##### edition  (gez)
=== paragraph 1 ===
ዝንቱ፡ መጽሐፍ፡ ዜናሆሙ፡ ለሐዋርያት፡ እምድኅረ፡ ዐርገ፡ እግዚእነ፡ ወአምላክነ፡ ክርስቶስ፡ ዘአዘዙ፡ ሴኖዶስ፡ ዘጸሐፈ፡ ቀሌምንጦስ፡ በእንተ፡ ሐዋርያት፡ ዘከመ፡ ሠርዑ፡ ለቤተ፡ ክርስቲያን፡ ቅድስት፡ እንተ፡ ተሣየጣ፡ በደሙ፡ ክቡር።
=== paragraph 2 ===
ወወሀቡ፡ ለዘ፡ ተለዎሙ፡ ወቦአ፡ ውስተ፡ ጽዋዔሆሙ፡ ወአምነ፡ በእግዚአብሔር፡ በእደዊሆሙ፡ እምኵሉ፡ አሕዛብ፡ ወአይሁድኒ። ወአዘዙ፡ መትልዎሙ፡ እምድኅሬሆሙ፡ ኤጲስ፡ ቆጶሳት፡ እምቅድመ፡ ጉባኤ፡ ዘኒቂያ፡ ዘሠርዑ፡ ሕገ፡ እግዚአብሔር፡ ወሞእዎሙ፡ ለዕልዋን፡ እለ፡ ይትቃረንዋ፡ ለጽድቅ፡ ወወሀቡ፡ ትእዛዘ፡ እምወንጌል፡ ወእምባዕዳን፡ መጻሕፍተ፡ እግዚአብሔር። ወአርአየ፡ እግዚአብሔር፡ ጽድቀ፡ በኵሉ፡ መዋዕል፡ በመዊእ፡ ወበቃል፡ ገሃደ፡ ወአስተኃፈሮሙ፡ ለዕልዋን፡ በመርገም፡ ዘለዓለም
=== paragraph 3 ===
ወአርዳኢሁሰ፡ እምድኅረ፡ ተንሥአ፡ እምውታን፡ ሀለዉ፡ ዝርዋን፡ በምድረ፡ ገሊላ፡ ወሀገረ፡ ናዝሬት፡ ኀበ፡ አዘዞሙ። ወበአርብዓ፡ ዕለት፡ እምድኅረ፡ ትንሣኤሁ፡ ተጋብኡ፡ ኀበ፡ ደብረ፡ ዘይት፡ በኢየሩሳሌም፡ ወክርስቶስ፡ ምስሌሆሙ፡ እንዘ፡ ኢያአምርዎ፡ በማእከሌሆሙ። ወአስተርአዮሙ፡ በይእቲ፡ ዕለት፡ ወአንበረ፡ እዴሁ፡ ዲበ፡ ርእሶሙ፡ ለለ፡ አሐዱ፡ አሐዱ፡ እምኔሆሙ፡ ለዐሠርቱ፡ ወአሐዱ፡ አርዳኢሁ፡ ወባረኮሙ፡ ወረሰዮሙ፡ ካህናተ፡ ህየንተ፡ ካህናተ፡ ደቂቀ፡ እስራኤል፡ ምኑናን።
=== paragraph 4 ===
እስመ፡ ከመዝ፡ ይቤ፡ እግዚአብሔር፡ በአፈ፡ ሚኪያስ፡ ነቢይ፡ ዘይቤ፡ ኦደቂቀ፡ አሮን፡ ናሁ፡ መነንኩ፡ ክህነተ፡ ሌዊ፡ አቡክሙ፡ ወኢይዜክሩ፡ እንከ፡ ክህነቶ፡ ለአሮን፡ እስመ፡ ካህን፡ መልአከ፡ እግዚአብሔር፡ ወይቤ፡ በወንጌል፡ ናሁ፡ አነ፡ እፌኑ፡ መልአክየ፡ ቅድመ፡ ገጽከ፡ ዘይጸይሕ፡ ፍኖተከ።
=== paragraph 5 ===
ወእምዝ፡ ጾሮ፡ ደመና፡ ብሩህ፡ ወአልዐሎ፡ እማእከሎሙ፡ እንዘ፡ ይሬኢይዎ፡ እስከ፡ ተላዐለ፡ እስከ፡ ሰማይ፡ እንዘ፡ ያንቀዐድዉ፡ በአዕይንቲሆሙ። ወሰገዱ፡ ለእግዚአብሔር፡ እስመ፡ ርእይዎ፡ እንዘ፡ የዐርግ፡ ሰማየ፡ በከመ፡ ነገሮሙ፡ ወተፈሥሑ፡ ዐቢየ፡ ፍሥሓ፡ እስመ፡ አንበረ፡ እዴሁ፡ ዲቤሆሙ፡ ወሤሞሙ፡ ካህናተ
=== paragraph 6 ===
ወሶበ፡ ተሰወሮሙ፡ ገብኡ፡ ውስተ፡ ጽርሕ፡ ኀበ፡ በልዑ፡ ምስሌሁ፡ ፍሥሐ፡ ወነበሩ፡ ውስቴታ፡ እንዘ፡ ይጼልዩ፡ ወይጸውሙ፡ ዐሡረ፡ መዋዕለ፡ ወሐለዩ፡ ኀበ፡ የሐውሩ፡ ከመ፡ ይጸውዑ፡ ሰብአ፡ ውስተ፡ አሚን።
=== paragraph 7 ===
ወኢያአምሩ፡ ልሳናቲሆሙ፡ ወኢይሌብዉ፡ ቃሎሙ። ወይቤሎሙ፡ ጴጥሮስ፡ ዘውእቱ፡ ርእስ፡ በኀበ፡ ክርስቶስ፡ ላዕለ፡ ኵሎሙ፡ ሐዋርያት፡ ዘሰመዮ፡ ስምዖን፡ ጴጥሮስ፡ ኢኮነ፡ ዝንቱ፡ ግብር፡ ኀቤነ፡ አላ፡ እግዚእነ፡ ዘአሰፈወነ፡ ከመ፡ ይፈኑ፡ ለነ፡ ጰራቅሊጦስ፡ ዘውእቱ፡ መንፈስ፡ ቅዱስ፡ ወውእቱ፡ ያሌብወነ፡ ኵሎ፡ ዘይደልወነ፡ ናስምዕ፡ ወንግበር
=== paragraph 8 ===
ወእንዘ፡ ይነግሮሙ፡ ጴጥሮስ፡ ዘንተ፡ ወናሁ፡ ሰምዑ፡ ድምፀ፡ ከመ፡ ድምፀ፡ ነፋስ፡ ዐውሎ፡ ወአጼነዉ፡ ጼና፡ ጥዑመ፡ ዘኢያአምሩ፡ ከማሁ፡ በውስተ፡ ዓለም። ወአስተርአየ፡ ማእከሎሙ፡ ልሳናተ፡ እሳት፡ ዘይወርድ፡ ላዕለ፡ አሐዱ፡ አሐዱ፡ እምኔሆሙ።
=== paragraph 9 ===
