##### edition ed1 (gez)
=== section 1 ===
1 አፍቅርዋ ፡ ለጽድቅ ፡ መኳንንተ ፡ ምድር ፤ ኀልዩ ፡ በእንተ ፡ እግዚአብሔር ፡ ሠናየ ፤ ወበፍሥሓ ፡ ልብክሙ ፡ ኅሥዎ ።
2 እስመ ፡ ይትረከብ ፡ ለእለ ፡ ኢያሜክርዎ ፤ ወያስተርኢ ፡ ለእለ ፡ ኢይክሕድዎ ።
3 እስመ ፡ ጠዋይ ፡ ኅሊና ፡ እምእግዚአብሔር ፡ ያርሕቅ ፤ ወእንዘ ፡ ትትሜከር ፡ ኀይል ፡ ትዘልፎሙ ፡ ለአብዳን ።
4 እስመ ፡ ውስተ ፡ ምይንት ፡ ነፍስ ፡ ኢትበውእ ፡ ጥበብ ፤ ወኢየኀድር ፡ ውስተ ፡ ሥጋ ፡ ዘቅኑይ ፡ ለኀጢአት ።
5 ቅዱስ ፡ መንፈስ ፡ ትምህርተ ፡ ያጐይይ ፡ ዘእከይ ፤ ወይትነሣእ ፡ እምኅሊናሆሙ ፡ ለአብዳን ፤ ወይዘልፍ ፡ በምጽአታ ፡ ለእከይ ።
6 እስመ ፡ መፍቀሬ ፡ ሰብእ ፡ መንፈሰ ፡ ጥበብ ፤ ወኢያነጽሕ ፡ ጽሩፈ ፡ እምከናፍሪሁ ፤ እስመ ፡ ለኲልያቲሁ ፡ ስምዕ ፡ እግዚአብሔር ፤ ወለልቡ ፡ ሐዋጺ ፡ ህልው ፤ ወለልሳን ፡ ሰማዒ ።
7 እስመ ፡ መንፈሰ ፡ እግዚአብሔር ፡ መልአ ፡ ዓለመ ፤ ወዘይእኅዝ ፡ ኲሎ ፡ አእመሮ ፡ በቃል ።
8 በእንተዝ ፡ ዘይነብብ ፡ ዐመፃ ፡ መኑሂ ፡ ኢያመሥጥ ፤ ወኢትትዐደዎ ፡ ለዘሊፍ ፡ ኲነኔ ።
9 እስመ ፡ ለምክሮሙ ፡ ለረሲዓን ፡ ሐተታ ፡ ይከውን ፤ ወለንባቦሙ ፡ ድምፁ ፡ ኀበ ፡ እግዚአብሔር ፡ ይበጽሕ ፤ ወለዘላፋ ፡ አበሳሁ ።
10 እስመ ፡ እዝን ፡ ቀናኢ ፡ ይሰምዕ ፡ ኲሎ ፤ ድምፀ ፡ ነጐርጓር ፡ ኢይትኀባእ ፨ ፡ ተዐቀቡኬ ፡ እንከ ፡ ነጐርጓረ ፡ ዘኢይበቊዕ ፤ ወእምሐሜት ፡ ባልሑ ፡ ልሳነ ፤ እስመ ፡ ነገር ፡ ዘበጽምሚት ፡ በከ ፡ ኢይወፅእ ፤ አፍ ፡ ዘይጠቅል ፡ ይቀትል ፡ ነፍሰ ።
11 ኢትቅንኡ ፡ ሞተ ፡ በስሕተተ ፡ ሕይወትክሙ ፤ ወኢትንሥኡ ፡ ሥራዌ ፡ በምግባረ ፡ እደዊክሙ ።
12 እስመ ፡ እግዚአብሔር ፡ ሞተ ፡ ኢገብረ ፤ ወኢያስተአድም ፡ በሀጒሎሙ ፡ ለሕያዋን ።
13 እስመ ፡ ፈጠረ ፡ ለከዊነ ፡ ኲሉ ፤ ወመድኀኒት ፡ ፍጥረተ ፡ ዓለም ፤ ወአልቦ ፡ ውስቴቶን ፡ ሥራየ ፡ ዘያማስን ፤ ወኢለሲኦል ፡ መንግሥተ ፡ በምድር ፡ እስመ ፡ ጽድቅ ፡ ኢመዋቲት ፡ ይእቲ ፡ ወረሲዓንሰ ፡ በእደው ፡ ወበቃል ፡ ጸውዕዎ ፤ ዐርከ ፡ አምሰልዎ ፡ ወተመሰዉ ፤ ወኪዳነ ፡ ተካየዱ ፡ ምስሌሁ ፤ እስመ ፡ ይደልዎሙ ፡ መክፈልተ ፡ ዚአሁ ፡ ከዊነ ።
=== section 2 ===
1 ይቤሉ ፡ በርእሶሙ ፡ ኢኀሊዮሙ ፡ ርቱዐ ፤ ኅዳጥ ፡ ወማሕዝን ፡ ንብረትነ ፤ ወአልቦ ፡ ፈውሰ ፡ በሞቱ ፡ ለብእሲ ፤ ወአልቦ ፡ ዘተአምረ ፡ ዘገብአ ፡ እምሲኦል ።
2 እስመ ፡ በከ ፡ ለሊነ ፡ ተፈጠርነ ፤ ወእምድኅረዝ ፡ ንከውን ፡ ከመ ፡ ዘኢተፈጠርነ ፤ እስመ ፡ ጢስ ፡ እስትንፋስ ፡ ውስተ ፡ አንፍነ ፤ ወቃል ፡ ቀለምጽጽ ፡ በሑሰተ ፡ ልብነ ፤ ዘእምከመ ፡ ጠፍአ ፡ ሐመደ ፡ ይከውን ፡ ሥጋ ፤ ወመንፈስሂ ፡ ይትከዐው ፡ ከመ ፡ ሳሕወ ፡ ደመና ።
3 ወስምነ ፡ ይትረሳዕ ፡ በመዋዕል ፤ ወአልቦ ፡ ዘይዜከር ፡ ምግባሪነ ፤ ወየኀልፍ ፡ ንብረትነ ፡ ከመ ፡ አሠረ ፡ ደመና ፤ ወከመ ፡ ጊሜ ፡ ይትፈረዘዝ ፤ እንተ ፡ ተሰደት ፡ በእግረ ፡ አሚር ፤ ወእምላህቡ ፡ እንተ ፡ ከብደት ።
4 ከመ ፡ ጽላሎት ፡ ኀላፊት ፡ ንብረትነ ፤ ወአልቦ ፡ ግብአተ ፡ በሞትነ ፤ ወአመ ፡ ተዐትበ ፡ ወአልቦ ፡ ዘይገብእ ።
5 ንዑኬ ፡ ንትፈጋዕ ፡ በዘሀሎ ፡ ሠናይ ፤ ወንግበር ፡ ውስተ ፡ ፍጥረት ፡ ከመ ፡ ወራዙት ፡ ፍጡነ ፡ ወይነ ፡ ብዙኀ ፡ ወዕፍረተ ፡ ንትመላእ ፤ ወኢይኅልፈነ ፡ ጽጌ ፡ ደመና ።
6 ወንትቀጸል ፡ ጽጌ ፡ ረዳ ፤ ሠርጸ ፡ ዘእንበለ ፡ ይጸመሂ ።
7 አልቦ ፡ ዘእምውስቴትክሙ ፡ ዘኢይደልዎ ፡ እምነ ፡ እንቲአነ ፡ ፍሥሓ ፤ በኲለሄ ፡ ንኅድግ ፡ ነገረ ፡ ፍግዕ ፤ እስመ ፡ ይእቲ ፡ መክፈልትነ ፡ ወርስትነ ፡ ንትዐገል ፡ ነዳየ ፡ ጻድቀ ፤ ወኢንምሀክ ፡ እቤረ ፤ ወልሂቀኒ ፡ ኢንኅፈር ፡ በሢበት ፡ ብዙኀ ፡ መዋዕል ፤ ይኩነነ ፡ ኀይልነ ፡ ሕገ ፡ ለጽድቅ ፤ እስመ ፡ ዕቡስ ፡ ምኑነ ፡ ይትበሀል ፡ ንቅትሎ ፡ ለጻድቅ ፡ እስመ ፡ ክቡድ ፡ ውእቱ ፡ ለነ ፤ ወይትቃወሞን ፡ ለምግባሪነ ፤ ወይዘነጒጐነ ፡ በኀጢአ ፡ ሕግ ፤ ወይሰብክ ፡ ለነ ፡ አበሳ ፡ ትምህርትነ ፡ ወይብል ፡ አእምሮ ፡ እግዚአብሔር ፡ ብየ ፤ ወወልደ ፡ እግዚአብሔር ፡ ይብል ፡ ርእሶ ፨ ፡ ዘኮነነ ፡ መዝለፌ ፡ ኅሊናነ ፤ ክቡድ ፡ ውእቱ ፡ ለነ ፡ በራእዩኒ ።
8 እስመ ፡ ኢይትማሰል ፡ ምስለ ፡ ባዕድ ፡ ንብረቱ ፤ ወፍሉጥ ፡ ፍኖቱ ፤ ምኑናነ ፡ ኮነ ፡ ሎቱ ፤ ወይርሕቅ ፡ እምፍናዊነ ፡ ከመ ፡ ዘእምርኩስ ፤ ወያስተበፅዕ ፡ ደኃሪቶሙ ፡ ለጻድቃን ፤ ወይትሜካሕ ፡ በአብ ፡ እግዚአብሔር ፨ ፡ ንርአይ ፡ ለእመ ፡ ነገሩ ፡ ህልው ፤ ወናመክር ፡ ደኃሪቶ ።
9 ወእመሰ ፡ ጻድቅ ፡ ወልዱ ፡ ለእግዚአብሔር ፡ ያድኅኖ ፤ ወይባልሖ ፡ እምእደ ፡ እለ ፡ ይትቃወምዎ ።
10 በጽዕለት ፡ ወበሕማም ፡ ንሕትቶ ፤ ከመ ፡ ናእምር ፡ ትዕግሥቶ ፤ ወንኰንን ፡ ትዕግሥተ ፡ ኢተዘክሮ ፡ እከይ ።
11 በሞት ፡ ኅሱር ፡ ንኰንኖ ፤ እመ ፡ ይከውኖ ፡ ረድኤተ ፡ በከመ ፡ ቃሉ ።
12 ዘንተ ፡ ኀለዩ ፡ ወስሕቱ ፤ እስመ ፡ አንቈረቶሙ ፡ እከዮሙ ።
13 ወኢያእመሩ ፡ ኅቡኣቲሁ ፡ ለእግዚአብሔር ፤ ወዐስበ ፡ ኢተሰፈዉ ፡ ዘጽድቅ ፤ ወኢያምሰሉ ፡ ክብረ ፡ ለነፍሳት ፡ ንጹሓት ፨ ፡ እስመ ፡ እግዚአብሔር ፡ ፈጠሮ ፡ ለሰብእ ፡ ለንጽሕ ፤ ወአርአያ ፡ አምሳለ ፡ ዚአሁ ፡ በራእዩ ፡ ገብሮ ።
14 ወበቅንአተ ፡ ዲያብሎስ ፡ ሞት ፡ መጽአ ፡ ውስተ ፡ ዓለም ፤ ወያሜክርዎ ፡ እለ ፡ እመክፈልተ ፡ ዝንቱ ፡ እሙንቱ ።
=== section 3 ===
1 ነፍሶሙ ፡ ለጻድቃን ፡ ውስተ ፡ እደ ፡ እግዚአብሔር ፤ ወኢይለክፎሙ ፡ ሥቃይ ።
2 ተመሰሉ ፡ በአዕይንቲሆሙ ፡ ለአብዳን ፡ ዘሞቱ ፤ ወተኈለቈት ፡ ለእከይ ፡ ፀአቶሙ ፤ ወኅልፈቶመ ፡ ተመሰለ ፡ ቅጥቃጤ ፡ ሎሙ ፤ ወእሙንቱሰ ፡ በሰላም ፡ ህለዉ ።
3 እስመ ፡ ለገጸ ፡ ሰብእ ፡ እመሂ ፡ ተኰነኑ ፤ ተስፋሆሙ ፡ ሕይወት ፡ ፍጽምት ።
4 ወኅዳጠ ፡ ተኰኒኖሙ ፡ ዐቢየ ፡ ይዴለዉ ፤ እስመ ፡ እግዚእብሄር ፡ አመከሮሙ ፤ ወረከቦሙ ፡ እለ ፡ ይዴለዉ ፡ ሎቱ ።
5 ከመ ፡ ወርቅ ፡ ዘበምንሃብ ፡ አመከሮሙ ፤ ወከመ ፡ ጽንሓሐ ፡ መሥዋዕት ፡ ተወክፎሙ ፡ ወበመዋዕለ ፡ ውሓዬሆሙ ፡ ይበርሁ ፤ ወከመ ፡ ቀለምጽጽ ፡ ውስተ ፡ ብርዕ ፡ ይረውጹ ።
6 ወይኴንኑ ፡ አሕዛበ ፡ ወይእኅዙ ፤ ወይነግሥ ፡ ሎሙ ፡ እግዚአብሄር ፡ ለዓለም ።
7 እለ ፡ ይትዌከሉ ፡ ቦቱ ፡ ያአምሩ ፡ ርትዐ ፤ ወመሃይምናን ፡ በአፍቅሮ ፡ ይሄልዉ ፡ ኀቤሁ ፤ እስመ ፡ ጸጋ ፡ ወክብር ፡ ላዕለ ፡ ኅሩያኒሁ ።
8 ወረሲዓንሰ ፡ በከመ ፡ ኀለዩ ፡ ይረክቡ ፡ ተግሣጸ ፤ እለ ፡ አስተትዎ ፡ ለጻድቅ ፡ ወእምእግዚአብሔር ፡ ርሕቁ ።
9 ጥበበ ፡ ወተግሣጸ ፡ ዘይሜንን ፡ ሕርቱም ፤ ወከንቱ ፡ ተስፋሆሙ ፡ ወሕማሞሙ ፡ ዘእንበለ ፡ በቊዕ ፤ ወከንቱ ፡ ምግባራቲሆሙ ፤ ወአንስቲያሆሙኒ ፡ አብዳት ፤ ወፀዋጋን ፡ ውሉዶሙ ፤ ወርጉም ፡ ትውልዶሙ ።
10 እስመ ፡ ብፅዕት ፡ መካን ፡ እስመ ፡ ንጽሕት ፤ እንተ ፡ ኢያእመረት ፡ ምስካበ ፡ ለአብሶ ፤ ትረክብ ፡ ፍሬ ፡ በሕዋጼ ፡ ነፍሳት ።
11 ወኅጽው ፡ ዘኢገብረ ፡ በእዴሁ ፡ አበሳ ፤ ወኢኀለየ ፡ ላዕለ ፡ እግዚአብሄር ፡ እኩየ ፤ እስመ ፡ ይትወህቦ ፡ ለሃይማኖት ፡ ጸጋ ፡ ኅርየት ፤ ወመክፈልት ፡ በቤተ ፡ እግዚአብሄር ፡ ዘይትፈቶ ።
12 እስመ ፡ ለኄር ፡ ጻማ ፡ ፍሬሁ ፡ ክብር ፤ ወአልቦ ፡ ድቀተ ፡ ሥርወ ፡ አእምሮ ።
13 ወውሉደ ፡ ዘማውያንሰ ፡ ንትጋ ፡ ይከውኑ ፤ ወዘበአበሳ ፡ ምስካብ ፡ ዘርእ ፡ ይማስን ።
14 ወእመኒ ፡ ኖኀ ፡ መንበርቶሙ ፡ ውስተ ፡ ምንትኒ ፡ ኢይትኈለቁ ፤ ወኅሱር ፡ በአኃሪቶሙ ፡ ርሥኦሙ ።
15 ወእመኒ ፡ ፍጡነ ፡ ሞቱ ፡ አልቦሙ ፡ ተስፋ ፤ ወአመ ፡ ዕለተ ፡ ሐተታ ፡ ኑዛዜ ።
16 ለትውልድ ፡ ፀዋግ ፡ እኩይ ፡ አኃሪታ ።
=== section 4 ===
1 ይኄይስ ፡ ኢወሊድ ፡ ምስለ ፡ ኂሩት ፤ እስመ ፡ ኢይመውት ፡ ውእቱ ፡ ተዝካራ ፤ እስመ ፡ በኀበ ፡ እግዚአብሄር ፡ ትትአኰት ፡ ወበኀበ ፡ ሰብእኒ ።
2 እንዘ ፡ ሀለወትኒ ፡ ያከብርዋ ፤ ወያፈቅርዋ ፡ ኀሊፋኒ ፤ ወበዓለም ፡ አክሊለ ፡ ተቀጺላ ፡ ታንሶሱ ፤ ዘኢይጸመሂ ፡ ገድለ ፡ መዊኣ ።
3 ወብዙኅ ፡ ትውልደ ፡ ረሲዓን ፡ ኢይበቊዕ ፤ ወእምከንቱ ፡ ተክል ፡ ኢይሁብ ፡ ውስተ ፡ ዕመቅ ፡ ሥርዎ ፤ ወጽኑዐ ፡ ምንባረ ፡ ኢይነብር ።
4 እመኒ ፡ ዘበጊዜ ፡ ዘበአዕጹቃቲሁ ፡ ይሠርጽ ፤ ጽኑዕ ፡ እንዘ ፡ ኢያንቀለቅል ፡ እምነፋስ ፡ ይትሐወስ ፤ ወበኀይለ ፡ ነፋሳት ፡ ይሤረው ።
5 ይሰብር ፡ አዕጹቀ ፡ ዘእለ ፡ ኢኮኑ ፡ ፍጹመ ፤ ወፍሬሆሙ ፡ ቆዐ ፡ ከንቱ ፡ ዘኢኮነ ፡ ዚአሆሙ ፡ ለበሊዕ ፤ ወለምንትኒ ፡ ኢይበቊዕ ።
6 እስመ ፡ በንዋመ ፡ እከይ ፡ ውሉድ ፡ ዘይትወለድ ፤ ሰማዕት ፡ እሙንቱ ፡ ለእከየ ፡ ዘመዶሙ ፡ በሐተታሆሙ ።
7 ወጻድቅሰ ፡ አመ ፡ በጽሐ ፡ ለመዊት ፡ በዕረፍት ፡ ይሄሉ ።
8 ርሥእ ፡ ክቡር ፡ አኮ ፡ ዘብዙኅ ፡ መዋዕል ፤ ወአኮ ፡ በኈልቈ ፡ ዓመታት ፡ ዘይትኌለቊ ።
9 ሢበት ፡ ይእቲ ፡ አእምሮ ፡ ለሰብእ ፤ ወቦ ፡ ርሥእ ፡ ሢበት ፡ ዘእንበለ ፡ ነውር ።
10 መሥምረ ፡ ከዊኖ ፡ ለእግዚአብሔር ፡ ተፈቅረ ፤ ወእንዘ ፡ የሐዩ ፡ ምስለ ፡ ኃጥኣን ፡ ፈለሰ ፨ ፡ ተመሥጠ ፡ ከመ ፡ እኩይ ፡ ኢትሚጥ ፡ አእምሮ ፤ ወእመ ፡ አኮ ፡ ሕብል ፡ ኢያስፍጣ ፡ ለነፍሱ ።
11 ምትሐቱ ፡ ለእከይ ፡ ይጼልሎን ፡ ሠናያተ ፤ ወነዛህላለ ፡ ፍትወት ፡ ያፈልስ ፡ ልበ ፡ የዋህ ፡ ተፈጺሞ ፡ በኅዳጣት ፡ መልአ ፡ ነዋኀ ፡ መዋዕለ ፡ እስመ ፡ ሥምርት ፡ ለእግዚአብሔር ፡ ነፍሱ ፤ በእንተዝ ፡ ጐጒአ ፡ እማእከለ ፡ ፁግ ።
12 ወነኪራንሰ ፡ ርእዮሙ ፡ ወኢያእሚሮሙ ፤ ወኢያንቢሮሙ ፡ ዲበ ፡ ኅሊናሆሙ ፡ ዘከመዝ ፤ ከመ ፡ ክብር ፡ ወሣህል ፡ ዲበ ፡ ጻድቃኒሁ ፤ ወውሓይ ፡ ለኅሩያኒሁ ።
13 ይኴንኖሙ ፡ ጻድቅ ፡ መዊቶ ፡ ለሕያዋን ፡ ረሲዓን ፤ ወውርዙት ፡ እንተ ፡ ተፈጸመት ፡ ፍጡነ ፡ ዘብዙኅ ፡ ዓመታት ፡ ርሥአ ፡ በእከይ ።
14 እስመ ፡ ይሬእዩ ፡ ሙተተ ፡ ጻድቅ ፤ ወኢያአምሩ ፡ ምንተ ፡ መከሩ ፡ በእንቲአሁ ፤ ወለምንት ፡ አስተጋብኦ ፡ እግዚአብሔር ፡ ይሬእዩ ፡ ወይሜንኑ ፤ ወኪያሆሙሰ ፡ እግዚአብሔር ፡ ይሥሕቆሙ ፤ ወይከውኑ ፡ እምድኅረዝ ፡ ለድቀት ፡ ኅሱር ፤ ወለጽዕለተ ፡ ምውታን ፡ ዘለዓለም ።
15 እስመ ፡ ያነቅዖሙ ፡ እንዘ ፡ ኢይነቡ ፡ ሐቢጦሙ ፤ ወያንቀለቅሎሙ ፡ እመሠረታ ፤ ወለዝሉፉ ፡ ይበድዉ ፤ ወይከውኑ ፡ ጽዑራነ ፤ ወዝክሮሙ ፡ ይትህጐል ።
16 ወይቀርቡ ፡ ለቅሥተ ፡ ኀጢአቶሙ ፡ ፍሩሃነ ፤ ወይዘልፎሙ ፡ በአንጻሪሆሙ ፡ ኀጣይኢሆሙ ።
=== section 5 ===
1 አሜሃ ፡ ይቀውም ፡ ጻድቅ ፡ በብዙኅ ፡ ግህደት ፤ አንጻረ ፡ ቅድመ ፡ እለ ፡ አመንደብዎ ፤ ወእለ ፡ ይሜንኑ ፡ ነገሮ ፨ ፡ ርእዮሙ ፡ ይትህወኩ ፡ በግርማ ፡ እኩይ ፤ ወይደመሙ ፡ በእንተ ፡ መንክረ ፡ ዳኅና ።
2 ይብሉ ፡ በበይናቲሆሙ ፡ እንዘ ፡ ይኔስሑ ፤ ወበጽዑር ፡ መንፈስ ፡ ይጸርኁ ፡ ወይብሉ ፤ ዝኑ ፡ ውእቱ ፡ ዘረስይነ ፡ ቀዲሙ ፡ ወኮነነ ፡ ለሠሐቅ ፡ ወለምስለ ፡ ዝንጓጔ ።
3 አብዳን ፡ ንብረቶ ፡ ረሰይነ ፡ እበደ ፤ ወሙተቶ ፡ ምኑነ ።
4 እፎ ፡ ምስለ ፡ ውሉደ ፡ እግዚአብሄር ፤ ወበቅዱሳን ፡ ኮነ ፡ ርስቱ ።
5 ስሕትነኬ ፡ እምፍኖተ ፡ ጽድቅ ፤ ወብርሃኑ ፡ ለጽድቅ ፡ ኢያስተርአየ ፡ ለነ ፤ ወፀሓይ ፡ ኢሠረቀ ፡ ለነ ።
6 አበሳ ፡ መላእነ ፡ በፍናው ፡ ወህጒለ ፤ ወነገድነ ፡ ገዳመ ፡ በድው ፤ ወፍኖተ ፡ እግዚአብሔር ፡ ኢያእመርነ ።
7 ምንተ ፡ በቊዐነ ፡ ትዕቢት ፤ ወምንት ፡ ብዕል ፡ ዘምስለ ፡ ትፍሥሕት ፡ ተውህበ ፡ ለነ ።
8 ኀላፊ ፡ ውእቱ ፡ ኲሉ ፡ ከመ ፡ ጽላሎት ፤ ወከመ ፡ ዜና ፡ ዘይረውጽ ፤ ወከመ ፡ ሐመር ፡ እንተ ፡ ተኀልፍ ፡ ዘያመዐብል ፡ ማየ ፤ እንተ ፡ ምኅላፈ ፡ አሠራ ፡ አልባ ፡ ዘይትረከብ ፤ ወፍኖተ ፡ እንግድኣሃ ፡ በውስተ ፡ ማዕበል ፤ ወከመ ፡ ዖፍ ፡ ዘሰረረ ፡ ደመና ፤ አልቦ ፡ ዘይረክብ ፡ ዘይትዐወቅ ፡ ፍኖታ ፤ ወዝብጠተ ፡ ስረተ ፡ መንፈስ ፡ ቀሊል ፤ ወይሠጥቅ ፡ ኀይለ ፡ ሩጸት ፤ ወአሕዊሶ ፡ ክነፊሁ ፡ ይነግድ ፤ ወእምዝ ፡ ኢተረክበ ፡ ትእምርተ ፡ ምቅዋሚሃ ፤ ወከመ ፡ ሐጽ ፡ ዘተውህበ ፡ ለሰሪር ፤ ተሠጥቀ ፡ ደመና ፡ ወበጊዜሁ ፡ ተጋብአ ፡ ከመ ፡ ቀዳሚ ፤ እስከ ፡ ይትኀጣእ ፡ አሠሩ ፤ ወከማሁ ፡ ንሕነሂ ፡ ተወሊደነ ፡ ኀለቅነ ፤ ወዘሠናይ ፡ ትእምርተ ፡ አልብነ ፡ ዘናርኢ ፤ ወበእከይ ፡ ኀለቅነ ።
9 እስመ ፡ ተስፋሆሙ ፡ ለረሲዓን ፡ ከመ ፡ ጸበል ፡ ዘይግሕፍ ፡ ነፋስ ፤ ከመ ፡ አስሐትያ ፡ ዘእምነፋስ ፡ ተሰደ ፡ ቊሩ ፤ ወከመ ፡ ጢስ ፡ ዘእምነፋስ ፡ ተክዕወ ፤ ወከመ ፡ ዝክረ ፡ ኀዳሪ ፡ ዘአሐቲ ፡ ዕለት ፡ ኀለፈ ።
10 ወጻድቃንሰ ፡ ለዓለም ፡ የሐይዉ ፤ ወእምእግዚአብሄር ፡ ዐስቦሙ ፤ ወትካዞሙ ፡ እምኀበ ፡ ልዑል ።
11 በእንተዝ ፡ ይነሥኡ ፡ መንግሥተ ፡ ክብር ፤ ወቀጸላ ፡ ሥን ፡ እምእደ ፡ እግዚአብሔር ፤ እስመ ፡ በየማኑ ፡ ይከድኖሙ ፤ ወበመዝራዕቱ ፡ ይረድኦሙ ።
12 ወይነሥእ ፡ ንዋየ ፡ ሐቅለ ፡ ቅንአቱ ፤ ወይሬስያ ፡ ንዋየ ፡ ሐቅል ፡ ለፍጥረቱ ፡ ለበቀለ ፡ ፀር ፤ ይለብስ ፡ ድርዐ ፡ ጽድቅ ፤ ወይትቄጸል ፡ ጌራ ፡ ኲነኔ ፡ ኢያድልዎ ፤ ወይነሥእ ፡ ወልታ ፡ ዘኢይትመዋእ ፡ ጽድቀ ፤ ወያበልኅ ፡ ምትረተ ፡ በመዐተ ፡ ሰይፉ ፤ ይትቃተል ፡ ዘምስሌሁ ፡ ዓለም ፡ ዲበ ፡ መስትታን ።
13 የሐውሩ ፡ ርቱዐ ፡ ሞጸፍተ ፡ መባርቅቱ ፤ ወከመ ፡ ዘእምሠናይ ፡ ምዕዋድ ፡ ቀስተ ፡ ደመና ፡ በአድምዖ ፡ ይቀንጹ ።
14 ወእምኰኲሐ ፡ መዐተ ፡ ሞጸፍ ፡ ፍጹመ ፡ ይወድቁ ፡ አብራድ ፤ ወይትቈጣዕ ፡ ላዕሌሆሙ ፡ ማየ ፡ ባሕር ፤ ወአፍላግ ፡ ያድለቀልቁ ፡ ፍጡነ ።
15 ወይትቃወሞሙ ፡ መንፈሰ ፡ ኀይል ፤ ወከመ ፡ ነፋስ ፡ ይነሥኦሙ ፤ ወትማስን ፡ ኲላ ፡ ምድር ፡ በአበሳ ፤ ወእከየ ፡ ምግባር ፡ ትመይጥ ፡ መንበረ ፡ ኀየልት ።
=== section 6 ===
1 ስምዑኒኬ ፡ ነገሥት ፡ ወለብዉ ፤ ወአእምሩ ፡ መኳንንተ ፡ ጽንፈ ፡ ምድር ።
2 አፅምኡ ፡ እለ ፡ ትእኅዙ ፡ ብዙኀ ፤ ወእለ ፡ ትትዔበዩ ፡ በብዙኅ ፡ አሕዛብ ።
3 እስመ ፡ ተውህበ ፡ እምእግዚአብሔር ፡ እኂዞትክሙ ፤ ወጽንዕክሙ ፡ እምኀበ ፡ ልዑል ፤ ዘየሐትት ፡ ምግባሪክሙ ፡ ወምክረክሙ ፡ ይፈትን ።
4 እስመ ፡ እንዘ ፡ ላእካን ፡ አንትሙ ፡ ለመንግሥተ ፡ ዚአሁ ፤ ኢኰነንክሙ ፡ ርትዐ ፡ ወኢዐቀብክሙ ፡ ሕገ ፤ ወኢበከመ ፡ ምክረ ፡ እግዚአብሄር ፡ ሖርክሙ ።
5 ድንጉፀ ፡ ወፍጡነ ፡ ይትቃወመክሙ ፤ እስመ ፡ ኲነኔ ፡ ምቱረ ፡ ለመኳንንት ፡ ይከውን ።
6 እስመ ፡ ትሑትሰ ፡ ንሕሱይ ፡ ለተምሕሮ ፤ ጽኑዓንሰ ፡ ጽኑዐ ፡ ይትሐተቱ ።
7 እስመ ፡ ኢይፈልጥ ፡ ገጸ ፡ መኰንነ ፡ ኲሉ ፤ ወኢየኀፍር ፡ ዕበየ ፤ እስመ ፡ ዐቢየ ፡ ወንኡሰ ፡ ውእቱ ፡ ገብረ ፤ ወከማሁ ፡ ይኄሊ ፡ በእንተ ፡ ኲሉ ።
8 ወለኀየልት ፡ ኅዩለ ፡ ይከውን ፡ ሐተታ ።
9 ለክሙኬ ፡ መኳንንት ፡ ነገርየ ፤ ከመ ፡ ታእምሩ ፡ ጥበበ ፡ ወኢትደቁ ።
10 እስመ ፡ እለ ፡ የዐቅቡ ፡ ጽድቀ ፡ በጽድቅ ፡ ይጸደቁ ፤ ወእለ ፡ ተመህርዎን ፡ ይረክቡ ፡ ምሕረተ ።
11 ፍትዉኬ ፡ እንከ ፡ ነገርየ ፤ አፍቅሩ ፡ ወትትጌሠጹ ።
12 ብርህት ፡ ወኢትጸመሂ ፡ ይእቲ ፡ ጥበብ ፤ ወፍጡነ ፡ ትትረአይ ፡ እምኀበ ፡ እለ ፡ ያፈቅርዋ ፤ ወትትረከብ ፡ በኀበ ፡ እለ ፡ የኀሥዋ ።
13 ትበጽሕ ፡ ለእለ ፡ ይፈትውዋ ፡ ትትአመሮሙ ።
14 ዘይገይሥ ፡ ኀቤሃ ፡ ኢይጻሙ ፤ ወትረ ፡ እንዘ ፡ ትጻናሕ ፡ ይረክባ ፡ ውስተ ፡ ኆኅቱ ።
15 ኀሊዮ ፡ በእንቲአሃ ፡ ፍጻሜ ፡ አእምሮ ፤ ወዘተግህ ፡ በእንቲአሃ ፡ ፍጡነ ፡ ዘእንበለ ፡ ትካዝ ፡ ይከውን ።
16 እስመ ፡ ለእለ ፡ ይደልውዋ ፡ ላቲ ፡ ትትአመሮሙ ፡ ተዐውድ ፡ ወተኀሥሦሙ ፤ ወበውስተ ፡ መንገድ ፡ ታስተርእዮሙ ፡ ግብተ ፡ አዳም ፤ ወበኲሉ ፡ ኅሊና ፡ ትትራከቦሙ ።
17 ቀዳሚሃ ፡ እንተ ፡ በህልው ፡ ዘተግሣጽ ፡ ፍትወት ፤ ወጻህቀ ፡ ተግሣጽ ፡ ፍቅር ፤ ወፍቅር ፡ ዐቂበ ፡ ሕገ ፡ ዚአሃ ፤ ወአፅምኦ ፡ ሕገ ፡ ዚአሃ ፡ ጸኒዖ ፡ ኢሙስና ፡ ኢሙስናሰ ፡ ቅሩበ ፡ ትሬሲ ፡ ኀበ ፡ እግዚአብሔር ።
18 ፍትወታኬ ፡ ለጥበብ ፡ ያዐርግ ፡ ኀበ ፡ መንግሥት ።
19 እመኬ ፡ ትፈትዉ ፡ መናብርተ ፡ ወኰንኖ ፡ ዐበይተ ፡ አሕዛብ ፤ አክብርዋ ፡ ለጥበብ ፡ ከመ ፡ ለዓለም ፡ ትንግሡ ።
20 ምንት ፡ ይእቲ ፡ ጥበብ ፡ ወእፎ ፡ ኮነት ፡ ኣየድዕ ፤ ወኢየኀብአክሙ ፡ ክቡተ ፤ ወእምነ ፡ ቅድመ ፡ ፍጥረት ፡ አአሥር ፤ ወእሬሲ ፡ ክሡተ ፡ አእምሮታ ፤ ወኢይትዐደው ፡ ጽድቀ ።
21 ወበቅንአ ፡ ሐማሚ ፡ ኢየሐውር ፤ ወከመዝ ፡ ኢይሳተፍ ፡ ለጥበብ ።
