##### edition  (gez) — Text of the EOTC printed Bible
=== chapter 1 ===
[Chapter 1]
1 ቀዳሚሃ፡ ለኵሉ፡ ጥበብ፡ እምኀበ፡ እግዚአብሔር፡ ይእቲ። ወምስሌሁ፡ ሀለወት፡ ጥበብ፡ ለዓለም።
2 ኆፃ፡ ባሕር፡ ወነጠብጣበ፡ ዝናም፡ ወመዋዕለ፡ ዓለም፡ መኑ፡ ኈለቈ።
3 ሉዓሌ፡ ሰማይ፡ ወራሕበ፡ ምድር፡ ወዕመቀ፡ ቀላይ፡ ወለጥበብ፡ መኑ፡ ሰፈሮሙ።
4 ቀዳሜ፡ ኵሉ፡ ተፈጥረት፡ ጥበብ።
5 ወኅሊናሃ፡ ለጥበብ፡ ዘእምፍጥረተ፡ ዓለም።
6 ሥርዋ፡ ለጥበብ፡ ለመኑ፡ ተከሥተ።
7 ወመኑ፡ አእመረ፡ ምክራ።
8 አሐዱ፡ ውእቱ፡ ጥበብ፡ ወፈድፋደ፡ ግሩም፡ ውእቱ፡ ወይነብር፡ ላዕለ፡ መንበሩ፡ ውእቱ።
9 ወእግዚአብሔር፡ ለሊሁ፡ ፈጠራ፡ ወርእያ፡ ወሰፈራሂ።
10 ወሶጣ፡ ላዕለ፡ ኵሉ፡ ግብሩ፡ ምስለ፡ ኵሉ፡ ዘሥጋ፡ በከመ፡ ሀብቱ። ወወሀቦሙ፡ ለኵሎሙ፡ እለ፡ ያፈቅርዋ።
11 ፈሪሀ፡ እግዚአብሔር፡ ክብር፡ ውእቱ። ወምክህ፡ ወትፍሥሕት፡ ውእቱ፡ ወአክሊለ፡ ሐሤት።
12 ፈሪሀ፡ እግዚአብሔር፡ ትፍሥሕተ፡ ልብ፡ ውእቱ። ወይሁብ፡ ሐሤተ፡ ወያስተፌሥሕ፡ ወያነውኅ፡ መዋዕለ፡ ሕይወት።
13 ለፈሪሀ፡ እግዚአብሔር፡ ያሤኒ፡ ደኃሪቱ። ወይትባረክ፡ አመ፡ ዕለተ፡ ሞቱ።
14 ቀዳሚሃ፡ ለጥበብ፡ ፈሪሀ፡ እግዚአብሔር። ወተፈጥረት፡ ምስለ፡ ምእመናን፡ እምከርሠ፡ እሞሙ።
15 ወምስለ፡ ዕጓለ፡ እመሕያው፡ ተፈጥረት፡ መሠረተ፡ ዓለም። ወተአምነት፡ ምስለ፡ ዘርዖሙ።
16 ጸጊቦታ፡ ለጥበብ፡ ፈሪሀ፡ እግዚአብሔር። ወታረውዮሙ፡ እምነ፡ ቀምሐ።
17 ምሉዕ፡ ትፍሥሕት፡ ውስተ፡ አብያቲሃ። ወውስተ፡ አዕጻዳቲሃ፡ ምሉዕ፡ ፍሬ።
18 አክሊላ፡ ለጥበብ፡ ፈሪሀ፡ እግዚአብሔር። ወያመጽኣ፡ ለሰላም፡ ወይፌውሳ፡ ወየሐዩ።
19 ወርእያ፡ ፈጣሪሃ፡ ወሠፈራ። ወአውሐዘ፡ ነቅዐ፡ አእምሮ፡ ወምክር፡ ወጥበብ። ወአዕበዮሙ፡ ለእለ፡ ያጸንዕዋ፡ ወአክበሮሙ።
20 ሥርዋ፡ ለጥበብ፡ ፈሪሀ፡ እግዚአብሔር። ወአዕፁቂሃኒ፡ ያነውኅ፡ መዋዕለ፡ ሕይወት።
21 ኢይክል፡ መዓትም፡ ወዐማፂ፡ ጸዲቀ። እስመ፡ በጊዜ፡ ይትመዐዕ፡ ይከውኖ፡ ድቀቱ።
22 እስከ፡ ተኀልፍ፡ ጊዜሃ፡ ተዐገሣ፡ ለመዓት፡ ወድኅረ፡ ታስተፌሥሐከ።
23 እስከ፡ ትረክብ፡ ጊዜሁ፡ ኅባዕ፡ ነገረከ፡ ወይትናገሩ፡ ብዙኃን፡ በጥበብከ።
24 ውስተ፡ መዛግብቲሃ፡ ለጥበብ፡ ትምህርተ፡ አምሳል። ያስቈርሮ፡ ኃጥእ፡ ለፈራሄ፡ እግዚአብሔር።
25 ለእመ፡ ታፈቅራ፡ ለጥበብ፡ ዕቀብ፡ ትእዛዛ። ወእግዚአብሔር፡ ይሁበከሃ።
26 ጥበብኒ፡ ወአእምሮኒ፡ ፈሪሀ፡ እግዚአብሔር፡ ውእቱ። ወፈቃዱኒ፡ ሃይማኖት፡ ወየዋሃት።
27 ኢትርሳዕ፡ ፈሪሀ፡ እግዚአብሔር።
28 ወኢትፀመዶ፡ በክልኤ፡ ልብ፡ እንዘ፡ ትናፍቅ።
29 ወኢትደቅ፡ ውስተ፡ አፈ፡ ሰብእ፡ ወዕቀብ፡ ከናፍሪከ።
30 ወኢታዕቢ፡ ርእሰከ፡ ከመ፡ ኢትሕሠር፡ ወከመ፡ ኢትደቅ፡ ነፍስከ። ወይከሥተከ፡ እግዚአብሔር፡ ኅቡዓቲከ፡ ወበማዕከለ፡ ብዙኃን። ያወድቀከ፡ እስመ፡ በፍርሀተ፡ እግዚአብሔር፡ ኢመጻእከ። ወምሉዕ፡ ጕሕሉት፡ ውስተ፡ ልብከ።
=== chapter 2 ===
[Chapter 2]
1 ወልድየ፡ ለእመ፡ ሖርከ፡ ትትቀነይ፡ ለእግዚአብሔር፡ አስተዳሉ፡ ነፍስከ፡ ለሕማም።
2 ወአርትዕ፡ ልበከ፡ ወተዐገሥ፡ ወኢትትወላወል፡ ወለእመ፡ ተመንደብከ፡ ኢትናፍቅ።
3 ዳእሙ፡ ትልዎ፡ ለእግዚአብሔር፡ ወኢትኅድጎ፡ ከመ፡ ትብዛኅ፡ ሕይወትከ፡ በደኃሪትከ።
4 ወተወከፍ፡ ኵሎ፡ እንተ፡ በጽሐከ፡ ወተዐገሥ፡ በመዋዕለ፡ ተጽናስከ።
5 እስመ፡ በእሳት፡ ያሜክርዎ፡ ለወርቅ፡ ወለብእሲኒ፡ ጻድቅ፡ በሕማመ፡ ተጽናስ፡ ያሜክርዎ።
6 ተአመኖ፡ ዳእሙ፡ ለእግዚአብሔር፡ ወይረድአከ፡ ወአርትዕ፡ ፍናዊከ፡ ወተወከል፡ ቦቱ።
7 እለ፡ ትፈርህዎ፡ ለእግዚአብሔር፡ ጽንሕዋ፡ ለምሕረቱ፡ ወኢትትገሐሡ፡ እምኔሁ፡ ከመ፡ ኢትደቁ።
8 እለ፡ ትፈርህዎ፡ ለእግዚአብሔር፡ ተአመንዎ፡ ወኢትሀጐሉ፡ ዕሴተክሙ።
9 እለ፡ ትፈርህዎ፡ ለእግዚአብሔር፡ ተሰፈውዋ፡ ለሠናይቱ፡ ወለትፍሥሕተ፡ ምሕረቱ፡ ዘለዓለም።
10 ርእዩ፡ ቀደምተ፡ ዓለም፡ ወአእምሩ፡ መኑ፡ ዘተአመነ፡ በእግዚአብሔር፡ ወተኀፍረ፡ ወመኑ፡ ዘተዐገሠ፡ በፈሪሆቱ፡ ወገደፎ፡ ወመኑ፡ ጸውዖ፡ ወተጸመሞ።
11 እስመ፡ መሓሪ፡ ውእቱ፡ እግዚአብሔር፡ ወመስተሣህል፡ የኀድግ፡ ኀጢአተ፡ ወያድኅን፡ በዕለተ፡ ምንዳቤ።
12 አሌ፡ ሎቱ፡ ለልብ፡ ዘይናፍቅ፡ ወለዕደው፡ ፀዋጋን፡ ወለኃጥእ፡ ዘክልኤ፡ ግዕዙ፡ ወምክዕቢተ፡ የሐውር።
13 አሌሎ፡ ለልብ፡ ዘይናፍቅ፡ እስመ፡ ኢተአመነ፡ ወእንበይነዝ፡ ኢያመሥጥ።
14 አሌ፡ ሎሙ፡ ለእለ፡ ሀጕሉ፡ ዕሴቶሙ፡ ወምንተ፡ ይሬስዩ፡ አመ፡ ይትመየጦሙ፡ እግዚአብሔር።
15 እለ፡ ይፈርህዎ፡ ለእግዚአብሔር፡ ኢይረስዑ፡ ቃሎ፡ ወእለ፡ ያፈቅርዎ፡ የዐቅቡ፡ ትእዛዞ፡ ወፍናዊሁ።
16 እለ፡ ይፈርህዎ፡ ለእግዚአብሔር፡ የኀሥሡ፡ ፈቃዶ፡ ወእለ፡ ያፈቅርዎ፡ ይትሬወዩ፡ ሕጎ።
17 እለ፡ ይፈርህዎ፡ ለእግዚአብሔር፡ ያስተዳልዉ፡ ልቦሙ፡ ወየሐምምዋ፡ ለነፍሶሙ፡ በቅድሜሁ።
18 ንደቅ፡ ውስተ፡ እደ፡ እግዚአብሔር፡ እምንደቅ፡ ውስተ፡ እደ፡ ዕጓለ፡ እመሕያው፡ እስመ፡ በከመ፡ ዕበዩ፡ ከማሁ፡ ምሕረቱ።
=== chapter 3 ===
[Chapter 3]
1 ሊተ፡ ለአቡክሙ፡ ስምዑኒ፡ ደቂቅየ፡ ወከመዝ፡ ግበሩ፡ ከመ፡ ትሕየዉ።
2 እስመ፡ አክበረ፡ እግዚአብሔር፡ አበ፡ ላዕለ፡ ውሉድ፡ ወአዕበየ፡ ኵነኔሃ፡ ለእም፡ ላዕለ፡ ደቂቃ።
3 ዘያከብር፡ አባሁ፡ ይትኀደግ፡ ሎቱ፡ ኀጢአቱ።
4 ወከመ፡ ዘይዘግብ፡ መዝገበ፡ ዘያከብራ፡ ለእሙ።
5 ዘያከብር፡ አባሁ፡ ይትፌሣሕ፡ በውሉዱ፡ ወበዕለተ፡ ጸሎቱ፡ ይሰምዖ፡ ፈጣሪሁ።
6 ዘያከብር፡ አባሁ፡ ይነውኅ፡ መዋዕሊሁ።
7 ወዘይሰምዖ፡ ለእግዚአብሔር፡ የአርፋ፡ ለእሙ።
8 ወከመ፡ አግብርቲሁ፡ ይትቀነይ፡ ለዘወለዶ።
9 በቃልከኒ፡ ወበምግባሪከኒ፡ አክብሮ፡ ለአቡከ፡ ከመ፡ ትብጻሕከ፡ በረከቱ።
10 መድኅረ፡ አብ፡ ያጸንዕ፡ አብያተ፡ ውሉድ፡ ወመርገም፡ እም፡ ይሤሩ፡ መሠረተ።
11 ኢትትመካሕ፡ በአስተሐቅሮቱ፡ ለአቡከ፡ እስመ፡ ኢይከውነከ፡ ምክሖ፡ አስተሐቅሮ፡ አቡከ፡ እስመ፡ በክብረ፡ አቡሁ፡ ይከብር፡ ሰብእ፡ ወኀሣሩ፡ ለሰብእ፡ አስተሐቅሮታ፡ ለእሙ።
12 ወልድየ፡ ፁር፡ ርስዓኒሁ፡ ለአቡከ፡ ወኢታሕዝኖ፡ በሕይወቱ።
13 ወእመኒ፡ ልህቀ፡ ወኀጥአ፡ ልቦ፡ ኦሆ፡ በሎ፡ ለግዕዙ፡ ወአክብሮ፡ በአምጣነ፡ ትክል፡ ወኢታስተአክዮ፡ በርስዓኑ፡ ለአቡከ፡ እስመ፡ ምጽዋቱ፡ ለአቡከ፡ ዕሤተ፡ ኢትትረሣዕ፡ ለከ።
14 ወህየንተ፡ ኀጢአት፡ ትትሐነጽ፡ ለከ፡ ጽድቅ።
15 ወበዕለተ፡ ምንዳቤከ፡ ይዜከራ፡ ለከ፡ ከመ፡ ይመስዎ፡ ፀሓይ፡ ለበረድ፡ ከማሁ፡ ያትመሰዋ፡ ኃጣውኢከ።
16 ጽሩፍ፡ ውእቱ፡ ዘይገድፎ፡ ለአቡሁ፡ ወርጉም፡ ውእቱ፡ በኀበ፡ እግዚአብሔር፡ ዘያምዕዓ፡ ለእሙ።
17 ወልድየ፡ በሃይማኖትከ፡ ያስተርኢ፡ ምግባሪከ፡ ወያፈቅሩከ፡ ዕደው፡ ጻድቃን።
18 በአምጣነ፡ ዕበይከ፡ ከማሁ፡ አትሕት፡ ርእሰከ፡ ወትረክብ፡ ዕሴተ፡ በኀበ፡ እግዚአብሔር።
20 እስመ፡ ዐቢይ፡ ግብሩ፡ ለእግዚአብሔር፡ ወይሴባሕ፡ በላዕለ፡ ትሑታን፡ ወቅዱሳን።
21 ኢትኅሥሥ፡ ዘይጸንዐከ፡ ወኢትሕትት፡ ዘኢይትከሃለከ፡ ሐሊ፡ ዳእሙ፡ ዘተአዘዝከ።
22 ወዘኅቡዕሰ፡ ኢያስተኀልፈከ።
23 ወኢትኅሥሥ፡ በብዝኀ፡ ምግባሪከ፡ እስመ፡ ፈድፋደ፡ እምነ፡ ሰብእ፡ ዘአርአዩከ፡ ለከ።
24 ወለብዙኃን፡ አስሐቶሙ፡ ትዝኅርቶሙ፡ ወለብዙኃን፡ አውደቆሙ፡ ትዕቢተ፡ ልቦሙ።
26 ዘይፈትዋ፡ ለመንሱት፡ ባቲ፡ ይመውት፡ ልብ፡ እኩይ፡ ይደዊ፡ በደኃሪቱ።
27 ልብ፡ እኩይ፡ ይትቀሠፍ፡ በሕማም፡ ወኃጥእሰ፡ ይዌስክ፡ ኀጢአተ፡ በላዕለ፡ ኃጣውኢሁ።
28 መንሱቶሙ፡ ለዕቡያን፡ አልባቲ፡ ፈውሰ፡ እስመ፡ እኩይ፡ ተክል፡ ገብረ፡ ሥርወ፡ ላዕሌሆሙ።
29 ልበ፡ ጠቢብ፡ ይፌክር፡ አምሳለ፡ ወእዝነ፡ ማዕምር፡ ትፈቱ፡ ጥበበ።
30 ለእሳት፡ እንተ፡ ትነድድ፡ ያጠፍዓ፡ ማይ፡ ወምጽዋት፡ ተኀድግ፡ ኀጢአተ።
31 ለዘይፈዲ፡ ዕሴተ፡ ይዜከራ፡ ሎቱ፡ ለደኃሪቱ፡ ወአመ፡ ዕለተ፡ ይድኅፅ፡ ይረክብ፡ በዘያሰምከ።
=== chapter 4 ===
[Chapter 4]
1 ወልድየ፡ ኢትክልዖ፡ ለነዳይ፡ ሕይወቶ፡ ወኢትሚጥ፡ አዕይንቲከ፡ እምዘይስእለከ።
2 ወኢታሕምም፡ ነፍሰ፡ ርኅብተ፡ ወኢታምዕዕ፡ ብእሴ፡ ሕዙነ።
3 ወኢታደንግፅ፡ ልበ፡ ትኩዘ፡ ወኢትትኀለፎ፡ ለዘይስእለከ።
4 ወኢትትቈጣዕ፡ ነባሪከ፡ ዘይትቀነይ፡ ለከ፡ ወኢትሚጥ፡ ገጸከ፡ እምነ፡ ነዳይ።
5 ወእምነ፡ ዘይስእለከ፡ ኢትሚጥ፡ ዐይነከ፡ ወኢተሀቦ፡ ምክንያተ፡ በዘይረግመከ።
6 እስመ፡ ለእመ፡ ረገመከ፡ በምረተ፡ ነፍሱ፡ ይሰምዖ፡ ፈጣሪሁ፡ ጸሎቶ።
7 ተፋቀር፡ በኀበ፡ ብዙኃን፡ ወተፀመድ፡ በኀበ፡ መኳንንት፡ ወኢተዕቢ፡ ርእሰከ።
8 ወለነዳይ፡ አጽምዖ፡ በእዝንከ፡ ወአውሥኦ፡ ሠናየ፡ ቃለ፡ በየውሃት።
9 ወአድኅኖ፡ ለግፉዕ፡ እምእደ፡ ገፋዒሁ፡ ወኢትትሀከይ፡ ኰንኖቶ።
10 ኵኖ፡ ለዕጓለ፡ ማውታ፡ ከመ፡ አቡሁ፡ ወቁም፡ ላቲ፡ ለእሙ፡ ከመ፡ ምታ፡ ወትከውን፡ ከመ፡ ውሉደ፡ ልዑል፡ ወያፈቅረከ፡ ፈድፋደ፡ እምነ፡ እምከ።
11 ጥበብሰ፡ አዕበየቶሙ፡ ለደቂቃ፡ ወትትዌከፎሙ፡ ለእለ፡ የኀሥሥዋ።
12 ዘኪያሃ፡ አፍቀረ፡ አፍቀረ፡ ሕይወቶ፡ ወዘይገይስ፡ ኀቤሃ፡ ይጸግብ፡ ትፍሥሕተ።
13 ወዘያጸንዓ፡ ይወርስ፡ ክብረ፡ ወኀበ፡ ቦአት፡ ይእቲ፡ ይባርክ፡ እግዚአብሔር።
14 እለ፡ ኪያሃ፡ ተፀምዱ፡ ተፀምድዎ፡ ለቅዱስ፡ ወለእለ፡ ያፈቅርዋ፡ ያፈቅሮሙ፡ እግዚአብሔር።
15 ወዘይሰምዓ፡ ላቲ፡ ይኴንን፡ አሕዛበ፡ ወዘያጸምዓ፡ ላቲ፡ ይነብር፡ ተአምኖ።
16 ለእመ፡ ትትአመና፡ ትረክባ፡ ወተዐብየከ፡ በመዋዕሊከ።
17 ወትቀድም፡ ትሑር፡ ምስሌሁ፡ እንዘ፡ ታፈርሆ፡ ወትጌርሞ፡ ወታደነግፆ፡ ወትቀሥፎ፡ ወትሜህሮ፡ እስከ፡ ታገርራ፡ ለነፍሱ፡ ወታሜክሮ፡ በተግሣጽ።
18 ወእም፡ ዝ፡ ካዕበ፡ ትትቄበሎ፡ ወታስተፌሥሖ፡ ወትከሥት፡ ሎቱ፡ ምክራ።
19 ወእመሰ፡ ስሕተ፡ እምኔሃ፡ ተኀድጎ፡ ወታገብኦ፡ ውስተ፡ ዘያወድቆ።
20 ወተዐቀብ፡ ጊዜሁ፡ ወዑቅ፡ ለእመሂ፡ እኩይ፡ ወኢታድሉ፡ በኀፊር፡ በእንተ፡ ነፍስከ።
21 እስመ፡ ቦ፡ ዘበኀፍረት፡ ይገብር፡ ኀጢአተ፡ ወቦ፡ ዘበኀፍረት፡ ይገብር፡ ጽድቀ፡ ወይረክብ፡ ሞገሰ።
22 ወኢታድሉ፡ ለገጽ፡ እንዘ፡ ላዕለ፡ ነፍስከ፡ ይበጽሐከ፡ ወኢትኅፈር፡ ከመ፡ ታውድቅ፡ ነፍሰከ።
23 ወኢትክልኦ፡ ነቢበ፡ ቃሉ፡ ለዘይትናገር፡ እስመ፡ እምቃሉ፡ ይትዐወቅ፡ ጥበቢሁ፡ ወትምህርቱ፡ እምቃለ፡ ንባቡ።
24 ኢትትከሀድ፡ በእንተ፡ ጽድቅ፡ ወተጋነይ፡ በእንተ፡ ዘስሕትከ።
25 ወኢትኅፈር፡ ነጊረ፡ ጌጋይከ፡ ወኢትትሀየል፡ ውሒዘ፡ ፈለግ።
26 ወኢታትሕት፡ ርእሰከ፡ ለብእሲ፡ አብድ፡ ወኢታድሉ፡ ለገጸ፡ ዐቢይ።
27 እስከ፡ ትበጽሕ፡ ለሞት፡ ተበዓስ፡ በእንተ፡ ጽድቅ፡ እስመ፡ እግዚአብሔር፡ አምላክከ፡ ይትበአስ፡ በእንቲኣከ።
28 ወኢትኩን፡ ዝሉፈ፡ በአፉከ፡ ወኢትጸመም፡ ተግባረከ።
29 ወኢትትዓርወይ፡ ከመ፡ አንበሳ፡ በውስተ፡ ቤትከ፡ ወኢታደንግፅ፡ ነባሬከ፡ ዘበጽድቅ፡ ይትቀነይ፡ ለከ።
30 ወኢትሰፋሕ፡ እዴከ፡ ለተለቅሖ፡ ወሶበ፡ ለፈድይ፡ ኢትግባዕ፡ ትኅባዕ፡ የማነከ።
=== chapter 5 ===
[Chapter 5]
1 ወኢትክዓው፡ ንዋየከ፡ በከንቱ፡ ወኢትበል፡ ኮንየ፡ አከለኒ።
2 ወኢትትሉ፡ ግዕዘ፡ ኀይለ፡ ነፍስከ።
3 ወኢትበል፡ ኀያል፡ አነ፡ ወመኑ፡ ይክለኒ፡ እስመ፡ እግዚአብሔር፡ በቀለ፡ ይትቤቀል።
4 ወኢትበል፡ አበስኩሂ፡ ወአልቦ፡ ዘተፈደይኩ፡ እስመ፡ እግዚአብሔር፡ ይትዔገሥ፡ ጕንዱየ።
5 ወኢትፍራህ፡ ተጋንዮ፡ በእንተ፡ ኀጢአትከ፡ ወኢትወስክ፡ ኀጢአተ፡ በዲበ፡ ኀጢአትከ፡ እንዘ፡ ትብል፡ ብዙኅ፡ ምሕረቱ፡ ለእግዚአብሔር።
6 ምሕረትኒ፡ ወመቅሠፍትኒ፡ እምኀቤሁ፡ ላዕለ፡ ኃጥእ፡ ይወርድ፡ መቅሠፍቱ።
7 ኢታጐንዲ፡ ተጋንዮ፡ ለእግዚአብሔር፡ ወኢታስተኀልፍ፡ ዕለተ፡ እምዕለት፡ እስመ፡ ግብተ፡ ትመጽእ፡ መንሱት፡ ወትትመነደብ፡ አመ፡ ትመጽእ፡ ፍዳከ፡ ወመቅሠፍትከ።
8 ኢትሰቈቊ፡ ለንዋየ፡ ዓመፃ፡ እስመ፡ ኢይክል፡ አድኅኖተከ፡ አመ፡ ምንዳቤከ።
9 ወኢታብቁ፡ ለኵሉ፡ ዘነፍስ፡ ወኢትትሉ፡ ውስተ፡ ኵሉ፡ ዘፈተውከ፡ ወኢትኩን፡ ከመ፡ ኃጥእ፡ ዘክልኤ፡ ልሳኑ።
10 አንተሰ፡ አስምክ፡ ላዕለ፡ ጥበብከ፡ ወአሐደ፡ ይኩን፡ ቃልከ።
11 ወኩን፡ ፍጡነ፡ ለሰሚዕ፡ ወመስተዓግሠ፡ ለአውሥኦ፡ ቃል።
12 እመ፡ ብከ፡ ዘታየድዖ፡ ንግሮ፡ ለቢጽከ፡ ወእመ፡ አኮሰ፡ ደይ፡ እዴከ፡ ላዕለ፡ አፉከ።
13 ኀሣርከኒ፡ ወክብርከኒ፡ እምቃልከኒ፡ ወእምልሳኑ፡ ለሰብእ፡ ድቀቱ።
14 ኢትኩን፡ ሐማዬ፡ ወኢትዘለፍ፡ በልሳንከ፡ እስመ፡ ኅዳጥ፡ ኀፍረቱ፡ ለሰራቂ፡ ወእኪት፡ ኀሣሩ፡ ለዘክልኤ፡ ልሳኑ።
15 በኀበ፡ ዐቢይኒ፡ ወበኀበ፡ ንዑስኒ፡ አስተርኢ፡ ኄረ።
=== chapter 6 ===
[Chapter 6]
1 ኩን፡ ዐርከ፡ እምትኩን፡ ጸላዔ፡ እስመ፡ ደኃሪቱ፡ ለስም፡ እኩይ፡ ኀሣር፡ ወጽዕለት፡ ወከማሁ፡ ኃጥእኒ፡ ዘክልኤ፡ ልሳኑ።
2 ወኢታዕቢ፡ ርእሰከ፡ በምክረ፡ ነፍስከ፡ ከመ፡ ኢይምሥጥዋ፡ ከመ፡ ላህም፡ ለነፍስከ።
3 ወቈፅለከኒ፡ ይበልዐከ፡ ወተሀጕል፡ ፍሬከ፡ ወከመ፡ ዕፅ፡ ይቡስ፡ የኀድገከ።
4 ነፍስ፡ ጸዋግ፡ ተሀጕሎ፡ ለዘአጥረያ፡ ወትሬስዮ፡ ጥቡዐ፡ ለጸላዒሁ።
5 ልሳን፡ ጥዑም፡ ያበዝኅ፡ ታአኃሁ፡ ወአፍ፡ ጥዑም፡ ያበዝኅ፡ ማኅፈሮ።
6 ብዙኃን፡ ይከውኑከ፡ አዕርክተ፡ ወአሐዱ፡ እምእልፍ፡ ምስለ፡ ዘትትናገር፡ ምክረከ።
7 ወአመ፡ ትትዐረክ፡ ዐርከ፡ ተዐረክ፡ በመዋዕለ፡ ተጽናስከ፡ ወኢትትአመኖ፡ ብዙኀ።
8 እስመ፡ ቦ፡ ዐርክ፡ ኀላፊ፡ ወለኅዳጥ፡ መዋዕል፡ ውእቱ፡ ወኢይትዔገሥ፡ ምስሌከ፡ አመ፡ ዕለተ፡ ምንዳቤከ።
9 ቦ፡ ዐርክ፡ ይከውነከ፡ ጸላዔ፡ ወይዘረክየከ፡ ወይከሥት፡ ለከ፡ ኅቡዓቲከ።
10 ወቦ፡ ዐርክ፡ እንበይነ፡ ማዕድከ፡ ይትዐረከከ፡ ወውእቱኒ፡ ኢይደሉ፡ ምስሌከ፡ ወእም፡ ከመ፡ ተጸነስከ፡ የኀድገከ።
11 ወአመ፡ ትዴሎ፡ ይከውን፡ ከማከ፡ ወይኴንን፡ ነባሬከ።
12 ወአመሰ፡ ተጸነስከ፡ ውእቱ፡ ይከውነከ፡ ዕድውከ፡ ወከመ፡ ኢትርአዮ፡ ይትኀብዐከ።
13 ተገሐሥከ፡ እምጸላዕትከ፡ ወተዐቀቦሙ፡ ለአዕርክቲከ።
14 ዐርክ፡ ምእመን፡ ከመ፡ ወልታ፡ ጽኑዕ፡ ወዘረከበ፡ ረከበ፡ መዝገበ።
15 ለዐርክ፡ ምእመን፡ አልቦቱ፡ ተውላጥ፡ ወለልሳኑሂ፡ አልቦቱ፡ መድሎት።
16 ዐርክ፡ ምእመን፡ ሥራየ፡ ሕይወት፡ ወእለ፡ ይፈርህዎ፡ ለእግዚአብሔር፡ ይረክብዎ።
17 ዘይፈርሆ፡ ለእግዚአብሔር፡ ያረትዕ፡ ተአኃሁ፡ እስመ፡ ከማሁ፡ ይከውኖ፡ ቢጹሂ።
18 ወልድየ፡ እምንእስከ፡ ኅረያ፡ ለጥበብ፡ ወእስከ፡ ትረሥዕ፡ ትረክባ።
19 ወፈር፡ ኀቤሃ፡ ከመ፡ ዘየሐርስ፡ ወከመ፡ ዘይዘርዕ፡ ወጽናሕ፡ ፍሬሃ፡ ቡሩክ፡ እስመ፡ ኅዳጠ፡ ትፃሙ፡ በቅኔሃ፡ ወፍጡነ፡ ትበልዕ፡ ቅምሐ።
20 ፈድፋደ፡ መብዕስ፡ ይእቲ፡ በኀበ፡ አብዳን፡ ወበኀበ፡ ዘአልቦ፡ ልብ፡ ኢትጐንዲ።
21 ከመ፡ ዕብነ፡ መከራ፡ ሶበ፡ ያነሥእዎ፡ ከማሁ፡ ትከብድ፡ ወፍጡነ፡ ይገድፋ።
22 ጥበብሰ፡ በከመ፡ ስማ፡ ይእቲ፡ ወአኮ፡ ብዙኃን፡ እለ፡ የአምርዋ።
23 ስምዐኒ፡ ወልድየ፡ ወተዐገሥ፡ በምክርየ፡ ወኢታስትት፡ ተግሣጽየ።
24 አብእ፡ እገሪከ፡ ውስተ፡ አርዑታ፡ ወዕንቅ፡ ውስተ፡ ክሣድከ፡ ጋጋሃ።
25 አትሕት፡ መታክፍቲከ፡ ወተሰከማ፡ ወኢትትቈጣዕ፡ በመዋቅሕቲሃ።
26 ወበኵሉ፡ ነፍስከ፡ ፈር፡ ኀቤሃ፡ ወበኵሉ፡ ኀይልከ፡ ዕቀብ፡ ፍናዊሃ።
27 ትሉ፡ ዓሠራ፡ ወኅሥሣ፡ ወትረክባ፡ አኀዛ፡ ወኢትኅድጋ።
28 ወበደኃሪትከ፡ ትረክብ፡ ዕረፍተ፡ ወትፍሥሕተ፡ ይከውነከ።
29 ወመዋቅሕቲሃኒ፡ ከመ፡ ወልታ፡ ጽኑዕ፡ ይከውነከ፡ ወጋጋሃኒ፡ አልባሰ፡ ክብር፡ ይገብአከ።
30 እስመ፡ ዘለዓለመ፡ ወርቅ፡ ኀቤሃ፡ ሀሎ፡ ወመዓሥርቲሃኒ፡ ሠርጐ፡ ያክንት፡ ይከውነከ።
31 ወከመ፡ ልብሰ፡ ክብር፡ ትለብሳ፡ ወአክሊለ፡ ትፍሥሕት፡ ታስተቈጽለከ።
32 ለእመ፡ ትፈቅድ፡ ወልድየ፡ ትጠበብ፡ ወለእመ፡ አጥባዕከ፡ እምነፍስከ፡ ከመ፡ ትትመሀር።
33 ወለእመ፡ ትፈቱ፡ ትስማዕ፡ ተዐገሥ፡ ወለእመ፡ አጽማዕከ፡ እዘኒከ፡ ትስማዕ፡ ጥበበ።
34 ኀበ፡ ብዙኃን፡ አዕሩግ፡ ቁም፡ ወዘርኢከ፡ እምውስቴቶሙ፡ ጠቢበ፡ ትልዎ።
35 ወኵሎ፡ ነገረ፡ መጽሐፍ፡ አፍጥን፡ ለሰሚዕ፡ ወምሳሌ፡ ጥበብኒ፡ ኢይትረሣዕከ።
36 ወለእመኒ፡ ርኢከ፡ ጠቢበ፡ ጊሥ፡ ኀቤሁ፡ ወመድረከ፡ ኆኅቱ፡ ያንዛሕልል፡ ሰኰናሁ።
37 ሐሊ፡ ትእዛዞ፡ ለእግዚአብሔር፡ ወአንብብ፡ መጻሕፍቲሁ፡ በኵሉ፡ ጊዜ፡ ወውእቱ፡ ያጸንዐከ፡ ልበከ፡ ወይሁበከ፡ ታፍቅራ፡ ለጥበብ።
=== chapter 7 ===
[Chapter 7]
1 ኢትግበራ፡ ለእኪት፡ ወኢይረክበከ፡ እኩይ።
2 ተገሐሥ፡ እምነ፡ ዓመፃ፡ ወትትገሐሥ፡ እምኔከ፡ ለሊሃኒ።
3 ኢትዝራዕ፡ ውስተ፡ ትልመ፡ ኀጢአት፡ ከመ፡ ኢትእርራ፡ ለከ፡ ምስብዒተ።
4 ኢትስአል፡ በኀበ፡ እግዚአብሔር፡ መንግሥተ፡ ወኢትስአል፡ በኀበ፡ ንጉሥ፡ መንበረ፡ ክብር።
5 ኢትጸደቅ፡ ቅድመ፡ እግዚአብሔር፡ ወኢትጠበብ፡ በኀበ፡ ንጉሥኒ።
6 ወኢትፍቅድ፡ ከዊነ፡ መኰንን፡ ዮጊ፡ ኢትክል፡ ተበቅሎቶ፡ ለዘአበሰ፡ ወዮጊ፡ ታደሉ፡ ለገጸ፡ ዐቢይ፡ ወታበውእ፡ ኀጢአተ፡ ማእከለ፡ ጽድቅ።
7 ወኢተአብስ፡ ሰብአ፡ ሀገርከ፡ ወኢታስሕት፡ ርእስከ፡ በማእከለ፡ ሕዝብከ።
8 ወኢትፀምር፡ አሲረ፡ ክልኤቱ፡ ኀጣይእ፡ ወኅቡረ፡ ኢታድርግ፡ እስመ፡ እምውስተ፡ አሐቲሰ፡ ኢታመሥጥ፡ ገቢረ።
9 ወኢትበል፡ በብዝኀ፡ መባዕየ፡ ይሰሪ፡ ሊተ፡ እግዚአብሔር፡ ወእም፡ ከመ፡ አባእኩ፡ ለእግዚአብሔር፡ ልዑል፡ ይሣሃለኒ።
10 ወኢትጐጕእ፡ ሶበ፡ ትጼሊ፡ ወኢታስትት፡ ገቢረ፡ ምጽዋት።
11 ወኢትሥሐቅ፡ ላዕለ፡ ሰብእ፡ ሕዙን፡ እስመ፡ ሀለወ፡ ዘያሐምም፡ ወያስተፌሥሕ።
12 ወኢትሕርስ፡ ሐሰተ፡ ላዕለ፡ ቢጽከ፡ ወኢትግበር፡ ከመ፡ ዝ፡ ላዕለ፡ ዐርክከ፡ ወቢጽከ።
13 ወኢታፍቅር፡ ሐሰተ፡ ለዝሉፉ፡ ወኢ፡ በምንትኒ፡ እስመ፡ ደኃሪታ፡ ትብእሰከ።
14 ኢትዛለፍ፡ በማእከለ፡ ሊቃውንት፡ ወኢትሚጥ፡ ብፅዐቲከ፡ ዘነበብከ፡ በአፉከ፡ ወኢትወልጥ፡ ቃለከ።
15 ወኢታስትት፡ ተግባረ፡ እደዊከ፡ ወዘርአከ፡ ዘያበቊል፡ ለከ፡ ፈጣሪከ።
16 ወኢትኅበር፡ ምስለ፡ ኃጥኣን፡ ለእመ፡ በዝኁ።
17 ተዘከር፡ ከመ፡ ኢይጐነዲ፡ መንሱት፡ ፈድፋደ፡ አትሕታ፡ ለነፍስከ፡ እስመ፡ ፍዳሆሙ፡ ለኃጥኣን፡ ዕፄ፡ ወእሳት።
18 ወእንተ፡ ጸብሐት፡ ኢትወልጥ፡ ዐርከ፡ ወኢትህጐል፡ ዐርከከ፡ በእንተ፡ ወርቅ፡ ቀይሕ።
19 ወኢትጽላእ፡ ብእሲተ፡ ጠባበ፡ ወኄርተ፡ እስመ፡ ሞገሳ፡ ይትበደር፡ እምወርቅ።
20 ወኢታሐሥም፡ ላዕለ፡ ነባሪከ፡ ዘበጽድቅ፡ ይትቀነይ፡ ለከ፡ ወኢ፡ ላዕለ፡ ገባኢከ፡ ዘይሜጡ፡ ነፍሶ፡ በእንቲኣከ።
21 አፍቅሮ፡ እምነፍስከ፡ ለጠቢብ፡ ነባሪከ፡ ወኢታህጕሎ፡ ዕሴቶ፡ ከመ፡ ታግዕዞ፡ እንተ፡ ተሰፈወከ።
22 ወኢትኅድግ፡ ዘልፈ፡ ፈቂደ፡ እንስሳከ፡ ወዘበቊዐከ፡ እምውስቴቶሙ፡ አቅርብ፡ ኀቤከ።
23 ለእመ፡ ብከ፡ ውሉደ፡ ገሥጾሙ፡ ወመሀሮሙ፡ እምንእሶሙ፡ ግምጽ፡ ክሣዶሙ።
24 ወለእመ፡ ብከ፡ አዋልደ፡ ዕቀቦን፡ ወኢታስሕቶን፡ ወኢትሥሐቅ፡ ሎቶን፡ ወኢትየውሆን።
25 አብጽሓ፡ ለወለትከ፡ በዐቅማ፡ ወዕቅባ፡ ወዐቢየ፡ ግብረ፡ ፈጸምከ፡ ወአንፈስከ፡ ወለብእሲ፡ ጠቢብ፡ አስተዋስባ።
26 ወለእመ፡ ብከ፡ ብእሲተ፡ እንተ፡ ከመ፡ ነፍስከ፡ ኢታውፅኣ።
27 በኵሉ፡ ልብከ፡ አክብሮ፡ ለአቡከ፡ ወኢትርሳዕ፡ ሕማማ፡ ለእምከ።
28 ወተዘከር፡ ከመ፡ እንበይነ፡ ዚኣሆሙ፡ ተወለድከ፡ ወምንተ፡ ተዐስዮሙ፡ ህየንተ፡ ዘገብሩ፡ ለከ።
29 በኵሉ፡ ነፍስከ፡ ፍርሆ፡ ለእግዚአብሔር፡ ወአክብሮሙ፡ ለካህናቲሁ።
30 ወበኵሉ፡ ኀይልከ፡ አፍቅሮ፡ ለፈጣሪከ፡ ወኢትኅድጎሙ፡ ለእለ፡ ይፀመድዎ።
31 ፍርሆ፡ ለእግዚአብሔር፡ ወአክብሮ፡ ለዘይፀመዶ፡ ወሀብ፡ ክፍሎ፡ ዘእዙዝ፡ ለከ፡ ቀዳምያተ፡ ወዘበእንተ፡ ኀጢአት፡ ወመዝራዕተ፡ ወመሥዋዕተ፡ ቅድሳት፡ ወቀዳሜ፡ ቅድሳት።
32 ወለነዳይኒ፡ ስፋሕ፡ እዴከ፡ ከመ፡ ፍጽምተ፡ ትኩን፡ በረከትከ።
33 ወዕሴተ፡ ጸጋከ፡ ትረክብ፡ በእንተ፡ ኵሉ፡ ነፍስከ፡ ወለዘሞተሂ፡ ኢትኅድግ፡ ጸግዎ።
