##### edition  (gez) — the text of the printed EOTC Bible
=== incipit ===
ወእም ዝ እምድኅረ ፄወውዎ ለእስራኤል ወለኢየሩሳሌምኒ አማሰንዋ ነበረ ኤርምያስኒ ይበኪ ወአስቆቀወ ዘከመ ዝ ሰቆቃወ ላዕለ ኢየሩሳሌም።
=== chapter 1 ===
[Chapter 1]
1 አሌፍ። እፎ፡ ነበረት፡ ባሕቲታ፡ ሀገር፡ እንተ፡ ምልእት፡ ሕዝበ፡ ወኮነት፡ መበለተ፡ እንተ፡ ትኴንን፡ አሕዛበ፡ ወእንተ፡ ትኴንን፡ በሓውርተ፡ ገብአት፡ ውስተ፡ ጸዋር።
2 ቤት። ብካየ፡ በከየት፡ በሌሊት፡ ወአንብዐ፡ ውስተ፡ መልታሕታ፡ ውሕዘ፡ ወኀጥአት፡ ዘይናዝዛ፡ እምኵሎሙ፡ ዘያፈቅርዋ፡ ወተፃረርዋ፡ ኵሎሙ፡ ፍቁራኒሃ፡ ወኮኑ፡ ላቲ፡ ጸላእተ።
3 ጋሜል። ፈለሰት፡ ይሁዳ፡ በኀሣራ፡ ወበብዝኀ፡ ቅኔሃ፡ ወነበረት፡ ውስተ፡ አሕዛብ፡ ወአልባ፡ ዕረፍት፡ ኵሎሙ፡ እለ፡ ዴገንዋ፡ አኀዝዋ፡ በማእከለ፡ እለ፡ አስርሕዋ።
4 ዳሌጥ። ፍናዊሃ፡ ለጽዮን፡ ይላሕውዋ፡ እስመ፡ አልቦ፡ ዘይመጽእ፡ ለበዓል፡ ወማሰነ፡ ኵሉ፡ አናቅጺሃ፡ ካህናቲሃኒ፡ ይበክዩ፡ ወደናሊሃ፡ ተፄወዋ፡ ወለሊሃ፡ መራረ፡ ኮነት።
5 ሄ። ወኮኑ፡ እለ፡ ሣቀይዋ፡ ላዕለ፡ ርእሳ፡ ወጸላእታሂ፡ ተፈሥሑ፡ እስመ፡ እግዚአብሔር፡ አኅሠራ፡ በብዝኀ፡ ኀጢአታ፡ ለሕፃናቲሃኒ፡ ፄወውዎሙ፡ በቅድመ፡ እለ፡ ሣቀይዋ።
6 ዋው። ሰለብዋ፡ ለወለተ፡ ጽዮን፡ ኵሎ፡ ትርሲታ፡ ወኮኑ፡ መላእክቲሃ፡ ከመ፡ አብሐኵ፡ እለ፡ ኀጥኡ፡ ዘይትረዐዩ፡ ወሖሩ፡ ድኩማኒሆሙ፡ ቅድመ፡ እለ፡ ሮድዎሙ።
7 ዛይ። ተዘከረት፡ ኢየሩሳሌም፡ መዋዕለ፡ ኀሣራ፡ በኵላ፡ ፍትወታ፡ ዘቀዲሙ፡ ሶበ፡ ተተተ፡ ሕዝባ፡ በእደ፡ ፀሮሙ፡ ወአልቦ፡ ዘይረድኣ፡ ወርእይዋ፡ ጸላእታ፡ በኀበ፡ ፈለሰት፡ ወሰሐቅዋ።
8 ሔት። አብሶ፡ አበሰት፡ ኢየሩሳሌም፡ ወበእንተ፡ ዝንቱ፡ ኮነት፡ ሰቆራረ፡ ኵሎሙ፡ እለ፡ ይዌድስዋ፡ አኅሠርዋ፡ እስመ፡ ርእዩ፡ ኀሣራ፡ በኀበ፡ ተመንደበት፡ ወወድቀት፡ ድኅሪተ።
9 ጤት። ርኵስ፡ ውስተ፡ እገሪሃ፡ ወኢተዘከረት፡ ደኃሪታ፡ ወጾረት፡ ክቡደ፡ ወኢሠኀትዋ። ርኢ፡ እግዚኦ፡ ሕማምየ፡ ከመ፡ ተዘኀሩ፡ ፀርየ።
10 ዮድ። አንሥአ፡ እዴሁ፡ ዘሣቀያ፡ በኵሉ፡ ፍትወታ፡ ርእየት፡ አሕዛበ፡ ዘከላእከ፡ ኢይባኡ፡ ውስተ፡ መቅደስከ።
11 ካፍ። ኵሉ፡ ሕዝባ፡ ይግዕሩ፡ ወየኀጥኡ፡ እክለ፡ ወወሀቡ፡ ፍትወቶሙ፡ ለመብልዕ፡ ለመይጠ፡ ነፍስ። ርኢ፡ እግዚኦ፡ ወነጽር፡ እስመ፡ ኀሠርኩ።
