##### edition  (gez)
=== chapter 1 ===
[II Regum 1]
2 ወአመ፡ ሣልስት፡ ዕለት፡ መጽአ፡ ብእሲ፡ እምነ፡ ትዕይንት፡ እምውስተ፡ ሕዝቡ፡ ለሳኦል፡ ወሥጡጥ፡ አልባሲሁ፡ ወሐመድ፡ ዲበ፡ ርእሱ፡ ወሶበ፡ ቦአ፡ ኀበ፡ ዳዊት፡ ወድቀ፡ ዲበ፡ ምድር፡ ወሰገደ፡ ሎቱ።
3 ወይቤሎ፡ ዳዊት፡ እምአይቴ፡ መጻእከ፡ ወይቤሎ፡ እምነ፡ ትዕይንተ፡ እስራኤል፡ አነ፡ ዘድኅንኩ።
4 ወይቤሎ፡ ዳዊት፡ ምንትኑ፡ ውእቱ፡ ዝንቱ፡ ነገር፡ ዜንወኒ፡ ወይቤሎ፡ ጐዩ፡ ሕዝብ፡ በውስተ፡ ቀትል፡ ወብዙኃን፡ እለ፡ ወድቁ፡ እምውስተ፡ ሕዝብ፡ ወሞተ፡ ሳኦልኒ፡ ወዮናታን፡ ወልዱ።
5 ወይቤሎ፡ ዳዊት፡ ለውእቱ፡ ብእሲ፡ ዘዜነዎ፡ እፎ፡ አእመርከ፡ ከመ፡ ሞቱ፡ ሳኦል፡ ወዮናታን፡ ወልዱ።
6 ወይቤሎ፡ ውእቱ፡ ብእሲ፡ ዘዜነዎ፡ ተቃተሉ፡ ወወድቁ፡ በደብረ፡ ጌላቡሔ፡ ወእምዝ፡ ረከብክዎ፡ ለሳኦል፡ ይሰክብ፡ በኲናቱ፡ ወእምዝ፡ በጽሕዎ፡ ሰረገላት፡ ወመስተጽዕናነ፡ አፍራስ።
7 ወተመይጠ፡ ድኅሬሁ፡ ወርእየኒ፡ ወጸውዐኒ፡ ወእቤሎ፡ ነየ፡ አነ።
8 ወይቤለኒ፡ መኑ፡ አንተ፡ ወእቤሎ፡ ዐማሌቃዊ፡ አነ።
9 ወይቤለኒ፡ ቁም፡ ላዕሌየ፡ ወቅትለኒ፡ እስመ፡ አኀዘተኒ፡ ጽልመት፡ እኪት፡ እስመ፡ ኢሀለወት፡ ላዕሌየ፡ ኵላ፡ ነፍስየ።
10 ወቆምኩ፡ ላሳሌሁ፡ ወቀተልክዎ፡ እስመ፡ አእመርኩ፡ ከመ፡ ኢየሐዩ፡ እምድኅረ፡ ወድቆ ፤ ወነሣእኩ፡ አከሊሎ፡ እምውስተ፡ ርእሱ፡ ወመዝግሐ፡ ልብሱ፡ ዘውስተ፡ መታክፍቱ፡ ወአምጻእኩ፡ ዝየ፡ ኀበ፡ እግዚእየ።
11 ወሠጠጠ፡ አልባሲሁ፡ ዳዊት፡ ወኵሉ፡ ሰብእ፡ እለ፡ ምስሌሁ፡ ሠጠጡ፡ አልባሲሆሙ።
12 ወበከይዎ፡ ወጾሙ፡ ወበከዩ፡ እስከ፡ ፍና፡ ሰርከ፡ [ላዕለ፡ ሳኦል፡] ወላዕለ፡ ዮናታን፡ ወላዕለ፡ ሕዝበ፡ ይሁዳ፡ ወላዕለ፡ ቤተ፡ እስራኤል፡ እስመ፡ ሞቱ፡ በኲናት።
13 ወይቤሎ፡ ዳዊት፡ ለውእቱ፡ ብእሲ፡ ዘዜነዎ፡ እምአይቴ፡ አንተ፡ ወይቤ፡ ወልደ፡ ብእሲ፡ ፈላሲ፡ ዐማሌቃዊ፡ አነ።
14 ወይቤሎ፡ ዳዊት፡ እፎ፡ ኢፈራህከ፡ አውርዶ፡ እዴከ፡ ላዕለ፡ መሲሑ፡ ለእግዚአብሔር፡ ከመ፡ ትቅትሎ።
15 ወጸውዐ፡ ዳዊት፡ አሐደ፡ እምውስተ፡ ደቁ፡ ወይቤሎ፡ ሖር፡ ቅትሎ፡ ወቀተሎ።
16 ወይቤሎ፡ ዳዊት፡ ደምከ፡ ላዕለ፡ ርእስከ፡ ለይኩን፡ እስመ፡ አፉከ፡ ነበበ፡ ወትቤ፡ አነ፡ ቀተልክዎ፡ ለመሲሐ፡ እግዚአብሔር።
17 ወበከዮሙ፡ ዳዊት፡ ለሳኦል፡ ወለዮናታን፡ ወልዱ።
18 ወይቤ፡ ከመ፡ ይምሀሮሙ፡ ለደቂቀ፡ ይሁዳ፡ ወይቤ፡ ናሁ፡ ጽሑፍ፡ ውስተ፡ መጽሐ[ፈ]፡ ርቱዕ።
19 [ትከል፡] ሐውልተ፡ እስራኤል፡ ላዕለ፡ ምውታን፡ ወበውሰተ፡ መልዕልተ፡ ቅቱላን፡ እፎኑመ፡ ወድቁ፡ ጽኑዓን።
20 ኢትንግሩ፡ ውስተ፡ ጌት፡ ወኢትዜንዉ፡ ውስተ፡ አናቅጸ፡ አስቀሎና፡ ከመ፡ ኢይትፈሥሓ፡ አዋልደ፡ ኢሎፍሊ፡ ወከመ፡ ኢይትሐሠያ፡ አዋልደ፡ ቄላፋን።
21 አድባረ፡ ጌላቡሔ፡ ኢይረድ፡ ጠል፡ ወዝናም፡ ላዕሌክን፡ ወአሕቃላተ፡ አጣርቆን፡ እስመ፡ በህየ፡ ኀስረ፡ አናቅጺሆሙ፡ ለኀያላን ፤ ንዋየ፡ ሐቅሉ፡ ለሳኦል፡ ኢተቀብአት፡ በቅብእ፡ ዘእንበለ፡ በደመ፡ ቅቱላን ፤
22 ቀስተ፡ ዮናታን፡ ኢገብአት፡ ድኅሬሃ፡ ዕራቃ፡ ወኲናቱሂ፡ ለሳኦል፡ ኢገብአት፡ ዕራቃ።
23 ሳኦል፡ ወዮናታን፡ ፍቁራን፡ ወሠናያን፡ እለ፡ ፍሉጥ፡ ሥኖሙ፡ በሕይወቶሙ፡ ወበሞቶሙኒ፡ ኢተሌለዩ ፤ ይቀሉ፡ እምነ፡ ንስር፡ ወይጸንዑ፡ እምነ፡ አንበሳ።
24 አዋልደ፡ ኢየሩሳሌም፡ ብክያ፡ ላዕለ፡ ሳኦል፡ ዘአልባሰክን፡ ለየ፡ ምስለ፡ ሰርጕክን፡ ወአግበረ፡ ለክን፡ ሰርጐ፡ ወርቅ፡ ላዕለ፡ ዐራዝክን።
25 እፎ፡ ከመ፡ ወድቁ፡ ጽኑዓን፡ በመልዕልተ፡ ቅቱላን።
26 ሐመምኩ፡ ላዕሌከ፡ እኁየ፡ ዮናታን ሠናይ፡ አንተ፡ በኀቤየ፡ ወፈድፋደ፡ ጥቀ፡ በኀቤየ፡ ፍቅርከ፡ እምነ፡ ፍቅረ፡ አንስት።
27 እፎ፡ ወድቁ፡ ጽኑዓን፡ ወተሀጕሉ፡ ዕደወ፡ ቀትል።
=== chapter 2 ===
[II Regum 2]
1 ወእምድኅረ፡ ዝንቱ፡ ተስእለ፡ ዳዊት፡ ቃለ፡ እግዚአብሔር፡ ወይቤ፡ እዕርግኑ፡ ውስተ፡ አሐቲ፡ እምነ፡ አህጉረ፡ ይሁዳ፡ ወይቤሎ፡ እግዚአብሔር፡ ዕርግ፡ ወይቤ፡ ዳዊት፡ አይቴ፡ አዐርግ፡ ወይቤሎ፡ ውስተ፡ ኬብሮን።
2 ወዐርገ፡ ዳዊት፡ ውስተ፡ ኬብሮን፡ ወክልኤሆን፡ አንስቲያሁ፡ ምስሌሁ፡ አኪናሖም፡ [ኢይዝ] ራኤላዊት፡ ወአቤግያ፡ ብእሲተ፡ ናባል፡ ቀርሜላዊ ፤ ወዕደውኒ፡ እለ፡ ምለሌሁ፡ ኵሎሙ፡ ምስለ፡ አብያቲሆሙ፡ ወነበሩ፡ ውስተ፡ አህጉረ፡ ኬብሮን።
3 ወመጽኡ፡ ሰብአ፡ ይሁዳ፡ ወቅብእዎ፡ ለዳዊት፡ በህየ፡ ያንግሥዎ፡ ላዕለ፡ ቤተ፡ ይሁዳ፡ ወዜነውዎ፡ ለዳዊት፡ ወይቤልዎ፡ ሰብአ፡ ኢያቤስ፡ ዘገለዓድ፡ ቀበርዎ፡ ለሳኦል።
4 ወፈነወ፡ ዳዊት፡ ዕደወ፡ ኀበ፡ መኳንንት፡ ኢያቤስ፡ ዘገለአድ፡ ወይቤሎሙ፡ ዳዊት፡ ቡሩካኑአ፡ አንትሙአ፡ ለእግዚአብሔርአ፡ እስመአ፡ ገበርክሙአ፡ ዘንተ፡ ምሕረትአ፡ ላዕለ፡ እግዚእክሙአ፡ እስራኤልአ፡ ወላዕለ፡ መሲሑአ፡ ለእግዚአብሔርአ፡ ወቀበርክምዎአ፡ ሎቱአ፡ ወለወልዱአ፡ ዮናታንአ።
5 ወይእዜኒአ፡ እግዚአብሔርአ፡ ይግበርአ፡ ላዕሌክሙአ፡ ጽድቀአ፡ ወምሕረተአ፡ ወአነኒአ፡ እገብርአ፡ ሠናይትአ፡ በእንተ፡ ዝንቱአ፡ ነገርአ።
6 ወይእዜኒአ፡ ለይጽናዕአ፡ እደዊክሙአ፡ ወኩኑአ፡ ደቂቀአ፡ ኀይልአ፡ ወእስመአ፡ ሞተአ፡ እግዚእክሙአ፡ ሳኦልአ፡ ወኪያየአ፡ ሤሙኒአ፡ ቤተአ፡ ይሁዳአ፡ ንጉሠአ፡ ሎሙአ።
7 ወአበኔርሰ፡ ወልደ፡ ኔር፡ መልአከ፡ ኀይሉ፡ ለሳኦል፡ ነሥኦ፡ ለኢያቡስቴ፡ ወልደ፡ ሳኦል፡ ወአዕረጎ፡ እምውስተ፡ ትዕይንት፡ ውስተ፡ ምናሔም።
8 ወአንገሦ፡ ለገለዓድ፡ ወላዕለ፡ ታሲሪ፡ ወላዕለ፡ እስራኤል፡ ወላዕለ፡ ኤፍሬም፡ ወላዕለ፡ ብንያም፡ ወላዕለ፡ ኵሉ፡ እስራኤል።
9 ወ፵ዓመት፡ ሎቱ፡ ኢያቡስቴ፡ አመ፡ ነግሠ፡ ላዕለ፡ እስራኤል፡ ወ፪ዓመተ፡ ነግሠ፡ እንበለ፡ ዳእሙ፡ ቤተ፡ ይሁዳ፡ እለ፡ ተለውዎ፡ ለዳዊት።
10 ወኮነ፡ መዋዕል፡ ዘነግሠ፡ ዳዊት፡ በኬብሮን፡ ላዕለ፡ ቤተ፡ ይሁዳ፡ ፯ዓመተ፡ ወ፮አውራኀ።
11 ወወፅአ፡ አበኔር፡ ወልደ፡ ኔር፡ ወደቀ፡ ኢያቡስቴ፡ ወልደ፡ ሳኦል፡ እምነ፡ ምናሔም፡ ውስተ፡ ገባኦን።
12 ወኢዮአብ፡ ወልደ፡ ሶርህያ፡ ወደቀ፡ ዳዊት፡ ወፅኡ፡ እምነ፡ ኬብርን፡ ወተራከቡ፡ በኀበ፡ ቄርኔን፡ እንተ፡ ገባኦን፡ ኅቡረ፡ ወነበሩ፡ እሉኒ፡ ውስተ፡ ማሰዶተ፡ ገባኦን፡ እምለፌ፡ ወእልክቱኒ፡ እምከሐክ፡ ውስተ፡ ማዕዶተ፡ ገባኦን።
13 ወይቤሎ፡ አበኔር፡ ለኢዮአብ፡ ለይትነሥአ።
14 ደቅነ፡ ወይትዋነዩ፡ ቅድሜነ፡ ወይቤ፡ ኢዮአብ፡ ለይትነሥኡ።
15 ወተንሥኡ፡ ወመጽኡ፡ እሙራን፡ ደቀ፡ ብንያም፡ ወ፲ወ፪እምነ፡ ደቀ፡ ዳዊት።
16 ወአኀዝዎሙ፡ ለኵሎሙ፡ በርእሶሙ፡ ወረገዝዎሙ፡ በመጣብሒሆሙ፡ ወወድቁ፡ ኅቡረ፡ ወተሰምየ፡ ስሙ፡ ለውእቱ፡ መካን፡ መክፈልቶሙ፡ ለእለ፡ ኀብሩ፡ ዘውስተ፡ ገባኦን።
17 ወኮነ፡ ቀትል፡ ጽኑዕ፡ ይእተ፡ አሚረ፡ ወወድቁ፡ ብንያም፡ ሰብአ፡ እስራኤል፡ ቅድመ፡ ሰብአ፡ ዳዊት።
18 ወሀለዉ፡ ህየ፡ ፫ደቀ፡ ሶርህያ፡ ኢዮአብ፡ ወአቢሳ፡ ወአሳሔል፡ ወለአሳሔልሰ፡ ቀሊላት፡ እገሪሁ፡ ወረዋጺ፡ ውእቱ፡ ከመ፡ ወይጠል፡ ውስተ፡ ገዳም።
19 ወዴገኖ፡ አሳሔል፡ ለአበኔር፡ ወተለዎ፡ ወኢተግሕሠ፡ ኢለየማን፡ ወኢለፀጋም፡ እምድኅሬሁ፡ ለአበኔር።
20 ወተመይጠ፡ አቤኔር፡ ድኅሬሁ፡ ወይቤሎ፡ አንተኑ፡ ውእቱ፡ አሳሔል፡ ወይቤሎ፡ እወ፡ አነ፡ ውእቱ።
21 ወይቤሎ፡ አበኔር፡ ተገሐሥ፡ አው፡ ለየማን፡ አው፡ ለፀጋም፡ ወአኀዝ፡ ለከ፡ አሐደ፡ እምውስተ፡ ደቅ፡ ወንሣእ፡ ለከ፡ ንዋየ፡ ሐቅሉ፡ ወአበየ፡ አሳሔል፡ ተግሕሦ፡ እምነ፡ ድኅሬሁ።
22 ወደገመ፡ ዓዲ፡ ብሂሎቶ፡ አበኔር፡ ለአሳሔል፡ ተገሐሥ፡ እምኔየ፡ ከመ፡ ኢይቅትልከ፡ ውስተ፡ ምድር፡ ወእፎ፡ እንከ፡ ኣሌዕል፡ ገጽየ፡ ቅድመ፡ ኢዮአብ።
23 ወኢይከውን፡ ከመዝ፡ ወእቱ፡ ኀበ፡ ኢዮአብ፡ እኁከ ፤ ወአበየ፡ ተግሕሦ፡ ወረገዞ፡ አበኔር፡ በቍጠ፡ ኲናቱ፡ ሐቌሀ፡ ወወፅአ፡ ሐፂኑ፡ በረሮ፡ ወወድቀ፡ በህየ፡ ወሞተ፡ በታሕቴሁ ፤ ወእምዝ፡ ኵሉ፡ ዘመጽአ፡ እስከ፡ ውእቱ፡ መካን፡ ወበጽሐ፡ ህየ፡ ይቀውም፡ ኀበ፡ ሞተ፡ አሳሔል።
24 ወዴገንዎ፡ ኢዮአብ፡ ወአቢሳ፡ ለአቤኔር፡ ወሶበ፡ የዐርብ፡ ፀሓይ፡ ቦኡ፡ ኀበ፡ ወግረ፡ ዐሞን፡ እንተ፡ ቅድመ፡ ጋይ፡ ፍኖተ፡ በድው፡ ዘገባኦን።
25 ወተጋብኡ፡ ደቂቀ፡ ብንያም፡ እለ፡ ምስለ፡ አቤኔር፡ ወተደመሩ፡ ኅቡረ፡ ወቆሙ፡ ውስተ፡ ርእሰ፡ ወግር፡ አሐቲ፡ ወጸውዖ፡ አቤኔር፡ ለኢዮአብ፡ ወይቤሎ፡
26 አኮኑ፡ ለመዊእ፡ ትበልዕ፡ ኲናት ፤ ኢታአምርኑ፡ ከመ፡ መራር፡ ይእቲ፡ ደኃሪታ ፤ እስከ፡ ማእዜኑ፡ እንከ፡ ኢትበሎሙ፡ ለሕዝብ፡ ከመ፡ ይትመየጡ፡ እምድኅረ፡ አኀዊሆሙ።
27 ወይቤ፡ ኢዮአብ፡ ሕያው፡ እግዚአብሔር፡ ከመ፡ ሶበ፡ ኢነበብከ፡ ከመ፡ በጽባሕ፡ እምዐርጉ፡ ሕዝብ፡ ኵሎሙ፡ ላዕለ፡ አኀዊሆሙ።
28 ወነፍሐ፡ ቀርነ፡ ኢዮአብ፡ ወተመይጡ፡ ኵሉ፡ ሕዝብ፡ ወኢዴገንዎሙ፡ እንከ፡ ለእስራኤል፡ ወኢደገሙ፡ እንከ፡ ተቃትሎ።
29 ወአቤኔርሰ፡ ወኵሉ፡ ሰብኡ፡ ሖሩ፡ መንገለ፡ ዐረብ፡ ኵላ፡ ይእቲ፡ ሌሊተ፡ ወዐደዉ፡ ዮርዳኖስ፡ ወሖሩ፡ ኵላንታሃ፡ ይእቲ፡ ፍኖት፡ ርትዕት፡ ወበጽሑ፡ ውስተ፡ ትዕይንት።
30 ወኢዮአብሰ፡ ተመይጠ፡ እምድኅሬሁ፡ ለአቤኔር፡ ወአስተጋብኦሙ፡ ለኵሉ፡ ሕዝብ፡ ወአስተፋቀዶሙ፡ ለደቂቀ፡ ዳዊት፡ ወኮኑ፡ እለ፡ ሞቱ፡ ፲ወ፱ዕደው፡ ወአሳሔል።
31 ወደቂቄሰ፡ ለዳዊት፡ ቀተሉ፡ እምነ፡ ደቂቀ፡ ብንያም፡ እምውስተ፡ ሰብአ፡ አቤኔር፡ ፫፻ወ፷ዕደው፡ እምኔሆሙ።
32 ወነሥእዎ፡ ለአሳሔል፡ ወቅበርዎ፡ ውስተ፡ መቃብረ፡ አቡሁ፡ ውስተ፡ ቤተ፡ ልሔም ፤ ወሖረ፡ ኢዮአብ፡ ወሰብእ፡ እለ፡ ምስሌሁ፡ ኵላ፡ ይእቲ፡ ሌሊተ፡ ወጸብሖሙ፡ በኬብሮን።
=== chapter 3 ===
[II Regum 3]
1 ወኮነ፡ ለዝላፉ፡ ቀትለ፡ ማእከለ፡ ቤተ፡ ሳኦል፡ ወማእከለ፡ ቤተ፡ ዳዊት፡ ወቤተ፡ ዳዊትሰ፡ ኀበ፡ ኀበ፡ ይጸንዕ፡ የሐውር፡ ወቤተ፡ ሳኦልሰ፡ ኀበ፡ ኀበ፡ ይደክም፡ የሐውር።
2 ወተወልዱ፡ ደቂቅ፡ ለዳዊት፡ በኬብሮን፡ ወበኵሩ፡ አምኖን፡ ወልደ፡ አኪናሖም፡ [ኢይዝ]ራኤላዊት ፤
3 ወዳግሙ፡ ደሉህያ፡ ወልደ፡ አቤግያ፡ ቀርሜላዊት ፤ ወሣልሱ፡ አበሴሎም፡ ወልደ፡ ማዐክ፡ ወለተ፡ ቶሚ፡ ንጉሠ፡ ጌሴሪም ፤
4 ወራብዑ፡ አርንያ፡ ወልደ፡ አፌጌ ፤ ወኃምሱ፡ አበጢያ፡ ወልደ፡ አቤገል ፤
5 ወሳድሱ፡ ይትራሐም፡ ወልደ፡ ኤገል፡ ብእሲተ፡ ዳዊት ፤ እሉ፡ እሙንቱ፡ እለ፡ ተወልዱ፡ ለዳዊት፡ በኬብሮን።
6 ወእምዝ፡ ሶበ፡ ኮነ፡ ቀትል፡ ማእከለ፡ ቤተ፡ ሳኦል፡ ወማእከለ፡ ቤተ፡ ዳዊት፡ ወአቤኔር፡ ያጸንዕ፡ ቤተ፡ ሳኦል።
7 ወቦ፡ ዕቅብተ፡ ለሳኦል፡ ወስማ፡ ሩጻፋ፡ ወለተ፡ ኢዮሔል፡ ወይቤሎ፡ ኢያቡስቴ፡ ወልደ፡ ሳኦል፡ ለአቤኔር፡ ለምንት፡ ቦእከ፡ ኀበ፡ ዕቅብተ፡ አቡየ።
8 ወተምዐ፡ ጥቀ፡ አቤኔር፡ በእንተ፡ ዘይቤሎ፡ ኢያቡስቴ፡ ወይቤሎ፡ አቤኔር፡ ቦኑ፡ ርእሰ፡ ከልብ፡ አነ፡ ለክሙ፡ ገቢርየ፡ ምሕረተ፡ ዮም፡ ምስለ፡ ቤተ፡ ሳኦል፡ አቡከ፡ ወምስለ፡ አኀውየ፡ ወምስለ፡ ቅሩብየ፡ ኢተኀበልኩ፡ እግባእ፡ ውስተ፡ ቤተ፡ ዳዊት፡ ወትትኀሠሠኒ፡ በእንተ፡ ኀጢአተ፡ ብእሲት፡ ዮም።
9 ከመዝ፡ ለይረሲዮ፡ እግዚአብሔር፡ ለአቤኔር፡ ወከመዝ፡ ለይቅትሎ፡ ከመ፡ በከመ፡ መሐለ፡ እግዚአብሔር፡ ለዳዊት፡ ከማሁ፡ እገብር፡ ሎቱ፡ ዮም፡ በዛቲ፡ ዕለት።
10 ዮም፡ ነሥኣ፡ ለመንግሥት፡ እምነ፡ ቤተ፡ ሳኦል፡ ከመ፡ ያቅም፡ መንበሮ፡ ለዳዊት፡ ላዕለ፡ እስራኤል፡ ወላዕለ፡ ይሁዳ፡ እስከ፡ ቤርሳቤሕ።
11 ወኢክህለ፡ እንከ፡ ኢያቡስቴ፡ አውሥኦቶ፡ ቃለ፡ ለአቤኔር፡ እስመ፡ ፈርሆ።
12 ወለአከ፡ ሰብአ፡ አቤኔር፡ ኀበ፡ ዳዊት፡ ውስተ፡ ተላሙሔን፡ በጊዜሃ፡ እንዘ፡ ይብል፡ ንትማሐልአ፡ መሐላ፡ ወአቅምአ፡ መሐላከ፡ ምስሌየአ፡ ወናሁአ፡ አገብእአ፡ እዴየአ፡ ምስሌከአ፡ ከመአ፡ እሚጥአ፡ ኀቤከአ፡ ኵሎአ፡ ቤተ፡ እሰራኤልአ።
13 ወይቤ፡ ዳዊት፡ ኦሆአ፡ እትማሐልአ፡ ምስሌከ፡ መሐላአ ፤ ሠናየአ፡ ትቤአ ፤ ወባሕቱአ፡ አሐተአ፡ ቃለአ፡ እሴአለከአ፡ ኢአ፡ ትሬኢአ፡ ገጽየአ፡ ለእመአ፡ ኢያምጻእካአ፡ ለሜልኮልአ፡ ወለተ፡ ሳኦልአ፡ ሶበአ፡ መጻእከአ፡ ከመ፡ ትርአይአ፡ ገጽየ።
14 ወለእከ፡ ዳዊት፡ ሰብአ፡ ኀበ፡ ኢያቡስቴ፡ እንዘ፡ ይብል፡ አግብኣአ፡ ሊተአ፡ ብእሲትየአ፡ ሜልኮልሃአ፡ እንተአ፡ ሐፀይክዋአ፡ በምእትአ፡ ቍልፈቶሙአ፡ ለኢሎፍሊአ።
15 ወለአከ፡ ኢያቡስቴ፡ ወነሥአ፡ እምኀበ፡ ምታ፡ ፈለጢየል፡ ወልደ፡ ሴሌስ።
16 ወትለዋ፡ ምታ፡ እስከ፡ ብራቂ፡ ወይቤሎ፡ አበኔር፡ ሖር፡ ግባእ፡ ወገብአ።
17 ወይቤሎሙ፡ አቤኔር፡ ለሊቃነ፡ እስራኤል፡ እንዘ፡ ይብል፡ ቀዲሙ፡ ተኀሥሥዎ፡ ለዳዊት፡ ታንግሥዎ፡ ለክሙ።
18 ወይእዜኒ፡ ግበሩ፡ ከማሁ፡ እስመ፡ እግዚአብሔር፡ ነበበ፡ በእንተ፡ ዳዊት፡ ወይቤ፡ በእደ፡ ዳዊት፡ ገብርየ፡ ኣድኅኖሙ፡ ለእስራኤል፡ እምነ፡ እደ፡ ኢሎፍሊ፡ ወእምነ፡ እደ፡ ኵሉ፡ ፀሮሙ።
19 ወተናገሮሙ፡ አበኔር፡ ለደቂቀ፡ ብንያም፡ ወሖረ፡ አቤኔር፡ ኬብሮን፡ ከመ፡ ይንግሮ፡ ለዳዊት፡ ኵሎ፡ ዘከመ፡ አደሞሙ፡ ለእስራኤል፡ ወዘከመ፡ አደሞሙ፡ ለኵሉ፡ ቤተ፡ ብንያም።
20 ወመጽአ፡ አቤኔር፡ ውስተ፡ ኬብሮን፡ ወዕሥራ፡ ዕደው፡ ምስሌሁ፡ ወገብረ፡ ዳዊት፡ ምሳሐ፡ ለአቤኔር፡ ወለዕደው፡ እለ፡ ምስሌሁ።
21 ወይቤሎ፡ አቤኔር፡ ለዳዊት፡ እትነሣእ፡ ወአሐውር፡ ወኣስተጋብኦሙ፡ ኀበ፡ እግዚእየ፡ ንጉሥ፡ ለኵሉ፡ እስራኤል፡ ወእትማሐል፡ ምስሌከ፡ መሐላ፡ ወትነግሥ፡ ላዕለ፡ ኵሉ፡ ዘትፈቱ፡ ነፍስከ ፤ ወፈነዎ፡ ዳዊት፡ ለአቤኔር፡ ወሖረ፡ በሰላም።
22 ወናሁ፡ ደቀ፡ ዳዊት፡ ወኢዮአብ፡ የአትዉ፡ እምነ፡ ሐቅል፡ ወአምጽኡ፡ ምስሌሆሙ፡ ምህርካ፡ ብዙኀ፡ ወአቤኔር፡ ኢሀለወ፡ ኀበ፡ ዳዊት፡ ውስተ፡ ኬብሮን፡ እስመ፡ ፈነዎ፡ ወወፅአ፡ እምኀቤሁ፡ በሰላም።
23 ወኢዮአብሰ፡ ወኵሉ፡ ሰራዊቱ፡ ቦኡ፡ ወዜነውዎ፡ ለኢዮአብ፡ ወይቤልዎ፡ መጽአ፡ አበኔር፡ ኀበ፡ ዳዊት፡ ወፈነዎ፡ ወሖረ፡ በሰላም።
24 ወቦአ፡ ኢዮአብ፡ ኀበ፡ ንጉሥ፡ ወይቤሎ፡ ምንት፡ ዝንቱ፡ ዘገበርከ፡ ናሁ፡ መጽአ፡ አቤኔር፡ ኀቤከ፡ ወለምንት፡ ፈነውኮ፡ ወሖረ፡ በሰላም።
25 አው፡ ኢታአምርኑ፡ እከዮ፡ ለአቤኔር፡ ወልደ፡ ኔር፡ እስመ፡ ከመ፡ ያስሕትከ፡ መጽአ፡ ወከመ፡ ያእምር፡ ግዕዘከ፡ ወከመ፡ ያእምር፡ ኵሎ፡ ዘትገብር፡ አንተ።
26 ወወፅእ፡ ኢዮአብ፡ እምኀበ፡ ዳዊት፡ ወለአከ፡ ሰብአ፡ ያግብእዎ፡ ለአቤኔር፡ እምኀበ፡ ዐዘቅት፡ ሴይሪም፡ ወኢያእመረ፡ ዳዊት።
27 ወገብአ፡ አቤኔር፡ ውስተ፡ ኬብሮን፡ ወአግሐሦ፡ ኢዮአብ፡ መንገለ፡ ዐውደ፡ ዴዴ፡ ይትናገሮ፡ እስመ፡ ይፈቅድ፡ ይቅትሎ፡ ወረገዞ፡ ሐቌሁ፡ ወሞተ፡ በበቀለ፡ አሳሔል፡ እኁሁ፡ ለኢዮአብ።
28 ወእምዝ፡ ሰምዐ፡ ዳዊት፡ ወይቤ፡ ንጹሕ፡ አነ፡ ወመንግሥትየ፡ በኀበ፡ እግዚአብሔር፡ ወእስከ፡ ለዓለም፡ እምነ፡ ደሙ፡ ለአቤኔር፡ ወልደ፡ ኔር።
29 ወይግባእ፡ ላዕለ፡ ርእሱ፡ ለኢዮአብ፡ ወላዕለ፡ ቤተ፡ አቡሁ፡ ወኢይትኀጣእ፡ እምነ፡ ቤተ፡ ኢዮአብ፡ ዝልጉስ፡ ወዘለምፅ፡ ወሐንካስ፡ ወዘይመውት፡ በኲናት፡ ወኀጢአ፡ እክል።
30 ወኢዮአብሰ፡ ወእኁሁ፡ አቢሳ፡ ይትዐቀብዎ፡ ለአቤኔር፡ ይቅትልዎ፡ በከመ፡ ቀተለ፡ እኁሆሙ፡ አሳሔልሃ፡ በገባኦን፡ በውስተ፡ ቀትል።
31 ወይቤሎሙ፡ ዳዊት፡ ለኢዮአብ፡ ወለኵሉ፡ ሕዝብ፡ እለ፡ ምስሌሁ፡ ሥጥጡ፡ አልባሲክሙ፡ ወልበሱ፡ ሠቀ፡ ወብክዩ፡ ቅድሜሁ፡ ለአቤኔር፡ ወዳዊትኒ፡ ንጉሥ፡ ሖረ፡ ድኅረ፡ ዐራቱ።
32 ወቀበርዎ፡ ለአበኔር፡ ውስተ፡ ኬብሮን፡ ወጸርኀ፡ ንጉሥ፡ በቃሉ፡ ወበከየ፡ በኀበ፡ መቃብሩ፡ ወበከይዎ፡ ሕዝብ፡ ለአበኔር።
