየሱስ፡ ገሃደ፡ በእንተ፡ ተፈንዎቱ፡ መለኮታዊት
12 ወብዙኀ፡ አንጐርጐሩ፡ ሕዝብ፡ በእንቲኣሁ። ወቦ፡ እለ፡ ይቤሉ፡ ኄር፡ ውእቱ። ወካልኣነ፡ ይቤሉ፡ አልቦ፡ አላ፡ ያስሕቶሙ፡ ለሕዝብ።
13 ወባሕቱ፡ ክሡተሰ፡ አልቦ፡ ዘተናገረ፡ በእንቲኣሁ፡ በእንተ፡ ፍርሀቶሙ፡ ለአይሁድ።
14 ወበማእከለ፡ መዋዕለ፡ በዓል፡ ዐርገ፡ እግዚእ፡ ኢየሱስ፡ ምኵራበ። ወአኀዘ፡ ይምሀር።
15 ወአንከሩ፡ አይሁድ፡ ምህሮቶ፡ እንዘ፡ ይብሉ። እፎ፡ የአምር፡ ዝንቱ፡ መጽሐፈ፡ ዘኢመሀሮ፡ መኑሂ።
16 ወአውሥአ፡ እግዚእ፡ ኢየሱስ፡ ወይቤሎሙ። ትምህርትየሰ፡ ኢኮነት፡ እንቲኣየ፡ አላ፡ እንቲኣሁ፡ ለዘፈነወኒ።
17 ወዘሰ፡ ይፈቅድ፡ ይግበር፡ ሥምረቶ። ውእቱ፡ የአምር፡ ከመ፡ እምኀበ፡ እግዚአብሔር፡ ውእቱ፡ ትምህርትየ። ወአኮ፡ ዘእምኀቤየ፡ ዘእነግር።
18 ወዘሰ፡ ለርእሱ፡ ይነግር፡ ተድላ፡ ርእሱ፡ የኀሥሥ። ወዘሰ፡ ይፈቅድ፡ ያድሉ፡ ለዘፈነዎ፡ ጻድቅ፡ ውእቱ። ወአልቦ፡ ዐመፃ፡ በኀቤሁ።
19 አኮኑ፡ ሙሴ፡ ወሀበክሙ፡ ኦሪተ። ወአልቦ፡ አሐዱሂ፡ እምኔክሙ፡ ዘይገብራ፡ ለኦሪት። ለምንት፡ እንከ፡ ተኀሥሡ፡ ትቅትሉኒ።
20 ወአውሥኡ፡ ሕዝብ፡ ወይቤልዎ። ጋኔንኑ፡ ብከ፡ መኑ፡ የኀሥሥ፡ ይቅትልከ።
21 ወአውሥአ፡ እግዚእ፡ ኢየሱስ፡ ወይቤሎሙ። አሐደ፡ ግብረ፡ ገበርኩ፡ ወኵልክሙ፡ አንከርክሙ።
22 በእንተ፡ ዝንቱ፡ ወሀበክሙ፡ ሙሴ፡ ግዝረተ። ወኢኮነት፡ እምኀበ፡ ሙሴ፡ አላ፡ እምአበው፡ ይእቲ። ወበሰንበት፡ ትገዝርዎ፡ ለሰብእ።
23 ወእመሰ፡ በሰንበት፡ ግዝረተ፡ ይነሥእ፡ ብእሲ፡ ከመ፡ ኢይሰዐር፡ ሕጉ፡ ለሙሴ። ለምንት፡ እንከ፡ ትግእዙኒ። ለእመ፡ አሕየውክዎ፡ ለብእሲ፡ ኵለንታሁ፡ በሰንበት።
24 ኢትፍትሑ፡ በአድልዎ፡ ለገጽ፡ አላ፡ ፍትሐ፡ ጽድቅ፡ ፍትሑ።
25 ወቦ፡ እለ፡ ይቤሉ፡ እምሰብአ፡ ኢየሩሳሌም። አኮኑ፡ ዝንቱ፡ ውእቱ፡ ዘየኀሥሡ፡ አይሁድ፡ ይቅትልዎ።
26 ወናሁ፡ ገሃደ፡ ይትናገሮሙ። ወአልቦ፡ ዘይቤልዎ፡ ምንተኒ፡ አእመሩኑ፡ እንጋ፡ መላእክት፡ ወሊቃውንት። ከመ፡ ዝንቱ፡ ውእቱ፡ ክርስቶስ፡ በአማን።
27 ወባሕቱ፡ ለዝንቱሰ፡ ነአምሮ፡ እምአይቴ፡ ውእቱ። ወክርስቶስሰ፡ አመ፡ ይመጽእ፡ አልቦ፡ ዘየአምሮ፡ እምኀበ፡ ይመጽእ።
28 ወአልዐለ፡ ቃሎ፡ እግዚእ፡ ኢየሱስ፡ በምኵራብ፡ እንዘ፡ ይሜህር፡ ወይቤ። ኪያየኑ፡ ተአምሩኒ፡ ወተአምሩኑ፡ እምኀበ፡ አይቴ፡ አነ። ወአኮ፡ ለልየ፡ ዘመጻእኩ። አላ፡ ሀሎ፡ ጻድቅ፡ ዘፈነወኒ፡ ዘኢተአምርዎ፡ አንትሙ።
29 ወአንሰ፡ አአምሮ፡ እስመ፡ እምኀቤሁ፡ አነ፡ ወውእቱ፡ ፈነወኒ።
30 ወፈቀዱ፡ የአኀዝዎ፡ ወባሕቱ፡ አልቦ፡ ዘአንሥአ፡ እዴሁ፡ ላዕሌሁ። እስመ፡ ዓዲ፡ ኢበጽሐ፡ ጊዜሁ። ወእምውእቶሙ፡ ሰብእ፡ ብዙኃን፡ እለ፡ አምኑ፡ ቦቱ።
31 ወይቤሉ፡ አመ፡ ይመጽእ፡ ክርስቶስ፡ ቦኑ፡ ፈድፋደ፡ ተኣምረ፡ ዘይገብር፡ እምዘገብረ፡ ዝንቱ።
32 ወሰምዑ፡ ፈሪሳውያን፡ ከመ፡ አንጐርጐሩ፡ ሕዝብ፡ በእንቲኣሁ። ወፈነዉ፡ ሊቃነ፡ ካህናት፡ ወፈሪሳውያን፡ ወዓልያኒሆሙ፡ ከመ፡ የአኀዝዎ።
33 ወይቤሎሙ፡ እግዚእ፡ ኢየሱስ። ዓዲ፡ ኅዳጠ፡ መዋዕለ፡ ሀሎኩ፡ ምስሌክሙ። ወእምዝ፡ አሐውር፡ ኀበ፡ አብ፡ ዘፈነወኒ።
34 ተኀሥሡኒ፡ ወኢትረክቡኒ። ወኀበ፡ አነ፡ አሐውር፡ አንትሙ፡ ኢትክሉ፡ መጺአ።
35 ወይቤሉ፡ አይሁድ፡ በበይናቲሆሙ። አይቴኑ፡ ሀለዎ፡ ለዝንቱ፡ ይሑር፡ ዘኢንክል፡ ረኪቦቶ፡ ንሕነ። ውስተ፡ ብሔረ፡ አረሚኑ፡ የሐውር፡ እንጋ፡ ወይሜህሮሙ፡ ለአረሚ።
36 ምንትኑ፡ ዝንቱ፡ ነገር፡ ዘይብለነ፡ ተኀሥሡኒ፡ ወኢትረክቡኒ። ወኀበ፡ አነ፡ አሐውር፡ አንትሙ፡ ኢትክሉ፡ መጺአ።
ዘከመ፡ ከሠተ፡ ኢየሱስ፡ መንፈሰ፡ ቅዱሰ
37 ወበደኃሪት፡ ዕለት፡ ዘበዓል፡ ዐባይ። ቆመ፡ እግዚእ፡ ኢየሱስ፡ ወከልሐ፡ ወይቤ። ዘጸምአ፡ ይምጻእ፡ ኀቤየ፡ ወይስተይ።
38 ወዘሂ፡ የአምን፡ ብየ፡ በከመ፡ ይቤ፡ መጽሐፍ። አፍላገ፡ ማየ፡ ሕይወት፡ ይውሕዝ፡ እምከርሡ።
39 ወዘንተ፡ ይቤ፡ በእንተ፡ መንፈስ፡ ቅዱስ፡ ዘሀለዎሙ። ይንሥኡ፡ እለ፡ የአምኑ፡ ቦቱ። እስመ፡ ዓዲ፡ ኢመጽአ፡ መንፈስ፡ ቅዱስ። በእንተ፡ ዘኢተሰብሐ፡ ዓዲሁ፡ እግዚእ፡ ኢየሱስ።
ዘከመ፡ ኀለዩ፡ አይሁድ፡ ላዕለ፡ ኢየሱስ፡ ዘዘ፡ ዚኣሆሙ፡ ኀልዮታተ
40 ወብዙኃን፡ እምሕዝብ፡ ሰሚዖሙ፡ ዘንተ፡ ነገረ፡ ይቤሉ። አማን፡ ነቢይ፡ ውእቱ፡ ዝንቱ።
41 ወቦ፡ እለ፡ ይቤሉ፡ ክርስቶስ፡ ውእቱ። ወመንፈቆሙ፡ ይቤሉ፡ ቦኑ፡ እምገሊላ፡ ይመጽእ፡ ክርስቶስ።
42 አኮኑ፡ ይብል፡ መጽሐፍ። ከመ፡ እምነ፡ ዘርዐ፡ ዳዊት፡ ወእምነ፡ ቤተልሔም፡ ሀገሩ፡ ለዳዊት፡ ይመጽእ፡ ክርስቶስ።
43 ወተናፈቁ፡ ሕዝብ፡ በበይናቲሆሙ፡ በእንቲኣሁ።
44 ወቦ፡ እለ፡ ፈቀዱ፡ የአኀዝዎ። ወባሕቱ፡ አልቦ፡ ዘአንሥአ፡ እዴሁ፡ ላዕሌሁ።
45 ወተሠውጡ፡ ወዓልያኒሆሙ፡ ኀበ፡ ሊቃነ፡ ካህናት፡ ወፈሪሳውያን። ወይቤልዎሙ፡ እሙንቱ፡ እፎኑመ፡ ዘኢያምጻእክምዎ።
46 ወአውሥኡ፡ ወዓልያኒሆሙ፡ ወይቤልዎሙ። ግሙራ፡ ኢተናገረ፡ ሰብእ፡ ዘከመ፡ ተናገረ፡ ውእቱ፡ ብእሲ።
47 ወአውሥኡ፡ ፈሪሳውያን፡ ወይቤልዎሙ፡ ትጌግዩኑ፡ አንትሙኒ።
48 ቦኑ፡ እመላእክት፡ ወእምፈሪሳውያን፡ እለ፡ አምኑ፡ ቦቱ።
49 ዘእንበለ፡ እሉ፡ ጊጉያን፡ ሕዝብ፡ እለ፡ ኢየአምሩ፡ ኦሪተ። ወእሙንቱሰ፡ ርጉማን።
50 ወይቤሎሙ፡ ኒቆዲሞስ፡ ዘሖረ፡ ኀቤሁ፡ ለእግዚእ፡ ኢየሱስ። ቀዲሙ፡ ሌሊተ፡ አሐዱ፡ እምኔሆሙ።
51 ኦሪትክሙኑ፡ ትኴንኖ፡ ለሰብእ፡ ዘእንበለ፡ ይሕትትዎ፡ ቅድመ። ወኢያእምሩ፡ ግብሮ፡ ዘገብረ።
52 ወአውሥእዎ፡ ወይቤልዎ፡ አንተሂ፡ እምገሊላኑ፡ ትብል። አንተ፡ ኅሥሥ፡ መጽሐፈ፡ ትርአይ፡ ከመ፡ እምገሊላ፡ ኢይትነሣእ፡ ነቢይ።
53 ወገብኡ፡ ኵሉ፡ ለለ፡ አሐዱ፡ ውስተ፡ ቤቶሙ።
=== chapter 8 ===
[ምዕራፍ 8]
1 ወእግዚእ፡ ኢየሱስኒ፡ ሖረ፡ ውስተ፡ ደብረ፡ ዘይት።
2 ወአንግሀ፡ በጽባሕ፡ ወቦአ፡ ካዕበ፡ ምኵራበ። ወተጋብኡ፡ ኵሉ፡ ሕዝብ፡ ኀቤሁ። ወነበረ፡ እንዘ፡ ይሜህሮሙ፡ ወአኀዘ፡ ይምሀሮሙ።
በእንተ፡ ኵነኔ፡ ብእሲት፡ ዘማዊት
3 ወአምጽኡ፡ ኀቤሁ፡ ጸሐፍት፡ ወፈሪሳውያን። ብእሲተ፡ እስርተ፡ እንተ፡ ተረክበት፡ በዝሙት። ወአብእዋ፡ ውስጠ፡ ወአቀምዋ፡ ቅድመ፡ እግዚእ፡ ኢየሱስ።
4 ወይቤልዎ፡ ኦ፡ ሊቅ፡ ረከብናሃ፡ ለዛቲ፡ ብእሲት፡ እንዘ፡ ትኤብስ፡ በዝሙት።
5 ወበሕግነሰ፡ ሠርዐ፡ ሙሴ፡ ከመ፡ ትትወገር፡ በእብን። ወአንተሰ፡ እንከ፡ ምንተ፡ ትብል፡ በእንቲኣሃ። እስመ፡ ናሁ፡ ተረክበት፡ በዝሙት።
6 ወዘንተ፡ ይቤሉ፡ እንዘ፡ ያሜክርዎ፡ ከመ፡ ይርከቡ፡ ምክንያተ፡ ላዕሌሁ። ወአትሐተ፡ እግዚእ፡ ኢየሱስ፡ አዕይንቲሁ፡ ውስተ፡ ምድር። ወጸሐፈ፡ በአጽባዕቱ።
7 ወሶበ፡ ቆሙ፡ ብዙኀ፡ ወአጐንደዩ፡ ተስእሎቶ። አንሥአ፡ አዕይንቲሁ፡ ወነጸረ፡ ኀቤሆሙ። ወይቤሎሙ፡ ዘአልቦ፡ ኀጢአተ፡ እምኔክሙ፡ ቀዲሙ፡ ለይገራ፡ በእብን።
8 ወካዕበ፡ ደነነ፡ ወጸሐፈ፡ ኀበ፡ ምድር፡ በአጽባዕቱ።
9 ወሰሚዖሙ፡ እሙንቱ፡ ዘንተ፡ ዘለፋ፡ በለብዎ፡ አኀዙ፡ ይሑሩ፡ በበ፡ አሐዱ። እስከ፡ ወፅኡ፡ ሊቃውንቲሆሙ፡ እምቀዳሚ፡ እስከ፡ ደኃሪ። ወተርፈ፡ እግዚእ፡ ኢየሱስ፡ ባሕቲቶ። ወይእቲኒ፡ ብእሲት፡ ትቀውም፡ ውስጠ።
10 ወአንሥአ፡ እግዚእ፡ ኢየሱስ፡ አዕይንቲሁ፡ ወነጸረ፡ ኀቤሃ፡ ወይቤላ። ኦ፡ ብእሲቶ፡ አይቴ፡ ሀለዉ፡ እለ፡ ይኴንኑኪ።
11 ወአውሥአት፡ ወትቤሎ፡ አልቦ፡ ዘእሬኢ፡ እግዚእየ። ወይቤላ፡ እግዚእ፡ ኢየሱስ፡ አነሂ፡ አልቦ፡ ዘእኴንነኪ። ሑሪ፡ እትዊ፡ በሰላም፡ ወእምዝ፡ ዳግመ፡ ኢተአብሲ።
ዘከመ፡ ተናገረ፡ ኢየሱስ፡ በእንተ፡ ተፈንዎቱ፡ መለኮታዊት
12 ወካዕበ፡ ነበቦሙ፡ እግዚእ፡ ኢየሱስ፡ ወይቤ። አነ፡ ውእቱ፡ ብርሃኑ፡ ለዓለም። ዘተለወኒ፡ ኢየሐውር፡ ውስተ፡ ጽልመት። አላ፡ ይረክብ፡ ብርሃነ፡ ሕይወት።
13 ወይቤልዎ፡ ፈሪሳውያን። ለሊከኑ፡ ትንእድ፡ ርእሰከ፡ ኢኮነ፡ ጽድቀ፡ ስምዕከ።
14 ወአውሥአ፡ እግዚእ፡ ኢየሱስ፡ ወይቤሎሙ። እመኒ፡ ለልየ፡ ስምዐ፡ ኮንኩ፡ ለርእስየ። ጽድቅ፡ ውእቱ፡ ስምዕየ። እስመ፡ አነ፡ አአምር፡ እምኀበ፡ መጻእኩ፡ ወኀበሂ፡ አሐውር። ወአንትሙሰ፡ ኢተአምሩ፡ እምኀበ፡ መጻእኩ፡ ወኀበሂ፡ አሐውር።
15 አንትሙሰ፡ ሕገ፡ ዘሥጋ፡ ትኴንኑ። ወአንሰ፡ ኢይኴንን፡ ወኢ፡ መነሂ።
16 ወእመሂ፡ ኰነንኩ፡ አነ፡ ጽድቀ፡ እኴንን። እስመ፡ ኢኮንኩ፡ አነ፡ ባሕቲትየ። አላ፡ አነ፡ ወአብ፡ ዘፈነወኒ።
17 አኮኑ፡ ጽሑፍ፡ ውስተ፡ ኦሪትክሙ። ከመ፡ ስምዐ፡ ክልኤቱ፡ ሰብእ፡ እሙን፡ ውእቱ።
18 ወአነሂ፡ ሰማዕት፡ ለርእስየ። ወአብ፡ ዘፈነወኒ፡ ሰማዕትየ።
19 ወይቤልዎ፡ አይቴ፡ ውእቱ፡ አቡከ። ወአውሥአ፡ እግዚእ፡ ኢየሱስ፡ ወይቤሎሙ። ኢ፡ ኪያየ፡ ተአምሩ፡ ወኢ፡ አቡየ። ሶበሰ፡ ኪያየ፡ አእመርክሙ፡ እምአእመርክምዎ፡ ለአቡየኒ።
20 ወዘንተ፡ ነገረ፡ ተናገሮሙ፡ እግዚእ፡ ኢየሱስ፡ በኀበ፡ ሙዳየ፡ ምጽዋት። እንዘ፡ ይሜህሮሙ፡ በምኵራብ። ወኢአኀዝዎ፡ እስመ፡ ዓዲ፡ ኢበጽሐ፡ ጊዜሁ።
21 ወካዕበ፡ ይቤሎሙ፡ እግዚእ፡ ኢየሱስ። አንሰ፡ አሐውር፡ ተኀሥሡኒ፡ ወኢትረክቡኒ። ወትመውቱ፡ በኀጢአትክሙ። ወኀበ፡ አነ፡ አሐውር፡ አንትሙ፡ ኢትክሉ፡ መጺአ።
22 ወይቤሉ፡ አይሁድ፡ ይቀትልኑ፡ እንጋ፡ ርእሶ፡ ለሊሁ። ዘይብለነ፡ ኀበ፡ አነ፡ አሐውር፡ አንትሙ፡ ኢትክሉ፡ መጺአ።
23 ወይቤሎሙ፡ አንትሙሰ፡ እምታሕቱ፡ አንትሙ፡ ወአንሰ፡ እምላዕሉ፡ አነ። አንትሙሰ፡ እምዝንቱ፡ ዓለም፡ አንትሙ። ወአንሰ፡ ኢኮንኩ፡ እምዝንቱ፡ ዓለም።
24 ወናሁ፡ እቤለክሙ፡ ከመ፡ ትመውቱ፡ በኀጢአትክሙ። ለእመ፡ ኢአመንክሙ፡ ከመ፡ አነ፡ ውእቱ፡ ትመውቱ፡ በኀጢአትክሙ።
25 ወይቤልዎ፡ አንተ፡ መኑ፡ አንተ። ወይቤሎሙ፡ እግዚእ፡ ኢየሱስ፡ ቀዳሚኒ፡ ነገርኩክሙ።
26 ወብዙኅ፡ ብየ፡ ዘእብል፡ በእንቲኣክሙ፡ ወእኴንን፡ ቦቱ። ወባሕቱ፡ ዘፈነወኒ፡ ጻድቅ፡ ውእቱ። ወአንሰ፡ ዘሰማዕኩ፡ በኀቤሁ፡ እነግር፡ ለዓለም።
27 ወኢያእመሩ፡ ከመ፡ በእንተ፡ አብ፡ ይቤሎሙ።
28 ወይቤሎሙ፡ እግዚእ፡ ኢየሱስ። አመ፡ ተለዐለ፡ ወልደ፡ ዕጓለ፡ እመሕያው፡ ይእተ፡ አሚረ። ተአምሩ፡ ከመ፡ አነ፡ ውእቱ። ወአኮ፡ ዘእምኀቤየ፡ ዘእነግር። አላ፡ በከመ፡ መሀረኒ፡ አቡየ፡ ከማሁ፡ እነግር።
29 ወዘፈነወኒ፡ ሀሎ፡ ምስሌየ፡ ወኢየኀድገኒ፡ አብ፡ ባሕቲትየ። እስመ፡ አነ፡ ሥምረቶ፡ እገብር፡ ዘልፈ።
30 ወዘንተ፡ ብሂሎ፡ ብዙኃን፡ እለ፡ አምኑ፡ ቦቱ።
31 ወይቤሎሙ፡ እግዚእ፡ ኢየሱስ፡ ለእለ፡ አምኑ፡ ቦቱ፡ አይሁድ። አንትሙሂ፡ ለእመ፡ ነበርክሙ፡ በቃልየ፡ አማን፡ አርዳእየ፡ አንትሙ።
32 ወተአምርዋ፡ ለጽድቅ፡ ወጽድቅኒ፡ ታግዕዘክሙ።
ዘከመ፡ ገሠጸ፡ ኢየሱስ፡ ትዝኅርቶሙ፡ ለአይሁድ
33 ወአውሥኡ፡ ወይቤልዎ፡ ዘርዐ፡ አብርሃም፡ ንሕነ። ወእምአመ፡ ኮነ፡ ግሙራ፡ ኢተቀነይነ፡ ወኢ፡ ለመኑሂ። እፎ፡ እንከ፡ ትብለነ፡ ግዑዛነ፡ ትኩኑ።
34 ወአውሥአ፡ እግዚእ፡ ኢየሱስ፡ ወይቤሎሙ። አማን፡ አማን፡ እብለክሙ። ኵሉ፡ ዘይገብራ፡ ለኀጢአት፡ ገብራ፡ ውእቱ፡ ለኀጢአት።
35 ወገብርሰ፡ ኢይነብር፡ ውስተ፡ ቤት፡ ለዝሉፉ። ወወልድሰ፡ ይነብር፡ ለዓለም።
36 ወእምከመሰ፡ ወልድ፡ አግዐዘክሙ፡ አማን፡ ግዑዛን፡ አንትሙ።
