##### edition  (gez) — Text of the EOTC printed Bible
=== chapter 1 ===
[ምዕራፍ 1]
በእንተ፡ ስብከተ፡ ዮሐንስ
1 ቀዳሚሁ፡ ለወንጌለ፡ እግዚእነ፡ ኢየሱስ፡ ክርስቶስ። ወልደ፡ እግዚአብሔር፡ ሕያው።
2 በከመ፡ ጽሑፍ፡ ውስተ፡ መጻሕፍተ፡ ነቢያት። ናሁ፡ አነ፡ እፌኑ፡ መልአክየ፡ ቅድመ፡ ገጽከ፡ ዘይጸይሕ፡ ፍኖተከ።
3 ቃለ፡ ዐዋዲ፡ ዘይሰብክ፡ በገዳም፡ ወይብል። ጺሑአ፡ ፍኖተ፡ እግዚአብሔር፡ ወዐርዩ፡ መጽያሕቶ።
4 ወሀሎ፡ ዮሐንስ፡ ያጠምቅ፡ በገዳም፡ ወይሰብክ፡ ጥምቀተ። ከመ፡ ይነስሑ፡ ወይትኀደግ፡ ሎሙ፡ ኀጢአቶሙ።
5 ወየሐውሩ፡ ኀቤሁ፡ ኵሉ፡ ሰብአ፡ ይሁዳ፡ ወኢየሩሳሌም። ወያጠምቆሙ፡ ለኵሎሙ፡ በፈለገ፡ ዮርዳኖስ፡ እንዘ፡ ይትአመኑ፡ ኀጢአቶሙ።
6 ወልብሱ፡ ለዮሐንስ፡ ኮነ፡ ዘጸጕረ፡ ገመል። ወቅናቱ፡ ዘአዲም፡ ውስተ፡ ሐቌሁ። ወሲሳዩ፡ አንበጣ፡ ወመዓረ፡ ጸደና።
7 ወሰበከ፡ ወይቤ፡ ይመጽእ፡ እምድኅሬየ፡ ዘይጸንዕ፡ እምኔየ። ዘኢይደልወኒ፡ እድንን፡ ወእፍታሕ፡ ቶታነ፡ አሣእኒሁ፡ እምእገሪሁ።
8 ወአንሰ፡ አጠምቀክሙ፡ በማይ። ወውእቱሰ፡ ያጠምቀክሙ፡ በመንፈስ፡ ቅዱስ።
በእንተ፡ ጥምቀት፡ ወተመክሮት፡ ዘእግዚእ፡ ኢየሱስ
9 ወይእተ፡ አሚረ፡ መጽአ፡ እግዚእ፡ ኢየሱስ፡ እምናዝሬት፡ ዘገሊላ። ወአጥመቆ፡ ዮሐንስ፡ በፈለገ፡ ዮርዳኖስ።
10 ወወፂኦ፡ እማይ፡ ርእየ፡ ተሠጥቀ፡ ሰማይ። ወወረደ፡ መንፈስ፡ ቅዱስ፡ ከመ፡ ርግብ፡ ወነበረ፡ ዲቤሁ።
11 ወመጽአ፡ ቃል፡ እምሰማይ፡ ዘይብል፡ አንተ፡ ውእቱ፡ ወልድየ፡ ዘአፈቅር። ወኪያከ፡ ሠመርኩ።
12 ወአውፅኦ፡ መንፈስ፡ ሶቤሃ፡ ገዳመ።
13 ወነበረ፡ ሐቅለ፡ አርብዓ፡ መዓልተ፡ ወአርብዓ፡ ሌሊተ፡ ወያሜክሮ፡ ሰይጣን። ወነበረ፡ ምስለ፡ አራዊት፡ ወይትለአክዎ፡ መላእክት።
በእንተ፡ ዘከመ፡ አኀዘ፡ እግዚእ፡ ኢየሱስ፡ ይስብክ
ወይኅረይ፡ ቀደመተ፡ ሐዋርያተ
14 ወእምድኅረ፡ አኀዝዎ፡ ወሞቅሕዎ፡ ለዮሐንስ። መጽአ፡ እግዚእ፡ ኢየሱስ፡ ገሊላ። ወሰበከ፡ ወንጌለ፡ መንግሥተ፡ እግዚአብሔር።
15 ወይቤ፡ በጽሐ፡ ጊዜሁ፡ ወቀርበት፡ መንግሥተ፡ ሰማያት። ነስሑ፡ ወእመኑ፡ በወንጌል።
16 ወእንዘ፡ የኀልፍ፡ መንገለ፡ ባሕረ፡ ገሊላ። ረከቦሙ፡ ለስምዖን፡ ወለእንድርያስ፡ እኁሁ። እንዘ፡ ያሤግሩ፡ ውስተ፡ ባሕር። እስመ፡ መሠግራነ፡ ዓሣ፡ እሙንቱ።
17 ወይቤሎሙ፡ እግዚእ፡ ኢየሱስ፡ ንዑ፡ ትልዉኒ። ወእሬስየክሙ፡ መሠግራነ፡ ሰብእ።
18 ወኀደጉ፡ መሣግሪሆሙ፡ ወተለውዎ፡ ሶቤሃ።
19 ወኀሊፎ፡ እምህየ፡ ሕቀ። ረከቦሙ፡ ለያዕቆብ፡ ወለዮሐንስ፡ እኁሁ፡ ደቂቀ፡ ዘብዴዎስ። ወለሊሁኒ፡ ምስሌሆሙ፡ ውስተ፡ ሐመር። እንዘ፡ ይሠርዑ፡ ወያስተሣንዩ፡ መሣግሪሆሙ።
20 ወጸውዖሙ፡ በጊዜሃ፡ ወኀደጉ፡ ዘብዴዎስሃ፡ አቡሆሙ፡ ምስለ፡ ዐሳቡ፡ ውስተ፡ ሐመር። ወሖሩ፡ ወተለውዎ።
21 ወሖሩ፡ ቅፍርናሆም። ወቦአ፡ በሰንበት፡ ምኵራበ፡ ወአኀዘ፡ ይምሀሮሙ።
22 ወአንከሩ፡ ምህሮቶ፡ እስመ፡ ከመ፡ መኰንን፡ ይሜህሮሙ። ወአኮ፡ ከመ፡ ጸሐፍቶሙ።
በእንተ፡ ዘጋኔን
23 ወሀሎ፡ ብእሲ፡ ዘጋኔን፡ ውስተ፡ ምኵራብ፡ ወዐውየወ።
24 ወይቤ፡ ምንት፡ ብየ፡ ምስሌከ፡ ኢየሱስ፡ ናዝራዊ። መጻእክኑ፡ ታጥፍአነ፡ ነአምረከ፡ ከመ፡ አንተ፡ ቅዱሱ፡ ለእግዚአብሔር።
25 ወገሠጾ፡ እግዚእ፡ ኢየሱስ፡ ወይቤሎ። ተፈፀም፡ ወፃእ፡ እምኔሁ።
26 ወአስተራገፆ፡ ውእቱ፡ ጋኔን፡ እኩይ። ወዐውየወ፡ በዐቢይ፡ ቃል፡ ወወፅአ፡ እምኔሁ።
27 ወደንገፁ፡ ኵሎሙ፡ ወይቤሉ፡ በበይናቲሆሙ። ምንትኑ፡ ዝንቱ፡ ትምህርት፡ ሐዲስ። እስመ፡ በትእዛዝ፡ ይኤዝዞሙ፡ ለአጋንንት፡ ርኩሳን፡ ወይትኤዘዙ፡ ሎቱ።
28 ወተሰምዐ፡ ነገሩ፡ ውስተ፡ ኵሉ፡ በሓውርተ፡ ገሊላ።
በእንተ፡ ሐማተ፡ ጴጥሮስ
29 ወወፂኦ፡ እምኵራብ፡ ቦአ፡ ቤተ፡ ስምዖን። ወምስሌሁ፡ እንድርያስ፡ ወያዕቆብ፡ ወዮሐንስ።
30 ወሐማቱ፡ ለስምዖን፡ ትፈፅን፡ ወነገርዎ፡ በእንቲኣሃ።
31 ወቀርበ፡ ኀቤሃ፡ ወአኀዛ፡ እዴሃ፡ ወአንሥኣ። ወኀደጋ፡ ፈፀንታ፡ ሶቤሃ፡ ወተንሥአት፡ ወተልእከቶሙ።
በእንተ፡ እለ፡ ተፈወሱ፡ እምብዙኅ፡ ደዌ
32 ወመስዮ፡ ጊዜ፡ የዐርብ፡ ፀሓይ። አምጽኡ፡ ኀቤሁ፡ ኵሎ፡ ድዉያነ፡ ወእለሂ፡ እኁዛነ፡ አጋንንት።
33 ወተጋብኡ፡ ኀቤሁ፡ ኵሎሙ፡ ሰብአ፡ ሀገር፡ ኀበ፡ አንቀጽ።
34 ወፈወሶሙ፡ ለብዙኃን፡ ድዉያን፡ ወሕሙማን። ወአውፅኦሙ፡ ለብዙኃን፡ አጋንንት፡ ወኢያብሖሙ፡ ይንብቡ። እስመ፡ አእመርዎ፡ ከመ፡ ውእቱ፡ ክርስቶስ።
35 ወበጽባሕ፡ ተንሥአ፡ ወአሌለየ፡ ጥቀ። ወወፂኦ፡ ሖረ፡ ሐቅለ፡ ወጸለየ፡ በህየ።
36 ወዴገንዎ፡ ስምዖን፡ ወእለ፡ ምስሌሁ።
37 ወሶበ፡ ረከብዎ፡ ይቤልዎ፡ እንጋ፡ ኵሉ፡ ሕዝብ፡ የኀሥሡከ።
38 ወይቤሎሙ፡ ተንሥኡ፡ ንሑር፡ ካልኣተኒ፡ አህጉረ። ከመ፡ በህየኒ፡ እስብክ፡ እስመ፡ እንበይነ፡ ዝ፡ ግብር፡ መጻእኩ።
39 ወሖረ፡ ወሰበከ፡ በምኵራባቲሆሙ፡ በኵሉ፡ ገሊላ፡ ወያወፅእ፡ አጋንንተ።
በእንተ፡ ዘለምጽ
40 ወመጽአ፡ ኀቤሁ፡ ዘለምጽ፡ ወአስተብረከ፡ ወአስተብቊዖ፡ ወይቤሎ። እግዚኦ፡ እመሰ፡ ፈቀድከ፡ ትክል፡ አንጽሖትየ።
41 ወምሕሮ፡ እግዚእ፡ ኢየሱስ፡ ወሰፍሐ፡ እዴሁ፡ ወገሰሶ። ወይቤሎ፡ እፈቅድ፡ ንጻሕ።
42 ወሶበ፡ ከመ፡ ዝ፡ ይቤሎ፡ ሐይወ፡ እምለምጹ፡ ሶቤሃ።
43 ወገሠጾ፡ ወፈነዎ፡ ወይቤሎ። ዑቅ፡ ኢትንግር፡ ወኢ፡ ለመኑሂ።
44 ወሑር፡ ወአፍትን፡ ርእሰከ፡ ለካህን፡ ወአብእ፡ መባአከ፡ በእንተ፡ ዘነጻሕከ። በከመ፡ አዘዘ፡ ሙሴ፡ ከመ፡ ይኩን፡ ስምዐ፡ ላዕሌሆሙ።
45 ወወፂኦ፡ አኀዘ፡ ይስብክ፡ ወይንግር፡ ብዙኀ፡ እስከ፡ ያነክሩ፡ ኵሉ፡ ሀገር። ወስእነ፡ በዊአ፡ ሀገር፡ ክሡተ። አላ፡ አፍኣ፡ ገዳመ፡ ይነብር። ወይመጽኡ፡ ኀቤሁ፡ እምኵለሄ።
=== chapter 2 ===
[ምዕራፍ 2]
1 ወቦአ፡ ካዕበ፡ ሀገረ፡ ቅፍርናሆም፡ ወጐንድዮ፡ ሕቀ። ሰምዑ፡ ሰብእ፡ ዜናሁ፡ ከመ፡ ሀሎ፡ ውስተ፡ ቤት።
2 ወተጋብኡ፡ ኀቤሁ፡ ብዙኃን፡ ሰብእ። እስከ፡ ኢያገምሮሙ፡ መካን፡ ውስተ፡ ቤት፡ ወኢ፡ ኀበ፡ ኆኅት። ወኮነ፡ ይነግሮሙ፡ ቃሎ፡ ለእለ፡ መጽኡ፡ ኀቤሁ።
በእንተ፡ መፃጕዕ
3 ወአምጽኡ፡ ኀቤሁ፡ ድዉየ፡ ወመፃጕዐ። እንዘ፡ ይጸውርዎ፡ በዐራት፡ አርባዕቱ፡ ዕደው።
4 ወሶበ፡ ስእኑ፡ አብኦቱ፡ ኀቤሁ፡ እስመ፡ ጽፉቅ፡ ሰብእ። ኀበ፡ ሀሎ፡ እግዚእ፡ ኢየሱስ፡ ዐርጉ፡ ናሕሰ። ወነሠቱ፡ ጠፈረ፡ ወአውረድዎ፡ ምስለ፡ ዐራቱ። ዘዲቤሁ፡ ይሰክብ፡ ውእቱ፡ መፃጕዕ።
5 ወርእዮ፡ እግዚእ፡ ኢየሱስ፡ ሃይማኖቶሙ፡ ይቤሎ፡ ለውእቱ፡ መፃጕዕ። ወልድየ፡ ተኀድገ፡ ለከ፡ ኀጢአትከ።
6 ወሀለዉ፡ ህየ፡ ጸሐፍት፡ ይነብሩ፡ ወኀለዩ፡ በልቦሙ።
7 ወይቤሉ፡ ምንትኑ፡ ዝ፡ ዘከመ፡ ዝ፡ ይነብብ፡ ፅርፈተ። ወመኑ፡ ይክል፡ ኀዲገ፡ ኀጢአት፡ ዘእንበለ፡ አሐዱ፡ እግዚአብሔር።
8 ወአእመሮሙ፡ እግዚእ፡ ኢየሱስ፡ በመንፈሱ፡ ከመ፡ ከመ፡ ዝ፡ ይኄልዩ። ወይቤሎሙ፡ ለምንት፡ ከመ፡ ዝ፡ ትኄልዩ፡ በልብክሙ።
9 ምንት፡ ይቀልል፡ እምብሂሎቱ፡ ለዝ፡ መፃጕዕ። ተኀድገ፡ ለከ፡ ኀጢአትከ፡ ወእምብሂሎቱ። ተንሥእ፡ ወንሣእ፡ ዐራተከ፡ ወሑር፡ በእገሪከ።
10 ወከመ፡ ታእምሩ፡ ከመ፡ ብዉሕ፡ ሎቱ፡ ለወልደ፡ ዕጓለ፡ እመሕያው። ከመ፡ ይኅድግ፡ ኀጢአተ፡ በዲበ፡ ምድር።
11 ወካዕበ፡ ይቤሎ፡ ለውእቱ፡ ድዉይ። ለከ፡ እብለከ፡ ተንሥእ፡ ወንሣእ፡ ዐራተከ፡ ወእቱ፡ ቤተከ።
12 ወተንሥአ፡ ሶቤሃ፡ ወነሥአ፡ ዐራቶ፡ ወወፅአ፡ በቅድመ፡ ኵሉ፡ ሰብእ። ወደንገፁ፡ ኵሎሙ፡ ወአእኰትዎ፡ ለእግዚአብሔር። ወይቤሉ፡ ግሙራ፡ ኢርኢነ፡ ዘከመ፡ ዝ።
13 ወእምዝ፡ ሖረ፡ እግዚእ፡ ኢየሱስ፡ ካዕበ፡ መንገለ፡ ጽንፈ፡ ባሕር። ወሖሩ፡ ኀቤሁ፡ ኵሉ፡ ሕዝብ፡ ወመሀሮሙ።
በእንተ፡ ሌዊ፡ መጸብሓዊ
14 ወኀሊፎ፡ እምህየ፡ ርእዮ፡ ለሌዊ፡ መጸብሓዊ፡ ወልደ፡ እልፍዮስ። እንዘ፡ ይነብር፡ ኀበ፡ ምጽባሕ። ወይቤሎ፡ ነዐ፡ ትልወኒ፡ ወተንሥአ፡ ወተለዎ።
15 ወእምዝ፡ መስሐ፡ በቤቱ፡ እግዚእ፡ ኢየሱስ። ወብዙኃን፡ ኃጥኣን፡ ወመጸብሓን፡ ረፈቁ፡ ምስለ፡ እግዚእ፡ ኢየሱስ፡ ወአርዳኢሁ። እስመ፡ ብዙኃን፡ እሙንቱ፡ እለ፡ ተለውዎ።
16 ወርእዮሙ፡ ጸሐፍት፡ ወፈሪሳውያን። ከመ፡ ይበልዕ፡ ወይሰቲ፡ ምስለ፡ ኃጥኣን፡ ወመጸብሓን። ይቤልዎሙ፡ ለአርዳኢሁ። ለምንት፡ ሊቅክሙ፡ ይበልዕ፡ ወይሰቲ፡ ምስለ፡ ኃጥኣን፡ ወመጸብሓን።
17 ወሰሚዖ፡ እግዚእ፡ ኢየሱስ፡ ይቤሎሙ። ሕሙማን፡ ይፈቅድዎ፡ ለዐቃቤ፡ ሥራይ። ወአኮ፡ ጥዑያን፡ ኃጥኣነ፡ እጸውዕ፡ መጻእኩ፡ ወአኮ፡ ጻድቃነ።
በእንተ፡ ጾም፡ ዘክርስቲያን
18 ወአርዳኢሁሰ፡ ለዮሐንስ፡ ወእለሂ፡ ፈሪሳውያን፡ ኮኑ፡ ይጸውሙ። ወሖሩ፡ ወይቤልዎ፡ አርዳኢሁ፡ ለዮሐንስ። ወአርዳኢሆሙ፡ ለፈሪሳውያን፡ ይጸውሙ፡ ወአርዳኢከሰ፡ በእፎ፡ ኢይጸውሙ።
19 ወይቤሎሙ፡ እግዚእ፡ ኢየሱስ፡ ይክሉኑ፡ ደቂቁ፡ ለመርዓዊ፡ ጸዊመ። አምጣነ፡ ሀሎ፡ መርዓዊ፡ ምስሌሆሙ።
20 ወባሕቱ፡ ይበጽሕ፡ መዋዕል፡ አመ፡ ይነሥእዎ፡ ለመርዓዊ፡ እምኔሆሙ። ወይእተ፡ አሚረ፡ ይጸውሙ።
21 ወአልቦ፡ ዘይጠቅብ፡ ግምደ፡ ደርግሐ፡ ውስተ፡ ስጠተ፡ ልብስ፡ ብሉይ። ወእመ፡ አኮሰ፡ ያነቅዖ፡ ጥቅበቱ፡ ሐዲስ፡ ለብሉይ፡ ወያዐብዮ፡ ለስጠቱ።
22 ወአልቦ፡ ዘይወዲ፡ ወይነ፡ ሐዲስ፡ ውስተ፡ ዝቅ፡ ብሉይ። እስመ፡ ያነቅዖ፡ ወይን፡ ሐዲስ፡ ለዝቅ፡ ብሉይ። ወወይኑሂ፡ ይትከዐው፡ ወዝቁሂ፡ ይትሀጐል። ወለወይንሰ፡ ሐዲስ፡ ውስተ፡ ዝቅ፡ ሐዲስ። ይወድይዎ፡ ወይትዐቀቡ፡ በበይናቲሆሙ።
በእንተ፡ ሰዊት፡ ወሰንበት
23 ወእምዝ፡ ካዕበ፡ ወፈረ፡ እግዚእ፡ ኢየሱስ፡ በሰንበት። እንተ፡ ማእከለ፡ ገራውህ፡ ወአርዳኢሁኒ፡ ምስሌሁ። ወአኀዙ፡ ይምሐዉ፡ ሰዊተ፡ ወይብልዑ፡ ወይጺሑ፡ ሎቱ፡ ፍኖተ።
24 ወይቤልዎ፡ ፈሪሳውያን፡ ርኢ፡ ዘይገብሩ፡ አርዳኢከ። ዘኢይከውን፡ ገቢረ፡ በሰንበት።
25 ወይቤሎሙ፡ እግዚእ፡ ኢየሱስ፡ ግሙራ፡ ኢያንበብክሙኑ። ዘገብረ፡ ዳዊት፡ አመ፡ ርኅበ፡ ውእቱኒ፡ ወእለሂ፡ ምስሌሁ።
26 ዘከመ፡ ቦአ፡ ቤተ፡ እግዚአብሔር፡ እንዘ፡ አብያታር፡ ሊቀ፡ ካህናት። ወበልዐ፡ ኅብስተ፡ መሥዋዕት፡ ዘኢይከውኖ፡ ለበሊዕ። ዘእንበለ፡ ለካህናት፡ ለባሕቲቶሙ። ወወሀቦሙ፡ ለእለ፡ ምስሌሁ።
27 ወይቤሎሙ፡ ሰንበትሰ፡ በእንተ፡ ሰብእ፡ ተፈጥረት። ወአኮ፡ ሰብእ፡ በእንተ፡ ሰንበት።
28 ወወልደ፡ ዕጓለ፡ እመሕያው፡ ውእቱ፡ እግዚኣ፡ ለሰንበት።
=== chapter 3 ===
[ምዕራፍ 3]
በእንተ፡ ዘየብሰት፡ እዴሁ
1 ወቦአ፡ ካዕበ፡ ምኵራበ፡ በሰንበት። ወሀሎ፡ ህየ፡ ብእሲ፡ ዘየብሰት፡ እዴሁ።
2 ወይትዐቀብዎ፡ ለእመ፡ ይፌውሶ፡ በሰንበት፡ ከመ፡ ያስተዋድይዎ።
3 ወይቤሎ፡ ለውእቱ፡ ብእሲ፡ ዘፅዉስት፡ እዴሁ። ተንሥእ፡ ወቁም፡ ማእከለ።
4 ወይቤሎሙ፡ ይከውንኑ፡ በሰንበት፡ ገቢረ፡ ሠናይ፡ አው፡ ገቢረ፡ እኩይ። አሕይዎ፡ ነፍስኑ፡ ወሚመ፡ ቀቲል፡ ወአርመሙ።
5 ወነጸሮሙ፡ እግዚእ፡ ኢየሱስ፡ እንዘ፡ ይትመዐዕ። ወይቴክዝ፡ በእንተ፡ ዑረተ፡ ልቦሙ። ወእምዝ፡ ይቤሎ፡ ለውእቱ፡ ብእሲ፡ ስፋሕ፡ እዴከ። ወሰፍሐ፡ እዴሁ፡ ወሐይወት፡ ወኮነት፡ ከመ፡ ካልእታ።
6 ወወፂኦሙ፡ ፈሪሳውያን፡ ሶቤሃ፡ ምስለ፡ ሰብአ፡ ሄሮድስ። ተማከሩ፡ ከመ፡ ይቅትልዎ።
በእንተ፡ ካልኣን፡ ተኣምራት፡ ዘኢየሱስ
7 ወተግሕሠ፡ እግዚእ፡ ኢየሱስ፡ ምስለ፡ አርዳኢሁ፡ መንገለ፡ ባሕር። ወተለውዎ፡ ብዙኃን፡ ጥቀ፡ እምገሊላ፡ ወእምይሁዳ።
8 ወእምኢየሩሳሌም፡ ወእምኤዶምያስ፡ ወእማዕዶተ፡ ዮርዳኖስ። ወእምጢሮስ፡ ወእምሲዶና። ወብዙኃን፡ ጥቀ፡ መጽኡ፡ ኀቤሁ፡ ሰሚዖሙ፡ ኵሎ፡ ዘገብረ።
9 ወይቤሎሙ፡ ለአርዳኢሁ፡ ያጽንሑ፡ ሎቱ፡ ሐመረ። ከመ፡ ኢይትጋፍዕዎ፡ ሰብእ።