ወአኀዙ፡ ይትናገሩ፡ በልሳን፡ ሐዲስ፡ ኀበ፡ የሐውሩ፡ ለጽዋዔ፡ ሰብእ፡ ውስተ፡ አሚን፡ ወለአለብዎቶሙ፡ ዘይደልዎሙ፡ ይግበሩ፡ ወከመ፡ ይምሀሩ፡ ለሰብእ፡ ጸሎተ፡ ወተቀንዮ፡ ወሕገ፡ ወሥርዐተ። ወአእኰትዎ፡ ለእግዚአብሔር፡ በእንተ፡ ዘአለበዎሙ፡ ወጾሙ፡ አርብዓ፡ ዕለተ፡ ለአኰቴተ፡ ዚአሁ። እምዝ፡ ተዘርዉ፡ ውስተ፡ ርሑቅ፡ በሓውርት፡ ከመ፡ ይጸውዑ፡ ሰብአ፡ ውስተ፡ አሚን፡ በከመ፡ አዘዞሙ፡ ክርስቶስ
=== paragraph 10 ===
ወኮነ፡ ሰባኬ፡ ወመጥምቀ፡ ወሠያሜ፡ ካህናት፡ ዘቀደመ፡ ክህነተ፡ ወዘአእመነ፡ ኵሎ፡ አይሁደ፡ ወሰብአ፡ እለ፡ ይነብሩ፡ ኢየሩሳሌም፡ ወበምድረ፡ ፍልስጤም፡ ወአድያሚሃ፡ ወኵሉ፡ አህጉር፡ ኀምስ፡ ወቂሳርያ፡ ወሳምር፡ ወምድረ፡ ዐረብ፡ ያዕቆብ፡ እኁሁ፡ ለእግዚእነ፡ ወውእቱ፡ ሥሉጥ፡ ላዕለ፡ ቤተ፡ ክርስቲያነ፡ ሐዋርያት፡ እንተ፡ ይእቲ፡ ጽዮን
=== paragraph 11 ===
ወማርቆስ፡ ወንጌላዊ፡ በእልስክንድርያ፡ ወግብጽ፡ ወኖባ፡ ወምድረ፡ ኢትዮጵያ፡ እስከ፡ ጽንፋ
=== paragraph 12 ===
ወህንዳኬ፡ ወስንድ፡ ወዘየዐውዳ፡ እስከ፡ ባሕረ፡ ኢርትራ፡ ቶማስ፡ ሐዋርያ
=== paragraph 13 ===
ወሶርያ፡ ወአንጾኪያ፡ ወገላቲያ፡ እስከ፡ ቀሬጤስ፡ ፎኖጥስ፡ ስምዖን፡ ኬፋ፡ ዘውእቱ፡ ጴጥሮስ።
=== paragraph 14 ===
ወእንዘ፡ ይትለአክ፡ በጽሐ፡ ኀቤሁ፡ ዜና፡ ሴሞን፡ መሠርይ፡ እንዘ፡ ሀሎ፡ በሀገረ፡ ሮሜ፡ ወአስሐቶሙ፡ ለሰብኣ፡ በሥራዩ፡ ወበዕልወቱ። ወሖረ፡ ኀቤሃ፡ ወአምኑ፡ ኵሎሙ፡ ሰብኣ፡ በእዴሁ፡ ወአጥመቆሙ፡ ለኵሎሙ፡ ወዓዲ፡ ሰብአ፡ አንጾኪያ፡ ወአስጰንያ፡ ወዘየዐውዶሙ፡ አህጉር፡ ወኵሎ፡ ሮሜ።
=== paragraph 15 ===
ወአጥፍኦ፡ እግዚአብሔር፡ ለሲሞን፡ መሠርይ፡ በስእለቱ፡ ወጸሎቱ፡ ለቅዱስ፡ ወአስተርአየ፡ ሀይማኖት፡ ውስተ፡ ኵላ፡ ይእቲ፡ ምድር፡ በቅድስናሁ፡ ወንጽሑ፡ ወትዕግሥቱ
=== paragraph 16 ===
ወዮሐንስ፡ ወንጌላዊ፡ በኤፌሶን፡ ወተስሎንቄ፡ ወአስያ፡ ወጢሮስ፡ ወአካይያ፡ ወኵሎ፡ ምድረ፡ ፊሪቅያ
=== paragraph 17 ===
እንድርያስ፡ እኁሁ፡ ለስምዖን፡ በኒቂያ፡ ወበኒቂድያ፡ ወኵሎ፡ ምድረ፡ ዲኑንያ፡ ወአድያሚሃ፡ እምወሰና
=== paragraph 18 ===
ሉቃስ፡ ጸሓፌ፡ ወንጌል፡ በዘንጢያ፡ ወበርቂያ፡ ወፍርቂያ፡ ወዘየዐውዳ፡ እስከ፡ አድያመ፡ ምዕራብ፡ እስከ፡ ባሕር፡ ዘየዐቢ
=== paragraph 19 ===
ወመርማሪ፡ ዘእምሰብዓ፡ አርድእት፡ በደሴት፡ ወፋርስ፡ ወምድረ፡ ባቢሎን፡ ወኵሎሙ፡ ጸለምት፡ ወዘየዐውዶሙ፡ ወምድረ፡ ቴማን፡ ወደሰያት፡ ወምድረ፡ ዐረብ፡ እለ፡ ይነብሩ፡ በሐይመታት፡ እስከ፡ ባሕረ፡ የም
=== paragraph 20 ===
ወአካይ፡ ረድኡ፡ ለመርማሪ፡ በምድረ፡ አድባር፡ ወአሕዋዝ፡ ወተርሴስ፡ እስከ፡ ምድረ፡ ስንድ፡ ወእስከ፡ ጎግ፡ ወማጎግ
=== paragraph 21 ===
ወባዕዳንሰ፡ ሐዋርያት፡ ተፈነዉ፡ ኀበ፡ አባግዕ፡ እለ፡ ተገድፉ፡ ወጸውዑ፡ ሰብአ፡ ውስተ፡ አሚን፡ ወአጥመቅዎሙ፡ በከመ፡ አዘዞሙ፡ እግዚእነ፡ ክርስቶስ፡ በስመ፡ አብ፡ ወወልድ፡ ወመንፈስ፡ ቅዱስ፡ እስከ፡ ተፈልጡ፡ እምዓለም፡ ወሖሩ፡ ውስተ፡ ዕረፍት፡ ወፍሥሓ፡ ዘለዓለም
=== paragraph 22 ===
ወእምቅድመ፡ ይትፈለጡ፡ ውስተ፡ አህጉር፡ ገብሩ፡ ሥርዐተ፡ ወቀኖና፡ ወአዘዝዎሙ፡ ለእለ፡ አምኑ፡ ወመሀርዎሙ፡ ኪያሃ፡ ወአጽንዕዎሙ፡ ባቲ፡ አመ፡ ሀለዉ፡ ጉቡኣን፡ በጽዮን። ወእምዝ፡ ተፈልጡ፡ ወመሀሩ፡ በኵልሄ፡ ለእለ፡ አምኑ፡ በእደዊሆሙ፡ እምኵሉ፡ በሓውርት፡ ኀበ፡ ሖሩ
=== paragraph 23 ===