37 ወአአምር፡ ከመ፡ ዘርዐ፡ አብርሃም፡ አንትሙ። ወባሕቱ፡ ተኀሥሡ፡ ትቅትሉኒ፡ እስመ፡ ኢይነብር፡ ቃልየ፡ ኀቤክሙ።
38 ወአንሰ፡ ዘርኢኩ፡ በኀበ፡ አቡየ፡ እነግር፡ ወአንትሙሂ፡ ዘርኢክሙ፡ በኀበ፡ አቡክሙ፡ ትገብሩ።
39 ወአውሥኡ፡ ወይቤልዎ፡ ለነሰ፡ አብርሃም፡ አቡነ። ወይቤሎሙ፡ እግዚእ፡ ኢየሱስ። ሶበሰ፡ ውሉደ፡ አብርሃም፡ አንትሙ፡ ግብረ፡ አብርሃም፡ እምገበርክሙ።
40 ወይእዜሰ፡ ተኀሥሡ፡ ትቅትሉኒ፡ ብእሴ፡ ጻድቀ። ዘጽድቀ፡ እነግረክሙ፡ ዘሰማዕኩ፡ በኀበ፡ እግዚአብሔር። ወአብርሃምሰ፡ ኢገብረ፡ ከመ፡ ዝ።
41 አንትሙሰ፡ ትገብሩ፡ ግብረ፡ አቡክሙ። ወይቤልዎ፡ ንሕነሰ፡ ኢተወለድነ፡ እምዝሙት። አላ፡ አሐዱ፡ አብ፡ ብነ፡ ወውእቱ፡ እግዚአብሔር።
42 ወይቤሎሙ፡ እግዚእ፡ ኢየሱስ። ሶበሰ፡ እግዚአብሔር፡ አቡክሙ፡ እምአፍቀርክሙኒ፡ ኪያየ። ወቃልየኒ፡ እምዐቀብክሙ። እስመ፡ አነ፡ እምኀበ፡ እግዚአብሔር፡ ወፃእኩ፡ ወመጻእኩ። ወአኮ፡ ለልየ፡ ዘመጻእኩ፡ አላ፡ ውእቱ፡ ፈነወኒ።
43 እፎ፡ እንከ፡ ኢተአምኑ፡ ቃልየ። እስመ፡ ኢትክሉ፡ ሰሚዐ፡ ነገረ፡ ዚኣየ።
44 አንትሙሰ፡ እምአቡክሙ፡ ሰይጣን፡ አንትሙ። ወፍትወቶ፡ ለአቡክሙ፡ ትግበሩ፡ ትፈቅዱ። ወውእቱሰ፡ ቀታሌ፡ ነፍሰ፡ ሰብእ፡ ውእቱ፡ እምትካት። ወኢይቀውም፡ በጽድቅ፡ እስመ፡ አልቦ፡ ጽድቅ፡ በኀቤሁ። ወሶበሂ፡ ይነብብ፡ ሐሰተ፡ እምዚኣሁ፡ ይነብብ። እስመ፡ ሐሳዊ፡ ውእቱ፡ ወአቡሃ፡ ለሐሰት።
45 ወአንሰ፡ እስመ፡ ጽድቀ፡ እነግር፡ ኢተአምኑኒ።
46 መኑ፡ እምኔክሙ፡ ዘይዛለፈኒ፡ በእንተ፡ ኀጢአት። ወእመሰ፡ አነ፡ ጽድቀ፡ እነግር፡ ለምንት፡ ኢተአምኑኒ።
47 ዘሰ፡ እምእግዚአብሔር፡ ውእቱ፡ ቃለ፡ እግዚአብሔር፡ ይሰምዕ። ወበእንተ፡ ዝንቱ፡ አንትሙሰ፡ ኢትሰምዑኒ። እስመ፡ ኢኮንክሙ፡ እምእግዚአብሔር።
48 ወተሰጥውዎ፡ አይሁድ፡ ወይቤልዎ። አኮኑ፡ ሠናየ፡ ንቤለከ፡ ከመ፡ ሳምራዊ፡ አንተ፡ ወጋኔን፡ ብከ።
49 ወአውሥአ፡ እግዚእ፡ ኢየሱስ፡ ወይቤሎሙ። አንሰ፡ ጋኔን፡ አልብየ፡ ወባሕቱ፡ አከብር፡ አባየ። ወአንትሙሰ፡ ታስተሐቅሩኒ።
50 አንሰ፡ ኢየኀሥሥ፡ ተድላ፡ ለርእስየ። ሀሎ፡ ዘየኀሥሥ፡ ወዘሂ፡ ይኴንን።
51 አማን፡ አማን፡ እብለክሙ። ዘዐቀበ፡ ቃልየ፡ ኢይጥዕሞ፡ ለሞት፡ ለዓለም።
52 ወይቤልዎ፡ አይሁድ፡ ይእዜኬ፡ አእመርናከ፡ ከመ፡ ጋኔን፡ ብከ። አብርሃም፡ ጥቀ፡ ሞተ፡ ወነቢያትኒ፡ ሞቱ። ወአንተሰ፡ ትብል፡ ዘዐቀበ፡ ቃልየ፡ ኢይጥዕሞ፡ ለሞት፡ ለዓለም።
53 አንተኑ፡ ተዐቢ፡ እምአብርሃም፡ አቡነ፡ ዘሞተ። ወእምነቢያትኒ፡ እለ፡ ሞቱ። መነ፡ ትሬሲ፡ ርእሰከ።
54 ወአውሥአ፡ እግዚእ፡ ኢየሱስ፡ ወይቤሎሙ። እመሰ፡ ለልየ፡ ሰባሕኩ፡ ርእስየ። ኢይበቊዐኒ፡ ስብሐትየ፡ ወኢ፡ ምንተኒ። አላ፡ ሀሎ፡ አቡየ፡ ዘይሴብሐኒ። ዘአንትሙ፡ ትብልዎ፡ አምላክነ፡ ውእቱ፡ ወኢተአምርዎ።
55 ወአንሰ፡ አአምሮ። ወእመሰ፡ እቤ፡ ኢየአምሮ፡ እከውን፡ ከማክሙ፡ ሐሳዌ። ወአንሰ፡ አአምሮሂ፡ ወቃሎሂ፡ አዐቅብ።
56 አብርሃም፡ አቡክሙ፡ ተመነየ፡ ከመ፡ ይርአይ፡ ዕለትየ። ወርእየሂ፡ ወተፈሥሐ።
57 ወይቤልዎ፡ አይሁድ፡ ኀምሳ፡ ዓመት፡ አልብከ፡ ወአብርሃምሃ፡ ርኢከ።
58 ወይቤሎሙ፡ እግዚእ፡ ኢየሱስ። አማን፡ አማን፡ እብለክሙ። እምቅድመ፡ ይትወለድ፡ አብርሃም፡ ሀሎኩ፡ አነ።
59 ወነሥኡ፡ እብነ፡ ከመ፡ ይውግርዎ። ወተኀብኦሙ፡ እግዚእ፡ ኢየሱስ፡ ወወፅአ፡ እምኵራብ። ወኀለፈ፡ እንተ፡ ማእከሎሙ፡ ወሖረ።
=== chapter 9 ===
[ምዕራፍ 9]
ዘከመ፡ ፈወሶ፡ ለዘዕዉሩ፡ ተወልደ
1 ወእንዘ፡ የኀልፍ፡ እምህየ፡ ርእየ፡ ብእሴ፡ ዘዕዉሩ፡ ተወልደ።
2 ወተስእልዎ፡ አርዳኢሁ፡ ወይቤልዎ። ረቢ፡ በኀጢአተ፡ መኑ፡ ተወልደ፡ ዝንቱ፡ ዕዉር። በዘርእሱኑ፡ ወሚመ፡ በዘአዝማዲሁ።
3 ወይቤሎሙ፡ እግዚእ፡ ኢየሱስ። ኢ፡ ውእቱ፡ አበሰ፡ ወኢ፡ አዝማዲሁ። ዳእሙ፡ ከመ፡ ያስተርኢ፡ ግብረ፡ እግዚአብሔር፡ በላዕሌሁ።
4 ወባሕቱ፡ ርቱዕ፡ ሊተ፡ እግበር፡ ግብሮ፡ ለዘፈነወኒ፡ እንዘ፡ መዓልት፡ ውእቱ። እስመ፡ ትመጽእ፡ ሌሊት፡ ዘኢይክል፡ ቦቱ፡ አሐዱሂ፡ ገቢረ።
5 እንዘ፡ ሀሎኩ፡ ውስተ፡ ዓለም። አነ፡ ውእቱ፡ ብርሃኑ፡ ለዓለም።
6 ወዘንተ፡ ብሂሎ፡ ወረቀ፡ ውስተ፡ ምድር። ወገብረ፡ ጽቡረ፡ በምራቁ፡ ወቀብዖ፡ አዕይንቲሁ፡ ለውእቱ፡ ዕዉር።
7 ወይቤሎ፡ ሑር፡ ተኀፀብ፡ በምጥማቃተ፡ ሰሊሆም፡ ዘበትርጓሜሁ፡ ሐዋርያ። ወሖረ፡ ወተኀፅበ፡ ወገብአ፡ እንዘ፡ ይሬኢ።
8 ወአግዋሪሁሰ፡ ወእለሂ፡ የአምርዎ፡ ትካት፡ ወይሬእይዎ፡ እንዘ፡ ይስእል። ይቤሉ፡ አኮኑ፡ ዝንቱ፡ ውእቱ፡ ዘይነብር፡ ውስተ፡ ፍኖት፡ ወይስእል።
9 ወቦ፡ እለ፡ ይቤሉ፡ ውእቱ፡ ዝንቱ። ወካልኣን፡ ይቤሉ፡ አልቦ፡ አላ፡ ይመስሎ።
10 ወለሊሁሰ፡ ይቤ፡ አነ፡ ውእቱ። ወይቤልዎ፡ እፎ፡ ተከሥተ፡ አዕይንቲከ።
11 ወአውሥአ፡ ወይቤሎሙ። ብእሲ፡ ዘስሙ፡ ኢየሱስ፡ ጽቡረ፡ ገብረ፡ በምራቁ። ወቀብዐኒ፡ አዕይንትየ፡ ወይቤለኒ፡ ሑር፡ ተኀፀብ፡ በምጥማቃተ፡ ሰሊሆም። ወሖርኩ፡ ወተኀፀብኩ፡ ወርኢኩ።
12 ወይቤልዎ፡ አይሁድ፡ አይቴ፡ ውእቱ፡ ብእሲሁ። ወይቤሎሙ፡ ኢየአምር።
13 ወወሰድዎ፡ ኀበ፡ ፈሪሳውያን፡ ለውእቱ፡ ዘዕዉሩ፡ ተወልደ።
14 እስመ፡ ሰንበት፡ አሜሁ። አመ፡ ገብረ፡ እግዚእ፡ ኢየሱስ፡ ጽቡረ፡ በምራቁ፡ ወከሠቶ፡ አዕይንቲሁ።
15 ወተስእልዎ፡ ካዕበ፡ ፈሪሳውያን፡ ዘከመ፡ እፎ፡ ርእየ። ወይቤሎሙ፡ ጽቡረ፡ ገብረ፡ በምራቁ። ወወደየ፡ ውስተ፡ አዕይንትየ። ወሖርኩ፡ ወተኀፀብኩ፡ ወርኢኩ።
16 ወቦ፡ እለ፡ ይቤሉ፡ እምፈሪሳውያን። ዝንቱ፡ ብእሲ፡ ኢኮነ፡ እምእግዚአብሔር፡ ዘኢየዐቅብ፡ ሰንበተ። ወቦ፡ እለ፡ ይቤሉ፡ በአይቴ፡ ይክል፡ ብእሲ፡ ኃጥእ፡ ገቢረ፡ ዘከመ፡ ዝ፡ ተኣምረ። ወተናፈቁ፡ በበይናቲሆሙ፡ በእንተ፡ ዝንቱ፡ ነገር።
17 ወይቤልዎ፡ ካዕበ፡ ለውእቱ፡ ዕዉር። ምንተ፡ ትብል፡ አንተ፡ በእንቲኣሁ፡ እስመ፡ ከሠተከ፡ አዕይንቲከ። ወይቤሎሙ፡ ነቢይ፡ ውእቱ።
18 ወኢአምንዎ፡ አይሁድ፡ ከመ፡ ዕዉሩ፡ ተወልደ፡ ወይእዜ፡ ርእየ። እስከ፡ ጸወዑ፡ አዝማዲሁ፡ ለዘርእየ።
19 ወተስእልዎሙ፡ ወይቤልዎሙ። ዝኑ፡ ውእቱ፡ ወልድክሙ፡ ዘትብሉ፡ ዕዉሩ፡ ተወልደ። ወበእፎ፡ ይእዜ፡ ይሬኢ።
20 ወአውሥኡ፡ አዝማዲሁ፡ ወይቤሉ። ነአምር፡ ከመ፡ ዝንቱ፡ ውእቱ፡ ወልድነ። ወከመሂ፡ ዕዉሩ፡ ተወልደ።
21 ወይእዜሰ፡ ዘከመ፡ እፎ፡ ይሬኢ፡ አው፡ መኑ፡ ከሠቶ፡ አዕይንቲሁ፡ ኢነአምር፡ ኪያሁ። ተሰአልዎ፡ እስመ፡ ልሂቅ፡ ውእቱ፡ ወይክል፡ ተናግሮ፡ ለርእሱ።
22 ወዘንተ፡ ይቤሉ፡ አዝማዲሁ፡ እስመ፡ ይፈርህዎሙ፡ ለአይሁድ። እስመ፡ አዘዙ፡ አይሁድ፡ ለእመ፡ ቦ፡ ዘአምነ፡ ቦቱ፡ ከመ፡ ውእቱ፡ ክርስቶስ፡ ይሰደድ፡ እምኵራብ።
23 ወበእንተ፡ ዝንቱ፡ ይቤሉ፡ አዝማዲሁ። ልሂቅ፡ ውእቱ፡ ሎቱ፡ ተሰአልዎ።
24 ወጸውዕዎ፡ ዳግመ፡ ለውእቱ፡ ብእሲ፡ ዕዉር፡ ወይቤልዎ። ሑር፡ ሀብ፡ ስብሐተ፡ ለእግዚአብሔር። ንሕነሰ፡ ነአምር፡ ከመ፡ ኃጥእ፡ ውእቱ፡ ዝ፡ ብእሲ።
25 ወአውሥአ፡ ውእቱ፡ ብእሲ፡ ወይቤሎሙ። ኢየአምር፡ ለእመ፡ ኃጥእ፡ ውእቱ። ወዘንተ፡ ባሕቱ፡ አአምር፡ ከመ፡ ዕዉር፡ አነ፡ ወይእዜ፡ እሬኢ።
26 ወይቤልዎ፡ ካዕበ፡ ምንተ፡ ገብረ፡ ለከ። ወእፎ፡ ከሠተከ፡ አዕይንቲከ።
27 ወአውሥአ፡ ወይቤሎሙ፡ ነገርኩክሙ፡ ወኢትሰምዑ። ምንተ፡ እንከ፡ ካዕበ፡ ትፈቅዱ፡ ትስምዑ። አንትሙሂ፡ አርዳኢሁኒ፡ ትኩኑ፡ ትፈቅዱ።
28 ወጸዐልዎ፡ ወይቤልዎ፡ አንተ፡ ኩን፡ ረድኦ፡ ሎቱ። ወንሕነሰ፡ አርዳኢሁ፡ ለሙሴ፡ ንሕነ።
29 ወንሕነ፡ ነአምር፡ ከመ፡ ለሙሴ፡ ተናገሮ፡ እግዚአብሔር፡ ገጽ፡ ለገጽ። ወለዝንቱሰ፡ ኢነአምሮ፡ ከመ፡ እምአይቴ፡ ውእቱ።
30 ወአውሥአ፡ ውእቱ፡ ብእሲ፡ ወይቤሎሙ። ዓዲ፡ በዝንቱ፡ ጥቀ፡ መንክር፡ ውእቱ። ዘኢተአምርዎ፡ አንትሙ፡ እምአይቴ፡ ውእቱ፡ ወከሠተኒ፡ አዕይንትየ።
31 ወንሕነሰ፡ ነአምር፡ ባሕቱ፡ ከመ፡ ለኃጥኣን፡ ኢይሰምዖሙ፡ እግዚአብሔር። ዘእንበለ፡ ለዘይፈርሆ፡ ለእግዚአብሔር፡ ወለዘይገብር፡ ፈቃዶ፡ ሎቱ፡ ይሰምዖ።
32 እምአመ፡ ተፈጥረ፡ ዓለም፡ ኢተሰምዐ፡ ግሙራ። ከመ፡ ቦ፡ ዘዕዉሩ፡ ተወልደ፡ ወተከሥተ፡ አዕይንቲሁ።
33 ሶበሰ፡ ኢኮነ፡ እምኀበ፡ እግዚአብሔር፡ ዝንቱ፡ ብእሲ። እምኢክህለ፡ ገቢረ፡ ወኢ፡ ምንተኒ።
34 ወአውሥኡ፡ ወይቤልዎ፡ ዘለሊከ፡ በኀጢአት፡ ተወለድከ። አንተሁ፡ ትሜህረነ፡ ለነ። ወሰደድዎ፡ ወአውፅእዎ፡ አፍኣ።
35 ወሰምዐ፡ እግዚእ፡ ኢየሱስ፡ ከመ፡ አውፅእዎ፡ አፍኣ። ወረከቦ፡ ወይቤሎ፡ ተአምንሁ፡ አንተ፡ በወልድ፡ እግዚአብሔር።
36 ወአውሥአ፡ ውእቱ፡ ብእሲ፡ ወይቤ። መኑ፡ ውእቱ፡ ወልደ፡ እግዚአብሔር፡ እግዚኦ፡ ከመ፡ አእመን፡ ቦቱ።
37 ወይቤሎ፡ እግዚእ፡ ኢየሱስ። ዘትሬእዮ፡ ወዘይትናገር፡ ምስሌከ፡ ውእቱ፡ ዝንቱ።
38 ወይቤ፡ አአምን፡ እግዚኦ፡ ወሰገደ፡ ሎቱ።
39 ወይቤሎ፡ እግዚእ፡ ኢየሱስ። አንሰኬ፡ መጻእኩ፡ ለኵነኔ፡ ዝንቱ፡ ዓለም። ከመ፡ እለ፡ ኢይሬእዩ፡ ይርአዩ፡ ወእለኒ፡ ይሬእዩ፡ ይዑሩ።
40 ወቦ፡ እምፈሪሳውያን፡ እለ፡ ሀለዉ፡ ምስሌሁ፡ እለ፡ ሰምዑ፡ ዘንተ። ወይቤልዎ፡ ንሕነኒኬ፡ ዕዉራንኑ፡ ንሕነ።
41 ወይቤሎሙ፡ እግዚእ፡ ኢየሱስ። ሶበሰ፡ ዕዉራን፡ አንትሙ፡ እምኢኮነክሙ፡ ጌጋየ። ወይእዜሰ፡ ባሕቱ፡ ንቡር፡ ጌጋይክሙ። እስመ፡ ትብሉ፡ ንሬኢ፡ ወኢትሬእዩ። ወበእንተ፡ ዝ፡ ኢይትኀደግ፡ ለክሙ፡ ጌጋይክሙ።
=== chapter 10 ===
[ምዕራፍ 10]
በእንተ፡ ኖላዊ፡ ኄር
1 አማን፡ አማን፡ እብለክሙ። ዘኢቦአ፡ እንተ፡ አንቀጽ፡ ውስተ፡ ዐጸደ፡ አባግዕ፡ ወዐርገ፡ እንተ፡ ካልእ፡ ገጽ። ሰራቂ፡ ወጕሕልያ፡ ውእቱ።
2 ወዘሰ፡ እንተ፡ አንቀጽ፡ ይበውእ፡ ኖላዌ፡ አባግዕ፡ ውእቱ።
3 ወሎቱሰ፡ ዐጻዊኒ፡ ያርኅዎ፡ ወአባግዕኒ፡ ይሰምዓሁ፡ ቃሎ። ወይጼውዖን፡ ለአባግዒሁ፡ በበ፡ አስማቲሆን። ወያወፅኦን፡ ወያወፍሮን።
4 ወሶበ፡ አውፅኦን፡ ወአውፈሮን፡ ለኵሎን፡ የሐውር፡ ቅድሜሆን። ወይተልዋሁ፡ አባግዒሁ፡ እስመ፡ የአምራ፡ ቃሎ።
5 ወለነኪርሰ፡ ኢይተልዋሁ፡ አላ፡ ይጐይያ፡ እምኔሁ። እስመ፡ ኢየአምራ፡ ቃሎ፡ ለነኪር።
6 ዘንተ፡ ምሳሌ፡ ይቤሎሙ፡ እግዚእ፡ ኢየሱስ። ወእሙንቱሰ፡ ኢያእመሩ፡ ዘይቤሎሙ።
7 ወካዕበ፡ ይቤሎሙ፡ እግዚእ፡ ኢየሱስ። አማን፡ አማን፡ እብለክሙ። አነ፡ ውእቱ፡ አንቀጸ፡ አባግዕ።
8 ኵሎሙ፡ እለ፡ መጽኡ፡ እምቅድሜየ፡ ሰረቅት፡ ወጕሕልያ፡ እሙንቱ። ወባሕቱ፡ ኢይሰምዓሆሙ፡ አባግዕ።
9 አነ፡ ውእቱ፡ አንቀጸ፡ አባግዕ፡ ዘበአማን። ዘቦአ፡ ብእሲ፡ እንተ፡ ኀቤየ፡ ይድኅን። ወይበውእ፡ ወይወፅእ፡ ወይረክብ፡ ምርዐየ።
10 ወሰራቂሰ፡ ኢይመጽእ፡ ዘእንበለ፡ ከመ፡ ይስርቅ፡ ወያህጕል። ወአንሰኬ፡ መጻእኩ፡ ከመ፡ ይርከቡ፡ ሕይወተ፡ ዘለዓለም። ወፈድፋደ፡ ይርክቡ።
11 አነ፡ ውእቱ፡ ኖላዊ፡ ኄር። ወኖላዊሰ፡ ኄር፡ ይሜጡ፡ ነፍሶ፡ ቤዛ፡ አባግዒሁ።
12 ወዐሳብሰ፡ ዘኢኮነ፡ ኖላዌ፡ ወዘኢኮና፡ አባግዕ። ዘዚኣሁ፡ ሶበ፡ ይሬኢ፡ ተኵላ፡ እንዘ፡ ይመጽእ፡ ይጐይይ። ወየኀድግ፡ አባግዒሁ፡ ወይመስጦን፡ ተኵላ፡ ወይዘርዎን፡ ለአባግዕ።
13 ወዐሳብሰ፡ ይጐይይ፡ እስመ፡ ዐሳብ፡ ውእቱ። ወኢያሐዝኖ፡ በእንተ፡ አባግዕ።