33 ወበከዮ፡ ንጉሥ፡ ለአቤኔር፡ ወይቤ፡ ከመ፡ ሞተ፡ ናባልኑ፡ ሞተ፡ አቤኔር።
34 እደዊከኒ፡ ኢተአስራ፡ ወእገሪከኒ፡ ኢተሞቀሐ፡ ወኢወሰደከ፡ ከመ፡ ናባል፡ ቅድመ፡ ደቂቀ፡ ዐመፃ፡ ወደቀ ፤ ወትጋብኡ፡ ኵሉ፡ ሕዝብ፡ ወበከይዎ።
35 ወመጽኡ፡ ኵሉ፡ ሕዝብ፡ ያምስሕዎ፡ ለዳዊት፡ እንዘ፡ ዓዲሁ፡ ሀሎ፡ ፀሓይ፡ ወመሐለ፡ ዳዊት፡ ወይቤ፡ ከመዝ፡ ለይረስየኒ፡ እግዚአብሔር፡ ወከመዝ፡ ለይቅትለኒ፡ ለእመ፡ ጥዕምኩ፡ እክለ፡ አው፡ ዘኮነ፡ ዘእንበለ፡ ይዕርብ፡ ፀሓይ።
36 ወአእመረ፡ ኵሉ፡ ሕዝብ፡ ወአሥመሮሙ፡ ቅድሜሆሙ፡ ኵሎ፡ ዘገብረ፡ ንጉሥ፡ በቅድመ፡ ሕዝብ።
37 ወአእመረ፡ ኵሉ፡ ሕዝብ፡ ወኵሉ፡ እስራኤል፡ ይእተ፡ አሚረ፡ ከመ፡ ኢአዘዘ፡ ንጉሥ፡ ይቅትልዎ፡ ለአቤኔር፡ ወልደ፡ ኔር።
38 ወይቤሎሙ፡ ንጉሥ፡ ለደቂቁ፡ ኢታአምሩኑ፡ ከመ፡ ዐቢይ፡ መኰንን፡ ወድቀ፡ ዮም፡ እምውስተ፡ እስራኤል ፤
39 ወከመ፡ አነ፡ ዮም፡ ለልየ፡ ዘመዱ፡ ወሥዩም፡ ውእቱ፡ በኀበ፡ ንጉሥ፡ ወእሉሰ፡ ዕደው፡ ደቂቀ፡ ሶሩህያ፡ እኩያን፡ እሙንቱ፡ ሊተ፡ ወይፈድዮ፡ እግዚአብሔር፡ ለዘይገብራ፡ ለእኪት፡ በከመ፡ እከዩ።
=== chapter 4 ===
[II Regum 4]
1 ወሰምዐ፡ ኢያቡስቴ፡ ከመ፡ ሞተ፡ አቤኔር፡ በኬብሮን፡ ወደክመ፡ እደዊሁ፡ ወኵሉ፡ ሰብአ፡ እስራኤል፡ ደንገፁ።
2 ወሀለዉ፡ ፪ዕደው፡ መሳፍንት፡ እሙንቱ፡ በደወለ፡ ምኵናኑ፡ ለኢያቡስቴ፡ ወልደ፡ ሳኦል፡ ወስሙ፡ ለአሐዱ፡ ሬቃካ፡ ወስመ፡ ካልኡ፡ በዐም፡ ደቂቀ፡ ሬሞን፡ ቤሮታዊ፡ ዘእምደቂቀ፡ ብንያም።
3 ወተኀጥኡ፡ እሙንቱ፡ ቤሮታዊያን፡ እምነ፡ ጌት፡ ወነበሩ፡ ህየ፡ እስከ፡ ዛቲ፡ ዕለት።
4 ወዮናታን፡ ወልደ፡ ሳኦል፡ ቦ፡ ወልደ፡ ወፅውስ፡ እገሪሁ፡ ወልደ፡ ፭ዓም፡ ውእቱ፡ ወሎቱ፡ አመ፡ በጽሐ፡ ዜና፡ ሳኦል፡ ወዮናታን፡ ወልዱ፡ እምኀበ፡ እስራኤል፡ ወነሥአቶ፡ ሐፃኒቱ፡ ወጐየት፡ ምስሌሁ፡ ወእንዘ፡ ትረውጽ፡ ከመ፡ ትትኀጣእ፡ ምስሌሁ፡ ወድቀ፡ ወፀወሰ፡ ወስሙ፡ ሜንፎብስቱ።
5 ወሖሩ፡ እልክቱ፡ ደቂቀ፡ ሬሞን፡ ቤሮታዊ፡ ሬቃካ፡ ወበዓም፡ ወቦኡ፡ መዓልት፡ ቀትር፡ ውስተ፡ ቤቱ፡ ለውእቱ፡ ኢያቡስቴ፡ ወውእቱሰ፡ ውስተ፡ ዐራቱ፡ ይነውም፡ መዓልተ፡ ጊዜ፡ ቀትር።
6 ወዐፀወ፡ ኆኅተ፡ ወየአሪ፡ ሥርናየ፡ ወደቀሰ፡ ወኖመ፡ ወቦኡ፡ ሬቃካ፡ ወበዓም፡ ጽሚተ፡ ውስተ፡ ቤተ፡ ኢያቡስቴ፡
7 ወኢያቡስቴሰ፡ ይነውም፡ ውስተ፡ ምስካቡ፡ ውስተ፡ ጽርሑ፡ ወረገዝዎ፡ ወቀተልዎ፡ ወመተሩ፡ ርእሶ፡ ወነሥኡ፡ ርእሶ፡ ወሖሩ፡ ፍኖቶሙ፡ መንገለ፡ ዐረብ፡ ኵላ፡ ይእተ፡ ሌሊተ።
8 ወወሰዱ፡ ሎቱ፡ ለዳዊት፡ ርእሶ፡ ለኢያቡስቴ፡ በኬብሮን፡ ወይቤልዎ፡ ለንጉሥ፡ ናሁ፡ ርእሱ፡ ለኢያቡስቴ፡ ወልደ፡ ሳኦል፡ ጸላኢከ፡ ዘኀሠሣ፡ ለነፍስከ፡ ወወሀቦ፡ እግዚአብሔር፡ ለእግዚእነ፡ ለንጉሥ፡ በቀለ፡ እምነ፡ ፀሩ፡ በዛቲ፡ ዕለት፡ እምነ፡ ሳኦል፡ ጸላኢከ፡ ወእምነ፡ ዘርኡ።
9 ወአውሥኦሙ፡ ዳዊት፡ ለሬቃካ፡ ወለበዓም፡ እኁሁ፡ ደቂቀ፡ ሬሞን፡ ቤሮታዊ፡ ወይቤሎሙ፡ ሕያው፡ እግዚአብሔር፡ ዘቤዘዋ፡ ለነፍስየ፡ እምነ፡ ኵሉ፡ ምንዳቤየ ፤
10 ከመ፡ ዘዜነወኒ፡ ከመ፡ ሞተ፡ ሳኦል፡ ዘውእቱ፡ ነገረኒ፡ በቅድሜየ፡ ከመ፡ አኀዝክዎ፡ ወቀተልክዎ፡ በሰቄላቅ፡ ለዝንቱ፡ ዘእምወሀብክዎ፡ ዐስበ፡ ዜናሁ።
11 ወይእዜኒ፡ አንትሙ፡ ዕደው፡ እኩያን፡ ቀተልክሙ፡ ብእሴ፡ ጻድቀ፡ በውስተ፡ ቤቱ፡ ወበውስት፡ ምስካቡ፡ ወይእዜኒ፡ እትኀሠሦ፡ ለደሙ፡ እምነ፡ እዴክሙ፡ ወእሤርወክሙ፡ እምነ፡ ምድር።
12 ወአዘዞሙ፡ ዳዊት፡ ለደቁ፡ ወቀተልዎሙ፡ ወመተርዎሙ፡ እደዊሆሙ፡ ወእገሪሆሙ፡ ወሰቀሉ፡ ውስተ፡ ዕፀ፡ ኬብሮን፡ ወርእሰ፡ ኢያቡስቴሰ፡ ቀበሩ፡ ውስት፡ መቃብረ፡ አቤኔር፡ ወልደ፡ ኔር።
=== chapter 5 ===
[II Regum 5]
1 ወመጽኡ፡ ኵሉ፡ ሕዝበ፡ እስራኤል፡ ኀበ፡ ዳዊት፡ ውስተ፡ ኬብሮን፡ ወይቤልዎ፡ ናሁ፡ ሥጋከ፡ ወዐፅምከ፡ ንሕነ።
2 ወቀዲሙኒ፡ እንዘ፡ ሀለወ፡ ሳኦል፡ ይነግሥ፡ ለነ፡ አንተ፡ ክመ፡ ዘታወፅኦሙሰ፡ ወታበውኦሙ፡ ለእስራኤል፡ ወይቤለከ፡ እግዚአብሔር፡ አንተ፡ ትርዕዮሙ፡ ለሕዝብየ፡ እስራኤል።
3 ወመጽኡ፡ ኵሎሙ፡ ሊቃናተ፡ እስራኤል፡ ኀበ፡ ንጉሠ፡ ኬብሮን፡ ወተማሐለ፡ ምስሌሆሙ፡ ዳዊት፡ መሐላ፡ በኬብሮን፡ በቅድመ፡ እግዚአብሔር፡ ወቀብእዎ፡ ለዳዊት፡ ይንግሥ፡ ላዕለ፡ ኵሉ፡ እስራኤል።
4 ወወልደ፡ ፴ዓመት፡ ውእቱ፡ ዳዊት፡ አመ፡ ያነግሥዎ፡ ወ፵ዓመተ፡ ነግሠ።
5 ወ፯ዓመተ፡ ወ፮አውራኀ፡ ነግሠ፡ በኬብሮን፡ ላዕለ፡ ይሁዳ ፤ ፴ወ፫ዓመተ፡ ነግሠ፡ ላዕለ፡ ኵሉ፡ እስራኤል፡ ወላዕለ፡ ይሁዳ፡ በኢየሩሳሌም።
6 ወሖረ፡ ዳዊት፡ ወሰብኡ፡ ውስተ፡ ኢየሩሳሌም፡ ኀበ፡ ኢያቡሴዎን፡ እለ፡ ይነብሩ፡ ውስተ፡ ይእቲ፡ ምድር፡ ወይቤልዎ፡ ለዳዊት፡ ኢትበውእ፡ ዝየ፡ ወተቃወምዎ፡ ዕውራን፡ ወስቡራን፡ ወይቤሉ፡ ኢትበውእ፡ ዝየ፡ ዳዊት።
7 ወአስተጋብአ፡ ዳዊት፡ ቅጽራ፡ ለጽዮን፡ እንተ፡ ይእቲ፡ ሀገረ፡ ዳዊት።
8 ወይቤ፡ ዳዊት፡ ይእተ፡ አሚረ፡ ኵሎ፡ ዘይቀትሎሙ፡ ለኢያቡሴዎን፡ ለይርግዞሙ፡ በኵናት፡ ለዕውራን፡ ወለስቡራን፡ ወለእለ፡ ይጻልእዋ፡ ለነፍሰ፡ ዳዊት፡ ወበበይነ፡ ዝንቱ፡ ይቤሉ፡ ዕውራን፡ ወስቡራን፡ ኢይባኡ፡ ቤት፡ እግዚአብሔር።
9 ወነበረ፡ ዳዊት፡ ውስተ፡ ቅጽር፡ ወተሰምየት፡ ይእቲ፡ ሀገረ፡ ዳዊት፡ ወነደቀ፡ ሀገረ፡ እንተ፡ ዐውዱ፡ እምጽንፋ፡ ወቤቶሂ።
10 ወሖረ፡ ዳዊት፡ እንዘ፡ የሐውር፡ ወየዐቢ፡ ወእግዚአብሔር፡ ዘኵሎ፡ ይመልክ፡ ሀለወ፡ ምስሌሁ።
11 ወፈነወ፡ ኪራም፡ ንጉሠ፡ ጢሮስ፡ ሐዋርያተ፡ ኀበ፡ ዳዊት፡ ወዕፀወ፡ አርዝ፡ ወጸረብተ፡ ዕፅ፡ ወወቀርተ፡ እብን፡ ወሐነጸ፡ ቤተ፡ ለዳዊት።
12 ወአእመረ፡ ዳዊት፡ ከመ፡ አስትዳለዎ፡ እግዚአብሔር፡ ይንግሥ፡ ላዕለ፡ እስራኤል፡ ወከመ፡ አልዐላ፡ ለመንግሥቱ፡ በእንተ፡ ሕዝቡ፡ እስራኤል።
13 ወነሥአ፡ ዳዊት፡ ዓዲ፡ እንስት፡ ዕቁባት፡ እምነ፡ ኢየሩሳሌም፡ ወእምድኅረ፡ መጽአ፡ ውስተ፡ ኬብሮን፡ ወእምዝ፡ ትወልዱ፡ ለዳዊት፡ ዓዲ፡ ደቂቅ፡ ወአዋልድ።
14 ወዝንቱ፡ ውእቱ፡ አስማቲሆሙ፡ ለእለ፡ ተወልዱ፡ ሎቱ፡ በኢየሩሳሌም፡ ሶሙስ፡ ወሰባብ፡ ወናታን፡ ወሰሎሞን ፤
15 ወኢየቤሖር፡ ወኢሊሱስ፡ ወናፌቅ፡ ወኢያፌሳ ፤
16 ወኤልሶሚ፡ ወኢያጴዳሔ፡ ወኤሊፊት፡ ወሶሜዔ፡ ወኢየሰበቄ፡ ወናታን፡ ወገለማሔን፡ ወኢየብሖር፡ ወትሔሱስ፡ ወኢለፋሌድ፡ ወናጌድ፡ ወናፌቅ፡ ወእነትሕልያ፡ ወሳሚስ፡ ወበዓሊ፡ ወቦተ፡ ወኢሊፋለት።
17 ወሰምዑ፡ ኢሎፍሊ፡ ከመ፡ ቀብእዎ፡ ለዳዊት፡ ወአንገሥዎ፡ ላዕለ፡ እስራኤል፡ ወዐርጉ፡ ኵሎሙ፡ ኢሎፍሊ፡ ይኀሥሥዎ፡ ለዳዊት፡ ወወረደ፡ ውስተ፡ ቅጽር።
18 ወበጽሑ፡ ኢሎፍሊ፡ ወወረዱ፡ ውስተ፡ ቈላተ፡ ጢጣኖስ።
19 ወተስእለ፡ ዳዊት፡ ቃለ፡ እግዚአብሔር፡ ወይቤ፡ እዕርግኑ፡ ኀበ፡ ኢሎፍሊ፡ ወታገብኦሙ፡ ውስተ፡ እዴየ፡ ወይቤሎ፡ እግዚአብሔር፡ ለዳዊት፡ ዕርግ፡ ወአግብኦ፡ ኣገብኦሙ፡ ውስት፡ እዴከ፡ ለኢሎፍሊ።
20 ወመጽኦሙ፡ ዳዊት፡ እምነ፡ መልዕልተ፡ ምቅታል፡ ወቀተሎሙ፡ ለኢሎፍሊ፡ በህየ፡ ወይቤ፡ ዳዊት፡ ቀተሎሙ፡ እግዚአብሔር፡ ለፀርየ፡ ለኢሎፍሊ፡ በቅድሜየ፡ ከመ፡ ክዕወተ፡ ማይ፡ ወበበይነ፡ ዝንቱ፡ ተሰምየ፡ ስሙ፡ ለውእቱ፡ መካን፡ መልዕልተ፡ ምቅታል።
21 ወኀደጉ፡ በህየ፡ አማልክቲሆሙ፡ ወነሥኦሙ፡ ዳዊት፡ ወሰብእ፡ እለ፡ ምስሌሁ።
22 ወደገሙ፡ ዓዲ፡ ኢሎፍሊ፡ ዐሪገ፡ ወወረዱ፡ ውስተ፡ ቄላተ፡ ጢጣኖስ።
23 ወተስእለ፡ ዳዊት፡ ቃለ፡ እግዚአብሔር፡ ወይቤሎ፡ እግዚአብሔር፡ ዕርግ፡ ተቀበሎሙ፡ ወጕየይ፡ እምኔሆሙ፡ እስከ፡ ይበጽሑ፡ በገቦሁ፡ ለቀለውትሞኖስ።
24 ይእት፡ ጊዜ፡ ረድ፡ ላዕሌሆሙ፡ እስመ፡ ይወፅእ፡ እግዚአብሔር፡ ይእተ፡ ጊዜ፡ ቅድሜከ፡ ከመ፡ ይቅትሎሙ፡ ለኢሎፍሊ፡ በውስተ፡ ቀትል።
25 ወገብረ፡ ዳዊት፡ በከመ፡ አዘዞ፡ እግዚአብሔር፡ ወቀተሎሙ፡ ለኢሎፍሊ፡ እምነ፡ ገባኦን፡ እስከ፡ ምድረ፡ ጌሴራ።
=== chapter 6 ===
[II Regum 6]
1 ወአስተጋብኦሙ፡ ካዕባ፡ ዳዊት፡ ለኵሎሙ፡ ወራዙተ፡ እስራኤል፡ መጠነ፡ ፯፼።
2 ወተንሥእ፡ ወሖረ፡ ዳዊት፡ ወኵሉ፡ ሕዝብ፡ ዘምስሌሁ፡ እምነ፡ መላእከተ፡ ይሁዳ፡ እምኀበ፡ ዐቀብ፡ ከመ፡ ያምጽእዋ፡ ለታቦተ፡ እግዚአብሔር፡ እንተ፡ ላዕሌሃ፡ ተሰምየ፡ እግዚአ፡ ኀይል፡ ዘይነብር፡ ዲበ፡ ኪሩቤል፡ በላዕሌሃ።
3 ወጸዐንዋ፡ ለታቦተ፡ እግዚአብሔር፡ ዲበ፡ ሰረገላ፡ ሐዲስ፡ ወነሥእዋ፡ እምነ፡ ቤተ፡ አሚናዳብ፡ ዘውስተ፡ ወግር፡ ወዖዛ፡ ወአኀዊሁ፡ ደቂቀ፡ አሚናዳብ፡ ይመርሁ፡ ቅድመ፡ ሰረገላት ፤
4 ወቅድመ፡ ታቦት፡ ወአኀዊሁኒ፡ የሐውሩ፡ ቅድመ፡ ታቦት።
5 ወዳዊትሰ፡ ወደቂቀ፡ እስራኤል፡ ይትዋነዩ፡ ቅድመ፡ እግዚአብሔር፡ በዕንዚራት፡ ወየዐነዝሩ፡ በኀይል፡ ወየሐልዩ፡ በጸናጽል፡ ወበናብሌሰ፡ ወበመሰንቆ።
6 ወበጽሑ፡ እስከ፡ ኀበ፡ ዐውደ፡ እክል፡ ዘኢያቡሳዊ፡ ወአልዐለ፡ እዴሁ፡ ዖዛ፡ ላዕለ፡ ታቦተ፡ እግዚአብሔር፡ ከመ፡ የአኀዛ፡ ወአጽንዓ፡ እስመ፡ ተግሕሠት፡ ወነድሖ፡ ላህም፡ እንዘ፡ ይእኅዛ።
7 ወተምዐ፡ እግዚአብሔር፡ ላዕለ፡ ዖዛ፡ ወአውደቆ፡ እግዚአብሔር፡ ወሞት፡ በህየ፡ በኀበ፡ ታቦተ፡ እግዚአብሔር፡ በቅድመ፡ እግዚአብሔር።
8 ወተከዘ፡ ዳዊት፡ እስመ፡ ቀተሎ፡ እግዚአብሔር፡ ለዖዛ፡ ወትሰምየ፡ ውእቱ፡ መካን፡ ምምዋቲሁ፡ ለዖዛ፡ እስከ፡ ዛቲ፡ ዕለት።
9 ወፈርሀ፡ ዳዊት፡ እምነ፡ እግዚአብሔር፡ ይእት፡ አሚረ፡ ወይቤ፡ እፎ፡ ትበውእ፡ ታቦተ፡ እግዚአብሔር፡ ኀቤየ።
10 ወኢፈቀደ፡ ዳዊት፡ ያግሕሣ፡ ለታቦት፡ ሕጉ፡ ለእግዚአብሔር፡ ውስተ፡ ሀገረ፡ ዳዊት፡ ወዐፀዋ፡ ዳዊት፡ ውስተ፡ ቤተ፡ አቢዳራ፡ ጌትያዊ።
11 [ወነበረት፡ ታቦተ፡ እግዚአብሔር፡ ውስተ፡ ቤት፡ አቢዳራ፡ ጌትያዊ፡] ፫አውራኀ፡ ወባረከ፡ እግዚአብሔር፡ ኵሎ፡ ቤቶ፡ ለአቢዳራ፡ ወኵሎ፡ ዘዚአሁ።
12 ወዜነውዎ፡ ለንጉሥ፡ ወይቤልዎ፡ ባረከ፡ እግዚአብሔር፡ ለቤተ፡ አቢዳራ፡ ወለኵሉ፡ ዘዚአሁ፡ በእንተ፡ ታቦተ፡ እግዚአብሔር፡ ወሖረ፡ ዳዊት፡ ወአምጽኣ፡ ለታቦተ፡ እግዚአብሔር፡ እምነ፡ ቤተ፡ አቢዳራ፡ ውስተ፡ ሀገረ፡ ዳዊት፡ በትፍሥሕት።
13 ወሀለዉ፡ ምስሌሆሙ፡ እለ፡ ይወስድዋ፡ ለታቦተ፡ እግዚአብሔር፡ ሰብዐቱ፡ መሰናቁት፡ ወጠብሑ፡ አልህምተ፡ ወአባግዐ።
14 ወዳዊት፡ የዐነዝር፡ በዕንዚራ፡ ቅድመ፡ ታቦት፡ ወለብሰ፡ ዳዊት፡ ዘየሀይድ፡ ዐይነ።
15 ወዳዊት፡ ወኵሉ፡ ሕዝበ፡ እስራኤል፡ ወሰድዋ፡ ለታቦተ፡ እግዚአብሔር፡ በውውዓ፡ ወበቃለ፡ ቀርን።
16 ወሰበ፡ በጽሐት፡ ታቦት፡ ውስተ፡ ሀገረ፡ ዳዊት፡ ወሜልኮል፡ ወለተ፡ ሳኦል፡ ትሔውጽ፡ እንተ፡ መስኮት፡ ወርእየቶ፡ ለዳዊት፡ ንጉሥ፡ እንዘ፡ ይዘፍን፡ ወየዐነዝር፡ በቅድመ፡ እግዚአብሔር፡ ወመነነቶ፡ በልባ።
17 ወእምጽእዋ፡ ለታቦተ፡ እግዚአብሔር፡ ወአንበርዋ፡ ውስተ፡ መካና፡ ውስት፡ ደብተራ፡ እንተ፡ ተከለ፡ ዳዊት፡ ወአብአ፡ ዳዊት፡ መሥዋዕተ፡ ቅድመ፡ እግዚአብሔር፡ ወዘበእንተ፡ ሰላም።
18 ወፈጸመ፡ ዳዊት፡ አብኦ፡ መሥዋዕት፡ ወዘበእንተ፡ ሰላም፡ ወባረኮሙ፡ ለሕዝብ፡ በስመ፡ እግዚአብሔር፡ እግዚአ፡ ኀይል።
19 ወከፈለ፡ ለኵሉ፡ ሕዝብ፡ ወለኵሉ፡ ኀይለ፡ እስራኤል፡ እምነ፡ ዳን፡ እስከ፡ ቤርሳቤሕ፡ ለዕደዊሆሙ፡ ወለአንስቲያሆሙ፡ ወለኵሎሙ፡ በበ፡ ጸሪቃት፡ ኅብስተ፡ ጤጉን፡ ወሥጋ፡ ወጽዋዐ፡ ወይን፡ ወአተዉ፡ ኵሉ፡ ሕዝብ፡ ውስተ፡ አብያቲሆሙ።
20 ወተመይጠ፡ ዳዊት፡ ወአተወ፡ ቤቶ፡ ወባረከ፡ ወወፅአት፡ ሜልኮል፡ ወለተ፡ ሳኦል፡ ትቀበለቶ፡ ለዳዊት፡ ወባረከቶ፡ ወትቤ፡ እፎ፡ ተሰብሐ፡ ዮም፡ ንጉሠ፡ እስራኤል፡ ዘተከሥተ፡ ዮም፡ ውስተ፡ አዕይንተ፡ አንስቲያ፡ አግብርቲሁ፡ በከመ፡ ይትከሠት፡ ፩እምእለ፡ ይዘፍኑ።
21 ወይቤላ፡ ዳዊት፡ ለሜልኮል፡ ቅድመ፡ እግዚአብሔር፡ ዘፈንኩ፡ ወይትባረክ፡ እግዚአብሔር፡ ዘአድኀነኒ፡ እምነ፡ አቡኪ፡ ወላዕለ፡ ኵሉ፡ ቤቱ፡ ሤመኒ፡ መኰንነ፡ ወላዕለ፡ ሕዝቡ፡ እስራኤል፡ ወእትዋነይሂ፡ ወእዘፍንሂ፡ ቅድመ፡ እግዚአብሔር ፤
22 ወአትከሠትሂ፡ ዓዲ፡ ወእከውን፡ ምኑነ፡ ቅድመ፡ አዕይንትኪ፡ ወበኀበ፡ አዋልድኒ፡ እለ፡ ትቤሊ፡ ተሰባሕከ።
23 ወሜልኮልሰ፡ ኢወለደት፡ እስከ፡ አመ፡ ሞተት።
=== chapter 7 ===
[II Regum 7]
1 ወእምዝ፡ ሶበ፡ ነበረ፡ ንጉሥ፡ ውስተ፡ ቤቱ፡ አውረሶ፡ እግዚአብሔር፡ ኵሎ፡ ፀሮ፡ እለ፡ ዐውዱ።
2 ወይቤሎ፡ ንጉሥ፡ ለናታን፡ ነቢይ፡ ናሁ፡ አንሰ፡ እነብር፡ ውስት፡ ቤተ፡ ዕፀ፡ አርዝ፡ ወታቦተ፡ እግዚአብሔር፡ ትነብር፡ ማእከለ፡ ደብተራ።
3 ወይቤሎ፡ ናታን፡ ለንጉሥ፡ ኵሎ፡ ዘትኄሊ፡ በልብከ፡ ግበር፡ እስመ፡ እግዚአብሔር፡ ምስሌከ።
4 ወኮነ፡ ቃለ፡ እግዚአብሔር፡ ኀበ፡ ናታን፡ ነቢይ፡ ወይቤሎ ፤
5 ሑር፡ ወበሎ፡ ለገብርየ፡ ዳዊት፡ ከመዝ፡ ይቤ፡ እግዚአብሔር፡ አኮአ፡ አንተአ፡ ዘትነድቅአ፡ ሊተ፡ ቤት፡ ዘውስቴቱ፡ እነብር፡ ህየ።
6 እስመ፡ ኢነበርኩ፡ ውስተ፡ ቤት፡ እምአመ፡ አውጻእክዎሙ፡ እምነ፡ ግብጽ፡ ለደቂቀ፡ እስራኤል፡ እስከ፡ ዛቲ፡ ዕለት፡ ወአንሶሰውኩ፡ ውስተ፡ ማኅደር፡ ወውስተ፡ ደብተራ፡
7 በኵሉ፡ ዘሖርኩ፡ ውስተ፡ ኵሉ፡ እስራኤል፡ ወእመኒ፡ ነበብኩ፡ ወተናገርኩ፡ ምስለ፡ አሐቲ፡ እምነ፡ ሕዝበ፡ እስራኤል፡ ዘአዘዝኩ፡ ወእቤ፡ ረዐዩ፡ ሊተ፡ ሕዝብየ፡ እስመ፡ ኢነደቅሙ፡ ሊተ፡ ቤተ፡ ዘአርዝ።
8 ወይእዜኒ፡ ከመዝ፡ በሎ፡ ለገብርየ፡ ዳዊት፡ ከመዝ፡ ይቤ፡ እግዚአብሔር፡ ዘኵሎ፡ ይመልክ፡ ነሣእኩከ፡ እምነ፡ መርዔተ፡ አባግዕ፡ ከመ፡ እረሲከ፡ መኰንነ፡ ለሕዝብየ፡ እስራኤል።
9 ወሀለውኩ፡ ምስሌከ፡ በኵሉ፡ ኀበ፡ ሖርከ፡ ወሠረውክዎሙ፡ ለኵሉ፡ ፀርከ፡ እምቅድመ፡ ገጽከ፡ ወረሰይኩ፡ ስመከ፡ ዐቢየ፡ ከመ፡ ስሞሙ፡ ለዐበይተ፡ ምድር።
10 ወእገብር፡ ብሔረ፡ ለሕዝብየ፡ እስራኤል፡ ወአበቍሎሙ፡ ወይነብሩ፡ ባሕቲቶሙ፡ ወአልቦ፡ ዘይትሐዘቡ፡ እንከ፡ ወኢይደግም፡ እንከ፡ ወልደ፡ ኀጢአት፡ አሕምሞቶሙ፡ ከመ፡ ቀዲሙ ፤
11 አመ፡ መዋዕለ፡ ሤምኩ፡ መኳንንት፡ ላዕለ፡ ሕዝብየ፡ እስራኤል፡ ወኣዐርፈከ፡ እምነ፡ ኵሉ፡ ፀርከ፡ ወያየድዐከ፡ እግዚአብሔር፡ እስመ፡ ቤተ፡ ትነድቅ፡ ሎቱ።
12 ወአመ፡ ትፌጽም፡ መዋዕሊከ፡ ወትሰክብ፡ ምሰለ፡ አበዊከ፡ ወኣቀውም፡ ዘርአከ፡ እምድኅሬከ፡ ዘይወፅእ፡ እምነ፡ ከርሥከ፡ ወአስተዴልዋ፡ ለመንግሥቱ።
13 ውእቱ፡ ይነድቅ፡ ቤተ፡ ለስምየ፡ ወለዓለም፡ ኣቀውም፡ መንበሮ።
14 ወአነ፡ እከውኖ፡ አቡሁ፡ ወውእቱ፡ ይከውነኒ፡ ወልድየ፡ ወለእመኒ፡ መጽአቶ፡ ኀጢአቱ፡ እጌሥጾ፡ በበትረ፡ ዕደው፡ ወበዘእጓለ፡ እመሕያው፡ ተግሣጽ።
15 ወምሕረትየሰ፡ ኢያርሕቅ፡ እምኔሁ፡ በከመ፡ ገሠጽኩ፡ በተግሣጽ፡ እምነ፡ ቅድመ፡ ገጽየ።
16 ወመሃይምነ፡ ይከውን፡ ቤቱ፡ ወመንግሥቱ፡ ለዓለም፡ ቅድሜየ፡ ወይረትዕአ፡ መንበሩአ፡ ለዓለምአ።
17 በከመ፡ ኵሉ፡ ዝንቱ፡ ራእይ፡ ከማሁ፡ ነገሮ፡ ናታን፡ ለዳዊት።
18 ወቦአ፡ ዳዊት፡ ንጉሥ፡ ወነበረ፡ ቅድመ፡ እግዚአብሔር፡ ወይቤ፡ ምንትኑ፡ አነ፡ እግዚኦ፡ ወምንት፡ ውእቱ፡ ቤትየ፡ ከመ፡ ታፍቅረኒ፡ መጠነዝ።
19 ወአንሰ፡ ሕቅ፡ ወንኡስ፡ በቅድሜከ፡ እግዚእየ፡ ወነበብከ፡ በእንተ፡ ቤተ፡ ገብርከ፡ ለነዋኅ፡ እስመ፡ ከመዝ፡ ውእቱ፡ ሕጉ፡ ለሰብእ፡ እግዚአ።
20 ወምንት፡ እንከ፡ ሀለዎ፡ ለዳዊት፡ ይንብብ፡ በኀቤከ ፤ ወይእዜኒ፡ ለሊከ፡ ታአምሮ፡ ለገብርከ፡ እግዚኦ።
21 በበይነ፡ ገብርከ፡ ገበርከ፡ ወበከመ፡ ልብከ፡ ገበርከ፡ ኵሎ፡ ዘንተ፡ ዕበየ፡ ዘትቤሎ፡ ለገብርከ።
22 እስመ፡ አዕበይከ፡ እግዚኦ፡ እስመ፡ አልቦ፡ ከማከ፡ ወአልቦ፡ እግዚአብሔር፡ ዘእንበሌከ፡ በኵሉ፡ ዘሰማዕነ፡ በእዘኒነ።
