##### edition  (gez)
=== paragraph 0 ===
ዝንቱ፡ ሴኖዶስ፡ ዘሐዋርያት፡ ቅዱሳን፡ ዘነገረ፡ ቀሌምንጦስ፡ ወይእቲ፡ በጥልሳት፡ ዘኀብሩ፡ ባቲ፡ አርዳኢሁ፡ ለእግዚእነ፡ ክርስቶስ፡ ወኍልቍ፡ ፹ወ፩
=== paragraph 1 ===
፩፡ ቀኖና። በእንተ፡ ሢመተ፡ ኤጲስ፡ ቆጶስ፡ ወሊቀ፡ ጳጳሳት፡ ወስፍን፡ ይደሉ፡ የሀልዉ፡ ኤጲስ፡ ቆጶሳት፡ ለሢመተ፡ ሊቀ፡ ጳጳሳት። እስመ፡ ኢይትፈጸም፡ ዝንቱ፡ ዘእንበለ፡ በህላዌ፡ ጉባኤሆሙ፡ ለኤጲስ፡ ቆጶሳት፡ ወህላዌ፡ መጥረብሊጥ፡ ዘውእቱ፡ ጳጳስ። ወይነግር፡ ካዕበ፡ ለዘ፡ ሀለዉ፡ ውስተ፡ ውእቱ፡ መካን፡ ወየአዝዞሙ፡ ለካልእ፡ ሕዝብ፡ በምክረ፡ መላህቅቲሆሙ
=== paragraph 2 ===
፪፡ ቀኖና። እመቦ፡ ብእሲ፡ ዘአምጽእዎ፡ ከመ፡ ይሠየም፡ ኤጲስ፡ ቆጶስ፡ ወይኩን፡ ዝንቱ፡ በሥምረተ፡ ሰብአ፡ ብሔሩ፡ ኵሎሙ። ወይኩን፡ ጳጳስ፡ አው፡ ሊቀ፡ ጳጳሳት፡ ዘይሠይሞ፡ ወየሀልዉ፡ ለሢመቱ፡ ኤጲስ፡ ቆጶሳት፡ ክልኤቱ፡ አው፡ ሠለስቱ፡ እስመ፡ ዝንቱ፡ ውእቱ፡ ዘይዌስኮ፡ ሞገሰ፡ ወሢመተ፡ ቀሲስ፡ ወዲያቆን፡ ወዘይቴሐት፡ እምውእቱ፡ ኤጲስ፡ ቆጶስ፡ ባሕቲቱ፡ ይሢሞሙ፡ ውስተ፡ መዓርጊሆሙ፡ በበሥርዐተ፡ ክህነቶሙ፡ ወውእቱ፡ ይኩን፡ በሥምረተ፡ እለ፡ ይሳተፍዎሙ
=== paragraph 3 ===
፫፡ ቀኖና። እመሂ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘተዐደወ፡ ሕገ፡ ክርስቶስ፡ በውስተ፡ ቍርባን፡ ወአቅረበ፡ ዲበ፡ ምሥዋዕ፡ መዐረ፡ አው፡ ሐሊበ፡ ወእመሂ፡ አቅረበ፡ ህየንተ፡ ስቴ፡ ወይን፡ ስቴ፡ ሶካር፡ አው፡ እምአምያስ፡ ዘግቡር፡ በእሳት፡ አው፡ ባዕደ። ወኢምንተሂ፡ እምአዕዋፍ፡ አው፡ እንስሳ፡ ወኢባዕደ፡ ዘይሠውዑ፡ ዘእንበለ፡ ቍርባን፡ ዘአዘዘ፡ እግዚእነ፡ ኢየሱስ፡ ክርስቶስ፡ እምኅብስት፡ ንጹሕ፡ ስንዳሌ፡ ሠናየ፡ ሐዲሰ፡ ወወይነ፡ ዘንጡፍ፡ እምአስካል፡ ዘይነሥኡ፡ እምሐረጉ። ወዘገብረ፡ ዘንተ፡ ዘእንበለ፡ ዝንቱ፡ እምኔሆሙ፡ ይስዐር፡ እምክህነቱ፡ ወኢይትወከፍዎ። ወያቅርቡ፡ ካዕበ፡ ሠዊተ፡ ሰብለ፡ በጊዜሁ፡ ወእክለ፡ ቀዳሜ፡ ፍሬ፡ ወአስካለ፡ ወይን፡ ካዕበ፡ በጊዜሁ፡ አመ፡ ይመልኦ፡ ማይ፡ ወይጥዕም፡ ወቦቱ፡ እምርተ፡ ጊዜ፡ በበዓል፡ ዘስሙይ፡ ውእቱ፡ በዓለ፡ ዮሐንስ፡ ወያዕርጉ፡ ውስተ፡ ምሥዋዕ፡ ወያቅርቡ፡ ቦቱ፡ ወሰብልሰ፡ በጊዜሁ፡ ወዘእንበሌሁሰ፡ ኢመፍትው፡ ያቅርቡ፡ ወኢይደሉ፡ ያብኡ፡ ኀበ፡ ምሥዋዕ፡ ምንተኒ፡ ቅብአ፡ ዘእንበለ፡ ቅብአ፡ ሜሮን፡ ዘግቡር፡ ሎቱ፡ ዘአዘዘ፡ እግዚአብሔር፡ ወቅብአ፡ ዘይት፡ ዘያኀትዉ፡ ቦቱ፡ መኃትወ፡ ወዕጣነ፡ ጽንሓሓት፡ ዘመዐዛሁ፡ ሠናይ፡ ዘውእቱ፡ ቅንአት፡ ወሰሊኆት፡ በጊዜ፡ ቅዳሴ፡ ወጸሎት፡ ወሶበ፡ ያርኅዉ
=== paragraph 4 ===
፬፡ ቀኖና። ኵሉ፡ ዘበፅዑ፡ መሃይምናን፡ በእንተ፡ ነፍሶሙ፡ ቀዳሜ፡ ፍረያት፡ ወበኵረ፡ እንስሳሆሙ፡ ያምጽእዎሙ፡ ኀበ፡ ቤተ፡ ክርስቲያን፡ በከመ፡ አዘዘ፡ እግዚአብሔር። ወእምፍረያተ፡ ዕፀው፡ ካዕበ፡ ወዘይመስሎ፡ ለዝንቱ፡ ወያምጽእዎሙ፡ ኀበ፡ ቤተ፡ ክርስቲያን፡ አው፡ ኀበ፡ ማኅደረ፡ ኤጲስ፡ ቆጶስ፡ እስመ፡ ውእቱ፡ መክፈልቱ፡ ወለሊሁ፡ ሥሉጥ፡ ባቲ፡ በእንተ፡ መልእክተ፡ ቤተ፡ ክርስቲያን። ወኢያቅርቡ፡ ዲበ፡ ምሥዋዕ፡ እምኔሁ፡ ወኢምንተኒ፡ ወይኩን፡ ኤጲስ፡ ቆጶስ፡ ዘይከፍሎሙ፡ ለቀሳውስት፡ በበመዓርጊሆሙ፡ ወመልእክቶሙ፡ ወቀሳውስትኒ፡ ይክፍልዎሙ፡ ለዲያቆናት፡ ወለኵሉ፡ ላእካነ፡ ቤተ፡ ክርስቲያን
=== paragraph 5 ===
፭፡ ቀኖና። በእንተ፡ ዘፈቀደ፡ ይኅድግ፡ ብእሲቶ፡ በእንተ፡ ፅሙና። ኢይከውኖ፡ ለኤጲስ፡ ቆጶስ፡ ወለቀሲስ፡ ወለዲያቆን፡ ያውፅእ፡ ብእሲቶ፡ እማኅደሩ፡ በምክንያተ፡ ጽሙና፡ ወሐዊረ፡ ኀበ፡ ምንኵስና፡ ወይትፈለጥ፡ እምኔሃ። ወዘገብረ፡ ከመዝ፡ ምግባር፡ ወይስዐርዎ፡ ሕዝብ፡ ወይክልእዎ፡ እምነገሩ። ወለእመ፡ ተቃሐወ፡ በዝንቱ፡ ለይፃእ፡ እምሢመቱ፡ ወይትመተር
=== paragraph 6 ===
፮፡ ቀኖና። በእንተ፡ ካህናት። ኢይትለአኩ፡ ዘእንበለ፡ ለምሥዋዕ። ኢይኅሥሥ፡ መኑሂ፡ እምኤጲስ፡ ቆጶሳት፡ ወቀሳውስት፡ ወዲያቆናት፡ እለ፡ ትኩላን፡ ለመልእክተ፡ ቤተ፡ ክርስቲያን፡ ግብረ፡ እምግብረ፡ ዓለም። ወለእመ፡ ገብረ፡ ከመዝ፡ ይትመተር፡ ካዕበ፡ ወይደቅ፡ እምሢመቱ
=== paragraph 7 ===
፯፡ ቀኖና። በእንተ፡ ፋሲካ። እመሂ፡ እጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ አሐዱ፡ እምላእካነ፡ ቤተ፡ ክርስቲያን፡ ዘገብረ፡ ፋሲካ፡ እምቅድመ፡ የዐሪ፡ ሌሊተ፡ ወመዓልተ፡ ወየኀሥሥ፡ በዝንቱ፡ ይትመሰሎሙ፡ ለአይሁድ፡ ወይገብር፡ ምስሌሆሙ፡ ፋሲካ፡ በአሐቲ፡ ዕለት፡ ዘእንበለ፡ በዕለተ፡ እሑድ፡ ዘይከውን፡ እምድኅረ፡ ፋሲካ፡ አይሁድ፡ ለይትመተር፡ እምሢመቱ፡ ወይትገደፍ፡ እምኔሃ
=== paragraph 8 ===
፰፡ ቀኖና። በእንተ፡ ዘአበየ፡ ቍርባነ። እመሂ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ አሐዱ፡ እምላእካነ፡ ቤተ፡ ክርስቲያን፡ ዘኢቀርበ፡ ወኢተመጠወ፡ ቍርባነ፡ ምስለ፡ ሕዝብ፡ በጊዜ፡ ይፌጽሙ፡ ቅዳሴ፡ በምክንያት፡ ለይጠየቁ፡ ምክንያቱ፡ ወሕማሙ፡ ወለእመ፡ ረከበ፡ ምክንያተ፡ በዘየኀድግ፡ ይእተ፡ ጊዜ፡ ወአኮ፡ ባዕድ፡ ይስረዩ፡ ሎቱ። ወለእመ፡ አመክነየ፡ በእንቲአሁ፡ ወኮኖ፡ ልማደ፡ ይትገሐሥዎ፡ ወይሰደድ፡ እስመ፡ ኮነ፡ ዕቅፍተ፡ ለሕዝብ፡ ወያስተማስል፡ ላዕለ፡ ካህን፡ ዘቀደሰ፡ ቍርባነ፡ ከመዘ፡ ኢቀደሰ፡ በኅሊና፡ ንጹሕ፡ ወበሀይማኖት፡ ርትዕት
=== paragraph 9 ===
፱፡ ቀኖና። በእንተ፡ ዘኢይቀውም፡ እስከ፡ ተፍጻሜተ፡ ቅዳሴ። እመቦ፡ ብእሲ፡ እመሀይምናን፡ ዘቦአ፡ ውስተ፡ ቤተ፡ ክርስቲያን፡ በጊዜ፡ ቅዳሴ፡ ወሰምዐ፡ መጻሕፍተ፡ ቅዱሳት፡ ወኢተዐገሠ፡ እስከ፡ ይፌጽሙ፡ ቅዳሴ፡ ወኢተመጠወ፡ ቍርባነ፡ ይሰደድ፡ እምቤተ፡ ክርስቲያን፡ እስመ፡ አማሰነ፡ ሕገ፡ ወአስተሐቀረ፡ ቁመቱ፡ ቅድመ፡ ንጉሥ፡ ሰማያዊ
=== paragraph 10 ===
