##### edition  (gez) — Text of the EOTC printed Bible
=== chapter 1 ===
[Chapter 1]
1 አመ፡ ዐሠርቱ፡ ወክልኤቱ፡ ዓመተ፡ መንግሥቱ፡ ለናቡከደነፆር፡ ዘነግሠ፡ ለፋርስ፡ በነነዌ፡ ሀገር፡ ዓባይ፡ በመዋዕለ፡ አርፋስክድ፡ ዘነግሠ፡ ለሜዶን፡ በባጥና።
2 ወነደቃ፡ ለባጥና፡ ዓውደ፡ ዓረፍታ፡ በዕብነ፡ ውቅሮ፡ ጽፍሐ፡ መሠረቱ፡ ሠላሳ፡ በዕመት፡ ዘመንገለ፡ ገዳማ፡ ለሀገር፡ ወዘመንገለ፡ ገጸ፡ ሀገር፡ ስሳ፡ በዕመት፡ ጽፍሐ፡ መሠረቱ፡ ወገብረ፡ ቆመ፡ ዓረፍቱ፡ ሰብዓ፡ በእመት፡ ወማዕዘኖ፡ ዘኃምሳ፡ በእመት።
3 ወዓቀመ፡ ማኅፈዲሁ፡ ኀበ፡ አንቀጽ፡ ዘዘ፻፡ በዕመት፡ ወመሠረቱ፡ እማዕዘንት፡ እስከ፡ ማዕዘንት፡ ፷፡ በዕመት።
4 ወገብረ፡ ኆኅተ፡ አናቅጺሃ፡ ዘይትረኃው፡ ፸፡ በእምት፡ ቆሞን፡ ወርኅቦን፡ ፴፡ በእመት፡ ኀበ፡ ይበውኡ፡ ኃያላኒሁ፡ ወጽኑዓኒሁ፡ ወሠራዊተ፡ አጋርያኒሁ።
5 ወጸብዖ፡ ናቡከደነፆር፡ በእማንቱ፡ መዋዕል፡ ለአርፋስክድ፡ ንጉሥ፡ ዓቢይ፡ ውስተ፡ ገዳም፡ ዓቢይ፡ ወውእቱ፡ ገዳም፡ ውስተ፡ ደወለ፡ ራግው።
6 ወተቀበልዎ፡ ኵሉ፡ እለ፡ ይነብሩ፡ ውስተ፡ አድባር፡ ወኵሎሙ፡ ዘውስተ፡ አድባረ፡ ኢዎፍራጤዎን፡ ወጤግራዎን፡ ለሄድስጦጶን፡ ወአሕቃለተ፡ አርዮክ፡ ንጉሠ፡ ኤሴሜዮክ፡ ወተጋብኡ፡ አሕዛብ፡ ብዙኃን፡ ጥቀ፡ ከመ፡ ይትቃተልዎሙ፡ ለደቂቀ፡ ካሌድ።
7 ወለአከ፡ ናቡከደነፆር፡ ንጉሠ፡ ፋርስ፡ ለኵሉ፡ እለ፡ ይነብሩ፡ ደወለ፡ ፋርስ፡ ወለኵሉ፡ እለ፡ ይነብሩ፡ መንገለ፡ ዓረቢሆሙ፡ ለእለ፡ ይነብሩ፡ ውስተ፡ ቄልቅያ፡ ወደማስቆ፡ ወሊባኖስ፡ ወለኵሎሙ፡ እለ፡ ይነብሩ፡ መንገለ፡ ገጸ፡ ጰራልያ።
8 ወለአሕዛብ፡ እለ፡ ይነብሩ፡ ውስተ፡ ቀርሜሎስ፡ ወገለዓድ፡ ወላዕለ፡ ገሊላ፡ ወዘዓቢይ፡ ገዳም፡ አስዳሬባም።
9 ወለኵሉ፡ እለ፡ ይነብሩ፡ ሰማርያ፡ ወእለ፡ ውስተ፡ አህጉሪሃ፡ ወእለ፡ ውስተ፡ ማዕዶተ፡ ዮርዳኖስ፡ እስከ፡ ኢየሩሳሌም፡ ወቢላጤኒ፡ ወበአክሉስ፡ ወቃዴስ፡ ወፈለገ፡ ግብፅ፡ ወጥፍናስ፡ ወራሚስ፡ ወኵሉ፡ ምድረ፡ ጌሤም።
10 እስከ፡ ይበጽሕ፡ መልዕልተ፡ ጣኔዎስ፡ ወሜንፌዎስ፡ ወለኵሉ፡ እለ፡ ውስተ፡ ግብፅ፡ እስከ፡ ይበጽሕ፡ ደወለ፡ ኢትዮጵያ።
11 ወዕበዩ፡ ኵሉ፡ እለ፡ ይነብሩ፡ ውስተ፡ ኵሉ፡ ምድር፡ ትእዛዘ፡ ናቡከደነፆር፡ ንጉሠ፡ ፋርስ፡ ወኢሖሩ፡ ምስሌሁ፡ ጸብዐ፡ እስመ፡ ኢፈርህዎ፡ ወኮነ፡ ቅድሜሆሙ፡ ከመ፡ አሐዱ፡ ብእሲ፡ ወገብኡ፡ ሐዋርያቲሁ፡ ዕራቃኒሆሙ፡ በሐሣር፡ እምቅድመ፡ ገጾሙ።
12 ወተምዐ፡ ናቡከደነፆር፡ ላዕለ፡ ኵላ፡ ይእቲ፡ ምድር፡ ጥቀ፡ ወመሐለ፡ በመንበረ፡ መንግሥቱ፡ ከመ፡ ይትበቀል፡ ኵሎ፡ ደወለ፡ ቄልቅያ፡ ወዘደማስቄኔስ፡ ወዘሶርያ፡ ከመ፡ ይቅትሎሙ፡ በሰይፍ፡ ወለኵሉ፡ እለ፡ ይነብሩ፡ ውስተ፡ ምድረ፡ ሞዓብ፡ ወለደቂቀ፡ አሞን፡ ወለኵሎሙ፡ ይሁዳ፡ ወለኵሉ፡ እለ፡ ውስተ፡ ግብፅ፡ እስከ፡ ይበጽሕ፡ ደወለ፡ ክልኤቱ፡ ብሔር።
13 ወፀብዖ፡ ምስለ፡ ኃይሉ፡ ለአርፋስክድ፡ ንጉሥ፡ አመ፡ ዐሠርቱ፡ ወሰብዐቱ፡ ዓመት፡ ወሞኦ፡ ወአእተወ፡ ኵሎ፡ ኃይሎ፡ ወኵሎ፡ አፍራሲሁ፡ ወኵሎ፡ ሠረገላቲሁ።
14 ወአስተጋብአ፡ አህጉሪሁ፡ ወሖረ፡ እስከ፡ ባጥና፡ ወነሥአ፡ ማኅፈዲሆሙ፡ እስከ፡ በርበረ፡ ሀገራ፡ ወነሠታ።
15 ወአኃዞ፡ ለአርፋስክድ፡ በደወለ፡ ራግው፡ ወረገዞ፡ በኵናት፡ ወሠረዎ፡ ለዝሉፋ።
16 ወአተዉ፡ ውእቱ፡ ወእለ፡ ምስሌሁ፡ ኵሉ፡ ብዙኃን፡ ዕደው፡ መስተቃትላን፡ ወነበረ፡ ህየ፡ ውእቱ፡ ምእተ፡ ወዕሥራ፡ ዕለተ፡ እንዘ፡ ይመክር፡ ወይሔሊ።
=== chapter 2 ===
[Chapter 2]
1 ወአመ፡ ዐሠርቱ፡ ወሰመንቱ፡ ዓመት፡ በሰብዑ፡ ለጽልመት፡ ቀዳማይ፡ ወርኅ፡ ኮነ፡ ነገር፡ በቤተ፡ ናቡከደነፆር፡ ንጉሠ፡ ፋርስ፡ ከመ፡ ይትበቀል፡ ለኵሉ፡ ምድር፡ በከመ፡ ይቤ።
2 ወጸውኦሙ፡ ለኵሎሙ፡ መገብቱ፡ ወመላእክቲሁ፡ ወተናገረ፡ ምስሌሆሙ፡ ምሥጢረ፡ ምክሩ፡ ወነበበ፡ ኵሎ፡ እኪተ፡ ላዕለ፡ ምድር።
3 ወእሙንቱ፡ አሕለቁ፡ ከመ፡ ይሥርውዎ፡ ለኵሉ፡ ዘሥላ፡ ላዕለ፡ እለ፡ ኢተደለዉ፡ በቃለ፡ አፉሁ።
4 ወእምዝ፡ ሶበ፡ አኅለቀ፡ ምክሮ፡ ጸውዖ፡ ናቡከደነፆር፡ ንጉሠ፡ ፋርስ፡ ለሆሎፎርኒስ፡ መልአከ፡ ኃይሉ፡ ዘእምታሕቴሁ።
5 ወይቤሎ፡ ከመዝ፡ ይቤ፡ ንጉሥ፡ ዓቢይ፡ እግዚኦ፡ ኵሉ፡ ብሔር፡ ናሁ፡ ትወጽእ፡ እምቅድመ፡ ገጽየ፡ ወትነሥእ፡ ምስሌከ፡ ዕደወ፡ ምዕመናነ፡ በኃይሎሙ፡ አጋራውያን፡ ዐሠርተ፼፡ ወ፳፻ተ፡ ወመስተፅዕናነ፡ አፍራስ፡ ምስለ፡ አፍራሲሆሙ፡ ዐሠርተ፼፡ ወ፳፻ተ፡ ወሰብአ፡ ሐፅ፡ ዐሠርተ፼፡ ወ፳፻ተ።
6 ወትወጽእ፡ እምኔየ፡ ውስተ፡ ኵላ፡ ምድር፡ እንተ፡ መንገለ፡ ዓረብ፡ እስመ፡ ዐበዩ፡ ተአዝዞ፡ ለቃለ፡ አፉየ።
7 ወትሰብክ፡ ሎሙ፡ ያስተዳልዉ፡ ሊተ፡ ብሔረ፡ ወማየ፡ እስመ፡ እመጽእ፡ በመዓትየ፡ ላዕሌሆሙ፡ ወእከድን፡ ገጻ፡ ለምድር፡ በእግረ፡ ኃይልየ፡ ወእሬስዮሙ፡ ሕብልያ፡ ወበርበረ።
8 ወአብድንቲሆሙኒ፡ ይመልእ፡ ውስተ፡ ቈላቲሆሙ፡ ወውስተ፡ አፍላግ፡ ይመልዕ፡ አብድንቲሆሙ፡ ወበተከዚኒ።
9 ወእዘርዎሙ፡ ለፄዋሆሙ፡ እስከ፡ አጽናፈ፡ ምድር።
10 ወአንተሰ፡ ቅድም፡ ወንሣእ፡ ኵሎ፡ ደወሎሙ፡ ሊተ፡ ወያገብኡ፡ ርእሶሙ፡ ኀቤከ፡ ወዕቀቦሙ፡ ሊተ፡ እስከ፡ ዕለተ፡ እትቤቀሎሙ።
11 እስመ፡ ኢትምሕኮሙ፡ ዓይንከ፡ ለእለ፡ አጽረሩ፡ ከመ፡ ትቅትሎሙ፡ ወትበርብሮሙ፡ ውስተ፡ ኵሉ፡ ምድርከ።
12 እስመ፡ ሕያው፡ አነ፡ ወጽኑዕ፡ መንግሥትየ፡ ከመ፡ እግበር፡ ዘንተ፡ በእዴየ፡ በከመ፡ ነበብኩ።
13 ወአንተኒ፡ አልቦ፡ ዘተሐድግ፡ ወኢአሐተ፡ እምቃለ፡ እግዚእከ፡ አላ፡ ገቢረ፡ ግበር፡ በከመ፡ አዘዝኩከ፡ ወኢታጐንዲ፡ ገቢሮቶ።
14 ወወፅአ፡ ሆሎፎርኒስ፡ እምቅድመ፡ እግዚኡ፡ ወጸውኦሙ፡ ለኵሎሙ፡ ኃያላን፡ ወለኵሎሙ፡ መላእክት፡ ወሠራዊት፡ ወሊቃናተ፡ ኃይሉ፡ ወዘአሶር።
15 ወኈለቆሙ፡ ለኅሩያን፡ ዕደው፡ መስተቃትላን፡ በከመ፡ ነበበ፡ እግዚኡ፡ አጋራውያን፡ ዐሠርቱ፡ ፼፡ ወ፳፻ት፡ ወሰብአ፡ ሐጽ፡ ዐሠርቱ፡ ፼፡ ወ፳፻ት።
16 ወአዘዞሙ፡ ለኵሎሙ፡ ከመ፡ ይትቃትሉ፡ ወከመ፡ ይፃብዑ።
17 ወነሥኡ፡ አግማለ፡ ወአዕዱገ፡ ወአብቅለ፡ ለስንቆሙ፡ ብዙኀ፡ ጥቀ፡ ወአባግዓ፡ ወአልሕምተ፡ ወአጣሌ፡ ለሲሳዮሙ፡ ዘአልቦ፡ ኍልቊ።
18 ወአስንቀ፡ ለኵሉ፡ ሰብኡ፡ ወለብዙኃን፡ ወርቀ፡ ወብሩረ፡ እምቤተ፡ ንጉሥ፡ ብዙኃ፡ ጥቀ።
19 ወወፅአ፡ ውእቱ፡ ወኵሉ፡ ኃይሉ፡ ወጸብዐ፡ ቅድመ፡ እምንጉሥ፡ ናቡከደነፆር፡ ወከመ፡ ይክድን፡ ኵሎ፡ ገጸ፡ ምድር፡ መንገለ፡ ዓረብ፡ በሠረገላ፡ ወበአፍራስ፡ ወአጋርያን፡ ኅሩያን።
20 ወብዙኃን፡ እለ፡ ኀብሩ፡ ምስሌሆሙ፡ ከመ፡ አንበጣ፡ ወፅኡ፡ ምስሌሆሙ፡ ወከመ፡ ኆፃ፡ ባሕር፡ ወአልቦሙ፡ ኍልቊ፡ እምነ፡ ብዝኆሙ።
21 ወወፅኡ፡ እምነ፡ ነነዌ፡ ምሕዋረ፡ ሠሉስ፡ ዕለት፡ ውስተ፡ ገጸ፡ ገዳም፡ ዘቤቄጤሌት፡ ወሖረ፡ እምነ፡ ቤቄጤሌት፡ ዘገቦ፡ ደብር፡ ዘመንገለ፡ ጸጋም፡ ዘመልዕልተ፡ ኬልቅያ።
22 ወነሥአ፡ ኵሎ፡ ኃይሎ፡ አጋርያነ፡ ወሰብአ፡ አፍራስ፡ ወሠረገላቲሁ፡ ወሖረ፡ እምህየ፡ መንገለ፡ አድዋሊሆሙ።
23 ወቀተሎሙ፡ ለፌድ፡ ወለሉድ፡ ወፄወዎሙ፡ ለኵሎሙ፡ ደቂቀ፡ ሬስስ፡ ወለደቂቀ፡ እስማኤል፡ እለ፡ ውስተ፡ ገዳም፡ ዘመንገለ፡ ገጸ፡ አዜብ፡ ዘኤሌዎን።
24 ወአደወ፡ ኤፍራጥስ፡ ወኃለፈ፡ እመስጴጦምያ፡ ወነሠተ፡ ኵሎ፡ አህጉሪሆሙ፡ ዓበይተ፡ ዘመልዕልተ፡ አህጉረ፡ አርባዐኔ፡ እስከ፡ በጽሐ፡ ኀበ፡ ብሔር።
25 ወረከበ፡ ደወለ፡ ቄልቅያ፡ ወቀተለ፡ ኵሉ፡ ፀሮ፡ ወሖረ፡ እስከ፡ ደወለ፡ ያፌት፡ ዘመንገለ፡ አዜብ፡ ዘገጸ፡ አረብ።
26 ወአገቶሙ፡ ለኵሎሙ፡ ደቂቀ፡ ምድያም፡ ወማኅረከ፡ እንስሳሆሙ፡ ወአውዐየ፡ አብያቲሆሙ።
27 ወወረደ፡ ውስተ፡ ገዳም፡ ዘደማስቆ፡ በጊዜ፡ ማዕረረ፡ ሥርናይ፡ ወአውዐየ፡ ኵሎ፡ ገራውሂሆሙ፡ ወአባግዒሆሙሰ፡ ወመራዕይሆሙ፡ አዘዘ፡ የሐብልዩ፡ ወነሠተ፡ አህጉሪሆሙ፡ ወደቂቆሙኒ፡ ነሥአ፡ ወቀተለ፡ ኵሎ፡ ወራዙቶሙ፡ በአፈ፡ ሐፂን፡ ወወድቀት፡ ፍርሃረ፡ ዚአሁ።