10 እስመ፡ ለብዙኃን፡ አሕየዎሙ፡ ወኮኑ፡ ይትጋፍዕዎ። እስከ፡ ይወድቁ፡ ዲቤሁ፡ ወያስተብቊዕዎ። ከመ፡ ይግስስዎ፡ ኵሎሙ፡ ሕሙማን።
11 ወእለሂ፡ እኁዛነ፡ አጋንንት፡ ርኩሳን፡ እምከመ፡ ርእይዎ። ይሰግዱ፡ ሎቱ፡ እንዘ፡ ይጸርሑ፡ ወይብሉ። አንተ፡ ውእቱ፡ ወልደ፡ እግዚአብሔር።
12 ወኮነ፡ ብዙኀ፡ ይጌሥጾሙ፡ ከመ፡ ኢያግህድዎ።
በእንተ፡ ኅርየቶሙ፡ ለሐዋርያት
13 ወዐርገ፡ ደብረ፡ ወጸውዐ፡ እለ፡ ፈቀደ፡ ወመጽኡ፡ ኀቤሁ።
14 ወኀረየ፡ ዐሠርተ፡ ወክልኤተ፡ ወሰመዮሙ፡ ሐዋርያተ። ወረሰዮሙ፡ ከመ፡ የሀልዉ፡ ምስሌሁ፡ ወፈነዎሙ፡ ይስብኩ።
15 ወአብሖሙ፡ ያውፅኡ፡ አጋንንተ፡ ወይፈውሱ፡ ድዉያነ።
16 ወሰመዮሙ፡ በበ፡ አስማቲሆሙ፡ ወሰመዮ፡ ለስምዖን፡ ጴጥሮስ።
17 ወለያዕቆብ፡ ወልደ፡ ዘብዴዎስ፡ ወለዮሐንስ፡ እኁሁ። ሰመዮሙ፡ በአኔርጌስ፡ ደቂቀ፡ ነጐድጓድ፡ ብሂል።
18 ወእንድርያስ፡ ወፊልጶስ፡ ወበርተሎሜዎስ፡ ወማቴዎስ፡ ወቶማስ። ወያዕቆብ፡ ወልደ፡ እልፍዮስ፡ ወታዴዎስ፡ ወስምዖን፡ ቀነናዊ።
19 ወይሁዳ፡ አስቆሮታዊ፡ ዘአግብኦ።
20 ወበዊኦ፡ ቤተ፡ መጽኡ፡ ካዕበ፡ አሕዛብ፡ ብዙኃን። እስከ፡ ኢያበውእዎ፡ ይብላዕ፡ እክለ።
ዘከመ፡ አስተዋደይዎ፡ ከመ፡ ያውፅእ፡ አጋንንተ፡ በብዔል፡ ዜቡል
21 ወሰሚዖሙ፡ አዝማዲሁ፡ መጽኡ፡ የአኀዝዎ። እስመ፡ ስሕወ፡ ልቡ፡ ይቤልዎሙ።
22 ወጸሐፍትኒ፡ እለ፡ ወረዱ፡ እምኢየሩሳሌም፡ ይቤሉ። ብዔል፡ ዜቡል፡ አኀዞ፡ ወበመልአኮሙ፡ ለአጋንንት፡ ያወፅኦሙ፡ ለአጋንንት።
23 ወጸውዖሙ፡ እግዚእ፡ ኢየሱስ፡ ወመሰለ፡ ሎሙ፡ ወይቤሎሙ። እፎ፡ ይክል፡ ሰይጣን፡ ለሰይጣን፡ አውፅኦቶ።
24 ወመንግሥትኒ፡ ዘበበይናቲሃ፡ ትትናፈቅ፡ ኢትቀውም፡ ይእቲ፡ መንግሥት።
25 ወእመኒ፡ ቤት፡ ተናፈቀት፡ በበይናቲሃ፡ ኢትቀውም፡ ይእቲ፡ ቤት።
26 ወሰይጣንሂ፡ ለእመ፡ ተንሥአ፡ በበይናቲሁ፡ ወተናፈቀ። ወኢይቀውም፡ አላ፡ ማኅለቅተ፡ ይረክብ።
27 ወአልቦ፡ ዘይክል፡ በዊአ፡ ቤተ፡ ኀያል፡ ወበርብሮተ፡ ንዋዩ። ለእመ፡ ኢቀደመ፡ አሲሮቶ፡ ለኀያል፡ ወእምዝ፡ ይበረብር፡ ቤቶ።
28 አማን፡ እብለክሙ፡ ኵሉ፡ ኀጢአት፡ ወፅርፈት፡ ይትኀደግ፡ ለዕጓለ፡ እመሕያው።
29 ወዘሰ፡ ፀረፈ፡ ዲበ፡ መንፈስ፡ ቅዱስ፡ ኢይትኀደግ፡ ሎቱ፡ ለዓለም። ወይትኴነን፡ በደይን፡ ለዝሉፉ።
30 እስመ፡ ይቤሉ፡ ጋኔን፡ ርኩስ፡ አኀዞ።
31 ወመጽኡ፡ እሙ፡ ወአኀዊሁ፡ ወቆሙ፡ አፍኣ። ወለአኩ፡ ኀቤሁ፡ ይጸውዕዎ።
32 ወይነብሩ፡ ሰብእ፡ ብዙኃን፡ ምስሌሁ፡ ወይቤልዎ። ነዮሙ፡ እምከኒ፡ ወአኀዊከኒ፡ አፍኣ፡ ይቀውሙ፡ ወየኀሥሡከ።
33 ወአውሥአ፡ ወይቤሎሙ፡ መኑ፡ ይእቲ፡ እምየ። ወእለ፡ መኑ፡ እሙንቱ፡ አኀውየ።
34 ወነጸሮሙ፡ ለእለ፡ ይነብሩ፡ ዐውዶ፡ ወይቤ። ነዮሙ፡ እምየኒ፡ ወአኀውየኒ።
35 እስመ፡ ኵሉ፡ ዘይገብር፡ ፈቃዶ፡ ለእግዚአብሔር። ውእቱ፡ እኁየኒ፡ ወእኅትየኒ፡ ወእምየኒ።
=== chapter 4 ===
[ምዕራፍ 4]
1 ወአኀዘ፡ ካዕበ፡ ይምሀሮሙ፡ ለአሕዛብ፡ እንተ፡ መንገለ፡ ባሕር። ወተጋብኡ፡ ኀቤሁ፡ ብዙኃን፡ ሰብእ። እስከ፡ ሶበ፡ የዐርግ፡ ውስተ፡ ሐመር፡ ወይነብር። ወኵሉ፡ ሰብእ፡ ውስተ፡ ምድር፡ ይቀውሙ።
በእንተ፡ ምሳሌ፡ ዘይዘርዕ
2 ወመሀሮሙ፡ ወመሰለ፡ ሎሙ፡ ብዙኀ።
3 ወይቤሎሙ፡ እንዘ፡ ይሜህሮሙ። ስምዑ፡ ወፈረ፡ ዘይዘርዕ፡ ይዝራዕ።
4 ወእንዘ፡ ይዘርዕ፡ ቦ፡ ዘወድቀ፡ ውስተ፡ ፍኖት፡ ወመጽኡ፡ አዕዋፍ፡ ወበልዕዎ።
5 ወቦ፡ ዘወድቀ፡ ውስተ፡ ኰኵሕ፡ ኀበ፡ አልቦ፡ መሬት፡ ብዙኅ። ወፍጡነ፡ በቈለ፡ እስመ፡ አልቦ፡ ዕመቅ፡ ለመሬቱ።
6 ወሠሪቆ፡ ፀሓይ፡ አውዐዮ፡ እስመ፡ ኢኮነ፡ ዕሙቀ፡ መሬቱ። ወአልቦ፡ ሥርው፡ የብሰ።
7 ወቦ፡ ዘወድቀ፡ ውስተ፡ ሦክ። ወሐነቆ፡ ሦክ፡ ወኢፈርየ።
8 ወቦ፡ ዘወድቀ፡ ውስተ፡ ምድር፡ ሠናይት። ወበቈለ፡ ወልህቀ፡ ወፈረየ፡ ወወሀበ፡ ፍሬ። ቦ፡ ዘሠላሳ፡ ወቦ፡ ዘስሳ፡ ወቦ፡ ዘምእት።
9 ወይቤሎሙ፡ ዘቦ፡ እዝን፡ ሰሚዐ፡ ለይስማዕ።
10 ወእምዝ፡ በባሕቲቶሙ፡ ተስእልዎ፡ እሊኣሁ። ምስለ፡ ዐሠርቱ፡ ወክልኤቱ፡ አርዳኢሁ፡ ምሳሌሁ።
11 ወይቤሎሙ፡ እግዚእ፡ ኢየሱስ። ለክሙ፡ ተውህበ፡ ታእምሩ፡ ምሥጢራ፡ ለመንግሥተ፡ እግዚአብሔር። ወለእለ፡ አፍኣሰ፡ በምሳሌ፡ ኵሉ፡ ይከውኖሙ።
12 ከመ፡ ርእየ፡ ይርአዩ፡ ወኢያእምሩ፡ ወሰሚዐ፡ ይሰምዑ። ወኢይሌብዉ፡ ከመ፡ ኢይነስሑ፡ ወኢይሣሀሎሙ። ወኢይትኀደግ፡ ሎሙ፡ ኀጢአቶሙ።
13 ወይቤሎሙ፡ ኢተአምሩኑ፡ ዛተ፡ ምሳሌ። እፎ፡ እንከ፡ ተአምሩ፡ ኵሎ፡ አምሳለ።
14 ዘይዘርዕሰ፡ ቃለ፡ እግዚአብሔር፡ ይዘርዕ።
15 ወእሉ፡ እሙንቱ፡ እለ፡ ውስተ፡ ፍኖት፡ ኀበ፡ ተዘርዐ፡ ቃል። ወእምከመ፡ ሰምዑ፡ ቃለ፡ ይመጽእ፡ ሰይጣን፡ ሶቤሃ። ወይነሥእ፡ እምልቦሙ፡ ቃለ፡ ዘተዘርዐ።
16 ወእሉ፡ ካዕበ፡ እሙንቱ፡ ዘውስተ፡ ኰኵሕ፡ ተዘርዑ። እለ፡ ይሰምዑ፡ ቃለ፡ ወይትዌከፍዎ፡ ሶቤሃ፡ በፍሥሓ።
17 ወአልቦሙ፡ ሥርው፡ ለጊዜሃ። ዳእሙ፡ እሙንቱ፡ ወእምከመሰ፡ ኮነ፡ ምንዳቤ፡ ወስደት። በእንተ፡ ዝ፡ ቃል፡ የዐልዉ፡ ሶቤሃ።
18 ወእሉ፡ እሙንቱ፡ እለ፡ ውስተ፡ ሦክ፡ ተዘርዑ፡ እለ፡ ይሰምዕዎ፡ ለቃል።
19 ወኅሊና፡ ዝንቱ፡ ዓለም፡ ወፍትወተ፡ ብዕል፡ ወባዕደኒ፡ ኵሉ፡ ፍትወት። ይበውኡ፡ ወየሐንቅዎ፡ ለቃል፡ ወኢይፈሪ።
20 ወእሉ፡ እሙንቱ፡ እለ፡ ውስተ፡ ምድር፡ ሠናይት። ተዘርዑ፡ እለ፡ ይሰምዑ፡ ቃለ፡ ወይትዌከፍዎ። ወይፈርዩ፡ አሐዱ፡ በሠላሳ፡ ወአሐዱ፡ በስሳ፡ ወአሐዱ፡ በምእት።
21 ወይቤሎሙ፡ ቦኑ፡ የኀትዉ፡ ማኅቶተ። ከመ፡ ያንብርዋ፡ ታሕተ፡ ከፈር፡ አው፡ ታሕተ፡ ዐራት። አላ፡ ከመ፡ ያንብርዋ፡ ዲበ፡ ተቅዋማ።
22 ወአልቦ፡ ኅቡእ፡ ዘኢይትከበት፡ ወአልቦ፡ ክዱን፡ ዘኢይትከሠት።
23 ዘቦ፡ እዝን፡ ሰሚዐ፡ ለይስማዕ።
24 ወይቤሎሙ፡ ለብዉ፡ ዘትሰምዑ። በውእቱ፡ መስፈርት፡ ዘሰፈርክሙ፡ ይሰፍሩ፡ ለክሙ፡ ወይዌስኩክሙ።
25 እስመ፡ ለዘቦ፡ ይሁብዎ፡ ወይዌስክዎ። ወለዘሰ፡ አልቦ፡ እለሂ፡ ቦ፡ የኀይድዎ።
በእንተ፡ ዘርዕ፡ ወማእረር
26 ወይቤሎሙ፡ ከመ፡ ዝ፡ ይእቲ፡ መንግሥተ፡ ሰማያት። ከመ፡ ብእሲ፡ ዘዘርዐ፡ ሠናየ፡ ዘርዐ፡ ውስተ፡ ገራህቱ።
27 ወነዊሞ፡ ይትነሣእ፡ መዓልተ፡ ወሌሊተ፡ ወይዋሕዮ። ወዘርዑ፡ ይፈሪ፡ የዐቢ፡ ወይልህቅ።
28 ወውእቱሰ፡ የአምር፡ ከመ፡ ባሕቲታ፡ ምድር፡ ትሁብ፡ ፍሬሃ፡ ቀዳማዌ፡ ሣዕረ። ወእምዝ፡ ሰብለ፡ ወእምሰብሉ፡ ይመልእ፡ ፍጹመ፡ ሥርናየ።
29 ወእምዝ፡ ሶበ፡ ፈጸመ፡ ፈርዮተ። ሶቤሃ፡ ይፌኑ፡ ማዕጸደ፡ እስመ፡ በጽሐ፡ ማእረር።
በእንተ፡ ኅጠተ፡ ሰናፔ
30 ወይቤ፡ በምንት፡ አስተማስላ፡ ለመንግሥተ፡ እግዚአብሔር። ወምንተ፡ ትመስል።
31 ከመ፡ ኅጠተ፡ ስናፔ፡ እንተ፡ ተዘርዐት፡ ውስተ፡ ምድር። ወትንእስ፡ እምኵሉ፡ አዝርዕት፡ ዘውስተ፡ ምድር።
32 ወእምከመ፡ ዘርዕዋ፡ ትበቊል። ወተዐቢ፡ እምኵሎን፡ አሕማላት። ወትገብር፡ አዕፁቀ፡ ዐበይተ፡ እስከ፡ ይክሉ፡ አዕዋፈ፡ ሰማይ። አጽልሎ፡ ታሕተ፡ አዕፁቂሃ።
33 ወበዘከመ፡ ዝ፡ አምሳል፡ ተናገሮሙ፡ ቃሎ፡ በአምጣነ፡ ይክሉ፡ ሰሚዐ።
34 ወዘእንበለ፡ ምሳሌሰ፡ ኢተናገሮሙ። ወበባሕቲቶሙ፡ ይፌክር፡ ለአርዳኢሁ፡ ኵሎ።
35 ወይእተ፡ አሚረ፡ መስዮ፡ ይቤሎሙ፡ ለአርዳኢሁ፡ ንዕዱ፡ ማዕዶተ።
36 ወኀደጎሙ፡ ለሕዝብ፡ ወነሥእዎ፡ በሐመር። ወቦ፡ ካልኣትኒ፡ አሕማር፡ ምስሌሆሙ።
37 ወመጽአ፡ ዐውሎ፡ ዐቢይ፡ ነፋስ። ወይሰወጥ፡ ማይ፡ እሞገድ፡ ውስተ፡ ሐመር። እስከ፡ መልአ፡ ማይ፡ ውስተ፡ ሐመር።
38 ወውእቱሰ፡ መንገለ፡ ከዋላ፡ ሐመር፡ ተተርኢሶ፡ ኖመ። ወአንቅህዎ፡ ወይቤልዎ፡ ሊቅ፡ ኢያሐዝነከኑ፡ እንዘ፡ ንመውት።
በእንተ፡ ዘከመ፡ ገሠጻ፡ ለባሕር
39 ወተንሥአ፡ ወገሠጾሙ፡ ለነፋሳት፡ ወይቤላ፡ ለባሕር፡ ተፈጸሚ፡ ወአርምሚ። ወኀደገ፡ ነፋስ፡ ወኮነ፡ ዛኅነ፡ ዐቢየ።
40 ወይቤሎሙ፡ ምንትኑ፡ ያፈርሀክሙ፡ ኦ፡ ድኩማን። ከመ፡ ዝኑ፡ አልብክሙ፡ ሃይማኖት።
41 ወፈርሁ፡ ዐቢየ፡ ፍርሀተ፡ ወተባሀሉ፡ በበይናቲሆሙ። መኑ፡ እንጋ፡ ውእቱ፡ ዝንቱ፡ ዘይትኤዘዙ፡ ሎቱ፡ ባሕርኒ፡ ወነፋሳትኒ።
=== chapter 5 ===
[ምዕራፍ 5]
በእንተ፡ ሌጌዎን
1 ወበጺሖሙ፡ ማዕዶተ፡ ባሕር፡ ኀበ፡ ብሔረ፡ ጌርጌሴኖን።
2 ወወሪዶ፡ እምሐመር፡ ተቀበሎ፡ ሶቤሃ፡ ብእሲ። ዘእኩይ፡ ጋኔን፡ ላዕሌሁ፡ ወፂኦ፡ እመቃብር።
3 ወይነብር፡ ውስተ፡ መቃብር፡ ወስእንዎ፡ አጽንዖቶ፡ በመዋቅሕትኒ። እንዘ፡ ዘልፈ፡ ይሞቅሕዎ፡ ወአልቦ፡ ዘይክል፡ አድክሞቶ።
4 እስመ፡ መዋቅሕተኒ፡ ይሰብር፡ ወሰናስለኒ፡ ይቀጠቅጥ፡ ወየዐቅብዎ፡ ደቅ።
5 ወዘልፈ፡ የዐውዩ፡ መዓልተ፡ ወሌሊተ፡ በውስተ፡ መቃብር። ወበውስተ፡ አድባር፡ ወይጌምድ፡ ሥጋሁ፡ በእብን።
6 ወሶበ፡ ርእዮ፡ ለእግዚእ፡ ኢየሱስ፡ እምርሑቅ። ሮጸ፡ ወሰገደ፡ ሎቱ።
7 ወጸርሐ፡ በዐቢይ፡ ቃል፡ ወይቤ። ምንት፡ ብየ፡ ምስሌከ፡ ኢየሱስ፡ ወልደ፡ እግዚአብሔር፡ ልዑል። አምሕለከ፡ በእግዚአብሔር፡ ሕያው፡ ከመ፡ ኢትሣቅየኒ።
8 እስመ፡ ይቤሎ፡ ለውእቱ፡ ጋኔን፡ እኩይ። ፃእ፡ እምላዕሌሁ።
9 ወተስእሎ፡ እግዚእ፡ ኢየሱስ፡ ወይቤሎ፡ መኑ፡ ስምከ። ወይቤሎ፡ ውእቱ፡ ጋኔን፡ ሌጌዎን፡ ስምየ፡ እስመ፡ ብዙኃን፡ ንሕነ።
10 ወአስተብቊዖ፡ ብዙኀ፡ ከመ፡ ኢይስድዶ፡ አፍኣ፡ እምብሔር።
11 ወቦ፡ ህየ፡ መራዕየ፡ አሕርው፡ ብዙኅ፡ ይትረዐይ፡ መንገለ፡ ደብር።
12 ወአስተብቊዕዎ፡ ብዙኅ፡ እሉ፡ አጋንንት፡ ወይቤልዎ። እመሰ፡ ታወፅአነ፡ ፈንወነ፡ ውስተ፡ አሕርው፡ ከመ፡ ንባእ፡ ላዕሌሆሙ።
13 ወአብሖሙ፡ እግዚእ፡ ኢየሱስ፡ ወወፂኦሙ፡ እሙንቱ፡ አጋንንት። ቦኡ፡ ላዕለ፡ አሕርው፡ ወአብዱ፡ እሙንቱ፡ መራዕይ። ወጸድፉ፡ ውስተ፡ ባሕር፡ ወኮኑ፡ መጠነ፡ ዕሥራ፡ ምእት። ወሞቱ፡ በውስተ፡ ባሕር።
14 ወጐዩ፡ ኖሎት፡ ወዜነዉ፡ ለአህጉር፡ ወለአዕጻዳት። ወወፅኡ፡ ይርአዩ፡ ዘኮነ።
15 ወመጽኡ፡ ኀበ፡ እግዚእ፡ ኢየሱስ፡ ወረከብዎ፡ ለዘጋኔን፡ አኀዞ። እንዘ፡ ይነብር፡ ዳኅነ፡ ወልቡ፡ ገብኦ፡ ወልቡሰ፡ ልብሶ። ዝኩ፡ ዘአኀዞ፡ ሌጌዎን፡ ወፈርሁ።
16 ወዜነውዎሙ፡ እለ፡ ርእዩ፡ ዘከመ፡ ኮነ፡ ዘጋኔን፡ ወዘበእንተ፡ አሕርው።
17 ወአኀዙ፡ ያስተብቊዕዎ፡ ከመ፡ ይፃእ፡ እምደወሎሙ።
18 ወዐሪጎ፡ ሐመረ፡ አስተብቊዖ፡ ውእቱ፡ ዘጋኔን፡ ይሑር፡ ምስሌሁ።
19 ወከልኦ፡ እግዚእ፡ ኢየሱስ፡ ወይቤሎ። ሑር፡ ቤተከ፡ ኀበ፡ እሊኣከ። ወንግር፡ ኵሎ፡ ዘገብረ፡ ለከ፡ እግዚአብሔር፡ ወተሣሀለከ።
20 ወሖረ፡ ወአኀዘ፡ ይስብክ፡ በዐሥሩ፡ አህጉር። ኵሎ፡ ዘገብረ፡ ሎቱ፡ እግዚእ፡ ኢየሱስ፡ ወአንከሩ፡ ኵሎሙ።
21 ወካዕበ፡ ዐደወ፡ እግዚእ፡ ኢየሱስ፡ በሐመር፡ ማዕዶተ። ወተጋብኡ፡ ብዙኅ፡ ሰብእ፡ ኀቤሁ፡ በኀበ፡ ሐይቀ፡ ባሕር።
በእንተ፡ ወለተ፡ መጋቤ፡ ምኵራብ
22 ወመጽአ፡ ኀቤሁ፡ አሐዱ፡ ብእሲ፡ መጋቤ፡ ምኵራብ፡ ዘስሙ፡ ኢያኢሮስ። ወርእዮ፡ ሰገደ፡ ሎቱ፡ ታሕተ፡ እገሪሁ።
23 ወብዙኀ፡ አስተብቊዖ፡ ወይቤ፡ ወለትየ፡ አልጸቀት፡ ትሙት። ወባሕቱ፡ ነዐ፡ ደይ፡ እዴከ፡ ላዕሌሃ፡ ወተሐዩ።
24 ወሖረ፡ እግዚእ፡ ኢየሱስ፡ ምስሌሁ፡ ወተለውዎ፡ ብዙኃን፡ ሰብእ፡ ወይትጋፍዕዎ።
በእንተ፡ እንተ፡ ይውሕዛ፡ ደም
25 ወመጽአት፡ ብእሲት፡ እንተ፡ ደም፡ ይውሕዛ፡ እምዐሠርቱ፡ ወክልኤቱ፡ ክረምት።
26 ወብዙኀ፡ አሕመምዋ፡ ብዙኃን፡ ዐቀብተ፡ ሥራይ። እንዘ፡ ይፌውስዋ፡ ወአስተዋፅአት፡ ኵሎ፡ ንዋያ፡ ወአኅለቀት። ወአልቦ፡ ዘበቊዐ፡ ዘእንበለ፡ ዳእሙ፡ ዘአልሐማ፡ ፈድፋደ።
27 ወሰሚዓ፡ በእንተ፡ እግዚእ፡ ኢየሱስ፡ መጽአት፡ ወቦአት፡ ማእከለ፡ ሰብእ። ወገሰሰት፡ ጽንፈ፡ ልብሱ፡ እንተ፡ ድኅሬሁ።