14 አነ፡ ውእቱ፡ ኖላዊ፡ ኄር። ወአአምር፡ ዘዚኣየ፡ መርዔትየ፡ ወየአምራኒ፡ እሊኣየ።
15 ወበከመ፡ የአምረኒ፡ አብ፡ አነኒ፡ አአምሮ፡ ለአብ። ወእሜጡ፡ ነፍስየ፡ ቤዛ፡ አባግዕየ።
16 ወብየ፡ ካልኣትኒ፡ አባግዕ፡ እለ፡ ኢኮና፡ እምዝንቱ፡ ዐጸድ። ወኪያሆንሂ፡ ሀለወኒ፡ አምጽኦን፡ ወይሰምዐኒ፡ ቃልየ። ወይከውና፡ አሐደ፡ መርዔተ፡ ለአሐዱ፡ ኖላዊ።
17 ወበእንተ፡ ዝንቱ፡ ያፈቅረኒ፡ አብ። እስመ፡ አነ፡ እሜጡ፡ ነፍስየ፡ ቤዛ፡ አባግዕየ። ከመ፡ ካዕበ፡ አንሥኣ።
18 ወአልቦ፡ ዘየኀይደንያ፡ አላ፡ ለልየ፡ እሜጥዋ፡ በፈቃድየ። እስመ፡ ብዉሕ፡ ሊተ፡ አንብራሂ፡ ወእሢማ። ወብዉሕ፡ ሊተ፡ ካዕበ፡ አንሥኣ፡ ዘንተ፡ ትእዛዘ፡ ነሣእኩ፡ እምኀበ፡ አቡየ።
19 ወተናፈቁ፡ እንከ፡ ካዕበ፡ አይሁድ፡ በበይናቲሆሙ፡ በእንተ፡ ዝንቱ፡ ነገር።
20 ወይቤሉ፡ ብዙኃን፡ እምኔሆሙ። ጋኔን፡ አኀዞ፡ ወየአብድ፡ ምንተኑ፡ ታጸምእዎ።
21 ወቦ፡ እለ፡ ይቤሉ፡ ዝንቱ፡ ነገር፡ ኢኮነ፡ ዘእምጋኔን። ዘጋኔንኑ፡ ይክል፡ ከሢተ፡ አዕይንቲሆሙ፡ ለዕዉራን።
ዘከመ፡ ሀሎ፡ ኢየሱስ፡ በበዓለ፡ ሐድሶ፡ ሕንጸት
22 ወኮነ፡ በውእቱ፡ መዋዕል፡ ሐድሶ፡ ሕንጸታ፡ ለኢየሩሳሌም። ወክረምት፡ ውእቱ።
23 ወአንሶሰወ፡ እግዚእ፡ ኢየሱስ፡ በቤተ፡ መቅደስ፡ በሕዋረ፡ ሰሎሞን።
24 ወዐገትዎ፡ አይሁድ፡ ወይቤልዎ። እስከ፡ ማእዜኑ፡ ታመነድበነ፡ ወትነሥአነ፡ ነፍሰነ። ለእመ፡ አንተሁ፡ ውእቱ፡ ክርስቶስ፡ ንግረነ፡ ገሃደ።
25 ወአውሥአ፡ እግዚእ፡ ኢየሱስ፡ ወይቤሎሙ። ነገርኩክሙ፡ ወኢተአምኑኒ፡ ግብር፡ ዘእገብር፡ አነ፡ በስመ፡ አቡየ። ውእቱ፡ ሰማዕትየ።
26 ወአንትሙሰ፡ ኢተአምኑኒ፡ እስመ፡ ኢኮንክሙ፡ እምነ፡ አባግዕየ፡ በከመ፡ እቤለክሙ።
27 አባግዕየሰ፡ እሊኣየ፡ ይሰምዓኒ፡ ቃልየ። ወአነሂ፡ አአምሮን፡ ወእማንቱ፡ ይተልዋኒ።
28 ወአነሂ፡ እሁቦን፡ ሕይወተ፡ ዘለዓለም። ወኢይትሀጐላ፡ ለዓለም፡ ወአልቦ፡ ዘየሀይደኒዮን፡ እምእዴየ።
29 እስመ፡ አቡየ፡ ዘወሀበኒዮን፡ ውእቱ፡ የዐቢ፡ እምኵሉ። ወአልቦ፡ ዘይክል፡ ሀይደ፡ እምእዴሁ፡ ለአቡየ።
30 አነ፡ ወአብ፡ አሐዱ፡ ንሕነ።
በእንተ፡ ጽልእ፡ ዘአይሁድ፡ ላዕለ፡ ኢየሱስ
31 ወነሥኡ፡ አይሁድ፡ እብነ፡ ካዕበ፡ ከመ፡ ይውግርዎ።
32 ወአውሥአ፡ እግዚእ፡ ኢየሱስ፡ ወይቤሎሙ። ብዙኀ፡ ግብረ፡ ሠናየ፡ አርአይኩክሙ፡ ዘእምኀበ፡ አቡየ። በአይ፡ ግብር፡ እምኔሆሙ፡ ትዌግሩኒ።
33 ወአውሥኡ፡ አይሁድ፡ ወይቤልዎ። በእንተ፡ ሠናይሰ፡ ግብርከ፡ ኢንዌግረከ፡ ወባሕቱ፡ በበይነ፡ ፅርፈትከ። እስመ፡ እንዘ፡ ሰብእ፡ አንተ፡ እግዚአብሔርሃ፡ ትሬሲ፡ ርእሰከ።
34 ወአውሥአ፡ እግዚእ፡ ኢየሱስ፡ ወይቤሎሙ። አኮኑ፡ ጽሑፍ፡ ውስተ፡ ኦሪትክሙ። አንሰ፡ እቤ፡ አማልክት፡ አንትሙ።
35 ወሶበ፡ ለእልክቱ፡ አማልክት፡ ይቤሎሙ፡ እለ፡ ኮነ፡ ቃለ፡ እግዚአብሔር፡ ኀቤሆሙ። ኢይትከሀል፡ ይትነሠት፡ ወይትሐሰው፡ ቃለ፡ መጽሐፍ።
36 ወዘሰ፡ ቀደሶ፡ አብ፡ ወፈነዎ፡ ውስተ፡ ዓለም። እፎ፡ እንከ፡ ትብሉኒ፡ ትፀርፍ፡ ለእመ፡ እቤለክሙ፡ ወልደ፡ እግዚአብሔር፡ አነ።
37 ወእመሰ፡ ኢይገብር፡ ግብሮ፡ ለአቡየ፡ ኢትእመኑ፡ ብየ። ወእመሰ፡ እገብር፡ ለእመ፡ ኪያየ፡ ኢአመንክሙ፡ ለግብርየ። እመኑ፡ ከመ፡ ታእምሩ፡ ወትጤይቁ፡ ከመ፡ አነ፡ በአብ፡ ወአብ፡ ብየ።
38 ወየኀሥሡ፡ ካዕበ፡ የአኀዝዎ፡ ወአምሠጠ፡ እምእዴሆሙ።
39 ወሖረ፡ ካዕበ፡ ማዕዶተ፡ ዮርዳኖስ፡ ብሔረ፡ ኀበ፡ አጥመቀ፡ ዮሐንስ፡ ቀዲሙ። ወነበረ፡ ህየ።
40 ወብዙኃን፡ ሖሩ፡ ኀቤሁ። ወይቤሉ፡ ዮሐንስ፡ አልቦ፡ ዘገብረ፡ ተኣምረ፡ ወኢ፡ ምንተኒ። ወባሕቱ፡ ኵሉ፡ ዘይቤ፡ ዮሐንስ፡ በእንተ፡ ዝ፡ ብእሲ፡ እሙነ፡ ኮነ።
41 ወብዙኃን፡ እለ፡ አምኑ፡ ቦቱ፡ በህየ።
=== chapter 11 ===
[ምዕራፍ 11]
ዘከመ፡ አንሥኦ፡ ኢየሱስ፡ ለአልአዛር
1 ወሀሎ፡ አሐዱ፡ ብእሲ፡ ዘይደዊ። ዘስሙ፡ አልአዛር፡ በቢታንያ፡ ዘሀገረ፡ ማርያ፡ ወማርታ፡ እኅታ።
2 ወማርያሰ፡ ይእቲ፡ እንተ፡ ቀብዐቶ፡ ለእግዚእነ፡ ዕፍረተ፡ ።ወመዝመዘት፡ እገሪሁ፡ በሥዕርታ። ወእኁሃ፡ ላቲ፡ አልአዛር፡ ይደዊ።
3 ወለአካ፡ አኃቲሁ፡ ኀበ፡ እግዚእ፡ ኢየሱስ። እንዘ፡ ይብላ፡ እግዚእነ፡ ናሁ፡ ዘታፈቅር፡ ይደዊ።
4 ወሰሚዖ፡ እግዚእ፡ ኢየሱስ፡ ይቤ። ዝንቱ፡ ደዌ፡ ኢኮነ፡ ለሞት፡ አላ፡ በእንተ፡ ስብሐተ፡ እግዚአብሔር። ወከመ፡ ይሰባሕ፡ ወልደ፡ እግዚአብሔር፡ በእንቲኣሁ።
5 ወያፈቅሮሙ፡ እግዚእ፡ ኢየሱስ፡ ለማርታ፡ ወለማርያ፡ እኅታ፡ ወለአልአዛር።
6 ወሶበ፡ ሰምዐ፡ ከመ፡ ይደዊ፡ ነበረ፡ ኀበ፡ ሀለወ፡ ብሔረ፡ ሰኑየ፡ መዋዕለ።
7 ወእምዝ፡ ይቤሎሙ፡ ለአርዳኢሁ። ንሑር፡ ብሔረ፡ ይሁዳ፡ ካዕበ።
8 ወይቤልዎ፡ አርዳኢሁ፡ ረቢ፡ አኮኑ፡ ይእዜ፡ የኀሥሡ፡ አይሁድ፡ ይውግሩከ። ወካዕበ፡ ተሐውር፡ ህየ።
9 ወአውሥአ፡ እግዚእ፡ ኢየሱስ፡ ወይቤሎሙ። አኮኑ፡ ዐሠርቱ፡ ወክልኤቱ፡ ሰዓቱ፡ ለዕለት። ብእሲ፡ ዘየሐውር፡ መዓልተ፡ ኢይትዐቀፍ። እስመ፡ ይሬኢ፡ ብርሃኖ፡ ለዝንቱ፡ ዓለም።
10 ወዘሰ፡ የሐውር፡ ሌሊተ፡ ይትዐቀፍ። እስመ፡ አልቦ፡ ውስቴቱ፡ ብርሃን፡ ዘይሬኢ።
11 ወዘንተ፡ ነገረ፡ ይቤሎሙ፡ ለአርዳኢሁ። ወእምዝ፡ ይቤሎሙ፡ አልአዛር፡ ዐርክነ፡ ኖመ። ወባሕቱ፡ አሐውር፡ አንቅሖ።
12 ወይቤልዎ፡ አርዳኢሁ። እግዚኦ፡ እመሰ፡ ኖመ፡ ይነቅሕ፡ ወይጥዒ።
13 ወእግዚእ፡ ኢየሱስ፡ ይቤ፡ በእንተ፡ ንዋመ፡ ሞቱ። ወሎሙሰ፡ መሰሎሙ፡ በእንተ፡ ንዋመ፡ ድቃስ፡ ዘይቤሎሙ።
14 ወእምዝ፡ ይቤሎሙ፡ እግዚእ፡ ኢየሱስ። ገሃደ፡ አልአዛር፡ ሞተ።
15 ወአንሰ፡ እትፌሣሕ፡ በእንቲኣክሙ፡ እስመ፡ ኢሀሎኩ፡ ህየ። ትእመኑ፡ አንትሙ፡ ወባሕቱ፡ ንዑ፡ ንሑር፡ ኀቤሁ።
16 ወይቤሎሙ፡ ቶማስ፡ ዘይብልዎ፡ ዲዲሞስ፡ ለቢጹ፡ ለአርዳእ። ንሑርኬ፡ ንሕነኒ፡ ከመ፡ ንሙት፡ ምስሌሁ።
17 ወሖረ፡ እግዚእ፡ ኢየሱስ፡ ቢታንያ። ወበጺሖ፡ ህየ፡ ረከቦ፡ በዘወድአ፡ ረቡዐ፡ መዋዕለ፡ እምዘተቀብረ።
18 ወቢታንያሰ፡ ቅርብት፡ ይእቲ፡ ለኢየሩሳሌም፡ መጠነ፡ ዐሠርቱ፡ ወኀምስቱ፡ ምዕራፍ።
19 ወብዙኃን፡ እምነ፡ አይሁድ፡ እለ፡ ሖሩ፡ ኀበ፡ ማርያ፡ ወማርታ። ከመ፡ ያላቅስዎን፡ በእንተ፡ እኁሆን።
20 ወሶበ፡ ሰምዐት፡ ማርታ፡ ከመ፡ መጽአ፡ እግዚእ፡ ኢየሱስ፡ ወፅአት፡ ወተቀበለቶ። ወማርያሰ፡ ነበረት፡ ቤተ።
21 ወትቤሎ፡ ማርታ፡ ለእግዚእ፡ ኢየሱስ። እግዚእየ፡ ሶበሰ፡ ሀሎከ፡ ዝየ፡ እምኢሞተ፡ እኁየ።
22 ወይእዜኒ፡ አአምር፡ ከመ፡ ዘሰአልኮ፡ ለእግዚአብሔር፡ ይሁበከ፡ እግዚአብሔር።
23 ወይቤላ፡ እግዚእ፡ ኢየሱስ፡ እኁኪሰ፡ ይትነሣእ።
24 ወትቤሎ፡ ማርታ፡ አአምር፡ ከመ፡ ይትነሣእ። አመ፡ ትንሣኤ፡ ምዉታን፡ በደኃሪት፡ ዕለት።
25 ወይቤላ፡ እግዚእ፡ ኢየሱስ። አነ፡ ውእቱ፡ ትንሣኤ፡ ወሕይወት። ዘየአምን፡ ብየ፡ እመኒ፡ ሞተ፡ የሐዩ።
26 ወኵሉ፡ ዘሕያው፡ ወየአምን፡ ብየ፡ ኢይመውት፡ ለዓለም፡ ተአምኒኑ፡ ዘንተ።
27 ወትቤሎ፡ እወ፡ እግዚኦ፡ አንሰ፡ አአምን። ከመ፡ አንተ፡ ውእቱ፡ ክርስቶስ፡ ወልደ፡ እግዚአብሔር፡ ዘመጽአ፡ ውስተ፡ ዓለም።
28 ወዘንተ፡ ብሂላ፡ ሖረት፡ ወጸውዐታ፡ ለማርያ፡ እኅታ፡ ጽሚተ። ወትቤላ፡ ናሁ፡ መጽአ፡ ሊቅነ፡ ወይጼውዐኪ።
29 ወሶበ፡ ሰምዐት፡ ማርያ፡ ተንሥአት፡ ፍጡነ፡ ወሖረት፡ ኀቤሁ።
30 ወዓዲሁ፡ ኢቦአ፡ እግዚእ፡ ኢየሱስ፡ ውስተ፡ ሀገር። አላ፡ ሀሎ፡ ውስተ፡ ብሔር፡ ኀበ፡ ተቀበለቶ፡ ማርታ።
31 ወሶበ፡ ርእይዋ፡ ለማርያ፡ አይሁድ፡ እለ፡ ሀለዉ፡ ምስሌሃ፡ ውስተ፡ ቤት። እለ፡ መጽኡ፡ ከመ፡ ያላቅስዋ፡ ከመ፡ ተንሥአት፡ ፍጡነ፡ ወመጽአት። ተለውዋ፡ ወመሰሎሙ፡ ዘተሐውር፡ ኀበ፡ መቃብሩ፡ ትብክዮ፡ በህየ።
32 ወሶበ፡ በጽሐት፡ ማርያ፡ ኀበ፡ እግዚእ፡ ኢየሱስ፡ ርእየቶ። ወሰገደተ፡ ሎቱ፡ ታሕተ፡ እገሪሁ፡ ወትቤሎ። እግዚእየ፡ ሶበሰ፡ ሀሎከ፡ ዝየ፡ እምኢሞተ፡ እኁየ።
33 ወሶበ፡ ርእያ፡ እግዚእ፡ ኢየሱስ፡ እንዘ፡ ትበኪ። ወአይሁድኒ፡ እለ፡ መጽኡ፡ ምስሌሃ፡ ከመ፡ ይበክዩ። ገዐረ፡ በመንፈሱ፡ ወሆከ፡ ርእሶ።
34 ወይቤ፡ አይቴ፡ ቀበርክምዎ። ወይቤልዎ፡ እግዚኦ፡ ነዐ፡ ትርአይ።
35 ወአንብዐ፡ ካዕበ፡ እግዚእ፡ ኢየሱስ።
36 ወይቤሉ፡ አይሁድ፡ ርእዩ፡ መጠነ፡ ያፈቅሮ።
37 ወቦ፡ እምውስቴቶሙ፡ እለ፡ ይቤሉ። እምኢክህለኑ፡ ዝንቱ፡ ዘከሠተ፡ አዕይንቲሁ፡ ለዘዕዉሩ፡ ተወልደ። ከመ፡ ይግበር፡ በዘኢይመውት፡ ዝንቱኒ።
38 ወካዕበ፡ ተከዘ፡ በልቡ፡ እግዚእ፡ ኢየሱስ፡ ወሖረ፡ ኀበ፡ መቃብሩ። ወበአት፡ ውእቱ፡ ወክዱን፡ እብን፡ ዐቢይ፡ ዲቤሁ።
39 ወይቤሎሙ፡ እግዚእ፡ ኢየሱስ፡ አእትትዋ፡ ለእብን። ወትቤሎ፡ ማርታ፡ እኅቱ፡ ለዘሞተ። እግዚእየ፡ ወድአ፡ ጼአ፡ እስመ፡ ረቡዐ፡ ኮነ፡ ዮም፡ እምዘተቀብረ።
40 ወይቤላ፡ እግዚእ፡ ኢየሱስ። ኢይቤለኪኑ፡ ከመ፡ እመ፡ ተአመንኪ፡ ትሬእዪ፡ ስብሐተ፡ እግዚአብሔር። ወአእተትዋ፡ ለይእቲ፡ ለእብን።
41 ወአንሥአ፡ አዕይንቲሁ፡ እግዚእ፡ ኢየሱስ፡ ላዕለ፡ ወይቤ። አአኵተከ፡ አባ፡ እስመ፡ ሰማዕከኒ።
42 ወአንሰ፡ አአምር፡ ከመ፡ ዘልፈ፡ ትሰምዐኒ። ወባሕቱ፡ በእንተ፡ እለ፡ ይቀውሙ፡ ሰብእ፡ እብል፡ ዘንተ። ከመ፡ ይእመኑ፡ ከመ፡ አንተ፡ ፈነውከኒ።
43 ወዘንተ፡ ብሂሎ፡ ከልሐ፡ በዐቢይ፡ ቃል፡ ወይቤ። አልአዛር፡ አልአዛር፡ ነዐ፡ ፃእ፡ አፍኣ።
44 ወወፅአ፡ ውእቱ፡ ምዉት፡ እንዘ፡ ግኑዝ፡ ወእሱር፡ እደዊሁ፡ ወእገሪሁ። ወገጹኒ፡ ጥብሉል፡ በሰበን። ወይቤሎሙ፡ እግዚእ፡ ኢየሱስ፡ ፍትሕዎኬ፡ እንከሰ፡ ወኅድግዎ፡ ይሑር።
45 ወብዙኃን፡ እምአይሁድ፡ እለ፡ መጽኡ፡ ኀበ፡ ማርያ፡ ወማርታ። ርእዮሙ፡ ዘገብረ፡ ኢየሱስ፡ አምኑ፡ ቦቱ።
46 ወቦ፡ እምውስቴቶሙ፡ እለ፡ ሖሩ፡ ኀበ፡ ፈሪሳውያን። ወአስተዋደይዎ፡ ወነገርዎሙ፡ ኵሎ፡ ዘገብረ፡ እግዚእ፡ ኢየሱስ።
ዘከመ፡ ተማከሩ፡ አይሁድ፡ ይቅትልዎ፡ ለኢየሱስ
47 ወአስተጋብእዎሙ፡ ሊቃነ፡ ካህናት፡ ወፈሪሳውያን፡ ለሕዝብ፡ ወይቤልዎሙ። ምንተ፡ ንሬሲ፡ ናሁ፡ ዝንቱ፡ ብእሲ፡ ብዙኀ፡ ተኣምረ፡ ይገብር።
48 ወእመኒ፡ ኀደግናሁ፡ ከመ፡ ዝ፡ ኵሉ፡ የአምን፡ ቦቱ። ወይመጽኡ፡ ሰብአ፡ ሮሜ፡ ወይነሥኡነ፡ ብሔረነ፡ ወሕዝበነኒ።
49 ወይቤሎሙ፡ አሐዱ፡ እምኔሆሙ፡ ዘስሙ፡ ቀያፋ። ሊቀ፡ ካህናት፡ ዘእብሬቱ፡ ይእቲ፡ ዓመት። አንትሙሰ፡ ኢተአምሩ፡ ወኢ፡ ምንተኒ፡ ወኢሂ፡ ትመክሩ።
50 ይኄይሰነ፡ አሐደ፡ ብእሴ፡ ንቅትል፡ ወይሙት፡ ህየንተ፡ ሕዝብ። እምይትሀጐል፡ ኵሉ፡ ሕዝብ።
51 ወዘንተሰ፡ አኮ፡ እምልቡ፡ ዘይቤ። አላ፡ እስመ፡ ሊቀ፡ ካህናት፡ ውእቱ፡ ወእብሬቱ፡ ይእቲ፡ ዓመት። ተነበየ፡ ዘንተ፡ እስመ፡ ሀለዎ፡ ለእግዚእ፡ ኢየሱስ፡ ይሙት፡ በእንተ፡ ኵሉ፡ ሕዝብ።
52 ወአኮ፡ በእንተ፡ ሕዝብ፡ ባሕቲቶሙ። አላ፡ ከመ፡ ያስትጋብኦሙ፡ ለውሉደ፡ እግዚአብሔር፡ እለ፡ ተዘርዉ፡ አሐተኔ።
53 ወእምይእቲ፡ ዕለት፡ ተማከሩ፡ ሊቃነ፡ ካህናት፡ ከመ፡ ይቅትልዎ።
ዘከመ፡ ተግሕሠ፡ ኢየሱስ፡ እምኢየሩሳሌም
54 ወኢያንሶሰወ፡ እንከ፡ እግዚእ፡ ኢየሱስ፡ ገሃደ፡ ማእከለ፡ አይሁድ። አላ፡ ሖረ፡ ኀበ፡ ሀገር፡ እንተ፡ ትሰመይ፡ ሀገረ፡ ኤፍሬም፡ አቅርብት፡ ለበድው። ወነበረ፡ ህየ፡ ምስለ፡ አርዳኢሁ።
