##### edition  (gez) — Text of the EOTC printed Bible
=== chapter 1 ===
[ምዕራፍ 1]
በእንተ፡ ኍልቈ፡ ትውልድ
1 መጽሐፈ፡ ልደቱ፡ ለእግዚእነ፡ ኢየሱስ፡ ክርስቶስ። ወልደ፡ ዳዊት፡ ወልደ፡ አብርሃም።
2 አብርሃም፡ ወለዶ፡ ለይስሐቅ፡ ወይስሐቅኒ፡ ወለዶ፡ ለያዕቆብ። ወያዕቆብኒ፡ ወለደ፡ ይሁዳሃ፡ ወአኀዊሁ።
3 ወይሁዳኒ፡ ወለደ፡ ፋሬስሃ፡ ወዛራሃ፡ እምትእማር። ወፋሬስኒ፡ ወለደ፡ ኤስሮምሃ። ወኤስሮምኒ፡ ወለደ፡ አራምሃ።
4 ወአራምኒ፡ ወለደ፡ አሚናዳብሃ። ወአሚናዳብኒ፡ ወለደ፡ ነአሶንሃ። ወነአሶንኒ፡ ወለደ፡ ሰልሞንሃ።
5 ወሰልሞንኒ፡ ወለደ፡ ቦኤዝሃ፡ እምራኬብ። ወቦኤዝኒ፡ ወለደ፡ ኢዮቤድሃ፡ እምነ፡ ሩት። ወኢዮቤድኒ፡ ወለደ፡ እሴይሃ።
6 ወእሴይኒ፡ ወለደ፡ ዳዊትሃ፡ ንጉሠ። ወዳዊትኒ፡ ንጉሥ፡ ወለደ፡ ሰሎሞንሃ፡ እምነ፡ ብእሲተ፡ ኦርዮ።
7 ወሰሎሞንኒ፡ ወለደ፡ ሮብዓምሃ። ወሮብዓምኒ፡ ወለደ፡ አብያሃ። ወአብያኒ፡ ወለደ፡ አሳፍሃ።
8 ወአሳፍኒ፡ ወለደ፡ ኢዮሳፍጥሃ። ወኢዮሳፍጥኒ፡ ወለደ፡ ኢዮራምሃ። ወኢዮራምኒ፡ ወለደ፡ አካዝያስሃ። ወአካዝያስኒ፡ ወለደ፡ ኢዮአስሃ። ወኢዮአስኒ፡ ወለደ፡ አሜስያስሃ። ወአሜስያስኒ፡ ወለደ፡ ዖዝያንሃ፡ ዘተሰምየ፡ አዛርያስ።
9 ወዖዝያንኒ፡ ወለደ፡ ኢዮአታምሃ። ወኢዮአታምኒ፡ ወለደ፡ አካዝሃ። ወአካዝኒ፡ ወለደ፡ ሕዝቅያስሃ።
10 ወሕዝቅያስኒ፡ ወለደ፡ ምናሴሃ። ወምናሴኒ፡ ወለደ፡ አሞጽሃ። ወአሞጽኒ፡ ወለደ፡ ኢዮስያስሃ።
11 ወኢዮስያስኒ፡ ወለደ፡ ኢኮንያንሃ፡ ወአኀዊሁ፡ አመ፡ ፍልሰተ፡ ባቢሎን።
12 ወእምድኅረ፡ ፍልሰተ፡ ባቢሎን፡ ኢኮንያንኒ፡ ወለደ፡ ሰላትያልሃ። ወሰላትያልኒ፡ ወለደ፡ ዘሩባቤልሃ።
13 ወዘሩባቤልኒ፡ ወለደ፡ አብዩድሃ። ወአብዩድኒ፡ ወለደ፡ ኤልያቄምሃ። ወኤልያቄምኒ፡ ወለደ፡ አዛርሃ።
14 ወአዛርኒ፡ ወለደ፡ ሳዶቅሃ። ወሳዶቅኒ፡ ወለደ፡ አኪምሃ። ወአኪምኒ፡ ወለደ፡ ኤልዩድሃ።
15 ወኤልዩድኒ፡ ወለደ፡ አልአዛርሃ። ወአልአዛርኒ፡ ወለደ፡ ማትያንሃ። ወማትያንኒ፡ ወለደ፡ ያዕቆብሃ።
16 ወያዕቆብኒ፡ ወለደ፡ ዮሴፍሃ፡ ፈኃሪሃ፡ ለማርያም። እንተ፡ እምኔሃ፡ ተወልደ፡ እግዚእ፡ ኢየሱስ፡ ዘተብህለ፡ ክርስቶስ።
17 ወኵሎንኬ፡ ትውልድ፡ እምአብርሃም፡ እስከ፡ ዳዊት፡ ትውልድ፡ ዐሠርቱ፡ ወአርባዕቱ። ወእምዳዊት፡ እስከ፡ ፍልሰተ፡ ባቢሎን፡ ትውልድ፡ ዐሠርቱ፡ ወአርባዕቱ። ወእምፍልሰተ፡ ባቢሎን፡ እስከ፡ ክርስቶስ፡ ትውልድ፡ ዐሠርቱ፡ ወአርባዕቱ። ወኵሎንኬ፡ ትውልድ፡ እምአብርሃም፡ እስከ፡ ክርስቶስ፡ ትውልድ፡ አርብዓ፡ ወክልኤቱ።
በእንተ፡ ፅንሰቱ፡ ወልደቱ፡ ለክርስቶስ
18 ወለእግዚእነ፡ ኢየሱስ፡ ክርስቶስ፡ ከመ፡ ዝ፡ ውእቱ፡ ልደቱ። ወተፍኀረት፡ እሙ፡ ማርያም፡ ለዮሴፍ። ወእንበለ፡ ይትቃረቡ፡ ተረክበት፡ ፅንስተ፡ እመንፈስ፡ ቅዱስ።
19 ወዮሴፍሰ፡ ፈኃሪሃ፡ እስመ፡ ጻድቅ፡ ውእቱ፡ ኢፈቀደ፡ ይክሥታ። አላ፡ መከረ፡ ጽሚተ፡ ይኀድጋ።
20 ወእንዘ፡ ዘንተ፡ ይኄሊ፡ ናሁ፡ አስተርአዮ፡ መልአከ፡ እግዚአብሔር፡ በሕልም። እንዘ፡ ይብል፡ ኦ፡ ዮሴፍ፡ ወልደ፡ ዳዊት፡ ኢትፍራህ፡ ነሢኦታ፡ ለማርያም፡ ፍኅርትከ። እስመ፡ ዘይትወለድ፡ እምኔሃ፡ እመንፈስ፡ ቅዱስ፡ ውእቱ።
21 ወትወልድ፡ ወልደ፡ ወትሰምዮ፡ ስሞ፡ ኢየሱስሃ። እስመ፡ ውእቱ፡ ያድኅኖሙ፡ ለሕዝቡ፡ እምኀጢአቲሆሙ።
22 ወዝ፡ ኵሉ፡ ዘኮነ፡ ከመ፡ ይትፈጸም፡ ዘተብሀለ፡ እምኀበ፡ እግዚአብሔር፡ በነቢይ፡ እንዘ፡ ይብል።
23 ናሁ፡ ድንግል፡ ትፀንስ፡ ወትወልድ፡ ወልደ። ወይሰመይ፡ ስሙ፡ አማኑኤል፡ ዘበትርጓሜሁ፡ እግዚአብሔር፡ ምስሌነ።
24 ወተንሢኦ፡ ዮሴፍ፡ እምንዋሙ፡ ገብረ፡ በከመ፡ አዘዞ፡ መልአከ፡ እግዚአብሔር። ወነሥኣ፡ ለማርያም፡ ፍኅርቱ።
25 ወኢያእመራ፡ እስከ፡ አመ፡ ወለደት፡ ወልደ፡ ዘበኵራ። ወጸውዑ፡ ስሞ፡ ኢየሱስሃ።
=== chapter 2 ===
[ምዕራፍ 2]
በእንተ፡ ምጽአተ፡ ሰብአ፡ ሰገል
1 ወተወሊዶ፡ እግዚእ፡ ኢየሱስ፡ በቤተልሔም፡ ዘይሁዳ፡ በመዋዕለ፡ ሄሮድስ፡ ንጉሥ። ናሁ፡ መጽኡ፡ መሰግላን፡ እምብሔረ፡ ጽባሕ፡ ወበጽሑ፡ ውስተ፡ ኢየሩሳሌም።
2 እንዘ፡ ይብሉ፡ አይቴ፡ ሀሎ፡ ዘተወልደ፡ ንጉሠ፡ አይሁድ። እስመ፡ ርኢነ፡ ኮከበ፡ ዚኣሁ፡ በምሥራቅ፡ ወመጻእነ፡ ከመ፡ ንስግድ፡ ሎቱ።
3 ወሰሚዖ፡ ሄሮድስ፡ ንጉሥ፡ ደንገፀ፡ ወተሀውከ። ወኵላ፡ ኢየሩሳሌም፡ ምስሌሁ።
4 ወአስተጋብኦሙ፡ ሄሮድስ፡ ለኵሎሙ፡ ሊቃነ፡ ካህናት፡ ወለጸሐፍተ፡ ሕዝብ። ተስእሎሙ፡ በአይቴ፡ ይትወለድ፡ ክርስቶስ።
5 ወይቤልዎ፡ በቤተልሔም፡ ዘይሁዳ፡ እስመ፡ ከማሁ፡ ጽሑፍ፡ በነቢይ።
6 ወአንቲኒ፡ ቤተልሔም፡ ምድረ፡ ኤፍራታ፡ ኢትቴሐቲ፡ እምነገሥተ፡ ይሁዳ። እስመ፡ እምኔኪ፡ ይወፅእ፡ ንጉሥ፡ ዘይርዕዮሙ፡ ለሕዝብየ፡ እስራኤል።
7 ወእምዝ፡ ጸውዖሙ፡ ሄሮድስ፡ ለሰብአ፡ ሰገል፡ ጽሚተ። ወተጠየቀ፡ እምኔሆሙ፡ መዋዕሊሁ፡ በዘአስተርአዮሙ፡ ኮከብ።
8 ወፈነዎሙ፡ ቤተልሔምሃ። ወይቤሎሙ፡ ሐዊረክሙ፡ ተሰአሉ፡ ጥዩቀ፡ በእንተ፡ ውእቱ፡ ሕፃን። ወእምከመ፡ ረከብክምዎ፡ ግብኡ፡ ኀቤየ፡ ወዜንዉኒ፡ ከመ፡ እምጻእ፡ አነሂ፡ ወእስግድ፡ ሎቱ።
9 ወሰሚዖሙ፡ እምኀበ፡ ንጉሥ፡ ሖሩ። ወናሁ፡ ኮከብ፡ ዘርእዩ፡ በምሥራቅ፡ ይመርሖሙ፡ እስከ፡ ሶበ፡ አብጽሖሙ፡ ቤተልሔም። ወቆመ፡ መልዕልተ፡ በአት፡ ኀበ፡ ሀሎ፡ ሕፃን።
10 ወርእዮሙ፡ ኮከበ፡ ተፈሥሑ፡ ዐቢየ፡ ፍሥሓ።
11 ወበዊኦሙ፡ ውስተ፡ ቤት፡ ረከብዎ፡ ለሕፃን፡ ምስለ፡ ማርያም፡ እሙ። ወወድቁ፡ ወሰገዱ፡ ሎቱ፡ ወአርኀዉ፡ መዛግብቲሆሙ። ወአብኡ፡ ሎቱ፡ አምኃ፡ ወርቀ፡ ወከርቤ፡ ወሰኂነ።
12 ወነገሮሙ፡ በሕልም፡ ከመ፡ ኢይግብኡ፡ ኀበ፡ ሄሮድስ። ወእንተ፡ ካልእ፡ ፍኖት፡ ገብኡ፡ ወአተዉ፡ ብሔሮሙ።
በእንተ፡ በአተ፡ ሕፃን፡ ውስተ፡ ምድረ፡ ግብጽ
13 ወእምድኅረ፡ ኀለፉ፡ እሉ፡ ናሁ፡ መልአከ፡ እግዚአብሔር፡ አስተርአዮ፡ በሕልም፡ ለዮሴፍ። እንዘ፡ ይብል፡ ተንሥእ፡ ወንሣእ፡ ሕፃነ፡ ወእሞ። ወጕየይ፡ ውስተ፡ ብሔረ፡ ግብጽ፡ ወሀሉ፡ ህየ፡ እስከ፡ አመ፡ እነግረከ።
14 እስመ፡ ሀለዎ፡ ለሄሮድስ፡ ይኅሥሦ፡ ለሕፃን፡ ከመ፡ ይቅትሎ። ወተንሢኦ፡ ነሥአ፡ ሕፃነ፡ ወእሞ፡ በሌሊት፡ ወሖረ፡ ብሔረ፡ ግብጽ።
15 ወነበረ፡ ህየ፡ እስከ፡ አመ፡ ሞቱ፡ ለሄሮድስ። ከመ፡ ይትፈጸም፡ ዘተብህለ፡ እምኀበ፡ እግዚአብሔር፡ በነቢይ። እንዘ፡ ይብል፡ እምግብጽ፡ ጸዋዕክዎ፡ ለወልድየ።
በእንተ፡ ቅትለተ፡ ሕፃናት
16 ወሶበ፡ ርእየ፡ ሄሮድስ፡ ከመ፡ ተሣለቁ፡ ላዕሌሁ፡ ሰብአ፡ ሰገል፡ ተምዕዐ፡ ጥቀ። ወፈነወ፡ ሐራሁ፡ ወአዘዘ፡ ይቅትሉ፡ ኵሎ፡ ሕፃናተ፡ ዘቤተልሔም፡ ወዘውስተ፡ ኵሉ፡ አድያሚሃ። ዘክልኤ፡ ዓመት፡ ወዘይንእስሂ፡ እምኔሁ። በከመ፡ ሐሳበ፡ መዋዕል፡ ዘተጠየቀ፡ እምኀበ፡ ሰብአ፡ ሰገል።
17 አሜሃ፡ ተፈጸመ፡ ዘተብህለ፡ በኤርምያስ፡ ነቢይ፡ እንዘ፡ ይብል።
18 ቃል፡ በራማ፡ ተሰምዐ፡ ብካይ፡ ወገዓር፡ ወሰቆቃው፡ ወሕማም፡ ብዙኅ። ራሄል፡ እንዘ፡ ትበኪ፡ በእንተ፡ ውሉዳ። ወአበየት፡ ተናዝዞ፡ ወነጊፈ፡ ላህ። እስመ፡ ኢኮንዋ፡ ውሉዳ፡ ውሉደ፡ ወኢሀለዉ።
በእንተ፡ ሞቱ፡ ለሄሮድስ፡ ወግብአተ፡ እግዚእነ
19 ወመዊቶ፡ ሄሮድስ፡ ናሁ፡ መልአከ፡ እግዚአብሔር፡ አስተርአዮ፡ በሕልም፡ ለዮሴፍ፡ በብሔረ፡ ግብጽ።
20 እንዘ፡ ይብል፡ ተንሢእ፡ ወንሣእ፡ ሕፃነ፡ ወእሞ። ወሑር፡ ውስተ፡ ምድረ፡ እስራኤል፡ እስመ፡ ሞቱ፡ እለ፡ የኀሥሥዎ፡ ለነፍሰ፡ ዝ፡ ሕፃን።
21 ወተንሢኦ፡ ነሥአ፡ ሕፃነ፡ ወእሞ፡ ወቦአ፡ ውስተ፡ ምድረ፡ እስራኤል።
22 ወሰሚዖ፡ ከመ፡ አርኬላኦስ፡ ነግሠ፡ ለይሁዳ፡ ህየንተ፡ አቡሁ፡ ሄሮድስ። ፈርሀ፡ ሐዊረ፡ ህየ። ወአስተርአዮ፡ ካዕበ፡ በሕልም። ወተግሕሠ፡ ውስተ፡ ደወለ፡ ገሊላ።
23 ወበጺሖ፡ ኀደረ፡ ውስተ፡ ብሔር፡ እንተ፡ ስማ፡ ናዝሬት። ከመ፡ ይትፈጸም፡ ዘተብህለ፡ በነቢይ፡ ከመ፡ ናዝራዊ፡ ይሰመይ፡ ወልድየ።
=== chapter 3 ===
[ምዕራፍ 3]
በእንተ፡ ስብከተ፡ ዮሐንስ
1 ወበውእቱ፡ መዋዕል፡ በጽሐ፡ ዮሐንስ፡ መጥምቅ፡ እንዘ፡ ይሰብክ፡ በገዳመ፡ ይሁዳ፡ ዘዮርዳኖስ።
2 እንዘ፡ ይብል፡ ነስሑ፡ እስመ፡ ቀርበት፡ መንግሥተ፡ ሰማያት።
3 እስመ፡ ዝንቱ፡ ውእቱ፡ ዘተብህለ፡ በኢሳይያስ፡ ነቢይ። እንዘ፡ ይብል፡ ቃለ፡ ዐዋዲ፡ ዘይሰብክ፡ በገዳም። ወይብል፡ ጺሑአ፡ ፍኖቶ፡ ለእግዚአብሔር፡ ወዐርዩ፡ መጽያሕቶ።
4 ወልብሱ፡ ለዮሐንስ፡ ኮነ፡ እምጸጕረ፡ ገመል። ወቅናቱ፡ ዘአዲም፡ ውስተ፡ ሐቌሁ። ወሲሳዩ፡ አንበጣ፡ ወመዓረ፡ ገዳም።
5 ወየሐውሩ፡ ኀቤሁ፡ ኵሎሙ፡ ሰብአ፡ ኢየሩሳሌም። ወኵሉ፡ ይሁዳ፡ ወኵሉ፡ አድያሚሃ፡ ለዮርዳኖስ።
6 ወያጠምቆሙ፡ ለኵሎሙ፡ በፈለገ፡ ዮርዳኖስ፡ እንዘ፡ ይትአመኑ፡ ኀጣውኢሆሙ።
7 ወሶበ፡ ርእየ፡ ብዙኃነ፡ አሕዛበ፡ እምፈሪሳውያን፡ ወእምሰዱቃውያን። እንዘ፡ ይመጽኡ፡ ውስተ፡ ጥምቀቱ፡ ጽሚተ፡ ይቤሎሙ። ኦ፡ ትውልደ፡ አራዊተ፡ ምድር። መኑ፡ አመረክሙ፡ ከመ፡ ታምሥጡ፡ እመቅሠፍት፡ ወእመንሱት፡ ወእመዐት፡ ዘይመጽእ።
8 ግበሩኬ፡ እንከ፡ ፍሬ፡ ሠናየ፡ ዘይደልወክሙ፡ ለንስሓ።
9 ወኢይምሰልክሙ፡ ዘታመሥጡ፡ በብሂለ፡ አብ፡ ብነ፡ አብርሃም። እብለክሙ፡ ከመ፡ ይክል፡ እግዚአብሔር፡ እምእላንቱ፡ አእባን፡ አንሥኦ፡ ውሉድ፡ ለአብርሃም።
10 እስመ፡ ናሁ፡ ወድአ፡ ማሕጼ፡ ተሠይመ፡ ውስተ፡ ጕንደ፡ ዕፀው፡ ይንበር። ኵሉኬ፡ ዕፅ፡ ዘኢይፈሪ፡ ፍሬ፡ ሠናየ፡ ይገዝምዎ፡ ወውስተ፡ እሳት፡ ይወድይዎ።
11 አንሰኬ፡ አጠምቀክሙ፡ በማይ፡ ለንስሓ። ወዘእምድኅሬየሰ፡ ይመጽእ፡ ውእቱ፡ ይጸንዕ፡ እምኔየ። ዘኢይደልወኒ፡ እጹር፡ አሣእኖ። ወውእቱ፡ ያጠምቀክሙ፡ በመንፈስ፡ ቅዱስ፡ ወበእሳት።
12 ዘመሥኤ፡ ውስተ፡ እዴሁ፡ ዘቦቱ፡ ያነጽሕ፡ ዐውደ፡ እክሉ። ወያስተጋብእ፡ ሥርናዮ፡ ውስተ፡ መዛግብቲሁ። ወኀሠሮሰ፡ ያውዒ፡ በእሳት፡ ዘኢይጠፍእ።
በእንተ፡ ጥምቀተ፡ እግዚእ፡ ኢየሱስ
13 አሜሃ፡ መጽአ፡ እግዚእ፡ ኢየሱስ፡ እምገሊላ፡ ውስተ፡ ዮርዳኖስ። ከመ፡ ይጠመቅ፡ እምኀበ፡ ዮሐንስ።
14 ወዮሐንስሰ፡ አበዮ፡ እንዘ፡ ይብል። አነ፡ እፈቅድ፡ እምኀቤከ፡ እጠመቅ። ወአንተኑ፡ ትመጽእ፡ ኀቤየ።
15 ወአውሥአ፡ እግዚእ፡ ኢየሱስ፡ ወይቤሎ። ኅድግ፡ ምዕረሰ፡ እስመ፡ ከመ፡ ዝ፡ ውእቱ፡ ተድላ፡ ለነ። ወይደልወነ፡ ከመ፡ ንፈጽም፡ ኵሎ፡ ጽድቀ፡ ወእምዝ፡ ኀደጎ።
16 ወተጠሚቆ፡ እግዚእ፡ ኢየሱስ፡ ሶቤሃ፡ ወፅአ፡ እማይ። ወናሁ፡ ተርኅወ፡ ሎቱ፡ ሰማይ። ወርእየ፡ መንፈሰ፡ እግዚአብሔር፡ እንዘ፡ ይወርድ፡ በአምሳለ፡ ርግብ። ወነበረ፡ ላዕሌሁ።
17 ወናሁ፡ መጽአ፡ ቃል፡ እምሰማይ፡ ዘይብል። ዝንቱ፡ ውእቱ፡ ወልድየ፡ ዘአፈቅር፡ ዘቦቱ፡ ሠመርኩ።
=== chapter 4 ===
[ምዕራፍ 4]
በእንተ፡ ጾሙ፡ ለእግዚእነ፡ ወተመክሮቱ፡ እምዲያብሎስ
1 ወእምዝ፡ ወሰዶ፡ መንፈስ፡ ገዳመ፡ ለእግዚእ፡ ኢየሱስ። ከመ፡ ይትመከር፡ እምኀበ፡ ዲያብሎስ።
2 ወጾመ፡ አርብዓ፡ መዓልተ፡ ወአርብዓ፡ ሌሊተ፡ ወእምድኅረ፡ ዝ፡ ርኅበ።
3 ወቀርበ፡ ዘያሜክሮ፡ ወይቤሎ። እመሰ፡ ወልደ፡ እግዚአብሔር፡ አንተ፡ በል፡ ከመ፡ እላ፡ አእባን፡ ኅብስተ፡ ይኩና።
4 ወአወሥአ፡ እግዚእ፡ ኢየሱስ፡ ወይቤሎ። ጽሑፍ፡ ከመ፡ አኮ፡ በኅብስት፡ ክመ፡ ዘየሐዩ፡ ሰብእ። አላ፡ በኵሉ፡ ቃል፡ ዘይወፅእ፡ እምአፉሁ፡ ለእግዚአብሔር።
5 ወእምዝ፡ ነሥኦ፡ ዲያብሎስ። ወወሰዶ፡ ውስተ፡ ቅድስት፡ ሀገር። ወአቀሞ፡ ውስተ፡ ተድባበ፡ ቤተ፡ መቅደስ።
6 ወይቤሎ፡ እመሰ፡ አማን፡ ወልደ፡ እግዚአብሔር፡ አንተ። ቅንጽ፡ እም፡ ዝየ፡ ወተወረው፡ ታሕተ። እስመ፡ ጽሑፍ፡ ከመ፡ ለመላእክቲሁ፡ ይኤዝዞሙ፡ በእንቲኣከ። ከመ፡ ይዕቀቡከ፡ በኵሉ፡ ፍናዊከ። ወበእደዊሆሙ፡ ያነሥኡከ፡ ከመ፡ ኢትትዐቀፍ፡ በእብን፡ እግረከ።
7 ወአውሥአ፡ እግዚእ፡ ኢየሱስ፡ ወይቤሎ። ካዕበ፡ ጽሑፍ፡ ኢታመክሮ፡ ለእግዚአብሔር፡ አምላክከ።
8 ወእምዝ፡ ዓዲ፡ ነሥኦ፡ ዲያብሎስ፡ ወአዕረጎ፡ ውስተ፡ ደብር፡ ነዋኅ፡ ጥቀ። ወአርአዮ፡ ኵሎ፡ መንግሥታተ፡ ዓለም፡ ወኵሎ፡ ክብሮ።
9 ወይቤሎ፡ ዘንተ፡ ኵሎ፡ እሁበከ፡ እምከመ፡ ሰገድከ፡ ሊተ፡ ወአማኅከኒ።
10 ወእምዝ፡ ይቤሎ፡ እግዚእ፡ ኢየሱስ፡ ሑር፡ እምድኅሬየ፡ ሰይጣን። ጽሑፍ፡ ውእቱ፡ ለእግዚአብሔር፡ አምላክከ፡ ትስግድ። ወኪያሁ፡ ባሕቲቶ፡ ታምልክ።
11 ወእምዝ፡ ኀደጎ፡ ዲያብሎስ። ወናሁ፡ መላእክት፡ መጽኡ፡ ይትለአክዎ።
ዘከመ፡ ነበረ፡ በቅፍርናሆም
12 ወሰሚዖ፡ እግዚእ፡ ኢየሱስ፡ ከመ፡ አኀዝዎ፡ ለዮሐንስ። ተግሕሠ፡ ውስተ፡ ደወለ፡ ገሊላ።
13 ወኀደጋ፡ ለናዝሬት፡ ወመጺኦ፡ ኀደረ፡ ቅፍርናሆም። እንተ፡ መንገለ፡ ባሕር፡ ውስተ፡ አድባረ፡ ዛብሎን፡ ወንፍታሌም።
14 ከመ፡ ይትፈጸም፡ ዘተብህለ፡ በኢሳይያስ፡ ነቢይ፡ እንዘ፡ ይብል።
15 ምድረ፡ ዛብሎን፡ ወምድረ፡ ንፍታሌም፡ ፍኖተ፡ ባሕር፡ ማዕዶተ፡ ዮርዳኖስ። ጰራልዩ፡ ወጰራልያስ፡ ወገሊላ፡ ዘአሕዛብ።
16 ሕዝብ፡ ዘይነብር፡ ውስተ፡ ጽልመት፡ ርእየ፡ ብርሃነ፡ ዐቢየ። ወለእለሂ፡ ይነብሩ፡ ውስተ፡ ጽልመት፡ ወጽላሎተ፡ ሞት፡ ብርሃን፡ ሠረቀ፡ ሎሙ።
በእንተ፡ ትምህርት፡ ቀዳሚ፡ ዘመሀረ፡ እግዚእነ፡ ኢየሱስ
17 እምአሜሃ፡ አኀዘ፡ እግዚእ፡ ኢየሱስ፡ ይስብክ፡ ወይብል። ነስሑ፡ እስመ፡ ቀርበት፡ መንግሥተ፡ ሰማያት።
በእንተ፡ ቀዳማውያን፡ ሐዋርያት
18 ወእንዘ፡ ያንሶሱ፡ መንገለ፡ ባሕረ፡ ገሊላ፡ ርእየ፡ ክልኤተ፡ አኀወ። ስምዖንሃ፡ ዘተሰምየ፡ ጴጥሮስ፡ ወእንድርያስሃ፡ እኅዋሁ። እንዘ፡ ያወርዱ፡ መርበብቶሙ፡ ውስተ፡ ባሕር፡ እስመ፡ መሠግራን፡ እሙንቱ።
19 ወይቤሎሙ፡ እግዚእ፡ ኢየሱስ፡ ንዑ፡ ትልዉኒ፡ ድኅሬየ። ወእሬስየክሙ፡ ትኩኑ፡ መሠግራነ፡ ሰብእ።
20 ወበጊዜሃ፡ ኀደጉ፡ መሣግሪሆሙ፡ ወተለውዎ።
21 ወዐዲዎ፡ ሕቀ፡ እምህየ፡ ርእየ፡ ካልኣነ፡ ክልኤተ፡ አኀወ። ያዕቆብሃ፡ ወልደ፡ ዘብዴዎስ፡ ወዮሐንስሃ፡ እኅዋሁ። ውስተ፡ ሐመር፡ ምስለ፡ ዘብዴዎስ፡ አቡሆሙ። እንዘ፡ ይሠርዑ፡ ወያስተሣንዩ፡ መሣግሪሆሙ፡ ወጸውዖሙ።
22 ወበጊዜሃ፡ ኀደጉ፡ ሐመሮሙ፡ ወአባሆሙ፡ ወተለውዎ።
በእንተ፡ ቀዳማዊ፡ ስብከቱ፡ ወመንክራቲሁ፡ ለእግዚእ፡ ኢየሱስ
23 ወአንሶሰወ፡ እግዚእ፡ ኢየሱስ፡ ውስተ፡ ኵሉ፡ ገሊላ። እንዘ፡ ይሜህር፡ በምኵራባቲሆሙ፡ ወይሰብክ፡ ወንጌለ፡ መንግሥት። ወይፌውስ፡ ኵሎ፡ ደዌ፡ ወኵሎ፡ ሕማመ፡ ዘውስተ፡ ሕዝብ።
24 ወወፅአ፡ ስሙዓተ፡ ነገሩ፡ ውስተ፡ ኵላ፡ ሶርያ። ወአምጽኡ፡ ኀቤሁ፡ ኵሎ፡ ድዉያነ። ወኵሎ፡ ሕሙማነ፡ ዘለለ፡ ዚኣሁ፡ ሕማሞሙ። ወጽዑራነ፡ ወእለሂ፡ አጋንንት፡ ወወርኃውያነ። ወእለሂ፡ ነገርጋር፡ ወመፃጕዓነ፡ ወአሕየዎሙ።
25 ወተለውዎ፡ ብዙኃን፡ አሕዛብ፡ እምገሊላ። ወእምዐሡሩ፡ አህጉር፡ ወእምኢየሩሳሌም፡ ወእምይሁዳ፡ ወእማዕዶተ፡ ዮርዳኖስ።
=== chapter 5 ===
[ምዕራፍ 5]
በእንተ፡ ብፁዓን
1 ሶበ፡ ርእየ፡ ብዙኃነ፡ አሕዛበ፡ ዐርገ፡ ውስተ፡ ደብር፡ ወነበረ። ወቀርቡ፡ ኀቤሁ፡ አርዳኢሁ።
2 ወከሠተ፡ አፉሁ፡ ወመሀሮሙ፡ እንዘ፡ ይብል።
3 ብፁዓን፡ ነዳያን፡ በመንፈስ። እስመ፡ ሎሙ፡ ይእቲ፡ መንግሥተ፡ ሰማያት።
4 ብፁዓን፡ እለ፡ ይላሕዉ፡ ይእዜ። እስመ፡ እሙንቱ፡ ይትፌሥሑ።
5 ብፁዓን፡ የዋሃን፡ እስመ፡ እሙንቱ፡ ይወርስዋ፡ ለምድር።
6 ብፁዓን፡ እለ፡ ይርኅቡ፡ ወይጸምኡ፡ በእንተ፡ ጽድቅ። እስመ፡ እሙንቱ፡ ይጸግቡ።
7 ብፁዓን፡ መሓርያን፡ እስመ፡ ሎሙኒ፡ ይምሕርዎሙ።
8 ብፁዓን፡ ንጹሓነ፡ ልብ። እስመ፡ እሙንቱ፡ ይሬእይዎ፡ ለእግዚአብሔር።
9 ብፁዓን፡ ገባርያነ፡ ሰላም። እስመ፡ እሙንቱ፡ ውሉደ፡ እግዚአብሔር፡ ይሰመዩ።
10 ብፁዓን፡ እለ፡ ይሰደዱ፡ በእንተ፡ ጽድቅ። እስመ፡ ሎሙ፡ ይእቲ፡ መንግሥተ፡ ሰማያት።
11 ብፁዓን፡ አንትሙ፡ ሶበ፡ ይሰድዱክሙ፡ ወይዘነጕጉክሙ። ወይነቡ፡ ኵሎ፡ እኩየ፡ ላዕሌክሙ። እንዘ፡ ይሔስዉ፡ በእንቲኣየ።
12 ተፈሥሑ፡ ወተሐሠዩ፡ እስመ፡ ብዙኅ፡ ዕሴትክሙ፡ በሰማያት። እስመ፡ ከማሁ፡ ሰደድዎሙ፡ ለነቢያት፡ እለ፡ እምቅድሜክሙ።
በእንተ፡ ግብር፡ ወንጌላዊ
13 አንትሙ፡ ውእቱ፡ ጼው፡ ለስሐ። በምንትኑ፡ እንከ፡ ይቄስምዎ፡ አልቦኬ፡ እንከ፡ ዘይበቊዕ። ዘእንበለ፡ ዘይገድፍዎ፡ አፍኣ፡ ወይከይድዎ፡ ሰብእ፡ በእገሪሆሙ።
14 አንትሙ፡ ውእቱ፡ ብርሃኑ፡ ለዓለም። ኢትክል፡ ተከብቶ፡ ሀገር፡ እንተ፡ ተሐንጸት፡ መልዕልተ፡ ደብር።
15 ወኢያኀትዉ፡ ማኅቶተ፡ ከመ፡ ያንብርዋ፡ ታሕተ፡ ከፈር። አላ፡ ያነብርዋ፡ ዲበ፡ ተቅዋማ። ወታበርህ፡ ለኵሎሙ፡ እለ፡ ውስተ፡ ቤት።
16 ከማሁኬ፡ ይብራህ፡ ብርሃንክሙ፡ በቅድመ፡ ሰብእ። ከመ፡ ይርአዩ፡ ምግባሪክሙ፡ ሠናየ። ወይሰብሕዎ፡ ለአቡክሙ፡ ዘበሰማያት።
በእንተ፡ ሐዲስ፡ ኪዳን፡ ተዓርዮታ፡ ምስለ፡ ብሊት
17 ኢይምሰልክሙ፡ ዘመጻእኩ፡ እስዐሮሙ፡ ለኦሪት፡ ወለነቢያት። ዘእንበለ፡ ዳእሙ፡ ከመ፡ እፈጽሞሙ።
18 አማን፡ እብለክሙ፡ እስከ፡ አመ፡ የኀልፍ፡ ሰማይ፡ ወምድር። የውጣ፡ እንተ፡ አሐቲ፡ ሕርመታ፡ ወአሐቲ፡ ቅርፀታ። ኢተኀልፍ፡ እምኦሪት፡ ወእምነቢያት፡ እስከ፡ ሶበ፡ ኵሉ፡ ይትገበር፡ ወይከውን።
19 ዘኬ፡ ፈትሐ፡ አሐተ፡ እምእላ፡ ትእዛዛት፡ እንተ፡ ተሐጽጽ። ወይሜህር፡ ከመ፡ ዝ፡ ለሰብእ፡ ሕጹጸ፡ ይከውን፡ በመንግሥተ፡ ሰማያት። ወዘሰ፡ ይሜህር፡ ወይገብር፡ ከመ፡ ዝ። ውእቱ፡ ዐቢየ፡ ይከውን፡ በመንግሥተ፡ ሰማያት።
20 ናሁ፡ እብለክሙ፡ ከመ፡ ለእመ፡ ኢፈድፈደ፡ ጽድቅክሙ፡ ፈድፋደ፡ እምጸሐፍት፡ ወእምፈሪሳውያን። ኢትበውኡ፡ ውስተ፡ መንግሥተ፡ ሰማያት።
በእንተ፡ ስድስቱ፡ ቃላት
21 ሰማዕክሙ፡ ዘተብህለ፡ ለቀደምትክሙ፡ ኢትቅትል፡ ነፍሰ። ወዘሰ፡ ቀተለ፡ ነፍሰ፡ ረስሐ፡ ውእቱ፡ ለኵነኔ።
22 ወአንሰ፡ እብለክሙ፡ ኵሉ፡ ዘያምዕዕ፡ እኅዋሁ፡ በከንቱ፡ ረስሐ፡ ውእቱ፡ ለኵነኔ። ወዘሂ፡ ይቤሎ፡ ለእኁሁ፡ ሕሡር፡ ዘፀርቅ፡ ረስሐ፡ ወይትኴነን፡ በዐውድ። ወዘሰ፡ ይቤሎ፡ አብድ፡ ረስሐ፡ ውእቱ፡ ወይትኴነን፡ በእሳተ፡ ገሃነም።
23 ወእምከመኬ፡ ታበውእ፡ መባአከ፡ ውስተ፡ ምሥዋዕ። ወበህየ፡ ተዘከርከ፡ ከመ፡ ቦ፡ እኁከ፡ ዘተሐየሰከ።
24 ኅድግ፡ ህየ፡ መባአከ፡ ቅድመ፡ ምሥዋዕ። ወሑር፡ ቅድመ፡ ተኳነን፡ ምስለ፡ እኁከ። ወእምዝ፡ ገቢአከ፡ አብእ፡ መባአከ።
25 ኩን፡ ጠቢበ፡ ለዕድውከ፡ ፍጡነ። እንዘ፡ ሀሎከ፡ ምስሌሁ፡ ውስተ፡ ፍኖት። ከመ፡ ኢይመጡከ፡ ዕድውከ፡ ለመኰንን። ወመኰንን፡ ይሜጥወከ፡ ለወዓሊሁ፡ ወወዓሊሁኒ፡ ይሞቅሐከ።
26 አማን፡ እብለከ፡ ኢትወፅእ፡ እምህየ። እስከ፡ ሶበ፡ ትፈዲ፡ ደኃሪተ፡ ገመስ፡ ዘላዕሌከ።
27 ሰማዕክሙ፡ ዘተብህለ፡ ለቀደምትክሙ፡ ኢትዘሙ።
28 ወአንሰ፡ እብለክሙ፡ ኵሉ፡ ዘርእያ፡ ለብእሲት፡ ወፈተዋ። ወድአ፡ ዘመወ፡ ባቲ፡ በልቡ።
29 እመኒ፡ ዐይንከ፡ እንተ፡ የማን፡ ታስሕተከ። ምልኃ፡ ወግድፋ፡ እምላዕሌከ። እስመ፡ ይኄይሰከ፡ ነቋረከ፡ ትባእ፡ ውስተ፡ መንግሥተ፡ ሰማያት። እምትባእ፡ ምስለ፡ ክልኤሆን፡ አዕይንቲከ፡ ውስተ፡ እሳተ፡ ገሃነም።
30 ወእመኒ፡ እዴከ፡ እንተ፡ የማን፡ ታስሕተከ። ምትራ፡ ወግድፋ፡ እምላዕሌከ። እስመ፡ ይኄይሰከ፡ ይትሀጐል፡ አሐዱ፡ እምነ፡ አባልከ። እምኵሉ፡ ሥጋከ፡ ይትወደይ፡ ውስተ፡ እሳተ፡ ገሃነም።
31 ወእመኒ፡ እግርከ፡ ዘየማን፡ ታስሕተከ። ምትራ፡ ወግድፋ፡ እምላዕሌከ። እስመ፡ ይኄይሰከ፡ ሐንካሰከ፡ ትባእ፡ ውስተ፡ መንግሥተ፡ ሰማያት። እምትባእ፡ ምስለ፡ ክልኤሆን፡ እገሪከ፡ ውስተ፡ እሳተ፡ ገሃነም።