23 ወመኑ፡ ከመ፡ ሕዝብከ፡ እስራኤል፡ ካልእ፡ ሕዝብ፡ በውስተ፡ ምድር፡ ዘእግዚአብሔር፡ መርሐ፡ ከመ፡ ይቤዙ፡ ሎቱ፡ ሕዝቦ፡ ወይግበር፡ ስምዐ፡ ወዐቢያተ፡ ወዘያስተርኢ፡ አመ፡ ትወፅእ፡ እምነ፡ ቅድመ፡ ሕዝብከ፡ ዘቤዘውከ፡ ለከ፡ እምነ፡ ግብጽ፡ ሕዝበ፡ ወተዓይነ።
24 ወአስተዳለውከ፡ ለከ፡ ሕዝበከ፡ እስራኤል፡ ሕዝበ፡ ለዓለም፡ ወአንት፡ እግዚኦ፡ ኮንኮሙ፡ አምላኮሙ።
25 ወይእዜኒ፡ እግዚኦ፡ እግዚኦ፡ ቃለ፡ ዘነበብከ፡ በእንት፡ ገብርከ፡ ወበእንተ፡ ቤቱ፡ አርትዖ፡ እስከ፡ ለዓለም፡ እግዚኦ፡ ዘኵሎ፡ ትመልክ፡ እግዚኦ፡ በውስተ፡ እስራኤል፡ ቤቱ፡ ለገብርከ፡ ዳዊት፡ ይኩን፡ ርቱዕ፡ ቀድሜሁ፡ እስመ፡ አንተ፡ እግዚኦ፡ አምላኩ፡ ለእስራኤል።
26 ወይእዜኒ፡ በከመ፡ ነበብከ፡
27 ይዕበይ፡ ስምከ፡ እስከ፡ ለዓለም፡ ይቤ፡ እግዚአብሔር፡ ዘኵሎ፡ ይመልክ፡ አምላከ፡ እስራኤል፡ ወከሠትከ፡ እዝኖ፡ ለገብርከ፡ ወትቤ፡ ቤተ፡ አሐንጽ፡ ለከ ፤ በበይነ፡ ዝንቱ፡ ገብአ፡ ልቡ፡ ለገብርከ፡ ከመ፡ ይጸሊ፡ ኀቤከ፡ ዛተ፡ ብፅዓተ።
28 ወይእዜኒ፡ እግዚኦ፡ አንተ፡ እግዚአብሔር፡ ውእቱ፡ ወቃልከኒ፡ ጽድቅ፡ ወነበብከ፡ ላዕለ፡ ገብርከ፡ ኵሎ፡ ዘንተ፡ ሠናይተ።
29 ወይእዜኒ፡ አኀዝ፡ እንከ፡ ወባርክ፡ ቤት፡ ገብርከ፡ ከመ፡ ይኩን፡ ቅድሜከ፡ ለዓለም፡ እስመ፡ አንተ፡ ነበብከ፡ እግዚኦ፡ ወእምነ፡ በረከትከ፡ ይትባረክ፡ ቤተ፡ ገብርከ፡ ለዓለም።
=== chapter 8 ===
[II Regum 8]
1 ወእምድኅረ፡ ዝንቱ፡ ቀተሎሙ፡ ዳዊት፡ ለኢሎፍሊ፡ ወአግረሮሙ፡ ወአስተጋብአ፡ ዳዊት፡ እምነ፡ እዴሆሙ፡ ለኢሎፍሊ፡ ዘነሥኡ።
2 ወቀተሎሙ፡ ዳዊት፡ ለሞአብ፡ ወሰፈሮሙ፡ በአሕባል፡ እምድኅረ፡ አስከቦሙ፡ ውስተ፡ ምድር፡ ወኮነ፡ ዘ፪አሕባል፡ መስፈርት፡ በሞት፡ ወ ፪አሕባል፡ መስፈርተ፡ ዘሐይወ፡ ወበዝ፡ ኮኑ፡ ሞአብ፡ ለዳዊት፡ አግብርተ፡ እለ፡ ያገብኡ፡ ጸባሕተ።
3 ወቀተሎ፡ ዳዊት፡ ለአድርዐዛር፡ ወልደ፡ ራዓም፡ ንጉሠ፡ ሱባ፡ እንዘ፡ የሐውር፡ ከመ፡ ያብጽሕ፡ እዴሁ፡ ላዕለ፡ ፈለገ፡ አፍራጦን።
4 ወረክበ፡ ዳዊት፡ [፲፻ወ፸ሰረገላተ፡] ዘዚአሁ፡ ወ፸፻ሰብእ፡ አፍራስ፡ ወ፪፼ዕደው፡ አጋር፡ ወነሠቶ፡ ዳዊት፡ ለኵሉ፡ ውእቱ፡ ሰረገላት፡ ወአትረፈ፡ ሎቱ፡ እምውስቴቶሙ፡ ፻ሰረገላት።
5 ወመጽኡ፡ ሶርያ፡ ዘደማስቆ፡ ይርድእዎ፡ ለአድርዐዛር፡ ንጉሠ፡ ሱባ፡ ወቀተሎሙ፡ ዳዊት፡ ለሶርያ፡ ፪፼ወ[፳፻]ብእሴ።
6 ወሤመ፡ ዳዊት፡ ነባሬ፡ ውስተ፡ ሶርያ፡ ዘደማስቆ፡ ወኮኑ፡ ሶርያ፡ አግብርተ፡ ለዳዊት፡ እለ፡ ያገብኡ፡ ጸባሕት፡ ወያድኅኖ፡ እግዚአብሔር፡ ለዳዊት፡ በኀበ፡ ሖረ።
7 ወነሥአ፡ ዳዊት፡ መዛግሕተ፡ አልባሲሆሙ፡ ዘወርቅ፡ ዘገብረ፡ ለሰብኡ፡ አድርዓዛር፡ ንጉሠ፡ ሱባ፡ ወወሰዶ፡ ኢየሩሳሌም፡ ወነሥአ፡ ሱሥቃም፡ ንጉሠ፡ ግብጽ፡ አመ፡ ዐርገ፡ ኢየሩሳሌም፡ በመዋዕለ፡ ሮብአም፡ ወልደ፡ ሰሎሞን።
8 ወእምነ፡ መስብቅኒ፡ ነሥአ፡ ዳዊት፡ ንጉሥ፡ እምነ፡ ኅሩያት፡ አህጉረ፡ አድርዓዛር፡ ብርተ፡ ብዙኀ፡ ጥቀ፡ ወቦቱ፡ ገብረ፡ ሰሎሞን፡ ባሕረ፡ እንተ፡ ብርት፡ ወአዕማደኒ፡ ወመዓክክተኒ፡ ወኵሎ፡ ንዋየኒ።
9 ወሰምዐ፡ ታይ፡ ንጉሠ፡ ሔማት፡ ከመ፡ ቀተለ፡ ዳዊት፡ ኵሎ፡ ኀይለ፡ አድርዓዛር።
10 ወለአኮ፡ ታይ፡ ለኢያዱራን፡ ወልዱ፡ ኀበ፡ ዳዊት፡ ንጉሥ፡ ይዜንዎ፡ በእንተ፡ ሰላም፡ እስመ፡ ፀብኦ፡ ወቀተሎ፡ ለአድርዓዛር፡ ወፈነወ፡ ምስሌሁ፡ ንዋየ፡ ወርቅ፡ ወንዋየ፡ ብሩር፡ ወንዋየ፡ ብርት።
11 ወኪያሁኒ፡ ቀደሰ፡ ንጉሥ፡ ለእግዚአብሔር፡ ምስለ፡ ብሩር፡ ወምስለ፡ ወርቅ፡ ዘቀደሰ፡ እምነ፡ ኵለ፡ አህጉር፡ ዘነሥአ ፤
12 እምነ፡ ይሁዳ፡ ወእምነ፡ ሞአብ፡ ወእምነ፡ ደቂቀ፡ ዐሞን፡ ወእምነ፡ ኢሎፍሊ፡ ወእምነ፡ ዐማሌቅ፡ ወእምነ፡ በርባረ፡ አድርዓዘር፡ ወልደ፡ ራዓም፡ ንጉሠ፡ ሱባ።
13 ወገብረ፡ ዳዊት፡ ስመ፡ ወበግብእቱ፡ አዘዞሙ፡ ዳዊት፡ ለኤዶምያ፡ በጌቤሌም፡ ፼ወ፳፻።
14 ወሤሞሙ፡ ውስተ፡ ኤዶምያ፡ ይዕቀብዋ፡ ለኵላ፡ ኤዶምያ፡ ወኮኑ፡ ኵሎሙ፡ ሰብአ፡ ኤዶምያ፡ አግብርተ፡ ለዳዊት፡ ንጉሥ፡ ወያድኅኖ፡ እግዚአብሔር፡ ለዳዊት፡ በኵለሄ፡ ኀበ፡ ሖረ።
15 ወነግሠ፡ ዳዊት፡ ላዕለ፡ ኵሉ፡ እስራኤል፡ ወዳዊትሰ፡ ይንብር፡ ፍትሐ፡ ወጽድቀ፡ በውስተ፡ ኵሉ፡ ሕዝብ።
16 ወኢዮአብ፡ ወልደ፡ ሱርህያ፡ ላዕለ፡ ሰራዊት፡ ወኢዮሳፍጥ፡ መዘክር ፤
17 ወሳዶቅ፡ ወልደ፡ አኪጦብ፡ ወአብያታር፡ ወልደ፡ አኪሜሌክ፡ ካህናት፡ ወአሳ፡ ጻሓፊ ፤ ወአሌኔያ፡ ወልደ፡ አሚናዳብ፡ መካሪ ፤
18 ወኬልቲ፡ ወፌልቲ፡ ደቀ፡ ዳዊት፡ ሊቃናት፡ እሙንቱ።
=== chapter 9 ===
[II Regum 9]
1 ወይቤ፡ ዳዊት፡ ቦኑ፡ ዘተርፈ፡ ዓዲ፡ ለቤተ፡ ሳኦል፡ ወእገብር፡ ምሕረተ፡ ላዕሌሁ፡ በእንተ፡ ዮናታን።
2 ወሀሎ፡ ወልድ፡ እምነ፡ ቤተ፡ ሳኦል፡ ወስሙ፡ ሲባ፡ ወጸውዕዎ፡ ኀበ፡ ዳዊት፡ ወይቤሎ፡ ንጉሥ፡ አንተኑ፡ ውእቱ፡ ሲባ፡ ወይቤ፡ አነ፡ ውእቱ፡ ገብርከ።
3 ወይቤሎ፡ ንጉሥ፡ ቦኑ፡ ዘተርፈ፡ ዓዲ፡ እምነ፡ ቤተ፡ ሳኦል፡ ብእሲ፡ ወእገብር፡ ምሕረተ፡ ምስሌሁ፡ ዘእግዚአብሔር፡ ወይቤሎ፡ ሲባ፡ ለንጉሥ፡ ሀሎ፡ ፩ወልደ፡ ዮናታን፡ ወፅውስ፡ እገሪሁ።
4 ወይቤሎ፡ ንጉሥ፡ አይቴ፡ ሀሎ፡ ወይቤሎ፡ ሲባ፡ ለንጉሥ፡ ሀለወ፡ ቤተ፡ ማኪር፡ ወልደ፡ አቢያል፡ ዘእምነ፡ ለበደር።
5 ወለአከ፡ ንጉሥ፡ ወነሥኦ፡ እምነ፡ ቤተ፡ ማኪር፡ ወልደ፡ አቢያል፡ ዘእምነ፡ ለበደር።
6 ወመጽአ፡ ሜንፌቦስቴ፡ ወልደ፡ ዮናታን፡ ወልደ፡ ሳኦል፡ ኀበ፡ ዳዊት፡ ንጉሥ፡ ወወድቀ፡ በገጹ፡ ወሰገደ፡ ሎቱ፡ ወይቤሎ፡ ዳዊት፡ ሜንፌቦስቴ፡ ወይቤ፡ ነየ፡ አነ፡ ገብርከ።
7 ወይቤሎ፡ ዳዊት፡ ኢትፍራህ፡ እስመ፡ ገቢረ፡ እገብር፡ ምሕረተ፡ ምስሌከ፡ በእንተ፡ ዮናታን፡ አቡከ፡ ወኣገብእ፡ ለከ፡ ኵሎ፡ ሐቅሎ፡ ለሳኦል፡ አቡሁ፡ ለአቡከ፡ ወአንተ፡ ብላፅ፡ እከለ፡ በውስተ፡ ማእድየ፡ ዘልፈ።
8 ወሰገደ፡ ሜንፌቦስቴ፡ ወይቤ፡ ምንትኑ፡ ገብርከ፡ ከመ፡ ትነጽር፡ ላዕሌየ፡ ከልብ፡ ምውት፡ ዘከማየ።
9 ወጸውዖ፡ ንጉሥ፡ ለሲባ፡ ለገብረ፡ ሳኦል፡ ወይቤሎ፡ ኵሎ፡ ንዋየ፡ ሳኦል፡ ወኵሎ፡ ቤቶ፡ ወሀብክዎ፡ ለወልደ፡ እግዚእከ።
10 ወተገበር፡ ሎቱ፡ ምድር፡ አንተ፡ ወደቂቅከ፡ ወነባሪከ፡ ወአእትዉ፡ ለወልደ፡ እግዚእክሙ፡ እክሎ፡ ወተሴሰይዎ፡ አንትሙ፡ ወሜንፎብስቴ፡ ወልደ፡ እግዚእከ፡ ይብላዕ፡ እክለ፡ ዘልፈ፡ በውስተ፡ ማእድየ ፤ ወቦ፡ ሲባ፡ ፲ወ፭ደቂቀ፡ ወ፳አግብርተ።
11 ወይቤሎ፡ ሲባ፡ ለንጉሥ፡ ኵሎ፡ ዘአዘዞ፡ እግዚእየ፡ ንጉሥ፡ ለገብሩ፡ ከማሁ፡ ይገብር፡ ገብርከ፡ ወሜንፎብስቴሰ፡ ይበልዕ፡ በውስተ፡ ማእደ፡ ዳዊት፡ በከመ፡ ፩እምደቂቀ፡ ንጉሥ።
12 ወቦ፡ ሜንፎብስቴ፡ ወልድ፡ ንኡስ፡ ወስሙ፡ ሚከ፡ ወኵሉ፡ ሰብአ፡ ሲባ፡ አግብርቲሁ፡ ለሜንፎብስቴ፡ እሙንቱ።
13 ወሜንፎብስቴሰ፡ ነበረ፡ ውስተ፡ ኢየሩሳሌም፡ እስመ፡ ውስተ፡ ማእደ፡ ንጉሥ፡ ይበልዕ፡ ዘልፈ፡ ወፅውስ፡ እገሪሁ፡ ውእቱ፡ ክልኤሆን።
=== chapter 10 ===
[II Regum 10]
1 ወእምዝ፡ እምድኅረ፡ ዝንቱ፡ ሞተ፡ ንጉሠ፡ ደቂቀ፡ ዐሞን፡ ወነግሠ፡ ሐኖን፡ ወልዱ፡ ህየንቴሁ።
2 ወይቤ፡ ዳዊት፡ እገብር፡ ምሕረተ፡ ምስለ፡ ሐኖን፡ ወልደ፡ ነአሶ፡ በከመ፡ ገብረ፡ አቡሁ፡ ምሕረተ፡ ላዕሌየ፡ ወፈነወ፡ ዳዊት፡ ሰብአ፡ ያስተብቍዕዎ፡ ሰብኡ፡ በእንተ፡ አቡሁ፡ ከመ፡ ያንግፍዎ፡ ላሐ፡ ወበጽሑ፡ ደቂቀ፡ ዳዊት፡ ውስተ፡ ብሔረ፡ ደቂቀ፡ ዐሞን።
3 ወይቤልዎ፡ መላእክቲሆሙ፡ ለደቂቀ፡ ዐሞን፡ ለሐኖን፡ ለእግዚኦሙ፡ ይመስለከኑ፡ ዳዊት፡ ከመ፡ ይንአዶ፡ ለአቡከ፡ ዘፈነወ፡ በቅድሜከ፡ ያስተብቍዑከ ፤ አኮኑ፡ አዕይንት፡ እሙንቱ፡ ወከመ፡ ይፍትንዋ፡ ለሀገር፡ ወከመ፡ ያእምርዋ፡ ዘፈነወ፡ ሰብአ፡ ኀቤከ።
4 ወነሥኦሙ፡ ሐኖን፡ ለደዊቀ፡ ዳዊት፡ ወላጸዮ፡ ጽሕሞሙ፡ ወመተረ፡ አልባሰ፡ ድርዖሙ፡ እምነ፡ ማአከሉ፡ እስከነ፡ ሐቌሆሙ፡ ወእምዝ፡ ፈነዎሙ።
5 ወዜነውዎ፡ ለዳዊት፡ ዘእሙንቱ፡ ዕደው፡ ወፈነወ፡ ዳዊት፡ ይትቀበልዎሙ፡ እስመ፡ ክቡራን፡ እሙንቱ፡ ዕደው፡ ጥቀ፡ ወይቤሎሙ፡ ዳዊት፡ ንጉሥ፡ ንበሩ፡ ውስተ፡ ኢያሪኮ፡ እስከ፡ ይበቍል፡ ጽሕምክሙ፡ ወእምዝ፡ ተጋብኡ።
6 ወርእዩ፡ ደቂቀ፡ ዐሞን፡ ከመ፡ ተኀፍሩ፡ ሕዝበ፡ ዳዊት፡ ወለአኩ፡ ደቂቀ፡ ዐሞን፡ ወዐሰቡ፡ ሎሙ፡ ሶርያሃ፡ ወሮዖብሃ፡ ፪፼አጋር፡ ወበኀበ፡ ንጉሠ፡ ዐማሌቅ፡ ፲፻ብእሴ፡ ወበእስጦብ፡ ፼ወ፳፻ብእሴ።
7 ወሰምዐ፡ ዳዊት፡ ወፈነዎ፡ ለኢዮአብ፡ ወኵሎ፡ ጽኑዓነ፡ ኀይለ።
8 ወወፅኡ፡ ደቂቀ፡ ዐሞን፡ ወተኣኀዙ፡ ይትቃተሉ፡ በኀበ፡ አንቀጽ፡ ወሶርያ፡ ዘሱባ፡ ወሮዖብ፡ ወእስጦብ፡ ወዐማሌቅ፡ ኅቡረ፡ ውስተ፡ ገዳም።
9 ወርእየ፡ ኢዮአብ፡ ከመ፡ መጽእዎሙ፡ እምኔሆሙ፡ ምክዕቢተ፡ ይትቃተልዎሙ፡ እምቅድሜሆሙኒ፡ ወእምድኅሬሆሙኒ፡ ወኀረየ፡ ሎቱ፡ እምነ፡ ኵሉ፡ ወራዙተ፡ እስራኤል፡ ወተቃተልዎሙ፡ ለሶርያ፡ እምቅድም።
10 ወዘተርፈ፡ ሕዝቦ፡ ፈነወ፡ ምስለ፡ አቢሳ፡ እኁሁ፡ ወተቃደምዎሙ፡ ለደቂቀ፡ ዐሞን፡ ወተቃተልዎሙ።
11 ወይቤ፡ ለእመ፡ ጸንዑ፡ ሶርያ፡ እምኔየ፡ ትከውኑኒ፡ ረድኤተ፡ አንትሙ፡ ወእመ፡ ደቂቀ፡ ዐሞን፡ ጸንሁ፡ እምኔክሙ፡ ወንከውነክሙ፡ ንሕነ፡ ረድኤተ።
12 ጽንዑ፡ ወኀይሉ፡ በእንተ፡ ሕዝብነ፡ ወበእንተ፡ አህጉረ፡ አምላክነ፡ ወእግዚአብሔር፡ ይገብር፡ ሠናይተ፡ ዘይኤድም፡ በቅድመ፡ አዕይንቲሁ።
13 ወቦኡ፡ ኢዮአብ፡ ወኵሉ፡ ሕዝብ፡ ዘምስሌሁ፡ ይትቃተሉ፡ ምስለ፡ ሶርያ፡ ወጐዩ፡ እምቅድመ፡ ገጾሙ።
14 ወሶበ፡ ርእዩ፡ ደቂቀ፡ ዐሞን፡ ከመ፡ ጐዩ፡ ሶርያ፡ ጐዩ፡ እሙንቱኒ፡ እምቅድመ፡ ገጹ፡ ለአቢሳ፡ ወቦኡ፡ ውስተ፡ ሀገር፡ ወአተወ፡ ኢዮአብ፡ እምኀበ፡ ደቂቀ፡ ዐሞን፡ ወቦአ፡ ውስተ፡ ኢየሩሳሌም።
15 ወሶበ፡ ርእዩ፡ ሶርያ፡ ከመ፡ ወድቁ፡ ቅድሜሆሙ፡ ለእስራኤል፡ ወተጋብኡ፡ ኅቡረ።
16 ወለአከ፡ እድረዐዛር፡ ወአስተጋብኦሙ፡ ለሶርያ፡ እምነ፡ ማዕዶት፡ ፈለገ፡ ከማዐቅ፡ ወመጽኡ፡ ውስተ፡ ኤላም፡ ወሶቤቅ፡ መልአከ፡ ኀይሉ፡ ለእድረዐዛር፡ ቅድሜሆሙ።
17 ወዜነውዎ፡ ለዳዊት፡ ወእስተጋብኦሙ፡ ለኵሉ፡ እስራኤል፡ ወዐደዉ፡ ዮርዳኖስ፡ ወመጽኡ፡ ሶርያ፡ ተቀበልዎ፡ ለዳዊት፡ ወተቃተሉ፡ ሶርያ፡ ምስሌሆሙ።
18 ወጐዩ፡ እምቅድመ፡ እስራኤል፡ ወቀተለ፡ እምነ፡ ሶርያ፡ ዳዊት፡ ፯፻ሰረገላተ፡ ወ፬፼ሰብአ፡ ፈረስ፡ ወሶሌቅሃኒ፡ መልአከ፡ ኀይሉ፡ ቀተሎ፡ ወሞተ፡ በህየ።
19 ወሶበ፡ ርእዩ፡ ኵሉ፡ ነገሥት፡ አግብርተ፡ አድረዐዛር፡ ከመ፡ ወድቁ፡ ቅድመ፡ እስራኤል፡ ወገረሩ፡ ለእስራኤል፡ ወተቀንዩ፡ ሎሙ፡ ወፈርሁ፡ ሶርያ፡ ህየ፡ አድኅኖቶሙ፡ ለደቂቀ፡ ዐሞን።
=== chapter 11 ===
[II Regum 11]
1 ወእምዝ፡ በጺሖ፡ ዓመት፡ አመ፡ መዋዕለ፡ ይወፅኡ፡ ነገሥት፡ ወፈነዎሙ፡ ዳዊት፡ ለኢዮአብ፡ ወለደቂቁ፡ ወለኵሉ፡ እስራኤል፡ ወቀተልዎሙ፡ ለደቂቀ፡ ዐሞን፡ ወነበሩ፡ ውስተ፡ ራባት፡ ወዳዊትሰ፡ ነበረ፡ ውስተ፡ ኢየሩሳሌም።
2 ወሶበ፡ ኮነ፡ ፍና፡ ሰርክ፡ ተንሥአ፡ ዳዊት፡ እምስካቡ፡ ወዐርገ፡ ውስተ፡ ናሕስ፡ ቤተ፡ ንጉሥ፡ ያንሶሱ፡ ወርእየ፡ ብእሲተ፡ በላዕለ፡ ናሕስ፡ እንዘ፡ ትትሐፀብ፡ ወሠናይት፡ ይእቲ፡ ብእሲት፡ ወፈድፋደ፡ ራእያ።
3 ወለአከ፡ ዳዊት፡ ኀቤሃ፡ ወይቤ፡ አኮኑ፡ ኬርሳቤኅ፡ ይእቲ፡ ወለተ፡ ኤልያብ፡ ኬጥያዊ፡ ወኦርዮስ፡ ምታ።
4 ወለአከ፡ ዳዊት፡ ኀቤሃ፡ ወነሥኣ፡ ወሰከበ፡ ምስሌሃ፡ ወይእቲሰ፡ በከመ፡ ተሐፅበት፡ እምነ፡ ትክቶሃ፡ ወአተወት፡ ቤታ።
5 ወፀንሰት፡ ይእቲ፡ ብእሲት፡ ወአይድዕዎ፡ ለዳዊት፡ ወትቤ፡ ፀነስኩ፡ አንሰ።
6 ወለአከ፡ ዳዊት፡ ኀበ፡ ኢዮአብ፡ እንዘ፡ ይብል፡ ፈንዎአ፡ ለኦርዮስእ፡ ኀቤየ፡ ወፈነዎ፡ ኢዮአብ፡ ለኦርዮስ፡ ኬጥያዊ፡ ኀበ፡ ዳዊት።
7 ወበጽሐ፡ ኦርዮስ፡ ወቦአ፡ ኀቤሁ፡ ወተስእሎ፡ ዳዊት፡ በእንተ፡ ዳኅናሁ፡ ለኢዮአብ፡ ወበእንተ፡ ዳኅና፡ ሕዝብ፡ ወበእንተ፡ ዳኅና፡ ፀብእ።
8 ወይቤሎ፡ ዳዊት፡ ለኦርዮስ፡ ሖር፡ ረድ፡ ውስተ፡ ቤትከ፡ ወተሐፀብ፡ እገሪከ፡ ወወፅአ፡ ኦርዮስ፡ እምነ፡ ቤተ፡ ንጉሥ፡ ወወፂእ፡ ተለዎ፡ ወዓሌ፡ ንጉሥ።
9 ወቤተ፡ ኦርዮስ፡ ዴዴ፡ ቤተ፡ ንጉሥ፡ ምስለ፡ አግብርተ፡ እግዚኡ፡ ወኢወረደ፡ ቤቶ።
10 ወይቤሎ፡ ዳዊት፡ ለኦርዮስ፡ አኮኑ፡ እምነ፡ ሐቅል፡ መጻእከ፡ ወለምንት፡ ኢወረድከ፡ ውስተ፡ ቤትከ።
11 ወይቤሎ፡ ኦርዮስ፡ ለዳዊት፡ ታቦተ፡ እግዚአብሔር፡ ወእስራኤል፡ ወይሁዳ፡ ይነብሩ፡ ውስተ፡ ደባትር፡ ወኢዮአብ፡ እግዚእየ፡ ወአግብርተ፡ እግዚእየ፡ ውስተ፡ ገጸ፡ ምድር፡ ይትዐየኑ፡ ወአንሰ፡ እበውእ፡ ውስተ፡ ቤትየ፡ ከመ፡ እብላዕ፡ ወእስተይ፡ ወከመ፡ እስክብ፡ ምስለ፡ ብእሲትየ ፤ እፎኑ፡ ዝንቱ ፤ ሕያው፡ እግዚአብሔር፡ ወሕያው፡ ነፍስከ፡ ከመ፡ ኢይንብሮ፡ ለዝንቱ፡ ነገር።
12 ወይቤሎ፡ ዳዊት፡ ለኦርዮ፡ ንበር፡ ዝየ፡ ዮም፡ ወጌሠመ፡ እፌንወከ፡ ወነበረ፡ ኦርዮ፡ ውስተ፡ ኢየሩሳሌም፡ ይእተ፡ አሚረ።
13 ወጸውዖ፡ ዳዊት፡ ወበልዐ፡ ወሰትየ፡ በቅድሜሁ፡ ወአስከሮ፡ ወወፅአ፡ ሰርከ፡ ከመ፡ ይስክብ፡ ውስተ፡ ዐራቱ፡ ምስለ፡ አግብርተ፡ እግዚኡ፡ ወኢወረደ፡ ቤቶ።
14 ወሶበ፡ ጸብሐ፡ ጸሐፈ፡ ዳዊት፡ መጽሐፈ፡ ኀበ፡ ኢዮአብ፡ ወፈነወ፡ ምስለ፡ ኦርዮ።
15 ወጸሐፈ፡ ውስተ፡ መጽሐፍ፡ እንዘ፡ ይብል፡ አብእዎአ፡ ለኦርዮ፡ ኀበ፡ ጽኑዕ፡ ቀትልአ፡ ፍጽመአ፡ ወተመየጡአ፡ ወኅድግዎአ፡ ያቍስልዎአ፡ ወይሙትአ።
16 ወእምዝ፡ እንዘ፡ የዐቅባ፡ ኢዮአብ፡ ለሀገር፡ ወሰድዎ፡ ለኦርዮ፡ ውስተ፡ መካን፡ ኀበ፡ ያአምር፡ ከመ፡ ሀለዉ፡ ዕደው፡ ጽኑዓን፡ ህየ።
17 ወወፅኡ፡ ሰብአ፡ ሀገር፡ ከመ፡ ይትቃተሉ፡ ምስለ፡ ኢዮአብ፡ ወወድቁ፡ እምነ፡ ሰብኡ፡ ለዳዊት፡ ወሞተ፡ ኦርዮኒ፡ ኬጥያዊ።
18 ወፈነወ፡ ኢዮአብ፡ ይዜንውዎ፡ ለንጉሥ፡ ኵሎ፡ ዜና፡ ፀብእ፡ ይንግርዎ፡ ለንጉሥ ፤
20 ወይቤ፡ እመ፡ ተምዕዐ፡ ንጉሥ፡ ወይቤ፡ ለምንት፡ ቀረብክሙ፡ ኀበ፡ ሀገር፡ ትትቃተሉ፡ ኢታአምሩኑ፡ ከመ፡ ይነድፉ፡ እምኀበ፡ አረፍት።
21 መኑ፡ ቀተሎ፡ ለአበሜሌክ፡ ወልደ፡ ኢዮርብዓም፡ ወልደ፡ ኔር፡ አኮኑ፡ ብእሲት፡ ወገረት፡ ስባረ፡ ማኅረፅ፡ ላዕሌሁ፡ እምነ፡ መልዕልተ፡ አረፍት፡ ወሞተ፡ በቴምናስ ፤ ለምንት፡ ቀረብክሙ፡ ኀበ፡ አረፍት ፤ ወትብሎ፡ ገብርከኒ፡ ኦርዮ፡ ኬጥያዊ፡ ሞተ።
22 ወሖረ፡ ሐዋርያሁ፡ ለኢዮአብ፡ ኀበ፡ ንጉሥ፡ ውስተ፡ ኢየሩሳሌም፡ ወበጽሐ፡ ወዜነዎ፡ ለዳዊት፡ ኵሎ፡ ዘከመ፡ ይቤሎ፡ ኢዮአብ፡ ኵሎ፡ ዜና፡ ፀብእ፡ ወተምዐ፡ ዳዊት፡ ላዕለ፡ ኢዮአብ፡ ወይቤሎ፡ ለውእቱ፡ ሐዋርያ፡ ለምንት፡ በጻሕክሙ፡ ኀበ፡ አረፍተ፡ ሀገር፡ ትትቃተሉ፡ ኢታአምሩኑ፡ ከመ፡ ትቈስሉ፡ እምነ፡ አረፍት፡ መኑ፡ ቀተሎ፡ ለአበሜሌክ፡ ወልደ፡ ኤርብዓም፡ አኮኑ፡ ብእሲት፡ ወገረት፡ ላዕሌሁ፡ ስባረ፡ ማኅረጽ፡ እምላዕለ፡ አረፍት፡ ወሞተ፡ በተምናስ፡ ለምንት፡ በጻሕክሙ፡ አረፍተ።
23 ወይቤሎ፡ ውእቱ፡ ሐዋርያ፡ ለዳዊት፡ ሶበ፡ ኀየሉነ፡ ወዴገኑነ፡ እሙንቱ፡ ዕደው፡ እስከ፡ ገዳም፡ አውጽኡነ፡ ወእምዝ፡ ተመየጥናሆሙ፡ ወሰደድናሆሙ፡ እስከ፡ ኆኅተ፡ አንቀጽ።
24 ወነደፉ፡ ሰብአ፡ ሐጽ፡ ላዕለ፡ ደቅከ፡ እመልዕልተ፡ አረፍት፡ ወሞቱ፡ እምውስተ፡ ደቁ፡ ለንጉሥ፡ ወገብርከኒ፡ ኦርዮስ፡ ኬጥያዊ፡ ሞተ።
25 ወይቤሎ፡ ዳዊት፡ ለውእቱ፡ ሐዋርያ፡ ከመዝ፡ በሎ፡ ለኢዮአብ፡ ኢይዕፀብከአ፡ ዝንቱአ፡ ነገር፡ ቅድመ፡ አዕይንቲከአ፡ እስመአ፡ ከመዝአ፡ ውእቱአ፡ ቦአመአ፡ ከማሁአ፡ ወቦአመአ፡ ከመዝአ፡ ትበልዕአ፡ መጥባሕትአ፡ ወአጽንዕአ፡ አንተሰአ፡ ተቃትሎአ፡ ምስለአ፡ ሀገርአ፡ ወአስተጋብእአ፡ ወአጽንዕአ።
26 ወሰምዐት፡ ብእሲቱ፡ ለኦርዮስ፡ ከመ፡ ሞተ፡ ኦርዮስ፡ ወበከየቶ፡ ለምታ።