55 ወቀርበ፡ በዓለ፡ ፋሲካሆሙ፡ ለአይሁድ። ወዐርጉ፡ ብዙኃን፡ ለኢየሩሳሌም፡ እምበሓውርት። እምቅድመ፡ በዓለ፡ ፋሲካ፡ ያንጽሑ፡ ርእሶሙ።
56 ወአኀዙ፡ አይሁድ፡ ይኅሥሥዎ፡ ለእግዚእ፡ ኢየሱስ። ወይቤሉ፡ በበይናቲሆሙ፡ እንዘ፡ ይቀውሙ፡ ውስተ፡ ቤተ፡ መቅደስ። ምንተ፡ ትብሉ፡ ናሁ፡ ኢመጽአ፡ ለበዓል።
57 ወአዘዙ፡ ሊቃነ፡ ካህናት፡ ወፈሪሳውያን። እምከመ፡ ቦ፡ ዘአእመረ፡ ኀበ፡ ሀሎ፡ ይቅጽብዎሙ፡ ከመ፡ የአኀዝዎ።
=== chapter 12 ===
[ምዕራፍ 12]
በእንተ፡ እንተ፡ ቀብዐቶ፡ ለእግዚእነ፡ ዕፍረተ
1 ወእምዝ፡ ሖረ፡ እግዚእ፡ ኢየሱስ፡ እምቅድመ፡ ሰዱስ፡ መዋዕል፡ ዘፋሲካ። ወበጽሐ፡ ቢታንያ፡ ኀበ፡ ሀሎ፡ አልአዛር፡ ዘአንሥኦ፡ እምነ፡ ምዉታን።
2 ወገብሩ፡ ሎቱ፡ ምሳሐ፡ በህየ፡ ወማርታ፡ ትሜጥዎሙ። ወአልአዛር፡ አሐዱ፡ ውእቱ፡ እምእለ፡ ይረፍቁ፡ ምስሌሁ።
3 ወማርያሰ፡ ነሥአት፡ ዕፍረተ፡ ልጥረ፡ ዘናርዱ፡ ጵስጥቂስ፡ ዘዕጹብ፡ ሤጡ። ወቀብዐቶ፡ እገሪሁ፡ ለእግዚእ፡ ኢየሱስ፡ ወመዝመዘቶ፡ በሥዕርታ። ወመልአ፡ ቤተ፡ መዐዛሁ፡ ለውእቱ፡ ዕፍረት።
በእንተ፡ ዘከመ፡ ይቤ፡ ይሁዳ
4 ወይቤ፡ ይሁዳ፡ ስምዖን፡ አስቆሮታዊ፡ አሐዱ፡ እምአርዳኢሁ፡ ዘሀለዎ፡ ያግብኦ።
5 ለምንት፡ ኢሤጥዎ፡ ለዝንቱ፡ ዕፍረት። ለሠለስቱ፡ ምእት፡ ዲናር፡ የሀብዎ፡ ለነዳያን።
6 ወዘንተ፡ ዘይቤ፡ አኮ፡ ዘያጽሕቅዎ፡ ነዳያን። አላ፡ እስመ፡ ሰራቂ፡ ውእቱ፡ ወየዐቅብ፡ አስከሬነ። ወቀምጠራ፡ ዘሙዳየ፡ ምጽዋተ፡ ሀሎ፡ ውስተ፡ እዴሁ። ወይነሥእ፡ እምዘይትወደይ፡ ውስቴቱ።
7 ወይቤሎ፡ እግዚእ፡ ኢየሱስ፡ ኅድጋ፡ እስመ፡ ተዐቅቦ፡ ለዕለተ፡ ቀበርየ።
8 ወነዳያንሰ፡ በኵሉ፡ ጊዜ፡ ሀለዉ፡ ምስሌክሙ፡ ወዘልፈ፡ ትረክብዎሙ። ወጊዜ፡ ፈቀድክሙ፡ ታሤንዩ፡ ሎሙ። ወኪያየሰ፡ አኮ፡ በኵሉ፡ ጊዜ፡ ዘትረክቡኒ።
9 ወብዙኃን፡ እምነ፡ አይሁድ፡ እለ፡ አእመሩ፡ ከመ፡ ሀሎ፡ እግዚእ፡ ኢየሱስ፡ ህየ። ወሖሩ፡ ኀቤሁ፡ ወአኮ፡ በእንተ፡ እግዚእ፡ ኢየሱስ፡ ባሕቲቱ፡ ዘሖሩ። ዳእሙ፡ ከመ፡ ይርአይዎ፡ ለአልአዛርሂ፡ ዘአንሥኦ፡ እግዚእ፡ ኢየሱስ፡ እምዉታን።
10 ወተማከሩ፡ ሊቃነ፡ ካህናት፡ ከመ፡ ይቅትልዎ፡ ለአልአዛር።
11 እስመ፡ ብዙኃን፡ እምውስተ፡ አይሁድ፡ የሐውሩ፡ በእንቲኣሁ። ወየአምኑ፡ በእግዚእ፡ ኢየሱስ።
በእንተ፡ ዕዋል፡ ወጸበርት
12 ወበሳኒታ፡ ሰብእ፡ ብዙኃን፡ እለ፡ መጽኡ፡ ለበዓል። ሶበ፡ ሰምዑ፡ ከመ፡ ይመጽእ፡ እግዚእ፡ ኢየሱስ፡ ኢየሩሳሌም።
13 ነሥኡ፡ ጸበርተ፡ ተመርት፡ ዘበቀልት። ወተቀበልዎ፡ ወፂኦሙ፡ እንዘ፡ ይጸርሑ፡ ወይብሉ። ሆሣዕና፡ ቡሩክ፡ ዘይመጽእ፡ በስመ፡ እግዚአብሔር፡ ወንጉሦሙ፡ ለእስራኤል።
14 ወረከበ፡ እግዚእ፡ ኢየሱስ፡ ዕዋለ፡ አድግ፡ ወተጽዕነ፡ ዲቤሃ።
15 በከመ፡ ጽሑፍ፡ ኢትፍርሂ፡ ወለተ፡ ጽዮን። ነዋ፡ ንጉሥኪ፡ ይመጽእ፡ እንዘ፡ ይጼዐን፡ ዲበ፡ ዕዋለ፡ አድግ።
16 ወቀዲሙሰ፡ ኢያእመሩ፡ አርዳኢሁ፡ ዘንተ፡ ነገረ። ዘእንበለ፡ አመ፡ ተሰብሐ፡ እግዚእ፡ ኢየሱስ፡ አሜሃ። ተዘከሩ፡ ከመ፡ ጽሑፍ፡ ዝንቱ፡ በእንቲኣሁ፡ ወከመ፡ ዝ፡ ገብሩ፡ ሎቱ።
17 ወሰማዕተ፡ ኮንዎ፡ እሙንቱ፡ ሕዝብ፡ እለ፡ ሀለዉ፡ ምስሌሁ። አመ፡ ጸውዖ፡ ለአልአዛር፡ እመቃብር፡ ወአንሥኦ፡ እምነ፡ ምዉታን።
18 ወበእንተ፡ ዝንቱ፡ ወፅኡ፡ ኵሉ፡ ሕዝብ፡ ይትቀበልዎ። እስመ፡ ሰምዑ፡ ተኣምረ፡ ዘገብረ፡ ወዘንተሂ፡ መንክረ።
19 ወይቤሉ፡ ፈሪሳውያን፡ በበይናቲሆሙ፡ ትሬእዩኑ። ከመ፡ አልቦ፡ ዘትበቊዑ፡ ወኢ፡ ምንተኒ። ናሁ፡ ኵሉ፡ ዓለም፡ ተለዎ፡ ድኅሬሁ።
በእንተ፡ እምነቶሙ፡ ለአረሚ፡ ወበእንተ፡ ኢ፡ አሚኖቶሙ፡ ለአይሁድ
20 ወቦ፡ እምሰብአ፡ ጽርእ፡ እምውስተ፡ አረሚ፡ እለ፡ ዐርጉ፡ ይስግዱ፡ ለበዓል።
21 ወሖሩ፡ እሙንቱሂ፡ ኀበ፡ ፊልጶስ፡ ዘቤተሳይዳ፡ ዘገሊላ። ወሰአልዎ፡ ወይቤልዎ፡ እግዚኦ፡ ንፈቅድ፡ ንርአዮ፡ ለኢየሱስ።
22 ወሖረ፡ ፊልጶስ፡ ወነገሮ፡ ለእንድርያስ። ወሖሩ፡ እንድርያስ፡ ወፊልጶስ፡ ወነገርዎ፡ ለእግዚእ፡ ኢየሱስ።
23 ወአውሥአ፡ እግዚእ፡ ኢየሱስ፡ ወይቤሎሙ። ናሁ፡ በጽሐ፡ ጊዜሁ፡ ከመ፡ ይሰባሕ፡ ወልደ፡ ዕጓለ፡ እመሕያው።
24 አማን፡ አማን፡ እብለክሙ። እመ፡ ኢወድቀት፡ ኅጠተ፡ ሥርናይ፡ ውስተ፡ ምድር፡ ወኢሞተት፡ ባሕቲታ፡ ትነብር። ወእመሰ፡ ሞተት፡ ብዙኀ፡ ፍሬ፡ ትፈሪ።
25 ወዘሰ፡ ያፈቅራ፡ ለነፍሱ፡ ለይገድፋ። ወዘሰ፡ ጸልኣ፡ ለነፍሱ፡ በዝንቱ፡ ዓለም፡ የዐቅባ፡ ለሕይወት፡ ዘለዓለም።
26 ወእመ፡ ቦ፡ ዘይትለአከኒ፡ ሊተ፡ ለይትልወኒ። እስመ፡ ኀበ፡ ሀሎኩ፡ አነ፡ ህየ፡ ይሄሉ፡ ዘይትለአከኒ። ወለዘሊተ፡ ተልእከኒ፡ ያከብሮ፡ አቡየ።
27 ወይእዜሰ፡ ተሀውከተኒ፡ ነፍስየ፡ ወምንተ፡ እብል። አባ፡ አድኅና፡ ለነፍስየ፡ እምዛቲ፡ ሰዓት። ወባሕቱ፡ በእንተ፡ ዝንቱ፡ መጻእኩ፡ ወበጻሕክዋ፡ ለዛቲ፡ ሰዓት።
28 አባ፡ ሰብሖ፡ ለወልድከ። ወመጽአ፡ ቃል፡ እምሰማይ፡ ዘይብል፡ ሰባሕኩከሂ። ወዓዲ፡ ካዕበ፡ እሴብሐከ።
29 ወሕዝብሰ፡ እለ፡ ይቀውሙ፡ ወይሰምዑ፡ ይቤሉ፡ ነጐድጓድ፡ ውእቱ። ወቦ፡ እለ፡ ይቤሉ፡ መልአክ፡ ተናገሮ።
30 ወአውሥአ፡ እግዚእ፡ ኢየሱስ፡ ወይቤሎሙ። አኮ፡ በእንቲኣየ፡ ዘመጽአ፡ ዝ፡ ቃል፡ አላ፡ በእንቲኣክሙ።
31 ወናሁ፡ እብለክሙ፡ ይእዜ፡ በጽሐ፡ ኵነኔሁ፡ ለዝንቱ፡ ዓለም። ወእምይእዜሰ፡ ይሰድድዎ፡ ለመልአከ፡ ዝንቱ፡ ዓለም፡ ወያወፅእዎ፡ አፍኣ።
32 ወአነኒ፡ እምከመ፡ ተለዐልኩ፡ እምድር፡ እስሕብ፡ ኵሎ፡ ኀቤየ።
33 ወዘንተ፡ ዘይቤ፡ እንዘ፡ ይኤምሮሙ፡ በአይ፡ ሞት፡ ሀለዎ፡ ይሙት።
34 ወአውሥእዎ፡ ሕዝብ፡ ወይቤልዎ። ንሕነሰ፡ ሰማዕነ፡ በውስተ፡ ኦሪት፡ ከመ፡ ለዓለም፡ ይነብር፡ ክርስቶስ። ወእፎ፡ እንከ፡ ትብለነ፡ አንተ። ሀለዎ፡ ለወልደ፡ እጓለ፡ እመሕያው፡ ይትለዐል። መኑ፡ እንከ፡ ዝንቱ፡ ወልደ፡ ዕጓለ፡ እመሕያው።
35 ወይቤሎሙ፡ እግዚእ፡ ኢየሱስ። ዓዲ፡ ኅዳጠ፡ መዋዕለ፡ ሀሎ፡ ምስሌክሙ፡ ብርሃን። አንሶስዉ፡ እንዘ፡ ብክሙ፡ ብርሃን፡ ዘእንበለ፡ ይርከብክሙ፡ ጽልመት። እስመ፡ ዘየሐውር፡ ውስተ፡ ጽልመት፡ ኢየአምር፡ ኀበ፡ የሐውር።
36 አምጣነ፡ ብክሙ፡ ብርሃን፡ እመኑ፡ በብርሃን። ከመ፡ ትኩኑ፡ ውሉደ፡ ብርሃን። ወዘንተ፡ ብሂሎ፡ እግዚእ፡ ኢየሱስ፡ ሖረ፡ ወተኀብኦሙ።
37 ወእንዘ፡ መጠነ፡ ዝ፡ ተኣምረ፡ ይገብር፡ በቅድሜሆሙ፡ ኢአምኑ፡ ቦቱ።
38 ከመ፡ ይብጻሕ፡ ቃለ፡ ኢሳይያስ፡ ነቢይ፡ ዘይቤ። እግዚኦ፡ መኑ፡ የአምነነ፡ ስምዐነ። ወለመኑ፡ ተከሥተ፡ መዝራዕቱ፡ ለእግዚአብሔር።
39 ወበእንተ፡ ዝንቱ፡ ስእኑ፡ አሚነ። እስመ፡ ካዕበ፡ ይቤ፡ ኢሳይያስ።
40 ዖራ፡ አዕይንቲሆሙ፡ ወገዝፋ፡ አልባቢሆሙ። ከመ፡ ኢይርአዩ፡ በአዕይንቲሆሙ፡ ወኢይለብዉ፡ በአልባቢሆሙ። ወከመ፡ ኢይትመየጡ፡ ኀቤየ፡ ወኢይሣሀሎሙ።
41 ወዘንተ፡ ይቤ፡ ኢሳይያስ፡ እስመ፡ ርእየ፡ ስብሐቲሁ፡ ወነገረ፡ በእንቲኣሁ።
42 ወቦ፡ ብዙኃን፡ እመላእክተ፡ ሕዝብ፡ እለ፡ አምኑ፡ ቦቱ። ወባሕቱ፡ ኢያግሀዱ፡ በእንተ፡ ፍርሀቶሙ፡ ለፈሪሳውያን። ከመ፡ ኢይስድድዎሙ፡ እምነ፡ ምኵራብ።
43 እስመ፡ አብደሩ፡ ስብሐተ፡ ሰብእ፡ ፈድፋደ፡ እምስብሐተ፡ እግዚአብሔር።
44 ወጸርሐ፡ እግዚእ፡ ኢየሱስ፡ ወይቤ። ዘየአምን፡ ብየ፡ አኮ፡ ብየ፡ ባሕቲቶ፡ ዘየአምን፡ ዘእንበለ፡ በዘፈነወኒ።
45 ወዘርእየ፡ ኪያየ፡ ርእዮ፡ ለዘፈነወኒ።
46 ወአንሰ፡ ብርሃን፡ መጻእኩ፡ ውስተ፡ ዓለም። ከመ፡ ኵሉ፡ ዘየአምን፡ ብየ፡ ኢይንበር፡ ውስተ፡ ጽልመት።
47 ወዘኒ፡ ሰምዐ፡ ቃልየ፡ ወኢዐቀቦ፡ አኮ፡ አነ፡ ዘእኴንኖ። እስመ፡ ኢመጻእኩ፡ ከመ፡ እኰንኖ፡ ለዓለም። ዘእንበለ፡ ከመ፡ አሕይዎ፡ ለዓለም።
48 ወዘሰ፡ ክሕደኒ፡ ወኢተወክፈ፡ ቃልየ። ሀሎ፡ ዘይኴንኖ፡ ቃል፡ ዘአነ፡ ነበብኩ። ውእቱ፡ ይኴንኖ፡ በደኃሪት፡ ዕለት።
49 እስመ፡ አኮ፡ ዘእምኀቤየ፡ ዘነበብኩ። አላ፡ አብ፡ ዘፈነወኒ፡ ውእቱ፡ ትእዛዘ፡ ወሀበኒ። ዘከመ፡ እነብብ፡ ወዘከመ፡ እብል።
50 ወአአምር፡ ከመ፡ ትእዛዙ፡ ሕይወት፡ ውእቱ፡ ዘለዓለም። ወዘሂ፡ እነግር፡ አነ፡ በከመ፡ ይቤለኒ፡ አብ፡ ከማሁ፡ እነግር።
=== chapter 13 ===
[ምዕራፍ 13]
በእንተ፡ ተፍጻሜተ፡ ድራር፡ ወኅጽበተ፡ እገሪሆሙ፡ ለሐዋርያት
1 ወእምቅድመ፡ በዓለ፡ ፋሲካ፡ ሶበ፡ ኮነ። የአምር፡ እግዚእ፡ ኢየሱስ፡ ከመ፡ በጽሐ፡ ጊዜሁ፡ ከመ፡ ይፈልስ፡ እምዝንቱ፡ ዓለም። ወየሐውር፡ ኀበ፡ አብ፡ ዘፈነዎ። ወአፍቀሮሙ፡ ለእሊኣሁ፡ እለ፡ ውስተ፡ ዓለም፡ ወለዝሉፉ፡ አፍቀሮሙ።
2 ወእንዘ፡ ይዴረሩ፡ ቦአ፡ ሰይጣን፡ ውስተ፡ ልበ፡ ይሁዳ፡ ስምዖን፡ አስቆሮታዊ፡ ከመ፡ ያግብኦ።
3 ወሶበ፡ ኮነ፡ የአምር፡ እግዚእ፡ ኢየሱስ። ከመ፡ አወፈዮ፡ አብ፡ ኵሎ፡ ውስተ፡ እዴሁ። ወከመ፡ እምኀበ፡ እግዚአብሔር፡ ወፅአ፡ ወኀበ፡ እግዚአብሔር፡ የሐውር።
4 ተንሥአ፡ እምኀበ፡ ይዴረሩ፡ ወአንበረ፡ አልባሲሁ። ወነሥአ፡ መክፌ፡ ዘለንጽ፡ ወቀነተ፡ ሐቌሁ።
5 ወወደየ፡ ማየ፡ ውስተ፡ ንብቲራ፡ ወአኀዘ፡ ይኅፅብ፡ እገሪሆሙ፡ ለአርዳኢሁ። ወመዝመዘ፡ በውእቱ፡ መክፌ፡ ዘቀነተ።
6 በበጽሐ፡ ኀበ፡ ስምዖን፡ ጴጥሮስ፡ ወይቤሎ። አንተኑ፡ እግዚኦ፡ ዘተኀፅበኒ፡ እገርየ።
7 ወአውሥአ፡ እግዚእ፡ ኢየሱስ፡ ወይቤሎ። ዘእገብር፡ አነ፡ አንተ፡ ኢተአምር፡ ይእዜ። ወባሕቱ፡ ድኅረሰ፡ ተአምሮ።
8 ወይቤሎ፡ ጴጥሮስ፡ ኢትኅፅበኒ፡ እገርየ፡ ለዓለም። ወአውሥአ፡ እግዚእ፡ ኢየሱስ፡ ወይቤሎ። አማን፡ አማን፡ እብለከ። እመ፡ አነ፡ ኢኀፀብኩከ፡ እገሪከ፡ አልብከ፡ ክፍለ፡ ምስሌየ።
9 ወይቤሎ፡ ስምዖን፡ ጴጥሮስ። እግዚኦ፡ አኮ፡ እገርየ፡ ባሕቲቶ፡ ዘተኀፅበኒ፡ ወዓዲ፡ እደውየኒ፡ ወርእስየኒ።
10 ወይቤሎ፡ እግዚእ፡ ኢየሱስ። ዘሰ፡ ወድአ፡ ተኀፅበ፡ ኢይፈቅድ፡ ይትኀፀብ፡ ዘእንበለ፡ እገሪሁ። ዳእሙ፡ እስመ፡ ንጹሕ፡ ኵለንታሁ፡ ወአንትሙሰ፡ ንጹሓን፡ አንትሙ። ወባሕቱ፡ አኮ፡ ኵልክሙ፡ ንጹሓን።
11 እስመ፡ የአምር፡ እግዚእ፡ ኢየሱስ፡ ዘያገብኦ። ወበእንተ፡ ዝንቱ፡ ይቤ፡ አኮ፡ ኵልክሙ፡ ንጹሓን።
12 ወሶበ፡ ኀፀቦሙ፡ እገሪሆሙ፡ ነሥአ፡ አልባሲሁ፡ ወረፈቀ፡ ካዕበ፡ ምስሌሆሙ። ወይቤሎሙ፡ አእመርክሙኑ፡ ዘገበርኩ፡ ለክሙ።
13 አንትሙሰ፡ ትብሉኒ፡ ሊቅነ፡ ወእግዚእነ። ወሠናየ፡ ትብሉ፡ እስመ፡ ከማሁ፡ አነ።
14 ወሶበ፡ እንዘ፡ አነ፡ እንከ፡ ሊቅክሙ፡ ወእግዚእክሙ፡ ኀፀብኩክሙ፡ እገሪክሙ። ከማሁኬ፡ አንትሙኒ፡ ይደልወክሙ፡ ትኀፅቡ፡ እግረ፡ ቢጽክሙ።
15 እስመ፡ አርአያየ፡ ወሀብኩክሙ። ከመ፡ ትግበሩ፡ አንትሙኒ፡ በከመ፡ ገበርኩ፡ ለክሙ፡ አነ።
16 አማን፡ አማን፡ እብለክሙ። አልቦ፡ ገብር፡ ዘየዐቢ፡ እምእግዚኡ። ወአልቦ፡ ሐዋርያ፡ ዘየዐቢ፡ እምዘፈነዎ።
17 ወእመሰ፡ ዘንተ፡ ተአምሩ፡ ብፁዓን፡ አንትሙ፡ እመ፡ ገበርክምዎ።
18 ወአኮ፡ በእንተ፡ ኵልክሙ፡ ዘእብል፡ ዘንተ። እስመ፡ አነ፡ አአምር፡ መኑ፡ እሙንቱ፡ እለ፡ ኀረይኩ። ወባሕቱ፡ ከመ፡ ይብጻሕ፡ ቃለ፡ መጽሐፍ፡ ዘይቤ። ዘይሴሰይ፡ እክልየ፡ አንሥአ፡ ሰኰናሁ፡ ላዕሌየ።
