##### edition  (gez)
=== paragraph 1 ===
[a] በስመ፡ አብ፡ ወወልድ፡ ወመንፈስ፡ ቅዱስ፡ አሐዱ፡ አምላክ። ዝንቱ፡ ሴኖዶስ፡ ዘአበው፡ ሐዋርያት፡ ንጹሓን፡ ወቅዱሳን
=== paragraph 2 ===
ቀዳሜ፡ ሥርዐተ፡ ክህነት፡ ዘስምዖን፡ ቀነናዊ፡ በእንተ፡ ሥርዐተ፡ ቤተ፡ ክርስቲያን
=== paragraph 3 ===
[1] ሊቀ፡ ጳጳሳት፡ ይባርክ፡ ወኢይትባረክ፡ ወከማሁ፡ ጳጳስ፡ ይባርክ፡ ወኢይትባረክ፡ ዘእንበለ፡ እምሊቀ፡ ጳጳሳት። ወኤጲስ፡ ቆጶስ፡ ይባርክ፡ ወይትባረክ፡ እምጳጳስ፡ ወዓዲ፡ ውእቱ፡ ዘይባርኮሙ፡ ለኤጲስ፡ ቆጶሳት፡ ወዘይቴሐቶሙ። ወእሙንቱ፡ ያነብሩ፡ እደዊሆሙ፡ ላዕለ፡ ርእሰ፡ ሕዝብ። ወኢያንብር፡ መኑሂ፡ እዴሁ፡ ላዕለ፡ አርእስት፡ ዘእንበለ፡ ሊቀ፡ ጳጳሳት፡ ወውእቱ፡ ዘይገብር፡ ሢመተ፡ ለኵሎሙ፡ ወዘይትወከፍ፡ ሢመተ፡ በኀቤሁ፡ ይትወከፍ፡ በረከተ
=== paragraph 4 ===
ቀሲስ፡ ወኢይግበር፡ ሢመተ፡ ወኢይደልዎ፡ ዝንቱ። ኢይኩኑ፡ ቀሳውስት፡ ወመነኮሳት፡ በሢመታተ፡ ምኔታት። ዕደው፡ ወአንስት፡ ኅቡረ፡ ለእመ፡ መንኰሱ፡ በበምኔታቲሆሙ፡ ወይሖሩ፡ ወኵሉ፡ ዘተወክፎሙ፡ ወመጽአ፡ ኀቤሆሙ፡ ኀበ፡ ምንኵስና፡ እስመ፡ ከማሁ፡ ብውሕ፡ ሎሙ
=== paragraph 5 ===
ሊቀ፡ ጳጳሳት፡ ውእቱ፡ ዘይስዕር፡ ለዘይደልዎ፡ ተስዕሮ፡ እምጳጳሳት፡ ወኤጲስ፡ ቆጶሳት፡ ወቀሳውስት፡ ወዲያቆናት፡ ወኵሎሙ፡ ካህናት፡ ወእምሕዝባዊያን። ለእመ፡ ወፅኡ፡ እምሥርዐተ፡ ጽድቅ፡ ወፀረፉ፡ ላዕለ፡ ክርስቶስ፡ ወተለዉ፡ ዕልወተ፡ ወወለጡ፡ ሕገ፡ ቤተ፡ ክርስቲያን፡ ወገብሩ፡ ሎሙ፡ ሕገ፡ ዘኢሠራዕነ፡ ሎሙ፡ ንሕነ፡ ንስዕሮሙ፡ አላ፡ ለእመ፡ ኮነ፡ ሊቀ፡ ጳጳሳት፡ ዘከማሁ፡ ኢይደልዎ፡ ይስዐሮ፡ ወኢይትከሀሎ፡ ዘእንበለ፡ በሀልዎ፡ ኤጲስ፡ ቆጶሳት፡ እለ፡ ከማሁ፡ ወማኅበረ፡ ኤጲስ፡ ቆጶሳት
=== paragraph 6 ===
ቀሲስ፡ ይባርክ፡ ወያንብር፡ እዴሁ፡ ላዕለ፡ ዲያቆናት፡ ወዘይቴሐቶሙ፡ እምሕዝብ፡ ወኢይባርኮ፡ ዘይቴሐቶ፡ እምኔሁ፡ ወውእቱ፡ ይትወከፍ፡ ቡራኬ፡ እምዘይበርኮ፡ ዘከመ፡ ኤጲስ፡ ቆጶስ፡ ወጳጳስ፡ ወሊቀ፡ ጳጳሳት፡ ወእምቀሲስ፡ ዘከማሁ፡ በእዴሁ፡ ወአኮ፡ በርእሱ። ወብውሕ፡ ሎቱ፡ ያንብር፡ እዴሁ፡ ላዕለ፡ ርእሰ፡ ሕዝብ፡ ለዕድ፡ ወለአንስት፡ ወኢይደልዎ፡ የሀብ፡ ሢመተ፡ ወኢይደልዎ፡ ይስድድ፡ መነሂ፡ ወኢይደልዎ፡ ይስዐር፡ መነሂ፡ እምሢመቱ፡ እምእለ፡ ይቴሐትዎ፡ ሶበ፡ ይደልዎሙ፡ ተስዕሮ
=== paragraph 7 ===
ዲያቆን፡ ኢይባርክ፡ ወኢየሀብ፡ ቡራኬ፡ ወባሕቱ፡ ይንሣእ፡ ቡራኬ፡ እምኤጲስ፡ ቆጶስ፡ ወቀሲስ፡ ወኢይከውኖ፡ ያጥምቅ፡ ወያቅርብ፡ መነሂ፡ እምእለ፡ ይትሌዐልዎ፡ በመዓርግ። ወሶበ፡ ይቄርብ፡ ኤጲስ፡ ቆጶስ፡ ወቀሲስ፡ ይቅረብ፡ ውእቱኒ፡ ወያቅርብ፡ ሕዝበ፡ በጽዋዕ፡ ወኢያቅርብ፡ ዲያቆን፡ ከመዘ፡ ይቄርብ፡ እምእደ፡ ቀሲስ፡ አኮ፡ ከመ፡ ኤጲስ፡ ቆጶስ፡ ወቀሲስ፡ አላ፡ ከመ፡ ላእከ፡ ካህናት፡ በዕርፈ፡ መስቀል። ወኢይደይ፡ እዴሁ፡ ውስተ፡ ጽዋዕ፡ ዘቍርባን፡ እስከ፡ ይቄድሶ፡ ሎቱ፡ ቀሲስ፡ አው፡ ኤጲስ፡ ቆጶስ፡ ይቄድሶ። ወዘይቴሐት፡ እምዲያቆናት፡ ኢይደልዎ፡ ይግበር፡ ግብረ፡ ዲያቆናት፡ ወዲያቆናት፡ ኢይባርኩ፡ መነሂ፡ ወኢይግበሩ፡ ምንተኒ፡ ዘይገብሩ፡ ቀሳውስት፡ ወይዕቀቡ፡ አናቅጸ፡ በጊዜ፡ ቍርባን፡ ወጥምቀት። ወዲያቆናት፡ ይኤዝዙ፡ ለእለ፡ መትሕቴሆሙ፡ ለመልእክተ፡ ቤተ፡ ክርስቲያን፡ ወኢይኤዝዝ፡ ዘይትሌዐል፡ እምኔሁ፡ በመዓርግ። ወኢመፍትው፡ ለቀሲስ፡ ይግበር፡ ጸሎተ፡ በባሕቲቱ፡ ዘእንበለ፡ ዲያቆን፡ ወኢይኩን፡ ውእቱ፡ በእበድ፡ ወኢይኤዝዝ፡ በቤተ፡ ክርስቲያን፡ ዘእንበለ፡ ቀሲስ፡ አላ፡ ይኩን፡ ቀሲስ፡ እምድኅረ፡ ኤጲስ፡ ቆጶስ፡ ዘይኤዝዝ፡ ወይጌሥጽ፡ በእንተ፡ እግዚአብሔር፡ ለእመ፡ ኢሀሎ፡ ሊቀ፡ ካህናት
=== paragraph 8 ===
[2] ፪። ዘአዘዙ፡ ሐዋርያት፡ ቅዱሳን፡ ማቴዎስ፡ ወስምዖን፡ በእንተ፡ ዓሥራት፡ ወበኵር
=== paragraph 9 ===
ይቤሉ፡ ሐዋርያት፡ ቅዱሳን፡ ኵሉ፡ በኵር፡ ዘይበፅዑ፡ ለእግዚአብሔር፡ እምእንስሳ፡ ወአልህምት፡ ወወይን፡ ወቀዳሜ፡ ፍሬያት፡ ወዘይመስሎ፡ ወያምጽኡ፡ ኀበ፡ ኤጲስ፡ ቆጶስ፡ ወኀበ፡ ቀሲስ፡ ወኀበ፡ ዲያቆንሂ፡ ለእመ፡ ኢሀሎ፡ ቀሲስ። ወይኩን፡ ውእቱ፡ ለሲሳዮሙ፡ ወመልእክቶሙ፡ ወዘይፈቅዱ፡ ለአንስቲያሆሙ፡ ወዘኮነ፡ እምዓሥራት፡ ያስተዋፅኡ፡ ለሲሳየ፡ እለ፡ ተርፉ፡ ወለነዳያን። ወበኵርሰ፡ እምእንስሳ፡ ለካህናት፡ ለባሕቲቶሙ፡ ወለእለ፡ ይትለአክዎሙ፡ ወከማሁ፡ ይግበሩ፡ በዘተረፈ፡ ቍርባንኒ፡ በፈቃደ፡ ኤጲስ፡ ቆጶስ፡ ወቀሲስ። ይክፍልዎ፡ ዲያቆናት። ወለኤጲስ፡ ቆጶስ፡ እምኵሉ፡ ዘኮነ፡ አርባዕቱ፡ ክፍል። ወለቀሲስ፡ ሠለስቱ፡ ክፍል። ወለዲያቆን፡ ክልኤቱ፡ ክፍል። ለእለ፡ ተርፉ፡ በበአሐዱ። እስመ፡ ዝንቱ፡ ውእቱ፡ ሠናይ፡ በቅድመ፡ እግዚአብሔር፡ ከመ፡ ታክብሩ፡ ኵሎ፡ ብእሴ፡ በአምጣነ፡ ሢመቱ፡ ወኢያልህቅ፡ ቀዳሚ፡ እምካህናት፡ ወእምካልኡ፡ ምንተኒ፡ ለርእሱ፡ አላ፡ ይኩን፡ ዕሩየ፡ ክልኤሆሙ፡ በአሐዱ፡ ነፍስ። እስመ፡ ሕገ፡ እግዚአብሔር፡ ወቤተ፡ ክርስቲያን፡ ኢኮነ፡ ዘእንበለ፡ ሥርዐት፡ አላ፡ ይእቲ፡ ሠናይ፡ ሥርዐታ፡ ወዕውቅ፡ በበመዓርጊሃ፡ በአምጣነ፡ መኃድሪሆሙ፡ እስመ፡ ከማሁ፡ ማኅደረ፡ ሢመታት፡ ሰማያዊያት፡ ወከመዝ፡ ካዕበ፡ አርአየነ፡ ወጠየቅነ፡ እመንፈስ፡ ቅዱስ፡ ጳራቅሊጦስ፡ እግዚእ፡ ማሕየዊ፡ ዘኀደረ፡ ላዕሌነ
