##### edition  (gez) — Text of the EOTC printed Bible
=== chapter 1 ===
[ምዕራፍ 1]
በእንተ፡ ጽሒፈ፡ ዜና
1 እስመ፡ ብዙኃን፡ እለ፡ ወጠኑ፡ ይንግሩ። ወይምሀሩ፡ በእንተ፡ ግብር፡ ዘአምኑ፡ በላዕሌነ።
2 በከመ፡ መሀሩነ፡ እለ፡ ቀደሙነ፡ ርእዮቶ፡ ወተልእክዎ፡ ለቃሉ።
3 ወረትዐኒ፡ ሊተኒ፡ እትልዎ፡ እምጥንቱ። ወጥዩቀ፡ ኵሎ፡ በበ፡ መትልው፡ እጽሐፍ፡ ለከ፡ ኦ፡ አዚዝ፡ ታኦፊላ።
4 ከመ፡ ታእምር፡ ጥዩቀ፡ በእንተ፡ ኵሉ፡ ኀይለ፡ ነገር፡ ትምህርተ፡ ዘተመሀርከ።
ዘከመ፡ አይድዐ፡ ገብርኤል፡ ልደቶ፡ ለዮሐንስ
5 ወኮነ፡ በመዋዕለ፡ ሄሮድስ፡ ንጉሠ፡ ይሁዳ። ሀሎ፡ አሐዱ፡ ካህን፡ ዘስሙ፡ ዘካርያስ፡ በመዋዕለ፡ አብያ። ወብእሲቱኒ፡ እምአዋልደ፡ አሮን፡ ወስማ፡ ኤልሳቤጥ።
6 ወክልኤሆሙ፡ ጻድቃን፡ እሙንቱ፡ በቅድመ፡ እግዚአብሔር። ወየሐውሩ፡ በኵሉ፡ ትእዛዙ፡ ወሕጉ፡ ወኵነኔሁ፡ ለእግዚአብሔር። ወንጹሓን፡ እሙንቱ፡ እምኀጢአት።
7 ወባሕቱ፡ አልቦሙ፡ ውሉድ፡ እስመ፡ መካን፡ ይእቲ፡ ኤልሳቤጥ። ወክልኤሆሙ፡ ልሂቃን፡ እሙንቱ፡ ወኀለፈ፡ መዋዕሊሆሙ።
8 ወእምዝ፡ አመ፡ ይገብር፡ ግብረ፡ ክህነት። በዕብሬቱ፡ ቅድመ፡ እግዚአብሔር።
9 በከመ፡ ይገብሩ፡ ካህናት፡ በጽሐ፡ ጊዜ፡ የዐጥን። ወቦአ፡ ቤተ፡ መቅደሱ፡ ለእግዚአብሔር።
10 ወኵሎሙ፡ ሕዝብ፡ ሀለዉ፡ በምልኦሙ፡ ይጼልዩ፡ በአፍኣ፡ በጊዜ፡ ሰዓተ፡ ዕጣን።
11 ወአስተርአዮ፡ መልአከ፡ እግዚአብሔር። ቀዊሞ፡ መንገለ፡ የማነ፡ ምሥዋዕ፡ ዘዕጣን።
12 ወሶበ፡ ርእዮ፡ ደንገፀ፡ ዘካርያስ። ፍርሀት፡ ወረዓድ፡ ወረደ፡ ላዕሌሁ።
13 ወይቤሎ፡ መልአክ፡ ኢትፍራህ፡ ዘካርያስ። እስመ፡ ናሁ፡ ተሰምዐ፡ ጸሎትከ፡ ቅድመ፡ እግዚአብሔር። ወብእሲትከኒ፡ ኤልሳቤጥ፡ ትወልድ፡ ለከ፡ ወልደ። ወትሰምዮ፡ ስሞ፡ ዮሐንስ።
14 ወይከውነከ፡ ትፍሥሕተ፡ ወሐሤተ፡ ወብዙኃን፡ ይትፌሥሑ፡ በልደቱ።
15 እስመ፡ ዐቢየ፡ ይከውን፡ ውእቱ፡ በቅድመ፡ እግዚአብሔር። ወኢይሰቲ፡ ወይነ፡ ወሜሰ፡ ኢ፡ ዘያሰክር፡ ወኢ፡ ዘኢያሰክር። ወይመልእ፡ ላዕሌሁ፡ መንፈስ፡ ቅዱስ፡ እምከርሠ፡ እሙ።
16 ወለብዙኃን፡ እምደቂቀ፡ እስራኤል፡ ይመይጦሙ፡ ኀበ፡ እግዚአብሔር፡ አምላኮሙ።
17 ወውእቱ፡ የሐውር፡ ቅድሜሁ፡ በመንፈስ፡ ቅዱስ፡ ወበኀይለ፡ ኤልያስ። ከመ፡ ይሚጥ፡ ልበ፡ አበው፡ ኀበ፡ ውሉድ። ወኅሊና፡ ከሓድያን፡ ኀበ፡ አእምሮ፡ ጻድቃን። ከመ፡ ይሥራዕ፡ ሕገ፡ ወሕዝበ፡ ዘድልው፡ ለእግዚአብሔር።
18 ወይቤሎ፡ ዘካርያስ፡ ለመልአከ፡ እግዚአብሔር። በምንት፡ አአምር፡ ከመ፡ ይከውን፡ ዝንቱ፡ ኵሉ። ናሁ፡ አነሂ፡ ልሂቅ፡ ወለብእሲትየኒ፡ ኀለፈ፡ መዋዕሊሃ።
19 ወተሰጥዎ፡ መልአክ፡ ወይቤሎ፡ አነ፡ ውእቱ፡ ገብርኤል። ዘእቀውም፡ ቅድመ፡ እግዚአብሔር፡ ዘተፈኖኩ፡ ኀቤከ። እንግርከ፡ ወእዜኑከ፡ ዘንተ።
20 ወናሁ፡ ትከውን፡ በሃመ፡ ወትስእን፡ ነቢበ፡ እስከ፡ አመ፡ ይከውን፡ ዝንቱ። እስመ፡ ኢአመንከኒ፡ ነገርየ፡ ዘይከውን፡ ወይትፌጸም፡ በዕድሜሁ።
21 ወሀለዉ፡ ሕዝብሰ፡ ይጼልዩ፡ ወይጸንሕዎ፡ ለዘካርያስ። ወአንከርዎ፡ እስመ፡ ጐንደየ፡ ውስተ፡ ቤተ፡ መቅደስ።
22 ወወፂኦ፡ ኀቤሆሙ፡ አፍኣ፡ ስእነ፡ ተናግሮቶሙ። ወአእመሩ፡ ከመ፡ ቦ፡ ዘአስተርአዮ፡ በቤተ፡ መቅደስ። ወነበረ፡ ከማሁ፡ እንዘ፡ በሃም፡ ውእቱ፡ ወይኤምሮሙ፡ በእዴሁ።
23 ወእምዝ፡ ፈጺሞ፡ መዋዕለ፡ ዕብሬቱ፡ አተወ፡ ቤቶ።
24 ወእምድኅረ፡ ክልኤ፡ መዋዕል፡ ፀንሰት፡ ኤልሳቤጥ፡ ብእሲቱ። ወከበተት፡ ፅንሳ፡ ኀምስተ፡ አውራኀ፡ እንዘ፡ ትብል።
25 ከመ፡ ዝኑ፡ ረሰየኒ፡ ሊተ፡ እግዚአብሔር፡ አመ፡ ሐውጾ፡ ሐወጸኒ። በዝንቱ፡ መዋዕል፡ ያእትት፡ ዝንጓጔየ፡ እምሰብእ።
በእንተ፡ ዘአብሠራ፡ ለማርያም፡ ወበእንተ፡ ሥጋዌሁ፡ ለቃል
26 ወበሳድስ፡ ወርኅ፡ ተፈነወ፡ ገብርኤል፡ መልአክ፡ እምኀበ፡ እግዚአብሔር። ኀበ፡ አሐቲ፡ ሀገር፡ ዘገሊላ፡ እንተ፡ ስማ፡ ናዝሬት።
27 ኀበ፡ ድንግል፡ እንተ፡ ተፍኅረት፡ ለብእሲ። ዘስሙ፡ ዮሴፍ፡ ዘእምቤተ፡ ዳዊት። ወስማ፡ ለይእቲ፡ ድንግል፡ ማርያም።
28 ወቦአ፡ መልአክ፡ ኀቤሃ፡ ወይቤላ፡ ተፈሥሒ፡ ፍሥሕት። ኦ፡ ምልእተ፡ ጸጋ፡ እግዚአብሔር፡ ምስሌኪ። ወቡርክት፡ አንቲ፡ እምአንስት።
29 ወርእያ፡ ደንገፀት፡ እምቃሉ፡ ወኀለየት፡ ወትቤ። እፎኑ፡ እንጋ፡ ዘከመ፡ ዝ፡ አምኃ፡ ይትአምኁ።
30 ወይቤላ፡ መልአክ፡ ኢትፍርሂ፡ ማርያም፡ እስመ፡ ረከብኪ፡ ሞገሰ፡ በኀበ፡ እግዚአብሔር።
31 ወናሁ፡ ትፀንሲ፡ ወትወልዲ፡ ወልደ። ወትሰምዪዮ፡ ስሞ፡ ኢየሱስ።
32 ውእቱ፡ ዐቢይ፡ ወይሰመይ፡ ወልደ፡ እግዚአብሔር፡ ልዑል። ወይሁቦ፡ እግዚአብሔር፡ አምላክ፡ መንበረ፡ ዳዊት፡ አቡሁ።
33 ወይነግሥ፡ ለቤተ፡ ያዕቆብ፡ ለዓለም። ወአልቦ፡ ማኅለቅት፡ ለመንግሥቱ።
34 ወትቤሎ፡ ማርያም፡ ለመልአክ፡ እፎኑ፡ ይከውነኒ፡ ዝንቱ። እንዘ፡ ኢየአምር፡ ብእሴ።
35 ወአውሥአ፡ መልአክ፡ ወይቤላ። መንፈሰ፡ እግዚአብሔር፡ ቅዱስ፡ ይመጽእ፡ ላዕሌኪ። ወኀይለ፡ ልዑል፡ ይጼልለኪ። ወዘኒ፡ ይትወለድ፡ እምኔኪ፡ ቅዱስ፡ ውእቱ። ወይሰመይ፡ ወልደ፡ እግዚአብሔር፡ ልዑል።
36 ወናሁ፡ ኤልሳቤጥኒ፡ እንተ፡ እምአዝማድኪ፡ ይእቲኒ። ፀንሰት፡ ወረከበት፡ ወልደ፡ በልህቃቲሃ፡ ወበርስዐቲሃ። ወናሁ፡ ሳድስ፡ ዝንቱ፡ ወርኅ፡ ለእንተ፡ ይብልዋ፡ መካን።
37 እስመ፡ አልቦ፡ ነገር፡ ዘይሰአኖ፡ ለእግዚአብሔር።
38 ወትቤሎ፡ ማርያም፡ ለመልአክ፡ ነየ፡ አመተ፡ እግዚአብሔር። ይኩነኒ፡ በከመ፡ ትቤለኒ። ወእምዝ፡ ሖረ፡ ወኀለፈ፡ እምኀቤሃ፡ መልአክ።
በእንተ፡ ብጽሐታ፡ ለማርያም፡ ኀበ፡ ኤልሳቤጥ
39 ወተንሥአት፡ ማርያም፡ ፍጡነ፡ በውእቱ፡ መዋዕል። ወሖረት፡ ደወለ፡ ዐይነ፡ ከርም፡ ወበጽሐት፡ ሀገረ፡ ዳዊት፡ ዘይሁዳ።
40 ወቦአት፡ ቤተ፡ ዘካርያስ፡ ወአምኀታ፡ ለኤልሳቤጥ።
41 ወሶበ፡ ሰምዐት፡ ኤልሳቤጥ፡ ቃላ፡ ለማርያም፡ እንዘ፡ ትትአምኃ። አንፈርዐፀ፡ ዕጓል፡ በውስተ፡ ከርሣ።
42 ወመልአ፡ መንፈስ፡ ቅዱስ፡ ላዕለ፡ ኤልሳቤጥ። ወከልሐት፡ በዐቢይ፡ ቃል፡ ወትቤ። ቡርክት፡ አንቲ፡ እምአንስት፡ ወቡሩክ፡ ፍሬ፡ ከርሥኪ።
43 ወምንትኑ፡ አነ፡ ከመ፡ ትምጽኢ፡ ኀቤየ፡ እሙ፡ ለእግዚእየ።
44 እስመ፡ ናሁ፡ ሶበ፡ ሰማዕኩ፡ ቃለኪ። እንዘ፡ ትትአምኅኒ፡ አንፈርዐፀ፡ ዕጓል፡ በውስተ፡ ከርሥየ፡ በፍሥሓ፡ ወበሐሤት።
45 ወብፅዕት፡ አንቲ፡ እንተ፡ ተአምኒ። ከመ፡ ይከውን፡ ቃል፡ ዘነገሩኪ፡ እምኀበ፡ እግዚአብሔር።
46 ወትቤ፡ ማርያም፡ ታዐብዮ፡ ነፍስየ፡ ለእግዚአብሔር።
47 ወትትሐሠይ፡ መንፈስየ፡ በአምላኪየ፡ ወመድኀኒየ።
48 እስመ፡ ርእየ፡ ሕማማ፡ ለአመቱ። ናሁ፡ እምይእዜሰ፡ ያስተበፅዑኒ፡ ኵሉ፡ ትውልድ።
49 እስመ፡ ገብረ፡ ሊተ፡ ኀይለ፡ ዐቢያተ፡ ወቅዱስ፡ ስሙ።
50 ወሣህሉኒ፡ ለትውልደ፡ ትውልድ፡ ለእለ፡ ይፈርህዎ።
51 ወገብረ፡ ኀይለ፡ በመዝራዕቱ። ወዘረዎሙ፡ ለእለ፡ ያዐብዩ፡ ኅሊና፡ ልቦሙ።
52 ወነሠቶሙ፡ ለኀያላን፡ እመናብርቲሆሙ፡ አዕበዮሙ፡ ለትሑታን።
53 ወአጽገቦሙ፡ እምበረከቱ፡ ለርኁባን። ወፈነዎሙ፡ ዕራቆሙ፡ ለብዑላን።
54 ወተወክፎ፡ ለእስራኤል፡ ቊልዔሁ፡ ወተዘከረ፡ ሣህሎ።
55 ዘይቤሎሙ፡ ለአበዊነ፡ ለአብርሃም፡ ወለዘርዑ፡ እስከ፡ ለዓለም።
56 ወነበረት፡ ማርያም፡ ኀቤሃ፡ መጠነ፡ ሠለስቱ፡ አውራኅ። ወእምድኅሬሁ፡ አተወት፡ ቤታ።
በእንተ፡ ልደተ፡ ዮሐንስ፡ መጥምቅ
57 ወበጽሐ፡ ወርኃ፡ ለኤልሳቤጥ፡ ከመ፡ ትለድ፡ ወወለደት፡ ወልደ።
58 ወሶበ፡ ሰምዑ፡ አዝማዲሃ፡ ወአግዋሪሃ። ከመ፡ አዕበየ፡ እግዚአብሔር፡ ሣህሎ፡ ላዕሌሃ፡ ተፈሥሑ፡ ላቲ።
59 ወእምዝ፡ አመ፡ ሰሙን፡ ዕለት፡ መጽኡ፡ ከመ፡ ይግዝርዎ፡ ለሕፃን። ወሰመይዎ፡ በስመ፡ አቡሁ፡ ዘካርያስ።
60 ወአውሥአት፡ እሙ፡ ወትቤ፡ አልቦ፡ አላ፡ ዮሐንስ፡ ይሰመይ፡ ስሙ።
61 ወይቤልዋ፡ አልቦ፡ እምአዝማድኪ፡ ዘከማሁ፡ ስሙ።
62 ወቀጸብዎ፡ ለአቡሁ፡ ወይቤልዎ፡ መነ፡ ትፈቅድ፡ ይስምይዎ።
63 ወሰአለ፡ ለውሀ፡ ወጸሐፈ፡ እንዘ፡ ይብል። ዮሐንስ፡ ይሰመይ፡ ስሙ፡ ወአንከሩ፡ ኵሎሙ።
64 ወተከሥተ፡ አፉሁ፡ ሶቤሃ፡ ወልሳኑ፡ ነበበ፡ ወባረኮ፡ ለእግዚአብሔር።
65 ወኮነ፡ ፍርሀት፡ ላዕለ፡ ኵሉ፡ ሰብእ፡ ዘውእቱ፡ ብሔር። ወላዕለ፡ ኵሉ፡ ደወለ፡ ይሁዳ። ወተናገርዎ፡ ለዝንቱ፡ ነገር፡ በኵሉ፡ ብሔረ፡ ይሁዳ።
66 ወዐቀብዎ፡ በልቦሙ፡ ኵሎሙ፡ እለ፡ ሰምዕዎ፡ ወይቤሉ። ምንትኑ፡ እንጋ፡ ይከውን፡ እምዝንቱ፡ ሕፃን። እስመ፡ እደ፡ እግዚአብሔር፡ ላዕሌሁ።
67 ወመልአ፡ መንፈስ፡ ቅዱስ፡ ላዕለ፡ ዘካርያስ፡ አቡሁ፡ ወተነበየ፡ ወይቤ።
68 ይትባረክ፡ እግዚአብሔር፡ አምላከ፡ እስራኤል፡ ዘተሣሀለነ። ወገብረ፡ መድኀኒተ፡ ለሕዝበ፡ ዚኣሁ።
69 አንሥአ፡ ለነ፡ ቀርነ፡ መድኀኒትነ፡ እምቤተ፡ ዳዊት፡ ገብሩ።
70 በከመ፡ ነበበ፡ በአፈ፡ ነቢያቲሁ፡ ቅዱሳን፡ እለ፡ እምዓለም።
71 ከመ፡ ያድኅነነ፡ እምእደ፡ ፀርነ። ወእምእዴሆሙ፡ ለኵሎሙ፡ እለ፡ ይጸልኡነ።
72 ከመ፡ ይግበር፡ ሣህሎ፡ ምስለ፡ አበዊነ፡ ወከመ፡ ይዘከር፡ ኪዳኖ፡ ቅዱሰ።
73 መሐላሁ፡ ዘመሐለ፡ ለአብርሃም፡ አቡነ።
74 ከመ፡ የሀበነ፡ በዘኢንፈርህ፡ እምእደ፡ ፀርነ።
75 ያድኅነነ፡ ናምልኮ፡ በጽድቅ፡ ወበርትዕ፡ በቅድሜሁ፡ ወበኵሉ፡ መዋዕሊነ።
76 ወአንተኒ፡ ሕፃን፡ ነቢየ፡ ልዑል፡ ትሰመይ። እስመ፡ ተሐውር፡ ቅድመ፡ እግዚአብሔር፡ ከመ፡ ትጺሕ፡ ፍኖቶ።
77 ከመ፡ ተሀቦሙ፡ ለአሕዛብ፡ ያእምሩ፡ መድኀኒቶሙ። በዘይትኀደግ፡ ሎሙ፡ ኀጢአቶሙ።
78 በሣህሉ፡ ወበምሕረቱ፡ ለአምላክነ፡ ለዘሐወጸነ፡ እምአርያም። ወሠረቀ፡ ከመ፡ ያርእዮሙ፡ ብርሃኖ።
79 ለእለ፡ ይነብሩ፡ ውስተ፡ ጽልመት፡ ወጽላሎተ፡ ሞት። ከመ፡ ያርትዕ፡ እገሪነ፡ ውስተ፡ ፍኖተ፡ ሰላም።
80 ወልህቀ፡ ሕፃን፡ ወጸንዐ፡ በኀይለ፡ መንፈስ፡ ቅዱስ። ወነበረ፡ ሐቅለ፡ እስከ፡ አመ፡ ያገይሥዎ፡ ኀበ፡ እስራኤል።
=== chapter 2 ===
[ምዕራፍ 2]
በእንተ፡ ልደተ፡ እግዚእ፡ ኢየሱስ
1 ወኮነ፡ በውእቱ፡ መዋዕል፡ ወፅአ፡ ትእዛዝ፡ እምኀበ፡ አውግስጦስ፡ ቄሣር። ከመ፡ ይጸሐፍ፡ ኵሉ፡ ዓለም።
2 ወውእቱ፡ ጻሕፍ፡ ቀዳሚ፡ አመ፡ ቄሬኔዎስ፡ መስፍን፡ ለሶርያ።
3 ወሖረ፡ ኵሉ፡ ሰብእ፡ ይጸሐፍ፡ በበ፡ ሀገሩ።
4 ወዐርገ፡ ዮሴፍኒ፡ እምገሊላ፡ እምሀገረ፡ ናዝሬት፡ መንገለ፡ ይሁዳ። ኀበ፡ ሀገረ፡ ዳዊት፡ እንተ፡ ስማ፡ ቤተልሔም። እስመ፡ እምቤተ፡ ዳዊት፡ ወእምአዝማደ፡ ቤቱ፡ ውእቱ።
5 ወሖረ፡ ይጸሐፍ፡ ምስለ፡ ማርያም፡ እንተ፡ ፈኀሩ፡ ሎቱ። እንዘ፡ ፅንስት፡ ይእቲ።
6 ወእምዝ፡ እንዘ፡ ሀለዉ፡ ህየ፡ በጽሐ፡ ዕለተ፡ ወሊዶታ።
7 ወወለደት፡ ወልደ፡ ዘበኵራ፡ ወአሰረቶ፡ መንኮብያቲሁ። ወአስከበቶ፡ ውስተ፡ ጎል፡ ወጠብለለቶ፡ በአጽርቅት። እስመ፡ አልቦሙ፡ መካን፡ ውስተ፡ ማኅደሮሙ።
በእንተ፡ እለ፡ ይኄልዉ፡ ኖሎት
8 ወሀለዉ፡ ኖሎት፡ ውስተ፡ ውእቱ፡ ብሔር፡ ይተግሁ፡ ወይኄልዉ። ወየዐቅቡ፡ መራዕይሆሙ፡ ሌሊተ፡ በበ፡ ዕብሬቶሙ።
9 ወናሁ፡ ቆመ፡ መልአከ፡ እግዚአብሔር፡ ኀቤሆሙ። ወስብሐተ፡ እግዚአብሔር፡ ሠረቀ፡ ላዕሌሆሙ። ወፈርሁ፡ ዐቢየ፡ ፍርሀተ።
10 ወይቤሎሙ፡ መልአክ፡ ኢትፍርሁ። እስመ፡ ናሁ፡ እዜንወክሙ፡ ዐቢየ፡ ዜና። ፍሥሓ፡ ዘይከውን፡ ለክሙ፡ ወለኵሉ፡ ዓለም።
11 እስመ፡ ናሁ፡ ተወልደ፡ ለክሙ፡ ዮም፡ መድኅን። ዘውእቱ፡ ክርስቶስ፡ እግዚእ፡ ቡሩክ፡ በሀገረ፡ ዳዊት።
12 ወከመ፡ ዝ፡ ትእምርቱ፡ ለክሙ። ትረክቡ፡ ሕፃነ፡ እሱረ፡ መንኮብያቲሁ። ወጥብሉለ፡ በአጽርቅት፡ ወስኩበ፡ ውስተ፡ ጎል።
13 ወግብተ፡ መጽኡ፡ ምስለ፡ ውእቱ፡ መልአክ። ብዙኃን፡ ሐራ፡ ሰማይ፡ እንዘ፡ ይሴብሕዎ፡ ለእግዚአብሔር።
14 ወይብሉ፡ ስብሐት፡ ለእግዚአብሔር፡ በሰማያት። ወሰላም፡ በምድር፡ ለዕጓለ፡ እመሕያው፡ ሥምረቱ።
15 ወእምዝ፡ ዐሪጎሙ፡ መላእክት፡ እምኀቤሆሙ፡ ውስተ፡ ሰማይ። ይቤሉ፡ እሙንቱ፡ ሰብእ፡ ኖሎት፡ በበይናቲሆሙ። ንሑር፡ እስከ፡ ቤተልሔም፡ ወናእምር፡ ዘንተ፡ ነገረ፡ ዘአርአየነ፡ እግዚአብሔር።
16 ወሖሩ፡ ፍጡነ፡ ወረከብዎሙ፡ ለማርያም፡ ወለዮሴፍ። ወሕፃንኒ፡ ይሰክብ፡ ውስተ፡ ጎል።
17 ወርእዮሙ፡ አእመሩ፡ ከመ፡ በእንተ፡ ውእቱ፡ ሕፃን፡ ዘነገርዎሙ።
18 ወኵሎሙ፡ እለ፡ ሰምዑ፡ አንከሩ፡ ዘነገርዎሙ፡ ኖሎት።
19 ወማርያምሰ፡ ተዐቅብ፡ ዘንተ፡ ኵሎ፡ ነገረ፡ ወትወድዮ፡ ውስተ፡ ልባ።
20 ወተመይጡ፡ ኖሎት፡ እንዘ፡ ይሴብሕዎ፡ ወየአኵትዎ፡ ለእግዚአብሔር። በእንተ፡ ኵሉ፡ ዘርእዩ፡ ወሰምዑ፡ ዘከመ፡ ይቤልዎሙ።
ዘከመ፡ ተገዝረ፡ ኢየሱስ፡ ወዘከመ፡ አቀምዎ፡ ውስተ፡ ቤተ፡ መቅደስ
21 ወአመ፡ ተፈጸመ፡ ሰሙን፡ ዕለት፡ ወሰድዎ፡ ለሕፃን፡ ከመ፡ ይግዝርዎ። ወሰመይዎ፡ ስሞ፡ ኢየሱስ፡ በከመ፡ ሰመዮ፡ መልአከ፡ እምቅድመ፡ ትፅንሶ፡ በከርሣ።
22 ወአመ፡ ተፈጸመ፡ መዋዕለ፡ ንጽሖሙ፡ በከመ፡ ሕገ፡ ሙሴ። ወሰድዎ፡ ኢየሩሳሌም፡ ያቅምዎ፡ ቅድመ፡ እግዚአብሔር።
23 በከመ፡ ጽሑፍ፡ ውስተ፡ ሕገ፡ እግዚአብሔር። ኵሉ፡ ተባዕት፡ ዘይፈትሕ፡ ማሕፀነ፡ እሙ። ቅዱሰ፡ ይሰመይ፡ ለእግዚአብሔር።
24 ወከመ፡ ያብኡ፡ መሥዋዕተ፡ በእንቲኣሁ። በከመ፡ ተብህለ፡ ውስተ፡ ሕገ፡ እግዚአብሔር። ዘውገ፡ ማዕነቅ፡ ወእመ፡ አኮ፡ ክልኤቲ፡ ዕጕለ፡ ርግበ።
በእንተ፡ ስምዖን
25 ወሀሎ፡ አሐዱ፡ ብእሲ፡ በኢየሩሳሌም፡ ዘስሙ፡ ስምዖን። ወውእቱ፡ ጻድቅ፡ ወየዋህ። ወይሴፎ፡ ይርአይ፡ መድኀኒቶሙ፡ ወፍሥሓሆሙ፡ ለእስራኤል። ወመንፈስ፡ ቅዱስ፡ ላዕሌሁ።
26 ወአርአዮ፡ መንፈስ፡ ቅዱስ፡ ከመ፡ ኢይመውት። ዘእንበለ፡ ይርአይ፡ መሲሖ፡ ለእግዚአብሔር።
27 ወወሰዶ፡ መንፈስ፡ ምኵራበ። ወሶበ፡ አብእዎ፡ አዝማዲሁ፡ ለሕፃን፡ እግዚእ፡ ኢየሱስ። ከመ፡ ይግበሩ፡ ሎቱ፡ ዘበሕጉ።
28 ተወክፎ፡ ውእቱኒ፡ ወአንበሮ፡ ውስተ፡ ሕፅኑ። ወባረኮ፡ ለእግዚአብሔር።
29 ወይቤ፡ ይእዜ፡ ትስዕሮ፡ ለገብርከ። በሰላም፡ እግዚኦ፡ በከመ፡ አዘዝከ።
30 እስመ፡ ርእያ፡ አዕይንትየ፡ አድኅኖተከ።
31 ዘአስተዳሎከ፡ ቅድመ፡ ኵሉ፡ ሕዝብከ።
32 ከመ፡ ትክሥት፡ ብርሃነ፡ ለአሕዛብ። ወክብረ፡ ለሕዝብከ፡ እስራኤል።
33 ወዮሴፍሰ፡ ወእሙ፡ ያነክሩ፡ በእንተ፡ ዘይነብብ፡ ላዕሌሁ።
34 ወባረኮሙ፡ ስምዖን፡ ወይቤላ፡ ለእሙ፡ ማርያም። ናሁ፡ ዝንቱ፡ ሕፃን፡ ሥዩም፡ ለድቀቶሙ። ወለተንሥኦቶሙ፡ ለብዙኃን፡ እምውስተ፡ እስራኤል። ወለትእምርት፡ በዘይትወቀሡ።
35 ወለኪሰ፡ ይበውእ፡ ውስተ፡ ልብኪ፡ ኵናተ፡ ኑፋቄ። ከመ፡ ይክሥት፡ ኅሊና፡ ልቦሙ፡ ለብዙኃን።
በእንተ፡ ሐና፡ ነቢያት
36 ወሀለወት፡ ሐና፡ ነቢይት፡ ወለተ፡ ፋኑኤል፡ እንተ፡ እምነገደ፡ አሴር። ወኀለፈ፡ መዋዕሊሃ፡ ወምስለ፡ ምታሰ፡ ነበረት፡ ሰብዐተ፡ ክረምተ። እምድኅረ፡ ነበረት፡ በድንግልናሃ።
37 ወኮነት፡ መዐስብተ፡ ሰማንያ፡ ወአርባዕተ፡ ክረምተ። ወኢትወፅእ፡ እምኵራብ፡ መዓልተ፡ ወሌሊተ። እንዘ፡ ትትቀነይ፡ በጾም፡ ወበጸሎት።
38 ወተንሥአት፡ ሶቤሃ፡ ወገነየት፡ ወአእኰተቶ፡ ለእግዚአብሔር። ወነገረት፡ በእንቲኣሁ፡ ለኵሎሙ፡ እለ፡ ይሴፈዉ፡ መድኀኒታ፡ ለኢየሩሳሌም።
39 ወፈጺሞሙ፡ ኵሎ፡ ዘበሕገ፡ እግዚአብሔር። አተዉ፡ ገሊላ፡ ሀገሮሙ፡ ናዝሬተ።
40 ወልህቀ፡ ሕፃን፡ ወጸንዐ፡ በመንፈስ፡ ቅዱስ፡ ወምሉእ፡ ጥበበ። ወፍጹም፡ በጸጋ፡ እግዚአብሔር፡ ዘላዕሌሁ።
ዘከመ፡ ረፈቀ፡ እግዚእ፡ ኢየሱስ፡ ማእከለ፡ ሊቃውንት
41 ወየሐውሩ፡ አዝማዲሁ፡ ኢየሩሳሌም፡ ለለ፡ ዓመት፡ ለበዓለ፡ ፋሲካ።
42 ወአመ፡ ኮኖ፡ ፍጹመ፡ ሎቱ፡ ዐሠርቱ፡ ወክልኤቱ፡ ክረምቱ። ዐርጉ፡ ለበዓል፡ ኢየሩሳሌም፡ በከመ፡ ያለምዱ።
43 ወሠሊጦሙ፡ ግብሮሙ፡ አተዉ፡ ገሊላ፡ ሀገሮሙ። ወሕፃንሰ፡ እግዚእ፡ ኢየሱስ፡ ነበረ፡ ኢየሩሳሌም። ወኢያእመሩ፡ ዮሴፍ፡ ወእሙ።
44 ወይመስሎሙ፡ ከመ፡ ዘበፍኖት፡ ሀሎ፡ ምስለ፡ ሰብእ። ወበጺሖሙ፡ ኀሠሥዎ፡ በዕለታ፡ ኀበ፡ አዝማዲሁ። ወኀበ፡ እለ፡ የአምርዎ፡ ወኢረከብዎ።
45 ወሶበ፡ ኢረከብዎ፡ ተሠውጡ፡ ኢየሩሳሌም፡ እንዘ፡ የኀሥሥዎ።
46 ወእምዝ፡ በሣልስታ፡ ረከብዎ፡ በምኵራብ። እንዘ፡ ይነብር፡ በማእከለ፡ ሊቃውንት፡ ወያጸምኦሙ፡ ወይሴአሎሙ።
47 ወያነክርዎ፡ ኵሎሙ፡ እለ፡ ሰምዑ፡ ጥበቦ፡ ወአውሥኦቶ።
48 ወሶበ፡ ርእይዎ፡ ደንገፁ፡ ወትቤሎ፡ እሙ። ወልድየ፡ ለምንት፡ ከመ፡ ዝ፡ ረሰይከነ። እስመ፡ ናሁ፡ አቡከኒ፡ ወአነኒ፡ ሰራሕነ፡ እንዘ፡ ነኀሥሠከ።
49 ወይቤሎሙ፡ ለምንት፡ ትኀሥሡኒ። ኢያእመርክሙኑ፡ ከመ፡ ይደልወኒ፡ አሀሉ፡ ውስተ፡ ዘአቡየ፡ ቤት።
50 ወእሙንቱሰ፡ ኢለበዉ፡ ቃሎ፡ ዘይቤሎሙ።
51 ወሖረ፡ ወወረደ፡ ምስሌሆሙ፡ ናዝሬተ፡ ወኮነ፡ ይትኤዘዝ፡ ሎሙ። ወእሙሰ፡ ተዐቅብ፡ ዘንተ፡ ኵሎ፡ ነገረ፡ ወትወድዮ፡ ውስተ፡ ልባ።
52 ወእግዚእ፡ ኢየሱስ፡ ልህቀ፡ ወዐብየ፡ በጥበብ። ወበምክር፡ ወበጸጋ፡ በኀበ፡ እግዚአብሔር፡ ወበኀበ፡ ሰብእ።
=== chapter 3 ===
[ምዕራፍ 3]
በእንተ፡ ስብከት፡ ዘዮሐንስ፡ መጥምቅ
1 ወአመ፡ ዐሠርቱ፡ ወኀምስቱ፡ ዓመተ፡ መንግሥቱ፡ ለጢባርዮስ፡ ቄሣር። እንዘ፡ ጲላጦስ፡ ጰንጤናዊ፡ መልአከ፡ ይሁዳ። ወሄሮድስ፡ ንጉሥ፡ ላዕለ፡ ገሊላ። ወፊልጶስ፡ እኁሁ፡ መልአከ፡ ኢጡርያስ። ወለብሔረ፡ ጥራኮኒዶስ፡ ወሊሳንዩስ፡ ሀቢ፡ እንተ፡ ሳብላኔስ።
2 ወአመ፡ ሐና፡ ወቀያፋ፡ ሊቃነ፡ ካህናት። መጽአ፡ ቃለ፡ እግዚአብሔር፡ ላዕለ፡ ዮሐንስ፡ ወልደ፡ ዘካርያስ፡ በገዳም።
3 ወዖደ፡ አድያመ፡ ዮርዳኖስ። ወሰበከ፡ ጥምቀተ፡ ለንስሓ፡ በዘይትኀደግ፡ ኀጢአት።
4 በከመ፡ ይብል፡ ቃለ፡ መጽሐፈ፡ ኢሳይያስ፡ ነቢይ፡ ዘይቤ። ናሁ፡ ቃለ፡ ዐዋዲ፡ ዘይሰብክ፡ በገዳም፡ ወይብል። ጺሑአ፡ ፍኖተ፡ እግዚአብሔር፡ ወዐርዩ፡ መጽያሕቶ።
5 ኵሉ፡ ማዕምቅ፡ ይምላእ፡ ወኵሉ፡ ደብር፡ ወወግር፡ ይተሐት። ወይኩን፡ መብእስ፡ መጽያሕተ፡ ርቱዐ። ወይዕሪ፡ ፍኖት፡ መብእስ።
6 ወይርአይ፡ ኵሉ፡ ዘነፍስ፡ አድኅኖቶ፡ ለእግዚአብሔር።
7 ወይቤሎሙ፡ ዮሐንስ፡ ለሕዝብ፡ እለ፡ መጽኡ፡ ኀቤሁ። ያጥምቆሙ፡ ትውልደ፡ ሰበድዓት። መኑ፡ ነገረክሙ፡ ታምሥጡ፡ እመቅሠፍት፡ ዘይመጽእ።
8 ግበሩ፡ እንከ፡ ፍሬ፡ ዘይደልወክሙ፡ ለንስሓ። ወኢይምሰልክሙ፡ በብሂለ፡ ዘትብሉ፡ ሀሎ፡ አቡነ፡ አብርሃም። እብለክሙ፡ ከመ፡ ይክል፡ እግዚአብሔር። አንሥኦ፡ ውሉድ፡ ለአብርሃም፡ እምእላንቱ፡ አእባን።
9 እስመ፡ ናሁ፡ ወድአ፡ ተሠይመ፡ ጕድብ፡ ኀበ፡ ጕንደ፡ ዕፀው። ወኵሉ፡ ዕፅ፡ ዘኢይፈሪ፡ ፍሬ፡ ሠናየ፡ ይገዝምዎ። ወውስተ፡ እሳት፡ ይወድይዎ።
በእንተ፡ እለ፡ ተስእልዎ፡ ለዮሐንስ
10 ወተስእልዎ፡ ሕዝብ፡ ወይቤልዎ፡ ምንተ፡ ንግበር።
11 ወአውሥአ፡ ወይቤሎሙ፡ ዘቦ፡ ክልኤ፡ ልብስ፡ ክዳናተ፡ የሀብ፡ ለዘአልቦ። ወዘሂ፡ ቦ፡ እክል፡ ከማሁ፡ ይግበር።
12 ወመጽኡ፡ መጸብሓንሂ፡ ያጥምቆሙ፡ ወተስእልዎ። ወይቤልዎ፡ ሊቅ፡ ምንተ፡ ንግበር።
13 ወይቤሎሙ፡ አልቦ፡ ዘትገብሩ፡ ፈድፋደ፡ እምዘተአዘዝክሙ።
14 ወተስእልዎ፡ ሐራሂ፡ ወይቤልዎ፡ ንሕነኬ፡ ምንተ፡ ንግበር። ወይቤሎሙ፡ ኢትትዐገሉ፡ ወኢ፡ መነሂ፡ ወኢትሂዱ። አላ፡ ንበሩ፡ በበ፡ ሲሳይክሙ።
15 ወኀለዩ፡ ኵሉ፡ ሕዝብ፡ በልቦሙ። ወመሰሎሙ፡ ዮሐንስ፡ ከመ፡ ውእቱ፡ ክርስቶስ።
16 ወአውሥአ፡ ዮሐንስ፡ ወይቤሎሙ፡ ለኵሎሙ። አንሰ፡ አጠምቀክሙ፡ በማይ፡ ወይመጽእ፡ ዘይጸንዐኒ። ዘኢይደልወኒ፡ እፍታሕ፡ ቶታነ፡ አሣእኒሁ፡ እምእገሪሁ። ወውእቱ፡ ያጠምቀክሙ፡ በመንፈስ፡ ቅዱስ፡ ወበእሳት።
17 ዘመሥኤ፡ ውስተ፡ እዴሁ፡ ወያነጽሕ፡ ዐውደ፡ እክሉ። ወያስተጋብእ፡ ሥርናዮ፡ ውስተ፡ መዛግብቲሁ። ወሐሠሮሰ፡ ያውዒ፡ በእሳት፡ ዘኢይጠፍእ።
18 ወቦ፡ ባዕድኒ፡ ብዙኀ፡ ዘመሀሮሙ፡ ለሕዝብ፡ ወገሠጾሙ።
ዘከመ፡ ተሞቅሐ፡ ዮሐንስ፡ መጥምቅ
19 ወኮነ፡ ዮሐንስ፡ ይጌሥጾ፡ ለሄሮድስ። ወይዘልፎ፡ በእንተ፡ ሄሮድያዳ፡ ብእሲተ፡ ፊልጶስ፡ እኁሁ። ወበእንተ፡ ኵሉ፡ እኩይ፡ ዘገብረ፡ ሄሮድስ።
20 ወዓዲ፡ ወሰከ፡ እንበይነ፡ ዝኒ፡ ተቀየሞ፡ ለዮሐንስ። ወዐጸዎ፡ ውስተ፡ ቤተ፡ ሞቅሕ።
በእንተ፡ ጥምቀት፡ ዘእግዚእ፡ ኢየሱስ
21 ወእምድኅረ፡ ተጠምቁ፡ ኵሉ፡ ሕዝብ፡ ተጠምቀ፡ እግዚእ፡ ኢየሱስኒ።
22 ወእንዘ፡ ይጼሊ፡ ተርኅወ፡ ሰማይ። ወወረደ፡ መንፈስ፡ ቅዱስ፡ ላዕሌሁ። በአምሳለ፡ ሥጋ፡ ርእየተ፡ ርግብ፡ ጸዐዳ። ወመጽአ፡ ቃል፡ እምሰማይ፡ ዘይብል። አንተ፡ ውእቱ፡ ወልድየ፡ ዘአፈቅር፡ ወኪያከ፡ ሠመርኩ።
በእንተ፡ መጽሐፈ፡ ትውልድ፡ ዘእግዚእ፡ ኢየሱስ
23 ወየአክል፡ ሠላሳ፡ ክረምቱ፡ ለእግዚእ፡ ኢየሱስ። ወይመስሎሙ፡ ወልደ፡ ዮሴፍ፡ ውእቱ።