28 ወድንጋፄ፡ ላዕለ፡ እለ፡ ይነብሩ፡ ውስተ፡ ጰራልያ፡ ወእለ፡ ውስተ፡ ሲዶና፡ ወጢሮስ፡ ወኵሎሙ፡ እለ፡ ይነብሩ፡ ውስተ፡ ደማናሆን፡ ወእለ፡ ውስተ፡ አዛጦን፡ ወአስቀሎና፡ ፈርሁ፡ ጥቀ፡ እምኔሁ።
=== chapter 3 ===
[Chapter 3]
1 ወፈነዉ፡ መልእክተ፡ በቃለ፡ ሰላም።
2 እንዘ፡ ይብሉ፡ ናሁአ፡ ንሕነ፡ አግብርቲሁ፡ ለናቡከደነፆር፡ ንጉሥ፡ ዓቢይ፡ ሀለውነ፡ ቅድሜከ፡ ወረስየነ፡ በከመ፡ ፈቀድከ፡ በቅድመ፡ ገጽከ።
3 ወናሁ፡ አህጉሪነ፡ ወኵሉ፡ በሐውርቲነ፡ ወኵሉ፡ ገራውሂነ፡ ወመራዕይነ፡ ወኵሉ፡ አዕፃዳተ፡ ወፍርነ፡ ወአባግዒነ፡ ለከ፡ ቅድመ፡ ገጽከ፡ ወግበር፡ ዘፈቀድከ።
4 ወናሁ፡ አህጉሪነ፡ ዓበይተ፡ ወእለ፡ ይነብሩ፡ ውስቴቶን፡ አግብርቲከ፡ እሙንቱ፡ ወነዓ፡ ረሲ፡ ዘከመ፡ ፈቃድከ።
5 ወበጽሑ፡ እሙንቱ፡ ዕደው፡ ኀበ፡ ሆሎፎርኒስ፡ ወዜነውዎ፡ ዘንተ፡ ነገረ።
6 ወወረደ፡ ውስተ፡ በሐውርቲሆሙ፡ ውእቱ፡ ወኃይሉ፡ ወአዕቀበ፡ አህጉሪሆሙ፡ ዓበይተ፡ ወነሥአ፡ እምኔሆሙ፡ ዕደወ፡ ኅሩያነ፡ እለ፡ ያስተታልዎሙ።
7 ወተቀበልዎ፡ እሙንቱኒ፡ ወኵሉ፡ በሐውርቲሆሙ፡ በአክሊላት፡ ወበማኅሌት፡ ወበመዝሙር፡ ወበከበሮ።
8 ወዖደ፡ ውስተ፡ ደወሎሙ፡ ወሠበረ፡ ምስላቲሆሙ፡ ወእዙዝ፡ ውእቱ፡ ከመ፡ ያጥፍእ፡ ኵሎ፡ አማልክተ፡ ሰብእ፡ ወያምልክዎ፡ ለናቡከደነፆር፡ ሎቱ፡ ለባሕቲቱ፡ ወኵሉ፡ አሕዛብ፡ ወኵሉ፡ በሐውርት፡ ከመ፡ ይበልዎ፡ እግዚአብሔር።
9 ወመጽአ፡ ውስተ፡ ኵሉ፡ ገጸ፡ ኤስድሬሎም፡ ዘገባይያ፡ ዘቅድመ፡ ጰርያኖስ፡ ዓቢይ፡ ዘይሁዳ።
10 ወሖረ፡ ማዕከለ፡ ገዳመ፡ ጤቦን፡ ወአሕጉረ፡ ሴቅቶን፡ ወነበረ፡ ህየ፡ አሐደ፡ ወርኃ፡ ያስተጋብእ፡ ስንቀ፡ ለአሕዛቢሁ።
=== chapter 4 ===
[Chapter 4]
1 ወሰምዑ፡ ደቂቀ፡ እሥራኤል፡ ወእለ፡ ይነብሩ፡ ውስተ፡ ይሁዳ፡ ኵሎ፡ ዘገብረ፡ ሆሎፎርኒስ፡ ላዕለ፡ አሕዛብ፡ መልአከ፡ ኃይሉ፡ ለናቡከደነፆር፡ ንጉሠ፡ ፋርስ፡ ዘከመ፡ አማሰነ፡ ኵሎ፡ ደወሎሙ፡ ወዘከመ፡ አጥፍኦሙ።
2 ወፈርሁ፡ ጥቀ፡ ፈድፋደ፡ እምቅድመ፡ ገጹ፡ ወበእንተ፡ ኢየሩሳሌም፡ ወበእንተ፡ ቤተ፡ እግዚአብሔር፡ አምላኮሙ።
3 እስመ፡ ግብተ፡ ሀለዉ፡ እምኀበ፡ ዐርጉ፡ እምድኅረ፡ ተፄወዉ፡ ኵሉ፡ ኅሩያን፡ ሕዝብ፡ ዘእምነገደ፡ ይሁዳ፡ ወበእንተ፡ ንዋየ፡ ቅድሳት፡ ወምሥዋዕ፡ ወበእንተ፡ ቤተ፡ መቅደስ፡ እስመ፡ እምድኅረ፡ ተገመነ፡ ቀደስዎ።
4 ወለአከ፡ ውስተ፡ ኵሉ፡ ደወለ፡ ሶርያ፡ ወቆናስ፡ ወቤቶሮ፡ ወቤልሞን፡ ወኢያሪኮ፡ ወአስኮባን፡ ወኦሥራ፡ ወአውሌናሴሌም።
5 ወበጽሐ፡ ውስተ፡ ኵሉ፡ አርእስተ፡ አድባሪሆሙ፡ ልዑላን፡ ወኀደረ፡ ላዕለ፡ አህጉር፡ እለ፡ ውስቴቶሙ፡ ወነሥኡ፡ ሎሙ፡ ስንቀ፡ ለፀብእ፡ እስመ፡ ግብተ፡ ኮኖሙ፡ ማዕረሮሙ።
6 ወጸሐፈ፡ ኢዮአቄም፡ ካህን፡ ዓቢይ፡ ዘሀለወ፡ በኪያሆን፡ መዋዕል፡ ውስተ፡ ኢየሩሳሌም፡ ለእለ፡ ይነብሩ፡ ውስተ፡ ቤጤልዋ፡ ወቤጦሜስታም፡ እንተ፡ ቅድመ፡ ኢያሪኮ፡ ውስተ፡ ገጸ፡ ገዳም፡ ዘገቦ፡ ዶታይም።
7 እንዘ፡ ይብል፡ አጽንዑ፡ ፍትሐታተ፡ አድባር፡ እስመ፡ እንተ፡ ህየ፡ ቦቱ፡ ሙባዕ፡ ላዕለ፡ ይሁዳ፡ ከመ፡ ትክልእዎሙ፡ ኃሊፈ፡ እስመ፡ ጸባብ፡ ሙባዒሁ፡ ወፍናዊሁ፡ ዳዕሙ፡ ምኅላፈ፡ ክልኤቱ፡ ዕደው፡ ኵለንታሁ።
8 ወገብሩ፡ ደቂቀ፡ እሥራኤል፡ በከመ፡ አዘዞሙ፡ ኢዮአቄም፡ ካህን፡ ዓቢይ፡ ወኵሉ፡ ሊቃውንተ፡ እሥራኤል፡ እለ፡ ይነብሩ፡ ኢየሩሳሌም።
9 ወጸርሑ፡ ኵሎሙ፡ ደቂቀ፡ እስራኤል፡ ኀበ፡ እግዚአብሔር፡ በዓቢይ፡ ቃል፡ ወአሕመሙ፡ ነፍሶሙ፡ በዓቢይ፡ ሕማም።
10 ወእሙንቱኒ፡ ወአንስቲያሆሙኒ፡ ወደቂቆሙኒ፡ ወእንስሳሆሙኒ፡ ወኵሉ፡ ፈላሲ፡ ወአሳብ፡ ወዘበሤጥ፡ ለሀዉ፡ ወለብሱ፡ ሠቀ።
11 ወኵሉ፡ ሰብአ፡ እስራኤል፡ ወአንስቲያሆሙ፡ ወደቂቆሙ፡ እለ፡ ይነብሩ፡ ኢየሩሳሌም፡ ወድቁ፡ ውስተ፡ ቤተ፡ መቅደስ፡ ወደዩ፡ ሐመደ፡ ዲበ፡ ርእሶሙ፡ ወሰፍሑ፡ ሠቃቲሆሙ፡ ቅድመ፡ እግዚአብሔር፡ ወአልበሱ፡ ምሥዋዓ፡ ሠቀ።
12 ወጸርሑ፡ ኀበ፡ እግዚአብሔር፡ አምላከ፡ እስራኤል፡ ኅቡረ፡ በሕቁ፡ ከመ፡ ኢይትመሠጡ፡ ደቂቆሙ፡ ወከመ፡ ኢይፄወዋ፡ አንስቲያሆሙ፡ ወከመ፡ ኢያጥፍኡ፡ አህጉረ፡ ርስቶሙ፡ ወኢያገምኑ፡ መቅደሶሙ፡ ወኢይሬስይዎ፡ ተውኔተ፡ ለአሕዛብ።
13 ወርእየ፡ እግዚአብሔር፡ ሕማሞሙ፡ ወሰምዐ፡ ቃሎሙ፡ ወጾሙ፡ ሕዝብ፡ ብዙኃ፡ መዋዕለ፡ በኵሉ፡ ይሁዳ፡ ወበኢየሩሳሌም፡ በቅድመ፡ መቅደሱ፡ ለእግዚአብሔር፡ ዘኵሎ፡ ይመልክ።
14 ወኢዮአቄምሰ፡ ካህን፡ ዓቢይ፡ ወኵሎሙ፡ እለ፡ ይቀውሙ፡ ካህናት፡ ቅድመ፡ እግዚአብሔር፡ ወእለ፡ ይገብሩ፡ ግብረ፡ እግዚአብሔር፡ ቀነቱ፡ ሠቃተ፡ ውስተ፡ ሐቌሆሙ፡ ወአብኡ፡ መሥዋዕተ፡ ዘዘልፍ፡ ወዘብፅአት፡ ወዘበፈቃዶሙ፡ ዘያበውዑ፡ ሕዝብ።
15 ወወደዩ፡ ሐመደ፡ ውስተ፡ አርእስቲሆሙ፡ ወጸርሑ፡ ኀበ፡ እግዚአብሔር፡ በኵሉ፡ ኃይሎሙ፡ ወይቤሉ፡ ነጽር፡ ላዕለ፡ ቤተ፡ እስራኤል፡ በሠናይ።
=== chapter 5 ===
[Chapter 5]
1 ወዜነውዎ፡ ለሆሎፎርኒስ፡ መልአከ፡ ኃይሉ፡ ለአሶር፡ ወይቤልዎ፡ ተደለዉ፡ ደቂቀ፡ እስራኤል፡ ለፀብእ፡ ወዐፀዉ፡ ፍስሐታተ፡ ወሐፀሩ፡ አርእስተ፡ አድባር፡ ነዋሐት፡ ወገብሩ፡ ፍናዋተ፡ መብዕሰ።
2 ወተምዐ፡ መዓተ፡ ጥቀ፡ ወጸውዖሙ፡ ለመላእክተ፡ ሞዓብ፡ ወለመሳፍንተ፡ አሞን፡ ወለመላእክተ፡ ጰራልያ።
3 ወይቤሎሙ፡ ንግሩኒ፡ ደቂቀ፡ ከነዓን፡ ምንት፡ እሉ፡ ሕዝብ፡ እለ፡ ይነብሩ፡ ውስተ፡ አድባር፡ ወምንት፡ እልክቱ፡ እለ፡ ይነብሩ፡ ወበዝኀ፡ ኃይሎሙ፡ ወምንት፡ አጽንኦሙ፡ ወመኑ፡ ንጉሥ፡ ዘቆመ፡ እምኔሆሙ፡ አው፡ መስፍን፡ አው፡ መልአኮሙ።
4 ወእፎ፡ ኢይመጽኡ፡ ከመ፡ ይትቀበሉኒ፡ እምነ፡ ኵሉ፡ እለ፡ ይነብሩ፡ መንገለ፡ ዓረብ።
5 ወይቤሎ፡ አኪዮር፡ መስፍኖሙ፡ ለኵሉ፡ ደቂቀ፡ አሞን፡ ስማዕ፡ እግዚእየ፡ ቃለ፡ እምነ፡ አፉሁ፡ ለገብርከ፡ ወእነግረከ፡ ጽድቀ፡ በበይነ፡ ዝንቱ፡ ሕዝብ፡ እለ፡ ይነብሩ፡ ውስተ፡ አድባር፡ ወቅሩበከ፡ ሀለዉ፡ እስመ፡ ሐሰት፡ ኢይወፅዕ፡ እምአፉሁ፡ ለገብርከ።
6 እሉ፡ ሕዝብ፡ እምነ፡ ከላውዴዎን፡ ወጽኡ።
7 ወነበሩ፡ ቀዲሙ፡ ውስተ፡ መስጴጦምያ፡ እስመ፡ ኢይፈቅዱ፡ ይትልዉ፡ አማልክተ፡ አበዊሆሙ፡ እለ፡ ኮኑ፡ በምድረ፡ ከላውዴዎን።
8 ወኃደጉ፡ ፍኖተ፡ አዝማዲሆሙ፡ ወሰገዱ፡ ለአምላከ፡ ሰማይ፡ ለእግዚአብሔር፡ ዘአእመሩ፡ ወዘአውፅኦሙ፡ እምቅኔ፡ አማልክቲሆሙ፡ ወጐዩ፡ ውስተ፡ መስጴጦምያ፡ ወነበሩ፡ ህየ፡ ብዙኀ፡ መዋዕለ።
9 ወይቤሎሙ፡ አምላኮሙ፡ ይፃኡ፡ እምኀበ፡ ፈለሱ፡ ወይሑሩ፡ ምድረ፡ ከነዓን፡ ወሖሩ፡ ምድረ፡ ከነዓን፡ ወነበሩ፡ ህየ፡ ብዙኀ፡ መዋዕለ፡ ወአብዝኁ፡ ወርቀ፡ ወብሩረ፡ ወእንስሳ፡ ብዙኀ፡ ጥቀ።
10 ወወረዱ፡ ውስተ፡ ምድረ፡ ግብፅ፡ እስመ፡ ከደነ፡ ገጸ፡ ምድረ፡ ከነዓን፡ ረኃብ፡ ወነበሩ፡ ህየ፡ እስከ፡ አመ፡ ተሴሰዩ፡ ወበዝኁ፡ በህየ፡ ወመልኡ፡ ወአልቦሙ፡ ኍልቊ፡ ለዘመዶሙ።
11 ወተንሥአ፡ ላዕሌሆሙ፡ ንጉሠ፡ ግብፅ፡ ወተጠበቦሙ፡ ወአሕመሞሙ፡ ወቀነዮሙ፡ በግንፋል፡ ወረሰዮሙ፡ አግብርተ።
12 ወጸርሑ፡ ኀበ፡ አምላኮሙ፡ ወቀተለ፡ ኵሎ፡ ምድረ፡ ግብፅ፡ በመቅሠፍት፡ ዘአልቦ፡ ፈውስ፡ ወአውፅኦሙ፡ እምግብፅ፡ እምቅድመ፡ ጾሙ።
13 ወአይበሳ፡ እግዚአብሔር፡ ለባሕረ፡ ኤርትራ፡ እምቅድሜሆሙ።
14 ወወሰዶሙ፡ ውስተ፡ ሲና፡ ወቃዴስ፡ በርኔ፡ ወአውፅኦሙ፡ ለኵሎሙ፡ እለ፡ ይነብሩ፡ ውስተ፡ ገዳም።
15 ወነበሩ፡ ውስተ፡ ምድረ፡ አሞሬዎን፡ ወአጥፍኦሙ፡ ለኵሉ፡ ሐሴቦን፡ በኃይሉ፡ ወአደዉ፡ ዮርዳኖስ፡ ወተዋረሱ፡ ኵሎ፡ ደወሎሙ።
16 ወአውፅኦሙ፡ እምቅድመ፡ ገጾሙ፡ ለከናኔዎን፡ ወፌርዜዎን፡ ወኢያቡሴዎን፡ ወኬጤዎን፡ ወሴኬም፡ ወኵሉ፡ ጌርጌሴዎን፡ ወነበሩ፡ ህየ፡ ብዙኃ፡ መዋዕለ።
17 ወአምጣነ፡ ኢአበሱ፡ ቅድመ፡ አምላኮሙ፡ ወነበረት፡ ምስሌሆሙ፡ ኵላ፡ ሠናይት፡ እስመ፡ እግዚአብሔር፡ ጸላኤ፡ ዓመፃ፡ ሀሎ፡ ምስሌሆሙ።
18 ወአመ፡ ባሕቱ፡ ኃደጉ፡ ፍኖቶ፡ እንተ፡ አዘዞሙ፡ አጥፍኦሙ፡ ወሠረዎሙ፡ በብዙኅ፡ አፅባእት፡ ወፈድፋደ፡ ጥቀ፡ ወተፄወዉ፡ ውስተ፡ ብሔረ፡ ባዕድ፡ ወቤተ፡ አምላኮሙ፡ መዝበረ፡ ወምድረ፡ ኮነ፡ ወአህጉሪሆሙኒ፡ ነሥእዎሙ፡ ፀሮሙ።