=== paragraph 10 ===
[3] ፫፡ ትእዛዝ፡ ዘጳውሎስ፡ ለኵሉ፡ መሀይምን፡ ወመሀይምንት፡ በእንተ፡ ጸሎት። ኵሉ፡ መሀይምን፡ ወመሀይምንት፡ ሶበ፡ ይከውን፡ ጽባሕ፡ ኢይግበሩ፡ ግብረ፡ ዘእንበለ፡ ይትኀፀቡ፡ እደዊሆሙ፡ በማይ፡ ወያንጽሑ፡ ወይጸልዩ፡ ለእግዚአብሔር፡ ፈጣሪሆሙ፡ በተጋንዮ፡ ወበትሕትና፡ በቅድመ፡ እግዚአብሔር። ወለእመቦ፡ ነገረ፡ ተዋቅሦ፡ ያቅድሙ፡ ነገረ፡ ሠናይ፡ እምኵሉ፡ ግብር፡ ወይትመየጡ፡ መሀይምናን፡ ኀበ፡ ግብሮሙ፡ በፍቅር፡ ወበየውሀት፡ በከመ፡ አዘዝነ፡ ወመሀርነ፡ በመልእክትነ፡ ወነገርነ፡ ኪያሁ፡ ለፈሪሀ፡ እግዚአብሔር
=== paragraph 11 ===
[4] ፬። ትእዛዝ፡ ዘጴጥሮስ፡ ወጳውሎስ፡ ሊቃነ፡ ሐዋርያት፡ በእንተ፡ ዕረፍት፡ ዘይደሉ፡ በዕለተ፡ በዓላት
=== paragraph 12 ===
ንሕነ፡ ንኤዝዘክሙ፡ ኦመሀይምናን፡ በክርስቶስ፡ ከመ፡ ታዕርፉ፡ በበዓላት፡ ዘመፍትው፡ ወያዕርፉ፡ አግብርት፡ በበሰሙን፡ ክልኤ፡ ዕለት፡ ዝውእቱ፡ ሰንበት፡ ወእሑድ፡ ክልኤሆን፡ ኅቡረ፡ ወአዕርፉ፡ ባቲ፡ በእንተ፡ ቤተ፡ ክርስቲያን፡ ቅድስት፡ ወሰሚዐ፡ መጻሕፍት፡ ወትእዛዛት። አነ፡ ጴጥሮስ፡ ወአነ፡ ጳውሎስ፡ ላእካኒሁ፡ ለኢየሱስ፡ ክርስቶስ፡ አዘዝነ፡ ከመ፡ ይትቀነዩ፡ አግብርት፡ ኀሙሰ፡ መዋዕለ፡ እምሰሙን፡ ወያዕርፉ፡ በሰንበት፡ ወበእሑድ፡ ወይሖሩ፡ ኀበ፡ ቤተ፡ ክርስቲያን፡ ለስኢለ፡ እግዚአብሔር፡ ወለፈሪሆቱ
=== paragraph 13 ===
ወዕረፍትሰ፡ በዕለተ፡ ሰንበት፡ ታእምሩ፡ ከመ፡ እግዚአብሔር፡ ፈጸመ፡ ኵሎ፡ ግብሮ፡ ወፈጢሮቶ፡ ወበይእቲ፡ ዕለት፡ አዕረፈ፡ ባቲ፡ ወአዘዘ፡ ከመ፡ ኢይግበሩ፡ ባቲ፡ ግብረ። ወይቤ፡ ዕቀቡ፡ ዕለታተ፡ ሰንበታት፡ እስመ፡ ይእቲ፡ ትእምርተ፡ ሕግ፡ ወትእምርት፡ በማእከሌየ፡ ወማእከሌክሙ፡ ለትውልደ፡ ትውልድክሙ፡ ወታእምሩ፡ ከመ፡ አነ፡ እግዚአብሔር፡ አምላክክሙ፡ ዘእቄድሰክሙ። ወዕቀቡ፡ ሰንበተ፡ ወአንጽሕዎ፡ ለክሙ፡ ወዘሰ፡ ሰዐሮ፡ ወአብደረ፡ ገቢረ፡ ቦቱ፡ ግብረ፡ ለይሙት፡ ወዘገብረ፡ ቦቱ፡ ግብረ፡ ለይትሀጐል፡ ውእቱ፡ ብእሲ፡ እምሕዝቡ። ግበሩ፡ ግብረክሙ፡ ኀሙሰ፡ መዋዕለ፡ ወክልኤ፡ ዕለተ፡ እሉ፡ እሙንቱ፡ ሰንበት፡ ወእሑድ፡ እለ፡ ቀደሰ፡ እግዚአብሔር፡ ወገብሮን፡ ኪዳነ፡ ለዝሉፉ፡ እስከ፡ ለዓለም፡ ወትእምርት፡ ዘለዓለም። ለሰንበትሰ፡ ገብራ፡ ተፍጻሜተ፡ ለመዋዕል፡ ወለፍጥረተ፡ ዓለም፡ ወእሑድሰ፡ ቀዳሚት፡ እመዋዕል። ከመዝ፡ ይቤ፡ እግዚአብሔር፡ ለመሀይምናን፡ እለ፡ የዐቅቡ፡ ሰንበታትየ፡ ወያበድሩ፡ ሥምረትየ፡ ወይጸንዑ፡ በኪዳንየ፡ እሁቦሙ፡ በቤትየ፡ ወመካነ፡ በኀበ፡ ማኅፈድየ፡ ወስመ፡ ዘይኄይሶሙ፡ እምውሉድ፡ ወአዋልድ፡ ወእሁቦሙ፡ ስመ፡ ዘይሄሉ፡ ለዓለም። ወውሉደ፡ ነኪር፡ እለ፡ ይመጽኡ፡ ኀበ፡ እግዚአብሔር፡ ወይትቀነዩ፡ ሎቱ፡ ወያፈቅሩ፡ ስመ፡ እግዚአብሔር፡ ይከውኑ፡ ሎቱ፡ አግብርተ፡ ወኵሎሙ፡ እለ፡ የዐቅቡ፡ ሰንበታትየ፡ ወኢያረኵሱ፡ አበውኦሙ፡ ውስተ፡ ደብረ፡ መቅደስየ፡ ወአስተፈሥሖሙ፡ በቤተ፡ ጸሎትየ፡ ወይከውን፡ ቍርባኖሙ፡ ወመሥዋዕቶሙ፡ ኅሩየ፡ ለሥምረትየ፡ በላዕለ፡ ምሥዋዕየ፡ እስመ፡ ቤትየ፡ ቤተ፡ ጸሎት፡ ይሰመይ፡ ለኵሉ፡ ሕዝብ። ከመዝ፡ ይቤ፡ እግዚአብሔር፡ አምላክክሙ፡ ዕቀቡ፡ ርትዐ፡ በውስተ፡ ፍትሕ፡ ወስምዑ፡ ጽድቀ፡ እስመ፡ ቅሩብ፡ ምጽአተ፡ መድኀኒትየ፡ ወፍጡነ፡ አስተርእዮተ፡ ጽድቅየ። ብፁዕ፡ ብእሲ፡ ዘይገብር፡ ዘንተ፡ ግብረ፡ ወይጸንዕ፡ ባቲ፡ ወየዐቅብ፡ ሰንበተ፡ ወኢይስዕር፡ ወየዐቅብ፡ እዴሁ፡ እምግብረ፡ ሰብእ። ወእመሰ፡ ሜጥከ፡ እግረከ፡ እምሰንበት፡ ወኢትገብር፡ ሥምረትየ፡ በቅድስት፡ ዕለትየ፡ ወባሕቱ፡ ትብላ፡ ሰንበት፡ ትጌጊ፡ እስመ፡ ቅድስት፡ ዕለት፡ ለእግዚአብሔር፡ አምላክከ፡ ወአክብራ፡ ወኢትሖር፡ ባቲ፡ ፍኖተከ፡ ወኢትግበር፡ ባቲ፡ ዘኢይደልወከ፡ ወኢትሖር፡ ኀበ፡ ከንቱ። ተወከል፡ በእግዚአብሔር፡ እስመ፡ እግዚአብሔር፡ ነበበ፡ በዝንቱ፡ አእምሩ፡ ከመ፡ እዴሁ፡ ለእግዚአብሔር፡ ኢይደክማ፡ ወኢይከብዳ፡ እዘኒሁ፡ እምሰሚዕ፡ ወባሕቱ፡ ፈለጠ፡ ማእከሌክሙ፡ ወማእከለ፡ ፍትሐ፡ ኀጣውኢክሙ፡ ወበእንተ፡ ኀጢአትክሙ፡ ሜጠ፡ ገጸ፡ እምኔክሙ፡ ከመ፡ ኢይስማዕክሙ። ወአዘዘ፡ ከመ፡ ኢይግበሩ፡ ባቲ፡ ወረሰያ፡ ተፍጻሜተ፡ ዕለታት፡ ወከማሁ፡ እምግብረ፡ ዓለም
=== paragraph 14 ===
