##### edition  (gez)
=== paragraph 1 ===
ዝንቱ፡ ሴኖዶስ፡ ዘቀሌምንጦስ፡ ዘጸሐፈ፡ ጴጥሮስ፡ ረድእ፡ ርእሰ፡ ሐዋርያት፡ ዘነገረ፡ በእንተ፡ እግዚእነ፡ ኢየሱስ፡ ክርስቶስ
=== paragraph 2 ===
ይቤ፡ ቀሌምንጦስ፡ ዘእምጴጥሮስ፡ ርእሰ፡ ሐዋርያት፡ ረድኡ፡ ለእግዚእነ፡ ክርስቶስ
=== paragraph 3 ===
ይቤለኒ፡ ወልድየ፡ ቀሌምንጦስ፡ ኢታጥምቅ፡ መነሂ፡ በሕልያን፡ ወኢበሤጥ፡ ምቱር፡ ላዕለ፡ ጥምቀት
=== paragraph 4 ===
ወዘነሥአ፡ ላዕለ፡ ጥምቀት፡ ሕሊያነ፡ በሤጥ፡ ምቱር፡ ውጉዝ፡ ውእቱ፡ ወርጉም፡ እምአፉየ፡ አነ፡ ጴጥሮስ፡ ንኡሰ፡ ሐዋርያት፡ ወመክፈልቱ፡ ይኩን፡ ምስለ፡ ሢሞን፡ መሠርይ፡ ወይሁዳ፡ ረሲዕ
=== paragraph 5 ===
ወኢትሢጥ፡ ወልድየ፡ ሀብተ፡ ክህነት፡ ወጸጋ፡ መንፈስ፡ ቅዱስ፡ በሤጥ፡ ወኢትሣየጥ፡ ላዕለ፡ ክህነት፡ ወኢትንሣእ፡ ላቲ፡ ዐስበ፡ እምቅድመ፡ ትባርክ፡ ወኢእምድኅሬሁ፡ ዘእንበለ፡ በገጸ፡ በረከት
=== paragraph 6 ===
ወዘወሀበ፡ ወዘነሥአ፡ በክህነት፡ ሕልያነ፡ አልቦቱ፡ ክህነተ፡ ወውጉዝ፡ በኀቤየ፡ አነ፡ ጴጥሮስ፡ በግዘት፡ ዘአውገዝክዎ፡ ለሢሞን፡ መሠርይ፡ ወመክፈልቱ፡ ይኩን፡ ምስለ፡ ይሁዳ፡ ዕልው፡ ወነፍሱ፡ ርሕቅት፡ እምጥቃ፡ እግዚአብሔር፡ ከመ፡ ዲያብሎስ፡ እመዓርጊሁ
=== paragraph 7 ===
ወልድየ፡ ስረይ፡ ለዘአበሰ፡ ለከ፡ ሰብዓ፡ ጊዜ፡ በበሰብዐቱ፡ በከመ፡ አዘዘ፡ እግዚእነ፡ በወንጌል፡ ቅዱስ
=== paragraph 8 ===
ወተወከፎ፡ ለዘይኔስሕ፡ እምኀጢአቱ፡ ወመሐሮ፡ ለዘአበሰ፡ ወአንሥኦ፡ በእዴሁ፡ ወገሥጾ። ወሐውጽ፡ ድውያነ፡ ወሖር፡ ኀበ፡ ሙቁሓን፡ ወአብልዕ፡ ርኁባነ፡ ወአርዊ፡ ጽሙኣነ፡ ወአልብስ፡ ዕሩቃነ
=== paragraph 9 ===
ወአጥብዕ፡ በሀይማኖት፡ ወተጋደል፡ በእንቲአሃ፡ በርትዕ፡ ዘይደሉ፡ ወስማዕ፡ እመጻሕፍተ፡ እግዚአብሔር፡ ቅዱሳት፡ እስመ፡ እለ፡ ያጠብዑ፡ ኪያሃ፡ ወይትጋደሉ፡ በእንቲአሃ፡ ይወርሱ፡ መንግሥተ፡ ሰማያት
=== paragraph 10 ===
ወልድየ፡ ስረይ፡ ከመ፡ ይስረይ፡ ለከ፡ ወኢትኰንን፡ ከመ፡ ኢትትኰነን። ወለእመ፡ ተአመንከ፡ ላዕለ፡ ሢመተ፡ እግዚአብሔር፡ ወኰነንከ፡ ሰብአ፡ ኰንን፡ በፍትሕ፡ ወርትዕ፡ ዘከመ፡ ነበበ፡ ሕግነ። ወተቃተል፡ በሰይፍ፡ ዘኀጺን፡ ከሓዲያነ፡ ወዕልዋነ፡ እለ፡ ኢይአምኑ፡ በክርስቶስ፡ ወምላኅ፡ ሰይፈከ፡ በላዕለ፡ ሀይማኖት፡ ፍጽምት። ወኢታድሉ፡ ለገጽ፡ ወኢትንሣእ፡ ሕሊያነ፡ በፍትሕ፡ ወይኩን፡ ባዕል፡ ወነዳይ፡ በኀቤከ፡ ከመ፡ አሐዱ