12 ላሜድ። አልቦ፡ ኀቤክሙ፡ ኵሉ፡ ኀላፍያነ፡ ፍኖት፡ ተመየጡ፡ ወርእዩ፡ እመ፡ ቦ፡ ቊስል፡ ከመ፡ ቊስልየ፡ ዘአሕመመኒ፡ እግዚአብሔር፡ በዕለተ፡ መቅሠፍተ፡ መዐቱ።
13 ሜም። እምአርያም፡ ፈነወ፡ እሳተ፡ ወአሕለለ፡ አዕፅምትየ፡ ወሰፍሐ፡ መሥገርቶ፡ ለእገርየ፡ ወአግብአኒ፡ ድኅሬየ፡ ወአማሰነኒ፡ ወአሕመመኒ፡ ኵሎ፡ ዕለተ።
14 ኖን። ተግሀ፡ በእንተ፡ ኀጢአትየ፡ ዘተፀፍረ፡ በእደውየ፡ ዐርገ፡ ውስተ፡ ክሳድየ፡ ወደክመ፡ ኀይልየ፡ እስመ፡ መጠወኒ፡ እግዚአብሔር፡ ውስተ፡ እደ፡ ሕማም፡ በዘኢይክል፡ ቀዊመ።
15 ሳምኬት። አእተቶሙ፡ እግዚአብሔር፡ ለኵሎሙ፡ ኀያላንየ፡ እማእከሌየ፡ ጸውዐ፡ ላዕሌየ፡ መዋዕለ፡ በዘይትቀጠቀጡ፡ ኅሩያንየ። ወነፅኃ፡ እግዚአብሔር፡ ለድንግል፡ ወለተ፡ ይሁዳ፡ በእንተ፡ ዝንቱ፡ እበኪ፡ አነ።
16 ዔ። ዐይንየ፡ አውሐዘት፡ ማየ፡ እስመ፡ ርኅቀ፡ እምኔየ፡ ዘይናዝዘኒ፡ ወዘያገብኣ፡ ለነፍስየ፡ ወማሰኑ፡ ደቂቅየ፡ እስመ፡ ሞአ፡ ፀር።
17 ፌ። አንሥአት፡ እደዊሃ፡ ጽዮን፡ ወኀጥአት፡ ዘይላሕያ። ወአዘዘ፡ እግዚአብሔር፡ ለያዕቆብ፡ ይዕግትዎ፡ እለ፡ ይረውድዎ፡ ወኮነት፡ ኢየሩሳሌም፡ ትክተ፡ በማእከሎሙ።
18 ጻዴ። ጻድቅ፡ ውእቱ፡ እግዚአብሔር፡ እስመ፡ ወሐክዎ፡ ለአፉሁ። ስምዑ፡ ኵልክሙ፡ አሕዛብ፡ ወርእዩ፡ ቊስልየ፡ እስመ፡ ፄወውዎሙ፡ ለደናግልየ፡ ወለወራዙትየ።
19 ቆፍ። ጸዋዕክዎሙ፡ ለመሐዛንየ፡ ወተጸመሙኒ። ካህናትየኒ፡ ወረበናትየ፡ ኀልቁ፡ በሀገር፡ ሶበ፡ ኀሠሡ፡ ዘይበልዑ፡ በዘይመይጡ፡ ነፍሶሙ፡ ወኀጥኡ።
20 ሬስ። ርኢ፡ እግዚኦ፡ እስመ፡ ሐመምኩ፡ ወተከውሰት፡ ከርሥየ፡ ወልብየ፡ ተመይጠ፡ በላዕሌየ፡ እስመ፡ መሪረ፡ መረርኩ፡ በአፍኣኒ፡ አምከነተኒ፡ መጥባሕት፡ ወብድብድ፡ በውስተ፡ ቤት።
21 ሳን። ስምዑኒ፡ ዘከመ፡ እግዕር፡ አነ፡ ወአልቦ፡ ዘያንህየኒ፡ ኵሎሙ፡ ፀርየ፡ ሰምዑ፡ ሕማምየ፡ ወተፈሥሑ፡ እስመ፡ አንተ፡ ገበርከ፡ በዘአምጻእከ፡ ዕለተ፡ ጸዋዕከ፡ ወኮኑ፡ ከማየ።
22 ታው። ለትባእ፡ ኵሉ፡ እከዮሙ፡ ቅድሜከ፡ ወተቀረሞሙ፡ ዘከመ፡ ተቀረምከ፡ ኪያየ፡ አንተ፡ በኵሉ፡ ኀጢአትየ፡ እስመ፡ በዝኀ፡ ናህክየ፡ ወልብየኒ፡ ያጠውቀኒ።
=== chapter 2 ===
[Chapter 2]
