##### edition  (gez) — Text of the EOTC printed Bible
=== chapter 1 ===
[Chapter 1]
1 መጽሐፍ፡ ነገሩ፡ ለጦብያ፡ ወልደ፡ ጦቢት፡ ወልደ፡ ገባኤል፡ ዘእምነ፡ አሳሔል፡ ዘእምነገደ፡ ንፍታሌም።
2 ዘተፄወወ፡ በመዋዕለ፡ አኔሜሴር፡ ንጉሠ፡ ፋርስ፡ ዘእምታቢስ፡ እንተ፡ እምየማና፡ ለቃዴስ፡ ዘእንተ፡ ንፍታሌም፡ ዘገሊላ፡ እንተ፡ መልዕልተ፡ አሴር።
3 አነ፡ ጦቢት፡ በፍኖተ፡ ጽድቅ፡ ሖርኩ፡ ወበርትዕ፡ ሐየውኩ፡ በኵሉ፡ መዋዕለ፡ ሕይወትየ፡ ወምጽዋትየኒ፡ ብዙኃ፡ ገበርኩ፡ ለአኃውየ፡ ወለሕዝብየኒ፡ እለ፡ ሖሩ፡ ምስሌየ፡ ብሔረ፡ ፋርስ፡ ውስተ፡ ነነዌ።
4 ወእንዘ፡ ሀሎኩ፡ ምስለ፡ ደቂቀ፡ እስራኤል፡ በብሔርየ፡ እንዘ፡ ንዑስ፡ አነ፡ ወኵሉ፡ ሕዝበ፡ ንፍታሌም፡ ወአቡየ፡ ክህዱ፡ እምነ፡ ኢየሩሳሌም፡ እንተ፡ ኃረይዋ፡ እምነ፡ ኵሉ፡ እስራኤል፡ ከመ፡ ይሡዑ፡ ውስቴታ፡ ኵሉ፡ እስራኤል፡ ወተቀደሰ፡ ጽርሐ፡ መቅደሱ፡ ለልዑል፡ ወተሐንፀ፡ ሎሙ፡ ለትውልድ፡ ዘለዓለም።
5 ወኵሉ፡ ሕዝብ፡ እለ፡ ክህዱ፡ ሦዑ፡ ለበዓል፡ ወለደማሊ፡ ወቤተ፡ ንፍታሌምኒ፡ ወቤተ፡ አቡየ፡ ኀብሩ፡ ምስሌሆሙ።
6 ወአነ፡ ባሕቲትየ፡ መብዝኅቶ፡ አሐውር፡ ኢየሩሳሌም፡ አመ፡ በዓላት፡ በከመ፡ ጽሑፍ፡ ለኵሉ፡ እስራኤል፡ ውስተ፡ ትእዛዝ፡ ዘለዓለም፡ እምነ፡ ቀዳሚት፡ ዘቀረጽኩ፡ እወስድ፡ ሎሙ፡ ለካህናት፡ ለደቂቀ፡ አሮን፡ ኀበ፡ ምሥዋዕ፡ ኵሎ፡ እክለ።
7 ወቀዳሜ፡ ኵሉ፡ ዓሥራት፡ እሁቦሙ፡ ለደቂቀ፡ አሮን፡ እለ፡ ይፀመዱ፡ ኢየሩሳሌም፡ ወዘዳግመ፡ ዓሥራተ፡ እዔሥር፡ ወአስተዋጽእ፡ ምጽዋተ፡ ወአሐውር፡ ኢየሩሳሌም፡ በበዓመት።
8 ወሣልስተ፡ እሁብ፡ ለነዳያን፡ በከመ፡ አዘዘት፡ ዲቦራ፡ እሙ፡ ለአቡየ፡ እስመ፡ ዕጓለ፡ ማውታ፡ ኀደጉኒ፡ አቡየ፡ ወእምየ።
9 ወአመ፡ ኮንኩ፡ ብእሴ፡ ነሣእኩ፡ ሊተ፡ ብእሲተ፡ እምነ፡ አዝማድየ፡ ወወለድኩ፡ እምኔሃ፡ ጦብያሃ።
10 ወአመ፡ ተፄወዉ፡ ነነዌ፡ ኵሎሙ፡ አኃውየ፡ ወአዝማድየ፡ በልዑ፡ እምነ፡ እክለ፡ አሕዛብ።
11 ወአንሰ፡ ዓቀብኩ፡ ነፍስየ፡ ከመ፡ ኢይብላዕ።
12 እስመ፡ እዜክሮ፡ ለእግዚአብሔር፡ በኵሉ፡ ልብየ።
13 ወወሀበኒ፡ እግዚአብሔር፡ ገጸ፡ ወሞገሰ፡ በቅድመ፡ አኔሜሴር፡ ወሤመኒ፡ መጋቢሁ።
14 ወሖርኩ፡ ምድያም፡ ወአዕቀብክዎ፡ ለገባኤል፡ በብሔረ፡ ራጊስ፡ ዘምድያም፡ ዐሠርተ፡ መካልየ፡ ብሩር።
15 ወአመ፡ ሞተ፡ አኔሜሴር፡ ነግሠ፡ ህየንቴሁ፡ ሰናክሬም፡ ዘእኩይ፡ ምግባሩ፡ ወሠዐረኒ፡ ወኢክህልኩ፡ ሐዊረ፡ ምድያም።
16 ወበመዋዕ፡ አኔሜሴር፡ ብዙኃ፡ ምጽዋተ፡ ገበርኩ፡ ለአኃውየ።
17 ወእክልየኒ፡ ወሀብኩ፡ ለርኁባን፡ ወልብስየኒ፡ ለዕሩቃን፡ ወእመቦ፡ ዘርኢኩ፡ እምሕዝብየ፡ ምውተ፡ ግዱፈ፡ ኀበ፡ ዓረፍት፡ በነነዌ፡ እቀብሮ።
18 እመቦ፡ ዘቀተለ፡ ሰናክሬም፡ ንጉሠ፡ አመ፡ አተወ፡ እምይሁዳ፡ እንዘ፡ ይጐይይ፡ ወአነ፡ ቀበርክዎሙ፡ ጽሚተ፡ እስመ፡ ብዙኃነ፡ ቀተለ፡ በመዓቱ፡ ወኃሠሠ፡ ንጉሥ፡ አብድንቲሆሙ፡ ወኢረከቦሙ።
19 ወሖረ፡ አሐዱ፡ እምሰብአ፡ ነነዌ፡ ኀበ፡ ንጉሥ፡ ወአስተዋደየኒ፡ ከመ፡ አነ፡ ቀበርክዎሙ፡ ወተኀባዕኩ፡ ሶበ፡ አእመርኩ፡ ከመ፡ ይፈቅዱ፡ ይቅትሉኒ፡ ወፈሪህየ፡ ተግኅሥኩ።
20 ወሶበ፡ ኃጥኡኒ፡ በርበሩ፡ ኵሎ፡ ንዋይየ፡ ወአልቦ፡ ዘአትረፉ፡ ሊተ፡ ዘእንበለ፡ ሐና፡ ብእሲትየ፡ ወጦብያ፡ ወልድየ።
21 ወኢወፃእኩ፡ ሃምሳ፡ ወሐምስተ፡ መዋዕለ፡ እስከ፡ አመ፡ ቀተልዎ፡ ክልኤሆሙ፡ ደቂቁ፡ ወጐዩ፡ ውስተ፡ አራራት፡ ወነግሠ፡ አስራዶን፡ ወልዱ፡ ህየንቴሁ፡ ወሤሞ፡ ለአካኪሮን፡ ወልደ፡ አሳሔል፡ ወልደ፡ እኁየ፡ ላዕለ፡ ኵሉ፡ ቤተ፡ አቡሁ፡ ወላዕለ፡ ኵሉ፡ ሥርዓቶሙ።
22 ወሰአሎ፡ በእንቲአየ፡ አካኪሮን፡ ወአዕተወኒ፡ ውስተ፡ ነነዌ፡ ወአካኪሮን፡ ዘላዕሌሁ፡ ማኅተም፡ ወፃዕፃዕ፡ ቤቱ፡ ወሤመ፡ ዳግመ፡ አክሮንድስሃ።
=== chapter 2 ===
[Chapter 2]
1 ወሶበ፡ አተውኩ፡ ቤትየ፡ አግብኡ፡ ሊተ፡ ሐናሃ፡ ብእሲትየ፡ በዕለተ፡ በዓለ፡ ጰንጠቈስጤ፡ ቅድስት፡ ሳብዕ፡ ሰንበት፡ ገብሩ፡ ላዕሌየ፡ ሠናየ፡ ወረፈቁ፡ እብላዕ።
2 ወርእኪ፡ ከመ፡ መስየ፡ በሕቁ፡ ወእቤሎ፡ ለወልድየ፡ ሑር፡ አምጽእ፡ ዘረከብከ፡ እምአኃዊነ፡ ቢጸ፡ ነዳያን፡ እስመ፡ ተዘከርክዎ፡ ለእግዚአብሔር፡ እጸንሐከ፡ እስከ፡ ትገብእ።
3 ወሶበ፡ ገብአ፡ ወይቤለኒ፡ አባ፡ ረከብኩ፡ አሐደ፡ እምሕዝብ፡ ወግዱፍ፡ በድኑ፡ ውስተ፡ ምሥያጥ።
4 ወአነሂ፡ ተንሣእኩ፡ ዘእንበለ፡ እጥዓም፡ እክለ፡ ወአባዕክዎ፡ ውስተ፡ አሐዱ፡ ቤት፡ እስከ፡ የዓርብ፡ ፀሐይ።
5 ወገባዕኩ፡ ውስተ፡ ቤትየ፡ ወተሐፀብኩ፡ ወበላዕኩ፡ እክልየ፡ በኃዘን።
6 ወተዘከርኩ፡ ዘይቤ፡ አሞጽ፡ ይትመየጥ፡ በዓላቲክሙ፡ ውስተ፡ ብካይ።
7 ወእምዝ፡ በከይኩ፡ ወሶበ፡ ዓርበ፡ ፀሐይ፡ ሖርኩ፡ ወከረይኩ፡ ወቀበርክዎ።
8 ወሰሐቁ፡ ላዕሌየ፡ ሰብአ፡ ብሔር፡ ወይቤሉ፡ ኢይፈርህኑ፡ ዝንቱ፡ ኢይቅትልዎ፡ በእንተ፡ ዝንቱ፡ ግብር፡ እስመ፡ ይቀብሮሙ፡ ለእለ፡ ቀተለ፡ ንጉሥ።