፲፡ ቀኖና። በእንተ፡ ተደምሮ፡ ምስለ፡ ውጉዛን። እመቦ፡ ብእሲ፡ ዘተናገረ፡ ምስለ፡ ዘከልእዎ፡ ቍርባነ፡ በእንተ፡ ውግዘት፡ ወተሰደ፡ ወዘተሳተፎ፡ በጸሎት፡ አው፡ ጸውዖ፡ ውስተ፡ ቤቱ፡ ለምሳሕ፡ ለይሰደድ፡ ወይትገደፍ፡ ወይትከላእ
=== paragraph 11 ===
፲፩፡ ቀኖና። በእንተ፡ ዘተወግዘ። እመቦ፡ ብእሲ፡ ዘተናገረ፡ ምስለ፡ ካህን፡ ዘተወግዘ፡ አው፡ ዲያቆን፡ ዘተሰደ፡ በእንተ፡ ፅርፈት፡ ዘነበበ፡ አው፡ ካልአ፡ አበሳ፡ ወዘጸለየ፡ ምስሌሁ፡ በከመ፡ ይጼሊ፡ ምስለ፡ ካህናት፡ በኅቡእ፡ ለይሰደድ፡ እምቤተ፡ ክርስቲያን፡ ወይክልእዎ፡ ተመጥዎ፡ ቍርባን
=== paragraph 12 ===
፲፪፡ ቀኖና። በእንተ፡ ፍልሰተ፡ ካህናት። እመቦ፡ ካህን፡ ዘሖረ፡ እምብሔሩ፡ ኀበ፡ ካልእ፡ ብሔር፡ ዘእንበለ፡ መባሕተ፡ ኤጲስ፡ ቆጶስ፡ ዘሤሞ፡ ካህነ፡ ኢይትወከፍዎ፡ ውስተ፡ ኍልቈ፡ ካህናት። ወለእመ፡ ተወክፍዎ፡ ይሰደድ፡ ውእቱኒ፡ ወዘተወክፎ። ወለእመ፡ ኮነ፡ ስዱደ፡ አው፡ ውጉዘ፡ ወወፅአ፡ በውእቱ፡ ግብር፡ ዘተሰደ፡ ባቲ፡ በፍኖተ፡ ስሕተቱ፡ ለይናኅ፡ ተሰዶቱ፡ እስመ፡ ሐሳዊ፡ ውእቱ፡ ወመስሐቲ፡ ለቤተ፡ ክርስቲያነ፡ እግዚአብሔር፡ ወውኁደ፡ ሃይማኖት
=== paragraph 13 ===
፲፫፡ ቀኖና። በእንተ፡ ኀዲገ፡ ኤጲስ፡ ቆጶስ፡ መካኖ። እመቦ፡ እጲስ፡ ቆጶስ፡ ዘየኀድግ፡ መንበሮ፡ ወግብሮ፡ ወትእዛዞ፡ ወዘይደልዎ፡ ሠናየ፡ ሠሪዐ፡ ሕዝቡ፡ ወየሐውር፡ ኀበ፡ ካልእ፡ ብሔር፡ ወእመሂ፡ በምንዳቤ፡ ወበዕፁብ፡ ወበእከይ፡ ለይሰደድ፡ ወይትገደፍ፡ እምሢመቱ። አላ፡ ለእመ፡ አስተብቍዕዎ፡ ኤጲስ፡ ቆጶሳት፡ ከመ፡ ይንበር፡ ኀቤሆሙ፡ ለመፍቅዱ፡ አው፡ ለዘይከውኖሙ፡ በቍዔተ፡ ለሰብአ፡ ሀገር፡ እንተ፡ ተተክለ፡ ሎሙ፡ ወያስተብቍዕዎ፡ በንብረቱ፡ ህየ፡ እስከ፡ ይፌጽም፡ መፍቅዶ
=== paragraph 14 ===
፲፬፡ ቀኖና። በእንተ፡ ከመ፡ መፍትው፡ ኢይትዋለጡ፡ ካህናት፡ እመካኖሙ። እመቦ፡ ቀሲስ፡ አው፡ ባዕዳን፡ ካህናት፡ ዘኀደገ፡ መካኖ፡ ወቤተ፡ ክርስቲያኖ፡ መካነ፡ ኀበ፡ ሤሞ፡ ኤጲስ፡ ቆጶስ፡ አው፡ ጳጳስ፡ አው፡ ሊቀ፡ ጳጳሳት፡ ዘእንበለ፡ ያብሕዎ፡ አላ፡ በትእዛዘ፡ ርእሱ፡ ከመ፡ ይኅሥሥ፡ በቍዔተ፡ አው፡ ያጥሪ፡ ክብረ፡ እምሰብአ፡ ውእቱ፡ ብሔር፡ ይስዐር፡ እምሢመቱ፡ እምክልኤሆን፡ መካናት፡ ኅቡረ፡ ወኢይትኈለቍ፡ ውስተ፡ ኍልቈ፡ ካህናት፡ አላ፡ ይኩን፡ ምቅዋሙ፡ በቤተ፡ ክርስቲያን፡ ምስለ፡ መእመናን። ወፈድፋደሰ፡ ለእመ፡ ጸውዖ፡ ኤጲስ፡ ቆጶስ፡ ከመ፡ ይግባእ፡ ኀበ፡ መካኑ፡ ወኢገብረ፡ ዘንተ፡ ወኢተሰጥዎ፡ ከመ፡ ይትመየጥ፡ ኀበ፡ መካኑ፡ ለይትፈለጥ፡ እምካህናት፡ ወእምነ፡ ማኅበሮሙ፡ ወይኩን፡ ምቅዋሙ፡ ምስለ፡ መእመናን፡ በቤተ፡ ክርስቲያን፡ እስመ፡ አፍቀረ፡ ይምትር፡ ማእሰረ፡ ክህነት፡ ለይኩን፡ ከመ፡ ሕዝብ፡ መእመናን
=== paragraph 15 ===
፲፭፡ ቀኖና። በእንተ፡ ኤጲስ፡ ቆጶስ፡ ዘይትወከፍ፡ ውጉዘ። ወለእመ፡ ተወክፈ፡ አሐዱ፡ እምኤጲስ፡ ቆጶሳት፡ ብእሴ፡ ዘከመዝ፡ ምግባሩ፡ ወግእዙ፡ ወያሰትት፡ ዘንተ፡ ግብረ፡ ወኮነ፡ ለውእቱ፡ ብእሲ፡ ኀቤሁ፡ ክብረ፡ ወይሬስዮ፡ በአምሳለ፡ እለ፡ ሀለዉ፡ ኀቤሁ፡ እምካህናት፡ ለይትገሐሥዎ፡ ለውእቱ፡ ኤጲስ፡ ቆጶስ፡ ወይኩን፡ በኀቤሆሙ፡ በአምሳለ፡ ዘይገብር፡ በዕልወተ፡ ሕግ፡ ወይመትር፡ ሕገጊሃ፡ ለቤተ፡ ክርስቲያን፡ ወሥርዐታ
=== paragraph 16 ===
፲፮፡ ቀኖና። በእንተ፡ ዘአውሰበ፡ ክልኤተ። እመቦ፡ ብእሲ፡ እምካህናት፡ ዘአውሰበ፡ ክልኤተ፡ ብእሲተ፡ ወአስተጋብኦን፡ ለክልኤሆን፡ አው፡ ዕቅብተ፡ ላዕለ፡ ብእሲቱ፡ እመሂ፡ ኅቡረ፡ ወእመሂ፡ አሐቲ፡ ድኅረ፡ አሐቲ፡ ወለእመ፡ ሞተት፡ ብእሲቱ፡ ወአውሰበ፡ ካልእተ፡ አው፡ አውሰበ፡ ዘኢኮነት፡ ድንግለ፡ ኢመፍትው፡ ይሠየም፡ ኤጲስ፡ ቆጶስ፡ ወኢቀሲስ፡ ወኢዲያቆን፡ ወኢምንተኒ፡ እመዓርገ፡ ክህነት
=== paragraph 17 ===
፲፯፡ ቀኖና። በእንተ፡ ዘአውሰበ፡ ዘኢይደልዎሙ፡ ለካህናት። እመቦ፡ ብእሲ፡ ዘአውሰበ፡ ብእሲተ፡ ማእሰበ፡ አው፡ እንተ፡ ደሐርዋ፡ አው፡ ዘማዊተ፡ አው፡ አመተ፡ አው፡ ምርዕተ፡ አው፡ እሕዝተ፡ ኢይከውኖ፡ ይኩን፡ ኤጲስ፡ ቆጶስ፡ ወኢቀሲስ፡ ወኢዲያቆን፡ ወኢዘይቴሐት፡ እምኔሁ፡ እመዓርገ፡ ክህነት
=== paragraph 18 ===
፲፰፡ ቀኖና። በእንተ፡ ዘአውሰበ፡ ዘኢመፍትው። እመቦ፡ ብእሲ፡ ዘአውሰበ፡ ክልኤተ፡ አኃተ፡ አው፡ አውሰበ፡ ወለተ፡ እኅቱ፡ አው፡ ወለተ፡ እኁሁ፡ ኢይከውኖ፡ ይሠየም፡ ወኢምንተኒ፡ እመዓርገ፡ ክህነት፡ ወይሰደድ፡ እምቤተ፡ ክርስቲያን፡ ወአልቦ፡ መክፈልተ፡ ምስለ፡ መእመናን
=== paragraph 19 ===
፲፱፡ ቀኖና። በእንተ፡ ከመ፡ ኢይትሐበዩ፡ ካህናት። እመቦ፡ ብእሲ፡ እምካህናት፡ ዘወሀበ፡ ምግበ፡ ዚአሁ፡ በእንተ፡ ገጸ፡ ነፍሱ፡ ወወሀቦሙ፡ ነፍሶ፡ ሐቤ፡ በእንተ፡ ካልእ፡ አው፡ አስተአኀዘ፡ ብእሴ፡ ካልአ፡ በከመ፡ ይገብሩ፡ አረሚ፡ ለይሰደድ፡ እምቤተ፡ ክርስቲያን
=== paragraph 20 ===
፳፡ ቀኖና። በእንተ፡ ኅጽው። እመቦ፡ ብእሲ፡ ዘተኀጽወ፡ በትዕግልት፡ አው፡ ተፈጥረ፡ ከማሁ፡ አው፡ በግብር፡ ዘይከልኦ፡ አውስቦ፡ ወኮነ፡ ዘይደሉ፡ ለጵጵስና፡ ወርቱዕ፡ ለዝንቱ፡ ለይሠየም
=== paragraph 21 ===
፳፩፡ ቀኖና። በእንተ፡ ዘኀጸወ፡ ርእሰ። እመቦ፡ ብእሲ፡ ዘኀጸወ፡ ርእሶ፡ በፈቃዱ፡ በድፍረት፡ ኢይከውኖ፡ ይሠየም፡ ውስተ፡ መዓርገ፡ ክህነት፡ እስመ፡ ቀተለ፡ ነፍሶ፡ ወኮነ፡ ፀረ፡ ለፍጥረተ፡ እግዚአብሔር
=== paragraph 22 ===
፳፪፡ ቀኖና። በእንተ፡ ዘኀጸወ፡ ርእሶ፡ እምድኅረ፡ ክህነት። እመቦ፡ ብእሲ፡ እምካህናት፡ ዘኀጸወ፡ ርእሶ፡ ሐዲሰ፡ እምድኅረ፡ ክህነት፡ ለይትመተር፡ እምሢመቱ፡ ወይሰደድ፡ እምቤተ፡ ክርስቲያን፡ ሠለስተ፡ ዓመተ፡ እስመ፡ ኮነ፡ ፀረ፡ ለሕይወቱ፡ ወአፍቀረ፡ ሞተ፡ ነፍሱ
=== paragraph 23 ===
፳፫፡ ቀኖና። በእንተ፡ መሀይምን፡ ዘኀጸወ፡ ርእሶ። እመቦ፡ መእመነ፡ ዘኀጸወ፡ ርእሶ፡ ለይሰደድ፡ እምቤተ፡ ክርስቲያን፡ ሠለስተ፡ ዓመተ፡ እስመ፡ ኮነ፡ ፀረ፡ ለፍጥረተ፡ እግዚአብሔር፡ ወቀታሌ፡ ነፍሱ