1 አሌፍ። እፎኬ፡ አደመና፡ እግዚአብሔር፡ በመቅሠፍተ፡ መዐቱ፡ ለወለተ፡ ጽዮን፡ ወነፅኆ፡ እምሰማይ፡ ውስተ፡ ምድር፡ ለክብረ፡ እስራኤል፡ ወኢተዘከረ፡ መከየደ፡ እገሪሁ፡ በዕለተ፡ መዐቱ።
2 ቤት። አሥጠመ፡ እግዚአብሔር፡ ወኢመሐከ፡ ኵሎ፡ መሠንዮ፡ ለያዕቆብ፡ ወአንኀለ፡ በመዐቱ፡ አጽዋኒሃ፡ ለወለተ፡ ይሁዳ፡ ወአጥበቃ፡ በምድር፡ ወአርኰሰ፡ መንግሥታ፡ ወምኵናኒሃ።
3 ጋሜል። ቀጥቀጠ፡ በመዐቱ፡ ኵሎ፡ ቀርነ፡ እስራኤል፡ ወሜጠ፡ ድኅረ፡ የማኖ፡ እምገጸ፡ ፀር። ወአንደደ፡ ላዕለ፡ ያዕቆብ፡ ነበልባለ፡ እሳት፡ ወበልዐ፡ ኵሎ፡ ዘዐውዱ።
4 ዳሌጥ። ወሰቀ፡ ቀስቶ፡ ከመ፡ ፀር፡ ወከመ፡ ጸላኢ፡ አጽንዐ፡ የማኖ፡ ከመ፡ እድው። ወቀተለ፡ ኵሎ፡ ዘያፈትዋ፡ ለዐይንየ፡ በተዐይኒሃ፡ ለወለተ፡ ጽዮን። ከዐወ፡ መዐቶ፡ ከመ፡ እሳት።
5 ሄ። ኮነኒ፡ እግዚአብሔር፡ ከመ፡ ፀር፡ ወአሥጠሞ፡ ለእስራኤል፡ ወአሥጠመ፡ ኵሎ፡ ክበዲሃ፡ ወአማሰነ፡ አጽዋኒሃ። ወአብዝኀ፡ ኀሣራ፡ ለወለተ፡ ይሁዳ፡ ኅሥርት።
6 ዋው። ወጸለለ፡ ከመ፡ ወይን፡ ማኅደሮ፡ ወአማሰነ፡ በዓሎ። ረስዐ፡ እግዚአብሔር፡ ዘገብረ፡ በጽዮን፡ በዓለ፡ ወሰንበተ። ወአኅለቀ፡ በመቅሠፍተ፡ መዐቱ፡ ነገሥተ፡ ወመላእክተ፡ ወካህናተ።
7 ዛይ። ኀደገ፡ እግዚአብሔር፡ ምሥዋዖ፡ ወረስዐ፡ መቅደሶ፡ ወዐጸወ፡ በእደ፡ ፀር፡ አረፍተ፡ ኀይላ። ወቃለ፡ ወሀቡ፡ ውስተ፡ ቤተ፡ እግዚአብሔር፡ ወየበቡ፡ ከመ፡ ዕለተ፡ በዓል።
8 ሔት። ወተመይጠ፡ እግዚአብሔር፡ ከመ፡ ያማስን፡ አረፍታ፡ ለወለተ፡ ጽዮን፡ ወሰሐበ፡ አምጣነ፡ ወኢመጠወ፡ እዴሁ፡ እምአሥጥሞ፡ ወለሐወ፡ ጥቅማ፡ ወአረፍታ፡ ኅቡረ፡ ደክመ።
9 ጤት። ተደፍኑ፡ ውስተ፡ ምድር፡ ዴዴያቲሃ። ተገድፈ፡ ወተቀጥቀጠ፡ መናስግቲሃ። ንጉሣሂ፡ ወመልአካሂ፡ ውስተ፡ አሕዛብ፡ አልባቲ፡ ሕግ። ወነቢያቲሃ፡ ኢርእዩ፡ ራእየ፡ በኀበ፡ እግዚአብሔር።
10 ዮድ። ነበሩ፡ ውስተ፡ ምድር፡ ወአርመሙ፡ ረበናቲሃ፡ ለወለተ፡ ጽዮን። ወወደዩ፡ መሬተ፡ ውስተ፡ ርእሶሙ፡ ወቀነቱ፡ ሠቀ። ወአውረድዎሙ፡ ውስተ፡ ምድር፡ ለመሳፍንት፡ ወለደናግል፡ በኢየሩሳሌም።
11 ካፍ። ደክማ፡ አዕይንትየ፡ በአንብዕ፡ ደንገፀ፡ ልብየ። ወተክዕወ፡ ውስተ፡ ምድር፡ ክብርየ፡ በእንተ፡ ቅጥቃጤሃ፡ ለወለተ፡ ሕዝብየ። ሶበ፡ ኀልቁ፡ ሕፃናት፡ ወጠባዊት፡ በመርሕበ፡ ሀገር።
12 ላሜድ። ይቤልዎን፡ ለእማቲሆሙ፡ አይቴ፡ እክል፡ ወወይን፡ ሶበ፡ ርኅቡ፡ ከመ፡ ቅቱላን፡ ውስተ፡ መርሕበ፡ ሀገር። ሶበ፡ ወፅአት፡ ነፍሶሙ፡ በውስተ፡ ሕፅነ፡ እሞሙ።