=== paragraph 11 ===
መሐሮ፡ ለእጓለ፡ ማውታ፡ ወሱቃ፡ ለመበለት፡ ወዕቀብ፡ ደናግለ፡ ወአጽንዖን፡ ወኢትግበር፡ ለሰይጣን፡ ፍኖተ፡ ላዕሌከ፡ ወግፋዕ፡ ሥልጣኖ፡ ርጉመ፡ በጾም፡ ወበጸሎት፡ ወትጋሀ፡ ሌሊት። ወምጽዋትሰ፡ ይኩን፡ ትእምርትከ፡ ወቤትከ፡ ወማኅደርከ፡ ወዕቀብ፡ ደቂቀ፡ ጥምቀት፡ ወሀይማኖተ
=== paragraph 12 ===
ወኢትትወከፍ፡ ሀይማኖተ፡ ብእሲ፡ ዘኢተጠምቀ
=== paragraph 13 ===
ወለእመ፡ ርኢከ፡ ካህነ፡ ነዳየ፡ ርድኦ፡ እምተመጽውቶ፡ ወኢትኅድጎ፡ ይጸነስ፡ ኀበ፡ አብዳን፡ ሕዝብ፡ ወከማሁ፡ ግበር፡ ለኵሉ፡ ላእካነ፡ እግዚአብሔር፡ ወለእመ፡ ብከ፡ በረከተ፡ ሀብ፡ ለውሉደ፡ ጥምቀት
=== paragraph 14 ===
ወአጽህቅ፡ ነፍስከ፡ ለሕንጸተ፡ አብያተ፡ ክርስቲያን፡ ወአድባራት፡ ወምኔታት፡ እንተ፡ ይእቲ፡ ማኅደር፡ ለግፉዓነ፡ ዓለም፡ ወለነዳያን። ሕንጽ፡ አብያተ፡ እግዚአብሔር፡ በመኃትው፡ ብሩሃት፡ ከመ፡ ሠምዕ፡ ወልኵንት። ወዘገብረ፡ ዘንተ፡ እግዚአብሔር፡ ያጸድቅ፡ ሎቱ፡ ምግባሮ፡ ወደኃሪቶ
=== paragraph 15 ===
ጹም፡ ረቡዐ፡ ወዐርበ፡ ኵሎ፡ መዋዕለ፡ ሕይወትከ
=== paragraph 16 ===
ወዕለተ፡ እሑድሰ፡ ይኩን፡ በዓለ፡ ኢይግበሩ፡ ቦቱ፡ ግብረ፡ ዘእንበለ፡ አንብቦ፡ መጻሕፍተ፡ ለመለኮት። ወዘዐለወ፡ ዘንተ፡ ውጉዝ፡ ውእቱ፡ ወርጉም፡ እምሠለስቱ፡ አስማተ፡ እግዚአብሔር፡ ዝውእቱ፡ አብ፡ ወወልድ፡ ወመንፈስ፡ ቅዱስ
=== paragraph 17 ===
ኢትስድዶ፡ ለነዳይ፡ እምአንቀጸ፡ ማኅደርከ፡ ወኢትትሀየዮ፡ ወኢትመንኖ፡ ወኢታስተሐቅሮ፡ አላ፡ ይኩን፡ ዕበየ፡ ኅሊናከ፡ ከመ፡ ትናዝዞ፡ ወታስተፈሥሖ፡ ከመ፡ ያስተፈሥሕከ፡ እግዚአብሔር፡ ወአንብሮ፡ ዲበ፡ ማእድከ፡ ምስሌከ፡ ወበጽዋዕ፡ ዘትሰቲ፡ አስቲዮ፡ ወኢትዜኀር፡ ላዕሌሁ፡ እስመ፡ ናቡክድናጾር፡ ንጉሥ፡ ተዘኀረ፡ ወተሀጕለ፡ ወረከቦ፡ መዐተ፡ እግዚአብሔር
=== paragraph 18 ===
ወኢትትዐበይ፡ በቅድመ፡ ንጉሥ፡ ወኢትግበር፡ ለአርአያ፡ በቤቱ፡ ወኢታመክኒ፡ ላዕሌሁ፡ በሠናይ፡ ምግባርከ፡ አላ፡ ሶበ፡ ትገብር፡ ኵሎ፡ ምግባረ፡ ሠናይ፡ ወትፌጽም፡ ኵሎ፡ ትእዛዘ፡ በል፡ አነ፡ ገብር፡ ጽሩዕ፡ በከመ፡ ይቤ፡ እግዚእነ፡ በመጽሐፈ፡ ሕይወት፡ እስመ፡ ኢትድኅን፡ በብዝኀ፡ ምግባርከ፡ እኩይ