34 ወኢትትኅደግ፡ እምእለ፡ ይበክዩ፡ ወይላሑ፡ ምስለ፡ እለ፡ ይላሕዉ።
35 ወኢትትሀከይ፡ ሐውጾ፡ ድዉይ፡ ወበዝንቱ፡ ያፈቅሩከ።
36 ውስተ፡ ኵሉ፡ ዘተናገርከ፡ ተዘከራ፡ ለደኃሪትከ፡ ወኢትአብስ፡ ለዝሉፉ።
=== chapter 8 ===
[Chapter 8]
1 ወኢትትገአዝ፡ ምስለ፡ ዐበይተ፡ ሰብእ፡ ከመ፡ ኢትደቅ፡ ውስተ፡ እዴሆሙ።
2 ወኢትትቀሐው፡ ምስለ፡ ዘይብዕለከ፡ ከመ፡ በብዕሉ፡ ኢይማእከ፡ እስመ፡ ብዙኃን፡ ተሀጕሉ፡ እንበይነ፡ ወርቅ፡ ቀይሕ፡ ወገመጾሙ፡ ልቦሙ፡ ለነገሥት።
3 ወኢትትላኰይ፡ ምስለ፡ ብእሲ፡ ነባቢ፡ ወእመ፡ አኮሰ፡ ወጣሕከ፡ ዕፀወ፡ ዲበ፡ እሳተ።
4 ኢትሥሐቅ፡ ወኢትሣለቅ፡ ምስለ፡ አብድ፡ ከመ፡ ኢታኅሥር፡ አዝማዲከ።
5 ወኢትትሀበቦ፡ ለዘይትጋነይ፡ በእንተ፡ ጌጋዩ፡ ተዘከር፡ ከመ፡ ኵልነ፡ ኃጥኣን፡ ንሕነ።
6 ወኢታስተአክዮ፡ ለሰብእ፡ በርሥዓቲሁ፡ እስመ፡ እምውስቴትነሂ፡ ቦ፡ ዘይረሥዕ።
7 ኢትትፌሣሕ፡ ላዕለ፡ ዘሞተ፡ ተዘከር፡ ከመ፡ ኵልነ፡ ንመውት።
8 ኢታስትት፡ ነገረ፡ ጠቢባን፡ ወተመሀር፡ አምሳሊሆሙ፡ እስመ፡ በኀቤሆሙ፡ ትረክባ፡ ለጥበብ፡ ወተፀመድ፡ መኳንንተ።
9 ወዕቀብ፡ ተግሣጾሙ፡ ለአእሩግ፡ እስመ፡ እሙንቱሂ፡ በኀበ፡ አበዊሆሙ፡ ተምህሩ፡ ወአንተሂ፡ በኀቤሆሙ፡ ትመሀር፡ ወትረክብ፡ ዘትነብብ፡ በጊዜ፡ ትካዝከ፡ ወተአምር፡ ዘታወሥእ።
10 ኢትሱጥ፡ እሳቶሙ፡ ለኃጥኣን፡ ከመ፡ ኢተዐይ፡ በነዶሙ።
11 ኢትትዋሣእ፡ በኀበ፡ ጸላኢ፡ ጸዓሊ፡ ከመ፡ ኢያስሕትከ፡ በቃለ፡ አፉሁ።
12 ወኢትለቅሖ፡ ለዘይብዕለከ፡ ወለእመሰ፡ ለቃሕካሁ፡ ረሲ፡ ከመ፡ ዘሀጐልከ።
13 ኢትትሐበዮ፡ ለዘይጸንዐከ፡ ወለእመሰ፡ ተሐበይካሁ፡ ኀሊ፡ እንከ፡ ዘከመ፡ ትፈዲ፡ ለሊከ።
14 ኢትሳነን፡ ምስለ፡ መኰንን፡ እስመ፡ በከመ፡ ክብሩ፡ ያገብኡ፡ ሎቱ፡ ፍትሐ።
15 ምስለ፡ መስተኀብል፡ ኢትኅበር፡ መንገደ፡ ከመ፡ ኢይትመዐዕ፡ ላዕሌከ፡ እስመ፡ ውእቱሰ፡ ዘፈተወ፡ ልቡ፡ ይገብር፡ ወትመውት፡ አንተ፡ በእበደ፡ ዚኣሁ።
16 ወኢትትገአዝ፡ ምስለ፡ መዐትም፡ ወኢትፃእ፡ ሐቅለ፡ ምስሌሁ፡ እስመ፡ ከመ፡ ወኢ፡ ምንት፡ ክዒወ፡ ደም፡ በኀበ፡ ዐይኑ፡ ወበኀበ፡ አልቦ፡ ረድኤት፡ ይወስደከ።
17 ወኢትትማከር፡ ምስለ፡ አብድ፡ እስመ፡ ኢይክል፡ ዐቂበ፡ ነገር፡ ዘሰምዐ።
18 ኢትንግር፡ ቅድመ፡ ነኪር፡ ትካዘከ፡ እስመ፡ ኢተአምር፡ እፎ፡ ይበጽሐከ።
19 ኢትክሥት፡ ለኵሉ፡ ሰብእ፡ ዘውስተ፡ ልብከ፡ ከመ፡ ኢይኩንከ፡ ህጉለ፡ ዕሴትከ።
=== chapter 9 ===
[Chapter 9]
1 ኢታቅንኣ፡ ለብእሲተ፡ ሕፅንከ፡ ከመ፡ ኢትትመሀር፡ ላዕሌከ፡ ትምህርተ፡ እኩየ።
2 ኢትመጥዋ፡ ለብእሲት፡ ነፍሰከ፡ ከመ፡ ኢትትከየድ፡ ላዕለ፡ ኀይልከ።
3 ኢትሰሐጥ፡ ብእሲተ፡ ባዕድ፡ ከመ፡ ኢትደቅ፡ ውስተ፡ መሥገርታ።
4 ወኢትዛዋዕ፡ ምስለ፡ መሰንቃዊት፡ ከመ፡ ኢታሥግርከ፡ በማሕሌታ።
5 ኢትሰሐጣ፡ ለድንግል፡ ከመ፡ ኢያስሕትከ፡ ፈቃዳ።
6 ኢትመጥዋ፡ ለዘማ፡ ነፍሰከ፡ ከመ፡ ኢትህጐል፡ ርስተከ።
7 ወኢትኅሥሥ፡ ውስተ፡ ፍናዊሃ፡ ለሀገር፡ ከመ፡ ኢያስሕትከ፡ ጽጐጕሃ።
8 ሚጥ፡ ዐይነከ፡ እምነ፡ ብእሲት፡ ሠናይት፡ ወኢያፍቱከ፡ ሥና፡ ለብእሲት፡ ባዕድ፡ ብዙኃን፡ እለ፡ ስሕቱ፡ በሥነ፡ ብእሲት፡ ወእንበይነ፡ ዝንቱ፡ ይነድድ፡ ፍቅር፡ ከመ፡ እሳት።
9 ኢትንበር፡ ምስለ፡ ብእሲተ፡ ብእሲ፡ ወኢትሠገር፡ ምስሌሃ፡ በስታይ፡ ከመ፡ ኢትግምድ፡ ነፍስከ፡ መንገሌሃ፡ ወኢታድኅፅ፡ መንፈስከ፡ ውስተ፡ ሞት።
10 ወኢትኅድግ፡ ዐርክከ፡ ዘትካት፡ እስመ፡ ኢይከውነከ፡ ከማሁ፡ ዐርከ፡ ግብት፡ ዐርከ፡ ሐዲስ፡ ወይን፡ ሐዲስ፡ ወእመሰ፡ ከረመ፡ ትሰትዮ፡ በትፍሥሕት።
11 ኢያቅንእከ፡ ብዕሎሙ፡ ለኃጥኣን፡ እስመ፡ ኢተአምር፡ ዘከመ፡ ይትገፈትኡ።
12 ወኢያፍቱከ፡ ተድላሆሙ፡ ለረሲዓን፡ ተዘከር፡ ከመ፡ ኢይጸድቁ፡ እስከ፡ አመ፡ ይመውቱ።
13 ረሐቅ፡ ነዋኀ፡ መካነ፡ እምነ፡ መኳንንት፡ ዘነፍሰ፡ ይኴንኑ፡ ወኢይርከብከ፡ ትሕዝብተ፡ ሞት፡ እመኒ፡ ቀረብካሆሙ፡ ኢትነስሕ፡ ከመ፡ ኢትግድፍ፡ ሕይወትከ፡ ወአእምር፡ ዳእሙ፡ ከመ፡ ማእከለ፡ መሥገርት፡ ተኀልፍ፡ ወከመ፡ ዘማእከለ፡ ቀልቀል፡ ታንሶሱ።
14 በአምጣነ፡ ትክል፡ አሠኒ፡ ለቢጽከ፡ ወምስለ፡ ጠቢባን፡ ተማከር።
15 ወምስለ፡ ማእምራን፡ ይኩን፡ ትካዝከ፡ ወኵሉ፡ ነገርከ፡ በሕገ፡ እግዚአብሔር፡ ይኩንከ።
16 ወዕደው፡ ጻድቃን፡ የሀልዉ፡ ውስተ፡ ምሳሕከ፡ ወበፍርሀተ፡ እግዚአብሔር፡ ይኩን፡ ምሳሕከ።
17 ወበውስተ፡ እደ፡ ኬንያሁ፡ ይትለማዕ፡ ግብሩ፡ ወለመልአከ፡ አሕዛብኒ፡ ይንእድዎ፡ በጥበበ፡ ቃሉ።
18 ግሩም፡ ውእቱ፡ ብእሲ፡ ነባቢ፡ በውስተ፡ ሀገሩ፡ ወይጸልእዎ፡ ለዝሉፉ፡ እምነ፡ ቃሉ።
=== chapter 10 ===
[Chapter 10]
1 ንጉሥ፡ ጠቢብ፡ ይጌሥጽ፡ አሕዛቢሁ፡ ወመኰንን፡ ለባዊ፡ ይገብር፡ ሥርዐተ።
2 ከመ፡ መልአከ፡ አሕዛብ፡ ከማሁ፡ ወዓሊሁ፡ ወከመ፡ መኰንና፡ ለሀገር፡ ይገብሩ፡ እለ፡ ውስቴታ።
3 ንጉሥ፡ አብድ፡ የሀጕል፡ አሕዛቢሁ፡ ወሀገርኒ፡ ትጸንዕ፡ በጥበቢሆሙ፡ ለሊቃውንቲሃ።
4 ውስተ፡ እዴሁ፡ ለእግዚአብሔር፡ ኵነኔሃ፡ ለምድር።
5 ወእምገጹ፡ ለጸሓፊ፡ ይትዐወቅ፡ ጥበቢሁ።
6 ወበኵሉ፡ ዘስሕተ፡ ቢጽከ፡ ኢትኂሶ፡ ወአልቦ፡ ዘትገብር፡ ሕሡመ፡ ምንተኒ፡ በዘኄስካሁ።
7 ጽሉእ፡ ትዕቢት፡ በኀበ፡ እግዚአብሔር፡ ወበኀበ፡ ዕጓለ፡ እመሕያው፡ ወእምኵሉ፡ ተዐኪ፡ ዓመፃ።
8 መንግሥትሰ፡ ትትፋለስ፡ እምሕዝብ፡ ለሕዝብ፡ እንበይነ፡ ዓመፃ፡ ወእንበይነ፡ ጋእዝ፡ ወእንበይነ፡ ንዋይ።
9 ወለምንት፡ እንከ፡ ይትዔበይ፡ መሬት፡ ወሐመድ፡ ዘእንዘ፡ ሕያው፡ ውእቱ፡ ዘይጸይእ፡ ነፍስቱ።
10 ለቊስልኒ፡ ዐቢይ፡ ይፌውሶ፡ ዐቃቤ፡ ሥራይ፡ ወንጉሠሰ፡ ለዮም፡ ዳእሙ፡ ወጌሠመ፡ ይመውት።
11 ወእም፡ ከመ፡ ሞተ፡ ሰብእ፡ ይከውን፡ ክፍለ፡ ዕፄ።
12 ቀዳሚሃ፡ ለትዕቢት፡ ታውፅኦ፡ እምእግዚአብሔር፡ ወታክሕዶ፡ ልቦ፡ እምነ፡ ፈጣሪሁ።
13 ቀዳሚሃ፡ ለትዕቢት፡ ኀጢአት፡ ወለዘአጽንዐ፡ ላዕሌሃ፡ ታበዝኅ፡ ላዕሌሁ፡ ርኵሰ፡ ወእንበይነ፡ ዝንቱ፡ ያርኢ፡ እግዚአብሔር፡ ፍዳሆሙ፡ ወይገፈትዖሙ፡ ለዝሉፉ።
14 ነሠተ፡ እግዚአብሔር፡ መናብርቲሆሙ፡ ለመላእክት፡ ወሤመ፡ የዋሃነ፡ ህየንቴሆሙ።
15 ሥርዎሙ፡ ለአሕዛብ፡ መልሐ፡ እግዚአብሔር፡ ወተከለ፡ ትሑታነ፡ ህየንቴሆሙ።
16 በሓውርተ፡ አሕዛብ፡ ደምሰሰ፡ እግዚአብሔር፡ ወሠረዎሙ፡ እስከ፡ መሠረተ፡ ምድር።
17 ወአሰሰሎሙ፡ ወአጥፍኦሙ፡ ወሰዐረ፡ እምድር፡ ዝክሮሙ።
18 አኮ፡ ለዕጓለ፡ እመሕያው፡ ዘተፈጥረ፡ ትዕቢት፡ ወአኮ፡ ለዘይትወለድ፡ እምአንስት፡ መዓት፡ ወመንሱት።
19 ዘርዕ፡ ክቡር፡ ዘርዐ፡ ዕጓለ፡ እመሕያው፡ አይኑ፡ ዘርዕ፡ ክቡር፡ ዘርዖሙ፡ ለፈራህያነ፡ እግዚአብሔር፡ ዘርዕ፡ ኅሡር፡ ዘርዕ፡ ለዕጓለ፡ እመሕያው፡ አይኑ፡ ዘርዕ፡ ኅሡር፡ ዘርዖሙ፡ ለእለ፡ ኢየዐቅቡ፡ ትእዛዘ።
20 ክቡር፡ ውእቱ፡ መኰንን፡ እምነ፡ ቢጹ፡ ወእለኒ፡ ይፈርህዎ፡ ለእግዚአብሔር፡ ይከብሩ፡ እምኔሁ።
22 ለባዕልኒ፡ ወለክቡርኒ፡ ወለነዳይኒ፡ በፈሪሀ፡ እግዚአብሔር፡ ይከውኖሙ፡ ምክሖሙ።
23 አኮ፡ ርቱዕ፡ ያስተአክይዎ፡ ለነዳይ፡ እንበይነ፡ ንዴቱ፡ ወአኮ፡ ርቱዕ፡ ያክብርዎ፡ ለብእሲ፡ ኃጥእ፡ እንበይነ፡ ብዕሉ።
24 ይከብሩ፡ ዐበይትኒ፡ ወመላእክትኒ፡ ወመኳንንትኒ፡ ወአልቦ፡ እምውስቴቶሙ፡ ዘየዐብዮ፡ ለፈራሄ፡ እግዚአብሔር።
25 ነባሬ፡ ጠቢብ፡ ንጹሐ፡ ይትለአክ፡ ወብእሲ፡ ማእምር፡ ኢየኀይሶ።
26 ኢትጠበብ፡ እንዘ፡ ትገብር፡ ግብረከ፡ ወኢትትዐበይ፡ በመዋዕለ፡ ተጽናስከ።
27 ይኄይስ፡ ዘይትቀነይ፡ ወይትጌበር፡ እምነ፡ ዘያንሶሱ፡ ወይትሜካህ፡ ወኢይረክብ፡ ሲሳዮ።
28 ወልድየ፡ በየውሃትከ፡ አስተፍሥሐ፡ ለነፍስከ፡ ወአስተዳልዋ፡ በአምጣነ፡ ትክል።
29 ዘላዕለ፡ ነፍሱ፡ ይኤብስ፡ ለመኑ፡ ኄረ፡ ይከውን፡ ወለዘ፡ ኢያስተዳልዋ፡ ለነፍሱ፡ መኑ፡ የአኵቶ።
30 ለነዳይሰ፡ ይንእድዎ፡ በጥበቢሁ፡ ወለባዕልኒ፡ ይዌድስዎ፡ እንበይነ፡ ብዕሉ።
31 ዘአመ፡ ይጼነስ፡ ኢየሐዝን፡ አመ፡ ይዴሎ፡ እፎ፡ ይትፌሣሕ።
=== chapter 11 ===
[Chapter 11]
1 ይከብር፡ ነዳይ፡ በጥበቢሁ፡ ወይነብር፡ ማእከለ፡ መኳንንት።
2 ኢታድሉ፡ ለሰብእ፡ እንበይነ፡ ላሕዩ፡ ወኢታስተአክዮ፡ ለሰብእ፡ እንበይነ፡ ሕሠሚሁ።
3 እምኵሉ፡ አዕዋፍ፡ ትንዕስ፡ ንህብ፡ ወእምኵሉ፡ ይጥዕም፡ ፍሬሃ።
4 ኢትዘኀር፡ በሥነ፡ አልባሲከ፡ በመዋዕለ፡ ክብርከኒ፡ ኢታዕቢ፡ ርእሰከ፡ እስመ፡ ነኪር፡ ግብሩ፡ ለእግዚአብሔር፡ ወኅቡእ፡ እምዕጓለ፡ እመሕያው፡ ኪኑ።
5 ብዙኃን፡ መኳንንት፡ እለ፡ ወድቁ፡ ውስተ፡ ምድር፡ ወቦ፡ ባሕታዊ፡ ዘተቀጸለ፡ አክሊለ።
6 ብዙኃን፡ ዐበይት፡ እለ፡ ኀሥሩ፡ ፈድፋደ፡ ወብዙኃን፡ ክቡራን፡ እለ፡ ገብኡ፡ ታሕተ፡ ባዕድ።
7 ኢትኂስ፡ ዘእንበለ፡ ትሕትቶ፡ ጠይቅ፡ ቅድመ፡ ወድኅረ፡ ትጌሥጽ።
8 ዘእንበለ፡ ትስማዕ፡ ኢታውሥእ፡ ወውስተ፡ ነገረ፡ ባዕድ፡ ኢትባእ።
9 ወውስተ፡ ዘኢኮነ፡ ትካዝከ፡ ኢትትኀለፍ፡ ወኢትሳነን፡ በቀስተ፡ ጊጉይ።
10 ወልድየ፡ ኢታብዝኅ፡ ተግባረከ፡ እስመ፡ ለእመ፡ አብዛኅከ፡ ትጸደቅ፡ ኢያበውሐከ፡ ወኢታመሥጥ፡ ለእመ፡ ሮጽከ፡ ወኢትረክባ፡ ለእመ፡ ዴገንከ፡ ለጽድቅ።
11 እስመ፡ ቦ፡ ዘይጔጕእ፡ ወይሠርሕ፡ ወይጻሙ፡ ወፈድፋደ፡ ይጼነስ።
12 ወቦ፡ እንዘ፡ ድኩም፡ ውእቱ፡ ኢይስእል፡ ወዘይመልክ፡ ወኢይክል፡ ምንተኒ፡ ወለእመኒ፡ ጸንዐ፡ ፈድፋደ፡ ይጼነስ፡ ወለአመ፡ ነጸሮ፡ እግዚአብሔር፡ በሠናይ፡ ያነሥኦ፡ እምተጽናሱ።
13 ወያዐብዮ፡ ወያከብሮ፡ ወያነክርዎ፡ ብዙኃን።
14 ሠናይትኒ፡ ወእኪትኒ።
15 ሐይውኒ፡ ወመዊትኒ።
16 ነዳይኒ፡ ወብዕልኒ፡ እምኀበ፡ እግዚአብሔር።
17 ጸጋሁ፡ ለእግዚአብሔር፡ ትዜውሮሙ፡ ለጻድቃን፡ ወፈቃዱሂ፡ ያስተፌሥሕ፡ ዓለመ።
18 ሀሎ፡ ዘይብዕል፡ በብዝኀ፡ ጠዊዕ፡ ወእንዘ፡ ይቄቂ፡ ወባቲ፡ ይሤልጥ፡ ትፍሥሕቶ።
19 ወአመ፡ ተሰፈወ፡ ያዕርፍ፡ ወአመ፡ ይብል፡ እበልዕ፡ ወእሰቲ፡ እንከሰ፡ እፌግዕ፡ ወአእከልኩ፡ ወኢየአምር፡ ዕለት፡ እንተ፡ ትበጽሖ፡ ወየኅድግ፡ ኵሎ፡ ለባዕድ፡ ወይመውት፡ ውእቱ።
20 ቁም፡ በፍርሀተ፡ እግዚአብሔር፡ ወቦቱ፡ ተመሀር፡ ወርሳዕ፡ በተግባርከ።
21 ወኢያፍቱከ፡ ግብሮሙ፡ ለኃጥኣን፡ ተአመን፡ በእግዚአብሔር፡ ወተሰፈዎ፡ ለጻማከ፡ እስመ፡ ቀሊል፡ በኀበ፡ እግዚአብሔር፡ ኵሉ፡ ለምዕር፡ ወግብተ፡ ያብዕሎ፡ ለነዳይ።
22 በረከተ፡ እግዚአብሔር፡ ዕሴቶሙ፡ ለጻድቃን፡ ወትትባዛኅ፡ በረከቱ፡ ለጻድቅ።
23 ወኢትበል፡ ኢይፈቅድ፡ እንከ፡ ወኢትበል፡ አልብየ፡ ዕሴት፡ እንከ።
24 እምይእዜሰ፡ አከለኒ፡ ወእምይእዜሰ፡ ኢይጼነስ፡ እንከ።
25 አመ፡ ዕለተ፡ ሠናይት፡ ይረስዕዋ፡ ለእኪት፡ ወአመ፡ ዕለተ፡ እኪት፡ ይረስዕዋ፡ ለሠናይት።
26 እስመ፡ ቀሊል፡ በኀበ፡ እግዚአብሔር፡ ዕለተ፡ ሞት፡ እስመ፡ ይፈድዮ፡ ለሰብእ፡ በከመ፡ ግዕዙ።
27 በእኪት፡ ዕለት፡ ይከሪ፡ ጽጋብ፡ ወበደኃሪቱ፡ ለሰብእ፡ ይትዐወቅ፡ ምግባሩ።
28 ወኢትበሎ፡ ለሰብእ፡ ብፁዕ፡ ዘእንበለ፡ ትርአይ፡ ደኃሪቶ፡ ወበላዕለ፡ ውሉዱ፡ ያስተርኢ፡ ንብረቱ፡ ለሰብእ።
29 ኢታብእ፡ ኵሎ፡ ሰብእ፡ ዘረከብከ፡ ውስተ፡ ቤትከ፡ እስመ፡ በብዙኀ፡ ይጠበበከ፡ ጕሕልያ።
30 ቆቃሕ፡ ተሠግረ፡ በቈጽለ፡ አስርቆ፡ ከማሁ፡ ልቡ፡ ለእቡይ፡ ወከመ፡ ሰብአ፡ ዐይን፡ ይትሔዘባ፡ ለድቀቱ።
31 መጠነ፡ ሠናይት፡ እኪተ፡ የዐስየከ፡ ጕሕልያ፡ ወይገብር፡ ለከ፡ ነውረ፡ በዘአልብከ።
32 በብዝኀ፡ ትንታጉ፡ ለእሳት፡ ይበዝኅ፡ ፍሕሙ፡ ወብእሲሰ፡ ኃጥእ፡ ይንዕዋ፡ ለነፍሱ።
33 ተዐቀብ፡ እምነ፡ እኩይ፡ እስመ፡ እኪተ፡ ይፈጥር፡ ከመ፡ ኢይግበር፡ ለዝሉፉ፡ ጽዕለተ፡ ላዕሌከ።
34 ለእመ፡ አኅደርከ፡ ነኪረ፡ ምስሌከ፡ የሀውከከ፡ ወየዐልወከ፡ ወያወፅአከ፡ እምንዋይከ።
=== chapter 12 ===
[Chapter 12]
1 አመ፡ ትገብር፡ ሠናየ፡ አእምር፡ ለዘትገብር፡ በዘትረክብ፡ ዕሴተ፡ ሠናይትከ።
2 ግበር፡ ለጻድቅ፡ ወትረክብ፡ ዕሴተከ፡ ወእመ፡ ኢረከብከ፡ በኀቤሁ፡ ትረክብ፡ በኀበ፡ ፈጣሪሁ።
3 አልቦቱ፡ ሠናይ፡ በኀበ፡ ዘይገብራ፡ ለእኪት፡ ወበኀበ፡ ዘኢይገብር፡ ምጽዋተ።
4 ሀብ፡ ለጻድቅ፡ ከመ፡ ኢይንሣእከ፡ ኃጥእ።
5 አሠኒ፡ ለነዳይ፡ ወኢተሀብ፡ ለእኩይ፡ አፅርዕ፡ እክለከ፡ ከመ፡ ኢይንሣእከ፡ ውእቱ፡ ከመ፡ ኢይማእከ፡ በንዋይከ፡ እስመ፡ ካዕበተ፡ ትረክባ፡ ለእኪት፡ በኀቤሁ፡ ዕሴተ፡ ኵሉ፡ ሠናይትከ፡ እንተ፡ ገበርከ፡ ሎቱ።
6 እስመ፡ እግዚአብሔር፡ ይጸልኦሙ፡ ለኃጥኣን፡ ወይትቤቀሎሙ፡ ለእኩያን።
7 ሀብ፡ ለጻድቅ፡ እምተሀብ፡ ለኃጥእ።
8 ኢያምሥጥከ፡ ዐርክከ፡ አመ፡ ትፍሥሕትከ፡ ወኢይትኅባእከ፡ ጸላኢከ፡ አመ፡ ምንዳቤከ።
9 ትፍሥሕትከ፡ ያቈስሎሙ፡ ለጸላእትከ፡ ወተጽናስከ፡ ይሰድዶሙ፡ ለአዕርክቲከ።
10 ኢትትአመኖ፡ ለጸላኢከ፡ ለዝሉፉ፡ እስመ፡ ከመ፡ ዛሕለ፡ ብርት፡ እከየ፡ ልቡ።
11 ወእመኒ፡ ተጸነስከ፡ ይፀመደከ፡ እንዘ፡ ኢይንእደከ፡ አጽንዓ፡ ለነፍስከ፡ ወተዐቀቦ፡ ወትከውኖ፡ ከመ፡ መጽሔት፡ ዝሕልተ፡ ወኢይክለከ፡ ለዝሉፉ።
12 ወኢታቅሞ፡ መንገሌከ፡ ከመ፡ ኢይጕዳዕከ፡ ወኢይቁም፡ ውስተ፡ መካንከ፡ ወኢታንብሮ፡ መንገለ፡ የማንከ፡ ከመ፡ ኢይንሣእከ፡ ሢመተከ፡ ወበደኃሪትከ፡ ሀለወከ፡ ታእምሮ፡ ለቃልየ፡ ወትዜከሮ፡ ለተግሣጽየ።
13 መኑ፡ ያስተምህሮ፡ ለአርዌ፡ ምድር፡ ወለኵሉ፡ አርዌ፡ እኩይ።
14 ከማሁ፡ ዘየሐውርኒ፡ ምስለ፡ ብእሲ፡ ኃጥእ፡ ወይዴመር፡ ምስለ፡ ኀጢአቱ።
15 ለእንተ፡ ምዕር፡ ይቀውም፡ ምስሌከ፡ ጸላኢከ፡ ወእስከ፡ ትትመየጥ፡ ኢትሬእዮ፡ እንከ፡ ወኢይትዔገሥ፡ ምስሌከ።
16 በከናፍሪሁሰ፡ ያስተጥዕም፡ ለከ፡ ቃሎ፡ ጸላኢከ፡ ወበልቡ፡ ይመክር፡ ውስተ፡ ግብ፡ ያውድቀ፡ ወበዐይኑሂ፡ ያነብዕ፡ ለከ፡ ጸላኢከ፡ ወእም፡ ከመ፡ አስሐተከ፡ ኢይጸግብ፡ እምደምከ።
17 ወእመኒ፡ ተመንደብከ፡ ቅድመ፡ ኵሉ፡ ትረክቦ፡ ቅድመ፡ ገጽከ፡ ወቅድመ፡ ዘይረድአከ፡ ያቴሕት፡ ርእሶ፡ ታሕተ፡ ሰኰናከ።
18 ወይጠፍሕ፡ በእደዊሁ፡ ወየሐውስ፡ ርእሶ፡ ወእምዝ፡ ይመይጥ፡ ገጾ፡ ወይትቃጸበከ።
=== chapter 13 ===
[Chapter 13]
1 ዘገሰሰ፡ ፒሳ፡ ይትአኀዝ፡ ቦቱ፡ ወዘተዐረኮ፡ ለዕቡይ፡ ይከውን፡ ከማሁ።
2 ኢታንሥእ፡ ክቡደ፡ ወኢትሰከም፡ ላዕሌከ፡ ወኢትደምር፡ ንዋየከ፡ ምስለ፡ ዘይኄይለከ፡ ወዘይብዕለከ፡ በአይቴ፡ ይትዐረክ፡ መቅጹት፡ ምስለ፡ ጽሕርት፡ እስመ፡ ለሊሃ፡ ትጐድዕ፡ ወለሊሃ፡ ትኬልሕ፡ ወለሊሃ፡ ትሰብር።
3 ወከማሁ፡ ባዕልኒ፡ ለሊሁ፡ ይገፍዕ፡ ወለሊሁ፡ ይትመዐዕ፡ ወነዳይሰ፡ ለሊሁ፡ ይትገፋዕ፡ ወለሊሁ፡ ይገኒ።
4 ወለእመ፡ ብከ፡ ዘትበቊዖ፡ ያቀርበከ፡ ኀቤሁ፡ ወእመሰ፡ ተጸነስከ፡ ኢይኔጽረከ፡ እንከ።
5 ወለእመ፡ ብከ፡ የኀብር፡ ምስሌከ፡ ወየኀልቅ፡ ለከ፡ ዘዚኣከ፡ ወዓዲ፡ ኢያነክረከ።
6 ወለእመ፡ ቦ፡ ትካዝ፡ ዘይቴክዝ፡ ይየውሀከ፡ ወብዙኀ፡ ያስተሴፍወከ፡ ወይሥሕቅ፡ ለከ፡ ወሠናየ፡ ይትናገረከ፡ ወምንተ፡ ትፈቅድ፡ ይብለከ።
7 ወበመብልዑ፡ የኀይጠከ፡ ምዕረ፡ ወካዕበ፡ ወሥልሰ፡ ያሰፍጠከ፡ ወእም፡ ዝ፡ ድኅረ፡ ይገብእ፡ ኢይስማዕከ፡ ወእመኒ፡ ርእየከ፡ ይሥሕቅ፡ ላዕሌከ፡ ወየሐውስ፡ ርእሶ፡ ለከ።
8 ተዐቀብ፡ ኢያስሕትከ፡ ወኢይየውህከ፡ ወኢታብእ፡ ሐዘነ፡ ማእከለ፡ ትፍሥሕትከ።
9 ዘይቤለከ፡ ዐቢይ፡ ኦሆ፡ በሎ፡ ለግእዙ፡ ወለእመኒ፡ ጸውዐከ፡ ኢትእበዮ፡ ወፈድፋደ፡ ያፈቅረከ።
10 ኢትርሐቅኒ፡ ወኢትስሐትኒ፡ ወኢታጐንዲ፡ ርሒቆቶ፡ ከመ፡ ኢይርሳዕከ።
11 ወኢታፈድፍድ፡ ተናግሮ፡ ምስሌሁ፡ ወኢትትአመኖ፡ በብዝኀ፡ ነገሩ፡ እስመ፡ በብዝኀ፡ ነገሩ፡ ያሜክረከ፡ ወከመ፡ ዘይሥሕቅ፡ ምስሌከ፡ የሐትተከ።
12 አልቦቱ፡ ሣህል፡ ለዘያወፅእ፡ ምክረ፡ ቢጹ፡ እስመ፡ ኢየሐዝኖ፡ ተሞቅሖቱ፡ ወመንሱቱ።
13 ዑቅ፡ ወተዐቀብ፡ በሕቁ፡ እስመ፡ ምስለ፡ ቀታሊከ፡ ተሐውር።
15 ኵሉ፡ እንስሳ፡ ያፈቅር፡ ዘመዶ፡ ወኵሉ፡ ሰብእ፡ ያፈቅር፡ ቢጾ።
16 ወኵሉ፡ ነፍስ፡ ይትጋባእ፡ ምስለ፡ ዘከማሁ፡ ወሰብእኒ፡ ምስለ፡ ዘይዘውጎ፡ ይተሉ።
17 በአይቴ፡ ይትዐረክ፡ ተኵላ፡ ምስለ፡ በግዕ፡ ከማሁ፡ ኃጥእ፡ ምስለ፡ ጻድቅ።
18 ወመኑ፡ ያስተሰናእዎሙ፡ ለከለባት፡ ምስለ፡ አዝእብት፡ ወመኑ፡ ያስተዐርኮ፡ ለነዳይ፡ ምስለ፡ ባዕል።
19 ከማሁ፡ ይትዔገሎ፡ ባዕል፡ ለነዳይ።
20 ያስቆርሮ፡ ዕቡይ፡ ለዘያቴሕት፡ ርእሶ፡ ከማሁ፡ ያስቆርሮ፡ ባዕል፡ ለነዳይ።
21 ባዕል፡ ለእመ፡ ተንተነ፡ ይሰውቅዎ፡ አዕርክቲሁ፡ ወነዳይሰ፡ ለእመኒ፡ ወድቀ፡ ይከይድዎ፡ ቢጹ።
22 ባዕል፡ ለእመ፡ ድኅፀ፡ ብዙኃን፡ ያነሥእዎ፡ ወእመኒ፡ ነበበ፡ ያረትዑ፡ ሎቱ፡ ቃሎ፡ ወነዳይሰ፡ ለእመ፡ ስሕተ፡ ይረግምዎ፡ ወእመኒ፡ ሠናየ፡ ነበበ፡ ኢያጸምእዎ።
23 ወባዕልሰ፡ ለእመ፡ ነበበ፡ ኵሉ፡ ያረምም፡ ወይንእዱ፡ ሎቱ፡ ቃሎ፡ ወያበጽሕዎ፡ እስከ፡ ደመና፡ ወነዳይሰ፡ ለእመ፡ ነበበ፡ ሠናይ፡ ምንትኑ፡ ዝንቱ፡ ይብልዎ፡ ወእመኒ፡ ተዐቅፈ፡ ያቴክልዎ።
24 ሠናይ፡ ብዕል፡ እንዘ፡ ኢትገብር፡ ኀጢአተ፡ ያሐሥማ፡ ኃጥእ፡ ለንዴቱ፡ በአፉሁ።
25 ልቡ፡ ለሰብእ፡ ይዌልጥ፡ ገጾ፡ ለእመኒ፡ ፍሡሕ፡ ውእቱ፡ ወለእመኒ፡ ትኩዝ፡ ውእቱ።
26 አሠሩ፡ ለልብ፡ ፍሡሕ፡ ገጽ፡ ብሩህ፡ ወትረክብ፡ ምክረ፡ ጥበብ፡ ሰሪሐከ።
=== chapter 14 ===
[Chapter 14]
1 ብፁዕ፡ ዘኢይድኅፅ፡ በአፉሁ፡ ወለኃጥእሰ፡ ኢያደነግፆ፡ ሐዘን።
2 ብፁዕ፡ ዘኢየሐዝን፡ ነፍሶ፡ ወዘኢሀጕል፡ ተስፋሁ።
3 ለብእሲ፡ ዘኢየአምር፡ ቃለ፡ ኢይደልዎ፡ ብዕል፡ ወለብእሲ፡ ጠዋዒ፡ ኢይደልዎ፡ ንዋይ።
4 ዘይቄቅያ፡ ለነፍሱ፡ ይዘግብ፡ ለባዕድ፡ ወካልእ፡ ይፌግዕ፡ በንዋዩ።
5 ዘለነፍሱ፡ ይጠውዕ፡ ለመኑ፡ ሀለዎ፡ ይጸጉ፡ ወዘኢይትፌሣሕ፡ በንዋዩ።
6 ወአልቦ፡ ዘየአክዮ፡ እምዘይጠውያ፡ ለነፍሱ፡ ወውእቱ፡ ይከውኖ፡ ፍዳሃ፡ ለእከይሁ።
7 ወሶበኒ፡ ያሤኒ፡ አመ፡ ረስዐ፡ ዳእሙ፡ ያሤኒ፡ ወድኅረ፡ ያዔውቅ፡ እከይሁ።
8 እኩይ፡ ዐይነ፡ ጠዋዒ፡ ዘይመይጥ፡ ገጾ፡ ይትዔወር፡ ነፍሶ።
9 ኢያጸግቦ፡ ክፍሉ፡ ለዐይነ፡ ሥሡዕ፡ ወእከየ፡ ልቡ፡ ያቋቊዖ፡ ለአዕፅምቲሁ።
10 ዐይኑ፡ ለሐማሚ፡ ይጠውዕ፡ እክለ፡ ወይደነግፁ፡ በውስተ፡ ማእድ።
11 ወልድየ፡ በአምጣነ፡ ትክል፡ አስተደልዋ፡ ለነፍስከ፡ ወአብእ፡ መባአ፡ ለእግዚአብሔር፡ በዘይደልወከ።
12 ወተዘከር፡ ከመ፡ ኢይጐነዲ፡ ሞት፡ ወኢታስተሐዘብከ፡ ዕለተ፡ ሞት።
13 ዘእንበለ፡ ትሙት፡ አሠኒ፡ ለቢጽከ፡ ወበአምጣነ፡ ትክል፡ ስፋሕ፡ እዴከ፡ ወሀብ።
14 ወኢትትኀጣእ፡[እም]ዕለተ፡ ትፍሥሕት(ከ)፤ ወመክፈልተ፡ ሠናይ፡ ኢያምሥጥከ።
15 አኮኑ፡ ለባዕድ፡ ተኀድጎ፡ ለጻማከ፡ ወኵሎ፡ ተግባረከ፡ ይትካፈሉ፡ መዋርስቲከ።
16 ንሣእ፡ ወሀብ፡ ወአስተፍሥሓ፡ ለነፍስከ፡ እስመ፡ አልቦ፡ ዘትረክብ፡ ትፍሥሕተ፡ በውስተ፡ መቃብር።
17 ኵሉ፡ ዘነፍስ፡ ይበሊ፡ ከመ፡ ልብስ፡ እስመ፡ ትእዛዘ፡ ሕግ፡ ተፈጥረ፡ ሞተ፡ ትሙት።
18 ከመ፡ ቈጽለ፡ ዕፅ፡ ዘጽፉቅ፡ ቈጽሉ፡ ዘቀዳሚ፡ ይትነገፍ፡ ወደኃሪ፡ ይሠርጽ፡ ከማሁ፡ ኵሉ፡ ትውልድ፡ ዘሥጋ፡ ወደም፡ ዘዝክቱ፡ ይትወለድ፡ ወዝክቱ፡ ይመውት።
19 ኵሉ፡ ግብር፡ ይበሊ፡ ወየኀልቅ፡ ምስሌሁ።
20 ወባሕቱ፡ ብፁዕ፡ ብእሲ፡ እንዘ፡ ጠቢብ፡ ውእቱ፡ ዘሞተ፡ ወዘተምህረ፡ ወዐቀበ፡ ጥበቢሁ።
21 ወዘይኄሊ፡ ፍናዊሃ፡ ለጥበብ፡ በልቡ፡ ወይትሜሃር፡ ኅቡአቲሃ።
22 ትልዋ፡ ድኅሬሃ፡ ወኅሥሣ፡ አሠራ፡ ወዕቀብ፡ ፍናዊሃ።
23 ዘይሔውጽ፡ እንተ፡ መሳክዊሃ፡ ወያፀምእ፡ በውስተ፡ አናቅጺሃ።
24 ወዘየኀድር፡ ቅሩበ፡ ቤታ፡ ወይተክል፡ መታክሊሁ፡ ውስተ፡ አረፋቲሃ።
25 ወያቀውም፡ ደብተራሁ፡ ውስተ፡ እደዊሃ፡ ወየኀችር፡ ውስተ፡ መኃድሪሃ፡ ሠናይ።
26 ወያነብር፡ ውሉዶ፡ ውስተ፡ ጽላሎታ፡ ወይበይት፡ ታሕተ፡ አዕጹቂሃ።
27 ወያጸልል፡ እምነ፡ መርቄ፡ ታሕቴሃ፡ ወያዐርፍ፡ በውስተ፡ ክብራ።
=== chapter 15 ===
[Chapter 15]