13 ሜም። በምንት፡ አስተማስለኪ፡ ወበምንት፡ አስተዔርየኪ፡ ወለተ፡ ኢየሩሳሌም። መኑ፡ ያድኅነኪ፡ ወመኑ፡ ያስተፌሥሐኪ፡ ወለተ፡ ጽዮን፡ ድንግል። እስመ፡ ሀብየ፡ ከመ፡ ባሕር፡ ቅጥቃጤኪ፡ መኑ፡ ይፌውሰኪ።
14 ኖን። ነቢያትኪ፡ ርእዩ፡ ለኪ፡ ከንቶ፡ ወእበደ። ወኢከሠቱ፡ ጌጋየኪ፡ ከመ፡ ይሚጡ፡ ፄዋኪ። ወርእዩ፡ ለኪ፡ ተረፈ፡ ከንቶ።
15 ሳምኬት። ጠፍሑ፡ እደዊሆሙ፡ ላዕሌኪ፡ ኵሎሙ፡ ኀለፍተ፡ ፍኖት። ተፋጸዩ፡ ወአሖሱ፡ ርእሶሙ፡ ላዕለ፡ ወለተ፡ ኢየሩሳሌም። ወይቤሉ፡ ዛቲኑ፡ ሀገር፡ አክሊሉ፡ ወክብሩ፡ ወፍሥሓሁ፡ ለኵሉ፡ ምድር።
16 ዔ። አብቀዉ፡ አፉሆሙ፡ ላዕሌኪ፡ ኵሎሙ፡ ፀርኪ። ተፋጸዩ፡ ወሐቀዩ፡ ስነኒሆሙ፡ ወይቤሉ። ውሕጥናሃ፡ ወባሕቱ፡ ዛቲ፡ ዕለት፡ ዘተሰፈውናሃ፡ ረከብናሃ፡ ወርኢናሃ።
17 ፌ። ገብረ፡ እግዚአብሔር፡ ዘሐለየ፡ ወፈጸመ፡ ዘነበበ፡ ዘአዘዘ፡ እግዚአብሔር፡ በመዋዕለ፡ ትካት፡ ወነሠታ፡ ወኢምሕካ፡ ወአስተፍሥሐ፡ ጸላእተኪ፡ ወአልዐለ፡ ቀርነ፡ ፀርኪ፡ ላዕሌኪ።
18 ጻዴ። አውየወ፡ ልቦሙ፡ ኀበ፡ እግዚአብሔር፡ ለአረፋተ፡ ወለተ፡ ጽዮን። ይወርዳ፡ አንብዕ፡ ከመ፡ ውሒዝ፡ መዓልተ፡ ወሌሊተ። ኢተሀቢ፡ ዕረፍተ፡ ለኪ፡ ወኢታርምም፡ ብንተ፡ ዐይንኪ።
19 ቆፍ። ተንሥኢ፡ ወተፈሥሒ፡ በሌሊት፡ በቀዳሚት፡ ሰዓትኪ። ከዐዊዮ፡ ከመ፡ ማይ፡ ለልብኪ፡ ቅድመ፡ ገጹ፡ ለእግዚአብሔር። አንሥኢ፡ እደወኪ፡ ኀቤሁ፡ በእንተ፡ ነፍሰ፡ ሕፃናትኪ፡ እለ፡ ኀልቁ፡ በረኀብ፡ በርእሰ፡ ኵሉ፡ ፍናዋት።
20 ሬስ። ርኢ፡ እግዚኦ፡ ወነጽር፡ መነ፡ ተቀረምከ፡ ከመዝ። ይበልዓኑ፡ አንስት፡ ፍሬ፡ ከርሦን፡ ወሐፃንያት፡ እለ፡ ያጠብዋ፡ አው፡ ይቀትሉኑ፡ ካህነ፡ ወነቢየ፡ በመቅደሰ፡ እግዚአብሔር።
21 ሳን። አስከብዎሙ፡ ውስተ፡ ፍናው፡ ለአእሩግ፡ ወለሕፃናት። ወለደናግልየ፡ ወለወራዙትየ፡ ፄወውዎሙ፡ ወወድቁ፡ በኵናት። ወቀተልኮሙ፡ በረኀብ፡ በዕለተ፡ መዐትከ፡ ቀተልከ፡ ወኢመሐከ።
22 ታው። ጸውዐ፡ ዕለተ፡ በዓል፡ በኀበ፡ ፈለስኩ፡ እምዐውድ። ወኢኮነ፡ በዕለተ፡ መዐቱ፡ ለእግዚአብሔር፡ ዘይድኅን፡ ወዘይተርፍ፡ በከመ፡ ዘአልሀቁ፡ ወዘሐፀንኩ፡ ፀርየ፡ አኅለቅዎሙ።
=== chapter 3 ===
[Chapter 3]
1 አሌፍ። አነ፡ ብእሲ፡ ዘይሬኢ፡ ተፅናሰ፡ በበትረ፡ መዐቱ።
2 ነሥአኒ፡ ወወሰደኒ፡ ውስተ፡ ጽልመት፡ ዘአልቦ፡ ብርሃን።
