##### edition  (gez)
=== chapter 1 ===
[Numeri 1]
1 ወነበቦ ፡ እግዚአብሔር ፡ ለሙሴ ፡ በገዳም ፡ ዘሲና ፡ በውስተ ፡ ደብተራ ፡ ዘመርጡል ፡ አመ ፡ ርእሰ ፡ ሠርቀ ፡ ካልእ ፡ ወርኅ ፡ በካልእት ፡ ዓመት ፡ ዘወፅኡ ፡ እምድረ ፡ ግብጽ ፡ ወይቤሎ ፤
2 አኀዙ ፡ እምጥንቱ ፡ ወኈልቍዎሙ ፡ ለኵሉ ፡ ተዓይኖሙ ፡ ለደቂቀ ፡ እስራኤል ፡ በበነገዶሙ ፡ ወበበቤተ ፡ አበዊሆሙ ፡ ወበበ ፡ አስማቲሆሙ ፡ ለለ ፡ አሐዱ ፤
3 ኵሉ ፡ ተባዕት ፡ ዘእምነ ፡ ዕሥራ ፡ ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይለ ፡ እስራኤል ፡ ወአስተፋቅድዎሙ ፡ ምስለ ፡ ኀይሎሙ ፤
4 አንተ ፡ ወአሮን ፡ አስተፋቅድዎሙ ።
5 ወየሀልዉ ፡ ምስሌክሙ ፡ አሐዱ ፡ አሐዱ ፡ እምነ ፡ መላእክተ ፡ ነገዶሙ ፡ እለ ፡ እምውስተ ፡ አብያተ ፡ አበዊሆሙ ፡ የሀልው ።
6 ወዝንቱ ፡ ውእቱ ፡ አስማቲሆሙ ፡ ለውእቶሙ ፡ ዕደው ፡ እለ ፡ መጽኡ ፡ ምስሌሆሙ ፡ ዘእምውስተ ፡ ሮቤል ፡ ኤሊሱር ፡ ወልደ ፡ ሰዲዩር ።
7 ወዘእምውስተ ፡ ስምዖን ፡ ሰልሚየል ፡ ወልደ ፡ ሶሪስዴ ።
8 ወዘእምውስተ ፡ ይሁዳ ፡ ነአሶን ፡ ወልደ ፡ አሚናዳብ ።
9 ወዘእምውስተ ፡ ይስካር ፡ ናተናኤል ፡ ወልደ ፡ ሶገር ።
10 ወዘእምውስተ ፡ ዛቡሎን ፡ ኤልያብ ፡ ወልደ ፡ ኬሎን ።
11 ወዘእምውስተ ፡ ትውልደ ፡ ዮሴፍ ፡ ዘእምነ ፡ ኤፍሬም ፡ ኤሊሳማ ፡ ወልደ ፡ ሴሚዩድ ፡ ወዘእምውስተ ፡ ማናሴ ፡ ገማልያል ፡ ወልደ ፡ ፈዳሶር ።
12 ወዘእምውስተ ፡ ብንያሚ ፡ አቢዳን ፡ ወልደ ፡ ጋዲዮኒ ።
13 ወዘእምውስተ ፡ ዳን ፡ አኪየዜር ፡ ወልደ ፡ ሰሚሳዴ ።
14 ወዘእምውስተ ፡ አሴር ፡ ፋጌኤል ፡ ወልደ ፡ ኤክራን ።
15 ወዘአምውስተ ፡ ጋድ ፡ ኤሊሳፍ ፡ ወልደ ፡ ራጉኤል ።
16 ወዘእምውስተ ፡ ንፍታሌም ፡ አኪሬ ፡ ወልደ ፡ ኤናን ።
17 እሉ ፡ ውእቶሙ ፡ ኅሩያነ ፡ ተዓይኒሆሙ ፡ መላእክተ ፡ ነገዶሙ ፡ ዘበበ ፡ አዝማዲሆሙ ፡ መሳፍንቶሙ ፡ ለእስራኤል ፡ እሙንቱ ።
18 ወነሥእዎሙ ፡ ሙሴ ፡ ወአሮን ፡ ለእሉ ፡ ዕደው ፡ እለ ፡ ተሰምዩ ፡ በበ ፡ አስማቲሆሙ ።
19 ወአስተጋብኡ ፡ ኵሎ ፡ ተዓይነ ፡ አመ ፡ ርእሰ ፡ ሠርቀ ፡ ወርኅ ፡ በካልእት ፡ ዓመት ፡ ወኈለቍዎሙ ፡ በበ ፡ አዝማዲሆሙ ፡ ወበበ ፡ ነገዶሙ ፡ ወበበኍልቈ ፡ አስማቲሆሙ ፡ ዘእም፳ዓም ፡ ወላዕሉ ፡ እምኔሁ ፡ [ለ]ኵሉ ፡ ተባዕቶሙ ፡ በበርእሶሙ ፤
20 በከመ ፡ አዘዞ ፡ እግዚአብሔር ፡ ለሙሴ ፡ ወኈለቍዎሙ ፡ እሙንቱ ፡ በደብረ ፡ ሲና ።
21 ወኮነ ፡ ደቂቀ ፡ ሮቤል ፡ በኵሩ ፡ ለእስራኤል ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበ ፡ ርእሶሙ ፡ ለኵሉ ፡ ተባዕቶሙ ፡ ዘእም፳ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይል ፤
22 ኍለቊሆሙ ፡ ዘእምነገደ ፡ ሮቤል ፡ ፬፻-፻፷፻፭፻ ።
23 ወደቂቁኒ ፡ ለስምዖን ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይል ፤
24 ኍለቊሆሙ ፡ ዘእምነገደ ፡ ስምዖን ፡ ፭፻-፻፺፻፫፻ ።
25 ወደቂቁኒ ፡ ለይሁዳ ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ ዘይወፅእ ፡ ምስለ ፡ ኀይል ፤
26 ኍለቊሆሙ ፡ ዘእምነገደ ፡ ይሁዳ ፡ ፯፻-፻፵፻፯፻ ።
27 ወደቂቁኒ ፡ ለይስካር ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበ ፡ ኍ[ልቈ] ፡ አስማቲሆሙ ፡ [በበ ፡] ርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይል ፤
28 ኍለቊሆሙ ፡ ዘእምነገደ ፡ ይስካር ፡ ፭፻-፻፵፻፬፻ ።
29 ወደቂቁኒ ፡ ለዛቡሎን ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበ ፡ ኍልቈ ፡ አስማቲሆሙ ፡ ወበበርእሶሙ ፡ ኵሉ ፡ ተባዕቶሙ ፡ ዘእም፳ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይል ፤
30 ኍለቊሆሙ ፡ ዘእምነገደ ፡ ዛቡሎን ፡ ፭፻-፻፸፻፬፻ ።
31 ወደቂቁኒ ፡ ለዮሴፍ ፡ ደቂቀ ፡ ኤፍሬም ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይል ፤
32 ኍለቊሆሙ ፡ ዘእምነገደ ፡ ኤፍሬም ፡ ፬፻-፻፻፭፻ ።
33 ወደቂቁኒ ፡ ለማናሴ ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ [ኵሉ ፡] ዘይወፅእ ፡ ምስለ ፡ ኀይል ፤
34 ኍለቊሆሙ ፡ ዘእምነገደ ፡ ምናሴ ፡ ፫፻-፻፳፻፪፻ ።
35 ወደቂቁኒ ፡ ለብንያሚ ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበ ፡ ርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይል ፤
36 ኍለቊሆሙ ፡ ዘእምነገደ ፡ ብንያሚ ፡ ፫፻-፻፶፬፻ ።
37 ወደቂቁኒ ፡ ለጋድ ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበ ፡ ርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይል ፤
38 ኍለቊሆሙ ፡ ዘእምነገደ ፡ ጋድ ፡ ፬፻-፻፶፻፯፻፶ ።
39 ወደቂቁኒ ፡ ለዳን ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይል ፤
40 ኍለቊሆሙ ፡ ዘእምነገደ ፡ ዳን ፡ ፯፻-፻፳፻፯፻ ።
41 ወደቂቁኒ ፡ ለአሴር ፡ በበአዝማዲሆሙ ፡ ወበበሕዘቢሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ ዘይወፅእ ፡ ምስለ ፡ ኀይል ፤
42 ኍለቊሆሙ ፡ ዘእምነገደ ፡ አሴር ፡ ፬፻-፻፲፻፭፻ ።
43 ወደቂቁኒ ፡ ለንፍታሌም ፡ በበአዝማዲሆሙ ፡ ወበበሕዘቤሆሙ ፡ ወበበአብያተ ፡ አበዊሆሙ ፡ ወበበኍልቈ ፡ አስማቲሆሙ ፡ ወበበርእሶሙ ፡ ኵሉ ፡ ተባዕት ፡ ዘእም፳ዓም ፡ ወላዕሉ ፡ እምኔሁ ፡ ኵሉ ፡ ዘይወፅእ ፡ ምስለ ፡ ኀይል ፤
44 ኍለቊሆሙ ፡ ዘእምነገደ ፡ ንፍታሌም ፡ ፭፻-፻፴፻፬፻ ።
45 ዛቲ ፡ ይእቲ ፡ ፍቅድ ፡ እንተ ፡ አስተፋቀድዎሙ ፡ ሙሴ ፡ ወአሮን ፡ ወመላእክቲሆሙ ፡ ለእስራኤል ፡ ፲ወ፪ዕደው ፡ አሐዱ ፡ አሐዱ ፡ ብእሲ ፡ እምውስተ ፡ ፩፩ነገድ ፡ አምነገደ ፡ አብያተ ፡ አበዊሆሙ ፡ ውእቶሙ ።
46 ወኮነ ፡ ኵሉ ፡ ኍለቊሆሙ ፡ ለደቂቀ ፡ እስራኤል ፡ ምስለ ፡ ኀይሎሙ ፡ ዘእም፳ዓም ፡ ወላዕሉ ፡ አምኔሁ ፡ ኵሉ ፡ ዘይወፅእ ፡ ፀብአ ፡ እምነ ፡ እስራኤል ፡ ፷፻-፻፴፻፭፻፶ ።
47 ወሌዋውያንሰ ፡ ምስለ ፡ ነገደ ፡ ፍጥረቶሙ ፡ እሙንቱ ፡ ወኢኈለቍዎሙ ፡ ውስተ ፡ ደቂቀ ፡ እስራኤል ።
48 ወነበቦ ፡ እግዚአብሔር ፡ ለሙሴ ፡ ወይቤሎ ፤
49 ዑቅ ፡ ኢትኈልቆሙ ፡ ለነገደ ፡ ሌዊ ፡ ወኢትትመጠው ፡ ኍለቊሆሙ ፡ እምነ ፡ ደቂቀ ፡ እስራኤል ።
50 ወሢሞሙ ፡ ለሌዋውያን ፡ ዲበ ፡ ደብተራ ፡ ዘመርጡል ፡ ወዲበ ፡ ኵሉ ፡ ንዋያ ፡ ወዲበ ፡ ኵሉ ፡ ዘቦቱ ፡ ውስቴታ ፡ ከመ ፡ እሙንቱ ፡ ያንሥእዋ ፡ ለደብተራ ፡ ወለኵሉ ፡ ንዋያ ፡ ወከመ ፡ እሙንቱ ፡ ይግበሩ ፡ ውስቴታ ፡ [ወዐውደ ፡ ደብተራ ፡ ይትዐየኑ ።]
51 ወእመኒ ፡ ግዕዝት ፡ ደብተራ ፡ ይ[ተ]ክልዋ ፡ ሌዋውያን ፡ ወእመሰ ፡ ኅድርት ፡ ይእቲ ፡ ደብተራ ፡ እሙንቱ ፡ ያነሥእዋ ፡ ወዘእምባዕድ ፡ ዘመድ ፡ ዘአኅበረ ፡ ምስሌሆሙ ፡ ሐዊረ ፡ ለይሙት ።
52 ወይትዐየኑ ፡ ደቂቀ ፡ እስራኤል ፡ ብእሲ ፡ ብእሲ ፡ ምስለ ፡ ቢጹ ፡ ወብእሲ ፡ ምስለ ፡ ምስፍናሁ ፡ በበኀይሎሙ ።
53 ወሌዋውያንሰ ፡ ይትዐየኑ ፡ ፍጽመ ፡ ውስተ ፡ ዐውደ ፡ ደብተራ ፡ ዘመርጡል ፡ ወኢይከውን ፡ ጌጋይ ፡ ላዕለ ፡ ደቂቀ ፡ እስራኤል ፡ ወይዕቀቡ ፡ ሌዋውያን ፡ ሕጋ ፡ ለደብተራ ፡ መርጡል ።
54 ወገብሩ ፡ ደቂቀ ፡ እስራኤል ፡ ኵሎ ፡ ዘአዘዞሙ ፡ እግዚአብሔር ፡ ለሙሴ ፡ ወለአሮን ፡ ከማሁ ፡ ገብሩ ።
=== chapter 2 ===
[Numeri 2]
1 ወነበቦ ፡ እግዚአብሔር ፡ ለሙሴ ፡ ወለአሮን ፡ ወይቤሎሙ ፤
2 ብእሲ ፡ ብእሲ ፡ በበሥርዐቱ ፡ ወበበ ፡ ትእምርቱ ፡ ወበበቤተ ፡ አበዊሆሙ ፡ ይትዐየኑ ፡ ደቂቀ ፡ እስራኤል ፡ አንጻረ ፡ ዐውደ ፡ ደብተራ ፡ ዘመርጡል ፡ ይትዐየኑ ፡ ደቂቀ ፡ እስራኤል ።
3 ወእለ ፡ ይቀድሙ ፡ ተዓይኖ ፡ መንገለ ፡ ጽባሕ ፡ ይኅድር ፡ ተዓይነ ፡ ይሁዳ ፡ ምስለ ፡ ኀይሎሙ ፡ ወመልአኮሙኒ ፡ ለደቂቀ ፡ ይሁዳ ፡ ነአሶን ፡ ወልደ ፡ አሚናዳብ ፤
4 ምስለ ፡ ኀይሉ ፡ እለ ፡ ተኈለቁ ፡ ፯፻-፻፵፻፯፻ ።
5 ወእምድኅሬሆሙ ፡ ይትዓየኑ ፡ ነገደ ፡ ይስካር ፡ ወመልአኮሙ ፡ ለደቂቀ ፡ ይስካር ፡ ናታናኤል ፡ ወልደ ፡ ሶገር ፤
6 ምስለ ፡ ኀይሉ ፡ እለ ፡ ተኈለቁ ፡ ፭፻-፻፵፻፬፻ ።
7 ወእምድኅሬሆሙ ፡ ይትዓየኑ ፡ ነገደ ፡ ዛቡሎን ፡ ወመልአኮሙ ፡ ለደቂቀ ፡ ዛቡሎን ፡ ኤልያብ ፡ ወልደ ፡ ኬሎን ፤
8 ምስለ ፡ ኀይሉ ፡ እለ ፡ ተኈለቁ ፡ ፭፻-፻፸፻፬፻ ።
9 ኵሉ ፡ እለ ፡ ተኈለቁ ፡ እምውስተ ፡ ትዕይንተ ፡ ይሁዳ ፡ ፲፻-፻[፰]፻-፻፷፻፬፻ ፡ ምስለ ፡ ኀይሎሙ ፡ እሙንቱ ፡ ይቀድሙ ፡ አንሥኦ ።
10 ወየኀድር ፡ ትዕይንተ ፡ ሮቤል ፡ መንገለ ፡ አዜብ ፡ ምስለ ፡ ኀይሎሙ ፡ ወመልአኮሙ ፡ ለደቂቀ ፡ ሮቤል ፡ [ኤ]ሊሱር ፡ ወልደ ፡ ሴድዩር ፤
11 ምስለ ፡ ኀይሉ ፡ እለ ፡ ተኈለቁ ፡ ፬፻-፻፷፻፭፻ ።
12 ወይትዐየኑ ፡ በገቦሆሙ ፡ ነገደ ፡ ስምዖን ፡ ወመልአኮሙ ፡ ለደቂቀ ፡ ስምዖን ፡ ሰለሚ[ዬል] ፡ ወልደ ፡ ሱሪስዴ ፤
13 ምስለ ፡ ኅይሉ ፡ እለ ፡ ተኈለቁ ፡ ፭፻-፻፺፻፫፻ ።
14 ወየኀድሩ ፡ በገቦሆሙ ፡ ነገደ ፡ ጋድ ፡ ወመልአኮሙ ፡ ለደቂቀ ፡ ጋድ ፡ ኤሊሳፍ ፡ ወልደ ፡ ራጉኤል ፤
15 ምስለ ፡ ኀይሉ ፡ እለ ፡ ተኈለቁ ፡ ፬፻-፻፶፻፯፻፶ ።
16 ኵሉ ፡ እለ ፡ ተኈለቁ ፡ እምውስተ ፡ ትዕይንተ ፡ ሮቤል ፡ ፲፻-፻፭፻-፻[፲፻፬፻፶] ፡ ምስለ ፡ ኀይሎሙ ፡ ወበዳግም ፡ ያነሥኡ ፡ እሙንቱ ።
17 ወይትነሣእ ፡ ደብተራ ፡ መርጡል ፡ ወትዕይነቶሙ ፡ ለሌዋውያን ፡ ማእከለ ፡ ተዓይን ፡ በከመ ፡ ይትዐየኑ ፡ ከማሁ ፡ ያነሥኡ ፡ ፩፩ ፡ ዘዘ ፡ ይታለዉ ፡ በበምስፍናሁ ።
18 ወየኀድር ፡ ትዕይንተ ፡ ኤፍሬም ፡ ገጸ ፡ ባሕር ፡ ምስለ ፡ ኀይሎሙ ፡ ወመልአኮሙ ፡ ለደቂቀ ፡ ኤፍሬም ፡ ኤሊሳማ ፡ ወልደ ፡ ኤሚዩድ ፤
19 ምስለ ፡ ኀይሉ ፡ እለ ፡ ተኈለቁ ፡ ፬፻-፻፭የ ።
20 ወየኀድሩ ፡ በገቦሆሙ ፡ ነገደ ፡ ምናሴ ፡ ወመልአኮሙ ፡ ለደቂቀ ፡ ምናሴ ፡ ገማልዬል ፡ ወልደ ፡ ፋዳሱር ፤
21 ምስለ ፡ ኀይሉ ፡ እለ ፡ ተኈለቁ ፡ [፫]፻-፻፳፻፪፻ ።
22 ወየኀድሩ ፡ በገቦሆሙ ፡ ነገደ ፡ ብንያሚ ፡ ወመልአኮሙ ፡ ለደቂቀ ፡ ብንያሚ ፡ አቢዳን ፡ ወልደ ፡ ጋዴዮን ፤
23 ምስለ ፡ ኀይሉ ፡ እለ ፡ ተኈለቁ ፡ ፫፻-፻፶፻፬፻ ።
24 ኵሉ ፡ እለ ፡ ተኈለቁ ፡ እምውስተ ፡ ትዕይንተ ፡ ኤፍሬም ፡ ፲፻-፻፹[፻ወ፻] ፡ ምስለ ፡ ኀይሎሙ ፡ ወበሣልስ ፡ ያነሥኡ ፡ እሙንቱ ።
25 ወየኀድሩ ፡ በገቦሆሙ ፡ ነገደ ፡ ዳን ፡ ምስለ ፡ ኀይሎሙ ፡ ገጸ ፡ መስዕ ፡ ወመልአኮሙ ፡ ለደቂቀ ፡ ዳን ፡ አኪየዜር ፡ ወልደ ፡ አሚሳዴ ፤
26 ምስለ ፡ ኀይሉ ፡ እለ ፡ ተኈለቁ ፡ ፯፻-፻፳፻፯፻ ።
27 ወየኀድሩ ፡ በገቦሆሙ ፡ ነገደ ፡ አሴር ፡ ወመልአኮሙ ፡ ለደቂቀ ፡ አሴር ፡ ፋጌሔል ፡ ወልደ ፡ ኤክራን ፤
28 ምስለ ፡ ኀይሉ ፡ እለ ፡ ተኈለቁ ፡ ፬፻-፻፲፻፭፻ ።
29 ወየኀድሩ ፡ በገቦሆሙ ፡ ነገደ ፡ ንፍታሌም ፡ ወመልአኮሙ ፡ ለደቂቀ ፡ ንፍታሌም ፡ አኪሬ ፡ ወልደ ፡ ኤናን ፤
30 ምስለ ፡ ኀይሉ ፡ እለ ፡ ተኈለቁ ፡ ፭፻-፻፴፻፬፻ ።
31 ኵሎሙ ፡ እለ ፡ ተኈለቁ ፡ እምውስተ ፡ ትዕይንተ ፡ ዳን ፡ ፲፻-፻፭፻-፻[፸፻]፯፻ ፡ እሙንቱ ፡ ደኃርያን ፡ ያነሥኡ ፡ በከመ ፡ ሥርዐቶሙ ።
32 ዝንቱ ፡ ኍለቊሆሙ ፡ ለደቂቀ ፡ እስራኤል ፡ በበአብያተ ፡ አበዊሆሙ ፡ ኵሉ ፡ ኍልቈ ፡ ተዓይኒሆሙ ፡ ምስለ ፡ ኀይሎሙ ፡ ፷፻-፻፴፻፭፻፶ ።
33 ወሌዋውያንሰ ፡ ኢተኈለቁ ፡ ምስሌሆሙ ፡ በከመ ፡ አዘዞ ፡ እግዚአብሔር ፡ ለሙሴ ።
34 ወገብሩ ፡ ደቂቀ ፡ እስራኤል ፡ ኵሎ ፡ ዘከመ ፡ አዘዞ ፡ እግዚአብሔር ፡ ለሙሴ ፡ ከማሁ ፡ ተዓየኑ ፡ በበሥርዐቶሙ ፡ ወከማሁ ፡ ያነሥኡሂ ፡ ምስለ ፡ ነገዶሙ ፡ ዘዘ ፡ ዚአሆሙ ፡ ወበበ ፡ አብያተ ፡ አበዊሆሙ ።
=== chapter 3 ===
[Numeri 3]
1 ወከመዝ ፡ ይእቲ ፡ ፍጥረቶሙ ፡ ለሙሴ ፡ ወለአሮን ፡ በዕለተ ፡ ተናገሮ ፡ እግዚአብሔር ፡ ለሙሴ ፡ በደብረ ፡ ሲና ።
2 ወዝንቱ ፡ ውእቱ ፡ አስማቲሆሙ ፡ ለደቂቀ ፡ አሮን ፡ በኵሩ ፡ ናዳብ ፡ ወአቢዩድ ፡ ወእልዓዛር ፡ ወይታመር ።
3 ወዝንቱ ፡ ውእቱ ፡ አስማቲሆሙ ፡ ለደቂቀ ፡ አሮን ፡ ለካህናት ፡ እለ ፡ ቅቡኣን ፡ ወእለ ፡ ፍጹማን ፡ እደዊሆሙ ፡ ከመ ፡ ይኩኑ ፡ ካህናተ ።
4 ወሞቱ ፡ ናዳብ ፡ ወአብዩድ ፡ በቅድመ ፡ እግዚአብሔር ፡ እስመ ፡ አምጽኡ ፡ እሳተ ፡ ዘባዕድ ፡ ቅድመ ፡ እግዚአብሔር ፡ በሐቅለ ፡ ሲና ፡ ወአልቦሙ ፡ ውሉደ ፡ ወኮኑ ፡ ካህናተ ፡ እልዓዛር ፡ ወይታመር ፡ ምስለ ፡ አሮን ፡ አቡሆሙ ።
5 ወነበቦ ፡ እግዚአብሔር ፡ ለሙሴ ፡ ወይቤሎ ፤
6 ንሥኦሙ ፡ ለነገደ ፡ ሌዊ ፡ ወአቅሞሙ ፡ ቅድመ ፡ አሮን ፡ ካህን ፡ ወይትለአክዎ ።
7 ወይዕቀቡ ፡ ሕጎ ፡ ወሕጎሙ ፡ ለደቂቀ ፡ እስራኤል ፡ በቅድመ ፡ ደብተራ ፡ ዘመርጡል ፡ ወይግበሩ ፡ ምግባራቲሃ ፡ ለደብተራ ።
8 ወይዕቀቡ ፡ ንዋያ ፡ ለደብተራ ፡ መርጡል ፡ ወሕጎሙ ፡ ለደቂቀ ፡ እስራኤል ፡ በኵሉ ፡ ምግባራቲሃ ፡ ለደብተራ ።
9 ወታገብኦሙ ፡ ለሌዋውያን ፡ ኀበ ፡ አሮን ፡ እኁከ ፡ ወኀበ ፡ ደቂቁ ፡ ካህናት ፡ እስመ ፡ ሀብትየ ፡ ውሁባን ፡ ሊተ ፡ እሙንቱ ፡ እምውስተ ፡ ደቂቀ ፡ እስራኤል ።
10 ወትሠይሞሙ ፡ ለአሮን ፡ ወለደቂቁ ፡ ላዕለ ፡ ደብተራ ፡ ዘመርጡል ፡ ወይዕቀቡ ፡ ክህነቶሙ ፡ ወኵሉ ፡ ዘምሥዋዕ ፡ ወዘውስጥ ፡ እምነ ፡ መንጦላዕት ፡ ወእመቦ ፡ ዘገሰሰ ፡ ዘእምውስተ ፡ ባዕድ ፡ ዘመድ ፡ ለይሙት ።
11 ወነበቦ ፡ እግዚአብሔር ፡ ለሙሴ ፡ ወይቤሎ ፤
12 ናሁ ፡ አነ ፡ ነሣእክዎሙ ፡ ለሌዋውያን ፡ እምነ ፡ ማእከሎሙ ፡ ለደቂቀ ፡ እስራኤል ፡ ህየንተ ፡ ኵሉ ፡ በኵር ፡ ዘይፈትሕ ፡ ማኅፀነ ፡ ዘእምኀበ ፡ ደቂቀ ፡ እስራኤል ፡ ቤዛ ፡ ዚአሆሙ ፡ ይኩኑኒ ፡ ሌዋውያን ፡ (ይቤ ፡ እግዚአብሔር ፡)፡ እስመ ፡ ለት ፡ ቀደስኩ ፡ ኵሎ ፡ በኵረ ፡ በምድረ ፡ ግብጽ ፤ ኵሉ ፡ በኵር ፡ ዘእምውስተ ፡ እስራኤል ፡ እምነ ፡ ሰብእ ፡ እስከ ፡ እንስሳ ፡ ሊተ ፡ ውእቱ ፡ እስመ ፡ አነ ፡ እግዚአብሔር ።
13 ወነበቦ ፡ እግዚአብሔር ፡ ለሙሴ ፡ በሐቅለ ፡ ሲና ፡ ወይቤሎ ፤
14 ኈልቆሙ ፡ ለደቂቀ ፡ ሌዊ ፡ በበ ፡ አብያተ ፡ አበዊሆሙ ፡ ወበበ ፡ ሕዘቢሆሙ ፡ ወበበ ፡ አዝማዲሆሙ ፤ ኵሉ ፡ ተባዕቶሙ ፡ ዘእምነ ፡ ወርኅ ፡ አሐዱ ፡ ወላዕሉ ፡ እምኔሁ ፡ ኈልቆሙ ።
15 ወኈለቍዎሙ ፡ ሙሴ ፡ ወአሮን ፡ በቃለ ፡ እግዚአብሔር ፡ በከመ ፡ አዘዞሙ ፡ እግዚአብሔር ።
16 ወበበ ፡ አስማቲሆሙ ፡ ውእቶሙ ፡ ደቂቀ ፡ ሌዊ ፡ ጌድሶን ፡ ወቃዓት ፡ ወሜራሪ ።
17 ወዝንቱ ፡ ውእቱ ፡ አስማቲሆሙ ፡ ለደቂቀ ፡ ጌድሶን ፡ በበሕዘቢሆሙ ፡ ሎቤን ፡ ወሴሜይ ።
18 ወደቂቁኒ ፡ ለቃዓት ፡ በበሕዘቢሆሙ ፡ አንብረም ፡ ወይ[ሰዓ]ር ፡ ወኬብሮን ፡ ወኦዚሔል ።
19 ወደቂቁኒ ፡ ለሜራሪ ፡ በበሕዘቢሆሙ ፡ ሞሖሊ ፡ ወሖሙሲ ፤
20 ዝንቱ ፡ ውእቱ ፡ ሕዘቢሆሙ ፡ ለሌዋውያን ፡ በበአብያተ ፡ አበዊሆሙ ።
21 ዘጌድሶን ፡ ሕዝበ ፡ ሎቤን ፡ ወሕዝበ ፡ ሴሜይ ፡ ዝንቱ ፡ ሕዝብ ፡ ዘጌድሶን ።
22 ወዘአስተፋቀዱ ፡ ኍልቈ ፡ ኵሉ ፡ ተባዕቶሙ ፡ ዘእምነ ፡ ፩ወርኅ ፡ ወላዕሉ ፡ እምኔሁ ፡ ኍልቊሆሙ ፡ ፸፻፭፻ ።
23 ወየኀድሩ ፡ ደቂቀ ፡ ጌድሶን ፡ ድኅረ ፡ ደብተራ ፡ መንገለ ፡ ገጸ ፡ ባሕር ።
24 ወመልአኮሙ ፡ ለቤተ ፡ አቡሆሙ ፡ ለሕዝበ ፡ ጌድሶን ፡ ኤሊሳፍ ፡ ወልደ ፡ ዳሔል ።
25 ወዘይትሐበዩ ፡ ደቂቀ ፡ ጌድሶን ፡ በውስተ ፡ ደብተራ ፡ ዘመርጡል ፡ ደብተራ ፡ ወመክደና ፡ ወመንጦላዕተ ፡ ኆኅተ ፡ ደብተራ ፡ ዘመርጡል ፤
26 ወአልባሰ ፡ ዐጸድ ፡ ወመንጦላዕት ፡ ዘውስተ ፡ አንቀጽ ፡ ዘዐጸድ ፡ ዘኀበ ፡ ደብተራ ፡ ወዘተርፈ ፡ ኵሉ ፡ ምግባራቲሁ ።
27 ወዘቃዓትኒ ፡ ሕዝበ ፡ አንብረም ፡ አሐዱ ፡ ወሕዝበ ፡ ሰኣር ፡ አሐዱ ፡ ወሕዝበ ፡ ኬብሮን ፡ አሐዱ ፡ ወሕዝበ ፡ ኦዚሔል ፡ አሐዱ ።
28 እሉ ፡ ውእቶሙ ፡ ሕዝብ ፡ ዘቃዓት ፡ በበ ፡ ኍልቈ ፡ ኵሉ ፡ ተባዕቶሙ ፡ ዘእምነ ፡ አሐዱ ፡ ወርኅ ፡ ወላዕሉ ፡ እምኔሁ ፡ ፹፻፯፻ወየዐቅቡ ፡ ሕጎሙ ፡ ለቅዱሳን ።
29 ወየኀድሩ ፡ ሕዝቦሙ ፡ ለደቂቀ ፡ ቃዓት ፡ እምገቦሃ ፡ ለደብተራ ፡ ለመንገለ ፡ አዜብ ።
30 ወመልአኮሙ ፡ ለቤተ ፡ አቡሆሙ ፡ ለሕዝበ ፡ ቃዓት ፡ ኤሊሳፈን ፡ ወልደ ፡ ኦዚሔል ።
31 ወዘይትሐበዩ ፡ እሙንቱ ፡ ታቦተ ፡ ወማእደ ፡ ወመራናተ ፡ ወመሥዋዕተ ፡ ወንዋያተ ፡ ዘቅድሳት ፡ ኵሉ ፡ ዘይገብሩ ፡ ቦቱ ፡ ወመካድንተ ፡ ወኵሎ ፡ ምግባራተ ።
32 ወመልአክ ፡ ዘዲበ ፡ መሳፍንቲሆሙ ፡ ለሌዋውያን ፡ እልዓዛር ፡ ወልደ ፡ አሮን ፡ ካህን ፡ ዘተሠይመ ፡ ይዕቀብ ፡ ሕጎሙ ፡ ለቅዱሳን ።
33 ወዘሜራሪኒ ፡ ሕዝበ ፡ ሞሖሊ ፡ ወሕዝበ ፡ ሖሙሲ ፡ እሉ ፡ ውእቶሙ ፡ ሕዝበ ፡ ሜራሪ ።
34 ወኍለቊሆሙኒ ፡ በከመ ፡ አስተፋቀድዎሙ ፡ ኵሉ ፡ ተባዕቶሙ ፡ ዘእም፩ወርኅ ፡ ወላዕሉ ፡ እምኔሁ ፡ ፷፻፶ ።
35 ወመልአኮሙ ፡ ለቤተ ፡ አቡሆሙ ፡ ለሕዝበ ፡ ሜራሪ ፡ ሱሪሔል ፡ ወልደ ፡ አቢኪያ ፡ ወየኀድሩ ፡ እምገቦሃ ፡ ለደብተራ ፡ ዘመንገለ ፡ መስዕ ።
36 ወ[ዘ]ይትሐበዩ ፡ ነገደ ፡ ደቂቀ ፡ ሜራሪ ፡ አርእስተ ፡ አዕማድ ፡ ዘደብተራ ፡ ወመናስግቲሃ ፡ ወአዕማዲሃ ፡ ወመካይዲሆን ፡ ወኵሎ ፡ ንዋዮን ፡ ወምግባራቲሆን ፤
37 ወአዕማድ ፡ ዘዐውደ ፡ ዐጸድ ፡ ወመካይዲሆን ፡ ወመታክሊሆን ፡ ወመታግሪሆን ።
38 ወእ[ለ]ሰ ፡ የኀድሩ ፡ ውስተ ፡ ቅድመ ፡ ድብተራ ፡ ዘመርጡል ፡ እመንገለ ፡ [ጽባሕ ፡] ሙሴ ፡ ወአሮን ፡ ወደቂቁ ፡ ከመ ፡ ይዕቀቡ ፡ ሕጎ ፡ ለቅዱስ ፡ በሕጎሙ ፡ ለደቂቀ ፡ እስራኤል ፡ ወእመቦ ፡ ዘገሰሰ ፡ ዘእምውስተ ፡ ባዕድ ፡ ዘመድ ፡ ለይሙት ።
39 ኵሉ ፡ ኍለቊሆሙ ፡ ለሌዋውያን ፡ ዘኈለቁ ፡ ሙሴ ፡ ወአሮን ፡ በቃለ ፡ እግዚአብሔር ፡ በበ ፡ ሕዘቢሆሙ ፡ ኵሉ ፡ ተባዕቶሙ ፡ ዘእም፩ወርኅ ፡ ወላዕሉ ፡ እምኔሁ ፡ ፪፻-፻፳፻ ።
40 ወነበቦ ፡ እግዚአብሔር ፡ ለሙሴ ፡ ወይቤሎ ፡ ኈልቍ ፡ ኵሎ ፡ በኵሮሙ ፡ ተባዕተ ፡ ለደቂቀ ፡ እስራኤል ፡ ዘእም፩ወርኅ ፡ ወላዕሉ ፡ እምኔሁ ፡ ወአእምር ፡ ኍለቊሆሙ ፡ በበ ፡ አስማቲሆሙ ።
41 ወታገብኦሙ ፡ ሊተ ፡ ለሌዋውያን ፡ እስመ ፡ አነ ፡ እግዚአብሔር ፡ ህየንተ ፡ ኵሉ ፡ በኵሮሙ ፡ ለደቂቀ ፡ እስራኤል ፡ ወእንስሳሆሙኒ ፡ ለሌዋውያን ፡ ህየንተ ፡ ኵሉ ፡ በኵረ ፡ እንስሳሆሙ ፡ ለደቂቀ ፡ እስራኤል ።
42 ወኈለቆሙ ፡ ሙሴ ፡ ለኵሉ ፡ በኵሮሙ ፡ ለደቂቀ ፡ እስራኤል ፡ በከመ ፡ አዘዞ ፡ እግዚአብሔር ።
43 ወኮነ ፡ ኵሉ ፡ በኵረ ፡ ተባዕት ፡ በበኍልቈ ፡ አስማቲሆሙ ፡ ዘእም፩ወርኅ ፡ ወላዕሉ ፡ እምኔሁ ፡ ኮነ ፡ ኍለቊሆሙ ፡ ፪፻-፻፳፻፪፻፸[፫] ።
44 ወነበቦ ፡ እግዚአብሔር ፡ ለሙሴ ፡ ወይቤሎ ፤
45 ንሥኦሙ ፡ ለሌዋውያን ፡ ህየንተ ፡ ኵሉ ፡ በኵሮሙ ፡ ለደቂቀ ፡ እስራኤል ፡ ወእንስሳሆሙኒ ፡ ለሌዋውያን ፡ ህየንተ ፡ ኵሉ ፡ እንስሳሆሙ ፡ ወይኩኑኒ ፡ ሊተ ፡ ሌዋውያን ፡ እስመ ፡ አነ ፡ እግዚአብሔር ።
46 ወቤዛሆሙኒ ፡ ለእልክቱ ፡ ፪፻፸[፫]እለ ፡ ፈድፈደ ፡ እምነ ፡ ሌዋውያን ፡ በኵሮሙ ፡ ለደቂቀ ፡ እስራኤል ።
47 ትነሥእ ፡ ለለ ፡ አሐዱ ፡ በዲድርክሙ ፡ ዘቅዱስ ፡ ትነሥእ ፡ ዕሥራ ፡ [ኦቦ]ሊ ፡ ዘሰቅሎ ።
48 ወትሁቦሙ ፡ ወርቆ ፡ ለአሮን ፡ ወለደቂቁ ፡ ቤዛሆሙ ፡ ለእለ ፡ ፈድፈዱ ፡ እምኔሆሙ ።
49 ወነሥአ ፡ ሙሴ ፡ ውእተ ፡ ወርቀ ፡ ዘቤዛሆሙ ፡ ለእለ ፡ ፈድፈዱ ፡ እምነ ፡ ቤዛሆሙ ፡ ለሌዋውያን ፡ ዘበኵሮሙ ፡ ለደቂቀ ፡ እስራኤል ።
50 ወነሥአ ፡ ወርቀ ፡ ፲፻[፫]፻፷፭ሰቅሎ ፡ በሰቅሎ ፡ ዘቅዱስ ።
51 ወወሀበ ፡ ሙሴ ፡ ውእተ ፡ ወርቀ ፡ ዘቤዛሆሙ ፡ ለእለ ፡ ፈድፈዱ ፡ ለአሮን ፡ ወለደቂቁ ፡ በቃለ ፡ እግዚአብሔር ፡ በከመ ፡ አዘዞ ፡ እግዚአብሔር ፡ ለሙሴ ።
=== chapter 4 ===
[Numeri 4]
1 ወነበቦሙ ፡ እግዚአብሔር ፡ ለሙሴ ፡ ወለአሮን ፡ ወይቤሎሙ ፤
2 ፍልጥዎሙ ፡ ለደቂቀ ፡ ቃዓት ፡ እምነ ፡ ማእከሎሙ ፡ ለደቂቀ ፡ ሌዊ ፡ በበሕዘቢሆሙ ፡ ወበበቤተ ፡ አበዊሆሙ ፤
3 ዘእምዕሥራ ፡ ወኀምስቱ ፡ ዓም ፡ ወላዕሉ ፡ እምኔሁ ፡ እስከ ፡ ዘኀምሳ ፡ ዓም ፡ ኵሉ ፡ ዘይበውእ ፡ ይግበር ፡ ግብረ ፡ ኵሉ ፡ ምግባር ፡ ዘውስተ ፡ ደብተራ ።
4 ወዝንቱ ፡ ውእቱ ፡ ግብሮሙ ፡ ለደቂቀ ፡ ቃዓት ፡ በውስተ ፡ ደብተራ ፡ ዘመርጡል ፡ ቅድሳት ፡ ዘቅዱሳን ።
5 ወይበውኡ ፡ አሮን ፡ ወደቂቁ ፡ ሶበ ፡ ያነሥእ ፡ ትዕይን[ት] ፡ ወያወርዱ ፡ መንጦላዕተ ፡ ዘይሴውር ፡ ወይከድንዋ ፡ ቦቱ ፡ ለታቦት ፡ ዘመርጡል ።
6 ወይወድዩ ፡ መልዕልቶ ፡ ክዳነ ፡ ዘማእሰ ፡ ምጺጺት ፡ ወይወድዩ ፡ መልዕልቶሙ ፡ ልብሰ ፡ ዘኵለንታሁ ፡ ዘደረከኖ ፡ ወያስተዋድድዋ ፡ ውስተ ፡ መጻውርቲሃ ።
7 ወዲበ ፡ ማእድኒ ፡ እንተ ፡ ሥርዐት ፡ ይወድዩ ፡ ልብሰ ፡ ዘኵለንታሁ ፡ ዘሕብረ ፡ ከብድ ፡ ወመጻብሕቲሃኒ ፡ ወአጽሕልቲሃኒ ፡ ወመዳምኅተኒ ፡ ወመዋጽሕቲሃኒ ፡ በዘ ፡ ቦቱ ፡ ያወጽኅ ፡ ወኅብስተኒ ፡ ዘይሠርዑ ፡ በኵሉ ፡ ጊዜ ፡ ላዕሌሃ ።
8 ወይወድዩ ፡ ላዕሌሃ ፡ ልብሰ ፡ ለይ ፡ ወይከድንዋ ፡ መክዳና ፡ ዘማእሰ ፡ ምጺጺት ፡ ወያስተዋድድዋ ፡ ውስተ ፡ መጻውርቲሃ ።
9 ወይነሥኡ ፡ ልብሰ ፡ ደረከኖ ፡ ወይከድንዋ ፡ ለመራናት ፡ እንተ ፡ ላዕሌሃ ፡ ያኃትዉ ፡ ወመኃትዊሃኒ ፡ ወጕጠታቲሃ ፡ ወበዘ ፡ ቦቱ ፡ ያሤንይዋ ፡ ወኵሎ ፡ ግምዓቲሃ ፡ ዘቅብእ ፡ ዘእምውስቴቱ ፡ ይገብርዋ ።
10 ወይወድይዋ ፡ ላቲ ፡ ወለኵሉ ፡ ንዋያ ፡ ውስተ ፡ መክደና ፡ ዘማእሰ ፡ ምጺጺት ፡ ወያስተዋድድዋ ፡ ውስተ ፡ መጻውርቲሃ ።
11 ወለምሥዋዕኒ ፡ ዘወርቅ ፡ ይገለብብዎ ፡ በልብስ ፡ ዘደረከኖ ፡ ወይከድንዎ ፡ እምላዕሉ ፡ በማእሰ ፡ ምጺጺት ፡ ወያስተዋድድዎ ፡ ውስተ ፡ መጻውርቲሁ ።
12 ወይነሥኡ ፡ ኵሎ ፡ ንዋየ ፡ ግብር ፡ በዘ ፡ ቦቱ ፡ ይገብሩ ፡ ወይወድይዎ ፡ ውስተ ፡ ልብስ ፡ ዘደረከኖ ፡ ወይከድንዎ ፡ በማእሰ ፡ ምጺጺት ፡ ወያነብርዎ ፡ ውስተ ፡ መጻውርቲሁ ።
13 ወመክደነሂ ፡ ያነብርዎ ፡ ውስተ ፡ ምሥዋዕ ፡ ወይከድኑ ፡ ላዕሌሁ ፡ ልብሰ ፡ ዘሕብረ ፡ ከብድ ፡ ኵለንታሁ ።
14 ወይወድዩ ፡ ውስቴቱ ፡ ኵሎ ፡ ንዋየ ፡ ግብሮሙ ፡ በዘ ፡ ቦቱ ፡ ይገብሩ ፡ ወመዓጥንተሂ ፡ ወመኋስስተኒ ፡ ወፍያላተኒ ፡ ወመክደኖሙ ፡ ወኵ[ሎ] ፡ ንዋየ ፡ ምሥዋዕ ፡ ወይ[ወድ]ዩ ፡ ላዕሌሁ ፡ መክዳኖ ፡ ዘማእሰ ፡ ምጺጺት ፡ ወያነብርዎ ፡ ዲበ ፡ መጻውርቲሁ ፡ ወይነሥኡ ፡ ልብሰ ፡ ዘሕብረ ፡ ከብድ ፡ ወይከድንዎ ፡ ለማዕከክ ፡ ወለመከየዱ ፡ ወይወድይዎ ፡ ውስተ ፡ መክደኑ ፡ ዘማእሰ ፡ ምጺጺት ፡ ወያነብርዎ ፡ ውስተ ፡ መጻውርቲሁ ።
15 ወፈጺሞሙ ፡ አሮን ፡ ወደቂቁ ፡ ከዲነ ፡ ዘቅድሳት ፡ ወኵሉ ፡ ንዋየ ፡ ዘቅድሳት ፡ ሶበ ፡ ያነሥእ ፡ ትዕይን[ት] ፡ ወእምዝ ፡ ይበውኡ ፡ ደቂቀ ፡ ቃዓት ፡ ይትመጠዉ ፡ ወኢይገስሱ ፡ ዘቅድሳት ፡ ከመ ፡ ኢይሙ[ቱ] ፡ ዝንቱ ፡ ዘይነሥኡ ፡ ደቂቀ ፡ ቃዓት ፡ እምውስተ ፡ ደብተራ ፡ ዘመርጡል ።
16 ወሥዩም ፡ ውእቱ ፡ እልዓዛር ፡ ወልደ ፡ አሮን ፡ ካህን ፡ ላዕለ ፡ ቅብአ ፡ ማኅቶት ፡ ወላዕለ ፡ ዕጣን ፡ ዘየዐጥኑ ፡ ወላዕለ ፡ መሥዋዕት ፡ ዘኵሉ ፡ አሚር ፡ ወላዕለ ፡ ቅብእ ፡ ዘይቀብኡ ፡ ወላዕለ ፡ ኵሉ ፡ ደብተራ ፡ ሥዩም ፡ ውእቱ ፡ ወላዕለ ፡ ኵሉ ፡ ዘሀለወ ፡ ውስተ ፡ ቅድሳት ፡ ወላዕለ ፡ ኵሉ ፡ ግብር ።
17 ወነበቦ ፡ እግዚአብሔር ፡ ለሙሴ ፡ ወለአሮን ፡ ወይቤሎሙ ፤
18 ኢትሥርውዎሙ ፡ ለነገደ ፡ ሕዝቡ ፡ ለቃዓት ፡ እምነ ፡ ማእከሎሙ ፡ ለሌዋውያን ።
19 ወከመዝ ፡ ግበሩ ፡ ሎሙ ፡ ወየሐይዉ ፡ ወኢይመውቱ ፡ ሶበ ፡ ለበዊኦቶሙ ፡ ውስተ ፡ ቅድሳት ፡ ዘቅዱሳን ፡ አሮን ፡ ወደቂቁ ፡ ይባኡ ፡ ወያስተዳልዉ ፡ ሎሙ ፡ ጾሮሙ ፡ ለለ ፡ አሐዱ ፡ እምኔሆሙ ።
20 ወኢይባኡ ፡ ግብተ ፡ ይርአዩ ፡ ቅድሳተ ፡ ወይሙቱ ።
21 ወነበቦ ፡ እግዚአብሔር ፡ ለሙሴ ፡ ወይቤሎ ፤
22 አሐዝ ፡ ኈልቆሙ ፡ ለደቂቀ ፡ ጌድሶን ፡ እምጥንቱ ፡ በበ ፡ አብያተ ፡ አበዊሆሙ ፡ ወበበ ፡ ሕዘቢሆሙ ፤
23 ዘእም፳ወ፭ዓም ፡ ወላዕሉ ፡ እምኔሁ ፡ እስከ ፡ ዘ፶ዓም ፡ ኈልቆሙ ፡ ኵሎ ፡ ዘይበውእ ፡ ይግበር ፡ ግብረ ፡ ውስተ ፡ ደብተራ ፡ ዘመርጡል ።
24 ወዝንቱ ፡ ውእቱ ፡ ግብሮሙ ፡ ለነገደ ፡ ጌድሶን ፡ ዘይገብሩ ፡ ወዘይጸውሩ ፤
25 አሥቃቃተ ፡ ዘደብተራ ፡ ወደብተራሂ ፡ ዘመርጡል ፡ ወመክደና ፡ ወመክደን ፡ ዘምጺጺት ፡ ዘዲቤሃ ፡ ዘእምላዕሉ ፡ ወመክደን ፡ ዘኆኅተ ፡ ደብተራ ፡ ዘመርጡል ፤
26 ወአልባሰ ፡ ዐጸድኒ ፡ ወኵሉ ፡ ደብተራ ፡ ዘመርጡል ፡ ወፈድፋዳተኒ ፡ ወኵ[ሎ] ፡ ንዋየ ፡ ግብሮሙ ፡ ወኵ[ሎ] ፡ በዘ ፡ ቦቱ ፡ ይገብሩ ፡ ወይገብሩ ።
27 በከመ ፡ አዘዝዎሙ ፡ አሮን ፡ ወደቂቁ ፡ ከማሁ ፡ ይኩን ፡ ግብሮሙ ፡ ለደቂቀ ፡ ጌድሶን ፡ በኵሉ ፡ ሕቢቶሙ ፡ ወበኵሉ ፡ ግብሮሙ ፡ ወኈ[ል]ቆሙ ፡ በበ ፡ አስማቲሆሙ ፡ ለኵሉ ፡ ዘይጸውሩ ፡ እሙንቱ ።
28 ዝንቱ ፡ ውእቱ ፡ ሕቢቶሙ ፡ ለደቂቀ ፡ ጌድሶን ፡ በውስተ ፡ ደብተራ ፡ ዘመርጡል ፡ ወሊቆሙ ፡ ይታመር ፡ ወልደ ፡ አሮን ፡ ካህን ።
29 ወደቂቀ ፡ ሜራሪኒ ፡ በበ ፡ ሕዘቢሆሙ ፡ ወበበ ፡ አብያተ ፡ አበዊሆሙ ፡ ኈልቆሙ ፤
30 ዘእም ፡ ፳ወ፭ዓም ፡ ወላዕሉ ፡ እምኔሁ ፡ እስከ ፡ ዘ፶ዓም ፡ ኈልቆሙ ፡ ኵሉ ፡ ዘይበውእ ፡ ይግበር ፡ ግብረ ፡ ደብተራ ፡ ዘመርጡል ።
31 ወዝንቱ ፡ ውእቱ ፡ ሕቢቶሙ ፡ ዘይጸውሩ ፡ እሙንቱ ፡ በኵሉ ፡ ግብሮሙ ፡ ዘውስተ ፡ ደብተራ ፡ ዘመርጡል ፡ አርእስቲሃ ፡ ለደብተራ ፡ ወመናስግቲሃ ፡ ወአዕማዲሃ ፡ ወመካይዲሆን ፡ ወመካድንተ ፡ ወመናብርቲሆሙ ፡ ወአዕማዲሆሙ ፡ ወመንጦላዕተ ፡ ኆኅተ ፡ ደብተራ ፡ ዘመርጡል ፤
32 ወአዕማደ ፡ አውደ ፡ ዐጸድ ፡ ወመካይዲሆን ፡ ወመታክሊሆን ፡ ወመታግርቲሆን ፡ ወኵሎ ፡ ንዋዮን ፡ ወኵሎ ፡ ንዋየ ፡ ግብሮሙ ፤ በበአስማቲሆሙ ፡ ትኌልቆሙ ፡ ወኵሎ ፡ ንዋየ ፡ ሕቢቶሙ ፡ ዘይጸውሩ ፡ እሙንቱ ።
33 ዝንቱ ፡ ውእቱ ፡ ሕቢቶሙ ፡ ለነገደ ፡ ደቂቀ ፡ ሜራሪ ፡ በኵሉ ፡ ግብሮሙ ፡ ዘውስተ ፡ ደብተራ ፡ ዘመርጡል ፡ ወእሙንቱኒ ፡ ላዕለ ፡ ይታመር ፡ ወልደ ፡ አሮን ፡ ካህን ።
34 ወኈለቍዎሙ ፡ ሙሴ ፡ ወአሮን ፡ ወመላእክቲሆሙ ፡ ለእስራኤል ፡ ለደቂቀ ፡ ቃዓት ፡ በበ ፡ ሕዘቢሆሙ ፡ ወበበ ፡ አብያተ ፡ አበዊሆሙ ፤
35 ዘእም፳ወ፭ዓም ፡ ወላዕሉ ፡ እምኔሁ ፡ እስከ ፡ ዘ፶ዓም ፡ ኵሉ ፡ ዘይበውእ ፡ ከመ ፡ ይግበር ፡ ውስተ ፡ ግብረ ፡ ደብተራ ፡ ዘመርጡል ።