9 ወበይእቲ፡ ሌሊት፡ ቤትኩ፡ ስኩብየ፡ ውስተ፡ ዓረፍተ፡ ዓፀድ፡ ወክሡት፡ ገጽየ።
10 ወኢያእመርኩ፡ ከመ፡ ቦቱ፡ አዕዋፍ፡ ውስተ፡ ዓረፍት፡ ወእንዘ፡ ክሡት፡ ገጽየ፡ አኵስሓ፡ እልክቱ፡ አዕዋፍ፡ ውዑየ፡ ውስተ፡ አዕይንትየ፡ ወሖርኩ፡ ኀበ፡ ዓቀብተ፡ ሥራይ፡ ወአልቦ፡ ዘበቊዓኒ፡ ወአካኪሮስ፡ ይሴስየኒ፡ እስከ፡ አመ፡ ሖርኩ፡ ኤልማድያ፡ ባሕቲትየ።
11 ወሐናሰ፡ ትፀመድ፡ ቤተ፡ አንስት።
12 ወለአከት፡ ኀበ፡ አጋዕዝቲሃ፡ ወወሀባሃ፡ እማንቱሂ፡ መሐስዓ፡ ወአምጽአት፡ ኀቤየ።
13 ወሶበ፡ መጽአት፡ ኀቤየ፡ አኀዘት፡ ትጽራኅ፡ ወእቤላ፡ እምአይቴ፡ ዛቲ፡ መሐስዕ፡ ወለእመ፡ ስረቂዮ፡ አግብኢዮ፡ ለባዕሉ፡ እስመ፡ ኢኮነ፡ ጽድቀ፡ በሊዕ፡ ዘስርቅ።
14 ወትቤለኒ፡ ጸግውኒያ፡ ህየንተ፡ አስብየ፡ ወኢአመንክዋ፡ ወእቤላ፡ አግብኢ፡ ለባዕሉ፡ ወብዙኃ፡ ተገአዝኩ፡ ምስሌሃ፡ ወአውሥአት፡ ወትቤለኒ፡ አይቴ፡ ውእቱ፡ ምጽዋትከ፡ ወጽድቅከ፡ ናሁ፡ ኵሉ፡ ተአውቀ፡ ዘላዕሌከ።
=== chapter 3 ===
[Chapter 3]
1 ወተከዝኩ፡ በሕማየ፡ ወጸለይኩ፡ ወበከይኩ።
2 ወእቤ፡ ጻድቅ፡ አንተ፡ እግዚኦ፡ ወኵሉ፡ ፍናዊከ፡ በምሕረት፡ ወበፍትሕ፡ በርትዕ፡ ወበጽድቅ፡ ትኴንን፡ ዓለመ።
3 ተዘከረኒ፡ ወነጽረኒ፡ ወኢትትበቀለኒ፡ በኃጢአትየ።
4 ወበኃጢአተ፡ አበውየ፡ እለ፡ አበሱ፡ ለከ፡ ወኢሰምዑ፡ ትእዛዘከ፡ ወረሰይከኒ፡ ለተበርብሮ፡ ወለተሄውዎ፡ ወለተቀትሎ፡ ወኮነ፡ ትዕይርተ፡ ውስተ፡ ኵሉ፡ ዓለም፡ ወአሕዛብ፡ እለ፡ እምውስቴቶሙ፡ ተዘርውነ፡ ኵለሄ።
5 ወይእዜኒ፡ ርቱዕ፡ ውእቱ፡ ኵነኔከ፡ ዘበጽድቅ፡ ወግበር፡ ሊተ፡ በዘይሠረይ፡ ኃጢአትየ፡ ወዘአበውየ፡ እስመ፡ ኢገበርነ፡ ትእዛዝከ፡ ወኢሖርነ፡ በጽድቅ፡ ቅድሜከ።
6 ወይእዜኒ፡ ዘይዔድመከ፡ ግበር፡ ምስሌየ፡ በቅድሜከ፡ ወአዝዝ፡ ዘይትሜጦ፡ መንፈስየ፡ ከመ፡ እሠዓር፡ ወእኩን፡ መሬተ፡ እስመ፡ ይኄይሰኒ፡ ትዕይርተ፡ በሐሰት፡ ወበዝኀ፡ ኃዘን፡ ላዕሌየ፡ ወአዝዝ፡ እሠዐር፡ እምሕማምየ፡ ውስተ፡ መካን፡ ዘለዓለም፡ ወኢትሚጥ፡ ገጸከ፡ እምኔየ።
7 ወበይእቲ፡ ዕለት፡ ረከባ፡ ለወለተ፡ ራጉኤል፡ ሣራ፡ እምነ፡ መጣኒ፡ ዘሜዶን፡ ወተአየራሃ፡ አዕማተ፡ አቡሃ።
8 እስመ፡ አስተዋሰብዋ፡ ለሰብዓቱ፡ ዕደው፡ ወቀተሎሙ፡ ጋኔን፡ እኩይ፡ አስማንድዮስ፡ ዘእንበለ፡ ይቅረብዋ፡ እንተ፡ ብእሲ፡ ወብእሲት፡ ወይቤላሃ፡ ኢተአምሪኑ፡ እንዘ፡ ይትሐነቁ፡ ዓምታትኪ፡ ወናሁ፡ ሰብዓቱ፡ አውሰቡኪ፡ ወአሐዱ፡ እምኔሆሙ፡ ኢተለወኪ።
9 ወምንተት፡ እንከ፡ ተቀሠፍነ፡ በእንቲአሆሙ፡ እስመ፡ ሞቱ፡ ሑሪ፡ ምስሌሆሙ፡ ወኢንርአይ፡ ወልደ፡ ወወለተ፡ እምኔኪ፡ ለዓለም።
10 ወሶበ፡ ሰምዐት፡ ዘንተ፡ ተከዘት፡ ጥቀ፡ ወትቤ፡ አሐቲ፡ አነ፡ ለአቡየ፡ ወእመ፡ ገበርኩ፡ ዘንተ፡ ከመዝ፡ ትዕይርተ፡ እከውኖ፡ ወአወርድ፡ ርስዓኒሁ፡ በፃዕር፡ ውስተ፡ መቃብር።
11 ወጸለየት፡ በውስተ፡ ቤታ፡ ወትቤ፡ ቡሩክ፡ አንተ፡ እግዚኦ፡ አምላኪየ፡ ወይትባረክ፡ ስምከ፡ ቅዱስ፡ ወቡሩክ፡ ስምከ፡ በኵሉ፡ ዓለም፡ ወክቡር፡ ኵሉ፡ ግብርከ፡ ለዓለም።
12 ወይእዜኒ፡ እግዚኦ፡ አዕይንትየ፡ ወገጽየ፡ ለከ፡ መጠውኩ።
13 ወእብለከ፡ ሠዓረኒ፡ እምነ፡ ምድር፡ ከመ፡ ኢይስማዕ፡ ትዕይርተ።
14 ለሊከ፡ እግዚኦ፡ ተአምር፡ ከመ፡ ንጽሕት፡ አነ፡ እምኵሉ፡ ኃጢአት፡ ዘምስለ፡ ብእሲ።
15 ወኢያገመንኩ፡ ስምየ፡ ወስመ፡ አቡየ፡ በብሔር፡ ዘተፄወውኩ፡ ወአሐቲ፡ አነ፡ ለአቡየ፡ ወአልብየ፡ እኍ፡ ወአልብየ፡ ዘቅሩብ፡ ወእትዓቀብ፡ ለብእሲ፡ እስመ፡ ሰብዓቱ፡ ሞቱኒ፡ ለምንተ፡ እንከ፡ አሐዩ፡ ወለእመኒ፡ ኢፈቀድከ፡ ትቅትለኒ፡ ነጽር፡ ላዕሌየ፡ ወአስተምሕረኒ፡ ወአዝዝ፡ ከመ፡ ኢይስማዕ፡ ትዕይርተ፡ እንከ።
16 ወተሰምዓ፡ ጸሎቶሙ፡ ለክልኤሆሙ፡ በቅድመ፡ ስብሐተ፡ ዕበዩ፡ ለእግዚአብሔር።
17 ወፈነዎ፡ ለሩፋኤል፡ ከመ፡ ይፈውሶሙ፡ ለክልኤሆሙ፡ ወለጦቢትኒ፡ ከመ፡ ያሰስል፡ ጢሰ፡ ዓይኑ፡ ወለሣራኒ፡ ወለተ፡ ራጉኤል፡ ከመ፡ የሀባ፡ ለጦብያ፡ ወልደ፡ ጦቢት፡ ትኰኖ፡ ብእሲቶ፡ ወከመ፡ ይሥዓሮ፡ ለአስማንድዮስ፡ ጋኔን፡ እኵይ፡ እስመ፡ ጦብያ፡ ይወርሳ፡ ወበእማንቱ፡ መዋዕል፡ ተመይጠ፡ ጦቢት፡ ወዐተወ፡ ቤቶ፡ ወሣራኒ፡ ወለተ፡ ራጉኤል፡ ወረደት፡ እምነ፡ ጽርሐ፡ ላዕላይ።
=== chapter 4 ===
[Chapter 4]
1 ወበይእቲ፡ ዕለተ፡ ተዘከረ፡ ጦቢት፡ በእንተ፡ ብሩር፡ ዘአማኅፀነ፡ ኀበ፡ ገባኤል፡ በራጊስ፡ ዘሜዶን።
2 ወሐለየ፡ ወይቤ፡ ናሁ፡ ሰአልኩ፡ ከመ፡ እሙት፡ ወለምንት፡ ኢይጼውዖ፡ ለወልድየ፡ ጦብያ፡ ከመ፡ እንግሮ፡ ዘእንበለ፡ እሙት።
3 ወጸውዖ፡ ወይቤሎ፡ ወልድየ፡ አመ፡ ሞትኩ፡ ቅበረኒ፡ በሠናይ፡ ወዕቀብ፡ እመከ፡ ወአክብራ፡ በኵሉ፡ መዋዕለ፡ ሕይወታ፡ ወግበር፡ ላቲ፡ ኵሎ፡ ዘፈቀደት፡ ወኢታኅዝና።
4 ተዘከር፡ ወልድየ፡ ከመ፡ ብዙኃ፡ ሕማመ፡ ረከበት፡ ብከ፡ እንዘ፡ ሀሎከ፡ ውስተ፡ ከርሣ፡ ወእመ፡ ሞተት፡ ቅብራ፡ ምስሌየ፡ ውስተ፡ አሐዱ፡ መቃብር።