32 ሰማዕክሙ፡ ዘተብህለ፡ ለቀደምትክሙ፡ ኵሉ፡ ዘይድሕር፡ ብእሲቶ። ይጽሐፍ፡ ላቲ፡ መጽሐፈ፡ ኅዳጋቲሃ፡ የሀባ፡ ወይድሐራ። ወአንሰ፡ እብለክሙ፡ ኵሉ፡ ዘይድሕር፡ ብእሲቶ፡ ዘእንበለ፡ ትዘሙ፡ በላዕሌሁ። ለሊሁ፡ ረሰያ፡ ዘማ። ወዘሰ፡ ኅድገተ፡ አውሰበ፡ ዘመወ።
33 ወካዕበ፡ ሰማዕክሙ፡ ዘከመ፡ ተብህለ፡ ለቀደምትክሙ። ኢትምሐሉ፡ በሐሰት፡ ባሕቱ፡ አግብኡ፡ መሐላክሙ፡ ለእግዚአብሔር።
34 ወአንሰ፡ እብለክሙ፡ ኢትምሐሉ፡ ግሙራ፡ ኢ፡ በሰማየ። እስመ፡ መንበሩ፡ ለእግዚአብሔር፡ ውእቱ።
35 ወኢ፡ በምድር፡ እስመ፡ መከየደ፡ እገሪሁ፡ ይእቲ። ወኢ፡ በኢየሩሳሌም፡ እስመ፡ ሀገሩ፡ ይእቲ፡ ለንጉሥ፡ ዐቢይ።
36 ወኢ፡ በርእስክሙ፡ ኢትምሐሉ፡ ወኢ፡ በሥዕርተ፡ ርእስክሙ። እስመ፡ ኢትክሉ፡ አሐተ፡ እምሥዕርተ፡ ርእስክሙ፡ ኢ፡ አጻዕድዎ፡ ወኢ፡ አጽልሞ።
37 ባሕቱ፡ ይኩን፡ ነገርክሙ፡ አሐደ። እመሂ፡ እወ፡ እወ፡ ወእመሂ፡ አልቦ፡ አልቦ። ወፈድፋደሰ፡ እምእሉ፡ እምእኩይ፡ ውእቱ።
38 ሰማዕክሙ፡ ዘተብህለ፡ ለቀደምትክሙ። ዐይን፡ ቤዛ፡ ዐይን፡ ወስን፡ ቤዛ፡ ስን።
39 ወአንሰ፡ እብለክሙ፡ ኢትትቃወምዎ፡ ለእኩይ፡ በእኩይ። ወለዘሂ፡ ጸፍዐከ፡ እንተ፡ የማን፡ መልታሕቴከ። ሚጥ፡ ሎቱ፡ ካልእታሂ።
40 ወለዘሂ፡ ይፈቅድ፡ ይትዐገልከ፡ መልበሰከ። ኅድግ፡ ሎቱ፡ ክዳነከሂ።
41 ወለዘሂ፡ ዐበጠከ፡ አሐደ፡ ምዕራፈ። ሑር፡ ምስሌሁ፡ ክልኤተ፡ ምዕራፈ።
42 ወለኵሉ፡ ዘሰአለከ፡ ሀቦ። ወለዘሂ፡ ይፈቅድ፡ እምኔከ፡ ይትለቃሕ፡ ኢትክልኦ።
43 ሰማዕክሙ፡ ዘተብህለ፡ ለቀደምትክሙ። አፍቅር፡ ቢጸከ፡ ወጽላእ፡ ጸላኢከ።
44 ወአንሰ፡ እብለክሙ፡ አፍቅሩ፡ ጸላእተክሙ። ባርክዎሙ፡ ለእለ፡ ይሰድዱክሙ። ሠናየ፡ ግበሩ፡ ለእለ፡ ይጸልኡክሙ። ወጸልዩ፡ በእንተ፡ እለ፡ ይሰድዱክሙ፡ ወይትዔገሉክሙ።
45 ከመ፡ ትኩኑ፡ ውሉዶ፡ ለአቡክሙ፡ ዘበሰማያት። እስመ፡ ውእቱ፡ ያሠርቅ፡ ፀሓየ፡ ላዕለ፡ ኄራን፡ ወእኩያን። ወያዘንም፡ ዝናመ፡ ላዕለ፡ ጻድቃን፡ ወኃጥኣን።
46 ወእመሰ፡ ታፈቅሩ፡ ዘያፈቅረክሙ፡ ምንትኑ፡ ዕሴትክሙ። አኮሁ፡ መጸብሓንሂ፡ ከማሁሰ፡ ይገብሩ።
47 ወእመሂ፡ ተአማኅክሙ፡ አኀዊክሙ፡ ባሕቲቶ። ምንት፡ እንከ፡ ፍድፋዴ፡ ዘገበርክሙ። አኮኑ፡ አሕዛብኒ፡ ከማሁሰ፡ ይገብሩ።
48 አንትሙሰ፡ ኩኑ፡ ፍጹማነ። ከመ፡ አቡክሙ፡ ሰማያዊ፡ ፍጹም፡ ውእቱ።
=== chapter 6 ===
[ምዕራፍ 6]
በእንተ፡ ምጽዋት
1 ወባሕቱ፡ ዑቁ፡ ምጽዋተክሙ፡ ኢትግበሩ፡ ለዐይነ፡ ሰብእ፡ ከመ፡ ታስተርእዩ፡ ሎሙ። ወእመ፡ አኮሰ፡ ዐስበ፡ አልብክሙ፡ በኀበ፡ አቡክሙ፡ ዘበሰማያት።
2 ሶበሰኬ፡ ትገብሩ፡ ምጽዋተክሙ፡ ኢትንፍኁ፡ ቀርነ፡ ቅድሜክሙ። በከመ፡ ይገብሩ፡ መድልዋን፡ በመኳርብት፡ ወበአስኳት፡ ወበፍናው። ከመ፡ ይትአኰቱ፡ እምኀበ፡ ሰብእ። አማን፡ እብለክሙ፡ ሀጕሉ፡ ዕሴቶሙ።
3 ወአንተሰ፡ ሶበ፡ ትገብር፡ ምጽዋተከ። ኢታእምር፡ ፀጋምከ፡ ዘትገብር፡ የማንከ።
4 ከመ፡ በኅቡእ፡ ይኩን፡ ምጽዋትከ፡ ወአቡከ፡ ዘይሬእየከ፡ በኅቡእ፡ የዐስየከ፡ ክሡተ።
በእንተ፡ ጸሎት
5 ወሶበሂ፡ ትጼልዩ፡ ኢትኩኑ፡ ከመ፡ መደልዋን። እስመ፡ እሙንቱ፡ ያፈቅሩ፡ በመኳርብት፡ ወውስተ፡ መዐዝነ፡ መራኅብት፡ ቀዊመ። ወጸልዮ፡ ከመ፡ ያስተርእዩ፡ ለሰብእ። አማን፡ እብለክሙ፡ ሀጕሉ፡ ዕሴቶሙ።
6 ወአንተሰ፡ ሶበ፡ ትጼሊ፡ ባእ፡ ቤተከ፡ ወዕፁ፡ ኆኅተከ። ወጸሊ፡ ለአቡከ፡ ሰማያዊ፡ በኅቡእ። ወአቡከ፡ ዘይሬእየከ፡ በኅቡእ፡ የዐስየከ፡ ክሡተ።
7 ወእንዘ፡ ትጼልዩ፡ ኢትዘንግዑ፡ ከመ፡ አሕዛብ። እስመ፡ ይመስሎሙ፡ በአብዝኆ፡ ንባቦሙ፡ ዘይሰምዖሙ።
8 ኢትትመሰልዎሙኬ፡ እስመ፡ የአምር፡ አቡክሙ፡ ሰማያዊ፡ ዘትፈቅዱ፡ ዘእንበለ፡ ትስአልዎ።
9 አንትሙሰ፡ ሶበ፡ ትጼልዩ፡ ከመ፡ ዝ፡ በሉ።
10 አቡነ፡ ዘበሰማያት፡ ይትቀደስ፡ ስምከ። ትምጻእ፡ መንግሥትከ፡ ወይኩን፡ ፈቃድከ። በከመ፡ በሰማይ፡ ከማሁ፡ በምድር።
11 ሲሳየነ፡ ዘለለ፡ ዕለትነ፡ ሀበነ፡ ዮም።
12 ኅድግ፡ ለነ፡ አበሳነ፡ ወጌጋይነ። ከመ፡ ንሕነኒ፡ ንኅድግ፡ ለዘአበሰ፡ ለነ።
13 ኢታብአነ፡ እግዚኦ፡ ውስተ፡ መንሱት። አላ፡ አድኅነነ፡ ወባልሐነ፡ እምኵሉ፡ እኩይ። እስመ፡ ዚኣከ፡ ይእቲ፡ መንግሥት። ኀይል፡ ወስብሐት፡ ለዓለመ፡ ዓለም።
14 እስመ፡ እመ፡ ኀደግሙ፡ ለሰብእ፡ አበሳሆሙ። ለክሙኒ፡ የኀድግ፡ አቡክሙ፡ ሰማያዊ፡ አበሳክሙ።
15 ወእመሰ፡ ኢኀደግሙ፡ ለሰብእ፡ አበሳሆሙ። አቡክሙ፡ ሰማያዊ፡ ኢየኀድግ፡ አበሳክሙ።
በእንተ፡ ጾም
16 ወሶበሂ፡ ትጸውሙ፡ ኢትኩኑ፡ ከመ፡ መደልዋን። እስመ፡ እሙንቱ፡ ይትመጸለዉ፡ ወይቈጽሩ፡ ገጾሙ፡ ወያማስኑ። ከመ፡ ያእምር፡ ሰብእ፡ ከመ፡ ጾሙ። አማን፡ እብለክሙ፡ ነሥኡ፡ ዕሴቶሙ።
17 ወአንትሙሰ፡ ሶበ፡ ትጸውሙ፡ ቅብኡ፡ ርእሰክሙ፡ ወኅፅቡ፡ ገጸክሙ።
18 ከመ፡ ኢያእምር፡ ሰብእ፡ ከመ፡ ጾምክሙ። ዘእንበለ፡ አቡክሙ፡ ማእምረ፡ ኅቡኣት። ወአቡክሙ፡ ዘይሬእየክሙ፡ በኅቡእ፡ የዐስየክሙ፡ ክሡተ።
19 ኢትዝግቡ፡ ለክሙ፡ መዝገበ፡ ዘበምድር፡ ኀበ፡ ይበሊ፡ ወይማስን። ወኀበ፡ ፃፄ፡ ወቊንቊኔ፡ ያማስኖ። ወኀበ፡ ሰረቅት፡ ይከርዩ፡ ወይሰርቁ።
20 አላ፡ ዝግቡ፡ ለክሙ፡ መዝገበ፡ ዘበሰማያት። ኀበ፡ ኢይበሊ፡ ወኢይማስን። ወኀበ፡ ኢያማስኖ፡ ፃፄ፡ ወቊንቊኔ። ወኀበ፡ ሰረቅት፡ ኢይከርዩ፡ ወኢይሰርቁ።
21 እስመ፡ ኀበ፡ ሀሎ፡ መዝገብክሙ፡ ህየ፡ ይሄሉ፡ ልብክሙኒ።
22 ማኅቶቱ፡ ለሥጋከ፡ ዐይንከ፡ ውእቱ። እምከመ፡ ዐይንከ፡ ብሩህ፡ ወስፉሕ፡ ውእቱ። ኵሉ፡ ሥጋከ፡ ብሩሀ፡ ይከውን። ወእመሰ፡ ዐይንከ፡ ሐማሚ፡ ውእቱ። ኵሉ፡ ሥጋከ፡ ጽልመተ፡ ይከውን።
23 ወሶበ፡ ብርሃን፡ ዘላዕሌከ፡ ጽልመት፡ ውእቱ። ጽልመትከ፡ እፎ፡ ብርሃነ፡ ይከውነከ።
24 ኢይክል፡ አሐዱ፡ ገብር፡ ለክልኤ፡ አጋእዝት፡ ተቀንዮ። ወእመ፡ አኮሰ፡ አሐደ፡ ይጸልእ፡ ወካልኦ፡ ያፈቅር። ወእመ፡ አኮ፡ ለአሐዱ፡ ይትኤዘዝ፡ ወለካልኡ፡ ኢይትኤዘዝ። ኢትክሉኬ፡ ተቀንዮ፡ ለእግዚአብሔር፡ ወለንዋይ።
25 ወበእንተ፡ ዝ፡ እብለክሙ፡ ኢትተክዙ፡ ለነፍስክሙ፡ ዘትበልዑ፡ ወዘትሰትዩ። ወኢ፡ ለሥጋክሙ፡ ዘትለብሱ። አኮሁ፡ ነፍስ፡ ተዐጽብ፡ እምሲሲት፡ ወሥጋ፡ የዐጽብ፡ እምዐራዝ።
26 ነጽሩ፡ አዕዋፈ፡ ሰማይ፡ ከመ፡ ኢይዘርዑ። ወኢየአርሩ፡ ወኢያስተጋብኡ፡ ውስተ፡ አብያት። ወአቡክሙ፡ ሰማያዊ፡ ይሴስዮሙ። አኮኑ፡ አንትሙ፡ ፈድፋደ፡ ትኄይስዎሙ።
27 መኑ፡ እምኔክሙ፡ በተክዞ፡ ዘይክል፡ ወስኮ፡ አሐደ፡ እመተ፡ በዲበ፡ ቆሙ። ወበእንተ፡ ዐራዝኒ፡ ምንተኑ፡ ትኄልዩ።
28 ርእዩ፡ ጽጌያተ፡ ገዳም፡ ከመ፡ ይልህቁ። ኢይጻምዉ፡ ወኢይፈትሉ።
29 እብለክሙ፡ ከመ፡ ሰሎሞን፡ ጥቀ፡ ኢለብሰ፡ በኵሉ፡ ክብሩ፡ ከመ፡ አሐዱ፡ እምእሉ።
30 ወናሁ፡ ሣዕረ፡ ገዳም፡ ዘዮም፡ ሀሎ። ወጌሠመ፡ ውስተ፡ እሳት፡ ይትወደይ። ወእግዚአብሔር፡ ዘከመ፡ ዝ፡ ያለብሶ። እፎ፡ እንከ፡ ፈድፋደ፡ ኪያክሙ፡ ኦ፡ ሕጹጻነ፡ ሃይማኖት።
31 ኢትተክዙኬ፡ እንከ፡ እንዘ፡ ትብሉ። ምንተ፡ ንበልዕ፡ ወምንተ፡ ንሰቲ፡ ወምንተ፡ ንትከደን።
32 እስመ፡ ዘንተሰ፡ ኵሎ፡ አሕዛበ፡ ዓለም፡ ዘአፍኣ፡ የኀሥሥዎ። ወለክሙሰ፡ የአምር፡ አቡክሙ፡ ሰማያዊ፡ ከመ፡ ትፈቅዱ፡ ዘንተ፡ ኵሎ።
33 አንትሙሰ፡ ኅሡ፡ መቅድመ፡ መንግሥቶ፡ ወጽድቆ። ወዝንቱሰ፡ ኵሉ፡ ይትዌሰከክሙ።
34 ኢትበሉኬ፡ ለጌሠም፡ እስመ፡ ጌሠምሰ፡ ትኄሊ። ለርእሳ፡ የአክላ፡ ለዕለት፡ እክያ፡ ወስራሓ።
=== chapter 7 ===
[ምዕራፍ 7]
በእንተ፡ ኵነኔ፡ ዘይደሉ
1 ኢትኰንኑ፡ ከመ፡ ኢትትኰነኑ።
2 እስመ፡ በኵነኔ፡ ዘኰነንክሙ፡ ትትኴነኑ፡ አንትሙ። ወበመስፈርት፡ ዘሰፈርክሙ፡ ይሰፍሩ፡ ለክሙ።
3 ለምንት፡ ትሬኢ፡ ኀሠረ፡ ዘውስተ፡ ዐይነ፡ እኁከ። ወኢትሬኢ፡ ሠርዌ፡ ዘውስተ፡ ዐይንከ፡ ኢታቤይንኑ።
4 ወእፎ፡ ትብሎ፡ ለእኁከ፡ ኅድገኒ። አውፅእ፡ ኀሠረ፡ እምውስተ፡ ዐይንከ። ወናሁ፡ ሠርዌ፡ ውስተ፡ ዐይንከ።
5 ኦ፡ መደልው፡ አውፅእ፡ ቅድመ፡ ሠርዌ፡ እምውስተ፡ ዐይንከ። ወእምዝ፡ ትሬኢ፡ ለአውፅኦ፡ ኀሠር፡ ዘውስተ፡ ዐይነ፡ እኁከ።
6 ኢተሀቡ፡ ቅድሳተ፡ ለከለባት፡ ወኢትደዩ፡ ባሕርየክሙ፡ ቅድመ፡ አሕርው። ከመ፡ ኢይኪድዎ፡ በእገሪሆሙ፡ ወተመይጦሙ፡ ይነጽሑክሙ።
7 ሰአሉ፡ ወይትወሀበክሙ፡ ኅሡ፡ ወትረክቡ፡ ጐድጕዱ፡ ወይትረኀወክሙ።
8 እስመ፡ ኵሉ፡ ዘሰአለ፡ ይነሥእ። ወዘሂ፡ ኀሥሥ፡ ይረክብ፡ ወለዘሂ፡ ጐድጐደ፡ ይትረኀዎ።
9 መኑ፡ ውእቱ፡ እምኔክሙ፡ ብእሲ፡ ዘይስእሎ፡ ወልዱ፡ ኅብስተ፡ ወእብነ፡ ይሁቦ።
10 ወእመሂ፡ ዓሣ፡ ሰአሎ፡ አርዌ፡ ምድርኑ፡ ይሁቦ።
11 ወሶበ፡ እንዘ፡ እኩያን፡ አንትሙ። ተአምሩ፡ ሠናየ፡ ሀብተ፡ ውሂበ፡ ለውሉድክሙ። እፎ፡ እንከ፡ ፈድፋደ፡ አቡክሙ፡ ዘበሰማያት። ይሁብ፡ ሠናየ፡ ለእለ፡ ይስእልዎ።
12 ኵሎኬ፡ ዘትፈቅዱ፡ ይግበሩ፡ ለክሙ፡ ሰብእ። ከማሁ፡ ግበሩ፡ ሎሙ፡ አንትሙኒ። እስመ፡ ከማሁ፡ ኦሪትኒ፡ ወነቢያትኒ።
13 ባኡ፡ እንተ፡ ጸባብ፡ አንቀጽ። እስመ፡ ረሓብ፡ አንቀጽ፡ ወስፍሕት፡ ፍኖት። እንተ፡ ትወስድ፡ ውስተ፡ ሀጕል። ወብዙኃን፡ እሙንቱ፡ እለ፡ ይበውኡ፡ ውስቴታ።
14 ጥቀ፡ ጸባብ፡ አንቀጽ፡ ወጽዕቅት፡ ፍኖት። እንተ፡ ትወስድ፡ ውስተ፡ ሕይወት። ወውኁዳን፡ እሙንቱ፡ እለ፡ ይበውእዋ።
15 ተዐቀቡኬ፡ እምሐሳውያን፡ ነቢያት፡ እለ፡ ይመጽኡ፡ ኀቤክሙ፡ በአልባሰ፡ አባግዕ። ወእንተ፡ ውስጦሙሰ፡ ተኵላት፡ መሰጥ፡ እሙንቱ።
16 ወእምፍሬሆሙ፡ ተአምርዎሙ፡ ይቀሥሙሁ፡ እምአሥዋከ፡ አስካለ፡ ወእምአሜከላ፡ በለሰ።
17 ከማሁኬ፡ ኵሉ፡ ዕፅ፡ ሠናይ፡ ፍሬ፡ ሠናየ፡ ይፈሪ። ወእኩይሰ፡ ዕፅ፡ ፍሬ፡ እኩየ፡ ይፈሪ።
18 ኢይክል፡ ዕፅ፡ ሠናይ፡ ፍሬ፡ እኩየ፡ ፈርየ። ወኢ፡ ዕፅ፡ እኩይ፡ ፍሬ፡ ሠናየ፡ ፈርየ።
19 ኵሉ፡ ዕፅ፡ ዘኢይፈሪ፡ ፍሬ፡ ሠናየ፡ ይገዝምዎ። ወውስተ፡ እሳት፡ ይወድይዎ።
20 ወእምፍሬሆሙ፡ እንከ፡ ተአምርዎሙ።
21 አኮ፡ ኵሉ፡ ዘይብለኒ፡ እግዚኦ፡ ዘይበውእ፡ ውስተ፡ መንግሥተ፡ ሰማያት። ዘእንበለ፡ ዘይገብር፡ ፈቃዶ፡ ለአቡየ፡ ዘበሰማያት።
22 ወብዙኃን፡ ይብሉኒ፡ በይእቲ፡ ዕለት። እግዚኦ፡ አኮኑ፡ በስምከ፡ ተነበይነ። ወበስምከ፡ አጋንንተ፡ አውፃእነ። ወበስምከ፡ ኀይላተ፡ ብዙኀ፡ ገበርነ።
23 ወይእተ፡ ጊዜ፡ እብሎሙ፡ ግሙራ፡ ኢየአምረክሙ። ረሐቁ፡ እምኔየ፡ ኵልክሙ፡ እለ፡ ትገብሩ፡ ዐመፃ።
24 ኵሉኬ፡ ዘይሰምዕ፡ ዘንተ፡ ቃልየ፡ ወይገብሮ። ይመስል፡ ብእሴ፡ ጠቢበ፡ ዘሐነጸ፡ ቤቶ፡ ዲበ፡ ኰኵሕ።
25 ዘንሙ፡ ዝናማት፡ ወውሕዙ፡ ወሓይዝት፡ ወነፍኁ፡ ነፋሳት። ወገፍዕዎ፡ ለውእቱ፡ ቤት፡ ወኢወድቀ። እስመ፡ ዲበ፡ ኰኵሕ፡ ተሣረረ።
26 ወኵሉ፡ ዘይሰምዕ፡ ዘንተ፡ ቃልየ፡ ወኢይገብሮ። ይመስል፡ ብእሴ፡ አብደ፡ ዘሐነጸ፡ ቤቶ፡ ዲበ፡ ኆጻ።
27 ዘንሙ፡ ዝናማት፡ ወውሕዙ፡ ወሓይዝት፡ ወነፍኁ፡ ነፍሳት። ወገፍዕዎ፡ ለውእቱ፡ ቤት፡ ወወድቀ። ወኮነ፡ ድቀቱ፡ ዐቢየ።
28 ወሶበ፡ ፈጸመ፡ ኢየሱስ፡ ዘንተ፡ ነገረ። ተደሙ፡ አሕዛብ፡ ወአንከሩ፡ ምህሮቶ።
24 እስመ፡ ከመ፡ መኰንን፡ ይሜህሮሙ። ወአኮ፡ ከመ፡ ጸሐፍቶሙ።
=== chapter 8 ===
[ምዕራፍ 8]
በእንተ፡ ዘለምጽ
1 ወእንዘ፡ ይወርድ፡ እምደብር፡ ተለውዎ፡ ሰብእ፡ ብዙኃን።
2 ወናሁ፡ መጽአ፡ አሐዱ፡ ብእሲ፡ ዘለምጽ። ወቀርበ፡ ኀቤሁ፡ ወሰገደ፡ ሎቱ፡ እንዘ፡ ይብል። እግዚኦ፡ እመሰ፡ ፈቀድከ፡ ትክል፡ አንጽሖትየ።
3 ወሰፍሐ፡ እዴሁ፡ ወገሰሶ፡ ወይቤሎ። እፈቅድ፡ ንጻሕ፡ ወነጽሐ፡ እምለምጹ፡ በጊዜሃ።
4 ወይቤሎ፡ እግዚእ፡ ኢየሱስ፡ ዑቅ፡ ኢትንግር፡ ወኢ፡ ለመኑሂ። ወባሕቱ፡ ሑር፡ ወአፍትን፡ ርእሰከ፡ ለካህን። ወአብእ፡ መባአከ፡ በእንተ፡ ዘነጻሕከ። በከመ፡ አዘዘ፡ ሙሴ፡ ከመ፡ ይኩን፡ ስምዐ፡ ላዕሌሆሙ።
በእንተ፡ ወልደ፡ መስፍን
5 ወበዊኦ፡ ቅፍርናሆም፡ መጽአ፡ ኀቤሁ፡ መስፍነ፡ ምእት።
6 ወይቤሎ፡ እግዚኦ፡ ብቊዐኒ፡ ቊልዔየ፡ ድዉይ። ወይሰከብ፡ ውስተ፡ ቤት፡ ወመፃጕዕ፡ ወጥቀ፡ ጽዑር።
7 ወይቤሎ፡ እግዚእ፡ ኢየሱስ፡ ነየ፡ እመጽእ፡ አነ፡ ወእፌውሶ።
8 ወአውሥአ፡ ሐቤ፡ ምእት፡ ወይቤሎ። እግዚኦ፡ ኢይደልወኒ፡ ከመ፡ አንተ፡ ትባእ፡ ታሕተ፡ ጠፈረ፡ ቤትየ። ዳእሙ፡ አዝዝ፡ በቃልከ፡ ወየሐዩ፡ ወልድየ።
9 እስመ፡ አነሂ፡ ብእሲ፡ መኰንን፡ አነ። ወብየ፡ ሐራ፡ እለ፡ ዘእኴንን። ወእብሎ፡ ለዝ፡ ሑር፡ ወየሐውር፡ ወለካልኡኒ፡ ነዐ፡ ወይመጽእ። ወለገብርየኒ፡ ግበር፡ ከመ፡ ዝ፡ ወይገብር።
10 ወሰሚዖ፡ እግዚእ፡ ኢየሱስ፡ አንከረ። ወተመይጦ፡ ይቤሎሙ፡ ለእለ፡ ይተልውዎ። አማን፡ እብለክሙ፡ ኢረከብኩ፡ ከመ፡ ዝ፡ ዘየአምን፡ በውስተ፡ ኵሉ፡ እስራኤል።
11 ወባሕቱ፡ እብለክሙ፡ ብዙኃን፡ ይመጽኡ፡ እምሥራቅ፡ ወእምዕራብ። ወይረፍቁ፡ ውስተ፡ ሕፅነ፡ አብርሃም፡ ይስሐቅ፡ ወያዕቆብ፡ በመንግሥተ፡ ሰማያት።
12 ወለውሉደ፡ መንግሥትሰ፡ ያወፅእዎሙ፡ ውስተ፡ ጸናፌ፡ ጽልመት። ኀበ፡ ሀሎ፡ ብካይ፡ ወሐቅየ፡ ስነን።
13 ወይቤሎ፡ እግዚእ፡ ኢየሱስ፡ ለውእቱ፡ ሐቤ፡ ምእት። ሑርኬ፡ ይኩንከ፡ በከመ፡ ተአመንከ። ወሐይወ፡ ወልዱ፡ በይእቲ፡ ሰዓት። ወገቢኦ፡ መስፍን፡ ውስተ፡ ቤቱ፡ ረከቦ፡ ለቊልዔሁ፡ ሐይዎ።
በእንተ፡ ሐማተ፡ ጴጥሮስ
14 ወበዊኦ፡ እግዚእ፡ ኢየሱስ፡ ቤቶ፡ ለጴጥሮስ። ረከባ፡ ለሐማተ፡ ጴጥሮስ፡ እንዘ፡ ትሰክብ፡ ወትፈፅን።
15 ወገሰሳ፡ ወአኀዛ፡ እዴሃ፡ ወኀደጋ፡ ፈፀንታ። ወተንሥአት፡ ወተልእክቶሙ።
በእንተ፡ እለ፡ ሐይዉ፡ እምብዙኅ፡ ደዌ
16 ወምሴተ፡ ከዊኖ፡ አምጽኡ፡ ኀቤሁ፡ ብዙኃነ፡ እለ፡ አጋንንት። ወአውፅኦሙ፡ ለመናፍስት፡ በቃሉ። ወፈወሰ፡ ኵሎ፡ ድዉያነ።
17 ከመ፡ ይትፈጸም፡ ቃለ፡ ኢሳይያስ፡ ነቢይ፡ ዘይቤ። ውእቱ፡ ነሥአ፡ ደዌነ፡ ወጾረ፡ ሕማመነ።
18 ወሶበ፡ ርእየ፡ እግዚእ፡ ኢየሱስ፡ ብዙኃነ፡ ሰብአ፡ ዘተለውዎ። አዘዘ፡ ከመ፡ ይሑሩ፡ ማዕዶተ፡ ባሕር።
በእንተ፡ እለ፡ ተስእልዎ፡ ይትልውዎ
19 ወመጽአ፡ ኀቤሁ፡ አሐዱ፡ ጸሓፊ፡ ወይቤሎ። ሊቅ፡ እትሉከኑ፡ ኀበ፡ ሖርከ።
20 ወይቤሎ፡ እግዚእ፡ ኢየሱስ፡ ለቈናጽልኒ፡ ግበብ፡ ቦሙ። ወለአዕዋፈ፡ ሰማይኒ፡ ምጽላል፡ ቦሙ። ወለወልደ፡ ዕጓለ፡ እመሕያውሰ፡ አልቦቱ፡ ኀበ፡ ያሰምክ፡ ርእሶ።
21 ወይቤሎ፡ ካልእ፡ እምአርዳኢሁ። እግዚኦ፡ አብሐኒ፡ ቅድመ፡ እሑር፡ ወእቅብሮ፡ ለአቡየ።
22 ወይቤሎ፡ እግዚእ፡ ኢየሱስ፡ አንተሰ፡ ትልወኒ። ወኅድጎሙ፡ ለምዉታን፡ ይቅብሩ፡ ምዉታኒሆሙ።
በእንተ፡ ዘከመ፡ ገሠጸ፡ ባሕረ
23 ወዐሪጎ፡ ውስተ፡ ሐመር፡ ተለውዎ፡ አርዳኢሁ።
24 ወናሁ፡ ዐቢይ፡ ድልቅልቅ፡ ኮነ፡ በውስተ፡ ባሕር። እስከ፡ ሶበ፡ ይደፍኖ፡ ለሐመር፡ ማዕበለ፡ ባሕር፡ እሞገድ። ወውእቱሰ፡ ይነውም።
25 ወቀርቡ፡ አርዳኢሁ፡ ወአንቅህዎ፡ ወይቤልዎ። እግዚኦ፡ አድኅነነ፡ ከመ፡ ኢንሙት።
26 ወይቤሎሙ፡ ምንት፡ ያፈርሀክሙ፡ አንትሙ፡ ኦ፡ ሕጹጻነ፡ ሃይማኖተ። ወተንሢኦ፡ ገሠጾሙ፡ ለነፍሳትኒ፡ ወለማዕበለ፡ ባሕርኒ። ወኮነ፡ ዐቢይ፡ ዛኅን።
27 ወአንከሩ፡ ሰብእ፡ ወይቤሉ፡ መኑ፡ እንጋ፡ ውእቱ፡ ዝንቱ። ዘይትኤዘዙ፡ ሎቱ፡ ባሕርኒ፡ ወነፋሳትኒ።
በእንተ፡ እለ፡ አጋንንት
28 ወበጺሖ፡ ማዕዶተ፡ ብሔረ፡ ጌርጌሴኖን። ተቀበልዎ፡ ክልኤቱ፡ እለ፡ አጋንንት፡ ወፂኦሙ፡ እመቃብራት። ወእኩያን፡ ጥቀ፡ እሙንቱ። ወኢያበውሑ፡ መነሂ፡ ይኅልፍ፡ እንተ፡ ይእቲ፡ ፍኖት።
29 ወሶበ፡ ርእይዎ፡ ጸርሑ፡ እንዘ፡ ይብሉ። ምንት፡ ብነ፡ ምስሌከ፡ ኢየሱስ፡ ወልደ፡ እግዚአብሔር፡ ሕያው። መጻእከኑ፡ ዝየሂ፡ ትስድደነ፡ ወትሣቅየነ። ዘእንበለ፡ ይብጻሕ፡ ጊዜሁ።
30 ወቦ፡ ህየ፡ መራዕየ፡ አሕርው፡ ብዙኅ። ይትረዐዩ፡ ርሑቀ፡ እምኔሆሙ።
31 ወአስተብቊዕዎ፡ እሙንቱ፡ አጋንንት፡ ወይቤልዎ። እመሰ፡ ታወፅአነ፡ ፈንወነ፡ ከመ፡ ንባእ፡ ዲበ፡ መራዕየ፡ አሕርው። ወይቤሎሙ፡ ሑሩ።
32 ወወፂኦሙ፡ ሖሩ፡ ወቦኡ፡ ውስተ፡ አሕርው። ወአብዱ፡ ኵሉ፡ መራዕየ፡ አሕርው። ወሮጹ፡ ወጸድፉ፡ ውስተ፡ ባሕር። ወሞቱ፡ ውስተ፡ ማይ።
33 ወጐዩ፡ ኖሎት፡ ወአተዉ፡ ሀገረ። ወዜነዉ፡ ለሰብእ፡ ኵሎ፡ ዘኮነ፡ ወበእንተ፡ እለ፡ አጋንንትሂ።
34 ወናሁ፡ ወፅኡ፡ ኵሉ፡ እለ፡ ውስተ፡ ሀገር፡ ይትቀበልዎ፡ ለእግዚእ፡ ኢየሱስ። ወሶበ፡ ርእይዎ፡ አስተብቊዕዎ፡ ይኅልፍ፡ እምደወሎሙ።
=== chapter 9 ===
[ምዕራፍ 9]
በእንተ፡ መፃጕዕ
1 ወዐሪጎ፡ ውስተ፡ ሐመር፡ ዐደወ፡ ወበጽሐ፡ ሀገሮ።
2 ወአምጽኡ፡ ኀቤሁ፡ ድዉየ፡ ወመፃጕዐ፡ እንዘ፡ ይጸውርዎ፡ በዐራት። ወርእዮ፡ እግዚእ፡ ኢየሱስ፡ ሃይማኖቶሙ፡ ይቤሎ፡ ለውእቱ፡ መፃጕዕ። ተአመን፡ ወልድየ፡ ተኀድገ፡ ለከ፡ ኀጢአትከ።
3 ወሰሚዖሙ፡ ጸሐፍት፡ ወፈሪሳውያን፡ ይቤሉ፡ በበይናቲሆሙ፡ ዝንቱሰ፡ ይፀርፍ።
4 ወአእሚሮ፡ እግዚእ፡ ኢየሱስ፡ ኅሊናሆሙ፡ ወይቤሎሙ። ለምንት፡ ትኄልዩ፡ እኩየ፡ በአልባቢክሙ።
5 ምንት፡ ይቀልል፡ እምብሂለ፡ ተኀደገ፡ ለከ፡ ኀጢአትከ። ወእምብሂለ፡ ተንሥእ፡ ወንሣእ፡ ዐራተከ፡ ወሑር፡ ቤተከ።
6 ወከመ፡ ታእምሩ፡ ከመ፡ ብዉሕ፡ ሎቱ፡ ለወልደ፡ ዕጓለ፡ እመሕያው። ይኅድግ፡ ኀጢአተ፡ በዲበ፡ ምድር። ወእምዝ፡ ይቤሎ፡ ለውእቱ፡ መፃጕዕ። ተንሥእ፡ ወንሣእ፡ ወጹር፡ ዐራተከ፡ ወእቱ፡ ቤተከ።
7 ወተንሢኦ፡ ነሥአ፡ ዐራቶ፡ ወሖረ፡ ቤቶ።
8 ወርእዮሙ፡ ሕዝብ፡ አንከሩ፡ ወአእኰትዎ፡ ለእግዚአብሔር። ዘወሀበ፡ ዘከመ፡ ዝ፡ ሥልጣነ፡ ለሰብእ።
ዘከመ፡ ተጸውዐ፡ ማቴዎስ
9 ወኀሊፎ፡ እግዚእ፡ ኢየሱስ፡ እምህየ፡ ረከበ፡ ብእሴ። እንዘ፡ ይነብር፡ ውስተ፡ ምጽባሕ፡ ዘስሙ፡ ማቴዎስ። ወይቤሎ፡ ትልወኒ፡ ወተንሢኦ፡ ተለዎ።
10 ወእንዘ፡ ይረፍቅ፡ ውስተ፡ ቤተ፡ ስምዖን፡ ናሁ። መጽኡ፡ ብዙኃን፡ መጸብሓን፡ ወኃጥኣን። ወረፈቁ፡ ምስለ፡ እግዚእ፡ ኢየሱስ፡ ወአርዳኢሁ።
11 ወርእዮሙ፡ ፈሪሳውያን፡ ይቤልዎሙ፡ ለአርዳኢሁ። ለምንት፡ ምስለ፡ መጸብሓን፡ ወኃጥኣን፡ ይበልዕ፡ ሊቅክሙ።
12 ወሰሚዖ፡ እግዚእ፡ ኢየሱስ፡ ይቤሎሙ። ሕሙማን፡ ይፈቅድዎ፡ ለዐቃቤ፡ ሥራይ፡ ወአኮ፡ ጥዑያን።
13 ሑሩ፡ ወአእምሩ፡ ምንት፡ ውእቱ፡ ዘይቤ፡ ምጽዋተ፡ አበድር፡ እመሥዋዕተ። እስመ፡ ኢመጻእኩ፡ እጸውዕ፡ ጻድቃነ፡ አላ፡ ኃጥኣነ፡ ለንስሓ።
በእንተ፡ ዘከመ፡ ይደልዎሙ፡ ለክርስቲያን፡ ጸዊመ
14 ወእምዝ፡ መጽኡ፡ ኀቤሁ፡ አርዳኢሁ፡ ለዮሐንስ፡ ወይቤልዎ። ንሕነ፡ ወፈሪሳውያን፡ ንጸውም፡ ብዙኀ፡ ወአርዳኢከሰ፡ በእፎ፡ ኢይጸውሙ።
15 ወይቤሎሙ፡ እግዚእ፡ ኢየሱስ፡ ኢይክሉ፡ ደቂቁ፡ ለመርዓዊ፡ ጸዊመ፡ ወላህዎ። አምጣነ፡ ሀሎ፡ መርዓዊ፡ ምስሌሆሙ። ወባሕቱ፡ ይመጽእ፡ መዋዕለ፡ አመ፡ ይነሥእዎ፡ ለመርዓዊ፡ እምኔሆሙ። ውእተ፡ አሚረ፡ ይጸውሙ።
16 ወአልቦ፡ ዘይጠቅብ፡ ግምደ፡ ደርግሐ፡ ውስተ፡ ስጠተ፡ ልብስ፡ ብሉይ። እስመ፡ ይትማላእ፡ ሕያዎ፡ ለልብስ፡ ወያዐብዮ፡ ለስጠቱ። ወፈድፋደ፡ ይከውን፡ ስጠቱ፡ ዐቢየ።
17 ወኢይወድዩ፡ ወይነ፡ ሐዲሰ፡ ውስተ፡ ዝቅ፡ ብሉይ። ወእመ፡ አኮሰ፡ ዝቁ፡ ይነቅዕ፡ ወወይኑሂ፡ ይትከዐው፡ ወዝቁሂ፡ ይትሀጐል። ወባሕቱ፡ ለወይንሰ፡ ሐዲስ፡ ውስተ፡ ዝቅ፡ ሐዲስ፡ ይወድይዎ። ወይትዐቀቡ፡ ክልኤሆሙ፡ በበይናቲሆሙ፡ ኅቡረ።
በእንተ፡ ወለተ፡ መጋቤ፡ ምኵራብ
18 ወእንዘ፡ ዘንተ፡ ይነግሮሙ፡ ናሁ፡ መጽአ፡ አሐዱ፡ መኰንን። ወሰገደ፡ ሎቱ፡ እንዘ፡ ይብል፡ ወለትየ፡ ይእዜ፡ ሞተት። ወባሕቱ፡ ነዐ፡ አንብር፡ እዴከ፡ ላዕሌሃ፡ ወተሐዩ።
19 ወተንሥአ፡ እግዚእ፡ ኢየሱስ፡ ወሖረ። ወተለውዎ፡ ብዙኃን፡ ሰብእ፡ ወአርዳኢሁኒ፡ ምስሌሁ።
በእንተ፡ ወለተ፡ ኢያኢሮስ፡ ወበእንተ፡ ዘይውሕዛ፡ ደም
20 ወናሁ፡ ብእሲት፡ እንተ፡ ደም፡ ይውሕዛ፡ እምዐሠርቱ፡ ወክልኤቱ፡ ክረምት። መጽአት፡ ወቆመት፡ እንተ፡ ድኅሬሁ።