36 ወኮነ ፡ ኍለቊሆሙ ፡ ዘበበ ፡ ሕዘቢሆሙ ፡ ፳፻፯፻፶ ።
37 ዝንቱ ፡ ውእቱ ፡ ኍለቊሆሙ ፡ ለደቂቀ ፡ ቃዓት ፡ ለኵሉ ፡ እለ ፡ ይበውኡ ፡ ውስተ ፡ ግብረ ፡ ደብተራ ፡ ዘመርጡል ፡ በከመ ፡ ኈለቍዎሙ ፡ ሙሴ ፡ ወአሮን ፡ በቃለ ፡ እግዚአብሔር ፡ ወበእደ ፡ ሙሴ ።
38 ወኈለቍዎሙ ፡ ለደቂቀ ፡ ጌድሶን ፡ በበ ፡ ሕዘቢሆሙ ፡ ወበበ ፡ አብያተ ፡ አበዊሆሙ ፤
39 ዘእም፳ወ፭ዓም ፡ ወላዕሉ ፡ እምኔሁ ፡ እስከ ፡ ዘ፶ዓም ፡ ኵሉ ፡ ዘይበውእ ፡ ውስተ ፡ ግብር ፡ ከመ ፡ ይግበር ፡ ግብረ ፡ ደብተራ ፡ ዘመርጡል ።
40 ወኮነ ፡ ኍለቊሆሙ ፡ ዘበበ ፡ ሕዘቢሆሙ ፡ ወበበ ፡ አብያተ ፡ አበዊሆሙ ፡ ፳፻፯፻፴ ።
41 ዝንቱ ፡ ውእቱ ፡ ኍለቊሆሙ ፡ ለነገደ ፡ ደቂቀ ፡ ጌድሶን ፡ ኵሉ ፡ እለ ፡ ይጸውሩ ፡ ውስተ ፡ ደብተራ ፡ ዘመርጡል ፡ እለ ፡ ኈለቍዎሙ ፡ ሙሴ ፡ ወአሮን ፡ በቃለ ፡ እግዚአብሔር ፡ ወበእደ ፡ ሙሴ ።
42 ወኈለቍዎሙ ፡ ለነገደ ፡ ደቂቀ ፡ ሜራሪ ፡ በበ ፡ ሕዘቢሆሙ ፡ ወበበ ፡ አብያተ ፡ አበዊሆሙ ፤
43 ዘእም፳ወ፭ዓም ፡ ወላዕሉ ፡ እምኔሁ ፡ እስከ ፡ ዘ፶ዓም ፡ ኵሉ ፡ ዘይበውእ ፡ ይግበር ፡ ውስተ ፡ ግብረ ፡ ደብተራ ፡ ዘመርጡል ።
44 ወኮነ ፡ ኍለቊሆሙ ፡ በበ ፡ ሕዘቢሆሙ ፡ ወበበ ፡ አብያተ ፡ አበዊሆሙ ፡ ፴፻፪፻ ።
45 ዝንቱ ፡ ውእቱ ፡ ኍለቊሆሙ ፡ ለነገደ ፡ ደቂቀ ፡ ሜራሪ ፡ እለ ፡ ኈለቍዎሙ ፡ ሙሴ ፡ ወአሮን ፡ በቃለ ፡ እግዚአብሔር ፡ ወበእደ ፡ ሙሴ ።
46 ኵሉ ፡ እለ ፡ ተኈለቁ ፡ እለ ፡ ኈለቍዎሙ ፡ ሙሴ ፡ ወአሮን ፡ ወመላእክቲሆሙ ፡ ለደቂቀ ፡ እስራኤል ፡ ለሌዋውያን ፡ በበሕዘቢሆሙ ፡ ወበበ ፡ አብያተ ፡ አበዊሆሙ ፤
47 ዘእም፳ወ፭ዓም ፡ ወላዕሉ ፡ እምኔሁ ፡ እስከ ፡ ዘ፶ዓም ፡ ኵሉ ፡ ዘይበውእ ፡ ውስተ ፡ ግብረ ፡ ምግባረ ፡ ግብር ፡ ዘይጸውሩ ፡ ዘደብተራ ፡ ዘመርጡል ፤
48 ኮኑ ፡ እለ ፡ ተኈለቁ ፡ ፹፻[፭]፻፹ ።
49 በቃለ ፡ እግዚአብሔር ፡ ተኈለቁ ፡ ለለ ፡ ብእሲ ፡ ብእሲ ፡ በበ ፡ ምግባሪሆሙ ፡ ወበበ ፡ ጾሮሙ ፡ ወተኈለቁ ፡ በከመ ፡ አዘዞ ፡ እግዚአብሔር ፡ ለሙሴ ።
=== chapter 5 ===
[Numeri 5]
1 ወነበቦ ፡ እግዚአብሔር ፡ ለሙሴ ፡ ወይቤሎ ፤
2 አዝዞሙ ፡ ለደቂቀ ፡ እስራኤል ፡ ከመ ፡ ያውፅኡ ፡ እምውስተ ፡ ትዕይንት ፡ ኵሎ ፡ ዘለምጽ ፡ ወኵሎ ፡ ዘይትከዐዎ ፡ ዘርኡ ፡ ወኵሎ ፡ ዘቦቱ ፡ ርኩሰ ፡ ውስተ ፡ ነፍሱ ፤
3 እምተባዕት ፡ እስከ ፡ አንስቱ ፡ ወያውፅእዎሙ ፡ አፍአ ፡ እምትዕይንት ፡ ወኢያርኵሱ ፡ ተዓይኒሆሙ ፡ ዘውስቴቱ ፡ እመጽእ ፡ አነ ፡ ኀቤሆሙ ።
4 ወገብሩ ፡ ከማሁ ፡ ደቂቀ ፡ እስራኤል ፡ ወአውፅእዎሙ ፡ አፍአ ፡ እምትዕይንት ፡ በከመ ፡ ይቤሎ ፡ እግዚአብሔር ፡ ለሙሴ ፡ ከማሁ ፡ ገብሩ ፡ ደቂቀ ፡ እስራኤል ።
5 ወነበቦ ፡ እግዚአብሔር ፡ ለሙሴ ፡ ወይቤሎ ፤
6 ንግሮሙ ፡ ለደቂቀ ፡ እስራኤል ፡ ወበሎሙ ፡ እመኒ ፡ ብእሲ ፡ ወእመኒ ፡ ብእሲት ፡ እመቦ ፡ ዘገብረ ፡ እምኵሉ ፡ ኀጣይእ ፡ ዘይገብር ፡ እጓለ ፡ እመ ፡ ሕያው ፡ ተዐዊሮ ፡ ወእመኒ ፡ በኢያእምሮ ፡ ወነስሐት ፡ ይእቲ ፡ ነፍስ ፤
7 ወአይድዐት ፡ ኀጢአታ ፡ ዘገብረት ፡ ወያገብእ ፡ ዘነስሐ ፡ ርአሰ ፡ ንዋዩ ፡ ወኃምስተ ፡ እዴሁ ፡ ይዌስክ ፡ ላዕሌሁ ፡ ወያገብእ ፡ ለባዕለ ፡ ንዋዩ ።
8 ወእመሰ ፡ አልቦቱ ፡ ሰብአ ፡ ዘየኀሥሦ ፡ ወአልቦ ፡ ኀሣሤ ፡ ዘይትፈደዮ ፡ ለእግዚአብሔር ፡ ውእቱ ፡ ዘንስሓሁ ፡ ወይሁቦ ፡ ለካህን ፡ ዘእንበለ ፡ በግዕ ፡ ዘቦቱ ፡ ያስተሰሪ ፡ ሎቱ ።
9 ወኵሉ ፡ እምቀዳሚ ፡ ዘያበውኡ ፡ ወኵሉ ፡ ብፅዓቲሆሙ ፡ ለደቂቀ ፡ እስራኤል ፡ ዘያበውኡ ፡ ለእግዚአብሔር ፡ ለካህን ፡ ውእቱ ።
10 ወብፅዓቲሁ ፡ ለለ፩ለካህን ፡ ዘተመጠዎ ፡ ሎቱ ፡ ውእቱ ።
11 ወነበቦ ፡ እግዚአብሔር ፡ ለሙሴ ፡ ወይቤሎ ፤
12 ንግሮሙ ፡ ለደቂቀ ፡ እስራኤል ፡ ወበሎሙ ፡ ብእሲ ፡ ብእሲ ፡ ለእመቦ ፡ ዘአበሰት ፡ ብእሲቱ ፡ ወተዐወረቶ ፤
13 ወቦ ፡ ዘሰክበ ፡ ምስሌሃ ፡ ተዐዊራ ፡ ወዘመወት ፡ ወኢያእመረ ፡ ምታ ፡ ወኀብአት ፡ እምኔሁ ፡ እንዘ ፡ ርኵስት ፡ ይእቲ ፡ ወአልቦቱ ፡ ስምዐ ፡ ዘይዛለፋ ፡ ወእመኒ ፡ ንጽሕት ፡ ይእቲ ፤
14 ወመጽአ ፡ ላዕሌሁ ፡ መንፈሰ ፡ ቀንእ ፡ ወቀንአ ፡ ላዕለ ፡ ብእሲቱ ፡ እንዘ ፡ ርኵስት ፡ ይእቲ ፡ ወእመኒ ፡ እንዘ ፡ ኢኮነት ፡ ርኵስተ ፡ ወመጽአ ፡ ላዕሌሁ ፡ መንፈሰ ፡ ቀንእ ፡ ወቀንአ ፡ ላዕለ ፡ ብእሲቱ ፤
15 ያመጽኣ ፡ ውእቱ ፡ ብእሲ ፡ ለብእሲቱ ፡ ኀበ ፡ ካህን ፡ ወያመጽእ ፡ ቍርባኖ ፡ በእንቲአሃ ፡ ዓሥርተ ፡ እዴሃ ፡ ለመስፈርተ ፡ ኢፍ ፡ ሐሪጸ ፡ ስገም ፡ ወኢይሰውጥ ፡ ላዕሌሁ ፡ ቅብአ ፡ ወኢይወዲ ፡ ዲቤሁ ፡ ስኂነ ፡ እስመ ፡ መሥዋዕተ ፡ ሕገ ፡ ቀንእ ፡ ውእቱ ፡ መሥዋዕተ ፡ ተዝካር ፡ ዘያዜክር ፡ ኀጢአተ ፡ ውእቱ ።
16 ወያመጽኣ ፡ ኀበ ፡ ካህን ፡ ወያቀውማ ፡ ቅድመ ፡ እግዚአብሔር ።
17 ወይነሥእ ፡ ካህን ፡ ማየ ፡ ጥዑም ፡ ንጹሐ ፡ በግምዔ ፡ ልሕኵት ፡ ወይነሥእ ፡ ካህን ፡ መሬተ ፡ እምውስተ ፡ ደብተራ ፡ ዘመርጡል ፡ እምነ ፡ ምድሩ ፡ ወይወድዮ ፡ ውስተ ፡ ውእቱ ፡ ማይ ።
18 ወያቀውማ ፡ ካህን ፡ ለይእቲ ፡ ብእሲት ፡ ቅድመ ፡ እግዚአብሔር ፡ ወይከሥታ ፡ ርእሳ ፡ ለይእቲ ፡ ብእሲት ፡ ወይሜጥዋ ፡ ውስተ ፡ እዴሃ ፡ ዝክተ ፡ መሥዋዕተ ፡ ተዝካር ፡ መሥዋዕተ ፡ ዘሕገ ፡ ቀንእ ፡ ወውስተ ፡ እዴሁሰ ፡ ለካህን ፡ ዝክቱ ፡ ማየ ፡ ዘለፋ ፡ ዘርጉም ፡ ውእቱ ።
19 ወያምሕላ ፡ ካህን ፡ ለይእቲ ፡ ብእሲት ፡ ወይብላ ፡ ለእመ ፡ አልቦ ፡ ዘሰከበ ፡ ምስሌኪ ፡ ወኢተዐወርኪ ፡ ምተኪ ፡ ወኢገመንኪ ፡ ርእሰኪ ፡ ንጽሕተ ፡ ኩኒ ፡ እምነ ፡ ዝንቱ ፡ ማየ ፡ ዘለፋ ፡ ዘርጉም ፡ ውእቱ ።
20 ወእመሰ ፡ ተዐወርኪ ፡ ምተኪ ፡ ወገመንኪ ፡ ርእሰኪ ፡ ወቦቱ ፡ ዘሰክበ ፡ ምስሌኪ ፡ ባዕድ ፡ ዘእንበለ ፡ ምትኪ ፤
21 ወያምሕላ ፡ ካህን ፡ ለይእቲ ፡ ብእሲት ፡ በዝንቱ ፡ መሐላ ፡ ዘመርገም ፡ ወይብላ ፡ ካህን ፡ ለይእቲ ፡ ብእሲት ፡ ርግምተ ፡ ለይረሲኪ ፡ እግዚአብሔር ፡ ወይደምስስኪ ፡ እምነ ፡ ማእከለ ፡ ሕዝብ[ኪ] ፡ ከመ ፡ ያውድቆ ፡ እግዚአብሔር ፡ ለገቦኪ ፡ ወይሥራ ፡ ለከርሥኪ ።
22 ወይባእ ፡ ዝንቱ ፡ ማይ ፡ ርጉም ፡ ውስተ ፡ ከርሥኪ ፡ ወይሥራ ፡ ለማኅፀንኪ ፡ ወይደቀ ፡ ገቦኪ ፡ ወትብል ፡ ይእቲ ፡ ብእሲት ፡ አሜን ፡ ወአሜን ።
23 ወይጽሕፎ ፡ ካህን ፡ ለዝንቱ ፡ መርገም ፡ ውስተ ፡ መጽሐፍ ፡ ወየኀፅቦ ፡ በውስተ ፡ ማየ ፡ ዘለፋ ፡ ዘርጉም ።
24 ወይበውእ ፡ ውእቱ ፡ ማየ ፡ ዘለፋ ፡ ዘርጉም ፡ ውስተ ፡ ከርሣ ።
25 ወይትሜጠው ፡ ካህን ፡ እምውስተ ፡ እዴሃ ፡ ዝክተ ፡ መሥዋዕተ ፡ ቀንእ ፡ ወያነብሮ ፡ ለውእቱ ፡ መሥዋዕት ፡ ቅድመ ፡ እግዚአብሔር ፡ ወያበው[ኦ] ፡ ኀበ ፡ ምሥዋዕ ።
26 ወይዘግን ፡ ካህን ፡ እምውስተ ፡ ውእቱ ፡ መሥዋዕ[ት] ፡ ዝክራ ፡ ወይወድዮ ፡ ውስተ ፡ ምሥዋዕ ፡ ወእምድኅረ ፡ ዝንቱ ፡ ያሰትያ ፡ ለይእቲ ፡ ብእሲት ፡ ውእተ ፡ ማየ ።
27 ወለእመ ፡ ገመነት ፡ ርእሳ ፡ ወተዐወረቶ ፡ ለምታ ፡ ይበውእ ፡ ውእቱ ፡ ማየ ፡ ዘለፋ ፡ ዘርጉም ፡ ውስተ ፡ ከርሣ ፡ ወይወሥራ ፡ ለከርሣ ፡ ወይወድቅ ፡ ገቦሃ ፡ ወትከውን ፡ ይእቲ ፡ ብእሲት ፡ መርገመ ፡ ውስተ ፡ ሕዝባ ።
28 ወእመሰ ፡ አገመነት ፡ ርእሳ ፡ ወንጽሕት ፡ ይእቲ ፡ ያነጽሓ ፡ ወዘርአ ፡ ይከውና ።
29 ዝንቱ ፡ ሕገ ፡ ቀንእ ፡ ለብእሲት ፡ እንተ ፡ አበሰት ፡ ላዕለ ፡ ምታ ፡ ወገመነት ፡ ርእሳ ፤
30 ወለብእሲኒ ፡ ዘመጽአ ፡ ላዕሌሁ ፡ መንፈሰ ፡ ቀንእ ፡ ወቀንአ ፡ ላዕለ ፡ ብእሲቱ ፡ ወያቀውማ ፡ ለብእሲቱ ፡ ቅድመ ፡ እግዚአብሔር ፡ ወይገብር ፡ ላቲ ፡ ካህን ፡ ኵሎ ፡ [ዘንተ ፡ ሕገ] ።
31 ወንጹሕ ፡ ውእቱ ፡ ብእሲ ፡ እምነ ፡ ኀጢአት ፡ ወይእቲሰ ፡ ብእሲት ፡ ትነሥእ ፡ ኀጢአታ ።
=== chapter 6 ===
[Numeri 6]
1 ወነበቦ ፡ እግዚአብሔር ፡ ለሙሴ ፡ ወይቤሎ ፤
2 ንግሮሙ ፡ ለደቂቀ ፡ እስራኤል ፡ ወበሎሙ ፡ ብእሲ ፡ አው ፡ ብእሲት ፡ ዘአዕበየ ፡ በፂዐ ፡ ብፅዓተ ፡ ከመ ፡ ያንጽሕ ፡ ርእሶ ፡ ለእግዚአብሔር ፤
3 እምነ ፡ ወይን ፡ ወእምነ ፡ ሜስ ፡ ያንጽሕ ፡ ርእሶ ፡ ወእምነ ፡ ብሒእ ፡ ወይን ፡ ወእምነ ፡ ብሒእ ፡ ሜስ ፡ ኢይስተይ ፡ ወእምነ ፡ ኵሉ ፡ ዘይትገበር ፡ እምአስካል ፡ ኢይስተይ ፡ ወአስካለ ፡ ወዘቢበ ፡ ኢይብላዕ ፡ በኵሉ ፡ መዋዕለ ፡ ብፅዓቲሁ ።
4 እምነ ፡ ኵሉ ፡ ዘይትገበር ፡ እምውስተ ፡ አስካል ፡ ወይነኒ ፡ ዘእምውስተ ፡ ዘቢበ ፡ ሕጕር ፡ ወአሥከሮኒ ፡ ኢይብላዕ ፡ በኵሉ ፡ መዋዕለ ፡ ብፅዓቲሁ ፡ በዘ ፡ ያነጽሕ ፡ ርእሶ ።
5 ወመላጼ ፡ ኢያቅርብ ፡ ውስተ ፡ ርእሱ ፡ እስከ ፡ ይትፌጸማ ፡ ኵሎን ፡ መዋዕል ፡ እለ ፡ በፅዐ ፡ ለእግዚአብሔር ፡ [ቅዱሰ ፡ ይከውን ፡ ወያነውኅ ፡ ሥዕርተ ፡ ርእሱ ፡ በኵሉ ፡ መዋዕለ ፡ ብፅዓቲሁ ፡ ለእግዚአብሔር ።]
6 ወላዕለ ፡ ኵሉ ፡ ነፍስ ፡ እንተ ፡ ሞተት ፡ ኢይባእ ፤
7 ወኢላዕለ ፡ አቡሁ ፡ ወኢላዕለ ፡ እሙ ፡ ወኢላዕለ ፡ እኁሁ ፡ ወኢላዕለ ፡ እኅቱ ፡ ከመ ፡ ኢይርኰስ ፡ ቦሙ ፡ እምከመ ፡ ሞቱ ፡ እስመ ፡ ብፅዓተ ፡ አምላኩ ፡ ሀለወ ፡ ላዕሌሁ ፡ ዲበ ፡ ርእሱ ።
8 በኵሉ ፡ መዋዕል ፡ ዘብፅዓቲሁ ፡ ይትቄደስ ፡ ለእግዚአብሔር ።
9 ወእመሰ ፡ ቦቱ ፡ ዘሞተ ፡ ግብተ ፡ በኀበ ፡ ሀለወ ፡ ውእቱ ፡ ወሞተ ፡ በጊዜሃ ፡ ይረኵስ ፡ ብፅዓተ ፡ ርእሱ ፤ ወይላጺ ፡ ርእሶ ፡ በዕለተ ፡ ይነጽሕ ፡ በሳብዕት ፡ ዕለት ፡ ይትላጸይ ።
10 ወበሳምንት ፡ ዕለት ፡ ያመጽእ ፡ ክልኤተ ፡ ማዕነቀ ፡ አው ፡ ክልኤተ ፡ እጕለ ፡ ርግብ ፡ ኀበ ፡ ካህን ፡ ኀበ ፡ ኆኅተ ፡ ደብተራ ፡ ዘመርጡል ።
11 ወይገብር ፡ ካህን ፡ አሐ[ተ] ፡ በእንተ ፡ ኀጢአት ፡ ወአሐ[ተ] ፡ ለመሥዋዕት ፡ ወያስተሰሪ ፡ በእንቲአሁ ፡ ካህን ፡ በበይነ ፡ ዘአበሰ ፡ በእንተ ፡ ነፍስ ፡ [ወ]ይቄድሶ ፡ ለርእሱ ፡ በይእቲ ፡ ዕለት ።
12 ወይቄድሶ ፡ ለእግዚአብሔር ፡ በኵሉ ፡ መዋዕለ ፡ ብፅዓቲሁ ፡ ወያመጽእ ፡ በግዐ ፡ ዘዓመት ፡ ዘንስሓ ፡ ወመዋዕለ ፡ ቀዲሙሰ ፡ ኢይትኌለቁ ፡ ሎቱ ፡ እስመ ፡ ረኵሰ ፡ ብፅዓተ ፡ ርእሱ ።
13 ወዝንቱ ፡ ሕጉ ፡ ለዘ ፡ በፅዐ ፡ አመ ፡ ዕለተ ፡ ይፌጽም ፡ መዋዕለ ፡ ብፅዓቲሁ ፡ ይመጽእ ፡ [ለሊሁ ፡] ኀበ ፡ ኆኅተ ፡ ደብተራ ፡ ዘመርጡል ።
14 ወያመጽእ ፡ ቍርባኖ ፡ ለእግዚአብሔር ፡ በግዐ ፡ ዘዓመት ፡ አሐደ ፡ ንጹሐ ፡ ለመሥዋዕት ፡ ወበግዕተ ፡ እንተ ፡ ዓመት ፡ ንጽሕተ ፡ አሐተ ፡ በእንተ ፡ ኀጢአት ፡ ወሐርጌ ፡ አሐደ ፡ ንጹሐ ፡ ለመድኀኒት ፤
15 ወከፈረ ፡ ኅብስተ ፡ ስንዳሌ ፡ ዘናእት ፡ ዘግቡር ፡ በቅብእ ፡ ወጸራይቀ ፡ ናእተ ፡ ዘቅቡእ ፡ በቅብእ ፡ ወመሥዋዕቶሙ ፡ ወሞጻሕቶሙ ።
16 ወያበውእ ፡ ካህን ፡ ቅድመ ፡ እግዚአብሔር ፡ ወይገብር ፡ ዘበእንተ ፡ ኀጢአቱ ፡ ወመሥዋዕተ ።
17 ወይገብር ፡ ጠሌኒ ፡ ዘመሥዋዕተ ፡ መድኀኒቱ ፡ ለእግዚአብሔር ፡ ምስለ ፡ ዝክቱ ፡ ከፈር ፡ ዘናእት ፡ ወይገብር ፡ ካህን ፡ መሥዋዕቶ ፡ ወሞጻሕቶ ።
18 ወይላጺ ፡ ርእሶ ፡ ውእቱ ፡ ዘበፅዐ ፡ በኀበ ፡ ኆኅተ ፡ ደብተራ ፡ ዘመርጡል ፡ ርእሰ ፡ ብፅዓቲሁ ፡ ወይወዲ ፡ ሥዕርቶ ፡ ውስተ ፡ እሳት ፡ ዘመሥዋዕተ ፡ መድኀኒት ።
19 ወይነሥእ ፡ ካህን ፡ መዝራዕተ ፡ በአነዳሁ ፡ እምውስተ ፡ ሐርጌ ፡ ወኅብስተ ፡ ናእት ፡ አሐተ ፡ እምውስተ ፡ ከፈር ፡ ወአሐተ ፡ ጸራይቀ ፡ ናእት ፡ ወያነብር ፡ ውስተ ፡ እደዊሁ ፡ ለዘበፅዐ ፡ እምድኅረ ፡ ተላጸየ ፡ ርእሶ ።
20 ወያበውኦ ፡ ካህን ፡ ቍርባነ ፡ ቅድመ ፡ እግዚአብሔር ፡ ወቅዱሰ ፡ ይከውን ፡ ለካህን ፡ ተላዕ ፡ ዘቍርባን ፡ ወመዝራዕት ፡ ዘመባእ ፡ ወእምድኅረ ፡ ዝንቱ ፡ ይሰቲ ፡ ወይነ ፡ ውእቱ ፡ ዘበፅዐ ።
21 ወዝንቱ ፡ ሕጉ ፡ ለዘ ፡ በፅአ ፡ እምከመ ፡ በፅአ ፡ ለእግዚአብሔር ፡ ዘያመጽእ ፡ ቍርባኖ ፡ ለእግዚአብሔር ፡ በእንታ ፡ ብፅዓቲሁ ፡ ዘእንበለ ፡ ለእመቦ ፡ ዘረከበ ፡ ውስተ ፡ እዴሁ ፡ በአምጣነ ፡ ይትከሀሎ ፡ ለብፅዓቲሁ ፡ ዘበፅዐ ፡ በሕገ ፡ አንጽሖ ።
22 ወነበቦ ፡ እግዚአብሔር ፡ ለሙሴ ፡ ወይቤሎ ፤
23 ንግሮሙ ፡ ለአሮን ፡ ወለደቂቁ ፡ ወበሎሙ ፡ ከመዝ ፡ ትባርክዎሙ ፡ ለደቂቀ ፡ እስራኤል ፡ ወትብልዎሙ ።
24 ወይሠይሙ ፡ ስምየ ፡ ላዕለ ፡ ደቂቀ ፡ እስራኤል ፡ ወአነ ፡ እግዚአብሔር ፡ ዘእባርኮሙ ።
25 ለይባርከ ፡ እግዚአብሔር ፡ ወይዕቀብከ ፤
26 ወለያርኢ ፡ እግዚአብሔር ፡ ገጾ ፡ ላዕሌከ ፡ ወለይምሐርከ ፤
27 ወለይሢም ፡ እግዚአብሔር ፡ ገጾ ፡ ኀቤከ ፡ ወለየሀብከ ፡ ሰላመ ።
=== chapter 7 ===
[Numeri 7]
1 ወኮነ ፡ በዕለት ፡ እንተ ፡ ፈጸመ ፡ ሙሴ ፡ ተኪሎታ ፡ ለደብተራ ፡ ወቀብአ ፡ ወቀደሳ ፡ ወለኵሉ ፡ ንዋያ ፡ ወምሥዋዕኒ ፡ ወኵሉ ፡ ንዋዩ ፡ ወቀብኦሙ ፡ ወቀደሶሙ ፤
2 ወአምጽኡ ፡ መላእክተ ፡ እስራኤል ፡ ዐሠርቱ ፡ ወክልኤቱ ፡ መላእክት ፡ ዘዘ ፡ አብያተ ፡ አበዊሆሙ ፡ እሉ ፡ ውእቶሙ ፡ መላእክተ ፡ ነገዶሙ ፡ እለ ፡ ተሠይሙ ፡ ዲበ ፡ ምስፍናሆሙ ።
3 ወአምጽኡ ፡ ቍርባኖሙ ፡ ቅድመ ፡ እግዚአብሔር ፤ ስድስቱ ፡ ሰረገላት ፡ ሠናያን ፡ ወዐሠርቱ ፡ ወክልኤቱ ፡ አልህምት ፡ ለለአሐዱ ፡ ሰረገላ ፡ በበክልኤቱ ፡ አልህምቱ ፡ ዘሰረገላት ፡ እምነ ፡ ክልኤቱ ፡ ክልኤቱ ፡ መላእክት ፡ ወሶር ፡ እምኀበ ፡ አሐዱ ፡ አሐዱ ፤ ወአምጽኡ ፡ ቅድመ ፡ ደብተራ ።
4 ወነበቦ ፡ እግዚአብሔር ፡ ለሙሴ ፡ ወይቤሎ ፤
5 ንሣእ ፡ እምኔሆሙ ፡ ወይኩን ፡ ዘይትቀነይ ፡ ለምግባረ ፡ ደብተራ ፡ ዘመርጡል ፡ ወሀቦሙ ፡ ለሌዋውያን ፡ ለለ፩እምኔሆሙ ፡ በከመ ፡ ምግባሮሙ ።
6 ወነሥአ ፡ ሙሴ ፡ ውእተ ፡ ሰረገላ ፡ ወአልህምቶኒ ፡ ወወሀቦሙ ፡ ለሌዋውያን ።
7 ፪ሰረገላተ ፡ ወ፬አልህምተ ፡ ወሀቦሙ ፡ ለደቂቀ ፡ ጌድሶን ፡ በአምጣነ ፡ ምግባሮሙ ።
8 ወ፬ሰረገላተ ፡ ወ፰አልህምተ ፡ ወሀቦሙ ፡ ለደቂቀ ፡ ሜራሪ ፡ በአምጣነ ፡ ምግባሮሙ ፡ ወላዕለ ፡ ይታመር ፡ ወልደ ፡ አሮን ፡ ካህን ፡ እሙንቱ ።
9 ወለደቂቀ ፡ ቃዓትሰ ፡ ኢወሀቦሙ ፡ እስመ ፡ ግብረ ፡ ቅድሳት ፡ ሕቢቶሙ ፡ ወበመትከፍቶሙ ፡ ይጸውርዎ ።
10 ወአምጽኡ ፡ መላእክት ፡ ለመድቅሐ ፡ ምሥዋዕ ፡ በዕለት ፡ እንተ ፡ ባቲ ፡ ቀብአ ፡ አምጽኡ ፡ መላእክት ፡ ቍርባኖሙ ፡ ቅድመ ፡ ምሥዋዕ ።
11 ወይቤሎ ፡ እግዚአብሔር ፡ ለሙሴ ፡ አሐዱ ፡ አሐዱ ፡ መልአክ ፡ ለለ ፡ ዕለቱ ፡ ያብእ ፡ ቍርባኖ ፡ መልአክ ፡ በበ ፡ ዕለቶሙ ፡ ለመድቅሐ ፡ ምሥዋዕ ።
12 ወዘያበውእ ፡ በቀዳሚት ፡ ዕለት ፡ ቍርባኖ ፡ ነአሶን ፡ ወልደ ፡ አሚናዳብ ፡ መልአኮሙ ፡ ለነገደ ፡ ይሁዳ ።
13 ወአብአ ፡ ቍርባኖ ፤ መጽብሕ ፡ ዘብሩር ፡ አሐዱ ፡ ዘምእተ ፡ ወሠላሳ ፡ ሐሳቡ ፡ ወአሐዱ ፡ ፍያል ፡ ዘብሩር ፡ ዘሰብዓ ፡ በሰቅሎን ፡ ውእቱ ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለ[መሥዋዕት] ።
14 ወጻሕል ፡ አሐዱ ፡ ዘዐሥሩ ፡ ወርቁ ፡ ወምሉእ ፡ ዕጣ[ነ] ።
15 ላህም ፡ አሐዱ ፡ እምውስተ ፡ አልህምት ፡ [ወበግዕ ፡] ኣሐዱ ፡ [ወማሕስአ ፡ በግዕ ፡ አሐዱ ፡] ዘዓመት ፡ ለመሥዋዕት ።
16 ወሐርጌ ፡ እምውስተ ፡ አጣሊ ፡ አሐዱ ፡ በእንተ ፡ ኀጢአት ።
17 ወለመሥዋዕተ ፡ መድኀኒት ፡ ክልኤ ፡ ዕጐልት ፡ ወኀምስቱ ፡ አባግዕ ፡ ወኀምስቱ ፡ አጣሊ ፡ ወ፭አባግዕ ፡ አንስት ፡ ዘዘ ፡ ዓመት ፡ ዝንቱ ፡ ውእቱ ፡ ቍርባኑ ፡ ለነአሶን ፡ ወልደ ፡ አሚናዳብ ።
18 ወበሳኒት ፡ ዕለት ፡ አብአ ፡ ናተናኤል ፡ ወልደ ፡ ሶገር ፡ መልአኮሙ ፡ ለነገደ ፡ ይስካር ።
19 ወአብአ ፡ ቍርባኖ ፤ መጽብኅ ፡ ዘብሩር ፡ ፩ዘ፻ወ፴ሐሳቡ ፡ ወፍያል ፡ ዘብሩር ፡ ፩ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
20 ወጻሕል ፡ ፩ዘ፲ወርቁ ፡ ወምሉእ ፡ ዕጣ[ነ] ።
21 ወላህም ፡ ፩እምውስተ ፡ አልህምት ፡ ወበግዕ ፡ ፩[ወማሕስአ ፡ በግዕ ፡ ፩]ዘዓመት ፡ ለመሥዋዕት ።
22 ወሐርጌ ፡ እምውስተ ፡ አጣሊ ፡ ፩በእንተ ፡ ኀጢአት ።
23 ወለመሥዋዕተ ፡ መድኀኒት ፡ ፪እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ ዘዘ ፡ ዓመት ፡ ዝንቱ ፡ ውእቱ ፡ ቍርባኑ ፡ ለናትናኤል ፡ ወልደ ፡ ሶገር ።
24 ወበሣልስት ፡ ዕለት ፡ አብአ ፡ መልአኮሙ ፡ ለደቂቀ ፡ ዛቡሎን ፡ [ኤልያብ ፡ ወልደ ፡ ኬሎን ፡] ቍርባኖ ።
25 መጽብኅ ፡ ፩ዘብሩር ፡ ዘ፻ወ፴ሐሳቡ ፡ ወፍያል ፡ ፩ዘብሩር ፡ ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
26 ወጻሕል ፡ ፩ዘ፲ወርቁ ፡ ወምሉእ ፡ ዕጣ[ነ] ።
27 ወላህም ፡ ፩እምውስተ ፡ አልህምት ፡ ወበግዕ ፡ ፩[ወማሕስአ ፡ በግዕ ፡ ፩]ዘዓመት ፡ ለ[መሥዋዕት] ።
28 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ።
29 ወለመሥዋዕተ ፡ መድኀኒት ፡ ፪እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ [ዘዘ ፡ ዓመት ፡] ዝንቱ ፡ ውእቱ ፡ ቍርባኑ ፡ ለኤልያብ ፡ ወልደ ፡ ኬሎን ።
30 ወበራብዕት ፡ ዕለት ፡ አብአ ፡ መልአኮሙ ፡ ለደቂቀ ፡ ሮቤል ፡ ኤሊሱር ፡ ወልደ ፡ ሴድዩር ፡ ቍርባኖ ።
31 መጽብሕ ፡ ዘብሩር ፡ ፩ዘ፻ወ፴ሐሳቡ ፡ ወፍያል ፡ ዘብሩር ፡ ፩ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
32 ወጻሕል ፡ ፩ዘ፲ወርቁ ፡ ወምሉእ ፡ ዕጣ[ነ] ።
33 ወላህም ፡ ፩እምውስተ ፡ አልህምት ፡ ወበግዕ፩[ወማሕስአ ፡ በግዕ ፡ ፩]ዘዓመት ፡ ለመሥዋዕት ።
34 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ።
35 ወለመሥዋዕተ ፡ መድኀኒት ፡ ፪እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ [ዘዘ ፡ ዓመት ፡] ዝንቱ ፡ ውእቱ ፡ ቍርባኑ ፡ ለኤሊሱር ፡ ወልደ ፡ ሴድዩር ።
36 ወበኃምስት ፡ ዕለት ፡ አብአ ፡ መልአኮሙ ፡ ለደቂቀ ፡ ስምዖን ፡ ሰላሚዬል ፡ ወልደ ፡ ሱሪስዴ ፡ ቍርባኖ ።
37 መጽብኅ ፡ ዘብሩር ፡ ፩ዘ፻ወ፴ሐሳቡ ፡ ወፍያል ፡ ዘብሩር ፡ ፩ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
38 ወጻሕል ፡ ፩ዘ፲ወርቁ ፡ ወምሉእ ፡ ዕጣ[ነ] ።
39 ወላህም ፡ ፩እምውስተ ፡ አልህምት ፡ ወበግዕ ፡ ፩[ወማሕሥአ ፡ በግዕ ፡ ፩]ዘዓመት ፡ ለመሥዋዕት ።
40 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ።
41 ወለመሥዋዕተ ፡ መድኀኒት ፡ ፪እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ [ዘዘ ፡ ዓመት ፡] ዝንቱ ፡ ውእቱ ፡ ቍርባኑ ፡ ለሰላሚዬል ፡ ወልደ ፡ ሱሪስዴ ።
42 ወበሳድስት ፡ ዕለት ፡ አብአ ፡ መልአኮሙ ፡ ለደቂቀ ፡ ጋድ ፡ ኤሊሳፍ ፡ ወልደ ፡ ራጕኤል ፡ ቍርባኖ ።
43 መጽብሕ ፡ ፩ዘብሩር ፡ ዘሐሳቡ ፡ ፻ወ፴ወፍያል ፡ ፩ዘብሩር ፡ ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
44 ወጻሕል ፡ ፩ዘ፲ወርቁ ፡ ወምሉእ ፡ ዕጣነ ።
45 ወላህም ፡ ፩እምውስተ ፡ አልህምት ፡ ወበግዕ ፡ ፩[ወማሕሥአ ፡ በግዕ ፡ ፩]ዘዓመት ፡ ለመሥዋዕት ።
46 ወሐርጌ ፡ እምውስተ ፡ አጣሊ ፡ ፩በእንተ ፡ ኀጢአት ።
47 ወለመሥዋዕተ ፡ መድኀኒትኒ ፡ ፪እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ ዘዘ ፡ ዓመት ፡ ዝንቱ ፡ ውእቱ ፡ ቍርባኑ ፡ ለኤሊሳፍ ፡ ወልደ ፡ ራጕኤል ።
48 ወበሳብዕት ፡ ዕለት ፡ አብአ ፡ መልአኮሙ ፡ ለደቂቀ ፡ ኤፍሬም ፡ ኤሊሳማ ፡ ወልደ ፡ ኤሚዩድ ፡ ቍርባኖ ።
49 መጽብሕ ፡ ፩ዘብሩር ፡ ዘ፻ወ፴ሐሳቡ ፡ ወፍያል ፡ ፩ዘብሩር ፡ ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
50 ወጻሕል ፡ ፩ዘ፲ወርቁ ፡ ወምሉእ ፡ ዕጣነ ።
51 ወላህም ፡ ፩እምውስተ ፡ አልህምት ፡ ወበግዕ ፡ ፩[ወማሕስአ ፡ በግዕ ፡ ፩]ዘዓመት ፡ ለመሥዋዕት ።
52 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ።
53 ወለመሥዋዕተ ፡ መድኀኒት ፡ ክልኤ ፡ እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ [ዘዘ ፡ ዓመት ፡] ዝንቱ ፡ ውእቱ ፡ ቍርባኑ ፡ ለኤሊሰማ ፡ ወልደ ፡ ኤምዩድ ።
54 ወበሳምንት ፡ ዕለት ፡ አብአ ፡ መልአኮሙ ፡ ለደቂቀ ፡ መናሴ ፡ ገማሊዬል ፡ ወልደ ፡ ፈዳሱር ፡ ቍርባኖ ።
55 መጽብሕ ፡ ፩ዘብሩር ፡ ዘ፻ወ፴ሐሳቡ ፡ ወፍያል ፡ ፩ዘብሩር ፡ ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
56 ወጻሕል ፡ ፩ዘ፲ወርቁ ፡ ወምሉእ ፡ ዕጣነ ።
57 ወላህም ፡ ፩እምውስተ ፡ አልህምት ፡ ወበግዕ ፡ ፩ወማሕስእ ፡ ፩ዘበግዕ ፡ ዘዓመት ፡ ለመሥዋዕት ።
58 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ።
59 ወለመሥዋዕተ ፡ መድኀኒት ፡ ፪እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ ዘዘ ፡ ዓመት ፡ ዝንቱ ፡ ውእቱ ፡ ቍርባኑ ፡ ለገማልዬል ፡ ወልደ ፡ ፈዳሱር ።
60 ወበታስዕት ፡ ዕለት ፡ አብአ ፡ መልአኮሙ ፡ ለደቂቀ ፡ ብንያሚ ፡ አቢዳን ፡ ወልደ ፡ ጋድዮን ፡ ቍርባኖ ።
61 መጽብሕ ፡ ፩ዘብሩር ፡ ዘ፻ወ፴ሐሳቡ ፡ ወፍያል ፡ ፩ዘብሩር ፡ ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
62 ወጻሕል ፡ ፩ዘ፲ወርቁ ፡ ወምሉእ ፡ ዕጣነ ።
63 ወላህም ፡ ፩እምውስተ ፡ አልህምት ፡ ወበግዕ ፡ ፩ወማሕስአ ፡ በግዕ ፡ ፩ዘዓመት ፡ ለመሥዋዕት ።
64 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ።
65 ወለመሥዋዕተ ፡ መድኀኒት ፡ ፪እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ [ዘዘ ፡ ዓመት ፡] ዝንቱ ፡ ውእቱ ፡ ቍርባኑ ፡ ለአቢዳን ፡ ወልደ ፡ ጋድዮን ።
66 ወበዓሥርት ፡ ዕለት ፡ አብአ ፡ መልአኮሙ ፡ ለደቂቀ ፡ ዳን ፡ ኣኪየዜር ፡ ወልደ ፡ አሚስዴ ፡ ቍርባኖ ።
67 መጽብሕ ፡ ፩ዘብሩር ፡ ዘ፻ወ፴ሐሳቡ ፡ ወፍያል ፡ ፩ዘብሩር ፡ ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
68 ወጻሕል ፡ ፩ዘ፲ወርቁ ፡ ወምሉእ ፡ ዕጣነ ።
69 ወላህም ፡ ፩እምውስተ ፡ አልህምት ፡ ወበግዕ ፡ ፩ወማሕስአ ፡ በግዕ ፡ ፩ዘዓመት ፡ ለመሥዋዕት ።
70 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ።
71 ወለመሥዋዕተ ፡ መድኀኒት ፡ ፪እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ ዘዘዓመት ፡ ዝንቱ ፡ ውእቱ ፡ ቍርባኑ ፡ ለአኪየዜር ፡ ወልደ ፡ አሚስዴ ።
72 ወአመ ፡ ዐሡር ፡ ወአሚር ፡ አብአ ፡ መልአኮሙ ፡ ለደቂቀ ፡ አሴር ፡ ፋጌሔል ፡ ወልደ ፡ ኤክራን ፡ ቍርባኖ ።
73 መጽብሕ ፡ ፩ዘብሩር ፡ ዘ፻ወ፴ሐሳቡ ፡ ወፍያል ፡ ፩ዘብሩር ፡ ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
74 ወጻሕል ፡ ፩ዘ፲ወርቁ ፡ ወምሉእ ፡ ዕጣነ ።
75 ወላህም ፡ ፩እምውስተ ፡ አልህምት ፡ ወበግዕ ፡ ፩ወማሕስአ ፡ በግዕ ፡ ፩ዘዓመት ፡ ለመሥዋዕት ።
76 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ።
77 ወለመሥዋዕተ ፡ መድኀኒት ፡ ክልኤ ፡ እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ [ዘዘ ፡ ዓመት ፡] ዝንቱ ፡ ውእቱ ፡ ቍርባኑ ፡ ለፋጌሔል ፡ ወልደ ፡ ኤክራን ።
78 ወአመ ፡ ዐሡሩ ፡ ወሰኑይ ፡ አብአ ፡ መልአኮሙ ፡ ለደቂቀ ፡ ንፍታሌም ፡ አኪሬ ፡ ወልደ ፡ ኤናን ፡ ቍርባኖ ።
79 መጽብሕ ፡ ፩ዘብሩር ፡ ዘ፻ወ፴ሐሳቡ ፡ ወፍያል ፡ ፩ዘብሩር ፡ ዘ፸በሰቅሎን ፡ በሰቅል ፡ ዘቅዱስ ፡ ወክልኤሆሙ ፡ ምሉኣን ፡ ስንዳሌ ፡ ዘግቡር ፡ በቅብእ ፡ ለመሥዋዕት ።
80 ወጻሕል ፡ ፩ዘ፲ወርቁ ፡ ወምሉእ ፡ ዕጣነ ።
81 ወላህም ፡ ፩እምውስተ ፡ አልህምት ፡ ወበግዕ ፡ ፩ወማሕስአ ፡ በግዕ ፡ ፩ዘዓመት ፡ ለመሥዋዕት ።
82 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ።
83 ወለመሥዋዕተ ፡ መድኀኒት ፡ ፪እጐልት ፡ ወ፭አባግዕ ፡ ወ፭አጣሊ ፡ ወ፭አባግዕ ፡ አንስት ፡ [ዘዘ ፡ ዓመት ፡] ዝንቱ ፡ ውእቱ ፡ ቍርባኑ ፡ ለአኪሬ ፡ ወልደ ፡ ኤናን ።
84 ከመዝ ፡ ውእቱ ፡ መድቅሐ ፡ ምሥዋዕ ፡ ዘአመ ፡ ቀብኦ ፡ ዘእምኀበ ፡ መላእክቲሆሙ ፡ ለደቂቀ ፡ እስራኤል ፤ መጽብሕ ፡ ዐሠርቱ ፡ ወክልኤቱ ፡ ዘብሩር ፡ ወፍያል ፡ ዘብሩር ፡ ፲ወ፪ወጻኅል ፡ ዘወርቅ ፡ ፲ወ፪ ።
85 ወለለ ፡ ፩መጽብኅ ፡ ፻ወ፴በሰቅሎን ፡ ወ፸በሰቅሎን ፡ ለለ፩ፍያል ፡ ወኵሉ ፡ ብሩሩ ፡ ለውእቱ ፡ ንዋይ ፡ ዕሥራ ፡ ምእት ፡ ወአርባዕቱ ፡ ምእት ፡ ሰቅል ፡ በሰቅሎ ፡ ዘቅዱስ ።
86 ወዐሠርቱ ፡ ወክልኤቱ ፡ አጽሕልት ፡ ዘወርቅ ፡ እለ ፡ ምሉኣን ፡ ዕጣነ ፡ ወኵሉ ፡ ወርቆሙ ፡ ለውእቶሙ ፡ አጽሕልት ፡ ምእት ፡ ወዕሥራ ፡ ወርቆሙ ።
87 ወኵሉ ፡ አልህምት ፡ ዘመሥዋዕት ፡ ፲ወ፪አልህምት ፡ ወአባግዕ ፡ ፲ወ፪ወማሕስአ ፡ አባግዕ ፡ ፲ወ፪ዘዘ ፡ ዓመት ፡ ለመሥዋዕትኒ ፡ ወለሞጻሕትኒ ፡ ወ፲ወ፪ሐራጊት ፡ እምውስተ ፡ አጣሊ ፡ በእንተ ፡ ኀጢአት ።
88 ወለመሥዋዕተ ፡ መድኀኒት ፡ ዕሥራ ፡ ወአርባዕቱ ፡ እጐልት ፡ ወአባግዕ ፡ ስሳ ፡ ወአጣሊ ፡ ፷ወአባግዕ ፡ አንስት ፡ ዘዘ ፡ ዓመት ፡ ንጹሓት ፡ ፷ ፤ ከመዝ ፡ ውእቱ ፡ መድቅሐ ፡ ምሥዋዕ ፡ እምድኅረ ፡ ፈጸመ ፡ እደዊሁ ፡ ወእምድኅረ ፡ ቀብአ ።
89 ወሶበ ፡ ይበውእ ፡ ሙሴ ፡ ውስተ ፡ ደብተራ ፡ ዘመርጡል ፡ ከመ ፡ ይትናገሮ ፡ ወሰምዐ ፡ ቃለ ፡ እግዚአብሔር ፡ እንዘ ፡ ይትናገሮ ፡ እምነ ፡ መልዕልተ ፡ ምሥሃል ፡ ዘዲበ ፡ ታቦት ፡ ዘመርጡል ፡ እምነ ፡ ማእከለ ፡ ክልኤቱ ፡ ኪሩብ ፡ ወይትናገር ፡ ምስሌሁ ።
=== chapter 8 ===
[Numeri 8]
1 ወነበቦ ፡ እግዚአብሔር ፡ ለሙሴ ፡ ወይቤሎ ፤
2 ንግሮ ፡ ለአሮን ፡ ወበሎ ፡ እምነ ፡ መንገለ ፡ ገቦሃ ፡ ዘገ[ጻ] ፡ አንብር ፡ መኃትዊሃ ፡ ለመራናት ፡ ወአኅትዎን ፡ ሰብዑሆን ፡ መኃትዊሃ ።
3 ወገብረ ፡ ከማሁ ፡ አሮን ፡ እምአሐዱ ፡ ገቦሃ ፡ ዘመንገለ ፡ ገ[ጻ] ፡ ለመራናት ፡ አሕተወ ፡ መኃትዊሃ ፡ በከመ ፡ አዘዞ ፡ እግዚአብሔር ፡ ለሙሴ ።
4 ወከመዝ ፡ ውእቱ ፡ ግብረታ ፡ ለመራናት ፡ ወአዕጹቂሃኒ ፡ ጽኑዓን ፡ ዘወርቅ ፡ ኵለንታሆሙ ፡ ወ[ጽጌ] ያቲሃኒ ፡ ጽኑዕ ፡ ኵለንታሁ ፡ በከመ ፡ አርአያ ፡ ዘአርአዮ ፡ እግዚአብሔር ፡ ለሙሴ ፡ ከማሁ ፡ ገብራ ፡ ለመራናት ።
5 ወነበቦ ፡ እግዚአብሔር ፡ ለሙሴ ፡ ወይቤሎ ፤