22 ብዝኀ ፡ ጥበብ ፡ መድኀኒተ ፡ ዓለም ፤ ወንጉሥ ፡ ጠቢብ ፡ ያቀውም ፡ ሕዝበ ።
23 ተገሠጹኬ ፡ በቃልየ ፡ ወትረብሑ ።
=== section 7 ===
1 እስመ ፡ አነኒኬ ፡ መዋቲ ፡ ሰብእ ፡ ትዕሪር ፡ ከመ ፡ ኲሉ ፤ እምድር ፡ ኮነ ፡ ዘተወለድኩ ፡ እምዘቀዳሚ ፡ ተልሕኰ ።
2 ወውስተ ፡ ከርሠ ፡ እምየ ፡ ተገለፍኩ ፡ ሥጋ ፤ ወነበርኩ ፡ ርጉዐ ፡ በደም ፡ ፲አውራኀ ፤ እምዘርአ ፡ ብእሲ ፡ ወፍትወተ ፡ ንዋም ፡ በሩካቤ ።
3 ወአነኒ ፡ ከዊንየ ፡ ነሣእኩ ፡ ዘለኲሉ ፡ ደመና ፤ ወውስተ ፡ መምሰለ ፡ ሕማም ፡ ወረድኩ ፡ ምድረ ፤ ቀዳሚተ ፡ ቃለ ፡ መምሰለ ፡ ኲሉ ፡ አውጻእኩ ፡ ብካየ ፤ በአፅርቅት ፡ ልህቁ ፡ ወበትካዝ ፨ ፡ እስመ ፡ አልቦ ፡ እምነገሥት ፡ ዘካልአ ፡ ኮነ ፡ ልደቱ ፤ አሐቲ ፡ ይእቲ ፡ ምጽአቱ ፡ ለኲሉ ፡ ውስተ ፡ ንብረት ፤ ወፀአቱ ፡ ዕሩይ ።
4 በእንተዝ ፡ ጸለይኩ ፡ ወአእምሮ ፡ ተውህበ ፡ ሊተ ፤ ወአስተብቋዕኩ ፡ ወመጽአኒ ፡ መንፈሰ ፡ ጥበብ ።
5 አቅደምክዋ ፡ እምኲነኔ ፡ ወመናብርት ፤ ወብዕለ ፡ ወኢከመ ፡ ምንትኒ ፡ ረሰይክዋ ፡ ወአስተዐረይክዋ ፤ ወኢያስተማሰልክዋ ፡ በእብን ፡ ዘሤጠ ፡ አልቦ ፤ እስመ ፡ ኲሉ ፡ ወርቅ ፡ በቅድመ ፡ ገጻ ፡ ከመ ፡ ኆጻ ፡ ኅዳጥ ፤ ወከመ ፡ ጽቡር ፡ ይመስል ፡ ብሩር ፡ በቅድሜሃ ፡ እምሕይወት ፡ ወእምላሕይ ፡ ፈተውክዋ ፤ ወአብደርክዋ ፡ እምብርሃን ፡ ትኩነኒ ፤ እስመ ፡ ኢይነውም ፡ ዘእምውስቴታ ፡ ጸዳለ ፡ ብርሃን ።
6 መጽአኒ ፡ ሠናይ ፡ ኲሉ ፡ ምስሌሃ ፡ ኅቡረ ፤ ወዘኈልቈ ፡ አልቦ ፡ ብዕል ፡ ውስተ ፡ እዴሃ ።
7 ወተፈሣሕኩ ፡ በኲሉ ፡ እስመ ፡ መኰንኖሙ ፡ ይእቲ ፡ ጥበብ ፤ ወኢያእመርክዋ ፡ ከመ ፡ ገባሪቶሙ ፡ ይእቲ ፡ ለዝ ፡ ኲሉ ።
8 ዘእንበለ ፡ እከይ ፡ ነሣእኩ ፡ ወዘእንበለ ፡ ቅንአት ፡ እሁብ ፤ ብዕላ ፡ ኢየኀብእ ፡ ዘኢየኀልቅ ፡ መዝገብ ፡ ይእቲ ፡ ለሰብእ ፤ እለ ፡ አጥረይዋ ፡ ኀበ ፡ እግዚአብሔር ፡ ተዓረኩ ፤ እስመ ፡ እምትምህርተ ፡ ተግሣጽ ፡ ቆሙ ።
9 ወየሀበኒ ፡ ሊተኒ ፡ እግዚአብሔር ፡ እንግር ፡ በፍትወት ፡ ወአኀሊ ፡ ዘይደሉ ፡ ለዘ ፡ ይትወህብ ፤ እስመ ፡ ውእቱ ፡ ለጥበብሂ ፡ መርሓ ፡ ውእቱ ፡ ወለጠበብት ፡ መርትዖሙ ።
10 እስመ ፡ ውስተ ፡ እዴሁ ፡ ንሕነኒ ፡ ወነገርነኒ ፤ ኲሉ ፡ ጠይቆ ፡ ወምግባረ ፡ ትምህርት ።
11 እስመ ፡ ውእቱ ፡ ወህበኒ ፡ ለዘ ፡ ኮነ ፡ አእምሮ ፡ ወአኮ ፡ ሕስወ ፤ ለአእምሮ ፡ ቁመተ ፡ ዓለም ፡ ወምሕዋረ ፡ ፀሓይ ፡ ወወርኅ ፡ ወከዋክብት ፤ ጽንፎ ፡ ወተፍጻሜቶ ፡ ወማእከለ ፡ መዋዕል ፤ ወለጊዜያት ፡ ሙያጤሁ ፡ ወለመዋዕል ፡ ሙያጤሆን ፤ ዑዳተ ፡ ዓመታት ፡ ወንብረተ ፡ ከዋክብት ፤ ፍጥረተ ፡ እንስሳ ፡ ወመዐተ ፡ አራዊት ፡ ወመናፍስተ ፡ ኀይል ፡ ወኅሊና ፡ ሰብእ ፤ ፍላጤ ፡ ዕፀው ፡ ወምግባረ ፡ አሥራው ።
12 ወእመኒቦ ፡ ኅቡኣተ ፡ ወክሡታተ ፡ አእመርኩ ።
13 እስመ ፡ ኬንያሁ ፡ ለኲሉ ፡ መህረኒ ፡ ጥበብ ፤ እስመ ፡ ባቲ ፡ ይእቲ ፡ መንፈሰ ፡ አእምሮ ፤ ቅዱስ ፤ ብሑተ ፡ ልደት ፤ ክፍልት ፡ ውስተ ፡ ብዙኅ ፤ ቀጣን ፤ ጽህርት ፤ ሠናይተ ፡ ቃል ፤ እንተ ፡ ኢትጸመሂ ፤ ህሉት ፤ እንተ ፡ አልባ ፡ ጽንፈ ፤ መፍቀሪተ ፡ ሠናይ ፤ በላኅ ፤ እንተ ፡ ኢትትከላእ ፤ መስልጥ ፤ መፍቀሪተ ፡ ሰብእ ፤ ጽንዕተ ፡ ኀይል ፤ እንተ ፡ እንበለ ፡ ትካዝ ፤ ከሃሊተ ፡ ኲሉ ፤ ዋሐዪተ ፡ ኲሉ ፤ ወእንተ ፡ ኲሉ ፡ ታገምር ፡ መናፍስተ ፡ ዘይትዐወቅ ፡ ንጹሓን ፡ ቀጢናን ።
14 እምኲሉ ፡ ፍጡነ ፡ ሑሰታ ፡ ታፈጥን ፡ ጥበብ ፤ ታንሶሱ ፡ ወተሐውር ፡ እንተ ፡ ዲበ ፡ ኲሉ ፡ በእንተ ፡ ንጽሓ ።
15 እስመ ፡ እስትንፋስ ፡ ይእቲ ፡ ዘእምኀይለ ፡ እግዚአብሔር ፤ ወፅአት ፡ እምእንተ ፡ አኃዜ ፡ ኲሉ ፡ ስብሐት ፡ ንጽሕት ፤ በእንተዝ ፡ አልቦ ፡ ርኩሰ ፡ ምንተኒ ፡ ዘይዳደቃ ።
16 እስመ ፡ ዋካ ፡ ይእቲ ፡ ለብርሃን ፡ ዘኢያስተርኢ ፤ ወመጽሄት ፡ ዘኢይዴምን ፡ ዘእምግብረ ፡ እግዚአብሄር ፤ ወአርአያ ፡ ኂሩቱ ።
17 እንዘ ፡ አሐቲ ፡ ይእቲ ፡ ኲሎ ፡ ትክል ፤ ወእንዘ ፡ በርእሳ ፡ ህሎት ፡ ኲሎ ፡ ትሔድስ ፤ ወበበትውልድ ፡ ውስተ ፡ ነፍሰ ፡ ጻድቃን ፡ ትትፋለስ ፤ አዕርክተ ፡ እግዚአብሔርኒ ፡ ወነቢያተኒ ፡ ትሬሲ ።
18 እስመ ፡ አልቦ ፡ ዘያፈቅር ፡ እግዚአብሔር ፤ ዘእንበለ ፡ ምስለ ፡ ጠቢባን ፡ ዘየኀድር ፨ ፡ እስመ ፡ ትልሒ ፡ እምፀሓይ ፤ ወእምኲሉ ፡ ንብረተ ፡ ከዋክብት ፤ ምስለ ፡ ብርሃን ፡ እንዘ ፡ ትትቃወም ፡ ትትረከብ ፡ ከመ ፡ ቀዳሚት ፡ ይእቲ ።
19 እስመ ፡ ለዝሰ ፡ ይዌልጦ ፡ ሌሊት ፤ ወለጥበብሰ ፡ ኢይትኄየላ ፡ እከይ ።
=== section 8 ===
1 ትሰፍሕ ፡ እምአጽናፍ ፡ እስከ ፡ አጽናፍ ፤ ወትሠርዕ ፡ ኲሎ ፡ ሠናየ ፡ ዛተ ፡ አፍቀርኩ ፡ ወኀሠሥክዋ ፡ እምውርዙትየ ፤ ወአፍቀርኩ ፡ እንሥኣ ፡ መርዓተ ፡ ሊተ ፤ ወመፍቅረ ፡ ኮንኩ ፡ ለሥና ።
2 ኂሩተ ፡ ትሴብሕ ፡ ሰብሳበ ፡ እንተ ፡ እምኀበ ፡ እግዚአብሔር ፡ እንዘ ፡ ባ ፤ ወመኰንነ ፡ ኲሉ ፡ አፍቀራ ።
3 እስመ ፡ መምክር ፡ ይእቲ ፡ ለትምህርተ ፡ እግዚአብሔር ፤ ወመፍቀሪተ ፡ ምግባሪሁ ።
4 ወእመ ፡ ብዕልኒ ፡ መፍትው ፡ ውእቱ ፡ ጥሪት ፡ ለንብረት ፤ ምንትኑ ፡ ይብዕላ ፡ ለጥበብ ፡ እንተ ፡ ኲሎ ፡ ትገብር ።
5 ወእመኒ ፡ አእምሮ ፡ ትገብር ፤ መኑ ፡ እምኔሃ ፡ እምዘ ፡ ህሎ ፡ ከማሃ ፡ ኬንያ ።
6 ወእመኒቦ ፡ ጽድቀ ፡ ዘያፈቅር ፡ ጻማሃ ፡ ለዛ ፡ ውእቱ ፡ ሠናይ ፤ እስመ ፡ ንጽሐ ፡ ወጥበበ ፡ ትሜህር ፤ ጽድቀ ፡ ወጽንዐ ፤ ዘአልቦ ፡ ዘይበቊዕ ፡ እምኔሁ ፡ ወኢምንተኒ ፡ በሕይወተ ፡ ሰብእ ።
7 ወእመኒ ፡ ዘብዙኅ ፡ አእምሮ ፡ ቦዘያፈቅር ፤ ታአምር ፡ ዘእምቅድም ፡ ወዘይመጽእ ፤ ታአምር ፡ ተጋብኦ ፡ ነገር ፡ ወፈክሮ ፡ ቅጽበት ፤ ተኣምረ ፡ ወመንክረ ፡ ታቀድም ፡ ኣእምሮ ፡ ወፀአተ ፡ ጊዜ ፡ መዋዕል ።
8 ፈቀድኩኬ ፡ ዛተ ፡ እንሥኣ ፡ ተህሉ ፡ ምስሌየ ፤ እስመ ፡ ኣአምር ፡ ከመ ፡ ትከውነኒ ፡ መምክረ ፡ ለሠናይ ፤ ወናዛዚተ ፡ ለትካዝ ፡ ወለሐዘን ።
9 እረክብ ፡ በእንቲአሃ ፡ አኰቴተ ፡ በኀበ ፡ ብዙኅ ፤ ወክብረ ፡ እምኀበ ፡ ሊቃውንት ፡ ወሬዛ ፨ ፡ በሊኀ ፡ እኩን ፡ ለኲነኔ ፤ ወበገጸ ፡ ኀያላን ፡ እትነከር ።
10 እንዘ ፡ ኣረምም ፡ ይጸንሑኒ ፤ ወእንዘ ፡ እነብብ ፡ ያፀምኡኒ ፤ ወእመ ፡ አብዛኅኩ ፡ ተናግሮ ፤ እዴሆሙ ፡ ያነብሩ ፡ ውስተ ፡ አፉሆሙ ።
11 እረክብ ፡ በእንቲአሃ ፡ ኢመዊተ ፤ ወዝክረ ፡ ዓለም ፡ ለእለ ፡ እምድኅሬየ ፡ አኀድግ ።
12 እሠርዕ ፡ ሕዝበ ፡ ወአሕዛብ ፡ ይትኴነኑ ፡ ሊተ ።
13 ይፈርሁኒ ፡ ሰሚዖሙ ፡ መኳንንት ፡ መደንግፃን ፤ በማኅበር ፡ ኣስተርኢ ፡ ኄረ ፡ ወበፀብእ ፡ ጽኑዐ ።
14 ወበዊእየ ፡ ቤትየ ፡ ኣዐርፍ ፡ ምስሌሃ ፤ እስመ ፡ አልቦ ፡ ምረተ ፡ ህልዎ ፡ ምስሌሃ ፤ ወኢሐዘነ ፡ ህልዎ ፡ ምስሌሃ ፤ ዘእንበለ ፡ ክመ ፡ ፍሥሓ ፡ ወሐሤት ።
15 ዘንተ ፡ ኀሊይየ ፡ በርእስየ ፡ ወተኪዝየ ፡ በልብየ ፤ ከመ ፡ ኢመዊት ፡ ውእቱ ፡ ዘመዳ ፡ ለጥበብ ፤ ወውስተ ፡ ፍቅራ ፡ ጥዑም ፡ ሠናይት ፤ ወውስተ ፡ ግብረ ፡ እደዊሃ ፡ ብዕል ፡ ዘኢየኀልቅ ፤ ወውስተ ፡ ነገራ ፡ ትምህርተ ፡ አእምሮ ፤ ወሠናይ ፡ ክብር ፡ ውስተ ፡ ሱታፌ ፡ ንባባ ፤ ዖድኩ ፡ እንዘ ፡ አኀሥሣ ፡ ከመ ፡ እንሥኣ ፡ ለርእስየ ፡ ወወልድ ፡ አነ ፡ ማእምር ፤ ወነፍስ ፡ ኄርት ፡ ኮነት ፡ ሊተ ፡ እስመ ፡ ኄር ፡ አነ ፡ መጻእኩ ፡ ውስተ ፡ ሥጋ ፡ ንጹሕ ።
16 ወአእሚርየ ፡ ከመ ፡ ኢይክል ፡ ነጺሐ ፡ እመ ፡ እግዚአብሄር ፡ ኢወህበ ፤ ወዝኒ ፡ ጥበብ ፡ አእምሮ ፡ እምይእቲ ፤ ሰከይኩ ፡ ኀበ ፡ እግዚአብሄር ፡ ወሰአልክዎ ፡ ወእቤ ፡ እምኲሉ ፡ ልብየ ፤
=== section 9 ===
1 አምላከ ፡ አበው ፡ ወእግዚኣ ፡ ለምሕረት ፤ ዘገበርከ ፡ ኲሎ ፡ በቃልከ ፤ ወበጥበብከ ፡ ረሰይከ ፡ ሰብአ ፤ ከመ ፡ ይኰንን ፡ ለዘ ፡ እምኀቤከ ፡ ተገብረ ፡ ፍጥረት ፤ ወያንሶሱ ፡ ዲበ ፡ ምድር ፡ በኂሩት ፡ ወበጽድቅ ፤ ወበርቱዕ ፡ መንፈስ ፡ ኲነኔ ፡ ይኰንን ፤ ሀበኒ ፡ እንተ ፡ ኀበ ፡ መናብርቲከ ፡ ትነብር ፡ ጥበብ ፤ ወኢትመንነኒ ፡ እምደቂቅከ ።
2 እስመ ፡ አነ ፡ ገብርከ ፡ ወልደ ፡ አመትከ ፤ ብእሲ ፡ ድዉይ ፡ ወሕጹጸ ፡ መዋዕል ፤ ወትሑት ፡ ለአእምሮ ፡ ወለኲነኔ ፡ ወለሕግ ።
3 ወለእመኒቦ ፡ ዘኮነ ፡ ፍጹመ ፡ እምውሉደ ፡ ሰብእ ፤ እምከመ ፡ እንተ ፡ እምኀቤከ ፡ ጥበብ ፡ ኢትሄሉ ፤ ወኢከመ ፡ ምንት ፡ ውእቱ ።
4 አንተ ፡ ኀረይከኒ ፡ ንጉሠ ፡ ለሕዝብከ ፤ ወመኰንነ ፡ ለውሉድከ ፡ ወለአዋልዲከ ።
5 ትቤ ፡ ይትሐነጽ ፡ ቤተ ፡ መቅደስ ፡ በደብረ ፡ መቅደስከ ፤ ወውስተ ፡ ህገረ ፡ ምዕራፊከ ፡ ምሥዋዕ ፤ አምሳለ ፡ ማኅደረ ፡ ቅድሳቲከ ፡ እንተ ፡ አስተዳሎከ ፡ እምፍጥረት ።
6 ወምስሌከ ፡ ጥበብ ፡ እንተ ፡ ታአምር ፡ ግብረከ ፤ ወሀለወት ፡ አመ ፡ ትገብር ፡ ዓለመ ፤ ወትጤይቅ ፡ ምንተ ፡ ዘያሠምር ፡ በቅድመ ፡ አዕይንቲከ ፤ ወበእንተ ፡ ዘርቱዕ ፡ ትእዛዛቲከ ፡ አውርዳ ፡ እምቅዱሳን ፡ ሰማያት ፤ ወእመንበረ ፡ ስብሐቲከ ፡ ፈንዋ ፤ ከመ ፡ ተህሉ ፡ ምስሌየ ፡ ወትጻሙ ፤ ወኣእምር ፡ ምንት ፡ ውእቱ ፡ ዘያሠምረከ ።
7 እስመ ፡ ይእቲ ፡ ታአምር ፡ ኲሎ ፡ ወትጤይቅ ፤ ወትምርሐኒ ፡ በምግባረትየ ፡ ንጹሐ ፤ ወትዕቀበኒ ፡ በክብራ ።
8 ወይከውን ፡ ሥሙረ ፡ ምግባርየ ፤ ወእኴንን ፡ ሕዝበከ ፡ በጽድቅ ፤ ወእከውን ፡ ዘይደሉ ፡ ለመናብርተ ፡ አቡየ ።
9 መኑ ፡ ውእቱ ፡ ሰብእ ፡ ዘያአምር ፡ ምክረ ፡ እግዚአብሔር ፤ ወመኑ ፡ ዘይኄሊ ፡ ዘከመ ፡ ይፈቅድ ፡ እግዚአብሔር ፨ ፡ እስመ ፡ ኅሊናሆሙ ፡ ለመዋትያን ፡ ፈራሂ ፤ ወእቡስ ፡ ኅሊናነ ።
10 እስመ ፡ ዘይማስን ፡ ሥጋ ፡ ያከብዳ ፡ ለነፍስ ፤ ወያበዝኅ ፡ ቤት ፡ ዘእምድር ፡ ለልብ ፡ ብዙኀ ፡ ትካዘ ።
11 ወበዕጹብ ፡ እመ ፡ ዐየነ ፡ ዘበዲበ ፡ ምድር ፤ ወዘበእዴነ ፡ ንረክብ ፡ ዘበጻማ ፤ ወዘውስተ ፡ ሰማይሰ ፡ መኑ ፡ ፈተነ ።
12 ወምክርከ ፡ መኑ ፡ አእመሮ ፤ ሶበ ፡ አኮ ፡ አንተ ፡ ወህብከ ፡ ጥበበ ፤ ወፈነውከ ፡ ቅዱሰ ፡ መንፈሰከ ፡ እምአርያም ፡ ወበዝ ፡ ረትዐ ፡ ፍኖቶሙ ፡ ለእለ ፡ ውስተ ፡ ምድር ፤ ወዘያሠምረከ ፡ ተምህሩ ፡ ሰብእ ፤ ወባቲ ፡ ለጥበብ ፡ ድኅኑ ።
=== section 10 ===
1 ዛቲ ፡ ቀዳሜ ፡ ልሕኲት ፡ አበ ፡ ዓለም ፡ ባሕቲቶ ፡ ተገቢሮ ፡ ተማሕፀነት ፤ ወአድኀነቶ ፡ እምአበሳ ፡ ርእሱ ፡ ወወህበቶ ፡ ኀይለ ፡ ይኰንን ፡ ኲሎ ።
2 ወርሒቆ ፡ እምኔሃ ፡ ገፋዒ ፡ በመዐቱ ፤ ምስለ ፡ ቀታልያነ ፡ አኀው ፡ ተህጒለ ፡ በቊጥዓ ።
3 ወካዕበ ፡ እንዘ ፡ ተአይኅ ፡ ምድር ፡ አድኀነታ ፡ ጥበብ ፤ ወበከንቱ ፡ ዕፅ ፡ ለጻድቅ ፡ ኀደፈቶ ፡ ይእቲ ።
4 ወበኅብረተ ፡ እከይ ፡ አሕዛብ ፡ ሶበ ፡ ተክዕዉ ፡ አእመረቶ ፡ ለጻድቅ ፤ ወዐቀበቶ ፡ ዘእንበለ ፡ አበሳ ፡ ለእግዚአብሔር ፤ ወበምሕረተ ፡ ውሉድ ፡ ጽኑዐ ፡ ዐቀበቶ ።
5 ይእቲ ፡ ለጻድቅ ፡ እምነ ፡ እለ ፡ ይትሀጐሉ ፡ ረሲዓን ፡ ባልሐቶ ፤ ጐዪዮ ፡ ዘወረደ ፡ እሳት ፡ ዲበ ፡ ኀምስ ፡ አህጉር ፤ ዘዓዲ ፡ ህሎ ፡ ስምዑ ፡ ለእከያ ፡ እንተ ፡ ትጠይስ ፡ ኮነት ፡ በድው ፤ ወዲበ ፡ አድባር ፡ ዘእንበለ ፡ ጊዜሁ ፡ ፍረያት ፤ ለእንተ ፡ ኢአምነት ፡ ነፍስ ፡ ተዝካረ ፡ ቆመት ፡ ሐውልተ ፡ ጼው ።
6 ጥበበ ፡ እለ ፡ ተዐደዉ ፡ አኮ ፡ ክመ ፡ ዘኀስሩ ፡ በኢያእምሮ ፡ ሠናይ ፤ ዓዲ ፡ ለእበዶሙ ፡ ኀደጉ ፡ ለንብረት ፡ ተዝካረ ፤ ከመ ፡ በዘ ፡ አበሱ ፡ አበሳ ፡ ኢይትከሀል ፡ ተረስዖቶሙ ።
7 ጥበብሰ ፡ ለእለ ፡ ይትለአክዋ ፡ እምሕማም ፡ ባልሐት ፨ ፡ ይእቲ ፡ እንዘ ፡ ይጐይይ ፡ መዐተ ፡ እኅው ፡ ጻድቀ ፡ መርሐቶ ፡ ፍኖተ ፡ ርቱዐ ፤ አርአየቶ ፡ መንግሥተ ፡ እግዚአብሔር ፤ ወወህበቶ ፡ አእምሮ ፡ ቅዱሳን ፤ አብዐለቶ ፡ በጻማ ፡ ወአብዝኀት ፡ ጥሪቶ ።
8 ለእለ ፡ የህይድዎ ፡ ወይኌይልዎ ፡ ቆመት ፡ ወአብዐለቶ ።
9 ተማሕፀነቶ ፡ እምፀር ፤ ወእምእለ ፡ የዐግቱ ፡ ዐቀበቶ ፤ ወገድለ ፡ ጽኑዐ ፡ አምአቶ ፤ ከመ ፡ ያእምር ፡ ከመ ፡ እምኲሉ ፡ ትጸንዕ ፡ በሠናይ ፡ አፍቅሮ ፡ እግዚአብሔር ።
10 ይእቲ ፡ ተሠይጦ ፡ ጻድቀ ፡ ኢኀደገት ፡ ወአድኀነቶ ፡ እምኀጢአት ፤ ወረደት ፡ ምስሌሁ ፡ ውስተ ፡ ዐዘቅት ።
11 ወውስተ ፡ ሞቅሕ ፡ ኢኀደገቶ ፤ እስከ ፡ ሶበ ፡ አምጽአት ፡ ሎቱ ፡ ሢመተ ፡ ወመንግሥተ ፡ ወምልክና ፡ ለእለ ፡ ይትኌየልዎ ፤ ወአርአየት ፡ ሐሰቶሙ ፡ ለእለ ፡ ይሜንንዎ ፤ ወወህበቶ ፡ ክብረ ፡ ዘለዓለም ።
12 ዛቲ ፡ ሕዝበ ፡ ጻድቀ ፡ ወዘርአ ፡ ዘአልቦ ፡ ሒሰ ፡ ባልሐት ፡ እምአሕዛብ ፡ እምእለ ፡ ያመነድቡ ።
13 ቦአት ፡ ውስተ ፡ ነፍሰ ፡ ገብረ ፡ እግዚአብሔር ፤ ወተቃወመ ፡ ለነገሥት ፡ መደንግፃን ፡ በአርአያ ፡ ወተኣምር ።
14 ወወሀበቶሙ ፡ ዐስበ ፡ ጻማሆሙ ፤ ወመርሐቶሙ ፡ በፍኖት ፡ መንክር ፤ ወኮነቶሙ ፡ ጽላሎተ ፡ ለዕለት ፡ ወለላህበ ፡ ከዋክብት ፡ በሌሊት ።
15 ወአዕደወቶሙ ፡ ባሕረ ፡ ኤርትራ ፤ ወአኅለፈቶሙ ፡ እንተ ፡ ማእከለ ፡ ማያት ፡ ብዙኅ ፤ ወፀሮሙሰ ፡ አስጠመት ፤ ወእምዕመቀ ፡ ቀላይ ፡ ጐሥዐቶሙ ።
16 በእንተዝ ፡ ጻድቃን ፡ ማህረኩ ፡ ረሲዓነ ፤ ወአእኰቱ ፡ እግዚኦ ፡ ስመከ ፡ ቅዱሰ ፤ ወእዴከ ፡ መስተቃትልተ ፡ ሰብሑ ፡ ኅቡረ ።
17 እስመ ፡ ጥበብ ፡ ከሠተት ፡ አፈ ፡ በሃመ ፤ ወልሳናቶሙ ፡ ለሕፃናት ፡ ረሰየት ፡ ርቱዐ ።
=== section 11 ===
1 ሠርሐት ፡ ምግባሮሙ ፡ በእደ ፡ ነቢይ ፡ ቅዱስ ፤ ወአንሶሰዉ ፡ ወነገዱ ፡ ምድረ ፤ ወውስተ ፡ በድው ፡ ተከሉ ፡ ምጽላላተ ።
2 ተቃወምዎሙ ፡ ለእለ ፡ ይትቃተሉ ፡ ወፀረ ፡ ተበቀሉ ።
3 ጸምኡ ፡ ወጸውዑከ ፤ ወተውህበ ፡ ሎሙ ፡ እምኰኲሐ ፡ እዝኅ ፡ ማየ ፤ ወፈወሶሙ ፡ ጽምኦሙ ፡ እብን ፡ ጽኑዕ ።
4 በዘ ፡ ተቃተለ ፡ ፀሮሙ ፤ ቦሙ ፡ እሙንቱ ፡ በምንዳቤሆሙ ፡ ተደለዉ ።
5 ህየንተ ፡ ነቅዐ ፡ ፈለግ ፡ ዘኢይነትግ ፤ በደመ ፡ ዐምዐም ፡ ሕሙግ ፡ ለዘለፋ ፡ ቀተልተ ፡ ሕፃናት ፡ በትእዛዛት ፤ ወህብኮሙ ፡ ብዙኀ ፡ ማየ ፡ ዘእንበለ ፡ ተስፋ ፡ አርአይከ ፡ በዘትካት ፡ ጽምእ ፡ ዘከመ ፡ እፎ ፡ ቀተልኮሙ ፡ ለፀር ።
6 እስመ ፡ አመ ፡ ተመከሩ ፡ ለተግሣጽ ፡ እንዘ ፡ ለምሕረት ፤ አእመሩ ፡ እፎ ፡ እንዘ ፡ በመዐት ፡ ይኴንን ፡ ረሲዓን ፡ ይዴየኑ ።
7 እስመ ፡ እላንቱሰ ፡ ከመ ፡ አብ ፡ ዘእንዘ ፡ ይጌሥጽ ፡ አመከርከ ፤ ወእልክቱሰ ፡ ከመ ፡ ዘእንበለ ፡ ምሕረት ፡ ንጉሥ ፡ እንዘ ፡ ይኴንን ፡ ፈተንከ ፡ እለ ፡ ህለዉኒ ፡ ወእለ ፡ ኢሀለዉኒ ፡ ዕሩየ ፡ ተቀሥፋ ፡ እስመ ፡ እንተ ፡ ምክዕቢት ፡ አኀዘቶሙ ፡ ሐዘን ፤ ወገዓረ ፡ ተዝካር ፡ ለዘ ፡ ኀለፈ ፡ እስመ ፡ አመ ፡ ረስዑ ፡ ዘበጌጋዮሙ ፡ መቅሠፍት ፤ በተድላሆሙ ፡ ሶበ ፡ ይሬእዩ ፤ ያአምርዎ ፡ ለእግዚአብሔር ።
8 እስመ ፡ ዘተገድፈ ፡ ቀዲሙ ፡ ክሕድዎ ፡ በስላቅ ፤ በፍጻሜ ፡ ፀአት ፡ አንከሩ ፤ አኮ ፡ ከመ ፡ ጻድቃን ፡ ዘጸምኡ ።
9 ወህየንተ ፡ ኅሊና ፡ እከዮሙ ፡ እለ ፡ በሐሰት ፡ አምለኩ ፡ ዘኢይነብብ ፡ እንስሳ ፡ ወዘይሰርር ፡ ምኑነ ፤ ፈኖከ ፡ ሎሙ ፡ ብዙኀ ፡ ዘኢይነብብ ፡ እንስሳ ፡ ለተበቅሎከመ ፡ ያእምሩ ፡ ከመ ፡ ዘቦቱ ፡ አበሰ ፡ ቦቱ ፡ ይትኴነን ፨ ፡ እስመ ፡ አኮ ፡ ዘትስእን ፡ እንተ ፡ ኲሎ ፡ ትክል ፡ የማንከ ፤ እስመ ፡ ፈጠረት ፡ ዓለመ ፡ እምአመ ፡ ሕሡም ፤ ፈንዎ ፡ ሎሙ ፡ ብዙኀ ፡ ድባተ ፡ ወመዐተ ፡ ዐናብስት ፤ ወእመ ፡ አኮ ፡ ግብተ ፡ ዘተፈጥሩ ፡ ምሉኣነ ፡ መዐት ፡ አራዊተ ፡ እለ ፡ ኢይትአመሩ ፤ ወእመ ፡ አኮ ፡ ዘእሳተ ፡ ያስተነፍስ ፡ ወይነፍኅ ፡ ወይልህብ ፤ ወእመ ፡ አኮ ፡ ጼና ፡ ጢስ ፡ ፍጉገ ፡ እለ ፡ ይሥዕዩ ፤ ወእመ ፡ አኮ ፡ እምውስተ ፡ ዐይኖሙ ፡ ፀዋገ ፡ ቀለምጽጸ ፡ እለ ፡ ያበርቁ ፡ ዘኢኮነ ፡ በባሕቲቱ ፡ በተኰንኖ ፡ ዘእምተሐርፁ ፤ ርእዮሙ ፡ ጥቀ ፡ በግርማ ፡ እምቀተለቶሙ ፡ ወዘእንበለ ፡ ዝኒ ፡ በ፩መንፈስ ፡ እምወድቁ ፡ እምኀበ ፡ ኲነኔ ፡ ተሰዲዶሙ ፤ ወእምተሥዕዩ ፡ በመንፈሰ ፡ ኀይልከ ፤ ወባሕቱ ፡ ኲሎ ፡ በዐቅም ፡ ወበኈልቈ ፡ መዳልው ፡ ሠራዕከ ።
10 እስመ ፡ ዕበየ ፡ ክሂሎትከ ፡ ህሎ ፡ ዘልፈ ፤ ወለኀይለ ፡ መዝራዕትከ ፡ መኑ ፡ ይትቃወማ ።
11 እስመ ፡ ከመ ፡ ልጽላጼ ፡ እምውስተ ፡ መዳልው ፡ ኲሉ ፡ ዓለም ፡ በቅድሜከ ፤ ወከመ ፡ ናፍንፈ ፡ ጠል ፡ እንተ ፡ ነግህ ፡ ወረደት ፡ ውስተ ፡ ምድር ።
12 ትምሕር ፡ ኲሎ ፡ እስመ ፡ ኲሎ ፡ ትክል ፤ ወትትሄየይ ፡ ኀጣውአ ፡ ሰብእ ፡ ለንስሓ ።
13 ወታፈቅር ፡ ኲሎ ፡ ዘህሎ ፡ ወአልቦ ፡ ዘትሜንን ፡ ዘገበርከ ፤ እስመ ፡ አልቦ ፡ ዘገበርከ ፡ እንዘ ፡ ትጸልእ ፡ ወእፎ ፡ እምህሎ ፡ ምንትኒ ፡ ሶበ ፡ አኮ ፡ አንተ ፡ ዘትፈቅድ ፤ ወዘኢተጸውዐ ፡ እምኀቤከ ፡ እምተዐቅበ ።
