##### edition  (gez)
=== paragraph 0 ===
ሥርዐተ፡ ሐዋርያት፡ ምስለ፡ ቀሌምንጦስ፡ ዘተፈነወ፡ ለአሕዛብ፡ ሕገ፡ ቤተ፡ ክርስቲያን
=== paragraph 1 ===
፩። ኤጲስ፡ ቆጶስ፡ እንከ፡ ይሠየም፡ እምኤጲስ፡ ቆጶሳት፡ ክልኤቱ፡ ወእመአኮ፡ ሠለስቱ፡ በዕለተ፡ ሰንበተ፡ ክርስቲያን
=== paragraph 2 ===
፪። ቀሲስ፡ እምአሐዱ፡ ኤጲስ፡ ቆጶስ፡ ወዲያቆንሂ፡ ወባዕዳንሂ፡ ከማሁመ፡ በሰንበተ፡ ክርስቲያን
=== paragraph 3 ===
፫። ለእመ፡ እንከ ኤጲስ፡ ቆጶስ፡ ወእመሂ፡ ቀሲስ፡ ዘእንበለ፡ ዘእግዚአብሔር፡ ሥርዐት፡ ለመሥዋዕት፡ ዘያቀርብ፡ ባዕደ፡ ዘኮነ፡ ለእመሂ፡ ህየንተ፡ ወይን፡ ሜስ፡ ዘይትመነገኑ፡ ወእመሂ፡ አዕዋፍ፡ ወእመሂ፡ እንስሳ፡ ዘኮነ፡ ወእመሂ፡ አዕታረ፡ ዘእንበለ፡ ሥርዐት፡ ይሰዐር
=== paragraph 4 ===
፬። በጊዜ፡ ይትፈቀድ፡ ዘእንበለ፡ ሐዲስ፡ በለስ፡ ወቀምሕ፡ ኢይከውን፡ ያብኡ፡ ምንተኒ፡ ኀበ፡ ምሥዋዕ፡ ወቅብአ፡ ውስተ፡ ቅድስት፡ ተቅዋም፡ ወዕጣን፡ በጊዜ፡ መንክር፡ ቍርባን
=== paragraph 5 ===
፭። ወባዕደ፡ ኵሎ፡ አቅማሕ፡ ውስተ፡ ቤት፡ ይትፈነው፡ ቀዳሚ፡ ለኤጲስ፡ ቆጶስ፡ ወለቀሳውስት፡ እስመ፡ ይከፍሉ፡ ለዲያቆናት፡ ወለባዕዳንሂ፡ ሥዩማን
=== paragraph 6 ===
፮። ኤጲስ፡ ቆጶስ፡ ወእመሂ፡ ቀሲስ፡ ወእመሂ፡ ዲያቆን፡ ዘሰብአ፡ ዓለም፡ ትካዛተ፡ ኢይግበር። ወእመአኮ፡ ይሰዐር
=== paragraph 7 ===
፯። እመኒ፡ ኤጲስ፡ ቆጶስ፡ ወለእመኒ፡ ቀሲስ፡ ወለእመኒ፡ ዲያቆን፡ ቅድስተ፡ ዕለተ፡ እግዚአብሔር፡ ፋሲካ፡ ምስለ፡ አይሁድ፡ ዘይገብር፡ ይሰዐር
=== paragraph 8 ===
፰። ለእመኒ፡ ኤጲስ፡ ቆጶስ፡ ወእመኒ፡ ቀሲስ፡ ወእመኒ፡ ዲያቆን፡ ወለእመኒ፡ ዘኮነ፡ እምሥዩማን፡ ጸሎተ፡ ከዊኖ፡ ዘኢይቀርብ፡ በእንተ፡ ምንት፡ ይንግር፡ ወእመሰ፡ ርቱዕ፡ ያናሕስዩ፡ ሎቱ። ወእመሰ፡ ዘኢይነግር፡ ያቅምዎ፡ ሕገ፡ ዘአዕቀፈ፡ ሕዝበ፡ ወትሕዝብተ፡ ረሰየ፡ ለዘቀርበ
=== paragraph 9 ===
፱። ኵሎሙ፡ እለ፡ ቦኡ፡ ውስተ፡ ቤተ፡ ክርስቲያን፡ ዐቢይ፡ ወእለሂ፡ መጽሐፈ፡ ይሰምዑ፡ ወኢይጸንሑ፡ ጸሎተ፡ ወቅድስተ፡ ቍርባነ፡ ሕገ፡ ዘኢመፍትው፡ ይግበሩ፡ እምቤተ፡ ክርስቲያን፡ ይቁሙ
=== paragraph 10 ===
፲። እመቦ፡ ዘምስለ፡ ቅውም፡ ወበቤት፡ ይጼሊ፡ ዘከመዝ፡ ይቁም
=== paragraph 11 ===
፲፩። እመቦ፡ ምስለ፡ ዘተስዕረ፡ ሥዩም፡ እንዘ፡ ውእቱ፡ ከመ፡ ዘሥዩም፡ ይጼሊ፡ ይሰዐር፡ ውእቱኒ
=== paragraph 12 ===
፲፪። እመቦ፡ ሥዩም፡ ወእመሂ፡ እምሕዝብ፡ ቅዉም፡ ወእመአኮ፡ ኢቅውም፡ ሐዊሮ፡ ውስተ፡ ካልእት፡ ሀገር፡ ኢይትወከፍዎ፡ ዘእንበለ፡ መጽሐፈ፡ ማዕተብ። ይቁሙ፡ እለ፡ ተወክፍዎ፡ ወዘተወክፍዎሂ። ወእመሰ፡ ቅዉም፡ ውእቱ፡ ያንኁ፡ ሎቱ፡ ቁመተ፡ ሕገ፡ ዘሐሰወ፡ ወአስሐተ፡ ቤተ፡ ክርስቲያኑ፡ ለእግዚአብሔር
=== paragraph 13 ===