6 ንሥኦሙ ፡ ለሌዋውያን ፡ እምነ ፡ ማእከሎሙ ፡ ለደቂቀ ፡ እስራኤል ፡ ወአንጽሖሙ ።
7 ወከመዝ ፡ ትገብር ፡ ከመ ፡ ታንጽሖሙ ፡ ትነዝኆሙ ፡ ማየ ፡ አንጽሖ ፡ ወይላጽዩ ፡ ኵሎ ፡ ሥጋሆሙ ፡ ወይሕፅቡ ፡ አልባሲሆሙ ፡ ወንጹሓነ ፡ ይከውኑ ።
8 ወይንሥኡ ፡ ላህመ ፡ አሐደ ፡ እምውስተ ፡ አልህምት ፡ ወሎቱኒ ፡ መሥዋዕተ ፡ ስንዳሌ ፡ ዘግበር ፡ በቅብእ ፡ ወላህም ፡ ዘዓመት ፡ እምውስተ ፡ አልህምት ፡ ይንሥኡ ፡ ዘበእንተ ፡ ኀጢአት ።
9 ወታመጽኦሙ ፡ ለሌዋውያን ፡ ቅድመ ፡ ደብተራ ፡ ዘመርጡል ፡ ወታስተጋብእ ፡ ኵሎ ፡ ተዓይኒሆሙ ፡ ለደቂቀ ፡ እስራኤል ።
10 ወታመጽኦሙ ፡ ለሌዋውያን ፡ ቅድመ ፡ እግዚአብሔር ፡ ወይወድዩ ፡ እደዊሆሙ ፡ ደቂቀ ፡ እስራኤል ፡ ላዕለ ፡ ሌዋውያን ።
11 ወይፈልጦሙ ፡ አሮን ፡ ለሌዋውያን ፡ ቅድመ ፡ እግዚአብሔር ፡ እምውስተ ፡ ደቂቀ ፡ እስራኤል ፡ ወይከውኑ ፡ ለግብረ ፡ እግዚአብሔር ፡ እለ ፡ ይገብሩ ።
12 ወሌዋውያን ፡ ይወድዩ ፡ እደዊሆሙ ፡ ዲበ ፡ አርእስተ ፡ አልህምት ፡ ወይገብር ፡ አሐደ ፡ በእንተ ፡ ኀጢአት ፡ ወአሐደ ፡ ለመሥዋዕተ ፡ እግዚአብሔር ፡ ወያስተሰሪ ፡ በእንቲአሆሙ ።
13 ወታቀውሞሙ ፡ ለሌዋውያን ፡ ቅድመ ፡ እግዚአብሔር ፡ ወቅድመ ፡ አሮን ፡ ወቅድመ ፡ ደቂቁ ፡ ወታገብኦሙ ፡ ሀብቶ ፡ ለእግዚአብሔር ።
14 ወትፈልጦሙ ፡ ለሌዋውያን ፡ እምነ ፡ ማእከሎሙ ፡ ለደቂቀ ፡ እስራኤል ፡ ወይከውኑ ፡ ሊተ ።
15 ወእምድኅረ ፡ ዝንቱ ፡ ይበውኡ ፡ ሌዋውያን ፡ ይግበሩ ፡ ግብረ ፡ ደብተራ ፡ ዘመርጡል ፡ ወታነጽሖሙ ፡ ወታገብኦሙ ፡ ቅድመ ፡ እግዚአብሔር ።
16 እስመ ፡ ሀብተ ፡ ገብኡ ፡ ሊተ ፡ እሙንቱ ፡ እምነ ፡ ማእከሎሙ ፡ ለደቂቀ ፡ እስራኤል ፡ ህየንተ ፡ ኵሉ ፡ ዘይፈትሕ ፡ ማኅፀነ ፡ ዘእምኵሉ ፡ በኵሮሙ ፡ ለደቂቀ ፡ እስራኤል ፡ ነሣእክዎሙ ፡ ሊተ ።
17 እስመ ፡ ሊተ ፡ ውእቱ ፡ ኵሉ ፡ በኵር ፡ ዘእምደቂቀ ፡ እስራኤል ፡ እምነ ፡ ሰብኡ ፡ እስከ ፡ እንስሳሁ ፤ በዕለት ፡ እንተ ፡ ባቲ ፡ ቀተልክዎሙ ፡ ለኵሉ ፡ በኵር ፡ ዘውስተ ፡ ምድረ ፡ ግብጽ ፡ ዘቀደስክዎሙ ፡ ሊተ ።
18 ወነሣእክዎሙ ፡ ለሌዋውያን ፡ ህየንተ ፡ ኵሉ ፡ በኵር ፡ ዘእምደቂቀ ፡ እስራኤል ።
19 ወአግባእክዎሙ ፡ ለሌዋውያን ፡ ሀብተ ፡ ወተውህቡ ፡ ለአሮን ፡ ወለደቂቁ ፡ እምነ ፡ ማእከሎሙ ፡ ለደቂቀ ፡ እስራኤል ፡ ከመ ፡ ይግበሩ ፡ ግብሮሙ ፡ ለደቂቀ ፡ እስራኤል ፡ በውስተ ፡ ደብተራ ፡ ዘመርጡል ፡ ወያስተሰርዩ ፡ በእንቲአሆሙ ፡ ለደቂቀ ፡ እስራኤል ፡ ወአልቦቱ ፡ እምውስተ ፡ ደቂቀ ፡ እስራኤል ፡ ዘይቀርብ ፡ ኀበ ፡ ቅድሳት ፡ እምደቂቀ ፡ እስራኤል ።
20 ወገብሩ ፡ ሙሴ ፡ ወአሮን ፡ ወኵሉ ፡ ተዓይኒሆሙ ፡ ለደቂቀ ፡ እስራኤል ፡ ላዕለ ፡ ሌዋውያን ፡ በከመ ፡ አዘሆ ፡ እግዚአብሔር ፡ በእንተ ፡ ሌዋውያን ፡ ከማሁ ፡ ገብሩ ፡ ሎሙ ፡ ደቂቀ ፡ እስራኤል ።
21 ወአንጹሑ ፡ ርእሶሙ ፡ ሌዋውያን ፡ ወኀፀቡ ፡ አልባሲሆሙ ፡ ወአግብእዎሙ ፡ ኀበ ፡ አሮን ፡ ሀብ[ተ] ፡ ቅድመ ፡ እግዚአብሔር ፡ ወአስተስረየ ፡ በእንቲአሆሙ ፡ አሮን ፡ ከመ ፡ ያንጽሖሙ ።
22 ወእምድኅረ ፡ ዝንቱ ፡ ቦኡ ፡ ሌዋውያን ፡ ይግበሩ ፡ ግብሮሙ ፡ ውስተ ፡ ደብተራ ፡ ዘመርጡል ፡ ቅድመ ፡ አሮን ፡ ወቅድመ ፡ ደቂቁ ፡ በከመ ፡ አዘዞ ፡ እግዚአብሔር ፡ ለሙሴ ፡ በእንተ ፡ ሌዋውያን ፡ ከማሁ ፡ ገብሩ ፡ ሎሙ ።
23 ወነበቦ ፡ እግዚአብሔር ፡ ለሙሴ ፡ ወይቤሎ ፤
24 ዝንቱ ፡ ውእቱ ፡ ዘበእንተ ፡ ሌዋውያን ፡ ዘእምዕሥራ ፡ ወኀምስቱ ፡ ዓም ፡ ወላዕሉ ፡ እምኔሁ ፡ ይበውኡ ፡ ይግበሩ ፡ ግብሮሙ ፡ ግብረ ፡ ደብተራ ፡ ዘመርጡል ።
25 ወዘእምኀምሳ ፡ ይሰዐር ፡ እምግብሩ ፡ ወኢይትቀነይ ፡ እንከ ፡ ውእቱ ።
26 ወይትለአ[ክ] ፡ እኁሁ ፡ ውስተ ፡ ደብተራ ፡ ዘመርጡል ፡ ወይዕቀብ ፡ ሕቢቶሙ ፡ ወተቀንዮ ፡ ባሕቱ ፡ [ኢ]ይትቀነዩ ፡ ወከመዝ ፡ ትገብር ፡ ሎሙ ፡ ለሌዋውያን ፡ በበ ፡ ሕቢቶሙ ።
=== chapter 9 ===
[Numeri 9]
1 ወነበቦ ፡ እግዚአብሔር ፡ ለሙሴ ፡ በገዳም ፡ ዘሲና ፡ በካልእት ፡ ዓመት ፡ እምዘ ፡ ወጽኡ ፡ እምነ ፡ ምድረ ፡ ግብጽ ፡ በቀዳሚ ፡ ወርኅ ፡ ወይቤሎ ፤
2 ንግሮሙ ፡ ለደቂቀ ፡ እስራኤል ፡ ከመ ፡ ይግበሩ ፡ ፋሲካ ፡ አመ ፡ ጊዜሁ ።
3 አመ ፡ ዐሡሩ ፡ ወረቡዑ ፡ ለሠርቀ ፡ ወርኅ ፡ ቀዳሚ ፡ ወፍና ፡ ሰርክ ፡ ትገብርዎ ፡ አመ ፡ ጊዜሁ ፡ ወበከመ ፡ ሕጉ ፡ ወበከመ ፡ ትእዛዙ ፡ ትገብሮ ።
4 ወነገሮሙ ፡ ሙሴ ፡ ለደቂቀ ፡ እስራኤል ፡ ከመ ፡ ይግበሩ ፡ ፋሲካ ።
5 ወይእኅዙ ፡ እምዕለተ ፡ ዐሡሩ ፡ ወረቡዑ ፡ ለሠርቀ ፡ ወርኅ ፡ በገዳም ፡ ዘሲና ፡ በከመ ፡ አዘዞ ፡ እግዚአብሔር ፡ ለሙሴ ፡ ከማሁ ፡ ገብሩ ፡ ደቂቀ ፡ እስራኤል ።
6 ወመጽኡ ፡ ሰብእ ፡ እለ ፡ ቦሙ ፡ ርኵስ ፡ ውስተ ፡ ነፍሶሙ ፡ ወስእኑ ፡ ገቢረ ፡ ፋሲካ ፡ በይእቲ ፡ ዕለት ፡ ወመጽኡ ፡ ቅድሜሆሙ ፡ ለሙሴ ፡ ወአሮን ፡ በይእቲ ፡ ዕለት ።
7 ወይቤልዎሙ ፡ ውእቶሙ ፡ ዕደው ፡ ንሕነሰ ፡ ሰብእ ፡ ንሕነ ፡ እለ ፡ ብነ ፡ ርኵስ ፡ ውስተ ፡ ነፍስነ ፡ ወኢንትኀደግ ፡ እምአብኦ ፡ ቍርባኑ ፡ ለእግዚአብሔር ፡ እምነ ፡ ማእከሎሙ ፡ ለደቂቀ ፡ እስራኤል ፡ በበዘመኑ ።
8 ወይቤሎሙ ፡ ሙሴ ፡ ቁሙኒ ፡ ወእስማዕ ፡ ምንተ ፡ ይኤዝዝ ፡ እግዚአብሔር ፡ በእንቲአክሙ ።
9 ወነበቦ ፡ እግዚአብሔር ፡ ለሙሴ ፡ ወይቤሎ ፤
10 ንግሮሙ ፡ ለደቂቀ ፡ እስራኤል ፡ ወበሎሙ ፡ ብእሲ ፡ ብእሲ ፡ ለእመቦ ፡ ዘወፅአ ፡ ርኵስ ፡ ውስተ ፡ ነፍሱ ፡ ለሰብእ ፡ ወለእመኒ ፡ ርሑቀ ፡ ብሔር ፡ ሀለወ ፡ ወለእመኒ ፡ ውስተ ፡ ሙላዲክሙ ፡ ይግበሩ ፡ ፋሲካሁ ፡ ለእግዚአብሔር ፤
11 በካልእ ፡ ወርኅ ፡ አመ ፡ ዐሡሩ ፡ ወረቡዑ ፡ ለሠርቅ ፡ ፍና ፡ ሰርክ ፡ ይግበርዎ ፡ በናእት ፡ ወኀምለ ፡ ብሒእ ፡ ይብልዕዎ ።
12 ወኢያትርፉ ፡ እምኔሁ ፡ ለነግህ ፡ ወዐጽመ ፡ ኢይስብሩ ፡ እምኔሁ ፡ በሕጉ ፡ ለፋሲካ ፡ ይግበርዎ ።
13 ወሰብእሰ ፡ ዘንጹሕ ፡ ውእቱ ፡ ወኢኮነ ፡ ርሑቀ ፡ ብሔር ፡ ኀበ ፡ ሀለወ ፡ ለእመ ፡ ኀደገ ፡ ገቢረ ፡ ፋሲካ ፡ ለትሠሮ ፡ ይእቲ ፡ ነፍስ ፡ እምነ ፡ ሕዝባ ፡ እስመ ፡ ቍርባኖ ፡ ለእግዚአብሔር ፡ ኢያብአ ፡ በዘመኑ ፡ ኀጢአተ ፡ ይከውኖ ፡ ለውእቱ ፡ ብእሲ ።
14 ወለእመኒ ፡ መጽአ ፡ ኀቤክሙ ፡ ግዩር ፡ ውስተ ፡ ምድርክሙ ፡ ይግበር ፡ ፋሲካሁ ፡ ለእግዚአብሔር ፡ በሕጉ ፡ ለፋሱካ ፡ ወበከመ ፡ ትእዛዙ ፡ ይግበርዎ ፡ አሐዱ ፡ ሕጉ ፡ ለክሙ ፡ ለግዩርኒ ፡ ወለዘ ፡ እምፍጥረቱኒ ።
15 ወበዕለት ፡ እንተ ፡ ባቲ ፡ ተከልዋ ፡ ለደብተራ ፡ ከደና ፡ ደመና ፡ ለደብተራ ፡ ለቤተ ፡ መርጡል ፡ ወሌሊተሰ ፡ ይመጽእ ፡ ዲበ ፡ ደብተራ ፡ ከመ ፡ ራእየ ፡ እሳት ፡ እስከ ፡ ይጸብሕ ።
16 ወከመዝ ፡ ይከውን ፡ ለዘልፍ ፡ ደመና ፡ ይከድና ፡ መዓልተ ፡ ወራእየ ፡ እሳት ፡ ሌሊተ ።
17 ወእምከመ ፡ ሰሰለ ፡ ደመና ፡ እምነ ፡ ደብተራ ፡ እምድኅረ ፡ ዝንቱ ፡ ይግዕዙ ፡ ደቂቀ ፡ እስራኤል ፡ ወመካኖ ፡ ኀበ ፡ ቆመ ፡ ደመና ፡ ህየ ፡ ይትዐየኑ ፡ ደቂቀ ፡ እስራኤል ።
18 ወበትእዛዘ ፡ እግዚአብሔር ፡ ይግዕዙ ፡ በኵሉ ፡ መዋዕል ፡ ዘቦቱ ፡ ይጼልላ ፡ ደመና ፡ ለደብተራ ፡ ዘየሐድሩ ፡ ደቂቀ ፡ እስራኤል ።
19 ወሶበ ፡ ይነብር ፡ ደመና ፡ ብዙኀ ፡ መዋዕለ ፡ ዲበ ፡ ደብተራ ፡ የዐቅቡ ፡ ደቂቀ ፡ እስራኤል ፡ መዓቅቢሆሙ ፡ ለእግዚአብሔር ፡ ወኢይግዕዙ ።
20 ወበኍልቈ ፡ መዋዕል ፡ ዘይከድን ፡ ደመና ፡ ዲበ ፡ ደብተራ ፡ የኀድሩ ፡ ደቂቀ ፡ እስራኤል ፡ በቃለ ፡ እግዚአብሔር ፡ ወበትእዛዘ ፡ እግዚአብሔር ፡ ይግዕዙ ።
21 ወሶበ ፡ ይነብር ፡ ደመና ፡ እምሰርክ ፡ እስከ ፡ ነግህ ፡ ወእምከመ ፡ ጸብሐ ፡ ይሴስል ፡ ደመና ፡ ይግዕዙ ፡ መዓልተ ።
22 ወለእመኒ ፡ አብዝኀ ፡ ነቢረ ፡ ደመና ፡ እንዘ ፡ ይጼልላ ፡ እስከ ፡ መዋዕለ ፡ ወርኅ ፡ ይትዓየኑ ፡ ደቂቀ ፡ እስራኤል ፡ ወኢይግዕዙ ።
23 እስመ ፡ በትእዛዘ ፡ እግዚአብሔር ፡ ይግዕዙ ፡ ወሕገጊሁ ፡ ለእግዚአብሔር ፡ የዐቅቡ ፡ በትእዛዘ ፡ እግዚአብሔር ፡ ወበእዴሁ ፡ ለሙሴ ።
=== chapter 10 ===
[Numeri 10]
1 ወነበቦ ፡ እግዚአብሔር ፡ ለሙሴ ፡ ወይቤሎ ፤
2 ግበር ፡ ለከ ፡ ክልኤተ ፡ መጣቅዕተ ፡ ዘብሩር ፡ ወዘ ፡ ዝብጦ ፡ ትገብሮሙ ፡ ወይከውኑከ ፡ በዘ ፡ ቦቱ ፡ ትጼውዕ ፡ ተዓይነ ፡ ለኅዲር ፡ ወበዘቦቱ ፡ ያነሥእ ፡ ተዓይን ።
3 ወትጠቅዕ ፡ ቦሙ ፡ ወይትጋባእ ፡ ኵሉ ፡ ተዓይን ፡ ኀበ ፡ ኆኅተ ፡ ደብተራ ፡ ዘመርጡል ።
4 ወለእመሰ ፡ በአሐዱ ፡ ጠቃዕክሙ ፡ ይመጽኡ ፡ ኀቤከ ፡ ኵሎሙ ፡ መላእክቲሆሙ ፡ ዘምስፍና ፡ እስራኤል ።
5 ወትጠቅዑ ፡ በትእምርቲሆሙ ፡ ወይግዕዙ ፡ ተዓይኒሆሙ ፡ ለእለ ፡ ተዓየኑ ፡ መንገለ ፡ ሠረቅ ።
6 ወትጠቅዑ ፡ በትእምርቲሆሙ ፡ ዳግ[መ] ፡ ወይግዕዙ ፡ ተዓይኒሆሙ ፡ ለእለ ፡ ተዓየኑ ፡ መንገለ ፡ አዜብ ፤ ወትጠቅዑ ፡ በትእምርቲሆሙ ፡ [ሣል]ስተ ፡ ወይግዕዙ ፡ ተዓይኒሆሙ ፡ ለእለ ፡ ተዓየኑ ፡ መንገለ ፡ ገጸ ፡ ባሕር ፤ ወትጠቅዑ ፡ በትእምርቲሆሙ ፡ ራብዕተ ፡ ወይግዕዙ ፡ ተዓይኒሆሙ ፡ ለእለ ፡ ተዓየኑ ፡ መንገለ ፡ መስዕ ፤ ሶበ ፡ ለግዒዝ ፡ በትእምርት ፡ ትጠቅዑ ።
7 ወሶበ ፡ ለአስተጋብኦ ፡ ተዓይን ፡ ትጠቅዑ ፡ ዘእንበለ ፡ ትእምርት ።
8 ወደቂቀ ፡ አሮን ፡ ካህናት ፡ እሙንቱ ፡ ይጠቅዕዎ ፡ በመጥቃዕት ፡ ወይኩንክሙ ፡ ሕግ ፡ ዘለዓለም ፡ በመዋዕሊክሙ ።
9 ወለእመ ፡ ወፃእክሙ ፡ ፀብአ ፡ ላዕለ ፡ ፀርክሙ ፡ እለ ፡ አፅረሩ ፡ እምኔክሙ ፡ ወትትኤመሩ ፡ [በመጥቅዕ ፡ ወትዜከሩ ፡] በቅድመ ፡ እግዚአብሔር ፡ ወትድኅኑ ፡ እምነ ፡ ፀርክሙ ።
10 ወበመዋዕለ ፡ ትፍሥሕትክሙ ፡ ወበበዓላቲክሙ ፡ ወበአሥህርቲክሙ ፡ ወትጠቅዑ ፡ በመጥቃዕት ፡ ላዕለ ፡ ቍርባንክሙ ፡ ወላዕለ ፡ መሣውዐ ፡ መድኀኒትክሙ ፡ ወይከውነክሙ ፡ ተዝካረ ፡ ቅድመ ፡ አምላክክሙ ፡ ወአነ ፡ እግዚአብሔር ፡ አምላክክሙ ።
11 ወኮነ ፡ በካልእ ፡ ወርኅ ፡ ዘካልእት ፡ ዓመት ፡ አመ ፡ ኀሙሱ ፡ ለጽልመት ፡ ሰሰለ ፡ ደመና ፡ እምነ ፡ ደብተራ ፡ ዘመርጡል ።
12 ወተንሥኡ ፡ ደቂቀ ፡ እስራኤል ፡ ምስለ ፡ ገዓዞሙ ፡ ውስተ ፡ ገዳም ፡ ዘሲና ፡ ወቆመ ፡ ደመና ፡ ውስተ ፡ ገዳም ፡ ዘፋራን ።
13 ወተንሥኡ ፡ እለ ፡ ይቀድሙ ፡ በቃለ ፡ እግዚአብሔር ፡ ወበእደ ፡ ሙሴ ።
14 ወአንሥኡ ፡ በሕጎሙ ፡ ትዕይንተ ፡ ደቂቀ ፡ ይሁዳ ፡ ቀደሙ ፡ ምስለ ፡ ኀይሎሙ ፡ ወዘላዕለ ፡ ኀይሎሙ ፡ ነአሶን ፡ ወልደ ፡ አሚናዳብ ።
15 ወዘላዕለ ፡ ኀይሎሙ ፡ ለነገደ ፡ ደቂቀ ፡ ይስካር ፡ ናታናኤል ፡ ወልደ ፡ ሶገር ።
16 ወዘላዕለ ፡ ኀይሎሙ ፡ ለነገደ ፡ ደቂቀ ፡ ዛቡሎን ፡ ኤልያብ ፡ ወልደ ፡ ኬሎን ።
17 ወይነሥትዋ ፡ ለደብተራ ፡ ወያነሥእዋ ፡ ደቂቀ ፡ ጌድሶን ፡ ወደቂቀ ፡ ሜራሪ ፡ ወይጸውርዋ ፡ ለደብተራ ።
18 ወያነሥኡ ፡ በሕጎሙ ፡ ትዕይንተ ፡ ሮቤል ፡ ምስለ ፡ ኀይሎሙ ፡ ወዘላዕለ ፡ ኀይሎሙ ፡ ኤሊሱር ፡ ወልደ ፡ ሴድዩር ።
19 ወዘላዕለ ፡ ኀይሎሙ ፡ ለነገደ ፡ ደቂቀ ፡ ስምዖን ፡ ሰላሚየል ፡ ወልደ ፡ ሱሪስዴ ።
20 ወዘላዕለ ፡ ኀይሎሙ ፡ ለነገደ ፡ ደቂቀ ፡ ጋድ ፡ ኤሊሳፍ ፡ ወልደ ፡ ራጕኤል ።
21 ወያነሥኡ ፡ ደቂቀ ፡ ቃዓት ፡ ወይጸውሩ ፡ ዘቅድሳት ፡ ወያቀውምዋ ፡ ለደብተራ ፡ እስከ ፡ ይበጽሑ ።
22 ወያነሥኡ ፡ በሕጎሙ ፡ ተዕይንተ ፡ ኤፍሬም ፡ ምስለ ፡ ኀይሎሙ ፡ ወዘላዕለ ፡ ኀይሎሙ ፡ ኤሊሳማ ፡ ወልደ ፡ ሴምዩድ ።
23 ወዘላዕለ ፡ ኀይሎሙ ፡ ለነገደ ፡ ደቂቀ ፡ መናሴ ፡ ገማሊዬል ፡ ወልደ ፡ ፈዳሱር ።
24 ወ[ዘ]ላዕለ ፡ ኀይሎሙ ፡ ለነገደ ፡ ደቂቀ ፡ ብንያሚ ፡ አቢዳን ፡ ወልደ ፡ ጋዴዮን ።
25 ወያነሥኡ ፡ በሕጎሙ ፡ ትዕይንተ ፡ ደቂቀ ፡ ዳን ፡ ድኅረ ፡ ኵሉ ፡ ተዓይን ፡ ምስለ ፡ ኀይሎሙ ፡ ወዘላዕለ ፡ ኀይሎሙ ፡ አኪዬዜር ፡ ወልደ ፡ አሚስዴ ።
26 ወዘላዕለ ፡ ኀይሎሙ ፡ ለነገደ ፡ ደቂቀ ፡ አሴር ፡ ፋጌሔል ፡ ወልደ ፡ ኤክራን ።
27 ወዘላዕለ ፡ ኀይሎሙ ፡ ለነገደ ፡ ደቂቀ ፡ ንፍታሌም ፡ አኪሬ ፡ ወልዶ ፡ ኤናን ።
28 ከመዝ ፡ ውእቱ ፡ ሰራዊቶሙ ፡ ለደቂቀ ፡ እስራኤል ፡ ወይግዕዙ ፡ ምስለ ፡ ኀይሎሙ ።
29 ወይቤሎ ፡ ሙሴ ፡ ለኦባብ ፡ ወልደ ፡ ራጕኤል ፡ መድያናዊ ፡ ሐሙሁ ፡ ለሙሴ ፡ ንግዕዝ ፡ ንሕነሰ ፡ ውስተ ፡ መካን ፡ ኀበ ፡ ይቤለነ ፡ እግዚአብሔር ፡ ኪያሁ ፡ እሁበክሙ ፡ ወነዓ ፡ ምስሌነ ፡ ወንገብር ፡ ሠናየ ፡ ላዕሌከ ፡ እስመ ፡ እግዚአብሔር ፡ ነበበ ፡ ሠናይተ ፡ ላዕለ ፡ እስራኤል ።
30 ወይቤሎ ፡ ኢየሐውር ፡ አላ ፡ ውስተ ፡ ብሔርየ ፡ ወውስተ ፡ ሙላድየ ፡ እገብእ ።
31 ወይቤሎ ፡ ኢትኅድገ[ነ] ፡ እስመ ፡ ነበርከ ፡ ምስሌነ ፡ ውስተ ፡ ገዳም ፡ ወልህቀ ፡ በኀቤነ ።
32 ወለእመ ፡ ሖርከ ፡ ምስሌነ ፡ እምኵሉ ፡ ዝክቱ ፡ ሠናይ ፡ እንተ ፡ ይገብር ፡ ሠናይተ ፡ እግዚአብሔር ፡ ላዕሌነ ፡ ንገብር ፡ ሠናይተ ፡ ላዕሌከ ።
33 ወገዐዙ ፡ እምኀበ ፡ ደብሩ ፡ ለእግዚአብሔር ፡ ምሕዋረ ፡ ሠሉስ ፡ መዋዕል ፡ ወታቦተ ፡ ሕጉ ፡ ለእግዚአብሔር ፡ ትቀድም ፡ ሐዊረ ፡ ቅድሜሆሙ ፡ ምሕዋረ ፡ ሠሉስ ፡ መዋዕል ፡ ከመ ፡ ትርአይ ፡ ሎሙ ፡ ምዕራፈ ።
34 ወኮነ ፡ ሶበ ፡ ግዕዘት ፡ ታቦት ፡ ይቤ ፡ ሙሴ ፡ ተንሥእ ፡ እግዚኦ ፡ ወይዘረዉ ፡ ፀርከ ፡ ወይጕይዩ ፡ ኵሎሙ ፡ እለ ፡ ይጸልኡከ ።
35 ወበማኅደርኒ ፡ ይቤ ፡ ተመየጥ ፡ እግዚኦ ፡ በእልፍ ፡ ወበአእላፍ ፡ ውስተ ፡ እስራኤል ።
36 ወመጽአት ፡ ደመና ፡ ወጸለለቶሙ ፡ መዓልተ ፡ እንዘ ፡ ይግዕዙ ፡ እምነ ፡ ትዕይንት ።
=== chapter 11 ===
[Numeri 11]
1 ወአንጐርጐረ ፡ ሕዝብ ፡ በእኪት ፡ ቅድመ ፡ እግዚአብሔር ፡ ወሰምዐ ፡ እግዚአብሔር ፡ ወተምዐ ፡ መዐተ ፡ ወነደደ ፡ እሳት ፡ ላዕሌሆሙ ፡ እምኀበ ፡ እግዚአብሔር ፡ ወበልዐት ፡ አሐደ ፡ ኅብረ ፡ እምነ ፡ ትዕይንት ።
2 ወጸርሐ ፡ ሕዝብ ፡ ላዕለ ፡ ሙሴ ፡ ወጸለየ ፡ ሙሴ ፡ ኀበ ፡ እግዚአብሔር ፡ ወኀደገት ፡ እሳት ።
3 ወተሰምየ ፡ ስሙ ፡ ለውእቱ ፡ መካን ፡ ውዕየት ፡ እስመ ፡ ነደደት ፡ እሳት ፡ ላዕሌሆሙ ፡ እምኀበ ፡ እግዚአብሔር ።
4 ወእለ ፡ ተደመሩሂ ፡ ምስሌሆሙ ፡ ፈተዉ ፡ ፍትወተ ፡ ወነበሩ ፡ ወበከዩ ፡ ወደቂቀ ፡ እስራኤልኒ ፡ ወይቤሉ ፡ መኑ ፡ ያበልዐነ ፡ ሥጋ ።
5 ተዘከርነ ፡ ዝክተ ፡ ዓሣተ ፡ ዘንበልዕ ፡ በብሔረ ፡ ግብጽ ፡ በከንቱ ፡ ወቍሳያቲሁ ፡ ወመልጰጶን ፡ ወስጕርደ ፡ ወበጸለ ፡ ወሶመተ ።
6 ወይአዜሰ ፡ የብሰት ፡ ነፍስነ ፡ ዘአልብነ ፡ ባዕደ ፡ ዘንሬኢ ፡ እንበለ ፡ መና ።
7 ወመናሰ ፡ ከመ ፡ ዘርአ ፡ ተቅዳ ፡ ውእቱ ፡ ወርእየቱ ፡ ከመ ፡ ርእየተ ፡ በረድ ።
8 ወየሐውሩ ፡ ሕዝብ ፡ ወይኤልዱ ፡ ሎሙ ፡ ወየሐርጽዎ ፡ በማሕረጽ ፡ ወይዴቅቅዎ ፡ በመድቀቅት ፡ ወያበስልዎ ፡ በመቅጹት ፡ ወይገብርዎ ፡ ዳፍንተኒ ፡ ወጣዕሙ ፡ ከመ ፡ ጣዕመ ፡ መዓር ፡ ምስለ ፡ ቅብእ ።
9 ወሶበ ፡ ይወርድ ፡ ጠል ፡ ዲበ ፡ ትዕይንት ፡ ሌሊተ ፡ ይወርድ ፡ መናሂ ፡ ላዕሌሆሙ ።
10 ወሰምዐ ፡ ሙሴ ፡ እንዘ ፡ ይበክዩ ፡ በበ ፡ ሕዘቢሆሙ ፡ አሐዱ ፡ አሐዱ ፡ በኀበ ፡ ኆኅቱ ፡ ወተምዕዐ ፡ መዐተ ፡ እግዚአብሔር ፡ ጥቀ ፡ ወበቅድመ ፡ ሙሴኒ ፡ እኩየ ፡ ኮነ ።
11 ወይቤሎ ፡ ሙሴ ፡ ለእግዚአብሔር ፡ ለምንት ፡ አሕሠምከ ፡ ላዕለ ፡ ቍልዔከ ፡ ወለምንት ፡ ኢረከብኩ ፡ ሞገሰ ፡ በቅድሜከ ፡ ከመ ፡ ታግብእ ፡ ላዕሌየ ፡ መንሴቶ ፡ ለዝንቱ ፡ ሕዝብ ።
12 ቦኑ ፡ አነ ፡ ፀነስክዎሙ ፡ ለኵሉ ፡ ዝንቱ ፡ ሕዝብ ፡ ወቦኑ ፡ አነ ፡ ወለድክዎሙ ፡ ከመ ፡ ትበለኒ ፡ ንሥኦሙ ፡ ውስተ ፡ ሕፅንከ ፡ ከመ ፡ ይነሥእዎ ፡ ለዘ ፡ የሐፅኑ ፡ ውስተ ፡ ምድር ፡ እንተ ፡ መሐልከ ፡ ለአበዊሆሙ ።
13 እምአይቴ ፡ ሊተ ፡ ሥጋ ፡ ዘእሁብ ፡ ለኵሉ ፡ ዝንቱ ፡ ሕዝብ ፡ እስመ ፡ ናሁ ፡ ይበክዩ ፡ ላዕሌየ ፡ ወይብሉኒ ፡ ሀበነ ፡ ሥጋ ፡ ከመ ፡ ንብላዕ ።
14 ወኢይክል ፡ አነ ፡ ባሕቲትየ ፡ ዐቂቦቶ ፡ ለዝንቱ ፡ ሕዝብ ፡ እስመ ፡ ይከብደኒ ።
15 ወለእመሰ ፡ ከመዝ ፡ ትሬስየኒ ፡ ቀቲለ ፡ ቅትለኒ ፡ ለእመ ፡ ረብብኩ ፡ ምሕረተ ፡ ቅድሜከ ፡ ከመ ፡ ኢይርአያ ፡ ለእኪትየ ።
16 ወይቤሎ ፡ እግዚአብሔር ፡ ለሙሴ ፡ አስተጋብእ ፡ ሊተ ፡ ፸ብእሴ ፡ እምውስተ ፡ አዕሩጊሆሙ ፡ ለደቂቀ ፡ እስራኤል ፡ እለ ፡ ታአምር ፡ ለሊከ ፡ ከመ ፡ እሙንቱ ፡ ሊቃናቱ ፡ ለሕዝብ ፡ ወጸሐፍቶሙኒ ፡ ወታበውኦሙ ፡ ውስተ ፡ ደብተራ ፡ ዘመርጡል ፡ ወይቁሙ ፡ ህየ ፡ ምስሌከ ።
17 ወእወርድ ፡ ወእትናገር ፡ በህየ ፡ ምስሌከ ፡ ወእነሥእ ፡ እምውስተ ፡ መንፈስ ፡ ዘላዕሌከ ፡ ወኣነብር ፡ ዲቤሆሙ ፡ ወይጸውሩ ፡ ምስሌከ ፡ ክበዶሙ ፡ ለዝንቱ ፡ ሕዝብ ፡ ወኢትሥራሕ ፡ ባሕቲትከ ፡ ሎሙ ።
18 ወለሕዝብኒ ፡ ትብሎሙ ፡ ያንጽሑ ፡ ርእሶሙ ፡ ለጌሠም ፡ ወትበልዑ ፡ ሥጋ ፡ እስመ ፡ በከይክሙ ፡ ቅድመ ፡ እግዚአብሔር ፡ እንዘ ፡ ትብሉ ፡ መኑ ፡ ያበልዐነ ፡ ሥጋ ፡ እስመ ፡ ይኄይሰነ ፡ ብሔረ ፡ ግብጽ ፡ ወይሁበክሙ ፡ እግዚአብሔር ፡ ትብልዑ ፡ ሥጋ ፡ ወተበልዑ ፡ ሥጋ ።
19 አኮ ፡ አሐተ ፡ ዕለተ ፡ ዘትበልዑ ፡ ወአኮ ፡ ሰኑየ ፡ ወአኮ ፡ ኀሙሰ ፡ መዋዕለ ፡ ወአኮ ፡ ዐሡረ ፡ ወአኮ ፡ ዕሥራ ፡ መዋዕለ ፤
20 አላ ፡ እስከ ፡ መዋዕለ ፡ ወርኅ ፡ ትበልዕዎ ፡ እስከ ፡ ይወፅእ ፡ እምውስተ ፡ አእናፋቲክሙ ፡ ወይከውነክሙ ፡ ሕምዘ ፡ እስመ ፡ ክህድክምዎ ፡ ለእግዚአብሔር ፡ ዘሀለወ ፡ ውስቴትክሙ ፡ ወበከይክሙ ፡ በቅድሜሁ ፡ እንዘ ፡ ትብሉ ፡ ለምንት ፡ ለነ ፡ አውፃእከነ ፡ እምነ ፡ ብሔረ ፡ ግብጽ ።
21 ወይቤ ፡ ሙሴ ፡ ስሳ ፡ እልፍ ፡ አጋር ፡ ሕዝብ ፡ እለ ፡ ውስቴቶሙ ፡ ሀለውኩ ፡ [ወአንተ ፡ ትቤለኒ ፡ እሁቦሙ ፡ ሥጋ ፡] ወይበልዑ ፡ መዋዕለ ፡ ወርኅ ።
22 ቦኑ ፡ አባግዕ ፡ ወአልህምት ፡ ይጠባኅ ፡ ሎሙ ፡ አው ፡ ኵሉ ፡ ዓሣተ ፡ ባሕር ፡ ይትጋባእ ፡ ሎሙ ፡ ከመ ፡ ይእከሎሙ ።
23 ወይቤሎ ፡ እግዚአብሔር ፡ ለሙሴ ፡ ቦኑ ፡ ኢትክል ፡ እዴሁ ፡ ለእግዚአብሔር ፡ ናሁ ፡ ትሬኢ ፡ እመ ፡ ትረክቦ ፡ ለቃልየ ፡ ወእመ ፡ አልቦ ።
24 ወወፅአ ፡ ሙሴ ፡ ወነገሮሙ ፡ ለሕዝብ ፡ ቃለ ፡ እግዚአብሔር ፡ ወአስተጋብአ ፡ ፸ብእሴ ፡ እምውስተ ፡ አዕሩጊሆሙ ፡ ለሕዝብ ፡ ወአቀሞሙ ፡ አውደ ፡ ደብተራ ።
25 ወወረደ ፡ እግዚአብሔር ፡ በደመና ፡ ወተናገሮ ፡ ወነሥአ ፡ እምውስተ ፡ መንፈስ ፡ ዘላዕሌሁ ፡ ወወደየ ፡ ላዕለ ፡ ፸ብእሲ ፡ ሊቃናት ፡ ወእምዘ ፡ አዕረፈ ፡ ላዕሌሆሙ ፡ መንፈስ ፡ ተነበዩ ፡ ወኢተወሰኩ ፡ እንከ ።
26 ወተረፉ ፡ ክልኤቱ ፡ ዕደው ፡ ውስተ ፡ ትዕይንት ፡ ስሙ ፡ ለአሐዱ ፡ ኤልዳድ ፡ ወሞዳድ ፡ ስሙ ፡ ለካልኡ ፡ ወአዕረፈ ፡ ላዕሌሆሙኒ ፡ መንፈስ ፡ ወእሙንቱኒ ፡ ተጽሕፉ ፡ ምስሌሆሙ ፡ ወኢመጽኡ ፡ ውስተ ፡ ደብተራ ፡ ወተነበዩ ፡ በውስተ ፡ ትዕይንት ።
27 ወሮጸ ፡ ወሬዛ ፡ ወዜነዎ ፡ ለሙሴ ፡ ወይቤሎ ፡ ኤልዳድ ፡ ወሞዳድ ፡ ተነበዩ ፡ በውስተ ፡ ትዕይንት ።
28 ወይቤሎ ፡ ኢየሱስ ፡ ዘነዌ ፡ ዘይቀውም ፡ ቅድሜሁ ፡ ለሙሴ ፡ ዘውእቱ ፡ ኅሩዩ ፡ ይቤሎ ፡ እግዚእየ ፡ [ሙሴ ፡] ክልኦሙ ።
29 ወይቤሎ ፡ ሙሴ ፡ አንተኑ ፡ ትቀንእ ፡ ሊተ ፡ ወመኑ ፡ እምወሀበኒ ፡ ከመ ፡ ይትነበይ ፡ ኵሉ ፡ ሕዝቡ ፡ ለእግዚአብሔር ፡ ሶበ ፡ ወሀበ ፡ እግዚአብሔር ፡ መንፈሶ ፡ ላዕሌሆሙ ።
30 ወገብአ ፡ ውስተ ፡ ትዕይንት ፡ ውእቱ ፡ ወአዕሩጊሆሙ ፡ ለእስራኤል ።
31 ወወፅአ ፡ መንፈስ ፡ እምኀበ ፡ እግዚአብሔር ፡ ወዐደወ ፡ ፍርፍርት ፡ እምነ ፡ ባሕር ፡ ወወረዶ ፡ ውስተ ፡ ትዕይንት ፡ እስከ ፡ ምሕዋረ ፡ ዕለት ፡ እምነ ፡ አውደ ፡ ትዕይንት ፡ እምለፌ ፡ ወእምለፌ ፡ ወተወጥሐ ፡ ካዕበ ፡ እመት ፡ መልዕልተ ፡ ምድር ።
32 ወተንሥአ ፡ ሕዝብ ፡ ኵሎ ፡ ዕለተ ፡ ወኵሎ ፡ ሌሊተ ፡ ወኵሎ ፡ ዕለተ ፡ እንተ ፡ በሳኒታ ፡ ወአለዱ ፡ ሎሙ ፡ ፍርፍርተ ፡ ወዘአውሐዱ ፡ አልዶ ፡ ዐሠርተ ፡ በቆ[ሮ]ስ ፡ ወሰጥሑ ፡ ሎሙ ፡ ወአይበሱ ፡ ውስተ ፡ አውደ ፡ ተዓይኒሆሙ ።
33 ወእንዘ ፡ ሀለወ ፡ ሥጋ ፡ ውስተ ፡ ፅረሲሆሙ ፡ እንበለ ፡ ያኅልቅዎ ፡ ተምዕዐ ፡ እግዚአብሔር ፡ ላዕለ ፡ ሕዝብ ፡ ወቀተሎሙ ፡ እግዚአብሔር ፡ ለሕዝብ ፡ በዐቢይ ፡ መቅሠፍት ፡ ጥቀ ።
34 ወተሰምየ ፡ ስሙ ፡ ለውእቱ ፡ መካን ፡ ተዝካረ ፡ ፍትወት ፡ እስመ ፡ ቀበርዎሙ ፡ ለሕዝብ ፡ ለእለ ፡ ፈተዉ ።
35 ወግዕዘ ፡ ሕዝብ ፡ እምነ ፡ ተዝካረ ፡ ፍትወት ፡ ውስተ ፡ አሴሮት ፡ [ወነበሩ ፡ በአሴሮት ፡]፡
=== chapter 12 ===
[Numeri 12]
1 ወሐመይዎ ፡ ለሙሴ ፡ ማርያም ፡ ወአሮን ፡ በበይነ ፡ ብእሲት ፡ ኢትዮጵያዊት ፡ እንተ ፡ ነሥአ ፡ ሙሴ ፡ እስመ ፡ ብእሲተ ፡ ኢትዮጵያዊተ ፡ ነሥአ ።
2 ወይቤሉ ፡ ቦኑ ፡ ለሙሴ ፡ ለባሕቲቱ ፡ ተናገሮ ፡ እግዚአብሔር ፡ አኮኑ ፡ ለነሂ ፡ ተናገረኑ ፡ ወሰምዐ ፡ እግዚአብሔር ።
3 ወሙሴሰ ፡ ብእሲ ፡ የዋህ ፡ ውእቱ ፡ ጥቀ ፡ እምነ ፡ ኵሉ ፡ እጓለ ፡ እመሕያው ፡ ዘሀለወ ፡ ውስተ ፡ ምድር ።
4 ወይቤሎሙ ፡ እግዚአብሔር ፡ ለሙሴ ፡ ወለአሮን ፡ ወለማርያም ፡ በጊዜሃ ፡ ንዑ ፡ አንትሙ ፡ ሠለስቲክሙ ፡ ውስተ ፡ ደብተራ ፡ ዘመርጡል ።
5 ወወረደ ፡ እግዚአብሔር ፡ በዐምደ ፡ ደመና ፡ ኀበ ፡ ኆኅተ ፡ ደብተራ ፡ ዘመርጡል ፡ ወጸውዖሙ ፡ ለአሮን ፡ ወለማርያም ፡ ወሖሩ ፡ ክልኤሆሙ ።
6 ወይቤሎሙ ፡ ስምዑ ፡ ቃልየ ፡ ለእመቦ ፡ ዘኮነ ፡ ነቢየ ፡ እምውስቴትክሙ ፡ ለእግዚአብሔር ፡ በራእይ ፡ ኣስተርኢ ፡ ሎቱ ፡ ወበሕልም ፡ እትናገሮ ።
7 ወአኮ ፡ ከመ ፡ ቍልዔየ ፡ ሙሴ ፡ ምእመን ፡ ውእቱ ፡ ውስተ ፡ ኵሉ ፡ ቤትየ ።
8 አፈ ፡ በአፍ ፡ እትናገሮ ፡ ገሃደ ፡ ወአኮ ፡ በስውር ፡ ወርእየ ፡ ስብሐቲሁ ፡ ለእግዚአብሔር ፡ ወለምንት ፡ ኢፈራህክሙ ፡ ሐምዮቶ ፡ ለቍልዔየ ፡ ሙሴ ።
9 ወኮነ ፡ ላዕሌሆሙ ፡ መንሱተ ፡ መዐቱ ፡ ለእግዚአብሔር ፡ ወሖሩ ።
10 ወሰሰለ ፡ ደመና ፡ እምውስተ ፡ ደብተራ ፡ ወአኀዛ ፡ ለምጽ ፡ ለማርያም ፡ ወጻዕደወት ፡ ከመ ፡ በረድ ፡ ወተመይጠ ፡ አሮን ፡ ኀበ ፡ ማርያም ፡ ወናሁ ፡ አኀዛ ፡ ለምጽ ።
11 ወይቤሎ ፡ አሮን ፡ ለሙሴ ፡ ብቍዐኒ ፡ እግዚእየ ፡ ኢትረሲያ ፡ ለነ ፡ ኀጢአተ ፡ እስመ ፡ ኢያእመርነ ፡ ከመ ፡ አበስነ ።
12 ወኢንኩን ፡ ትዕሪነ ፡ ለሞት ፡ ከመ ፡ ፃእፃእ ፡ ዘይወፅእ ፡ እምነ ፡ ማኅፀነ ፡ እሙ ፡ ወተበልዐ ፡ መንፈቀ ፡ ሥጋሃ ።
13 ወጸርኀ ፡ ሙሴ ፡ ኀበ ፡ እግዚአብሔር ፡ ወይቤ ፡ እግዚኦ ፡ ብቍዐኒ ፡ አሕይዋ ።
14 ወይቤሎ ፡ እግዚአብሔር ፡ ለሙሴ ፡ ሶበ ፡ አቡሃ ፡ ተፍአ ፡ ትፍአቶ ፡ ውስተ ፡ ገጻ ፡ እምኢኀፍረትኑ ፡ ሰቡዐ ፡ መዋዕለ ፡ ለትትገሐስ ፡ አፍኣ ፡ እምትዕይንት ፡ ሰቡዐ ፡ መዋዕለ ፡ ወእምዝ ፡ ትበውእ ።
15 ወተግሕሠት ፡ ማርያም ፡ አፍኣ ፡ እምትዕይንት ፡ ሰቡዐ ፡ መዋዕለ ፡ ወኢግዕዘ ፡ ሕዝብ ፡ እስከ ፡ ነጽሐት ፡ ማርያም ።
16 ወእምድኅረ ፡ ዝንቱ ፡ ግዕዙ ፡ ሕዝብ ፡ እምነ ፡ አሴሮት ፡ [*ወኀደሩ ፡*] ውስተ ፡ ገዳም ፡ [ዘፋራን] ።
=== chapter 13 ===
[Numeri 13]
1 ወነበቦ ፡ እግዚአብሔር ፡ ለሙሴ ፡ ወይቤሎ ፤
2 ፈኑ ፡ ዕደወ ፡ ሰብአ ፡ ዐይን ፡ እለ ፡ ይሬእይዋ ፡ ለምድረ ፡ ከናአን ፡ እንተ ፡ አነ ፡ እሁቦሙ ፡ ለደቂቀ ፡ እስራኤል ፡ ከመ ፡ ይኰንንዋ ፤ አሐዱ ፡ አሐዱ ፡ ብእሲ ፡ እምውስተ ፡ ነገዶሙ ፡ ወእምውስተ ፡ ሕዘቢሆሙ ፡ ዘአብያተ ፡ አበዊሆሙ ፤ ወትፌኑ ፡ ኵሎ ፡ ዐበይቶሙ ።
3 [*ወፈነዎሙ ፡ ሙሴ ፡ እምነ ፡ ገዳም ፡ ዘፋራን ፡ በቃለ ፡ እግዚአብሔር ፡ ወእሉ ፡ ኵሎሙ ፡ ዕደው ፡ ዐበይቶሙ ፡*] ለደቂቀ ፡ እስራኤል ፡ እሙንቱ ።
4 ወዝንቱ ፡ አስማቲሆሙ ፡ ዘእምነገደ ፡ ሮቤል ፡ [ሰ]ሙ ፡ ወልደ ፡ ዝ[ኩር] ።
5 ወዘእምነገደ ፡ ስምዖን ፡ ሰፈጥ ፡ ወልደ ፡ ሱሪ ።
6 ወዘእምነገደ ፡ ይሁዳ ፡ ካ[ሌብ] ፡ ወልደ ፡ ዬፎኔ ።
7 ወዘእምነገደ ፡ ይስካር ፡ ኢጋል ፡ ወልደ ፡ ዮሴፍ ።
8 ወዘእምነገደ ፡ ኤፍሬም ፡ አውሴ ፡ ወልደ ፡ ነዌ ።
9 ወዘእምነገደ ፡ ብንያሚ ፡ ፈልጢ ፡ ወልደ ፡ ራፈው ።
10 ወዘእምነገደ ፡ ዛቡሎን ፡ ጉዲዬል ፡ ወልደ ፡ [ሶ]ዲ ።
11 ወዘእምነገዶ ፡ ዮሴፍ ፡ ዘእምደቂቀ ፡ መናሴ ፡ ገዲ ፡ ወልደ ፡ ሱሲ ።
12 ወዘእምነገደ ፡ ዳን ፡ አሚሔል ፡ ወልደ ፡ ገማሊ ።
13 ወዘእምነገደ ፡ አሴር ፡ ሳቱር ፡ ወልደ ፡ ሚካኤል ።
14 ወዘእምነገደ ፡ ንፍታሌም ፡ ናቢ ፡ ወልደ ፡ ያቢ ።
15 ወዘእምነገደ ፡ ጋድ ፡ ጉዲያል ፡ ወልደ ፡ ማኪ ።
16 ዝንቱ ፡ ውእቱ ፡ አስማቲሆሙ ፡ ለዕደው ፡ እለ ፡ ፈነወ ፡ ሙሴ ፡ ከመ ፡ ይርአይዋ ፡ ለይእቲ ፡ ምድር ፡ ወሰመዮ ፡ ሙሴ ፡ ለአውሴ ፡ ወልደ ፡ ነዌ ፡ ኢየሱስ ።
17 ወፈነዎሙ ፡ ሙሴ ፡ ከመ ፡ ይርአይዋ ፡ ለይእቲ ፡ ምድረ ፡ ከናአን ፡ ወይቤሎሙ ፡ ዕረጉ ፡ ውስተ ፡ ውእቱ ፡ ገዳም ፡ ወእምዝ ፡ ተዐርጉ ፡ ውስተ ፡ ደብር ።
18 ወርእይዋ ፡ ለይእቲ ፡ ምድር ፡ እንተ ፡ ከመ ፡ እፎ ፡ ይእቲ ፡ ወሕዝብኒ ፡ እለ ፡ ይነብሩ ፡ ውስቴታ ፡ እመ ፡ ጽኑዓን ፡ እሙንቱ ፡ ወእመ ፡ ድኩማን ፡ ወእመ ፡ ውሑዳን ፡ እሙንቱ ፡ ወእመ ፡ ብዘኃን ።
19 ወእንተ ፡ ከመ ፡ እፎ ፡ ይእቲ ፡ ምድራ ፡ እንተ ፡ ውስቴታ ፡ ይነብሩ ፡ እሙንቱ ፡ እመ ፡ ሠናይት ፡ ይእቲ ፡ ወእመ ፡ እኪት ፡ ወዘከመ ፡ እፎ ፡ ውእቶን ፡ አህጉሪሆ[ሙ] ፡ እለ ፡ ውስቴቶን ፡ ይነብሩ ፡ እሙንቱ ፡ ወለእመ ፡ ቦንቱ ፡ ቅጽረ ፡ ወለእመ ፡ አልቦንቱ ።
20 ወእንተ ፡ ከመ ፡ እፎ ፡ ይእቲ ፡ ምድራ ፡ ለእመ ፡ ጥልልት ፡ ወለእመ ፡ ይብስት ፡ ለእመ ፡ ቦቱ ፡ ውስቴታ ፡ አእዋመ ፡ ወለእመ ፡ አልቦቱ ፡ ወርእየክሙ ፡ ንሥኡ ፡ እምውስተ ፡ ፍሬሃ ፡ ወመዋዕሊሁ ፡ መዋዕለ ፡ ማእረር ፡ እንበለ ፡ ይትቀሠም ፡ ወይን ።
21 ወዐርጉ ፡ ወርእይዋ ፡ ለይእቲ ፡ ምድር ፡ እምነ ፡ ገዳም ፡ ዘ[ፂን] ፡ እስከ ፡ ሮዖብ ፡ እንዘ ፡ የሐውሩ ፡ ለኤመት ።
22 ወዐርጉ ፡ እንተ ፡ ገዳም ፡ ወበጽሑ ፡ እስከ ፡ ኬብሮን ፡ ወህየ ፡ ውእቱ ፡ አኪ[መ]ን ፡ ወሴሲ ፡ ወተላሚ ፡ ፍጥረቱ ፡ ለኤናቅ ፡ ወኬብሮንሂ ፡ እንተ ፡ በሰብፀቱ ፡ ዓመት ፡ ተነድቀት ፡ እምቅድመ ፡ ሀገረ ፡ ጠኒ ፡ ዘግብጽ ።
23 ወበጽሑ ፡ እስከ ፡ ቈላተ ፡ ዐጽቅ ፡ ወርእይዋ ፡ ወገመዱ ፡ እምህየ ፡ ሐረገ ፡ ወይን ፡ ወውስቴታ ፡ አሐዱ ፡ አስካል ፡ ወጾርዎ ፡ በመዝለል ፡ ወእምውስተ ፡ ሮማንሂ ፡ ወእምውስተ ፡ በለስሂ ።
24 ወሰመይዎ ፡ ለውእቱ ፡ መካን ፡ ቈላ ፡ ሐረግ ፡ [በእንተ ፡ ሐረግ ፡] ዘገመዱ ፡ እምህየ ፡ ደቂቀ ፡ እስራኤል ።
25 ወገብኡ ፡ እምህየ ፡ ርእዮሙ ፡ ይእተ ፡ ምድረ ፡ በአርብዓ ፡ ጽባሕ ።