21 ወገሰሰት፡ ጽንፈ፡ ልብሱ፡ እንዘ፡ ትብል፡ በልባ። እምከመ፡ ገሰስኩ፡ ጽንፈ፡ ልብሱ፡ አሐዩ።
22 ወተመይጦቶ፡ እግዚእ፡ ኢየሱስ፡ ርእያ፡ ወይቤላ። ተአመኒ፡ ወለትየ፡ ሃይማኖትኪ፡ አሕየወተኪ። ወሐይወት፡ ይእቲ፡ ብእሲት፡ ሶቤሃ።
23 ወበጺሖ፡ እግዚእ፡ ኢየሱስ፡ ቤቶ፡ ለውእቱ፡ መኰንን። ርእየ፡ መብክያነ፡ ወሰብእ፡ እንዘ፡ ይትሀወኩ፡ ወያስቆቅዉ።
24 ወይቤሎሙ፡ ተገሐሡ፡ እስመ፡ አኮ፡ ዘሞተት፡ ሕፃን፡ አላ፡ ትነውም። ወሠሐቅዎ።
25 ወእምዘወፅኡ፡ ሰብእ፡ ቦአ። ወአኀዛ፡ እዴሃ፡ ወተንሥአት፡ ሕፃን።
26 ወወፅአ፡ ስሙዓተ፡ ነገሩ፡ ውስተ፡ ኵሉ፡ በሓውርት።
በእንተ፡ ክልኤቱ፡ ዕዉራን
27 ወኀሊፎ፡ እግዚእ፡ ኢየሱስ፡ እምህየ። ተለውዎ፡ ክልኤቱ፡ ዕዉራን፡ እንዘ፡ ይጸርሑ። ወይብሉ፡ ተሣሀለነ፡ ወልደ፡ ዳዊት።
28 ወበዊኦ፡ ቤተ፡ መጽኡ፡ ኀቤሁ፡ እሙንቱ፡ ዕዉራን። ወይቤሎሙ፡ እግዚእ፡ ኢየሱስ፡ ተአምኑሁ፡ ከመ፡ እክል፡ ዘንተ፡ ገቢረ። ወይብልዎ፡ እወ፡ እግዚኦ።
29 ወገሰሶሙ፡ አዕይንቲሆሙ፡ እንዘ፡ ይብል። በከመ፡ ሃይማኖትክሙ፡ ይኩንክሙ። ወሶቤሃ፡ ተከሥታ፡ አዕይንቲሆሙ።
30 ወገሠጾሙ፡ እግዚእ፡ ኢየሱስ፡ ወይቤሎሙ። ዑቁ፡ ኢትንግሩ፡ ወኢ፡ ለመኑሂ።
31 ወወፂኦሙ፡ ነገሩ፡ ውስተ፡ ኵሉ፡ በሓውርት።
በእንተ፡ ጽሙም፡ ዘጋኔን፡ ወበሃም
32 ወእምዝ፡ ወፅኡ፡ እሙንቱ። አምጽኡ፡ ኀቤሁ፡ ብእሴ፡ ዘጋኔን፡ ጽሙመ፡ ወበሃመ።
33 ወወፂኦ፡ ጋኔኑ፡ ነበበ፡ ውእቱ፡ በሃም፡ ወጽሙም፡ ሰምዐ። ወአንከሩ፡ ሰብእ፡ እንዘ፡ ይብሉ፡ ግሙራ፡ ኢያስተርአየ። ዘከመ፡ ዝ፡ በውስተ፡ እስራኤል።
34 ወፈሪሳውያንሰ፡ ይቤሉ፡ በመልአኮሙ፡ ለአጋንንት፡ ያወፅኦሙ፡ ለአጋንንት።
ዘከመ፡ አንሶሰወ፡ ውስተ፡ ገሊላ
35 ወአንሶሰወ፡ እግዚእ፡ ኢየሱስ፡ ውስተ፡ ኵሉ፡ አህጉር፡ ወበሓውርት። እንዘ፡ ይሜህር፡ በምኵራባቲሆሙ፡ ወይሰብክ፡ ወንጌለ፡ መንግሥት። ወይፌውስ፡ ኵሎ፡ ድዉያነ፡ ወኵሎ፡ ሕሙማነ፡ ዘውስተ፡ ሕዝብ።
36 ወርእዮ፡ ብዙኃነ፡ ሰብአ፡ አምሐርዎ፡ ወተሣሀሎሙ። እስመ፡ ስሩሓን፡ እሙንቱ። ወግዱፋን፡ ከመ፡ አባግዕ፡ ዘአልቦ፡ ኖላዊ።
37 ወይቤሎሙ፡ ለአርዳኢሁ፡ ማእረሩሰ፡ ብዙኅ፡ ወገባሩ፡ ኅዳጥ።
38 ሰአልዎ፡ እንከ፡ ለበዓለ፡ ማእረር፡ ከመ፡ ይወስክ፡ ገባረ፡ ለማእረሩ።
=== chapter 10 ===
[ምዕራፍ 10]
በእንተ፡ ዘአዘዞሙ፡ ለሐዋርያት
1 ወጸውዖሙ፡ ለዐሠርቱ፡ ወክልኤቱ፡ አርዳኢሁ። ወወሀቦሙ፡ ሥልጣነ፡ ዲበ፡ መናፍስት፡ ርኩሳን። ከመ፡ ያውፅእዎሙ፡ ወይፈውሱ፡ ኵሎ፡ ድዉያነ፡ ወሕሙማነ።
2 ወለዐሠርቱ፡ ወክልኤቱ፡ ሐዋርያት፡ ከመ፡ ዝ፡ አስማቲሆሙ። ቀዳሚ፡ ስምዖን፡ ዘተሰምየ፡ ጴጥሮስ፡ ወእንድርያስ፡ እኁሁ።
3 ወያዕቆብ፡ ወልደ፡ ዘብዴዎስ፡ ወዮሐንስ፡ እኁሁ። ፊልጶስ፡ ወበርተሎሜዎስ፡ ቶማስ፡ ወማቴዎስ፡ መጸብሓዊ። ወያዕቆብ፡ ወልደ፡ እልፍዮስ፡ ወልብድዮስ፡ ዘተሰምየ፡ ታዴዎስ።
4 ወስምዖን፡ ቀነናዊ፡ ወይሁዳ፡ አስቆሮታዊ፡ ዘአግብኦ።
5 እሎንተ፡ ዐሠርተ፡ ወክልኤተ፡ ፈነዎሙ፡ እግዚእ፡ ኢየሱስ። ወአዘዞሙ፡ እንዘ፡ ይብል፡ ፍኖተ፡ አሕዛብ፡ ኢትሑሩ። ወሀገረ፡ ሳምር፡ ኢትባኡ።
6 ወሑሩ፡ ባሕቱ፡ ኀበ፡ አባግዕ፡ ዘተሀጕላ፡ ዘቤተ፡ እስራኤል።
7 ወሐዊረክሙ፡ ስብኩ፡ እንዘ፡ ትብሉ፡ ቀርበት፡ መንግሥተ፡ ሰማያት።
8 ድዉያነ፡ ፈውሱ፡ ምዉታነ፡ አንሥኡ። እለ፡ ለምጽ፡ አንጽሑ፡ አጋንንተ፡ አውፅኡ። በከንቱ፡ ዘነሣእክሙ፡ በከንቱ፡ ሀቡ። በጸጋ፡ ዘነሣእክሙ፡ በጸጋ፡ ሀቡ።
9 ኢታጥርዩ፡ ለክሙ፡ ወርቀ፡ ወብሩረ። ወኢ፡ ጸሪቀ፡ ውስተ፡ ቅናውቲክሙ።
10 ወኢ፡ ጽፍነተ፡ ለፍኖት፡ ወኢ፡ ክልኤ፡ ክዳናተ። ወኢ፡ አሣእነ፡ ወኢ፡ በትረ፡ እስመ፡ ይደልዎ፡ ዐስቡ፡ ለዘይትቀነይ።
11 ወውስተ፡ ሀገር፡ እንተ፡ ቦእክሙ። ወእመኒ፡ አብያት፡ ተሰአሉ፡ ወበሉ። ለመኑ፡ ይደልዎ፡ ሰላም፡ በውስቴታ። ወህየ፡ ኅድሩ፡ እስከ፡ አመ፡ ትወፅኡ።
12 ወበዊአክሙ፡ ውስተ፡ ቤት፡ ተአምኅዎሙ። ወለእመ፡ ይደልዎ፡ ለውእቱ፡ ቤት። ይኅድር፡ ሰላምክሙ፡ ላዕሌሁ።
13 ወእመሰ፡ ኢይደልዎ፡ ይግባእ፡ ሰላምክሙ፡ ላዕሌክሙ።
14 ወለዘሰ፡ ኢተወክፈክሙ፡ ወኢሰምዐክሙ፡ ነገረክሙ። ወፂአክሙ፡ አፍኣ፡ እምውእቱ፡ ቤት፡ ወእምይእቲ፡ ሀገር። ንግፉ፡ ጸበለ፡ እገሪክሙ።
15 አማን፡ እብለክሙ፡ ከመ፡ ይረክባ፡ ሣሕተ፡ ምድረ፡ ሰዶም፡ ወገሞራ። አመ፡ ዕለተ፡ ደይን፡ ፈድፋደ፡ እምይእቲ፡ ሀገር።
16 ወናሁ፡ አነ፡ እፌንወክሙ፡ ከመ፡ አባግዕ፡ ማእከለ፡ ተኵላት። ኩኑ፡ እንከ፡ ጠቢባነ፡ ከመ፡ አርዌ፡ ምድር፡ ወየዋሃነ፡ ከመ፡ ርግብ።
17 ወተዐቀቡ፡ እምሰብእ፡ እኩያን፡ እስመ፡ ያገብኡክሙ፡ ውስተ፡ አዕዋዳት። ወይቀሥፉክሙ፡ በመኳርብቲሆሙ።
18 ወያገብኡክሙ፡ ኀበ፡ መሳፍንት፡ ወነገሥት፡ በእንቲኣየ። ከመ፡ ይኩን፡ ስምዐ፡ ላዕሌሆሙ፡ ወላዕለ፡ አሕዛብ።
19 ወሶበ፡ ያገብኡክሙ፡ ኢተኀልዩ፡ ዘትነብቡ፡ ወዘትትናገሩ። እስመ፡ ይትወሀበክሙ፡ በይእቲ፡ ሰዓት፡ ዘትትናገሩ።
20 እስመ፡ ኢኮንክሙ፡ አንትሙ፡ ዘትነብቡ። አላ፡ መንፈሱ፡ ለአቡክሙ፡ ሰማያዊ። ውእቱ፡ ይትናገር፡ በላዕሌክሙ።
21 ወያገብእ፡ እኅው፡ እኅዋሁ፡ ለሞት፡ ወአብኒ፡ ውሉዶ። ወይትነሥኡ፡ ውሉድ፡ ላዕለ፡ አዝማዲሆሙ፡ ወይቀትልዎሙ።
22 ወትከውኑ፡ ጽሉኣነ፡ በኀበ፡ ኵሉ፡ ሰብእ፡ በእንተ፡ ስምየ። ወዘሰ፡ አዝለፈ፡ ትዕግሥቶ፡ ውእቱ፡ ይድኅን።
23 ወሶበ፡ ይሰድዱክሙ፡ እምዛቲ፡ ሀገር፡ ጕዩ፡ ውስተ፡ ካልእታ። አማን፡ እብለክሙ፡ ኢይትፌጸማ፡ አህጉረ፡ እስራኤል። እስከ፡ ሶበ፡ ይመጽእ፡ ወልደ፡ ዕጓለ፡ እመሕያው።
24 አልቦ፡ ረድእ፡ ዘየዐቢ፡ እምሊቁ። ወኢ፡ ገብር፡ ዘየዐቢ፡ እምእግዚኡ።
25 መጠኑ፡ ለረድእ፡ እምከመ፡ ኮነ፡ ከመ፡ ሊቁ፡ ወለገብርኒ፡ ከመ፡ እግዚኡ። ወለእመ፡ ይቤልዎ፡ ለበዓለ፡ ቤት፡ በብዔል፡ ዜቡል፡ ያወፅኦሙ፡ ለአጋንንት። እፎ፡ ፈድፋደ፡ ለሰብአ፡ ቤቱ።
26 ኢትፍርህዎሙኬ፡ እንከ፡ እስመ፡ አልቦ፡ ክዱን፡ ዘኢይትከሠት። ወአልቦ፡ ኅቡእ፡ ዘኢይትዐወቅ።
27 ዘነገርኩክሙ፡ በጽልመት፡ ንግርዎ፡ በብርሃን። ወዘኒ፡ አልኆሰስኩ፡ ውስተ፡ እዝንክሙ፡ ስብክዎ፡ በዲበ፡ አንሕስት።
28 ወኢትፍርህዎሙ፡ ለእለ፡ ይቀትሉ፡ ሥጋክሙ። ወለነፍስክሙሰ፡ ኢይክሉ፡ ቀቲሎታ። ወባሕቱ፡ ፍርህዎ፡ ለዘቦ፡ ሥልጣን። ወይክል፡ እምድኅረ፡ ቀተለ፡ ነፍሰ፡ ወሥጋ፡ ኅቡረ፡ አህጕሎ፡ በውስተ፡ ገሃነም።
29 አኮኑ፡ ክልኤቲ፡ አዕዋፍ፡ ይሠየጣ፡ በክልኤ፡ ጸሪቀ፡ አሶርዮን። ወአሐቲ፡ እምኔሆን፡ ኢትወድቅ፡ ውስተ፡ ምድር። ዘእንበለ፡ ያእምር፡ አቡክሙ፡ ሰማያዊ።
30 ወለክሙሰ፡ ሥዕርተ፡ ርእስክሙኒ፡ ኵሉ፡ ኍሉቅ፡ ውእቱ።
31 ኢትፍርሁኬ፡ እስመ፡ እምብዙኅ፡ አዕዋፍ፡ ትኄይሱ፡ አንትሙ።
32 ኵሉ፡ ዘየአምን፡ ብየ፡ በቅድመ፡ ሰብእ። አነኒ፡ አአምኖ፡ በቅድመ፡ አቡየ፡ ዘበሰማያት።
33 ወለዘሰ፡ ክሕደኒ፡ በቅድመ፡ ሰብእ። አነኒ፡ እክሕዶ፡ በቅድመ፡ አቡየ፡ ዘበሰማያት።
34 ኢይምሰልክሙ፡ ዘአምጻእኩ፡ ሰላመ፡ ለምድር፡ አላ፡ መጥባሕተ።
35 ወመጻእኩሰ፡ እፍልጥ፡ ብእሴ፡ እምአቡሁ። ወወለተኒ፡ እምእማ፡ ወመርዓተኒ፡ እምሐማታ። ወሰብአ፡ ቤቱ፡ ይፃረሮ፡ ለሰብእ።
36 ዘያፈቅር፡ አባሁ፡ ወእሞ፡ እምኔየ። ኢይደሉ፡ ሊተ፡ ወኢይክል፡ ይፀመደኒ።
37 ወዘያፈቅር፡ ወልዶ፡ ወወለቶ፡ እምኔየ። ኢይደሉ፡ ሊተ፡ ወኢይክል፡ ይፀመደኒ።
38 ወኢያጥብዐ፡ ወዘኢነሥአ፡ መስቀለ፡ ሞቱ፡ ወዘኢተለወ፡ ድኅሬየ። ኢይደሉ፡ ሊተ፡ ወኢይክል፡ ይፀመደኒ።
39 ዘረከባ፡ ለነፍሱ፡ ለይግድፋ። ወዘሰ፡ ገደፋ፡ ለነፍሱ፡ በእንቲኣየ፡ ይረክባ።
40 ዘኪያክሙ፡ ተወክፈ፡ ኪያየ፡ ተወክፈ። ወዘኪያየ፡ ተወክፈ፡ ተወክፎ፡ ለዘፈነወኒ።
41 ዘተወክፈ፡ ነቢየ፡ በስመ፡ ነቢይ፡ ዐስበ፡ ነቢይ፡ ይነሥእ። ወዘተወክፈ፡ ጻድቀ፡ በስመ፡ ጻድቅ፡ ዐስበ፡ ጻድቅ፡ ይነሥእ።
42 ወዘአስተየ፡ ለአሐዱ፡ እምእሉ፡ ንኡሳን፡ ጽዋዐ፡ ማይ፡ ቈሪር። ባሕቲቶ፡ በስመ፡ ረድእየ። አማን፡ እብለክሙ፡ ኢየሀጕል፡ ዐስቦ።
=== chapter 11 ===
[ምዕራፍ 11]
በእንተ፡ እለ፡ ተፈነዉ፡ እምኀበ፡ ዮሐንስ
1 ወሶበ፡ ፈጸመ፡ እግዚእ፡ ኢየሱስ፡ አዝዞቶሙ፡ ለዐሠርቱ፡ ወክልኤቱ፡ አርዳኢሁ። ኀለፈ፡ እምህየ፡ ከመ፡ ይምሀር፡ ወይስብክ፡ ውስተ፡ አህጉሪሆሙ።
2 ወሰሚዖ፡ ዮሐንስ፡ ምግባሮ፡ ለእግዚእ፡ ኢየሱስ፡ እንዘ፡ ሀሎ፡ በቤተ፡ ሞቅሕ። ፈነወ፡ ኀቤሁ፡ ክልኤተ፡ እምአርዳኢሁ።
3 ወይቤሎ፡ አንተኑ፡ ዘትመጽእ፡ ወቦኑ፡ ካልእ፡ ዘንሴፎ።
4 ወአውሥአ፡ እግዚእ፡ ኢየሱስ፡ ወይቤሎሙ። ሐዊረክሙ፡ ዜንውዎ፡ ለዮሐንስ፡ ዘርኢክሙ፡ ወዘሰማዕክሙ።
5 ዕዉራን፡ ይሬእዩ፡ ሐንካሳን፡ የሐውሩ። እለ፡ ለምጽ፡ ይነጽሑ፡ ወጽሙማን፡ ይሰምዑ። ምዉታን፡ ይትነሥኡ፡ ወነዳያን፡ ይዜነዉ።
6 ወብፁዕ፡ ውእቱ፡ ዘኢተዐቅፈ፡ ብየ።
ዘከመ፡ ወደሶ፡ እግዚእ፡ ኢየሱስ፡ ለዮሐንስ፡ መጥምቅ
7 ወእምድኅረ፡ ኀለፉ፡ ላእካነ፡ ዮሐንስ። አኀዘ፡ እግዚእ፡ ኢየሱስ፡ ይቤሎሙ፡ ለአሕዛብ፡ በእንተ፡ ዮሐንስ፡ መጥምቅ። ምንትኑመ፡ ወፃእክሙ፡ ገዳመ፡ ትርአዩ፡ ብርዐኑ፡ ዘይትሐወስ፡ እምነፋስ።
8 ወምንትኑመ፡ ወፃእክሙ፡ ትርአዩ፡ ብእሴኑ፡ ዘርሡይ፡ በቀጠንት፡ አልባስ። እለሰ፡ ቀጠንተ፡ ይለብሱ፡ ናሁ፡ ውስተ፡ አብያተ፡ ነገሥት፡ ሀለዉ።
9 ወምንትኑመ፡ ወፃእክሙ፡ ትርአዩ፡ ነቢየኑ፡ እወ፡ እብለክሙ። ወዝንቱ፡ ፈድፋደ፡ የዐቢ፡ እምነቢያት።
10 እስመ፡ ዝንቱ፡ ውእቱ፡ ዘበእንቲኣሁ፡ ተጽሕፈ። ናሁ፡ አነ፡ እፌኑ፡ መልአክየ፡ ቅድመ፡ ገጽከ። ዘይጸይሕ፡ ፍኖተከ፡ በቅድሜከ።
11 አማን፡ እብለክሙ፡ ኢተንሥአ፡ እምትውልደ፡ አንስት፡ ዘየዐቢ፡ እምዮሐንስ፡ መጥምቅ። ወበመንግሥተ፡ ሰማያትሰ፡ ዘይንእሶ፡ የዐብዮ።
12 ወእመዋዕለ፡ ዮሐንስ፡ መጥምቅ፡ እስከ፡ ይእዜ። ትትገፋዕ፡ መንግሥተ፡ ሰማያት፡ ወግፉዓን፡ ይትማሠጥዋ።
13 እስመ፡ ኵሎሙ፡ ኦሪት፡ ወነቢያት፡ እስከ፡ ዮሐንስ፡ ተነበዩ።
14 ወእመሰ፡ ትፈቅዱ፡ ትትወከፍዎ። ዝ፡ ውእቱ፡ ኤልያስ፡ ዘሀለዎ፡ ይምጻእ።
15 ዘቦ፡ እዝን፡ ሰሚዐ፡ ለይስማዕ።
16 በመኑ፡ አስተማስሎሙ፡ ለሰብአ፡ ዛቲ፡ ትውልድ። ይመስሉ፡ ደቂቀ፡ እለ፡ ይነብሩ፡ ውስተ፡ ምሥያጥ፡ ወይጼውዑ፡ ቢጾሙ።
17 ወይብልዎሙ፡ ሐለይነ፡ ለክሙ፡ ወኢዘፈንክሙ። አስቆቀውነሂ፡ ለክሙ፡ ወኢበከይክሙ።
18 እስመ፡ መጽአ፡ ዮሐንስ፡ እንዘ፡ ኢይበልዕ፡ ወኢይሰቲ። ወይቤልዎ፡ ጋኔን፡ ቦቱ።
19 ወመጽአ፡ ወልደ፡ ዕጓለ፡ እመሕያው፡ እንዘ፡ ይበልዕ፡ ወይሰቲ። ወይቤልዎ፡ ነዋ፡ ብእሲ፡ በላዒ፡ ወሰታዬ፡ ወይን። ዐርከ፡ መጸብሓን፡ ወኃጥኣን። ወጸድቀት፡ ጥበብ፡ እምደቂቃ፡ ወእምግባራ።
ዘከመ፡ ኄሶን፡ ለአህጉር፡ ኢ፡ ነሳሕያት
20 ወእምዝ፡ አኀዘ፡ እግዚእ፡ ኢየሱስ፡ ይኂሶን፡ ለአህጉር። እለ፡ በውስቴቶን፡ ገብረ፡ ኀይለ፡ ብዙኀ፡ እስመ፡ ኢነስሓ።
21 ወይቤሎን፡ አሌ፡ ለኪ፡ ኰራዚ፡ አሌ፡ ለኪ፡ ቤተሳይዳ። እስመ፡ ሶበሁ፡ በጢሮስ፡ ወበሲዶና፡ ተገብረ፡ ኀይል። ዘተገብረ፡ በውስቴትክን፡ በሠቅ፡ ወበሐመድ፡ እምነስሓ።
22 ወባሕቱ፡ እብለክን፡ ጢሮስ፡ ወሲዶና፡ ይረክባ፡ ሣሕተ። አመ፡ ዕለተ፡ ደይን፡ ፈድፋደ፡ እምኔክን።
23 ወአንቲኒ፡ ቅፍርናሆም፡ ለእመ፡ እስከ፡ ሰማይ፡ ትትሌዐሊ። ሀለወኪ፡ እስከ፡ ሲኦል፡ ትረዲ፡ እስመ፡ ሶበሁ፡ በሰዶም፡ ዘተገብረ፡ ኀይል። ተገብረ፡ በውስቴትኪ፡ እምሀለወት፡ እስከ፡ ዮም።
24 ወባሕቱ፡ እብለኪ፡ ከመ፡ ምድረ፡ ሰዶም፡ ትረክብ፡ ሣሕተ፡ በዕለተ፡ ደይን፡ እምኔኪ።
25 በይእተ፡ ጊዜ፡ አውሥአ፡ እግዚእ፡ ኢየሱስ፡ ወይቤ። ኣአምነከ፡ አባ፡ እግዚአ፡ ሰማያት፡ ወምድር። እስመ፡ ኀባእኮ፡ ለዝንቱ፡ እምጠቢባን፡ ወእማእምራን፡ ወከሠትኮ፡ ለሕፃናት።
26 እወ፡ አባ፡ እስመ፡ ከማሁ፡ ኮነ፡ ሥምረትከ፡ በቅድሜከ።
27 ኵሉ፡ ተውህበኒ፡ እምኀበ፡ አቡየ። ወአልቦ፡ ዘየአምሮ፡ ለወልድ፡ ዘእንበለ፡ አብ። ወለአብኒ፡ አልቦ፡ ዘየአምሮ፡ ዘእንበለ፡ ወልድ። ወለዘፈቀደ፡ ወልድ፡ ይከሥት፡ ሎቱ።
28 ንዑ፡ ኀቤየ፡ ኵልክሙ፡ ስሩሓን፡ ወጽዑራን፡ ወክቡዳነ፡ ጾር። ወአነ፡ ኣዐርፈክሙ።
29 ንሥኡ፡ አርዑትየ፡ ላዕሌክሙ፡ ወተመሀሩ፡ እምኔየ። ወአእምሩ፡ ከመ፡ የዋህ፡ አነ፡ ወትሑት፡ ልብየ። ወትረክቡ፡ ዕረፍተ፡ ለነፍስክሙ።
30 እስመ፡ አርዑትየኒ፡ ሠናይ፡ ወጾርየኒ፡ ቀሊል፡ ውእቱ።
=== chapter 12 ===
[ምዕራፍ 12]
በእንተ፡ ሰዊት
1 ወበውእቱ፡ መዋዕል፡ ኀለፈ፡ እግዚእ፡ ኢየሱስ፡ በሰንበት፡ እንተ፡ መንገለ፡ ገራውህ። ወአርዳኢሁሰ፡ ርኅቡ፡ ወአኀዙ፡ ይምሐዉ፡ ሰዊተ፡ ወይብልዑ።
2 ወርእዮሙ፡ ፈሪሳውያን፡ ይቤልዎ። ናሁ፡ ርኢ፡ አርዳኢከ፡ ዘይገብሩ፡ ዘኢይከውን፡ ገቢረ፡ በሰንበት።
3 ወይቤሎሙ፡ ኢያንበብክሙኑ፡ ዘገብረ፡ ዳዊት፡ አመ፡ ርኅበ። ውእቱኒ፡ ወእለ፡ ምስሌሁ።
4 ዘከመ፡ ቦአ፡ ቤቶ፡ ለእግዚአብሔር፡ ወበልዐ፡ ኀባውዘ፡ ቊርባን። ዘኢይከውኖ፡ ለበሊዕ፡ ወኢ፡ ለእለ፡ ምስሌሁ። ዘእንበለ፡ ለካህናት፡ ለባሕቲቶሙ።
5 ወኢያንበብክሙኑ፡ ዘሀሎ፡ ውስተ፡ ኦሪት። ከመ፡ ካህናት፡ እለ፡ ውስተ፡ ቤተ፡ መቅደስ፡ ያረኵስዋ፡ ለሰንበት። ወኢይከውኖሙ፡ ጌጋየ።
6 ወናሁ፡ እብለክሙ፡ ከመ፡ ዘየዐቢ፡ እምቤተ፡ መቅደስ፡ ሀሎ፡ ዝየ።
7 ሶበሰ፡ ተአምሩ፡ ምንት፡ ውእቱ፡ ዘይቤ፡ ምጽዋተ፡ አበድር፡ እመሥዋዕት። እምኢኰነንክምዎሙ፡ ለእለ፡ ኢይኤብሱ።
8 እስመ፡ እግዚኣ፡ ውእቱ፡ ለሰንበት፡ ወልደ፡ ዕጓለ፡ እመሕያው።
በእንተ፡ ዘየብሰት፡ እዴሁ
9 ወፈለሰ፡ እግዚእ፡ ኢየሱስ፡ እምህየ፡ ወቦአ፡ ውስተ፡ ምኵራቦሙ።
10 ወናሁ፡ ሀሎ፡ ብእሲ፡ ዘየብሰት፡ እዴሁ። ወተስእልዎ፡ እንዘ፡ ይብሉ፡ ይከውንኑ፡ በሰንበት፡ ፈውሶ፡ ከመ፡ ያስተዋድይዎ።
11 ወይቤሎሙ፡ መኑ፡ እምውስቴትክሙ፡ ብእሲ፡ ዘቦቱ፡ አሐዱ፡ በግዕ። ወእመ፡ ወድቆ፡ በሰንበት፡ ውስተ፡ ግብ፡ አኮኑ፡ ይእኅዞ፡ ወያነሥኦ።
12 እፎ፡ እንከ፡ ፈድፋደ፡ ይኄይስ፡ ሰብእ፡ እምበግዕ። ይከውንኬ፡ በሰንበት፡ ገቢረ፡ ሠናይ።
13 ወእምዝ፡ ይቤሎ፡ ለውእቱ፡ ብእሲ፡ ስፋሕ፡ እዴከ። ወሰፍሐ፡ እዴሁ፡ ወሐይወት፡ ሶቤሃ። ወኮነት፡ ከመ፡ ካልእታ።
14 ወወፂኦሙ፡ ፈሪሳውያን፡ ተማከሩ፡ በእንቲኣሁ፡ ከመ፡ ይቅትልዎ።
በእንተ፡ አሕይዎቱ፡ ብዙኃነ፡ ሰብአ
15 ወአእሚሮ፡ እግዚእ፡ ኢየሱስ፡ ተግሕሠ፡ እምህየ።
16 ወተለውዎ፡ ብዙኃን፡ ሰብእ፡ ወአሕየዎሙ፡ ለኵሎሙ። ወገሠጾሙ፡ ከመ፡ ኢያግህድዎ።
17 ከመ፡ ይትፈጸም፡ ዘተብህለ፡ በኢሳይያስ፡ ነቢይ፡ እንዘ፡ ይብል።
18 ናሁ፡ ቊልዔየ፡ ዘኀረይኩ፡ ፍቁርየ፡ ዘሠምረቶ፡ ነፍስየ። ወኣነብር፡ መንፈስየ፡ ላዕሌሁ። ውእቱ፡ ይሜህሮሙ፡ ፍትሕየ፡ ለአሕዛብ። ወኵነኔየ፡ ለሕዝብ፡ ይነግር።
19 ኢይደምፅ፡ ወኢይጸርሕ፡ ወአልቦ፡ ዘይሰምዕ፡ ቃሎ። እንዘ፡ ይሜህር፡ በምኵራብ።
20 ብርዐ፡ ቅጥቁጠ፡ ኢይሰብር፡ ወሱዐኒ፡ ዘይጠይስ፡ ኢያጠፍእ። እስከ፡ ያገብእ፡ ፍትሐ፡ መዊኦቱ።
21 ወበስመ፡ ዚኣሁ፡ አሕዛብ፡ ይትአመኑ።
በእንተ፡ ዘጋኔን፡ ዕዉር፡ ወጽሙም፡ ወበሃም
22 ወእምዝ፡ አምጽኡ፡ ሎቱ፡ ዘጋኔን፡ ዕዉረ፡ ወጽሙመ፡ ወበሃም። ወፈወሶ፡ እስከ፡ ውእቱ፡ ዕዉር፡ ወጽሙም፡ ወበሃም፡ ነበበሂ፡ ወርእየሂ፡ ወሰምዐሂ።
23 ወቀደሙ፡ ኵሎሙ፡ አሕዛብ፡ ወይቤሉ። አኮኑ፡ ዝንቱ፡ ወልደ፡ ዳዊት።
24 ወፈሪሳውያንሰ፡ ሰሚዖሙ፡ ይቤሉ፡ ዝንቱሰ፡ ኢያወፅእ፡ አጋንንተ። ዘእንበለ፡ በብዔል፡ ዜቡል፡ መልአኮሙ፡ ለአጋንንት።
25 ወአእሚሮ፡ እግዚእ፡ ኢየሱስ፡ ኅሊናሆሙ፡ ይቤሎሙ። ኵላ፡ መንግሥት፡ እንተ፡ ትትናፈቅ፡ በበይናቲሃ፡ ትማስን። ወኵላ፡ ሀገር፡ ወእመሂ፡ ቤት፡ እንተ፡ ትትናፈቅ፡ በበይናቲሃ፡ ኢትቀውም።
26 ወእመሰ፡ ሰይጣን፡ ለሰይጣን፡ ያወፅኦ፡ ተናፈቀኬ፡ በበይናቲሁ። እፎ፡ እንከ፡ ትቀውም፡ መንግሥቱ።
27 ወእመሰ፡ አነ፡ በብዔል፡ ዜቡል፡ አወፅኦሙ፡ ለአጋንንት። ውሉድክሙ፡ በምንት፡ ያወፅእዎሙ። ወበእንተ፡ ዝ፡ እሙንቱ፡ ፈታሕተ፡ ይከውኑክሙ።
28 ወእመሰ፡ አነ፡ በመንፈሰ፡ እግዚአብሔር፡ አወፅኦሙ፡ ለአጋንንት። ዮጊኬ፡ በጽሐት፡ ላዕሌክሙ፡ መንግሥተ፡ እግዚአብሔር።
29 ወአልቦ፡ ዘይክል፡ መኑሂ፡ በዊአ፡ ቤተ፡ ኀያል፡ ወበርብሮተ፡ ንዋዩ። ለእመ፡ ኢቀደመ፡ አሲሮቶ፡ ለኀያል፡ ወእምዝ፡ ይበረብር፡ ቤቶ።
30 ዘኢኮነ፡ ምስሌየ፡ ዕድውየ፡ ውእቱ። ወዘኢይትጋባእ፡ ምስሌየ፡ ይዘርወኒ፡ ዝርወተ።
31 በእንተ፡ ዝ፡ እብለክሙ፡ ኵሉ፡ ኀጢአት፡ ወፅርፈት፡ ይትኀደግ፡ ለሰብእ። ወዘሰ፡ ፀረፈ፡ ላዕለ፡ መንፈስ፡ ቅዱስ፡ ኢይትኀደግ፡ ሎቱ።
32 ወዘሰ፡ ነበበ፡ ቃለ፡ ላዕለ፡ ወልደ፡ ዕጓለ፡ እመሕያው፡ ይትኀደግ፡ ሎቱ። ወዘሰ፡ ነበበ፡ ላዕለ፡ መንፈስ፡ ቅዱስ፡ ኢይትኀደግ፡ ሎቱ። ኢ፡ በዝ፡ ዓለም፡ ወኢ፡ በዘይመጽእ።
33 እመ፡ አኮ፡ ግበሩ፡ ዕፀ፡ ሠናየ። ወፍሬሁኒ፡ ሠናየ፡ ወእመ፡ አኮ፡ ግበሩ፡ ዕፀ፡ እኩየ፡ ወፍሬሁኒ፡ እኩየ። እስመ፡ እምፍሬሁ፡ ይትዐወቅ፡ ዕፅ።
34 ኦ፡ ትውልደ፡ አራዊተ፡ ምድር፡ በእፎ፡ ትክሉ፡ ሠናየ፡ ተናግሮ። እንዘ፡ እኩያን፡ አንትሙ። እስመ፡ እምተረፈ፡ ልብ፡ ይነብብ፡ አፍ።
35 ኄር፡ ብእሲ፡ እምሠናይ፡ መዝገበ፡ ልቡ፡ ያወፅኣ፡ ለሠናይት። ወእኩይሰ፡ ብእሲ፡ እምእኩይ፡ መዝገበ፡ ልቡ፡ ያወፅኣ፡ ለእኪት።
36 አንሰ፡ እብለክሙ፡ ኵሉ፡ ሰብእ፡ ዘይነብብ፡ ንባብ፡ ፅሩዐ። ያገብኡ፡ ሎቱ፡ ቃለ፡ በዕለተ፡ ደይን።
37 እስመ፡ እምቃልከ፡ ትጸድቅ፡ ወእምቃልከ፡ ትትኴነን።
በእንተ፡ እለ፡ ተስእሉ፡ ትእምርተ
38 ወአሜሃ፡ መጽኡ፡ ሰብእ፡ እምጸሐፍት፡ ወእምፈሪሳውያን፡ ወይቤልዎ። ሊቅ፡ ንፈቅድ፡ እምኀቤከ፡ ትእምርተ፡ ንርአይ።
39 ወአውሥአ፡ እግዚእ፡ ኢየሱስ፡ ወይቤሎሙ። ትውልድ፡ ዕሉት፡ ወዐማፂት፡ ወዘማዊት፡ ትእምርተ፡ ተኀሥሥ። ወትእምርትሰ፡ ኢይትወሀባ፡ ዘእንበለ፡ ትእምርተ፡ ዮናስ፡ ነቢይ።
40 እስመ፡ በከመ፡ ነበረ፡ ዮናስ፡ ውስተ፡ ከርሠ፡ አንበሪ፡ ሠሉሰ፡ መዋዕለ፡ ወሠሉሰ፡ ለያልየ።
41 ከማሁ፡ ይነብር፡ ወልደ፡ ዕጓለ፡ እመሕያው። ውስተ፡ ልበ፡ ምድር፡ ሠሉሰ፡ መዋዕለ፡ ወሠሉሰ፡ ለያልየ።
42 ሰብአ፡ ነነዌ፡ ይትነሥኡ፡ አመ፡ ዕለተ፡ ደይን። ወይትፋትሕዋ፡ ለዛቲ፡ ትውልድ። ወያስተኃፍርዋ፡ እስመ፡ ነስሑ፡ በስብከተ፡ ዮናስ። ወናሁ፡ ዘየዐቢ፡ እምዮናስ፡ ሀሎ፡ ዝየ።
43 ንግሥተ፡ አዜብ፡ ትትነሣእ፡ አመ፡ ዕለተ፡ ደይን፡ ምስለ፡ ዛ፡ ትውልድ። ወትትፋትሓ፡ ወታስተኃፍራ። እስመ፡ መጽአት፡ እምአጽናፈ፡ ምድር፡ ትስማዕ፡ ጥበቢሁ፡ ለሰሎሞን። ወናሁ፡ ዘየዐቢ፡ እምሰሎሞን፡ ሀሎ፡ ዝየ።
በእንተ፡ ተመይጦተ፡ መንፈስ፡ ርኩስ፡ እምድኅረ፡ ወፅአ
44 ወእምከመ፡ ወፅአ፡ መንፈስ፡ ርኩስ፡ እምሰብእ። የዐውድ፡ በድው፡ ኀበ፡ አልቦ፡ ማይ። እንዘ፡ የኀሥሥ፡ ዕረፍተ፡ ወየኀጥእ።
45 ወእምዝ፡ ይብል፡ እገብእ፡ እንከሰ፡ ውስተ፡ ቤትየ፡ እምኀበ፡ ወፃእኩ። ወመጺኦ፡ ይረክቦ፡ እንዘ፡ ያስተራክብ፡ እዳወ፡ ወምሩገ፡ ዕሩቀ፡ ወኵስቱረ።
46 ወእምዝ፡ የሐውር፡ ወያመጽእ፡ ምስሌሁ፡ ካልኣነ፡ ሰብዐተ፡ አጋንንተ፡ እለ፡ የአክዩ፡ እምኔሁ። ወበዊኦሙ፡ የኀድሩ፡ ህየ፡ ወይከውን፡ ደኃሪቱ፡ ለውእቱ፡ ብእሲ፡ ዘየአኪ፡ እምቀዳሚቱ። ከማሁ፡ ይከውና፡ ለዛቲ፡ ትውልድ፡ እኪት።
47 ወእንዘ፡ ይነግሮሙ፡ ለሕዝብ፡ ናሁ፡ እሙ፡ ወአኀዊሁ፡ ይቀውሙ፡ አፍኣ። እንዘ፡ ይፈቅዱ፡ ይትናገርዎ።
48 ወመጽአ፡ አሐዱ፡ እምአርዳኢሁ፡ ዘይቤሎ። ናሁ፡ እምከ፡ ወአኀዊከ፡ አፍኣ፡ ይቀውሙ። ወይፈቅዱ፡ ይትናገሩከ።