1 ፈራሄ፡ እግዚአብሔር፡ ይገብር፡ ከመዝ፡ ወዘየዐቅብ፡ ሕጎ፡ ይረክባ።
2 ወትጸንሖ፡ ከመ፡ እሙ፡ ወተሐቅፎ፡ ከመ፡ ብእሲት፡ ድንግል።
3 ወትሴስዮ፡ እክለ፡ ጥበብ፡ ወታሰትዮ፡ ማየ፡ አእምሮ።
4 ወይትመረጐዝ፡ ባቲ፡ ወኢይተነትን፡ ወይትአመን፡ ባቲ፡ ወኢይትኀፈር።
5 ወታዐቢዮ፡ እምነ፡ ቢጹ፡ ወበማእከለ፡ ብዙኃን፡ ይከሥት፡ አፉሁ።
6 ወትሁቦ፡ አክሊለ፡ (ጥበብ፡ወ)ትፍሥሕት፡ ወሐሤት፡ ወይወርስ፡ ስመ፡ ዘለዓለም።
7 ወአብዳንሰ፡ ኢይረክብዋ፡ ወኃጥኣንሰ፡ ኢይሬእይዋ።
8 ርሕቅት፡ እምነ፡ ዕቡያን፡ ወሐሳውያንኒ፡ ኢይዜከርዋ።
9 ኢኮነ፡ አዳመ፡ ቃለ፡ አፉሁ፡ ለኃጥእ፡ እስመ፡ ኢኮነ፡ በፍርሃተ፡ እግዚአብሔር፡ ዘይነብብ።
10 በጥበብ፡ ይነግርዋ፡ ለአምሳል፡ ወእግዚአብሔር፡ ይረድኦ፡ ለዘ፡ ይትሜሀር።
11 ኢትበል፡ በእንተ፡ እግዚአብሔር፡ ተሐረምኩ፡ ወዘውእቱ፡ ጸልአ፡ ኢትግበር።
12 ወኢትበል፡ ውእቱ፡ አስሐተኒ፡ ውእቱሰ፡ ኢይፈቅድ፡ ብእሴ፡ ኃጥእ።
13 እስመ፡ ኵሎ፡ ርኩስ፡ ጸልአ፡ እግዚአብሔር፤….።
14 ውእቱ፡ ገብሮ፡ ለእጓለ፡ እመሕያው፡ ቀዳሚሁ፡ ወኀደጎ፡ በግዕዙ፡ በዘፈቀደ።
15 ወለእመሰ፡ ትፈቅድ፡ ትዕቀብ፡ ትእዛዞ፡ ወትግበር፡ ሃይማኖተ፡ ፈቃዱ።
16 ናሁ፡ አንበረ፡ ለከ፡ እሳተ፡ ወማየ፡ ከመ፡ ትደይ፡ እዴከ፡ ኀበ፡ ኀረይከ።
17 ሕይወትኒ፡ ወሞትኒ፡ ቅድሜሁ፡ ለእጓለ፡ እመሕያው፡ ወዘኀረየ፡ እምውስቴቱ፡ ይሁብዎ።
18 እስመ፡ ብዙኅ፡ ጥበበሁ፡ ለእግዚአብሔር፡ ጽኑዕ፡ ኀይሉ፡ ወያአምር፡ ኵሎ፡ ወይሬኢ።
19 ወአዕይንቲሁኒ፡ ኀበ፡ እለ፡ ይፈርህዎ፡ ውእቱ፡ ያአምር፡ ኵሎ፡ ግብሮ፡ ለእጓለ፡ እመሕያው።
20 ወውእቱሰ፡ አልቦ፡ ለዘ፡ አዘዘ፡ ይግበሩ፡ ኀጢአተ፡ ወኢያብሐ፡ ወኢለመኑሂ፡ ከመ፡ ያአብሱ።
=== chapter 16 ===
[Chapter 16]
1 ወኢትፍቅድ፡ ብዙኀ፡ ውሉደ፡ እለ፡ አልቦሙ፡ በቊዐ፡ ወኢትትፌሣሕ፡ በእኩይ፡ ውሉድ።
2 ወለእመኒ፡ በዝኁ፡ ኢትትፌሣሕ፡ ቦሙ፡ ለእመ፡ አልቦሙ፡ ፍርሀተ፡ እግዚአብሔር፡ ላዕሌሆሙ።
3 ኢትትአመኖሙ፡ በሕይወቶሙ፡ ወኢያስተፌሥሕከ፡ ብዝኆሙ። ይኄይስ፡ አሐዱ፡ እምዐሠርቱ፡ ምእት፡ ወይኄይስ፡ መዋቲ፡ ዘእንበለ፡ ውሉድ፡ እምወሊደ፡ እኩይ።
4 እስመ፡ በ፩ጠቢብ፡ ትጸንዕ፡ ሀገር፡ ወሕዝቦሙሰ፡ ለኃጥኣን፡ ይጠፍኡ።
5 ብዙኀ፡ ዘከመዝ፡ ርእየት፡ ዐይንየ፡ ወዘየዐቢ፡ እምዝ፡ ሰምዐት፡ እዝንየ።
6 ውስተ፡ ማኅበሮሙ፡ ለኃጥኣን፡ ትነድድ፡ እሳት፡ ወላዕለ፡ ሕዝብ፡ ዐላዊያን፡ ትነድድ፡ መዐት።
7 ወቀድምትኒ፡ እለ፡ ይርባሕ፡ ኢያድኀኑ፡ ነፍሶሙ፡ እለ፡ ተአመኑ፡ በኀይሎሙ።
8 ወኢመሐካ፡ ለብሔር፡ ኀበ፡ ነበረ፡ ሎጥ፡ እለ፡ አዕበዩ፡ ርእሶሙ፡ ወአስቆረርዎ፡ ለሎጥ።
9 ወኢተሣሀሎ፡ ለሕዝብ፡ ኃጥእ፡ እለ፡ ተሠርዉ፡ በኃጢአቶሙ፤
10 ስሳ፡ እልፍ፡ አጋር፡ እሙንቱ፡ እለ፡ ተጋብኡ፡ ወአእከዩ፡ ልቦሙ።
11 ወእመኒ፡ ቦ፡ አሐዱ፡ ዘአግዘፈ፡ ክሳዶ፡ ወውእቱኒ፡ ነኪር፡ ለእመ፡ ድኅነ፡ እስመ፡ ሣህልኒ፡ ወመቅሰፍትኒ፡ እምኀቤሁ፡ ወይክል፡ ተሣህሎ፡ ወይክል፡ አምጽኦ፡ መቅሠፍት።
12 በአምጣነ፡ ብዝኀ፡ ምሕረቱ፡ ከማሁ፡ ተግሣጹ፡ ወይፈድዮ፡ ለሰብእ፡ በከመ፡ ምግባሩ።
13 ወኢያመሥጥ፡ ኃጥእ፡ እምነ፡ ጻሕፍ፡ ወኢየሀጕል፡ ጻድቅ፡ ዕሴተ፡ ትዕግሥቱ።
14 ኵሉ፡ ምጽዋተ፡ ሣህለ፡ ያመጽእ፡ ወኵሉ፡ ሰብእ፡ ይረክብ፡ ዘከመ፡ ግዕዙ።
17 ኢትበል፡ ኣመሥጥ፡ እምእግዚአብሔር፡ ወአልቦ፡ ዘይረክበኒ፡ በሰማያት፡ ወበውስተ፡ ብዙኅ፡ አሕዛብ፡ አልቦ፡ ዘያአምረኒ፡ ወምንትኑ፡ ኈልቋ፡ ለነፍስየ፡ በውስተ፡ ኵሉ፡ ዓለም።
18 ናሁ፡ ሰማይ፡ ወሰማይኒ፡ ዘመልዕልተ፡ ሰማይ፡ ወቀላይኒ፡ ወምድርኒ፡ ኵሉዝ፡ ያድለቀልቅ፡ እመከመ፡ ሐወጾሙ።
19 ወአድባርኒ፡ ወመሠረተ፡ ምድርኒ፡ እምከመ፡ ነጸሮሙ፡ ይርዕዱ፡ ወያድለቀልቁ።
20 ወበዝኒ፡ ኢይኄልዮ፡ ልብ፡ መኑ፡ ይክል፡ አእምሮ፡ ፍናዊሁ።
21 ወዐውሎሂ፡ ዘኢይሬኢ፡ እጓለ፡ እመሕያው፡ ወዘይበዝኅ፡ ግብሩ፡ ኅቡእ፡ ውእቱ።
22 ግብረ፡ ጽድቅ፡ መኑ፡ ይሜህር፡ ወመኑ፡ ይጸንሕ፡ ተስፋሐ፡ ለምሕረቱ።
23 ሕጹጸ፡ ልብ፡ ያኄሊ፡ ከመዝ፡ ብእሲ፡ አብድ፡ ወጊጉይ፡ ይኄሊ፡ እበደ።
24 ስምዐኒ፡ ወልድ፡ ወተመሀር፡ ጥበበ፡ ወአፅምእ፡ እምልብከ፡ ለነገር።
25 አርእያ፡ ለጥበብከ፡ ደሊወከ፡ በመዳልው፡ ወጠይቅ፡ ነገራ፡ ለትምህርትከ።
26 ግብሩ፡ ለእግዚአብሔር፡ ተፈጥረ፡ በኵነኔሁ፡ ወፈሊጦሙ፡ ሥርዐቶሙ፡ በበ፡ በሓውርቲሆሙ።
27 ወሠርዐ፡ ኵሎ፡ ግብሮ፡ በዘይቀውም፡ ዓለም፡ ወአሕዛቢሆሙ፡ በበፍጥረቶሙ፡ ዘኢይጸምእ፡ ወዘኢይርኅብ፡ ወዘኢየኀልቅ፡ ግብሮሙ።
28 ወኢይጠወቅ፡ አሐዱ፡ ምስለ፡ ካልኡ፡ ወለዓለም፡ ኢይትገሐሡ፡ እምነ፡ ቃሉ።
29 ወእምዝ፡ ነጸረ፡ እግዚአብሔር፡ ውስተ፡ ምድር፡ ወአጽገባ፡ እምነ፡ (ኵሉ)፡ በረከቱ።
30 መንፈሰ፡ ኵሉ፡ ዘሕያው፡ መልአ፡ ላዕለ፡ ምድር፡ ወውስተ፡ ምድር፡ ምግባኢሆሙ።
=== chapter 17 ===
[Chapter 17]
1 እግዚአብሔር፡ ፈጠሮሙ፡ ለእጓለ፡ እመሕያው፡ እምነ፡ ምድር፡ ወካዕበ፡ ያገብኦ፡ ውስቴታ።
2 ወወሀቦሙ፡ ዓመተ፡ መዋዕለ፡ ኍልቊ፡ ወአኰነኖሙ፡ ኵሎ፡ ዘውስቴታ።
3 ወአልበሶሙ፡ ኀይለ፡ ዘዘዚአሆሙ፡ ወበአምሳለ፡ ዚአሁ፡ ገብሮሙ።
4 ወገብረ፡ ሎሙ፡ ይፍርህዎሙ፡ ኵሉ፡ ዘነፍስ፡ ወይቅንይዎሙ፡ ለአራዊት፡ ወለአዕዋፍ።
6 ወወሀቦሙ፡ ቃለ፡ ወልሳነ፡ ወዐይነ፡ ወእዝነ፡ ወልበ፡ በዘ፡ ይኄልዩ።
7 አእምሮ፡ ጥበብ፡ አጽገቦሙ፡ ወአርአዮሙ፡ እኪተኒ፡ ወሠናይተኒ።
8 ወወደየ፡ ውስተ፡ ልቦሙ፡ ፍርሀተ፡ ከመ፡ ያርእዮሙ፡ ዕበየ፡ ግብሩ።
10 ከመ፡ ይሰብሕዎ፡ ለስሙ፡ ቅዱስ፤
9 ከመ፡ ይትናገሩ፡ በዕበየ፡ ግብሩ።
11 ወወሀቦሙ፡ ጥበበ፡ ወሕገ፡ ዘያሐይዎሙ፡ አውረሶሙ።
12 ኪዳነ፡ ዘለዓለም፡ ተካየዶሙ፡ ወነገሮሙ፡ ኵነኔሁ።
13 ወዕበየ፡ ስብሐቲሁ፡ ርእያ፡ አዕይንቲሆሙ።
14 ወይቤሎሙ፡ ተዐቀቡ፡ እምኵሉ፡ ዐመፃ።
13 ወቃለ፡ ስብሐቲሁ፡ ሰምዐት፡ እዝኖመጁ።
14 ወአዘዞሙ፡ ለኵሎሙ፡ በእንተ፡ ቢጾሙ።
15 ወቅድሜሁ፡ ፍናዊሆሙ፡ በኵሉ፡ ጊዜ፡ ወአልቦሙ፡ ኀበ፡ ይትኀብኡ፡ እምነ፡ አዕይንቲሁ።
17 ወለኵሎሙ፡ አሕዛበ፡ ሤመ፡ ሎሙ፡ ነገሥተ፡ ወእስራኤል፡ ኮነ፡ ክፍለ፡ እግዚአብሔር።
19 ወኵሉ፡ ግብሮሙ፡ ከመ፡ ፀሐይ፡ በቅድሜሁ፡ ወአዕይንቲሁ፡ ዘልፈ፡ ይኔጽራ፡ ፍናዊሆሙ።
20 ወኢይትኀባእ፡ ኀጢአቶሙ፡ እምኔሁ፡ ወኵሉ፡ ጌጋዮሙ፡ ቅድመ፡ እግዚአብሔር።
22 ምጽዋቱ፡ ለሰብእ፡ ከመ፡ ማኅተም፡ ምስሌሁ፡ ዕሴቱ፡ ለሰብእ፡ ከመ፡ ብንተ፡ ዐይን፡ ትትዐቀብ፡ ሎቱ።
23 ወድኅረ፡ ይትመየጦ፡ ወየዐስዮ፡ ወፍዳ፡ ኀጢአቶሙ፡ ያገብእ፡ ላዕለ፡ ርእሶሙ።
24 ወባሕቱ፡ ወሀቦሙ፡ ፍኖተ፡ በዘ፡ ይኔስሑ፡ ወያስፌሥሖሙ፡ ለእለ፡ ቀብጹ፡ ተስፋሆሙ።
25 ተመየጥ፡ ኀበ፡ እግዚአብሔር፡ ወ[ኅድጋ፡ ለኀጢአት]፤ተጋነይ፡ ቅድሜሁ፡ ወነስሕ፡ አበሳከ።
26 ወግባእ፡ ኀበ፡ ልዑል፡ ወተመየጥ፡ እምነ፡ ዐመፃ፡ ወጽላእ፡ ኵሎ፡ ርኩስ፡[ፈድፋደ]።
27 መኑ፡ ይሴብሖ፡ ለልዑል፡ በመቃብር፡ ከመ፡ ሕያዋን፡ እለ፡ ይትጋነዩ፡ ሎቱ።
28 ወለዘ፡ሞተሰ፡ወኢከመ፡ ምንትሂ፡ ንስሓ፡ ኀለፎ፡ በሕይወትከ፡ እንዘ፡ ትትፌሣሕ፡ ሰብሖ፡ ለእግዚአብሔር።
29 እስመ፡ ዐቢይ፡ ምሕረቱ፡ ለእግዚአብሔር፡ ወይሣሀሎሙ፡ ለእለ፡ ይትጋነዩ፡ ሎቱ።
30 እስመ፡ ኢይክል፡ ኵሎ፡ ከዊነ፡ እጓለ፡ እመሕያው፡ እስመ፡ መዋቲ፡ ውእቱ፡ እጓለ፡ እመሕያው።
31 ምን[ት]፡ ይበርህ፡ እምነ፡ ፀሓይ፡ ወውእቱሂ፡ ይጠፍእ፡ ወእኩየ፡ ይኄሊ፡ ዘሥጋ፡ ወደም።
32 ወውእቱሰ፡[ኢ]ያአምር፡ ኀይለ፡ ልዕልና፡ ሰማያት፡ ወእጓለ፡ እመሕያውሰ፡ ኵሉ፡ ሐመድ፡ ወመሬት፡ ውእቱ።
=== chapter 18 ===
[Chapter 18]
1 ዘሕያው፡ ዘዓለም፡ ፈጠረ፡ ኵሎ፡ ሕቡረ።
2 እግዚአብሔር፡ ባሕቲቱ፡ ጻድቅ።
4 ወኢያብሐ፡ መኑሂ፡ ያአምር፡ ግብሮ፡ ወመኑ፡ ያአምር፡ አሠረ፡ ዕበዩ።
5 ወመኑ፡ ኈለቈ፡ ጽንዐ፡ ኀይሉ፡ ወመኑ፡ ይክል፡ ነጊረ፡ ምሕረቱ፡ ጥንቁቀ።
6 አልቦ፡ ከመ፡ ይወስኩ፡ ወአልቦ፡ ከመ፡ ያንትጉ፡ ወአልቦ፡ ዘይረክብ፡ አሠረ፡ ስብሐቲሁ፡ ለእግዚአብሔር።
7 አመ፡ ይፈጥሮ፡ ለእጓለ፡ እመሕያው፡ ይእተ፡ አሚረ፡ ይኤዝዞ፡ ወአመ፡ ያሰልጦ፡ ይእተ፡ አሚረ፡ ያዐርፎ።
8 ምንት፡ ውእቱ፡ እጓለ፡ እመሕያው፡ ወምንት፡ በቊዑ፡ ምንትኑ፡ ሠናይቱ፡ ወምንትኑ፡ እኪቱ።
9 ኈልቈ፡ መዋዕሊሁ፡ ምእተ፡ ክረምቱ።
10 ከመ፡ አሐቲ፡ ነጠብጣበ፡ ማይ፡ ውስተ፡ ኵሉ፡ ማየ፡ ባሕር፡ ወከመ፡ አሐቲ፡ ኅጠተ፡ ኆጻ፡ እምውስተ፡ ኵሉ፡ ኆጻ፡ ከማሁ፡ ኅዳጥ፡ ዓመቲሁ፡ እምውስተ፡ ኵሉ፡ መዋዕለ፡ ዓለም።
11 እንበይነዝ፡ ይትዔገሦሙ፡ እግዚአብሔር፡ ወሶጠ፡ ምሕረቶ፡ ላዕሌሆሙ።
12 ርእዮሙ፡ ወአእመሮሙ፡ ከመ፡ እኪት፡ ደኃሪቶሙ፡ እስመ፡ ከማሁ፡ አብዝኀ፡ ምሕረቶ።
13 ሰብእሰ፡ ይምሕር፡ ቢጾ፡ ወእግዚአብሔር፡ ባሕ(ቲ)ቱ፡ ይሣሀል፡ ለኵሉ፡ ዘነፍስ፡ ወይጌሥጽሂ፡ ወይሜህርሂ፡ ወይመይጥ፡ ከመ፡ ኖላዊ፡ መርዔቶ።
14 ወይሣሀሎሙ፡ ለእለ፡ ይትዔገሡ፡ በተግሣጹ፡ ወለእለ፡ ይተልዉ፡ ሕጎ።
15 ወልድየ፡ ውስተ፡ ትፍሥሕት፡ ኢታምጽእ፡ ሐዘነ፡ ወበኵሉ፡ ዘትሁብ፡ ኢታሕሥም፡ ቃለ።
16 አኮኑ፡ ዝናም፡ ያቈርሮ፡ ለመርቄ፡ ከማሁ፡ ቃል፡ ሠናይ፡ ይኄይስ፡ እምውሂብ።
17 ናሁኬ፡ እንከ፡ ይትበደር፡ ቃል፡ ሠናይ፡ እምውሂብ፡ ወክልኤሆን፡ በኀበ፡ ብእሲ፡ ጻድቅ፡ ይትረከቡ።
18 (ወ)ይሁብ፡ ደንጻዊ፡ እንዘ፡ ኢይሔውዞ፡ ለልብ፡ ወአብድኒ፡ ይዘረኪ፡ ወኢያአኵት።
19 እንበለ፡ ትንብብ፡ ጠይቅ፡ ወእንበለ፡ ትሕምም፡ ተፈወስ።
20 ወአእንበለ፡ ትትኰነን፡ ተሐተት፡ ወትረክብ፡ ሣህለ፡ ለጊዜ፡ ምንዳቤከ።
21 ዘእንበለ፡ ትድክም፡ አትሕት፡ ርእሰከ፡ ወተጋነይ፡ ሶበ፡ ትኤብስ።
22 ወኢትጐንዲ፡ ውሂበ፡ ብፅዐቲከ፡ ወግበራ፡ ለጽድቅ፡ እንበለ፡ ትሙት።
23 ወእንበለ፡ ትብፃዕ፡ አስተዳሉ፡ ብፅዐቲከ፡ ወኢትኩን፡ ከመ፡ ዘያሜክሮ፡ ለእግዚአብሔር።
24 ሶበ፡ ትትመዐዕ፡ ተዘከር፡ ዕለተ፡ ሞት፡ ወተዘከር፡ ዕለተ፡ ፍዳከ፡ ወነሥሕ፡ ወተጋነይ።
25 ወተዘከር፡ መዋዕለ፡ ረኃብ፡ አመ፡ መዋዕለ፡ ጽጋብ፡ ወተዘከር፡ መዋዕለ፡ ተጽናስ፡ አመ፡ መዋዕለ፡ ትዴሉ።
26 እስመ፡ እምነግህ፡ እስከ፡ ሰርክ፡ ትትዐለው፡ መንበርት፡ ወኵሉ፡ ፍጡን፡ በኀበ፡ እግዚአብሔር፡(ለእንተ፡ምዕር)።
27 ወብእሲሰ፡ ጠቢብ፡ ይፈርህ፡ በኵሉ፡ ወይትዐቀብ፡ ወበመዋዕለ፡ ትኤብስ፡ ተነሳሕ።
28 ወኵሉ፡ ለባዊ፡ ይረክባ፡ ለጥበብ፡ ወለዘ፡ ረከባሂ፡ ታአምኖ፡ ወታፈርሆ።
29 ማእምራነ፡ ቃል፡ ይጠብቡ፡ ለሊሆሙ፡ በልቦሙ፡ ወይነግሩ፡ አምሳለ፡ ጥንቁቀ።
30 ኢትሖር፡ ወኢትትሉ፡ ፈቃዳ፡ ለኀጢአት፡ ወተዐገሥ፡ እምፍትወተ፡ እኩይ።
31 ወእመሰ፡ ወሀብካሃ፡ ዘትፈቱ፡ ለነፍስከ፡ ትሬስየከ፡ ጥቡዐ፡ ለጸላኢከ።
33 ኢትትለቃሕ፡ እንዘ፡ ነዳይ፡ አንተ፡ ከመ፡ ኢትሠገር፡ እንዘ፡ አልብከ፡ ወኢምንተኒ፡ ውስተ፡ ቊናማቲከ።
=== chapter 19 ===
[Chapter 19]
1 ሠያጢ፡ ወሰካሪ፡ ኢይብዕል፡ ዘያሰትት፡ ኅዳጠ፡ ብዙኀ፡ የሀጕል።
2 ስታይ፡ ወአንስት፡ ያስሕቶ፡ ለጠቢብ፡ ወዘይተልዋ፡ ለዘማ፡ ጊጉይ፡ ውእቱ።
3 ወለዝ፡ ደኃሪቱ፡ ዕፄ፡ ወሙስና፡ ነፍስ፡ ዝልፍት፡ ኢትዜውር።
4 ዘፍጡነ፡ የአምን፡ ቀሊል፡ ልቡ፡ ወዘይግበር፡ ኀጢአተ፡ ላዕለ፡ ነፍሱ፡ ይኤብስ።
5 ዘያስተፌግዕ፡ ልቦ፡ ይትነከር፡ ወዘይጸልእ፡ ብዙኀ፡ ነቢበ፡ ያሐጽጻ፡ ለኃጢአቱ።
7 ኢታውጽእ፡ ቃለ፡ ዘሰማዕከ፡ ወኢትድግም፡ ወለዝላፉ፡ ኢይብእሰከ።
8 በኀበ፡ ዐርክ፡ ወጸላኢ፡ አልቦ፡ ዘትትናገር፡ ወኢታይድዕ፡ አበሳከ፡ ዘሰማዕከ።
9 እስመ፡ ለእመ፡ ከመ፡ ሰምዐ፡ ኢየኀብእ፡ ለከ፡ ወያጸንሐከ።
10 እስከ፡ አመ፡ ትመውት፡ ኢታውጽእ፡ ነገረ፡ ዘሰማዕከ፡ ወተአመን፡ እንከ፡ ከመ፡ ሕሡም፡ አልቦ፡ ዘይረክበከ።
11 የዐነብዝ፡ አብድ፡ እስከ፡ ይነግር፡ ቃለ፡ ዘሰምዐ፡ ወይትዌፃኅ፡ ከመ፡ ማሕምም፡ እንተ፡ ትወልድ፡ ሕፃነ።
12 ወከመ፡ ይጔጕእ፡ ዘተነድፈ፡ ይምላኅ፡ ሐጸ፡ እምላዕሌሁ፡ ከማሁ፡ ይጔጕእ፡ አብድ፡ ያውጽእ፡ ቃለ፡ ዘሰምዐ።
13 ገሥጾ፡ ለዐርክከ፡ ዮጊ፡ ኢገብረ፡ ወእመኒ፡ ገብረ፡ ከመ፡ ኢይደግም።
14 ገሥጾ፡ ለዐርክክ፡ ዮጊ፡ ኢነበበ፡ ወእመኒ፡ ነበበ፡ ከመ፡ ኢይድግም።
15 ገሥፆ፡ ለዐርክክ፡ ዮጊ፡ በጽልእ፡ አስተዋደይዎ፡ ወኢትትአመን፡ ኵሎ፡ ቃለ፡ ዘነገሩከ።
16 እስመቦ፡ ዘይስሕት፡ እንዘ፡ ኢይፈቅድ፡ እምልቡ፡ ወመኑ፡ ውእቱ፡ ዘኢይስሕት፡ በአፉሁ።
17 ገሥጾ፡ ለዐርክከ፡ እንበለ፡ ይትነዋኅ፡ መዐት፡ አኅልፋ፡ ለመዐት፡ እኪት፡ እንበይነ፡ ሕገ፡ እግዚአብሔር።
20 እስመ፡ ኵሉ፡ ጥበብ፡ ፈሪሀ፡ እግዚአብሔር፡ ይእቲ፡ ኵሉ፡ ጥበብ፡ ትገብሮ፡ ለሕጉ።
22 ወአልቦ፡ ጥበብ፡ ዘእኩየ፡ ይሜህር፡ ወአልቦ፡ ጥበብ፡ ምክረ፡(ረሲአን፡ወ)ኃጥኣን።
23 ቦ፡ እከይ፡ እንተ፡ እምኵሉ፡ ትረኵስ፡ ወሀለወ፡ አብድ፡ ሕጹጽ፡ ልብ።
24 ወይኄይስ፡ ባሕቱ፡ አብድ፡ እንዘ፡ ይፈርሆ፡ ለእግዚአብሔር፡ እምትጥበብ፡ ወትክሐድ፡ ሕጎ፡ ለእግዚአብሔር።
25 ሀለወ፡ ዘይጠበብ፡ ወይጠናቀቅ፡ እንዘ፡ ይዔምፅ፡ ወሀለወ፡ ዘይመይጣ፡ ለምክር፡ ወያስተርኢ፡ ከመ፡ ያድሉ፡ ለቢጹ፡ ወከመ፡ ያስተራትዕ፡ ፍትሕ፡ ለማኅፈሩ።
26 ወቦ፡ ዘያደሉ፡ ለእኩይ፡ እንዘ፡ ኢይንእድ፡ ወልቡሰ፡ ምሉእ፡ ጕሕሉት።
27 ወቦ፡ ዘያደሉ፡ ለገጽ፡ እንዘ፡ ካልእ፡ ውስተ፡ ልቡ፡ ወእንተ፡ ኀበ፡ ኢያሐዘብካ፡ ይመጽአከ።
28 ወእመኒ፡ ደክመ፡ ኀይሉ፡ ወስእነ፡ አሕሥሞ፡ ላዕሌከ፡ እንተ፡ አመሰ፡ ያስሕተከ፡ ግብር፡ ያሐመምከ።
29 እስመ፡ እምራእዩ፡ ይትዐወቅ፡ ሰብእ፡ ወእምገጹ፡ ይትዐወቅ፡ ጠቢብ።
30 ወእምልበሰቱ፡ ለሰብእ፡ ወእምሑረቱ፡ ወእምሠሐቁ፡ ይትዐወቅ፡ ግዕዙ።
=== chapter 20 ===
[Chapter 20]
1 ሀለወ፡ ዘይጌሥጽ፡ እንዘ፡ ኢኮነ፡ ለሠናይ፡ ወሀለወ፡ ዘያረምም፡ እንዘ፡ ጠቢብ፡ ውእቱ።
2 ይኄይስ፡ ትገሥጽ፡ እምትሒስ፡ ወቦ፡ ዘይትጋነይ፡ እስመ፡ በኀጢኡ፡ ተስእኖ።
4 ከመ፡ ይፈቱ፡ ኅጽው፡ ወለተ፡ ድንግለ፡ ከማሁ፡ ዘይፈቱ፡ የዐምፅ፡ ፍትሐ።
5 ወቦ፡ እንዘ፡ ያአምር፡ ዘያረምም፡ ወቦ፡ ዘያጸልእ፡ ርእሶ፡ በብዝኀ፡ ነቢቡ።
6 ወቦ፡ ዘያረምም፡ እስመ፡ ኢያአምር፡ ዘያወሥእ፡ ወቦ፡ ዘያረምም፡ እስከ፡ ይረክብ፡ ጊዜሁ።
7 ወብእሲ፡ ጠቢብ፡ ያረምም፡ እስከ፡ ይረክብ፡ ጊዜሁ፡ ወአብድሰ፡ ወዝሉፍ፡ በከመ፡ ረከበ፡ ይነብብ።
8 ለዘያበዝኅ፡ ነቢበ፡ ይትቋጥዕዎ፡ ወለዘኒ፡ ያዐቢ፡ ርእሶ፡ ይጸልእዎ።
9 ቦ፡ ሰብእ፡ ዘምንዳቤሁ፡ ያ[ሤ]ኅቶ፡ ወቦ፡ ዘእንዘ፡ ይረክብ፡ ኢይነብሮ።
10 ቦ፡ ዘይሁበከ፡ ወካዕበቶ፡ ይትፈደየከ።
11 ወቦ፡ ዘእንዘ፡ ይጼነስ፡ ያዐቢ፡ ርእሶ፡ ወቦ፡ ዘይከብር፡ በአትሕቶ፡ ርእሱ።
12 ወቦ፡ ዘይሠይጥ፡ ብዙኀ፡ በኅዳጥ፡ ወየኀሥሥ፡ ይረስዮ፡ ምስብዔቶ።
13 ዘጠቢብ፡ በቃሉ፡ ያስተቄርብ፡ ርእሶ፡ ጸጋሆሙ፡ ለአብዳን፡ አልባቲ፡ ሞገስ።
14 ይሁብ፡ አብድ፡ ዘአልቦቱ፡ በቊዐ፡ ለእመኒ፡ ኅዳጠ፡ ወሀብ፡ ብዙኀ፡ ይመስሎ፡ ለልቡ፡ ዘጸገወከ።
15 ወእመኒ፡ ኅዳጠ፡ ወሀብከ፡ ከመ፡ ዘብዙኀ፡ ወሀበከ፡ ይዘረክየከ፡ ወያዐቢ፡ አፉሁ፡ ላዕሌከ፡ ወየዐውድ፡ ይንግር፡ ለከ፡ ዘወሀብከ። ዮም፡ ለእመ፡ ወሀብከ፡ ጌሠመ፡ ይትፈደየከ፡ መጽልእ፡ ዘከመዝ፡ ሰብእ።
16 አብድሰ፡ ይብል፡ ኢይፈቅድ፡ ዐርከ፡ ምንተ፡ ይበቊዐኒ፡ እስመ፡ ኢይረክብ፡ ዕሴተ፡ እንተ፡ ገበርኩ፡ ሠናይተ፡ እለኒ፡ ይሴሰዩ፡ እክልየ፡ ያሐሥሙ፡ አፉሆሙ፡ ላዕሌከ።
17 ወዘልፈ፡ ኵሎሙ፡ የሐምዩኒ፡ ወይሥሕቁ፡ ዲቤየ።
18 ይኄይስ፡ ትድኀፅ፡ ወትደቅ፡ ዲበ፡ ምድር፡ እምትድኀፅ፡ (በአፉከ፡)ወትደቅ፡ በልሳንከ፡ ከማሁ፡ ድቀ[ተ፡እኩይ፡]፡ ፍጡነ፡ ትመጽእ።
19 ወዘሰ፡ ይነብብ፡ በከመ፡ ረከበ፡ ያለስሕ፡ ርእሶ፡ ወአልቦ፡ ሞገሰ፡ ቃሉ፡ ውስተ፡ አፉሆሙ፡ ለአብዳን፡ ልሱሕ፡ ነገር።
20 ወውስተ፡ አፉሁ፡ ለአብድ፡ ይለስሕ፡ አምሳል፡ እስመ፡ ኢይነግራ፡ በጊዜሃ።
21 ወቦ፡ ለእመ፡ ከመ፡ ተጸነሰ፡ ዘይትመየጥ፡ ውስተ፡ ፍርሀተ፡ እግዚአብሔር፡ ወሎቱ፡ በሠናይ፡ ታዐርፍ፡ ነፍሱ።
22 ወቦ፡ ዘበኀፍረት፡ ያሀጕል፡ ነፍሶ፡ ወበእበዲሁ፡ ይገድፍ፡ ነፍሶ።
23 ወቦ፡ ዘበኀፍረት፡ ያስተሴፈዎ፡ ለማኅፈሩ፡(እንዘ፡ ኢይሁብ)፤ወእንበይነዝ፡ ጸላኤ፡ ይከውኖ፡ በከንቱ።
24 እኪት፡ ኀሳሩ፡ ለብእሲ፡ ሐሳዊ፡ ልሱሕ፡ ነገሮሙ፡ ለአብዳን።
25 ይኄይስ፡ ሰራቂ፡ እምሐስዎ፡ ወባሕቱ፡ ለክልኤሆሙ፡ ሞት፡ ደኃሪቶሙ፡ ወኀሳር።
26 እስመ፡ ሐሳዊ፡ ሰብእ፡ የኀስር፡ ወይትኀፈር፡ ለዝሉፉ።
27 ዘጠቢብ፡ ውእቱ፡ በቃሉ፡ ይሰማዕ፡ ነገሩ፡ ወብእሲ፡ ጠቢብ፡ ያሰልጥ፡ ለመኳንንቲሁ።
28 ዘይትጌበራ፡ ለምድር፡ ያዐብያ፡ ለክምረ፡ እክሉ፡ ወዘይፀመድ፡ መኳንንቲሁ፡ ይበቊዕ፡ ለርእሱ።
29 አምኃ፡ ወሕልያን፡ ያዐውሮሙ፡ አዕይንቲሆሙ፡ ለጠቢባን፡ ወይፈፅም፡ አፉሆሙ፡ ወይመይጦሙ፡ ቃሎሙ።
30 ጥበብ፡ ዘኅቡእ፡ ከመ፡ መድፍን፡ ክቡት፡ ምንት፡ እንከ፡ ረባሖሙ፡ ለክልኤሆሙ።
31 ይኄይስ፡ አብድ፡ ዘየኀብእ፡ እበዲሁ፡ እምጠቢብ፡ ዘይከብት፡ ጥበቢሁ።
=== chapter 21 ===
[Chapter 21]
1 ወልድየ፡ ለእመቦ፡ ዘአበስከ፡(ወተስሕትከ፡)፡ ኢትድግም፡ ዑቅ፡ እንከ፡ ወተጋነይ፡ እንበይነ፡ ዘቅድም፡ ጌጋይከ።
2 ወከመ፡ ዘይጐይይ፡ እምአርዌ፡ እኩይ፡ ከማሁ፡ ጕየይ፡ እምኀጢአት፡ ወእመሰ፡ አድምዐተከ፡ ኢታወጽአከ፡ ከመ፡ ስነነ፡ ዐንበሳ፡ ስነኒሃ፡ ወታኀልቅ፡ ነፍሰ፡ እጓለ፡ እመሕያው።
3 ከመ፡ መላጼ፡ በሊኅ፡ ዘክልኤ፡ አፉሁ፡ ከማሁ፡ ኵሉ፡ ኀጢአት፡ ወኀበኒ፡ አቊሰለት፡ አልባቲ፡ ፈውስ፡ ቊስላ።
4 ትዝኅርት፡(ወምክሕ፡)፡ ወትዕቢት፡ ያማስኖ፡ ለባዕል፡ ከማሁ፡ ይማስን፡ ቤቶሙ፡ ለዕቡያን።
5 ሶበ፡ ይስእል፡ ነዳይ፡ ያበቁ፡ እስከ፡ እዘኒሁ፡ ወገዓሩኒ፡ ፍጡነ፡ ይበጽሕ።
6 ዘይጸልእ፡ ተግሣጸ፡ ተለዎሙ፡ ለኃጥኣን፡ ወዘሰ፡ ይፈርህ፡ እግዚአብሔር፡ እምከመ፡ ገሠጽዎ፡ ይመይጥ፡ ልቦ።
7 ይትዐወቅ፡ እምርሑቅ፡ ዘይክል፡ ነቢበ፡ ወለጠቢብሰ፡ ይትዐወቆ፡ ዘተስሕቶ።
8 ዘየሐንጽ፡ ቤቶ፡ በንዋየ፡ ልቃሕ፡ ከመ፡ ንድቀ፡ ክረምት፡ ሕንጻሁ።
9 ከመ፡ ከምረ፡ ሐሠር፡ ከማሁ፡ ማኅበሮሙ፡ ለኃጥኣን፡ ወደኃሪቶሙ፡ ለነደ፡ እሳት፡ ይከውኑ።
10 መብእስ፡ እበኒሃ፡ ለፍኖተ፡ ኃጥኣን፡ ወጸድፍ፡ ሙፃእታ።
11 ዘአጽንዐ፡ ልቦ፡ የዐቅብ፡ ሕገ፡ እግዚአብሔር፡ ወደኃሪሃ፡ ለፍርሀተ፡ እግዚአብሔር፡ ጥበበ።
12 ወኢይጠብብ፡ ዘኢተመ[የነ]፤ሀለወ፡ ዘይትሜ[የን]፤ወይትዌሰኮ፡ ኀሳሩ።
13 ኅሊናሁ፡ ለጠቢብ፡ ብዙኅ፡ ከመ፡ ማየ፡ አይኅ፡ ወምክሩኒ፡ ይነቅዕ፡ ከመ፡ ማየ፡ ሕይወት።
14 ልቡ፡ ለአብድ፡ ከመ፡ ጻሕብ፡ ስቁር፡ ወኢይክል፡ ዐቂበ፡ ኵሎ፡ ነገረ፡ ዘሰምዐ።
15 ነገረ፡ ጠቢብ፡ እምከመ፡ ሰምዐ፡ ለባዊ፡ ይንእዶ፡ ወይዌስክ፡ ዓዲ፡ በዲቤሁ፡ ወእኩይሰ፡ ልብ፡ እምከመ፡ ሰምዖ፡ ይቀይእ፡ ወያገብኦ፡ ድኅረ፡ ዘባኑ።
16 ነገሩ፡ ለአብድ፡ ከመ፡ ጾር፡(ክቡድ፡)፡ በውስተ፡ ፍኖት፡(ርሑቅ)፤ወሠናይ፡ ሞገሶን፡ ለከናፍረ፡ ጠቢብ።
17 ቃለ፡ ጠቢብ፡ ይሰማዕ፡ በውስተ፡ እንግልጋ፡ ወነገሩሂ፡ ይበውእ፡ ውስተ፡ ልብ።
18 ከመ፡ ቤተ፡ መዝብር፡ ከማሁ፡ ጥበብ፡ በኀበ፡ አብዳን፡ ወምክሩሰ፡ ለአብድ፡ ዘኢይትፈቀድ፡ ነገረ።
19 ከመ፡ እግር፡ ሙቁሕ፡ ከማሁ፡ ት[ም]ህርቶሙ፡ ለአብዳን፡ ወከመ፡ ዘእሱር፡ እዴሁ፡ ዘየማን፡(ከማሁ፡ ፅቡስ፡ ልቡ፡ ለአብድ። )
20 ሶበ፡ ይሥሕቅ፡ አብድ፡ ያዐቢ፡ ቃሎ፡ ወጠቢብሰ፡ እምዕጹብ፡ ያክሞስስ፡ ከናፍሪሁ።
21 ከመ፡ ሰርጎ፡ ወርቅ፡ ከማሁ፡ ጥበብ፡ በኀበ፡ ለባዊ፡ ወከመ፡ ድጕልማ፡ ውስተ፡ እደ፡ የማን።
22 እግሩ፡ ለአብድ፡ ፍጡነ፡ ትገብእ፡ ውስተ፡ ቤት፡ ወብእሲሰ፡ ዘበኵሉ፡ ተጐድአ፡ የኀፍር፡ ገጾ።
23 ወአብድሰ፡ እምኆኅት፡ ይሔውጽ፡ ቤተ፡ ባዕድ፡ ወብእሲሰ፡ ጠቢብ፡ አፍአ፡ ይቀውም።
24 እበዲሁ፡ ለሰብእ፡ እምአፍአ፡ ትስማዕ፡ ወበኀበ፡ ጠቢብሰ፡ ዕጹብ፡ አስተሐቅሮ።