26 ወሐዊሮሙ ፡ በጽሑ ፡ ኀበ ፡ ሙሴ ፡ ወአሮን ፡ ወኀበ ፡ ኵሎሙ ፡ ተዓይኒሆሙ ፡ ለደቂቀ ፡ እስራኤል ፡ ውስተ ፡ ገዳም ፡ ዘፋራን ፡ ቃዴስ ፡ ወነገርዎሙ ፡ ዜናሆሙ ፡ ወለኵሉ ፡ ተዓይኒሆሙ ፡ ወአርአይዎሙ ፡ ፍሬሃ ፡ ለይእቲ ፡ ምድር ።
27 ወነገርዎሙ ፡ ወይቤሉ ፡ በጻሕነ ፡ ውስተ ፡ ይእቲ ፡ ምድር ፡ ኀበ ፡ ፈነውከነ ፡ ምድር ፡ እንተ ፡ ትውሕዝ ፡ ሐሊበ ፡ ወመዓረ ፡ ወናሁ ፡ ፍሬሃ ።
28 ወሕዝብኒ ፡ ዘይነብር ፡ ውስቴታ ፡ ለይእቲ ፡ ምድር ፡ ጽኑዕ ፡ ወአህጉሪሃኒ ፡ ጽኑዕ ፡ ጥቀ ፡ ወዐበይት ፡ ወቦንቱ ፡ ቅጽረ ፡ ወሙላዱ ፡ ለኤናቅ ፡ ርኢነ ፡ በህየ ።
29 ወዐማሌቅ ፡ ኅዱራን ፡ ውስተ ፡ ምድር ፡ እንተ ፡ መንገለ ፡ አዜብ ፡ ወኬጤዎስ ፡ ወአሞሬዎስ ፡ ወኤዌዎስ ፡ ወኢየቡሴዎስ ፡ ኅዱራን ፡ ውስተ ፡ አድባሪሃ ፡ ወከናአንሰ ፡ ኅዱራን ፡ መንገለ ፡ ባሕር ፡ ወመንገለ ፡ ፈለገ ፡ ዮርዳንስ ።
30 ወአዘዘ ፡ ካሌብ ፡ ያርምም ፡ ሕዝብ ፡ በኀበ ፡ ሙሴ ፡ [ወይቤ ፡] አልቦ ፡ አላ ፡ ዐሪገ ፡ ነዐርግ ፡ ወንትዋረሳ ፡ እስመ ፡ ክሂለኒ ፡ ንክሎሙ ።
31 ወይቤሉ ፡ እልክቱ ፡ እለ ፡ ዐርጉ ፡ ምስሌሆሙ ፡ ዕደው ፡ ኢነዐርግ ፡ እስመ ፡ ኢንክል ፡ ዐሪገ ፡ ኀበ ፡ ውእቱ ፡ ሕዝብ ፡ እስመ ፡ ይጸንዑ ፡ እምኔነ ፡ ፈድፋደ ።
32 ወግርምተ ፡ ረሰይዋ ፡ ለይእቲ ፡ ምድር ፡ እንተ ፡ ርእዩ ፡ በኀበ ፡ ደቂቀ ፡ እስራኤል ፡ እንዘ ፡ ይብሉ ፡ ምድር ፡ እንተ ፡ ሖርነ ፡ ከመ ፡ ንርአያ ፡ ምድር ፡ ይእቲ ፡ እንተ ፡ ተዐቅቦሙ ፡ ለእለ ፡ ይነብሩ ፡ ውስቴታ ፡ ወኵሉ ፡ ሕዝብ ፡ ዘርኢነ ፡ ዕደው ፡ እሙንቱ ፡ እለ ፡ ፍድፉድ ፡ ኑኆሙ ።
33 ወርኢነ ፡ በህየ ፡ እለ ፡ [ያርብ]ሕ ፡ ወኮነ ፡ ቅድሜሆሙ ፡ ከመ ፡ አናብጥ ፡ እለ ፡ ከማሁኒ ፡ ቅድሜሆሙ ።
=== chapter 14 ===
[Numeri 14]
1 ወኀበረ ፡ ኵሉ ፡ ተዓይን ፡ ወጸርሑ ፡ በቃል ፡ ወበከዩ ፡ ሕዝብ ፡ ኵሎ ፡ ሌሊተ ።
2 ወአንጐርጐሩ ፡ ላዕለ ፡ ሙሴ ፡ ወላዕለ ፡ አሮን ፡ ኵሎሙ ፡ ደቂቀ ፡ እስራኤል ፡ ወይቤልዎሙ ፡ ኵሉ ፡ ትዕይንት ፡ ኀየሰነ ፡ ሶበ ፡ ሞትነ ፡ በብሔረ ፡ ግብጽ ፡ እምነ ፡ ንሙት ፡ በዝንቱ ፡ ገዳም ።
3 ወለምንት ፡ ይወስደነ ፡ እግዚእ ፡ ውስተ ፡ ይእቲ ፡ ምድር ፡ ከመ ፡ ንደቅ ፡ በውስተ ፡ ቀትል ፡ ወአንስቲያነኒ ፡ ወደቂቅነሂ ፡ ይከውኑ ፡ ሕብልያ ፡ ወይእዜኒ ፡ ይኄይሰነ ፡ ንግባእ ፡ ውስተ ፡ ብሔረ ፡ ግብጽ ።
4 ወተባሀሉ ፡ በበይናቲሆሙ ፡ ሀቡነ ፡ ናንግሥ ፡ ለነ ፡ ወንግባእ ፡ ውስተ ፡ ብሔረ ፡ ግብጽ ።
5 ወወድቁ ፡ ሙሴ ፡ ወአሮን ፡ በገጾሙ ፡ ቅድመ ፡ ኵሉ ፡ ተዓይኒሆሙ ፡ ለደቂቀ ፡ እስራኤል ።
6 ወኢያሱ ፡ ወልደ ፡ ነዌ ፡ ወእብ ፡ ወልደ ፡ ዬፎኒ ፡ እለ ፡ እምውስቴቶሙ ፡ ለእለ ፡ ርእይዋ ፡ ለይእቲ ፡ ምድር ፡ ሠጠጡ ፡ አልባሲሆሙ ።
7 ወይቤልዎሙ ፡ ለኵሉ ፡ ተዓይኒሆሙ ፡ ለደቂቀ ፡ እስራኤል ፡ ምድርሰ ፡ እንተ ፡ ርኢነ ፡ ሠናይት ፡ ጥቀ ፡ ወፈድፋደ ።
8 ወለእመሰ ፡ እግዚአብሔር ፡ ኀርየነ ፡ ከመ ፡ ያብአነ ፡ ውስተ ፡ ይእቲ ፡ ምድር ፡ ወይሁበነሃ ፡ ለነ ፤ ምድር ፡ ይእቲ ፡ ለነ ፡ እንተ ፡ ትውሕዝ ፡ ሐሊበ ፡ ወመዓረ ።
9 ወባሕቱ ፡ ኢትኩኑ ፡ ከሓድያነ ፡ በእግዚአብሔር ፡ ወኢትፍርህዎሙ ፡ አንትሙ ፡ ለሕዝባ ፡ ለይእቲ ፡ ምድር ፡ እስመ ፡ ንሕነ ፡ ናጠፍኦሙ ፡ ወእስመ ፡ ኀለፈ ፡ መዋዕሊሆሙ ፡ ወእስመ ፡ እግዚአብሔር ፡ ሀለወ ፡ ምስሌነ ፡ ኢትፍርህዎሙ ።
10 ወይቤሉ ፡ ኵሉ ፡ ተዓይን ፡ ከመ ፡ ይወግርዎሙ ፡ በእብን ፡ ወአስተርአየ ፡ ስብሐተ ፡ እግዚአብሔር ፡ በደመና ፡ ኀበ ፡ ደብተራ ፡ ዘመርጡል ፡ ለኵሉ ፡ ደቂቀ ፡ እስራኤል ።
11 ወይቤሎሙ ፡ እግዚአብሔር ፡ ለሙሴ ፡ እስከ ፡ ማእዜኑ ፡ ይዌሕከኒ ፡ ዝንቱ ፡ ሕዝብ ፡ ወእስከ ፡ ማእዜኑ ፡ ኢየአምኑኒ ፡ በኵሉ ፡ ተአምርየ ፡ ዘገበርኩ ፡ ሎሙ ።
12 እቅትሎሙኑ ፡ በሞት ፡ ወአጥፍኦሙ ፡ ወእሬስየከ ፡ ለከ ፡ ወለቤተ ፡ አቡከ ፡ ውስተ ፡ ሕዝብ ፡ ዐቢይ ፡ ዘይበዝኅ ፡ እምነ ፡ ዝንቱ ፡ ፈድፋደ ።
13 ወይቤሎ ፡ ሙሴ ፡ ለእግዚአብሔር ፡ ወይሰምዑ ፡ ግብጽ ፡ እለ ፡ እምኔሆሙ ፡ አውፃእኮሙ ፡ ለዝንቱ ፡ ሕዝብ ፡ በኀይልከ ።
14 ወይሰምዑ ፡ ኵሎሙ ፡ እለ ፡ ይነብሩ ፡ ውስቴታ ፡ ለዛቲ ፡ ምድር ፡ ከመ ፡ አንተ ፡ እግዚአብሔር ፡ ሀለውከ ፡ ውስተ ፡ ዝንቱ ፡ ሕዝብ ፡ ወአንተ ፡ እግዚኦ ፡ ታስተርኢ ፡ ሎሙ ፡ ከመዘ ፡ ዐይነ ፡ በዐይን ፡ ይትረአይ ፡ ወደመናከ ፡ ቆመት ፡ መልዕልቴሆሙ ፡ ወበዐምደ ፡ ደመና ፡ አንተ ፡ ሖርከ ፡ ቅድሜሆሙ ፡ መዐልተ ፡ ወበዐምደ ፡ እሳት ፡ ሌሊተ ።
15 ወለእመ ፡ ቀጥቀጥካሁ ፡ ለዝንቱ ፡ ሕዝብ ፡ ከመዘ ፡ አሐዱ ፡ ብእሲ ፡ ይብሉ ፡ አሕዛብ ፡ እለ ፡ ይሰምዑ ፡ ስመከ ፡ ይብሉ ፤
16 እስመ ፡ ስእነ ፡ እግዚአብሔር ፡ አብኦቶሙ ፡ ውስተ ፡ ምድር ፡ እንተ ፡ መሐለ ፡ ሎሙ ፡ ቀተሎሙ ፡ በውስተ ፡ ገዳም ።
17 ወይእዜኒ ፡ ለይትላዐል ፡ ኀይልከ ፡ እግዚኦ ፡ በከመ ፡ ትቤ ፡ እንዘ ፡ ትብል ፤
18 እግዚአብሔር ፡ ርሑቀ ፡ መዐት ፡ ወብዙኀ ፡ ምሕረት ፡ ወጻድቅ ፡ ዘየኀድግ ፡ ዐመፃ ፡ ወኀጢአተ ፡ ወጌጋየ ፡ ወአንጽሖኒ ፡ ኢያነጽሖ ፡ ለመአብስ ፡ ወይትፈደይ ፡ ኀጣይአ ፡ ወላዲ ፡ ላዕለ ፡ ውሉድ ፡ እስከ ፡ ሣልስት ፡ ወራብዕት ፡ ትውልድ ።
19 ኅድግ ፡ ሎሙ ፡ ኀጣይኢሆሙ ፡ ለዝንቱ ፡ ሕዝብ ፡ በከመ ፡ ዕበየ ፡ ምሕረትከ ፡ ወበከመ ፡ መሓሬ ፡ ኮንከ ፡ ሎሙ ፡ እምነ ፡ ብሔረ ፡ ግብጽ ፡ እስከ ፡ ይእዜ ።
20 ወይቤሎ ፡ እግዚአብሔር ፡ ለሙሴ ፡ ናሁ ፡ ምህርክዎሙ ፡ በከመ ፡ ትቤ ።
21 አላ ፡ ሕያው ፡ አነ ፡ ወሕያው ፡ ስምየ ፡ ወይመልእ ፡ ስብሐቲሁ ፡ ለእግዚአብሔር ፡ ኵሎ ፡ ምድረ ፤
22 ከመ ፡ ኵሎሙ ፡ ዕደው ፡ እለ ፡ ርእይዎ ፡ ለስብሐቲየ ፡ ወለተአምርየ ፡ ዘገበርኩ ፡ [በ]ብሔረ ፡ ግብጽ ፡ [ወበገዳም ፡] ወእምዝ ፡ አመከሩኒ ፡ ናሁ ፡ ዓሥር ፡ ዝንቱ ፡ ወኢሰምዑ ፡ ቃልየ ፤
23 ከመ ፡ ኢይሬእይዋ ፡ ለይእቲ ፡ ምድር ፡ እንተ ፡ መሐልኩ ፡ ለአበዊሆሙ ፡ ዘእንበለ ፡ ውሉዶሙ ፡ እለ ፡ ሀለዉ ፡ ምስሌየ ፡ ዝየ ፡ ኵሎሙ ፡ እለ ፡ ኢያአምሩ ፡ ሠናይተ ፡ ወእኪተ ፡ ኵሉ ፡ ንኡስ ፡ ዘአልቦ ፡ ዘያአምር ፡ ሎሙ ፡ እሁባ ፡ ለይእቲ ፡ ምድር ፡ ወኵሎሙ ፡ ባሕቱ ፡ እለ ፡ ወሐኩኒ ፡ ኢይሬእይዋ ።
24 ወቍልዔየ ፡ ባሕቱ ፡ ካሌብ ፡ እስመ ፡ ኮነ ፡ ካልእ ፡ መንፈስ ፡ ላዕሌሁ ፡ ወተለወኒ ፡ አበውኦ ፡ ውስተ ፡ ይእቲ ፡ ምድር ፡ እንተ ፡ ውስቴታ ፡ ቦአ ፡ ህየ ፡ ወዘርኡ ፡ ይትዋረሳ ።
25 ወዐማሌቅ ፡ ወከናአን ፡ ንቡራን ፡ ውስተ ፡ ቈላተ ፡ አውርዮን ፤ ወአንትሙሰ ፡ ገዐዙ ፡ ወግብኡ ፡ ውስተ ፡ ገዳም ፡ ዘፍኖተ ፡ ባሕረ ፡ ኤርትራ ።
26 ወይቤሎሙ ፡ እግዚአብሔር ፡ ለሙሴ ፡ ወለአሮን ፡ እንዘ ፡ ይብል ፤
27 እስከ ፡ ማእዜኑ ፡ አሰምዖሙ ፡ ነጐርጓሮሙ ፡ ለዛቲ ፡ ትዕይንት ፡ ዘያንጐረጕሩ ፡ እሙንቱ ፡ ደቂቀ ፡ እስራኤል ፡ ላዕሌክሙ ፡ ዘአንጐርጐሩ ፡ በቅድሜየ ።
28 በሎሙ ፡ ሕያው ፡ አነ ፡ ይቤ ፡ እግዚአብሔር ፡ እመ ፡ አኮ ፡ ዳእሙ ፡ በከመ ፡ ነበብ[ክሙ] ፡ ውስተ ፡ እ[ዝንየ] ፡ ከማሁ ፡ እገብረክሙ ፡ በዝንቱ ፡ ገዳም ።
29 ወይወድቅ ፡ አብድንቲክሙ ፡ ወኵልክሙ ፡ እለ ፡ ተፋቀድክሙ ፡ ወእለ ፡ ተኈለቍክሙ ፡ ዘእም ፡ ፳ዓም ፡ ወላዕሉ ፡ እምኔሁ ፡ ኵልክሙ ፡ እለ ፡ አንጐርጐርክሙ ፡ ላዕሌየ ፤
30 ከመ ፡ ኢትበውእዋ ፡ አንትሙ ፡ ለይእቲ ፡ ምድር ፡ እንተ ፡ ሰፋሕኩ ፡ እዴየ ፡ ከመ ፡ አንብርክሙ ፡ ውስቴታ ፡ እንበለ ፡ ካሌብ ፡ ወልደ ፡ ዬፎኒ ፡ ወኢየሱስ ፡ ወልደ ፡ ነዌ ።
31 ወደቂቀ ፡ እለ ፡ ትቤሉ ፡ ሕብልያ ፡ ይከውኑ ፡ አበውኦሙ ፡ ውስተ ፡ ይእቲ ፡ ምድር ፡ ወይትዋረስዋ ፡ ለይእቲ ፡ ምድር ፡ እንተ ፡ አንትሙ ፡ ተራሐቅክሙ ፡ እምኔሃ ።
32 ወይወድቅ ፡ አብድንቲክሙ ፡ ውስተ ፡ ዝንቱ ፡ ገዳም ።
33 ወይትረዐዩ ፡ ደቂቅክሙ ፡ አርብዓ ፡ ዓመ ፡ ውስተ ፡ ገዳም ፤
34 በከመ ፡ ኍለቊሆሙ ፡ ለእልክቱ ፡ መዋዕል ፡ እለ ፡ ቦንቱ ፡ ርእይዋ ፡ ለይእቲ ፡ ምድር ፡ አርብዓ ፡ ዕለተ ፤ አሐቲ ፡ ዕለት ፡ ዓመተ ፡ ትከውነክሙ ፡ በእንተ ፡ ኀጢአትክሙ ፡ ወይኩንክሙ ፡ ፵ዓመ ፡ ወታአምሩ ፡ እንከ ፡ መንሱተ ፡ መዐትየ ።
35 እስመ ፡ አነ ፡ እግዚአብሔር ፡ ዘነብኩ ፡ ከመ ፡ ከመዝ ፡ እገብራ ፡ ለዛቲ ፡ ትዕይንት ፡ እኪት ፡ እንተ ፡ ኀበረት ፡ ላዕሌየ ፡ በዝንቱ ፡ ገዳም ፡ ለይጥፍኡ ፡ ወበህየ ፡ ለይሙቱ ።
36 ወእልክቱ ፡ ዕደው ፡ እለ ፡ ፈነዎሙ ፡ ሙሴ ፡ ከመ ፡ ይርአይዋ ፡ ለይእቲ ፡ ምድር ፡ አመ ፡ ገብኡ ፡ አንጐርጐሩ ፡ በእንቲአሃ ፡ ኀበ ፡ ኵሉ ፡ ተዓይን ፡ ወአውፅኡ ፡ ነገረ ፡ እኩየ ፡ በእንተ ፡ ይእቲ ፡ ምድር ፤
37 ወሞቱ ፡ ውእቶሙ ፡ ዕደው ፡ እለ ፡ ይቤልዋ ፡ እኪት ፡ ለይእቲ ፡ ምድር ፡ ወምድርሰ ፡ ሠናይት ፡ ይእቲ ፡ በቅድመ ፡ እግዚአብሔር ።
38 ወኢያሱ ፡ ወልደ ፡ ነዌ ፡ ወካሌብ ፡ ወልደ ፡ ዬፎኔ ፡ እለ ፡ ኀይዉ ፡ እምኔሆሙ ፡ ለውእቶሙ ፡ ዕደው ፡ እለ ፡ ሖሩ ፡ ይርአይዋ ፡ ለይእቲ ፡ ምድር ።
39 ወነገሮሙ ፡ ሙሴ ፡ ዘንተ ፡ ነገረ ፡ ለኵሉ ፡ ደቂቀ ፡ እስራኤል ፡ ወላሐወ ፡ ሕዝብ ፡ ጥቀ ።
40 ወጌሡ ፡ በጽባሕ ፡ ወዐርጉ ፡ ውስተ ፡ ርእሰ ፡ ደብር ፡ ወይቤሉ ፡ ናሁ ፡ ንሕነ ፡ ነዐርግ ፡ ውስተ ፡ ውእቱ ፡ መካን ፡ ዘይቤለነ ፡ እግዚአብሔር ፡ ከመ ፡ አበስነ ፡ በእንቲአሁ ።
41 ወይቤሎሙ ፡ ሙሴ ፡ ለምንት ፡ ለክሙ ፡ ትትዓደዉ ፡ ቃለ ፡ እግዚአብሔር ፡ ኢኮነ ፡ ሠናይ ፡ ለክሙ ፡ ከመዝ ።
42 ኢትዕረጉ ፡ እስመ ፡ አሀለወ ፡ እግዚአብሔር ፡ ምስሌክሙ ፡ ወትወድቁ ፡ ቅድመ ፡ ፀርክሙ ።
43 እስመ ፡ ዐማሌቅ ፡ ወከናአን ፡ ሀለዉ ፡ ህየ ፡ ቅድሜክሙ ፡ ወትወድቁ ፡ በኀፂን ፡ በበይነ ፡ ዘተመየጥክሙ ፡ ወክህድክምዎ ፡ ለእግዚአብሔር ፡ ወኢሀለወ ፡ እግዚአብሔር ፡ ምስሌክሙ ።
44 ወተኀይሎሙ ፡ ዐርጉ ፡ ውስተ ፡ ርእሰ ፡ ደብር ፡ ወታቦተ ፡ ሕጉሰ ፡ ለእግዚአብሔር ፡ ወሙሴሂ ፡ ኢተሐውሱ ፡ እምነ ፡ ማእከለ ፡ ትዕይንት ።
45 ወወረዱ ፡ ዐማሌቅ ፡ ወከናአን ፡ እለ ፡ ይነብሩ ፡ ውስተ ፡ ውእቱ ፡ ደብር ፡ ወሰደድዎሙ ፡ እስከ ፡ ኤርማ ፡ ወገብኡ ፡ ውስተ ፡ ትዕይንት ።
=== chapter 15 ===
[Numeri 15]
1 ወነበቦ ፡ እግዚአብሔር ፡ ለሙሴ ፡ ወይቤሎ ፤
2 ንግሮሙ ፡ ለደቂቀ ፡ እስራኤል ፡ ወበሎሙ ፡ አመ ፡ ቦእክሙ ፡ ውስተ ፡ ይእቲ ፡ ምድር ፡ እንቴ ፡ ውስቴታ ፡ ትነብሩ ፡ እንተ ፡ አነ ፡ እሁበክሙ ፤
3 ትገብሩ ፡ ፍሬ ፡ ለእግዚአብሔር ፡ ቍርባነ ፡ አው ፡ መሥዋዕተ ፡ ወታዐብዩ ፡ ብፅዓተ ፡ ወእመኒ ፡ ዘበፈቃድክሙ ፡ ወአመኒ ፡ በበዓላቲክሙ ፡ ትገብሩ ፡ ለመዐዛ ፡ ሠናይ ፡ ለእግዚአብሔር ፡ እመኒ ፡ እምውስተ ፡ አልህምት ፡ ወእመኒ ፡ እምውስተ ፡ አባግዕ ።
4 ወያመጽእ ፡ ዘያበውእ ፡ ቍርባኖ ፡ ለእግዚአብሔር ፡ መሥዋዕተ ፡ ስንዳሌ ፡ ዓሥራተ ፡ እዴሃ ፡ ለመስፈርተ ፡ ኢፍ ፡ ዘልውስ ፡ በቅብእ ፡ በራብዕተ ፡ እዴሃ ፡ ለመስፈርተ ፡ ኢን ።
5 [ወወይነ ፡ ለሞጻሕት ፡ ራብዕተ ፡ እዴሃ ፡ ለመስፈርተ ፡ ኢን ፡] ይገብር ፡ ዲበ ፡ ቍርባን ፡ ወእመኒ ፡ ዲበ ፡ መሥዋዕ[ት] ፤ ለአሐዱ ፡ ማሕስአ ፡ በግዕ ፡ ይግበር ፡ መጠነዝ ፡ ቍርባነ ፡ ለመዐዛ ፡ ሠናይ ፡ ለእግዚአብሔር ።
6 ወለበግዕኒ ፡ ሶበ ፡ ትገብርዎ ፡ ቍርባነ ፡ አው ፡ መሥዋዕተ ፡ ትገብር ፡ መሥዋዕተ ፡ ስንዳሌ ፡ ክልኤ ፡ ዓሥራተ ፡ ዘግቡር ፡ በቅብእ ፡ በሣልስተ ፡ እዴሃ ፡ ለመስፈርተ ፡ ኢን ።
7 ወወይ[ነ] ፡ ለሞጻሕት ፡ ሣልስተ ፡ እዴሃ ፡ ለመስፈርተ ፡ ኢን ፡ ያበውእ ፡ ለመዐዛ ፡ ሠናይ ፡ ለእግዚአብሔር ።
8 ወለእመሰ ፡ እምውስተ ፡ አልህምት ፡ ገበርክሙ ፡ ቍርባነ ፡ አው ፡ መሥዋዕተ ፡ አው ፡ አዕበይክሙ ፡ ብፅዓተ ፡ መድኀኒት ፡ ለእግዚአብሔር ፤
9 ወያመጽእ ፡ ላዕለ ፡ ውእቱ ፡ ላህሙ ፡ መሥዋዕተ ፡ ስንዳሌ ፡ ፫ዓሥራተ ፡ ዘልውስ ፡ በቅብእ ፡ በመንፈቃ ፡ ለመስፈርተ ፡ ኢን ፤
10 ወወይነ ፡ ለሞጻሕት ፡ መንፈቃ ፡ ለመስፈርተ ፡ ኢን ፡ ቍርባነ ፡ ዘመዐዛ ፡ ሠናይ ፡ ለእግዚአብሔር ።
11 ከማሁ ፡ ትገብር ፡ ለአሐዱ ፡ ላህም ፡ አው ፡ ለአሐዱ ፡ በግዕ ፡ አው ፡ ለአሐዱ ፡ ማሕስአ ፡ በግዕ ፡ እምውስተ ፡ አባግዕ ፡ ወእመኒ ፡ እምውስተ ፡ አጣሊ ።
12 በኍለቊሆሙ ፡ ለእለ ፡ ገበርክሙ ፡ ከመዝ ፡ ትገብሩ ፡ ለለ፩በአምጣነ ፡ ኍለቊሆሙ ።
13 ኵሉ ፡ ዘእምፍጥረቱ ፡ ከመዝ ፡ ይግበር ፡ ወከመዝ ፡ ያበውእ ፡ ቍርባኖ ፡ ለመዐዛ ፡ ሠናይ ፡ ለእግዚአብሔር ።
14 ወለእመሰ ፡ ግዩር ፡ ቦቱ ፡ ዘኮነ ፡ ውስቴትክሙ ፡ ወፈለሰ ፡ ውስተ ፡ ምድርክሙ ፡ ወእመኒ ፡ ቦቱ ፡ ዘኮነ ፡ ውስተ ፡ ሙላድክሙ ፡ ይገብር ፡ ቍርባነ ፡ ዘመዐዛ ፡ ሠናይ ፡ ለእግዚአብሔር ፡ በከመ ፡ ትገብሩ ፡ አንትሙ ፡ ከማሁ ፡ ትገብር ፡ ትዕይንቱ ፡ ለእግዚአብሔር ።
15 አሐዱ ፡ ውእቱ ፡ ሕጉ ፡ ለክሙ ፡ ወለግዩራን ፡ እለ ፡ ሀለዉ ፡ ውስቴትክሙ ፡ ሕ[ግ] ፡ ዘለዓለም ፡ በመዋዕሊክሙ ፤ በከመ ፡ አንትሙ ፡ ከማሁ ፡ ግዩራን ፡ ቅድመ ፡ እግዚአብሔር ።
16 አሐዱ ፡ ውእቱ ፡ ሕጉ ፡ ወአሐዱ ፡ ኵነኔሁ ፡ ለክሙ ፡ ወለግዩር ፡ ዘሀለወ ፡ ውስቴትክሙ ።
17 ወነበቦ ፡ እግዚአብሔር ፡ ለሙሴ ፡ ወይቤሎ ፤
18 ንግሮሙ ፡ ለደቂቀ ፡ እስራኤል ፡ ወበሎሙ ፡ አመ ፡ ትበውኡ ፡ ውስተ ፡ ይእቲ ፡ ምድር ፡ እንተ ፡ አነ ፡ እወስደክሙ ፡ ህየ ፤
19 ሶበ ፡ በላዕክሙ ፡ እምነ ፡ እክላ ፡ ለይእቲ ፡ ምድር ፡ ትፈልጡ ፡ መባአ ፡ ፍሉጥ ፡ ለእግዚአብሔር ፡ እምውስተ ፡ ቀዳሜ ፡ ሐሪጽክሙ ።
20 ኅብስተ ፡ መባአ ፡ ትፈልጡ ፡ ሎቱ ፡ ከመ ፡ መባእ ፡ ዘእምውስተ ፡ ዐውደ ፡ እክል ፡ ከማሁ ፡ ትፈልጡ ፡ ሎቱ ፡ እምውስተ ፡ ቀዳሜ ፡ ሐሪጽክሙ ፤
21 ወትሁቡ ፡ ለእግዚአብሔር ፡ መባአ ፡ በመዋዕሊክሙ ።
22 ወለእመ ፡ አበስክሙ ፡ ወኢገበርክሙ ፡ ኵሎ ፡ ዘንተ ፡ ትእዛዘ ፡ ዘይቤሎ ፡ እግዚአብሔር ፡ ለሙሴ ፤
23 በከመ ፡ አዘዘክሙ ፡ እግዚአብሔር ፡ በእደ ፡ ሙሴ ፡ እምአመ ፡ አዘዘክሙ ፡ እግዚአብሔር ፡ ወእምቅድሜሁ ፡ በመዋዕሊክሙ ፤
24 ወለእመ ፡ ቦቱ ፡ ዘኢተዐውቆሙ ፡ ውስተ ፡ አዕይንቲሆሙ ፡ ለትዕይንት ፡ ወትገብር ፡ ኵላ ፡ ይእቲ ፡ ትዕይንት ፡ ላህመ ፡ አሐደ ፡ እምውስተ ፡ አልህምት ፡ ንጹሐ ፡ ለመሥዋዕት ፡ ወለመዐዛ ፡ ሠናይ ፡ ለእግዚአብሔር ፡ ወመሥዋዕቱሂ ፡ ለዝንቱ ፡ ወሞጻኅቱሂ ፡ በከመ ፡ ሕጉ ፡ ወአሐዱ ፡ ሐርጌ ፡ እምውስተ ፡ አጣሊ ፡ በእንተ ፡ ኀጢአት ።
25 ወያስተሰሪ ፡ ካህን ፡ በእንተ ፡ ኵሉ ፡ ተዓይኒሆሙ ፡ ለደቂቀ ፡ እስራኤል ፡ ወይትኀደግ ፡ ሎሙ ፡ እስመ ፡ በኢያእምሮ ፡ ውእቱ ፡ ወእሙንቱኒ ፡ አምጽኡ ፡ ቍርባኖሙ ፡ ወመሥዋዕተ ፡ ለእግዚአብሔር ፡ በእንተ ፡ ኀጢአቶሙ ፡ ቅድመ ፡ እግዚአብሔር ፡ ወበእንተ ፡ ኢያእምሮቶሙ ።
26 ወይትኀደግ ፡ ለኵሉ ፡ ትዕይንቶሙ ፡ ለደቂቀ ፡ እስራኤል ፡ ወለግዩ[ርኒ] ፡ ዘይመጽእ ፡ ኀቤክሙ ፡ እስመ ፡ ለኵሉ ፡ ሕዝብ ፡ ኢያእምሮ ፡ ኮነ ።
27 ወለእመሰ ፡ አሐቲ ፡ ነፍስ ፡ አበሰት ፡ በኢያእምሮ ፡ ያመጽእ ፡ አሐተ ፡ ጠሊተ ፡ እንተ ፡ ዓመት ፡ በእንተ ፡ ኀጢአት ።
28 ወያስተሰሪ ፡ ካህን ፡ በእንተ ፡ ይእቲ ፡ ነፍስ ፡ እንተ ፡ በኢያእምሮ ፡ አበሰት ፡ በእንተ ፡ ኢያእምሮታ ፡ ቅድመ ፡ እግዚአብሔር ፡ ወያስተሰሪ ፡ በእንቲአሁ ።
29 [ዘ] እምፍጥረቱሂ ፡ ውስተ ፡ ደቂቀ ፡ እስራኤል ፡ ወለግዩ[ርኒ] ፡ ዘሀለወ ፡ ውስቴትክሙ ፡ አሐዱ ፡ ውእቱ ፡ ሕጉ ፡ ሎሙ ፡ እምከመ ፡ በኢያእምሮ ፡ ገብረ ።
30 ወነፍስ ፡ እንተ ፡ ገብረት ፡ በእዴሃ ፡ ትዕቢተ ፡ እመኒ ፡ እምውስተ ፡ እለ ፡ እምፍጥረቶሙ ፡ ወእመኒ ፡ እምውስተ ፡ ግዩራኒሁ ፡ ለእግዚአብሔር ፡ ወአምዕዐ ፡ በዝንቱ ፡ ለትሰሮ ፡ ይእቲ ፡ ነፍስ ፡ እምውስተ ፡ ሕዝባ ።
31 እስመ ፡ ላዕለ ፡ ቃለ ፡ እግዚአብሔር ፡ አበሰ ፡ ወዐለወ ፡ ትእዛዞ ፡ ተቀጥቅጦ ፡ ለትትቀጥቀጥ ፡ ይእቲ ፡ ነፍስ ፡ ወኀጢአታሂ ፡ ላዕሌሃ ።
32 ወሀለዉ ፡ ደቂቀ ፡ እስራኤል ፡ ውስተ ፡ ገዳም ፡ ወረከቡ ፡ ብእሴ ፡ እንዘ ፡ ይኤልድ ፡ ዕፀወ ፡ በዕለተ ፡ ሰንበት ።
33 ወአምጽእዎ ፡ እለ ፡ ረከብዎ ፡ ኀበ ፡ ሙሴ ፡ ወአሮን ፡ ወኀበ ፡ ኵሉ ፡ ተዓይኒሆሙ ፡ ለደቂቀ ፡ እስራኤል ።
34 ወአውዐልዎ ፡ ውስተ ፡ ሙዓል ፡ እስመ ፡ አልቦ ፡ ዘኰነኑ ፡ ዘከመ ፡ ይሬስይዎ ።
35 ወነበቦ ፡ እግዚአብሔር ፡ ለሙሴ ፡ ወይቤሎ ፡ ሞተ ፡ ለይሙት ፡ ውእቱ ፡ ብእሲ ፡ ወግርዎ ፡ በእብን ፡ ኵሉ ፡ ትዕይንት ።
36 ወአውጽእዎ ፡ አፍአ ፡ ኵሉ ፡ ተዓይን ፡ እምትዕይንት ፡ ወወገርዎ ፡ በከመ ፡ ይቤሎ ፡ እግዚአብሔር ፡ ለሙሴ ።
37 ወነበቦ ፡ እግዚአብሔር ፡ ለሙሴ ፡ ወይቤሎ ፤
38 ንግሮሙ ፡ ለደቂቀ ፡ እስራኤል ፡ ወበሎሙ ፡ ወይግበሩ ፡ ሎሙ ፡ ዘፈረ ፡ ውስተ ፡ ጽነፈ ፡ አልባሲሆሙ ፡ በመዋዕሊሆሙ ፡ ወይደዩ ፡ ውስተ ፡ ዘፈረ ፡ ጽነፊሁ ፡ ደረከኖ ፡ ፍቱለ ።
39 ወይኩንክሙ ፡ ውስተ ፡ ዘፈር ፡ ወትሬእይዎ ፡ ወትዜከሩ ፡ ኵሎ ፡ ትእዛዞ ፡ ለእግዚአብሔር ፡ ወግበርዎን ፡ ወ[ኢ]ትተልዉ ፡ ድኅረ ፡ ሕሊናክሙ ፡ ወድኅረ ፡ አዕይንቲክሙ ፡ በዘ ፡ ቦቱ ፡ ትዜምዉ ፡ አንትሙ ፡ ድኅሬሆሙ ፤
40 ከመ ፡ ትዘከሩ ፡ ወትግበሩ ፡ ኵላ ፡ ትእዛዝየ ፤ ወትከውኑ ፡ ቅዱሳነ ፡ ለአምላክክሙ ፤
41 ዘአውጽአክሙ ፡ እምነ ፡ ምድረ ፡ ግብጽ ፡ ከመ ፡ እኩንክሙ ፡ አምላከ ፡ ወአነ ፡ እግዚአብሔር ፡ አምላክክሙ ።
=== chapter 16 ===
[Numeri 16]
1 ወተናገሮ ፡ ቆሬ ፡ ወልደ ፡ ይስአር ፡ ወልደ ፡ ቃዓት ፡ ወልደ ፡ ሌዊ ፡ ወዳታን ፡ ወአቢሮን ፡ ደቂቀ ፡ ኤልያብ ፡ ወአውናን ፡ ወልደ ፡ ፋሌት ፡ ወልደ ፡ ሮቤል ።
2 ወተቃወምዎ ፡ ቅድሜሁ ፡ ለሙሴ ፡ ወዕደውኒ ፡ እምውስተ ፡ ደቂቀ ፡ እስራኤል ፡ ክልኤ ፡ ምእት ፡ ወኀምሳ ፡ ዐበይተ ፡ ተዓይን ፡ ኅሩያን ፡ በውስተ ፡ ምክር ፡ ወዕደው ፡ ስሙያን ።
3 ተንሥኡ ፡ ዲበ ፡ ሙሴ ፡ ወዲበ ፡ አሮን ፡ ወይቤልዎሙ ፡ ይኩንክሙ ፡ ለክሙ ፡ እስመ ፡ ኵሉ ፡ ተዓይን ፡ ቅዱሳ[ን] ፡ ኵሎሙ ፡ ወእግዚአብሔር ፡ ሀለወ ፡ ውስቴቶሙ ፡ ወለምንት ፡ ትቀውሙ ፡ ዲበ ፡ ትዕይንቱ ፡ ለእግዚአብሔር ።
4 ወሶበ ፡ ሰምዐ ፡ ሙሴ ፡ ወድቀ ፡ በገጹ ።
5 ወይቤሎ ፡ ለቆሬ ፡ ወለኵሉ ፡ ትዕይንቱ ፡ እንዘ ፡ ይብል ፡ ለይርአይ ፡ እግዚአብሔር ፡ ወለያእምሮሙ ፡ ለእሊአሁ ፡ ወያስተጋብኦሙ ፡ ኀቤሁ ፡ ለቅዱሳኒሁ ።
6 ወከመዝ ፡ ግበሩ ፡ አንትሙ ፡ ንሥኡ ፡ ለክሙ ፡ መዓጥንተ ፡ ቆሬ ፡ ወኵሉ ፡ ትዕይንቱ ።
7 ወደዩ ፡ ውስቴቱ ፡ እሳተ ፡ ወደዩ ፡ ዲቤሁ ፡ ዕጣነ ፡ ቅድመ ፡ እግዚአብሔር ፡ ጌሠመ ፡ ወይኩን ፡ ዝክቱ ፡ ብእሲ ፡ ዘኀርየ ፡ እግዚአብሔር ፡ ቅዱሰ ፡ ይኩኖሙ ፡ ለደቂቀ ፡ ሌዊ ።
8 ወይቤሎ ፡ ሙሴ ፡ ለቆሬ ፡ ስምዑኒ ፡ ደቂቀ ፡ ሌዊ ።
9 ታስተንእስዎኑ ፡ አንትሙ ፡ ለዝንቱ ፡ ዘኀርየክሙ ፡ አምላከ ፡ እስራኤል ፡ እምነ ፡ ትዕይንቶሙ ፡ ለእስራኤል ፡ ወአቅረበክሙ ፡ ኀቤሁ ፡ ከመ ፡ ትግበሩ ፡ ምግባረ ፡ ደብተራሁ ፡ ለእግዚአብሔር ፡ ወትቁሙ ፡ ቅድመ ፡ ትዕይንት ፡ ወትትለአክዎ ።
10 ወአቅረበከ ፡ ለከ ፡ ወለአኀዊከ ፡ ደቂቀ ፡ ሌዊ ፡ ምስሌከ ፡ ወትፈቅዱ ፡ ትኩኑ ፡ ካህናተ ።
11 ወከማሁ ፡ አንተኒ ፡ ወኵሉ ፡ ትዕይንትከ ፡ እንተ ፡ አንገለገት ፡ ላዕለ ፡ እግዚአብሔር ፡ [ወአሮን ፡ ምንት ፡ ውእቱ ፡] ከመ ፡ ታንጐርጕሩ ፡ ላዕሌሁ ።
12 ወለአከ ፡ ሙሴ ፡ ይጸውዕዎሙ ፡ ለዳታን ፡ ወለአቤሮን ፡ ደቂቀ ፡ ኤልያብ ፡ ወይቤሉ ፡ ኢንመጽእ ።
13 ታስተንእስኑአ ፡ ዘንተአ ፡ ዘአባእከነአ ፡ ውስተአ ፡ ምድርአ ፡ እንተ ፡ ትውሕዝአ ፡ ሐሊበአ ፡ ወመዓረአ ፡ ዘቀተልከነአ ፡ ውስተ ፡ ገዳምአ ፡ ከመ ፡ ትትመልአክአ ፡ ለነአ ።
14 መልአክኑአ ፡ አንተሂአ ፡ ካዕበአ ፡ ውስተ ፡ ምድርኑአ ፡ እንተአ ፡ ትውሕዝአ ፡ ሐሊበአ ፡ ወመዓረአ ፡ አባእከነአ ፡ ዘንተአ ፡ ዘወሀብከነአ ፡ መክፈልተአ ፡ ውስተአ ፡ ገዳምአ ፡ ወአዕጻደ ፡ ወይንሂአ ፡ ዝክቱኑአ ፡ አዕይንቲሆሙ ፡ ለእልክቱአ ፡ ዕደውአ ፡ ዘአውጻእከአ ፡ ኢንመጽእአ ።
15 ወአክበደ ፡ ተክዞ ፡ ሙሴ ፡ ጥቀ ፡ ወይቤሎ ፡ ለእግዚአብሔር ፡ ኢትነጽር ፡ ውስተ ፡ መሥዋዕቶሙ ፡ አልቦ ፡ ዘነሣእኩ ፡ ወኢዘአሐዱ ፡ እምኔሆሙ ፡ ተፈቲውየ ፡ ወአልቦ ፡ ዘአሕሠምኩ ፡ ወኢላዕለ ፡ አሐዱ ፡ እምኔሆሙ ።
16 ወይቤሎ ፡ ሙሴ ፡ ለቆሬ ፡ ቀድስ ፡ ትዕይንተከ ፡ ወኩኑ ፡ ድልዋነ ፡ ቅድመ ፡ እግዚአብሔር ፡ አንተ ፡ ወእሙንቱ ፡ ወአሮን ፡ ለጌሠም ።
17 ወይንሣእ ፡ ፩፩ማዕጠንቶ ፡ ወደዩ ፡ ዕጣነ ፡ ወያብእ ፡ አሐዱ ፡ አሐዱ ፡ ማዕጠንቶ ፡ ቅድመ ፡ እግዚአብሔር ።
18 ወነሥአ ፡ አሐዱ ፡ አሐዱ ፡ ማዕጠንቶ ፡ ወወደዩ ፡ ውስቴቱ ፡ እሳተ ፡ ወወደዩ ፡ ውስቴቱ ፡ ዕጣነ ፡ ወቆመ ፡ ኀበ ፡ ኆኅተ ፡ ደብተራ ፡ ዘመርጡል ፡ ሙሴ ፡ ወአሮን ።
19 ወሮዶሙ ፡ ቆሬ ፡ ምስለ ፡ ኵሉ ፡ ትዕይንቱ ፡ ኀበ ፡ ኆኅተ ፡ ደብተራ ፡ ዘመርጡል ፡ ወአስተርአየ ፡ ስብሐተ ፡ እግዚአብሔር ፡ ለኵሉ ፡ ትዕይንት ።
20 ወነበቦ ፡ እግዚአብሔር ፡ ለሙሴ ፡ ወለአሮን ፡ ወይቤሎሙ ፤
21 ተገሐሡ ፡ እምነ ፡ ማእከሎሙ ፡ ለዝንቱ ፡ ትዕይንት ፡ ወአጠፍኦሙ ፡ በምዕር ።
22 ወወድቁ ፡ በገጾሙ ፡ ወይቤሉ ፡ እግዚኦ ፡ አምላኮ ፡ ለኵሉ ፡ መንፈስ ፡ ወለኵሉ ፡ ዘሥጋ ፡ ለእመ ፡ ፩ብእሲ ፡ አበሰ ፡ ዲበ ፡ ኵሉኑ ፡ ትዕይንት ፡ ይከውን ፡ መዐተ ፡ እግዚአብሔር ።
23 ወነበቦ ፡ እግዚአብሔር ፡ ለሙሴ ፡ ወይቤሎ ፤
24 ንግሮሙ ፡ ለትዕይንት ፡ ወይትገሐሡ ፡ እምነ ፡ አውደ ፡ ትዕይንተ ፡ ቆሬ ።
25 ወተንሥአ ፡ ሙሴ ፡ ወሖረ ፡ ኀበ ፡ ዳታን ፡ ወአቤሮን ፡ ወሖሩ ፡ ምስሌሁ ፡ ኵሎሙ ፡ አዕሩገ ፡ እስራኤል ።
26 ወነገሮሙ ፡ ለትዕይንት ፡ ወይቤሎሙ ፡ ተገሐሡ ፡ እምነ ፡ ኀበ ፡ ተዓይኒሆሙ ፡ ለእሉ ፡ ሰብእ ፡ እኩያን ፡ ወኢትግስሱ ፡ እምነ ፡ ኵሉ ፡ ዘዚአሆሙ ፡ ከመ ፡ ኢትትኀጐሉ ፡ በኵሉ ፡ ኀጣውኢሆሙ ።
27 ወተግሕሡ ፡ እምነ ፡ አውደ ፡ ትዕይንተ ፡ ቆሬ ፡ ወወፅኡ ፡ ዳታን ፡ ወአቢሮን ፡ ወቆሙ ፡ ኀበ ፡ ኆኅተ ፡ ደብተራሆሙ ፡ ወአንስቲያሆሙኒ ፡ ወደቂቆሙኒ ፡ ወንዋዮሙኒ ።
28 ወይቤ ፡ ሙሴ ፡ ቦዝንቱ ፡ ታአምሩ ፡ ከመ ፡ እግዚአብሔር ፡ ፈነወኒ ፡ ከመ ፡ እግበር ፡ ዘንተ ፡ ግብረ ፡ ኵሎ ፡ [ከመ ፡ አኮ ፡ እምልብየ] ፤
29 ከመ ፡ ኢይሙቱ ፡ ከመ ፡ ሞተ ፡ ሰብእ ፡ ወከመ ፡ ኢኮነ ፡ መቅሠፍቶሙ ፡ ከመ ፡ መቅሠፍተ ፡ ሰብእ ፡ ለእሉ ፡ አኮኑ ፡ እግዚአብሔር ፡ ፈነወኒ ።
30 እንበለ ፡ በተርኅዎተ ፡ ምድር ፡ ዘያርኢ ፡ እግዚአብሔር ፡ ወታበቁ ፡ ምድር ፡ አፉሃ ፡ ወትውኅጦሙ ፡ ወለአብያቲሆሙኒ ፡ ወለደባትሪሆሙኒ ፡ ወለኵሉ ፡ ዘዚአሆሙ ፡ ወይወርዱ ፡ ሕያዋኒሆሙ ፡ ውስተ ፡ ሲኦል ፡ ወያአምሩ ፡ ከመ ፡ ያምዕዕዎ ፡ እሉ ፡ ሰብእ ፡ ለእግዚአብሔር ።
31 ወሶበ ፡ አኅለቀ ፡ ተናግሮ ፡ ኵሎ ፡ ዘንተ ፡ ነገረ ፡ ተሠጠት ፡ ምድር ፡ በታሕተ ፡ እገሪሆሙ ።
32 ወተርኅወት ፡ ምድር ፡ ወውሕጠቶሙ ፡ ወለአብያቲሆሙ ፡ ወኵሉ ፡ ሰብእ ፡ እለ ፡ ሀለዉ ፡ ምስለ ፡ ቆሬ ፡ ወለአንስቲያሆሙኒ ።
33 ወወረዱ ፡ እሙንቱ ፡ ወኵሉ ፡ ዘዚአሆሙ ፡ ሕያዋኒሆሙ ፡ ውስተ ፡ ሲኦል ፡ ወከደነቶሙ ፡ ምድር ፡ ወተሐጕሉ ፡ እምነ ፡ ማእከለ ፡ ትዕይንት ።
34 ወኵሉ ፡ እስራኤል ፡ እለ ፡ አውዶሙ ፡ ጐዩ ፡ እምነ ፡ ቃሎሙ ፡ እንዘ ፡ ይብሉ ፡ ከመ ፡ ኢተኀጠነ ፡ ለነሂ ፡ ምድር ።
35 ወወፅአት ፡ እሳት ፡ እምኀበ ፡ እግዚአብሔር ፡ ወበልዐቶሙ ፡ ለእልክቱ ፡ ፪፻ወ፶ዕደው ፡ እለ ፡ አብኡ ፡ ዕጣነ ።
=== chapter 17 ===
[Numeri 17]
1 ወይቤሎሙ ፡ እግዚአብሔር ፡ ለሙሴ ፡ ወለእልዓዛር ፡ ወልደ ፡ አሮን ፡ ካህን ፤
2 አሰስሉ ፡ ማዕጠንተ ፡ ዘብርት ፡ እምነ ፡ ማእከሎሙ ፡ ለእለ ፡ ውዕዩ ፡ ወዘንተ ፡ እሳተ ፡ ዘእምነ ፡ ባዕድ ፡ ዝርዎ ፡ ከሐ ፡ እስመ ፡ ተቀደሰ ፡ መዓጥንቲሆሙ ፡ ለእሉ ፡ ኃጥኣን ፡ በነፍሶሙ ።
3 ወግበሮሙ ፡ ሰሊዳተ ፡ ዘዝብጦ ፡ ወይኩን ፡ ለምግባረ ፡ ምሥዋዕ ፡ እስመ ፡ ቦአ ፡ ቅድመ ፡ እግዚአብሔር ፡ ወተቀደሰ ፡ ወኮነ ፡ ተአምረ ፡ ለደቂቀ ፡ እስራኤል ።
4 ወነሥአ ፡ እልዓዛር ፡ ወልደ ፡ አሮን ፡ ውእተ ፡ መዓጥንተ ፡ ዘብርት ፡ ኵ[ሎ] ፡ ዘአብኡ ፡ እለ ፡ ውዕዩ ፡ ወረሰይዎ ፡ ለምግባረ ፡ ምሥዋዕ ፤
5 ተዝካረ ፡ ለደቂቀ ፡ እስራኤል ፡ ከመ ፡ አልቦ ፡ ዘይባእ ፡ ዘእምነ ፡ ባዕድ ፡ ዘመድ ፡ ዘኢኮነ ፡ እምነ ፡ ዘርአ ፡ አሮን ፡ ከመ ፡ ይደይ ፡ ዕጣነ ፡ ቅድመ ፡ እግዚአብሔር ፡ ወኢይኩን ፡ ከመ ፡ ቆሬ ፡ ወከመ ፡ ተቃውሞቱ ፡ በከመ ፡ ነበበ ፡ እግዚአብሔር ፡ በእደ ፡ ሙሴ ።
6 ወበሳኒታ ፡ አንጐርጐሩ ፡ ደቂቀ ፡ እስራኤል ፡ ዲበ ፡ ሙሴ ፡ ወዲበ ፡ አሮን ፡ ወይቤልዎሙ ፡ አንትሙ ፡ ቀተልክምዎሙ ፡ ለሕዝበ ፡ እግዚአብሔር ።
7 ወኮነ ፡ ሶበ ፡ ተጋብኡ ፡ ትዕይንት ፡ ላዕለ ፡ ሙሴ ፡ ወአሮን ፡ ወሮድዎሙ ፡ ኀበ ፡ ደብተራ ፡ ዘመርጡል ፡ በጊዜሃ ፡ ከደና ፡ ደመና ፡ ወአስተርአየ ፡ ስብሐተ ፡ እግዚአብሔር ።
8 ወቦኡ ፡ ሙሴ ፡ ወአሮን ፡ እንተ ፡ ኀበ ፡ ገጸ ፡ ደብተራ ፡ ዘመርጡል ።
9 ወነበቦሙ ፡ እግዚአብሔር ፡ ለሙሴ ፡ ወለአሮን ፡ ወይቤሎሙ ፤
10 ተገሐሡ ፡ እምነ ፡ ማእከላ ፡ ለዛቲ ፡ ትዕይንት ፡ ወአጥፍኦሙ ፡ በምዕር ፡ ወወድቁ ፡ በገጾሙ ።
11 ወይቤሎ ፡ ሙሴ ፡ ለአሮን ፡ ንሣእ ፡ ማዕጠንተ ፡ ወደይ ፡ ውስቴቱ ፡ እሳተ ፡ እምነ ፡ መሥዋዕት ፡ ወደይ ፡ ዲቤሁ ፡ ዕጣነ ፡ ወአብእ ፡ ፍጡነ ፡ ውስተ ፡ ትዕይንት ፡ ወአስተስሪ ፡ በእንቲአሆሙ ፡ እስመ ፡ ወድአ ፡ ወፅአ ፡ መንሱት ፡ እምቅድመ ፡ እግዚአብሔር ፡ ወአሐዘ ፡ ያጥፍኦሙ ፡ ለሕዝብ ።
12 ወነሥኦ ፡ አሮን ፡ በከመ ፡ ይቤሎ ፡ ሙሴ ፡ ወሮጸ ፡ ፍጡነ ፡ ውስተ ፡ ትዕይንት ፡ ወወድአ ፡ አኀዘ ፡ ብድብድ ፡ ውስተ ፡ ሕዝብ ፡ ወወደየ ፡ ዕጣነ ፡ ወአስተስረየ ፡ በእንተ ፡ ሕዝብ ።
13 ወቆመ ፡ ማእከለ ፡ ምውታን ፡ ወማእከለ ፡ ሕያዋን ፡ ወኀደገ ፡ ብድብድ ።
14 ወኮኑ ፡ እለ ፡ ሞቱ ፡ በብድብድ ፡ እልፍ ፡ ወአርብዓ ፡ ምእት ፡ ወሰብዐቱ ፡ ምእት ፡ ዘእንበለ ፡ እለ ፡ ሞቱ ፡ በእንተ ፡ ቆሬ ።
15 ወገብአ ፡ አሮን ፡ ኀበ ፡ ሙሴ ፡ ወኀበ ፡ ኆኅተ ፡ ደብተራ ፡ ዘመርጡል ፡ ወኀደገ ፡ ብድብድ ።
16 ወነበቦ ፡ እግዚአብሔር ፡ ለሙሴ ፡ ወይቤሎ ፤
17 ንግሮሙ ፡ ለደቂቀ ፡ እስራኤል ፡ ወንሣእ ፡ በኀቤሆሙ ፡ በትረ ፡ ለለ ፡ አብያተ ፡ አበዊሆሙ ፡ እምኀበ ፡ ኵሉ ፡ መላእክቲሆሙ ፡ ዘአብያተ ፡ አበዊሆሙ ፡ ዐሥሩ ፡ ወክልኤ ፡ አብታረ ፡ ወለለ ፡ አሐዱ ፡ ጸሐፍ ፡ ስሞ ፡ ውስተ ፡ በትሩ ።