፲፫። ለኤጲስ፡ ቆጶስ፡ ኢይከውኖ፡ ኀዲጎ፡ ዘዚአሁ፡ በሓውርተ፡ ባዕደ፡ ይድቢ፡ ወእመሂ፡ እምኀበ፡ ብዙኃን፡ ያጌብርዎ። ለእመ፡ ባሕቱ፡ ለርቱዕ፡ ትካዝ፡ እንተ፡ ከመዝ፡ ታገብሮ፡ ዘንተ፡ ይግበር። ለእለ፡ ህየ፡ በእንተ፡ ፍርሀተ፡ እግዚአብሔር፡ ይርዳእ፡ ወዘንተ፡ አኮ፡ ለሊሁ፡ አላ፡ በጽውዓ፡ ብዙኃን፡ ወበበቍዔተ፡ ዐቢይ
=== paragraph 14 ===
፲፬። ለእመቦ፡ ቀሲስ፡ ወእመሂ፡ ዲያቆን፡ ወእመሂ፡ ዘኮነ፡ ካልእ፡ እምሥዩማን፡ ኀዲጎ፡ ዘዚአሁ፡ በሓውርተ፡ ውስተ፡ ካልእት፡ የሐውር፡ ወግሙራ፡ እምኔሃ፡ ፈሊሶ፡ ይነብር፡ ውስተ፡ ካልእት፡ በሓውርት፡ ዘከመዝ፡ ንኤዝዝ፡ ግሙራ፡ ኢይትቀነይ። ወእመ፡ ዓዲ፡ እንዘ፡ ይጼውዖ፡ ኤጲስ፡ ቆጶስ፡ ከመ፡ ይግባእ፡ ኢሰምዐ፡ እንዘ፡ ያጠብዕ፡ ለፍሒል፡ ከመ፡ ሕዝባዊ፡ ይንበር፡ ባሕቱ፡ በህየ፡ እንዘ፡ ይትኬነስ
=== paragraph 15 ===
፲፭። ወእመሰ፡ ኤጲስ፡ ቆጶስ፡ ኀበ፡ ዘሀለዉ፡ ቀሊለ፡ ረሰየ፡ እንተ፡ ላዕሌሆሙ፡ ተሠርዐ፡ ሥርዐተ፡ ወይትወከፎሙ፡ ከመ፡ ሥዩማን፡ ይቁም፡ ሕገ፡ ሊቀ፡ ፈሐል
=== paragraph 16 ===
፲፮። ዘክልኤተ፡ አውሰበ፡ እምድኅረ፡ ጥምቀት፡ ወእመሂ፡ ዕቅብተ፡ አጥረየ፡ ኢይክል፡ ከዊነ፡ ኤጲስ፡ ቆጶስ፡ ወኢቀሲስ፡ ወኢዲያቆን፡ ወኢምንተኒ፡ ዘኮነ፡ ውስተ፡ ምሥዋዕ
=== paragraph 17 ===
፲፯። ዘማዕሰበ፡ ነሥአ፡ ወእመሂ፡ ኅድግተ፡ ወእመአኮ፡ ካልእተ፡ አመተ፡ ወእመሂ፡ ዘማ፡ ኢይክል፡ ከዊነ፡ ኤጲስ፡ ቆጶስ፡ ወኢቀሲስ፡ ወኢዲያቆን፡ ወኢምንተኒ፡ ዘኮነ፡ ውስተ፡ ምሥዋዕ
=== paragraph 18 ===
፲፰። ዘክልኤተ፡ አኀተ፡ አውሰበ፡ ወእመ፡ አኮ፡ ወለተ፡ እኁሁ፡ አው፡ ወለተ፡ እኅቱ፡ ኢይክል፡ ይሠየም
=== paragraph 19 ===
፲፱። ሥዩም፡ ሐቤ፡ ዘይሁብ፡ ይሰዐር
=== paragraph 20 ===
፳። ኅጽው፡ ለእመ፡ እምተኀይሎ፡ ሰብእ፡ በዘኮነ፡ ወእመሂ፡ በስደት፡ ተመትረ፡ ዘብእሲ፡ ወእመሂ፡ ከመዝ፡ ተፈጥረ፡ ወይደልዎ፡ ኤጲስ፡ ቆጶስ፡ ይሠየም
=== paragraph 21 ===
፳፩። ዘመተረ፡ ርእሶ፡ ኢይሠየም፡ እስመ፡ ቀታሌ፡ ርእሱ፡ ውእቱ፡ ወጸላኤ፡ ተግባረ፡ እግዚአብሔር
=== paragraph 22 ===
፳፪። ለእመቦ፡ እንዘ፡ ሥዩም፡ ውእቱ፡ ወመተረ፡ ርእሶ፡ ይሰዐር፡ እስመ፡ ቀታሌ፡ ርእሱ፡ ውእቱ
=== paragraph 23 ===
፳፫። ሕዝባዊ፡ ዘይመትር፡ ርእሶ፡ ይቁም፡ ፫፡ ክረምተ፡ እስመ፡ ጸላኢ፡ ውእቱ፡ ለሕይወተ፡ ዚአሁ
=== paragraph 24 ===
፳፬። ኤጲስ፡ ቆጶስ፡ ወእመሂ፡ ቀሲስ፡ ወእመሂ፡ ዲያቆን፡ በዝሙት፡ ወእመሂ፡ በምሒለ፡ ሐሰት፡ ወእመሂ፡ በስርቅ፡ ተረክበ፡ ይሰዐር፡ ወኢይቁም፡ እስመ፡ ይብል፡ መጽሐፍ፡ ኢይትቤቀል፡ እግዚአብሔር፡ ካዕበ፡ በአሐቲ፡ አበሳ
=== paragraph 25 ===
፳፭። ወከማሁ፡ ባዕዳንሂ፡ ሥዩማን፡ እለ፡ ውስተ፡ ሢመት፡ ኮኑ፡ እለ፡ ኢያውሰቡ፡ ንኤዝዝ፡ ለእለ፡ ይፈቅዱ፡ ያውስቡ፡ አናጕንስጢስ፡ ወመዘምራን፡ ባሕቲቶሙ