=== paragraph 24 ===
፳፬፡ ቀኖና። በእንተ፡ ካህን፡ ዘይትረከብ፡ በእኪት። እመቦ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ ዘይቴሐቶሙ፡ እመዓርገ፡ ክህነት፡ ዘተረክበ፡ በዝሙት፡ ወመሐለ፡ በሐሰት፡ አው፡ ሰረቀ፡ ለይትመተር፡ እምክህነቱ፡ ወኢይሰደድ፡ እምቤተ፡ ክርስቲያን፡ ወኢይሀሉ፡ ውስተ፡ ካህናት፡ አላ፡ ውስተ፡ ቤተ፡ ክርስቲያን፡ እስመ፡ እግዚአብሔር፡ ይቤ፡ በመጽሐፍ፡ እግዚአብሔር፡ ኢይትቤቀል፡ ካዕበ፡ በአሐቲ፡ አበሳ
=== paragraph 25 ===
፳፭፡ ቀኖና። በእንተ፡ አውስቦ፡ ካህን። እመቦ፡ ብእሲ፡ ዘቦአ፡ ውስተ፡ መልእክተ፡ ቤተ፡ ክርስቲያን፡ ወተወክፈ፡ ክህነተ፡ ለበሐውርት፡ ንሕነ፡ ንኤዝዝ፡ ከመ፡ ያውስብ፡ ለእመ፡ ፈተወ፡ ዘንተ፡ ወባዕደሰ፡ አልቦ
=== paragraph 26 ===
፳፮፡ ቀኖና። በእንተ፡ ካህን፡ ከመ፡ ኢይዝብጥ። እመሂ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ለእመ፡ ዘበጠ፡ መሀይምነ፡ ሶበ፡ ይኤብስ፡ አው፡ ይጌጊ፡ ጌጋየ፡ አው፡ ዘበጠ፡ ዘኢይአምን፡ ሶበ፡ ይጌጊ፡ አው፡ ያሐሥም፡ ለይትመተር፡ እመዓርጊሁ፡ ከመ፡ ይፍርሁ፡ ቦቱ፡ ካልኣን። እስመ፡ ርኢናሁ፡ ለኢየሱስ፡ ክርስቶስ፡ እግዚእነ፡ ወአምላክነ፡ ሶበ፡ ዘበጥዎ፡ ኢፈደየ፡ በዘቢጥ፡ ወከማሁ፡ ሶበ፡ ይፀርፉ፡ ላዕሌሁ፡ ኢፀረፈ
=== paragraph 27 ===
፳፯፡ ቀኖና። በእንተ፡ ዘያቀልል፡ ውግዘተ። እመሂ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘተሰደ፡ እምቤተ፡ ክርስቲያን፡ በእንተ፡ አበሳ፡ ዘገብረ፡ አው፡ ኮነ፡ ላዕሌሁ፡ መኣስር፡ እምሊቅ፡ ራትዕ፡ ዘየዐቢዮ፡ ወኢያሕዘኖ፡ ውእቱ፡ መኣስር፡ ወግዘት፡ ወነሥአ፡ መልእክቶ፡ በትዕግልት፡ ዘእንበለ፡ ፍርሀት፡ ወኢገረሞ፡ ወተልእከ፡ ባቲ፡ አስተሐቂሮ፡ ዘንተ፡ ለይትመተር፡ እምቤተ፡ ክርስቲያን፡ ለዝሉፉ
=== paragraph 28 ===
፳፰፡ ቀኖና። በእንተ፡ ከመ፡ ኢይንሥኡ፡ ክህነተ፡ በሕልያን። እመቦ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘአጥረየ፡ ከህነተ፡ ወመዓርገ፡ ዘይሄሉ፡ ውስቴታ፡ በሕልያን፡ ወዐስበ፡ ንዋይ፡ አው፡ አሰፈወ፡ ከመ፡ የሀብ፡ ንዋየ፡ ከመ፡ ይሠየም፡ ባቲ፡ በምክር፡ ወበጽልሑት፡ ኢይትወከፍዎ፡ ሢመቶ። ወለእመ፡ ሞአ፡ በጕሕሉት፡ ኢይኩን፡ በኀቤክሙ፡ ዘእንበለ፡ ከመ፡ መምላኬ፡ ጣዖት፡ ወምቱር፡ ውእቱ፡ ወውጉዝ፡ ወርጉም፡ ወይሰደድ፡ እምቤተ፡ ክርስቲያነ፡ እግዚአብሔር፡ ወይትገሐሡ፡ እምነገሩ፡ ወትድምርቱ፡ በከመ፡ ተገሐሥኩ፡ አነ፡ ጴጥሮስ፡ ትድምርተ፡ ሲሞን፡ መሠርይ፡ ወሰደድክዎ፡ እምቤተ፡ ክርስቲያኑ፡ ለእግዚአብሔር፡ በትእዛዘ፡ መንፈስ፡ ቅዱስ
=== paragraph 29 ===
፳፱፡ ቀኖና። በእንተ፡ ዘይመሥጥ፡ ክህነተ፡ በእደ፡ ኀይል። እመቦ፡ ኤጲስ፡ ቆጶስ፡ ዘተማሕፀነ፡ በእንተ፡ ሢመቱ፡ በሰብአ፡ አፍኣ፡ አው፡ በመኳንንት፡ አው፡ በሥዩማነ፡ ዓለም፡ ከመ፡ ይርድእዎ፡ ላዕለ፡ ትእዛዘ፡ ቤተ፡ ክርስቲያን፡ ወይፈቅድ፡ በዝንቱ፡ አድክሞ፡ ሕዝበ፡ እግዚአብሔር፡ ንጹሐ፡ ወቅዱሰ፡ እንተ፡ ወለደቶ፡ ንዋይ፡ ንጽሕት፡ እንተ፡ ይእቲ፡ ጥምቀት፡ ቅድስት፡ ወይትሌዐል፡ ላዕሌሆሙ፡ በዘኢይደሉ፡ አው፡ ይሬሲ፡ ለርእሱ፡ ቤተ፡ ክርስቲያን፡ ዘኢኮነ፡ ዚአሁ፡ ወኢሥዩም፡ ውእቱ፡ ላዕሌሃ፡ ወባቲ፡ ይእቲ፡ ቤተ፡ ክርስቲያን፡ ሊቀ፡ ካህናት፡ ካልአ፡ ወካህናተ፡ እምታሕተ፡ ውእቱ፡ ሊቅ፡ ለይደቅ፡ ውእቱ፡ ኤጲስ፡ ቆጶስ፡ እምትእዛዘ፡ ይእቲ፡ ቤተ፡ ክርስቲያን፡ ወእምትእዛዘ፡ ካህናቲሃ፡ አው፡ መነኮሳተ፡ ዘህየ፡ ዘእንበለ፡ ትእዛዘ፡ ውእቱ፡ ሊቅ፡ ዘዚአሆሙ፡ ውጉዝ፡ ውእቱ፡ ወርጉም፡ ወይትመተር፡ እምቤተ፡ ክርስቲያኑ፡ ለእግዚአብሔር፡ ውእቱኒ፡ ወኵሎሙ፡ እለ፡ ረድእዎ፡ ላዕለ፡ ዝንቱ፡ ወባልሕዎ፡ ቦቱ
=== paragraph 30 ===
፴፡ ቀኖና። በእንተ፡ ካህን፡ ዘያቀልል፡ ግዘተ። እመቦ፡ ቀሲስ፡ ዘመተሮ፡ ኤጲስ፡ ቆጶስ፡ በእንተ፡ ፅርፈት፡ ዘነበበ፡ አው፡ ኀጢአት፡ ዘተዐውቀ፡ አው፡ በፍትሕ፡ ዘረከቦ፡ አው፡ ተግሕሦ፡ ለውእቱ፡ ኤጲስ፡ ቆጶስ፡ ዘንጹሕ፡ እምነውር፡ ወእሙር፡ በርትዕ፡ ወበኂሩት፡ ዘበሕግ፡ ወያቀልሎ፡ ወይገብር፡ ለርእሱ፡ ምሥዋዐ፡ ወይነሥእ፡ እምሕዝብ፡ ወይከፍል፡ ቤተ፡ ክርስቲያኑ፡ ለእግዚአብሔር፡ ክልኤተ፡ ክፍለ፡ ለይትመተር፡ እምቤተ፡ ክርስቲያኑ፡ ለእግዚአብሔር፡ እስመ፡ አፍቀረ፡ ሢመተ፡ ለርእሱ፡ ወኀደገ፡ ትእዛዞ፡ ለኤጲስ፡ ቆጶስ፡ እንዘ፡ ይደልዎ። ወያውግዝዎ፡ ወዘንተ፡ ይግበሩ፡ ቦቱ፡ ወበኵሉ፡ ዘተመይጠ፡ ኀቤሁ፡ እምቀሳውስት፡ ወዲያቆናት፡ ወኵሉ፡ ካህናት፡ እለ፡ ተለውዎ። ወለመሀይምናንሰ፡ ያግብእዎሙ፡ ዘእንበለ፡ ኵነኔ። ወዝኒ፡ እምድኅረ፡ ነገሮሙ፡ ኤጲስ፡ ቆጶስ፡ ለእሉ፡ ካህናት፡ ወሕዝብ፡ ወየሐውር፡ ኀበ፡ ማኅደሮሙ፡ ምዕረ፡ ወካዕበ፡ ወሥልሰ፡ ከመ፡ ኢይድፍሩ፡ ገቢረ፡ ከመ፡ ምግባሮሙ፡ ወለእመ፡ ኢሰምዕዎ፡ ይግበር፡ ላዕሌሆሙ፡ ዘንተ
=== paragraph 31 ===
፴፩፡ ቀኖና። ከመ፡ ኢይትወከፍ፡ ኤጲስ፡ ቆጶስ፡ ዘአውገዘ፡ ካልኡ። እመቦ፡ ቀሲስ፡ አው፡ ዲያቆን፡ ዘሰዐሮ፡ ኤጲስ፡ ቆጶስ፡ በእንተ፡ ቃለ፡ ክህደት፡ አው፡ ፅርፈት፡ ላዕለ፡ እግዚአብሔር፡ ኢይከውኖሙ፡ ለባዕዳን፡ ኤጲስ፡ ቆጶሳት፡ ይትወከፍዎ፡ ዘእንበለ፡ ዳእሙ፡ ለእመ፡ ፈለሰ፡ ውእቱ፡ ዘሰዐሮ፡ አው፡ ተስዕረ፡ አው፡ ሞተ፡ ወእመሰ፡ ሞተ፡ ኮነ፡ ብዉሐ፡ ለዘ፡ ተሠይመ፡ ህየንቴሁ፡ ወዓዲ፡ ብዉሕ፡ ለባዕድኒ፡ ዘይሠየም
=== paragraph 32 ===