18 ወጸሐፍ ፡ ስሞ ፡ ለአሮን ፡ ውስተ ፡ በትረ ፡ ሌዊ ፡ እስመ ፡ ለለ ፡ ሕዝበ ፡ አብያተ ፡ አበዊሆሙ ፡ አሐተ ፡ በትረ ፡ ይሁቡ ።
19 ወታነብሮን ፡ ውስተ ፡ ደብተራ ፡ ዘመርጡል ፡ ቅድመ ፡ መርጡል ፡ በዘ ፡ ቦቱ ፡ ኣስተርኢ ፡ ለከ ፡ በህየ ።
20 ወዝክቱ ፡ ብእሲ ፡ ዘአነ ፡ ኀረይክዎ ፡ ትሠርጽ ፡ በትሩ ፡ ወአሰስል ፡ እምኔከ ፡ ነጐርጓሮሙ ፡ ለደቂቀ ፡ እስራኤል ፡ ኵሉ ፡ ዘያንጐረጕሩ ፡ እሙንቱ ፡ በላዕሌክሙ ።
21 ወነገሮሙ ፡ ሙሴ ፡ ለደቂቀ ፡ እስራኤል ፡ ወወሀብዎ ፡ ኵሎሙ ፡ መላእክቲሆሙ ፡ በትረ ፤ ለአሐዱ ፡ መልአክ ፡ ወለለ ፡ መልአክ ፡ በትር ፡ ዘዘ ፡ አብያተ ፡ አበዊሆሙ ፡ ዐሥሩ ፡ ወክልኤ ፡ አብትር ፡ ወበትረ ፡ አሮን ፡ ማእከለ ፡ አብትሪሆሙ ።
22 ወአንበሮን ፡ ሙሴ ፡ ለውእቶን ፡ አብትር ፡ ቅድመ ፡ እግዚአብሔር ፡ ውስተ ፡ ደብተራ ፡ ዘመርጡል ።
23 ወኮነ ፡ በሳኒታ ፡ ወቦኡ ፡ ሙሴ ፡ ወአሮን ፡ ውስተ ፡ ደብተራ ፡ ዘመርጡል ፡ ወናሁ ፡ ሰረጸት ፡ በትሩ ፡ ለአሮን ፡ እንተ ፡ ቤተ ፡ ሌዊ ፡ ወአውጽአት ፡ ቈጽለ ፡ ወጸገየት ፡ ጽጌ ፡ ወፈርየት ፡ ከርካዕ ።
24 ወአውጽኦን ፡ ሙሴ ፡ ለኵሎን ፡ አብትሪሆሙ ፡ እምቅድመ ፡ እግዚአብሔር ፡ ኀበ ፡ ኵሉ ፡ ደቂቀ ፡ እስራኤል ፡ ወርእዩ ፡ ወነሥአ ፡ አሐዱ ፡ አሐዱ ፡ በትሮ ።
25 ወይቤሎ ፡ እግዚአብሔር ፡ ለሙሴ ፡ አንብር ፡ በትሮ ፡ ለአሮን ፡ ቅድመ ፡ መርጡል ፡ ከመ ፡ ትትዐቀብ ፡ ለትእምርት ፡ ለደቂቆሙ ፡ ለእለ ፡ አልቦሙ ፡ መስማዕተ ፡ ወይትኀደግ ፡ ነጐርጓሮሙ ፡ እምላዕሌየ ፡ ከመ ፡ ኢይሙቱ ።
26 ወገብሩ ፡ ሙሴ ፡ ወአሮን ፡ ኵሎ ፡ ዘአዘዞ ፡ እግዚአብሔር ፡ ለሙሴ ፡ ከማሁ ፡ ገብሩ ።
27 ወይቤልዎ ፡ ደቂቀ ፡ እስራኤል ፡ ለሙሴ ፡ ናሁ ፡ ተወዳእነ ፡ ወንትሐጐል ፡ እንዘ ፡ ነሐልቅ ።
28 እስመ ፡ ኵሉ ፡ ዘገሰሰ ፡ ደብተራሁ ፡ ለእግዚአብሔር ፡ ይመውት ፤ ለተገምሮኑ ፡ እንከ ፡ ንመውት ።
=== chapter 18 ===
[Numeri 18]
1 ወነበቦ ፡ እግዚአብሔር ፡ ለአሮን ፡ ወይቤሎ ፡ አንተ ፡ ወደቂቅከ ፡ ወቤተ ፡ አቡከ ፡ ምስሌከ ፡ ትነሥኡ ፡ ኀጣይአ ፡ ክህነትክሙ ።
2 ወአኀዊከኒ ፡ ነገደ ፡ ሌዊ ፡ ሕዝበ ፡ አቡከ ፡ አስተጋብእ ፡ ኀቤከ ፡ ወይትወሰኩ ፡ ለከ ፡ ወይትለአኩከ ፡ ወአንተ ፡ ወደቂቅከ ፡ ምስሌከ ፡ ላዕለ ፡ ደብተራ ፡ ዘመርጡል ።
3 ወይዕቀቡ ፡ ሕ[ገ] ከ ፡ ወሕጋ ፡ ለደብተራከ ፡ ዳእሙ ፡ ኀበ ፡ ንዋይ ፡ ዘቅድሳት ፡ ወኀበ ፡ ምሥዋዕ ፡ ኢይባኡ ፡ ወኢይሙቱ ፡ እሙንቱሂ ፡ ወአንትሙሂ ።
4 ወይትወሰኩ ፡ ኀቤከ ፡ ወይዕቀቡ ፡ ሕጋ ፡ ለደብተራ ፡ ዘመርጡል ፡ በኵሉ ፡ ግብራ ፡ ለደብተራ ፡ ወዘእምነ ፡ ባዕድ ፡ ዘመድ ፡ ኢይባእ ፡ ኀቤከ ።
5 ወተዐቅቡ ፡ ሕጎሙ ፡ ለቅዱሳን ፡ ወሕጎ ፡ ለምሥዋዕ ፡ ወኢይመጽእ ፡ እንከ ፡ መንሱት ፡ ላዕለ ፡ ደቂቀ ፡ እስራኤል ።
6 ወአነ ፡ ነሣእክዎሙ ፡ ለአኀዊክሙ ፡ ለሌዋውያን ፡ እምነ ፡ ማእከሎሙ ፡ ለደቂቀ ፡ እስራኤል ፡ ሀብተ ፡ ተውህቡ ፡ ለእግዚአብሔር ፡ ከመ ፡ ይግበሩ ፡ ግብራ ፡ ለደብተራ ፡ መርጡል ።
7 ወአንተ ፡ ወደቂቅከ ፡ ምስሌከ ፡ ዕቀቡ ፡ ክህነተክሙ ፡ በከመ ፡ ኵሉ ፡ ሕጉ ፡ ለምሥዋዕ ፡ ወዘውስጥ ፡ እምነ ፡ መንጦላዕት ፡ ወግበሩ ፡ ግብረ ፡ ሀብታ ፡ ለ[ክህነት] ክሙ ፡ ወዘእምነ ፡ ባዕድ ፡ ዘመድ ፡ ዘቦአ ፡ ለይሙት ።
8 ወይቤሎ ፡ እግዚአብሔር ፡ ለአሮን ፡ ናሁ ፡ አነሂ ፡ ወሀብኩክሙ ፡ ትዕቀቡ ፡ ዘያቀድሙ ፡ አብኦ ፡ ሊተ ፡ እምነ ፡ ኵሉ ፡ ዘይትቄደስ ፡ ሊተ ፡ እምኀበ ፡ ደቂቀ ፡ እስራኤል ፡ ለከ ፡ ወሀብኩካሁ ፡ እስከ ፡ ትረሥእ ፡ ወእምድኅሬከ ፡ ለደቂቅከ ፡ ሕግ ፡ ዘለዓለም ።
9 ወዝንቱ ፡ ይክንክሙ ፡ ለክሙ ፡ እምነ ፡ ዘይትቄደስ ፡ ለቅዱሳን ፡ ዘመሣውዕ ፡ እምነ ፡ ኵሉ ፡ ቍርባኖሙ ፡ ወእምነ ፡ ኵሉ ፡ መሥዋዕቶሙ ፡ ወእምነ ፡ ኵሉ ፡ ዘንስሓሆሙ ፡ ወእምነ ፡ ኵሉ ፡ ዘኀጣይኢሆሙ ፡ ኵሉ ፡ ዘያመጽኡ ፡ ሊተ ፡ እምነ ፡ ኵሉ ፡ ዘቅዱሳን ፡ ለከ ፡ ውእቱ ፡ ወለደቂቅከ ።
10 በቅዱሰ ፡ ቅዱሳን ፡ ብልዕዎ ፤ ኵሉ ፡ ተባዕት ፡ ለይብልዖ ፡ አንተ ፡ ወደቂቅከ ፡ እስመ ፡ ቅዱስ ፡ ውእቱ ፡ ለከ ።
11 ወዝንቱ ፡ ይኩንክሙ ፡ ለክሙ ፡ እምነ ፡ ቀዳሜ ፡ ሀብቶሙ ፡ ወእምነ ፡ ኵሉ ፡ ዘያበውኡ ፡ ደቂቀ ፡ እስራኤል ፤ ለከ ፡ ወሀብኩካሃ ፡ ወለደቂቅከ ፡ ወአዋልዲከሂ ፡ ምስሌከ ፡ ሕግ ፡ ዘለዓለም ፤ ኵሉ ፡ ዘንጹሕ ፡ በውስተ ፡ ቤትከ ፡ ይብልዖ ።
12 ኵሎ ፡ ቀዳምያተ ፡ ቅብእ ፡ ወኵሎ ፡ ቀዳምያተ ፡ ወይን ፡ ወዘስርናይ ፡ ቀዳምያቲሆሙ ፡ ወኵሎ ፡ ዘያበውኡ ፡ ለእግዚአብሔር ፡ ለከ ፡ ወሀብኩካሁ ።
13 ወኵሎ ፡ ቀዳሜ ፡ እክል ፡ ዘበኵሉ ፡ ምድሮሙ ፡ ወኵሎ ፡ ዘያመጽኡ ፡ ለእግዚአብሔር ፡ ለከ ፡ ወሀብኩካሁ ፡ ኵሉ ፡ ዘንጹሕ ፡ በውስተ ፡ ቤትከ ፡ ይብልዖ ።
14 ኵሉ ፡ ዘያሐርሙ ፡ በውስተ ፡ ደቂቀ ፡ እስራኤል ፡ ለከ ፡ ውእቱ ።
15 ወኵሉ ፡ ዘይሪትሕ ፡ ማኅፀነ ፡ እምነ ፡ ኵሉ ፡ ዘሥጋ ፡ ኵሎ ፡ ዘያመጽኡ ፡ ለእግዚአብሔር ፡ እምነ ፡ ሰብእ ፡ እስከ ፡ እንስሳ ፡ ለከ ፡ ውእቱ ፡ [አላ ፡] በቤዛ ፡ ይትቤዘው ፡ በኵረ ፡ ሰብእ ፡ ወበኵረ ፡ እንስሳሂ ፡ ዘርኩስ ፡ ታቤዙ ።
16 ወቤዛሁ ፡ ለዘ ፡ አሐዱ ፡ ወርኁ ፡ ሤጡ ፡ ፭ሰቅሎ ፡ በሰቅሎ ፡ ዘቅዱስ ፡ ፳ኦቦሊ ፡ ውእቱ ።
17 ዘእንበለ ፡ በኵረ ፡ አልህምት ፡ ወበኵረ ፡ አባግዕ ፡ ወበኵረ ፡ አጣሊ ፡ ዘኢታቤዙ ፡ እስመ ፡ ቅዱስ ፡ ውእቱ ፡ ወትክዑ ፡ ደሞሙ ፡ ኀበ ፡ ምሥዋዕ ፡ ወሥብሖሙ ፡ ትገብር ፡ መሥዋዕተ ፡ ለእግዚአብሔር ፡ ወመዐዛ ፡ ሠናይ ።
18 ወሥጋሁ ፡ ይኩንከ ፡ ለከ ፡ በከመ ፡ ተላዕ ፡ ዘያበውኡ ፡ ወበከመ ፡ መዝራዕት ፡ ዘየማን ፡ ይኩንከ ፡ ለከ ።
19 ኵሉ ፡ መባእ ፡ ዘቅዱስ ፡ ኵሉ ፡ ዘይፈልጡ ፡ ደቂቀ ፡ እስራኤል ፡ ለእግዚአብሔር ፡ ወሀብኩካሁ ፡ ለከ ፡ ወለደቂቅከ ፡ ወለአዋልዲከ ፡ ምስሌከ ፡ ሕግ ፡ ዘለዓለም ፡ ወሥርዐት ፡ ዘለ ፡ ዘላፉ ፡ እንተ ፡ ለዓለም ፡ ይእቲ ፡ ቅድመ ፡ እግዚአብሔር ፡ ለከ ፡ ወለዘርእከ ፡ እምድኅሬከ ።
20 ወነበቦ ፡ እግዚአብሔር ፡ ለአሮን ፡ እምነ ፡ ምድሮሙ ፡ ኢትወርስ ፡ ወአልብከ ፡ ክፍለ ፡ ምስሌሆሙ ፡ እስመ ፡ አነ ፡ ውእቱ ፡ ክፍልከ ፡ ወርስትከ ፡ በማእከሎሙ ፡ ለደቂቀ ፡ እስራኤል ።
21 ወለደቂቀ ፡ ሌዊኒ ፡ ናሁ ፡ ወሀብክዎሙ ፡ ዓሥራተ ፡ ዘደቂቀ ፡ እስራኤል ፡ ክፍሎሙ ፡ ህየንተ ፡ ግብሮሙ ፡ ኵሎ ፡ ዘይገብሩ ፡ እሙንቱ ፡ ግብረ ፡ ደብተራ ፡ ዘመርጡል ።
22 ወኢይበውኡ ፡ እንከ ፡ ደቂቀ ፡ እስራኤል ፡ ውስተ ፡ ደብተራ ፡ ዘመርጡል ፡ ከመ ፡ ኢይኩኖሙ ፡ አበሳ ፡ ዘለሞት ።
23 ወይግበሮ ፡ ለዝንቱ ፡ ግብረ ፡ ደብተራ ፡ ዘመርጡል ፡ ሌዋዊ ፡ ወእሙንቱ ፡ ይረክቡ ፡ ኀጣይኢሆሙ ፡ ሕግ ፡ ዘለዓለም ፡ በመዋዕሊሆሙ ፡ ወኢይወርሱ ፡ ርስተ ፡ በማእከሎሙ ፡ ለደቂቀ ፡ እስራኤል ።
24 እስመ ፡ ዓሥራቲሆሙ ፡ ለደቂቀ ፡ እስራኤል ፡ ኵ[ሎ] ፡ መባ[አ] ፡ ዘይፈልጡ ፡ ለእግዚአብሔር ፡ ወሀብክዎሙ ፡ ለሌዋውያን ፡ ክፍሎሙ ፡ ወበበይነ ፡ ዝንቱ ፡ እቤሎሙ ፡ ኢትወር[ሱ] ፡ ርስተ ፡ በማእከሎሙ ፡ ለደቂቀ ፡ እስራኤል ።
25 ወነበቦ ፡ እግዚአብሔር ፡ ለሙሴ ፡ ወይቤሎ ፤
26 ንግሮሙ ፡ ለሌዋውያን ፡ ወበሎሙ ፡ እንዘ ፡ ትብል ፡ ለእመ ፡ ነሣእክሙ ፡ እምኀበ ፡ ደቂቀ ፡ እስራኤል ፡ ዓሥራተ ፡ ዘወሀብኩክሙ ፡ እምኀቤሆሙ ፡ ክፍ[ለ] ክሙ ፡ ትፈልጡ ፡ አንትሙሂ ፡ እምኔሁ ፡ መባአ ፡ ለእግዚአብሔር ፡ ዓሥራቱ ፡ ለዓሥራት ።
27 ወይትኌለቍ ፡ ለክሙ ፡ መባአክሙ ፡ ከመ ፡ ስርናይ ፡ እምውስተ ፡ ዐውደ ፡ እክል ፡ ወከመ ፡ መባእ ፡ ዘእምውስተ ፡ ምክያደ ፡ ወይን ።
28 ከማሁ ፡ ፍልጡ ፡ አንትሙሂ ፡ እምውስተ ፡ ኵሉ ፡ መባእ ፡ ለእግዚአብሔር ፡ እምነ ፡ ዓሥራቲክሙ ፡ እምኵሉ ፡ ዘትነሥኡ ፡ እምነ ፡ ደቂቀ ፡ እስራኤል ፡ ወትሁብዎ ፡ እምኔሁ ፡ ለአሮን ፡ ካህን ፡ መባአ ፡ ለእግዚአብሔር ።
29 ኵሎ ፡ ዘይቀድሙ ፡ አብኦ ፡ እምኔሁ ፡ ይትቄደስ ።
30 ወበሎሙ ፡ ሶበ ፡ ትፈልጡ ፡ እምነ ፡ ቀዳምያት ፡ ወይትኌለቍ ፡ ሎሙ ፡ ለሌዋውያን ፡ ከመ ፡ እክል ፡ ዘእምውስተ ፡ ዐውዱ ፡ ወከመ ፡ ወይን ፡ ዘእምውስተ ፡ ምክያዱ ።
31 ወትበልዕዎ ፡ በኵሉ ፡ መካን ፡ አንትሙ ፡ ወአብያቲክሙ ፡ እስመ ፡ ዝንቱ ፡ ውእቱ ፡ ዐስብክሙ ፡ ለክሙ ፡ ህየንተ ፡ ግብረክሙ ፡ ደብተራ ፡ ዘመርጡል ።
32 ወኢይከውነክሙ ፡ በእንቲአሁ ፡ ኀጢአተ ፡ እስመ ፡ ታወፅኡ ፡ እምኔሁ ፡ ቀዳምያቲሁ ፡ ወኢታርኵሱ ፡ ቅድሳቲሆሙ ፡ ለደቂቀ ፡ እስራኤል ፡ ከመ ፡ ኢትሙቱ ።
=== chapter 19 ===
[Numeri 19]
1 ወነበቦሙ ፡ እግዚአብሔር ፡ ለሙሴ ፡ ወለአሮን ፡ ወይቤሎሙ ፤
2 ዝንቱ ፡ ትእዛዙ ፡ ለ(ኵሉ ፡) ሕግ ፡ ዘአዘዘ ፡ እግዚአብሔር ፡ ወይቤ ፡ ንግሮሙ ፡ ለደቂቀ ፡ እስራኤል ፡ ወበሎሙ ፡ ያ[ም] ጽኡ ፡ ለከ ፡ አሐተ ፡ እጐልተ ፡ ቀያሐ ፡ ንጽሕተ ፡ እንተ ፡ አልባቲ ፡ ላዕሌሃ ፡ ነውረ ፡ ወእንተ ፡ ኢተወድየ ፡ ላዕሌሃ ፡ አርዑት ።
3 ወትሁቦ ፡ ለእልዓዛር ፡ ካህን ፡ ወይወስድዋ ፡ አፍአ ፡ እምትዕይንት ፡ ውስተ ፡ መካን ፡ ንጹሕ ፡ ወይጠብሕዋ ፡ በቅድሜሁ ።
4 ወይነሥእ ፡ እልዓዛር ፡ እምውስተ ፡ ደማ ፡ ወይነዝኅ ፡ ቅድመ ፡ ገጻ ፡ ለደብተራ ፡ መርጡል ፡ እምነ ፡ ደማ ፡ ስብዕ ።
5 ወያውዕይዋ ፡ በቅድሜሁ ፡ ወማእሳኒ ፡ ወሥጋሃኒ ፡ ወደማሂ ፡ ምስለ ፡ ካዕሴሃ ፡ ወያውዕይዎ ።
6 ወይነሥእ ፡ ካህን ፡ ዕፀ ፡ አርዘ ፡ ወቈጽለ ፡ ህሦጱ ፡ ወለየ ፡ ወይወድይዎ ፡ ውስተ ፡ ማእከለ ፡ እሳታ ፡ ለይእቲ ፡ እጐልት ።
7 ወየኀፅብ ፡ አልባሲሁ ፡ ካህን ፡ ወይትኀፀብ ፡ ሥጋሁ ፡ በማይ ፡ ወእምድኅረ ፡ ዝንቱ ፡ ይበውእ ፡ ውስተ ፡ ትዕይንት ፡ ወርኩስ ፡ ውእቱ ፡ ካህን ፡ እስከ ፡ ሰርክ ።
8 ወዘአውዐያሂ ፡ የኀፅብ ፡ አልባሲሁ ፡ ወይትኀፀብ ፡ ሥጋሁ ፡ ወርኩስ ፡ ውእቱ ፡ እስከ ፡ ሰርክ ።
9 ወያስተጋብኦ ፡ ብእሲ ፡ ንጹሕ ፡ ለሐመዳ ፡ ወይክዕዎ ፡ አፍአ ፡ እምትዕይንት ፡ ውስተ ፡ መካን ፡ ንጹሕ ፡ ወይከውን ፡ ለተዐቅቦ ፡ ለትዕይንቶሙ ፡ ለደቂቀ ፡ እስራኤል ፡ ለማየ ፡ መንዝኅ ፡ የዐቅብዎ ፡ እስመ ፡ ቦቱ ፡ ያነጽሑ ።
10 ወዝክቱ ፡ ዘያስተጋብእ ፡ ሐመዳ ፡ ለይእቲ ፡ እጐልት ፡ የኀፅብ ፡ አልባሲሁ ፡ ወርኩስ ፡ ውእቱ ፡ እስከ ፡ ሰርክ ፡ ወይኩኖሙ ፡ ለደቂቀ ፡ እስራኤል ፡ ወለግዩራን ፡ ለእለ ፡ ሀለዉ ፡ ውስቴትክሙ ፡ ማእከሌክሙ ፡ ሕግ ፡ ዘለዓለም ።
11 ወዘገሰሰ ፡ በድነ ፡ ዘኵሉ ፡ ነፍሰ ፡ ሰብእ ፡ ርኩስ ፡ ውእቱ ፡ ሰቡዐ ፡ ዕለተ ።
12 ወከመዝ ፡ ያነጽሕ ፡ ርእሶ ፡ በሣልስት ፡ ዕለት ፡ ወበሳብዕት ፡ ዕለት ፡ ወይከውን ፡ ንጹሐ ፡ ወለእመሰ ፡ ኢያንጽሐ ፡ ርእሶ ፡ በሣልስትኒ ፡ ዕለት ፡ ወበሳብዕትኒ ፡ ዕለት ፡ ኢ[ይነጽሕ] ።
13 ኵሉ ፡ ዘገሰሰ ፡ በድነ ፡ ዘኵሉ ፡ ነፍሰ ፡ እጓለ ፡ እመ ፡ ሕያው ፡ ዘሞተ ፡ ወኢያንጽሐ ፡ ርእሶ ፡ አርኰሰ ፡ ደብተራሁ ፡ ለእግዚአብሔር ፡ ለትትቀጥቀጥ ፡ ይእቲ ፡ ነፍስ ፡ እምነ ፡ እስራኤል ፡ እስመ ፡ ኢያንዝኀ ፡ ላዕሌሁ ፡ ማየ ፡ መንዝኅ ፡ ርኩስ ፡ ውእቱ ፡ ወዓዲሁ ፡ ር[ኵሱ] ፡ ሀለወ ፡ ላዕሌሁ ።
14 ወከመዝ ፡ ሕጉ ፡ ለሰብእ ፡ ለእመቦ ፡ ዘሞተ ፡ በውስተ ፡ ቤት ፡ ኵሉ ፡ ዘቦአ ፡ ውስተ ፡ ውእቱ ፡ ቤት ፡ ወኵሉ ፡ ዘሀለወ ፡ ውስተ ፡ ቤት ፡ ርኩስ ፡ ውእቱ ፡ ሰቡዐ ፡ መዋዕለ ።
15 ወኵሉ ፡ ንዋይ ፡ ክሡት ፡ ወዘኢኮነ ፡ እሱረ ፡ ማእሰር ፡ ላዕሌሁ ፡ ርኩስ ፡ ውእቱ ።
16 ወኵሉ ፡ ዘገሰሰ ፡ በውስተ ፡ ምድር ፡ እመኒ ፡ ቅቱለ ፡ ወእመኒ ፡ በድን ፡ አው ፡ ዐጽመ ፡ ሰብእ ፡ አው ፡ መቃብር ፡ ርኩስ ፡ ውእቱ ፡ ሰቡዐ ፡ መዋዕለ ።
17 ወያመጽኡ ፡ ሎቱ ፡ ለዝክቱ ፡ ርኩስ ፡ እምውስተ ፡ ሐመዳ ፡ ለእንታክቲ ፡ እንተ ፡ አውዐዩ ፡ ለአንጽሖ ፡ ወይሰውጡ ፡ ውስቴቱ ፡ ማየ ፡ ጥዑም ፡ በውስተ ፡ ግምዔ ።
18 ወያመጽኡ ፡ ቈጽለ ፡ ህሶጱ ፡ ወይጠምዖ ፡ ብእሲ ፡ ንጹሕ ፡ ውስተ ፡ ውእቱ ፡ ማይ ፡ ወይነዝኅ ፡ ላዕለ ፡ ውእቱ ፡ ቤት ፡ [ወ] ላዕለ ፡ ንዋዩ ፡ ወላዕለ ፡ ኵሉ ፡ ነፍስ ፡ ዘሀለወ ፡ ህየ ፡ ወዲበ ፡ ዘገሰሰ ፡ ዐጽመ ፡ ሰብእ ፡ ወእመኒ ፡ ቅቱለ ፡ ወእመኒ ፡ በድን ፡ ወእመኒ ፡ መቃብር ።
19 ወይነዝኆ ፡ ዘንጹሕ ፡ ለርኩስ ፡ በሣልስት ፡ ዕለት ፡ ወበሳብዕት ፡ ዕለት ፡ ወይነጽሕ ፡ በሳብዕት ፡ ዕለት ፡ ወየኀፅብ ፡ አልባሲሁ ፡ ወይትኅፀብ ፡ ሥጋሁ ፡ በማይ ፡ ወርኩስ ፡ ውእቱ ፡ እስከ ፡ ሰርክ ።
20 ወብእሲ ፡ ዘረኵሰ ፡ ወኢያንጽሐ ፡ ርእሶ ፡ ለትሠሮ ፡ ይእቲ ፡ ነፍስ ፡ እምነ ፡ ማእከለ ፡ ትዕይንት ፡ እስመ ፡ አርኰሰት ፡ ቅድሳቲሁ ፡ ለእግዚአብሔር ፡ እስመ ፡ ማየ ፡ መንዝኅ ፡ ኢተነዝኀ ፡ ላዕሌሁ ፡ ርኩስ ፡ ውእቱ ።
21 ወይኩንክሙ ፡ ሕግ ፡ ዘለዓለም ፤ ወዘይነዝኅ ፡ ማየ ፡ መንዝኅ ፡ የኀፅብ ፡ አልባሲሁ ፡ ወዘገሰሶ ፡ ለ[ማየ ፡] መንዝኅ ፡ ርኩስ ፡ ውእቱ ፡ እስከ ፡ ሰርክ ።
22 ወኵሉ ፡ ዘገሰሶ ፡ ለርኩስ ፡ ይረኵስ ፡ ወነፍስ ፡ እንተ ፡ ገሰሰቶ ፡ ርኵስት ፡ ይእቲ ፡ እስከ ፡ ሰርክ ።
=== chapter 20 ===
[Numeri 20]
1 ወበጽሑ ፡ ደቂቀ ፡ እስራኤል ፡ ኵሉ ፡ ተዓይኒሆሙ ፡ ውስተ ፡ ገዳም ፡ ዘ[ፂን] ፡ በቀዳሚ ፡ ወርኅ ፡ ወነበረ ፡ ሕዝብ ፡ ውስተ ፡ ቃዴስ ፡ ወሞተት ፡ በህየ ፡ ማርያም ፡ ወተቀብረት ፡ ህየ ።
2 ወኦልቦቱ ፡ ማየ ፡ ለትዕይንት ፡ ወተጋብኡ ፡ ላዕለ ፡ ሙሴ ፡ ወላዕለ ፡ አሮን ።
3 ወፀአልዎ ፡ ሕዝብ ፡ ለሙሴ ፡ ወይቤልዎ ፡ ኀየሰነ ፡ ንሙት ፡ በሞተ ፡ አኀዊነ ፡ በቅድመ ፡ እግዚአብሔር ።
4 ወለምንት ፡ አውፃእክሙ ፡ ትዕይንቶ ፡ ለእግዚአብሔር ፡ ውስተ ፡ ዝንቱ ፡ ገዳም ፡ ከመ ፡ ትቅትሉነ ፡ ወለእንስሳነሂ ።
5 ወለምንት ፡ ዝንቱ ፡ ዘአውፃእክሙነ ፡ እምነ ፡ ግብጽ ፡ ከመ ፡ ታምጽኡነ ፡ ውስተ ፡ ዝንቱ ፡ መካን ፡ እኩይ ፡ መካን ፡ ዘኢይዘ[ራ]እ ፡ ወዘአልቦ ፡ በለሰ ፡ ወአልቦቱ ፡ አዕጻደ ፡ ወይን ፡ ወአልቦ ፡ ሮማን ፡ ወአልቦ ፡ ማየ ፡ ለሰትይ ።
6 ወመጽኡ ፡ ሙሴ ፡ ወአሮን ፡ እምቅድመ ፡ ገጾሙ ፡ ለትዕይንት ፡ ኀበ ፡ ኆኅተ ፡ ደብተራ ፡ ዘመርጡል ፡ ወወድቁ ፡ በገጾሙ ፡ ወአስተርአየ ፡ ስብሐተ ፡ እግዚአብሔር ፡ ሎሙ ።
7 ወነበቦ ፡ እግዚአብሔር ፡ ለሙሴ ፡ ወይቤሎ ፤
8 ንሥኣ ፡ ለእንታክቲ ፡ በትር ፡ ወአስተጋብኡ ፡ ትዕይንተ ፡ አንተ ፡ ወአሮን ፡ እኁከ ፡ ወበልዋ ፡ ለኰኵሕ ፡ በቅድሜሆሙ ፡ ወትሁብ ፡ ማያ ፡ ወታወፅኡ ፡ ሎሙ ፡ ማየ ፡ እምውስተ ፡ ኰኵሕ ፡ ወታሰትዩ ፡ ትዕይንተ ፡ ወእንስሳሆሙኒ ።
9 ወነሥአ ፡ ሙሴ ፡ ለይእቲ ፡ በትር ፡ እንተ ፡ እምቅድሜሁ ፡ ለእግዚአብሔር ፡ በከመ ፡ አዘዞ ፡ እግዚአብሔር ።
10 ወአስተጋብእዎሙ ፡ ሙሴ ፡ ወአሮን ፡ ለትዕይንት ፡ ቅድሜሃ ፡ ለይእቲ ፡ ኰኵሕ ፡ ወይቤሎሙ ፡ ስምዑኒ ፡ ከሓድያን ፡ ቦኑ ፡ እምነ ፡ ዛቲ ፡ ኰኵሕ ፡ ናወፅእ ፡ ለክሙ ፡ ማየ ።
11 ወአልዐለ ፡ ሙሴ ፡ እዴሁ ፡ ወዘበጣ ፡ ለይእቲ ፡ ኰኵሕ ፡ በእንታክቲ ፡ በትር ፡ ካዕበ ፡ ወወፅአ ፡ ማይ ፡ ብዙኅ ፡ ወሰትዩ ፡ ትዕይንት ፡ ወእንሳሆሙኒ ።
12 ወይቤሎሙ ፡ እግዚአብሔር ፡ ለሙሴ ፡ ወለአሮን ፡ እስመ ፡ ኢአመንክሙ ፡ ከመ ፡ ትቀድሱኒ ፡ ቅድሜሆሙ ፡ ለደቂቀ ፡ እስራኤል ፡ በበይነ ፡ ዝንቱ ፡ ኢታበውእዎሙ ፡ አንትሙ ፡ ለዛቲ ፡ ትዕይንት ፡ ውስተ ፡ ምድር ፡ እንተ ፡ አነ ፡ ወሀብክዎሙ ።
13 ወዝንተ ፡ ማይ ፡ ዘቅስት ፡ ውእቱ ፡ እስመ ፡ ተዋቀሱ ፡ ደቂቀ ፡ እስራኤል ፡ ቅድመ ፡ እግዚአብሔር ።
14 ወፈነወ ፡ ሙሴ ፡ መላእክተ ፡ እምነ ፡ ቃዴስ ፡ ኀበ ፡ ንጉሠ ፡ ኤዶም ፡ እንዘ ፡ ይብል ፡ ከመዝአ ፡ ይቤአ ፡ እኁከአ ፡ እስራኤል ፡ ለሊከ ፡ ታአምር ፡ ኵሎ ፡ ሕማመነ ፡ ዘረከብነ ።
15 ወወረዱ ፡ አበዊነ ፡ ውስተ ፡ ግብጽ ፡ ወነበሩ ፡ ውስተ ፡ ግብጽ ፡ ብዙኀ ፡ መዋዕለ ፡ ወሣቀዩነ ፡ ግብጽ ፡ ወለአበዊነሂ ።
16 ወጸራኅነ ፡ ኀበ ፡ እግዚአብሔር ፡ ወሰምዐ ፡ እግዚአብሔር ፡ ቃለነ ፡ ወፈነወ ፡ መልአኮ ፡ ወአውጽአነ ፡ እምነ ፡ ግብጽ ፡ ወይእዜኒ ፡ ሀለውነ ፡ ውስተ ፡ ሀገር ፡ ቃደስ ፡ ውስተ ፡ ደወለ ፡ ብሔርከ ።
17 ወአኅልፈነ ፡ እንተ ፡ ምድርከ ፡ ወኢንኅልፍ ፡ እንተ ፡ ላዕለ ፡ ገራኅት ፡ ወኢላዕለ ፡ አዕጻደ ፡ ወይን ፡ ወኢንሰቲ ፡ እምዐዘቃት ፡ ማየ ፤ ፍኖተ ፡ መጽያኅተ ፡ ነሐውር ፡ ወኢንትገሐሥ ፡ ኢለየማንአ ፡ ወኢለፀጋምአ ፡ እስከአ ፡ ነኀልፍአ ፡ እምደወልከአ ።
18 ወይቤሎ ፡ ኤዶም ፡ ኢተኀልፍአ ፡ እንተአ ፡ ላዕሌየ ፡ ወእመአኮሰአ ፡ ንትቃተልአ ፡ እወጽእ ፡ እትቀበልከአ ።
19 ወይቤልዎ ፡ ደቂቀ ፡ እስራኤል ፡ እንተአ ፡ መንገለአ ፡ አድባር ፡ ንኅልፍ ፡ ወለእመኒ ፡ ሰተይነ ፡ እምነ ፡ ማይከ ፡ ንሕነ ፡ ወእንስሳነ ፡ ሤጦ ፡ ንሁበከ ፡ ወዝንቱሰ ፡ ኢኮነ ፡ ወኢምንተኒ ፡ እንተ ፡ መንገለ ፡ ደብርአ ፡ ንኅልፍአ ።
20 ወይቤ ፡ ኢትኅልፍአ ፡ እንተአ ፡ ላዕሌየአ ፤ ወወፅአ ፡ ኤዶም ፡ ተቀበሎ ፡ ምስለ ፡ ሰብእ ፡ ክቡድ ፡ ወበእድ ፡ ጽንዕት ።
21 ወኢፈቀደ ፡ ኤዶም ፡ የሀቦ ፡ ለእስራኤል ፡ ምኅላፈ ፡ እንተ ፡ ደወሉ ፡ ወተግሕሰ ፡ እስራኤል ፡ እምኔሁ ።
22 ወግዕዙ ፡ እምነ ፡ ቃዴስ ፡ ወኀደሩ ፡ ደቂቀ ፡ እስራኤል ፡ ኵሉ ፡ ትዕይንት ፡ ውስተ ፡ ደብረ ፡ ሆር ።
23 ወይቤሎሙ ፡ እግዚአብሔር ፡ ለሙሴ ፡ ወለአሮን ፡ በደብረ ፡ ሆር ፡ በመንገለ ፡ ደወለ ፡ ምድሩ ፡ ለኤዶም ፡ እንዘ ፡ ይብል ፤
24 ለይትወሰክ ፡ አሮን ፡ ኀበ ፡ ሕዝቡ ፡ እስመ ፡ ኢትበውኡ ፡ ውስተ ፡ ይእቲ ፡ ምድር ፡ እንተ ፡ አነ ፡ ወሀብክዎሙ ፡ ለደቂቀ ፡ እስራኤል ፡ እስመ ፡ አምዓዕክሙኒ ፡ በኀበ ፡ ማየ ፡ ቅስት ።
25 ንሥኦ ፡ ለአሮን ፡ ወለእልዓዛር ፡ ወልዱ ፡ ወአዕርጎሙ ፡ ውስተ ፡ ደብረ ፡ ሆር ፡ በቅድመ ፡ ኵሉ ፡ ትዕይንት ።
26 ወንሣእ ፡ አልባሲሁ ፡ ለአሮን ፡ እምላዕሌሁ ፡ ወአልብሶ ፡ ለአልዓዛር ፡ ወልዱ ፡ ወይትወሰክ ፡ አሮን ፡ ወይሙት ፡ በህየ ።
27 ወገብረ ፡ ሙሴ ፡ በከመ ፡ አዘዞ ፡ እግዚአብሔር ፡ ወአዕረጎሙ ፡ ውስተ ፡ ደብረ ፡ ሆር ፡ በቅድመ ፡ ኵሉ ፡ ትዕይንት ።
28 ወነሥአ ፡ አልባሲሁ ፡ ለአሮን ፡ እምላዕሌሁ ፡ ወአልበሶ ፡ ለእልዓዛር ፡ ወልዱ ፡ ወሞተ ፡ አሮን ፡ በውስተ ፡ ርእሰ ፡ ደብር ፡ ወወረዱ ፡ ሙሴ ፡ ወእልዓዛር ፡ እምነ ፡ ደብር ።
29 ወርእዩ ፡ ኵሉ ፡ ትዕይንት ፡ ከመ ፡ ሐለፈ ፡ አሮን ፡ ወበከይዎ ፡ ለአሮን ፡ ፴መዋዕለ ፡ ኵሉ ፡ ቤተ ፡ እስራኤል ።
=== chapter 21 ===
[Numeri 21]
1 ወሰምዐ ፡ ከናአን ፡ ንጉሠ ፡ አራድ ፡ ዘይነብር ፡ ውስተ ፡ ገዳም ፡ ከመ ፡ መጽአ ፡ እስራኤል ፡ እንተ ፡ ፍኖተ ፡ አታርን ፡ ወተቀበሎሙ ፡ ለእስራኤል ፡ ወማህረኩ ፡ እምኔሆሙ ፡ ፄዋ ።
2 ወበፅዐ ፡ እስራኤል ፡ ብፅዓተ ፡ ለእግዚአብሔር ፡ ወይቤ ፡ ለእመ ፡ አግብኦ ፡ እግዚአብሔር ፡ ለዝንቱ ፡ ሕዝብ ፡ ሊተ ፡ አዐልሎ ፡ ሎቱ ፡ ወለአህጉሪሁ ።
3 ወሰምዐ ፡ እግዚአብሔር ፡ ቃሎ ፡ ለእስራኤል ፡ ወአግብኦሙ ፡ ለከናአን ፡ ውስተ ፡ እደዊሆሙ ፡ ወአዕለልዎሙ ፡ ሎሙ ፡ ወለአህጉሪሆሙ ፡ ወሰመዩ ፡ ስሞ ፡ ለውእቱ ፡ መካን ፡ ማዕለልት ።
4 ወግዕዙ ፡ (አፍአ ፡) እምነ ፡ ደብ[ረ ፡ ሆር ፡] መንገለ ፡ ፍኖተ ፡ ባሕረ ፡ ኤርትራ ፡ ወዖድዎ ፡ ለምድረ ፡ ኤዶም ፡ ወተቈጥዐ ፡ ሕዝብ ፡ በፍኖት ።
5 ወሐመይዎ ፡ ለእግዚአብሔር ፡ ወለሙሴ ፡ ወይቤልዎ ፡ ለምንት ፡ አውፃእከነ ፡ እምነ ፡ ግብጽ ፡ ከመ ፡ ትቅትለነ ፡ በውስተ ፡ ዝንቱ ፡ ገዳም ፡ እስመ ፡ አልቦቱ ፡ እክለ ፡ ወአልቦቱ ፡ ማየ ፡ ወተቈጥዐት ፡ ነፍስነ ፡ በዝንቱ ፡ ኅብስት ፡ ዘአልቦ ፡ በቍዐ ።
6 ወፈነወ ፡ እግዚአብሔር ፡ አርዌ ፡ ምድር ፡ ላዕለ ፡ ሕዝብ ፡ ዘይቀትሎሙ ፡ ወይነስኮሙ ፡ ለሕዝብ ፡ ወይመውቱ ፡ ሕዝብ ፡ ብዙኃን ፡ እምደቂቀ ፡ እስራኤል ።
7 ወመጽአ ፡ ሕዝብ ፡ ኀበ ፡ ሙሴ ፡ ወይቤልዎ ፡ አበስነ ፡ እስመ ፡ ሐመይናሁ ፡ ለእግዚአብሔር ፡ ወለከኒ ፡ ጸሊ ፡ እንከሰ ፡ ኀበ ፡ እግዚአብሔር ፡ ወያሴስል ፡ እምኔነ ፡ አርዌ ፡ ምድር ።
8 ወጸለየ ፡ ሙሴ ፡ ኀበ ፡ እግዚአብሔር ፡ በእንተ ፡ ሕዝብ ፡ ወይቤሎ ፡ እግዚአብሔር ፡ ለሙሴ ፡ ግበር ፡ ለከ ፡ አርዌ ፡ ወአንብሮ ፡ ኀበ ፡ ይትኤመሩ ፡ ወእምከመ ፡ ነሰከ ፡ አርዌ ፡ ምድር ፡ ሰብአ ፡ ኵሉ ፡ ዘተነስከ ፡ ለይርአዮ ፡ ወለይኅየው ።
9 ወገብረ ፡ ሙሴ ፡ አርዌ ፡ ምድር ፡ ዘብርት ፡ ወአቀሞ ፡ ኀበ ፡ ይትኤመሩ ፡ ወኮነ ፡ እምከመ ፡ ነሰከ ፡ አርዌ ፡ ምድር ፡ ሰብአ ፡ ይኔጽሮ ፡ ለዝክቱ ፡ አርዌ ፡ ምድር ፡ ዘብርት ፡ ወየሐዩ ።
10 ወግዕዙ ፡ ደቂቀ ፡ እስራኤል ፡ ወኀደሩ ፡ ውስተ ፡ ኦቦት ።
11 ወግዕዙ ፡ እምነ ፡ ኦቦት ፡ ወኀደሩ ፡ ውስተ ፡ ኬልጋይ ፡ ማዕዶተ ፡ ውስተ ፡ ገዳም ፡ እንተ ፡ አንጻረ ፡ ገጹ ፡ ለሞአብ ፡ መንገለ ፡ ምሥራቀ ፡ ፀሐይ ።
12 ወግዕዙ ፡ እምህየ ፡ ወኀደሩ ፡ ውስተ ፡ ቈላተ ፡ ዛሬት ።
13 ወግዕዙ ፡ እምህየ ፡ ወኀደሩ ፡ ውስተ ፡ ማዕዶተ ፡ አርኖን ፡ ዘይክዑ ፡ እምውስተ ፡ አድባር ፡ ዘአሞሬዎን ፡ እስመ ፡ ደወሎሙ ፡ ውእቱ ፡ ለሞአብ ፡ ወማእከለ ፡ ሞአብ ፡ ወማእከለ ፡ አሞሬዎን ፡ ውእቱ ።
14 ወበበይነ ፡ ዝንቱ ፡ ይብል ፡ ውስተ ፡ መጽሐፍ ፡ ፀብኡ ፡ ለእግዚአብሔር ፡ አውዐያ ፡ ለዞዖም ።
15 ወአቀመ ፡ ወሓይዝተ ፡ አርኖን ፡ ዘሀለወ ፡ ውስተ ፡ ዔር ፡ ዘይሰመይ ፡ ደወለ ፡ ሞአብ ።
16 ወእምህየ ፡ ውእቱ ፡ ዐዘቅት ፤ ዐዘቅት ፡ ዘይቤሎ ፡ እግዚአብሔር ፡ ለሙሴ ፡ አስተጋብእ ፡ ሕዝበ ፡ ወእሁቦሙ ፡ ማየ ፡ ዘይሰትዩ ።
17 ይእተ ፡ አሚረ ፡ ኀለዩ ፡ እስራኤል ፡ ዛተ ፡ ማኅሌተ ፡ በኀበ ፡ ይእቲ ፡ ዐዘቅት ፡ አቅድሙ ፡ ሎቱ ፡ ዐዘቅተ ፤
18 እንተ ፡ ከረይዋ ፡ መላእክት ፡ ወወቀርዋ ፡ ነገሥተ ፡ አሕዛብ ፡ በምኵናኖሙ ፤ ወእምይአቲ ፡ ዐዘቅት ፡ ውስተ ፡ መንተናይን ።
19 ወእምነ ፡ መንተናይን ፡ ውስተ ፡ ናሐሊየል ፡ ወእምነ ፡ ናሐሊየል ፡ ውስተ ፡ ባሞት ።
20 ወእምነ ፡ ባሞት ፡ ውስተ ፡ አናጴን ፡ እንተ ፡ ውስተ ፡ ገዳም ፡ ዘሞአብ ፡ እምኀበ ፡ ርእሱ ፡ ለዘ ፡ ንዱቅ ፡ ዘይኔጽር ፡ መንገለ ፡ ገጸ ፡ ገዳም ።
21 ወፈነወ ፡ እስራኤል ፡ ተናብልተ ፡ ኀበ ፡ ሴዎን ፡ ንጉሠ ፡ አሞሬዎን ፡ በቃለ ፡ ሰላም ፡ እንዘ ፡ ይብል ፤
22 ንኅልፍአ ፡ እንተአ ፡ ምድርከ ፡ ወመንገደ ፡ ነኀልፍ ፡ ወኢንትገሐሥ ፡ ኢውስተ ፡ ገራህት ፡ ወኢውስተ ፡ ዐጸደ ፡ ወይን ፡ ወኢንሰቲ ፡ ማየ ፡ እምውስተ ፡ ዐዘቃቲከ ፡ ፍኖተ ፡ መጽያሕተ ፡ ነሐውር ፡ እስከአ ፡ ነሐልፍአ ፡ እምደወልከአ ።
23 ወኢአብሖሙ ፡ ሴዎን ፡ ለእስራኤል ፡ ይኅልፉ ፡ እንተ ፡ ደወሉ ፡ ወአስተጋብአ ፡ ሴዎን ፡ ኵሎ ፡ ሰብኦ ፡ ወወፅአ ፡ ይትቃተሉሙ ፡ ለእስራኤል ፡ ውስተ ፡ ገዳም ፡ ወበጽሐ ፡ ውስተ ፡ ኢየሰ ፡ ወተቃተሎሙ ፡ ለእስራኤል ።
24 ወቀተልዎሙ ፡ እስራኤል ፡ ቀትለ ፡ በኀፂን ፡ ወገብአ ፡ ሎሙ ፡ ብሔሩ ፡ እምነ ፡ አርኖን ፡ እስከ ፡ ኢያቦቅ ፡ እስከ ፡ ደቂቀ ፡ ዐማን ፡ እስመ ፡ ኢያዜር ፡ ደወሎሙ ፡ ውእቱ ፡ ለደቂቀ ፡ ዐማን ።
25 ወነሥአ ፡ እስራኤል ፡ ኵሎን ፡ ውእቶን ፡ አህጉረ ፡ ወነበረ ፡ እስራኤል ፡ ውስተ ፡ ኵሉ ፡ አህጉረ ፡ አሞሬዎን ፡ በሔሴቦን ፡ ወበኵሉ ፡ ደወላ ።
26 እስመ ፡ ቦቱ ፡ በሔሴቦን ፡ አህጉረ ፡ ሴዎን ፡ ንጉሠ ፡ አሞሬዎን ፡ ወውእቱ ፡ ዘፀብኦ ፡ ቀዲሙ ፡ ለንጉሠ ፡ ሞአብ ፡ ወነሥአ ፡ ኵሎ ፡ ምድሮ ፡ እምነ ፡ አሮኤር ፡ እስከ ፡ አርኖን ።
27 ወበእንተ ፡ ዝንቱ ፡ ይብሉ ፡ ሰብአ ፡ ንግመጥስጤ ፡ [ሑ]ሩ ፡ ውስተ ፡ ሔሴቦን ፡ ከመ ፡ ትትነደቅ ፡ ወይትገበር ፡ አህጉረ ፡ ሴዎን ።
28 እስመ ፡ እሳት ፡ ወፅአት ፡ እምነ ፡ ሔሴቦን ፡ ወነድ ፡ እምነ ፡ አህጉረ ፡ ሴዎን ፡ ወበልዐት ፡ እስከ ፡ ሞአብ ፡ ወውሕጠት ፡ ሐውልተ ፡ አርኖን ።
29 አሌ ፡ ለ[ኪ] ፡ ሞአብ ፡ ሐጐልኪዮሙ ፡ ለሕዝበ ፡ ከሞስ ፡ እለ ፡ ገብኡ ፡ ወደቂቆሙሰ ፡ አድኀንክሙ ፡ ወአዋልዲሆሙ ፡ ተፄወዋ ፡ ኀበ ፡ ሴዎን ፡ ንጉሠ ፡ አሞሬዎን ።
30 ወዘርኦሙኒ ፡ ደምሰሶሙ ፡ ሔሴቦን ፡ እስከ ፡ ዴቦን ፡ ወአንስቲያሆሙኒ ፡ ዓዲ ፡ አንደዳ ፡ እሳተ ፡ ላዕለ ፡ ሞአብ ።
31 ወነበረ ፡ እስራኤል ፡ ውስተ ፡ ኵሉ ፡ አህጉረ ፡ አሞሬዎን ።
32 ወፈነወ ፡ ሙሴ ፡ ይርአይዋ ፡ ለኢያዜር ፡ ወእምዝ ፡ አስተግብእዋ ፡ ምስለ ፡ አህጉሪሃ ፡ ወአውፅእዎሙ ፡ ለአሞሬዎን ፡ እለ ፡ ሀለዉ ፡ ህየ ።
33 ወተመይጡ ፡ ወዐርጉ ፡ ውስተ ፡ ፍኖተ ፡ ባሳን ፡ ወወፅአ ፡ ኣግ ፡ ንጉሠ ፡ ባሳን ፡ ወተቀበሎሙ ፡ ምስለ ፡ ኵሉ ፡ ሕዝቡ ፡ ከመ ፡ ይትቃተሎሙ ፡ [በ]አድራይን ።
34 ወይቤሎ ፡ እግዚአብሔር ፡ ለሙሴ ፡ ኢትፍርሆ ፡ እስመ ፡ ውስተ ፡ እዴከ ፡ አገብኦ ፡ ወለኵሉ ፡ ሕዝቡ ፡ ወለኵሉ ፡ ምድሩ ፡ ወትገብሮ ፡ ከመ ፡ ገበርካሁ ፡ ለሴዎን ፡ ንጉሠ ፡ አሞሬዎን ፡ ዘይነብር ፡ ውስተ ፡ ሔሴቦን ።
35 ወቀተሎ ፡ ሎቱ ፡ ወለደቂቁ ፡ ወለኵሉ ፡ ሕዝቡ ፡ እስከ ፡ ኢአትረፈ ፡ ሎቱ ፡ ነፋጺተ ፡ ወተወርሱ ፡ ምድሮሙ ።
=== chapter 22 ===
[Numeri 22]
1 ወግዕዙ ፡ ደቂቀ ፡ እስራኤል ፡ ወኀደሩ ፡ መንገለ ፡ ዐረባ ፡ ለሞአብ ፡ ኀበ ፡ ዮርዳንስ ፡ ዘኢያሪኮ ።
2 ወሶበ ፡ ርእየ ፡ ባለቅ ፡ ወልደ ፡ ሴፎር ፡ ኵሎ ፡ ዘገብረ ፡ እስራኤል ፡ በአሞሬዎን ፤
3 ወፈርህዎሙ ፡ ሞአብ ፡ ለሕዝብ ፡ ጥቀ ፡ እስመ ፡ ብዙኃን ፡ እሙንቱ ፡ ወተሀወኩ ፡ ሞአብ ፡ እምቅድመ ፡ ገጾሙ ፡ ለደቂቀ ፡ እስራኤል ።
4 ወይቤሎሙ ፡ ሞአብ ፡ ለአእሩገ ፡ ምድያም ፡ ይእዜ ፡ ታኀልቆሙ ፡ ዛቲ ፡ ትዕይንት ፡ ለኵሎሙ ፡ እለ ፡ አውድነ ፡ ከመ ፡ ያኀልቅ ፡ ላህም ፡ ሣዕረ ፡ ዘውስተ ፡ ገዳም ፡ ወባለቅ ፡ ወልደ ፡ ሴፎር ፡ ንጉሠ ፡ ሞአብ ፡ ውእቱ ፡ በውእቶን ፡ መዋዕል ።
5 ወፈነወ ፡ ተናብልተ ፡ ኀበ ፡ በለዓም ፡ ወልደ ፡ ቤዖር ፡ ዘፋቱራ ፡ ዘሀለወ ፡ ኀበ ፡ ፈለገ ፡ ምድሮሙ ፡ ለደቂቀ ፡ ሕዝቡ ፡ ወጸውዖ ፡ እንዘ ፡ ይብል ፡ ናሁአ ፡ ሕዝብአ ፡ ዘወጽአ ፡ እምነ ፡ ግብጽ ፡ ወናሁ ፡ ከደና ፡ ለገጸ ፡ ምድር ፡ ወሀለዉ ፡ ይነብሩ ፡ ቅሩብየ ።
6 ወይእዜኒ ፡ ነዐ ፡ ርግሞሙ ፡ ሊተ ፡ እስመ ፡ ይጸንዑ ፡ እምኔነ ፡ ለእመ ፡ ንክል ፡ ቀቲሎቶሙ ፡ እምኔሆሙ ፡ ወናውፅኦሙ ፡ እምነ ፡ ምድር ፡ እስመ ፡ ኣአምር ፡ ከመ ፡ ዘአንተ ፡ ባረከ ፡ ቡሩከ ፡ ይከውን ፡ ወዘአንተ ፡ ረገምከ ፡ ርጉመአ ፡ ይከውንአ ።
7 ወሖሩ ፡ አዕሩገ ፡ ሞአብ ፡ ወአዕሩገ ፡ ምድያም ፡ ወነሥኡ ፡ መቃስምቲሆሙ ፡ ምስሌሆሙ ፡ ወበጽሑ ፡ ኀበ ፡ በለዓም ፡ ወነገርዎ ፡ ቃለ ፡ ባለቅ ።