25 ወበኀበ፡ ነኪር፡ ዕጹብ፡ ዝነገር፡ ቃሎሙ፡ ለጠቢባን፡ ድሉት፡ በመዳልው።
26 ወለአብዳንሰ፡ ውስተ፡ አፉሆሙ፡ ልቦሙ፡ ወምክሮሙ፡ ለጠቢባን፡ ቃለ፡ አፉሆሙ።
27 ሶበ፡ ይረግሞ፡ ኃጥእ፡ ለጋኔን፡ ለሊሁ፡ ነፍሰ፡ እንቲአሁ፡ ይረግም።
28 ወዘየሐሚ፡ ለሊሁ፡ ነፍሶ፡ ይጌምን፡ ወያጸልእ፡ ርእሶ፡ በኀበ፡ ኀደረ።
=== chapter 22 ===
[Chapter 22]
1 ከመ፡ እብነ፡ ጾላዕ፡ ከማሁ፡ ሃካይ፡ በኀበ፡ ነበረ፡ ወያፀርዕ፡ ኵሎ፡ በኀሳረ፡ ሀኬቱ።
2 ከመ፡ ፅፍዕ፡ ግዱፍ፡ ከማሁ፡ ሀካይ፡ በኀበ፡ ሰከበ፡ ኵሉ፡ ዘቀተሎ፡ ነገፈ፡ እዴሁ።
3 ኀፍረት፡ ለአቡ[ሁ]፡ውሉድ፡ አብድ፡ ወወለትሰ፡ አብድ፡ ኅስርተ፡ ትከውን።
4 ወወለትሰ፡ ጠባብ፡ ትወርሶ፡ ለምታ፡ ወእንተሰ፡ ታስተኃፍር፡ ሐዘን፡ ይእቲ፡ ለወላዲሃ።
5 ወበኵለሄ፡ ተሐረምት፡ ምክዕቢተ፡ ታስተኃፍር፡ አባሃኒ፡ ወታስተኀፍር፡ ምታኒ፡ ዝልፍት።
6 ከመ፡ ዘይሰነቁ፡ በቤተ፡ ላሕ፡ ዘይነግር፡ ቃሎ፡ በኀበ፡ ረከበ፡ መቅሠፍት፡ ወተግሣጽ፡ በኵለሄ፡ ያጠብብ።
7 ከመ፡ ዘያስተጣብቅ፡ አግዕልተ፡ ዘይሜህሮ፡ ለአብድ፡ አንቅሆ፡ እምዐቢይ፡ ንዋም፡ ለዘይነውም።
8 (ከማሁ፡)ዘይነግሮ፡ ለአብድ፡ ከመ፡ ዘይነግሮ፡ ለድቁስ፡ ወሶበ፡ አኅለቀ፡ ነጊሮቶ፡ ይብለከ፡ ምንተ፡ ትቤ።
11 ብክዮ፡ ለዘሞተ፡ እስመ፡ ኀለፈ፡ ብርሃኑ፡ ወብክዮ፡ ለአብድ፡ እስመ፡ አምሠጦ፡ ልቡ። ርቱዕ፡ ትብክዮ፡ ለዘሞተ፡ እስመ፡ አልቦ፡ ምግባአ፡ ወለአብድሰ፡ ብክዮ፡ በሕይወቱ፡ እስመ፡ ሐይው፡ የአክዮ፡ እምነ፡ መዊት።
13 ኢታብዝኅ፡ ተናግሮ፡ ምስለ፡ አብድ፡ ወኢትሖር፡ ምስለ፡ ዘአልቦ፡ ልብ። ወተዐቀብ፡ ከመ፡ ኢያብእከ፡ ውስተ፡ ጻሕብ፡ ወከመ፡ አትትሐየስ፡ አንተ፡ በእበደ፡ ዚአሁ። ረሐቀ፡ እምኔሁ፡ ወተዐርፍ፡ ነፍስከ፡(ወይቀልለከ)፤ ወአልቦ፡ ዘትት[ነከይ]፡አንተ፡ በእበደ፡ ዚአሁ።
14 ምንተ፡ ይከብድ፡ እምነ፡ ዐረር፡ ወምንተ፡ ስሙ፡ ዘእንበለ፡ አብድ።
15 ይኄይስ፡ ትጾር፡ ኆጻ፡ ወፄወ፡ ወዘብርታተ፡ ኀጺን፡ እምትንበር፡ ምስለ፡ አብድ።
16 መሠንየ፡ ማእሰር፡ ዘእሱር፡ ውስተ፡ ቅጽረ፡ ንድቅ፡ ወኢይትፈታሕ፡ ለእመኒ፡ አድለቅለቀ፡ ከማሁ፡ ምክረ፡ ጥበብ፡ ውስተ፡ ልበ፡ ጽኑዕ።
17 ወኢይትፈታሕ፡ ቅጽሩ፡ ለዝላፉ፡ ለልብ፡ ጽኑዕ፡ ወለምክረ፡ ጥበብ፡ ወከመ፡ መርገ፡ ኆጻ፡ በውስተ፡ አረፍት።
18 ወከመ፡ ሐሠር፡ ቅድመ፡ ዐውሎ፡ ዘኢይቀውም፡ እምከመ፡ መጽአ፡ ነፋስ፡ ከማሁ፡ ኅሊና፡ አብድ፡ በውስተ፡ ልበ፡ ፈራህ፡ ዘኢይቀውም፡ ለእምከመ፡ ቦቱ፡ ዘገረሞ።
19 ዘደጐጸ፡ ዐይኖ፡ ያወርድ፡ አንብዐ፡ ወዘደጐጸ፡ ልቦ፡ ያርኢ፡ ጥበበ።
20 ዘወገሮን፡ ለአዕዋፍ፡ ይሰዶን፡ ወዘይዘረክዮ፡ ለዐርኩ፡ ሰዐረ፡ ታእኃሁ።
21 እመኒ፡ መላኅከ፡ መጥባሕተ፡ ላዕለ፡ ዐርክከ።
22 ወእመኒ፡ አዕበይከ፡ አፉከ፡ ላዕሌሁ፡ ኢትቅበጾ፡ በከመ፡ ይትዓረከከ። እንበለ፡ ዳእሙ፡ ለእመ፡ ዘርከይካሁ፡ ወአዕበይከ፡ አፉከ፡ ላዕሌሁ፡ ወጸዐልካሁ፡ ወለእመኒ፡ ከሠትከ፡ ሎቱ፡ ምክሮ፡ ወተጓሕለውካሁ፡ ወአሕመምካሁ፡ በዝንቱ፡ ነገር፡ ይጐይይ፡ ኵሉ፡ ዐርክ።
23 ለእመኒ፡ ነዳይ፡ አንተ፡ ሃይማኖተከ፡ ዕቀብ፡ ምስለ፡ ቢጽከ፡ ከመ፡ ትትፈሣሕ፡ አመ፡ ትፍሥሕቱ። ለእመኒ፡ ተጸነሰ፡ ተዐገሥ፡ ምስሌሁ፡ ከመ፡ ትትፈሣሕ፡ አመ፡ ይረክብ፡ ርስቶ፡ ምስሌሁ።
24 ለእሳትኒ፡ ይቀድም፡ ይጠይስ፡ ተነ፡ ጢሱ፡ ከማሁ፡ ለደምኒ፡ ይቀድም፡ ላኳ፡ ወጋእዝ።
25 ሰውሮቶ፡ ለዐርክየ፡ ኢየኀፍር፡ ወኢይትኀባእኒ፡ እምቅድመ፡ ገጹ።
26 ወአእመሰ፡ እኪት፡ ትረክበኒ፡ በእንቲአሁ፡ ኵሉ፡ ዘሰምዐ፡ የዐቅብ፡ ርእሶ፡ እምኔሁ።
27 መኑ፡ ይሠይም፡ ሊተ፡ ዐቃቤ፡ ላዕለ፡ አፉየ፡ ወማኅተመ፡ ጥበብ፡ ዲበ፡ ከናፍርየ፡ ከመ፡ ኢይደቅ፡ ቦቱ፡ ወከመ፡ ኢይቅትለኒ፡ ልሳንየ።
=== chapter 23 ===
[Chapter 23]
1 እግዚኦ፡ አቡየ፡ አምላከ፡ ሕይወትየ፡ ኢትግድፈኒ፡ በምክረ፡ ዚአሆሙ፡ ወኢትኅድገኒ፡ እደቅ፡ ቦሙ።
2 መኑ፡ ይጌሥጾ፡ ሊተ፡ ለልብየ፡ ወመኑ፡ ይሜህራ፡ ሊተ፡ ጥበብ፡ ለኅሊናየ፡ ከመ፡ ይኅድገኒ፡ እበድየ፡ ወኢይማኡኒ፡ በዘይነቡ፡ ላዕሌየ።
3 ወከመ፡ ኢይብዝኀኒ፡ ጌጋይየ፡ ወከመ፡ ኢትፈድፍድ፡ ኀጢአተ፡ ወከመ፡ ኢይደቅ፡ ቅድሜሆሙ፡ ለፀርየ፡ ወኢትፍሥሑ፡ ጸላእትየ፡ ዲቤየ።
4 እግዚየ፡ ወአቡየ፡ ወአምላከ፡ ሕይወትየ፡ ኢታምጽእ፡ ሊተ፡ ዘያስሕታ፡ ለዐይንየ።
5 ወአሰስል፡ ፍትወተ፡ እምኔነ።
6 ጽጋብ፡ ኢይምጽአኒ፡ ወፈሐል፡ ኢይክርየኒ፡ ወለነፍስ፡ እኪት፡ ኢትመጥወኒ።
7 >ስምዑኒ፡ ደቂቅየ፡ ተግሣጸ፡ አፉየ፡ ወዘሰ፡ ዐቀበ፡ ኢይድኅፅ፡ ወዘአጽንዐ፡ ከናፍሪሁ።
8 ኃጥእ፡ ወዕቡይ፡ ወጸዓሊ፡ ይትዐቀፉ፡ ቦሙ።
9 ወልድየ፡ ኢታልምዶ፡ መሐላ፡ ለአፉከ፡ ወስሞ፡ ለቅዱስ፡ ኢትዝክር፡ ሶበ፡ ትምሕል።
10 ከመ፡ ገብር፡ ዘኵሎ፡ ጊዜ፡ የሐትትዎ፡ ኢይጸብእ፡ ቊስለ፡ ለሥጋሁ፡ ከማሁ፡ ዘይዜከር፡ ስሞ፡ ለእግዚአብሔር፡ ዘልፈ፡ እንዘ፡ ይምሕል፡ ኢይነጽሕ፡ እምነ፡ ኀጢአት።
11 ብዙኅ፡ ጌጋዩ፡ ለብእሲ፡ መሓሊ፡ ወኢየኀልቅ፡ መቅሠፍተ፡ ቤቱ። ወእመኒ፡ ረስዐ፡ ኀጢአቱሰ፡ ኢይትኀደጎ፡ ወእመኒ፡ ተጸመመ፡ ካዕበተ፡ ይከውኖ፡ ጌጋዩ። ወኢይጸድቅ፡ በዘ፡ መሐለ፡ እስመ፡ ምሉእ፡ ፍዳሁ፡ ዲበ፡ ቤቱ።
12 ቦቱ፡ ቃለ፡ እንተ፡ ታመጽኣ፡ ለሞት፡ ወኢትሄሉ፡ ውስተ፡ ርስተ፡ ያዕቆብ። ኵሉ፡ ዝንቱ፡ ኢሀለወ፡ ኀበ፡ ጻድቃን፡ ወኢይትዐቀፉ፡ በኀጢአት።
13 ነገረ፡ ስላቅ፡ ኢይፃእ፡ እምአፉከ፡ እስመቦ፡ ውስቴቱኒ፡ ብዙኅ፡ ኀጢአት።
14 ተዘከሮሙ፡ ለአቡከ፡ ወለእምከ፡ ወተፀመድ፡ መኳንንቲከ፡ ወኢትስሐት፡ በቅድሜሆሙ፡ ወኢትልሳሕ፡ በእበድከ፡ ከመ፡ ኢትበል፡ ሶበ፡ ኢተወለድኩ፡ ወከመ፡ ኢትርግም፡ ዕለተ፡ ተወለድከ።
15 ብእሲ፡ ዘልሙድ፡ ስላቀ፡ ኢይጠብብ፡ አምጣነ፡ ሕያው፡ ውእቱ።
16 ክልኤቱ፡ እሙንቱ፡ እለ፡ ያመጽእዋ፡ ለኀጢአት፡ ወሣልሶሙ፡ ያመጽኣ፡ ለመንሱት፡ ነፍስ፡ መዐትም፡ ዘይነድድ፡ ከመ፡ እሳት፡ ወኢትቈርር፡ እስከ፡ ታሰጥሞ፡ ወብእሲኒ፡ ዘይዜሙ፡ በነፍስተ፡ ሥጋሁ፡ ኢኀድግ፡ እስከ፡ ያነድዳ፡ ለእሳት።
17 ለብእሲ፡ ዘማዊ፡ ኵሉ፡ እክል፡ ይጥዕሞ፡ ወኢያዐርፍ፡ እስከ፡ አመ፡ ይመውት።
18 ብእሲ፡ ዘይትፋለስ፡ እምነ፡ ምስካቢሁ፡ ወይብል፡ በልቡ፡ አልቦ፡ ዘይሬእየኒ፡ ጽልመት፡ ብሔር፡ ወአረፍትኒ፡ ይሴውረኒ፡ ምንተ፡ እፈርህ፡ እንከ፡ አልቦ፡ ዘያአምረኒ፡ ወልዑልኒ፡ ይረስዕ፡(ሊተ፡)፡ ኀጢአትየ፡ ወኢይዜከረኒ።
19 ወዳእሙ፡ ዐይነ፡ ሰብእ፡ ይፈርህ፡ ኢይርአዮ፡ ወኢያአምር፡ ከመ፡ ዐይነ፡ እግዚአብሔር፡ ይበርህ፡ እምአእላፈ፡ ፀሓይ፡ ወይሬእዮ፡ ኵሎ፡ ምግባሮ፡ ለእጓለ፡ እመሕያው፡ ወያአምሮ፡ ኵሎ፡ ዘይገብር፡ ጽምሚተ።
21 ወበማእከለ፡ ሀገር፡ ይትቤቀሎ፡ ወእንተ፡ ኀበ፡ ኢተሐዘበ፡ ያሠግሮ።
22 ወከማሁ፡ ብእሲትኒ፡ እንተ፡ ተኀድግ፡ ምታ፡ ወትውልድ፡ ወራሴ፡ በዲበ፡ መሐዛ።
23 አሐቲ፡ ክሕደት፡ በእግዚአብሔር፡ ወካልእታ፡ ዐለወቶ፡>ለምታ፤ ወሣልስታ፡ ሰረቀት፡ በዝሙታ፡ ወአቀመት፡ ውሉደ፡ እምላዕለ፡ መሐዛ።
24 ለእንተ፡ ከመዝ፡ የኀስርዋ፡ ወትትቀሠፍ፡ በውሉዳ።
25 ወይሤረው፡ ዘርኣ፡ ወፍሬሃ፡ ወኢይፈርዩ፡ አዕጹቂሃ።
26 ወርጉመ፡ ይከውን፡ ዝክራ፡ ወታወርስ፡ መርገመ፡ ለቤታ፡ ወኢየኀልቅ፡ ለዝላፉ፡(መርገማ፡ወ)ኀሳራ።
27 ወያአምር፡ እንከ፡ ኵሉ፡ ዘርእያ፡ ከመ፡ አልቦ፡ ዘይኄይስ፡ እምፈሪሃ፡ እግዚአብሔር፡ ወአልቦ፡ ዘይጥዕም፡ እምነ፡ ዐቂበ፡ ትእዛዙ፡ ለእግዚአብሔር።
=== chapter 24 ===
[Chapter 24]
1 ጥበብ፡ ትዌድስ፡ ነፍሳ፡ ወትትሜካሕ፡ በማእከለ፡ ሕዝባ።
2 ውስተ፡ ማኅበረ፡ ልዑል፡ ትከሥት፡ አፉሃ፡ ወትትሜካሕ፡ በቅድመ፡ ኀይሉ።
3 አንሰ፡ እምአፉሁ፡ ለልዑል፡ ወፃእኩ፡ ወከመ፡ ጊሜ፡ ከደንክዋ፡ ለምድር።
4 አንሰ፡ ውስተ፡ ሰማያት፡ ኀደርኩ፡ ወመንበርየኒ፡ ውስተ፡ ዐምደ፡ ደመና።
5 ወዖድኩ፡ ባሕቲትየ፡ አጽናፈ፡ ሰማይ፡ ወአንሶሰውኩ፡ ውስተ፡ ዕሙቅ፡ ቀላይ።
6 ወመልዕልተ፡ ማዕበለ፡ ባሕርኒ፡ ወውስተ፡ ኵሉ፡ ምድር፡ ወአጥረይኩ፡ በውስተ፡ ኵሉ፡ አሕዛብ፡ ወበውስተ፡ ኵሉ፡ ሕዝብ።
7 ወእምድኅረዝ፡ ኵሉ፡ ዕረፍተ፡ ኀሠሥኩ፡ ውስተ፡ ርስተ፡ መኑ፡ እንከ፡ አኀድር።
8 ወእምዝ፡ አዘዘኒ፡ ፈጣሬ፡ ኵሉ፡ ወአዕረፈ፡ ሊተ፡ ፈጣሪየ፡ መንበርየ፡ ወይቤለኒ፡ ኀበ፡ ያዕቆብ፡ ኅድሪ፡ ወበውስተ፡ እስራኤል፡ ተዋረሲ።
9 እምቅድመ፡ ይትፈጠር፡ ዓለም፡ ፈጠረኒ፡ ወኢይጠፍእ፡ ለዝሉፉ፡ ወለዓለመ፡ ዓለም።
10 ወተልእኩ፡ በውስተ፡ ደብተራሁ፡ ቅዱስ፡ በቅድሜሁ፡ በውስተ፡ ጽዮን፡ አስመኩ።
11 ወከማሁ፡ ውስተ፡ ሀገር፡ ቅድስት፡ አዕረፍኩ፡ ወበኢየሩሳሌም፡ ምኵናንየ፡ ኀበ፡ አኰነነኒ።
12 ወአብቈልኩ፡ ሥርው፡ በውስተ፡ ሕዝብ፡ ክቡር፡ በውስተ፡ መክፈልተ፡ እግዚአብሔር፡ ወበውስተ፡ ርስቱ።
13 ከመ፡ ዕፀ፡ ቄድሮስ፡ በውስተ፡ ሊባኖስ፡ ተለዐልኩ፡ ወከመ፡ ዕፀ፡ ቄድሮስ፡ በውስተ፡ አድባረ፡ ኤርሞን።
14 ወኖኅኩ፡ ከመ፡ በቀልት፡ ኀበ፡ ድንጋገ፡ ማይ፡ ወከመ፡ ጽጌ፡ ረዳ፡ ዘውስተ፡ ኢያሪኮ፡ ወከመ፡ ዕፀ፡ ዘይት፡ ሠናይት፡ ዘውስተ፡ ገዳም፡ ወዐበይኩ፡ ከመ፡ ጵላጣኖስ።
15 ወጥዕመ፡ መዐዛየ፡ ከመ፡ ቀናንሞስ፡ ወከመ፡ አስጳዳቶስ፡ ወከመ፡ መዐዛ፡ ዕፍረት፡ ቅድው፡ ኮነ፡ መዐዛየ፡ ወከመ፡ ከልበኔ፡ ወከመ፡ እንክስ፡ ወከመ፡ ስጠቄጤ፡ ወከመ፡ ጢሰ፡ ስኂን፡ በውስተ፡ ደብተራ።
16 ወኖኀ፡ አዕጹቅየ፡ ከመ፡ ዕፀ፡ ጤርባንቶስ፡ ወአዕጹቅየኒ፡ አዕጹቀ፡ ክብር፡ ወስብሐት።
17 አንሰ፡ ከመ፡ ዐጸደ፡ ወይን፡ ሠረጽኩ፡ ሞገሰ፡ ወጽጌየኒ፡ ፍሬ፡ ክብር፡(ወስብሐት፡)፡ ወብዕል።
19 ንዑ፡ ኀቤየ፡ ኵልክሙ፡ እለ፡ ትፈቅዱኒ፡ ወትጸግቡ፡ እምነ፡ ቀምሕየ።
20 እስመ፡ ይጥዕም፡ እምነ፡ መዓር፡ ዝክርየ፡ ወእምነ፡ ሶከር፡ ርስትየ።
21 ወእለኒ፡ ይበልዑኒ፡ ኢይጸግቡኒ፡ ወእለኒ፡ ይሰትዩኒ፡ ኢይረውዩኒ።
22 ወዘኒ፡ ይሰምዐኒ፡ ኢይትኀፈር፡ ወኢይስሕቱ፡ እለ፡ ሊተ፡ ይትቀነዩ።
23 ዝኵሉ፡ ነገር፡ ዘመጽሐፈ፡ ሕጉ፡ ለልዑል፡ ሕግ፡ ዘአዘዘ፡ ሙሴ፡ ወርስቶሙ፡ ለማኅበረ፡ ያዕቆብ።
25 ዘይመልኣ፡ ከመ፡ ተከዜ፡ ፊሶን፡ ለጥበብ፡ ወከመ፡ ተከዜ፡ ጤግሪስ፡ በአውራኀ፡ ኔዎን።
26 ወይመልኣ፡ ከመ፡ ተከዜ፡ ኤፍራጢስ፡ ለምክር፡ ወከመ፡ ተከዜ፡ ዮርዳኖስ፡ በመዋዕለ፡ ማእረር።
27 ዘይከሥታ፡ ከመ፡ ብርሃን፡ ለጥበብ፡ ወከመ፡ ተከዜ፡ ግዮን፡ በመዋዕለ፡ ማእረረ፡ ቀሥም።
28 ቀዳማዊኒ፡ ኢፈጸመ፡ አእምሮታ፡ ወደኃራዊኒ፡ ኢረከበ፡ አሠራ።
29 ይበዝኅ፡ እምነ፡ ማየ፡ ባሕር፡ ኅሊናሃ፡ ወየዐምቅ፡ እምነ፡ ማ፡ ቀላይ፡ ምክራ።
30 ወኮነኒ፡ ከመ፡ ሙሓዘ፡ ማይ፡ ዘይወጽእ፡ እምነ፡ ተከዜ፡ ወከመ፡ ምንኀር፡ ቦእኩ፡ ውስተ፡ ገነት።
31 ወእቤ፡ ከመ፡ እስቅያ፡ ለገነት፡ ወኣርውዮ፡ ለዐጸደ፡ ሐምልየ፡ ወኮነኒ፡ ዝክቱ፡ ሙሓዝየ፡ ከመ፡ ተከዜ፡ ወፈለግየኒ፡ ኮነኒ፡ መጠነ፡ ባሕር።
32 ወዓዲ፡ ኣበርሃ፡ ለጥበብ፡ ከመ፡ ጎሕ፡ ወአርኣያ፡ እስከ፡ ነዋኅ።
33 ወእሰውጣ፡ ለትምህርት፡ ከመ፡ ተንብዮ፡ ወኣነብራ፡ ለውሉደ፡ ውሉድ፡ ወለዓለመ፡ ዓለም።
34 ናሁ፡ ርእዩ፡ ከመ፡ አኮ፡ ለባሕቲትየ፡ ዘጻመውኩ፡ አላ፡ ለኵሎሙ፡ እለ፡ የኀሡኒ።
=== chapter 25 ===
[Chapter 25]
1 በእላ፡ ሠለስቱ፡ ሠነይኩ፡ ወቆምኩ፡ ሠናየ፡ ቅድመ፡ እግዚአብሔር፡ ወቅድመ፡ እጓለ፡ እመሕያው፡ አኀው፡ እለ፡ የኀብሩ፡ ልበ፡ ወታእኃሆሙ፡ ለአዕርክት፡ ወብእሲ፡ ምስለ፡ ብእሲቱ፡ እለ፡ የኀብሩ፡ ግዕዘ።
2 ወሠለስቲሆሙ፡ ከንቶ፡ መነነት፡ ነፍስየ፡ ወጸልአቶሙ፡ ወፈድፋደ፡ አስተቈጥዐኒ፡ ሕይወቶሙ፡ ነዳየ፡ ዕቡየ፡ ወባዕለ፡ ደንጻዌ፡ ወአረጋዌ፡ ዘማዌ፡ ዘአልቦ፡ ልበ።
3 ዘእምንእስከ፡ ኢተገሠጽከ፡ እፎ፡ ትጠብብ፡ በርሥኣኒከ።
4 ይደልዎን፡ ኰንኖ፡ ለሢበት፡ ወይደልዎሙ፡ ምክረ፡ ለሊቃውንት።
5 ወይደልዎሙ፡ ጥበብ፡ ለአእሩግ፡ ወትደልዎሙ፡ ትምህርተ፡ ጥበብ፡ ለዐበይት።
6 አክሊሎሙ፡ ለአእሩግ፡ ብዝኀ፡ ትምህርት፡ ወምክሖሙ፡ ፈሪሀ፡ እግዚአብሔር።
7 ተስዐቱ፡ እሙንቱ፡ እለ፡ አስተብፃእክዎሙ፡ በልብየ፡ ወዓሥሮሙሰ፡ እነግር፡ በቃልየ፡ ብእሲ፡ ዘይትፌሣሕ፡ በውሉድ፡ ወእንዘ፡ ሕያው፡ ውእቱ፡ ይሬኢ፡ ድቀተ፡ ጸላኢሁ።
8 ብፁዕ፡ ዘአውሰበ፡ ብእሲተ፡ ጠባበ፡ ወብፁዕ፡ ዘኢስሕተ፡ በቃሉ፡ ወዘኢገብአ፡ ታሕተ፡ ዘየአክዮ።
9 ብፁዕ፡ ዘረከባ፡ ለጥበብ፡ ወዘረከበ፡ ዘይትኤዘዝ፡ ሎቱ።
10 ዐቢይ፡ ውእቱ፡ ዘረከባ፡ ለጥበብ፡ ወየዐብዮ፡ ፈራሄ፡ እግዚአብሔር።
11 ፈሪሀ፡ እግዚአብሔር፡ እኵሉ፡ ትኄይስ፡ ወዘኪያሃ፡ ዐቀበ፡ አልቦ፡ ዘይመስሎ።
13 እምኵሉ፡ ቊስል፡ የአኪ፡ ቊስለ፡ ልብ፡ ወእምኵሉ፡ እኪት፡ ተአኪ፡ እኪት፡ ብእሲት።
14 ወለእመ፡ በኵሉ፡ ወደቀ፡ ኢትደቅ፡ ውስተ፡ እደ፡ ጸላኢከ፡ ወለእመ፡ ኵሉ፡ ተበቀለከ፡ ጸላኢከ፡ ኢይትበቀልከ።
15 አልቦ፡ ርእስ፡ ዘየአኪ፡ እምርእሰ፡ አርዌ፡ ምድር፡ ወአልቦ፡ ቂም፡ ዘየአኪ፡ እምቂመ፡ ጸላኢ።
16 ይኄይስ፡ ትንበር፡ ምስለ፡ ዐናብስት፡ ወምስለ፡ አራዊተ፡ ምድር፡ እምትንበር፡ ምስለ፡ እኪት፡ ብእሲት።
17 እከይሃ፡ ያዐልዎ፡ ለራእያ፡ ወያጸልሞ፡ ከመ፡ ርእየተ፡ ድብ፡ ለገጻ።
18 ወበማእከለ፡ ቢጹ፡ ይትሀበብዎ፡ ለምታ፡ ወመሪረ፡ ሐዘነ፡ ያቴክዝዎ፡ ወያመነዝዝዎ።
19 ኵሉ፡ እኪት፡ ትንእስ፡ እምእኪት፡ ብእሲት፡ ውስተ፡ መክፈልተ፡ ኀጢአት፡ ታበጽእ፡ ይእቲ።
20 ከመ፡ ያደክሞሙ፡ ዐቀበ፡ ኆጻ፡ እገሪሆሙ፡ ለአእሩግ፡ ከማሁ፡ ታደክሞ፡ ብእሲት፡ ነባቢት፡ ለብእሲ፡ የዋህ።
21 ኢያስሕትከ፡ ላሕያ፡ ለብእሲት፤>ወኢያፍቱከ፡ ላሕያ፡ ለብእሲት፤
22 እስመ፡(መቅሰፍት፡ወ)መንሱት፡ ወዐቢይ፡ ኀሳር፡ ይእቲ፡ ወኀፍረትሂ፡ ለእመ፡ ሴሰየቶ፡ ለምታ፡ ብእሲት።
23 ቊስል፡(ይእቲ፡)ለልብ፡ ወጽልመት፡(ይእቲ፡)፡ ለገጽ፡ ወሐዘን፡(ይእቲ፡)ለነፍስ፡ ብእሲት፡ እኪት። ከመ፡ ዕድ፡ ፅቡስ፡ ወከመ፡ እግር፡ ፅውስ፡ ከማሁ፡ ብእሲት፡ እንተ፡ ኢታአኵቶ፡ ለምታ።
24 ቀዳሚሁኒ፡ እምላዕለ፡ ብእሲት፡ ወጽአት፡ ኀጢአት፡ ወበእንቲአሃ፡ ኵልነ፡ ንመውት።
25 ኢትግበር፡ ሎቱ፡ ሙሐዘ፡ ለማይ፡ ወኢታርእያ፡ ዘውስተ፡ ልብከ፡ ለብእሲት።
26 ለእመ፡ ኢኮነት፡ ኮነ፡ ግዕዝከ፡ ምትራ፡ እምኔከ፡ ወአውጽኣ፡ እምሥጋከ።
=== chapter 26 ===
[Chapter 26]
1 ለብእሲት፡ ኄርት፡ ያበጽዕ፡ ምታ፡ ወይትመክዐብ፡ መዋዕለ፡ ሕይወቱ።
2 ብእሲት፡ ዕብራዊት፡ ታስተፌሥሖ፡ ለምታ፡ ወይፌጽም፡ መዋዕሊሁ፡ በሰላም።
3 ብእሱት፡ ኄርት፡ ሠናይ፡ መክፈል[ት]፡ ወ[ት]በጽሖ፡ ለፈራሄ፡ እግዚአብሔር፡ ውስተ፡ መክፈልቱ።
4 ለባዕልኒ፡ ወለነዳይኒ፡ ልቡ፡ ይሠኒ፡ ወለዝሉፉ፡ ብሩሀ፡ ይኩን፡ ገጽከ።
5 እምእሉ፡ ሠለስቱ፡ ደንገጸኒ፡ ልብየ፡ ወራብዕሰ፡ አፍርሀኒ፡ ገጽየ፡ ማዕሌተ፡ ሀገር፡ ወእንግልጋ፡ አሕዛብ፡ ወስምዐ፡ ሐሰት፡ ላዕለ፡ ነፍስ፡ ዘያበጽሕ፡ ለሞት።
6 ቊስል፡ ይእቲ፡ ለልብ፡ ወላሕ፡ ይእቲ፡ ለነፍስ፡ ብእሲት፡ እንተ፡ ታስተቃንእ፡ ከመ፡ መቅሠፍተ፡ ልሳን፡ ትዔሪ፡ በኵሉ፡ እኩይ።
7 ከመ፡ አርዑተ፡ ብዕራ፡ ዘያንቀለቅል፡ ከማሁ፡ ብእሲት፡ እኪት፡ ወዘይነብር፡ ምስሌሃ፡ ከመ፡ ዘይፀብጥ፡ ዐቅረበ።
8 ዐቢይ፡ መንሱት፡ ይእቲ፡ ብእሲት፡ ሰካሪት፡ እንተ፡ ኢትክል፡ ኀፍረታ፡ ከዲነ።
9 ዝሙታ፡ ለብእሲት፡ ይትዐወቅ፡ እምአዕይንቲሃ፡ ወይትአመር፡ በቀራንብቲሃ።
10 ወለወለትከኒ፡ አጽንዓ፡ ዐቂቦታ፡ ለእመ፡ ሥኅተት፡ ከመ፡ ኢታማስን፡ ርእሳ።
11 ወተዐቀብ፡ እምነ፡ ዐይነ፡[መ]ታሂ፤ከመ፡ ኢትግባእ፡ ትነስሕ፡ ለእመቦ፡ ዘብእሰከ።
12 ከመ፡ ይልሕስ፡ ጽሙእ፡ ወይሰቲ፡ እምኵሉ፡ ማይ፡ ዘቀርበ፡ ወያጸልል፡ ታሕተ፡ ኵሉ፡ ዕፀው፡ ወከመ፡ ዘያወጽእ፡ አሕጻሁ፡ እምጕንጳሁ።
13 ሞገሳ፡ ለብእሲት፡ ያስተፌሥሖ፡ ለምታ፡ ወጥበቢሃ፡ ያጠልሎ፡ ለአዕፅምቲሁ።
14 ፍቱ፡ ለእግዚአብሔር፡ ብእሲት፡ የዋህ፡ ወአልባቲ፡ መድሎተ፡ ነፍስ፡ ጠባብ።
15 ሠናይት፡ በዲበ፡ በረከት፡ ብእሲት፡ ኀፋሪት፡ ወአልባቲ፡ ተውላጠ፡ ነፍስ፡ መስተዓግሥት።
16 ከመ፡ ፀሓይ፡ በውስተ፡ ሰማዩ፡ ለእግዚአብሔር፡ ከማሁ፡ ላሕየ፡ ሥና፡ ለብእሲት፡ ኄርት፡ በውስተ፡ ትርሲተ፡ ቤታ።
17 ከመ፡ ማኅቶተ፡ ቅድሳት፡ እንተ፡ ታበርህ፡ በዲበ፡ ተቅዋማ፡ ከማሁ፡ ላሕየ፡ ገጹ፡ ለጠቢብ፡ በሥነ፡ ግዕዙ።
18 ከመ፡ አዕማደ፡ ወርቅ፡ እለ፡ ይቀውሙ፡ ዲበ፡ ምክያደ፡ ብሩር፡ ከማሁ፡ በአተ፡ እገሪሁ፡ ለኄር፡ ዘይቀውም፡ በሠናይ።
28 በእሉ፡ ሠለስቱ፡ ተከዘኒ፡ ልብየ፡ ወራብዖሙሰ፡ መዐተ፡ አምጽአ፡ ላዕሌየ፡ ብእሲ፡ መስተቃትል፡(ወተባዕ፡)ሶበ፡ የኀጥእ፡ ወይጼነስ፡ ዕደው፡ ጠቢባን፡ ለእመ፡ ስሕቱ፡ ወዘየኀድጋ፡ ለጽድቅ፡ ወይገብእ፡ ውስተ፡ ኀጢአት፡ እግዚአብሔር፡ ያወድቆ፡ በኵናት።
29 እምዕጹብ፡ ይድኅን፡ ሠያጢ፡ እምኀጢአት፡ ወኢይጸድቅ፡ መያሲ፡ እምዐምፆት።
=== chapter 27 ===
[Chapter 27]
1 ብዙኃን፡ እለ፡ በአድልዎ፡ ይገብርዋ፡ ለኀጢአት፡ ወዘሰ፡ ይፈቅድ፡ ይትባዛኅ፡ ይመይጥ፡ ዐይኖ።
2 ማእከለ፡ ንድቀ፡ አእባን፡ ይተክሉ፡ መትከለ፡ ወማእከለ፡ ሤጥ፡ ወተግባር፡ ትመጽእ፡ ኀጢአት።
3 ለእመ፡ ኢያፍጠነ፡ ተዐቅቦ፡ በፍርሀተ፡ እግዚአብሔር፡ ኢይጐነዲ፡ ተገፍትኦ፡ ቤቱ።
4 ውስተ፡ መንጠፍት፡ ይጥሕል፡ ሐሠረ፡ ከማሁ፡ ሰብእኒ፡ እምኅሊናሁ፡ ተረክበ፡ ርስሐቱ።
5 ለንዋየ፡ ለብሓኒ፡ እሳት፡ ይፈትኖ፡ ወለሰብእኒ፡ ኅሊና፡ ልቡ፡ ያሜክሮ።
6 ዐቃቢሁ፡ ለቀምሕ፡ ይሬኢ፡ ፍሬሁ፡ ከማሁ፡ ቃሉ፡ ለሰብእ፡ ይከሥቶ፡ ፍትወተ፡ ልቡ።
7 እንበለ፡ ትጠይቆ፡ ለሰብእ፡ ኢትንአዶ፡ እስመ፡ ግዕዙ፡ ያሜክርዎ፡ ለሰብእ።
8 ለእመ፡ ዴገንካ፡ ለጽድቅ፡ ትረክባ፡ ወትለብሳ፡ ከመ፡ ልብሰ፡ ጶዴር፡ ዘክቡር።
9 አዕዋፍኒ፡ ምስለ፡ ዘመዱ፡ የኀድር፡ ወጽድቅኒ፡ ኀበ፡ እለ፡ ይገብርዋ፡ ተሐውር።
10 ዐንበሳ፡ ይንዑ፡ ዘይበልዕ፡ ከማሁ፡ ኀጢአትኒ፡ ትንዕዎሙ፡ ለእለ፡ ይገብርዋ።
11 ጻድቅሰ፡ ይሜህር፡ ዘልፈ፡ ጥበበ፡ ወአብድሰ፡ ባሕቱ፡ እንተ፡ ጸብሐት፡ የሐጽጽ፡ ልቡ፡ ከመ፡ ወርኅ።
12 በኀበ፡ አብዳን፡ ተዐቀብ፡ ጊዜሁ፡ ወበኀበ፡ ጠቢባን፡ ተጠየቅ፡ በኵሉ፡ ጊዜ።
13 ነገሮሙ፡ ለአብዳን፡ ያስተቋጥዕ፡ ወሠሐቆሙኒ፡ ፍግዐ፡ ኀጢአት።
14 ነገሩ፡ ለዘ፡ ብዙኀ፡ ይምሕል፡ ያንሦጥጥ፡ ሥዕርተ፡ ወላኳሆሙኒ፡ ያጸምም፡ እዝነ።
15 ያክዑ፡ ደመ፡ ላኳሆሙ፡ ለዕቡያን፡ ወጋእዞሙ፡ ስራሕ፡ ለዘይሰምዖሙ።
16 ዘከሠተ፡ ምክረ፡ ቢጹ፡ ሀጕለ፡ ሃይማኖቶሙ፡ ወኢይረክብ፡ እንከ፡ ዐርከ፡ ዘከመ፡ ልቡ።
17 ዕቀብ፡ ዐርከከ፡ ወተአመን፡ ምስሌሁ፡ ወለእመሰ፡ ከሠትከ፡ ምክሮ፡ ኢትዴግኖ፡(እንከ፡ወኢትትልዎ፡)ድኅሬሁ።
18 ከመ፡ ሀጕለ፡ ሰብእ፡ ጸላኢሁ፡ ከማሁ፡ ሀጐልካሁ፡ አንተኒ፡ ታእኃሁ፡ ለዐርክከ።
19 ከመ፡ ዖፍ፡ እንተ፡ ታመሥጠከ፡ እምእዴከ፡ ከማሁ፡ ሰረረ፡ እምኔከ፡ ዐርክከ።
20 ወኢትዴግኖ፡ እንከ፡ እስመ፡ ነዋኅ፡ ኀበ፡ አምሠጠከ፡ ከመ፡ አምሠጠት፡ ምዳቊ፡ እምነ፡ ማዕገት።
21 ሶበሰ፡ ቊስል፡ ውእቱ፡ እምፈወስዎ፡ ወለዘኒ፡ ተጽዕለ፡ ያስተማውጽዎ፡ ወለዘሰ፡ ከሠተ፡ ምክረተ፡ ቢጹ፡ ይቀብጽዎ።
22 ዘይቀጽብ፡ በዐይኑ፡ ኢይሤኒ፡ ኅሊናሁ፡ አልቦ፡ ዘይክል፡ አኅደጎተ፡ እከዩ።
23 ለዐይንከሰ፡ ያጥዕም፡ ለከ፡ አፉሁ፡ ወበኵሉ፡ ዘነበብከ፡ ይንእደከ፡ ወድኅረ፡ የዐልወከ፡ ቃሎ፡ ወያስሕተከ፡ በቃልከ፡ እንተ፡ ነበብከ።
24 ብዙኃን፡ እለ፡ ጸላእኩ፡ ወአኮሰ፡ ከማሁ፡ ወእግዚአብሔርኒ፡ ጸልአ፡ ኪያሁ።
25 ዘይወግር፡ እብነ፡ ላዕሌሁ፡ ትወርድ፡ ዲበ፡ ርእሱ፡ መቅሠፍተ፡ ዐመፃሰ፡ ይትዐወቅ፡ ቊስሉ።
26 ዘከረየ፡ ግበ፡(ለቢጹ፡)ለሊሁ፡ ይወድቅ፡ ውስቴቱ፡ ወዘኒ፡ ወርዐ፡ መሥገርተ፡ ውእቱ፡ ይሠግር፡ ቦቱ።
28 ኀጢአት፡ ጸዐሎሙ፡ ወሠሐቆሙ፡ ለዕቡያን፡ ከመ፡ ዐንበሳ፡ ትንፅዎሙ፡ ወትትቤቀሎሙ።
29 በመሥገርት፡ ይሠግሩ፡ እለ፡ ይትፌሥሑ፡ በድቀቱ፡ ለጻድቅ፡ መቅሠፍት፡ ይመስዎሙ፡ ዘእንበለ፡ ይብጽሖሙ፡ ጊዜ፡ ሞቶሙ።