5 ወበኵሉ፡ መዋዕል፡ ኦ፡ ወልድየ፡ ተዘከሮ፡ ለእግዚአብሔር፡ አምላክነ፡ ወኢትፍቅድ፡ አብሶ፡ ወክሂደ፡ ትእዛዙ፡ ወግበር፡ ጽድቀ፡ በኵሉ፡ መዋዕለ፡ ሕይወትከ፡ ወኢትሑር፡ በፍኖተ፡ ዓመፃ።
6 ወእምከመ፡ ገበርካ፡ ለጽድቅ፡ ትሤራህ፡ በኵሉ፡ ፍኖትከ፡ ወበኵሉ፡ ግብርከ፡ ዘገበርከ፡ ወከማሁ፡ ለኵሎሙ፡ እለ፡ ይገብርዋ፡ ለጽድቅ።
7 ወእምንዋይከ፡ ግበር፡ ምጽዋተ፡ ወኢትደንግፅ፡ ዓይንከ፡ ሶበ፡ ትገብር፡ ምጽዋተ፡ ወኢትሚጥ፡ ገጸከ፡ እምነ፡ ነዳይ፡ ወእግዚአብሔር፡ ኢይመይጥ፡ ገጾ፡ እምኔከ።
8 ወአምጣነ፡ ትክል፡ መጠነ፡ ብከ፡ ግበር፡ ምጽዋተ፡ ወእመኒ፡ ውኁድ፡ ኢትደንግፅ፡ ለገቢረ፡ ምጽዋት።
9 እስመ፡ ሠናየ፡ መዝገበ፡ ትዘግብ፡ ለከ።
10 እስመ፡ ምጽዋት፡ ታድኅን፡ እሞት፡ በዕለተ፡ ምንዳቤ፡ ወኢትወስድ፡ ውስተ፡ ጽልመት።
11 እስመ፡ ሠናይ፡ ጸጋ፡ ይእቲ፡ ምጽዋት፡ ለእለ፡ ይገብርዋ፡ በቅድመ፡ ልዑል።
12 ወዑቅ፡ ርእሰከ፡ ኦ፡ ወልድየ፡ እምኵሉ፡ ዝሙት፡ ወቅድም፡ ለከ፡ ነሢአ፡ ብእሲት፡ እምዘርአ፡ አበዊከ፡ ወኢታውስብ፡ እምነኪር፡ ለእመ፡ ኢኮነት፡ እምዘመድከ፡ እስመ፡ እምደቂቀ፡ ነቢያት፡ ንሕነ፡ ኖኅ፡ ወአብርሃም፡ ይስሐቅ፡ ወያዕቆብ፡ እለ፡ እምዓለም፡ አበዊነ፡ ተዘከር፡ ወልድየ፡ ከመ፡ ኵሎሙ፡ ነሥኡ፡ አንስትያ፡ እምትውልደ፡ አኃዊሆሙ፡ ወተባረኩ፡ ውሉዶሙ፡ ወዘርኦሙ፡ ወረስዋ፡ ለምድር።
13 ወይእዜኒ፡ ወልድየ፡ አፍቅር፡ ቢጸከ፡ ወኢታዕቢ፡ ልበከ፡ እምነ፡ ቢጽከ፡ ወእምደቂቀ፡ ሕዝብከ፡ ወእምነ፡ አዋልዲሆሙ፡ ንሣእ፡ ለከ፡ ብእሲተ፡ እምኔሆሙ፡ እስመ፡ ኀበ፡ ሀለወት፡ ትዕቢት፡ ህየ፡ ሀሎ፡ ኃሣር፡ ወብዙኅ፡ ሁከት፡ ወኀበ፡ ሀለወ፡ ሁከት፡ ህየ፡ ሀሎ፡ ተጽናስ፡ ወንዴት፡ እስመ፡ እማ፡ ይእቲ።
14 አስቡ፡ ለኵሉ፡ ዘተጋነየ፡ ለከ፡ ኢይቢት፡ ኀቤከ፡ አላ፡ ሀቦ፡ በጊዜሃ፡ እምዘ፡ ብከ፡ ወእምከመ፡ ተቀነይከ፡ ለእግዚአብሔር፡ ይፈደፍድ፡ አስብከ፡ ወዑቅ፡ ርእሰከ፡ ወበኵሉ፡ ግብርከ፡ ኩን፡ ጠቢበ፡ ወበኵሉ፡ ግዕዝከ።
15 ወዘትጸልዕ፡ ለርእስከ፡ ኢትግበር፡ ለመኑሂ፡ ወይነ፡ ለሰኪር፡ ኢትስተይ፡ ወኢትሑር፡ ምስለ፡ ስክርት፡ ውስተ፡ ፍኖትከ።
16 ወእምነ፡ እክልከ፡ ሀብ፡ ለርኁብ፡ ወእምነ፡ አልባሲከ፡ ሀብ፡ ለዕሩቅ፡ ወእምኵሉ፡ ዘይተርፈከ፡ ግበር፡ ምጽዋተ።
17 ወዝሩ፡ እክለከ፡ ላዕለ፡ መቃብረ፡ ጻድቃን፡ ወኢተሀብ፡ ለኃጥአን።
18 ምክረ፡ ኅሥሥ፡ በኀበ፡ ኵሉ፡ ጠቢባን፡ ወኢታስትት፡ ምክረ፡ እንተ፡ ትበቊዓከ።
19 ወበኵሉ፡ ጊዜ፡ ባርኮ፡ ለእግዚአብሔር፡ ወጸሊ፡ ኀቤሁ፡ ከመ፡ ሥሩሕ፡ ይኩን፡ ፍኖትከ፡ ዘይሤርሐከ፡ በኵሉ፡ ግብርከ፡ ወበኵሉ፡ ፍናዊከ፡ እስመ፡ ኵሎሙ፡ አሕዛብ፡ ዘይመክሩ፡ ምክረ፡ ዘኢኮነ፡ እምእግዚአብሔር፡ እንበለ፡ ውእቱ፡ እግዚአብሔር፡ ይሁብ፡ ኵሎ፡ ሠናይቶ፡ ወለዘፈቀደ፡ ያቴሕቶ፡ በከመ፡ ውእቱ፡ ፈቀደ፡ ወይእዜኒ፡ ወልድየ፡ ተዘከር፡ ትእዛዝየ፡ ወኢይደምሰስ፡ እምልብከ።
20 ወይእዜኒ፡ እነግረከ፡ በእንተ፡ መካልየ፡ ብሩር፡ ዐሠርቱ፡ ዘአዕቀብኩ፡ ኀበ፡ ገባኤል፡ ወልደ፡ ግብርያ፡ ዘራጊስ፡ ዘሜዶን።
21 ወኢትፍራህ፡ ወልድየ፡ በእንተ፡ ንዴትከ፡ እስመ፡ ነዳያን፡ ብከ፡ ይነሥኡ፡ በረከተ፡ ለእመ፡ ፈራህኮ፡ ለእግዚአብሔር፡ ወኃደገ፡ ኵሎ፡ ኃጢአተከ፡ ወገበርከ፡ ዘያሠምሮ፡ ለእግዚአብሔር፡ በቅድሜሁ።
=== chapter 5 ===
[Chapter 5]
1 ወአውሥአ፡ ጦብያ፡ ወይቤ፡ እገብር፡ አባ፡ ኵሎ፡ ዘአዘዝከኒ።
2 ወባሕቱ፡ እፎ፡ እክል፡ ነሢኦቶ፡ ለውእቱ፡ ብሩር፡ ዘኢየአምሮ።
3 ወወሀቦ፡ መጽሐፈ፡ ወይቤሎ፡ ኅሥሥ፡ ብእሴ፡ ዘየሐውር፡ ምስሌከ፡ ወእሁቦ፡ አስቦ፡ እንዘ፡ ሕያው፡ አነ፡ ወሑር፡ ንሣእ፡ ዘንተ፡ ብሩረ።
4 ወሖረ፡ ይኅሥሥ፡ ሎቱ፡ ብእሴ፡ ወረከቦ፡ ለሩፋኤል፡ መልአክ፡ ወኢያእመሮ፡ ከመ፡ መልአክ፡ ውእቱ።
5 ወይቤሎ፡ ትክልኑ፡ ሐዊረ፡ ምስሌየ፡ ራጊስ፡ ዘሜዶን፡ እመ፡ ተአምር፡ ብሔሮ።
6 ወይቤሎ፡ ውእቱ፡ መልአክ፡ አሐውር፡ ምስሌከ፡ ወፍኖቶሂ፡ አአምር፡ ወኀበ፡ ገባኤልሂ፡ ነበርኩ።
7 ወይቤሎ፡ ጦብያ፡ ጽንሐኒ፡ ከመ፡ እንግሮ፡ ለአቡየ፡ ጦቢት።
8 ወይቤሎ፡ ሑር፡ ኢትጐንዲ፡ ወሖረ፡ ወይቤሎ፡ ለአቡሁ፡ ነዋ፡ ረከብኩ፡ ዘየሐውር፡ ምስሌየ፡ ወይቤሎ፡ ጸውዖ፡ ኀቤየ፡ ከመ፡ አእምር፡ እምአይ፡ ሕዝብ፡ ውእቱ፡ ወእመ፡ ማእምን፡ ለሐዊር፡ ምስሌከ።
9 ወጸውዖ፡ ወቦአ፡ ወተአምኁ፡ በበይናቲሆሙ።
10 ወይቤሎ፡ ጦቢት፡ አንተ፡ እኁየ፡ እምአይ፡ ሕዝብ፡ አንተ፡ ወእምአይ፡ ብሔር፡ አንተ።
11 ወይቤሎ፡ መልአክ፡ ሕዝብየኑ፡ ወብሔርየኑ፡ ተኃሥሥ፡ አው፡ አስቦ፡ ዘየሐውር፡ ምስለ፡ ወልድከ፡ ወይቤሎ፡ ጦቢት፡ እፈቅድ፡ አንተ፡ እኁየ፡ አእምር፡ ዘመደከ፡ ወስመከ።
12 ወይቤሎ፡ አንሰ፡ አዛርያ፡ ዘመደ፡ አናንያ፡ ዓቢይ፡ እኁከ።
13 ወይቤሎ፡ ዳኅንኑ፡ አንተ፡ እኁየ፡ ወኢትኂሰኒ፡ እስመ፡ ኃሠሥኩ፡ አእምር፡ ሕዝበከ፡ ወብሔረከ፡ ወአማን፡ ባሕቱ፡ እምሠናይ፡ ዘመድ፡ አንተ፡ ወቡሩክ፡ ወአአምሮ፡ አነ፡ ለአዛርያ፡ ደቂቀ፡ ሴምዩ፡ ዓቢይ፡ ወሖርነ፡ ምስሌሆሙ፡ ኅቡረ፡ ኢየሩሳሌም፡ ከመ፡ ንስግድ፡ ወወሰድነ፡ በኵረነ፡ ወአሥራተ፡ እክልነ፡ ወኢአበስነ፡ አበሳ፡ አበዊነ፡ ወአንተሰ፡ እምነ፡ ዓቢይ፡ ሥርው፡ አንተ፡ እኁየ።