[1] ፩፡ ትእዛዝ። ከመ፡ ይኩን፡ ጸሎቶሙ፡ መንገለ፡ ምሥራቅ፡ እስመ፡ ይቤ፡ እግዚእነ፡ ኢየሱስ፡ ክርስቶስ፡ ከመ፡ ይመጽእ፡ ለሊሁ፡ እግዚአብሔር፡ እምሰማይ፡ በደኃሪ፡ መዋዕል፡ ከመ፡ መብረቅ፡ ዘይወፅእ፡ እምሥራቅ፡ ወያስተሬኢ፡ እስከ፡ ምዕራብ፡ ወበእንተዝ፡ አእመርነ፡ ከመ፡ ምጽአቱ፡ ይከውን፡ እምሥራቅ
=== paragraph 24 ===
[2] ፪፡ ትእዛዝ። በእንተ፡ ሰንበተ፡ ክርስቲያን። ከመ፡ ይትጋብኡ፡ በበእሑድ፡ በሠለስቱ፡ ሰዐት፡ ለጸሎት፡ ወአንብቦ፡ መጻሕፍት፡ ዘትካት፡ ወዘሐዲስ፡ ወአቅርቦ፡ ቍርባን፡ እስመ፡ ባቲ፡ ዜናዋ፡ መልአክ፡ ለማርያም፡ ከመ፡ ትፀንስ፡ ክርስቶስሃ፡ ወባቲ፡ ተንሥአ፡ እምውታን፡ ወባቲ፡ ይወርድ፡ እምሰማይ፡ በዕለተ፡ ትንሣኤ፡ ምስለ፡ መላእክቲሁ፡ በዐቢይ፡ ስብሐት፡ ወይነብር፡ ምስለ፡ አርዳኢሁ፡ ቅዱሳን፡ ወይኴንን፡ ሕያዋነ፡ ወምውታነ
=== paragraph 25 ===
[3] ፫፡ ትእዛዝ። በእንተ፡ ዕለተ፡ ረቡዕ። ከመ፡ ይግበሩ፡ ጸሎተ፡ ተጋቢኦሙ፡ በዕለተ፡ ረቡዕ፡ እስመ፡ ባቲ፡ ነገሮሙ፡ ኢየሱስ፡ ከመ፡ ይነሥእዎ፡ ወይሰቅልዎ፡ ወይመውት፡ ወይትነሣእ፡ በሣልስት፡ ዕለት፡ ወሐዘኑ፡ ወተከዙ፡ በእንቲአሁ
=== paragraph 26 ===
[4] ፬፡ ትእዛዝ። በእንተ፡ ዐርብ። ከመ፡ ይግበሩ፡ ጸሎተ፡ በዕለተ፡ ዐርብ፡ በ፱፡ ሰዐት፡ እስመ፡ በጽሐ፡ ዘነገሮሙ፡ ክርስቶስ፡ በረቡዕ፡ በእንተ፡ ሕማሙ፡ ወስቅለቱ፡ በዕለተ፡ ዐርብ። ወተጠየቀ፡ ውእቱ፡ አመ፡ አድለቅለቀት፡ ምድር፡ ወጸልመ፡ ፀሐይ፡ በይእቲ፡ ዕለት
=== paragraph 27 ===
[5] ፭፡ ትእዛዝ። በእንተ፡ ሊቃውንት። ከመ፡ ይሢሙ፡ ሎሙ፡ መሀይምናን፡ ሊቃውንተ፡ ሊቃነ፡ ጳጳሳት፡ ወጳጳሳተ፡ ወኤጲስ፡ ቆጶሳተ፡ ከመ፡ ይኩኑ፡ በአርአያ፡ ሙሴ፡ ወአሮን፡ ሊቃነ፡ ካህናት፡ ወይአዝዙ፡ ለኵሉ፡ ሕዝብ
=== paragraph 28 ===
[6] ፮፡ ትእዛዝ። ከመ፡ ይሢሙ፡ ቀሳውስተ፡ ከመ፡ ይኩኑ፡ በአርአያ፡ ካህናተ፡ ደቂቀ፡ እስራኤል
=== paragraph 29 ===
[7] ፯፡ ትእዛዝ። ከመ፡ ይሢሙ፡ ዲያቆናተ፡ ወንፍቀ፡ ዲያቆናተ፡ ወአናጕንስጢሰ፡ ከመ፡ ይኩኑ፡ ለመልእክት፡ ከመ፡ ደቂቀ፡ ሌዊ፡ ወይጸውሩ፡ ንዋየ፡ ቍርባን፡ ወንዋየ፡ ቤተ፡ መቅደስ፡ ወንዋየ፡ መሥዋዕት
=== paragraph 30 ===
[8] ፰፡ ትእዛዝ። በእንተ፡ ልደት። ወይግበሩ፡ በዓለ፡ ልደቱ፡ ለእግዚእነ፡ በበዐመት፡ በዕለተ፡ ተወልደ፡ አመ፡ ፳ወ፱፡ ለወርኀ፡ ታኅሣሥ፡ እስመ፡ ውእቱ፡ ርእሰ፡ ኵሉ፡ በዓላት
=== paragraph 31 ===
[9] ፱፡ ትእዛዝ። በእንተ፡ ጥምቀት። ወይግበሩ፡ በዓለ፡ ጥምቀቱ፡ ለእግዚእነ፡ እስመ፡ ዕለተ፡ ቅዳሴ፡ ይእቲ፡ አመ፡ ተጠምቀ፡ እምዮሐንስ፡ መጥምቅ፡ ዘውእቱ፡ ፲ወ፩፡ ለጥር
=== paragraph 32 ===
[10] ፲፡ ትእዛዝ። በእንተ፡ ጾመ፡ ፋሲካ። ወይጹሙ፡ በበዐመት፡ ፵፡ ዕለተ፡ በከመ፡ ጾሙ፡ ሙሴ፡ ወኤልያስ፡ ወነቢያት፡ በቀዳሚ፡ ወአኀዘ፡ እግዚእነ፡ ኢየሱስ፡ ክርስቶስ፡ ከማሁ፡ በሥጋሁ፡ ወአዖቀ፡ ከመ፡ ይግበርዎ፡ እምቅድመ፡ ሕማማቲሁ፡ ወይዘከሩ፡ ሕማሞ፡ ለክርስቶስ፡ ወስቅለቶ፡ ወሞቶ፡ ወርደቶ፡ ውስተ፡ መቃብር። ወበዕለተ፡ ትንሣኤሁ፡ ይግበሩ፡ ፋሲካ፡ ወይግበሩ፡ በዓለ፡ በተፍጻሜተ፡ ጾም፡ ዘእንበለ፡ ሰናብት፡ ወእሑድ፡ ጸዊሞሙ፡ ፵፡ ዕለተ፡ ወዕለተ፡ ዐርብ፡ ወቀዳሚት፡ ሰንበት፡ ክልኤሆን፡ በዕለተ፡ ተሰቅለ፡ ወተቀብረ፡ ወዕለተ፡ እሑድ፡ ትንሣኤሁ፡ ወአልቦ፡ እምድኅረ፡ እሉ፡ መዋዕል፡ ጾመ፡ እስከ፡ ተፍጻሜተ፡ ፶፡ ዕለት
=== paragraph 33 ===