27 ወእምዝ፡ ሶበ፡ ኀለፈ፡ ላሓ፡ ለአከ፡ ላቲ፡ ዳዊት፡ ወነሥኣ፡ ወአእተዋ፡ ቤቶ፡ ወአውሰባ፡ ወኮነቶ፡ ብእሲቶ፡ ወወለደት፡ ሎቱ፡ ወልደ ፤ ወኮነ፡ እኩየ፡ ዝንቱ፡ ነገር፡ ዘገብረ፡ ዳዊት፡ በቅድመ፡ አዕይንቲሁ፡ ለእግዚአብሔር።
=== chapter 12 ===
[II Regum 12]
1 ወፈነዎ፡ እግዚአብሔር፡ ለናታን፡ ነቢይ፡ ኀበ፡ ዳዊት፡ ወቦአ፡ ኀቤሁ፡ ወይቤሎ፡ ሀለዉ፡ ፪ዕደው፡ ውስተ፡ አሐቲ፡ ሀገር፡ ወ፩ባዕል፡ ወ፩ነዳይ።
2 ወቦ፡ ዝክቱ፡ ባዕል፡ ብዙኀ፡ እንስሳ፡ ወመራዕየ።
3 ወዝክቱሰ፡ ነዳይ፡ አልቦቱ፡ ዘእንበለ፡ አሐቲ፡ በግዕተ፡ ንስቲተ፡ እንተ፡ ተሣየጣ፡ ወአልሀቃ፡ ወሐፀና፡ ወልህቀት፡ ምስሌሁ፡ ወምስለ፡ ውሉዱ፡ ትነብር፡ ወእምዘ፡ በልዐ፡ ትበልዕ፡ ይእቲ፡ ወእምነ፡ ዘይሰቲ፡ ውእቱ፡ ጽዋዖ፡ ትሰቲ፡ ወውስተ፡ ሕፅኑ፡ ትነውም፡ ወከመ፡ ወለቱ፡ ይእቲ፡ ሎቱ።
4 ወበጽሐ፡ ነግድ፡ ኀበ፡ ዝክቱ፡ ብእሲ፡ ባዕል፡ ወመሐከ፡ ነሢአ፡ እምውስተ፡ መራዕዪሁ፡ ከመ፡ ይግበር፡ ለነግድ፡ ዘመጽአ፡ ኀቤሁ፡ ወነሥአ፡ ለበግዕቱ፡ ለዝክቱ፡ ነዳይ፡ ወገብራ፡ ለውእቱ፡ ብእሲ፡ ነግድ፡ ዘመጽአ፡ ኀቤሁ።
5 ወተምዕዐ፡ ዳዊት፡ ፈድፋደ፡ ላዕለ፡ ውእቱ፡ ብእሲ፡ ወይቤሎ፡ ዳዊት፡ ሕያው፡ እግዚአብሔር፡ ከመ፡ ርቱዕ፡ ይሙት፡ ውእቱ፡ ብእሲ፡ ዘገብሮ፡ ለዝ፡ ግብር፡ እስመ፡ ኢይምሕሮ።
6 ወይቤሎ፡ ናታን፡ ለዳዊት፡ አንተ፡ ብእሲ፡ ዘገብሮ፡ ለዝንቱ ፤ ከመዝ፡ ይቤ፡ እግዚአብሔር፡ አምላከ፡ እስራኤል፡ አነ፡ ውእቱ፡ ዘቀባእኩከ፡ ትንግሥአ፡ ላዕለአ፡ እስራኤልአ፡ ወአድኀንኩከአ፡ እምነ፡ እዴሁ፡ ለሳኦል።
7 ወወሀብኩከ፡ ቤቶ፡ ለእግዚእከ፡ ወአንስቲያሁኒ፡ ለእግዚእከ፡ ውስተ፡ ሕፅንከ፡ ወወሀብኩከ፡ ቤተ፡ እስራኤል፡ ወዘይሁዳ፡ ወእመኒ፡ ይውሕደከ፡ እዊስከከ፡ በአምጣነ፡ ዘከማሁ።
8 በእፎ፡ ከመ፡ አሕሠምከ፡ ላዕለ፡ ቃለ፡ እግዚአብሔር፡ ከመ፡ ትግበር፡ እኩየ፡ ቅድመ፡ አዕይንቲሁ፡ ወቀተልኮ፡ ለኦርዮስ፡ ወብእሲቶኒ፡ ነሣእክ፡ ለከ፡ ብእሲተ፡ ወኪያሁኒ፡ ቀተልከ፡ በኲናት፡ ዘደቂቀ፡ ዐሞን።
9 ወይእዜኒ፡ ኢየኀልፍ፡ ኲናት፡ እምነ፡ ቤትከ፡ እስከ፡ ለዓለም፡ ኢትርሐቅ፡ ኲናት፡ እስመ፡ አስተሐቀርከኒ፡ ወነሣእከ፡ ብእሲቶ፡ ለኦርዮስ፡ ኬጥያዊ።
10 ትኩንከ፡ ብእሲተ።
11 ከመዝአ፡ ይቤ፡ እግዚአብሔርአ፡ ናሁ፡ አነአ፡ ኣመጽእ፡ ላዕሌከ፡ እኪተ፡ እምነ፡ ቤትከ፡ ወእነሥእን፡ ለአንስቲያከ፡ እንዘ፡ ትሬኢ፡ በአዕይንቲከ፡ ወእሁቦን፡ ለአንስቲያከ፡ ለካልእከ፡ ወይሰክብ፡ ምስለ፡ አንስቲያከ፡ በቅድሜሁ፡ ለዝንቱ፡ ፀሓይ።
12 እስመ፡ አንተ፡ ገበርከ፡ ጽሚተ፡ ወአንሰ፡ ገሃደ፡ እገብር፡ በቅድመ፡ ኵሉ፡ እስራኤል፡ ወበቅድመ፡ ዝንቱአ፡ ፀሓይአ።
13 ወይቤሎ፡ ዳዊት፡ ለናታን፡ አበስኩ፡ ለእግዚአብሔር፡ ወይቤሎ፡ ናታን፡ ለዳዊት፡ ወእግዚአብሔርኒ፡ ተዐደዋ፡ ለኀጢአትከ፡ ወኢትመውት።
14 ወባሕቱ፡ እስመ፡ ውሒከ፡ ወሐካሆሙ፡ ለፀረ፡ እግዚአብሔር፡ በዝንቱ፡ ነንር፡ ወወልድከኒ፡ ዘተወልደ፡ ለከ፡ ሞተ፡ ይመውት።
15 ወአተወ፡ ናታን፡ ቤቶ፡ ወቀተሎ፡ እግዚአብሔር፡ ለውእቱ፡ ሕፃን፡ ዘወለደት፡ ሎቱ፡ ብእሲተ፡ ኦርዮስ፡ ለዳዊት፡ ወደወየ።
16 ወኀሠሦ፡ ለእግዚአብሔር፡ ዳዊት፡ በእንተ፡ ውእቱ፡ ሕፃን፡ ወጾመ፡ ዳዊት፡ ጾመ፡ ወቦአ፡ ወሰከበ፡ ውስተ፡ ምድር።
17 ወቆሙ፡ ላዕሌሁ፡ ሊቃናተ፡ ቤቱ፡ ያንሥእዎ፡ እምነ፡ ምድር፡ ወአበየ፡ ወኢበልዐ፡ ምስሌሆሙ፡ እክለ።
18 ወእምዝ፡ አመ፡ ሳብዕት፡ ዕለት፡ ሞተ፡ ውእቱ፡ ሕፃን፡ ወፈርሁ፡ ደቁ፡ ለዳዊት፡ አይድዖቶ፡ ከመ፡ ሞተ፡ ውእቱ፡ ሕፃን፡ እስመ፡ ይቤሉ፡ እንዘ፡ ዓዲ፡ ሕፃን፡ ሕያው፡ ነበብናሁ፡ ወኢሰምዐ፡ ቃለነ፡ ወእፎ፡ ንብሎ፡ ሞተ፡ ሕፃን፡ ወይገብር፡ እንከ፡ እኪተ።
19 ወርእዮሙ፡ ዳዊት፡ እንዘ፡ ያልሖስሱ፡ ደቁ፡ ወአእመረ፡ ዳዊት፡ ከመ፡ ሞተ፡ ሕፃን፡ ወይቤሎሙ፡ ሞተኑ፡ ሕፃን፡ ወይቤልዎ፡ ሞተ።
20 ወተንሥአ፡ ዳዊት፡ እምነ፡ ምድር፡ ወተሐፅበ፡ ወወለጠ፡ አልባሲሁ፡ ወቦአ፡ ውስተ፡ ሌተ፡ እግዚአብሔር፡ ወሰገደ፡ ሎቱ፡ ወአተወ፡ ቤቶ፡ ወስአለ፡ እክለ፡ ወበልዐ፡ ወአንበረ፡ ቅድሜሁ፡ ኅብስተ፡ ወበልዐ።
21 ወይቤልዎ፡ ደቁ፡ ለዳዊት፡ ምንትኑ፡ ውእቱ፡ ዝንቱ፡ ነንር፡ ዘገበርከ፡ በእንተ፡ ውእቱ፡ ሕፃን፡ እስመ፡ እንዘ፡ ዓዲሁ፡ ሕያው፡ ጾምከ፡ ወበከይከ፡ ወተጋህከ፡ ወእምዘ፡ ሞተ፡ ሕፃን፡ ተንሣእከ፡ ወበላዕከ፡ እክለ፡ ወሰተይከ።
22 ወይቤሎሙ፡ ዳዊት፡ አመሰ፡ ሕያው፡ ሕፃን፡ ጾምኩ፡ ወዓዲ፡ በከይኩ፡ እስመ፡ እቤ፡ መኑ፡ ያአምር፡ ዮጊ፡ ይምሕረኒ፡ እግዚአብሔር፡ ወየሐዩ፡ ሕፃን።
23 ወይእዜሰ፡ ሶበ፡ ሞተ፡ ለምንት፡ እንከ፡ አነ፡ እጾውም፡ ቦኑ፡ እክል፡ አግብኦቶ፡ እምይእዜሰ፡ እንከ፡ አነ፡ ዓዲ፡ አሐውር፡ ኀቤሁ፡ ወውእቱሰ፡ ኢይገብእ፡ ኀቤየ።
24 ወአንገፈ፡ ላሓ፡ ለቤርሳቤሕ፡ ብእሲቱ፡ ወቦአ፡ ኀቤሃ፡ ወሰከበ፡ ምስሌሃ፡ ወፀንሰት፡ ወወለደት፡ ወልደ፡ ወሰመዮ፡ ስሞ፡ ሰሎሞንሃ፡ ወአፍቀሮ፡ እግዚአብሔር።
25 ወለአከ፡ በእዴሁ፡ ለናታን፡ ነቢይ፡ ወጸውዖ፡ በስሙ፡ ከመ፡ ይርአይ፡ ለእመ፡ በእንተ፡ እግዚአብሔር፡
26 ተቃተሎሙ፡ ኢዮአብ፡ ለደቂቀ፡ ዐሞን፡ በረቦት፡ ወአስተጋብአ፡ ሀገረ፡ መንግሥቶሙ።
27 ወፈነወ፡ ኢዮአብ፡ ዜና፡ ኀበ፡ ዳዊት፡ እንዘ፡ ይብል፡ ተቃተልናሆሙአ፡ ለረቦትአ፡ ወአስተጋባእነአ፡ ሀገርአ፡ ማያትአ።
28 ወይእዜኒአ፡ አስተጋብእአ፡ ሕዝብአ፡ ዘተርፈአ፡ ወተዐየንአ፡ ላዕለ፡ ሀገርአ፡ ከመአ፡ ታስተጋብእአ፡ ለሀገርአ፡ ወይሰመይአ፡ ስም[ከ]፡ በላዕሌሃ።
29 ወአስተጋብአ፡ ዳዊት፡ ኵሎ፡ ሕዝበ፡ ወሖረ፡ ውስተ፡ ረባት፡ ወተቃተለ፡ ወአስተጋብአ።
30 ወነሥአ፡ አክሊሎ፡ ለሚልኮል፡ ንጉሦሙ፡ እምነ፡ ርእሱ፡ ወድልወቱ፡ መክሊተ፡ ወርቅ፡ ወቦ፡ ውስቴቱ፡ ዕንቈ፡ ክቡረ፡ ወወደየ፡ ውስተ፡ ርእሱ፡ ዳዊት፡ ወብዙኅ፡ በርባር፡ ዘአውፅአ፡ እምነ፡ ሀገር፡ ፈድፋደ።
31 ወሕዝብኒ፡ ዘውስቴታ፡ አውጽኦሙ፡ ወአንበሮሙ፡ ውስተ፡ ጵርዮን፡ ወአኅለፎሙ፡ እንተ፡ ጰልንትያ፡ ወከማሁ፡ ገብሮሙ፡ ለኵሉ፡ አሀጉረ፡ ደቂቀ፡ ዐሞን፡ ወአተወ፡ ዳዊት፡ ምስለ፡ ኵሉ፡ ሕዝብ፡ ውስተ፡ ኢየሩሳሌም።
=== chapter 13 ===
[II Regum 13]
1 ወእምዝ፡ እምድኅረ፡ ዝንቱ፡ ሀለወ፡ አቤሴሎም፡ ወልደ፡ ዳዊት፡ ወቦ፡ እኅተ፡ ወሠናይት፡ ፈድፋደ፡ ወስማ፡ ትዕማር፡ ወአፍቀራ፡ አምኖን፡ ወልደ፡ ዳዊት።
2 ወተጠወቀ፡ አምኖን፡ ጥቀ፡ እስከ፡ ይደዊ፡ በእንተ፡ ትዕማር፡ እኅቱ፡ እስመ፡ ድንግል፡ ይእቲ፡ ወዕፁ ብ፡ ውእቱ፡ ሎቱ፡ በቅድመ፡ አዕይንቲሁ፡ ለአምኖን፡ ከመ፡ ይግበር፡ ሠይአ፡ ላዕሌሃ።
3 ወቦ፡ አምኖን፡ ዐርከ፡ ወስሙ፡ ኢዮናዳብ፡ ወልደ፡ ሳባዕ፡ እኁሁ፡ ለዳዊት፡ ወኢዮናዳብሰ፡ በእሲ፡ ጠቢብ፡ ውእቱ፡ ጥቀ።
4 ወይቤሎ፡ ምንትኑ፡ ከመዝ፡ ያደገድገከ፡ ወልደ፡ ነጋሢ፡ ነግሀ፡ ነግህ፡ ወኢትነግረኒ፡ ወይቤሎ፡ አምኖን፡ ትዕማርሃ፡ እኅቶ፡ ለአቤሴሎም፡ እኁየ፡ ኣፈቅራ፡ አነ።
5 ወይቤሎ፡ አሚናዳብ፡ ስክብ፡ ውስተ፡ ምስካብከ፡ ወተደወይ፡ ወይበውእ፡ አቡከ፡ ይርአይከ፡ ወትብሎ፡ ትምጻእ፡ ትዕማር፡ እኅትየ፡ ወታምስሐኒ፡ ወታብስል፡ ሊተ፡ በቅድሜየ፡ መብልዐ፡ ከመ፡ እርአይ፡ ወእብላዕ፡ በላዕለ፡ እዴሃ።
6 ወሰከበ፡ አምኖን፡ ወተደወየ፡ ወቦአ፡ ንጉሥ፡ ይርአዮ፡ ወይቤሎ፡ አምኖን፡ ለንጉሥ፡ ትምጻእ፡ ትዕማር፡ እኅትየ፡ ኀቤየ፡ ወታብስል፡ ሊተ፡ በቅድሜየ፡ ክልኤ፡ ጸራይቀ፡ ወእብላዕ፡ በውስተ፡ እዴሃ።
7 ወለአከ፡ ዳዊት፡ ውስተ፡ ቤታ፡ ወይቤላ፡ ሖሪ፡ ቤተ፡ አምኖንአ፡ እኁኪአ፡ ወግበሪአ፡ ሎቱአ፡ ዘይበልዕአ።
8 ወሖረት፡ ትዕማር፡ ቤተ፡ አምኖን፡ እኁሃ፡ ወውእቱሰ፡ ይሰክብ፡ ወነሥአት፡ ሐሪጻ፡ ወሎሰት፡ ወገብረት፡ ጸራይቀ፡ በቅድሜሁ፡ ወአብሰለት፡ ውእተ፡ ጸራይቀ።
9 ወአምጽአቶ፡ በጤገኑ፡ ወአንበረት፡ ቅድሜሁ፡ ወአበየ፡ በሊዐ፡ ወይቤ፡ አምኖን፡ ይፃእ፡ ኵሉ፡ ሰብእ፡ እምኀቤሁ፡ ወወፅኡ፡ ኵሉ፡ ሰብእ፡ እምነ፡ ቅድሜሁ።
10 ወይቤላ፡ አምኖን፡ ትዕማር፡ አብኢ፡ ዘንተ፡ እክለ፡ ጽርሐ፡ ወእብላዕ፡ በውስተ፡ እዴኪ፡ ወነሥአት፡ ትዕማር፡ ጻራይቀ፡ ዘገብረት፡ ወአብአት፡ ለአምኖን፡ እኁሃ፡ ውስተ፡ ጽርሑ።
11 ወአቅረበት፡ ሎቱ፡ ይብላዕ፡ ወአኀዛ፡ ወይቤላ፡ ንዒ፡ እኅትየ፡ ስክቢ፡ ምስሌየ።
12 ወትቤሎ፡ እኅቱ፡ ኢታኅስረኒ፡ እኁየ፡ እስመ፡ ኢይከውን፡ ከመዝ፡ በውስተ፡ እስራኤል፡ ኢትግበራ፡ ለዛቲ፡ እበድ።
13 ወአይቴ፡ እንከ፡ አነ፡ አኀድጋ፡ ለጽእለትየ፡ ወአንተኒ፡ ትከውን፡ ከመ፡ ፩እምነ፡ አብዳን፡ በውስተ፡ እስራኤል፡ ወይእዜኒ፡ ንግሮ፡ ለንጉሥ፡ ወኢየአብየከ፡ ውሂበ፡ ኪያየ።
14 ወአበየ፡ ሰሚዖቶ፡ ቃላ፡ አምኖን፡ ወተበአሳ፡ ወአድከማ፡ ወሰከበ፡ ምስሌሃ።
15 ወጸልኣ፡ አምኖን፡ ጽልአ፡ ዐቢየ፡ ጥቀ፡ ወተዐቢ፡ እኪት፡ ደኃሪት፡ እምነ፡ ቀዳሚት፡ እምነ፡ ፍቅር፡ ዘአፍቀራ፡ ወይቤላ፡ አምኖን፡ ተንሥኢ፡ ሖሪ።
16 ወትቤሎ፡ ትዕማር፡ በእንተ፡ ዛቲ፡ እኪት፡ እንተ፡ ገበርከ፡ ላዕሌየ፡ ተአኪ፡ እንተ፡ ትሰድደኒ፡ ወአበየ፡ አምኖን፡ ሰሚዖተ፡ ቃላ።
17 ወጸውዖ፡ ለወልዱ፡ ዘይቀውም፡ ላዕለ፡ ቤቱ፡ ወይቤሎ፡ አውፅእዋ፡ ለዛቲ፡ እምኀቤየ፡ አፍአ፡ ወዕፅዉ፡ ኆኅተ፡ ውስተ፡ ገጻ።
18 ወትትዐጸፍ፡ ክዳነ፡ ጽጉየ፡ እስመ፡ ከማሁ፡ ይለብሰ፡ አዋልደ፡ ንጉሥ፡ ደናግል፡ ዐጽፎን ፤ ወአውፅኣ፡ ወልዱ፡ አፍአ፡ ወዐፀወ፡ ኆኅተ፡ እምድኅሬሃ።
19 ወነሥአት፡ ትዕማር፡ ሐመደ፡ ወወደየት፡ ላዕለ፡ ርእሳ፡ ወዝክቱ፡ ክዳን፡ ዘላዕሌሃ፡ ጽጉየ፡ ሠጠጠቶ፡ ወሖረት፡ ወእንዘ፡ ተሐውር፡ ተዐወዩ።
20 ወይቤላ፡ አቤሴሎም፡ እኁሃ፡ አምኖን፡ እኁኪ፡ ሰከበ፡ ምስሌኪ፡ ወይእዜኒ፡ እኅትየ፡ አርምሚ፡ እስመ፡ እኁኪ፡ ውእቱ፡ ወኢተኀልዪ፡ በልብኪ፡ ከመ፡ ትንግሪ፡ ዘንተ፡ ነገረ፡ ወነበረት፡ ትዕማር፡ መበለት፡ ውስተ፡ ቤተ፡ እኁሃ፡ አቤሴሎም።
21 ወሰምዐ፡ ዳዊት፡ ንጉሥ፡ ኵሎ፡ ዘንተ፡ ነገረ፡ ወተምዕዐ፡ ፈድፋደ፡ ወኢያሕመሞ፡ ነፍሶ፡ ለአምኖን፡ ወልዱ፡ እስመ፡ ያፈቅሮ፡ እስመ፡ በኵሩ፡ ውእቱ።
22 ወአልቦ፡ ዘነበቦ፡ አበሴሎም፡ ኢሠናየ፡ ወኢእኩየ፡ ለአምኖን፡ እስመ፡ ይፀልኦ፡ አበሴሎም፡ ለአምኖን፡ በበይነ፡ ዝንቱ፡ ነገር፡ ዘአኅሰራ፡ ለትዕማር፡ እኅቱ፡ ወዐቀበ፡ ሎቱ፡ በልቡ።
23 ወእምዝ፡ አመ፡ ይቀርጽዎ፡ ለአበሴሎም፡ በቤለሶር፡ እንተ፡ ቅርብት፡ ለኤፍሬም፡ ወጸውዖሙ፡ አበሴሎም፡ ለኵሎሙ፡ ደቀ፡ ንጉሥ።
24 ወመጽአ፡ አበሴሎም፡ ኀበ፡ ንጉሥ፡ ወይቤሎ፡ ናሁ፡ ይቀርጽዎ፡ ለገብርከ፡ ወይምጻእ፡ ንጉሥኒ፡ ወደቂቁሂ፡ ምስለ፡ ገብርከ።
25 ወይቤሎ፡ ንጉሥ፡ ለአበሴሎም፡ አልቦ፡ ወልድየ፡ ኢነሐውር፡ ኵልነሰ፡ ንሕነ፡ ከመ፡ ኢንክበድ፡ ላዕሌከ፡ ወአጽሐቦሂ፡ ወአበየ፡ ሐዊረ፡ ወአእኰቶ።
26 ወይቤ፡ አበሴሎም፡ ወእመአኮ፡ ይሖር፡ አምኖን፡ እኁየ፡ ምስሌየ፡ ወይቤሎ፡ ንጉሥ፡ ለምንት፡ የሐውር፡ ምስሌከ።
27 ወሶበ፡ አጽሐቦ፡ አበሴሎም፡ ፈነዎ፡ ለአምኖን፡ ምስሌሁ፡ ወለኵሉ፡ ደቂቀ፡ ንጉሥ፡ ወገብረ፡ አበሴሎም፡ ምሳሐ፡ ከመ፡ ምሳሐ፡ ንጉሥ።
28 ወአዘዞሙ፡ አበሴሎም፡ ለደቁ፡ ወይቤሎሙ፡ ዑቁ፡ ወአእምሩ፡ እምከመ፡ ሰክረ፡ ልቡ፡ ለአምኖን፡ በወይን፡ ወእቤለክሙ፡ ቅትልዎ፡ ለአምኖን፡ ቅትልዎ፡ ወኢትፍርሁ፡ እስመ፡ አነ፡ እዘዝኩክሙ ፤ ጽንዑ፡ ወኩኑ፡ ደቂቀ፡ ኀይል።
29 ወገብሩ፡ ደቂቀ፡ አበሴሎም፡ ላዕለ፡ አምኖን፡ በከመ፡ አዘዞሙ፡ አበሴሎም፡ ወተንሥኡ፡ ኵሎሙ፡ ደቂቀ፡ ንጉሥ፡ ወተጽዕኑ፡ አብቅሊሆሙ፡ ወጐዩ።
30 ወእንዘ፡ እሙንቱ፡ ፍኖቶሙ፡ ሀለዉ፡ በጽሐ፡ ዜና፡ ኀበ፡ ዳዊት፡ ሐይቤልዎ፡ ቀተሎሙ፡ አበሴሎም፡ ለኵሎሙ፡ ደቂቀ፡ ንጉሥ፡ ወኢያትረፈ፡ እምኔሆሙ፡ አሐደ።
31 ወተንሥአ፡ ንጉሥ፡ ወሠጠጠ፡ አልባሲሁ፡ ወዕከበ፡ ውስተ፡ ምድር፡ ወኵሎሙ፡ ደቁ፡ እለ፡ ይቀውሙ፡ ቅድሜሁ፡ ሠጠጡ፡ አልባሲሆሙ።
32 ወተሠጥዎ፡ አሚናዳብ፡ ወልደ፡ ሳባዕ፡ እኁሁ፡ ለዳዊት፡ ወይቤ፡ ኢይበል፡ እግዚእየ፡ ንጉሥ፡ ከመ፡ ኵሎ፡ ደቂቀ፡ ንጉሥ፡ ቀተለ፡ ዘእንበለ፡ አምኖን፡ ባሕቲቱ፡ አልቦ፡ ዘሞተ፡ እስመ፡ ከመዝ፡ ይብል፡ አበሴሎሞ፡ እምአመ፡ ዕለተ፡ አኅሰራ፡ ለትዕማር፡ እኅቱ።
33 ወይእዜኒ፡ ኢተኀሊ፡ እግዚእየ፡ ንጉሥ፡ ዘንተ፡ ነገረ፡ እንዘ፡ ትብል፡ ኵሎሙ፡ ደቂቀ፡ ንጉሥ፡ ሞቱ፡ ዘእንበለ፡ አምኖን፡ ባሕቲቱ፡ አልቦ፡ ዘሞተ።
34 ወአበሴሎምሰ፡ ተኀጥአ፡ ወእምዝ፡ አልዐለ፡ አዕይንቲሁ፡ ወልድ፡ ዘይኔጽር፡ ወሶበ፡ ይሬኢ፡ ወናሁ፡ ሕዝብ፡ ብዙኅ፡ ይመጽእ፡ ውስተ፡ ፍኖት፡ እንተ፡ መንገለ፡ ድኅሬሁ፡ እምገቦ፡ ደብር፡ እምኀበ፡ ሙራድ፡ ወመጽአ፡ ውእቱ፡ ዘዐይን፡ ወአይድዖ፡ ለንጉሥ፡ ወይቤሎ፡ ሰብአ፡ ርኢኩ፡ እመንገለ፡ ፍኖተ፡ አድባር፡ እምነ፡ ማእከለ፡ ደብር።
35 ወይቤሎ፡ አሚናዳብ፡ ለንጉሥ፡ ናሁ፡ ደቂቀ፡ ንጉሥ፡ በጽሑ፡ በከመ፡ ይቤለከ፡ ገብርከ፡ ከማሁ፡ ኮነ።
36 ወእምዝ፡ ሶበ፡ አኅለቀ፡ ተናግሮ፡ በጽሑ፡ ደቂቀ፡ ንጉሥ፡ ወጸርኁ፡ በቃሎሙ፡ ወበከዩ፡ ወንጉሥኒ፡ ወኵሉ፡ ደቂቁ፡ በከዩ፡ ዐቢየ፡ ብካየ፡ ፈድፋደ።
37 ወአበሴሎም፡ ተኀጥአ፡ ወሖረ፡ ኀበ፡ ቶሎሜሌም፡ ወልደ፡ አምዩድ፡ ንጉሠ፡ ጌዶሶር፡ ውስተ፡ ምድረ፡ መዓከም፡ ወላሐዎ፡ ንጉሥ፡ ለወልዱ፡ በኵሉ፡ መዋዕል።
38 ወአበሴሎምሰ፡ ተኀጥአ፡ ወሖረ፡ ውስተ፡ ጌዶሶር፡ ወነበረ፡ ህየ፡ ፫ዓመተ።
39 ወኀደገ፡ ሐዊረ፡ ዳዊት፡ ንጉሥ፡ ኀበ፡ አበሴሎም፡ እስመ፡ አንገፍዎ፡ በእንተ፡ አምኖን፡ እስመ፡ ሞተ።
=== chapter 14 ===
[II Regum 14]
1 ወአእመረ፡ ኢዮአብ፡ ወልደ፡ ሶርህያ፡ ከመ፡ ገብአ፡ ልቡ፡ ለንጉሥ፡ ኀበ፡ አበሴሎም።
2 ወለአከ፡ ኢዮአብ፡ ኀበ፡ ቴቆሔ፡ ወነሥአ፡ እምህየ፡ ብእሲተ፡ ጠባበ፡ ወይቤላ፡ ላሕዊ፡ ወልበሲ፡ አልባሰ፡ ላሕ፡ ወኢትትቀብኢ፡ ቅብአ፡ ወኩኒ፡ ከመ፡ ብእሲት፡ እንተ፡ ትላሑ፡ ላዕለ፡ ዘሞተ፡ ወከመዝ፡ ግበሪ፡ ብዙኀ፡ መዋዕለ።
3 ወትበውኢ፡ ኀበ፡ ንጉሥ፡ ወትብልዮ፡ ዘከመ፡ እቤለኪ ፤ ወመሀራ፡ ኢዮአብ፡ ዘከመ፡ ትብሎ።
4 ወቦአት፡ ይእቲ፡ ብእሲት፡ ቴቆያዊት፡ ኀበ፡ ንጉሥ፡ ወወድቀት፡ በገጻ፡ ውስተ፡ ምድር፡ ወሰገደት፡ ሎቱ፡ ወትቤ፡ አሕይወኒ፡ ንጉሥ፡ አሕይወኒ።
5 ወይቤላ፡ ምንተ፡ ኮንዚ፡ ወትቤሎ፡ ብእሲት፡ መበለት፡ አነ፡ ወሞተ፡ ምትየ።
6 ወባቲ፡ አመትከ፡ ፪ደቂቀ፡ ወተባአሱ፡ ክልኤሆሙ፡ በፍኖት፡ ወአልቦ፡ ዘያስተኃድጎሙ፡ በማእከሎሙ፡ ወተንሥአ፡ ፩ላዕለ፡ ካልኡ፡ ወቀተሎ።
7 ወተንሥአ፡ ኵሉ፡ ሀገር፡ ላዕለ፡ አመትከ፡ ወይቤሉ፡ አውጽኡ፡ ዘቀተለ፡ እኁሁ፡ ወንቅትሎ፡ ህየንተ፡ ነፍሰ፡ እኀ፡ ሁ፡ ዘቀተለ፡ ወንደምስሶ፡ ለወራሲክሙ፡ ወያጥፍእዎ፡ ለሕፃንየ፡ ዘተርፈ፡ ከመ፡ ኢየሀሉ፡ ለምትየ፡ ተረፈ፡ ወስመ፡ በውስተ፡ ምድር።
8 ወይቤላ፡ ንጉሥ፡ ሖሪ፡ በዳኅን፡ እተዊ፡ ውስተ፡ ቤትኪ፡ ወአነ፡ እኤዝዝ፡ በእንቲአኪ።
9 ወትቤሎ፡ ብእሲት፡ ቴቆያዊት፡ ለንጉሥ፡ ላዕሌየ፡ እግዚእየ፡ ንጉሥ፡ ኀጢአትየ፡ ወላዕለ፡ ቤተ፡ አቡየ፡ ወንጉሥሰ፡ ወመንበሩ፡ ንጹሕ።
10 ወይቤላ፡ ንጉሥ፡ መኑ፡ ውእቱ፡ ዘይቤለሊ፡ አምጽኢዮ፡ ኀቤየ፡ ወኢይደግም፡ እንከ፡ ለኪፎቶ።
11 ወትቤ፡ ይእቲ፡ ብእሲት፡ ይዝክር፡ ንጉሥ፡ እግዚአብሔር፡ አምላከ፡ ኢይብዘኅ፡ አበ፡ ደም፡ ለቀትል፡ ወኢያጥፍኡ፡ ሊተ፡ ወልድየ፡ ወይቤላ፡ ሕያው፡ እግዚአብሔር፡ ከመ፡ ኢትወድቅ፡ ሥዕርቱ፡ ለወልድኪ፡ ውስተ፡ ምድር።
12 ወትሴ፡ ይእቲ፡ ብእሲት፡ ትንግሮ፡ አመትከ፡ ለእግዚኣ፡ ንጉሥ፡ ቃለ።