14 ወባሕቱ፡ ንግረኒ፡ ምንተ፡ ነሀብ፡ አስበከ፡ ድርከመኑ፡ ለለዕለትከ፡ ወሲሳይከ፡ ምስለ፡ ወልድየ።
15 ወእዌስክ፡ አስበከ፡ በዲበ፡ አስብከ፡ ለእመ፡ ዳኅነ፡ አቶክሙ።
16 ወአኅለቁ፡ ከመዝ፡ ወይቤሎ፡ ጦቢት፡ ለጦብያ፡ ወልዱ፡ ተደለው፡ ከመ፡ ትሑር፡ ወተሠርሑ፡ ወአስተዳለወ፡ ወልዱ፡ ስንቆሙ፡ ለፍኖት፡ ወይቤሎ፡ አቡሁ፡ ሑር፡ ምስለ፡ ዝንቱ፡ ብእሲ፡ ወእግዚአብሔር፡ ዘይነብር፡ ውስተ፡ ሰማይ፡ ይሠርሕ፡ ፍኖተክሙ፡ ወመልአኩ፡ ይሑር፡ ምስሌክሙ፡ ወወጽኡ፡ ክልኤሆሙ፡ ወሖሩ፡ ወተለዎሙ፡ ከልበ፡ ወልዶሙ።
17 ወበከየት፡ ሐና፡ እሙ፡ ወትቤሎ፡ ለጦቢት፡ ለምንት፡ ፈነውኮ፡ ለወልድየ፡ አኮኑ፡ ውእቱ፡ በትርነ፡ እንተ፡ ውስተ፡ እዴነ፡ ዘይወጽእ፡ ቅድሜነ።
18 ብሩር፡ ለይጥፋዕ።
19 ወቤዛሁ፡ ለወልድየ፡ ይኩን፡ ዘወሀበነ፡ እግዚአብሔር፡ ዘቦቱ፡ ነሐዩ።
20 ወይቤላ፡ ኢትትኃለፊ፡ እኅትየ፡ ዳኅነ፡ የአቱ፡ ወትሬኢይዮ፡ በአዕይ፡ ንትኪ።
21 እስመ፡ መልአከ፡ እግዚአብሔር፡ የሐውር፡ ቅድሜሁ፡ ወይሤርሕ፡ ፍኖቶ፡ ወየአቱ፡ ዳኅነ፡ ወኃደገት፡ ብካየ፡ ሐና።
=== chapter 6 ===
[Chapter 6]
1 ወእንዘ፡ የሐውሩ፡ ፍኖቶሙ፡ በጽሑ፡ በጣኔስ፡ ውስተ፡ ተከዚ፡ ምሴተ፡ ወቤቱ፡ በህየ።
2 ወወረደ፡ ውእቱ፡ ወልድ፡ ይትሐፀብ፡ ወሠረረ፡ ላዕሌሁ፡ ዓሣ፡ እምውስተ፡ ተከዚ፡ ወፈቀደ፡ የሐጦ፡ ለውእቱ፡ ወልድ።
3 ወይቤሎ፡ መልአክ፡ አኃዞ፡ ለውእቱ፡ ዓሣ፡ ወአኃዞ፡ ለዓሣ፡ ውእቱ፡ ወልድ፡ ወአውጽኦ፡ ውስተ፡ ምድር።
4 ወይቤሎ፡ ዝኩ፡ መልአክ፡ ምትሮ፡ ለውእቱ፡ ዓሣ፡ ወንሣእ፡ ልቦ፡ ወከብዶ፡ ወሐሞቶ፡ ወአጽንዕ፡ ዓቂቦቶ።
5 ወገብረ፡ ውእቱ፡ ወልድ፡ በከመ፡ አዘዞ፡ መልአክ፡ ወዓሣሁኒ፡ ጠበሱ፡ ወበልዑ፡ ወጌሡ፡ ክልኤሆሙ፡ ወበጽሑ፡ በጣኔስ።
6 ወይቤሎ፡ ዝኩ፡ ወልድ፡ ለመልአክ፡ አንተ፡ እኁየ፡ አዛርያ፡ ምንት፡ ውእቱ፡ ከብዱ፡ ወልቡ፡ ወሐሞቱ፡ ለዝንቱ፡ ዓሣ።
7 ወይቤሎ፡ ልቡ፡ ወከብዱ፡ ለእመቦ፡ ዘየሐምሞ፡ ጋኔን፡ እኵይ፡ ዘንተ፡ ያጠይሱ፡ ቅድሜሁ፡ ለውእቱ፡ ብእሲ፡ ወእመኒ፡ ብእሲት፡ ወኢየሐምም፡ እንከ።
8 ወሐሞቶሰ፡ ይኵሕልዎ፡ ለብእሲ፡ ዘቦቱ፡ ጢስ፡ ውስተ፡ አዕይንቲሁ፡ ወየሐዩ።
9 ወሶበ፡ ቀርቡ፡ ኀበ፡ ራጊስ፡ ወይቤሎ፡ ውእቱ፡ መልአክ፡ አንተ፡ እኁየ፡ ዮምኬ፡ ኀበ፡ ራጉኤል፡ ነኅድር።
10 ወአዝማዲከ፡ ውእቱ፡ ወቦ፡ አሐቲ፡ ወለት፡ ዘስማ፡ ሣራ፡ ወእትናገርኑ፡ በእንቲአሃ፡ የሀቡከ፡ ትኩንከ፡ ብእሲተ።
11 እስመ፡ ለከ፡ ይበጽሐከ፡ ርስታ፡ ወአንተ፡ ሀሎከ፡ እምነ፡ አዝማዲሃ፡ ወወለታኒ፡ ሠናይት፡ ወጠባብ።
12 ወይእዜኒ፡ ስምዓኒ፡ ወእትናገሮ፡ ለአቡሃ፡ ወሶበ፡ ገባዕነ፡ እምነ፡ ራጊስ፡ ንገብር፡ በዓለ፡ እስመ፡ ኢይገብር፡ የሀባ፡ ራጉኤል፡ ለካልዕ፡ ሰብእ፡ በእንተ፡ ሕገ፡ ሙሴ፡ ወእምአብደረ፡ ትሙት፡ እስመ፡ ርስታ፡ ለከ፡ ይበጽሐከ፡ እምኵሉ፡ ሰብእ።
13 ወይቤሎ፡ ዝኩ፡ ወልድ፡ ለውእቱ፡ መልአክ፡ አንተ፡ እኁየ፡ አዛርያ፡ ሰማዕኩ፡ አነ፡ ከመ፡ አስተዋሰብዋ፡ ለይእቲ፡ ወለት፡ ለሰብእቱ፡ ዕደው፡ ወኵሎሙ፡ ሞቱ፡ አመ፡ ከብካብ።
14 ወይእዜኒ፡ ባሕቲትየ፡ አነ፡ ለአቡየ፡ እፈርህ፡ ሶበ፡ ቦእኩ፡ ኢይሙት፡ ወኢይወርድ፡ ሕይወቶሙ፡ ለአቡየ፡ ወእምየ፡ በፃዕር፡ ወአልቦሙ፡ ካልዕ፡ ወልድ፡ ዘይቀብሮሙ።
15 ወይቤሎ፡ ውእቱ፡ መልአክ፡ ኢትዜከርኑ፡ ቃለ፡ ዘአዘዘከ፡ አቡከ፡ ከመ፡ ትንሣእ፡ ለከ፡ ብእሲተ፡ አምአዝማዲከ፡ ወይእዜኒ፡ ስምዐኒ፡ አንተ፡ እኁየ፡ ወበእንተ፡ ጋኔንሰ፡ ኢያኅዝንከ፡ እስመ፡ በዝንቱ፡ ሌሊት፡ ትትወሀብ፡ ለከ፡ ብእሲት፡ እምአዝማዲከ።
16 ወሶበ፡ ቦእከ፡ ውስተ፡ ጽርሕከ፡ ንሣእ፡ ለከ፡ ሕራረ፡ ዕጣን፡ ወደይ፡ እምነ፡ ከብዱ፡ ወልቡ፡ ለዝኩ፡ ዓሣ፡ ወአጢስ፡ ቦቱ።
17 ወሶበ፡ ፄነዎ፡ ለውእቱ፡ ጋኔን፡ ይጐይይ፡ ወኢይገብእ፡ ለዓለም፡ ወሶበ፡ ቦእከ፡ ኀቤሃ፡ ጽርሑ፡ ክልኤክሙ፡ ኀበ፡ እግዚአብሔር፡ መሐሪ፡ ወያድኅነክሙ፡ ወይምሕረክሙ፡ ወኢትፍርሁ፡ እንከ፡ እስመ፡ ኪያክሙ፡ አስተዳለወ፡ እምነ፡ ዓለም፡ ወአንተ፡ ታድኅና፡ ወተሐውር፡ ምስሌከ፡ ወእብለከ፡ ከመ፡ ትረክብ፡ ውሉደ፡ እምኔሃ፡ ወሰሚዖ፡ ጦብያ፡ አንከረ፡ ወተለዋ፡ ነፍሱ፡ ኀቤሃ፡ ጥቀ፡ ወበጽሑ፡ ውስተ፡ በጣኔስ።
=== chapter 7 ===
[Chapter 7]
1 ወቦኡ፡ ቤተ፡ ራጉኤል፡ ወተቀበለቶሙ፡ ሣራ፡ ወአስተፍሥሐቶሙ፡ ወከማሁ፡ እሙንቱኒ፡ ላቲ፡ ወአብአቶሙ፡ ቤተ።
2 ወይቤላ፡ ራጉኤል፡ ለብእሲቲ፡ እድና፡ ዕፁብ፡ ዝንቱ፡ ወልድ፡ ይመስሎ፡ ለጦቢት፡ ዘእምአዝማድየ።
3 ወይቤሎሙ፡ ራጉኤል፡ እምአይቴ፡ አንትሙ፡ አኃውየ፡ ወይቤልዎ፡ እምደቂቀ፡ ንፍታሌም፡ እለ፡ ተፄወዉ፡ ነነዌ።
4 ወይቤሎሙ፡ ራጉኤል፡ ተአምርዎኑ፡ ለጦቢት፡ እኁየ።