፴፪፡ ቀኖና። በእንተ፡ ኤጲስ፡ ቆጶሳት። ኢይትወከፉ፡ ካህነ፡ ባዕደ፡ ዘእንበለ፡ በመባሕት፡ እምብሔሩ። ኢይትወከፍ፡ ኤጲስ፡ ቆጶስ፡ ካልአ፡ ኤጲስ፡ ቆጶስ፡ ወቀሳውስት፡ ወዲያቆናት፡ ባዕደ፡ እለ፡ መጽኡ፡ እምበሓውርት፡ ርሑቅ፡ ወኢይረስይዎሙ፡ ከመ፡ ካህናት፡ ዘእንበለ፡ ዳእሙ፡ ለእመ፡ ቦሙ፡ መጽሐፈ፡ መባሕት፡ በዘ፡ ይደልዎሙ። ወእመሰ፡ ቦሙ፡ መጽሐፈ፡ ይጠይቁ፡ ግብሮሙ፡ ወእመ፡ ኮንዎሙ፡ ሰማዕተ፡ ሰብእ፡ መእመናን፡ ወኄራን፡ በከመ፡ ይብሉ፡ ይትወከፍዎሙ፡ በሠናይ፡ ተወክፎ። ወእመሰ፡ ኢኮንዎሙ፡ ሰማዕተ፡ በዘከማሁ፡ የሀብዎሙ፡ ዘይፈቅዱ፡ ወኢይደመሩ፡ ምስለ፡ ውሉደ፡ ቤተ፡ ክርስቲያን፡ ቅድስት፡ እስመ፡ ይከውን፡ ዘከመ፡ እሉ፡ ብዙኅ፡ ዘይጽሕፉ፡ ሎሙ፡ መጻሕፍተ፡ እንዘ፡ ኢያአምርዎሙ፡ ጥዩቀ፡ አእምሮ
=== paragraph 33 ===
፴፫፡ ቀኖና። በእንተ፡ ትሕትናሁ፡ ለኤጲስ፡ ቆጶስ፡ ወዐቂበ፡ ዘይደልዎ። ይደልዎ፡ ለኤጲስ፡ ቆጶስ፡ ከመ፡ ያእምር፡ ዘይደልዎ፡ ለእመ፡ ይፈቅድ፡ ዘአዘዝነ፡ ወይሥራዕ፡ ርእሶ፡ ከማሁ፡ ወያርትዕ፡ ለሊሁ፡ እምቅድመ፡ ሕዝብ፡ ከመ፡ ያእምር፡ እግዚአብሔር፡ በላዕሌሁ። ወለእመ፡ ኮነ፡ ከማሁ፡ ኢይግበር፡ ወኢምንተኒ፡ በፈቃዱ፡ አላ፡ ያእምር፡ ክብረ፡ ሊቁ፡ ዘላዕሌሁ፡ እመኒ፡ ጳጳስ፡ አው፡ ሊቀ፡ ጳጳሳት፡ ወኢይግበር፡ በፈቃዱ፡ ዘእንበለ፡ ቀሊላተ፡ ዘይትፈቀድ፡ ለሰብአ፡ ሢመቱ፡ ዘቦቱ፡ ይረትዕ፡ መንበሩ፡ ወኢይግበር፡ ሊቀ፡ ጳጳሳት፡ ወጳጳስ፡ ዘእንበለ፡ በምክረ፡ ኤጲስ፡ ቆጶሳት፡ ወበፈቃዶሙ፡ ወዝንቱኒ፡ በእንተ፡ ዐቢይ፡ ግብር
=== paragraph 34 ===
፴፬፡ ቀኖና። በእንተ፡ ጳጳስ፡ ከመ፡ ኢይሢም፡ ለካልእ፡ ብሔር። ኢይከውኖ፡ ለጳጳስ፡ ይሢም፡ በኀበ፡ ዘኢሢመቱ፡ ቀሳውስተ፡ ወዲያቆናተ። ወለእመ፡ ተዐደወ፡ ወገብረ፡ ከማሁ፡ አው፡ ስምዐ፡ ኮኑ፡ ላዕሌሁ፡ ከመ፡ ገብረ፡ ከማሁ፡ ዘእንበለ፡ መባሕተ፡ ሰብአ፡ ውእቱ፡ ብሔር፡ ይስዐር፡ ወእለኒ፡ ሤሞሙ
=== paragraph 35 ===
፴፭፡ ቀኖና። በእንተ፡ ዘይደሉ፡ ለኤጲስ፡ ቆጶስ፡ ይግበር። እመቦ፡ ብእሲ፡ ዘተሠይመ፡ ኤጲስ፡ ቆጶስ፡ ወኢቆመ፡ በግብረ፡ ኤጲስ፡ ቆጶስና፡ ወኢይቀውም፡ በመዓርጊሁ፡ ወኢተወክፈ፡ በርትዕ፡ ወኢተልእከ፡ ለቤተ፡ ክርስቲያኑ፡ ለእግዚአብሔር፡ ዘተከለ፡ ላቲ፡ ነፍሶ፡ ወኢአኀዘ፡ ትእዛዘ፡ በከመ፡ ይደሉ፡ ይሰዐር፡ እምኔሆሙ፡ እስከ፡ ይትወከፍ፡ ግብራ። ወለእመ፡ ተሠይመ፡ ኀበ፡ ቤተ፡ ክርስቲያን፡ ዘእግዚአብሔር፡ ወኢተወክፍዎ፡ ሰብእ፡ ወኢኮነ፡ ሢመቱ፡ በፈቃዱ፡ አላ፡ ዘኀረዮ፡ እግዚአብሔር፡ ወሤሞ፡ ወመንፈቀ፡ ሰብአ፡ ሀገሩ፡ ወባሕቱ፡ ይጸልእዎ፡ ካህናት፡ በተቃሕዎ፡ ወጽልእ፡ ከመ፡ ኢይኩን፡ ሥዩመ፡ ላዕሌሆሙ፡ ወመንፈቆሙ፡ ከማሁ፡ ለይኩን፡ ኤጲስ፡ ቆጶስ፡ እመሂ፡ አፍቀሩ፡ አው፡ ጸልኡ። ወለእመቦ፡ ዘተፈልጠ፡ እምካህናተ፡ ውእቱ፡ መካን፡ ለይትመተሩ፡ እሉ፡ ካህናት፡ እስመ፡ ኢተሰናአዉ፡ ወኢተአዘዙ፡ በፍቅር
=== paragraph 36 ===
፴፮፡ ቀኖና። በእንተ፡ ጉባኤ፡ ኤጲስ፡ ቆጶሳት፡ ካዕበ፡ በበዓመት። አዘዝነ፡ ከመ፡ ይኩን፡ ጉባኤ፡ በዓመት፡ ክልኤ፡ ጊዜ፡ ወይትሐተቱ፡ በበይናቲሆሙ፡ በአእምሮ፡ ፈሪሀ፡ እግዚአብሔር፡ ወበእንተ፡ ዘይትሐደስ፡ በኀቤሆሙ፡ ነገራት፡ በእንተ፡ ሕግ፡ ወበግብረ፡ አብያተ፡ ክርስቲያናቲሆሙ፡ ወዘተሰወረ፡ እመንፈቆሙ፡ ይፈክሩ፡ ሎቱ፡ ወያርእዩ። ወለእመቦ፡ ፍትሐ፡ ማእከለ፡ ሰብእ፡ ይሥልጥዎ፡ ወይዕርቁ፡ ማእከለ፡ ሕዝብ። ወይኩን፡ ቀዳሚት፡ ጉባኤ፡ በራብዕ፡ ሰንበት፡ ዘጰንጠቈስቴ፡ ወውእቱ፡ ወርኅ፡ በሶንስ፡ በሐሳበ፡ ግብጻዊያን፡ ዘውእቱ፡ ግንቦት፡ ወካልእታ፡ ጉባኤ፡ አመ፡ ፲ወ፪፡ ለወርኀ፡ በአባ፡ ዘውእቱ፡ ጥቅምት
=== paragraph 37 ===
፴፯፡ ቀኖና። በእንተ፡ ትእዛዘ፡ ንዋየ፡ ቤተ፡ ክርስቲያን። ኵሉ፡ ንዋየ፡ ቤተ፡ ክርስቲያን፡ ወአልባሲሃ፡ ይኩን፡ ውስተ፡ እዴሁ፡ ለኤጲስ፡ ቆጶስ። ይምልክ፡ ዐቂቦቶ፡ ለእመ፡ ይደልዎ፡ ወኮነ፡ ማእመነ፡ ወውእቱ፡ ይኩን፡ ዘይኤዝዝ፡ ወይከፍል፡ በከመ፡ ይደሉ፡ ወይረትዕ፡ በከመ፡ አዘዘ፡ እግዚአብሔር፡ ለካህናትኒ፡ በከመ፡ መናብርቲሆሙ፡ ወመዓርጊሆሙ። ቦ፡ ለዘያልህቅ፡ ወቦ፡ ለዘያንእስ፡ ወኢይደልዎ፡ ይግበር፡ ዘንተ፡ በሥምረቱ። ወኢይክፍል፡ አዕቢዮ፡ ለፍቁራኒሁ፡ ወመቅርቡ፡ ወለእመ፡ መጽኡ፡ ነዳያን፡ የሀቦሙ፡ ሲሳዮሙ፡ በዐቅም፡ ወአኮ፡ በአብዝኆ፡ እስመ፡ ውእቱ፡ ይደልዎሙ፡ ለካህናት፡ ወኢያብዝኃ፡ ሲሳዮ፡ ለርእሱ፡ ወኢይልበስ፡ አልባሰ፡ ክቡረ፡ ከመ፡ ኢያህጕል፡ ንዋየ፡ ቤተ፡ ክርስቲያን፡ ወይትኀሠሦ፡ እግዚአብሔር፡ በእንቲአሃ
=== paragraph 38 ===
፴፰፡ ቀኖና። በእንተ፡ ትእዛዘ፡ ቤተ፡ ክርስቲያን፡ ለኤጲስ፡ ቆጶስ። ኢይግበር፡ መኑሂ፡ እምቀሳውስት፡ ወዲያቆናት፡ ወኢምንተኒ፡ በቤተ፡ ክርስቲያን፡ ዘእንበለ፡ በፈቃደ፡ ኤጲስ፡ ቆጶስ፡ እስመ፡ ውእቱ፡ ዘተአምነ፡ ላዕለ፡ ቤተ፡ ክርስቲያኑ፡ ለእግዚአብሔር፡ ወውእቱ፡ ዘይትሐተት፡ በእንተ፡ ነፍሰ፡ ሕዝብ
=== paragraph 39 ===
፴፱፡ ቀኖና። በእንተ፡ ዐቂበ፡ ንዋየ፡ ኤጲስ፡ ቆጶስ፡ ወንዋየ፡ ቤተ፡ ክርስቲያን። ለይኩን፡ ንዋየ፡ ኤጲስ፡ ቆጶስ፡ ፍሉጠ፡ እምንዋየ፡ ቤተ፡ ክርስቲያን፡ ከመ፡ ይኩን፡ ኤጲስ፡ ቆጶስ፡ ሥሉጠ፡ ላዕለ፡ ንዋየ፡ ርእሱ፡ ከመ፡ ይግበር፡ ዘፈቀደ፡ ወአብደረ፡ ወያውርሶ፡ ለዘ፡ ይፈቅድ፡ ወያፈቅር፡ እምሰብኡ፡ አው፡ ያውርስ፡ ለቤተ፡ ክርስቲያን፡ እስመ፡ ብዉሕ፡ ሎቱ፡ ወኢያህጕል፡ ንዋዮ፡ በምክንያተ፡ ንዋየ፡ ቤተ፡ ክርስቲያን፡ ወኢንዋየ፡ ቤተ፡ ክርስቲያን፡ በምክንያተ፡ ንዋዩ። እስመቦ፡ እንጋ፡ ኤጲስ፡ ቆጶስ፡ ዘመደ፡ አው፡ ውሉደ፡ አው፡ ብእሲተ፡ አው፡ ካልአ፡ አው፡ ገብረ፡ ዘይፈቅድ፡ መካኖ፡ ወያውርሶሙ፡ በከመ፡ ፈቀደ፡ ወዝንቱ፡ ውእቱ፡ ርትዕ፡ በቅድመ፡ እግዚአብሔር። ወለእመ፡ ኮነ፡ ከመዝ፡ ኢይትሀጐል፡ ንዋየ፡ ቤተ፡ ክርስቲያን፡ ወኢየኀሥሥ፡ ኤጲስ፡ ቆጶስ፡ ወኢወራስያን፡ ዘኢኮነ፡ ዚአሆሙ፡ ወኢይትጋአዙ፡ በላዕለ፡ ንዋየ፡ ቤተ፡ ክርስቲያን፡ ወኢሰብአ፡ ቤተ፡ ክርስቲያን፡ በላዕለ፡ ንዋየ፡ ኤጲስ፡ ቆጶስ፡ ዘእንበለ፡ ዘአብሖ፡ ለሊሁ፡ ከመ፡ ኢይትጋአዙ፡ ሰብአ፡ ቤቱ፡ ወአዝማዲሁ፡ በእንተ፡ ንዋዩ፡ ወንዋየ፡ ቤተ፡ ክርስቲያን፡ ወይከውኖ፡ ኀሳረ፡ ወሐሜተ፡ ወሕሡመ፡ ዜና፡ እምድኅረ፡ ሞቱ፡ ወይከውን፡ ውእቱ፡ ዕቅፍተ፡ ለሕዝበ፡ እግዚአብሔር
