##### edition  (gez)
=== chapter 1 ===
[Chapter 1]
1 ቃለ፡ እግዚአብሔር፡ ዘኮነ፡ ኀበ፡ ኤርምያስ፡ ወልደ፡ ኬልቅዩ፡ ዘእምካህናት፡ ዘይነብር፡ ውስ፡ አናቶት፡ በብሔረ፡ ብንያም።
2 ወኮነ፡ ቃለ፡ እግዚአብሔር፡ በኀቤየ፡ በመዋዕለ፡ ኢዮስያስ፡ ወልደ፡ አሙፅ፡ ንጉሠ፡ ይሁዳ፡ እምአመዐሠርቱ፡ ወሠለስቱ፡ ዓመተ፡ መንግሥቱ።
3 ወኮነ፡ በመዋዕለ፡ ኢዮአቄም፡ ወልደ፡ ኢዮስያስ፡ ንጉሠ፡ ይሁዳ፡ አስከ፡ ተፈጸመ፡ ዐሠርቱ፡ ወአሐዱ፡ ዓተ፡ ሴዴቅስ፡ ወልደ፡ ኢዮስያስ፡ ንጉሠ፡ ይሁዳ፡ እስከ፡ አመ፡ ተፄወወት፡ ኢየሩሳሌም፡ በኀምስ፡ ወርኅ።
4 ወኮነ፡ ቃለ፡ እግዚአብሔር፡ ኀቤየ፡ ወይቤለኒ፡ እግዚአብሔር።
5 ዘእንበለ፡ እፍጥርከ፡ እምከርሠ፡ እምከ፡ አእመርኩከ፡ ወዘእንበለ፡ ትፃእ፡ እማሕፀን፡ ቀደስኩከ፡ ወነቢየ፡ ረሰይኩከ፡ ለአሕዛብ።
6 ወእቤሎ፡ አሌ፡ ሊተ፡ እግዚኦ፡ እግዚእየ፡ ናሁኬ፡ ኢይክል፡ ተናግሮ፡ እስመ፡ ንኡስ፡ አነ።
7 ወይቤለኒ፡ እግዚአብሔር፡ ኢትበል፡ ወሬዛ፡ አነ፡ እስመ፡ ተሐውር፡ ኵለሄ፡ ኀበ፡ ፈነውኩከ፡ ወትነግር፡ ኵሎ፡ ዘአዘእኩከ።
8 ወኢትፍራህ፡ እምገጾሙ፡ እስመ፡ ሀለውኩ፡ ምስሌከ፡ ወአድኅነከ፡ ይቤ፡ እግዚአብሔር።
9 ወሰፍኀ፡ እዴሁ፡ እግዚአብሔር፡ ኀቤየ፡ ወገሠሠኒ፡ አፉየ፡ ወይቤለኒ፡ እግዚአብሔር።
10 ናሁ፡ ሤምኩከ፡ ዮም፡ ለአሕዛብ፡ ወለነገሥት፡ ትሥርዎሙ፡ ወትንስቶሙ፡ ወታጥፍዖሙ፡ ወትሕንፅ፡ ወትትክል።
11 ወነበበኒ፡ እግዚአብሔር፡ ዳግመ፡ ይቤለኒ፡ ምንተ፡ ትሬኢ፡ ኤርምያስ፡ ወእቤ፡ ቀስታመ፡ ከርካዕ፡ እሬኢ።
12 ወየወቤለኒ፡ እግዚአብሐሄር፡ ሠናየ፡ ርኢከ፡ እስመ፡ እተግህ፡ አነ፡ ከመ፡ እግበር፡ ዘነበብኩ።
13 ወነበበኒ፡ እግዚአብሔር፡ ዳግመ።
14 ወይቤለኒ፡ እግዚአብሔር፡ እምገጸ፡ ሰሜን፡ ይትረኀው፡ እኪት፡ ላዕለ፡ እለ፡ ይነብሩ፡ ውስተ፡ ምድር።