=== paragraph 26 ===
፳፮። ኤጲስ፡ ቆጶስ፡ ወእመሂ፡ ቀሲስ፡ ወእመሂ፡ ዲያቆን፡ ዘይዘብጥ፡ መሀይምናነ፡ እለ፡ አበሱ፡ ወእመሂ፡ ኢመሀይምናነ፡ እለ፡ ገፍዑ፡ ወበዘ፡ ያፈርሁ፡ ይፈቅዱ፡ ይስዐሩ፡ ንኤዝዝ፡ እስመ፡ አልቦ፡ እግዚእ፡ ዘከመዝ፡ ኀበ፡ አዘዘ። ዓዲ፡ እንከ፡ ለሊሁ፡ እንዘ፡ ይዘበጥ፡ ኢዘበጠ፡ ወእንዘ፡ ይጼዐል፡ ኢጸዐለ፡ ወእንዘ፡ ያሐምምዎ፡ ኢተቀየመ
=== paragraph 27 ===
፳፯። እመቦ፡ ኤጲስ፡ ቆጶስ፡ ወእመሂ፡ ቀሲስ፡ ወእመሂ፡ ዲያቆን፡ ዘተስዕረ፡ በጽድቅ፡ በአበሳ፡ ዕውቅ፡ ወይደፍር፡ ወይገስስ፡ እንተ፡ ቀዲሙ፡ ተውህበት፡ ሎቱ፡ ሢመተ፡ ዘከመዝ፡ ግሙራ፡ ለዝሉፉ፡ ይትመተር፡ እምቤተ፡ ክርስቲያን
=== paragraph 28 ===
፳፰። ለእመቦ፡ ኤጲስ፡ ቆጶስ፡ በወርቅ፡ ለዛቲ፡ ሢመት፡ አኃዜ፡ ኮነ፡ ወእመሂ፡ ቀሲስ፡ ወእመሂ፡ ዲያቆን፡ ይሰዐር፡ ውእቱሂ፡ ወዘሤሞሂ፡ ወይትመተር፡ ለዝሉፉ፡ እምተከንሶሂ፡ ከመ፡ ሲሞን፡ እምኀበ፡ ጴጥሮስ
=== paragraph 29 ===
፳፱። ለእመቦ፡ ኤጲስ፡ ቆጶስ፡ ለሰብአ፡ ዓለም፡ መኳንንት፡ ተፀሚዶ፡ ወቦሙ፡ አኃዜ፡ ቤተ፡ ክርስቲያን፡ ኮነ፡ ይሰዐርሂ፡ ወይቁምሂ፡ ወእለሂ፡ ይትኬነሱ፡ ምስሌሁ፡ ኵሎሙ
=== paragraph 30 ===
፴። ለእመቦ፡ ቀሲስ፡ ዘአስተኣከየ፡ ዘዚአሁ፡ ኤጲስ፡ ቆጶሰ፡ ወእንተ፡ ባሕቲቱ፡ ገብረ፡ ጸሎተ፡ ወምሥዋዐ፡ ይተክል፡ እንዘ፡ አልቦ፡ ዘይግእዞ፡ ለኤጲስ፡ ቆጶስ፡ በሠናይ፡ አምልኮ፡ ወበጽድቅ፡ ይስዐር፡ ሕገ፡ መፍቀሬ፡ መኰንን፡ እስመ፡ መምዕላይ፡ ውእቱ፡ ወባዕዳንሂ፡ ሥዩማን፡ መጠኔ፡ ዘምስሌሁ፡ ኀብሩ። ወሕዝባዊያንሰ፡ ይቁሙ። ዘንተ፡ እንከ፡ እምድኅረ፡ አኃቲ፡ ወክልኤቱ፡ ወሠለስቱ፡ በቍዔተ፡ ኤጲስ፡ ቆጶስ፡ ይኩን
=== paragraph 31 ===
፴፩። ለእመቦ፡ ቀሲስ፡ ወእመሂ፡ ዲያቆን፡ እምኀበ፡ ኤጲስ፡ ቆጶስ፡ ዘኮነ፡ ቅውመ፡ ለዝ፡ ኢይከውኖ፡ እምኀበ፡ ካልእ፡ ይትወከፍዎ፡ ዘእንበለ፡ በኀበ፡ ዘአቀሞ፡ ለእመ፡ ኢኮነ፡ ይደድቆ፡ ሞት፡ ለዘ፡ አቀሞ፡ ኤጲስ፡ ቆጶስ
=== paragraph 32 ===
፴፪። ወኢአሐደ፡ እምእንግዳ፡ ኤጲስ፡ ቆጶስ፡ ወቀሳውስት፡ ወዲያቆናት፡ ዘእንበለ፡ መጽሐፈ፡ ማዕተብ፡ ኢይትወከፉ። ወአምጺኦሙኒ፡ ይትሐተቱ፡ ወእመሰ፡ ሰባኪያነ፡ ሠናየ፡ አምልኮ፡ እሙንቱ፡ ይትወከፉ። ወእመአኮሰ፡ ትካዞሙ፡ ውሂበክሙ፡ ውስተ፡ ተከንሶ፡ ኢትትወከፍዎሙ፡ እስመ፡ ብዙኅ፡ እንከ፡ ዘተስሕቶሂ፡ ይከውን
=== paragraph 33 ===
፴፫። ኤጲስ፡ ቆጶሶሙ፡ ለለ፡ አሐዱ፡ አሐዱ፡ ሕዝብ፡ ያእምሩ፡ መፍትው፡ ቀዳሜ፡ ዚአሆሙ፡ ወይረስይዎ፡ ሕገ፡ ርእሶሙ፡ ወኢምንተኒ፡ ዘኮነ፡ ፈድፋደ፡ ኢይግበሩ፡ ዘእንበለ፡ ፈቃደ፡ ዚአሁ። ዘንተ፡ ባሕቲቶ፡ አሐዱ፡ አሐዱ፡ መጠኔ፡ ለእንቲአሁ፡ በሓውርት፡ ይትከሀል፡ ወለዘሂ፡ መትሕቴሃ፡ ብሔር። አላ፡ ወኢውእቱ፡ ዘእንበለ፡ ምክረ፡ ኵሎሙ፡ ኢይግበር፡ ምንተኒ፡ እስመ፡ ከመዝ፡ ኅብረተ፡ ትኩን፡ ወይሴባሕ፡ እግዚአብሔር፡ በኢየሱስ፡ ወለመንፈስ፡ ቅዱስ