14 ወትምሕር ፡ ኲሎ ፡ እስመ ፡ ዚአከ ፡ ውእቱ ፡ እግዚኦ ፡ መፍቀሬ ፡ ነፍስ ።
=== section 12 ===
1 እስመ ፡ ዘኢይጠፍእ ፡ መንፈስከ ፡ ህሎ ፡ ውስተ ፡ ኲሉ ።
2 እስመ ፡ ለእለ ፡ ይወድቁ ፡ በበ ፡ ሕቅ ፡ ትዛለፍ ፤ ወአበሳ ፡ ዘይኤብሱ ፡ እንዘ ፡ ትዜከር ፡ ትጌሥጽ ፤ ከመ ፡ ርሒቆሙ ፡ እምእኩይ ፡ ይእመኑ ፡ ብከ ፡ እግዚኦ ፡ እስመ ፡ እለ ፡ ቀደምት ፡ ኀደርተ ፡ ለቅድስት ፡ ምድርከ ፡ ጸላእከ ፡ በግብረ ፡ ዐመፃ ፡ ዘይጸላእ ፡ በግብረ ፡ አበሳ ፡ ዘሥራያት ፡ ወአጣዕዎ ፡ ኀጢአት ፤ ቀተልተ ፡ ውሉዶሙ ፡ ኢመሓርያን ፤ ወበላዕያነ ፡ ሥጋ ፡ ሰብእ ፡ ወደም ፡ በቅድመ ፡ መላእክት ፡ ቅዱሳኒከ ፤ ወኅቡላነ ፡ ትዝምድ ፡ ለነፍስ ፡ እለ ፡ ኢይትራድኡ ፤ ፈቀድከ ፡ ታህጒል ፡ በእደ ፡ አበዊነ ፤ ከመ ፡ ዘይደሉ ፡ ማኅደረ ፡ ይንሥኡ ፡ ደቂቀ ፡ እግዚአብሔር ፤ እንተ ፡ እምኀቤከ ፡ ክብርት ፡ እምኲሉ ፡ ምድር ።
3 ወኪያሆሙኒ ፡ ከመ ፡ ሰብእ ፡ መሐርኮሙ ፤ ፈነውከ ፡ ሐዋርያቲከ ፡ ከመ ፡ መራደ ፡ ትኒንያ ፤ ከመ ፡ ኪያሆሙ ፡ በበሕቅ ፡ ይሠርዉ ፤ እንዘ ፡ አኮ ፡ ስኢነከ ፡ አስተዳልዎ ፡ ረሲዓን ፡ ወአግብኦ ፡ ለጻድቃን ፡ ውስተ ፡ እዴሆሙ ፤ ወእመ ፡ አኮ ፡ ለአራዊት ፡ ፀዋጋን ፤ ወእመ ፡ አኮ ፡ በአሐቲ ፡ ቃል ፡ አዝዞ ፡ ወአጥፍኦ ።
4 ወበኰንኖ ፡ በበሕቅ ፡ ትሁብ ፡ መካነ ፡ ለንስሓ ፤ አኮ ፡ ኢያእሚረከ ፡ ከመ ፡ እኩይ ፡ ትውልዶሙ ፤ ወከመ ፡ እምኔሆሙ ፡ እከዮሙ ፤ ወከመ ፡ ኢይትመየጥ ፡ ኅሊናሆሙ ፡ ለዓለም ፤ እስመ ፡ ዘርእ ፡ ውእቱ ፡ ርጉም ፡ እምትካት ፤ ወአኮ ፡ መነሂ ፡ ኀፊረከ ፡ ለአበሳ ፡ ዘትሁብ ፡ ስርየተ ።
5 ወመኑ ፡ ውእቱ ፡ ዘይብል ፡ ምንተ ፡ ገበርከ ፤ ወመኑ ፡ ውእቱ ፡ ዘይትቃወሞ ፡ ለኲነኔከ ፤ ወመኑ ፡ ዘይትኃሠሠከ ፡ በእንተ ፡ ሕዝብ ፡ ዘተሀጒለ ፡ ዘአንተ ፡ ገበርከ ፤ ወመኑ ፡ መኰንን ፡ ዘይበጽሕ ፡ ኀቤከ ፡ ለአስተዋቅሦ ፡ በእንተ ፡ ሰብእ ፡ ዐማፅያን ።
6 እስመ ፡ አልቦ ፡ አምላከ ፡ ዘእንበሌከ ፡ ባዕደ ፡ ዘየሐዝን ፡ በእንተ ፡ ኲሉ ፤ ከመ ፡ ታርኢ ፡ ከመ ፡ አኮ ፡ ግፍዐ ፡ ዘኰነንከ ።
7 ወኢንጉሥ ፡ ወኢመምዕለይ ፡ ተናጽሮ ፡ ይክል ፡ ምስሌከ ፡ በእንተ ፡ እለ ፡ ኰነንከ ።
8 እስመ ፡ ጻድቅ ፡ አንተ ፡ ዘበጽድቅ ፡ ኲሎ ፡ ትሠርዕ ፤ ኪያሁ ፡ ዘኢኮነ ፡ መፍትወ ፡ ለተኰንኖ ፡ ትኴንን ፡ ነኪረ ፡ ረሰይከ ፡ እምኀይልከ ።
9 እስመ ፡ ኀይልከ ፡ ቀዳሚሃ ፡ ለጽድቅ ፤ እስመ ፡ ኲሎ ፡ ትመልክ ፡ ይሬስየከ ፡ ትምሐር ፡ ኲሎ ።
10 ኀይለ ፡ ታርኢ ፡ እንዘ ፡ ኢየአምነከ ፡ በጽንዐ ፡ ፍጻሜ ፤ ወለእለ ፡ ኢያአምሩ ፡ መዐተ ፡ ትዘልፍ ።
11 ወእንዘ ፡ አንተ ፡ መኰንን ፡ ኀያል ፡ ዘበየውሀት ፡ ትኴንን ፤ ወምስለ ፡ ብዙኅ ፡ ምሕረት ፡ ታሄልወነ ፤ እስመ ፡ ህልው ፡ ለከ ፡ ሶበ ፡ ፈቀድከ ፡ ክሂል ።
12 ወመህርከ ፡ ሕዝበከ ፡ በዘ ፡ ከመዝ ፡ ምግባር ፤ ከመ ፡ መፍትው ፡ ይኩን ፡ ጻድቅ ፡ መፍቀሬ ፡ ሰብእ ፤ ወሠናያነ ፡ ተስፋ ፡ ተናገርኮሙ ፡ ለውሉድከ ፤ ከመ ፡ ተሀብ ፡ ለአባሲ ፡ ንስሓ ።
13 እመ ፡ ፀረ ፡ ደቅከ ፡ መፍትዋነ ፡ ለመዊት ፡ ምስለ ፡ እንተ ፡ መጠኔዝ ፡ ትዕግሥት ፡ ኰነንከ ፤ ወወህብከ ፡ መዋዕለ ፡ ወመካነ ፡ ከመ ፡ ያንፍሱ ፡ እምእኩይ ፤ ምስለ ፡ እንተ ፡ ሚመጠን ፡ ጥንቃቄ ፡ ትኴንን ፡ ውሉደከ ፤ ለእለ ፡ ለአበዊሆሙ ፡ መሐላ ፡ ወኪዳነ ፡ ወህብከ ፡ ለሠናይ ፡ ተስፋ ፡ እንዘ ፡ ኪያነኬ ፡ ትኴንን ፡ ወፀረነ ፡ በምእልፊት ፡ ትቀሥፍ ፤ ከመ ፡ ኂሩተከ ፡ ንዘከር ፡ እንዘ ፡ ንኴንን ፤ ወእንዘ ፡ ንትኴነን ፡ ንሰፎ ፡ ሣህለከ ፡ እስመ ፡ ዘበ ፡ እበደ ፡ ሕይወተ ፡ ንብረት ፡ ዘበ ፡ ኀጢአት ፤ በዘ ፡ ዚአሆሙ ፡ ኰነንኮሙ ፡ በርኲሶሙ ፡ እስመ ፡ እምፍኖተ ፡ ስሒትኒ ፡ እንተ ፡ ታርሕቅ ፡ ስሕቱ ፤ አማልክት ፡ እንዘ ፡ ይብሉ ፡ ዘእምእንስሳኒ ፡ ፀር ፡ ርኩሰ ፤ ከመ ፡ ሕፃናት ፡ ደቂቀ ፡ አብዳን ፡ ተሐሲዎሙ ።
14 በእንተዝ ፡ ከመ ፡ ሕፃናት ፡ አብዳን ፡ ኲነኔ ፡ ለስላቅ ፡ ፈኖከ ።
15 አላ ፡ በተውኔተ ፡ ስላቅ ፡ እለ ፡ ኢተገሠጹ ፤ ዘይደሉ ፡ ኲነኔ ፡ ዘእምእግዚአብሔር ፡ ይረክቡ ።
16 እስመ ፡ እሙንቱ ፡ በዘ ፡ የሐሙ ፡ ይትአነተሉ ፤ ቦሙ ፡ በእለ ፡ ይብሉ ፡ አማልክት ፡ ሎሙ ፡ እንዘ ፡ ይትኴነኑ ፤ እንዘ ፡ ያአምሩ ፡ ዘካዕበ ፡ ይክሕዱ ፡ አእምሮ ፡ እግዚአብሔር ፡ አእመሩ ፡ ህልወ ፤ ወበዝ ፡ ፍጻሜሁ ፡ ለኲነኔ ፡ ላዕሌሆሙ ፡ በጽሐ
=== section 13 ===
1 ወኢምንትኒ ፡ ሰብእ ፡ ኲሉ ፡ በሰብእ ፤ ለእለ ፡ ላዕሌሆሙ ፡ ቦሙ ፡ ኢያእምሮ ፡ እግዚአብሔር ፤ ወበዘያስተርኢ ፡ ሠናያት ፡ ስእኑ ፡ አእምሮ ፡ ህልው ፤ ወእንዘሂ ፡ ይሬእዩ ፡ ምግባራተ ፡ ኢያእመርዎ ፡ ለኬንያ ።
2 አላ ፡ እሳተ ፡ ወመንፈሰ ፡ ወዘፍጡን ፡ ደመና ፡ ወእመ ፡ ዑደተ ፡ ከዋክብት ፡ ወእመ ፡ ኀይለ ፡ ማይ ፡ ወብርሃናተ ፡ ሰማይ ፡ ሰበክተ ፡ ዓለም ፡ አማልክተ ፡ አምሰሉ ።
3 እለ ፡ በላሕዮሙ ፡ በአስተአድሞ ፡ ኪያሆሙ ፡ አማልክተ ፡ ረሰዩ ፤ ያእምሩ ፡ እፎ ፡ ፈድፋደ ፡ እግዚኦሙ ፡ ለእሉ ፡ ይኌይስ ፤ እስመ ፡ ወላዴ ፡ ሥን ፡ ፈጠሮሙ ።
4 ወእመ ፡ እምኀይል ፡ ወምግባር ፡ ተደሙ ፤ ያእምሩ ፡ እምኔሆሙ ፡ እፎ ፡ ፈድፋደ ፡ ዘገብሮሙ ፡ ኀያል ፡ ውእቱ ።
5 እስመ ፡ በዕበይ ፡ ወበሥን ፡ ዘፍጥረት ፡ ይትዐወቅ ፡ ዘገብሮሙ ።
6 ወባሕቱ ፡ ዓዲ ፡ ለእሉ ፡ ሀለወት ፡ ሒስ ፡ ንስቲት ፤ እስመ ፡ እሙንቱኒ ፡ እንጓ ፡ ይስሕቱ ፡ እንዘ ፡ የኀሥዎ ፡ ለእግዚአብሄር ፡ ወፈቀዱ ፡ ይርከቡ ፡ እንዘ ፡ ውስተ ፡ ግብሩ ፡ ይትመየጡ ፡ የኀሡ ፡ ወየአምኑ ፡ በገጽ ፡ ከመ ፡ ሠናይ ፡ ዘያስተርኢ ።
7 ወካዕበ ፡ እሙንቱኒ ፡ አኮ ፡ ዘእንበለ ፡ ሒስ ።
8 ዘመጠነዝ ፡ ክህሉ ፡ አእምሮ ፡ ከመ ፡ ይክሉ ፡ ዐቅሞ ፡ ዓለመ ፤ ለእሉ ፡ መኰንኖሙ ፡ እፎ ፡ ፍጡነ ፡ ኢረከቡ ።
9 ኅሱራን ፡ በውስተ ፡ ምውታንኒ ፡ ተስፋሆሙ ፤ እለ ፡ ጸውዑ ፡ አማልክተ ፡ ግብረ ፡ እደ ፡ ሰብእ ፤ ወርቀ ፡ ወብሩረ ፡ ኪነ ፡ ትምህርት ፡ ወአያያተ ፡ እንስሳ ፡ ወእብነ ፡ ምኑነ ፡ ግብረ ፡ እድ ፡ ዘትካት ።
10 ወእመኒ ፡ ገዛሜ ፡ ዖም ፡ ጸራቢ ፡ ዘሠናየ ፡ ይትሐወስ ፡ ዕፀ ፡ ወሠረ ፤ ቀረፈ ፡ ኲሎ ፡ ቅርፍቶ ፡ በሥነ ፡ ኪን ፤ ወተኬኒዎ ፡ ሠናየ ፡ ገብረ ፡ ዘይበቊዕ ፡ ንዋየ ፡ ለነሶሳወ ፡ ሕይወት ፤ ወዘተርፈ ፡ እምግብሩ ፡ ለአስተዳልዎ ፡ ሲሲት ፡ አስተዋፅአ ፡ ጸግበ ፡ ወዘወፅአ ፡ እምኔሆሙ ፡ አልቦ ፡ ዘይበቊዕ ፡ ዕፅ ፡ ጠዋይ ፡ ዘአዕጽቅቱ ፡ ኲለሄ ፡ ነሢኦ ፡ ገለፎ ፡ በፅርዐተ ፡ ዘውዑ ፤ ወበረኪበ ፡ ዕረፍት ፡ አስተማሰሎ ፡ ወመሰሎ ፡ አምሳለ ፡ ሰብእ ፡ ወእመሂ ፡ ለእንስሳ ፡ ከንቱ ፡ አስተማሰሎ ፤ ቀቢኦ ፡ ህጒሬ ፡ ወዐጽፈ ፡ ሠሪዮ ፡ ሕብሮ ፡ ወኲሎ ፡ ጥላቄ ፡ ቀቢኦ ፡ ሎቱ ፤ ወገብረ ፡ ሎቱ ፡ ዘሎቱ ፡ ይደሉ ፡ ቤተ ፤ ውስተ ፡ አረፍት ፡ አጥበቆ ፡ አጽኒዖ ፡ በኀጺን ፤ ወከመ ፡ ኢይደቅ ፡ ኀለየ ፡ ሎቱ ፤ እስመ ፡ ያአምር ፡ ከመ ፡ ኢይክል ፡ ረዲአ ፡ ርእሶ ፤ እስመ ፡ ምስል ፡ ውእቱ ፡ ወይፈቅድ ፡ ዘይረድኦ ።
11 ወበእንተ ፡ ጥሪቱሰ ፡ ወከብካቡ ፡ ወበእንተ ፡ ውሉዱ ፡ እንዘ ፡ ይጼሊ ፡ ወኢየኀፍር ፡ ለዘ ፡ እንበለ ፡ ነፍስ ፡ እንዘ ፡ ይትናገር ፡ ወበእንተ ፡ ሕይወት ፡ ድዉየ ፡ ይስእል ፤ ወበእንተ ፡ ሕይወት ፡ ምውተ ፡ ያስተበቊዕ ፤ ወበእንተ ፡ ንብረት ፡ ለዘ ፡ ኢያአምር ፡ ይትመሐለል ፤ ወበእንተ ፡ መንግድ ፡ ዘኬደ ፡ ተሐውሶ ፡ ጥቀ ፡ ኢይክል ።
12 ወበእንተ ፡ ጥሪት ፡ ወምግባር ፡ ወረኪብ ፡ ለሕርቱም ፡ ኀይለ ፡ ለእድ ፡ ይስእል ።
=== section 14 ===
1 ወመንግደ ፡ ሐመር ፡ ዘይፈቅድ ፡ ካዕበ ፡ ወፀዋገ ፡ ህሊዎ ፡ ይነግድ ፡ ሞገታተ ፡ እምሐመር ፡ እንተ ፡ ታመጽኦ ፡ ዘይደክም ፡ ዕፀ ፡ ይስእል ።
2 ወኪያሁሰ ፡ ፍትወተ ፡ ረባሕ ፡ ኀለየ ፤ ወኬንያ ፡ በጥበብ ፡ ገብረ ፡ ወእንቲአከ ፡ አባ ፡ ተኀድፍ ፡ ሥምረት ፤ እስመ ፡ ወህብከ ፡ ውስተ ፡ ባሕር ፡ ፍኖተ ፡ ወውስተ ፡ ሞገትኒ ፡ አሠረ ፡ ጽኑዐ ፤ ታርኢ ፡ ከመ ፡ እምኲሉ ፡ ትክል ፡ አድኅኖ ፡ ከመ ፡ ዘእንበለ ፡ ኪንኒ ፡ ዘዐርገ ።
3 ትፈቅድ ፡ ከመ ፡ ፅሩዐ ፡ ኢይኩን ፡ ምግባሪሃ ፡ ለጥበብከ ፤ በእንተ ፡ ዝንቱ ፡ ውስተ ፡ ዕፅ ፡ ሕጹጽ ፡ ይትአመኑ ፡ ሰብእ ፡ ነፍሶሙ ፤ ወተዐዲዎሙ ፡ ማዕበለ ፡ በአርማስ ፡ ድኅኑ ።
4 ወቀዲሙ ፡ አመ ፡ ይትህጐሉ ፡ ዕቡያን ፡ ረዐይት ፤ ተስፋ ፡ ዓለም ፡ ውስተ ፡ ዕፅ ፡ ተጸዊኖ ፤ ኀደገት ፡ ለዓለም ፡ ዘርአ ፡ ትውልድ ፡ ተኀዲፋ ፡ በእደ ፡ ዚአከ ፡ እስመ ፡ ተባረከ ፡ ዕፅ ፡ በዘ ፡ ይትገበር ፡ ጽድቀ ።
5 ወዘበእድሰ ፡ ይትገበር ፡ ርጉም ፡ ውእቱ ፡ ወዘገብሮ ፤ እስመ ፡ ውእቱሰ ፡ ገብረ ፡ ወዘይማስን ፡ አምላከ ፡ ተሰምየ ።
6 እስመ ፡ ዕሩየ ፡ ተጸልአ ፡ በኀበ ፡ እግዚአብሔር ፡ ረሲዕኒ ፡ ወርስዓኑ ።
7 እስመ ፡ ዘይትገበር ፡ ወገባሪሁኒ ፡ ይትኴነን ።
8 በእንተ ፡ ጣዖቶሙኒ ፡ ለአሕዛብ ፡ ውሓይ ፡ ይከውን ፤ እስመ ፡ ዘፈጠረ ፡ እግዚአብሔር ፡ ለአጣዕዎ ፡ ገብሩ ፤ ወለማዕቀፈ ፡ ነፍሰ ፡ ሰብእ ፡ ወለመሥገርተ ፡ እግረ ፡ አብዳን ።
9 እስመ ፡ ቀዳሜ ፡ ዝሙት ፡ ኅሊና ፡ አጣዕዎ ፤ ወረኪቦቶሙ ፡ ሙስናሃ ፡ ለሕይወት ።
10 እስመ ፡ ኢህሎ ፡ እምፍጥረት ፡ ወለዓለምኒ ፡ ኢይሄሉ ።
11 ግብተ ፡ ተከብሮ ፡ ቦአት ፡ ውስተ ፡ ዓለም ፤ ወበእንተዝ ፡ ፍጡነ ፡ ኅልቀቱ ፡ ተኀለየ ፡ ቆዐ ፡ ላሐ ፡ እንዘ ፡ ይጼዐር ፡ አብ ፤ ለዘ ፡ ፍጡነ ፡ ተመሥጠ ፡ ሕፃኑ ፡ አምሳለ ፡ ገቢሮ ፤ ዘቀዲሙ ፡ ሞተ ፡ ሰብእ ፡ ከመ ፡ አምላክ ፡ አክበርዎ ፤ ወወሀበ ፡ ለእለ ፡ ምስሌሁ ፡ በጒሐን ፡ ወዘውዕ ።
12 ወእምዝ ፡ በርሕቀተ ፡ መዋዕል ፡ ተእኂዞ ፡ ልማደ ፡ እብሰት ፡ ከመ ፡ ሕግ ፡ ዐቀብዋ ፤ ወበእንተ ፡ ትእዛዘ ፡ መኳንንት ፡ ያመልኩ ፡ ግልፎ ።
13 ወለእለ ፡ በገጽ ፡ ይከልእዎሙ ፡ አእኲቶ ፡ ሰብእ ፤ እስመ ፡ ርሑቀ ፡ ሀለዉ ፤ እንተ ፡ ርሕቀት ፡ ገጸ ፡ መሲሎሙ ፤ እንተ ፡ ታስተርኢ ፡ አምሳለ ፡ ለዘ ፡ ያከብሩ ፡ ንጉሥ ፡ ገብሩ ፤ ከመ ፡ ዘኢሀሎ ፡ ከመ ፡ ዘሀሎ ፡ ያስተብቊዕ ፡ በጻህቅ ።
14 ለጸኒዐ ፡ አምልኮ ፡ ለእለ ፡ ኢያአምሩ ፡ ምግባሩ ፡ ለኬንያ ፡ አስፈጠቶሙ ፡ በሥን ፡ ወቦ ፡ ካዕበ ፡ እንዘ ፡ ለዘ ፡ ይኄይል ፡ እንዘ ፡ ይፈቅድ ፡ ያድሉ ፡ ተጠንቀቀ ፡ ወተዐገለ ፡ ለኪኑ ፡ ለአስተማስሎ ፡ አምሳሎ ።
15 ወአሕዛብ ፡ ተመስከ ፡ በሥነ ፡ ላሕየ ፡ ምግባር ፤ ዘእምቅድመ ፡ ንስቲት ፡ አክበርዎ ፡ ለብእሲ ፡ ይእዜ ፡ ከመ ፡ አምላክ ፡ ረሰይዎ ።
16 ወዝንቱ ፡ ኮነ ፡ ለንብረት ፡ ለፅርዐት ፤ እስመ ፡ ለሙስና ፡ ግብተ ፡ ወእመ ፡ ለኀይል ፡ ዘይትቀነዩ ፡ ሰብእ ፡ ዘኢሱቱፍ ፡ ስም ፡ ለእብን ፡ ወለዕፅ ፡ አንበሩ ።
17 ኢአከሎሙሁ ፡ ስሒተ ፡ ኢያእምሮ ፡ እግዚአብሔር ፤ ወእንዘ ፡ ዓዲ ፡ የሐይዉ ፡ በዐቢይ ፡ ዘኢያእምሮ ፡ ጸብእ ፡ ዘመጠኔዝ ፡ እኩየ ፡ ሰላመ ፡ ይሬስይዎ ፡ እንዘ ፡ ውሉዶሙ ፡ ይቀትሉ ፡ ለግብር ፡ ወኅቡእ ፡ ጒሐን ፡ ወእለ ፡ ይትዔበዱ ፡ እምካልእ ፡ ሥርዐት ፡ መሓልየ ፡ ያመጽኡ ፤ እለ ፡ ወኢንብረተ ፡ ወኢሰብሳበ ፡ ንጹሐ ፡ እንዘ ፡ ኢዐቀቡ ፤ ወካልእ ፡ ካልአ ፡ እመ ፡ አኮ ፡ በፅኑስ ፡ ይቀትል ፤ ወእመ ፡ አኮ ፡ በሥራይ ፡ ያደዊ ።
18 ኲሉ ፡ ኅዉሥ ፡ ቦደመ ፡ ወቀትለ ፤ ስርቀ ፡ ወጽልሑተ ፤ ሙስና ፤ ኢአሚነ ፤ ሁከተ ፤ መሐላ ፤ ህዊክ ፡ ሠናየ ፤ ዕሴተ ፡ ኢተዘክሮ ፤ ግማኔ ፡ ነፍስ ፤ ሙያጤ ፡ ምግባር ፤ ሰብሳበ ፡ እከይ ፤ ዝሙት ፡ ወርኲስ ።
19 እስመ ፡ ቦ ፡ እለ ፡ እንበለ ፡ ስም ፡ ጣዖተ ፡ አምልኮ ፡ ቀዳሜ ፡ ኲሉ ፡ እከይ ፡ ወምክንያት ፡ ወፍጻሜ ፡ ይእቲ ።
20 እስመ ፡ በፈጊዕ ፡ የዐብዱ ፤ ወእመ ፡ አኮ ፡ ይትኔበዩ ፡ ሕስወ ፤ ወእመ ፡ አኮ ፡ የሐይዉ ፡ ሕርቱመ ፤ ወእመ ፡ አኮ ፡ ይምሕሉ ፡ ፍጡነ ፡ ወሕስወ ።
21 እስመ ፡ ለእለ ፡ እንበለ ፡ ነፍስ ፡ ይትአመኑ ፡ ጣዖት ፤ ሕስወ ፡ እመ ፡ መሐሉ ፡ ኢይትኴነኑ ፡ ይሴፈዉ ።
22 ኅቡረ ፡ ይረክቦሙ ፡ ዘበጽድቅ ፤ እስመ ፡ እኩየ ፡ ኀለዩ ፡ ዘበእንተ ፡ እግዚአብሔር ፡ በነጽሮ ፡ ጣዖት ፤ ወግፍዐ ፡ መሐሉ ፡ በሕብል ፡ አስተአኪዮሙ ፡ ጽድቀ ።
23 እስመ ፡ አኮ ፡ ኀይለ ፡ እለ ፡ ይምሕልዎሙ ፡ አላ ፡ ኲነኔ ፡ ለእለ ፡ ይኤብሱ ፡ ትትቤቀል ፡ ዘልፈ ፡ ለእለ ፡ ይገፍዑ ፡ በዐመፃሆሙ ።
=== section 15 ===
1 ወአንተ ፡ አምላክነ ፡ ኄር ፡ ወየዋህ ፤ ዕጉሥ ፡ ወበምሕረት ፡ ትሠርዕ ፡ ኲሎ ።
2 እስመ ፡ እመሂ ፡ አበስነ ፡ ዚአከ ፡ ንሕነ ፡ እንዘ ፡ ናአምር ፡ ጽንዐከ ፤ ወኢነኀጥእ ፡ ባሕቱ ፡ እስመ ፡ ናአምር ፡ ከመ ፡ እሊአከ ፡ ንሕነ ።
3 እስመ ፡ አእምሮትከ ፡ ፍጽምት ፡ ይእቲ ፡ ጽድቅ ፤ ወአእምሮ ፡ ጽንዕከ ፡ ሥርወ ፡ ኢመዊት ።
4 እስመ ፡ ኢያስሐተነ ፡ ኅሊና ፡ ኪነ ፡ ሰብእ ፤ ወኢዘጸሓፌ ፡ ጽላሎት ፡ ጻማ ፡ ዘአልቦ ፡ ፍሬ ፤ መልክዕ ፡ ጥቡቅ ፡ በሕብር ፡ ዘዘ ፡ ዚአሁ ፤ ዘርእዮ ፡ ለአብድ ፡ ውስተ ፡ ፍትወት ፡ ይመጽእ ፤ ያፈቅር ፡ ባሕቱ ፡ አምሳለ ፡ ምውት ፡ ዘእንበለ ፡ ነፍስ ።
5 መፍቅራነ ፡ እኩይ ፡ ይደልዎሙ ፡ ዘከመዝ ፡ ተስፋ ፡ እለ ፡ ይገብሩኒ ፡ ወእለ ፡ ያፈቅሩኒ ፡ ወእለ ፡ ያመልኩኒ ።
6 እስመ ፡ ለበሓዊኒ ፡ ድክምተ ፡ መሬተ ፡ ለዊሶ ፡ ለሕማማ ፡ ይልሕኲ ፡ ለነሶሳውነ ፡ ዘዘ ፡ ዚአሁ ፤ ወባሕቱ ፡ እምውስተ ፡ ውእቱ ፡ ጽቡር ፡ ለሐኰ ፡ ንጹሐ ፡ ለነሶሳው ፡ ንዋየ ፡ ወዘአንጻረ ፡ ከማሁመ ፡ ዘይመስል ፤ ወለእሉ ፡ ኲሎሙ ፡ ዘዘ ፡ ዚአሁ ፡ ለመፍቅዱ ፡ ፈታሒሁ ፡ አጽባሪሁ ።
7 ወከንቶ ፡ ዘጻመወ ፡ እምውስተ ፡ ውእቱ ፡ ጽቡር ፡ አምላከ ፡ ከንቶ ፡ ይልሕኲ ፤ ዘእምቅድመ ፡ ንስቲት ፡ ዘእምድር ፡ ተገብረ ፡ ንስቲተ ፡ ሀሊዎ ፡ ይገብእ ፡ እንተ ፡ እምውስቴታ ፡ ተነሥአ ፤ ዘነፍስ ፡ እንዘ ፡ ስኢሎሙ ፡ ዕዳ ፡ ይፈዲ ።
8 ወባሕቱ ፡ ቦቱ ፡ ትካዘ ፡ አኮ ፡ እስመ ፡ ሀለዎ ፡ ይጻሙ ፡ ወአኮ ፡ እስመ ፡ ንስቲተ ፡ ህሉና ፡ ዘቦ ፤ ወባሕቱ ፡ ይትቃሐው ፡ ለነሀብተ ፡ ብሩር ፡ ወወርቅ ፡ ወይትሜሰሎሙ ፡ ለለሓኲያነ ፡ ብርት ፤ ወክብረ ፡ ይሬሲ ፡ እስመ ፡ ርኩሰ ፡ ይገብር ።
9 ሐመድ ፡ ልቡ ፤ ወእምነ ፡ መሬት ፡ ታሕተ ፡ ተስፋሁ ፤ ወእምጽቡርኒ ፡ ምኑን ፡ ንብረቱ ።
10 እስመ ፡ ኢያአምሮ ፡ ለዘ ፡ ገብሮ ፡ ወአስተንፈሰ ፡ ሎቱ ፡ ነፍሰ ፡ እንተ ፡ ታሰልጥ ፡ ወነፍኀ ፡ መንፈሰ ፡ ሕይወት ።
11 እስመ ፡ ረሰዩ ፡ ለነ ፡ ስላቀ ፡ ሕይወተነ ፤ ወንብረተ ፡ ለሤጠ ፡ ረባሕ ፤ ወመፍትወ ፡ ይቤሉ ፡ እምውስተ ፡ ዘኮነ ፡ እምእኩይ ፡ ያጥርዩ ፡ ወዝ ፡ ያአምር ፡ ከመ ፡ እምኲሉ ፡ ይፈደፍድ ፡ አብሶ ፡ እምንዋየ ፡ ምድር ፡ ዘይሰበር ፡ ንዋያተ ፡ ግልፎ ፡ ዘይገብር ።
12 ወእምኲሉ ፡ አብዳን ፡ ወሕርቱማን ፡ እምነፍሰ ፡ ሕፃናት ፡ ጥቀ ፡ ፀረ ፡ ሕዝብከ ፡ እለ ፡ ተዐገልዎሙ ።
13 እስመ ፡ ኲሉ ፡ ጣዖቶሙ ፡ ለአሕዛብ ፡ አማልክት ፡ እለ ፡ ወኢአዕይንቲሆሙ ፡ ለርኢይ ፤ ወኢአንፎሙ ፡ ለተማዕዞ ፡ ደመና ፤ ወኢእዝን ፡ ለሰሚዕ ፤ ወኢአጻብዐ ፡ እድ ፡ ለገሢሥ ፤ ወእገሪሆሙ ፡ ፅሩዕ ፡ ለተሐውሶ ።
14 እስመ ፡ ብእሲ ፡ ገብሮሙ ፤ ዘመንፈሰ ፡ ተለቅሐ ፡ ለሐኮሙ ፤ እስመ ፡ አልቦ ፡ ሰብእ ፡ ዘከማሁ ፡ ዘይክል ፡ ልሒኮ ፡ አምላከ ።
15 እስመ ፡ መዋቲ ፡ ውእቱ ፡ ምዉተ ፡ ይገብር ፡ በእደ ፡ ኀጢአት ፤ እስመ ፡ ይኌይስ ፡ ውእቱ ፡ እምአማልክቲሁ ፤ እስመ ፡ ውእቱሰቦ ፡ አመ ፡ ሐይወ ፡ ወእልክቱሰ ፡ ወኢማእዜኒ ።
16 ወእንስሳተኒ ፡ ምኑነ ፡ ያመልኩ ፤ እስመ ፡ ስሑተ ፡ ኀሊዮሙ ፡ እምዝክቱኒ ፡ የአኪ ።
17 ወኲሉ ፡ መጠነ ፡ ያፈቅር ፡ ወይፈቱ ፡ ርእየ ፡ እንስሳ ፡ ሠናየ ፡ ይከውን ፤ ጐየ ፡ ክብረ ፡ እምኀበ ፡ እግዚአብሔር ፡ ወበረከቶ ።
=== section 16 ===
1 በእንተዝ ፡ በዝ ፡ አምሳል ፡ በዘ ፡ ይመስሎሙ ፡ ተቀሥፉ ፡ እስመ ፡ ይደልዎሙ ፤ ወብዙኀ ፡ ዘይትሐወስ ፡ ጻዕሮሙ ።
2 ህየንተ ፡ ጻዕር ፡ አስተደለውከ ፡ ሕዝበከ ፤ ለእለ ፡ ለፍትወት ፡ ወሀብኮሙ ፡ ጣዕመ ፡ ነኪር ፤ ሲሲተ ፡ አስተደለውከ ፡ ፍርፍርተ ፤ ከመ ፡ እልክቱ ፡ በፍትወተ ፡ መብልዕ ፡ በእንተ ፡ ብዙኀ ፡ ዘተፈነወ ፡ ወዘዘልፍኒ ፡ ፍትወተ ፡ መነኑ ፤ ወእሉ ፡ ንስቲተ ፡ ተጸኒሶሙ ፡ ወነኪር ፡ ጣዕመ ፡ መብልዑ ፡ በጽሖሙ ።
3 ወመፍትው ፡ ለእልክቱሰ ፡ ይምጽኦሙ ፡ ዘእንበለ ፡ ኑፋቄ ፡ ረኃብ ፡ ለእለ ፡ ይትኌየሉ ፤ ወለእሉሰ ፡ ክመ ፡ ይርአዩ ፡ እፎ ፡ ፀሮሙ ፡ ይጸዐሩ ።
4 እስመ ፡ አመ ፡ መጽኦሙ ፡ ፀዋግ ፡ ዘአርዌ ፡ መዐት ፡ ወበንስከተ ፡ እኩይ ፡ አርዌ ፡ ምድር ፡ ይመውቱ ፡ አኮ ፡ ለዝሉፉ ፡ ዘነበረ ፡ መቅሠፍትከ ።