15 ናሁ፡ አነ፡ እጼውዕ፡ ኵሎ፡ ነገሥተ፡ ምድረ፡ ሰሜን፡ ይቤ፡ እግዚአብሔር፡ ይመጽኡ፡ ወያነብሩ፡ መናብርቲሆሙ፡ ወኵሎሙ፡ ቅድመ፡ ዴዴያት፡ አናቅጸ፡ ኢየሩሳሌም፡ ወላዕለ፡ ኵሉ፡ አህጉረ፡ ይሁዳ።
16 ወእትናገሮሙ፡ በኵነኔየ፡ በእንተ፡ ኵሉ፡ እከዮሙ፡ ዘኀደጉኒ፡ ወሦዑ፡ ለአማልክተ፡ ነኪር፡ ወሰገዱ፡ ለግብረ፡ እደዊሆሙ።
17 ወአንተሰ፡ ቅን፡ ሐቌከ፡ ወተንሥእ፡ በሎሙ፡ ኵሎ፡ ዘአዘዝኩከ፡ ወኢትፍራኅ፡ እምገጾሙ፡ ወኢትደንግፅ፡ እምቅድሜሆሙ፡ እስመ፡ ሀለውኩ፡ ምስሌከ፡ ከመ፡ አድኅንከ፡ ይቤ፡ እግዚአብሔር።
18 ናሁ፡ ረሰይኩከ፡ ዮም፡ በዛቲ፡ ዕለት፡ ከመ፡ ሀገር፡ ጽንዕት፡ ወከመ፡ ዓምደ፡ ሐፂን፡ ወከመ፡ አረፍተ፡ ብርት፡ ጽኑዕ፡ ለኵሉ፡ ምድር፡ ወለነገሥተ፡ ይሁዳ፡ ወለመላእክቲሆሙ፡ ወለካህናት፡ ወለሕዝበ፡ ምድር።
19 ወይጸብኡዑከ፡ ወኢይክሉከ፡ እስመ፡ አነ፡ ሀሉኩ፡ ምስሌከ፡ ወአድኅነከ፡ ይቤ፡ እግዚአብሔር።
=== chapter 2 ===
[Chapter 2]
1 ወኮነ፡ ቃለ፡ እግዚአብሔር፡ ኀቤየ።
2 ወይቤለኒ፡ ሑር፡ ወስብክ፡ ውስተ፡ ዕዘኒሁ፡ ለኢየሩሳሌም፡ እንዘ፡ ትብል፡ ከመዝ፡ ይቤ፡ እግዚአብሔር፡ እስመ፡ ተዘከርኩ፡ ምሕረተኪ፡ ዘእምንዕስኪ፡ ወፍቅረኪ፡ ዘአመ፡ ልሕቂ፡ ዘተለውኪ፡ ድኅሬየ፡ በገዳም፡ ውስተ፡ ምድር፡ ዘኢይዘራዕ።
3 ቅዱስ፡ እስራኤል፡ ለእግዚአብሔር፡ ቀዳሜ፡ ማዕረሩ፡ ወኵሎሙ፡ እለ፡ ይበልዕዎ፡ ይኔስሑ፡ ወትመጽእ፡ እኪት፡ ላዕሊሆሙ፡ ይቤ፡ እግዚአብሔር።
4 ስምዑ፡ ቃለ፡ እግዚአብሔር፡ ቤተ፡ ያዕቆብ፡ ወኵሉ፡ በሐውርት፡ ዘቤተ፡ እስራኤል።
5 ከመዝ፡ ይቤ፡ እግዚአብሔር፡ ምንተ፡ ረከቡ፡ አበዊክሙ፡ ላዕሌየ፡ በዘይግዕዙኒ፡ ከመ፡ ይርኀቁ፡ እምኔ፡ ነዋኃ፡ ወሖሩ፡ ወተለው፡ ከንቶ፡ ወከንቶ፡ ኮኑ።