19 ወይእዜሰ፡ ተመይጡ፡ ኀበ፡ አምላኮሙ፡ ወተጋብኡ፡ ህየ፡ እምኀበ፡ ተዘርዉ፡ ወነበሩ፡ ኢየሩሳሌም፡ ኀበ፡ ሀለወ፡ መቅደሶሙ፡ ወውስተ፡ አድባርኒ፡ ነበሩ፡ እስመ፡ ሐቅል፡ ውእቱ።
20 ወይእዜኒ፡ እግዚኦ፡ አመ፡ አበሱ፡ እሉ፡ ሕዝብ፡ ወቦ፡ ዘአበሱ፡ ለአምላኮሙ፡ ንጠይቅ፡ ምዕረ፡ እስመ፡ ዝንቱ፡ እቅፍቶሙ፡ ወእምዝ፡ ነዐርግ፡ ወንትቃተሎሙ።
21 ወእመሰ፡ አልቦሙ፡ ለእሉ፡ ሕዝብ፡ አበሳ፡ ኢትትአደዎሙ፡ እግዚእየ፡ ዮጊ፡ ያጸንዖሙ፡ እግዚአብሔር፡ ወአምላኮሙ፡ ይቀውሙ፡ ሎሙ፡ ወንከውን፡ ኃፍረተ፡ ውስተ፡ ኵሉ፡ በሐውርት።
22 ወእምዝ፡ ሶበ፡ አኅለቀ፡ ነቢበ፡ አኪዮር፡ ዘንተ፡ ነገረ፡ ወአንጐርጐሩ፡ ኵሉ፡ ሕዝብ፡ እለ፡ ይቀውሙ፡ ዓውደ፡ ትዕይንት፡ ወይቤልዎ፡ መሳፍንቲሁ፡ ለሆሎፎርኒስ፡ ወኵሉ፡ እለ፡ ይነብሩ፡ ውስተ፡ ጰራልያ፡ ወሞዓብ፡ ከመ፡ ይቅትልዎ።
23 ወይቤሉ፡ ዘአኮ፡ ንፈርሆሙ፡ ለደቂቀ፡ እስራኤል፡ ሕዝብ፡ እለ፡ አልቦሙ፡ ኃይል፡ ወፅንዕ፡ ከመ፡ ይትቃተሉ፡ ምስለ፡ ጸባዒት፡ ጽንዕት።
24 ወንዕርግ፡ ባሕቱ፡ ወይኩኑ፡ ለሲሳየ፡ ኵሉ፡ ሐራከ፡ እግዚእነ፡ ሆሎፎርኒስ።
=== chapter 6 ===
[Chapter 6]
1 ወእምዝ፡ ሶበ፡ አርመሙ፡ እልክቱ፡ ዕደው፡ እለ፡ ዓውደ፡ እንግልጋ፡ ይቤሉ፡ ሆሎፎርኒስ፡ መልአከ፡ ኃይሉ፡ ለአሶር፡ ለአክዮር፡ በቅድመ፡ ኵሉ፡ ሕዝበ፡ ኢሎፍሊ፡ ወኀበ፡ ኵሉ፡ ደቂቀ፡ ሞአብ።
2 ገባዒሁ፡ ለኤፍሬም፡ ከመ፡ ትትነበይ፡ ለነ፡ ዮም፡ ወትብለነ፡ ኢትፅብዕዎሙ፡ ለደቂቀ፡ እስራኤል፡ እስመ፡ እግዚአብሔር፡ ያጸንዖሙ፡ መኑ፡ ውእቱ፡ እግዚአብሔር፡ ዘእንበለ፡ ናቡከደነፆር።
3 ውእቱ፡ ይፌኑ፡ መልእክቶ፡ ወያጠፍኦሙ፡ ወይዘርዎሙ፡ እምገጸ፡ ምድር፡ ወኢያድኅኖሙ፡ አምላኮሙ፡ ወንሕነሰ፡ አግብርቲሁ፡ ለናቡከደነፆር፡ ንሴርዎሙ፡ ከመ፡ አሐዱ፡ ብእሲ፡ ወኢይትቃወምዎ፡ ለኃይለ፡ አፍራሲነ።
4 እስመ፡ ቦቱ፡ ንከይዶሙ፡ ወአድባሪሆሙ፡ ይሰክሩ፡ በደሞሙ፡ ወይበዝኅ፡ አብድንቲሆሙ፡ ወደቂቆሙ፡ ኢይቀውሙ፡ በሰኰና፡ እግሮሙ፡ በቅድመ፡ ገጽነ፡ አላ፡ ጠፊአ፡ ይጠፍኡ፡ እምነ፡ ምድር፡ ይቤ፡ ንጉሥ፡ ናቡከደነፆር፡ እግዚላ፡ ለኵላ፡ ምድር፡ እስመ፡ ይቤ፡ ከመ፡ ኢይኩን፡ ቃሉ።
5 ወአንተሰ፡ አኪዮር፡ ገባዒሁ፡ ለአሞን፡ ዘነበብከ፡ ዘንተ፡ ቃለ፡ ዮም፡ ኢትሬኢ፡ ገጽየ፡ እምዮም፡ እምይእቲ፡ ዕለት፡ በኃጢአትከ፡ እስከ፡ አመ፡ እትቤቀሎሙ፡ ለእለ፡ ወጽኡ፡ እምድረ፡ ግብፅ።
6 ወውእተ፡ አሚረ፡ ይበውእ፡ ኃጺኖሙ፡ ለሐራየ፡ ወዘሕዝብየ፡ ውስተ፡ ገቦከ፡ ወትወድቅ፡ ምስለ፡ አብድንቲሆሙ።
7 ወሶበ፡ ገባእኩ፡ ይወስዱከ፡ አግብርትየ፡ ውስተ፡ አድባሪሆሙ፡ ወያነብሩከ፡ ውስተ፡ አሐቲ፡ እምአህጉሪሆሙ፡ እለ፡ ውስተ፡ ዓቀብ።
8 ወኢይቀትሉከ፡ እስከ፡ አመ፡ እሤርዎሙ።
9 እስመ፡ ትትአመን፡ በልብከ፡ ከመ፡ ኢንክሎሙ፡ ኢትወድቅ፡ ገጽከ፡ እስመ፡ አንሰ፡ ነበብኩ፡ ወአልቦ፡ ዘይወድቅ፡ እምነ፡ ቃልየ።
10 ወአዘዞሙ፡ ሆሎፎርኒስ፡ ለአግብርቲሁ፡ እለ፡ ይቀውሙ፡ ቅድሜሁ፡ ውስተ፡ ደብተራሁ፡ ከመ፡ ይንሥእዎ፡ ለአኪዮር፡ ወይሰድዎ፡ ቤጤልዋ፡ ወያወፍይዎ፡ ለደቂቀ፡ እስራኤል፡ ኪያሁ።
11 ወነሥእዎ፡ አግብርቲሁ፡ ወወሰድዎ፡ አፍአ፡ እምትዕይንት፡ ውስተ፡ ገዳም፡ ወሖረ፡ እምነ፡ ማዕከለ፡ ገዳም፡ ውስተ፡ አድባር፡ ወእምዝ፡ በጽሑ፡ ኀበ፡ አንቅዕት፡ ዘመትሕተ፡ ቤጤልዋ።
12 ወሶበ፡ ርእይዎሙ፡ ሰብአ፡ ይእቲ፡ ሀገር፡ ውስተ፡ ርእሰ፡ ደብር፡ ነሥኡ፡ ንዋየ፡ ሐቅሎሙ፡ ወሖሩ፡ አፍአ፡ እምነ፡ ሀገር፡ ውስተ፡ ርእሰ፡ ደብር፡ ወኵሉ፡ ሰብአ፡ ሞጸፍ፡ ዓቀቡ፡ ፍሥሐታተ፡ ወአመርግሑ፡ ዕብነ፡ ላዕሌሆሙ።
13 ወፈትሕዎ፡ ማኅሜሁ፡ ለአኪዮር፡ ወአሠርዎ፡ ጕንደ፡ ደብር፡ ወኀደግዎ፡ ህየ፡ መትሕተ፡ ደብር፡ ግዱፈ፡ ወአተዉ፡ ኀበ፡ እግዚኦሙ።
14 ወወረዱ፡ ደቂቀ፡ እሥራኤል፡ እምነ፡ አህጉሪሆሙ፡ ወሖሩ፡ ኀቤሁ፡ ወፈትሕዎ፡ ወወሰድዎ፡ ብሔረ፡ ቤጤልዋ፡ ወሤምዎ፡ ውስተ፡ መላእክተ፡ አህጉሪሆሙ።
15 እለ፡ ሀለዉ፡ በኪያሆን፡ መዋዕል፡ ዖዝያስ፡ ወልደ፡ ሚካ፡ ዘእምነገደ፡ ስምዖን፡ ወክብሪስ፡ ወልደ፡ ጎቶንያል።
16 ወጸውኡ፡ ኵሎ፡ ሊቃውንተ፡ አህጉሪሆሙ፡ ወሮጹ፡ ኵሉ፡ ወራዙቶሙ፡ ወአንስቲያሆሙ፡ ውስተ፡ ምንግላጊሆሙ፡ ወአቀምዎ፡ ለአኪዮር፡ ማእከለ፡ ኵሎሙ፡ ወተስእሎ፡ ዖዝያስ፡ ኵሎ፡ ዘከመ፡ ኮነ።
17 ወአውሥኦሙ፡ ወአይድኦሙ፡ ነገሮ፡ ለሆሎፎርኒስ፡ ኵሎ፡ ዘከመ፡ አንገለጉ፡ ወኵሎ፡ ቃሎሙ፡ ዘከመ፡ ይቤሉ፡ በማዕከለ፡ መላእክቲሆሙ፡ ለደቂቀ፡ አሶር፡ ወመጠነ፡ አዕበየ፡ አፉሁ፡ ሆሎፎርኒስ፡ ላዕለ፡ ቤተ፡ እስራኤል።
18 ወወድቁ፡ ኵሉ፡ ሕዝብ፡ ወሰገዱ፡ በገዶሙ፡ ለእግዚአብሔር።
19 ወጸርሑ፡ ወይቤሉ፡ እግዚኦ፡ አምላከ፡ ሰማይ፡ ርኢ፡ ትዕይርቶሙ፡ ወአስተምሕር፡ ሕማሞሙ፡ ለዘመድነ፡ ወነጽር፡ ላዕለ፡ መቅደስከ፡ በሠናይ፡ በዛቲ፡ ዕለት።
20 ወአስተፍሥሕዎ፡ ለአኪዮር፡ ወአእኰትዎ፡ ጥቀ።
21 ወነሥኦ፡ ዖዝያስ፡ እምኀበ፡ አንገለጉ፡ ወአእተዎ፡ ቤቶ፡ ወገብረ፡ በዓለ፡ ለሊቃናት፡ ወጸውዕዎ፡ ለአምላከ፡ እስራኤል፡ ኵላ፡ ይእተ፡ ሌሊተ፡ ከመ፡ ይርድኦሙ።
=== chapter 7 ===
[Chapter 7]
1 ወበሳኒታ፡ አዘዘ፡ ሆሎፎርኒስ፡ ለኵሉ፡ ሐራሁ፡ ወለኵሉ፡ ሕዝቡ፡ እለ፡ ፀብዑ፡ ምስሌሁ፡ ከመ፡ ይግዓዙ፡ ቤጤልዋ፡ ወይሑሩ፡ ይቅድሙ፡ ውስተ፡ ፍትሐታተ፡ አድባር፡ ወይትቃተልዎሙ፡ ለደቂቀ፡ እስራኤል።
2 ወወረዱ፡ ይእተ፡ አሚረ፡ ኵሉ፡ ብእሲ፡ ጽኑዓኒሆሙ፡ ወኃያላኒሆሙ፡ ዕደው፡ መስተቃትላን፡ ዐሠርቱ፡ ወሰብዐቱ፡ ፼፡ ዘበእግር፡ ወዘፈረስ፡ ፼፡ ወ፳፻፡ ዘእንበለ፡ ምስለ፡ ንዋይ፡ ወዘእንበለ፡ ዕደው፡ እለ፡ ኢሮዱ፡ አጋርያን፡ ብዙኃን፡ ጥቀ።
3 ወኀደሩ፡ ውስተ፡ ዓውሎንያ፡ ገቦሃ፡ ለቤጤልዋ፡ ኀበ፡ ነቅዕ፡ ወበጽሐ፡ ተዓይኒሆሙ፡ ኑኁ፡ እስከ፡ ዶታይም፡ ወእስከ፡ ቤልሜም፡ ወግድሙ፡ እስከ፡ ቅያስም፡ እምነ፡ ቤጤልዋ፡ እንተ፡ እምቅድመ፡ አስዲራሎም።
4 ወሶበ፡ ርእዩ፡ ብዝኆሙ፡ ደቂቀ፡ እስራኤል፡ ደንገጹ፡ ጥቀ፡ ወተበሀሉ፡ በበይናቲሆሙ፡ የአጽውዎ፡ ይእዜ፡ ለኵሉ፡ ገጸ፡ ምድር፡ እሉ፡ ወአልቦ፡ ዘይክል፡ ፀዊረ፡ ክበዶሙ፡ ኢአድባር፡ ወኢአውግር፡ ወኢቈላት።
5 ወነሥኡ፡ ኵሎሙ፡ ንዋየ፡ ሐቅሎሙ፡ ወአንደዱ፡ እሳተ፡ ውስተ፡ ማኅፈዲሆሙ፡ ወነበሩ፡ የዓቅቡ፡ ኵላ፡ ይእተ፡ ሌሊተ።
6 ወበሳኒታ፡ ዕለት፡ አውፅአ፡ ሆሎፎርኒስ፡ ኵሎ፡ አፍራሲሁ፡ ቅድሜሆሙ፡ ለደቂቀ፡ እስራኤል፡ እለ፡ ውስተ፡ ቤጤልዋ።
7 ወፈነወ፡ ሰብአ፡ ዓይን፡ ይርአዩ፡ ፍሥሐታተ፡ አህጉሪሆሙ፡ ወይዑዱ፡ አንቅዕተ፡ ማያቲሆሙ፡ ይቅድምዎ፡ በጺሐ፡ ህየ፡ ወይትዐየንዎሙ፡ ዕደው፡ መስተቃትላን፡ ወውእቱሰ፡ ሮጸ፡ ምስለ፡ ሕዝቡ።
8 ወመጽኡ፡ ኀቤሁ፡ ኵሉ፡ መላእክተ፡ ደቂቀ፡ ኤሳው፡ ወኵሎሙ፡ መሳፍንተ፡ ቤተ፡ ሞዓብ፡ ወመኳንንተ፡ ጰራልያ።
9 ወይቤልዎ፡ ስማዕ፡ እግዚኦ፡ ቃለነ፡ ከመ፡ ኢይኩን፡ ሙስና፡ ላዕለ፡ ሕዝብከ።
10 እስመ፡ ዝንቱ፡ ሕዝበ፡ ደቂቀ፡ እስራኤል፡ አኮ፡ በኵናቶ፡ ዘይትዌከሉ፡ አላ፡ በላዕለ፡ አጽዋኒሆሙ፡ ወአድባሪሆሙ፡ እለ፡ ይነብሩ፡ ውስቴቶሙ፡ እስመ፡ አልቦ፡ ምዕራግ፡ ለአድባሪሆሙ።
11 ወይእዜኒ፡ እግዚኦ፡ ኢትትቃተሎሙ፡ በሕገ፡ ቀትል፡ ወአልቦ፡ ዘይመውት፡ እምነ፡ ሰብእከ፡ ወኢአሐዱ፡ ብእሲ።
12 ወባሕቱ፡ ጽንሖሙ፡ ምስለ፡ ተዓይኒከ፡ ወይዕቀቡ፡ ኵሎ፡ ዕደወ፡ ኃይልከ፡ ወደቂቅከ፡ ኵሎ፡ አንቅዕተ፡ ማያቲሆሙ፡ ዘይነቅዕ፡ እምጕንደ፡ ደብር፡ ያጸንዑ።
13 እስመ፡ እምህየ፡ ይቀድሑ፡ ኵሎሙ፡ እለ፡ ይነብሩ፡ ቤጤልዋ፡ ወይቀትሎሙ፡ ጽምዕ፡ ወያገብኡ፡ ድኅሬሆሙ፡ ወንሕነኒ፡ ወሕዝብነኒ፡ ነዓርግ፡ ኀበ፡ ቅሩበ፡ አጽዋኒሆሙ፡ ወአርእስተ፡ አድባሪሆሙ፡ ወነኃድር፡ ህየ፡ ወነዓቅቦሙ፡ ከመ፡ አልቦ፡ ዘይወጽእ፡ እምኔሆሙ፡ ወኢአሐዱ፡ ብእሲ፡ እምውስተ፡ አህጉሪሆሙ።
14 ወይጠፍኡ፡ በረሀብ፡ እሙንቱኒ፡ ወአንስቲያሆሙኒ፡ ወውሉዶሙኒ፡ ዘእንበለ፡ ይትቃተልዎሙ፡ ወይትነጽሑ፡ በውስተ፡ ፍና፡ አህጉሪሆሙ።
15 ወትትቤቀሎሙ፡ እኩየ፡ በቀለ፡ እስመ፡ አዕረሩ፡ ወኢተቀበሉከ፡ በሰላም።