49 ወአውሥአ፡ ወይቤሎ፡ ለዘነገሮ። መኑ፡ ይእቲ፡ እምየ፡ ወእለ፡ መኑ፡ እሙንቱ፡ አኀውየ።
50 ወሰፍሐ፡ ወአመረ፡ እዴሁ፡ ኀበ፡ አርዳኢሁ። ወይቤ፡ ነዮሙ፡ እምየ፡ ወአኀውየ።
51 እስመ፡ ኵሉ፡ ዘይገብር፡ ፈቃዶ፡ ለአቡየ፡ ዘበሰማያት። ውእቱ፡ እኁየኒ፡ ወእኅትየኒ፡ ወእምየኒ፡ ውእቱ።
=== chapter 13 ===
[ምዕራፍ 13]
በእንተ፡ ምሳሌ፡ ዘርዕ፡ ወዘራዒ
1 ወበይእቲ፡ ዕለት፡ ወፂኦ፡ እግዚእ፡ ኢየሱስ፡ እምቤት። ነበረ፡ መንገለ፡ ሐይቅ፡ ባሕር።
2 ወተጋብኡ፡ ኀቤሁ፡ ሰብእ፡ ብዙኃን። እስከ፡ ሶበ፡ የዐርግ፡ ውስተ፡ ሐመር፡ ወይነብር። ወኵሉ፡ ሰብእ፡ ውስተ፡ ሐይቅ፡ ይቀውሙ።
3 ወነገሮሙ፡ ብዙኀ፡ በምሳሌ፡ እንዘ፡ ይብል። ናሁ፡ ወፅአ፡ ይዝራዕ፡ ዘይዘርዕ።
4 ወእንዘ፡ ይዘርዕ፡ ቦ፡ ዘወድቀ፡ ውስተ፡ ፍኖት። ወመጽኡ፡ አዕዋፈ፡ ሰማይ፡ ወበልዕዎ።
5 ወቦ፡ ዘወድቀ፡ ዲበ፡ ኰኵሕ፡ ኀበ፡ አልቦ፡ መሬት፡ ብዙኀ። ወውእተ፡ ጊዜ፡ ሠረጸ፡ እስመ፡ አልቦ፡ ዕመቅ፡ ለመሬቱ።
6 ወሶበ፡ ሠረቀ፡ ፀሓይ፡ መጽለወ፡ ወየብሰ። እስመ፡ አልቦ፡ ሥርው።
7 ወቦ፡ ዘወድቀ፡ ውስተ፡ ሦክ። ወበቊሎ፡ ጠበቆ፡ ሦክ፡ ወኀነቆ።
8 ወቦ፡ ዘወድቀ፡ ውስተ፡ ምድር፡ ሠናይት። ወወሀበ፡ ፍሬ፡ ቦ፡ ዘምእተ፡ ወቦ፡ ዘስሳ፡ ወቦ፡ ዘሠላሳ።
9 ዘቦ፡ እዝን፡ ሰሚዐ፡ ለይስማዕ።
10 ወቀሪቦሙ፡ አርዳኢሁ፡ ይቤልዎ። በእንተ፡ ምንት፡ በአምሳል፡ ትትናገሮሙ፡ ለሕዝብ።
11 ወአውሥአ፡ እግዚእ፡ ኢየሱስ፡ ወይቤሎሙ። እስመ፡ ለክሙ፡ ተውህበ፡ አእምሮ፡ ምሥጢራቲሃ፡ ለመንግሥተ፡ ሰማያት። ወሎሙሰ፡ ኢተውህቦሙ።
12 እስመ፡ ለዘቦ፡ ይሁብዎ፡ ወይዌስክዎ። ወለዘሰ፡ አልቦ፡ እለሂ፡ ቦ፡ የሀይድዎ።
13 ወበእንተ፡ ዝንቱ፡ በአምሳል፡ እትናገሮሙ። እስመ፡ እንዘ፡ ይሬእዩ፡ ኢይሬእዩ። ወእንዘ፡ ይሰምዑ፡ ኢይሰምዑ፡ ወኢይሌብዉ።
14 ከመ፡ ይትፈጸም፡ ላዕሌሆሙ፡ ትንቢተ፡ ኢሳይያስ፡ ዘይቤ። ሰሚዐ፡ ትሰምዑ፡ ወኢትሌብዉ። ወነጽሮ፡ ትኔጽሩ፡ ወኢትሬእዩ።
15 እስመ፡ ገዝፈ፡ ልቡ፡ ለዝ፡ ሕዝብ። ወእዘኒሆሙ፡ ደንቀወ፡ እምሰሚዕ። ወከደኑ፡ አዕይንቲሆሙ፡ ከመ፡ ኢይርአዩ፡ በአዕይንቲሆሙ። ወበእዘኒሆሙ፡ ኢይስምዑ፡ ወበልቦሙ፡ ኢይለብዉ። ወኢይትመየጡ፡ ኀቤየ፡ ከመ፡ ኢይሣሀሎሙ።
16 ወለክሙሰ፡ ብፁዓት፡ አዕይንቲክሙ፡ እስመ፡ ይሬእያ። ወአእዛኒክሙ፡ እስመ፡ ይሰምዓ።
17 አማን፡ እብለክሙ፡ ከመ፡ ብዙኃን፡ ነቢያት፡ ወጻድቃን። ፈተዉ፡ ይርአዩ፡ አንትሙ፡ ዘትሬእዩ፡ ወኢርእዩ። ወፈተዉ፡ ይስምዑ፡ አንትሙ፡ ዘትሰምዑ፡ ወኢሰምዑ።
18 አንትሙኬ፡ ስምዑ፡ ምሳሌሁ፡ ለዘይዘርዕ።
19 ኵሉ፡ ዘይሰምዕ፡ ነገረ፡ መንግሥተ፡ ሰማያት፡ ወኢይሌቡ። ይመጽእ፡ እኩይ፡ ወይመሥጥ፡ ቃለ። ዘተዘርዐ፡ ውስተ፡ ልቡ፡ ውእቱኬ፡ ዘተዘርዐ፡ ውስተ፡ ፍኖት።
20 ወዘሰ፡ ውስተ፡ ኰኵሕ፡ ተዘርዐ። ውእቱ፡ ዝ፡ ዘነገረ፡ ይሰምዕ። ወሶቤሃ፡ በፍሥሓ፡ ይትዌከፎ።
21 ወባሕቱ፡ አልቦ፡ ሥርው፡ ላዕሌሁ፡ ለጊዜሃ። ዳእሙ፡ ውእቱ፡ ወከዊኖሰ፡ ምንዳቤ፡ ወስደት። በእንተ፡ ዝ፡ ነገር፡ በጊዜሃ፡ የዐሉ።
22 ወዘሰ፡ ውስተ፡ ሦክ፡ ተዘርዐ፡ ዝ፡ ውእቱ፡ ዘነገረ፡ ይሰምዕ። ወትካዘ፡ ዝ፡ ዓለም፡ ወስፍጠተ፡ ብዕል፡ ተኀንቆ፡ ለነገር። ወዘእንበለ፡ ፍሬ፡ ይከውን።
23 ወዘሰ፡ ተዘርዐ፡ ውስተ፡ ምድር፡ ሠናይት። ዝ፡ ውእቱ፡ ዘነገረ፡ ይሰምዕ፡ ወይሌቡ፡ ወይፈሪ፡ ወይገብር። ቦ፡ ዘምእተ፡ ወቦ፡ ዘስሳ፡ ወቦ፡ ዘሠላሳ።
24 ካልእተ፡ ምሳሌ፡ አምጽአ፡ ሎሙ፡ እንዘ፡ ይብል። ትመስል፡ መንግሥተ፡ ሰማያት፡ ብእሴ፡ ዘዘርዐ፡ ሠናየ፡ ዘርዐ፡ ውስተ፡ ገራህቱ።
25 ወእንዘ፡ ይነውሙ፡ ሰብኡ፡ መጽአ፡ ጸላኢሁ። ወዘርዐ፡ ክርዳደ፡ ማእከለ፡ ሥርናይ፡ ወኀለፈ።
26 ወሶበ፡ በቈለ፡ ሥርናይ፡ ወፈርየ፡ ፍሬ። አሜሃ፡ አስተርአየ፡ ክርዳድኒ።
27 ወመጺኦሙ፡ አግብርቲሁ፡ ለበዓለ፡ ገራህት፡ ወይቤልዎ። እግዚኦ፡ አኮሁ፡ ሠናየ፡ ዘርዐ፡ ዘራዕከ፡ ውስተ፡ ገራህትከ። እምአይቴ፡ እንከ፡ ሎቱ፡ ክርዳድ።
28 ወይቤሎሙ፡ ብእሲ፡ ፀራዊ፡ ገብረ፡ ዘንተ። ወአግብርቲሁሰ፡ ይቤልዎ፡ ትፈቅድኑ፡ እንከ፡ ንሑር፡ ወንጻሕይዮ፡ ለከ።
29 ወይቤሎሙ፡ አልቦ፡ ከመ፡ እንዘ፡ ትጸሐይዩ፡ ክርዳደ፡ ኢትምሐዉ፡ ምስሌሁ፡ ሥርናየኒ።
30 ኅድግዎሙ፡ ይልሀቁ፡ ኅቡረ፡ እስከ፡ ጊዜ፡ ማእረር። ወበጊዜ፡ ማእረር፡ እብሎሙ፡ ለእለ፡ የዐጽዱ። እርዩ፡ ቅድመ፡ ክርዳደ፡ ወእስርዎ፡ በበ፡ ከላስስቲሁ። ወአውዕይዎ፡ በእሳት። ወሥርናዮሰ፡ አስተጋብኡ፡ ውስተ፡ መዛግብትየ።
31 ካልእተ፡ ምሳሌ፡ አምጽአ፡ ሎሙ፡ እንዘ፡ ይብል። ትመስል፡ መንግሥተ፡ ሰማያት፡ ኅጠተ፡ ስናፔ። እንተ፡ ነሥኣ፡ ብእሲ፡ ወዘርዓ፡ ውስተ፡ ገራህቱ።
32 ወይእቲ፡ ትንእስ፡ እምኵሉ፡ አዝርዕት። ወሶበ፡ ልህቀት፡ ተዐቢ፡ እምኵሎን፡ አሕማላት። ወትከውን፡ ዕፀ፡ ዐባየ፡ እስከ፡ ያጸልሉ፡ አዕዋፈ፡ ሰማይ፡ ታሕተ፡ አዕፁቂሃ።
33 ካልእተ፡ ምሳሌ፡ አምጽአ፡ ሎሙ። ትመስል፡ መንግሥተ፡ ሰማያት፡ ብሑአ፡ ዘነሥአት፡ ብእሲት። ወአብሕአቶ፡ ውስተ፡ ሠለስቱ፡ መስፈርተ፡ ሐሪጽ፡ ወአብሕአ፡ ኵሎ።
34 ዘንተ፡ ኵሎ፡ ተናገረ፡ እግዚእ፡ ኢየሱስ፡ በምሳሌ፡ ለአሕዛብ። ወዘእንበለ፡ ምሳሌሰ፡ ኢተናገሮሙ።
35 ከመ፡ ይትፈጸም፡ ዘተብህለ፡ በነቢይ፡ እንዘ፡ ይብል። እከሥት፡ በምሳሌ፡ አፉየ፡ ወእነግር፡ አምሳለ፡ ዘእምትካት።
36 ወእምዝ፡ ኀደጎሙ፡ ለአሕዛብ፡ ወቦአ፡ ውስተ፡ ቤት። ወቀርቡ፡ ኀቤሁ፡ አርዳኢሁ፡ ወይቤልዎ። ፈክር፡ ለነ፡ ምሳሌ፡ ዘክርዳድ፡ ወዘሥርናይ፡ ወዘገራህት።
37 ወአውሥአ፡ ወይቤሎሙ፡ ዘይዘርዕሰ፡ ሠናየ፡ ዘርዐ፡ ወልደ፡ ዕጓለ፡ እመሕያው፡ ውእቱ።
38 ወገራህቱኒ፡ ዓለም፡ ውእቱ። ወሠናይኒ፡ ዘርዕ፡ ውሉደ፡ መንግሥት፡ እሙንቱ። ወክርዳድኒ፡ ውሉዱ፡ ለእኩይ።
39 ወፀራዊኒ፡ ዘዘርዖ፡ ዲያብሎስ፡ ውእቱ። ወማእረሩኒ፡ ኅልቀተ፡ ዓለም፡ ውእቱ። ወዐጸዱኒ፡ መላእክት፡ እሙንቱ።
40 ከመኬ፡ የአርይዎ፡ ለክርዳድ፡ ቅድመ፡ ወበእሳት፡ ያውዕይዎ። ከማሁ፡ ይከውን፡ በኅልቀተ፡ ዓለም።
41 ይፌንዎሙ፡ ወልደ፡ ዕጓለ፡ እመሕያው፡ ለመላእክቲሁ። ወየአርዩ፡ እመንግሥቱ፡ ኵሎ፡ ዐላውያነ፡ ወእለ፡ ይገብሩ፡ አበሳ።
42 ወይወድይዎሙ፡ ውስተ፡ እቶነ፡ እሳት። ኀበ፡ ሀሎ፡ ብካይ፡ ወሐቅየ፡ ስነን።
43 አሜሃ፡ ይበርሁ፡ ጻድቃን፡ ምስብዒተ፡ እደ። እምብርሃነ፡ ፀሓይ፡ በመንግሥተ፡ አቡሆሙ፡ ዘበሰማያት። ዘቦ፡ እዝን፡ ሰሚዐ፡ ለይስማዕ።
44 ካዕበ፡ ትመስል፡ መንግሥተ፡ ሰማያት፡ መድፍነ፡ ዘኅቡእ፡ ውስተ፡ ገራህት። ወረኪቦ፡ ብእሲ፡ ኀብኣ፡ ወእምፍሥሓሁ፡ ሖረ፡ ወሤጠ፡ ኵሎ፡ ዘቦ። ወተሣየጣ፡ ለይእቲ፡ ገራህተ።
45 ወካዕበ፡ ትመስል፡ መንግሥተ፡ ሰማያት፡ ብእሴ፡ ሠያጤ፡ ዘየኀሥሥ፡ ባሕርየ፡ ሠናየ።
46 ወረኪቦ፡ አሐተ፡ ባሕርየ፡ እንተ፡ ብዙኅ፡ ሤጣ። ሖረ፡ ወሤጠ፡ ኵሎ፡ ዘቦ። ወተሣየጣ፡ ለይእቲ፡ ባሕርይ።
47 ወካዕበ፡ ትመስል፡ መንግሥተ፡ ሰማያት፡ ገሪፈ። እንተ፡ ተወድየት፡ ውስተ፡ ባሕር፡ ወአስተጋብአት፡ ኵሎ፡ ዘመደ፡ ዓሣት።
48 ወሶበ፡ መልአት፡ አዕረግዋ፡ ውስተ፡ ሐይቅ። ወነቢሮሙ፡ አረዩ፡ ሠናዮ፡ ወወደዩ፡ ውስተ፡ ሙዳዮሙ። ወእኩዮሰ፡ ገደፍዎ፡ አፍኣ።
49 ከማሁ፡ ይከውን፡ በኅልቀተ፡ ዓለም፡ ይመጽኡ፡ መላእክት። ወይፈልጡ፡ እኩያነ፡ እማእከሎሙ፡ ለጻድቃን።
50 ወይወድይዎሙ፡ ውስተ፡ እቶነ፡ እሳት። ኀበ፡ ሀሎ፡ ብካይ፡ ወሐቅየ፡ ስነን።
51 ወይቤሎሙ፡ እግዚእ፡ ኢየሱስ፡ ለበውክሙኑ፡ እንከ፡ ዘንተ፡ ኵሎ። ወይቤልዎ፡ እወ።
52 ወይቤሎሙ፡ በእንተ፡ ዝንቱ፡ ኵሉ፡ ጸሓፊ፡ ዘይፀመድ፡ ለመንግሥተ፡ ሰማያት። ይመስል፡ ብእሴ፡ በዓለ፡ ቤት፡ ዘያወፅእ፡ እመዝገቡ፡ ሐዲሰ፡ ወብሉየ።
53 ወፈጺሞ፡ እግዚእ፡ ኢየሱስ፡ እሎንተ፡ ምሳልያተ፡ ተንሥአ፡ እምህየ።
54 ወሖረ፡ ሀገሮ፡ ወመሀሮሙ፡ በምኵራቦሙ። እስከ፡ ሶበ፡ ይዴመሙ፡ ወይብሉ። እምአይቴ፡ እንከ፡ ሎቱ፡ ዝንቱ፡ ኵሉ፡ ጥበብ፡ ወኀይል።
55 አኮኑ፡ ዝንቱ፡ ውእቱ፡ ወልዱ፡ ለጸራቢ። ወስማ፡ ለእሙ፡ ማርያም። ወአኀዊሁ፡ ያዕቆብ፡ ወዮሳ፡ ወስምዖን፡ ወይሁዳ።
56 ወአኀቲሁኒ፡ ኵሎን፡ ኀቤነ፡ ሀለዋ። እምአይቴ፡ እንከ፡ ሎቱ፡ ዝንቱ፡ ኵሉ፡ ጥበብ፡ ወኀይል። ወአኀዙ፡ ያንጐርጕሩ፡ በእንቲኣሁ።
57 ወይቤሎሙ፡ እግዚእ፡ ኢየሱስ። ኢይትሜነን፡ ነቢይ፡ ዘእንበለ፡ በሀገሩ፡ ወበቤቱ።
58 ወኢገብረ፡ በህየ፡ ኀይለ፡ ብዙኀ፡ በእንተ፡ ሕጸጸ፡ አሚኖቶሙ።
=== chapter 14 ===
[ምዕራፍ 14]
በእንተ፡ ዮሐንስ፡ ወሄሮድስ
1 ወበውእቱ፡ መዋዕል፡ ሰምዐ፡ ሄሮድስ፡ ንጉሥ፡ ነገሮ፡ ለእግዚእ፡ ኢየሱስ።
2 ወይቤሎሙ፡ ለአግብርቲሁ፡ ዝ፡ ውእቱ፡ ዮሐንስ፡ መጥምቅ። ውእቱ፡ ተንሥአ፡ እምዉታን። ወበእንተ፡ ዝንቱ፡ ይትገበራ፡ ኀይላት፡ ቦቱ።
3 እስመ፡ ውእቱ፡ ሄሮድስ፡ አኀዞ፡ ለዮሐንስ። ወሞቅሖ፡ በቤተ፡ ሞቅሕ። በእንተ፡ ሄሮድያዳ፡ ብእሲተ፡ ፊልጶስ፡ እኁሁ። እስመ፡ ኪያሃ፡ አውሰበ።
4 እስመ፡ ይቤሎ፡ ዮሐንስ፡ ሎቱ። ኢይከውነከ፡ ታውስብ፡ ብእሲተ፡ እኁከ፡ ፊልጶስ።
5 ወእንዘ፡ ይፈቅድ፡ ይቅትሎ፡ ይፈርሆሙ፡ ለሕዝብ። እስመ፡ ከመ፡ ነቢይ፡ ይሬእይዎ፡ ለዮሐንስ።
6 ወከዊኖ፡ ዕለተ፡ ልደቱ፡ ለሄሮድስ፡ መጽአት፡ ወለተ፡ ሄሮድያዳ። ወዘፈነት፡ ሎቱ፡ በማእከሎሙ፡ ወአደመቶ፡ ለሄሮድስ።
7 ወበእንተ፡ ዝ፡ መሐለ፡ ላቲ፡ ከመ፡ የሀባ፡ ዘሰአለቶ።
8 ወይእቲሰ፡ አቅደመት፡ አእምሮ፡ በኀበ፡ እማ፡ ወትቤሎ። ሀበኒ፡ ይእዜ፡ በዝየ፡ በጻሕል፡ ርእሶ፡ ለዮሐንስ፡ መጥምቅ።
9 ወተከዘ፡ ንጉሥ፡ በእንተ፡ መሐላሁ፡ ወበእንተ፡ እለ፡ ይረፍቁ፡ ምስሌሁ። ወአዘዘ፡ የሀብዋ።
10 ወፈነወ፡ ሶቤሃ፡ መስተራትዓተ፡ ሐራ። ወመተሩ፡ ርእሶ፡ ለዮሐንስ፡ በቤተ፡ ሞቅሕ።
11 ወአምጽኡ፡ ርእሶ፡ በጻሕል፡ ወወሀብዋ፡ ለይእቲ፡ ወለት። ወይእቲኒ፡ ወሰደት፡ ወወሀበት፡ ለእማ።
12 ወመጽኡ፡ አርዳኢሁ፡ ወነሥኡ፡ በድኖ። ወቀበርዎ፡ ወመጺኦሙ፡ ዜነውዎ፡ ለእግዚእ፡ ኢየሱስ።
በእንተ፡ ኀምስ፡ ኅብስት፡ ወክልኤቲ፡ ዓሣት
13 ወሰሚዖ፡ እግዚእ፡ ኢየሱስ፡ ተግሕሠ፡ እምህየ፡ በሐመር፡ ውስተ፡ ገዳም፡ እንተ፡ ባሕቲቱ። ወሰሚዖሙ፡ አሕዛብ፡ ተለውዎ፡ በእግር፡ እምአህጉር።
14 ወወፂኦ፡ ርእየ፡ ብዙኃነ፡ አሕዛበ። ወምሕሮሙ፡ ወአሕየወ፡ ድዉያኒሆሙ።
15 ወምሴተ፡ ከዊኖ፡ ቀርቡ፡ ኀቤሁ፡ አርዳኢሁ፡ ወይቤልዎ። ገዳም፡ ውእቱ፡ ብሔር፡ ወሰዓቱኒ፡ ኀለፈ። ፈንዎሙ፡ ለሕዝብ፡ ከመ፡ ይሑሩ፡ ውስተ፡ አህጉር። ወይሣየጡ፡ ለርእሶሙ፡ መብልዐ።
16 ወይቤሎሙ፡ እግዚእ፡ ኢየሱስ፡ አኮ፡ መፍትው፡ ይሑሩ፡ ርኁባኒሆሙ። አላ፡ አንትሙ፡ ሀብዎሙ፡ ዘይበልዑ።
17 ወይቤልዎ፡ አልብነ፡ ዝየ፡ ዘእንበለ፡ ኀምስ፡ ኅብስት፡ ወክልኤቲ፡ ዓሣት።
18 ወይቤሎሙ፡ አምጽእዎን፡ ሊተ፡ ዝየ። ወአዘዞሙ፡ ለሰብእ፡ ይርፍቁ፡ ዲበ፡ ሣዕር።
19 ወነሥአ፡ ውእተ፡ ኀምሰ፡ ኅብስተ፡ ወክልኤ፡ ዓሣ። ወነጸረ፡ ኀበ፡ ሰማይ፡ ባረከ፡ ወፈተተ። ወወሀቦሙ፡ ለአርዳኢሁ፡ ወአርዳኢሁኒ፡ አቅረቡ፡ ለሕዝብ።
20 ወበልዑ፡ ኵሎሙ፡ ወጸግቡ፡ ወአግሐሡ፡ ዘተርፈ፡ ፍተታተ። ወመልአ፡ ዐሠርተ፡ ወክልኤተ፡ መዛርዐ፡ ምሉአ።
21 ወእለሰ፡ በልዕዎ፡ እሙንቱ፡ ሰብእ፡ የአክሉ፡ ኀምሳ፡ ምእት፡ ብእሲ። ዘእንበለ፡ አንስት፡ ወደቅ።
በእንተ፡ ዘከመ፡ ሖረ፡ እግዚእ፡ ኢየሱስ፡ ዲበ፡ ባሕር
22 ወአዘዞሙ፡ ሶቤሃ፡ ለአርዳኢሁ፡ ከመ፡ ይዕርጉ፡ ውስተ፡ ሐመር። ወይቅድምዎ፡ ወይሑሩ፡ ኀበ፡ ማዕዶተ፡ ባሕር። እስከ፡ ሶበ፡ ይፌንዎሙ፡ ለአሕዛብ።
23 ወእምዝ፡ ፈነወ፡ አሕዛበ፡ ወዐርገ፡ ውስተ፡ ደብር። እንተ፡ ባሕቲቱ፡ ይጸሊ። ወምሴተ፡ ከዊኖ፡ ባሕቲቱ፡ ሀሎ፡ ህየ።
24 ወሐመርሰ፡ ናሁ፡ ሀሎ፡ ማእከለ፡ ባሕር። ወርሑቅ፡ እምሐይቅ፡ መጠነ፡ ዕሥራ፡ ወኀምስቱ፡ ምዕራፍ። ወይትሀወክ፡ እሞገድ፡ ወያመነድቦሙ፡ ማዕበለ፡ ባሕር። እስመ፡ እምቅድሜሆሙ፡ ውእቱ፡ ነፋስ።
25 ወበራብዕት፡ ሰዓተ፡ ሌሊት፡ መጽአ፡ ኀቤሆሙ፡ እግዚእ፡ ኢየሱስ። እንዘ፡ የሐውር፡ ዲበ፡ ባሕር።
26 ወሶበ፡ ርእይዎ፡ አርዳኢሁ፡ እንዘ፡ ዲበ፡ ባሕር፡ የሐውር። ደንገፁ፡ ወፈርሁ፡ እንዘ፡ ይብሉ፡ ምትሐት፡ ውእቱ። ወእምግርማሁ፡ ዐውየዉ።
27 ወበጊዜሃ፡ ተናገሮሙ፡ እግዚእ፡ ኢየሱስ፡ እንዘ፡ ይብል። ተአመኑ፡ አነ፡ ውእቱ፡ ኢትፍርሁ።
28 ወአውሥአ፡ ጴጥሮስ፡ ወይቤ፡ እመሰ፡ አንተሁ፡ እግዚኦ። አዝዘኒ፡ እምጻእ፡ ኀቤከ፡ እንተ፡ ዲበ፡ ማይ።
29 ወይቤሎ፡ ነዐ፡ ወወሪዶ፡ ጴጥሮስ፡ እምዲበ፡ ሐመር። ሖረ፡ ዲበ፡ ማይ፡ ይብጻሕ፡ ኀበ፡ እግዚእ፡ ኢየሱስ።
30 ወሶበ፡ ርእየ፡ ነፋሰ፡ ኀያለ፡ ፈርሀ፡ ወአኀዘ፡ ይሰጠም። ወዐውየወ፡ ሶቤሃ፡ እንዘ፡ ይብል፡ እግዚኦ፡ አድኅነኒ።
31 ወሶቤሃ፡ ሰፍሐ፡ እዴሁ፡ እግዚእ፡ ኢየሱስ፡ ወአኀዞ። ወይቤሎ፡ ውኁደ፡ ሃይማኖት፡ ለምንት፡ ናፈቀ።
32 ወዐሪጎ፡ ውስተ፡ ሐመር፡ ይእተ፡ ጊዜ፡ ኀደገ፡ ነፋስ፡ ወኮነ፡ ዛኅነ።
33 ወእለ፡ ውስተ፡ ሐመር፡ ሰገዱ፡ ሎቱ። እንዘ፡ ይብሉ፡ አማን፡ ወልደ፡ እግዚአብሔር፡ አንተ።
34 ወዐዲዎሙ፡ ባሕረ፡ በጽሑ፡ ምድረ፡ ጌንሴሬጥ።
35 ወአእመርዎ፡ ሰብአ፡ ውእቱ፡ ብሔር፡ ወፈነዉ፡ ኀበ፡ ኵሉ፡ አድያም። ወአምጽኡ፡ ሎቱ፡ ኵሎ፡ ሕሙማነ።
36 ወአስተብቊዕዎ፡ ከመ፡ ይግስሱ፡ ጽንፈ፡ ልብሱ። እስመ፡ ኵሎሙ፡ እለ፡ ገሰስዎ፡ የሐይዉ።
=== chapter 15 ===
[ምዕራፍ 15]
በእንተ፡ እለ፡ የኀድጉ፡ ትእዛዘ፡ እግዚአብሔር
1 ወእምዝ፡ መጽኡ፡ እምኢየሩሳሌም፡ ጸሐፍት፡ ወፈሪሳውያን። ኀበ፡ እግዚእ፡ ኢየሱስ፡ እንዘ፡ ይብሉ።
2 ለምንት፡ ይትዐደዉ፡ አርዳኢከ፡ ሥርዐተ፡ ረበናት፡ ወትእዛዞሙ፡ ለሊቃነ፡ ካህናት። እስመ፡ ኢይትኀፀቡ፡ እደዊሆሙ፡ ሶበ፡ ይበልዑ፡ ኅብስተ።
3 ወአውሥአ፡ ወይቤሎሙ። ለምንት፡ አንትሙኒ፡ ትትዐደዉ፡ ትእዛዘ፡ እግዚአብሔር፡ በእንተ፡ ሥርዐትክሙ።
4 ወእግዚአብሔርሰ፡ ይቤ፡ አክብር፡ አባከ፡ ወእመከ። ወዘአሕሠመ፡ ቃለ፡ ላዕለ፡ አቡሁ፡ ወእሙ፡ ሞተ፡ ለይሙት።
5 ወአንትሙሰ፡ ትብሉ፡ ዘይቤሎ፡ ለአቡሁ፡ ወለእሙ፡ ሀብተ፡ ቊርባን፡ ዘረባሕከ፡ እምኔየ። ዝ፡ ብሂል፡ ኢያከብር፡ አባሁ፡ ወእሞ።
6 ወሰዐርክሙ፡ ቃሎ፡ ለእግዚአብሔር፡ በእንተ፡ ሥርዐትክሙ።
7 ኦ፡ መደልዋን፡ ሠናየ፡ ተነበየ፡ ኢሳይያስ፡ ላዕሌክሙ፡ እንዘ፡ ይብል።
8 ዝ፡ ሕዝብ፡ በከናፍሪሆሙ፡ ያከብሩኒ። ወበልቦሙሰ፡ ነዋኀ፡ ይርሕቁ፡ እምኔየ።
9 ወከንቶ፡ ያመልኩኒ፡ እንዘ፡ ይሜህሩ፡ ትምህርተ፡ ሥርዐታተ፡ ሰብእ።
10 ወጸውዖሙ፡ ለሕዝብ፡ ወይቤሎሙ፡ ስምዑ፡ ወለብዉ።
11 ከመ፡ አኮ፡ ዘይበውእ፡ ውስተ፡ አፍ፡ ዘያረኵሶ፡ ለሰብእ። አላ፡ ዘይወፅእ፡ እምውስተ፡ አፍ፡ ውእቱ፡ ያረኵሶ፡ ለሰብእ።
12 ወእምዝ፡ ቀሪቦሙ፡ አርዳኢሁ፡ ይቤልዎ። ኢተአምርሁ፡ ከመ፡ ፈሪሳውያን፡ ሰሚዖሙ፡ ቃለከ፡ አንጐርጐሩ።
13 ወአውሥአ፡ ወይቤ፡ ኵላ፡ ተክል፡ እንተ፡ ኢተከላ፡ አቡየ፡ ሰማያዊ፡ ትሤሮ።
14 ኅድግዎሙ፡ ለእሉ፡ እስመ፡ ዕዉራን፡ እሙንቱ። ወአምርሕተ፡ ዕዉራን፡ ዕዉር፡ ዕዉረ። ለእመ፡ መርሐ፡ ክልኤሆሙ፡ ይውድቁ፡ ውስተ፡ ግብ።
15 ወአውሥአ፡ ጴጥሮስ፡ ወይቤሎ፡ ፈክር፡ ለነ፡ ዘንተ፡ ምሳሌ።
16 ወይቤሎሙ፡ እግዚእ፡ ኢየሱስ። ዓዲሁ፡ አንትሙኒ፡ ኢለበውክሙኑ፡ ዘንተ።
17 ኢተአምሩኑ፡ ከመ፡ ኵሉ፡ ዘይበውእ፡ ውስተ፡ አፍ። ውስተ፡ ከርሥ፡ ይትገመር፡ ወጽመ፡ ይትገደፍ።
18 ወዘሰ፡ ይወፅእ፡ እምውስተ፡ አፍ፡ እምልብ፡ ይወፅእ። ወዝ፡ ውእቱ፡ ዘያረኵሶ፡ ለሰብእ።
19 እስመ፡ እምውስተ፡ ልብ፡ ይወፅእ፡ ኅሊና፡ እኩይ። ዘውእቱ፡ ቀቲል፡ ወዝሙት፡ ስርቅ፡ ስምዕ፡ በሐሰት። ወፅርፈት፡ ወሐዊር፡ ኀበ፡ ብእሲተ፡ ብእሲ።
20 እሉኬ፡ ዘያረኵስዎ፡ ለሰብእ። ወዘእንበለ፡ ተኀፅቦ፡ እድሰ፡ በሊዕ፡ ኢያረኵሶ፡ ለሰብእ።
21 ወወፂኦ፡ እግዚእ፡ ኢየሱስ፡ ተግሕሠ፡ እምህየ። ውስተ፡ ደወለ፡ ጢሮስ፡ ወሲዶና።
በእንተ፡ ከነናዊት፡ እንተ፡ ወለታ፡ ተአብድ
22 ወናሁ፡ ብእሲት፡ ከነናዊት፡ እምውእቱ፡ አድዋል፡ መጽአት። እንዘ፡ ትጸርሕ፡ ወትብል፡ መሐረኒ፡ እግዚእየ፡ ወልደ፡ ዳዊት። እስመ፡ ለወለትየ፡ እኩይ፡ ጋኔን፡ አኀዛ፡ ወያአብዳ።
23 ወኢያውሥኣ፡ እግዚእ፡ ኢየሱስ፡ ቃለ። ወቀሪቦሙ፡ አርዳኢሁ፡ አስተብቊዕዎ፡ እንዘ፡ ይብሉ። ፈንዋ፡ ለዛቲ፡ ብእሲት፡ እስመ፡ ትጸርሕ፡ በድኅሬነ።
24 ወአውሥአ፡ ወይቤሎሙ። ኢተፈነውኩ፡ ዘእንበለ፡ ኀበ፡ አባግዕ፡ ዘተሀጕላ፡ ዘቤተ፡ እስራኤል።
25 ወቀሪባ፡ ሰገደት፡ ሎቱ፡ እንዘ፡ ትብል፡ እግዚኦ፡ ርድአኒ።
26 ወአውሥኣ፡ ወይቤላ። ኢኮነ፡ ሠናየ፡ ነሢአ፡ ኅብስተ፡ ውሉድ፡ ወውሂብ፡ ለከለባት።
27 ወትቤ፡ እወ፡ እግዚኦ፡ ከለባትኒ፡ ጓ፡ ይበልዑ። እምፍርፋራት፡ ዘይወድቅ፡ እማእደ፡ አጋእዝቲሆሙ።
28 ወእምዝ፡ አውሥኣ፡ እግዚእ፡ ኢየሱስ፡ ወይቤላ። ኦ፡ ብእሲቶ፡ ዐቢይ፡ ሃይማኖትኪ፡ ይኩንኪ፡ በከመ፡ ተአመንኪ። ወሐይወት፡ ወለታ፡ እምይእቲ፡ ሰዓት።
በእንተ፡ አሕዛብ፡ እለ፡ ተፈወሱ፡ እምብዙኅ፡ ደዌሆሙ
29 ወኀሊፎ፡ እምህየ፡ እግዚእ፡ ኢየሱስ፡ በጽሐ፡ ኀበ፡ ሐይቀ፡ ባሕር፡ ዘገሊላ። ወዐሪጎ፡ ደብረ፡ ነበረ፡ ህየ።
30 ወቀርቡ፡ ኀቤሁ፡ አሕዛብ፡ ብዙኃን። ወአምጽኡ፡ ምስሌሆሙ፡ ሐንካሳነ፡ ወዕዉራነ። ጽሙማነ፡ ወፅዉሳነ፡ ወባዕዳነኒ፡ ብዙኃነ፡ ድዉያነ። ወገደፍዎሙ፡ ኀበ፡ እገሪሁ፡ ለእግዚእ፡ ኢየሱስ፡ ወፈወሶሙ።
31 እስከ፡ ሶበ፡ ያነክሩ፡ አሕዛብ፡ እንዘ፡ ይሬእዩ። ከመ፡ በሃማን፡ ይትናገሩ፡ ወሐንካሳን፡ የሐውሩ፡ ወዕዉራን፡ ይሬእዩ። ወሰብሕዎ፡ ለአምላከ፡ እስራኤል፡ ዘወሀበ፡ ዘከመ፡ ዝ፡ ሥልጣነ፡ ለሰብእ።
በእንተ፡ ሰብዑ፡ ኅብስት፡ ወኅዳጥ፡ ዓሣ
32 ወጸውዖሙ፡ እግዚእ፡ ኢየሱስ፡ ለአርዳኢሁ፡ ወይቤሎሙ። ያምሕሩኒ፡ እሉ፡ ሕዝብ፡ እስመ፡ ናሁ፡ ሠሉስ፡ መዋዕለ፡ እምዘበልዑ፡ እክለ። ወአልቦሙ፡ ዘይበልዑ፡ ወኢይፈቅድ፡ እፈንዎሙ፡ ርኁባኒሆሙ። ከመ፡ ኢይመጽልዉ፡ በፍኖት።
33 ወይቤልዎ፡ አርዳኢሁ፡ እምአይቴ፡ እንከ፡ ለነ፡ በገዳም። ኅብስት፡ ዘያጸግብ፡ ለዘመጠነ፡ ዝ፡ ሕዝብ።
34 ወይቤሎሙ፡ እግዚእ፡ ኢየሱስ፡ ሚ፡ መጠነ፡ ኀባውዝ፡ ብክሙ። ወይቤልዎ፡ ሰብዑ፡ ኅብስት፡ ወኅዳጥ፡ ዓሣ።
35 ወአዘዞሙ፡ ለሕዝብ፡ ይርፍቁ፡ ዲበ፡ ምድር። ወነሥአ፡ ሰብዑ፡ ኅብስተ፡ ወዓሣኒ።
36 ወይእተ፡ ጊዜ፡ አእኰተ፡ ወፈተተ። ወወሀቦሙ፡ ለአርዳኢሁ፡ ያቅርቡ። ወአርዳኢሁኒ፡ አቅረቡ፡ ለሕዝብ።
37 ወበልዑ፡ ኵሎሙ፡ ወጸግቡ፡ ወአግሐሡ፡ ዘተርፈ፡ ፍተታተ። ወመልአ፡ ሰብዐተ፡ አስፈሬዳተ፡ ምሉአ።
38 ወእለሰ፡ በልዕዎ፡ ዕደው፡ የአክሉ፡ አርብዓ፡ ምእት፡ ብእሲ። ዘእንበለ፡ አንስት፡ ወደቅ።
39 ወፈቲሖ፡ አሕዛበ፡ ዐርገ፡ ውስተ፡ ሐመር። ወሖረ፡ ውስተ፡ ደወለ፡ መጌዶን።
=== chapter 16 ===
[ምዕራፍ 16]
በእንተ፡ ዘከመ፡ ኀሠሡ፡ ትእምርተ፡ እምሰማይ
1 ወመጽኡ፡ ፈሪሳውያን፡ ወሰዱቃውያን፡ ያመክርዎ። ወይሰአልዎ፡ ትእምርተ፡ እምሰማይ፡ ያርእዮሙ።
2 ወአውሥአ፡ እግዚእ፡ ኢየሱስ፡ ወይቤሎሙ። እምከመ፡ መስየ፡ ወኮነ፡ ሕዋየ፡ ትብሉ፡ ጽሕወ፡ ብሔር። እስመ፡ ያቅየሐይሕ፡ ሰማይ።
3 ወእምከመ፡ ጸብሐ፡ ትብሉ፡ ዮምሰኬ፡ ይዘንም። እስመ፡ ያቅየሐይሕ፡ ሰማይ፡ ድሙነ። ኦ፡ መደልዋን፡ ለገጸ፡ ሰማይኑ፡ ተአምሩ፡ ፈክሮቶ። ወተአምረ፡ መዋዕልሰ፡ እፎ፡ ኢተአምሩ።
4 ወይቤሎሙ፡ ኦ፡ ትወልድ፡ ዕሉት፡ ወዘማ፡ ትእምርተ፡ ተኀሥሥ። ወትእምርትሰ፡ ኢይትወሀባ፡ ዘእንበለ፡ ትእምርተ፡ ዮናስ፡ ነቢይ። ወእምዝ፡ ኀደጎሙ፡ ወሖረ።
በእንተ፡ ብሑአ፡ ፈሪሳውያን፡ ወሰዱቃውያን