=== paragraph 19 ===
ወኢታስተጋብእ፡ ወርቀ፡ ወብሩረ፡ ዘእንበለ፡ ዘታስተዋፅእ፡ ለበቍዔተ፡ መሀይምናን
=== paragraph 20 ===
አብዝኅ፡ ሰላመ፡ ለውሉደ፡ መሀይምናን፡ ወግነይ፡ ለካህን፡ ራትዕ፡ ዘያአምሮ፡ ለእግዚአብሔር፡ ወይገብር፡ በሕጉ፡ ወተዐቀብ፡ አስሕቶ፡ ሰይጣን፡ እስመ፡ አስሐቶ፡ ለሢሞን፡ መሠርይ፡ እምድኅረ፡ ኮነ፡ ረድኦ፡ ለእኁየ፡ ፊሊጶስ፡ ወእምድኅረ፡ አስተርአየ፡ በእዴሁ፡ ብዙኀ፡ ተኣምረ፡ ዘመለኮት፡ ወኮነ፡ ምክንያተ፡ ስሕተቱ፡ እስመ፡ ኀሠሠ፡ እምኔየ፡ ሢመተ፡ ክህነት፡ ወሀብተ፡ መንፈስ፡ ቅዱስ፡ በሕልያን፡ ወነገረኒ፡ እግዚእነ፡ ከመ፡ ጽልሕው፡ ወጕሕላዊ፡ ውእቱ፡ ወሰደድክዎ፡ እምኔየ፡ ወኮነ፡ ውእቱ፡ መርሐ፡ ለተሀጕሎቱ
=== paragraph 21 ===
ወልድየ፡ አክብሮሙ፡ ለአእሩግ፡ ወአዕቢዮሙ፡ ወስምዖሙ፡ ነገሮሙ፡ ወኢትሳለቅ፡ ሰብአ፡ በእንተ፡ ኀጢአቱ፡ አላ፡ ገሥጾ፡ ወንግሮ፡ ወሚጦ፡ በየውሀት፡ ኀበ፡ ፈሪሀ፡ እግዚአብሔር
=== paragraph 22 ===
አዝዞሙ፡ ለነገሥት፡ በርትዕ፡ ወተዛለፎሙ፡ በእንተ፡ እከየ፡ ምግባሮሙ። ኢታስትት፡ ቅድሳተ፡ እግዚአብሔር፡ በኵሉ፡ ዕለት፡ እስመ፡ ቀሪበ፡ ቍርባን፡ ይከልእ፡ መንሱተ
=== paragraph 23 ===
ተዘከሮሙ፡ ለምውታን፡ አመ፡ ሣልስት፡ ዕለት፡ ወበሳብዕት፡ ወበዐሠርቱ፡ ወክልኤቱ፡ ወበሠለሳ፡ ወበአርብዓ፡ ወበስሳ። ወአእምር፡ ወልድየ፡ ከመ፡ በአርብዓ፡ ዕለት፡ አመ፡ ዕረፍቱ፡ ለዘ፡ ሞተ፡ ትቀውም፡ ነፍሱ፡ ለዘተጠምቀ፡ ኃጥእ፡ ቅድመ፡ ክርስቶስ፡ ወይትፈደይ፡ በከመ፡ ምግባሩ፡ ወይጌሥጽዎ፡ በመጠኔ፡ ገብረ
=== paragraph 24 ===
ወቅብኦ፡ በቅብአ፡ ትፍሥሕት፡ ለዘይፈቅድ፡ ጥምቀተ፡ እምቅድመ፡ ታጥምቆ፡ በማይ፡ ወእምድኅረ፡ ጥምቀት፡ ኅትሞ፡ በቅብአ፡ መለኮት፡ ዘወሀብኩከ፡ ዝውእቱ፡ ቅብአ፡ ሜሮን፡ ዘቦቱ፡ ተፍጻሜተ፡ ኵሉ፡ ወይቁሙ፡ መሀይምናን፡ በእገሪሆሙ፡ ለሰሚዐ፡ መጻሕፍት፡ ቅዱሳት፡ ዘመለኮት
=== paragraph 25 ===
ኢትንሣእ፡ ቅድሳተ፡ ዘእንበለ፡ ነጺሐከ፡ ወጸዊመከ
=== paragraph 26 ===
ወጸሊ፡ በጽባሕ፡ ወበጊዜ፡ ሠለስቱ፡ ሰዐት፡ እመዐልት፡ ወበምሴት፡ እስመ፡ እሉ፡ ሠለስቱ፡ ጸሎት፡ መፍትው፡ ላዕለ፡ ኵሉ፡ ካህናት፡ ወሕዝባዊያንሰ፡ ይጸልዩ፡ ነግሀ፡ ወሰርከ