13 ወትሌ፡ ይእቲ፡ ኀለይኩ፡ ዘከመዝ፡ ላዕለ፡ ሕዝበ፡ እግዚአብሔር፡ አው፡ እምነ፡ አፈ፡ ንጉሥኑ፡ ዝቃል፡ ከመ፡ ኢያእትዎ፡ ንጉሥ፡ ለዘ፡ አበሰ፡ ለዘ፡ ተባአሰ።
14 እስመ፡ ሞተ፡ ንመውት፡ ወከመ፡ ማይ፡ ዘእምከመ፡ ተክዕወ፡ ውስተ፡ ምድር፡ ኢይትገባእ፡ እንከ፡ ወይነሥእ፡ እግዚአብሔር፡ ነፍሶ፡ ወኀልዮ፡ ያርሕቅ፡ እምኀሴሁ፡ ብኡሰ።
15 ወይእዜኒ፡ መጻእኩ፡ እንግር፡ ቅድመ፡ እግዚእየ፡ ንጉሥ፡ ዘንተ፡ ነገረ፡ እስመ፡ ይሬእዩኒ፡ ሕዝብ፡ ወይብሉ፡ ሕዝብ፡ ይንግርዎ፡ ለንጉሥ፡ ዮጊ፡ ይገብር፡ ንጉሥ፡ ቃለ፡ አመቱ፡ ወይሰምዕ።
16 ወአድኅና፡ ለአመትከ፡ እምነ፡ እደ፡ ብእሲ፡ ዘያአትተኒ፡ ወለወልድየኒ፡ እምርስቱ፡ ለእግዚአብሔር።
17 ወትቤ፡ ይእቲ፡ ብእሲት፡ እስመ፡ ቃሉ፡ ለእግዚአብሔር፡ ከመ፡ መሥዋዕት፡ ወከመ፡ መልአከ፡ እግዚአብሔር፡ ከማሁ፡ ውእቱ፡ እግዚእየ፡ ንጉሥ፡ ለሰሚዐ፡ ሠናይ፡ ወእኩይ፡ ወእግዚአብሔር፡ አምላክከ፡ የሀሉ፡ ምስሌከ።
18 ወአውሥአ፡ ንጉሥ፡ ለይእቲ፡ ብእሲት፡ ወይቤላ፡ ኢትኅብኢ፡ እምኔየ፡ ቃለ፡ ዘአነ፡ እሴአለከ፡ ወትቤ፡ ይእቲ፡ ብእሲት፡ አይድዕ፡ እግዚእየ፡ ንጉሥ።
19 ወይቤላ፡ ንጉሥ፡ እዴሁ[ኑ]፡ ምስሌኪ፡ በኵሉ፡ ዝንቱ፡ ለኢዮአብ፡ ወትቤሎ፡ ይእቲ፡ ብእሲት፡ ለንጉሥ፡ ሕያው፡ ነፍስከ፡ እግዚእየ፡ ንጉሥ፡ ከመ፡ ኢለየማን፡ ወኢለፀጋም፡ ኢተስሕቶ፡ እምነ፡ ኵሉ፡ ዘይቤ፡ እግዚእየ፡ ንጉሥ፡ እስመ፡ ገብርከ፡ ኢዮአብ፡ ውእቱ፡ አዘዘኒ፡ ወውእቱ፡ መሀረኒ፡ ኵሎ፡ ዘንተ፡ ነገረ፡ ለአመትከ ፤
20 በዘ፡ መጻእኩ፡ ውስተ፡ ገጹ፡ ለዝንቱ፡ ነገር፡ ዘገብረ፡ ገብርከ፡ ኢዮአብ፡ ዘንተ፡ ጕሕሉተ ፤ እግዚእየሰ፡ ጠቢብ፡ ከመ፡ ጥበበ፡ መልአከ፡ እግዚአብሔር፡ ከመ፡ ያእምር፡ ኵሎ፡ ዘውስተ፡ ምድር።
21 ወይቤሎ፡ ንጉሥ፡ ለኢዮአብ፡ ናሁ፡ ገበርኩ፡ ለከ፡ በከመ፡ ዝንቱ፡ ነገርከ ፤ አእትዎ፡ ለውእቱ፡ ወልድ፡ ለአቤሴሎም።
22 ወወድቀ፡ በገጹ፡ ኢዮአብ፡ ውስተ፡ ምድር፡ ወሰገደ፡ ሎቱ፡ ወባረኮ፡ ለንጉሥ፡ ወይቤ፡ ኢዮአብ፡ ዮም፡ አእመረ፡ ገብርከ፡ ከመ፡ ረከብኩ፡ ሞገሰ፡ ቅድመ፡ አዕይንቲከ፡ እግዚእየ፡ ንጉሥ፡ እስመ፡ ገብረ፡ እግዚእየ፡ ንጉሥ፡ ቃለ፡ ገብሩ።
23 ወተንሥአ፡ ኢዮአብ፡ ወሖረ፡ ጌዶሶር፡ ወአምጽኦ፡ ለአቤሴሎም፡ ውስተ፡ ኢየሩሳሌም።
24 ወይቤ፡ ንጉሥ፡ ይግባእ፡ ቤቶ፡ ወገጽየሰ፡ ኢይርአይ፡ ወገብአ፡ አቤሴሎም፡ ወገጸ፡ ንጉሥሰ፡ ኢርእየ።
25 ወከመ፡ አቤሴሎም፡ አልቦ፡ ብእሴ፡ በውስተ፡ ኵሉ፡ እስራኤል፡ ዘፈድፋደ፡ ሥኑ፡ እምእገሪሁ፡ እስከ፡ ርእሱ፡ ዘአልቦ፡ ኀበ፡ ሐሠመ፡ እምኔሁ።
26 ወአመ፡ ይቀርጽ፡ ርእሶ፡ ትካት፡ አመ፡ ቀዳሚ፡ መዋዕል፡ አመ፡ ይትቀረጽ፡ እስመ፡ ይከብድ፡ ላዕሌሁ፡ ተቀሪጾ፡ ይደልዎ፡ ለስእርተ፡ ርእሱ፡ ወይከውን፡ ድልወቱ፡ ፪፻ሰቅለ፡ በሰቅለ፡ ንጉሥ።
27 ወተወልዱ፡ ለአቤሴሎም፡ ፫ደቂቅ፡ ወአሐቲ፡ ወለት፡ ወስማ፡ ትዕማር፡ ወሠናይት፡ ይእቲ፡ ብእሲት፡ ጥቀ፡ ወኮነት፡ ብእሲቶ፡ ለሮብዓም፡ ለወልደ፡ ሰሎሞን፡ ወወለደቶ፡ ሎቱ፡ ለአብያ።
28 ወነበረ፡ አቤሴሎም፡ ውስተ፡ ኢየሩሳሌም፡ ፪ዓመተ፡ ወገጸ፡ ንጉሥ፡ ኢርእየ።
29 ወለአከ፡ አቤሴሎም፡ ኀበ፡ ኢዮአብ፡ ከመ፡ ይልኣኮ፡ ኀበ፡ ንጉሥ፡ ወአበየ፡ መጺአ፡ ኀቤሁ፡ ወለአከ፡ ዳግመ፡ ሎቱ፡ ወአበየ፡ መጺአ፡ ኀቤሁ።
30 ወይቤሎሙ፡ አቤሴሎም፡ ለደቁ፡ ሀለወት፡ ገራህተ፡ ኢዮአብ፡ ኀበ፡ እንቲአነ፡ እንተ፡ ስገም ፤ ሖሩ፡ አውዕይዋ፡ በእሳት፡ ወአውዐዩ፡ ገራውሂሁ፡ ደቀ፡ አቤሴሎም፡ ወሖሩ፡ ደቂቅ፡ ኢዮአብ፡ ኀቤሁ፡ እንዘ፡ ሥጡጥ፡ አልባሲሆሙ፡ ወይቤሉ፡ አውዐዩ፡ ደቀ፡ አበሴሎም፡ ገራውሂከ፡ በእሳት።
31 ወተንሥአ፡ ኢዮአብ፡ ወሖረ፡ ኀበ፡ አቤሴሎም፡ ውስተ፡ ቤቱ፡ ወይቤሎ፡ ለምንት፡ አውዐዩ፡ ደቅከ፡ ገራውህየ፡ በእሳት።
32 ወይቤሎ፡ አቤሴሎም፡ ለኢዮአብ፡ ለአኩ፡ ኀቤከ፡ እንዘ፡ እብል፡ ነዓአ፡ ዝየአ፡ ወእልአከአ፡ ኀበ፡ ንጉሥ፡ እንዘ፡ እብል፡ ለምንትአ፡ መጻእኩአ፡ እምነአ፡ ጌዶሶርአ፡ እምኀየሰኒአ፡ ሶበአ፡ ነበርኩአ፡ ህየአ፡ ወይእዜኒአ፡ ናሁ፡ ገጸ፡ ንጉሥ፡ ኢርኢኩ፡ ወለእመቦሰ፡ ዘአበስኩ፡ ይቅትለኒ።
33 ወቦአ፡ ኢዮአብ፡ ኀበ፡ ንጉሥ፡ ወአይድዖ፡ ወጸውዖ፡ ለአቤሴሎም፡ ወቦአ፡ ኀበ፡ ንጉሥ፡ ወሰገደ፡ ሎቱ፡ ወወድቀ፡ በገጹ፡ ውስተ፡ ምድር፡ ቅድመ፡ ንጉሥ፡ ወሰዐሞ፡ ንጉሥ፡ ለአቤሴሎም።
=== chapter 15 ===
[II Regum 15]
1 ወእምዝ፡ እምድኅረ፡ ዝንቱ፡ ገብረ፡ ሎቱ፡ አቤሴሎም፡ ሰረገላተ፡ ወአፍራሰ፡ ወ፶እለ፡ ይረውጹ፡ ቅድሜሁ።
2 ወይገይስ፡ አቤሴሎም፡ ወይቀውም፡ ኀበ፡ ፍኖተ፡ አንቀጽ፡ ወኵሉ፡ ዘይመጽእ፡ ሰብእ፡ ዘቦ፡ ተስናነ፡ ከመ፡ ይትኰነን፡ ኀበ፡ ንጉሥ፡ ይጼውዖ፡ አቤሴሎም፡ ወይብሎ፡ እምአይ፡ ሀገር፡ አንተ፡ ወይብሎ፡ ውእቱ፡ ብእሲ፡ እምነ፡ አሐቲ፡ ነገደ፡ እስራኤል፡ ገብርከ።
3 ወይቤሎ፡ አቤሴሎም፡ ናሁ፡ ሠናይ፡ ቃልከ፡ ወቀሊል፡ ወበኀበ፡ ንጉሥ፡ አልቦ፡ ዘይሰምዐከ።
4 ወይብል፡ አቤሴሎም፡ መኑ፡ እምሤመኒ፡ መከኰንነ፡ ለብሔር፡ ወይምጻእ፡ ኀቤየ፡ ኵሉ፡ ሰብእ፡ ዘቦ፡ ቅስተ፡ ወተስናነ፡ ወእኰንኖ።
5 ወሶበ፡ ይመጽእ፡ ሰብእ፡ ይሰግድ፡ ሎቱ፡ ወያሴዕል፡ እዴሁ፡ ወየሐቅፎ፡ ወይትኣምኆ።
6 ወከመዝ፡ ገብረ፡ አቤሴሎም፡ ለኵሉ፡ እስራኤል፡ እለ፡ ይመጽኡ፡ ይትኰነኑ፡ በኀበ፡ ንጉሥ፡ ወያስተፌሥሖሙ፡ ልቦሙ፡ አቤሴሎም፡ ለሰብአ፡ እስራኤል።
7 ወእምዝ፡ አመ፡ በጽሐ፡ ፵ዓመተ፡ ይቤሎ፡ አቤሴሎም፡ ለአቡሁ፡ አሐውር፡ እገብር፡ ብዕዓትየ፡ ዘበፃዕኩ፡ ለእግዚአብሔር፡ በኬብሮን።
8 እስመ፡ ብፅዓተ፡ በፅበ፡ ገብርከ፡ አመ፡ ይነብር፡ ጌዶሶር፡ ዘሶርያ፡ እንዘ፡ እብል፡ ለእመ፡ ሜጠኒ፡ ወአግብአኒ፡ እግዚአብሔር፡ ውስተ፡ ኢየሩሳሌም፡ ወእሠውዕ፡ ለእግዚአብሔር።
9 ወይቤሎ፡ ንጉሥ፡ ሖር፡ በሰላም ፤ ወተንሥአ፡ ወሖረ፡ ውስተ፡ ኬብሮን።
10 ወለአከ፡ አቤሴሎም፡ ውስተ፡ ኵሉ፡ ሕዝበ፡ እስራኤል፡ እንዘ፡ ይብል፡ ምስለ፡ ሐዋርያት፡ እምከመ፡ ሰማዕክሙ፡ ቃለ፡ ቀርንአ፡ በሉአ፡ ነግሠአ፡ ንጉሥአ፡ አቤሴሎምአ፡ በኬብሮንአ።
11 ወሖሩ፡ ምስለ፡ አቤሴሎም፡ ፪፻ብእሲ፡ ኅሩያን፡ እምነ፡ እስራኤል፡ ወሖሩ፡ በየውሀተ፡ ልቦሙ፡ ወኢያእመሩ፡ እምነ፡ ኵሉ፡ ነገሩ፡ ወኢምንተ።
12 ወለአከ፡ አቤሴሎም፡ ኀበ፡ አኪጦፌል፡ መማክርቲሁ፡ ለዳዊት፡ ውስተ፡ ሀገፋ፡ ጎላሔን፡ ዘይሠውዕ፡ ሎቱ፡ መሥዋዕቶ፡ ወተጋብኡ፡ ብዙኅ፡ ሕዝብ፡ ወብዙኅ፡ ፈድፋደ፡ ምስለ፡ አቤሴሎም።
13 ወሖረ፡ ዘይዜንዎ፡ ለዳዊት፡ ወይቤሎ፡ ንብአ፡ ልቦሙ፡ ለእስራኤል፡ ኀበ፡ አቤሴሎም።
14 ወይቤሎሙ፡ ዳዊት፡ ለኵሉ፡ ደቁ፡ ተንሥኡ፡ ንጕየይ፡ እስመ፡ አልብነ፡ ሕይወተ፡ እምነ፡ ቅድመ፡ ገጹ፡ ለአቤሴሎም ፤ አፍጥኑ፡ ከመ፡ ንጕየይ፡ ወንሖር፡ ከመ፡ ኢያፍጥን፡ ረኪቦተነ፡ ወያመጽእ፡ ላዕሌነ፡ እኪተ፡ ወይቀትል፡ ሀገረ፡ በኵናት።
15 ወይቤልዎ፡ ደቁ፡ ለንጉሥ፡ ኵሎ፡ ዘአዘዘነ፡ እግዚእነ፡ ንጉሥ፡ ናሁ፡ ንሕነ፡ አግብርቲከ፡ ንንብር።
16 ወወፅአ፡ ንጉሥ፡ ወኵሉ፡ ቤቱ፡ በእገሪሆሙ፡ ወኀደገ፡ ንጉሥ፡ ዐሥሩ፡ አንስቲያሁ፡ ወዕቁባቲሁ፡ ይዕቀባ፡ ቤቶ።
17 ወወፅአ፡ ንጉሥ፡ ወኵሉ፡ ሰብኡ፡ በእገሪሆሙ፡ ወቆሙ፡ ኀበ፡ ቤት፡ ዘርኁቅ።
18 ወኵሉ፡ ሰብእ፡ ምስሌሁ፡ ይተልውዎ፡ ወኵሉ፡ ዘኬልቲ፡ ወኵሉ፡ ዘፌልቲ፡ ወቆሙ፡ ኀበ፡ ዕፀ፡ ዘይት፡ እንተ፡ ውስተ፡ ገዳም፡ ወኵሉ፡ ሕዝብ፡ የሐውር፡ ምስሌሁ፡ ወኵሎሙ፡ እለ፡ ምስሌሀ።
19 ፯፻ብእሲ፡ እሙንቱ፡ ወኀቤሁ፡ እሙንቱ፡ ኵሉ፡ ዘኬልቲ፡ ወኵሉ፡ ዘፌልቲ፡ ወኵሎሙ፡ ጌታውያን፡ ፮፻ብእሲ፡ እለ፡ መጽኡ፡ በእገሪሆሙ፡ ውስተ፡ ጌት፡ ወየሐውሩ፡ ቅድመ፡ ንጉሥ።
20 ወይቤሎ፡ ንጉሥ፡ ለሴቲ፡ ጌትያዊ፡ ለምንት፡ ተሐውር፡ አንተኒ፡ ምስሌነ፡ እቱ፡ ወንበር፡ ኀበ፡ ንጉሥ፡ እስመ፡ እንግዳ፡ አንተ፡ ወእስመ፡ ትማልም፡ ፈለስከ፡ እምነ፡ ብሔርከ፡ ወዮም፡ እንከ፡ እነሥአከ፡ ትሖር፡ ምስሌነ፡ ወአንሰ፡ አሐውር፡ ናሁ፡ ኀበ፡ አሐውር ፤ እቱ፡ ወአእቱ፡ አኀዊከ፡ ምስሌከ፡ ወየሀሉ፡ ምስሌከ፡ ጽድቅ፡ ወምሕረት።
21 ወተሰጥዎ፡ ሴቲ፡ ለንጉሥ፡ ወይቤሎ፡ ሕያው፡ እግዚአብሔር፡ ወሕያው፡ እግዚእየ፡ ንጉሥ፡ ከመ፡ ውስተ፡ መካን፡ ኀበ፡ ሀለወ፡ እግዚእየ፡ እመኒ፡ ውስተ፡ ሞት፡ ወእመኒ፡ ውስተ፡ ሕይወት፡ ከመ፡ ህየ፡ ይሄሉ፡ ገብርከኒ።
22 ወይቤሎ፡ ንጉሥ፡ ለሴቲ፡ ነዓ፡ ዕዱ፡ ምስሌየ፡ ወዐደወ፡ ሴቲ፡ ወኵሉ፡ ሰብኡ፡ ወኵሉ፡ ሕዝብ፡ ዘምስሌሁ።
23 ወኵሉ፡ ብሔር፡ ይበኪ፡ በዐቢይ፡ ቃል፡ ወኵሉ፡ ሕዝብ፡ የሐውር፡ እንተ፡ ፈለገ፡ አርዝ፡ ወኵሉ፡ ሕዝብ፡ ወንጉሥኒ፡ የሐውር፡ ላዕለ፡ ገጸ፡ ፍኖተ፡ ገዳም።
24 ወናሁ፡ ሳዶቅ፡ ወኵሉ፡ ሌዋውያን፡ ምስሌሁ፡ ያመጽእዋ፡ ለታቦተ፡ እግዚአብሔር፡ እምነ፡ ቤቴል፡ ወአቀምዋ፡ ለታቦተ፡ እግዚአብሔር፡ ወዐርገ፡ አብያታር፡ እስከ፡ የኀልፍ፡ ኵሉ፡ ሕዝብ፡ እምኀበ፡ ሀገር።
25 ወይቤሎ፡ ንጉሥ፡ ለሳዶቅ፡ አግብእ፡ ታቦተ፡ እግዚአብሔር፡ ውስተ፡ ሀገር፡ ለእመ፡ ረከብኩ፡ ሞገሰ፡ ቅድመ፡ አዕይንቲሁ፡ ለእግዚአብሔር፡ ወአእተወኒ፡ ወአርአየኒ፡ ሠናየ ፤
26 ወእመ፡ ባሕቱ፡ ይቤ፡ ኢይፈቅደከ፡ ነየ፡ አነ፡ ይረስየኒ፡ ዘከመ፡ ይኤድሞ፡ በቅድመ፡ አዕይንቲሁ።
27 ወይቤሎ፡ ንጉሥ፡ ለሳዶቅ፡ ካህን፡ ናሁ፡ ተአቱ፡ አንተ፡ ውስተ፡ ሀገር፡ በሰላም፡ ወናሁ፡ አኪማዓስ፡ ወልድከ፡ ወዮናታን፡ ወልደ፡ አብያታር፡ ክልኤሆሙ፡ ደቂቅክሙ፡ ምስሌክሙ።
28 ወአንሰ፡ አሐውር፡ ውስተ፡ ዐረቦት፡ እንተ፡ ውስተ፡ ሐቅል፡ እስከ፡ አመ፡ ይመጽእ፡ ቃለ፡ ዜና፡ እምኀቤክሙ።
29 ወአግብእዋ፡ ሳዶቅ፡ ወአብያታር፡ ለታቦት፡ ውስተ፡ ኢየሩሳሌም፡ ወነበሩ፡ ህየ።
30 ወዳዊትሰ፡ ዐርገ፡ ዐቀበ፡ ደብረ፡ ቅብእ፡ ወእንዘ፡ የዐርግ፡ ይበኪ፡ ወግልቡብ፡ ርእሱ፡ ወየሐውር፡ ዘእንበለ፡ አሣእን፡ ወኵሎሙ፡ ሕዝብ፡ እለ፡ ምስሌሁ፡ ግልቡባን፡ ርእሶሙ፡ ወየዐርጉ፡ ወእንዘ፡ የዐርጉ፡ ይበክዩ።
31 ወዜነውዎ፡ ለዳዊት፡ ወይቤልዎ፡ አኪጦፌልኒ፡ ኀብረ፡ ምስለ፡ እለ፡ ኀብሩ፡ ምስለ፡ አበሴሎም፡ ወይቤ፡ ዳዊት፡ ዕልዋ፡ እግዚኦ፡ አምላኪየ፡ ለምክረ፡ አኪጦፌል።
32 ወበጽሐ፡ ዳዊት፡ እስከ፡ ሮዖት፡ ኀበ፡ ሰገደ፡ ለእግዚአብሔር፡ በህየ፡ ወመጽአ፡ ኵሲ፡ ዘእምታሕቴሁ፡ ለዳዊት፡ መኰንን፡ ወሥጡጥ፡ አልባሲሁ፡ ወሐመድ፡ ውስተ፡ ርእሱ።
33 ወይቤሎ፡ ዳዊት፡ ለእመ፡ ዐደውከ፡ ምስሌየ፡ ትከውነኒ፡ ከመ፡ [ፆር፡] ላዕሌየ።
34 ወእመሰ፡ አተውከ፡ ሀገረ፡ ትብሎ፡ ለአበሴሎም፡ መጽኡ፡ አኀዊከ፡ ወንጉሥኒ፡ ወነዮሙ፡ ድኅሬየ፡ መጽኡ፡ አቡከ፡ ወይእዜኒ፡ ገብረ፡ ዚአከ፡ አነ፡ ንጉሥ፡ ወኅድገኒ፡ እሕየው፡ ወትካትኒ፡ ገብረ፡ አቡከ፡ አነ፡ ወይእዜኒ፡ ገብረ፡ ዚአከ፡ አነ፡ ወትሚጣ፡ ሊተ፡ ለምክረ፡ አኪጦፌል።
35 ወናሁ፡ ምስሌከ፡ ህየ፡ ሳዶቅ፡ ወአብያታር፡ ካህናት፡ ወኵሎ፡ ዘሰማዕክሙ፡ ቃለ፡ እምነ፡ ቤተ፡ ንጉሥ፡ ዜንውዎ፡ ለሳዶቅ፡ ወለአብያታር፡ ካህናት።
36 ወናሁ፡ ህየ፡ ምስሌሆሙ፡ ክልኤሆሙ፡ ደቂቆሙ፡ አኪማሃስ፡ ወልደ፡ ሳዶቅ፡ ወዮናታን፡ ወልደ፡ አብያታር፡ ወንግሩ፡ ኵሎ፡ ቃለ፡ ዘሰማዕክሙ፡ በኀቤሆሙ።
37 ወቦአ፡ ኵሲ፡ ካልኡ፡ ለዳዊት፡ ውስተ፡ ሀገር፡ ወአበሴሎምሰ፡ ቦአ፡ ውስተ፡ ሀገረ፡ ኢየሩሳሌም።
=== chapter 16 ===
[II Regum 16]
1 ወዳዊትኒ፡ ኀለፈ፡ እምነ፡ ሮዓት፡ ሕቀ፡ ወናሁ፡ ሲባ፡ ገብረ፡ ሜንፎብስቴ፡ ቅድሜሁ፡ ወ፪አእዱግ፡ ምስሌሁ፡ ጽዑናን፡ ወላዕሌሆሙ፡ ፪፻ኅብስት፡ ወ፻ዐጽቅ፡ ዘቢብ፡ ወ፻ዘተመርት፡ ወኔባል፡ ዘወይን።
2 ወይቤሎ፡ ንጉሥ፡ ለሲባ፡ ምንትኑ፡ ዝንቱ፡ ለከ፡ ወይቤ፡ ሲባ፡ አእዱግ፡ ለቤተ፡ ንጉሥ፡ በዘ፡ ይፅእኑ፡ ወኅብስትሰ፡ ወተመርት፡ ለሲሳየ፡ ደቂቁ፡ ወወይንኒ፡ ከመ፡ ይስተዩ፡ እለ፡ ደክሙ፡ በሐቅል።
3 ወይቤሎ፡ ንጉሥ፡ ወአይቴ፡ ወልደ፡ እግዚእከ፡ ወይቤ፡ ሲባ፡ ለንጉሥ፡ ናሁ፡ ይነብር፡ ውስተ፡ ኢየሩሳሌም፡ ሀለወ፡ ወይብል፡ ዮም፡ ያገብኡ፡ ሊተ፡ ቤተ፡ እስራኤል፡ መንግሥተ፡ አቡየ።
4 ወይቤሎ፡ ንጉሥ፡ ለሲባ፡ ናሁ፡ ለከ፡ አግባእኩ፡ ኵሎ፡ ዘሜንፎብስቴ፡ ወሰገደ፡ ሲባ፡ ወይቤ፡ ረከብኩ፡ ሞገሰ፡ ቅድመ፡ አዕይንቲከ፡ እግዚእየ፡ ንጉሥ።
5 ወበጽሐ፡ ንጉሥ፡ ዳዊት፡ ኀበ፡ ብኅሩም፡ ወናሁ፡ ብእሲ፡ ዘይወፅእ፡ እምህየ፡ ዘእምነ፡ ዘመደ፡ ቤተ፡ ሳኦል፡ ወስሙ፡ ሳሚ፡ ወልደ፡ ጌራ፡ ወወፅአ፡ ወእንዘ፡ የሐውር፡ ይረግሞ።
6 ወይዌግሮ፡ በእብን፡ ለዳዊት፡ ወኵሉ፡ ሕዝብ፡ ሀለወ፡ ምስሴሁ፡ ወኵሎሙ፡ ኀያላን፡ እምየማኑ፡ ወእምፀጋሙ፡ ለንጉሥ፡ የሐውሩ።
7 ወከመዝ፡ ይብል፡ ሳሚ፡ እንዘ፡ ይረግሞ፡ ፃእ፡ ፃእ፡ ብእሴ፡ ደም፡ ወብእሲ፡ ዐማፂ።
8 ፈደየከ፡ እግዚአብሔር፡ በኵሉ፡ ደሙ፡ ለቤተ፡ ሳኦል፡ እስመ፡ ነገሥከ፡ ህየንቴሁ፡ ወአግብኣ፡ እግዚአብሔር፡ ለመንግሥትከ፡ ውስተ፡ እደ፡ አቤሴሎም፡ ወልድከ፡ ወአንተሰ፡ ግባእ፡ ውስተ፡ እኪትከ፡ እስመ፡ ብእሴ፡ ደም፡ አንተ።
9 ወይቤሎ፡ አቢሳ፡ ወልደ፡ ሶሩህያ፡ ለንጉሥ፡ ለምንት፡ ይረግሞ፡ ለእግዚእየ፡ ለንጉሥ፡ ዝንቱ፡ ከልብ፡ ምውት፡ እዕዱኑ፡ ወእምትር፡ ርእሶ።
10 ወይቤሎ፡ ንጉሥ፡ ሚሊተ፡ ወለክሙ፡ ደቂቀ፡ ሶሩህያ፡ ኅድግዎ፡ ለዝንቱ፡ ይርግመኒ፡ እስመ፡ ከማሁ፡ ይቤ፡ እግዚአብሔር፡ ይርግምዎ፡ ለዳዊት፡ ወመኑ፡ ያአምር፡ ዘይገብር፡ ዝንቱ።
11 ወይቤሎሙ፡ ዳዊት፡ ለአቢሳ፡ ወለኵሉ፡ ደቁ፡ ወልድየ፡ ዘወፅአ፡ እምነ፡ ከርሥየ፡ የኀሥሣ፡ ለነፍስየ፡ ወዘንተኒ፡ ይእዜ፡ ወልደ፡ ኢያሜኒ፡ ታነክሩ ፤ ኅድግዎ፡ ይርግመኒ፡ እስመ፡ ከማሁ፡ ይቤ፡ እግዚአብሔር።
12 ዮጊ፡ ይሬኢ፡ እግዚአብሔር፡ ሕማምየ፡ ወይፈድየኒ፡ ሠናይተ፡ ህየንተ፡ መርገመ፡ ዚአሁ፡ ዮም፡ በዛቲ፡ ዕለት።
13 ወሖረ፡ ዳዊት፡ ወሰብኡ፡ ፍኖቶመ፡ ወሳሚሰ፡ የሐውር፡ በገቦ፡ ደብር፡ እንተ፡ ቅሩቡ፡ ወእንዘ፡ የሐውር፡ ይረግሞ፡ ወይዌግሮ፡ በእብን፡ እመንገለ፡ ገቦሁ፡ ወይዘሩ፡ መሬተ፡ ላዕሌሁ።
14 ወበጽሐ፡ ንጉሥ፡ ወኵሉ፡ ሕዝብ፡ ድኩማኒሆሙ፡ ህየ፡ ወአዕረፉ።
15 ወአበሴሎም፡ ወኵሉ፡ ሰብኡ፡ ቦኡ፡ ውስተ፡ ኢየሩሳሌም፡ ወአኪጦፌል፡ ምስሌሁ።
16 ወሶበ፡ በጽሐ፡ ኵሲ፡ ካልኡ፡ ለዳዊት፡ ኀበ፡ አበሴሎም፡ ወይቤሎ፡ ኵሲ፡ ለአበሴሎመ፡ ሕያው፡ አበ፡ ነጋሢ።
17 ወይቤሎ፡ አበሴሎም፡ ለኵሲ፡ ዝንቱ፡ ውእቱ፡ ምሕረትከ፡ በእፎ፡ ከመ፡ ኢሖርከ፡ ምስለ፡ ካልእከ።
18 ወይቤሎ፡ ኵሲ፡ ለአበሴሎም፡ አኮኑ፡ እለ፡ ድኅሬከ፡ ኀረየ፡ እግዚአብሔር፡ ውዘንቱኒ፡ ሕዝብ፡ ወኵሉ፡ ሰብአ፡ እስራኤል፡ ለከ፡ ንሕነ፡ ወምስሌከ፡ ንሄሉ።
19 ወለመኑ፡ አነ፡ እትቀነይ፡ ዳግመ፡ እንከ፡ እንበለ፡ ቅድመ፡ ወልዱ፡ በከመ፡ ተቀነይኩ፡ ቅድመ፡ አቡከ፡ ከማሁ፡ እሄሉ፡ ቅድሜከ።
20 ወይቤሎ፡ አበሴሎም፡ ለአኪጦፌል፡ ምክሩ፡ ምክረ፡ ዘንገብር።
21 ወይቤሎ፡ አኪጦፌል፡ ለአበሴሎም፡ ባእ፡ ኀበ፡ ዕቁባቲሁ፡ ለአቡከ፡ እለ፡ ኀደገ፡ ይዕቀባ፡ ቤቶ፡ ወይስምዑ፡ ኵሎሙ፡ እስራኤል፡ ከመ፡ አስተኀፈርኮ፡ ለአቡከ፡ ወይጸንዕ፡ እዴሆሙ፡ ለኵሎሙ፡ ምስሌከ።
22 ወተከሉ፡ ሎቱ፡ ደብተራሁ፡ ለአበሴሎም፡ ውስተ፡ ናሕስ፡ ወቦአ፡ አበሴሎም፡ ኀበ፡ ዕቁባተ፡ አቡሁ፡ እንዘ፡ ይሬእዩ፡ ኵሉ፡ እስራኤል።
23 ወምክሩ፡ ለአኪጦፌል፡ እንተ፡ ያመክሮሙ፡ እምቀዲሙ፡ መዋዕል፡ በከመ፡ ውፁእ፡ ውእቱ፡ እምነ፡ ቃለ፡ እግዚአብሔር፡ ከማሁ፡ ኵሉ፡ ምክሩ፡ ለአኪጦሬል፡ በኀበ፡ ዳዊትኒ፡ ወበኀበ፡ አበሴሎምኒ።
=== chapter 17 ===
[II Regum 17]
1 ወይቤሎ፡ አኪጦፌል፡ ለአቤሴሎም፡ ኅረይ፡ ሊተ፡ ፼ወ፳፻ወእትነሣእ፡ ወእዴግኖ፡ ወእትልዎ፡ ለዳዊት፡ በሌሊት።