5 ወይቤልዎ፡ እወ፡ ነአምሮ፡ ሕያውኑ፡ ወዳኅንኑ፡ ወይቤሎ፡ ጦቢያ፡ አቡየ፡ ውእቱ።
6 ወሠረረ፡ ራጉኤል፡ ወሰዓሞ፡ ወበከየ።
7 ወባረኮ፡ ወይቤሎ፡ ወልደ፡ ብእሲ፡ ቡሩክ፡ አንተ፡ ወነገሮ፡ ከመ፡ ጠፍዓ፡ አዕይንቲሁ፡ ለጦቢት፡ ወሶበ፡ ሰምዐ፡ ከመ፡ ተኃጕለ፡ አዕይንቲሁ፡ ራጉኤል፡ ተከዘ፡ ወበከየ።
8 ወከማሁ፡ እድናሂ፡ ብእሲቱ፡ ወሣራሂ፡ ወለቱ፡ ወተቀበልዎሙ፡ በትፍሥሕት፡ ወጠብሑ፡ አባግዓ፡ ወአቅረበ፡ ሎሙ፡ ወመስየ፡ በሕቁ፡ ወይቤሎ፡ ጦብያ፡ ለአዛርያ፡ አንተ፡ እኁየ፡ አዛርያ፡ ተናገር፡ በእንተ፡ ዘትቤለኒ፡ በፍኖት፡ ወይሕልቅ፡ ነገሩ።
9 ወዘንተ፡ ሰሚዖ፡ ራጉኤል፡ እንዘ፡ ይትናገሮ፡ ጦብያ፡ ለመልአክ፡ ወይቤሎ፡ ለጦብያ፡ ብላዕ፡ ወስተይ፡ ምዕረ፡ ወተፈሣሕ።
10 እስመ፡ ለከ፡ ይእቲ፡ ወለትየ፡ ወአንተ፡ ትነሥኣ፡ ወአነ፡ እነግር፡ ጽድቃ፡ ለዛቲ፡ ወለትየ።
11 ለዛቲ፡ ወለትየ፡ አስተዋሰብክዋ፡ ለሰብአቱ፡ ዕደው፡ ወእምከመ፡ ቦኡ፡ ኀቤሃ፡ ይመውቱ፡ በሌሊት፡ ወባሕቱ፡ ብላዕ፡ ወተፈሣሕ፡ ምዕረ፡ ወይቤ፡ ጦብያ፡ ኢይጥዕም፡ ወኢምንተኒ፡ እስከ፡ ታሐልቁ፡ ወታቀውሙ፡ ሊተ፡ ነገርየ።
12 ወይቤሎ፡ ራጉኤል፡ ንሣኣ፡ እምይእዜሰ፡ ዘበሕጉ።
13 እስመ፡ እኁሃ፡ አንተ፡ ወይእቲኒ፡ ብእሲትከ፡ ወእግዚአብሔር፡ መሐሪ፡ ይሠርሕክሙ፡ በእንተ፡ ዘትሤኒ።
14 ወጸውዓ፡ ለሣራ፡ ወለቱ።
15 ወአኃዛ፡ እዴሃ፡ ወመጠዋ፡ ለጦብያ፡ ትኩኖ፡ ብእሲተ፡ ወይቤሎ፡ ናሁ፡ ንሣእ፡ በሕገ፡ ሙሴ፡ ወአዕትዋ፡ ኀበ፡ አቡከ፡ ወባረኮሙ።
16 ወጸውዓ፡ ለእድና፡ ብእሲቱ፡ ወነሥአ፡ መጽሐፈ፡ ወኀተመ፡ ወአኃዙ፡ ይብልዑ፡ ወጸውዓ፡ ለእድና፡ ወይቤላ፡ አንቲ፡ እኅትየ፡ አስተዳልዊ፡ ካልዓ፡ ጽርሐ፡ ወአብኢያ።
17 ወገብረታ፡ በከመ፡ ይቤላ፡ ወአብአታ፡ ህየ፡ ወበከየት፡ ወአውከፈት፡ አንብዓ፡ ወለታ።
18 ወትቤላ፡ ተአመኒ፡ ወለትየ፡ ከመ፡ እግዚአ፡ ሰማይ፡ ወምድር፡ ይሁበኪ፡ ትፍሥሕተ፡ ወኃሤተ፡ ህየንተ፡ ኃዘንኪ።
=== chapter 8 ===
[Chapter 8]
1 ወሶበ፡ አሕለቁ፡ ተደሮ፡ አብእዎ፡ ኀቤሃ፡ ለጦብያ።
2 ወሶበ፡ ቦአ፡ ተዘከረ፡ ቃሎ፡ ወነሥአ፡ ሕራረ፡ ዕጣን፡ ወወደየ፡ እምነ፡ ልቡ፡ ወከብዱ፡ ለዝኩ፡ ዓሣ፡ ወአጤሰ።
3 ወሶበ፡ ፄነዎ፡ ፄናሁ፡ ለዝኩ፡ ጋኔን፡ እስከ፡ ላዕላይ፡ ደወለ፡ ግብጽ፡ ወዓሠሮ፡ ዝኩ፡ መልአክ፡ ለውእቱ፡ ጋኔን።
4 ወሶበ፡ ተዓደዉ፡ ክልኤሆሙ፡ ተንሥአ፡ ጦብያ፡ እምነ፡ ዓራቱ፡ ወይቤላ፡ ተንሥኢ፡ እኅትየ፡ ንጸሊ፡ ኀበ፡ እግዚአብሔር፡ ከመ፡ ይሣሃለነ።
5 ወአኃዘ፡ ጦብያ፡ እንዘ፡ ይብል፡ ቡሩክ፡ አንተ፡ እግዚኦ፡ አምላከ፡ አበዊነ፡ ወይትባረክ፡ ስምከ፡ ቅዱስ፡ ወይሴባሕ፡ ለዓለመ፡ ዓለም፡ ይባርኩከ፡ ሰማያት፡ ወኵሉ፡ ዘፈጠርከ፡ አንተ፡ ገበርኮ፡ ለአዳም።
6 ወወሀብኮ፡ ሔዋንሃ፡ ትኩኖ፡ ብእሲተ፡ ወከመ፡ ታዕርፎ፡ ወእምኔሆሙ፡ ተወልደ፡ ዘርአ፡ ዕጓለ፡ እመሕያው፡ አንተ፡ ትቤ፡ ኢኮነ፡ ሠናየ፡ የሃሉ፡ ብእሲ፡ ባሕቲቱ፡ አላ፡ ንግበር፡ ሎቱ፡ ቢጸ፡ ዘትረድኦ።
7 ወይእዜኒ፡ እግዚኦ፡ እንበይነ፡ ዝሙት፡ ዘእነሥኣ፡ ለዛቲ፡ ብእሲት፡ እኅትየ፡ አላ፡ በጽድቅ፡ ፈኑ፡ ሣህለከ፡ ላዕሌየ፡ ወላቲኒ፡ ከመ፡ ንትፈሣሕ።
8 ወትቤ፡ ምስሌሁ፡ አሜን።
9 ወቤቱ፡ ክልኤሆሙ፡ ኅቡረ፡ በይእቲ፡ ሌሊት፡ ወእምዝ፡ ተንሥአ፡ ራጉኤል፡ ወሖረ፡ ወከረየ፡ መቃብረ።
10 እንዘ፡ ይብል፡ ዮጊ፡ ይመውት፡ ውእቱኒ።
11 ወገብአ፡ ራጉኤል፡ ቤቶ፡ ወይቤላ፡ ለእድና፡ ብእሲቱ።
12 ፈንዊ፡ አሐተ፡ ወለተ፡ ትርአዮ፡ እመሕያው፡ ውእቱ፡ ወእመ፡ አኮ፡ ንቅብሮ፡ እንዘ፡ አልቦ፡ ዘየአምሮ፡ መኑሂ።
13 ወሖረት፡ ይእቲ፡ ወለት፡ ወአርኃወት፡ ኆኅተ፡ ወረከበቶሙ፡ ይስክቡ፡ ክልኤሆሙ።
14 ወገብአት፡ ወአይድዐቶሙ፡ ከመ፡ ሕያዋን፡ እሙንቱ።
15 ወባረኮ፡ ራጉኤል፡ ለእግዚአብሔር፡ ወይቤ፡ ቡሩክ፡ አንተ፡ እግዚኦ፡ በኵሉ፡ በረከት፡ ንጽሕት፡ ወቅድስት፡ ወይባርኩከ፡ ቅዱሳኒከ፡ በኵሉ፡ ግብርከ፡ ወኵሎሙ፡ መላእክቲከ፡ ወኅሩያኒከ፡ ይባርኩከ፡ በኵሉ፡ ዓለም።
16 ቡሩክ፡ አንተ፡ እግዚኦ፡ እስመ፡ አስተፍሣሕከኒ፡ ወበከመ፡ ኢተኃዘብኩ፡ ኮነኒ፡ አላ፡ በከመ፡ ብዝኃ፡ ምሕረትከ፡ ገበርከ፡ ላዕሌየ።
17 ቡሩክ፡ አንተ፡ እግዚኦ፡ እስመ፡ ተሣሃልኮሙ፡ ለክልኤቱ፡ ባሕታውያን፡ ወገበርከ፡ ሎሙ፡ እግዚኦ፡ ሠናይቲከ፡ ከመ፡ ይፈጽሙ፡ ሕይወቶሙ፡ በደኅና፡ ወበፍሥሓ፡ በምሕረትከ።
18 ወእምዝ፡ አዘዞሙ፡ ለአግብርቲሁ፡ ይድፍኑ፡ ዝክተ፡ መቃብረ።
19 ወገብረ፡ ሎሙ፡ በዓለ፡ ዐሡረ፡ ወረቡዐ፡ መዋዕለ።
20 ወእምዝ፡ አምሐሎ፡ ራጉኤል፡ ለጦብያ፡ ከመ፡ ኢይፃእ፡ ወኢይሑር፡ እስከ፡ ይትፌጸም፡ መዋዕል፡ ዐሡር፡ ወረቡዕ፡ ዘመርዓ።
21 ወእምድኅረ፡ ዝንቱ፡ ይሑር፡ ወይንሣዕ፡ መንፈቀ፡ ንዋዩ፡ ወይሑር፡ በዳኅን፡ ኀበ፡ አቡሁ፡ ወዘተርፈሰ፡ እምድኅረ፡ ሞቱ፡ ውእቱ፡ ወብእሲቱ፡ ይንሥኡ።
=== chapter 9 ===
[Chapter 9]
1 ወጸውዖ፡ ጦብያ፡ ለሩፋኤል፡ ወይቤሎ፡ አንተ፡ እኁየ፡ አዛርያ፡ ንሣእ፡ ምስሌከ፡ ክልኤተ፡ ደቂቀ፡ ወአግማለ።