28 እንዘ፡ ትብል፡ እምከመ፡ ገሰስኩ፡ ጽንፈ፡ ልብሱ፡ አሐዩ።
29 ወሶቤሃ፡ ነፅፈ፡ ነቅዐ፡ ደማ፡ ወአንከረት፡ ርእሳ። ከመ፡ ሐይወት፡ እምደዌሃ።
30 ወአእመረ፡ እግዚእ፡ ኢየሱስ፡ ሶቤሃ፡ ከመ፡ ወፅአ፡ ኀይል፡ እምኔሁ። ወተመይጦ፡ ኀበ፡ ሰብአ፡ ይቤሎሙ፡ መኑ፡ ገሰሰኒ፡ ጽንፈ፡ ልብስየ።
31 ወይቤልዎ፡ አርዳኢሁ፡ ኢትሬኢኑ፡ ሰብእ፡ እንዘ፡ ይትጋፍዐከ። አንተሰ፡ ትብል፡ መኑ፡ ገሰሰኒ፡ ልብስየ።
32 ወተመይጠ፡ ከመ፡ ይርአይ፡ ዘገብረ፡ ዘንተ።
33 ወፈርሀት፡ ይእቲ፡ ብእሲት፡ ወርዕደት፡ ጥቀ። እስመ፡ አእመረት፡ ዘኮነ፡ ላዕሌሃ፡ ወመጽአት፡ ኀበ፡ እግዚእ፡ ኢየሱስ። ወሰገደት፡ ሎቱ፡ ወነገረቶ፡ ኵሎ፡ ጽድቀ።
34 ወይቤላ፡ ወለትየ፡ ሃይማኖትኪ፡ አሕየወተኪ። እትዊ፡ በሰላም፡ ወሕየዊ፡ እምደዌኪ።
35 ወእንዘ፡ ይትናገር፡ ምስሌሃ፡ መጽኡ፡ ሰብእ፡ ኀበ፡ መጋቤ፡ ምኵራብ። ወይቤልዎ፡ ወለትከሰ፡ ሞተት፡ ወኢታጻምዎ፡ እንከ፡ ለሊቅ።
36 ወሰሚዖ፡ እግዚእ፡ ኢየሱስ፡ እንዘ፡ ይትናገርዎ። ይቤሎ፡ ለመጋቤ፡ ምኵራብ፡ ኢትፍራህ፡ ተአመን፡ ዳእሙ።
37 ወከልአ፡ ከመ፡ አልቦ፡ ዘይተልዎ፡ ዘእንበለ፡ ጴጥሮስ። ወያዕቆብ፡ ወዮሐንስ፡ እኁሁ፡ ለያዕቆብ።
38 ወቦአ፡ ቤቶ፡ ለመጋቤ፡ ምኵራብ። ወረከቦሙ፡ እንዘ፡ ይትሀወኩ፡ ወይበክዩ፡ ወየዐወይዉ፡ ብዙኀ።
39 ወቦአ፡ ወይቤሎሙ፡ ለምንት፡ ትትሀወኩ፡ ወትበክዩ። ሕፃንሰ፡ ኢሞተት፡ አላ፡ ትነውም፡ ወሠሐቅዎ።
40 ወእምዝ፡ ሰደደ፡ ኵሎ። ወነሥኦሙ፡ ለአቡሃ፡ ወለእማ፡ ለሕፃን፡ ወእለ፡ ምስሌሆሙ። ወቦአ፡ ኀበ፡ ሀለወት፡ ሕፃን።
41 ወአኀዛ፡ እዴሃ፡ ለሕፃን፡ ወይቤላ። ጣቢታ፡ ቁሚ፡ ተንሥኢ፡ ወለትየ፡ ብሂል፡ በትርጓሜሁ።
42 ወተንሥአት፡ ሶቤሃ፡ ይእቲ፡ ወለት፡ ወአንሶሰወት። ወዐሠርቱ፡ ወክልኤቱ፡ ክረምታ። ወደንገፁ፡ ሶቤሃ፡ ዐቢየ፡ ድንጋፄ።
43 ወገሠጾሙ፡ ለአቡሃ፡ ወለእማ፡ ብዙኀ፡ ከመ፡ አልቦ፡ ዘየአምር፡ ዘንተ። ወአዘዘ፡ የሀብዋ፡ ዘትበልዕ።
=== chapter 6 ===
[ምዕራፍ 6]
ዘከመ፡ ሰበከ፡ እግዚእ፡ ኢየሱስ፡ በናዝሬት
1 ወወፂኦ፡ እግዚእ፡ ኢየሱስ፡ እምህየ፡ ቦአ፡ ሀገሮ፡ ወተለውዎ፡ አርዳኢሁ።
2 ወበሰንበት፡ መሀሮሙ፡ በምኵራብ፡ ወብዙኃን፡ ያጸምእዎ፡ ወያነክሩ። እንዘ፡ ይብሉ፡ እምአይቴ፡ ሎቱ፡ ዝንቱ፡ ኵሉ፡ ትምህርት። ወምንትኑ፡ ዛቲ፡ ጥበብ፡ እንተ፡ ተውህበት፡ ሎቱ። ወዝኒ፡ ኀይል፡ ዘይትገበር፡ በእደዊሁ።
3 አኮኑ፡ ዝንቱ፡ ውእቱ፡ ወልዱ፡ ለጸራቢ፡ ወወልደ፡ ማርያም። ወአኀዊሁኒ፡ ያዕቆብ፡ ወዮሳ፡ ወይሁዳ፡ ወስምዖን። ወአኮኑ፡ አኀቲሁኒ፡ ሀለዋ፡ ዝየ፡ ኀቤነ። ወተዐቅፉ፡ በእንቲኣሁ።
4 ወይቤሎሙ፡ እግዚእ፡ ኢየሱስ፡ ኢኮነ፡ ምኑነ፡ ነቢይ። ዘእንበለ፡ በሀገሩ፡ ወበቤቱ፡ ወበኀበ፡ አዝማዲሁ።
5 ወኢገብረ፡ ኀይለ፡ በህየ፡ ዘእንበለ፡ ኅዳጣን፡ ድዉያን። እለ፡ አንበረ፡ እዴሁ፡ ዲቤሆሙ፡ ወአሕየዎሙ።
6 ወአንከረ፡ ኢ፡ አሚኖቶሙ፡ ወአንሶሰወ፡ እግዚእ፡ ኢየሱስ። ውስተ፡ አህጉረ፡ አድያም፡ እንዘ፡ ይሜህር።
በእንተ፡ ዘከመ፡ ፈነዎሙ፡ ለሐዋርያት፡ ይስብኩ
7 ወጸውዖሙ፡ ለዐሠርቱ፡ ወክልኤቱ፡ ሐዋርያት፡ ወፈነዎሙ፡ በበ፡ ክልኤቱ። ወአብሖሙ፡ ላዕለ፡ አጋንንት፡ እኩያን።
8 ወአዘዞሙ፡ ከመ፡ አልቦ፡ ዘይሰንቁ፡ ለፍኖት። ወኢይንሥኡ፡ ዘእንበለ፡ በትር፡ ባሕቲታ። ወኢ፡ ኅብስተ፡ ወኢ፡ ጽፍነተ፡ ወኢ፡ ጸሪቀ፡ ውስተ፡ ቅናቶሙ። ዘእንበለ፡ አሣእን፡ ዘውስተ፡ እገሪሆሙ። ወኢይልበሱ፡ ክልኤ፡ ክዳናተ።
9 ወይቤሎሙ፡ ቤተ፡ ኀበ፡ ቦእክሙ፡ ህየ፡ ንበሩ። እስከ፡ አመ፡ ትወፅኡ፡ እምህየ።
10 ወብሔረ፡ ኀበ፡ ኢተወክፉክሙ፡ ወኢሰምዑክሙ፡ ወፂአክሙ። እምህየ፡ ንግፉ፡ ጸበለ፡ እገሪክሙ። ከመ፡ ይኩን፡ ስምዐ፡ ላዕሌሆሙ።
11 አማን፡ እብለክሙ፡ ከመ፡ ይረክባ፡ ሣሕተ፡ ሰዶም፡ ወገሞራ። አመ፡ ዕለተ፡ ደይን፡ ፈድፋደ፡ እምይእቲ፡ ሀገር።
12 ወወፂኦሙ፡ ሰበኩ፡ ውስተ፡ ኵሉ፡ አህጉር፡ ከመ፡ ኵሉ፡ ይነስሑ።
13 ወብዙኃነ፡ አጋንንተ፡ ያወፅኡ። ወይቀብጽዎሙ፡ ቅብዐ፡ ለብዙኃን፡ ድዉያን፡ ወየሐይዉ።
በእንተ፡ ዮሐንስ፡ ወሄሮድስ
14 ወሰምዐ፡ ሄሮድስ፡ ንጉሥ፡ እስመ፡ ክሡተ፡ ኮነ፡ ስሙ። ወይቤ፡ ዮሐንስ፡ መጥምቅ፡ ተንሥአ፡ እምዉታን። ወበእንተ፡ ዝ፡ ይረድኦ፡ ኀይል።
15 ወቦ፡ እለ፡ ይቤሉ፡ ኤልያስ፡ ውእቱ። ወቦ፡ እለ፡ ይቤሉ፡ ነቢይ፡ ውእቱ። ወእመ፡ አኮ፡ ይቤሉ፡ ከመ፡ አሐዱ፡ እምነቢያት።
16 ወሰሚዖ፡ ሄሮድስ፡ ይቤ፡ ዮሐንስ፡ ውእቱ፡ ዘአነ፡ መተርኩ፡ ርእሶ። ውእቱ፡ ተንሥአ፡ እምዉታን።
17 እስመ፡ ውእቱ፡ ሄሮድስ፡ ፈነወ፡ አግብርቲሁ፡ ወአኀዞ፡ ለዮሐንስ፡ ወሞቅሖ። በእንተ፡ ሄሮድያዳ፡ ብእሲተ፡ ፊልጶስ፡ እኁሁ፡ እስመ፡ ኪያሃ፡ አውሰበ።
18 እስመ፡ ይቤሎ፡ ዮሐንስ፡ ለሄሮድስ፡ ኢይከውነከ፡ ታውስብ፡ ብእሲተ፡ እኁከ።
19 ወተቀየመቶ፡ ሄሮድያዳ፡ ወፈቀደት፡ ታቅትሎ፡ ወስእነት።
20 ወኮነ፡ ይፈርሆ፡ ሄሮድስ፡ ለዮሐንስ። እስመ፡ የአምር፡ ከመ፡ ብእሲ፡ ጻድቅ፡ ወቅዱስ፡ ውእቱ። ወይትዐቀቦ፡ ወብዙኀ፡ ይሰምዕ፡ በኀቤሁ። ወይፈቅድ፡ ይርአይ፡ ተኣምረ፡ ዘይገብር። ወያስተሐውዝ፡ ወይፈቅድ፡ ይስምዖ።
21 ወኮነት፡ ዕለት፡ አመ፡ ይገብር፡ ሄሮድስ፡ በዓለ፡ ዘዕለተ፡ ተወልደ። ወአምስሐ፡ መኳንንቲሁ፡ ወመላእክቲሁ፡ ወመሳፍንቲሁ። ወመገብቶ፡ ወዐበይተ፡ ሀገረ፡ ገሊላ።
22 ወቦአት፡ ወለተ፡ ሄሮድያዳ፡ ወዘፈነት፡ ሎቱ። ወአሥመረቶ፡ ለሄሮድስ፡ ወለእለ፡ ይረፍቁ፡ ምስሌሁ። ወይቤላ፡ ንጉሥ፡ ለይእቲ፡ ወለት፡ ሰአልኒ፡ ዘትፈቅዲ፡ ወእሁበኪ።
23 ወመሐለ፡ ላቲ፡ ከመ፡ የሀባ፡ ዘሰአለቶ፡ እስመ፡ መንፈቀ፡ መንግሥቱ።
24 ወወፅአት፡ ወትቤላ፡ ለእማ፡ ምንተ፡ እስአሎ። ወትቤላ፡ ርእሶ፡ ለዮሐንስ፡ መጥምቅ።
25 ወቦአት፡ ሶቤሃ፡ ኀበ፡ ንጉሥ፡ እንዘ፡ ትጔጕእ፡ ወሰአለቶ፡ ወትቤሎ። እፈቅድ፡ ይእዜኒ፡ ተሀበኒ፡ ርእሶ፡ ለዮሐንስ፡ መጥምቅ፡ በፃሕል።
26 ወተከዘ፡ ንጉሥ፡ በእንተ፡ መሐላሁ፡ ወበእንተሂ፡ እለ፡ ይረፍቁ፡ ምስሌሁ። ወኢፈቀደ፡ ይእበያ።
27 ወፈነወ፡ ንጉሥ፡ ሶቤሃ፡ መስተራትዓተ፡ ሐራ። ወአዘዘ፡ ያምጽኡ፡ ርእሶ።
28 ወሖሩ፡ ወመተሩ፡ ርእሶ፡ ለዮሐንስ፡ መጥምቅ፡ በቤተ፡ ሞቅሕ። ወአምጽኡ፡ ርእሶ፡ በፃሕል፡ ወወሀብዋ፡ ለይእቲ፡ ወለት። ወይእቲኒ፡ ወለት፡ ወሀበት፡ ለእማ።
29 ወሰሚዖሙ፡ አርዳኢሁ፡ ሖሩ፡ ወነሥኡ፡ በድኖ፡ ለዮሐንስ፡ ወቀበርዎ።
በእንተ፡ ተመይጦቶሙ፡ ለሐዋርያት፡ ኀበ፡ እግዚእ፡ ኢየሱስ
30 ወተጋብኡ፡ ሐዋርያት፡ ኀበ፡ እግዚእ፡ ኢየሱስ። ወነገርዎ፡ ኵሎ፡ ዘገብሩ፡ ወዘከመ፡ መሀሩ።
31 ወይቤሎሙ፡ ንዑ፡ ንፃእ፡ ገዳመ፡ ባሕቲተነ፡ ወታዕርፉ፡ ሕቀ።
32 እስመ፡ ብዙኃን፡ እለ፡ የሐውሩ፡ ወይመጽኡ። ወኢያበውሕዎሙ፡ ይብልዑ፡ እክለ፡ እስመ፡ ኢያስተርከቡ።
33 ወሖሩ፡ ሐቅለ፡ በሐመር፡ ባሕቲቶሙ። ወርእይዎሙ፡ እንዘ፡ የሐውሩ፡ ወአእመርዎሙ፡ ብዙኃን። ወሖሩ፡ እንተ፡ እግር፡ ኀቤሁ፡ እምኵሉ፡ አህጉር። ወተቃደምዎሙ፡ ወመጽኡ፡ ኀቤሁ።
በእንተ፡ ኀምስቱ፡ ኅብስት፡ ወክልኤተ፡ ዓሣተ
34 ወወፂኦ፡ እግዚእ፡ ኢየሱስ፡ ርእየ፡ ብዙኃነ፡ ሰብአ። ወምህሮሙ፡ እስመ፡ ከመ፡ አባግዕ፡ ዘአልቦ፡ ኖላዊ፡ እሙንቱ። ወአኀዘ፡ ይምሀሮሙ፡ ብዙኀ።
35 ወእምድኅረ፡ ብዙኅ፡ ሰዓት፡ መጽኡ፡ አርዳኢሁ፡ ወይቤልዎ። ሐቅል፡ ውእቱ፡ ዝ፡ ብሔር፡ ወሰዓቱኒ፡ ወድአ፡ መስየ።
36 ሰዐር፡ ሰብአ፡ ይሑሩ፡ ውስተ፡ አህጉር፡ ወአዕጻዳተ። ወይሣየጡ፡ ሎሙ፡ ሲሳየ፡ እስመ፡ አልቦሙ፡ ዘይበልዑ።
37 ወአውሥአ፡ ወይቤሎሙ፡ ሀብዎሙ፡ አንትሙ፡ ዘይበልዑ። ወይቤልዎ፡ ንሑርኑ፡ ንሣየጥ፡ በክልኤ፡ ምእት፡ ዲናር፡ ኅብስተ። ወነሀቦሙ፡ ይብልዑ።
38 ወይቤሎሙ፡ ሑሩ፡ ርእዩ፡ ሚ፡ መጠን፡ ኅብስት፡ ብክሙ። ወርእዮሙ፡ ይቤልዎ፡ ኀምስ፡ ኅብስት፡ ወክልኤቲ፡ ዓሣት።
39 ወአዘዞሙ፡ ለኵሎሙ፡ ይርፍቁ፡ በበ፡ ምርፋቃቲሆሙ፡ ዲበ፡ ሐመልማል፡ ሣዕር።
40 ወረፈቁ፡ በበ፡ ምርፋቃቲሆሙ፡ በበ፡ ምእት፡ ወበበ፡ ኀምሳ።
41 ወነሥኦን፡ ለኀምስ፡ ኅብስት፡ ወለክልኤቲ፡ ዓሣት። ወነጸረ፡ ሰማየ፡ ወባረከ፡ ወፈተተ፡ ኅብስተ። ወወሀቦሙ፡ ለአርዳኢሁ፡ ያቅርቡ፡ ሎሙ።
42 ወከፈሎሙ፡ ለኵሎሙ፡ እምክልኤቲ፡ ዓሣትኒ።
43 ወበልዑ፡ ኵሎሙ፡ ወጸግቡ። ወዘአግሐሡ፡ ዘተርፈ፡ ፍተታተ። መልአ፡ ዐሠርተ፡ ወክልኤተ፡ መሣይምተ፡ ወእምዓሣሁኒ።
44 ወእለሰ፡ በልዕዎ፡ ለውእቱ፡ ኅብስት፡ ዕደው፡ ኀምሳ፡ ምእት።
45 ወአገበሮሙ፡ ሶቤሃ፡ ለአርዳኢሁ፡ ወአዘዞሙ፡ ይዕርጉ፡ ሐመረ። ወይቅድምዎ፡ ማዕዶተ፡ ቤተሳይዳ፡ እስከ፡ ሶበ፡ ይሥዕሮሙ፡ ለሕዝብ።
46 ወፈነዎሙ፡ ወኀለፈ፡ እምህየ፡ ወዐርገ፡ ደብረ፡ ከመ፡ ይጸሊ።
በእንተ፡ ዘከመ፡ ሖረ፡ ዲበ፡ ባሕር
47 ወመስዮ፡ ብሔር፡ ሀለወት፡ ሐመር፡ ማእከለ፡ ባሕር። ወውእቱሰ፡ ባሕቲቱ፡ ሀሎ፡ ውስተ፡ ምድር።
48 ወርእዮሙ፡ እንዘ፡ የሐውሩ፡ ወጥቀ፡ ይትመነደቡ። ወያሐሞሙ፡ ነፋስ፡ እስመ፡ እምገጾሙ፡ ውእቱ። ወበራብዕት፡ ሰዓተ፡ ሌሊት፡ መጽአ፡ እግዚእ፡ ኢየሱስ፡ ኀቤሆሙ። እንዘ፡ የሐውር፡ ዲበ፡ ባሕር፡ ወፈቀደ፡ ይትዐደዎሙ።
49 ወሶበ፡ ርእይዎ፡ እንዘ፡ የሐውር፡ ዲበ፡ ባሕር፡ መሰሎሙ፡ ምትሐተ።
50 ወኵሎሙ፡ ርእይዎ፡ ወደንገፁ፡ ወዐውየዉ፡ ወነበቦሙ፡ ሶቤሃ። ወይቤሎሙ፡ ተአመኑ፡ ከመ፡ አነ፡ ውእቱ፡ ወኢትፍርሁ።
51 ወዐርገ፡ ኀቤሆሙ፡ ውስተ፡ ሐመር፡ ወኀደገ፡ ነፋስ። ወፈድፋደ፡ ተደሙ፡ ወአንከርዎ።
52 ወአመሂ፡ ኅብስት፡ ኢለበውዎ፡ እስመ፡ ጽሉል፡ ልቦሙ።
ዘከመ፡ ገብረ፡ መንክራተ፡ በጌንሴሬጥ፡ በገሲሰ፡ ጽንፈ፡ ልብስ
53 ወሶበ፡ ዐደዉ፡ ወበጽሑ፡ ምድረ፡ ጌንሴሬጥ። አርሰዩ፡ ህየ፡ ሐመሮሙ።
54 ወወፂኦሙ፡ እምሐመር፡ አእመርዎ፡ ሶቤሃ፡ ሰብአ፡ ይእቲ፡ ሀገር።
55 ወሮጹ፡ ውስተ፡ ኵሉ፡ በሓውርት። ወአምጽኡ፡ ድዉያነ፡ በዐራታት። ወይወስዱ፡ ኀበ፡ ሰምዑ፡ ከመ፡ ሀሎ፡ ውእቱ፡ ህየ።
56 ወውስተ፡ አህጉር፡ ወአዕጻዳት፡ ወውስተ፡ ምሥያጣት። ኀበ፡ ቦአ፡ ያነብርዎሙ፡ ለድዉያን። ወያስተበቊዕዎ፡ ከመ፡ ይግስሱ፡ ጽንፈ፡ ልብሱ። ወኵሎሙ፡ እለ፡ ገሰስዎ፡ የሐይዉ።
=== chapter 7 ===
[ምዕራፍ 7]
በእንተ፡ ፈሪሳውያን፡ ወሥርዐቶሙ፡ ለአይሁድ
1 ወተጋብኡ፡ ኀቤሁ፡ ጸሐፍት፡ ወፈሪሳውያን፡ መጺኦሙ፡ እምኢየሩሳሌም።
2 ወርእይዎሙ፡ ለአርዳኢሁ፡ እንዘ፡ ይበልዑ፡ እክለ። ዘእንበለ፡ ይትኀፀቡ፡ እደዊሆሙ።
3 እስመ፡ ፈሪሳውያንሰ፡ ወኵሎሙ፡ አይሁድ። ለእመ፡ በሕቁ፡ ኢተኀፅቡ፡ እደዊሆሙ፡ ኢይበልዑ፡ እክለ። እስመ፡ የዐቅቡ፡ ሥርዐቶሙ፡ ለረበናት።
4 ወዘሂ፡ ተሣየጡ፡ እምሥያጥ፡ ኢይበልዑ። ለእመ፡ ኢያጥመቅዎ፡ በማይ። ወባዕደኒ፡ ብዙኀ፡ ሕርመተ፡ ይትዐቀቡ። ወያጠምቁ፡ ጽዋዓተኒ፡ ወቈሳቊሳተኒ፡ ወጻሕራተኒ፡ ወዐራታተ።
በእንተ፡ እለ፡ ኀደጉ፡ ትእዛዘ፡ እግዚአብሔር
5 ወይቤልዎ፡ ጸሐፍት፡ ወፈሪሳውያን። ለምንት፡ ኢየሐውሩ፡ አርዳኢከ፡ በከመ፡ ሠርዑ፡ ረበናት። ወዘእንበለ፡ ይትኀፀቡ፡ እደዊሆሙ፡ ይበልዑ፡ እክለ።
6 ወአውሥአ፡ እግዚእ፡ ኢየሱስ፡ ወይቤሎሙ። ኦ፡ መደልዋን፡ ሠናየ፡ ተነበየ፡ ኢሳይያስ፡ ላዕሌክሙ፡ እንዘ፡ ይብል። ዝንቱ፡ ሕዝብ፡ በከናፍሪሆሙ፡ ያከብሩኒ። ወበልቦሙሰ፡ ነዋኀ፡ ይርሕቁ፡ እምኔየ።
7 ወከንቶ፡ ያመልኩኒ፡ እንዘ፡ ይሜህሩ፡ ሥርዐታተ፡ ትእዛዛተ፡ ሰብእ።
8 ወየኀድጉ፡ ትእዛዘ፡ እግዚአብሔር። ወየዐቅቡ፡ ትእዛዛተ፡ ዕጓለ፡ እመሕያው። ጥምቀታተ፡ ቈሳቊሳት፡ ወጻሕራት፡ ወጽዋዓት። ወባዕደኒ፡ ብዙኀ፡ ዘይመስሎ፡ ለዝንቱ፡ ይገብሩ።
9 ወይቤሎሙ፡ ርቱዕኑ፡ ትዕልዉ፡ ትእዛዘ፡ እግዚአብሔር። ከመ፡ ትዕቀቡ፡ ትእዛዘ፡ ርእስክሙ።