=== paragraph 27 ===
ወእለሰ፡ ያስተረክቡ፡ ወይኀሥሡ፡ አፈድፍዶ፡ ጸጋ፡ ዘመለኮት፡ ይጸልዩ፡ በከመ፡ ሠራዕነ፡ በመጽሐፈ፡ ሥርዐት፡ እስመ፡ አምላኪየ፡ ክርስቶስ፡ መሀረኒ፡ ወአነ፡ እነግረከ፡ ኦወልድየ፡ ቀሌምንጦስ፡ እስመ፡ ጸሎት፡ ይደልዎሙ፡ በቀዳሚ፡ ሰዐተ፡ መዐልት፡ ወበሠለስቱ፡ ሰዐት፡ ወበስድስቱ፡ ሰዐት፡ ወበትስዐቱ፡ ሰዐት፡ ወበምሴት፡ ወበጊዜ፡ ንዋም፡ ወበጊዜ፡ መንፈቀ፡ ሌሊት
=== paragraph 28 ===
ወአነ፡ ጴጥሮስ፡ እኤዝዞሙ፡ ለመሀይምናን፡ ያዕርፉ፡ እምግብሮሙ፡ ወተግባሮሙ፡ በመዋዕለ፡ በዓላተ፡ ሰማዕት
=== paragraph 29 ===
ወእጌሥጾሙ፡ እምስካር፡ እኩይ፡ ወነቢረ፡ ምስለ፡ ተውኔት፡ ወምስለ፡ ማዕሌት፡ በፍኖት፡ ወኢይብልዑ፡ ዘሐረደ፡ ዘኢተጠምቀ፡ እስመ፡ እግዚአብሔር፡ ሰዐረ፡ መሥዋዕቶሙ፡ ለአይሁድ፡ ወባዕዳን፡ አሕዛብ
=== paragraph 30 ===
ወንኤዝዝ፡ ኢይብልዑ፡ ናእተ፡ አይሁድ፡ ወኢምንተኒ፡ እመሥዋዕቶሙ፡ ወኢያስተዋስብዎሙ፡ ወኢያውስቡ፡ እምኔሆሙ። ወዘአምነ፡ እምኔሆሙ፡ ወተጠምቀ፡ ይቁም፡ ኀበ፡ አንቀጸ፡ ቤተ፡ ክርስቲያን፡ አርብዓ፡ ዕለተ፡ ወኢይብላዕ፡ ዘእንበለ፡ ኅብስተ፡ ይቡስ፡ ባሕቱ
=== paragraph 31 ===
ወለእመ፡ ገብረ፡ ዘንተ፡ ይቅረብ፡ ኀበ፡ መቅደሰ፡ እግዚአብሔር፡ እምድኅረ፡ አመከሩ፡ ሀይማኖቶ፡ ወይስቈሩ፡ እዝኖ። ወያብልዕዎ፡ መሥዋዕተ፡ መሀይምናን፡ ወፈድፋደሰ፡ ሥጋ፡ እንስሳ፡ ቅዱስ፡ ዘአስተርአየኒ፡ በልብስ፡ ብሩህ፡ ዘወረደ፡ ላዕሌየ፡ በሀገረ፡ ኢዮጴ፡ እስመ፡ ቅዱስ፡ ውእቱ፡ እማእከለ፡ ኵሉ፡ እንስሳ
=== paragraph 32 ===
ወሶበ፡ ትፈቅድ፡ ኦመሀይምን፡ ትኑም፡ ተዐተብ፡ ገጸከ፡ ወኵሎ፡ ሥጋከ፡ ወለእመ፡ ፈቀድከ፡ ትሖር፡ ፍኖተ፡ ተባረክ፡ እምአዕፅምተ፡ ሰማዕት፡ እምቅድመ፡ ትሖር
=== paragraph 33 ===
ኦካህን፡ ኢታቅርብ፡ ላዕለ፡ ምሥዋዕ፡ ሥብሐ፡ ወሥጋ፡ ወኢታዕርግ፡ ዲበ፡ ምሥዋዕ፡ ዘእንበለ፡ ኅብስተ፡ ስንዳሌ፡ ንጹሐ፡ ዘይቤ፡ ሥጋየ፡ ውእቱ፡ እስመ፡ እግዚአብሔር፡ ሰመዮ፡ ኅብስተ፡ ሰማያዌ፡ ወኢእምአምያስ፡ ዘእንበለ፡ ማየ፡ አስካል፡ እስመ፡ እግዚአብሔር፡ ሰመዮ፡ ማየ፡ ሕይወት፡ ወሠዊተ፡ እምሰብል፡ ስርናይ፡ አመ፡ ይበጽሕ፡ ወባዕድሰ፡ ኢብዉሕ፡ ለክሙ፡ ታብኡ፡ ቍርባነ። ወኢያቅርብ፡ ካህን፡ ወይነ፡ ዲበ፡ ምሥዋዕ፡ ዘእንበለ፡ ይቶስሕ፡ በማይ፡ እስመ፡ እግዚእነ፡ ክርስቶስ፡ ይቤ፡ አነ፡ ውእቱ፡ ማየ፡ ሕይወት