=== paragraph 34 ===
፴፬። ኤጲስ፡ ቆጶስ፡ ኢይድፍር፡ ባዕደ፡ እምዘዚአሁ፡ መካናት፡ ሢመታተ፡ ይግበር፡ ውስተ፡ ዘኢኮነ፡ ምኵናኑ፡ ብሔር፡ ወአህጉር። ወእመሰ፡ ተዛለፈ፡ እንተ፡ ከመዝ፡ ገብረ፡ ዘእንበለ፡ ምክረ፡ እለ፡ ይእኅዙ፡ ብሔረ፡ ወአህጉረ፡ ይስዐር፡ ውእቱሂ፡ ወእለ፡ ሤሞሙ
=== paragraph 35 ===
፴፭። እመቦ፡ ዘተሠይመ፡ ኤጲስ፡ ቆጶስ፡ ወኢተወክፈ፡ ቅኔ፡ ወኅሊና፡ ሕዝብ፡ እንተ፡ ተውህበቶ፡ ዘከመዝ፡ ቅውመ፡ ይኩን፡ እስከ፡ ሶበ፡ ይትወከፍ፡ ወከማሁ፡ ቀሲስሂ፡ ወዲያቆንሂ። ወእመሰ፡ ሐዊሮ፡ ኢተወክፍዎ፡ አኮ፡ እምፈቃዱ፡ አላ፡ እምእከየ፡ ሕዝብ፡ ውእቱሰ፡ ይኩን፡ ኤጲስ፡ ቆጶሰ፡ ወሥዩማነ፡ ሀገርሰ፡ ይቁሙ፡ እስመ፡ ለዘከመዝ፡ ሕዝብ፡ ኢይትኤዘዝ፡ መምህራነ፡ ኢኮኑ
=== paragraph 36 ===
፴፮። ካዕበ፡ ለዐመት፡ ሴኖዶስ፡ ትትገበር፡ ዘኤጲስ፡ ቆጶሳት፡ ወይትፋትሑ፡ በበይናቲሆሙ፡ ሥርዐተ፡ ሠናየ፡ አምልኮ፡ ወእለሂ፡ ወድቃ፡ ዘቤተ፡ ክርስቲያናት፡ በህየ፡ ይፍትሑ። አሐተ፡ እንከ፡ በራብዕተ፡ ሰንበተ፡ ጰንጠቈስቴ፡ ወዳግሚታ፡ በነሓሲ፡ አመ፡ ፲ወ፪
=== paragraph 37 ===
፴፯። ኵሎ፡ ዘቤተ፡ ክርስቲያን፡ ትካዛተ፡ ኤጲስ፡ ቆጶስ፡ ይርከብ፡ ኅሊና፡ ወይሥርዖ፡ ሕገ፡ ዘእግዚአብሔር፡ ይሬኢ። ወኢይከውኖ፡ ይዝሩ፡ እምውስቴቶሙ፡ ወኢለአዝማዲሁ፡ ዘእግዚአብሔር፡ ይጸጉ። ወእመሰ፡ ነዳየቦ፡ ይሴሲ፡ አላ፡ ኢበምክንያተ፡ እሉ፡ ዘቤተ፡ ክርስቲያን፡ ኢያማስን
=== paragraph 38 ===
፴፰። ቀሳውስት፡ ወዲያቆናት፡ ዘእንበለ፡ ምክረ፡ ኤጲስ፡ ቆጶስ፡ ወኢምንተኒ፡ ኢይግበሩ፡ እስመ፡ እንከ፡ ውእቱ፡ ዘተአመነ፡ ሕዝበ፡ እግዚአብሔር፡ ወበእንተ፡ ነፍሶሙ፡ ቃለ፡ ያገብእ
=== paragraph 39 ===
፴፱። ይኩን፡ ዕዉቀ፡ ዚአሁ፡ ለኤጲስ፡ ቆጶስ፡ ንዋዩ፡ ለእመሂ፡ ዚአሁቦ፡ ወዕዉቅ፡ ዘቤተ፡ ክርስቲያንሂ፡ ከመ፡ ሥሉጠ፡ ይኩን፡ ለዘዚአሁ፡ እምከመ፡ ሞተ፡ ኤጲስ፡ ቆጶስ፡ ለዘፈቀደ፡ የሀብ። ወኢበምክንያት፡ ዘቤተ፡ ክርስቲያን፡ ንዋይ፡ ኢይደመር፡ ዘኤጲስ፡ ቆጶስ፡ ወለእመ፡ ብእሲተ፡ ወደቂቀ፡ ቦ፡ ወእመአኮ፡ አዝማደ፡ ወእመአኮ፡ ነባሬ። እስመ፡ ጽድቅ፡ ውእቱዝ፡ በኀበ፡ እግዚአብሔር፡ ወበኀበ፡ ሰብእ፡ ከመ፡ ወኢቤተ፡ ክርስቲያን፡ ኀሳረ፡ ምንተኒ፡ ኢትርከብ፡ በኢያእምሮ፡ ዘኤጲስ፡ ቆጶስ፡ ንዋየ። ወኤጲስ፡ ቆጶስ፡ ወአዝማዲሁ፡ በምክንያተ፡ ንዋየ፡ ቤተ፡ ክርስቲያን፡ ኢይትበረበሩ። ወበትካዛት፡ ኢይደቁ፡ ሰብአ፡ ዚአሁ፡ ወሞተ፡ ዚአሁ፡ በፅርፈት፡ ኢይኩን
=== paragraph 40 ===