19 ወይእዜሰ፡ እነግረክሙ፡ ዘእንበለ፡ ይኩን። ከመ፡ አመ፡ ኮነ፡ ትእመኑ፡ ከመ፡ አነ፡ ውእቱ።
20 አማን፡ አማን፡ እብለክሙ። ዘተወክፎ፡ ለዘፈነውኩ፡ አነ፡ ኪያየ፡ ተወክፈ። ወዘኪያየ፡ ተወክፈ፡ ተወክፎ፡ ለዘፈነወኒ።
ዘከመ፡ አእመረ፡ እግዚእ፡ ኢየሱስ፡ ዘያገብኦ
21 ወዘንተ፡ ብሂሎ፡ እግዚእ፡ ኢየሱስ፡ ተሀወከ፡ በመንፈሱ። ወስምዐ፡ ኮነ፡ ወይቤ። አማን፡ አማን፡ እብለክሙ። ከመ፡ አሐዱ፡ እምኔክሙ፡ ያገብአኒ።
22 ወተናጸሩ፡ አርዳኢሁ፡ በበይናቲሆሙ፡ እስመ፡ ኢያእመሩ። ወኀጥኡ፡ ከመ፡ እንበይነ፡ መኑ፡ ይብል፡ ዘንተ።
23 ወሀሎ፡ አሐዱ፡ እምአርዳኢሁ፡ ዘይረፍቅ፡ ውስተ፡ ሕፅኑ፡ ለእግዚእ፡ ኢየሱስ። ወያፈቅሮ፡ እግዚእ፡ ኢየሱስ።
24 ወቀጸቦ፡ ስምዖን፡ ጴጥሮስ፡ ሎቱ፡ ወይቤሎ። ተሰአል፡ ወንግረነ፡ እንበይነ፡ መኑ፡ ይብል፡ ዘንተ።
25 ወሖረ፡ ወረፈቀ፡ ውእቱ፡ ረድእ፡ ዲበ፡ እንግድዓሁ፡ ለእግዚእ፡ ኢየሱስ። ወይቤሎ፡ እግዚኦ፡ መኑ፡ ውእቱ፡ ዘያገብአከ።
26 ወአውሥአ፡ እግዚእ፡ ኢየሱስ፡ ወይቤሎ። ዝ፡ ወእቱ፡ ዘአነ፡ እጸብሕ፡ ሎቱ፡ ኅብስተ፡ ወእሜጥዎ። ውእቱ፡ ዘያገብአኒ። ወጸብሐ፡ ኅብስተ፡ ወመጠዎ፡ ለይሁዳ፡ ስምዖን፡ አስቆሮታዊ።
27 ወእምድኅረ፡ ውእቱ፡ ኅብስት፡ ወሀቦ፡ ኅብስተ። ወምስለ፡ ውእቱ፡ ኅብስት፡ ቦአ፡ ሶቤሃ፡ ሰይጣን፡ ውስተ፡ ልቡ። ወይቤሎ፡ እግዚእ፡ ኢየሱስ፡ ዘትገብር፡ እንከ፡ ፍጡነ፡ ግበር።
28 ወኢያእመሩ፡ እለ፡ ይረፍቁ፡ ምስሌሁ። በእንተ፡ ምንት፡ ይቤሎ፡ ዘንተ።
29 ወቦ፡ እለ፡ መሰሎሙ፡ ከመ፡ በእንተ፡ አስከሬነ፡ ቀምጠራ፡ ዘሙዳየ፡ ምጽዋት። ዘሀሎ፡ በኀበ፡ ይሁዳ። ዘይቤሎ፡ እግዚእ፡ ኢየሱስ፡ ተሣየጥ፡ ዘንፈቅድ፡ ለበዓል። አው፡ ዘንሁብ፡ ለነዳያን። እስመ፡ ውእቱ፡ የዐቅብ፡ አስከሬነ፡ ቀምጠራ፡ ዘሙዳየ፡ ምጽዋት።
30 ወተመጢዎ፡ ይሁዳ፡ ውእተ፡ ኅብስተ፡ ወፅአ፡ ሶቤሃ፡ በሌሊት።
ዘከመ፡ ተናገረ፡ ኢየሱስ፡ እምድኅረ፡ ድራር፡ ወዘከመ፡ ተነበየ፡ ኀዲጎተ፡ ዘሐዋርያት
31 ወወፂኦ፡ ይሁዳ፡ ውእተ፡ ጊዜ፡ ይቤሎሙ፡ እግዚእ፡ ኢየሱስ። ይእዜኬ፡ እንከ፡ ተሰብሐ፡ ወልደ፡ ዕጓለ፡ እመሕያው። ወእግዚአብሔርኒ፡ ተሰብሐ፡ ቦቱ።
32 ወእመሰ፡ እግዚአብሔር፡ ተሰብሐ፡ ቦቱ፡ ወእግዚአብሔርኒ፡ ይሴብሖ። ወሶቤሃ፡ ይሴብሖ፡ ወዓዲ፡ ካዕበ፡ ይሴብሖ።
33 ደቂቅየ፡ ዓዲ፡ ኅዳጠ፡ መዋዕለ፡ ሀሎኩ፡ ምስሌክሙ። ተኀሥሡኒ፡ ወበከመ፡ እቤሎሙ፡ ለአይሁድ። ኀበ፡ አነ፡ አሐውር፡ አንትሙ፡ ኢትክሉ፡ መጺአ። ወለክሙኒ፡ ይእዜ፡ እነግረክሙ።
34 ወእሁበክሙ፡ ሐዲሰ፡ ትእዛዘ፡ ከመ፡ ትትፋቀሩ፡ በበይናቲክሙ። በከመ፡ አነ፡ አፍቀርኩክሙ፡ ከማሁ፡ አንትሙኒ፡ ተፋቀሩ፡ በበይናቲክሙ።
35 ወበዝንቱ፡ የአምረክሙ፡ ኵሉ፡ ከመ፡ አርዳእየ፡ አንትሙ። እምከመ፡ ተፋቀርክሙ፡ በበይናቲክሙ።
36 ወይቤሎ፡ ስምዖን፡ ጴጥሮስ፡ እግዚኦ፡ አይቴኑ፡ ተሐውር። ወአውሥአ፡ እግዚእ፡ ኢየሱስ፡ ወይቤሎ። ኀበሰ፡ አነ፡ አሐውር፡ ኢትክል፡ ተሊዎትየ፡ ይእዜ። ወባሕቱ፡ ድኅረሰ፡ ትተልወኒ።
37 ወይቤሎ፡ ጴጥሮስ፡ እግዚኦ፡ በእንተ፡ ምንት፡ ኢይክል፡ ተሊዎተከ፡ ይእዜ። ወአነ፡ ነፍስየ፡ ጥቀ፡ እሜጡ፡ በእንቲኣከ።
38 ወአውሥአ፡ እግዚኦ፡ ኢየሱስ፡ ወይቤሎ። ነፍስከኑ፡ ትሜጡ፡ በእንቲኣየ፡ ኦ፡ ስምዖን። አማን፡ አማን፡ እብለከ። ዘእንበለ፡ ይንቁ፡ ዶርሆ፡ እስከ፡ ሥልሰ፡ ትክሕደኒ።
=== chapter 14 ===
[ምዕራፍ 14]
በእንተ፡ ሃይማኖት
1 ኢይደንግፅክሙ፡ ልብክሙ፡ እመኑ፡ በእግዚአብሔር፡ ወእመኑ፡ ብየ።
2 እስመ፡ ውስተ፡ ቤተ፡ አቡየ፡ ብዙኅ፡ ማኅደር፡ ወምዕራፍ፡ ቦቱ። ወናሁ፡ እብለክሙ፡ ከመ፡ አነ፡ አሐውር፡ ወአስተዳሉ፡ ለክሙ፡ መካነ። ወእመ፡ አኮሰ፡ እምኢይቤለክሙ፡ ከመ፡ አሐውር፡ አስተዳሉ፡ ለክሙ፡ ማኅደረ።
3 ወእምከመ፡ ሖርኩ፡ ወአስተዳሎኩ፡ ለክሙ፡ መካነ፡ እመጽእ፡ ካዕበ። ወእነሥእክሙ፡ ኀቤየ፡ ከመ፡ ተሀልዉ፡ አንትሙኒ፡ ኀበ፡ ሀሎኩ፡ አነ።
4 ወለሊክሙ፡ ኢተአምሩ፡ ኀበ፡ አሐውር፡ ወፍኖቶሰ፡ ተአምሩ።
5 ወይቤሎ፡ ቶማስ፡ እግዚኦ፡ ዘኢነአምር፡ ኀበ፡ ተሐውር። በእፎ፡ እንከ፡ ነአምር፡ ፍኖቶ።
6 ወይቤሎ፡ እግዚእ፡ ኢየሱስ። አነ፡ ውእቱ፡ ፍኖተ፡ ጽድቅ፡ ወሕይወት። ወአልቦ፡ ዘይመጽእ፡ ኀበ፡ አብ፡ ዘእንበለ፡ እንተ፡ ኀቤየ።
7 እምከመ፡ ሊተ፡ አእመርክሙኒ፡ እምአእመርክምዎ፡ ለአቡየኒ። ወይእዜሰ፡ አእመርክምዎሂ፡ ወርኢክምዎሂ።
8 ወይቤሎ፡ ፊልጶስ፡ እግዚኦ፡ አርእየነሁ፡ ለአብ፡ ወየአክለነ።
9 ወይቤሎ፡ እግዚእ፡ ኢየሱስ። መጠነ፡ ዝ፡ መዋዕል፡ ሀሎኩ፡ ምስሌክሙ፡ ኢያእመርከኒኑ፡ ፊልጶስ። ዘርእየ፡ ኪያየ፡ ርእዮ፡ ለአብ። እፎ፡ እንከ፡ ትብል፡ አርእየነሁ፡ ለአብ።
10 ኢተአምንሁ፡ ከመ፡ አነ፡ በአብ፡ ወአብ፡ ብየ። ወዝኒ፡ ቃል፡ ዘአነ፡ ነገርኩክሙ፡ አኮ፡ እምኀቤየ፡ ዘነበብኩ። አላ፡ አብ፡ ዘሀሎ፡ ብየ፡ ውእቱ፡ ይገብሮ፡ ለዝንቱ፡ ግብር።
11 እመኑ፡ ከመ፡ አነ፡ በአብ፡ ወአብ፡ ብየ። ወእመ፡ አኮሰ፡ በእንተ፡ ግብርየ፡ እመኑኒ።
12 አማን፡ አማን፡ እብለክሙ። ዘየአምን፡ ብየ፡ ግብረ፡ ዘአነ፡ እገብር። ውእቱኒ፡ ይገብር፡ ወዘየዐቢ፡ እምኔሁ፡ ይገብር። እስመ፡ አነ፡ አሐውር፡ ኀበ፡ አብ።
13 ወኵሎ፡ ዘሰአልክሙ፡ በስምየ፡ ይገብር፡ ለክሙ። ከመ፡ ይሰባሕ፡ አብ፡ በወልድ።
14 ወእመ፡ ቦ፡ ዘሰአልክሙ፡ በስምየ፡ እገብር፡ ለክሙ፡ ኪያሁ።
15 ወእመሰ፡ ታፈቅሩኒ፡ ዕቀቡ፡ ትእዛዝየ።
16 ወአነ፡ እስእሎ፡ ለአብ፡ ይፈኑ፡ ለክሙ፡ ጰራቅሊጦስሃ። ካልአ፡ ዘይሄሉ፡ ምስሌክሙ፡ ለዓለም።
17 መንፈሰ፡ ጽድቅ፡ ዘኢይክል፡ ዓለም፡ ነሢኦቶ፡ እስመ፡ ኢይሬእዮ፡ ወኢየአምሮ። ወአንትሙሰ፡ ተአምርዎ፡ እስመ፡ ኀቤክሙ፡ ይነብር፡ ወውስቴትክሙ፡ ይሄሉ።
18 ወኢየኀድገክሙ፡ ዕጓለ፡ ማውታ፡ ትኩኑ። እስመ፡ አነ፡ እመጽእ፡ ኀቤክሙ።
19 እምድኅረ፡ ኅዳጥ፡ መዋዕል፡ ወኢይሬእየኒ፡ እንከ፡ ዓለም። ወአንትሙሰ፡ ትሬእዩኒ፡ እስመ፡ አነ፡ ሕያው። ወአንትሙሂ፡ ተሐይዉ።
20 ይእተ፡ አሚረ፡ ተአምሩ፡ ከመ፡ አነ፡ በአብ፡ ወአብ፡ ብየ። ወአንትሙሂ፡ ብየ፡ ወአነሂ፡ ብክሙ።
21 ዘቦቱ፡ ትእዛዝየ፡ ወየዐቅቦ፡ ውእቱ፡ ዘያፈቅረኒ። ወለዘያፈቅረኒ፡ ያፈቅሮ፡ አቡየ። ወአነሂ፡ አፈቅሮ፡ ወአርእዮ፡ ርእስየ።
22 ወይቤሎ፡ ይሁዳ፡ ዘአኮ፡ አስቆሮታዊ። እግዚኦ፡ ምንትኑ፡ ዘትቤ። ከመ፡ ለነ፡ ዳእሙ፡ ሀለወከ፡ ታርኢ፡ ርእሰከ፡ ወአኮ፡ ለዓለም።
23 ወአውሥአ፡ እግዚእ፡ ኢየሱስ፡ ወይቤሎ። ዘያፈቅረኒ፡ ይዕቀብ፡ ቃልየ፡ ወያፈቅሮ፡ አቡየ። ወእመ፡ ቦ፡ ዘዐቀበ፡ ቃልየ፡ አነ፡ ወአቡየ፡ ንመጽእ፡ ኀቤሁ። ወንገብር፡ ምዕራፈ፡ ውስቴቱ።
24 ወዘሰ፡ ኢያፈቅረኒ፡ ኢየዐቅብ፡ ቃልየ። ወዝኒ፡ ቃል፡ ዘትሰምዑ፡ ኢኮነ፡ ቃለ፡ ዚኣየ። አላ፡ ቃሉ፡ ውእቱ፡ ለአብ፡ ዘፈነወኒ።
25 ወዘንተ፡ ነገርኩክሙ፡ እንዘ፡ ሀሎኩ፡ ምስሌክሙ።
26 ወባሕቱ፡ ጰራቅሊጦስ፡ መንፈሰ፡ ጽድቅ፡ ዘይፌኑ፡ አብ፡ በስምየ። ውእቱ፡ ይሜህረክሙ፡ ኵሎ፡ ወያዜክረክሙ፡ ኵሎ፡ ዘነገርኩክሙ፡ አነ።
27 ሰላምየ፡ አኀድግ፡ ለክሙ፡ ወሰላመ፡ አቡየ፡ እሁበክሙ። አኮ፡ በከመ፡ ይሁብ፡ ዓለም፡ ዘእሁበክሙ፡ አነ። ኢይደንግፅክሙ፡ ልብክሙ፡ ወኢትፍርሁ።
28 ሰማዕክሙ፡ ዘእቤለክሙ፡ ከመ፡ አነ፡ አሐውር፡ ወእሠወጥ፡ ኀቤክሙ። ሶበሰ፡ ታፈቅሩኒ፡ እምተፈሣሕክሙ፡ በሐዊሮትየ፡ ኀበ፡ አብ። እስመ፡ ውእቱ፡ አብ፡ የዐብየኒ።
29 ወይእዜ፡ ነገርኩክሙ፡ ዘእንበለ፡ ይኩን። ከመ፡ አመ፡ ኮነ፡ ትእመኑ።
30 ወኢይትናገር፡ እንከ፡ ብዙኀ፡ ምስሌክሙ። እስመ፡ ይመጽእ፡ መልአኩ፡ ለዝንቱ፡ ዓለም። ወኢይረክብ፡ በላዕሌየ፡ ወኢ፡ ምንተኒ።
31 ወባሕቱ፡ ከመ፡ ያእመር፡ ዓለም፡ ከመ፡ አነ፡ አፈቅሮ፡ ለአብ። ወበከመ፡ ወሀበኒ፡ አብ፡ ትእዛዞ፡ ከማሁ፡ እገብር። ተንሥኡ፡ ንሑር፡ እም፡ ዝየ።
=== chapter 15 ===
[ምዕራፍ 15]
በእንተ፡ ሐረገ፡ ወይን፡ ወበእንተ፡ አዕፁቂሁ
1 አነ፡ ውእቱ፡ ሐረገ፡ ወይን፡ ዘጽድቅ። ወአቡየ፡ ተካሊሁ፡ ውእቱ።
2 ወለኵሉ፡ ዐጽቅ፡ ዘኢይፈሪ፡ በላዕሌየ፡ ይገዝምዎ፡ ወያአትትዎ። ወለኵሉ፡ ዐጽቅ፡ ዘይፈሪ፡ ያስተናጽሕዎ፡ ከመ፡ ብዙኀ፡ ይፍረይ።
3 ወአንትሙሰ፡ ወዳእክሙ፡ ንጹሓን፡ አንትሙ፡ በእንተ፡ ቃል፡ ዘነገርኩክሙ።
4 ንበሩ፡ ብየ፡ ወአነሂ፡ ብክሙ። ወበከመ፡ ዐጽቅ፡ ኢይክል፡ ፈርየ፡ ባሕቲቱ፡ እመ፡ ኢሀሎ፡ ውስተ፡ ጕንደ፡ ወይኑ። ከማሁ፡ አንትሙኒ፡ ኢትክሉ፡ ፈርየ፡ ለእመ፡ ኢነበርክሙ፡ ብየ።
5 አነ፡ ውእቱ፡ ጕንደ፡ ወይን። ወአንትሙሂ፡ አዕጹቂሁ፡ ዘነበረ፡ ብየ፡ ወአነሂ፡ ቦቱ። ውእቱኬ፡ ዘይፈሪ፡ ብዙኀ። እስመ፡ ዘእንበሌየሰ፡ አልቦ፡ ዘትክሉ፡ ገቢረ፡ ወኢ፡ ምንተኒ።
6 ወእመ፡ ቦ፡ ዘኢነበረ፡ ብየ፡ ይገድፍዎ፡ አፍኣ፡ ከመ፡ ዐጽቅ፡ ይቡስ። ወያስተጋብእዎ፡ ወያውዕይዎ፡ በእሳት።
7 ወእመሰ፡ ነበርክሙ፡ ብየ፡ ወነበረ፡ ቃልየ፡ ኀቤክሙ። ኵሎ፡ ዘፈቀድክሙ፡ ትስእሉ፡ ይከውን፡ ለክሙ።
8 ወበዝንቱ፡ ይሴባሕ፡ አቡየ፡ እምከመ፡ ብዙኀ፡ ፍሬ፡ ትፈርዩ። ወትከውኑኒ፡ አርዳእየ።
9 ወበከመ፡ አፍቀረኒ፡ አብ፡ ከማሁ፡ አነሂ፡ አፍቀርኩክሙ። ንበሩ፡ በፍቅረ፡ ዚኣየ።
10 ወእመሰ፡ ታፈቅሩኒ፡ ዕቀቡ፡ ትእዛዝየ። ወሀልዉ፡ በፍቀረ፡ ዚኣየ። በከመ፡ ዐቀብኩ፡ አነ፡ ትእዛዞ፡ ለአቡየ፡ ወእሄሉ፡ በፍቅሩ።
11 ወነገርኩክሙ፡ ዘንተ፡ ከመ፡ የሀሉ፡ ልብየ፡ ወፍሥሓየ፡ ወፍቅርየ፡ ኀቤክሙ። ከመ፡ ፍጹመ፡ ይኩን፡ ፍሥሓክሙ።
ዘከመ፡ ይደልዎሙ፡ ለአኀው፡ ተፋቅሮ
12 ወዛቲ፡ ይእቲ፡ ትእዛዘ፡ እንቲኣየ። ከመ፡ ትትፋቀሩ፡ በበይናቲክሙ፡ በከመ፡ አነ፡ አፍቀርኩክሙ።
13 አልቦ፡ ዘየዐቢ፡ እምዝ፡ ፍቅር። ከመ፡ ብእሲ፡ ዘይሜጡ፡ ነፍሶ፡ ቤዛ፡ ነፍሰ፡ ቢጹ።
14 አንትሙሰኬ፡ አዕርክትየ፡ አንትሙ። እምከመ፡ ገበርክሙ፡ ኵሎ፡ ዘአዘዝኩክሙ።
15 ኢይብለክሙ፡ እንከ፡ አግብርትየ፡ አላ፡ አዕርክትየ፡ አንትሙ። እስመ፡ ገብርሰ፡ ኢየአምር፡ ዘይሬስዮ፡ እግዚኡ። ወለክሙሰ፡ አዕርክትየ፡ እብለክሙ። እስመ፡ ኵሎ፡ ዘሰማዕኩ፡ በኀበ፡ አቡየ፡ ነገርኩክሙ።
16 አኮ፡ አንትሙ፡ ዘኀረይክሙኒ፡ ወሤምኩኒ። አላ፡ አነ፡ ኀረይኩክሙ፡ ወሤምኩክሙ። ወእሬስየክሙ፡ ከመ፡ ትሑሩ፡ ወፍሬ፡ ትፍረዩ። ወውእቱ፡ ፍሬክሙ፡ ይነብር፡ ለዓለም። ከመ፡ እመ፡ ቦ፡ ዘሰአልክምዎ፡ ለአብ፡ በስምየ፡ ኵሎ፡ ይሁበክሙ።
17 ወዘንተ፡ እኤዝዘክሙ፡ ከመ፡ ትትፋቀሩ፡ በበይናቲክሙ።
18 እመሂ፡ ዓለም፡ ጸልአክሙ፡ አእምሩ፡ ከመ፡ ኪያየ፡ ቀደመ፡ ጸሊአ።
19 ሶበሰ፡ እምዓለም፡ እምአፍቀረክሙ፡ ዓለም። እስመ፡ ዓለም፡ ያፈቅር፡ እሊኣሁ፡ ወባሕቱ፡ እስመ፡ ኢኮንክሙ፡ እምዓለም። አላ፡ አነ፡ ኀረይኩክሙ፡ እምውስተ፡ ዓለም። ወበእንተ፡ ዝንቱ፡ ይጸልአክሙ፡ ዓለም።
20 ተዘከሩ፡ ቃልየ፡ ዘአነ፡ እቤለክሙ። አልቦ፡ ገብር፡ ዘየዐቢ፡ እምእግዚኡ። ወኢ፡ ሐዋርያ፡ እምዘፈነዎ። እምከመ፡ ኪያየ፡ ሰደዱ፡ ኪያክሙኒ፡ ይሰድዱክሙ። ወሶበሰ፡ ዐቀቡ፡ ቃልየ፡ ቃልክሙኒ፡ እምዐቀቡ።
21 ወባሕቱ፡ ዘንተ፡ ኵሎ፡ ይገብሩ፡ ላዕሌክሙ፡ በእንተ፡ ስምየ። እስመ፡ ኢየአምርዎ፡ ለዘፈነወኒ።
22 ሶበሰ፡ ኢመጻእኩ፡ ወኢነገርክዎሙ፡ እምድኅኑ፡ ወእምኢኮኖሙ፡ ጌጋየ። ወይእዜሰ፡ ባሕቱ፡ አልቦሙ፡ ምክንያተ፡ ለጌጋዮሙ።