10 ወሙሴ፡ ይቤለክሙ፡ አክብር፡ አባከ፡ ወእምከ። ወዘአሕሠመ፡ ቃለ፡ ላዕለ፡ አቡሁ፡ ወእሙ፡ ሞተ፡ ለይሙት።
11 ወአንትሙሰ፡ ትብሉ፡ ዘይቤሎ፡ ለአቡሁ፡ አው፡ ለእሙ። ቊርባን፡ ዘረባሕከ፡ እምኔየ፡ ብሂል።
12 ኢታበውሕዎ፡ ይግበር፡ ምንተኒ፡ ለአቡሁ፡ ወለእሙ።
13 ወትስዕሩ፡ ቃለ፡ እግዚአብሔር፡ በእንተ፡ ትእዛዝክሙ፡ ዘሠራዕክሙ። ወዓዲ፡ ብዙኀ፡ በአምሳለ፡ ዝንቱ፡ ዘትገብሩ።
14 ወጸውዖሙ፡ ካዕበ፡ ለሕዝብ፡ ወይቤሎሙ። ስምዑ፡ ኵልክሙ፡ ወለብዉ።
15 አልቦ፡ ዘይበውእ፡ እምአፍኣ፡ ውስተ፡ አፉሁ፡ ለሰብእ፡ ዘይክል፡ አርኵሶቶ። ዘእንበለ፡ ዳእሙ፡ ዘይወፅእ፡ እምልቡ፡ ለሰብእ፡ ውእቱ፡ ያረኵሶ፡ ለሰብእ።
16 ዘቦ፡ እዘን፡ ሰሚዐ፡ ለይስማዕ።
17 ወበዊኦ፡ ቤተ፡ እምኀበ፡ ሕዝብ፡ ተስእልዎ፡ አርዳኢሁ፡ ዘንተ፡ አምሳለ። ወይቤሎሙ፡ ከመ፡ ዝኑ፡ አንትሙሂ፡ ኢትሌብዉ።
18 ኢተአምሩኑ፡ ከመ፡ ኵሉ፡ ዘእምአፍኣ፡ ይበውእ፡ ውስተ፡ አፈ፡ ሰብእ። ኢይክል፡ አርኵሶቶ።
19 እስመ፡ ኢይበውእ፡ ውስተ፡ ልቡ፡ ዘእንበለ፡ ዳእሙ፡ ውስተ፡ ከርሡ፡ ክመ። ወጽቡ፡ ይትከዐው፡ እንዘ፡ ያነጽሕ፡ ኵሎ፡ መባልዕተ።
20 ወይቤሎሙ፡ ዘይወፅእ፡ እምኔሁ፡ ለሰብእ፡ ውእቱ፡ ያረኵሶ፡ ለሰብእ።
21 እስመ፡ እምውስጠ፡ ልቡ፡ ለሰብእ፡ ይወፅእ፡ ኵሉ፡ ኅሊና፡ እኩይ። ዘውእቱ፡ ዝሙት፡ ወስርቅ፡ ወቀቲል።
22 ወሐዊረ፡ ብእሲተ፡ ብእሲ፡ ወትዕግልት፡ ወእከይ፡ ወጕሕሉት፡ ወጽልሑት። ወምርዓት፡ ወፅርፈት፡ ወትዕቢት፡ ወሕመሜ፡ ዐይን፡ ወእበድ።
23 ዝንቱ፡ ኵሉ፡ እኩይ፡ ዘይወፅእ፡ እምውስጥ፡ ያረኵሶ፡ ለሰብእ።
24 ወተንሢኦ፡ እምህየ፡ ሖረ፡ ብሔረ፡ ጢሮስ፡ ወሲዶና። ወቦአ፡ ቤተ፡ ወኢፈቀደ፡ ያእምሮ፡ መኑሂ፡ ወስእነ፡ ተከብቶ።
በእንተ፡ ብእሲት፡ ሲሮፊኒቃዊት
25 ወእምዝ፡ ሰምዐት፡ በእንቲኣሁ፡ አሐቲ፡ ብእሲት። እንተ፡ ጋኔን፡ እኩይ፡ አኀዘ፡ ላቲ፡ ወለታ። ወቦአት፡ ወሰገደት፡ ሎቱ፡ ታሕተ፡ እገሪሁ።
26 ወአረማዊት፡ ይእቲ፡ ብእሲት፡ ወሲሮፊኒቂሳዊት። ወሰአለቶ፡ ያውፅእ፡ ጋኔነ፡ እምወለታ።
27 ወይቤላ፡ እግዚእ፡ ኢየሱስ፡ ኅድጊ፡ ቅድመ፡ ምዕረ፡ ይጽገቡ፡ ውሉድ። እስመ፡ ኢኮነ፡ ሠናየ፡ ነሢአ፡ ኅብስተ፡ ውሉድ፡ ወውሂብ፡ ለከለባት።
28 ወተሰጥወቶ፡ ወትቤሎ፡ እወ፡ እግዚኦ፡ ከለባትኒ፡ ይበልዑ። በታሕተ፡ ማእድ፡ ፍርፋራተ፡ ዘያወድቁ፡ ደቂቅ።
29 ወይቤላ፡ በእንተ፡ ዝ፡ ቃልኪ፡ ሑሪ። ወፅአ፡ ውእቱ፡ ጋኔን፡ እምወለትኪ።
30 ወሖረት፡ ወአተወት፡ ቤታ፡ ወረከበታ፡ ለወለታ፡ ልብስታ። ወትነብር፡ ዲበ፡ ዐራታ፡ ወኀደጋ፡ ጋኔና።
31 ወኀሊፎ፡ ካዕበ፡ እምጢሮስ፡ ሖረ፡ እንተ፡ ሲዶና። ላዕለ፡ ገሊላ፡ ማእከለ፡ ዐሠርቱ፡ አህጉር።
በእንተ፡ በሃም፡ ወጽሙም
32 ወአምጽኡ፡ ኀቤሁ፡ በሃመ፡ ወጽሙመ። ወአስተብቊዕዎ፡ ከመ፡ ይደይ፡ እዴሁ፡ ላዕሌሁ።
33 ወአግሐሦ፡ እምኀበ፡ ሰብእ፡ በባሕቲቶሙ። ወወደየ፡ አጻብዒሁ፡ ውስተ፡ እዘኒሁ፡ ወተፍአ፡ ወገሰሰ፡ ልሳኖ።
34 ወነጸረ፡ ሰማየ፡ ወአስተምሐረ። ወይቤሎ፡ ኤፍታሔ፡ ኤፍታሔ፡ ተረኀው፡ ብሂል።
35 ወሶቤሃ፡ ተከሥታ፡ እዘኒሁ፡ ወተፈትሐ፡ ማእሰረ፡ ልሳኑ፡ ወተናገረ፡ ርቱዐ።
36 ወገሠጾሙ፡ ኢይንግሩ፡ ወኢ፡ ለመኑሂ። ወአምጣነ፡ ይከልኦሙ፡ ውእቱ፡ ፈድፋደ፡ ይነግሩ፡ ሎቱ።
37 ወፈድፋደ፡ ያነክሩ፡ እንዘ፡ ይብሉ። ሚ፡ ሠናይ፡ ኵሎ፡ ዘገብረ፡ ዝንቱ፡ ብእሲ። ለጽሙማን፡ ያስምዖሙ፡ ወለበሃማን፡ ያነብቦሙ።
=== chapter 8 ===
[ምዕራፍ 8]
በእንተ፡ ባርኮተ፡ ሰብዑ፡ ኅብስት
1 ወይእተ፡ አሚረ፡ ካዕበ፡ ብዙኃን፡ ሰብእ፡ ሀለዉ። ወአልቦሙ፡ ዘይበልዑ፡ ወጸውዖሙ፡ ለአርዳኢሁ፡ ወይቤሎሙ።
2 ያምሕሩኒ፡ እሉ፡ ሰብእ፡ ሣልሶሙ፡ ዮም። እንዘ፡ ይጸንሑኒ፡ ወአልቦሙ፡ ዘይበልዑ።
3 ወእመኒ፡ ሰዐርክዎሙ፡ ርኁባኒሆሙ፡ ይእትዉ፡ አብያቲሆሙ። ይደክሙ፡ በፍኖት፡ እስመ፡ ቦ፡ እምኔሆሙ፡ እምርሑቅ፡ ዘመጽኡ።
4 ወይቤልዎ፡ አርዳኢሁ፡ መኑ፡ ዘይክል፡ በዝየ፡ በገዳም፡ አጽግቦቶሙ። ኅብስተ፡ ለኵሉ፡ ዝንቱ፡ ሕዝብ።
5 ወይቤሎሙ፡ ሚ፡ መጠን፡ ኀባውዝ፡ ብክሙ፡ ወይቤልዎ፡ ሰብዑ።
6 ወአዘዞሙ፡ ለሰብእ፡ ይርፍቁ፡ ዲበ፡ ምድር። ወነሥኦን፡ ለሰብዑ፡ ኅብስት፡ ወአእኰተ፡ ወፈተተ። ወወሀቦሙ፡ ለአርዳኢሁ፡ ያቅርቡ፡ ሎሙ፡ ወአቅረቡ፡ ለሰብእ።
7 ወቦሙ፡ ዓሣኒ፡ ኅዳጥ፡ ወባረከ፡ ኪያሁኒ። ወይቤሎሙ፡ አቅርቡ፡ ሎሙ፡ ዘኒ።
8 ወበልዑ፡ ወጸግቡ። ወዘአግሐሡ፡ ዘተርፈ፡ ፍተታተ፡ መልአ፡ ሰብዐተ፡ አስፈሬዳተ።
9 ወእለሰ፡ በልዕዎ፡ የአክሉ፡ አርብዓ፡ ምእተ። ወእምዝ፡ ፈነዎሙ፡ ሶቤሃ፡ ይሑሩ።
10 ወእምዝ፡ ዐርገ፡ ሐመረ፡ ምስለ፡ አርዳኢሁ። ወበጽሐ፡ ውስተ፡ ደወለ፡ ድልማኑታ።
በእንተ፡ ዘከመ፡ ኀሠሡ፡ ትእምርተ፡ እምሰማይ
11 ወወፅኡ፡ ፈሪሳውያን፡ ወአኀዙ፡ ይትኀሠሥዎ። ወይሰአልዎ፡ ትእምርተ፡ እምሰማይ፡ እንዘ፡ ያሜክርዎ።
12 ወተከዘ፡ በመንፈሱ፡ ወይቤ፡ ለምንት፡ ተኀሥሥ፡ ትእምርተ፡ ዛቲ፡ ትውልድ። አማን፡ እብለክሙ፡ ከመ፡ ኢይትወሀባ፡ ለዛቲ፡ ትውልድ፡ ትእምርት።
13 ወኀደጎሙ፡ ወዐርገ፡ ካዕበ፡ ሐመረ፡ ወሖረ፡ ማዕዶተ።
14 ወረስዑ፡ ነሢአ፡ ኅብስት። ወአልቦሙ፡ ዘእንበለ፡ አሐቲ፡ ኅብስት፡ ምስሌሆሙ፡ ውስተ፡ ሐመር።
በእንተ፡ ብሑአ፡ ፈሪሳውያን
15 ወአዘዞሙ፡ ወይቤሎሙ፡ ዑቁ፡ ወተዐቀቡ። እምነ፡ ብሑኦሙ፡ ለፈሪሳውያን፡ ወእምነ፡ ብሑኦሙ፡ ለሄሮድሳውያን።
16 ወኀለዩ፡ በበይናቲሆሙ፡ ወይቤሉ። እስመሁ፡ እንጋ፡ ኅብስተ፡ ኢነሣእነ፡ ይብለነ።
17 ወአእመሮሙ፡ እግዚእ፡ ኢየሱስ፡ ወይቤሎሙ። ምንተኑ፡ ትኄልዩ፡ በልብክሙ፡ እስመሁ፡ ኅብስት፡ አልብክሙ። ዓዲኑ፡ ኢተአምሩ፡ ወኢትሌብዉ፡ ልብክሙኑ፡ ጽሉል።
18 አዕይንት፡ ብክሙ፡ ወኢትሬእዩ። ወእዝን፡ ብክሙ፡ ወኢትሰምዑ።
19 ወኢትዜከሩኑ፡ ዘአመ፡ ኀምሰ፡ ኅብስት፡ ፈተትኩ፡ ለኀምሳ፡ ምእት፡ ብእሲ። ሚ፡ መጠነ፡ አግሐሥክሙ፡ አክፋረ፡ ዘመልአ፡ ፍተታተ፡ ዘተርፈ። ወይቤልዎ፡ ዐሠርተ፡ ወክልኤተ።
20 ወይቤሎሙ፡ አመኬ፡ ሰብዑ፡ ኅብስተ፡ ለአርባዕ፡ ምእት፡ ብእሲ። ሚ፡ መጠነ፡ አግሐሥክሙ፡ አስፈሬዳተ፡ ዘመልአ፡ ፍተታተ፡ ዘተርፈ። ወይቤልዎ፡ ሰብዑ።
21 ወይቤሎሙ፡ እፎ፡ እንከ፡ ዘኢትለብዉ።
በእንተ፡ ዕዉር፡ ዘቤተሳይዳ
22 ወበጽሑ፡ ቤተሳይዳ፡ ወአምጽኡ፡ ኀቤሁ፡ ዕዉረ። ወአስተብቊዕዎ፡ ይግስሶ።
23 ወአኀዞ፡ በእዴሁ፡ ለውእቱ፡ ዕዉር፡ ወአውፅኦ፡ አፍኣ፡ እምሀገር። ወተፍአ፡ ውስተ፡ አዕይንቲሁ፡ ወገሰሶ፡ ወይቤሎ፡ ምንተ፡ ትሬኢ።
24 ወነጸረ፡ ወይቤ፡ እሬኢ፡ ሰብአ፡ ከመ፡ ዕፀው፡ ያንሶስዉ።
25 ወገሰሶ፡ አዕይንቲሁ፡ ካዕበ፡ ወርእየ፡ ዳኅነ። ወነጸረ፡ ኵሎ፡ ብሩሀ።
26 ወፈነዎ፡ ቤቶ፡ ወይቤሎ፡ ኢትባእ፡ ውስተ፡ አዕጻዳት። ወአልቦ፡ ዘትነግር፡ በውስተ፡ ሀገርኒ።
በእንተ፡ ዘተስእሎሙ፡ በቂሳርያ
27 ወሖረ፡ እግዚእ፡ ኢየሱስ፡ ወአርዳኢሁ፡ ውስተ፡ አህጉረ፡ ቂሳርያ፡ ዘፊልጶስ። ወተስእሎሙ፡ ለአርዳኢሁ፡ በፍኖት፡ ወይቤሎሙ። መነ፡ ይብለኒ፡ ሰብእ።
28 ወይቤልዎ፡ ዮሐንስሃ፡ መጥምቀ፡ አው፡ ኤልያስሃ፡ አው፡ አሐዱ፡ እምነቢያት።
29 ወይቤሎሙ፡ አንትሙኬ፡ መነ፡ ትብሉኒ። ወተሰጥዎ፡ ጴጥሮስ፡ ወይቤሎ፡ አንተ፡ ውእቱ፡ ክርስቶስ።
30 ወገሠጾሙ፡ ከመ፡ ኢይንግሩ፡ ወኢ፡ ለመኑሂ፡ በእንቲኣሁ።
በእንተ፡ ትንቢት፡ ዘሕማማት
31 ወአኀዘ፡ ይምሀሮሙ፡ ከመ፡ ሀለዎ፡ ለወልደ፡ ዕጓለ፡ እመሕያው። ብዙኀ፡ ያሐምምዎ፡ ወያመክርዎ፡ ረበናት፡ ወሊቃነ፡ ካህናት፡ ወጸሐፍት። ወይቀትልዎ፡ ወይትነሣእ፡ በሣልስተ፡ ዕለት።
32 ወገሃደ፡ ነገሮሙ፡ ዘንተ፡ ነገረ፡ ወቀርበ፡ ጴጥሮስ፡ ወአኀዘ፡ ይክልኦ።
33 ወተመይጠ፡ ወነጸረ፡ ኀበ፡ አርዳኢሁ፡ ወገሠጾ፡ ለጴጥሮስ፡ ወይቤሎ። ሑር፡ እምድኅሬየ፡ ሰይጣን፡ እስመ፡ ኢትኄሊ፡ ዘእግዚአብሔር። ዘእንበለ፡ ዘዕጓለ፡ እመሕያው።
በእንተ፡ ኀዲገ፡ ርእስ፡ ዘክርስቲያን
34 ወጸውዖሙ፡ ለሕዝብ፡ ምስለ፡ አርዳኢሁ፡ ወይቤሎሙ። ዘይፈቅድ፡ ይፀመደኒ፡ ይጽልኣ፡ ለነፍሱ፡ ወያጥብዕ። ወይጹር፡ መስቀለ፡ ሞቱ፡ ወይትልወኒ።
35 ወዘይፈቅድ፡ ያድኅና፡ ነፍሱ፡ ይግድፋ። ወዘሰ፡ ገደፋ፡ ለነፍሱ፡ በእንቲኣየ፡ ወበእንተ፡ ወንጌል፡ ይረክባ።
36 ወምንተ፡ ይበቊዕዎ፡ ለሰብእ። ለእመ፡ ኵሎ፡ ዓለመ፡ ረብሐ፡ ወነፍሶ፡ ሀጕለ።
37 ወምንተ፡ እምወሀበ፡ ሰብእ፡ ቤዛሃ፡ ለነፍሱ።
38 ወለዘኒ፡ ኀፈረኒ፡ ወኀፈረ፡ ቃልየ፡ በዛቲ፡ ትውልድ፡ ዘማ፡ ወኃጥእት። ወልደ፡ ዕጓለ፡ እመሕያውኒ፡ የኀፍሮ። አመ፡ ይመጽእ፡ በስብሐተ፡ አቡሁ፡ ምስለ፡ መላእክቲሁ፡ ቅዱሳን።
=== chapter 9 ===
[ምዕራፍ 9]
1 ወይቤሎሙ፡ አማን፡ እብለክሙ፡ ሀለዉ፡ እምእለ፡ ይቀውሙ፡ ዝየ። እለ፡ ኢይጥዕምዎ፡ ለሞተ፡ እስከ፡ ይሬእይዋ፡ ለመንግሥተ፡ እግዚአብሔር። እንዘ፡ ትመጽእ፡ በኀይል።
ዘከመ፡ ተወለጠ፡ ራእዩ፡ በደብረ፡ ታቦር
2 ወአመ፡ ሰዱስ፡ ዕለት፡ ነሥኦሙ፡ እግዚእ፡ ኢየሱስ። ለጴጥሮስ፡ ወያዕቆብ፡ ወለዮሐንስ። ወአዕረጎሙ፡ ደብረ፡ ነዋኀ፡ በባሕቲቶሙ፡ ራእዩ። ወተወለጠ፡ በቅድሜሆሙ።
3 ወአልባሲሁኒ፡ በረቀ፡ ወጻዕደወ፡ ጥቀ። ዘኢይክል፡ መሃፒል፡ ከማሁ፡ አጻዕድዎቶ፡ በዲበ፡ ምድር።
4 ወአስተርአይዎሙ፡ ሙሴ፡ ወኤልያስ፡ እንዘ፡ ይትናገሩ፡ ምስለ፡ እግዚእ፡ ኢየሱስ።
5 ወአውሥአ፡ ጴጥሮስ፡ ወይቤሎ፡ ለእግዚእ፡ ኢየሱስ። ረቢ፡ ይኄይሰነ፡ ንንበር፡ ዝየ፡ ወንግበር፡ ሠለስተ፡ ማኅደረ። አሐደ፡ ለከ፡ ወአሐደ፡ ለሙሴ፡ ወአሐደ፡ ለኤልያስ። ወኢየአምር፡ ዘይብል፡ እስመ፡ ድንጉፃን፡ እሙንቱ።
6 ወመጽአ፡ ደመና፡ ብሩህ፡ ወጸለሎሙ። ወመጽአ፡ ቃል፡ እምደመና፡ ዘይብል። ዝንቱ፡ ውእቱ፡ ወልድየ፡ ዘአፈቅር፡ ወሎቱ፡ ስምዕዎ።
7 ወእምዝ፡ ግብተ፡ ነጺሮሙ፡ አልቦ፡ ዘርእዩ። ዘእንበለ፡ እግዚእ፡ ኢየሱስ፡ ባሕቲቶ፡ ምስሌሆሙ።
8 ወእንዘ፡ ይወርዱ፡ እምደብር፡ አዘዞሙ፡ እግዚእ፡ ኢየሱስ። ኢይንግሩ፡ ወኢ፡ ለመኑሂ፡ ዘርእዩ። ዘእንበለ፡ አመ፡ ተንሥአ፡ ወልደ፡ ዕጓለ፡ እመሕያው፡ እምነ፡ ምዉታን።
9 ወዐቀቡ፡ ቃሎ፡ ወተኀሠሡ፡ በበይናቲሆሙ፡ እንዘ፡ ይብሉ። ምንት፡ ውእቱ፡ ተንሥኦ፡ እምነ፡ ምዉታን።
10 ወተስእልዎ፡ ወይቤልዎ፡ ይብሉ፡ ጸሐፍት፡ ወፈሪሳውያን። ኤልያስ፡ ይቀድም፡ መጺአ።
11 ወአውሥአ፡ ወይቤሎሙ፡ ኤልያስ፡ ይመጽእ፡ ቅድመ፡ ወያስተራትዕ፡ ኵሎ። ወእፎ፡ ጽሑፍ፡ በእንተ፡ ወልደ፡ ዕጓለ፡ እመሕያው። ከመ፡ ብዙኀ፡ ያሐምምዎ፡ ወይሜንንዎ።
12 ወባሕቱ፡ እብለክሙ፡ ኤልያስ፡ ወድአ፡ መጽአ። ወገብሩ፡ ላዕሌሁ፡ ኵሎ፡ ዘፈቀዱ፡ በከመ፡ ጽሑፍ፡ በእንቲኣሁ።
13 ወበጽሐ፡ ኀበ፡ አርዳኢሁ፡ ወረከበ፡ ብዙኀ፡ ሰብአ፡ ኀቤሆሙ። ወጸሐፍትኒ፡ እንዘ፡ ይሴአልዎሙ።
14 ወሶበ፡ ርእይዎ፡ ኵሎሙ፡ ሰብእ፡ ደንገፁ። ወሮጹ፡ ሶቤሃ፡ ወአምኅዎ።
15 ወተስእሎሙ፡ ለጸሐፍት፡ እንዘ፡ ይብል፡ ምንተኑ፡ ትትኀሠሥዎሙ።
በእንተ፡ ዘነገርጋር
16 ወአውሥአ፡ አሐዱ፡ እምውስተ፡ ሕዝብ፡ ወይቤሎ። ሊቅ፡ አምጻእክዎ፡ ለወልድየ፡ ኀቤከ፡ እስመ፡ ጋኔን፡ በሃም፡ አኀዞ።
17 ወኀበ፡ ረከቦ፡ ይነፅኆ፡ ወያስተራግፆ፡ ወያሤውኖ።
18 ወያሐቅዮ፡ ስነኒሁ፡ ወያየብሶ። ወእቤሎሙ፡ ለአርዳኢከ፡ ወስእንዎ፡ ፈውሶቶ።
19 ወአውሥአ፡ ወይቤሎሙ፡ ኦ፡ ትወልድ፡ እንተ፡ አልባቲ፡ ሃይማኖት። እስከ፡ ማእዜኑ፡ እሄሉ፡ ምስሌክሙ፡ ወእስከ፡ ማእዜኑ፡ እትዔገሠክሙ። አምጽእዎ፡ ዝየ፡ ኀቤየ።
20 ወወሰድዎ፡ ኀቤሁ፡ ወሶበ፡ ርእዮ፡ ውእቱ፡ ጋኔን። ነፅኆ፡ ሶቤሃ፡ ውስተ፡ ምድር፡ ወአስተራገፆ፡ ወአሠወኖ።
21 ወተስእሎ፡ እግዚእ፡ ኢየሱስ፡ ለአቡሁ፡ ወይቤሎ። እማእዜ፡ ዘአኀዞ፡ ወይቤሎ፡ እምንእሱ።