[11] ፲፩፡ ትእዛዝ። በእንተ፡ በዓለ፡ ፵። ወይግበሩ፡ በዓለ፡ ዕርገቱ፡ ለእግዚእነ፡ ውስተ፡ ሰማይ፡ እምድኅረ፡ ትንሣኤሁ፡ በ፵፡ ዕለት
=== paragraph 34 ===
[12] ፲፪፡ ትእዛዝ። በእንተ፡ አንብቦ፡ መጻሕፍት፡ ወያንብቡ፡ መጻሕፍተ፡ በዲበ፡ መንበር፡ ልዑል፡ በቤተ፡ ክርስቲያን፡ እምኦሪት፡ ወመጻሕፍተ፡ ኵሉ፡ ነቢያት፡ ወዘሐዋርያት፡ ዜናሆሙ። ወእምድኅሬሁ፡ ያንብቡ፡ እምወንጌል፡ እስመ፡ ውእቱ፡ ተፍጻሜተ፡ ኵሉ፡ መጻሕፍት፡ ወይስምዑ፡ ኵሉ፡ ሕዝብ፡ ቀዊሞሙ፡ በእገሪሆሙ፡ እስመ፡ ዜና፡ ሕይወት፡ ወመድኀኒት፡ ውእቱ፡ ወጸጋ፡ ለኵሉ፡ ሰብእ፡ ወይደሉ፡ ያዕቢይዎ፡ እምኵሉ፡ መጻሕፍት፡ ወይስአሉ፡ ሰብእ፡ ኀበ፡ እግዚአብሔር፡ እንዘ፡ ይትነበብ
=== paragraph 35 ===
[13] ፲፫፡ ትእዛዝ። በእንተ፡ ሥርዐተ፡ ሢመት። ወኢይሠየም፡ ላዕለ፡ ክርስቲያን፡ ወኢይአዝዞሙ፡ ዘኢያአምር፡ ሕገ፡ ወሥርዐተ፡ አላ፡ ዘይገብር፡ ባቲ፡ ወይከውን፡ ኄረ፡ በግዕዙ፡ ወተዐጋሲ፡ በትሕትና፡ ወሠናይ፡ በፍናዊሁ። ወእመሰ፡ ወለጠ፡ ዘንተ፡ ወኢገብረ፡ ኵሎ፡ ዘነገርነ፡ ይስዐር፡ እምሢመቱ፡ በኀይል፡ ወኢይትወከፍዎ፡ ቃሎ፡ ወትእዛዞ፡ እስመ፡ ኢኮነ፡ መእመነ፡ በሠሪዖቱ
=== paragraph 36 ===
[14] ፲፬፡ ትእዛዝ። ካዕበ፡ በእንተ፡ ሢመት። ወይክልእዎ፡ ሢመተ፡ ወመልእክተ፡ ቤተ፡ ክርስቲያን፡ ወኰንኖ፡ ማእከለ፡ ሰብእ፡ ለኵሉ፡ ዘይደፍር፡ መሐላ፡ ሐሰት፡ ወስምዐ፡ ሐሰት፡ ወተዐቅፎ፡ ላዕለ፡ ሰብእ፡ ወዘየሐሚዮሙ፡ በዘኢገብሩ
=== paragraph 37 ===
[15] ፲፭፡ ትእዛዝ። ወይእተት፡ እምሢመት፡ ኵሉ፡ ዘይትአመን፡ በሐሳበ፡ ከዋክብት፡ ወየአምን፡ በነገረ፡ ማርያን፡ ወሰብአ፡ ሥራይ፡ ወረአይተ፡ ኮከብ፡ ወሐሳበ፡ ልደት፡ ወይሴአሎሙ፡ በእንተ፡ ዘኢይደልዎ፡ ወይትወከፍ፡ ቃሎሙ፡ ወያሰትት፡ ትእዛዘ፡ እግዚአብሔር፡ ወሥርዐቶ፡ ወኵነኔሁ፡ ወይዔርዮሙ፡ ለክርስቲያን፡ ምስለ፡ እለ፡ ኢያአምርዎ፡ ለእግዚአብሔር፡ ለይደቅ፡ እምሢመተ፡ ክህነት፡ እስመ፡ ገብረ፡ ከመ፡ አይሁድ፡ መጠዓዊያን
=== paragraph 38 ===
[16] ፲፮፡ ትእዛዝ። ወለእመ፡ ሀለወ፡ ውስተ፡ መልእክተ፡ ቤተ፡ ክርስቲያን፡ ዘይናፍቅ፡ በመልእክቱ፡ ወኢይትአመን፡ ባቲ፡ ወኢይአምንዎ፡ ዲቤሃ፡ ይክልእዎ፡ እምሢመቱ፡ እስመ፡ ኢኮነ፡ መእመነ፡ ወኢሠናየ፡ በመልእክቱ፡ ወባሕቱ፡ ያአብድ፡ ሰብአ፡ ወርእሶሂ፡ እስመ፡ እግዚአብሔር፡ ኢይፈቅድ፡ ጽልሑተ
=== paragraph 39 ===
[17] ፲፯፡ ትእዛዝ። ወይስዐር፡ እምሢመቱ፡ ኵሉ፡ ቀሲስ፡ ወዲያቆን፡ ዘይትዐወቅ፡ በዝሙት፡ ወሥሥዕት፡ ወይኀሥሥ፡ በዝንቱ፡ ዓለም
=== paragraph 40 ===
[18] ፲፰፡ ትእዛዝ። ወኢይሀሉ፡ ውስተ፡ ሢመት፡ ወመልእክተ፡ ቤተ፡ ክርስቲያን፡ ወኢይደመር፡ ምስለ፡ ካህናት፡ ዘያፈቅሮሙ፡ ለአይሁድ፡ ወዘይከውን፡ ዐርኮሙ፡ ከመ፡ አስቆሮታዊ፡ ወኢመፍቀሬ፡ መሰግላን፡ እለ፡ ያመልኩ፡ ጣዖተ። ወዘከመዝ፡ ግዕዙ፡ ያውፅእዎ፡ እምኔሆሙ፡ ወኢይኅድግዎ፡ ማእከሎሙ፡ ወኢይትለአክ፡ ምስሌሆሙ፡ ወኢይሳተፎሙ
=== paragraph 41 ===
[19] ፲፱፡ ትእዛዝ። ወይትወከፍዎ፡ ለኵሉ፡ ዘይመጽእ፡ ውስተ፡ አሚን፡ ወይደምርዎ፡ ምስሌሆሙ፡ ወኢይክልእዎ፡ ሐዊረ፡ ኀበ፡ ሰብኡ፡ እምአይሁድ፡ ወመምለኪያነ፡ ጣዖት፡ ወለእመ፡ ገብአ፡ ኀበ፡ ዘትካት፡ ግብሩ፡ እምድኅረ፡ ትድምርት፡ ወእምዝ፡ ተመይጠ፡ ኀበ፡ እለ፡ ኢየአምኑ፡ ኢይትወከፍዎ፡ ዘእንበለ፡ ከመ፡ መምለኪያነ፡ ጣዖት
=== paragraph 42 ===