=== paragraph 34 ===
በእንተ፡ አክብሮ፡ በዓላት። ግበሩ፡ በዓለ፡ በመዋዕለ፡ ሕማማቲሁ፡ ለክርስቶስ፡ ወሐዘኑ፡ ወስቅለቱ፡ ወደምሩ፡ በይእቲ፡ መዋዕል፡ ሐዘነ፡ ወፍሥሓ፡ ኅቡረ። ሐዘንሰ፡ ይከውን፡ በእንተ፡ ትዕግሥቱ፡ በምንዳቤ፡ ወፍሥሓሰ፡ እስመ፡ መድኀኒትክሙ፡ በሕማመ፡ ክርስቶስ
=== paragraph 35 ===
ወበዓለ፡ ፋሲካሰ፡ ይዐቢ፡ ወይከብር፡ እምኵሉ፡ በዓላት፡ ወኢይኩን፡ ቦቱ፡ ሐዘን፡ ዘእንበለ፡ ፍሥሓ
=== paragraph 36 ===
ወተዘከሩ፡ ምውታኒክሙ፡ በቅዳሴ፡ በኵሉ፡ ጊዜ፡ እስመ፡ ይበቍዖሙ፡ ፈድፋደ፡ ወያቀርቦሙ፡ ኀበ፡ እግዚእነ፡ ክርስቶሰ
=== paragraph 37 ===
ወግበሩ፡ በዓለ፡ ፋሲካ፡ በተፍጻሜቱ፡ በዕለተ፡ እሑድ፡ ዘይከውን፡ እምድኅረ፡ ፍሥሕ፡ ወውእቱ፡ ዕለት፡ ትንሣኤሁ፡ ለእግዚእነ፡ ክርስቶስ፡ እመቃብር
=== paragraph 38 ===
ወግበሩ፡ በዓለ፡ እምትንሣኤሁ፡ በሰሙን፡ መዋዕል፡ ዘውእቱ፡ እሑድ፡ ሐዲስ፡ እስመ፡ ቦቱ፡ ቦአ፡ ኀቤነ፡ ማኅበረ፡ ዐሠርቱ፡ ወክልኤቱ፡ እምድኅረ፡ ትንሣኤሁ፡ እምውታን፡ እንዘ፡ ጉቡኣን፡ ንሕነ፡ በጽርሕ፡ በጽዮን፡ እንዘ፡ ዕጽው፡ ኆኅት፡ እስመ፡ በይእቲ፡ ዕለት፡ ረከቦ፡ ቶማስ፡ ይግስስ፡ በእዴሁ፡ መካነ፡ ኵናት፡ እምገቦሁ፡ ለእግዚእነ፡ ክርስቶስ፡ ወመካነ፡ ቅንዋት፡ እስከ፡ ውዕየ፡ አጽናፈ፡ አጻብዒሁ፡ ወሐደሶን፡ አምላክነ፡ ወአሕየዎን፡ ወይቤሎ፡ ኢትናፍቅ፡ ቶማስ፡ ወኩን፡ መሀይምነ
=== paragraph 39 ===
ወግበሩ፡ በዓለ፡ ዕርገቱ፡ ውስተ፡ ሰማይ፡ ወበዓለ፡ ርደተ፡ መንፈስ፡ ቅዱስ፡ ላዕሌነ፡ ሐዋርያት፡ እስመ፡ ወረደ፡ ላዕለ፡ አፉነ፡ እምሰማይ፡ ከመ፡ ልሳናተ፡ እሳት፡ ወመሀረነ፡ ነገረ፡ ዘኢናአምር፡ ወኢሰማዕነ፡ ቅድመ፡ አሚሃ፡ ወኢያእመርነ፡ ወውእቱ፡ እምድኅረ፡ ዕርገቱ፡ ለክርስቶስ፡ ውስተ፡ ሰማይ፡ ዘኢአተተ፡ እምኔሃ፡ በሰረገላ፡ ብርሃን፡ እምደብረ፡ ዘይት፡ ዘውእቱ፡ እምድኅረ፡ ትንሣኤሁ፡ በአርብዓ፡ ዕለት
=== paragraph 40 ===
ወግበሩ፡ በዓለ፡ አመ፡ ዜነዋ፡ እስመ፡ አሕዛብ፡ ገብርዎ፡ በዓለ፡ ቅድሜክሙ፡ ለአማልክቲሆሙ፡ ወረስይዎ፡ አንትሙ፡ ለእመ፡ ብርሃን፡ በከመ፡ አዘዘ፡ ብእሴ፡ እግዚአብሔር፡ ጳውሎስ፡ ኅሩይ
=== paragraph 41 ===
ወግበሩ፡ ኵሎ፡ በዓላተ፡ ዘአዘዝናክሙ፡ በመጽሐፈ፡ ሥርዐት