=== paragraph 40 ===
፵፡ ቀኖና። በእንተ፡ ኤጲስ፡ ቆጶስ፡ ከመ፡ ይኩን፡ ሥሉጠ፡ በትእዛዘ፡ ንዋየ፡ ቤተ፡ ክርስቲያን። ንሕነ፡ ንኤዝዝ፡ ከመ፡ ይኩን፡ ሥሉጠ፡ ላዕለ፡ ኵሉ፡ ንዋየ፡ ቤተ፡ ክርስቲያን፡ ለእመ፡ ኮነ፡ ልብወ፡ እስመ፡ ሶበ፡ አመናሁ፡ ላዕለ፡ ነፍሰ፡ ሰብእ፡ ክቡር፡ ወዐቢይ፡ ይደልዎ፡ ይትአመን፡ ላዕለ፡ ንዋየ፡ ቤተ፡ ክርስቲያን፡ ከመ፡ ይክፍሎ፡ ላዕለ፡ ቀሳውስት፡ ወዲያቆናት፡ ወይኩን፡ በፈሪሀ፡ እግዚአብሔር፡ በፍርሃት፡ ወበንጽሕ። ወይንሣእ፡ ኤጲስ፡ ቆጶስኒ፡ እምኔሁ፡ መጠነ፡ መፍቅዱ፡ ውእቱኒ፡ ወአኃዊሁ፡ ካህናት፡ ከመ፡ ኢያሕጽጾሙ፡ ወኢምንተኒ፡ እመፍቅዶሙ፡ እስመ፡ ሕገ፡ እግዚአብሔር፡ አዘዘ፡ ከመዝ። ኵሉ፡ ዘኮነ፡ ፅሙደ፡ ለመልእክተ፡ ምሥዋዕ፡ ይኩን፡ ሲሳዩ፡ እምንዋየ፡ ምሥዋዕ፡ ወከማሁ፡ ሐራዊ፡ ዘተአዘዘ፡ ውስተ፡ ግብረ፡ ንጉሥ፡ ኢይክልእዎ፡ ሲሳዮ፡ ዘለርእሱ፡ ወዘይጼዐን፡ ወንዋየ፡ ሐቅሉ፡ ዘቦቱ፡ ይትቃተል፡ ውስተ፡ ፀብአ፡ ፀሩ፡ ለንጉሥ
=== paragraph 41 ===
፵፩፡ ቀኖና። በእንተ፡ ትእዛዘ፡ ካህናት፡ እምእኩይ። እመቦ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘይለምድ፡ ቍጥዓ፡ ወስካረ፡ ወይነብር፡ በእከይ፡ ዘይገብር፡ ወኀደገ፡ ገቢረ፡ ሠናይ፡ ለይትመየጥ፡ እምኔሁ፡ ወእመአኮ፡ ይስዐር፡ እምሢመቱ። ወኵሉ፡ ብእሲ፡ እመሀይምናን፡ ዘከመዝ፡ ግብሩ፡ ይሰደድ፡ እምቤተ፡ ክርስቲያኑ፡ ለእግዚአብሔር፡ ወኵሉ፡ ዘእምካህናት፡ ዘገብረ፡ ከመዝ፡ አው፡ ደፈረ፡ ለዘ፡ ኢይደሉ፡ ይትገሠጽ፡ እምኔሁ፡ ወእመአኮ፡ ይትመተር፡ እምክህነቱ
=== paragraph 42 ===
፵፪፡ ቀኖና። በእንተ፡ ርዴ። እመሂ፡ እጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘኀሠሠ፡ እምኀበ፡ ዘለቀሐ፡ ረድኤተ፡ አው፡ ርዴ፡ ይትመተር፡ እመዓርጊሁ፡ ዘእንበለ፡ ዳእሙ፡ ለእመ፡ ተመይጠ፡ ወኀደገ፡ ውእተ፡ ግብረ
=== paragraph 43 ===
፵፫፡ ቀኖና። በእንተ፡ ተደምሮ፡ ምስለ፡ ዕልዋን። እመቦ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘጸለየ፡ ምስለ፡ ዕልዋን፡ እለ፡ ይሰመዩ፡ አርሲስ፡ በነገረ፡ ጽርእ፡ ለይስዐሮ፡ ሊቁ፡ ዘላዕሌሁ። ለኤጲስ፡ ቆጶስ፡ ይስዐሮ፡ ጳጳስ፡ አው፡ ሊቀ፡ ጳጳሳት፡ ወለቀሲስ፡ ወለዘይቴሐቶ፡ ይስዐሮሙ፡ ኤጲስ፡ ቆጶስ። ወለእመሰ፡ አብሖሙ፡ ይባኡ፡ ምስሌሁ፡ ውስተ፡ ምሥዋዕ፡ ወአቀሞሙ፡ ውስተ፡ ኍልቈ፡ ካህናት፡ ይሰዐር፡ ውእቱኒ፡ እመዓርጊሁ
=== paragraph 44 ===
፵፬፡ ቀኖና። በእንተ፡ ጥምቀተ፡ ዕልዋን። እመቦ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘተወክፈ፡ ጥምቀተ፡ ዕልዋን፡ አው፡ ቀርበ፡ ቍርባኖሙ፡ ይትመተር፡ እመዓርጊሁ፡ እስመ፡ አልቦ፡ ለሰይጣን፡ ሰላመ፡ ምስለ፡ ክርስቶስ፡ ወአልቦ፡ መክፈልተ፡ ለመሀይምን፡ ምስለ፡ ዕልው፡ ወኢለራትዕ፡ ምስለ፡ ጠዋይ
=== paragraph 45 ===
፵፭፡ ቀኖና። በእንተ፡ ድሕረት። እመቦ፡ ብእሲ፡ ሕዝባዊ፡ ዘአውፅኣ፡ ለብእሲቱ፡ እምቤቱ፡ ዘእንበለ፡ ምክንያት፡ አው፡ ግብር፡ በዘ፡ ይደልዋ፡ አው፡ አውሰበ፡ ካልእተ፡ ምስሌሃ፡ አው፡ ድሕርተ፡ በዝሙት፡ ለይሰደድ፡ እምቤተ፡ ክርስቲያን
=== paragraph 46 ===
፵፮፡ ቀኖና። በእንተ፡ ዘየሐርም፡ ንጹሐ። እመቦ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ ዘይቴሐቶሙ፡ እምካህናት፡ ዘአበየ፡ አውስቦ፡ ወበሊዐ፡ ሥጋ፡ ወሰቲየ፡ ወይን፡ ከመዘ፡ ርኩስ፡ ወይሬሲ፡ ርእሶ፡ ከመ፡ ዘይኄይስ፡ እምባዕድ፡ ወከመ፡ ዘኢይደልዎ፡ ወኢበልዖ፡ በዝንቱ፡ ምክንያት፡ ወይገብር፡ ዘንተ፡ በእበዱ፡ እስመ፡ ኵሉ፡ ዘፈጠረ፡ እግዚአብሔር፡ ሠናይ፡ ውእቱ፡ ፈድፋደ፡ ወተባዕትኒ፡ ወአንስትኒ፡ እሙንቱ፡ ፍጥረተ፡ እግዚአብሔር፡ ሠናይ፡ ወአዳም። አላ፡ ውእቱ፡ ዘይፀርፍ፡ ላዕለ፡ ፍጥረተ፡ እግዚአብሔር፡ ወይክሕድ፡ ከመ፡ ኢኮነ፡ ሠናየ፡ ፍጥረቱ፡ ለይትመተር፡ እምቤተ፡ ክርስቲያኑ፡ ለእግዚአብሔር፡ ወከማሁ፡ መሀይምናንሂ። ወዘሰ፡ ኀደገ፡ በፍኖተ፡ አምልኮ፡ ወተፀምዶ፡ ወኀዲገ፡ ፍትወት፡ ለፈሪሀ፡ እግዚአብሔር፡ ወለሥምረቱ፡ ወውእቱሰ፡ ብዉሕ፡ ሎቱ
=== paragraph 47 ===
፵፯፡ ቀኖና። በእንተ፡ ኃጥእ፡ ዘይኔስሕ። እመቦ፡ ኤጲስ፡ ቆጶስ፡ አው፡ ቀሲስ፡ ዘኢይትወከፍ፡ ንስሓሁ፡ ለኃጥእ፡ ሶበ፡ ይኔስሕ፡ ኀቤሁ፡ ወይትመየጥ፡ እምኀጢኣቱ፡ ለይትመተር፡ እምቤተ፡ ክርስቲያኑ፡ ለእግዚአብሔር፡ እስመ፡ ዐለወ፡ ቃለ፡ እግዚእነ፡ ክርስቶስ፡ ዘይቤ፡ ይከውን፡ በሰማይ፡ ፍሥሓ፡ ዐቢየ፡ በእንተ፡ አሐዱ፡ ኃጥእ፡ ዘይኔስሕ፡ ወይገብእ፡ ኀበ፡ እግዚአብሔር፡ እስመ፡ ሶበ፡ ይገብእ፡ ይትወከፎ
=== paragraph 48 ===
፵፰፡ ቀኖና። በእንተ፡ በሊዐ፡ ሥጋ፡ በበዓላት። እመቦ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘኢበልዐ፡ ሥጋ፡ ወኢሰትየ፡ ወይነ፡ በመዋዕለ፡ በዓላተ፡ ፋሲካ፡ ለይትመተር፡ እምቤተ፡ ክርስቲያኑ፡ ለእግዚአብሔር፡ እስመ፡ ኮነ፡ መርሓ፡ ለሙስና፡ ሰብእ፡ ወተለዎ፡ ለማኒ፡ ፀረ፡ ክርስቶስ
=== paragraph 49 ===
፵፱፡ ቀኖና። በእንተ፡ በሊዕ፡ ወሰቲይ፡ ለካህናት፡ በካልእ፡ ፍኖት። እመቦ፡ ብእሲ፡ እምካህናት፡ ዘበልዐ፡ መባልዕተ፡ በውስተ፡ ምዝፋናት፡ ዘውእቱ፡ ማኅደረ፡ እኩያን፡ ወለእመ፡ ሰትየ፡ ስቴ፡ ስካር፡ በኀበ፡ ማኅደረ፡ ዘማዊያን፡ ወይደመር፡ ምስለ፡ እለ፡ አልቦሙ፡ ሠናየ፡ አላ፡ ባሕቱ፡ ለእመ፡ ኮነ፡ ነግደ፡ ወይበልዕ፡ በውስተ፡ ማኅደረ፡ ነግድ፡ አው፡ ይሣየጥ፡ መብልዐ፡ ወይወስድ፡ ኀበ፡ ማኅደሩ፡ እስመ፡ ሰብእ፡ ይትመነደቡ፡ በመንግድ። ወእመአኮ፡ ይሰዐር፡ እመዓርጊሁ
=== paragraph 50 ===