24 ወልደ፡ ኤሊ፡ ወልደ፡ ማቲ፡ ወልደ፡ ሌዊ። ወልደ፡ ሜልኪ፡ ወልደ፡ ዮና፡ ወልደ፡ ዮሴፍ።
25 ወልደ፡ ማታትዩ፡ ወልደ፡ አሞጽ፡ ወልደ፡ ናሆም። ወልደ፡ ኤሴሌም፡ ወልደ፡ ናጌ።
26 ወልደ፡ ማአት፡ ወልደ፡ ማታትዩ፡ ወልደ፡ ሴሜይ። ወልደ፡ ዮሴፍ፡ ወልደ፡ ዮዳ።
27 ወልደ፡ ዮናን፡ ወልደ፡ ሬስ፡ ወልደ፡ ዘሩባቤል። ወልደ፡ ሰላትያል፡ ወልደ፡ ኔሪ።
28 ወልደ፡ ሜልኪ፡ ወልደ፡ ሐዲ፡ ወልደ፡ ዮሳ። ወልደ፡ ቆሳም፡ ወልደ፡ ኤልሞዳም፡ ወልደ፡ ኤር።
29 ወልደ፡ ዮሴዕ፡ ወልደ፡ አልአዛር፡ ወልደ፡ ዮራም። ወልደ፡ ማጣት፡ ወልደ፡ ሌዊ።
30 ወልደ፡ ስምዖን፡ ወልደ፡ ይሁዳ፡ ወልደ፡ ዮሴፍ። ወልደ፡ ዮናን፡ ወልደ፡ ኤልያቄም።
31 ወልደ፡ ሜልያ፡ ወልደ፡ ማይናን፡ ወልደ፡ ማጣት። ወልደ፡ ናታን፡ ወልደ፡ ዳዊት።
32 ወልደ፡ ዕሤይ፡ ወልደ፡ ኢዮቤድ፡ ወልደ፡ ቡዔዝ። ወልደ፡ ሰልሞን፡ ወልደ፡ ነአሶን።
33 ወልደ፡ አሚናዳብ፡ ወልደ፡ አራም፡ ወልደ፡ ኦርኒ። ወልደ፡ ኤስሮም፡ ወልደ፡ ፋሬስ፡ ወልደ፡ ይሁዳ።
34 ወልደ፡ ያዕቆብ፡ ወልደ፡ ይስሐቅ፡ ወልደ፡ አብርሃም። ወልደ፡ ታራ፡ ወልደ፡ ናኮር።
35 ወልደ፡ ሴሩኅ፡ ወልደ፡ ራግው፡ ወልደ፡ ፋሌቅ። ወልደ፡ ኤቦር፡ ወልደ፡ ሳላ።
36 ወልደ፡ ቃይንም፡ ወልደ፡ አርፋክስድ፡ ወልደ፡ ሴም። ወልደ፡ ኖኅ፡ ወልደ፡ ላሜሕ።
37 ወልደ፡ ማቱሳላ፡ ወልደ፡ ሄኖክ፡ ወልደ፡ ያሬድ። ወልደ፡ መላልኤል፡ ወልደ፡ ቃይናን።
38 ወልደ፡ ሄኖስ፡ ወልደ፡ ሴት። ወልደ፡ አዳም፡ ወልደ፡ እግዚአብሔር።
=== chapter 4 ===
[ምዕራፍ 4]
በእንተ፡ ተመክሮት፡ ዘእግዚእ፡ ኢየሱስ
1 ወመልአ፡ መንፈስ፡ ቅዱስ፡ ላዕለ፡ እግዚእ፡ ኢየሱስ። ወተመይጠ፡ እምዮርዳኖስ፡ ወወሰዶ፡ መንፈስ፡ ገዳመ።
2 ወጾመ፡ አርብዓ፡ መዓልተ፡ ወአርብዓ፡ ሌሊተ። ወያሜክሮ፡ ሰይጣን፡ ወኢበልዐ፡ ወኢሰትየ፡ ምንተኒ፡ በውእቶን፡ መዋዕል። ወተፈጺሞን፡ እማንቱ፡ መዋዕል፡ ርኅበ።
3 ወይቤሎ፡ ሰይጣን፡ እመሰ፡ ወልደ፡ እግዚአብሔር፡ አንተ። በል፡ ዝንቱ፡ እብን፡ ይኩን፡ ኅብስተ።
4 ወአውሥአ፡ እግዚእ፡ ኢየሱስ፡ ወይቤሎ። ጽሑፍ፡ ዘይብል፡ አኮ፡ በኅብስት፡ ክመ፡ ዘየሐዩ፡ ሰብእ። አላ፡ በኵሉ፡ ቃል፡ ዘይወፅእ፡ እምአፉሁ፡ ለእግዚአብሔር።
5 ወአዕረጎ፡ ሰይጣን፡ ውስተ፡ ደብር፡ ነዋኅ። ወአርአዮ፡ መንግሥታተ፡ ኵሉ፡ ዓለም፡ ከመ፡ ወኢ፡ ምንትኒ።
6 ወይቤሎ፡ ሰይጣን፡ ዘንተ፡ ኵሎ፡ ምኵናነ፡ ለከ፡ እሁበከ። ወዘንተኒ፡ ክብረ፡ እስመ፡ ሊተ፡ ተውህበ፡ ወለዘፈቀድኩ፡ እሁቦ።
7 ወእምከመሰ፡ ሰገድከ፡ ሊተ፡ አንተ፡ ቅድሜየ፡ ለከ፡ ይኩንከ፡ ኵሉ።
8 ወይቤሎ፡ እግዚእ፡ ኢየሱስ፡ ሑር፡ እምድኅሬየ፡ ሰይጣን። ጽሑፍ፡ ለእግዚአብሔር፡ አምላክከ፡ ትስግድ። ወኪያሁ፡ ባሕቲቶ፡ ታምልክ።
9 ወወሰዶ፡ ኢየሩሳሌም፡ ወአቀሞ፡ ዲበ፡ ርእሰ፡ ማዕዘንተ፡ ቤተ፡ መቅደስ። ወይቤሎ፡ እመሰ፡ ወልደ፡ እግዚአብሔር፡ አንተ። ረድ፡ ለሊከ፡ ታሕተ፡ እም፡ ዝየ፡ ወተወረው።
10 እስመ፡ ጽሑፍ፡ ከመ፡ ለመላእክቲሁ፡ ይኤዝዞሙ፡ በእንቲኣከ። ከመ፡ ይዕቀቡከ፡ በኵሉ፡ ፍናዊከ።
11 ወበእደዊሆሙ፡ ያነሥኡከ፡ ከመ፡ ኢትትዐቀፍ፡ በእብን፡ እግረከ።
12 ወአውሥአ፡ እግዚእ፡ ኢየሱስ፡ ወይቤሎ። ተብህለ፡ ኢታመክሮ፡ ለእግዚአብሔር፡ አምላክከ።
13 ወፈጺሞ፡ ሰይጣን፡ አመክሮቶ፡ በኵሉ፡ ኀደጎ፡ እስከ፡ ጊዜሁ።
ዘከመ፡ አኀዘ፡ እግዚእ፡ ኢየሱስ፡ ይስብክ፡ በገሊላ
14 ወተመይጠ፡ እግዚእ፡ ኢየሱስ፡ በኀይለ፡ መንፈስ፡ ቅዱስ። ወሖረ፡ ገሊላ፡ ወተሰምዐ፡ ነገሩ፡ በኵሉ፡ በሓውርት።
15 ወይሜህሮሙ፡ በኵሉ፡ ምኵራባቲሆሙ፡ ወያነክሩ፡ ምህሮቶ። ወይሴብሕዎ፡ ኵሉ፡ ወያከብርዎ።
ዘከመ፡ ሰበከ፡ እግዚእ፡ ኢየሱስ፡ በናዝሬት
16 ወሖረ፡ ናዝሬተ፡ ኀበ፡ ተሐፅነ። ወቦአ፡ ምኵራበ፡ በዕለተ፡ ሰንበት፡ በከመ፡ ያለምድ። ወተንሥአ፡ ያንብብ።
17 ወወሀብዎ፡ መጽሐፈ፡ ኢሳይያስ፡ ነቢይ። ወከሢቶ፡ መጽሐፈ፡ ረከበ፡ መካነ፡ ኀበ፡ ይብል።
18 መንፈሰ፡ እግዚአብሔር፡ ላዕሌየ፡ ዘበእንቲኣሁ፡ ቀብዐኒ። እዜንዎሙ፡ ለነዳያን፡ ፈነወኒ።
19 ወእስብክ፡ ሎሙ፡ ግዕዛነ፡ ለፂዉዋን፡ ወአስተፍሥሖሙ፡ ለሕዙናን። ወይርአዩ፡ ዕዉራን፡ ወአንግፎሙ፡ ለግፉዓን። ወእፍትሖሙ፡ ለሙቁሓን፡ ወእፈውሶሙ፡ ለቊሱላን። ወእስብክ፡ ዓመተ፡ እግዚአብሔር፡ ኅሪተ፡ ወዘኮነ፡ መዋዕለ።
20 ወከደነ፡ መጽሐፈ፡ ወመጠዎ፡ ለላእክ፡ ወነበረ። ወአንሥኡ፡ አዕይንቲሆሙ፡ ኵሎሙ፡ እለ፡ ሀለዉ፡ ውስተ፡ ምኵራብ፡ ወነጸርዎ።
21 ወአኀዘ፡ ይበሎሙ፡ ዮም፡ በጽሐ፡ ቃለ፡ ዝንቱ፡ መጽሐፍ። ወተሠልጠ፡ ውስተ፡ እዘኒክሙ።
22 ወእለ፡ ሰምዕዎ፡ ኵሎሙ፡ አንከርዎ፡ ሞገሰ፡ ቃሉ፡ ወሣዕሣዐ፡ አፉሁ። ወይቤሉ፡ አኮኑ፡ ዝንቱ፡ ውእቱ፡ ወልደ፡ ዮሴፍ።
23 ወይቤሎሙ፡ ቦኑ፡ ትብሉኒ፡ ኵልክሙ፡ ዛተ፡ ምሳሌ። ዐቃቤ፡ ሥራይ፡ ፈውስ፡ ርእሰከ። ኵሎ፡ ዘሰማዕነ፡ ዘገበርከ፡ በቅፍርናሆም፡ ግበር፡ በዝየኒ፡ በሀገርከ።
24 ወይቤሎሙ፡ አማን፡ እብለክሙ፡ ኢይከብር፡ ነቢይ፡ በሀገሩ።
25 አማን፡ እብለክሙ፡ ብዙኃት፡ መበለታት፡ ሀለዋ፡ በውስተ፡ እስራኤል። በመዋዕለ፡ ኤልያስ፡ ነቢይ፡ አመ፡ ተዐጽወ፡ ሰማይ። ሠለስተ፡ ዓመተ፡ ወስድስተ፡ አውራኀ። እስከ፡ ኮነ፡ ረኀብ፡ ዐቢይ፡ ውስተ፡ ኵሉ፡ ምድር።
26 ወኢተፈነወ፡ ኤልያስ፡ ኀበ፡ አሐቲ፡ እምኔሆን። ዘእንበለ፡ ኀበ፡ አሐቲ፡ ብእሲት፡ መበለት። ዘሀለወት፡ በሰራጵታ፡ ዘሲዶና።
27 ወብዙኃን፡ እለ፡ ለምጽ፡ ሀለዉ፡ በውስተ፡ እስራኤል። አመ፡ መዋዕለ፡ ኤልሳዕ፡ ነቢይ። ወኢነጽሐ፡ አሐዱሂ፡ እምኔሆሙ፡ ዘእንበለ፡ ንእማን፡ ሶርያዊ።
28 ወተምዕዑ፡ ኵሎሙ፡ እለ፡ ሀለዉ፡ በምኵራብ፡ ሰሚዖሙ፡ ዘንተ።
29 ወተንሥኡ፡ ሶቤሃ፡ ወአውፅእዎ፡ አፍኣ፡ እምሀገር። ወወሰድዎ፡ ውስተ፡ ሕፅነ፡ ርእሰ፡ ደብር። ዘተነድቀት፡ ላዕሌሁ፡ ሀገሮሙ፡ ከመ፡ ያጽድፍዎ።
30 ወውእቱሰ፡ ኀለፈ፡ እንተ፡ ማእከሎሙ፡ ወሖረ።
31 ወወረደ፡ ቅፍርናሆም፡ ሀገረ፡ ገሊላ፡ ወመሀሮሙ፡ በሰንበት።
32 ወያነክሩ፡ ምህሮቶ፡ እስመ፡ በትእዛዝ፡ ውእቱ፡ ቃሉ።
ዘከመ፡ አሕየወ፡ እግዚእ፡ ኢየሱስ፡ ዘቦቱ፡ ጋኔን
33 ወሀሎ፡ በምኵራብ፡ አሐዱ፡ ብእሲ፡ ዘጋኔን፡ እኩይ፡ ላዕሌሁ። ወከልሐ፡ በዐቢይ፡ ቃል።
34 ወይቤ፡ ምንት፡ ብየ፡ ምስሌከ፡ ኢየሱስ፡ ናዝራዊ። መጻእክኑ፡ ታጥፍአነ፡ አአምረከ፡ መኑ፡ አንተ፡ ቅዱሱ፡ ለእግዚአብሔር።
35 ወገሠጾ፡ እግዚእ፡ ኢየሱስ፡ ወይቤሎ፡ ተፈፀም፡ ወፃእ፡ እምኔሁ። ወነፅኆ፡ ጋኔኑ፡ ማእከለ፡ ምኵራብ። ወወፅአ፡ እምኔሁ፡ ወኢነከዮ፡ ወኢ፡ ምንትኒ።
36 ወደንገፁ፡ ኵሎሙ፡ ወተናገሩ፡ በበይናቲሆሙ። ወይቤሉ፡ ምንትኑ፡ ዝ፡ ነገር። እስመ፡ በትእዛዝ፡ ወበኀይል፡ ይኤዝዞሙ፡ ለአጋንንት፡ እኩያን፡ ወይወፅኡ።
37 ወወፅአ፡ ወተሰምዐ፡ ነገሩ፡ በኵሉ፡ በሓውርተ፡ አድያም።
ዘከመ፡ አሕየዎሙ፡ እግዚእ፡ ኢየሱስ፡ ለሐማተ፡ ጴጥሮስ
38 ወወፂኦ፡ እምኵራብ፡ ቦአ፡ ቤተ፡ ስምዖን። ወሐማቱ፡ ለስምዖን፡ ተሐምም፡ ዐቢየ፡ ፈፀንተ። ወነገርዎ፡ ወሰአልዎ፡ በእንቲኣሃ።
39 ወቆመ፡ ኀቤሃ፡ ወገሠጾ፡ ለፈፀንታ። ወኀደጋ፡ ወተንሥአት፡ ሶቤሃ፡ ወተልእከቶሙ።
40 ወሶበ፡ የዐርብ፡ ፀሓይ። አምጽኡ፡ ኀቤሁ፡ ኵሎ፡ ድዉያነ፡ ወሕሙማነ፡ ደዌ፡ ዘዘ፡ ዚኣሁ። ወለለ፡ አሐዱ፡ እምኔሆሙ፡ አንበረ፡ እዴሁ፡ ዲቤሆሙ፡ ወፈወሶሙ።
41 ወብዙኃን፡ አጋንንት፡ ይወፅኡ፡ ወይኬልሑ፡ ወይብልዎ። አንተ፡ ውእቱ፡ ክርስቶስ፡ ወልደ፡ እግዚአብሔር። ወይጌሥጾሙ፡ ወኢያበውሖሙ፡ ይንብቡ፡ ዘንተ። እስመ፡ የአምርዎ፡ ከመ፡ ውእቱ፡ ክርስቶስ።
42 ወጸቢሖ፡ ወፅአ፡ ወሖረ፡ ውስተ፡ ገዳም። ወኀሠሥዎ፡ ሕዝብ፡ ወሖሩ፡ ኀቤሁ። ወአኀዝዎ፡ ወአቀምዎ፡ ከመ፡ ኢይኅልፍ፡ እምኔሆሙ።
43 ወይቤሎሙ፡ ለካልኣትኒ፡ አህጉር፡ ሀለወኒ፡ እዜንዎን። በእንተ፡ መንግሥተ፡ እግዚአብሔር። እስመ፡ እንበይነ፡ ዝንቱ፡ ተፈነውኩ።
44 ወይሰብክ፡ በምኵራባተ፡ ገሊላ።
=== chapter 5 ===
[ምዕራፍ 5]
1 ወሀለዉ፡ ኀቤሁ፡ ሰብእ፡ ብዙኃን። ወያጸምእዎ፡ ቃለ፡ እግዚአብሔር። ወውእቱሰ፡ ይቀውም፡ መንገለ፡ ሐይቅ፡ ባሕረ፡ ጌንሴሬጥ።
2 ወርእየ፡ ክልኤተ፡ አሕማረ፡ ኀበ፡ ውእቱ፡ ሐይቅ። ወወረዱ፡ እምኔሆን፡ መሠግራን፡ ይኅፅቡ፡ መሣግሪሆሙ።
3 ወዐርገ፡ ውስተ፡ አሐቲ፡ ሐመር፡ እምኔሆን። ወይእቲ፡ ሐመር፡ እንተ፡ ስምዖን። ወይቤሎ፡ ከመ፡ ያርሕቃ፡ ሕቀ፡ እምነ፡ ምድር። ከመ፡ ይንበር፡ ዲቤሃ፡ ወይምሀር። ወነበረ፡ ውስተ፡ ሐመር፡ ወመሀሮሙ፡ ለሕዝብ።
ዘከመ፡ አኀዙ፡ በተአምር፡ ብዙኃነ፡ ዓሣተ
4 ወሶበ፡ ፈጸመ፡ ነገሮ፡ አርመመ፡ ወይቤሎ፡ ለስምዖን። አእትቱ፡ መንገለ፡ ዕመቀ፡ ባሕር። ወአውርዱ፡ መሣግሪክሙ፡ ኀበ፡ ይምነ፡ ሐመር።
5 ወአውሥአ፡ ስምዖን፡ ወይቤሎ። ሊቅ፡ ሰራሕነ፡ ኵላ፡ ሌሊተ፡ እንዘ፡ ናወርድ፡ መሣግሪነ። ወአልቦ፡ ዘአኀዝነ፡ ወባሕቱ፡ እስመ፡ አዘዝከነ፡ ናወርድ፡ መሣግሪነ።
6 ወገቢሮሙ፡ ከማሁ፡ ተእኅዙ፡ ብዙኃን፡ ዓሣት። ፈድፋደ፡ እስከ፡ ይትበተከ፡ መሣግሪሆሙ።
7 ወጸውዕዎሙ፡ ለቢጾሙ፡ እለ፡ ውስተ፡ ካልእ፡ ሐመር። ከመ፡ ይምጽኡ፡ ወይርድእዎሙ። ወመጽኡ፡ ወመልኡ፡ ክልኤሆን፡ አሕማረ፡ እስከ፡ ይሰጠማ።
8 ወርእዮ፡ ስምዖን፡ ጴጥሮስ፡ አስተብረከ። ወሰገደ፡ ኀበ፡ እገሪሁ፡ ለእግዚእ፡ ኢየሱስ፡ ወይቤሎ። ኅድገኒ፡ እግዚኦ፡ ወሑር፡ እምኔየ፡ እስመ፡ ብእሲ፡ ኃጥእ፡ አነ።
9 እስመ፡ አኀዞ፡ ድንጋፄ፡ ወፍርሀት። ወኵሎሙ፡ እለ፡ ምስሌሁ፡ ደንገፁ፡ በእንተ፡ ዓሣት፡ ዘተሠግሩ።
10 ወከማሁ፡ ያዕቆብኒ፡ ወዮሐንስ፡ ደቂቀ፡ ዘብዴዎስ፡ አዕርክቲሁ፡ ለስምዖን። ወይቤሎ፡ እግዚእ፡ ኢየሱስ፡ ለስምዖን። ኢትፍራህ፡ እምይእዜሰ፡ ሰብአ፡ ታሤግር።
11 ወአውፅኡ፡ አሕማሪሆሙ፡ ውስተ፡ ምድር፡ ወኀደጉ፡ ኵሎ፡ ወተለውዎ።
ዘከመ፡ አሕየዎሙ፡ እግዚእ፡ ኢየሱስ፡ ለዘለምጽ፡ ወለመፃጕዕ
12 ወእንዘ፡ ሀሎ፡ ውስተ፡ አሐቲ፡ ሀገር፡ መጽአ፡ ብእሲ፡ ዘለምጽ፡ ኵለንታሁ። ወሶበ፡ ርእዮ፡ ለእግዚእ፡ ኢየሱስ፡ ሰገደ፡ ሎቱ፡ በገጹ። ወአስተብቊዖ፡ ወይቤሎ፡ እግዚኦ፡ እመሰ፡ ፈቀድከ፡ ትክል፡ አንጽሖትየ።
13 ወሰፍሐ፡ እዴሁ፡ ወገሰሶ፡ ወይቤሎ። እፈቅድ፡ ንጻሕ፡ ወኀደጎ፡ ለምጹ፡ ሶቤሃ።
14 ወከልኦ፡ ኢይንግር፡ ወኢ፡ ለመኑሂ፡ ወአዘዞ፡ ወይቤሎ። ሑር፡ ወአፍትን፡ ርእሰከ፡ ለካህን። ወአብእ፡ መባእከ፡ በእንተ፡ ዘነጻሕከ። በከመ፡ አዘዘ፡ ሙሴ፡ ከመ፡ ይኩን፡ ስምዐ፡ ላዕሌሆሙ።
15 ወተሰምዐ፡ ነገሩ፡ ፈድፋደ፡ ወይመጽኡ፡ ብዙኃን፡ ሰብእ፡ ኀቤሁ። ይስምዕዎ፡ ወይትፈወሱ፡ እምደዌሆሙ።
16 ወውእቱሰ፡ ይወፅእ፡ ገዳመ፡ ወይጼሊ፡ በህየ።
17 ወእምዝ፡ ኮነ፡ በአሐቲ፡ ዕለት፡ እመዋዕል፡ እንዘ፡ ሀሎ፡ ይሜህሮሙ። ወይነብሩ፡ ፈሪሳውያን፡ ወሊቃናተ፡ ኦሪት፡ እለ፡ መጽኡ፡ እምገሊላ። ወእምኵሉ፡ አህጉረ፡ ይሁዳ፡ ወእምኢየሩሳሌም። ወኀይለ፡ እግዚአብሔር፡ ውእቱ፡ በዘይፌውስ።
18 ወአምጽኡ፡ ኀቤሁ፡ ብእሴ፡ መፃጕዕ፡ እንዘ፡ ይጸውርዎ፡ አርባዕቱ፡ ዕደው፡ በዐራት። ወፈቀዱ፡ ያብእዎ፡ ኀቤሁ፡ ይፈውሶ።
19 ወኀጥኡ፡ እንተ፡ ኀበ፡ ያበውእዎ፡ እስመ፡ ጽፉቅ፡ ሰብእ። ወዐርጉ፡ ናሕሰ፡ ወነሠቱ፡ ጠፈረ። ወአውረድዎ፡ ምስለ፡ ዐራቱ፡ ውስተ፡ ቤት፡ ቅድሜሁ፡ ለእግዚእ፡ ኢየሱስ።
20 ወርእዮ፡ ሃይማኖቶሙ፡ ይቤሎ፡ ለውእቱ፡ ብእሲ። ተኀድገ፡ ለከ፡ ኀጢአትከ።
21 ወአኀዙ፡ የኀልዩ፡ ጸሐፍት፡ ወፈሪሳውያን፡ ወይበሉ። ምንትኑ፡ ውእቱ፡ ዝንቱ፡ ዘይነብብ፡ ፅርፈተ። መኑ፡ ይክል፡ ኀዲገ፡ ኀጢአት፡ ዘእንበለ፡ አሐዱ፡ እግዚአብሔር፡ ባሕቲቱ።
22 ወአእመሮሙ፡ እግዚእ፡ ኢየሱስ፡ ዘይኄልዩ፡ ወይቤሎሙ። ምንተኑ፡ ትኄልዩ፡ በልብክሙ።
23 ምንት፡ ይቀልል፡ እምብሂለ፡ ተኀድገ፡ ለከ፡ ኀጢአትከ። ወእምብሂለ፡ ተንሥእ፡ ወጹር፡ ዐራተከ፡ ወሑር።
24 ከመ፡ ታእምሩ፡ ከመ፡ ብዉሕ፡ ሎቱ፡ ለወልደ፡ ዕጓለ፡ እመሕያው። ይኅድግ፡ ኀጢአተ፡ በዲበ፡ ምድር። ወይቤሎ፡ ለውእቱ፡ ድዉይ፡ ለከ፡ እብለከ። ተንሥእ፡ ወንሣእ፡ ዐራተከ፡ ወእቱ፡ ቤተከ።
25 ወተንሥአ፡ ሶቤሃ፡ ወነሥአ፡ ዐራቶ፡ ዘዲቤሁ፡ ይሰክብ፡ በቅድሜሆሙ። ወአተወ፡ ቤቶ፡ እንዘ፡ ይሴብሖ፡ ለእግዚአብሔር።
26 ወደንገፁ፡ ኵሎሙ፡ ወአእኰትዎ፡ ለእግዚአብሔር። ወፈርሁ፡ ብዙኀ፡ ወይቤሉ፡ ርኢነ፡ መንክረ፡ ዮም።
በእንተ፡ ተኀርዮቱ፡ ለሌዊ፡ መጸብሓዊ
27 ወእምዝ፡ ወፂኦ፡ እምህየ፡ ርእየ፡ ብእሴ፡ መጸብሓዌ፡ ዘስሙ፡ ሌዊ። እንዘ፡ ይነብር፡ ኀበ፡ ምጽባሕ፡ ወይቤሎ፡ ትልወኒ።
28 ወኀደገ፡ ኵሎ፡ ወተለዎ።
29 ወተንሢኦ፡ ገብረ፡ ሎቱ፡ ሌዊ፡ ዐቢየ፡ ምሳሐ፡ በቤቱ። ወብዙኃን፡ ሰብእ፡ ምስሌሁ፡ መጸብሓን፡ ወኃጥኣን። እለ፡ ረፈቁ፡ ምስሌሆሙ፡ ወባዕዳንሂ፡ ብዙኃን።
30 ወአንጐርጐሩ፡ ጸሐፍት፡ ወፈሪሳውያን፡ ላዕሌሁ፡ ወይቤልዎሙ፡ ለአርዳኢሁ። ለምንት፡ ትበልዑ፡ ወትሰትዩ፡ ምስለ፡ መጸብሓን፡ ወኃጥኣን።
31 ወአውሥአ፡ እግዚእ፡ ኢየሱስ፡ ወይቤሎሙ። ሕሙማን፡ ይፈቅድዎ፡ ለዐቃቤ፡ ሥራይ፡ ወአኮ፡ ጥዑያን።
32 ኢመጻእኩ፡ እጸውዕ፡ ጻድቃነ፡ አላ፡ ኃጥኣነ፡ ለንስሓ።
33 ወይቤልዎ፡ ለምንት፡ አርዳኢሁ፡ ለዮሐንስ፡ ጽፉቀ፡ ይጸውሙ፡ ወጸሎተ፡ ይገብሩ። ወከማሁ፡ እለሂ፡ ፈሪሳውያን፡ ወአርዳኢከሰ፡ እሊኣከ፡ ይበልዑ፡ ወይሰትዩ።
34 ወይቤሎሙ፡ እግዚእ፡ ኢየሱስ። ኢይክሉ፡ ደቂቁ፡ ለመርዓዊ፡ ጸዊመ፡ እንዘ፡ ሀሎ፡ መርዓዊ፡ ምስሌሆሙ።
35 ወባሕቱ፡ ይመጽእ፡ መዋዕል፡ አመ፡ ይነሥእዎ፡ ለመርዓዊ፡ እምኔሆሙ። ወይእተ፡ አሚረ፡ ይጸውሙ።
36 ወይቤሎሙ፡ በምሳሌ። አልቦ፡ ዘይጠቅብ፡ ግምደ፡ ደርግሐ፡ ልብስ፡ ውስተ፡ ሥጠት፡ ብሉይ። ወእመ፡ አኮሰ፡ ይሠጦ፡ ሐዲስ፡ ለብሉይ። ወምስለ፡ ብሉይ፡ ኢየዐሪ።
37 ወአልቦ፡ ዘይወዲ፡ ወይነ፡ ሐዲሰ፡ ውስተ፡ ዝቅ፡ ብሉይ። ወእመ፡ አኮሰ፡ ያነቅዖ፡ ወወይኑሂ። ይትከዐው፡ ወዝቁሂ፡ ይትሀጐል።
38 ወለወይንሰ፡ ሐዲስ፡ ውስተ፡ ዝቅ፡ ሐዲስ፡ ይወድይዎ። ወይትዐቀቡ፡ በበይናቲሆሙ።
39 ወአልቦ፡ ዘይሰቲ፡ ጻዕፈ፡ እንዘ፡ ይፈቅድ፡ ከራሜ። እስመ፡ ይኄይስ፡ ከራሚ፡ እምሐዲስ።
=== chapter 6 ===
[ምዕራፍ 6]
ዘከመ፡ ተናገረ፡ እግዚእ፡ ኢየሱስ፡ በእንተ፡ ሰዊት፡ ወዕለተ፡ ሰንበት
1 ወእምዝ፡ ካዕበ፡ ወፈረ፡ እግዚእ፡ ኢየሱስ፡ እንተ፡ ገራውህ፡ በሰንበት። ወመሐዉ፡ አርዳኢሁ፡ ሰዊተ፡ ወሐሰዩ፡ በእደዊሆሙ፡ ወበልዑ።
2 ወይቤልዎሙ፡ ፈሪሳውያን፡ ለምንት፡ ትገብሩ፡ ዘኢይከውን፡ ለገቢር፡ በሰንበት።
3 ወአውሥአ፡ እግዚእ፡ ኢየሱስ፡ ወይቤሎሙ። ኢያንበብክሙኑ፡ ዘገብረ፡ ዳዊት፡ አመ፡ ርኅበ፡ ውእቱሂ፡ ወእለ፡ ምስሌሁ።
4 ዘከመ፡ ቦአ፡ ቤተ፡ እግዚአብሔር፡ ወነሥአ፡ ኅብስተ፡ ቊርባን፡ ዘይሠርዑ። ወበልዑ፡ ውእቱኒ፡ ወወሀቦሙ፡ ለእለ፡ ምስሌሁ። ዘኢይከውኖሙ፡ ለበሊዕ፡ ዘእንበለ፡ ለካህናት፡ ለባሕቲቶሙ።
5 ወይቤሎሙ፡ እግዚኣ፡ ውእቱ፡ ለሰንበት፡ ወልደ፡ ዕጓለ፡ እመሕያው።
በእንተ፡ ዘየብሰት፡ እዴሁ
6 ወእምዝ፡ በካልእት፡ ሰንበት፡ ቦአ፡ ምኵራበ፡ ወመሀሮሙ።
7 ወሀሎ፡ ህየ፡ ብእሲ፡ ዘየብሰት፡ እዴሁ፡ እንተ፡ የማን። ወይትዐቀብዎ፡ ጸሐፍት፡ ወፈሪሳውያን፡ ለእመ፡ ይፌውሶ፡ በሰንበት። ከመ፡ ይርከቡ፡ ምክንያተ፡ በዘያስተዋድይዎ።
8 ወውእቱሰ፡ የአምሮሙ፡ ዘይኄልዩ። ወይቤሎ፡ ለውእቱ፡ ብእሲ፡ ዘየብሰት፡ እዴሁ። ተንሥእ፡ ወቁም፡ ማእከለ፡ ወተንሥአ፡ ወቆመ።
9 ወይቤሎሙ፡ እግዚእ፡ ኢየሱስ። እሴአለክሙ፡ ዘይከውን፡ በሰንበት።
10 ገቢረ፡ ሠናይኑ፡ አው፡ ገቢረ፡ እከይ። አሕድዎ፡ ነፍስኑ፡ ወሚመ፡ ቀቲል። ወአርመሙ። ወነጺሮ፡ ኵሎሙ፡ በመዓት፡ ይቤሎ፡ ለውእቱ፡ ብእሲ፡ ስፋሕ፡ እዴከ። ወሰፍሐ፡ ወሐይወት፡ እዴሁ፡ ወኮነት፡ ከመ፡ ካልእታ።
11 ወእሙንቱሰ፡ የአብዱ፡ ፈድፋደ፡ ወተማከሩ፡ በበይናቲሆሙ። ዘከመ፡ ይሬስይዎ፡ ለእግዚእ፡ ኢየሱስ።
ዘከመ፡ ሰመዮሙ፡ ለ፲ወ፪፡ ሐዋርያት
12 ወእምዝ፡ ኮነ፡ በውእቱ፡ መዋዕል፡ ዐርገ፡ እግዚእ፡ ኢየሱስ፡ ውስተ፡ ደብር። ይጸሊ፡ ወያሌሊ፡ በጸሎት፡ ኀበ፡ እግዚአብሔር።
13 ወጸቢሖ፡ ጸውዖሙ፡ ለአርዳኢሁ። ወኀረየ፡ እምውስቴቶሙ፡ ዐሠርተ፡ ወክልኤተ፡ ወሰመዮሙ፡ ሐዋርያተ።
14 እሉ፡ እሙንቱ፡ ስምዖን፡ ዘተሰምየ፡ ጴጥሮስ፡ ወእንድርያስ፡ እኁሁ። ወያዕቆብ፡ ወዮሐንስ፡ ወፊልጶስ፡ ወበርተሎሜዎስ።
15 ወማቴዎስ፡ ወቶማስ፡ ወያዕቆብ፡ ወልደ፡ እልፍዮስ። ወስምዖን፡ ዘይብልዎ፡ ቀናኢ።
16 ወይሁዳ፡ ዘያዕቆብ፡ ወይሁዳ፡ አስቆሮታዊ፡ ዘዐለዎ፡ ወዘአግብኦ።
17 ወወረደ፡ ምስሌሆሙ፡ ወቆመ፡ በገዳም። ወብዙኃን፡ ሰብእ፡ እምአርዳኢሁኒ፡ ወብዙኃን፡ ጥቀ፡ እምሕዝበ። ዘእምኵሉ፡ ይሁዳ፡ ወእምኢየሩሳሌም። ወእምጰራልያስ፡ ወጰራልዩ፡ ወእምጢሮስ፡ ወሲዶና። እለ፡ መጽኡ፡ ይስምዕዎ፡ ወይትፈወሱ፡ እምደዌሆሙ።
18 ወእለሂ፡ አጋንንት፡ እኩያን፡ የሐይዉ።
19 ወኵሎሙ፡ አሕዛብ፡ ይፈቅዱ፡ ይግስስዎ። እስመ፡ ኀይል፡ ይወፅእ፡ እምኔሁ፡ ወያሐይዎሙ፡ ለኵሎሙ።
በእንተ፡ ስብከት፡ በውስተ፡ ደብር፡ ወበእንተ፡ ብፁዓን
20 ወውእቱሰ፡ አንሥአ፡ አዕይንቲሁ፡ ኀበ፡ አርዳኢሁ፡ ወይቤሎሙ። ብፁዓን፡ አንትሙ፡ ነዳያን፡ እስመ፡ ለክሙ፡ ይእቲ፡ መንግሥተ፡ እግዚአብሔር።
21 ብፁዓን፡ እለ፡ ትርኅቡ፡ ይእዜ፡ እስመ፡ ትጸግቡ። ብፁዓን፡ እለ፡ ትበክዩ፡ ይእዜ፡ እስመ፡ ትሥሕቁ።
22 ብፁዓን፡ አንትሙ፡ ሶበ፡ ይጸልኡክሙ፡ ሰብእ። ወይፈልጡክሙ፡ ወይሰድዱክሙ፡ ወይጼዕሉክሙ። ወያወፅኡ፡ ለክሙ፡ ስመ፡ እኩየ፡ በእንተ፡ ወልደ፡ ዕጓለ፡ እመሕያው።
23 ተፈሥሑ፡ ወተሐሠዩ፡ ይእተ፡ አሚረ። ወአንፈርዕፁ፡ እስመ፡ ብዙኅ፡ ዕሴትክሙ፡ በሰማያት። እስመ፡ ከማሁ፡ ረሰይዎሙ፡ ለነቢያት፡ ቀደምት፡ አበዊሆሙ።
24 ወባሕቱ፡ አሌ፡ ለክሙ፡ አብዕልት። እስመ፡ ሠለጥክሙ፡ ትፍሥሕተክሙ።
25 አሌ፡ ለክሙ፡ እለ፡ ትጸግቡ፡ ይእዜ፡ እስመ፡ ትርኅቡ። አሌ፡ ለክሙ፡ እለ፡ ትሥሕቁ፡ ይእዜ። እስመ፡ ትበክዩ፡ ወትላሕዉ።
26 አሌ፡ ለክሙ፡ ሶበ፡ ሠናየ፡ ይብል፡ ሰብእ፡ ላዕሌክሙ፡ ወይዌድሱክሙ። እስመ፡ ከማሁ፡ ረሰይዎሙ፡ ለነቢያተ፡ ሐሰት፡ አበዊሆሙ።
27 ወለክሙሰ፡ እለ፡ ትሰምዑኒ፡ እብለክሙ። አፍቅሩ፡ ጸላእተክሙ፡ ወግበሩ፡ ሠናየ፡ ለእለ፡ ይፃረሩክሙ።
28 ወደሐርዎሙ፡ ለእለ፡ ይረግሙክሙ። ወጸልዩ፡ ዲበ፡ እለ፡ ይትዔገሉክሙ።
29 ወለዘሂ፡ ጸፍዐከ፡ መልታሕቴከ፡ መጥዎ፡ ካልእታኒ። ወለዘኒ፡ ነሥአከ፡ ልብሰከ፡ ክዳነከሂ፡ ኢትክልኦ።
30 ለኵሉ፡ ዘሰአለከ፡ ሀብ። ወለዘኒ፡ ሄደከ፡ ንዋየከ፡ ኢትክልኦ።
31 ወበከመ፡ ትፈቅዱ፡ ይግበሩ፡ ለክሙ፡ ሰብእ። ከማሁ፡ ግበሩ፡ ሎሙ፡ አንትሙኒ።
32 ወእመሰ፡ ዳእሙ፡ ዘአፍቀረክሙ፡ አፍቀርክሙ። ምንትኑ፡ እንከ፡ ዕሴትክሙ። ኃጥኣንሂ፡ ዘሰ፡ ይገብሩ፡ ዘያፈቅሮሙ፡ ያፈቅሩ።
33 ወእመኒ፡ አሠነይክሙ፡ ለእለ፡ ያሤንዩ፡ ለክሙ። ምንትኑ፡ እንከ፡ ዕሴትክሙ። ኃጥኣንሂ፡ ከማሁሰ፡ ይገብሩ።
34 ወእመኒ፡ ለቃሕክሙ፡ እምኀበ፡ ዘትሴፈዉ፡ ትትፈደዩ፡ እምኔሁ። ምንትኑ፡ እንከ፡ ዕሴትክሙ። ኃጥኣንሂ፡ ይሌቅሕዎሙ፡ ለኃጥኣን፡ ከመ፡ ይትፈደይዎሙ፡ ዕሩየ።
35 ወይእዜኒ፡ አፍቅሩ፡ ጸላእተክሙ፡ ወአሠንዩ፡ ሎሙ። ወለቅሑ፡ እንዘ፡ ኢትሴፈዉ፡ ትትፈደዩ። ወይከውን፡ ብዙኀ፡ ዕሴትክሙ፡ ወትከውኑ፡ ውሉዶ፡ ለልዑል። እስመ፡ ውእቱ፡ ኄር፡ ላዕለ፡ ኄራን፡ ወላዕለ፡ እኩያን።
36 ወኩኑ፡ መሓርያነ፡ ከመ፡ አቡክሙ፡ ሰማያዊ፡ መሓሪ፡ ውእቱ።
37 ኢትኰንኑ፡ ወኢትትኰነኑ፡ ኢትግፍዑ፡ ወኢይግፍዑክሙ። ኅድጉ፡ ወየኀድጉ፡ ለክሙ።
38 ሀቡ፡ ወይትወሀበክሙ፡ መስፈርተ፡ ሠናየ። ንሕኑሐ፡ ወምሉአ፡ ወዝሕዙሐ፡ ይሁቡክሙ፡ ውስተ፡ ሕፅንክሙ። ወበመስፈርት፡ ዘሰፈርክሙ፡ ይሰፍሩ፡ ለክሙ።
በእንተ፡ ካልኣት፡ ትእዛዛት
39 ወመሰለ፡ ሎሙ፡ ወይቤሎሙ፡ ይክልኑ፡ ዕዉር፡ ለዕዉር፡ መሪሖቶ።
40 አኮኑ፡ ክልኤሆሙ፡ ይወድቁ፡ ውስተ፡ ግብ። አልቦ፡ ረድእ፡ ዘየዐቢ፡ እምሊቁ። መጠኑ፡ ለኵሉ፡ ይኩን፡ ከመ፡ ሊቁ።
41 ምንተኑ፡ ትኔጽር፡ ኀሰረ፡ ዘውስተ፡ ዐይነ፡ ቢጽከ። ወኢትሬኢ፡ ሠርዌ፡ ዘውስተ፡ ዐይንከ።
42 ወእፎ፡ ትክል፡ ብሂሎቶ፡ ለቢጽከ። ተዐገሥ፡ እኁየ፡ አውፅእ፡ ኀሰረ፡ እምዐይንከ። ወአንተሰ፡ ኢትሬኢ፡ ሠርዌ፡ ዘውስተ፡ ዐይንከ። ኦ፡ መደልው፡ አውፅእ፡ ቅድመ፡ ሠርዌ፡ እምዐይንከ። ወእምዝ፡ ትኔጽር፡ ታውፅእ፡ ኀሰረ፡ እምዐይነ፡ ቢጽከ።
43 አልቦ፡ ዕፅ፡ ሠናይ፡ ዘይፈሪ፡ ፍሬ፡ እኩየ። ወአልቦ፡ ዕፅ፡ እኩይ፡ ዘይፈሪ፡ ፍሬ፡ ሠናየ።