2 ወሑር፡ ራጊስ፡ ዘሜዶን፡ ኀበ፡ ገባኤል፡ ወንሣእ፡ አሠርተ፡ መክሊተ፡ ብሩር፡ ወጸውዖ፡ ኪያሁኒ፡ ውስተ፡ በዓል።
3 እስመ፡ አምሐለኒ፡ ራጉኤል፡ ከመ፡ ኢይፃእ፡ ዘእንበለ፡ ይኅልፍ፡ በዓል።
4 ወአቡየሰ፡ ይኌልቊ፡ መዋዕለ፡ ወለእመ፡ ጐንደይኩ፡ ጥቀ፡ የኀዝን።
5 ወሖረ፡ ሩፋኤል፡ ወበጽሐ፡ ኀበ፡ ገባኤል፡ ወመጠዎ፡ መጽሐፈ፡ ወገባኤልኒ፡ አምጽአ፡ ዝኰ፡ መስነቀ፡ በማኅተም፡ ወወሀቦ፡ ለሩፋኤል።
6 ወጌሡ፡ በጽባሕ፡ ኅቡረ፡ ወበጽሑ፡ ውስተ፡ በዓል፡ ወባረኮ፡ ጦብያ፡ ሶበ፡ አምጽአ፡ ሎቱ፡ ውእተ፡ ብሩረ።
=== chapter 10 ===
[Chapter 10]
1 ወጦቢትሰ፡ አቡሁ፡ ለጦብያ፡ ይኌልቊ፡ መዋዕለ፡ ወሶበ፡ ተፈጸመ፡ መዋዕለ፡ ዕድሜሆሙ፡ ወኢመጽኡ።
2 ይቤ፡ ዮጊ፡ ተኃፍረኑ፡ ወልድየ፡ አው፡ ይመውት፡ ገባኤል፡ ወኢረከበ፡ ዘይሁቦ፡ ብሩረ።
3 ወተከዘ፡ ጥቀ።
4 ወትቤሎ፡ ብእሲቱ፡ ወልድየሰ፡ ሞተ፡ ወበእንተዝ፡ ጐንደየ፡ ወአኃዘጽ፡ ትብክዮ።
5 ወትቤ፡ እምኢያኅዘነኒ፡ ወልድየ፡ ሶበ፡ አኮ፡ ዘአኅጐከኒ፡ ብርሃነ፡ አዕይንትየ።
6 ወይቤላ፡ አርምሚ፡ ወኢትትኃለፊ፡ ውእቱሰ፡ ሕያው።
7 ወትቤሎ፡ ይእቲኒ፡ አርምም፡ አንተኒ፡ ወኢታስተአብደኒ፡ ወልድየሰ፡ ሞተ፡ ወተሐውር፡ ኵሎ፡ አሚረ፡ ትብክዮ፡ ውስተ፡ ፍኖት፡ እንተ፡ ኀበ፡ ሖረ፡ መዓልተ፡ እክለ፡ ኢትበልዕ፡ ወሌሊተ፡ ኢታረምም፡ እንዘ፡ ትበክዮ፡ ለጦብያ፡ ወልዳ፡ ወእስከ፡ ተፈጸመ፡ ዓሠርቱ፡ ወረቡዕ፡ ዕለት፡ መዋዕለ፡ በዓል፡ ዘአምሐሎ፡ ራጉኤል፡ ከመ፡ ኢይሑር፡ እስከ፡ አመ፡ ይትፌጸም፡ በዓል፡ ዘመርዓ።
8 ወእምዝ፡ ተፈጺሞ፡ መዋዕለ፡ በዓል፡ ይቤሎ፡ ጦብ፡ ለራጉኤል፡ ፈንወኒ፡ እንከሰ፡ እስመ፡ አቡየ፡ ወእምየ፡ ቀብፁኒ፡ ወኢይሴፈዉ፡ እንከ፡ ይርአዩኒ።
9 ወይቤሎ፡ ሐሙሁ፡ ንበር፡ ኀቤየ፡ ወአነ፡ እልእክ፡ ኀበ፡ አቡከ፡ ከመ፡ ይንግርዎ፡ ዜናከ።
10 ወይቤሎ፡ ጦብያ፡ አልቦ፡ ዳዕሙ፡ ፈንወኒ፡ ኀበ፡ አቡየ።
11 ወተንሥአ፡ ራጉኤል፡ ወወሀቦ፡ ሣራሃ፡ ብእሲቶ፡ ወመንፈቀ፡ ንዋዮሙ፡ ሰብአኒ፡ ወእንስሳሁኒ።
12 ወባረኮሙ፡ ወይቤሎሙ፡ እግዚአ፡ ሰማይ፡ ያሠኒ፡ ላዕሌክሙ፡ ደቂቅየ፡ ዘእንበለ፡ እሙት፡ ወይቤላ፡ ለወለቱ፡ አክብሪ፡ ታሕማኪ፡ እስመ፡ እምይእዜ፡ ዘመድኪ፡ ወንሕነሰ፡ ንስማዕ፡ ዜና፡ ሠናየ፡ በላዕሌኪ፡ ወሰዓማ፡ ወትቤሎ፡ እድና፡ ለጦብያ፡ አንተ፡ እኁየ፡ ዘአፈቅሮ፡ እግዚአ፡ ሰማይ፡ ይሠርሕከ፡ ወየሀብከ፡ ወልደ፡ እምነ፡ ሣራ፡ ወለትየ፡ እርአይ፡ ለከ፡ ከመ፡ እትፈሣሕ፡ በቅድመ፡ እግዚአብሔር፡ ወናሁ፡ አማኅፀንኩከ፡ ወለትየ፡ ማኅፀንተ፡ ኢታኅዝና።
13 ወእምድኅረ፡ ሖረ፡ ጦብያ፡ ወባረኮ፡ እግዚአብሔር፡ እስመ፡ ሠርሐ፡ ፍኖቶ፡ ወባረክዎ፡ ራጉኤል፡ ወእድና፡ ብእሲቱ፡ ወሖሩ፡ ወቀርቡ፡ ኀበ፡ ነነዌ።
=== chapter 11 ===
[Chapter 11]
1 ወእምዝ፡ ይቤሎ፡ ሩፋኤል፡ ለጦብያ፡ አንተ፡ እኁየ፡ ኢተአምርኑ፡ እፎ፡ ኀደጋሁ፡ ለአቡከ።
2 ነዓ፡ ንቅድም፡ እምነ፡ ብእሲትከ፡ ወናስተዳሉ፡ ቤተ።
3 ወንሣእ፡ ምስሌከ፡ ሐሞቶ፡ ለውእቱ፡ ዓሣ፡ ወሖሩ፡ ክልኤሆሙ፡ ወሖረ፡ ምስሌሆሙ፡ ዝኩ፡ ወልድ፡ ዘተለዎሙ።
4 ወሐናሰ፡ ትነብር፡ ውስተ፡ ፍኖት፡ ወትጸንሕ፡ ምጽአቶ፡ ለወልዳ።
5 ወርእየቶ፡ እንዘ፡ ይመጽእ፡ ሕረት፡ ወነገረቶ፡ ለአቡሁ፡ ወትቤሎ፡ ናሁ፡ መጽአ፡ ወልድከ፡ ወውእቱኒ፡ ብእሲ፡ ዘሖረ፡ ምስሌሁ፡ ውእቱኒ፡ መጽአ።
6 ወይቤሎ፡ ሩፋኤል፡ ለጦብያ፡ አነ፡ አአምር፡ ከመ፡ ይትከሠት፡ አዕይንቲሁ፡ ለአቡከ።
7 አንተሰ፡ ኰሐሎ፡ ዘንተ፡ ሐሞተ፡ አዕይንቲሁ፡ ወሶበ፡ ተኵሕለ፡ የሐሲ፡ ወይወጽእ፡ ዝኩ፡ ጢስ፡ እምኔሁ፡ ወይሬኢ፡ ዳኅነ።
8 ወሮፀት፡ ሐና፡ ወሐቀፈት፡ ክሣደ፡ ወልዳ፡ ወትቤሎ፡ እሙ፡ እምይእዜሰ፡ እሙት፡ እንከ፡ እስመ፡ ርኢኩከ፡ ወልድየ፡ ወበከዩ፡ ክልኤሆሙ።
9 ወወጽአ፡ ጦቢት፡ ኀበ፡ ኆኅት፡ ወተሐቅፉ፡ ወሮፀ፡ ወልዱ፡ ወአንሥኦ፡ ለአቡሁ፡ ወኰሐሎ፡ ዝኰ፡ ሐሞተ፡ ውስተ፡ አዕይንቲሁ።
10 ወይቤሎ፡ ተአመን፡ አባ፡ ከመ፡ ተሐዩ።
11 ወሶበ፡ ኰሐሎ፡ ሐሰየ፡ አዕይንቲሁ።
12 ወተሥዕየ፡ እምነ፡ ብንተ፡ አዕይንቲሁ፡ ወርእዮ፡ ለወልዱ።
13 ወሐቀፎ፡ ክሣዶ፡ ወበከየ፡ ወይቤ፡ ቡሩክ፡ አንተ፡ እግዚኦ፡ ወይትባረክ፡ ስምከ፡ ለዓለም፡ ወቡሩካን፡ ኵሎሙ፡ መላእክቲከ፡ ቅዱሳን።
14 እስመ፡ ቀሠፍከነ፡ ወተሣሃልከነ፡ ወናሁ፡ ርኢክዎ፡ ለጦብያ፡ ወልድየ፡ ወእምዝ፡ ቦአ፡ ወልዱ፡ እንዘ፡ ይትፌሣሕ፡ ወአይድዖ፡ ለአቡሁ፡ ኵሎ፡ ዓቢያተ፡ ዘኮነ፡ ላዕሌሁ።
15 ወወጽአ፡ ጦቢት፡ ወተቀበላ፡ ለመርዓቱ፡ እንዘ፡ ይትፌሣሕ፡ ወባረኮ፡ ለእግዚአብሔር፡ በኀበ፡ አንቀጸ፡ ነነዌ፡ ወአንከሩ፡ እለ፡ ርእይዎ፡ እንዘ፡ የሐውር፡ ወይቤሉ፡ እፎ፡ ርእየ።
16 ወጦቢትሰ፡ ገነየ፡ ለእግዚአብሔር፡ በቅድሜሆሙ፡ እስመ፡ ተሣሃሎ፡ አምላከ፡ ሰማይ፡ ወሶበ፡ በጽሐ፡ ጦቢት፡ ኀበ፡ ሣራ፡ መርዓቱ፡ ባረካ፡ ወይቤላ፡ በጻሕኪኑ፡ በዳኅን፡ ወለትየ፡ ይትባረክ፡ እግዚአብሔር፡ ዘአምጽአኪ፡ ኀቤነ፡ ወይባርክ፡ አባኪኒ፡ ወእመኪኒ፡ ወኮነ፡ ዓቢይ፡ ትፍሥሕት፡ ላዕለ፡ ኵሉ፡ አዝማዲሁ፡ እለ፡ ይነብሩ፡ ነነዌ።