፶፡ ቀኖና። በእንተ፡ ዘጸዐለ፡ ኤጲስ፡ ቆጶሰ፡ ወባዕደ። እመቦ፡ ብእሲ፡ ዘጸዐለ፡ ኤጲስ፡ ቆጶሰ፡ አው፡ ረገሞ፡ ወይቤ፡ ኢያአምር፡ ወረሰዮ፡ ከመ፡ አብድ፡ ለይትመተር፡ እመዓርጊሁ። ወከማሁ፡ ኤጲስ፡ ቆጶስኒ፡ ለእመ፡ ረገመ፡ ካህነ፡ አው፡ ጸዐለ፡ ከመዝ፡ ለይትመተር። እስመ፡ ተብህለ፡ በሕግ፡ ለርእሰ፡ ሕዝብከ፡ ኢትንብብ፡ እኩየ፡ ወኢትርግም
=== paragraph 51 ===
፶፩፡ ቀኖና። በእንተ፡ ዘይረግም፡ ካህናተ፡ እምሕዝብ። እመቦ፡ ብእሲ፡ እምካህናት፡ አው፡ እመሀይምናን፡ ዘጸዐለ፡ ቀሲሰ፡ አው፡ ዲያቆነ፡ አው፡ ረገሞሙ፡ በከመ፡ አቅደምነ፡ ነጊረ፡ ለይትፈለጥ
=== paragraph 52 ===
፶፪፡ ቀኖና። በእንተ፡ ዘይሳለቅ፡ ላዕለ፡ ድውያን። እመቦ፡ ብእሲ፡ እምካህናት፡ ወሕዝባዊያን፡ ዘተሳለቀ፡ አው፡ ሠሐቀ፡ ብእሴ፡ ጽሙመ፡ አው፡ ዕዉረ፡ አው፡ በሃመ፡ አው፡ ሐንካሰ፡ አው፡ ድዉየ፡ አው፡ መፃጕዐ፡ አው፡ ዝልጉሰ፡ ለይሰዐር፡ እስመ፡ ከመዝ፡ ይቤ፡ እግዚአብሔር፡ በውስተ፡ ሕግ፡ ኢትግበር፡ ቅድመ፡ ዕዉር፡ ዕቅፍተ፡ ወኢታምዕዖ፡ ለበሃም። ወኢይጽዐል፡ መነሂ፡ መሀይምነ፡ ዘረከቦ፡ መንሱት፡ እምኀበ፡ እግዚአብሔር፡ እስመ፡ ውእቱ፡ እምኀበ፡ እግዚአብሔር። ያዐጽብ፡ ወያቀልል፡ ያነዲ፡ ወያብዕል፡ ይቀትል፡ ወያሐዩ፡ ያደዊ፡ ወይፌውስ። ወዘገብረ፡ ከመዝ፡ እመሂ፡ ካህን፡ ይስዐር፡ እምክህነቱ፡ ወእመሂ፡ ሕዝባዊ፡ ይክልእዎ፡ ቍርባነ፡ ወዝንቱ፡ ፍዳሁ፡ ወስዱድ፡ ውእቱ፡ እምሕገ፡ እግዚአብሔር፡ ዘብሉይ፡ ወዘሐዲስ
=== paragraph 53 ===
፶፫፡ ቀኖና። በእንተ፡ ገሥጾ፡ ሰብእ። እመቦ፡ ኤጲስ፡ ቆጶስ፡ አው፡ ቀሲስ፡ ዘተሠይመ፡ ለብሔር፡ ወገደፎሙ፡ ለካህናት፡ ወለሕዝብ፡ ወኢኀወጾሙ፡ በትእዛዝ፡ ወኢመሀሮሙ፡ ፈሪሀ፡ እግዚአብሔር፡ ለይስዐር፡ እምኔሆሙ፡ ወለእመ፡ ነበረ፡ በውእቱ፡ አስትቶ፡ ለይትመተር፡ እመዓርጊሁ
=== paragraph 54 ===
፶፬፡ ቀኖና። በእንተ፡ መፍቅዶሙ፡ ለካህናት። እመቦ፡ ኤጲስ፡ ቆጶስ፡ አው፡ ቀሲስ፡ ዘተሠይመ፡ ላዕለ፡ ሀገር፡ ወይሬኢ፡ ብእሴ፡ እምካህናት፡ ጽኑሰ፡ አው፡ ምንዱበ፡ ወኢወሀቦ፡ መፍቅዶ፡ ወኢከልአ፡ ተጽናሶ፡ ወኢረድኦ፡ በንዴቱ፡ በዘረከቦ፡ ምንዳቤ፡ ለይሰዐር፡ ተስዒረ፡ ወይርከቦ፡ ኵነኔ
=== paragraph 55 ===
፶፭፡ ቀኖና። በእንተ፡ መጻሕፍት፡ ዘኢይደሉ፡ ለቤተ፡ ክርስቲያን። እመቦ፡ ብእሲ፡ ዘነሥአ፡ መጻሕፍተ፡ ሐሰት፡ ዘሤሙ፡ ዕልዋን፡ እለ፡ እሙንቱ፡ ጸላእተ፡ ክርስቶስ፡ ወአብአ፡ ውስተ፡ ቤተ፡ ክርስቲያን፡ ወኈለቋ፡ ምስለ፡ መጻሕፍት፡ ቅዱሳት፡ ለምርዓት፡ ወለአማስኖ፡ ሕዝብ፡ ለይሰደድ፡ እምቤተ፡ ከርስቲያን፡ ወይስዐር
=== paragraph 56 ===
፶፮፡ ቀኖና። በእንተ፡ ዝሙት፡ ወባዕድኒ፡ ዘኢይደሉ። እመቦ፡ ብእሲ፡ መሀይምን፡ ዘወድቀ፡ በአብዝኆ፡ ዝሙት፡ ገሃደ፡ እስከ፡ ይከውኖ፡ እምዘማዊያት፡ ውሉደ፡ ወባዕድኒ፡ እኩይ፡ ዘአምሳለ፡ ሥራይ፡ ወዝሙት፡ በጣዖት፡ የሀብዎ፡ ይላሑ፡ ላዕለ፡ ነፍሱ፡ ወይነስሕ። ወኢይሠየም፡ በምንትኒ፡ እምክህነት፡ ለእመ፡ ፈቀደ፡ ውእተ። ወለእመ፡ አነኀ፡ በሠናይ፡ ተነስሖ፡ ይትወከፍዎ
=== paragraph 57 ===
፶፯፡ ቀኖና። በእንተ፡ ዘክሕደ፡ ሕጎ። እመቦ፡ ብእሲ፡ እምካህናት፡ ወሕዝባዊያን፡ ዘክሕደ፡ ሕጎ፡ እምፍርሀተ፡ አይሁድ፡ ወአረሚ፡ ወዕልዋን፡ ወኢያግሀደ፡ ግብረ፡ ሕጉ፡ ወኮኖ፡ መርሐ፡ ለክሒድ፡ ወዐሊው፡ በስመ፡ ክርስቶስ፡ ይሰደድ፡ እምቤተ፡ ክርስቲያን። ወለእመ፡ ክሕደ፡ ክህነቶ፡ ይሰዐር፡ እመዓርጊሁ፡ ወለእመ፡ ነስሐ፡ ይትወከፍዎ፡ ምስለ፡ መሀይምናን
=== paragraph 58 ===
፶፰፡ ቀኖና። በእንተ፡ በሊዐ፡ ሕሩም። እመቦ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ አው፡ ባዕድ፡ እምካህናት፡ ዘበልዐ፡ ሥጋ፡ ዘኢተሐርደ፡ አው፡ ዘነሰኮ፡ ተኵላ፡ አው፡ ማውታ፡ አው፡ ባዕደ፡ እምውታን፡ ለይስዐር፡ እምሢመቱ። እስመ፡ ዘንተኒ፡ ከልአ፡ ሕግ፡ ወለእመኒ፡ ሕዝባዊ፡ ይሰደድ
=== paragraph 59 ===
፶፱፡ ቀኖና። በእንተ፡ ጾመ፡ ሰንበት፡ ወእሑድ። እመቦ፡ ብእሲ፡ እምካህናት፡ ወሕዝባዊያን፡ ዘተገበረ፡ ጾመ፡ በዕለተ፡ ሰንበት፡ ወዕለተ፡ እሑድ፡ ዘእንበለ፡ አሐቲ፡ ሰንበት፡ እንተ፡ ይእቲ፡ ሰንበተ፡ ፋሲካ፡ ለይትመተር፡ ካህን፡ እምሢመቱ፡ ወሕዝባዊ፡ እምቍርባን
=== paragraph 60 ===
፷፡ ቀኖና። በእንተ፡ ዘቦአ፡ ምኵራበ፡ አይሁድ። እመቦ፡ ብእሲ፡ ካህን፡ አው፡ ሕዝባዊ፡ መሀይምን፡ ዘቦአ፡ ምኵራበ፡ አይሁድ፡ ለጸሎት፡ አው፡ ቤተ፡ ክርስቲያነ፡ ዕልዋን፡ ለተፈውሶ፡ በኀቤሆሙ፡ ወጸሎት፡ ለይትመተር፡ እመዓርጊሁ፡ ወይሰደድ፡ እምቤተ፡ ክርስቲያን
=== paragraph 61 ===
፷፩፡ ቀኖና። በእንተ፡ ዘቀተለ፡ ዘእንበለ፡ ፈቃዱ። እመቦ፡ ብእሲ፡ እምካህናት፡ ዘተባአሰ፡ ምስለ፡ ካልእ፡ ብእሲ፡ ወዘበጦ፡ ወሞተ፡ ባቲ፡ ለይስዐር፡ እምሢመቱ፡ ወለእመ፡ ኮነ፡ ሕዝባዊ፡ ይሰደድ፡ እምቤተ፡ ክርስቲያኑ፡ ለእግዚአብሔር፡ ቅድስት
=== paragraph 62 ===
፷፪፡ ቀኖና። በእንተ፡ ዘአማሰነ፡ ድንግለ። እመቦ፡ ብእሲ፡ ዘተዐገለ፡ ወለተ፡ ድንግለ፡ እንተ፡ ተፍኅረት፡ ለካልእ፡ ወኢኮነት፡ ሎቱ፡ ወኀየላ፡ ላዕለ፡ ነፍሳ፡ ወአኅሰራ፡ ድንግልናሃ፡ ለይስዐር፡ ከመ፡ ይትገሠጽ። ወኢይከውኖ፡ ያውስብ፡ ካልእተ፡ አላ፡ የአዝዝዎ፡ ከመ፡ ያውስባ፡ በከመ፡ አፍቀራ፡ ለነፍሱ፡ ወእመሂ፡ ኮነት፡ ነዳይተ
=== paragraph 63 ===
፷፫፡ ቀኖና። በእንተ፡ ዘአውሰበ፡ ክልኤተ። እመሂ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘአውሰበ፡ ክልኤተ፡ እምቅድመ፡ ይሠየም፡ ለይትመተር፡ ውእቱሂ፡ ወዘሤሞ። አላ፡ ለእመ፡ ነገረ፡ ዘሤሞ፡ ከመ፡ ኢያእመረ፡ ግብሮ፡ ወይደልዎ፡ ለውእቱ፡ ይትመተር፡ ባሕቲቱ፡ እስመ፡ ኀብአ፡ ኀጢአቶ፡ በአፍቅሮ፡ ክህነት። ወቦ፡ እምእሉ፡ እለ፡ ይሠየሙ፡ ዳግመ። ወዘተሠይመ፡ ዳግመ፡ ለይስዐር፡ እምሢመቱ፡ ወዘሤሞሂ። አላ፡ ለእመ፡ ነገረ፡ ከመ፡ ዘሤሞ፡ ቀዳሚ፡ ካህነ፡ አረሳዊ፡ ውእቱ፡ እምቅድመ፡ ጥምቀት፡ ዘበአማን፡ እስመ፡ ክህነቶሙ፡ ለዕልዋን፡ ኢኮነት፡ ክህነተ፡ ወኢኮነ፡ ብእሲ፡ ዘይትወከፍ፡ ጥምቀቶሙ፡ መሀይመነ፡ ወካህነ