5 ለተግሣጽ ፡ ኅዳጠ ፡ ተህውኩ ፡ እንዘ ፡ መምክረ ፡ ቦሙ ፡ ለተዝካረ ፡ ትእዛዘ ፡ ሕግከ ።
6 እስመ ፡ ዘይትመየጥ ፡ አኮ ፡ በዘያስተርኢ ፡ ዘይድኅን ፤ አላ ፡ በእንቲአከ ፡ መድኅነ ፡ ኲሉ ።
7 ወበዝኒ ፡ አእመንኮሙ ፡ ለፀርነ ፡ ከመ ፡ አንተ ፡ ውእቱ ፡ ዘታድኅን ፡ እምኲሉ ፡ እኩይ ።
8 ዘመንፈቆሙ ፡ ንስከተ ፡ አንበጣ ፡ ወትኒንያ ፡ ቀተለ ፤ ወኢተረክበ ፡ ፈውስ ፡ ለነፍሶሙ ፤ እስመ ፡ ይደልዎሙ ፡ እምኀበ ፡ እለ ፡ ከመዝ ፡ ይጸዐሩ ።
9 ወውሉድከሰ ፡ ወኢበዘ ፡ ሕምዘ ፡ ቦቱ ፡ ስነነ ፡ አክይስት ፡ ተሞኡ ፤ እስመ ፡ ምሕረትከ ፡ ኀለፈ ፡ ወፈወሶሙ ።
10 እስመ ፡ ለተዝካረ ፡ ቃልከ ፡ ይደጐጹ ፤ ወፍጡነ ፡ የሐይዉ ፡ ከመ ፡ ውስተ ፡ ዕሙቅ ፡ ረሲዖት ፡ ኢይደቁ ፤ ወከመ ፡ ውስተ ፡ ሕማም ፡ ኢይኩኑ ፡ እምተድላ ፡ እንቲአከ ።
11 እስመ ፡ ወኢዕፅ ፡ ወኢሥራይ ፡ ቦቱ ፡ ዘፈወሶሙ ፤ አላ ፡ ቃለ ፡ ዚአከ ፡ እግዚኦ ፡ ዘኲሎ ፡ ይፌውስ ።
12 እስመ ፡ አንተ ፡ ለሕይወት ፡ ወለሞት ፡ ሥልጣነ ፡ ብከ ፤ ወታወርድ ፡ ውስተ ፡ አናቅጸ ፡ ሲኦል ፡ ወታወጽእ ።
13 ወሰብእሰ ፡ ይቀትል ፡ በእከዩ ፤ ወዘወፅአሰ ፡ መንፈስ ፡ ኢይገብእ ፤ ወኢያሠውጥ ፡ ነፍሰ ፡ እንተ ፡ ተነሥአት ።
14 ወእምእደ ፡ ዚአከሰ ፡ ጐዪየ ፡ ኢይትከሀል ።
15 እስመ ፡ እንዘ ፡ ይክሕዱከ ፡ ኢያእመሩ ፡ ረሲዓን ፡ በኀይለ ፡ መዝራዕትከ ፡ ተቀሥፉ ፤ በማይ ፡ ነኪር ፡ ወበደመና ፡ ዝናም ፡ እንዘ ፡ ይሰደዱ ፡ ዘእንበለ ፡ ከልክሎ ፡ ወእንዘ ፡ በእሳት ፡ የኀልቁ ።
16 ወዘመንክርሰ ፡ ዘበዘ ፡ ኲሉ ፡ ይጠፍእ ፡ በመይ ፡ ፈድፋደ ፡ ያሰልጥ ፡ እሳት ፤ እስመ ፡ መርድእ ፡ ዓለም ፡ ለጻድቃን ።
17 እስመቦ ፡ አመ ፡ ላህብ ፡ ነደ ፡ ከመ ፡ ኢያውዒ ፡ ዘኀበ ፡ ረሲዓን ፡ ተፈነወ ፡ እንስሳ ፤ ወባሕቱ ፡ እሙንቱ ፡ እንዘ ፡ ይሬእዩ ፡ ይኔጽሩ ፡ ከመ ፡ በኲነኔ ፡ እግዚአብሄር ፡ ይሰደዱ ።
18 ወቦ ፡ አመ ፡ ምስለ ፡ ማይ ፡ ፈድፋደ ፡ እምኀይለ ፡ እሳት ፡ አውዐየ ፤ ከመ ፡ በእሳት ፡ ለምድር ፡ ፍረያቲሃ ፡ ያማስን ።
19 ህየንተ ፡ መብልዐ ፡ መላእክት ፡ ፈአምኮ ፡ ለሕዝብከ ፤ ወድልወ ፡ ኅብስተ ፡ እምሰማይ ፡ ፈኖከ ፡ ሎሙ ፡ ዘእንበለ ፡ ጻማ ፤ ኲሎ ፡ እንተ ፡ ቦኀይለ ፤ ወጥዕምተ ፡ በአምሳለ ፡ ኲሉ ፡ ጣዕም ።
20 እስመ ፡ መለኮተ ፡ ዚአከ ፡ ዘለከ ፡ ኀበ ፡ ውሉድከ ፡ አርአየ ፡ ጣዕመ ፤ ወለዘ ፡ ይነሥኦ ፡ በሐሳበ ፡ ፍትወቱ ፡ ይትለአክ ፤ ወበከመ ፡ ኀለየ ፡ በኲሉ ፡ ይትፌሣሕ ።
21 በረድ ፡ ወአስሐትያ ፡ ቆመ ፡ ተዐጊሦ ፡ እሳተ ፡ ወኢተመስወ ፤ ከመ ፡ ያእምሩ ፡ አዝርእቲሆሙ ፡ ለፀር ፡ አማሰነት ፡ እሳት ፡ እንተ ፡ ትነድድ ፡ ውስተ ፡ በረድ ፡ ወበውስተ ፡ ዝናማት ፡ እንዘ ፡ ይበርቅ ።
22 ወዝኒ ፡ ካዕበ ፡ ከመ ፡ ይሴሰዩ ፡ ጻድቃን ፡ ወከመ ፡ ኀይለ ፡ ርእሶሙ ፡ ይርስዑ ።
23 እስመ ፡ ፍጥረት ፡ ለከ ፡ ገባሪ ፡ እንዘ ፡ ትትለአክ ፡ ወትትመሰክ ፡ ለመቅሠፍት ፡ ላዕለ ፡ ኃጥኣን ፡ ወትትከላእ ፡ በተድላሆሙ ፡ ለእለ ፡ ብከ ፡ ተአመኑ ።
24 በእንተዝ ፡ ትካትኒ ፡ እንዘ ፡ ውስተ ፡ ኲሉ ፡ ትትዌለጥ ፡ ለመሴሲተ ፡ ኲሉ ፡ ጸጋከ ፡ ትትለአክ ፡ በከመ ፡ ዘእለ ፡ ይስእሉከ ፡ ፍትወት ፤ ከመ ፡ ያእምሩ ፡ ውሉድከ ፡ እለ ፡ አፍቀርከ ፡ እግዚኦ ፤ ከመ ፡ አኮ ፡ ፍሬ ፡ ዘርእ ፡ ዘይሴስዮ ፡ ለሰብእ ፤ አላ ፡ ቃልከ ፡ ለእለ ፡ የአምኑ ፡ ብከ ፡ የዐቅብ ።
25 እስመ ፡ በእሳትኒ ፡ ዘኢይማስን ፤ በከ ፡ በንስቲት ፡ ላህበ ፡ ፀሓይ ፡ መዊቆ ፡ ይትመሶ ፤ ከመ ፡ ይትአመር ፡ ከመ ፡ ሀሎ ፡ ፀሓይኒ ፡ ይብጻሕ ፡ ለአኰቴትከ ፡ ወኀበ ፡ ሠረቀ ፡ ብርሃን ፡ ሰኪየ ፡ ለከ ።
26 እስመ ፡ ለዘ ፡ ኢያአኲት ፡ ተስፋሁ ፡ ከመ ፡ ዘአስሐትያ ፡ ይትመሶ ፤ ወይውሕዝ ፡ ከመ ፡ ማይ ፡ ርኩስ ።
=== section 17 ===
1 እስመ ፡ ዐቢይ ፡ ኲነኔከ ፡ ወዕጹብ ፡ ለተናግሮ ፤ በእንተዝ ፡ እለ ፡ እንበለ ፡ ትምህርት ፡ ነፍሳት ፡ ስሕታ ።
2 እስመ ፡ አምሰሉ ፡ የኀይሉ ፡ ሕዝበ ፡ ቅዱሰ ፡ ኃጥኣን ፡ እሱራነ ፡ በጽልመት ፡ ወርሑቀ ፡ ሙቁሓነ ፡ በሌሊት ፡ ተዐጺዎሙ ፡ ወተሰቂሎሙ ፡ ጒዩያነ ፡ እምዘ ፡ ዓለም ፡ ኀሊይ ፡ ኮኑ ።
3 ዘኢያአምርዎሙ ፡ አምሰሉ ፡ ዘኢያአምርዎሙ ፡ ዘበኅቡኣት ፡ ኀጣይኢሆሙ ፤ ለዘ ፡ አልቦ ፡ ብርሃነ ፡ ተኀቢኦሙ ፡ ተሰወሩ ፤ መጽለዉ ፡ ደንጊጾሙ ፡ ጥቀ ፡ ወበሕልም ፡ እንዘ ፡ ይትህወኩ ።
4 እስመ ፡ ዘሂ ፡ ይእኅዞሙ ፡ ዕሙቅ ፡ ጥቀ ፡ ጽልመት ፡ አኮ ፡ ዘእንበለ ፡ ድንጋጼ ፡ ዘዐቀቦሙ ፤ ወድምፅ ፡ እንዘ ፡ የህውኩ ፡ ያንሦጥጡ ፤ ወርእየ ፡ ምትሐት ፡ ትኩዙ ፡ በገጽ ፡ ያስተርኢ ።
5 ወእሳትኒ ፡ ወኢበምንትኒ ፡ ዘእምክህለ ፡ አብርሆ ፤ ወኢከዋክብት ፡ ብሩሃነ ፡ ላህብ ፡ እመ ፡ ኢክህሉ ፡ አብርሆ ፡ ጽልመታ ፡ ለእንታክቲ ፡ ሌሊት ።
6 ወያስተርእዮሙ ፡ ሎሙ ፡ ባሕቱ ፡ ግብተ ፡ እሳት ፡ እንተ ፡ ግርማ ፡ ፍጽምት ፤ እንዘ ፡ ኢይትኀፈሩ ፡ በእንታክቲ ፡ ገጽ ፡ እንተ ፡ ኢታስተርኢ ፤ ወያመስሉ ፡ ዘየአኪ ፡ ዘያስተርኢ ።
7 ወሰብዐታተ ፡ አብድ ፡ ይነብር ፡ ኪን ፤ ወላዕለ ፡ ጥበብ ፡ ትዕግልተ ፡ ዘለፋ ፡ ጸዐል ።
8 እስመ ፡ እለ ፡ ይብሉ ፡ ስሕተተ ፡ ወህከከ ፡ ሰዲደ ፡ ለነፍስ ፡ ድዊት ፡ እሉ ፡ ሠሐቀ ፡ ዝሩት ፡ ደወዩ ።
9 ወእመሰ ፡ ወኢምንተኒ ፡ ህከክ ፡ ያደነግጽ ፡ በዘ ፡ ዘይትሐወስ ፡ ነሶሳው ፡ ወፉጻየ ፡ ዘይሰርር ፡ ስዱዳን ፤ ወይትህጐሉ ፡ በረዓድ ፡ ወዘኢይትከህል ፡ ጐዪየ ፡ ደመናት ፡ ርእየቶ ፡ ይክሕዱ ።
10 ድንጋጼ ፡ ክሡተ ፡ ስምዕ ፡ ይእቲ ፡ ለኲነኔ ፤ ወዘልፈ ፡ ትትወከፍ ፡ ዘፁግ ፡ እንዘ ፡ ይትዐወቃ ፡ በዘ ፡ ኀለያ ።
11 እስመ ፡ አልቦ ፡ ምንተኒ ፡ ግሩመ ፡ ዘእንበለ ፡ ግብአት ፡ እምረድኤተ ፡ ኅልያ ።
12 ወውስጣ ፡ እንዘ ፡ ሀለወት ፡ ተሐጽጽ ፡ ተስፋ ፤ ፈድፋደ ፡ ትኄልያ ፡ ለኢያእምሮ ፡ ለእንተ ፡ ታመጽእ ፡ ኲነኔ ፡ ምክንያት ።
13 ወእሉ ፡ እንተ ፡ ኢትክል ፡ ኪያሃ ፡ ሌሊተ ፡ ወእምነ ፡ ዘኢይትከህል ፡ ሌሊተ ፡ ሲኦል ፡ እመዓምቀ ፡ ጽልመት ፡ እንተ ፡ ዐርገት ፡ ኪያሁ ፡ ንዋመ ፡ እንዘ ፡ ይነውሙ ።
14 እለ ፡ በርኢየ ፡ ሕሡም ፡ ይሰደዱ ፤ በረዓድ ፡ ዘበ ፡ መንፈስ ፡ ይደክም ፡ ሥርዐት ፤ ግብተ ፡ ሎሙ ፡ እንዘ ፡ ኢይሴፈዉ ፡ ድንጋጼ ፡ በጽሖሙ ።
15 ወከመዝ ፡ ኮነ ፡ ዘዘ ፡ ዚአሆሙ ፡ ይወድቅ ፡ ወይትዐቀብ ፡ ቤተ ፡ ሞቅሕ ፡ እንተ ፡ ዘእንበለ ፡ ኀጺን ፡ ዕቅብት ፡ ተዘጊሖ ።
16 ወእመኒ ፡ ሐራሲ ፤ ወእመኒ ፡ ኖላዊ ፡ ውእቱ ፤ ወእመሂ ፡ ዘበ ፡ ገዳም ፡ ገባኢ ፡ ዘይጻሙ ፤ ተረኪቦ ፡ በእንተ ፡ ዕጽበት ፡ ይትዔገሥ ፡ ምንዳቤ ፤ እስመ ፡ በአሐቲ ፡ ሞቅሐ ፡ ጽልመት ፡ ኲሎሙ ፡ ተአስሩ ።
17 ወእመ ፡ መንፈስ ፡ ዘይትፋጸይ ፤ ወእመ ፡ በብዙኅ ፡ ዓፅ ፡ ዕፅ ፡ ዘአዕዋፍ ፡ እለ ፡ ድምፅ ፡ ሠናይ ፤ ወእመ ፡ ድምፀ ፡ ውሒዝ ፡ ዘየሐውር ፡ በኀይል ፤ ወእመ ፡ ድምፅ ፡ ግሩም ፡ እምነ ፡ ዘያንኰረኲር ፡ ጸዋልዕት ፤ ወእመ ፡ ዘያንፈርዕጽ ፡ እንስሳ ፡ እንዘ ፡ ይረውጽ ፡ ዘኢያስተርኢ ፤ ወእንዘ ፡ የሐውር ፡ አራዊት ፡ በጥራዐ ፡ ቃል ፤ ወእመ ፡ እንተ ፡ ትትዐለው ፡ እምቈላ ፡ ድምፀ ፡ አዕዋፍ ፤ ይመስዎሙ ፡ በድንጋጼ ።
18 እስመ ፡ ኲሉ ፡ ዓለም ፡ በጽዱል ፡ ይበርህ ፡ ብርሃን ፤ ወዘእንበለ ፡ ፅርዐት ፡ የዐውዶ ፡ ምግባራት ፤ ወለእሉ ፡ በባሕቲቶሙ ፡ ትሰርር ፡ ክበደ ፡ ሌሊት ፤ አርአያ ፡ ለዘ ፡ ህለወ ፡ ይንሥኦሙ ፡ ጽልመት ፤ ወለሊሆሙ ፡ እምርእሶሙ ፡ እሙንቱ ፡ እለ ፡ ይከብዱ ፡ እምጽልመት ።
=== section 18 ===
1 ወለጻድቃኒከሰ ፡ ዐቢይ ፡ ውእቱ ፡ ብርሃን ፤ ወለእለ ፡ ድምፆሙሰ ፡ ይሰምዑ ፡ ወራእዮሙ ፡ ኢይሬእዩ ፤ ወመጠነ ፡ ረከቡ ፡ እልክቱ ፡ ያስተበፅዑ ፤ ወእስመ ፡ እሉ ፡ ኢይትፈደዩ ፡ ለእለ ፡ ቀደሙ ፡ ተገፍዖ ፡ ያአኲቱ ፤ ወለድኂን ፡ ጸጋ ፡ ይስእሉ ።
2 ህየንተ ፡ በዐምደ ፡ እሳት ፡ ወመርሐ ፡ ፍኖት ፡ ዘኢያአምርዎ ፡ ወፀሓየ ፡ ዘኢያሐምም ፡ በፍታው ፡ ወህብከ ፡ ለተግዕዞ ።
3 ወይደልዎሙ ፡ ለእልክቱ ፡ ይትከልኦሙ ፡ ብርሃን ፡ ወተሞቅሖ ፡ ውስተ ፡ ጽልመት ፡ እለ ፡ ዕጽዋነ ፡ ረሰይዎሙ ፡ ለውሉድከ ፡ ዘቦሙ ፡ ዘዘኢይማስን ፡ ሕግ ፡ ብርሃን ፡ ለዓለም ፡ ይትወሀብ ።
4 ወመኪሮሙ ፡ እሙንቱ ፡ ዘጻድቃን ፡ ውሉደ ፡ ይቅትሉ ፡ ወ፩ሕፃን ፡ ተውሂቦ ፡ ለሙስና ፡ ወድኂኖ ፡ ለዘላፉ ፡ ለዘ ፡ ከማሁ ፡ አእተትከ ፡ ብዙኀ ፡ ሕፃናተ ፡ ወኲሎሙ ፡ ኅቡረ ፡ አጥፋእከ ፡ በማይ ።
5 ይእቲ ፡ ሌሊት ፡ ተአምረት ፡ ለአበዊነ ፡ ከመ ፡ ለህልው ፡ ያእምሩ ፡ ለዘ ፡ አምኑ ፡ መሐላ ፡ ወሠናየ ፡ ይትፈሥሑ ።
6 ወይትወከፍ ፡ እምኀበ ፡ ሕዝብከ ፡ መድኀኒት ፡ ለጻድቃን ፡ ወለፀር ፡ ተሀጒሎ ።
7 ወበዘ ፡ ቀሠፍኮሙ ፡ ለፀር ፡ ቦቱ ፡ ኪያነ ፡ ጸዊዐከ ፡ አክበርከ ።
8 እስመ ፡ ጽምሚተ ፡ ይሠውዑ ፡ ውሉዶሙ ፡ ኄራን ፡ ሠናየ ፤ ወሕገ ፡ እግዚአብሔር ፡ ኅቡረ ፡ ዐረዩ ፤ ወከማሁ ፡ ለሠናይ ፡ ወለምንዳቤ ፡ ይትወከፉ ፡ ጻድቃን ፤ ዘአበው ፡ ቀደምት ፡ እንዘ ፡ ይሴፈዉ ፡ አኰቴተ ፡ እንተ ፡ ትትወከፍ ።
9 ትትቃወም ፡ ቃለ ፡ ጸላእተ ፡ ብካይ ፡ ወሕርትምት ፡ ትደምፅ ፡ ቃለ ፡ ሰቆቃው ፡ በእንተ ፡ ደቂቃ ።
10 ወዕሪተ ፡ ኲነኔ ፡ ገብር ፡ ምስለ ፡ እግዚኡ ፡ ተቀሢፎ ፡ ወዘጽጒሂ ፡ ይትዔረይ ፡ ምስለ ፡ መንግሥት ፡ የሐምም ።
11 ወኲሎሙ ፡ ኅቡረ ፡ በ፩ስመ ፡ ሞት ፡ አብድንተ ፡ ቦሙ ፡ ዘአልቦ ፡ ኈልቈ ፤ እስመ ፡ ለቀቢር ፡ ጥቀ ፡ ኢየአክሉ ፡ እለ ፡ ህለዉ ፡ ሕያዋን ፤ እስመ ፡ በአሐቲ ፡ ጊዜ ፡ ክብርት ፡ ልደቶሙ ፡ ተሀጒለት ።
12 ኲሎ ፡ እንዘ ፡ ኢየአምኑ ፡ በእንተ ፡ ሥራያቲሆሙ ፤ በሞተ ፡ በኲሮሙ ፡ አምኑ ፡ ውሉደ ፡ እግዚአብሄር ፡ ከዊነ ፡ ሕዝብ ።
13 እስመ ፡ ዘእንበለ ፡ ድምፅ ፡ አርምሞ ፡ እንተ ፡ ኲሎ ፡ ትመልክ ፡ ወሌሊት ፡ በዘ ፡ ዚአሃ ፡ ፈጢን ፡ እንተ ፡ ታመአክል ፤ ከሃሌ ፡ ኲሉ ፡ ንባብከ ፡ እምሰማይ ፡ እመንበረ ፡ መንግሥትከ ፡ ከመ ፡ ዘእንበለ ፡ ምሕረት ፡ መስተቃትል ፡ ማእከለ ፡ ሥራዌ ፡ ይትቃነጽ ፡ ውስተ ፡ ምድር ፤ ሰይፍ ፡ በሊኅ ፡ እንተ ፡ እንበለ ፡ አድልዎ ፡ ትእዛዘከ ፡ ይገብር ፡ ወቀዊሞ ፡ ፈጸመ ፡ ኲለሄ ፡ ሞተ ፤ ወሰማየ ፡ ይለክፍ ፡ ወይቀውም ፡ ምድረ ።
14 ይእተ ፡ ሶቤ ፡ በጊዜሃ ፡ ድንጋጼ ፡ ሕልም ፡ ፀዋግ ፡ ሆኮሙ ፤ ወበድንጋጼ ፡ ቆሙ ፡ ዘእንበለ ፡ ሕዝበት ።
15 ወካልእ ፡ ካልአ ፡ ገጸ ፡ ወድቀ ፡ ኢኅሉድ ፤ በእንተ ፡ ዘይመውቱ ፡ ይነግሩ ።
16 እስመ ፡ ሕልም ፡ ሆኮሙ ፡ ዘዘንተ ፡ ቀደመ ፡ አይድዖቶሙ ፤ ከመ ፡ ዘእንበለ ፡ ያእምሩ ፡ በእንተ ፡ ዘእምእኩይ ፡ ኢይትሀጐሉ ።
17 ወለከፈቶሙ ፡ ለጻድቃንሂ ፡ መከራ ፡ ሞት ፤ ወድቀት ፡ ኮነ ፡ በገዳም ፡ ዘብዙኅ ፤ ወአኮ ፡ ዘብዙኅ ፡ ጐንዲዮ ፡ መዐተ ።
18 እስመ ፡ አፍጠነ ፡ ብእሲ ፡ ዘአልቦ ፡ ሒስ ፡ ተቃወመ ፤ ዘቅኔሁ ፡ ዘዘ ፡ ዚአሁ ፡ ነሥአ ፡ ወልታ ፡ ጸሎት ፡ ወዕጣነ ፡ ለምህልላ ፡ አብአ ፤ ተቃወሞ ፡ ለመዐት ፡ ወአኅሥዐ ፡ መቅሠፍተ ፤ ወአርአየ ፡ ከመ ፡ ላእከ ፡ ዚአከ ፡ ውእቱኒ ።
19 ወሞኦሙ ፡ ለአሕዛብ ፤ አኮ ፡ በኀይለ ፡ ሥጋ ፡ ወአኮ ፡ በሥርዐተ ፡ ወልታ ፤ አላ ፡ በቃል ፡ ለዘ ፡ ይቀሥፍ ፡ አግረረ ፤ መሐላ ፡ አበው ፡ ወኪዳነ ፡ ዘኪሮ ፡ መድበለ ፡ ኅቡረ ፡ እለ ፡ ወድቁ ፡ በበ ፡ አንጻረ ፡ ዚአሆሙ ፡ አብድንተ ፤ ማእከሎሙ ፡ ቀዊሞ ፡ ከተረ ፡ መዐተ ፡ ወሠጠቀ ፡ ፍኖተ ፡ ለሕያዋን ፡ እስመ ፡ ውስተ ፡ ልብሱ ፡ ክህነተ ፡ ኲሉ ፡ ዓለም ፡ ውእቱ ፤ ወክብረ ፡ አበው ፡ ውስተ ፡ ጾታ ፡ ፬እበን ፡ ግሉፍ ፤ ወዕበየ ፡ ዚአከ ፡ ዲበ ፡ አክሊለ ፡ ርእሱ ፡ ለእሉ ፡ ሰምዖሙ ፡ ዘይሤሩ ፡ ወዘንተ ፡ ፈርህ ፤ እስመ ፡ ተአክል ፡ መከራ ፡ መቅሠፍት ፡ ወብዝኅት ።
=== section 19 ===
1 ወለረሲዓንሰ ፡ እስከኔ ፡ ታኀልቆሙ ፡ መዐቱ ፤ እስመ ፡ አቅደመ ፡ አእምሮ ፡ ዘይከውንሂ ፤ እስመ ፡ እሙንቱ ፡ ተመዪጦሙ ፡ ለሐዊር ፡ ወጒጉአ ፡ ፈነውዎሙ ፡ ይዴግንዎሙ ፡ ተነሲሖሙ ፡ እስመ ፡ ዓዲ ፡ እንዘ ፡ ውስተ ፡ ላሕ ፡ ሀለዉ ፡ ወእንዘ ፡ ይግዕሩ ፡ ዲበ ፡ መቃብረ ፡ አብድንት ፤ ካልአ ፡ አምጽኡ ፡ ኅሊና ፡ እበድ ፤ ወለእለ ፡ እንዘ ፡ ያስተበቊዕዎሙ ፡ ወአውፅኡ ፡ ኪያሆሙ ፡ ከመ ፡ ዘተኀጥኡ ፡ ይዴግኑ ።
2 እስመ ፡ ትስሕቦሙ ፡ እንተ ፡ ትደልዎሙ ፡ ለፈጽሞ ፡ ምንዳቤ ፤ ወለዘ ፡ ረከቦሙ ፡ ኢተዘክሮ ፡ ወደየት ፡ ሎሙ ፤ ከመ ፡ እንተ ፡ ትንታጋት ፡ መቅሠፍት ፡ ይምልኡ ፡ ቅሥፈተ ፤ ወከመ ፡ ሕዝብከ ፡ መንክረ ፡ ፍኖተ ፡ ይኅልፉ ፡ ወእልክቱሰ ፡ መንክረ ፡ ይርከቡ ፡ ሞተ ።
3 እስመ ፡ ኲላ ፡ ፍጥረት ፡ ውስተ ፡ ዘዚአሃ ፡ ልደት ፡ እምላዕሉ ፡ ትትሜሰል ፤ እንዘ ፡ ትትለአክ ፡ ለትእዛዝ ፤ ከመ ፡ ደቀ ፡ ዚአከ ፡ ይትዐቀቡ ፡ ዳኅነ ።
4 እንተ ፡ ትዕይንቶሙ ፡ ጸለለ ፡ ደመና ፤ ወእምነ ፡ ዘቀዲሙ ፡ ማይ ፡ የብስ ፡ ሥርጽት ፡ ምድር ፡ አስተርአየት ፤ እምነ ፡ ኤርትራ ፡ ባሕር ፡ ፍኖት ፡ ዘእንበለ ፡ ማዕቅፍ ፤ ወፂኦተ ፡ ሐመልማል ፡ እምውስተ ፡ ማዕበል ፡ ኅዩል ፡ ዘእንተ ፡ ዲቤሃ ፡ ኲሉ ፡ ሕዝብ ፡ ኀለፉ ፡ እለ ፡ ይትከደኑ ፡ በየማንከ ፤ እንዘ ፡ ይሬእዩ ፡ ተኣምረ ፡ ወመንክረ ።
5 እስመ ፡ ከመ ፡ አፍራስ ፡ ተርዕዩ ፤ ወከመ ፡ አባግዕ ፡ አንፈርዐጹ ፤ እንዘ ፡ ያአኲቱ ፡ እግዚኦ ፡ ኪያከ ፡ ዘያድኅኖሙ ።
6 እስመ ፡ ዓዲ ፡ ይዜከሩ ፡ ዘውስተ ፡ ፍልሰቶሙ ፤ ዘከመ ፡ ህየንተ ፡ እንስሳ ፡ አውጽአት ፡ ምድሮሙ ፡ ትኒንያ ፤ ወህየንተ ፡ ዓሣት ፡ አውጽአት ፡ ፈለግ ፡ ቈርናናዓተ ።
7 ወእምድኅረ ፡ ዝንቱ ፡ ርእዩ ፡ ትውልደ ፡ ሐዲሰ ፡ አዕዋፈ ፤ እስመ ፡ አመ ፡ ውስተ ፡ ፍትወት ፡ መጽኡ ፡ ወሰአሉ ፡ መብልዐ ፡ ፍግዕ ፡ እስመ ፡ ለፍትወቶሙ ፡ ዐርገ ፡ እምውስተ ፡ ባሕር ፡ ድርንቅ ፡ ወመቅሠፍት ፡ ለኃጥኣን ፡ መጽአ ፤ አኮ ፡ ዘእንበለ ፡ ዘተገብረ ፡ ቅድመ ፡ ተኣምር ፡ ዘበኀይለ ፡ መቅሠፍት ፤ ዘበ ፡ ጽድቅ ፡ ይትኰነኑ ፡ በምግባረ ፡ ዚአሆሙ ፡ ዘዐመፃ ፤ ወዘየአኪ ፡ ዓዲ ፡ ጸሊአ ፡ ሰብእ ፡ ረከቡ ።
8 እስመ ፡ ዘኢያአምርሰ ፡ ዘኢይትወከፍ ፡ እመ ፡ መጽኦ ፤ ወእሉሰ ፡ ዘሂ ፡ በቊዖሙ ፡ ከመ ፡ እንግዳ ፡ ይሬስዩ ።
9 ወአኮ ፡ ክመ ፤ ዓዲ ፡ ውሓየ ፡ ይከውኖሙ ፡ እስመ ፡ በከንቱ ፡ ይትወከፍዎሙ ፡ ለነኪራን ፡ ወእለሰ ፡ ዘበበ ፡ በዓል ፡ ተወክፉ ፡ ለእለ ፡ እምውስቴቶሙ ፡ ተወክፉ ፡ ጻድቃን ፡ በእኩይ ፡ ጻዕር ፡ አሕመሙ ።
10 ወተቀሥፉ ፡ ዓዲ ፡ በጽላሌ ፡ ከመ ፡ እልክቱ ፡ ውስተ ፡ አንቀጹ ፡ ለጻድቅ ፡ አመ ፡ ግብተ ፡ ተመገቡ ፡ በጽልመት ፡ ኲሎሙ ፡ የኀሥሡ ፡ ፍኖተ ፡ ኆኃቲሆሙ ።
11 እስመ ፡ ዘዘ ፡ ዚአሆሙ ፡ እንዘ ፡ ይትመየጡ ፡ ፍጥረተ ፡ ከዋክብት ፤ ከመ ፡ በውስተ ፡ መዝሙር ፡ ለቃል ፡ በዜማሁ ፡ ስሙ ፡ ይትወለጥ ፡ እንዘ ፡ ዘልፈ ፡ ውእቱ ፡ ድምፅ ፤ ዝውእቱ ፡ አስተርእዮ ፡ እምዘ ፡ ተገብረ ፡ በበ ፡ ገጹ ፡ ህልው ።
12 እስመ ፡ ዘየብሰ ፡ ውስተ ፡ ዘማያት ፡ ይትመየጥ ፤ ወዘይትላሀስ ፡ ወይጸብት ፡ ፈለሰ ፡ ውስተ ፡ ምድር ።
13 እስመ ፡ እሳት ፡ ውስተ ፡ ማይ ፡ ኀይለ ፡ ዚአሁ ፡ ኀየለ ፤ ወማይ ፡ ዘአጥፍኦ ፡ ፍጥረቶ ፡ ረስዐ ።
14 ላህብ ፡ ካዕበ ፡ ዘዘፍጡነ ፡ ይመጽእ ፡ ወይማስን ፡ እንስሳ ፡ ኢያጸምህየ ፡ ሥጋ ፡ እንዘ ፡ ያንሶስዉ ፤ ወኢዘይትመሰው ፡ ዘርእየ ፡ በረድ ፡ ዘይትመሰው ፡ ዘፍግዕ ፡ ሲሲት ።
15 በኲሉ ፡ እግዚኦ ፡ አዕበይከ ፡ ሕዝበከ ፡ ወሰባሕኮ ፡ ወኢተዐወርኮ ፡ በኲሉ ፡ ጊዜ ፡ ወመካን ፡ እንዘ ፡ ትሄሉ ።
##### edition ed2 (gez) — Text of the EOTC printed Bible
=== chapter 1 ===
[Chapter 1]
1 አፍቅርዋ፡ ለጥበብ፡ አመኳንንተ፡ ምድር፡ ወሐልዩ፡ ኃይለ፡ እግዚአብሔር፡ በአእምሮ፡ ሠናይ፡ ወበስፉሕ፡ ልብ፡ ኅሥዎ።
2 እስመ፡ ውእቱ፡ ይረትከብ፡ በኀበ፡ እለ፡ ኢያሜክርዎ፡ ወያስተርኢ፡ በኀበ፡ እለ፡ ኢይክሕድዎ።
3 እስመ፡ ጠዋይ፡ ሕሊና፡ ያርኅቅ፡ እምእግዚአብሔር፡ ኃይል፡ ፍትንት፡ ትዘልፎሙ፡ ለዓብዳን።
4 እስመ፡ ውእተ፡ ምይንት፡ ነፍስ፡ ኢትበውእ፡ ጥበብ፡ ወኢተኃድር፡ ውስተ፡ ሥጋ፡ ዘቅኑይ፡ ለኃጢአት።
5 እስመ፡ መንፈሰ፡ ተግሣፅ፡ ቅዱስ፡ ያጐይይ፡ ትምህርተ፡ ዘእኩይ፡ ወይትነሣእ፡ በመዊዕ፡ እምሕሊናሆሙ፡ ለዐብዳን፡ ወይዘልፍ፡ እኩየ፡ ሶበ፡ ይመጽእ።
6 እስመ፡ መፍቀሬ፡ ሰብእ፡ መንፈሰ፡ ጥበብ፡ ወኢያነጽሕ፡ ዐራፌ፡ እምከናፍሪሁ፡ እስመ፡ እግዚአብሔር፡ ስምዕ፡ ላዕለ፡ ኵልያቲሁ፡ ወሐዋፂ፡ ህልው፡ ይሔውጽ፡ ልቦ፡ ወልሳኖ፡ ሰማዒ።