ወዕረፍትሰ፡ በዕለተ፡ እሑድ፡ ናአምር፡ ከመ፡ እግዚአብሔር፡ አቅደመ፡ ቦቱ፡ ገቢረ፡ ወፈጠረ፡ ኵሎ፡ ፍጥረተ፡ ወአዕበያ፡ በክሂሎቱ። ወረሰያ፡ ቀዳሚተ፡ ወጥንተ፡ በከመ፡ ይቤ፡ መጽሐፍ፡ ዘኮነ፡ እግዚእነ፡ ክርስቶስ፡ ፍጻሜሃ፡ ወፈጸማ። ወውእቱ፡ ካዕበ፡ ጥንቱ፡ ለወንጌል፡ መንፈሳዊ፡ ሐዲስ፡ ለሐዲስ፡ ሕዝብ። ወኀረያ፡ ወአቅደማ፡ ወረሰያ፡ ዕለተ፡ ብርሃን፡ ወጸዳል፡ ለሥልጣነ፡ ቃሉ፡ ወዕለተ፡ ሕይወት፡ ለፍጥረት፡ ሐዲስ፡ ወሕይወተ፡ ዓለም፡ በትንሣኤሁ። ወውእቱ፡ ካዕበ፡ ቀዳሚት፡ ዕለት፡ እምዕለት፡ ደኃሪት፡ በከመ፡ ኮነት፡ ቀዳሚት፡ ዕለት፡ እምዕለተ፡ ፍጥረት፡ ወቀዳሚት፡ ዕለት፡ እምሐዲስ፡ ሥርዐት፡ በዘ፡ ባቲ፡ ይከውን፡ ዕሴት። ወሤማ፡ ለዕለተ፡ ሰንበት፡ ህየንተ፡ ጽልመት፡ እንተ፡ ፈጠረ፡ ቀዲሙ፡ ወአቅደማ፡ ወረሰያ፡ ሌሊተ፡ ወገብራ፡ ዕረፍተ፡ ለሕያዋን፡ ወለምውታን። ወሤማ፡ ለዕለተ፡ እሑድ፡ ህየንተ፡ ብርሃን፡ ለሕያዋን፡ ወይእቲ፡ ዕለት፡ እንተ፡ ባቲ፡ ተንሥአ፡ እግዚእነ፡ ክርስቶስ፡ እምውታን፡ ወአርአየ፡ ብርሃኖ፡ ላዕለ፡ ምድር፡ ወተዐውቀ፡ ብርሃነ፡ እምብርሃን፡ ለአሕዛብ፡ ወገብረ፡ ብርሃነ፡ ወሕገ
=== paragraph 15 ===
ወአዘዝነ፡ ካዕበ፡ ያዕርፉ፡ አግብርት፡ ወመሀይምናን፡ በሰሙነ፡ ፋሲካ፡ እስመ፡ ሰሙነ፡ ሐዘን፡ ይእቲ፡ ወያዕርፉ፡ ካዕበ፡ በሰሙን፡ ድኅሬሃ፡ እስመ፡ ሰሙነ፡ ፍስሓ፡ ወትንሣኤሁ፡ ለክርስቶስ፡ ወመድኀኒተ፡ ዓለም፡ እምብድብድ፡ እስመ፡ ይፈቅዱ፡ ይምሀርዎሙ፡ ወያእምሩ፡ እፎ፡ ኮነ፡ ትንሣኤ፡ ወአስተርኢዮ፡ ወይለብዉ፡ ዜናሁ፡ ለዘተሰቅለ፡ ወሐመ፡ ወተቀብረ፡ ወተንሥአ፡ በሣልስት፡ ዕለት፡ ወተፈጸመ፡ ላዕሌሁ፡ ትንቢተ፡ ነቢያት
=== paragraph 16 ===
ወያዕርፉ፡ ካዕበ፡ በሰላም፡ ዝውእቱ፡ በዓለ፡ ፵፡ በእንተ፡ ዘኮነ፡ ትእዛዞ፡ ለክርስቶስ፡ ወዕርገቶ፡ ውስተ፡ ሰማያት
=== paragraph 17 ===
ወካዕበ፡ ያዕርፉ፡ በዕለተ፡ እሑድ፡ ዝውእቱ፡ ተፍጻሜተ፡ ፶፡ ዕለት፡ በእንተ፡ ርደተ፡ መንፈስ፡ ቅዱስ፡ ጰራቅሊጦስ፡ ዘተውህበ፡ ለእለ፡ የአምኑ፡ በክርስቶስ
=== paragraph 18 ===
ወካዕበ፡ ያዕርፉ፡ በዕለተ፡ ዜነዋ፡ በእንተ፡ መድኀኒት፡ ዘአሰፈወ፡ ለአዳም፡ ወለውሉዱ፡ እማርያም፡ ድንግል
=== paragraph 19 ===
ወካዕበ፡ ያዕርፉ፡ በዕለተ፡ ልደት፡ እስመ፡ ጸጋ፡ እግዚአብሔር፡ በይእቲ፡ ዕለት፡ ዘተውህበ፡ ለሰብእ፡ እንተ፡ ሀለዉ፡ ይሴፈውዎ፡ እምቀዳሚ፡ ፍጥረት፡ ወባቲ፡ አስተርአየ፡ ቃሉ፡ ዘእምትካት፡ ተሠጊዎ፡ በዲበ፡ ምድር፡ ለመድኀኒተ፡ ዓለም፡ ውእቱ፡ ኢየሱስ፡ ክርስቶስ፡ ዘተወልደ፡ እማርያም፡ ድንግል፡ ዘንጽሕት፡ እምትሕዝብት፡ ወርኵስ
=== paragraph 20 ===
ወካዕበ፡ ያዕርፉ፡ በዕለተ፡ ኤጰፋንያ፡ ዘውእቱ፡ ኅፅበት፡ ዘቦቱ፡ አስተርአየ፡ እግዚእ፡ ወመድኅን፡ ኢየሱስ፡ ክርስቶስ፡ ለኵሉ፡ ሰብእ፡ በፈለገ፡ ዮርዳኖስ፡ በብርሃነ፡ መለኮቱ፡ ወባቲ፡ ተሠጥቀ፡ ሰማይ፡ ወስምዐ፡ ኮነ፡ አብ፡ ለወልዱ፡ በይእቲ፡ ዕለት፡ እንዘ፡ ይብል፡ ዝንቱ፡ ውእቱ፡ ወልድየ፡ ዘኣፈቅር፡ ዘኪያሁ፡ ሠመርኩ፡ ወሎቱ፡ ስምዕዎ፡ ወተአዘዝዎ፡ ወወረደ፡ ላዕሌሁ፡ መንፈስ፡ ቅዱስ፡ ጳራቅሊጦስ፡ በአምሳለ፡ ርግብ፡ ወሰማዕት፡ ወኵሉ፡ ሰብእ፡ እንዘ፡ ይሬኢዩ፡ ወይሰምዑ፡ ዘንተ፡ ኵሎ
=== paragraph 21 ===
ወካዕበ፡ ያዕርፉ፡ በበዓለ፡ ስምዖን፡ ዘውእቱ፡ በዓለ፡ ማኅቶት፡ እስመ፡ በይእቲ፡ ዕለት፡ ተወክፎ፡ ስምዖን፡ ካህን፡ ዲበ፡ እደዊሁ፡ ወዓዲ፡ እንዘ፡ ክቡዳን፡ አዕይንቲሁ፡ እምርስኣን፡ እስመ፡ ተብህለ፡ ሎቱ፡ እስመ፡ ኢትጥዕማ፡ ለሞት፡ እስከ፡ ይሬኢያ፡ አዕይንቲከ፡ መሲሐ፡ መድኅነ
=== paragraph 22 ===
ወያዕርፉ፡ በዕለተ፡ ተወለጠ፡ ራእዩ፡ እስመ፡ በደብረ፡ ታቦር፡ አስተርአየ፡ እግዚእነ፡ ክርስቶስ፡ ወአርአየነ፡ ስብሐተ፡ መለኮቱ፡ ወርኢናሁ፡ ንሕነ፡ ሐዋርያት፡ ምስለ፡ ሙሴ፡ ወኤልያስ
=== paragraph 23 ===
ወካዕበ፡ ያዕርፉ፡ በዕለተ፡ ተዝካሮሙ፡ ለሐዋርያት፡ እስመ፡ እሙንቱ፡ መምህራኒክሙ፡ ትእዛዘ፡ ክርስቶስ፡ ወመለብዋኒክሙ፡ ሀብተ፡ መንፈስ፡ ቅዱስ። ወካዕበ፡ ያዕርፉ፡ በበዓለ፡ እስጢፋኖስ፡ ሊቀ፡ ሰማዕት፡ ወዲያቆናት፡ ወቀዳሚሆሙ፡ ወለኵሎሙ፡ ሰማዕት፡ ከማሁ፡ እስመ፡ ለሰማዕት፡ ወለቅዱሳን፡ ይደሉ፡ ያክብርዎሙ፡ በእንተ፡ ክርስቶስ፡ እለ፡ አብደሩ፡ ፍቅሮ፡ እምሕይወቶሙ
=== paragraph 24 ===
[5] ፭። ትእዛዝ፡ ዘሐዋርያት፡ በእንተ፡ ዐቂበ፡ ጊዜያተ፡ ጸሎት፡ ወሰዐታት
=== paragraph 25 ===
ቁሙ፡ ለጸሎት፡ እምቅድመ፡ ጽባሕ፡ እንዘ፡ ሠለስቱ፡ ሰዐት፡ በሌሊት፡ ወጸሎተ፡ ነግህ፡ በጽባሕ፡ ወጸሎተ፡ ሠለስቱ፡ ሰዐት፡ ወጸሎተ፡ ስድስቱ፡ ሰዐት፡ ወጸሎተ፡ ተስዐቱ፡ ሰዐት፡ ወጸሎተ፡ ሰርክ፡ በምሴት፡ ወጸሎት፡ ካልእ፡ እምድኅረ፡ ምሴት፡ በሠለስቱ፡ ሰዐት፡ ወመንፈቀ፡ ሌሊት
=== paragraph 26 ===
ጸሎትሰ፡ እምቅድመ፡ ጽባሕ፡ እንዘ፡ ሠለስቱ፡ ሰዐት፡ ከመ፡ በእንተ፡ በይእቲ፡ ሰዐት፡ ንሴፎ፡ ምጽአቶ፡ ለእግዚእነ፡ ኢየሱስ፡ ክርስቶስ፡ ለኰንኖ፡ ወበይእቲ፡ ሰዐት፡ ዮጊ፡ ያአምርዎ፡ ውሉደ፡ ብርሃን፡ ለዝንቱ፡ ምግባረ፡ ሠናይ
=== paragraph 27 ===
ወጸሎትሰ፡ በጽባሕ፡ እንዘ፡ ታአኵትዎ፡ ለእግዚአብሔር፡ በእንተ፡ ዘአምጽአ፡ ብርሃነ፡ ወጸዳለ፡ ላህየ፡ ወአእተተ፡ ፍርሀተ፡ ሌሊት፡ ወጽልመት
=== paragraph 28 ===
ወጸሎትሰ፡ በሠለስቱ፡ ሰዐት፡ እስመ፡ ለክርስቶስ፡ በይእቲ፡ ሰዐት፡ ኰነንዎ፡ በሞት፡ ወውእቱ፡ ኮነ፡ መርሐ፡ ለመድኀኒተ፡ አዳም፡ ወለውሉዱ