=== paragraph 42 ===
ወአእምር፡ ወልድየ፡ ከመ፡ ዕጣን፡ በስኂን፡ እስመ፡ ስኂን፡ ዐቢይ፡ ዕጣን፡ ዘይዐጥኑ፡ በቅድመ፡ እግዚአብሔር፡ እስመ፡ እግዚእትነ፡ እመ፡ ብርሃን፡ ነገረተኒ፡ ወወሀበተኒ፡ እምኔሁ፡ ወውእቱ፡ ዘአምጽኡ፡ ሰብአ፡ ሰገል፡ አምኃ። ወከርቤሰ፡ ይኩን፡ ለግንዘተ፡ ሥጋሆሙ፡ ለካህናት፡ ከመ፡ ኢይማስን፡ ወኢይድፍንዎሙ፡ ውስተ፡ ምድር፡ አላ፡ በንፍቀ፡ መልዕልተ፡ ምድር
=== paragraph 43 ===
ወልድየ፡ ዕቀብ፡ ትእዛዝየ፡ በከመ፡ ዐቀበ፡ ኢያሱ፡ ወልደ፡ ነዌ፡ ትእዛዘ፡ እኁየ፡ ሙሴ
=== paragraph 44 ===
በእንተ፡ ቅዳሴ፡ ታቦት። ወቀድስ፡ ኵሎ፡ ታቦተ፡ ሕግ፡ ወኅትሞ፡ በማኅተመ፡ እግዚአብሔር፡ ዘውእቱ፡ ሜሮን፡ ቅብአ፡ ትፍሥሕት፡ ወይኩኑ፡ ምስሌከ፡ በጊዜ፡ ትቄድሶ፡ ሰብዐቱ፡ ቀሳውስት፡ እስመ፡ እሙንቱ፡ መትልው፡ ድኅሬነ። ወኅትም፡ ታቦታተ፡ ወመሥዋዓተ፡ በማኅተመ፡ እግዚአብሔር፡ ከመ፡ ይርከብ፡ በዘ፡ ይቄድሱ፡ ላዕሌሁ፡ ምክሐ፡ እግዚአብሔር። ወኅትም፡ በዝንቱ፡ ቅብአ፡ ቅዱስ፡ ኵሎ፡ ዘይጠመቅ፡ ወይርከቡ፡ ቦቱ፡ ክህነተ፡ ወመንግሥተ፡ ወይብዛኅ፡ ትንቢት፡ በቅብአ፡ ሜሮን፡ ወበክብሩ
=== paragraph 45 ===
ወእመቦ፡ ብእሲ፡ ዘኀተመ፡ ነፍሶ፡ በዝንቱ፡ ቅብአ፡ ቅዱስ፡ ዘአነ፡ ጴጥሮስ፡ ንኡሰ፡ ሐዋርያት፡ እሁበክዮ፡ ዘእንበለ፡ ይኅትሞ፡ ካህን፡ ዘብዉሕ፡ ሎቱ፡ ይእኀዞ፡ አባሕኩ፡ ይቅትልዎ።
=== paragraph 46 ===
ወለእመ፡ ብእሲ፡ ሰትየ፡ እምኔሁ፡ በእንተ፡ ፈውሶ፡ ይሰደድ፡ ኀበ፡ ኢይገብእ፡ ወዘደፈረ፡ ጸዊሮቶ፡ እምሕዝብ፡ ዘእንበለ፡ አእምሮ፡ ይሰደድ፡ እምቤተ፡ ክርስቲያኑ፡ ለእግዚአብሔር፡ ሰብዐተ፡ ዐመተ።
=== paragraph 47 ===
ወለእመ፡ ጾረ፡ በአእምሮ፡ ይዝብጥዎ፡ ምእተ፡ ወኃምሳ፡ ወሠለስተ፡ ጥብጣቤ፡ ወይቁም፡ አፍአ፡ ቤተ፡ ክርስቲያን፡ ዐሠርተ፡ ዐመተ።
=== paragraph 48 ===
ወእመቦ፡ ቀሲስ፡ ዘቀብአ፡ በዝንቱ፡ ቅብእ፡ ዘኢተጠምቀ፡ ይስዐር፡ እምሢመቱ።
=== paragraph 49 ===
ወእመቦ፡ ካህን፡ ዘወሰደ፡ ዘንተ፡ ቅብአ፡ ኀበ፡ ዘኢካህን፡ ይስዐር፡ እምሢመቱ።
=== paragraph 50 ===
ወእመቦ፡ ካህን፡ ዘጾረ፡ ዘንተ፡ ቅብአ፡ ያንብብ፡ መዝሙረ፡ ዳዊት፡ ነቢይ፡ ዘተነበየ፡ ላዕለ፡ ዝንቱ፡ ቅብእ፡ እስከ፡ ያነብሮ፡ እምእዴሁ።
=== paragraph 51 ===