16 ወአደመ፡ ቃሎሙ፡ በቅድሜሁ፡ ለሆሎፎርኒስ፡ ወቅድመ፡ ኵሉ፡ ሰብኡ፡ ወአዘዘ፡ ይግበሩ፡ በከመ፡ ይገብሩ።
17 ወግዕዙ፡ ተዓይኒሆሙ፡ ለደቂቀ፡ አሞን፡ ወምስሌሆሙ፡ ፶፻፡ ደቂቀ፡ አሶር፡ ወኃደሩ፡ ውስተ፡ ዓውሎኒ፡ ወቀደሙ፡ አጽንኦ፡ ማያቲሆሙ፡ ወአንቅዕቲሆሙ፡ ለደቂቀ፡ እስራኤል።
18 ወዐርጉ፡ ደቂቀ፡ ኤሳው፡ ወደቂቀ፡ አሞን፡ ወኃደሩ፡ ውስተ፡ አድባር፡ አንፃረ፡ ዶታይም፡ ወፈነዉ፡ እምውስቴቶሙ፡ እለ፡ መንገለ፡ ዓረብ፡ ዘአዜብ፡ ወኤጴልዮጤን፡ ዘአንፃረ፡ ኤጴራቤል፡ ዘገቦ፡ ኩሲ፡ በኀበ፡ ፈለገ፡ ምኩር፡ ወዘተርፈ፡ ሠራዊቶሙ፡ ለፋርስ፡ ተዓየኑ፡ ውስተ፡ ገዳም፡ ወከደኑ፡ ውስተ፡ ኵሉ፡ ገጸ፡ ምድር፡ ወእምዝ፡ ዓግአዙ፡ ተአይኒሆሙ፡ ወንዋዮሙኒ፡ ብዙኃ፡ ሰብእ፡ ጥቀ፡ ዘአልቦ፡ ዘይበዝኆሙ።
19 ወጸርሑ፡ ደቂቀ፡ እስራኤል፡ ኀበ፡ እግዚአብሔር፡ አምላኮሙ፡ እስመ፡ አንበዘት፡ ነፍሶሙ፡ እስመ፡ አገትዎሙ፡ ኵሉ፡ ፀሮሙ፡ ወአልቦሙ፡ ሙፃእ፡ እምነ፡ ማዕከሎሙ።
20 ወነበሩ፡ ደቂቀ፡ አሶር፡ ምስለ፡ ኵሉ፡ ተዓይኒሆሙ፡ የዓግትዎሙ፡ አጋሮሙኒ፡ ወሰብአ፡ ሠረገላትኒ፡ ወሰብአ፡ አፍራስኒ፡ ሠሉሰ፡ ወረቡዓ፡ መዋዕለ፡ ወኃልቀ፡ ኵሉ፡ ሙዳየ፡ ማዮሙ፡ ለእለ፡ ይነብሩ፡ ቤጤልዋ።
21 ወአልቦ፡ ዘይሰትዩ፡ ማይ፡ ወዘያረውዮሙ፡ ወበመስፈርት፡ ገብኡ፡ ይስተዩ።
22 ወሐሙ፡ ደቂቆሙ፡ ወአንስቲያሆሙ፡ ወወራዙቶሙ፡ ወሐልቁ፡ በጽምዕ፡ ወይወድቁ፡ ውስተ፡ መርህበ፡ ሀገር፡ ወውስተ፡ ፍናወ፡ አናቅጽ፡ ወአልቦሙ፡ ኃይል፡ እንከ።
23 ወተጋብኡ፡ ኵሉ፡ ሕዝብ፡ ላዕለ፡ ዖዝያን፡ ወመላእክተ፡ ሀገርኒ፡ ወወራዙትኒ፡ ወአንስትኒ፡ ወደቂቅኒ፡ ወጸርሑ፡ በዓቢይ፡ ቃል፡ ወይቤሉ፡ በቅድመ፡ ኵሉ፡ ሊቃውንቲሆሙ።
24 ይፍታሕ፡ እግዚአብሔር፡ ማዕከሌነ፡ ወማዕከሌክሙ፡ ከመ፡ ትግበሩ፡ ላዕሌነ፡ ዓቢየ፡ ግፍዐ፡ ዘኢተናገርክሙ፡ ዳህነ፡ በሰላም፡ ምስለ፡ ደቂቀ፡ አሶር።
25 ወይእዜሰ፡ ኃጣእነ፡ ዘይረድአነ፡ ሦጠነ፡ እግዚአብሔር፡ ውስተ፡ እዴሆሙ፡ ከመ፡ ንደቅ፡ ቅድሜሆሙ፡ በጽምዕ፡ በዓቢይ፡ ኃጕል።
26 ወይእዜኒ፡ ግርሩ፡ ሎሙ፡ ወአግብኡ፡ ኵሎ፡ አህጉሪክሙ፡ ወይበርብሩ፡ ሕዝበ፡ ሆሎፎርኒስ፡ ወኵሉ፡ ኃይሉ።
27 እስመ፡ ይኄይሰነ፡ ይበርብሩነ፡ ወንትቀነይ፡ ሎሙ፡ ወትሕየው፡ ነፍስነ፡ ወኢንርአይ፡ ሞተ፡ ደቂቅነ፡ በአዕይንቲነ፡ እስመ፡ ኀልቀት፡ ነፍሶሙ፡ ለአንስቲያነ፡ ወደቂቅነ።
28 ወናሁ፡ ናሰምዕ፡ ለክሙ፡ ሰማየ፡ ወምድረ፡ ወአምላከ፡ አበዊነ፡ ዘውእቱ፡ ይኴንነነ፡ በከመ፡ ኃጣውኢነ፡ ወበከመ፡ ኃጣውኢሆሙ፡ ለአበዊነ፡ ከመ፡ ኢትግበሩ፡ ዘንተ፡ ነገረ፡ ዮም፡ በዛቲ፡ ዕለት።
29 ወኮነ፡ ብካይ፡ ዓቢይ፡ በማዕከለ፡ ማኅበሮሙ፡ ወበከዩ፡ ኵሎሙ፡ ኅቡረ፡ ወጸርሑ፡ በዓቢይ፡ ቃል፡ ኀበ፡ እግዚአብሔር።
30 ወይቤሎሙ፡ ኦዝያስ፡ ተአመኑ፡ አኃዊነ፡ ወተዓገሡ፡ ዓዲ፡ ሐሙሰ፡ መዋዕለ፡ እስከ፡ ይመይጥ፡ እግዚአብሔር፡ አምላክነ፡ ምሕረቶ፡ መንገሌነ፡ እስመ፡ አኮ፡ ለዝሉፉ፡ ዘይገድፈነ።
31 ወእምከመ፡ ኃለፉ፡ እማንቱ፡ መዋዕል፡ ወኢመጽአ፡ ረድኤቱ፡ ላዕሌነ፡ ንገብር፡ ዘከመ፡ ትቤሉ።
32 ወዘረዎሙ፡ ለሕዝብ፡ ውስተ፡ ትዕይንቶሙ፡ ወውስተ፡ ማኅፈዲሆሙ፡ ወውስተ፡ ዐረፍተ፡ ሀገሮሙ፡ ወሖሩ፡ ወፈነዉ፡ አንስቲያሆሙ፡ ወሕሙማን፡ እሙንቱ፡ ጥቀ፡ ውስተ፡ ሀገር።
=== chapter 8 ===
[Chapter 8]
1 ወሰምዓት፡ በኪያሆን፡ መዋዕል፡ ዮዲት፡ ወለተ፡ ሜራሪ፡ ወልደ፡ ሆክስ፡ ወልደ፡ ዮሴፍ፡ ወልደ፡ ዖዝያን፡ ወልደ፡ ሕልቅያ፡ ወልድ፡ አናንዩ፡ ወልደ፡ ጋዲዮን፡ ወልደ፡ ራዎይል፡ ወልደ፡ ሐቂቶ፡ ወልደ፡ ኤልያስ፡ ወልደ፡ ኤልያብ፡ ወልደ፡ ናትናኤል፡ ወልደ፡ ሰላምያል፡ ወልደ፡ ሰለስዳይ፡ ወልደ፡ እሥራኤል።
2 ወምታሰ፡ ምናሴ፡ ዘእምነገዳ፡ ወእምሀገራ፡ ወሞተ፡ በመዋዕለ፡ ማዕረረ፡ ሰገም።
3 እስመ፡ ወዐለ፡ ገዳመ፡ ኀበ፡ እለ፡ የአሥሩ፡ ከላስስተ፡ ወመጽአ፡ ላዕለ፡ ርእሱ፡ ሐሩር፡ ወአድወዮ፡ ወሰከበ፡ ወሞተ፡ ወቤጤልዋ፡ ሀገሩ፡ ወቀበርዎ፡ ምስለ፡ አበዊሁ፡ ውስተ፡ አፀዶሙ፡ ዶታይም፡ ወበላሞን።
4 ወነበረት፡ ዮዲት፡ መበለተ፡ ውስተ፡ ቤታ፡ ሠሉሰ፡ ወረቡዐ፡ ዕለተ።
5 ወገብረት፡ ላቲ፡ ዐሪሠ፡ ውስተ፡ ናሕሰ፡ ቤታ፡ ወቀነተት፡ ሠቀ፡ ውስተ፡ ሐቌሃ፡ ወለብሰት፡ አልባሰ፡ መበለታ።
6 ወትጸውም፡ ኵሎ፡ መዋዕለ፡ መበለታ፡ እንበለ፡ እንተ፡ ቅድመ፡ ሰንበት፡ ወሰንበተኒ፡ ወእንተ፡ ቅድመ፡ ሠርቅ፡ ወሠርቀኒ፡ ወበዓላተኒ፡ ወትፍሥሕተ፡ ቤተ፡ እሥራኤል።
7 ወሠናይት፡ ይእቲ፡ ራዕያ፡ ወላህያ፡ ገጻ፡ ጥቀ፡ ፈድፋደ፡ ወኀደገ፡ ላቲ፡ ምናሴ፡ ምታ፡ ወርቀ፡ ወብሩረ፡ ደቀ፡ ወአዋልደ፡ እንስሳ፡ ወገራውሀ፡ ወነበረት፡ ላዕሌሆሙ።
8 ወአልቦ፡ ዘያወጽእ፡ ላዕሌሃ፡ ቃለ፡ ሕሱመ፡ እስመ፡ ትፈርሆ፡ ለእግዚአብሔር፡ ፈድፋደ።
9 ወሰምዐት፡ ዘይቤሉ፡ ሕዝብ፡ ላዕለ፡ መልአኮሙ፡ እኩየ፡ እስመ፡ አንበዘት፡ ነፍሶሙ፡ በእንተ፡ ዘኀልቀ፡ ማይ፡ ወሰምዐት፡ ዮዲት፡ ኵሎ፡ ቃለ፡ ዘይቤሎሙ፡ ዖዝያን፡ ዘከመ፡ መሐለ፡ ሎሙ፡ ከመ፡ እምድኅረ፡ ሐሙስ፡ መዋዕል፡ ያገብኡ፡ ሀገሮሙ፡ ለፋርስ።
10 ወፈነወት፡ ወጸውዓታ፡ ለሐፃኒታ፡ እንተ፡ ተዐቅብ፡ ኵሎ፡ ንዋያ፡ ወጸውዓቶሙ፡ ለክብሪን፡ ወለከርሚን፡ ወለሊቃውንተ፡ ሀገራ።
11 ወመጽኡ፡ ኀቤሃ፡ ወትቤሎሙ፡ ስምዑኒ፡ መኳንንቲሆሙ፡ ለእለ፡ ይነብሩ፡ ቤጤልዋ፡ እስመ፡ ኢኮነ፡ ጽድቀ፡ ቃልክሙ፡ ዘነበብክሙ፡ በቅድመ፡ ሕዝብ፡ ዮም፡ ወአቀምክሙ፡ በዝንቱ፡ ዘነበብክሙ፡ መሐላ፡ ማዕከሌክሙ፡ ወማዕከለ፡ እግዚአብሔር፡ ከመ፡ ታግብኡ፡ ሀገረክሙ፡ ለፀርክሙ፡ ለእመ፡ ኢረዳክሙ፡ እግዚአብሔር፡ በእላንቱ፡ ሐሙስ፡ መዋዕል።
12 ወይእዜኒ፡ ምንተኑ፡ አንትሙ፡ እለ፡ ታሜክርዎ፡ ለእግዚአብሔር፡ ዮም፡ በዛቲ፡ ዕለት፡ ወቆምክሙ፡ ማእከለ፡ እግዚአብሔር፡ ወማዕከለ፡ ደቀቀ፡ እጓለ፡ እመሕያው።
13 ወይእዜኒ፡ የሐትት፡ እግዚአብሔር፡ ለሊሁ፡ ወአንትሙሰ፡ አልቦ፡ ዘተአምሩ፡ ለዝሉፉ።
14 ዘእመቀ፡ ልቡ፡ ለእጓለ፡ እመሕያው፡ ኢተአምሩ፡ ወምክረ፡ ሕሊናሁ፡ ኢትሬእዩ፡ እፎ፡ ለእግዚአብሔር፡ ትትኃሠሥዎ፡ ዘውእቱ፡ ገብረ፡ ዘንተ፡ ኵሎ፡ ወልበ፡ ዚአሁ፡ ትፈቅዱ፡ ታእምሩ፡ ወምክረ፡ ዚአሁ፡ ተኃሥሡ፡ ትርከቡ፡ ሐሰ፡ ለክሙ፡ አኃውየ፡ ኢታምዕዕዎ፡ ለእግዚአብሔር፡ አምላክነ።
15 እመኒ፡ ፈቀደ፡ ይርድእነ፡ እስከ፡ እማንቱ፡ ሐሙስ፡ መዋዕል፡ ሥሉጥ፡ ውእቱ፡ በዘፈቀደ፡ ያድኅነነ፡ ወእመኒ፡ በኵሉ፡ መዋዕሊነ፡ ወእመኒ፡ ይሤርወነ፡ በቅድመ፡ ፀርነ።
16 ወአንትሙሂ፡ ዳዕሙ፡ ኢታመክርዎ፡ ለእግዚአብሔር፡ አምላክክሙ፡ እስመ፡ አኮ፡ እግዚአብሔር፡ ከመ፡ ሰብእ፡ ዘይትሜአክ፡ ወኢኮነ፡ ከመ፡ ወልደ፡ እጓለ፡ እመሕያው፡ ዘይትቄየም።
17 ወባሕቱ፡ ጽንሑ፡ መድኃኒተ፡ ዘእምኀቤሁ፡ ወጸውዕዎ፡ ይርድአነ፡ ወይስምዓነ፡ ቃለነ፡ እመ፡ ፈቀደ፡ ያድኅነነ።
18 እስመ፡ ኢተንሥአ፡ በመዋዕሊነ፡ ወአልቦ፡ ዮም፡ ኢሕዝብ፡ ወኢነገድ፡ ወኢብሔር፡ ወኢሀገር፡ እምኔነ፡ እለ፡ ይሰግዱ፡ ለአማልክት፡ ግብረ፡ እደ፡ ሰብእ፡ በከመ፡ ኮነ፡ በመዋዕለ፡ ቀደምት።
19 ወበእንቲአሁ፡ ኮኑ፡ ለኵናት፡ ወለተበርብሮ፡ አበዊነ፡ ወወድቁ፡ ዓቢየ፡ ድቀተ፡ እምቅድመ፡ ፀሮሙ።
20 ወንሕነሰ፡ አልብነ፡ ባዕድ፡ አምላክ፡ እንበሌሁ፡ ወቦቱ፡ ንትአመን፡ ከመ፡ ኢይትዐወረነ፡ አዝማዲነ።
21 እስመ፡ ከመ፡ ነሥአነ፡ ከማሁ፡ ገብረ፡ ይሁዳ፡ ወተበርበረ፡ ኵሉ፡ ቅድሳቲነ፡ ወይትኃሠሦሙ፡ በእንተ፡ ርኵሶሙ፡ እምነ፡ አፉሆሙ።
22 ወተቀትሉ፡ አኃዊነ፡ ወተፄወወ፡ ብሔርነ፡ ወማሰነ፡ ርስትነ፡ ዘይገብእ፡ ውስተ፡ ርስትነ፡ ወውስተ፡ አሕዛብ፡ ኀበ፡ ተቀነይነ፡ ህየ፡ ንከውን፡ ዕቁፋነ፡ ወግዩራነ፡ በቅድመ፡ እለ፡ ያጠርዩነ።
23 እንበለ፡ አኰቴት፡ ይከውን፡ ቅኔነ፡ እስመ፡ ትሕትናነ፡ ርእየ፡ እግዚአብሔር፡ አምላክነ።
24 ወይእዜኒ፡ አኃዊነ፡ ንግርዎ፡ ለቢጽነ፡ እስመ፡ ኪያነ፡ ያጸምዑ፡ ወኀቤነ፡ ተሰቅለ፡ ነፍሶሙ፡ ወቤተ፡ መቅደስኒ፡ ወምሥዋዕኒ፡ ብነ፡ ያሰምክ።