[20] ፳፡ ትእዛዝ። ወኢይግበሩ፡ ሊቀ፡ ዘይኤዝዝ፡ ለቤተ፡ ክርስቲያነ፡ እግዚአብሔር፡ ዘይገብር፡ ግብረ፡ ዝንቱ፡ ዓለም። ወኢይደመር፡ ውስተ፡ ነገረ፡ ሕዝብ፡ ዘእንበለ፡ በምክረ፡ ቢጹ፡ እለ፡ ቀደምዎ፡ እለ፡ ያቀውሙ፡ ጸሎተ፡ ከማሁ። ወኢይደሉ፡ ዘእንበለ፡ በምክሩ፡ ወምክሮሙ፡ ኅቡረ፡ በዘያሠምሮ፡ ለእግዚአብሔር፡ ወዘይደልዎሙ፡ ለሕዝብ፡ ወርቱዕ፡ ኵነኔሁ። ወኢይኩን፡ በፍትሑ፡ ዘያሐሥም፡ ለመንፈቆሙ፡ ወኢጋእዘ፡ በተዐድዎ፡ ርትዕ። ወዘከመዝ፡ ግዕዙ፡ ይትፈለጥ። ወኢይኅድግ፡ ቀሲስ፡ ወዲያቆን፡ ጸሎቱ፡ ዘአኀዘ፡ ወኢይፃእ፡ ኀበ፡ ነገረ፡ ባዕድ። ወዘገብረ፡ ከመዝ፡ ኢይከውኖ፡ ይግባእ፡ ኀበ፡ መካኑ፡ ዘቀዲሙ
=== paragraph 43 ===
[21] ፳፩፡ ትእዛዝ። በእንተ፡ ተዝካር። ወይግበሩ፡ ለኵሉ፡ ሰማዕት፡ መሀይምናን፡ እለ፡ ተክዕወ፡ ደሞሙ፡ በእንተ፡ ክርስቶስ፡ እግዚእነ፡ በተአምኖ፡ ተዝካሮሙ፡ በዕለተ፡ ተከለሉ
=== paragraph 44 ===
[22] ፳፪፡ ትእዛዝ። በእንተ፡ ሥርዐተ፡ ጸሎት። ወያብዝኁ፡ ጸሎተ፡ በሌሊት፡ ወመዓልት፡ በመዝሙረ፡ ዳዊት፡ ወይኀልዩ፡ ጸሎተ፡ ባቲ፡ እስመ፡ ይቤ፡ እባርኮ፡ ለእግዚአብሔር፡ በኵሉ፡ ጊዜ፡ ወዘልፈ፡ ስብሐቲሁ፡ ውስተ፡ አፉየ። ወካዕበ፡ ይቤ፡ ጥዑም፡ ለጕርዔየ፡ ነቢብከ፡ እመዓር፡ ወሶካር፡ ጥዕመኒ፡ ለአፉየ። ወበእንተዝ፡ ይደሉ፡ አንብቦ፡ በዜማ፡ ጥዑም፡ በእንተ፡ አዕቢዮ፡ እግዚአብሔር፡ ወስባሔሁ፡ ወአእኵቶ፡ ጸጋሁ፡ ወስኢል፡ ኀቤሁ፡ ወአሠንዮ፡ በኵሉ፡ በእንተ፡ ስሙ፡ ግሩም፡ ወቅዱስ። ወካዕበ፡ ይነግር፡ በእንተ፡ ተፀምዶ፡ ወስባሔ፡ ወተጋንዮ፡ ወተአምኖ፡ ኀጣውእ፡ ወስእለታት፡ ዘይደልዎሙ፡ ለመሀይምናን። ይጸልዩ፡ ባቲ፡ ሶበ፡ ይረክቦሙ፡ ምንዳቤ፡ ወሐዘን፡ ወተጽናስ፡ ወያመሥጡ፡ እመንሱት
=== paragraph 45 ===
[23] ፳፫፡ ትእዛዝ። በእንተ፡ ኈልቈ፡ ካህናት። ወይኩኑ፡ ላእካን፡ ሰብዐቱ፡ እለ፡ ተኀርዩ፡ እምሕዝብ፡ ለመልእክተ፡ ቤተ፡ መቅደስ፡ ኄራን፡ ወሠናያን፡ ወልብዋነ፡ ጥበብ፡ ወአእምሮ፡ ወፈራህያነ፡ እግዚአብሔር፡ እለ፡ ያአምሩ፡ ሥርዐቶ፡ እስመ፡ እሙንቱ፡ እለ፡ ይነግሩ፡ በእንተ፡ ጸሎት። ወይቀድሱ፡ ቍርባነ፡ ወይዕርቁ፡ ሕዝበ፡ በዳኅን፡ ወሰላም፡ እስመ፡ እሙንቱ፡ ውሉደ፡ እግዚአብሔር፡ በአማን፡ በከመ፡ ተብህለ፡ በወንጌል፡ ቅዱስ። ወላእካነ፡ ትንቢት፡ ወይኩኑ፡ እስትርኩባነ፡ ኢይትሀወኩ፡ በግብረ፡ ዓለም፡ አላ፡ ይኩን፡ ግብሮሙ፡ መልእክቶ፡ ለአእምሮ፡ ሕጉ
=== paragraph 46 ===
[24] ፳፬፡ ትእዛዝ። ወይኩን፡ ሊቅ፡ ዘይኤዝዞሙ፡ ለሕዝብ፡ ወይጌሥጾሙ፡ በመስቀል፡ እስመ፡ ንኤዝዝ፡ ወአኮ፡ ዘነአስር፡ ዘእንበለ፡ ርትዕ። ወእመሰ፡ ተዐገሎሙ፡ ካህን፡ እንዘ፡ ንጹሓን፡ እሙንቱ፡ ይሢሙ፡ ዲቤሁ፡ ካህናተ፡ በርትዕ፡ ወለእመ፡ ተስእኖሙ፡ ይሰድዎ፡ ኀበ፡ ጳጳስ፡ አው፡ ኀበ፡ ሊቀ፡ ጳጳሳት፡ ወያቅምዎ፡ በርትዕ፡ ወኢይኅድግዎ፡ ይትዐደው፡ ላዕለ፡ አባግዐ፡ ክርስቶስ፡ እለ፡ ተሣየጦሙ፡ በደሙ፡ ክቡር። ወኢያምዕዕዎሙ፡ ከመ፡ ኢይፃኡ፡ ውስተ፡ ፅርፈት፡ ላዕለ፡ እግዚአብሔር፡ ወክሒድ፡ ለስሙ፡ ቅዱስ። ወይኩኑ፡ መሀይምናን፡ ኄራነ፡ ዘይትዔገሡ፡ ግፍዐ፡ በከመ፡ ይደሉ፡ ከመ፡ ይትበቀል፡ እግዚአብሔር፡ በእንቲአሆሙ። ወኢያድሉ፡ ሢዩም፡ በፍትሕ፡ ማእከለ፡ ሕዝብ፡ ወይሥልጥ፡ ኵነኔሁ። ወዘሰ፡ ያጸድቆ፡ ለዐማጺ፡ በእንተ፡ ዘይሁቦ፡ ወይዔምፆ፡ ለንጹሕ፡ በእንተ፡ ድካሙ፡ ወንዴቱ፡ ውእቱ፡ ይከውን፡ ውጉዘ፡ ወርጉመ፡ ወኢይረስይዎ፡ ዘእንበለ፡ ከመ፡ መምለኬ፡ ጣዖት። ወይክልእዎ፡ ሢመቶ፡ ለዘ፡ ይገብር፡ ከመዝ፡ ወይዘልፍዎ፡ በእንተ፡ ዐመፃሁ፡ ወኢያፍርህከ፡ ጵጵስናሁ