ወእመቦ፡ ብእሲ፡ ዘመሠጠ፡ ክህነተ፡ ዘእንበለ፡ ይንሣእ፡ እምሊቀ፡ ካህናት፡ ይሰደድ፡ እምቤተ፡ ክርስቲያኑ፡ ለእግዚአብሔር
=== paragraph 52 ===
በእንተ፡ ሥርዐተ፡ ምሥዋዕ። ወይቀድሱ፡ ቍርባነ፡ ዲበ፡ ምሥዋዕ፡ ዘኅቱም፡ በሜሮን፡ በቀዳሚ፡ ጊዜ፡ ኀበ፡ ተጋብኡ፡ ሊቃነ፡ ካህናት፡ ወቀሳውስት፡ ኅቡረ፡ ወኵሉ፡ ዲያቆናት፡ ከመ፡ ይኩን፡ ክብረ፡ ወፍሥሓ። ወከማሁ፡ በሰናብት፡ ወበበዓላት፡ ወያንብቡ፡ ዲበ፡ ምሥዋዕ፡ ወንጌለ፡ ዮሐንስ፡ እስመ፡ ውእቱ፡ ነባቢ፡ ዘመለኮት።
=== paragraph 53 ===
ወይኩን፡ ውስተ፡ ኵሉ፡ ቤተ፡ መቅደስ፡ ክልኤቱ፡ ምሥዋዕ፡ አሐደ፡ ዘይጸውርዎ፡ እመካን፡ ውስተ፡ መካን፡ ከመ፡ እብነ፡ ደቂቀ፡ እስራኤል፡ ዘኮነ፡ በገዳም፡ ይጸውርዎ፡ እመካን፡ ውስተ፡ መካን፡ ወካልኦ፡ ዘኢይጸውርዎ፡ እመካኑ።
=== paragraph 54 ===
ወለእመ፡ ተሰብረ፡ ምሥዋዕ፡ ዘኢይጸውርዎ፡ አው፡ አንቀልቀሎ፡ ሰብእ፡ እመካኑ፡ ዘተቀደሰ፡ አእምር፡ ከመ፡ አተተ፡ ቅድስናሁ፡ እምኔሁ፡ በከመ፡ አተተ፡ ቅድስና፡ ደቂቀ፡ እስራኤል፡ እምውሉዱ፡ ወይደሉ፡ ይቀድስዎ፡ ዳግመ
=== paragraph 55 ===
ወለእመ፡ ብእሲ፡ እምሀይምናን፡ ወድቀ፡ ላዕሌሁ፡ ፂዋዌ፡ አው፡ ቦአ፡ ወተደመረ፡ ምስለ፡ አሕዛብ፡ ወበልዐ፡ መብልዖሙ፡ ወቀርቦሙ፡ ወቀርብዎ፡ ወረኵሰ፡ ቦሙ፡ ወገብአ፡ ውስተ፡ ብሔሩ፡ እምፂዋዌሁ፡ ይደሉ፡ ያጥምቅዎ፡ ዳግመ
=== paragraph 56 ===
ወእመቦ፡ ሕዝባዊ፡ ዘቦአ፡ ምሥዋዐ፡ እግዚአብሔር፡ ቅዱስ፡ በጊዜ፡ ይቄድሱ፡ ኀሢሦ፡ ክብረ፡ እምቢጹ፡ ያውግዝዎ፡ ወይቁም፡ አፍአ፡ ቤተ፡ ክርስቲያን፡ ሰብዐተ፡ ዐመተ፡ ወያርኢ፡ ለሰብእ፡ ንስሓሁ
=== paragraph 57 ===
ወእመቦ፡ ሕዝባዊ፡ ዘጸዐለ፡ ካህነ፡ አው፡ ረገሞ፡ ይሰደድ፡ እምአህጉረ፡ እግዚአብሔር፡ ወአብያተ፡ ክርስቲያኑ፡ ኀበ፡ ምድረ፡ ዕልዋን። ወለእመ፡ ተማሕፀነ፡ በምሥዋዐ፡ እግዚአብሔር፡ ወአኀዘ፡ አልባሰ፡ የአዝዞ፡ ካህን፡ ጾመ፡ ዐሠርቱ፡ ወክልኤቱ፡ ዐመት፡ ወይግበር፡ ላዕሌሁ፡ ካህን፡ ቅብአተ፡ ስርየተ፡ ኀጢአት
=== paragraph 58 ===
ወእመቦ፡ ብእሲ፡ ወብእሲት፡ እምሀይምናን፡ ዘበልዐ፡ እምዘ፡ ያቄርቡ፡ ይሰደድ፡ እምቤተ፡ ክርስቲያነ፡ እግዚአብሔር፡ እስከ፡ ሞቱ፡ ለእመ፡ ገብረ፡ በአቅልሎ። ወለእመ፡ ገብረ፡ ዘእንበለ፡ አእምሮ፡ ይጹም፡ ዐሠርተ፡ ወክልኤተ፡ ዐመተ፡ ፍጹመ፡ ወይሀቡ፡ ለቤተ፡ ክርስቲያን፡ ክልኤ፡ እደ፡ ንዋዩ፡ እንዘ፡ ኢይኤዝዝ፡ አላ፡ ያጌብርዎ