44 ወኵሉ፡ ዕፅ፡ እምፍሬሁ፡ ይትዐወቅ። ወኢየአርሩ፡ በለሰ፡ እምአሥዋክ። ወኢይቀሥሙ፡ አስካለ፡ እምአሜከላ።
45 ኄር፡ ብእሲ፡ እምሠናይ፡ መዝገበ፡ ልቡ፡ ያወፅኣ፡ ለሠናይት። ወእኩይሰ፡ ብእሲ፡ እምእኩይ፡ መዝገበ፡ ልቡ፡ ያወፅኣ፡ ለእኪት። እስመ፡ እምተረፈ፡ ልብ፡ ይነብብ፡ አፍ።
46 ለምንት፡ እንከ፡ ትብሉኒ፡ እግዚኦ፡ እግዚኦ። ወኢትገብሩ፡ ዘእቤለክሙ።
47 ኵሉ፡ ዘይመጽእ፡ ኀቤየ፡ ወይሰምዐኒ፡ ቃልየ። ወይገብሮ፡ አርእየክሙ፡ ዘይመስል።
48 ይመስል፡ ብእሴ፡ ጠቢበ፡ ዘሐነጸ፡ ቤቶ። ወከረየ፡ ወአዕመቀ፡ ወሣረረ፡ መሠረቶ፡ ዲበ፡ ኰኵሕ። ወብዙኃን፡ አፍላግ፡ መጺኦሙ፡ ገፍዕዎ፡ ወሓይዝት፡ ለውእቱ፡ ቤት። ወስእኑ፡ አንቀልቅሎቶ፡ እስመ፡ ዲበ፡ ኰኵሕ፡ ተሣረረ።
49 ወዘሰ፡ ይሰምዐኒ፡ ቃልየ፡ ወኢይገብሮ። ይመስል፡ ብእሴ፡ ዘሐነጸ፡ ቤቶ፡ መልዕልተ፡ ምድር፡ ዘእንበለ፡ መሠረት። ወገፍዕዎ፡ ወሓይዝት፡ ወወድቀ፡ ሶቤሃ። ወኮነ፡ ድቀቱ፡ ለውእቱ፡ ቤት፡ ዐቢየ።
=== chapter 7 ===
[ምዕራፍ 7]
በእንተ፡ ወዓሊ፡ ዘመስፍን
1 ወፈጺሞ፡ ነጊሮቶሙ፡ ቃሎ፡ ለሕዝብ፡ ቦአ፡ ቅፍርናሆም።
2 ወሀሎ፡ አሐዱ፡ መስፍን፡ ወገብሩ፡ ይደዊ፡ ወአልጸቀ፡ ይሙት። ወክቡር፡ ውእቱ፡ በኀቤሁ።
3 ወሰሚዖ፡ በእንተ፡ እግዚእ፡ ኢየሱስ። ለአከ፡ ኀቤሁ፡ ረበናተ፡ አይሁድ፡ ያስተብቊዕዎ። ከመ፡ ይምጻእ፡ ወያሕዩ፡ ሎቱ፡ ቊልዔሁ።
4 ወመጽኡ፡ ኀበ፡ እግዚእ፡ ኢየሱስ፡ ወአስተብቊዕዎ፡ ወይቤልዎ። ፍጡነ፡ ረድ፡ እስመ፡ ይደልዎ፡ ትግበር፡ ምስሌሁ፡ ዘንተ።
5 እስመ፡ ያፈቅር፡ ሕዝበነ፡ ወምኵራበነኒ፡ ውእቱ፡ ሐነጸ፡ ለነ።
6 ወሖረ፡ እግዚእ፡ ኢየሱስ፡ ምስሌሆሙ። ወአልጺቆ፡ ኀበ፡ ቤቱ። ለአከ፡ አዕርክቲሁ፡ ውእቱ፡ መስፍን፡ ኀቤሁ፡ እንዘ፡ ይብል። እግዚኦ፡ ኢትጻሙ፡ እስመ፡ ኢይደልወኒ፡ ከመ፡ ትባእ፡ ታሕተ፡ ጠፈረ፡ ቤትየ።
7 ወለልየኒ፡ ኢይደልወኒ፡ እምጻእ፡ ኀቤከ። ወባሕቱ፡ አዝዝ፡ በቃልከ፡ ወየሐዩ፡ ቊልዔየ።
8 እስመ፡ አነሂ፡ ብእሲ፡ መኰንን፡ አነ፡ ወብየ፡ ወዓልት። ወእብሎ፡ ለዝ፡ ሑር፡ ወየሐውር፡ ወለካልኡኒ፡ ነዐ፡ ወይመጽእ። ወለገብርየኒ፡ ግበር፡ ከመ፡ ዝ፡ ወይገብር።
9 ወሰሚዖ፡ እግዚእ፡ ኢየሱስ፡ ዘንተ፡ እምኔሁ፡ አንከሮ፡ ወተመይጦ። ይቤሎሙ፡ ለሕዝብ፡ እለ፡ ተለውዎ። ኢረከብኩ፡ ዘከመ፡ ዝ፡ ዘይትአመን፡ በውስተ፡ እስራኤል።
10 ወአቲዎሙ፡ እለ፡ ተፈነዉ፡ ረከብዎ፡ ለገብሩ፡ በዘሐይወ።
11 ወበሳኒታ፡ ሖረ፡ ሀገረ፡ እንተ፡ ስማ፡ ናይን። ወሖሩ፡ ምስሌሁ፡ አርዳኢሁ፡ ወሕዝብኒ፡ ብዙኅ።
በእንተ፡ ወልደ፡ መበለት
12 ወበጺሖ፡ ኀበ፡ አንቀጸ፡ ሀገር። ረከበ፡ ቀበረ፡ ፅዉረ፡ ዘወልደ፡ ብእሲት፡ መበለት። ዘውእቱ፡ አሐዱ፡ ለእሙ። ወብዙኃን፡ ሰብአ፡ ሀገር፡ ምስሌሃ።
13 ወሶበ፡ ርእያ፡ እግዚእነ፡ መሐራ፡ ወተሣሀላ፡ ወይቤላ፡ ኢትብክዪ።
14 ወቀርበ፡ ወአኀዘ፡ ነፍቆ፡ ወቆሙ፡ እለ፡ ይጸውርዎ። ወይቤሎ፡ ለከ፡ እብለከ፡ ወሬዛ፡ ተንሥእ።
15 ወተንሥአ፡ ወነበረ፡ ውእቱ፡ በድን። ወተናገረ፡ ርቱዐ፡ ወአወፈዮ፡ ለእሙ።
16 ወፈርሁ፡ ኵሎሙ፡ ወሰብሕዎ፡ ለእግዚአብሔር። ወይቤሉ፡ ዐቢይ፡ ነቢይ፡ ተንሥአ፡ ለነ። ወተሣሀሎሙ፡ እግዚአብሔር፡ ለሕዝቡ።
17 ወተሰምዐ፡ በእንቲኣሁ፡ ዝንቱ፡ ነገር። በኵሉ፡ በሓውርተ፡ ይሁዳ፡ ወበኵሉ፡ አድያሚሃ።
በእንተ፡ እለ፡ ተፈነዉ፡ እምኀበ፡ ዮሐንስ
18 ወነገርዎ፡ አርዳኢሁ፡ ለዮሐንስ፡ ዘንተ፡ ኵሎ።
19 ወጸውዐ፡ ዮሐንስ፡ ክልኤተ፡ እምአርዳኢሁ። ወለአኮሙ፡ ኀበ፡ እግዚእ፡ ኢየሱስ፡ ወይቤ። አንተኑአ፡ ዘይመጽእ፡ ወሚመ፡ ቦኑ፡ ካልእ፡ ዘንሴፎ።
20 ወበጺሖሙ፡ እለ፡ ለአኮሙ፡ ኀቤሁ፡ ይቤልዎ። ዮሐንስ፡ መጥምቅ፡ ለአከነ፡ ኀቤከ፡ ወይቤ። አንተኑአ፡ ዘይመጽእ፡ ወቦኑ፡ ካልእ፡ ዘንሴፎ።
21 ወፈወሶሙ፡ ለብዙኃን፡ ሶቤሃ፡ እምደዌሆሙ። ወእምሕማሞሙ፡ ወእምአጋንንት፡ እኩያን። ወለብዙኃን፡ ዕዉራን፡ ጸገዎሙ፡ ብርሃነ፡ ይርአዩ።
22 ወአውሥአ፡ እግዚእ፡ ኢየሱስ፡ ወይቤሎሙ። ሑሩ፡ ንግርዎ፡ ለዮሐንስ፡ ዘሰማዕክሙ፡ ወዘርኢክሙ። ዕዉራን፡ ይሬእዩ፡ ወስቡራን፡ የሐውሩ፡ ወእለ፡ ለምጽ፡ ይነጽሑ። ወጽሙማን፡ ይሰምዑ፡ ወምዉታን፡ ይትነሥኡ። ወነዳያን፡ ይዜነዉ፡ ወይትፌሥሑ።
23 ወብፁዓን፡ እለ፡ ኢይትዐቀፉ፡ ብየ።
ዘከመ፡ ወደሶ፡ እግዚእ፡ ኢየሱስ፡ ለዮሐንስ
24 ወኀሊፎሙ፡ አርዳኢሁ፡ ለዮሐንስ። አኀዘ፡ ይበሎሙ፡ ለሕዝብ፡ በእንተ፡ ዮሐንስ፡ መጥምቅ። ምንተኑ፡ ወፃእክሙ፡ ገዳመ፡ ትርአዩ፡ ብርዐኑ፡ ዘይትሐወስ፡ እምነፋስ።
25 ወምንትኑመ፡ ወፃእክሙ፡ ትርአዩ፡ ብእሴኑ፡ ዘርሱይ፡ በቀጠንተ፡ አልባስ። ናሁ፡ እለሰ፡ ርሱያን፡ አልባሰ፡ ክብር፡ ውስተ፡ አብያተ፡ ነገሥት፡ ሀለዉ። ወምንትኑመ፡ ወፃእክሙ፡ ትርአዩ፡ ነቢየኑ።
26 እወ፡ እብለክሙ፡ የዐቢ፡ እምነቢይ።
27 ዝ፡ ውእቱ፡ ዘበእንቲኣሁ፡ ተጽሕፈ። ናሁ፡ አነ፡ እፌኑ፡ መልአክየ፡ ቅድመ፡ ገጽከ። ዘይጸይሕ፡ ፍኖተከ፡ በቅድሜከ።
28 አማን፡ እብለክሙ፡ ኢተንሥአ፡ እምትውልደ፡ አንስት። ዘየዐቢ፡ እምዮሐንስ፡ መጥምቅ፡ ወኢ፡ መኑሂ። ወበመንግሥተ፡ እግዚአብሔርሰ፡ ዘይንእሶ፡ የዐብዮ።
29 ወሰሚዖሙ፡ ኵሎሙ፡ ሕዝብ፡ ወመጸብሓን፡ አጽደቅዎ፡ ለእግዚአብሔር። እስመ፡ ተጠምቁ፡ ጥምቀተ፡ ዮሐንስ።
30 ወፈሪሳውያንሰ፡ ወጸሐፍተ፡ ሕግ፡ ዐለዉ፡ ትእዛዘ፡ እግዚአብሔር። ወኢተጠምቁ፡ በኀቤሁ።
31 በምንት፡ አስተማስሎሙ፡ ለሰብአ፡ ዛቲ፡ ትውልድ። ወመነ፡ ይመስሉ።
32 ይመስሉ፡ ደቂቀ፡ እለ፡ ይነብሩ፡ ውስተ፡ ምሥያጥ። ወይጼውዑ፡ ቢጾሙ፡ ወይብልዎሙ። ሐለይነ፡ ለክሙ፡ ወኢዘፈንክሙ። አስቆቀውነሂ፡ ለክሙ፡ ወኢበከይክሙ።
33 እስመ፡ መጽአ፡ ዮሐንስ፡ መጥምቅ፡ ኢይበልዕ፡ እክለ፡ ወኢይሰቲ፡ ወይነ። ወትቤልዎ፡ ጋኔን፡ ቦቱ።
34 ወመጽአ፡ ወልደ፡ ዕጓለ፡ እመሕያው፡ ይበልዕ፡ ወይሰቲ። ወትቤሉ፡ ነዋ፡ ብእሲ፡ በላዒ፡ ወሰታዬ፡ ወይን፡ ዐርከ፡ መጸብሓን፡ ወኃጥኣን።
35 ወጸድቀት፡ ጥበብ፡ እምኵሉ፡ ውሉዳ።
በእንተ፡ ፈሪሳዊ፡ ወኃጥእት፡ ብእሲት
36 ወይቤሎ፡ አሐዱ፡ እምፈሪሳውያን፡ ከመ፡ ይምሳሕ፡ በኀቤሁ። ወቦአ፡ ቤተ፡ ፈሪሳዊ፡ ወረፈቀ።
37 ወመጽአት፡ ብእሲት፡ ኃጥእት፡ እምሰብአ፡ ይእቲ፡ ሀገር። አእሚራ፡ ከመ፡ ይመስሕ፡ ውስተ፡ ቤተ፡ ፈሪሳዊ። ወተሣየጠት፡ ዕፍረተ፡ ዘአልባስጥሮስ።
38 ወቆመት፡ ድኅሬሁ፡ ኀበ፡ እገሪሁ። ወበከየት፡ ወአርሐሰት፡ እገሪሁ፡ በአንብዓ። ወትመዘምዝ፡ በሥዕርተ፡ ርእሳ። ወትስዕም፡ እገሪሁ፡ ወትቀብኦ፡ ዕፍረተ።
39 ወርእዮ፡ ፈሪሳዊ፡ ዘጸውዖ፡ ኀለየ፡ በልቡ፡ ወይቤ። ሶበሁ፡ ነቢይ፡ ውእቱ፡ ዝንቱ። እምኢያእመረኑ፡ ከመ፡ ኃጥእት፡ ይእቲ፡ ዛቲ፡ ብእሲት፡ እንተ፡ ትገስሶ። ወዘከመ፡ እፎ፡ ይእቲ።
40 ወአውሥአ፡ እግዚእ፡ ኢየሱስ፡ ወይቤሎ። ስምዖን፡ ብየ፡ ዘእብለከ፡ ወይቤሎ፡ ሊቅ፡ በል።
41 ወይቤሎ፡ ክልኤቱ፡ ይፈድይዎ፡ ለአሐዱ፡ በዓለ፡ ዕዳ። አሐዱ፡ ይፈድዮ፡ ኀምስተ፡ ምእተ፡ ዲናረ፡ ወካልኡኒ፡ ኀምሳ።
42 ወኀጢኦሙ፡ ዘይፈድዎ፡ ኀደገ፡ ሎሙ፡ ለክልኤሆሙ። መኑ፡ እንከ፡ ርቱዕ፡ ፈድፋደ፡ ያፍቅሮ፡ እምኔሆሙ።
43 ወተሰጥወ፡ ስምዖን፡ ወይቤሎ፡ እብልሰ፡ ዘብዙኀ፡ ኀደገ፡ ሎቱ። ወይቤሎ፡ ሠናየ፡ ፈታሕከ።
44 ወተመይጠ፡ ኀበ፡ ይእቲ፡ ብእሲት፡ ወይቤሎ፡ ለስምዖን። ትሬእያኑ፡ ለዛቲ፡ ብእሲት። ቦእኩ፡ ቤተከ፡ ወኢወሀብከኒ፡ ማየ፡ ጥቀ፡ ለእገርየ። ወይእቲሰ፡ በከየት፡ ወበአንብዓ፡ አርሐሰት፡ እገርየ። ወበሥዕርታ፡ መዝመዘተኒ።
45 ወአንተሰ፡ ኢተአማኅከኒ። ወይእቲሰ፡ እምዘቦእኩ፡ ኢያንተገት፡ ስዒመ፡ እገርየ።
46 ወአንተሰ፡ ኢቀባዕከኒ፡ በዘይት፡ ርእስየ። ወይእቲሰ፡ ዕፍረተ፡ ቀብዐተኒ፡ እገርየ።
47 በእንተ፡ ዝንቱ፡ እብለከ፡ ተኀድገ፡ ላቲ፡ ኀጢአታ፡ ብዙኅ። እስመ፡ ብዙኀ፡ አፍቀረተኒ።
48 ወዘሰ፡ ውኁደ፡ አፍቀረኒ፡ ውኁድ፡ ኀጢአቱ፡ ይትኀደግ፡ ሎቱ። ወዘሰ፡ ብዙኀ፡ አፍቀረኒ፡ ብዙኀ፡ ይትኀደግ፡ ሎቱ። ወይቤላ፡ ለይእቲ፡ ብእሲት፡ ተኀድገ፡ ለኪ፡ ኀጢአተኪ።
49 ወአኀዙ፡ እለ፡ ይረፍቁ፡ ይበሉ፡ በበይናቲሆሙ። መኑ፡ ውእቱ፡ ዝንቱ፡ ዘየኀድግ፡ ኀጢአተ።
50 ወይቤላ፡ ለይእቲ፡ ብእሲት። ሃይማኖትኪ፡ አድኀነተኪ፡ እትዊ፡ በሰላም።
=== chapter 8 ===
[ምዕራፍ 8]
ዘከመ፡ ዖደ፡ እግዚእ፡ ኢየሱስ፡ አህጉረ፡ ገሊላ
1 ወእምዝ፡ በሳኒታ፡ አንሶሰወ፡ እግዚእ፡ ኢየሱስ። ውስተ፡ አህጉር፡ ወአዕጻዳት፡ ወሰበከ፡ ሎሙ። ወመሀሮሙ፡ በእንተ፡ መንግሥተ፡ እግዚአብሔር። ወምስሌሁ፡ ዐሠርቱ፡ ወክልኤቱ፡ አርዳኢሁ።
2 ወአንስትኒ፡ እለ፡ አሕየዎን፡ እምአጋንንት፡ እኩያን፡ ወእምደዌሆን። ወእማንቱ፡ ማርያም፡ እንተ፡ ይብልዋ፡ መግደላዊት። እንተ፡ ሰብዐቱ፡ አጋንንት፡ ወፅኡ፡ እምኔሃ።
3 ወዮሐና፡ ብእሲተ፡ ኩዛ፡ መጋቢሁ፡ ለሄሮድስ። ወሶስና፡ ወካልኣትሂ፡ ብዙኃት፡ እለ፡ ተልእካሁ፡ በንዋዮን።
በእንተ፡ ምሳሌ፡ ዘዘራዒ
4 ወእንዘ፡ ያጸምእዎ፡ ኵሉ፡ ሕዝብ። ወእለሂ፡ መጽኡ፡ ኀቤሁ፡ እምኵሉ፡ አህጉር። ይቤሎሙ፡ ምሳሌ፡ እንተ፡ ከመ፡ ዝ።
5 ወፈረ፡ ዘይዘርዕ፡ ከመ፡ ይዝራዕ፡ ዘርዖ። ወእንዘ፡ ይዘርዕ፡ ቦ፡ ዘወድቀ፡ ውስተ፡ ፍኖት። ወመጽኡ፡ ሰብእ፡ ወኬድዎ፡ ወበልዕዎ፡ አዕዋፈ፡ ሰማይ።
6 ወቦ፡ ዘወድቀ፡ ውስተ፡ ኰኵሕ። ወበቊሎ፡ የብሰ፡ በጊዜሃ፡ እስመ፡ አልቦ፡ ሥርው።
7 ወቦ፡ ዘወድቀ፡ ውስተ፡ ሦክ። ወበቊሎ፡ ጠበቆ፡ ሦክ።
8 ወቦ፡ ዘወድቀ፡ ውስተ፡ ምድር፡ ሠናይት። ወበቈለሂ፡ ወፈረየሂ፡ ምእተ፡ ምክዕቢተ። ወዘንተ፡ ብሂሎ፡ ይቤሎሙ፡ ዘቦ፡ እዘን፡ ሰሚዐ፡ ለይስማዕ።
9 ወተስእልዎ፡ አርዳኢሁ፡ ወይቤልዎ። ምንትኑ፡ ይእቲ፡ ዛቲ፡ ምሳሌ።
10 ወይቤሎሙ፡ ለክሙ፡ ተውህበ፡ ታእምሩ፡ ምሥጢራ፡ ለመንግሥተ፡ እግዚአብሔር። ወለእልክቱሰ፡ በምሳሌ፡ ከመ፡ ርእዮሙኒ፡ ኢይርእዩ። ወሰሚዖሙኒ፡ ኢይስምዑ፡ ወኢይለብዉ።
11 ወከመ፡ ዝ፡ ይእቲ፡ ምሳሌሃ። ዘርእሰ፡ ቃለ፡ እግዚአብሔር፡ ውእቱ።
12 ወዘሰ፡ ውስተ፡ ፍኖት፡ እሉ፡ እሙንቱ፡ እለ፡ ይሰምዑ፡ ቃለ። ወይመጽእ፡ ሰይጣን፡ ወይነሥኦ፡ ለቃል፡ እምልቦሙ። ከመ፡ ኢይእመኑ፡ ወኢይሕየዉ።
13 ወዘሰ፡ ውስተ፡ ኰኵሕ፡ እለ፡ ሰሚዖሙ፡ ይትዌከፍዎ፡ ለነገር፡ በፍሥሓ። ወባሕቱ፡ ሥርው፡ አልቦሙ፡ ለሶቤሃ። ዳእሙ፡ የአምኑ፡ ወእምከመ፡ ተመንደቡ፡ የዐልዉ።
14 ወዘሰ፡ ውስተ፡ ሦክ፡ ወድቀ፡ እሉ፡ እሙንቱ፡ እለ፡ ይሰምዑ። ወኅሊና፡ ብዕል፡ ወትካዘ፡ መንበርት፡ ወሐውዘ፡ ተድላ። ወፈጊዕ፡ ያጠውቆሙ፡ ወኢይገብሩ።
15 ወዘሰ፡ ውስተ፡ ምድር፡ ሠናይት። እሉ፡ እሙንቱ፡ እለ፡ ይሰምዑ፡ ቃለ፡ በሠናይ፡ ልብ። ወየዐቅብዎ፡ ወበጥቡዕ፡ ይትዔገሡ፡ ወያጠብዑ፡ ወይፈርዩ።
16 ወአልቦ፡ ዘያኀቱ፡ ማኅቶተ፡ ወይከድና፡ ንዋየ። ወያነብራ፡ ታሕተ፡ ዐራት፡ ዘእንበለ፡ ዲበ፡ ተቅዋማ። ከመ፡ ይርአዩ፡ ብርሃነ፡ እለ፡ ያንሶስዉ።
17 ወአልቦ፡ ኅቡእ፡ ዘኢይትከሠት፡ ወአልቦ፡ ክዱን፡ ዘኢያስተርኢ። ወገሃደ፡ ይከውን።
18 ወአእምሩ፡ እንከ፡ ዘከመ፡ ትሰምዑ፡ እስመ፡ ለዘቦ፡ ይሁብዎ። ወለዘሰ፡ አልቦ፡ እለሂ፡ ቦ፡ የሀይድዎ።
19 ወመጽኡ፡ ኀቤሁ፡ እሙ፡ ወአኀዊሁ፡ ወስእኑ፡ ረኪቦቶ። እስመ፡ ጽፉቅ፡ ሰብእ።
20 ወይቤልዎ፡ እምከ፡ ወአኀዊከ፡ አፍኣ፡ ይቀውሙ። ወይፈቅዱ፡ ይርአዩከ።
21 ወአውሥአ፡ ወይቤሎሙ። እምየ፡ ወአኀውየ፡ እሉ፡ እሙንቱ፡ እለ፡ ይሰምዑ፡ ቃለ፡ እግዚአብሔር፡ ወይገብሩ።
በእንተ፡ ዘከመ፡ ገሠጸ፡ ማያተ
22 ወኮነ፡ በአሐቲ፡ ዕለት፡ ዐርገ፡ ውእቱ፡ ውስተ፡ ሐመር። ወአርዳኢሁኒ፡ ወይቤሎሙ፡ ንዑ፡ ንዕዱ፡ ማዕዶተ፡ ቀላይ፡ ወሖሩ።
23 ወእንዘ፡ የሐውሩ፡ ኖመ። ወመጽአ፡ ነፋሰ፡ ዐውሎ፡ ውስተ፡ ባሕር። ወመልአ፡ ማየ፡ ሐመሮሙ፡ ወተመንደቡ።
24 ወሖሩ፡ ወአንቅሕዎ፡ ወይቤልዎ። ኦ፡ ሊቅ፡ አድኅነነ፡ ከመ፡ ኢንሙት። ወተንሥአ፡ ወገሠጾሙ፡ ለነፋሳትኒ፡ ወለማዕበለ፡ ባሕርኒ። ወአርመሙ፡ ወኮነ፡ ዛኅን፡ ዐቢየ።
25 ወይቤሎሙ፡ አይቴኑ፡ ሃይማኖትክሙ። ወፈርሁ፡ ወአንከሩ፡ ወይቤሉ፡ በበይናቲሆሙ። መኑ፡ እንጋ፡ ውእቱ፡ ዝንቱ፡ ዘይትኤዘዙ፡ ሎቱ፡ ባሕርኒ፡ ወነፋሳትኒ።
ዘከመ፡ ፈወሶ፡ እግዚእ፡ ኢየሱስ፡ በብሔረ፡ ጌርጌሴኖን፡ ለዘቦቱ፡ ጋኔን
26 ወእምዝ፡ ሖረ፡ እግዚእ፡ ኢየሱስ፡ በሐመር፡ ብሔረ፡ ጌርጌሴኖን። ዘአንጻረ፡ ማዕዶተ፡ ገሊላ።
27 ወወሪዶሙ፡ ምድረ፡ ተቀበሎ፡ ብእሲ፡ ዘጋኔን፡ ወፂኦ፡ እምሀገር። ወጕንዱይ፡ መዋዕል፡ እምዘኢለብሰ፡ ልብሶ። ወኢቦአ፡ ቤተ፡ ዳእሙ፡ ይነብር፡ ውስተ፡ መቃብር።
28 ወሶበ፡ ርእዮ፡ ለእግዚእ፡ ኢየሱስ፡ ከልሐ፡ ወሮጸ፡ ወሰገደ፡ ሎቱ። ወዐውየወ፡ በዐቢይ፡ ቃል፡ ወይቤ። ምንት፡ ብየ፡ ምስሌከ፡ ኢየሱስ፡ ወልደ፡ እግዚአብሔር፡ ልዑል። ወአስተብቊዖ፡ ኢይሣቅዮ።
29 እስመ፡ አዘዞ፡ ለውእቱ፡ ጋኔን፡ እኩይ፡ ይፃእ፡ እምላዕለ፡ ውእቱ፡ ብእሲ። እስመ፡ ዘልፈ፡ ያአብዶ፡ ወይሞቅሕዎ፡ በመዋቅሕት። ወየዐቅብዎ፡ ደቅ፡ ወይሰብር፡ መዋቅሕቲሁ። ወያረውጾ፡ ጋኔኑ፡ ውስተ፡ ገዳም።
30 ወተስእሎ፡ እግዚእ፡ ኢየሱስ፡ ወይቤሎ፡ መኑ፡ ስምከ። ወይቤሎ፡ ሌጌዎን፡ ስምየ፡ እስመ፡ ብዘኃን፡ አጋንንት፡ አኀዝዎ።
31 ወአስተብቊዕዎ፡ ከመ፡ ኢይፈንዎሙ፡ ይረዱ፡ ውስተ፡ ሲኦል።
32 ወቦ፡ ህየ፡ መራዕየ፡ አሕርው፡ ብዙኅ፡ ይትረዐይ፡ ውስተ፡ ደብር። ወአስተብቊዕዎ፡ እሙንቱ፡ አጋንንት። ከመ፡ ያብሖሙ፡ ይባኡ፡ ላዕለ፡ አሕርው፡ ወአብሖሙ።
33 ወወፂኦሙ፡ እሙንቱ፡ አጋንንት፡ እምላዕለ፡ ውእቱ፡ ብእሲ። ቦኡ፡ ላዕለ፡ አሕርው፡ ወአብዱ፡ ኵሉ፡ መራዕየ፡ አሕርው። ወወድቁ፡ እንተ፡ ጽድፍ፡ ወውስተ፡ ቀላይ፡ ወሞቱ።
34 ወርእዮሙ፡ ኖሎት፡ ዘኮነ፡ ጐዩ፡ ወሖሩ። ወአተዉ፡ ወዜነዉ፡ ለአህጉር፡ ወለአዕጻዳት።
35 ወወፅኡ፡ ሰብእ፡ ከመ፡ ይርአዩ፡ ዘኮነ። ወሖሩ፡ ወበጽሑ፡ ኀበ፡ እግዚእ፡ ኢየሱስ። ወረከብዎ፡ ለውእቱ፡ ብእሲ፡ ዘወፅኡ፡ እምኔሁ፡ አጋንንት። እንዘ፡ ይነብር፡ ኀበ፡ እገሪሁ፡ ለእግዚእ፡ ኢየሱስ። ወልቡሰ፡ ልብሶ፡ ወገብኦ፡ ልቡ፡ ወፈርሁ።
36 ወነገርዎሙ፡ እለሂ፡ ርእዩ፡ ዘከመ፡ ሐይወ፡ ዘጋኔን።
37 ወአስተብቊዎ፡ ኵሎሙ፡ ሰብአ፡ አድያም፡ ዘጌርጌሴኖን። ወይቤልዎ፡ ከመ፡ ይሑር፡ እምኀቤሆሙ። እስመ፡ ፍርሀት፡ ዐቢይ፡ አኀዞሙ። ወዐርገ፡ ሐመረ፡ ወተመይጠ።
38 ወአስተብቊዖ፡ ለእግዚእ፡ ኢየሱስ። ውእቱ፡ ብእሲ፡ ዘወፅኡ፡ እምኔሁ፡ አጋንንት፡ ከመ፡ ይሑር፡ ምስሌሁ። ወፈነዎ፡ ወይቤሎ። ሑር፡ ወእቱ፡ ቤተከ፡ ወንግር፡ ኵሎ፡ ዘገብረ፡ ለከ፡ እግዚአብሔር።
39 ወሖረ፡ ውስተ፡ ኵሉ፡ አህጉር። ወነገረ፡ ኵሎ፡ ዘገብረ፡ ሎቱ፡ እግዚእ፡ ኢየሱስ።
40 ወሶበ፡ ተመይጠ፡ እግዚእ፡ ኢየሱስ፡ ተቀበልዎ፡ ሕዝብ፡ ኅቡረ። እስመ፡ ኮኑ፡ ኵሎሙ፡ ይጸንሕዎ።
በእንተ፡ ወለተ፡ ኢያኢሮስ፡ ወበእንተ፡ ደም፡ ዘይውሕዛ
41 ወመጽአ፡ ብእሲ፡ ዘስሙ፡ ኢያኢሮስ፡ ወውእቱ፡ መጋቤ፡ ምኵራብ። ወሰገደ፡ ሎቱ፡ ታሕተ፡ እገሪሁ፡ ለእግዚእ፡ ኢየሱስ። ወአስተብቊዖ፡ ይባእ፡ ቤቶ።
42 እስመ፡ ቦቱ፡ አሐቲ፡ ወለት፡ ዘዐሠርቱ፡ ወክልኤቱ፡ ክረምታ። ወይእቲ፡ አልጸቀት፡ ትሙት።
43 ወእምዝ፡ እንዘ፡ የሐውር፡ ምስሌሁ፡ እግዚእ፡ ኢየሱስ፡ ይትጋፍዕዎ፡ ሰብእ። ወመጽአት፡ ብእሲት፡ እንተ፡ ደም፡ ይውሕዛ፡ እምዐሠርቱ፡ ወክልኤቱ፡ ክረምት። ወአኅለቀት፡ ኵሎ፡ ንዋያ፡ ለዐቀብተ፡ ሥራይ፡ ወአልቦ፡ ዘክህለ፡ ፈውሶታ።
44 ወቀርበት፡ ወቆመት፡ እንተ፡ ድኅሬሁ፡ ለእግዚእ፡ ኢየሱስ። ወገሰሰት፡ ጽንፈ፡ ልብሱ፡ ወቆመ፡ ሶቤሃ፡ ውሕዘተ፡ ደማ። ወይቤ፡ እግዚእ፡ ኢየሱስ፡ መኑ፡ ገሰሰኒ፡ ወክሕዱ፡ ኵሎሙ።
45 ወይቤልዎ፡ ጴጥሮስ፡ ወእለሂ፡ ምስሌሁ። ሊቅ፡ አኮኑ፡ ሰብእ፡ ይጣወቅ፡ ወይጻዐቅ፡ ወትብል፡ መኑ፡ ገሰሰኒ።
46 ወይቤሎሙ፡ እግዚእ፡ ኢየሱስ፡ ቦ፡ ዘገሰሰኒ። እስመ፡ አነ፡ አአምር፡ ከመ፡ ኀይል፡ ወፅአ፡ እምኔየ።
47 ወርእያ፡ ይእቲ፡ ብእሲት፡ ከመ፡ ኢተከብተ፡ ላቲ። ርዕደት፡ ወሖረት፡ ወሰገደት፡ ሎቱ። ወነገረት፡ በቅድመ፡ ኵሉ፡ ሕዝብ፡ ዘከመ፡ ሐይወት፡ ሶቤሃ።
48 ወይብላ፡ እመኒ፡ ወለትየ፡ ሃይማኖትኪ፡ አሕየወተኪ። እትዊ፡ በሰላም።
49 ወእንዘ፡ ይትናገር፡ መጽአ፡ አሐዱ፡ ብእሲ፡ እምቤተ፡ መጋቤ፡ ምኵራብ። ወይቤሎ፡ ወለትከሰ፡ ሞተት፡ ወኢታጻምዎ፡ እንከ፡ ለሊቅ።
50 ወሰሚዖ፡ እግዚእ፡ ኢየሱስ፡ ይቤሎ፡ ለመጋቤ፡ ምኵራብ። ኢትፍራህ፡ ዳእሙ፡ ተአመን፡ ወለትከሰ፡ ተሐዩ።
51 ወበዊኦ፡ ቤተ፡ ከልአ፡ ባዕደ፡ ኢይባእ፡ ምስሌሁ። ወኢ፡ መኑሂ፡ ዘእንበለ፡ ጴጥሮስ፡ ወያዕቆብ፡ ወዮሐንስ፡ ወአቡሃ፡ ወእማ፡ ለሕፃን።
52 ወኵሎሙ፡ ይበክዩ፡ ወያስቆቅውዋ፡ ወይቤሎሙ፡ እግዚእ፡ ኢየሱስ። ኢትብክዩ፡ ሕፃንሰ፡ ኢሞተት፡ አላ፡ ትነውም።
53 ወሠሐቅዎ፡ እስመ፡ አእመሩ፡ ከመ፡ ሞተት።
54 ወአውፅኣ፡ አፍኣ፡ ኵሎ፡ ወአኀዛ፡ እዴሃ፡ ወጸውዓ። ወይቤላ፡ ተንሥኢ፡ ወለትየ።
55 ወሶቤሃ፡ ገብአ፡ ነፍሳ፡ ወተሠውጠ፡ መንፈሳ፡ ላዕሌሃ። ወተንሥአት፡ ሶቤሃ፡ ወአዘዘ፡ የሀብዋ፡ ዘትበልዕ።
56 ወደንገፁ፡ አቡሃ፡ ወእማ። ወከልኦሙ፡ ኢይንግሩ፡ ወኢ፡ ለመኑሂ፡ ዘኮነ።
=== chapter 9 ===
[ምዕራፍ 9]
በእንተ፡ ዘከመ፡ አዘዞሙ፡ ለ፲ወ፪ቱ፡ ሐዋርያት
1 ወጸውዖሙ፡ ለዐሠርቱ፡ ወክልኤቱ፡ ሐዋርያት፡ ወወሀቦሙ፡ ኀይለ። ወአብሖሙ፡ ላዕለ፡ ኵሉ፡ አጋንንት፡ ያሕይዉ፡ ድዉያነ።
2 ወፈነዎሙ፡ ይስብኩ፡ መንግሥተ፡ እግዚአብሔር። ወይፈውሱ፡ ድዉያነ፡ ወኵሎሙ፡ ሕሙማነ።
3 ወይቤሎሙ፡ ኢትንሥኡ፡ ለፍኖት፡ ወኢ፡ ምንተኒ፡ ኢ፡ በትረ፡ ወኢ፡ ጽፍነተ። ወኢ፡ እክለ፡ ወኢ፡ ወርቀ፡ ወኢ፡ ክልኤተ፡ ክዳናተ።
4 ወቤተ፡ ኀበ፡ ቦእክሙ፡ ህየ፡ ኅድሩ። ወኢትፃኡ፡ እምህየ፡ እስከ፡ ተኀልፉ።
5 ወዘሰ፡ ኢተወክፉክሙ፡ ወፂአክሙ፡ እምይእቲ፡ ሀገር። ንግፉ፡ ጸበለ፡ እገሪክሙ፡ ከመ፡ ይኩን፡ ስምዐ፡ ላዕሌሆሙ።
6 ወወፂኦሙ፡ ዖዱ፡ አህጉረ፡ አድያም፡ ወሰበኩ፡ ወፈወሱ፡ በኵለሄ።
በእንተ፡ ኀልዮተ፡ ሄሮድስ፡ ላዕለ፡ እግዚእ፡ ኢየሱስ
7 ወሰምዐ፡ ሄሮድስ፡ ንጉሥ፡ ኵሎ፡ ዘኮነ፡ ወዘከመ፡ ገብረ። ወየኀጥእ፡ ዘይብል፡ እስመ፡ ቦ፡ እለ፡ ይብሉ። ዮሐንስ፡ ተንሥአ፡ እምነ፡ ምዉታን።
8 ወቦ፡ እለ፡ ይብሉ፡ ኤልያስ፡ አስተርአየ። ወቦ፡ እለ፡ ይብሉ፡ አሐዱ፡ እምነቢያት፡ ቀደምት፡ ተንሥአ።
9 ወይቤ፡ ሄሮድስ፡ ለዮሐንስሰ፡ አነ፡ መተርኩ፡ ርእሶ። መኑ፡ እንከ፡ ውእቱ፡ ዝንቱ፡ ዘእሰምዕ፡ በእንቲኣሁ። ወፈቀደ፡ ይርአዮ።
10 ወሶበ፡ ተሠውጡ፡ ሐዋርያት፡ ነገርዎ፡ ኵሎ፡ ዘገብሩ። ወነሥኦሙ፡ በባሕቲቶሙ፡ ወተግሕሡ። ወወፅኡ፡ ሐቅለ፡ ሀገር፡ እንተ፡ ስማ፡ ቤተሳይዳ።
11 ወአእሚሮሙ፡ ሕዝብ፡ ተለውዎ። ወተቀበሎሙ፡ ወነገሮሙ፡ በእንተ፡ መንግሥተ፡ እግዚአብሔር። ወለእለሂ፡ ይፈቅዱ፡ ይትፈወሱ፡ አሕየዎሙ።
በእንተ፡ ኀምስ፡ ኅብስት፡ ወክልኤቲ፡ ዓሣት
12 ወተቈልቈለ፡ ፀሓይ፡ ወመጽኡ፡ ዐሠርቱ፡ ወክልኤቱ፡ አርዳኢሁ። ወይቤልዎ፡ ፈኑ፡ ሰብአ፡ ይእትዉ፡ አህጉረ፡ አድያም። ወይቢቱ፡ ውስተ፡ አዕጻዳት፡ ወይርከቡ፡ ዘይበልዑ። እስመ፡ ሐቅል፡ ውእቱ፡ ኀበ፡ ሀለውነ።
13 ወይቤሎሙ፡ ሀብዎሙ፡ አንትሙ፡ ዘይበልዑ። ወይቤልዎ፡ አልብነ፡ ዝየ፡ ዘእንበለ፡ ኀምስ፡ ኅብስት፡ ወክልኤቲ፡ ዓሣት። እመ፡ ኢሖርነ፡ ንሣየጥ፡ መብልዐ፡ ለኵሉ፡ ዝንቱ፡ ሕዝብ።
14 ወየአክሉ፡ ዕደው፡ ኀምሳ፡ ምእት፡ ወይቤሎሙ፡ ለአርዳኢሁ። አርፍቅዎሙ፡ በበ፡ ኀምሳ፡ ለለ፡ ምርፋቆሙ።
15 ወገብሩ፡ ከማሁ፡ ወረፈቁ፡ ኵሎሙ።
16 ወነሥኦን፡ ለኀምስ፡ ኅብስት፡ ወለክልኤቲ፡ ዓሣት። ወነጸረ፡ ሰማየ፡ ወባረከ፡ ወፈተተ። ወወሀቦሙ፡ ለአርዳኢሁ፡ ያቅርቡ፡ ለሰብእ።
17 ወአቅረቡ፡ ወበልዑ፡ ወጸግቡ፡ ኵሎሙ። ወዘአግሐሡ፡ ዘተርፈ፡ ፍተታት። መልአ፡ ዐሠርተ፡ ወክልኤተ፡ መሣይምተ፡ ምሉኣነ።
በእንተ፡ እምነት፡ ጴጥሮስ፡ ወበእንተ፡ ትንቢት፡ ዘሕማማት
18 ወእምዝ፡ እንዘ፡ ይጼሊ፡ በባሕቲቱ፡ ወአርዳኢሁኒ፡ ምስሌሁ። ተስእሎሙ፡ ወይቤሎሙ፡ መነ፡ ይብለኒ፡ ሰብእ።
19 ወተሰጥውዎ፡ ወይቤልዎ። ቦ፡ እለ፡ ይብሉከ፡ ዮሐንስሃ፡ መጥምቀ። ወቦ፡ እለ፡ ይብሉከ፡ ኤልያስሃ። ወቦ፡ እለ፡ ይብሉከ፡ አሐዱ፡ እምነቢያት፡ ቀደምት፡ ተንሥአ።
20 ወይቤሎሙ፡ አንትሙሰኬ፡ መነ፡ ትብሉኒ። ወተሰጥዎ፡ ጴጥሮስ፡ ወይቤሎ። አንተ፡ ውእቱ፡ መሲሑ፡ ለእግዚአብሔር።
21 ወገሠጾሙ፡ ወከልኦሙ፡ ኢይንግሩ፡ ዘንተ፡ ወኢ፡ ለመኑሂ።
22 ወይቤሎሙ፡ ሀለዎ፡ ለወልደ፡ ዕጓለ፡ እመሕያው፡ ብዙኀ፡ ያሐምምዎ። ወያመክርዎ፡ ረበናት፡ ወሊቃነ፡ ካህናት፡ ወጸሐፍት። ወይቀትልዎ፡ ወይትነሣእ፡ በሣልስት፡ ዕለት።