6 ወኢይቤሉ፡ አይቴ፡ ውእቱ፡ እግዚአብሔር፡ ዘአውጽአነ፡ እምድረ፡ ግብፅ፡ ወመርሐነ፡ ወነ,መርሐነ፡ ውስተ፡ በድው፡ በብሄረ፡ ዓጽ፡ ወበምድር፡ ኀበ፡ አልቦ፡ ዕፅ፡ ዘአልቦ፡ ፍሬ፡ ብሔረ፡ ኀበ፡ ኢኬዶ፡ ሰብእ፡ ወኢይነብሮ፡ ዕጓለ፡ መሕያው።
7 ወአብአነ፡ ውስተ፡ ከነዓን፡ ወቀርሜሎስ፡ ከመ፡ ንብላዕ፡ ፍሬሁ፡ ወበረከቶ፡ ወቦእክሙ፡ ወአርኰስክምዋ፡ ለምድርየ፡ ወአሕሰርክሙ፡ ርስትየ።
8 ወካህናትኒ፡ ኢይቤሉ፡ አይቴ፡ ውእቱ፡ እግዚአብሔር፡ ወእለሂ፡ ለምህሩ፡ ሕግየ፡ ወኢሐለዩኒ፡ ወኖሎትኒ፡ ዐለዉኒ፡ ወነቢያትኒ፡ ይትዌረዱ፡ ለበዓል፡ ወሖሩ፡ ወተለዉ፡ ዘኢይበቊዖሙ።
9 ወበበይነዝ፡ ዓዲ፡ እትዋቀሶሙ፡ ይቤ፡ እግዚአብሔር፡ ወእሳነኖሙ፡ ለደቂቀ፡ ደቂቆሙ።
10 ዕደዉ፡ ውስተ፡ ደስያተ፡ ኬጥኤም፡ ወፈንዉ፡ ውስተ፡ ቄዳር፡ ወጠይቁ፡ በሕቁ፡ ወርእዩ፡ እመ፡ ኮነ፡ ከመዝ።
11 እመ፡ ይዌልጡ፡ አሕዛብ፡ አማልክቲሆሙ፡ እንዘኬ፡ ኢኮኑ፡ አማልክተ፡ ወሕዝብሰ፡ ወለጡ፡ ክብሮሙ፡ በዘይበቊዖሙ።
12 ደንገፀት፡ ሰማይ፡ በበይነዝ፡ ወአንሥጠጠት፡ በሕቁ፡ ጥቀ፡ ይቤ፡ እግዚአብሔር።
13 እስመ፡ ክልዔተ፡ እከያተ፡ ገብሩ፡ ሕዝብየ፡ ኪያየ፡ ኀደጉኒ፡ ነቅዓ፡ ማይ፡ ሕይወት፡ ወከረዩ፡ ሎሙ፡ አዘቃተ፡ ንጹፋተ፡ ዘአልቦ፡ ማይ።
14 ቦኑ፡ ውእቱ፡ ገብር፡ ያዕቆብ፡ አውልደ፡ ቤት፡ ውእቱ፡ ለምንት፡ ኮነ፡ ፄዋ።
15 ወጥህሩ፡ ላዕሌሁ፡ አንብስት፡ ወወውዑ፡ ላዕሌሁ፡ እለ፡ አማሰንዋ፡ ለብሔሩ፡ ወነሠትዎን፡ ለአህጉሪሁ፡ ወረሰይዎን፡ ከመ፡ አልቦ፡ ዘይነብሮን።
16 ወአእመሩኪ፡ ደቂቀኖፍ፡ ወጣፍናስ።
17 ናሁ፡ ርእዪ፡ ዘረሰየኪ፡ ኀዲገ፡ ዚአየ፡ ይቤ፡ እግዚአብሔር፡ አምላክኪ።
18 ወይእዜኒ፡ ምንት፡ ብኪ፡ በፍኖተ፡ ግብጽ፡ ከመ፡ ትሰትዪ፡ ማየ፡ ሕሙግ፡ ትሰትዪ፡ ማየ፡ ፈለግ።
19 ወይገሥጽኪ፡ ተራኅቆትኪ፡ ወይዝልፍኪ፡ እከይኪ፡ ተአምሪ፡ ወትጠይቂ፡ ከመ፡ ይመርረኪ፡ ኀዲገ፡ ዚአየ፡ ይቤ፡ እግዚአብሔር፡ አንላክኪ።