=== paragraph 29 ===
ወጸሎትሰ፡ በስድስቱ፡ ሰዐት፡ በእንተ፡ ከመ፡ በይእቲ፡ ሰዐት፡ ተሰቅለ፡ ክርስቶስ፡ ዲበ፡ መስቀል፡ ወሰፍሐ፡ እደዊሁ፡ ወደምሰሰ፡ ኀጢአተ
=== paragraph 30 ===
ወጸሎትሰ፡ በተስዐቱ፡ ሰዐት፡ በእንተ፡ ከመ፡ በይእቲ፡ ሰዐት፡ ክርስቶስ፡ አግብአ፡ መንፈሶ፡ ወአድለቅለቀት፡ ምድር፡ ወተሠጠ፡ መንጦላዕተ፡ ምኵራብ፡ ወተሐምገ፡ ፀሓይ፡ ወጸልመ፡ ኵሉ፡ ዓለም
=== paragraph 31 ===
ወጸሎትሰ፡ በምሴት፡ አኰቴት፡ እምኀቤክሙ፡ ለእግዚአብሔር፡ በእንተ፡ ዘአምጽአ፡ ለክሙ፡ ዕረፍተ፡ ሌሊት፡ ወአስተርክቦ፡ ወአእተተ፡ እምኔክሙ፡ ጻማ፡ ወሥራሐ፡ ዘመዓልት
=== paragraph 32 ===
ወጸሎትሰ፡ ዘሌሊት፡ ከመ፡ ትስአልዎ፡ ለእግዚአብሔር፡ ከመ፡ ይዕቀብክሙ፡ እምእከዮሙ፡ ለውሉደ፡ ጽልመት፡ ወያድኅንክሙ፡ እመሥገርተ፡ ጸላኢ፡ ማህጕል፡ ወእምኅሊና፡ እኩይ፡ እስመ፡ በይእቲ፡ ሰዐት፡ ይትባሐቱ፡ አጋንንት፡ ምስለ፡ ሰብእ፡ ወይወድዩ፡ ውስተ፡ ልቦሙ፡ ኅሊና፡ እኩይ
=== paragraph 33 ===
ወለእመ፡ ኢክህልክሙ፡ ትሖሩ፡ ኀበ፡ ቤተ፡ ክርስቲያን፡ እምፍርሀተ፡ አረሚ፡ ጸልዩ፡ ዘንተ፡ ጸሎታተ፡ በውስተ፡ መኃድሪክሙ፡ ወኢትባኡ፡ ውስተ፡ አብያተ፡ ክርስቲያናት፡ ዘእኩያን፡ እለ፡ ኢኮኑ፡ ርቱዓነ፡ እስመ፡ ከመዝ፡ ይቤ፡ በእንቲአሆሙ፡ ዳዊት፡ ነቢይ፡ ዘበትርጓሜሁ፡ ጸላእኩ፡ ማኅበረ፡ እኩያን፡ ወኢይነብር፡ ምስለ፡ ጽልሕዋን፡ እስመ፡ መካን፡ አኮ፡ ዘይቄድሶ፡ ለሰብእ፡ አላ፡ ሰብእ፡ ይቄድሶ፡ ለመካን። ወለእመ፡ ኮነ፡ መካነ፡ አረሚ፡ ብሔሩ፡ ፍልሱ፡ እምኔሁ፡ እስመ፡ ርኩስ፡ ውእቱ፡ ወበከመ፡ ካህናት፡ ንጹሓን፡ ይቄድስዎሙ፡ ለመሀይምናን፡ በክርስቶስ፡ እለ፡ ርቱዓነ፡ ልብ፡ ወከማሁ፡ ረሲዓን፡ ያረኵሱ፡ መካናተ፡ ቅዱሳተ። ወለእመ፡ ኢተክህለክሙ፡ ትትጋብኡ፡ በቤተ፡ ክርስቲያን፡ ወኢበማኅደረ፡ ኤጲስ፡ ቆጶስ፡ ለይጸሊ፡ ኵሉ፡ ለለአሐዱ፡ እምኔክሙ፡ በውስተ፡ ማኅደሩ፡ አው፡ ምስለ፡ ክልኤቱ፡ ወሠለስቱ፡ እስመ፡ ተብህለ፡ ኀበ፡ ሀለዉ፡ ክልኤቱ፡ ወሠለስቱ፡ ጉቡኣን፡ በስምየ፡ ህየ፡ ሀለውኩ፡ አነ፡ ምስሌሆሙ። ወኢመፍትው፡ ይጸልዩ፡ መሀይምናን፡ ምስለ፡ ዕልዋን፡ በአሐዱ፡ ቤት፡ እስመ፡ ኢይደሉ፡ ይጸሊ፡ ዘይሳተፍ፡ ምስለ፡ ዘኢይሳተፍ፡ ወኢመሀይምናን፡ ይደመሩ፡ ምስለ፡ ዕልዋን፡ ወኢይጸልዩ፡ ምስሌሆሙ። መኑ፡ ዘደመሮ፡ ለብርሃን፡ ምስለ፡ ጽልመት፡ ወአይ፡ ሱታፌ፡ ለአግዓዚ፡ ምስለ፡ ገብር
=== paragraph 34 ===
[6] ፮። ትእዛዝ፡ ዘጳውሎስ፡ ወያዕቆብ፡ ሐዋርያት፡ በእንተ፡ እለ፡ ኖሙ። ተዝካረ፡ ምውታን፡ ወዘከመ፡ ይትገበር፡ በእንቲአሆሙ፡ ትእዛዝ
=== paragraph 35 ===
ይትገበር፡ በሣልስት፡ ዕለት፡ ለእለ፡ ኖሙ፡ ተዝካረ፡ ምውታን፡ ንነግረክሙ፡ ኦመሀይምናን፡ ምስለ፡ ጸሎት፡ በእንተ፡ ዘሞተ፡ ክርስቶስ፡ ወተንሥአ፡ በሣልስት፡ ዕለት። ወይትገበር፡ ካዕበ፡ በሳብዕት፡ ዕለት፡ ለተዝካረ፡ ሕያዋን፡ ወምውታን። ወይትገበር፡ ካዕበ፡ በዕለተ፡ ሠላሳ፡ ዝውእቱ፡ ተፍጻሜተ፡ ወርኅ፡ ሥርዐት፡ ዘትካት፡ እስመ፡ ደቂቀ፡ እስራኤል፡ ላሐዉ፡ ላዕለ፡ ሙሴ፡ ነቢይ፡ ሠላሳ፡ ዕለተ። ወካዕበ፡ ይግበሩ፡ በተፍጻሜተ፡ ዐመት፡ ወየሀቡ፡ እምንዋዮሙ፡ ለነዳያን፡ ወለምስኪናን፡ በእንተ፡ ነፍሶሙ
=== paragraph 36 ===
ወኢንኤዝዝ፡ ከመ፡ ይግበሩ፡ ዘንተ፡ ለዕልዋን፡ ወመናፍቃን፡ አላ፡ ንኤዝዝ፡ በዝንቱ፡ ሰብአ፡ የውሀት፡ ወኂሩት፡ ወሀይማኖት። ወበእንተሰ፡ ከሓዲያነ፡ መሲሑ፡ ለእግዚአብሔር፡ ሶበ፡ መጽወቱ፡ በምልአ፡ ምድር፡ ወበኵሉ፡ ዘውስተ፡ ዓለም፡ እመ፡ ኢበቍዖሙ፡ ውእቱ፡ ምንተኒ። ዘኮነ፡ በሕይወቱ፡ ጸላኤ፡ እግዚአብሔር፡ ወከማሁ፡ ውእቱ፡ በሞቱሂ፡ እስመ፡ አልቦ፡ አድልዎ፡ በኀበ፡ እግዚአብሔር፡ ወውእቱ፡ ራትዕ፡ ወያፈቅር፡ ጽድቀ፡ ወኢይዔምፅ፡ በፍትሕ፡ ወይፈድዮ፡ ለኵሉ፡ ሰብእ፡ በከመ፡ ምግባሩ
=== paragraph 37 ===
[7] ፯። ትእዛዝ፡ በእንተ፡ እለ፡ ተጸውዑ፡ ውስተ፡ ምሳሕ፡ ዘይትገበር፡ በዕለተ፡ ተዝካሮሙ፡ ለእለ፡ ኖሙ፡ መሀይምናን
=== paragraph 38 ===
ሶበ፡ ተጸዋዕክሙ፡ ኦካህናት፡ ኀበ፡ ተዝካረ፡ ምውታን፡ ዘይትገበር፡ መብልዕ፡ ወመስቴ፡ ሖሩ፡ ኀቤሆሙ፡ እንዘ፡ ትፈርህዎ፡ ለእግዚአብሔር፡ ፈድፋደ፡ በፍቅር፡ ወግርማ፡ ወየውሀት፡ በከመ፡ ይደሉ፡ ለዘአምሳሊክሙ። ወብልዑ፡ በከመ፡ ግብሮሙ፡ ለእለ፡ ይፈቅዱ፡ ይስአልዎ፡ ለእግዚአብሔር፡ ህየንተ፡ ውእቱ፡ ዘተገብረ፡ መብልዕ፡ በእንቲአሁ፡ እስመ፡ ኮንክሙ፡ ቀሳውስት፡ ወዲያቆናት፡ ውስተ፡ ቤተ፡ ክርስቲያኑ፡ ለክርስቶስ፡ ወይደልወክሙ፡ ትኩኑ፡ ንቁሃነ፡ በገሥጾ፡ ርእሰክሙ፡ ወለካልኣን፡ እስመ፡ ከመዝ፡ ይቤ፡ መጽሐፍ፡ እስመ፡ ለጽኑዓን፡ በእንቲአሆሙ፡ መዐት፡ ወበእንተዝ፡ ኢይደልዎሙ፡ ይስተዩ፡ ወይነ፡ ከመ፡ ኢይርስዕዋ፡ ለጥበብ፡ ወያርትዑ፡ በውስተ፡ ፍትሕ፡ ወያቅሙ፡ በዝንቱ
=== paragraph 39 ===