5 ወበጺሖሙ፡ አርዳኢሁ፡ ማዕዶተ፡ ረስዑ፡ ነሢአ፡ ኅብስት።
6 ወይቤሎሙ፡ ኢየሱስ፡ ዑቁ፡ ወተዐቀቡ፡ እምብሑኦሙ፡ ለፈሪሳውያን፡ ወሰዱቃውያን።
7 ወኀለዩ፡ በበይናቲሆሙ፡ እንዘ፡ ይብሉ። እስመሁ፡ እንጋ፡ ኅብስተ፡ ኢነሣእነ፡ ይብለነ።
8 ወአእመሮሙ፡ እግዚእ፡ ኢየሱስ፡ ወይቤሎሙ። ምንተ፡ ትኄልዩ፡ በበይናቲክሙ፡ ኦ፡ ሕጹጻነ፡ ሃይማኖት። እስመሁ፡ ኅብስት፡ አልብክሙ።
9 ዓዲሁ፡ ኢትሌብዉኑ፡ ወኢትዜከሩ፡ ዘአመ፡ ኀምስ፡ ኅብስት። እለ፡ ለኀምሳ፡ ምእት፡ ብእሲ፡ ሚ፡ መጠነ፡ መዛርዐ፡ አግሐሥክሙ። ወይቤልዎ፡ ዐሠርተ፡ ወክልኤተ።
10 ወአመ፡ ሰብዑ፡ ኅብስት፡ እለ፡ ለአርባዕ፡ ምእት። ሚ፡ መጠነ፡ አስፈሬዳተ፡ ዘአግሐሥክሙ፡ ወይቤልዎ፡ ሰብዑ።
11 ወይቤሎሙ፡ እፎ፡ ዘኢትሌብዉ፡ ከመ፡ አኮ፡ በእንተ፡ ኅብስት፡ ዘእቤለክሙ። ዑቁ፡ ወተዐቀቡ፡ እምነ፡ ብሑኦሙ፡ ለፈሪሳውያን፡ ወሰዱቃውያን።
12 ወእምዝ፡ ለበዉ፡ አርዳኢሁ፡ ከመ፡ አኮ፡ ዘይቤሎሙ፡ በእንተ፡ ብሕአተ፡ ኅብስት። ተዐቀቡ፡ እምነ፡ ብሕአቶሙ፡ ለፈሪሳውያን፡ ወሰዱቃውያን። አላ፡ እምነ፡ ትምህርቶሙ፡ ለፈሪሳውያን፡ ወሰዱቃውያን።
በእንተ፡ ዘተስእሎሙ፡ በቂሳርያ
13 ወበጺሖ፡ እግዚእ፡ ኢየሱስ፡ ብሔረ፡ ቂሳርያ፡ ዘፊልጶስ። ተስእሎሙ፡ ለአርዳኢሁ፡ እንዘ፡ ይብል። መነ፡ ይብለኒ፡ ሰብእ፡ ለወልደ፡ ዕጓለ፡ እመሕያው።
14 ወይቤልዎ፡ ቦ፡ እለ፡ ይብሉከ፡ ዮሐንስሃ፡ መጥምቀ። ወካልኣን፡ ይብሉከ፡ ኤልያስሃ። ወመንፈቆሙ፡ ይብሉከ፡ ኤርምያስሃ። ወእመ፡ አኮ፡ አሐዱ፡ እምነቢያት፡ ቀደምት።
15 ወይቤሎሙ፡ አንትሙሰኬ፡ መነ፡ ትብሉኒ፡ ከዊነ።
16 ወአውሥአ፡ ስምዖን፡ ጴጥሮስ፡ ወይቤ። አንተ፡ ውእቱ፡ ክርስቶስ፡ ወልደ፡ እግዚአብሔር፡ ሕያው።
17 ወአውሥአ፡ እግዚእ፡ ኢየሱስ፡ ወይቤሎ። ብፁዕ፡ አንተ፡ ስምዖን፡ ወልደ፡ ዮና። እስመ፡ ኢከሠተ፡ ለከ፡ ሥጋ፡ ወደም፡ አላ፡ አቡየ፡ ዘበሰማያት።
18 ወአንሰ፡ እብለከ፡ ከመ፡ አንተ፡ ኰኵሕ። ወዲበ፡ ዛቲ፡ ኰኵሕ፡ አሐንፃ፡ ለቤተ፡ ክርስቲያንየ። ወአናቅጸ፡ ሲኦል፡ ኢይኄይልዋ።
19 ወእሁበከ፡ መራኁተ፡ መንግሥተ፡ ሰማያት። ወዘአሰርከ፡ በምድር፡ ይከውን፡ እሱረ፡ በሰማያት። ወዘፈታሕከ፡ በምድር፡ ይከውን፡ ፍቱሐ፡ በሰማያት።
20 ወእምዝ፡ ገሠጾሙ፡ ለአርዳኢሁ፡ ከመ፡ ኢይንግሩ። ወኢ፡ ለመኑሂ፡ ከመ፡ ውእቱ፡ ክርስቶስ።
በእንተ፡ አዘክሮተ፡ ሕማሙ፡ ወሞቱ
21 ወእምአሜሃ፡ እግዚእ፡ ኢየሱስ፡ አኀዘ፡ ይንግሮሙ፡ ለአርዳኢሁ። ከመ፡ ሀለዎ፡ ይሑር፡ ኢየሩሳሌም። ወብዙኀ፡ ያሐምምዎ፡ ረበናት፡ ወሊቃነ፡ ካህናት፡ ወጸሐፍት። ወይትቀተል፡ ወበሣልስት፡ ዕለት፡ ይትነሣእ።
22 ወተሰጥዎ፡ ጴጥሮስ፡ ወአኀዘ፡ ይከልኦ፡ እንዘ፡ ይብል። ሐሰ፡ ለከ፡ እግዚኦ፡ ይኩን፡ ላዕሌከ፡ ዝንቱ።
23 ወተመይጦ፡ ይቤሎ፡ ለጴጥሮስ። ሑር፡ እምድኅሬየ፡ ሰይጣን፡ እስመ፡ ኮንከ፡ ማዕቀፍየ። እስመ፡ ኢትኄሊ፡ ዘእግዚአብሔር፡ ዘእንበለ፡ ዘሰብእ።
24 ወእምዝ፡ ይቤሎሙ፡ እግዚእ፡ ኢየሱስ፡ ለአርዳኢሁ። ዘይፈቅድ፡ ይትልወኒ፡ ይጽላእ፡ ነፍሱ፡ ወያጥብዕ። ወይንሣእ፡ መስቀለ፡ ሞቱ፡ ወይትልወኒ።
25 ወዘይፈቅድ፡ ያድኅና፡ ለነፍሱ፡ ለይግድፋ። ወዘሰ፡ ገደፋ፡ ለነፍሱ፡ በእንቲኣየ፡ ይረክባ።
26 ወምንተ፡ ይበቁዖ፡ ለሰብእ፡ ለእመ፡ ኵሎ፡ ዓለመ፡ ረብሐ፡ ወነፍሶ፡ ሀጕለ። ወምንተ፡ እምወሀበ፡ ሰብእ፡ ቤዛሃ፡ ለነፍሱ።
27 እስመ፡ ሀለዎ፡ ለወልደ፡ ዕጓለ፡ እመሕያው፡ ይምጻእ፡ በስብሐተ፡ አቡሁ፡ ምስለ፡ መላእክቲሁ። ወአሜሃ፡ የዐስዮ፡ ለኵሉ፡ በከመ፡ ምግባሩ።
28 አማን፡ እብለክሙ። ቦ፡ እምእለ፡ ሀለዉ፡ ይቀውሙ፡ ዝየ። እለ፡ ኢይጥዕምዎ፡ ለሞት። እስከ፡ አመ፡ ይሬእይዎ፡ ለወልደ፡ ዕጓለ፡ እመሕያው፡ በስብሐተ፡ አቡሁ።
=== chapter 17 ===
[ምዕራፍ 17]
በእንተ፡ ዘከመ፡ ተወለጠ፡ ራእዩ፡ በቅድሜሆሙ
1 ወእምድኅረ፡ ስሱ፡ መዋዕል፡ ነሥኦሙ፡ እግዚእ፡ ኢየሱስ። ለጴጥሮስ፡ ወለያዕቆብ፡ ወለዮሐንስ፡ እኁሁ። ወአዕረጎሙ፡ ደብረ፡ ነዋኀ፡ እንተ፡ ባሕቲቶሙ።
2 ወተወለጠ፡ አርአያሁ፡ በቅድሜሆሙ፡ ወአብርሀ፡ ገጹ፡ ከመ፡ ፀሓይ። ወአልባሲሁኒ፡ ኮነ፡ ጸዐዳ፡ ከመ፡ በረድ።
3 ወናሁ፡ አስተርአዩ፡ ሙሴ፡ ወኤልያስ፡ እንዘ፡ ይትናገሩ፡ ምስሌሁ።
4 ወአውሥአ፡ ጴጥሮስ፡ ወይቤሎ፡ ለእግዚእ፡ ኢየሱስ። እግዚኦ፡ ሠናይ፡ ውእቱ፡ ለነ፡ ሀልዎ፡ ዝየ። ወእመሰ፡ ትፈቅድ፡ ንግበር፡ በዝየ፡ ሠለስተ፡ ማኅደረ። አሐደ፡ ለከ፡ ወአሐደ፡ ለሙሴ፡ ወአሐደ፡ ለኤልያስ።
5 ወእንዘ፡ ዘንተ፡ ይትናገሩ፡ መጽአ፡ ደመና፡ ብሩህ፡ ወጸለሎሙ። ወናሁ፡ መጽአ፡ ቃል፡ እምውስተ፡ ደመና፡ ዘይብል። ዝንቱ፡ ውእቱ፡ ወልድየ፡ ዘአፈቅር። ዘቦቱ፡ ሠመርኩ፡ ወሎቱ፡ ስምዕዎ።
6 ወሰሚዖሙ፡ አርዳኢሁ፡ ደንገፁ፡ ወፈርሁ፡ ጥቀ። ወወድቁ፡ በገጾሙ፡ ዲበ፡ ምድር።
7 ወቀርበ፡ እግዚእ፡ ኢየሱስ፡ ወለከፎሙ። ወይቤሎሙ፡ ተንሥኡ፡ ወኢትፍርሁ።
8 ወአንሥኡ፡ አዕይንቲሆሙ፡ ወአልቦ፡ ዘርእዩ። ወኢ፡ መነሂ፡ ዘእንበለ፡ እግዚእ፡ ኢየሱስ፡ ባሕቲቶ።
9 ወእንዘ፡ ይወርዱ፡ እምደብር፡ አዘዞሙ፡ እግዚእ፡ ኢየሱስ፡ እንዘ፡ ይብል። ኢትንግሩ፡ ወኢ፡ ለመኑሂ፡ ዘርኢክሙ፡ ወዘሰማዕክሙ። እስከ፡ አመ፡ ይትነሣእ፡ ወልደ፡ ዕጓለ፡ እመሕያው፡ እምዉታን።
10 ወተስእልዎ፡ አርዳኢሁ፡ እንዘ፡ ይብሉ። እፎ፡ ይብሉ፡ ጸሐፍት፡ ኤልያስ፡ ሀለዎ፡ ይምጻእ፡ ቅድመ።
11 ወአውሥአ፡ እግዚእ፡ ኢየሱስ፡ ወይቤሎሙ። ኤልያስ፡ ይቀድም፡ መጺአ፡ ወያስተራትዕ፡ ኵሎ።
12 ወባሕቱ፡ እብለክሙ፡ ከመ፡ ኤልያስ፡ ወድአ፡ መጽአ፡ ወኢያእመርዎ። ወባሕቱ፡ ገብሩ፡ ላዕሌሁ፡ ኵሎ፡ ዘከመ፡ ፈቀዱ። ወከማሁ፡ ለወልደ፡ ዕጓለ፡ እመሕያውኒ፡ ሀለዎ፡ ይሕምም፡ እምኔሆሙ።
13 ወእምዝ፡ አእመሩ፡ አርዳኢሁ። ከመ፡ በእንተ፡ ዮሐንስ፡ መጥምቅ፡ ይቤሎሙ።
በእንተ፡ ወርኃዊ፡ ዘይጼዐር
14 ወበጺሖ፡ ኀበ፡ ሕዝብ፡ ይቤሎሙ። ምንትኑ፡ ትትኀሠሥዎሙ። ወቀርበ፡ ኀቤሁ፡ ብእሲ፡ ወሰገደ፡ ሎቱ። እንዘ፡ ይትመሀለል፡ ወይብል።
15 እግዚኦ፡ ተሣሀል፡ ሊተ፡ ወልድየ። እስመ፡ እኩይ፡ ጋኔን፡ አኀዞ፡ ወያንገረግሮ፡ ወበአርእስተ፡ አውራኅ፡ ይሣቅዮ። ወመብዝኅቶሰ፡ ይወድቆ፡ ውስተ፡ እሳት። ወቦ፡ አመ፡ ያወድቆ፡ ውስተ፡ ማይ።
16 ወአምጻእክዎ፡ ኀበ፡ አርዳኢከ፡ ወስእኑ፡ ፈውሶቶ።
17 ወእምዝ፡ አውሥአ፡ እግዚእ፡ ኢየሱስ፡ ወይቤ። ኦ፡ ትውልድ፡ ኢ፡ አማኒት፡ ወዕሉት። እስከ፡ ማእዜኑ፡ እሄሉ፡ ምስሌክሙ፡ ወእስከ፡ ማእዜኑ፡ እትዔገሠክሙ። እምጽእዎ፡ ሊተ፡ ዝየ፡ ወአምጽእዎ።
18 ወገሠጾ፡ እግዚእ፡ ኢየሱስ፡ ወወፅአ፡ ጋኔኑ፡ እምላዕሌሁ። ወሐይወ፡ ወልዱ፡ በይእቲ፡ ሰዓት።
19 ወእምዝ፡ ቀሪቦሙ፡ አርዳኢሁ፡ እንተ፡ ባሕቲቶሙ። ይቤልዎ፡ ለእግዚእ፡ ኢየሱስ። በእንተ፡ ምንት፡ ንሕነ፡ ስእነ፡ አውፅኦቶ።
20 ወይቤሎሙ፡ እግዚእ፡ ኢየሱስ፡ በእንተ፡ ሕጸጸ፡ ሃይማኖትክሙ። አማነ፡ እብለክሙ፡ እመ፡ ብክሙ፡ ሃይማኖት፡ መጠነ፡ ኅጠተ፡ ስናፔ። ወትብልዎ፡ ለዝ፡ ደብር፡ ፍልስ፡ እም፡ ዝየ፡ ኀበ፡ ከሃ። ወይፈልስ፡ ወአልቦ፡ ዘይሰአነክሙ።
21 ወዝንቱ፡ ዘመድ፡ ኢይወፅእ፡ ዘእንበለ፡ በጾም፡ ወበጸሎት።
22 ወእንዘ፡ ያንሶስዉ፡ ውስተ፡ ገሊላ፡ ይቤሎሙ፡ እግዚእ፡ ኢየሱስ። ሀለዎ፡ ለወልደ፡ ዕጓለ፡ እመሕያው፡ ያግብእዎ፡ ውስተ፡ እደ፡ ሰብእ። ወይቀትልዎ፡ ወአመ፡ ሣልስት፡ ዕለት፡ ይትነሣእ።
23 ወተከዙ፡ ጥቀ፡ አርዳኢሁ፡ ሰሚዖሙ፡ ዘንተ።
በእንተ፡ ውሂበ፡ ጸባሕት፡ ለቤተ፡ መቅደስ
24 ወበጺሖሙ፡ ቅፍርናሆም፡ መጽኡ፡ እለ፡ ጸባሕተ፡ ዲናር። ይነሥኡ፡ እምኀበ፡ ጴጥሮስ፡ ወይቤልዎ። ሊቅክሙሰ፡ ኢይሁብኑ፡ ጸባሕተ።
25 ወይቤ፡ እወ፡ ወበዊኦ፡ ውስተ፡ ቤት፡ አቅደመ፡ እግዚእ፡ ኢየሱስ፡ ብሂሎቶ። ምንተ፡ ትብል፡ ስምዖን፡ ነገሥተ፡ ምድር። እምኀበ፡ መኑ፡ ይነሥኡ፡ ጸባሕተ፡ ወጋዳ። እምኀበ፡ ውሉዶሙኑ፡ ወሚመ፡ እምኀበ፡ ነኪር። ወይቤ፡ እምኀበ፡ ነኪር።
26 ወይቤሎ፡ እግዚእ፡ ኢየሱስ። እንጋ፡ ውሉዶሙሰኬ፡ አግኣዝያንኑ፡ እሙንቱ።
27 ወባሕቱ፡ ከመ፡ ኢያንጐርጕሩ፡ ሑር፡ ውስተ፡ ባሕር፡ ወደይ፡ መቃጥነ። ወዘቀዳሚ፡ አሥገርከ፡ ዓሣ፡ ንሣእ፡ ወክሥት፡ አፉሁ። ወትረክብ፡ ውስቴቱ፡ ዲናረ፡ ሰጢጥራስ፡ ዘውእቱ፡ አርባዕቱ፡ ድርኅም። ኪያሁ፡ ንሣእ፡ ወሀቦሙ፡ ህየንቴየ፡ ወህየንቴከ።
=== chapter 18 ===
[ምዕራፍ 18]
በእንተ፡ እለ፡ ይብሉ፡ መኑ፡ የዐቢ
1 ወበይእቲ፡ ሰዓት፡ ቀርቡ፡ ኀቤሁ፡ አርዳኢሁ፡ ለእግዚእ፡ ኢየሱስ። እንዘ፡ ይብሉ፡ መኑ፡ እንጋ፡ የዐቢ፡ በመንግሥተ፡ ሰማያት።
2 ወጸውዐ፡ ሕፃነ፡ ወአቀሞ፡ ማእከሎሙ።
3 ወይቤ፡ አማን፡ እብለክሙ። እመ፡ ኢተመየጥክሙ፡ ወኢኮንክሙ፡ ከመ፡ ዝንቱ፡ ሕፃን። ኢትበውኡ፡ ውስተ፡ መንግሥተ፡ ሰማያት።
4 ወዘአትሐተ፡ ርእሶ፡ ከመ፡ ዝንቱ፡ ሕፃን። ዝ፡ ውእቱ፡ ዘየዐቢ፡ በመንግሥተ፡ ሰማያት።
5 ወዘሂ፡ ተወክፈ፡ አሐደ፡ ሕፃነ፡ ዘከመ፡ ዝ፡ በስምየ፡ ኪያየ፡ ተወክፈ።
በእንተ፡ መንሱት፡ ዘይመጽእ
6 ወለዘሂ፡ አስሐቶ፡ ለአሐዱ፡ እምእሉ፡ ንኡሳን፡ እለ፡ የአምኑ፡ ብየ። ይኄይሶ፡ ከመ፡ ይእስሩ፡ በክሳዱ፡ ማሕረጸ፡ አድግ። ወያስጥምዎ፡ ውስተ፡ ልጐተ፡ ባሕር።
7 አሌ፡ ሎቱ፡ ለዓለም፡ እመንሱት፡ ዘይመጽእ። እስመ፡ ግብር፡ ይመጽእ፡ መንሱት። ወባሕቱ፡ አሌሎ፡ ለውእቱ፡ ብእሲ፡ ዘያመጽኣ፡ ለመንሱት።
8 ወእመኒ፡ እዴከ፡ አው፡ እግርከ፡ ታስሕተከ። ምትራ፡ ወግድፋ፡ እምላዕሌከ። እስመ፡ ይኄይሰከ፡ ትባእ፡ ውስተ፡ ሕይወት፡ ሐንካሰከ፡ ወፅዉሰከ። እምእንዘ፡ ብከ፡ ክልኤ፡ እድ፡ ወክልኤ፡ እግር። ትትወደይ፡ ውስተ፡ እሳት፡ ዘለዓለም።
9 ወእመሂ፡ ዐይንከ፡ ታስሕተከ፡ ምልኃ፡ ወግድፋ፡ እምላዕሌከ። እስመ፡ ይኄይሰከ፡ ነቋረከ፡ ትባእ፡ ውስተ፡ ሕይወት። እምእንዘ፡ ክልኤ፡ ዐይን፡ ብከ፡ ትትወደይ፡ ውስተ፡ እሳተ፡ ገሃነም።
10 ዑቁ፡ ኢታስተሕቅርዎ፡ ለአሐዱሂ፡ እምእሉ፡ ንኡሳን። እብለክሙ፡ ከመ፡ መላእክቲሆሙ፡ በሰማያት፡ ወትረ፡ ይሬእዩ፡ ገጾ፡ ለአቡየ፡ ዘበሰማያት።
በእንተ፡ በግዕ፡ ዘተሀጕለ
11 እስመ፡ መጽአ፡ ወልደ፡ ዕጓለ፡ እመሕያው፡ ይኅሥሥ፡ ወያድኅን፡ ዘተሀጕለ።
12 ምንተ፡ ትብሉ፡ እመ፡ ቦ፡ ብእሲ፡ ዘቦቱ፡ ምእተ፡ አባግዕ። ወእመ፡ ተገድፎ፡ አሐዱ፡ እምውስቴቶሙ። አኮኑ፡ የኀድግ፡ ተስዓ፡ ወተስዐተ፡ ውስተ፡ ገዳም። ወየሐውር፡ ይኅሥሥ፡ ዘተገድፎ።
13 ወእምከመ፡ ረከቦ፡ አማን፡ እብለክሙ። ከመ፡ ይትፌሣሕ፡ በእንቲኣሁ፡ ፈድፈደ። እምተስዓ፡ ወተስዐቱ፡ እለ፡ ኢተገድፉ።
14 ከማሁኬ፡ ኢይፈቅድ፡ አቡየኒ፡ ዘበሰማያት። ከመ፡ ይትሀጐል፡ አሐዱ፡ እምእሉ፡ ንኡሳን።
በእንተ፡ ዘከመ፡ ይደልዎሙ፡ ለአኀው፡ ተገሥጾ
15 ወእመኒ፡ አበሰ፡ ለከ፡ እኁከ። ሑር፡ ወገሥጾ፡ በባሕቲትከ፡ በባሕቲቱ፡ አንተ፡ ወውእቱ። ወእመ፡ ሰምዐከ፡ ረባሕኮ፡ ለእኁከ።
16 ወእመሰ፡ ኢሰምዐከ፡ ንሣእ፡ ምስሌከ፡ በዳግም፡ አሐደ፡ አው፡ ክልኤተ። እስመ፡ በስምዐ፡ ክልኤቱ፡ ወሠለስቱ፡ ሰማዕት፡ ይቀውም፡ ኵሉ፡ ነገር።
17 ወእመሰ፡ ኢሰምዖሙ፡ ሎሙሂ፡ ንግራ፡ ለቤተ፡ ክርስቲያን። ወእመሰ፡ ለቤተ፡ ክርስቲያንሂ፡ ኢሰምዓ። ይኩን፡ ከመ፡ አረማዊ፡ ወመጸብሓዊ።
18 አማን፡ እብለክሙ፡ ዘአሰርክሙ፡ በምድር፡ ይከውን፡ እሱረ፡ በሰማያት። ወዘፈታሕክሙ፡ በምድር፡ ይከውን፡ ፍቱሐ፡ በሰማያት።
19 ወዓዲ፡ እብለክሙ፡ ለእመ፡ ኀብሩ፡ ክልኤቱ፡ አው፡ ሠለስቱ፡ እምኔክሙ። በውስተ፡ ምድር፡ በእንተ፡ ኵሉ፡ ግብር፡ ዘሰአሉ። ይትገበር፡ ሎሙ፡ በኀበ፡ አቡየ፡ ዘበሰማያት።
20 እስመ፡ ኀበ፡ ሀለዉ፡ ክልኤቱ፡ ወሠለስቱ፡ ግቡኣን፡ በስምየ። ህየ፡ እሄሉ፡ አነ፡ ማእከሎሙ።
21 ወእምዝ፡ ቀርበ፡ ኀቤሁ፡ ጴጥሮስ፡ ወይቤሎ። እግዚኦ፡ ሚ፡ መጠን፡ እመ፡ አበሰ፡ ሊተ፡ እኁየ። እኅድግ፡ ሎቱ፡ እስከ፡ ስብዕኑ።
22 ወይቤሎ፡ እግዚእ፡ ኢየሱስ፡ ኢይብለከ፡ እስከ፡ ስብዕ። አላ፡ እስከ፡ ሰብዓ፡ በበ፡ ስብዕ።
በእንተ፡ ምሳሌ፡ አግብርት፡ ወፈድዮተ፡ ዕዳ
23 በእንተ፡ ዝ፡ ትመስል፡ መንግሥተ፡ ሰማያት። ብእሴ፡ ንጉሠ፡ ዘፈቀደ፡ ይትሐሰቦሙ፡ ለአግብርቲሁ።
24 ወሶበ፡ አኀዘ፡ ይትሐሰቦሙ። አምጽኡ፡ ሎቱ፡ አሐደ፡ ዘይፈድዮ፡ እልፈ፡ መካልየ።
25 ወኀጢኦ፡ ዘይፈድዮ፡ አዘዘ፡ እግዚኡ፡ ይሢጥዎ፡ ምስለ፡ ብእሲቱ። ወምስለ፡ ውሉዱ፡ ወኵሎ፡ ዘቦ፡ እስከ፡ ይፈዲ።
26 ወወድቀ፡ እንከ፡ ውእቱ፡ ገብር፡ ታሕተ፡ እገሪሁ። ወሰገደ፡ ሎቱ፡ ወአስተብቊዖ፡ እንዘ፡ ይብል። እግዚኦ፡ ተዐገሠኒ፡ ወኵሎ፡ እፈድየከ።
27 ወምሕሮ፡ እግዚኡ፡ ለውእቱ፡ ገብር፡ ወዕዳሁኒ፡ ኀደገ፡ ሎቱ።
28 ወወፂኦ፡ ውእቱ፡ ገብር፡ ረከበ፡ አሐደ፡ ገብረ፡ እምነ፡ አብያጺሁ። ዘይፈድዮ፡ ምእተ፡ ዲናረ፡ ወአኀዞ፡ ወኀነቆ። እንዘ፡ ይብል፡ ሀበኒ፡ ዘትፈድየኒ።
29 ወወድቀ፡ ውእቱ፡ ገብር፡ ወሰገደ፡ ታሕተ፡ እገሪሁ። ወአስተብቊዖ፡ እንዘ፡ ይብል፡ እግዚኦ፡ ተዐገሠኒ፡ ወኵሎ፡ እፈድየከ።
30 ወአበዮ፡ ወሖረ፡ ወሞቅሖ፡ እስከ፡ ይፈድዮ።
31 ወርእዮሙ፡ አብያጺሁ፡ አግብርት፡ ዘገብረ፡ ተከዙ፡ ጥቀ። ወሐዊሮሙ፡ ነገርዎ፡ ለእግዚኦሙ፡ ኵሎ፡ ዘገብ።
32 ወእምዝ፡ ጸውዖ፡ እግዚኡ፡ ወይቤሎ። ኦ፡ ገብረ፡ እኩይ፡ ኵሎ፡ ዕዳ፡ ኀደጉ፡ ለከ፡ እስመ፡ አስተብቋዕከኒ።
33 አኮሁ፡ መፍትው፡ አንተሂ፡ ትምሐር፡ ቢጸከ። በከመ፡ አነ፡ መሐርኩከ።
34 ወተምዕዐ፡ እግዚኡ፡ ወመጠዎሙ፡ ለእለ፡ ይሣቅይዎ። እስከ፡ አመ፡ ይሤልጥ፡ ኵሎ፡ ዘይፈድዮ።
35 ከማሁኬ፡ አቡየኒ፡ ሰማያዊ፡ ይገብር፡ ለክሙ። እመ፡ ኢኀደግሙ፡ አበሳሆሙ፡ ለቢጽክሙ፡ እምኵሉ፡ ልብክሙ።
=== chapter 19 ===
[ምዕራፍ 19]
በእንተ፡ ዘከመ፡ ተግሕሠ፡ እግዚእ፡ ኢየሱስ፡ እምኢየሩሳሌም፡ ወዘከመ፡ አሕየዎሙ፡ ለብዙኃን፡ ሕሙማን
1 ወሶበ፡ ፈጸመ፡ እግዚእ፡ ኢየሱስ፡ ዘንተ፡ ነገረ። ተንሥአ፡ እምገሊላ፡ ወበጽሐ፡ ውስተ፡ ብሔረ፡ ይሁዳ፡ ማዕዶተ፡ ዮርዳኖስ።
2 ወተለውዎ፡ ብዙኃን፡ ሕሙማን፡ ወፈወሶሙ፡ በህየ።
በእንተ፡ ኪዳን፡ ዘኢይትፈታሕ
3 ወመጽኡ፡ ኀቤሁ፡ ፈሪሳውያን፡ ያመክርዎ፡ ወይቤልዎ። ይከውኖሁ፡ ለብእሲ፡ ይድኀር፡ ብእሲቶ፡ በኵሉ፡ ዘአበሰት፡ ሎቱ።
4 ወአውሥአ፡ ወይቤሎሙ፡ ኢያንበብክሙኑ፡ ዘውስተ፡ ኦሪት። ዘከመ፡ ፈጠሮሙ፡ እግዚአብሔር፡ እምትካት። ተባዕተ፡ ወአንስተ፡ ብእሴ፡ ወብእሲተ፡ ገብሮሙ።
5 ወበእንተዝ፡ የኀድግ፡ ብእሲ፡ አባሁ፡ ወእሞ። ወይተልዋ፡ ለብእሲቱ፡ ወይከውኑ፡ ክልኤሆሙ፡ አሐደ፡ ሥጋ።
6 እንከሰኬ፡ ኢኮኑ፡ ክልኤተ፡ አላ፡ አሐዱ፡ ሥጋ፡ እሙንቱ። ዘእግዚአብሔር፡ አስተፃመረ፡ ሰብእ፡ ኢይፍልጥ።
7 ወይቤልዎ፡ ለምንት፡ እንከ፡ አዘዘ፡ ሙሴ። ከመ፡ የሀብዋ፡ መጽሐፈ፡ ኅዳጋቲሃ፡ ወይድሐርዋ።
8 ወይቤሎሙ፡ ሙሴሰ፡ አዘዘክሙ፡ በከመ፡ እከየ፡ ልብክሙ። ትድኀሩ፡ አንስቲያክሙ፡ ትካትሰ፡ ኢኮነ፡ ከመ፡ ዝ።
9 አንሰ፡ እብለክሙ፡ ኵሉ፡ ዘይድሕር፡ ብእሲቶ፡ ዘእንበለ፡ ትዘሙ፡ ላዕሌሁ። ለሊሁ፡ ረሰያ፡ ዘማ። ወእንተሂ፡ ደሐርዋ፡ ዘአውሰበ፡ ዘመወ።
10 ወይቤልዎ፡ አርዳኢሁ። እመሰ፡ ከመ፡ ዝ፡ ውእቱ፡ ሥርዐተ፡ ብእሲ፡ ወብእሲት፡ ኢ፡ ርቱዕ፡ ያውስቡ።
11 ወይቤሎሙ፡ አኮ፡ ለኵሉ፡ ዘይትከሀል፡ ዝንቱ፡ ዘእንበለ፡ ለዘተውህቦ።
12 እስመ፡ ቦ፡ ሕጽዋን፡ እለ፡ ከማሁ፡ ተወልዱ፡ እምከርሠ፡ እሞሙ። ወቦ፡ ሕጽዋን፡ እለ፡ ሐጸውዎሙ፡ ሰብእ። ወቦ፡ ሕጽዋነ፡ እለ፡ ሐጸዉ፡ ርእሶሙ። በእንተ፡ መንግሥተ፡ ሰማያት፡ ወዘሰ፡ ይክል፡ ተዐግሦ፡ ለይትዐገሥ።
በእንተ፡ ሕፃናት፡ እለ፡ መጽኡ፡ ኀበ፡ እግዚእ፡ ኢየሱስ
13 ወእምዝ፡ አምጽኡ፡ ሎቱ፡ ሕፃናተ። ከመ፡ ያንብር፡ እዴሁ፡ ላዕሌሆሙ፡ ወይጸሊ። ወገሠጽዎሙ፡ አርዳኢሁ፡ ለእለ፡ አምጽእዎሙ።
14 ወይቤሎሙ፡ እግዚእ፡ ኢየሱስ፡ ኅድግዎሙ፡ ለእሉ፡ ሕፃናት። ወኢትክልእዎሙ፡ ይምጽኡ፡ ኀቤየ። እስመ፡ ለዘከመ፡ እሉ፡ ይእቲ፡ መንግሥተ፡ ሰማያት።
15 ወአንበረ፡ እዴሁ፡ ላዕሌሆሙ፡ ወኀለፈ፡ እምህየ።
በእንተ፡ ወሬዛ፡ ባዕል፡ ዘተስእሎ፡ ለእግዚእነ
16 ወናሁ፡ መጽአ፡ አሐዱ፡ ወሬዛ፡ ወይቤሎ። ሊቅ፡ ኄር፡ ምንተ፡ እግበር፡ እምሠናያት፡ ከመ፡ እረስ፡ ሕይወተ፡ ዘለዓለም።
17 ወይቤሎ፡ ለምንት፡ ትብለኒ፡ ኄር። አልቦ፡ ኄር፡ ዘእንበለ፡ አሐዱ፡ እግዚአብሔር። ወእመሰ፡ ትፈቅድ፡ ትባእ፡ ውስተ፡ ሕይወት፡ ዕቀብ፡ ትእዛዛተ።
18 ወይቤሎ፡ አያተኑ፡ ዘአዐቅብ። ወይቤሎ፡ እግዚእ፡ ኢየሱስ፡ ኢትቅትል፡ ነፍሰ። ኢትዘሙ፡ ኢትስርቅ፡ ኢትኩን፡ ስምዐ፡ በሐሰት።
19 አክብር፡ አባከ፡ ወእመከ። ወአፍቅር፡ ቢጸከ፡ ከመ፡ ነፍስከ።
20 ወይቤሎ፡ ውእቱ፡ ወሬዛ፡ ዘንተሰ፡ ኵሎ፡ ዐቀብኩ፡ እምንእስየ። ምንት፡ እንከ፡ ዘተርፈኒ።
21 ወነጸሮ፡ እግዚእ፡ ኢየሱስ፡ ወአፍቀሮ፡ ወይቤሎ፡ አሐቲ፡ ተርፈተከ። እመሰ፡ ትፈቅድ፡ ፍጹመ፡ ትኩን፡ ሑር፡ ወሢጥ፡ ኵሎ፡ ዘብከ። ወሀብ፡ ለነዳያን፡ ወለምስኪናን። ወታጠሪ፡ ለከ፡ መዝገበ፡ ዘበሰማያት፡ ወነዐ፡ ትልወኒ።
22 ወሰሚዖ፡ ወሬዛ፡ ዘንተ፡ ነገረ፡ ኀለፈ፡ ትኩዞ። እስመ፡ ብዙኅ፡ ጥሪቱ።
23 ወይቤሎሙ፡ እግዚእ፡ ኢየሱስ፡ ለአርዳኢሁ፡ አማን፡ እብለክሙ። ከመ፡ ባዕል፡ እምዕጹብ፡ ይበውእ፡ ውስተ፡ መንግሥተ፡ ሰማያት።
24 ወካዕበ፡ እብለክሙ፡ ይቀልል፡ ይኅልፍ፡ ገመል፡ እንተ፡ ስቊረተ፡ መርፍእ። እምባዕል፡ ይባእ፡ ውስተ፡ መንግሥተ፡ እግዚአብሔር።
25 ወሰሚዖሙ፡ አርዳኢሁ፡ አንከሩ፡ ጥቀ። እንዘ፡ ይብሉ፡ መኑ፡ እንጋ፡ ይክል፡ ድኂነ።
26 ወነጸሮሙ፡ እግዚእ፡ ኢየሱስ፡ ወይቤሎሙ። በኀበ፡ ሰብእ፡ ኢይትከሀል፡ ዝ። ወበኀበ፡ እግዚአብሔርሰ፡ ኵሉ፡ ይትከሀል።
በእንተ፡ ዘከመ፡ ይደልዎሙ፡ ዕሴት፡ ለእለ፡ ይተልውዎ፡ ለእግዚእ፡ ኢየሱስ
27 ወእምዝ፡ አውሥአ፡ ጴጥሮስ፡ ወይቤሎ። ናሁኬ፡ ንሕነ፡ ኀደግነ፡ ኵሎ፡ ወተሎናከ። ምንተ፡ እንጋ፡ ንረክብ።
28 ወይቤሎሙ፡ እግዚእ፡ ኢየሱስ፡ አማን፡ እብለክሙ። አንትሙ፡ እለ፡ ተለውክሙኒ። አመ፡ ዳግም፡ ልደት፡ አመ፡ ይነብር፡ ወልደ፡ ዕጓለ፡ እመሕያው፡ ዲበ፡ መንበረ፡ ስብሐቲሁ። አንትሙኒ፡ ትነብሩ፡ ዲበ፡ ዐሠርቱ፡ ወክልኤቱ፡ መናብርት። ወትኴንኑ፡ ዐሠርተ፡ ወክልኤተ፡ ሕዝበ፡ እስራኤል።
29 ወኵሉ፡ ዘኀደገ፡ አብያተ፡ ወአኀወ፡ ወአኀተ፡ ወአበ፡ ወእመ። ወብእሲተ፡ ወውሉደ፡ ወገራውሀ፡ በእንተ፡ ስምየ። ምእተ፡ ምክዕቢተ፡ ይረክብ፡ ወሕይወተ፡ ዘለዓለም፡ ይወርስ።
30 ወብዙኃን፡ ቀደምት፡ ይከውኑ፡ ደኀርተ። ወደኀርትኒ፡ ይከውኑ፡ ቀደምተ።
=== chapter 20 ===
[ምዕራፍ 20]
በእንተ፡ ምሳሌ፡ ተዐስቦ፡ ገባእት
1 እስመ፡ ትመስል፡ መንግሥተ፡ ሰማያት፡ ብእሴ፡ በዓለ፡ ቤት። ዘወፅአ፡ በነግህ፡ ይትዐሰብ፡ ገባእተ፡ ለዐጸደ፡ ወይኑ።
2 ወተከሀሎሙ፡ ዐስቦሙ፡ በበ፡ ዲናር፡ ለዕለት። ወፈነዎሙ፡ ውስተ፡ ዐጸደ፡ ወይኑ፡ ይትቀነዩ።
3 ወወፂኦ፡ ጊዜ፡ ሠለስቱ፡ ሰዓት፡ ርእየ፡ ካልኣነ። እንዘ፡ ይቀውሙ፡ ውስተ፡ ምሥያጥ፡ ፅሩዓነ።
4 ወሎሙኒ፡ ይቤሎሙ፡ ሑሩ፡ አንትሙኒ፡ ውስተ፡ ዐጸደ፡ ወይንየ። ተቀነዩ፡ ወዘረትዐኒ፡ እሁበክሙ። ወእሙንቲሂ፡ ሖሩ።
5 ወካዕበ፡ ወፂኦ፡ ጊዜ፡ ስሱ፡ ወተሱዑ፡ ሰዓት፡ ገብረ፡ ከማሁ።
6 ወጊዜ፡ ዐሥሩ፡ ወአሐዱ፡ ሰዓት። ወፂኦ፡ ረከበ፡ ካልኣነ፡ ፅሩዓነ፡ እንዘ፡ ይቀውሙ። ወይቤሎሙ፡ ለምንት፡ ቆምክሙ፡ ዝየ፡ ኵሎ፡ ዕለተ፡ ፅሩዓኒክሙ።
7 ወይቤልዎ፡ እስመ፡ አልቦ፡ ዘተዐሰበነ። ወይቤሎሙ፡ ሑሩ፡ አንትሙኒ፡ ውስተ፡ ዐጸደ፡ ወይንየ። ተቀነዩ፡ ወዘረትዐኒ፡ እሁበክሙ።