23 ወይቤሎሙ፡ ለኵሎሙ፡ ዘይፈቅድ፡ ይትልወኒ፡ ይጽልኣ፡ ለነፍሱ። ወያጥብዕ፡ ወይንሣእ፡ መስቀለ፡ ሞቱ። ወኵሎ፡ ዕለተ፡ ይትልወኒ።
24 ወዘሰ፡ ይፈቅድ፡ ያድኅና፡ ለነፍሱ፡ ለይገድፋ። ወዘሰ፡ ገደፋ፡ ለነፍሱ፡ በእንቲኣየ፡ ያድኅና።
25 ወምንተ፡ ይበቊዖ፡ ለሰብእ። ለእመ፡ ኵሎ፡ ዓለመ፡ ረብኀ፡ ወነፍሶ፡ ሀጕለ።
26 ወለዘኒ፡ ኀፈረኒ፡ ወኀፈረ፡ ቃልየ። የኀፍሮ፡ ሎቱኒ፡ ወልደ፡ ዕጓለ፡ እመሕያው። አመ፡ ይመጽእ፡ በስብሐቲሁ። ወበስብሐተ፡ አቡሁ፡ ወዘቅዱሳን፡ መላእክቲሁ።
27 አማን፡ አማን፡ እብለክሙ፡ ሀለዉ፡ እምእለ፡ ይቀውሙ፡ ዝየ። እለ፡ ኢይጥዕምዎ፡ ለሞት፡ እስከ፡ ይሬእይዋ፡ ለመንግሥተ፡ እግዚአብሔር።
በእንተ፡ ዘተወለጠ፡ ራእዩ፡ ለእግዚእ፡ ኢየሱስ
28 ወእምድኅረ፡ ዝንቱ፡ ነገር፡ አመ፡ ሳምንት፡ ዕለት። ነሥኦሙ፡ እግዚእ፡ ኢየሱስ፡ ለጴጥሮስ፡ ወለያዕቆብ፡ ወለዮሐንስ። ወዐርገ፡ ደብረ፡ ከመ፡ ይጸሊ።
29 ወእንዘ፡ ይጼሊ፡ ተወለጠ፡ ርእየተ፡ ገጹ። ወአልባሲሁኒ፡ ጻዕደወ፡ ወበረቀ፡ ከመ፡ መብረቅ።
30 ወናሁ፡ መጽኡ፡ ክልኤቱ፡ ዕደው፡ ወይትናገሩ፡ ምስሌሁ። እሉ፡ እሙንቱ፡ ሙሴ፡ ወኤልያስ።
31 እለ፡ አስተርአዩ፡ በስብሐት። ወነገሩ፡ ስብሐቲሁ፡ ዘሀለዎ፡ ይኩን፡ በኢየሩሳሌም።
32 ወፀአቶሂ፡ ረከበ፡ ጴጥሮስሃ፡ ወእለ፡ ምስሌሁ። ክቡዳን፡ አዕይንቲሆሙ፡ በድቃስ። ወነቂሆሙ፡ ርእዩ፡ ስብሐቲሁ። ወዕደውኒ፡ ክልኤቱ፡ እለ፡ ይቀውሙ፡ ምስሌሁ።
33 ወእምዝ፡ ሶበ፡ ፈቀዱ፡ ይትሌለዩ፡ እምኔሁ። ይቤሎ፡ ጴጥሮስ፡ ለእግዚእ፡ ኢየሱስ። ሊቅ፡ ይኄይሰነ፡ ንንበር፡ ዝየ፡ ወንግበር፡ ሠለስተ፡ ሰቃልወ። አሐደ፡ ለከ፡ ወአሐደ፡ ለሙሴ፡ ወአሐደ፡ ለኤልያስ። ወኢየአምር፡ ዘይብል።
34 ወዘንተ፡ ብሂሎ፡ ጸለሎሙ፡ ደመና። ወፈርሁ፡ ሶበ፡ ቦኡ፡ ውስተ፡ ደመና።
35 ወመጽአ፡ ቃል፡ እምውስተ፡ ደመና፡ ዘይብል። ዝንቱ፡ ውእቱ፡ ወልድየ፡ ዘኀረይኩ፡ ወሎቱ፡ ስምዕዎ።
36 ወመጺኦ፡ ቃል፡ ተረክበ፡ ኢየሱስ፡ ባሕቲቱ። ወእሙንቱሰ፡ አርመሙ፡ ወኢነገሩ፡ ወኢ፡ ለመኑሂ። ዘርእዩ፡ ወዘሰምዑ፡ ውእተ፡ አሚረ።
ዘከመ፡ ፈወሶ፡ እግዚእ፡ ኢየሱስ፡ ለዘያንገረግሮ፡ ጋኔን
37 ወእምዝ፡ በሳኒታ፡ ዕለት፡ ወረዱ፡ እምደብር። ወተቀበልዎ፡ ሕዝብ፡ ብዙኃን።
38 ወዐውየወ፡ አሐዱ፡ ብእሲ፡ በማእከለ፡ ሕዝብ። ወይቤሎ፡ ኦ፡ ሊቅ፡ ብቊዐኒ፡ ርአይ፡ ሊተ፡ ወልድየ። እስመ፡ አሐዱ፡ ሊተ፡ ውእቱ።
39 ወናሁ፡ ጋኔን፡ የሀይደንዮ፡ ወያዌግቦ፡ ወይነፅኆ። ወያስተራግፆ፡ ወያሴውኖ፡ ወእምዕጹብ፡ የኀድጎ፡ ቀጥቂጦ።
40 ወአስተብቋዕክዎሙ፡ ለአርዳኢከኒ፡ ከመ፡ ያውፅእዎ። ወስእንዎ፡ ፈውሶቶ፡ ወአውፅኦቶ።
41 ወአውሥአ፡ እግዚእ፡ ኢየሱስ፡ ወይቤ። ኦ፡ ትውልድ፡ ዕልዉት፡ ወግፍትዕት፡ እንተ፡ አልባቲ፡ ሃይማኖት። እስከ፡ ማእዜኑ፡ እሄሉ፡ ምስሌክሙ፡ ወእትዔገሠክሙ። አምጽኦ፡ ዝየ፡ ለወልድከ።
42 ወእንዘ፡ ያመጽኦ፡ ነፅኆ፡ ጋኔኑ፡ ወአስተራገፆ። ወገሠጾ፡ እግዚእ፡ ኢየሱስ፡ ለውእቱ፡ ጋኔን፡ እኩይ። ወአሕየዎ፡ ለውእቱ፡ ወልድ፡ ወአወፈዮ፡ ለአቡሁ። ወአንከሩ፡ ኵሎሙ፡ እምዕበዩ፡ ለእግዚአብሔር።
43 ወአንኪሮሙ፡ ኵሎሙ፡ በእንተ፡ ኵሉ፡ ዘገብረ፡ እግዚእ፡ ኢየሱስ። ይቤሎሙ፡ ለአርዳኢሁ።
44 አንትሙሰ፡ ደይዎ፡ ውስተ፡ ልብክሙ፡ ለዝንቱ፡ ነገር። እስመ፡ ሀለዎ፡ ለወልደ፡ ዕጓለ፡ እመሕያው፡ ይግባእ፡ ውስተ፡ እደ፡ ሰብእ።
45 ወኢለበውዎ፡ ለዝንቱ፡ ነገር፡ እስመ፡ ስዉር፡ ውእቱ፡ እምኔሆሙ። ከመ፡ ኢይሕንክዎ፡ ወይፈርህዎ፡ ተጠይቆቶ፡ በእንተ፡ ዝንቱ፡ ነገር።
ዘከመ፡ ይደልዎሙ፡ ለክርስቲያን፡ ትሕትና፡ ወተዐግሦተ፡ ቢጽ
46 ወኀለዩ፡ በበይናቲሆሙ፡ እንዘ፡ ይብሉ። መኑ፡ የዐቢ፡ እምኔሆሙ።
47 ወአእመሮሙ፡ እግዚእ፡ ኢየሱስ፡ ዘይኄልዩ፡ በልቦሙ። ነሥአ፡ ሕፃነ፡ ወአቀሞ፡ በማእከሎሙ።
48 ወይቤሎሙ፡ ዘተወክፈ፡ ዘመጠነ፡ ዝ፡ ሕፃን፡ በስምየ፡ ኪያየ፡ ተወከፈ። ወዘኒ፡ ኪያየ፡ ተወከፈ፡ ተወክፎ፡ ለዘፈነወኒ። እስመ፡ ዘአትሐተ፡ ርእሶ፡ እምኵሉ፡ ውእቱ፡ የዐቢ።
49 ወአውሥአ፡ ዮሐንስ፡ ወይቤሎ። ሊቅ፡ ቦ፡ ዘርኢነ፡ አሐደ፡ ብእሴ፡ እንዘ፡ ያወፅእ፡ አጋንንተ፡ በስምከ። ወከላእናሁ፡ እስመ፡ ኢተለወከ፡ ምስሌነ።
50 ወይቤሎሙ፡ እግዚእ፡ ኢየሱስ፡ ኢትክልእዎ። እስመ፡ እምከመ፡ ኢኮነ፡ ዕድውክሙ፡ ቢጽክሙ፡ ውእቱ።
51 ወተፈጺሞ፡ መዋዕለ፡ ዕርገቱ፡ አንጸረ፡ ገጾ፡ ለሐዊር፡ ውስተ፡ ኢየሩሳሌም።
52 ወፈነወ፡ ሐዋርያተ፡ ቅድመ፡ ገጹ። ወሐዊሮሙ፡ ቦኡ፡ ሀገረ፡ ሳምር፡ ከመ፡ ያስተዳልዉ፡ ሎቱ።
53 ወኢተወክፍዎሙ፡ እስመ፡ ኅሉፍ፡ ገጹ፡ ለኢየሩሳሌም።
54 ወርእዮሙ፡ አርዳኢሁ፡ ያዕቆብ፡ ወዮሐንስ፡ ዘንተ፡ ይቤልዎ። እግዚኦ፡ ትፈቅድኑ፡ ንበል፡ ይረድ፡ እሳት፡ እምሰማይ። ወያጥፍኦሙ፡ በከመ፡ ገብረ፡ ኤልያስ።
55 ወተመይጠ፡ ወገሠጾሙ፡ ወይቤሎሙ። ኢተአምሩኑ፡ ዘአይ፡ መንፈስ፡ አንትሙ።
56 እስመ፡ ኢመጽአ፡ ወልደ፡ ዕጓለ፡ እመሕያው፡ ከመ፡ ያጥፍእ፡ ነፍሳተ፡ ሰብእ። ዘእንበለ፡ ከመ፡ ያሕዩ። ወሖሩ፡ ካልእተ፡ ሀገረ።
ዘከመ፡ ይደሉ፡ በአይ፡ ተሊዎተ፡ እግዚእ፡ ኢየሱስ
57 ወእምዝ፡ እንዘ፡ የሐውሩ፡ በፍኖት፡ ይቤሎ፡ አሐዱ፡ ሊቅ። እትሉከኑ፡ ኀበ፡ ሖርከ።
58 ወይቤሎ፡ እግዚእ፡ ኢየሱስ፡ ለቈናጽልኒ፡ ግበብ፡ ቦሙ። ወለአዕዋፈ፡ ሰማይኒ፡ ምጽላል፡ ቦሙ። ለወልደ፡ ዕጓለ፡ እመሕያውሰ፡ አልቦቱ፡ ኀበ፡ ያስምክ፡ ርእሶ።
59 ወይቤሎ፡ ካልኡኒ፡ እትሉከኑ፡ እግዚኦ። ወባሕቱ፡ አብሐኒ፡ እሑር፡ ቅድመ፡ እቅብሮ፡ ለአቡየ።
60 ወይቤሎ፡ እግዚእ፡ ኢየሱስ፡ ኅድጎሙ፡ ለምዉታን፡ ይቅብሩ፡ ምዉታኒሆሙ። ወአንተሰ፡ ሑር፡ ወስብክ፡ መንግሥተ፡ እግዚአብሔር።
61 ወይቤሎ፡ ሣልሱኒ፡ እትሉከኑ፡ እግዚኦ። ወባሕቱ፡ አብሐኒ፡ እሑር፡ እሥራዕ፡ ኵሎ፡ ሰብአ፡ ቤትየ።
62 ወይቤሎ፡ እግዚእ፡ ኢየሱስ፡ አልቦ፡ ዘይእኅዝ፡ ዕርፈ፡ ወየሐርስ፡ ድኅሪተ። እስመ፡ ርትዕት፡ ይእቲ፡ መንግሥተ፡ እግዚአብሔር።
=== chapter 10 ===
[ምዕራፍ 10]
በእንተ፡ ኀርዮተ፡ ካልኣነ፡ ሰብዐ
1 ወእምዝ፡ ኀረየ፡ እግዚእነ፡ ካልኣነ፡ ሰብዐ። ወፈነዎሙ፡ በበ፡ ክልኤቱ፡ ቅድመ፡ ገጹ። ውስተ፡ ኵሉ፡ አህጉር፡ ወበሓውርት፡ ኀበ፡ ሀለዎ፡ ይባእ።
2 ወይቤሎሙ፡ እግዚእ፡ ኢየሱስ፡ ማእረሩሰ፡ ብዙኀ፡ ወገባሩ፡ ኅዳጥ። ሰአልዎ፡ እንከ፡ ለበዓለ፡ ማእረር፡ ከመ፡ ይወስክ፡ ወይፈኑ፡ ገባረ፡ ለማእረሩ።
3 ሑሩ፡ ናሁ፡ አነ፡ እፌንወክሙ፡ ከመ፡ አባግዕ፡ ማእከለ፡ ተኵላት።
4 ወኢትጹሩ፡ ቊናማተ፡ ወኢ፡ ጽፍነተ፡ ወኢ፡ አሳእነ፡ ወኢ፡ ምንተኒ። ወኢተአምኁ፡ ወኢ፡ መነሂ፡ በፍኖት።
5 ወኀበ፡ ቦእክሙ፡ ቤት፡ ቅድመ። በሉ፡ ሰላም፡ ለሰብአ፡ ዝንቱ፡ ቤት።
6 ወእመሂ፡ ቦ፡ ህየ፡ ወልደ፡ ሰላም፡ ያዕርፍ፡ ሰላምክሙ፡ ላዕሌሁ። ወእመ፡ አኮሰ፡ ይግባእ፡ ሰላምክሙ፡ ላዕሌክሙ።
7 ወውእተ፡ ቤተ፡ ንበሩ፡ ወብልዑ፡ ወስትዩ፡ ዘእምኀቤሆሙ። እስመ፡ ይደልዎ፡ ዐስቡ፡ ለዘይትቀነይ። ወኢትትፋለሱ፡ እምቤት፡ ውስተ፡ ቤት።
8 ወሀገረኒ፡ እንተ፡ ኀበ፡ ቦእክሙ፡ ወተወከፉክሙ፡ ሰብአ፡ ይእቲ፡ ሀገር። ብልዑ፡ ዘአቅረቡ፡ ለክሙ።
9 ወፈውሱ፡ ድዉያነ፡ እለ፡ ውስቴታ። ወበልዎሙ፡ ቀርበት፡ መንግሥተ፡ እግዚአብሔር፡ ኀቤክሙ።
10 ወሀገረሰ፡ ኀበ፡ ቦእክሙ፡ ወኢተወክፉክሙ፡ ሰብአ፡ ይእቲ፡ ሀገር። ወፂአክሙ፡ ውስተ፡ መርሕባ። ንግፉ፡ ጸበለ፡ እገሪክሙ፡ እንዘ፡ ትብሉ።
11 ጸበለክሙኒ፡ ዘተለወነ፡ እምሀገርክሙ፡ ንነግፍ፡ ለክሙ። ወባሕቱ፡ ዘንተ፡ አእምሩ። ከመ፡ ቀርበት፡ መንግሥተ፡ እግዚአብሔር፡ ላዕሌክሙ።
12 እብለክሙ፡ ከመ፡ ሰዶም፡ ትኄይስ። ወትረክብ፡ ሣህለ፡ ፈድፋደ፡ እምይእቲ፡ ሀገር፡ በዕለተ፡ ደይን።
13 አሌ፡ ለኪ፡ ኰራዚ፡ አሌ፡ ለኪ፡ ቤተሳይዳ። ሶበሰ፡ በጢሮስ፡ ወበሲዶና፡ ተገብረ፡ ኀይል፡ ዘተገብረ፡ በውስቴትክን። ሠቀ፡ እምለብሱ፡ ወውስተ፡ ሐመድ፡ እምነበሩ፡ ወእምነስሑ።
14 ወባሕቱ፡ ጢሮስ፡ ወሲዶና፡ ይኄይሳ፡ እምኔክን፡ በዕለተ፡ ደይን።
15 ወአንቲኒ፡ ቅፍርናሆም፡ እመ፡ እስከ፡ ሰማይ፡ ትትሌዐሊ። ሀለወኪ፡ ትረዲ፡ እስከ፡ ሲኦል።
16 ዘኪያክሙ፡ ሰምዐ፡ ኪያየ፡ ሰምዐ። ወዘለክሙ፡ አበየ፡ ሊተ፡ አበየ። ወዘሊተ፡ አበየ፡ አበዮ፡ ለዘፈነወኒ። ወዘኪያየ፡ ሰምዐ፡ ሰምዖ፡ ለዘፈነወኒ።
ዘከመ፡ ተመይጡ፡ እምዘተፈነዉ
17 ወተመይጡ፡ እልክቱ፡ ሰብዐ፡ እለ፡ ተፈነዉ። እንዘ፡ ይትፌሥሑ፡ ወይቤልዎ። እግዚኦ፡ አጋንንትሂ፡ ገረሩ፡ ለነ፡ በስምከ።
18 ወይቤሎሙ፡ ርኢክዎ፡ ለሰይጣን፡ ከመ፡ መብረቅ፡ ወድቀ፡ እምሰማይ።
19 ወናሁ፡ ወሀብኩክሙ፡ ሥልጣነ፡ ትኪዱ፡ ዲበ፡ አቃርብት። ወዲበ፡ አራዊተ፡ ምድረ፡ ወዲበ፡ ኵሉ፡ ኀይለ፡ ጸላኢ። ወአልቦ፡ ዘይነክየክሙ።
20 ወባሕቱ፡ በዝሰ፡ ኢትትፈሥሑ፡ እስመ፡ አጋንንት፡ ይገንዩ፡ ለክሙ። ተፈሥሑሰ፡ ባሕቱ፡ እስመ፡ ተጽሕፈ፡ አስማቲክሙ፡ በሰማያት።
21 ወበይእቲ፡ ሰዓት፡ ተፈሥሐ፡ እግዚእ፡ ኢየሱስ፡ በመንፈሱ፡ ቅዱስ። ወይቤ፡ አአምነከ፡ አባ፡ እግዚአ፡ ሰማይ፡ ወምድር። ዘኀባእኮ፡ ለዝንቱ፡ እምጠቢባን፡ ወእምለባውያን፡ ወከሠትኮ፡ ለሕፃናት። እወ፡ አባ፡ እስመ፡ ከማሁ፡ ኮነ፡ ሥምረትከ፡ በቅድሜከ።
22 ወተመይጠ፡ ኀበ፡ አርዳኢሁ፡ ወይቤሎሙ። ኵሉ፡ ተውህበ፡ ሊተ፡ እምኀበ፡ አቡየ። ወአልቦ፡ ዘየአምሮ፡ ለወልድ፡ ከመ፡ መኑ፡ ውእቱ፡ ወልድ፡ ዘእንበለ፡ አብ። ወአልቦ፡ ዘየአምሮ፡ ለአብ፡ ከመ፡ መኑ፡ ውእቱ፡ አብ፡ ዘእንበለ፡ ወልድ። ወለዘፈቀደ፡ ወልድ፡ ይከሥት፡ ሎቱ።
23 ወካዕበ፡ ወይቤሎሙ፡ ለአርዳኢሁ፡ እንተ፡ ባሕቲቶሙ። ብፁዓት፡ አዕይንት፡ እለ፡ ርእያ፡ ዘትሬእዩ፡ አንትሙ።
24 እብለክሙ፡ ከመ፡ ብዙኃን፡ ነቢያተ፡ ወነገሥት። ፈተዉ፡ ይርአዩ፡ ዘትሬእዩ፡ አንትሙ፡ ወኢርእዩ። ወይስምዑ፡ ዘትሰምዑ፡ አንትሙ፡ ወኢሰምዑ።
በእንተ፡ ዘከመ፡ ተስእሎ፡ ጸሓፌ፡ ሀገር
25 ወእምዝ፡ ተንሥአ፡ አሐዱ፡ ጸሓፌ፡ ሀገር፡ ያመክሮ፡ ወይቤሎ። ኦ፡ ሊቅ፡ ምንተ፡ ገቢርየ፡ እወርስ፡ ሕይወተ፡ ዘለዓለም።
26 ወይቤሎ፡ ውስተ፡ ኦሪት፡ ምንት፡ ጽሑፍ፡ ወእፎ፡ ታነብብ።
27 ወአውሥአ፡ ወይቤሎ፡ አፍቅሮ፡ ለእግዚአብሔር፡ አምላክከ። በኵሉ፡ ልብከ፡ ወበኵሉ፡ ነፍስከ፡ ወበኵሉ፡ ኀይልከ፡ ወበኵሉ፡ ኅሊናከ። ወአፍቅር፡ ቢጸከ፡ ከመ፡ ነፍስከ።
28 ወይቤሎ፡ እግዚእ፡ ኢየሱስ፡ ሠናየ፡ ተሰጠውከ። ከማሁኬ፡ ግበር፡ ወተሐዩ።
29 ወፈቀደ፡ ያጽድቅ፡ ርእሶ፡ ወይመንን፡ ቢጾ። ወይቤሎ፡ መኑ፡ ውእቱ፡ ቢጽየ።
በእንተ፡ ዘዘበጥዎ፡ ፈያት
30 ወተሰጥዎ፡ እግዚእ፡ ኢየሱስ፡ ወይቤሎ። አሐዱ፡ ብእሲ፡ እንዘ፡ ይወርድ፡ እምኢየሩሳሌም፡ ለኢያሪሆ። ረከብዎ፡ ፈያት፡ ወዘበጥዎ፡ ወፈቅዕዎ፡ ወአቊሰልዎ፡ ወሰለብዎ። ወገደፍዎ፡ ወኀለፉ፡ ወአልጸቀ፡ ይሙት።
31 ወተዳደቆ፡ አሐዱ፡ ካህን፡ እንዘ፡ ይወርድ፡ ይእተ፡ ፍኖተ። ወርእዮ፡ ተዐደወ፡ ወኀለፈ።
32 ወከማሁ፡ ሌዋዊሂ፡ ረከቦ፡ በውእቱ፡ መካን። ወርእዮ፡ ተዐደወ፡ ወኀለፈ፡ ከመ፡ ቀዳሚ።
33 ወረከቦ፡ አሐዱ፡ ሳምራዊ፡ እንዘ፡ የሐውር፡ ይእተ፡ ፍኖተ፡ ወርእዮ፡ ወምሕሮ።
34 ወቀርበ፡ ኀቤሁ፡ ወሦጠ፡ ወይነ፡ ወቅብዐ፡ ውስተ፡ ቊሰሊሁ። ወጸዐኖ፡ ዲበ፡ አድጉ፡ ወወሰዶ፡ ኀበ፡ ዐቃቤ፡ ቤተ፡ ነግድ። ከመ፡ ይፈውሶ፡ ወአስተሐመመ፡ በግብሩ።
35 ወበሳኒታ፡ አውፅአ፡ ክልኤተ፡ ዲናረ፡ ወወሀቦ፡ ለዐቃቤ፡ ነግድ። ወይቤሎ፡ ፈውሶ፡ ሊተ፡ በእሎን። ወእመ፡ ቦ፡ ዘአስተዋፃእከ፡ ሎቱ፡ ዘይበዝኅ፡ እምዝ። እፈድየከ፡ አነ፡ አመ፡ ግብአትየ።
36 መኑ፡ እንከ፡ እምእለ፡ ሠለስቱ፡ ዘይከውኖ፡ ቢጾ፡ ለዘዘበጥዎ፡ ፈያት።
37 ወይቤሎ፡ ዘገብረ፡ ምሕረተ፡ ላዕሌሁ፡ ወይቤሎ፡ እግዚእ፡ ኢየሱስ፡ ሑርኬ፡ አንተኒ፡ ግበር፡ ከማሁ፡ ወተሐዩ።
በእንተ፡ ማርያ፡ ወማርታ
38 ወእምዝ፡ ሐዊሮሙ፡ ቦኡ፡ አሐተ፡ ሀገረ። ወተቀበለቶ፡ አሐቲ፡ ብእሲት፡ በቤታ፡ እንተ፡ ስማ፡ ማርታ።
39 ወስመ፡ እኅታ፡ ማርያ። እንተ፡ ነበረት፡ ኀበ፡ እገሪሁ፡ ለእግዚእ፡ ኢየሱስ፡ ወትሰምዕ፡ ነገሮ።
40 ወማርታሰ፡ ትሠርሕ፡ በአስተዳልዎ፡ ብዙኀ። ወቆመት፡ ወትቤሎ፡ እግዚእየ፡ ኢያጽሕቀከኑ፡ ግብርየ። ዘተኀድገኒ፡ እኅትየ፡ ባሕቲትየ፡ እንዘ፡ አስተዳሉ፡ በላኬ፡ ትርድአኒ።
41 ወአውሥአ፡ እግዚእ፡ ኢየሱስ፡ ወይቤላ። ማርታ፡ ማርታ፡ ለምንት፡ ትሠርሒ፡ ብዙኀ፡ ወታስተዳልዊ።
42 ወኅዳጥ፡ የአክል፡ ወእመ፡ አኮ፡ አሐቲ፡ መክፈልት። ወማርያምሰ፡ ኀርየት፡ መክፈልተ፡ ሠናየ፡ ዘኢየሀይድዋ።
=== chapter 11 ===
[ምዕራፍ 11]
በእንተ፡ ጸሎት፡ ክርስቲያናዊት
1 ወእምዝ፡ ጸለየ፡ በአሐቲ፡ መካን። ወፈጺሞ፡ ጸሎቶ፡ ይቤሎ፡ አሐዱ፡ እምአርዳኢሁ። እግዚኦ፡ መሀረነ፡ ጸሎተ፡ በከመ፡ መሀሮሙ፡ ዮሐንስ፡ ለአርዳኢሁ።
2 ወይቤሎሙ፡ ሶበ፡ ትጼልዩ፡ ከመ፡ ዝ፡ በሉ። አቡነ፡ ዘበሰማያት፡ ይትቀደስ፡ ስምከ፡ ትምጻእ፡ መንግሥትከ። ወይኩን፡ ፈቃድከ፡ በከመ፡ በሰማይ፡ ከማሁ፡ በምድር።
3 ሲሳየነ፡ ዘለለ፡ ዕለትነ፡ ሀበነ፡ ዮም።
4 ኅድግ፡ ለነ፡ አበሳነ፡ ወጌጋየነ። ከመ፡ ንሕነኒ፡ ንኅድግ፡ ለዘአበሰ፡ ለነ። ወኢታብአነ፡ እግዚኦ፡ ውስተ፡ መንሱት። አላ፡ አድኅነነ፡ ወባልሐነ፡ እምኵሉ፡ እኩይ።
5 ወመሰለ፡ ሎሙ፡ ወይቤሎሙ። ለእመ፡ ቦ፡ እምውስቴትክሙ፡ ዘቦ፡ ዐርክ፡ ወሖረ፡ ኀቤሁ፡ መንፈቀ፡ ሌሊት። ወይቤሎ፡ ዐርክየ፡ ለቅሐኒ፡ ሠላሰ፡ ኅብስተ።
6 እስመ፡ በጽሐኒ፡ ማኅፈርየ፡ እምሐቅል። ወአልብየ፡ ዘአቀርብ፡ ሎቱ፡ ወዘአሠብጦ።
7 ወይሰጠዎ፡ ዝኩ፡ ዐርኩ፡ እምውስጥ፡ ወይቤሎ። ኢታንጥየኒ፡ ወዳእነ፡ ቀተርነ፡ ኆኅተ። ወደቂቅነ፡ ይሰክቡ፡ ምስሌየ፡ ውስተ፡ ዐራት። ወኢይክል፡ ተንሥኦ፡ አሀብከ።
8 እብለክሙ፡ ለእመሂ፡ ኢተንሥአ፡ የሀቦ፡ እስመ፡ ዐርኩ፡ ውእቱ። ከመ፡ ኢያንጥዮ፡ ይትነሣእ፡ ወይሁቦ፡ መጠነ፡ ፈቀደ።
9 ወአነሂ፡ እብለክሙ፡ ሰአሉ፡ ወይትወሀበክሙ። ጐድጕዱ፡ ወይትረኀወክሙ። ኀሥሡ፡ ወትረክቡ።
10 እስመ፡ ኵሉ፡ ዘሰአለ፡ ይነሥእ። ወዘሂ፡ ኀሠሠ፡ ይረክብ። ወለዘሂ፡ ጐድጐደ፡ ይትረኀዎ።
11 ወእመ፡ ቦ፡ እምውስቴትክሙ፡ ዘሰአሎ፡ ወልዱ፡ ለአቡሁ፡ ኅብስተ፡ እብነኑ፡ ይሁቦ። ወእመኒ፡ ዓሣ፡ ሰአሎ፡ አርዌ፡ ምድርኒ፡ ይሁቦ፡ ህየንተ፡ ዓሣ።
12 ወእመኒ፡ አንቆቅሖ፡ ሰአሎ፡ ዐቅራበኑ፡ ይሁቦ፡ ህየንቴሁ።
13 ወሶበ፡ አንትሙ፡ እንዘ፡ እኩያን፡ አንትሙ። ተአምሩ፡ ሠናየ፡ ሀብተ፡ ውሂበ፡ ለውሉድክሙ። እፎ፡ ፈድፋደ፡ አቡክሙ፡ ዘበሰማያት። ይሁብ፡ ሠናየ፡ ሀብተ፡ መንፈስ፡ ቅዱስ፡ ለእለ፡ ይስእልዎ።
በእንተ፡ ዘአኀዞ፡ ጋኔን፡ ጽሙም
14 ወሀሎ፡ ያወፅእ፡ ጋኔነ፡ በሃመ፡ ወጽሙመ። ወወፂኦ፡ ጋኔኑ፡ ነበበ፡ ወሰምዐ፡ ውእቱ፡ በሃም፡ ወጽሙም። ወአንከርዎ፡ ሰብእ።
15 ወቦ፡ እምውስቴቶሙ፡ እለ፡ ይቤሉ፡ በብዔልዜቡል። በመልአኮሙ፡ ለአጋንንት፡ ያወፅኦሙ፡ ለአጋንንት። ወአውሥአ፡ ወይቤ፡ እፎ፡ ይክል፡ ሰይጣን፡ ለሰይጣን፡ አውፅኦቶ።
በእንተ፡ መናፍስት፡ ርኩሳን
16 ወቦ፡ እለ፡ ያሜክርዎ፡ ወየኀሥሡ፡ ትእምርተ፡ እምሰማይ፡ በኀቤሁ።
17 ወውእቱሰ፡ አእመሮሙ፡ ዘይኄልዩ፡ ወይቤሎሙ። ኵላ፡ መንግሥት፡ እንተ፡ ትትናፈቅ፡ በበይናቲሃ፡ ትማስን። ወቤትኒ፡ እመ፡ ተናፈቀ፡ በበይናሁ፡ ይወድቅ፡ ውእቱ፡ ቤት።
18 ወእመሰ፡ ሰይጣን፡ ተናፈቀ፡ በበይናቲሁ። እፎ፡ ይቀውም፡ መንግሥቱ። እስመ፡ ትብሉ፡ በብዔልዜቡል። በመልአኮሙ፡ ለአጋንንት፡ ያወፅኦሙ፡ ለአጋንንት።
19 ወእመሰ፡ አነ፡ በብዔልዜቡል፡ አወፅኦሙ፡ ለአጋንንት። ደቂቅክሙ፡ በምንትኑ፡ ያወፅእዎሙ። ወበእንተ፡ ዝንቱ፡ እሙንቱ፡ ይዛለፉክሙ።
20 ወእመሰ፡ አነ፡ በአጽባዕተ፡ እግዚአብሔር፡ አወፅኦሙ፡ ለአጋንንት። ዮጊኬ፡ በጽሐት፡ እንከሰ፡ ኀቤክሙ፡ መንግሥተ፡ እግዚአብሔር።
21 ወአምጣነ፡ የዐቅብ፡ ኀያል፡ ዐጸዶ፡ ርሱየ። በንዋየ፡ ሐቅሉ፡ ዳኅን፡ ኵሉ፡ ጥሪቱ።
22 ወእመሰ፡ ይመጽእ፡ ዘይኄይሎ፡ ይመውኦ፡ ወይሰልቦ፡ ንዋየ፡ ሐቅሉ። ዘቦቱ፡ ይትአመን፡ ወይትካፈል፡ በርበሮ፡ ወምህርካሁ።
23 ዘኢሀሎ፡ ምስሌየ፡ ዕድውየ፡ ውእቱ። ወዘኢይትጋባእ፡ ምስሌየ፡ ይዘርወኒ።
24 ወሶበ፡ ይወፅእ፡ ጋኔን፡ እኩይ፡ እምሰብእ፡ የዐውድ፡ በድወ፡ ኀበ፡ አልቦ፡ ማይ። ወየኀሥሥ፡ ምንባረ፡ ኀበ፡ የዐርፍ፡ ወእምከመ፡ ኢረከበ፡ ይብል። እገብእ፡ ቤትየ፡ እምኀበ፡ ወፃእኩ።
25 ወመጺኦ፡ ይረክቦ፡ እንዘ፡ ያስተራክብ። እዳወ፡ ወሥርግወ፡ ወኵስቱረ፡ ወምሩገ።
26 ወእምዝ፡ የሐውር፡ ወያመጽእ፡ ምስሌሁ፡ ሰብዐተ፡ ቢጾ፡ አጋንንተ። እለ፡ የአክይዎ፡ ወይበውኡ፡ ወየኀድሩ፡ ውስቴቱ። ወይብእሶ፡ ደኃሪቱ፡ ለውእቱ፡ ብእሲ፡ እምቀዳሚቱ።
በእንተ፡ ብእሲት፡ እንተ፡ ጸርሐት፡ በማእከለ፡ አሕዛብ
27 ወእምዝ፡ እንዘ፡ ዘንተ፡ ይትናገር። ከልሐት፡ አሐቲ፡ ብእሲት፡ በማእከለ፡ ሰብእ፡ ወትቤሎ። ብፅዕት፡ ከርሥ፡ እንተ፡ ጾረተከ፡ ወአጥባት፡ እለ፡ ሐፀናከ።
28 ወይብላ፡ ውእቱኒ። ብፁዓንሰ፡ እለ፡ ይሰምዑ፡ ቃለ፡ እግዚአብሔር፡ ወየዐቅቡ።
በእንተ፡ ትእምርተ፡ ዮናስ
29 ወእንዘ፡ ጉቡኣን፡ ብዙኃን፡ ሰብእ፡ አኀዘ፡ ይበሎሙ። ዛቲ፡ ትውልድ፡ እኪት፡ ይእቲ፡ ትእምርተ፡ ተኀሥሥ። ወትእምርትሰ፡ ኢይሁብዋ፡ ዘእንበለ፡ ትእምርተ፡ ዮናስ፡ ነቢይ።
30 ወበከመ፡ ዮናስ፡ ኮኖሙ፡ ትእምርተ፡ ለሰብአ፡ ነነዌ። ከማሁ፡ ይከውና፡ ትእምርተ፡ ወልደ፡ ዕጓለ፡ እመሕያው፡ ለዛቲ፡ ትውልድ።
31 ንግሥተ፡ አዜብ፡ ትትነሣእ፡ ምስለ፡ ዛቲ፡ ትውልድ፡ አመ፡ ዕለተ፡ ደይን። ወትትኳነኖሙ፡ እስመ፡ መጽአት፡ እምአጽናፈ፡ ምድር፡ ትስማዕ፡ ጥበቢሁ፡ ለሰሎሞን። ወናሁ፡ ዘየዐቢ፡ እምሰሎሞን፡ ሀሎ፡ ዝየ።
32 ሰብአ፡ ነነዌ፡ ይትነሥኡ፡ አመ፡ ደይን፡ ምስለ፡ ዛቲ፡ ትውልድ። ወይትኳነንዋ፡ ወያስተኃፍርዋ፡ እስመ፡ ነስሑ፡ አመ፡ ሰበከ፡ ዮናስ። ወናሁ፡ ዘየዐቢ፡ እምዮናስ፡ ሀሎ፡ ዝየ።
33 ወአልቦ፡ ዘያኀቱ፡ ማኅቶተ፡ ከመ፡ ያንብራ፡ ውስተ፡ ምኀባእ። ወእመ፡ አኮ፡ ታሕተ፡ ከፈር፡ ዘእንበለ፡ ዲበ፡ ተቅዋማ። ከመ፡ ይርአዩ፡ ብርሃነ፡ እለ፡ ያንሶስዉ።
34 ማኅቶቱ፡ ለሥጋከ፡ ዐይንከ፡ ውእቱ። ወአምጣነ፡ ዐይንከ፡ ብሩህ፡ ውእቱ፡ ኵሉ፡ ነፍስትከ፡ ብሩህ፡ ውእቱ። ወእመሰ፡ ዐይንከ፡ ሐማሚ፡ ውእቱ፡ ኵሉ፡ ነፍስትከ፡ ጽልመት፡ ውእቱ።
35 ዑቅ፡ እንከ፡ ብርሃንከ፡ ጽልመተ፡ ኢይኩን።
36 ወእምከመሰ፡ ኵሉ፡ ነፍስትከ፡ ብሩህ፡ ውእቱ። አልቦ፡ ምንተኒ፡ ጽልመት፡ ላዕሌከ። ወትከውን፡ ኵለንታከ፡ ብሩሀ፡ ወከመ፡ ማኅቶተ፡ መብረቅ፡ ያበርሀከ።
በእንተ፡ ፈሪሳዊ፡ ዘጸውዖ፡ ለእግዚእ፡ ኢየሱስ፡ ውስተ፡ ምሳሕ
37 ወእንዘ፡ ይነግሮሙ፡ ዘንተ፡ ይቤሎ፡ አሐዱ፡ ፈሪሳዊ፡ ከመ፡ ይምሳሕ፡ ኀቤሁ። ወቦአ፡ ወረፈቀ።
38 ወርእዮ፡ ፈሪሳዊ፡ አንከረ፡ እስመ፡ ኢተኀፅበ፡ እዴሁ፡ ለመሲሕ።
39 ወይቤሎ፡ እግዚእ፡ ኢየሱስ፡ አንትሙሰ፡ ፈሪሳውያን። ይእዜ፡ እንተ፡ አፍኣሁ፡ ተኀፅብዎ፡ ወታነጽሕዎ፡ ለጽዋዕኒ፡ ወለጻሕልኒ። ወእንተ፡ ውስጡሰ፡ ምሉእ፡ ሀይደ፡ ወእከየ።
40 ኦ፡ አብዳን፡ አኮኑ፡ ዘፈጠረ፡ እንተ፡ አፍኣ፡ ወእንተ፡ ውስጥኒ፡ ፈጠረ።
41 ወባሕቱ፡ ዘይትፈቀድሰ፡ ሀቡ፡ ለምጽዋት። ወኵሉ፡ ንጹሐ፡ ይከውነክሙ።
42 አሌ፡ ለክሙ፡ ጸሐፍት፡ ወፈሪሳውያን። እለ፡ ታበውኡ፡ ዐሥራተ፡ እዴሁ፡ ለአሕዛብ፡ ወለጼናታም፡ ወለኵሉ፡ አሕማላት። ወትትዔወርዎ፡ ለጽድቅ፡ ወለፍቅረ፡ እግዚአብሔር። ወዘንተኒ፡ ርቱዕ፡ ትግበሩ፡ ወዝክተኒ፡ ኢትኅድጉ።
43 አሌ፡ ለክሙ፡ ጸሐፍት፡ ወፈሪሳውያን፡ መደልዋን። እስመ፡ ታፈቅሩ፡ ነቢረ፡ ፍጽም፡ በውስተ፡ አዕዋዳት። ወተአምኆ፡ በውስተ፡ ምሥያጣት። ወርእሰ፡ ምርፋቃት፡ በውስተ፡ ምሳሓት።
44 አሌ፡ ለክሙ፡ ጸሐፍት፡ ወፈሪሳውያን፡ መደልዋን። እስመ፡ አንትሙ፡ ከመ፡ መቃብር፡ ዘኢይትዐወቅ። ዘያንሶሱ፡ ሰብእ፡ ላዕሌሁ፡ ወኢየአምሮ።
45 ወአውሥአ፡ አሐዱ፡ እምጸሐፍተ፡ ሀገር፡ ወይቤሎ። ሊቅ፡ ዘንተ፡ እንዘ፡ ትብል፡ ኪያነሂ፡ ትጼዕል።
46 ወይቤሎ፡ ለክሙሂ፡ ለጸሐፍተ፡ ሀገር፡ አሌ፡ ለክሙ። እስመ፡ ታጸውርዎ፡ ለሰብእ፡ ጾረ፡ ክቡደ። ወለሊክሙሰ፡ ኢትለክፍዎ፡ በአሐቲ፡ አጽባዕትክሙ፡ ጥቀ፡ ለውእቱ፡ ጾር።
47 አሌ፡ ለክሙ፡ ጸሐፍት፡ ወፈሪሳውያን። እስመ፡ ተሐንጹ፡ መቃብሪሆሙ፡ ለነቢያት፡ እለ፡ አበዊክሙ፡ ቀተልዎሙ።
48 አደመክሙኑ፡ ምግባሮሙ፡ ለአበዊክሙ፡ ወለሊክሙ፡ ሰማዕቶሙ። እስመ፡ ዘእሙንቱ፡ ቀተሉ፡ አንትሙ፡ ተሐንጹ፡ መቃብሪሆሙ።