7 እስመ፡ መንፈስ፡ እግዚአብሔር፡ መልአ፡ ዓለመ፡ ወዘይእኅዝ፡ ኵሎ፡ ዓለም፡ ያገምር፡ አእምሮ፡ ቃሎሙ።
8 ወበእንተዝ፡ ዝንቱ፡ ኢይትኀባእ፡ እምኔሁ፡ ወኢምንትኒ፡ እምዘ፡ ይትነገር፡ ቃለ፡ ዓመፃ።
9 እስመ፡ ኢይትዓደዎ፡ ኵነኔሁ፡ በከሢተ፡ ግብሩ፡ እስመ፡ ለረሲዓን፡ የሐትቶሙ፡ በምክረ፡ ሐሊናሆሙ፡ ድምፀ፡ ንባቦሙ፡ ይበጽሕ፡ ኀበ፡ እግዚአብሔር፡ ለዝልፈተ፡ አበሳሆሙ።
10 እስመ፡ አኮ፡ እንበይነ፡ ቅንአት፡ ዘይሰምዕ፡ ኵሎ፡ ግብረ፡ ወድምፀ፡ ነጐርጓር፡ ኢትኀባእ፡ እምኔሁ።
11 ተዓቀቡኬ፡ እምነጐርጓር፡ ዘኢይበቊዕ፡ ወእምኀሜት፡ ባልሑ፡ ልሳነክሙ፡ እስመ፡ ነገር፡ ዘበጽሚት፡ በከ፡ ኢይመጽእ፡ ወአፍ፡ ዘይጤቅል፡ ወይሔሱ፡ ይቀትል፡ ነፍሰ።
12 ባልሑ፡ ልሳነክሙ፡ ወኢትቅንኡ፡ ለመዊት፡ በስሕተተ፡ ሕይወትክሙ፡ ወኢትንሥኡ፡ ሥራዌ፡ በግብረ፡ እደዊክሙ።
13 እስመ፡ እግዚአብሔር፡ ኢገብረ፡ ሞተ፡ ወኢያስተዔድሞ፡ ሐጒሎሙ፡ ለሕያዋን፡ እስመ፡ ፈጠረ፡ ፍጥረተ፡ ይኩን፡ ህልወ፡ ወልደተ፡ ዓለም፡ ለድኂን።
14 ወአልቦ፡ እምውስቴቶሙ፡ ኅምዘ፡ ሥራይ፡ ዘአማስኖ፡ ወለሲኦልኒ፡ አልቦቱ፡ መንግሥት፡ በዲበ፡ ምድር፡ እስመ፡ ጽድቅ፡ ኢመዋቲት፡ ይእቲ።
15 ወረሲዓንሰ፡ በእደዊሆሙ፡ ወበቃሎሙ፡ ጸውዕዎ፡ ወዓርከ፡ አምሰልዎ፡ ወተመስዉ፡ ቦቱ።
16 ወኪዳነ፡ ተካየዱ፡ ምስሌሁ፡ እስመ፡ ይደልዎሙ፡ መክፈልተ፡ ዚአሁ፡ ከዊን።
=== chapter 2 ===
[Chapter 2]
1 ይቤሉ፡ በርእሶሙ፡ ኢሐሊዮሙ፡ ርትዐ፡ እስመ፡ ኅዳጥ፡ ውእቱ፡ ንብረትነ፡ ወማኅዘን።
2 ወአልቦ፡ ፈውስ፡ ለሞተ፡ ብእሲ፡ ወአልቦ፡ ዘተአምረ፡ ዘገብአ፡ እምሲኦል፡ እስመ፡ በከ፡ ለሊነ፡ ተፈጠርነ፡ ወእምድኅረዝ፡ ንከውን፡ ከመ፡ ዘኢተፈጠርነ።
3 እስመ፡ ከመ፡ ጢስ፡ እስትንፋስ፡ ዘውስተ፡ አንፍነ፡ ወከመ፡ ቃለ፡ ቀለምጺጽ፡ በሑሰተ፡ ልብነ።
4 ወእምከመ፡ ጠፍአ፡ ሐመደ፡ ይከውን፡ ሥጋነ፡ ወመንፈስነሂ፡ ይትከዓው፡ ከመ፡ ሳሕወ፡ ደመና፡ ወስምነሂ፡ ይትረሳዕ፡ በመዋዕል፡ ወአልቦ፡ መኑሂ፡ ዘይዜክር፡ ምግባራቲነ።
5 ወየኀልፍ፡ ንብረትነ፡ ከመ፡ አሠረ፡ ኅልፈተ፡ ደመና፡ ወከመ፡ ጊሜ፡ ዘይትፈረዘዝ፡ ወከመ፡ አስሐትያ፡ ቀጢን፡ እንተ፡ ተሰደ፡ በእግረ፡ አሜር፡ እምላህቡ፡ እንተ፡ ፈለሰ።
6 እስመ፡ ንብረትነ፡ ከመ፡ ጽላሎት፡ ኃላፊ፡ ወአልቦ፡ ክልአት፡ ለሞትነ፡ እስመ፡ ውእቱ፡ ዕቁብ፡ ነገር፡ ወኢይመይጦ፡ መኑሂ።
7 ንዑኬ፡ ንትፈጋዕ፡ በዘሀሎ፡ ሠናያት፡ ወንግበር፡ ሐዋዘ፡ ውስተ፡ ፍጥረትነ፡ በአስተሐምሞ፡ እንዘ፡ ሀሎነ፡ በመዋዕለ፡ ውርዛዌነ።
8 ወይነ፡ ብዙኀ፡ ወዕፍረተ፡ ምዑዝ፡ ንትመላእ፡ ወኢይኅል፡ ፈኔ፡ ጽጌ፡ ደመና።
9 ወንትቀጸል፡ ጽጌ፡ ረዳ፡ ሠርዕነ፡ ዘእንበለ፡ ይጸመሂ፡ ወይኩን፡ መኑሂ፡ ዘኢይሳተፍ፡ እምጽጌ፡ ትዕቢትነ።
10 ወአልቦ፡ እምውስቴትነ፡ ዘኢይደልዎ፡ እምእንቲአነ፡ ፍስሓ፡ በኵለሄ፡ ኢንኅድግ፡ ወናንብር፡ ነገረ፡ ዕበድ፡ እስመ፡ ውእቱ፡ መክፈልትነ፡ ወዝንቱ፡ ርስትነ።
11 ንትዐገል፡ ነዳየ፡ ጻድቀ፡ ወኢንምሐክ፡ ዕቤረ፡ ወኢንኅፈር፡ እምሲባተ፡ ልሂቅ፡ ዘብዙኀ፡ መዋዕል፡ ወዓመታት።
12 ወኃይልነ፡ ይኩነነ፡ ሕገ፡ ጽድቅ፡ እስመ፡ ሕሊና፡ ጽቡስ፡ ምኑነ፡ ይትበሀል።
13 ንዑ፡ ንቅትሎ፡ ለጻድቅ፡ እስመ፡ ዕፁብ፡ ወክቡድ፡ ውእቱ፡ ለነ፡ ወይትቃወሞን፡ ለምግባራቲነ፡ ወይዘነጒጐነ፡ በኃጢአ፡ ሕግ።
14 ወይሰብክ፡ ለነ፡ አበሳ፡ ትምህርትነ፡ ወይብል፡ አእምሮ፡ እግዚአብሔር፡ ብየ፡ ወወልደ፡ እግዚአብሔር፡ ይሬሲ፡ ርእሶ፡ ወኮነነ፡ መዝለፌ፡ ሕሊናነ።
15 ክቡድ፡ ውእቱ፡ ብነ፡ በራእዩኒ፡ እስመ፡ ኢይትማሰል፡ ምስለ፡ ባዕድ፡ ንብረቱ፡ ወፍሉጥ፡ ፍኖቱ።
16 ወምኑናነ፡ ኮነ፡ በኀቤሁ፡ ወይርኅቅ፡ እምፍናዊነ፡ ከመ፡ ዘእምርኩስ፡ ይርኅቅ፡ ወያስተበዕዕ፡ ደኀሪቶሙ፡ ለጻድቃን፡ ወይትሜካሕ፡ ከመ፡ እግዚአብሔር፡ አቡሁ።
17 ንርአይ፡ ለእመ፡ ነገሩ፡ ኮነ፡ ህልወ፡ ወናመክር፡ ዘይከውን፡ እምርእየቱ።
18 ወእመሰ፡ ጻድቅ፡ ወልዱ፡ ለእግዚአብሔር፡ ያድኅኖ፡ ወይባልሖ፡ እምእደ፡ እለ፡ ይትቃወምዎ።
19 በጽእለት፡ ወበሕማም፡ ንሕትቶ፡ ከመ፡ ናእምር፡ የዋሀቶ፡ ወናመክር፡ ትዕግሥቶ።
20 ወእኩይ፡ ወበሞት፡ ኅሡር፡ ንኰንኖ፡ እመ፡ ይከውኖ፡ ረድኤተ፡ በከመ፡ ቃሉ።
21 ወዘንተ፡ ንባበ፡ ሐለዩ፡ ወቦቱ፡ ስሕቱ፡ እስመ፡ አንቈረቶሙ፡ እከዮሙ።
22 ወኢያእመሩ፡ ኅቡአቲሁ፡ ለእግዚአብሔር፡ ወኢተሰፈዉ፡ ዐስበ፡ ጻድቅ።
23 ወኢፈለጡ፡ ዕበየ፡ ክብረ፡ ነፍሳት፡ ንጹሐት፡ እለ፡ አልቦን፡ ነውር፡ እስመ፡ እግዚአብሔር፡ ፈጠሮ፡ ለሰብእ፡ እንበለ፡ ሙስና፡ ወገብሮ፡ በአርአያ፡ ዚአሁ።
24 ወበቅንአተ፡ ዲያብሎስ፡ ሞት፡ መጽአ፡ ወቦአ፡ ውስተ፡ ዓለም።
25 ወያሜክር፡ ሰብአ፡ እለ፡ እሙንቱ፡ እመክፈልተ፡ ዝንቱ።
=== chapter 3 ===
[Chapter 3]
1 ነፍሶሙ፡ ለጻድቃን፡ ውስተ፡ እደ፡ እግዚአብሔር፡ ወኢለክፎሙ፡ ሥቃይ።
2 ወአዕይንተ፡ ዐብዳንሰ፡ መሰሉ፡ ከመ፡ እሙንቱ፡ ዘሞቱ፡ ወተኈለቈት፡ ዐአቶሙ፡ ከመ፡ እከይ፡ ቦሙ።
3 ወኅልፈቶሙሰ፡ ተመሰለ፡ ቅጥቃጤ፡ ወእሙንቱሰ፡ በሰላም፡ ሀለዉ።
4 ወእመሂ፡ ተኰነኑ፡ በቅድመ፡ ሰብእ፡ ተስፋሆሙሰ፡ በኀበ፡ እግዚአብሔር፡ ሕይወት፡ ፍጽምት፡ እንተ፡ አልባቲ፡ ሞት።
5 ወኅዳጠ፡ ተኰኒኖሙ፡ ዓቢይ፡ ይዴለዉ፡ እስመ፡ እግዚአብሔር፡ አምከሮሙ፡ ወረከቦሙ፡ ድልዋነ፡ ሎቱ።
6 ከመ፡ ወርቅ፡ ዘይትፈተን፡ በምንሀብ፡ አመከሮሙ፡ ወከመ፡ ጽንሐሐ፡ ዕጣን፡ ዘይትዌከፍ፡ ውኩፈ፡ ተወክፎሙ።
7 ወበመዋዕለ፡ ሕዋፄሆሙ፡ ይበርሁ፡ ከመ፡ ፀሐይ፡ ወይረውዑ፡ ከመ፡ ሩፀተ፡ ቀለምጺጽ፡ በውስተ፡ ብርዕ።
8 ወይኴንኑ፡ አሕዛበ፡ ወይእኅቡ፡ ሕዝበ፡ ወይነግሥ፡ ሎሙ፡ እግዚአብሔር፡ ለዓለም።
9 እለ፡ ይትዌከሉ፡ ቦቱ፡ የአምሩ፡ ርትዐ፡ ወመሃይምናኒሁ፡ ይሄልዉ፡ ሎቱ፡ በፍቅር፡ እስመ፡ ጸጋ፡ ወክብር፡ ለኅሩያኒሁ፡ ወሕዋፄ፡ ክሡት፡ ለጻድቃኒሁ።
10 ወረሲዓንሰ፡ በከመ፡ ሐለዩ፡ ይረክቡ፡ ኵነኔ፡ ወእለ፡ አስተትዋ፡ ለጽድቅ፡ እምእግዚአብሔር፡ ርኅቁ።
11 ጥበበ፡ ወተግሣፀ፡ ዘይሜንኑ፡ ሕርቱማን፡ ወከንቱ፡ ተስፋሆሙ፡ ወሕማሞሙ፡ ወፃማሆሙ፡ ዘእንበለ፡ በቊዔት፡ ወከንቱ፡ ምግባራቲሆሙ።
12 ወአንስቲያሆሙ፡ ዓብዳት፡ እማንቱ፡ ወጸዋጋን፡ ውሉዶሙ፡ ወርጉም፡ ትውልዶሙ።
13 እስመ፡ ብእሲት፡ መካን፡ እንተ፡ አልባቲ፡ ነውር፡ ብፅዕት፡ ወንጽሕት፡ ይእቲ፡ እንተ፡ ኢተአምር፡ ምስካበ፡ ዘአበሳ፡ እንታክቲ፡ ትረክብ፡ ፍሬ፡ በሕዋፄ፡ ነፍሳት።
14 ወሕፀው፡ ዘኢገብረ፡ በእዴሁ፡ አበሳ፡ ወዘኢሐለየ፡ ላዕለ፡ እግዚአብሔር፡ እኩየ፡ እስመ፡ ይትወሀቦ፡ ጸጋ፡ ሃይማኖት፡ ኅሪት፡ ወመክፈልት፡ በቤተ፡ እግዚአብሔር፡ ዘይትፈተው።
15 እስመ፡ ለኄር፡ ፍሬ፡ ፃማሁ፡ ክብር፡ ወሥን፡ ወአልቦ፡ ድቀት፡ ለሥርወ፡ አእምሮቱ።
16 ወውሉደ፡ ዘማውያንሰ፡ ንቱጋነ፡ ይከውኑ፡ ወዘርእ፡ ዘይወጽእ፡ እምስካበ፡ ተዓዳዌ፡ ሕግ፡ ይማስን።
17 ወእመሂ፡ ኖኀ፡ መንበርቶሙ፡ ውስተ፡ ምድር፡ ምንተኒ፡ ይትኌለቊ፡ ወርስዖሙ፡ በደኀሪቶሙ፡ ይከውን፡ ኅሡረ።
18 ወእመኒ፡ ፍቱነ፡ ሞቱ፡ አልቦሙ፡ ተስፋ፡ ወኢኑዛዜ፡ አመ፡ ዕለተ፡ ሐተታ።
19 እስመ፡ ለትውልድ፡ አማፂት፡ እኩይ፡ ደኃሪታ።
=== chapter 4 ===
[Chapter 4]
1 ግብር፡ ትሩፍ፡ ኢወሊድ፡ ምስለ፡ ኂሩት፡ እስመ፡ ዝክራ፡ ኢመዊት፡ ውእቱ፡ እስመ፡ እምርት፡ ይእቲ፡ በኀበ፡ እግዚአብሔር።
2 ወበኀበ፡ ሰብእኒ፡ ያከብርዋ፡ እንዘ፡ ሀለወት፡ ወኅሊፋኒ፡ ይፈትውጥ፡ ወያፈቅርዋ፡ ወበዝንቱ፡ ዓለም፡ አክሊለ፡ ተቀጺላ፡ ታንሶሱ፡ ዘኢይጸመሂ፡ ገድለ፡ መዊዕ።
3 ብዝኀ፡ ትውልደ፡ ረሲዐን፡ ኢይበቊዕ፡ ወለከንቱ፡ ተክል፡ ኢይትአመር፡ ላቲ፡ ሥርዋ፡ ወኢትግበር፡ ጽኑዐ፡ መንበረ።
4 ወእመኒ፡ ጊዜ፡ ሠርዐ፡ ውስተ፡ አዕፁቂሃ፡ ቈጽል፡ ጽኑዕ፡ እንዘ፡ ኢይልህቅ፡ ያንቀለቅሎ፡ ነፋስ፡ ወበኃይለ፡ ነፋስ፡ ይትመላኅ።
5 ወይሰበሩ፡ አዕፁቂሃ፡ እንዘ፡ ኢኮኑ፡ ፍጹማነ፡ ወፍሬሆሙኒ፡ ቆዕ፡ ከንቱ፡ ዘኢይደሉ፡ ለበሊዕ፡ እስመ፡ ኢኮነ፡ ጊዜሁ፡ ወለምንትኒ፡ ኢይበቊዕ።
6 እስመ፡ ውሉድ፡ እለ፡ ይትወለዱ፡ እምእኩያን፡ ሰማዕት፡ እሙንቱ፡ ለእከየ፡ አዝማዲሆሙ፡ በሐተታሆሙ።
7 ጻድቅሰ፡ አመ፡ በጽሐ፡ ጊዜሁ፡ ለመዊት፡ ይሄሉ፡ በዕረፍት።
8 ክብረ፡ ርእስ፡ አኮ፡ በብዝኀ፡ መዋዕል፡ ወአኮ፡ በኊልቈ፡ ዓመታት።
9 ሲባትሰ፡ አእምሮቱ፡ ለብእሲ፡ ውእቱ፡ ወአክሊለ፡ ለርእስ፡ ግእዝ፡ ዘእንበለ፡ ነውር።
10 መሥመሬ፡ እግዚአብሔር፡ ዘኮነ፡ ይትፈቀር፡ ወእንዘ፡ የሐዩ፡ ማእከለ፡ ኃጥአን፡ ይፈልስ፡ ወይትመሰጥ፡ እምቅድመ፡ ትሚጥ፡ እኪት፡ አእምሮቶ፡ አው፡ እመ፡ አኮ፡ ኅብል፡ ኢታስፍጥ፡ ነፍሶ።
11 እስመ፡ ቅንአተ፡ እከይ፡ ያጸልም፡ ሠናያተ፡ ወንዝህላለ፡ ፍትወት፡ ያፈልስ፡ ልበ፡ የዋሀን።
12 ወለእመኒ፡ ሞተ፡ በኅዳጥ፡ መዋዕል፡ ፈጸመ፡ ዓመታተ፡ ነዋኀ፡ እስመ፡ ሀለወት፡ ነፍሱ፡ ሥምርተ፡ በኀበ፡ እግዚአብሔር።
13 ወበእንዝ፡ ጐጒዐ፡ ወሖረ፡ እማእከለ፡ ጹግ፡ ወነኪራንሰ፡ ርእዮሙ፡ ዘንተ፡ ኢለበውዎ፡ ወኢያስተጋብኡ፡ ውስተ፡ ሕሊናሆሙ፡ ፍካሬሁ፡ ለዝ።
14 እስመ፡ ፍትሑ፡ ለእግዚአብሔር፡ ውእቱ፡ ለጻድቃኒሁ፡ ወሕዋፄሁ፡ በሣህል፡ ይከውን፡ ላዕለ፡ ኅሩያኒሁ።
15 ወብእሲሰ፡ ጻድቅ፡ መዊቶ፡ ይኴንን፡ ረሲዓነ፡ እንዘ፡ ሀለዉ፡ ሕያዋኒሆሙ፡ ወወሬዛሂ፡ ሶበ፡ ሞተ፡ ፍጡነ፡ ይኴንን፡ ረሲዓነ፡ ዓመታተ፡ ርስዕ፡ ዘዓመፃ።
16 እስመ፡ ይሬእዩ፡ ሙተተ፡ ጻድቅ፡ ጠቢብ፡ ወኢይሌብዉ፡ ወኢየአምሩ፡ ምንተ፡ መከረ፡ በእንቲአሁ፡ ወለምንት፡ አስተጋብኦ፡ እግዚአብሔር፡ ኀቤሁ፡ ወይሬእይዎ፡ ወይትቃጸቡ፡ ቦቱ።
17 ወኪያሆሙሳ፡ ይስሕቆሙ፡ እግዚአብሔር፡ ወይከውኑ፡ እምድኅረዝ፡ ለድቀት፡ ኅሡር፡ ወለጽእለተ፡ ሙታን፡ ዘለዓለም።
18 እስመ፡ ይመትሮሙ፡ ወያነቅዖሙ፡ ወይትፈከቡ፡ ውዱቃነ፡ በገጾሙ፡ እንዘ፡ አልቦሙ፡ ቃል።
19 ወየሀውኮሙ፡ እምሥርዎሙ፡ ወለዝሉፉ፡ ይከውኑ፡ ከመ፡ ምድር፡ ብድውት፡ ወይከውኑ፡ ጽዑራነ፡ ወዝክሮሙ፡ ይትኀጐል።
20 ወይቀርቡ፡ ለቅስተ፡ ኃጢአቶሙ፡ ፍሩሃነ፡ ወይዛለፎሙ፡ ገሃደ፡ በአንፃሪሆሙ፡ ኃጢአቶሙ።
=== chapter 5 ===
[Chapter 5]
1 አሜሃ፡ ይቀውም፡ ጻድቅ፡ በብዙኅ፡ ግህደት፡ አንፃረ፡ እለ፡ አመንደብዎ፡ ወክሕዱ፡ ፃማሁ፡ ወመነኑ፡ ነገሮ።
2 ወሶበ፡ ርእይዎ፡ ይትሀወኩ፡ በግርማ፡ ወበፍርሃት፡ እኩይ፡ ወይዴመሙ፡ በእንተ፡ መንክር፡ ዳኅናሁ።
3 ወይብሉ፡ በበይናቲሆሙ፡ እንዘ፡ ይኔስሑ፡ ወበጽዑር፡ ከንፈሰ፡ ይቴክዙ፡ ወይጸርሑ።
4 ወይብሉ፡ ዝኑ፡ ዘኮነ፡ በኀቤነ፡ እምዐብዳን፡ ቀዲሙ፡ ሰሐቀ፡ ወነገረ፡ ዝንጓጔ፡ ወረሰይነ፡ ግእዞ፡ ዕበደ፡ ወሙተቶሂ፡ ምኑነ።
5 እፎ፡ ኮነ፡ ወልደ፡ እግዚአብሔር፡ ወለቅዱሳን፡ ኮነት፡ ርስቱ።
6 ስሕትነኬ፡ እምፍኖተ፡ ርትዕ፡ ወብርሃኑ፡ ለጻድቅ፡ ኢያስተርአየ፡ ለነ፡ ወፀሐይኒ፡ ኢሠረቀ፡ ለነ።
7 ወአበሳ፡ ወኀጒለ፡ መላእነ፡ በፍናዊነ፡ ወነገድበ፡ ገዳነ፡ በድው፡ ወፍኖተ፡ እግዚአብሔር፡ ኢያእመርነ።
8 ምንተ፡ በቊዓነ፡ ትዕቢት፡ ወምንተ፡ አምጽአ፡ ለነ፡ ብዕል፡ ምስለ፡ ትዕቢት።
9 ኃላፊ፡ ውእቱ፡ ዝንቱ፡ ኵሉ፡ ከመ፡ ጽላሎት፡ ወከመ፡ ኅልፈተ፡ ዜና፡ ዘይረውፅ።
10 ወከመ፡ ሐመር፡ ዘየኀልፍ፡ ወይመሥጦ፡ ማይ፡ በማዕበሉ፡ እንተ፡ ምኅላፈ፡ አሠሩ፡ አልቦ፡ ዘይትፈከብ፡ ወፍኖተ፡ ገጸ፡ ሩጸቱ፡ በውስተ፡ ማዕበል፡ ኢይትአመር።
11 ወከመ፡ ዕፍ፡ ዘይሠርር፡ በውስተ፡ ነፋስ፡ አልቦ፡ ዘይትረከብ፡ አሠረ፡ ፍኖቱ፡ እስመ፡ ሶበ፡ ኀለፈ፡ ተዳድቆተ፡ ሥረቱ፡ ወይሬሲ፡ ነፋሰ፡ ቀሊለ፡ ዝቡጠ፡ ወይሰጥቆ፡ በጽንዐ፡ ፍጥነቱ፡ ይነግድ፡ ወይረውፅ፡ በአሁሶ፡ ክነፊሁ፡ ወእምዝ፡ ኢይትረከብ፡ ትእምርተ፡ ኅልፈቱ፡ በውስቴቱ።
12 አው፡ ከመ፡ ሐፅ፡ ዘተውህበ፡ ለሠሪር፡ እስመ፡ ነፋስ፡ ተሠጥቀ፡ ቦቱ፡ ወበጊዜሃ፡ ተጋብአ፡ ከመ፡ ቀዳሚ፡ ወኅልፈቱ፡ ውስቴቱ፡ ኢይትአመር።
13 ከማሁ፡ ንሕነኒ፡ ሶበ፡ ተወለድነ፡ ኀለቅነ፡ ወኢይደልወነ፡ ከመ፡ ንርአይ፡ ትእምርተ፡ ሠናይ፡ ዳዕሙ፡ ኀለቅነ፡ በእከይነ።
14 እስመ፡ ተስፋሆሙ፡ ለረሲዐን፡ ከመ፡ ዐበል፡ ዘይግሕፎ፡ ነፋስ፡ ወከመ፡ አስሐትያ፡ ቀጢን፡ ዘእምነፋስ፡ ተሰደ፡ ከመ፡ ጢስ፡ ዘእምነፋስ፡ ይትመሰው፡ ወከመ፡ ዝክረ፡ ኅዳሪ፡ ዘአሐተ፡ ዕለተ፡ ኀደረ፡ ወኃለፈ።
15 ወጻድቃንሰ፡ ርቱዐን፡ ለዓለም፡ የሐይዉ፡ ወጽኑሕ፡ ዓስቦሙ፡ በኀበ፡ እግዚአብሔር፡ ወትካዞሙ፡ ኀበ፡ ልዑል፡ ይሄሉ።
16 ወበእንተዝ፡ ይነሥኡ፡ መንግሥተ፡ ክብር፡ ወቀጸላ፡ ሥነ፡ እምእደ፡ እግዚአብሔር፡ እስመ፡ በየማኑ፡ ይከድኖሙ፡ ወበመዝራዕቱ፡ ይረድኦሙ።
17 ወይነሥእ፡ ንዋየ፡ ሐቅለ፡ ቅንአቱ፡ ፍጹመ፡ ወይሬስያ፡ ለፍጥረቱ፡ ንዋየ፡ ሐቅል፡ ለተበቅሎ፡ አፅራሪሁ።
18 ወይለብስ፡ ድርዐ፡ ጽድቅ፡ ወይትቄጸል፡ ጌራ፡ ኵነኔ፡ ዘኢያድልዎ።
19 ወይነሥእ፡ ወልታ፡ ጽድቅ፡ ዘኢይትመዋዕ።
20 ወያበልኅ፡ መዓቶ፡ ሰይፈ፡ መታሬ፡ ወዓለምኒ፡ ይፃባዕ፡ ወይትቃተል፡ ምስሌሁ።
21 ወዲበ፡ መስሕታን፡ የሐውር፡ ርቱዐ፡ ሞጸፈ፡ መዓተ፡ መባርቅቲሁ፡ ከመ፡ ይርከቦሙ፡ ፍጡነ፡ ጻድቃንሰ፡ ከመ፡ ዘሠናይ፡ ምዕዋደ፡ ቀስተ፡ ደማና፡ በአጽምኦ፡ ይቀንዑ።
22 ወእምኰኵሐ፡ መዓተ፡ ሞጸፉ፡ ፍጡነ፡ ያወርድ፡ አብራደ፡ ወይትቈጣዕ፡ ላዕሌሆሙ፡ ማየ፡ ባሕር፡ አፍላግኒ፡ ያንቀለቅሉ፡ ወየዓግትዎሙ፡ ፍጡነ።
23 ወይትቃወሞሙ፡ መንፈሰ፡ ኃይል፡ ወከመ፡ ነፋስ፡ ይሥዕዮሙ፡ ወይዘርዎሙ፡ እስመ፡ አበሳ፡ ታማስን፡ ኵሎ፡ ምድረ፡ ወገቢረ፡ እከይ፡ ይገፈትዕ፡ መናብርተ፡ ኃያላን።
=== chapter 6 ===
[Chapter 6]
1 ስምዑኬ፡ ነገሥት፡ ወለብዉ፡ ወአእምሩ፡ መኳንንተ፡ አጽናፈ፡ ምድር።
2 ወአጽምኡ፡ እለ፡ ትእኅዙ፡ ምድረ፡ ብዙኀ፡ ወእለ፡ ትትዔበዩ፡ በብዝኀ፡ አሕዛብ።
3 እስመ፡ እግዚአብሔር፡ ወሀበክሙ፡ እዘዘ፡ ወጽንዕክሙ፡ እምኀበ፡ ልዑል፡ ወውእቱ፡ ዘየሐትት፡ ምግባሪክሙ፡ ወይፈትን፡ ምክረክሙ።
4 እስመ፡ እንዘ፡ ላእካነ፡ ጽድቁ፡ አንትሙ፡ እፎኑመ፡ ኢትኴንኑ፡ ፍትሕ፡ ርቱዐ፡ ወኢዓቀብክሙ፡ ሕጎ፡ ወኢሖረክሙ፡ በፍናወ፡ እግዚአብሔር።
5 ወያነሥእ፡ ላዕሌክሙ፡ ድንጋፄ፡ ፍጡነ፡ ዘይትቃወመክሙ፡ እስመ፡ ኵነኔ፡ ምቱር፡ ለመኳንንት፡ ይከውን።
6 ወለነዳይሰ፡ ያነሐስዮ፡ ሎቱ፡ እምፍኖተ፡ ምሕረት፡ ወለጽኑዐንሰ፡ ጽኑዐ፡ ሐተታ፡ የሐትትዎሙ።
7 እስመ፡ ኢያደሉ፡ እግዚአብሔር፡ ለገጸ፡ ኵሉ፡ ወኢየኃፍር፡ ክብረ፡ ዕበይ፡ እስመ፡ ዓቢየ፡ ወንኡሰ፡ ገብረ፡ ወከማሁ፡ ይሔሊ፡ በእንተ፡ ኵሉ፡ ዘይቀኒ፡ ወዘይትቀነይ፡ ወይሠርዖሙ።
8 ወለአዚዛንሰ፡ ኅዩለ፡ ሐተታ፡ ይበጽሖሙ።
9 ለክሙኬ፡ ነገርየ፡ ኢ፡ መኳንንት፡ እኩያን፡ ወገፋዕያነ፡ ከመ፡ ታእምሩ፡ ጥበበ፡ ወተግሣፀ፡ ወኢትደቁ።
10 እስመ፡ እለ፡ የአምሩ፡ ትእዛዘ፡ ጽድቅ፡ ወየዓቅቡ፡ በጽድቅ፡ ይጸድቁ፡ ወእለ፡ ተምህርዋ፡ ይረክቡ፡ ምሕረተ።
11 ፍትዉኬ፡ እንከ፡ ነገርየ፡ አፍቅርዋ፡ ወተገሠፁ፡ ከመ፡ ትርከቡ፡ ሣህለ፡ ወምሕረተ።
12 ብርህት፡ ይእቲ፡ ጥቀ፡ ጥበብ፡ ወኢይጸመሂ፡ ሥና፡ ወእለ፡ ያፈቅርዋ፡ ይሬእይዋ፡ ፍጡነ፡ ወእለ፡ የኃሥሥዋ፡ ይረክብዋ።
13 ወትበጽሕ፡ ለእለ፡ ይፈትውዋ፡ ወትትኤመሮሙ፡ ቅድመ።
14 ወዘይገይሥ፡ ኀቤሃ፡ ኢይፃሙ፡ እስመ፡ ውእቱ፡ ይረክባ፡ ወትረ፡ እንዘ፡ ትጸንሖ፡ ውሰተ፡ ኆኅቱ።
15 እስመ፡ ሐሊዮ፡ ኪያሃ፡ ፍጻሜ፡ አእምሮ፡ ወዘተግሀ፡ በእንቲአሃ፡ ፍጡነ፡ ዘእንበለ፡ ትካዝ፡ ይከውን።
16 እስመ፡ ለእለ፡ ይደልውዋ፡ ይእቲ፡ ትመጽእ፡ እንዘ፡ ተኃሥሦሙ፡ ወበውስተ፡ ፍኖትኒ፡ ታስተርእዮሙ፡ ሥእልታ፡ ግብተ፡ አዳመ፡ በኵሉ፡ ሕሊና፡ ትትራከቦሙ።
17 እስመ፡ ቀዳሚ፡ ተግሣፅ፡ ህልው፡ ውእቱ፡ ፍትወታ፡ ወአስተሐምሞ፡ በተግሣፅ፡ አፍቅሮታ፡ ውእቱ።
18 ወአፍቅሮታሂ፡ ዓቂበ፡ ሕገ፡ ዚአሃ፡ ወጠይቆ፡ ኢሙስና፡ ውእቱ።
19 ወኢሙስናሂ፡ ትሬሲ፡ ሰብአ፡ ቅሩበ፡ ኀበ፡ እግዚአብሔር።
20 ፍትወታኬ፡ ለጥበብ፡ ታዓርግ፡ ኀበ፡ መንግሥት።
21 እመሰኬ፡ ትፈትዉ፡ መኳንንተ፡ አሕዛብ፡ መናብርተ፡ ወሢመተ፡ መወንግሥተ፡ አክብርዋ፡ ለጥበብ፡ ከመ፡ ለዓለም፡ ትንግሡ።
22 ወምንት፡ ይእቲ፡ ጥበብ፡ ወእፎ፡ ኮነት፡ አነ፡ አየድዐክሙ፡ ወኢየሃብእ፡ እምኔክሙ፡ ምሥጢራቲሃ፡ ክቡተ።
23 ወባሕቱ፡ አኃሥሥ፡ እምጥንት፡ ክዋኔሃ፡ ወእሬሲ፡ ክሡተ፡ አእምሮታ፡ ወኢይትዓደው፡ ጽድቀ፡ ወኢየሐውር፡ በቅንአተ፡ ሕመሜ።
24 እስመ፡ ዘከመዝሰ፡ ኢይሳተፋ፡ ለጥበብ፡ እስመ፡ ብዝኅ፡ ጠበብት፡ መድኃኒተ፡ ዓለም፡ ውእቱ።
25 ወንጉሥ፡ ልብው፡ ቃውም፡ ለሕዝብ፡ ተገሠፁኬ፡ በቃልየ፡ ወትረብኁ።
=== chapter 7 ===
[Chapter 7]
1 እስመ፡ አነሂኬ፡ መዋቲ፡ ሰብእ፡ ዕሩይ፡ አምሳለ፡ ኵሉ፡ ወወልደ፡ ምድራዊ፡ ዘተልሕኰ፡ ቅድመ፡ ወውስተ፡ ከርሠ፡ እምየ፡ ተገለፍኩ፡ ሥጋ።
2 ወነበርኩ፡ ርጉአ፡ በደም፡ ዓሠርተ፡ አውራኅ፡ እምዘርአ፡ ብእሲ፡ ወፍትወተ፡ ንዋም፡ በሩካቤ።
3 ወአነሂ፡ ነሣእኩ፡ ነፍሰ፡ ሶበ፡ ተወለድኩ፡ ከመ፡ ኵሉ፡ ሰብእ፡ ወወረድኩ፡ ውስተ፡ ምድር፡ መምሰሊተ፡ ሕማምየ፡ ወቀዳሚተ፡ ቃል፡ አውጻእኩ፡ ብካየ።
4 ወአጽርቅት፡ ልህቁ፡ ወበትካዝ፡ እስመ፡ አልቦ፡ እምነገሥት፡ ዘካልአ፡ ኮነ፡ ጥንተ፡ ልደቱ።
5 ወአሐቲ፡ ይእቲ፡ ምጽአቱ፡ ለኵሉ፡ ውስተ፡ ዓለም፡ ወጸአተ፡ ኵሉ፡ በዕሩይ።
6 ወበእንተዝ፡ ጸለይኩ፡ ወአእምሮ፡ ተውህበኒ፡ ሊተ፡ አስተብቋዕኩ፡ ወመጽአኒ፡ መንፈሰ፡ ጥበብ።