25 ወበዝንቱ፡ ኵሉ፡ ናእኵቶ፡ ለእግዚአብሔር፡ ዘያሜክረነ፡ በከመ፡ አበዊነ።
26 ተዘከሩ፡ ኵሎ፡ ዘገብረ፡ ምስለ፡ አብርሃም፡ ወመጠነ፡ አመከሮ፡ ለይስሐቅ፡ ወበከመ፡ ኮነ፡ ለያዕቆብ፡ በመስጴጦምያ፡ ዘሶርያ፡ እንዘ፡ ይርኢ፡ አባግዒሁ፡ ለላባ፡ እኁሃ፡ ለእሙ።
27 እስመ፡ አኮ፡ አመ፡ አምከሮሙ፡ ለእልክቱ፡ ፈተነ፡ ልቦሙ፡ ወለነኒ፡ አኮ፡ ዘገፍዓነ፡ አላ፡ ከመ፡ ይምሐሮሙ፡ ለእለ፡ ይቀርብዎ፡ ይቀሥፎሙ፡ እግዚአብሔር።
28 ወይቤላ፡ ዖዝያን፡ ኵሎ፡ ዘተናገርኪ፡ በሠናይ፡ ልብ፡ ነበብኪ፡ ወአልቦ፡ ዘይትቃወሞ፡ ለቃልኪ።
29 እስመ፡ ኢኮነ፡ እምዮም፡ ዘተሰምዐ፡ ጥበብኪ፡ አላ፡ እምነ፡ ቀዳሚ፡ መዋዕልኪ፡ አእመከ፡ ኵሉ፡ ሰብእ፡ ጥበበኪ፡ እስመ፡ ቡሩክ፡ ውእቱ፡ ፍጥረተ፡ ልብኪ።
30 ወባሕቱ፡ እስመ፡ ፈድፋደ፡ ጸምዑ፡ ሕዝብ፡ አገበሩነ፡ ንግበር፡ ዘከመ፡ ይቤሉነ፡ ወአምጽኡ፡ ላዕሌነ፡ መሐላ፡ ዘኢንክል፡ ክሒደ።
31 ወይእዜኒ፡ ጸልዩ፡ ለነ፡ እስመ፡ ብእሲት፡ ፈራሂተ፡ እግዚአብሔር፡ አንቲ፡ ወይፌኑ፡ እግዚአብሔር፡ ዝናመ፡ ወይምላዕ፡ ዓዘቃቲነ፡ ወኢንጸማዕ፡ እንከ።
32 ወትቤሎሙ፡ ዮዲት፡ ስምዑኒ፡ ወእገብር፡ ግብረ፡ ዘይትነገር፡ ለትውልደ፡ ትውልድ።
33 ወአንትሙሰ፡ ቁመ፡ ኀበ፡ አንቀጽ፡ በዛቲ፡ ሌሊት፡ ወእወጽእ፡ አነ፡ ምስለ፡ ቊልዔትየ፡ ወበእልክቱ፡ መዋዕል፡ እለ፡ ትብሉ፡ ያገብእ፡ ሀገረ፡ ለፀርነ፡ ይረድአነ፡ እግዚአብሔር፡ አምላከ፡ እስራኤል፡ በእዴየ።
34 ወአንትሙሰ፡ ኢትሕትቱኒ፡ ዘእገብር፡ እስመ፡ ኢይነግረክሙ፡ እንከ፡ የሐልቅ፡ ዘእገብር።
35 ወይቤልዋ፡ ዖዝያን፡ ወመላእክቲሆሙ፡ ሑሪ፡ በሰላም፡ ወእግዚአብሔር፡ ምስሌኪ፡ ወቅድሜኪ፡ ይትቤቀል፡ ፀረነ።
36 ወገብኡ፡ ወሖሩ፡ ኀበ፡ ቢጾሙ።
=== chapter 9 ===
[Chapter 9]
1 ወዮዲትሰ፡ ወድቀት፡ በገጻ፡ ውስተ፡ ምድር፡ ወወደየት፡ ሐመደ፡ ውስተ፡ ርእሳ፡ ወአርአየት፡ ሠቅ፡ ዘትለብስ፡ ወአብአት፡ ቊርባነ፡ ውስተ፡ ቤተ፡ እግዚአብሔር፡ በኢየሩሳሌም፡ ለዝሉፉ፡ ዕጣነ፡ ዘይእቲ፡ አሚር፡ ወጸርሐት፡ በዓቢይ፡ ቃል፡ ውእተ፡ አሚረ።
2 ወትቤ፡ ዮዲት፡ እግዚኦ፡ አምላከ፡ አቡየ፡ ስምዓኒ፡ ዘመጠውኮ፡ ኵናተ፡ ለስምዖን፡ ውስተ፡ እዴሁ፡ ለተበቅሎ፡ ፀር፡ እለ፡ ሰበሩ፡ ማኅፀነ፡ ወአርኰሱ፡ ድንግለ፡ ወሰለቡ፡ ወገመኑ፡ ማኅፀነ፡ በትዕይንት፡ አኮ፡ ከመዝ፡ ወበኵለሄ።
3 ወእሙንቱሰ፡ ገብሩ፡ እስመ፡ ወሀብኮሙ፡ ኃይለ፡ ለመላእክቲሆሙ፡ ውስተ፡ ቀትል፡ ወምስካብ፡ ተነጽፈ፡ በደመ፡ እለ፡ ተቀትሉ፡ አግብርት፡ ጽኑዓን፡ ወኃያላን፡ እመናብርቲሆሙ።
4 ወተፄወዋ፡ አንስቲያሆሙ፡ ወአዋልዲሆሙ፡ ወተካፈሉ፡ ምሕርካሆሙ፡ ለውሉድ፡ እለ፡ ፍቁራን፡ በኀቤከ፡ እለ፡ ቀንዑ፡ ቅንዓተከ፡ ወአስቈረሩ፡ ርኩሰ፡ ደሞሙ፡ ወጸውዑከ፡ ከመ፡ ትርድኦሙ፡ እግዚኦ፡ አምላከ፡ ዚአየ፡ ስምዓኒ፡ ሊተ፡ ለመበለት።
5 እስመ፡ አንተ፡ ገበርከ፡ ዘቅድመ፡ ዝንቱ፡ ወዘእልክቱ፡ ወዘእምድኅሬሁ፡ ወዘይእዜኒ፡ ወዘይመጽአኒ፡ አእመርከ፡ ወዘእልክቱ፡ ወዘእምድኅሬሁ፡ ወዘይእዜ፡ ወዘይመጽእኒ፡ ወኮነ፡ በዘአእመርከ።
6 ወርቱዕ፡ ምክርከ፡ ወይቤሉከ፡ ናሁ፡ መጻእከ፡ እስመ፡ ድልው፡ ኵሉ፡ ፍናዊከ፡ ወኵነኔከኒ፡ በዘአእመርከ፡ ኰነንከ።
7 እስመ፡ ናሁ፡ ፋርስ፡ በዝኁ፡ ምስለ፡ ኃይሎሙ፡ ወተለዐሉ፡ ዲበ፡ አፍራሲሆሙ፡ ወመስተፅዕናን፡ ተሐየሉ፡ በመዝራዕቶሙ፡ አጋርያን፡ ተአመኑ፡ በድርዖሙ፡ በኵናቶሙ፡ ወበቀስቶሙ፡ ወበሞጸፎሙ፡ ኢያእመሩከ፡ ከመ፡ አንተ፡ እግዚአብሔር፡ ዘትቀጠቅጥ፡ ፀባዒተ፡ ወእግዚእ፡ ስምከ።
8 ወአንተ፡ ነፃህኮሙ፡ ምስለ፡ ኃይሎሙ፡ በኃይልከ፡ ወአስጥሞሙ፡ በመዓትከ፡ ለጽንዖሙ፡ እስመ፡ መከሩ፡ ያርኵሱ፡ መቅደሰከ፡ ወያገምኑ፡ ደብተራ፡ ምዕራፈ፡ ስብሐተ፡ ስምከ፡ ወነሠቱ፡ በኃፂን፡ አቅርንተ፡ ምሥዋዒከ።
9 ወርኢ፡ ትዕቢቶሙ፡ ወፈኑ፡ መዓተከ፡ ውስተ፡ ርእሶሙ፡ ወሀብ፡ ኃይለ፡ በእዴየ፡ ሊተ፡ ለመበለት።
10 በዘሐለይኩ፡ እቅትል፡ ገብረ፡ ወመልአከ፡ ወቊልዔሁ፡ በአስፍጦ፡ ከናፍር፡ ወደምስስ፡ ቆሞሙ፡ በእደ፡ ብእሲት።
11 እስመ፡ ኢኮነ፡ ለብዙኃን፡ ጽንዕከ፡ ወአኮ፡ ለጽኑዓን፡ ኃይልከ፡ አትሕቶሙ፡ እግዚኦ፡ እስመ፡ ረዳኢሆሙ፡ አንተ፡ ለውኁዳን፡ ወረዳኢሆሙ፡ ለድኩማን፡ ወመድኅኖሙ፡ አንተ፡ ለኅጉላን፡ ወማሕየዊሆሙ፡ አንተ፡ ለቅቡፃን።
12 እወ፡ እግዚኦ፡ አምላከ፡ አቡየ፡ ወአምላከ፡ ርስቶሙ፡ ለእስራኤል፡ እግዚኦ፡ ሰማያት፡ ወምድር፡ ፈጣሬ፡ ማይ፡ ንጉሥ፡ አንተ፡ ለኵሉ፡ ተግባርከ፡ አንተ፡ ስማዕ፡ ጸሎትየ።
13 ወረስዩ፡ ለቃልየ፡ ከመ፡ ያስህቶሙ፡ ወያቊስሎሙ፡ ወይቅትሎሙ፡ ለፀረ፡ ሕግከ፡ ወቤተ፡ መቅደስከ፡ ወርእሳ፡ ለጽዮን፡ ወቤተ፡ ንብረቶሙ፡ ለደቂቅከ፡ እለ፡ መከሩ፡ ዕፁባተ።
14 ወግበር፡ ለኵሉ፡ ሕዝብከ፡ ከመ፡ ያእምሩ፡ ወይጠይቁ፡ ከመ፡ አንተ፡ ውእቱ፡ እግዚአብሔር፡ እግዚአ፡ ኵሉ፡ ወአልቦ፡ ባዕድ፡ ዘያፀንዖሙ፡ ለዘመደ፡ እሥራኤል፡ ዘእንበሌከ።
=== chapter 10 ===
[Chapter 10]
1 ወእምዝ፡ ሶበ፡ አኅለቀት፡ ጸሪሐ፡ ኀበ፡ እግዚአብሔር፡ አምላከ፡ እሥራኤል።
2 ወፈጺማ፡ ዘንተ፡ ኵሎ፡ ነገረ፡ ተንሥአት፡ እምኀበ፡ ወድቀት፡ ወጸውኦታ፡ ለወለታ፡ ወወረደት፡ ውስተ፡ ቤታ፡ ኀበ፡ ትነብር፡ በመዋዕለ፡ ሰንበታት፡ ወአመ፡ በዓላት።
3 ወአሰሰለት፡ ሠቀ፡ ዘትለብስ፡ ወለብሰት፡ ልብሰ፡ መበለታ፡ ወተሐፅበት፡ ሥጋሃ፡ በማይ፡ ወተቀብዓት፡ እፍረተ፡ ወተነፍቀት፡ ስእርተ፡ ርዕሳ፡ ወተሠርገወት፡ ባዝግናሃ፡ ወእምዝ፡ ለብሰት፡ አልባሰ፡ ትፍሥሕታ፡ ዘትለብስ፡ አመ፡ ሕያው፡ ምታ፡ ምናሴ።
4 ወተሰእነት፡ አሣዕኒሃ፡ ወተሠርገወት፡ ወአውቃፈ፡ ወኅልቀታተ፡ ወአእኑገ፡ ወኵሎ፡ ሠርጓ፡ ወተሠነየት፡ ጥቀ፡ እስከ፡ ታስሕት፡ ዓይኖሙ፡ ለኵሉ፡ ዕደው፡ እለ፡ ይሬእይዋ።
5 ወወሀበታ፡ ለወለታ፡ ትፁር፡ ግብነተ፡ ወይን፡ ወግምዔ፡ ቅብዕ፡ ወመልዓት፡ ዕፍነታ፡ ጥሕነ፡ ወበለሰ፡ ወኅብስተ፡ ስንዳሌ፡ ወአስነቀት፡ ኵሎ፡ ንዋያ፡ ወአፆረታ።
6 ወሖረት፡ መንገለ፡ ገጸ፡ ቤጤልዋ፡ ወረከበቶሙ፡ ይቀውሙ፡ ህየ፡ ለዖዝያን፡ ወለሊቃውንተ፡ ሀገር፡ ክብራም፡ ወከርሜን።
7 ወሶበ፡ ይሬእይዋ፡ ከመ፡ ነኪር፡ ተወለጠ፡ ገጻ፡ ወትትዓፀፍ፡ አልባሲሃ፡ ወብዙኀተ፡ ደሙ፡ እምነ፡ ስና፡ ፈድፋደ፡ ጥቀ።
8 ወይቤልዋ፡ የሀብኪ፡ አምላከ፡ እስራኤል፡ ሞገሰ፡ ትግበሪ፡ ዘሐለይኪ፡ ለጽንዖሙ፡ ለደቂቀ፡ እስራኤል፡ ወለኢየሩሳሌም።
9 ወትቤሎሙ፡ አዝዙ፡ ሊተ፡ ዘያርኅወኒ፡ አንቀፀ፡ ሀገር፡ ወእጻእ፡ እግበር፡ ዘንተ፡ ቃለ፡ ዘተናገርኩ፡ ምስሌክሙ፡ ወአዘዝዎሙ፡ ለመሐዛት፡ ያርኅውዋ፡ ዘከመ፡ ትቤ።
10 ወገበሩ፡ ከማሁ፡ ወወፅአት፡ ዮዲት፡ ወቁልዔታ፡ ምስሌሃ፡ ወይኔጽርዋ፡ ሰብአ፡ ሀገር፡ እስከ፡ ወረደተ፡ እምደብር፡ ወእስከ፡ ኃለፈት፡ እምነ፡ ዓውሎኒ፡ ወኢርእይዋ፡ እንከ።
11 ወሖረት፡ እንተ፡ ዓውሎኒ፡ ርቱዓ፡ ወረከብዋ፡ መዓቅበ፡ ፋርስ።
12 ወአኃዝዋ፡ ወሐተትዋ፡ ወይቤልዋ፡ መኑ፡ አንቲ፡ ወአይቴ፡ ተሐውሪ፡ ወእምአይቴ፡ መጻእኪ፡ ወትቤሎሙ፡ ወለቶሙ፡ አነ፡ ለዕብራውያን፡ ወተኃጣዕኩ፡ እምኔሆሙ፡ ሶበ፡ ፈቀዱ፡ ያግብኡ፡ ለክሙ፡ ሀገሮሙ።
13 አነ፡ አቅደምኩ፡ መጺአ፡ ኀቤሁ፡ ለሆሎፎርኒስ፡ መልአከ፡ ኃይልክሙ፡ ከመ፡ እንግሮ፡ ቃለ፡ ጽድቅ፡ ወአርእዮ፡ ፍኖተ፡ እንተ፡ ባቲ፡ ተሐውሩ፡ ወታስተጋብኡ፡ ኵሎ፡ ደወሎሙ፡ ወአልቦ፡ ዘይቈስል፡ እምነ፡ ሰብእክሙ፡ ወኢአሐቲ፡ ነፍስ።
14 ወሶበ፡ ሰምዑ፡ እሙንቱ፡ ዕደው፡ ቃላ፡ ወርእይዋ፡ ገጻ፡ ወመድምም፡ ውእቱ፡ ስና፡ ፈድፋደ፡ በቅድሜሆሙ።
15 ወይቤልዋ፡ አሕየውኪ፡ ነፍሰኪ፡ ዘአፍጠንኪ፡ ወሪደ፡ ኀበ፡ እግዚእነ፡ ወይእዜኒ፡ ሑሪ፡ ኀበ፡ ደብተራሁ፡ ወንፌኑ፡ ምስሌኪ፡ እምኔኒ፡ እለ፡ ያበጽሑኪ፡ ኀቤሁ።
16 ወሶበ፡ ቆምኪ፡ ቅድሜሁ፡ ኢይፍራህ፡ ልብኪ፡ ዳዕሙ፡ ዜንዊዮ፡ ዘንተ፡ ነገረኪ፡ ወያሤኒ፡ ላዕሌኪ።
17 ወኀረዩ፡ እምኔሆሙ፡ ምእተ፡ ብእሴ፡ ወነድእዋ፡ ምስለ፡ ወለታ፡ ወአብጽሕዋ፡ ኀበ፡ ሆሎፎርኒስ፡ እስከ፡ ያየድእዎ፡ በእንቲአሃ።