=== paragraph 47 ===
[25] ፳፭፡ ትእዛዝ። ወኢይሀሉ፡ ውስተ፡ ሢመት፡ ወኢይቅረብ፡ ዘይትዔበይ፡ በነፍሱ፡ ወይዜሀር፡ ላዕለ፡ ሰብእ፡ ወይሬኢ፡ ነፍሶ፡ ከመ፡ ዘይዐቢ፡ እምሰብእ፡ ወይከብር፡ ወይኄይስ፡ ወይሬኢዮሙ፡ ለሕዝበ፡ እግዚአብሔር፡ በዐይነ፡ መንኖ። አላ፡ ውእቱ፡ ምኑን፡ በኀበ፡ እግዚአብሔር፡ ወኅሱር፡ ዘአልቦ፡ ሠናየ፡ ዝክረ፡ በሕይወቱ፡ ወኢምሕረተ፡ በኀበ፡ እግዚአብሔር፡ በሞቱ፡ ወስዑር፡ እምክህነቱ። ዘበእንቲአሁ፡ ይቤ፡ እግዚአብሔር፡ በመጽሐፍ፡ እመይጣ፡ ለጸጋ፡ ኀበ፡ ካልእ፡ እምእለ፡ ይትዔበዩ
=== paragraph 48 ===
[26] ፳፮፡ ትእዛዝ። ወይሢሙ፡ ሊቀ፡ ካህናተ፡ ላዕለ፡ ቀሳውስተ፡ በሓውርት፡ ዘየዐውድ፡ ማእከሎሙ፡ ወይዋሒዮሙ፡ ወይአዝዞሙ፡ ወይገሥጾሙ፡ ወያእምሩ፡ ከመ፡ ሥሉጥ፡ ውእቱ፡ ላዕሌሆሙ፡ ወያእምር፡ ግብሮሙ፡ ወይደልዎሙ፡ ይግበሩ፡ ትእዛዞ፡ በከመ፡ ሳሙኤል፡ ነቢይ፡ ዘዖደ፡ በአድያመ፡ ኢየሩሳሌም፡ ወአዘዞሙ፡ ወገሠጾሙ
=== paragraph 49 ===
[27] ፳፯፡ ትእዛዝ። በእንተ፡ ንጉሥ። ወይኩን፡ ምቅዋሙ፡ ለንጉሥ፡ ምስለ፡ መሀይምናን፡ በጊዜ፡ ጸሎት፡ ቅድመ፡ ኵሎሙ፡ ሰብእ፡ ወይቁም፡ ምስለ፡ ሊቃውንት፡ ወሢዩማን፡ ካህናት፡ ወይባእ፡ ምስሌሆሙ፡ ውስተ፡ ምሥዋዕ፡ ወይኩን፡ ምቅዋሙ፡ በህየ፡ እስመ፡ ዳዊት፡ ንጉሥ፡ ወእለ፡ ይትማሰልዎ፡ ነገሥት፡ ይቀድምዎሙ፡ ለኵሉ፡ ሰብእ፡ በውስተ፡ ጸሎት፡ ወይበውኡ፡ ቤተ፡ መቅደስ፡ ወቦሙ፡ ምቅዋመ፡ በውስጥ
=== paragraph 50 ===
[28] ፳፰፡ ትእዛዝ። ኢይትኀበል፡ ንጉሥ፡ ገቢረ፡ በቤተ፡ መቅደስ፡ በፈቃደ፡ ርእሱ፡ አላ፡ በፈሪሀ፡ እግዚአብሔር፡ ወበኂሩት፡ ከመ፡ ይሡቅ፡ እግዚአብሔር፡ መንበሮ፡ በጽድቅ፡ ወያኑኅ፡ መዋዕሊሁ፡ ወያውርሶ፡ ጸጋ፡ ዘለዓለም፡ መንፈሳዌ፡ ወኢይክልኦ፡ ውሉደ፡ እለ፡ ይነብሩ፡ ዲበ፡ መንበሩ፡ እስከ፡ ለዓለም
=== paragraph 51 ===
[29] ፳፱፡ ትእዛዝ። ካህናት። ወኢይትሐበሉ፡ ካህናት፡ ወሢዩማን፡ እምግብር፡ ዘተአዘዙ፡ ወኢይትዐደዉ፡ ትእዛዘ፡ እምዘ፡ አብሕዎሙ፡ ከመ፡ ይአዝዙ፡ ወይገሥጹ። ወሤምዎሙ፡ በዘ፡ ይደሉ፡ ወይረትዕ፡ ወአኮ፡ በዘ፡ ይረክብ፡ ኀጢአተ፡ ወቅሥተ፡ ወይከውን፡ በላዕሌሁ፡ ጋእዘ
=== paragraph 52 ===
[30] ፴፡ ትእዛዝ። በእንተ፡ ቍርባን። ወያዕርጉ፡ ኅብስተ፡ ዘይትገበር፡ ለቍርባን፡ ዲበ፡ ምሥዋዕ፡ በዕለተ፡ ተገብረ፡ ወኢያስተዳኅርዎ፡ ለጌሠም፡ ወይሜጥዉ፡ በዕለቱ፡ ወኢያትርፉ፡ ለካልእ፡ ዕለት፡ እስመ፡ ኢይደሉ። ወከመዝ፡ አዘዝናክሙ፡ ከመ፡ ትግበሩ፡ በከመ፡ አርአየክሙ፡ እግዚአብሔር፡ እምድኅሬነ
=== paragraph 53 ===
ወዘንተ፡ ሠርዑ፡ ሐዋርያት፡ እንዘ፡ ጉቡኣን፡ እሙንቱ፡ ውስተ፡ ጽርሕ፡ በኢየሩሳሌም፡ ለእለ፡ ሰምዕዎሙ፡ ወተለውዎሙ፡ ወአምኑ፡ በእግዚአብሔር፡ በእደዊሆሙ፡ እምአይሁድ፡ ወእምኵሉ፡ አሕዛብ፡ ወሠርዕዎ፡ ለኵሉ፡ ዓለም፡ እስመ፡ መንፈስ፡ ቅዱስ፡ ዘወረደ፡ ላዕሌሆሙ፡ በመልዕልተ፡ ጽዮን፡ በበዓለ፡ ኀምሳ፡ ኮኖሙ፡ ጥበበ፡ ወአለበዎሙ፡ ኵሎ፡ ዘይትፈቀድ፡ በከመ፡ አሰፈዎሙ፡ እግዚእነ፡ ክርስቶስ፡ በኵሉ፡ ግብሮሙ።
=== paragraph 54 ===
ወአልቦሙ፡ ጻማ፡ በእንቲአሁ፡ እስመ፡ ረድኤተ፡ ቦሙ፡ በዘ፡ ተውህበ፡ ሥልጣነ፡ ወለበዉ፡ አእምሮ፡ እግዚአብሔር፡ ወገብርዎ፡ እስመ፡ ይፈርሁ፡ ላዕለ፡ እለ፡ ተለውዎሙ፡ ወአምኑ፡ በእደዊሆሙ፡ እምተኵላት፡ መደልዋን፡ ከመ፡ ኢይምጽኡ፡ ወኢይምሥጥዎሙ፡ እምድኅሬሆሙ፡ እስመቦ፡ ሰብአ፡ እለ፡ ይትሜሰልዎሙ፡ ለሐዋርያት፡ ወይመጽኡ፡ በአርአያ፡ አባግዕ፡ ወእሙንቱሰ፡ ተኵላት፡ መሠጥ