7 ወአክበርክዋ፡ እምኵናነ፡ መንግሥት፡ ወመናብርት፡ ወለብዕልኒ፡ ከመ፡ ወኢምንት፡ ረሰይክዋ፡ በመድሎታ።
8 ወኢያስተማሰልክዋ፡ በእብነ፡ ባሕርይ፡ ዘሤጥ፡ አልቦቱ፡ እስመ፡ ኵሉ፡ ወርቅ፡ በቅድመ፡ ገጻ፡ ከመ፡ ኆፃ፡ ኅዳጥ፡ ወከመ፡ ዕቡር፡ ይመስል፡ ብሩር፡ በቅድሜሃ።
9 ወእምነ፡ ሕይወት፡ ወእምሥነ፡ ላህያ፡ አፍቀርክዋ፡ ፈድፋደ፡ ወአብደርክዋ፡ ህየንተ፡ ብርሃን፡ ትኩነኒ፡ እስመ፡ ፀዳለ፡ ብርሃን፡ ዘእምውስቴታ፡ ይወፅእ፡ ኢይትጋባእ፡ ወኢይነውም።
10 ወመጽአኒ፡ ኵሉ፡ ሠናያት፡ ምስሌሃ፡ ኅቡረ፡ ወዘአልቦ፡ ኊልቊ፡ ብዕል፡ ውስተ፡ እዴሃ።
11 ወተፈሣሕኩ፡ በኵሉ፡ እስመ፡ መኰንንቶሙ፡ ይእቲ፡ ጥበብ፡ ወኢያእመርኩ፡ ከመ፡ ገባሪቱ፡ ይእቲ፡ ለዝ፡ ኵሉ።
12 ወሶበ፡ አእመርኩ፡ ዘንተ፡ ዘእንበለ፡ እከይ፡ ወዘእንበለ፡ ቅንአት፡ እሁበ፡ ኪያሃ፡ ወብዕላ፡ ኢየኃብእ።
13 ወኢየኃልቅ፡ መዝገበ፡ ይእቲ፡ ለሰብእ፡ ወእለ፡ አጥረይዋ፡ ኀበ፡ እግዚአብሔር፡ በጽሑ፡ ወተዓረኩ፡ በእንተ፡ ምግባረ፡ ተግሣፅ፡ እንተ፡ ትከሥት፡ ሀብተ።
14 ወሊተኒ፡ ወሀበኒ፡ እግዚአብሔር፡ እንግር፡ ዘይትፈተው፡ ወአሐሊ፡ ሕሊና፡ ዘይደሉ፡ ለዘይትወሀቦ፡ እስመ፡ ውእቱ፡ መርሕ፡ ውስተ፡ ጥበብ፡ ወመርትዐ፡ ጠበብት።
15 እስመ፡ ውስተ፡ እዴሁ፡ ንሕነ፡ ኵልነ፡ ወነገርነኒ፡ ኵሉ፡ ጠይቆ፡ ወአእምሮ፡ ምግባራት።
16 እስመ፡ ውእቱ፡ ወሀበኒ፡ ቃለ፡ አእምሮ፡ ህልወ፡ ዘእንበለ፡ ሐስዎ፡ ከመ፡ አእምር፡ ሥርዓተ፡ ቁመተ፡ ዓለም፡ ወምግባረ፡ ፀሐይ፡ ወወርኅ፡ ወከዋክብት።
17 ጥንተ፡ ወተፍጸመ፡ ወማእከለ፡ መዋዕል፡ ወሙያጤ፡ መዋዕል፡ ወተፋልሶ፡ ጊዜያት።
18 ወዑደተ፡ ዓመታት፡ ወንብረተ፡ ከዋክብት።
19 ወጠባይዐ፡ እንስሳ፡ ወነፍሳተ፡ አራዊት፡ ወኃይለ፡ ነፋሳት፡ ወሕሊና፡ ሰብእ፡ ወፈሊጠ፡ ዕፅው፡ ወኃይለ፡ ምግባርሰ፡ አሥራው።
20 አእመርኩ፡ ኵሎ፡ ዘኅቡእ፡ ወዘከሡት፡ እስመ፡ ኬንያሁ፡ ለኵሉ፡ ግበር፡ መሀረኒ፡ ጥበበ።
21 እስመ፡ ቦቱ፡ ውእቱ፡ መንፈሰ፡ አእምሮ፡ ቅዱስ፡ ብሑተ፡ ልደት፡ እንዘ፡ አሐዱ፡ ክፍሉ፡ ውስተ፡ ብዙኅ፡ ክፍል።
22 ወጢን፡ ዘፍጡን፡ ነሶሳው፡ ወሠናይ፡ ቃሉ፡ ወጠቢብ፡ ዘአልቦቱ፡ ርስሐት፡ ዘኢይፃሙ፡ ህልው፡ አንተ፡ አልቦቱ፡ ጽንፍ፡ መፍቀሬ፡ ኂሩት፡ በሊኅ፡ ዘአልቦ፡ ዘይከልኦ፡ ዘያሤኒ።
23 መፍቀሬ፡ ሰብእ፡ ስንዓሃ፡ ለጥበብ፡ ማእምር፡ ዘበአማን፡ ዕጉሥ፡ ዘእንበለ፡ ታካዘ፡ ከሃሌ፡ ኵሉ፡ ወሐዋፄ፡ ኵሉ፡ ዘይበውእ፡ ውስተ፡ መናፍስት፡ ንጹሐት፡ ለባውያተ፡ ወቀጢናት።
24 እስመ፡ ሑሳታ፡ ለጥበብ፡ ይፈጥን፡ እምኵሉ፡ ሑሰት፡ ትሰፍሕ፡ ወታንሶሱ፡ ውስተ፡ ኵሉ፡ ወተሐውር፡ እንተ፡ ዲበ፡ ኵሉ፡ በእንተ፡ ጽርየተ፡ ንጽሓ።
25 እስመ፡ ላህበ፡ ኃይለ፡ እግዚአብሔር፡ ይእቲ፡ ወስብሐተ፡ አኃዜ፡ ኵሉ፡ ዘዕዉቅ፡ አርአያሁ፡ ስቡሕ፡ ወንጹሕ፡ በእንተዝ፡ ምንትኒ፡ አልቦ፡ ርኵስ፡ ዘይዳደቅ።
26 እስመ፡ ዋካ፡ ብርሃን፡ ይእቲ፡ ዘቀዳማዊ፡ ወመጽሔተ፡ ግብረ፡ እግዚአብሔር፡ ይእቲ፡ እንተ፡ ኢትዴምን።
27 ወአርአያ፡ ኂሩቱ፡ እንዘ፡ አሐቲ፡ ይእቲ፡ ኵሎ፡ ትክል፡ ወእንዘ፡ በርስዕ፡ ሀለወት፡ ኵሎ፡ ትሔድስ፡ ወትትፋለስ፡ ውስተ፡ ነፍሳተ፡ ጻድቃን፡ እምትውልድ፡ ውስተ፡ ትውልድ።
28 ወትሬስዮሙ፡ አዕርክተ፡ እግዚአብሔር፡ ወነቢያቲሁ፡ እስመ፡ አልቦ፡ ዘያፈቅር፡ እግዚአብሔር፡ ዘእንበለ፡ ምስለ፡ ጥበብ፡ ዘየኃድር።
29 እስመ፡ ትልሂ፡ ይእቲ፡ በሥነ፡ ፀሐይ፡ ወትፈደፍድ፡ እምነ፡ ኵሉ፡ ኅብረ፡ ከዋክብት።
30 ወሶበ፡ ተደለወት፡ ምስለ፡ ብርሃን፡ ትትረከብ፡ እምቅድሜሁ፡ እስመ፡ ለብርሃን፡ ደዌልጦ፡ ሌሊት፡ ወለጥበብሰ፡ ኢይትኄየላ፡ ምንትኒ፡ እኩይ።
=== chapter 8 ===
[Chapter 8]
1 ትሰፍሕ፡ እምጽንፍ፡ እስከ፡ ጽንፍ፡ ጥዕይታ፡ ወትሠርዕ፡ ኵሎ፡ በኂሩታ፡ ለዛቲ፡ አፍቀርክዋ፡ ወኃሠሥክዋ፡ እምውርዙትየ።
2 ወፈቀድኩ፡ እንሥኣ፡ ሊተ፡ መርዓተ፡ ወመፍቀሬ፡ ኮንኩ፡ ለሥና፡ እስመ፡ ኂሩታ፡ ትዝምደ፡ ያቀርብ፡ ኀበ፡ እግዚአብሔር።
3 ወመኰንነ፡ ኵሉ፡ አፍቀራ፡ እስመ፡ መንክርት፡ ይእቲ፡ ለአእምሮ፡ ምሥጢራተ፡ እግዚአብሔር፡ ወትትሌዓል፡ ዕበየ፡ እምኵሉ፡ ግብሩ።
4 ወኀበ፡ ሀለወት፡ ብዕል፡ ይእቲ፡ እምኵሉ፡ ትትበደር፡ ለእለ፡ አጥረይዋ፡ ውስተ፡ ዓልም።
5 ምንትኑ፡ ይብላዕ፡ ለጥበብ፡ ገባሪተ፡ ኵሉ፡ ወእመኒ፡ ባቲ፡ አእምሮ፡ ተገብረ።
6 መኑ፡ እምእለ፡ ሀለዉ፡ ዘይፈደፍድ፡ እምኔሃ፡ ኬንያ፡ ወእመኒቦ፡ ዘአፍቀረ፡ ጽድቀ።
7 እስመ፡ ፃማሃ፡ ውእቱ፡ ሠናይ፡ ትሜህር፡ ንጽሐ፡ ወጥበበ፡ ወጽድቀ፡ ወጽንዐ፡ ወትሩፋተ፡ ወሠናያተ።
8 ወአልቦ፡ ውስተ፡ ዓለም፡ ዘይበቊዕ፡ ወዘይሤኒ፡ እምኔሃ፡ ወኢምንትኒ፡ ሕይወቱ፡ ለብእሲ።
9 ወእመኒቦ፡ ዘአፍቀረ፡ ብዙኀ፡ አእምሮ፡ ወሠናያተ፡ ወለእመ፡ አእመረ፡ ዘቀዲሙ፡ ወዘይመጽእሂ።
10 ወዘየአምር፡ አውሥኦተ፡ ነገር፡ ወፈክሮ፡ ቅጽበተ፡ ወያቀድም፡ አእምሮ፡ ተአምራት፡ ወመንክራት፡ ወኅልፈተ፡ ጊዜያት፡ ወዓመታት።
11 ወአነሂ፡ ፈቀድኩ፡ ከመ፡ እንሥኣ፡ ተሀሉ፡ ምስሌየ፡ አእሚርየ፡ ከመ፡ ይእቲ፡ ትከውነኒ፡ መምክርተ፡ ለሠናይ፡ ወመገሥዕተ፡ ዘታኀድግ፡ ኀዘነ፡ ወትካዘ።
12 በእንቲኣሃ፡ ረከብኩ፡ አነ፡ ወሬዛ፡ አኰቴተ፡ በኀበ፡ ብዙኃን፡ ወክብረ፡ በኀበ፡ ሊቃውንት።
13 ወኮንኩ፡ በሊኀ፡ ልሳን፡ ወሕሊና፡ ለኰንኖ፡ ወተነከርኩ፡ በአዕይንተ፡ ገጸ፡ ኃያላን።
14 እንዘ፡ አረምም፡ ይጸንሑኒ፡ ወይትዔገሡኒ፡ ወእንዘ፡ እነብብ፡ ያጸምኡኒ፡ ወእመኒ፡ አብዛኅኩ፡ ተናግሮ፡ እዴሆሙ፡ ያነብሩ፡ ዲበ፡ አፉሆሙ።
15 በእንቲኣሃ፡ ረከብኩ፡ ኢመዋቲ፡ ወዝክረ፡ ዘለዓለም፡ ኀደጉ፡ ለእለ፡ እምድኅሬየ።
16 ወእሠርዕ፡ ሕዝበ፡ ወይትኴነኑ፡ ሊተ፡ አሕዛብ።
17 ወይፈርሁኒ፡ ሰሚዖሙ፡ መኳንንተ፡ ምድር፡ መደንግፃን፡ በማኅበር፡ አስተርኢ፡ ኄረ፡ ወበፀብዕ፡ ፅኑዐ።
18 ወሶበ፡ ቦእኩ፡ ውስተ፡ ቤትየ፡ አዐርፍ፡ ባቲ፡ እስመ፡ ሀልዎ፡ ምስሌሃ፡ አልቦ፡ ውስቴታ፡ ምረት፡ ወኢፃማ፡ ወኃዘን፡ ኢይቀርብ፡ ኀቤሃ፡ ዘእንበለ፡ ፍሥሓ፡ ወኃሤት።
19 ዘንተ፡ እንዘ፡ እሔሊ፡ በርእስየ፡ ነበርኩ፡ ወእጽሕቅ፡ ባቲ፡ በልብየ፡ ወአእሚርየ፡ ከመ፡ ኢክል፡ ነጺሐ፡ እስመ፡ ከመ፡ ኢመዊት፡ ውእቱ፡ ትዝምዳ፡ ለጥበብ።
20 ወውስተ፡ ፍቅራ፡ ፍሥሓ፡ ወኃሤት፡ ሠናይ፡ ወውስተ፡ ግብረ፡ አደዊሃ፡ ብዕል፡ ዘኢየኀልቅ፡ ወውስተ፡ ነገራ፡ ትምህርተ፡ አእምሮ፡ ወውስተ፡ ተሳትፎታ፡ ንባበ፡ ምክር።
21 ዖድኩ፡ ኵላ፡ ምድረ፡ እንዘ፡ አኃሥሣ፡ ከመ፡ እንሥኣ፡ ሊተ፡ በርእስየ፡ ትኩነኒ፡ ሊተ፡ መርዓተ።
22 ወልድ፡ ማእምር፡ አነ፡ ወነፍስየ፡ ኄርተ፡ ኮነት፡ ሊተ፡ እስመ፡ አነ፡ ኄር፡ ቦእኩ፡ ውስተ፡ ሥጋሃ፡ ንጹሕ።
23 ወሶበ፡ አእመርኩ፡ ከመ፡ ኢይክል፡ ነጺሐ፡ እመ፡ እግዚአብሔር፡ ኢወሀበኒያ፡ ሊተ።
24 ወዝኒ፡ ምክር፡ ኮነ፡ እመጥበብ፡ ከመ፡ አእምር፡ ለመኑ፡ ይእቲ፡ ጸጋ፡ ሰከይኩ፡ ኀበ፡ እግዚአብሔር፡ ወሰአልክዎ።
=== chapter 9 ===
[Chapter 9]
1 ወእቤ፡ እምኵሉ፡ ልብየ፡ አምላከ፡ አቡየ፡ ወእግዚኣ፡ ለምሕረት፡ ዘገበርከ፡ ኵሎ፡ ዓለመ፡ በቃልከ።
2 ወበጥበብከ፡ ረሰይከ፡ ሰብአ፡ ከመ፡ ይኰንን፡ ዘእምኀቤከ፡ ተገብረ፡ ፍጥረተ።
3 ወያንሶሱ፡ ውስተ፡ ምድር፡ ወይሥራዕ፡ ዓለመ፡ በኂሩትከ፡ ወበጽድቅከ፡ ወበርትዐ፡ መንፈሰ፡ ኵነኔ፡ ይኴንን።
4 ሀበኒ፡ እንተ፡ እምኀበ፡ መናብርቲከ፡ ትነብር፡ ጥበበ።
5 ወኢትመንነኒ፡ እማእከለ፡ አግብርቲከ፡ እስመ፡ አነ፡ ገብርከ፡ ወልደ፡ አመትከ፡ ብእሲ፡ ድውየ፡ ኃይል፡ ወሕፁፀ፡ መዋዕል፡ ወትሑት፡ ለአእምሮ፡ ሕገ፡ ፍትሕ።
6 ወለእመኒቦ፡ ዘኮነ፡ ፍጹመ፡ እምውሉደ፡ ሰብእ፡ እምከመ፡ ርኅቅት፡ እምኔሁ፡ ጥበብ፡ እንተ፡ እምኀቤከ፡ እስመ፡ ውእቱ፡ ከመ፡ ወኢምንትኒ፡ እምኮነ።
7 አንተ፡ ኃረይከኒ፡ ንጉሠ፡ ለሕዝብከ፡ ወመኰንነ፡ ለውሉድከ፡ ወለአዋልዲከ።
8 ወትቤ፡ ይትሐነጽ፡ ቤተ፡ በደብረ፡ መቅደስከ፡ ወውስተ፡ ሀገረ፡ ምዕራፍከ፡ ምሥዋዕ፡ አምሳለ፡ ቅድሳተ፡ ስብሐቲከ፡ እንተ፡ አስተዳሎከ፡ እምፍጥረት።
9 ወምስሌከ፡ ጥበብ፡ እንተ፡ ተአምር፡ ግብረከ፡ ወሀለወት፡ አመ፡ ትገብር፡ ዓለመ፡ ወይእቲ፡ ትጤይቅ፡ ምንት፡ ውእቱ፡ ዘያሠምረከ፡ ቅድመ፡ አዕይንቲከ፡ ወምንት፡ ውእቱ፡ ዘርቱዕ፡ በትእዛዛቲከ።
10 ፈንዋ፡ እምቅዱሳት፡ ሰማያት፡ ከመ፡ ትትነሣእ፡ ወትምጻእ፡ ኀቤየ፡ ፈንዋ፡ እመንበረ፡ ስብሐቲከ፡ ወአእምር፡ ምንት፡ ውእቱ፡ ዘያሠምረከ፡ ከመ፡ ተሃሉ፡ ምስሌየ፡ ወትፃሙ።
11 እስመ፡ ይእቲ፡ ተአምር፡ ኵሎ፡ ግብረከ፡ ዘአንተ፡ ትጤይቅ፡ ወይእቲ፡ ትምርሐኒ፡ በኵሉ፡ ምግባራትየ፡ ንጹሐ፡ ወትዕቀበኒ፡ በክብራ፡ ወይኩን፡ ምግባራትየ፡ ሥሙረ።
12 ወእኰንን፡ ሕዝበከ፡ በጽድቅ፡ ወእኩን፡ ድልወ፡ ለመናብርተ፡ አበውየ።
13 መኑ፡ ውእቱ፡ ሰብእ፡ ዘየአምር፡ ምክረ፡ እግዚአብሔር፡ ወመኑ፡ ዘይሔሊ፡ ወየአምር፡ ምንተ፡ ይፈቅድ፡ እግዚአብሔር፡ እስመ፡ ሕሊናሆሙ፡ ለመዋትያን፡ ፈራህ፡ ወመብእስ፡ ሕሊናሆሙ።
14 እስመ፡ ሥጋ፡ ዘይማስን፡ ይከድና፡ ለነፍስ፡ ወይከብዳ፡ ወማኅደር፡ ምድራዊ፡ ይከድን፡ ልበ።
15 በብዙኅ፡ ፃሕቅ፡ ወትካዝ፡ ወበዕፁብ፡ ለእመ፡ አየነ፡ ንረክብ፡ ምግባረ፡ ዘውስተ፡ ምድር፡ ወንረክብ፡ በፃማ፡ ግብረ፡ እንተ፡ ንገሥሣ፡ በእደዊነ፡ ወዘውስተ፡ ሰማይሰ፡ መኑ፡ ፈተነ፡ ወምክረከመኑ፡ አእመረ።
16 ወሶበ፡ አኮ፡ አንተ፡ እመ፡ ኢወሀብከ፡ ጥበበ፡ ወፈኖከ፡ ኀቤሁ፡ እምአርያም፡ ቅዱሰ፡ መንፈሰከ።
17 ወበእንተዝ፡ ረትዓት፡ ፍኖቶሙ፡ ለእለ፡ ውስተ፡ ምድር፡ ወዘያሠምረከ፡ አእመሩ፡ ሰብእ፡ በጥበብ፡ ወድኅኑ፡ ባቲ።
=== chapter 10 ===
[Chapter 10]
1 ዛቲ፡ ዓቀበት፡ አበ፡ ዓለም፡ ዘተልሕኰ፡ ቅድመ፡ ባሕቲቱ፡ ተገቢሮ፡ ተማኅፀነቶ፡ ወአድኃነቶ፡ እምአበሳ፡ ርእሱ።
2 ወወሀበቶ፡ ኃይለ፡ ከመ፡ ይኰንን፡ ወየአኀዝ፡ ኵሎ።
3 ወሶበ፡ ርኅቀ፡ እምኔሃ፡ ዓማፂ፡ ወገፋዒ፡ በመዓት፡ ተኀጒለ፡ ምስለ፡ ነፍሳተ፡ ቀታልያነ፡ አኃው።
4 ወከማሁ፡ ካዕበ፡ ሶበ፡ ተአይኅ፡ ምድር፡ አድኀነቶ፡ ጥበብ፡ ወኃደፈቶ፡ ለጻድቅ፡ በንዋየ፡ ዕፅ፡ ምኑን።
5 ዛቲ፡ ሶበ፡ ተክዕዉ፡ አሕዛብ፡ ውስተ፡ ኅብረ፡ እከይ፡ ወጹግ፡ አመረቶ፡ ለጻድቅ፡ ወዓቀበቶ፡ ለእግዚአብሔር፡ ዘእንበለ፡ አበሳ፡ ወነውር፡ ወዓቀበት፡ ወልደ፡ ጽኑዐ፡ በምሕረት።
6 ዛቲ፡ ባልሐት፡ ወልደ፡ ጻድቀ፡ እምእለ፡ ይትኃጐሉ፡ ረሲዓን፡ ወአድኃነቶ፡ በጐይይ፡ ሶበ፡ ወረደት፡ እሳት፡ ዲበ፡ ኃምስቱ፡ አህጉር።
7 እስከ፡ ይእዜ፡ ሀለወት፡ ስምዐ፡ እስከ፡ ዮም፡ እንዘ፡ ትጠይስ፡ ብድውታ፡ ወአትክልቲሃኒ፡ እመ፡ በጊዜሃ፡ ይፈርዩ፡ ዘኢኮኑ፡ ፍጹማነ።
8 ወነፍስ፡ እንተ፡ ኢአምነት፡ ዝክረ፡ ቆመት፡ ሐውልተ፡ ፄው፡ ዘያስተርኢ።
9 እስመ፡ እልክቱ፡ እለ፡ ተዐደዉ፡ ትእዛዘ፡ አኮ፡ ከመ፡ ዘኃሥሩ፡ በአእምሮ፡ ርደተ፡ መዓት፡ እንተ፡ በጽሐቶሙ፡ አላ፡ ኀደጉ፡ ውስተ፡ ዓለም፡ ለዕበዶሙ፡ ዝክረ፡ ከመ፡ ኢይትከሃሎሙ፡ ኅብአተ፡ አበሳ፡ እንተ፡ አበሱ።
10 ጥበብሰ፡ ባልሐት፡ እለ፡ ይትለአክዋ፡ እምፃማ፡ ወሕማም።
11 ዛቲ፡ መርሐት፡ ውስተ፡ ፍኖተ፡ ርትዕ፡ ጻድቀ፡ ዘጐየ፡ እምዓተ፡ እኁሁ፡ ወአርአየቶ፡ መንግሥተ፡ እግዚአብሔር፡ ወወሀበቶ፡ አእምሮ፡ ቅዱሳን፡ ወአርኀበት፡ ሎቱ፡ ብዕሎ፡ እምፃማሁ።
12 ወእምእለ፡ የኃይድዎ፡ ወይትኄየልዎ፡ ቆመት፡ ሎቱ።
13 ወረድአቶ፡ ወዓቀበቶ፡ ወተማኅፀነቶ፡ እምአዕራሪሁ፡ ወአድኀነቶ፡ እምእለ፡ ዐገትዎ፡ ወሠርዓቶ፡ አመ፡ ጸገወቶ፡ ገድለ፡ ጽኑዐ፡ ከመ፡ ያእምር፡ እስመ፡ ተቀንዮ፡ ለእግዚአብሔር፡ በሠናይ፡ ይጸንዕ፡ እምኵሉ።
14 ዛቲ፡ ኢኀደገት፡ ጽድቀ፡ ተሣይጦ፡ ወወረደት፡ ምስሌሁ፡ ውስተ፡ ግብፅ፡ ወአድኀነቶ፡ እምኀጢአት።
15 ወውስተ፡ ሙቃሔሑ፡ ኢኃደገቶ፡ እስከ፡ ሶበ፡ አምጽአት፡ ሎቱ፡ ሢመተ፡ መንግሥት፡ ወምልክና፡ ላዕለ፡ እለ፡ ተኃየልዎ።
16 ወከሠተት፡ ሐሰቶሙ፡ ለእለ፡ አንወርዎ፡ ወመነንዎ፡ ወወሀበቶ፡ ክብረ፡ ዘለዓለም።
17 ዛቲ፡ ባልሐት፡ ሕዝበ፡ ጻድቀ፡ ወዘርአ፡ ዘአልቦ፡ ነውር፡ ወኂስ፡ እምአሕዛብ፡ እለ፡ ያመነድቡ፡ በዊአ፡ ውስተ፡ ነፍሰ፡ ገብረ፡ እግዚአብሔር።
18 ወተቃወመት፡ ነገሥተ፡ ብዙኃነ፡ በተአምራት፡ ወበመንክራት፡ ወወሀበቶሙ፡ ዐስበ፡ ፃማሆሙ።
19 ወመርሐቶሙ፡ መንክረ፡ ወኮነቶሙ፡ በመዓልት፡ ጽላሎተ፡ ወበሌሊት፡ ህየንተ፡ ሥርቀተ፡ ከዋክብት፡ ጸዳለ።
20 ወአዕደወቶሙ፡ ባሕረ፡ መፍርሀ፡ ወአኀለፈቶሙ፡ እምተ፡ ማእከለ፡ ማይ፡ ብዙኅ።
21 ወፀሮሙሰ፡ አስጠመት፡ ወአዕረገቶሙ፡ እማዕምቀ፡ ቀላይ።
22 ወበእንተዝ፡ ጻድቃን፡ ማህረኩ፡ ረሲዐነ፡ ወአእኰቱ፡ እግዚኦ፡ ስመከ፡ ቅዱሰ።
23 ወእዴከ፡ መስተቃትልተ፡ ወመዋዒተ፡ ሰብሑ፡ ኅቡረ፡ እስመ፡ ጥበብ፡ ከሠተት፡ አፈ፡ በሀማን፡ ወረሰየት፡ ልሳነ፡ ሕፃናት፡ ርቱዐ፡ ነባቤ።
=== chapter 11 ===
[Chapter 11]
1 እስመ፡ ውእቱ፡ ሠርዐ፡ ምግባሮ፡ በእደ፡ ነቢዩ፡ ቅዱስ፡ ወአንሶሰዉ፡ ወነገዱ፡ ብሔረ፡ በድው፡ ዘኢኀደሮ፡ መኑሂ፡ ወተከሉ፡ ወታክለ፡ ደባትሪሆሙ፡ ውስተ፡ መካን፡ እንተ፡ ኢተከይደት።
2 ወታወምዎሞሙ፡ ለመስተቃትላን፡ ወተበቀሉ፡ አፅራረ።
3 ጸምኡ፡ ወጸውዑከ፡ ወተውህበ፡ ሎሙ፡ ማይ፡ እምኰኵሕ፡ እዝኅ።
4 ወፈውሰ፡ ለጽኦሙ፡ እምእብን፡ ጽኑዕ፡ እስመ፡ በዝንቱ፡ ግበር፡ ተኰነኑ፡ ወተቀትሉ፡ አፅራሪሆሙ።
5 ወበዝንቱ፡ አሠነይከ፡ ሎሙ፡ ሶበ፡ ተመንደቡ፡ ወዓፀቦሙ።
6 ወህየንተ፡ ነቅዐ፡ ፈለግ፡ ዘኢይትነግ፡ ዘሐመግዎ፡ እልክቱ፡ በደ፡ ቅቱላን፡ ወሀብኮሙ፡ ማየ፡ ብዙኀ፡ ዘእንቃዕከ፡ ፍጡነ፡ ዘእንበለ፡ አሰፍዎ፡ ለዘለፋ፡ ብእሲት፡ ቀታሊተ፡ ሕፃናት።
7 ወከማሁ፡ ኮነንከ፡ ተቃዋምያነ፡ አመ፡ አመከሩከ፡ ሶበ፡ ጸምኡ።
8 ወእሙንቱሰ፡ በምሕረት፡ ተገሠፁ፡ ወአእመሩ፡ እፎ፡ ከመ፡ ተኰነኑ፡ በመዓት።
9 እስመ፡ ለእሉሰ፡ ከመ፡ አብ፡ መገዕሥ፡ አምከርከ።
10 ወለእልክቱሰ፡ ከመ፡ ንጉሥ፡ ዘእንበለ፡ ምሕረት፡ ዴገንከ፡ ወፈተንከ፡ ወበዝንቱ፡ አምሳል፡ ቀሠፍኮሙ።
11 ወአተከዝኮሙ፡ እንዘ፡ ኢሀለዉ፡ ወእንዘ፡ ሀለዉ፡ እስመ፡ አኀዞሙ፡ ኀዘን፡ ምክዕቢት፡ ወገዓረ፡ ተዝካር፡ ዘእኩይ፡ አእምሮ፡ ዘኀለፈ።
12 አመ፡ ሰምዑ፡ ከመ፡ አሠነይ፡ ሎሙ፡ በምንዳቤሆሙ፡ ወእሙንቱሂ፡ ረሰይዎ፡ ተድላ፡ ዘእምእግዚአብሔር።
13 ወዓዲ፡ ለዘሂ፡ ገደፉ፡ ቀዲሙ፡ ውስተ፡ ሕሰም፡ ቀብዕዎ፡ ወጐዩ፡ እምኔሁ፡ በሥላቅ።
14 ወአንከሩ፡ እምፍጻሜ፡ ፀአተ፡ ትእዛዝ፡ አኮ፡ እሙንቱ፡ ዘጸምኡ፡ በከመ፡ ጸምኡ፡ ጻድቃን።
15 ወህየንተ፡ እከየ፡ ሕሊናሆሙ፡ እንተ፡ አልባቲ፡ አእምሮ፡ እስመ፡ ሶበ፡ ስሕቱ፡ ባቲ፡ አምለኩ፡ እንስሳ፡ ዘኢይነብብ፡ ሀብተ፡ ምኑነ፡ ወከንቶ።
16 ፈኖከ፡ ላዕሌሆሙ፡ ለተበቅሎ፡ ብዙኀ፡ እንስሳ፡ ዘኢይነብብ፡ ከመ፡ ያእምሩ፡ እስመ፡ በግብር፡ ዘይኤብስ፡ ሰብእ፡ ቦቱ፡ ይትኴነን።
17 እስመ፡ ኢይሰአኖ፡ ለእዴከ፡ እንተ፡ ኵሎ፡ ይክል፡ ወየማንከ፡ እንተ፡ ፈጠረት፡ ዓለመ፡ እምነ፡ ከንቱ፡ ዘአልቦቱ፡ ገጽ፡ ከመ፡ ትፈኑ፡ ላዕሌሆሙ፡ ብዙኃነ፡ ድባተ፡ ወመዓትማነ፡ አናብስተ።
18 ወእመ፡ አኮ፡ አራዊተ፡ ምሉአነ፡ መዓት፡ ግብተ፡ ዘተፈጥሩ፡ እለ፡ ኢይትአመሩ፡ ዘያነፍሱ፡ እሳተ፡ ዘይነፍሕ፡ ወያልህብ፡ ወእመአኮ፡ እለ፡ ፄና፡ ጢስ፡ ፍጉገ፡ ይሥዕዩ፡ ወአመ፡ አኮ፡ እምውስተ፡ ዓይኖሙ፡ ጸዋግ፡ ቀለምጺጸ፡ እለ፡ ይበርቁ።
19 አኮ፡ ባሕቲቱ፡ እከዮሙ፡ ወኵነኔሆሙ፡ ዘይክል፡ ከመ፡ ይሕርዖሙ፡ አላ፡ ራእዮሙሂ፡ እምገረሞሙ፡ ወእምቀተሎሙ።
20 ወዘእንበለ፡ ዝኒ፡ በአሐቲ፡ ትእምርት፡ እምደለዎሙ፡ ከመ፡ ይደቁ፡ እንዘ፡ ትሰድዶሙ፡ በቃልከ፡ ወትሥዕዮሙ፡ በመንፈሰ፡ ኃይልከ።
21 ወባሕቱ፡ ኵሎ፡ በዓቅም፡ ወበኊልቊ፡ ወበመዳልው፡ ሠራዕከ፡ እስመ፡ ዕበየ፡ ክሂሎትከ፡ ህልው፡ ኀቤከ፡ ዘልፈ።
22 ወለኃይለ፡ እዘዘ፡ መዝራዕትከ፡ መኑ፡ ይትቃወማ፡ እስመ፡ ከመ፡ ለጽሊጸ፡ ልሳነ፡ መዳልው፡ ኵሉ፡ ዓለም፡ በቅድሜከ፡ ወከመ፡ ነጥበ፡ ጠል፡ በቅድሜከ፡ እንተ፡ ነግህ፡ ወረደት፡ ዲበ፡ ምድር።
23 ትምህር፡ ኵሎ፡ እስመ፡ ከሃሊ፡ አንተ፡ ላዕለ፡ ኵሉ፡ ወኢትትኄየይ፡ ኃጣውአ፡ ሰብእ፡ እንዘ፡ ትጸንሕ፡ ለንስሓ።
24 ታፈቅር፡ ኵሎ፡ እለ፡ ሀለዉ፡ ወአልቦ፡ ዘትሜንን፡ ምንተኒ፡ እምዘገበርከ፡ እስመ፡ አልቦ፡ ዘገበርከ፡ እንዘ፡ ትጸልእ፡ ወሶበሰ፡ ጸላእከ፡ ምንተኒ፡ እምኢገበርከ፡ ወእፎመ፡ እምጸንዐ፡ በቅድሜከ።
25 ወእመ፡ ለሊከ፡ ኢፈቀድከ፡ እፎመ፡ እምተዓቅበ፡ ዘኢጸዋዓከ፡ አንተ።
26 ትምሀክ፡ ወትሣሃል፡ ላዕለ፡ ኵሉ፡ ፍጥረት።
=== chapter 12 ===
[Chapter 12]
1 ኦ፡ እግዚኦ፡ መፍቀሬ፡ ሰብእ፡ እስመ፡ እንቲአከ፡ ይእቲ፡ ጥበብ፡ እስመ፡ ዘኢይጠፍእ፡ መንፈስከ፡ ኄር፡ ሀሎ፡ ውስተ፡ ኵሉ።
2 በእንተ፡ ዝንቱ፡ ትዘልፍ፡ ለእለ፡ ወድቁ፡ በዘሕቅ፡ ዘከመ፡ ይደሉ፡ ለንባብ፡ ወአበሳ፡ እንተ፡ አበሱ፡ እንዘ፡ ታዜክሮሙ፡ ወትጌሥፆሙ፡ ከመ፡ ሶበ፡ ይጤይቁ፡ ርኂቆሙ፡ እምእከዮሙ፡ ይእመኑ፡ ብከ፡ እግዚኦ።
3 እስመ፡ ለቀደምት፡ እለ፡ የኀድሩ፡ ዲበ፡ ምድርከ፡ ቅድስት፡ ጸላእከ፡ በእንተ፡ ምግባራቲሆሙ፡ ግብረ፡ ሥራይ፡ ጽሉእ፡ ወበዓላቲሆሙኒ፡ ዘርኁቅ፡ እምጽድቅ።
4 ወቅትለተ፡ ውሉዶሙ፡ ዘእንበለ፡ ምሕረት፡ ወአስተበውሖቶሙሰ፡ በሊዐ፡ ንዋየ፡ ውሥጠ፡ ከርሦሙ፡ ለሰብእ፡ ወሥጋሆሙ፡ ወደሞሙ።