ናሁኬ፡ ተዐውቀ፡ ከመ፡ ኤጲስ፡ ቆጶሳት፡ ወቀሳውስት፡ ወዲያቆናት፡ እሙንቱ፡ ድኅረ፡ እግዚአብሔር፡ አብ፡ ወወልዱ፡ ዘያፈቅር፡ ጽኑዓን፡ በቤተ፡ ክርስቲያኑ፡ ለእግዚአብሔር። ወዘንተ፡ ዘንቤ፡ አኮ፡ ከመ፡ ኢይስተዩ፡ ወይነ፡ ለዝሉፉ፡ እስመ፡ ውእቱ፡ ነውር፡ ለፍጥረተ፡ እግዚአብሔር፡ ወባሕቱ፡ ንቤ፡ ከመ፡ ኢይስከሩ፡ ወይነ፡ ፈድፋደ፡ እስመ፡ መጽሐፍ፡ ኢአዘዞሙ፡ ለአበው፡ ቀደምት፡ ከመ፡ ኢይስተዩ፡ ወይነ፡ ለዝሉፉ፡ አላ፡ ይቤ፡ ኢትስተዩ፡ ወይነ፡ ለስካር
=== paragraph 40 ===
ወካዕበ፡ ይቤ፡ በመጽሐፍ፡ ለመኑ፡ አሌሎቱ፡ ወለመኑ፡ ተደምሮ፡ ወለመኑ፡ ተዐቅቦ፡ ወለመኑ፡ ድካም፡ ወእበድ፡ ወለመኑ፡ ይከውን፡ አዕይንቲሁ፡ በአምሳለ፡ ጥንፍሕ፡ ወለመኑ፡ ዘአልቦቱ፡ ምክንያተ፡ አኮኑ፡ ዝንቱ፡ ኵሉ፡ ለዘያበዝኅ፡ ሰቲየ፡ ወይን፡ ወይጐነዲ፡ ነቢረ፡ በሰቲዮታ፡ ረሐቁኬ፡ እምዝንቱ፡ ወተዐቀቡ፡ እምትሕዝብት፡ ወኢትግበሩ፡ ዘይሐሥመክሙ
=== paragraph 41 ===
[8] ፰። ትእዛዝ፡ በእንተ፡ እለ፡ ይሰደዱ፡ በእንተ፡ ሀይማኖቶሙ፡ ወይጐዩ፡ እምፍርሀተ፡ እለ፡ ይሰድድዎሙ
=== paragraph 42 ===
አይ፡ ፍሥሓ፡ ይከውን፡ ሎሙ፡ ኵሎሙ፡ እለ፡ ይሰደዱ፡ በእንተ፡ ሀይማኖቶሙ፡ ወይጐዩ፡ እምሀገር፡ ውስተ፡ ሀገር፡ ወይዜከሩ፡ ቃለ፡ ክርስቶስ፡ ዘይቤ፡ ሶበ፡ ይሰድዱክሙ፡ እምሀገር፡ ጕዩ፡ ውስተ፡ ካልእታ፡ እስመ፡ ትድኅኑ፡ እስመ፡ ነፍሶሙ፡ ኮነ፡ ጥቡዐ፡ በሀይማኖት፡ ወኮነ፡ ካዕበ፡ ሥጋሆሙ፡ ድኩመ፡ እምተዐግሦ፡ ለኵነኔ፡ ወጐዩ፡ ወተዐውቀ፡ ንጽሐ፡ ኅሊናሆሙ፡ እስመ፡ ተዐገሡ፡ አህጕሎ፡ ንዋዮሙ፡ ወተበርብሮ፡ አብያቲሆሙ፡ ከመ፡ ኢይትሀጐል፡ ሀይማኖቶሙ፡ በክርስቶስ፡ ወመፍትው፡ ይርድእዎሙ፡ ለዘ፡ ከመ፡ እሉ፡ ከመ፡ ይፈጽሙ፡ ትእዛዘ፡ እግዚእነ፡ ወያጽንዑ፡ ቦቱ
=== paragraph 43 ===
[9] ፱። ነገረ፡ ሐዋርያት፡ ቅዱሳን፡ በእንተ፡ ዐቂበ፡ ሥርዐተ፡ መዓርገ፡ ክህነት
=== paragraph 44 ===
ንሕነ፡ ንኤዝዘክሙ፡ ኦካህናት፡ እለ፡ ተአመንክሙ፡ ግብረ፡ ሰማያዊ፡ ዘመላእክት፡ ግሙራ፡ ኢታስትቱ፡ መኃድሪክሙ፡ ወጸጋ፡ ዘተተከልክሙ፡ ላቲ፡ ወይኩን፡ ኵሉ፡ ለለ፡ አሐዱ፡ እምኔክሙ፡ ውስተ፡ ግብር፡ ዘኀረዮ፡ እግዚአብሔር፡ ላቲ። ወዛቲ፡ ይእቲ፡ ትእዛዘ፡ እግዚአብሔር፡ ዘይቤ፡ ኵሉ፡ ሀብት፡ ሠናይ፡ ወጸጋ፡ መንፈሳዊት፡ እምላዕሉ፡ ይእቲ፡ እምአበ፡ ብርሃን፡ ይከውን። ወይቤለነ፡ እግዚእነ፡ ክርስቶስ፡ ዘኪያክሙ፡ ሰምዐ፡ ኪያየ፡ ሰምዐ፡ ወዘኪያየ፡ ሰምዐ፡ ሰምዖ፡ ለዘፈነወኒ፡ ወዘዐመፀክሙ፡ ኪያየ፡ ዐመፀ
=== paragraph 45 ===
ወእመሰ፡ እለ፡ አልቦሙ፡ ኅሊና፡ ወልበ፡ የዐቅቡ፡ ግብሮሙ፡ ወሥርዐቶሙ፡ በዘተአዘዙ፡ ናሁ፡ ሌሊት፡ ትዴግኖ፡ ለመዐልት፡ ዐቂባ፡ ትእዛዘ፡ ወግብራ፡ ወፀሓይ፡ ይዴግኖ፡ ለወርኅ፡ በከመ፡ ተአዘዘ፡ ወከዋክብት፡ ወአዝማናት፡ ወማእዝንት፡ ወፍልጠታት፡ ወአውራኅ፡ ወሱባዕያት፡ ወዕለታት፡ ወሰዐታት፡ ወይነብሩ፡ በበኆልቆሙ፡ አላ፡ በከመ፡ ተብህለ፡ በመጽሐፍ፡ እግዚአብሔር፡ ወሀቦሙ፡ ትእዛዘ፡ ወኢኀለፉ። ወካዕበ፡ ይቤ፡ በእንተ፡ ባሕር፡ እግዚአብሔር፡ ወሀባ፡ ትእዛዘ፡ ወቀጸራ፡ በአረፍት፡ ወአናቅጽ፡ ወይቤላ፡ ብጽሒ፡ ዝየ፡ ባሕቱ፡ ወኢትኅልፊ፡ ሚመጠንኪ፡ ይደልወክሙ፡ ኢትትቈጥዑ፡ ወኢትዘኀሩ፡ በምንትኒ፡ እምዘ፡ ሠርዑ፡ ለክሙ፡ ወአዘዘክሙ፡ እግዚአብሔር፡ ቦቱ
=== paragraph 46 ===
ወባሕቱ፡ በእንተ፡ ብዙኃን፡ እለ፡ ያሰትቱ፡ ዘንተ፡ ሥርዐተ፡ ወይዌልጥዎ፡ ወይትዔበዩ፡ ወይመትሩ፡ መኣስረ፡ ክህነት፡ ወይነሥኡ፡ መዓርገ፡ ዘኢይከውኖሙ፡ በጽድቅ፡ ወኢእግዚአብሔር፡ ወሀቦሙ፡ ውእቱ፡ ወኮኑ፡ ዐላዊያነ፡ እግዚአብሔር፡ ከመ፡ ሰብአ፡ ቆሬ፡ በዕልወቶሙ፡ እለ፡ ተዐደዉ፡ ትእዛዘ፡ ኦሪት፡ ወከመ፡ ዖዝያን፡ ንጉሥ፡ ዘሠርዐ፡ ዘእንበለ፡ መባሕት፡ ወኢሀብት፡ እምኀበ፡ እግዚአብሔር፡ ወረሰየ፡ ርእሶ፡ ካህነ፡ ወደቂቀ፡ ቆሬሰ፡ ውዕዩ፡ በእሳት፡ ወለዖዝያንሰ፡ አልበሶ፡ ልብሰ፡ ለምጽ
=== paragraph 47 ===
ወኵሉ፡ ዘገብረ፡ ከማሆሙ፡ ውእቱ፡ ያምዕዖ፡ ለክርስቶስ፡ ዘአዘዘ፡ ሠናየ፡ ግብረ፡ ወከማሁ፡ መንፈስ፡ ቅዱስ፡ እስመ፡ የኀሥሡ፡ ስምዐ፡ ላዕለ፡ ርእሶሙ፡ ወከማሁ፡ ይነሥኡ፡ ኵነኔ፡ በርቱዕ፡ ወይከውን፡ ላዕሌሆሙ፡ መርገም፡ እምኀበ፡ እግዚአብሔር፡ እስመ፡ ይሬኢዩ፡ ዘይከውን፡ እንከ፡ በእንተ፡ አስትቶ፡ በቍርባን፡ ዘያቀርቡ፡ ለዘ፡ ኢይደልዎ፡ ወይመስሎሙ፡ ክህነት፡ ከመ፡ ተውኔት፡ ወኢያአምሩ፡ ከመ፡ ይእቲ፡ አምሳለ፡ ክህነቱ፡ ለክርስቶስ፡ አምላክነ። ወእምይእዜሰ፡ ለዘኮነ፡ ከመ፡ ዘነገርናክሙ፡ በተዐድዎ፡ ላዕለ፡ ዝንቱ፡ ኢይረክብ፡ ክፍለ፡ እስመ፡ ኢጽህቀ፡ ይዕቀብ፡ ክህነተ፡ ወይንግር፡ ለሰብእ፡ ከመ፡ ዘሀለዉ፡ ይግብኡ፡ ውስተ፡ ምክሩ፡ ለአህጕሎቱ
=== paragraph 48 ===
ሙሴኒ፡ ገብሩ፡ ለእግዚአብሔር፡ ዘየዐቢ፡ እምነቢያት፡ ዘተናገሮ፡ እግዚአብሔር፡ ገጸ፡ በገጽ፡ ከመ፡ ዘይትናገር፡ ብእሲ፡ ለካልኡ፡ ወይቤሎ፡ ናሁ፡ እሬኢየከ፡ ዕዉቅ፡ በማእከለ፡ ሰብእ። ወኢያስተርአዮ፡ በለሖሳስ፡ ወኢበሕልም፡ ወኢበትሕዝብት፡ ወኢበመልእክተ፡ መላእክት፡ አላ፡ በጸጋሁ፡ ላዕለ፡ ገብሩ፡ ወከመዝ፡ ሠርዐ፡ ሕገ፡ ዘነሥአ፡ እምኀበ፡ እግዚአብሔር