=== paragraph 55 ===
ወቀዲሙ፡ ነገሮሙ፡ እግዚእነ፡ ዘንተ። ወጳውሎስኒ፡ ላእከ፡ ጽድቅ፡ ወስልዋኖስ፡ ረድኡ፡ አመ፡ ዖዱ፡ ምድረ፡ ሶርያ፡ ወባዕደኒ፡ አዘዝዎሙ፡ ለእለ፡ አምኑ፡ በእደዊሆሙ፡ ወበእደ፡ ኵሎሙ፡ ሐዋርያት።
=== paragraph 56 ===
ወዓዲሆሙ፡ ኢተጋብኡ፡ ወገብሩ፡ ዘንተ፡ ትእዛዘ፡ እንዘ፡ ያነብቡ፡ ፍካሬ፡ መጻሕፍት፡ ቅዱሳት። ወከሠቱ፡ ለሰብእ፡ ዘቦቱ፡ በቍዔተ፡ ለነፍሶሙ፡ ወገብሩ፡ ሕገ፡ ወሥርዐተ፡ ለቤተ፡ ክርስቲያን፡ ቅድስት፡ ወውእቱኒ፡ በትሕትና፡ ወየውሀት፡ ወአውፅኡ፡ ኅቡኣተ፡ ለሰብእ፡ ወአርአዩ፡ ተአምረ፡ ዘከመ፡ ገብረ፡ እግዚኦሙ፡ ወከማሁ፡ ኮነ፡ በእደዊሆሙ።
=== paragraph 57 ===
ወይመጽኡ፡ ኀቤሆሙ፡ ብዙኀ፡ ሰብእ፡ በበዕለቱ፡ ወየአምኑ፡ በክርስቶስ፡ በእደዊሆሙ። ወይመጽኡ፡ ኀቤሆሙ፡ እምርሑቅ፡ ብሔር፡ ወይሰምዑ፡ ቃሎሙ፡ ወይትዌከፉ፡ ትእዛዞሙ፡ ወትምህርቶሙ፡ ጥዩቀ፡ በአማን
=== paragraph 58 ===
ወኒቆዲሞስ፡ ወገማልኤል፡ ሊቃነ፡ ካህናት፡ ወማኅበረ፡ አይሁድ፡ ይመጽኡ፡ በኅቡእ፡ ወይትዌከፉ፡ ትምህርቶሙ፡ ወትእዛዞሙ፡ ርኢዮሙ፡ ዘያወፅኡ፡ ኅቡኣተ። ወአንቆ፡ ወአሌዊ፡ ወቀዳይ፡ ወኔሪ፡ ወሐና፡ ወቀያፋ፡ ወአስክንድሮስ፡ ካህናተ፡ አይሁድ፡ ይመጽኡ፡ በሌሊት፡ ወይአምኑ፡ ወይገንዩ፡ ከመ፡ ውእቱ፡ ክርስቶስ፡ ዘአሐሰውናሁ፡ ውእቱ፡ መሲሐ፡ ጽድቅ፡ ዘተነበዩ፡ ላዕሌሁ፡ ነቢያት፡ ውእቱ፡ ወልደ፡ እግዚአብሔር፡ በአማን፡ ወኢያግሀዱ፡ እምፍርሀተ፡ አይሁድ።
=== paragraph 59 ===
ወተወክፍዎሙ፡ ሐዋርያት፡ ወተፈሥሑ፡ ቦሙ፡ ወይቤልዎሙ፡ ኢይደልወክሙ፡ ትግበሩ፡ ከመዝ፡ ወኢትኅፈሩ፡ እምሰብእ፡ ወኢትፍርህዎሙ። ወታኀልቁ፡ ሕይወተክሙ፡ በጌጋይ፡ ወበከንቱ። ወይደልወክሙሰ፡ ትፍርህዎ፡ ለእግዚአብሔር፡ ዘአልቦ፡ ዘይትኀብኦ፡ ወኢትሙቱ፡ በማእከል፡ ወይትኀሠሡክሙ፡ ምስለ፡ አበዊክሙ፡ በደመ፡ እግዚእነ፡ ክርስቶስ፡ ዘደፈሩ፡ አበዊክሙ፡ ወባሕቱ፡ ይደልወክሙ፡ ለእመ፡ አመንክሙ፡ በክርስቶስ፡ ከመ፡ ታጥብዑ፡ ገሀደ፡ ወትእመኑ፡ በሀይማኖት፡ እንተ፡ ዜነዉ፡ ሐዋርያት፡ ወትትወከፉ፡ ኵሎ፡ ዘንጼውዕ፡ ሰብአ፡ ኀቤሁ።
=== paragraph 60 ===
ወሰሚዖሙ፡ ቃሎሙ፡ ካህናተ፡ አይሁድ፡ ከልሑ፡ በዐቢይ፡ ቃል፡ በማእከለ፡ ኵሎሙ፡ ሐዋርያት፡ ወይቤሉ፡ በአማን፡ ንሕነ፡ ነአምን፡ በክርስቶስ፡ ዘሰቀሉ፡ አይሁድ፡ ወተቀብረ፡ ወተንሥአ፡ በሣልስት፡ ዕለት፡ ወንሕነ፡ ንአምን፡ ከመ፡ ውእቱ፡ አምላክ፡ ቀዳማዊ፡ ዘእምትካት፡ ወይትቤቀሎሙ፡ ለእለ፡ ሰቀልዎ። ወንሕነሰ፡ ውፁኣን፡ እምኔሆሙ።
=== paragraph 61 ===
ወከሠቱ፡ ለሰብእ፡ ኵሎ፡ ኅቡኣተ፡ ወአምኑ፡ ገሀደ፡ ወኢተፈልጡ፡ እምሐዋርያት፡ እስመ፡ ያሌብውዎሙ፡ ኵሎ፡ ዘመሀሩ፡ ለሰብእ፡ እምሐዲስ፡ ሕግ፡ ዘውእቱ፡ ሥርዐት፡ ኅሩይ፡ ዘወፅአ፡ እምጽዮን፡ በከመ፡ ይቤ፡ ጽሑፍ።
=== paragraph 62 ===
ወይሰምዑ፡ ትምህርተ፡ ወይገብርዎ፡ ቅድመ፡ ኵሉ፡ ሰብእ፡ ወለእመ፡ ረከቦሙ፡ ምንዳቤ፡ ለሐዋርያት፡ ይረድእዎሙ፡ ወይትዔገሡ፡ መቅሠፍተ፡ ወመዋቅሕተ፡ ወኵሎ፡ ኀሳረ፡ በእንተ፡ አሚን፡ በክርስቶስ፡ ወይትፌሥሑ፡ በኵሉ፡ ዘረከቦሙ፡ ወያበዝኁ፡ ሐዊረ፡ ኀበ፡ አሚን፡ በእግዚእነ፡ ክርስቶስ።
=== paragraph 63 ===
ወእምድኅረ፡ ወፅኡ፡ ሐዋርያት፡ ውስተ፡ ዓለም፡ ኮኑ፡ ሊቃውንተ፡ ለቤተ፡ ክርስቲያን፡ ቅድስት፡ ወይኤዝዙ፡ ወይሜህሩ፡ ለሰብእ፡ ኵሎ፡ ዘነሥኡ፡ እምሐዋርያት። ወአዘዙ፡ እምቅድመ፡ ሞቶሙ፡ ለእለ፡ እምድኅሬሆሙ፡ አርድእቶሙ