5 እስመ፡ ተአተተ፡ እማእከሎሙ፡ አእምሮ፡ ምሥጢራተ፡ መለኮትከ፡ ወለነፍስ፡ እንተ፡ አልባቲ፡ ረድኤት፡ እምኀበ፡ መኑሂ፡ ይቀትሉ፡ ነፍሳቲሆሙ፡ ፈቀድከ፡ ታኅጒሎሙ፡ በእደ፡ አበዊነ፡ ከመ፡ ይንሥኡ፡ ደቂቀ፡ እግዚአብሔር፡ ምኅደረ፡ ዘይደሉ፡ ሎሙ፡ እንተ፡ እምኀቤከ፡ ክብርት፡ እምኵሉ፡ ምድር።
6 ወባሕቱ፡ ኪያሆሙኒ፡ መሐርከ፡ ዘከመ፡ ትምሕር፡ ሰብአ፡ ወሶበ፡ ፈኖከ፡ መራደ፡ ትንንያ፡ ይቅድሙ፡ ተዓይኒከ፡ ኪያሆሙ፡ በበሕቅ፡ ይሥርዉ።
7 ወእመ፡ አኮ፡ እምኢተስእነከ፡ ከመ፡ ታግብኦሙ፡ ለረዓሲን፡ ውስተ፡ እዴሆሙ፡ ለጻድቃን፡ በበዖታሆሙ፡ ይፄውውዎሙ።
8 ወእመ፡ አኮ፡ ትመጥዎሙ፡ ለአራዊት፡ ጸዋጋን፡ ወእመ፡ አኮ፡ በእሉኒ፡ በአሐዱ፡ ቃል፡ አዚዘከ፡ ታጥፍኦሙ።
9 ፈታሕከ፡ ይኩን፡ ዝንቱ፡ በበሕቅ፡ እንዘ፡ ትሁብ፡ ኪያሆሙ፡ መካን፡ ለንስሐ፡ አኮ፡ ኢያእሚረከ፡ ከመ፡ እኩይ፡ ሀልዎቶሙ፡ ወእከዮሙ፡ ጥቀ፡ ፈድፋደ።
10 ወከመ፡ ኢይትመየጥ፡ ሕሊናሆሙ፡ ለዓለም፡ እስመ፡ እሙንቱ፡ ዘርእ፡ ርጉም፡ እምትካት፡ ወአኮ፡ ኀፊረከ፡ መነሂ፡ ለአበሳ፡ ዘአበሱ፡ ትሁቦሙ፡ ዕድሜ።
11 ወመኑ፡ ውእቱ፡ ዘይብለከ፡ ምንተ፡ ገበርከ፡ ወመኑ፡ ውእቱ፡ ዘይትቃሞ፡ ለኵነኔከ፡ ወመኑ፡ ውእቱ፡ ዘያስተዋድከ፡ ወይትኃሠሠከ፡ በእንተ፡ አሕዛብ፡ ዘተኀጒሉ፡ ዘአንተ፡ ገበርከ።
12 ወመኑ፡ ውእቱ፡ መኰንን፡ ዘይበጽሕ፡ ኀቤከ፡ ለተዋቅሦ፡ በእንተ፡ ሰብእ፡ ዓማዕያን፡ እስመ፡ አልቦ፡ ባዕድ፡ አምላክ፡ ዘእንበሌከ፡ ዘይሔሊ፡ በእንተ፡ ኵሉ፡ ከመ፡ ታርኢ፡ ከመ፡ አኮ፡ ግፍዐ፡ ዘኰነንከ።
13 ኢ፡ ንጉሥ፡ ወኢ፡ መኰንን፡ ወኢ፡ መስፍን፡ ኢይክል፡ ተናጽሮ፡ ምስሌከ፡ እንዘ፡ ይሔምየከ፡ በእንተ፡ እለ፡ ኰነንኮሙ።
14 እስመ፡ ጻድቅ፡ አንተ፡ ዘበጽድቅ፡ ትሠርዕ፡ ኵሎ፡ ረሰይከ፡ ግብረ፡ ነኪረ፡ እምነ፡ ኃይልከ፡ ዘኢኮነ፡ መፍትወ፡ ለኰንኖ፡ ከመ፡ ትኰንን።
15 እስመ፡ ኃይልከ፡ ቀዳሚሃ፡ ለጽድቅ፡ እስመ፡ ቅንየትከ፡ ወምልክናከ፡ ኵሎ፡ ይሬስየከ፡ ትሣሃል፡ ላዕለ፡ ኵሉ።
16 እስመ፡ ከሠትከ፡ ኃይለከ፡ ለዘኢየአምን፡ ፍጻሜ፡ ክሂሎትከ፡ ወለእለ፡ ኢየአምኑ፡ ትዘልፍ፡ ተሀብሎቶሙ።
17 ወእንዘ፡ አንተ፡ መኰንን፡ ኃያል፡ ዘበየዋሃት፡ ትኴንን፡ ወምስለ፡ ብዙኅ፡ ምሕረት፡ ታሄልወነ፡ ወማእዜ፡ እመ፡ ፈቀድከ፡ እስመ፡ ክሂል፡ ሀሎ፡ ኀቤከ።
18 ወመሐርከ፡ ሕዝበከ፡ በዘከመዝ፡ ምግባር፡ ከመ፡ መፍትው፡ ይኩን፡ ጻድቅ፡ ወርኅሩኅ፡ ወመፍቀሬ፡ ሰብእ።
19 ወሠናየ፡ ተስፋ፡ ረሰይከ፡ ለወልድከ፡ ወተናገርኮሙ፡ ለውሉድከ፡ እስመ፡ አንተ፡ ትሁብ፡ ለአባሲ፡ ንስሐ።
20 ወሀበኒ፡ ሀለዉ፡ ፀረ፡ ደቂቅከ፡ እልክቱ፡ እለ፡ ድልዋን፡ ለመዊት፡ ምስለ፡ መጠነዝ፡ ትዕግሥት፡ ኰነንከ፡ ወወሀብኮሙ፡ መዋዕለ፡ ወፍኖተ፡ ከመ፡ ይድኀኑ፡ ባቲ፡ እምእኩይ።
21 ወሚመጠነ፡ በጥንቃቄ፡ ትኴንን፡ ውሉደከ፡ እለ፡ ወሀብኮሙ፡ መሐላ፡ ወኪዳነ፡ ተስፋ፡ ወእንዘ፡ ትጌሥፅ፡ ኪዳነ።
22 ወጸረነሂ፡ በብዙኅ፡ ኵነኔ፡ ምእልፊተ፡ ትቀሥፍ፡ ከመ፡ ሶበ፡ ትኴንኖሙ፡ ኂሩተከ፡ ንዘከር፡ ወንትመሰሎ።
23 ወሶበሂ፡ ንትኴነን፡ ንሴፎ፡ ሣህለከ፡ ወበዝየሰ፡ ኰነንከ፡ ዓማፅያነ፡ እለ፡ በዕደው፡ ሐይዉ፡ ሕይወተ፡ ወነበሩ፡ በኃጢአት።
24 ወኰነንኮሙ፡ በዘዚአሆሙ፡ ርኵሰ፡ እስመ፡ ተኀጒሉ፡ በነዋኅ፡ ፎኖተ፡ ስሕተት፡ አማልክተ፡ እንዘ፡ ይበሉ፡ ኅሡራነ፡ እንስሳ፡ ዘበኀበ፡ አንፃሪሆሙ።
25 ወሐሰዉ፡ ከመ፡ ከቂቅ፡ እለ፡ አልቦሙ፡ አእምሮ፡ በእንተዝ፡ ከመ፡ ሕፃናት፡ እለ፡ አልቦሙ፡ ንባበ፡ ፈኖከ፡ ላዕሌሆሙ፡ ኵነኔ፡ ዘከመ፡ ተውኔቶሙ።
26 ወሶበ፡ ተገሠፁ፡ ተግሣፀ፡ መዓት፡ ይጥዓሙኬ፡ ኅብስተ፡ ኵነኔሁ፡ ለእግዚአብሄር፡ ጻድቅ፡ እስመ፡ እሙንቱ፡ አንጐርጐሩ፡ በዘረከቦሙ፡ ሕማም፡ ወተአንተሉ።
27 ወበእልክቱ፡ እለ፡ ሐላይዎሙ፡ አማልክተ፡ ሶበ፡ ተኰነኑቦሙ፡ የአምርዎ፡ ለዘክሕድዎ፡ ቀድሙ፡ ወየአምርዎ፡ ከመ፡ ውእቱ፡ አምላክ፡ ዘበጽድቅ፡ ወበእንተዝ፡ በጽሖሙ፡ ፍጻሜሁ፡ ለበቀል።
=== chapter 13 ===
[Chapter 13]
1 እስመ፡ ኵሉ፡ ሰብእ፡ እለ፡ ሕፀተ፡ አእምሮ፡ እግዚአብሔር፡ ህልው፡ ውስቴቶሙ፡ በአማን፡ ከንቱ፡ እሙንቱ፡ ወበዘያስተርእዩ፡ ሠናያት፡ ስእኑ፡ ያእምሩ፡ ዘህልው፡ ወእንዘሂ፡ ይሬእዩ፡ ምግባራቲሁ፡ ኢያእመርዎ፡ ለኬንያ።
2 ወባሕቱ፡ ሐለዩ፡ እሳተ፡ ወነፋሰ፡ ዘፍጡነ፡ አው፡ ዑደተ፡ ከዋክብት፡ አው፡ ማየ፡ ኅዩለ፡ አው፡ ብርሃናተ፡ ሰማይ፡ እለ፡ ይትለአኩ፡ ለሥርዓተ፡ ዓለም፡ አማልክተ፡ አምሰሉ።
3 ወለእመ፡ ለእሉ፡ ምግባራት፡ ረሰይዎሙ፡ አማልክተ፡ ሶበ፡ ተፈሥሑ፡ በአድሞ፡ ሥነ፡ ላህዮሙ፡ ያእምሩ፡ እፎ፡ ፈድፋደ፡ እግዚኦሙ፡ ለእሉ፡ ይኄይስ፡ እስመ፡ ወላዴ፡ ሥነ፡ ገብረ፡ ዘንተ፡ ፍጥረተ።
4 ወሶበሰ፡ እምኃይሎሙ፡ ወምግባሮሙ፡ ተደሙ፡ ይለብዉኬ፡ እፎ፡ ፈድፋደ፡ ዘገብሮሙ፡ ኅዩል፡ ውእቱ።
5 ቦዑ፡ ዕበየ፡ ሥነ፡ ዘፍጥረት፡ ርእዮሙ፡ ፍቱራን፡ ቦቱ፡ አስተማሰልዎ፡ ለገባሬ፡ ክዋኔሁ።
6 ወባሕቱ፡ ምስለ፡ ዝኒ፡ ዓዲ፡ ኂስ፡ ንስቲት፡ ላዕሌሆሙ፡ እስመ፡ እሙንቱሂ፡ እንጋ፡ ሶበ፡ ስሕቱ፡ እንዘ፡ የኃሥሥዎ፡ ለአምላክ፡ ወይፈቅዱ፡ ይርከብዎ፡ ተመይጦ፡ ውስተ፡ ምግባሩ፡ አምኃሠሥዎ።
7 ወአእከሉ፡ በርእይ፡ እስመ፡ እለ፡ ያስተርእዩ፡ ሠናያን፡ ዓዲ፡ እስመ፡ ምክንያቶሙ፡ ስፉሕ።
8 እስመ፡ በዝንቱ፡ ገጽ፡ ዘመጠነዝ፡ ክህሉ፡ ይነጽሩ፡ እስከ፡ ደለዎሙ፡ ጠይቆተ፡ ዓለም፡ ወእመሰ፡ ኢክህሉ፡ ይርደብዎ፡ ለእግዚአ፡ እሉ፡ ፍጡራን።
9 ኅሡራንኬ፡ እሙንቱ፡ ወበውስተ፡ ምግባርኒ፡ ምውት፡ ተስፋሆሙ፡ እለ፡ ጸውዑ፡ ግብረ፡ እደ፡ ሰብእ፡ አማልክተ፡ ዘእምወርቅ፡ ወዘእምብሩር፡ ገብርዎሙ፡ በተኬንዎ፡ ምግባር።
10 ወአምሳለ፡ እንስሳ፡ አው፡ እብነ፡ ዘኢይበቊዕ፡ ግብረ፡ እድ፡ ዘትካት።
11 ወእመኒቦ፡ ጸራቢ፡ ዘይጸርብ፡ ዕጸ፡ ዘያስተርኢ፡ ወዘኢይትሐወስ፡ እስመ፡ ወሠረ፡ ዕፀ፡ ዘሠናይ፡ ሠረፀ፡ ወጸረበ፡ በሥነ፡ ኪኑኵሎ፡ ቅርፍቶ።
12 ወተኬነዎ፡ ሠና፡ ወገብሮ፡ ዘይበቊዕ፡ ንዋየ፡ ለመልእክተ፡ ሕይወት፡ ወፈጸመ፡ ፀሪበ፡ ገግብሩ፡ ዘአስተዋፅኦ፡ ለመልእክተ፡ ሲሲት፡ ወጸግበ።
13 ወዓዲ፡ ግማደ፡ ዘተርፈ፡ እምዕፅ፡ ዘኢይበቊዕ፡ በምንትኒ፡ ዕፅ፡ ጽኑዕ፡ ወጠዋይ፡ ዘአፅጹቂሁ፡ ኵለሄ፡ ነሢኦ፡ ወጸሪቦ፡ በአስተሐምሞ፡ ግብሩ፡ ወእምዝ፡ ገለፎ፡ በመዋዕለ፡ ጽርዓቱ፡ ወመሰሎ፡ በአምሳለ፡ ሰብእ።
14 አው፡ አስተማሰሎ፡ በእንስሳ፡ ከንቱ፡ ወቀብዖ፡ በኅጒሬ፡ ወሤረዮ፡ ወአቅየሐይሖ፡ በአጽፋር፡ ወመልአ፡ ጥላቄ፡ ዘቦቱ።
15 ወገብረ፡ ቤተ፡ ዘውቅሮ፡ ዘሎቱ፡ ይደሉ፡ ወአንበሮ፡ ውስተ፡ መካን፡ ዘአውቀረ፡ ሎቱ፡ ወውስተ፡ አረፍት፡ አጥበቆ፡ ወአጽንዖ፡ በሐፂን።
16 ወአስተሐመመ፡ ቦቱ፡ ከመ፡ ኢይደቅ፡ አእሚሮ፡ ከመ፡ ኢይክል፡ ርእሶ፡ ረዲአ፡ እስመ፡ ምስል፡ ውእቱ፡ ወይፈቅድ፡ ዘይረድኦ።
17 ወያስተበቊዕ፡ ኀቤሁ፡ በእንተ፡ ጥሪቱ፡ ወብእሲቱ፡ ወውሉዱ፡ ወኢየኀፍር፡ እንዘ፡ ይትናገር፡ ምስለ፡ ዘአልቦቱ፡ ነፍስ።
18 ወየኀሥሥ፡ በእንተ፡ ፈውስ፡ ኀበ፡ ድውይ፡ ወበእንተ፡ ሕይወትኒ፡ ምውተ፡ ይስእል፡ ወያስተበቊዕ፡ ኀበ፡ ዘአልቦቱ፡ አእምሮ፡ በእንተ፡ ንብረት፡ ወይትመሀለል።
19 ወበእንተ፡ ሐዊረ፡ ፍኖት፡ ይስእል፡ ኀበ፡ ዘኢይክል፡ ይትሐወስ፡ ወኢየሐውር፡ አሐተ፡ ምሥጋረ፡ ወበእንተ፡ ብዕል፡ ወምግባር፡ ወረኪብ፡ ወለአርትዖ፡ እግረ፡ እድ፡ ኀበ፡ ዘኢይገብራ፡ እደዊሁ፡ ምንተኒ፡ ይስእል፡ ወየኃሥሥ፡ እምኔሁ፡ ይጸግዎ፡ ኃይለ፡ ወአፍጥኖ፡ ምግባር።
=== chapter 14 ===
[Chapter 14]
1 ወካዕበ፡ ሶበ፡ ይፌኑ፡ ሰብአ፡ ይዕርግ፡ ሀመረ፡ ውስተ፡ ባሕር፡ እንዘ፡ ይፈቅድ፡ ይንግድ፡ ውስተ፡ ፀዋጋት፡ ሞገዳት፡ ይስእል፡ ወይጸርህ፡ ኀበ፡ ዕፅ፡ ዘየኃሥር፡ ወይደክም፡ እምሐመር፡ እንተ፡ ትፀውሮ።
2 እስመ፡ ለዝኩ፡ ጣዖት፡ በፍትወተ፡ ረባኅ፡ ተኬንዎ፡ ወኬንያ፡ በጥበብ፡ ገብሮ።
3 ወእንቲአከሰ፡ ኃዳፍ፡ ኦ፡ አብ፡ ትሠርዕ፡ ኵሎ፡ እስመ፡ ወሀብከ፡ ውስተ፡ ባሕር፡ ፍኖተ፡ ወውስተ፡ ሞገድ፡ አሠረ፡ ጽኑዐ፡ ታርኢ፡ ከመ፡ ትክል፡ ኵሎ፡ አድኅኖ፡ በጽድቅ።
4 ወበአዕርጎሂ፡ ውስተ፡ ሐመር፡ ወዘእንበለ፡ ኪንሂ፡ ዓዲ፡ አሕለፍከ፡ እስመ፡ ትፈቅድ፡ ከመ፡ ኢይኩን፡ ጽሩዐ፡ ምግባሪሃ፡ ለጥበብከ።
5 በእንተ፡ ዝንቱ፡ ይትአመኑ፡ ሰብእ፡ ነፍሶሙ፡ ውስተ፡ ዕፅ፡ ምኑን፡ ወኅሡር፡ ወይትዓደዉ፡ ማእከለ፡ መዋግድ፡ በሐመር፡ ንኡስ፡ ወበአርማስ፡ ወይድኅኑ።
6 ወቀዲሙኒ፡ እመ፡ ተኀጒሉ፡ ዕቡያን፡ ረዓይት፡ ውስተ፡ ዕፅ፡ ተስፋ፡ ዓለም፡ ተፀዊሮ፡ ወተፀዊኖ፡ ድኅነ፡ ወኀደገ፡ ለዓለም፡ ዘርአ፡ ትውልድ፡ ተኀዲፎ፡ በእደ፡ ዚአከ።
7 እስመ፡ ተባረክ፡ ዕፅ፡ በዘቦቱ፡ ይትገበር፡ ጽድቅ።
8 ወዘበዕበድሰ፡ ተገብረ፡ ርጉም፡ ውእቱ፡ ወዘገብሮኒ፡ እስመ፡ ውእቱ፡ ግብር፡ በላዪ፡ ውእቱ፡ ወዘይማስን፡ አምላከ፡ ተሰምየ።
9 እስመ፡ ዕሩየ፡ ተጸልኡ፡ በኀበ፡ እግዚአብሔር፡ ረሲዕኒ፡ ወርስዓት።
10 እስመ፡ ግብር፡ ዘተገብረ፡ ምስለ፡ ገባሪሁ፡ ይትኴነን።
11 ወበእንተዝ፡ ሐተታ፡ ይከውን፡ በኀበ፡ ጣዖቶሙ፡ ለአሕዛብ።
12 እስመ፡ ተገብረ፡ ፍጥረት፡ ለአኅጒሎ፡ ወማዕቅፈ፡ ለነፍሳተ፡ ሰብእ፡ ወመሥገርተ፡ ለአእጋረ፡ ሰብእ፡ ዓብዳን፡ እስመ፡ ቀዳሚሃ፡ ለዝሙት፡ ሐል፡ ውስተ፡ ፈጣሪሁ፡ ለጣዖት።
13 ወረኪቦቱ፡ ሙስናሃ፡ ለሕይወት፡ እስመ፡ ኢሀሎ፡ እምፍጥረት፡ ወኢይሄሉ፡ ለዓለም።
14 ወበምክንያተ፡ ሰብእ፡ ከንቱ፡ ቦአ፡ ውስተ፡ ዓለም፡ ከመዝ፡ በእንተ፡ ዘያፈጥን፡ ፍጻሜ፡ ኅልፈተ፡ ምስጠቶሙ።
15 ወእምዝ፡ ሐለዩ፡ በጊረ፡ ጣዖት፡ እስመ፡ አብ፡ ይፄዓር፡ ወይላሁ፡ ላዕለ፡ ዘአሐዱ፡ ሎቱ፡ እስመ፡ እንዘ፡ ቆዑ፡ ተመሥጠ፡ ሕፃኑ፡ ፍጡነ።
16 አምሳለ፡ ዘገብሩ፡ ሎቱ፡ ቀዲሙ፡ ለዘሞተ፡ ሰብእ፡ ይእዜሰ፡ ከመ፡ አምላክ፡ አክበርዎ፡ ወወሀብዎ፡ ቅኑያን፡ ለኃጢአት፡ በዓላተ፡ በጉሃን፡ ወመሥዋዕተ፡ ምሥጢር።
17 ወእምዝ፡ በርኅቀተ፡ መዋዕል፡ ተእኅዘ፡ ልማደ፡ እብሰት፡ ወርስዐት፡ ወከመ፡ ዘሕግ፡ ዓቀብዎ፡ ወበትእዛዘ፡ መኳንንት፡ እኩያን፡ አምለክዎሙ፡ ለግልፎዋት፡ ወለእለ፡ ይትከሀሎሙ፡ ለሰብእ፡ ያክብርዎሙ፡ በቅድመ፡ ገጾሙ።
18 እስመ፡ ርኁቀ፡ ሀለዉ፡ ወመሰሉ፡ ገጾሙ፡ ዘርኁቅ፡ መልክዑ፡ ወገብሩ፡ ለንጉሥ፡ ዘክቡር፡ በኀቤሆሙ፡ አምሳለ፡ ክሡተ፡ ለዘኢሀሎ፡ ከመ፡ ዘሀሎ።
19 ያስተበቊዕ፡ በጻሕቅ፡ ወለእለሂ፡ ኢአምሩ፡ ስሕተቶሙ፡ ፀንዑ፡ በአምልኮቶሙ፡ ወሜጡ፡ ክብረ፡ ኬንያ፡ ውስተ፡ ኪነ፡ እደ፡ ሰብእ።
20 ወቦ፡ ካዕበ፡ ዘይፈቅደ፡ ያድሉ፡ ወያሥምሮ፡ ለነጋሢ፡ አኃዚ፡ ተጠናቀቀ፡ ለገቢረ፡ አምሳሉ፡ በዘይሤኒ፡ ወበዘይኄይስ።
21 ወበውእቱ፡ ተስሕበ፡ ሰብእ፡ ብዙኅ፡ በእንተ፡ ፍሥሐሆሙ፡ በሥነ፡ ላህየ፡ ምግባር፡ ወለብእሲ፡ ዘሀሎ፡ እምቅድመ፡ መዋዕል፡ በንስቲት፡ ክብር፡ ይእዜሰ፡ ከመ፡ አምላክ፡ ረሰይዎ።
22 ወዝንቱ፡ ኮነ፡ መሥገርተ፡ ዓለም፡ እስመ፡ ሰብእ፡ ተቀንየ፡ ሎቱ፡ በምንዳቤ፡ አው፡ በአገብሮ።
23 ወረሰዩ፡ ስሞ፡ ለአምላክ፡ ዘአልቦቱ፡ ሱታፌ፡ ለዕፅ፡ ወለእብን፡ ዘይረብኅዎሙ።
24 ዓዲ፡ ኢእከሎሙ፡ ስሕተቶሙ፡ እምኢያእምሮ፡ እግዚአብሔር፡ አላ፡ እንዘሂ፡ ሀለዉ፡ ውስተ፡ ፀብዕ፡ ዓቢይ፡ ዘመጠነዝ፡ ሕያዋን፡ በፅበዶሙሰ፡ ለዘመጠነዝ፡ እኩይ፡ ረሰይዎ፡ ወሰመይዎ፡ ሰላመ።
25 እስመ፡ እለ፡ ሀለዉ፡ ይቀትሉ፡ ደቂቆሙ፡ ወይገብሩ፡ ኅቡእ፡ ምሥጢረ፡ አው፡ የሐልዩ፡ ወጺኦሙ፡ እንዘ፡ ያንጎግዉ፡ በካልእ፡ ሥርዓት፡ ኢ፡ ፍናዊሆሙ።
26 ወኢ፡ ሰብሳቦሙ፡ ዓቀቡ፡ እንከ፡ ዳዕሙ፡ ካልእ፡ ይቀትሎ፡ ለካልኡ፡ ወእመ፡ አኮ፡ ይየውሆ፡ ወያስተሴፍዎ፡ በዘያደውዮ።
27 ወኵሉ፡ ምግባራቲሆሙ፡ ድሙር፡ ውስተ፡ ደም፡ ወቀትል፡ ወስርቅ፡ ወሕብል፡ ወሙስና፡ ወሕፀተ፡ አኰቴት፡ ወኢ፡ አሚን፡ ወመሐላ።
28 ወሀዊከ፡ ሠናይ፡ ወኢተዘክሮ፡ ዕሤት፡ ግማኔ፡ ነፍስ፡ ወሙያጤ፡ ልደት፡ ንስተተ፡ ሥርዓተ፡ ሰብሳብ፡ ዝሙት፡ ወርኵስ።
29 እስመ፡ አምልኮ፡ ጣዖት፡ እለ፡ አልቦሙ፡ ስም፡ ውእቱ፡ ጥንተ፡ ኵሉ፡ እከይ፡ ወምክንያተ፡ ፍጻሜሁ፡ እስመ፡ እለ፡ ያመልክዎሙ፡ ለእለ፡ ተፈሥሑ፡ ወየዓብዱ፡ ወይቀትሉ፡ ውሉዶሙ።
30 ወእመ፡ አኮ፡ ይትኔበዩ፡ ወይሔስዉ፡ ሐሰተ፡ ወእመ፡ አኮ፡ የሐይዉ፡ ኅርቱመ፡ ወእመ፡ አኮ፡ ይምሕሉ፡ ፍጡነ።
31 እስመ፡ እለ፡ እንበለ፡ ነፍስ፡ ይትአመኑ፡ ጣዖተ፡ ሕስወ፡ ወበሀመ፡ እለ፡ አልቦሙ፡ ንባብ፡ ወአእምሮ፡ አምሳለ፡ ፈጣሪ፡ ዘየአምር፡ ኵሎ፡ እስመ፡ አመ፡ መሐሉ፡ ይትኰነኑ፡ ኢይሴፈዉ።
32 ኅቡረ፡ ይረክቦሙ፡ ኵነኔ፡ ዘበጽድቅ፡ እስመ፡ ሐለዩ፡ እኩየ፡ በእግዚአብሔር፡ አመ፡ ነጸሩ፡ ጣዖተ፡ ወግፍዐ፡ መሐሉ፡ ቦቱ፡ በሕብል፡ አስተአኪዮሙ፡ ጽድቀ፡ ፈጣሪ።
33 እስመ፡ አኮ፡ በእንተ፡ ኃይልከ፡ ዘመሐሉ፡ ቦቱ፡ ዳዕሙ፡ ለአኅልፎ፡ ኵነኔ፡ አበሳሆሙ፡ ትምጻእኬ፡ እንከ፡ ኵነኔ፡ ዲበ፡ ዕልወቶሙ፡ ለገፋዕያን፡ ዘልፈ።
=== chapter 15 ===
[Chapter 15]
1 ወአንተሰ፡ አምላክነ፡ ኄር፡ ወየዋህ፡ ወፅጉሥ።
2 ወበምሕረትከ፡ ትሠርዕ፡ ኵሎ፡ እስመ፡ እመ፡ አበስነ፡ ዚአከ፡ ንሕነ፡ እንዘ፡ ነአምር፡ ጽንዓከ፡ ወለእመ፡ ኢንኤብስ፡ ባሕቱ፡ እስመ፡ ነአምር፡ ኵሎ፡ ከመ፡ እሊአከ፡ ንሕነ።
3 እስመ፡ አእምሮትከ፡ ፍጽምት፡ ጽድቅ፡ ይእቲ፡ ወአእምሮተ፡ ጽንዕከ፡ ሥርወ፡ ኢ፡ መዊት።
4 እስመ፡ ኢያስሕተነ፡ ሕሊና፡ አኩይ፡ ከነ፡ ሰብእ፡ ወኢፃማ፡ ሠርጒ፡ ዘኢይፈሪ፡ በቊዔተ፡ አው፡ ግብረ፡ እድ፡ ዘበተሤርዮ፡ ይትዌለጥ፡ ኅብሮሙ፡ ዘራእዮሙ፡ ይስሕቦ፡ ለዓብድ፡ ውስተ፡ ፍትወቶሙ፡ ይምጻእ፡ ያፍቅር፡ ባሕቱ፡ አምሳለ፡ ምውት፡ ዘእንበለ፡ ነፍስ፡ ወኢነሶሳው።
5 ፈታውያነ፡ እከይ፡ እሙንቱ፡ ይደልዎሙ፡ ዘከመዝ፡ ተስፋ፡ ለእለ፡ ይገብርዎሙኒ፡ ወለእለ፡ ያፈቅርዎሙኒ፡ ወለእለ፡ ያመልክዎሙኒ።
6 እስመ፡ ለባሐዊኒ፡ አመ፡ ሎሰ፡ ዕቡረ፡ ልምሉመ፡ ይገብር፡ ዘዘዚአሁ፡ ዘይደሉ፡ ለመልእክተ፡ ኵሉ፡ ለለ፡ አሐዱ፡ አሐዱ፡ እምኔነ።
7 ወባሕቱ፡ እምውእቱ፡ ዕቡር፡ ንዋያተ፡ ይገብር፡ ለመልእክተ፡ ምግባራት፡ ንጹሐት፡ ወለካልአትሂ፡ ምግባራት፡ ከማሆሙ፡ አምሳለ፡ እልክቱ፡ ይገብር።
8 ወተግባሮሙሰ፡ ለእሉ፡ ኵሎሙ፡ ለዘዘዚአሁ፡ መፍቅድ፡ ወፈታሒ፡ መኰንን፡ ገባሬ፡ ዕቡር፡ ውእቱ።
9 ወዘይፃሙሂ፡ ለእከይ፡ ይልሕኵ፡ እምውስተ፡ ውእቱ፡ ዕቡር፡ ከንቶ፡ አምላከ።
10 ወዝንቱ፡ እምቅድመ፡ ንስቲት፡ መዋዕል፡ ተገብረ፡ እምድር፡ ወእምድኅረ፡ ንስቲት፡ መዋዕል፡ ሀለዎ፡ ይግባእ፡ ውስተ፡ እንተ፡ ወፅአ፡ እምኔሃ።
11 ወይትኃሠሥዎ፡ በእንተ፡ ኵነኔ፡ ነፍሱ፡ ወባሕቱ፡ ፃሕቅሰ፡ ዘኀቤሁ፡ አኮ፡ ኢያእሚሮ፡ እስመ፡ ሀለዎ፡ ይፃሙ፡ ወይድክም።
12 ወኢሀልዎተ፡ ንብረቱ፡ ንስቲት፡ አላ፡ ከመ፡ ይትቃሐዎሙ፡ ለነሀብተ፡ ብሩር፡ ወወርቅ፡ ወይትማሰሎሙ፡ ለገባርያነ፡ ብርት፡ ወገቢሮ፡ ኅሡረ፡ ይጼግዎ፡ ክብረ።
13 ሐመድ፡ ልቡ፡ ወእመሬት፡ የኀሥር፡ ተስፋሁ፡ ወእምዕቡር፡ ይትሜነን፡ ፈድፋደ፡ ንብረቱ።
14 እስመ፡ ኢየአምር፡ ለዘገብሮ፡ ወአስተንፈሰ፡ ቦቱ፡ ነፍሰ፡ እንተ፡ ታሠልጥ፡ ወነፍሐ፡ ውስቴቱ፡ መንፈሰ፡ ሕይወት፡ ሠናይተ።
15 ወባሕቱ፡ እስመ፡ እሙንቱሂ፡ ሐለዩ፡ ሕይወተነ፡ ተውኔተ፡ ወሥላቀ፡ ወንብረተነ፡ ትምምርተ፡ ለረባኅ፡ እስመ፡ ውእቱ፡ ይቤ፡ የዓፅበኒ፡ እስመ፡ ኃጣእኩ፡ ወእምዝ፡ ይረብኅ፡ ወያጠሪ፡ እከየ።
16 ወናሁ፡ ተዓውቀ፡ ከመ፡ ዝንቱ፡ ይኤብስ፡ ፈድፋደ፡ እምኵሉ፡ እስመ፡ ገብረ፡ ጣዖተ፡ ዘግልፎ፡ እምዘ፡ ያስተርኢ፡ ውስተ፡ ምድር፡ ዘይማስን፡ ወይጠፍእ፡ ፍጡነ።
17 ወኵሎሙ፡ ዐብዳን፡ ወኅርቱማን፡ አሙንቱ፡ ወኵሎሙ፡ ሙታን፡ እምሕዝብ፡ ፂዉዋን፡ ወእሱራን፡ ቦቱ፡ ያፈደፍዱ፡ ዕበደ፡ አምነፍሰ፡ ሕፃናት።
18 እስመ፡ እሙንቱ፡ ሐለዩ፡ ወረሰዩ፡ ጣዖተ፡ አሕዛብ፡ አማልክተ፡ እለ፡ ኢይትከሀሎሙ፡ ተገብሮ፡ በኣዕይንቲሆሙ፡ ውስተ፡ ርእይ፡ ወኢአንፎሙ፡ ለአፄንዎ፡ ነፋስ፡ ወኢዕዝኖሙ፡ ለሰሚዕ፡ ወኢ፡ አፃብዐ፡ እደዊሆሙ፡ ለገሢሥ፡ ወኢ፡ አእጋሪሆሙ፡ ጽሩዓት፡ እምነሶሳው።
19 እስመ፡ ብእሲ፡ ገብሮሙ፡ ወመንፈስ፡ ዘተከፍለ፡ ለሐኮሙ፡ እስመ፡ ኢይትከሀሎ፡ ለሰብእ፡ ይግበር፡ አምላከ፡ አምሳሊሁ።
20 እስመ፡ እንዘ፡ መዋቲ፡ ውእቱ፡ ምውተ፡ ይገብር፡ በእደ፡ ኃጢአት፡ እስመ፡ ውእቱ፡ ይኄይስ፡ እምአማልክቲሁ፡ እስመ፡ ውእቱ፡ ሕያው፡ ወእልክቱሰ፡ ኢየሐይዉ፡ ግሙራ።
21 ወለእንስሳኒ፡ ረሰይዎሙ፡ አማልክተ፡ ያምልክዎሙ፡ በዕበድ፡ ወለእሉሰ፡ ሶበ፡ ደለዎሙ፡ በሕሊና፡ የአክዩ፡ እምካልአን፡ አማልክት።
22 ወዘሂ፡ ፈተወ፡ ፍትወተ፡ ናሁ፡ ሠለጠ፡ በአሐዱ፡ እምኔሆሙ፡ ውስተ፡ ርእየተ፡ እንስሳ፡ ወበአሐዱ፡ ዓለወ፡ እስመ፡ በዝንቱ፡ ጐየ፡ ውዳሴ፡ እግዚአብሔር፡ ወክብሩ።
=== chapter 16 ===
[Chapter 16]
1 ወበእንተዝ፡ ዘበዘይመስሎሙ፡ ለአማልክቲሆሙ፡ ተቀሥፉ፡ በጽድቅ፡ እስመ፡ ይደልዎሙ፡ ወበብዙኀን፡ እለ፡ ይትሐወሱ፡ ሕሱማን፡ ተፅዕሩ።
2 ወአሠነይከ፡ ሎሙ፡ ለሕዝብከ፡ አንፃረ፡ ፀሮሙ፡ ወወሀብኮሙ፡ ፍርፍርተ፡ መብልዐ፡ ለፍትወቶሙ፡ ወይጥዓሙ፡ ፍትወተ፡ ዘጣዕሙ፡ ነኪር።
3 ወእልክቱሰ፡ አመ፡ ፈተዉ፡ መብልዐ፡ ወባሕቱ፡ በእንተ፡ ግብር፡ ዘተፈነወ፡ ላዕሌሆሙ፡ ይትመየጡ፡ ወዘዘልፈ፡ ልማደ፡ መነኑ።
4 ወእሉሰ፡ ሶበ፡ ረከቦሙ፡ ዓፀባ፡ ወኃጥኡ፡ ኅዳጠ፡ መዋዕለ፡ ተደለዉ፡ ለመብልዕ፡ ዘነኪር፡ ጣዕሙ።
5 እስመ፡ መፍቅድ፡ ጸውዐ፡ ይብጻሕ፡ ላዕለ፡ እልክቱ፡ ኵነኔ፡ ዘእንበለ፡ ምሂክ፡ እስመ፡ ኅዩላን፡ ወእኩያን፡ እሙንቱ፡ ወከመ፡ ይርአዩ፡ እሉ፡ እፎ፡ ባሕቲቶሙ፡ ተፅዕሩ፡ አፅራሪሆሙ።