=== paragraph 49 ===
ወፈለጠ፡ ባቲ፡ በዘይደልዎ፡ ለሊቀ፡ ካህናት፡ ወለካህናት፡ በዘይደልዎሙ፡ ይግበሩ፡ ሌዋዊያን፡ ወከፈለ፡ በኵሉ፡ ክፍል፡ እምኔሁ፡ ወዘከመ፡ ይደሉ፡ ለመጋቤ፡ ምኵራብ፡ በመልእክቱ፡ ወቀዊም፡ ቦቱ። ወዘኮነ፡ እምግብረ፡ ሊቃነ፡ ካህናት፡ ኢይቀርብዎ፡ ካህናት፡ ወኢአዘዞሙ፡ በውእቱ፡ ሕግ፡ ወኵሉ፡ ዘኮነ፡ ግብረ፡ ካህናት፡ ኢይቀርብዎ፡ ሌዋዊያን። ዳእሙ፡ ለኵሉ፡ ዘመድ፡ እምኔሆሙ፡ ዐቃቢ፡ ዘየዐቅብ፡ ወለሊሁሰ፡ የዐቅብ፡ በዘተአዘዘ፡ በዐቅም፡ እንዘ፡ ኢይትዐደው። ወኮነ፡ ኵሉ፡ ዘተዐደወ፡ በምንትኒ፡ እምውእቱ፡ ትእዛዝ፡ ይቀትልዎ
=== paragraph 50 ===
ወከማሁ፡ ተዐውቀ፡ እምነገረ፡ ሳኦል፡ ንጉሥ፡ እስመ፡ ሶበ፡ ሦዐ፡ እምአባግዐ፡ ዐማሌቅ፡ ወተዐደወ፡ ትእዛዘ፡ እግዚአብሔር፡ ወሥርዐቶ፡ ወረሰየ፡ ርእሶ፡ ዘያቀርብ፡ ቍርባነ፡ እንዘ፡ ኢሀሎ፡ ምስሌሁ፡ ሳሙኤል፡ ነቢይ፡ ዘኮነ፡ ሊቀ፡ ካህናት፡ ወሤመ፡ ርእሶ፡ ዘእንበለ፡ ሊቀ፡ ካህናት፡ ዘተውህበ፡ ሎቱ፡ ወወረደ፡ ላዕሌሁ፡ ውእቱ፡ ኀጢአት፡ ወመርገም፡ እስመ፡ ኢሰአሎ፡ ለነቢይ፡ ዘቀብኦ፡ መንግሥተ፡ ከመ፡ ያቅርብ፡ ቍርባነ፡ ህየንቴሁ፡ እስመ፡ ውእቱ፡ ኮነ፡ ካህነ፡ እግዚአብሔር፡ በአማን
=== paragraph 51 ===
ወአርአየ፡ እግዚአብሔር፡ ከመ፡ ውእቱ፡ በዖዝያን፡ ንጉሥ፡ በምግባሩ፡ በጊዜሃ፡ እስመ፡ ሶበ፡ ተዐደወ፡ ትእዛዘ፡ ወረደ፡ ላዕሌሁ፡ ኵነኔ፡ ወኮነ፡ ለምጸ፡ ወሶበ፡ ኮነ፡ ደፋሬ፡ ላዕለ፡ ክህነት፡ ዘኢይከውን፡ ሎቱ፡ ተሰልበ፡ መንግሥቱ፡ ዘያስተርኢ፡ ቦቱ፡ ወኮነ፡ ነኪረ፡ እምኔሁ፡ ወስዱድ፡ በኀቤሁ
=== paragraph 52 ===
ወዘኮነ፡ ነቢየ፡ ኢይትኀባእ፡ እምኔክሙ፡ እስመ፡ ታአምሩ፡ ከመ፡ ተሰምዩ፡ ነቢየ፡ ኤጲስ፡ ቆጶሳት፡ ወቀሳውስት፡ ወዲያቆናት፡ እለ፡ ጸለይነ፡ ላዕሌሆሙ፡ ወአንበርነ፡ እደዊነ፡ ላዕለ፡ ርእሶሙ፡ ከመ፡ ያጥርዩ፡ ሰማያዊተ፡ ወይምርሖሙ፡ ላዕለ፡ መዓርጊሆሙ። እስመ፡ አኮ፡ ኵሎ፡ ዕለተ፡ ዘይትገበር፡ ምቱረ፡ ሢመት፡ ወባሕቱ፡ ዘንገብር፡ ከመዝ፡ ለዘጸውዖ፡ እግዚአብሔር፡ ወሤመ፡ ወኮነ፡ ሰብአ፡ በምግባረ፡ ሠናይ፡ ወተኀርየ፡ ከመዝ
=== paragraph 53 ===
ወሶበሰ፡ ኢኮነ፡ ተኀርዮ፡ ወምግባር፡ ኢኮነ፡ ሕገ፡ ወሥርዐተ፡ እምአከለ፡ ይሰመይ፡ መዓርገ፡ ክህነት፡ በአሐዱ፡ ስም። ወባሕቱ፡ በከመ፡ ተመሀርነ፡ እምእግዚእነ፡ ሥርው፡ ለኵሉ፡ ምግባር፡ ወበእንተዝ፡ አዕበይናሁ፡ ለኤጲስ፡ ቆጶስ፡ በሢመተ፡ ክህነት፡ ወለቀሲስ፡ ሰባኬ፡ ወለዲያቆን፡ ይትለአክ፡ ለክልኤሆሙ፡ ከመ፡ ይትፈጸም፡ ግብረ፡ ቤተ፡ ክርስቲያን፡ በንጹሕ
=== paragraph 54 ===
እስመ፡ ኢይደልዎ፡ ለዲያቆን፡ ያቅርብ፡ ቍርባነ፡ በእዴሁ፡ ወኢያጥምቅ፡ ጥምቀተ፡ ወኢይባርክ፡ ለሕዝብ፡ ካዕበ፡ ቡራኬ፡ ዐቢየ፡ ወንኡሰ። ወቀሳውስትሰ፡ ኀቤሆሙ፡ ይትፈጸም፡ ሢመት፡ እስመ፡ ኢይደልዎ፡ ይሚጥ፡ ሥርዐተ፡ ወከማሁ፡ ትእዛዘ፡ እግዚአብሔር፡ ተባረከ፡ ወተላዐለ፡ ስሙ፡ ወኢይከውን፡ ዘእንበለ፡ ሥርዐት፡ አላ፡ በሠናይ፡ ሥርዐት፡ ወበትእዛዝ፡ ከመ፡ ይኩኑ፡ ሐራ፡ መላእክት፡ ትሑታን፡ ወይትመጠዉ፡ ግብረ፡ ሐራ፡ ሰማይ፡ እለ፡ እሙንቱ፡ ይትሌዐሉ፡ እምኔሆሙ፡ ወይከውኑ፡ ሰራዊተ፡ በታሕቱ፡ በአርአያ፡ ሰራዊት፡ ዘበላዕሉ
=== paragraph 55 ===
ኵሉ፡ ዘገብረ፡ ዘኢአዘዝነ፡ ቦቱ፡ ወይነሥእ፡ መዓርገ፡ ዘይትሌዐል፡ እምኔሁ፡ ወገብረ፡ ለርእሱ፡ በፈቃዱ፡ ሕገ፡ ሐዲሰ፡ ወያእምር፡ ከመ፡ ያመክዕብ፡ ላዕለ፡ ነፍሱ፡ ኵነኔ፡ እምኀበ፡ እግዚአብሔር፡ አምላክነ፡ ወነገርነ፡ ኵነኔሆሙ፡ በሳድስ፡ መጽሐፍነ፡ ኀበ፡ ሀሎ፡ ሥርዐተ፡ ኵነኔ፡ እስመ፡ አኮ፡ ለነ፡ ዘይትቃረኑነ፡ ወኢለአሐዱ፡ እምኤጲስ፡ ቆጶሳት፡ ወባሕቱ፡ ይትቃረንዎ፡ ለኤጲስ፡ ቆጶስ፡ ዘየዐቢ፡ ዘውእቱ፡ ዘይሬኢ፡ ኵሎ፡ ወለቤተ፡ ክርስቲያን፡ በኵሉ፡ ጊዜ፡ ዝውእቱ፡ ኢየሱስ፡ ክርስቶስ፡ አምላክነ
=== paragraph 56 ===
ሙሴሂ፡ መፍቀሬ፡ እግዚአብሔር፡ ዘአፍቀሮ፡ ለእግዚአብሔር፡ በጥዩቅ፡ አፍቅሮ፡ ሤሞ፡ ሊቀ፡ ካህናት፡ ወሌዋዊያን፡ ወክርስቶስ፡ መድኀኒነ፡ ሤመነ፡ ለነ፡ ለዐሠርቱ፡ ወክልኤቱ፡ ሐዋርያት፡ አነ፡ ፊልጶስ፡ ወአነ፡ ያዕቆብ፡ ወምስሌነ፡ ካልኣን፡ እለ፡ እሙንቱ፡ እሙራን፡ እምውስቴትነ፡ ሊቃነ፡ ካህናት፡ ሠለስቱ፡ ሰራዊት፡ ወካህናት፡ ወቀሳውስት፡ ሠለስቱ፡ ሰራዊት፡ ወዲያቆናት፡ ሠለስቱ፡ ሰራዊት፡ ምስለ፡ ዲያቆን፡ ወንፍቀ፡ ዲያቆን፡ ወአናጕንስጢስ
=== paragraph 57 ===
ወቀዳሚ፡ እምሰራዊት፡ ሊቀ፡ ካህናት፡ ውእቱ፡ ዋሕድ፡ ክርስቶስ፡ ዘኢመሠጠ፡ ለርእሱ፡ ክህነተ፡ ወባሕቱ፡ አብ፡ ዘሤሞ፡ ካህነ፡ ለዓለም፡ እስመ፡ አመ፡ ኮነ፡ ሰብአ፡ ከማነ፡ ወአቅረበ፡ ነፍሶ፡ ለእግዚአብሔር፡ መሥዋዕተ፡ መንፈሳዊተ፡ ለሊሁ፡ በእዴሁ፡ ወውእቱ፡ ወልድ፡ አዘዘነ፡ ለነ፡ ለባሕቲትነ፡ ከመ፡ ንግበር፡ ከማሁ፡ እንዘ፡ ሀሎ፡ ምስሌነ፡ በዐቢይ፡ ምሥጢር፡ እንዘ፡ ነአምን፡ ቦቱ
=== paragraph 58 ===