23 ዘጸልአ፡ ኪያየ፡ ጸልኦ፡ ለአቡየ። ወሶበ፡ ኢገበርኩ፡ ሎሙ፡ ግብረ፡ ዘባዕድ፡ ኢገብሮ፡ እምኢኮኖሙ፡ ጌጋየ።
24 ወይእዜሰ፡ ባሕቱ፡ ርእዩኒሂ፡ ወጸልኡኒሂ፡ ኪያየሂ፡ ወአቡየሂ።
25 ወባሕቱ፡ ከመ፡ ይብጻሕ፡ ቃል፡ ዘጽሑፍ፡ ውስተ፡ ኦሪቶሙ፡ ዘይቤ። ጸልኡኒ፡ በከንቱ።
በእንተ፡ ጰራቅሊጦስ
26 ወሶበ፡ መጽአ፡ ጰራቅሊጦስ፡ ዘአነ፡ እፌኑ፡ ለክሙ፡ እምኀበ፡ አብ። መንፈሰ፡ ጽድቅ፡ ዘይወፅእ፡ እምኀበ፡ አብ፡ ውእቱ፡ ሰማዕትየ።
27 ወአንትሙሂ፡ ሰማዕትየ፡ እስመ፡ እምትካት፡ ሀለውክሙ፡ ምስሌየ።
=== chapter 16 ===
[ምዕራፍ 16]
በእንተ፡ ሰደታት
1 ዘንተ፡ ነገርኩክሙ፡ ከመ፡ ኢትትዐቀፉ።
2 እስመ፡ እምኵራባቲሆሙ፡ ያወፅኡክሙ። ወባሕቱ፡ ትመጽእ፡ ሰዓት። ከመ፡ ኵሉ፡ ዘይቀትለክሙ፡ ይመስሎ፡ ከመ፡ ዘመሥዋዕተ፡ ያበውእ፡ ለእግዚአብሔር።
3 ወዘንተኒ፡ ዘይገብሩ፡ ላዕሌክሙ፡ እስመ፡ ኢየአምርዎ፡ ለአብ፡ ወኢ፡ ኪያየ።
4 ወባሕቱ፡ ዘንተ፡ ነገርኩክሙ፡ ከመ፡ ትዘከርዎ፡ አመ፡ በጽሐ፡ ጊዜሁ፡ ከመ፡ አነ፡ እቤለክሙ። ወቀዲሙሰ፡ ኢነገርኩክሙ፡ ዘንተ፡ እስመ፡ ሀሎኩ፡ ምስሌክሙ።
5 ወይእዜሰ፡ ባሕቱ፡ አሐውር፡ ኀበ፡ አብ፡ ዘፈነወኒ። ወኢ፡ አሐዱሂ፡ እምኔክሙ፡ ኢትብሉኒ፡ አይቴ፡ ተሐውር።
6 ወባሕቱ፡ እስመ፡ ዘንተ፡ ነገርኩክሙ፡ ሐዘን፡ መልአ፡ ውስተ፡ ልብክሙ።
ዘከመ፡ አሰፈዎሙ፡ ኢየሱስ፡ መንፈሰ፡ ቅዱሰ
7 ወአንሰ፡ አማን፡ ህልወ፡ እብለክሙ። ይኄይሰክሙ፡ እሑር፡ አነ፡ ኀበ፡ አብ። እስመ፡ እመ፡ ኢሖርኩ፡ አነ፡ ኢይመጽእ፡ ጰራቅሊጦስ፡ ኀቤክሙ። ወእመሰ፡ ሖርኩ፡ አነ፡ እፌንዎ፡ ለክሙ።
8 ወመጺኦ፡ ውእቱ፡ ይዛለፎ፡ ለዓለም። በእንተ፡ ኀጢአት፡ ወበእንተ፡ ጽድቅ፡ ወበእንተ፡ ኵነኔ።
9 በእንተ፡ ኀጢአትሰ፡ እስመ፡ ኢአምኑ፡ ብየ።
10 ወበእንተ፡ ጽድቅኒ፡ እስመ፡ አነ፡ አሐውር፡ ኀበ፡ አብ። ወኢትሬእዩኒ፡ እንከ።
11 ወበእንተሰ፡ ኵነኔ፡ እስመ፡ ይትኴነን፡ መልአኩ፡ ለዝንቱ፡ ዓለም።
12 ወብየ፡ ብዙኅ፡ ነገር፡ ዘእነግረክሙ። ወባሕቱ፡ ኢትክሉ፡ ጸዊሮቶ፡ ይእዜ።
13 ወመጺኦ፡ ውእቱ፡ መንፈሰ፡ ጽድቅ፡ ይመርሐክሙ፡ ኀበ፡ ኵሉ፡ ጽድቅ። እስመ፡ ኢይነግር፡ ዘእምኀቤሁ፡ ወዘሰምዐ። ዳእሙ፡ ይነግር፡ ወዘይመጽእሂ፡ ይነግረክሙ።
14 ወኪያየ፡ ይሴብሕ፡ ውእቱ፡ እስመ፡ እምዚኣየ፡ ይነሥእ። ወይነግረክሙ፡ ኵሎ።
15 እስመ፡ ኵሉ፡ ዘቦ፡ ለአቡየ፡ ዚኣየ፡ ውእቱ። ወበእንተ፡ ዝንቱ፡ እብለክሙ፡ እምዚኣየ፡ ይነሥአ፡ ወይነግረክሙ።
በእንተ፡ ተመይጦተ፡ ኢየሱስ፡ ውስተ፡ ሰማይ
16 ዓዲ፡ ኅዳጠ፡ ኢትሬእዩኒ። ወካዕበ፡ ኅዳጠ፡ ትሬእዩኒ፡ እስመ፡ አሐውር፡ ኀበ፡ አብ።
17 ወተባሀሉ፡ አርዳኢሁ፡ በበይናቲሆሙ። ምንትኑ፡ ዝንቱ፡ ዘይብለነ፡ ዓዲ፡ ኅዳጠ፡ ኢትሬእዩኒ። ወካዕበ፡ ኅዳጠ፡ ትሬእዩኒ፡ እስመ፡ አሐውር፡ ኀበ፡ አብ።
18 ወይቤሉ፡ ምንትኑ፡ ዝንቱ፡ ዘይብለነ። ኅዳጠ፡ ኢነአምር፡ ዘይትናገር፡ ቦቱ።
19 ወአእመሮሙ፡ እግዚእ፡ ኢየሱስ፡ ከመ፡ ይፈቅዱ፡ ይሰአልዎ፡ ወይቤሎሙ። በእንተ፡ ዝንቱኑ፡ ትትኀሠሡ፡ በበይናቲክሙ። እስመ፡ እቤለክሙ፡ ዓዲ፡ ኅዳጠ፡ ኢትሬእዩኒ። ወካዕበ፡ ኅዳጠ፡ ትሬእዩኒ።
20 አማን፡ አማን፡ እብለክሙ። ከመ፡ ትበክዩ፡ ወትላሕዉ፡ አንትሙ፡ ወዓለምሰ፡ ይትፌሣሕ። ወአንትሙሰ፡ ተሐዝኑ፡ አላ፡ ሐዘንክሙ፡ ፍሥሓ፡ ይከውነክሙ።
21 በከመ፡ ብእሲት፡ ትቴክዝ፡ ሶበ፡ አልጸቀት፡ ትለድ። እስመ፡ በጽሐ፡ ጊዜሃ። ወእምከመ፡ ወለደት፡ ዕጓለ፡ ኢትዜከሮ፡ እንከ፡ ለሕማማ፡ በእንተ፡ ፍሥሓሃ። እስመ፡ ወለደት፡ ብእሴ፡ ውስተ፡ ዓለም።
22 ወከማሁ፡ አንትሙኒ፡ ትቴክዙ፡ ይእዜ። ወባሕቱ፡ ካዕበ፡ እሬእየክሙ፡ ወይትፌሥሐክሙ፡ ልብክሙ። ወፍሥሓክሙኒ፡ አልቦ፡ ዘይሀይደክሙ።
23 ወይእተ፡ አሚረ፡ አልቦ፡ ዘትስእሉኒ፡ ኪያየ፡ ወኢ፡ ምንተኒ። አማን፡ አማን፡ እብለክሙ። ከመ፡ አመ፡ ሰአልክምዎ፡ ለአብ፡ በስምየ፡ ኵሎ፡ ይሁበክሙ።
24 ወእስከ፡ ይእዜሰ፡ ኢሰአልክምዎ፡ ወኢ፡ ምንተኒ፡ በስምየ፡ ሰአሉ። ወትነሥኡ፡ ከመ፡ ፍጹመ፡ ይኩን፡ ፍሥሓክሙ።
ዘከመ፡ ተሰነአለ፡ ኢየሱስ፡ እምአርድእት
25 ወይእዜሰ፡ በምሳሌ፡ ነገርኩክሙ። ወባሕቱ፡ ይበጽሕ፡ ጊዜሁ፡ አመ፡ ኢይነግረክሙ፡ በምሳሌ። አላ፡ አየድዐክሙ፡ ክሡተ፡ በእንተ፡ አብ።
26 ወይእተ፡ አሚረ፡ ትስእሉ፡ በስምየ። ወኢይብለክሙ፡ ከመ፡ አነ፡ ዘእስእሎ፡ ለአብ፡ በእንቲኣክሙ።
27 ወአኮ፡ አነ፡ ዘእስእሎ፡ ለአብ፡ በእንቲኣክሙ። እስመ፡ ለሊሁ፡ አብ፡ ያፈቅረክሙ። እስመ፡ አንትሙ፡ አፍቀርክሙኒ፡ ወአመንክሙኒ። ከመ፡ እምኀበ፡ እግዚአብሔር፡ ወፃእኩ።
28 ወመጻእኩ፡ ውስተ፡ ዓለም፡ ወካዕበ፡ አኀድጎ፡ ለዓለም። ወአሐውር፡ ኀበ፡ አብ።
29 ወይቤልዎ፡ አርዳኢሁ፡ ይእዜሰ፡ ገሃደ፡ ተናገርከነ። ወአልቦ፡ ዘመሰልከ፡ ወኢ፡ ምንተኒ።
30 ወይእዜ፡ አእመርነ፡ ከመ፡ ኵሎ፡ ተአምር፡ አንተ። ወኢትፈቅድ፡ ይንግርከ፡ መኑሂ። ወበዝንቱ፡ አእመርነ፡ ከመ፡ እምኀበ፡ እግዚአብሔር፡ ወፃእከ።
31 ወይቤሎሙ፡ እግዚእ፡ ኢየሱስ፡ ይእዜሰኬ፡ አእምሩ፡ ወእመኑ።
32 ናሁኬ፡ ከመ፡ ይበጽሕ፡ ጊዜሁ። ወበጺሖሂ፡ ከመ፡ ኵልክሙ፡ ትዘረዉ፡ ለለ፡ አሐዱ፡ ውስተ፡ መካኑ። ወተኀድጉኒ፡ ባሕቲትየ፡ እስመ፡ አብ፡ ምስሌየ፡ ውእቱ።
33 ወዝንቱ፡ ውእቱ፡ ዘነገርኩክሙ፡ ከመ፡ በኀቤየ፡ ሰላመ፡ ትርከቡ። ወበዓለምሰ፡ ሀለወክሙ፡ ሕማመ፡ ትርከቡ። ወባሕቱ፡ ጽንዑ፡ እስመ፡ አነ፡ ሞእክዎ፡ ለዓለም።
=== chapter 17 ===
[ምዕራፍ 17]
ዘከመ፡ ጸለየ፡ ኢየሱስ
1 ወዘንተ፡ ነገረ፡ ተናጊሮ፡ እግዚእ፡ ኢየሱስ፡ አንሥአ፡ አዕይንቲሁ፡ ውስተ፡ ሰማይ። ወይቤ፡ አባ፡ በጽሐ፡ ጊዜሁ፡ ከመ፡ ትሰብሖ፡ ለወልድከ። ወከመ፡ ወልድከኒ፡ ይሰብሕከ።
2 በከመ፡ አኰነንኮ፡ ላዕለ፡ ኵሉ፡ ዘሥጋ፡ ወነፍስ። ከመ፡ የሀቦሙ፡ ሕይወተ፡ ዘለዓለም፡ ለኵሎሙ፡ እለ፡ ወሀብካሁ።
3 ወዛቲ፡ ይእቲ፡ ሕይወት፡ ዘለዓለም፡ ከመ፡ ያእምሩከ፡ ለከ። ለአሐዱ፡ ዘበአማን፡ አምላከ፡ ጽድቅ፡ ባሕቲትከ። ወዘፈነውኮ፡ ኢየሱስ፡ ክርስቶስ፡ ወልድከ።
4 አንሰ፡ ሰባሕኩከ፡ በዲበ፡ ምድር፡ ፈጺምየ፡ ግብረ፡ ዘወሀብከኒ፡ ከመ፡ እግበር።
5 ወይእዜኒ፡ አንተ፡ አባ፡ ሰብሐኒ፡ በስብሐትየ። ዘሀሎ፡ ምስሌከ፡ እምቅድመ፡ ይትፈጠር፡ ዓለም።
6 ወነገርኩ፡ ስመከ፡ ለሰብእ፡ ለእለ፡ ወሀብከኒ፡ እምዓለም። እስመ፡ እሊኣከ፡ እሙንቱ፡ ወሊተ፡ ወሀብከኒዮሙ፡ ወዐቀቡ፡ ቃለከ።
7 ወይእዜኒ፡ አእመሩ፡ ከመ፡ ኵሉ፡ ዘወሀብከኒ፡ እምኀቤከ፡ ውእቱ።
8 እስመ፡ ወሀብክዎሙ፡ ቃለ፡ ዘወሀብከኒ። ወእሙንቱሂ፡ ነሢኦሙ፡ አማን፡ አእመሩ፡ ከመ፡ እምኀቤከ፡ ወፃእኩ። ወአምኑ፡ ከመ፡ አንተ፡ ፈነውከኒ።
9 ወአንሰ፡ በእንቲኣሆሙ፡ እስእል፡ ወአኮ፡ በእንተ፡ ዓለም፡ ዘእስእለከ። አላ፡ በእንት፡ እለ፡ ወሀብከኒ፡ እስመ፡ እሊኣከ፡ እሙንቱ።
10 ወኵሉ፡ ዘዚኣየ፡ ዚኣከ፡ ውእቱ። ወዘዚኣከኒ፡ ዚኣየ፡ ውእቱ፡ ወተሰባሕኩ፡ ቦሙ።
11 ወኢይሄሉ፡ እንከ፡ ውስተ፡ ዓለም። ወእሙንቱሰ፡ ውስተ፡ ዓለም፡ ይሄልዉ፡ ወአንሰ፡ ኀቤከ፡ እመጽእ። ኦ፡ አባ፡ ቅዱስ፡ ዕቀቦሙ፡ በስምከ፡ ለእለ፡ ወሀብከኒ። ከመ፡ ይኩኑ፡ አሐደ፡ ብነ፡ ከማነ።
12 አመሰ፡ ሀሎኩ፡ አነ፡ ምስሌሆሙ፡ ውስተ፡ ዓለም። ዐቀብክዎሙ፡ በስምከ፡ ለእለ፡ ወሀብከኒ። ናሁ፡ ዐቀብክዎሙ፡ ወተማሐፀንክዎሙ። ወኢተሀጕለ፡ አሐዱሂ፡ እምኔሆሙ። ዘእንበለ፡ ወልደ፡ ሀጕል፡ ከመ፡ ይብጻሕ፡ ቃለ፡ መጽሐፍ።
13 ወይእዜሰ፡ ባሕቱ፡ እመጽእ፡ ኀቤከ። ወዘንተ፡ እነግር፡ ውስተ፡ ዓለም። ከመ፡ ይኩን፡ ፍሥሓየ፡ ፍጹመ፡ በላዕሌሆሙ።
14 ወአንሰ፡ ፈጺምየ፡ ወሀብክዎሙ፡ ቃለከ፡ ወዓለምሰ፡ ጸልኦሙ። እስመ፡ ኢኮኑ፡ እሙንቱ፡ እምዓለም። በከመ፡ ኢኮንኩ፡ አነ፡ እምዓለም።
15 አኮ፡ ዘእስእለከ፡ ከመ፡ ትንሥኦሙ፡ እምዓለም። ዘእንበለ፡ ዳእሙ፡ ከመ፡ ትዕቀቦሙ፡ እምእኩይ።
16 እስመ፡ እሙንቱ፡ ኢኮኑ፡ እምዓለም። በከመ፡ ኢኮንኩ፡ አነ፡ እምዓለም።
17 ቀድሶሙ፡ በጽድቅከ፡ እስመ፡ ጽድቅ፡ ውእቱ፡ ቃልከ።
18 በከመ፡ ፈነውከኒ፡ ውስተ፡ ዓለም፡ ኪያየ። አነኒ፡ ፈነውክዎሙ፡ ውስተ፡ ዓለም።
19 ወበእንቲኣሆሙ፡ አነ፡ እቄድስ፡ ርእስየ። ከመ፡ ይኩኑ፡ እሙንቱኒ፡ ቅዱሳነ፡ በጽድቅ።
20 ወአኮ፡ በእንተ፡ እሉ፡ ባሕቲቶሙ፡ ዘእስእለከ። አላ፡ በእንተሂ፡ እለ፡ የአምኑ፡ ብየ፡ በቃሎሙ።
21 ከመ፡ ይኩኑ፡ አሐደ፡ ኵሎሙ። በከመ፡ አንተ፡ አብ፡ ብየ፡ ወአነሂ፡ ብከ። ከመ፡ ይኩኑ፡ እሙንቱሂ፡ አሐደ፡ ብነ፡ ከማነ። ከመ፡ ይእመን፡ ዓለም፡ ከመ፡ አንተ፡ ፈነውከኒ።
22 ወአነሂ፡ ወሀብክዎሙ፡ ቃለከ፡ ዘወሀብከኒ። ከመ፡ ይኩኑ፡ አሐደ፡ ከማነ፡ በከመ፡ አሐዱ፡ ንሕነ።
23 ወአነሂ፡ ቦሙ፡ ወአንተሂ፡ ብየ፡ ከመ፡ ይኩኑ፡ ፍጹማነ፡ በአሐዱ። ከመ፡ ያእምር፡ ዓለም፡ ከመ፡ አንተ፡ ፈነውከኒ። ወአፍቀርክዎሙ፡ አነ፡ በከመ፡ ኪያየ፡ አፍቀርከኒ።
24 አባ፡ እለሰ፡ ወሀብከኒ፡ እፈቅድ፡ ከመ፡ የሀልዉ፡ ኀበ፡ ሀሎኩ፡ አነ፡ ምስሌየ። ከመ፡ ይርአዩ፡ ስብሐትየ፡ ዘወሀብከኒ። እስመ፡ አፍቀርከኒ፡ እምቅድመ፡ ይትፈጠር፡ ዓለም።
25 አባ፡ ጻድቅ፡ ወዓለምሰ፡ ኢያእመረከ፡ ወአንሰ፡ አእመርኩከ። ወእሉሂ፡ አእመሩከ፡ ከመ፡ አንተ፡ ፈነውከኒ።
26 ወነገርክዎሙ፡ ስመከ። ወዓዲ፡ እነግሮሙ፡ ከመ፡ የሀሉ፡ ኀቤሆሙ፡ ፍቅር፡ ዘአፍቀርከኒ። ወአነሂ፡ ምስሌሆሙ።
=== chapter 18 ===
[ምዕራፍ 18]
ዘከመ፡ ጸለየ፡ ኢየሱስ፡ በጌቴሰማኒ
1 ወዘንተ፡ ብሂሎ፡ ወፅአ፡ እግዚእ፡ ኢየሱስ፡ ምስለ፡ አርዳኢሁ፡ ማዕዶተ፡ ቄድሮስ፡ ፈለገ፡ አርዝ። ወቦቱ፡ ህየ፡ ገነት፡ ዐጸደ፡ ሐምል። ወቦአ፡ እግዚእ፡ ኢየሱስ፡ ውስቴታ፡ ምስለ፡ አርዳኢሁ።
2 ወየአምሮ፡ ይሁዳ፡ ዘያገብኦ፡ ለውእቱ፡ መካን። እስመ፡ ብዙኀ፡ ጊዜ፡ ይትኀባእ፡ እግዚእ፡ ኢየሱስ፡ ህየ፡ ምስለ፡ አርዳኢሁ።
ዘከመ፡ አግብኦ፡ ይሁዳ፡ ወዘከመ፡ አኀዝዎ፡ ለኢየሱስ
3 ወነሥኦሙ፡ ይሁዳ፡ ለሠገራተ፡ ሰጲራ፡ እምኀበ፡ ሊቃነ፡ ካህናት፡ ወፈሪሳውያን። ወነሥአ፡ ረድኤተ፡ ወዓልያኒሆሙ። ወሖረ፡ ህየ፡ በመኀትወ፡ ጽጕ፡ ወበፓናት፡ ወበንዋየ፡ ሐቅል።
4 ወአእሚሮ፡ እግዚእ፡ ኢየሱስ፡ ኵሎ፡ ዘይበጽሕ፡ ላዕሌሁ። ወፅአ፡ አፍኣ፡ ኀቤሆሙ፡ ወይቤሎሙ፡ መነ፡ ተኀሥሡ።
5 ወአውሥኡ፡ ወይቤልዎ፡ ኢየሱስሃ፡ ናዝራዌ። ወይቤሎሙ፡ እግዚእ፡ ኢየሱስ፡ አነ፡ ውእቱ። ወሀለወ፡ ይሁዳኒ፡ ዘያገብኦ፡ ይቀውም፡ ምስሌሆሙ።
6 ወሶበ፡ ይቤሎሙ፡ እግዚእ፡ ኢየሱስ፡ አነ፡ ውእቱ። ገብኡ፡ ድኅሬሆሙ፡ ወወድቁ፡ ዲበ፡ ምድር።
7 ወእምዝ፡ ካዕበ፡ ተስእሎሙ፡ ወይቤሎሙ። መነ፡ ተኀሥሡ፡ ወይቤልዎ፡ ኢየሱስሃ፡ ናዝራዌ።
8 ወአውሥአ፡ እግዚእ፡ ኢየሱስ፡ ወይቤሎሙ። አኮኑ፡ እቤለክሙ፡ አነ፡ ውእቱ። ወእመሰ፡ ኪያየ፡ ተኀሥሡ፡ ኅድግዎሙ፡ ለእለ፡ ይሑሩ።
9 ከመ፡ ይብጻሕ፡ ቃሉ፡ ዘይቤ። እለሰ፡ ወሀብከኒ፡ ኢተሀጕለ፡ ወኢ፡ አሐዱሂ፡ እምኔሆሙ።
10 ወቦ፡ መጥባሕት፡ ለስምዖን፡ ጴጥሮስ። ወመልኀ፡ መጥባሕቶ፡ ወዘበጦ፡ ለገብረ፡ ሊቀ፡ ካህናት። ወመተረ፡ እዝኖ፡ ዘየማን። ወስሙ፡ ለውእቱ፡ ገብር፡ ማልኮስ።