8 ወይቤሎሙ ፡ ቢቱ ፡ ዛተ ፡ ሌሊተ ፡ ወኣየድዐክሙ ፡ ቃለ ፡ ዘይቤለኒ ፡ እግዚአብሔር ፡ ወኀደሩ ፡ መላእክተ ፡ ሞአብ ፡ ኀበ ፡ በለዓም ።
9 ወመጽአ ፡ እግዚአብሔር ፡ ኀበ ፡ በለዓም ፡ ወይቤሎ ፡ ምንተ ፡ መጽኡ ፡ እሉ ፡ ሰብእ ፡ ኀቤከ ።
10 ወይቤሎ ፡ በለዓም ፡ ለእግዚአብሔር ፡ በላቅ ፡ ወልደ ፡ ሴፎር ፡ ንጉሠ ፡ ሞአብ ፡ ፈነዎሙ ፡ ኀቤየ ፡ እንዘ ፡ ይብል ፤
11 ናሁአ ፡ ሕዝብአ ፡ ዘወፅአ ፡ እምነ ፡ ግብጽ ፡ ወከደና ፡ ለገጸ ፡ ምድር ፡ ወሀለዉ ፡ ንቡራነ ፡ ቅሩብየ ፡ ወይእዜኒ ፡ ነዐ ፡ ርግሞሙ ፡ ሊተ ፡ ለእመ ፡ እክል ፡ ቀቲሎቶሙ ፡ ወአወፅኦሙ ፡ እምነአ ፡ ምድርአ ።
12 ወይቤሎ ፡ እግዚአብሔር ፡ ለበለዓም ፡ ኢትሑር ፡ ምስሌሆሙ ፡ ወኢትርግም ፡ ሕዝበ ፡ እስመ ፡ ቡሩክ ፡ ውእቱ ።
13 ወተንሥአ ፡ በለዓም ፡ በጽባሕ ፡ ወይቤሎሙ ፡ ለመላእክተ ፡ በላቅ ፡ ሑሩ ፡ ኀበ ፡ እግቢእክሙ ፡ ግብኡ ፡ እስመ ፡ ኢኀደገኒ ፡ እግዚአብሔር ፡ ከመ ፡ እሑር ፡ ምስሌክሙ ።
14 ወተንሥኡ ፡ መላእክተ ፡ ሞአብ ፡ ወሖሩ ፡ ኀበ ፡ ባለቅ ፡ ወይቤልዎ ፡ አበየ ፡ በለዓም ፡ መጺአ ፡ ምስሌነ ።
15 ወደገመ ፡ ዓዲ ፡ ባላቅ ፡ ፈነወ ፡ መላእክተ ፡ እለ ፡ ይበዝኁ ፡ ወእለ ፡ ይከብሩ ፡ እምእልክቱ ።
16 ወመጽኡ ፡ ኀበ ፡ በለዓም ፡ ወይቤልዎ ፡ ከመዝ ፡ ይቤ ፡ ባላቅ ፡ ወልደ ፡ ሴፎር ፡ ብቍዐኒአ ፡ ኢትትሀከይአ ፡ መጺኦተአ ፡ ኀቤየ ።
17 እስመ ፡ አክብሮ ፡ ኣከብረከ ፡ ወኵሎ ፡ ዘትቤለኒ ፡ እገብር ፡ ለከ ፡ ወነዐ ፡ ርግሞሙ ፡ ሊተአ ፡ ለዝንቱአ ፡ ሕዝብአ ።
18 ወአውሥኦሙ ፡ በለዓም ፡ ወይቤሎሙ ፡ ለመላእክተ ፡ በላቅ ፡ ምልአ ፡ ቤት ፡ ወርቀ ፡ ወብሩረ ፡ እመ ፡ ወሀበኒ ፡ በላቅ ፡ ኢይክል ፡ ተዓውሮ ፡ ቃለ ፡ እግዚአብሔር ፡ ከመ ፡ እግበር ፡ ንኡሰ ፡ አው ፡ ዐቢየ ፡ እምልብየ ።
19 ወይእዜኒ ፡ ቢቱ ፡ ዛተ ፡ ሌሊተ ፡ አንትሙ ፡ ምንተ ፡ ይገብር ፡ እግዚአብሔር ፡ ዘከመ ፡ ይብለኒ ።
20 ወመጽአ ፡ እግዚአብሔር ፡ ኀበ ፡ በለዓም ፡ በሌሊት ፡ ወይቤሎ ፡ እመ ፡ ይጸውዑከኑ ፡ መጽኡ ፡ እሉ ፡ ሰብእ ፡ ተንሥእ ፡ ወትልዎሙ ፡ አላ ፡ ቃለ ፡ ዘእቤለከ ፡ ኪያሁ ፡ ግበር ።
21 ወተንሥአ ፡ በጽባሕ ፡ በለዓም ፡ ወረሐነ ፡ አድግቶ ፡ ወሖረ ፡ ምስለ ፡ መላእክተ ፡ በላቅ ።
22 ወተምዕዐ ፡ መዐተ ፡ እግዚአብሔር ፡ እስመ ፡ ሖረ ፡ ውእቱ ፡ ወተንሥአ ፡ መልአከ ፡ እግዚአብሔር ፡ ይትዓቀፎ ፡ ወውእቱሰ ፡ ይጼዐን ፡ ዲበ ፡ አድግቱ ፡ ወክልኤቱ ፡ ደቁ ፡ ምስሌሁ ።
23 ወሶበ ፡ ርእየቶ ፡ ይእቲ ፡ አድግት ፡ ለመልአከ ፡ እግዚአብሔር ፡ ይቀውም ፡ ውስተ ፡ ፍኖት ፡ ወሰይፍ ፡ ምሉኅ ፡ ውስተ ፡ እዴሁ ፡ ተግሕሠት ፡ ይእቲ ፡ አድግት ፡ እምነ ፡ ፍኖት ፡ ወሖረት ፡ ውስተ ፡ ገዳም ፡ ወዘበጣ ፡ ለይእቲ ፡ አድግት ፡ በበትር ፡ ከመ ፡ ይግብኣ ፡ ውስተ ፡ ፍኖት ።
24 ወቆመ ፡ መልአከ ፡ እግዚአብሔር ፡ ማእከለ ፡ ፀቈን ፡ ዘዓጸደ ፡ ወይን ፡ ፀቈን ፡ እምለፌ ፡ ወፀቈን ፡ እምለፌ ።
25 ወሶበ ፡ ርእየቶ ፡ ይእቲ ፡ አድግት ፡ ለመልአከ ፡ እግዚአብሔር ፡ ተጠውቀት ፡ በፀቈን ፡ ወመለጠቶ ፡ እግሮ ፡ ለበለዓም ፡ ወደገመ ፡ ዓዲ ፡ ዘቢጦታ ።
26 ወደገመ ፡ መልአከ ፡ እግዚአብሔር ፡ ወሖረ ፡ ወቆመ ፡ ውስተ ፡ መካን ፡ ጸቢብ ፡ ኀበ ፡ አልቦ ፡ ምግሐሠ ፡ ኢለየማን ፡ ወኢለፀጋም ።
27 ወሶበ ፡ ርእየቶ ፡ ይእተ ፡ አድግት ፡ ለመልአከ ፡ እግዚአብሔር ፡ በረከት ፡ በታሕቴሁ ፡ ለበለዓም ፡ ወዘበጣ ፡ በበትር ፡ ለይእቲ ፡ አድግት ።
28 ወፈትሐ ፡ እግዚአብሔር ፡ አፉሃ ፡ ለይእቲ ፡ አድግት ፡ ወትቤሎ ፡ ለበለዓም ፡ ምንተ ፡ ረሰይኩከ ፡ ከመ ፡ ትዝብጠኒ ፡ ናሁ ፡ ሣልስከ ፡ ዝንቱ ።
29 ወይቤላ ፡ በለዓም ፡ ለይእቲ ፡ አድግት ፡ እስመ ፡ ተሳለቂ ፡ ላዕሌየ ፡ ወሶበ ፡ ብየ ፡ መጥባኅተ ፡ ውስተ ፡ እዴየ ፡ ወዳእኩ ፡ እምረገዝኩኪ ።
30 ወትቤሎ ፡ ይእቲ ፡ አድግት ፡ ለበለዓም ፡ አኮኑ ፡ አነ ፡ ይእቲ ፡ ኦድግትከ ፡ እንተ ፡ ትፄዐን ፡ እምንእስከ ፡ እስከ ፡ ዮም ፡ ወዛቲ ፡ ዕለት ፡ ቦኑ ፡ አመ ፡ ተዐውሮ ፡ ተዐወርኩከ ፡ ወገበርኩ ፡ ላዕሌከ ፡ ከመዝ ፡ ወይቤላ ፡ አልቦ ።
31 ወከሠተ ፡ እግዚአብሔር ፡ አዕይንቲሁ ፡ ለበለዓም ፡ ወርእዮ ፡ ለመልአከ ፡ እግዚአብሔር ፡ እንዘ ፡ ይቀውም ፡ ውስተ ፡ ፍኖት ፡ ወመጥባኅት ፡ ምልኅት ፡ ውስተ ፡ እዴሁ ፡ ወደነነ ፡ ወሰገደ ፡ ሎቱ ፡ በገጹ ።
32 ወይቤሎ ፡ መልአከ ፡ እግዚአብሔር ፡ ለምንት ፡ ዘበጥካሃ ፡ ለአድግትከ ፡ ናሁ ፡ ሣልስከ ፡ ዝንቱ ፡ ወናሁ ፡ አነ ፡ ወፃእኩ ፡ ከመ ፡ እትዓቀፍከ ፡ እስመ ፡ ኢኮነት ፡ ርትዕተ ፡ ፍኖትከ ፡ ቅድሜየ ፡ ወሶበ ፡ ርእየተኒ ፡ አድግትከ ፡ ተግሕሠት ፡ እምኔየ ፡ ወናሁ ፡ ሣልስ ፡ ዝንቱ ።
33 ወሶበ ፡ አኮ ፡ ዘተግሕሠት ፡ እምኔየ ፡ እምወዳእኩ ፡ ቀተልኩከ ፡ ይእዜ ፡ ወኪያሃሰ ፡ እምአሕየውክዋ ።
34 ወይቤሎ ፡ በለዓም ፡ ለመልአከ ፡ እግዚአብሔር ፡ አበስኩ ፡ እስመ ፡ ኢያእመርኩ ፡ ከመ ፡ አንተ ፡ ተቃወምከኒ ፡ ቅድሜየ ፡ ውስተ ፡ ፍኖት ፡ ወይእዜኒ ፡ ለእመ ፡ ኢትፈቅድ ፡ እግባእ ።
35 ወይቤሎ ፡ መልአከ ፡ እግዚአብሔር ፡ ለበለዓም ፡ ሑር ፡ ምስለ ፡ እሉ ፡ ሰብእ ፡ ወባሕቱ ፡ ቃለ ፡ ዘእቤለከ ፡ ኪያሁ ፡ ተዐቀብ ፡ ለነቢብ ፡ ወሖረ ፡ በለዓም ፡ ምስለ ፡ መላእክተ ፡ በላቅ ።
36 ወሶበ ፡ ሰምዐ ፡ በላቅ ፡ ከመ ፡ መጽአ ፡ በለዓም ፡ ወፅአ ፡ ተቀበሎ ፡ ውስተ ፡ ሀገረ ፡ ሞአብ ፡ እንተ ፡ ደወለ ፡ አርኖን ፡ እንተ ፡ ሀለወት ፡ ውስተ ፡ አሐዱ ፡ ኅብር ፡ እምደወሎሙ ።
37 ወይቤሎ ፡ ባላቅ ፡ ለበለዓም ፡ አኮኑ ፡ ለአኩ ፡ ለከ ፡ ይጸውዑከ ፡ ለምንት ፡ ኢመጻእከ ፡ ኀቤየ ፡ እምኢክህልኩኑ ፡ አክብሮ[ተ]ከ ።
38 ወይቤሎ ፡ በለዓም ፡ ለባላቅ ፡ ናሁ ፡ መጻእኩ ፡ ኀቤከ ፡ ይእዜኒ ፡ እክል ፡ ነቢበ ፡ ቃለ ፡ ዘወደየ ፡ እግዚአብሔር ፡ ውስተ ፡ ኦፉየ ፡ ወኪያሁ ፡ እትዓቀብ ፡ ለነቢብ ።
39 ወሖረ ፡ በለዓም ፡ ምስለ ፡ ባላቅ ፡ ወቦኡ ፡ ውስተ ፡ ሀገረ ፡ ንድቅ ።
40 ወጠብኀ ፡ ባላቅ ፡ አባግዐ ፡ ወአልህምተ ፡ ወፈነወ ፡ ለበለዓም ፡ ወለመላእክት ፡ እለ ፡ ምስሌሁ ።
41 ወኮነ ፡ ሶበ ፡ ጸብሐ ፡ ነሥኦ ፡ ባላቅ ፡ ለበለዓም ፡ ወአዕረጎ ፡ ውስተ ፡ ትእምርቱ ፡ ለበአል ፡ ወአርአዮ ፡ እምህየ ፡ አሐደ ፡ ኅብረ ፡ እምሕዝብ ።
=== chapter 23 ===
[Numeri 23]
1 ወይቤሎ ፡ በለዓም ፡ ለባላቅ ፡ ንድቅ ፡ ሊተ ፡ ዝየ ፡ ሰብዐተ ፡ ምሥዋዓተ ፡ ወአስተዳሉ ፡ ሊተ ፡ ዝየ ፡ ሰብዐተ ፡ አልህምተ ፡ ወሰብዐተ ፡ አባግዐ ።
2 ወገብረ ፡ ባላቅ ፡ በከመ ፡ ይቤሎ ፡ በለዓም ፡ ወአዕረገ ፡ ላህመ ፡ ወበግዐ ፡ ውስተ ፡ ምሥዋዕ ።
3 ወይቤሎ ፡ በለዓም ፡ ለባላቅ ፡ ቁም ፡ ኀበ ፡ መሥዋዕትከ ፡ ወአሐውር ፡ እመ ፡ ያስተርእየኒ ፡ እግዚአብሔር ፡ ቅድሜየ ፡ ወቃል ፡ ዘአስተርአየኒ ፡ አየድዐከ ፡ ወቆመ ፡ በላቅ ፡ ኀበ ፡ መሥዋዕቱ ።
4 ወበለዓምሰ ፡ ሖረ ፡ ይሰአሎ ፡ ለእግዚአብሔር ፡ ወሖረ ፡ ርቱዐ ፡ ወአስተርአዮ ፡ እግዚአብሔር ፡ ለበለዓም ፡ ወይቤሎ ፡ በለዓም ፡ ለእግዚአብሔር ፡ አስተዳለውኩ ፡ ፯አልህምተ ፡ ወአዕረጉ ፡ ላህመ ፡ ወበግዐ ፡ ውስተ ፡ ምሥዋዕ ።
5 ወወደየ ፡ እግዚአብሔር ፡ ቃለ ፡ ውስተ ፡ አፉሁ ፡ ለበለዓም ፡ ወይቤሎ ፡ ግባእ ፡ ኀበ ፡ ባላቅ ፡ ወከመዝ ፡ በል ።
6 ወገብአ ፡ ኀቤሁ ፡ ወረከቦ ፡ ይቀውም ፡ ኀበ ፡ መሥዋዕቱ ፡ ወኵሎሙ ፡ መላእክተ ፡ ሞአብ ፡ ምስሌሁ ፡ ወመጽአ ፡ መንፈሰ ፡ እግዚአብሔር ፡ ላዕሌሁ ።
7 [ወመሰ]ለ ፡ ነገ[ሮ] ፡ ወይቤ ፡ እምነ ፡ ሜስጶጦምያ ፡ ጸውዐኒ ፡ በላቅ ፡ ንጉሠ ፡ ሞአብ ፡ እምደወለ ፡ ጽባሕ ፡ እንዘ ፡ ይብል ፡ ነዐ ፡ ርግሞ ፡ ሊተ ፡ ለያዕቆብ ፡ ወነዐ ፡ ፀአሎ ፡ ሊተ ፡ ለእስራኤል ።
8 ወምንተ ፡ እፄእል ፡ ዘእግዚአብሔር ፡ ኢፀአለ ፡ ወምንተ ፡ እረግም ፡ ዘእግዚአብሔር ፡ ኢረገመ ።
9 እስመ ፡ እምአርእስተ ፡ አድባር ፡ እሬእዮ ፡ ወእምነ ፡ አውግር ፡ እሌብዎ ፡ ናሁ ፡ ሕዝብ ፡ ዘባሕቲቱ ፡ የኀድር ፡ ወኢይትኌለቍ ፡ ውስተ ፡ አሕዛብ ።
10 መኑ ፡ የአምሮ ፡ ለዘርአ ፡ ያዕቆብ ፡ ወመኑ ፡ ይኌልቆ ፡ ለሕዝበ ፡ እስራኤል ፡ ወትሙት ፡ ነፍስ[የ] ፡ ምስለ ፡ ነፍሶሙ ፡ ለጻድቃን ፡ ወይኩን ፡ ዘርእየ ፡ ከመ ፡ ዘርኦሙ ፡ ለእሉ ።
11 ወይቤሎ ፡ ባላቅ ፡ ለበለዓም ፡ ለምንት ፡ ረሰይከኒ ፤ ከመ ፡ ትርግም ፡ ሊተ ፡ ፀርየ ፡ ጸዋዕኩከ ፡ ወናሁ ፡ ባርኮ ፡ ባረከ ።
12 ወይቤሎ ፡ በለዓም ፡ ለባላቅ ፡ አኮኑ ፡ ኵሎ ፡ ዘወደየ ፡ እግዚአብሔር ፡ ውስተ ፡ አፉየ ፡ ኪያሁ ፡ እትዓቀብ ፡ ለነቢብ ።
13 ወይቤሎ ፡ ባላቅ ፡ ነዐ ፡ ዓዲ ፡ ምስሌየ ፡ ካልአ ፡ መካነ ፡ ኀበ ፡ ኢትሬእዮሙ ፡ በህየ ፡ እንበለ ፡ አሐደ ፡ ኅብረ ፡ ዘትሬኢ ፡ እምኔሆሙ ፡ ወኵሎሙሰ ፡ ኢትሬኢ ፡ ወርግሞሙ ፡ ሊተ ፡ በህየ ።
14 ወነሥኦ ፡ ወአዖዶ ፡ ውስተ ፡ ገዳም ፡ ውስተ ፡ ርእሰ ፡ ዘውቁር ፡ ወነደቀ ፡ ፯ምሥዋዓተ ፡ ወአዕረገ ፡ ላህመ ፡ ወበግዐ ፡ ውስተ ፡ ምሥዋዕ ።
15 ወይቤሎ ፡ በለዓም ፡ ለባላቅ ፡ ቁም ፡ ኀበ ፡ መሥዋዕትከ ፡ ወአንሰ ፡ አሐውር ፡ እሰአሎ ፡ ለእግዚአብሔር ።
16 ወተራከቦ ፡ እግዚአብሔር ፡ ለበለዓም ፡ ወወደየ ፡ ቃለ ፡ ውስተ ፡ አፉሁ ፡ ወይቤሎ ፡ ግባእ ፡ ኀበ ፡ በላቅ ፡ ወከመዝ ፡ በል ።
17 ወገብአ ፡ ኀቤሁ ፡ ወረከቦ ፡ ይቀውም ፡ ኀበ ፡ መሥዋዕቱ ፡ ወኵሉ ፡ መላእክተ ፡ ሞአብ ፡ ምስሌሁ ፡ ወይቤሎ ፡ ባለቅ ፡ ምንተ ፡ ይቤ ፡ እግዚአብሔር ።
18 ወ[መሰ]ለ ፡ ነገ[ሮ] ፡ ወይቤ ፡ ተንሥእ ፡ ባላቅ ፡ ወስማዕ ፡ ወአጽምእ ፡ ባላቅ ፡ ስምዐ ፡ ዘወልደ ፡ ሴፎር ።
19 አኮ ፡ ከመ ፡ ሰብእ ፡ ዘይትዬዋህ ፡ እግዚአብሔር ፡ ወአኮ ፡ ከመ ፡ እጓለ ፡ እመ ፡ ሕያው ፡ ዘይትሜአክ ፡ አንተሰ ፡ ትቤ ፡ ኢይገብር ፡ ወይነብ[ብኑ] ፡ ወኢያበጽሕ ።
20 ናሁ ፡ ለባርኮ ፡ መጻእኩ ፡ እባርክ ፡ ወኢይትመየጥ ።
21 አልቦቱ ፡ ጻማ ፡ ውስተ ፡ ያዕቆብ ፡ ወኢያስተርኢ ፡ ሕማም ፡ ላዕለ ፡ እስራኤል ፡ እግዚአብሔር ፡ አምላኩ ፡ ምስሌሁ ፡ ወክብረ ፡ መላእክት ፡ ሎቱ ።
22 እግዚአብሔር ፡ ዘአውጽኦ ፡ እምነ ፡ ብሔረ ፡ ግብጽ ፡ ከመ ፡ ክብረ ፡ ዘአሐዱ ፡ ቀርኑ ።
23 እስመ ፡ አልቦቱ ፡ ሰገለ ፡ ውስተ ፡ ያዕቆብ ፡ ወአልቦቱ ፡ መቅሰመ ፡ ውስተ ፡ እስራኤል ፡ ለለ ፡ መዋዕሊሁ ፡ ይትበሀል ፡ ለያዕቆብ ፡ ወለእስራኤል ፡ ምንተ ፡ ይገብር ፡ እግዚአብሔር ።
24 ናሁ ፡ ሕዝብ ፡ ዘይትነሣእ ፡ ከመ ፡ እጓለ ፡ አንበሳ ፡ ወይጥሕር ፡ ከመ ፡ አንበሳ ፡ ዘኢይነውም ፡ እስከ ፡ ይበልዕ ፡ እምዘነዐወ ፡ ወይሰቲ ፡ ደመ ፡ ዘቀተለ ።
25 ወይቤሎ ፡ ባላቅ ፡ ለበለዓም ፡ ኢመርገመ ፡ ትርግሞሙ ፡ ሊተ ፡ ወኢባርኮ ፡ ትባርኮሙ ።
26 ወአውሥአ ፡ በለዓም ፡ ወይቤሎ ፡ ለባላቅ ፡ ኢይቤለከኑ ፡ እንዘ ፡ እብል ፡ ቃለ ፡ ዘይቤለኒ ፡ እግዚአብሔር ፡ ኪያሁ ፡ እገብር ።
28 ወነሥኦ ፡ ባላቅ ፡ ለበለዓም ፡ ውስተ ፡ ርእሰ ፡ ፌጎር ፡ ዘየዐውድ ፡ ውስተ ፡ ገዳም ።
29 ወይቤሎ ፡ በለዓም ፡ ለባላቅ ፡ ንድቅ ፡ ሊተ ፡ ዝየ ፡ ፯ምሥዋዓተ ፡ ወአስተዳሉ ፡ ሊተ ፡ ዝየ ፡ ፯አልህምተ ፡ ወ፯አባግዐ ።
30 ወገብረ ፡ በላቅ ፡ በከመ ፡ ይቤሎ ፡ በለዓም ፡ ወአዕረገ ፡ ላህመ ፡ ወበግዐ ፡ ውስተ ፡ ምሥዋዕ ።
=== chapter 24 ===
[Numeri 24]
1 ወሶበ ፡ ርእየ ፡ በለዓም ፡ ከመ ፡ ሠናይ ፡ ውእቱ ፡ ቅድመ ፡ እግዚአብሔር ፡ በረኩቱ ፡ ለእስራኤል ፡ ኢሖረ ፡ በከመ ፡ ያለምድ ፡ መንጸረ ፡ ቅድሜሁ ፡ ለአስተቃስሞ ፡ ወሜጠ ፡ ገጾ ፡ መንገለ ፡ ገዳም ።
2 ወአልዐለ ፡ በለዓም ፡ አዕይንቲሁ ፡ ወይሬእዮሙ ፡ ለእስራኤል ፡ እንዘ ፡ ይግዕዙ ፡ በበ ፡ ሕዘቢሆሙ ፡ ወመጽአ ፡ ላዕሌሁ ፡ መንፈሰ ፡ እግዚአብሔር ።
3 ወ[መሰ]ለ ፡ ነገ[ሮ] ፡ ወይቤ ፡ ይቤ ፡ በለዓም ፡ ወልደ ፡ ቤዖር ፡ ይቤ ፡ ብእሲ ፡ ራትዕ ፤
4 ዘይሬኢ ፡ ራእየ ፡ እግዚአብሔር ፡ ዘክሡት ፡ አዕይንቲሁ ፡ እንዘ ፡ ይነውም ፤
5 እፎ ፡ ሠናይ ፡ አብያቲከ ፡ ያዕቆብ ፡ ወተዓይኒከ ፡ እስራኤል ፤
6 ወከመ ፡ አእዋም ፡ ዘይጼልል ፡ ወከመ ፡ ገነት ፡ ዘኀበ ፡ ፈለግ ፡ ወከመ ፡ ትዕይንት ፡ ዘተከለ ፡ እግዚአብሔር ፡ ወከመ ፡ አርዝ ፡ ዘኀበ ፡ ማይ ።
7 ወይወፅእ ፡ ብእሲ ፡ እምዘርኡ ፡ ወይቀኒ ፡ ብዙኀ ፡ አሕዛበ ፡ ወትት[ሌ]ዐል ፡ ጎግ ፡ መንግሥቱ ፡ ወተዐቢ ፡ መንግሥቱ ።
8 ወእግዚአብሔር ፡ መርሖ ፡ እምነ ፡ ግብጽ ፡ ከመ ፡ ክብረ ፡ ዘአሐዱ ፡ ቀርኑ ፡ ውእቱ ፡ ሎቱ ፡ ይበልዖሙ ፡ ለአሕዛበ ፡ ፀሩ ፡ ወያስተናጕዕ ፡ ስብሖሙ ፡ ወይነድፎ ፡ በአሕፃሁ ፡ ለፀር ።
9 ይሰክብ ፡ ወያዐርፍ ፡ ከመ ፡ አንበሳ ፡ ወከመ ፡ እጓለ ፡ አንበሳ ፡ መኑ ፡ ያነቅሆ ፤ እለ ፡ ይባርኩከ ፡ ቡሩካነ ፡ ይኩኑ ፡ ወእለ ፡ ይረግሙከ ፡ ርጉማነ ፡ ይኩኑ ።
10 ወተምዕዐ ፡ ባላቅ ፡ ላዕለ ፡ በለዓም ፡ ወአስተጣፍሐ ፡ በእደዊሁ ፡ ወይቤሎ ፡ በላቅ ፡ ለበለዓም ፡ ከመ ፡ ትርግሞሙ ፡ ሊተ ፡ ለጸላእትየ ፡ ጸዋዕኩከ ፡ ወናሁ ፡ ባርኮ ፡ ትባርክ ፡ ሣልስከ ፡ ዝንቱ ።
11 ወይእዜኒ ፡ እቱ ፡ ቤተከ ፡ እቤ ፡ ከመ ፡ አክብርከ ፡ ወይእዜሰ ፡ ኢያውሀበከ ፡ እግዚአብሔር ፡ ክብረ ።
12 ወይቤሎ ፡ በለዓም ፡ ለባላቅ ፡ አኮኑ ፡ ለወዓሊከኒ ፡ እለ ፡ ለአከ ፡ ኀቤየ ፡ እቤሎሙ ፡ እንዘ ፡ እብል ፤
13 ለእመ ፡ ወሀበኒ ፡ በላቅ ፡ ወርቀ ፡ ወብሩረ ፡ ምልአ ፡ ዝንቱ ፡ ቤት ፡ ኢይክል ፡ ተዐድዎ ፡ ቃለ ፡ እግዚአብሔር ፡ ከመ ፡ እግበር ፡ ሠናየ ፡ አው ፡ እኩየ ፡ እምኀቤየ ፤ ኵሎ ፡ ዘይቤለኒ ፡ እግዚአብሔር ፡ ኪያሁ ፡ እብል ።
14 ወይእዜኒ ፡ ናሁ ፡ አአቱ ፡ ቤትየ ፡ ወነዐ ፡ አይድዕከ ፡ ዘይገብሩ ፡ ዝንቱ ፡ ሕዝብ ፡ ለሕዝብከ ፡ በደኃሪ ፡ መዋዕል ።
15 ወ[መሰ]ለ ፡ ነገ[ሮ] ፡ ወይቤ ፡ ይቤ ፡ በለዓም ፡ ወልደ ፡ ቤዖር ፡ ይቤ ፡ ብእሲ ፡ ራትዕ ፡ ዘይሬኢ ፤
16 ወይሰምዕ ፡ ቃለ ፡ እግዚአብሔር ፡ ዘያአምር ፡ መዝራእቶ ፡ ለልዑል ፡ ወርእየ ፡ ራእየ ፡ እግዚአብሔር ፡ ዘክሡት ፡ አዕይንቲሁ ፡ እንዘ ፡ ይነውም ፤
17 እሬእዮ ፡ ወአኮ ፡ ይእዜ ፡ ወአስተበፅዖ ፡ ወአኮ ፡ ዘይቀርብ ፡ ይሠርቅ ፡ ኮከብ ፡ እምያዕቆብ ፡ ወይትነሣእ ፡ እምእስራኤል ፡ ወያጠፍኦሙ ፡ ለመላእክተ ፡ ሞአብ ፡ ወይጼውዎሙ ፡ ለኵሉ ፡ ደቂቀ ፡ ሴት ።
18 ወይከውኖ ፡ ኤዶም ፡ ርስቶ ፡ ወይከውን ፡ ርስቶ ፡ ዔሳው ፡ ፀሩ ፡ ወእስራኤልሰ ፡ ገብረ ፡ በኀይል ።
19 ወይትነሣእ ፡ እምነ ፡ ያዕቆብ ፡ ወያጠፍኦሙ ፡ ለእለ ፡ ድኅኑ ፡ እምነ ፡ ሀገር ።
20 ወሶበ ፡ ርእዮሙ ፡ ለዐማሌቅ ፡ [መሰ]ለ ፡ ነገ[ሮ] ፡ ወይቤ ፡ ቀዳሚሁ ፡ ለአሕዛብ ፡ ዐማሌቅ ፡ ወይጠፍእ ፡ ዘርኦሙ ።
21 ወሶበ ፡ ርእዮሙ ፡ ለቄኔዎን ፡ [መሰ]ለ ፡ ነገ[ሮ] ፡ ወይቤ ፡ ጽንዕት ፡ እከይከ ፡ ወለእመሂ ፡ ውስተ ፡ ኰኵሕ ፡ አንበርከ ፡ እጐሊከ ፤
22 ወለእመሂ ፡ ኮነ ፡ ለቤዖር ፡ እጕለ ፡ ጕሕሉት ፡ አሲርየ ፡ ይጼውወከ ።
23 ወሶበ ፡ ርእዮ ፡ ለኦግ ፡ [መሰ]ለ ፡ ነገ[ሮ] ፡ ወይቤ ፡ ኦአ ፡ መኑ ፡ የሐዩ ፡ አመ ፡ ይገብሮ ፡ እግዚአብሔር ፡ ለዝንቱ ።
24 ወይወፅእ ፡ እምእደዊሆሙ ፡ ለቀጢየዎን ፡ ወየአክዩ ፡ በአሱር ፡ ወየአክዩ ፡ ዕብራውያን ፡ ወእሙንቱሰ ፡ ኅቡረ ፡ ይጠፍኡ ።
25 ወተንሥአ ፡ በለዓም ፡ ወሖረ ፡ ወገብአ ፡ ውስተ ፡ ቤቱ ፡ ወበላቅሂ ፡ አተወ ፡ ቤቶ ።
=== chapter 25 ===
[Numeri 25]
1 ወኀደሩ ፡ ደቂቀ ፡ እስራኤል ፡ ውስተ ፡ ሰጢም ፡ ወተገመነ ፡ ሕዝብ ፡ ወዘመዉ ፡ በአዋልደ ፡ ሞአብ ።
2 ወጸውዕዎሙ ፡ ውስተ ፡ መሥዋዕተ ፡ አማልክቲሆሙ ፡ ወበልዑ ፡ ሕዝብ ፡ መሥዋዕቶሙ ፡ ወሰገዱ ፡ ለአማልክቲሆሙ ።
3 ወተፈጸመ ፡ እስራኤል ፡ ለቤዔል ፡ ፌጎር ፡ ወተምዕዐ ፡ መዐተ ፡ እግዚአብሔር ፡ ላዕለ ፡ እስራኤል ።
4 ወይቤሎ ፡ እግዚአብሔር ፡ ለሙሴ ፡ ንሥኦሙ ፡ ለመላእክተ ፡ ሕዝብ ፡ ወተዛለፎሙ ፡ ለእግዚአብሔር ፡ [*በቅድመ ፡*] ፀሐይ ፡ ወይሴስል ፡ መንሱተ ፡ መዐቱ ፡ ለእግዚአብሔር ፡ እምነ ፡ እስራኤል ።
5 ወይቤሎሙ ፡ ሙሴ ፡ ለሕዝበ ፡ እስራኤል ፡ ቅትሉ ፡ አሐዱ ፡ አሐዱ ፡ እምኔክሙ ፡ ሰብአ ፡ ቤትክሙ ፡ እለ ፡ ገብሩ ፡ ለቤዔል ፡ ፌጎር ።
6 ወናሁ ፡ አሐዱ ፡ ብእሲ ፡ እምደቂቀ ፡ እስራኤል ፡ መጽአ ፡ ወወሰዶ ፡ ለወልዱ ፡ ኀበ ፡ መድናዊት ፡ በቅድመ ፡ ሙሴ ፡ ወበቅድመ ፡ ኵሉ ፡ ተዓይኒሆሙ ፡ ለደቂቀ ፡ እስራኤል ፡ ወእሙንቱሰ ፡ ሀለዉ ፡ ይበክዩ ፡ ኀበ ፡ ኆኅተ ፡ ደብተራ ፡ ዘመርጡል ።
7 ወሶበ ፡ ርእየ ፡ ፊንሕስ ፡ ወልደ ፡ እልዓዛር ፡ ወልደ ፡ አሮን ፡ ካህን ፡ ተንሥአ ፡ እምነ ፡ ማእከለ ፡ ትዕይንት ፡ ወነሥአ ፡ ረምሐ ፡ ውስተ ፡ እዴሁ ።
8 ወቦአ ፡ ወተለዎ ፡ ለውእቱ ፡ ብእሲ ፡ እስራኤላዊ ፡ ውስተ ፡ እቶን ፡ ወረገዞሙ ፡ ለክልኤሆሙ ፡ ለውእቱ ፡ ብእሲ ፡ እስራኤላዊ ፡ ወለይእቲ ፡ ብእሲት ፡ መድናዊት ፡ እንተ ፡ መንገለ ፡ ሕምሳ ፡ ወሐደገ ፡ መቅሠፍት ፡ እምደቂቀ ፡ እስራኤል ።
9 ወኮኑ ፡ እለ ፡ ሞቱ ፡ በውስተ ፡ መቅሠፍት ፡ ፪፻-፻፵፻ ።
10 ወነበቦ ፡ እግዚአብሔር ፡ ለሙሴ ፡ ወይቤሎ ፤
11 ፊንሕስ ፡ ወልደ ፡ እልዓዛር ፡ ወልደ ፡ አሮን ፡ ካህን ፡ አኅደገኒ ፡ መዐትየ ፡ እምነ ፡ ደቂቀ ፡ እስራኤል ፡ እስመ ፡ ቀንአ ፡ ሊተ ፡ ቅንአትየ ፡ ላዕሌሆሙ ፡ ወኢያጥፋእክዎሙ ፡ ለደቂቀ ፡ እስራኤል ፡ በቀንእየ ።
12 ወከመዝ ፡ እቤ ፡ ናሁ ፡ እሁቦ ፡ ሕገ ፡ ሰላም ፤
13 ወይኩኖ ፡ ሎቱ ፡ ወለዘርኡ ፡ እምድኅሬሁ ፡ ሕገ ፡ [ክህነት ፡] ዘለዓለም ፡ እስመ ፡ ቀንአ ፡ ለአምላኩ ፡ ወአስተስረየ ፡ ለደቂቀ ፡ እስራኤል ።
14 ወስሙ ፡ ለውእቱ ፡ ብእሲ ፡ እስራኤላዊ ፡ ዘተቀትለ ፡ ዝንብሪ ፡ ወልደ ፡ ሐሎ ፡ መልአከ ፡ ቤተ ፡ አበዊሆሙ ፡ ዘስምዖን ።
15 ወስማ ፡ ለይእቲ ፡ ብእሲት ፡ መድናዊት ፡ እንተ ፡ ተቀትለት ፡ ከስቢ ፡ ወለተ ፡ ሱር ፡ መልአኮሙ ፡ ለሕዝበ ፡ ሳሞት ፡ ዘቤተ ፡ አበዊሆሙ ፡ ውእቱ ፡ ለምድያም ።
16 ወነበቦ ፡ እግዚአብሔር ፡ ለሙሴ ፡ ወይቤሎ ፡ ንግሮሙ ፡ ለደቂቀ ፡ እስራኤል ፡ ወበሎሙ ፤
17 ተፃረርዎሙ ፡ ለመድናውያን ፡ ወቅትልዎሙ ።
18 እስመ ፡ እሙንቱኒ ፡ ይፃረሩክሙ ፡ በጕሕሉት ፡ ወኵሉ ፡ ዘይትጐሐለውክሙ ፡ በእንተ ፡ ፌጎር ፡ ወበእንተ ፡ ከስቢ ፡ ወለተ ፡ መልአከ ፡ ምድያም ፡ እኅቶሙ ፡ እንተ ፡ ተቀትለት ፡ አመ ፡ ዕለተ ፡ መቅሠፍት ፡ በበይነ ፡ ፌጎር ።
=== chapter 26 ===
[Numeri 26]
1 ወኮነ ፡ እምድኅረ ፡ መቅሠፍት ፡ ወነበቦሙ ፡ እግዚአብሔር ፡ ለሙሴ ፡ ወለእልዓዛር ፡ ካህን ፡ ወይቤሎሙ ፤
2 ንሣእ ፡ እምጥንቱ ፡ አኀዝ ፡ ኵሎ ፡ ተዓይኒሆሙ ፡ ለደቂቀ ፡ እስራኤል ፡ ዘእምዕሥራ ፡ ዓም ፡ ወላዕሉ ፡ እምኔሁ ፡ በበ ፡ አብያተ ፡ አበዊሆሙ ፡ ኵሎ ፡ ዘይወፅእ ፡ ፀብአ ፡ እምውስተ ፡ እስራኤል ።
3 ወነገርዎሙ ፡ ሙሴ ፡ ወእልዓዛር ፡ ምስሌሁ ፡ በአራቦት ፡ ዘሞአብ ፡ በኀበ ፡ ዮርዳንስ ፡ ዘመንገለ ፡ ኢያሪኮ ፡ ወይቤልዎሙ ፤
4 ዘእም፳ዓም ፡ ወላዕሉ ፡ እምኔሁ ፡ በከመ ፡ አዘዞ ፡ እግዚአብሔር ፡ ለሙሴ ፡ ወደቂቀ ፡ እስራኤልሰ ፡ እለ ፡ ወፅኡ ፡ እምግብጽ ፤
5 ሮቤል ፡ በኵሩ ፡ ለእስራኤል ፡ ወደቂቀ ፡ ሮቤል ፡ ሄኖኅ ፡ ወነገደ ፡ ሄኖኅ ፤ ዘፈሉ ፡ ነገደ ፡ ፈሉይ ።
6 ወዘአስሮንሂ ፡ ነገደ ፡ አስሮኒ ፡ ወዘካርም ፡ ነገደ ፡ ካርሚ ።
7 እሉ ፡ ሕዝብ ፡ ዘሮቤል ፡ ወኮነ ፡ ኍለቊሆሙ ፡ ፬፻-፻፴፻፯፻፴ ።
8 ወደቂቀ ፡ ፈሉ ፡ ኤሊያብ ።
9 ወደቂቀ ፡ ኤሊያብ ፡ ናሙኤል ፡ ወዳታን ፡ ወአቤሮን ፡ እሉ ፡ ዐበይተ ፡ ትዕይንት ፡ እሉ ፡ እሙንቱ ፡ እለ ፡ ቆሙ ፡ ላዕለ ፡ ሙሴ ፡ ወአሮን ፡ ውስተ ፡ ትዕይንተ ፡ ቆሬ ፡ አመ ፡ ተቃወሙ ፡ ላዕለ ፡ እግዚአብሔር ።
10 ወአብቀወት ፡ አፉሃ ፡ ምድር ፡ ወውሕ[ጠቶ]ሙ ፡ ወለቆሬሂ ፡ ወሞተ ፡ ወትዕይንቲሆሙኒ ፡ አመ ፡ በልዐቶሙ ፡ እሳት ፡ ፪፻፶ወኮኑ ፡ ለተአምር ።
11 ወደቂቀ ፡ ቆሬሰ ፡ ኢሞቱ ።
12 ወደቂቀ ፡ ስምዖንሂ ፡ ወዘናሙሔልሂ ፡ ውስተ ፡ ነገደ ፡ ደቂቀ ፡ ናሙሔሊ ፡ ወዘኢያምንሂ ፡ ውስተ ፡ ነገደ ፡ ደቂቀ ፡ ኢያምኒ ፡ ወዘኢያክንሂ ፡ ውስተ ፡ ነገደ ፡ ደቂቀ ፡ ኢያክኒ ።
13 ወዘዘራሂ ፡ ውስተ ፡ ነገደ ፡ ደቂቀ ፡ ዘራይ ፡ ወዘሳውልሂ ፡ ውስተ ፡ ነገደ ፡ ሳውል ።
14 እሉ ፡ ሕዝብ ፡ ዘስምዖን ፡ ወኍለቊሆሙ ፡ ፪፻-፻፳፻፪፻ ።
15 ወደቂቀ ፡ ይሁዳሂ ፡ ዔር ፡ ወአውናን ፡ ወሴሎን ፡ ወፋሬስ ፡ ወዛራ ፡ ወሞቱ ፡ ዔር ፡ ወአውናን ፡ በምድረ ፡ ከናአን ።
16 ወኮኑ ፡ ደቂቀ ፡ ይሁዳ ፡ በበ ፡ ሕዘቢሆሙ ፡ ዘሴሎን ፡ ውስተ ፡ ነገደ ፡ ዘሴሎኒ ፡ ወዘፋሬስ ፡ ውስተ ፡ ነገደ ፡ ፋሬስ ፡ ወዘዛራ ፡ ውስተ ፡ ነገደ ፡ ዛራይ ።
17 ወኮኑ ፡ ደቂቀ ፡ ፋሬስ ፡ ለአስሮን ፡ ውስተ ፡ ነገደ ፡ አስሮኒ ፡ ወዘያሙሔልሂ ፡ ውስተ ፡ ነገደ ፡ ያሙሔሊ ።
18 እሉ ፡ ሕዝብ ፡ ዘይሁዳ ፡ ወኍለቊሆሙ ፡ ፯፻-፻፷፻፭፻ ።
19 ወደቂቀ ፡ ይስካርሂ ፡ በበ ፡ ሕዘቢሆሙ ፡ ዘቶላ ፡ ውስተ ፡ ነገደ ፡ ቶላይ ፡ [ዘ]ፎሐ ፡ ውስተ ፡ ነገደ ፡ ፉሓይ ።
20 ወዘያሱብ ፡ ውስተ ፡ ነገደ ፡ ያሱብ ፡ ወዘስምራ ፡ ውስተ ፡ ነገደ ፡ ስምራሚ ።
21 እሉ ፡ ሕዝብ ፡ ዘይስካር ፡ ወኍለቊሆሙ ፡ ፯፻-፻፵፻፬፻ ።
22 ወደቂቀ ፡ ዛቡሎንሂ ፡ በበ ፡ ሕዘቢሆሙ ፡ ዘሳሬድ ፡ ውስተ ፡ ነገደ ፡ ሳሬዲ ፡ ወዘአሎ ፡ ውስተ ፡ ነገደ ፡ አሎኒ ፡ ወዘአሌል ፡ ውስተ ፡ ነገደ ፡ አሌሊ ።
23 እሉ ፡ ሕዝብ ፡ ዘዛቡሎን ፡ ወኍለቊሆሙ ፡ ፯፻-፻[፭]፻ ።
24 ወደቂቀ ፡ ጋድሂ ፡ በበሕዘቢሆሙ ፡ ዘሳፎን ፡ ነገደ ፡ ሳፎኒ ፡ ወዘሕግ ፡ ነገደ ፡ ሕጊ ፡ ወዘሱኒ ፡ ነገደ ፡ ሱኒ ።
25 ወዘዐዜን ፡ ነገደ ፡ ዐዜኒ ፡ ወዘሳድ ፡ ነገደ ፡ ሳዲ ።
26 ወዘአሮሐድ ፡ ነገደ ፡ አሮሐዲ ፡ ወዘአሪሔል ፡ ነገደ ፡ አሪሔሊ ።
27 እሉ ፡ ሕዝበ ፡ ጋድ ፡ ወኍለቊሆሙ ፡ ፬፻-፻፵፻፭፻ ።
28 ወደቂቀ ፡ አሴርሂ ፡ በበ ፡ ሕዘቢሆሙ ፡ ዘኢያምን ፡ ነገደ ፡ ኢያሚን ፡ ወዘኢያሱ ፡ ነገደ ፡ ኢያሱይ ፡ ወዘባርያ ፡ ነገደ ፡ ባራዊ ።
29 ወዘኮቦር ፡ ነገደ ፡ ኮቦሪ ፡ ወዘሜልኪየል ፡ ነገደ ፡ ሜልኪየል ።
30 ወስማ ፡ ለወለተ ፡ አሴር ፡ ሳራ ።
31 እሉ ፡ ሕዝበ ፡ አሴር ፡ ወኍለቊሆሙ ፡ ፬፻-፻፴፻፯፻ ።
32 ወደቂቀ ፡ ዮሴፍ ፡ በበ ፡ ሕዘቢሆሙ ፡ ማናሴ ፡ ወኤፍሬም ።
33 ወደቂቀ ፡ ማናሴ ፡ ዘማክር ፡ ነገደ ፡ ማኪር ፡ ወማክር ፡ ወለዶ ፡ ለገለአድ ፤
34 [ዘ]ገላአድ ፡ ነገደ ፡ ገላአዲ ።
35 እሉ ፡ ደቂቀ ፡ ገላአድ ፡ ዘአኪየዜር ፡ ነገደ ፡ አኪየዜሪ ፡ [*ወዘኬሌግ ፡ ነገደ ፡ ኬሌጊ ፡*] ፡ ወዘኤሶርየል ፡ ነገደ ፡ ኤሶሪየሊ ፡ ወዘአሲኬም ፡ ነገደ ፡ ሲኬሚ ።
36 ወዘሲማዔር ፡ ነገደ ፡ ሲማዔሪ ፡ ወዘዖፌር ፡ ነገደ ፡ ዖፌሪ ።
37 ወለሰልጰአድ ፡ ወልደ ፡ ዖፌር ፡ ኢተወልደ ፡ ሎቱ ፡ ደቂቅ ፡ ዘእንበለ ፡ አዋልድ ፡ ወዝንቱ ፡ ውእቱ ፡ አስማቲሆን ፡ መሐላ ፡ ወኑሕ ፡ ወዔግላ ፡ ወሜልካ ፡ ወቴርሳ ።
38 ዝንቱ ፡ ሕዝበ ፡ ማናሴ ፡ ወኍለቊሆሙ ፡ ፭፻-፻፳፻፯፻ ።
39 ወእሉ ፡ ደቂቀ ፡ ኤፍሬም ፡ ዘሱታላ ፡ ነገደ ፡ ሱታላይ ፡ ወዘጠነኅ ፡ ነገደ ፡ ጠነኂ ።
40 እሉ ፡ ደቂቀ ፡ ሴታላ ፡ (ወ)ዘኤዴን ፡ ነገደ ፡ ኤዴኒ ።
41 እሉ ፡ ሕዝብ ፡ ዘኤፍሬም ፡ ወኍለቊሆሙ ፡ ፫፻-፻፳፻፭፻ ፡ እሉ ፡ ሕዝብ ፡ ዘደቂቀ ፡ ዮሴፍ ፡ በበ ፡ ነገዶሙ ።
42 ወደቂቀ ፡ ብንያሚ ፡ በበ ፡ ነገዶሙ ፡ ዘባዕል ፡ ነገደ ፡ በዓሊ ፡ ወዘአሲቤር ፡ ነገደ ፡ አሲቤሪ ፡ ወዘአኪራን ፡ ነገደ ፡ አኪራኒ ።
43 ወዘሳፋን ፡ ነገደ ፡ ሳፋኒ ።
44 ወኮኑ ፡ ደቂቀ ፡ ባዕል ፡ ዓዴር ፡ ወኖሔማን ፡ ነገደ ፡ ኖሔማኒ ።
45 እሉ ፡ ደቂቀ ፡ ብንያሚ ፡ በበ ፡ ነገዶሙ ፡ ወኍለቊሆሙ ፡ [፬፻-፻፶፻፯፻] ።
46 ወደቂቀ ፡ ዳንሂ ፡ በበ ፡ ነገዶሙ ፡ ዘሳሚ ፡ ነገደ ፡ ሳሚ ፡ እሉ ፡ ሕዝብ ፡ ዘዳን ፡ በበነገዶሙ ።
47 ወኍለቊሆሙ ፡ ለኵሉ ፡ ነገደ ፡ ሳሚ ፡ ፯፻-፻፵፻፯፻ ።
48 ወደቂቀ ፡ ንፍታሌምሂ ፡ በበ ፡ ነገዶሙ ፡ ዘአሴሔል ፡ ነገደ ፡ አሴሔሊ ፡ ወዘጎሂን ፡ ነገደ ፡ ጎሂኒ ።
49 ወዘዬሴር ፡ ነገደ ፡ ዬሴሪ ፡ ወዘሴሌም ፡ ነገደ ፡ ሴሌሚ ።
50 እሉ ፡ ሕዝብ ፡ ዘንፍታሌም ፡ ወኍለቊሆሙ ፡ ፬፻-፻፶፻፬፻ ።
51 ዝንቱ ፡ ውእቱ ፡ ኍለቊሆሙ ፡ ለደቂቀ ፡ እስራኤል ፡ ፷፻-፻፲፻[፯፻]፴ ።
52 ወነበቦ ፡ እግዚአብሔር ፡ ለሙሴ ፡ ወይቤሎ ፤
53 እሉ ፡ ይወርስዋ ፡ ለይእቲ ፡ ምድር ፡ በበ ፡ መክፈልቶሙ ፡ ወበበ ፡ ኍልቈ ፡ አስማቲሆሙ ።
54 ለእለ ፡ ይበዝኁ ፡ ታበዝኅ ፡ መክፈልቶሙ ፡ ወለእለ ፡ ይውኅዱ ፡ ታውኅድ ፡ መክፈልቶሙ ፡ ወለለ ፡ አሐዱ ፡ እምኔሆሙ ፡ በአምጣነ ፡ ኍለቊሆሙ ፡ ትሁቦሙ ፡ መክፈልቶሙ ።
55 ወበዕፆሙ ፡ ይረክቦሙ ፡ መክፈልቶሙ ፡ እለ ፡ ተሰምዩ ፡ በበ ፡ ነገደ ፡ አበዊሆሙ ።
56 ወይወርሱ ፡ እምውስተ ፡ መክፈልቶሙ ፡ ዘይረክቦሙ ፡ ርስቶሙ ፡ ማእከለ ፡ ብዙኃን ፡ ወውሑዳን ።
57 ወደቂቀ ፡ ሌዊሂ ፡ በበ ፡ ነገዶሙ ፡ ዘጌድሶን ፡ ነገደ ፡ ጌድሶኒ ፡ ወዘቃዓት ፡ ነገደ ፡ ቃዓቲ ፡ ወዘሜራር ፡ ነገደ ፡ ሜራሪ ።
58 እሉ ፡ ሕዝበ ፡ ነገደ ፡ ደቂቀ ፡ ሌዊ ፡ ነገደ ፡ ሎቤኒ ፡ ወነገደ ፡ ኬብሮን ፡ ወነገደ ፡ ሐሙሲ ፡ ወነገደ ፡ ቆሬ ፡ ወቃዓት ፡ ወለዶ ፡ ለአንብረም ።
59 ወስማ ፡ ለብእሲተ ፡ አንብረም ፡ ዮከቤድ ፡ ወለተ ፡ ሌዊ ፡ እንተ ፡ ወለደቶሙ ፡ ለእሉ ፡ ለሌዊ ፡ በብሔረ ፡ ግብጽ ፡ ወወለደት ፡ ሉቱ ፡ ለአንብረም ፡ አሮንሃ ፡ ወሙሴሃ ፡ ወማርያም ፡ እኅቶሙ ።
60 ወተወልዱ ፡ ለአሮን ፡ ናዳብ ፡ ወአብዩድ ፡ ወእልዓዛር ፡ ወኢታመር ።
61 ወሞቱ ፡ ናዳብ ፡ ወአብዩድ ፡ አመ ፡ አብኡ ፡ እሳተ ፡ ዘእምባዕድ ፡ ቅድመ ፡ እግዚአብሔር ፡ በገዳም ፡ ዘሲና ።
62 ወኮነ ፡ ኍለቊሆሙ ፡ ፪፻-፻፴፻ኵሉ ፡ ተባዕት ፡ ዘእም፩ወርኅ ፡ ወላዕሉ ፡ እምኔሁ ፡ እስመ ፡ ኢተኈለቁ ፡ ምስለ ፡ ደቂቀ ፡ እስራኤል ፡ እስመ ፡ ኢተውህበ ፡ ሎሙ ፡ መክፈልት ፡ ማእከሎሙ ፡ ለደቂቀ ፡ እስራኤል ።
63 ወከመዝ ፡ ውእቱ ፡ አስተፋቅዶሙ ፡ ለሙሴ ፡ ወለእልዓዛር ፡ ካህን ፡ እለ ፡ ኈለቍዎሙ ፡ ለደቂቀ ፡ እስራኤል ፡ በአረቦት ፡ ዘሞአብ ፡ በኀበ ፡ ዮርዳንስ ፡ ዘመንገለ ፡ ኢያሪኮ ።
64 ወእምውስተ ፡ እሉ ፡ ኢተርፈ ፡ ብእሲ ፡ እምእለ ፡ ኈለቁ ፡ ሙሴ ፡ [ወአሮን ፡] እለ ፡ ኈለቍዎሙ ፡ ለደቂቀ ፡ እስራኤል ፡ በገዳም ፡ ዘሲና ።
65 እስመ ፡ ይቤሎሙ ፡ እግዚአብሔር ፡ ከመ ፡ ሞተ ፡ [ይመውቱ ፡] በገዳም ፡ ወኢተርፈ ፡ እምኔሆሙ ፡ ወኢአሐዱ ፡ ዘእንበለ ፡ ካሌብ ፡ ወልደ ፡ ዬፎኒ ፡ ወዮሴዕ ፡ ወልደ ፡ ነዌ ።
=== chapter 27 ===