8 ወሶበ፡ መስየ፡ ይቤሎ፡ በዓለ፡ ዐጸደ፡ ወይን፡ ለመጋቢሁ። ጸውዖሙ፡ ለገባእት፡ ወሀቦሙ፡ ዐስቦሙ። ወአኀዝ፡ ቅድመ፡ እምደኀርት፡ እስከ፡ ቀደምት።
9 ወመጽኡ፡ እለ፡ ዐሥሩ፡ ወአሐዱ፡ ሰዓት። ወወሀቦሙ፡ በበ፡ ዲናር።
10 ወመጽኡ፡ ቀደምት፡ ወመሰሎሙ፡ ዘያፈደፍድ፡ ሎሙ፡ ውሂበ፡ እምእሉ። ወነሥኡ፡ በበ፡ ዲናር፡ እሙንቱሂ።
11 ወነሢኦሙ፡ አንጐርጐሩ፡ ላዕሌሁ፡ ለበዓለ፡ ቤት።
12 እንዘ፡ ይብሉ፡ እሉ፡ ደኀርት። አሐተ፡ ሰዓተ፡ ተቀንዩ፡ ወአስተዐረይኮሙ፡ ምስሌነ። ለእለ፡ ጾርነ፡ ክበዳ፡ ወላህባ፡ ለዕለት።
13 ወአውሥአ፡ ወይቤሎ፡ ለአሐዱ፡ እምኔሆሙ። ኢዐመፅኩከ፡ ዐርክየ፡ አኮኑ፡ በዲናር፡ ተከሀልኩከ።
14 ንሣእ፡ ዘይረክበከ፡ ወሑር። ፈቀድኩ፡ አነ፡ ለዝንቱ፡ ደኃራዊ፡ አሀቦ፡ ከማከ።
15 ወሚመ፡ ኢይከውነኒሁ፡ እግበር፡ ዘፈቀድኩ፡ በንዋይየ። አው፡ ዐይንከኑ፡ ሐማሚ፡ ውእቱ፡ ወአንሰ፡ ኄር፡ አነ።
16 ከማሁኬ፡ ይከውኑ፡ ደኀርት፡ ቀደምተ፡ ወቀደምትኒ፡ ይከውኑ፡ ደኀርተ። እስመ፡ ብዙኃን፡ ጽዉዓን፡ ወኅዳጣን፡ ኅሩያን።
በእንተ፡ ትንቢት፡ ሣልሲት፡ ዘሕማማት
17 ወእንዘ፡ የዐርግ፡ እግዚእ፡ ኢየሱስ፡ ኢየሩሳሌም። ነሥኦሙ፡ ለዐሠርቱ፡ ወክልኤቱ፡ አርዳኢሁ። እንተ፡ ባሕቲቶሙ፡ ወአግሐሦሙ፡ እምፍኖት።
18 ወይቤሎሙ፡ ናሁ፡ ነዐርግ፡ ኢየሩሳሌም። ወይእኅዝዎ፡ ለወልደ፡ ዕጓለ፡ እመሕያው። ወያገብእዎ፡ ኀበ፡ ሊቃነ፡ ካህናት፡ ወጸሐፍት፡ ወይኴንንዎ፡ በሞት።
19 ወይሜጥውዎ፡ ለሕዝብ፡ ወይሣለቁ፡ ላዕሌሁ፡ ወይቀሥፍዎ። ወይሰቅልዎ፡ ወበሣልስት፡ ዕለት፡ ይትነሣእ።
በእንተ፡ ደቂቀ፡ ዘብዴዎስ
20 ወእምዝ፡ መጽአት፡ ኀቤሁ፡ እሞሙ፡ ለደቂቀ፡ ዘብዴዎስ፡ ምስለ፡ ደቂቃ። ወሰገደት፡ ሎቱ፡ እንዘ፡ ትስእል።
21 ወይቤላ፡ ምንተ፡ ትፈቅዲ፡ እግበር፡ ለኪ። ወትቤሎ፡ ረሲ፡ ሊተ፡ ከመ፡ ይንበሩ፡ እሉ፡ ደቂቅየ፡ ክልኤሆሙ። አሐዱ፡ በየማንከ፡ ወአሐዱ፡ በፀጋምከ፡ በመንግሥትከ።
22 ወአውሥአ፡ እግዚእ፡ ኢየሱስ፡ ወይቤ። ኢተአምሩ፡ ዘትስእሉ፡ ትክሉኑ፡ ሰትየ፡ ጽዋዕ፡ ዘአነ፡ እሰቲ። ወጥምቀትየኒ፡ ዘአነ፡ እጠመቅ፡ ትጠመቁኑ። ወይቤልዎ፡ እወ፡ ንክል።
23 ወይቤሎሙ፡ ጽዋዕየሰ፡ ትሰትዩ፡ ወጥምቀትየኒ፡ ትጠመቁ። ወነቢረሰ፡ በየማንየ፡ ወበፀጋምየ፡ አኮ፡ አነ፡ ዘእሁብ። ዘእንበለ፡ ለእለ፡ አስተዳለወ፡ ሎሙ፡ አቡየ፡ ዘበሰማያት።
24 ወሰሚዖሙ፡ ዐሠርቱ፡ አንጐርጐሩ፡ በእንተ፡ ክልኤሆሙ፡ አኀው።
25 ወጸውዖሙ፡ እግዚእ፡ ኢየሱስ፡ ወይቤሎሙ። ኢተአምሩኑ፡ ከመ፡ መኳንንቲሆሙ፡ ለአሕዛብ፡ ይኴንንዎሙ። ወዐበይቶሙ፡ ይቀንይዎሙ።
26 ወለክሙሰ፡ አኮ፡ ከማሁ፡ ወባሕቱ፡ ዘይፈቅድ፡ እምኔክሙ። ይኩን፡ ዐቢየ፡ ይኩንክሙ፡ ገብረ።
27 ወዘሂ፡ ይፈቅድ፡ እምኔክሙ፡ ይኩን፡ ሊቀ፡ ይኩንክሙ፡ ላእከ።
28 እስመ፡ ኢመጽአ፡ ወልደ፡ ዕጓለ፡ እመሕያው፡ ከመ፡ ይትለአክዎ። ዘእንበለ፡ ዳእሙ፡ ከመ፡ ይትለአክ፡ ወየሀብ፡ ነፍሶ፡ ቤዛ፡ ብዙኃን።
በእንተ፡ ክልኤ፡ ዕዉራን
29 ወወፂኦ፡ እምኢያሪሆ፡ ተለውዎ፡ ሰብእ፡ ብዙኃን።
30 ወናሁ፡ ክልኤቱ፡ ዕዉራን፡ ይነብሩ፡ ጥቃ፡ ፍኖት። ወሰሚዖሙ፡ ከመ፡ እግዚእ፡ ኢየሱስ፡ የኀልፍ፡ ጸርሑ። እንዘ፡ ይብሉ፡ ተሣሀለነ፡ እግዚኦ፡ ወልደ፡ ዳዊት።
31 ወሰብእሰ፡ ይጌሥጽዎሙ፡ ከመ፡ ያርምሙ፡ ወአፈድፈዱ፡ ጸሪሐ። እንዘ፡ ይብሉ፡ ተሣሀለነ፡ እግዚኦ፡ ወልደ፡ ዳዊት።
32 ወቆመ፡ እግዚእ፡ ኢየሱስ፡ ወጸውዖሙ፡ ወይቤሎሙ። ምንተ፡ ትፈቅዱ፡ እግበር፡ ለክሙ።
33 ወይቤልዎ፡ እግዚኦ፡ ከመ፡ ይትከሠታ፡ አዕይንቲነ።
34 ወአምሐርዎ፡ ለእግዚእ፡ ኢየሱስ፡ ወገሰሶሙ፡ አዕይንቲሆሙ። ወበጊዜሃ፡ ነጸሩ፡ ወተለውዎ።
=== chapter 21 ===
[ምዕራፍ 21]
ዘከመ፡ ቦአ፡ እግዚእነ፡ ኢየሩሳሌም
1 ወቀሪቦ፡ እግዚእ፡ ኢየሱስ፡ ኢየሩሳሌም። በጽሐ፡ ቤተ፡ ፋጌ፡ እንተ፡ ገቦ፡ ደብረ፡ ዘይት። ወሶቤሃ፡ ፈነወ፡ ክልኤተ፡ እምአርዳኢሁ።
2 ወይቤሎሙ፡ ሑሩ፡ ሀገረ፡ ዘቅድሜክሙ። ወይእተ፡ ጊዜ፡ ትረክቡ፡ እድግተ፡ እስርተ፡ ምስለ፡ ዕዋለ። ፍትሕዎሙ፡ ወአምጽእዎሙ፡ ሊተ።
3 ወእመ፡ ቦ፡ ዘይቤለክሙ፡ ምንተ፡ ትገብሩ። በሉ፡ እግዚኦሙ፡ ይፈቅዶሙ፡ ወበጊዜሃ፡ ይፌንዉክሙ።
4 ወዝ፡ ኵሉ፡ ዘኮነ፡ ከመ፡ ይትፈጸም፡ ዘተብህለ፡ በነቢይ።
5 በልዋ፡ ለወለተ፡ ጽዮን፡ ነዋ፡ ንጉሥኪ፡ ይመጽእ፡ ኀቤኪ። ጻድቅ፡ ወየዋህ፡ እንዘ፡ ይጼዐን፡ ዲበ፡ እድግት፡ ወዲበ፡ ዕዋላ።
6 ወሐዊሮሙ፡ አርዳኢሁ፡ ገብሩ፡ በከመ፡ አዘዞሙ፡ እግዚእ፡ ኢየሱስ።
7 ወአምጽኡ፡ ሎቱ፡ እድግተ፡ ወዕዋላ። ወረሐኑ፡ አልባሲሆሙ፡ ላዕሌሆን። ወተጽዕነ፡ እግዚእ፡ ኢየሱስ፡ ዲቤሆሙ።
8 ወዘይበዝኁ፡ ሕዝብ፡ ነጸፉ፡ አልባሲሆሙ፡ ውስተ፡ ፍኖት። ወካልኣንሂ፡ ይመትሩ፡ አዕጹቀ፡ እምውስተ፡ ዕፀው። ወይነጽፉ፡ ውስተ፡ ፍኖት።
9 ወሕዝብሰ፡ እለ፡ ይመርሑ፡ ወእለሂ፡ ይተልዉ፡ ይጸርሑ፡ ወይብሉ። ሆሣዕና፡ ለወልደ፡ ዳዊት። ቡሩክ፡ ዘይመጽእ፡ በስመ፡ እግዚአብሔር። ሆሣዕና፡ በአርያም።
10 ወበዊኦ፡ እግዚእ፡ ኢየሱስ፡ ኢየሩሳሌም፡ ተሀውከት፡ ኵላ፡ ሀገር። እንዘ፡ ትብል፡ መኑ፡ ውእቱ፡ ዝንቱ።
11 ወይቤሉ፡ ሕዝብ፡ ዝ፡ ውእቱ፡ ኢየሱስ፡ ነቢይ፡ ዘእምናዝሬት፡ ዘገሊላ።
ዘከመ፡ ሰደዶሙ፡ እግዚእ፡ ኢየሱስ፡ ለእለ፡ ያረኵሱ፡ ቤተ፡ መቅደስ
12 ወቦአ፡ እግዚእ፡ ኢየሱስ፡ ቤተ፡ መቅደስ። ወሰደደ፡ ኵሎ፡ እለ፡ ይሠይጡ፡ ወይሣየጡ፡ በቤተ፡ መቅደስ። ወገፍትዐ፡ ማእዳቲሆሙ፡ ለመወልጣን። ወመናብርቲሆሙ፡ ለእለ፡ ይሠይጡ፡ ርግበ።
13 ወይቤሎሙ፡ ጽሑፍ፡ ዘይብል፡ ቤትየሰ፡ ቤተ፡ ጸሎት፡ ይሰመይ። ወአንትሙሰ፡ ረሰይክምዎ፡ በአተ፡ ፈያት፡ ወሰረቅት።
በእንተ፡ ዕዉራን፡ ወሐንካሳን
14 ወመጽኡ፡ ኀቤሁ፡ ዕዉራን፡ ወሐንካሳን፡ በቤተ፡ መቅደስ፡ ወአሕየዎሙ።
15 ወሶበ፡ ርእዩ፡ ሊቃነ፡ ካህናት፡ ወጸሐፍት፡ መንክረ፡ ዘገብረ። ወደቂቅኒ፡ እንዘ፡ ይጸርሑ፡ በቤተ፡ መቅደስ፡ ወይብሉ። ሆሣዕና፡ ለወልደ፡ ዳዊት፡ ኢሐወዞሙ፡ አላ፡ አንጐርጐሩ።
16 ወይቤልዎ፡ ኢትሰምዕኑ፡ ዘይብሉ፡ እሉ፡ ደቂቅ። ወይቤሎሙ፡ እግዚእ፡ ኢየሱስ፡ እወ፡ አልቦሁ፡ አመ፡ አንበብክሙ። ዘይቤ፡ እምአፈ፡ ደቂቅ፡ ወሕፃናት፡ አስተዳሎከ፡ ስብሐተ።
17 ወኀደጎሙ፡ ወወፅአ፡ አፍኣ፡ እምሀገር። ወቦአ፡ ቢታንያ፡ ወቤተ፡ ህየ።
በእንተ፡ በለስ፡ ዘተረግመት
18 ወጸቢሖ፡ እንዘ፡ የዐርግ፡ እግዚእ፡ ኢየሱስ፡ ሀገረ፡ ርኅበ።
19 ወርእየ፡ ዕፀ፡ በለስ፡ በፍኖት፡ ወሖረ፡ ኀቤሃ፡ ይንሣእ፡ ፍሬ፡ እምኔሃ። ወአልቦ፡ ዘረከበ፡ ውስቴታ፡ ዘእንበለ፡ ቈጽል፡ ባሕቲቱ። ወይቤላ፡ ኢይኩን፡ እንከ፡ ፍሬ፡ እምውስቴትኪ፡ ለዓለም። ወየብሰት፡ በጊዜሃ፡ ይእቲ፡ በለስ።
20 ወርእዮሙ፡ አርዳኢሁ፡ አንከሩ፡ ወይቤሉ። እፎ፡ በጊዜሃ፡ የብሰት፡ ዛቲ፡ በለስ።
21 ወአውሥአ፡ እግዚእ፡ ኢየሱስ፡ ወይቤሎሙ። አማን፡ እብለክሙ፡ እመ፡ ብክሙ፡ ሃይማኖተ፡ ወኢትናፍቁ። አኮ፡ ክመ፡ ዕፀ፡ ባሕቲቶ፡ ዘትገብሩ። አላ፡ ለዝንቱ፡ ደብር፡ ለእመ፡ ትብልዎ። ተንሥእ፡ ወተወረው፡ ውስተ፡ ባሕር፡ ይከውን፡ ለክሙ።
22 ወኵሎ፡ ዘሰአልክሙ፡ በጸሎት፡ እንዘ፡ ትትአመኑ፡ ትነሥኡ።
በእንተ፡ እለ፡ ተስእልዎ፡ ካህናት፡ ወረበናት
23 ወበዊኦ፡ ቤተ፡ መቅደስ፡ እንዘ፡ ይሜህር። መጽኡ፡ ኀቤሁ፡ ሊቃነ፡ ካህናት፡ ወመላህቅተ፡ ሕዝብ። ወይቤልዎ፡ በመባሕተ፡ መኑ፡ ትገብር፡ ዘንተ። ወመኑ፡ ወሀበከ፡ ዘንተ፡ ሥልጣነ።
24 ወአውሥአ፡ እግዚእ፡ ኢየሱስ፡ ወይቤሎሙ። እሴአለክሙ፡ አነሂ፡ አሐተ፡ ቃለ። ወእምከመ፡ ነገርክሙኒ፡ አነሂ፡ አየድዐክሙ። በአይ፡ ሥልጣን፡ እገብር፡ ዘንተ።
25 ጥምቀቱ፡ ለዮሐንስ፡ እምአይቴ፡ ውእቱ። እምሰማይኑ፡ ወሚመ፡ እምሰብእ። ወኀለዩ፡ በበይናቲሆሙ፡ ወይቤሉ። እመ፡ ንብሎ፡ እምሰማይ፡ ይብለነ፡ በእፎኬ፡ ዘኢአመንክምዎ።
26 ወእመሂ፡ ንብሎ፡ እምሰብእ፡ ንፈርሆሙ፡ ለሕዝብ። እስመ፡ ከመ፡ ነቢይ፡ ይሬእይዎ፡ ለዮሐንስ።
27 ወአውሥእዎ፡ ለእግዚእ፡ ኢየሱስ፡ ወይቤልዎ፡ ኢነአምር። ወይቤሎሙ፡ ውእቱኒ፡ አነሂ፡ ኢያየድዐክሙ፡ በአይ፡ ሥልጣን፡ እገብር፡ ዘንተ።
በእንተ፡ ምሳሌ፡ ዘክልኤ፡ አኀው
28 ወምንተ፡ ትብሉ፡ ለአሐዱ፡ ብእሲ፡ ቦቱ፡ ክልኤቱ፡ ደቂቅ፡ አኀው። ወይቤሎ፡ ለቀዳማዊ፡ ወልድየ፡ ሑር። ተቀነይ፡ ዮም፡ ውስተ፡ ዐጸደ፡ ወይንየ።
29 ወአውሥአ፡ ወይቤ፡ ኦሆ፡ እግዚእየ፡ ወኢሖረ።
30 ወለካልኡኒ፡ ዘይንእስ፡ ይቤሎ፡ ከማሁ፡ ወአውሥአ፡ ወይቤ፡ አንብየ። ወእምድኅረ፡ ዝ፡ ነስሐ፡ ወሖረ።
31 መኑ፡ እንከ፡ እምክልኤሆሙ፡ ዘገብረ፡ ፈቃደ፡ አቡሁ። ወይቤልዎ፡ ደኃራዊ፡ ወይቤሎሙ፡ እግዚእ፡ ኢየሱስ። አማን፡ እብለክሙ፡ ከመ፡ ኃጥኣን፡ ወመጸብሓን፡ ወዘማውያን። ይቀድሙክሙ፡ በዊአ፡ ውስተ፡ መንግሥተ፡ እግዚአብሔር።
32 እስመ፡ መጽአ፡ ኀቤክሙ፡ ዮሐንስ፡ በፍኖተ፡ ጽድቅ። ወኢአመንክምዎ፡ ኃጥኣንሰ፡ ወመጸብሓን፡ ወዘማውያን። አምንዎ፡ ወአንትሙሰ፡ ርኢክሙሂ፡ ኢነሳሕክሙ፡ ድኅረ፡ ለአሚን፡ ቦቱ።
በእንተ፡ እኩያን፡ ገባእት
33 ወመሰለ፡ ሎሙ፡ ወይቤሎሙ፡ ካልእተ፡ ምሳሌ። ስምዑ፡ ብእሲ፡ በዓለ፡ ቤት፡ ተከለ፡ ዐጸደ፡ ወይን። ወገብረ፡ ሎቱ፡ ጸቈነ፡ ወአክረየ፡ ምክያደ፡ ወሐነጸ፡ ማኅፈደ። ወሤመ፡ ሎቱ፡ ዐቀብተ፡ ወወሀቦሙ፡ ወነገደ።
34 ወአመ፡ በጽሐ፡ ጊዜ፡ ፍሬሁ፡ ፈነወ፡ አግብርቲሁ፡ ኀበ፡ ዐቀብተ፡ ወይን። ከመ፡ ይምጽእ፡ ሎቱ፡ እምፍሬ፡ ወይኑ።
35 ወአኀዝዎሙ፡ እሉ፡ ዐቀብት፡ ለአግብርቲሁ። ቦ፡ ዘቀሠፉ፡ ወቦ፡ ዘወገሩ፡ ወቦ፡ ዘቀተሉ።
36 ወእምዝ፡ ፈነወ፡ ካልኣነ፡ አግብርተ፡ እለ፡ ይበዝኁ፡ እምቀደምት። ወኪያሆሙኒ፡ ከማሆሙ፡ ረሰይዎሙ።
37 ወድኅረ፡ ፈነወ፡ ኀቤሆሙ፡ ወልዶ። እንዘ፡ ይብል፡ ለወልድየሰ፡ የኀፍርዎ።
38 ወሶበ፡ ርእይዎ፡ እሉ፡ ዐቀብት፡ ለወልዱ፡ ይቤሉ፡ በበይናቲሆሙ። ነዋ፡ ዝ፡ ውእቱ፡ ወራሲሁ፡ ንዑ፡ ንቅትሎ፡ ወንርከብ፡ ርስቱ።
39 ወነሥእዎ፡ ወአውፅእዎ፡ አፍኣ፡ እምዐጸደ፡ ወይን፡ ወቀተልዎ።
40 ወአመ፡ መጽአ፡ በዓለ፡ ዐጸደ፡ ወይን። ምንተ፡ እንከ፡ ይሬስዮሙ፡ ለእሉ፡ ዐቀብት።
41 ወይቤልዎ፡ በእኪት፡ ይቀትሎሙ፡ ለእኩያን። ወወይኖሂ፡ ይሁብ፡ ለካልኣን፡ ዐቀብት። እለ፡ ይሁብዎ፡ ፍሬሁ፡ በበ፡ ጊዜሁ፡ ወበበ፡ አግዋሊሁ።
42 ወይቤሎሙ፡ እግዚእ፡ ኢየሱስ። አልቦሁ፡ አመ፡ አንበብክሙ፡ ውስተ፡ መጻሕፍት። እብን፡ እንተ፡ መነንዋ፡ ነደቅት። ወይእቲ፡ ኮነት፡ ውስተ፡ ርእሰ፡ ማእዘንት። እምኀበ፡ እግዚአብሔር፡ ኮነት፡ ዛቲ። ወነካር፡ ይእቲ፡ ለአዕይንቲነ።
43 በእንተ፡ ዝንቱ፡ እብለክሙ። ከመ፡ ይነሥእዋ፡ እምኔክሙ፡ ለመንግሥተ፡ እግዚአብሔር። ወይሁብዋ፡ ለካልኣን፡ እለ፡ ይገብሩ፡ ፍሬሃ።
44 ወዘሰ፡ ወድቀ፡ ዲበ፡ ይእቲ፡ እብን፡ ይትቀጠቀጥ። ወለዘሂ፡ ወድቀት፡ ዲቤሁ፡ ትደምቆ።
45 ወሰሚዖሙ፡ ሊቃነ፡ ካህናት፡ ወፈሪሳውያን፡ ምሳሌያቲሁ። አንከሩ፡ ወአእመሩ፡ ከመ፡ በእንቲኣሆሙ፡ ይብል።
46 ወእንዘ፡ ይፈቅዱ፡ የአኀዝዎ፡ ፈርህዎሙ፡ ለሕዝብ። እስመ፡ ከመ፡ ነቢይ፡ ውእቱ፡ በኀቤሆሙ።
=== chapter 22 ===
[ምዕራፍ 22]
በእንተ፡ ምሳሌ፡ ዘገብረ፡ ንጉሥ፡ ከብካበ፡ ለወልዱ
1 ወአውሥአ፡ እግዚእ፡ ኢየሱስ፡ ዳግመ። ወተናገረ፡ በምሳሌ፡ እንዘ፡ ይብል።
2 ትመስል፡ መንግሥት፡ ሰማያት፡ ብእሴ፡ ንጉሠ። ዘገብረ፡ ከብካበ፡ ለወልዱ።
3 ወፈነወ፡ አግብርቲሁ፡ ይጸውዕዎሙ፡ ለእለ፡ ተዐሠሩ፡ ውስተ፡ ከብካብ። ወአበዩ፡ መጺአ።
4 ወዳግመ፡ ፈነወ፡ ካልኣነ፡ አግብርተ፡ እንዘ፡ ይብል። በልዎሙ፡ ለእለ፡ ዐሠርናሆሙ፡ ናሁ፡ ምሳሕየ፡ አስተዳሎኩ። ወጠባሕኩ፡ መጋዝእትየ፡ ወአስዋርየ፡ ወኵሉ፡ ድልው። ንዑ፡ ውስተ፡ ከብካብየ።
5 ወእሙንቱሰ፡ ተሀየዩ፡ ወኀለፉ። ቦ፡ ዘሖረ፡ ውስተ፡ ገራህቱ። ወቦ፡ ዘሖረ፡ ውስተ፡ ንግዱ። ወቦ፡ ዘሖረ፡ ውስተ፡ ዐጸደ፡ ወይኑ።
6 ወእለሰ፡ ተርፉ፡ አኀዝዎሙ፡ ለአግብርቲሁ፡ ወቀተልዎሙ። ወኪያሁኒ፡ ጸአልዎ።
7 ወሰሚዖ፡ ንጉሥ፡ ተምዕዐ። ወፈነወ፡ ሐራሁ፡ ይቅትልዎሙ፡ ለእልክቱ፡ ቀተልት። ወቀተልዎሙ፡ ወሀገሮሙኒ፡ አውዐዩ፡ በእሳት።
8 ወእምዝ፡ ይቤሎሙ፡ ለአግብርቲሁ። ከብካብየሰ፡ ድልው፡ ውእቱ። ወባሕቱ፡ ኢደልዎሙ፡ ለእለ፡ ዐሠርናሆሙ።
9 ሑሩኬ፡ እንከ፡ ውስተ፡ መራሕብት፡ ወአናቅጽ። ወኵሎ፡ ዘረከብክሙ፡ ጸውዑ፡ ውስተ፡ ከብካብ።
10 ወወፂኦሙ፡ እሙንቱ፡ አግብርት፡ ውስተ፡ ፍናው። አስተጋብኡ፡ ኵሎ፡ ዘረከቡ፡ እኩያነ፡ ወኄራነ። ወመልአ፡ ቤተ፡ በዓል፡ እምእለ፡ ይረፍቁ።
11 ወበዊኦ፡ ንጉሥ፡ ይርአዮሙ፡ ለእለ፡ ይረፍቁ። ረከበ፡ በህየ፡ ብእሴ፡ ዘኢለብሰ፡ ልብሰ፡ መርዓ።
12 ወይቤሎ፡ ዐርክየ፡ እፎ፡ ቦእከ፡ ዝየ፡ ዘኢለበስከ፡ ልብሰ፡ መርዓ። ወተፈፅመ፡ ውእቱ፡ ብእሲ።
13 ወእምዝ፡ አዘዞሙ፡ ንጉሥ፡ ለአግብርቲሁ፡ ይእስርዎ፡ እደዊሁ፡ ወእገሪሁ። ወያውፅእዎ፡ ወይግድፍዎ፡ ውስተ፡ ጸናፌ፡ ጽልመት። ውስተ፡ ብካይ፡ ወሐቅየ፡ ስነን።
14 እስመ፡ ብዙኃን፡ እሙንቱ፡ ጽዉዓን፡ ወኅዳጣን፡ ኅሩያን።
በእንተ፡ ዘከመ፡ ይደሉ፡ ውሂበ፡ ጸባሕት፡ ለቄሣር
15 ወእምዝ፡ ወፂኦሙ፡ ፈሪሳውያን፡ ተማከሩ፡ ላዕለ፡ እግዚእ፡ ኢየሱስ። ከመ፡ ያስሕትዎ፡ በቃሉ።
16 ወፈነዉ፡ ኀቤሁ፡ አርዳኢሆሙ፡ ምስለ፡ ሰብአ፡ ሄሮድስ። ወይቤልዎ፡ ሊቅ፡ ነአምር፡ ከመ፡ ራትዕ፡ አንተ። ወበጽድቅ፡ ትሜህር፡ ፍኖተ፡ እግዚአብሔር። ወኢተሐስብ፡ መነሂ፡ ወኢታደሉ፡ ለገጸ፡ ሰብእ።
17 ንግረነኬ፡ እንከ፡ ዘይረትዕ፡ ምንተ፡ ትብል። ይከውንሁ፡ ነሀብ፡ ጸባሕተ፡ ዲናር፡ ለቄሣር፡ ወሚመ፡ ኢይከውንሁ።
18 ወአእመሮሙ፡ እግዚእ፡ ኢየሱስ፡ እከዮሙ። ወይቤሎሙ፡ ለምንት፡ ታሜክሩኒ፡ ኦ፡ መደልዋን።
19 አርእዩኒ፡ መልክዐ፡ ዲናሩ። ወአምጽኡ፡ ሎቱ፡ ዲናረ።
20 ወይቤሎሙ፡ እግዚእ፡ ኢየሱስ፡ ዘመኑ፡ ዝንቱ፡ መልክዑ፡ ወጽሕፈቱ።
21 ወይቤልዎ፡ ዘነጋሢ። ወይቤሎሙ፡ ሀቡ፡ ዘቄሣር፡ ለቄሣር፡ ወዘእግዚአብሔር፡ ለእግዚአብሔር።
22 ወሰሚዖሙ፡ አንከሩ፡ ወኀደግዎ፡ ወኀለፉ።
በእንተ፡ ሰዱቃውያን፡ እለ፡ ይብሉ፡ አልቦ፡ ትንሣኤ፡ ምዉታን
23 ወበይእቲ፡ ዕለት፡ መጽኡ፡ ኀቤሁ፡ ሰዱቃውያን። እለ፡ ይብሉ፡ አልቦ፡ ትንሣኤ፡ ምዉታን።
24 ወተስእልዎ፡ እንዘ፡ ይብሉ። ኦ፡ ሊቅ፡ ሙሴ፡ ጸሐፈ፡ ለነ፡ እንዘ፡ ይብል። እመ፡ ቦ፡ ብእሲ፡ ዘሞተ፡ እኁሁ፡ እንዘ፡ አልቦ፡ ውሉደ። ያውስባ፡ ለብእሲተ፡ እኁሁ፡ ወያቅም፡ ዘርዕ፡ ለእኁሁ።
25 ሀለዉ፡ እንከ፡ ኀቤነ፡ ሰብዐቱ፡ አኀው። ወዘይልህቅ፡ አውሰበ፡ ወሞተ፡ እንዘ፡ አልቦ፡ ውሉደ። ወኀደገ፡ ብእሲቶ፡ ለእኁሁ።
26 ወከማሁ፡ ካዕበ፡ ካልኡኒ፡ ወሣልሱሂ፡ እስከ፡ ሰብዐቲሆሙ። ወሞቱ፡ እንዘ፡ አልቦሙ፡ ውሉድ።
27 ወድኅረ፡ ኵሎሙ፡ ሞተት፡ ይእቲ፡ ብእሲት።
28 ወአመ፡ ይትነሥኡ፡ እንከ፡ ምዉታን። ለመኑ፡ እምሰብዐቲሆሙ፡ ትከውን፡ ብእሲተ። እስመ፡ ኵሎሙ፡ አውሰብዋ።
29 ወአውሥአ፡ እግዚእ፡ ኢየሱስ፡ ወይቤሎሙ። ስሕትክሙ፡ በኢያእምሮ፡ መጻሕፍት። ወኢ፡ ኀይለ፡ እግዚአብሔር።
30 እመሰ፡ የሐይዉ፡ ምዉታን፡ ኢያወስቡ፡ ወኢይትዋሰቡ። አላ፡ ከመ፡ መላእክተ፡ እግዚአብሔር፡ በሰማያት፡ እሙንቱ።
31 ወበእንተ፡ ትንሣኤ፡ ምዉታንሰ፡ ኢያንበብክሙኑ። ዘተብህለ፡ ለክሙ፡ እምኀበ፡ እግዚአብሔር።
32 ዘይቤ፡ አነ፡ ውእቱ፡ እግዚአብሔር፡ አምላከ፡ አብርሃም። ወአምላከ፡ ይስሐቅ፡ ወአምላከ፡ ያዕቆብ። ኢኮነኬ፡ አምላከ፡ ምዉታን፡ አላ፡ አምላከ፡ ሕያዋን፡ ውእቱ።
33 ወሰሚዖሙ፡ ሕዝብ፡ አንከሩ፡ ምህሮቶ።
በእንተ፡ ጸሓፊ፡ ዘተስእሎ፡ አይ፡ ትእዛዝ፡ የዐቢ
34 ወሰሚዖሙ፡ ፈሪሳውያን፡ ከመ፡ ፈፀሞሙ፡ አፉሆሙ፡ ለሰዱቃውያን። ተጋብኡ፡ ኀቤሁ፡ ኵሎሙ፡ ኅቡረ።
35 ወተስእሎ፡ እምውስቴቶሙ፡ አሐዱ፡ ጸሓፌ፡ ሀገር፡ እንዘ፡ ያሜክሮ።
36 ወይቤሎ፡ ሊቅ፡ አይኑ፡ ትእዛዝ፡ የዐቢ፡ በውስተ፡ ኦሪት።
37 ወይቤሎ፡ እግዚእ፡ ኢየሱስ፡ አፍቅሮ፡ ለእግዚአብሔር፡ አምላክከ፡ በኵሉ፡ ልብከ። ወበኵሉ፡ ነፍስከ፡ ወበኵሉ፡ ኀይልከ፡ ወበኵሉ፡ ኅሊናከ።
38 ዛቲ፡ ትእዛዝ፡ ዐባይ፡ ወቀዳሚት።
39 ወካልእታሂ፡ እንተ፡ ትመስላ፡ አፍቅር፡ ቢጸከ፡ ከመ፡ ነፍስከ።
40 በእላ፡ ክልኤቲ፡ ትእዛዛት፡ ተሰቅሉ፡ ኵሉ፡ ኦሪት፡ ወነቢያት።
በእንተ፡ ዘከመ፡ ተስእሎሙ፡ ለፈሪሳውያን
41 ወእንዘ፡ ጉቡኣን፡ ፈሪሳውያን፡ ተስእሎሙ፡ እግዚእ፡ ኢየሱስ፡ እንዘ፡ ይብል።
42 ምንተ፡ ትብሉ፡ በእንተ፡ ክርስቶስ፡ ወልደ፡ መኑ፡ ውእቱ።
43 ወይቤልዎ፡ ወልደ፡ ዳዊት።
44 ወይቤሎሙ፡ እግዚእ፡ ኢየሱስ። እፎ፡ እንከ፡ ለሊሁ፡ ዳዊት፡ በመንፈስ፡ ቅዱስ፡ ይቤ። ይቤሎ፡ እግዚእ፡ ለእግዚእየ፡ ንበር፡ በየማንየ። እስከ፡ አገብኦሙ፡ ለጸላእትከ፡ ታሕተ፡ መከየደ፡ እገሪከ።
45 ዘለሊሁ፡ እንከ፡ ዳዊት፡ እግዚእየ፡ ይቤሎ። እፎ፡ እንከ፡ ይከውኖ፡ ወልዶ።
46 ወአልቦ፡ ዘክህለ፡ አውሥኦቶ፡ ቃለ። ወአልቦ፡ ዘተሀበለ፡ እምይእቲ፡ ዕለት፡ ይሰአሎ፡ ምንተኒ።
=== chapter 23 ===
[ምዕራፍ 23]
በእንተ፡ መደልዋን፡ ፈሪሳውያን
1 ወእምዝ፡ ነገሮሙ፡ እግዚእ፡ ኢየሱስ፡ ለሕዝብ። ወለአርዳኢሁ፡ እንዘ፡ ይብል።
2 ዲበ፡ መንበረ፡ ሙሴ፡ ነበሩ፡ ለክሙ፡ ጸሐፍት፡ ወፈሪሳውያን።
3 ኵሎ፡ ዘይቤሉክሙ፡ ግበሩ፡ ወዘመሀሩክሙ፡ ዕቀቡ። ወዘከመ፡ ምግባሮሙሰ፡ ኢትግበሩ። እስመ፡ እሙንቱ፡ ዘይሜህሩ፡ ለሰብእ፡ ኢይገብሩ።
4 ወየአስሩ፡ ጾረ፡ ዐቢየ፡ ወክቡደ፡ ወያሰክምዎ፡ ለሰብእ፡ ዲበ፡ መትከፍቱ። ወለሊሆሙሰ፡ ኢይለክፍዎ፡ በአጽባዕቶሙ፡ ጥቀ፡ ለውእቱ፡ ጾር።
5 ወኵሎ፡ ምግባሮሙ፡ ዘይገብሩ፡ ለዐይነ፡ ሰብእ፡ ይገብሩ። ወይሰፍሑ፡ ኵርበታቲሆሙ፡ ወያዐብዩ፡ አዝፋረ፡ አልባሲሆሙ።
6 ወያፈቅሩ፡ ርእሰ፡ ምርፋቃት፡ በውስተ፡ ምሳሓት። ወነቢረ፡ ፍጽም፡ በውስተ፡ አዕዋዳት።
7 ወተአምኆ፡ በውስተ፡ ምሥያጣት፡ ከመ፡ ይበሎሙ፡ ሰብእ፡ መምህራን።
8 አንትሙሰኬ፡ ኢትረስዩ፡ መምህረ፡ በዲበ፡ ምድር። እስመ፡ አሐዱ፡ ውእቱ፡ መምህርክሙ፡ ዘ፡ ውእቱ፡ ክርስቶስ። ወአንትሙሰ፡ አኀው፡ ኵልክሙ።
9 ወኢትረስዩ፡ አበ፡ በዲበ፡ ምድር። እስመ፡ አሐዱ፡ ውእቱ፡ አቡክሙ፡ ሰማያዊ።
10 ወኢትረስዩ፡ እግዚአ፡ በዲበ፡ ምድር። እስመ፡ አሐዱ፡ ውእቱ፡ እግዚአክሙ፡ ክርስቶስ።
11 ወባሕቱ፡ ዘይልህቀክሙ፡ ይኩንክሙ፡ ላእከ።
12 እስመ፡ ዘአዕበየ፡ ርእሶ፡ የኀስር፡ ወዘአትሐተ፡ ርእሶ፡ ይከብር።
በእንተ፡ አሌ፡ ሎሙ፡ ለጸሐፍት፡ ወፈሪሳውያን
13 አሌ፡ ለክሙ፡ ጸሐፍት፡ ወፈሪሳውያን፡ መደልዋን። እለ፡ ትበልዑ፡ አብያተ፡ መበለታት፡ በምክንያተ፡ አንኆ፡ ጸሎትክሙ። ወበእንተ፡ ዝንቱ፡ ትረክቡ፡ ኵነኔ፡ ፈድፋደ።
14 አሌ፡ ለክሙ፡ ጸሐፍት፡ ወፈሪሳውያን፡ መደልዋን። እስመ፡ ተዐጽዉ፡ መንግሥተ፡ ሰማያት፡ ቅድመ፡ ገጹ፡ ለሰብእ። አንትሙሂ፡ ኢትበውኡ፡ ወለእለሂ፡ ይበውኡ፡ ትከልእዎሙ፡ በዊአ።
15 አሌ፡ ለክሙ፡ ጸሐፍት፡ ወፈሪሳውያን፡ መደልዋን። እስመ፡ ተዐውዱ፡ ባሕረ፡ ወየብሰ፡ ከመ፡ ታጥምቁ፡ አሐደ፡ ፈላሴ። ወተጠሚቆ፡ ትሬስይዎ፡ ካዕበተክሙ፡ ወልደ፡ ገሃነም።
16 አሌ፡ ለክሙ፡ ጸሐፍት፡ ወፈሪሳውያን፡ አምርሕተ፡ ዕዉራን። እለ፡ ትብሉ፡ ዘመሐለ፡ በቤተ፡ መቅደስ፡ ኢይጌጊ። ወዘሰ፡ መሐለ፡ በወርቀ፡ ቤተ፡ መቅደስ፡ ይጌጊ፡ ትብሉ።
17 ኦ፡ አብዳን፡ ወዕዉራን፡ አይኑ፡ የዐቢ፡ ወርቅኑ። ወሚመ፡ ቤተ፡ መቅደስ፡ አኮኑ፡ ቤተ፡ መቅደስ፡ ዘይቄድሶ፡ ለወርቅ።
18 ወዘመሐለ፡ በምሥዋዕ፡ ኢይጌጊ፡ ትብሉ። ወዘሰ፡ መሐለ፡ በጽንሐሕ፡ ዘላዕሌሁ፡ ይጌጊ፡ ትብሉ።
19 ኦ፡ አብዳን፡ ወዕዉራን፡ አይኑ፡ የዐቢ፡ ጽንሐሕኑ፡ ወሚመ፡ መሥዋዕ። አኮኑ፡ ምሥዋዕ፡ ዘይቄድሶ፡ ለውእቱ፡ ጽንሐሕ።