49 ወበእንተ፡ ዝንቱ፡ ትቤ፡ ጥበቢሁ፡ ለእግዚአብሔር። ናሁ፡ አነ፡ እፌኑ፡ ኀቤሆሙ፡ ነቢያተ፡ ወሐዋርያተ። ወይቀትሉ፡ እምኔሆሙ፡ ወይሰድዱ።
50 ከመ፡ ይትበቀሎሙ፡ በእንተ፡ ደመ፡ ኵሉ፡ ነቢያት። ዘተክዕወ፡ እምፍጥረተ፡ ዓለም፡ እስከ፡ ዛቲ፡ ትውልድ።
51 እምደመ፡ አቤል፡ ጻድቅ፡ እስከ፡ ደመ፡ ዘካርያስ። ዘቀተልዎ፡ በማእከለ፡ ቤተ፡ መቅደስ፡ ወምሥዋዕ። እወ፡ እብለክሙ፡ ይትኀሠሥዋ፡ ለዛቲ፡ ትውልድ።
52 አሌ፡ ለክሙ፡ ጸሐፍተ፡ ሀገር፡ ወፈሪሳውያን። እስመ፡ ትነሥኡ፡ መራኁተ፡ ጽድቅ፡ ወአእምሮ፡ ወተኀብኡ።
53 ለሊክሙኒ፡ ኢትበውኡ፡ ወለእለሂ፡ ይበውኡ፡ ትከልእዎሙ፡ በዊአ።
54 ወእንዘ፡ ይነግሮሙ፡ ዘንተ፡ በቅድመ፡ ኵሉ፡ ሕዝብ። አኀዙ፡ ጸሐፍት፡ ወፈሪሳውያነ፡ ያመንዝዝዎ፡ ወይትቀየምዎ፡ ወይንዕውዎ። ወያስሕትዎ፡ በቃለ፡ አፉሁ፡ በዘያስተዋድይዎ።
=== chapter 12 ===
[ምዕራፍ 12]
በእንተ፡ ብሑኦሙ፡ ለፈሪሳውያን
1 ወተጋብኡ፡ ኀቤሁ፡ አእላፍ፡ ሰብእ፡ እስከ፡ ይትካየዱ፡ በበይናቲሆሙ። ወአኀዘ፡ ይበሎሙ፡ ለአርዳኢሁ፡ ቅድሙ፡ ወተዐቀቡ። እምነ፡ ብሑኦሙ፡ ለፈሪሳውያን፡ ዘውእቱ፡ አድልዎ።
2 እስመ፡ አልቦ፡ ክዱን፡ ዘኢይትከሠት፡ ወአልቦ፡ ኅቡእ፡ ዘኢያስተርኢ።
3 ወዘተናገሩ፡ በጽልመት፡ ይትናገርዎ፡ በብርሃን። ወዘሂ፡ አልኆሰሱ፡ በእዝን፡ ይሰብክዎ፡ በአጽራሕ፡ ወበአንሕስት።
4 እብለክሙ፡ ለክሙ፡ ለአዕርክትየ። ኢትፍርህዎሙ፡ ለእለ፡ ይቀትሉክሙ፡ ነፍስተክሙ። ወእምዝ፡ አልቦ፡ ፈድፋደ፡ ዘይክሉ፡ ገቢረ።
5 ወባሕቱ፡ አርእየክሙ፡ ዘትፈርሁ፡ ፍርህዎሰ። ለዘእምድኅረ፡ ቀተለ፡ ብዉሕ፡ ሎቱ፡ ይደይ፡ ነፍሰኒ፡ ወሥጋኒ፡ ውስተ፡ ገሃነም። እወ፡ እብለክሙ፡ ኪያሁ፡ ፍርህዎ።
6 አኮኑ፡ ኀምስ፡ አዕዋፍ፡ ይሠየጣ፡ በክልኤ፡ ጸሪቀ፡ አሶርዮን። ወኢ፡ አሐቲ፡ እምኔሆን፡ ኢትትረሳዕ፡ በቅድመ፡ እግዚአብሔር።
7 ወለክሙሰ፡ ሥዕርተ፡ ርእስክሙኒ፡ ኵሉ፡ ኍሉቅ፡ ውእቱ። ኢትፍርሁ፡ እንከ፡ እስመ፡ እምብዙኅ፡ አዕዋፍ፡ ትኄይሱ፡ አንትሙ።
8 እብለክሙ፡ ኵሉ፡ ዘየአምን፡ ብየ፡ በቅድመ፡ ዕጓለ፡ እመሕያው። አአምኖ፡ አነሂ፡ በቅድመ፡ መላእክተ፡ እግዚአብሔር።
9 ወዘሰ፡ ክሕደኒ፡ በቅድመ፡ ዕጓለ፡ እመሕያው። እክሕዶ፡ አነሂ፡ በቅድመ፡ መላእክተ፡ እግዚአብሔር።
10 ወኵሉ፡ ዘነበበ፡ ቃለ፡ ፅርፈት፡ ላዕለ፡ ወልደ፡ ዕጓለ፡ እመሕያው፡ ይትኀደግ፡ ሎቱ። ወዘሰ፡ ነበበ፡ ቃለ፡ ፅርፈት፡ ላዕለ፡ መንፈስ፡ ቅዱስ፡ ኢይትኀደግ፡ ሎቱ። ኢ፡ በዝ፡ ዓለም፡ ወኢ፡ በዘይመጽእ፡ ዓለም።
11 ወሶበሂ፡ ይወስዱክሙ፡ አዕዋዳተ፡ ወኀበሂ፡ መላእክት፡ ወነገሥት፡ ወመኳንንት። ኢተኀልዩ፡ ዘከመ፡ ትብሉ፡ ወዘከመሂ፡ ትትናገሩ።
12 እስመ፡ መንፈስ፡ ቅዱስ፡ ውእቱ፡ ዘይነብብ፡ በላዕሌክሙ፡ ሶቤሃ።
በእንተ፡ ዘፈቀደ፡ ይትካፈል፡ ርስተ
13 ወይቤሎ፡ አሐዱ፡ እምሕዝብ። ሊቅ፡ በሎ፡ ለእኁየ፡ ይክፍለኒ፡ ርስትየ።
14 ወይቤሎ፡ እግዚእ፡ ኢየሱስ። አንተ፡ ብእሲ፡ መኑ፡ ሤመኒ፡ ከፋሌ፡ ወመኰንነ፡ ላዕሌክሙ።
15 ወይቤሎሙ፡ ለአርዳኢሁ፡ ዑቁ፡ ወተዐቀቡ፡ እምነ፡ ኵሉ፡ ትዕግልት። እስመ፡ አኮ፡ በአብዝኆ፡ ንዋይ፡ ዘየሐዩ፡ ሰብእ።
በእንተ፡ ባዕል፡ ዘሠምረ፡ ሎቱ፡ ገራህቱ
16 ወመሰለ፡ ሎሙ፡ ወይቤሎሙ። አሐዱ፡ ብእሲ፡ ባዕል፡ ዘሠምረ፡ ሎቱ፡ ተግባሩ፡ ወደለዎ፡ ብሔር።
17 ወኀለየ፡ በልቡ፡ ወይቤ። ምንተ፡ እሬሲ፡ ዘአልብየ፡ ኀበ፡ እዘግብ፡ እክልየ፡ ወበረከትየ።
18 ወይቤ፡ ከመ፡ ዝ፡ እገብር፡ እነሥት፡ ዘትካት፡ መዛግብትየ። ወአሐንጽ፡ ካልአ፡ ዘየዐቢ፡ እምኔሁ። ወእዘግብ፡ ህየ፡ እክልየ፡ ወበረከትየ።
19 ወእብላ፡ ለነፍስየ፡ ኦ፡ ነፍስየ፡ ብኪ፡ ብዙኀ፡ በረከት፡ ዘዘገብኩ፡ ለኪ። ንቡረ፡ ዘየአክለኪ፡ ለብዙኅ፡ ዓመታት። አዕርፊ፡ እንከሰ፡ ብልዒ፡ ወስትዪ፡ ወተፈሥሒ።
20 ወይቤሎ፡ እግዚአብሔር፡ ኦ፡ አብድ፡ በዛቲ፡ ሌሊት፡ ይነሥእዋ፡ ለነፍስከ፡ እምላዕሌከ። ለመኑ፡ እንከ፡ ይከውን፡ ዘአስተዳሎከ።
21 ከማሁኬ፡ ዘይዘግብ፡ ሎቱ፡ መዝገበ፡ ዘኢኮነ፡ እምእግዚአብሔር፡ ብዕሉ።
ዘከመ፡ ኢይደልዎ፡ ለክርስቲያን፡ ተዐጽቦት፡ በከንቱ
22 ወይቤሎሙ፡ ለአርዳኢሁ፡ በእንተ፡ ዝንቱ፡ እብለክሙ። ኢተኀልዩ፡ ለነፍስክሙ፡ ዘትበልዑ፡ ወዘትሰትዩ፡ ወለሥጋክሙ፡ ዘትለብሱ።
23 እስመ፡ ነፍስ፡ ተዐጽብ፡ እምሲሲት። ወሥጋ፡ የዐጽብ፡ እምዐራዝ።
24 ርእዩ፡ ዕጕለ፡ ቋዓት፡ ዘኢይዘርዑ፡ ወኢየአርሩ። ወአልቦሙ፡ መዛግብት፡ ወኢ፡ ውሳጥያት፡ ወእግዚአብሔር፡ ይሴስዮሙ። እፎ፡ እንከ፡ ፈድፋደ፡ ትኄይሱ፡ አንትሙ፡ እምአዕዋፍ።
25 መኑ፡ እምኔክሙ፡ ኀልዮ፡ ዘይክል፡ ወስኮ፡ አሐደ፡ እመተ፡ በዲበ፡ ቆሙ።
26 ወሶበ፡ ኢትክሉ፡ ዘንተ፡ ዘይቀልል፡ ለምንት፡ ትኄልዩ፡ ዘየዐጽብ።
27 ናሁ፡ ጽጌያተ፡ ገዳም፡ ርእዩ፡ ዘከመ፡ ይልህቁ። ኢይፈትሉ፡ ወኢይጻምዉ። እብለክሙ፡ ከመ፡ ሰሎሞን፡ ጥቀ፡ ኢለብሰ። ከመ፡ አሐዱ፡ እምእሉ፡ በኵሉ፡ መዋዕለ፡ ክብሩ።
28 ወለእመ፡ ኮነ፡ ሥርወ፡ ጽጌ፡ ዘዮም፡ ሀሎ። ወጌሠመ፡ ውስተ፡ እሳት፡ ይትወደይ። ከማሁኬ፡ ይሬሲ፡ እግዚአብሔር።
29 እፎ፡ እንከ፡ ፈድፋደ፡ ለክሙ፡ ኦ፡ ሕጹጻነ፡ ሃይማኖት። አንትሙሂ፡ ኢትኅሥሡ፡ ዘትበልዑ፡ ወዘትሰትዩ። ወኢትትፋለሱ፡ ወኢትጽሐቅዎ።
30 እስመ፡ ዘንተሰ፡ ኵሉ፡ አሕዛበ፡ ዓለም፡ ዘአፍኣ፡ የኀሥሥዎ። ወለክሙሰ፡ የአምር፡ አቡክሙ፡ ከመ፡ ተኀሥሥዎ፡ ለዝንቱ፡ ኵሉ።
31 ወባሕቱ፡ ኅሡ፡ መንግሥቶ፡ ወጽድቆ። ወዝሰ፡ ኵሉ፡ ይትዌሰክ፡ ለክሙ።
32 ኢትፍራህ፡ ኦ፡ ንኡስ፡ መርዔት። እስመ፡ ሠምረ፡ አቡክሙ፡ የሀብክሙ፡ መንግሥቶ። ሢጡ፡ ንዋየክሙ፡ ወሀቡ፡ ምጽዋተ፡ ለነዳያን።
33 ግበሩ፡ ለክሙ፡ ቊናማተ፡ ዘኢይበሊ፡ ወመዛግብተ፡ በሰማያት፡ ዘኢየኀልቅ። ኀበ፡ ኢይረክቦ፡ ሰራቂ፡ ወኢያማስኖ፡ ፃፄ፡ ወቊንቊኔ።
34 ወኀበ፡ ሀሎ፡ መዝገብክሙ፡ ህየ፡ ይሄሉ፡ ልብክሙ።
በእንተ፡ ተጊሆት
35 ወይኩን፡ ቅኑተ፡ ሐቌክሙ፡ ወኀትወ፡ መኃትዊክሙ።
36 ወአንትሙኒ፡ ኩኑ፡ ከመ፡ ዕደው። እለ፡ ይጸንሑ፡ እግዚኦሙ፡ እስከ፡ የአቱ፡ እምከብካብ። ከመ፡ መጺኦ፡ ወጐድጕዶ፡ ያርኅውዎ፡ ሶቤሃ።
37 ብፁዓን፡ እሙንቱ፡ አግብርት፡ እለ፡ ይረክቦሙ፡ እግዚኦሙ፡ መጺኦ። እንዘ፡ ከመ፡ ዝ፡ ይገብሩ፡ ወይተግሁ። አማን፡ እብለክሙ፡ ከመ፡ ይቀንት፡ ሐቌሁ። ወያረፍቆሙ፡ ወያንሶሱ፡ ማእከሎሙ፡ ወይትለአኮሙ።
38 ወእመኒ፡ በካልእት፡ ወእመኒ፡ በሣልስት፡ ሰዓተ፡ ሌሊት። ሶበ፡ መጽአ፡ ወረከቦሙ። ከመ፡ ዝ፡ ብፁዓን፡ እሙንቱ፡ እልክቱ፡ አግብርት።
39 ወዘንተ፡ ባሕቱ፡ አእምሩ፡ ሶቤሁ፡ የአምር፡ በዓለ፡ ቤት። እንተ፡ ጊዜ፡ ይመጽእ፡ ሰራቂ። እምተግሀ፡ ወእምሀለወ፡ ወእምኢያብሐ፡ ይክርዩ፡ ቤቶ።
40 ወአንትሙሂ፡ ድልዋኒክሙ፡ ሀልዉ። እስመ፡ በጊዜ፡ ኢተሐዘብክሙ፡ ይመጽእ፡ ወልደ፡ ዕጓለ፡ እመሕያው።
41 ወይቤሎ፡ ጴጥሮስ፡ እግዚኦ፡ ለነኑ፡ ትሜስል፡ ዘንተ፡ ምሳሌ፡ አው፡ ለኵሉኑ።
42 ወይቤሎ፡ እግዚእነ፡ መኑ፡ እንጋ፡ ውእቱ፡ መጋቢ፡ ኄር። ወምእመን፡ ወጠቢብ፡ ዘይሠይሞ፡ እግዚኡ፡ ላዕለ፡ ኵሉ፡ ሰብአ፡ ቤቱ። ከመ፡ የሀቦሙ፡ ሲሳዮሙ፡ በበ፡ ጊዜሁ።
43 ብፁዕ፡ ውእቱ፡ ገብር፡ ዘመጺኦ፡ እግዚኡ፡ ይረክቦ። እንዘ፡ ከመ፡ ዝ፡ ይገብር።
44 አማን፡ እብለክሙ፡ ከመ፡ ላዕለ፡ ኵሉ፡ ንዋዩ፡ ያሜግቦ።
45 ወእመሰ፡ ይቤ፡ ውእቱ፡ ገብር፡ እኩይ፡ በልቡ። ይጐነዲ፡ አቲወ፡ እግዚእየ። ወይእኅዝ፡ ይዝብጥ፡ ወያመንዝዝ፡ ደቀ፡ ወአዋልደ፡ ዘቤተ፡ እግዚኡ። ወይበልዕ፡ ወይሰቲ፡ ምስለ፡ ሰካርያን፡ ወይሰክር።
46 ወይበጽሕ፡ እግዚኡ፡ ለውእቱ፡ ገብር፡ በዕለተ፡ ኢተሐዘበ፡ ወበጊዜ፡ ኢያእመረ። ወይመትሮ፡ እማእከሉ፡ ወያገብእ፡ መክፈልቶ፡ ምስለ፡ እለ፡ ኢየአምኑ።
47 ወለገብርሰ፡ ዘየአምር፡ ፈቃደ፡ እግዚኡ። ወኢይገብር፡ ወኢያስተዳሉ፡ ዘከመ፡ ይፈቅድ፡ ብዙኅ፡ መቅሠፍቱ።
48 ወዘሰ፡ ኢየአምር፡ ለእመ፡ ኢገብረ፡ ውኁድ፡ መቅሠፍቱ። ወለኵሉ፡ ዘብዙኀ፡ ወሀብዎ፡ ብዙኀ፡ ይትኀሠሥዎ። ወለዘኒ፡ ውኁደ፡ አማኅፀንዎ፡ ውኁደ፡ ይትኀሠሥዎ።
49 እሳተ፡ አምጻእኩ፡ ለብሔር፡ ወምንተ፡ እፈቅድ፡ ዘእንበለ፡ አንድዶታ።
50 ወባሕቱ፡ ብየ፡ ጥምቀት፡ ዘእጠመቅ። ወጥቀ፡ እትዔገሥ፡ እስከ፡ እፌጽማ።
51 ወይቤሎሙ፡ ለሕዝብ፡ ይመስለክሙኑ፡ ሰላመ፡ ዘአምጻእኩ፡ ለምድር።
52 አልቦ፡ እብለክሙ፡ ዘእንበለ፡ መጥባሕተ፡ ወፍልጣን። ወእምይእዜሰ፡ ለእመ፡ ኀምስቱ፡ ሀለዉ፡ ውስተ፡ አሐዱ፡ ቤት። ይትፈለጡ፡ ሠለስቱ፡ እምክልኤቱ፡ ወይትፈለጡ፡ ክልኤቱ፡ እምሠለስቱ። ወይትፈለጥ፡ አሐዱ፡ እምካልኡ።
53 ወይትፈለጥ፡ አብ፡ እምወልዱ፡ ወወልድኒ፡ እምአቡሁ። ወትትፈለጥ፡ እም፡ እምወለታ፡ ወወለትኒ፡ እምእማ። ወሐማት፡ እመርዓታ፡ ወመርዓትኒ፡ እምሐማታ።
54 ወእምዝ፡ ይቤሎሙ፡ ለሕዝብ፡ ሶበ፡ ትሬእዩ፡ ደመና፡ ዘይዴምን፡ መንገለ፡ ዐረብ። ዝናም፡ ለመጺእ፡ ከመ፡ ዝ፡ ይከውን፡ ትብሉ።
55 ወሶበ፡ ይነፍኅ፡ ነፋሰ፡ አዜብ። ሐሩር፡ ለመጺእ፡ ከመ፡ ዝ፡ ይከውን፡ ትብሉ።
56 ኦ፡ መደልዋን፡ ለገጸ፡ ሰማይ፡ ወምድር፡ ተአምሩ፡ አመክሮቶ። ወእፎ፡ ኢተአምሩ፡ አመክሮቶን፡ ለእላንቱ፡ መዋዕል።
57 ወምንትኑ፡ ለሊክሙ፡ ኢትፈትሑ፡ ጽድቀ።
በእንተ፡ ዕርቅ
58 ሶበ፡ ተሐውር፡ ምስለ፡ ዕድውከ፡ ኀበ፡ መልአክ። ተዐረቅ፡ በፍኖት፡ ወሠልጥ፡ ዘትፈድዮ። ከመ፡ ኢይትባጻሕከ፡ ኀበ፡ መኰንን። ወመኰንን፡ ይሜጥወከ፡ ለወዓሊሁ፡ ወወዓሊሁ፡ ይሞቅሐከ።
59 እብለከ፡ ከመ፡ ኢትወፅእ፡ እምህየ። እስከ፡ ሶበ፡ ትሤልጥ፡ ደኃሪተ፡ ገመስ፡ ዘላዕሌከ።
=== chapter 13 ===
[ምዕራፍ 13]
ዘከመ፡ ይደልዎ፡ ለክርስቲያን፡ ገቢረ፡ ንስሓ፡ በኵርሕ
1 ወበውእቱ፡ መዋዕል፡ መጽኡ፡ ሰብእ፡ ኀቤሁ፡ ወዜነውዎ፡ በእንተ፡ ገሊላውያን። እለ፡ ደመረ፡ ጲላጦስ፡ ደሞሙ፡ ምስለ፡ መሥዋዕቶሙ።
2 ወአውሥአ፡ እግዚእ፡ ኢየሱስ፡ ወይቤሎሙ። ይመስለክሙኑ፡ እሙንቱ፡ ገሊላውያን፡ ኃጥኣን፡ እምኵሉ፡ ሰብአ፡ ገሊላ። እስመ፡ ዛቲ፡ ሕማም፡ ረከበቶሙ።
3 አልቦ፡ እብለክሙ፡ እመሰ፡ ኢነሳሕክሙ፡ አንትሙኒ። ከማሆሙ፡ ትትሀጐሉ፡ ኵልክሙ።
4 ወሚመ፡ ይመስለክሙኑ፡ እሉ፡ ዐሠርቱ፡ ወሰመንቱ። እለ፡ ወድቀ፡ ላዕሌሆሙ፡ ማኅፈድ፡ በሰሊሆሙ፡ ወቀተሎሙ። ከመ፡ እሙንቱ፡ ኃጥኣን፡ እምኵሉ፡ ሰብአ፡ ኢየሩሳሌም።
5 አልቦ፡ እብለክሙ፡ እመሰ፡ ኢነሳሕክሙ። ከማሆሙ፡ ትትሀጐሉ፡ አንትሙሂ፡ ኵልክሙ።
በእንተ፡ በለስ፡ ዘአልባቲ፡ ፍሬ
6 ወመሰለ፡ ሎሙ፡ ወይቤሎሙ፡ አሐዱ፡ ብእሲ፡ በለስ፡ ቦቱ፡ ውስተ፡ ዐጸደ፡ ወይኑ፡ እምርት። ወሖረ፡ ኀቤሃ፡ ይንሣእ፡ ፍሬሃ፡ ወኢረከበ።
7 ወሶበ፡ ኢረከበ፡ ይቤሎ፡ ለዐቃቤ፡ ወይን። ናሁ፡ ሠለስቲ፡ ዓመት፡ እንዘ፡ እመጽእ፡ እንሣእ፡ ፍሬሃ፡ ለዛቲ፡ በለስ። ወኢረከብኩ፡ ግዝማ፡ እንከሰ፡ ከመ፡ ኢታፅርእ፡ ምድረነ።
8 ወአውሥአ፡ ዐቃቤ፡ ወይን፡ ወይቤሎ። ኅድጋ፡ እግዚኦ፡ ኀሪፈኒ፡ እስከ፡ እከሪ፡ መሬተ። ወእወዲ፡ ወእክዑ፡ ድኵዐ፡ ታሕቴሃ።
9 ለእመ፡ ቦ፡ ከመ፡ ትፈሪ፡ ለዓም፡ ዘይመጽእ። ወእመ፡ አኮሰ፡ ንገዝማ፡ ለእመ፡ ሐዮነ።
በእንተ፡ ብእሲት፡ ዘድኅነት፡ በዕለተ፡ ሰንበት
10 ወእንዘ፡ ይሜህሮሙ፡ በሰንበት፡ በአሐዱ፡ ምኵራብ። ሀለወት፡ አሐቲ፡ ብእሲት፡ እንተ፡ አድወያ፡ ጋኔን፡ ዐሠርተ፡ ወሰመንተ፡ ዓመተ። ወጕሕቈት፡ ወኢትክል፡ ርቱዐ፡ ቀዊመ፡ ግሙራ።
11 ወርእያ፡ እግዚእ፡ ኢየሱስ፡ ወመሐራ፡ ወጸውዓ፡ ወይቤላ። ኦ፡ ብእሲቶ፡ ተስዕርኪ፡ እምደዌኪ።
12 ወአንበረ፡ እዴሁ፡ ላዕሌሃ። ወረትዐት፡ ሶቤሃ፡ ወአእኰተቶ፡ ለእግዚአብሔር።
13 ወአውሥአ፡ መጋቤ፡ ምኵራብ፡ እንዘ፡ ይትመዐዕ። እስመ፡ በሰንበት፡ ፈወሰ፡ እግዚእ፡ ኢየሱስ።
14 ወይቤሎሙ፡ ለሕዝብ፡ አኮኑ፡ ሰዱስ፡ መዋዕል፡ ውእቱ፡ በዘትገብሩ፡ ግብረክሙ። ውእተ፡ አሚረ፡ ንዑኬ፡ ተፈወሱ፡ በውእቶን፡ ዕለታት፡ ወአኮ፡ በዕለተ፡ ሰንበት።
15 ወአውሥአ፡ እግዚእ፡ ኢየሱስ፡ ወይቤሎሙ፡ ኦ፡ መደልዋን። አንትሙሰ፡ ኢትፈትሑኑ፡ አድገክሙ፡ ወላሕመክሙ፡ እምነ፡ ምቅማሑ። ወኢትወሰድዎኑ፡ ታስትይዎ፡ ማየ፡ በዕለተ፡ ሰንበት።
16 ወዛቲ፡ ወለተ፡ አብርሃም፡ ናሁ፡ ዐሠርቱ፡ ወሰመንቱ፡ ዓመት፡ እምዘአሰራ፡ ሰይጣን። አኮኑ፡ ርቱዕ፡ ትትፈታሕ፡ እምነ፡ ማእሰራ፡ ይእቲሂ፡ በዕለተ፡ ሰንበት።
17 ወዘንተ፡ ብሂሎ፡ ተኀፍሩ፡ ኵሎሙ፡ እለ፡ ቆሙ፡ ላዕሌሁ። ወተፈሥሑ፡ ኵሉ፡ ሕዝብ፡ በእንተ፡ ኵሉ፡ መንክር፡ ዘይትገበር፡ እምኔሁ።
በእንተ፡ ኅጠተ፡ ሰናፔ፡ ወበእንተ፡ ዘርዕ፡ ወብሑእ
18 ወይእተ፡ ዕለት፡ ይቤሎሙ፡ እግዚእ፡ ኢየሱስ። ምንተ፡ ትመስል፡ መንግሥተ፡ ሰማያት፡ ወበምንት፡ አስተማስላ።
19 ትመስል፡ ኅጠተ፡ ስናፔ፡ እንተ፡ ነሥአ፡ ብእሲ፡ ወዘርዐ፡ ውስተ፡ ገራህቱ። ወልህቀት፡ ወኮነት፡ ዕፀ፡ ዐባየ። ወአጽለሉ፡ አዕዋፈ፡ ሰማይ፡ ውስተ፡ አዕጹቂሃ።
20 ወካዕበ፡ ይቤ፡ በምንት፡ አስተማስላ፡ ለመንግሥተ፡ እግዚአብሔር።
21 ትመስል፡ ብሑአ፡ ዘነሥአት፡ ብእሲት። ወደፈነቶ፡ ውስተ፡ ኀሪጽ፡ ዘሠለስቱ፡ መስፈርት፡ ወአብሕአ፡ ኵሎ።
በእንተ፡ ኍልቈ፡ ኅሩያን
22 ወየሐውር፡ አህጉረ፡ ወአዕጻዳተ፡ ወያንሶሱ፡ በኢየሩሳሌም፡ ወይሜህር።
23 ወይቤሎ፡ አሐዱ፡ እግዚኦ፡ ውኁዳንኑ፡ እንጋ፡ እሙንቱ፡ እለ፡ ይድኅኑ።
24 ወይቤሎሙ፡ ተኀየሱ፡ ትባኡ፡ እንተ፡ ጸባብ፡ አንቀጽ። እብለክሙ፡ ብዙኃን፡ እለ፡ የኀሥሡ፡ ይባኡ፡ ወኢይክሉ።
25 እስመ፡ ይትነሣእ፡ በዓለ፡ ቤት፡ ወየዐጹ፡ ኆኅቶ። ወይእተ፡ ጊዜ፡ ይእኅዙ፡ ይቁሙ፡ አፍኣ፡ ወይጐድጕዱ። እንዘ፡ ይብሉ፡ እግዚኦ፡ እግዚኦ፡ አርኅወነ። ወያወሥእ፡ ወይብሎሙ፡ ኢየአምረክሙ፡ እምአይቴ፡ አንትሙ።
26 ወእምዝ፡ ይእኅዙ፡ ይበልዎ። በላዕነሂ፡ ወሰተይነሂ፡ በቅድሜከ፡ ወመሀርከ፡ በመራኅብቲነ።
27 ወይብሎሙ፡ እብለክሙ፡ ኢየአምረክሙ፡ እምአይቴ፡ አንትሙ። ረሐቁ፡ እምኔየ፡ ኵልክሙ፡ ገበርተ፡ ዐመፃ።
28 ወሑሩ፡ ውስተ፡ ብካይ፡ ወሐቅየ፡ ስነን። ወአመ፡ ርኢክምዎሙ፡ ለአብርሃም፡ ወለይስሐቅ፡ ወለያዕቆብ። ወለኵሎሙ፡ ነቢያት፡ በመንግሥተ፡ እግዚአብሔር። ወለክሙሰ፡ ያወፅኡክሙ፡ አፍኣ።
29 ወይመጽኡ፡ እምጽባሕ፡ ወእምዕራብ፡ ወእምሰሜን፡ ወእምደቡብ። ወይትፌሥሑ፡ በመንግሥተ፡ እግዚአብሔር።
30 ወይከውኑ፡ ደኀርት፡ ቀደምተ፡ ወቀደምት፡ ይከውኑ፡ ደኀርተ።
በእንተ፡ ጽልእ፡ ዘሄሮድስ
31 ወበይእቲ፡ ዕለት፡ መጽኡ፡ ሰብእ፡ እምፈሪሳውያን፡ ወይቤልዎ። ሑር፡ እም፡ ዝየ፡ እስመ፡ ሄሮድስ፡ ይፈቅድ፡ ይቅትልከ።
32 ወይቤሎሙ፡ ሑሩ፡ በልዋ፡ ለዛቲ፡ ቊንጽል። ናሁ፡ አወፅእ፡ አጋንንተ፡ ወእሁብ፡ ሕይወተ፡ ዮም። ወጌሠመ፡ ወበሣልስት፡ እፌጽም።
33 ወባሕቱ፡ ዮምሰ፡ ወጌሠመ፡ ሀለውኩ፡ ወበሣልስተ፡ አሐውር። እስመ፡ ኢይደልዎ፡ ለነቢይ፡ መዊት፡ በአፍኣ፡ ዘእንበለ፡ በኢየሩሳሌም።
ዘከመ፡ ተናገረ፡ ኢየሱስ፡ ተኀድጎታ፡ ለኢየሩሳሌም
34 ኢየሩሳሌም፡ ኢየሩሳሌም፡ እንተ፡ ትቀትልዮሙ፡ ለነቢያት። ወትዌግርዮሙ፡ ለሐዋርያት፡ እለ፡ ተፈነዉ፡ ኀቤኪ። ሚ፡ መጠነ፡ ፈቀድኩ፡ አስተጋብኦሙ፡ ለደቂቅኪ። ከመ፡ እንተ፡ ታስተጋብእ፡ ዶርሆ፡ ዕጐሊሃ፡ ታሕተ፡ ክነፊሃ። ወአበይክሙ፡ ወናሁ፡ ይትኀደግ፡ ለክሙ፡ ቤትክሙ፡ በድወ።
35 እብለክሙ፡ ከመ፡ ኢትሬእዩኒ፡ እምይእዜ። እስከ፡ ሶበ፡ ትብሉ፡ ቡሩክ፡ ዘይመጽእ፡ በስመ፡ እግዚአብሔር።
=== chapter 14 ===
[ምዕራፍ 14]
ዘከመ፡ ፈወሶ፡ ኢየሱስ፡ ለቅብው፡ በዕለተ፡ ሰንበት
1 ወእምዝ፡ ሶበ፡ ሖረ፡ ቦአ፡ ቤተ፡ አሐዱ፡ ብእሲ። እምነ፡ መልአኮሙ፡ ለፈሪሳውያን። በሰንበት፡ ከመ፡ ይብላዕ፡ እክለ፡ ወእሙንቱሰ፡ ይትዐቀብዎ።
2 ወሀሎ፡ አሐዱ፡ ብእሲ፡ ቅብው፡ ቅድሜሁ።
3 ወአውሥአ፡ እግዚእ፡ ኢየሱስ፡ ወተስእሎሙ፡ ለጸሐፍተ፡ ሀገር፡ ወለፈሪሳውያን። ወይቤሎሙ፡ ይከውንሁ፡ በሰንበት፡ ፈውሶ፡ ወሚመ፡ ኢይከውንሁ።
4 ወአርመሙ፡ ወነሥኦ፡ ወፈወሶ፡ ወፈነዎ።
5 ወይቤሎሙ፡ እመ፡ ቦ፡ አሐዱ፡ እምኔክሙ። ለእመ፡ ወድቆ፡ ላሕሙ፡ አው፡ አድጉ፡ ውስተ፡ ዐዘቅት። አኮኑ፡ በጊዜሃ፡ ያነሥኦ፡ በዕለተ፡ ሰንበት።
6 ወስእኑ፡ አውሥኦቶ፡ በእንተ፡ ዝንቱ፡ ነገር።
በእንተ፡ ኢያፍቅሮ፡ ርእሰ፡ ምርፋቅ
7 ወይቤሎሙ፡ ለእለ፡ ሀለዉ፡ ውስተ፡ ምሳሕ፡ ወመሰለ፡ ሎሙ፡ ወመሀሮሙ። ሶበ፡ ርእዮሙ፡ እንዘ፡ ይትባደሩ፡ ውስተ፡ ርእሰ፡ ምርፋቅ።
8 ወይቤ፡ እመ፡ ቦ፡ ዘጸውዐከ፡ ውስተ፡ ምሳሕ፡ ወሖርከ። ኢትርፍቅ፡ ውስተ፡ ርእሰ፡ ምርፋቅ፡ ክቡር። ዮጊ፡ ይመጽእ፡ ዘይከብረከ።
9 እስመ፡ መጺኦ፡ ድኅረ፡ ይብለከ፡ ዝኩ፡ ዘጸውዐከ። ኅድግ፡ ሎቱ፡ ዘንተ፡ ገጸ። ወትገብእ፡ ወትትኀፈር፡ ውእተ፡ ጊዜ፡ ወትወርድ፡ ውስተ፡ ምርፋቅ፡ ዘይቴሐት።
10 ወእመሰ፡ ቦ፡ ዘጸውዐከ፡ ወሖርከ፡ ርፍቅ፡ ውስተ፡ ታሕታይ፡ ምርፋቅ። ከመ፡ ሶበ፡ መጽአ፡ ዘጸውዐከ፡ ይብለከ። ዐርክየ፡ ዕርግ፡ ውስተ፡ ዘይትሌዐል፡ ምርፋቅ። ወውእተ፡ ጊዜ፡ ይከውነከ፡ ክብረ። በቅድመ፡ ኵሎሙ፡ እለ፡ ይረፍቁ፡ ወይመስሑ፡ ምስሌከ።
11 እስመ፡ ኵሉ፡ ዘአዕበየ፡ ርእሶ፡ የኀስር፡ ወዘአትሐተ፡ ርእሶ፡ ይከብር።
12 ወይቤሎ፡ ለዘጸውዖ፡ ሶበ፡ ትገብር፡ በዓለ፡ ወምሳሐ፡ አው፡ ድራረ። ኢትጸውዕ፡ አዕርክቲከ፡ ወአኀዊከ፡ ወአዝማዲከ፡ ወጎረከ፡ ወቢጸከ፡ አብዕልተ። ከመ፡ ይጸውዑከ፡ እሙንቱሂ፡ ወይከውነከ፡ ፍዳ፡ በኀቤሆሙ።
13 አላ፡ ሶበ፡ ትገብር፡ በዓለ፡ ወምሳሐ። ጸውዕ፡ ነዳያነ፡ ወምስኪናነ፡ ወዕዉራነ፡ ወስቡራነ።
14 ወብፁዕ፡ አንተ፡ እስመ፡ አልቦሙ፡ ዘይፈድዩከ። ወባሕቱ፡ ትትዐሰይ፡ አመ፡ ይትነሥኡ፡ ጻድቃን።
15 ወሰሚዖ፡ ዘንተ፡ አሐዱ፡ እምእለ፡ ይረፍቁ፡ ይቤሎ። ብፁዕ፡ ውእቱ፡ ዘይበልዕ፡ እክለ፡ በመንግሥተ፡ ሰማያት።
በእንተ፡ እለ፡ ተጸውዑ፡ ውስተ፡ ድራር
16 ወይቤሎሙ፡ እግዚእ፡ ኢየሱስ፡ አሐዱ፡ ብእሲ፡ ገብረ፡ ምሳሐ፡ ዐቢየ፡ ወዐሠሮሙ፡ ለብዙኃን።
17 ወሶበ፡ በጽሐ፡ ዐሡር፡ ፈነወ፡ ገብሮ፡ ይጸውዖሙ፡ ለእለ፡ ዐሠሮሙ። ወሶበ፡ በጽሐ፡ ጊዜ፡ ምሳሕ፡ ሖረ፡ ገብሩ፡ ወይቤሎሙ፡ ለእለ፡ ዐሠሮሙ። ንዑአ፡ እስመ፡ ወዳእነ፡ አስተዳለውነ፡ ምሳሐ። ወአበይዎ፡ ኵሎሙ፡ ኅቡረ፡ በአሐዱ፡ ቃል።
18 ወይቤሎ፡ ቀዳማዊ፡ ገራህተ፡ ተሣየጥኩ፡ ዘእጽሕቅ። ከመ፡ እፃእ፡ ወእሑር፡ እርአያ። ወበሎ፡ ረሲ፡ ሊተ፡ ከመ፡ ዘኢአበይኩ።
19 ወይቤሎ፡ ካልኡኒ፡ ኀምስተ፡ ፅምደ፡ አልሕምት፡ ተሣየጥኩ። ወአሐውር፡ እርአዮሙ፡ ወእፍትኖሙ። ወበሎ፡ ረሲ፡ ሊተ፡ ከመ፡ ዘመጻእኩ፡ ወኢአበይኩ።
20 ወሣልሱኒ፡ ይቤሎ፡ ብእሲተ፡ አውሰብኩ። ወበእንተ፡ ዝ፡ ኢይክል፡ መጺአ።
21 ወገብአ፡ ገብሩ፡ ወነገሮ፡ ከመ፡ ዝ፡ ለእግዚኡ። ወይእተ፡ ጊዜ፡ ተምዕዐ፡ በዓለ፡ ቤት፡ ወይቤሎ፡ ለገብሩ። ሑር፡ ፍጡነ፡ ውስተ፡ መራሕብት፡ ወውስተ፡ አስኳተ፡ ሀገር። ወአምጽእ፡ ሊተ፡ ዝየ፡ ነዳያነ፡ ወጽኑሳነ፡ ወምስኪናነ፡ ወዕዉራነ፡ ወስቡራነ።
22 ወእምዝ፡ ይቤሎ፡ ገብሩ፡ ገበርኩ፡ እግዚኦ፡ በከመ፡ አዘዝከኒ። ወዓዲ፡ ቦ፡ መካን።
23 ወይቤሎ፡ እግዚኡ፡ ለገብሩ። ሑር፡ ፍጡነ፡ ውስተ፡ ፍናው፡ ወውስተ፡ ጥቅመ፡ ሀገር፡ ወበግብር። አብእ፡ ሰብእ፡ ከመ፡ ይምላእ፡ ቤትየ።
24 እብለክሙ፡ ከመ፡ አሐዱሂ፡ እምእልክቱ፡ ሰብእ፡ እለ፡ ጸዋዕኩ። ኢይጥዕምዋ፡ ለበዓልየ።
ዘከመ፡ ይደሉ፡ ተሊዎተ፡ እግዚእ፡ ኢየሱስ
25 ወእምዝ፡ እንዘ፡ የሐውሩ፡ ምስሌሁ፡ ብዙኃን፡ ሰብእ፡ ተመይጠ፡ ወይቤሎሙ።
26 ዘይመጽእ፡ ኀቤየ፡ ወይፈቅድ፡ ይትልወኒ። ለእመ፡ ኢጸልእ፡ አባሁ፡ ወእሞ፡ ወብእሲቶ፡ ወቤቶ። ወውሉዶ፡ ወአኀዊሁ፡ ወአኀቲሁ፡ ወዓዲ፡ ነፍሶሂ። ኢይክል፡ ከዊነ፡ ረድእየ።
27 ወዘኢይጸውር፡ መስቀሎ፡ ወኢይመጽእ፡ ይትልወኒ። ኢይክል፡ ከዊነ፡ ረድእየ።
በእንተ፡ ምሳሌ፡ ዘሐነጸ፡ ማኅፈደ
28 ወእመ፡ ቦ፡ አሐዱ፡ እምኔክሙ፡ ዘይፈቅድ፡ ይሕንጽ፡ ማኅፈደ። አኮኑ፡ ይቀድም፡ ይንበር፡ ወየሐስብ፡ ፃእፃአ። እመ፡ ቦ፡ ዘየአክሎ፡ ከመ፡ ይሣርር፡ መሠረቶ።
29 ከመ፡ ሣሪሮ፡ መሠረተ፡ ለእመ፡ ስእነ፡ ፈጽሞ። ኵሎሙ፡ እለ፡ ርእይዎ፡ ይእኅዙ፡ ይሣለቁ፡ ላዕሌሁ። እንዘ፡ ይብሉ፡ ዝንቱ፡ ብእሲ፡ አኀዘ፡ ይሕንጽ፡ ወስእነ፡ ፈጽሞ።
30 ወእመኒ፡ ፈቀደ፡ ንጉሥ፡ ይሑር፡ ይጽብኦ፡ ለካልእ፡ ንጉሥ። አኮኑ፡ ያቀድም፡ ወይነብር፡ ወይመክር፡ ለእመ፡ ይክል። በእልፍ፡ ጸቢኦቶ፡ ለዘይመጽእ፡ ኀቤሁ፡ ምስለ፡ ክልኤ፡ እልፍ።
31 ወእመ፡ አኮሰ፡ እንዘ፡ ርሑቅ፡ ውእቱ። ይፌኑ፡ ሐዋርያተ፡ ትንብልና፡ ኀቤሁ፡ ወይዜንውዎ፡ ሰላመ።