30 መዐትኒ፡ ወቊጥዓ፡ ርኵሳን፡ እሙንቱ፡ ወበኀበ፡ ብእሲ፡ ኃጥእ፡ ይሄልዉ።
=== chapter 28 ===
[Chapter 28]
1 ዘይትዔገሦ፡ ለእግዚአብሔር፡ ይትቤቀል፡ ሎቱ፡ ወኀጢአቶ፡ የኀድግ፡ ሎቱ።
2 ኅድግ፡ ሎቱ፡ ለቢጽከ፡ ዘተሐይሶ፡ ወይእተ፡ ጊዜ፡ እምከመ፡ ተጋነይከ፡ ይሰሪ፡ ለከ፡ ኀጢአተከ።
3 ሶበ፡ አንተ፡ እንዘ፡ ሰብእ፡ አንተ፡ ትትቄየም፡ ሰብአ፡ (ዘከማሁ)፡ እፎ፡ እንከ፡ ተሣሃለኒ፡ ትብሎ፡ ለእግዚአብሔር።
4 እንዘ፡ ኢታስተምሕር፡ ሰብአ፡ ከማከ፡ አእፎ፡ ትስእሎ፡ ይስረይ፡ ለከ፡ ኀጢአተከ።
6 ተዘከር፡ [ደኃሪተከ፡]፡ ወኅድጋ፡ ለጽልእ፡ ተዘከሮ፡ ለሞት፡ ወለሙስና፡ ወዕቀብ፡ ትእዛዞ።
7 ተዘከር፡ ሕጎ፡ ወኢትትቀየም፡ ቢጸከ፡ ተዘከር፡ ኵነኔሁ፡ ለልዑል፡ ወአሰስላ፡ ለመዐት።
8 ግድጎ፡ ለጋእዝ፡ ወታውኅዶን፡ ለኀጣውኢከ፡ ብእሲ፡ መዐትም፡ ያፈልሖ፡ ለላኳ።
9 ወብእሲ፡ ኃጥእ፡ ያሰርሕ፡ ቢጾ፡ ወያስተዳጕጽ፡ ማእከለ፡ አዕርክት።
10 በአምጣነ፡ ዕፁ፡ ለእሳት፡ የዐቢ፡ ነዱ፡ ወበአምጣነ፡ ዕበየ፡ ጋእዙ፡ ከማሁ፡ ይፈልሕ፡ ላኳሁ፡ በአምጣነ፡ ኀይሉ፡ ለሰብእ፡[ቂ]ሙ፡ ወበአምጣነ፡ ብዕሉ፡ ከማሁ፡ ያዐብያ፡ ለመዐቱ።
11 ዘያልሕሓ፡ ለትዝኅርቱ፡ ያነድዳ፡ ለእሳት፡ ወዘይጔጕእ፡ ለጋእዝ፡ ያፈጥን፡ ክዒወ፡ ደም።
12 እመ፡ ነፋሕካ፡ ለፍሕም፡ ትነድድ፡ ወእመ፡ ወረቃ፡ ትጠፍእ፡ ወክልኤሆሙ፡ እምውስተ፡ አፍ፡ ይወጽኡ።
13 ለሐማዩ፡ ወለዘ፡ ክልኤቱ፡ ልሳኑ፡ ይረግምዎ፡ እስመ፡ ብዙኃነ፡ አዕርክተ፡ አስተቃተለ።
14 ልሳን፡ መስተዳጕጽ፡ ሁኮሙ፡ ለብዙኃን፡ ወአስተፋለሶሙ፡ እምሕዝብ፡ ውስተ፡ ሕዝብ፡ ወአህጉረ፡ ጽኑዓተ፡ አመዝበረት፡ ወአብያቲሆሙ፡ ለዐበይት፡ አውደቀት።
15 ልሳን፡ ነባቢት፡ ሰደደቶን፡ ለአንስት፡ እምአብያተ፡ አምታቲሆን፡ ወአህጐለቶሙ፡ ጻማሆን።
16 ወዘሰ፡ ኢትዐቀበ፡ ኢያዐርፍ፡ ለዝላፉ፡ ወኢይነብር፡ በሰላም።
17 ቊስለ፡ መቅሠፍት፡ ይገብር፡ አምግልተ፡ ወቊስለ፡ ልሳን፡ ይሰብር፡ አዕፅምተ።
18 ብዙኃን፡ እለ፡ ወድቁ፡ በኀጺን፡ ወአኮ፡ ከመ፡ እለ፡ ወድቁ፡ በልሳን።
19 ብፁዕ፡ ዘድኅነ፡ እምኔሃ፡ ወዘኢድኅፀ፡ በመንሱታ፡ ወዘኢሐረሰ፡ በአርዑታ፡ ወዘኢተሞቅሐ፡ በማእሰራ።
20 አርዑታሂ፡ አርዑተ፡ ኀጺን፡ ወመዋቅሕቲሃኒ፡ ዘብርት።
21 እኩይ፡ ሞት፡ ሞታ፡ ትቀልል፡ ሲኦል፡ እምኔሃ።
22 ለጻድቃንሰ፡ ኢትበጽሖሙ፡ ወኢውዕዩ፡ በእሳታ።
23 እለ፡ ይረስዕዎ፡ ለእግዚአብሔር፡ ይወድቁ፡ ባቲ፡ ወታውዕዮሙ፡ በዘኢይጠፍእ፡ እሳት፡ ወትሰርር፡ ላዕሌሆሙ፡ ከመ፡ ዐንበሳ፡ ወትእኅዞሙ፡ ከመ፡ ነምር።
24 እመኒ፡ ሐጸርከ፡ በሦክ፡ ላዕለ፡ ንዋይከ፡ ወኀተምከ፡ ወርቀከ፡ ወብሩረከ።
25 ወደለውከ፡ በመዳልው፡ ቃለከ፡ ወወደይከ፡ ማዕጾ፡ ወመንሠገ፡ ላዕለ፡ አፉከ።
26 ዓዲ፡ ተዐቀባ፡ ኢታድኅፅከ፡ ልሳንከ፡ ወኢታውድቀ፡ ቅድመ፡ ዘይንፅወከ።
=== chapter 29 ===
[Chapter 29]
1 ዘይገብር፡ ምጽዋተ፡ ይሌቅሖ፡ ለቢጹ፡ ወዘኒ፡ የአክል፡ ውስተ፡ እዴሁ፡ ይገብር፡ ትእዛዞ።
2 ለቅሖ፡ ለቢጽከ፡ አመ፡ ተጽናሱ፡ ከመ፡ ትደለው፡ ምስሌሁ፡ አመ፡ ተድላሁ።
3 ዕቀብ፡ ነገረከ፡ ወተአመን፡ ምስሌሁ፡ ወእንተ፡ ሶበ፡ ፈቀድከ፡ ትረክቦ፡ ለጽድቅከ።
4 ብዙኃን፡ እለ፡ ይመስሎሙ፡ ከመ፡ ዘውስተ፡ ምድር፡ ዘረከብዎ፡ ለንዋየ፡ ልቃሕ፡ ወአስርሕዎሙ፡ ለእለ፡ (ለቅሖሙ፡ እለ)፡ ረድእዎሙ፡ (እለ፡ ምንዳቤሆሙ)።
5 እስከ፡ ይትሌቃሕ፡ ይስዕመከ፡ ርእሰከ፡ ወያደክም፡ ቃሎ፡ ወይየውሀከ፡ እስከ፡ ይነሥእ፡ ንዋየከ። ወአመ፡ ትትፈደዮ፡ ያነውኅ፡ ለከ፡ ዕድሜከ፡ ወየዐስየከ፡ ቅሥተ፡ ወተስናነ፡ በንዋይከ፡ ወያቴክት፡ (ወያስተኀልፍ)፡ ዕድሜከ።
6 እምዕጹብ፡ መንፈቆ፡ ለእመ፡ ፈደየከ፡ ወዓዲ፡ ኪያሁኒ፡ ይመስለከ፡ ከመ፡ ዘበዲበ፡ ምድር፡ ረከብከ። ወእመ፡ አልቦሰ፡ ተሀጕል፡ ወዓዲ፡ ጸላኤ፡ ይከውነከ፡ ወመርገመ፡ ወጽዕለተ፡ የዐስየከ፡ ወያኀስረከ፡ ዘእምአክበረከ።
7 ወብዙኃን፡ እለ፡ ኢይሌቅሑ፡ በኢፈቂደ፡ ጻሕብ፡ ወበፈሪሀ፡ ኢይህጐሉ፡ ወከመ፡ ኢይጸልኡ።
8 ወባሕቱ፡ ለነዳይሰ፡ ተዐገሦ፡ ወምጽዋተኒ፡ ኢታኅልፎ።
9 እንበይነ፡ ምጽዋት፡ ተወከፎ፡ ለነዳይ፡ ወእስመ፡ ጽኑስ፡ ውእቱ፡ ኢታውጽኦ፡ ዕራቆ።
10 ህጐል፡ ወርቀከ፡ እምትህጐል፡ ዐርከከ፡ ወቢጸከ፡ ወእምይዝሐልውስተ፡ መድፍን፡ ወይትሀጐል፡ ታሕተ፡ እብን።
11 አስተዋጽኦ፡ ለመድፍንከ፡ በእንተ፡ ትእዛዙ፡ ለልዑል፡ ወይረብሐከ፡ ፈድፋደ፡ እመዛግብተ፡ ወርቅ።
12 ዝግባ፡ ለምጽዋት፡ ውስተ፡ አብያቲከ፡ ወይእቲ፡ ትኄይስ፡ አድኅኖተከ፡ እምነ፡ ኵሉ፡ ምንዳቤከ።
13 እመኒ፡ በኲናት፡ በንዋየ፡ ሐቅል፡ ትበድር፡ ይእቲ፡ (ወትመውእ፡ ለከ፡ ጸላኤከ)፡ ወትትቃተል፡ ለከ፡ ፀረከ።
14 ብእሲሰ፡ ኄር፡ ይትሐበዮ፡ ለዐርኩ፡ ወዘኢየኀፍር፡ ይትዔወር።
15 ዕሴቶ፡ ለዘ፡ ተሐበየከ፡ ኢትርሳዕ፡ ሎቱ፡ እስመ፡ መጠወ፡ ነፍሶ፡ ህየንቴከ።
16 ሠናይ፡ ተሐበዮ፡ ለአጥፍኦ፡ እኩይ።
17 ወኃጥእሰ፡ ይረስዕ፡ ዕሴተ፡ ዘአድኀኖ።
18 ብዙኃነ፡ ኄራነ፡ አሕመሞሙ፡ ተሐበዮ፡ ወሆኮሙ፡ ከመ፡ ማዕበለ፡ ባሕር፡ ወአስሐቶሙ፡ ለዕደው፡ ጽኑዓን፡ ወውስተ፡ አሕዛበ፡ ባዕድ፡ አፍለሶሙ።
19 ኃጥእሰ፡ ይትመነሶ፡ በሕቢት፡ ወዘይሤሥዕ፡ በረባሕ፡ ይወድቅ፡ ውስተ፡ መንሱት።
20 ተወከፍ፡ ቢጸከ፡ በአምጣነ፡ ኀይልከ፡ ወተዐቀብ፡ ርእሰከ፡ ኢያስሕትከ።
21 ቀዳሜ፡ ሕይወትከ፡ እክል፡ ወማይ፡ ወልብስ፡ ወቤት(ከሰ)፡ ኀበ፡ ትሴውር፡ ኀፍረተከ።
22 ይኄይስ፡ ትጸነስ፡ በታሕተ፡ ሠርዌ፡ ቤትከ፡ እምትደለው፡ ወትትፈጋዕ፡ በቤተ፡ ባዕድ፡ በንዋየ፡ ነኪር።
23 ለንኡስኒ፡ ወለዐቢይኒ፡ አሠኒ፡ ግዕዘከ፡ ወቃለከ።
24 እኩይ፡ ሕይወቱ፡ ለዘይትፋለስ፡ እምቤት፡ ቤተ፡ ወኀበ፡ ኀደርከ፡ ዑቅ፡ ኢታሕሥም፡ አፉከ።
25 ወእመ፡ አኮሰ፡ ታበልዕኒ፡ ወታሰቲኒ፡ ወአኰቴተ፡ አልብከ፡ ወምስለ፡ ኵሉዝ፡ መራር፡ ያውሥኡከ።
26 ወአመሰ፡ ትዴለው፡ ይብሉከ፡ ባእ፡ ኀዳሪነ፡ ሥራዕ፡ ማእደ፡ ወአብልዐነ፡ ዘብከ።
27 ወእምከመ፡ ተጸነስከ፡ ይብሉከ፡ ፃእ፡ ኀዳሪነ፡ በጽሐ፡ ማኅፈርነ፡ ንፈቅድ፡ ቤተነ።
28 ዕጹብ፡ ዝነገር፡ በኀበ፡ ብእሲ፡ ጠቢብ፡ ያኀስረከ፡ ዘአኅደ[ረ]ከ፡ ወይዘረክየከ፡ ዘለ[ቅሐ]ከ።
=== chapter 30 ===
[Chapter 30]
1 ዘያፈቅር፡ ወልዶ፡ ኢያጸብእ፡ ተግሣጸ፡ ከመ፡ ይትፈሣሕ፡ ቦቱ፡ በደኃሪቱ።
2 ዘመሀሮ፡ ለወልዱ፡ ይንእድዎ፡ ቦቱ፡ ወይከውኖ፡ ምክሑ፡ በኀበ፡ ማኅፈሩ።
3 ዘመሀሮ፡ ለወልዱ፡ ያቀንኦ፡ ለጸላኢሁ፡ ወይትፌሣሕ፡ ቦቱ፡ በኀበ፡ አዕርክቲሁ።
4 እመኒ፡ ሞተ፡ አቡሁ፡ ከመ፡ ዘኢሞተ፡ እስመ፡ ኀደገ፡ ድኅሬሁ፡ ዘከማሁ።
5 ወእንዘ፡ ሕያው፡ ውእቱ፡ ተፈሥሐ፡ በወልዱ፡ ወእመኒ፡ ይመውት፡ ኢያሐምሞ፡ ልቡ።
6 እስመ፡ ኀደረ፡ ድኅሬሁ፡ ዘይትቤቀሎሙ፡ ለጸላእቱ፡ ወዘየዐስዮሙ፡ ለአዕርክቲሁ።
7 እንበይነ፡ ነፍሰ፡ ውሉድከ፡ ፅምም፡ ልበከ፡ እስመ፡ እምነ፡ ብካዮሙ፡ ይትመሰወከ፡ አማዑቲከ።
8 ፈረስ፡ ዘኢተረየፀ፡ ይወፅእ፡ እኩየ፡ ወልድ፡ ዘኢተገሠጸ፡ ይወፅእ፡ ዝሉፈ።
9 እምከመ፡ አስተማዛኅኮ፡ ለወልድከ፡ ይገብእ፡ ይትኀየልከ፡ እምከመ፡ ተዋነይከ፡ ምስሌሁ፡ ይገብእ፡ ያሕምምከ።
10 ኢትሥሐቅ፡ ሎቱ፡ ከመ፡ ኢያሕዝንከ፡ ወአመ፡ ደኃሪትከ፡ ያፀርሰከ፡ አስናኒከ።
11 ኢ[ታ]ኰንኖ፡ ለወልድከ፡ በውርዝቱ።
12 እምንእሱ፡ አጸንጵዎ፡ አዕፅምተ፡ ገበዋቲሁ፡ ከመ፡ እምከመ፡ ጸንዐ፡ ኢይዕሉከ።
13 መሀሮ፡ ለወልድከ፡ ወያሰልጠከ፡ ከመ፡ ኢትኅፈር፡ በሙስና፡ ዚአሁ።
14 ይኄይስ፡ ነዳይ፡ ጥዑይ፡ ውእቱ፡ ወፍቱሕ፡ ነፍሱ፡ እምነ፡ ባዕል፡ ዘድውይ፡ ሥጋሁ፡ ወእሱር፡ ነፍሱ።
15 ጥዑየ፡ ይኩን፡ ሥጋከ፡ ወፍቱሐ፡ ይኩን፡ ነፍስከ፡ ወዝእምኵሉ፡ ብዕል፡ ይኄይስ፡ ወእምኵሉ፡ ብዕል፡ ወንዋይ፡ ይኄይስ፡ ጥዕዮ፡ ነፍስ።
16 ኢይትበደር፡ ብዕል፡ እምነቢረ፡ ጥዑይ፡ አልቦ፡ ትፍሥሕት፡ ዘይኄይስ፡ እምሐሤተ፡ ልብ።
17 ይኄይስ፡ መዊት፡ እመራር፡ ሕይወት፡ ወእምነ፡ ደዌ፡ ሲሕ።
18 ከመ፡ ሥሩፅ፡ መብልዕ፡ ውስተ፡ አፍ፡ ፍፁም፡ ከማሁ፡ ዘያወፍር፡ እክለ፡ ውስተ፡ መቃብር።
19 ምንተ፡ ይበቊዕ፡ ሠዊዕ፡ ለአማልክት፡ ኢእሙንቱ፡ ያጼንው፡ ከማሁ፡ ዘእግዚአብሔር፡ ቀሠፎ።
20 ይሬኢ፡ በአዕይንቲሁ፡ ወያሐምም፡ ልቦ፡ ከመ፡ ኅጽው፡ ሶበ፡ የሐቅፋ፡ ለድንግል፡ ወይቴክዝ።
21 ኢታሕዝን፡ ነፍሰከ፡ ወኢታጥቅልበከ።
22 ትፍሥሕቱ፡ ለልብ፡ ሕይወቱ፡ ለሰብእ፡ ወሐሤተ፡ ነፍስ፡ ያነውኅ፡ መዋዕለ።
23 የውሃ፡ ለነፍስከ፡ ወናዝዛ፡ ለልብከ፡ ከመ፡ ታውፅእ፡ ሐዘነ፡ እምላዕሌከ። እስመ፡ ለብዙኃን፡ ቀተሎሙ፡ ሐዘን፡ ወአልባቲ፡ ዘትበቊዕ፡ ሐዘን።
24 ቅንአት፡ ወመዐት፡ ያውኅዱ፡ መዋዕለ፡ ሕይወት፡ ወእንበለ፡ ይብጻሕ፡ ጊዜሁ፡ ያረሥእ፡ ትካዝ።
25 ከመ፡ ዘየአሪ፡ ድኅረ፡ ዘይቀሥም፡ በበረከቱ፡ ለእግዘአብሔር፡ በጻሕኩ፡ ከመ፡ ማእረረ፡ ወይን፡ መላእኩ፡ ምክያድየ።
26 ናሁ፡ ርእዩ፡ ከመ፡ አኮ፡ ለባሕቲትየ፡ ዘጻመውኩ፡ ወከመ፡ ለኵሉ፡ እለ፡ ይፈቅዱ፡ ይጥበቡ።
27 ስምዑኒ፡ መኳንንተ፡ ሕዝብ፡ ወአፅምኡኒ፡ መላእክተ፡ አሕዛብ።
28 ለወልድከ፡ ወለብእሲትከ፡ ወለእኁከ፡ ወለዐርክከ፡ ኢታኰንኖሙ፡ ንዋየከ፡ እንዘ፡ ሕያው፡ አንተ፡ ወኢታመግብ፡ ነኪረ፡ ላዕለ፡ ቤትከ፡ ከመ፡ ኢትነስሕ፡ ድኅረ፡ ወኢትግባእ፡ ታስተበቊዖሙ።
29 አምጣነ፡ ሕያው፡ አንተ፡ ወሀለወት፡ ነፍስከ፡ ኢትወልጥ፡ ግዕዘከ።
30 ይኄይሰከ፡ ውሉድከ፡ ይስአሉከ፡ እምትጽናሕ፡ አንተ፡ እምእዴሆሙ፡ ለደቂቅከ።
31 ኩን፡ ጠቢበ፡ በኵሉ፡ ዘገበርከ፡ ወኢታሒስ፡ ርእሰከ፡ በኀበ፡ ሤሙከ።
32 አመ፡ የኀልቃ፡ መዋዕለ፡ ሕይወትከ፡ ወአመ፡ ትበጽሕ፡ ደኃሪትከ፡ ይእተ፡ አሚረ፡ አስተዋርስ፡ ንዋየከ።
33 ለአድግሰ፡ አቅምሖ፡ ወጸዐኖ፡ ወዝብጦ፡ ወለገብርኒ፡ ገሥጾ፡ ወሴስዮ፡ ወቅንዮ።
34 ወቅንዮሙ፡ ለአግብርቲከ፡ ወትረክብ፡ ዕረፍተ፡ ወለእመሰ፡ አፅራዕኮሙ፡ ይትገዐዙ፡(ይፈቅዱ፡ ይፃኡ፡ እምኔከ)።
35 ፀሚድ፡ አርዑት፡ ያደንኖ፡ ለክሳድ፡ ወለገብርሰ፡ እኩይ፡ ሰውጥ፡ ወመቃይጽ።
36 ቅንዮ፡ ለገብርከ፡ ወኢታንብሮ፡ ፅሩዐ።
37 እስመ፡ ብዙኃተ፡ እኪተ፡ ትሜህር፡ አፅርዖት።
38 ወሀቦ፡ ግብሮ፡ መአምጣነ፡ ኀይሉ፡ ወእመሰ፡ ኢገረረ፡ አክብድ፡ ገንዶራቲሁ። ወኢትትአመኖ፡ ለኵሉ፡ ዘሥጋ፡ አልቦ፡ ዘትገብር፡ ዘእንበለ፡ ምክር።
39 ወእመ፡ ብከ፡ ነባሬ፡(ኄር)፡ረስዮ፡ ከመ፡ እኁከ፡ ወአፍቅሮ፡ ከመ፡ ነፍስከ።
40 ወእመከመ፡ አሕሠምከ፡ ዲቤሁ፡ ወተኀጥአከ፡ ያመስጠከ፡ በአይ፡ ፍኖት፡ እንከ፡ ተኀሥሦ።
=== chapter 31 ===
[Chapter 31]
1 ብእሲሰ፡ አብድ፡ ከንቶ፡ ይሴፈዋ፡ ለሐሰት፡ ወሕልምኒ፡ ያደነግጾ፡ ለአብድ።
2 ከመ፡ ዘይፀብጥ፡ ጽላሎተ፡ ወከመ፡ ዘይዴግን፡ ነፋሰ፡ ከማሁ፡ ዘይትአመን፡ ሕልመ።
3 እምዝንቱ፡ ውስተ፡ ዝንቱ፡ ይትፋለስ፡ ሕልመ፡ ወበበ፡ አምሳለ፡ ገጹ፡ ያርእየከ፡ ዘዘዚአሁ።
4 እምውስተ፡ ርኵስ፡ ምንት፡ ይወፅእ፡ ንጹሕ፡ ወበውስተ፡ ሐሰት፡ በአይቴ፡ ይትረክብ፡ ጽድቅ።
5 ሕልም፡ ወሰገል፡ ወመቅሰም፡ ከንቱ፡ ኵሎሙ፡ ወያደነግጹ፡ ልብ፡ ወይቀንዑ፡ ከመ፡ ማሕምም።
6 ለእመ፡ ኢኮነ፡ እምኀበ፡ እግዚአብሔር፡ ዘተፈነወ፡ እመ፡ ይሣሀል፡ ኢትደዮ፡ ውስተ፡ ልብከ።
7 እስመ፡ ለብዙኃን፡ አስሐቶሙ፡ ሕልም፡ ወወደቁ፡ እንዘ፡ ኪያሁ፡ ይሴፈው።
8 እሙነ፡ ይበጽሕ፡ ዘእምኀበ፡[እግዚአብሔር፡]፡ ዘእንበለ፡ ሐሰት፡ ወጥዩቀ፡ ይከውን፡ ቃለ፡ ጽድቅ።
9 ብእሲ፡ ምሁር፡ ተግሣጸ፡ ብዙኀ፡ ያአምር፡ ወዘፈድፋደ፡ ሐመመ፡ ጥበበ፡ ይነርግ።
10 ወዘሰ፡ ኢትጐድአ፡ አልቦ፡ ዘየአምር።
11 ዘብዙኀ፡ ተመንደበ፡ ብዙኀ፡ ይትሜ[የን]።
12 ብዙኀ፡ ርኢኩ፡ አመ፡ ተመንደብኩ፡ ወበዝኀ፡ ቃልየ፡ እምነ፡ ኅሊናየ።
13 እስመ፡ ዘልፈ፡ እትመነደብ፡ ወእበጽሕ፡ ለሞት፡ ወእንበይነዝ፡ ያድኅነኒ፡ እግዚአብሔር።
14 ነፍስ፡ እንተ፡ ትፈርሆ፡ ለእግዚአብሔር፡ ተሐዩ።
15 ወይድኅኑ፡ ኵሎሙ፡ እለ፡ ይሴፈው፡ ኪያሁ።
16 ለፈራሄ፡ እግዚአብሔር፡ አልቦ፡ ዘይጌርሞ፡ ወኢይደነግጽ፡ እስመ፡ ውእቱ፡ ተስፋሁ።
17 ብፅዕት፡ ነፍስ፡ እንተ፡ ትፈርሆ፡ ለእግዚአብሔር።
18 እስመ፡ ላዕሌሁ፡ ያሰክም፡ ወውእቱ፡ ምእመኑ።
19 አዕይንቲሁ፡ ለእግዚአብሔር፡ ኀበ፡ እለ፡ ያፈቅርዎ፡ ምእመን፡ ኀይሉ፡ ወጽኑፅ፡ ምስማኩ። ያቈርር፡ ለከ፡ መርቄ፡ ወይጼልለከ፡ እምፀሓየ፡ ቀትር፡ የዐቅበከ፡ እምዕቅፍት፡ ወይረድአከ፡ እምድቀት።
20 ያዐብያ፡ ለነፍስከ፡ ወያበርሆን፡ ለአዕይንቲከ፡ ወይፌውስኒ፡ ወይሁብ፡ ሕይወተ፡ ወያጸግብ፡ በረከተ።
21 ርኵስ፡ መሥዋዕቱ፡ ለመባአ፡ ዐመፃ፡ ወግሙን፡ ቊርባኖሙ፡ ለኃጥኣን።
22 ወኢይትወከፎሙ፡ መባኦሙ፡ ለረሲዓን።
23 አኮ፡ በብዝኀ፡ መባእከ፡ ዘይትኀደግ፡ ለከ፡ ኀጢአትከ።
24 ከመ፡ ዘይቀትሎ፡ ለሕፃን፡ በቅድመ፡ አቡሁ፡ ከማሁ፡ ዘበንዋየ፡ ዐመፃ፡ ያበውእ፡ መባእ።
25 ሕይወቱ፡ ለነዳይ፡ ስኢለ፡ ምጽዋት፡ ወዘሰ፡ አበዮ፡ ቀታሌ፡ ነፍስ፡ ውእቱ።
26 ከመ፡ ዘቀተለ፡ ቢጾ፡ ዘፈለጠ፡ ብእሴ፡ እምብእሲቱ።
27 ወዘሄደ፡ ዐስቦ፡ ለዐሳቡ፡ ከዐወ፡ ደሞ።
28 ሶበ፡ ፩ዱ፡ የሐንጽ፡ ወካልኡ፡ ይነሥት፡ ምንተ፡ በቊዐ፡ ጻማሆሙ፡ ለክልኤሆሙ።
29 ሶበ፡ ፩ዱ፡ ይድኅር፡ ወካልኡ፡ ይረግም፡ ለመኑ፡ እምውስተ፡ ክልኤሆሙ፡ ይሰምዖሙ፡ ቃሎሙ።
30 ዘይትኀፀብ፡ እምድኅር፡ ገሲሶ፡ በድነ፡ ወካዕበ፡ ይደግም፡ ገሲሶ፡ ምንተ፡ በቊዖ፡ ተኀፅቦ።
31 ከማሁ፡ ሰብእ፡ ዘይጸውም፡ እንበይነ፡ ኀጢአቱ፡ ወካዕበ፡ የሐውር፡ ዳግመ፡ የአብስ። መኑ፡ እንከ፡ ይሰምዖ፡ ጸሎቶ፡ ሎቱ፡ ወምንተ፡ በቊዖ፡ አሕምሞ፡ ነፍሶ።
=== chapter 32 ===
[Chapter 32]
1 ዘየዐቅብ፡ ሕጎ፡ ያበውእ፡ መባአ።
2 ወዘያፀምእ፡ ትእዛዞ፡ ይሠውዕ፡ ለመድኀኒቱ።
3 ዕሴቶ፡ ያገብእ፡ ዘያበውእ፡ ስንዳሌ።
4 ወዘገብረ፡ ምጽዋተ፡ ሦዐ፡ መሥዋዕተ፡ ስብሐት።
5 ፈቃዱ፡ ለእግዚአብሔር፡ ከመ፡ ኢትግበር፡ እኩየ፡ ወሥምረቱ፡ ከመ፡ ትትገሐሥ፡ እምዐመፃ።
6 ኢትባእ፡ ቅድመ፡ እግዚአብሔር፡ ዕራቅከ።
7 ወግበር፡ ዘኵሎ፡ በእንተ፡ ትእዛዙ።
8 መሥዋዕቱ፡ ለጻድቅ፡ ያጠልሎ፡ ለምሥዋዕ፡ ወመዐዛሁ፡ ይበጽሕ፡ ቅድመ፡ ልዑል።
9 ወመሥዋዕቱ፡ ለብእሲ፡ ጻድቅ፡ ቅዱስ፡ ውእቱ፡ ወኢይትረሳዕ፡ ዝክሩ፡ ሎቱ።
10 በፍሡሕ፡ ዐይን፡ አእኵቶ፡ ለእግዚአብሔር፡ ወኢትኅድግ፡ አብኦ፡ እምውስተ፡ ቀዳሚ፡ ተግባር።
11 እንዘ፡ ፍሡሕ፡ ገጽከ፡ መጥዎ፡ ለኵሉ፡ ዘጸገውከ፡ ወእንዘ፡ ትትሐሠይ፡ አብእ፡ ዓሥራቲሁ፡ ለተግባርከ።
12 ወአብአ፡ ለእግዚአብሔር፡ በከመ፡ አኰቴቱ፡ ወአእምዘ፡ ረከብከ፡ ውስተ፡ እዴከ፡ አብእ፡ ሎቱ፡ በሠናይ፡ ዐይን።
13 እስመ፡ እግዚአብሔር፡ ያገብእ፡ ዕስየተ፡ ወየዐስየከ፡ ምስብዒተ።
14 ኢታብእ፡ ሎቱ፡ ሕልያነ፡ እስመ፡ ኢይትወከፍ፡ ለከ።
15 ወኢይምሰልከ፡ ዘይሰጠወከ፡ በአብኦ፡ ዐመፃ፡ እስመ፡ እግዚአብሔር፡ መኰንነ፡ ጽድቅ፡ ውእቱ፡ ወኢያደሉ፡ ለገጽ።
16 ወኢይሠዚ፡ እንበይነ፡ ነዳይ፡ ወይሰምዖ፡ ዐውያቶ፡ ለግፉዕ።
17 ወኢይጸመም፡ ጸሎቶ፡ ለእጓለ፡ ማውታ፡ ወእቤረ፡ ብእሲተኒ፡ ለእመቦ፡ ዘአግዐራ።
18 ወአውረደት፡ አንብዐ፡ ዲበ፡ መላትሒሃ።
19 ከማሁ፡ ያውርድ፡ ዐውያተ፡ ዲበ፡ ዘአግዐራ።
20 ለዘይፀመዶ፡ በጽድቅ፡ ይትወከፍ፡ ሎቱ፡ ወተዐርግ፡ እስከ፡ ደመና፡ ጸሎቱ።
21 ወጸሎተ፡ ነዳይሰ፡ ትትዐዶ፡ እምደመና፡ ወኢትትመየጥ፡ እስከ፡ ትበጽሕ፡ ኀቤሃ፡ ወኢትገብእ፡ እስከ፡ ይሬእያ፡ እግዚአብሔር።
22 ወይፈትሕ፡ ሎሙ፡ ለጻድቃን፡ ወይትቤቀል፡ ሎሙ፡ ወኢይጐነዲ፡ እግዚአብሔር፡ ላዕሌሆሙ፡ ወኢይትዔገሥ፡ በእንቲአሆሙ፡ እስከ፡ ይቀጠቅጦሙ፡ ሐቋሆሙ።
23 ወይትቤቀሎሙ፡ ለአሕዛብ፡ ወይሤርዎሙ፡ ለኵሎሙ፡ ዐማፅያን፡ ወይሰብራ፡ ለበትረ፡ ኃጥኣን።
24 ለኵሉ፡ ሰብእ፡ ይፈድዮ፡ በከመ፡ ምግባሩ፡ ወለኵሉ፡ እጓለ፡ እመሕያው፡ በበ፡ ምግባሮሙ፡ ወበበ፡ ፍኖቶሙ።
25 እስከ፡ ይትቤቀል፡ በቀለ፡ ሕዝቡ፡ ወያስተፌሥሖ፡ በምሕረቱ።
26 ብፁዕ፡ ዘይረክብ፡ ሣህለ፡ በመዋዕለ፡ ሕማሙ፡ ከመ፡ ደመና፡ ዝናም፡ ውስተ፡ ብሔረ፡ መርቄ።
=== chapter 33 ===
[Chapter 33]
1 ተሣሀለነ፡ እግዚኦ፡ አምላከ፡ ኵሉ፡ ኀይል፡ ወተመየጠነ።
2 ፈኑ፡ ፍርሀተከ፡ ላዕለ፡ ኵሉ፡ አሕዛብ።
3 ወአንሥእ፡ እዴከ፡ ላዕለ፡ ሕዝብ፡ ነኪር፡ ወይርአዩ፡ ኀይለከ።
4 በከመ፡ እንዘ፡ ይሬእዩ፡ እሙንቱ፡ ተቀደስከ፡ በኀቤነ፡ ከማሁ፡ እንዘ፡ ንሕነሂ፡ ንሬኢ፡ ተሰባሕ፡ በኀቤሆሙ።
5 ወያአምሩከ፡ እሙንቱኒ፡ በከመ፡ አእመርናከ፡ ንሕነ፡ እስመ፡ አልቦ፡ አምላክ፡ ዘእንበሌከ፡ እግዚኦ።
6 አርኢ፡ ተኣምሪከ፡ ወክሥት፡ ስብሐቲከ።
7 በኀይለ፡ እዴከ፡ ወበክብረ፡ የማንከ።
8 አምጽእ፡ መንሱተ፡ ወፈኑ፡ መቅሠፍተ።
9 ወሠርዎ፡ ለዐማፂ፡ ወቀጥቅጦ፡ ለፀራዊ።
10 ተዘከር፡ መሐላሆሙ፡ ወአፍጥና፡ ለዕለቶሙ፤….።
11 ወቅሥፎሙ፡ በመዐት፡ ወበእሳት፡ ወአጥፍኦሙ፡ ለእለ፡ አምሠጡ፡ እምውስቴቶሙ፡ ወእለ፡ አሕሠሙ፡ ላዕለ፡ ሕዝብከ፡ ይርከቦሙ፡ ሞቶሙ።
12 ወስብሮሙ፡ አርእስቲሆሙ፡ ለመላእክተ፡ ፀር፡ እለ፡ ይብሉ፡ አልቦ፡ ባዕደ፡ ዘእንበሌነ።
13 ወአስተጋብኦሙ፡ ለኵሎሙ፡ ዘርአ፡ ያዕቆብ።
=== chapter 34 ===
[Chapter 34]
1 ለሠናይ፡ ልብ፡ ወለጥዑም፡ እክል፡ ኢይሜንንዎ። ትጋሁ፡ ለብዕል፡ ያቋቊዕ፡ አዕፅምተ፡ ወነፍስተ፡ ወኀልዮ፡ ንዋይ፡ ያሰርር፡ ንዋመ።
2 ወኀልዎ፡ ዘይትሐዘብ፡ ያኀልቅ፡ ንዋመ፡ በድቃስ፡ ክቡድ፡ ሕማም፡ ያተግህ፡ ወአልቦ፡ ንዋም።
3 የዐውድ፡ ባዕል፡ ከመ፡ ይዝግብ፡ ንዋየ፡ ወእንተ፡ ጊዜ፡ ያዐርፍኒ፡ ይፈግዕ፡ በጽጋብ።
4 ይሰርሕ፡ ነዳይ፡ በኀጢአ፡ ንዋይ፡ ወሶበ፡ እምአዕረፈኒ፡ ይገብእ፡ ውስተ፡ [ስኢ]ል።
5 ኢይጸድቅ፡ ዘያፈቅር፡ ንዋየ፡ ወዘያፈቅራ፡ ለኀጢአት፡ ይተልዋ።
6 ብዙኃን፡ እለ፡ ወድቁ፡ እንበይነ፡ ንዋይ፡ ወርእይዎ፡ ለሞቶሙ፡ ቅድመ፡ ገጾሙ።
7 ዕፀ፡ እቅፍት፡ ይእቲ፡ ለኵሎሙ፡ እለ፡ የኀሥሥዋ፡ ወኵሉ፡ አብድ፡ ይትዐቀፍ፡ ቦቱ።
8 ብፁዕ፡ ባዕል፡ ዘንጹሕ፡ እምኀጢአት፡ ወዘኢያትለወ፡ ልቦ፡ ድኅረ፡ ንዋይ።
9 መኑ፡ እንጋ፡ ውእቱ፡ ወናስተበፅዖ፡ ዘገብረ፡ ሠናየ፡ ላዕለ፡ ሕዝቡ።
10 መኑ፡ እንጋ፡ ዘተመከረ፡ ቦቱ፡ ወኢስሕተ፡ ወውእቱ፡ ኮኖ፡ ምክሐ፡ መኑ፡ እንጋ፡ እንዘ፡ ይክል፡ አሐሥሞ፡ ዘኢያሐሥም፡ ወመኑ፡ እንዘ፡ ይክል፡ ገቢረ፡ ኀጢአት፡ ወኢይገብር።
11 ለትጽናዕ፡ በረከቱ፡ ወይሰማዕ፡ ምጽዋቲሁ፡ በውስተ፡ ሕዝብ።
12 ወእምከመ፡ ነበርከ፡ ውስተ፡ ማእድ፡ ዐቢይ፡ ኢታርኁ፡ ጕርዔከ፡ ላዕሌሁ፡ ወኢትበል፡ ብዙኀ፡ ሠርዑ፡ ውስቴቱ።
13 ተዘከር፡ ከመ፡ እኩይ፡ ዐይነ፡ ሰብእ፡ ምንት፡ የአኪ፡ እምነ፡ ዐይነ፡ እጓለ፡ እመሕያው፡ ወእንበይነዝ፡ ታነብዕ፡ ዐይን።
14 ኢትሠሥዕ፡ ውስተ፡ ኵሉ፡ ዘርኢከ፡ ወኢትጥማዕ፡ እደተከ፡ ወኢትኅሥሥ፡ አጽሕልተ፡ ወኢትልሐስ፡ መጻብኅተ።
15 አእምር፡ ዘአምስሐከ፡ ቢጽከ፡ ወጠይቅ፡ ኵሎ፡ ዘአቅረበ፡ ለከ።
16 ወብላዕ፡ ከመ፡ ብእሲ፡ ጠቢብ፡ ዘሠርዑ፡ ለከ፡ ወኢትልሳሕ፡ እንዘ፡ ትመጽር፡ ከመ፡ ኢታጽልኦ፡ ለቢጽከ።
17 ቅድም፡ እምኵሉ፡ ኀዲገ፡ ከመ፡ ጠቢብ፡ ወኢተሐሲ፡ ወኢትኩን፡ ከመ፡ ዘኢይጸግብ።
18 እመኒ፡ ማእከለ፡ ብዙኃን፡ ነበርከ፡ ኢትቅድም፡ አውርዶ፡ እደተከ።
19 በዐቅሙ፡ ብላዕ፡ ከመ፡ ብእሲ፡>ጠቢብ፡ ዘኅዳጥ፡ የአክሎ፡ ወኢይክበድከ፡ ነፍስትከ፡ በውስተ፡ ምስካብከ።
20 ጥዑይ፡ ንዋሙ፡ ለዘይዔቅማ፡ ለነፍሱ፡ ሶበኒ፡ ይነቅህ፡ በጽባሕ፡ ኢይደበድብ፡ ነፍስቱ፡ ለብእሲሰ፡ ሥሡዕ፡ ዘኢይጸግብ፡ ደዌሁ፡ ቅንጣዌ፡ ወገብጥ፡ ወጥዋይ።
21 እመኒ፡ አገበሩከ፡ ትብላዕ፡ ብድሮሙ፡ ተንሥእ፡ ወአዕርፍ።
22 አፅምአኒ፡ ወልድየ፡ ወኢታስትት፡ ተግሣጽየ፡ ወድኅረ፡ ትረክቦ፡ ለነገርየ። ኢትኩን፡ ፅቡሰ፡ በኵሉ፡ ዘገበርከ፡ ከመ፡ ኢትኅጣእ፡ ወኢምንተኒ።