11 ወይቤሎ፡ እግዚእ፡ ኢየሱስ፡ ለጴጥሮስ። አግብኣ፡ ለመጥባሕትከ፡ ውስተ፡ ቤታ። ጽዋዐ፡ ዘወሀበኒ፡ አቡየ፡ ኢየኀድግ፡ ዘእንበለ፡ እስተይ።
ዘከመ፡ ቆመ፡ ኢየሱስ፡ ማእከለ፡ ዐውድ
12 ወአኀዝዎ፡ ለእግዚእ፡ ኢየሱስ፡ ሠገራተ፡ ሰጲራ። ወሊቀ፡ ዐሠርቱ፡ ምእት፡ ወወዓልያኒሆሙ፡ ለአይሁድ፡ ወኀመይዎ።
13 ወወሰድዎ፡ ኀበ፡ ሐና፡ ቀዲሙ፡ እስመ፡ ሐሙሁ፡ ውእቱ፡ ለቀያፋ። ወሊቀ፡ ካህናት፡ ዘዕብሬቱ፡ ይእቲ፡ ዓመት።
14 ወቀያፋሰ፡ ውእቱ፡ ዘአምከሮሙ፡ ለአይሁድ፡ ወይቤሎሙ። ይኄይስ፡ ይሙት፡ አሐዱ፡ ብእሲ፡ እምይትሀጐል፡ ኵሉ፡ ሕዝብ።
በእንተ፡ ክሕደተ፡ ጴጥሮስ
15 ወተለውዎ፡ ለእግዚእ፡ ኢየሱስ፡ እምርሑቅ፡ ስምዖን፡ ጴጥሮስ፡ ወካልእኒ፡ ረድእ። ወውእቱሰ፡ ረድእ፡ ልሙድ፡ በኀበ፡ ሊቀ፡ ካህናት። ወቦአ፡ ምስለ፡ እግዚእ፡ ኢየሱስ፡ ውስተ፡ ዐጸደ፡ ሊቀ፡ ካህናት።
16 ወጴጥሮስሰ፡ ቆመ፡ አፍኣ፡ ኀበ፡ ኆኅት። ወወፅአ፡ ዝኩ፡ ረድእ፡ ዘልሙድ፡ በኀበ፡ ሊቀ፡ ካህናት። ወተናገራ፡ ለዐጻዊት፡ ወአብኦ፡ ለጴጥሮስ።
17 ወትቤሎ፡ ይእቲ፡ አመት፡ ዐጻዊት፡ ለጴጥሮስ። አንተሂ፡ እምአርዳኢሁኒ፡ ለውእቱ፡ ብእሲ፡ አንተ። ወይቤላ፡ ውእቱኒ፡ ኢኮንኩ።
18 ወሀለዉ፡ ይቀውሙ፡ አግብርቲሆሙ፡ ወወዓልያኒሆሙ፡ ወይበቊጹ፡ አፍሐመ። ወይስኅኑ፡ እስመ፡ ብዙኅ፡ ቊራ፡ ለይእቲ፡ ሌሊት። ወይቀውም፡ ጴጥሮስኒ፡ ወይስኅን፡ ምስሌሆሙ።
ዘከመ፡ ተስእልዎ፡ አይሁድ፡ ለኢየሱስ
19 ወተስእሎ፡ ሊቀ፡ ካህናት፡ ለእግዚእ፡ ኢየሱስ፡ በእንተ፡ አርዳኢሁ፡ ወበእንተ፡ ትምህርቱ።
20 ወአውሥአ፡ እግዚእ፡ ኢየሱስ፡ ወይቤሎ። አንሰ፡ ክሡተ፡ ተናገርኩ፡ በውስተ፡ ዓለም። ወበኵሉ፡ ጊዜ፡ መሀርኩ፡ በምኵራብ። ወበቤተ፡ መቅደስ፡ ኀበ፡ ይትጋብኡ፡ ኵሎሙ፡ አይሁድ። ወአልቦ፡ ዘተናገርኩ፡ ጽሚተ፡ ወኢ፡ ምንተኒ።
21 ለምንት፡ እንከ፡ ትሴአለኒ፡ ሊተ፡ ተሰአሎሙ፡ ለእለ፡ ሰምዑኒ፡ ዘተናገርክዎሙ። እስመ፡ እሙንቱ፡ የአምሩ፡ ዘተናገርኩ፡ አነ።
22 ወዘንተ፡ ብሂሎ፡ ጸፍዖ፡ መልታሕቶ፡ ለእግዚእ፡ ኢየሱስ። አሐዱ፡ እምእለ፡ ይቀውሙ፡ ወዓልት። ወይቤሎ፡ ከመ፡ ዝኑ፡ ትትዋሥኦ፡ ለሊቀ፡ ካህናት።
23 ወአውሥአ፡ እግዚእ፡ ኢየሱስ፡ ወይቤሎ። እመሰ፡ እኩየ፡ ነበብኩ፡ ስምዐ፡ ኩን፡ ላዕሌየ፡ ወአስተዋድየኒ፡ በእንተ፡ እኩይ። ወእመሰ፡ ሠናየ፡ ነበብኩ፡ ለምንት፡ ትዘብጠኒ።
24 ወፈነዎ፡ ሐና፡ ኅሙዮ፡ ለእግዚእ፡ ኢየሱስ፡ ኀበ፡ ቀያፋ፡ ሊቀ፡ ካህናት።
25 ወሀሎ፡ ስምዖን፡ ጴጥሮስ፡ ይቀውም፡ ወይስኅን፡ ወይቤልዎ። አንተሂ፡ እምአርዳኢሁኑ፡ ለውእቱ፡ ብእሲ፡ አንተ። ወክሕደ፡ ወይቤ፡ ኢኮንኩ።
26 ወይቤሎ፡ አሐዱ፡ እምአግብርቲሁ፡ ለሊቀ፡ ካህናት። ዘእምአዝማዲሁ፡ ለዝኩ፡ ዘመተሮ፡ ጴጥሮስ፡ እዝኖ። አኮኑ፡ አነ፡ ርኢኩከ፡ ውስተ፡ ገነት፡ ምስሌሁ።
27 ወካዕበ፡ ክሕደ፡ ጴጥሮስ። ወሶቤሃ፡ ነቀወ፡ ዶርሆ።
ዘከመ፡ ቆመ፡ ኢየሱስ፡ ቅድመ፡ ጲላጦስ
28 ወወሰድዎ፡ ለእግዚእ፡ ኢየሱስ፡ እምኀበ፡ ቀያፋ፡ ኀበ፡ ዐውድ። ወጎህ፡ ውእቱ፡ ወኢቦኡ፡ አይሁድ፡ ውስተ፡ ዐውደ፡ ምኵናን። እስመ፡ ወድአ፡ ጸብሐ። ከመ፡ ኢይርኰሱ፡ እምቅድመ፡ ይብልዑ፡ ፍሥሐ።
29 ወወፅአ፡ ጲላጦስ፡ አፍኣ፡ ኀቤሆሙ፡ ወይቤሎሙ። ምንትኑ፡ ጌጋዩ፡ ለዝ፡ ብእሲ፡ በዘአምጻእክምዎ፡ ኀቤየ።
30 ወአውሥኡ፡ ወይቤልዎ፡ ሶበሰ፡ ኢኮነ፡ ገባሬ፡ እኪት፡ እምኢያግባእናሁ፡ ኀቤከ።
31 ወይቤሎሙ፡ ጲላጦስ፡ ንሥእዎ፡ አንትሙ፡ ወበከመ፡ ሕግክሙ፡ ኰንንዎ። ወይቤልዎ፡ አይሁድ፡ ለነሰ፡ ኢይከውነነ፡ ንቅትል፡ ወኢ፡ መነሂ።
32 ከመ፡ ይብጻሕ፡ ቃሉ፡ ለእግዚእ፡ ኢየሱስ፡ ዘይቤ። እንዘ፡ ይኤምሮሙ፡ በአይ፡ ሞት፡ ሀለዎ፡ ይሙት።
33 ወቦአ፡ ካዕበ፡ ጲላጦስ፡ ውስተ፡ ዐውድ። ወጸውዖ፡ ለእግዚእ፡ ኢየሱስ፡ ወይቤሎ። አንተኑ፡ ንጉሦሙ፡ ለአይሁድ።
34 ወአውሥአ፡ እግዚእ፡ ኢየሱስ፡ ወይቤሎ። ዘእምልብከኑ፡ ትብል፡ ዘንተ። ወሚመ፡ ቦኑ፡ ባዕድ፡ ዘነገረከ፡ በእንቲኣየ።
35 ወአውሥአ፡ ጲላጦስ፡ ወይቤሎ፡ አነሂ፡ አይሁዳዊኑ፡ አነ። አኮኑ፡ ሕዝብከ፡ ወሊቃነ፡ ካህናት፡ አግብኡከ፡ ኀቤየ፡ ምንተኑ፡ እግበርከ።
36 ወአውሥአ፡ እግዚእ፡ ኢየሱስ፡ ወይቤሎ። መንግሥትየሰ፡ ኢኮነት፡ እምዝንቱ፡ ዓለም። ሶበሰ፡ በዝንቱ፡ ዓለም፡ መንግሥትየ። እምተበአሱ፡ ሊተ፡ ወዐልያንየ፡ ከመ፡ ኢያግብኡኒ፡ አይሁድ፡ ኀቤከ። ወይእዜሰ፡ ባሕቱ፡ ኢኮነት፡ እም፡ ዝየ፡ መንግሥትየ።
37 ወይቤሎ፡ ጲላጦስ፡ እንከሰኬ፡ ንጉሥ፡ አንተ። ወአውሥአ፡ እግዚእ፡ ኢየሱስ፡ ወይቤሎ። ለሊከ፡ ትቤ፡ ከመ፡ ንጉሥ፡ አነ። ወአንሰ፡ በእንተ፡ ዝንቱ፡ ተወለድኩ። ወእንበይነ፡ ዝንቱ፡ መጻእኩ፡ ውስተ፡ ዓለም። ከመ፡ እኩን፡ ሰማዕተ፡ በጽድቅ። ወኵሉ፡ ዘእምጽድቅ፡ ውእቱ፡ ይሰምዐኒ፡ ቃልየ።
38 ወይቤሎ፡ ጲላጦስ፡ ምንትኑ፡ ውእቱ፡ ጽድቅ። ወዘንተ፡ ብሂሎ፡ ወፅአ፡ ካዕበ፡ ኀበ፡ አይሁድ፡ ወይቤሎሙ። አንሰ፡ አልቦ፡ ዘረከብኩ፡ ጌጋየ፡ ላዕሌሁ፡ ወኢ፡ አሐተኒ።
39 ወባሕቱ፡ ሀሎ፡ ዘናለምድ፡ ዘአሐዩ፡ ለክሙ፡ አሐደ፡ እምነ፡ ሙቁሓን፡ ለለ፡ ፋሲካ። ትፈቅዱኑ፡ እንከ፡ አሕይዎ፡ ለክሙ፡ ለንጉሠ፡ አይሁድ።
40 ወከልሑ፡ ካዕበ፡ ኵሎሙ፡ ወይቤሉ። አኮ፡ ዘንተ፡ ዘታሐዩ፡ አላ፡ በርባንሃ። ወበርባንሰ፡ ሊቀ፡ ፊያት፡ ውእቱ።
=== chapter 19 ===
[ምዕራፍ 19]
1 ወእምዝ፡ ነሥኦ፡ ጲላጦስ፡ ለእግዚእ፡ ኢየሱስ፡ ወቀሠፎ።
2 ወጸፈሩ፡ ሐራ፡ አክሊለ፡ ዘሦክ። ወአስተቀጸልዎ፡ ላዕለ፡ ርእሱ፡ ወአልበስዎ፡ ልብሰ፡ ሜላት።
3 ወይመጽኡ፡ ኀቤሁ፡ ወይብልዎ፡ በሓከ፡ ንጉሠ፡ አይሁድ። ወይጸፍዕዎ፡ ገጾ።
4 ወወፅአ፡ ካዕበ፡ ጲላጦስ፡ አፍኣ፡ ወይቤሎሙ። ናሁ፡ አወፅኦ፡ ለከሙ፡ አፍኣ። ከመ፡ ታእምሩ፡ ከመ፡ አልቦ፡ ዘረከብኩ፡ ላዕሌሁ፡ ጌጋየ፡ ወኢ፡ አሐተኒ።
5 ወወፅአ፡ እግዚእ፡ ኢየሱስ፡ አፍኣ። እንዘ፡ ይትቄጸል፡ አክሊለ፡ ዘሦክ፡ ወይለብስ፡ ሜላተ። ወይቤሎሙ፡ ጲላጦስ፡ ነዋ፡ ውእቱ፡ ብእሲ።
6 ወሶበ፡ ርእይዎ፡ ሊቃነ፡ ካህናት፡ ወወዓልያኒሆሙ፡ ከልሑ። ወይቤሉ፡ ስቅሎ፡ ስቅሎ። ወይቤሎሙ፡ ጲላጦስ፡ ንሥእዎ፡ ለሊክሙ፡ ወስቅልዎ። አንሰ፡ ኢረከብኩ፡ ላዕሌሁ፡ ጌጋየ።
7 ወአውሥኡ፡ አይሁድ፡ ወይቤልዎ። ንሕነሰ፡ ሕግ፡ ብነ፡ ወበከመ፡ ሕግነ፡ ርቱዕ፡ ይሙት። እስመ፡ ወልደ፡ እግዚአብሔር፡ ረሰየ፡ ርእሶ።
8 ወሰሚዖ፡ ጲላጦስ፡ ዘንተ፡ ነገረ፡ ፈርሀ፡ ፈድፋደ።
9 ወቦአ፡ ካዕበ፡ ኀበ፡ ዐውድ። ወይቤሎ፡ ለእግዚእ፡ ኢየሱስ፡ እምአይቴ፡ አንተ። ወኢተሰጥዎ፡ እግዚእ፡ ኢየሱስ፡ ወኢ፡ ምንተኒ።
10 ወይቤሎ፡ ጲላጦስ፡ ሊተሂ፡ ኢተነብበኒሁ። ኢተአምርሁ፡ ከመ፡ ብዉሕ፡ ሊተ፡ እቅትልከሂ፡ ወብዉሕ፡ ሊተ፡ አሕዩከሂ።
11 ወአውሥአ፡ እግዚእ፡ ኢየሱስ፡ ወይቤሎ። ኢኮንከ፡ ብዉሐ፡ ላዕሌየ፡ ወኢ፡ ምንተኒ። ሶበ፡ ኢተውህበ፡ ለከ፡ እምሰማይ። ወበእንተ፡ ዝንቱ፡ ለዘአግብአኒ፡ ኀቤከ፡ ዘየዐቢ፡ ጌጋይ፡ ላዕሌሁ።
12 ወበእንተ፡ ዝ፡ ፈቀደ፡ ጲላጦስ፡ ያሕይዎ። ወከልሑ፡ አይሁድ፡ ወይቤሉ። እመ፡ አሕየውኮ፡ ለዝንቱ፡ ኢኮንከ፡ ዐርኮ፡ ለቄሣር። እስመ፡ ኵሉ፡ ዘያነግሥ፡ ርእሶ፡ ዐላዌ፡ ነጋሢ፡ ውእቱ።
13 ወሰሚዖ፡ ጲላጦስ፡ ዘንተ፡ ነገረ፡ አውፅኦ፡ ለእግዚእ፡ ኢየሱስ፡ አፍኣ። ወነበረ፡ ዲበ፡ መንበር፡ ውስተ፡ መካን፡ ዘስሙ፡ ሊቶስጥሮስ። ወበዕብራይስጥ፡ ይብልዎ፡ ገቦታ።
14 ወዐርበ፡ ፋሲካ፡ ወውእቱ፡ ጊዜ፡ ቀትር፡ ዘስሱ፡ ሰዓት። ወይቤሎሙ፡ ጲላጦስ፡ ለአይሁድ፡ ነዋ፡ ንጉሥክሙ። ወከልሑ፡ ወይቤሉ፡ አእትቶ፡ ወስቅሎ።
15 ወይቤሎሙ፡ ጲላጦስ፡ ለንጉሥክሙኑ፡ እስቅሎ። ወአውሥኡ፡ ሊቃነ፡ ካህናት፡ ወይቤሉ፡ አልብነ፡ ንጉሥ፡ ዘእንበለ፡ ቄሣር።
16 ወእምዝ፡ ወሀቦሙ፡ ይስቅልዎ፡ ወተመጠውዎ፡ ለእግዚእ፡ ኢየሱስ። ወአውፅእዎ፡ አፍኣ።
17 ወወሰድዎ፡ እንዘ፡ ይጸውር፡ መስቀሎ፡ ውስተ፡ መካን፡ ዘስሙ፡ ቀራንዮ።
18 ወበዕብራይስጥ፡ ይብልዎ፡ ጎልጎታ፡ ኀበ፡ ሰቀልዎ። ወሰቀሉ፡ ምስሌሁ፡ ካልኣነ፡ ክልኤተ፡ ፈያት። አሐደ፡ እምለፌ፡ ወአሐደ፡ እምለፌ፡ ወማእከሎሙ፡ ኢየሱስሃ።
19 ወጸሐፈ፡ ጲላጦስ፡ መጽሐፈ፡ ወአንበረ፡ ዲበ፡ መስቀሉ። ወይብል፡ መጽሐፉ፡ ኢየሱስ፡ ናዝራዊ፡ ንጉሦሙ፡ ለአይሁድ፡ ውእቱ፡ ዝንቱ።
20 ወብዙኃን፡ እምአይሁድ፡ እለ፡ አንበብዋ፡ ለይእቲ፡ መጽሐፍ። እስመ፡ ቅሩብ፡ ውእቱ፡ መካን፡ ለሀገር፡ ኀበ፡ ሰቀልዎ፡ ለእግዚእ፡ ኢየሱስ። ወጽሕፈቱ፡ ጽሑፍ፡ ውእቱ፡ በዕብራይስጥ፡ ወበሮማይስጥ፡ ወበጽርእ።
21 ወይቤልዎ፡ ሊቃነ፡ ካህናት፡ ለጲላጦስ። ኢትጽሐፍ፡ ንጉሥሙ፡ ለአይሁድ። አላ፡ ለሊሁ፡ ይቤ፡ ንጉሦሙ፡ ለአይሁድ፡ አነ።
22 ወአውሥአ፡ ጲላጦስ፡ ወይቤሎሙ፡ ዘጸሐፍኩ፡ ጸሐፍኩ።
23 ወሐራሰ፡ ሶበ፡ ሰቀልዎ፡ ለእግዚእ፡ ኢየሱስ፡ ነሥኡ፡ አልባሲሁ። ወረሰይዎ፡ አርባዕተ፡ ክፍለ፡ ለለ፡ አሐዱ፡ እምሐራ። ወክዳኖሂ፡ አልታሕ፡ ዘአልቦ፡ ርፍአተ፡ ዘእምላዕሉ፡ እንመቱ።
24 ወተባሀሉ፡ በበይናቲሆሙ፡ ኢንግምድ፡ ወኢንስጥጥ። አላ፡ ንትፋሰስ፡ ለዘረከኮ፡ ይርከቦ። ከመ፡ ይብጻሕ፡ ቃለ፡ መጽሐፍ፡ ዘይቤ። ተካፈሉ፡ አልባስየ፡ ለርእሶሙ፡ ወተዐፀዉ፡ ዲበ፡ ዐራዝየ። ወከመ፡ ዝ፡ ገብሩ፡ ሐራ።
25 ወይቀውማ፡ ኀበ፡ መስቀሉ፡ ለእግዚእ፡ ኢየሱስ። እመ፡ ወእኅታ፡ ለእመ፡ ወማርያም፡ እንተ፡ ቀለዮጳ፡ ወማርያም፡ መግደላዊት።
26 ወሶበ፡ ርእዮሙ፡ እግዚእ፡ ኢየሱስ፡ ለእሙ፡ ወለረድኡ፡ ዘያፈቅር፡ ይቀውሙ። ይቤላ፡ ለእሙ፡ ብእሲቶ፡ ነዋ፡ ወልድኪ።
27 ወይቤሎ፡ ለውእቱኒ፡ ረድኡ፡ ነያ፡ እምከ። ወእምይእቲ፡ ሰዓት፡ ነሥኣ፡ ውእቱ፡ ረድእ፡ ወአእተዋ፡ ቤቶ።
28 ወእምዝ፡ ሶበ፡ ርእየ፡ እግዚእ፡ ኢየሱስ፡ ከመ፡ ተፈጸመ፡ ኵሉ። ከመ፡ ይብጻሕ፡ ቃለ፡ መጽሐፍ፡ ይቤ፡ ጸማእኩ።
29 ወቦ፡ ህየ፡ ግምዔ፡ ዘምሉእ፡ ብኂአ። ወመልኡ፡ ሰፍነገ፡ እምውእቱ፡ ብኂእ። ወአሰሩ፡ በቈጽለ፡ ሁስጱ፡ ዲበ፡ ሕለት፡ ወአስተርከቡ፡ ውስተ፡ አፉሁ፡ ወዐጸሩ።
30 ወሠሪቦ፡ ብኂአ፡ እግዚእ፡ ኢየሱስ፡ ይቤ፡ ተፈጸመ፡ ኵሉ። ወአጽነነ፡ ርእሶ፡ ወመጠወ፡ ነፍሶ።
31 ወአይሁድሰ፡ እስመ፡ ዐርብ፡ ውእቱ፡ ይቤሉ። እላንቱ፡ ሥጋት፡ ኢይቢታ፡ ዲበ፡ መሳቅሊሆን፡ በእንተ፡ ሰንበት። እስመ፡ ዐባይ፡ ዕለታ፡ ለይእቲ፡ ሰንበት። ወሰአልዎ፡ ለጲላጦስ፡ ከመ፡ ይስብሩ፡ ቊየጺሆሙ፡ ወያውርድዎሙ።
32 ወሖሩ፡ ሐራ፡ ወሰበሩ፡ ቊይጾ፡ ለቀዳማዊ፡ ወለካልኡኒ፡ እለ፡ ተሰቅሉ፡ ምስሌሁ።
33 ወሶበ፡ ሖሩ፡ ኀበ፡ እግዚእ፡ ኢየሱስ፡ ርእይዎ፡ ከመ፡ ሠለጠ፡ መዊተ። ወኢሰበሩ፡ ቊይጾ።
34 አላ፡ አሐዱ፡ እምሐራ፡ ረገዞ፡ ገቦሁ፡ ዘየማን፡ በኵናት። ወሶቤሃ፡ ወፅአ፡ እምኔሁ፡ ደም፡ ወማይ።
35 ወዘርእየ፡ ስምዐ፡ ኮነ፡ ወጽድቅ፡ ውእቱ፡ ስምዑ። ወአእመረ፡ ውእቱ፡ ከመ፡ ጽድቀ፡ ይነግር፡ ከመ፡ አንትሙሂ፡ ትእመኑ።
36 ወዝንቱ፡ ኵሉ፡ ዘኮነ፡ ከመ፡ ይብጻሕ፡ ቃለ፡ መጽሐፍ፡ ዘይቤ። ዐፅሞ፡ ኢትስብሩ፡ እምኔሁ።
37 ወካዕበ፡ ይብል፡ ካልእኒ፡ መጽሐፍ። ሀለዎሙ፡ ይርአይዎ፡ ለዘወግእዎ።
በእንተ፡ ዘከመ፡ ሰአለ፡ ሥጋሁ፡ ለእግዚእነ፡ ዮሴፍ