20 ዘኬ፡ መሐለ፡ በምሥዋዕ፡ መሐለ፡ ቦቱ፡ ወበኵሉ፡ ዘይነብር፡ ዲቤሁ።
21 ወዘሂ፡ መሐለ፡ በቤተ፡ መቅደስ። መሐለ፡ ቦቱ፡ ወበኵሉ፡ ዘይነብር፡ ውስቴቱ።
22 ወዘሂ፡ መሐለ፡ በሰማይ፡ መሐለ፡ በመንበሩ፡ ለእግዚአብሔር፡ ወበዘይነብር፡ ዲቤሁ።
23 አሌ፡ ለክሙ፡ ጸሐፍት፡ ወፈሪሳውያን፡ መደልዋን። እለ፡ ታበውኡ፡ ዐሥራተ፡ እዴሁ፡ ለአዛብ፡ ወለሲለን፡ ወለከሙን። ወኀደግሙ፡ ዘየዐቢ፡ ትእዛዛተ፡ ኦሪት። ፍትሐ፡ ወጽድቀ፡ ወምጽዋተ፡ ወሃይማኖተ። ዘኒ፡ መፍትው፡ ትግበሩ፡ ወዝክተኒ፡ ኢትኅድጉ።
24 አምርሕተ፡ ዕዉራን፡ እለ፡ ጻጹተ፡ ትነጥፉ፡ ወገመለሰ፡ ትውኅጡ።
25 አሌ፡ ለክሙ፡ ጸሐፍት፡ ወፈሪሳውያን፡ መደልዋን። እለ፡ ተኀፅብዎሙ፡ ለጽዋዕ፡ ወለፃሕል፡ እንተ፡ አፍኣሆሙ። ወእንተ፡ ውስጦሙሰ፡ ምሉእ፡ ኀይደ፡ ወዐመፃ፡ ወትዕግልተ።
26 ኦ፡ ፈሪሳዊ፡ ዕዉር፡ ቅድመ፡ ኅፅቦ፡ ለጽዋዕ፡ ወለፃሕል። እንተ፡ ውስጡ፡ ከመ፡ ይኩን፡ ንጹሐ፡ እንተ፡ አፍኣሁኒ።
27 አሌ፡ ለክሙ፡ ጸሐፍት፡ ወፈሪሳውያን፡ መደልዋን። እለ፡ ትመስሉ፡ መቃብራተ፡ ግብሱሳነ። እለ፡ እንተ፡ አፍኣሆሙ፡ ያስተርእዩ፡ ሠናያነ። ወእንተ፡ ውስጦሙሰ፡ ምሉኣን፡ አዕጽምተ፡ ወኵሎ፡ ርኩሰ።
28 ከማሁኬ፡ አንትሙኒ፡ እንተ፡ አፍኣክሙ፡ ትጼደቁ፡ ለዐይነ፡ ሰብእ። ወእንተ፡ ውስጥክሙሰ፡ ምሉኣን፡ አንትሙ፡ ዐመፃ፡ ወኀይደ፡ ወአድልዎ።
29 አሌ፡ ለክሙ፡ ጸሐፍት፡ ወፈሪሳውያን፡ መደልዋን። እለ፡ ተሐንጹ፡ መቃብሪሆሙ፡ ለነቢያት። ወታሰረግዉ፡ ዝኅሮሙ፡ ለጻድቃን።
30 ወትብሉ፡ ሶበሰ፡ ሀለውነ፡ በመዋዕለ፡ አበዊነ። እመ፡ ኢተሳተፍነ፡ ምስሌሆሙ፡ በደመ፡ ነቢያተ።
31 ናሁኬ፡ ለሊክሙ፡ ትከውኑ፡ ስምዐ። ከመ፡ ደቂቆሙ፡ አንትሙ፡ ለቀተልተ፡ ነቢያት።
32 አንትሙሂ፡ ፈጽሙ፡ መስፈርተ፡ አበዊክሙ።
33 ኦ፡ ትውልደ፡ አራዊተ፡ ምድር። በእፎ፡ ትክሉ፡ አምስጦ፡ እምኵነኔ፡ ገሃነም።
34 ወበእንተ፡ ዝ፡ ናሁ፡ አነ፡ እፌኑ፡ ኀቤክሙ፡ ነቢያት፡ ወሐዋርያት፡ ወጠቢባን፡ ወጸሐፍተ። ቦ፡ እምኔሆሙ፡ ዘትቀትሉ፡ ወቦ፡ ዘትቀሥፉ፡ በመኳርብቲክሙ። ወትሰድድዎሙ፡ እምሀገር፡ ውስተ፡ ሀገር።
35 ከመ፡ ይብጻሕ፡ ላዕሌክሙ፡ ደመ፡ ኵሎሙ፡ ጻድቃን፡ ዘተክዕወ፡ ዲበ፡ ምድር። እምደመ፡ አቤል፡ ጻድቅ፡ እስከ፡ ደመ፡ ዘካርያስ፡ ወልደ፡ በራክዩ። ዘቀተልክምዎ፡ በማእከለ፡ ቤተ፡ መቅደስ፡ ወምሥዋዕ።
36 አማን፡ እብለክሙ፡ ከመ፡ ዝንቱ፡ ኵሉ፡ ይበጽሓ፡ ለዛቲ፡ ትውልድ።
ዘከመ፡ ኄሳ፡ ለኢየሩሳሌም
37 ኢየሩሳሌም፡ ኢየሩሳሌም፡ እንተ፡ ትቀትሎሙ፡ ለነቢያት። ወትዌግሮሙ፡ ለሐዋርያት፡ እለ፡ ተፈነዉ፡ ኀቤሃ። ሚ፡ መጠነ፡ ፈቀድኩ፡ አስተጋብኦሙ፡ ለውሉድኪ። ከመ፡ እንተ፡ ታስተጋብእ፡ ዶርሆ፡ ዕጐሊሃ፡ ታሕተ፡ ክነፊሃ፡ ወአበይክሙ።
38 ናሁ፡ ይትኀደግ፡ ለክሙ፡ ቤትክሙ፡ በድወ።
39 አማን፡ እብለክሙ፡ እምይእዜሰ፡ ኢትሬእዩኒ። እስከ፡ ሶበ፡ ትብሉ፡ ቡሩክ፡ ዘይመጽእ፡ በስመ፡ እግዚአብሔር።
=== chapter 24 ===
[ምዕራፍ 24]
በእንተ፡ ዘአቅደመ፡ ነጊረ፡ ሙስናሃ፡ ለቤተ፡ መቅደስ
1 ወወፂኦ፡ እግዚእ፡ ኢየሱስ፡ እምቤተ፡ መቅደስ፡ ሖረ። ወቀርቡ፡ አርዳኢሁ፡ ወአርአይዎ፡ ንድቀ፡ ሕንጻሁ፡ ለቤተ፡ መቅደስ።
2 ወአውሥአ፡ ወይቤሎሙ፡ ትሬእዩኑ፡ ዘንተ፡ ኵሎ። አማን፡ እብለክሙ፡ ኢይትኀደግ፡ ዝየ፡ እብን፡ ዲበ፡ እብን፡ ዘኢይትነሠት።
3 ወእንዘ፡ ይነብር፡ እግዚእነ፡ ውስተ፡ ደብረ፡ ዘይት። ቀርቡ፡ ኀቤሁ፡ አርዳኢሁ፡ ወይቤልዎ፡ እንተ፡ ባሕቲቶሙ። ንግረነ፡ ማእዜ፡ ይከውን፡ ዝንቱ። ወምንት፡ ተኣምሪሁ፡ ለምጽአትከ፡ ወለኅልቀተ፡ ዓለም።
4 ወአውሥአ፡ እግዚእ፡ ኢየሱስ፡ ወይቤሎሙ፡ ዑቁ፡ ኢያስሕቱክሙ።
5 እስመ፡ ብዙኃን፡ ይመጽኡ፡ በስምየ። እንዘ፡ ይብሉ፡ አነ፡ ውእቱ፡ ክርስቶስ። ወያስሕትዎሙ፡ ለብዙኃን።
6 ወአመ፡ ሰማዕክሙ፡ ቀትለ፡ ወድምፀ፡ ጸባኢት። ዑቁ፡ ኢትደንግፁ፡ እስመ፡ ግብር፡ ይከውን፡ ዝንቱ፡ ኵሉ። ወባሕቱ፡ አኮ፡ በጊዜሃ፡ ዘየኀልቅ።
7 ወይትነሥኡ፡ ሕዝብ፡ ዲበ፡ ሕዝብ፡ ወነገሥት፡ ላዕለ፡ ነገሥት። ወይመጽእ፡ ረኀብ፡ ወብድብድ፡ ወድልቅልቅ፡ ወሀከክ፡ በበ፡ ብሔሩ።
8 ወዝንቱ፡ ኵሉ፡ ቀዳሚሁ፡ ለሕማም።
9 አሜሃ፡ ይትባጽሑክሙ፡ ወይሜጥዉክሙ፡ ለምንዳቤ። ወይቀሥፉክሙ፡ ወይቀትሉክሙ፡ ወይጸልኡክሙ። ወትከውኑ፡ ጽሉኣነ፡ በኀበ፡ ኵሉ፡ ሰብእ፡ በእንተ፡ ስምየ።
10 ወአሜሃ፡ የዐልዉ፡ ብዙኃን፡ ሃይማኖቶሙ። ወይጻልኡ፡ በበይናቲሆሙ፡ ወይትቃተሉ።
11 ወይትነሥኡ፡ ብዙኃን፡ ሐሳውያነ፡ ነቢያት፡ ወለብዙኃን፡ ያስሕትዎሙ።
12 ወእምብዝኀ፡ ዐመፃ፡ ወእከይ፡ ትሴኵስ፡ ፍቅር፡ እምብዙኃን። ወብዙኃን፡ የዐልዉ፡ ሃይማኖቶሙ፡ ወፍቅሮሙ።
13 ወዘሰ፡ አዝለፈ፡ ትዕግሥቶ፡ ውእቱ፡ ይድኅን።
14 ወይሰበክ፡ ዝ፡ ወንጌለ፡ መንግሥት፡ ውስተ፡ ኵሉ፡ ዓለም። ከመ፡ ይኩን፡ ስምዐ፡ ላዕለ፡ ኵሉ፡ አሕዛብ። ወይእተ፡ አሚረ፡ ይበጽሕ፡ ኅልቀት።
15 ወእምከመ፡ ርኢክሙ፡ ትእምርተ፡ ርኩስ፡ ዘምዝባሬ። ዘተብህለ፡ በዳንኤል፡ ነቢይ። ወይቀውም፡ ውስተ፡ መካን፡ ቅዱስ፡ ዘያነብብ፡ ለይለቡ።
16 አሜሃ፡ እለ፡ ውስተ፡ ይሁዳ፡ ይጐዩ፡ ውስተ፡ አድባር።
17 ወዘሂ፡ ሀሎ፡ ውስተ፡ ናሕስ፡ ኢይረድ፡ ይንሣእ፡ ዘውስተ፡ ቤቱ።
18 ወዘሂ፡ ገዳመ፡ ሀሎ፡ ኢይትመየጥ፡ ድኅሬሁ፡ ይንሣእ፡ ልብሶ።
19 ወባሕቱ፡ አሌ፡ ሎን፡ ለፅኑሳት። ወለእለ፡ የሐፅና፡ በውእቱ፡ መዋዕል።
20 ወጸልዩ፡ ባሕቱ፡ ከመ፡ ኢይኩን፡ ጕያክሙ፡ በክረምት፡ ወበሰንበት።
21 እስመ፡ ይከውን፡ ይእተ፡ አሚረ፡ ዐቢይ፡ ሕማም፡ ወምንዳቤ። ዘኢኮነ፡ ከማሁ፡ እምአመ፡ ተፈጥረ፡ ዓለም፡ እስከ፡ ዮም፡ ወኢይከውንሂ።
22 ወሶበ፡ አኮ፡ ዘአሐጸሮን፡ ለእማንቱ፡ መዋዕል። እምኢድኅነ፡ መኑሂ፡ ኵሉ፡ ዘሥጋ። ወባሕቱ፡ በእንተ፡ ኅሩያኒሁ፡ የሐጽራ፡ እማንቱ፡ መዋዕል።
23 አሜሃ፡ እመ፡ ቦ፡ ዘይቤለክሙ፡ ነዋ፡ ዝየ፡ ሀሎ፡ ክርስቶስ። ወነዋ፡ ከሃክ፡ ኢትእመኑ።
24 እስመ፡ ይመጽኡ፡ ሐሳውያነ፡ መሲሕ፡ ወሐሳውያነ፡ ነቢያት። ወይገብሩ፡ ተኣምራተ፡ ወመንክራተ፡ ዐበይተ፡ ለአስሕቶ። ሶበሰ፡ ይትከሀሎሙ፡ ለኅሩያንሂ፡ እምአስሐትዎሙ።
25 ናሁ፡ አቅደምኩ፡ ነጊሮተክሙ።
26 እመ፡ ቦ፡ ዘይቤለክሙ፡ ነዋ፡ ገዳመ፡ ሀሎ፡ ኢትፃኡ። ወነዋ፡ ውስተ፡ አብያት፡ ኢትእመኑ።
27 እስመ፡ ከመ፡ መብረቅ፡ ዘይወፅእ፡ እምጽባሕ፡ ወያስተርኢ፡ እስከ፡ ዐረብ። ከማሁኬ፡ ይከውን፡ ምጽአቱ፡ ለወልደ፡ ዕጓለ፡ እመሕያው።
28 ኀበ፡ ሀሎ፡ ገደላ፡ ህየ፡ ይትጋብኡ፡ አንስርት።
በእንተ፡ ካልኣዊት፡ ምጽአት፡ ዘወልደ፡ ዕጓለ፡ እመሕያው
29 ወእምድኅረ፡ ሕማሞን፡ ለእማንቱ፡ መዋዕል። ፀሓይኒ፡ ይጸልም፡ ወወርኅኒ፡ ኢይሁብ፡ ብርሃኖ። ወከዋክብትኒ፡ ይወድቁ፡ እምሰማይ፡ ወያንቀለቅል፡ ኀይለ፡ ሰማያት።
30 ወይእተ፡ አሚረ፡ ያስተርኢ፡ ተኣምሪሁ፡ ለወልደ፡ ዕጓለ፡ እመሕያው፡ በሰማይ። አሜሃ፡ ይበክዩ፡ ኵሎሙ፡ አሕዛበ፡ ምድር። ሶበ፡ ይሬእይዎ፡ ለወልደ፡ ዕጓለ፡ እመሕያው። እንዘ፡ ይመጽእ፡ በደመና፡ ሰማይ፡ ምስለ፡ ኀይል፡ ወስብሐት፡ ብዙኅ።
31 ወይፌንዎሙ፡ ለመላእክቲሁ፡ ምስለ፡ ቃለ፡ ቀርን፡ ወስብሐት፡ ዐቢይ። ወያስተጋብእዎሙ፡ ለኅሩያኒሁ፡ እምአርባዕቱ፡ ነፋሳት። እምአጽናፈ፡ ሰማይ፡ እስከ፡ አጽናፊሃ።
32 ወእምበለስ፡ አእምሩ፡ አምሳሊሁ። እምከመ፡ ለምለመ፡ አዕፁቂሁ፡ ወሠረጸ፡ ቈጽሉ። ተአምሩ፡ ከመ፡ ቀርበ፡ ማእረር።
33 ከማሁኬ፡ አንትሙሂ፡ እምከመ፡ ርኢክሙ፡ ዘንተ፡ ኵሎ። አእምሩ፡ ከመ፡ ቀርበ፡ ወበጽሐ፡ ኀበ፡ ኆኅት።
34 አማን፡ እብለክሙ፡ ከመ፡ ኢተኀልፍ፡ ዛቲ፡ ትውልድ። እስከ፡ ዝ፡ ኵሉ፡ ይትገበር።
35 ሰማይ፡ ወምድር፡ የኀልፍ፡ ወቃልየሰ፡ ኢየኀልፍ።
በእንተ፡ ሰዓት፡ ወዕለት
36 ወበእንተሰ፡ ይእቲ፡ ዕለት፡ ወይእቲ፡ ሰዓት፡ አልቦ፡ ዘየአምራ። ኢ፡ መላእክተ፡ ሰማይ፡ ወኢ፡ ወልድ፡ ዘእንበለ፡ አብ፡ ባሕቲቱ።
37 ወበከመ፡ ኮነ፡ በመዋዕሊሁ፡ ለኖኅ። ከማሁ፡ ይከውን፡ ምጽአቱ፡ ለወልደ፡ ዕጓለ፡ እመሕያው።
38 እስመ፡ በከመ፡ ኮነ፡ በመዋዕለ፡ ኖኅ፡ እምቅድመ፡ ማየ፡ አይኅ። ይበልዑ፡ ወይሰትዩ፡ ያወስቡ፡ ወይትዋሰቡ። እስከ፡ አመ፡ ቦአ፡ ኖኅ፡ ውስተ፡ ንፍቀ፡ ታቦት።
39 ወኢያእመሩ፡ እስከ፡ አመ፡ መጽአ፡ ማየ፡ አይኅ፡ ወአጥፍአ፡ ኵሎ። ከማሁኬ፡ ይከውን፡ ምጽአቱ፡ ለወልደ፡ ዕጓለ፡ እመሕያው።
40 አሜሃ፡ ክልኤቱ፡ ይሄልዉ፡ ውስተ፡ አሐዱ፡ ገራህት። አሐደ፡ ይነሥኡ፡ ወካልኦ፡ የኀድጉ።
41 ወክልኤቲ፡ የሐርጻ፡ በአሐቲ፡ ማሕረጽ። አሐተ፡ ይነሥኡ፡ ወካልእታ፡ የኀድጉ። ወክልኤቱ፡ ይሰክቡ፡ ውስተ፡ አሐዱ፡ ዐራት። አሐደ፡ ይነሥኡ፡ ወካልኦ፡ የኀድጉ።
42 ትግሁ፡ እንከ፡ እስመ፡ ኢተአምሩ፡ በአይ፡ ሰዓት፡ ይመጽእ፡ እግዚእክሙ።
43 ወዘንተ፡ ባሕቱ፡ አእምሩ። ሶበሁ፡ የአምር፡ በዓለ፡ ቤት፡ ጊዜ፡ ይመጽእ፡ ሰራቂ፡ እምተግሀ። ወእምሀለወ፡ ወእምኢኀደገ፡ ይክርዩ፡ ቤቶ።
44 ከማሁ፡ አንትሙሂ፡ ድልዋኒክሙ፡ ሀልዉ። እስመ፡ በጊዜ፡ ኢተሐዘብክሙ፡ ይመጽእ፡ ወልደ፡ ዕጓለ፡ እመሕያው።
45 መኑ፡ እንጋ፡ ገብር፡ ምእመን፡ ወጠቢብ። ዘይሠይሞ፡ እግዚኡ፡ ውስተ፡ ኵሉ፡ ቤቱ። ከመ፡ የሀቦሙ፡ ሲሳዮሙ፡ በጊዜሁ።
46 ብፁዕ፡ ውእቱ፡ ገብር፡ ዘመጺኦ፡ እግዚኡ። ይረክቦ፡ እንዘ፡ ዘንተ፡ ይገብር።
47 አማን፡ እብለክሙ፡ ከመ፡ ዲበ፡ ኵሉ፡ ንዋዩ፡ ይሠይሞ።
48 ወእመሰ፡ ይቤ፡ ውእቱ፡ ገብር፡ እኩይ፡ በልቡ። ይጐነዲ፡ አቲወ፡ እግዚእየ።
49 ወይዘብጥ፡ አብያጺሁ፡ አግብርተ። ይበልዕ፡ ወይሰቲ፡ ምስለ፡ ሰካርያን።
50 ወይመጽእ፡ እግዚኡ፡ ለውእቱ፡ ገብር። በዕለተ፡ ኢተሐዘበ፡ ወበጊዜ፡ ኢያእመረ። ወይሠጥቆ፡ እማእከሉ።
51 ወይሬሲ፡ መክፈልቶ፡ ምስለ፡ መደልዋን። ኀበ፡ ሀሎ፡ ብካይ፡ ወሐቅየ፡ ስነን።
=== chapter 25 ===
[ምዕራፍ 25]
በእንተ፡ ዐሥሩ፡ ደናግል
1 አሜሃ፡ ትመስል፡ መንግሥተ፡ ሰማያት፡ ዐሥሮን፡ ደናግለ። እለ፡ ነሥኣ፡ መኃትዊሆን፡ ወወፅኣ፡ ውስተ፡ ቀበላ፡ መርዓዊ።
2 ወኀምስ፡ እምውስቴቶን፡ አብዳት፡ እማንቱ፡ ወኀምስ፡ ጠባባት።
3 ወአብዳትሰ፡ ነሢኦን፡ መኃትዊሆን፡ ኢነሥኣ፡ ቅብዐ፡ ምስሌሆን።
4 ወጠባባትሰ፡ ነሥኣ፡ ቅብዐ፡ በገማዕዊሆን፡ ምስለ፡ መኃትዊሆን።
5 ወጐንድዮ፡ መርዓዊ፡ ደቀሳ፡ ኵሎን፡ ወኖማ።
6 ወከዊኖ፡ መንፈቀ፡ ሌሊት፡ ውውዐ፡ ኮነ። ናሁ፡ መርዓዊ፡ መጽአ፡ ፃኡ፡ ውስተ፡ ቀበላሁ።
7 ወእምዝ፡ ነቅሓ፡ እልኩ፡ ደናግል፡ ኵሎን። ወአሠነያ፡ መኃትዊሆን፡ ወወፅኣ፡ ለቀበላ፡ መርዓዊ።
8 ወእልኩ፡ አብዳት፡ ይቤላሆን፡ ለጠባባት። ሀባነ፡ ቅብዐ፡ እምቅብዕክን፡ እስመ፡ መኃትዊነ፡ ጠፍአነ።
9 ወአውሥኣሆን፡ ጠባባት፡ ወይቤላሆን፡ አልቦ፡ ዘየአክል፡ ለነ፡ ወለክን። አላ፡ ሑራ፡ እምኀበ፡ እለ፡ ይሠይጡ፡ ወተሣየጣ፡ ለክን።
10 ወሐዊሮን፡ ይሣየጣ፡ በጽሐ፡ መርዓዊ። ወቦአ፡ ምስሌሁ፡ እልኩ፡ ድልዋት፡ ውስተ፡ ከብካብ፡ ወተዐጽወ፡ ኆኅት።
11 ወድኅረ፡ መጽኣ፡ እልክቱሂ፡ ደናግል። ወይቤላ፡ እግዚኦ፡ እግዚኦ፡ አርኅወነ።
12 ወአውሥኦን፡ ወይቤሎን፡ አማን፡ እብለክን። ከመ፡ ኢየአምረክን፡ እስመ፡ ስእንክን፡ ተጊሀ፡ ወአምስዮ፡ ምስሌየ።
13 ትግሁኬ፡ እስመ፡ ኢተአምሩ፡ ዕለታ፡ ወሰዓታ። እንተ፡ ባቲ፡ ይመጽእ፡ ወልደ፡ ዕጓለ፡ እመሕያው።
በእንተ፡ እለ፡ ነሥኡ፡ መካልየ፡ ብሩር
14 እስመ፡ ከመ፡ ብእሲ፡ ዘይነግድ፡ ወጸውዐ፡ አግብርቲሁ። ወወሀቦሙ፡ ንዋዮ፡ ይትገበሩ፡ ቦቱ።
15 ቦ፡ ለዘወሀቦ፡ ኀምስተ፡ መክሊተ። ወቦ፡ ለዘወሀቦ፡ ክልኤተ፡ መክሊተ። ወቦ፡ ለዘወሀቦ፡ አሐደ፡ መክሊተ። ወለለ፡ አሐዱ፡ እምኔሆሙ፡ በአምጣነ፡ ይክሉ፡ ወሀቦሙ፡ ወነገደ፡ በጊዜሃ።
16 ወሖረ፡ ዝኩ፡ ዘኀምሰ፡ መካልየ፡ ነሥአ፡ ወተገበረ፡ ቦቶን። ወረብሐ፡ ካልኣተ፡ ኀምስተ፡ መካልየ።
17 ወከማሁ፡ ዘሂ፡ ክልኤተ፡ መካልየ፡ ነሥአ፡ ረብሐ፡ ካልኣተ፡ ክልኤተ፡ መካልየ።
18 ወዘአሐተሰ፡ መክሊተ፡ ነሥአ፡ ሖረ፡ ወከረየ፡ ምድረ። ወኀብአ፡ ወርቀ፡ እግዚኡ።
19 ወእምድኅረ፡ ብዙኅ፡ መዋዕል፡ አተወ፡ እግዚኦሙ፡ ለእሉ፡ አግብርት። ወአኀዘ፡ ይትሐሰቦሙ።
20 ወቀርበ፡ ዘኀምሰ፡ መካልየ፡ ነሥአ፡ ወአምጽአ፡ ካልኣተ፡ ኀምሰ፡ መካልየ። እንዘ፡ ይብል፡ አኮኑ፡ እግዚኦ፡ ኀምሰ፡ መካልየ፡ ወሀብከኒ። ወናሁ፡ ኀምስ፡ መካልየ፡ እለ፡ ረባሕኩ፡ ዲቤሆን።
21 ወይቤሎ፡ እግዚኡ፡ ኦ፡ ገብር፡ ኄር፡ ወምእመን። ዘበውኁድ፡ ምእመነ፡ ኮንከ፡ ዲበ፡ ብዙኅ፡ እሠይመከ። ባእ፡ ውስተ፡ ፍሥሓሁ፡ ለእግዚእከ።
22 ወመጽአ፡ ዘክልኤተ፡ መክሊተ፡ ነሥአ፡ ወይቤ። እግዚኦ፡ አኮሁ፡ ክልኤተ፡ መካልየ፡ ወሀብከኒ። ወናሁ፡ ክልኤተ፡ ካልኣተ፡ መካልየ፡ እለ፡ ረባሕኩ፡ ዲቤሆን።
23 ወይቤሎ፡ እግዚኡ፡ ኦ፡ ገብር፡ ኄር፡ ወምእመን። ዘበውኁድ፡ ምእመነ፡ ኮንከ፡ ዲበ፡ ብዙኅ፡ እሠይመከ። ባእ፡ ውስተ፡ ፍሥሓሁ፡ ለእግዚእከ።
24 ወመጽአ፡ ዘአሐተኒ፡ መክሊተ፡ ነሥአ፡ ወይቤ። እግዚኦ፡ ኣአምረከ፡ ከመ፡ ድሩክ፡ ብእሲ፡ አንተ። ተአርር፡ እምኀበ፡ ኢዘራዕከ፡ ወታስተጋብእ፡ እምኀበ፡ ኢዘረውከ።
25 ወፈሪህየ፡ ሖርኩ፡ ወከረይኩ፡ ምድረ። ወኀባእኩ፡ መክሊተከ፡ ውስተ፡ ምድር። ናሁ፡ እንከ፡ መክሊተከ።
26 ወአውሥኦ፡ እግዚኡ፡ ወይቤሎ፡ ኦ፡ ገብር፡ ሀካይ፡ ወእኩይ። ተአምረኒኑ፡ ከመ፡ ድሩክ፡ ብእሲ፡ አነ። ኣአርር፡ እምኀበ፡ ኢዘራዕኩ፡ ወአስተጋብእ፡ እምኀበ፡ ኢዘረውኩ።
27 እምደለወከ፡ ታግብእ፡ ወርቅየ፡ ውስተ፡ ማእድየ። ወመጺእየ፡ እምአስተገበርክዎ፡ ለልየ፡ በርዴ።
28 ወይቤሎሙ፡ ለእለ፡ ይቀውሙ፡ ህየ። ንሥኡ፡ እምኔሁ፡ ዘንተ፡ መክሊተ። ወሀብዎ፡ ለዘቦቱ፡ ዐሠርቱ፡ መክሊት።
29 እስመ፡ ለዘቦ፡ ይሁብዎ፡ ወይዌስክዎ። ወለዘሰ፡ አልቦ፡ እለሂ፡ ቦ፡ የሀይድዎ።
30 ወለገብርሰ፡ እኩይ፡ ወሀካይ፡ አውፅእዎ፡ አፍኣ። ወደይዎ፡ ውስተ፡ ጸናፌ፡ ጽልመት። ኀበ፡ ሀሎ፡ ብካይ፡ ወሐቅየ፡ ስነን።
በእንተ፡ ምጽአቱ፡ ለክርስቶስ
31 ወአመ፡ ይመጽእ፡ ወልደ፡ ዕጓለ፡ እመሕያው፡ በስብሐቲሁ። ወኵሎሙ፡ መላእክቲሁ፡ ቅዱሳን፡ ምስሌሁ። አሜሃ፡ ይነብር፡ ዲበ፡ መንበረ፡ ስብሐቲሁ።
32 ወይትጋብኡ፡ ኵሎሙ፡ አሕዛብ፡ ቅድሜሁ። ወይፈልጦሙ፡ ዘዘ፡ ዚኣሆሙ። ከመ፡ እንተ፡ ይፈልጥ፡ ኖላዊ፡ አባግዐ፡ እምአጣሊ።
33 ወያቀውም፡ አባግዐ፡ በየማኑ፡ ወአጣሌ፡ በጸጋሙ።
34 አሜሃ፡ ይብሎሙ፡ ንጉሥ፡ ለእለ፡ በየማኑ። ንዑ፡ ኀቤየ፡ ቡሩካኑ፡ ለአቡየ፡ ትረሱ፡ መንግሥተ፡ ሰማያት። ዘድልው፡ ለክሙ፡ እምቅድመ፡ ይትፈጠር፡ ዓለም።
35 እስመ፡ ርኅብኩ፡ ወአብላዕክሙኒ። ጸማእኩ፡ ወአስተይክሙኒ። ነግደ፡ ኮንኩ፡ ወተወከፍክሙኒ።
36 ዐረቁ፡ ወአልበስክሙኒ። ደወይኩ፡ ወሐወጽክሙኒ። ተሞቃሕኩ፡ ወመጻእክሙ፡ ኀቤየ፡ ወነበብክሙኒ።
37 አሜሃ፡ ያወሥኡ፡ ጻድቃን፡ ወይብሉ። እግዚኦ፡ ማእዜኑ፡ ርኢናከ። ርኁበከ፡ ወአብላዕናከ፡ ወጽሙአከ፡ ወአስተይናከ።
38 ወማእዜ፡ ርኢናከ፡ እንግዳከ፡ ወተወከፍናከ። ወዕሩቀከ፡ ወአልበስናከ።
39 ወድውየከኒ፡ ወሐወጽናከ። ወሙቁሐከኒ፡ ወመጻእነ፡ ኀቤከ፡ ወነበብናከ።
40 ወእምዝ፡ ያወሥኦሙ፡ ንጉሥ፡ ለእለ፡ በየማኑ፡ ወይብሎሙ። አማን፡ እብለክሙ፡ ኵሎ፡ ዘገበርክሙ። ለአሐዱ፡ እምእሉ፡ ንኡሳን፡ አኀውየ፡ እለ፡ የአምኑ፡ ብየ፡ ሊተ፡ ገበርክሙ።
41 ወእምዝ፡ ይብሎሙ፡ ለእለ፡ በጸጋሙ። ሑሩ፡ እምኔየ፡ ርጉማን፡ ውስተ፡ እሳት፡ ዘለዓለም። ዘድልው፡ ለሰይጣን፡ ወለመላእክቲሁ።
42 እስመ፡ ርኅብኩ፡ ወኢያብላዕክሙኒ። ጸማእኩ፡ ወኢያስተይክሙኒ።
43 ነግደ፡ ኮንኩ፡ ወኢተወከፍክሙኒ። ዐረቁ፡ ወኢያልበስክሙኒ። ደወይኩ፡ ወኢሐወጽክሙኒ። ተሞቃሕኩ፡ ወኢመጻእክሙ፡ ኀቤየ፡ ወኢነበብክሙኒ።
44 አሜሃ፡ ያወሥኡ፡ እለ፡ በጸጋሙ፡ ወይብሉ፡ እግዚኦ፡ ማእዜ፡ ርኢናከ። ርኁበከ፡ ወኢያብላዕናከ። ወማእዜ፡ ርኢናከ፡ ጽሙአከ፡ ወኢያስተይናከ። ወእንግዳከ፡ ወኢተወከፍናከ። ወዕሩቀከ፡ ወኢያልበስናከ። ወድውየከኒ፡ ወኢሐወጽናከ። ወሙቁሐከኒ፡ ወኢነበብናከ።
45 ወእምዝ፡ ያወሥኦሙ፡ ንጉሥ፡ እንዘ፡ ይብል። አማን፡ እብለክሙ፡ አማን፡ እብለክሙ። ዘኢገበርክሙ፡ ለአሐዱ፡ እምእሉ፡ ንኡሳን፡ አኀውየ፡ ሊተ፡ ኢገበርክሙ።
46 ወየሐውሩ፡ እሉሂ፡ ውስተ፡ ኵነኔ፡ ዘለዓለም። ወጻድቃንሰ፡ ውስተ፡ ሕይወት፡ ዘለዓለም።
=== chapter 26 ===
[ምዕራፍ 26]
በእንተ፡ ምክረ፡ አይሁድ
1 ወሶበ፡ ፈጸመ፡ እግዚእ፡ ኢየሱስ፡ ዘንተ፡ ኵሎ፡ ነገረ። ይቤሎሙ፡ ለአርዳኢሁ።
2 ተአምሩሁ፡ ከመ፡ እምድኅረ፡ ክልኤ፡ መዋዕል፡ ይከውን፡ ፋሲካ። ወይእኅዝዎ፡ ለወልደ፡ ዕጓለ፡ እመሕያው፡ ወይሰቅልዎ።
3 ወእምዝ፡ ተጋብኡ፡ ሊቃነ፡ ካህናት፡ ወጸሐፍት፡ ወሊቃናተ፡ ሕዝብ። ውስተ፡ ዐጸደ፡ ሊቀ፡ ካህናት፡ ዘስመ፡ ቀያፋ።
4 ወተማከሩ፡ ከመ፡ በሕብል፡ የአኀዝዎ፡ ለእግዚእ፡ ኢየሱስ፡ ወይቅትልዎ።
5 ወይቤሉ፡ ባሕቱ፡ አኮኬ፡ በበዓል። ከመ፡ ኢይኩን፡ ሀከክ፡ በውስተ፡ ሕዝብ።
በእንተ፡ እንተ፡ ቀብዐቶ፡ ለእግዚእነ፡ ዕፍረተ
6 ወበጺሖ፡ እግዚእ፡ ኢየሱስ፡ ቢታንያ። ቦአ፡ ቤተ፡ ስምዖን፡ ዘለምጽ።
7 ወመጽአት፡ ኀቤሁ፡ ብእሲት። እንተ፡ ባቲ፡ ቢረሌ፡ ዘምሉእ፡ ዕፍረተ፡ ዘአልባስጥሮስ፡ ዘብዙኅ፡ ሤጡ። ወሦጠት፡ ዲበ፡ ርእሱ፡ ለእግዚእ፡ ኢየሱስ፡ እንዘ፡ ይረፍቅ።
8 ወርእዮሙ፡ ዘንተ፡ አርዳኢሁ፡ ተምዕዑ፡ ወአንጐርጐሩ፡ ወይቤሉ። ለምንት፡ ዘመጠነ፡ ዝ፡ ዕፍረት፡ አህጐለት፡ ዛቲ፡ ብእሲት።
9 እምኢተሠይጠኑ፡ ለብዙኅ፡ ንዋይ፡ ወየሀብዎ፡ ምጽዋተ፡ ለነዳያን።
10 ወአእመሮሙ፡ እግዚእ፡ ኢየሱስ፡ ወይቤሎሙ። ለምንት፡ ታሠርሕዋ፡ ለዛቲ፡ ብእሲት። ሠናየ፡ ግብረ፡ ገብረት፡ ላዕሌየ።
11 ወለነዳያንሰ፡ ዘልፈ፡ ትረክብዎሙ፡ ወጊዜ፡ ፈቀድክሙ፡ ታሤንዩ፡ ሎሙ። ወኪያየሰ፡ አኮ፡ ዘልፈ፡ ዘትረክቡኒ።
12 ወዘንተሰ፡ ዕፍረተ፡ ዘሦጠት፡ ዲበ፡ ርእስየ፡ ለቀበርየ፡ ገብረት።
13 አማን፡ እብለክሙ፡ በኀበ፡ ሰበክዋ፡ ለዛቲ፡ ወንጌል፡ በውስተ፡ ኵሉ፡ ዓለም። ያንብቡ፡ ላቲ፡ ዘገብረት፡ ዛቲ፡ ብእሲት፡ ወይዝክርዋ።
በእንተ፡ ይሁዳ፡ አስቆሮታዊ
14 ወእምዝ፡ ሖረ፡ አሐዱ፡ እምዐሠርቱ፡ ወክልኤቱ፡ አርዳኢሁ። ዘስሙ፡ ይሁዳ፡ አስቆሮታዊ፡ ኀበ፡ ሊቃነ፡ ካህናት።
15 ወይቤሎሙ፡ ሚ፡ መጠነ፡ ትሁቡኒ፡ እመ፡ አገብኦ፡ ለክሙ። ወተናገሩ፡ ምስሌሁ፡ ወተሰናአዉ፡ የሀብዎ፡ ሠላሳ፡ ብሩረ።
16 ወእምይእቲ፡ ዕለት፡ ኮነ፡ የኀሥሥ፡ ሣሕተ፡ ከመ፡ ያግብኦ፡ ሎሙ።
በእንተ፡ ዘከመ፡ ይደልዎሙ፡ በኀበ፡ ያስተዳልዉ፡ ሎቱ፡ ፍሥሐ
17 ወበቀዳሚት፡ ዕለተ፡ ፍሥሕ፡ ቀርቡ፡ አርዳኢሁ፡ ለእግዚእ፡ ኢየሱስ። ወይቤልዎ፡ በአይቴ፡ ትፈቅድ፡ ናስተዳሉ፡ ለከ፡ ትብላዕ፡ ፍሥሐ።
18 ወይቤሎሙ፡ እግዚእ፡ ኢየሱስ። ሑሩ፡ ኀበ፡ እገሌ፡ ወበልዎ፡ ለበዓለ፡ ውእቱ፡ ቤት። ይቤለከ፡ ሊቅ፡ ጊዜየ፡ ቀርበ። ወበኀቤከ፡ እገብር፡ ፋሲካ፡ ምስለ፡ አርዳእየ።
19 ወገብሩ፡ አርዳኢሁ፡ በከመ፡ አዘዞሙ፡ እግዚእ፡ ኢየሱስ። ወአስተዳለዉ፡ ሎቱ፡ ፍሥሐ።
በእንተ፡ ዘከመ፡ ከሠተ፡ ሎሙ፡ ዘያገብኦ
20 ወምሴተ፡ ከዊኖ፡ ረፈቀ፡ ምስለ፡ ዐሠርቱ፡ ወክልኤቱ፡ አርዳኢሁ።
21 ወእንዘ፡ ይበልዑ፡ ይቤሎሙ። አማን፡ እብለክሙ፡ ከመ፡ አሐዱ፡ እምኔክሙ፡ ያገብአኒ።
22 ወተከዙ፡ ጥቀ፡ ወአኀዙ፡ ይበሉ፡ በበ፡ አሐዱ። አነኑ፡ እንጋ፡ እግዚኦ።
23 ወአውሥአ፡ ወይቤሎሙ፡ ዘያወርድ፡ እዴሁ፡ ምስሌየ፡ ውስተ፡ መጽብሕየ። ውእቱ፡ ያገብአኒ።