23 ለጸጋዊሰ፡ ይድኅርዎ፡ በሥነ፡ ምግባሩ፤….።
24 ወለደንጻዊ፡ ይረግም፡ በእከየ፡ ግዕዙ፤….።
25 እምከመ፡ ሰተይከ፡ ኢትዝኀር፡ እስመ፡ ለብዙኃን፡ አስሐቶሙ፡ ስታይ።
26 በምንሃብ፡ ያሜክርዎ፡ ለኀጺን፡ ጽኑዕ፡ ከማሁ፡ ወይንሂ፡ በውስተ፡ ልቦሙ፡ ለዕቡያን።
27 ሕይወቱ፡ ለሰብእ፡ ሰትየ፡ ወይን፡ ወትፍሥሕት፡ ውእቱ፡ ለዘይሰትዮ፡ በዐቅሙ፡ ምንትኑ፡ ሕይወቱ፡ ለዘኢይሰቲ፡ ወይነ፡ እስመ፡ ውእቱ፡ ለትፍሥሕተ፡ እጓለ፡ እመሕያው፡ ተፈጥረ።
28 ትፍሥሕትኒ፡ ውእቱ፡ ለልብ፡ ወሐሤት፡ ውእቱ፡ ለነፍስ፡ ሠናይ፡ ሰትየ፡ ወይን፡ በዐቅሙ፡ ወበጊዜሁ።
29 ሐዘና፡ ለልብ፡ ያረስዕ፡ ወይን፡ ለዘይላሑ፡ ወለዘይቴክዝ፡ አስትዮ፡ ወይነ።
30 ወአብድሰ፡ እምከመ፡ ሰትየ፡ ያበዝኅ፡ ላኳ፡ ወይስሕት፡ ወይጌጊ፡ ብዙኀ፡ ሰትይ፡ ኢያረክብ፡ ኀይለ፡ ወኢያኀጥእ፡ ቊስለ።
31 ወኢትገሥጽ፡ ቢጸከ፡ እንዘ፡ ስቱይ፡ ወይነ፡ ወኢታተክዞ፡ እንዘ፡ ፍሡሕ፡ ውእቱ፡ ልቡ፡ ወኢትንግሮ፡ ዘተሐይሶ፡ ወኢታጽሕቦ፡ ወኢትስአሎ፡ ትካዘከ፡ እንዘ፡ ስኩር፡ ውእቱ።
=== chapter 35 ===
[Chapter 35]
1 ወእመኒ፡ ሤሙከ፡ መልአከ፡ ኢታዕቢ፡ ርእሰከ፡ ኩን፡ ከማሆሙ፡ ከመ፡ ፩ዱ፡ እምኔሆሙ፡ ወተክዝ፡ ትካዞሙ፡ ወንበር።
2 ኰንኖሙ፡ ከመ፡ ትርከብ፡ አክሊለ፡ ክብር፡ ፈጺመከ፡ መልእክተከ።
3 ንብብ፡ አረጋዊ፡ ወይደልወከ፡ ወኢትጸመም፡ ለሠናይ፡ ነገር፡ ትምህርተ፡ ጥበብከ።
4 ኢታይድዕ፡ ቃለከ፡ ለኵሉ፡ ዘሐተተከ፡ ወኢትጠበብ፡ በከመ፡ ረከብከ።
5 ከመ፡ ዕንቊ፡ ክቡር፡ ውስተ፡ ሰርጐ፡ ወርቅ፡ ከማሁ፡ ማሕሌት፡ በኀበ፡ ይሰትዩ፡ ወይነ።
6 ወከመ፡ መረግድ፡ ውስተ፡ ባዝግና፡ ወርቅ፡ ከማሁ፡ ሐዋዝ፡ ማሕሌት፡ ወመሰንቆ፡ በቤተ፡ ስታይ።
7 ንብብ፡ ወሬዛ፡ ለእመ፡ አብሑከ፡ እምዕጹብ፡ ንግር፡ ሶበ፡ ዳግመ፡ ተስእሉከ።
8 ምዕረ፡ አውሢአከ፡ ሶቤሃ፡ ፈጽም፡ ቃለከ፡ ወእንዘ፡ ታአምር፡ አርምም፡ አፉከ።
9 ወኢትንበር፡ ማእከለ፡ ዐበይት፡ እንዘ፡ ባዕድ፡ ይነግር፡ ኢታይድዕ፡ ቃለከ።
10 ከመ፡ ይረውጽ፡ መብረቅ፡ ቅድመ፡ ነጐድጓድ፡ ከማሁ፡ ሞገሱ፡ ቅድመ፡ ገጹ፡ ለዘየኀፍር።
11 ኵሎ፡ በጊዜሁ፡ ወበዐቅሙ፡ ግበር፡ አቲወከ፡ ቤተከ፡ ወበህ፡ ተፈሣሕ።
12 ወተዋነይ፡ ወግበር፡ ኵሎ፡ ዘመፍትው፡ ዘትፈቅድ፡ ዑቅ፡ ኢትንብብ፡ ነገረ፡ ትዕቢት፡ ወኢተአብስ፡ በቃልከ።
13 ምስለ፡ ዝንቱ፡ ኵሉ፡ አእኵቶ፡ ለፈጣሪከ፡ ወውእቱ፡ ያጸግበከ፡ እምነ፡ ኵሉ፡ በረከቱ።
14 ዘይፈርሆ፡ ለእግዚአብሔር፡ ይገኒ፡ ለተግሣጹ፡ ወእለኒ፡ ይገይሱ፡ ኀቤሁ፡ ይረክቡ፡ ፍትወቶሙ።
15 ወዘየኀሥሦ፡ ለሕጉ፡ ይጸግብ፡ እምውስቴቱ፡ ወዘሰ፡ ይናፍቅ፡ ቦቱ፡ ይወድቅ፡ ወይጌጊ።
16 እለ፡ ይፈርህዎ፡ ለእግዘአብሔር፡ ይፈትሕ፡ ሎሙ፡ ወቀትረ፡ መዓልት፡ ይትቤቀል፡ በቀሎሙ።
17 ወብእሲሰ፡ ኃጥእ፡ ኢያፀምእ፡ ዘይጌሥጽዎ፡ ወኵሉ፡ ከማሁ፡ ይመስሎ፡ በልቡ።
18 ብእሲ፡ ጠቢብ፡ አልቦ፡ ዘይገብር፡ ዘእንበለ፡ ምክር፡ ፀራይ፡ ወዕቡይ፡ ዘይቴክዝ፡ ፍርሀተ፡ ይገብር፡ እንበለ፡ ምክር።
19 ወአንተሰ፡ ወልድየአልቦ፡ ዘትገብር፡ ዘእንበለ፡ ምክር፡ ወዘኒ፡ ገበርከ፡ ኢታማስን።
20 ወኢትሖር፡ ፍኖተ፡ በዳ፡ ከመ፡ ኢትትዐቀፍ፡ በእብነ፡ መንሱት።
21 ኢትተአመኖ፡ ለጸላኢከ፡ በሐቅል።
22 ወኢትትአመን፡ ወልደከሂ፡ ዘኢየሐውር፡ በግዕዝከ።
23 ወበኵሉ፡ ዘገበርከ፡ አስተፍሥሓ፡ ለነፍስከ፡ ወበኵሉ፡ ዕቀብ፡ ትእዛዞ።
24 ዘይፈርህ፡ ሕጎ፡ ያፀምእ፡ ትእዛዘ፡ መጽሐፉ፡ ወዘይትአመን፡ በእግዚአብሔር፡ አልቦ፡ ዘየኀጥእ።
=== chapter 36 ===
[Chapter 36]
1 ለፈራሄ፡ እግዚአብሔር፡ ኢይረክቦ፡ እኩይ፡ እንበለ፡ ከመ፡ ያመክርዎ፡ ወይድኅን፡ እምኔሃ።
2 ብእሲሰ፡ ጠቢብ፡ ያፈቅር፡ ሰሚዐ፡ መጽሐፍ፡ ወዘሰ፡ ይናፍቅ፡ ወኢይትአመን፡ በመጽሐፉ፡ ይከውን፡ ከመ፡ ሐመር፡ እንተ፡ ታንኮልል፡ ማእከለ፡ ዐውሎ።
3 ብእሲ፡ የቢብ፡ ይትአመን፡ ወይገኒ፡ በሕጉ፡ ለእግዚአብሔር፡ ወእግዚአብሔር፡ ይከውኖ፡ ምእመኖ፡ ወያስተፌሥሖ።
4 አስተዳሊወከ፡ ዘትነብብ፡ ቃለከ፡ [አስምዕ]፡ ወቈጺረከ፡ ምክረ፡ ዘትገብር፡ አውሥእ።
5 ከመ፡ መንኰራኵረ፡ ሰረገላ፡ ልቡ፡ ለአብድ፡ ወከመ፡ መንኮኮት፡ እንተ፡ ተዐውድ፡ ከማሁ፡ ምክሩ፡ ለፈራህ።
6 ፈረስ፡ ገይድ፡ ከመ፡ ዐርክ፡ ኄር።
7 በእፎ፡ ዕለት፡ እምዕለት፡ ትነውኅ፡ እንዘ፡ ኵሉ፡ መዋዕለ፡ ዓመት፡ በብርሃነ፡ ፀሓይ፡ የሐውር።
8 ወበትእዛዘ፡ እግዚአብሔር፡ ይትፈለጥ፡ ኵሉ፡ መዋዕል፡ ወጊዜ፡ በዓላቲሁ፡ በኁላቋሁ፡ ይትዐወቅ።
9 እምውስተ፡ መዋዕልኒ፡ ቦ፡ ዘቀደሰ፡ ወአዕበየ፡ ወፈለጠ፡ እምውስቴቶሙ፡ ክረምተ፡ ወማእረረ፡ ወሐጋየ፡ በበ፡ ኁላቋሆሙ፡ ወበበ፡ ጊዜሆሙ።
10 ወኵልነ፡ እጓለ፡ እመሕያው፡ እምውስተ፡ መሬት፡ ንሕነ፡ ወእምነ፡ ምድር፡ ተፈጥረ፡ አዳም።
11 ወሌለዩ፡ እግዚአብሔር፡ በብዝኀ፡ ጥበቢሁ፡ ወሠርዖሙ፡ ፍናዊሆሙ።
12 ወቦ፡ እለ፡ ባረከ፡ እምውስቴቶሙ፡ ወአዕበዮሙ፡ ወቦ፡ እለ፡ ቀደሰ፡ እምውስቴቶሙ፡ ወአስተርአየ፡ ሎሙ፡ ወቦ፡ እለ፡ ረገመ፡ እምውስቴቶሙ፡ ወአኅሰሮሙ፡ ወዐለዎሙ፡ በከመ፡ ምግባሮሙ።
13 ከመ፡ ጽቡር፡ ውስተ፡ እዴሁ፡ ለለብሓዊ፡ ከማሁ፡ ንሕነ፡ በኀቤሁ፡ ወኵሉ፡ ግብሩ፡ የሐውር፡ በፍናዊሁ፡ ወከማሁ፡ ሰብእኒ፡ ውስተ፡ እደ፡ ፈጣሪሁ፡ ወይፈድዮ፡ ለኵሉ፡ በከመ፡ ምግባሩ።
14 መናቅዕቲሃ፡ ለእኪት፡ ሠናይት፡ ወመናቅዕቲሃ፡ ለሞት፡ ሕይወት፡ ከማሁ፡ መናቅዕቲሁ፡ ለጻድቅ፡ ኃጥእ።
15 ወምስለ፡ ኵሉዝ፡ ርኢ፡ ግብሮ፡ ለልዑል፡ ወኵሉ፡ በበክልኤቱ፤፩፩በበዚአሁ።
16 አንሰ፡ ድኅረ፡ ኀለይክዎ፡ ለዝንቱ፡ ወኀሠሥክዎ፡ እምጥንቱ።
17 ተሣሀለነ፡ እግዚኦ፡ አሕዛበከ፡ እለ፡ ተሰምዩ፡ በስምከ፡ ወለእስራኤልሂ፡ እለ፡ በበኵርከ፡ አስተማሰልከ።
18 ተሣሀል፡ ሀገረ፡ ቅድሳቲከ፡ ወኢየሩሳሌምሂ፡ ሀገረ፡ ማኅደረ፡ ምዕራፊከ።
19 ወምልኣ፡ ለጽዮን፡ በረከተ፡ ቃልከ፡ ወእምነ፡ ስብሐቲከ፡ ላዕለ፡ ሕዝብከ።
20 ወሀቦሙ፡ ሕገ፡ ለቀደምት፡ [ፍጡራኒከ]፡ ወአቅም፡ ነቢያተ፡ ለስምከ።
21 ወሀቦሙ፡ ዕሴቶሙ፡ ለእለ፡ ተሰፈዉከ፡ ከመ፡ ይእመንዎሙ፡ ለነቢያቲከ።
22 ስማዕ፡ እግዚኦ፡ ጸሎቶሙ፡ (ለነቢያቲከ፡ወ)ለአግብርቲከ፡ በረከተ፡ አሮን፡ ፈኑ፡ ላዕለ፡ ሕዝብከ፡ ወያእምሩ፡ ኵሎሙ፡ እለ፡ ሀለዉ፡ ዲበ፡ ምድር፡ ከመ፡ አንተ፡ ውእቱ፡ እግዚአብሔር፡ አምላክ፡ ዘለዓለም።
23 ኵሉ፡ እክል፡ ይትበላዕ፡ ወይወርድ፡ ውስተ፡ ከርሥ፡ ወባሕቱ፡ ቦ፡ እክል፡ ዘይጥእም፡ እምእክል።
24 ወጕርዔ፡ ይፈልጦ፡ ለኵሉ፡ ጣዕመ፡ እክል፡ ወከማሁ፡ ልቡ፡ ለጠቢብ፡ ይፈልጥ፡ ነገረ፡ ሐሰት።
25 ልብ፡ እኩይ፡ ያመጽእ፡[ሐዘነ፤]፡ ወብእሲ፡ ዘብዙኀ፡ ሐመ፡ ይለምዶ፡ ትዕግሥቱ።
26 ኵሉ፡ ተባዕት፡ ይትወከፍ፡ አንስተ፡ ወቦ፡ ብእሲት፡ እንተ፡ ትሤኒ፡ እምብእሲት።
27 ላሕያ፡ ለብእሲት፡ ያበርሆ፡ ለገ[ጽ]፡ እምኵሉ፡ ፍትወተ፡ ብእሲ፡ ይእቲ፡ ተዐቢ።
28 ወእመሰ፡ የዋህ፡ ይእቲ፡ ወሠናይ፡ ቃላ፡ ኢኮነ፡ ከመ፡ እጓለ፡ እመሕያው፡ ምታ።
29 ዘአውሰበ፡ ብእሲተ፡ ኄርተ፡ ረከበ፡ ተድላሁ፡ እስመ፡ ረዳኢቱ፡ ወዐምደ፡ ምስማኩ፡ ይእቲ።
30 ከመ፡ ዘአልቦ፡ ጥቅመ፡ ወይሰረቅ፡ ንዋዩ፡ ከማሁ፡ ዘአልቦ፡ ብእሲተ፡ ምንዱበ፡ ይነብር።
31 መኑ፡ ዘይትሐበዮ፡ ለሰራቂ፡ ዘይትፋለስ፡ ሀገረ፡ እምሀገር፡ ከማሁ፡ ለብእሲኒ፡ ዘአልቦ፡ ውሉደ፡ ወአልቦ፡ ንብረተ፡ ዘኀበ፡ መስዮ፡ ይበይት።
=== chapter 37 ===
[Chapter 37]
1 ኵሉ፡ ዘተዓረኮ፡ ይብል፡ ተዓረኩ፡ አነኒ፡ ባሕቱ፡ ቦቱ፡ ዐርከ፡ ለስም፡ በከ፡ ዘይትዓረክ።
2 ወሐዘንሰ፡ ይነብር፡(ውስተ፡ ልብ፡)እስከ፡ አመ፡ ዕለተ፡ ሞት፡(ወቦ፡)ዐርክ፡ ዘይከውነከ፡ ጸላኤ።
3 እኪት፡ ፍትወት፡ እምአይቴኑ፡ አንኰርኰርኪ፡ ወመላእኪ፡ ውስተ፡ ብሔር፡ ኀጢአተ።
4 ወቦ፡ ዐርክ፡ ዘይቀርበከ፡ አመ፡ ትፍሥሕትከ፡ ወእምከመ፡ ተመንደብከ፡ ውእቱ፡ ይከውነከ፡ ፀረከ።
5 ወቦ፡ ዐርክ፡ ዘእንበይነ፡ ከርሡ፡ ይቴክዝ፡ ለከ፡ ሕማመከ፡ ወእምከመቦ፡ ዘዐለወከ፡ ውእቱ፡ ይቀድም፡ ይትቃተለከ።
6 ኢትርሳዕ፡ ዐርከከ፡ እምከመ፡ ተደሎከ፡ ወኢትኅድጎ፡ ለእምከመ፡ ንዋየ፡ ረከብከ።
7 ኵሉ፡ መምክር፡ ያመክር፡ ምክረ፡ ወቦ፡ ዘያመክር፡ ዘይበቊዕ፡ ለርእሱ።
8 ዕቀብ፡ ልበከ፡ እምነ፡ ዘያመክረከ፡ ቅድም፡ አእምር፡ ትካዞ፡ በዘይፈቅደከ፡ እስመ፡ እንበይነ፡ ርእሱ፡ ያመክረከ።
9 ወይብለከ፡ ሠናየ፡ ገበርከ፡ ወያመጽእ፡ ለከ፡ በዘ፡ ያሀጕለከ፡ ንዋየከ፡ ወእምከመ፡ ተጸነስከ፡ ይኔጽረከ፡ ወይሥሕቅ፡ ላዕሌከ።
10 ኢትትማከር፡ ምስለ፡ ዘይትዐቀበከ፡ ወኅባእ፡ ቃለከ፡ እምነ፡ ዘይትኃሠሠከ።
11 ኢትትናገር፡ ምስለ፡ ብእሲት፡ በዘታቀንኣ፡ ወኢትትማከር፡ ምስለ፡ ፈራህ፡ እንበይነ፡ ፀብእ፡ ኢትትማከር፡ እንበይነ፡ ረባሕ፡ ምስለ፡ ሠያጢ፡ ወኢትትማከር፡ ምስለ፡ ነጋዲ፡ እንበይነ፡ ተግባር፡ ወኢትትማከር፡ ምስለ፡ ደንጻዊ፡ ለውሂበ፡ ምጽዋት፤ወኢትትማከር፡ ምስለ፡ ዐላዊ፡ ለአግብኦ፡ ዕሴት፡ ወኢትትማከር፡ ምስለ፡ ሀካይ፡ በእንተ፡ ግብር፡ ወኢትትማከር፡ ምስለ፡ ዐሳብ፡ እንበይነ፡ ጥብዖት፡ ወኢትትማከር፡ ምስለ፡ አብድ፡ እንበይነ፡ ኪን፤(ቅኒ፡ ነባሬከ፡ ወኢታንብሮ፡ ፅሩዐ፤)ወምስለዝ፡ ኵሉ፡ አልቦ፡ ዘትትማከሮሙ፡ እንበይነ፡ ዝነገር።
12 ምስለ፡ ብእሲ፡ ጻድቅ፡ ዘልፈ፡ ተናገር፡ ምክረከ፡ ዘታአምር፡ ከመቦ፡ ሃይማኖተ፡ ወይፈርህ፡ እግዚአብሔር፡ ዘከመ፡ ልብከ፡ ልቡ፡ ወእመኒ፡ ተከዝከ፡ የሐምም፡ ሕማመከ።
13 ወአቅም፡ ምክረ፡ ነፍስከ፡ እስመ፡ ይእቲ፡ እምኵሉ፡ ምእመንከ።
14 እስመ፡ ነፍሱ፡ ለሰብእ፡ እንተ፡ ትረክቦ፡ ታሐዝቦ፡ ፈድፋደ፡ እምነ፡ ፯ቱ፡ አስባብ፡ ሰብአ፡ ዐይን።
15 ምስለ፡ ዝንቱ፡ ኵሉ፡ ጸሊ፡ ኀበ፡ ልዑል፡ ከመ፡ ያርትዓ፡ በንጹሕ፡(በጽድቅ፡)፡ ለፍኖትከ።
16 ቀዳሜ፡ ኵሉ፡ ትካዝ፡ ነገር፡ ወቀዳሜ፡ ኵሉ፡ ግብር፡ ምክር።
17 አሠረ፡ ልቡ፡ ለብእሲ፡ መርብዕተ፡ ያስተርኢ።
18 ለእመኒ፡ ለሐዘን፡ ወለእመኒ፡ ለትፍሥሕት፡ እመኒ፡ ለሞት፡ ወእመኒ፡ ለሕይወት፡ ወልሳን፡ ያመጽኦሙ፡ ለኵሎሙ።
19 ወቦ፡ ሰብእ፡ ዘበኵሉ፡ ይትሜየን፡ ወብዙኀ፡ ያአምር፡ ወኢይክል፡ በቊዖታ፡ ለነፍሱ።
20 ወቦ፡ ዘይጠብብ፡ በነገር፡ ወያጸልእ፡ ርእሶ፡ ወለዘ፡ ከመዝ፡ የኀልፎ፡ ኵሉ፡ ረባሕ።
21 እስመ፡ ኢይሁቦ፡[እግዚአብሔር፡]ሞገሰ፡ ወወጽአ፡ እምኵሉ፡ ጥበብ።
22 ሀሎ፡ ዘይጠብብ፡ ለነፍሱ፡ ወይዪውህ፡ በቃሉ።
23 ብእሲ፡ ጠቢብ፡ ይጌሥጾሙ፡ ለሕዝቡ፡ ወይሜህሮሙ፡ ጥበበ፡ ለሰብኡ።
24 ብእሲ፡ ጠቢብ፡ ይጸግብ፡ እምበረከቱ፡ ወያስተበፅዕዎ፡ ኵሎሙ፡ እለ፡ ይሬእይዎ።
25 መዋዕሊሁ፡ ለእጓለ፡ እመሕያው፡ በኈልቊ፡ ወመዋዕሊሁ፡ ለእስራኤል፡ ዘኢይትኌለቊ።
26 ዘጠበበ፡ በሕዝቡ፡ ይረክብ፡ ዕሴቶ፡ ወይነብር፡ ስሙ፡ ለዝላፉ።
27 ወልድየ፡ እንዘ፡ ሕያው፡ አንተ፡ አመክራ፡ ለነፍስከ፡ አእምር፡ ዘይብእሳ፡ ወኢተሀባ።
28 እስመ፡ አኮ፡ ኵሉ፡ ዘይደልዋ፡ ወአኮ፡ ኵሉ፡ ዘታስተአድም፡ ኵሉ፡ ነፍስ።
29 ወኢትሠሥዕ፡ ለኵሉ፡ መብልዕ፡ ወኢተሐሢ፡ ለኵሉ፡ እክል፡ ዘርኢከ።
30 እስመ፡ ያደዊ፡ ብዙኀ፡ በሊዕ፡ ወያበዝኆ፡ ለገብጥ፡ ሥሥዕት።
31 ወብዙኃን፡ እለ፡ ቀተሎሙ፡ ሥሥዕት፡ ወዘሰ፡ በዐቅሙ፡ ይበልዕ፡ ጥዑይ፡ ነፍሱ።
=== chapter 38 ===
[Chapter 38]
1 አክብሮ፡ ለዐቃቤ፡ ሥራይ፡ እስመ፡ በከመ፡ እዴሁ፡ ከማሁ፡ ክብሩ፡ እስመ፡ ሎቱኒ፡ እግዚአብሔር፡ ፈጠሮ።
2 እንዘ፡ ሕይወትሰ፡ በኀበ፡ እግዘአብሔር፡ ወፍተኒ፡ እምኀበ፡ ንጉሥ፡ ይነሥእ።
3 በጥበቢሁ፡ ለዐቃቤ፡ ሥራይ፡ ያከብሮ፡ ኵሉ፡ ወይትአኰት፡ በኀበ፡ መኳንንት።
4 እግዚአብሔር፡ ፈጠረ፡ ሥራያተ፡ እምነ፡ ምድር፡ ወብእሲሰ፡ ጠቢብ፡ ኢይሜንኖ።
5 አኮኑ፡ በዕፅ፡ ጥዕመ፡ ማይ፡ ከመ፡ ያእምሮ፡ ኀይሎ።
6 ወውእቱ፡ ወሀቦሙ፡ ለእጓለ፡ እመሕያው፡ ጥበብ፡ ከመ፡ ይከብሩ፡ በስብሐቲሁ።
7 ወቦቱ፡ ይፌውሶሙ፡ ወያሴስል፡ ኵሎ፡ ሕማሞሙ።
8 እምውስቴቱ፡ ይገብሩ፡ ሥራያተ፡ በዘ፡ ይፌውሱ፡ ወውእቱ፡ ያመጽእ፡ ሰላመ፡ ለብሔር።
9 ወልድየ፡ ኢትጸመም፡ ሕማመከ፡ ጸሊ፡ ኀበ፡ እግዚአብሔር፡ ወውእቱ፡ ይፌውሰከ።
10 ወኅድጋ፡ ለኀጢአት፡ ወአርትዕ፡ እዴከ፡ ወአንጽሕ፡ [ልብከ]፡ እምኵሉ፡ ዐመፃ።
11 አብአ፡ መባአከ፡ ወተዘከር፡ ስንዳሌ፡ ወአሥብሕ፡ መሥዋዕተከ፡ በከመ፡ ይትከሀለከ።
12 ወግበር፡ ሎቱ፡ ፍኖተ፡ ለዐቃቤ፡ ሥራይ፡ እስመ፡ ሎቱኒ፡ እግዘአብሔር፡ ፈጠሮ፡ ወኢታርሕቆ፡ እምኀቤከ፡ እስመ፡ ሎቱኒ፡ ትፈቅዶ።
13 እስመቦ፡ ጊዜ፡ ይከውን፡ አሶት፡ በእዴሆሙ።
14 እስመ፡ እሙንቱኒ፡ ይስእሉ፡ ኀበ፡ እግዚአብሔር፡ ከመ፡ ይርድኦሞ፡ ወየሀቦሙ፡ ዕረፍተ፡ ወከመ፡ ይፌውስ፡ ሎሙ፡ በኵሉ፡ ጊዜ።
15 ወዘይኤብስ፡ ቅድመ፡ ፈጣሪሁ፡ ይወድቅ፡ በእደ፡ ዐቃቤ፡ ሥራይ።
16 ብኪ፡ ወልድየ፡ ላዕለ፡ ዘሞተ፡ ወላሕዎ፡ ወአሕምም፡ ርእሰከ፡ ወበከመ፡ ግዕዙ፡ ግበር፡ ሎቱ፡ ወቅብሮ፡ ወኢትጸመም፡ ሞቶ፡ (ለዘ፡ ተልእከከ)።
17 አምርረ፡ በኪዮቶ፡ ወአዕምቅ፡ ላሕዎቶ፡ ወለሕዎ፡ በከመ፡ ግዕዙ፡ አሐተ፡ ዕለተ፡ ወሰኑየ፡ መዋዕለ፡ እንበይነ፡ ሕግ፡ ወእምዝ፡ ንግፍ፡ ላሐከ።
18 ሐዘን፡ ኢይባእከ፡ እስመ፡ ብዙኃን፡ እለ፡ ሞቱ፡ እንበይነ፡ ሐዘን፡ እስመ፡ ሐዘኑ፡ ለልብ፡ ይሰብሮ፡ ለኀይል።
19 ወያበጽሕ፡ ለሞት፡ ሐዘን፡ ወትካዝ፡ ወኵሉ፡ መዋዕሊሁ፡ ለነዳይ፡ የኀልቅ፡ በትካዝ።
20 ኢታብእ፡ ሐዘን፡ ውስተ፡ ነፍስከ፡ አርሕቃ፡ ለሐዘን፡ እምኔከ።
21 ወአእምር፡ ከመ፡ አልባቲ፡ ፈውስ፡ ወርእስከኒ፡ ታሐምም፡ ወአልቦ፡ ዘትበቊዕ።
22 ርኢ፡ በላዕሌየ፡ ዘተፈደይኩ፡ አነኒ፡ ወአእምር፡ ከመ፡ ከማሁ፡ ትትፈደይ፡ አንተሂ፡ አነ፡ ዮም፡ ወአንተ፡ ጌሠም።
23 ዘሞተሰ፡ አዕረፈ፡ ወባሕቱ፡ ግበር፡ ሎቱ፡ ተዝካሮ፡ ወእምዝ፡ ንግፍ፡ ላሐ፡ ከመ፡ ታዕርፍ፡ ነፍሱ።
24 ጥበቢሁ፡ ለጸሐፊ፡ በመዋዕለ፡ ሢመቱ፡ ወይጠብብ፡ ዘኢያበዝኅ፡ ግብሮ።
25 ወምንትኑ፡ ይጠብብ፡ ዘያጸንዕ፡ ዕርፎ፡ ወይዜኀር፡ በሐሪሱ፡ ወይቀሥፍ፡ ብዕራሁ፡ ወይትመየጥ፡ በምግባሮሙ፡ ወኵሉ፡ ነገሩ፡ ተያፍን፡ ወብዕራ።
26 ወኵሉ፡ ኅሊናሁ፡ ዘከመ፡ የሐርስ፡ ትለሚሁ፡ ወትጋሁኒ፡ ዘከመ፡ ያቀምሕ፡ ብዕራሁ፡(ወይሰርሕ፡ እስከ፡ ያገርር፡ ተያፍኒሁ)።
27 ከማሁ፡ ኵሉ፡ ጸራቢ፡ ወሊቀ፡ ጸረብትኒ፡ ዘሌሊት፡ መዓልተ፡ ይከውኖ። እለ፡ ይገልፉ፡ ወየኀርዉ፡ ዐይነ፡ ማኅተም፡ ኵሉ፡ ኅሊናሁ፡ ዘከመ፡ ያስተማስል፡ በበገጹ፡ ወኵሉ፡ ምክሩ፡ ዘከመ፡ ያጠነቅቅ፡ ኀሪወ፡ ማኅተም፡ ወትጋሁኒ፡ ዘከመ፡ ይፌጽም፡ ግብሮ።
28 ወከማሁ፡ ነሃቢኒ፡ ዘይነብር፡ ኀበ፡ ምንሃብ፡ ወይትሜሀር፡ ግብረ፡ ኀጺን፡ ጢሰ፡ ምንሃብ፡ ያስሕክ፡ ሥጋሁ፡ ወነደ፡ እሳት፡ ይመስዋ፡ ለነፍሱ፡ ወደድምፀ፡ ሰፌልያ፡ ያጸምም፡ እዘኒሁ፡ ወአዕይንቲሁኒ፡ ይጤይቅ፡ ኵሎ፡ አምሳለ፡ መብዐል፡ ወይኄሊ፡ በልቡ፡ በከመ፡ ይፌጽም፡ ግብሮ፡ ወትጋሁኒ፡ ዘከመ፡ ያስተሤኒ፡ መብዐሎ፡ ወምንሀቦ።
29 ወከማሁ፡ ለብሓዊኒ፡ ዘይነብር፡ ዲበ፡ ግብሩ፡ ወያዐውድ፡ መንኰራኵሪሁ፡ በእገሪሁ፡ ወዘልፈ፡ ይኄሊ፡ ዘከመ፡ ይፌጽም፡ ግብሮ፡ ወይኌልቊ፡ ኵሎ፡ ዘገብረ።
30 ይሜስል፡ ጽቡረ፡ በእደዊሁ፡ ወያደክም፡ ኀይሎ፡ እንዘ፡ ይትቀነይ፡ በእገሪሁ፡ ወኅሊና፡ ልቡ፡ ዘከመ፡ ይፌጽም፡ ግብሮ፡ ወትጋሁኒ፡ በከመ፡ [የአዱ]፡ ሞፍጦ።
31 እሉ፡ ኵሎሙ፡ ይሴፈዉ፡ በተግባረ፡ እደዊሆሙ፡ ወኵሎሙ፡ ይጠብቡ፡ በግብሮሙ።
32 ወዘእንበሌሆሙ፡ ኢይትከሀል፡ ነቢረ፡ ሀገር፤….።
33 ወበውስተ፡ እንግልጋ፡ ኢይመክርዎሙ፡ ምክረ፡ ወበውስተ፡ ዐውድ፡ ኢያነብርዎሙ፡ ምስለ፡ መኰንን፡ ወኢያፈትሕዎሙ፡ ፍትሐ፡ ኵነኔ፡ ወኢያኴንንዎሙ፡ ወኢያመልክዎሙ፡ ወውስተ፡ መስሎ፡ ነገርሂ፡ ኢይሄልዉ።
34 እንበለ፡ ዘይጼንዑ፡ መፍቅደ፡ ብሔር፡ ወጸሎቶሙኒ፡ ከመ፡ ይጥብቡ፡ በውስተ፡ ኪኖሙ።
=== chapter 39 ===
[Chapter 39]
1 ወባሕቱ፡(ኪንሰ፡)ለዘ፡ አስተሐመመ፡ በልቡ፡(ውእቱ፡)ወዘይኄሊ፡ ሕጎ፡ ለልዑል፡ ጥበብ(ሰ)፡ ተኀሠት፡ በኀበ፡ ኵሎሙ፡ ቀደምት፡ ወትሜህር፡ ተነብዮተ፡ ለዕደው።
2 እለ፡ አስመዩ፡ በሃይማኖት፡ ወታበውእ፡ ውስተ፡ አምሳለ፡ ነቢያት።
3 ወተኅሥሥ፡ አምሳለ፡ ዘኅቡእ፤[ወትትመየጥ]፡ በፍካሬ፡ አምሳል።
4 ወትበቊዕ፡ በማእከለ፡ መኳንንት፡ ወታስተርኢ፡ በማእከለ፡ መላእክት፡ ወትበውእ፡ ብሔረ፡ አሕዛብ፡ ነኪር፡ እስመ፡ ወጠንቆሙ፡ ለእጓለ፡ እመሕያው፡ በሠናይትኒ፡ ወበእኪትኒ።
5 ወሜጠ፡ ልቦ፡ ከመ፡ ይጊሥ፡ ኀበ፡ እግዚአብሔር፡ ፈጣሪሁ፤ወ(ከመ፡)፡ ይጼሊ፡ ቅድመ፡ ልዑል፡ ወይከሥት፡ [አፉሁ]፡ ወይስእል፡ ወይትጋነይ፡ እንበይነ፡ ኀጢአቱ።
6 ወእመሰ፡ ፈቀደ፡ እግዚአብሔር፡ ዘዐቢይ፡ ውእቱ፡ ወመልአ፡ ሎቱ፡ መንፈሰ፡ ጥበብ፡ ላዕሌሁ፡ ወውእቱ፡ ያነቅዕ፡ ቃለ፡ ጥበቢሁ፡ [ለሊሁ]፡ ወበጸሎት፡ ይገኒ፡ ለእግዚአብሔር።
7 ወውእቱ፡ ያረትዕ፡ ሎቱ፡ ምክረ፡ ወጥበበ፡ ወያኄልዮ፡ ዘኅቡእ፡ ያእምር።
8 ወውእቱ፡ ያርኢ፡ ጥበበ፡ ትምህርቱ፡ ወይትሜካሕ፡ በሕገ፡ ኪዳኑ፡ ለእግዚአብሔር።
9 ወብዙኃን፡ ይዌድስዎ፡ እንበይነ፡ ጥበቢሁ፡ ወኢይደመሰስ፡ ለዓለም፡ ወኢይጠፍእ፡ ዝክሩ፡ ወይቀውም፡ ስሙ፡ ለትውልደ፡ ትውልድ።
10 ወይትናገሩ፡ አሕዛብ፡ በጥበቢሁ፡ ወይዌድስዎ፡ በማእከለ፡ ማኅበር።
11 ወይኄይስ፡ ቀዊመ፡ ስሙ፡ እምነ፡ ፲፻፡ ወእምድኅረ፡ ሞተኒ፡ ጽኑዕ፡ ግብሩ።
12 ወዓዲ፡ እኄሊ፡ ወእነግር፤….።
13 ስምዑኒ፡ ውሉደ፡ ጻድቃን፡ ወሥረጹ፡ ወከመ፡ ይጸጊ፡ ጽጌ፡ በውስተ፡ ጠለ፡ ገዳም፡ ጽገዩ።
14 ወከመ፡ መዐዛ፡ ሊባኖስ፡ ከማሁ፡ ይጥዐም፡ መዐዛክሙ፡ ወአብቊሉ፡ ፍሬክሙ፡ ከመ፡ ጽጌ፡ ረዳ፡ ወአጥዕሙ፡ ወዐዛክሙ፡ ወሰብሑ፡ ማሕሌቶ፡ ወባርክዎ፡ ለእግዚአብሔር፡ በኵሉ፡ ምግባሩ።
15 ወአዕብይዎ፡ ለስሙ፡ ወግነዩ፡ ሎቱ፡ ለስብሐቲሁ፡ በ፲፻ማሕሌት፡ ወበመሰንቆ፡ ወከመዝ፡ በሉ፡ ሶበ፡ ትሴብሕዎ።
16 ዐቢይ፡ ግብሩ፡ ለእግዚአብሔር፡ ወፈድፋደ፡ ሠናይ፡ ወኵሉ፡ ሥርዐቱ፡ ዘበዕድሜሁ።
17 ወአልቦ፡ ከመ፡ ይበሉ፡ ለምንትኑ፡ ዝንቱ፡ ወለምንትኑ፡ ዝክቱ፡ ወኵሉ፡ በጊዜሁ፡ ይትፈቀድ፡ አቀሞ፡ ለማይ፡ ከመ፡ አረፍት፡ በቃሉ፤….።
19 ወቅድሜሁ፡ ውእቱ፡ ግብረ፡ ኵሉ፡ ዘነፍስ፡ ወአልቦ፡ ዘይክል፡ ተኀብኦ፡ እምውድመ፡ አዕይንቲሁ።
20 እምቅድመ፡ ይትፈጠር፡ ዓለም፡ ወእስከ፡ ለዓለም፡ ኵሎ፡ አእመረ፡ ወአልቦ፡ ምንትኒ፡ ነኪር፡ በቅድሜሁ።
21 ወአልቦ፡ ዘይክል፡ ይበል፡ ለምንትኑ፡ ዝንቱ፡ ወለምንትኑ፡ ዝክቱ፡ እስመ፡ ኵሉ፡ መፍቅዶሙ፡ ተፈጥረ።
22 ወበረከቱኒ፡ ከመ፡ ማየ፡ ተከዜ፡ መልአት፡ ወከመ፡ ማየ፡ አይኅ፡ [አርወየታ፡]ለምድር።
23 ወከማሁ፡ መዐቱኒ፡ ከፈለቶሙ፡ ለአሕዛብ።
24 ርቱዕ፡ ፍናዊሁ፡ ለጻድቅ፡ ወለኃጥእሰ፡ ዕቅፍት፡ ውእቱ፡ ዘሜጦ፡ ለማይ፡ ወረሰዮ፡ ጼወ።
25 ሠናይት፡ ለሠናያት፡ ተፈጥረት፡ እምትካት፡ ወከማሁ፡ እኪትኒ፡ ለኃጥኣን።
26 ቀዳሜ፡ ኵሉ፡ መፍቅዱ፡ ለሰብእ፡ ማይ፡ ወእሳት፡ ወኀጺን፡ ወጼው፡ ወእክል፡ ሥርናይ፡ ወመዓር፡ ወሐሊብ፡ ደመ፡ አስካል፡ ወቅብእ፡ ወልብስ።
27 ዝንቱ፡ ኵሉ፡ በረከቶሙ፡ ለጻድቃን፡ ወከማሁ፡ ለኃጥኣን፡ ይትመየጦሙ፡ በእኩይ።
28 ወቦ፡ መንፈስ፡ ለተበቅሎ፡ ተፈጥረት፡ ወበመንሱቶሙ፡ ያዐብይዋ፡ ለመቅሠፍቶሙ፡ ወበዕድሜሆሙ፡ ይዘረው፡ ኀይሎሙ፡ ወመቅሠፍተ፡ ፈጣሪሆሙ፡ ይቀርቦሙ።
29 እሳት፡ ወበረድ፡ ወረኃብ፡ ወብድብድ፡ ኵሉ፡ ዝንቱ፡ ለተበቅሎ፡ ተፈጥረ።
30 ስነነ፡ አራዊተ፡ ምድር፡ ወዐቃርብት፡ ወአፍዖት፡ ወኲናት፡ ከመ፡ ትሠርዎሙ፡ ለኃጥኣን።
31 ወውእቱሰ፡[ያስተፌሥሕ፡]በሣህሉ፡ ወያስተዴሉ፡ ለዓለም፡ መፍቅደ፡ ወኵሉ፡ እምከመ፡ በጽሐ፡ ዕድሜሁ፡ ወኮነ፡ ጊዜሁ፡ የኀልቅ፡ ሶቤ[ሃ]።
32 እንበይነ፡ ዝንቱ፡ እምፍጥረቱ፡ ተሠርዐ፡ ኵሉ፡ ወኀለይክዎ፡ ለዝንቱ፡ ወለካእክዎ፡ ውስተ፡ መጽሐፍ።
33 እስመ፡ ኵሉ፡ ግብሩ፡ ለእግዚአብሔር፡ ሠናይ፡ ወይሁብ፡ ለሰብእ፡ ኵሉ፡ መፍቅዶ፡ በበጊዜሁ።