18 ወአንከሩ፡ ስና፡ ወተደሙ፡ እምደቂቀ፡ እስራኤል፡ በእንቲአሃ፡ ወተበሀሉ፡ በበይናቲሆሙ፡ መኑ፡ ዘይሜንኖሙ፡ ለእሉ፡ ሕዝብ፡ እንዘ፡ በውስቴቶሙ፡ ዘከመዛ፡ አንስት፡ እስመ፡ ኢኮነ፡ ሠናየ፡ ያትርፉ፡ እምኔሆሙ፡ አሐደ፡ ብእሴ፡ ወእለሰ፡ ይክሉ፡ ኀዲገ፡ ተጠቢቦሙ፡ እምነ፡ ኵሉ፡ ምድር።
19 ወወፅኡ፡ እለ፡ ይነብሩ፡ ኀበ፡ ሆሎፎርኒስ፡ ወኵሉ፡ ደቂቁ፡ ወአብእዋ፡ ውስተ፡ ደብተራሁ።
20 ወሆሎፎርኒስ፡ ይነውም፡ ውስተ፡ ምስካቡ፡ ፈላሲ፡ ዘርጉፍ፡ በልብሰ፡ ሜላት፡ ዘወርቅ፡ ወመረግድ፡ ወእንቊ፡ ዘብዙኅ፡ ሤጡ።
21 ወነገርዎ፡ በእንቲአሃ፡ ወወፅአ፡ ገብጋቦ፡ ወመሐትወ፡ ወርቅ፡ የሐትዉ፡ ቅድሜሁ።
22 ወሶበ፡ መጽአት፡ ዮዲት፡ ኀቤሁ፡ ወይቀውሙ፡ ደቁ፡ ወተደሙ፡ ኵሎሙ፡ እምስነ፡ ላህየ፡ ገጻ፡ ወወድቀት፡ በገጻ፡ ውስተ፡ ምድር፡ ወሰገደት፡ ሎቱ፡ ወአንሥእዋ፡ አግብርቲሁ።
=== chapter 11 ===
[Chapter 11]
1 ወይቤላ፡ ሆሎፎርኒስ፡ ተአመኒ፡ ብእሲቶ፡ ወኢይፍራህኪ፡ ልብኪ፡ እስመ፡ አንሰ፡ ኢየሐስም፡ ላእለ፡ ሰብእ፡ ዘያገብእ፡ ርእሶ፡ ከመ፡ ይትቀነይ፡ ለናቡከደነፆር፡ ንጉሠ፡ ኵሉ፡ ዓለም።
2 ወይእዜኒ፡ እሉ፡ ሕዝብኪ፡ እለ፡ ይነብሩ፡ ውስተ፡ አድባር፡ ሶበ፡ አኮ፡ ዘዓለዉኒ፡ እምኢያንሣእኩ፡ ኵናትየ፡ ላዕሌሆሙ፡ አላ፡ እሙንቱ፡ ለሊሆሙ፡ ገብርዎ፡ ለዝንቱ።
3 ወይእዜኒ፡ ንግርኒ፡ በበይነ፡ ምንት፡ ተኃጣእኪ፡ እምኔሆሙ፡ ወመጻእኪ፡ ኀቤነ፡ ወባሕቱ፡ ለሕይወትኪ፡ መጻእኪ፡ ተአመኒ፡ ከመ፡ በዛቲ፡ ሌሊት፡ ተሐይዊ፡ ለዝሉፉ።
4 ወእመቦ፡ ዘያሐሥም፡ ላዕሌኪ፡ ዘእንበለ፡ ሠናይ፡ ዘንገብር፡ ላዕሌኪ፡ ዘእንበለ፡ ሠናይ፡ ዘንገብር፡ ላዕሌኪ፡ በከመ፡ ንገብር፡ ለአግብርተ፡ እግዚእነ፡ ንጉሥ፡ ናቡከደነፆር።
5 ወትቤሎ፡ ዮዲት፡ ተወከፍ፡ ቃለ፡ አመትከ፡ ወትነግረከ፡ አመትከ፡ በቅድሜከ፡ ወኢይነግሮ፡ ሐሰተ፡ ለእግዚእየ፡ በዛቲ፡ ሌሊት።
6 ወለእመ፡ ተለውከ፡ ቃለ፡ አመትከ፡ ፍጹመ፡ ግብረ፡ ይገብር፡ እግዚአብሔር፡ ወአልቦ፡ ዘይስሕት፡ እምዘ፡ ሐለይከ፡ እግዚእየ።
7 ወሕያው፡ ውእቱ፡ ናቡከደነፆር፡ በኵሉ፡ ምድር፡ ወሕያው፡ ኃይሉ፡ ዘፈነወከ፡ ከመ፡ ታስተራትዕ፡ ኵሎ፡ ከመ፡ አኮ፡ ሰብእ፡ ባሕቲቱ፡ ዘይትቀነይ፡ ሎቱ፡ በዕብሬትከ፡ አላ፡ አራዊተ፡ ገዳምኒ፡ ወእንስሳ፡ ወአዕዋፈ፡ ሰማይኒ፡ በእንተ፡ ኃይልከ፡ ይትቀነዩ፡ ወየሐይዉ፡ ለናቡከደነፆር፡ ወኵሉ፡ ቤቱ።
8 እስመ፡ ሰማዕነ፡ ግብረከ፡ ወተሰምዓ፡ በኵሉ፡ ምድር፡ ከመ፡ አንተ፡ ባሕቲትከ፡ ኄር፡ በኵሉ፡ መንግሥቱ፡ ወጽኑዕ፡ አንተ፡ በኵሉ፡ ግብርከ፡ ወመድምም፡ አንተ፡ በኵሉ፡ ፀብዕከ።
9 ወይእዜኒ፡ ቃለ፡ ዘይቤለክሙ፡ አኪዮር፡ ዘይቤ፡ በውስተ፡ ትዕይንትክሙ፡ ሰማዕነ፡ ዘይቤ፡ ወሰብአ፡ ቤጤልዋ፡ አሕየውዎ፡ ወዜነዎሙ፡ ኵሎ፡ ዘይቤለክሙ።
10 ወይእዜኒ፡ እግዚኦ፡ ኢታስትት፡ ቃሎ፡ አላ፡ ሢሞ፡ ውስተ፡ ልብከ፡ እስመ፡ አማን፡ ከማሁ፡ ውእቱ፡ እስመ፡ ኢይክልዎሙ፡ ለሕዝብ፡ ተበቅሎቶሙ፡ ወኢትክል፡ ኵናት፡ ቀቲሎቶሙ፡ እመ፡ ኢአበሱ፡ ለአምላኮሙ።
11 ወይእዜኒ፡ ከመ፡ ኢይኩን፡ እግዚእየ፡ መስትተ፡ ወዘኢያበቊዕ፡ በዘይበጽሖሙ፡ ሞቶሙ፡ ቅድመ፡ ገጽከ፡ ወበዝ፡ ኃጢአቶ፡ እንተ፡ ባቲ፡ አምዕዕዎ፡ ለአምላኮሙ፡ በግብረ፡ ጌጋዮሙ።
12 እስመ፡ ሐልቀ፡ እክሎሙ፡ ወአፅዋረ፡ ማዮሙ፡ ወገብኡ፡ ይብልዑ፡ እንስሳሆሙ፡ ወኵሎ፡ ዘንተ፡ ዘከልኦሙ፡ አምላኮሙ፡ በውስተ፡ ኦሪቶሙ፡ ከመ፡ ኢይብልዑ፡ አልጸቁ፡ ኪያሁ፡ ይብልዑ።
13 ወዘቀዳምያተ፡ እክሎሙ፡ ወአሥራተ፡ ወይኖሙኒ፡ ወቅብዖሙኒ፡ ዘዓቀቡ፡ ዝኰ፡ ወዘቀደሱ፡ ለካህናት፡ እለ፡ ይቀውሙ፡ በኢየሩሳሌም፡ ቅድመ፡ ገጹ፡ ለአምላክነ፡ ሐለዩ፡ ኪያሁ፡ ወኢይከውኖሙ፡ ለገሢሥ፡ በእደዊሆሙ፡ ወኢለአሐዱ፡ እምውስተ፡ ሕዝብ።
14 ወለአኩ፡ ውስተ፡ ኢየሩሳሌም፡ እስመ፡ እለኒ፡ ህየ፡ ሀለዉ፡ ከመዝ፡ ይግበሩ፡ ወእለኒ፡ ነሥኡ፡ ዘኅድገት፡ እምኀበ፡ ሊቃውንት፡ ወመሳፍንት።
15 እምከመ፡ ነገርዎሙ፡ ወገብሩ፡ ከመዝ፡ ውእተ፡ አሚረ፡ ያገብኦሙ፡ ውስተ፡ እዴከ።
16 ወሶበ፡ አእመርኩ፡ ዘንተ፡ ኵሎ፡ አነ፡ አመትከ፡ ተኃጣእኩ፡ እምኔሆሙ፡ ወፈነወኒ፡ እግዚአብሔር፡ እግበር፡ ምስሌከ፡ ግብረ፡ ዘአመሰ፡ ምዕዎ፡ ሰብእ፡ ወኵሉ፡ ምድር፡ ይደነግፅ።
17 እስመ፡ አነ፡ አመትከ፡ ፈራሂተ፡ እግዚአብሔር፡ አነ፡ ወእጸመዶ፡ ለእግዚአብሔር፡ አምላከ፡ ሰማይ፡ ወምድር፡ መዓልተ፡ ወሌሊተ፡ አዝዝ፡ ወበል፡ ኢትክልዕዋ፡ ወይእዜኒ፡ እነብር፡ ኀቤከ፡ እግዚኦ፡ ወባሕቱ፡ በሌሊት፡ እወጽእ፡ አመትከ፡ ገዳመ፡ ከመ፡ እጸሊ፡ ኀበ፡ እግዚአብሔር፡ ወይነግረኒ፡ ማዕዜ፡ ዘገብሩ፡ ኃጢአቶሙ።
18 ወእመጽእ፡ ወአየድዐከ፡ ወትወጽእ፡ ምስለ፡ ኵሉ፡ ኃይልከ፡ ወአልቦ፡ ዘይትቃወመከ።
19 ወእወስደከ፡ እንተ፡ ማዕከለ፡ ይሁዳ፡ እስከ፡ ትበጽሕ፡ ቅድመ፡ ኢየሩሳሌም፡ ወታነብር፡ መንበረከ፡ ማዕከላ፡ ወታስተጋብኦሙ፡ ወትነሥኦሙ፡ ከመ፡ አባግዕ፡ ዘገደፎሙ፡ ኖላዊሆሙ፡ ወከልብ፡ ኢይልሕስ፡ በልሳኑ፡ በቅድሜከ፡ እስመ፡ ሊተ፡ ከመዝ፡ ነገሩኒ፡ ወአይድዑኒ፡ ወአእሚርየ፡ ተፈነውኩ፡ እንግርከ።
20 ወአዳም፡ ቃላ፡ በቅድመ፡ ሆሎፎርኒስ፡ በቅድመ፡ ኵሉ፡ ሕዝብ፡ ወአንከሩ፡ ጥበቢሃ።
21 ወይቤሉ፡ አልቦ፡ ከመ፡ ዛቲ፡ ብእሲት፡ እምአጽናፈ፡ ምድር፡ እስከ፡ አጽናፈ፡ ምድር፡ በስነ፡ ገጻ፡ ወበጥበበ፡ ቃላ።
22 ወይቤላ፡ ሆሎፎርኒስ፡ ሠናየ፡ ገብረ፡ እግዚአብሔር፡ ላዕሌኪ፡ ዘፈነወኪ፡ ቅድመ፡ ሕዝብኪ፡ ከመ፡ ትኩኒ፡ ውስተ፡ ጽንዓ፡ እዴነ፡ ወለእለሰ፡ ዐለውዎ፡ ለእግዚእየ፡ ሞት፡ ወሕርትምና።
23 ወይእዜኒ፡ ሠናይት፡ በራእይኪ፡ አንቲ፡ ወቡርክት፡ አንቲ፡ በቃልኪ፡ ወእመ፡ ገበርኪ፡ በከመ፡ ትቤሊ፡ ይከውነኪ፡ አምላክኪ፡ አምላኪየ፡ ወአንቲ፡ ትነብሪ፡ ውስተ፡ ቤቱ፡ ለናቡከደነፆር፡ ወይትሌዓል፡ ስምኪ፡ በኵሉ፡ ምድር።
=== chapter 12 ===
[Chapter 12]
1 ወአዘዘ፡ ያብእዋ፡ ኀበ፡ ይነብሩ፡ ንዋየ፡ ብሩር፡ ወአዘዘ፡ ይሴስይዋ፡ እምነ፡ ዘይገብሩ፡ ሎቱ፡ ሲሳዮ፡ ወያስትይዋ፡ እምነ፡ ወይኑ።
2 ወትቤ፡ ዮዲት፡ ኢይበልዕ፡ እምኔሁ፡ ከመ፡ ኢይኩነኒ፡ ጌጋየ፡ አላ፡ እምነ፡ ዘአምጻዕኩ፡ እሴሰይ።
3 ወይቤላ፡ ሆሎፎርኒስ፡ ወእመሰ፡ ኀልቀ፡ ዘአምጻእኪ፡ ምስሌኪ፡ እምአይቴ፡ ናመጽእ፡ ለኪ፡ ዘንሁበኪ፡ ዘከማሁ፡ ወእምነ፡ ሕዝብኪ፡ አልቦ፡ ዘሀሎ፡ ምስሌነ።
4 ወትቤሎ፡ ዮዲት፡ ሕያው፡ ነድስከ፡ እግዚእየ፡ ከመ፡ ኢይትዌድእ፡ አመትከ፡ ዘሀለወ፡ ምስሌሃ፡ እስከ፡ አመ፡ ይገብር፡ እግዚአብሔር፡ ዘመከረ፡ በእዴየ።
5 ወአብእዋ፡ ደቂቀ፡ ሆሎፎርኒስ፡ ውስተ፡ ደብተራ፡ ወቤተት፡ ወኖመት፡ እስከ፡ መንፈቀ፡ ሌሊት።
6 ወተንሥአት፡ በሰዓት፡ ወእምድኅረ፡ ንቅሐተ፡ ሌሊት፡ ለአከት፡ ኀቤሁ፡ ለሆሎፎርኒስ፡ እንዘ፡ ትብል፡ አዝዝ፡ እግዚእየ፡ ያብሕዋ፡ ትፃእ፡ አመትከ።
7 ወአዘዞሙ፡ ሆሎፎርኒስ፡ ለእለ፡ የዓቅብዋ፡ ከመ፡ ኢይክልእዋ፡ ወእምዝ፡ ነበረት፡ ሠሉሰ፡ መዋዕለ፡ ውስተ፡ ትዕይንት፡ ወትወጽእ፡ በሌሊት፡ ውስተ፡ ቈላተ፡ ቤጤልዋ፡ ወትጠመቅ፡ በትዕይን፡ ውስተ፡ ነቅዓ፡ ማይ።
8 ወሶበ፡ ተዓርግ፡ ትጼሊ፡ ኀበ፡ እግዚአብሔር፡ አምላከ፡ እሥራኤል፡ ያርትዕ፡ ፍኖታ፡ በዘኢይትነሥኡ፡ ደቂቀ፡ ሕዝባ።
9 ወእምዝ፡ ትገብእ፡ ወነበረት፡ ንጽሕት፡ ውስተ፡ ትዕይንት፡ ወሠርከ፡ ሠርከ፡ ትበልዕ።
10 ወእምዝ፡ አመ፡ ራብዕት፡ ዕለት፡ ገብረ፡ ሆሎፎርኒስ፡ ምሳሓ፡ ለአግብርቲሁ፡ ለባሕቲቱ፡ ወኢፀውዐ፡ ባዕደ፡ ሰብአ፡ ወኢመነሂ፡ ውስተ፡ ምሳሕ።
11 ወይቤሎ፡ ለባግዋ፡ መጋቢሁ፡ ሕጽው፡ ዘኵሉ፡ ንዋዩ፡ ላዕሌሁ፡ አስፍጣ፡ ሊተ፡ ለዛቲ፡ ብእሲት፡ ዕብራዊት፡ እንተ፡ ኀቤከ፡ ከመ፡ ትምጻእ፡ ኀቤነ፡ ወትብላዕ፡ ወትስተይ፡ ምስሌነ፡ ሑር፡ ኀቤሃ፡ ተናገራ።
12 እስመ፡ ኃፍረት፡ ለነ፡ እንተ፡ ከመ፡ ዛቲ፡ ብእሲት፡ ረኪበነ፡ እመ፡ ኢተናገርናሃ፡ ወእመ፡ ኢረከብናሃ፡ ለዛቲ፡ ይስሕቁነ።