32 ወከመ፡ ዝ፡ እንከ፡ ኵሉ፡ ዘእምኔክሙ፡ ዘኢወፅአ፡ እምኵሉ። ወዘኢይትናከር፡ ኵሎ፡ ዘዚኣሁ፡ ንዋየ፡ ኢይክል፡ ከዊነ፡ ረድእየ።
33 ሠናይ፡ ውእቱ፡ ጼው። ወእመሰ፡ ጼው፡ ለስሐ፡ በምንት፡ እንከ፡ ይቄስምዎ።
34 አኮኑ፡ ይገድፍዎ፡ አፍኣ፡ ውስተ፡ መሬት።
35 ዘቦ፡ እዘን፡ ሰሚዐ፡ ለይስማዕ።
=== chapter 15 ===
[ምዕራፍ 15]
1 ወቀርቡ፡ ኀቤሁ፡ መጸብሓን፡ ወኃጥኣን፡ ይስምዕዎ።
2 ወአንጐርጐሩ፡ ጸሐፍት፡ ወፈሪሳውያን፡ እንዘ፡ ይብሉ። ዝንቱሰ፡ ኃጥኣነ፡ ይትዌከፍ፡ ወይበልዕ፡ ምስሌሆሙ።
በእንተ፡ ምሳሌ፡ ዘምእት፡ አባግዕ
3 ወመሰለ፡ ሎሙ፡ ከመ፡ ዝ፡ ወይቤሎሙ።
4 እመ፡ ቦ፡ ብእሲ፡ እምኔክሙ፡ ዘቦ፡ ምእት፡ አባግዕ። ወለእመ፡ ተገድፈቶ፡ አሐቲ፡ እምኔሆን። አኮኑ፡ የኀድግ፡ ተስዓ፡ ወተስዐተ፡ ውስተ፡ ገዳም። ወየሐውር፡ ኀበ፡ እንተ፡ ተገድፈቶ፡ እስከ፡ ይረክባ።
5 ወእምከመ፡ ረከባ፡ ይጸውራ፡ ዲበ፡ መትከፍቱ፡ እንዘ፡ ይትፌሣሕ።
6 ወአቲዎ፡ ቤቶ፡ ይጼውዕ፡ አዕርክቲሁ፡ ወጎሮ፡ ወይቤሎሙ። ተፈሥሑ፡ ሊተ፡ እስመ፡ ረከብኩ፡ በግዕትየ፡ እንተ፡ ተገድፈተኒ።
7 እብለክሙ፡ ከመ፡ ከመ፡ ዝ፡ ይከውን፡ ትፍሥሕት፡ በሰማያት። በበይነ፡ አሐዱ፡ ኃጥእ፡ ዘይኔስሕ። ፈድፋደ፡ እምነ፡ ተስዓ፡ ወተስዐቱ፡ ጻድቃን፡ እለ፡ ኢይፈቅዱ፡ ይነስሑ።
በእንተ፡ ተረክቦተ፡ ገመስ
8 ወእመኒ፡ ብእሲት፡ ዘባቲ፡ ዐሥሩ፡ ጠፋልሐ፡ አግሙስ። ወለእመ፡ ተገድፈታ፡ አሐቲ፡ እምኔሆን። አኮኑ፡ ታኀቱ፡ ማኅቶተ፡ ወትፈነቅል፡ ኵሎ፡ ዘውስተ፡ ቤታ። ወተኀሥሥ፡ አስተሐሚማ፡ እስከ፡ ትረክባ።
9 ወእምከመ፡ ረከበታ፡ ትጼውዕ፡ አዕርክቲሃ፡ ወጎራ፡ ወትብሎን። ተፈሥሓ፡ ሊተ፡ እስመ፡ ረከብኩ፡ ገመስየ፡ እንተ፡ ተገድፈተኒ።
10 እብለክሙ፡ ከመ፡ ከማሁ፡ ይከውን፡ ፍሥሓ፡ በሰማያት። በቅድመ፡ መላእክተ፡ እግዚአብሔር፡ በእንተ፡ አሐዱ፡ ኃጥእ፡ ዘይኔስሕ።
በእንተ፡ ተኀጕሎቱ፡ ወተመይጦቱ፡ ለወልድ
11 ወካዕበ፡ ይቤሎሙ፡ አሐዱ፡ ብእሲ፡ ቦቱ፡ ክልኤተ፡ ደቂቅ።
12 ወይቤሎ፡ ዘይንእስ፡ ለአቡሁ። አባ፡ ሀበኒ፡ መክፈልተ፡ ርስትየ፡ ዘይረክበኒ፡ እምንዋይከ። ወከፈሎ፡ ንዋዮ።
13 ወእምድኅረ፡ ኅዳጥ፡ መዋዕል፡ አስተጋብአ፡ ኵሎ፡ ንዋዮ፡ ዝኩ፡ ወልዱ፡ ዘይንእስ። ወሖረ፡ ወነገደ፡ ርሑቀ፡ ብሔረ፡ ወበህየ፡ ዘረወ፡ ወአማሰነ፡ ኵሎ፡ ንዋዮ። እንዘ፡ የሐዩ፡ በምርዓት።
14 ወአኅሊቆ፡ ኵሎ፡ ንዋዮ፡ መጽአ፡ ረኀብ፡ ዐቢይ፡ ውስተ፡ ውእቱ፡ ብሔር። ወተጸነሰ።
15 ወሖረ፡ ወተፀምደ፡ ኀበ፡ አሐዱ፡ እምሰብአ፡ ውእቱ፡ ብሔር። ወፈነዎ፡ ውስተ፡ አዕጻደ፡ ወፍሩ፡ ይርአይ፡ አሕርወ።
16 ወፈተወ፡ ይጽገብ፡ እምሐማረ፡ ጽራእ። ዘይሴሰዩ፡ አሕርው፡ ወአልቦ፡ ዘይሁቦ።
17 ወኀለየ፡ በልቡ፡ ወይቤ። ሚ፡ መጠን፡ አግብርቲሁ፡ ወገባእቱ፡ ለአቡየ፡ እለ፡ ያተርፍዎ፡ ለእክል። ወአንሰ፡ እመውት፡ በረኀብ፡ በዝየ።
18 እትነሣእ፡ ወአሐውር፡ ኀበ፡ አቡየ፡ ወእብሎ። አባ፡ አበስኩ፡ በሰማይኒ፡ ወበቅድሜከኒ።
19 ወኢይደልወኒ፡ እንከ፡ እሰመይ፡ ወልደከ። አላ፡ ረስየኒ፡ ከመ፡ አሐዱ፡ እምአግብርቲከ።
20 ወተንሥአ፡ ወሖረ፡ ኀበ፡ አቡሁ። ወርእዮ፡ አቡሁ፡ እምርሑቅ፡ ምሕሮ። ወሮጸ፡ ወሐቀፎ፡ ክሳዶ፡ ወሰዐሞ።
21 ወይቤሎ፡ ወልዱ፡ አባ፡ አበስኩ፡ በሰማይኒ፡ ወበቅድሜከኒ። ወኢይደልወኒ፡ እንከ፡ እሰመይ፡ ወልደከ። አላ፡ ረስየኒ፡ ከመ፡ አሐዱ፡ እምአግብርቲከ።
22 ወይቤሎሙ፡ አቡሁ፡ ለአግብርቲሁ። አምጽኡ፡ ፍጡነ፡ አልባሰ፡ ቀደዋተ፡ ወአልብስዎ። ወደዩ፡ ኅልቀተ፡ ውስተ፡ አጻብዒሁ፡ ወአሣእነ፡ ውስተ፡ እገሪሁ።
23 ወአምጽኡ፡ ላሕመ፡ መግዝአ፡ ወጥብሑ፡ ንብላዕ፡ ወንትፈሣሕ።
24 እስመ፡ ዝንቱ፡ ወልድየ፡ ሞተሂ፡ ወሐይወ፡ ተሀጕለሂ፡ ወተረክበ። ወአኀዙ፡ ይትፈሥሑ።
25 ወወልዱሰ፡ ዘይልህቅ፡ ሀለወ፡ ውስተ፡ ሐቅል። ወሶበ፡ በጽሐ፡ ኀበ፡ ጽንፈ፡ ሀገር፡ ሰምዐ፡ እንዚራ፡ ወማሕሌተ።
26 ወጸውዐ፡ አሐደ፡ እምአግብርተ፡ አቡሁ፡ ወይቤሎ። ምንትኑ፡ ዝንቱ፡ ዘእሰምዕ።
27 ወይቤሎ፡ እስመ፡ አተወ፡ እኁከ፡ ወጠብሐ፡ አቡከ፡ ላሕመ፡ መግዝአ። እስመ፡ ረከቦ፡ ሕያዎ።
28 ወተምዕዐ፡ ወአበየ፡ በዊአ፡ ወወፅአ፡ አቡሁ፡ ወአስተብቊዖ።
29 ወአውሥአ፡ ወይቤሎ፡ ለአቡሁ፡ ናሁ፡ መጠነ፡ ዝ፡ ዓመተ፡ ተቀነይኩ፡ ለከ። ወግሙራ፡ ኢኀለፍኩ፡ እምትእዛዝከ። ወሊተሰ፡ ኢወሀብከኒ፡ ማሕስአ፡ ጠሊ፡ ጥቀ። በዘእትፌሣሕ፡ ቦቱ፡ ምስለ፡ አዕርክትየ፡ ወቢጽየ።
30 ወአቲዎሰ፡ ዝንቱ፡ ወልድከ፡ ዘአኅለቀ፡ ወዘበልዐ፡ ኵሎ፡ ንዋየከ፡ ምስለ፡ ዘማት። ጠባሕከ፡ ሎቱ፡ ላሕመ፡ መግዝአ።
31 ወይቤሎ፡ አቡሁ፡ ወልድየ፡ አንተሰ፡ ጓ፡ ዘልፈ፡ ሀለውከ፡ ምስሌየ። ወኵሉ፡ ዘዚኣየ፡ ዚኣከ፡ ውእቱ።
32 ወባሕቱ፡ ርቱዕሰ፡ ንትፈሣሕ። እስመ፡ ዝንቱ፡ እኁከ፡ ሞተሂ፡ ወሐይወ፡ ተሀጕለሂ፡ ወተረክበ።
=== chapter 16 ===
[ምዕራፍ 16]
በእንተ፡ መጋቤ፡ ዐመፃ
1 ወይቤሎሙ፡ እግዚእ፡ ኢየሱስ፡ ለአርዳኢሁ። አሐዱ፡ ብእሲ፡ ባዕል፡ ቦቱ፡ መጋቢ። ወአስተዋደይዎ፡ ኀቤሁ፡ ከመ፡ ዘይዘሩ፡ ሎቱ፡ ኵሎ፡ ንዋዮ።
2 ወጸውዖ፡ እግዚኡ፡ ወይቤሎ፡ ምንትኑ፡ ዝ፡ ዘእሰምዕ፡ በእንቲኣከ። እንከሰ፡ አግብእ፡ ሐሳበ፡ ምግብናከ። እስመ፡ ኢትከውነኒ፡ እንከ፡ መጋቤ፡ ሊተ።
3 ወኀለየ፡ ውእቱ፡ መጋቢ፡ ወይቤ። ምንተ፡ እሬሲ፡ ናሁ፡ ይስዕረኒ፡ እግዚእየ፡ እምግብናየ። ሐሪሰሂ፡ ኢይክል፡ ወስኢለሃ፡ አኀፍር።
4 ኣአምር፡ እንከሰ፡ ዘእገብር፡ እምከመ፡ ሰዐረኒ፡ እግዚእየ፡ እምግብናየ። ከመ፡ ይትወከፉኒ፡ ውስተ፡ አብያቲሆሙ።
5 ወጸውዖሙ፡ ለእለ፡ ይፈድይዎ፡ ዕዳ፡ ለእግዚኡ፡ ወይቤሎ፡ ለቀዳማዊ። ሚ፡ መጠን፡ ዕዳ፡ ዘትፈድዮ፡ ለእግዚእየ። ወይቤሎ፡ ምእተ፡ በመስፈርተ፡ ባዶስ፡ ቅብዐ።
6 ወይቤሎ፡ ናሁኬ፡ መጽሐፍከ፡ ንበር። ወጸሐፍ፡ ፍጡነ፡ ኀምሳ፡ ላዕሌከ።
7 ወይቤሎ፡ ለካልኡሂ፡ አንተሰ፡ ሚ፡ መጠነ፡ ትፈድዮ፡ ለእግዚእየ። ወይቤሎ፡ ምእት፡ በመስፈርተ፡ ቆሮስ፡ ሥርናየ። ወይቤሎ፡ ናሁኬ፡ መጽሐፍከ፡ ንበር። ወጸሐፍ፡ ፍጡነ፡ ሰማንያ፡ ላዕሌከ።
8 ወንእዶ፡ እግዚአብሔር፡ ለመጋቤ፡ ዐመፃ፡ እስመ፡ ከመ፡ ጠቢብ፡ ገብረ። እስመ፡ ውሉደ፡ ዝ፡ ዓለም፡ ይጠበቡ፡ እምውሉደ፡ ብርሃን፡ በዓለሞሙ።
9 ወአነሂ፡ እብለክሙ፡ ግበሩ፡ ለክሙ፡ አዕርክተ፡ እምንዋየ፡ ዐመፃ። ከመ፡ አመ፡ የኀልቅ፡ ንዋይክሙ። ይትወከፉክሙ፡ እሙንቱሂ፡ ውስተ፡ አብያቲሆሙ፡ ዘለዓለም።
10 ወዘሰ፡ በውኁድ፡ ምእመን፡ በብዙኅኒ፡ ምእመን፡ ውእቱ። ወዘሰ፡ በኅዳጥ፡ ዐማፂ፡ በብዙኅኒ፡ ዐማፂ፡ ውእቱ።
11 ወሶበ፡ በንዋየ፡ ዐመፃ፡ ሃይማኖት፡ አልብክሙ። በንዋየ፡ ጽድቅ፡ መኑ፡ የአምነክሙ።
12 ወሶበ፡ በንዋየ፡ ባዕድ፡ ሃይማኖት፡ አልብክሙ። ዘዚኣሁ፡ መኑ፡ እንከ፡ ይሁበክሙ።
13 አልቦ፡ ገብር፡ ዘይክል፡ ተቀንዮ፡ ለክልኤቱ፡ አጋእዝት። ወእመ፡ አኮ፡ አሐደ፡ ያፈቅር፡ ወካልኦ፡ ይጸልእ። ወእመ፡ አኮ፡ ለአሐዱ፡ ይትኤዘዝ፡ ወለካልኡ፡ የአቢ። ኢትክሉኬ፡ ለእግዚአብሔር፡ ተቀንዮ፡ እንዘ፡ ንዋየ፡ ታፈቅሩ።
14 ወሰሚዖሙ፡ ዘንተ፡ ኵሎሙ፡ ፈሪሳውያን፡ ተቃጸብዎ። እስመ፡ መፍቀርያነ፡ ንዋይ፡ እሙንቱ።
15 ወይቤሎሙ፡ አንትሙሰ፡ ትጼደቁ፡ ለዐይነ፡ ሰብእ። ወእግዚአብሔር፡ የአምር፡ ልበክሙ። እስመ፡ በኀበ፡ ሰብእ፡ ዐቢይ፡ በኀበ፡ እግዚአብሔር፡ ትሑት፡ ወምኑን፡ ውእቱ።
16 ኦሪትኒ፡ ወነቢያትኒ፡ እስከ፡ ዮሐንስ፡ እምትካት። ሰበኩ፡ በእንተ፡ መንግሥተ፡ እግዚአብሔር። ወኵሉ፡ ይትገፋዕ፡ በእንቲኣሃ።
17 ወባሕቱ፡ ይቀልል፡ ሰማይ፡ ወምድር፡ ይኅልፍ። እምትደቅ፡ አሐቲ፡ ቃል፡ እምኦሪት፡ ወእምነቢያት።
18 ወኵሉ፡ ዘይድሕር፡ ብእሲቶ፡ ወያወስብ፡ ካልእተ፡ ዘመወ። ወዘኒ፡ ያወስብ፡ ኅድግተ፡ ዘማዊ፡ ውእቱ። ወእንተኒ፡ ደሐራ፡ ምታ፡ ለእመ፡ ቀርበት፡ ካልአ፡ ዘመወት።
በእንተ፡ ባዕል፡ ወአልአዛር
19 ወሀሎ፡ አሐዱ፡ ብእሲ፡ ባዕል፡ ወይለብስ፡ ሜላተ። ወልብሰ፡ ቢሶስ፡ ወቀጠንተ፡ አልባስ። ወይትፌሣሕ፡ ወይፌጋዕ፡ ኵሎ፡ አሚረ።
20 ወሀሎ፡ አሐዱ፡ ነዳይ፡ ዘስሙ፡ አልአዛር። ግዱፍ፡ ውስተ፡ ዴዴሁ፡ ለባዕል፡ እንዘ፡ ይደዊ፡ በሕማመ፡ ቊስል።
21 ወይፈቱ፡ ይጽገብ፡ እምፍርፋራት፡ ዘይወድቅ፡ እማእዱ፡ ለባዕል። ወከለባትሂ፡ ይመጽኡ፡ ወይልሕሱ፡ ቊሰሊሁ።
22 ወእምዝ፡ ሞተ፡ ዝኩ፡ ነዳይ፡ ወወሰድዎ፡ መላእክት፡ ውስተ፡ ሕፅነ፡ አብርሃም። ወሞተ፡ ባዕልኒ፡ ወተቀብረ።
23 ወበሲኦል፡ አንሥአ፡ አዕይንቲሁ፡ እንዘ፡ ሀሎ፡ ውስተ፡ ደይን። ወርእዮ፡ ለአብርሃም፡ እምርሑቅ፡ ወአልአዛርሃ፡ ውስተ፡ ሕፅኑ።
24 ወጸውዐ፡ ወይቤ፡ አባ፡ አብርሃም፡ ተሣሀለኒ። ወፈንዎ፡ ለአልአዛር፡ ከመ፡ ይጥማዕ፡ ጽንፈ፡ አጽባዕቱ፡ ማየ፡ ወያቊርረኒ፡ ልሳንየ። እስመ፡ ሐመምኩ፡ ፈድፋደ፡ በዛቲ፡ እሳት።
25 ወይቤሎ፡ አብርሃም፡ ተዘከር፡ ወልድየ፡ ዘከመ፡ ፈጋዕከ፡ ወተፈሣሕከ፡ በሕይወትከ። ወአልአዛርሰ፡ ከማሁ፡ ክመ፡ በተጽናስ። ወይእዜሰ፡ ከማሁ፡ ክመ፡ ውእቱ፡ ይትፌሣሕ፡ በዝየ፡ ወአንተሰ፡ ተሐምም።
26 ወምስለ፡ ዝንቱ፡ ኵሉ፡ ጸድፍ፡ ዐቢይ፡ ይከልአነ፡ ማእከሌነ፡ ወማእከሌክሙ። ከመ፡ እለሂ፡ ይፈቅዱ፡ እምለፌ፡ ይኅልፉ፡ ኢይክሀሉ፡ መጺአ፡ ኀቤክሙ። ወእለሂ፡ እመንገሌክሙ፡ ኢይዕድዉ፡ ኀቤነ።
27 ወይቤሎ፡ እስእለከ፡ አባ፡ አብርሃም፡ ትፈንዎ፡ ለአልአዛር፡ ቤተ፡ አቡየ።
28 እስመ፡ ሀለዉ፡ ኀምስቱ፡ አኀውየ፡ ይንግሮሙ። ወይስምዑ፡ ወኢይምጽኡ፡ እሙንቱሂ፡ ውስተ፡ ዛቲ፡ ብሔረ፡ ሕማም።
29 ወይቤሎ፡ አብርሃም፡ ቦሙ፡ ሙሴ፡ ወነቢያት፡ ኪያሆሙ፡ ለይስምዑ።
30 ወይቤሎ፡ አልቦ፡ አባ፡ አብርሃም፡ አሐዱ፡ እምነ፡ ምዉታን። ለእመ፡ ኢሖረ፡ ኀቤሆሙ፡ ወለእመ፡ ኢነገሮሙ፡ ኢየአምኑ፡ ወኢይኔስሑ።
31 ወይቤሎ፡ አብርሃም፡ ለእመሰኬ፡ ሙሴሃ፡ ወነቢያተ፡ ኢይሰምዑ። እመሂ፡ ቦ፡ ዘተንሥአ፡ እምዉታን፡ ኢይሰምዕዎ፡ ወኢየአምንዎ።
=== chapter 17 ===
[ምዕራፍ 17]
ዘከመ፡ ተናገረ፡ ኢየሱስ፡ ላዕለ፡ ዕቅፍት
1 ወይቤሎሙ፡ እግዚእ፡ ኢየሱስ፡ ለአርዳኢሁ። ግብር፡ ይመጽእ፡ መንሱት፡ ወባሕቱ፡ አሌ፡ ሎቱ። ባሕቱ፡ ለዘያመጽኣ፡ ለመንሱት፡ እምኀቤሁ።
2 እምኀየሶ፡ ይእስሩ፡ በክሣዱ፡ አድግ፡ ወያስጥምዎ፡ ውስተ፡ ቀላየ፡ ባሕር። እምያስሕቶ፡ ለአሐዱ፡ እምእሉ፡ ንኡሳን።
3 ዑቁ፡ ርእሰክሙ፡ ለእመ፡ አበሰ፡ ለከ፡ እኁከ፡ ገሥጾ፡ በባሕቲትከ። ወለእመሰ፡ ነስሐ፡ ኅድግ፡ ሎቱ።
4 ወእመኒ፡ ስብአ፡ ለለ፡ ዕለቱ፡ አበሰ፡ ወሰብአ፡ ለለ፡ ዕለቱ፡ ተጋነየ፡ ኅድግ፡ ሎቱ።
በእንተ፡ ኀይል፡ ዘሃይማኖት፡ ወዘከመ፡ ይደሉ፡ ፈጽሞቱ፡ ለግብር
5 ወይቤልዎ፡ ሐዋርያት፡ ለእግዚእነ፡ ወስከነ፡ ሃይማኖተ።
6 ወይቤሎሙ፡ እግዚእ፡ ኢየሱስ። እመ፡ ብክሙ፡ ሃይማኖት፡ መጠነ፡ ኅጠተ፡ ስናፔ፡ ወትብልዋ፡ ለዛቲ፡ ሰግላ። ተመልኂ፡ እምሥርውኪ፡ ወተተከሊ፡ ውስተ፡ ባሕር፡ ትትኤዘዝ፡ ለክሙ።
7 ወመኑ፡ እምኔክሙ፡ ዘቦ፡ ገብር፡ ሐረሳዊ። ወእመኒ፡ ኖላዊ፡ አቲዎ፡ እምወፍሩ፡ ይብሎኑ። ዕርግ፡ ወነዐ፡ ርፍቅ፡ ምስሌየ።
8 አኮኑ፡ ይብሎ፡ አስተዳሉ፡ ሊተ፡ ዘእዴረር። ወቅንት፡ ወመጥወኒ፡ እስከ፡ እበልዕ፡ ወእሰቲ። ወእምዝ፡ ብላዕ፡ ወስተይ፡ አንተሂ።
9 ቦኑ፡ እንጋ፡ ምዝጋና፡ ለውእቱ፡ ገብር፡ ለእመ፡ ገብረ፡ ዘአዘዞ፡ እግዚኡ።
10 ከማሁኬ፡ አንትሙኒ፡ ገቢረክሙ፡ ኵሎ፡ ዘአዘዝኩክሙ። በሉ፡ አግብርት፡ ፅሩዓን፡ ንሕነ፡ ወዘይደልወነ፡ ለገቢር፡ ገበርነ።
በእንተ፡ ዐሠርቱ፡ እለ፡ ለምጽ
11 ወእምዝ፡ እንዘ፡ የሐውር፡ ኢየሩሳሌም። ኀለፈ፡ ማእከለ፡ ሰማርያ፡ ወገሊላ።
12 ወእንዘ፡ ይበውእ፡ አሐተ፡ ሀገረ። ተቀበልዎ፡ ዐሠርቱ፡ ዕደው፡ እለ፡ ለምጽ፡ ወቆሙ፡ እምርሑቅ።
13 ወዐውየዉ፡ ወይቤሉ፡ ኢየሱስ፡ ሊቅ፡ ተሣሀለነ።
14 ወርእዮሙ፡ ወይቤሎሙ፡ ሑሩ፡ ኀበ፡ ካህን፡ ወአፍትኑ፡ ርእሰክሙ። ወእንዘ፡ የሐውሩ፡ ነጽሑ።
15 ወርእዮ፡ አሐዱ፡ እምኔሆሙ፡ ከመ፡ ነጽሐ። ተመይጠ፡ እንዘ፡ የአኵቶ፡ ለእግዚአብሔር፡ በዐቢይ፡ ቃል።
16 ወሰገደ፡ ታሕተ፡ እገሪሁ፡ ለእግዚእ፡ ኢየሱስ፡ በገጹ፡ ወአእኰቶ። ወሳምራዊ፡ ውእቱ፡ ብእሲሁ።
17 ወአውሥአ፡ እግዚእ፡ ኢየሱስ፡ ወይቤሎ። አኮኑ፡ ዐሠርቱ፡ እሙንቱ፡ አንትሙ፡ እለ፡ ነጻሕክሙ። አይቴኑ፡ እንከ፡ ተስዐቱ።
18 ሎሙሰ፡ ተስእኖሙኑ፡ ተመይጦ፡ ወአእኵቶቶ፡ ለእግዚአብሔር። ዘእንበለ፡ ዝንቱ፡ ዘካልእ፡ ሕዝቡ።
19 ወይቤሎ፡ ተንሥእ፡ ወሑር፡ ሃይማኖትከ፡ አሕየወተከ።
በእንተ፡ መንግሥተ፡ እግዚአብሔር
20 ወተስእልዎ፡ ፈሪሳውያን፡ ወይቤልዎ። ማእዜ፡ ትመጽእ፡ መንግሥተ፡ እግዚአብሔር። ወአውሥአ፡ ወይቤሎሙ፡ ኢትመጽእ፡ መንግሥተ፡ እግዚአብሔር፡ በተዐቅቦ።
21 ወኢይብልዋ፡ ነያ፡ ዝየ፡ ወነያ፡ ከሃክ። መንግሥተ፡ እግዚአብሔርሰ፡ ነያ፡ ማእከሌክሙ፡ ይእቲ።
22 ወይቤሎሙ፡ ለአርዳኢሁ፡ ይመጽእ፡ መዋዕል፡ አመ፡ ትፈትዉ፡ ትርአዩ። አሐተ፡ እምነ፡ መዋዕሊሁ፡ ለወልደ፡ ዕጓለ፡ እመሕያው፡ ወኢትሬእዩ።
23 ወለእመ፡ ይብሉክሙ፡ ነዋ፡ ዝየ፡ ወነዋ፡ ከሃክ። ኢትፃኡ፡ ወኢትዴግኑ።
24 እስመ፡ ከመ፡ መብረቅ፡ ዘይበርቅ። ወያበርህ፡ እምአጽናፈ፡ ሰማይ፡ እስከ፡ አጽናፈ፡ ሰማይ። ከማሁ፡ ውእቱ፡ ምጽአቱ፡ ለወልደ፡ ዕጓለ፡ እመሕያው።
25 ወባሕቱ፡ እምቅድመ፡ ዝንቱ፡ ኵሉ። ብዙኀ፡ የሐምም፡ ወትሜንኖ፡ ወታሜክሮ፡ ዛቲ፡ ትውልድ።
26 ወበከመ፡ ኮነ፡ በመዋዕሊሁ፡ ለኖኅ። ከማሁ፡ ይከውን፡ በምጽአቱ፡ ለወልደ፡ ዕጓለ፡ እመሕያው።
27 ወበከመ፡ ኮነ፡ እንዘ፡ ይበልዑ፡ ወይሰትዩ፡ ወያወስቡ፡ ወይትዋሰቡ። እስከ፡ አመ፡ ቦአ፡ ኖኅ፡ ውስተ፡ ንፍቀ፡ ታቦት። ወመጽአ፡ ማየ፡ አይኅ፡ ወአጥፍአ፡ ኵሎ፡ ኅቡረ።
28 ወበከመ፡ ኮነ፡ በመዋዕሊሁ፡ ለሎጥ። እንዘ፡ ይበልዑ፡ ወይሰትዩ፡ ወየሐንጹ፡ ወይተክሉ፡ ወይሠይጡ፡ ወይሣየጡ።
29 እስከ፡ አመ፡ ዕለተ፡ ወፅአ፡ ሎጥ፡ እምሰዶም። ወአዝነመ፡ እግዚአብሔር፡ እሳት፡ ወተይ፡ እምሰማይ፡ ወአጥፍአ፡ ኵሎ።
30 ከማሁ፡ ውእቱ፡ ምጽአቱ፡ ለወልደ፡ ዕጓለ፡ እመሕያው፡ ኢይትዐወቅ።
31 ይእተ፡ አሚረ፡ ዘሀሎ፡ ውስተ፡ ናሕስ፡ ወንዋዩ፡ ውስተ፡ ቤት። ኢይረድ፡ ይንሣእ፡ ወዘሂ፡ ገዳመ፡ ሀሎ፡ ኢይግባእ፡ ድኅሬሁ።
32 ተዘከርዋ፡ ለብእሲተ፡ ሎጥ።
33 እስመ፡ ዘይፈቅድ፡ ያድኅና፡ ለነፍሱ፡ ይገድፋ። ወዘሰ፡ ገደፋ፡ ለነፍሱ፡ በእንቲኣየ፡ ያሐይዋ።
34 እብለክሙ፡ በይእቲ፡ ሌሊት፡ ክልኤቱ፡ ይሰክቡ፡ ውስተ፡ አሐዱ፡ ዐራት። አሐደ፡ ይነሥኡ፡ ወካልኦ፡ የኀድጉ።
35 ወክልኤቲ፡ የሐርጻ፡ ውስተ፡ አሐቲ፡ ማሕረጽ። አሐተ፡ ይነሥኡ፡ ወካልእታ፡ የኀድጉ።
36 ወክልኤቱ፡ ይኄልዉ፡ ውስተ፡ አሐዱ፡ ገራህት። አሐደ፡ ይነሥኡ፡ ወካልኦ፡ የኀድጉ።
37 ወአውሥኡ፡ ወይቤልዎ፡ በአይቴኑ፡ እግዚኦ። ወይቤሎሙ፡ ኀበ፡ ሀሎ፡ ገደላ፡ ህየ፡ ይትጋብኡ፡ አንስርት።
=== chapter 18 ===
[ምዕራፍ 18]
በእንተ፡ መኰንን፡ ዐመፃ
1 ወይቤሎሙ፡ በምሳሌ፡ ከመ፡ ዘልፈ፡ ይጸልዩ፡ ወኢይትሀከዩ።
2 ወይቤሎሙ፡ ሀሎ፡ በአሐቲ፡ ሀገር፡ አሐዱ፡ መኰንን። ዘኢይፈርህ፡ እግዚአብሔርሃ፡ ወኢየኀፍር፡ ሰብአ።
3 ወሀለወት፡ አሐቲ፡ ዕቤርት፡ በይእቲ፡ ሀገር። ወኮነት፡ ትመጽእ፡ ኀቤሁ፡ ወትብሎ፡ ኰንነኒ፡ እምዕድውየ፡ ወአበያ፡ ወአጐንደያ።
4 ወእምዝ፡ ኀለየ፡ በልቡ፡ ወይቤ። እመ፡ ኢይፈርሆ፡ ለእግዚአብሔር፡ ወኢየኀፍር፡ ሰብአ።
5 ከመ፡ ኢታንጥየኒ፡ ዛቲ፡ ዕቤር፡ እትቤቀል፡ ላቲ። ከመ፡ ኢትምጻእ፡ ወኢታስርሐኒ፡ ዘልፈ።
6 ወይቤሎሙ፡ እግዚእነ፡ ስምዑ፡ ዘይቤ፡ መኰንነ፡ ዐመፃ።
7 ኢይፈትሕኑ፡ እንከ፡ እግዚአብሔር፡ ለኅሩያኒሁ። እለ፡ ይግዕሩ፡ ኀቤሁ፡ መዓልተ፡ ወሌሊተ፡ ወይትዔገሦሙኑ።
8 እወ፡ እብለክሙ፡ ከመ፡ ይፈትሕ፡ ሎሙ፡ ፍጡነ። ወባሕቱ፡ ወልደ፡ ዕጓለ፡ እመሕያው፡ መጺኦ። ይረክብኑ፡ እንጋ፡ ሃይማኖተ፡ በዲበ፡ ምድር።
በእንተ፡ ፈሪሳዊ፡ ወመጸብሓዊ
9 ወይቤሎሙ፡ ለእለ፡ ያጸድቁ፡ ርእሶሙ፡ ወይሜንኑ፡ ቢጾሙ። ወመሰለ፡ ሎሙ፡ ከመ፡ ዝ።
10 ክልኤቱ፡ ዕደው፡ ዐርጉ፡ ቤተ፡ መቅደስ፡ ይጸልዩ። ወአሐዱ፡ ፈሪሳዊ፡ ወካልኡ፡ መጸብሓዊ።
11 ወቆመ፡ ፈሪሳዊ፡ ወጸለየ፡ ወይቤ፡ አአኵተከ፡ እግዚኦ። ዘኢረሰይከኒ፡ ከመ፡ ባዕዳን፡ ሰብእ፡ ኀያድያን፡ ወዐማፅያን። ወእለ፡ የሐውሩ፡ ብእሲተ፡ ብእሲ፡ ወኢ፡ ከመ፡ ዝንቱ፡ መጸብሓዊ።
12 አንሰ፡ እጸውም፡ ካዕበ፡ ክልኤተ፡ ዕለተ፡ በሰናብት። ወኣበውእ፡ ዐሥራተ፡ እዴሁ፡ ለኵሉ፡ ዘአጥረይኩ።
13 ወመጸብሓዊሰ፡ ቆመ፡ እምርሑቅ። ወኢፈቀደ፡ ያንሥእ፡ አዕይንቲሁ፡ ላዕለ፡ ውስተ፡ ሰማይ። ወጐድዐ፡ እንግድዓሁ፡ ወይቤ፡ ሥረይ፡ ሊተ፡ እግዚኦ፡ እስመ፡ አነ፡ ኃጥእ።
14 ዘኢይደልወኒ፡ እቁም፡ ውስተ፡ መካነ፡ መቅደስከ፡ ወእብለክሙ። አተወ፡ ቤቶ፡ ዝንቱ፡ እንዘ፡ ይጸድቅ፡ እምዝክቱ። እስመ፡ ኵሉ፡ ዘአዕበየ፡ ርእሶ፡ የኀስር፡ ወዘአትሐተ፡ ርእሶ፡ ይከብር።
በእንተ፡ እግዚእ፡ ኢየሱስ፡ ወሕፃናት
15 ወአምጽኡ፡ ኀቤሁ፡ ሕፃናተ፡ ይግስሶሙ፡ ወያንብር፡ እዴሁ፡ ላዕሌሆሙ። ወርእዮሙ፡ አርዳኢሁ፡ ገሠጽዎሙ።
16 ወጸውዖሙ፡ እግዚእ፡ ኢየሱስ፡ ወይቤሎሙ። ኅድጉ፡ ሕፃናተ፡ ይምጽኡ፡ ኀቤየ፡ ወኢትክልእዎሙ። እስመ፡ ለዘከመ፡ መጠነ፡ እሉ፡ ይእቲ፡ መንግሥተ፡ እግዚአብሔር።
17 አማን፡ እብለክሙ፡ ዘኢተቀበላ፡ ለመንግሥተ፡ እግዚአብሔር፡ ከመ፡ ሕፃናት፡ ኢይበውኣ።
በእንተ፡ ባዕል፡ ዘተስእሎ
18 ወተስእሎ፡ አሐዱ፡ መልአክ፡ ወይቤሎ፡ ሊቅ፡ ኄር። ምንተ፡ ሠናየ፡ ገቢርየ፡ እረክብ፡ ሕይወተ፡ ዘለዓለም።
19 ወይቤሎ፡ እግዚእ፡ ኢየሱስ፡ ለምንት፡ ትብለኒ፡ ኄር። አልቦ፡ ኄር፡ ዘእንበለ፡ አሐዱ፡ እግዚአብሔር።
20 ተአምር፡ ትእዛዛቲሁ፡ ኢትቅትል፡ ነፍሰ፡ ወኢትሑር፡ ብእሲተ፡ ብእሲ። ወኢትዘሙ፡ ወኢትስርቅ፡ ወኢትኩን፡ ስምዐ፡ በሐሰት። ወአክብር፡ አባከ፡ ወእመከ።
21 ወይቤሎ፡ ዘንተሰ፡ ኵሎ፡ ዐቀብኩ፡ እምንእስየ፡ እስከ፡ ይእዜ።
22 ወሰሚዖ፡ ዘንተ፡ እግዚእ፡ ኢየሱስ፡ ይቤሎ። አሐቲ፡ ተርፈተከ፡ ሑር፡ ወሢጥ፡ ኵሎ፡ ዘብከ፡ ንዋየ። ወሀብ፡ ለነዳያን፡ ወትረክብ፡ መዝገበ፡ ዘበሰማያት፡ ወነዐ፡ ትልወኒ።
23 ወሰሚዖ፡ ዘንተ፡ ተከዘ፡ ፈድፋደ። እስመ፡ ባዕል፡ ውእቱ፡ ጥቀ፡ ወብዙኅ፡ ጥሪቱ።
24 ወርእዮ፡ እግዚእ፡ ኢየሱስ፡ እንዘ፡ ይቴክዝ፡ ብዙኀ፡ ይቤ። እፎ፡ ዕጹብ፡ ለእለ፡ ቦሙ፡ ንዋይ፡ በዊእ፡ መንግሥተ፡ እግዚአብሔር።
25 ይቀልል፡ ይኅልፍ፡ ገመል፡ እንተ፡ ስቊረተ፡ መርፍእ። እምባዕል፡ ይባእ፡ ውስተ፡ መንግሥተ፡ እግዚአብሔር።
26 ወይቤሉ፡ እለ፡ ሰምዑ፡ መኑ፡ እንከ፡ ይክል፡ ድኂነ።
27 ወይቤሎሙ፡ ዘበኀበ፡ ሰብእ፡ ይሰአን፡ በኀበ፡ እግዚአብሔር፡ ይትከሀል።
በእንተ፡ ተላውያነ፡ እግዚእ፡ ኢየሱስ
28 ወይቤሎ፡ ጴጥሮስ፡ ናሁኬ፡ ንሕነ፡ ኀደግነ፡ ኵሎ። ወተሎናከ፡ ምንተ፡ እንጋ፡ ንረክብ።
29 ወይቤሎሙ፡ አማን፡ እብለክሙ፡ አልቦ፡ መኑሂ፡ ዘየኀድግ፡ ቤቶ። ወአዝማዲሁ፡ ወአኀዊሁ፡ ወብእሲቶ፡ ወውሉዶ፡ በእንተ፡ መንግሥተ፡ እግዚአብሔር።
30 ወዘኢይትዐሰይ፡ ምእተ፡ ምክዕቢተ፡ በዝንቱ፡ ዓለም። ወበዓለምሰ፡ ዘይመጽእ፡ ሕይወተ፡ ዘለዓለም።
በእንተ፡ ትንቢት፡ ዘሕማማት
31 ወነሥኦሙ፡ ለዐሠርቱ፡ ወክልኤቱ፡ ወይቤሎሙ። ናሁ፡ ነዐርግ፡ ኢየሩሳሌም፡ ወይትፌጸም፡ ኵሉ። ዘጸሑፍ፡ ውስተ፡ መጻሕፍተ፡ ነቢያት፡ ላዕለ፡ ወልደ፡ ዕጓለ፡ እመሕያው።
32 ወይሜጥውዎ፡ ለአሕዛብ፡ ወይሣለቁ፡ ላዕሌሁ፡ ወይጼእልዎ፡ ወይዌርቅዎ።
33 ወይቀሥፍዎ፡ ወይቀትልዎ፡ ወይትነሣእ፡ በሣልስት፡ ዕለት።
34 ወእሙንቱሰ፡ አልቦ፡ ዘለበዉ፡ እምዘይቤሎሙ። እስመ፡ ስዉር፡ ውእቱ፡ ዝ፡ ነገር፡ እምኔሆሙ፡ ወኢየአምሩ፡ ዘይብል።
በእንተ፡ ዕዉር፡ ዘኢያሪሆ
35 ወእምዝ፡ አልጺቆሙ፡ ኢያሪሆ፡ ሀሎ፡ አሐዱ፡ ዕዉር። ይነብር፡ ውስተ፡ ፍኖት፡ ወይስእል።
36 ወሰሚዖ፡ ድምፀ፡ ሰብእ፡ ዘየኀልፍ፡ ይቤ፡ ምንትኑ፡ ዝ።
37 ወይቤልዎ፡ ኢየሱስ፡ ናዝራዊ፡ የኀልፍ።
38 ወዐውየወ፡ ወይቤ፡ ኢየሱስ፡ ወልደ፡ ዳዊት፡ ተሣሀለኒ።
39 ወገሠጽዎ፡ እለ፡ ይመርሕዎ፡ ከመ፡ ያርምም። ወዐውየወ፡ ፈድፋደ፡ ወይቤ፡ ወልደ፡ ዳዊት፡ ተሣሀለኒ።
40 ወቆመ፡ እግዚእ፡ ኢየሱስ፡ ወአዘዘ፡ ያምጽእዎ፡ ኀቤሁ። ወበጺሖ፡ ኀቤሁ፡ ይቤሎ፡ ምንተ፡ ትፈቅድ፡ እግበር፡ ለከ።
41 ወይቤሎ፡ እግዚኦ፡ ከመ፡ ይርአያ፡ አዕይንትየ።
42 ወይቤሎ፡ እግዚእ፡ ኢየሱስ፡ ርኢ፡ ሃይማኖትከ፡ አሕየወተከ።
43 ወርእየ፡ ሶቤሃ፡ ወተለዎ፡ ወአእኰቶ፡ ለእግዚአብሔር። ወርእዮሙ፡ ኵሉ፡ ሕዝብ፡ ሰብሕዎ፡ ለእግዚአብሔር።