3 ወሜጠ፡ እዴሁ፡ ኀቤየ፡ ኵሎ፡ ዕለተ።
4 በልየ፡ ሥጋየ፡ ወማእስየ፡ ወተቀጥቀጠ፡ አዕፅምትየ።
5 ቤት። ሐነጸ፡ ጥቅመ፡ ላዕለ፡ ርእስየ። ወሰርሐ፡ ፍኖተ፡ ሕማም፡ ላዕሌየ።
6 ወውስተ፡ ጽልመት፡ አንበረኒ፡ ከመ፡ ምዉተ፡ ትካት።
7 ወነደቀ፡ ላዕሌየ፡ ወኢይወፅእ፡ ወአክበደ፡ ብርትየ።
8 ጋሜል። እጸርሕ፡ ወአአወዩ፡ እስመ፡ ተፈጸመ፡ ጸሎትየ።
9 ዳሌጥ። ወሐነጸ፡ ፍኖትየ፡ በኰኵሕ፡ ወዐጸወ፡ ፍኖትየ።
10 ድብ፡ እንተ፡ ትንዑ፡ ውእቱ፡ ሊተ፡ ወከመ፡ አንበሳ፡ ጽሚተ።
11 ዴገነኒ፡ ወአኅለቀኒ፡ ወረሰየኒ፡ ገዳመ።
12 ሄ። ወሰቀ፡ ቀስቶ፡ ወአቀመኒ፡ ከመ፡ መጠራ፡ ለሐፅ።
13 ወነደፈኒ፡ ውስተ፡ ኵልያትየ፡ በአሕፃሁ።
14 ወኮንኩ፡ ሰሐቀ፡ ለኵሉ፡ ሕዝብየ፡ ወየኀልዩኒ፡ ኵሎ፡ አሚረ።
15 ዋው። አጽገበኒ፡ ሕምዘ፡ ወአርወየኒ፡ ሐሞተ።
16 ወሰበረ፡ ስነንየ፡ በኆጻ፡ ወአቅምሐኒ፡ ሐመደ።
17 ቀብጸት፡ ነፍስየ፡ ሰላመ፡ ወረሳዕክዋ፡ ለሠናይት።
18 ወሐጐልኩ፡ ተስፋየ፡ ወትውክልትየ፡ በኀበ፡ እግዚአብሔር።
19 ዛይ። ተዘከርኩ፡ ተፅናስየ፡ ወተሰዶትየ፡ ወምረተ፡ ሕምዝየ።
20 ወዐንበዘት፡ ነፍስየ፡ በላዕሌየ።
21 ወአነብር፡ ውስተ፡ ልብየ፡ በእተ፡ ዝንቱ፡ እትዔገሥ።
22 ሔት። ምሕረተ፡ እግዚአብሔር፡ እስመ፡ ኢኀልቀ፡ ወኢተፈጸመ፡ ሣህሉ።
23 ሐዳሳት፡ ለለ፡ ጽባሕ፡ ብዝኀ፡ ጽድቅከ።
24 ክፍልየ፡ እግዚአብሔር፡ ትቤ፡ ነፍስየ፡ በእንተ፡ ዝንቱ፡ እጸንሕ።
25 ጤት። ኄር፡ እግዚአብሔር፡ ለእለ፡ ይትዔገሥዎ።
26 ለነፍስ፡ እንተ፡ ተኀሥሥ፡ በሠናይ፡ ወትትዔገሥ፡ ወታረምም፡ ለመድኀኒተ፡ እግዚአብሔር።
27 ጤት። ሠናይ፡ ለብእሲ፡ ሶበ፡ ይነሥእ፡ አርዑቶ፡ እምንእሱ።
28 ወይነብር፡ ባሕቲቱ፡ ወይፃሙ፡ ሶበ፡ አንሥኡ፡ ላዕሌሁ።
29 ይወዲ፡ ውስተ፡ መሬት፡ አፉሁ፡ ዮጊ፡ በተስፋ።
30 ዮድ። ይመይጥ፡ መልታሕቶ፡ ለዘይጸፍዖ፡ ወይጸግብ፡ ጽዕለተ።
31 እስመ፡ ኢይገድፎሙ፡ እግዚአብሔር፡ ለዓለም።
32 ካፍ። እስመ፡ ዘአሕመመ፡ ይሠሀል፡ በከመ፡ ብዝኀ፡ ምሕረቱ።
33 እስመ፡ ኢተቈጥዐ፡ ልቡ፡ ወኢያሕመመ፡ ደቂቀ፡ እጓለ፡ እመሕያው።
34 ላሜድ። ከመ፡ ያኅሥር፡ በታሕተ፡ እገሪሁ፡ ለኵሉ፡ ኅሡራነ፡ ምድር።
35 ከመ፡ ይሚጥ፡ ፍትሐ፡ ብእሲ፡ በቅድመ፡ ገጸ፡ ልዑል።
36 ይደይ፡ ብእሴ፡ ውስተ፡ ኵነኔ፡ ሶበ፡ ይኴንን፡ እግዚአብሔር፡ ዘኢአዘዘ።