22 ወዘልፈ፡ ያወድቆ፡ ኀበ፡ ጽድፍ፡ ወውስተ፡ እሳት፡ ወማይ፡ ከመ፡ ይቀትሎ። ወባሕቱ፡ በዘትክል፡ ርድአኒ፡ ወመሐረኒ።
23 ወይቤሎ፡ እግዚእ፡ ኢየሱስ፡ እስመ፡ ትቤ፡ በዘትክለ፡ ርድአኒ። እመሰ፡ ተአምን፡ ኵሉ፡ ይትከሀል፡ ለዘየአምን።
24 ወጸርሐ፡ አቡሁ፡ ለውእቱ፡ ወልድ፡ ወይቤ። ኣአምን፡ እግዚኦ፡ ባሕቱ፡ ርድኦ፡ ለኢአሚኖትየ።
25 ወርእዮ፡ እግዚእ፡ ኢየሱስ፡ ከመ፡ ይትራወጽ፡ ሰብእ። ገሠጾ፡ ለውእቱ፡ ጋኔን፡ እኩይ፡ ወይቤሎ። ጋኔን፡ በሃም፡ ወጽሙም፡ አነ፡ እኤዝዘከ፡ ትፃእ፡ እምኔሁ። ወኢትግባእ፡ እንከ፡ ላዕሌሁ።
26 ወአግዐሮ፡ ብዙኀ፡ ወአስተራገፆ፡ ወወፅአ። ወኮነ፡ ከመ፡ በድን፡ እስከ፡ ይብሉ፡ ብዙኃን፡ ሞተ።
27 ወአኀዞ፡ እግዚእ፡ ኢየሱስ፡ በእዴሁ፡ ወአንሥኦ፡ ወተንሥአ።
28 ወበዊኦሙ፡ ቤተ፡ ይቤልዎ፡ አርዳኢሁ፡ በባሕቲቶሙ። በእፎ፡ ስእነ፡ ንሕነ፡ አውፅኦቶ።
29 ወይቤሎሙ፡ ዝንቱ፡ ዘመድ፡ ኢይክል፡ ይፃእ። ዘእንበለ፡ በጾም፡ ወበጸሎት።
30 ወወፂኦ፡ እምህየ፡ ሖረ፡ እንተ፡ ገሊላ። ወኢፈቀደ፡ ያእምርዎ።
ዘከመ፡ አቅደመ፡ ነጊረ፡ መዊቶቱ
31 ወመሀሮሙ፡ ለአርዳኢሁ፡ ወይቤሎሙ። ሀለዎ፡ ለወልደ፡ ዕጓለ፡ እመሕያው፡ ይግባእ፡ ውስተ፡ እደ፡ ሰብእ፡ ኃጥኣን። ወይቀትልዎ፡ ወበሣልስት፡ ዕለት፡ ይትነሣእ።
32 ወኢያእመሩ፡ ዘይቤሎሙ፡ ወይፈርህዎ፡ ተስእሎቶ።
በእንተ፡ ትሕትና፡ ወትዕግሥት፡ ዘክርስቲያን
33 ወበጺሖ፡ ቅፍርናሆም፡ ወበዊኦ፡ ቤተ፡ ይቤሎሙ። ምንተኑ፡ ኀለይክሙ፡ በፍኖት፡ በበይናቲክሙ።
34 ወአርመሙ፡ እስመ፡ ተበሃሉ፡ በበይናቲሆሙ፡ በፍኖት። መኑ፡ እንጋ፡ የዐቢ፡ እምኔሆሙ።
35 ወነበረ፡ ወጸውዖሙ፡ ለዐሠርቱ፡ ወክልኤቱ፡ ወይቤሎሙ። ዘይፈቅድ፡ ሊቀ፡ ይኩን፡ ለያትሕት፡ ርእሶ፡ ለኵሉ። ወይኩን፡ ላእከ፡ ለኵሉ።
36 ወነሥአ፡ ሕፃነ፡ ወአቀሞ፡ ማእከሎሙ፡ ወአንበሮ፡ ውስተ፡ ሕፅኑ፡ ወይቤሎሙ። ዘተወክፈ፡ አሐደ፡ ዘከመ፡ ዝ፡ ሕፃነ፡ በስምየ፡ ኪያየ፡ ተወክፈ።
37 ወዘኒ፡ ኪያየ፡ ተወክፈ። አኮ፡ ኪያየ፡ ባሕቲቶ፡ ዘተወክፈ፡ ዘእንበለ፡ ዘፈነወኒ።
38 ወአውሥአ፡ ዮሐንስ፡ ወይቤሎ፡ ሊቅ። ቦ፡ ዘርኢነ፡ ዘያወፅእ፡ አጋንንተ፡ በስምከ። ወከላእናሁ፡ እስመ፡ ኢተለወከ፡ ምስሌነ።
39 ወይቤሎሙ፡ እግዚእ፡ ኢየሱስ፡ ኢትክልእዎ። እስመ፡ አልቦ፡ ዘይገብር፡ ኀይለ፡ በስምየ። ወይክል፡ ፍጡነ፡ አሕሥሞ፡ ቃል፡ ላዕሌየ።
40 እስመ፡ እምከመ፡ ኢኮነ፡ ዕድውክሙ፡ ቢጽክሙ፡ ውእቱ።
41 ወዘአስተየክሙ፡ ጽዋዐ፡ ማይ፡ ቈሪር፡ በስምየ። እስመ፡ እለ፡ ክርስቶስ፡ አንትሙ። አማን፡ እብለክሙ፡ ኢየሀጕል፡ ዕሴቶ።
42 ወዘአስሐቶ፡ ለአሐዱ፡ እምእሉ፡ ንኡሳን፡ እለ፡ የአምኑ፡ ብየ። ይኄይሶ፡ ይስቅሉ፡ ማሕረጾ፡ አድግ፡ በክሳዱ። ወያስጥምዎ፡ ውስተ፡ ባሕር።
43 ወእመኒ፡ እዴከ፡ ታስሕተከ፡ ምትራ። ይኄይሰከ፡ ምቱረ፡ እድ፡ ትባእ፡ ውስተ፡ ሕይወት። እምትባእ፡ ምስለ፡ ክልኤሆን፡ እደዊከ፡ ውስተ፡ እሳተ፡ ገሃነም። ኀበ፡ ዕፄሁ፡ ኢይነውም፡ ወእሳቱ፡ ኢይጠፍእ።
44 ወእመኒ፡ እግርከ፡ ታስሕተከ፡ ምትራ። ይኄይሰከ፡ ሐንካሰከ፡ ትባእ፡ ውስተ፡ ሕይወት። እምትባእ፡ ምስለ፡ ክልኤሆን፡ እገሪከ፡ ውስተ፡ እሳተ፡ ገሃነም። ኀበ፡ ዕፄሁ፡ ኢይነውም፡ ወእሳቱ፡ ኢይጠፍእ።
45 ወእመኒ፡ ዐይንከ፡ ታስሕተከ፡ ምልኃ። እስመ፡ ይኄይሰከ፡ ነቋረከ፡ ትባእ፡ ውስተ፡ መንግሥተ፡ እግዚአብሔር። እምትባእ፡ ምስለ፡ ክልኤሆን፡ አዕይንቲከ፡ ውስተ፡ ገሃነም፡ ዘእሳት። ኀበ፡ ዕፄሁ፡ ኢይነውም፡ ወእሳቱ፡ ኢይጠፍእ።
46 እስመ፡ ለኵሉ፡ በእሳት፡ ይሜልሕዎ። ወኵሉ፡ ዘይጠባሕ፡ ይትሜላሕ፡ በጼው።
47 ሠናይ፡ ውእቱ፡ ጼወ፡ ወእመሰ፡ ጼው፡ ለስሐ። በምንት፡ እንከ፡ ይቄስምዎ።
48 ጼወ፡ ርከቡ፡ በበይናቲክሙ፡ ወተሰናአዉ።
=== chapter 10 ===
[ምዕራፍ 10]
ዘከመ፡ ተግሕሠ፡ እግዚእ፡ ኢየሱስ፡ እምኢየሩሳሌም
1 ወተንሢኦ፡ እምህየ፡ ሖረ፡ ብሔረ፡ ይሁዳ፡ እንተ፡ ማዕዶተ፡ ዮርዳኖስ። ወሖሩ፡ ካዕበ፡ ምስሌሁ፡ ሕዝብ፡ ወመሀሮሙ፡ በከመ፡ ያለምድ።
በእንተ፡ ዘከመ፡ ኢይደሉ፡ ኀዲገ፡ ብእሲት፡ ወአውስቦ፡ ካልእት
2 ወመጽኡ፡ ፈሪሳውያን፡ ወተስእልዎ፡ ወይቤልዎ። ይከውኖሁ፡ ለብእሲ፡ ኀዲገ፡ ብእሲቱ፡ እንዘ፡ ያሜክርዎ።
3 ወአውሥአ፡ እግዚእ፡ ኢየሱስ፡ ወይቤሎሙ። ምንተኑመ፡ አዘዘክሙ፡ ሙሴ።
4 ወይቤልዎ፡ አዘዘነ፡ ሙሴ፡ ንጽሐፍ፡ ላቲ፡ መጽሐፈ፡ ኅድጋቲሃ፡ ወንድኀራ።
5 ወአውሥአ፡ እግዚእ፡ ኢየሱስ፡ ወይቤሎሙ። በከመ፡ እከየ፡ ልብክሙ፡ ወሀበክሙ፡ ሙሴ። ዘንተ፡ ትእዛዘ፡ ትድኀሩ፡ አንስቲያክሙ።
6 ወእምፍጥረትሰ፡ ተባዕተ፡ ወአንስተ፡ ገብረ፡ እግዚአብሔር።
7 ወበእንተ፡ ዝንቱ፡ የኀድግ፡ ብእሲ፡ አባሁ፡ ወእሞ። ወይተልዋ፡ ለብእሲቱ።
8 ወይከውኑ፡ ክልኤሆሙ፡ አሐደ፡ ሥጋ። ናሁኬ፡ ኢኮኑ፡ ክልኤተ፡ አላ፡ አሐዱ፡ ሥጋ፡ እሙንቱ።
9 ዘእግዚአብሔር፡ እንከ፡ አስተፃመረ፡ ሰብእ፡ ኢይፍልጥ።
10 ወበቤት፡ ካዕበ፡ ተስእልዎ፡ አርዳኢሁ፡ በእንተ፡ ዝንቱ።
11 ወይቤሎሙ፡ ዘደሐረ፡ ብእሲቶ፡ ወሖረ፡ ካልእተ፡ ዘመወ፡ ላዕሌሃ።
12 ወእንተሂ፡ ደሐራ፡ ምታ፡ ወሖረት፡ ካልአ፡ ዘመወት።
ዘከመ፡ ባረኮሙ፡ እግዚእ፡ ኢየሱስ፡ ለሕፃናት
13 ወአምጽኡ፡ ኀቤሁ፡ ሕፃናተ፡ ይግስሶሙ። ወገሠጽዎሙ፡ አርዳኢሁ፡ ለእለ፡ አቅረብዎሙ።
14 ወርእዮ፡ እግዚእ፡ ኢየሱስ፡ ተምዕዐ፡ ወይቤሎሙ። ኅድጉ፡ ሕፃናት፡ ይምጽኡ፡ ኀቤየ። ወኢትክልእዎሙ፡ እስመ፡ ለዘከመ፡ እሉ፡ ይእቲ፡ መንግሥተ፡ እግዚአብሔር።
15 አማን፡ እብለክሙ። ዘኢተቀበላ፡ ለመንግሥተ፡ እግዚአብሔር፡ ከመ፡ ሕፃን፡ ኢይበውኣ።
16 ወአንበሮሙ፡ ውስተ፡ ሕፅኑ፡ ወባረኮሙ። ወወደየ፡ እዴሁ፡ ዲቤሆሙ።
በእንተ፡ ወሬዛ፡ ባዕል
17 ወእንዘ፡ የሐውር፡ በፍኖት፡ መጽአ፡ አሐዱ፡ ብእሲ። ወሰገደ፡ ሎቱ፡ ወይቤሎ፡ ሊቅ፡ ኄር። ምንተ፡ እግበር፡ ከመ፡ እረስ፡ ሕይወተ፡ ዘለዓለም።
18 ወይቤሎ፡ እግዚእ፡ ኢየሱስ፡ ምንተ፡ ትብለኒ፡ ኄር። አልቦ፡ ኄር፡ ዘእንበለ፡ አሐዱ፡ እግዚአብሔር።
19 ተአምር፡ ትእዛዛተ፡ ኢትሑር፡ ብእሲተ፡ ብእሲ። ኢትቅትል፡ ነፍሰ፡ ኢትስርቅ። ኢትኩን፡ ስምዐ፡ በሐሰት፡ ኢትሂድ። ወአክብር፡ አባከ፡ ወእመከ።
20 ወአውሥአ፡ ወይቤሎ። ሊቅ፡ ዘንተሰ፡ ኵሎ፡ ዐቀብኩ፡ እምንእስየ።
21 ወነጸሮ፡ እግዚእ፡ ኢየሱስ፡ ወአፍቀሮ፡ ወይቤሎ። እመሰ፡ ትፈቅድ፡ ፍጹመ፡ ትኩን፡ አሐቲ፡ ተርፈተከ። ሑር፡ ሢጥ፡ ኵሎ፡ ዘብከ፡ ወሀብ፡ ለነዳያን። ወትረክብ፡ መዝገበ፡ በሰማያት። ወጹር፡ መስቀለ፡ ሞትከ፡ ወነዐ፡ ትልወኒ።
22 ወተከዘ፡ በእንተ፡ ዝንቱ፡ ነገር። ወሖረ፡ ትኩዞ፡ እስመ፡ ብዙኅ፡ ጥሪቱ።
23 ወነጸሮሙ፡ ኢየሱስ፡ ለአርዳኢሁ፡ ወይቤሎሙ። እፎ፡ ዕጹብ፡ ለዘቦ፡ ንዋይ፡ በዊእ፡ ውስተ፡ መንግሥተ፡ ሰማያት።
24 ወአንከሩ፡ አርዳኢሁ፡ ዘንተ፡ ነገረ። ወካዕበ፡ ይቤሎሙ፡ እግዚእ፡ ኢየሱስ፡ ለአርዳኢሁ። ደቂቅየ፡ እፎ፡ ዕጹብ፡ ለእለ፡ ቦሙ፡ ንዋይ። በዊእ፡ ውስተ፡ መንግሥተ፡ እግዚአብሔር።
25 ይቀልል፡ ይኅልፍ፡ ገመል፡ እንተ፡ ቀፈረ፡ ሐጽ። እምባዕል፡ ይባእ፡ ውስተ፡ መንግሥተ፡ እግዚአብሔር።
26 ወፈድፋደ፡ አንከሩ፡ ወተባሀሉ፡ በበይናቲሆሙ። መኑ፡ እንከ፡ ይክል፡ ድኂነ።
27 ወነጸሮሙ፡ እግዚእ፡ ኢየሱስ፡ ወይቤሎሙ። በኀበ፡ ሰብእ፡ ኢይትከሀል፡ ዝ። ወበኀበ፡ እግዚአብሔርሰ፡ ኵሉ፡ ይትከሀል።
በእንተ፡ ዕሴቶሙ፡ ለእለ፡ ይተልውዎ፡ ለእግዚእ፡ ኢየሱስ
28 ወአኀዘ፡ ጴጥሮስ፡ ይበሎ፡ ናሁኬ፡ ንሕነ፡ ኀደግነ፡ ኵሎ፡ ወተሎናከ።
29 ወአውሥአ፡ እግዚእ፡ ኢየሱስ፡ ወይቤሎሙ። አማን፡ እብለክሙ፡ አልቦ፡ ዘየኀድግ፡ አብያተ፡ ወአኀወ፡ ወአኀተ። አበ፡ ወእመ፡ ብእሲተ፡ ወውሉደ፡ ወገራውሀ። በእንቲኣየ፡ ወበእንተ፡ ወንጌልየ።
30 ዘኢይትዐሰይ፡ ምእተ፡ ምክዕቢተ፡ በዝንቱ፡ ዓለም። አብያተ፡ ወአኀወ፡ ወአኀተ፡ ወአበ፡ ወእመ፡ ወውሉደ፡ ወገራውሀ፡ በስደት። ወበዓለምሰ፡ ዘይመጽእ፡ ሕይወተ፡ ዘለዓለም።
31 ወብዙኃን፡ ቀደምት፡ ይከውኑ፡ ደኀርተ። ወደኀርትኒ፡ ይከውኑ፡ ቅድመ።
በእንተ፡ ካልእ፡ ትንቢት፡ ዘሕማማት
32 ወበፍኖት፡ እንዘ፡ የዐርጉ፡ ኢየሩሳሌም፡ ይቀድሞሙ፡ እግዚእ፡ ኢየሱስ። ወደንገፁ፡ ወእለሂ፡ ይተልውዎ፡ ፈርሁ። ወነሥኦሙ፡ ለዐሠርቱ፡ ወክልኤቱ፡ ወአኀዘ፡ ይንግሮሙ፡ ዘሀለዎ፡ ይረከቦ።
33 ወይቤሎሙ፡ ናሁ፡ ነዐርግ፡ ኢየሩሳሌም። ወይእኅዝዎ፡ ለወልደ፡ ዕጓለ፡ እመሕያው፡ ሊቃነ፡ ካህናት፡ ወጸሐፍት።
34 ወይኴንንዎ፡ በሞት፡ ወይሜጥውዎ፡ ለአሕዛብ፡ ወይሣለቁ፡ ላዕሌሁ። ወይዌርቅዎ፡ ወይቀሥፍዎ፡ ወይቀትልዎ፡ ወይትነሣእ፡ በሣልስት፡ ዕለት።
በእንተ፡ ገሥጾ፡ ትዝኅርት፡ ዘደቂቀ፡ ዘብዴዎስ
35 ወእንዘ፡ የሐውሩ፡ ምስሌሁ፡ ያዕቆብ፡ ወዮሐንስ። ክልኤሆሙ፡ ደቂቀ፡ ዘብዴዎስ፡ ይቤልዎ። ሊቅ፡ ንፈቅድ፡ ትግበር፡ ለነ፡ ዘሰአልናከ።
36 ወይቤሎሙ፡ ምንተ፡ ትፈቅዱ፡ እግበር፡ ለክሙ።
37 ወይቤልዎ፡ ሀበነ፡ ንንበር፡ አሐድነ፡ በየማንከ። ወአሐድነ፡ በጸጋምከ፡ በውስተ፡ ስብሐቲከ።
38 ወይቤሎሙ፡ እግዚእ፡ ኢየሱስ፡ ኢተአምሩ፡ ዘትስእሉ። ትክሉኑ፡ እንከ፡ ሰትየ፡ ጽዋዕ፡ ዘአነ፡ እሰቲ። ወጥምቀትየኒ፡ ዘአነ፡ እጠመቅ፡ ትጠመቁኑ። ወይቤልዎ፡ እወ፡ ንክል።
39 ወይቤሎሙ፡ እግዚእ፡ ኢየሱስ፡ ጽዋዕየሰ፡ ዘአነ፡ እሰቲ፡ ትሰትዩ። ወጥምቀትየኒ፡ ዘአነ፡ እጠመቅ፡ ትጠመቁ።
40 ወነቢረሰ፡ በየማንየ፡ ወበጸጋምየ፡ አኮ፡ አነ፡ ዘእሁበክሙ። አላ፡ ለካልኣን፡ አስተዳለወ፡ ሎሙ፡ አቡየ፡ ዘበሰማያት።
41 ወሰሚዖሙ፡ ዐሠርቱ፡ ተምዕዑ፡ ዲበ፡ ክልኤቱ፡ አኀው፡ ያዕቆብ፡ ወዮሐንስ።
42 ወጸውዖሙ፡ እግዚእ፡ ኢየሱስ፡ ወይቤሎሙ። ኢተአምሩኑ፡ ከመ፡ መላእክቲሆሙ፡ ለአሕዛብ፡ ይኴንንዎሙ። ወዐበይቶሙ፡ ይቀንይዎሙ።
43 ወለክሙሰ፡ አኮ፡ ከማሁ፡ አላ፡ ዘይፈቅድ፡ እምኔክሙ፡ ይኩን፡ ሊቀ። ይኩንክሙ፡ ገብረ።
44 ወዘይፈቅድ፡ እምኔክሙ፡ ይኩን፡ ዐቢየ። ይኩንክሙ፡ ላእከ።
45 እስመ፡ ወልደ፡ ዕጓለ፡ እመሕያውኒ፡ ኢመጽአ፡ ከመ፡ ይትለአክዎ። ዘእንበለ፡ ዳእሙ፡ ከመ፡ ይትለአክ። ወከመ፡ ይቤዝዎሙ፡ ለብዙኃን፡ በነፍሱ።
በእንተ፡ ዕዉር፡ ጤሜዎስ፡ ወልደ፡ በርጤሜዎስ
46 ወቦኡ፡ ኢያሪሆ፡ ወወፂኦ፡ እምኢያሪሆ፡ ወአርዳኢሁኒ፡ ምስሌሁ። ወሰብእኒ፡ ብዙኀ፡ ወሀሎ፡ ጤሜዎስ፡ ወልደ፡ በርጤሜዎስ፡ ዕዉር። ይነብር፡ ውስተ፡ ፍኖት፡ ወይስእል።
47 ወሰሚዖ፡ ከመ፡ ኢየሱስ፡ ናዝራዊ፡ የኀልፍ፡ ከልሐ፡ ወይቤ። ተሣሀለኒ፡ ኢየሱስ፡ ወልደ፡ ዳዊት።
48 ወገሠጽዎ፡ ብዙኃን፡ ከመ፡ ያርምም፡ ወአፈድፈደ፡ ከሊሐ፡ ወይቤ። ወልደ፡ ዳዊት፡ ተሣሀለኒ።
49 ወቆመ፡ እግዚእ፡ ኢየሱስ፡ ወአዘዘ፡ ይጸውዕዎ፡ ለውእቱ፡ ዕዉር። ወጸውዕዎ፡ ወይቤልዎ፡ እመን፡ ወተንሥእ፡ ይጼውዐከ፡ ሊቅ።
50 ወተንሥአ፡ ወገደፈ፡ ልብሶ፡ ወለብሰ፡ ልብሶ። ወመጽአ፡ ኀበ፡ እግዚእ፡ ኢየሱስ።
51 ወይቤሎ፡ ወአውሥአ፡ እግዚእ፡ ኢየሱስ። ምንተ፡ ትፈቅድ፡ እግበር፡ ለከ። ወይቤሎ፡ ውእቱ፡ ዕዉር፡ ረቡኒ፡ ከመ፡ እርአይ።
52 ወይቤሎ፡ እግዚእ፡ ኢየሱስ፡ ሑር፡ ሃይማኖትከ፡ አሕየወተከ። ወርእየ፡ ሶቤሃ፡ ወተለዎ፡ በፍኖት።
=== chapter 11 ===
[ምዕራፍ 11]
በእንተ፡ ዕዋል
1 ወአልጺቆሙ፡ ኢየሩሳሌም፡ ኀበ፡ ቤተ፡ ፋጌ፡ ወቢታንያ። በኀበ፡ ደብረ፡ ዘይት፡ ፈነወ፡ ክልኤተ፡ እምአርዳኢሁ።
2 ወይቤሎሙ፡ ሑሩ፡ ውስተ፡ ሀገር፡ እንተ፡ ቅድሜክሙ። ወበዊአክሙ፡ ትረክቡ፡ ሶቤሃ፡ ዕዋለ፡ አድግ፡ እሱረ፡ ዘኢተጽዕኖ፡ ሰብእ፡ ዲቤሁ። ፍትሕዎ፡ ወአምጽእዎ፡ ሊተ።