34 ወአልቦ፡ ዘይብሎ፡ ዘንተሰ፡ እኩየ፡ ፈጠርከ፡ ወዝክተሰ፡ አሠነይከ፡ እስመ፡ ለኵሉ፡ ዕለቱ፡[ይንእዶ]።
35 ወይእዜኒ፡ በኵሉ፡ ልብክሙ፡ ወበአፉክሙ፡ ሰብሕዎ፡ ለእግዚአብሔር፡ ወባርኩ፡ ለስሙ፡ በኵሉ፡ ጊዜ።
=== chapter 40 ===
[Chapter 40]
1 ዐቢይ፡ ትሕዝብት፡ ፍጥረቱ፡ ለእጓለ፡ እመሕያው፡ ወክቡድ፡ ጾር፡ ላዕለ፡ ውሉደ፡ አዳም፡ እምከመ፡ ይወፅኡ፡ እምከርሠ፡ እሞሙ፡ እስከ፡ አመ፡ ይትቀበሩ፡ ውስተ፡ እመ፡ ኵሉ።
2 ድንጋጼ፡ ይእቲ፡ ወፍርሀተ፡ ልብ፡ ትሕዝብታ፡ ለእለተ፡ ሞት፡ ላዕለ፡ ኵሉ፡ እጓለ፡ እመሕያው።
3 እምነ፡ ዘይነብር፡ ላዕለ፡ መንበረ፡ መንግሥት፡ እስከ፡ ነዳይ፡ ዘይሰክብ፡ ውስተ፡ መሬት፡ ወሐመድ።
5 መዐት፡ ወቅንአት፡ ወጋእዝ፡ ወሁከት፡ ወፍርሀተ፡ ሞት፡ ወቀሐው፡ ወሐኔት፡ ጊዜ፡ ይሰክብ፡ ውስተ፡ ምስካቢሁ፡ ይዌልጥ፡ ኅሊናሁ፡ ንዋመ፡ ሌሊት።
6 ኅዳጥኒ፡ ወኢከመ፡ ምንት፡ ውእቱ፡ ለዕረፍት፡ ወበንዋሙ፡ ይትዐወቆ፡ ወይረክቦ፡ ከመ፡ እንግልጋ፡ ለምዕር፡ ወያወላውላ፡ ለምክረ፡ ልቡ፡ ከመ፡ ዘይነትዕ፡ በውስተ፡ ቀትል።
7 ወዘሰ፡ ይገይስ፡ ያመሥጥ፡ በዕለቱ፡ ለሊሁ፡[ያነክራ]፡ለፍርሀቱ።
8 ወዝ፡ ምስለ፡ ኵሉ፡ ነፍሰ፡ እጓለ፡ እመሕያው፡ እስከ፡ እንስሳ፡ ዘላዕለ፡ ኃጥኣን፡ ይብእስ፡ ምስብዒተ፡ ዝንቱ፡ ኵሉ።
9 ቀትል፡ ወትዝኅርት፡ ወብድብድ፡ ወኲናት፡ ረኃብ፡ ወቊስለ፡ ልብ፡ ወመቅሠፍት።
10 ዝንቱ፡ ኵሉ፡ ተፈጥረ፡ ላዕለ፡ ኃጥኣን፡ ወእንበይነ፡ ዚአሆሙ፡ መጽአ፡ ማየ፡ አይኅ።
11 ኵሉ፡ እምነ፡ ምድር፡ ወኵሉ፡ ውስተ፡ ምድር፡ ወአፍላግኒ፡ ኵሉ፡ ውስተ፡ ባሕር፡ ይገብእ፡ ማዩ።
12 ወኵሉ፡[ሕልያን፡]ወዐመፃ፡ ትደመሰስ፡ ወሃይማኖትሰ፡ ለዓለም፡ ትቀውም።
13 ንዋየ፡ ዐመፃ፡ ከመ፡ ውሒዝ፡ ይየብስ፡ ወይደምፅ፡ ከመ፡ ዐቢይ፡ ፀዓዕ፡ ሶበ፡ ይዘንም።
14 ወውእቱሰ፡ እምከመ፡ ሰፍሐ፡ እዴሁ፡ ያስተፌሥሕ፡ ወእለሰ፡ የዐልውዎ፡ የኀልቁ፡ ወይጠፍኡ።
15 ውሉደ፡ ኃጥኣን፡ ኢይትባዝኁ፡ አዕጹቂሆሙ፡ ወሥርዎሙ፡ ለርኩሳን፡ ከመ፡ ዘውስተ፡ ኰኵሕ፡ ልሙጽ።
16 ወይደምፅ፡ በላዕለ፡ ኵሉ፡ ማይ፡ ወበጽንፈ፡ ውሒዝ፡ ወይቀውም፡ ተምሒዎ፡ እምነ፡ ኵሉ፡ ሣዕር።
17 ወጸጋሁሰ፡ ከመ፡ ገነተ፡ እግዚአብሔር፡ በበረከት፡ ወምጽዋትኒ፡ ለዓለም፡ ይቀውም።
18 ሕይወቱ፡ ለዘይዴለው፡ ዘገብረ፡ ይጥዕሞ፡ ወእምነ፡ ክልኤሆሙ፡ ረኪበ፡ መድፍን።
19 ውሉድኒ፡ ወሕንጻ፡ ሀገር፡ ያዐብዩ፡ ስመ፡ ወእምነ፡ ክልኤሆሙ፡ ብእሲት፡ እንሰ፡ ሠናይ፡ ልባ።
20 ወይን፡ ወማሕሌት፡ ያስተፌሥሕ፡ ልበ፡ ወእምነ፡ ክልኤሆሙ፡ አፍቅሮታ፡ ለጥበብ።
21 መሰንቆ፡ ወመዝሙር፡ ይሔውዛ፡ ለነፍስ፡ ወእምነ፡ ክልኤሆሙ፡ ልሳን፡ ጥዑም።
22 ሥን፡ ወላሕይ፡ ይኤድማ፡ ለዐይን፡ ወእምነ፡ ክልኤሆሙ፡ ሐመልማለ፡ ዘርእ።
23 ዐርክ፡ ወማኅፈር፡ ይበቊዑ፡ በመዋዕሊሆሙ፡ ወእምነ፡ ክልኤሆሙ፡ ብእሲት፡ ኄርት፡ ለምታ።
24 አኀውኒ፡ ወረድኤትኒ፡ ለዕለተ፡ ምንዳቤ፡ ወእምነ፡ ክልኤሆሙ፡ ምጽዋት፡ ትኄይስ፡ አድኅኖ።
25 ወርቅ፡ ወብሩር፡ ያጸንዑ፡ ሀገረ፡ ወእምነ፡ ክልኤሆሙ፡ ምክር፡ ሠናይት።
26 ብዕል፡ ወንዋይ፡ ያስተፌሥሑ፡ ልበ፡ ወእምነ፡ ክልኤሆሙ፡ ፈሪሀ፡ እግዚአብሔር። ፈሪሀ፡ እግዚአብሔር፡ አልባቲ፡ ዘታኀጥእ፡ ወኢትፈቅድ፡ ላቲ፡ ረድኤተ።
27 ፈሪሀ፡ እግዚአብሔር፡ ከመ፡ ገነተ፡ እግዚአብሔር፡ በረከታ፡ ወኵሉ፡ ክብር፡ ወትፍሥሕት፡ ውስቴታ።
28 ወልድየ፡ በሕይወትከ፡ ኢታፍቅራ፡ ለስኢል፡ ይኄይስ፡ መዊት፡ እምነ፡ ሲኦል።
29 ብእሲ፡ ዘማእደ፡ ባዕድ፡ ይጸንሕ፡ ወይሴፈው፡ ንብረቱ፡ ከመ፡ ዘኢኮነ፡ ሕያወ፡ ዘይፈቱ፡ እክለ፡ ባዕድ፡ ወብእሲሰ፡ ጠቢብ፡ ዘተገሠጸ፡ ይትዐቀብ።
30 ጥዑም፡ ሲኦል፡ ውስተ፡ አፈ፡ ዘኢየኀፍር፡ ወውስተ፡ ከርሡሰ፡ እሳት፡ ትነድድ።
=== chapter 41 ===
[Chapter 41]
1 ኦሞት፡ እፎ፡ ዝክርከ፡ መሪር፡ሶበ፡ ትመጽእ፡ ላዕለ፡ ብእሲ፡ እንዘ፡ ዳኅነ፡ ይነብር፡ ወይዴለው፡ በኵሉ፡ ወቦ፡ ኀይለ፡ ወፍቱሕ፡ ነፍሱ፡ ለበሊዕ።
2 ኦሞት፡ ሠናይ፡ ኵነኔከ፡ ሶበ፡ ትመጽእ፡ ላዕለ፡ ብእሲ፡ ነዳይ፡ ዘአልቦ፡ ኀይለ፡ ላዕለ፡ ዘልህቀ፡ ወረሥአ፡ ወአልቦ፡ ወኢምንተኒ፡ ዘይክል፡ ወአልቦ፡ ዘ[የአምን]።
3 ኢትፍራህ፡ ኵነኔሁ፡ ለሞት፡ ተዘከሮሙ፡ ለእለ፡ እምቅድሜከ፡ ወለእለ፡ እምድኅሬከ።
4 እስመ፡ ኵነኔ፡ እግዚአብሔር፡ ውእቱ፡ ላዕለ፡ ኵሉ፡ ዘነፍስ፡ ወለምንት፡ እንከ፡ ትግእዝ፡ ፈቃዶ፡ ለእግዚአብሔር፡ እመኒ፡ ዐሠርተ፡ ምእተ፡ ዓመተ፡ ሐዩከ፡ አልብከ፡ ምስለ፡ ሞት፡ ዘለፋ፡ ሕይወትከ።
5 ውሉድ፡ ሕርቱማ[ነ]፡ ይከውኑ፡ ውሉደ፡ ኃጥኣን፡ ወይትገፈታእ፡ አብያቲሆሙ፡ ለረሲዓን።
6 ውሉደ፡ ኃጥኣን፡ የሀጕሉ፡ ርስቶሙ፡ ወልህቀ፡ ምስለ፡ ፍሬሆሙ፡ ኀሳሮሙ።
7 ለአብ፡ ኃጥእ፡ ያሐረትሙ፡ ውሉዱ፡ እስመ፡ በእንቲአሁ፡ የኀስሩ።
8 አሌ፡ ለክሙ፡ ለዕደው፡ ኃጥኣን፡ እለ፡ ኀደግሙ፡ ሕጎ፡ ለልዑል።
9 ወእመኒ፡ ተዋለድክሙ፡ ለመርገም፡ ትወልዱ፤….።
10 ኵሉ፡ እምነ፡ ምድር፡ ተፈጥረ፡ ወውስተ፡ ምድር፡ ምግባኢሁ፡ ከማሁ፡ ኃጥኣንሂ፡ እመርገም፡ ውስተ፡ ሞት።
11 [ላሑ]፡ ለሰብእ፡ በሥጋሁ፡ ወስሞሙኒ፡ ለኃጥኣን፡ ይደመሰስ።
12 ኀሊ፡ ስመ፡ ትግበር፡ ለከ፡ ውእቱ፡ ይተርፈከ፡ እምነ፡ እልፍ፡ መዛግብተ፡ ወርቅ፡ ዐበይት።
13 ሠናይ፡ ሐይው፡ በኈልቈ፡ መዋዕሊከ፡ በትፍሥሕት፡ ይኄይስ፡ ስም፡ ሠናይ፡ እስመ፡ ውእቱ፡ ለዓለም፡ ይቀውም፡ ለከ።
14 ጥበብሰ፡ በሰላም፡ ትትመሐፀን፡ ውሉዳ፡ ጥበብሰ፡ ክቡት፡ ወመዝገብ፡ ዘኢያስተረኢ፡ ምንት፡ ረባሖሙ፡ ለክልኤሆሙ።
15 ይኄይስ፡ ብእሲ፡ ዘየኀብስ፡ እበዲሁ፡ እምነ፡ ብእሲ፡ ዘይከብት፡ ጥበቢሁ።
16 ኅፈሩ፡ እንከ፡ ቃልየ፡(ወጥበብየ)፤ኵሉ፡ ዘየኀፍር፡ ሠናየ፡ ይትዐቀብ፡ ወአኮ፡ ኵሉ፡ ዘእሙን፡ በኵሉ፡ ይትሜከር።
17 ኀፍረት፡ ለአብ፡ ወለእም፡ እንበይነ፡ ውሉድ፡ በዝሙት፡ ኀፍረት፡ ለመልአክ፡ ወለአበይት፡ ሐሰት።
18 ኀፍረት፡ ለመኰንን፡ ወለመስፍን፡ ወልጦ፡ ቃል፡ ኅፍረት፡ ለሕዝብ፡ ወለማኅበር፡ ስሒት፡ ኀፍረት፡ ተዓምዖ፡ ምስለ፡ ዐርክከ፡ ወምስለ፡ መዕመርከ።
19 ኀፍረት፡ ለኀዳሪ፡ ሰሪቀ፡ ማኅደር፤….፤ኀፍረት፡ ተቃርቦ፡ ለበሊዐ፡ እክለ፡ ባዕድ፡ ኀፍረት፡ ሰሪቅ፡ እምንዋየ፡ ማሕፀንትከ፡ ወእምተግባረ፡ ቢጸከ።
20 ኀፍረት፡ ተጸምሞቱ፡ ለዘ፡ ይበጽሐከ፡ ኀፍረት፡ አስተአድሞ፡ ብእሲተ፡ ባዕድ።
21 ኀፍረት፡ ተዐውሮቱ፡ ለቢጽከ፡ በምንዳቤሁ፡ ኀፍረት፡ ተሰቊቆ፡ ንዋየ፡ ባዕድ፡ ኀፍረት፡ ተናግሮ፡ ብእሲተ፡ ባዕድ፡ ወኢትትጓሕለው፡ ላቲ።
22 ወኢትኂጣ፡ ለወለታ፡ ወኢትቅረብ፡ ኀበ፡ ምስካባ፡ ኀፍረት፡ ዘርክዮቱ፡ ለዐርክከ፡ እምድኅረ፡ ጸገወከ፡ ኀፍረት፡ አውፅኦ፡ ነገር፡ ዘሰማዕከ፡ ኀፍረት፡ ከሢተ፡ ምክረ፡ ዐርክከ።
23 ወዘንተ፡ ለእመ፡ ተዐቀብከ፡ አማን፡ ኀፋረ፡ ትከውን፡ ወትረክብ፡ በኀበ፡ ኵሉ፡ ሰብእ፡ ሞገሰ።
=== chapter 42 ===
[Chapter 42]
1 እንበይነ፡ ዝንቱሰ፡ ባሕቱ፡ ኢትኅፈር፡ ወኢታድልው፡ ለገጸ፡ ሰብእ፡ ከመ፡ ጌጋየ፡ ኢይኩንከ።
2 በእንተ፡ ሕጉ፡ ለልዑል፡ ወበእንተ፡ ሕርመትከ፡ ወበእንተ፡ ፍትሕኒ፡ ከመ፡ ኢታንጽሖ፡ ለጊጉይ።
3 ወሶበኒ፡ ትትሓሰብ፡ ምስለ፡ ሱታፌከ፡ በእንተ፡ ተግባርከ፡ በእንተኒ፡ ሤጥ፡ ወበእንተኒ፡ ርስትከ።
4 በእንተ፡ መዳልውኒ፡ ወበእንተ፡ መስፈርት፡ ወእንበይነ፡ ጥሪትከ፡ እመኒ፡ ውኁድ፡ ወእመኒ፡ ብዙኅ።
5 በእንተ፡ ኵሉ፡ ዘይረብሐከ፡ ወዘይበቊዐከ፡ በእንተ፡ ምህሮቶሙ፡ ለውሉድከ፡ ለገብር፡ እኩይ፡ ሥትሮ፡ ገበዋቲሁ።
6 ሠናይ፡ ኀቲም፡ ላዕለ፡ ብእሲት፡ እኪት፡ ወኀበ፡ ብዙኅ፡ በዋኢቱ፡ በመዝግሕ፡ አንብር።
7 ኵሎ፡ ዘገበርከ፡ በኈልቊ፡ ወበመስፈርት፡ ወበመዳልው፡ ግበር፡ ወኵሉ፡ ዘአባእከ፡ ወአውፃእከ፡ ወዘወሀብከ፡ ወነሣእከ፡ በመጽሐፍ፡ ይኩንከ።
8 ወበእንተ፡ ገሥጾቱ፡ ለአብድ፡ ወለዘ፡ አልቦ፡ ልብ፡ ወለአረጋዊኒ፡ ዘበርሥአቱ፡ ይተሉ፡ ዝሙት፡ ወትከውን፡ በአማን፡ ጠቢበ፡ ወማእምረ፡ በኀበ፡ ኵሉ፡ ሰብእ።
9 ወለትሰ፡ ትጋህ፡ ኅቡእ፡ ይእቲ፡ ለአቡሃ፡ ወኀልዮታ፡ ያሰርሮ፡ ለንዋሙ፡ እምንእሳ፡ እስከ፡ አመ፡ ትልኅቅ፡ እንበለ፡ ትፍተው።
11 ለወለት፡ እንተ፡ ኢትኅፍር፡ አጽንዕ፡ ዐቂቦታ፡ ከመ፡ ኢትረሲከ፡ ስላተ፡ ጸላኢከ፡ ወ[ነገረ]፡ ለማኅፈርከ፡ ወለማኅበረ፡ ሕዝብከ፡ ከመ፡ ኢታስተኀፍር፡ በማእከለ፡ ብዙኃን።
12 ኢታድሉ፡ ለኵሉ፡ ሰብእ፡ እንበይነ፡ ላሕዩ፡ ወኢትባእ፡ ማእከለ፡ አንስት።
13 እምነ፡ ልብስ፡ ይወፅእ፡ ቊንቊኔ፡ ወእመነ፡ አንስት፡ ኵሉ፡ እኪት።
14 ይኄይስ፡ እከይሁ፡ ለብእሲ፡ እምነ፡ ኂሩታ፡ ለብእሲት፡ ብእሲትኒ፡ እንተ፡ ታስተቃንእ፡ ኀፍረት፡ ይእቲ።
15 ወእዜከር፡ ግብሮ፡ ለእግዚአብሔር፡ ወእነግር፡ ዘርኢኩ፡ እስመ፡ በቃሉ፡ ለእግዚአብሔር፡ ኵሉ፡ ግብሩ።
16 ፀሓይኒ፡ ያበርህ፡ ወያርኢ፡ ላዕለ፡ ኵሉ፡ ወስብሐቲሁ፡ ለእግዚአብሔር፡ ምሉእ፡ ላዕለ፡ ኵሉ፡ ግብሩ።
17 ወኢገብረኑ፡ እግዚአብሔር፡ ለቅዱሳኑ፡ ከመ፡ ይንግሩ፡ ኵሎ፡ ስብሐቲሁ፡ ዘአጽንዐ፡ እግዚአብሔር፡ ዘኵሎ፡ ይመልክ፡ ወኵሉ፡ ጽንዕ፡ በስብሐቲሁ።
18 ለቀላይኒ፡ ወለልብኒ፡ ይረክቦሙ፡ አሠሮሙ፡ ወያአምሮሙ፡ ምክሮሙ፡ ወያአምር፡ እግዚአብሔር፡ ኵሎ፡ ኅሊና፡ ልብ፡ ወርእየ፡ ትእምርቶ፡ ለዓለም።
19 ወዘኒ፡ ኀለፈ፡ ወዘኒ፡ ይመጽእ፡ ውእቱ፡ ይዜኑ፡ ወይከሥት፡ አሠረ፡ ዘኅቡእ።
20 ወአልቦ፡ ዘያመሥ[ጦ]፡ እምነ፡ ኵሉ፡ ምክር፡ ወአልቦ፡ ዘይሴውሮ፡ እምነ፡ ኵሉ፡ ወኢአሐ[ቲ]ኒ፡(ቃል፡)፡ ።
21 ወአሰርገ[ወ]፡ ዕበ[ያ]፡ ለጥበቢሁ፡ እንተ፡ ይእቲ፡ ዘእንበለ፡ ይትፈጠር፡ ዓለም፡ ወለዓለምኒ፡ ትሄሉ፡ ኢሂ፡ ትትዌሰክ፡ ወኢሂ፡ ተሐጽጽ፡ ወኢፈቀደ፡ ወኢአሐደ፡ መምከረ።
22 ወክሉ፡ ግብሩ፡ ሠነይ፡ ወመፍትው፡ ወከመ፡ ብርሀን፡ ውእቱ፡ ለርእይ።
23 ወኵሉ፡ ዝንቱ፡ ሕያው፡ ወይሄሉ፡ ለዓለም፡ ወይሰምዕ፡ በኵሉ፡ ዘፈቀዱ።
24 ወኵሉ፡ ምክዕቢተ፡ ፩፩ቅድመ፡ ካልኡ፡ ወአልቦ፡ ዘገብረ፡ ወኢምንተኒ፡ ዘሕጹጽ።
25 ፩ምስለ፡ ካልኡ፡ አስተጻንዖሙ፡ ለሠናይ፡ ወመኑ፡ ዘይጸግብ፡ እምርእየ፡ ሠናይቱ።
=== chapter 43 ===
[Chapter 43]
1 ላዕለ፡ ጽንዓ፡ ለሰማይ፡ በንጽሕ፡ ወርእየተ፡ ሰማይኒ፡ በስብሐቲሁ።
2 ወያሠርቅ፡ ፀሓየ፡ ከመ፡ ያርኢ፡ ብርሃኖ፡ ወነኪር፡ ሥርዐቱ፡ ለግብረ፡ ሰማይ።
3 ወበቀትሩሂ፡ ያየብስ፡ ብሔረ፡ ወመኑ፡ ይትቃወማ፡ ለላህቡ።
4 ከመ፡ እቶን፡ ዘይነድድ፡ ይሬሲ፡ ላህ[ቦ]፡ ወመሥልስ[ተ]፡ ፀሓይ፡ ያውዕዮሙ፡ ለአድባር፡ ወላህበ፡ እሳት፡ ይነፍኅ፡ እምኔሁ፡ ወነጽሮ፡ ብርሃኑ፡ ያከፍእ፡ ዐይነ።
5 ዐቢይ፡ ውእቱ፡ እግዚአብሔር፡ ዘገብሮ፡ ወበቃሉ፡ ይፈጥን፡ ሑረቱ።
6 ወወርኅኒ፡ ዕድሜሁ፡ ውእቱ፡ ለኵሉ፡ ወትእምርት፡ ለብሔር፡ ወባቲ፡ ይትፈለጥ፡ መዋዕል።
7 እምነ፡ ወርኅ፡ ይትዐወቅ፡ ትእምርተ፡ በዓላት፡ ብርሃን፡ ዘየኀልቅ፡ እንዘ፡ የሐጽጽ።
8 ወወርኅሰ፡ በከመ፡ ስማ፡ ይእቲ፡ ወነኪር፡ ከመ፡ ተዐቢ፡ ወዕጹብ፡ ከመ፡ ታስተባሪ፡ በውስተ፡ ሥርዓተ፡ ትዕይንተ፡ ሰማይ፡ ወያበርህ፡ በውስተ፡ ኀይለ፡ ሰማይ።
9 ስርጋዌሃ፡ ለሰማይ፡ ክብሮሙ፡ ለከዋክብት፡ ወያበርሁ፡ ለብሔር፡ በውስተ፡ ሰማዩ፡ ለእግዚአብሔር።
10 ወበቃለ፡ ቅድሳቲሁ፡ የሐውሩ፡ በበሥርዓቶሙ፡ ወኢይስሕቱ፡ ወኢይፈልሱ፡ እመነ፡ ዐቅሞሙ።
11 ወርኢ፡ ቀስቶሂ፡ ወባርኮ፡ ለፈጣሪሁ፡ እስመ፡ ፈድፋደ፡ ሠናይ፡ ዋካሁ።
12 ወይቀምር፡ ውስተ፡ ሰማይ፡ ወያዐውዶ፡ ስብሐቲሁ፡ እደዊሁ፡ ለልዑል፡ ይቀምሮ።
13 በትእዛዘ፡ ዚአሁ፡ ይዘንም፡ በረድ፡ ወይፈጥን፡ መብረቅ፡ በፈቃዱ።
14 ወእንበይነ፡ ዝንቱ፡ ይከሥት፡ መዛግብቲሁ፡ ወይሰርራ፡ ደመናት፡ ከመ፡ አዕዋፍ።
15 ወበዕበይሁ፡ ያጸንዖሙ፡ ለደመናት፡ ወይትፈተት፡ እብነ፡ በረድ።
16 ወበሐውጾቱ፡ ያድለቀልቁ፡ አድባር፡ ወበፈቃዱ፡ ይነፍኅ፡ ነፋስ፡ ጽብሓዊ።
17 ወቃለ፡ ፀዓዑ፡ ያፈርሃ፡ ለምድር፡ ወዐውሎሁ፡ ለነፋስ፡ ዐረባዊ፡ ያጠውያ፡ ለመንፈስ፡ ወከመ፡ አዕዋፍ፡ ዘይሰርር፡ ይዘርዎ፡ ለበረድ፡ ወከመ፡ ርደተ፡ አንበጣ፡ ርደቱ።
18 ወዕጹብ፡ ለዐይን፡ ሥነ፡ ጽዕዱቱ፡ ወነኪር፡ ለልብ፡ ዝናሙ።
19 እስመ፡ ይሰውጣ፡ ለበረዱ፡ ከመ፡ ጼው፡ ውስተ፡ ምድር፡ ለጊሜሁ፡ ወእምከመ፡ ረግዐ፡ አስሐትያ፡ ይትፈለጽ፡ ከመ፡ ስባራተ፡ ማህው፡ በላኅት።
20 ቈሪረ፡ ነፋስ፡ ይነፍኅ፡ ነፋስ፡ ጽባሓዊ፡ ወአስሐትያኒ፡ ይገርዕ፡ ዲበ፡ ማይ፡ ወይነብር፡ ላዕለ፡ ኵሉ፡ ምቅዋመ፡ ማይ፡ ወከመ፡ ልብሰ፡ ኀጺን፡ የኀድር፡ ዲበ፡ ማይ፡ ወይገለብባ።
21 ወይበልዕ፡ አድባረ፡ ወያውዒ፡ ገዳመ፡ ወያሐርሮ፡ ለሣዕር፡ ከመ፡ እሳት።
22 ወፈወሰ፡ ኵሎ፡ ፍጡነ፡ ጊሜ፡ ዝናምኒ፡ እምከመ፡ ወረደ፡ ውስተ፡[መርቄ]፡ ያስተፌሥሕ።
23 ወበምክረ፡ ዚአሁ፡ ይየብስ፡ ቀላይ፡ ወእምዝ፡ ተከ[ላ]፡ ዮሴዕ።
24 ወእለኒ፡ ይነግድዋ፡ ለባሕር፡ ይነግሩ፡ ሕማማ፡ ወንሕነሰ፡ ሰሚዐነ፡ ናነክር።
25 ወህየ፡ ዕጹብ፡ ክብሩ፡ ወነኪር፡ ወአጥርዮ፡ እንስሳሂ፡ በበዘመዱ።
26 ወእምውስቴቱ፡ ይትገበር፡ ሎቱ፡ ለሠናይ፡ መዐዛ፡ ወበቃሉ፡ ይከውን፡ ኵሉ።
27 ወብዙኀ፡ ንነግር፡ ወኢንክል፡ ፈጽሞቶ፡ ወማኅለቅቱ፡ ለኵሉ፡ ነገር፡ ዳእሙ፡ ባሕቲቱ።
28 ሚመጠነ፡ ንክል፡ አእኵቶቶ፡ እስመ፡ ውእቱ፡ የዐቢ፡ እምነ፡ ኵሉ፡ ግብሩ።
29 ወግሩም፡ ውእቱ፡ እግዚአብሔር፡ ወፈድፋደ፡ ዕጹብ፡ ወዕጹብ፡ ኀይሉ።
30 አእኵትዎ፡ ለእግዚአብሔር፡ ወአዕብይዎ፡ በአምጣነ፡ ትክሉ፡ እስመ፡ ኢታጠነቅቁ፡ ፈጽሞ፡ ዓዲ፡ የዐቢ፡ እምኵሉ፡ ዝንቱ፡ ወበኵሉ፡ ኀይልክሙ፡ አዕብይዎ፡ ወአትትሀከዩ፡ እስመ፡ ኢትበጽሕዎ።
31 መኑ፡ ዘርእዮ፡ ወይነግረነ፡ ወመኑ፡ የዐብዮ፡ በአምጣነ፡ ዕበዩ።
32 ወብዙኅ፡ ዘኢያስተርኢ፡ የዐቢ፡ እምነ፡ ዝንቱ፡ ውኁድ፡ ዳእሙ፡ ዘርኢነ፡ ግብሩ።
33 እስመ፡ ኵሎ፡ እግዚአብሔር፡ ገባሪ፡ ወወሀቦሙ፡ ጥበበ፡ ለጻድቃን።
=== chapter 44 ===
[Chapter 44]
1 ነወድሶሙ፡ ለዕደው፡ ክቡራን፡ ለአበዊነ፡ በመዋዕሌሆሙ።
2 እስመ፡ ብዙኀ፡ ክብረ፡ ወሀቦሙ፡ እግዚአብሔር፡ ወዕበዩኒ፡ እምፍጥረተ፡ ዓለም።
3 ወኰነኖሙ፡ በመንግሥቶሙ፡ ዕደው፡ እለ፡ አስመዩ፡ በኀይሎሙ፡ ወመካርያን፡ በጥበቢሆሙ፡ ወይነግሩ፡ በትንቢቶሙ።
4 ነገሥተ፡ አሕዛብኒ፡ በአጽባኢሆሙ፡ ወጸሐፍቶሙኒ፡ ለሕዝብ፡ በጥበቦሙ፡ በጥበበ፡ ቃሎሙ፡ ዘውስተ፡ ልቦሙ።
5 ወእለሰ፡ የኀሥሡ፡ ሐውዘ፡ መሰንቆ፡ ወማሕሌት፡ ወየሐልዩ፡ ከመ፡ ዘበመጽ፡ ሐፍ።
6 ወዕደውኒ፡ ብዑላን፡ እለ፡ የአክሎሙ፡ ኀይሎሙ፡ እለ፡ ዳኅነ፡ ይነብሩ፡ ውስተ፡ አብያቲሆሙ።
7 ወእሉ፡ ኵሎሙ፡ እለ፡ ከብሩ፡ በመዋዕሊሆሙ፡ ወተደለዉ፡ በሕይወቶሙ።
8 ወቦ፡ እምውስቴቶሙ፡ እለ፡ ኀደጉ፡ ስመ፡ ክብረ፡ ዘይትናገሩ፡ ቦቱ።
9 ወቦ፡ እለ፡ አልቦ፡ ዘይዜከሮሙ፡ ወእለኒ፡ ጠፍኡ፡ ወኮኑ፡ ከመ፡ ዘኢተፈጥሩ፡ ወገብኡ፡ ከመ፡ ዘኢተወልዱ፡ ወውሉዶሙሂ፡ ከማሁ፡ ምስሌሆሙ።
10 ወእሉሰ፡ ዕደው፡ ሥሁላን፡ እለ፡ ኢተረስዐት፡ ሎሙ፡ ጽድቆሙ።
11 ወትቀውም፡ ምስለ፡ ውሉዶሙ፡ ለዝሉፉ፡ ሠናይ፡ ርስቶሙ፡ በላዕለ፡ ውሉዶሙ።
12 ወበሥርዐቶሙ፡ ይነብሩ፡ ውሉዶሙ፤….።
14 ወተቀብረ፡ በሰላም፡ ሥጋሆሙወለዓለም፡ ትቀውም፡ ስሞሙ።
15 ወይትናገሩ፡ አሕዛብ፡ በጥበቢሆሙ፡ ወበማኅበረ፡ አሕዛብ፡ ይዌድስዎሙ።
16 ወሄኖክሰ፡ አሥመሮ፡ ለእግዚአብሔር፡ ወኀብኦ፡ ወኮነ፡ አርአያ፡ ለዓለም፡ ከመ፡ ይነስሑ።
17 ወኖኅኒ፡ ተረክበ፡ ፍጹመ፡ ጻድቅ፡ ወአመ፡ መዋዕለ፡ መንሱት፡ ኮነ፡ ውእቱ፡ ሣህለ፡ ለዓለም፡ ወውእቱ፡ ተረፈ፡ ለብሔር፡ አመ፡ ኮነ፡ ማየ፡ አይኅ።
18 ተካየደ፡ ምስሌሁ፡ ለዓለም፡ ከመ፡ ኢይጥፍ[ኦ]፡ ማየ፡ አይኅ፡ ለኵሉ፡ [ዘ]ነፍስ።
19 አብርሃም፡ ዐቢይ፡ ውእቱ፡ አቡሆሙ፡ ለአሕዛብ፡ ኵሎሙ፡ ወኢተረክበ፡ ከማሁ፡ ክቡር።
20 ዘዐቀበ፡ ሕጎ፡ ለልዑል፡ ወተካየደ፡ ምስሌሁ፡(በሥጋሁ፡)ግብረ፡ ሕጉ፡ ወአመኒ፡ አመከሮ፡ ተረክበ፡ ምእመነ።
21 ወእንበይነ፡ ዝንቱ፡ በመሐላ፡ አቀመ፡ ሎቱ፡ ኪዳነ፡ ከመ፡ ይትባረኩ፡ አሕዛብ፡ በዘርኡ፡ ወከመ፡ ያበዝኆ፡ ከመ፡ ኆጻ፡ ምድር፡ ወከመ፡ ኮከብ፡ ይትባዝኁ፡ ዘርኡ፡ ከመ፡ ያውርሶሙ፡ እምባሕር፡ እስከ፡ ባሕር፡ ወእምነ፡ አፍላግ፡ እስከ፡ አጽናፈ፡ ምድር።
22 ወለይስሐቅኒ፡ ከማሁ፡ አቀመ፡ ሎቱ፡ እንበይነ፡ አብርሃም፡ አቡሁ፡ በረከተኒ፡ ለኵሉ፡ እጓለ፡ እመሕያው፡ ወሥርዐተ።
23 ወአዕረፈት፡ ላዕለ፡ ያዕቆብ፡ ዲበ፡ ርእሱ፡ ወአስተርአየት፡ ሎቱ፡ በበረከቱ፡ ወወሀቦሙ፡ ርስቶ፡ ኪያሃ፡ ወፈለጠ፡ ሎሙ፡ ርስቶሙ፡ ዘዘዚአሆሙ፡ ወከፈሎሙ፡ ለዐሠርቱ፡ ወክልኤቱ፡ አሕዛብ።
24 ወአውፅአ፡ እምኔሆሜ፡ ዕደወ፡ ጻድቃነ፡ እለ፡ ከብሩ፡ ወረከቡ፡ ሞገሰ፡ በኀበ፡ ኵሉ፡ እጓለ፡ እመሕያው፡ ወተፈቅሩ፡ በኀበ፡ እግዚአብሔር፡ ወበኀበ፡ ሰብእ።
=== chapter 45 ===
[Chapter 45]
1 ወሙሴኒ፡ ዘቡሩክ፡ ዝክሩ።
2 ወስብሐተ፡ ቅዱሳን፡ ዝክሩ፡ ወአምሳሉ፡ ወአዕበዮ፡ ወግሩመ፡ ኮነ፡ ላዕለ፡ ፀር።
3 ወገብረ፡ ተኣምረ፡ በቃሉ፡ ወወደሶ፡ በቅድመ፡ ነገሥት፡ ወአዘዞ፡ በእንተ፡ ሕዝቡ፡ ወአርአዮ፡ ስብሐቲሁ።
4 ወቀደሶ፡ በበይነ፡ ሃይማኖቱ፡ ወየውሃቱ፡ ወኪያሁ፡ ኀረየ፡ እምነ፡ ኵሉ፡ ሰብእ።
5 ወአስምዖ፡ ቃሎ፡ ወአብኦ፡ ውስተ፡ ቆባር፡ ወወሀቦ፡ ትእዛዘ፡ በቅድሜሁ፡ ወመሀሮ፡ ሕገ፡ ሕይወት፡ ከመ፡ ይመሀሮ፡ ለያዕቆብ፡ ኪዳኖ፡ ወኵነኔሁ፡ ለእስራኤል።
6 ወአሮንሂ፡ ዐቢይ፡ ከማሁ፡ ቅዱስ፡ ወእኁሁሰ፡ እምሕዝበ፡ ሌዊ።
7 ወአቀመ፡ ሎቱ፡ ሕገ፡ ዘለዓለም፡ ወወሀቦ፡ ቅድሳቶሙ፡ ለሕዝብ፡ ወአብፅዖ፡ በሠናይ፡ ሰርጕ፡ ወአልበሶ፡ ልብሰ፡ ክብር።
8 ወአልበሶ፡ ወአስተመክሖ፡ በኵሉ፡ ወአጽንዖ፡ በመዋዕለ፡ ኀይል፡ ወቆጶናቲሁኒ፡ ወልብሰ፡ ጶደሬ፡ ወልብሰ፡ ዐጽፍ።
9 ወእንተ፡ ዐውዱ፡ ጽጌያት፡ ወጸናጽለ፡ ወርቅ፡ ብዙኀ፡ ዐውዱ፡ ወኀበኒ፡ ኬደ፡ ይደምፅ፡ እግሩ፡ በቃለ፡ ፀዓዕ፡ ወነገረ፡ ይገብር፡ ድምፀ፡ ጽርሑ፡ ወተዝካረ፡ ለሕዝቡ፡ ወለውሉዶሙ።
10 ወአልባሰ፡ ወርቅ፡ ዘቅድሳት፡ ወያክንት፡ ወአልባስ፡ ዘተገብረ፡ በዐስቀ፡ ሜላት፡ ወአልባሰ፡ ሎግዮን፡ ዘበነገረ፡ ጽድቅ፡ ወርትዕ።
11 ልብስ፡ በልብሰት፡ እንተ፡ ክዑብ፡ ፈትላ፡ ዘለይ፡ ግብረ፡ ኬንያ፡ ወዕንቊ፡ ዘዕጹብ፡ ሤጡ፡ ኅርው፡ ዐይነ፡ ማኅተም፡ መቊጸሪቱ፡ ወርቅ፡ ወግቡር፡ በ[ዕንቊ]፡ ወጽሑፍ፡ ተዝካር፡ ውስቴቱ፡ ወልኩእ፡ በአምጣነ፡ ኈልቆሙ፡ ለደቂቀ፡ እስራኤል፡ በበሕዘቢሆሙ።
12 ወቀጸላ፡ ወርቅ፡ መልዕልተ፡ ቄዳራን፡ በአምሳለ፡ ዐይነ፡ ማኅተም፡ ቅድሳቱ፡ ምክሐ፡ ክብሩ፡ ወግብረ፡ ኀይሉ፡ መፍተው፡ ለዐይን፡ ሰርጉ፡ ወፈድፋደ፡ ሥኑ።
13 ወኢተገብረ፡ እምቅድሜሁ፡ ዘከማሁ፡ ለዓለም፡ አልቦ፡ ዘለብሰ፡ ከማሁ፡ ዘእንበለ፡ ደቂቁ፡ ባሕቲቶሙ፡ ወአዝማዲሁኒ፡ ለዝላፉ።
14 ከመ፡ ይሡዑ፡ ሎቱ፡ በመሥዋዕት፡ ኵሎ፡ አሚረ፡ እንተ፡ ጸብሐት፡ ካዕበ፡ ለዕለት።
15 ወፈፀመ፡ ሎሙ፡ ሙሴ፡ እደዊሆሙ፡ ወቀብኦ፡ ቅብአ፡ ቅድሳት። ወኮኖ፡ ሕገ፡ ዘለዓለም፡ ወለውሉዱኒ፡ በአምጣነ፡ መዋዕለ፡ ሰማይ፡ ከመ፡ ይትቀነዩ፡ ሎቱ፡ ወይኩንዎ፡ ካህናቲሁ፡ ወከመ፡ ይባርክዎ፡ ለሕዝቡ፡ በስሙ።
16 ወኪያሁ፡ ኀረየ፡ እምኵሉ፡ ሕያዋን፡ ከመ፡ ያብእ፡ መሥዋዕተ፡ ለእግዚአብሔር፡ ወዕጣነ፡ ወተዝካረ፡ መዐዛ፡ ሠናይ፡ ከመ፡ ያስተስሪ፡ ሎሙ፡ ለሕዝቡ።
17 ወወሀቦ፡ ትእዛዞ፡ ወሠርዖ፡ ፍትሖ፡ ወኵነኔሁ፡ ከመ፡ ይምሀሮ፡ ለያዕቆብ፡ ስምዖ፡ ወከመ፡ ያለብዎሙ፡ ለእስራኤል፡ ሕጎ።
18 ወተቃወምዎ፡ ነኪራን፡ ወቀንኡ፡ ላዕሌሁ፡ በገዳም፡ ዕደው፡ እለ፡ ዳታን፡ ወአቤሮን፡ ወትዕይንቶሙ፡ ለእለ፡ ቆሬ፡ ወሞቱ፡ በመቅሠፍት፡ ወበመንሱት።
19 ወርእዮሙ፡ እግዚአብሔር፡ ወኢያሥመርዎ፡ ወአጥፍኦሙ፡ በመዐቱ፡ ወገብረ፡ ዕጹበ፡ በላዕሌሆሙ፡ ወአኅለቆሙ፡ በነደ፡ እሳት።