=== paragraph 59 ===
ወእመቦ፡ ብእሲ፡ እምሀይምናን፡ ዘቦአ፡ ውስተ፡ መንጦላዕተ፡ ምሥዋዕ፡ ወሰፍሐ፡ እዴሁ፡ ላዕለ፡ ካህን፡ ወዘበጦ፡ ይምትሩ፡ እዴሁ፡ በድፍረቱ፡ ላዕለ፡ ክህነተ፡ እግዚአብሔር
=== paragraph 60 ===
ወእመቦ፡ ብእሲ፡ እምሀይምናን፡ ዘበዝኀ፡ ኀጢአቱ፡ ወፈቀደ፡ ይትከላእ፡ እምኔሁ፡ ይክሥታ፡ ለካህናት፡ ወለማእምራነ፡ መጻሕፍተ፡ እግዚአብሔር
=== paragraph 61 ===
ወኢይትለአክ፡ ለምሥዋዐ፡ እግዚአብሔር፡ ዘለምጽ፡ አኮ፡ ርኩሰ፡ ከዊኖ፡ እስመ፡ አልቦ፡ ርኩሰ፡ እምድኅረ፡ ነሥአ፡ ጥምቀተ፡ አላ፡ ከመ፡ ኢይምራዕ፡ ክህነተ፡ እግዚአብሔር፡ ወከማሁ፡ ነገሩ፡ ለዝልጉስ፡ እስመ፡ ኢያጠአጥእ፡ መልእክተ፡ ቤተ፡ እግዚአብሔር
=== paragraph 62 ===
በእንተ፡ አልባሰ፡ ክህነት። ወይኩን፡ አልባሰ፡ ክህነት፡ ካልእ፡ እምአልባሰ፡ ሕዝባዊያን። ወይደሉ፡ ይኩን፡ መልበሱ፡ ርሒበ፡ ዘእንበለ፡ ኅባኔ፡ ወሞጣሕቱ፡ ስፉሐ፡ እንተ፡ ታሕቱ። ወይኩን፡ መልበሱ፡ ከማሁ፡ ወእንተ፡ ላዕሉ፡ ክቡበ፡ እስመ፡ ዝንቱ፡ አርአያ፡ ለማእሰረ፡ እገሪሁ፡ ለእግዚእነ፡ ክርስቶስ፡ ወይክሥት፡ እደዊሁ፡ በሐብል።
=== paragraph 63 ===
ወይልበስ፡ ካህን፡ ሰበነ፡ ከመ፡ ማዕተብ፡ ዲበ፡ መትከፍቱ፡ እስመ፡ ውእቱ፡ አርአያ፡ ለሐብል፡ ዘወደዩ፡ ውስተ፡ ክሳዱ፡ ለእግዚእነ፡ ክርስቶስ፡ ወሰሐብዎ፡ ኀበ፡ ዐውደ፡ ጲላጦስ። ወይኩን፡ ቅናቱ፡ ዘአዲም፡ ስፉሐ
=== paragraph 64 ===
ወያንብብ፡ ካህን፡ መዐልተ፡ መዝሙረ፡ ዳዊት፡ ወበሌሊት፡ ስብሐተ፡ ነቢያት፡ እስመ፡ ይከውኑ፡ በዝንቱ፡ ቅኑታነ፡ ክልኤ፡ ሰይፍ
=== paragraph 65 ===
እብለከ፡ ወልድየ፡ ቀሌምንጦስ፡ ወለእለ፡ ከማከ፡ በመዓርግ፡ ከመ፡ ትፍታሕ፡ ማእከለ፡ መሀይምናን፡ ወተአዝዞሙ፡ በዘይደሉ፡ በዘ፡ አርአየከ፡ መንፈስ፡ ቅዱስ፡ ዘይፈጽም፡ ንትገተ። ወዘዐለወ፡ ወአስተተ፡ ኮነ፡ ርጉመ፡ እስከ፡ ዕለተ፡ ደይን፡ ዘይቀውም፡ ቅድመ፡ ክርስቶስ
=== paragraph 66 ===
ወአእምር፡ ወልድየ፡ ከመ፡ ኵሉ፡ ዘአዘዝኩከ፡ በትእዛዘ፡ እግዚአብሔር፡ አዘዝኩከ
=== paragraph 67 ===
ወበእዴሁ፡ ጸሐፈ፡ ሊተ፡ ዘንተ፡ ትእዛዘ፡ ወወሀበኒዮ፡ በደብረ፡ ዘይት፡ በዕለተ፡ ዕርገቱ፡ ውስተ፡ ስብሐቱ፡ አሜን።