24 ወወልደ፡ ዕጓለ፡ እመሕያውሰ፡ የሐውር፡ በከመ፡ ተሠርዐ፡ በእንቲኣሁ። ወባሕቱ፡ አሌ፡ ሎቱ፡ ለውእቱ፡ ብእሲ፡ ዘያገብኦ፡ ለወልደ፡ ዕጓለ፡ እመሕያው። እምኀየሶ፡ ሶበ፡ ኢተወልደ፡ ለውእቱ፡ ብእሲ።
25 ወአውሥአ፡ ይሁዳ፡ ዘያገብኦ፡ ወይቤ። አነኑ፡ እንጋ፡ ረቢ። ወይቤሎ፡ እግዚእ፡ ኢየሱስ፡ አንተ፡ ትቤ።
በእንተ፡ ሥርዐተ፡ ምሥጢር
26 ወእንዘ፡ ይበልዑ፡ ነሥአ፡ ኅብስተ፡ እግዚእ፡ ኢየሱስ። ባረከ፡ ወፈተተ፡ ወወሀቦሙ፡ ለአርዳኢሁ፡ ወይቤሎሙ። እንክሙ፡ ብልዑ፡ ዝ፡ ውእቱ፡ ሥጋየ።
27 ወነሥአ፡ ጽዋዐኒ፡ ወአእኰተ፡ ወወሀቦሙ። እንዘ፡ ይብል፡ ስትዩ፡ እምኔሁ፡ ኵልክሙ።
28 ዝ፡ ውእቱ፡ ደምየ፡ ዘሐዲስ፡ ሥርዐት። ዘይትከዐው፡ በእንተ፡ ብዙኃን፡ ለኅድገተ፡ ኀጢአት።
29 ወናሁ፡ እብለክሙ፡ ኢይሰቲ፡ እንከ፡ እምይእዜ፡ እምዝንቱ፡ አጺረ፡ ፍሬ፡ ወይን። እስከ፡ እንታክቲ፡ ዕለት፡ አመ፡ እሰትዮ፡ ሐዲሰ፡ ምስሌክሙ፡ በመንግሥተ፡ አቡየ።
30 አንቢቦሙ፡ ወሰቢሖሙ፡ ወፅኡ፡ ወሖሩ፡ ውስተ፡ ደብረ፡ ዘይት።
በእንተ፡ ቅትለተ፡ ኖላዊ፡ ወተዘርዎተ፡ አባግዕ
31 ወእምዝ፡ ይቤሎሙ፡ እግዚእ፡ ኢየሱስ። ኵልክሙ፡ ትክሕዱኒ፡ በዛቲ፡ ሌሊት። እስመ፡ ይቤ፡ መጽሐፍ፡ እቀትሎ፡ ለኖላዊ። ወይዘረዉ፡ አባግዐ፡ መርዔቱ።
32 ወእምድኅረ፡ ተንሣእኩ፡ እቀድመክሙ፡ ገሊላ።
33 ወአውሥአ፡ ጴጥሮስ፡ ወይቤሎ። እመሂ፡ ኵሎሙ፡ ክሕዱከ፡ አንሰ፡ ኢይክሕደከ፡ ግሙራ።
34 ወይቤሎ፡ እግዚእ፡ ኢየሱስ፡ አማን፡ እብለከ። ከመ፡ በዛቲ፡ ሌሊት፡ ሥልሰ፡ ትክሕደኒ፡ ዘእንበለ፡ ይንቁ፡ ዶርሆ።
35 ወይቤሎ፡ ጴጥሮስ፡ እመውትሂ፡ ምስሌከ፡ ወኢይክሕደከ። ወከማሁ፡ ይቤሉ፡ ኵሎሙ፡ አርዳኢሁ።
ዘከመ፡ ጸለየ፡ እግዚእ፡ ኢየሱስ፡ በጌቴሴማን
36 ወእምዝ፡ ሖረ፡ ምስሌሆሙ፡ ውስተ፡ ዐጸደ፡ ወይን፡ ዘስሙ፡ ጌቴሴማን። ወይቤሎሙ፡ ለአርዳኢሁ፡ ንበሩ፡ ዝየ፡ እስከ፡ ሶበ፡ አሐውር፡ ከሃ፡ ወእጸሊ።
37 ወነሥኦሙ፡ ምስሌሁ፡ ለጴጥሮስ፡ ወለክልኤቱ፡ ደቂቀ፡ ዘብዴዎስ። ወአኀዘ፡ ይተክዝ፡ ወይሕዝን።
38 ወእምዝ፡ ይቤሎሙ፡ ተከዘት፡ ነፍስየ፡ እስከ፡ ለሞት። ንበሩ፡ ዝየ፡ ወትግሁ፡ ምስሌየ፡ ወኢትኑሙ።
39 ወተአተተ፡ ሕቀ፡ እምኔሆሙ፡ ወሰገደ፡ በገጹ። ወጸለየ፡ ወይቤ፡ አቡየ፡ እመሰ፡ ይትከሀል፡ ይኅልፍ፡ እምኔየ፡ ዝንቱ፡ ጽዋዕ። ወባሕቱ፡ ፈቃደ፡ ዚኣከ፡ ይኩን፡ ወአኮ፡ ፈቃድ፡ ዚኣየ።
40 ወሖረ፡ ኀበ፡ አርዳኢሁ፡ ወረከቦሙ፡ እንዘ፡ ይነውሙ። ወይቤሎ፡ ለጴጥሮስ፡ ከመ፡ ዝኑ። ስእንከሙ፡ ተጊሀ፡ አሐተ፡ ሰዓተ፡ ምስሌየ።
41 ትግሁ፡ ወጸልዩ፡ ከመ፡ ኢትባኡ፡ ውስተ፡ መንሱት። እስመ፡ መንፈስ፡ ይፈቱ፡ ወሥጋ፡ ይደክም።
42 ወካዕበ፡ ሖረ፡ ወጸለየ፡ ወይቤ። አቡየ፡ እመሰ፡ ይትከሀል፡ ዝንቱ፡ ጽዋዕ፡ ይኅልፍ፡ ዘእንበለ፡ እስትዮ። ወባሕቱ፡ ፈቃደ፡ ዚኣከ፡ ይኩን፡ ወአኮ፡ ፈቃደ፡ ዚኣየ።
43 ወገብአ፡ ካዕበ፡ ኀበ፡ አርዳኢሁ፡ ወረከቦሙ፡ እንዘ፡ ይነውሙ። እስመ፡ ከብዳ፡ አዕይንቲሆሙ፡ በድቃስ።
44 ወኀደጎሙ፡ ወሖረ፡ ካዕበ፡ በሣልስ። ወጸለየ፡ ኪያሁ፡ ክመ፡ ቃለ፡ እንዘ፡ ይብል።
45 ወገብአ፡ ካዕበ፡ ኀበ፡ አርዳኢሁ፡ ወይቤሎሙ፡ ኑሙ፡ እንከሰ፡ ወአዕርፉ። ናሁ፡ በጽሐ፡ ጊዜሁ፡ ዘያገብእዎ፡ ለወልደ፡ ዕጓለ፡ እመሕያው፡ ውስተ፡ እደ፡ ኃጥኣን።
46 ተንሥኡ፡ ንሑር፡ ናሁ፡ ቀርበ፡ ዘያገብአኒ።
ዘከመ፡ አግብኦ፡ ይሁዳ፡ ለክርስቶስ፡ ወዘከመ፡ ተእኅዘ
47 ወእንዘ፡ ዘንተ፡ ይትናገር፡ ናሁ፡ በጽሐ፡ ይሁዳ፡ እምዐሠርቱ፡ ወክልኤቱ፡ አርዳኢሁ። ወምስሌሁ፡ መጽኡ፡ ብዙኃን፡ ሰብእ፡ ምስለ፡ መጣብሕ፡ ወዕፀው። እምኀቤሆሙ፡ ለሊቃነ፡ ካህናት፡ ወሊቃናተ፡ ሕዝብ።
48 ወዘያገብኦ፡ ወሀቦሙ፡ ትእምርተ፡ እንዘ፡ ይብል። ዘእስዕሞ፡ ውእቱ፡ ኪያሁ፡ አኀዙ።
49 ወይእተ፡ ጊዜ፡ ቀርበ፡ ይሁዳ፡ ኀበ፡ እግዚእ፡ ኢየሱስ። ወሰዐሞ፡ ወይቤሎ፡ በሓ፡ ረቢ።
50 ወይቤሎ፡ እግዚእ፡ ኢየሱስ፡ በእንተ፡ ዝኑ፡ መጻእከ፡ ዐርክየ። ወእምዝ፡ ቀርቡ፡ ወአንሥኡ፡ እደዊሆሙ፡ ወአኀዝዎ፡ ለእግዚእ፡ ኢየሱስ።
51 ወናሁ፡ አሐዱ፡ እምእለ፡ ምስሌሁ፡ ለእግዚእ፡ ኢየሱስ። ሰፍሐ፡ እዴሁ፡ ወመልኀ፡ መጥባሕቶ። ወዘበጦ፡ ለገብረ፡ ሊቀ፡ ካህናት፡ ወመተሮ፡ እዝኖ፡ ዘየማን።
52 ወይቤሎ፡ እግዚእ፡ ኢየሱስ፡ አግብኣ፡ ለመጥባሕትከ፡ ውስተ፡ ቤታ። እስመ፡ ኵሉ፡ ዘይቀትል፡ በመጥባሕተ፡ ይመውት፡ በመጥባሕት።
53 ይመስለከኑ፡ ዘኢይክል፡ አስተብቊዖቶ፡ ለአቡየ። ይፈኑ፡ ሊተ፡ ዘይበዝኁ፡ እምዐሠርቱ፡ ወክልኤቱ፡ ሠራዊተ፡ መላእክት።
54 ወእፎ፡ እንከ፡ ይትፌጸም፡ ቃለ፡ መጽሐፍ፡ ዘይቤ። እስመ፡ ከመ፡ ዝ፡ ሀለዎ፡ ይኩን።
55 ወይቤሎሙ፡ እግዚእ፡ ኢየሱስ፡ ለሕዝብ፡ ሶቤሃ። ከመ፡ ሰራቂኑ፡ መጻእክሙ፡ ትዴግኑኒ፡ ወተአኀዙኒ፡ በዕፀው፡ ወበመጣብሕ። ወእንዘ፡ ዘልፈ፡ እነብር፡ ምስሌክሙ፡ በምኵራብ፡ ወእሜህር፡ ኢአኀዝክሙኒ።
56 ወዝ፡ ኵሉ፡ ዘኮነ፡ ከመ፡ ይብጻሕ፡ ቃለ፡ ነቢያት። ወእምዝ፡ ኵሎሙ፡ አርዳኢሁ፡ ኀደግዎ፡ ወጐዩ።
57 ወእለሰ፡ አኀዝዎ፡ ለእግዚእ፡ ኢየሱስ፡ ወሰድዎ። ኀበ፡ ቀያፋ፡ ሊቀ፡ ካህናት፡ ወኀበ፡ ተጋብኡ፡ ጸሐፍት፡ ወሊቃናት።
58 ወተለዎ፡ ጴጥሮስ፡ እምርሑቅ፡ እስከ፡ ዐጸደ፡ ሊቀ፡ ካህናት። ወቦአ፡ ውስጠ፡ ወነበረ፡ ምስለ፡ ወዓልት። ይርአይ፡ ማኅለቅቶ፡ ለነገር።
59 ወየኀሥሡ፡ ሊቃነ፡ ካህናት፡ ወጸሐፍት፡ ወሊቃናት፡ ወኵሉ፡ ዐውድ፡ ሰማዕተ፡ ሐሰት። በዘይቀትልዎ፡ ለእግዚእ፡ ኢየሱስ፡ ወኢረከቡ፡ ሎቱ፡ ጌጋየ።
60 ወመጽኡ፡ ብዙኃን፡ ሰማዕተ፡ ሐሰት፡ ወስእኑ። ወድኅረ፡ መጽኡ፡ ክልኤቱ።
61 ወይቤሉ፡ ይቤ፡ ዝንቱ፡ እክል፡ ነሢቶቶ፡ ለቤተ፡ መቅደስ። ወበሣልስት፡ ዕለት፡ አንሥኦቶ።
62 ወተንሥአ፡ ሊቀ፡ ካህናት፡ ወይቤሎ። ኢትሰጠውኑ፡ እንዘ፡ መጠነ፡ ዝ፡ ያስተዋድዩከ።
63 ወኢያውሥኦ፡ ለእግዚእ፡ ኢየሱስ፡ ወይቤሎ፡ ሊቀ፡ ካህናት። አምሐልኩከ፡ በእግዚአብሔር፡ ሕያው፡ ከመ፡ ትንግረኒ። እመ፡ አንተሁ፡ ክርስቶስ፡ ወልዱ፡ ለእግዚአብሔር።
64 ወይቤሎ፡ እግዚእ፡ ኢየሱስ፡ አንተ፡ ትቤ። ወባሕቱ፡ እብለክሙ፡ እምይእዜሰ፡ ትሬእይዎ፡ ለወልደ፡ ዕጓለ፡ እመሕያው። እንዘ፡ ይነብር፡ በየማነ፡ ኀይል፡ ወእንዘ፡ ይመጽእ፡ በደመና፡ ሰማይ።
65 ወሰጠጠ፡ አልባሲሁ፡ ሊቀ፡ ካህናት፡ እንዘ፡ ይብል። ምንተ፡ እንከ፡ ትፈቅዱ፡ ሎቱ፡ ሰማዕተ። ናሁ፡ ፀረፈ፡ ወሰማዕክሙ፡ ፅርፈቶ፡ ምንተ፡ እንከ፡ ትብሉ።
66 ወአውሥኡ፡ ወይቤሉ፡ ዝንቱ፡ ድልው፡ ለሞት።
67 ወእምዝ፡ ወረቁ፡ ውስተ፡ ገጹ። ወኰርዕዎ፡ ርእሶ፡ በኅለት፡ ወጸፍዕዎ፡ ገጾ።
68 እንዘ፡ ይብሉ፡ ተነበይ፡ ለነ፡ ክርስቶስ። መኑ፡ ውእቱ፡ ዘጸፍዐከ፡ ወመኑ፡ ዘኰርዐከ።
በእንተ፡ ክሕደተ፡ ጴጥሮስ
69 ወጴጥሮስሰ፡ ሀሎ፡ ይነብር፡ አፍኣ፡ ውስተ፡ ዐጸድ። ወመጽአት፡ ኀቤሁ፡ አሐቲ፡ ወለት፡ ወትቤሎ። አንተሂ፡ ምስለ፡ ኢየሱስ፡ ገሊላዊ፡ ሀለውከ።
70 ወክሕደ፡ በቅድመ፡ ኵሉ፡ እንዘ፡ ይብል፡ ኢየአምሮ፡ ለዘትብሊ።
71 ወወፂኦ፡ ኆኅተ፡ ርእየቶ፡ ካልእት፡ ወለት። ወትቤሎሙ፡ ለእለ፡ ይቀውሙ፡ ህየ። ዝኒ፡ ሀሎ፡ ምስለ፡ ኢየሱስ፡ ናዝራዊ።
72 ወክሕደ፡ ካዕበ፡ ወመሐለ፡ ከመ፡ ኢየአምሮ፡ ለውእቱ፡ ብእሲ።
73 ወጐንደየ፡ ሕቀ፡ መጽኡ፡ እለ፡ ይቀውሙ፡ ወይቤልዎ፡ ለጴጥሮስ። አማን፡ አንተሂ፡ እምኔሆሙ፡ ወገሊላዊ፡ አንተ፡ ወነገርከ፡ ያዔውቀከ።
74 ወእምዝ፡ መሐለ፡ ወተረግመ፡ ከመ፡ ኢየአምሮ፡ ለውእቱ፡ ብእሲ። ወበጊዜሃ፡ ነቀወ፡ ዶርሆ።
75 ወተዘከረ፡ ጴጥሮስ፡ ቃሎ፡ ለእግዚእ፡ ኢየሱስ። ዘይቤሎ፡ ሥልሰ፡ ትክሕደኒ፡ ዘእንበለ፡ ይንቁ፡ ዶርሆ። ወወፅአ፡ አፍኣ፡ ወበከየ፡ ብካየ፡ መሪረ።
=== chapter 27 ===
[ምዕራፍ 27]
በእንተ፡ ግብአቱ፡ ውስተ፡ እደ፡ መስፍን
1 ወጸቢሖ፡ ተማከሩ፡ ሊቃነ፡ ካህናት፡ ወረበናተ፡ ሕዝብ። ይቅትልዎ፡ ለእግዚእ፡ ኢየሱስ።
2 ወአሲሮሙ፡ ወሰድዎ፡ ወመጠውዎ፡ ለጲላጦስ፡ ጰንጤናዊ፡ መልአከ፡ አሕዛብ።
በእንተ፡ ዘከመ፡ ነስሐ፡ ይሁዳ
3 ወእምዝ፡ ሶበ፡ ርእየ፡ ይሁዳ፡ ዘአግብኦ፡ ከመ፡ አርስሕዎ። ነስሐ፡ ወአግብአ፡ ውእተ፡ ሠላሳ፡ ብሩረ። ዘነሥአ፡ እምኀበ፡ ሊቃነ፡ ካህናት፡ ወሊቃናተ፡ ሕዝብ። እንዘ፡ ይብል፡ አበስኩ፡ ዘአግባእኩ፡ ደመ፡ ንጹሕ፡ ወዘአቅተልኩ፡ ብእሴ፡ ጻድቅ።
4 ወይቤልዎ፡ ሚ፡ ላዕሌነ፡ ወሚ፡ ላዕሌከ፡ ለሊከ፡ አእምር።
5 ወገደፈ፡ ወእቱ፡ ብሩረ፡ ውስተ፡ ምኵራብ። ወሖረ፡ ወተኀንቀ፡ ወሞተ።
6 ወነሥኡ፡ ሊቃነ፡ ካህናት፡ ውእቱ፡ ብሩረ፡ ወይቤሉ። ኢይደልወነ፡ ንደዮ፡ ውስተ፡ ቤተ፡ መባእ፡ እስመ፡ ሤጠ፡ ደም፡ ውእቱ።
7 ወተማኪሮሙ፡ ተሣየጠ፡ ቦቱ፡ ገራህተ፡ ለብሓዊ፡ ለመቃብረ፡ እንግዳ።
8 ወተሰምየ፡ ውእቱ፡ ገራህት፡ ገራህተ፡ ደም፡ እስከ፡ ዮም።
9 ወይእተ፡ አሚረ፡ በጽሐ፡ ቃለ፡ ኤርምያስ፡ ነቢይ፡ ዘይቤ። ነሥኡ፡ ሠላሳ፡ ብሩረ፡ ሤጦ፡ ለክቡር፡ ዘአክበርዎ፡ ደቂቀ፡ እስራኤል።
10 ወወሀብዎ፡ ለገራህተ፡ ለብሓዊ፡ በከመ፡ አዘዘኒ፡ እግዚአብሔር።
በእንተ፡ ዘከመ፡ ቆመ፡ እግዚእ፡ ኢየሱስ፡ ቅድመ፡ ጲላጦስ
11 ወቆመ፡ እግዚእ፡ ኢየሱስ፡ ቅድሜሁ፡ ለመልአከ፡ አሕዛብ። ወተስእሎ፡ መልአከ፡ አሕዛብ፡ ወይቤሎ፡ አንተሁ፡ ንጉሦሙ፡ ለአይሁድ። ወይቤሎ፡ እግዚእ፡ ኢየሱስ፡ አንተ፡ ትቤ።
12 ወእንዘ፡ ያስተዋድይዎ፡ ሊቃነ፡ ካህናት፡ ወሊቃውንተ፡ ሕዝብ። አልቦ፡ ዘተሠጥዎሙ፡ ወኢ፡ ምንተኒ።
13 ወእምዝ፡ ይቤሎ፡ ጲላጦስ፡ ኢትሰምዕኑ፡ እንዘ፡ መጠነ፡ ዝ፡ ያስተዋድዩከ።
14 ወኢያውሥኦ፡ ወኢ፡ አሐተኒ፡ ቃለ፡ እስከ፡ ያነክር፡ መልአክ።
15 ወቦ፡ ልማድ፡ ለመስፍን፡ ለለ፡ በዓል፡ ያሕዩ፡ ሎሙ። አሐደ፡ ለሕዝብ፡ እምነ፡ ሙቁሓን፡ ዘፈቀዱ።
16 ወቦ፡ አሜሃ፡ ሙቁሕ፡ ዘስሙ፡ በርባን፡ ስሙዕ፡ ወየአምሮ፡ ኵሉ፡ ሰብእ።
17 ወእንዘ፡ ጉቡኣን፡ እሙንቱ፡ ይቤሎሙ፡ ጲላጦስ፡ ለሕዝብ። መነ፡ ትፈቅዱ፡ አሕዩ፡ ለክሙ። በርባንሃኑ፡ ወሚመ፡ ኢየሱስሃ፡ ዘይብልዎ፡ ክርስቶስ።
18 እስመ፡ የአምር፡ ከመ፡ በቅንአቶሙ፡ አግብእዎ።
በእንተ፡ ስምዕ፡ ዘኮነ፡ በጊዜ፡ ሕማሙ
19 ወእንዘ፡ ይነብር፡ ጲላጦስ፡ ዐውደ፡ ለአከት፡ ኀቤሁ፡ ብእሲቱ፡ እንዘ፡ ትብል። ዑቅ፡ ኢተአብስ፡ ወኢትትኀለፍ፡ ላዕለ፡ ውእቱ፡ ጻድቅ። እስመ፡ ብዙኀ፡ ሐመምኩ፡ በዛቲ፡ ሌሊት፡ በሕልምየ፡ በእንቲኣሁ።
20 ወሊቃነ፡ ካህናትሰ፡ ወረበናት፡ ኄጥዎሙ፡ ለሕዝብ፡ ወኦሆ፡ አበልዎሙ። ከመ፡ በርባንሃ፡ ይስእሉ፡ ያሕዩ፡ ሎሙ፡ ወኢየሱስሃ፡ ይስቅሉ።
21 ወአውሥአ፡ መስፍን፡ ወይቤሎሙ። መነ፡ ትፈቅዱ፡ እምክልኤሆሙ፡ አሕዩ፡ ለክሙ። ወይቤሉ፡ በርባንሃ።
22 ወይቤሎሙ፡ ጲላጦስ፡ ምንተ፡ እንከ፡ እረስዮ፡ ለኢየሱስ፡ ዘተብህለ፡ ክርስቶስ። ወይቤሉ፡ ኵሎሙ፡ ስቅሎ።
23 ወይቤሎሙ፡ መስፍን፡ ምንተ፡ እኩየ፡ ገብረ። ወአፈድፈዱ፡ ጸሪሐ፡ እንዘ፡ ይብሉ፡ ስቅሎ፡ ስቅሎ።
24 ወእምዝ፡ ሶበ፡ ርእየ፡ ጲላጦስ፡ ከመ፡ አልቦ፡ ዘይበቊዕ። ዘእንበለ፡ ዳእሙ፡ ዘይበዝኅ፡ ሀከክ። ነሥአ፡ ማየ፡ ወተኀፅበ፡ እዴሁ፡ በቅድሜሆሙ፡ ለሕዝብ። እንዘ፡ ይብል፡ ንጹሕ፡ አነ፡ እምደሙ፡ ለዝ፡ ብእሲ፡ ጻድቅ፡ ወአንትሙ፡ ለሊክሙ፡ አእምሩ።
25 ወአውሥኡ፡ ወይቤሉ፡ ኵሎሙ፡ ሕዝብ። ደሙ፡ ላዕሌነ፡ ወላዕለ፡ ውሉድነ።
26 ወእምዝ፡ አሕየወ፡ ሎሙ፡ በርባንሃ፡ ወቀሠፎ፡ ለእግዚእ፡ ኢየሱስ። ወመጠዎሙ፡ ይስቅልዎ።
በእንተ፡ ተሳልቆተ፡ ሐራ፡ ላዕለ፡ እግዚእ፡ ኢየሱስ
27 ወእምዝ፡ ነሥእዎ፡ መስተራትዓተ፡ ሐራ፡ ለእግዚእ፡ ኢየሱስ። ወወሰድዎ፡ ውስተ፡ ዓውደ፡ ምኵናን። ወአስተጋብኡ፡ ላዕሌሁ፡ ኵሎ፡ ሠርዌ፡ ሐራ።
28 ወሰለብዎ፡ አልባሲሁ፡ ወአልበስዎ፡ ከለሜዳ፡ ዘለይ።
29 ወፀፈሩ፡ ሐራ፡ አክሊለ፡ ዘሦክ፡ ወአስተቀጸልዎ፡ ዲበ፡ ርእሱ። ወአስተአኀዝዎ፡ ኅለተ፡ በየማኑ፡ ወአስተብረኩ፡ ቅድሜሁ። ወተሣለቁ፡ ላዕሌሁ፡ ወይቤልዎ፡ በሓ፡ ንጉሠ፡ አይሁድ።
30 ወይወርቁ፡ ላዕሌሁ፡ ወይኰርዕዎ፡ ርእሶ፡ በኅለት።
31 ወተሣሊቆሙ፡ ላዕሌሁ፡ ሰለብዎ፡ ውእተ፡ ከለሜዳ፡ ዘለይ። ወአልበስዎ፡ አልባሲሁ፡ ወወሰድዎ፡ ይስቅልዎ።
32 ወእንዘ፡ ይወፅኡ፡ ረከቡ፡ ብእሴ፡ ቀሬናዌ፡ ዘስሙ፡ ስምዖን። ወዐበጥዎ፡ ይጹር፡ መስቀሎ።
33 ወበጺሖሙ፡ ብሔረ፡ ዘስሙ፡ ጎልጎታ፡ ዘበትርጓሜሁ፡ ቀራንዮ። ወወሀብዎ፡ ይስተይ፡ ወይነ፡ ወሐሞተ፡ ድሙረ።
34 ወጥዒሞ፡ አበየ፡ ሰትየ።
በእንተ፡ ስቅለቱ፡ ለእግዚእነ
35 ወእምዝ፡ ሰቀልዎ፡ ወተካፈሉ፡ አልባሲሁ፡ ወተዐፀዉ፡ ላዕሌሁ። ከመ፡ ይትፈጸም፡ ቃለ፡ መጽሐፍ፡ ዘይቤ። ተካፈሉ፡ አልባስየ፡ ለርእሶሙ፡ ወትዐፀዉ፡ ዲበ፡ ዓራዝየ።
36 ወነበሩ፡ የዐቅብዎ፡ ህየ።
37 ወአንበሩ፡ መልዕልተ፡ ርእሱ፡ ጽሒፎሙ፡ መጽሐፈ፡ ጌጋዩ፡ ዘይብል። ዝንቱ፡ ውእቱ፡ ኢየሱስ፡ ንጉሦሙ፡ ለአይሁድ።
38 ወእምዝ፡ ሰቀሉ፡ ምስሌሁ፡ ክልኤቱ፡ ፈያተ። አሐደ፡ በየማኑ፡ ወአሐደ፡ በፀጋሙ።
39 ወእለሂ፡ የኀልፉ፡ ይፀርፉ፡ ላዕሌሁ፡ እንዘ፡ የሐውሱ፡ ርእሶሙ።
40 ወይብሉ፡ ኦ፡ ዘይነሥቶ፡ ለቤተ፡ መቅደስ፡ ወበሠሉስ፡ ዕለት፡ የሐንጾ። አድኅን፡ ርእሰከ፡ እመሰ፡ ወልደ፡ እግዚአብሔር፡ አንተ። ረድ፡ እስኩ፡ እመስቀልከ።
41 ወከማሁ፡ ሊቃነ፡ ካህናትሂ፡ ይሣለቁ፡ ምስለ፡ ጸሐፍት፡ ወሊቃናት፡ እንዘ፡ ይብሉ።
42 ዘባዕደ፡ ያድኅን፡ ወርእሶ፡ ኢይክል፡ አድኅኖ። እመሰ፡ ንጉሠ፡ እስራኤል፡ ውእቱ። ለይረድኬ፡ ይእዜ፡ እመስቀሉ፡ ንርአይ፡ ወንእመን፡ ቦቱ።
43 ወለእመ፡ ተአመነ፡ በእግዚአብሔር፡ ናሁ፡ ይእዜ፡ ለያድኅኖ፡ እመ፡ ይፈቅዶ። እስመ፡ ይብል፡ ወልደ፡ እግዚአብሔር፡ አነ።
44 ወከማሁ፡ ፈያትኒ፡ እለ፡ ተሰቅሉ፡ ምስሌሁ፡ ይዘነጕጕዎ።
በእንተ፡ ሞቱ፡ ለእግዚእነ፡ ዲበ፡ ዕፀ፡ መስቀል
45 ወእምስሱ፡ ሰዓት፡ ጸልመ፡ ኵሉ፡ ዓለም፡ እስከ፡ ተስዑ፡ ሰዓት።
46 ወጊዜ፡ ተስዐቱ፡ ሰዓት፡ ጸርሐ፡ እግዚእ፡ ኢየሱስ፡ በዐቢይ፡ ቃል። እንዘ፡ ይብል፡ ኤሎሄ፡ ኤሎሄ፡ ኤልማስ፡ ላማ፡ ሰበቅታኒ። ዝ፡ ውእቱ፡ ብሂል፡ አምላኪየ፡ አምላኪየ፡ ለምንት፡ ኀደገኒ።
47 ወሰሚዖሙ፡ እለ፡ ይቀውሙ፡ ህየ፡ ይቤሉ፡ ዝሰ፡ ኤልያስሃ፡ ይጼውዕ።
48 ወውእተ፡ ጊዜ፡ ሮጸ፡ አሐዱ፡ እምኔሆሙ፡ ወነሥአ፡ ሰፍነገ። ወመልአ፡ ብኂአ፡ ወአሰረ፡ ውስተ፡ ኅለት፡ ወአስዖዘዞ፡ ውስተ፡ አፉሁ።
49 ወቦ፡ እለ፡ ይቤሉ፡ ኅድጉ፡ ንርአይ፡ ለእመ፡ ይመጽእ፡ ኤልያስ፡ ያድኅኖ።
50 ወጸርሐ፡ ካዕበ፡ እግዚእ፡ ኢየሱስ፡ በዐቢይ፡ ቃል። ወወፅአት፡ መንፈሱ፡ ሶቤሃ።
51 ወእምዝ፡ ተሰጠ፡ መንጦላዕተ፡ ቤተ፡ መቅደስ፡ እምላዕሉ፡ እስከ፡ ታሕቱ። ወኮነ፡ ለክልኤ፡ ክፍል፡ ወአድለቅለቀት፡ ምድር፡ ወነቅዐ፡ ኰኵሕ።
52 ወተከሥቱ፡ መቃብራት፡ ወተንሥኡ፡ ብዙኃን፡ እምአብድንቲሆሙ፡ ለጻድቃን።
53 ወወፅኡ፡ እመቃብሪሆሙ፡ ወቦኡ፡ ውስተ፡ ሀገር፡ ቅድስት። እምድኅረ፡ ተንሥኡ፡ ወአስተርአይዎሙ፡ ለብዙኃን።
54 ወመኰንነ፡ ምእትሰ፡ ወእለ፡ ምስሌሁ፡ የዐቅብዎ፡ ለእግዚእ፡ ኢየሱስ። ርእዮሙ፡ ውእተ፡ ድልቅልቀ፡ ዘኮኑ፡ ፈርሁ፡ ጥቀ፡ ወይቤሉ። አማን፡ ወልደ፡ እግዚአብሔር፡ ውእቱ፡ ዝንቱ።
55 ወሀለዋ፡ ህየ፡ ብዙኃት፡ አንስት፡ እለ፡ ይሬእያ፡ እምርሑቅ፡ ኵሎ፡ ዘኮነ። ወውእቶን፡ እለ፡ ተለዋሁ፡ ለእግዚእ፡ ኢየሱስ፡ እምገሊላ፡ እለ፡ ይትለአካሁ።
56 ወእማንቱ፡ ማርያ፡ መግደላዊት፡ ወማርያም፡ እንተ፡ ያዕቆብ። ወእሙ፡ ለዮሳ፡ ወእሞሙ፡ ለደቂቀ፡ ዘብዴዎስ።
ዘከመ፡ ሰአለ፡ ዮሴፍ፡ ሥጋሁ፡ ለእግዚእነ
57 ወመስዮ፡ መጽአ፡ ብእሲ፡ ባዕል፡ እምአርማትያስ፡ ዘስሙ፡ ዮሴፍ። ወውእቱ፡ ኮነ፡ ይፀመዶ፡ ለእግዚእ፡ ኢየሱስ።
58 ወሖረ፡ ኀበ፡ ጲላጦስ፡ ወሰአለ፡ ሥጋሁ፡ ለእግዚእ፡ ኢየሱስ። ወአዘዘ፡ ጲላጦስ፡ የሀብዎ።
59 ወነሢኦ፡ ዮሴፍ፡ ሥጋሁ፡ ለእግዚእ፡ ኢየሱስ፡ ገነዞ፡ በሰንዱናት፡ ንጹሕ።
60 ወቀበሮ፡ ውስተ፡ መቃብር፡ ሐዲስ፡ ዘሎቱ፡ አውቀረ፡ ውስተ፡ ኰኵሕ። ወአንኰርኰረ፡ እብነ፡ ዐቢየ። ወአንበረ፡ ውስተ፡ አፈ፡ መቃብር፡ ወኀለፈ።
61 ወሀለዋ፡ ህየ፡ ማርያም፡ መግደላዊት፡ ወካልእታሂ፡ ማርያም። ይነብራ፡ ቅድመ፡ መቃብር።
62 ወበሳኒታ፡ እንተ፡ ይእቲ፡ እምድኅረ፡ ዐርብ። ተጋብኡ፡ ሊቃነ፡ ካህናት፡ ወፈሪሳውያን፡ ኀበ፡ ጲላጦስ።
63 ወይቤልዎ፡ ተዘከርነ፡ እግዚኦ፡ ዘይቤ፡ ዝኩ፡ መስሐቲ። አመ፡ ሕያወ፡ ውእቱ፡ አመ፡ ሣልስት፡ ዕለት፡ እትነሣእ።
64 አዝዝ፡ እንከ፡ ይዕቀቡ፡ መቃብሪሁ፡ እስከ፡ ሠሉስ፡ መዋዕል። ከመ፡ ኢምጽኡ፡ አርዳኢሁ፡ ወኢይስርቅዎ፡ ሌሊተ። ወኢይበሉ፡ ለሕዝብ፡ ተንሥአ፡ እምዉታን። ወትከውን፡ ደኃሪተ፡ ጌጋዩ፡ እንተ፡ ተአኪ፡ እምቀዳሚት።
65 ወይቤሎሙ፡ ጲላጦስ፡ ንሥኡ፡ ሠገራተ። ወሑሩ፡ ወአጽንዑ፡ መቃብሪሁ፡ በከመ፡ ተአምሩ።
66 ወሖሩ፡ ወአጽንዑ፡ ወቀተሩ፡ መቃብሮ። ወኀተምዋ፡ ለይእቲ፡ እብን፡ ምስለ፡ ሠገራት።
=== chapter 28 ===
[ምዕራፍ 28]
በእንተ፡ ትንሣኤሁ፡ ለእግዚእነ
1 ወሠርከ፡ ሰንበት፡ ለጸቢሐ፡ እሑድ፡ መጽአት፡ ማርያም፡ መግደላዊት። ወካልእታኒ፡ ማርያም፡ ይርአያ፡ መቃብሮ።
2 ወናሁ፡ ኮነ፡ ድልቅልቅ፡ ዐቢይ። እስመ፡ መልአከ፡ እግዚአብሔር፡ ወረደ፡ እምሰማይ። ወቀርበ፡ ወአንኰርኰራ፡ ለይእቲ፡ እብን፡ እምአፈ፡ መቃብር። ወነበረ፡ ዲቤሃ።
3 ወርእየቱ፡ ከመ፡ ዘመብረቅ፡ ወልብሱ፡ ጸዐዳ፡ ከመ፡ ዘበረድ።
4 ወእምግርማሁ፡ ተሀውኩ፡ ወኮኑ፡ ከመ፡ አብድንት፡ እለ፡ የዐቅቡ፡ መቃብረ።
5 ወአውሥአ፡ ውእቱ፡ መልአከ፡ ወይቤሎን፡ ለአንስት። ኢትፍርሃ፡ አንትንሰ፡ እስመ፡ አአምር። ከመ፡ ኢየሱስሃ፡ ዘተሰቅለ፡ ተኀሥሣ።
6 ኢሀሎ፡ ዝየሰ፡ ተንሥአ፡ በከመ፡ ይቤ። ወባሕቱ፡ ነዐ፡ ትርአያ፡ ኀበ፡ ተቀብረ።
7 ወፍጡነ፡ ሑራ፡ ንግራሆሙ፡ ለአርዳኢሁ። ከመ፡ ተንሥአ፡ እምዉታን፡ ወናሁ፡ ይቀድመክሙ፡ ገሊላ። ወበህየ፡ ትሬእይዎ፡ ናሁ፡ አይዳዕኩክን።
8 ወኀለፋ፡ ፍጡነ፡ እምኀበ፡ መቃብር፡ በፍርሀት፡ ወበረዓድ፡ ወበፍሥሓ፡ ዐቢይ። ወሮጻ፡ ይንግራሆሙ፡ ለአርዳኢሁ።
9 ወእንዘ፡ የሐውራ፡ ይንግራሆሙ፡ ለአርዳኢሁ። ተራከቦን፡ እግዚእ፡ ኢየሱስ፡ በፍኖት፡ ወይቤሎን፡ በሓክን። ወቀርባ፡ ወአኀዛ፡ እገሪሁ፡ ወሰገዳ፡ ሎቱ።
10 ወእምዝ፡ ይቤሎን፡ እግዚእ፡ ኢየሱስ። ኢትፍርሃ፡ ሑራ፡ ንግራሆሙ፡ ለአኀውየ። ከመ፡ ይሑሩ፡ ገሊላ፡ ወበህየ፡ ይሬእዩኒ።
11 ወኀሊፎን፡ እማንቱ፡ አተዉ፡ ሠገራት፡ ሀገረ። ወነገሩ፡ ለሊቃነ፡ ካህናት፡ ኵሎ፡ ዘኮነ።
12 ወተጋብኡ፡ ወተማከሩ፡ ምስለ፡ ሊቃውንት። ወወሀብዎሙ፡ ብዙኀ፡ ወርቀ፡ ለሠገራት።
13 ወይቤልዎሙ፡ በሉ፡ አርዳኢሁ፡ ሌሊተ፡ መጽኡ። ወሰረቅዎ፡ እንዘ፡ ንነውም፡ ንሕነ።
14 ወእምከመ፡ ተሰምዐ፡ ዝ፡ ነገር፡ በኀበ፡ መልአከ፡ አሕዛብ። ንሕነ፡ ናአምኖ፡ ወለክሙኒ፡ ናድኅነክሙ። ወናጸድቅ፡ ነገረክሙ፡ ወዘእንበለ፡ ሐዘን፡ ንሬስየክሙ።
15 ወነሢኦሙ፡ ሠገራት፡ ውእተ፡ ብሩረ፡ ኀለፉ፡ ወገብሩ፡ በከመ፡ መሀርዎሙ። ወወፅአ፡ ዝንቱ፡ ነገር፡ በኀበ፡ አይሁድ፡ እስከ፡ ዮም።
16 ወአርዳኢሁሰ፡ ዐሠርቱ፡ ወአሐዱ፡ ሖሩ፡ ውስተ፡ ገሊላ። ኀበ፡ ደብረ፡ ዘአዘዞሙ፡ እግዚእ፡ ኢየሱስ።
17 ወሶበ፡ ርእይዎ፡ ሰገዱ፡ ሎቱ፡ ወመንፈቆሙሰ፡ ናፈቁ።
18 ወቀርበ፡ እግዚእ፡ ኢየሱስ፡ ወተናገሮሙ፡ እንዘ፡ ይብል። ተውህበ፡ ሊተ፡ ኵሉ፡ ኵነኔ፡ ሰማይ፡ ወምድር።
19 ሑሩ፡ ወመሀሩ፡ ኵሎ፡ አሕዛበ። ወእንዘ፡ ታጠምቅዎሙ፡ በሉ፡ በስመ፡ አብ፡ ወወልድ፡ ወመንፈስ፡ ቅዱስ።
20 ወመሀርዎሙ፡ ይዕቀቡ፡ ኵሎ፡ ዘአዘዝኩክሙ። ወናሁ፡ አነ፡ እሄሉ፡ ምስሌክሙ፡ በኵሉ፡ መዋዕል፡ እስከ፡ ኅልቀተ፡ ዓለም።