3 ወለእመ፡ ቦ፡ ዘይቤለክሙ፡ ምንተ፡ ትገብሩ፡ በሉ፡ እግዚኡ፡ ይፈቅዶ። ወሶቤሃ፡ ካዕበ፡ ይፌንወክሙ፡ ዝየ።
4 ወሖሩ፡ ወረከቡ፡ ዕዋለ፡ እሱረ፡ ኀበ፡ አንቀጽ፡ ውስተ፡ ፍኖት፡ ወፈትሕዎ።
5 ወይቤልዎሙ፡ እለ፡ ይቀውሙ፡ ህየ። ምንተ፡ ትገብሩ፡ ዘትፈትሑ፡ ዕዋለ።
6 ወይቤልዎሙ፡ በከመ፡ አዘዞሙ፡ እግዚእ፡ ኢየሱስ፡ ወኀደግዎሙ።
7 ወወሰድዎ፡ ለዕዋል፡ ኀበ፡ እግዚእ፡ ኢየሱስ። ወረሐኑ፡ ላዕሌሁ፡ አልባሲሆሙ፡ ወአጽዐንዎ።
8 ወብዙኃን፡ እለ፡ ነጸፉ፡ ቈጽለ፡ መቲሮሙ፡ እምዕፀው። ወቦ፡ እለ፡ ነጸፉ፡ አልባሲሆሙ፡ ውስተ፡ ፍኖት።
9 እለሂ፡ ይመርሑ፡ ወእለሂ፡ ይተልዉ፡ ይኬልሑ፡ ወይብሉ። ሆሣዕና፡ ቡሩክ፡ ዘይመጽእ፡ በስመ፡ እግዚአብሔር።
10 ወቡርክት፡ እንተ፡ ትመጽእ፡ መንግሥት፡ በስመ፡ እግዚአብሔር። እንተ፡ አቡነ፡ ዳዊት፡ ሆሣዕና፡ በአርያም።
11 ወቦአ፡ እግዚእ፡ ኢየሱስ፡ ኢየሩሳሌም፡ ኀበ፡ ቤተ፡ መቅደስ። ወርእዮ፡ ኵሎ፡ ሶበ፡ መስየ፡ ሖረ፡ ቢታንያ፡ ምስለ፡ ዐሠርቱ፡ ወክልኤቱ።
በእንተ፡ በለስ፡ ዘተረግመት
12 ወበሳኒታ፡ ወፂኦ፡ እምቢታንያ፡ ርኅበ፡ ወርእየ፡ በለሰ፡ እምርሑቅ። ወባቲ፡ ቈጽለ፡ ወሖረ፡ ይርአይ፡ እመ፡ ቦ፡ ዘይረክብ፡ ፍሬ፡ በውስቴታ።
13 ወበጺሖ፡ ኀቤሃ፡ አልቦ፡ ዘረከበ፡ ዘእንበለ፡ ቈጽል፡ ባሕቲቱ። እስመ፡ ኢኮነ፡ ጊዜሁ፡ ለበለስ።
14 ወአውሥአ፡ ወይቤላ፡ አልቦ፡ ዘይበልዕ፡ ፍሬ፡ እምኔኪ፡ ለዓለም፡ እንከ። ወሰምዕዎ፡ አርዳኢሁ።
በእንተ፡ እለ፡ ያረኵሱ፡ ቤተ፡ መቅደስ
15 ወበጽሐ፡ ኢየሩሳሌም፡ ወቦአ፡ ቤተ፡ መቅደስ። ወአኀዘ፡ ይሰድድ፡ እለ፡ ይሠይጡ፡ ወይሣየጡ፡ በምኵራብ። ወገፍትዐ፡ ማእዳቲሆሙ፡ ለመወልጣን። ወመናብርቲሆሙ፡ ለእለ፡ ይሠይጡ፡ ርግበ።
16 ወከልአ፡ አልቦ፡ ዘየኀልፍ፡ ንዋየ፡ እንተ፡ ምኵራብ።
17 ወመሀሮሙ፡ ወይቤሎሙ፡ አኮኑ፡ ጽሑፍ፡ ዘይብል። ቤተየሰ፡ ቤተ፡ ጸሎት፡ ይኩን፡ ለኵሉ፡ አሕዛብ። ወአንትሙሰ፡ ረሰይክምዎ፡ በአተ፡ ፈያት፡ ወሰረቅት።
18 ወሰምዑ፡ ሊቃነ፡ ካህናት፡ ወጸሐፍት። ወኀሠሡ፡ እንተ፡ ኀበ፡ ይቀትልዎ። ወፈርህዎ፡ እስመ፡ ኵሉ፡ ሕዝብ፡ ያነክሩ፡ ምህሮቶ።
19 ወሶበ፡ መስየ፡ ወፅአ፡ አፍኣ፡ እምሀገር።
በእንተ፡ ትውክልት፡ ኀበ፡ አምላክ
20 ወበግብአቶሙ፡ በነግህ፡ ረከብዋ፡ ለይእቲ፡ በለስ፡ ይብስት፡ እምሥርዋ።
21 ወተዘከረ፡ ጴጥሮስ፡ ወይቤሎ። ኦ፡ ሊቅ፡ ነያ፡ እንታክቲ፡ በለስ፡ እንተ፡ ረገምካ፡ የብሰት።
22 ወአውሥአ፡ እግዚእ፡ ኢየሱስ፡ ወይቤሎሙ። እመ፡ ብክሙ፡ ሃይማኖተ፡ እግዚአብሔር።
23 አማን፡ እብለክሙ፡ ለእመ፡ ትብልዎ፡ ለዝ፡ ደብር። ተንሥእ፡ ወተወረው፡ ውስተ፡ ባሕር። ወኢናፈቅሙ፡ በልብክሙ፡ ወተአመንክሙ፡ ከመ፡ ዘነበብክሙ። ይከውን፡ ወትረክቡ።
24 ወበእንተ፡ ዝንቱ፡ እብለክሙ፡ ኵሎ፡ ዘጸለይክሙ፡ ወሰአልክሙ። እንዘ፡ ትትአመኑ፡ ከመ፡ ትረክቡ፡ ወይከውን፡ ለክሙ።
በእንተ፡ ኢ፡ ተዘክሮ፡ እከይ፡ ለቢጹ
25 ወሶበሂ፡ ትጼልዩ፡ ኅድጉ፡ ለቢጽክሙ፡ ዘተኀየስክምዎሙ። ከመ፡ ይኅድግ፡ ለክሙ፡ አቡክሙ፡ ዘበሰማያት፡ አበሳክሙ።
26 ወእመሰ፡ አንትሙ፡ ኢኀደግሙ። አቡክሙኒ፡ ሰማያዊ፡ ኢየኀድግ፡ ለክሙ፡ አበሳክሙ።
በእንተ፡ ተስእሎት፡ ዘዮሐንስ፡ መጥምቅ
27 ወሖረ፡ ካዕበ፡ ኢየሩሳሌም፡ ወእንዘ፡ ያንሶሱ፡ በምኵራብ። መጽኡ፡ ኀቤሁ፡ ሊቃነ፡ ካህናት፡ ወጸሐፍት፡ ወረበናት።
28 ወይቤልዎ፡ በመባሕተ፡ መኑ፡ ትገብር፡ ከመ፡ ዝ። ወመኑ፡ አብሐከ፡ ትግበር፡ ዘንተ።
29 ወይቤሎሙ፡ እግዚእ፡ ኢየሱስ፡ አነሂ፡ እሴአለክሙ፡ አሐተ፡ ነገረ። ወንግሩኒ፡ ወአነሂ፡ እነግረክሙ፡ በመባሕተ፡ መኑ፡ እገብር፡ ዘንተ።
30 ጥምቀቱ፡ ለዮሐንስ፡ እምአይቴኑ። እምሰማይኑ፡ አው፡ እምሰብእኑ፡ አይድዑኒ።
31 ወተባሀሉ፡ በበይናቲሆሙ፡ ለእመ፡ ንብሎ፡ እምሰማይ። ይብለነ፡ ለምንት፡ ኢአመንክምዎ።
32 ወለእመኒ፡ ንብሎ፡ እምሰብእ፡ ንፈርሆሙ፡ ለሕዝብ። እስመ፡ ኵሎሙ፡ ከመ፡ ነቢይ፡ ይሬእይዎ፡ ለዮሐንስ።
33 ወተሠጥውዎ፡ ለእግዚእ፡ ኢየሱስ፡ ወይቤልዎ፡ ኢነአምር።
34 ወአውሥአ፡ እግዚእ፡ ኢየሱስ፡ ወይቤሎሙ። አነኒ፡ ኢይነግረክሙ፡ በመባሕተ፡ መኑ፡ እገብር፡ ከመ፡ ዝ።
=== chapter 12 ===
[ምዕራፍ 12]
በእንተ፡ እኩያን፡ ዐቀብተ፡ ወይን
1 ወአኀዘ፡ ይመስል፡ ሎሙ፡ ወይቤሎሙ። ብእሲ፡ ተከለ፡ ወይነ፡ ወጸቈኖ፡ ወአክረየ፡ ምክያደ። ወሐነጸ፡ ማኅፈደ፡ ውስቴቱ። ወሤመ፡ ሎቱ፡ ገባረ፡ ወዐቀብተ፡ ወይን፡ ወነገደ።
2 ወፈነወ፡ ገብሮ፡ ኀበ፡ ዐቀብተ፡ ወይን፡ በጊዜሁ። ያምጽእ፡ ሎቱ፡ እምፍሬ፡ ወይኑ።
3 ወአኀዝዎ፡ ወቀሠፍዎ፡ ወፈነውዎ፡ ዕራቆ።
4 ወካዕበ፡ ፈነወ፡ ኀቤሆሙ፡ ካልአ፡ ገብሮ። ወኪያሁኒ፡ ወገርዎ፡ ወኰርዕዎ፡ ወፈነውዎ፡ አኅሢሮሙ።
5 ወፈነወ፡ ሣልሳየኒ፡ ገብሮ፡ ወኪያሁኒ፡ ቀተልዎ። ወፈነወ፡ ካልኣነ፡ አግብርተ፡ ብዙኃነ። ቦ፡ ዘቀሠፉ፡ ወቦ፡ ዘቀተሉ።
6 ወቦቱ፡ አሐዱ፡ ወልድ፡ ዘያፈቅር፡ ወፈነዎ፡ ኀቤሆሙ፡ ድኅረ፡ ኵሉ። እንዘ፡ ይብል፡ የኀፍርዎ፡ ለወልድየሰ።
7 ወሶበ፡ ርእይዎ፡ ዐቀብት፡ ይቤሉ። ዝንቱ፡ ውእቱ፡ ወራሲሁ፡ ንዑ፡ ንቅትሎ፡ ወንርከብ፡ ርስቶ።
8 ወአኀዝዎ፡ ወአውፅእዎ፡ አፍኣ፡ እምዐጸደ፡ ወይን፡ ወቀተልዎ።
9 ምንተ፡ እንከ፡ ይሬስዮሙ፡ በዓለ፡ ወይን። ይመጽእ፡ ወይቀትሎሙ፡ ለእልክቱ፡ ገባር፡ ወይሁብ፡ ወይኖ፡ ለካልኣን።
10 ወዘኒ፡ ኢያንበብክሙኑ፡ ውስተ፡ መጽሐፍ። እብን፡ እንተ፡ መነንዋ፡ ነደቅት፡ ይእቲ፡ ኮነት፡ ውስተ፡ ርእሰ፡ ማዕዘንት።
11 እምኀበ፡ እግዚአብሔር፡ ኮነት፡ ዛቲ። ወነካር፡ ይእቲ፡ ለአዕይንቲነ።
12 ወፈቀዱ፡ የአኀዝዎ፡ ወፈርህዎሙ፡ ለሕዝብ። እስመ፡ አእመሩ፡ ከመ፡ በእንቲኣሆሙ፡ ይቤ፡ ዘንተ፡ አምሳለ። ወኀደግዎ፡ ወሖሩ።
ዘከመ፡ ተስእልዎ፡ በእንተ፡ ዲናር
13 ወፈነዉ፡ ኀቤሁ፡ እምፈሪሳውያን፡ ምስለ፡ ሰብአ፡ ሄሮድስ። ከመ፡ ያስሕትዎ፡ በቃሉ።
14 ወመጽኡ፡ ኀቤሁ፡ ወይቤልዎ። ሊቅ፡ ነአምር፡ ከመ፡ ጻድቅ፡ አንተ። ወአልቦ፡ ዘያሐዝነከ፡ ወኢ፡ መኑሂ፡ ወኢታደሉ፡ ለገጸ፡ ሰብእ። ወበጽድቅ፡ ትሜህር፡ ፍኖተ፡ እግዚአብሔር።
15 ይከውነነሁ፡ ነሀብ፡ ጸባሕተ፡ ዲናር፡ ለነጋሢ፡ አው፡ አልቦ።
16 ወአእመሮሙ፡ እግዚእ፡ ኢየሱስ፡ ጉሕሉቶሙ፡ ወይቤሎሙ። ለምንት፡ ታሜክሩኒ፡ አምጽኡ፡ ዲናረ፡ ወአርእዩኒ።
17 ወአምጽኡ፡ ሎቱ፡ ወይቤሎሙ፡ ዘመኑ፡ ዝንቱ፡ መልክዑ፡ ወመጽሐፉ። ወይቤልዎ፡ ዘነጋሢ።
18 ወአውሥአ፡ እግዚእ፡ ኢየሱስ፡ ወይቤሎሙ። ሀቡ፡ ዘነጋሢ፡ ለነጋሢ፡ ወዘእግዚአብሔርኒ፡ ግበሩ፡ ለእግዚአብሔር። ወአንከርዎ።
በእንተ፡ ሰዱቃውያን
19 ወመጽኡ፡ ኀቤሁ፡ ሰዱቃውያን፡ እለ፡ ይብሉ፡ አልቦ፡ ትንሣኤ፡ ምዉታን።
20 ወተስእልዎ፡ ወይቤልዎ። ሊቅ፡ ሙሴ፡ ጸሐፈ፡ ለነ፡ ለእመ፡ ቦ፡ ዘሞተ፡ እኁሁ። ወኀደገ፡ ብእሲቶ፡ እንዘ፡ አልቦ፡ ውሉድ። ያውስባ፡ እኁሁ፡ ለብእሲቱ፡ ወያቅም፡ ዘርዐ፡ ለእኁሁ።
21 ወሀለዉ፡ እንከ፡ በኀቤነ፡ ሰብዐቱ፡ አኀው። ወአውሰበ፡ ዘይልህቅ፡ ብእሲተ፡ ወሞተ፡ እንዘ፡ አልቦ፡ ውሉድ።
22 ወአወሰባ፡ ካልኡኒ፡ ወሞተ፡ እንዘ፡ አልቦ፡ ውሉድ። ወሣልሱኒ፡ ከማሁ።
23 ወእስከ፡ ሰብዐቲሆሙ፡ አውሰብዋ፡ ወኢኀደጉ፡ ውሉደ። ወድኅረ፡ ኵሎሙ፡ ሞተት፡ ይእቲ፡ ብእሲት።
24 አመ፡ የሐይዉ፡ ምዉታን፡ ለመኑ፡ እምኔሆሙ፡ ትከውኖ፡ ብእሲተ። እስመ፡ ሰብዐቲሆሙ፡ አውሰብዋ።
25 ወአውሥአ፡ እግዚእ፡ ኢየሱስ፡ ወይቤሎሙ። አኮኑ፡ በእንተ፡ ዝንቱ፡ ስሕትክሙ። በኢያእምሮ፡ መጻሕፍት፡ ወኢ፡ ኀይለ፡ እግዚአብሔር።
26 እመሰ፡ የሐይዉ፡ ምዉታን፡ ኢያወስቡ፡ ወኢይትዋሰቡ። አላ፡ ከመ፡ መላእክተ፡ እግዚአብሔር፡ እሙንቱ፡ በሰማያት።
27 ወከመሰ፡ የሐይዉ፡ ምዉታን፡ ኢያንበብክሙኑ፡ በውስተ፡ መጽሐፈ፡ ሙሴ። ዘይቤሎ፡ እግዚአብሔር፡ በኀበ፡ ዕፀ፡ ጳጦስ፡ እንዘ፡ ይብል። አነ፡ ውእቱ፡ እግዚአብሔር፡ አምላክከ፡ አምላከ፡ አብርሃም። ወአምላከ፡ ይስሐቅ፡ ወአምላከ፡ ያዕቆብ።
28 ኢኮንኬ፡ አምላከ፡ ምዉታን፡ አላ፡ አምላከ፡ ሕያዋን፡ ውእቱ። ወአንትሙሰ፡ ብዙኀ፡ ትጌግዩ።
በእንተ፡ ጸሓፊ፡ ዘተስእሎ
29 ወመጽአ፡ አሐዱ፡ ጸሓፊ፡ ሰሚዖ፡ ከመ፡ ተኀሠሥዎ። ወሶበ፡ ርእየ፡ ከመ፡ ሠናየ፡ ተሠጥዎሙ፡ ተስእሎ፡ ወይቤሎ። አይኑ፡ ትእዛዝ፡ ቀዳሚት፡ እምኵሉ።
30 ወአውሥአ፡ እግዚእ፡ ኢየሱስ፡ ወይቤሎ። ዛቲ፡ ይእቲ፡ ቀዳሚት፡ እምኵሉ፡ ትእዛዝ። ስማዕ፡ እስራኤል፡ አሐዱ፡ ውእቱ፡ እግዚአብሔር፡ አምላክከ።
31 ወአፍቅሮ፡ ለእግዚአብሔር፡ አምላክከ፡ በኵሉ፡ ልብከ፡ ወበኵሉ፡ ነፍስከ። ወበኵሉ፡ ኅሊናከ፡ ወበኵሉ፡ ኀይልከ። ዛቲ፡ ይእቲ፡ ቀዳሚት፡ ትእዛዝ።
32 ወካልእታሂ፡ እንተ፡ ትመስላ፡ ዛቲ፡ ይእቲ። አፍቅር፡ ቢጸከ፡ ከመ፡ ነፍስከ። ወዘየዐቢ፡ እምእላንቱ፡ ትእዛዛት፡ አልቦ።
33 ወይቤሎ፡ ውእቱ፡ ጸሓፊ፡ ሠናየ፡ ትቤ፡ ሊቅ። አማን፡ አሐዱ፡ ውእቱ፡ እግዚአብሔር፡ ወአልቦ፡ ባዕድ፡ ዘእንበሌሁ።
34 ወከመ፡ ታፍቅሮ፡ በኵሉ፡ ልብከ፡ ወበኵሉ፡ ነፍስከ። ወበኵሉ፡ ኅሊናከ፡ ወበኵሉ፡ ኀይልከ። ወከመ፡ ታፍቅር፡ ቢጸከ፡ ከመ፡ ነፍስከ። ወዝንቱ፡ ይኄይስ፡ እምኵሉ፡ መባእ፡ ወእምኵሉ፡ መሥዋዕት።
35 ወርእዮ፡ ከመ፡ ጠቢብ፡ ውእቱ፡ ይቤሎ፡ እግዚእ፡ ኢየሱስ። ኢኮንከ፡ ርሑቀ፡ እመንግሥተ፡ እግዚአብሔር። ወአልቦ፡ እንከ፡ ዘተሐበለ፡ ይሰአሎ።
በእንተ፡ ዘተስእሎሙ፡ ክርስቶስ
36 ወይቤሎሙ፡ እግዚእ፡ ኢየሱስ፡ እንዘ፡ ይሜህሮሙ፡ በምኵራብ። እፎ፡ ይብሉ፡ ጸሐፍት፡ ከመ፡ ክርስቶስ፡ ወልደ፡ ዳዊት፡ ውእቱ።
37 ወለሊሁሰ፡ ዳዊት፡ ይቤ፡ በመንፈስ፡ ቅዱስ። ይቤሎ፡ እግዚእ፡ ለእግዚእየ፡ ንበር፡ በየማንየ። እስከ፡ አገብኦሙ፡ ለጸላእትከ፡ ታሕተ፡ መከየደ፡ እገሪከ።
38 ዘለሊሁ፡ እንከ፡ ዳዊት፡ እግዚእየ፡ ይቤሎ። እፎ፡ እንከ፡ ይከውኖ፡ ወልዶ።
39 ወኵሉ፡ ሕዝብ፡ ሠናየ፡ ያጸምእዎ፡ ወይቤሎሙ። እንዘ፡ ይሜህሮሙ፡ ዑቁ፡ ወተዐቀቡ፡ እምጸሐፍት። እለ፡ ይፈቅዱ፡ ያንሶስዉ፡ ተላቢሶሙ፡ ወይትአምኅዎሙ፡ በምሥያጣት።
40 ወይነብሩ፡ ፍጽመ፡ በውስተ፡ አዕዋዳት። ወርእሰ፡ ምርፋቃት፡ በውስተ፡ ምሳሓት።
41 እለ፡ ይውኅጥዎን፡ ለአብያተ፡ መበለታት፡ ወይትሜየኑ፡ በነዋኅ፡ ጸሎቶሙ። እሉ፡ ይረክቡ፡ ዘየዐቢ፡ ኵነኔ።
በእንተ፡ ክልኤ፡ ጸረቅ
42 ወነቢሮ፡ እግዚእ፡ ኢየሱስ፡ ኆኅተ፡ ምኵራብ። መንጸረ፡ ሙዳየ፡ ምጽዋት፡ ይሬኢ፡ ሰብአ፡ ዘያበውኡ፡ ጸራይቀ። ወይወድዩ፡ ውስተ፡ ሙዳየ፡ ምጽዋት። ወብዙኃን፡ አብዕልት፡ እለ፡ አብኡ፡ ብዙኀ።
43 ወመጽአት፡ አሐቲ፡ ብእሲት፡ ነዳይት፡ መበለተ። ወአብአት፡ ክልኤ፡ ጸራይቀ፡ ዘይብልዎ፡ ቆንደራጢስ።
44 ወጸውዖሙ፡ ለአርዳኢሁ፡ ወይቤሎሙ። አማን፡ እብለክሙ፡ ከመ፡ ዛቲ፡ ነዳይት፡ መበለት። አብዝኀት፡ አብኦ፡ እምኵሎሙ፡ እለ፡ አብኡ፡ ውስተ፡ ሙዳየ፡ ምጽዋት።
45 እስመ፡ ኵሎሙ፡ እለ፡ አብኡ፡ እምተረፎሙ፡ አብኡ። ወይእቲሰ፡ እምተጽናሳ፡ ኵሎ፡ ዘባቲ፡ አብአት፡ ወኵሎ፡ መንበርታ።
=== chapter 13 ===
[ምዕራፍ 13]
በእንተ፡ ንስተተ፡ ቤተ፡ መቅደስ፡ ወኢየሩሳሌም
1 ወወፂኦ፡ እምኵራብ፡ ይቤሎ፡ አሐዱ፡ እምአርዳኢሁ። ሊቅ፡ ርኢ፡ ምንተ፡ ይመስል፡ ንድቁ፡ ወእበኒሁ።
2 ወአውሥአ፡ እግዚእ፡ ኢየሱስ፡ ወይቤሎ። ትሬኢኑ፡ ዘንተ፡ ኵሎ፡ ንድቀ፡ ዐቢየ። ኢይትኀደግ፡ ዝየ፡ እብን፡ ዲበ፡ እብን፡ ዘኢይትነሠት።
በእንተ፡ ኅልቀተ፡ ዓለም
3 ወእንዘ፡ ይነብር፡ ውስተ፡ ደብረ፡ ዘይት፡ አንጻረ፡ ምኵራብ። ተስእልዎ፡ በባሕቲቶሙ፡ ጴጥሮስ፡ ወያዕቆብ፡ ወዮሐንስ፡ ወእንድርያስ።
4 ወይቤልዎ፡ ንግረነ፡ ማእዜ፡ ይከውን፡ ዝንቱ፡ ኵሉ።