=== chapter 19 ===
[ምዕራፍ 19]
በእንተ፡ ዘኬዎስ፡ መጸብሓዊ
1 ወቦአ፡ ኢያሪሆ፡ እግዚእ፡ ኢየሱስ፡ ወአንሶሰወ።
2 ወናሁ፡ ረከበ፡ ብእሴ፡ ዘስሙ፡ ዘኬዎስ። መልአኮሙ፡ ለመጸብሓን፡ ወባዕል፡ ውእቱ።
3 ወየኀሥሥ፡ ይርአዮ፡ ለእግዚእ፡ ኢየሱስ፡ ከመ፡ ያአምር፡ መኑ፡ ውእቱ። ወኢያበውሖ፡ ሰብእ፡ እስመ፡ ኀጺር፡ ውእቱ፡ በቆሙ።
4 ወሮጸ፡ ቅድሜሁ፡ ወዐርገ፡ ዲበ፡ ሰግላ፡ ከመ፡ ይርአዮ። እስመ፡ እንተ፡ ይእቲ፡ ፍኖት፡ ሀለዎ፡ ይኅልፍ።
5 ወበጺሖ፡ ህየ፡ ነጸሮ፡ እግዚእ፡ ኢየሱስ፡ ወይቤሎ። ዘኬዎስ፡ አፍጥን፡ ወረድ፡ እስመ፡ ዮም፡ ሀለወኒ፡ አዐል፡ ቤተከ።
6 ወአፍጠነ፡ ወሪዶ፡ ወአግሐሦ፡ ኀበ፡ ቤቱ፡ እንዘ፡ ይትፌሣሕ።
7 ወርእዮሙ፡ ኵሎሙ፡ አንጐርጐሩ፡ ወይቤሉ፡ ኀበ፡ ብእሲ፡ ኃጥእ፡ ቦአ፡ የዐል።
8 ወቆመ፡ ዘኬዎስ፡ ወይቤሎ፡ ለእግዚእነ። ናሁ፡ እግዚእየ፡ መንፈቀ፡ ንዋይየ፡ እሁብ፡ ለነዳያን። ወእምሂ፡ ቦ፡ ዘገፋዕክዎ፡ እፈድዮ፡ ህየንተ፡ አሐዱ፡ ትርብዕተ።
9 ወይቤሎ፡ እግዚእ፡ ኢየሱስ፡ ዮምሰ፡ ሕይወት፡ ኮነ፡ ለሰብአ፡ ዝንቱ፡ ቤት። እስመ፡ አንተሂ፡ ወልደ፡ አብርሃም፡ አንተ።
10 እስመ፡ መጽአ፡ ወልደ፡ ዕጓለ፡ እመሕያው፡ ይኅሥሥ፡ ወያድኅን፡ ዘተሀጕለ።
በእንተ፡ እለ፡ ነሥኡ፡ ዐሠርተ፡ ምናናተ
11 ወእንዘ፡ ይሰምዑ፡ ዘንተ፡ መሰለ፡ ሎሙ፡ ወይቤሎሙ። እስመ፡ ቅሩብ፡ ውእቱ፡ ለኢየሩሳሌም። ወይመስሎሙ፡ ከመ፡ ሶቤሃ፡ ታስተርኢ፡ መንግሥተ፡ እግዚአብሔር።
12 ወይቤ፡ አሐዱ፡ ብእሲ፡ ክቡር፡ ሖረ፡ ብሔረ፡ ርሑቀ። ይንሣእ፡ ሎቱ፡ መንግሥተ፡ ወይሠወጥ።
13 ወጸውዐ፡ አግብርቲሁ፡ ዐሠርተ፡ ወወሀቦሙ፡ ዐሠርተ፡ ምናናተ። ወይቤሎሙ፡ ተገበሩ፡ እንከ፡ እስከ፡ ኣአቱ።
14 ወሰብአ፡ ሀገሩሰ፡ ይጸልእዎ፡ ወፈነዉ፡ ተናብልተ፡ ድኅሬሁ። እንዘ፡ ይብሉ፡ ኢንፈቅዶ፡ ለዝንቱ፡ ይንግሥ፡ ላዕሌነ።
15 ወእምዝ፡ አተወ፡ ነሢኦ፡ መንግሥተ፡ አዘዘ፡ ያምጽእዎሙ፡ ለአግብርቲሁ። እለ፡ ወሀቦሙ፡ ወርቆ፡ ከመ፡ ያእምር፡ ዘከመ፡ ተገበሩ።
16 ወመጽአ፡ ቀዳማዊ፡ ወይቤሎ፡ እግዚኦ፡ ምናንከ፡ ዐሠርቱ። ወዐሠርተ፡ ምናናተ፡ ረባሕኩ።
17 ወይቤሎ፡ እግዚኡ፡ ኦ፡ ገብር፡ ኄር፡ ወምእመን። ዘበውኁድ፡ ማእመነ፡ ኮንከ፡ ዲበ፡ ብዙኀ። እሠይመከ፡ ተሠየም፡ ላዕለ፡ ዐሠርቱ፡ አህጉር።
18 ወመጽአ፡ ካልኡሂ፡ ወይቤሎ፡ እግዚኦ፡ ምናንከ፡ ኀምስቱ። ወኀምስተ፡ ምናናተ፡ ረባሕኩ።
19 ወይቤሎ፡ ሎቱኒ፡ አንተኒ፡ ተሠየም፡ ላዕለ፡ ኀምስቱ፡ አህጉር።
20 ወመጽአ፡ ሣልሱኒ፡ ወይቤሎ፡ እግዚኦ፡ ነያ፡ ምናንከ። እንተ፡ ኀቤየ፡ ጠብለልክዋ፡ ወአንበርክዋ፡ ውስተ፡ ሰበንየ።
21 እስመ፡ ፈራህኩከ፡ እስመ፡ አአምረከ፡ ከመ፡ ዕጹብ፡ ብእሲ፡ አንተ። ወትነሥእ፡ ዘኢያንበርከ፡ ወተአርር፡ ዘኢዘራዕከ፡ ወታስተጋብእ፡ ዘኢዘረውከ።
22 ወይቤሎ፡ እግዚኡ፡ በከመ፡ ቃልከ፡ እኴንነከ፡ ገብር፡ እኩይ፡ ወሐካይ። ተአምረኒኑ፡ ከመ፡ ብእሲ፡ ዕጹብ፡ አነ፡ እነሥእ፡ ዘኢያንበርኩ። ወኣአርር፡ ዘኢዘራዕኩ፡ ወአስተጋብእ፡ ዘኢዘረውኩ።
23 ወለምንት፡ ኢያግባእከ፡ ወርቅየ፡ ውስተ፡ ማእድየ። ወለሊየ፡ አነ፡ አቲውየ፡ እምአስተገበርክዎ፡ ምስለ፡ ረባሑ።
24 ወይቤሎሙ፡ ለእለ፡ ይቀውሙ፡ ህየ። ንሥኡ፡ እምላዕሌሁ፡ ዘንተ፡ ምናነ፡ ወሀብዎ፡ ለዘቦቱ፡ ዐሠርቱ፡ ምናናተ።
25 ወይቤልዎ፡ እግዚኦ፡ አኮኑ፡ ቦቱ፡ ዐሠርቱ፡ ምናናተ።
26 ወይቤሎሙ፡ እብለክሙ፡ ለኵሉ፡ ዘቦ፡ ይሁብዎ፡ ወይዌስክዎ። ወለዘሰ፡ አልቦ፡ እለሂ፡ ቦ፡ የሀይድዎ።
27 ወባሕቱ፡ ለእልክቱሰ፡ ጸላእትየ፡ እለ፡ ኢይፈቅዱ፡ እንግሥ፡ ላዕሌሆሙ። አምጽእዎሙ፡ ዝየ፡ ወርግዝዎሙ፡ በቅድሜየ።
በእንተ፡ በአተ፡ እግዚእ፡ ኢየሱስ፡ ኀበ፡ ኢየሩሳሌም
28 ወዘንተ፡ ብሂሎ፡ አመልአ፡ ቅድመ፡ ወዐርገ፡ ኢየሩሳሌም።
29 ወሶበ፡ በጽሐ፡ ቤተ፡ ፋጌ፡ ወቢታንያ፡ ኀበ፡ ደብር፡ ዘስሙ፡ ኤሌዎን። ፈነወ፡ ክልኤተ፡ እምአርዳኢሁ።
30 ወይቤሎሙ፡ ሑሩ፡ ሀገረ፡ ዘቅድሜክሙ። ወበዊአክሙ፡ ትረክቡ፡ ዕዋለ፡ እሱረ፡ ዘኢተጽዕኖ፡ ሰብእ። ፍትሕዎ፡ ወአምጽእዎ፡ ሊተ።
31 ወእመ፡ ቦ፡ ዘይቤለክሙ፡ ለምንት፡ ትፈትሑ፡ በሉ፡ እግዚኡ፡ ይፈቅዶ።
32 ወሐዊሮሙ፡ እለ፡ ተፈነዉ፡ ረከቡ፡ በከመ፡ ይቤሎሙ።
33 ወፈትሑ፡ ዕዋለ፡ ወእንዘ፡ ይፈትሑ፡ ዕዋለ፡ ይቤልዎሙ፡ አጋእዝቲሁ። ለምንት፡ ትፈትሕዎ፡ ለዕዋል።
34 ወይቤሉ፡ እግዚኡ፡ ይፈቅዶ።
35 ወነሥእዎ፡ ወወሰድዎ፡ ኀበ፡ እግዚእ፡ ኢየሱስ። ወረሐኑ፡ አልባሲሆሙ፡ ዲበ፡ ዕዋል፡ ወአጽዐንዎ፡ ለእግዚእ፡ ኢየሱስ፡ ዲቤሁ።
36 ወእንዘ፡ የሐውሩ፡ ነጸፉ፡ አልባሲሆሙ፡ ውስተ፡ ፍኖት።
37 ወበጺሖሙ፡ ኀበ፡ ሙራደ፡ ዐቀብ፡ ዘደብረ፡ ዘይት። አኀዙ፡ ኵሎሙ፡ አርዳኢሁ፡ ይትፈሥሑ፡ ወይሰብሕዎ፡ ለእግዚአብሔር፡ በዐቢይ፡ ቃል። በእንተ፡ ኵሉ፡ ኀይል፡ ዘርእዩ።
38 እንዘ፡ ይብሉ፡ ቡሩክ፡ ዘይመጽእ፡ በስመ፡ እግዚአብሔር። ወቡሩክ፡ ንጉሠ፡ እስራኤል፡ ሰላም፡ በምድር፡ ወስብሐት፡ በአርያም።
39 ወቦ፡ እምፈሪሳውያን፡ እለ፡ ይቤልዎ፡ በማእከለ፡ ሕዝብ። ሊቅ፡ ገሥጾሙ፡ ለአርዳኢከ።
40 ወአውሥአ፡ ወይቤሎሙ፡ እብለክሙ፡ ለእመ፡ አርመሙ፡ እሉ፡ እሎንቱ፡ አእባን፡ ይኬልሑ።
41 ወበጺሖ፡ ርእያ፡ ለሀገር፡ ወበከየ፡ ላዕሌሃ።
42 ወይቤላ፡ ሶበሰ፡ ተአምሪ፡ ዮም፡ ሰላምኪ። ወባሕቱ፡ እምይእዜሰ፡ ተሰወረ፡ እምአዕይንትኪ።
43 ወይበጽሐኪ፡ መዋዕል፡ አመ፡ የዐግቱኪ፡ ፀርኪ። ወይትዐየኑኪ፡ ወየሐጽሩኪ፡ ወያስተጋብኡኪ፡ እምኵለሄ።
44 ወይነፅኁኪ፡ ለኪ፡ ወለውሉድኪኒ፡ ምስሌኪ። ወኢየኀድጉ፡ እብነ፡ ዲበ፡ እብን፡ በውስቴትኪ፡ እስመ፡ ኢያእመርኪ፡ መዋዕለ፡ ሣህልኪ።
በእንተ፡ ዘከመ፡ ሰደዶሙ፡ ለእለ፡ ይሠይጡ፡ በቤተ፡ መቅደስ
45 ወቦአ፡ ምኵራበ፡ ወሰደደ፡ ኵሎሙ፡ እለ፡ ይሠይጡ፡ ወይሣየጡ፡ በህየ፡ በቤተ፡ መቅደስ። ወገፍትዐ፡ ማእዳቲሆሙ፡ ለመወልጣን፡ ወመናብርቲሆሙ፡ ለእለ፡ ይሠይጡ፡ ርግበ፡ ገንጰለ።
46 ወይቤሎሙ፡ ጽሑፍ፡ ዘይብል፡ ቤትየሰ፡ ቤተ፡ ጸሎት፡ ይሰመይ። ወአንትሙሰ፡ ረሰይክምዎ፡ በአተ፡ ፈያት፡ ወሰረቅት።
47 ወኵሎ፡ አሚረ፡ ይሜህሮሙ፡ በምኵራብ። ወየኀሥሡ፡ ሊቃነ፡ ካህናት፡ ወጸሐፍት፡ ወሊቃናተ፡ ሕዝብ፡ በዘይቀትልዎ።
48 ወኀጥኡ፡ ዘይሬስይዎ፡ እስመ፡ ኵሎሙ፡ ሕዝብ፡ ይሰቀሉ፡ በአጽምኦቱ።
=== chapter 20 ===
[ምዕራፍ 20]
ዘከመ፡ ተስእሎሙ፡ እግዚእ፡ ኢየሱስ፡ በእንተ፡ ጥምቀት፡ ዘዮሐንስ
1 ወእምዝ፡ አሐተ፡ ዕለተ፡ እንዘ፡ ይሜህሮሙ፡ ለሕዝብ፡ በምኵራብ፡ ወይነግሮሙ። ቆሙ፡ ላዕሌሁ፡ ሊቃነ፡ ካህናት፡ ወጸሐፍት፡ ወረበናት።
2 ወይቤልዎ፡ ንግረነ፡ በመባሕተ፡ መኑ፡ ትገብር፡ ዘንተ። ወመኑ፡ አብሐከ፡ ትግበር፡ ከመ፡ ዝ።
3 ወአውሥአ፡ ወይቤሎሙ፡ እሴአለክሙ፡ አነሂ፡ አሐተ፡ ነገረ፡ ዘትንግሩኒ።
4 ጥምቀቱ፡ ለዮሐንስ፡ እምአይቴ፡ ይእቲ። እምሰማይኑ፡ ወሚመ፡ እምሰብእ።
5 ወተባሀሉ፡ በበይናቲሆሙ፡ እመሂ፡ ንብሎ፡ እምሰማይ፡ ይብለነ፡ እፎ፡ ኢአመንክምዎ።
6 ወእመሂ፡ ንብሎ፡ እምሰብእ፡ ይዌግሩነ፡ ኵሎ፡ ሕዝብ። እስመ፡ ኵሎሙ፡ ተአመንዎ፡ ለዮሐንስ፡ ከመ፡ ነቢይ፡ ውእቱ።
7 ወአውሥእዎ፡ ወይቤልዎ፡ ኢነአምር፡ እምኀበ፡ ኮነት።
8 ወይቤሎሙ፡ እግዚእ፡ ኢየሱስ፡ አነሂ፡ ኢይነግረክሙ። በመባሕተ፡ መኑ፡ እገብር፡ ከመ፡ ዝ።
በእንተ፡ እኩያን፡ ዐቀብተ፡ ወይን
9 ወአኀዘ፡ ይመስል፡ ሎሙ፡ ለሕዝብ፡ ዘንተ፡ ምሳሌ፡ ወይቤሎሙ። ብእሲ፡ ተከለ፡ ወይነ፡ ወሤመ፡ ሎቱ፡ ዐቀብተ፡ ለወይኑ። ወአክረየ፡ ምክያደ፡ ወሐነጸ፡ ማኅፈደ፡ ወነገደ፡ ርሑቀ፡ ብሔረ፡ ወጐንደየ፡ አቲወ።
10 ወአመ፡ ኮነ፡ ጊዜ፡ ፍሬሁ፡ ፈነወ፡ ገብሮ፡ ኀበ፡ ዐቀብተ፡ ወይን። ከመ፡ ይፈንዉ፡ ሎቱ፡ እምፍሬ፡ ወይኑ። ወዘበጥዎ፡ ዐቀብተ፡ ወይን፡ ለገብሩ፡ ወፈነውዎ፡ ዕራቆ።
11 ወዳግመ፡ ፈነወ፡ ካልአኒ፡ ገብሮ። ወኪያሁኒ፡ ዘበጥዎ፡ ወአኅሰርዎ፡ ወፈነውዎ፡ ዕራቆ።
12 ወካዕበ፡ ፈነወ፡ ሣልሰኒ፡ ገብሮ፡ ወኪያሁኒ፡ ፈቅዕዎ፡ ወሰደድዎ።
13 ወይቤ፡ በዓለ፡ ዐጸደ፡ ወይን፡ ምንተ፡ እንከ፡ እሬሲ፡ እፌኑ፡ ወልድየ፡ ዘአፈቅሮ። ለእመ፡ ኪያሁ፡ የኀፍሩ፡ ርእዮሙ፡ ወፈነዎ።
14 ወሶበ፡ ርእይዎ፡ ዐቀብተ፡ ወይን፡ ተማከሩ። ወይቤሉ፡ ዝንቱ፡ ውእቱ፡ ወልዱ፡ ወራሲሁ።
15 ንዑ፡ ንቅትሎ፡ ወንርከብ፡ ርስቶ። ወአውፅእዎ፡ አፍኣ፡ እምዐጸደ፡ ወይን፡ ወቀተልዎ።
16 ወሶበ፡ መጽአ፡ በዓለ፡ ዐጸደ፡ ወይን፡ ምንተ፡ እንከ፡ ይሬስዮሙ። ይመጽእ፡ ወይቀትሎሙ፡ ለእልክቱ፡ ዐቀብተ፡ ዐጸደ፡ ወይን። ወይሁብ፡ ወይኖ፡ ለካልኣን፡ ዐቀብተ። ወሰሚዖሙ፡ ቃሎ፡ ይቤሉ፡ ሐሰ፡ ኢይከውን፡ ከመ፡ ዝ።
17 ወነጸሮሙ፡ እግዚእ፡ ኢየሱስ፡ ወይቤሎሙ፡ ምንትኑመ፡ ጽሑፍ፡ ዘይብል። እብን፡ እንተ፡ መነንዋ፡ ነደቅት፡ ይእቲ፡ ኮነት፡ ውስተ፡ ርእሰ፡ ማእዘንት።
18 ወኵሎ፡ ዘወድቀ፡ ዲበ፡ ይእቲ፡ እብን፡ ይትቀጠቀጥ። ወለዘኒ፡ ወድቀት፡ ላዕሌሁ፡ ትቀጠቅጦ።
19 ወፈቀዱ፡ ሊቃነ፡ ካህናት፡ ወጸሐፍት፡ የአኀዝዎ፡ ሶቤሃ። ወፈርህዎሙ፡ ለሕዝብ፡ እስመ፡ አእመሩ፡ ከመ፡ በእንቲኣሆሙ፡ መሰለ፡ ከመ፡ ዝ።
በእንተ፡ ጸባሕት፡ ዘቄሣር
20 ወተግሒሶሙ፡ እምኔሁ፡ አጽንሑ፡ ሎቱ፡ እለ፡ ይትዐቀብዎ። ወፈነዉ፡ ኀቤሁ፡ ሰብአ፡ ዐይን፡ እለ፡ ያጸድቁ፡ ርእሶሙ፡ ከመ፡ ያስሕትዎ፡ በቃሉ። ወከመ፡ ያግብእዎ፡ ለመኳንንት፡ ወለመሳፍንት።
21 ወተስእልዎ፡ ወይቤልዎ፡ ሊቅ፡ ነአምር፡ ከመ፡ ጽድቀ፡ ትነግር፡ ወትሜህር። ወኢታደሉ፡ ለገጽ፡ ወኢ፡ ለመኑሂ፡ ወርቱዐ፡ ትሜህር፡ ፍኖተ፡ እግዚአብሔር።
22 ይከውነነሁ፡ ነሀብ፡ ጸባሕተ፡ ለቄሣር፡ ወሚመ፡ አልቦኑ።
23 ወአእመሮሙ፡ ትምይንቶሙ፡ ወይቤሎሙ፡ ለምንት፡ ታሜክሩኒ፡ አርእዩኒ፡ ዲናረ።
24 ወአምጽኡ፡ ወአርአይዎ፡ ወይቤሎሙ። ዘመኑ፡ መልክዑ፡ ወመጽሐፉ፡ ወአውሥእዎ፡ ወይቤልዎ፡ ዘቄሣር።
25 ወይቤሎሙ፡ ሀቡ፡ ዘቄሣር፡ ለቄሣር፡ ወዘእግዚአብሔር፡ ለእግዚአብሔር።
26 ወስእንዎ፡ አስሕቶቶ፡ በቃሉ፡ በቅድመ፡ ኵሉ፡ ሕዝብ። ወአንከሩ፡ ሣዕሣዐ፡ አፉሁ፡ ወአውሥኦቶ፡ ወአርመሙ።
በእንተ፡ ሰዱቃውያን፡ ወበእንተ፡ ትንሣኤ፡ ምዉታን
27 ወመጽኡ፡ ኀቤሁ፡ ሰዱቃውያን፡ እለ፡ ይብሉ፡ ኢየሐይዉ፡ ምዉታን።
28 ወተስእልዎ፡ ወይቤልዎ፡ ሊቅ፡ ሙሴ፡ ጸሐፈ፡ ለነ፡ እንዘ፡ ይብል። ለእመ፡ ቦ፡ ብእሲ፡ ዘሞተ፡ እኁሁ፡ ወኀደገ፡ ብእሲቶ፡ እንዘ፡ አልቦ፡ ውሉድ። ያውስባ፡ እኁሁ፡ ለብእሲቱ፡ ወያቅም፡ ዘርዐ፡ ለእኁሁ።
29 ወሀለዉ፡ እንከ፡ ኀቤነ፡ ሰብዐቱ፡ አኀው፡ ወአውሰበ፡ ዘይልህቅ፡ ብእሲተ። ወሞተ፡ እንዘ፡ አልቦ፡ ውሉድ።
30 ወከማሁ፡ አውሰባ፡ ካልኡሂ፡ ወሣልሱሂ፡ ነሥኣ፡ ከማሁ፡ ወኢኀደጉ፡ ውሉደ።
31 ወሰብዐቲሆሙ፡ ከማሁ፡ አውሰብዋ፡ ወሞቱ፡ እንዘ፡ አልቦሙ፡ ውሉድ።
32 ወድኅረ፡ ኵሎሙ፡ ሞተት፡ ይእቲ፡ ብእሲት።
33 ወአመ፡ የሐይዉ፡ እንከ፡ ምዉታን፡ ለመኑ፡ እምኔሆሙ፡ ትከውኖ፡ ብእሲተ። እስመ፡ ናሁ፡ ሰብዐቲሆሙ፡ አውሰብዋ።
34 ወአውሥአ፡ እግዚእ፡ ኢየሱስ፡ ወይቤሎሙ። ውሉደ፡ ዝንቱ፡ ዓለም፡ ያወስቡ፡ ወይትዋሰቡ፡ ወይወልዱ፡ ወይትዋለዱ።
35 ወእለሰ፡ ይደልዎሙ፡ ይርከብዎ፡ ለዝክቱ፡ ዓለም። አመ፡ የሐይዉ፡ ምዉታን፡ ኢያወስቡ፡ ወኢይትዋሰቡ።
36 ወኢሂ፡ ይትከሀሎሙ፡ እንከ፡ መዊት፡ አላ፡ ከመ፡ መላእክተ፡ እግዚአብሔር፡ እሙንቱ። ወውሉደ፡ እግዚአብሔር፡ ይከውኑ፡ ወውሉደ፡ ሕይወት፡ እሙንቱ።
37 ወከመሰ፡ የሐይዉ፡ ምዉታን፡ ሙሴሂ፡ ነገረ፡ ዘከመ፡ ይቤሎ፡ እግዚአብሔር፡ በኀበ፡ ዕፀ፡ ጳጦስ። አነ፡ ውእቱ፡ አምላከ፡ አብርሃም፡ ወአምላከ፡ ይስሐቅ፡ ወአምላከ፡ ያዕቆብ።
38 ኢኮነኬ፡ አምላከ፡ ምዉታን፡ አላ፡ አምላከ፡ ሕያዋን፡ ውእቱ። እስመ፡ ኵሎሙ፡ ሕያዋን፡ እሙንቱ፡ በኀቤሁ።
39 ወአውሥኡ፡ ሰብእ፡ እምጸሐፍት፡ ወይቤሉ፡ ሊቅ፡ ሠናየ፡ ትቤ።
40 ወአልቦ፡ እንከ፡ መኑሂ፡ ዘተኀበለ፡ ይሰአሎ።
በእንተ፡ ዘከመ፡ ተስእሎሙ፡ እግዚእነ፡ ለፈሪሳውያን
41 ወይቤሎሙ፡ እፎ፡ ይብልዎ፡ ለክርስቶስ፡ ወልደ፡ ዳዊት።
42 ወለሊሁ፡ ዳዊት፡ ይቤ፡ በመጽሐፈ፡ መዝሙር፡ ይቤሎ። እግዚእ፡ ለእግዚእየ፡ ንበር፡ በየማንየ። እስከ፡ አገብኦሙ፡ ለጸላእትከ፡ ታሕተ፡ መከየደ፡ እገሪከ።
43 ዘለሊሁ፡ እንከ፡ ዳዊት፡ እግዚእየ፡ ይቤሎ፡ እፎ፡ እንከ፡ ይከውኖ፡ ወልዶ።
44 ወእንዘ፡ ኵሎሙ፡ ሕዝብ፡ ይሰምዑ፡ ይቤሎሙ፡ ለአርዳኢሁ። ተዐቀብዎሙ፡ ለጸሐፍት፡ እለ፡ ይፈቅዱ፡ ያንሶስዉ፡ ተላቢሶሙ። ወያፈቅሩ፡ ተአምኆ፡ በምሥያጣት። ወነቢረ፡ ፍጽም፡ በውስተ፡ አዕዋዳት፡ ወርእሰ፡ ምርፋቃት፡ በውስተ፡ ምሳሓት።
45 እለ፡ ይውኅጥዎን፡ ለአብያተ፡ መበለታት፡ ወበምክንያት፡ ያነውኁ፡ ጸሎተ።
46 እሙንቱ፡ ይነሥኡ፡ ዘየዐቢ፡ ኵነኔ።
=== chapter 21 ===
[ምዕራፍ 21]
በእንተ፡ ጸሪቀ፡ መበለት
1 ወነጸረ፡ ወርእየ፡ አብዕልተ፡ ዘያበውኡ፡ መባኦሙ፡ ውስተ፡ ሙዳየ፡ ምጽዋት።
2 ወርእየ፡ ዕቤረ፡ መበለተ፡ እንዘ፡ ታበውእ፡ ክልኤ፡ ጸራይቀ።
3 ወይቤሎሙ፡ አማን፡ እብለክሙ። ከመ፡ ዛቲ፡ ዕቤር፡ ነዳይት፡ አብዝኀት፡ አብኦ፡ መባአ፡ ለእግዚአብሔር።
4 እስመ፡ እሉ፡ ኵሎሙ፡ እምተረፎሙ፡ አብኡ፡ መባአ፡ ለእግዚአብሔር። ወዛቲሰ፡ እምተጽናሳ፡ ኵሎ፡ ጥሪታ፡ ዘባ፡ አብአት።
በእንተ፡ ትንቢት፡ ጥፍአተ፡ ቤተ፡ መቅደስ፡ ወኢየሩሳሌም
5 ወቦ፡ እለ፡ ይቤልዎ፡ በእንተ፡ ቤተ፡ መቅደስ፡ ሠናይ፡ እበኒሁ፡ ወስርግው፡ ንድቁ።
6 ወይቤሎሙ፡ ትሬእዩኑ፡ ዘንተ፡ ይመጽእ፡ መዋዕል። አመ፡ ኢይትኀደግ፡ ዝየ፡ እብን፡ ዲበ፡ እብን፡ ዘኢይትነሠት።
7 ወተስእልዎ፡ ወይቤልዎ፡ ሊቅ፡ ማእዜ፡ ይከውን፡ ዝንቱ። ወምንት፡ ተኣምሪሁ፡ አመ፡ ይከውን፡ ዝንቱ።
8 ወይቤሎሙ፡ ዑቁ፡ ኢያስሕቱክሙ፡ ብዙኃን፡ ይመጽኡ፡ በስምየ። እንዘ፡ ይብሉ፡ አነ፡ ውእቱ፡ ክርስቶስ፡ ወበጽሐ፡ ዕድሜሁ። ወኢትሑሩ፡ ወኢትትልውዎሙ።
9 ወአመ፡ ሰማዕክሙ፡ ቀትለ፡ ወሀከከ፡ ኢትደንግፁ፡ እስመ፡ ይከውን፡ ቅድመ፡ ከመ፡ ዝ። ወባሕቱ፡ አኮ፡ ሶቤሃ፡ ዘየኀልቅ።
10 ወይቤሎሙ፡ ይትነሥኡ፡ ሕዝብ፡ ዲበ፡ ሕዝብ፡ ወነገሥት፡ ዲበ፡ ነገሥት።
11 ወይመጽእ፡ ዐቢይ፡ ድልቅልቅ፡ ወረኀብ፡ በበ፡ ብሔሩ። ወፍርሀት፡ ላዕለ፡ ሰብእ፡ ወተኣምር፡ ዐቢይ፡ ይከውን፡ እምሰማይ።
12 ወእምቅድመ፡ ዝንቱ፡ ኵሉ፡ ይእኅዙክሙ፡ ወይወስዱክሙ፡ አዕዋዳተ። ወይሰድዱክሙ፡ ወይሞቅሑክሙ፡ ወይወስዱክሙ፡ ኀበ፡ ነገሥት፡ ወመሳፍንት፡ በእንተ፡ ስምየ።
13 ወዝንቱ፡ ይረክበክሙ፡ ከመ፡ ይኩን፡ ስምዐ፡ ላዕሌሆሙ።
14 ዑቁ፡ ኢተኀልዩ፡ በልብክሙ፡ ዘትብሉ።
15 አነ፡ እሁበክሙ፡ አፈ፡ ወጥበበ፡ በዘኢይክሉ፡ ተዋሥኦተክሙ። ወተዋቅሦተክሙ፡ እለ፡ ይትነሥኡ፡ ላዕሌክሙ።
16 ወያገብኡክሙ፡ አዝማዲክሙ፡ ወአኀዊክሙ፡ ወአዕርክቲክሙ፡ ወቢጽክሙ።
17 ወኵሉ፡ ይጸልኡክሙ፡ በእንተ፡ ስምየ፡ ወይቀትሉክሙ።
18 ወኢትትሀጐል፡ አሐቲ፡ እምሥዕርተ፡ ርእስክሙ።
19 ወበትዕግሥትክሙ፡ ታጠርይዋ፡ ለነፍስክሙ።
ዘከመ፡ በአይ፡ ጥፍአታ፡ ለኢየሩሳሌም፡ ወሕዝብ
20 ወአመ፡ ርኢክሙ፡ የዐግትዋ፡ ሠራዊት፡ ለኢየሩሳሌም፡ አእምሩ፡ ከመ፡ በጽሐ፡ ሙስናሃ።
21 ወይእተ፡ አሚረ፡ እለ፡ ውስተ፡ ይሁዳ፡ ይጐዩ፡ ውስተ፡ አድባር። ወእለሂ፡ ማእከላ፡ ይወፅኡ፡ እምኔሃ፡ ወእለሂ፡ ውስተ፡ በሓውርቲሃ፡ ኢይበውእዋ።
22 እስመ፡ ዕድሜሃ፡ ውእቱ፡ በዘይትቤቀልዋ፡ ከመ፡ ይብጻሕ፡ ኵሉ፡ ዘጽሑፍ፡ ላዕሌሃ።
23 ወባሕቱ፡ አሌ፡ ሎን፡ ለፅኑሳት፡ ወለእለ፡ የሐፅና፡ በውእቱ፡ መዋዕል። እስመ፡ ይከውን፡ ዐቢይ፡ ምንዳቤ፡ ዲበ፡ ምድር፡ ወመቅሠፍት፡ ዲበ፡ ዝንቱ፡ ሕዝብ።
24 ወይወድቁ፡ በኵናት፡ ወይፄወዉ፡ ውስተ፡ ኵሉ፡ አሕዛብ። ወይከይድዋ፡ አሕዛብ፡ ለኢየሩሳሌም፡ እስከ፡ ይበጽሕ፡ ዕድሜሆሙ፡ ለአሕዛብ።
በእንተ፡ እለ፡ ይቀድሙ፡ ትእምርታት፡ ዘዕለተ፡ ደይን
25 ወይከውን፡ ተኣምር፡ ውስተ፡ ፀሓይ፡ ወወርኅ፡ ወከዋክብትኒ፡ ይወድቁ፡ እምሰማይ፡ ዲበ፡ ምድር። ወይትመነደቡ፡ አሕዛብ፡ ወየኀስሩ፡ እምድምፀ፡ ባሕር፡ ወባሕርኒ፡ ትደምፅ፡ ወትትከወስ።
26 ወትወፅእ፡ ነፍሰ፡ ዕጓለ፡ እመሕያው፡ እምፍርሀት፡ ወእምትሕዝብት፡ ዘይመጽእ፡ በዓለም። እስመ፡ ይትከወስ፡ ኀይለ፡ ሰማያት፡ ይእተ፡ አሚረ።
27 አሜሃ፡ ይሬእይዎ፡ ለወልደ፡ ዕጓለ፡ እመሕያው። እንዘ፡ ይመጽእ፡ በደመና፡ ሰማይ፡ ምስለ፡ ኀይል፡ ብዙኀ፡ ወስብሐት።
28 ወአመ፡ ኮነ፡ ዝንቱ፡ ኵሉ፡ ስግዱ፡ ወአንሥኡ፡ ርእሰክሙ፡ እስመ፡ በጽሐ፡ ዘያድኅነክሙ።
29 ወመሰለ፡ ሎሙ፡ ወይቤሎሙ። እምከመ፡ ርኢክምዋ፡ ለበለስ፡ ወለኵሉ፡ ዕፀው፡ ከመ፡ ሠረጹ፡ ተአምሩ፡ ከመ፡ አልጸቀ፡ ማእረር።
30 ከማሁ፡ አንትሙኒ፡ እምከመ፡ ርኢክሙ፡ ከመ፡ ኮነ፡ ዝንቱ። አእምሩ፡ ከመ፡ በጽሐት፡ መንግሥተ፡ እግዚአብሔር።
31 አማን፡ እብለክሙ፡ ከመ፡ ኢተኀልፍ፡ ዛቲ፡ ትውልድ፡ እስከ፡ አመ፡ ይከውን፡ ዝንቱ፡ ኵሉ።
32 ሰማይ፡ ወምድር፡ የኀልፍ፡ ወቃልየሰ፡ ኢየኀልፍ።
ዘከመ፡ ይደልዎሙ፡ ለክርስቲያን፡ ተደልዎ፡ ለሞት
33 ዑቁ፡ ርእሰክሙ፡ ኢታክብዱ፡ ልበክሙ፡ በበሊዕ፡ ወበስታይ፡ ወበፈጊዕ፡ ወበኀልዮ፡ መንበርት። ወትበጽሐክሙ፡ ይእቲ፡ ዕለት፡ ግብተ።
34 ከመ፡ መሥገርት፡ እንተ፡ ትወርድ፡ ዲበ፡ ኵሎሙ፡ እለ፡ ይነብሩ፡ ዲበ፡ ምድር።
35 ትግሁ፡ እንከ፡ በኵሉ፡ ጊዜ፡ ከመ፡ ትክሀሉ፡ እምስጦ፡ በጸሎትክሙ። እምነ፡ ዝንቱ፡ ኵሉ፡ ዘይመጽእ፡ ወትቁሙ፡ ቅድሜሁ፡ ለወልደ፡ ዕጓለ፡ እመሕያው።
36 ወኮነ፡ መዓልተ፡ ይሜህር፡ በምኵራብ፡ ወሌሊተ፡ ይወፅእ። ወይበይት፡ ውስተ፡ ደብረ፡ ዘይት፡ ዘስሙ፡ ኤሌዎን።
37 ወኵሉ፡ ሕዝብ፡ ይገይሡ፡ ኀቤሁ፡ ውስተ፡ ምኵራብ፡ ያጽምእዎ፡ ቃሎ።
=== chapter 22 ===
[ምዕራፍ 22]
በእንተ፡ ፋሲካ
1 ወቀርበ፡ በዓለ፡ መጸለት፡ ዘስሙ፡ ፋሲካ።
2 ወየኀሥሡ፡ ሎቱ፡ ሊቃነ፡ ካህናት፡ ወጸሐፍት፡ በዘይቀትልዎ፡ ወኮኑ፡ ይፍርህዎሙ፡ ለሕዝብ።
በእንተ፡ ተሰናዕዎቱ፡ ለይሁዳ፡ ምስለ፡ አይሁድ
3 ወቦአ፡ ሰይጣን፡ ውስተ፡ ልበ፡ ይሁዳ፡ አስቆሮታዊ፡ ዘእምዐሠርቱ፡ ወክልኤቱ፡ ኍልቁ።
4 ወሖረ፡ ወተናገሮሙ፡ ለሊቃነ፡ ካህናት፡ ወለጸሐፍት፡ ዘከመ፡ ያገብኦ፡ ሎሙ።
5 ወተፈሥሑ፡ ወተሰናአዉ፡ ምስሌሁ፡ ወተናገርዎ፡ የሀብዎ፡ ሠላሳ፡ ብሩረ።
6 ወአስተኃለቁ፡ ነገረ፡ ወየኀሥሥ፡ ሣሕተ፡ ያግብኦ፡ ሎሙ፡ እንዘ፡ አልቦ፡ ሰብእ።
በእንተ፡ ደኃሪት፡ ድራር፡ ወበእንተ፡ አስተዳልዎት
7 ወሶበ፡ በጽሐት፡ ዕለተ፡ መጸለት፡ አመ፡ ይጠብሑ፡ ፍሥሐ። ይቤሎሙ፡ እግዚእ፡ ኢየሱስ፡ ለጴጥሮስ፡ ወለዮሐንስ። ሑሩ፡ ወአስተዳልዉ፡ ለነ፡ ፍሥሐ፡ ዘንበልዕ።
8 ወይቤልዎ፡ በአይቴ፡ ትፈቅድ፡ ናስተዳሉ፡ ለከ፡ ፍሥሐ።
9 ወይቤሎሙ፡ በዊአክሙ፡ ሀገረ፡ ትረክቡ፡ ብእሴ፡ ዘይጸውር፡ ጻሕበ፡ ማይ። ወትልውዎ፡ ኪያሁ፡ ኀበ፡ ቦአ፡ ቤት።
10 ወበልዎ፡ ለበዓለ፡ ውእቱ፡ ቤት። ይቤለከ፡ ሊቅ፡ አይቴኑ፡ ቤት፡ ኀበ፡ አበልዕ፡ ፍሥሐ፡ ምስለ፡ አርዳኢየ።
11 ወውእቱ፡ ያርእየክሙ፡ ጽርሐ፡ ዐቢየ፡ ወንጹፈ፡ ወስርግወ፡ ወበህየ፡ አስተዳልዉ፡ ለነ።
12 ወሐዊሮሙ፡ ረከቡ፡ በከመ፡ ይቤሎሙ፡ ወአስተዳለዉ፡ ፍሥሐ።
በእንተ፡ ሠሪዐ፡ ቅዱስ፡ ቍርባን
13 ወሶበ፡ ኮነ፡ ጊዜሁ፡ ለድራር፡ ረፈቀ፡ እግዚእ፡ ኢየሱስ፡ ወዐሠርቱ፡ ወክልኤቱ፡ ሐዋርያቲሁ፡ ምስሌሁ።
14 ወይቤሎሙ፡ ፈቲወ፡ ፈተውክዎ፡ ለዝንቱ፡ ፋሲካ፡ እብላዕ፡ ምስሌክሙ። ዘእንበለ፡ ይብጽሐኒ፡ ሕማምየ።
15 እብለክሙ፡ ባሕቱ፡ ከመ፡ ኢይበልዕ። እንከ፡ እምኔሁ፡ እስከ፡ ይትፌጸም፡ በመንግሥተ፡ እግዚአብሔር።
16 ወተመጠወ፡ ጽዋዐ፡ ወአእኰተ፡ ወይቤ፡ ንሥኡ፡ ዘንተ፡ ወተካፈልዎ፡ ኵልክሙ።
17 እብለክሙ፡ ኢይሰቲ፡ እንከ፡ እምዝንቱ፡ ፍሬ፡ ወይን። እስከ፡ አመ፡ እሰትዮ፡ ሐዲሰ፡ በመንግሥተ፡ እግዚአብሔር።
18 ወነሥአ፡ ኅብስተ፡ ወአእኵቶ፡ ፈተተ፡ ወወሀቦሙ፡ ወይቤሎሙ። ዝንቱ፡ ውእቱ፡ ሥጋየ፡ ዘይትወሀብ፡ በእንቲኣክሙ፡ ለቤዛ፡ ብዙኃን። ወከመ፡ ዝ፡ ግበሩ፡ ተዝካርየ፡ በእንቲኣየ።
19 ወከማሁ፡ ጽዋዐኒ፡ እምድኅረ፡ ተደሩ፡ ይቤሎሙ። ዝንቱ፡ ጽዋዕ፡ ዘሐዲስ፡ ሥርዐት፡ ደምየ፡ ውእቱ። ዘይትከዐው፡ በእንቲኣክሙ፡ ወበእንተ፡ ብዙኃን።
በእንተ፡ ትእምርት፡ ለዘያገብኦ
20 ወባሕቱ፡ ናሁ፡ እዴሁ፡ ለዘያገብአኒ፡ ምስሌየ፡ ውስተ፡ ማእድ።
21 ወወልደ፡ ዕጓለ፡ እመሕያውሰ፡ የሐውር፡ በከመ፡ ተሠርዐ፡ በእንቲኣሁ።
22 ወባሕቱ፡ አሌ፡ ሎቱ፡ ለውእቱ፡ ብእሲ። ዘበውስተ፡ እዴሁ፡ ይትሜጠውዎ፡ ለወልደ፡ ዕጓለ፡ እመሕያው።