38 ወእምድኅረ፡ ዝንቱ፡ ሰአሎ፡ ለጲላጦስ፡ ዮሴፍ፡ ዘአርማትያስ። ዘኮነ፡ ረድኦ፡ ለእግዚእ፡ ኢየሱስ፡ በኅቡእ፡ በእንተ፡ ፍርሀቶሙ፡ ለአይሁድ። ከመ፡ ይንሣእ፡ ሥጋሁ፡ ለእግዚእ፡ ኢየሱስ። ወአብሖ፡ ጲላጦስ፡ ወሖረ፡ ውእቱኒ፡ ወነሥአ፡ ሥጋሁ፡ ለእግዚእ፡ ኢየሱስ።
39 ወመጽአ፡ ኒቆዲሞስኒ፡ ዘሖረ፡ ኀቤሁ፡ ለእግዚእ፡ ኢየሱስ፡ ቀዲሙ፡ ሌሊተ። ወአምጽአ፡ ምእተ፡ ልጥረ፡ ከርቤ፡ ወዓልወ፡ ሕውሰ፡ በዘቦቱ፡ ይቀብርዎ።
40 ወነሥኡ፡ ሥጋሁ፡ ለእግዚእ፡ ኢየሱስ። ወገነዝዎ፡ በመዋጥሐ፡ ክታን፡ ዘሰንዱናት፡ ምስለ፡ አፈው። በከመ፡ ሕገ፡ አይሁድ፡ ሶበ፡ ይገንዙ፡ ወይቀብሩ።
41 ወቦ፡ ህየ፡ ገነት፡ ውስተ፡ ውእቱ፡ መካን፡ ኀበ፡ ሰቀልዎ። ወውስተ፡ ውእቱ፡ ገነት፡ ዝኅር፡ ሐዲስ፡ ዘአልቦ፡ ዘተቀብረ፡ ውስቴቱ።
42 ወህየ፡ ቀበርዎ፡ ለእግዚእ፡ ኢየሱስ። እስመ፡ ተፍጻሜተ፡ ዐርቦሙ፡ ውእቱ፡ ለአይሁድ። ወቅሩብ፡ ውእቱ፡ መቃብር፡ ኀበ፡ ሰቀልዎ።
=== chapter 20 ===
[ምዕራፍ 20]
ዘከመ፡ ሖሩ፡ ማርያም፡ መግደላዊት፡ ወጴጥሮስ፡ ወዮሐንስ፡ ውስተ፡ መቃብር
1 ወበእሑድ፡ ሰንበት፡ መጽአት፡ ማርያም፡ መግደላዊት፡ በጽባሕ፡ ኀበ፡ መቃብር። እንዘ፡ ዓዲሁ፡ ጽልመት። ወረከበት፡ እብነ፡ እቱተ፡ እምአፈ፡ መቃብር።
2 ወሮጸት፡ ወበጽሐት፡ ኀበ፡ ስምዖን፡ ጴጥሮስ። ወኀበ፡ ዝኩ፡ ካልእ፡ ረድእ፡ ዘያፈቅሮ፡ እግዚእ፡ ኢየሱስ። ወትቤሎሙ፡ ነሥእዎ፡ ለእግዚእየ፡ እምውስተ፡ መቃብር። ወኢየአምር፡ ኀበ፡ ወሰድዎ።
3 ወወፅኡ፡ ጴጥሮስ፡ ወዝኩ፡ ካልእ፡ ረድእ። ወሖሩ፡ ኀበ፡ መቃብር።
4 ወእንዘ፡ ይረውጹ፡ ክልኤሆሙ፡ ኅቡረ። በደሮ፡ ለጴጥሮስ፡ ዝኩ፡ ካልእ፡ ረድእ፡ በጺሖ፡ ኀበ፡ መቃብር።
5 ወሶበ፡ ሐወጸ፡ ርእየ፡ መዋጥሐ፡ ንቡረ፡ ወኢቦአ፡ ባሕቱ።
6 ወተለዎ፡ ስምዖን፡ ጴጥሮስ፡ ወበጽሐ፡ ወቦአ፡ ውስተ፡ መቃብር። ወረከበ፡ መዋጥሐ፡ ንቡረ፡ ውስተ፡ አሐዱ፡ ገጽ።
7 ወሰበነኒ፡ ዘዲበ፡ ርእሱ፡ እንተ፡ ባሕቲቱ፡ ጥብሉለ። ወአኮ፡ ምስለ፡ መዋጥሕ።
8 ወእምዝ፡ ቦአ፡ ዝኩኒ፡ ካልእ፡ ረድእ፡ ዘበደሮ፡ በጺሐ፡ ኀበ፡ መቃብር። ወርእዩ፡ ወአምኑ።
9 እስመ፡ ዓዲሁ፡ ኢያእመሩ፡ ዘውስተ፡ መጻሕፍት። ከመ፡ ሀለዎ፡ ይትነሣእ፡ እምነ፡ ምዉታን።
10 ወእምዝ፡ ሖሩ፡ ክልኤሆሙ፡ አርዳኢሁ፡ ወአተዉ፡ ቤቶሙ።
ዘከመ፡ አስተርአያ፡ እግዚእ፡ ኢየሱስ፡ ለማርያም፡ መግደላዊት
11 ወማርያምሰ፡ ቆመት፡ ኀበ፡ መቃብር፡ አፍኣ፡ ወትበኪ። ወእንዘ፡ ትበኪ፡ ሐወጸት፡ ውስተ፡ መቃብር።
12 ወርእየት፡ ክልኤተ፡ መላእክተ፡ በጸዐድው፡ አልባስ። ወይነብሩ፡ አሐዱ፡ ትርአሰ፡ ወአሐዱ፡ ትርጋፀ። ኀበ፡ ነበረ፡ ሥጋሁ፡ ለእግዚእ፡ ኢየሱስ።
13 ወይቤልዋ፡ እሙንቱ፡ መላእክት፡ ምንት፡ ያበክየኪ፡ ኦ፡ ብእሲቶ። ወመነ፡ ተኀሥሢ። ወትቤሎሙ፡ ነሥእዎ፡ ለእግዚእየ፡ እምውስተ፡ መቃብር። ወኢየአምር፡ ኀበ፡ ወሰድዎ።
14 ወዘንተ፡ ብሂላ፡ ተመይጠት፡ ድኅሬሃ። ወርእየቶ፡ ለእግዚእ፡ ኢየሱስ፡ እንዘ፡ ይቀውም። ወኢያእመረት፡ ከመ፡ እግዚእ፡ ኢየሱስ፡ ውእቱ።
15 ወይብላ፡ እግዚእ፡ ኢየሱስ፡ ብእሲቶ፡ ምንት፡ ያበክየኪ። ወመነ፡ ተኀሥሢ። ወመሰላ፡ ላቲሰ፡ ዐቃቤ፡ ገነት፡ ውእቱ። ወትቤሎ፡ እግዚእየ፡ እመኒ፡ እንተ፡ ነሣእኮ፡ ንግረኒ፡ ኀበ፡ ወሰድኮ። ከመ፡ እሑር፡ አነ፡ ወእንሥኦ፡ ኀቤየ፡ ወእቅብዖ፡ ዕፍረት።
16 ወይቤላ፡ እግዚእ፡ ኢየሱስ፡ ማርያም። ወተመይጠት፡ ወትቤሎ፡ በነገረ፡ ዕብራይስጥ፡ ረቡኒ። ዘበትርጓሜሁ፡ ሊቅ፡ ብሂል።
17 ወይቤላ፡ እግዚእ፡ ኢየሱስ፡ ኢትልክፍኒ፡ እስመ፡ ዓዲ፡ ኢዐረጉ፡ ኀበ፡ አቡየ። ወሑሪ፡ ባሕቱ፡ ኀበ፡ አኀውየ። ወበሊዮሙ፡ አዐርግ፡ ኀበ፡ አቡየ፡ ወአቡክሙ፡ ኀበ፡ አምላክየ፡ ወአምላክክሙ።
18 ወሖረት፡ ማርያም፡ መግደላዊት፡ ወአብሠረቶሙ፡ ለአርዳኢሁ። ወትቤሎሙ፡ ርኢክዎ፡ ለእግዚእነ፡ ወነገረቶሙ፡ ዘከመ፡ ይቤላ።
ዘከመ፡ አስተርአዮሙ፡ እግዚእ፡ ኢየሱስ፡ ለሐዋርያት
19 ወመስዮ፡ በይእቲ፡ ዕለት፡ ዘውእቱ፡ እሑድ፡ ሰንበት። እንዘ፡ ዕጽው፡ ኆኅት፡ ኀበ፡ ሀለዉ፡ አርዳኢሁ፡ ጉቡኣነ። በእንተ፡ ፍርሀቶሙ፡ ለአይሁድ። መጽአ፡ እግዚእ፡ ኢየሱስ፡ ወቆመ፡ ማእከሎሙ። ወይቤሎሙ፡ ሰላም፡ ለክሙ።
20 ወዘንተ፡ ብሂሎ፡ አርአዮሙ፡ እደዊሁ፡ ወእገሪሁ፡ ወገቦሁ። ወተፈሥሑ፡ አርዳኢሁ፡ ሶበ፡ ርእይዎ፡ ለእግዚእነ።
21 ወይቤሎሙ፡ ካዕበ፡ እግዚእ፡ ኢየሱስ፡ ሰላም፡ ለክሙ። ወበከመ፡ ፈነወኒ፡ አብ፡ ከማሁ፡ አነሂ፡ እፌንወክሙ።
22 ወዘንተ፡ ብሂሎ፡ ነፍኀ፡ ላዕሌሆሙ። ወይቤሎሙ፡ ንሥኡ፡ መንፈሰ፡ ቅዱሰ።
23 ለእለ፡ ኀደግሙ፡ ኀጢአት፡ ይትኀደግ፡ ሎሙ። ወለእለሰ፡ ኢኀደግሙ፡ ኢይትኀደግ፡ ሎሙ።
ዘከመ፡ ተጠየቀ፡ ቶማስ
24 ወቶማስ፡ አሐዱ፡ እምዐሠርቱ፡ ወአሐዱ፡ አርዳኢሁ፡ ዘይብልዎ፡ ዲዲሞስ። ኢሀሎ፡ ምስሌሆሙ፡ ሶበ፡ መጽአ፡ እግዚእ፡ ኢየሱስ።
25 ወይቤልዎ፡ ካልኣኒሁ፡ አርዳእ፡ ርኢናሁ፡ ለእግዚእነ። ወይቤሎሙ፡ እመ፡ ኢርኢኩ፡ እደዊሁ፡ ወእገሪሁ፡ ኀበ፡ ቀነውዎ። ወእመ፡ ኢወደይኩ፡ አጽባዕትየ፡ ውስተ፡ ቅንዋቲሁ። ወእመ፡ ኢያባእኩ፡ እዴየ፡ ውስተ፡ ገቦሁ፡ ኢየአምን።
26 ወእምድኅረ፡ ሰሙን፡ መዋዕል፡ እንዘ፡ ሀለዉ፡ ካዕበ፡ አርዳኢሁ፡ ውስጠ። ወቶማስኒ፡ ሀሎ፡ ምስሌሆሙ፡ እንዘ፡ ዕጽው፡ ኆኅት። መጽአ፡ እግዚእ፡ ኢየሱስ፡ ወቆመ፡ ማእከሎሙ። ወይቤሎሙ፡ ሰላም፡ ለክሙ።
27 ወእምዝ፡ ይቤሎ፡ ለቶማስ፡ አምጽእ፡ አጽባዕተከ፡ ዝየ። ወርኢ፡ እደውየ፡ ወእገርየ። ወሀብ፡ እዴከ፡ ወአብእ፡ ውስተ፡ ገቦየ። ወኢትኩን፡ ናፋቄ፡ አላ፡ እመን።
28 ወአውሥአ፡ ቶማስ፡ ወይቤሎ፡ እግዚእየ፡ ወአምላክየ። ወይቤሎ፡ እግዚእ፡ ኢየሱስ፡ እስመ፡ ርኢከኒሁ፡ አመንከኒ።
29 ብፁዓንሰ፡ እለ፡ እንዘ፡ ኢይሬእዩኒ፡ የአምኑኒ።
30 ወብዙኃተ፡ ካልኣተ፡ ተኣምራተ፡ ገብረ፡ እግዚእ፡ ኢየሱስ፡ በቅድመ፡ አርዳኢሁ። ዘኢተጽሕፈ፡ ውስተ፡ ዝንቱ፡ መጽሐፍ።
31 ወዝንቱሰ፡ ተጽሕፈ፡ እምኔሆን፡ ከመ፡ ትእመኑ፡ አንትሙ። ከመ፡ ኢየሱስ፡ ክርስቶስ፡ ውእቱ፡ ወልደ፡ እግዚአብሔር። ወአሚነክሙ፡ ሕይወተ፡ ዘለዓለም፡ ትርከቡ፡ በስመ፡ ዚኣሁ።
=== chapter 21 ===
[ምዕራፍ 21]
ዘከመ፡ አስተርአዮሙ፡ እግዚእ፡ ኢየሱስ፡ ለሐዋርያት፡ በብሔረ፡ ጥብርያዶስ
1 ወእምዝ፡ ካዕበ፡ አስተርአዮሙ፡ እግዚእ፡ ኢየሱስ፡ ለአርዳኢሁ፡ በብሔረ፡ ጥብርያዶስ።
2 ወከመ፡ ዝ፡ አስተርአዮሙ፡ እንዘ፡ ሀለዉ፡ ኅቡረ፡ ስምዖን፡ ጴጥሮስ። ወቶማስ፡ ዘይብልዎ፡ ዲዲሞስ። ወናትናኤል፡ ዘቃና፡ ዘገሊላ፡ ወደቂቀ፡ ዘብዴዎስ። ወዓዲ፡ ካልኣን፡ ክልኤቱ፡ እምውስተ፡ አርዳኢሁ።
3 ወይቤሎሙ፡ ስምዖን፡ ጴጥሮስ፡ አንሰ፡ አሐውር፡ ከመ፡ እሥግር፡ ዓሣ። ወይቤልዎ፡ ካልኣኒሁ፡ አርድእ፡ ንሕነኒ፡ ንመጽእ፡ ምስሌከ። ወሖሩ፡ ወዐርጉ፡ ሐመረ። ወአልቦ፡ ዘአሥገሩ፡ በይእቲ፡ ሌሊት፡ ወኢ፡ ምንተኒ።
4 ወጸቢሖ፡ ይቀውም፡ እግዚእ፡ ኢየሱስ፡ ውስተ፡ ሐይቅ። ወርእይዎ፡ አርዳኢሁ፡ ወኢያእመሩ፡ ከመ፡ እግዚእ፡ ኢየሱስ፡ ውእቱ።
5 ወይቤሎሙ፡ እግዚእ፡ ኢየሱስ፡ ደቂቅየ፡ ቦኑ፡ ብክሙ፡ ዘንበልዕ። ወይቤልዎ፡ አልቦ።
6 ወይቤሎሙ፡ እግዚእ፡ ኢየሱስ፡ አውርዱ፡ መሣግሪክሙ፡ ኀበ፡ ይምነ፡ ሐመር። ወትረክቡ፡ ብዙኀ። ወይቤልዎ፡ ሰራሕነ፡ ኵላ፡ ሌሊተ። ወአልቦ፡ ዘረከብነ፡ ወኢ፡ ምንተኒ። ወበቃልከሰ፡ ናወርድ። ወአውሪዶሙ፡ መሣግሪሆሙ፡ ስእኑ፡ እንከ፡ ስሒበ፡ እምብዝኀ፡ ዓሣት፡ ዘተሠግረ።
7 ወይቤሎ፡ ለጴጥሮስ፡ ዝኩ፡ ካልእ፡ ረድእ፡ ዘያፈቅሮ፡ እግዚእ፡ ኢየሱስ። እግዚእነ፡ ውእቱ። ወሰሚዖ፡ ስምዖን፡ ጴጥሮስ፡ ከመ፡ እግዚእነ፡ ውእቱ። ነሥአ፡ ዐራዘ፡ ሰንዱነ፡ ዘይትዐጸፍ፡ ወቀነተ፡ ውስተ፡ ሐቌሁ። እስመ፡ ዕራቁ፡ ውእቱ፡ ወተወርወ፡ ውስተ፡ ባሕር።
8 ወካልኣንሰ፡ አርዳእ፡ በሐመር፡ በጽሑ። እስመ፡ ኢኮኑ፡ ርሑቃነ፡ እምድር፡ ዘእንበለ፡ መጠነ፡ ክልኤ፡ ምእት፡ በእመት። ወሖሩ፡ እንዘ፡ ይስሕቡ፡ መሣግሪሆሙ፡ ዘውስቴቶን፡ ዓሣት።
9 ወወሪዶሙ፡ ምድረ፡ ረከቡ፡ ፍሕመ፡ ብቊጸ፡ ወዓሣ፡ ጥቡሰ፡ ወኅብስተ፡ ሥሩዐ።
10 ወይቤሎሙ፡ እግዚእ፡ ኢየሱስ፡ አምጽኡ፡ እምዓሣት፡ ዘአኀዝክሙ፡ ይእዜ።
11 ወዐርገ፡ ስምዖን፡ ጴጥሮስ፡ ውስተ፡ ሐመር። ወሰሐበ፡ መሥገርተ፡ ውስተ፡ ምድር። ወምሉእ፡ ውስቴቱ፡ ዓሣተ፡ ዐበይተ፡ ምእተ፡ ወኀምሳ፡ ወሠለስተ። ወእንዘ፡ መጠነ፡ ዝ፡ ብዝኁ፡ ኢተሰጠ፡ መሥገርቱ።
12 ወይቤሎሙ፡ እግዚእ፡ ኢየሱስ፡ ንዑ፡ ንምሳሕ። ወአልቦ፡ ዘተኀበለ፡ እምአርዳኢሁ፡ ይሰአሎ፡ ወይበሎ፡ መኑ፡ አንተ። እስመ፡ አእመሩ፡ ከመ፡ እግዚእነ፡ ውእቱ።
13 ወመጽአ፡ እግዚእ፡ ኢየሱስ፡ ወነሥአ፡ ኅብስተ። ወወሀቦሙ፡ ወእምዓሣሁኒ፡ ከማሁ።
14 ወዝንቱ፡ ሣልሱ፡ እንዘ፡ ያስተርእዮሙ፡ እግዚእ፡ ኢየሱስ፡ ለአርዳኢሁ። ተንሢኦ፡ እምነ፡ ምዉታን።
ዘከመ፡ ተሰይመ፡ ጴጥሮስ፡ ርእሰ፡ ሐዋርያት
15 ወእምድኅረ፡ መስሑ፡ ይቤሎ፡ እግዚእ፡ ኢየሱስ፡ ለስምዖን፡ ጴጥሮስ። ስምዖን፡ ወልደ፡ ዮና፡ ታፈቅረኒኑ፡ ፈድፋደ፡ እምእሉ። ወይቤሎ፡ እወ፡ እግዚኦ፡ ለሊከ፡ ተአምር፡ ከመ፡ አነ፡ አፈቅረከ። ወይቤሎ፡ እግዚእ፡ ኢየሱስ፡ ረዐይኬ፡ አባግዕየ።
16 ወካዕበ፡ ይብሎ፡ ዳግመ፡ ስምዖን፡ ወልደ፡ ዮና፡ ታፈቅረኒኑ። ወይቤሎ፡ እወ፡ እግዚኦ፡ አንተ፡ ተአምር፡ ከመ፡ አነ፡ አፈቅረከ። ወይቤሎ፡ ረዐይኬ፡ መሐስእየ።
17 ወይቤሎ፡ ሣልሰ፡ ስምዖን፡ ወልደ፡ ዮና፡ ታፈቅረኒኑ። ወተከዘ፡ ጴጥሮስ፡ እስመ፡ ይቤሎ፡ ሥልሰ፡ ታፈቅረኒኑ። ወይቤሎ፡ እግዚኦ፡ ለሊከ፡ ተአምር፡ ኵሎ፡ ወለሊከ፡ ትጤይቅ፡ ከመ፡ አነ፡ አፈቅረከ። ወይቤሎ፡ ረዐይኬ፡ አባግዕትየ።
18 አማን፡ አማን፡ እብለከ። አመ፡ ወሬዛ፡ አንተ፡ ለሊከ፡ ትቀንተ፡ ሐቌከ። ወተሐውር፡ ኀበ፡ ፈቀድከ። ወአመሰ፡ ልህቀ፡ ታነሥእ፡ እደዊከ፡ ወባዕድ፡ ያቀንተከ፡ ሐቌከ። ወይወስደከ፡ ኀበ፡ ኢፈቀድከ።
19 ወዘንተ፡ ይቤሎ፡ እንዘ፡ ይኤምሮ፡ በአይ፡ ሞት፡ ሀለዎ፡ ይሰብሖ፡ ለእግዚአብሔር። ወዘንተ፡ ብሂሎ፡ ይቤሎ፡ ትልወኒ።
20 ወተመይጦ፡ ጴጥሮስ፡ ርእዮ፡ ለዝኩ፡ ረድእ፡ ዘያፈቅሮ፡ እግዚእ፡ ኢየሱስ፡ እንዘ፡ ይተልዎ። ወውእቱ፡ ረድእ፡ ዘረፈቀ፡ ዲበ፡ እንግድዓሁ፡ ለእግዚእ፡ ኢየሱስ፡ እንዘ፡ ይዴረሩ። ወዘይቤሎ፡ እግዚኦ፡ መኑ፡ ውእቱ፡ ዘያገብአከ።
21 ወኪያሁ፡ ርእዮ፡ ጴጥሮስ፡ ይቤሎ፡ ለእግዚእ፡ ኢየሱስ። እግዚኦ፡ ዝኬ፡ እፎ።
22 ወይቤሎ፡ እግዚእ፡ ኢየሱስ። እመኬ፡ ፈቀድኩ፡ የሀሉ፡ እስከ፡ ሶበ፡ እመጽእ፡ ሚ፡ ላዕሌከ። ወአንተሰ፡ ትልወኒ።
23 ወወፅአ፡ ዝንቱ፡ ነገር፡ በኀበ፡ አኀው፡ ከመ፡ ውእቱ፡ ረድእ፡ ኢይመውት። ወባሕቱ፡ እግዚእ፡ ኢየሱስ፡ ኢይቤሎ፡ ኢይመውት። አላ፡ ይቤ፡ አመ፡ ፈቀድኩ፡ የሀሉ፡ እስከ፡ ሶበ፡ እመጽእ፡ ሚ፡ ላዕሌከ።
24 ወዝንቱ፡ ውእቱ፡ ረድእ፡ ዘኮነ፡ ሰማዕተ፡ በእንተ፡ ዝ። ወዘሂ፡ ጸሐፈ፡ በእንቲኣሁ፡ ዘንተ። ወንሕነ፡ ነአምር፡ ከመ፡ ጽድቅ፡ ውእቱ፡ ስምዑ።
25 ወዘንተ፡ ገብረ፡ እግዚእ፡ ኢየሱስ። ወቦ፡ ባዕዳትኒ፡ ብዙኃት፡ ግብራት፡ ዘገብረ፡ እግዚእ፡ ኢየሱስ። ወሶበ፡ ተጽሕፈ፡ ኵሉ፡ በበ፡ አሐዱ፡ እምኢያግመሮ፡ ዓለም፡ ጥቀ፡ መጻሕፍቲሁ፡ ዘተጽሕፈ።