5 ወአውሥአ፡ እግዚእ፡ ኢየሱስ፡ ወአኀዘ፡ ይበሎሙ፡ ዑቁ፡ ኢያስሕቱክሙ።
6 እስመ፡ ብዙኃን፡ ይመጽኡ፡ በስምየ፡ እንዘ፡ ይብሉ። አነ፡ ውእቱ፡ ክርስቶስ፡ ወያስሕትዎሙ፡ ለብዙኃን።
7 ወእመ፡ ሰማዕክሙ፡ አፅባዕተ፡ ወድምፀ፡ ፀባኢት፡ ኢትደንግፁ። እስመ፡ ሀለዎ፡ ይኩን፡ ዝንቱ፡ ወባሕቱ፡ አኮ፡ ሶቤሃ፡ ዘየኀልቅ።
8 ወይትነሣእ፡ ሕዝብ፡ ዲበ፡ ሕዝብ፡ ወነገሥት፡ ዲበ፡ ነገሥት። ወይከውን፡ ድልቅልቅ፡ በበ፡ ብሔሩ። ወይመጽእ፡ ረኀብ፡ ወዝንቱ፡ ቀዳሚሁ፡ ለጻዕር።
9 ወአንትሙሰ፡ ዑቁ፡ ርእሰክሙ፡ ወይወስዱክሙ፡ አዕዋዳተ፡ ወይቀሥፉክሙ፡ በመኳርብት። ወይትባጽሑክሙ፡ ኀበ፡ መላእክት፡ ወነገሥት፡ በእንቲኣየ። ከመ፡ ይኩን፡ ስምዐ፡ ላዕሌሆሙ።
10 ወለኵሎሙ፡ አሕዛብ፡ ይደሉ፡ ይቅድሙ፡ ወይስብክዎ፡ ለወንጌል።
11 ወሶበሂ፡ ያበጽሑክሙ፡ ኢትቅድሙ፡ ተኀልዩ፡ ዘትብሉ፡ ወዘትነብቡ። ወዘአንበበክሙ፡ ሶቤሃ፡ ንበቡ፡ እስመ፡ ኢኮንክሙ፡ አንትሙ፡ ዘትነብቡ። ዘእንበለ፡ መንፈስ፡ ቅዱስ።
12 ወያገብእ፡ እኅው፡ እኅዋሁ፡ ለሞት፡ ወአብኒ፡ ወልዶ። ወውሉድ፡ ይትነሥኡ፡ ዲበ፡ አዝማዲሆሙ፡ ወይቀትልዎሙ።
13 ወትከውኑ፡ ጽሉኣነ፡ በኀበ፡ ኵሉ፡ ሰብእ፡ በእንተ፡ ስምየ። ወዘሰ፡ አዝለፈ፡ ትዕግሥቶ፡ ውእቱ፡ ይድኅን።
14 ወሶበ፡ ርኢክሙ፡ ኀሣሮ፡ ለሙስና፡ ዘይቤ፡ ዳንኤል፡ ነቢይ። ዘይቀውም፡ ውስተ፡ መካን፡ ቅዱስ፡ ኀበ፡ ኢይከውን፡ ዘያነብብ፡ ለይለቡ።
15 ይእተ፡ አሚረ፡ እለ፡ ውስተ፡ ይሁዳ፡ ይጐዩ፡ ውስተ፡ አድባር። ወዘኒ፡ ውስተ፡ ናሕስ፡ ኢይረድ፡ ውስተ፡ ቤት። ወኢይባእ፡ ይንሣእ፡ ዘኮነ፡ ውስተ፡ ቤት።
16 ወዘኒ፡ ገዳመ፡ ሀሎ፡ ኢይትመየጥ፡ ድኅሬሁ፡ ከመ፡ ይንሣእ፡ ልብሶ።
17 ወባሕቱ፡ አሎ፡ ሎን፡ ለፅኑሳት። ወለእለ፡ የሐፅና፡ ይእተ፡ አሚረ፡ በውእቱ፡ መዋዕል።
18 ወጸልዩ፡ ከመ፡ ኢይኩን፡ ጕያክሙ፡ በክረምት።
19 እስመ፡ ይከውን፡ ይእተ፡ አሚረ፡ ዐቢይ፡ ሕማም። ዘእምአመ፡ ኮነ፡ ዓለም፡ ኢኮነ፡ ከማሁ። ወእምአመ፡ ፈጠረ፡ እግዚአብሔር፡ ኢኮነ፡ ወኢይከውንሂ።
20 ወሶበ፡ አኮ፡ ዘአኅጸሮን፡ እግዚአብሔር፡ ለእማንቱ፡ መዋዕል። እምኢድኅነ፡ ኵሉ፡ ዘሥጋ። ወባሕቱ፡ በእንተ፡ ኅሩያኒሁ፡ እለ፡ ኀረየ፡ እግዚአብሔር። የኀጽራ፡ እማንቱ፡ መዋዕል።
21 ወይእተ፡ አሚረ፡ እመ፡ ቦ፡ ዘይቤለክሙ፡ ነዋ፡ ዝየ፡ ሀሎ፡ ክርስቶስ። ወነዋ፡ ከሃክ፡ ኢትእመኑ።
22 እስመ፡ ይመጽኡ፡ ሐሳውያነ፡ መሲሕ፡ ወሐሳውያነ፡ ነቢያት። ወይገብሩ፡ ተኣምረ፡ ወመንክረ፡ ከመ፡ ያስሕቱ። ወሶበሰ፡ ይትከሀሎሙ፡ እምአስሐትዎሙ፡ ለኅሩያንሂ።
23 ወአንትሙሰ፡ ዑቁ፡ ናሁ፡ አቅደምኩ፡ ነጊሮተክሙ፡ ኵሎ።
በእንተ፡ ምጽአቱ፡ ለወልደ፡ ዕጓለ፡ እመሕያው
24 ወባሕቱ፡ ይእተ፡ አሚረ፡ ምስለ፡ ዝ፡ ኵሉ፡ ሕማም። ፀሓይኒ፡ ይጸልም፡ ወወርኅ፡ ኢይሁብ፡ ብርሃኖ።
25 ወከዋክብትኒ፡ ይወድቁ፡ እምሰማይ፡ ወይትከወስ፡ ኀይለ፡ ሰማያት።
26 ወአሜሃ፡ ይሬእይዎ፡ ለወልደ፡ ዕጓለ፡ እመሕያው። እንዘ፡ ይመጽእ፡ በደመና፡ ምስለ፡ ኀይል፡ ወብዙኅ፡ ስብሐት።
27 ወይእተ፡ አሚረ፡ ይፌንዎሙ፡ ለመላእክቲሁ፡ ወያስተጋብእዎሙ፡ ለኅሩያኒሁ። እምአርባዕቱ፡ ነፋሳት፡ እምአጽናፈ፡ ምድር፡ እስከ፡ አጽናፈ፡ ሰማይ።
28 ወእምበለስ፡ አእምሩ፡ አምሳሊሁ፡ እምከመ፡ ኮነ፡ አጽቃ፡ ድኩመ። ወሠረጸ፡ ቈጽላ፡ ይትዐወቅ፡ ከመ፡ አልጸቀ፡ ማእረር።
29 ከማሁኬ፡ አንትሙኒ፡ እምከመ፡ ርኢክሙ፡ ዘንተ፡ ኵሎ፡ ከመ፡ ኮነ። አእምሩ፡ ከመ፡ በጽሐ፡ ኀበ፡ ኆኅት።
30 አማን፡ እብለክሙ፡ ከመ፡ ኢተኀልፍ፡ ዛቲ፡ ትውልድ። ዘእንበለ፡ ይኩን፡ ዝንቱ፡ ኵሉ።
31 ሰማይ፡ ወምድር፡ የኀልፍ፡ ወቃልየሰ፡ ኢየኀልፍ።
በእንተ፡ ሰዓት፡ ወዕለት
32 ወበእንተሰ፡ ይእቲ፡ ዕለት፡ ወይእቲ፡ ሰዓት፡ አልቦ፡ ዘየአምራ። ኢ፡ መላእክተ፡ ሰማይ፡ ወኢ፡ ወልድ፡ ዘእንበለ፡ አብ፡ ባሕቲቱ።
33 ዑቁ፡ ትግሁ፡ ወጸልዩ፡ እስመ፡ ኢተአምሩ፡ ማእዜ፡ መዋዕለ፡ ጊዜሁ።
34 እስመ፡ ከመ፡ ብእሲ፡ ዘይነግድ፡ ወየኀድግ፡ ቤቶ። ወይሁቦሙ፡ ግብሮሙ፡ ለአግብርቲሁ፡ ለለ፡ አሐዱ፡ እምኔሆሙ። ወይኤዝዞ፡ ለዐጻዊነ፡ ከመ፡ ይትጋህ።
35 ትግሁ፡ እንከ፡ እስመ፡ ኢተአምሩ፡ ማእዜ፡ ይመጽእ፡ በዓለ፡ ቤት። እመሂ፡ ሠርክ፡ ወእመሂ፡ መንፈቀ፡ ሌሊት። ወእመሂ፡ ጊዜ፡ ይነቁ፡ ዶርሆ፡ ወእመሂ፡ ጸቢሖ።
36 ኢይምጻእክሙ፡ ግብተ፡ ወኢይርከብክሙ፡ እንዘ፡ ትነውሙ።
37 ወናሁ፡ እብለክሙ፡ ለኵልክሙ፡ ትግሁ።
=== chapter 14 ===
[ምዕራፍ 14]
ዘከመ፡ ተማከሩ፡ ሊቃነ፡ ካህናት፡ ይቅትልዎ፡ ለእግዚእ፡ ኢየሱስ
1 ወእስከ፡ ሰኑይ፡ መዋዕል፡ ይከውን፡ ፋሲካ፡ በዓለ፡ መጸለት። ወኀሠሡ፡ ሊቃነ፡ ካህናት፡ ወጸሐፍት፡ ይትመየንዎ፡ ወየአኀዝዎ፡ ወይቅትልዎ።
2 ወይቤሉ፡ አኮ፡ በበዓል፡ ከመ፡ ኢይትሀወኩ፡ ሕዝብ።
በእንተ፡ እንተ፡ ቀብዐቶ፡ ዕፍረተ
3 ወእንዘ፡ ሀሎ፡ ቢታንያ፡ በቤተ፡ ስምዖን፡ ዘለምጽ፡ እንዘ፡ ይረፍቅ። መጽአት፡ ብእሲት፡ ወአምጽአት፡ ዕፍረተ፡ ዘአልባስጥሮስ። ዘናርዱ፡ ቅድው፡ ዘዕጹብ፡ ሤጡ። ወአኮሰቶ፡ ወሦጠት፡ ዲበ፡ ርእሱ።
4 ወቦ፡ እለ፡ ተምዕዑ፡ ወይቤሉ፡ ለምንት፡ ዘመጠነ፡ ዝ፡ ሀጕል፡ ዘዝ፡ ዕፍረት።
5 እምኢተክሀለኑ፡ ይሠየጥ፡ ዝንቱ፡ ዕፍረት፡ ፈድፋደ። እምሠለስቱ፡ ምእት፡ ዲናር፡ ወይትወሀብ፡ ለነዳያን። ወገሠጽዋ።
6 ወይቤሎሙ፡ እግዚእ፡ ኢየሱስ፡ ኅድግዋ፡ ለብእሲት፡ ወኢታሥርሕዋ። ሠናየ፡ ግብረ፡ ገብረት፡ ላዕሌየ።
7 ወለነዳያንሰ፡ ዘልፈ፡ ትረክብዎሙ፡ በኀቤክሙ። ወጊዜ፡ ፈቀድክሙ፡ ታሤንዩ፡ ሎሙ። ወኪያየሰ፡ አኮ፡ ዘልፈ፡ ዘትረክቡኒ።
8 ወዛቲኒ፡ ዘባቲ፡ ገብረት፡ ወአቅደመት፡ ወቀብዐተኒ፡ ሥጋየ፡ ለቀበርየ።
9 አማን፡ እብለክሙ፡ በኀበ፡ ሰበክዋ፡ ለዛቲ፡ ወንጌል፡ ውስተ፡ ኵሉ፡ ዓለም። ይነግሩ፡ ዘገብረት፡ ዛቲ፡ ብእሲት፡ ወይዜክርዋ።
ዘከመ፡ ሤጦ፡ ይሁዳ
10 ወይሁዳ፡ አስቆሮታዊ፡ አሐዱ፡ እምዐሠርቱ፡ ወክልኤቱ። ሖረ፡ ኀበ፡ ሊቃነ፡ ካህናት፡ ከመ፡ ያግብኦ፡ ሎሙ።
11 ወሰሚዖሙ፡ ተፈሥሑ፡ ወተናገርዎ፡ የሀብዎ፡ ሠላሳ፡ ብሩረ። ወፈቀደ፡ በጽሚት፡ ያግብኦ፡ ሎሙ።
በእንተ፡ ደኃሪት፡ ድራር፡ ወአስተዳልዎት
12 ወአመ፡ ቀዳሚት፡ ዕለት፡ በዓለ፡ መጸለት፡ ፋሲካ፡ አመ፡ ይጠብሑ፡ ፍሥሐ። ይቤልዎ፡ አርዳኢሁ፡ በአይቴ፡ ትፈቅድ፡ ናስተዳሉ፡ ለከ፡ ትብላዕ፡ ፍሥሐ።
13 ወፈነወ፡ ክልኤተ፡ እምአርዳኢሁ፡ ወይቤሎሙ። ሑሩ፡ ሀገረ፡ ዘቅድሜክሙ፡ ወትረክቡ፡ ብእሴ፡ ዘይጸውር፡ ጻሕበ፡ ማይ። ወትልውዎ፡ ኀበ፡ ቦአ፡ ቤት።
14 ወበልዎ፡ ለበዓለ፡ ቤት፡ ይቤለከ፡ ሊቅ። አይቴኑ፡ ጽርሕ፡ ኀበ፡ እበልዕ፡ ፍሥሐ፡ ምስለ፡ አርዳእየ።
15 ወውእቱ፡ ያርእየክሙ፡ ጽርሐ፡ ዐቢየ፡ ወንጹፈ፡ ወርሱየ። ወበህየ፡ አስተዳልዉ፡ ለነ።
16 ወሖሩ፡ አርዳኢሁ፡ ሀገረ፡ ወረከቡ፡ በከመ፡ ይቤሎሙ። ወአስተዳለዉ፡ በህየ፡ ፍሥሐ።
17 ወመስዮ፡ ሖረ፡ ምስለ፡ ዐሠርቱ፡ ወክልኤቱ፡ አርዳኢሁ።
ዘከመ፡ ከሠተ፡ ለሐዋርያት፡ ዘያገብኦ
18 ወእንዘ፡ ይረፍቁ፡ ወይበልዑ፡ ይቤሎሙ፡ እግዚእ፡ ኢየሱስ። አማን፡ እብለክሙ፡ አሐዱ፡ እምኔክሙ፡ ዘይበልዕ፡ ምስሌየ፡ ያገብአኒ።
19 ወአኀዙ፡ ይተክዙ፡ ወይበሉ፡ በበ፡ አሐዱ፡ አነኑ፡ እንጋ፡ ውእቱ።
20 ወአውሥአ፡ ወይቤሎሙ፡ አሐዱ፡ እምዐሠርቱ፡ ወክልኤቱ። ዘይጸብሕ፡ ምስሌየ፡ ውስተ፡ መጽብሕየ።
21 ወወልደ፡ ዕጓለ፡ እመሕያውሰ፡ የሐውር፡ በከመ፡ ጽሑፍ፡ በእንቲኣሁ። ወባሕቱ፡ አሌ፡ ሎቱ፡ ለውእቱ፡ ብእሲ። ዘእምኔሁ፡ ይትሜጠውዎ፡ ለወልደ፡ ዕጓለ፡ እመሕያው፡ እምኀየሶ። ሶበ፡ ኢተወልደ፡ ለውእቱ፡ ብእሲ።
ዘከመ፡ ሠርዐ፡ አኰቴት፡ ቍርባን
22 ወእንዘ፡ ይበልዑ፡ ነሥአ፡ እግዚእ፡ ኢየሱስ፡ ኅብስተ። ወባረከ፡ ወፈተተ፡ ወወሀቦሙ፡ ወይቤሎሙ። ንሥኡ፡ ብልዑ፡ ዝ፡ ውእቱ፡ ሥጋየ።
23 ወነሥአ፡ ጽዋዐኒ፡ ወአእኵቶ፡ ወሀቦሙ፡ ወይቤሎሙ። ንሥኡ፡ ወስትዩ፡ እምኔሁ፡ ኵልክሙ።
24 ወይቤሎሙ፡ ዝ፡ ውእቱ፡ ደምየ፡ ዘሐዲስ፡ ሥርዐት። ዘይትከዐው፡ በእንተ፡ ብዙኃን።
25 አማን፡ እብለክሙ፡ ኢይሰቲ፡ እንከ፡ እምዝንቱ፡ ፍሬ፡ ወይን። እስከ፡ እንታክቲ፡ ዕለት፡ አመ፡ እሰትዮ፡ ሐዲሰ፡ በመንግሥተ፡ እግዚአብሔር።
ዘከመ፡ ኀደግዎ፡ ሐዋርያት፡ ለእግዚእ፡ ኢየሱስ
26 ሰቢሖሙ፡ ወአንቢቦሙ፡ ወፅኡ፡ ውስተ፡ ደብረ፡ ዘይት።
27 ወይቤሎሙ፡ እግዚእ፡ ኢየሱስ፡ ለአርዳኢሁ። ኵልክሙ፡ ትክሕዱኒ፡ በዛቲ፡ ሌሊት። እስመ፡ ጽሑፍ፡ ዘይብል፡ እቀትሎ፡ ለኖላዊ፡ ወይዘረዋ፡ አባግዒሁ።
28 ወእምድኅረ፡ ተንሣእኩ፡ እቀድመክሙ፡ ገሊላ።
29 ወይቤሎ፡ ጴጥሮስ፡ ለእመኒ፡ ኵሎሙ፡ ክሕዱከ፡ አንሰ፡ ኢይክሕደከ።
30 ወይቤሎ፡ እግዚእ፡ ኢየሱስ፡ አማን፡ እብለከ። አንተ፡ ትክሕደኒ፡ ዮም፡ ሥልሰ፡ በዛቲ፡ ሌሊት። ዘእንበለ፡ ይንቁ፡ ዶርሆ፡ ክልኤ፡ ጊዜ።
31 ወአፈድፈደ፡ ጴጥሮስ፡ ትምክሕተ፡ ወተኀልፎተ። እንዘ፡ ይብል፡ እመውትሂ፡ ምስሌከ፡ ወኢይክሕደከ። ወከማሁ፡ ይቤሉ፡ ኵሎሙ።
32 ወሖሩ፡ ዐጸደ፡ ወይን፡ እንተ፡ ስማ፡ ጌቴሴማን። ወይቤሎሙ፡ ለአርዳኢሁ፡ ንበሩ፡ ዝየ፡ እስከ፡ አሐውር፡ ከሃ፡ ወእጸሊ።
33 ወነሥኦሙ፡ ለጴጥሮስ፡ ወለያዕቆብ፡ ወለዮሐንስ፡ ምስሌሁ። ወአኀዘ፡ ይተክዝ፡ ወይሕዝን።
34 ወይቤሎሙ፡ ተከዘት፡ ነፍስየ፡ እስከ፡ ለሞት። ንበሩ፡ ዝየ፡ ወትግሁ፡ እንከ።
35 ወእምዝ፡ ተአተተ፡ ሕቀ፡ ወሰገደ፡ ውስተ፡ ምድር። ወጸለየ፡ ከመ፡ ትኅልፍ፡ እምኔሁ፡ ይእቲ፡ ሰዓት፡ ለእመ፡ ይትከሀል።
36 ወይቤ፡ አባ፡ ወአቡየ፡ ኵሉ፡ ይትከሀለከ። አኅልፋ፡ እምኔየ፡ ለዛቲ፡ ጽዋዕ። ወባሕቱ፡ ፈቃደ፡ ዚኣከ፡ ለይኩን፡ ወአኮ፡ ፈቃደ፡ ዚኣየ።
37 ወገቢኦ፡ ረከቦሙ፡ እንዘ፡ ይነውሙ፡ ወይቤሎ፡ ለጴጥሮስ፡ ስምዖን። ትነውምኑ፡ ወኢትክል፡ ተዐግሦ፡ አሐተ፡ ሰዓተ።
38 ትግሁ፡ ወጸልዩ፡ ከመ፡ ኢትባኡ፡ ውስተ፡ መንሱት። እስመ፡ መንፈስ፡ ይፈቅድ፡ ወሥጋ፡ ይደክም።
39 ወሖረ፡ ካዕበ፡ ወጸለየ፡ ወከማሁ፡ ክመ፡ ይቤ።
40 ወገቢኦ፡ ካዕበ፡ ረከቦሙ፡ እንዘ፡ ይነውሙ። እስመ፡ ከብዳ፡ አዕይንቲሆሙ፡ ወኢየአምሩ፡ ዘይነብቡ።
41 ወመጽአ፡ በሣልስ፡ ወይቤሎሙ፡ ኑሙ፡ እንከሰ፡ ወአዕርፉ፡ ምዕረ። እስመ፡ ናሁ፡ በጽሐ፡ ጊዜሁ። ወናሁ፡ ያገብእዎ፡ ለወልደ፡ ዕጓለ፡ እመሕያው፡ ውስተ፡ እደ፡ ኃጥኣን።
42 ተንሥኡ፡ ንሑር፡ ናሁ፡ በጽሐ፡ ዘያገብአኒ።
በእንተ፡ ዘከመ፡ አግብኦ፡ ይሁዳ፡ ለእግዚእ፡ ኢየሱስ
43 ወእንዘ፡ ይትናገሮሙ፡ በጽሐ፡ ሶቤሃ፡ ይሁዳ፡ አስቆሮታዊ። አሐዱ፡ እምዐሠርቱ፡ ወክልኤቱ። ወምስሌሁ፡ ብዙኃን፡ ሰብእ፡ ምስለ፡ መጣብሕ፡ ወዕፀወ። እምኀበ፡ ሊቃነ፡ ካህናት፡ ወጸሐፍት፡ ወረበናት።
44 ወወሀቦሙ፡ ትእምርተ፡ ዘያገብኦ፡ ወይቤሎሙ። ዘሰዐምክዎ፡ ውእቱ፡ አኀዝዎ፡ ወአጽንዕዎ፡ ወሰድዎ።
45 ወሶቤሃ፡ መጽአ፡ ኀቤሁ፡ ወይቤሎ፡ ረቢ፡ ወሰዐሞ።
46 ወሰፍሑ፡ እደዊሆሙ፡ ላዕሌሁ፡ ወአኀዝዎ።
47 ወመልኀ፡ መጥባሕቶ፡ አሐዱ፡ እምእለ፡ ምስሌሁ፡ ይቀውሙ። ወዘበጦ፡ ለገብረ፡ ሊቀ፡ ካህናት፡ ወመተረ፡ እዝኖ።
48 ወአውሥአ፡ እግዚእ፡ ኢየሱስ፡ ወይቤሎሙ። ከመ፡ ሰራቂኑ፡ ትዴግኑኒ፡ መጻእክሙ። ምስለ፡ መጣብሕ፡ ወአብትር፡ ተአኀዙኒ።
49 ወኵሎ፡ አሚረ፡ ሀሎኩ፡ ምስሌክሙ፡ እሜህር፡ በምኵራብ። ወኢአኀዝክሙኒ፡ ወባሕቱ፡ ከመ፡ ይብጻሕ፡ ዘውስተ፡ መጻሕፍት።
50 ወኀደግዎ፡ ኵሎሙ፡ አርዳኢሁ፡ ወጐዩ።
51 ወተለዎ፡ አሐዱ፡ ወሬዛ፡ ዘይትዐጸፍ፡ ሰንዱነ፡ ወአኀዝዎ፡ ወራዙት።
52 ወኀደገ፡ ሰንዱኖ፡ ወጐየ፡ ዕራቆ።
ዘከመ፡ ቆመ፡ ኢየሱስ፡ በዐውድ
53 ወወሰድዎ፡ ለእግዚእ፡ ኢየሱስ፡ ኀበ፡ ሊቀ፡ ካህናት። ወተጋብኡ፡ ኀቤሁ፡ ኵሎሙ፡ ሊቃነ፡ ካህናት፡ ወጸሐፍት፡ ወረበናት።