6 ወለእመ፡ መጽኦሙ፡ መዓተ፡ አራዊት፡ ፀዋጋን፡ ወኀልቁ፡ በንስከተ፡ አራዊተ፡ ምድር፡ እኩያን፡ አኮ፡ ለዝሉፉ፡ ዘፀንዐ፡ መዓትከ፡ ዳዕሙ፡ ተሀውኩ፡ ኅዳጠ፡ መዋዕለ፡ ከመ፡ ይትገሠዑ።
7 ወዝንቱ፡ ትእምርት፡ ኮኖሙ፡ መድኃኒተ፡ ያዘክሮሙ፡ ትእዛዛ፡ ሕግከ።
8 እስመ፡ ዘተመይጠ፡ እምኔሆሙ፡ አኮ፡ ዘድኅነ፡ በዘርእየ፡ አላ፡ በእንቲአከ፡ ድኅነ፡ ኦ፡ መድኃኔ፡ ኵሉ።
9 ወበዝኒ፡ አመከርኮሙ፡ ወአእመንኮሙ፡ ከመ፡ አንተ፡ ውእቱ፡ ዛታድኅን፡ እምኵሉ፡ እኩይ።
10 እስመ፡ ለእልክቱ፡ ቀተሎሙ፡ ንስከተ፡ አንበጣ፡ ወጽንጽንያ፡ ወኢተረክበ፡ ፈውስ፡ ለነፍሶሙ፡ እስመ፡ ይደልዎሙ፡ ከመ፡ ትኰንኖሙ፡ በዘከመዝ፡ አምሳል።
11 ወለውሉድከሰ፡ ሶበ፡ ተአዘዙ፡ ቦሙ፡ ስነነ፡ አክይስት፡ ዘቦቱ፡ ሕምዝ፡ እስመ፡ ምሕረትከ፡ መጽኦሙ፡ ወፈወሶሙ።
12 እስመ፡ ለተዘክሮ፡ ቃልከ፡ ጥዕሙ፡ ዘንተ፡ ወፍጡነ፡ ሐይዉ፡ ከመ፡ ኢይደቁ፡ ውስተ፡ ርስዓት፡ ዕሙቅ፡ ወከመ፡ ኢይደቁ፡ ውስተ፡ ካልእ፡ ምግባር፡ ወሕማም፡ እምዝክረ፡ ሠናያቲከ።
13 እስመ፡ አኮ፡ ዕፅ፡ ዘይሰትይዎ፡ ወኢሥራይ፡ ዘይቀብዕዎ፡ ዘፈወሶሙ፡ አላ፡ ቃለ፡ ዚአከ፡ እግዚኦ፡ ዘኵሎ፡ ይፌውስ።
14 እስመ፡ ለሞት፡ ወለሕይወት፡ ሥልጣን፡ ብከ፡ ወታወርድ፡ ውስተ፡ አናቅጸ፡ ሲኦል፡ ወታወፅእ።
15 ወሰብእሰ፡ ይቀትል፡ በእኩይ፡ ወእምከመ፡ ወፅአ፡ መንፈስ፡ ኢይገብእ፡ ወኢትሠወጥ፡ ነፍስ፡ እንተ፡ ተነሥአት።
16 ወእምእደ፡ ዚአከሰ፡ ጐይይ፡ ኢይትከሀል፡ ወኢይደሉ።
17 ወሶበ፡ አእመርከ፡ ከመ፡ ረሲዓን፡ ይክሕዱከ፡ በኃይለ፡ መዝራዕትከ፡ ተቀሥፉ፡ ወኃልቁ።
18 ወተሰዱ፡ በዝናም፡ ነኪር፡ ወበበረድ፡ ወበአስራበ፡ ሰማይ፡ ዘእንበለ፡ ምሕረት፡ ወኢክልአት፡ ወኃልቁ፡ በእሳት።
19 ወዘመንከርሰ፡ ግብር፡ ዘኢይትከሀል፡ ኵሉ፡ ዘይጠፍእ፡ በማይ፡ ፈድፋደ፡ ተገብረ፡ ወተሠልጠ፡ ውስቴቱ፡ እሳት፡ እስመ፡ ዓለም፡ መርድእ፡ ለጻድቃን፡ ውእቱ።
20 እስመ፡ ላህበ፡ ነድ፡ ኮነ፡ ልሙደ፡ ከመ፡ ኢያውዒ፡ እንስሳ፡ ዘተፈነወ፡ ላዕለ፡ ረሲዓን።
21 ወባሕቱ፡ ሶበ፡ ርእዩ፡ ዘንተ፡ እሙንቱ፡ የአምሩ፡ ከመ፡ በኵነኔ፡ እግዚአብሔር፡ ይሰደዱ፡ ወቦሙ፡ ማእከለ፡ ማይ፡ ይነድድ፡ ኃይለ፡ እሳት፡ ፈድፋደ፡ ከመ፡ ያማስን፡ ወያጥፍእ፡ ፍሬያተ፡ ምድር፡ ዓማፂት።
22 ወበህየንቴሁ፡ አብላዕከ፡ ለሕዝብከ፡ መብልዐ፡ መላእክት፡ ወፈነውከ፡ ኅብስተ፡ ድልወ፡ እምሰማይ፡ ዘእንበለ፡ ፃማ፡ ዘይትኄየል፡ ጣዕሙ፡ እምኵሉ፡ ዘይጥዕም፡ ወያኃሥር፡ ኵሎ፡ ጣዕመ።
23 እስመ፡ አርአያ፡ መልክዕከ፡ ዘላዕሉ፡ ከሠተ፡ ጣዕመ፡ ምዕርዕርናከ፡ ለውሉድከ፡ ወይትፋለስ፡ ጣዕሙ፡ ለዘይነሥእ፡ እምኔሁ፡ ወይትለአከ፡ ለፈጽሞ፡ ፍትዎቶሙ፡ ዘሐለዩ፡ እምነ፡ መባልዕት፡ ወፈቀዱ።
24 በረድኒ፡ ወአስሐትጸንዑ፡ ወቆሙ፡ ዘምስለ፡ እሳት፡ ወኢተመስዉ፡ ከመ፡ ያእምሩ፡ ከመ፡ ፍሬያተ፡ አዝርእቶሙ፡ ለአፅራር፡ አማሰት፡ ወአጥፍአት፡ እሳት፡ እንዘ፡ ትነድድ፡ ውስተ፡ በረድ፡ ወውስተ፡ ዝናማትኒ፡ እንዘ፡ ትበርቅ።
25 ወዘንተ፡ ካዕበ፡ ሶበ፡ ተሴሰዩ፡ ጻድቃን፡ ኃይለ፡ ሲሳየ፡ ርእሶሙ፡ ረስዑ፡ እስመ፡ ኵሉ፡ ፍጥረት፡ ለከ፡ ይትለአክ።
26 ኦ፡ ገባሪ፡ ትሰፍሕ፡ ኵነኔ፡ ዘይትፌኖ፡ ላዕለ፡ ዓማፅያን፡ ወትጼጉ፡ ተድላ፡ ይብጻሕ፡ ኀበ፡ እለ፡ ይትአመኑ፡ ብከ።
27 ወበእንተዝ፡ አሜሃ፡ ሀብትከ፡ ሀለወት፡ ትትፋለስ፡ ውስተ፡ ኵሉ፡ ግብር፡ ወትትለአከ፡ ውስተ፡ ኵሉ፡ መብልዕ፡ መንገለ፡ መፍቅድ፡ ዘሰአሉ፡ ወፈተዉ።
28 ከመ፡ ያእምሩ፡ ውሉድከ፡ እለ፡ አፍቀርኮሙ፡ እግዚኦ፡ ከመ፡ አኮ፡ ዘዘዚአሁ፡ ፍሬያተ፡ ዘርእ፡ ዘይሴሴ፡ ሰብእ፡ አላ፡ ቃልከ፡ የዓቅቦሙ፡ ለእለ፡ ይትዌከሉ፡ ብከ።
29 እስመ፡ ዘኢያማስኖ፡ እሳት፡ በከ፡ በንስቲት፡ ላህበ፡ ፀሐይ፡ መዊቆ፡ ተመስወ፡ ከመ፡ ይትአመር።
30 እስመ፡ ፀሐይኒ፡ የኃሥሥ፡ ይምጻእ፡ ኀቤነ፡ ከመ፡ ኪያከ፡ ናእኵት፡ ወናስተብቊዕ፡ ኀቤከ፡ መንገለ፡ ሠርቀ፡ ፀሐይ።
31 እስመ፡ ተስፋሁ፡ ለዘኢየአኵት፡ ይትመሰው፡ ከመ፡ አስሐትያ፡ ክረምት፡ ወይውኅዝ፡ ከመ፡ ማይ፡ ርኩስ፡ ዘኢይበቊዕ።
=== chapter 17 ===
[Chapter 17]
1 እስመ፡ ዓቢይ፡ ኵነኔከ፡ ወዕፁብ፡ ለተናግሮ፡ በእንተዝ፡ ስሕቱ፡ ነፍሳት፡ እለ፡ አልቦሙ፡ ትምህርተ፡ ፈጣሪ።
2 እስመ፡ ኃጥአን፡ አመ፡ ነሥኡ፡ ሕዝቦ፡ ቅድሰ፡ ወተኃየሉ፡ ላዕሌሆሙ፡ ወኃያላን፡ ተአስሩ፡ በጽልመተ፡ ሌሊት፡ ነዋኅ፡ አሜሃ፡ ተሞቅሑ፡ መትሕተ፡ ተድባበ፡ ቤት።
3 ወተረክቡ፡ ጊጉያን፡ እምሥርዓተ፡ መልእክት፡ ዘለዓለም፡ ሐሊዮሙ፡ ዘአበሱ፡ ቦቱ።
4 ውስተ፡ አብያት፡ ዘአልቦ፡ ውስቴቱ፡ ብርሃን፡ ይትኃባእ፡ በምሥዋር፡ ወይትረሳዕ፡ ወተዘርዉ፡ ወተመስዉ፡ እምድንጋፄ፡ እንዘ፡ ይዴመሙ፡ ጥቀ፡ ወተሀውኩ፡ በምትሐት።
5 እስመ፡ ዘማዊ፡ ዘአኀዞሙ፡ ኢከሀለ፡ ይዕቀቦሙ፡ ዘእንበለ፡ ድንጋፄ፡ ወድምፀ፡ ቃል፡ ልዑል፡ ያንሶጥጥ፡ ንባቡ፡ ኮነ፡ የሀውኮሙ።
6 ወራእየ፡ ምምትሐተ፡ ጸዋግ፡ አጥፍአ፡ ኵሎ፡ ዘገጹ፡ ትኩዝ።
7 ወብርሃነ፡ እሳትኒ፡ ኢክሀለ፡ ያብርህ፡ ወኢአሐተ፡ ጊዜ፡ ወኢፀዳለ፡ ከዋክብት፡ ብሩሃን፡ ዘቆሙ፡ ለሥርዓተ፡ እንታክቲ፡ ጽልመተ፡ ሌሊት።
8 ወባሕቱ፡ አስተርአየ፡ ሎሙ፡ ግብተ፡ እሳት፡ ባሕቲቱ፡ ዘፍጹም፡ ግርማኑ፡ እምዝንቱ፡ ገጽ፡ ዘያስተርኢ፡ ዘየአኪ፡ እምገጻት፡ እለ፡ ያስተርእዩ፡ አመ፡ ረሰዩ፡ ፃማ፡ ዕበድ፡ ዘግብረ፡ ሥራይ።
9 ዘወርቅ፡ ወዘብሩር፡ ትዕቢት፡ ለዝላፉ፡ በእለ፡ ይፄእሉ።
10 እስመ፡ እለ፡ አሰፈዉ፡ ከመ፡ ይስድዱ፡ ሁከታ፡ ለነፍስ፡ ድውይት፡ ወድንጋፄሃ፡ አድወዮሙ፡ ለእሉ፡ ፍርሃት፡ ዘሰሐቅ፡ እመሰ፡ ኢያፍርሆሙ፡ ምንትኒ፡ ዘየሀውክ።
11 ነሶሳወ፡ ተሐዋስያን፡ ዘይሠርር፡ ወንኡስ፡ እምእለ፡ ይትሐወሱ፡ ሰደዶሙ፡ ወአንፈዖሙ፡ ድንጉፃነ።
12 ወኢተክህሎሙ፡ በርእየተ፡ ነፋስ፡ ዘይጐይይ፡ እምነ፡ ኵሉ፡ ገጻተ።
13 እስመ፡ ምግባሩ፡ ለእኩይ፡ ዓመፃ፡ እንተ፡ ይከውኑ፡ ቦቱ፡ ስምዐ፡ ወይፈትሑ፡ ላዕሌሁ፡ ወዘልፈ፡ ውእቱ፡ ይትዌከፍ።
14 ወይገብር፡ ግብረ፡ ዘዑግ፡ ወጠዋይ፡ እንዘ፡ ይትዓወቆ፡ ወይኔጽር፡ በሕሊና፡ አእምሮ።
15 እስመ፡ አኮ፡ ምንትኒ፡ ውእቱ፡ ግርማ፡ ፍርሃት፡ አላ፡ ያስተሴፉ፡ ትሕዝብተ፡ ኵነኔ፡ በሕሊና።
16 ወእመሰ፡ ተሰፍዎ፡ ትሕዝብት፡ ዘውስጥ፡ ኅዳጥ፡ ወኅፁፅ፡ ፈድፋደ፡ ትትሔለይ፡ በኢያእምሮ፡ ወዕበድ፡ እንተ፡ ትሁብ፡ ፍኖተ፡ ለኵነኔ።
17 ወለእልክቱኒ፡ ሶበ፡ ከደነቶሙ፡ እንታክቲ፡ ሌሊት፡ እንተ፡ ኢይትከሀል፡ ፀዊሮታ፡ እሙነ፡ እንተ፡ ዓርገት፡ እማዕምቅተ፡ ፃዕረ፡ ሲኦል፡ ዘኢይትከሀል፡ ፀዊሮታ፡ ሀለዉ፡ እንዘ፡ ይነውሙ፡ ኪያሃ፡ ዕለተ።
18 እስመ፡ አደንገፅዎሙ፡ መደንግፃን፡ በዘይሰድድዎሙ፡ በአርእዮ፡ ምትሐት፡ ወበዘያደክም፡ ተስፋሃ፡ ለነፍስ፡ ወግብተ፡ በጽሖሙ፡ ድንጋፄ፡ ወፍርሃት፡ ዘኢተሰፈውዎ፡ ወኢተሐዘብዎ።
19 ወከመዝ፡ ኵሉ፡ ዘሀሎ፡ ህየ፡ መኑሂ፡ ዘኮነ፡ እመኒ፡ ዘወድቀ፡ ወእመኒ፡ ዘይትዓቀብ፡ ውስተ፡ ቤተ፡ ሞቅሕ፡ ተሞቂሖ፡ በሐፂን፡ ወዘእንበለ፡ ሐፂን፡ እመሂ፡ ሐረሳዊ፡ ወእመሂ፡ ኖላዊ።
20 እመኒ፡ ገባኢ፡ ዘይፃሙ፡ ለተገብሮታ፡ ለምድር፡ ነቢሮ፡ ውስተ፡ ገዳም፡ እስመ፡ ተዓገሠ፡ ይእተ፡ ምንዳቤ፡ ዕፅብተ፡ ዘተራከበቶ፡ እንተ፡ አልባቲ፡ ማኅለቅት።
21 እስመ፡ ማኅበሮሙ፡ ተአስረ፡ በአሐቲ፡ ሞቅሕ፡ ሙቃሔ፡ ጽልመት፡ ወአምሳል፡ ዘረከቦሙ፡ ከመዝ፡ መንፈስ፡ ዘይትፋጸይ።
22 አው፡ ቃለ፡ አዕጹቅ፡ ዘሠናይ፡ ድምፁ፡ እምአእዋም፡ ጽፉቃት፡ እለ፡ ይጼልሉ፡ አው፡ እምቃለ፡ አዕዋፍ፡ ዘሠናይ፡ ዜማሆሙ።
23 አው፡ ድምፀ፡ ምንባሐብሐተ፡ ማይ፡ ዘየሐውር፡ በኃይል፡ አው፡ ድምፀ፡ ፀዋልዕት፡ እለ፡ ያንኰረኵሩ፡ በግርማ።
24 አው፡ ሩዐተ፡ እንስሳ፡ እለ፡ ያንፈርዕዑ፡ ወኢይትረአይ፡ ሩፀቶሙ፡ አው፡ ቃለ፡ አራዊት፡ እለ፡ ይጥኅሩ፡ በጥራዐ፡ ቃል፡ መፍርህ።
25 አው፡ ድምፀ፡ ቃል፡ ዘአድባር፡ መፍርሃን፡ እለ፡ ያወሥኡ፡ ወያዓልዉ፡ ድምፀ፡ በበይናቲሆሙ፡ እምድምፀ፡ አዕዋፍ፡ ወአራዊት።
26 ከመዝ፡ ውእቱ፡ ምንዳቤ፡ ዘመሠጦሙ፡ ወአደንገፆሙ።
27 እስመ፡ ኵሉ፡ ዓለም፡ ሀሎ፡ ይበርህ፡ በብርሃን፡ ጽዱል፡ ይፈጽም፡ ግብሮ፡ ዘእንበለ፡ ፅርዓት፡ ወኢክልአት።
28 ወለእልክቱሰ፡ ባሕቲቶሙ፡ ከደኖሙ፡ ክበደ፡ ሌሊት፡ አርአያሁ፡ ለጽልመት፡ ዘሀሎ፡ ይነሥኦሙ፡ ወለሊሆሙ፡ ለርእሶሙ፡ እለ፡ ይከብዱ፡ እምጽልመት።
=== chapter 18 ===
[Chapter 18]
1 ወኀበ፡ ጻድቃንሰ፡ ሀሎ፡ ዓቢይ፡ ብርሃን፡ እስመ፡ እልክቱ፡ ኮኑ፡ ይሰምዑ፡ ቃሎሙ፡ ወራእዮሙሰ፡ ኢይሬእዩ።
2 እስመ፡ እሙንቱ፡ ሀለዉ፡ ይዘብጡ፡ ለእለ፡ ይፈትዎሙ፡ ወሀለዉ፡ ይትአኰቱ፡ እንበይነ፡ ዘአሕመምዎሙ፡ ለግፉዓን።
3 ወእሉሰ፡ ተፈሥሑ፡ በጸጋ፡ ድኂን፡ ዘተፈነወ፡ ሎሙ፡ ወወሀቦሙ፡ ዕሤተ፡ ዓምደ፡ እሳት፡ ዘያበርህ፡ ይምርሖሙ፡ ፍኖተ፡ መንገድ፡ ዘኢይትአመር።
4 ወፀሐየ፡ ዘያዋኪ፡ ውስተ፡ ተእንግዶ፡ ዘይትፈቀር፡ እስመ፡ ለእልክቱ፡ ይደልዎሙ፡ ከመ፡ ይኅጥኡ፡ ብርሃነ።
5 ወይትሞቅሑ፡ ውስተ፡ ጽልመት፡ እስመ፡ ዓፀውዎሙ፡ ለውሉድከ፡ ወሞቅሕዎሙ፡ እለ፡ ቦሙ፡ ብርሃነ፡ ሕግ፡ ዘኢይበሊ፡ ዘሀሎ፡ ይትወሀብ፡ ሎሙ፡ ለዓለመ፡ ዓለም።
6 ወሶበ፡ ሐለዩ፡ ወመከሩ፡ ይቅትሉ፡ ውሉደ፡ ጻድቃን፡ ወተገዲፎ፡ አሐዱ፡ ሕፃን፡ ድኅነ፡ ለዘለፋሆሙ፡ ወቦቱ፡ አጥፋእከ፡ ዘእንበለ፡ ምሂክ፡ መብዝኅተ፡ ውሉዶሙ፡ ወማኅበሮሙ፡ ኵሎ፡ በማይ፡ ብዙኅ።
7 ለእንታክቲ፡ ሌሊት፡ አእመርዋ፡ አበዊነ፡ እምከመ፡ ሶበ፡ አእመሩ፡ መሐላ፡ ዘተካየዶሙ፡ ባቲ፡ በፍቅር፡ ይዘከርዋ።
8 ወተወከፍከ፡ ሕዝበከ፡ መድኃኒተ፡ ለጻድቃን፡ ወኀጒለ፡ ለፀር፡ ተቃራንያን።
9 እስመ፡ ዘከመ፡ ቀሠፍኮሙ፡ ለእለ፡ ይትቃረኑ፡ ከማሁ፡ ሶበ፡ ጸዋዕከነ፡ አክበርከነ።
10 እስመ፡ አግብርቲከ፡ ጻድቃን፡ ሀለዉ፡ ይሠውዑ፡ መሥዋዕተ፡ ተድላ፡ ሠናየ፡ ወወደዩ፡ ውስተ፡ ልቦሙ፡ ሕገ፡ መለኮትከ፡ በተሰናዕዎ።
11 ወበዝንቱ፡ አምሳል፡ ተወከፉ፡ ቅዱሳን፡ ሠናያተ፡ ወምንዳቤሂ፡ ለእለ፡ ይደልዎሙ።
12 አበዊነሰ፡ ሀለዉ፡ ይሰብኩ፡ ፍሥሓ፡ እንዘ፡ ይሴብሑ፡ ወይትራከብ፡ ቃላቲሆሙ፡ ምስለ፡ ጽራሐ፡ ብካየ፡ ጸላእት፡ እንዘ፡ ኢየኀብር፡ ንባቦሙ።
13 ወእማትኒ፡ ያደምፃ፡ ቃለ፡ ሰቆቃው፡ በእንተ፡ ደቂቆን።
14 ወኵነኔ፡ ገብር፡ ምስለ፡ እግዚእ፡ በመቅሠፍት፡ ተዓረየ።
15 ወለሐምራዊኒ፡ ምስለ፡ ንጉሥ፡ ዕሩየ፡ ረከበቶሙ፡ ዛቲ፡ ሕማም፡ ወኵሎሙ፡ ኅቡረ፡ በአሐዱ፡ አምሳል፡ ሞቱ።
16 ወቦሙ፡ አብድንተ፡ ሙታን፡ ዘአልቦሙ፡ ኊልቊ፡ እስመ፡ ሕያዋን፡ ኢከሀሉ፡ ይቅብርዎሙ፡ ለምውታን፡ እስመ፡ በአሐቲ፡ ሰዓት፡ ጠፍአት፡ ወማሰነት፡ ክብርት፡ ልደቶሙ።
17 እስመ፡ በእንተ፡ ሥራይ፡ ኢአምነት፡ ኵሎ፡ መቅሠፍተ፡ ዘረከቦሙ፡ ወበጥፍአተ፡ በኵሮሙ፡ አእመሩ፡ ከመ፡ ሕዝብ፡ ውሉደ፡ እግዚአብሔር፡ እሙንቱ።
18 እስመ፡ ሶበ፡ ከደና፡ ለኵላ፡ ፍጥረት፡ ኅድአት፡ ወአርምሞ፡ እንተ፡ ኵሎ፡ ትመልክ፡ ተበቀላ፡ ለይእቲ፡ ሌሊት፡ ቃልከ፡ መዋዒ፡ ወፀባኢ፡ ወመስተቃትል፡ ዘይክል፡ ኵሎ።
19 እምሰማያት፡ ውስተ፡ ማእከሎሙ፡ ለአፅራር፡ እለ፡ ሎሙ፡ መንግሥት፡ ከመ፡ ይሥርዎሙ፡ እምድር፡ ዘእንበለ፡ አድልዎ፡ ትእዛዝከ፡ ቀኒቶ፡ ሰይፈ፡ በሊሐ፡ ቀዊሞ፡ ማእከሎሙ፡ ወመልአኵሎ፡ ደዌሆሙ፡ ሞተ።
20 ወገሠሦሙ፡ እምሰማይ፡ ወተፅዕኖሙ፡ እምድር፡ ወሆኮሙ፡ አሜሃ፡ በመትሕተ፡ አልሕምት፡ ጸዋጋን፡ ወሰፈነት፡ ላዕሌሆሙ፡ ድንጋፄ፡ እንተ፡ ኢተሐዘብዋ።
21 ወቦ፡ እምኔሆሙ፡ ዘይወድቅ፡ ውስተ፡ ካልእ፡ ገጸመካን፡ እንዘ፡ መንፈቁ፡ ምውት፡ ወእንዘ፡ መንፈቁ፡ ሕያው፡ ወከሠተ፡ ሎሙ፡ ምክንያተ፡ እንተ፡ በእንቲአሃ፡ ይመውቱ።
22 እስመ፡ አሕላም፡ እለ፡ ሆክዎሙ፡ አቅደሙ፡ ነጊሮቶሙ፡ ዘንተ፡ ከመ፡ ኢይትኰነኑ፡ ዘእንበለ፡ አእምሮ፡ እስመ፡ በእንተ፡ ምንት፡ ይረክቦሙ፡ ሞት፡ እኩይ፡ ወይቀትሎሙ።
23 ወቦ፡ እምነ፡ ጻድቃን፡ ዘረከቦሙ፡ መከራ፡ ሞት፡ ቀዲሙ፡ ወኮነ፡ በገዳም፡ ድቀት፡ ወአውደቀ፡ ብዙኀነ፡ እምኔሆሙ።
24 ወባሕቱ፡ መዓት፡ ኢጐንደየ፡ ብዙኀ፡ መዋዕለ፡ እስመ፡ ብእሲ፡ ዘአልቦ፡ ነውር፡ አፍጠነ፡ ወተፃብአ፡ ነሢኦ፡ ንዋየ፡ ሐቅል፡ ዘቅኔሁ፡ ኤፉደ፡ ጸሎት፡ ወዕጣን።
25 ወረከበ፡ ሞገሰ፡ ለአስተርእዮ፡ ወተቃወመ፡ መዓተ፡ ወአሕስአ፡ መቅሠፍተ፡ ወአርአየ፡ በዝንቱ፡ ርእሶ፡ ከመ፡ ላእከ፡ ዚአከ፡ ውእቱ፡ ወሞዐ፡ ማኅበሮሙ፡ ለእለ፡ ያጠፍኡ።
26 አኮ፡ በኃይለ፡ ሥጋ፡ ወኢ፡ በግብረ፡ ንዋየ፡ ሐቅል፡ አላ፡ አግረረ፡ ዘይቀሥፍ፡ በቃለ፡ ዚአከ፡ በዘአዘከረ፡ ሎቱ፡ መሐላ፡ አበው፡ ወኪዳኖሙ።
27 እስመ፡ ሶበ፡ ይወድቁ፡ ሙታን፡ በበይናቲሆሙ፡ ዘኢይትኌለቊ፡ ብዝኆሙ፡ ወቀዊሞ፡ ማእከለ፡ ሕያዋን፡ ወሙታን፡ ከተረ፡ መዓተ፡ ወፈለጠ፡ ፍኖተ፡ ለሕያዋን።
28 እስመ፡ ኵሉ፡ ክህነተ፡ ዓለም፡ ሀሎ፡ ዲበ፡ ጽንፈ፡ ልብሱ፡ ወስብሐተ፡ አበው፡ ዲበ፡ መትከፍቱ፡ እምአእባነ፡ ባሕርይ፡ ግሉፋን፡ ወዕበየ፡ ዚአከ፡ ዲበ፡ አክሊለ፡ ርእሱ።
29 ወተአተቱ፡ በዝንቱ፡ እለ፡ ያኃጒሉ፡ ወአፍርህዎሙ፡ እሉ፡ ምግባራት፡ እስመ፡ መቅሠፍትኒ፡ ባሕቲቱ፡ እምአከለ።
=== chapter 19 ===
[Chapter 19]
1 ወለረሲዓንሰ፡ ፀንዐ፡ መዓትከ፡ ላዕሌሆሙ፡ እስከ፡ አኅለቀት፡ ለዝሉፉ፡ ዘእንበለ፡ ምሕረት።
2 እስመ፡ አቅደሙ፡ አእምሮ፡ ምግባራቲሆሙ፡ ዘይከውን፡ እስመ፡ እሙንቱ፡ ሜጥዎሙ፡ እምሐዊር፡ ወዓዲ፡ ፈነውዎሙ፡ በብዙኅ፡ ጒጒዓ።
3 ወሶበ፡ ነስሑ፡ ወረዱ፡ በረዊዕ፡ ወዴገንዎሙ፡ እንዘ፡ ይብሉ፡ እስመ፡ መዋግድ፡ ህልው፡ በቅድሜሆሙ።
4 እስመ፡ ዓዲ፡ እንዘ፡ ውስተ፡ ላህ፡ ሀለዉ፡ እንዘ፡ ያስቆቅዉ፡ ወይግዕሩ፡ ዲበ፡ መቃብረ፡ አብድንቲሆሙ፡ ሰሐቦሙ፡ ካልእ፡ ሕሊና፡ ዕበድ፡ ወእለ፡ አስተብቊዑ፡ ኀቤሆሙ፡ ከመ፡ ይሑሩ፡ ወአውፅእዎሙ፡ መረዱ፡ በረዊዕ፡ ይዴግንዎሙ፡ ከመ፡ ሰብእ፡ እለ፡ ተኀጥኡ።
5 ወሰሐበቶሙ፡ ውስተ፡ ዝንቱ፡ ገግብር፡ ፍጻሜ፡ ምንዳቤ፡ እንተ፡ ደለዉ፡ ወአስሐቶሙ፡ ርስዓት፡ ወዘረከቦሙ፡ ኢተዘከሩ፡ ከመ፡ ይፈጽሙ፡ ወይምልኡ፡ ኵነኔ፡ ዘነትገ፡ በኊልቈ፡ ኵነኔያት።
6 ወሕዝብከሰ፡ መንክረ፡ ፍኖተ፡ ኀለፉ፡ ወእልክቱሰ፡ ሞተ፡ ነኪረ፡ ረከቡ።
7 እስመ፡ ኵላ፡ ፍጥረት፡ ተመሰለት፡ መልዕልቶሙ፡ ምስለ፡ አንጋዲሃ፡ እንዘ፡ ዓዲ፡ ትትለአክ፡ ዘተአዘዘት፡ ቦቱ፡ ትእዛዘ፡ ከመ፡ ይትዐቀቡ፡ ቦቱ፡ ደቂቅከ፡ ዘእንበለ፡ እከይ፡ በዳኅና።
8 ወደመና፡ እንተ፡ ኮነት፡ ትጼልል፡ ትዕይንተ፡ ወተርእየት፡ እምነ፡ ዘቀዳሚ፡ ማይ፡ ርግእተ፡ ወሥርጽተ፡ ምድር፡ ይብስት።
9 ወአስተርአየ፡ እምባሕረ፡ ኤርትራ፡ ፍኖት፡ ዘእንበለ፡ ማዕቅፍ።
10 ወእምውስተ፡ ማዕበል፡ ኅል፡ ፂአተ፡ ሐመልማል፡ እንተ፡ ዲቤሃ፡ ኃለፉ፡ ኵሉ፡ ሕዝብከ፡ እንዘ፡ ይትከደኑ፡ እዴከ፡ ክብርተ፡ ወመዝራዕተከ፡ ልዕልተ።
11 አመ፡ ሶበ፡ ርእዩ፡ ምግባረ፡ መንክረ፡ ለይእቲ፡ እዴከ፡ ሰብሕዋ፡ እስመ፡ እሙንቱ፡ ተርእዩ፡ ከመ፡ አፍራስ፡ ወአንፈርዐዑ፡ ከመ፡ አሥዋር፡ እንዘ፡ ይሴብሑ፡ ኪያከ፡ እግዚኦ፡ ዘአድኀንኮሙ፡ እስመ፡ ተዘከሩ፡ በስከየተ፡ ምግባሮሙ።
12 እፎ፡ አውፅአት፡ ምድሮሙ፡ ህየንተ፡ ልደተ፡ እንስሳ፡ አኮተ፡ ወአውጽአት፡ ባሕርኒ፡ ህየንተ፡ ልደተ፡ ዓሣ፡ ዘውስተ፡ ማይ፡ ብዙኀ፡ ቈርነነዓተ።
13 ወእምድኅረዝ፡ አመ፡ ሴሰይኮሙ፡ ርእዩ፡ ልደተ፡ አዕዋፍ፡ ሐዲስ፡ ወሶበ፡ ፈተዉ፡ ፍትወተ፡ ወሰአሉ፡ መብልዐ፡ ፍግዓ፡ ወተድላ፡ ዓርገ፡ እምውስተ፡ ባሕር፡ ለኑዛዜ፡ ፍትወቶሙ፡ ብዙኅ፡ ድርንቅ።
14 ወመጽአት፡ መቅሠፍት፡ ዘኢርኅቅት፡ እመባርቅት፡ ላዕለ፡ ኃጥአን፡ እንተ፡ ትትሜሰል፡ በኃይለ፡ መቅሠፍታተ፡ ተአምር፡ ዘተገብረ፡ ቅድመ።
15 እስመ፡ እሙንቱ፡ በጽድቅ፡ ተኰነኑ፡ ዘከመ፡ ድልወተ፡ እከዮሙ፡ እስመ፡ ፈቀዱ፡ ጸሊአ፡ አናግድ፡ በሕቁ፡ ዘየአኪ፡ ወእሉሰ፡ ተወከፉ፡ እለ፡ ኢየአምርዎሙ፡ አመ፡ በጽሑ።
16 ወእልክቱሰ፡ ቀነይዎሙ፡ ለእለ፡ ተአንገዱ፡ ኀቤሆሙ፡ እንዘ፡ ያሤንዩ፡ ሎሙ፡ ወይበቊዕዎሙ።
17 አኮ፡ በዝንቱ፡ ባሕቲቱ፡ እላ፡ ይኩን፡ ለምግባራቲሆሙ፡ ዋህየ፡ ወሐተታ፡ እስመ፡ ኮኑ፡ ይትዌከፍዎሙ፡ በክበድ፡ ለእለ፡ ተአንገዱ፡ ኀቤሆሙ።
18 ወእሉሰ፡ ሀለዉ፡ ይትዌከፉ፡ በእብስሎ፡ ለእለ፡ ተሳተፉ፡ ዘሎሙ፡ ጻድቃን።
19 ወሶበ፡ አሕመምዎሙ፡ በብዙኅ፡ ፃዕር፡ ተቀሥፉ፡ በኀጢአ፡ ንፃሬ፡ ዘከመ፡ እልክቱ፡ እለ፡ ተጋብኡ፡ ኀበ፡ ኆኅተ፡ ጻድቃን፡ እስመ፡ ግብተ፡ ተወድዩ፡ ውስተ፡ ጽልመት፡ ጽፉቅ።
20 ወኵሉ፡ እምኔሆሙ፡ ሀሎ፡ የኃሥሥ፡ ፍኖተ፡ ምብዋእ፡ ዘኀዋኅወ፡ ቤቱ።
21 እስመ፡ ፈለሱ፡ ቦሙ፡ ወተመይጡ፡ ብርሃናት፡ እምፍጥረተ፡ ዚአሆሙ፡ እስመ፡ ከመ፡ ቃለ፡ መዝሙር፡ ይትዌለጥ፡ በአእምሮ፡ ቃለ፡ ዜማሁ፡ ወይደሉ፡ ዘልፈ፡ ርቱዐ፡ ውስተ፡ ዜማሁ፡ ከመዝ፡ ግብርሂ፡ ዘይሰፍር፡ ፍጹመ፡ በነጽሮ፡ እለ፡ ተገብሩ፡ በበህላዌሆሙ።
22 እስመ፡ ፍጥረተ፡ የብስ፡ ተመይጠ፡ ውስተ፡ ማያት፡ እለሰ፡ ይትሐወሱ፡ ወይፀብቱ፡ ውስተ፡ ማይ፡ ተመይጠ፡ ሑረቶሙ፡ ውስተ፡ ምድር።
23 ወእሳትኒ፡ ኀየለ፡ ኀይሎ፡ ውስተ፡ ማያት፡ ወማይኒ፡ ኀብአ፡ ፍጥረተ፡ ህላዌሁ።
24 ወላህበ፡ ነድሂ፡ ዘፍጡነ፡ ይማስኑ፡ እንዘ፡ ይትወላወል፡ ወያንሶሱ፡ ውስቴቶሙ።
25 ወዘመደ፡ ፍጥረትኒ፡ ዘኢይበሊ፡ ኢመፅዎ፡ ለአስሐትያ፡ ዘፍጡነ፡ ይትመሰው።
26 እስመ፡ በኵሉ፡ ግብር፡ እግዚኦ፡ አዕበይከ፡ ክብረ፡ ሕዝብከ፡ ወሰባሕከ፡ በኵሉ፡ ዘመጽአ፡ ኀቤነ፡ ኢያሰሰልከ፡ ወኢተአወርከ፡ እምኔነ፡ በኵሉ፡ መካን፡ እንተ፡ ትሄሉ፡ ህየ።