2 ወእባእ፡ ላዕሌሁ፡ እንዘ፡ ድኩም፡ ውእቱ፡ ወእንዘ፡ አልቦ፡ ኀይለ፡ ውስተ፡ እደዊሁ፡ ወእቁም፡ ላዕሌሁ፡ ወኣጕይዮሙ፡ ለኵሉ፡ ሕዝብ፡ እለ፡ ምስሌሁ፡ ወእቅትሎ፡ ለንጉሥ፡ ለባሕቲቱ።
3 ወእሚጦሙ፡ ለኵሉ፡ ሕዝብ፡ ኀቤከ፡ ከመ፡ ትገብእ፡ መርዓት፡ ኀበ፡ ምታ፡ እስመ፡ ነፍሰ፡ ፩ብእሲ፡ ዘተኀሥሥ፡ አንተ፡ ዳእሙ፡ ወለባዕድሰ፡ ለኵሉ፡ ሰብእ፡ ሰላም።
4 ወአደሞ፡ ዝንቱ፡ ነገር፡ ለአበሴሎም፡ በቅድመ፡ አዕይንቲሁ፡ ወቅድመ፡ አዕይንቲሆሙ፡ ለኵሉ፡ ሊቃናተ፡ እስራኤል።
5 ወይቤ፡ አበሴሎም፡ ጸውዕዎ፡ ለኵሲኒ፡ ለአራጋይ፡ ወንስምዖ፡ ሎቱኒ፡ ዘከመ፡ ይብል።
6 ወቦአ፡ ኵሲ፡ ኀበ፡ አቤሴሎም፡ ወነገሮ፡ አቤሴሎም፡ ዘንተ፡ ነገረ፡ ዘይቤ፡ አኪጦፌል፡ ንግበርኑ፡ ዘከመ፡ ይቤ፡ ወአው፡ ንግረነ፡ ዘትብል።
7 ወይቤሎ፡ ኵሲ፡ ለአበሴሎም፡ ኢኮነ፡ ሠናየ፡ ዛቲ፡ ምክር፡ እንተ፡ መከረ፡ አኪጦፌል፡ ዛቲ፡ አሐቲ።
8 ወይቤሎ፡ ኵሲ፡ አንተ፡ ታአምሮ፡ ለአቡከ፡ ወለሰብኡ፡ ከመ፡ ጽኑዓን፡ እሙንቱ፡ ፈድፋደ፡ ወመሪር፡ ነፍሶሙ፡ ከመ፡ ድብ፡ ኀራስ፡ ዘውስተ፡ ገዳም፡ ወከመ፡ ሐራውያ፡ ሐቅል፡ ለዋው፡ በውስተ፡ ገዳም፡ ወአቡከኒ፡ ብእሲ፡ መስተቃትል፡ ውእቱ፡ ወኢይፈትሖሙ፡ ለሕዝብ።
9 እስመ፡ ሀለወ፡ ይትኀባእ፡ እምነ፡ አውግር፡ ወእመ፡ አኮ፡ ውስተ፡ ፩መከን፡ ወእምከመ፡ በጽሑ፡ ቀደምት፡ ዘትሰምዕ፡ ሀሎከ፡ ወይቤ፡ ያጥፍእዎሙ፡ ለሕዝብ፡ እለ፡ ተለውዎ፡ ለአበሴሎም።
10 እስመ፡ ወልደ፡ ኀይል፡ ውእቱ፡ ለሊሁ፡ ዘልቡ፡ ከመ፡ ልበ፡ አንበሳ፡ ይነድድ፡ ወይውዒ፡ ወያእምሩ፡ ኵሎሙ፡ እስራኤል፡ ከመ፡ ጽኑዕ፡ አቡከ፡ ወደቂቀ፡ ኀይል፡ ኵሎሙ፡ እለ፡ ምስሌሁ።
11 እስመ፡ ከመዝ፡ አንሰ፡ አምከርኩከ፡ ወይትአለዱ፡ ወይትጋብኡ፡ ኵሎሙ፡ እስራኤል፡ እምዳን፡ እስከ፡ ቤርሳቤሕ፡ ከመ፡ ኆጻ፡ ባሕር፡ ብዝኆሙ፡ ወገጽከ፡ የሐውር፡ ምስሌሆሙ፡ ማእከሌሆሙ።
12 ወንበጽሕ፡ ኀቤሁ፡ ውስተ፡ ፩ብሔር፡ ኀበ፡ ረከብናሁ፡ ህየ፡ ወንትዐየን፡ ላዕሌሁ፡ ከመ፡ ይወርድ፡ ጠል፡ ውስተ፡ ምድር፡ ወኢናተርፍ፡ ወኢዕደ፡ እለ፡ ምስሌሁ፡ ወኢአሐደ።
13 ወእመኒ፡ ውስተ፡ ሀገር፡ ተጋብኡ፡ ወይመጽኡ፡ ኵሉ፡ እስራኤል፡ ኀበ፡ ይእቲ፡ ሀገር፡ ወይስሕብዋ፡ ዘአኅባል፡ እስከ፡ ፈለግ፡ ከመ፡ ኢያትርፉ፡ ህየ፡ ወኢእብነ።
14 ወይቤሉ፡ ኵሉ፡ እስራኤል፡ ትኈይስ፡ ምክረ፡ ኵሲ፡ እምነ፡ ምክረ፡ አኪጦፌል፡ ወእግዚአብሔር፡ አዘዘ፡ ይትኀደግ፡ ምክረ፡ አኪጦፌል፡ ከመ፡ ያምጽእ፡ እግዚአብሔር፡ ላዕለ፡ አበሴሎም፡ ኵሎ፡ እኪተ።
15 ወይቤሎሙ፡ ኵሲ፡ አረጋይ፡ ለሳዶቅ፡ ወለአብያታር፡ ካህናት፡ ከመዝ፡ ወከመዝ፡ እምከሮሙ፡ አኪጦፌል፡ ለአበሴሎም፡ ወለሊቃናተ፡ እስራኤል፡ ወከመዝ፡ ወከመዝ፡ አምከርኩ፡ እነ።
16 ወይእዜኒ፡ ለአኩ፡ ፍጡነ፡ ይንግርዎ፡ ለዳዊት፡ ወይበልዎ፡ ኢትቢትአ፡ በዛቲአ፡ ሌሊትአ፡ ውስተ፡ አረቦትአ፡ እንተአ፡ ሐቅልአ፡ አፍጥንአ፡ ዐዲወአ፡ ዮጊአ፡ ያሰፍጦሙአ፡ ለንጉሥአ፡ ወለኵሉአ፡ አሕዛብአ፡ ዘምስሌሁአ።
17 ወዮናታንሰ፡ ወአኪማሐስ፡ ይቀውሙ፡ ኀበ፡ ዐዘቅት፡ ሮጌል፡ ወሖረት፡ አሐቲ፡ ወለት፡ ወነገረቶሙ፡ ወሖሩ፡ እሙንቱ፡ ወዜነውዎ፡ ለዳዊት፡ እስመ፡ ኢተክህሎሙ፡ ዘዊአ፡ ውስተ፡ ሀገር።
18 ወርእዮሙ፡ ፩ወልድ፡ ወአይድዖ፡ ለአበሴሎም፡ ወእሙንቱሰ፡ ሖሩ፡ ፍጡነ፡ ወቦኡ፡ ውስተ፡ ቤተ፡ ፩ብእሲ፡ ዘእምነ፡ ብሔሮሙ፡ ወቦቱ፡ ዐዘቅት፡ ውስተ፡ ዐጸድ፡ ወወረዱ፡ ህየ።
19 ወነሥአት፡ ብእሲት፡ ክዳነ፡ ዐዘቅት፡ ወረበበት፡ ላዕለ፡ አፈ፡ ዐዘቅት፡ ወሰጥሐት፡ ላዕሌሁ፡ አረቦናተ፡ ወሎሙሰ፡ አውረደቶሙ፡ ውስተ፡ ዐዘቅት፡ ታሕተ፡ ወአልቦ፡ ዘአእመረ፡ ቦሙ።
20 ወመጽኡ፡ ደቀ፡ አበሴሎም፡ ውስተ፡ ቤተ፡ ይእቲ፡ ብእሲት፡ ወይቤልዋ፡ አይቴ፡ አኪማሐስ፡ ወዮናታን፡ ወትቤሎሙ፡ ይእቲ፡ ብእሲት፡ ይእዜ፡ ናሁ፡ ኀለፉ፡ እምኀበ፡ ማይ፡ ሕቀ፡ ክመ፡ ዘደሩክሙ፡ ወኀሠሥዎሙ፡ ወኢረከብዎሙ፡ ወገብኡ፡ ውስተ፡ ኢየሩሳሌም።
21 ወእምዝ፡ እምድኅረ፡ ኀለፉ፡ እሙንቱ፡ ወፂኦሙ፡ እምነ፡ ዐዘቅት፡ ሖሩ፡ ወዜነውዎ፡ ለዳዊት፡ ንጉሥ፡ ወይቤልዎ፡ ለዳዊት፡ ተንሥኡ፡ ወዕድዉ፡ ማየ፡ ፍጡነ፡ እስመ፡ ከመዝ፡ እምከረ፡ ላዕሌክሙ፡ አኪጦፌል።
22 ወተንሥኡ፡ ዳዊት፡ ወኵሉ፡ ሕዝብ፡ ዘምስሌሁ፡ ወዐደዉ፡ ዮርዳኖስ፡ እንዘ፡ ይገውሕ፡ ጽባሐ፡ ኢተረፋ፡ ወኢአሐዱ፡ እምኔሆሙ፡ አልቦ፡ ዘኢዐደዉ፡ ዮርዳኖስ።
23 ወአኪጦፌልሰ፡ ሶበ፡ ርእየ፡ ከመ፡ ኢገብረ፡ ሎቱ፡ ምክሮ፡ ረሐነ፡ አድጎ፡ ወተንሥአ፡ ወሖረ፡ ቤቶ፡ ውስተ፡ ሀገሩ፡ ወአዘዘ፡ በእንተ፡ ቤቱ፡ ወተኀንቀ፡ ወሞተ፡ ወተቀብረ፡ ውስተ፡ መቃብረ፡ አቡሁ።
24 ወዳዊትሰ፡ ውስተ፡ ምናሔም፡ ወአበሴሎምኒ፡ ዐደወ፡ ውስተ፡ ዮርዳኖስ፡ ወኵሉ፡ ሰብአ፡ እስራኤል፡ ምስሌሁ።
25 ወእሜሳይሃ፡ ሤመ፡ አበሴሎም፡ ህየንተ፡ ኢዮአብ፡ ላዕለ፡ ኀይል፡ ወአሜሳይ፡ ወልደ፡ ብእሲ፡ ዘስሙ፡ ኢዮቶር፡ እስራኤላዊ፡ ውእቱ፡ ዘቦአ፡ ኀበ፡ አቤግያ፡ ወለተ፡ ነአሶ፡ እኁሃ፡ ለሶርህያ፡ እሙ፡ ለኢዮአብ።
26 ወተዐየኑ፡ ኵሉ፡ እስራኤል፡ ምስለ፡ አበሴሎም፡ ውስተ፡ ምድረ፡ ገለዓድ።
27 ወሶበ፡ በጽሐ፡ ዳዊት፡ ኀበ፡ ምናሔም፡ ኡኤሴብ፡ ወልደ፡ ነአሶ፡ ዘእምነ፡ ረባተ፡ ወልደ፡ ደቂቀ፡ ዐሞን፡ ወማኬር፡ ወልደ፡ አሜሔል፡ ዘእምነ፡ ዶዳቦር፡ ወቤርዜሊ፡ ዘእምነ፡ ገለዓድ፡ ዘሮጌሌም ፤
28 አምጽኡ፡ ዐሥሩ፡ ዐራታተ፡ ወጕዛጕዛተ፡ ወዐሥሩ፡ ጸሀራተ፡ ወአጽሕብተ፡ ወስርናየ፡ ወሰገመ፡ ወሖሪጸ፡ ወጥሕነ፡ ወዐተረ፡ ወብርስነ ፤
29 ወመዐረ፡ ወቅብአ፡ ወአባግዐ፡ ወአልህምተ፡ አምጽኡ፡ ለዳዊት፡ ወለአሕዛብ፡ እለ፡ ምስሌሁ፡ ይብልዑ፡ ወርኅቡ፡ ሕዝብ፡ ወጸምኡ፡ ወደክሙ፡ በውስተ፡ ሐቅል።
=== chapter 18 ===
[II Regum 18]
1 ወአስተፋቀዶሙ፡ ዳዊት፡ ለሕዝብ፡ እለ፡ ምስሌሁ፡ ወሤመ፡ ላዕሌሆሙ፡ መሳፍንተ፡ ወመኳንንተ።
2 ወፈነዎሙ፡ ዳዊት፡ ለሕዝብ፡ [ሣልስተ፡ እዴሆሙ፡ ምስለ፡ ኢዮአብ፡ ወ]ሣልስተ፡ እዴሆሙ፡ ምስለ፡ አቢሳ፡ ወልደ፡ ሶርህያ፡ እኁሁ፡ ለኢዮአብ፡ ወሣልስተ፡ እዴሆሙ፡ ምስለ፡ ሴቲ፡ ጌትያዊ፡ ወይቤሎሙ፡ ዳዊት፡ ለሕዝብ፡ እወፅእ፡ አነሂ፡ ምስሌክሙ።
3 ወይቤልዎ፡ ኢትወፅእ፡ እስመ፡ እመቦ፡ ከመ፡ ጐየይነ፡ ኢይትልወነ፡ ልቦሙ፡ እስመ፡ አንተ፡ ከመ፡ ኵልነ፡ ከመ፡ እልፍ፡ ወይእዜኒ፡ ይኄይስነ፡ ሶበ፡ ትሄሉ፡ ለነ፡ ውስተ፡ ሀገር፡ ረዳኢተ፡ ከመ፡ ትርድአነ።
4 ወይቤሎሙ፡ ንጉሥ፡ ኵሎ፡ ዘይኤድመክሙ፡ ቅድመ፡ አዕይንቲክሙ፡ እገብር፡ ወቆመ፡ ንጉሥ፡ ኀበ፡ አንቀጸ፡ ሀገር፡ ወወፅእ፡ ኵሉ፡ ሕዝብ፡ በበ፻ወበበ፡ ፲፻።
5 ወአዘዞሙ፡ ለኢዮአብ፡ ወለአቢሳ፡ ወለሴቲ፡ እንዘ፡ ይብል፡ መሐኩ፡ ሊተ፡ ወልድየ፡ አበሴሎምሃ፡ ወኵሉ፡ ሕዝብ፡ ሰምዑ፡ እንዘ፡ ይኤዝዞሙ፡ ንጉሥ፡ ለኵሉ፡ መላእክት፡ በእንተ፡ አበሴሎም።
6 ወወፅኡ፡ ኵሉ፡ ሕዝብ፡ ውስተ፡ ገዳም፡ ወተቀበልዎሙ፡ ለእስራኤል፡ ወተቃተልዎሙ፡ በውስተ፡ ሐቅለ፡ ኤፍሬም።
7 ወወድቁ፡ በህየ፡ ሰብአ፡ እስራኤል፡ ቅድመ፡ ሰብአ፡ ዳዊት፡ ወኮነ፡ ዐቢየ፡ ቀትለ፡ በይእቲ፡ ዕለት፡ ወሞቱ፡ ፪፼ብእሲ።
8 ወተዘርወ፡ ቀትል፡ ውስተ፡ ኵሉ፡ ምድር፡ ወበዝኁ፡ እለ፡ ሞቱ፡ በበድው፡ እምነ፡ እለ፡ ተቀትሉ፡ በኲናት፡ ይእተ፡ አሚረ።
9 ወተራከቦሙ፡ አበሴሎም፡ ቅድሜሆሙ፡ ለሰብአ፡ ዳዊት፡ ወአበሴሎምሰ፡ ይጼዐን፡ ውስተ፡ በቅሎ፡ ወቦአ፡ ውእቱ፡ በቅሉ፡ ታሕተ፡ ዕፅ፡ ዐቢይ፡ ወተሰቅለ፡ ርእሶ፡ በዕፅ፡ ወተሰቅለ፡ ማእከለ፡ ሰማይ፡ ወምድር፡ ወኀለፈ፡ በቅል፡ እምታሕቴሁ።
10 ጠርእዮ፡ ፩ብእሲ፡ ወአይድዖ፡ ለኢዮአብ፡ ወይቤ፡ ርኢክዎ፡ ለአበሴሎም፡ ኀበ፡ ተሰቅለ፡ ዲበ፡ ዕፅ።
11 ወይቤሎ፡ ኢዮአብ፡ ለውእቱ፡ ብእሲ፡ ዘአይድዖ፡ ናሁ፡ ርኢኮ፡ ለምንት፡ ኢቀተልኮ፡ ውስተ፡ ምድር፡ ወእምወሀብኩከ፡ አነ፡ ፲ብሩረ፡ ወዘትቀንት፡ አሐደ።
12 ወይቤሎ፡ ውእቱ፡ ብእሲ፡ ለኢዮአብ፡ ወሶበ፡ ፲፻ሰቅለ፡ ብሩር፡ ትደሉ፡ ሊተ፡ ውስተ፡ እዴየ፡ እመ፡ ኢያውረድኩ፡ እዴየ፡ ላዕለ፡ ወልደ፡ ንጉሥ፡ እስመ፡ ለሊነ፡ ሰማዕነ፡ በእዘኒነ፡ እንዘ፡ ይኤዝዞሙ፡ ንጉሥ፡ ለአቢሳ፡ ወለሴቲ፡ ወይቤሎሙ፡ ተዐቀቡ፡ ሊተ፡ ወልድየ፡ አበሴሎምሃ።
13 ኢትግበሩ፡ ላዕለ፡ ነፍሱ፡ ሰይአ፡ ሕሡመ፡ ወኵሉ፡ ቃል፡ ኢይትረሳዕ፡ በኀበ፡ ንጉሥ፡ ወአንተስ፡ ትቀውም።
14 ወይቤ፡ ልኢዮአብ፡ አነ፡ እገብር፡ ዘንተሰ፡ አኮ፡ ከመዝ፡ ዘእነብር፡ ቅድሜከ፡ ወነሥእ፡ ኢዮአብ፡ ፫አሕገ፡ ውስተ፡ እዴሁ፡ ወነደፎ፡ በቱ፡ ለአበሴሎም፡ ውስተ፡ ልቡ፡ እንዘ፡ ዓዲሁ፡ ሕያው፡ ወሀሎ፡ ውስተ፡ ማእከለ፡ ዕፅ።
15 ወዐገትዎ፡ ፲ደቀ፡ ኢዮአብ፡ እለ፡ ይጸውሩ፡ ንዋየ፡ ሐቅሉ፡ ወረገዝዎ፡ ለአበሴሎም፡ ወቀተልዎ።
16 ወአንፍሐ፡ ቀርነ፡ ኢዮአብ፡ ወሜጦሙ፡ ለሕዝብ፡ ከመ፡ ኢይዴግንዎሙ፡ ወኢይቅትልዎሙ፡ ለእስራኤል፡ እስመ፡ መሐኮሙ፡ ለሕዝብ፡ ኢዮአብ።
17 ወነሥኦ፡ ለአበሴሎም፡ ወወገሮ፡ ውስተ፡ ጸድፍ፡ ዐቢይ፡ ውስተ፡ ማዕምቅ፡ ዘውስተ፡ ገዳም፡ ወአቀሙ፡ ህየ፡ ሐውልተ፡ እብን፡ ዐቢይ፡ ጥቀ፡ ወኵሉ፡ ሰብአ፡ እስራኤል፡ ጐዩ፡ ወአተዉ፡ አብያቲሆሙ።
18 ወአበሴሎምሰ፡ ሞተ፡ ወአቀሙ፡ ላዕሌሁ፡ ሐውልተ፡ ዘእምነ፡ ቁላተ፡ መንግሥት፡ እስመ፡ ይቤ፡ አልቦ፡ ውሉደ፡ እንከ፡ በዘቦቱ፡ ይዜክርዎ፡ ስሞ፡ ወሰመይዋ፡ ለይእቲ፡ ሐውልት፡ እደ፡ አበሴሎም፡ እስከ፡ ዮም።
19 ወይቤ፡ አኪማሐስ፡ እሩጽኑ፡ ወእዜንዎ፡ ለንጉሥ፡ ከመ፡ ፈትሐ፡ ሎቱ፡ እግዚአብሔር፡ እምነ፡ እደ፡ ፀሩ።
20 ወይቤሎ፡ ኢዮአብ፡ ኢኮንከ፡ ብእሴ፡ ዜና፡ አንተ፡ ዮም፡ በዛቲ፡ ዕለት፡ ወኢትዜኑ፡ በእንተ፡ ወልደ፡ ንጉሥ፡ ከመ፡ ሞተ።
21 ወይቤሎ፡ ኢዮአብ፡ ለኵሲ፡ ሖር፡ ወዜንዎ፡ ለንጉሥ፡ ኵሎ፡ ዘርኢከ፡ ወሰገደ፡ ኵሲ፡ ለኢዮአብ፡ ወወፅአ።
22 ወደገመ፡ ብሂሎቶ፡ አኪማሐስ፡ ወልደ፡ ሳዶቅ፡ ለኢዮአብ፡ እሩጽኑ፡ አነኒ፡ ወእትልዎ፡ ለኵሲ፡ ወይቤሎ፡ ኢዮአብ፡ ለምንት፡ ለከ፡ ትረውጽ፡ ወልድየ፡ ግባእ፡ እስመ፡ ኢትከውነከ፡ ዛቲ፡ ዜና፡ ለበቍዒትከ፡ እመ፡ ሖርከ።
23 ወይቤሎ፡ ወምንትኑ፡ እመ፡ ሮጽኩ፡ ወይቤሎ፡ ኢዮአብ፡ ሩጽ፡ ወሮጸ፡ አኪማሐስ፡ ፍኖተ፡ ኬርቃ፡ ወተዐደዎ፡ ለኵሲ።
24 ወዳዊትሰ፡ ይነብር፡ ማእከለ፡ ክልኤ፡ ኆኀት፡ ወዐርገ፡ ናሕሰ፡ ዘይሬኢ፡ ዲበ፡ ተድባበ፡ ዴዴ፡ ወአልዐለ፡ ዐይኖ፡ ወይሬኢ፡ ወናሁ፡ ብእሲ፡ ይረውጽ፡ ባሕቲቱ፡ ቅድሜሁ።
25 ወጸርኀ፡ ውእቱ፡ ዘይሬኢ፡ ወአይድዖ፡ ለንጉሥ፡ ወይቤሎ፡ ንጉሥ፡ አመሰ፡ ባሕቲቱ፡ ውእቱ፡ ዜናቦ፡ ምስሌሁ፡ ወይረውጽ፡ ወእንዘ፡ ይረውጽ፡ ቀርበ።
26 ወዓዲ፡ ርእየ፡ ውእቱ፡ ዘይሔውጽ፡ ካልአ፡ ብእሴ፡ እንዘ፡ ይረውጽ፡ ወጸርኀ፡ ውእቱ፡ ዘይሔውጽ፡ እመልዕልተ፡ ዴዴ፡ ወይቤ፡ ናሁ፡ ብእሲ፡ ካልእ፡ ይረውጽ፡ ባሕቲቱ፡ ወይቤ፡ ንጉሥ፡ ወዝንቱኒ፡ ዜና፡ መጽአ።
27 ወይቤ፡ ውእቱ፡ ዘይሔውጽ፡ አንሰ፡ እሬኢ፡ ሩጸቱ፡ ለቀዳማዊ፡ ከመ፡ ሩጸተ፡ አኪማሐስ፡ ወልደ፡ ሳዶቅ፡ ወይቤ፡ ንጉሥ፡ ብእሲ፡ ቡሩክ፡ ውእቱ፡ ወበእንተ፡ ዜና፡ ሠናይ፡ ይመጽእ።
28 ወጸርኀ፡ አኪማሐስ፡ ወይቤሎ፡ ለንጉሥ፡ ሰላም፡ ለከ፡ ወሰገደ፡ ሎቱ፡ ለንጉሥ፡ በገጹ፡ ውስተ፡ ምድር፡ ወይቤሎ፡ ይትባረክ፡ እግዚአብሔር፡ አምላክከ፡ ዘዐፀዎሙ፡ ለዕደው፡ እለ፡ ይጸልኡ፡ እደዊሆሙ፡ በእንተ፡ እግዚእየ፡ ንጉሥ።
29 ወይቤሎ፡ ንጉሥ፡ ዳኅንኑ፡ ወልድየ፡ አበሴሎም፡ ወይቤሎ፡ አኪማሐስ፡ ርኢኩ፡ ብዙኀ፡ ሰብአ፡ ከመ፡ ይፌኑ፡ ገብረ፡ ንጉሥ፡ ኢዮአብ፡ ወገብርከሰ፡ ኢያእመርኩ፡ ምንተ፡ ኮነ፡ በህየ።
30 ወይቤሎ፡ ንጉሥ፡ ሖር፡ ወቁም፡ ዝየ፡ ወተግኅሠ፡ ወቆመ።
31 ወበጽሐ፡ ኵሲ፡ ወይቤሎ፡ ለንጉሥ፡ ይዜንዎ፡ ለእግዚእየ፡ ንጉሥ፡ ከመ፡ ፈትሐ፡ ሎቱ፡ እግዚአብሔር፡ እምእደ፡ ኵሎሙ፡ እለ፡ ይትነሥኡ፡ ላዕሌሁ።
32 ወይቤሎ፡ ንጉሥ፡ ዳኅንኑ፡ ወልድየ፡ አበሴሎም፡ ወይቤሎ፡ ኵሲ፡ ከመ፡ ወልድከ፡ ለይኩኑ፡ ጸላእቱ፡ ለእግዚእየ፡ ንጉሥ፡ ወኵሎሙ፡ እለ፡ ይትነሥኡ፡ ላዕሌሁ፡ ለእኪት።
33 ወደንገፀ፡ ንጉሥ፡ ወዐርገ፡ ውስተ፡ ጽርሑ፡ ዘመልዕልተ፡ ዴዴ፡ ወበከየ፡ ወከመዝ፡ ይብል፡ እንዘ፡ የሐውር፡ ወልድየ፡ አበሴሎም፡ ወልድየ፡ አበሴሎም፡ መኑ፡ እምረሰየኒ፡ ሊተ፡ ከመ፡ አነ፡ እሙት፡ ህየንቴከ፡ ወአነ፡ ቤዛከ፡ ለእኩን፡ ወልድየ፡ አበሴሎም።
=== chapter 19 ===
[II Regum 19]
1 ወይቤልዎ፡ ለኢዮአብ፡ ይበኪ፡ ንጉሥ፡ ወይላሕዎ፡ ለአበሴሎም።
2 ወገብአት፡ ላሐ፡ ሕይወቶሙ፡ ለኵሉ፡ ሕዝብ፡ ይእተ፡ አሚረ፡ እስመ፡ ሰምዑ፡ ሕዝብ፡ ይእተ፡ አሚረ፡ እንዘ፡ ይብሉ፡ ይቴክዝ፡ ንጉሥ፡ በእንተ፡ ወልዱ፡ አበሴሎም።
3 ወይሰረቁ፡ ሕዝብ፡ ይእተ፡ አሚረ፡ ከመ፡ ይባኡ፡ ውስተ፡ ሀገር፡ ከመ፡ ይሰረቅ፡ ሕዝብ፡ ዘየኀፍር፡ ሶበ፡ ይነትዕ፡ በውስተ፡ ቀትል።
4 ወንጉሥሰ፡ ተከድነ፡ ገጾ፡ ወጸርኀ፡ በዐቢይ፡ ቃል፡ ወይቤ፡ ወልድየ፡ አበሴሎም፡ ወልድየ።
5 ወይቤሎ፡ ኢዮአብ፡ ለንጉሥ፡ በዊኦ፡ ኀቤሁ፡ ውስተ፡ ቤቱ፡ አስተኀፈርከ፡ ገጸ፡ ኵሉ፡ አግብርቲከ፡ እለ፡ አድኀኑከ፡ ዮም፡ ወነፍሰ፡ ደቂቅከኒ፡ ወአዋልድከኒ፡ ወነፍሰ፡ አንስቲያከኒ፡ ወዕቁባቲከኒ።
6 እስመ፡ ታፈቅሮሙ፡ ለእለ፡ ይጸልኡከ፡ ወትጸልኦሙ፡ ለእለ፡ ያፈቅሩከ፡ ወእብለከ፡ ዮም፡ ከመ፡ ኢይበቍዑ፡ መላእክቲከ፡ ወደቅከ ፤ ኢታአምርሁ፡ ከመ፡ ሶበ፡ አበሴሎም፡ ሐይወ፡ ዮም፡ እምኮነ፡ ንሕነ፡ ኵልነ፡ አብድንተ፡ እስመ፡ ይረትዐከ፡ ከማሁ፡ ለከ።
7 ወይእዜኒ፡ ተንሥእ፡ ወሖር፡ ወንብቦሙ፡ ለአግብርቲከ፡ ዘይበውእ፡ ውስተ፡ ልቦሙ፡ እስመ፡ መሐልኩ፡ በእግዚአብሔር፡ ከመ፡ እመ፡ ኢወፃእከ፡ ዮም፡ ኀቤሆሙ፡ ከመ፡ አልቦ፡ ዘይበይት፡ ምስሌከ፡ ወኢአሐዱ፡ ብእሲ፡ በዛቲ፡ ሌሊት፡ ወአእምር፡ እንከ፡ ለሊከ፡ ከመ፡ ተአክየከ፡ ዛቲ፡ እምነ፡ እንታክቲ፡ እኪት፡ እንተ፡ ረከበተከ፡ እምንእስከ፡ እስከ፡ ይእዜ።
8 ወተንሥአ፡ ንጉሥ፡ ወነበረ፡ ውስተ፡ አንቀጽ፡ ወእይድዕዎሙ፡ ለኵሉ፡ ሕዝብ፡ ወይቤልዎሙ፡ ናሁ፡ ንጉሥ፡ ይነብር፡ ውስተ፡ እንቀጽ፡ ወቦኡ፡ ኵሉ፡ ሕዝብ፡ ቅድመ፡ ንጉሥ ፤ ሰብአ፡ እስራኤል፡ ጐዩ፡ ወአተዉ፡ ውስተ፡ አብያቲሆሙ።
9 ወአንገለጉ፡ ኵሉ፡ ሕዝብ፡ ወኵሉ፡ ነገደ፡ እስራኤል፡ ወይቤሉ፡ ዳዊት፡ ንጉሥ፡ አድኀነነ፡ እምነ፡ እደ፡ ኵሉ፡ ፀርነ፡ ወውእቱ፡ አድኀነነ፡ እምነ፡ እዴሆሙ፡ ለኢሎፍሊ፡ ወይእዜኒ፡ ጐየ፡ ወተኀጥአ፡ እምነ፡ ብሔር፡ ወወፅአ፡ እምነ፡ መንግሥት።
10 ወቀባእናሁ፡ ለአበሴሎም፡ ለነ፡ ወሞተ፡ ዘውስተ፡ ቀትል፡ ወይእዜኒ፡ ለምንት፡ ታረምሙ፡ ከመ፡ ኢታግብእዎ፡ ለንጉሥ።
11 ወለአከ፡ ዳዊት፡ ንጉሥ፡ ኀበ፡ ሳዶቅ፡ ወአብያታር፡ ካህናት፡ እንዘ፡ ይብል፡ በልዎሙአ፡ ለሊቃናተ፡ ይሁዳ፡ እንዘ፡ ትብሉአ፡ ለምንትአ፡ ትዴኀሩአ፡ አንትሙአ፡ ከመአ፡ ኢታግብእዎአ፡ ለንጉሥአ፡ ውስተአ፡ ቤቱአ።
13 ወበእንተ፡ አሜሳይኒ፡ (ካህን፡) ይቤ፡ በልዎአ፡ አኮኑአ፡ ዐፅምየአ፡ ወሥጋየአ፡ ወይእዜኒአ፡ ከመዝእ፡ ለይረስየኒአ፡ እግዚአብሔርአ፡ ወከመዝአ፡ ለይቅትለኒአ፡ ከመአ፡ ዳእሙአ፡ መልአከአ፡ ኀይልአ፡ አንተአ፡ ቅድሜየአ፡ በኵሉአ፡ መዋዕልአ፡ ህየንተ፡ ኢዮአብ።
14 ወሜጦሙ፡ ልቦሙ፡ ለኵሉ፡ ይሁዳ፡ ከመዘ፡ ፩ብእሲ፡ ወለአኩ፡ ኀበ፡ ንጉሥ፡ እንዘ፡ ይብሉ፡ እቱአ፡ ወኵሉአ፡ ደቂቅከአ፡ ወአግብርቲከእ።
15 ወገብአ፡ ንጉሥ፡ ወበጽሐ፡ ኀበ፡ ዮርዳኖስ፡ ወመጽኡ፡ ሰብአ፡ ይሁዳ፡ ውስተ፡ ገልገላ፡ ከመ፡ ይሖሩ፡ ይትቀበልዎ፡ ለንጉሥ፡ ወከመ፡ ያዕድውዎ፡ ለንጉሥ፡ ዮርዳኖስ።
16 ወአፍጠነ፡ ሳሚ፡ ወልደ፡ ጌራ፡ ወልደ፡ ኢየሜን፡ ዘእምነ፡ ባቱሪ፡ ወወረደ፡ ምስለ፡ ሰብአ፡ ይሁዳ፡ ወተቀበሎ፡ ለዳዊት፡ ንጉሥ ፤