54 ወተለዎ፡ ጴጥሮስ፡ እምርሑቅ፡ እስከ፡ ውሳጤ፡ ዐጸደ፡ ሊቀ፡ ካህናት። ወነበረ፡ ምስለ፡ ወዓልያንሆሙ፡ ይስሕን፡ መንገለ፡ በርህ።
55 ወኀሠሡ፡ ሊቃነ፡ ካህናት፡ ወኵሉ፡ ዐውድ፡ ሰማዕተ፡ ሐሰት። ዘያስተዋድይዎ፡ ለእግዚእ፡ ኢየሱስ፡ ከመ፡ ይቅትልዎ፡ ወኀጥኡ።
56 ወብዙኃን፡ እለ፡ አስተዋደይዎ፡ ወኢኀበረ፡ ቃሎሙ።
57 ወቦ፡ ሰማዕተ፡ ሐሰት፡ እለ፡ ተንሥኡ፡ ወነበቡ፡ ሐሰተ።
58 ወይቤሉ፡ ንሕነ፡ ሰማዕናሁ፡ እንዘ፡ ይብል። አነ፡ እነሥቶ፡ ለዝንቱ፡ ቤተ፡ መቅደስ፡ ዘእድ፡ ገብሮ። ወበሠሉስ፡ ዕለት፡ ኣሐንጽ፡ ካልእ፡ ዘእድ፡ ኢገብሮ።
59 ወምስለ፡ ዝኒ፡ ኢኀበረ፡ ስምዖሙ።
60 ወተንሥአ፡ ሊቀ፡ ካህናት፡ ወሐተቶ፡ ለእግዚእ፡ ኢየሱስ፡ ወይቤሎ። አልቦኑ፡ ዘትሰጠው፡ እንዘ፡ መጠነ፡ ዝ፡ ያስተዋድዩከ።
61 ወአርመመ፡ ወኢተሰጥዎ፡ ወኢ፡ ምንተኒ። ወካዕበ፡ ሐተቶ፡ ሊቀ፡ ካህናት፡ ወይቤሎ። አንተኑ፡ ውእቱ፡ ክርስቶስ፡ ወልዱ፡ ለቡሩክ።
62 ወይቤሎ፡ እግዚእ፡ ኢየሱስ፡ እወ፡ አነ፡ ውእቱ። ወትሬእይዎ፡ ለወልደ፡ ዕጓለ፡ እመሕያው። እንዘ፡ ይነብር፡ በየማነ፡ ኀይል፡ ወይመጽእ፡ በደመና፡ ሰማይ።
63 ወሰጠጠ፡ አልባሲሁ፡ ሊቀ፡ ካህናት፡ ወይቤ። ምንተ፡ እንከ፡ ትፈቅዱ፡ ሎቱ፡ ሰማዕተ።
64 ናሁ፡ ለሊክሙ፡ ሰማዕክሙ፡ ፅርፈቶ፡ ምንተ፡ እንከ፡ ትብሉ። ወአግብኡ፡ ፍትሐ፡ ኵሎሙ፡ ወይቤሉ፡ ይቅትልዎ።
65 ወአኀዙ፡ እምውስቴቶሙ፡ ይውርቅዎ፡ ወይጽፍዕዎ፡ ገጾ። ወይኵርዕዎ፡ ርእሶ፡ ወይቤልዎ፡ ተነበይ፡ ለነ፡ ክርስቶስ፡ መኑ፡ ጸፍዐከ። ወኮኑ፡ ወዓልት፡ ይጸፍዕዎ፡ በሕቁ።
በእንተ፡ ዘከመ፡ ክሕዶ፡ ጴጥሮስ
66 ወእንዘ፡ ሀሎ፡ ጴጥሮስ፡ ታሕተ፡ ውስተ፡ ውሳጤ፡ ዐጸድ። መጽአት፡ አሐቲ፡ ወለት፡ እምአእማተ፡ ሊቀ፡ ካህናት።
67 ወርእየቶ፡ ለጴጥሮስ፡ ይስሕን፡ ወነጸረቶ፡ ወትቤሎ። አንተሂ፡ ምስለ፡ ኢየሱስ፡ ገሊላዊ፡ ሀሎከ።
68 ወክሕደ፡ ወይቤላ፡ ኢየአምር፡ ወኢይጤይቅ፡ ዘትብሊ። ወወፅአ፡ አፍኣ፡ ኀበ፡ ጸናፌ፡ ዐጸድ፡ ወነቀወ፡ ዶርሆ።
69 ወርእየቶ፡ ካዕበ፡ ካልእተ፡ ወለት፡ ወትቤሎሙ፡ ለእለ፡ ይቀውሙ፡ ህየ። ዝንቱኒ፡ እምኔሆሙ፡ ውእቱ፡ ወክሕደ፡ ካዕበ።
70 ወእምድኅረ፡ ሕቅ፡ ካዕበ፡ ይበልዎ፡ ለጴጥሮስ፡ እለ፡ ይቀውሙ። አማን፡ እምኔሆሙ፡ አንተ፡ ወገሊላዊ፡ አንተ፡ ወቃልከ፡ ያዔውቀከ።
71 ወአኀዘ፡ ይትረገም፡ ወይምሐል፡ እንዘ፡ ይብል። ኢየአምሮ፡ ለውእቱ፡ ብእሲ፡ ዘትብሉ። ወሶቤሃ፡ ነቀወ፡ ካዕበ፡ ዶርሆ።
72 ወተዘከረ፡ ጴጥሮስ፡ ቃሎ፡ ለእግዚእ፡ ኢየሱስ፡ ዘይቤሎ። ሥልሰ፡ ትክሕደኒ፡ ዘእንበለ፡ ይንቁ፡ ዶርሆ፡ ክልኤ፡ ጊዜ፡ ወበከየ።
=== chapter 15 ===
[ምዕራፍ 15]
ዘከመ፡ አቀምዎ፡ ለእግዚእ፡ ኢየሱስ፡ ቅድመ፡ ጲላጦስ
1 ወሶበ፡ ጸብሐ፡ ተማከሩ፡ ሊቃነ፡ ካህናት፡ ወረበናት። ወጸሐፍተ፡ ሕዝብ፡ ወኵሉ፡ ዐውድ። ወሐመይዎ፡ ለእግዚእ፡ ኢየሱስ፡ ወወሰድዎ፡ ወመጠውዎ፡ ለጲላጦስ።
2 ወተስእሎ፡ ጲላጦስ፡ ወይቤሎ፡ አንተኑ፡ ንጉሦሙ፡ ለአይሁድ።
3 ወአውሥአ፡ እግዚእ፡ ኢየሱስ፡ ወይቤሎ፡ አንተ፡ ትብል። ወአስተዋደይዎ፡ ሊቃነ፡ ካህናት፡ ብዙኀ። ወውእቱሰ፡ አልቦ፡ ዘአውሥአ።
4 ወሐተቶ፡ ካዕበ፡ ጲላጦስ፡ ወይቤሎ፡ አልቦኑ፡ ዘትሰጠው። እንዘ፡ መጠነ፡ ዝ፡ ያስተዋድዩከ።
5 ወኢተሰጥዎ፡ እግዚእ፡ ኢየሱስ። ወኢ፡ ምንተኒ፡ እስከ፡ አንከሮ፡ ጲላጦስ።
6 ወለለ፡ በዓል፡ ያሐዩ፡ ሎሙ፡ አሐደ፡ እምነ፡ ሙቁሓን፡ ዘአብደሩ።
7 ወሀሎ፡ አሐዱ፡ ብእሲ፡ ዘስሙ፡ በርባን። ሙቁሕ፡ ምስለ፡ እለ፡ ገብሩ፡ ሀከከ፡ ወምስለ፡ ቀተልተ፡ ነፍስ።
8 ወዐርጉ፡ ሕዝብ፡ ወከልሑ፡ ወሰአሉ፡ ይግበር፡ ሎሙ፡ በከመ፡ ያለምድ።
9 ወአውሥአ፡ ጲላጦስ፡ ወይቤሎሙ። ትፈቅዱኑ፡ አሕይዎ፡ ለክሙ፡ ለንጉሠ፡ አይሁድ።
10 እስመ፡ የአምሮሙ፡ ከመ፡ በቅንአቶሙ፡ አግብእዎ፡ ሊቃነ፡ ካህናት።
11 ወሊቃነ፡ ካህናትሰ፡ ሆክዎሙ፡ ለሕዝብ። ከመ፡ በርባንሃ፡ ይስእሉ፡ ያሕዩ፡ ሎሙ።
12 ወካዕበ፡ አውሥአ፡ ጲላጦስ፡ ወይቤሎሙ። ምንተ፡ እንከ፡ ትፈቅዱ፡ እረስዮ፡ ለዘተብህለ፡ ንጉሠ፡ አይሁድ።
13 ወካዕበ፡ ከልሑ፡ ኵሎሙ፡ ወይቤሉ፡ ስቅሎ።
14 ወይቤሎሙ፡ ጲላጦስ፡ ምንተ፡ እኩየ፡ ገብረ። ወፈድፋደ፡ ጸርሑ፡ ወይቤሉ፡ ስቅሎ።
15 ወመከረ፡ ጲላጦስ፡ ይግበር፡ ፈቃዶሙ፡ ለሕዝብ። ወአሕየወ፡ ሎሙ፡ በርባንሃ። ወቀሠፎ፡ ለእግዚእ፡ ኢየሱስ፡ ወወሀቦሙ፡ ይስቅልዎ።
ዘከመ፡ ተሣለቁ፡ ላዕሌሁ፡ ወዘከመ፡ አፆርዎ፡ መስቀሎ
16 ወአብእዎ፡ ሐራ፡ ውሳጤ፡ ዐጸድ፡ ኀበ፡ ምኵናን። ወጸውዑ፡ ኵሎ፡ ሠገራተ፡ ሰጲራ።
17 ወአልበስዎ፡ ሜላተ፡ ወፀፈሩ፡ አክሊለ፡ ዘሦክ። ወአስተቀጸልዎ፡ ላዕለ፡ ርእሱ፡ ወይሣለቅዎ።
18 ወይብልዎ፡ በሓ፡ ንጉሦሙ፡ ለአይሁድ።
19 ወይኰርዕዎ፡ ርእሶ፡ በኅለት። ወይዌርቅዎ፡ ወያስተበርኩ፡ ወይሰግዱ፡ ሎቱ።
20 ወሶበ፡ ተሣለቁ፡ ላዕሌሁ፡ ሰለብዎ፡ ውእተ፡ ሜላተ። ወአልበስዎ፡ አልባሲሁ፡ ወወሰድዎ፡ ኀበ፡ ይሰቅልዎ።
21 ወዐበጡ፡ አሐደ፡ ኀላፌ፡ ፍኖት፡ ስምዖንሃ፡ ቀሬናዌ፡ እትወቶ፡ እምሐቅል። ወውእቱ፡ አቡሆሙ፡ ለእለ፡ እስክንድሮስ፡ ወለሮፎስ። ከመ፡ ይጹር፡ መስቀሎ።
22 ወወሰድዎ፡ ብሔረ፡ ጎልጎታ፡ ዘበትርጓሜሁ፡ ይብልዎ፡ መካነ፡ ቀራንዮ።
23 ወወሀብዎ፡ ይስተይ፡ ወይነ፡ ምስለ፡ ከርቤ፡ ቱሱሐ፡ ወአበየ፡ ሰትየ።
ዘከመ፡ ተሰቅለ፡ እግዚእ፡ ኢየሱስ
24 ወሰቀልዎ፡ ወተዐፀዉ፡ ዲበ፡ አልባሲሁ። ወተካፈሉ፡ ዘከመ፡ ይነሥኡ።
25 ወሠለስቱ፡ ሰዓት፡ ውእቱ፡ ጊዜ፡ ይሰቅልዎ። ወይብል፡ መጽሐፈ፡ ጌጋዩ፡ ንጉሦሙ፡ ለአይሁድ።
26 ወሰቀሉ፡ ምስሌሁ፡ ክልኤተ፡ ፈያተ። አሐደ፡ በየማኑ፡ ወአሐደ፡ በጸጋሙ።
27 ወተፈጸመ፡ መጽሐፍ፡ ዘይቤ፡ ተኈለቈ፡ ምስለ፡ ገበርተ፡ ዐመፃ።
28 ወኀለፍትኒ፡ ይፀርፉ፡ ላዕሌሁ፡ ወየሐውሱ፡ ርእሶሙ።
29 ወይብልዎ፡ ኦ፡ ዘይነሥቶ፡ ለቤተ፡ መቅደስ። ወበሠሉስ፡ ዕለት፡ የሐንጾ።
30 አድኅን፡ ርእሰከ፡ ወረድ፡ እመስቀልከ።
31 ወከማሁ፡ ሊቃነ፡ ካህናትኒ፡ ወጸሐፍት፡ ይሣለቁ፡ ላዕሌሁ። ወይብልዎ፡ ዘባዕደ፡ ያድኅን፡ ወርእሶ፡ ኢይክል፡ አድኅኖ።
32 እመሰ፡ ክርስቶስ፡ ውእቱ፡ ንጉሠ፡ እስራኤል። ለይረድኬ፡ ይእዜ፡ እምነ፡ መስቀሉ፡ ንርአይ፡ ወንእመን፡ ቦቱ። ወእለሂ፡ ተሰቅሉ፡ ምስሌሁ፡ ይዘነጕጕዎ።
33 ወሶበ፡ ኮነ፡ ጊዜ፡ ቀትር፡ ጸልመ፡ ፀሓይ። ወኵሉ፡ ዓለም፡ ጸልመ፡ እስከ፡ ተሱዓት፡ ሰዓት።
34 ወጊዜ፡ ተሱዓት፡ ሰዓት፡ ገዐረ፡ እግዚእ፡ ኢየሱስ፡ በዐቢይ፡ ቃል። ወይቤ፡ ኤሎሄ፡ ኤሎሄ፡ ላማ፡ ሰበቅታኒ። ዘበትርጓሜሁ፡ ይብል፡ አምላኪየ፡ አምላኪየ፡ ለምንት፡ ኀደገኒ።
35 ወቦ፡ እለ፡ ይቤሉ፡ እምእለ፡ ይቀውሙ፡ ህየ፡ ኤልያስሃ፡ ይጼውዕ።
36 ወሮጸ፡ አሐዱ፡ ወመልአ፡ ሰፍነገ፡ ብኂአ። ወአሰረ፡ በኅለት፡ ወአስተዮ፡ ወይቤ። ኅድጉ፡ ንርአይ፡ ለእመ፡ ይመጽእ፡ ኤልያስ፡ ያውርዶ።
37 ወገዐረ፡ እግዚእ፡ ኢየሱስ፡ በዐቢይ፡ ቃል፡ ወመጠወ፡ ነፍሶ።
38 ወተሰጠ፡ መንጦላዕተ፡ ምኵራብ፡ ለክልኤ፡ እምላዕሉ፡ እስከ፡ ታሕቱ።
39 ወርእዮ፡ ሐራዊ፡ ሊቀ፡ ምእት፡ ዘይቀውም፡ መንጸረ። ከመ፡ ከመ፡ ዝ፡ ግዒሮ፡ ሞተ፡ ይቤ። አማን፡ ዝንቱ፡ ብእሲ፡ ወልደ፡ እግዚአብሔር፡ ውእቱ።
40 ወሀለዋ፡ አንስት፡ ይቀውማ፡ ወይኔጽራ፡ እምርሑቅ። ማርያም፡ መግደላዊት፡ ወማርያም፡ እንተ፡ ያዕቆብ፡ ዘይንእስ። ወእሙ፡ ለዮሳ፡ ወለሰሎሜ።
41 እለ፡ ተለዋሁ፡ እምገሊላ፡ ወተልእካሁ። ወባዕዳትሂ፡ ብዙኃት፡ እለ፡ ዐርጋ፡ ምስሌሁ፡ ኢየሩሳሌም።
በእንተ፡ ተቀብረ፡ እግዚእ፡ ኢየሱስ
42 ወመስዮ፡ ዐርብ፡ አሜሃ፡ በአተ፡ ሰንበት፡ ውእቱ።
43 መጽአ፡ ዮሴፍ፡ እምአርማትያስ፡ ብእሲ፡ ኄር፡ ወጠቢብ። ወውእቱ፡ ይሴፎ፡ መንግሥተ፡ እግዚአብሔር። ወተሐበለ፡ ወቦአ፡ ኀበ፡ ጲላጦስ። ወሰአለ፡ ሥጋሁ፡ ለእግዚእ፡ ኢየሱስ።
44 ወአንከረ፡ ጲላጦስ፡ ወይቤ፡ እፎ፡ ሞተ። ወጸውዖ፡ ለሐራዊ፡ ወይቤሎ፡ ወድአኑ፡ ሞተ። ወይቤ፡ እወ፡ ሞተ።
45 ወአእሚሮ፡ እምኀበ፡ ሐራዊ፡ ከመ፡ ሞተ። ወአዘዘ፡ ይጸግውዎ፡ ለዮሴፍ፡ ሥጋሁ።
46 ወተሣየጠ፡ ዮሴፍ፡ ሰንዱናተ፡ ወአውረዶ፡ ወገነዞ፡ በሰንዱናት። ወቀበሮ፡ ውስተ፡ መቃብር፡ ሐዲስ፡ ዘአውቀረ፡ ውስተ፡ ኰኵሕ። ወአንኰርኰረ፡ እብነ፡ ውስተ፡ አፈ፡ መቃብር።
47 ወማርያም፡ መግደላዊት፡ ወማርያም፡ እንተ፡ ዮሳ፡ ርእያ፡ ኀበ፡ ቀበርዎ።
=== chapter 16 ===
[ምዕራፍ 16]
በእንተ፡ ትንሣኤሁ፡ ለእግዚእነ
1 ወሶበ፡ ኀለፈት፡ ሰንበት፡ ማርያም፡ መግደላዊት። ወማርያም፡ እንተ፡ ያዕቆብ፡ ወሰሎሜ። ተሣየጣ፡ አፈወ፡ ከመ፡ ይምጽኣ፡ ወይቅብዓ፡ ሥጋሁ።
2 ወሖራ፡ ወአንግሃ፡ ጥቀ፡ ሐዊረ፡ ኀበ፡ መቃብር፡ በእሑድ፡ ሰንበት።
3 ወሶበ፡ ሠረቀ፡ ፀሓይ፡ ይቤላ፡ በበይናቲሆን። መኑ፡ ይከሥታ፡ ለነ፡ ለእብን፡ እምኆኅተ፡ መቃብር።
4 ወረዊጾን፡ ርእያሃ፡ ለእብን፡ ኀበ፡ አንኰርኰረት። ወዐባይ፡ ይእቲ፡ ጥቀ።
5 ወበዊኦን፡ ውስተ፡ መቃብር፡ ረከባ፡ አሐደ፡ ወሬዛ፡ እንዘ፡ ይነብር፡ መንገለ፡ የማን። ወይለብስ፡ አልባሰ፡ ንጹሐ፡ ወደንገፃ።
6 ወይቤሎን፡ መልአክ፡ ኢትደንግፃ። ኢየሱስሃኑ፡ ናራዝዌ፡ ዘተሰቅለ፡ ተኀሥሣ፡ ተንሥአ፡ ወኢሀሎ፡ ዝየሰ። ወናሁ፡ መካኑ፡ ኀበ፡ ተቀብረ።
7 ወባሕቱ፡ ሑራ፡ ንግራሆሙ፡ ለአርዳኢሁ፡ ወለጴጥሮስ። ከመ፡ ይቀድሞሙ፡ ገሊላ፡ ወበህየ፡ ይሬእይዎ፡ በከመ፡ ይቤሎሙ።
8 ወወፅኣ፡ እምነ፡ መቃብር፡ ወጐያ፡ እስመ፡ አኀዞን፡ ረዓድ፡ ወድንጋፄ። ወኢነገራ፡ ወኢ፡ ለመኑሂ፡ እስመ፡ ፈርሃ። ወኵሎ፡ ዘአዘዞን፡ ለጴጥሮስ፡ ወለእሊኣሁ፡ ፈጺሞን፡ ነጊረ። አስተርአዮሙ፡ እግዚእነ፡ እምድኅረ፡ ተንሥአ፡ እምዉታን። ወፈነዎሙ፡ ይስብኩ፡ እምሥራቀ፡ ፀሓይ፡ እስከ፡ ዐረብ። ለኵሉ፡ ፍጥረት፡ በወንጌል፡ ቅዱስ፡ ለሕይወት፡ ዘለዓለም።
ዘከመ፡ አስተርአየ፡ ኢየሱስ፡ ለብዙኃን
9 ወተንሢኦ፡ በጽባሕ፡ በእሑድ፡ ሰንበት። አስተርአያ፡ ቅድመ፡ ለማርያም፡ መግደላዊት። እንተ፡ እምኔሃ፡ አውፅአ፡ ሰብዐተ፡ አጋንንተ።
10 ወይእቲ፡ ሐዊራ፡ ዜነወቶሙ፡ ለእለ፡ ምስሌሁ፡ ሀለዉ፡ ቀዲሙ። እንዘ፡ ይላሕዉ፡ ወይበክዩ።
11 ወእሙንቱሂ፡ ሶበ፡ ሰምዑ፡ ከመ፡ አስተርአያ፡ ወሕያው፡ ውእቱ፡ ኢአምንዋ።
12 ወእምዝ፡ አስተርአዮሙ፡ ለክልኤቱ፡ እምኔሆሙ፡ በካልእ፡ ራእይ። እንዘ፡ የሐውሩ፡ ሐቅለ።
13 ወሖሩ፡ እሙንቱሂ፡ ወዜነዉ፡ ለቢጾሙ፡ ወሎሙኒ፡ ኢአምንዎሙ።
14 ወእምድኅረ፡ ዝ፡ ካዕበ፡ እንዘ፡ ይረፍቁ፡ ዐሠርቱ፡ ወአሐዱ። አስተርአዮሙ፡ ወገሠጾሙ፡ በእንተ፡ ሕጸተ፡ አሚኖቶሙ። ወግእዘ፡ ጽንዐ፡ ልቦሙ። እስመ፡ ለእለ፡ ርእይዎ፡ ከመ፡ ተንሥአ፡ ኢአምንዎሙ።
በእንተ፡ ፈንዎቱ፡ ሐዋርያት
15 ወይቤሎሙ፡ ሑሩ፡ ውስተ፡ ኵሉ፡ ዓለም። ወስብኩ፡ ወንጌለ፡ ለኵሉ፡ ፍጥረት።
16 ዘአምነ፡ ወዘተጠምቀ፡ ይድኅን፡ ወዘሰ፡ ኢአምነ፡ ይደየን።
17 ወዛቲ፡ ተኣምር፡ ለእለ፡ አምኑ፡ በስምየ፡ ትተልዎሙ። በስመ፡ ዚኣየ፡ አጋንንተ፡ ያወፅኡ። ወበካልእ፡ ልሳን፡ ይትናገሩ፡ ሐዲሳተ።
18 ወአራዊተ፡ ምድር፡ ይእኅዙ፡ በእደዊሆሙ። ወአልቦ፡ ዘየሐሥሞሙ፡ ወዘሂ፡ ይቀትል፡ ለእመ፡ ሕምዘ። ለእመ፡ በልዑ፡ ወሰትዩ፡ አልቦ፡ ዘይነክዮሙ። ወዲበ፡ ድዉያን፡ እደዊሆሙ፡ ያነብሩ። ወይሜጥኑ፡ ወእሙንቱሂ፡ ይትፌወሱ።
በእንተ፡ ዕርገቱ፡ ለእግዚእነ
19 ወእግዚእነሰ፡ ኢየሱስ፡ እምድኅረ፡ ተናገሮሙ። ዐርገ፡ ውስተ፡ ሰማይ፡ ወነበረ፡ በየማነ፡ እግዚአብሔር፡ አቡሁ።
20 ወወፂኦሙ፡ እሙንቱ፡ ሰበኩ፡ በኵለሄ። እንዘ፡ እግዚእ፡ ይረድእ፡ ወቃሎ፡ ያጸንዕ፡ በተኣምር፡ ዘይተሉ።