37 መኑ፡ ዘይቤ፡ ወይከውን፡ እግዚአብሔር፡ ዘኢአዘዘ።
38 ወእምአፈ፡ ልዑል፡ ዘኢወፅአ፡ እኩይኒ፡ ወሠናይኒ።
39 ሜም። ለምንት፡ ያንጐረጕር፡ ሰብእ፡ እንዘ፡ ሕያው፡ ብእሲ፡ በእንተ፡ ኀጢአቱ።
40 ኖን። ንሕትት፡ ፍኖተነ፡ ወንኀሥሦ፡ ወንትመየጥ፡ ኀበ፡ እግዚአብሔር።
41 ናንሥእ፡ ልበነ፡ ወእደዊነ፡ ኀበ፡ እግዚአብሔር፡ ሰማየ።
42 ንሕነ፡ አበስነ፡ ወጌገይነ፡ አንተኒ፡ ኢመሐከነ።
43 ሳምኬት። ደፈንከነ፡ በመዐትከ፡ ወሰደድከነ፡ ወቀተልከነ፡ ወኢመሐከነ።
44 ጸለልከነ፡ በደመና፡ እምወፂእ፡ ለምዕራገ፡ ጸሎትነ።
45 ዔ። ከመ፡ ንሕምም፡ ወከመ፡ ኢንርአይ፡ አንበርከነ፡ ማእከለ፡ አሕዛብ።
46 ከሠቱ፡ አፉሆሙ፡ ላዕሌነ፡ ኵሉ፡ ፀርነ።
47 ፍርሃት፡ ወረዓድ፡ አኀዘነ፡ ሙስና፡ ወቅጥቃጤ።
48 ፈለገ፡ ማይ፡ ይውሕዝ፡ እምአዕይንቲነ፡ በእንተ፡ ቅጥቃጤሃ፡ ለወለተ፡ ሕዝብየ።
49 ፌ። ዐይንየ፡ ተደፍነት፡ ወኢያረምም፡ እንከ፡ እምአልዕሎ።
50 እስከ፡ ይሬኢ፡ እግዚአብሔር፡ እምሰማይ።
51 ዐይንየ፡ አሕመሞ፡ ለነፍስየ፡ በእንተ፡ ኵሉ፡ አዋልደ፡ ሀገርየ።
52 ጻዴ። ንዒወ፡ ነዐዉኒ፡ ከመ፡ ዖፍ፡ ኵሉ፡ ፀርየ፡ በከንቱ።
53 ወቀተሉ፡ ሕይወትየ፡ በውስተ፡ ዓዘቅት፡ ወከደኑኒ፡ እብነ።
54 ተክዕወ፡ ማይ፡ ላዕለ፡ ርእስየ፡ እቤ፡ ተኀድጉ፡ እምኔሁ።
55 ቆፍ። ጸዋዕኩ፡ ስመከ፡ እግዚኦ፡ እምግብ፡ ታሕቲት።
56 ወሰማዕከኒ፡ ቃልየ፡ ወኢትሚጥ፡ እዝነከ፡ እምነ፡ እስለትየ።
57 ቀረብከ፡ በዕለተ፡ እጼውዐከ፡ ወትቤ፡ ኢትፍራህ።
58 ሬስ። ኰነንከ፡ እግዚኦ፡ ኵነኔ፡ ነፍስየ፡ ወቤዘውከ፡ ሕይወትየ።
59 ርኢከ፡ እግዚኦ፡ ኵሎ፡ ዘይመክሩ፡ ላዕሌየ፡ ፈታሕከ፡ ፍትሕየ።
60 ርኢከ፡ ኵሎ፡ ተበቅሎቶሙ፡ ወኵሎ፡ ሕሊናሆሙ፡ ብየ።
61 ሳን። ሰማዕከ፡ ኵሎ፡ ጽዕለቶሙ፡ እግዚኦ፡ ወኵሎ፡ ሕሊናሆሙ፡ ላዕሌየ።
62 ወዘአሖሱ፡ ከናፍሪሆሙ፡ ብየ፡ ኵሎ፡ ዕለተ።
63 ንብረቶሙ፡ ወተንሥኦቶሙ፡ ርኢ፡ አነ፡ ማኅሌቶሙ።
64 ፍድዮሙ፡ ወተበቀሎሙ፡ በከመ፡ ምግባረ፡ እደዊሆሙ።
65 ታው። ሀቦሙ፡ ሕማመ፡ ልብ፡ ወመርገምከ።
66 ስድዶሙ፡ በመዐትከ፡ ወአጥፍኦሙ፡ እምታሕተ፡ ሰማይ፡ እግዚኦ፡ በከመ፡ እከየ፡ ልቦሙ።
=== chapter 4 ===
[Chapter 4]
1 አሌፍ። እፎ፡ ተጸልአ፡ ወርቅ፡ ወተወለጠ፡ ብሩር፡ ሠናይ፡ ወተዘርወ፡ ዕንቊ፡ ቅዱስ፡ ውስተ፡ ኵሉ፡ ፍኖት።