17 ወ፲፻ብእሲ፡ ምስሌሁ፡ እምነ፡ ብንያም፡ ወሲባ፡ ገብረ፡ ቤተ፡ ሳኦል፡ ወ፲ወ፭ብእሲ፡ ምስሌሁ፡ ወ፳አግብርቲሁ፡ ምስሌሁ፡ ወአርትዑ፡ ላዕለ፡ ዮርዳኖስ፡ መንገለ፡ ቅድመ፡ ንጉሥ።
18 ወገብሩ፡ ግብሮሙ፡ በዘ፡ ያዐድውዎ፡ ለንጉሥ፡ ወዐደዉ፡ ማዕዶተ፡ ከመ፡ ያንሥኡ፡ ቤተ፡ ንጉሥ፡ ወከመ፡ ይግበሩ፡ ዘከመ፡ ይረትዕ፡ በቅድሜሁ፡ ወሳሚሰ፡ ወልደ፡ ጌራ፡ ወድቀ፡ በገጹ፡ ቅድመ፡ ንጉሥ፡ እንዘ፡ የዐዱ፡ ዮርዳኖስ።
19 ወይቤሎ፡ ለንጉሥ፡ ኢትረሲ፡ ሊተ፡ እግዚእየ፡ ጌጋየ፡ ወኢትዝክር፡ ኵሎ፡ ዘአበሰ፡ ለከ፡ ገብርከ፡ እመ፡ ይወፅእ፡ እግዚእየ፡ እምነ፡ ኢየሩሳሌም፡ ወኢትዕቀቦ፡ ሊተ፡ እግዚእየ፡ ንጉሥ፡ ውስተ፡ ልብከ።
20 እለመ፡ አእመረ፡ ገብርከ፡ ከመ፡ አነ፡ አበስኩ፡ ናሁ፡ አነ፡ መጻእኩ፡ ቀደምኩ፡ እምነ፡ ኵሉ፡ ቤተ፡ ዮሴፍ፡ ከመ፡ እረድ፡ ወእትቀበሎ፡ ለእግዚእየ፡ ንጉሥ።
21 ወተሠጥዎ፡ አቢሳ፡ ወልደ፡ ሶርህያ፡ ወይቤ፡ ዝንቱኒ፡ እንከ፡ ኢይመውት፡ ሳሚ፡ ዘረገሞ፡ ለመሲሐ፡ እግዚአብሔር።
22 ወይቤሎ፡ ዳዊት፡ ሚሊተ፡ ወለክሙ፡ ደቂቀ፡ ሶርህያ፡ ከመ፡ ትኩኑኒ፡ ዮም፡ መስሕታነ ፤ ዮምሰ፡ አልቦ፡ ዘይመውት፡ ዘውስተ፡ እስራኤል፡ ወኢ፩ብእሲ፡ እስመ፡ ኢያአምር፡ እመ፡ ዮጊ፡ ዮም፡ እነግሥ፡ ለእስራኤል።
23 ወይቤሎ፡ ንጉሥ፡ ለሳሚ፡ ኢትመውት፡ ወመሐለ፡ ሎቱ፡ ንጉሥ።
24 ወሜንፌቦስቴ፡ ወልደ፡ ሳኦል፡ ወረደ፡ ወተቀበሎ፡ ለንጉሥ፡ ወኢተፈወሰ፡ አእጋሪሁ፡ ወኢተጸፍረ፡ ሠኢተላጸየ፡ ወኢሐፀበ፡ አልባሲሁ፡ እምአመ፡ ወፅአ፡ ንጉሥ፡ እስከ፡ ይእቲ፡ ዕለት፡ እንተ፡ አመ፡ በጽሐ፡ በሰላም።
25 ወእምዝ፡ አመ፡ በጽሐ፡ ውስተ፡ ኢየሩሳሌም፡ ወረደ፡ ወተቀበሎ፡ ለንጉሥ፡ ወይቤሎ፡ ንጉሥ፡ በእፎ፡ ከመ፡ ኢመጻእከ፡ ምስሌየ፡ ሜንፎብስቴ።
26 ወይቤሎ፡ ሜንፎብስቴ፡ እግዚእየ፡ ንጉሥ፡ ገብርየ፡ አስተሐቀረኒ፡ እስመ፡ ይቤሎ፡ ቍልዔከ፡ ረኀን፡ ሊተ፡ እድግትየ፡ ወእፀዐና፡ ወእሖር፡ ምስለ፡ ንጉሥ፡ እስመ፡ ጽውስ፡ ገብርከ፡ እገሪሁ።
27 ወይሖር፡ ገብርከ፡ ምስለ፡ እግዚኡ፡ ምስለ፡ ንጉሥ፡ ወእግዚእየሰ፡ ንጉሥ፡ ገብረ፡ ሠናየ፡ ላዕሌየ፡ ከመ፡ መልአከ፡ እግዚአብሔር፡ እግዚእየ፡ ንጉሥ፡ ወግበር፡ ዘሠናይ፡ ቅድመ፡ አዕይንቲከ።
28 እስመ፡ ኢኮነ፡ ኵሉ፡ ቤተ፡ አቡየ፡ እንበለ፡ ዕደወ፡ ሞት፡ እሙንቱ፡ በኀበ፡ እግዚእየ፡ ንጉሥ፡ ወረሰይኮ፡ ለገብርከ፡ ምስለ፡ እለ፡ ይበልዑ፡ ማእድከ፡ ወምንት፡ ብየ፡ እንከ፡ ዘእብል፡ ወበዘ፡ እጸርኅ፡ ኀበ፡ ንጉሥ።
29 ወይቤሎ፡ ንጉሥ፡ ለምንት፡ ለከ፡ እንከ፡ ዓዲ፡ ታዐቢ፡ ነቢበ ፤ እቤለከ፡ አንተ፡ ወሲባ፡ ተካፈሉ፡ ሐቅሎ፡ ለአቡከ።
30 ወይቤሎ፡ ሜንፎብስቴ፡ ለንጉሥ፡ ወኵሎሂ፡ ለይንሣእ፡ እምድኅረሰ፡ አተወ፡ እግዚእየ፡ ንጉሥ፡ ውስተ፡ ቤቱ፡ በሰላም።
31 ወቤርዜሊ፡ ገላአዳዊ፡ ወረደ፡ እምነ፡ ሮጌሊም፡ ወዐደወ፡ ዮርዳኖስ፡ ምስለ፡ ንጉሥ።
32 ወበርዜሊሰ፡ ብእሲ፡ ልሂቅ፡ ውእቱ፡ ፈድፋደ፡ ወልደ፡ ፹ዓም፡ ውእቱ፡ ወውእቱሰ፡ ሴሰዮ፡ ለንጉሥ፡ አመ፡ ነበረ፡ ውስተ፡ ምናሔም፡ እስመ፡ ብእሲ፡ ዐቢይ፡ ውእቱ፡ ጥቀ።
33 ወይቤሎ፡ ንጉሥ፡ ለቤርዜሊ፡ አንተ፡ ተዐዱ፡ ምስሌየ፡ ዮርዳኖስ፡ ወእሴስዮ፡ ለርሥኣንከ፡ ምስሌየ፡ ቟ኢየሩሳሌም።
34 ወይቤሎ፡ ቤርዜሊ፡ ለንጉሥ፡ ሚመጠነ፡ ተረፈኒ፡ መዋዕል፡ ሕይወትየ፡ ዘላዕሌየ፡ ከመ፡ እዕረግ፡ ምስለ፡ ንጉሥ፡ ኢየሩሳሌም።
35 ወልደ፡ ሰማንያ፡ ዓም፡ ኦነ፡ ዮም፡ ሶበሰ፡ እፈልጥ፡ ሠናየ፡ እምነ፡ እኩይ፡ ወሶበሂ፡ ይጥዕም፡ ዓዲ፡ ገብርከ፡ አው፡ እበልዕ፡ ወአው፡ እሰቲ፡ አው፡ እስምዕ፡ ቃለ፡ ሐላይያን፡ ወሐላይያት፡ ወለምንት፡ ይከውን፡ ክበደ፡ ገብርከ፡ ላዕለ፡ እግዚእየ፡ ንጉሥ።
36 ሕቀ፡ ክመ፡ የዐዱ፡ ዮርዳኖስ፡ ገብርከ፡ ምስለ፡ ንጉሥ፡ ወለምንት፡ ይፈድያኒ፡ ንጉሥ፡ ዘንተ፡ ፍዳ።
37 ይንበር፡ ገብርከሰ፡ ወእሙት፡ ዘሀገርየ፡ ወእትቀበር፡ ውስተ፡ መቃብረ፡ አቡየ፡ ወእምየ፡ ወናሁ፡ ገብርከ፡ መከዓም፡ ይዕዱ፡ ምስለ፡ እግዚእየ፡ ንጉሥ፡ ወግዘር፡ ሎቱ፡ ዘከመ፡ ፈቀድከ፡ በቅድመ፡ አዕይንትከ።
38 ወይቤሎ፡ ንጉሥ፡ ምስሌየ፡ ይዕዱ፡ መከዓም፡ ወአነ፡ እገብር፡ ሎቱ፡ ዘከመ፡ ይኤድመኒ፡ በቅድመ፡ አዕይንትየ፡ ወኵሎ፡ ዘፈቀድክሙ፡ በኀቤየ፡ እገብር፡ ለክሙ።
39 ወዐደወ፡ ኵሉ፡ ሕዝብ፡ ዮርዳኖስ፡ ወንጉሥኒ፡ ዐደወ፡ ዮርዳኖስ፡ ወሐቀፎ፡ ንጉሥ፡ ለቤርዜሊ፡ ወባረከ፡ ወተመይጠ፡ ወአተወ፡ ብሔሮ።
40 ወዐደወ፡ ንጉሥ፡ ውስተ፡ ገልገላ፡ ወመከዐም፡ ዐደወ፡ ምስሌሁ፡ ወኵሉ፡ ሕዝበ፡ ይሁዳ፡ ዐደዉ፡ ምስለ፡ ንጉሥ፡ ወመንፈቀ፡ ሕዝበ፡ እስራኤል።
41 ወመጽኡ፡ ኵሉ፡ ሰብአ፡ እስራኤል፡ ኀስ፡ ንጉሥ፡ ወይቤልዎ፡ ለንጉሥ፡ በእፎ፡ ሰረቁከ፡ አኀዊነ፡ ሰብአ፡ ይሁዳ፡ ወአፅደሡዎ፡ ለንጉሥ፡ ወለቤቱ፡ ዮርዳኖስ፡ ወኵሉ፡ ሰብኡ፡ ለዳዊት፡ ሀለዉ፡ ምስሌሁ።
42 ወአውሥእዎሙ፡ ኵሉ፡ ሰብአ፡ ይሁዳ፡ ለለብአ፡ እስራኤል፡ ወይቤልዎሙ፡ ምንት፡ ያምዕዐክሙ፡ በእንተዝ፡ ነገር፡ እምኔክሙሰ፡ ሊተ፡ ቅሩብየ፡ ውእቱ፡ ንጉሥ፡ ቦኑ፡ ሲሳየ፡ ዘዘላዕነ፡ እምኀበ፡ ንጉሥ፡ እው፡ ቦኑ፡ ዘፈተ[ተ]ነ፡ ወጸገወነ፡ አው፡ ቦኑ፡ ጋላተ፡ ሤመነ።
43 ወአውሥእዎሙ፡ ሰብአ፡ እስራኤል፡ ለሰብአ፡ ይሁዳ፡ ወይቤልዎሙ፡ ፲እደ፡ ዚአየ፡ ዘምስለ፡ ንጉሥ፡ ወእምኔከሰ፡ አነ፡ እቀድም፡ አነ፡ በኵር፡ ወለዳዊትኒ፡ አነ፡ ቅሩቡ፡ እምኔከ፡ ወለምንት፡ ከመዝ፡ ትጼእለኒ፡ ወኢቀደመኑ፡ ተኈልቆ፡ ሊተ፡ ቃልየ፡ ከመ፡ አነ፡ ቀደምኩ፡ እምኔከ፡ ኣእትዎ፡ ለንጉሥ፡ ኀቤየ፡ ወከብደ፡ ቃሎሙ፡ ለሰብአ፡ ይሁዳ፡ እምነ፡ ሰብአ፡ እስራኤል።
=== chapter 20 ===
[II Regum 20]
1 ወሀሎ፡ ህየ፡ ፩ወልደ፡ ኀጢአት፡ ዘስሙ፡ ሳቡሔ፡ ወልደ፡ ቦከሪ፡ ብእሲ፡ ኢያሜናዊ፡ ወአንፍሐ፡ ቀርነ፡ ወይቤ፡ አልብነ፡ ክፍለ፡ ምስለ፡ ዳዊት ፤ ትልውዎ፡ ለሳቡሔ፡ ወልደ፡ ቤኮሪ።
2 ወሰብአ፡ ይሁዳሰ፡ ተለዉ፡ ንጉሦሙ፡ እምነ፡ ዮርዳኖስ፡ እስከ፡ ኢየሩሳሌም።
3 ወነሥኦን፡ ንጉሥ፡ ለዐሥሩ፡ ዕቁባቲሁ፡ እለ፡ ኀደጎን፡ ይዕቀባ፡ ቤቶ፡ ወአንበሮን፡ ውስተ፡ ቤተ፡ ሙዓል፡ ወበህየ፡ ይሴስዮን፡ ወኀቤሆንሰ፡ ኢቦአ፡ ወነበራ፡ ኅቡረ፡ ኵሎን፡ መበለታተ፡ እስከ፡ አመ፡ ዕለተ፡ ሞታ።
4 ወይቤሎ፡ ንጉሥ፡ ለአሜሳይ፡ ጸውዖሙ፡ ሊተ፡ ለሰብአ፡ ይሁዳ፡ እስከ፡ ሠሉስ፡ ዕለት፡ ወለሊከ፡ ቁም፡ ላዕሌሆሙ።
5 ወሖረ፡ አሜሳይ፡ ወጸውዖሙ፡ ለሰብአ፡ ይሁዳ፡ ወጐንደየ፡ እምነ፡ ዕድሜው፡ ዘአዘዞ።
6 ወይቤሎ፡ ዳዊት፡ ለአቢሳ፡ ይእዜ፡ ይገብር፡ ብነ፡ እኪተ፡ ስቡሔ፡ ወልደ፡ ቦከሪ፡ እምነ፡ እንተ፡ ገብረ፡ ላዕሌነ፡ አበሴሎም፡ እንተ፡ ተአኪ፡ ወይእዜኒ፡ ንሣእ፡ ደቀ፡ እግዚእከ፡ ሖር፡ ዴግኖ፡ ዮጊ፡ ይረክብ፡ ሎቱ፡ ሀገረ፡ ጽንዕተ፡ ወይጼልለነ፡ አዕይንቲነ።
7 ወወፅኡ፡ ወዴገንዎ፡ አቢሳ፡ ወኬልቲ፡ ወፌልቲ፡ ወኵሎሙ፡ ጽኑዓን፡ ወወፅኡ፡ እምነ፡ ኢየሩሳሌም፡ ወዴገኑ፡ ወተለውዎ፡ ለስቡሔ፡ ወልደ፡ ቤኮሪ።
8 ወአሜሳይ፡ ቦአ፡ ቅድሜሁ፡ ወእሙንቱሰ፡ ሀለዉ፡ ኀበ፡ እብን፡ ዐቢይ፡ እንተ፡ ውስተ፡ ገባኦን፡ ወኢዮአብሰ፡ ይለብስ፡ ልብሰ፡ መንድያ፡ ወቅኑት፡ ውእቱ፡ ሔቇሁ፡ ባቲ።
9 ወይቤሎ፡ ኢዮአብ፡ ለአሜሳይ፡ ዳኀንኑ፡ አንተ፡ እኁየ፡ ወአኀዞ፡ ኢዮአብ፡ በእዴሁ፡ እንተ፡ የማን፡ ጽሕሞ፡ ለአሜሳይ፡ ወመልሐ፡ መጥባሕቶ።
10 ወኢያእመሮ፡ አሜሳይ፡ ከመ፡ መጥባሕት፡ ውስተ፡ እዴሁ፡ ወረገዞ፡ ውስተ፡ ሐቇሁ፡ ወተክዕወ፡ ዘውስተ፡ ከርሡ፡ ውስተ፡ ምድር፡ ወኢደገሞ፡ ወሞተ፡ ባቲ፡ ወኢዮአብ፡ ወአቢሳ፡ ተለውዎ፡ ለስቡሔ፡ ወልደ፡ ቤኮሪ።
11 ወ፩ብእሲ፡ ቆመ፡ መልዕልቶ፡ እምውስተ፡ ደቀ፡ ኢዮአብ፡ ወይቤ፡ ምንት፡ ውእቱ፡ ዘይፈቅድ፡ ኢዮአብ፡ ወመኑ፡ እሙንቱ፡ እለ፡ ዳዊት፡ እለ፡ ተለውዎ፡ ለኢዮአብ፡ እንዘ፡ አሜሳይ፡ ይሰክብ፡ ውስተ፡ ደም፡ ማእከለ፡ ፍኖት ፤
12 ወሶበ፡ ርእየ፡ ውእቱ፡ ብእሲ፡ ከመ፡ ይቀውም፡ ኵሉ፡ ሕዝብ፡ አግኀሦ፡ ለአሜሳይ፡ እምነ፡ ፍኖት፡ ውስተ፡ ገዳም፡ ወከደኖ፡ አልባሰ፡ ሶበ፡ ርእየ፡ ካመ፡ ኵሉ፡ ዘመጽአ፡ ላዕሌሁ፡ ይቀውም፡ መልዕልቶ።
13 ወእምዝ፡ ኀለፉ፡ እምይእቲ፡ ፍኖት፡ ኵሉ፡ ሰብአ፡ እስራኤል፡ ወተለውዎ፡ ለኢዮአብ፡ ኀበ፡ ይዴግኖ፡ ለስቡሔ፡ ወልደ፡ ቤኮሪ።
14 ወሖረ፡ ውስተ፡ ኵሉ፡ ሰብአ፡ እስራኤል፡ ወውስተ፡ አቤል፡ ወውስተ፡ ቤተ፡ ማክ፡ ወተጋብኡ፡ ኵሎሙ፡ እለ፡ ውስተ፡ ካራን፡ ወመጽኡ፡ እንተ፡ ድኅሬሆሙ።
15 ወበጽሑ፡ ወተቃተልዎሙ፡ በአቤል፡ ወበቤተ፡ ማክ፡ ወጐዩ፡ ኀበ፡ ሀገር፡ ወዐርጉ፡ ወቆሙ፡ ውስተ፡ አረፍት፡ ወፈቀዱ፡ ኵሉ፡ ሕዝብ፡ ምስለ፡ ኢዮአብ፡ ያውድቅዋ፡ ለይእቲ፡ አረፍት።
16 ወጸርኀት፡ ሎቱ፡ አሐቲ፡ ብእሲት፡ እምነ፡ አረፍት፡ ወትቤ፡ ስምዑኒ፡ ስምዑኒ፡ ወበልዎ፡ ለኢዮአብ፡ ቅረብ፡ ዝየ፡ ወእንግርከ።
17 ወቀርበ፡ ኀቤሃ፡ ወትቤሎ፡ ይእቲ፡ ብእሲት፡ አንተኑ፡ ውእቱ፡ ኢዮአብ፡ ወይቤላ፡ እወ፡ አነ፡ ውእቱ፡ ወትቤሎ፡ ስማዕ፡ ቃለ፡ አመትከ፡ ወይቤላ፡ ኢዮአብ፡ እሰምዕ፡ አነ፡ ውእቱ።
18 ወትቤ፡ እንዘ፡ ትብል፡ ቃለ፡ ነበቡ፡ እምውስተ፡ ቀደምት፡ ወይቤሉ፡ ሐቲተ፡ ሕትዎ፡ ለአቤል፡ ወርእዩ፡ እመ፡ ኀልቀ፡ ዘሤሙ፡ በውስተ፡ እስራኤል፡ ተሰአልዎ፡ ወሕትዎ፡ ለአቤል፡ ወበዝንቱ፡ ኀልቀ።
19 ወአንሰ፡ እንተ፡ ሰላም፡ ወኀይሎሙ፡ ለእስራኤል፡ አንተ፡ ወአንተ፡ ተኀሥሥ፡ ትቅትል፡ ሀገረ፡ ወደብረ፡ ሀገረ፡ እስራኤል፡ ወለምንት፡ ታሰጥም፡ ርስቶ፡ ለእግዚአብሔር።
20 ወአውሥአ፡ ኢዮአብ፡ ወይቤላ፡ ሐሰ፡ ሊተ፡ ኢያስጥም፡ ወኢያማስን።
21 አኮ፡ ከማሁ፡ ነገሩ ፤ ብእሲ፡ ዘእምነ፡ ደብረ፡ ኤፍሬም፡ ስቡሔ፡ ወልደ፡ ቤኮሪ፡ ይብልዎ፡ ዘአንሥአ፡ እዴሁ፡ ላዕለ፡ ዳዊት፡ ንጉሥ፡ ኪያሁ፡ ሀቡኒ፡ ባሕቲቶ፡ ወአሐውር፡ እምነ፡ መልዕልተ፡ ሀገር፡ ወትቤሎ፡ ይእቲ፡ ብእሲት፡ ለኢዮአብ፡ ናሁ፡ ርአሶ፡ ይወግሩ፡ ለከ፡ እንተ፡ ዲበ፡ አረፍት።
22 ወቦአት፡ ይእቲ፡ ብእሲት፡ ኀበ፡ ኵሉ፡ ሕዝብ፡ ወነበበቶሙ፡ ለኵሉ፡ ሀገር፡ በጥበባ፡ ወመተሩ፡ ርእሶ፡ ለስቡሔ፡ ወልደ፡ ቤኮሪ፡ ወወገረት፡ ሎቱ፡ ለኢዮአብ፡ ወአንፍሐ፡ ቀርነ፡ ወኀለፈ፡ እምነ፡ ሀገር፡ ወአተወ፡ ኵሉ፡ ሰብእ፡ ውስተ፡ አብያቲሁ፡ ወኢዮአብኒ፡ አተወ፡ ውስተ፡ ኢየሩሳሌም፡ ኀበ፡ ንጉሥ።
23 ወኢዮአብ፡ ላዕለ፡ ኵሉ፡ ኀይለ፡ እስራኤል፡ ወበንያስ፡ ወልደ፡ አኪሉ፡ ዘዲበ፡ ኬልቲ፡ ወፌልቲ።
24 ወአዶኒረም፡ ላዕለ፡ [ፆር፡] ወዮስፋጥ፡ ወልደ፡ አኪሉት፡ መዘክር ፤
25 ወኢዩሱስ፡ ጸሓፊ፡ ወሳዶቀ፡ ወአብያታር፡ ካህናት ፤
26 ወጋይራስ፡ ካህን፡ ለዳዊት።
=== chapter 21 ===
[II Regum 21]
1 ወኮነ፡ ረኃብ፡ በመዋዕለ፡ ዳዊት፡ ፫ዓመተ፡ ወ[ተታለ]ወ፡ ዓመታቲሁ፡ ወኀሠሠ፡ ዳዊት፡ ቃለ፡ እግዚአብሔር፡ ወይቤ፡ እግዚአብሔር፡ ላዕለ፡ ሳኦል፡ ወላዕለ፡ ቤቱ፡ ዐመፃ፡ እስመ፡ ቀታሌ፡ ነፍስ፡ ውእቱ፡ እስመ፡ ቀተሎሙ፡ ለገባኦን።
2 ወጸውዖሙ፡ ዳዊት፡ ንጉሥ፡ ለሰብአ፡ ገባኦን፡ ወተናገሮሙ፡ ወሰብአ፡ ገባኦንሰ፡ ኢኮኑ፡ ደቂቀ፡ እስራኤል፡ አላ፡ እምነ፡ ደመ፡ አሞሬዎን፡ እሙንቱ፡ ወመሐሉ፡ ሎሙ፡ ደቂቀ፡ እስራኤል፡ ወፈቀደ፡ ሳኦል፡ ይቅትሎሙ፡ ሶበ፡ ቀንአ፡ ላዕለ፡ ደቂቀ፡ እስራኤል፡ ወላዕለ፡ ይሁዳ።
3 ወይቤሎሙ፡ ዳዊት፡ ለሰብአ፡ ገባኦን፡ ምንተ፡ እግበር፡ ለክሙ፡ ወበምንት፡ አስተስሪ፡ ወትባርኩ፡ ርስተ፡ እግዚአብሔር።
4 ወይቤልዎ፡ ሰብአ፡ ገባኦን፡ አልብነ፡ ወርቀ፡ ወብሩረ፡ ምስለ፡ ሳኦል፡ ወምስለ፡ ቤቱ፡ ወአልቦ፡ ዘንቀትል፡ እምውስተ፡ እስራኤል፡ ወይቤሎሙ፡ ምንተ፡ እንከ፡ ትብሉ፡ ወምንተ፡ እረሲ፡ ለክሙ።
5 ወይቤልዎ፡ ለንጉሥ፡ ብእሲሰ፡ ገብረ፡ ላዕሌነ፡ ወሰደደነ፡ ወበከመ፡ ኀለየ፡ ይሠርወነ፡ ንሠርዎ፡ ከመ፡ አልቦ፡ ዘይቁም፡ እምኔሁ፡ በውስተ፡ ኵሉ፡ ደወለ፡ እስራኤል።
6 ሀበነ፡ ፯ዕደወ፡ እምውስተ፡ ደቂቁ፡ ወንሡዖሙ፡ ለእግዚአብሔር፡ በገባኦን፡ እምነ፡ ዘሳኦል፡ ኅሩዩ፡ ለእግዚአብሔር፡ ወይቤሎሙ፡ ንጉሥ፡ አነ፡ እሁበክሙ።
7 ወመሐኮ፡ ንጉሥ፡ ለሜንፎብስቴ፡ ወልደ፡ ዮናታን፡ ወልደ፡ ሳኦል፡ በእንተ፡ መሐላ፡ እግዚአብሔር፡ ዘማእከሎሙ፡ ዘማእከለ፡ ዳዊት፡ ወማእከለ፡ ዮናታን፡ ወልደ፡ ሳኦል።
8 ወነሥአ፡ ንጉሥ፡ ፪ደቂቃ፡ ለሩሳፋ፡ ወለተ፡ ኤአ፡ ዘወለደት፡ ለሳኦል፡ ሄርሞንስቴ፡ ወሜንፎብስቴ፡ ወ፭ደቂቃ፡ ለሜሮብ፡ ዘወለደት፡ ለኤሳድራ፡ ወልደ፡ ቤርዜሊ፡ ዘሞሐለቲ።
9 ወመጠዎሙ፡ ለሰብአ፡ ገባኦን፡ ውስተ፡ እዴሆሙ፡ ወሦዕዎሙ፡ ውስተ፡ ደብር፡ ቅድመ፡ እግዚአብሔር፡ ወገብርዎሙ፡ ሰብዓቲሆሙ፡ ኅቡረ፡ ወሞቱ፡ እሙንቱ፡ በመዋዕለ፡ ማእረር፡ አመ፡ ቀዳሜ፡ የአሩ፡ ሰገመ።
10 ወነሥአት፡ ራሳፋ፡ ወለተ፡ ኤአ፡ ሠቀ፡ ወረበበት፡ ውስተ፡ ኰኵሕ፡ አመ፡ ቀዳሜ፡ የዐፅዱ፡ ሰገመ፡ እስከ፡ አመ፡ አንጠብጠበ፡ ዝናም፡ ላዕሌሆሙ፡ እምሰማይ፡ ወኢያብሐት፡ አዕዋፈ፡ ሰማይ፡ ይረድ፡ ላዕሌሆሙ፡ መዓልተ፡ ወሌሊተ፡ አርዌ፡ ገዳም።
11 ወዜነውዎ፡ ለዳዊት፡ ኵሎ፡ ዘገብረት፡ ሬሳፋ፡ ወለተ፡ ኤአ፡ ዕቅብቱ፡ ለሳኦል።
12 ወሖረ፡ ዳዊት፡ ወነሥአ፡ አዕጽምቲሁ፡ ለሳኦል፡ ወአዕጽምቲሁ፡ ለዮናታን፡ ወልዱ፡ እምኀበ፡ ደቂቀ፡ ኢያቢስ፡ ዘገለዓድ፡ [ዘ]ሰረቅዎሙ፡ እምነ፡ መርሕበ፡ ቤድሳን፡ እስመ፡ አቀምዎሙ፡ ህየ፡ ኢሎፍሊ፡ አመ፡ ቀተልዎ፡ ኢሎፍሊ፡ ለሳኦል፡ በጌላቡሔ።
13 ወኦምጽአ፡ እምህየ፡ አዕጽምተ፡ ሳኦል፡ ወአዕጽምተ፡ ዮናታን፡ ወልዱ፡ ወአዕጽምቶሙ፡ ለእለ፡ ሦዑ፡ አስተጋብአ።
14 ወቀበረ፡ አዕጽምተ፡ ሳኦል፡ ወአዕጽምተ፡ ዮናታን፡ ወልዱ፡ ወአዕጽምቶሙ፡ ለእለ፡ ሦዑ፡ ውስተ፡ ምድረ፡ ብንያም፡ በገቦ፡ መቃብረ፡ ቂስ፡ አቡሁ፡ ወገብሩ፡ ኵሎ፡ ዘአዘዞሙ፡ ንጉሥ፡ ወሰምዓ፡ እግዚአብሔር፡ ለምድር፡ እምድኅረ፡ ዝንቱ።
15 ወኮነ፡ ዓዲ፡ ፀብአ፡ ኢሎፍሊ፡ ምስለ፡ እስራኤል፡ ወወረደ፡ ዳዊት፡ ወደቁ፡ ምስሌሁ፡ ወተቃተሉ፡ ምስሌሁ፡ ኢሎፍሊ፡ ወደክመ፡ ዳዊት።
16 ወተኣኀዙ፡ ሕዝብ፡ ምስለ፡ ሕዝበ፡ ራፋ፡ ወመጽአ፡ ፩መንገለ፡ ዳዊት፡ ወድልወተ፡ ኲናቱ፡ ፫፻ሰቅለ፡ ብርት፡ ወቅኑት፡ ውእቱ፡ በቆርኔን፡ ወፈቀደ፡ ይቅትሎ፡ ለዳዊት።
17 ወወውዐ፡ ሎቱ፡ አቢሳ፡ ወልደ፡ ሶሩህያ፡ ወረገዞ፡ ለውእቱ፡ ኢሎፍሊ፡ ወቀተሎ፡ ወይእተ፡ አሚረ፡ መሐሉ፡ ሰብአ፡ ዳዊት፡ ወይቤሉ፡ ከመ፡ ኢትወጽእ፡ እንከ፡ ምስሌነ፡ ውስተ፡ ፀብእ፡ ወኢትጥፋእ፡ ማኅቶቶሙ፡ ለእስራኤል።
18 ወእምዝ፡ ኮነ፡ ዓዲ፡ ፀብእ፡ ውስተ፡ ጌት፡ ምስለ፡ ኢሎፍሊ፡ ይእተ፡ አሚረ፡ ቀተሎ፡ ሴሜኮይ፡ ለአስጣጦቲ፡ ስፍጣዊ፡ በውስተ፡ ሕዝበ፡ ራፋ።
19 ወኮነ፡ ቀትል፡ በሮም፡ ምስለ፡ ኢሎፍሊ፡ ወቀተሎ፡ ኤልያናን፡ ወልደ፡ አርዮጊ፡ ቤተ፡ ልሔማዊ፡ ለጎዶልያን፡ ጌትያዊ፡ ወዕፀ፡ ኲናቱ፡ መጠነ፡ ሰርዌ፡ ዐጥፍ፡ ዘመዓሥቃን።
20 ወኮነ፡ ዓዲ፡ ፀብእ፡ ውስተ፡ ጌት፡ ወሀሎ፡ ብእሲ፡ ዘእምነ፡ ራማ፡ ወብእሲሁ፡ መዴናዊ፡ ወአጻብዐ፡ እደዊሁ፡ ወአጻብዐ፡ እገሪሁ፡ በበ፡ ስሱ፡ ፳ወ፬ኵሉ፡ ኍልቁ፡ ወውአቱኒ፡ ውስተ፡ ነገደ፡ ራፋ፡ ተወልደ።
21 ወተዐየሮሙ፡ ለእስራኤል፡ ወቀተሎ፡ ዮናታን፡ ወልደ፡ ሴሜይ፡ እኁሁ፡ ለዳዊት።
22 እስመ፡ እሉ፡ ፬እሙንቱ፡ እለ፡ ተወልዱ፡ እምነ፡ ዘመደ፡ እለ፡ ያርብሕ፡ በጌት፡ ውስተ፡ ቤተ፡ ራፋ፡ ወወድቁ፡ በእደ፡ ዳዊት፡ ወበእደ፡ ደቁ።
=== chapter 22 ===
[II Regum 22]
1 ወይቤ፡ ዳዊት፡ ዛቲ፡ ማሕሌት፡ ለእግዚአብሔር፡ በዝንቱ፡ ቃል፡ በዕለተ፡ እንተ፡ አድኀኖ፡ እግዚአብሔር፡ እምነ፡ እደ፡ ኵሉ፡ ፀሩ፡ ወእምነ፡ እደ፡ ሳኦል።