፵። ንኤዝዝ፡ ለኤጲስ፡ ቆጶስ፡ ሥልጣነ፡ ይርከብ፡ ላዕለ፡ ንዋየ፡ ቤተ፡ ክርስቲያን። ወእመ፡ እንከ፡ ክቡራተ፡ ዘሰብእ፡ ነፍሳተ፡ ሎቱ፡ ተአመነ፡ ፈድፋደ፡ መፍትው፡ በእንተ፡ ንዋይ፡ ያስተጋብእ፡ ከመ፡ በሥልጣነ፡ ዚአሁ፡ ይሥራዕ፡ ለእለ፡ ይጼነሱ፡ ለቀሳውስት፡ ወለዲያቆናት፡ ወይትወሀብ፡ በፍርሀት፡ ወበኵሉ፡ ኂሩት። ወይንሣእ፡ ውእቱኒ፡ ዘመፍትው፡ ለእመ፡ ዘይፈቅድ፡ ለጻህቁ፡ ወለእለ፡ ይትኔገዱሂ፡ ለአኃው፡ ጻህቀ፡ ከመ፡ ወኢበምንትኒ፡ ኢይኅጥኡ። እስመ፡ ሕገ፡ እግዚአብሔር፡ ሠርዐ፡ ለእለ፡ ምሥዋዕ፡ ይፀመዱ፡ እምሥዋዕ፡ ይሴሰዩ፡ እስመ፡ ወኢሐራ፡ በዘዚአሁ፡ ንዋይ፡ ወልታ፡ ዲበ፡ ፀር፡ ኢያነሥእ
=== paragraph 41 ===
፵፩። ኤጲስ፡ ቆጶስ፡ ወእመኒ፡ ቀሲስ፡ ወዲያቆን፡ በተውኔት፡ ወስካር፡ ዘይትረከብ፡ ይኅድግ፡ ወእመ፡ አኮ፡ ይሰዐር
=== paragraph 42 ===
፵፪። መንፈቀ፡ ዲያቆን፡ ወእመኒ፡ አናጕንስጢስ፡ ወእመኒ፡ መዘምር፡ ዘከመዝ፡ ይገብር፡ ይኅድግ፡ ወእመ፡ አኮ፡ ይቁም። ከማሁ፡ ሕዝባዊኒ
=== paragraph 43 ===
፵፫። ኤጲስ፡ ቆጶስ፡ ወእመኒ፡ ቀሲስ፡ ወዲያቆን፡ ሲሳየ፡ ዘይነሥእ፡ እምኀበ፡ እለ፡ ተለቅሑ፡ ይኅድግ፡ ወእመ፡ አኮ፡ ይስዐር
=== paragraph 44 ===
፵፬። ኤጲስ፡ ቆጶስ፡ ወእመኒ፡ ቀሲስ፡ ወዲያቆን፡ ምስለ፡ ዕልዋን፡ ለእመ፡ ጸለዩ፡ ይቁሙ። ወእመሰ፡ አብእዎሙ፡ በከመ፡ ሥዩማን፡ ይግበሩ፡ ይስዐሩ
=== paragraph 45 ===
፵፭። ኤጲስ፡ ቆጶስ፡ ወእመኒ፡ ቀሲስ፡ ወእመኒ፡ ዲያቆን፡ ዘዕልዋን፡ ለእመ፡ ተወክፈ፡ ጥምቀተ፡ ወእመኒ፡ መሥዋዕተ፡ ይስዐር፡ ንኤዝዝ። ምንተ፡ እንከ፡ ኅብረቱ፡ ለክርስቶስ፡ ምስለ፡ ቤልሖር፡ ወምንተ፡ መክፈልቱ፡ ለመሀይምን፡ ምስለ፡ ኢመሀይምን
=== paragraph 46 ===
፵፮። እመቦ፡ ሕዝባዊ፡ ብእሲቶ፡ ኀዲጎ፡ ካልእተ፡ ነሥአ፡ ወእመኒ፡ ዘእምኀበ፡ ባዕድ፡ ኅድግተ፡ ይቁም
=== paragraph 47 ===
፵፯። እመቦ፡ ኤጲስ፡ ቆጶስ፡ ወእመኒ፡ ቀሲስ፡ ወዲያቆን፡ ወግሙራ፡ ዘኮነ፡ ዘእምሥዋዕ፡ ዘአውስቦ፡ ወሥጋ፡ ወወይነ፡ ዘበእንተ፡ ኢተዐግሦ፡ አላ፡ በእንተ፡ ምናኔ፡ ኀደገ፡ ረሲዖ፡ ከመ፡ ኵሉ፡ ሠናይ፡ ጥቀ፡ ወከመ፡ ብእሴ፡ ወብእሲተ፡ ገብረ፡ እግዚአብሔር፡ ሰብአ፡ አላ፡ እንዘ፡ ይፀርፍ፡ ያስተዋዲ፡ ግብረ፡ ዓለም፡ ይትገሠጽ፡ ወእመ፡ አኮ፡ ይስዐር፡ እምቤተ፡ ክርስቲያን። ይሰደድ፡ ከማሁ፡ ሕዝባዊኒ
=== paragraph 48 ===
፵፰። እመቦ፡ ኤጲስ፡ ቆጶስ፡ ወእመኒ፡ ቀሲስ፡ ወእመኒ፡ ዲያቆን፡ ዘይገብእ፡ እምኀጢአቱ፡ ወኢይትዌከፍ፡ አላ፡ ይሰድዶ፡ ይስዐር፡ እስመ፡ ያሐዝን፡ ክርስቶስሃ፡ ለዘ፡ ይቤ፡ ፍሥሓ፡ ይከውን፡ በሰማይ፡ በእንተ፡ አሐዱ፡ ኃጥእ፡ ዘይኔስሕ
=== paragraph 49 ===
፵፱። እመቦ፡ ኤጲስ፡ ቆጶስ፡ ወእመኒ፡ ቀሲስ፡ ወዲያቆን፡ በመዋዕለ፡ በዓላት፡ ዘኢይጥዕም፡ ሥጋ፡ ወወይነ፡ ይሰዐር፡ ሕገ፡ ውዑየ፡ ኅሊና፡ ወምክንያተ፡ ዕቅፍት፡ ለሰብእ፡ ኮነ
=== paragraph 50 ===
፶። እመቦ፡ ሥዩም፡ በቤተ፡ መያሲ፡ ዘተረክበ፡ እንዘ፡ ይበልዕ፡ ይቁም፡ ዘእንበለ፡ በምዕራፍ፡ ወበፍኖት፡ በግብር፡ አዕሪፎ
=== paragraph 51 ===
፶፩። እመቦ፡ ሥዩም፡ ዘጸዐሎ፡ ለኤጲስ፡ ቆጶስ፡ በዐመፃ፡ ይስዐር፡ እስመ፡ ይብል፡ መኰንነ፡ ሕዝብከ፡ ኢትሐሚ፡ እኩየ