2 ቤት። ደቂቀ፡ ጽዮን፡ ክቡራን፡ ተሠይጡ፡ በወርቅ። እፎ፡ ኮኑ፡ ከመ፡ ንዋየ፡ ልሕኵት፡ ግብረ፡ እደ፡ ለብሓዊ።
3 ጋሜል። አክይስትኒ፡ አጥበዉ፡ እጐሊሆሙ። አዋልደ፡ ሕዝብየሰ፡ ከመ፡ አዕዋፈ፡ ሰገኖ፡ ውስተ፡ ገዳም።
4 ዳሌጥ። ጠግዐ፡ ልሳነ፡ ሕፃን፡ ውስተ፡ ጕርዔሁ፡ በጽምእ። ወሕፃናት፡ ሰአሉ፡ ኅብስተ፡ ወአልቦ፡ ዘይሁቦሙ።
5 ሄ። እለ፡ ይሴሰዩ፡ ሲሳየ፡ ማሰኑ፡ በውስተ፡ ፍናው፡ ወደፈኖሙ፡ መሬት።
6 ዋው። ዐብየት፡ ኀጢአታ፡ ለወለተ፡ ሕዝብየ፡ እምኀጢአተ፡ ሰዶም፡ እንተ፡ ተገፍትዐት፡ ፍጡነ፡ እንዘ፡ ኢይፃምዉ፡ እደው፡ ባቲ።
7 ዛይ። ጻዕደዉ፡ ቅዱሳኒሃ፡ እምበረድ፡ ወጻዕደዉ፡ እምሐሊብ፡ ወቄሑ፡ ፈድፋደ፡ እምዕንቈ፡ ሰንፔር፡ ፀአቶሙ።
8 ሔት። ጸልመ፡ እምነ፡ ሕመት፡ ራእዮሙ፡ ወኢተዐውቀት፡ በአፍኣ፡ ፍኖቶሙ። ወቈቊዐ፡ ማእሶሙ፡ በዲበ፡ አዕፅምቲሆሙ፡ ወየብሰ፡ ከመ፡ ዕፅ።
9 ጤት። ኀየሱ፡ ቅቱላን፡ በኵናት፡ እምቅቱላን፡ በረኀብ፡ ወሖሩ፡ እንዘ፡ ርጉዛን፡ በትእዛዘ፡ እግዚአብሔር።
10 ዮድ። እደዊሆን፡ ለአንስት፡ መሓርያት፡ አብሰላ፡ እጐሊሆን፡ ወኮንዎን፡ ሲሳዮን፡ በቅጥቃጤሃ፡ ለወለተ፡ ሕዝብየ።
11 ካፍ። ፈጸመ፡ እግዚአብሔር፡ መዐቶ፡ ወከዐወ፡ መቅሠፍቶ፡ ወአንደደ፡ እሳተ፡ ውስተ፡ ጽዮን፡ ወበልዐት፡ መሠረታቲሃ።
12 ላሜድ። ኢአምኑ፡ ነገሥተ፡ ምድር፡ ኵሎሙ፡ እለ፡ ይነብሩ፡ ውስተ፡ ዓለም፡ ከመ፡ ይበውእ፡ ፀር፡ ወጸላእት፡ አንቀጸ፡ ኢየሩሳሌም።
13 ሜም። በኀጢአተ፡ ነቢያቲሃ፡ ወጌጋየ፡ ካህናቲሃ፡ እለ፡ ከዐዉ፡ ደመ፡ ጻድቃን፡ በማእከላ።
14 ኖን። ተሀውኩ፡ እለ፡ ይሔልውዋ፡ በአፍኣ፡ ወተቀብኡ፡ በደም፡ ሶበ፡ ተስእኖሙ፡ ገሰሱ፡ አልባሲሆሙ።
15 ሳምኬት። ረኀቁ፡ እምርኩሳን፡ ስብኩ፡ ሎሙ፡ ወበልዖሙ፡ ረኀቁ፡ ረኀቁ፡ ወኢትግስስዎሙ። እስመ፡ ተሀውኩ፡ ወበልዖሙ፡ ለአሕዛብ፡ ኢይድግሙ፡ ነቢሮታ።
16 ዔ። ገጹ፡ ለእግዚአብሔር፡ መክፈልቶሙ፡ ወኢይደግም፡ ነጽሮቶሙ። እስመ፡ ኢኀፈሩ፡ ገጸ፡ ካህናት፡ ወኢመሐሩ፡ ሊቃውንተ።
17 ፌ። እንዘ፡ ዓዲነ፡ ሕያዋን፡ ንሕነ፡ ጠፍኣ፡ አዕይንቲነ፡ በእንተ፡ ከንቱ፡ ረድኤተነ፡ እንዘ፡ ንሴፎ።
18 ጻዴ። ተወከልነ፡ ኀበ፡ ሕዝብ፡ ዘኢያድኅን።ከላእነ፡ ደቂቀነ፡ ኢይፃኡ፡ መርሕበነ።