2 ወይቤ፡ እግዚኦ፡ ጸወንየ፡ ወኰኵሕየ፡ ወያድኅነኒ፡ ሊተ ፤
3 አምላኪየ፡ ወዐቃቢየ፡ ይከውነኒ፡ ወእትዌከል፡ ቦቱ፡ ምእመንየ፡ ወዘመነ፡ ፍርቃንየ፡ ወረፋኢየ፡ ወምስካይየ፡ ወሕይወትየ፡ ወያድኅነኒ፡ እምነ፡ ገፋዒየ።
4 በስብሐት፡ እጼውዖ፡ ለእግዚአብሔር፡ ወእድኅን፡ እምነ፡ ፀርየ።
5 እስመ፡ ቅጥቃጤ፡ ሞት፡ አኀዘኒ፡ ወውኂዘ፡ ኀጢአት፡ አደንገጸኒ።
6 ወጻዕረ፡ ሞት፡ ዐገተኒ፡ ወበጽሐኒ፡ ዕፀቢሁ፡ ለሞት።
7 ወሶበ፡ ተመንደብኩ፡ ጸዋዕክዎ፡ ለእግዚአብሔር፡ ወለአምላኪየኒ፡ ከመ፡ ይርድአኒ፡ ወሰምዐኒ፡ እምነ፡ ጽርሐ፡ መቅደሱ፡ ቃልየ፡ ወጽራኅየኒ፡ ውስተ፡ እዘኒሁ።
8 ወደንገጸት፡ ወአንቀልቀለት፡ ምድር፡ ወመሰረተ፡ ሰማይ፡ ተሀውከ፡ ወተከውሰ፡ እስመ፡ ተምዖን፡ እግዚአብሔር።
9 ወዐርገ፡ ጢስ፡ እምነ፡ መዐቱ፡ ወእሳት፡ እምነ፡ አፉሁ፡ እንተ፡ ትበልዕ፡ ወአፍሓም፡ ነደደ፡ እምኔሁ።
10 ወአጽነነ፡ ሰማየ፡ ወወረደ፡ ወቆባር፡ መትሕተ፡ እገሪሁ።
11 ተጽዕነ፡ ላዕለ፡ ኪሩቤል፡ ወሠረረ፡ ወአስተርአየ፡ በክነፈ፡ ነፋስ።
12 ወገብረ፡ ጽልመተ፡ ምኅባኢሁ፡ ወዐውዶ፡ ጽላሎቱ፡ ወአግዘፈ፡ ጽልመተ፡ በራእየ፡ ደመናት።
13 ወእምነ፡ ብርሃን፡ ቀድሜሁ፡ ነደደ፡ አፍሓመ፡ እሳት።
14 ወአንጐድጐደ፡ በሰማይ፡ እግዚአብሔር፡ ወወሀበ፡ ቃሎ፡ ልዑል።
15 ወፈነወ፡ አሕጻ፡ ወዘረዎሙ፡ ወአብረቀ፡ መብረቀ፡ ወአደንገጾሙ።
16 ወአስተርአየ፡ ሙጻአተ፡ ማያት፡ ወተከሥተ፡ መሰረተ፡ ዓለም፡ እምነ፡ ተግሣጸ፡ እግዚአብሔር፡ ወእምነ፡ እስትንፋሰ፡ መንፈስ፡ መዐቱ፡ ቆመ፡ ማይ።
17 ፈነወ፡ እምአርያም፡ ወነሥአኒ፡ ወአድኀነኒ፡ እምነ፡ ማያት፡ ብዙኅ።
18 ወባልሐኒ፡ እምነ፡ ፀርየ፡ ጽኑዓን፡ ወእምነ፡ ጸላእትየ፡ እለ፡ ኀየሉ፡ እምኔየ፡ ወደክሙ፡ ኵሉ፡ ፀርየ።
19 ወበጽሑኒ፡ በዕለተ፡ ምንዳቤየ፡ ወኮነኒ፡ እግዚአብሔር፡ ምስካይየ።
20 ወአውፅአኒ፡ ውስተ፡ መርሕብ፡ ወአድኀነኒ፡ እስመ፡ ሠምረ፡ ብየ።
21 ወፈደየኒ፡ እግዚአብሔር፡ ዘካመ፡ ጽድቀየ፡ ወበከመ፡ ንጽሐ፡ እደውየ፡ አግብአ፡ ሊተ።
23 እስመ፡ ኵሉ፡ ኵነኔሁ፡ ቅድሜየ፡ ውእቱ፡ ወጽድቁኒ፡ ኢርሕቀ፡ እምኔየ።
24 ወእከውን፡ ንጹሐ፡ ምስሌሁ፡ ወእቀድም፡ ተዐቅቦ፡ እምነ፡ ኀጣውእየ።
25 ወይፈድየኒ፡ እግዚአብሔር፡ በከመ፡ ጽድቅየ፡ ወበካመ፡ ንጽሐ፡ እደውየ፡ ይፈድየኒ፡ በቅድመ፡ አዕይንቲሁ።
26 ምስለ፡ ጻድቀ፡ ትጸድቅ፡ ወምስለ፡ ንጹሕ፡ ብእሲ፡ ትነጽሕ።
27 ወምስለ፡ ኅሩይ፡ ኅሩየ፡ ትከውን፡ ወምስለ፡ ዕልው፡ ትትገፈታዕ።
28 እስመ፡ አንተ፡ ሕዝበ፡ ትሑተ፡ ታድኅን፡ ወአዕይንቲሆሙ፡ ለዕቡያን፡ ታቴሕት።
29 እስመ፡ ታበርህ፡ አዕይንትየ፡ እግዚኦ ፤ አምላኪየ፡ ያበርሃ፡ ለጽልመትየ።
30 እስመ፡ ብከ፡ እረውጽ፡ ባሕቲትየ፡ ወበአምላኪየ፡ እትዐደዋ፡ ለአረፍት።
31 ንጽሕት፡ ፍኖቱ፡ ለጽኑዕ ፤ ቃለ፡ እግዚአብሔር፡ ጽኑዕ፡ ወርሱን ፤ ወምእመኖሙ፡ ውእቱ፡ ለኵሎሙ፡ እለ፡ ተወከሉ፡ በቱ።
32 መኑ፡ ጽኑዕ፡ ዘእንበለ፡ እግዚአብሔር፡ ወመኑ፡ ፈጣሪ፡ ዘእንበለ፡ አምላክነ፡ ኀያል።
33 ወያጸንዐኒ፡ በኀይል፡ ወጼሐ፡ ንጹሐ፡ ለፍኖትየ።
34 ወአቀሞን፡ ከመ፡ ሀየል፡ ለእገርየ፡ ወአቀሞን፡ ውስተ፡ ልዑል።
35 ወይሜህሮን፡ ውስተ፡ ፀብእ፡ ለእደውየ፡ ወአዘዘ፡ ቀስተ፡ ብርት፡ ለመዝራዕትየ።
36 ወወሀበኒ፡ ምእመነ፡ ለፍርቃንየ፡ ወአውሥኦትከ፡ አብዝኀተኒ፡ ውስተ፡ መርሕብ፡
37 ወአጽናዕከ፡ መካይድየ፡ በመትሕቴየ፡ ወኢተሀውከ፡ እገርየ።
38 እዴግኖሙ፡ ለፀርየ፡ ወኣጠፍኦሙ፡ ወኢይትመየጥ፡ እስከ፡ አኀልቆሙ ፤
39 ወእቀጠቅጦሙ፡ ኢይትነሥኡ፡ እንከ፡ ወይወድቁ፡ ታሕተ፡ እገርየ።
40 ወታጸንዐኒ፡ በኀይል፡ ውስተ፡ ፀብእ፡ ወትቀጽኦሙ፡ ለእለ፡ ይትነሥኡ፡ ላዕሌየ፡ ታሕቴየ።
41 ወትሜጥወኒ፡ ዘባናቲሆሙ፡ ለፀርየ፡ ወትሤርዎሙ፡ ለጸላእትየ።
42 ይጸርኁ፡ ወአልቦ፡ ዘይረድኦሙ፡ ወኀበ፡ እግዚአብሔር፡ ወኢሰምዖሙ።
43 ወእከይዶሙ፡ ከመ፡ ጽንጕነ፡ ፍኖት፡ ወእጠስዮሙ።
44 ወአድኅነኒ፡ እምነ፡ [ባእሰ፡] አሕዛብ፡ ወተዐቅበኒ፡ ውስተ፡ ርእሰ፡ ሕዝብ ፤ ሕዝብ፡ ዘኢያአምር፡ ተቀንዩ፡ ሊተ።
45 ውስተ፡ ምስማዐ፡ እዝን፡ አውሥ[ኡ]ኒ፡ ደቂቀ፡ ነኪር፡ ሐሰዉኒ።
46 ደቂቀ፡ ነኪር፡ በልዩ፡ ወይድኀጹ፡ እምነ፡ ሕንክስናሆሙ።
47 ሕያው፡ እግዚአብሔር፡ ወይትባረክ፡ ዐቃቤ፡ ሕይወትየ፡ አምላኪየ።
48 ጽኑዕ፡ ውእቱ፡ እግዚአብሔር፡ ወይትቤቀል፡ ሊተ፡ ወያገርሮሙ፡ ለአሕዛብ፡ መትሕቴየ።
49 ወያወጽአኒ፡ እምነ፡ ፀርየ፡ ወታሌዕለኒ፡ እምእለ፡ ይትነሥኡ፡ ላዕሌየ፡ ወእምነ፡ ብእሲ፡ በማፂ፡ ታድኅነኒ።
50 ወበበይነዝ፡ እገኒ፡ ለከ፡ በኀበ፡ አሕዛብ፡ ወእዜምር፡ ለስምከ።
51 ያዐብያ፡ ለመድኃኒተ፡ ንጉሥ፡ ወአይ፡ ምሕረተ፡ ለመሲሑ፡ ለዳዊት፡ ወለዘርኡ፡ እስከ፡ ለዓለም።
=== chapter 23 ===
[II Regum 23]
1 ወዝንቱ፡ ነገሩ፡ ደኃሪ፡ ለዳዊት ፤ ምእመን፡ ዳዊት፡ ወልደ፡ እሴይ፡ ወምእመን፡ ብእሲ፡ ዘአቀመ፡ እግዚአብሔር፡ አምላከ፡ ያዕቆብ፡ ወአዳም፡ መዝሙረ፡ እስራኤል።
2 መንፈሰ፡ እግዚአብሔር፡ ተናገረ፡ በላዕሌየ፡ ወቃሉ፡ ውስተ፡ ልሳንየ።
3 ይቤ፡ አምላከ፡ እስራኤል፡ አምሳለ፡ ተናገርኩ፡ በእጓለ፡ እመሕያው፡ ከመ፡ ታጽንዑ፡ ፍርሀተ፡ እግዚአብሔር።
4 ወበብርሃነ፡ እግዚአብሔር፡ በጽባሕ፡ ይሠርቅ፡ ፀሓይ፡ ወበነግህ፡ ይመጽእ፡ ብርሃኑ፡ ወእምነ፡ ዝናም፡ ይሥዕር፡ ሐመልማል፡ ውስተ፡ ምድር።
5 ወዝንቱ፡ ውእቱ፡ ቤትየ፡ ዘምስለ፡ ጽኑዕ፡ እስመ፡ ኪዳን፡ ዘለዓለም፡ ድልወ፡ አቀመ፡ ሊተ፡ እንተ፡ ዕቅብት፡ በኵሉ፡ መዋዕል፡ እስመ፡ ኵሉ፡ ሕይወትየ፡ ወኵሉ፡ ፈቃድየ፡ በእግዚአብሔር፡ እስመ፡ ኢይሠርፅ፡ በማፂ።
6 ከመ፡ ዐቃቤ፡ ምልኅት።
7 ከማሁ፡ ኵሎሙ፡ እሙንቱ፡ እስመ፡ አኮ፡ በእድ፡ ዘይመልኅዎሙ።
8 ወአኮ፡ ሰብእ፡ ዘይጻሙ፡ ቦሙ፡ ወኢበብዝኀ፡ ኀፂን፡ ወኢበብዝኀ፡ ዕፀ፡ ኵናት፡ ዘእንበለ፡ ዘይውዕዩ፡ በእሳት፡ ወይነድዱ፡ በኀሳሮሙ።
9 ወዝንቱ፡ ውእቱ፡ አስማቲሆሙ፡ ለጽኑዓኒሁ፡ ለዳዊት ፤ ኢያቡስቴ፡ ከነናዊ፡ መልአከ፡ ሣልስተ፡ እዴሁ ፤ አዲኖን፡ አሣናዊ፡ ዘቈልቈለ፡ ላዕለ፡ ፰፻ብእሲ፡ ሐራ፡ በምዕር።
10 ወምስሌሁ፡ ኤሌአናን፡ ወልደ፡ አበ፡ እኁሁ፡ ወልደ፡ ሶሲ፡ ዘላዕለ፡ ፫ኀያላን፡ እለ፡ ምስለ፡ ዳዊት፡ ወአመ፡ ተዐየኑ፡ በኢሎፍሊ፡ ተጋብኡ፡ በህየ፡ ይትቃተሉ፡ ወሶበ፡ ጸርኁ፡ ሰብአ፡ እስራኤል፡ ውእቱ፡ ተንሥአ፡ ወቀተሎሙ፡ ለኢሎፍሊ፡ እስከ፡ ደክመ፡ እደዊሁ፡ ወየብሰ፡ እዴሁ፡ በመጥባሕት፡ ወገብረ፡ እግዚአብሔር፡ ዐቢየ፡ መድኀኒተ፡ ይእተ፡ አሚረ፡ ወሕዝብሰ፡ ነበሩ፡ ድኅሬሁ፡ ወባሕቱ፡ ይሰልቡ።
11 ምስሌሁ፡ ሶርክያስ፡ ወተጋብኡ፡ ኢሎፍሊ፡ በሐጋይ፡ ወሀለወ፡ ህየ፡ ፩ኅብረ፡ ገራህት፡ ምሉእ፡ ብርስነ፡ ወጐዩ፡ ሕዝብ፡ እምቅድመ፡ ገጾሙ፡ ለኢሎፍሊ።
12 ወቆሙ፡ ማእከለ፡ ይእቲ፡ ገራህት፡ ወአድኀኖሙ፡ ወቀተሎሙ፡ ለኢሎፍሊ፡ ወገብረ፡ እግዚአብሔር፡ መድኀኒተ፡ ዐቢየ።
13 ወወረዱ፡ ፫እምነ፡ ፴ወወረዱ፡ ውስተ፡ ቃስኖ፡ ኀበ፡ ዳዊት፡ ውስተ፡ በአተ፡ ኤዶላም፡ ወአልባሲሆሙኒ፡ ለኢሎፍሊ፡ ወተዐየኑ፡ ውስተ፡ አንቀጸ፡ ረፋይን።
14 ወዳዊትሰ፡ ይእተ፡ አሚረ፡ ውስተ፡ ቅጽር፡ ሀሎ፡ ወኀይሎሙ፡ ለኢሎፍሊ፡ ይእተ፡ አሚረ፡ ውስተ፡ ቤተ፡ ልሔም።
15 ወፈተወ፡ ዳዊት፡ ወይቤ፡ መኑ፡ እምአስተየኒ፡ ማየ፡ እምነ፡ ዐዘቅት፡ ዘውስተ፡ አንቀጸ፡ ቤተ፡ ልሔም፡ ወሀለወ፡ ኀይሎሙ፡ ለኢሎፍሊ፡ ይእተ፡ አሚረ፡ ውስተ፡ ቤተ፡ ልሔም።
16 ወሠጠቁ፡ ማእከለ፡ ትዕይንቶሙ፡ ለኢሎፍሊ፡ እልክቱ፡ ፫ጽኑዓን፡ ወቀድሑ፡ ማየ፡ እምነ፡ ይእቲ፡ ዐዘቅት፡ እንተ፡ ውስተ፡ አንቀጸ፡ ቤተ፡ ልሔም፡ ወነሥኡ፡ ወአምጽኡ፡ ኀበ፡ ዳዊት፡ ወአበየ፡ ሰትየ፡ እምኔሁ፡ ወአውጽኆ፡ ለእግዚአብሔር።
17 ወይቤ፡ ሐሰ፡ ሊተ፡ እግዚኦ፡ እምነ፡ ገቢሮቱ፡ ለዝንቱ፡ እምሰቲየ፡ ደሞሙ፡ ለእለ፡ ሖሩ፡ ወመጠዉ፡ ነፍሶሙ፡ ወአበየ፡ ለሰቲዮቶ፡ ወከመዝ፡ ገብሩ፡ እልክቱ፡ ፫ጽኑዓን።
18 ወአቢሳ፡ ወልደ፡ ሶሩህያ፡ እኁሁ፡ ለኢዮአብ፡ መልአኮሙ፡ ውእቱ፡ ለሠለስቲሆሙ፡ ወውእቱኒ፡ አንሥአ፡ ኵናቶ፡ ላዕለ፡ ፫፻ወዝንቱ፡ ምዝጋናሁ፡ ሎቱኒ፡ በውስተ፡ ሠለስቲሆሙ።
19 ወውእቱ፡ ይከብር፡ እምነ፡ ሠለስቲሆሙ፡ ወኮነ፡ ሎሙ፡ መልአኮሙ፡ ወእስከ፡ ሠለስቲሆሙ፡ ኢበጽሐ።
20 ወባንያስ፡ ወልደ፡ ዮዳሔ፡ ውእቱኒ፡ ብእሲ፡ ዘብዙኅ፡ ዕልገቱ፡ እምነ፡ ቀባስሔል ፤ ውእቱ፡ ቀተሎሙ፡ ለሞአብ፡ ለደቂቀ፡ [አር]ኤል፡ ወውእቱ፡ ወረደ፡ ወቀተሎሙ፡ ለሕዝብ፡ እለ፡ ውስተ፡ ማእከለ፡ በዘቅት፡ አመ፡ ዕለተ፡ በረድ።
21 ወውእቱ፡ ቀተሎ፡ ለብእሲ፡ ግብጻዊ፡ ብእሲ፡ ነኪር፡ ወውስተ፡ እዴሁ፡ ለውእቱ፡ ግብጻዊ፡ ኵናት፡ ከመ፡ ሰርዌ፡ ተንከተም፡ ወወረደ፡ ኀቤሁ፡ ምስለ፡ ውእቱ፡ ኵናት፡ ወመሠጠ፡ እምውስተ፡ እዴሁ፡ ኵናቶ፡ ለውእቱ፡ ግብጻዊ፡ ወቀተሎ፡ በኵናቱ።
22 ወከመዝ፡ ገብረ፡ ብንያስ፡ ወልደ፡ ዮዳሔ፡ ወዝንቱ፡ ምዝጋናሁ፡ በውስተ፡ ሠለስቲሆሙ።
23 ወክቡር፡ እምነ፡ ሠለስቲሆሙ፡ ወኢበጽሐ፡ ውስተ፡ ሠለስቲሆሙ፡ ወሤሞ፡ ዳዊት፡ ላዕለ፡ ትእዛዙ ፤ ወዝንቱ፡ ውእቱ፡ አስማቲሆሙ፡ ለጽኑዓኒሁ፡ ለዳዊት ፤
24 አሳሔል፡ እኁሁ፡ ለኢዮአብ፡ ወውእቱ፡ ላዕለ፡ ሠላሳ ፤
25 ኤልአናን፡ ወልደ፡ ዱል፡ አበ፡ እኁሁ፡ በቤተ፡ ልሔም።
26 ሳሜ፡ አሩዳዊ።
27 ሶሌ፡ ዘተለዎ፡ ለኢራሶ፡ ወልደ፡ ኤስኮ፡ ቶቄያዊ።
28 አብዮዜር፡ አጦታዊ፡ ዘእምነ፡ ደቂቀ፡ አስቲጡ።
29 ኤሎን፡ አሎናዊ፡ ኖኤሬታ፡ ዘውስተ፡ ፋጢ።
30 ዘኤታይ፡ ወልደ፡ ሬማስጋብሔት፡ ወልደ፡ ብንያም፡ ኤፍራታዊ።
31 [አሶም፡] አብረላዊ።
32 ኤማሌዎስ፡ አለሞናዊ፡ ወልደ፡ አሶን፡ ዮናታን።
33 ስምና፡ አሮዳዊ፡ አሜነን፡ ወልደ፡ ሳሬ፡ ሐተራዊ።
34 አሊፍሌት፡ ወልደ፡ ዐሳብ፡ ወልደ፡ መከኪ ፤ ኤልያብ፡ ወልደ፡ አኪጦፌል፡ ጌሎናዊ።
35 አሰሬ፡ ቀርሜላዊ፡ ዘአፌዎ፡ ኢአኪ።
36 ገለአዳዊ፡ ወልደ፡ እታን፡ ዘእምነ፡ ኀይል ፤ ደቂቀ፡ ገለአድ።
37 ኤልዩ፡ ዐመናዊ ፤ ጌሎሬ፡ ቤሮታዊ፡ ዘይጸውር፡ ንዋየ፡ ሐቅሉ፡ ለኢዮአብ፡ ወልደ፡ ሶርህያ።
38 ኤራስ፡ ኤተራዊ ፤ ጋሬብ፡ ኤተናዊ።
39 ኡርያስ፡ ኬጥያዊ ፤ ኵሎሙ፡ ፴ወ፯ጽኑዓን፡ እምነ፡ ፈለገ፡ ገደብያል፡ ወልደ፡ አረበቴው።
=== chapter 24 ===
[II Regum 24]
1 ወደገመ፡ መዐተ፡ እግዚአብሔር፡ ወወረደ፡ ላዕለ፡ እስራኤል፡ ወሆኮ፡ ለዳዊት፡ ዲቤሆሙ፡ ወይቤ፡ ሖሩ፡ ኈልቍዎሙ፡ ለእስራኤል፡ ወለይሁዳ።
2 ወይቤሎ፡ ንጉሥ፡ ለኢዮአብ፡ መልአካ፡ ኀይሉ፡ ዘምስሌሁ፡ ሖር፡ ዑድ፡ ውስተ፡ ኵሉ፡ ሕዝበ፡ እስራኤል፡ እምነ፡ ዳን፡ እስካ፡ ቤርሳቤሕ፡ አስተፋቅዶሙ፡ ለሕዝብ፡ ወኈልቆሙ።
3 ወይቤሎ፡ ኢዮአብ፡ ለንጉሥ፡ እግዚአብሔር፡ አምላክከ፡ ለይወስክ፡ ላዕለ፡ ሕዝብ፡ በአምጣነ፡ ሀለዉ፡ ፻ምክዕቢተ፡ ወይርአያ፡ አዕይንቲሁ፡ ለእግዚእየ፡ ንጉሥ፡ ወለምንት፡ ይኄሊ፡ እግዚእየ፡ ንጉሥ፡ ዘንተ፡ ነገረ።
4 ወሞአ፡ ቃለ፡ ንጉሥ፡ እምነ፡ ኢዮአብ፡ ወላዕለ፡ መላእክተ፡ ኀይል፡ ወወፅአ፡ ኢዮአብ፡ ወመላእክተ፡ ኀይል፡ እምቅድመ፡ ንጉሥ፡ ከመ፡ ይኈልቁ፡ ሕዝበ፡ እስራኤል።
5 ወዐደዉ፡ ዮርዳኖስ፡ ወኀደሩ፡ አሮኤር፡ በየማነ፡ ሀገር፡ እንተ፡ ውስተ፡ ማእከለ፡ ቈላተ፡ ገለአድ፡ ወመንገለ፡ ኤልዮዜር።
6 ወመጽኡ፡ ውስተ፡ ገለአድ፡ ወውስተ፡ ተባሶን፡ ዘኤስቶን፡ ዘተበሰን፡ ወበጽሑ፡ ውስተ፡ ዳና፡ ወውስተ፡ ይሁዳ፡ ወዖዱ፡ ውስተ፡ ሲዶና።
7 ወበጽሑ፡ ሶንፌሴ፡ ዘጢሮስ፡ ወኵሉ፡ አህጉረ፡ አዌዎን፡ ወከናኔዎን፡ ወመጽኡ፡ ላዕለ፡ ይሁዳ፡ ወቤርሳቤሕ።
8 ወዖዱ፡ ውስተ፡ ኵሉ፡ ምድር፡ ወገብኡ፡ ፈጺሞሙ፡ በ፱አውራኅ፡ ወ፳ጽባሕ፡ ውስተ፡ ኢየሩሳሌም።
9 ወአግብአ፡ ኢዮአብ፡ ጕልቆሙ፡ ዘአስተፋቀዶሙ፡ ለሕዝብ፡ ኀበ፡ ንጉሥ፡ ወኮነ፡ እስራኤል፡ ፹፼ዕደወ፡ ኀይል፡ እለ፡ ይጸውሩ፡ ኵናተ፡ ወሰብአ፡ ይሁዳ፡ ፶፼ዕደው፡ መስተቃትላን።
10 ወአሕዘነ፡ ልቦ፡ ዳዊት፡ እምድኅረ፡ ኅ።
11 ለቆሙ፡ ለሕዝብ፡ ወይቤሎ፡ ዳዊት፡ ለእግዚአብሔር፡ አበስኩ፡ ፈድፋደ፡ እስመ፡ ገበርኩ፡ ዘንተ፡ ወስረይ፡ ሊተ፡ እግዚኦ፡ ኀጢአትየ፡ እስመ፡ አበድኩ፡ ፈድፋደ፡ (ስረይ፡ ሊተ፡ ለገብርከ)።
12 ወተንሥአ፡ ዳዊት፡ በጽባሕ፡ ወኮነ፡ ቃለ፡ እግዚአብሔር፡ ኀበ፡ ጋድ፡ ነቢይ፡ ራእይ፡ ለኀበ፡ ዳዊት፡ ወይቤሎ ፤ ሖር፡ ንግሮ፡ ለዳዊት፡ ወበሎ፡ ከመዝ፡ ይቤ፡ እግዚአብሔር፡ ሠለስተአ፡ ግብራተአ፡ አነአ፡ ኣመጽእ፡ ላዕሌከ፡ ወኅረይ፡ ለከ፡ አሐደ፡ እምኔሆሙአ፡ ዘእገብርአ፡ ለከአ።
13 ወቦአ፡ ጋድ፡ ኀበ፡ ዳዊት፡ ወነገሮ፡ ወይቤሎ፡ ኅረይ፡ ለከ፡ ዘይከውነከ፡ እምይምጻእካ፡ ረኀብ፡ ሠለስተ፡ ዓመተ፡ ውስተ፡ ሀገርካ፡ ወእመ፡ አኮ፡ ፫አውራኀ፡ ትጕየይ፡ ቅድመ፡ ፀርከ፡ ወእሙንቱ፡ ይዴግኑከ፡ ወእምይኩንካ፡ ሠሉሳ፡ መዋዕለ፡ ሞት፡ ውስተ፡ ብሔርከ ፤ ወይእዜኒ፡ ርኢ፡ እንከ፡ ወአእምር፡ ዘከመ፡ እነግሮ፡ ለዘ፡ ለአከኒ፡ ቃለ።
14 ወይቤሎ፡ ዳዊት፡ ለጋድ፡ ተመንደብኩ፡ እምነ፡ ኵለሄ፡ ፈድፋደ፡ እደቅ፡ ውስተ፡ እደ፡ እግዚአብሔር፡ እስመ፡ ብዙኅ፡ ምሕረቱ፡ ፈድፋደ፡ ወኢእደቅ፡ ውስተ፡ እደ፡ እጓለ፡ እመሕያው።
15 ወኀረየ፡ ሎቱ፡ ዳዊት፡ ሞተ፡ እምነ፡ ነግህ፡ እስከ፡ ጊዜ፡ ምሳሕ፡ ወአኀዞሙ፡ ሞት፡ ለሕዝብ፡ ወሞቱ፡ እምነግህ፡ እስከ፡ ጊዜ፡ ምሳሕ፡ ወሞቱ፡ እምነ፡ ሕዝብ፡ እምነ፡ ዳን፡ እስከ፡ ቤርሳቤሕ፡ ፯፼ብእሲ።
16 ወአልዐለ፡ እዴሁ፡ መልአከ፡ እግዚአብሔር፡ ከመ፡ ያጥፍኣ፡ ለኢየሩሳሌም፡ ወተሣሀላ፡ እግዚአብሔር፡ እምነ፡ እኪት፡ ወይቤሎ፡ እግዚአብሔር፡ ለውእቱ፡ መልአክ፡ በዝኀ፡ እንከሰ፡ ይእዜሰ፡ ኅድግ፡ እዴከ፡ ወቆመ፡ መልአከ፡ እግዚአብሔር፡ ኀበ፡ ዐውደ፡ እክል፡ ዘኦርና፡ ኢያቡሳዊ።
17 ወይቤሎ፡ ዳዊት፡ ለውእቱ፡ መልአክ፡ ሶበ፡ ርእዮ፡ እንዘ፡ ይቀሥፎሙ፡ ለሕዝብ፡ ወይቤሎ፡ ናሁ፡ አነ፡ ዘአበስኩ፡ ወአነ፡ ኖላዊ፡ ዘገበርኩ፡ እኩየ፡ ወእሉ፡ አባግዕ፡ ምንተ፡ ገብሩ፡ ወትኩን፡ እዴከ፡ ላዕሌየ፡ ወላዕለ፡ ቤተ፡ አቡየ።
18 ወመጽአ፡ ጋድ፡ ኀበ፡ ዳዊት፡ በይእቲ፡ ዕለት፡ ወይቤሎ፡ ዕረግ፡ ወግበር፡ መሥዋዕተ፡ ለእግዚአብሔር፡ ኀበ፡ ዐውደ፡ እክል፡ ዘኦርናን፡ ኢያቡሳዊ።
19 ወዐርገ፡ ዳዊት፡ በከመ፡ ይቤሎ፡ ጋድ፡ በከመ፡ አዘዞ፡ እግዚአብሔር።
20 ወሐወጸ፡ ኦርናን፡ ወርእዮ፡ ለንጉሥ፡ ወለደቁ፡ እንዘ፡ የሐውሩ፡ መንገሌሁ፡ ወሰገደ፡ ለንጉሥ፡ በገጹ፡ ውስተ፡ ምድር።
21 ወይቤ፡ ኦርናን፡ ምንተ፡ አምጽኦ፡ ለእግዚእየ፡ ንጉሥ፡ ኀበ፡ ገብሩ፡ ወይቤሎ፡ ዳዊት፡ ከመ፡ እሣየጥ፡ በኀቤከ፡ ዐውደ፡ እክል፡ ከመ፡ እንድቅ፡ መሥዋሰተ፡ ለእግዚአብሔር፡ ወኀደገ፡ ሞት፡ እምሕዝብ።
22 ወይቤሎ፡ ኦርናን፡ ለዳዊት፡ ለይንሣእ፡ እግዚእየ፡ ንጉሥ፡ ዘአደሞ፡ በቅድመ፡ አዕይንቲሁ፡ ወናሁ፡ አልህምትኒ፡ ለመሥዋዕት፡ ወመንኰራኵርኒ፡ ወዕፀዊሆሙ፡ ለአልህምት።
23 ወወሀቦ፡ ኵሎ፡ ኦርናን፡ ለዳዊት፡ ወይቤሎ፡ ኦርናን፡ ለንጉሥ፡ እግዚአብሔር፡ አምላክከ፡ ባረከከ።
24 ወይቤሎ፡ ንጉሥ፡ ለኦርናን፡ አልቦ ፤ በሤጥ፡ ዳእሙ፡ እሣየጥ፡ በኀቤከ፡ ወኢይገብር፡ መሥዋዕተ፡ ለእግዚአብሔር፡ አምላኪየ፡ ዘበከንቱ፡ ወተሣየጠ፡ ዳዊት፡ ውእተ፡ ዐውደ፡ እክል፡ ወአልህምቲሁኒ፡ በብሩር፡ በ፶ሰቅሎን።
25 ወነደቀ፡ ዳዊት፡ በህየ፡ ምሥዋዐ፡ ለእግዚአብሔር፡ ወአዕረገ፡ መሥዋዕተ፡ ሰላም፡ ወወሰከ፡ ሰሎሞን፡ በደኃሪ፡ መዋዕል፡ ዲበ፡ መሥዋዕት፡ እስመ፡ ደቂቅ፡ ውእቱ፡ ይእተ፡ አሚረ፡ ወተሣሀላ፡ እግዚአብሔር፡ ለምድር፡ ወኀደጎሙ፡ ሞት፡ ለእስራኤል።