ወአኮ፡ ኵሉ፡ ዘአምነ፡ ቦቱ፡ ይሠየም፡ ካህነ፡ በአማን፡ አው፡ ይሠየም፡ ሊቀ፡ ካህናት፡ ወባሕቱ፡ ንሕነ፡ እምድኅረ፡ ዐርገ፡ ውስተ፡ ሰማይ፡ አቅረብነ፡ በከመ፡ አዘዘነ፡ መሥዋዕተ፡ ንጹሐ፡ ዘእንበለ፡ ደም፡ ወሤምነ፡ እምውስቴትነ፡ ኤጲስ፡ ቆጶሳተ፡ ወቀሳውስተ፡ ወዲያቆናተ፡ እለ፡ ኮኑ፡ ሰብዐቱ፡ ዘእምኔሆሙ፡ እስጢፋኖስ፡ ወፊልጶስ፡ ወአኖኮሮን፡ ወኒቃሮና፡ ወጢሞና፡ ወጴርሞና፡ ወኒቃለዎሙ፡ እሉ፡ ሰብዐቱ፡ ዲያቆናት
=== paragraph 59 ===
እስመ፡ ኮነ፡ አሐዱ፡ እምኔነ፡ በፍቅረ፡ እግዚአብሔር፡ ወፈድፋደ፡ አርአየ፡ በፍርሀተ፡ እግዚአብሔር፡ ወፍቅረ፡ እግዚእነ፡ ክርስቶስ፡ እስመ፡ ለሊሁ፡ መጠወ፡ ነፍሶ፡ ወከዐወ፡ ደሞ፡ ወወሀበ፡ ሕይወቶ፡ ለአይሁድ፡ ቀታልያን፡ ወወገርዎ፡ በእብን፡ ወቀተልዎ። ወእምዝ፡ መንክር፡ በኀቤሁ፡ ወእንዘ፡ ሀሎ፡ ከመዝ፡ ወኮነ፡ ሥራኀ፡ በመንፈስ፡ እስከ፡ ጊዜ፡ ወገርዎ፡ ርእየ፡ አናቅጸ፡ ሰማይ፡ ርኅወ፡ ወርእዮ፡ ለክርስቶስ፡ እግዚእነ፡ እንዘ፡ ይነብር፡ በየማነ፡ አብ፡ ወውእቱ፡ ኮነ፡ በኂሩቱ፡ ወየውሀቱ፡ እስከ፡ ርእየ፡ ዘንተ
=== paragraph 60 ===
ወኢተዐደወ፡ እመዓርጊሁ፡ ወኢእመልእክቱ፡ ወኢያቅረበ፡ ቍርባነ፡ ወኢያንበረ፡ እዴሁ፡ ላዕለ፡ መኑሂ፡ ወኢባረከ፡ ብእሴ፡ ወባሕቱ፡ ዐቀበ፡ ግብረ፡ ዲያቆን፡ እስከ፡ አመ፡ ይመውት፡ ወባቲ፡ በጽሐ፡ ኀበ፡ እግዚአብሔር። ወዮጊ፡ ዝንቱ፡ ውእቱ፡ ዘይኄይስ፡ ወይሤኒ፡ ከመ፡ ይኩን፡ ከማሁ፡ ወይዕቀቡ፡ ሠናየ፡ ሥርዐተ
=== paragraph 61 ===
እስመ፡ ተዐውቀ፡ ነገሩ፡ በላዕለ፡ ፊልጶስ፡ ወሐናንያ፡ ወይቤ፡ ከመ፡ ፊልጶስ፡ አጥመቆ፡ ለገብረ፡ ንግሥተ፡ ኢትዮጲያ፡ ወሐናንያ፡ አጥመቆ፡ ለጳውሎስ፡ ወንሕነ፡ ንብል፡ ወአቅደምነ፡ ትእዛዘ፡ ወአዘዝነ፡ ከመ፡ ኢመፍትው፡ ለመኑሂ፡ እምሰብእ፡ ይምሥጥ፡ ሢመተ፡ ክህነት፡ ለርእሱ፡ አላ፡ ለእመ፡ ተውህበ፡ እምእግዚአብሔር። በከመ፡ መልከጼዴቅ፡ ካህን፡ ወያዕቆብ፡ እኁሁ፡ ለእግዚእነ፡ እለ፡ ነሥኡ፡ ክህነተ፡ እምኀበ፡ እግዚአብሔር፡ አው፡ ይነሥእ፡ ዘይነሥእ፡ እምሊቀ፡ ካህናት፡ ከመ፡ አሮን፡ ዘተወክፈ፡ ክህነተ፡ እሙሴ፡ በከመ፡ አዘዞ፡ እግዚአብሔር
=== paragraph 62 ===
ናሁ፡ ተዐውቀ፡ እምነገረ፡ ዝንቱ፡ ከመ፡ ፊልጶስ፡ ወሐናንያ፡ እለ፡ አቅደምነ፡ ነጊረ፡ ኢመሠጡ፡ ለርእሶሙ፡ ወኢምንተኒ፡ ወባሕቱ፡ ተፈነዉ፡ ለአጥምቆ፡ ወተወክፉ፡ ክህነተ፡ እምሊቀ፡ ካህናት፡ ዘውእቱ፡ ኢየሱስ፡ ክርስቶስ፡ ዘአልቦ፡ ዘይመስሎ፡ ወአልቦ፡ ዘይትኀባእ፡ እምኔሁ፡ ወአልቦ፡ ዘይትዐረይ፡ ምስሌሁ፡ ዘሎቱ፡ ስብሐት፡ ወዕበይ፡ ወክብር፡ እስከ፡ ለዓለም፡ አሜን
=== paragraph 63 ===
[10] ፲። ትእዛዝ፡ ዘጳውሎስ፡ በእንተ፡ እለ፡ ይመጽኡ፡ ኀበ፡ ምሥጢርነ። አነ፡ ጳውሎስ፡ ንኡስ፡ እምሐዋርያት፡ እኤዝዘክሙ፡ ዘንተ፡ ሥርዐተ፡ ዐሠርቱ፡ ወኀምስቱ
=== paragraph 64 ===
[10.1] ፩፡ ትእዛዝ። ኵሉ፡ ዘአፍቀረ፡ ይደመር፡ ምስሌነ፡ ወይሳተፍ፡ በነፍሱ፡ ውስተ፡ ምሥጢርነ፡ ይደልዎሙ፡ ያምጽኦሙ፡ ዲያቆን፡ ኀበ፡ ቀሲስ፡ አው፡ ኀበ፡ ኤጲስ፡ ቆጶስ፡ ወይስአሎሙ፡ ኤጲስ፡ ቆጶስ፡ አው፡ ቀሲስ፡ በእንተ፡ ምንት፡ አፍቀሩ፡ በዊአ፡ ውስተ፡ ሕግነ፡ ወይኩን፡ ዲያቆን፡ ዘይጌሥጾሙ፡ ወይሕትት፡ በእንተ፡ ግብሮሙ፡ ወይርአይ፡ ውስተ፡ ምክሮሙ፡ ወይስአል፡ በእንተ፡ ሠናይ፡ ሥርዐቶሙ፡ ወለእመ፡ ኮኑ፡ አግብርተ፡ አው፡ አግዓዝያነ። ወለእመቦ፡ እምኔሆሙ፡ ገብር፡ ለብእሲ፡ መሀይምን፡ ይስአልዎ፡ ለውእቱ፡ መሀይምን፡ በእንቲአሁ፡ ለእመ፡ ኮነ፡ ሠናየ፡ ሥርዐቱ፡ ወለእመ፡ ስምዐ፡ ኮኖ፡ እግዚኡ፡ በኂሩቱ፡ ወበሠናይ፡ ፍናዊሁ፡ ይትወከፍዎ፡ እምድኅረ፡ ይሕትቶ፡ ዲያቆን፡ ወእመአኮ፡ ይቁም። ወለእመ፡ ኮነ፡ ገብረ፡ ለዘኢየአምን፡ በክርስቶስ፡ ይሴአልዎ፡ ለእግዚኡ፡ ወያእምርዎ፡ ለእመ፡ ሠናይ፡ ወኢይግበርዎ፡ ፍጡነ፡ ከመ፡ ኢይኩን፡ ለጋእዝ፡ ወለሙስና፡ አላ፡ ይኩን፡ ለሠናይ፡ ወለኂሩት
=== paragraph 65 ===
[10.2] ፪፡ ትእዛዝ። ወለእመ፡ ኮነ፡ ብእሲ፡ ዘቦ፡ ብእሲተ፡ አው፡ ብእሲተ፡ እንተ፡ ባቲ፡ ምተ፡ ይምሀርዎሙ፡ ከመ፡ ይትዐገሡ፡ በበይናቲሆሙ። ወለእመ፡ ኮኑ፡ ዘኢያውሰቡ፡ ይምሀርዎሙ፡ ወይገሥጽዎሙ፡ ከመ፡ ኢይዘምው፡ አላ፡ ያውስቡ፡ ዘበሕግ፡ በከመ፡ አዘዝነ። ወለእመ፡ ኮነ፡ እግዚኡ፡ መሀይምን፡ ወያአምር፡ ከመ፡ ይዜሙ፡ ወኢያስተዋስቦ፡ አው፡ ቦቱ፡ አመተ፡ መፍቀሪተ፡ ዝሙት፡ ኢያስተዋስቦሙ፡ ወእመአኮ፡ ይስዐር፡ ወይሰደድ
=== paragraph 66 ===
[10.3] ፫፡ ትእዛዝ። ወለእመቦ፡ ብእሲ፡ ዘቦ፡ ጋኔን፡ ወአፍቀረ፡ ይባእ፡ ውስተ፡ ሕግነ፡ ይምሀርዎ፡ ፈሪሀ፡ እግዚአብሔር፡ ቀዲሙ፡ ወይፈውስዎ፡ ወኢይቅረብ፡ ቍርባነ፡ እስከ፡ ይነጽሕ፡ ወይሐውር፡ እምኔሁ፡ ጋኔኑ። ወለእመ፡ ቀርቦ፡ ሞት፡ ይትወከፍዎ፡ ወይስረዩ፡ ሎቱ፡ ወያቅርብዎ
=== paragraph 67 ===
[10.4] ፬፡ ትእዛዝ። እመቦ፡ ብእሲ፡ ዘይነብር፡ በዝሙት፡ ወገብረ፡ ውእተ፡ ልማዶ፡ ይገሥጽዎ፡ ወይትመየጥ፡ ወይኅድግ፡ ርስሐተ፡ ወኀጢአተ፡ ወይግባእ፡ ወለእመ፡ ኢገብረ፡ ዘንተ፡ ይሰደድ