23 ወይቤሉ፡ በበይናቲሆሙ፡ አርዳኢሁ፡ መኑ፡ እንጋ፡ ውእቱ፡ እምኔሆሙ፡ ዘዘንተ፡ ይገብር።
በእንተ፡ ትሕትና፡ ዘክርስቲያን
24 ወእምዝ፡ ተዋክሑ፡ በበይናቲሆሙ፡ እንዘ፡ ይብሉ፡ መኑ፡ እንጋ፡ የዐቢ፡ እምኔሆሙ።
25 ወይቤሎሙ፡ ነገሥቶሙ፡ ለአሕዛብ፡ ይኴንንዎሙ። ወዐበይቶሙ፡ ይቀንይዎሙ፡ ወለመኳንንቲሆሙ፡ ረዳእያነ፡ ይብልዎሙ።
26 ወለክሙሰ፡ አኮ፡ ከመ፡ ዝ፡ አላ፡ ዘየዐቢ፡ እምኔክሙ፡ ይኩንክሙ፡ ከመ፡ ዘይንእስ። ወሊቅኒ፡ ይኩን፡ ከመ፡ ላእክ።
27 መኑ፡ ውእቱ፡ ዘየዐቢ፡ ዘይረፍቅኑ፡ ወሚመ፡ ዘይትለአክ፡ አኮኑ፡ ዘይረፍቅ። ወአንሰ፡ ናሁ፡ ከመ፡ ላእከ፡ በማእከሌክሙ።
28 ወአንትሙሰ፡ ባሕቱ፡ እለ፡ በእንቲኣየ፡ ተዐገሥክሙ፡ ምስሌየ፡ በሕማምየ።
29 አነኒ፡ አስተዳሉ፡ ለክሙ፡ መንግሥተ፡ በከመ፡ ሊተ፡ ወሀበኒ፡ አቡየ።
30 ከመ፡ ትብልዑ፡ ወትስትዩ፡ በማእድየ፡ በመንግሥትየ። ወትነብሩ፡ ዲበ፡ መናብርት፡ ወትኴንኑ፡ ዐሠርተ፡ ወክልኤተ፡ ሕዝበ፡ እስራኤል።
በእንተ፡ ዘሰአለ፡ ሰይጣን
31 ወይቤሎ፡ እግዚእ፡ ኢየሱስ፡ ለስምዖን። ስምዖን፡ ስምዖን፡ ናሁ፡ ስኢለ፡ ሰአለ፡ ሰይጣን፡ የኀንጽጽክሙ፡ ወየኀንፍጽክሙ፡ ከመ፡ ዐለስ።
32 ወአንሰ፡ ሰአልኩ፡ በእንቲኣክሙ፡ ከመ፡ ኢይድክም፡ ሃይማኖትክሙ። ወአንተኒ፡ ተመይጠከ፡ ጽንዖሙ፡ ለአኀዊከ።
33 ወይቤሎ፡ እግዚኦ፡ አንሰኬ፡ ጥቡዕ፡ ለሐዊር፡ ምስሌከ፡ ውስተ፡ ኢየሩሳሌም። እመኒ፡ ለተሞቅሖ፡ ወእመኒ፡ ለመዊት።
34 ወይቤሎ፡ እብለከ፡ ኦ፡ ጴጥሮስ፡ ዮም፡ ዘእንበለ፡ ይንቁ፡ ዶርሆ፡ ሥልሰ፡ ትክሕደኒ፡ ከመ፡ ዘኢተአምረኒ።
35 ወይቤሎሙ፡ አመ፡ ፈነውኩክሙ፡ ዘእንበለ፡ ቊናማት፡ ወጽፍነት፡ ወአሣእን። ቦኑ፡ ዘተጸነስክሙ፡ ወይቤልዎ፡ አልቦ።
36 ወይቤሎሙ፡ ይእዜሰኬ፡ ዘቦ፡ ቊናማት፡ ይንሣእ፡ ሎቱ፡ ወከማሁ፡ ዘሂ፡ ጽፍነት። ወዘሰ፡ አልቦ፡ መጥባሕት፡ ይሢጥ፡ ልብሶ፡ ወይሣየጥ፡ ሎቱ፡ መጥባሕተ።
37 እብለክሙ፡ ከመ፡ ይበጽሐኒ፡ ዘጽሑፍ፡ ወይትፌጸም፡ በላዕሌየ፡ ዘይብል። ምስለ፡ ኃጥኣን፡ ተኈለቈ፡ ወኵሉ፡ ዘበእንቲኣየ፡ ይትፌጸም።
38 ወይቤልዎ፡ እግዚኦ፡ ነዋ፡ ሀለዉ፡ ኀቤነ፡ ክልኤቱ፡ መጣብሕ፡ ዝየ። ወይቤሎሙ፡ የአክለክሙ፡ እንከሰ።
ዘከመ፡ ጸለየ፡ እግዚእ፡ ኢየሱስ፡ በደብረ፡ ዘይት
39 ወወፂኦ፡ ሖረ፡ በከመ፡ ያለምድ፡ ይጸሊ፡ ደብረ፡ ዘይት፡ ወተለውዎ፡ አርዳኢሁ።
40 ወበጺሖ፡ ህየ፡ ይቤሎሙ፡ ጸልዩ፡ ከመ፡ ኢትባኡ፡ ውስተ፡ መንሱት።
41 ወተአተተ፡ እምኔሆሙ፡ መጠነ፡ ሙጋረ፡ እብን፡ ወሰገደ፡ ወጸለየ።
42 እንዘ፡ ይብል፡ አባ፡ ለእመ፡ ትፈቅድ፡ አግሕሦ፡ ለዝንቱ፡ ጽዋዕ፡ እምኔየ። ወባሕቱ፡ ፈቃደ፡ ዚኣከ፡ ይኩን፡ ወአኮ፡ ፈቃደ፡ ዚኣየ።
43 ወአስተርአዮ፡ መልአከ፡ እግዚአብሔር፡ እምሰማይ፡ ዘይጼንዖ።
44 ወፈርሀ፡ ወአውተረ፡ ጸልዮ፡ ወኮነ፡ ሐፉ፡ ከመ፡ ነፀፍፃፈ፡ ደም፡ ዘይወርድ፡ ውስተ፡ ምድር።
45 ወተንሢኦ፡ እምኀበ፡ ይጼሊ፡ ሖረ፡ ኀበ፡ አርዳኢሁ። ወረከቦሙ፡ እንዘ፡ ይነውሙ፡ እምሐዘን።
46 ወይቤሎሙ፡ ምንትኑ፡ ያነውመክሙ፡ ተንሥኡ፡ ወጸልዩ፡ ከመ፡ ኢትባኡ፡ ውስተ፡ መንሱት።
በእንተ፡ አግብኦት፡ ዘይሁዳ፡ ወተእኅዞት፡ ዘእግዚእ፡ ኢየሱስ
47 ወእንዘ፡ ዘንተ፡ ይብሎሙ፡ በጽሑ፡ ሕዝብ። ወይሁዳ፡ አሐዱ፡ እምዐሠርቱ፡ ወክልኤቱ፡ አርዳኢሁ፡ ይመርሖሙ። ወቀርበ፡ ኀቤሁ፡ ለእግዚእ፡ ኢየሱስ፡ ወሰዐሞ፡ ወዝ፡ ውእቱ፡ ትእምርት፡ ዘወሀቦሙ። ወይቤሎሙ፡ ዘሰዐምክዎ፡ ውእቱ፡ ኪያሁ፡ አኀዙ፡ አጽኒዐክሙ።
48 ወይቤሎ፡ እግዚእ፡ ኢየሱስ፡ ለይሁዳ፡ በስዒምኑ፡ ታገብኦ፡ ለወልደ፡ ዕጓለ፡ እመሕያው። አኮኑ፡ ከመ፡ ታቅትሎ።
49 ወርእዮሙ፡ እለ፡ ምስሌሁ፡ ዘኮነ፡ ይቤልዎ፡ ለእግዚእ፡ ኢየሱስ። እግዚኦ፡ ትፈቅድኑ፡ ንዝብጦሙ፡ በመጥባሕት።
50 ወዘበጦ፡ አሐዱ፡ እምኔሆሙ፡ ለገብረ፡ ሊቀ፡ ካህናት፡ ወመተሮ፡ እዝኖ፡ ዘየማን።
51 ወአውሥአ፡ እግዚእ፡ ኢየሱስ፡ ወይቤሎ፡ ኅድግ፡ ዘንተሰ። ወገሰሶ፡ እዝኖ፡ ሶቤሃ፡ ወአሕየዎ።
52 ወይቤሎሙ፡ እግዚእ፡ ኢየሱስ፡ ለእለ፡ መጽኡ፡ ኀቤሁ። የአኀዝዎ፡ ሊቃነ፡ ካህናት፡ ወመገብተ፡ ምኵራብ፡ ወረበናት። ከመ፡ ሰራቂኑ፡ ተእኅዙኒ፡ መጻእክሙ፡ ምስለ፡ መጣብሕ፡ ወዕፀው።
53 ወእንዘ፡ ኵሎ፡ አሚረ፡ ሀለውኩ፡ ምስሌክሙ፡ በምኵራብ፡ እዴክሙ፡ ጥቀ፡ ኢሰፋሕክሙ፡ ላዕሌየ። ወባሕቱ፡ ዝንቱ፡ ውእቱ፡ ሰዓትክሙ፡ ወሥልጣኑ፡ ለመኰንነ፡ ጽልመት።
በእንተ፡ ክሕደታት፡ ዘጴጥሮስ
54 ወአኀዝዎ፡ ወወሰድዎ፡ ቤተ፡ ሊቀ፡ ካህናት፡ ወተለዎ፡ ጴጥሮስ፡ እምርሑቅ።
55 ወአንደዱ፡ እሳተ፡ ማእከለ፡ ዐጸድ፡ ወነበሩ፡ ወጴጥሮስኒ፡ ነበረ፡ ምስሌሆሙ፡ ማእከሎሙ።
56 ወርእየቶ፡ ወለት፡ እንዘ፡ ይነብር፡ መንገለ፡ በርህ፡ ወተጠየቀቶ፡ ወትቤ፡ ዝኒ፡ ምስሌሁ፡ ሀሎ።
57 ወክሕደ፡ ወይቤላ፡ ብእሲቶ፡ ኢየአምሮ፡ ለዘትብሊ።
58 ወእምድኅረ፡ ሕቅ፡ ርእዮ፡ ካልእ፡ ወይቤሎ፡ አንተሂ፡ እምኔሆሙ፡ አንተ። ወይቤሎ፡ ጴጥሮስ፡ አንተ፡ ብእሲ፡ ኢኮንኩ።
59 ወኀሊፎ፡ መጠነ፡ አሐቲ፡ ሰዓት፡ አጥወቆ፡ አሐዱ፡ ካልእ፡ እንዘ፡ ይብል። አማን፡ ዝንቱሂ፡ ምስሌሁ፡ ሀሎ፡ ወገሊላዊ፡ ውእቱ፡ ብእሲሁ።
60 ወይቤሎ፡ ጴጥሮስ፡ አንተ፡ ብእሲ፡ ኢየአምሮ፡ ለዘትብል። ወእንዘ፡ ውእቱ፡ ይትናገር፡ ዘንተ፡ ነቀወ፡ ዶርሆ፡ ሶቤሃ።
61 ወተመይጠ፡ እግዚእ፡ ኢየሱስ፡ ወነጸሮ፡ ለጴጥሮስ፡ ወተዘከረ፡ ጴጥሮስ፡ ቃሎ፡ ለእግዚእነ፡ ዘይቤሎ። ሥልሰ፡ ትክሕደኒ፡ ዮም፡ ዘእንበለ፡ ይንቁ፡ ዶርሆ።
62 ወወፂኦ፡ ጴጥሮስ፡ አፍኣ፡ በከየ፡ ብካየ፡ መሪረ።
ዘከመ፡ ተሣለቁ፡ አይሁድ፡ ላዕለ፡ እግዚእ፡ ኢየሱስ
63 ወዕደውኒ፡ እለ፡ አኀዝዎ፡ ለእግዚእ፡ ኢየሱስ፡ ኮኑ፡ ይሣለቁ፡ ላዕሌሁ፡ ወይዘብጥዎ።
64 ወይገለብብዎ፡ ወይጸፍዕዎ፡ ገጾ፡ ወይሴአልዎ፡ ወይብልዎ። ተነበይ፡ ለነ፡ መኑ፡ ውእቱ፡ ዘጸፍዐከ።
65 ወባዕደኒ፡ ብዙኀ፡ ይቤልዎ፡ እንዘ፡ ይፀርፉ፡ ላዕሌሁ።
በእንተ፡ ቀዊሞቱ፡ ለእግዚእ፡ ኢየሱስ፡ ውስተ፡ ዐውድ
66 ወጸቢሖ፡ ተጋብኡ፡ ሊቃነ፡ ካህናት፡ ወጸሐፍት፡ ወሊቃናተ፡ ሕዝብ። ወወሰድዎ፡ ውስተ፡ ዐውዶሙ።
67 ወይቤልዎ፡ እመ፡ አንተሁ፡ ክርስቶስ፡ ንግረነ፡ ገሃደ። ወይቤሎሙ፡ እመኒ፡ አይዳዕኩክሙ፡ ኢተአምኑኒ።
68 ወእመኒ፡ ተስእልኩክሙ፡ ኢትነግሩኒ፡ ወኢሂ፡ ተኀድጉኒ።
69 ወባሕቱ፡ እምይእዜሰ፡ ይነብር፡ ወልደ፡ ዕጓለ፡ እመሕያው፡ በየማነ፡ ኀይለ፡ እግዚአብሔር።
70 ወይቤልዎ፡ ኵሎሙ፡ አንተኑ፡ እንከ፡ ውእቱ፡ ወልደ፡ እግዚአብሔር።
71 ወይቤሎሙ፡ አንትሙ፡ ትብሉ፡ ከመ፡ አነ፡ ውእቱ፡ ወልደ፡ እግዚአብሔር።
72 ወይቤሉ፡ ምንተ፡ እንከ፡ ንፈቅድ፡ ሰማዕተ፡ በእንቲኣሁ፡ ናሁ፡ ለሊነ፡ ሰማዕነ፡ እምአፉሁ።
=== chapter 23 ===
[ምዕራፍ 23]
በእንተ፡ ቀዊሞተ፡ እግዚእ፡ ኢየሱስ፡ ቅድመ፡ ጲላጥስ፡ ወሄሮድስ
1 ወተንሥኡ፡ ኵሎሙ፡ በምልኦሙ፡ ወወሰድዎ፡ ኀበ፡ ጲላጦስ።
2 ወአኀዙ፡ ያስተዋድይዎ፡ ወይቤሉ፡ ረከብናሁ፡ ለዝንቱ፡ እንዘ፡ ያዐልዎሙ፡ ለሕዝብነ። ወይከልኦሙ፡ ኢየሀቡ፡ ጸባሕተ፡ ለቄሣር። ወይሬሲ፡ ርእሶ፡ ክርስቶስሃ፡ ንጉሠ፡ እስራኤል።
3 ወሐተቶ፡ ጲላጦስ፡ ወተስእሎ፡ ወይቤሎ፡ አንተኑ፡ ንጉሦሙ፡ ለአይሁድ። ወአውሥአ፡ እግዚእ፡ ኢየሱስ፡ ወይቤሎ፡ አንተ፡ ትብል፡ ከመ፡ አነ፡ ውእቱ።
4 ወይቤሎሙ፡ ጲላጦስ፡ ለሊቃነ፡ ካህናት፡ ወለሕዝብ። አልቦ፡ ዘረከብኩ፡ አበሳ፡ ላዕለ፡ ዝንቱ፡ ብእሲ።
5 ወዐውየዉ፡ ወይቤሉ፡ የሀውኮሙ፡ ለሕዝብ፡ ወይሜህር፡ በኵሉ፡ ይሁዳ፡ እኂዞ፡ እምገሊላ፡ እስከ፡ ዝየ።
6 ወሰሚዖ፡ ጲላጦስ፡ ስመ፡ ገሊላ፡ ተስእለ፡ ገሊላውያነ፡ ለእመ፡ ገሊላዊ፡ ብእሲሁ።
7 ወአእሚሮ፡ ከመ፡ እምኵናነ፡ ሄሮድስ፡ ውእቱ። ፈነዎ፡ ኀበ፡ ሄሮድስ፡ እንዘ፡ ሀሎ፡ ውእቱ፡ በኢየሩሳሌም፡ በውእቱ፡ መዋዕል።
8 ወሶበ፡ ርእዮ፡ ሄሮድስ፡ ለእግዚእ፡ ኢየሱስ፡ ተፈሥሐ፡ ፈድፋደ፡ እስመ፡ ይፈቅድ፡ ይርአዮ፡ እምጕንዱይ፡ ዕለት። እስመ፡ ይሰምዕ፡ ነገሮ፡ ወይሴፎ፡ ይርአይ፡ ተኣምረ፡ በኀቤሁ፡ ዘይገብር።
9 ወሐተቶ፡ በብዙኅ፡ ነገር፡ ወአልቦ፡ ዘተሰጥዎ፡ አሐተ፡ ቃለ።
10 ወይቀውሙ፡ ሊቃነ፡ ካህናት፡ ወጸሐፍት፡ ወብዙኀ፡ ያስተዋድይዎ።
11 ወአስተአከዮ፡ ሄሮድስ፡ ወተሣለቁ፡ ላዕሌሁ፡ ወዓልያኒሁ። ወአልበስዎ፡ ልብሰ፡ ቀይሐ፡ ወፈነዎ፡ ኀበ፡ ጲላጦስ።
12 ወይእተ፡ አሚረ፡ ተኳነኑ፡ ሄሮድስ፡ ወጲላጦስ፡ እስመ፡ ጋእዘ፡ ቦሙ፡ እምቅድም።
13 ወጸውዖሙ፡ ጲላጦስ፡ ለሊቃነ፡ ካህናት፡ ወለመኳንንተ፡ ሕዝብ።
14 ወይቤሎሙ፡ አምጻእክምዎ፡ ኀቤየ፡ ለዝንቱ፡ ብእሲ፡ ከመ፡ ዐላዌ፡ ሕዝብ። ወናሁ፡ አነ፡ ሐተትክዎ፡ በቅድሜክሙ። ወአልቦ፡ ዘረከብኩ፡ ሎቱ፡ ጌጋየ፡ ለዝንቱ፡ ብእሲ፡ እምዘአንትሙ፡ አስተዋደይክምዎ።
15 ወኀበ፡ ሄሮድስኒ፡ ፈነውክዎ፡ ወውእቱኒ፡ ፈነዎ፡ ኀቤነ፡ ወናሁ፡ አልቦ፡ ዘገብረ፡ በዘይመውት።
16 እቀሥፎኬ፡ ወእኅድጎ።
ዘከመ፡ ኀረዩ፡ በርባንሃ፡ እምነ፡ እግዚእ፡ ኢየሱስ፡ ወዘከመ፡ ኰነንዎ
17 ወቦ፡ ልማድ፡ በበዓል፡ ያሕዩ፡ ሎሙ፡ አሐደ፡ እም፡ ሙቁሓን።
18 ወዐውየዉ፡ ኵሎሙ፡ ኅቡረ፡ በምልኦሙ፡ ወይቤሉ። አእትቶ፡ ወስቅሎ፡ ለዝ፡ ወአሕዩ፡ ለነ፡ በርባንሃ።
19 ወውእቱሰ፡ በርባን፡ ዘገብረ፡ ሀከከ፡ በውስተ፡ ሀገር፡ ወበቀቲለ፡ ነፍስ፡ ተሞቅሐ።
20 ወካዕበ፡ ይቤሎሙ፡ ጲላጦስ፡ ትፈቅዱኑ፡ አሕይዎ፡ ለክሙ፡ ለኢየሱስ።
21 ወዐውየዉ፡ ወይቤሉ፡ ስቅሎ፡ ስቅሎ።
22 ወይቤሎሙ፡ ጲላጦስ፡ በሣልስ፡ ምንተ፡ እኩየ፡ ገብረ። ናሁ፡ አልቦ፡ ዘረከብኩ፡ በላዕሌሁ፡ በዘይመውት፡ እቅሥፎኬ፡ እንከሰ፡ ወአሕይዎ።
23 ወዐውየዉ፡ በዐቢይ፡ ቃል፡ ወሰአሉ፡ ወይቤሉ፡ ይስቅልዎ። ወኀየለ፡ ቃሎሙ፡ ወቃለ፡ ሊቃነ፡ ካህናት።
24 ወኰነኖ፡ ጲላጦስ፡ ከመ፡ ይኩን፡ ፈቃዶሙ። ወአሕየወ፡ ሎሙ፡ ዘሰአልዎ፡ ዘበቀቲለ፡ ነፍስ፡ ወበገቢረ፡ ሁከት፡ ተሞቅሐ።
25 ወኢየሱስሃ፡ መጠዎሙ፡ ለፈቃዶሙ።
በእንተ፡ ፍኖት፡ ዘሐዘን
26 ወሶበ፡ ወሰድዎ፡ አኀዝዎ፡ ለስምዖን፡ ቀሬናዊ፡ እትወቶ፡ እምሐቅል። ወአጾርዎ፡ መስቀል፡ ይትልዎ፡ ለኢየሱስ።
27 ወተለውዎ፡ ብዙኃን፡ ሕዝብ፡ ወአንስትኒ፡ ይበክያሁ፡ ወያስቆቅዋሁ።
28 ወተመይጦን፡ እግዚእ፡ ኢየሱስ፡ ወይቤሎን፡ አዋልደ፡ ኢየሩሳሌም፡ ኢትብክያኒ፡ ኪያየሰ። አላ፡ ብክያ፡ ላዕለ፡ ርእስክን፡ ወላዕለ፡ ውሉድክን።
29 እስመ፡ ይመጽእ፡ መዋዕል፡ አመ፡ ይብሉ። ብፁዓት፡ መካናት፡ ወከርሥኒ፡ እንተ፡ ኢወለደት፡ ወአጥባትኒ፡ እለ፡ ኢሐፀና።
30 ይእተ፡ አማረ፡ ይብልዎሙ፡ ለአድባር፡ ደቁ፡ ላዕሌነ፡ ወለአውግርኒ፡ ድፍኑነ።
31 በዝ፡ ዕፅ፡ ርጡብ፡ ከመ፡ ዝ፡ ዘገብሩ፡ እፎኑመ፡ ይከውን፡ በይቡስ።
32 ወወሰዱ፡ ምስሌሁ፡ ካልኣነ፡ ክልኤተ፡ ፈያተ፡ ይስቅሉ።
በእንተ፡ ተሰቅሎተ፡ ኢየሱስ
33 ወበጺሖሙ፡ ብሔረ፡ ዘስሙ፡ ቀራንዮ፡ በህየ፡ ሰቀልዎ። ወእልክተኒ፡ ክልኤተ፡ ፈያተ፡ አሐደ፡ በየማኑ፡ ወአሐደ፡ በጸጋሙ፡ ሰቀሉ።
34 ወይቤ፡ እግዚእ፡ ኢየሱስ፡ አባ፡ ሥረይ፡ ሎሙ፡ እስመ፡ በዘኢየአምሩ፡ ይገብሩ። ወተዐፀዉ፡ ዲበ፡ አልባሲሁ፡ ወተካፈሉ።
35 ወይቀውሙ፡ ሕዝብ፡ ወይሬእዩ፡ ወመላእክትኒ፡ ይዘነጕጕዎ፡ ወይብልዎ። ዘባዕደ፡ ያድኅን፡ ርእሶ፡ ለያድኅን፡ እመሰ፡ ክርስቶስ፡ ውእቱ፡ ወኅሩዩ፡ ለእግዚአብሔር።
36 ወይሣለቁ፡ ላዕሌሁ፡ ሐራ፡ ወይቀርቡ፡ ወአምጽኡ፡ ሎቱ፡ ብኂአ፡ ይስተይ።
37 ወይቤልዎ፡ እመሰ፡ ንጉሦሙ፡ አንተ፡ ለአይሁድ፡ አድኅን፡ ርእሰከ።
38 ወጸሐፉ፡ መጽሐፈ፡ ላዕሌሁ፡ ወጽሕፈቱ፡ በሮማይስጥ፡ ወበጽርእ፡ ወበዕብራይስጥ፡ ዘይብል። ዝንቱ፡ ውእቱ፡ ንጉሦሙ፡ ለአይሁድ።
በእንተ፡ ዘነስሐ፡ ፈያታዊ
39 ወአሐዱ፡ ፈያታዊ፡ እምእለ፡ ተሰቅሉ፡ ምስሌሁ፡ ፀረፈ፡ ወይቤሎ። እመሰ፡ አንተ፡ ክርስቶስ፡ አድኅን፡ ርእሰከ፡ ወኪያነሂ።
40 ወአውሥአ፡ ካልኡ፡ ወገሠጾ፡ ወይቤሎ። ኢትፈርሆኑ፡ ለእግዚአብሔር፡ አምላክከ፡ አንተሰ፡ ወአነ፡ እንዘ፡ ውስተ፡ ዝንቱ፡ ኵነኔ፡ ሀለውነ።
41 ወለነሰ፡ ዘበርቱዕ፡ ረከበነ፡ ዘይደልወነ፡ በከመ፡ ምግባሪነ፡ ተፈደይነ። ወዝንቱሰ፡ አልቦ፡ እኩይ፡ ዘገብረ።
42 ወይቤሎ፡ ለእግዚእ፡ ኢየሱስ፡ ተዘከረኒ፡ እግዚኦ፡ አመ፡ ትመጽእ፡ በመንግሥትከ።
43 ወአውሥአ፡ እግዚእ፡ ኢየሱስ፡ ወይቤሎ፡ አማን፡ እብለከ። እመን፡ ፈድፋደ፡ ከመ፡ ዮም፡ ትሄሎ፡ ምስሌየ፡ ውስተ፡ ገነት።
44 ወቀቲሮ፡ ጊዜ፡ ስሱ፡ ሰዓት፡ ሞተ፡ ፀሓይ፡ ወጸልመ፡ ኵሉ፡ ዓለም፡ እስከ፡ ጊዜ፡ ተሱዓት፡ ሰዓት።
45 ወጸልመ፡ ፀሓይ፡ ወተሠጠ፡ መንጦላዕተ፡ ምኵራብ፡ እምላዕሉ፡ እስከ፡ ታሕቱ።
46 ወሶቤሃ፡ ጸርሐ፡ እግዚእ፡ ኢየሱስ፡ በዐቢይ፡ ቃል፡ ወይቤ። አባ፡ ውስተ፡ እዴከ፡ አመሐፅን፡ ነፍስየ፡ ወዘንተ፡ ብሂሎ፡ መጠወ፡ ነፍሶ።
47 ወርእዮ፡ መስፍነ፡ ምእት፡ ዘኮነ፡ አእኰቶ፡ ለእግዚአብሔር፡ ወይቤ። አማን፡ ጻድቅ፡ ውእቱ፡ ዝ፡ ብእሲ።
48 ወኵሎሙ፡ ሕዝብ፡ ሶበ፡ ርእዩ፡ ዘኮነ፡ ጐድኡ፡ እንግድዓቲሆሙ፡ ወተሠውጡ፡ ወአተዉ፡ አብያቲሆሙ።
49 ወይቀውሙ፡ ኵሎሙ፡ እለ፡ የአምርዎ፡ እምርሑቅ። ወአንስትኒ፡ እለ፡ ተለዋሁ፡ እምገሊላ፡ ርእያ፡ ዘንተ።
በእንተ፡ ተቀብሮቱ፡ ለእግዚእ፡ ኢየሱስ
50 ወመጽአ፡ ብእሲ፡ ዘስሙ፡ ዮሴፍ፡ ብእሲ፡ ባዕል፡ ኄር፡ ወጻድቅ፡ ወጠቢብ።
51 ወውእቱሰ፡ ኢሀሎ፡ ውስተ፡ ምክሮሙ፡ ወምግባሮሙ፡ ለአይሁድ። ወሀገሩ፡ አርማትያስ፡ ዘእምሀገረ፡ ይሁዳ። ወኮነ፡ ይሴፈዋ፡ ውእቱኒ፡ ለመንግሥተ፡ እግዚአብሔር።
52 ወሖረ፡ ኀበ፡ ጲላጦስ፡ ወሰአለ፡ ሥጋሁ፡ ለእግዚእ፡ ኢየሱስ።
53 ወአውረደ፡ ሥጋሁ፡ ወገነዞ፡ በስንዱናት። ወቀበሮ፡ ውስተ፡ መቃብር፡ ዘአውቅረ፡ ለርእሱ፡ ዘአልቦ፡ ዘተቀብረ፡ ውስቴቱ። ወአንኰርኰረ፡ እብነ፡ ዐቢየ፡ ወአንበረ፡ ውስተ፡ አፈ፡ መቃብር፡ ወኀለፈ።
54 ወዐርብ፡ ውእቱ፡ ዕለት፡ አሜሁ፡ ለጸቢሕ፡ ሰንበት።
55 ወተለዋሁ፡ ክልኤቲ፡ አንስት፡ እለ፡ መጽኣ፡ እምገሊላ። ወርእያ፡ መቃብሮ፡ ወዘከመ፡ ተወድየ፡ ሥጋሁ።
56 ወአተዋ፡ ወአስተዳለዋ፡ አፈዋተ፡ ወኀደጋ፡ በሰንበት፡ ሐዊረ፡ እስመ፡ ከማሁ፡ ሕጎሙ።
=== chapter 24 ===
[ምዕራፍ 24]
በእንተ፡ ተንሥኦቱ፡ ለእግዚእ፡ ኢየሱስ
1 ወበእሑድ፡ ሰንበት፡ በጽባሕ፡ አሌለያ፡ ገይሠ፡ ወሖራ፡ ኀበ፡ መቃብር። ወወሰዳ፡ ውእተ፡ አፈዋተ፡ ዘአስተዳለዋ፡ ወካልኣትኒ፡ አንስት፡ ምስሌሆን።
2 ወረከባሃ፡ ለይእቲ፡ እብን፡ ኀበ፡ አንኰርኰረት፡ እምነ፡ መቃብር።
3 ወቦአ፡ ወኢረከባ፡ ሥጋሁ፡ ለእግዚእ፡ ኢየሱስ።
4 ወእንዘ፡ ያነክራ፡ ወየኀጥኣ፡ ዘይብላ፡ በእንተ፡ ዝንቱ። አስተርአይዎን፡ ክልኤቱ፡ ዕደው፡ ወቆመ፡ ኀቤሆን፡ ወይበርቅ፡ አልባሲሆሙ።
5 ወፈርሃ፡ ወአትሐታ፡ ገጾን፡ ውስተ፡ ምድር፡ ወይቤልዎን። ምንተ፡ ተኀሥሣሁ፡ ለሕያው፡ ምስለ፡ ምዉታን።
6 ተንሥኣ፡ ኢሀሎ፡ ዝየሰ።
7 ተዘከራ፡ ቃሎ፡ ዘይቤለክን፡ በገሊላ። ሀለዎ፡ ለወልደ፡ ዕጓለ፡ እመሕያው፡ ይግባእ፡ ውስተ፡ እደ፡ ሰብእ፡ ኃጥኣን። ወይሰቅልዎ፡ ወይቀትልዎ፡ ወይትነሣእ፡ በሣልስት፡ ዕለት።
8 ወተዘከራ፡ ቃሎ።
9 ወአቲዎን፡ እምኀበ፡ መቃብር፡ ነገራሆሙ፡ ዘንተ፡ ለዐሠርቱ፡ ወአሐዱ፡ ወለቢጾሙኒ፡ ኵሎሙ።
10 ወእማንቱሰ፡ ማርያም፡ መግደላዊት፡ ወዮሐና፡ ወማርያም፡ እንተ፡ ያዕቆብ። ወቢጾንሂ፡ እለ፡ ምስሌሆን፡ ነገራሆሙ፡ ዘንተ፡ ለሐዋርያት።
11 ወኮነ፡ ዝንቱ፡ ነገር፡ በቅድሜሆሙ፡ ከመ፡ ዝንጋዔ፡ ወኢአምንዎን፡ ወአክሐድዎን።
12 ወተንሥአ፡ ጴጥሮስ፡ ወሮጸ፡ ኀበ፡ መቃብር፡ ወሐወጸ፡ ወርእየ፡ መዋጥሐ፡ ባሕቲቶ፡ ንቡረ። ወአተወ፡ እንዘ፡ ያነክር፡ ዘኮነ።
በእንተ፡ አርድእት፡ ዘኤማኁስ
13 ወይእተ፡ ዕለተ፡ እንዘ፡ የሐውሩ፡ ክልኤቱ፡ እምውስቴቶሙ፡ ሀገረ። እንተ፡ ርሕቅት፡ እምኢየሩሳሌም፡ መጠነ፡ ስሳ፡ ምዕራፍ፡ እንተ፡ ስማ፡ ኤማኁስ።
14 ወይትናገሩ፡ በበይናቲሆሙ፡ በእንት፡ ኵሉ፡ ዘኮነ።
15 ወእንዘ፡ ይትናገሩ፡ ወይትኀሠሥዎ፡ ለዝንቱ፡ ቀርቦሙ፡ እግዚእ፡ ኢየሱስ፡ ወሖረ፡ ምስሌሆሙ።
16 ወተእኅዘ፡ አዕይንቲሆሙ፡ ከመ፡ ኢያእምርዎ።
17 ወይቤሎሙ፡ እግዚእነ፡ ምንትኑ፡ ዝንቱ፡ ነገር፡ ዘትትናገሩ፡ በበይናቲክሙ፡ እንዘ፡ ተሐውሩ፡ ትኩዛኒክሙ።
18 ወአውሥአ፡ አሐዱ፡ እምኔሆሙ፡ ዘስሙ፡ ቀለዮጳ፡ ወይቤሎ። አንተኑ፡ ባሕቲትከ፡ ነግድ፡ ለኢየሩሳሌም፡ ወኢያእመርከኑ፡ ዘኮነ፡ በውስቴታ፡ በዝንቱ፡ መዋዕል።
19 ወይቤሎ፡ እግዚእ፡ ኢየሱስ፡ ምንትኑ፡ ውእቱ። ወይቤልዎ፡ በእንተ፡ ኢየሱስ፡ ናዝራዊ፡ ብእሲ፡ ጻድቅ፡ ወነቢይ። ዘኮነ፡ ከሃሌ፡ በቃሉ፡ ወበምግባሩ፡ በቅድመ፡ እግዚአብሔር፡ ወበቅድመ፡ ሰብእ።
20 ወዘከመ፡ አግብእዎ፡ ሊቃነ፡ ካህናት፡ ለመኳንንት፡ ወኰነንዎ፡ ለሞት፡ ወሰቀልዎ።
21 ወንሕነሰ፡ ነአምን፡ ቦቱ፡ ከመ፡ ውእቱ፡ ሀለዎ፡ ያድኅኖሙ፡ ለእስራኤል። ወምስለ፡ ዝንቱ፡ ኵሉ፡ ሠሉስ፡ ዮም፡ እምዘኮነ፡ ዝንቱ።
22 ወቦ፡ አንስትኒ፡ እለ፡ አንከራ፡ ወነገራነ፡ ለነ፡ እለ፡ ጌሣ፡ ኀበ፡ መቃብር።
23 ወኢረከባ፡ ሥጋሁ፡ ወተሠውጣ፡ ወነገራነ፡ ከመ፡ ርእያ፡ ርእየተ፡ መላእክት። እለ፡ ይቤልዎን፡ ከመ፡ ሐይወ።
24 ወቦ፡ እለ፡ ሖሩ፡ እምኔነሂ፡ ኀበ፡ መቃብር፡ ወረከቡ፡ ከማሁ፡ በከመ፡ ይቤላ፡ አንስት። ወሎቱሰ፡ ኢረከብዎ።
25 ወይቤሎሙ፡ እግዚእ፡ ኢየሱስ፡ ኦ፡ አብዳን። ወጕንዱያነ፡ ልብ፡ ለአሚን፡ በኵሉ፡ ዘይቤሉ፡ ነቢያት።
26 አኮኑ፡ ከመ፡ ዝ፡ ሀለዎ፡ ለክርስቶስ፡ ይትቀተል፡ ወይባእ፡ ውስተ፡ ስብሐቲሁ።
27 ወአኀዘ፡ ይፈክር፡ ሎሙ፡ እምዘሙሴ፡ ወዘነቢያተ፡ ወእምኵሉ፡ መጻሕፍት፡ ዘበእንቲኣሁ።
28 ወቀርቡ፡ ሀገረ፡ ኀበ፡ የሐውሩ፡ ባቲ፡ ወአኀዘ፡ ይትራሐቆሙ፡ ወአገበርዎ፡ ወይቤልዎ። ንበር፡ ምስሌነ፡ እስመ፡ መስየ፡ ወተቈልቈለ፡ ፀሓይ።
29 ወቦአ፡ ከመ፡ ይኅድር፡ ምስሌሆሙ።
30 ወእምዝ፡ እንዘ፡ ይረፍቅ፡ ምስሌሆሙ፡ ነሥአ፡ ኅብስተ፡ ወባረከ፡ ወፈተተ፡ ወወሀቦሙ።
31 ወተከሥተ፡ አዕይንቲሆሙ፡ ወአእመርዎ፡ ወተሰወረ፡ እምኔሆሙ፡ ሶቤሃ፡ ወኀጥእዎ።
32 ወይቤሉ፡ በበይናቲሆሙ፡ አኮኑ፡ ይነድደነ፡ ልብነ፡ ወይርሕቀነ። ዘከመ፡ ይነግረነ፡ በፍኖት፡ ወይፌክር፡ ለነ፡ መጻሕፍተ።
33 ወተንሥኡ፡ ሶቤሃ፡ ይእተ፡ ሰዓተ፡ ወተሠውጡ፡ ኢየሩሳሌም። ወረከብዎሙ፡ ለዐሠርቱ፡ ወአሐዱ፡ አርዳኢሁ፡ ጉቡኣኒሆሙ፡ ወእለሂ፡ ምስሌሆሙ።
34 እንዘ፡ ይብሉ፡ አማን፡ ተንሥአ፡ እግዚእነ፡ ወአስተርአዮ፡ ለሰምዖን።
35 ወነገርዎሙ፡ እሙንቱሂ፡ ዘበፍኖት፡ ወዘከመሂ፡ አእመርዎ፡ ለእግዚእነ፡ እንዘ፡ ይፌትት፡ ኅብስተ።
36 ወእንዘ፡ ዘንተ፡ ይትናገሩ፡ ቆመ፡ ማእከሎሙ፡ እግዚእ፡ ኢየሱስ፡ ወይቤሎሙ። ሰላም፡ ለክሙ፡ ኢትፍርሁ፡ አነ፡ ውእቱ።
37 ወደንገፁ፡ ወፈርሁ፡ ወመሰሎሙ፡ ከመ፡ ዘመንፈሰ፡ ይሬእዩ።
38 ወይቤሎሙ፡ ምንትኑ፡ ያደነግፀክሙ። ወለምንት፡ የዐርግ፡ ዘከመ፡ ዝ፡ ኅሊና፡ ውስተ፡ ልብክሙ።
39 ርእዩ፡ እደውየ፡ ወእገርየ፡ ከመ፡ አነ፡ ውእቱ፡ ወግስሱኒ፡ ወአእምሩ። እስመ፡ ለመንፈስሰ፡ አልቦቱ፡ ሥጋ፡ ወዐፅም፡ በከመ፡ ትሬእዩ፡ ብየ።
40 ወዘንተ፡ ብሂሎ፡ አርአዮሙ፡ እደዊሁ፡ ወእገሪሁ።
41 ወእንዘ፡ ዓዲ፡ ኢአምኑ፡ እምድንጋፄ፡ ወእንዘ፡ ያነክሩ፡ በትፍሥሕት፡ ይቤሎሙ። ደቂቅየ፡ ቦኑ፡ ብክሙ፡ ዝየ፡ ዘንበልዕ።
42 ወወሀብዎ፡ መክፈልተ፡ ዓሣ፡ ጥቡሰ፡ ወእምጸቃውዐ፡ መዓር።
43 ወበልዐ፡ በቅድሜሆሙ፡ ወነሥአ፡ ዘተርፈ፡ ወወሀቦሙ።
44 ወይቤሎሙ፡ አኮኑ፡ ዝንቱ፡ ነገርየ፡ ዘእቤለክሙ፡ እንዘ፡ ሀለውኩ፡ ምስሌክሙ። ከመ፡ ሀለዎ፡ ይብጻሕ፡ ዘይቤ፡ ኦሪተ፡ ሙሴ፡ ወነቢያት፡ ወመዝሙር፡ በእንቲኣየ።
45 ወእምዝ፡ ከሠተ፡ ልቦሙ፡ ከመ፡ ይለብዉ፡ መጻሕፍተ፡ ወለበዉ፡ ወኮኑ፡ ከመ፡ ሰብል።
46 ወይቤሎሙ፡ ከማሁ፡ ጽሑፍ፡ ከመ፡ ይትቀተል፡ ክርስቶስ፡ ወይትነሣእ፡ እምነ፡ ምዉታን፡ በሣልስት፡ ዕለት። ወይስብኩ፡ በስመ፡ ለንስሓ፡ ወለኅድገተ፡ ኀጢአት፡ ለኵሉ፡ አሕዛብ፡ እኂዞሙ፡ እምኢየሩሳሌም።
47 ወአንትሙሰ፡ ሰማዕቱ፡ ለዝንቱ፡ ነገር።
48 ወናሁ፡ አነ፡ እፌኑ፡ ተስፋሁ፡ ለአቡየ፡ ላዕሌክሙ።
49 ወአንትሙሰ፡ ንበሩ፡ ሀገረ፡ ኢየሩሳሌም፡ እስከ፡ ትለብሱ፡ ኀይለ፡ እምአርያም።
50 ወእምዝ፡ አውፅኦሙ፡ አፍኣ፡ እስከ፡ ቢታንያ። ወአንሥአ፡ እዴሁ፡ ወአንበረ፡ ላዕሌሆሙ፡ ወባረኮሙ።
51 ወእንዘ፡ ይባርኮሙ፡ ተረሐቆሙ፡ ወዐርገ፡ ሰማየ።
52 ወእሙንቱሰ፡ ሰገዱ፡ ሎቱ፡ ወተሠውጡ፡ ኢየሩሳሌም፡ በዐቢይ፡ ፍሥሓ።
53 ወነበሩ፡ በቤተ፡ መቅደስ፡ ዘልፈ። እንዘ፡ ይባርክዎ፡ ወይሴብሕዎ፡ ለእግዚአብሔር፡ አሜን።