=== paragraph 52 ===
፶፪። እመቦ፡ ሥዩም፡ ዘጸዐለ፡ ቀሲሰ፡ ወዲያቆነ፡ ይቁም
=== paragraph 53 ===
፶፫። እመቦ፡ ሥዩም፡ ጽሙመ፡ ወእመኒ፡ ጽሉለ፡ ወሐንካሰ፡ ወዕውረ፡ ዘይሳለቅ፡ ይቁም። ከማሁ፡ ሕዝባዊኒ
=== paragraph 54 ===
፶፬። እመቦ፡ ኤጲስ፡ ቆጶስ፡ ወእመኒ፡ ቀሲስ፡ ዘያሰትት፡ ሥዩማነ፡ ወእመኒ፡ ሕዝበ፡ ወኢይሜህሮሙ፡ ሠናየ፡ አምልኮ፡ ይቁም። ወእመሰ፡ ነበረ፡ እንዘ፡ ያሰትት፡ ይስዐር
=== paragraph 55 ===
፶፭። እመቦ፡ ኤጲስ፡ ቆጶስ፡ ወእመኒ፡ ቀሲስ፡ ዘኮነ፡ ፅኑሰ፡ እምሥዩማን፡ ወኢይሁብ፡ ዘመፍትው፡ ይቁም፡ ሕገ፡ ዘቀተለ፡ እኁሁ
=== paragraph 56 ===
፶፮። እመቦ፡ ሕስወ፡ ዘተጽሕፈ፡ ዘረሲዓን፡ መጻሕፍተ፡ ከመ፡ ቅዱስ፡ በቤተ፡ ክርስቲያን፡ ዘያግህድ፡ ለሙስና፡ ሕዝብ፡ ይሰዐር
=== paragraph 57 ===
፶፯። እመቦ፡ ዘኮነ፡ ሐሜተ፡ ዲበ፡ መሀይምናን፡ በእንተ፡ ዝሙት፡ ወእመኒ፡ በእንተ፡ ብእሲተ፡ ብእሲ፡ ወእመኒ፡ ካልእ፡ ዘኮነ፡ እምኅሩም፡ ምግባር፡ ወዘለፍዎ፡ ኢይከውኖ፡ ይሠየም
=== paragraph 58 ===
፶፰። እመቦ፡ ሥዩም፡ በእንተ፡ ፍርሀተ፡ ሰብእ፡ እመሂ፡ ለአይሁዳዊ፡ ወእመኒ፡ ለአረማዊ፡ ወእመኒ፡ ለዕልዋን፡ ዘክሕደ፡ ስሞ፡ ለክርስቶስ፡ ይሰደድ፡ እምስመ፡ ሢመቱ፡ ይሰዐር
=== paragraph 59 ===
፶፱። እመቦ፡ ኤጲስ፡ ቆጶስ፡ ወቀሲስ፡ ወዲያቆን፡ ወእመ፡ አኮ፡ ዘኮነ፡ እምሥዋዕ፡ ይበልዕ፡ ሥጋ፡ በደመ፡ ነፍስ፡ ወእመኒ፡ ምውተ፡ በአርዌ፡ ወማውታ፡ ይሰዐር። እስመ፡ ዘንተ፡ ሕግ፡ ከልአ፡ ወእመሰ፡ ሕዝባዊ፡ ይቁም
=== paragraph 60 ===
፷። እመቦ፡ ሥዩም፡ ዘተረክበ፡ በሰንበተ፡ ክርስቲያን፡ ወእመኒ፡ በሰንበተ፡ አይሁድ፡ እንዘ፡ ይጸውም፡ ዘእንበለ፡ አሐቲ፡ ይስዐር
=== paragraph 61 ===
፷፩። እመቦ፡ ሥዩም፡ ወእመኒ፡ ሕዝባዊ፡ ዘቦአ፡ ውስተ፡ ምኵራበ፡ አይሁድ፡ ወእመኒ፡ ውስተ፡ ዘዕልዋን፡ ይጸሊ፡ ይስዐር፡ ወይቁም
=== paragraph 62 ===
፷፪። እመቦ፡ ሥዩም፡ በባእስ፡ ወጐድአ፡ ወእምጕድአት፡ አሐቲ፡ ቀተለ፡ ይስዐር፡ በእንተ፡ ትዝልፍቱ፡ ወእመሰ፡ ሕዝባዊ፡ ይቁም
=== paragraph 63 ===
፷፫። እመቦ፡ ድንግለ፡ ዘኢፍኅርት፡ ተኀዪሎ፡ ነሥአ፡ ይቁም። ወኢይከውኖ፡ ካልእተ፡ ይንሣእ፡ አላ፡ ኪያሃ፡ ያቅም፡ እንተ፡ አብደረ፡ እመኒ፡ ነዳይት፡ ይእቲ
=== paragraph 64 ===
፷፬። እመቦ፡ ኤጲስ፡ ቆጶስ፡ ወእመኒ፡ ቀሲስ፡ ወዲያቆን፡ ዳግሚተ፡ ሢመተ፡ ነሥአ፡ እምኀበ፡ ዘኮነ፡ ይስዐር፡ ውእቱኒ፡ ወዘሤሞሂ፡ ለእመ፡ ኢያርአየ፡ ከመ፡ እምዕልዋን፡ ነሥአ፡ ሢመተ። እስመ፡ እንከ፡ ዘእምኀበ፡ እሉ፡ ተጠምቁ፡ ወእመአኮ፡ ተሠይሙ፡ ወኢመሀይምናነ፡ ወኢሥዩማነ፡ ኢይትከሀል
=== paragraph 65 ===