=== paragraph 64 ===
ወዜነወ፡ አስቅጢ፡ ጳውሎስ፡ ወጸሐፈ፡ ያዕቆብ፡ በኢየሩሰሌም፡ ወስምዖን፡ ጴጥሮስ፡ በሀገረ፡ ሮሜ፡ ወዮሐንስ፡ በኤፌሶን፡ ወማርቆስ፡ በአልስክንድርያ፡ ወእንድርያስ፡ በአፍርጋ፡ ወሉቃስ፡ በመቄዶንያ፡ ወይሁዳ፡ ወቶማስ፡ እምድረ፡ ህንደኬ፡ ኀበ፡ ሊቃውንት፡ ወመሀይምናን፡ ውስተ፡ ኵሎ፡ ዓለም፡ ከመ፡ ይትወከፉ፡ መጻሕፍቲሁ፡ ወመልእክቶ፡ ወያንብብዎ፡ ውስተ፡ ኵሉ፡ አብያተ፡ ክርስቲያናት፡ ዘእግዚአብሔር፡ በከመ፡ ይትነበብ፡ ነገረ፡ ሐዋርያት፡ ዘጸሐፈ፡ ሉቃስ፡ ከመ፡ ያእምሩ፡ እስመ፡ ሐዋርያት፡ ወነቢያት፡ ወመጻሕፍት፡ ዘቀዳሚ፡ ወዘሐዲስ፡ የኀብሩ፡ በበይናቲሆሙ።
=== paragraph 65 ===
ወጸውዑ፡ ኀበ፡ አሐዱ፡ ጽድቅ፡ ወአሐዱ፡ ቃል፡ ኵሎሙ፡ አሐዱ፡ መንፈስ፡ ዘውእቱ፡ መንፈስ፡ ቅዱስ፡ እምአሐዱ፡ እግዚአብሔር፡ ዘሎቱ፡ ንሰግድ፡ ኵልነ። ወተፈነዉ፡ ሐዋርያት፡ ወሰበኩ፡ ቦቱ፡ ወጸውዑ፡ ኀቤሁ፡ ኵሎ፡ በሓውርተ፡ ዘርሑቅ፡ እምኔሆሙ።
=== paragraph 66 ===
ወኵሎ፡ ዘነሥኡ፡ ሐዋርያት፡ በኀበ፡ እግዚእነ፡ ኢየሱስ፡ ክርስቶስ፡ ወመሀሩ፡ ሐዋርያት፡ ወተወክፍዎሙ፡ ወአምኑ፡ ቦቱ፡ በኵሉ፡ አህጉር፡ ወብሔር፡ ወእስከ፡ አጽናፈ፡ ኵሉ፡ ዓለም፡ እንዘ፡ ይረድኦሙ፡ ኀይሉ፡ ለእግዚአብሔር፡ ወጽንዑ፡ ወኢሐሰወ፡ ቃሎ፡ ዘይቤ፡ አነ፡ እሄሉ፡ ምስሌክሙ፡ እስከ፡ ኅልቀተ፡ ዓለም
=== paragraph 67 ===
ወምስለ፡ ዝንቱ፡ ይጽህቁ፡ ተጋድሎ፡ ምስለ፡ አይሁድ፡ በመጻሕፍተ፡ ነቢያት፡ ወይትጋደሉ፡ ምስለ፡ መሰግላን፡ በተኣምር፡ ግሩም፡ ዘይገብሩ፡ በስመ፡ እግዚእነ፡ ኢየሱስ፡ ክርስቶስ። ወኵሉ፡ አሕዛብ፡ እለ፡ ባዕዳን፡ አህጉር፡ ተወክፉ፡ ኀበ፡ ተጸውዑ፡ ውስተ፡ አሚን፡ በክርስቶስ፡ ዘእንበለ፡ ጋእዝ።
=== paragraph 68 ===
ወሶበ፡ ይረክቦሙ፡ ምንዳቤ፡ በእንቲአሁ፡ ይብሉ፡ ዛቲ፡ ምንዳቤ፡ እንተ፡ ረከበተነ፡ ትተነብል፡ ለነ፡ እስመ፡ ንሕነሂ፡ አስተቈጣዕናሁ፡ ለዘ፡ ፈጠረነ።
=== paragraph 69 ===
ወቦ፡ እምኀቤሆሙ፡ ዘሰቀልዎ፡ ወቦ፡ ዘተቀትለ፡ በሰይፍ፡ ተዐጊሦ፡ ወቦ፡ ዘተበርበረ፡ ንዋዮ፡ በትዕግልት፡ ብዙኀ፡ ጊዜ፡ ወቦ፡ ዘርሕቀ፡ እምንዋዩ፡ ወውሉዱ፡ ወቤቱ፡ ወእንዘ፡ ሀለዉ፡ ውስተ፡ ኵነኔ፡ ወይሣቂይዎሙ፡ ወይትዔገሡ፡ በሥምረቶሙ፡ እስከ፡ ይመውቱ፡ በእንተ፡ አሚን፡ በክርስቶስ።
=== paragraph 70 ===
ወይበዝኁ፡ ወይትወሰኩ፡ ወኢሐጸጸ፡ ስብከቶሙ፡ ወጸውዖቶሙ፡ እስከ፡ ስፍሐ፡ ውስተ፡ አርባዕቱ፡ መአዝነ፡ ዓለም።
=== paragraph 71 ===
ወኢሠርዑ፡ ሐዋርያት፡ ዘንተ፡ ኵሎ፡ አመ፡ ወጠኑ፡ ይዜንዉ፡ ወይጸውዑ፡ ውስተ፡ አሚን፡ አላ፡ ጸሀቁ፡ ከመ፡ ይትወከፉ፡ ኵሎ፡ እምጌጋይ፡ ወዕልወት፡ ወአምልኮ፡ ጣዖት፡ ውስተ፡ ርትዕ፡ ወአሚን፡ ወይኤዝዝዎሙ፡ እምበሊዐ፡ ዝቡሕ፡ ለአማልክት፡ ወማውታ፡ ወደም፡ ወዘበፅዑ፡ ለአምላከ፡ ባዕድ።
=== paragraph 72 ===
ወአመ፡ በዝኁ፡ እለ፡ የአምኑ፡ በክርስቶስ፡ ወኮኑ፡ እምኔሆሙ፡ ሰባኪያነ፡ ወዜናዊያነ፡ ወተፈቅደ፡ ይግበሩ፡ ትእዛዘ፡ ወሥርዐተ፡ ለአርትዖ፡ ሕግ፡ ወተፍጻሜተ፡ ግብር፡ ወወሀብዎሙ፡ ሐዋርያት፡ ሶቤሃ፡ ዘንተ፡ ቀኖና፡ ዘይሰመይ፡ በነገረ፡ ጽርእ፡ በጥልሳት፡ በዘኀብሩ፡ ቦቱ፡ ሐዋርያቲሁ፡ ለክርስቶስ፡ ኄራን፡ ወጻድቃን፡ ወንጹሓን፡ መራሕያን፡ ወአዘዙ፡ ባቲ፡ ከመ፡ ይግበርዋ። ወይደልዎ፡ ለዘ፡ ተዐደዋ፡ ኵነኔ፡ ወንሕነሂ፡ ንተሉ፡ አሰረ፡ ዚአሆሙ።