[Numeri 27]
1 ወመጽኣ ፡ አዋልደ ፡ ሰልጰአድ ፡ ወልደ ፡ ዖፌር ፡ ወልደ ፡ ገላአድ ፡ ወልደ ፡ ማኪር ፡ ዘእምነገደ ፡ ማናሴ ፡ ዘእምደቂቀ ፡ ዮሴፍ ፡ ወዝንቱ ፡ ውእቱ ፡ አስማቲሆን ፡ መሐላ ፡ ወኑሐ ፡ ወሔግላ ፡ ወሜልካ ፡ ወቴርሳ ።
2 ወቆማ ፡ ቅድመ ፡ ሙሴ ፡ ወቅድመ ፡ እልዓዛር ፡ ካህን ፡ ወቅድመ ፡ መላእክት ፡ ወቅድመ ፡ ኵሉ ፡ ተዓይን ፡ ኀበ ፡ ኆኅተ ፡ ደብተራ ፡ ዘመርጡል ፡ ወይቤላ ፤
3 አቡነ ፡ ሞተ ፡ በገዳም ፡ ወኢሀለወ ፡ ማእከሎሙ ፡ ለትዕይንት ፡ እንተ ፡ ተቃወመት ፡ ቅድመ ፡ እግዚአብሔር ፡ ውስተ ፡ ትዕይንተ ፡ ቆሬ ፡ እስመ ፡ በኀጢአተ ፡ ዚአሁ ፡ ሞተ ፡ ወአልቦቱ ፡ ደቂቀ ።
4 ኢይደምሰስ ፡ ስሙ ፡ ለአቡነ ፡ እምነ ፡ ማእከለ ፡ ነገዱ ፡ እስመ ፡ አልቦቱ ፡ ውሉደ ፡ ሀቡነ ፡ መክፈልተነ ፡ በማእከለ ፡ አኀዊሁ ፡ ለአቡነ ።
5 ወአብአ ፡ ሙሴ ፡ ቃሎን ፡ ቅድመ ፡ እግዚአብሔር ።
6 ወነበቦ ፡ እግዚአብሔር ፡ ለሙሴ ፡ ወይቤሎ ፤
7 ርቱዐ ፡ ይቤላ ፡ አዋልደ ፡ ሰልጰኣድ ፡ ሀቦን ፡ ሀብቶን ፡ መክፈልተ ፡ ርስቶን ፡ በማእከለ ፡ አኀዊሁ ፡ ለአቡሆን ፡ ወታገብእ ፡ ሎንቱ ፡ መክፈልተ ፡ አቡሆን ።
8 ወንግሮሙ ፡ ለደቂቀ ፡ እስራኤል ፡ ወበሎሙ ፡ ለእመ ፡ ቦቱ ፡ ዘሞተ ፡ ብእሲ ፡ ወአልቦ ፡ ደቂቀ ፡ ትሁቡ ፡ ርስቶ ፡ ለአዋልዲሁ ።
9 ወለእመ ፡ አልቦ ፡ ወለተ ፡ ሀቡ ፡ ርስቶ ፡ ለአኀዊሁ ።
10 ወለእመ ፡ አልቦ ፡ አኀወ ፡ ሀቡ ፡ ርስቶ ፡ ለእኅወ ፡ አቡሁ ።
11 ወለእመ ፡ አልቦ ፡ አኀወ ፡ አቡሁ ፡ ሀቡ ፡ ርስቶ ፡ ለቤት ፡ ዘቅሩቡ ፡ ዘእምነገዱ ፡ ይወርስ ፡ ወይኩን ፡ ዝንቱ ፡ ፍትሐ ፡ ኵነኔየ ፡ ለደቂቀ ፡ እስራኤል ፡ በከመ ፡ አዘዞ ፡ እግዚአብሔር ፡ ለሙሴ ።
12 ወይቤሎ ፡ እግዚአብሔር ፡ ለሙሴ ፡ ዕረግ ፡ ውስተ ፡ ደብር ፡ ዘውስተ ፡ ማዕዶ[ት] ፡ ደብረ ፡ ናበው ፡ ውእቱ ፡ ወርእያ ፡ ለምድረ ፡ ከናአን ፡ እንተ ፡ አነ ፡ እሁቦሙ ፡ ለደቂቀ ፡ እስራኤል ፡ ይኰነንዋ ።
13 ወርእያ ፡ ወትትዌሰክ ፡ ኀበ ፡ ሕዝብከ ፡ አንተሂ ፡ በከመ ፡ ተወሰከ ፡ አሮን ፡ እኁከ ፡ በደብረ ፡ ሆር ።
14 እስመ ፡ ተዐወርክሙ ፡ ቃልየ ፡ በገዳም ፡ ዘ[ፂን] ፡ አመ ፡ ተዋሳእክምዎሙ ፡ ለትዕይንት ፡ ወቀድሶሂ ፡ ኢቀደስክሙኒ ፡ በበይነ ፡ ማይ ፡ በቅድሜሆሙ ፡ ዘውእቱ ፡ ማየ ፡ ቅስት ፡ ዘበ ፡ ቃዴስ ፡ በገዳም ፡ ዘ[ፂን] ።
15 ወይቤሎ ፡ ሙሴ ፡ ለእግዚአብሔር ፤
16 ለይርአይ ፡ እግዚአብሔር ፡ አምላኮ ፡ ለኵሉ ፡ ነፍስ ፡ ወለኵሉ ፡ ሥጋ ፡ ብእሴ ፡ ለዛቲ ፡ ትዕይንት ፤
17 ዘይወፅእ ፡ ወይበውእ ፡ ወዘያወፅኦሙ ፡ ወዘያበውኦሙ ፡ በቅድመ ፡ ገጾሙ ፡ ወኢትኩን ፡ ትዕይንቱ ፡ ለእግዚአብሔር ፡ ከመ ፡ አባግዕ ፡ ዘአልቦ ፡ ኖላዌ ።
18 ወነበቦ ፡ እግዚአብሔር ፡ ለሙሴ ፡ ወይቤሎ ፡ ንሥኦ ፡ ኀቤከ ፡ ለዮሴዕ ፡ ወልደ ፡ ነዌ ፡ ብእሲ ፡ ዘሀለወ ፡ ላዕሌሁ ፡ መንፈስ ፡ ቅዱስ ፡ ወደይ ፡ እዴከ ፡ ላዕሌሁ ።
19 ወአቅሞ ፡ [ቅድመ ፡] እልዓዛር ፡ ካህን ፡ ወአዝዞ ፡ ቅድመ ፡ ኵሉ ፡ ተዓይን ፡ ወአ[ዝዝ] ፡ በእንቲአሁ ፡ ቅድሜሆሙ ።
20 ወታገብእ ፡ ክብረከ ፡ ላዕሌሁ ፡ ከመ ፡ ይትአዘዙ ፡ ሎቱ ፡ ደቂቀ ፡ እስራኤል ።
21 ወይቁም ፡ ቅድመ ፡ እልዓዛር ፡ ካህን ፡ ወይስአልዎ ፡ ፍትሐ ፡ ዘይትናገር ፡ ቅድመ ፡ እግዚአብሔር ፡ ወበቃለ ፡ ዚአሁ ፡ ይፃኡ ፡ ወበቃለ ፡ ዚአሁ ፡ ይባኡ ፡ ውእቱ ፡ ወደቂቀ ፡ እስራኤል ፡ ኅቡረ ፡ ወኵሉ ፡ ተዓይን ።
22 ወገብረ ፡ ሙሴ ፡ በከመ ፡ አዘዞ ፡ እግዚአብሔር ፡ ወነሥኦ ፡ ለዮሴዕ ፡ ወአቀሞ ፡ ቅድመ ፡ እልዓዛር ፡ ካህን ፡ ወቅድመ ፡ ኵሉ ፡ ተዓይን ፡
23 ወወደየ ፡ እዴሁ ፡ ላዕሌሁ ፡ ወሤሞ ፡ በከመ ፡ አዘዞ ፡ እግዚአብሔር ።
=== chapter 28 ===
[Numeri 28]
1 ወነበቦ ፡ እግዚአብሔር ፡ ለሙሴ ፡ ወይቤሎ ፤
2 አዝዘሙ ፡ ለደቂቀ ፡ እስራኤል ፡ ወበሎሙ ፡ ቍርባን[የ] ፡ ወሀብትየ ፡ ወመሣውዒየ ፡ ዘመዐዛ ፡ ሠናይ ፡ ዕቀቡ ፡ ታ[ብ]ኡ ፡ ሊተ ፡ በበዓላቲየ ።
3 ወበሎሙ ፡ ዝንቱ ፡ ውእቱ ፡ መሥዋዕትየ ፡ ኵሉ ፡ ዘታበውኡ ፡ ለእግዚአብሔር ፡ አባግዐ ፡ ዘዘዓመት ፡ ንጹሓነ ፡ ክልኤቱ ፡ ለለ ፡ ዕለቱ ፡ መሥዋዕት ፡ ዘዘልፍ ።
4 አሐደ ፡ በግዐ ፡ ትገብሩ ፡ በጽባሕ ፡ ወአሐደ ፡ በግዐ ፡ ትገብሩ ፡ ፍና ፡ ሰርክ ።
5 ወትገብር ፡ ስንዳሌ ፡ ዓሥርተ ፡ እዴሃ ፡ ለኢፍ ፡ ለመሥዋዕት ፡ ዘዘልፍ ፡ ዘግቡር ፡ በቅብእ ፡ በራብዕተ ፡ እዴሃ ፡ ለኢን ፤
6 ለመሥዋዕት ፡ ዘዘልፍ ፡ ዘ[ተገብረ] ፡ በደብረ ፡ ሲና ፡ ለመዐዛ ፡ ሠናይ ፡ ለእግዚአብሔር ።
7 ወሞጻሕቱ ፡ ራብዕተ ፡ እዴሃ ፡ ለኢን ፡ ለአሐዱ ፡ በግዕ ፡ ታወጽኅ ፡ ሞጻሕተ ፡ በቅዱስ ፡ ለእግዚአብሔር ።
8 ወይገብሩ ፡ ካልአ ፡ በግዐ ፡ ፍና ፡ ሰርክ ፡ በከመ ፡ መሥዋዕቱ ፡ ወበከመ ፡ ሞጻሕቱ ፡ ትገብሩ ፡ ለመዐዛ ፡ ሠናይ ፡ ለእግዚአብሔር ።
9 ወበዕለተ ፡ ሰንበት ፡ ትገብሩ ፡ ክልኤተ ፡ አባግዐ ፡ ዘዘ ፡ ዓመት ፡ ንጹሓነ ፡ ወክልኤተ ፡ ዓሥራተ ፡ ዘስንዳሌ ፡ ለመሥዋዕት ፡ ዘግቡር ፡ በቅብእ ፡ ወሞጻሕቱ ።
10 ወቍርባኑ ፡ ለሰንበት ፡ ዘውስተ ፡ ሰናብት ፡ ላዕለ ፡ መሥዋዕት ፡ ዘዘልፍ ፡ ሎቱኒ ፡ ሞጻሕቱ ።
11 ወአመ ፡ አሥራቀ ፡ ወርኅ ፡ ታበውኡ ፡ መሥዋዕተ ፡ ለእግዚአብሔር ፡ አስዋረ ፡ ክልኤተ ፡ እምውስተ ፡ አልህምት ፡ ወበግዐ ፡ አሐደ ፡ ወማሕስአ ፡ አባግዕ ፡ ሰብዐተ ፡ ዘዘዓመት ፤
12 ወሠለስቱ ፡ ዓሥራተ ፡ ስንዳሌ ፡ ዘግቡር ፡ በቅብእ ፡ ለ፩ላህም ፡ [ወ፪ዓሥራተ ፡ ስንዳሌ ፡ ዘግቡር ፡ በቅብዕ ፡ ለበግዕ ፡ ፩ ፤
13 ወዓሥራተ ፡ ዓሥራተ ፡ ስንዳሌ ፡ ዘግቡር ፡ በቅብእ ፡ ለለ፩ማሕስዕ ፡ መሥዋዕት ፡] ለመዐዛ ፡ ሠናይ ፡ ለእግዚአብሔር ።
14 ወሞጻኅቶሙ ፡ ለለ፩ላህም ፡ መንፈቃ ፡ ለኢን ፡ ይኩን ፡ ወሣልስተ ፡ እዴሃ ፡ ለኢን ፡ ለ፩በግዕ ፡ ይኩን ፡ [ወራብዕተ ፡] እዴሃ ፡ ለኢን ፡ ወይን ፡ ይኩን ፡ ለ፩ማሕስአ ፡ በግዕ ፡ ዝንቱ ፡ መሥዋዕቱ ፡ ለለ ፡ ወርኅ ፡ እምወርኅ ፡ ዘውስተ ፡ አውራኀ ፡ ዓመት ።
15 ወኀርጌ ፡ አሐዱ ፡ እምውስተ ፡ አጣሊ ፡ ለእግዚአብሔር ፡ በእንተ ፡ ኀጢአት ፡ ላዕለ ፡ መሥዋዕተ ፡ ዘልፍ ፡ ትገብሩ ፡ ወሞጻሕቱሂ ።
16 ወበቀዳሚ ፡ ወርኅ ፡ አመ ፡ ዐሡሩ ፡ ወረቡዑ ፡ ለሠርቅ ፡ ፋ[ሲ] ካሁ ፡ ለእግዚአብሔር ።
17 ወአመ ፡ ዐሡሩ ፡ ወኀሙሱ ፡ ለሠርቀ ፡ ውእቱ ፡ ወርኅ ፡ በዓል ፡ ሰቡዐ ፡ ዕለተ ፡ (ወ)ናእተ ፡ ትበልዑ ።
18 ወቀዳሚት ፡ ዕለት ፡ ቅድስተ ፡ ትሰመይ ፡ ለክሙ ፤ ኵሎ ፡ ግብረ ፡ ማሕረስ ፡ ኢትግበሩ ።
19 ወታበውኡ ፡ ቍርባኖ ፡ ለእግዚአብሔር ፡ አስዋረ ፡ ክልኤተ ፡ እምውስተ ፡ አልህምት ፡ ወበግዕ ፡ ፩ወማሕስአ ፡ በግዕ ፡ ሰብዐተ ፡ ንጹሓነ ፡ ዘዘ ፡ ዓመት ፡ ይኩንክሙ ።
20 ወመሥዋዕቶሙ ፡ ስንዳሌ ፡ ዘግቡር ፡ በቅብእ ፤
21 ሠለስቱ ፡ ዓሥራት ፡ ለ፩ላህም ፡ ወክልኤቱ ፡ ዓሥራት ፡ ለ፩በግዕ ።
22 ዓሥራተ ፡ ዓሥራ[ተ] ፡ ትገብር ፡ ለ፩ማሕስአ ፡ በግዕ ፡ ወከማሁ ፡ ሰብዓቲሆሙ ፡ ማሕስአ ፡ አባግዕ ።
23 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ፡ በዘ ፡ ቦቱ ፡ ያስተሰርዩ ፡ ለክሙ ።
24 ዘእንበለ ፡ መሥዋዕት ፡ ዘኵሉ ፡ ጊዜ ፡ ዘበበ ፡ ነግህ ፡ ዘመሥዋዕተ ፡ ዘልፍ ።
25 ከመዝ ፡ ትገብሩ ፡ [ዘንተ] ፡ ለለ ፡ ዕለቱ ፡ ለሰቡዕ ፡ መዋዕል ፡ ቍርባነ ፡ መሥዋዕት ፡ ለመዐዛ ፡ ሠናይ ፡ ለእግዚአብሔር ፡ በዲበ ፡ መሥዋዕት ፡ ዘዘልፍ ፡ ወትገብር ፡ ሞጻኅተኒ ።
26 ወዕለት ፡ ሳብዕት ፡ ቅድስተ ፡ ትኩንክሙ ፡ ኵሎ ፡ ግብረ ፡ ማሕረስ ፡ ኢትግበሩ ፡ ባቲ ።
27 ወአመ ፡ ዕለተ ፡ ሠዊት ፡ አመ ፡ ታበውኡ ፡ መሥዋዕተ ፡ ሠዊት ፡ ለእግዚአብሔር ፡ ሰንበታ ፡ ቅድስተ ፡ ትኩንክሙ ፡ ኵሎ ፡ ግብረ ፡ ማኅረስ ፡ ኢትግበሩ ።
28 ወታበውኡ ፡ መሣውዐ ፡ ለመዐዛ ፡ ሠናይ ፡ ለእግዚአብሔር ፡ አስዋረ ፡ እምውስተ ፡ አልህምት ፡ ክልኤተ ፡ ወአሐደ ፡ በግዐ ፡ ወማሕስአ ፡ [በግዕ ፡] ሰብዐተ ፡ ዘዘ ፡ ዓመት ፡ ንጹሓነ ።
29 ወመሥዋዕቶሙ ፡ ስንዳሌ ፡ ዘግቡር ፡ በቅብእ ፡ ፫ዓሥራተ ፡ ለ፩ላህም ፡ [ወ፪ዓሥራተ ፡ ለ፩በግዕ ፡] ፡ ወዓሥራተ ፡ ዓሥራ[ተ] ፡ ለ፩ማሕስአ ፡ በግዕ ፡ ወከማሁ ፡ ለሰብዓቲሆሙ ፡ ማሕስአ ፡ አባግዕ ።
30 ወሐርጌ ፡ አሐደ ፡ እምውስተ ፡ አጣሊ ፡ በእንተ ፡ ኀጢአት ፡ በዘ ፡ ቦቱ ፡ ያስተሰርዩ ፡ ለክሙ ።
31 ዘእንበለ ፡ መሥዋዕተ ፡ ዘልፍ ፡ ወመሥዋዕቶሙኒ ፡ ትገብሩ ፡ ሊተ ፡ ወንጹሓነ ፡ ይኩኑክሙ ፡ ወሞጻሕቶሙኒ ።
=== chapter 29 ===
[Numeri 29]
1 ወበሳብዕ ፡ ወርኅ ፡ አመ ፡ ሠርቀ ፡ ወርኅ ፡ ቅድስተ ፡ ትሰመይ ፡ ለክሙ ፡ ይእቲ ፡ ዕለት ፡ ኵሎ ፡ ግብረ ፡ ማሕረስ ፡ ኢትግበሩ ፡ ባቲ ፡ ወዕለተ ፡ ትእምርት ፡ ትኩንክሙ ።
2 ወትገብሩ ፡ መሣውዐ ፡ ለመዐዛ ፡ ሠናይ ፡ ለእግዚአብሔር ፡ ሶረ ፡ አሐደ ፡ እምውስተ ፡ አልህምት ፡ ወበግዐ ፡ አሐደ ፡ ወማሕስአ ፡ አባግዕ ፡ ሰብዐተ ፡ ንጹሓነ ፡ ዘዘዓመት ።
3 ወመሥዋዕቶሙ ፡ ስንዳሌ ፡ ዘግቡር ፡ በቅብእ ፡ ሠለስቱ ፡ ዓሥራት ፡ ለ፩ላህም ፡ ወክልኤቱ ፡ ዓሥራት ፡ ለ፩በግዕ ።
4 ወዓሥራ[ት] ፡ ዓሥራት ፡ ለ፩ማሕስአ ፡ በግዕ ፡ ወከማሁ ፡ ለሰብዐቲሆሙ ፡ ማሕስአ ፡ አባግዕ ።
5 ወሐርጌ ፡ አሐዱ ፡ እምውስተ ፡ አጣሊ ፡ በእንተ ፡ ኀጢአት ፡ በዘ ፡ ቦቱ ፡ ያስተሰርዩ ፡ ለክሙ ።
6 ዘእንበለ ፡ መሥዋዕት ፡ ዘበበ ፡ ሠርቀ ፡ ወርኅ ፡ ወመሥዋዕቶሙኒ ፡ ወሞጻሕቶሙኒ ፡ [ወመሥዋዕትኒ ፡ ዘዘልፍ ፡ ወመሥዋዕቶሙኒ ፡ ወሞጻሕቶሙኒ ፡] ዘከመ ፡ ሕጎሙ ፡ ለመዐዛ ፡ ሠናይ ፡ ለእግዚአብሔር ።
7 ወአመ ፡ ዐሡሩ ፡ ለሠርቀ ፡ ውእቱ ፡ ወርኅ ፡ ቅድስተ ፡ ትሰመይ ፡ ለክሙ ፡ ወአሕምምዋ ፡ ለነፍስክሙ ፡ ወኵሎ ፡ ግብረ ፡ ማሕረስ ፡ ኢትግበሩ ።
8 ወታበውኡ ፡ መሥዋዕተ ፡ ለመዐዛ ፡ ሠናይ ፡ ሶረ ፡ አሐደ ፡ እምውስተ ፡ አልህምት ፡ ወበግዐ ፡ አሐደ ፡ ወመሓስአ ፡ አባግዕ ፡ ሰብዐተ ፡ ንጹሓነ ፡ ዘዘ ፡ ዓመት ፡ ይኩንክሙ ።
9 ወመሥዋዕቶሙ ፡ ስንዳሌ ፡ ዘግቡር ፡ በቅብእ ፡ (ወ)ሠለስቱ ፡ ዓሥራት ፡ ለ፩ላህም ፡ ወክልኤቱ ፡ ዓሥራት ፡ ለ፩በግዕ ።
10 ወዓሥራ[ት] ፡ ዓሥራት ፡ ለ፩ማሕስአ ፡ በግዕ ፡ ወከማሁ ፡ ለሰብዐቲሆሙ ፡ መሓስአ ፡ አባግዕ ።
11 ወሐርጌ ፡ አሐዱ ፡ እምውስተ ፡ አጣሊ ፡ በዘ ፡ ቦቱ ፡ ያስተሰርዩ ፡ ለክሙ ፡ በእንተ ፡ ኀጢአት ፡ ዘእንበለ ፡ ዘበእንተ ፡ ኀጢአት ፡ ዘአስተስርዮ ፡ ወመሥዋዕት ፡ ዘዘልፍ ፡ ወመሥዋዕቶሙኒ ፡ ወሞጻሕቶሙኒ ፡ በከመ ፡ ሕጎሙ ፡ ለመዐዛ ፡ ሠናይ ።
12 ወአመ ፡ ዐሡሩ ፡ ወኀሙሱ ፡ ለሠርቀ ፡ ውእቱ ፡ ወርኅ ፡ ሳብዕ ፡ ቅድስተ ፡ ትሰመይ ፡ ለክሙ ፡ ኵሎ ፡ ግብረ ፡ ማሕረስ ፡ ኢትግበሩ ፡ ወግበሩ ፡ በዓለ ፡ ለእግዚአብሔር ፡ ባቲ ፡ ሰቡዐ ፡ መዋዕለ ።
13 ወአብኡ ፡ መሥዋዕተ ፡ ቍርባን ፡ ለመዐዛ ፡ ሠናይ ፡ ለእግዚአብሔር ፡ አመ ፡ ዕለት ፡ ቀዳሚት ፡ አስዋረ ፡ ሠለስተ ፡ እምውስተ ፡ አልህምት ፡ ወዐሠርተ ፡ አልህምተ ፡ ወክልኤተ ፡ አባግዐ ፡ ወዐሠርተ ፡ ወአርባዕተ ፡ መሓስአ ፡ አባግዕ ፡ ዘዘ ፡ ዓመት ፡ ንጹሓነ ፡ ይኩኑ ።
14 ወመሥዋዕቶሙ ፡ ሠለስቱ ፡ ዓሥራት ፡ ለለ ፡ ላህም ፡ ስንዳሌ ፡ ዘግቡር ፡ በቅብእ ፡ ወከማሁ ፡ ለዐሠርቲሆሙ ፡ ወሠለስቲሆሙ ፡ ወክልኤቱ ፡ ዓሥራት ፡ ለ፩በግዕ ፡ ወከማሁ ፡ ለክልኤሆሙ ፡ አባግዕ ።
15 ዐ[ሥራት] ፡ ዓሥራት ፡ ለ፩ማሕስአ ፡ በግዕ ፡ ወከማሁ ፡ ለዐሠርቲሆሙ ፡ ወአርባዕቲሆሙ ፡ ማሕስአ ፡ አባግዕ ።
16 ወሐርጌ ፡ አሐዱ ፡ እምውስተ ፡ አጣሊ ፡ በእንተ ፡ ኀጢአት ፡ ዘእንበለ ፡ መሥዋዕተ ፡ ዘልፍ ፡ ወሞጻሕቶሙ ፡ ወመሥዋዕቶሙ ።
17 ወበሳ[ኒታ] ፡ ዕለት ፡ ፲ወ፪አስዋር ፡ ወ፪አባግዕ ፡ ወ፲ወ፬መሓስአ ፡ አባግዕ ፡ ንጹሓን ፡ ዘዘዓመት ።
18 ወመሥዋዕቶሙ ፡ ወሞጻሕቶሙ ፡ ለአልህምትኒ ፡ ወለአባግዕኒ ፡ ወለመሓስአ ፡ አባግዕ ፡ በኍለቊሆሙ ፡ በከመ ፡ ሕጎሙ ።
19 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ፡ ዘእንበለ ፡ መሥዋዕተ ፡ ዘልፍ ፡ ወመሥዋዕቶሙ ፡ ወሞጻሕቶሙ ።
20 ወበሣልስት ፡ ዕለት ፡ አስዋር ፡ ፲ወ፩ወበግዕ ፡ ፪ወመሐስአ ፡ አባግዕ ፡ ፲ወ፬ንጹሓን ፡ ዘዘዓመት ።
21 ወመሥዋዕቶሙ ፡ ወሞጻሕቶሙ ፡ ለአልህምትኒ ፡ ወለአባግዕኒ ፡ ወለመሓስአ ፡ አባግዕ ፡ በበ ፡ ኍለቊሆሙ ፡ በከመ ፡ ሕጎሙ ።
22 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ፡ ዘእንበለ ፡ መሥዋዕተ ፡ ዘልፍ ፡ ወመሥዋዕቶሙ ፡ ወሞጻሕቶሙ ።
23 ወበራብዕት ፡ ዕለት ፡ አስዋር ፡ ፲ወ፪አባግዕ ፡ ወ፲ወ፬መሓስአ ፡ አባግዕ ፡ ንጹሓን ፡ ዘዘ ፡ ዓመት ።
24 ወመሥዋዕቶሙ ፡ ወሞጻሕቶሙ ፡ ለአልህምትኒ ፡ ወለአባግዕኒ ፡ ወለመሓስአ ፡ አባግዕ ፡ በበ ፡ ኍለቊሆሙ ፡ በከመ ፡ ሕጎሙ ።
25 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ፡ ዘእንበለ ፡ መሥዋዕተ ፡ ዘልፍ ፡ ወመሥዋዕቶሙ ፡ ወሞጻሕቶሙ ።
26 ወበኃምስት ፡ ዕለት ፡ አስዋር ፡ ፱ወ፪አባግዕ ፡ ወ፲ወ፬መሐስአ ፡ አባግዕ ፡ ንጹሓን ፡ ዘዘ ፡ ዓመት ።
27 ወመሥዋዕቶሙ ፡ ወሞጻሕቶሙ ፡ ለአልህምትኒ ፡ ወለአባግዕኒ ፡ ወለመሐስአ ፡ አባግዕ ፡ በከመ ፡ ኍለቊሆሙ ፡ በከመ ፡ ሕጎሙ ።
28 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ፡ ዘእንበለ ፡ መሥዋዕተ ፡ ዘልፍ ፡ ወመሥዋዕቶሙ ፡ ወሞጻሕቶሙ ።
29 ወበሳድስት ፡ ዕለት ፡ አስዋር ፡ ፰ወ፪አባግዕ ፡ ወ፲ወ፬መሐስአ ፡ አባግዕ ፡ ንጹሓን ፡ ዘዘ ፡ ዓመት ።
30 ወመሥዋዕቶሙ ፡ ወሞጻሕቶሙ ፡ ለአልህምትኒ ፡ ወለአባግዕኒ ፡ ወለመሓስአ ፡ አባግዕ ፡ በበ ፡ ኍለቊሆሙ ፡ ወበከመ ፡ ሕጎሙ ።
31 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ፡ ዘእንበለ ፡ መሥዋዕተ ፡ ዘልፍ ፡ ወመሥዋዕቶሙ ፡ ወሞጻሕቶሙ ።
32 ወበሳብዕት ፡ ዕለት ፡ አልህምት ፡ ፯ወአባግዕ ፡ ፪ወ፲ወ፬መሓስአ ፡ አባግዕ ፡ ዘዘ ፡ ዓመት ፡ ንጹሓን ።
33 ወመሥዋዕቶሙኒ ፡ ወሞጻሕቶሙኒ ፡ ለአልህምትኒ ፡ ወለአባግዕኒ ፡ ወለመሓስአ ፡ አባግዕ ፡ በበ ፡ ኍለቊሆሙ ፡ ወበከመ ፡ ሕጎሙ ።
34 ወሐርጌ ፡ ፩እምውስተ ፡ አጣሊ ፡ በእንተ ፡ ኀጢአት ፡ ዘእንበለ ፡ መሥዋዕተ ፡ ዘልፍ ፡ ወመሥዋዕቶሙ ፡ ወሞጻሕቶሙ ።
35 ወበሳምንት ፡ ዕለት ፡ ዕለተ ፡ ተሐውሶ ፡ ይእቲ ፡ ለክሙ ፡ ኵሎ ፡ ግብረ ፡ ማሕረስ ፡ ኢትግበሩ ፡ ባቲ ።
36 ወአብኡ ፡ መሥዋዕተ ፡ ቍርባን ፡ ለመዐዛ ፡ ሠናይ ፡ ለእግዚአብሔር ፡ ላህመ ፡ አሐደ ፡ ወበግዐ ፡ አሐደ ፡ ለመሥዋዕት ፡ ወመሖስአ ፡ አባግዕ ፡ ዘዘ ፡ ዓመት ፡ ንጹሓነ ፡ ሰብዐተ ።
37 ወመሥዋዕቶሙ ፡ ወሞጻሕቶሙ ፡ ለአልህምትኒ ፡ ወለአባግዕኒ ፡ ወለመሐስአ ፡ አባግዕ ፡ በበ ፡ ኍለቊሆሙ ፡ ወበከመ ፡ ሕጎሙ ።
38 ወሐርጌ ፡ አሐደ ፡ እምውስተ ፡ አጣሊ ፡ በእንተ ፡ ኀጢአት ፡ ዘእንበለ ፡ መሥዋዕተ ፡ ዘልፍ ፡ ወመሥዋዕቶሙ ፡ ወሞጻሕቶሙ ።
39 ወከመዝ ፡ ግበሩ ፡ ዘንተ ፡ ለእግዚአብሔር ፡ በበዓላቲክሙ ፡ ወዘበፈቃድክሙኒ ፡ ወቍርባንክሙኒ ፡ ወመሥዋዕትክሙኒ ፡ ወሞጻሕትክሙኒ ፡ ወዘመድኀኒትክሙ ።
=== chapter 30 ===
[Numeri 30]
1 ወነገሮሙ ፡ ሙሴ ፡ ለደቂቀ ፡ እስራኤል ፡ ኵሎ ፡ ዘከመ ፡ አዘዞ ፡ እግዚአብሔር ፡ ለሙሴ ።
2 ወነገሮሙ ፡ ሙሴ ፡ ለመላእክተ ፡ ሕዝብ ፡ ደቂቀ ፡ እስራኤል ፡ ወይቤሎሙ ፡ ዝንቱ ፡ ውእቱ ፡ ቃል ፡ ዘአዘዘ ፡ እግዚአብሔር ።
3 ብእሲ ፡ ብእሲ ፡ ለእመቦ ፡ ዘበፅዐ ፡ ብፅዐተ ፡ ለእግዚአብሔር ፡ ወለእመኒ ፡ መሐለ ፡ መሐላ ፡ አው ፡ ፈለጠ ፡ ፍሉጠ ፡ በእንተ ፡ ነፍሱ ፡ ኢይገምን ፡ ቃሎ ፤ ኵሎ ፡ ዘወፅአ ፡ እምአፉሁ ፡ ይግበር ።
4 ወለእመኒ ፡ ብእሲት ፡ በፅዐት ፡ ብፅዓተ ፡ ለእግዚአብሔር ፡ አው ፡ ፈለጠት ፡ ፍሉጠ ፡ በቤተ ፡ አቡሃ ፡ በንእሳ ፤
5 ወሰምዐ ፡ አቡሃ ፡ ጸሎታ ፡ ወኵሎ ፡ ብፅዓቲሃ ፡ ዘበፅዐት ፡ በእንተ ፡ ነፍሳ ፡ ወተጸመመ ፡ አቡሃ ፡ ወይቀውም ፡ ላዕሌሃ ፡ ኵሉ ፡ ጸሎታ ፡ ወኵሉ ፡ ብፅዓቲሃ ፡ ዘበፅዐት ፡ በእንተ ፡ ነፍሳ ፡ ይነብር ፡ ዲቤሃ ።
6 ወለእመሰ ፡ ገብረ ፡ ላቲ ፡ አቡሃ ፡ ወፈጸመ ፡ ላቲ ፡ በዕለተ ፡ ሰምዐ ፡ ኵሎ ፡ ጸሎታ ፡ ወብፅዓቲሃ ፡ ዘበፅአት ፡ በእንተ ፡ ነፍሳ ፡ ኢይነብር ፡ ላዕሌሃ ፡ ወያነጽሐ ፡ እግዚአብሔር ፡ በዕለተ ፡ ገብረ ፡ ላቲ ፡ አቡሃ ።
7 ወለአመሰ ፡ አውሰበት ፡ ብእሴ ፡ ወሀለወ ፡ ላዕሌሃ ፡ ጸሎታ ፡ ዘከመ ፡ ነበበት ፡ በከናፍሪሃ ፡ ኵሎ ፡ ዘበፅአት ፡ በእንተ ፡ ነፍሳ ፤
8 ወሰምዐ ፡ ምታ ፡ ወተጸመማ ፡ በዕለተ ፡ ሰምዐ ፡ ከማሁ ፡ ይቀውም ፡ ላዕሌሃ ፡ ኵሉ ፡ ጸሎታ ፡ ወብፅዓቲሃ ፡ ዘበፅዐት ፡ በእንተ ፡ ነፍሳ ፡ ይቀውም ፡ ዲቤሃ ።
9 ወእመሰ ፡ ገብረ ፡ ላቲ ፡ ምታ ፡ ወፈጸመ ፡ በዕለተ ፡ ሰምዐ ፡ ኵሎ ፡ ጸሎታ ፡ ወብፅዓቲሃ ፡ ዘበፅዐት ፡ በእንተ ፡ ነፍሳ ፡ ኢይነብር ፡ ላዕሌሃ ፡ እስመ ፡ ገብረ ፡ ላቲ ፡ ምታ ፡ ወያነጽሐ ፡ እግዚአብሔር ።
10 ወጸሎታሂ ፡ ለመበለት ፡ ወለእንተ ፡ አውጽአ ፡ ምታ ፡ ኵሎ ፡ ዘበፅአት ፡ በእንተ ፡ ነፍሳ ፡ ይሄሉ ፡ ላዕሌሃ ።
11 ወለእመኒ ፡ እንዘ ፡ ሀለወት ፡ ቤተ ፡ ምታ ፡ ጸለየት ፡ ወበፅአት ፡ በእንተ ፡ ነፍሳ ፤
12 ወሰምዐ ፡ ምታ ፡ ወተጸመማ ፡ ወኢገብረ ፡ ላቲ ፡ ኵሎ ፡ ጸሎታ ፡ ይቀውም ፡ ላዕሌሃ ፡ ወኵሉ ፡ ብፅዓቲሃ ፡ ዘበፅዐት ፡ በእንተ ፡ ነፍሳ ፡ ይቀውም ፡ ዲቤሃ ።
13 ወለእመሰ ፡ ገብረ ፡ ላቲ ፡ ምታ ፡ ወፈጸመ ፡ በዕለተ ፡ ሰምዐ ፡ ኵሎ ፡ ዘወፅአ ፡ እምከናፍሪሃ ፡ ዘከመ ፡ ጸለየት ፡ ወዘከመ ፡ በፅአት ፡ በእንተ ፡ ነፍሳ ፡ ኢይነብር ፡ ላዕሌሃ ፡ እስመ ፡ ገብረ ፡ ላቲ ፡ ምታ ፡ ወያነጽሐ ፡ እግዚአብሔር ።
14 ወኵሉ ፡ ብፅዓት ፡ ወኵሉ ፡ ማእሰረ ፡ መሐላ ፡ ዘይከውን ፡ እኩየ ፡ ላዕለ ፡ ነፍሳ ፡ ምታ ፡ ያቀውም ፡ ላቲ ፡ ወምታ ፡ ይገብር ፡ ላቲ ።
15 ወለእመሰ ፡ ተጸመማ ፡ ዕለተ ፡ እምዕለት ፡ [ያ]ቀውም ፡ ላዕሌሃ ፡ ኵሎ ፡ ጸሎታ ፡ ወብፅዓቲሃኒ ፡ [ያ]ቀውም ፡ ዲቤሃ ፡ እስመ ፡ ተጸመማ ፡ በዕለተ ፡ ሰምዐ ።
16 ወለእመሰ ፡ ገብረ ፡ ላቲ ፡ እምድኅረ ፡ ዕለት ፡ እንተ ፡ ባቲ ፡ ሰምዐ ፡ ይከውኖ ፡ ኀጢአተ ።
17 ዝንቱ ፡ ውእቱ ፡ ኵነኔ ፡ ኵሉ ፡ ዘአዘዞ ፡ እግዚአብሔር ፡ ለሙሴ ፡ ማእከለ ፡ ብእሲ ፡ ወማእከለ ፡ ብእሲቱ ፡ ወማእከለ ፡ አብ ፡ ወወለቱ ፡ በንእሳ ፡ እንዘ ፡ ሀለወት ፡ ቤተ ፡ አቡሃ ።
=== chapter 31 ===
[Numeri 31]
1 ወነበቦ ፡ እግዚአብሔር ፡ ለሙሴ ፡ ወይቤሎ ፤
2 ተበቀል ፡ በቀሎሙ ፡ ለደቂቀ ፡ እስራኤል ፡ እምነ ፡ መድናውያን ፡ ወድኅረ ፡ ትትዌሰክ ፡ ኀበ ፡ ሕዝብከ ።
3 ወነገሮሙ ፡ ሙሴ ፡ ለሕዝብ ፡ ወይቤሎሙ ፡ አስተረስዩ ፡ እምውስቴትክሙ ፡ ዕደወ ፡ ወ[ተቃተ] ሉ ፡ ቅድመ ፡ እግዚአብሔር ፡ ምስለ ፡ ምድያም ፡ ከመ ፡ ያግብኡ ፡ በቀለ ፡ እምኀበ ፡ እግዚአብሔር ፡ ለምድያም ።
4 ወ፲፻እምውስተ ፡ ነገድ ፡ ወ፲፻እምውስተ ፡ ነገድ ፡ ወእምውስተ ፡ ኵሉ ፡ ነገደ ፡ እስራኤል ፡ ፈንዉ ፡ ዘይትቃተል ።
5 ወኈለቁ ፡ እምውስተ ፡ አእላፍ ፡ ዘእስራኤል ፡ እምነገድ ፡ ነገድ ፡ ፲፻ወኮነ ፡ እልፈ ፡ ወዕሥራ ፡ ምእተ ፡ እለ ፡ ተረሰዩ ፡ ለቀትል ።
6 ወፈነዎሙ ፡ ሙሴ ፡ በበ ፡ ዐሠርቱ ፡ ምእት ፡ ዘነገድ ፡ ነገድ ፡ ምስለ ፡ ኀይሎሙ ፡ ወፊንሕስ ፡ ወልደ ፡ እልዓዛር ፡ ወልደ ፡ አሮን ፡ ካህን ፡ ወንዋየ ፡ ቅድሳት ፡ ወመጣቅዕት ፡ ዘተአምር ፡ ምስሌሆሙ ።
7 ወተቃተልዎሙ ፡ ለምድያም ፡ በከመ ፡ አዘዞ ፡ እግዚአብሔር ፡ [ለሙሴ ፡] ወቀተሉ ፡ ኵሎ ፡ ተባዕቶሙ ።
8 ወለነገሥተ ፡ ምድያምሂ ፡ ቀተልዎሙ ፡ ኅቡረ ፡ በውእቱ ፡ ቀትሎሙ ፡ ወአውንሂ ፡ ወሮቆምሂ ፡ ወሱርሂ ፡ ወሑርሂ ፡ ወሮቦቅሂ ፡ ኀምስቱ ፡ ነገሥተ ፡ ምድያም ፡ ወለበለዓምሂ ፡ ወልደ ፡ ቤዖር ፡ ቀተልዎ ፡ በኀፂን ፡ በውእቱ ፡ ቀትሎሙ ።
9 ወፄወዉ ፡ አንስቲያሆሙ ፡ ለምድያም ፡ ወንዋዮሙኒ ፡ ወእንስሳሆሙኒ ፡ ወኵሎ ፡ ጥሪቶሙ ፡ ወኀይሎሙ ፡ ፄወዉ ።
10 ወኵሎ ፡ አህጉሪሆሙ ፡ ዘውስቴቱ ፡ ይነብሩ ፡ ወአዕጻዳቲሆሙኒ ፡ አውዐዩ ፡ በእሳት ።
11 ወነሥኡ ፡ ኵሎ ፡ ፄዋሆሙ ፡ ወምህርካሆሙ ፡ እምሰብእ ፡ እስከ ፡ እንስሳ ።
12 ወወሰዱ ፡ ኀበ ፡ ሙሴ ፡ ወኀበ ፡ እልዓዛር ፡ ካህን ፡ ወኀበ ፡ ኵሉ ፡ ደቂቀ ፡ እስራኤል ፡ ፄዋ ፡ ወምህርካ ፡ ወዘበርበሩ ፡ ውስተ ፡ ትዕይንት ፡ ዘአራ[ቦ] ት ፡ ዘሞአብ ፡ እንተ ፡ ዲበ ፡ ዮርዳንስ ፡ መንገለ ፡ ኢያሪኮ ።
13 ወወፅኡ ፡ ሙሴ ፡ ወእልዓዛር ፡ ካህን ፡ ወኵሉ ፡ መላእክተ ፡ ተዓይን ፡ ተቀበልዎሙ ፡ አፍአ ፡ እምትዕይንት ።
14 ወተምዐ ፡ መዐተ ፡ ሙሴ ፡ ላዕለ ፡ መላእክተ ፡ ሰራዊት ፡ ወላዕለ ፡ መሳፍንቲሆሙ ፡ ወላዕለ ፡ መላእክትኒ ፡ እለ ፡ አተዉ ፡ እምፀብእ ፡ እምኀበ ፡ ይትቃተሉ ።
15 ወይቤሎሙ ፡ ሙሴ ፡ ለምንት ፡ አሕየውክሙ ፡ ኵሎ ፡ አንስተ ።
16 እስመ ፡ እላንቱ ፡ ውእቶን ፡ እለ ፡ ይከውናሆሙ ፡ ለደቂቀ ፡ እስራኤል ፡ በከመ ፡ ይቤ ፡ በለዓም ፡ እለ ፡ ያስሕታሆሙ ፡ ወያኀድጋሆሙ ፡ ቃለ ፡ እግዚአብሔር ፡ በበይነ ፡ ፌጎር ፡ ወመጽአ ፡ መቅሠፍተ ፡ እግዚአብሔር ፡ ላዕለ ፡ ትዕይንት ።
17 ወይእዜኒ ፡ ቅትሉ ፡ ኵሎ ፡ ተባዕተ ፡ በኀበ ፡ ሀለዉ ፡ ወኵሎ ፡ ብእሲተ ፡ እንተ ፡ አእመረት ፡ ብእሴ ፡ ቅትሉ ።
18 ወኵሎ ፡ አዋልደ ፡ እለ ፡ ኢያእመራ ፡ ብእሴ ፡ አሕይውዎን ።
19 ወአንትሙሰ ፡ ተዓየኑ ፡ ለክሙ ፡ አፍአ ፡ እምትዕይንት ፡ ሰቡዐ ፡ መዋዕለ ፡ ኵሉ ፡ ዘቀተለ ፡ ወዘገሰሰ ፡ ምውተ ፡ ያንጽሕ ፡ ርእሶ ፡ አመ ፡ ሣልስት ፡ ዕለት ፡ ወአመ ፡ ሳብዕት ፡ ዕለት ፡ አንትሙ ፡ ወፄዋክሙ ።
20 ወኵሎ ፡ ልብሰ ፡ ወኵሎ ፡ ንዋየ ፡ ማእስ ፡ ወኵሎ ፡ ንዋየ ፡ ዘእምነ ፡ ማእሰ ፡ ጠሊ ፡ ወኵሎ ፡ ንቀየ ፡ ዕፅ ፡ አንጽሑ ።
21 ወይቤሎሙ ፡ እልዓዛር ፡ ለዕደወ ፡ ኀይል ፡ እለ ፡ አተዉ ፡ እምፀብእ ፡ እምኀበ ፡ ይትቃተሉ ፡ ዝንቱ ፡ ውእቱ ፡ ኵነኔሁ ፡ ለሕግ ፡ ዘአዘዞ ፡ እግዚአብሔር ፡ ለሙሴ ።
22 ወርቅ ፡ ወብሩር ፡ ወብርት ፡ ወኀፂን ፡ ወዐረር ፡ ወናእክ ፤
23 ኵሉ ፡ ዘይትገበር ፡ በእሳት ፡ ንዋይ ፡ ወይነጽሕ ፡ ለያንጽሕዎ ፡ በማየ ፡ አንጽሖ ፡ ወኵሉ ፡ ዘይበውእ ፡ ውስተ ፡ እሳት ፡ ለይጥምዕዎ ፡ ውስተ ፡ ማይ ።
24 ወኅፅቡ ፡ አልባሲክሙ ፡ በሳብዕት ፡ ዕለት ፡ ወትነጽሑ ፡ ወእምድኅረ ፡ ዝንቱ ፡ ትበውኡ ፡ ውስተ ፡ ትዕይንተ ።
25 ወነበቦ ፡ እግዚአብሔር ፡ ለሙሴ ፡ ወይቤሎ ፤
26 ንሥኦ ፡ መሠንዮ ፡ ለፄዋ ፡ ወለምህርካ ፡ እምሰብእ ፡ እስከ ፡ እንስሳ ፡ አንተ ፡ ወእልዓዛር ፡ ወመላእክተ ፡ አበዊሆሙ ፡ ለተዓይን ።
27 ወትከፍሉ ፡ ምህርካ ፡ ማእከሎሙ ፡ ለእለ ፡ ፀብኡ ፡ ለእለ ፡ ሖሩ ፡ ይትቃተሉ ፡ ወማእከለ ፡ ኵሉ ፡ ተዓይን ።
28 ወታወፅኡ ፡ ፀባሕቶ ፡ ለእግዚአብሔር ፡ እምኀቤሆሙ ፡ ለእለ ፡ ፀብኡ ፡ ለእለ ፡ ሖሩ ፡ ይትቃተሉ ፡ አሐተ ፡ ነፍሰ ፡ እምውስተ ፡ ፭፻ወእምነ ፡ ሰብእ ፡ ወእምነ ፡ እንስሳ ፡ ወእምነ ፡ አልህምት ፡ ወእምነ ፡ አባግዕ ፡ ወእምነ ፡ አእዱግ ።
29 ወትነሥእ ፡ እምነ ፡ መንፈቆሙ ፡ ወትሁቦ ፡ ለእልዓዛር ፡ ካህን ፡ ቀደምያቲሁ ፡ ለእግዚአብሔር ።
30 ወእምነ ፡ መንፈቆሙ ፡ ለደቂቀ ፡ እስራኤል ፡ ትነሥእ ፡ አሐደ ፡ እምኀምሳ ፡ እምነ ፡ ሰብእ ፡ ወእምነ ፡ አልህምት ፡ ወእምነ ፡ አባግዕ ፡ ወእምነ ፡ አእዱግ ፡ ወእምነ ፡ እንስሳ ፡ ወሀቦሙ ፡ ለሌዋውያን ፡ እለ ፡ የዐቅቡ ፡ ሕገ ፡ ደብተራሁ ፡ ለእግዚአብሔር ።
31 ወገብረ ፡ ሙሴ ፡ ወእልዓዛር ፡ ካህን ፡ በከመ ፡ አዘዞ ፡ እግዚአብሔር ፡ ለሙሴ ።
32 ወኮነ ፡ ኍልቈ ፡ አባግዕ ፡ ዘማህረኩ ፡ ዕደው ፡ እለ ፡ ፀብኡ ፡ ፷፻-፻፯፻-፻፶፻ ።
33 ወላህሞሙ ፡ ፯፻-፻፳፻ ።
34 ወአእዱግ ፡ ፯፻-፻፲፻ ።
35 ወሰብእ ፡ ዘመንፈስ ፡ አንስት ፡ እለ ፡ ኢያአምራ ፡ ብእሴ ፡ ኵሉ ፡ ነፍስ ፡ ፫፻-፻፳፻ ።
36 ወኮነ ፡ መንፈቀ ፡ ክፍሎሙ ፡ ለእለ ፡ ሖሩ ፡ ፅብአ ፡ እምውስተ ፡ ኍልቈ ፡ አባግዒሆሙ ፡ ፴፻-፻፫፻-፻፸፻፭፻ ።
37 ወኮነ ፡ ጸባሕቱ ፡ ለእግዚአብሔር ፡ እምውስተ ፡ አባግዕ ፡ ፯፻፸፭ ።
38 ወላህም ፡ ፫፻-፻፷፻ወጸባሕቱ ፡ ለእግዚአብሔር ፡ ፸ወ፪ ።
39 ወአእዱግ ፡ ፫፻-፻፭፻ወጸባሕቱ ፡ ለእግዚአብሔር ፡ ፷፩ ።
40 ወሰብእ ፡ ዘመንፈስ ፡ ፩፻-፻፷፻ወጸባሕቱ ፡ ለእግዚአብሔር ፡ ፴፪ ።
41 ወወሀበ ፡ ሙሴ ፡ ጸባሕተ ፡ ለእግዚአብሔር ፡ ዘፈለጡ ፡ ለእግዚአብሔር ፡ ለእልዓዛር ፡ ካህን ፡ በከመ ፡ አዘዞ ፡ እግዚአብሔር ፡ ለሙሴ ።
42 እምውስተ ፡ መንፈቆሙ ፡ ለደቂቀ ፡ እስራኤል ፡ ዘአውፅአ ፡ ሙሴ ፡ እምነ ፡ ዕደው ፡ እለ ፡ ሖሩ ፡ ፀብአ ፤
43 ወኮነ ፡ መንፈቅ ፡ ዘእምውስተ ፡ ትዕይንት ፡ እምነ ፡ አባግዕ ፡ ፴፻-፻[፫፻-፻፸፻] ፭፻ ።
44 [ወአልህምት ፡ ፫፻-፻፷፻ ።
45 ወአእዱግ ፡ ፫፻-፻፭፻ ።]
46 ወሰብእ ፡ ዘመንፈስ ፡ ፩፻-፻፷፻ ።
47 ወነሥአ ፡ ሙሴ ፡ እምውስተ ፡ መንፈቆሙ ፡ ለደቅቀ ፡ እስራኤል ፡ አሐደ ፡ እም፶እምነ ፡ ሰብእ ፡ ወእምነ ፡ እንስሳ ፡ ወወሀቦሙ ፡ ለሌዋውያን ፡ ለእለ ፡ የዐቅቡ ፡ ሕገ ፡ ደብተራሁ ፡ ለእግዚአብሔር ፡ በከመ ፡ አዘዞ ፡ እግዚአብሔር ፡ ለሙሴ ።
48 ወመጽኡ ፡ ኀበ ፡ ሙሴ ፡ ኵሎሙ ፡ እለ ፡ ሥዩማን ፡ ላዕለ ፡ ሰራዊተ ፡ ኀይል ፡ ነገሥተ ፡ ሰራዊት ፡ ወመሳፍንት ።
49 ወይቤልዎ ፡ ለሙሴ ፡ ሰብእከ ፡ ነሥኡ ፡ ሰርጕሆሙ ፡ ለዕደው ፡ እለ ፡ ቀተሉ ፡ ምስሌነ ፡ ወኢያይድዑነ ፡ ወኢአሐዱ ፡ እምኔሆሙ ።
50 ወናሁ ፡ አምጻእነ ፡ ቍርባኖ ፡ ለእግዚአብሔር ፡ ብእሲ ፡ ዘረከበ ፡ ሰርጐ ፡ ወርቅ ፡ በዝግና ፡ አው ፡ ወቅፈ ፡ አው ፡ ሕልቀተ ፡ አው ፡ ሐብለተ ፡ ዘፅፍሮ ፡ ከመ ፡ ታስተስርዩ ፡ በእንቲአነ ፡ ቅድመ ፡ እግዚአብሔር ።
51 ወነሥኡ ፡ ሙሴ ፡ ወእልዓዛር ፡ ካህን ፡ ውእተ ፡ ወርቀ ፡ እምኔሆሙ ፡ ወኵሎ ፡ ሰርጐ ፡ ግቡር ።
52 ወኮነ ፡ ኵሉ ፡ ወርቅ ፡ ዘመባእ ፡ ዘፈለጡ ፡ ለእግዚአብሔር ፡ ፩፻-፻፷፻፯፻፶ ፡ በሰቅል ፡ ዘእምኀበ ፡ ነገሥተ ፡ ሰራዊት ፡ ወመሳፍንት ።
53 ወእልክቱሰ ፡ ዕደው ፡ እለ ፡ ፀብኡ ፡ አእተዉ ፡ ለለ ፡ ርእሶሙ ፡ ዘሰለቡ ።
54 ወነሥኡ ፡ ሙሴ ፡ ወእልዓዛር ፡ ካህን ፡ ውእተ ፡ ወርቀ ፡ እምኀበ ፡ መላእክተ ፡ ሰራዊት ፡ ወእምኀበ ፡ መሳፍንት ፡ ወአብኡ ፡ ውስተ ፡ ደብተራ ፡ ዘመርጡል ፡ ተዝካሮሙ ፡ ለደቂቀ ፡ እስራኤል ።
=== chapter 32 ===
[Numeri 32]