፷፭። እመቦ፡ ኤጲስ፡ ቆጶስ፡ ወቀሲስ፡ ወዲያቆን፡ ወእመኒ፡ አናጕንስጢስ፡ ወመዘምር፡ ቅድስተ፡ ጾመ፡ ፋሲካ፡ ዘኢይጸውም፡ ወኢረቡዐ፡ ወኢዐርበ፡ ይስዐር፡ ዘእንበለ፡ በእንተ፡ ደዌ፡ ሥጋሁ፡ ዘይከልኦ። ወእመሰ፡ ሕዝባዊ፡ ይቁም
=== paragraph 66 ===
፷፮። እመቦ፡ ኤጲስ፡ ቆጶስ፡ ወእመኒ፡ ካልእ፡ ሢዩም፡ ዘይጸውም፡ ምስለ፡ አይሁድ፡ ወእመአኮ፡ ይገብር፡ በዓለ፡ ምስሌሆሙ፡ ወእመኒ፡ ይነሥእ፡ ዘበዓሎሙ፡ አስትዓ፡ እንከሰ፡ ዘመጸለት፡ ወእመኒ፡ ዘውጎ፡ ይስዐር፡ ወሕዝባዊሰ፡ ይቁም
=== paragraph 67 ===
፷፯። እመቦ፡ ክርስቲያናዊ፡ ቅብአ፡ ዘወሰደ፡ ቤተ፡ አምላከ፡ አረሚ፡ ወእመኒ፡ ውስተ፡ ምኵራበ፡ አይሁድ፡ ወእመ፡ አኮ፡ መኃትወ፡ ይቁም
=== paragraph 68 ===
፷፰። እመቦ፡ ሥዩም፡ ወእመሂ፡ ሕዝባዊ፡ እምቅድስት፡ ቤተ፡ ክርስቲያን፡ ዘቀሠጠ፡ መዓረ፡ ግራ፡ ወእመአኮ፡ ቅብአ፡ ይቁም፡ ወትሕምስቶ፡ የኀሊ፡ ምስለ፡ ዘነሥአ
=== paragraph 69 ===
፷፱። ንዋየ፡ ብሩር፡ ወእመ፡ አኮ፡ ዘወርቅ፡ ወዘወይን፡ ወዘተቀደሰ፡ ወኢመኑሂ፡ እንከ፡ ለነሶሳወ፡ ቤቱ፡ ኢይረሲ፡ እስመ፡ ኢሕግ። ወእመሰቦ፡ ዘተረክበ፡ ይትገሠጽ፡ ወእመአኮ፡ ይቁም
=== paragraph 70 ===
፸። ኤጲስ፡ ቆጶስ፡ ለእመ፡ አስተዋደይዎ፡ በዘ፡ ኮነ፡ በኀበ፡ ኄራን፡ ወመሀይምናን፡ ይጸዋዕ፡ መፍትው፡ እምኀበ፡ ኤጲስ፡ ቆጶሳት። ወእመሰ፡ መጺኦ፡ ተአመነ፡ ተዛሊፎ፡ ይሠራዕ፡ ተግሣጹ። ወእመሰ፡ እንዘ፡ ይጼውዕዎ፡ ኢተአዘዘ፡ ይጸዋዕ፡ ዳግመ፡ እንዘ፡ ይልእኩ፡ ኀቤሁ፡ ክልኤተ፡ ኤጲስ፡ ቆጶሳት። ወለእመሰ፡ ከመዝኒ፡ ኢተአዘዘ፡ ይጸዋዕ፡ ሣልሰ፡ ክልኤ፡ ካዕበ፡ ኤጲስ፡ ቆጶሳት፡ ተልኢኮሙ፡ ኀቤሁ። ወለእመሰ፡ እንዘ፡ ከመዝ፡ አስተአከየ፡ ወኢመጽአ፡ ሴኖዶስ፡ ትኴንን፡ ዲበ፡ ዘከመዝ፡ ዘኀልቀ፡ ከመ፡ ኢይምሰሎ፡ ዘረብሐ፡ በጐዪየ፡ ተስናን
=== paragraph 71 ===
፸፩። ዘኮነ፡ ስምዐ፡ ዲበ፡ ኤጲስ፡ ቆጶስ፡ ዕልወ፡ ኢይንሥኡ፡ አላ፡ ወኢመሀይምነ፡ አሐደ፡ እስመ፡ በአፈ፡ ክልኤቱ፡ ወሠለስቱ፡ ሰማዕት፡ ይቁም፡ ኵሉ፡ ቃል
=== paragraph 72 ===
፸፪። እስመ፡ ኢርቱዕ፡ ለኤጲስ፡ ቆጶስ፡ ለእኁሁ፡ ወእመኒ፡ ለወልዱ፡ ወእመ፡ አኮ፡ ለአዝማዲሁ፡ እንዘ፡ ይጼጉ፡ ሢመተ፡ ኤጲስ፡ ቆጶስና፡ ይሢም፡ ወኢዘውእቱ፡ ፈቀደ፡ ይሢም። ዋርሳነ፡ ኤጲስ፡ ቆጶስናሁ፡ ይግበር፡ ኢጽድቅ፡ ውእቱ፡ ዘእግዚአብሔር፡ እንዘ፡ ይጼጉ፡ በአብድሮ፡ ሰብእ፡ ወኢዘክርስቶስ፡ ቤተ፡ ክርስቲያን፡ ለርስት፡ ኢመፍትው፡ ይረሲ። ወእመሰቦ፡ ዘዘንተ፡ ገብረ፡ ዘእንበለ፡ በቍዕ፡ ትኩኖ፡ ሢመቱ፡ ወሎቱኒ፡ ይትገሠጽ፡ በቁመት
=== paragraph 73 ===
፸፫። እመቦ፡ ፅዉሰ፡ ዐይን፡ ወፅዉሰ፡ እግር፡ ወይደልዎ፡ ኤጲስ፡ ቆጶስና፡ ይሠየም። እስመ፡ ኢቍስለ፡ ሥጋሁ፡ ኪያሁ፡ ይከልእ፡ አላ፡ ዘነፍስ፡ ርኵስ
=== paragraph 74 ===
፸፬። ጽሙም፡ ወዕዉር፡ ኢይሠየም፡ ኤጲስ፡ ቆጶስ፡ አኮ፡ እስመ፡ ርኩስ፡ አላ፡ ከመ፡ ግብረ፡ ቤተ፡ ክርስቲያን፡ ኢይፀራዕ