19 ቆፍ። ቀርበ፡ ጊዜነ፡ በኀልቀ፡ መዋዕሊነ፡ እስመ፡ በጽሐ፡ ጊዜነ። ረዋጽያነ፡ ኮኑ፡ እለ፡ ዴገኑነ፡ እምአንስርተ፡ ሰማይ። ላዕለ፡ አድባር፡ ረከቡነ፡ እስመ፡ በገዳም፡ ጸንሑነ።
20 ሬስ። መንፈሰ፡ ገጽነ፡ መሲሑ፡ ለእግዚአብሔር፡ ተንሥአ፡ በመሥገርቶሙ። ዝኩ፡ ዘንቤ፡ በጽላሎቱ፡ ነሐዩ፡ ውስተ፡ አሕዛብ።
21 ሳን። ተፈሥሒ፡ ወተኀሠዪ፡ ወለተ፡ ኤዶምያስ፡ እንተ፡ ትነብሪ፡ ውስተ፡ ምድረ፡ ዖፅ። እስመ፡ ላዕሌኪ፡ ኀለፈ፡ ጽዋዐ፡ እግዚአብሔር፡ ትሰክሪ፡ ወትትዐረቂ።
22 ታው። ኀልቀ፡ ኀጢአትኪ፡ ወለተ፡ ጽዮን፡ ኢይደግም፡ እንከ፡ አፍልሶተኪ። ይዋህዮ፡ ለኀጢአትኪ፡ ወለተ፡ ኤዶምያስ፡ ከሠተ፡ ላዕለ፡ ኀጢአትኪ።
=== chapter 5 ===
[Chapter 5]
1 ተዘከር፡ እግዚኦ፡ ምንተ፡ ኮነ፡ ለነ፡ ነጽር፡ ወርኢ፡ እግዚኦ፡ ኀሣረነ።
2 ዘኮነ፡ ለባዕድ፡ ርስትነ፡ ወአብያቲ፡ ለነኪራን።
3 ዕጓለ፡ ማውታ፡ ኮነ፡ አልብነ፡ አብ፡ እማቲነ፡ ኮና፡ ከመ፡ መበለታት።
4 ወማያቲነ፡ በብሩር፡ ሰተይነ። ዕፀዊነ፡ በሤጥ፡ ይመጽእ፡ ላዕለ፡ ክሳውዲነ።
5 ዴገኑነ፡ ሰራሕነ፡ ወኢያዕረፍነ።
6 ግብጽ፡ ወሰብአ፡ ፋርስሂ፡ ወሀቡነ፡ እደ፡ ከመ፡ ያጽግቡነ፡ እክለ።
7 አበዊነ፡ አበሱ፡ ለሊሆሙ፡ ወኢሀለዉ፡ ንሕነ፡ ኀጢአቶሙ፡ ጾርነ።
8 አግብርት፡ ተሠልጡ፡ ላዕሌነ፡ ወአልቦ፡ ዘያድኅን፡ እምእዴሆሙ።
9 በነፍስነ፡ ናመጽእ፡ ሲሳየነ፡ እምገጸ፡ ኵናተ፡ ገዳም።
10 አማእሲነ፡ ከመ፡ እቶን፡ ተጸምሀየዩ፡ ወተሀውኩ፡ እምገጸ፡ ረኀብ።
11 አንስት፡ በጽዮን፡ ኀሥራ፡ ደናግል፡ በአህጉረ፡ ይሁዳ።
12 መላእክት፡ በእደዊሆሙ፡ ተሰቅሉ፡ ገጸ፡ ሊቃናት፡ ኢያክበሩ።
13 ወራዙት፡ ማሕረፀ፡ ጾሩ፡ ወመሐዛት፡ በዕፅ፡ ደክሙ።
14 ሊቃናት፡ እምነ፡ አንቀጽ፡ ተሥዕሩ፡ ወለወራዙት፡ ማኅሌቶሙ፡ ተሥዕረ።
15 ፍሥሐ፡ ልብነ፡ ተሥዕረ፡ ተመይጠ፡ ለላሕ፡ ማኅሌትነ።
16 ወድቀት፡ አክሊለ፡ ርእስነ፡ ወይኬ፡ ለነ፡ እስመ፡ ጌገይነ።
17 በእንተ፡ ዝንቱ፡ ደወየ፡ ልብነ፡ በእተ፡ እሉ፡ ጸልመ፡ ዐይንነ።
18 በእንተ፡ ደብረ፡ ጽዮን፡ እስመ፡ ኮነ፡ ገዳመ፡ ቈናጽል፡ ሖሩ፡ ቦቱ።
19 አንተ፡ እግዚኦ፡ ለዓለም፡ ትነብር፡ ወመንበርከሂ፡ ለትውልደ፡ ትውልድ።
20 ለምንት፡ ለግሙራ፡ ትረስዐነ፡ ተኀድገነ፡ ለነዋኅ፡ መዋዕል።
21 ሚጠነ፡ እግዚኦ፡ ኀቤከ፡ ወንትመየጥ፡ ሐድስ፡ መዋዕሊነ፡ ከመ፡ ትካት።
22 እስመ፡ መንኖ፡ መነንከነ፡ ተማዕከ፡ ላዕሌነ፡ ጥቀ።