13 ወወፅአ፡ ባግዋ፡ እምኀቤሁ፡ ለሆሎፎርኒስ፡ ወቦአ፡ ኀቤሃ፡ ወይቤላ፡ ኢትትሐከዪ፡ ወለትየ፡ ሠናይት፡ መጺአ፡ ኀበ፡ እግዚእየ፡ ትትአኰቲ፡ በኀቤሁ፡ ወትስተዪ፡ ወይነ፡ ምስሌሁ፡ ወትትፈሥሒ፡ ወትኩኒዮ፡ ዮም፡ ከመ፡ አሐቲ፡ እምነ፡ አዋልደ፡ ደቂቀ፡ አሶር፡ እለ፡ ይቀውማ፡ ውስተ፡ ቤቱ፡ ለናቡከደነፆር።
14 ወትቤሎ፡ ዮዲት፡ ምንት፡ አነ፡ ወሚ፡ ዘመድየ፡ ከመ፡ እትዋሥኢ፡ ለእግዚእየ፡ ኵሎ፡ ዘአመከ፡ በቅድመ፡ አዕይንቲከ፡ እገብር፡ ፍጡነ፡ ወሊተ፡ ይከውነኒ፡ ትፍሥሕተ፡ እስከ፡ አመ፡ እመውት።
15 ወተንሥአት፡ ወተሠነየት፡ ወለብሰት፡ አልባሲሃ፡ ወተሠርገወት፡ ኵሎ፡ ሠርጐ፡ አንስት፡ ወሖረት፡ ምስሌሃ፡ ወለታ፡ ወነጸፈት፡ ላቲ፡ ውስተ፡ ምድር፡ ቅድሜሁ፡ ለሆሎፎርኒስ፡ ምስካቢሃ፡ ዘነሥአት፡ እምኀበ፡ ባግዋ፡ ዘነጸፈ፡ ላቲ፡ በውስተ፡ ማኅደራ፡ ዘዲቤሁ፡ ትረፍቅ፡ ሶበ፡ ትመስሕ።
16 ወቦአት፡ ዮዲት፡ ወሰከበት፡ ወተሀውከ፡ ልቡ፡ ለሆሎፎርኒስ፡ ላዕሌሃ፡ ወፈተወት፡ ነፍሱ፡ ፈድፋደ፡ ይስክብ፡ ምስሌሃ፡ ወይጸንሕ፡ እምአመ፡ ርእያ፡ እስከ፡ ጊዜ፡ ያሰፍጣ።
17 ወይቤላ፡ ሆሎፎርኒስ፡ ስተዪ፡ ምስሌነ፡ ወተፈሥሒ።
18 ወትቤሎ፡ ዮዲት፡ እሰቲ፡ እግዚእየ፡ እስመ፡ ዐብየት፡ ዮም፡ ሕይወትየ፡ ላዕሌየ፡ እምነ፡ ኵሉ፡ መዋዕልየ፡ ዘአመ፡ ተወለድኩ።
19 ወነሥአት፡ ወሰትየት፡ ወበልዐት፡ በቅድሜሁ፡ ዘአስተዳለወት፡ ላቲ፡ አመታ።
20 ወተፈሥሐ፡ ሆሎፎርኒስ፡ በእንቲአሃ፡ ወሰትየ፡ ወይነ፡ ብዙኃ፡ ወፈድፋደ፡ ዘኢሰትየ፡ ከማሁ፡ ወኢበአሐቲ፡ ዕለት፡ እምአመ፡ ኮነ፡ ወእምአመ፡ ተወልደ።
=== chapter 13 ===
[Chapter 13]
1 ወሶበ፡ መስየ፡ አስተፋጠኑ፡ አግብርቲሁ፡ ወአግሐሡ፡ ወባግዋ፡ ዐጸወ፡ ደብተራሁ፡ ላዕሌሆሙ፡ እንተ፡ አፍአ፡ ወሰደዶሙ፡ ለእለ፡ ይቀውሙ፡ ቅድመ፡ እግዚኡ፡ ወአተዉ፡ ውስተ፡ ማኅደሪሆሙ፡ እስመ፡ ድኩማን፡ ኵሎሙ፡ እስመ፡ ፈድፋደ፡ ሰትዩ።
2 ወተርፈት፡ ዮዲት፡ ባሕቲታ፡ ወሆሎፎርኒስኒ፡ ውስተ፡ ደብተራሁ፡ ውእቱሰ፡ ይሰክብ፡ ውስተ፡ ምስካቡ፡ እስመ፡ ፈድፋደ፡ ሰትየ፡ ወስኩር፡ ውእቱ።
3 ወትቤላ፡ ዮዲት፡ ለአመታ፡ ትፃእ፡ አፍአ፡ ወትቁም፡ ኀበ፡ ማኅደራ፡ ወትዕቀባ፡ ጊዜ፡ ትወጽእ፡ ከመ፡ ዘልፍ፡ እስመ፡ እወጽዕ፡ ኀበ፡ እጼሊ፡ ትቤላ፡ ወለባግዋኒ፡ ከማሁ፡ ትቤሎ።
4 ወወጽኡ፡ ኵሎሙ፡ እምኀቤሃ፡ ወአልቦ፡ ዘተርፈ፡ ውስተ፡ ጽርሑ፡ ኢንዑስ፡ ወኢዓቢይ፡ ወተንሥአት፡ ዮዲት፡ ወቆመት፡ ኀበ፡ ምስካቡ፡ ወትቤ፡ በልባ፡ እግዚኦ፡ አምላከ፡ ኵሉ፡ ኃይል፡ ርኢ፡ ወግበር፡ በእዴየ፡ በዛቲ፡ ሰአት፡ ከመ፡ ትትለአል፡ ኢየሩሳሌም።
5 እስመ፡ በጽሐ፡ ጊዜሁ፡ በዘታነሥእ፡ ርስተከ፡ ወግበር፡ ሊተ፡ ሕሊናየ፡ በዘይሤሮ፡ ፀር፡ እለ፡ ተንሥኡ፡ ላዕሌነ።
6 ወሖረት፡ ውስተ፡ ምስካቡ፡ መንገለ፡ ትርአሲሁ፡ ለሆሎፎርኒስ፡ ወመልሐት፡ መተርእስቶ።
7 ወቆመት፡ መልዕልቴሁ፡ ወአኃዘት፡ በስዕርተ፡ ርዕሱ፡ ወትቤ፡ እግዚእየ፡ አምላከ፡ እስራኤል፡ አጽንዓኒ፡ ዮም።
8 ወዘበጠት፡ ካዕበ፡ ውስተ፡ ክሳዱ፡ በኃይላ፡ ወመተረት፡ ርእሶ፡ እምኔሁ።
9 ወአውደቀት፡ በድኖ፡ እምነ፡ ምስካቡ፡ ውስተ፡ ምድር፡ ወነበረት፡ ንስቲተ፡ ወወጽአት፡ ወወሀበታ፡ ለወለታ፡ ርእሶ፡ ለሆሎፎርኒስ።
10 ወወደየቶ፡ ውስተ፡ ፅፍነታ፡ ዘእክል፡ ወወፅኣ፡ ክልኤሆን፡ ኅቡረ፡ በከመ፡ ያለምዳ፡ ለጸሎት፡ ወዐዲዎን፡ እምተዓይነ፡ ዓደዋ፡ እንተ፡ ውስተ፡ ቈላት፡ ወዓርጋ፡ እንተ፡ ዓቀበ፡ ቤጤልዋ፡ ወበጽሓ፡ ኀበ፡ አንቀጸ፡ ሀገር።
11 ወትቤሎሙ፡ ዮዲት፡ እምርኁቅ፡ ለእለ፡ የዓቅቡ፡ አንቀጸ፡ አኅርዉ፡ አንቀጸ፡ እስመ፡ እግዚአብሔር፡ ምስሌነ፡ ከመ፡ ይግበር፡ ዓዲ፡ ኃይለ፡ ወጽንዓ፡ ለእሥራኤል፡ እምነ፡ ፀሮሙ፡ ከመ፡ ገብረ፡ ዮም።
12 ወእምዝ፡ ሶበ፡ ሰምዑ፡ ቃላ፡ ሰብአ፡ ሀገር፡ አፍጠኑ፡ ወሪደ፡ ኀበ፡ አንቀጸ፡ ሀገር፡ ወጸውዑ፡ ሊቃውንተ፡ ሀገር።
13 ወሮጹ፡ ኵሎሙ፡ ንኡሶሙ፡ ወዓቢዮሙ፡ እስመ፡ አንከሩ፡ እፎ፡ ገብአት፡ ወአርኃዉ፡ አንቀጸ፡ ወተቀበልዋ፡ ወአንደዱ፡ እሳተ፡ ወአብርኁ፡ ወዖድዋ።
14 ወትቤሎሙ፡ በዐቢይ፡ ቃል፡ ሰብሕዎ፡ ለእግዚአብሔር፡ እስመ፡ ኢያርኅቀ፡ ሣህሎ፡ ወምሕረቶ፡ እምነ፡ እስራኤል፡ አላ፡ ሠረዎመ፡ ለፀሩ፡ በዛቲ፡ ሌሊት።
15 ወአውፅአት፡ ርእሶ፡ እምነ፡ ፅፍነታ፡ ወአርአየቶሙ፡ ወትቤሎሙ፡ ናሁ፡ ርእሱ፡ ለሆሎፎርኒስ፡ መልአከ፡ ኃይሎሙ፡ ለአሶር፡ ወናሁ፡ መተርእሶቱ፡ እንተ፡ በዲቤሃ፡ ይሰክብ፡ ሶበ፡ ይሰቲ፡ ወቀተሎ፡ እግዚአብሔር፡ በእደ፡ ብእሲት።
16 ወሕያው፡ እግዚአብሔር፡ ዘአቀበኒ፡ በፍኖትየ፡ እንተ፡ ሖርኩ፡ ከመ፡ አስሕቶ፡ በገጽየ፡ ከመ፡ ይሙት፡ ወኢገብረ፡ ላዕሌየ፡ አበሳ፡ ወርኵሰ፡ ወኃሣረ።
17 ወደንገፁ፡ ኵሉ፡ ሕዝብ፡ ፈድፋደ፡ ወደነኑ፡ ወሰገዱ፡ ለእግዚአብሔር፡ ወይቤሉ፡ ኅቡረ፡ ቡሩክ፡ አንተ፡ አምላክነ፡ ዮም፡ በዛቲ፡ ዕለት፡ ዘአሕሠርኮሙ፡ ለፀረ፡ ሕዝብከ።
18 ወይቤላ፡ ዖዝያን፡ ቡርክቱ፡ ለእግዚአብሔር፡ ልዑል፡ አንቲ፡ ወለትየ፡ እምነ፡ ኵሎን፡ አንስት፡ እለ፡ ውስተ፡ ምድር፡ ወቡሩክ፡ እግዚአብሔር፡ ፈጣሬ፡ ሰማያት፡ ወምድር፡ ዘረድአኪ፡ ትምትሪ፡ ርእሶ፡ ለመልአከ፡ ፀርነ።
19 እስመ፡ ኢይደመሰስ፡ አኰቴትኪ፡ እምልበ፡ እጓለ፡ እመሕያው፡ እንዘ፡ ያዜክሩ፡ ኃይለ፡ እግዚአብሔር፡ ለዓለም።
20 ወይሬስዮ፡ ለኪ፡ እግዚአብሔር፡ ስመኪ፡ ዘለዓለም፡ ወይነጽረኪ፡ በሠናይቱ፡ እስመ፡ ኢመሐኪ፡ ነፍሰኪ፡ በእንተ፡ ሕማመ፡ ሕዝብኪ፡ አላ፡ አንቲ፡ ወፃእኪ፡ በእንተ፡ ሞት፡ ወርቱዐ፡ ሖርኪ፡ ቅድመ፡ አምላክነ፡ ወይቤሉ፡ ሕዝብ፡ አሜን፡ ወአሜን።
=== chapter 14 ===
[Chapter 14]
1 ወትቤሎሙ፡ ዮዲት፡ ስምዑኒ፡ አኃውየ፡ ንሥኡ፡ ዘንተ፡ ርእሶ፡ ወስቅሉ፡ ውስተ፡ ተድባበ፡ አረፍትክሙ።
2 ወእምዝ፡ ሶበ፡ ጎሐ፡ ጽባሕ፡ ወወጽአት፡ ፀሐይ፡ ውስተ፡ ምድር፡ ንሥኡ፡ ኵልክሙ፡ ንዋየ፡ ሐቅልክሙ፡ ወይፃኡ፡ ኵሎሙ፡ ዕደወ፡ ኃያላን፡ አፍአ፡ እምነ፡ ሀገር፡ ወሢሙ፡ ለክሙ፡ መልአከ፡ ወሶበ፡ ወረድክሙ፡ ውስተ፡ ምድር፡ መንገለ፡ መዓቅቢሆሙ፡ ለደቂቀ፡ አሶር።
3 ንሥኡ፡ ኵልክሙ፡ ንዋየ፡ ሐቅልክሙ፡ ወፁሩ፡ ወእምከመ፡ ርእዩክሙ፡ የሐውሩ፡ መዐቅቢሆሙ፡ ኀበ፡ ተዓይኒሆሙ፡ ከመ፡ ያንሥኡ፡ መላእክተ፡ ሠራዊቶሙ፡ ለአሶር፡ ወኃይሎሙ፡ ወእምዝ፡ ይረውፁ፡ ኀበ፡ ደብተራሁ፡ ለሆሎፎርኒስ፡ ወኢይረክብዎ፡ ወእምዝ፡ ይፈርሁ፡ ወይደነግፁ፡ ወይጐይዩ፡ እምቅድመ፡ ገጽክሙ።
4 ወአንትሙሰ፡ ዴግንዎሙ፡ ወኵሉ፡ እለ፡ ይነብሩ፡ ውስተ፡ ኵሉ፡ ደወለ፡ እስራኤል፡ ወነጽርዎሙ፡ ውስተ፡ ኵሉ፡ ፍኖቶሙ።
5 ወእምቅድመ፡ ትግበሩ፡ ዘንተ፡ ጸውዑ፡ ሊተ፡ አክዮርሃ፡ አሞናዊ፡ ከመ፡ ይርአይ፡ ወያእምር፡ ከመ፡ ዘዐለወ፡ ለቤተ፡ እስራኤል፡ ወፈነዎ፡ ኪያሁኒ፡ ኀቤነ፡ ይሙት፡ ምስሌነ።
6 ወጸውእዎ፡ ለአኪዮር፡ እምነ፡ ቤተ፡ ዖዝያን፡ ወሶበ፡ መጽአ፡ ወርእየ፡ ርእሶ፡ ለሆሎፎርኒስ፡ ውስተ፡ እደ፡ ብእሲት፡ በማኅበረ፡ ሕዝብ፡ ወድቀ፡ በገጹ፡ ወደንገጸት፡ ነፍሱ።
7 ወሶበ፡ አንሥእዎ፡ ወድቀ፡ ውስተ፡ እገሪሃ፡ ለዮዲት፡ ወሰገደ፡ በገጹ፡ ወይቤ፡ ቡርክት፡ አንቲ፡ እምነ፡ ኵሉ፡ ዓበይተ፡ ይሁዳ፡ ወእምኵሉ፡ ሕዝብ፡ በዓለም፡ ሰሚዖሙ፡ ስመኪ፡ ይደነግፁ።
8 ወይእዜኒ፡ ዜንውነ፡ ኵሎ፡ ዘገበርኪ፡ በእላንቱ፡ መዋዕል፡ ወዜነወቶሙ፡ ዮዲት፡ በማዕከለ፡ ሕዝብ፡ ኵሎ፡ ዘገብረት፡ እምአመ፡ ወጽአት፡ እስከ፡ አመ፡ ገብአት።
9 ወሶበ፡ አህለቀት፡ ነገራ፡ ወውዑ፡ ኵሉ፡ ሕዝብ፡ በዓቢይ፡ ቃል፡ ወጸርሑ፡ በቃለ፡ ትፍሥሕት፡ በበሀገሮሙ።
10 ወሶበ፡ ርእየ፡ አኪዮር፡ ኵሎ፡ ዘገብረ፡ እግዚአብሔር፡ ለእስራኤል፡ አምነ፡ ፈድፋደ፡ በእግዚአብሔር፡ ወተገዝረ፡ ወተወሰከ፡ ውስተ፡ ቤተ፡ እስራኤል፡ እስከ፡ ዮም።
11 ወሶበ፡ ጎሐ፡ ወጽብሐ፡ ሰቀሉ፡ ርእሶ፡ ለሆሎፎርኒስ፡ ውስተ፡ አረፍት፡ ወነሥኡ፡ ኵሎሙ፡ ዕደዊሆሙ፡ ንዋየ፡ ሐቅሎሙ፡ ወወጽኡ፡ ወአገትዎሙ፡ እንተ፡ መንገለ፡ ዐቀበ፡ ደብር።
12 ወደቂቀ፡ አሶር፡ ሶበ፡ ርእይዎሙ፡ ለአኩ፡ ኀበ፡ መሳፍንቲሆሙ።
13 ወወጽኡ፡ መላእክቲሆሙ፡ ወሥዩማኒሆሙ፡ ወመሳፍንቲሆሙ፡ ኀበ፡ ደብተራ፡ ሆሎፎርኒስ፡ ወይቤልዎ፡ ለመጋቢሁ፡ አንቅሆ፡ ለእግዚእነ፡ እስመ፡ ተሀበሉ፡ አግብርት፡ ወወረዱ፡ ላዕሌነ፡ ይትቃተሉነ።