20 ወወሰኮ፡ ክብረ፡ ለአሮን፡ ወወሀቦ፡ መክፈልቶ፡ ቀዳሜ፡ እክሎሙ፡ ወቅድመ፡ ሠርዖሙ፡ እክለ፡ ዘያጸግቦሙ።
21 ከመ፡ ይብልዑ፡ መሥዋዕቶ፡ ለእግዚአብሔር፡ ዘወሀቦ፡ ሎቱ፡ ወለፍሬሁ።
22 ከመ፡ ኢይትካፈሎሙ፡ ምድሮሙ፡ ለሕዝቡ፡ ወኢይትዋረስ፡ ምስለ፡ ሕዝ[ብ]፡ ርስ[ተ]፡ እስመ፡ ውእቱ፡ ክፍልከ፡ ወርስትከ።
23 ወፊንሐስኒ፡ ወለደ፡ አልዐዛር፡ ሣልስ፡ ክብሩ፡ እስመ፡ ቀንአ፡ ለፍርሀተ፡ እግዚአብሔር፡ ወአቀሞ፡ ለገሥጾ፡ ሕዝብ፡ በኂሩና፡ ነፍሱ፡ እምፈቃዱ፡ አስተርአየ፡ ለእስራኤል።
24 ወእንበይነ፡ ዝንቱ፡ አቀመ፡ ሎቱ፡ ኪዳነ፡ ሰላም፡ ከመ፡ ይምሀሮሙ፡ ለሕዝቡ፡ በሥርዐተ፡ ቅዱሳን፡ ወከመ፡ ይኩኖ፡ ሎቱ፡ ወለዘርኡ፡ ዐቢይ፡ ክህነት፡ ዘለዓለም።
25 ወትርሲተ፡ ወልዱ፡ ለዳዊት፡ ዘእምነገደ፡ ይሁዳ፡ ወመክፈልተ፡ መንግሥተ፡ ውሉዱ፡ ዘበሕጉ፡ ወሎቱኒ፡ ርስቱ፡ ወለውሉዱ።
26 ከመ፡ የሀቦሙ፡ ጥበበ፡ ውስተ፡ ልቦሙ፡ ከመ፡ ይኰንንዎሙ፡ ለሕዝቡ፡ በጽድቅ፡ ከመ፡ ኢያማስኖሙ፡ በረከቶሙ፡ ወክብሮሙ፡ በኵሉ፡ መዋዕሊሆሙ።
=== chapter 46 ===
[Chapter 46]
1 ጽነዕ፡ ውእቱ፡ በውስተ፡ ቀትል፡ ኢያሱ፡ ወለደ፡ ነዌ፡ ወተለዎ፡ እምነ፡ ሙሴ፡ ተነብዮት፡ ወኮነ፡ በከመ፡ ስሙ፡ ዐቢየ፡ ወአድኀኖሙ፡ ለኅሩያኒሁ፡ ወተበቀለ፡ ፀሮሙ፡ ከመ፡ ያውርሶሙ፡ ለእስራኤል፡ ምድሮሙ።
2 ወተሰብሐ፡ ሶበ፡ አንሥአ፡ እዴሁ፡ ወሶበ፡ ቈልቈለ፡ ኲናተ፡ ላዕለ፡ አህጉሪሆሙ።
3 መኑ፡ እምቅድሜሁ፡ ዘኮነ፡ ከማሁ፡ ወለሊሁ፡ እግዚአብሔር፡ ጸብአ፡ ሎሙ፡ ፀሮሙ።
4 አኮኑ፡ በእዴሁ፡ ቆመት፡ ፀሓይ፡ ወአሐቲ፡ ዕለት፡ ሰኑየ፡ መዋዕለ፡ ኮነት።
5 ወጸውዖ፡ ለልዑል፡ ወኀያል፡ ሶበ፡ አመንደብዎ፡ ፀሩ፡ እምዐውዱ፤ወ[አውሥኦ]፡ እግዚአብሔር፡ ዐቢይ፡ በእብነ፡ በረድ፡ ወበኀይል፡ ጽኑዕ።
6 ወአዝነመ፡ ላዕለ፡ ሕዝብ፡ እለ፡ ጸብእዎሙ፡ በውስተ፡ ጸድፍ፡ አጥፍኦሙ፡ ለእለ፡ ተቃተልዎሙ፡ ከመ፡ ያእምሩ፡ ሕዝብ፡ ኀይሎ፡ እስመ፡ እግዚአብሔር፡ ውእቱ፡ ዘይጸብኦሙ፡ ወአትለወ፡ ምስሌሆሙ፡ ኀይሎ።
7 ወበመዋዕለ፡ ሙሴኒ፡ ገብረ፡ ሣህሎ፡ ምስሌሆሙ፡ ውእቱ፡ ወካሌብ፡ ወልደ፡ ዮፎኒ፡ ወተቃወሙ፡ ቅድመ፡ ፀር፡ ወከልእዎሙ፡ ለሕዝብ፡ ጌጋየ፡ ወአኅደግዎሙ፡ እኩየ፡ ነጐርጓረ።
8 ወእሙንቱ፡ ዳእሙ፡ ክልኤሆሙ፡ እለ፡ ድኅኑ፡ እምነ፡ ስሳ፡ እልፍ፡ አጋራን፡ ወቦኡ፡ ምድረ፡ እንተ፡ ትውሕዝ፡ ሐሊበ፡ ወመዓረ።
9 ወወሀቦ፡ እግዚአብሔር፡ ኀይለ፡ ለካሌብ፡ ወነበረ፡ ምስሌሁ፡ እስከ፡ አመ፡ ይልህቅ፡ ወአዕረጎ፡ ውስተ፡ መልዕልተ፡ ምድር፡ ወውሉዱ፡ ተካፈሉ፡ ርስቶሙ።
10 ከመ፡ ይርአዮ፡ ኵሎሙ፡ ደቂቀ፡ እስራኤል፡ ከመ፡ ሠናይ፡ ተሊዎቱ፡ ለእግዚአብሔር።
11 ወመኳንንቲሆሙኒ፡ ኵሎሙ፡ በበአስማቲሆሙ፡ ወኵሎሙ፡ እለ፡ ኢዘመዎ፡ ልቦሙ፡ ወኵሎሙ፡ እለ፡ ኢኀደግዎ፡ ለእግዚአብሔር፡ ቡሩክ፡ ለይኩን፡ ዝክሮሙ።
12 ወይትፈሣሕ፡ አዕጽምቲሆሙ፡ በኀበ፡ ሀለዉ፡ ወይትባረኩ፡ ውሉዶሙ፡ ወይክበሩ።
13 ሳሙኤልኒ፡ ፍቁር፡ ውእቱ፡ በኀበ፡ እግዚአብሔር፡ ወነቢይ፡ ውእቱ፡ በኀበ፡ እግዚአብሔር፡ ወያነግሥ፡ ንጉሠ፡ ወይቀብእ፡ ንጉሠ፡ ለሕዝቡ።
14 ወበሕገ፡ እግዚአብሔር፡[ኰነነ፡]፡ ትእይንተ፡ ወተሣሀሎ፡ እግዚአብሔር፡ ለያዕቆብ።
15 ወበሃይማኖቱ፡ ጸንዐ፡ ተነብዮ፡ ነቢይ፡ ወአስተርአየ፡ በቃሉ፡ ራእየ፡ ምእመን።
16 ወጸውዖ፡ ለእግዚአብሔር፡ ኀያል፡ ሶበ፡ አመንደብዎ፡ ፀሩ፡ ወዐገትዎ፡ በመሥዋዕተ፡ ማሕስዐ፡ በግዕ።
17 ወአንጐድጐደ፡ እግዚአብሔር፡ በሰማይ፡ ወበዐቢይ፡ ፀዓዕ፡ ገብረ፡ ድምፀ፡ ቃሉ።
18 ወቀጥቀጦሙ፡ ለነገሥተ፡ ጢሮስ፡ ወለኵሎሙ፡ ነገሥተ፡ ፍልስጥኤም።
19 ወእንበለ፡ ይብጻሕ፡ ዕለተ፡ ሞቱ፡ አስምዖ፡ ለእግዚአብሔር፡ ወለመሲሑ፡ እምንዋዮሙ፡ እስከ፡ አሣእኒሆሙ፡ ከመ፡ ኢይነሥአ፡ እምኔሆሙ፡ እምኵሎሙ፡ ወአልቦ፡ እምውስቴቶሙ፡ ዘግእዞ።
20 ወተነበየ፡ እምድኅረ፡ ሞተ፡ ወነገረ፡ ሞቶ፡ ለንጉሥ፡ ወአ[ን]ሥአ፡ ቃሎ፡ እምውስተ፡ ምድር፡ ወበተነብዮቱ፡ አደምሰሰ፡ ጌጋዮሙ፡ ለሕዝብ።
=== chapter 47 ===
[Chapter 47]
1 ወእምድኅሬሁ፡ ተንሥአ፡ ናታን፡ ወተነበየ፡ በመዋዕለ፡ ዳዊት።
2 ከመ፡ ይፈልጡ፡ ስብሐ፡ መሥዋዕተ፡ መድኀኒት፡ ከማሁ፡ ዳዊት፡ ተፈልጠ፡ እምነ፡ ደቂቀ፡ እስራኤል።
3 ከመ፡ መሓስዐ፡ አጣሊ፡ ከማሁ፡ ዐናብስት፡ በኀቤሁ፡ ወከመ፡ ማሕስዐ፡ በግዕ፡ ከማሁ፡ ድብ፡ በኀቤሁ።
4 አኮኑ፡ በንእሱ፡ ቀተለ፡ ይርባሕ፡ ወአኅድጎሙ፡ ጽዕለቶሙ፡ ለሕዝቡ፡ ሶበ፡ አንሥአ፡ እዴሁ፡ ወጸፎ፡ በእብን፡ ወሄጶ፡ ውስተ፡ ፍጽሙ፡ ለጎልያድ፡ ወረከቦ፡ ናላሁ።
5 እስመ፡ ጸውዖ፡ ለእግዚአብሔር፡ ልዑል፡ ወወሀቦ፡ ኀይለ፡ ውስተ፡ የማኑ፡ ከመ፡ ይቅትል፡ ብእሴ፡ ኀያለ፡ በውስተ፡ ጸብእ፡ ከመ፡ ያንኅ፡ ቀርኖሙ፡ ለሕዝቡ።
6 ወሎቱሰ፡ አግብአ፡ ሎቱ፡ ዕልገቶ፡ በእልፍ፡ ሐለያሁ፡ ወዘመራሁ፡ በበረከተ፡ እግዚአብሔር፡ ወተቀጸለ፡ አክሊለ፡ ስብሐት።
7 ወቀጥቀጦሙ፡ ለፀሩ፡ እለ፡ ዐውዱ፡ ወአኅሰሮሙ፡ ለፀ[ር]፡ ፍልስጥኤም፡ ወሰበሮሙ፡ ቀርኖሙ፡ እስከ፡ ዮም።
8 ወበኵሉ፡ ዘገብረ፡ ይትአመን፡ ቦቱ፡ ወበቃለ፡ ስብሐቲሁ፡ ለልዑል፡ ወቅዱስ፡ ወሰብሖ፡ በኵሉ፡ ግብሩ፡ ወአእኰቶ፡ ለፈጣሪሁ፡ ወአፍቀሮ።
9 ወአቀመ፡ መዘምራነ፡ ቅድመ፡ ምሥዋዕ፡ ወጕማ፡ ቃሎሙ፡ ሐዋዝ፡ ወጥዑም።
10 ወገብረ፡ በዓለ፡ ሠናየ፡ ወአስተፍሥሐ፡ ኵሎ፡ ዓመተ፡ ወሰብሐ፡ ስሞ፡ ቅዱሰ፡ እምነግህ፡ ይትነበብ፡ ቅድሳቱ።
11 ወደምሰሰ፡ ሎቱ፡ እግዚአብሔር፡ ኀጣውአ፡ ወአንኀ፡ ቀርኖ፡ ለዓለም፡ ወወሀቦ፡ መንግሥተ፡ ቡርክተ፡ ወመንበረ፡ ክብሮሙ፡ ለእስራኤል።
12 ወእምድኅሬሁ፡ ሎቱ፡ ቆመ፡ ወልዱ፡ ጠቢብ፡ ወበእንቲአሁ፡ ኀደረ፡ ውስተ፡ መርሕብ።
13 ወነግሠ፡ ሰሎሞን፡ በመዋዕለ፡ ሰላም፡ ወአዕረፎ፡ እግዚአብሔር፡ እምኵሉ፡ ዐውዱ፡ ወአቀመ፡ ቤተ፡ በስመ፡ ዚአሁ፡ ወገብረ፡ መቅደሰ፡ በስሙ፡ ዘለዓለም።
14 ወፈድፋደ፡ ጥበብከ፡ እምንእስከ፡ ወመልአት፡ ጥበብከ፡ ከመ፡ ማየ፡ ተከዜ።
15 ወደፈነቶ፡ ለምድር፡ ነፍስከ፡ ወአብዛኅከ፡ አምሳሊከ፡ ወፍካሬ፡ ነገርከ።
16 ወተሰምዐ፡ ስምከ፡ እስከ፡ ርሑቅ፡ ደሰያት፡ ወአፍቀሩከ፡ እንበይነ፡ ሰላምከ።
17 ወበመዝሙርከ፡ ወበአምሳሊከ፡ ወበነገርከ፡ ወአንከሩከ፡ በሓውርት፡ እምነ፡ ፍካሬ፡ ቃልከ።
18 በስመ፡ እግዚአብሔር፡ ዘተሰምየ፡ አምላከ፡ እስራኤል፡ ወዘገብካሁ፡ ለወርቅ፡ ከመ፡ ዐረር፡ ወከመ፡ ናእክ፡ መላእካሁ፡ ለብሩር።
19 ወሜጣከ፡ አንስት፡ ኅሊናከ፡ ወተሰለጥከ፡ በሥጋከ።
20 ወአንወርከ፡ ክብረከ፡ ወገመንከ፡ ዘርአከ፡ ወአምጻእከ፡ መንሱተ፡ ወመቅሠፍተ፡ ላዕለ፡ ውሉድከ፡ ወአደንገጸኒ፡ እበድከ።
21 ወተናፈቀ፡ ምኵናኒከ፡ ወእምነ፡ ኤፍሬም፡ ወፅአት፡ መንግሥተ፡ ዐላዊት።
22 ወእግዚአብሔር፡ ኢኀደገ፡ ምሕረቶ፡ ወኢያጥፍአ፡ ተግባሮ፡ ወኢደመሰሰ፡ ውሉደ፡ ጻድቃን፡ ወኢያእተተ፡ ዘርኦሙ፡ ለእ[ለ፡ያፈቅርዎ]፤ወወሀበ፡ ለያዕቆብ፡ ተረፈ፡ ወለዳዊትኒ፡ ሥርወ፡ እምኔሁ።
23 ወአዕረፈ፡ ሰሎሞን፡ ምስለ፡ አበዊሁ፡ ወኀደገ፡ እምድኅሬሁ፡ ዘርአ፡ ለሕዝብ፡ አብድ፡ ዘአልቦ፡ ልበ፡ ሮብዓም፡ ዘአዕለዎሙ፡ ለሕዝብ፡ በምክሩ፡ ወኢዮሮብዓም፡ ዘአስሐቶሙ፡ ለእስራኤል፡ ወገብረ፡ ፍኖተ፡ ኀጢአት፡ ለኤፍሬም።
24 ወበዝኀ፡ ኀጢአቶሙ፡ ፈድፋደ፡ ወአውፅኦሙ፡ እምነ፡ ምድሮሙ።
25 ወኀሠሥዋ፡ ለኵላ፡ እኪት፡ እስከ፡ በጽሖሙ፡ ፍዳሆሙ።
=== chapter 48 ===
[Chapter 48]
1 ወተንሥአ፡ ኤልያስ፡ ነቢይ፡ ዘከመ፡ እሳት፡ ወቃሉኒ፡ ከመ፡ ነድ፡ ያውዒ።
2 ወአምጽአ፡ ረኃብ፡ ላዕሌሆሙ፡ ወበቅንአቱ፡ አውኀዶሙ።
3 ወበቃለ፡ እግዚአብሔር፡ ከልኦ፡ ለሰማይ፡ ወአውረደ፡ እሳተ፡ እምሰማይ፡ ሥልሰ።
4 እፎ፡ ተሰባሕከ፡ ኤልያስ፡ በስብሐቲከ፡ ወመኑ፡ ተመክሐ፡ ከማከ።
5 ዘአንሥአ፡ በድነ፡ እምነ፡ ምውታን፡ ወእምነ፡ መቃብርኒ፡ በቃለ፡ ልዑል።
6 ወአውረዶሙ፡ ለነገሥት፡ ውስተ፡ ሞት፡ ወለክቡራን፡ እመነ፡ ዓራታቲሆሙ።
7 ዘያ[ፀምእ፡]ኵነኔ፡ በሲና፡ ወበኮሬብ፡ ፍትሐ፡ ወበቀለ።
8 ዘይቀብኦሙ፡ ለነገሥት፡ ወይትፈድዮሙ፡ ወተዐለዉ፡ ነቢያት፡ እምኔሁ።
9 ዘዐርገ፡ በነደ፡ እሳት፡ በሰረገላት፡ ወበአፍራስ፡ ዘእሳት።
10 ዘአጽሐፈ፡ ኵነኔ፡ ለዕድሜሁ፡ ከመ፡ ያቊርር፡ መዐተ፡ እምቅድመ፡ መቅሠፍት፡ ወከመ፡ ያግብእ፡ ልበ፡ አብ፡ ኀበ፡ ውሉድ፡ ወከመ፡ ያቅሞሙ፡ ለአሕዛበ፡ ያዕቆብ።
11 ብፁዓን፡ እለ፡ ያአምሩከ፡ ወእለ፡ ስርግዋን፡ በፍቅርከ፡ ወንሕነሂ፡ ሕይወተ፡ ነሐዩ፡(በእንቲአከ)።
12 ኤልያስ፡ ዘዐርገ፡ በነደ፡ እሳት፡ ወኤልሳዕኒ፡ ዘመልአ፡ ላዕሌሁ፡ እምነ፡ መንፈሱ፡(ቅዱስ)፡ወበመዋዕሊሁኒ፡ ኢያደንግጽዎ፡ መላእክት፡ ወአልቦ፡ ዘተዐገሎ፡ ወኢመኑሂ።
13 ወእምኵሉ፡ ነገር፡ አልቦ፡ ዘተስእኖ፡ ወመዊቶሂ፡ ተነበየ፡ በድኑ።
14 ወበሕይወቱሂ፡ ገብረ፡ ነኪረ፡ ወመሞቱሂ፡ ዕጹብ፡ ግብሩ።
15 ወምስለዝ፡ ኵሉ፡ ኢነስሑ፡ ሕዝብ፡ ወኢኀደጉ፡ ጌጋዮሙ፡ እስከ፡ ተፄወዉ፡ እምነ፡ ብሔሮሙ፡ ወተዘርዉ፡ ውስተ፡ ኵሉ፡ ምድር፡ ወተርፉ፡ ኅዳጣን፡ እምውስተ፡ ሕዝብ፡ ወመልአ[ክ]፡ እምነ፡ ቤተ፡ ዳዊት።
16 ወቦ፡ እምውስቴቶሙ፡ እለ፡ ገብሩ፡ ሠናየ፡ ወቦ፡ እለ፡ አብዝኅዋ፡ ለኃጢአት።
17 ወሕዝቅያስኒ፡ አጽንዐ፡ ሀገሮ፡ ወአብአ፡ ማየ፡ ማእከላ፡ ወአውቀረ፡ ኰኵሐ፡ በኀጺን፡ ወሐነጸ፡ ምዕቃለ፡ ማይ።
18 ወዐርገ፡ ስናክሬም፡ በመዋዕሊሁ፡ ወለአኮ፡ ለረፍስቂስ፡ ወሖረ፡ ኀቤሁ፡ ወአንስአ፡ እዴሁ፡ ላዕለ፡ ጽዮን፡ ወተዘኀረ፡ ወአዕበየ፡ አፉሁ።
19 ወውእተ፡ አሚረ፡ ደንገጾሙ፡ ልቦሙ፡ ወእደዊሆሙ፡ ወሐሙ፡ ከመ፡ እንተ፡ ትውልድ።
20 ወጸውዕዎ፡ ለአእግዚአብሔር፡ ለመሓሪ፡ ወአንሥኡ፡ እደዊሆሙ፡ ኀቤሁ፡ ወፍጡነ፡ ሰምዖሙ፡ ቅዱስ፡ እምሰማይ፡ ወቤዘዎሙ፡ በእደዊሁ፡ ለ[ኢሳይያስ]።
21 ወቀተሎሙ፡ ተዓይኒሆሙ፡ ለፋርስ፡ ወቀጥቀጦሙ፡ መልአኩ።
22 እስመ፡ ገብረ፡ ሕዝቅያስ፡ ዘይኤድሞ፡ ለእግዘአብሔር፡ ወአጽንዐ፡ [እኂዘ፡]ፍናዌ፡ ዳዊት፡ አቡሁ፡ በከመ፡ አዘዘ፡ ኢሳይያስ፡ ነቢይ፡ ወምእመን፡ ውእቱ፡ ወዐቢይ፡ ራእዩ።
23 ወተፀርዐት፡ ፀሓይ፡ በመዋዕሊሁ፡ ወወሰኮ፡ ዓመቲሁ፡ ለንጉሥ።
24 ወበዐቢይ፡ መንፈስ፡ ርእየ፡ ደኃሪተ፡ ወአስተፍሥሖሙ፡ ለእለ፡ ይላሕዉ፡ በጽዮን።
25 ወነገረ፡ ዘይከውን፡ ለዓለም፡ ወዘኒ፡ ኅቡእ፡ ዘእንበለ፡ ይኩን።
=== chapter 49 ===
[Chapter 49]
1 ዝክሩ፡ ለኢዮስያስ፡ ሠናይ፡ ዝክረ፡ ጥበብ፡ ከመ፡ ዕፍረት፡ ዘቅድው፡ መዐዛሁ፡ ወጥዑም፡ ከመ፡ መዓር፡ ውስተ፡ ኵሉ፡ አፍ፡ ወከመ፡ ማሕሌት፡ ውስተ፡ ስታይ።
2 ወውእቱ፡ ረትዐ፡ ወሜጦሙ፡ ለሕዝብ፡ ወአእተተ፡ ኵሎ፡ ኀጢአተ፡ ርኵስ።
3 ወአርትዐ፡ ልቦ፡ ኀበ፡ እግዚአብሔር፡ ወበመዋዕለ፡ ኀጥኣን፡ አጽንዓ፡ ለጽድቅ።
4 ዳዊት፡ ዳእሙ፡ ወሕዝቅያስ፡ ወኢዮስያስ፡ ወኵሎሙ፡ እልክቱሰ፡ አበሱ፡ ወጌገዩ፡ ወኀደጉ፡ ሕጎ፡ ለልዑል፡ ወኀልቁ፡ ነገሥተ፡ ይሁዳ።
5 እስመ፡ አግብኡ፡ ቀርኖሙ፡ ለባዕድ፡ ወክብሮሙኒ፡ ለካልእ፡ ሕዝብ።
6 ወአውዐይዋ፡ ለሀገር፡ ኅሪት፡ ወቅድስት፡ ወአጥፍኡ፡ ፍናዊሃ፡ በእደ፡ ኤርምያስ።
7 እስመ፡ ሣቀይዎ፡ ወውእቱሰ፡ እምከርሠ፡ እሙ፡ ተቀደሰ፡ ይኩን፡ ነቢየ፡ ከመ፡ ይሠሩ፡ ወከመ፡ ያጥፍእ፡ ወከማሁ፡ ከመ፡ ይትክል፡ ወከመ፡ ይሕንጽ።
8 ወሕዝቅኤልኒ፡ ዘርእየ፡ ርእየተ፡ ስብሐቲሁ፡ ወርእዩ፡ ላእለ፡ ሠረገላ፡ ዘኪሩቤል።
9 ወዘከሮሙ፡ በመዐት፡ ለፀር፡ ወበሠናይ፡ አርትዐ፡ ፍናዎሙ፡ ለጻድቃን።
10 ወሠረጸ፡ አዕጽምቲሆሙ፡ ለዐሠርቱ፡ ወክልኤቱ፡ ነቢያት፡ በመካኖሙ። ወአስተፍሥሖ፡ ለያዕቆብ፡ ወቤዘዎሙ፡ በሃይማኖተ፡ ተስፋሆሙ።
11 እፎኑ፡ እንጋ፡ ናዐብዮ፡ ለዘሩባቤል፡ ወውእቱሰ፡ ከመ፡ ኅልቀተ፡ ማዕተብ፡ ውስተ፡ ዕደ፡ የማን።
12 ወኢዮሴዕኒ፡ ወልደ፡ ዮሴዴቅ፡ እለ፡ ሐነጹ፡ ቤተ፡ በመዋዕሊሆሙ፡ ወአዕበይዎ፡ [ለሕዝብ፡]እግዚአብሔር፡ ዘድልው፡ ለክብር፡ ዘለዓለም።
13 ወለነሐምያን፡ ብዙኅ፡ ዝክሩ፡ [ዘ]አንሥአ፡ ለነ፡ አረፍተ፡ ውድቅተ፡ ወአቀመ፡ ኆኅተ፡ ወገብረ፡ መናሥግተ፡ ወሐነጸ፡ ለነ፡ አብያቲነ።
14 ወአልቦ፡ ዘተፈጥረ፡ ውስተ፡ ምድር፡ ዘከመ፡ ሄኖክ፡ ወሎቱኒ፡ ነሥእዎ፡ እምነ፡ ብሔር።
15 ወኢተወልደ፡ ሰብእ፡ ዘከመ፡ ዮሴፍ፡ መልአከ፡ ኮነ፡ ለአኀዊሁ፡ ወኀይለ፡ ኮነ፡ ለሕዝቡ፡ ወሣህለ፡ ረከበ፡ ለአዕፅምቲሁ።
16 ሴም፡ ወሴት፡ ከብሩ፡ እምእጓለ፡ እመሕያው፡ ወአዳምኒ፡ እምኵሉ፡ ሕያው፡ ዘተፈጥረ።
=== chapter 50 ===
[Chapter 50]
1 ስምዖን፡ ወልደ፤….ካህን፡ ዐቢይ፡ ወበሕይወቱ፡ ሐነጸ፡ ቤተ፡ ወበመዋዕሊሁ፡ አጽንዐ፡ ጽርሐ።
2 ወከማሁ፡ ሣረረ፡ ዘይነውኆ፡ ካዕበቶ፡ ወገብረ፡ ልብሰ፡ ቀጢነ፡ ዘይትዐጸፍ፡ ካህን።
3 ወበመዋዕሊሁ፡ ሐነጸ፡ አንቅዕተ፡ ማያት፡ ወዐዘቅትኒ፡ ዘከመ፡ ማየ፡ ባሕር፡ ብዝኁ።
4 ዘይኄልዮሙ፡ ለሕዝቡ፡ እምነ፡ ድቀት፡ ወኀሠሠ፡ አሠረ፡ ሀገር፡ ወቀተለ።
5 ወተሰብሐ፡ በሚጠቶሙ፡ ለሕዝብ፡ ወበመንጦላዕተ፡ አንቀጸ፡ ቤት።
6 ከመ፡ ኮከበ፡ ጽባሕ፡ በውስተ፡ ደመና፡ ወከመ፡ ወርኅ፡ ምልእት፡ በዕለተ፡ ገሃህ።
7 ወከመ፡ ፀሓይ፡ እንተ፡ ታበርህ፡ በመቅደሱ፡ ለልዑል፡ ወከመ፡ ስብሐተ፡ ብርሃን፡ በ[ቀስተ]፡ደመና።
8 ወከመ፡ ጽጌ፡ ረዳ፡ በወርኀ፡ ኔዎን፡ ወከመ፡ ዘይፈሪ፡ ኀበ፡ ሙሓዘ፡ ማይ፡ ወከመ፡ ሠርጸ፡ ሊባኖስ፡ በመዋዕለ፡ ማእረር።
9 ወከመ፡ ስኂን፡ ውስተ፡ እሳት፡ ዲበ፡ ማዕጠንት፡ ወከመ፡ ንዋየ፡ ወርቅ፡ ዝብጦ።
10 ወከመ፡ ዕፀ፡ ዘይት፡ እንተ፡ ሠረጸ፡ ፍሬሃ፡ ወከመ፡ ዕንቊ፡ ክቡር፡ ውስተ፡ ሰርጕ፡ ወከመ፡ ዕፀ፡ ቄጵሮስ፡ ነዋኅ፡ በታሕተ፡ ደመና።
11 ከማሁ፡ ውእቱ፡ ሶበ፡ ይለብስ፡ ልብሰ፡ ክብሩ፡ ወሶበ፡ ይለብስ፡ ሰርጐ፡ ምክሑ፡ ወሶበ፡ የዐርግ፡ ውስተ፡ መዓርገ፡ ምሥዋዕ፡ ወተሰብሀ፡ በልብሰ፡ ቅድሳተ፡ ስብሐት።
12 ሶበ፡ ይትሜጦ፡ ሥጋ፡ መሥዋዕት፡ እምእዴሆሙ፡ ለካህናት፡ እንዘ፡ ይቀውም፡ ውስተ፡ ምቅዋመ፡ ግብሩ፡ ወይቀውም፡ ዐውዶ፡ አኀዊሁ፡ ወይኬልልዎ፡ ወየዐውድዎ፡ ከመ፡ በቀልት፡ ተመርት።
13 ወኵሎሙ፡ ደቂቀ፡ አሮን፡ በትርሲቶሙ፡ ወመባአ፡ እግዚአብሔር፡ ውስተ፡ እደዊሆሙ፡ በቅድመ፡ ኵሉ፡ ማኅበሮሙ፡ ለእስራኤል።
14 ወይገብሩ፡ ግብሮሙ፡ በውስተ፡ መሥዋዕት፡ ወያሤንዩ፡ መሥዋዕቶ፡ ለልዑል፡ ዘኵሎ፡ ይመልክ።
15 ወአንሥአ፡ እዴሁ፡ በሞጻሕት፡ ወአውጽሐ፡ በደመ፡ አስካል፡ ወይሰውጥ፡ ውስተ፡ መሠረተ፡ ምሥዋዕ፡ መዐዛ፡ ሠናይ፡ ለልዑል፡ ለንጉሠ፡ ኵሉ፡ ነገሥት።
16 ወያነብቡ፡ ደቂቀ፡ አሮን፡ ወይነፍኁ፡ በቀርነ፡ ዝብጦ፡ ወያሰምዑ፡ ድምፆ፡ በዐቢይ፡ ቃል፡ ተዝካረ፡ በቅድመ፡ ልዑል።
17 ይእተ፡ አሚረ፡ ኅቡረ፡ ያዐርፉ፡ ኵሎሙ፡ ሕዝብ፡ ወይሰግዱ፡ በገጾሙ፡ ውስተ፡ ምድር፡ ወይገንዩ፡ ለእግዚአብሔር፡ እግዚኦሙ፡ ለልዑል፡ ዘኵሎ፡ ይመልክ።
18 ወይሴብሕዎ፡ መዘምራን፡ በቃሎሙ፡ ወይመልእ፡ ኵሎ፡ ቤተ፡ ዕበየ፡ ጕማ፡ ቃሎሙ።
19 ወይጼልዩ፡ ሕዝብ፡ ኀበ፡ እግዚአብሔር፡ ልዑል፡ ወይስእሉ፡ ቅድሜሁ፡ ለመሓሪ፡ እስከ፡ ይፌጽሙ፡ በሕገ፡ እግዚአብሔር፡ ወይገብሩ፡ ግብሮሙ።
20 ወእምዝ፡ ወረደ፡ ወአንሥአ፡ እዴሁ፡ ላዕለ፡ ኵሉ፡ ማኅበሮሙ፡ ለደቂቀ፡ ለእስራኤል፡ ከመ፡ የሀቦሙ፡ በረከተ፡ እግዚአብሔር፡ በከናፍሪሁ፡ ወከመ፡ ይትመክሑ፡ በስሙ።
21 ወደገሙ፡ ሰጊደ፡ ከመ፡ ያርኢ፡ ልዑል፡ በረከቶ።
22 ወይእዜኒ፡ ባርክዎ፡ ለአምላከ፡ ኵሉ፡ ዘይገብር፡ ዐቢየ፡ በኵለሄ፡ ዘያነውኅ፡ መዋዕሊነ፡ እምከርሠ፡ እምነ፡ ወይገብር፡ ምስሌነ፡ በከመ፡ ምሕረቱ።
23 ወየሀበነ፡ ትፍሥሕተ፡ ልብ፡ ወይ[ግበ]ር፡ ሰላመ፡ በመዋዕሊነ፡ ወበላዕለኒ፡ እስራኤል፡ በአምጣነ፡ መዋዕለ፡ ዓለም።
24 ወተአመነ፡ ምስሌነ፡ ምሕረቱ፡ ወቤዘወነ፡ በመዋዕሊነ።
25 ክልኤተ፡ አሕዛበ፡ ጸልአት፡ ነፍስየ፡ ወሣልሶሙሰ፡ ኢኮነ፡ ሕዝብ።
26 እለ፡ ይነብሩ፡ ውስተ፡ ደብረ፡ ሰማርያ፡ ወፍልስጥኤም፡ ወሕዝበ፡ አሞሬዎን፡ እለ፡ ይነብሩ፡ ውስተ፡ ሰቂማ።
27 ትምህርተ፡ ጥበብ፡ ወተግሣጽ፡ ጸሐፍኩ፡ ውስተ፡ ዝንቱ፡ መጽሐፍ፡ ኢያሱ፡ ወልደ፡ ሲራክ፡ ወልደ፡ አልዐዛር፡ ዘኢየሩሳሌም፡ ዘአንቅዓ፡ ለጥበብ፡ እምልቡ።
28 ብፁዕ፡ ዘይገብር፡ ከመዝ፡ ዘንተ፡ ወዘይጠብብ፡ ወየዐቅቦ፡ ለዝንቱ።
29 ዘዘንተ፡ ገብረ፡ ኵሎ፡ ይክል፡ እስመ፡ ብርሃኑ፡ ለእግዚአብሔር፡ አሠሩ።
=== chapter 51 ===
[Chapter 51]
1 እገኒ፡ ለከ፡ እግዚኦ፡ ንጉሥ፡ ወእሴብሐከ፡ አምላኪየ፡ ወመድኀኒየ፡ ወእትአመን፡ በስምከ።
2 እስመ፡ ኮንከኒ፡ ረዳኤ፡ ወመሰውረ፡ ወቤዘውኮ፡ ለሥጋየ፡ እምነ፡ ሞት፡ ወእምነ፡ መሥገርተ፡ ውድየተ፡ ልሳን፡ ወእምነ፡ አእላፍ፡ እለ፡ ይትጌበርዋ፡ ለሐሰት። በቅድመ፡ ኵሎሙ፡ እለ፡ ቆሙ፡ ላዕሌየ፡ ኮንከኒ፡ ረዳእየ፡ ወመሰውርየ።
3 ወቤዘውከኒ፡ በከመ፡ ብዝኀ፡ ምሕረትከ፡ ወበእንተ፡ ስምከ። ከመ፡ ዘየሐቅዩ፡ ዘአስተዳለዉ፡ ይብልዑ፡ ከማሁ፡ ኀሠሥዋ፡ ለነፍስየ፡ በብዝኀ፡ ሕማም፡ እንተ፡ ረከበተኒ።
4 ወከመ፡ ዘዐገቶ፡ እሳት፡ ወኢይውዒ፡ በማእከለ፡ እሳት።
5 ወእምታሕቱ፡ እምከርሠ፡ ሞት፡ ወእምልሳን፡ ግሙን፡ ወእምቃለ፡ ሐሰት።
6 ልሳን፡ ዐማፂ፡ ዘያስተዳጕጽ፡ ኀበ፡ ንጉሥ፡ ወአብጽሓ፡ ውስተ፡ ሞት፡ ለ(ሕይወትየ፡ ወለ)ነፍስ፡ ወሕይወትየኒ፡ አልጸቀት፡ ለመቃብር።
7 ወዐገቱኒ፡ እምኵለሄ፡ ወኀጣእኩ፡ ረዳኤ፡ ወተናጸርኩ፡ እመቦ፡ ዘይትዔዘበኒ፡ ሰብእ፡ ወአልቦ።
8 ወተዘከርኩ፡ ሣህለከ፡ እግዚኦ፡ ወግብረከኒ፡ ዘእምፍጥረተ፡ ዓለም፡ እስመ፡ ብፁዓን፡ እለ፡ ኪያከ፡ ይሴፈዉ፡ ወታድኅኖሙ፡ እምእደ፡ ፀሮሙ።
9 ወአንሣእከኒ፡ እመነ፡ ምድር፡ እምኀጢአትየ፡ ወሰአልኩ፡ ከመ፡ እድኅን፡ እሞት።
10 ወእቤሎ፡ ለእግዚአብሔር፡ አቡየ፡ ወእግዚእየ፡ ኢትኅድገኒ፡ አመ፡ ምንዳቤየ፡ በመዋዕለ፡ ዕቡያን፡ ኀበ፡ አልቦ፡ ረድኤት።
11 ወእሴብሕ፡ ለስምከ፡ ለዝሉፉ፡ ወእገኒ፡ ወአነብብ፡ ወ[ሰ]ምዐኒ፡ ስእለትየ።
12 ወአድ[ኅ]ነኒ፡ እሞት፡ ወባልሐኒ፡ እምዕለት፡ እኪት፡ እንበይነ፡ ዝንቱ፡ እገኒ፡ ለከ፡ ወእሴብሐከ፡ ወእባርክ፡ ለስምከ፡ እግዚኦ።
13 እንዘ፡ ንኡስ፡ አነ፡ እንበለ፡ እስሐት፡ ኀሠሥክዋ፡ ለጥበብ፡ ወአበደርክዋ፡ በጸሎትየ።
14 ወበቅድመ፡ መቅደስ፡ ሰአልኩ፡ በእንቲአሃ፡ ለዝሉፉ፡ አኀሥሣ።
15 ወሠረጸ፡ ፍሬሃ፡ ከመ፡ ቆዐ፡ ቀምሕ፡ ወተፈሥሐ፡ ልብየ፡ ባቲ፡ ወቆመት፡ እግርየ፡ በጽድቅ፡ ወእምንእስየ፡ ተለውኩ፡ አሠራ።
16 ወአፅማእኩ፡ ሕቀ፡ በእዝንየ፡ ወኀረይክዋ፡ ወብዙኀ፡ ጥበበ፡ [ረከብ]ኩ፡ ሊተ።
17 ወኮነኒ፡ ተልዕሎ፡ ባቲ፡ ወእሴብሖ፡ ለዘወሀበኒያ፡ ለጥበብ።
18 ወኀለይኩ፡ ከመ፡ እግበራ፡ ወቀናእኩ፡ ለሠናይ፡ ወኢይትኀፈር።
19 ወተኀየለት፡ ነፍስ፡ባቲ፡ ወጠበብኩ፡ በግብርየ፡ ወአንሣእኩ፡ ላዕለ፡ እደዊየ፡ ወለሐውክዋ፡ ለእበድየ።
20 ወአርታዕኩ፡ ነፍስየ፡ በእንቲአሃ፡ ወረከብክዋ፡ በንጹሕ፡ ወአቀምኩ፡ ልብየ፡ ምስሌሃ፡ እምቀዳሚሁ፡ ወእንበይነ፡ ዝንቱ፡ ኢገደፈኒ።
21 ወከርሥየኒ፡ ተሀውከት፡ ላቲ፡ ወኀሠሠታ፡ እንበይነ፡ ዝንቱ፡ አጥረይኩ፡ ሠናየ፡ ጥሪተ።
22 ወወሀበኒ፡ እግዚአብሔር፡ በልሳንየ፡ ዕሴትየ፡ ወእሴብሖ፡ ባቲ።
23 ቅረቡ፡ ኀቤየ፡ አብዳን፡ ወትኅደሩ፡ ውስተ፡ ቤተ፡ ጥበብ።
24 በእፎ፡ ኀጣእክምዋ፡ ንግሩ፡ እንበይነ፡ ዝንቱ፡ ወነፍስክሙኒ፡ ጸምአት፡ ፈድፋደ።
25 ወከሠትኩ፡ አፉየ፡ ወነገርኩ፡ ወአጥ[ርይዋ]፡ ለክሙ፡ እንበለ፡ ሤጥ።
26 አትሕቱ፡ ክሳደክሙ፡ ወተሰክምዋ፡ ጾራ፡ ወትትወከፍ፡ ነፍስክሙ፡ ጥበበ፡ ቅሩብ፡ ውእቱ፡ ረኪቦታ።
27 ናሁ፡ ርእዩ፡ በአዕይንቲክሙ፡ ከመ፡ ውኁደ፡ ጻመውኩ፡ ወብዙኀ፡ ዕረፍተ፡ ረከብኩ፡ ሊተ።
28 አብ[ድር]ዋ፡ ለጥበብ፡ እምነ፡ ብዙኀ፡ ወርቅ፡ ዘአልቦ፡ ኈልቈ፡ አጥ[ርይ]ዋ፡ ለክሙ።
29 ወ[ትትፌሣሕ፡ ነፍስክሙ፡]፡ በምሕረቱ፡ ወኢትኅፈሩ፡ አእኵቶቶ።
30 ግበሩ፡ ግብረክሙ፡ እንበለ፡ ይብጻሕ፡ ዕድሜሁ፡ ከመ፡ የሀብክሙ፡ ዕሴተክሙ፡ በጊዜሁ።