1 ወቦሙ ፡ ደቂቀ ፡ ሮቤል ፡ እንስሳ ፡ ብዙኀ ፡ ወደቂቀ ፡ ጋድ ፡ ብዙኀ ፡ ጥቀ ፡ ወፈድፋደ ፡ ወርእይዎ ፡ ለብሔረ ፡ ያዜር ፡ ወለብሔረ ፡ ገላአድ ፡ ከመ ፡ ብሔረ ፡ እንስሳ ፡ ብሔሩ ።
2 ወመጽኡ ፡ ደቂቀ ፡ ሮቤል ፡ ወደቂቀ ፡ ጋድ ፡ ወይቤልዎ ፡ ለሙሴ ፡ ወለእልዓዛር ፡ ካህን ፡ ወለመላእክተ ፡ ተዓይን ፡ እንዘ ፡ ይብሉ ፤
3 አጣሮት ፡ ወዴቦን ፡ ወያዜር ፡ ወነምራ ፡ ወሔሴቦን ፡ ወእልየሌ ፡ ወሴበማ ፡ ወናበው ፡ ወቤያን ፤
4 ምድር ፡ እንተ ፡ ወሀበ ፡ እግዚአብሔር ፡ ቅድሜሆሙ ፡ ለደቂቀ ፡ እስራኤል ፡ ምድር ፡ ዘኖሎተ ፡ እንስሳ ፡ ይእቲ ፡ ወንሕነ ፡ አግብርቲከ ፡ ብዙኀ ፡ እንስሳ ፡ ብነ ።
5 ወይቤልዎ ፡ ለእመ ፡ ረከብነ ፡ ሞገሰ ፡ ቅድሜከ ፡ ሀቦሙ ፡ ዛተ ፡ ምድረ ፡ ለአግብርቲከ ፡ መክፈልተነ ፡ ትኩነነ ፡ ወኢታዕድወነ ፡ ዮርዳንስ ።
6 ወይቤሎሙ ፡ ሙሴ ፡ ለደቂቀ ፡ ሮቤል ፡ ወለደቂቀ ፡ ጋድ ፡ አኀዊክሙ ፡ ሖሩ ፡ ይትቃተሉ ፡ ወአንትሙሰ ፡ ነበርክሙ ።
7 ለምንት ፡ ትገፈትዑ ፡ ልቦሙ ፡ ለደቂቀ ፡ እስራኤል ፡ ከመ ፡ ኢይሑሩ ፡ ውስተ ፡ ምድር ፡ እንተ ፡ ይሁቦሙ ፡ እግዚአብሔር ።
8 አኮኑ ፡ ከመዝ ፡ ገብሩ ፡ አበዊክሙ ፡ አመ ፡ ፈነውክዎሙ ፡ እምነ ፡ ቃዴስ ፡ ከመ ፡ ይርአይዋ ፡ ለይእቲ ፡ ምድር ።
9 ወዐርጉ ፡ ኀበ ፡ ቈላተ ፡ ዐጽቅ ፡ ከመ ፡ ይነጽርዋ ፡ ለይእቲ ፡ ምድር ፡ ወሜጥዎ ፡ ለልቦሙ ፡ ለደቂቀ ፡ እስራኤል ፡ ከመ ፡ ኢይባኡ ፡ ውስተ ፡ ይእቲ ፡ ምድር ፡ እንተ ፡ ይሁቦሙ ፡ እግዚአብሔር ።
10 ወተምዕዐ ፡ መዐተ ፡ እግዚአብሔር ፡ በይእቲ ፡ ዕለት ፡ ወመሐለ ፡ እንዘ ፡ ይብል ፤
11 ከመ ፡ ኢይሬእይዋ ፡ እሉ ፡ ዕደው ፡ እለ ፡ ወፅኡ ፡ እምነ ፡ ግብጽ ፡ ዘእም፳ዓም ፡ ወላዕሉ ፡ እምኔሆሙ ፡ እለ ፡ ያአምርዋ ፡ ለሠናይት ፡ ወለእኪት ፡ ለምድር ፡ እንተ ፡ መሐለ ፡ እግዚአብሔር ፡ ለአብርሃም ፡ ወለይስሐቅ ፡ ወለያዕቆብ ፡ እስመ ፡ ኢተለዉ ፡ ድኅሬየ ፤
12 እንበለ ፡ ካሌብ ፡ ወልደ ፡ ዬፎኒ ፡ ዘተፈልጠ ፡ ወዬሳዕ ፡ ወልደ ፡ ነዌ ፡ እስመ ፡ ተለዉ ፡ ድኅሬሁ ፡ ለእግዚአብሔር ።
13 ወተምዕዐ ፡ መዐተ ፡ እግዚአብሔር ፡ ላዕለ ፡ እስራኤል ፡ ወአዔሎሙ ፡ ውስተ ፡ ገዳም ፡ ፵ዓመ ፡ እስከ ፡ ጠፍኡ ፡ ኵሎሙ ፡ ይእቲ ፡ ትውልድ ፡ እለ ፡ ይገብሩ ፡ እኪተ ፡ ቅድመ ፡ እግዚአብሔር ።
14 ወናሁ ፡ ተንሣእክሙ ፡ ህየንተ ፡ አበዊክሙ ፡ በማዕሌተ ፡ ሰብእ ፡ ኃጥኣን ፡ ከመ ፡ ትወስኩ ፡ ዓዲ ፡ መዐተ ፡ ዲበ ፡ መዐቱ ፡ ለእግዚአብሔር ፡ ላዕለ ፡ እስራኤል ።
15 እስመ ፡ ኀደግምዎ ፡ ዓዲ ፡ ትደግሙ ፡ ኀዲጎቶ ፡ በገዳም ፡ ወትኤብሱ ፡ ላዕለ ፡ ኵላ ፡ ዛቲ ፡ ትዕይንት ።
16 ወቀርቡ ፡ ኀቤሁ ፡ ወይቤልዎ ፡ ንንድቅ ፡ አዕጻዳተ ፡ አባግዕ ፡ ዝየ ፡ ለእንስሳነ ፡ ወአህጉረ ፡ ለንዋይነ ።
17 ወንሕነሰ ፡ ምስለ ፡ ንዋየ ፡ ሐቅልነ ፡ ፍጽመ ፡ ንሑር ፡ ቅድሜሆሙ ፡ ለደቂቀ ፡ እስራኤል ፡ እስከ ፡ ናበጽሖሙ ፡ ውስተ ፡ መካኖሙ ፡ ወይንበር ፡ ንዋይነ ፡ ውስተ ፡ አህጉር ፡ እለ ፡ ቦቶን ፡ ቀጽረ ፡ በእንተ ፡ ሰብአ ፡ ብሔር ።
18 ወኢንገብእ ፡ ውስተ ፡ አብያቲነ ፡ እስከ ፡ ይትካፈሉ ፡ ደቂቀ ፡ እስራኤል ፡ ርስቶሙ ፡ ዘዘ ፡ ዚአሆሙ ።
19 ወኢንትካፈሎሙ ፡ እንከ ፡ እምነ ፡ ማዕዶተ ፡ ዮርዳንስ ፡ ወከሐክ ፡ እምኔሁ ፡ እስመ ፡ ነሣእነ ፡ ክፍለነ ፡ እምነ ፡ ማዕዶተ ፡ ዮርዳንስ ፡ ዘመንገለ ፡ ጽባሕ ።
20 ወይቤሎሙ ፡ ሙሴ ፡ ለእመ ፡ ገበርክሙ ፡ በከመ ፡ ትቤሉ ፡ ወሖርክሙ ፡ ምስለ ፡ ንዋየ ፡ ሐቅልክሙ ፡ ቅድመ ፡ እግዚአብሔር ፡ ውስተ ፡ ፀብእ ፤
21 ወዐደውክሙ ፡ ኵልክሙ ፡ እለ ፡ ምስለ ፡ ንዋየ ፡ ሐቅልክሙ ፡ ዮርዳንስ ፡ ቅድመ ፡ እግዚአብሔር ፤
22 ወእምድኅረ ፡ ዝንቱ ፡ ትገብኡ ፡ ወንጹሓነ ፡ ትከውኑ ፡ ቅድመ ፡ እግዚአብሔር ፡ ወእምነ ፡ እስራኤልኒ ፡ ወትከውን ፡ ለክሙ ፡ ዛቲ ፡ ምድር ፡ መክፈልተክሙ ፡ ቅድመ ፡ እግዚአብሔር ።
23 ወለእመሰ ፡ ኢገበርክሙ ፡ ከመዝ ፡ ትጌግዩ ፡ ቅድመ ፡ እግዚአብሔር ፡ ወአመ ፡ ረከበተክሙ ፡ እኪት ፡ ተአምርዋ ፡ ለአበሳክሙ ።
24 ወንድቁ ፡ ለክሙ ፡ አህጉረ ፡ ለንዋይክሙ ፡ ወአዕጻደተ ፡ ለእንስሳክሙ ፡ ወግበሩ ፡ በከመ ፡ ወፅአ ፡ እምነ ፡ አፉክሙ ።
25 ወይቤልዎ ፡ ደቂቀ ፡ ሮቤል ፡ ወደቂቀ ፡ ጋድ ፡ ለሙሴ ፡ ንሕነ ፡ አግብርቲከ ፡ ንገብር ፡ በከመ ፡ አዘዝከነ ፡ እግዚእ ።
26 ንዋይነ ፡ ወአንስቲያነ ፡ ይንበር ፡ ውስተ ፡ አህጉረ ፡ ገላአድ ፡ ወኵሉ ፡ እንስሳነ ።
27 ወንሕነሰ ፡ ነሐውር ፡ ኵልነ ፡ ምስለ ፡ ንዋየ ፡ ሐቅልነ ፡ ተረስየነ ፡ ቅድመ ፡ እግዚአብሔር ፡ ውስተ ፡ ፀብእ ፡ በከመ ፡ ትቤለነ ፡ እግዚኦ ።
28 ወሤመ ፡ ላዕሌሆሙ ፡ ሙሴ ፡ እልዓዛርሃ ፡ ካህነ ፡ ወኢየሱ ፡ ወልደ ፡ ነዌ ፡ ወመላእክተ ፡ አበዊሆሙ ፡ ለነገደ ፡ እስራኤል ።
29 ወይቤሎሙ ፡ ሙሴ ፡ ለእመ ፡ ዐደው ፡ ምስሌክሙ ፡ ደቂቀ ፡ ሮቤል ፡ ወደቂቀ ፡ ጋድ ፡ ዮርዳንስ ፡ ኵሎሙ ፡ ምስለ ፡ ንዋየ ፡ ሐቅሎሙ ፡ ውስተ ፡ ፀብእ ፡ ቅድመ ፡ እግዚአብሔር ፡ ትነሥኡ ፡ ዛተ ፡ ምድረ ፡ እንተ ፡ ቅድሜክሙ ፡ ወትሁብዎሙ ፡ ሎሙ ፡ ገላአድ ፡ መክፈልቶሙ ።
30 ወለእመሰ ፡ ኢዐደዉ ፡ ምስሌክሙ ፡ በንዋየ ፡ ሐቅሎሙ ፡ ውስተ ፡ ፀብእ ፡ ቅድመ ፡ እግዚአብሔር ፡ አግዕዙ ፡ ንዋዮሙ ፡ ወአንስቲያሆሙ ፡ ወእንስሳሆሙ ፡ ቅድሜክሙ ፡ ውስተ ፡ ምድረ ፡ ከናአን ።
31 ወአውሥኡ ፡ ደቂቀ ፡ ሮቤል ፡ ወደቂቀ ፡ ጋድ ፡ ወይቤሉ ፡ ኵሎ ፡ ዘይቤለነ ፡ እግዚእነ ፡ ከማሁ ፡ ንገብር ፡ ንሕነ ።
32 ነዐዱ ፡ በንዋየ ፡ ሐቅልነ ፡ ቅድመ ፡ እግዚአብሔር ፡ ውስተ ፡ ምድረ ፡ ከናአን ፡ ወሀቡነ ፡ መክፈልተነ ፡ ውስተ ፡ ማዕዶተ ፡ ዮርዳንስ ።
33 ወወሀቦሙ ፡ ሙሴ ፡ ለደቂቀ ፡ ጋድ ፡ ወለደቂቀ ፡ ሮቤል ፡ ወለመንፈቀ ፡ ነገደ ፡ ማናሴ ፡ ደቂቀ ፡ ዮሴፍ ፡ መንግሥተ ፡ ሴዎን ፡ ንጉሠ ፡ አሞሬዎን ፡ ወመንግሥተ ፡ አግ ፡ ንጉሠ ፡ ባሳን ፡ ምድሮሙ ፡ ወአህጉሪሆሙ ፡ ምስለ ፡ አድባሪሆሙ ፡ ወአህጉረ ፡ ዘውስተ ፡ ምድር ፡ ዘአውዶሙ ።
34 ወነደቁ ፡ ደቂቀ ፡ ጋድ ፡ ዴቦን ፡ ወአጣሮት ፡ ወአሮዔር ፤
35 ወሶፋን ፡ ወያዜር ፤
36 ወነምራን ፡ ወቤታራን ፡ አህጉረ ፡ ጽኑዓተ ፡ ወአንኅዎን ፡ ወአዕጻዳተ ፡ አባግዕ ።
37 ወደቂቀ ፡ ሮቤል ፡ ነደቁ ፡ ሔሴቦን ፡ ወእልያሌ ፡ ወቀርያቴም ፤
38 ወቤዔልማዎን ፡ ወቀጽሮን ፡ ወሴባማ ፡ ወሰመይዎን ፡ በአስማቲሆን ፡ አስማተ ፡ አህጉር ፡ ዘነደቁ ።
39 ወሖረ ፡ ወልደ ፡ ማኪር ፡ ወልደ ፡ ማናሴ ፡ ወነሥአ ፡ ገላአድ ፡ ወአጥፍኦሙ ፡ ለአሞሬዎን ፡ እለ ፡ ይነብሩ ፡ ውስቴታ ።
40 ወወሀቦ ፡ ሙሴ ፡ ለማኪር ፡ ወልደ ፡ ማናሴ ፡ ገላአድ ፡ ወነበረ ፡ ውስቴታ ።
41 ወኢያዕር ፡ ወልደ ፡ ማናሴ ፡ ሖረ ፡ ወነሥአ ፡ አዕጻዳቲሆሙ ፡ ወሰመይዎን ፡ አዕጻዳተ ፡ ኢያዕር ።
42 ወሖረ ፡ ናበው ፡ ወነሥአ ፡ ቃነተ ፡ ወአዕጻዳቲሃ ፡ ወሰመይዎን ፡ ናቦት ፡ በስመ ፡ ዚአሁ ።
=== chapter 33 ===
[Numeri 33]
1 ወዝንቱ ፡ ውእቱ ፡ መኃድሪሆሙ ፡ ለደቂቀ ፡ እስራኤል ፡ እምዘ ፡ ወፅኡ ፡ እምግብጽ ፡ ምስለ ፡ ኀይሎሙ ፡ በእደ ፡ ሙሴ ፡ ወአሮን ።
2 ወጸሐፈ ፡ ሙሴ ፡ መኃድሪሆሙ ፡ አምጣነ ፡ ግዕዙ ፡ በቃለ ፡ እግዚአብሔር ፡ ወዝንቱ ፡ ውእቱ ፡ መኃድሪሆሙ ፡ ዘግዕዙ ።
3 ወግዕዙ ፡ እምራሜስ ፡ በቀዳሚ ፡ ወርኅ ፡ አመ ፡ ዐሡሩ ፡ ወኀሙሱ ፡ ለቀደሚ ፡ ወርኅ ፡ በሳኒታ ፡ ፋስካ ፡ ወፅኡ ፡ ደቂቀ ፡ እስራኤል ፡ በእድ ፡ ልዕልት ፡ በቅድመ ፡ ኵሉ ፡ ግብጽ ።
4 ወቦቱ ፡ እምነ ፡ ግብጽ ፡ እለ ፡ ቀበሩ ፡ ምውቶሙ ፡ ኵሎሙ ፡ እለ ፡ ቀተለ ፡ እግዚአብሔር ፡ [ለ] ኵሉ ፡ በኵ[ረ] ፡ ምድረ ፡ ግብጽ ፡ ወላዕለ ፡ አማልክቲሆሙኒ ፡ ገብረ ፡ እግዚአብሔር ፡ በቀለ ።
5 ወግዕዙ ፡ ደቂቀ ፡ እስራኤል ፡ እምነ ፡ ራሜሴ ፡ ወኀደሩ ፡ ውስተ ፡ ሶቆት ።
6 ወግዕዙ ፡ እምነ ፡ ሶቆት ፡ ወኀደሩ ፡ ውስተ ፡ ቡታን ፡ ወአሐዱ ፡ ኅብረ ፡ በድው ፡ ውእቱ ።
7 ወግዕዙ ፡ እምነ ፡ ቡታን ፡ ወኀደሩ ፡ ውስተ ፡ ኀበ ፡ አፉሁ ፡ ለኤሮት ፡ ዘቅድመ ፡ ቤዔልሴፎን ፡ ወኀደሩ ፡ ውስተ ፡ ቅድመ ፡ መግዶሉ ።
8 ወግዕዙ ፡ ቅድመ ፡ ኤሮት ፡ ወዐደዉ ፡ እንተ ፡ ማእከለ ፡ ባሕር ፡ ውስተ ፡ ገዳም ፡ ወሖሩ ፡ ሠሉሰ ፡ ዕለተ ፡ ውስተ ፡ ገዳም ፡ እሙንቱ ፡ ወኀደሩ ፡ ውስተ ፡ ምረት ።
9 ወግዕዙ ፡ እምነ ፡ ምረት ፡ ወበጽሑ ፡ ውስተ ፡ ኤሌም ፡ ወቦቱ ፡ ውስተ ፡ ኤሌም ፡ ዐሠርተ ፡ ወክልኤተ ፡ አንቅዕተ ፡ ማይ ፡ ወሰብዓ ፡ በቀልተ ፡ ተመርት ፡ ወኀደሩ ፡ ህየ ፡ ኀበ ፡ ማይ ።
10 ወግዕዙ ፡ እምነ ፡ ኤሌም ፡ ወኀደሩ ፡ ኀበ ፡ ባሕረ ፡ ኤርትራ ።
11 ወግዕዙ ፡ እምነ ፡ ባሕረ ፡ ኤርትራ ፡ ወኀደሩ ፡ ውስተ ፡ ገዳም ፡ ዘሲ[ን] ።
12 ወግዕዙ ፡ እምነ ፡ ገዳም ፡ ዘሲ[ን] ፡ ወኀደሩ ፡ ውስተ ፡ ራፋቃ ።
13 ወግዕዙ ፡ እምነ ፡ ራፋቃ ፡ ወኀደሩ ፡ ውስተ ፡ ኤሉስ ።
14 ወግዕዙ ፡ እምነ ፡ ኤሉስ ፡ ወኀደሩ ፡ ውስተ ፡ ራፊድን ፡ ወአልቦ ፡ ህየ ፡ ማየ ፡ ዘይሰቲ ፡ ሕዝብ ።
15 ወግዕዙ ፡ እምነ ፡ ራፊድን ፡ ወኀደሩ ፡ ውስተ ፡ ገዳም ፡ ዘሲና ።
16 ወግዕዙ ፡ እምነ ፡ ገዳም ፡ ዘሲና ፡ ወኀደሩ ፡ ውስተ ፡ ተዝካረ ፡ ፍትወት ።
17 ወግዕዙ ፡ እምነ ፡ ተዝካረ ፡ ፍትወት ፡ ወኀደሩ ፡ ውስተ ፡ አሴሮት ።
18 ወግዕዙ ፡ እምነ ፡ አሴሮት ፡ ወኀደሩ ፡ ውስተ ፡ ራታማ ።
19 ወግዕዙ ፡ እምነ ፡ ራታማ ፡ ወኀደሩ ፡ ውስተ ፡ ሬሞት ፡ ዘፋሬስ ።
20 ወግዕዙ ፡ እምነ ፡ ሬሞት ፡ ዘፋሬስ ፡ ወኀደሩ ፡ ውስተ ፡ ሌቦና ።
21 ወግዕዙ ፡ እምነ ፡ ሌቦና ፡ ወኀደሩ ፡ ውስተ ፡ ሬሶ ።
22 ወግዕዙ ፡ እምነ ፡ ሬሶ ፡ ወኀደሩ ፡ ውስተ ፡ መቄደት ።
23 ወግዕዙ ፡ እምነ ፡ መቄደት ፡ ወኀደሩ ፡ ውስተ ፡ አርሳፈር ።
24 ወግዕዙ ፡ እምነ ፡ አርሳፈር ፡ ወኀደሩ ፡ ውስተ ፡ ከሬዳ ።
25 ወግዕዙ ፡ እምነ ፡ ከሬደ ፡ ወኀደሩ ፡ ውስተ ፡ መቄዶት ።
26 ወግዕዙ ፡ እምነ ፡ መቄዶት ፡ ወኀደሩ ፡ ውስተ ፡ ቀጦዐት ።
27 ወግዕዙ ፡ እምነ ፡ ቀጦዐት ፡ ወኀደሩ ፡ ውስተ ፡ ተረት ።
28 ወግዕዙ ፡ እምነ ፡ ተረት ፡ ወኀደሩ ፡ ውስተ ፡ መቴቃ ።
29 ወግዕዙ ፡ እምነ ፡ መቴቃ ፡ ወኀደሩ ፡ ውስተ ፡ አሴምና ።
30 ወግዕዙ ፡ እምነ ፡ አሴምና ፡ ወኀደሩ ፡ ውስተ ፡ መሱሩት ።
31 ወግዕዙ ፡ እምነ ፡ መሱሩት ፡ ወኀደሩ ፡ ውስተ ፡ በንያቅን ።
32 ወግዕዙ ፡ እምነ ፡ በንያቅን ፡ ወኀደሩ ፡ ውስተ ፡ ደብረ ፡ ገ[ድገ] ድ ።
33 ወግዕዙ ፡ እምነ ፡ ደብረ ፡ ገ[ድገ] ድ ፡ ወኀደሩ ፡ ውስተ ፡ ዔጤቤት ።
34 ወግዕዙ ፡ እምነ ፡ ዔጤቤት ፡ ወኀደሩ ፡ ውስተ ፡ ዔብሮና ።
35 ወግዕዙ ፡ እምነ ፡ ዔብሮና ፡ ወኀደሩ ፡ ውስተ ፡ ጌስዮን ፡ ጋቤር ።
36 ወግዕዙ ፡ እምነ ፡ ጌስዮን ፡ ጋቤር ፡ ወኀደሩ ፡ ውስተ ፡ ገዳም ፡ ዘ[ፂን] ፡ ወግዕዙ ፡ እምነ ፡ ገዳም ፡ ዘ[ፂን] ፡ ወኀደሩ ፡ ውስተ ፡ ገዳም ፡ ዘፋራን ፡ ዘውእቱ ፡ ቃዴስ ።
37 ወግዕዙ ፡ እምነ ፡ ቃዴስ ፡ ወኀደሩ ፡ ውስተ ፡ ደብረ ፡ ሆር ፡ ዘገቦሁ ፡ ለምድረ ፡ ኤዶም ።
38 ወዐርገ ፡ አሮን ፡ ካህን ፡ በትእዛዘ ፡ እግዚአብሔር ፡ ወሞተ ፡ በህየ ፡ አመ ፡ አርብዓ ፡ ዓም ፡ እምዘ ፡ ወፅኡ ፡ ደቂቀ ፡ እስራኤል ፡ እምግብጽ ፡ በኃምስ ፡ ወርኅ ፡ አመ ፡ ሠርቀ ፡ ወርኅ ።
39 ወዓመቲሁ ፡ ለአሮን ፡ መጠነ ፡ ኮነ ፡ አመ ፡ ሞተ ፡ በደብረ ፡ ሆር ፡ ፻፳፫ዓመት ፡ ሎቱ ።
40 ወሰምዐ ፡ ከናናዊ ፡ ንጉሠ ፡ አራድ ፡ እንዘ ፡ ይነብር ፡ ውስተ ፡ ምድረ ፡ ከናአን ፡ አመ ፡ ይበውኡ ፡ ደቂቀ ፡ እስራኤል ።
41 ወግዕዙ ፡ እምነ ፡ ደብረ ፡ ሆር ፡ ወኀደሩ ፡ ውስተ ፡ ሴልሞና ።
42 ወግዕዙ ፡ እምነ ፡ ሴልሞና ፡ ወኀደሩ ፡ ውስተ ፡ ፊኖ ።
43 ወግዕዙ ፡ እምነ ፡ ፊኖ ፡ ወኀደሩ ፡ ውስተ ፡ ኦቦት ።
44 ወግዕዙ ፡ እምነ ፡ ኦቦት ፡ ወኀደሩ ፡ ውስተ ፡ ጋይ ፡ ውስተ ፡ ማዕዶተ ፡ ደወሎሙ ፡ ለሞአብ ።
45 ወግዕዙ ፡ እምነ ፡ ጋይ ፡ ወኀደሩ ፡ ውስተ ፡ ዴቦን ፡ ዘጋድ ።
46 ወግዕዙ ፡ እምነ ፡ ዴቦን ፡ ዘጋድ ፡ ወኀደሩ ፡ ውስተ ፡ ጌልሞን ፡ ዘዴብላቴም ።
47 ወግዕዙ ፡ እምነ ፡ ጌልሞን ፡ ዘዴብላቴም ፡ ወኀደሩ ፡ ውስተ ፡ አድባረ ፡ አበርም ፡ ዘአንጻረ ፡ ናበው ።
48 ወግዕዙ ፡ እምነ ፡ አድባረ ፡ አበርም ፡ ወኀደሩ ፡ ውስተ ፡ ዐረቢሃ ፡ ለሞአብ ፡ ኀበ ፡ ዮርዳንስ ፡ መንገለ ፡ ኢየሪኮ ።
49 ወኀደሩ ፡ መንገለ ፡ ዮርዳንስ ፡ ማእከለ ፡ አሲሞት ፡ እስከ ፡ አቤልሰጢም ፡ ዘመንገለ ፡ ዐረቢሃ ፡ ለሞአብ ።
50 ወነበቦ ፡ እግዚአብሔር ፡ ለሙሴ ፡ በዐረቢሃ ፡ ለሞአብ ፡ በኀበ ፡ ዮርዳንስ ፡ ዘመንገለ ፡ ኢየሪኮ ፡ ወይቤሎ ፤
51 ንግሮሙ ፡ ለደቂቀ ፡ እስራኤል ፡ ወበሎሙ ፡ ናሁ ፡ ተዐድዉ ፡ አንትሙ ፡ ዮርዳንስ ፡ ውስተ ፡ ምድረ ፡ ከናኤን ።
52 ወአጥፍእዎሙ ፡ ለኵሎሙ ፡ እለ ፡ ይነብሩ ፡ ውስተ ፡ ይእቲ ፡ ምድር ፡ ቅድመ ፡ ገጽክሙ ፡ ወደምስሱ ፡ ግብሮሙ ፡ ወኵሎ ፡ አማልክቲሆሙ ፡ አጥፍኡ ፡ ወኵሎ ፡ አምሳሊሆሙ ፡ አሰስሉ ።
53 ወደምስስዎሙ ፡ ለእለ ፡ ይነብሩ ፡ ውስተ ፡ ይእቲ ፡ ምድር ፡ ወንበሩ ፡ ውስቴታ ፡ እስመ ፡ ለክሙ ፡ ወሀብኩክሙ ፡ ምድሮሙ ፡ መክፈልተክሙ ።
54 ወትወርስዋ ፡ ለይእቲ ፡ ምድር ፡ ወተከፈልዋ ፡ በበ ፡ ነገድክሙ ፡ ለእለ ፡ ይበዝኁ ፡ አብዝኁ ፡ ሎሙ ፡ መክፈልቶሙ ፡ ወለእለ ፡ ይውሕዱ ፡ አውሕዱ ፡ ሎሙ ፡ መክፈልቶሙ ፡ ወለለ ፡ ዘበጽሖ ፡ በስሙ ፡ ይኩኖ ፡ ሎቱ ፡ ህየ ፡ በበነገድክሙ ፡ ወበበ ፡ አብያተ ፡ አበዊክሙ ፡ ተካፈልዋ ።
55 ወለእመሰ ፡ ኢያጥፋእክምዎሙ ፡ ለእለ ፡ ይነብሩ ፡ ውስተ ፡ ይእቲ ፡ ምድር ፡ እምቅድመ ፡ ገጽክሙ ፡ ይከውኑክሙ ፡ እለ ፡ አትረፍክሙ ፡ አሥዋከ ፡ ለአዕይንቲክሙ ፡ ወአሜከላ ፡ ለገበዋቲክሙ ፡ ወይፃረሩክሙ ፡ በውስተ ፡ ምድር ፡ እንተ ፡ ውስቴታ ፡ ትነብሩ ፡ አንትሙ ።
56 ወዝክቱ ፡ ዘሐለይ[ኩ] ፡ ከመ ፡ እግበር ፡ ላዕሌሆሙ ፡ እገብር ፡ ላዕሌክሙ ።
=== chapter 34 ===
[Numeri 34]
1 ወነበቦ ፡ እግዚአብሔር ፡ ለሙሴ ፡ ወይቤሎ ፤
2 አዝዞሙ ፡ ለደቂቀ ፡ እስራኤል ፡ ወበሎሙ ፡ ናሁ ፡ ትበውኡ ፡ ውስተ ፡ ምድረ ፡ ከናአን ፡ አንትሙ ፡ ወርስትክሙ ፡ ይእቲ ፡ ለክሙ ፡ ምስለ ፡ አድዋሊሆሙ ።
3 ወይኩንክሙ ፡ ገቦሃ ፡ ዘመንገለ ፡ አዜብ ፡ እምገዳም ፡ ዘ[ፂን] ፡ እስከ ፡ ማእኀዘ ፡ ኤዶም ፡ ወይኩንክሙ ፡ ደወልክሙ ፡ ዘመንገለ ፡ አዜብ ፡ እምነ ፡ ገቦሃ ፡ ለባሕረ ፡ አሊቄ ፡ ዘመንገለ ፡ ጽባሕ ።
4 ወየዐውደክሙ ፡ ደወላ ፡ ዘአዜብ ፡ እምነ ፡ ዐቀበ ፡ ዐቅረቦን ፡ ወይበጽሕ ፡ እስከ ፡ ሴናቅ ፡ ወይከውን ፡ ሞፃእቱ ፡ ለዘመንገለ ፡ አዜብ ፡ ቃዴስ ፡ ዘበርኔ ፡ ወይበውእ ፡ ውስተ ፡ አህጉረ ፡ አረድ ፡ ወይወፅእ ፡ እንተ ፡ አሴሞና ።
5 ወየዐውድ ፡ ደወሉ ፡ እምነ ፡ አሴሞና ፡ ፈለገ ፡ ግብጽ ፡ ወይከውን ፡ ወሰኑ ፡ ባሕር ።
6 ደወልክሙኒ ፡ ዘመንገለ ፡ ባሕር ፡ ትኩንክሙ ፡ ባሕር ፡ ዐባይ ፡ ወሰነክሙ ፡ ወዝንቱ ፡ ውእቱ ፡ ወሰንክሙ ፡ ዘመንገለ ፡ ባሕር ።
7 ወዝንቱ ፡ ደወልክሙ ፡ ዘመንገለ ፡ መስዕ ፡ እምነ ፡ ባሕር ፡ ዐቢይ ፡ ወይትኌለቍ ፡ ለክሙ ፡ እንተ ፡ መንገለ ፡ ደብር ።
8 ወእምደብር ፡ እስከ ፡ ደብር ፡ ይትኌለቍ ፡ ለክሙ ፡ እንዘ ፡ ይበጽሕ ፡ እስከ ፡ ኤመት ፡ ወይከውን ፡ ሞፃእቱ ፡ [*ደወለ ፡ ሰረደክ ።
9 ወይወፅእ ፡ ደወሉ ፡ ውስተ ፡ ዴፍሮና ፡ ወይከውን ፡ ሞፃእቱ ፡*] አርሴናይን ፡ ወበዝንቱ ፡ ይኩንክሙ ፡ ወሰንክሙ ፡ ዘመንገለ ፡ መስዕ ።
10 ወይትኌለቍ ፡ ለክሙ ፡ ደወልክሙ ፡ ዘጽባሕ ፡ እምነ ፡ አርሴናይን ፡ ዘሴፋማ ።
11 ወይወርድ ፡ ደወልክሙ ፡ እምነ ፡ ሴፋማ ፡ እስከ ፡ አርቤላ ፡ ወይትራከብ ፡ በዘባነ ፡ ባሕር ፡ ኬኔሬት ፡ እምጽባሕ ።
12 ወይወርድ ፡ ደወሉ ፡ ዲበ ፡ ዮርዳንስ ፡ ወይከውን ፡ ሞጻእቱ ፡ ባሕረ ፡ አሌቄ ፡ ወበዝንቱ ፡ ውእቱ ፡ ምድርክሙ ፡ ምስለ ፡ አድዋሊሃ ፡ ዘዐውዳ ።
13 ወነገሮሙ ፡ ሙሴ ፡ ለደቂቀ ፡ እስራኤል ፡ ወይቤሎሙ ፡ ዛቲ ፡ ይእቲ ፡ ምድርክሙ ፡ እንተ ፡ ትትዋረስዋ ፡ ወትትካፈልዋ ፡ በከመ ፡ አዘዘ ፡ እግዚአብሔር ፡ ከመ ፡ የሀብዎሙ ፡ ለትስዐቱ ፡ ነገድ ፡ ወለመንፈቀ ፡ ነገደ ፡ ማናሴ ።
14 እስመ ፡ ነሥኡ ፡ ነገደ ፡ ደቂቀ ፡ ሮቤል ፡ ወነገደ ፡ ደቂቀ ፡ ጋድ ፡ በበ ፡ አብያተ ፡ አበዊሆሙ ፡ ወመንፈቀ ፡ ነገደ ፡ ማናሴ ፡ ነሥኡ ፡ መክፈልቶሙ ።
15 ክልኤቱ ፡ ነገድ ፡ ወመንፈቀ ፡ ነገድ ፡ ሰለጡ ፡ መክፈልቶሙ ፡ በማዕዶተ ፡ ዮርዳንስ ፡ ዘኀበ ፡ ኢየሪኮ ፡ እምዘባኑ ፡ ዘመንገለ ፡ ጽባሕ ።
16 ወነበቦ ፡ እግዚአብሔር ፡ ለሙሴ ፡ ወይቤሎ ፤
17 ዝንቱ ፡ ውእቱ ፡ አስማቲሆሙ ፡ ለዕደው ፡ እለ ፡ ያስተካፍሉክሙ ፡ ይእተ ፡ ምድረ ፡ እልዓዛር ፡ ካህን ፡ ወኢየሱስ ፡ ወልደ ፡ ነዌ ።
18 ወንሥኡ ፡ በበ ፡ አሐዱ ፡ አሐዱ ፡ መልአክ ፡ እምውስተ ፡ አሐዱ ፡ አሐዱ ፡ ነገድ ፡ ከመ ፡ ያስተዋርሱክሙዋ ፡ ለይእቲ ፡ ምድር ።
19 ወዝንቱ ፡ ውእቱ ፡ አስማቲሆሙ ፡ ለውእቶሙ ፡ ዕደው ፡ ዘእምነገደ ፡ ይሁዳ ፡ ካሌብ ፡ ወልደ ፡ ዬፎኒ ።
20 ወዘእምነገደ ፡ ስምዖን ፡ ሰላሚየል ፡ ወልደ ፡ አሚዩድ ።
21 ወዘእምነገደ ፡ ብንያሚ ፡ ኤልዳድ ፡ ወልደ ፡ አስሎን ።
22 ወዘእምነገደ ፡ ዳን ፡ [ባ] ቂ ፡ ወልደ ፡ ዬቅሊ ፡ መልአክ ።
23 ወዘእምደቂቀ ፡ ዮሴፍ ፡ ዘእምውስተ ፡ ነገደ ፡ ደቂቀ ፡ ማናሴ ፡ አንሔል ፡ ወልደ ፡ ሱፊድ ፡ መልአክ ።
24 ወዘእምነገደ ፡ ደቂቀ ፡ ኤፍሬም ፡ ቃሙሔል ፡ ወልደ ፡ ሳፋጣን ፡ መልአክ ።
25 ወዘእምነገደ ፡ ደቂቀ ፡ ዛቡሎን ፡ ኤሊሳፈን ፡ ወልደ ፡ በርነክ ፡ መልአክ ።
26 ወዘእምነገዶ ፡ ደቂቀ ፡ ይሳከር ፡ ፈልጢሔል ፡ ወልደ ፡ ሖዛ ፡ መልአክ ።
27 ወዘእምነገደ ፡ ደቂቀ ፡ አሴር ፡ አኪሖር ፡ ወልደ ፡ ሴሌሚ ፡ መልአክ ።
28 ወዘእምነገደ ፡ ደቂቀ ፡ ንፍታሌም ፡ ፈዳሔል ፡ ወልደ ፡ የሚዩድ ፡ መልአክ ።
29 እሉ ፡ እሙንቱ ፡ እለ ፡ አዘዘ ፡ እግዚአብሔር ፡ ከመ ፡ ይስፍሩ ፡ ሎሙ ፡ ለእስራኤል ፡ ምድረ ፡ ከናአን ።
=== chapter 35 ===
[Numeri 35]
1 ወነበቦ ፡ እግዚአብሔር ፡ ለሙሴ ፡ በዐረበ ፡ ሞአብ ፡ በኀበ ፡ ዮርዳንስ ፡ ዘመንገለ ፡ ኢየሪኮ ፡ ወይቤሎ ፤
2 አዝዞሙ ፡ ለደቂቀ ፡ እስራኤል ፡ ከመ ፡ የሀብዎሙ ፡ ለሌዋውያን ፡ እምውስተ ፡ ዘይትዋረሱ ፡ መክፈልቶሙ ፡ አህጉረ ፡ ዘውስቴቶን ፡ ይነብሩ ፡ ወአድያሚሆን ፡ ዘዐውዶን ፡ ለውእቶን ፡ አህጉር ፡ የሀብዎሙ ፡ ለሌዋውያን ።
3 ወይኩኖሙ ፡ አህጉረ ፡ እለ ፡ ውስቴቶን ፡ ይነብሩ ፡ ወአዕጻዳቲሆን ፡ ይኩኖሙ ፡ ለላህሞሙ ፡ ወለእንስሳሆሙ ።
4 ወደወሎን ፡ ለአህጉር ፡ እለ ፡ ትሁብዎሙ ፡ ለሌዋውያን ፡ እምነ ፡ ሀገሩ ፡ ትሜጥኑ ፡ በአፍአ ፡ እምዐውዱ ፤
5 ዕሥራ ፡ ምእት ፡ በእመት ፡ እምዐረፍቱ ፡ ጽባሓዊ ፡ ለሀገር ፡ ወ፳፻በእመት ፡ እምገቦሁ ፡ ዘመንገለ ፡ አዜብ ፡ ወ፳፻[በእመት ፡] እምገቦሁ ፡ ዘመንገለ ፡ ባሕር ፡ ወ፳፻በእመት ፡ እምገቦሁ ፡ ዘመንገለ ፡ መስዕ ፡ ወሀገሩ ፡ ማእከለ ፡ ዝንቱ ፡ ትኩንክሙ ፡ ወዘአምሳለ ፡ አህጉሮንሂ ።
6 ትሁብዎሙ ፡ ለሌዋውያን ፡ ስሱ ፡ አህጉረ ፡ ዘምስካይ ፡ ዘትፈልጡ ፡ ከመ ፡ ይኩኖ ፡ ምስካይ ፡ ህየ ፡ ለቀታሊ ፡ ወዘእንበለ ፡ እላንቱ ፡ ዘትሁብዎሙ ፡ ባዕደ ፡ አህጉረ ፡ አርብዓ ፡ ወክልኤ ።
7 ይከውን ፡ ኵሉ ፡ አህጉር ፡ ዘትሁብዎሙ ፡ ለሌዋውያን ፡ አርብዓ ፡ ወሰማኒ ፡ ወለእላንቱሂ ፡ አህጉር ፡ ምስለ ፡ አድያሚሆን ።
8 ወአህጉር ፡ ዘትሁብዎሙ ፡ እምውስተ ፡ መክፈልቶሙ ፡ ለደቂቀ ፡ እስራኤል ፡ እምውስተ ፡ ዘብ[ዙ] ኅ ፡ ብዙኅ ፡ ወእምውስተ ፡ ዘውሑድ ፡ ውሑድ ፡ እምውስተ ፡ ርስቶሙ ፡ ዘተከፍሉ ፡ ዘዘ ፡ አሐዱ ፡ እምኔሆሙ ፡ የሀብዎሙ ፡ እምውስተ ፡ ርስቶሙ ፡ ለሌዋውያን ፡ አህጉረ ።
9 ወነበቦ ፡ እግዚአብሔር ፡ ለሙሴ ፡ ወይቤሎ ፤
10 ንግሮሙ ፡ ለደቂቀ ፡ እስራኤል ፡ ወበሎሙ ፡ ናሁ ፡ ተዐድዉ ፡ አንትሙ ፡ ዮርዳንስ ፡ ውስተ ፡ ምድረ ፡ ከናአን ።
11 ወፍልጡ ፡ ለክሙ ፡ አህጉረ ፡ ምስካይ ፡ ከመ ፡ ይኩንክሙ ፡ ኀበ ፡ ይሰኪ ፡ ህየ ፡ ቀታሊ ፡ ኵሉ ፡ ዘቀተለ ፡ ነፍሰ ፡ በኢያእምሮ ።
12 ወይኩናክሙ ፡ ውእቶን ፡ አህጉር ፡ ምስካየ ፡ እምነ ፡ አበ ፡ ደም ፡ ከመ ፡ ኢይሙት ፡ ቀታሊ ፡ እስከ ፡ ይቀውም ፡ ቅድመ ፡ ትዕይንት ፡ ወይትሐተት ።
13 ወውእቶን ፡ አህጉር ፡ እለ ፡ ትሁቡ ፡ ስሱ ፡ አህጉረ ፡ ምስካይ ፡ ይኩናክሙ ።
14 ሠላሰ ፡ አህጉር ፡ ትፈልጡ ፡ በማዕዶተ ፡ ዮርዳንስ ፡ ወሠላሰ ፡ አህጉር ፡ ትፈልጡ ፡ በምድረ ፡ ከናአን ።
15 ምስካይ ፡ ይኩኖሙ ፡ ለደቂቀ ፡ እስራኤል ፡ ለግዩርኒ ፡ ወለፈላሲኒ ፡ ዘሀለወ ፡ ኀቤክሙ ፤
16 ይኩኖሙ ፡ ምስካየ ፡ እላንቱ ፡ አህጉር ፡ ከመ ፡ ይስኪ ፡ ህየ ፡ ኵሉ ፡ ዘቀተለ ፡ መንፈሰ ፡ በኢያእምሮ ።
17 ወእመሰ ፡ በንዋየ ፡ ሐፂን ፡ ዘበጦ ፡ ወሞተ ፡ ቀታሊ ፡ ውእቱ ፡ ሞተ ፡ ለይሙት ፡ ዘቀተለ ።
18 ወለእመኒ ፡ በእብን ፡ ወገሮ ፡ አው ፡ አውደቀ ፡ ላዕሌሁ ፡ እምውስተ ፡ እዴሁ ፡ ወሞተ ፡ ቀታሊ ፡ ውእቱ ፡ ሞተ ፡ ለይሙት ፡ ዘቀተለ ።
19 ወለእመኒ ፡ በንዋየ ፡ ዕፅ ፡ ዘበጦ ፡ ወሞተ ፡ አው ፡ አውደቀ ፡ ላዕሌሁ ፡ እምውስተ ፡ እዴሁ ፡ ወሞተ ፡ ቀታሊ ፡ ውእቱ ፡ ሞተ ፡ ለይሙት ፡ ዘቀተለ ።
20 ወአበ ፡ ደም ፡ ለሊሁ ፡ ይቅትሎ ።
21 ወእመኒ ፡ ጸልኦ ፡ ይጸልኦ ፡ ወአውደቀ ፡ ላዕሌሁ ፡ ዘኮነ ፡ ንዋየ ፡ እንዘ ፡ ይፀንሖ ፡ ወሞተ ፤
22 ቀታሊ ፡ [ውእቱ ፡] ይቅትልዎ ፡ ለዘባጢ ፡ እስመ ፡ ቀታሊ ፡ ውእቱ ፤ ሞተ ፡ ለይሙት ፡ ዘቀተለ ፡ ወአበ ፡ ደም ፡ ለይቅትሎ ፡ በኀበ ፡ ረከቦ ።
23 ወእመሰ ፡ ግብት ፡ ውእቱ ፡ እንዘ ፡ ኢይጸልእ ፡ ወአውደቀ ፡ ላዕሌሁ ፡ ዘኮነ ፡ ንዋየ ፡ እንዘ ፡ ኢይጸንሖ ፤
24 አው ፡ በዘ ፡ ኮነ ፡ እብን ፡ ወሞተ ፡ ቦቱ ፡ ወቀተሎ ፡ እንዘ ፡ ኢያአምር ፡ ወኢኮነ ፡ ጸላኢሁ ፡ ወኢይፈቅድ ፡ ያሕስም ፡ ላዕሌሁ ፤
25 ወይሕትቱ ፡ ትዕይንት ፡ ማእከለ ፡ ቀታሊ ፡ ወማእከለ ፡ አበ ፡ ደም ፡ በከመ ፡ ዝንቱ ፡ ፍትሕ ።
26 ወያድኅንዎ ፡ ትዕይንት ፡ ለዘ ፡ ቀተለ ፡ እምነ ፡ አበ ፡ ደም ፡ ወይወስድዎ ፡ ትዕይንት ፡ ውስተ ፡ ሀገረ ፡ ምስካይ ፡ ኀበ ፡ ይሰኪ ፡ ወይነብር ፡ ህየ ፡ እስከ ፡ ይመውት ፡ ካህን ፡ ዐቢይ ፡ ዘቀብእዎ ፡ በቅብአ ፡ ቅድሳት ።
27 ወለእመሰ ፡ ወፅአ ፡ አፍአ ፡ ቀታሊ ፡ ውእተ ፡ አድዋለ ፡ ሀገር ፡ እንተ ፡ ውስቴታ ፡ ሰከየ ፡ ህየ ፤
28 ወረከቦ ፡ አበ ፡ ደም ፡ በአፍአ ፡ ውስተ ፡ አድዋለ ፡ ሀገረ ፡ ምስካዩ ፡ ወቀተሎ ፡ አበ ፡ ደም ፡ ለቀታሊ ፡ አልቦ ፡ ጌጋየ ።
29 እስመ ፡ ውስተ ፡ ሀገረ ፡ ምስካዩ ፡ ይነብር ፡ አስከ ፡ ይመውት ፡ ካህን ፡ ዐቢይ ፡ ወእምድኅረ ፡ ሞተ ፡ ካህን ፡ ዐቢይ ፡ ይገብእ ፡ ውስተ ፡ ምድረ ፡ ብሔሩ ፡ ወከመዝ ፡ ይኩንክሙ ፡ ፍትሐ ፡ ኵነኔ ፡ በመዋዕሊክሙ ፡ በኵሉ ፡ በሓውርቲክሙ ።
30 ኵሉ ፡ ዘቀተለ ፡ መንፈሰ ፡ ወዘለፎ ፡ ማኅተት ፡ ቅትልዎ ፡ ለቀታሊ ፡ ወስምዕ ፡ አሐዱ ፡ ኢይከውን ፡ ማሕተተ ፡ ለአቅትሎ ፡ መንፈስ ።
31 ወኢትንሥኡ ፡ ቤዛ ፡ በእንተ ፡ ነፍስ ፡ በኀበ ፡ ቀታሊ ፡ ዘጌጋዩ ፡ ለመዊት ፡ ሞተ ፡ ለይሙት ።
32 ወኢትንሥኡ ፡ ቤዛ ፡ ከመ ፡ ታጕይይዎ ፡ ውስተ ፡ ሀገረ ፡ ምስካይ ፡ ከመ ፡ ይንበር ፡ ካዕበ ፡ ውስተ ፡ ምድር ፡ እስከ ፡ ይመውት ፡ ካህን ፡ ዐቢይ ።
33 ወኢትግበርዋ ፡ ቀታሊተ ፡ ለምድርክሙ ፡ እንተ ፡ ውስቴታ ፡ ትነብሩ ፡ እስመ ፡ ውእቱ ፡ ደም ፡ ዘይሬስያ ፡ ቀታሊተ ፡ ለምድር ፡ ወኢትሰሪ ፡ ሎቱ ፡ ምድር ፡ ለዘ ፡ ከዐወ ፡ ደመ ፡ ላዕሌሃ ።
34 ወኢትገምንዋ ፡ ለምድር ፡ እንተ ፡ ውስቴታ ፡ ትነብሩ ፡ ወእንተ ፡ ውስቴታ ፡ አነ ፡ አኀድር ፡ ምስሌክሙ ፡ እስመ ፡ አነ ፡ ውእቱ ፡ እግዚአብሔር ፡ ዘየኀድር ፡ ማእከሎሙ ፡ ለደቂቀ ፡ እስራኤል ።
=== chapter 36 ===
[Numeri 36]
1 ወመጽኡ ፡ መላእክተ ፡ ነገደ ፡ ቤተ ፡ አቡሁ ፡ ለገላአድ ፡ ወልደ ፡ ማኪር ፡ ወልደ ፡ መናሴ ፡ ዘእምነገደ ፡ ደቂቀ ፡ ዮሴፍ ፡ ወይቤሉ ፡ ቅድመ ፡ ሙሴ ፡ ወቅድመ ፡ እልዓዛር ፡ ካህን ፡ ወቅድመ ፡ መላእክተ ፡ አብያተ ፡ አበዊሆሙ ፡ ለደቂቀ ፡ እስራኤል ።
2 ወይቤሉ ፡ አዘዞ ፡ እግዚአብሔር ፡ ለእግዚእነ ፡ ከመ ፡ የሀቦሙ ፡ ምድረ ፡ ርስቶሙ ፡ በበ ፡ መክፈልቶሙ ፡ ለደቂቀ ፡ እስራኤል ፡ ወአዘዞ ፡ እግዚአብሔር ፡ ለእግዚእነ ፡ ከመ ፡ የሀቦን ፡ መክፈልቶ ፡ ለሰልጰአድ ፡ እኁነ ፡ ለአዋልዲሁ ።
3 ወይኩናሆሙ ፡ አንስቲያሆሙ ፡ ለ፩እምነገዶሙ ፡ ለደቂቀ ፡ እስራኤል ፡ ወይወፅእ ፡ መክፈልቶን ፡ እምውስተ ፡ መክፈልተ ፡ አበዊነ ፡ ወይትዌሰክ ፡ ውስተ ፡ ካልእ ፡ መክፈልተ ፡ ነገድ ፡ ኀበ ፡ አውሰባ ፡ ወይወፅእ ፡ እምውስተ ፡ መክፈልተ ፡ ርስትነ ።
4 ለእመ ፡ ይከው[ን] ፡ ይፃእ ፡ እምደቂቀ ፡ እስራኤል ፡ ወይግባእ ፡ ርስቶሙ ፡ ውስተ ፡ ርስተ ፡ ካልእ ፡ ነገድ ፡ ኀበ ፡ አውሰባ ፡ እስመ ፡ ናሁ ፡ ይወፅእ ፡ እምውስተ ፡ ርስቶሙ ፡ ወመክፈልቶሙ ፡ ለነገደ ፡ አበዊነ ።
5 ወአዘዞሙ ፡ ሙሴ ፡ ለደቂቀ ፡ እስራኤል ፡ በትእዛዘ ፡ እግዚአብሔር ፡ ወይቤሎሙ ፡ እስመ ፡ ከመዝ ፡ ይቤሉ ፡ ነገደ ፡ ደቂቀ ፡ ዮሴፍ ።
6 ዝንቱ ፡ ውእቱ ፡ ቃል ፡ ዘአዘዞን ፡ እግዚአብሔር ፡ ለአዋልደ ፡ ሰልጰአድ ፡ ወይቤ ፡ ዘአደሞን ፡ በቅድሜሆን ፡ ለያውስባ ፡ [ወዳእሙ ፡ እምውስተ ፡ ነገደ ፡ አበዊሆን ፡ ለያውስባ ፡]፡
7 ወኢይግባእ ፡ ርስቶሙ ፡ ለደቂቀ ፡ እስራኤል ፡ እምነገድ ፡ ለነገድ ፡ እስመ ፡ አሐዱ ፡ አሐዱ ፡ እምኔሆሙ ፡ ውስተ ፡ ርስተ ፡ አበዊሆሙ ፡ ይትልዉ ፡ ደቂቀ ፡ እስራኤል ።
8 ወኵሉ ፡ ወለት ፡ እንተ ፡ ተኅሥሥ ፡ ርስተ ፡ እምነ ፡ ደቂቀ ፡ እስራኤል ፡ አሐደ ፡ እምውስተ ፡ ነገዶን ፡ ለያውስባ ፡ ከመ ፡ ይኅሥሡ ፡ ደቂቀ ፡ እስራኤል ፡ አሐዱ ፡ አሐዱ ፡ እምኔሆሙ ፡ ርስተ ፡ አበዊሆሙ ።
9 ወኢይግባእ ፡ ርስት ፡ እምነገድ ፡ ውስተ ፡ ካልእ ፡ ነገድ ፡ አላ ፡ ፩፩ውስተ ፡ መክፈልቶሙ ፡ ይትልዉ ፡ ደቂቀ ፡ እስራኤል ።
10 ወገብራ ፡ አዋልደ ፡ ሰልጰአድ ፡ በከመ ፡ አዘዞ ፡ እግዚአብሔር ፡ ለሙሴ ።
11 ወአውሰባ ፡ አዋልደ ፡ ሰልጰአድ ፡ ዘእምደቂቀ ፡ ቅሩቦን ፡ ዘእምውስተ ፡ ነገደ ፡ ደቂቀ ፡ መናሴ ፡ ደቂቀ ፡ ዮሴፍ ፤
12 መሐላ ፡ ወቴርሳ ፡ ወሔግላ ፡ ወሜልካ ፡ ወኑሐ ፡ ወገብአ ፡ መክፈልቶን ፡ ውስተ ፡ ነገደ ፡ ሕዝበ ፡ አበዊሆን ።
13 ዝንቱ ፡ ውእቱ ፡ ትእዛዝ ፡ ወኵነኔ ፡ ወፍትሕ ፡ ዘአዘዘ ፡ እግዚአብሔር ፡ በእደ ፡ ሙሴ ፡ በዐረቢሃ ፡ ለሞአብ ፡ በኀበ ፡ ዮርዳንስ ፡ ዘመንገለ ፡ ኢየሪኮ ።