14 ወቦአ፡ ባግዋ፡ ወጐድጐደ፡ ኀበ፡ አጸድ፡ ዘቅድመ፡ ደብተራ፡ እስመ፡ መሰሎ፡ ይሰክብ፡ ምስለ፡ ዮዲት።
15 ወሶበ፡ አልቦ፡ ዘያወሥኦ፡ ለቀየ፡ ወቦአ፡ ውስተ፡ ጽርሕ፡ ወረከበ፡ በድኖ፡ ግዱፈ፡ ውስተ፡ ምድር፡ ወርእሱ፡ ኢሀለወ፡ ላዕሌሁ።
16 ወጸርሐ፡ በዐቢይ፡ ቃል፡ እንዘ፡ ይበኪ፡ ወይግዕር፡ ወአውየወ፡ በሕቁ፡ ወሰጠጠ፡ አልባሲሁ።
17 ወቦአ፡ ውስተ፡ ደብተራ፡ ኀበ፡ ተኀድር፡ ዮዲት፡ ወኢረከባ፡ ወሮፀ፡ ኀበ፡ ሕዝቡ፡ ወጸርሐ፡ ሎሙ፡ ወይቤሎሙ።
18 ዐለዉነ፡ ሀለዉነ፡ አግብርት፡ አሐቲ፡ ብእሲት፡ ዕብራዊት፡ ገብረት፡ ኃሣረ፡ ላዕለ፡ ቤተ፡ ናቡከደነፆር፡ ንጉሥ፡ ወናሁ፡ ሆሎፎርኒስ፡ ውዱቅ፡ ውስተ፡ ምድር፡ በድኑ፡ ወኢሀለወ፡ ርእሱ፡ ላዕሌሁ።
19 ወሶበ፡ ሰምዑ፡ ዘንተ፡ ነገረ፡ መላእክተ፡ ኃይሎሙ፡ ለአሶር፡ ሰጠጡ፡ አልባሲሆሙ፡ ወደንገፀት፡ ነፍሶሙ፡ ፈድፋደ፡ ወጸርሑ፡ ወአውየዉ፡ በዐቢይ፡ ቃል፡ ጥቀ፡ በማዕከለ፡ ትዕይንት።
=== chapter 15 ===
[Chapter 15]
1 ወሶበ፡ ሰምዑ፡ እለ፡ ውስተ፡ ተዓይን፡ ሀለዉ፡ ደንገጹ፡ እሙንቱሂ፡ በበይነ፡ ዘኮነ።
2 ወአኃዞሙ፡ ፍርሃት፡ ወረዓድ፡ ወአልቦ፡ እንከ፡ ሰብእ፡ ዘቆመ፡ ምስለ፡ ቢፁ፡ አላ፡ ደንጊጾሙ፡ ጐዩ፡ ኵሎሙ፡ ኅቡረ፡ ውስተ፡ ኵሉ፡ ፍናው፡ ወውስተ፡ ሐቅል፡ ወውስተ፡ አድባር።
3 ወእለ፡ ውስተ፡ ተዓይን፡ ወእለ፡ ውስተ፡ አድባር፡ ዘአውደ፡ ቤጤልዋ፡ እሙንቱሂ፡ መምዑ፡ ወጐዩ፡ ወውእተ፡ ጊዜ፡ ተንሥኡ፡ ደቂቀ፡ እሥራኤል፡ ኵሎሙ፡ መስተቃትላን፡ ዕደው፡ ወዴገንዎሙ።
4 ወለአከ፡ ዖዝያን፡ ውስተ፡ ሴሎ፡ ወበስቴሞስ፡ ወቤቢ፡ ወኮቤ፡ ወቆላ፡ ውስተ፡ ኵሉ፡ ደወለ፡ እስራኤል፡ ይዜንዉ፡ በእንተ፡ ዘኮነ፡ ወከመ፡ ይርድኡ፡ ኵሎሙ፡ ወይዴግኑ፡ ፀሮሙ፡ ወይቅትልዎሙ።
5 ወሶበ፡ ሰምዑ፡ ደቂቀ፡ እስራኤል፡ ዴገኑ፡ ኵሎሙ፡ ኅቡረ፡ ወቀተልዎሙ፡ እስከ፡ ኮቤ፡ ወከማሁ፡ እለ፡ እምኢየሩሳሌም፡ መጽኡ፡ ወእምኵሉ፡ ደወሎሙ፡ እስመ፡ ዜነውዎሙ፡ ዘከመ፡ ኮነ፡ በትዕይንተ፡ ፀሮሙ፡ ወእለኒ፡ እምነ፡ ገሊላ፡ ወእምነ፡ ገለዓድ፡ ዴገንዎሙ፡ ወቀተልዎሙ፡ ዓቢየ፡ ቀትለ፡ እስከ፡ አደዉ፡ እምደማስቆ፡ ወእምደወላ።
6 እለሰ፡ ይነብሩ፡ ውስተ፡ ቤጤልዋ፡ ወረዱ፡ ውስተ፡ ትዕይንቶሙ፡ ለአሶር፡ ወተሐብለይዎሙ፡ ወብዕሉ፡ ፈድፋደ።
7 ወእምዝ፡ ገብዑ፡ ደቂቀ፡ እሥራኤል፡ እምኀበ፡ ቀተሉ፡ ወአስተጋኡ፡ ኵሎ፡ ዘተርፈ፡ አዕፃዳት፡ ወአህጉሪሆሙኒ፡ ዘውስተ፡ አድባር፡ ወዘውስተ፡ ምድር፡ እስመ፡ እምብዙኅ፡ መዋዕል፡ ነሥእዎሙ፡ ዓቢየ፡ ደወሎሙ።
8 ወመጽአ፡ ኢዮአቄም፡ ካህን፡ ዐቢይ፡ ወአዕረጎሙ፡ ለደቂቀ፡ እሥራኤል፡ እለ፡ ይነብሩ፡ ኢየሩሳሌም፡ ወመጽኡ፡ ከመ፡ ይርአዩ፡ ሠናይተ፡ እንተ፡ ገብረ፡ እግዚአብሔር፡ ለእስራኤል፡ ወከመ፡ ይርአይዋ፡ ለዮዲት፡ ወከመ፡ ይግበሩ፡ ምስሌሃ፡ ሰላመ።
9 ወሶበ፡ ቦኡ፡ ኀቤሃ፡ ኵሎሙ፡ ኅቡረ፡ ባረክዋ፡ ወይቤልዋ፡ አንቲ፡ ይእቲ፡ ላዕለ፡ ኢየሩሳሌም፡ ወአንቲ፡ ይእቲ፡ ዕበዮሙ፡ ለደቂቀ፡ እሥራኤል፡ ወአንቲ፡ ይእቲ፡ ትምክህቶሙ፡ ለሕዝብነ።
10 እስመ፡ ተገብረ፡ ዝንቱ፡ ኵሉ፡ በእዴኪ፡ ወገበርኩ፡ ዘንተ፡ ሠናይተ፡ በውስተ፡ እስራኤል፡ ወሠምረ፡ ቦሙ፡ እግዚአብሔር፡ ኩኒ፡ ቡርክተ፡ በኀበ፡ እግዚአብሔር፡ ዘኵሎ፡ ይመልክ፡ ለዓለመ፡ ዓለም።
11 ወበርበሩ፡ ሕዝብ፡ ትዕይንቶሙ፡ ሠሉሰ፡ መዋዕለ፡ ወወሀብዋ፡ ለዮዲት፡ ደብተራሁ፡ ለሆሎፎርኒስ፡ ወኵሎ፡ ንዋየ፡ ብሩር፡ ወኵሎ፡ ዘቦ፡ ነሥአት፡ ወፀዐነት፡ አብቅሊሃ፡ ወነድአት፡ ሠረገላሃ፡ ወአዕተወት፡ ምስሌሃ።
12 ወሮጻ፡ ኵሎን፡ አንስተ፡ እሥራኤል፡ ይርአያሃ፡ ወይባርካሃ፡ ወገብራ፡ ላቲ፡ ዓቢየ፡ በዓለ፡ ወነሥአት፡ ፀበርተ፡ ውስተ፡ እዴሃ፡ ወወሀበት፡ ለአንስት፡ እለ፡ ምስሌሃ፡ ወከለላሃ።
13 ወሖረት፡ ቅድመ፡ ኵሉ፡ ሕዝብ፡ እንዘ፡ የሐልያ፡ ወይእቲ፡ መስፍኖን፡ ለአንስት፡ ኵሎን፡ ወተለውዋ፡ ኵሎሙ፡ ደቂቀ፡ እስራኤል፡ ምስለ፡ ንዋየ፡ ሐቅሎሙ፡ እንዘ፡ ይኬልልዋ፡ ወይሴብሕዋ፡ በአፉሆሙ።
=== chapter 16 ===
[Chapter 16]
1 ወአንበበት፡ ዮዲት፡ በዛቲ፡ ስብሐት፡ በኀበ፡ ኵሉ፡ እስራኤል፡ ወአውሥኡ፡ ኵሉ፡ ሕዝብ፡ በዛቲ፡ ስብሐት።
2 ወትቤ፡ ዮዲት፡ ሰብሕዎ፡ ለእግዚአብሔር፡ አምላክነ፡ በከበሮ፡ ወኀልዩ፡ በጸናጽል፡ ወሰንቅዉ፡ ሎቱ፡ በመዝሙር፡ ወበስብሐት፡ አልዕልዎ፡ ወፀውዑ፡ ስሞ።
3 እስመ፡ እግዚአብሔር፡ ይቀጠቅጥ፡ ፀብዐ፡ ወእግዚአብሔር፡ ስሙ።
4 ወትዕይንቱ፡ ማዕከለ፡ ሕዝብ፡ ወአድኃነነ፡ እምእለ፡ ዴገኑነ።
5 ወመጽኡ፡ አሶር፡ እምአድባር፡ ዘመንገለ፡ መስዕ፡ ወወጽኡ፡ በአዕላፍ፡ ኃይሎሙ፡ ወአፀዉ፡ አፍላገ፡ በበዝኆሙ፡ ወከደኑ፡ አውግረ፡ በእግረ፡ አፍራሲሆሙ።
6 ወይቤሉ፡ ያውዕዩ፡ ደወለነ፡ በእሳት፡ ወይቀትሉ፡ በኵናት፡ ወራዙቲነ፡ ወይፄውዉ፡ ደቂቀነ፡ ወይማህርኩ፡ ደናግሊነ።
7 ወእግዚአብሔር፡ ዘኵሎ፡ ይመልክ፡ ቀተሎሙ፡ በእደ፡ ብእሲት።
8 እስመ፡ ኢወድቀ፡ ጽንኦሙ፡ በእደ፡ ወሬዛ፡ ወአኮ፡ ደቂቀ፡ ጤቤኖን፡ ዘቀተልዎሙ፡ ወአኮ፡ እለ፡ ያርብሕ፡ ዐበይት፡ ዘሞዕዎሙ፡ ዘእንበለ፡ ዮዲት፡ ወለተ፡ ሜራሪ፡ በስነ፡ ገጻ፡ አድከመቶ።
9 ወኀደገት፡ አልባሰ፡ መበለታ፡ ላዕሌሆሙ፡ ለእለ፡ የሐምሙ፡ በውስተ፡ እስራኤል።
10 ወተቀብዐት፡ ገጻ፡ ዕፍረተ፡ ወተጸፍረት፡ ርእሳ፡ ወተከፍለት፡ ወለብሰት፡ አልባሰ፡ አግያት፡ ለአስሕቶቱ፡ ወተስእነት፡ አሣዕኒሃ።
11 ወበስና፡ ተሐይዳ፡ አዕይንቲሁ፡ ወላሕያ፡ ፄወዋ፡ ለነፍሱ፡ ሐለፈ፡ ሰይፍ፡ እንተ፡ ክሳዱ።
12 ወደንገፁ፡ ፋርስ፡ እምተሀብሎታ፡ ወፈርሑ፡ ሜዶን፡ እምነ፡ ትብዓ።
13 ወውእተ፡ ጊዜ፡ ወውዑ፡ ሕሙማንየ፡ ወፈርሑ፡ ድውያንየ፡ ወደንገፁ፡ ወዐልዓሉ፡ ቃሎሙ።
14 ወዴገንዎሙ፡ ደቂቀ፡ አዋልድየ፡ ወወግዕዎሙ፡ ወወራዙቶሙኒ፡ ተደራበይዎሙ፡ ወጠፍኡ፡ እምፀባዒተ፡ እግዚአብሔር።
15 አነብብ፡ ስብሐተ፡ ለእግዚአብሔር፡ አነብብ፡ ስብሐተ፡ ሐዲሰ፡ ለእግዚአብሔር።
16 እግዚአብሔርሰ፡ ዐቢይ፡ ውእቱ፡ ወክቡር፡ ፈድፋደ፡ ወመድምም፡ ኃይሉ።
17 ለከ፡ ይገንዩ፡ ኵሉ፡ ተግባርከ፡ እስመ፡ ትቤ፡ ወኮኑ፡ ወፈኖከ፡ መንፈሰከ፡ ወተሐንፁ፡ ወአልቦ፡ ዘኢይትኤዘዝ፡ በቃልከ።
18 እስመ፡ አድባርኒ፡ መሠረቶሙ፡ ይትከወሱ፡ ወይትከወሱ፡ ሰማያትኒ፡ ወኰኵሕኒ፡ ከመ፡ መዓረ፡ ግራ፡ ይትመሰው፡ እምቅድመ፡ ገጽከ፡ ወዓዲ፡ ተሠሃሙ፡ ለእለ፡ ይፈርሁከ።
19 እስመ፡ ኢየአክል፡ ኵሉ፡ መሥዋዕት፡ ለመዓዛ፡ ሠናይ፡ ወይውህድ፡ ኵሉ፡ ስብሕ፡ እምነ፡ ቊርባንከ፡ ዘሰ፡ ይፈርሆ፡ ለእግዚአብሔር፡ ዓቢይ፡ ውእቱ፡ በኵሉ፡ ጊዜ።
20 አሌ፡ ሎሙ፡ ለአሕዛብ፡ እለ፡ ይቀውሙ፡ ዲበ፡ ዘመድየ፡ እግዚአብሔር፡ ዘኵሎ፡ ይመልክ፡ ይትቤቀሎሙ፡ በዕለተ፡ ደይን።
21 ወይፌኑ፡ እሳተ፡ ወእፄ፡ ውስተ፡ ሥጋሆሙ፡ ወይበክዩ፡ በሕማም፡ ዘለዓለም።
22 ወሶበ፡ በጽሑ፡ ኢየሩሳሌም፡ ሰገዱ፡ ለእግዚአብሔር፡ ወሶበ፡ አንጽሑ፡ ርእሶሙ፡ ሕዝብ፡ አብዑ፡ ቁርባኖሙ፡ ወዘበፈቃዱ፡ ሀብቶሙ።
23 ወአንበረት፡ ዮዲት፡ ኵሎ፡ ንዋዮ፡ ለሆሎፎርኒስ፡ ዘወሀብዋ፡ ሕዝብ።
24 ተፈሥሑ፡ ሕዝብ፡ በኢየሩሳሌም፡ በቅድመ፡ መቅደስ፡ ሠለስተ፡ አውራኃ፡ ወዮዲትኒ፡ ነበረት፡ ምስሌሆሙ።
25 ወእምድኅረ፡ እማንቱ፡ መዋዕል፡ አተዉ፡ ኵሉ፡ ውስተ፡ ርስቱ፡ ወዮዲትኒ፡ አተወት፡ ቤጤልዋ፡ ወነበረት፡ ውስተ፡ ተግባራ፡ ወኮነት፡ ክብርተ፡ በመዋዕሊሃ፡ በኵሉ፡ ምድር።
26 ወብዙኃን፡ እለ፡ ይፈቅድዋ፡ ወአልቦ፡ ብእሲ፡ ዘአእመራ፡ በኵሉ፡ መዋዕለ፡ ሕይወታ፡ እምአመ፡ ሞተ፡ ምናሴ፡ ምታ፡ ወተቀብረ፡ ኀበ፡ ሕዝቡ።
27 ወዐብየት፡ ፈደፋደ።
28 ወረስዓት፡ በቤተ፡ ምናሴ፡ ምታ፡ ፻ወ
29 ወለሀውዋ፡ ቤተ፡ እስራኤል፡ ሰቡዓ፡ መዋዕለ፡ ወከፈለት፡ ንዋያ፡ እምቅድመ፡ ትሙት፡ ለኵሉ፡ ቅሩበ፡ ምናሴ፡ ምታ፡ ወለቅሩበ፡ አዝማዲሃ።
30 ወአልቦ፡ እንከ፡ ዘገረሞሙ፡ ለደቂቀ፡ እሥራኤል፡ በመዋዕለ፡ ዮዲት፡ ወዓዲ፡ እምድኅረ፡ ሞተት፡ ብዙኃ፡ መዋዕለ።