17 ወመጽኡ፡ አካኪሮስ፡ ወነሳቦስ፡ ወልደ፡ እኁሁ።
18 ወገብሩ፡ በዓለ፡ ሰቡዓ፡ መዋዕለ፡ በትፍሥሕት።
=== chapter 12 ===
[Chapter 12]
1 ወእምዝ፡ ጸውዖ፡ ለጦብያ፡ ጦቢት፡ ወይቤሎ፡ ርኢ፡ ሎቱ፡ ወልድየ፡ አስቦ፡ ለዝኩ፡ ብእሲ፡ ዘሖረ፡ ምስሌከ፡ ወዓዲ፡ ርቱዕ፡ ትወስክ፡ ሎቱ።
2 ወይቤሎ፡ ጦቢያ፡ ለአቡሁ፡ አባ፡ ዘይነክየኒ፡ አልቦ፡ ለእመ፡ ወሀብክዎ፡ መንፈቀ፡ ዝንቱ፡ ነዋይ፡ ዘአምጻእኩ።
3 እስመ፡ አዕተወኒ፡ ኀቤከ፡ በዳኅና፡ ወለብእሲትየኒ፡ ፈወሳ፡ ወብሩረኒ፡ አምጽአ፡ ከማሁ፡ ለከሂ፡ ፈወሰከ።
4 ወይቤሎ፡ አቡሁ፡ ጽድቀ፡ ነበብከ።
5 ወጸውዖ፡ ለውእቱ፡ መልአክ፡ ወይቤሎ፡ ንሣእ፡ መንፈቀ፡ ኵሉ፡ ንዋይ፡ ዘአምጻእክሙ፡ ምስሌክሙ፡ ወሑር፡ በዳኅን።
6 ወጸውዖሙ፡ ሩፋኤል፡ ውእተ፡ ጊዜ፡ ለክልኤሆሙ፡ ወአግኃሦሙ፡ ወይቤሎሙ፡ ባርክዎ፡ ለእግዚአብሔር፡ ወግነዩ፡ ሎቱ፡ ወወሀቡ፡ ዕበየ፡ ለስሙ፡ ወእመኑ፡ ቦቱ፡ በቅድመ፡ ኵሉ፡ ዘሕያው፡ በእንተ፡ ኵሉ፡ ዘገብረ፡ ላዕሌክሙ፡ ሠናያተ፡ ወአዕኵትዎ፡ ለእግዚአብሔር፡ ወሰብሑ፡ ለስሙ፡ ወንግሩ፡ ግብሮ፡ ለእግዚአብሔር፡ በክብር፡ አርእዩ፡ ወኢትትሐከዩ፡ ገንየ፡ ሎቱ።
7 እስመ፡ ምሥጢረ፡ መንግሥት፡ ሠናይ፡ ለኀቢእ፡ ወለግብረ፡ እግዚአብሔርሰ፡ ይከሥትዎ፡ በግብር፡ ግበርዋ፡ ለሠናይት፡ ወኢትረክበክሙ፡ እኪት።
8 ሠናይ፡ ውእቱ፡ ጸሎት፡ ምስለ፡ ሰላም፡ ወምጽዋት፡ ወጽድቅ፡ ይኄይስ፡ ኅዳጥ፡ ዘበጽድቅ፡ እምብዙኅ፡ ብዕለ፡ ዓመፃ፡ ወይኄይስ፡ ውኂበ፡ ምጽዋት፡ እምዘጊቦቱ፡ ለወርቅ።
9 እስመ፡ ምጽዋት፡ ታድኅን፡ እሞት፡ ወታነጽሕ፡ እምኵሉ፡ ኃጢአት፡ ወእለሰ፡ ይገብሩ፡ ጽድቀ፡ ወምጽዋተ፡ ይመልዑ፡ ላዕሌሆሙ፡ ሕይወተ።
10 ወእለሂ፡ ይኤብሱ፡ ይጸልእዋ፡ ለነፍሶሙ።
11 ወናሁ፡ ኢየኀብእ፡ እምኔክሙ፡ ኵሎ፡ ነገረ፡ ወእቤለክሙ፡ ከመ፡ ምሥጢረ፡ መንግሥት፡ ሠናይ፡ ለኃቢዕ፡ ወግብሮሰ፡ ለእግዚአብሔር፡ ይከሥትዎ፡ በክብር።
12 ወይእዜኒ፡ አመ፡ ጸለይክሙ፡ አንተ፡ ወሣራ፡ መርዓትከ፡ አነ፡ አባዕኩ፡ ተዝካረ፡ ስእለትክሙ፡ ቅድሜሁ፡ ለቅዱሰ፡ ቅዱሳን፡ ወአንተኒ፡ አመ፡ ትቀብር፡ አብድንተ፡ አሜሃ፡ ሀሎኩ፡ ምስሌከ።
13 ወአመኒ፡ ኢተሐየይከ፡ ወተንሣእከ፡ ኀዲገከ፡ ምስሐከ፡ ወሖርከ፡ ትቀብር፡ በድነ፡ ወኢረሣእከ፡ ገቢረ፡ ሠናይ፡ አሜሃ፡ ሀሎኩ፡ ምስሌከ።
14 ወእግዚአብሔር፡ ፈነወኒ፡ ከመ፡ እፈውስከ፡ ወለሣራ፡ መርዓትከ፡ ከመ፡ እናዝዝ፡ ኃዘና።
15 አነ፡ ውእቱ፡ ሩፋኤል፡ መልአክ፡ አሐዱ፡ እምነ፡ ሰብአቱ፡ ሊቃነ፡ መላእክት፡ ቅዱሳን፡ እለ፡ የዓርጉ፡ ጸሎቶሙ፡ ለቅዱሳን፡ ወያበውዑ፡ ቅድመ፡ ስብሐቲሁ፡ ለዓቢይ፡ ወቅዱስ።
16 ወሰሚዖሙ፡ ዘንተ፡ ደንገፁ፡ ክልኤሆሙ፡ ወወድቁ፡ በገጾሙ፡ እስመ፡ ፈርሁ።
17 ወይቤሎሙ፡ ኢትፍርሁ፡ ለእግዚአብሔር፡ አምላክክሙ፡ ባርክዎ።
18 እስመ፡ አኮ፡ ሊተ፡ አኰቴት፡ አላ፡ ፈቃዱ፡ ለአምላክክሙ፡ አምጽአኒ፡ ወበእንተዝ፡ ባርክዎ፡ ለአምላከ፡ ጽድቅ፡ ለዓለም።
19 ወበኵሉ፡ መዋዕለ፡ ወአነ፡ አስተርአይኩክሙ፡ ወርኢክሙ፡ ራእይየ፡ ኢበላዕኩ፡ ወኢሰተይኩ፡ ምስሌክሙ።
20 ወይእዜኒ፡ እመኑ፡ በእግዚአብሔር፡ እስመአ፡ ዓርግ፡ ኀበ፡ ዘፈነወኒ፡ ወመጻእኩ፡ እጽሐፍ፡ እሎንተ፡ መጻሕፍተ።
21 ወሶቤሃ፡ ተንሥአ፡ ወሖረ፡ ወኢርእይዎ፡ እንከ።
22 ወአምኑ፡ በኵሉ፡ ግብሩ፡ ለእግዚአብሔር፡ ዓቢይ፡ ወግሩም፡ ወበእንተ፡ ዘአስተርአዮሙ፡ መልአከ፡ እግዚአብሔር።
=== chapter 13 ===
[Chapter 13]
1 ወጸለየ፡ ጦቢት፡ ጸሎተ፡ ትፍሥሕት፡ ወይቤ፡ ይትባረክ፡ እግዚአብሔር፡ ዘውእቱ፡ ሕያው፡ ዘለዓለም፡ ወለዓለመ፡ ዓለም፡ መንግሥቱ።
2 ወውእቱ፡ ይቀሥፍ፡ ወይሣሃል፡ ወውእቱ፡ ያወርድ፡ ውስተ፡ ሲኦል፡ ወየዐርግ፡ ወአልቦ፡ ዘያመስጥ፡ እምእዴሁ።
3 ወግነዩ፡ ሎቱ፡ ኵልክሙ፡ ደቂቀ፡ እስራኤል፡ በቅድመ፡ ኵሉ፡ አሕዛብ፡ እለ፡ ዘረወነ፡ ውስቴቶሙ።
4 በህየ፡ አርአየ፡ ምሕረቶ፡ ላዕሌነ፡ ወአልዕልዎ፡ በቅድመ፡ ኵሉ፡ ደቂቀ፡ ዕጓለ፡ እመሕያው፡ እስመ፡ ውእቱ፡ እግዚእነ፡ ወውእቱ፡ እግዚአብሔር፡ አቡነ፡ በኵሉ፡ ዓለም።
5 ወይቀሥፈነ፡ በኵሉ፡ ኃጣውኢነ፡ ወካዕበ፡ ይሣሃለነ፡ ወያስተጋብአነ፡ እምኵሉ፡ አሕዛብ፡ እለ፡ ውስቴቶሙ፡ ዘረወነ።
6 ወለእመኒ፡ ተመየጥነ፡ ኀቤሁ፡ በኵሉ፡ ልብነ፡ ወበኵሉ፡ ነፍስነ፡ ከመ፡ ንግበር፡ ጽድቀ፡ በቅድሜሁ፡ ወውእተ፡ ጊዜ፡ ይትመየጥ፡ ኀቤነ፡ ወኢይሤውር፡ ገጾ፡ እምኔነ፡ ወርእዩ፡ ዘገብረ፡ በላዕሌነ፡ ወእመኑ፡ ቦቱ፡ በኵሉ፡ ልብክሙ፡ ወበኵሉ፡ ነፍስክሙ፡ ወባርክዎ፡ ለእግዚአብሔር፡ ወአልዕልዎ፡ ለንጉሠ፡ ዓለም፡ በምድር፡ ዘትፄወውክሙ፡ ወአንሰ፡ በምድር፡ ዘተፄወውኩ፡ አአምን፡ ቦቱ፡ ወእነግር፡ ኃይሎ፡ ወዕበዮ፡ ለሕዝብ፡ ኃጥአን፡ ተመየጡ፡ ኃጥአን፡ ወግበርዋ፡ ለጽድቅ፡ ቅድሜሁ፡ ለእግዚእየ፡ መኑ፡ የአምሮ፡ እመ፡ ይፈቅድ፡ ዘይገብር፡ ምሕረቶ፡ በላዕሌክሙ፡ አምላኪየ።