=== paragraph 75 ===
፸፭። እመቦ፡ ዘቦ፡ ጋኔን፡ ኢይሠየም፡ አላ፡ ውስተ፡ ዐቢይ፡ ክርስቲያን፡ ይትበዋሕ። ወነጺሖሰ፡ ይጸሊ፡ ወለእመ፡ ይደልዎ፡ ይኩን
=== paragraph 76 ===
፸፮። ዘእምአረሚ፡ ቦአ፡ ወተጠምቀ፡ ወእመኒ፡ እምእኪት፡ ሕይወት፡ ኢጽድቅ፡ ይእተ፡ ጊዜ፡ ይሠየም፡ ለኤጲስ፡ ቆጶስና። እስመ፡ ግፍዕ፡ ዝዓዲ፡ ሕገ፡ ኢያእሚሮ፡ ለካልኣን፡ ይኩን፡ መምህረ፡ ዘኢተምህረ፡ ለሊሁ፡ ለእመሰ፡ ባሕቱ፡ በመለኮተ፡ ጸጋ፡ ኮነ፡ በመልእክት፡ ሠናይ
=== paragraph 77 ===
፸፯። ነገርነ፡ ከመ፡ ኢመፍትው፡ ኤጲስ፡ ቆጶስ፡ ያብእ፡ ርእሶ፡ ውስተ፡ ዘዝዓለም፡ ሥርዐት፡ አላ፡ ይፀመድ፡ ለዘቤተ፡ ክርስቲያን፡ ትካዝ፡ ወእመ፡ አኮ፡ ይስዐር። እስመ፡ አልቦ፡ ዘይክል፡ ለክልኤ፡ አጋእዝት፡ ተቀንዮ፡ በከመ፡ ዘእግዚእ፡ ትእዛዝ
=== paragraph 78 ===
፸፰። አግብርት፡ ውስተ፡ ሢመት፡ ይሠየሙ፡ ዘእንበለ፡ ፈቃደ፡ አጋእዝቲሆሙ፡ ኢናበውሕ፡ ለአሕዝኖ፡ ለእለ፡ አጥረዩ። እስመ፡ ግፍዐ፡ አብያት፡ ዝይከውን። ወለእመሰ፡ ዘይደልዎ፡ ተረክበ፡ ገብር፡ ለሢመት፡ በከመ፡ ሲሞን፡ ዘዚአነ፡ ዘተረክበ፡ ወአብሕዎ፡ አጋእዝቲሆሙ፡ ወአግዐዝዎ፡ እምቤቶሙ፡ ያውፅእዎ፡ ይኩን
=== paragraph 79 ===
፸፱። ኤጲስ፡ ቆጶስ፡ ወእመኒ፡ ቀሲስ፡ ወዲያቆን፡ ምስለ፡ ሐራ፡ ዘይነብር፡ ወምክዕቢተ፡ ይግበር፡ ይፈቱ፡ ወይእኅዝ፡ ሢመተ፡ ሐራ፡ ወዘክህነት፡ ይስዐር፡ መፍትው። እስመ፡ ዘንጉሥ፡ ለንጉሥ፡ ወዘእግዚአብሔር፡ ለእግዚአብሔር
=== paragraph 80 ===
፹። ዘጸዐለ፡ ንጉሠ፡ ወእመሂ፡ መኰንነ፡ ዘእንበለ፡ ዘበርቱዕ፡ ኵነኔ፡ ይትኰነን፡ ወእመሰ፡ ሥዩም፡ ይስዐር፡ ወእመሰ፡ ሕዝባዊ፡ ይቁም
=== paragraph 81 ===
፹፩። ከመ፡ ኢመፍትው፡ ፍጡራነ፡ መዝሙር፡ ይትነበብ፡ በቤተ፡ ክርስቲያን፡ ወኢዘእንበለ፡ በሕገ፡ መጻሕፍት፡ አላ፡ ዳእሙ፡ ባሕቲቶ፡ ዘበሕግ፡ ዘሐዲስ፡ ወዘትካት። ሥርዐት፡ መጠነ፡ ዘመፍትው፡ ይትነበብ፡ ወመጠነ፡ ይትገሀድ። ግብረ፡ ዓለም፡ ፩። ፀአተ፡ ግብጽ፡ ፩። ሌዋዊያን፡ ፩። ኍልቍ፡ ፩። ዳግም፡ ሕግ፡ ፩። ኢያሱ፡ ዘኔዌ፡ ፩። ፈታሕት፡ ፩። ሩት፡ ፩። ነገሥት፡ ፬። ሕጹጻን፡ ፪። ዕዝራ፡ ፫። መጽሐፈ፡ መዝሙር፡ ፻፶። ምሳሌ፡ ሰሎሞን፡ ፩። መክብብ፡ ፩። መሓልየ፡ መሓልይ፡ ፩። ኢዮብ፡ ፩። ነቢያት፡ ንኡሳን፡ ፲፪። ኢሳይያስ፡ ነቢይ፡ ፩። ኤርሚያስ፡ ነቢይ፡ ፩። ሕዝቅኤል፡ ነቢይ፡ ፩። ዳንኤል፡ ነቢይ፡ ፩። ወንጌላት፡ ፬። ግብረ፡ ሐዋርያት፡ ፩። ዘጳውሎስ፡ መልእክት፡ ፲፬። ዘሐዋርያት፡ ፯። ዘንተ፡ እንከ፡ ወበእንተ፡ ሥርዐታት፡ ለክሙ፡ ተሠርዐ፡ እምኀቤነ። ኤጲስ፡ ቆጶሳት፡ ወአንትሙሂ፡ እንዘ፡ ትሄልዉ፡ ቦቱ፡ ትድኅኑ፡ ወሰላመ፡ ትረክቡ። ወእመሰ፡ ኢተአዘዝክሙ፡ ትትኴነኑ፡ ወሕገ፡ ዘበበይናቲክሙ፡ ዘለዘለፉ፡ ትረክቡ፡ ኵነኔ። በኢተአዝዞ፡ ዘመፍትው፡ ትትኴነኑ፡ ወይእዜኒ፡ ወዘልፈኒ። ወለዓለመ፡ ዓለም፡ አሜን።