=== paragraph 64 ===
፷፬፡ ቀኖና። በእንተ፡ ትእዛዘ፡ ጾም። እመቦ፡ ብእሲ፡ ዘኢይጸውም፡ ዐቢየ፡ ጾመ፡ ፵፡ ዕለተ፡ ወረቡዐ፡ ወዐርበ፡ ዘወትር፡ ከመ፡ ሕገ፡ ቤተ፡ ክርስቲያን፡ ዘአዘዝነ፡ ለይስዐር፡ እምሢመቱ፡ ለእመ፡ ኢከልኦ፡ እምኔሃ፡ ሕማም፡ ዘሥጋ፡ አው፡ ምክንያተ፡ ዕውቅ፡ ዘያመከኒ፡ ባቲ። ወለእመ፡ ገብረ፡ ከማሁ፡ ሕዝባዊ፡ ለይሰደድ
=== paragraph 65 ===
፷፭፡ ቀኖና። በእንተ፡ አምኃሆሙ፡ ለአይሁድ። እመቦ፡ ብእሲ፡ እምካህናት፡ ወሕዝባዊያን፡ ዘጾመ፡ ምስለ፡ አይሁድ፡ አው፡ ገብረ፡ በዓለ፡ ምስሌሆሙ፡ ወተወክፈ፡ አምኃሆሙ፡ በበዓሎሙ፡ ናእተ፡ ወዘይመስሎ፡ እንዘ፡ ያከብሮሙ፡ ወለበዓላቲሆሙ፡ ወያቀልል፡ ሕጎ፡ ወኢያከብሮ፡ ለእመ፡ ኮነ፡ ካህነ፡ ይስዐር፡ እምሢመቱ፡ ወለእመ፡ ኮነ፡ ሕዝባዊ፡ ይሰደድ፡ እምሕዝብ
=== paragraph 66 ===
፷፮፡ ቀኖና። በእንተ፡ ዘይበፅዕ፡ ለመካነ፡ አፍኣ። እመቦ፡ ብእሲ፡ እመሀይምናን፡ ወካህናት፡ ዘፈነወ፡ ለምኵራበ፡ አይሁድ፡ አው፡ ለምስጋደ፡ አማልክት፡ ወተንበላት፡ አው፡ አብያተ፡ ክርስቲያነ፡ ዕልዋን፡ ቅብአ፡ በዘያበርሁ፡ አው፡ ማኅቶተ፡ በዘ፡ ያኀትው፡ ለይሰደድ፡ እምቤተ፡ ክርስቲያን
=== paragraph 67 ===
፷፯፡ ቀኖና። በእንተ፡ ዘይሰርቅ፡ ንዋየ፡ ቤተ፡ ክርስቲያን። እመሂ፡ ካህን፡ አው፡ ሕዝባዊ፡ ዘይነሥእ፡ እምቤተ፡ ክርስቲያን፡ ቅብአ፡ አው፡ ሠምዐ፡ በሰሪቅ፡ ለይስዐር፡ ወያግብእ፡ ዘነሥአ፡ ኃምስተ፡ መክዕቢቶ፡ ወይገሥጽዎ፡ በእንቲአሃ
=== paragraph 68 ===
፷፰፡ ቀኖና። በእንተ፡ ንዋየ፡ መቅደስ፡ ለመቅደስ፡ ወአኮ፡ ለባዕድ። ኵሉ፡ ንዋየ፡ ቤተ፡ ክርስቲያን፡ እምአልባስ፡ ቅዱስ፡ አው፡ ንዋየ፡ ዘወርቅ፡ ወብሩር፡ ኢይከውን፡ ለሰብእ፡ ይትገበሮሙ፡ በቤቱ፡ እስመ፡ ውእቱ፡ ዕልወተ፡ ሕግ፡ ዘአዘዘ፡ እግዚአብሔር፡ ወለእመቦ፡ ዘገብረ፡ ከማሁ፡ ይኰንንዎ፡ ወይስድድዎ፡ እምቤተ፡ ክርስቲያን
=== paragraph 69 ===
፷፱፡ ቀኖና። በእንተ፡ ተዐድዎ፡ ኤጲስ፡ ቆጶስ፡ ኀበ፡ ዘኢይደሉ። ኤጲስ፡ ቆጶስ፡ ለእመ፡ ሰከይዎ፡ መሀይምናን፡ ሥሙራን፡ ወካህናት፡ ወአልቦሙ፡ በውእቱ፡ መካን፡ ሊቀ፡ ዘይሰኪዩ፡ ኀቤሁ፡ በእንተ፡ ዕልወተ፡ ሕግ፡ ወወልጦቱ፡ ዘአዘዝነ፡ ይስክይዎ፡ ኀበ፡ ኤጲስ፡ ቆጶሳት፡ እለ፡ ቅሩብ፡ ኀቤሆሙ፡ ወይጸውዕዎ፡ ኀቤሆሙ፡ ከመ፡ ይገሥጽዎ፡ ወይርአዩ፡ በዘ፡ አስተዋደይዎ። ወለእመ፡ መጽአ፡ ወአምነ፡ ኀጢአቶ፡ ይዛለፍዎ፡ በእንተ፡ ዘገብረ፡ ወይኰንንዎ፡ ወየአዝዝዎ፡ በከመ፡ ሠራዕነ፡ ለዘ፡ ከማሁ፡ ወይኰንንዎ፡ ዐቢየ፡ ኵነኔ፡ ወለእመ፡ አበየ፡ መጺአ፡ ይድግሙ፡ ልኢከ፡ ካዕበ፡ ወለእመ፡ አበየ፡ ይልአኩ፡ ኀቤሁ፡ ክልኤተ፡ ኤጲስ፡ ቆጶሳተ፡ ካዕበ፡ ወሥልሰ፡ ወለእመ፡ አበዮሙ፡ ወኢተለዎሙ፡ ይኤዝዙ፡ ሕዝብ፡ ከመ፡ ይስዐርዎ፡ ወኢይምሰሎ፡ ሶበ፡ ይጐይይ፡ እምሕዝብ፡ ዘይኄይሶ
=== paragraph 70 ===
፸፡ ቀኖና። በእንተ፡ ስምዕ፡ ላዕለ፡ ኤጲስ፡ ቆጶስ። ኢይትወከፉ፡ ስምዐ፡ አረሳዊ፡ ላዕለ፡ ኤጲስ፡ ቆጶስ፡ ወኢይትወከፉ፡ ስምዐ፡ አሐዱ፡ መሀይምን፡ ላዕሌሁ፡ እስመ፡ ከመዝ፡ ጽሑፍ፡ ውስተ፡ ሕግ፡ በአፈ፡ ክልኤቱ፡ አው፡ ሠለስቱ፡ ይቁም፡ ኵሉ፡ ቃል፡ ወቦሙ፡ ዓዲ፡ ይትፈጸም፡ ኵሉ፡ ስምዕ
=== paragraph 71 ===
፸፩፡ ቀኖና። በእንተ፡ ክህነት። ወኢይትዋረስ። ኢይከውኖ፡ ለኤጲስ፡ ቆጶስ፡ ያውርስ፡ ሢመቶ፡ ወኢለመኑሂ፡ እምሰብአ፡ ቤቱ፡ ወኢለእኁሁ፡ ወኢለእኅወ፡ እሙ፡ ወኢለወልዱ፡ ወኢለዘመዱ፡ ወኢለመኑሂ፡ ለዘያፈቅር። ወኢይከውኖ፡ ያውርስ፡ ክህነተ፡ ወኢይትገሐሥ፡ እምዘ፡ አዘዘ፡ እግዚአብሔር፡ ኀበ፡ ዘኢይደሉ፡ ወኢይኩን፡ ትእዛዝ፡ ለኤጲስ፡ ቆጶስ፡ በከመ፡ ያፈቅር፡ ወኢይደሉ፡ ያውርሱ፡ ቤተ፡ ክርስቲያኑ፡ ለእግዚአብሔር። ወለእመ፡ ገብረ፡ ከመዝ፡ ይትገደፍ፡ ክህነት፡ ወዘገብረ፡ ከመዝ፡ ይኰንንዎ፡ ኵነኔ፡ ስዑራን
=== paragraph 72 ===
፸፪፡ ቀኖና። በእንተ፡ ነውረ፡ ሥጋ። ኢይከልእ፡ ተሠይሞ፡ ኤጲስ፡ ቆጶስ፡ ሐንካሰ፡ አው፡ ነቋረ፡ ለእመ፡ ኮነ፡ ዘይደልዎ፡ ወተዐውቀ፡ በኂሩት፡ ወፈሪሀ፡ እግዚአብሔር፡ በሠናይ፡ ወንጽሕ፡ ወጥበብ፡ በሃይማኖት፡ ወግብረ፡ ቤተ፡ ክርስቲያን፡ እስመ፡ ውእቱ፡ ኢያሐጽጾ፡ እመልእክቱ። እስመ፡ ነውረ፡ ሥጋ፡ ኢኮነ፡ ነውረ፡ አላ፡ ነውር፡ ነውረ፡ ነፍስ፡ ዘውእቱ፡ ሐሜት፡ ወጽዕለት፡ ወጽልሑት፡ ወተሳልቆት፡ ወአሕሥሞ፡ ለሰብእ፡ ወነቢብ፡ ላዕሌሆሙ፡ በዘኢሀሎ፡ ኀቤሆሙ፡ እንዘ፡ የኀሥሥ፡ አግዝፎ፡ ሠናየ፡ ዜና፡ ወዝንቱ፡ ኵሉ፡ አርአያ፡ ፅርፈት፡ ላዕለ፡ እግዚአብሔር፡ ዘይቤ፡ በወንጌል፡ ቅዱስ፡ ኵሉ፡ ኀጢአት፡ ይትኀደግ፡ ዘእንበለ፡ ፅርፈት፡ ላዕለ፡ እግዚአብሔር፡ ወላዕለ፡ መንፈስ፡ ቅዱስ፡ ወካዕበ፡ ይብል፡ አኮ፡ ኵሉ፡ ዘይበውእ፡ ውስተ፡ አፍ፡ ዘያረኵሶ፡ ለሰብእ፡ አላ፡ ዘይወፅእ፡ እምአፍ
=== paragraph 73 ===
፸፫፡ ቀኖና። በእንተ፡ ኤጲስ፡ ቆጶስ። ኢይከውኖ፡ ዘቦ፡ ነውረ። ኢይደሉ፡ ይሠየም፡ ኤጲስ፡ ቆጶስ፡ ዕውር፡ ወኢጽሙም፡ አው፡ በሃም፡ አው፡ አብድ፡ አው፡ ዘነገርጋር፡ አው፡ ዘመንፈስ፡ ርኩስ፡ አኮ፡ ነውረ፡ ከዊኖ፡ አላ፡ ኢይክል፡ አስልጦ፡ ዘይትፈቀድ፡ እምአንቀጸ፡ መላእክት፡ ወቀዊም፡ በግብረ፡ ቤተ፡ ክርስቲያን፡ ወክህነቱ
=== paragraph 74 ===
፸፬፡ ቀኖና። በእንተ፡ ዘጋኔን። ኢይደሉ፡ ካህነ። እመቦ፡ ብእሲ፡ ዘጋኔን፡ አው፡ ዘነገርጋር፡ ኢይሠየም፡ ካህነ፡ ወኢይደመር፡ ምስለ፡ መሀይምናን። ወለእመ፡ ተፈወሰ፡ ወሐይወ፡ ይደመር፡ ምስለ፡ መሀይምናን፡ ወለእመ፡ ይደልዎ፡ ክህነት፡ ይሠየም
=== paragraph 75 ===