7 ወታሌዕሎ፡ ነፍስየ፡ ለንጉሠ፡ ሰማይ፡ እሴብሕ፡ ዕበዮ፡ ለአምላከ፡ ጽድቅ፡ በኵሉ።
8 ወእመኒ፡ ቦቱ፡ በጽድቅ፡ ሀገረ፡ ኢየሩሳሌም፡ ቅድስት፡ ኢይቅሥፍኪኑ፡ በምግባረ፡ ጽድቅኪ፡ ወካዕበ፡ ይምሕኮሙ፡ ለደቂቀ፡ ጻድቃን።
9 ግነዩ፡ ለእግዚአብሔር፡ በሠናይ፡ ወባርኪዮ፡ ለንጉሠ፡ ዓለም፡ ከመ፡ ትትሐነፅ፡ ደብተራሁ፡ ውስቴትኪ፡ በትፍሥሕት፡ ወይትፌሥሑ፡ ብኪ፡ ህየ፡ እለ፡ ሀለዉ፡ ፂውዋን፡ ወይትፋቀሩ፡ በእንቲአኪ፡ ጽሉዓን፡ በኵሉ፡ ትውልድ፡ ዘለዓለም።
10 እስመ፡ ብዙኃን፡ አሕዛብ፡ ይመጽኡ፡ እምርኁቅ፡ ኀበ፡ ስሙ፡ ለእግዚአብሔር፡ ወያመጽኡ፡ አምኃ፡ ለንጉሠ፡ ዓለም፡ ወለንጉሠ፡ ሰማይ፡ ለትውልደ፡ ትውልድ፡ ይሴብሑከ፡ እግዚኦ፡ ወይሁቡ፡ ስብሐተ፡ ለስምከ።
11 ርጉማን፡ ኵሎሙ፡ እለ፡ ይጸልኡከ፡ ወቡሩካን፡ እሙንቱ፡ ኵሎሙ፡ እለ፡ ያፈቅሩከ፡ ለዓለም።
12 ወትትፌሣሕ፡ በደቂቆሙ፡ ለጻድቃን፡ እስመ፡ ይትጋብኡ፡ ወይባርኩከ፡ እግዚኦ፡ እስመ፡ ብፁዓን፡ እሙንቱ፡ እለ፡ ያፈቅሩከ፡ ወይትፌሥሑ፡ በስምከ።
13 ወብፁዓን፡ ኵሎሙ፡ እለ፡ ይቴክዙ፡ በሕማምከ፡ እስመ፡ ይትፌሥሑ፡ ብከ፡ ርእዮሙ፡ ኵሎ፡ ስብሐቲከ፡ ወይትፌሥሑ፡ ለዓለም።
14 ነፍስነሰ፡ ትባርኮ፡ ለእግዚአብሔር፡ ንጉሥ፡ ዓቢይ።
15 እስመ፡ ትትሐነፅ፡ ኢየሩሳሌም፡ በዕብነ፡ ሰንፔር፡ ወበመረግድ፡ ወበዕንቊ፡ ክቡር፡ አረፋቲሃ፡ ወማሕፈዲሃ፡ ወአናቅጺሃ፡ በወርቅ፡ ንጽሕ።
16 ወመርኅባኒ፡ በቢረሌ፡ ወበዕንቈ፡ ሶፎር፡ አትራኮስ፡ ወበዕንቈ፡ ሶፎር፡ ይትገበር።
17 ወይብሉ፡ በኵሉ፡ ፍናዊሃ፡ ሃሌሉያ፡ ይሴብሑ፡ ወይብሉ፡ ይትባረክ፡ እግዚአብሔር፡ ለዓለም፡ ወበኵሉ፡ ዓለም።
=== chapter 14 ===
[Chapter 14]
1 ወእምዝ፡ አርመመ፡ ጦቢት፡ እምኀበ፡ ይጼሊ።
2 ኃምሳ፡ ወሰመንቱ፡ ዓመት፡ ሎቱ፡ አመ፡ የኃጕል፡ አዕይንቲሁ፡ ወእምድኅረ፡ ኃምሳ፡ ወሰመንቱ፡ ዓመት፡ ርእየ፡ ወገብረ፡ ምጽዋተ፡ ወወሰከ፡ ዓዲ፡ ፈሪሆቶ፡ ለእግዚአብሔር።
3 ወፈድፋደ፡ ረስዓ፡ ወጸውዖሙ፡ ለወልዱ፡ ወለደቂቀ፡ ወልዱ፡ ወይቤሎ፡ ወልድየ፡ ንሣእ፡ ደቂቀከ፡ እስመ፡ ረሣዕኩ፡ ወበጻሕኩ፡ እስከ፡ ለሞት።
4 ወሑር፡ እስከ፡ ሜዶን፡ እስመ፡ አአምር፡ ኵሎ፡ ዘነበበ፡ ዮናስ፡ ነቢይ፡ ላዕለ፡ ነነዌ፡ ከመ፡ ሀለዋ፡ ትትነሠት፡ ውስተ፡ ሜዶንሰ፡ ሰላም፡ ይከውን፡ እስከ፡ ዘመኑ፡ ወአኃዊነ፡ ሀለዎሙ፡ ይዘረዉ፡ ውስተ፡ በሐውርት፡ እምነ፡ ኵሉ፡ ምድር፡ ቡርክት፡ ወኢየሩሳሌምኒ፡ ትከውን፡ በድወ፡ ወቤተ፡ እግዚአብሔር፡ ዘውስቴታ፡ ይውዒ፡ በእሳት፡ ወይከውን፡ በድወ።
5 ወካዕበ፡ ይሣሃሎሙ፡ እግዚአብሔር፡ ወያገብኦሙ፡ ውስተ፡ ምድሮሙ፡ ወየሐንፁ፡ ቤቶ፡ ወአኮ፡ ከመ፡ ቀዲሙ፡ አላ፡ እስከ፡ ይትፌጸም፡ መዋዕለ፡ ዓለም፡ ወእምድኅረ፡ ዝንቱ፡ ይገብኡ፡ እምኀበ፡ ይፄወዉ፡ ወይትሐነፅ፡ ኢየሩሳሌም፡ በክብር፡ ወይትሐነፅ፡ በውስቴታ፡ ቤተ፡ እግዚአብሔር፡ በኵሉ፡ ትውልድ፡ ዘለዓለም፡ በንድቅ፡ ክቡር።
6 ወኵሉ፡ አሕዛብ፡ ይገድፉ፡ አማልክቲሆሙ፡ ወይትመየጡ፡ በጽድቅ።
7 ወይፈርህዎ፡ ለእግዚአብሔር፡ ወይባርክዎ፡ ወሕዝብኒ፡ የአምኑ፡ ቦቱ፡ ወይሣሃሎሙ፡ እግዚአብሔር፡ ለሕዝቡ፡ ወይትፌሥሑ፡ ኵሎሙ፡ እለ፡ ይፈርህዎ፡ ለእግዚአብሔር፡ በጽድቅ፡ ወበርትዕ፡ ወይገብሩ፡ ምሕረተ፡ ላዕለ፡ አኃዊሆሙ።
8 ወይእዜኒ፡ ወልድየ፡ ፃዕ፡ እነ፡ ነነዌ፡ እስመ፡ በግብር፡ ይከውን፡ ዘነበበ፡ ዮናስ፡ ነቢይ።
9 ወአንተሰ፡ ዕቀብ፡ ሕገ፡ ወትእዛዘ፡ ወኩን፡ መሐሬ፡ ወአፍቅር፡ ጽድቀ፡ ከመ፡ ይኩን፡ ሠናየ፡ ላዕሌከ።
10 ወቅብረኒ፡ በሠናይ፡ ወለእምከኒ፡ ምስሌየ፡ ወኢትንበር፡ ውስተ፡ ነነዌ፡ ወልድየ፡ ወርኢ፡ ዘከመ፡ ገብረ፡ ሐማ፡ ላዕለ፡ አካኪሮስ፡ ወከመ፡ አብኦ፡ እምብርሃን፡ ውስተ፡ ጽልመት፡ ወእመ፡ ተፈድየ፡ በከመ፡ እከዩ፡ ወአካኪሮንሰ፡ ሕያው፡ ውእቱ፡ ወውእቱሰ፡ ተፈድየ፡ ፍዳሁ፡ ወለሊሁ፡ ወረደ፡ ውስተ፡ ጽልመት፡ ወምናሴ፡ ገብረ፡ ምጽዋተ፡ ወገብረ፡ ጽድቀ፡ ወድኅነ፡ እምነ፡ መቅሠፍተ፡ ሞት፡ እንተ፡ ሠርዑ፡ ላዕሌሁ፡ ወሐማሰ፡ ወድቀ፡ ውስተ፡ ይእቲ፡ መሥገርት፡ ወሞተ፡ ሞተ።
11 ወይእዜኒ፡ ርኢ፡ ወልድየ፡ ከመ፡ ታድኅን፡ ምጽዋተ፡ ለእለ፡ ይገብርዋ፡ ወትፈሪ፡ ጽድቀ፡ ወከመዝ፡ ብሂሎ፡ ሞተ፡ ጦቢት፡ ወወጽአት፡ መንፈሱ፡ በዲበ፡ ዓራቱ፡ ምዕት፡ ወኃምሣ፡ ወሰመንቱ፡ ዓመት፡ ሎቱ፡ ወቀበርዎ፡ በክብር።
12 ወአመ፡ ሞተት፡ ሐና፡ እሙ፡ ቀበራ፡ ጦብያ፡ ወልዱ፡ ምስለ፡ አቡሁ፡ ወሖረ፡ ጦብያ፡ ምስለ፡ ብእሲቱ፡ ወደቂቁ፡ ውስተ፡ ባጥና፡ ኀበ፡ ራጉኤል።
13 ወረስዐ፡ ራጉኤል፡ ወእድና፡ ብእሲቱ፡ ወሞቱ፡ ወቀበሮሙ፡ ጦብያ፡ በክብር፡ ለሐማትሁ፡ ወተዋረሶሙ፡ ኵሎ፡ ንዋዮሙ፡ ወለጦቢትኒ፡ አቡሁ።
14 ወሰምዐ፡ ጦብያ፡ ሙስናሃ፡ ለነነዌ፡ ዘእንበለ፡ ይሙት፡ በከመ፡ ነገሮ፡ አቡሁ፡ ወሰምዑ፡ ናቡከደነፆር፡ ወአስዊሮስ፡ ሙስናሃ፡ ለነነዌ፡ ወተፈሥሑ።
15 ወሞተ፡ ጦብያ፡ በ፻ወ፳ወ