=== paragraph 68 ===
[10.5] ፭፡ ትእዛዝ። ወከማሁ፡ ኵሉ፡ ብእሲት፡ ዘማዊት፡ እመሂ፡ ትኅድግ፡ ዝሙታ፡ ወትትመየጥ፡ ወእመአኮ፡ ትሰደድ
=== paragraph 69 ===
[10.6] ፮፡ ትእዛዝ። እመቦ፡ ብእሲ፡ ዘይገብር፡ ጣዖተ፡ ወግልፎ፡ ዘእብን፡ አው፡ ዕፅ፡ አው፡ ብርት፡ ካዕበ፡ ወዘኀጺን፡ ወዘወርቅ፡ ወዘብሩር፡ ለእመ፡ ቦአ፡ ምስሌነ፡ ውስተ፡ ሕግነ፡ ይኅድግ፡ ግብሮ፡ ወእመ፡ አኮ፡ ይሰዐር
=== paragraph 70 ===
[10.7] ፯፡ ትእዛዝ። እመቦ፡ ብእሲ፡ አው፡ ብእሲት፡ እምነኪራን፡ ወይፈቅዱ፡ ይባኡ፡ ውስተ፡ ሕግነ፡ ለእመ፡ ኮነ፡ ብእሲ፡ መስተሓምም፡ አው፡ ሠዓሊ፡ አው፡ ሰካሪ፡ አው፡ ተጠያሪ፡ አው፡ ዘይትዋነይ፡ አው፡ ዘይሜህር፡ ማሕሌተ፡ አው፡ ዘይመርሕ፡ ኀበ፡ ዝሙት፡ ለይኅድጉ፡ ግብሮሙ። ወከማሁ፡ ብእሲት፡ ለእመ፡ ኮነት፡ ተጠባቢተ፡ አው፡ መራሒተ፡ ለዝሙት፡ አው፡ ተዋናዪተ፡ አው፡ መዐንዘሪተ፡ አው፡ ዘፋኒተ፡ አው፡ ሐላዪተ፡ አው፡ ዘትሜህር፡ ከማሁ፡ አው፡ ዘይወድዩ፡ ማእከለ፡ ሰብእ፡ እከየ፡ ወጸልአ፡ አው፡ መስተዋዲያነ፡ አው፡ ዘይመስሎ፡ ለዝንቱ፡ እምእሉ፡ ምግባር፡ ይግድፍዎ፡ ወይነስሑ፡ ወይሖሩ፡ ፍኖተ፡ መሀይምናን፡ ወእመአኮ፡ ኢይትወከፍዎሙ
=== paragraph 71 ===
[10.8] ፰፡ ትእዛዝ። እመቦ፡ ብእሲ፡ እምሐራ፡ ወቦአ፡ ውስተ፡ ሕግነ፡ ለይኅድግ፡ ሀዪደ፡ ወትዕግልተ፡ ወአስተዋድዮ፡ ወተዐድዎ፡ ወእበደ። ወይንበር፡ በሲሳዩ፡ ወለእመ፡ ኀደገ፡ ዘንተ፡ ምግባረ፡ ይትወከፍዎ፡ ወእመአኮ፡ ይሰደድ
=== paragraph 72 ===
[10.9] ፱፡ ትእዛዝ። እመቦ፡ ብእሲ፡ ዘአውሰበ፡ ብእሲተ፡ መሀይምንተ፡ ወይገብር፡ እኩየ፡ በሥጋሁ፡ አው፡ ዝሙተ፡ አው፡ ኢኀፋሪ፡ አው፡ መሠሪይ፡ አው፡ ረቃይ፡ አው፡ ያስተጋብእ፡ መናፍስተ፡ አው፡ ረኣየ፡ ኮከብ፡ አው፡ ማሪ፡ በዐይን፡ አው፡ ተማሕፃኒ፡ አው፡ ሰባኪ፡ አው፡ ዘሕሡም፡ ቃል፡ አው፡ ዘይነግር፡ በትእምርት፡ ወገጹ፡ ኀበ፡ አስሕቶ፡ አው፡ ተጠያሪ፡ በዖፍ፡ አው፡ ዘየኀትም፡ ዲበ፡ እደዊሁ፡ ወእገሪሁ፡ በመርፍእ፡ ያቀጥን፡ ወያቀይሕ፡ ወይጽሕፍ፡ ላዕሌሁ፡ ዘውዐ፡ አው፡ በፋል፡ በእንተ፡ ድምፅ፡ ዘሰምዐ፡ አው፡ ነገር፡ አው፡ በዘርእየ፡ አው፡ በትሕዝብት፡ ዘይትአመር። እስመ፡ ዝንቱ፡ ኵሉ፡ ኀበ፡ ዕልዋን፡ ወረሲዓን፡ ወቦሙ፡ መጻሕፍተ፡ በከመ፡ ይመስሎሙ፡ ዘያአምሩ፡ በእንተ፡ ሕይወት፡ ወሞት፡ ወኢይትወከፍዎሙ፡ ውስተ፡ ሕግነ፡ እስከ፡ የሐትትዎሙ፡ ወይፈትንዎሙ፡ ለእመ፡ ነስሑ፡ በእንተ፡ ዘኮነ፡ እምኔሆሙ፡ ወለእመ፡ ኀደጉ፡ ወተመይጡ፡ ይትወከፍዎሙ፡ ወእመአኮ፡ ይሰደዱ
=== paragraph 73 ===
[10.10] ፲፡ ትእዛዝ። እመቦ፡ ዕቅብተ፡ ለብእሲ፡ ዘኢይአምን፡ ለእመ፡ ዐቀበት፡ ርእሳ፡ ሎቱ፡ ለባሕቲቱ፡ ይትወከፍዋ፡ ወለእመ፡ ነሥአት፡ ካልአ፡ ትትመነን
=== paragraph 74 ===
[10.11] ፲፩፡ ትእዛዝ። እመቦ፡ ብእሲ፡ ዘኮነ፡ ከማነ፡ ወቦአ፡ ውስተ፡ ሕግነ፡ ወቦ፡ ዕቅብተ፡ አው፡ አመተ፡ ይትዐገሥ፡ እምኔሃ፡ እስመ፡ ክርስቲያናዊ፡ ውእቱ፡ ወያውስባ፡ ዘበሕግ፡ በከመ፡ አዘዝነ። ለእመ፡ እንከ፡ ያፈቅራ፡ ይጽሐፍ፡ ላቲ፡ መጽሐፈ፡ ግዕዛን፡ ቀዲሙ፡ ወድኅሬሁ፡ ያውስባ። ወለእመ፡ ኮነት፡ አግዓዚተ፡ ያውስባ፡ በሕግ። ወለእመ፡ ኢገብረ፡ ከማሁ፡ ይሰደድ
=== paragraph 75 ===
[10.12] ፲፪፡ ትእዛዝ። እመቦ፡ ብእሲ፡ እምኔነ፡ ወይገብር፡ እኩየ፡ አው፡ የአምን፡ አምሳሎሙ፡ ለአይሁድ፡ ወይገብር፡ ከማሆሙ፡ ለይኅድግ፡ ወይትመየጥ፡ ወእመአኮ፡ ይሰደድ
=== paragraph 76 ===
[10.13] ፲፫፡ ትእዛዝ። ዘይፈቅድ፡ እመሀይምናን፡ በክርስቶስ፡ ይኩን፡ ውስተ፡ ኆልቈ፡ እለ፡ ይገብሩ፡ ሠናየ፡ ወይፀመድ፡ በፅሙና፡ ወበንጽሕ፡ ያመክር፡ ርእሶ፡ ሠለስተ፡ ዐመተ። ወለእመ፡ ኮነ፡ ብእሲ፡ ዘቦቱ፡ ሞገሰ፡ መንፈሳዊ፡ ወኂሩተ፡ ንጹሐ፡ ይትወከፍዎ፡ እስመ፡ ዝንቱ፡ ግብር፡ ኢይከውን፡ በጊዜሃ፡ ፍጡነ፡ አላ፡ ይከውን፡ በሠናይ፡ ኅሊና፡ ወተፀምዶ፡ ወአመክሮ
=== paragraph 77 ===
[10.14] ፲፬፡ ትእዛዝ። እመቦ፡ ብእሲ፡ ዘይመይጦ፡ ፍትወቱ፡ ውስተ፡ ነጽሮ፡ ማሕሌት፡ አው፡ ይትመሀሩ፡ ቀትለ፡ አው፡ ይትጋደሉ፡ አው፡ ያስተዛብጡ፡ አባግዐ፡ ወዶርሆ፡ ምስለ፡ ካልኡ፡ አው፡ ኀበ፡ ይትመሀሩ፡ አፍራስ፡ ወነዲፈ፡ በሐጽ፡ ይኅድጉ፡ ዘንተ፡ ወይትመየጡ፡ እምኔሁ፡ ወይምትሩ፡ ዘንተ፡ ምግባረ፡ እስመ፡ ግብረ፡ አረሚ፡ ይእቲ፡ ወእመአኮ፡ ይሰደድ
=== paragraph 78 ===
[10.15] ፲፭፡ ትእዛዝ። እመቦ፡ ሕዝባዊ፡ ዘይሜህር፡ ሰብአ፡ ለሠናይ፡ ይኩን፡ ፅምወ፡ በቃሉ፡ ወኄረ፡ በሥጋሁ፡ ወኢይዘኀር፡ ወይኩን፡ ራትዐ፡ በልሳኑ፡ ወእምዝ፡ ይምሀር፡ ለሰብእ፡ እምድኅረ፡ ውእቱ፡ እስመ፡ እግዚእነ፡ ይቤ፡ በወንጌል፡ ቅዱስ፡ ቅድመ፡ አውፅእ፡ ሰርዌ፡ ወሐሠረ፡ እምዐይንከ፡ ወእምዝ፡ አውፅእ፡ እምዐይነ፡ እኁከ፡ ወበእንተ፡ ኂሩት፡ ይብል፡ ወይከውኑ፡ ምሁራነ፡ እምኀበ፡ እግዚአብሔር።