፸፭፡ ቀኖና። በእንተ፡ ዘይሠየም፡ ኤጲስ፡ ቆጶስ። እመቦ፡ ብእሲ፡ ዘእምአረሚ፡ ወተጠምቀ፡ ወትካት፡ ብእሲ፡ እኩይ፡ ዘተዐውቀ፡ እከየ፡ ምግባሩ፡ ወእምዝ፡ ነስሐ፡ ንስሓ፡ ንጹሐ፡ በማእከለ፡ ሰብእ፡ ዘኢያአምሩ፡ እከዮ፡ ኢይደሉ፡ ይሠየም፡ ኤጲስ፡ ቆጶስ፡ ወኢካህነ፡ በቀዳሜ፡ ግብሩ፡ እስመ፡ ኀጢአት፡ ሶበ፡ ይሠየም፡ መምህረ፡ ዘኢተምህረ፡ ወኢያእመርዎ፡ ኂሩቶ፡ ወዓዲሁ፡ ዘእንበለ፡ ለእመ፡ ኮነ፡ በአለብዎ፡ እግዚአብሔር፡ ወአስተርአየ፡ እምኔሁ፡ ሠናየ፡ ልቡና፡ ወኂሩት
=== paragraph 76 ===
፸፮፡ ቀኖና። በእንተ፡ ኤጲስ፡ ቆጶስ። ኢይደሉ፡ ይትቀነይ፡ ለመኳንንት፡ እስመ፡ ኢይደልዎ፡ ወኢይከውኖ፡ ለኤጲስ፡ ቆጶስ፡ ያውድቅ፡ ርእሶ፡ እምሐራ፡ ክርስቶስ፡ ወያህጕል፡ መዓርጊሁ፡ ወይሠየም፡ ወኢበምንትኒ፡ እምግብረ፡ መኰንን፡ አላ፡ በአቱ፡ ውስተ፡ ግብረ፡ ቤተ፡ ክርስቲያን፡ ዘይኄይስ፡ ወይሤኒ፡ ወይደሉ። ወለእመ፡ አጥበዐ፡ ውስተ፡ ግብረ፡ መኳንንት፡ ወበአቱ፡ ውስተ፡ ሐራ፡ ምድራዊያን፡ ወየኀድግ፡ ሐራ፡ ንጉሥ፡ ሰማያዊ፡ ለይኅድጋ፡ ለሢመቱ፡ እስመ፡ እግዚአብሔር፡ ይቤ፡ አልቦ፡ ዘይክል፡ ለክልኤ፡ አጋእስት፡ ተቀንዮ፡ ወእመአኮ፡ ለአሐዱ፡ ያምዕዕ፡ ወካልኦ፡ ያሠምር
=== paragraph 77 ===
፸፯፡ ቀኖና። በእንተ፡ ሠዪመ፡ አግብርት፡ ካህናት። ኢይሠየሙ፡ አግብርት፡ ካህናተ፡ ወኢምንተኒ፡ እምክህነት፡ ዘእንበለ፡ ሥምረተ፡ አጋእዝቲሆሙ፡ እስመ፡ በውእቱ፡ የሐዝኑ፡ አግእስቲሆሙ፡ አው፡ ይመዘብር፡ አብያቲሆሙ፡ ወለእመ፡ ኮነ፡ ውእቱ፡ ገብር፡ ዘይደሉ፡ ለክህነት፡ በከመ፡ ኦኒሲዮስ፡ ወአብሕዎ፡ አግእስቲሁ፡ ወአግዐዝዎ፡ ወአውፅእዎ፡ እምአብያቲሆሙ፡ አግዒዞሙ፡ ገሃደ፡ ወኮነ፡ ዘይደልዎ፡ ለይሠየም
=== paragraph 78 ===
፸፰፡ ቀኖና። በእንተ፡ ካህናት። ኢይትቀነዩ፡ ለመኰንን። እመቦ፡ ብእሲ፡ ኤጲስ፡ ቆጶስ፡ አው፡ ቀሲስ፡ አው፡ ዲያቆን፡ ዘኮነ፡ ሐራ፡ ወአፍቀረ፡ መልእክተ፡ ምሥዋዕ፡ ወሢመተ፡ ቤተ፡ ክርስቲያን፡ ወይከውን፡ ሐራዌ፡ ለይስዐር፡ ወይሰደድ፡ እስመ፡ እግዚአብሔር፡ ቡሩክ፡ ስሙ፡ ይቤ፡ ሀቡ፡ ዘቄሳር፡ ለቄሳር፡ ወዘእግዚአብሔር፡ ለእግዚአብሔር
=== paragraph 79 ===
፸፱፡ ቀኖና። በእንተ፡ ዘረገመ፡ ንጉሠ፡ አው፡ ጸዐሎ፡ ዘእንበለ፡ ፍትሕ፡ ዘኢገፍዖ፡ አው፡ ረገመ፡ አሐደ፡ እመሳፍንት፡ ዘእንበለ፡ ፍትሕ፡ ይትኰነን፡ ዐቢየ፡ ኵነኔ፡ ዘያሐምሞ፡ ወለእመ፡ ኮነ፡ ካህነ፡ ይስዐር፡ ወለእመ፡ ኮነ፡ ሕዝባዊ፡ ይሰደድ
=== paragraph 80 ===
፹፡ ቀኖና። በእንተ፡ አስማተ፡ መጻሕፍት፡ ዘብሉይ፡ ወዘሐዲስ። ዝንቱ፡ አስማቲሆሙ፡ ለመጻሕፍተ፡ ቤተ፡ ክርስቲያን፡ ዘአዘዝነ፡ ለመሀይምናን፡ በክርስቶስ፡ እምዘ፡ ትካት፡ ወእምሐዲስ፡ ዘውእቱ፡ መጽሐፈ፡ ትእዛዛት፡ ዐበይት፡ ዘወረደ፡ እምኀበ፡ እግዚአብሔር፡ ወበፍልጠተ፡ ኍልቍ፡ ፹ወ፩፡ መጽሐፍ፡ ምስለ፡ መጽሐፈ፡ ቀኖና፡ ዘዜነውነ፡ ለቀሌምንጦስ፡ ዘትካት፡ ወዘሐዲስ። ቀዳማዊ፡ ይነግር፡ በእንተ፡ ደኃሪ፡ ወደኃሪ፡ ይፌጽሞ፡ ለቀዳማዊ። ወደኃሪ፡ ማኅተመ፡ ግብሩ፡ ወኵሎሙ፡ ተታለዉ፡ ወተሰናአዉ፡ እንዘ፡ ያጸድቅዎ፡ ለዘፈነዎሙ። አሐዱ፡ ነገር፡ እምአሐዱ፡ ነባቢ፡ አምላክ፡ ለሓኲ፡ ወፈጣሪ። ቀዳማዊ፡ ትእዛዝ። ብሉይ፡ ዘውእቱ፡ ኦሪት፡ ፭። ቀዳሚ፡ ዘፍጥረት፡ ወካልእ፡ ዘፀአት፡ ወሣልስ፡ ዘሌዋዊያን፡ ወራብዕ፡ ዘኍልቍ፡ ወኃምስ፡ ዘዳግም፡ ሕግ፡ ወሳድስ፡ ዘኢያሱ፡ ወሳብዕ፡ ዘመሳፍንት፡ ወሳምን፡ ዘሩት። ዘዮዲት፡ ፩። ዘጦቢት፡ ፩። ዘአስቴር፡ ፩። ዘመቃቢያን፡ ፫። ዘዳዊት፡ መዝሙር፡ ፻፶። ዘሰሎሞን፡ ጠቢብ፡ ፭። ዘነገሥት፡ ፬። ጥበበ፡ ኢያሱ፡ ወልደ፡ ሲራክ፡ ፩። ዘኢዮብ፡ ፩። ዘዕዝራ፡ ፫። ዘኢሳይያስ፡ ፩። ዘኤርምያስ፡ ፩። ዘሕዝቅኤል፡ ፩። ዘዳንኤል፡ ፩። ዘዖዝያ፡ ፩። ዘአሞፅ፡ ፩። ዘዮናስ፡ ፩። ዘእንባቆም፡ ፩። ዘናሖም፡ ፩። ዘሶፎንያስ፡ ፩። ዘዘካርያስ፡ ፩። ዘሚኪያስ፡ ፩። ዘሚልክያስ፡ ፩። ፬፡ ብሔረ፡ ወንጌል። ዘማቴዎስ፡ ፩። ዘማርቆስ፡ ፩። ዘሉቃስ፡ ፩። ዘዮሐንስ፡ ፩። ዘሐዋርያት፡ ፯። ዘያዕቆብ፡ ፩። ዘጴጥሮስ፡ ፪። ዘዮሐንስ፡ ፫። ዘይሁዳ፡ ፩። ወግብረ፡ ሐዋርያት፡ ፩። ወመልእክተ፡ ጳውሎስ፡ ፲፬። ለብሔረ፡ ሮሜ፡ ፩። ለቆሮንቶስ፡ ቀዳማዊ፡ ለቆሮንቶስ፡ ዳግማዊ፡ ፪። ለገላትያ፡ ፩። ለኤፌሶን፡ ፩። ለፊልጵስዩስ፡ ፩። ለቈላስይስ፡ ፩። ለተስሎንቄ፡ ፩። ለተስሎንቄ፡ ፪። ለዕብራዊያን፡ ፩። ለጢሞቴዎስ፡ ረድኡ፡ ፩። ለጢሞቴዎስ፡ ዳግም፡ ፩። ለቲቶ፡ ፩። ለፊልሞና፡ ፩። ወአርአያ፡ ዮሐንስ፡ አቡ፡ ቀለምሲስ፡ ፩። ዘቀሌምንጦስ፡ ፪፡ አሐዱ፡ መጽሐፍ።
=== paragraph 81 ===
ወኵሉ፡ ዘአዘዝናክሙ፡ ኦአበው፡ ኤጲስ፡ ቆጶሳት፡ ወሊቃነ፡ ጳጳሳት፡ ወሊቃነ፡ ካህናት፡ በእደ፡ ቀሌምንጦስ፡ ወይእቲ፡ ፰፡ መጻሕፍተ፡ ቀኖና። ፪፡ እምኔሆሙ፡ ቦኡ፡ ውስተ፡ ኍልቈ፡ ሐዲስ፡ ወ፮፡ ተፍጻሜተ፡ ኍልቈ፡ ፹ወ፩፡ መጻሕፍት፡ እስመ፡ ብሉይ፡ ኮነ፡ መክብቡ፡ ፵ወ፯፡ ወሐዲስ፡ ኮነ፡ መክብቡ፡ ፳ወ፰። ወእሉ፡ ፮፡ ምስጢር፡ ቀኖና፡ ኢይደሉ፡ ያርእይዎ፡ ለሕዝብ፡ መሀይምናን፡ በእንተ፡ ዘውስቴቶሙ፡ ሕግ፡ ወሥርዓት፡ ዘኢይደሉ፡ የአዝዙ፡ ቦቱ፡ ዘእንበለ፡ ሊቃውንት፡ ወካህናት። ኦሕዝብ፡ መሀይምናን፡ ተወከፉ፡ ነገረነ፡ ወትእዛዘነ፡ እስመ፡ እመንፈስ፡ ቅዱስ፡ ውእቱ። እግዚአብሔር፡ ማሕየዊ፡ ዘአለበወነ፡ ወንሕነ፡ ንኤዝዘክሙ፡ ወለእመ፡ ዐቀብክምዎ፡ ይከውን፡ ቦቱ፡ ሕይወትክሙ፡ ወይከውን፡ ለክሙ፡ ሰላመ፡ ማእከሌክሙ። ወለእመ፡ ኢዐቀብክምዎ፡ ትትኴነኑ፡ ወይኅዘክሙ፡ ቅሥት፡ ወያአትት፡ ዘሀሎ፡ ኀቤክሙ፡ ኀበ፡ ካልእ፡ ወይወርድ፡ ማእከሌክሙ፡ ተስናን፡ ወጋእዝ፡ ወእከይ፡ ወትትሐተቱ፡ በእንተ፡ ዘገበርክሙ፡ እስመ፡ ዘኀደገ፡ ትእዛዘ፡ ወይገብር፡ አበሳ፡ ይትሐተት፡ ወእግዚአብሔር፡ አብ፡ ያቅርብክሙ፡ ኀበ፡ ፈሪሆቱ፡ በመንፈስ፡ ቅዱስ፡ ሕያው፡ ወንጹሕ፡ ጰራቅሊጦስ፡ ወያድኅንክሙ፡ ወይርዳእክሙ፡ ለገቢረ፡ ሠናይ፡ ወይረሲክሙ፡ ንጹሓነ፡ ወየሀብክሙ፡ ሕይወተ፡ ዘለዓለም፡ በትንብልናሁ፡ ለኢየሱስ፡ ክርስቶስ፡ ምስለ፡ አቡሁ፡ ወመንፈስ፡ ቅዱስ። ለዓለመ፡ ዓለም፡ አሜን።