20 እስመ፡ እምዓለም፡ ቀጥቀጥኩ፡ አርዑትኪ፡ ወሰበርኩ፡ መዋቅሕትኪ፡ ወሰበርኩ፡ መዋሕቅትኪ፡ ወትቤሊ፡ ኢገበርኩ፡ ዳዕሙ፡ ተሐውሪ፡ ውስተ፡ አድባር፡ ነዋኃት፡ ወታሕተ፡ ኵሉ፡ ዖም፡ ዘቦ፡ ጽላሎጽ፡ ወበህየ፡ ከዓውኪ፡ ዝሙተኪ።
21 አንሰ፡ ተከልኩኪ፡ ሴሬቀ፡ እፎ፡ ኮንኪ፡ ሦከ፡ ወወይነ፡ ነኪረ።
22 እመ፡ ተሐዘብኪ፡ በአፋላግ፡ ወተካየድኪ፡ ኪዳነ፡ ወይትኀተም፡ ኀጢአትኪ፡ በቀቅድሜ፡ ይቤ፡ እግዚአብሔር።
23 ወእፎ፡ ትብሊ፡ ኢረኰስኩ፡ ወኢተለውክዎ፡ ለበዓል፡ ርእ፡ ፍኖተኪ፡ ዘውስተ፡ አፍለግ፡ ወአእምሪ፡ ዘገበርኪ፡ በበሠርክ፡ ትየብቢ፡ ውስተ፡ ፍናዊሃ።
24 ወተርኅበት፡ በውስተ፡ ማያተ፡ አሕቃላት፡ በፍትወተ፡ ነፍሳ፡ ትትዌረድ፡ ወአኃዝዋ፡ ወአልቦ፡ ዘያገብኣ፡ ኵሎሙ፡ እለኀሠሥዋ፡ ኢይፃምዉ።
25 ሚጢ፡ እግረኪ፡ እምነ፡ ፍኖት፡ መብእስ፡ ወጒርዔኪኒ፡ እምነ፡ ጽምዕ፡ ወትቤ፡ አጥባእኩ፡ አንሰ፡ ወአፍቀርኩ፡ ነኪረ።
26 ከመ፡ ኀፍረተ፡ ሰራቂ፡ ሶበ፡ ይእኅዝዎ፡ ከማሁ፡ የሐፍሩ፡ ደቂቀ፡ እስራኤል፡ እሙንቱኒ፡ ነገሥቶሙኒ፡ ወመላእክቲሆሙኒ፡ ወካህናቲሆሙኒ፡ ወነቢያቲሆሙኒ።
27 እስመ፡ ይቤልዎ፡ ለዕፅ፡ አቡነ፡ አንተ፡ ወለእብንኒ፡ ወለድከነ፡ አንተ፡ ወሜጡ፡ ዘባኖሙ፡ ኀቤየ፡ ወአኮ፡ ገጾሙ፡ ወአመሰ፡ ምንዳቤሆሙ፡ ይብሉኒ፡ ተንሥእ፡ ወአድኅነነ።
28 አይቴኑመ፡ አማልክቲከ፡ ዘገበርከ፡ ለከ፡ ኢይትነሥኡኑ፡ እንከ፡ ኢያድኅኑከ፡ አመ፡ ምንዳቤከ፡ እስመ፡ በኍልቈ፡ አህጉሪከ፡ አማልክቲከ፡ ይሁዳ፡ ወበኍልቈ፡ ፍናዊሃ፡ ለኢየሩሳሌም፡ ሦዑ፡ ለበዓል።
29 ለምንት፡ ትነብቡኒ፡ ናሁ፡ ኵልክሙ፡ ዓለውክሙኒ፡ ይቤ፡ እግዚአብሔር።
30 በከ፡ ለከንቱ፡ ቀተልክምዎሙ፡ ለደቂቅክሙ፡ ወኢተወከፍክሙ፡ ተግሣጽየ፡ ወለነቢያቲክሙኒ፡ በልዐቶሙ፡ መጥባሕትየ፡ ከመ፡ አንበሳ፡ ዘይሤሩ፡ ወበዝኒ፡ ኢፈራሀረከረሙኒ፡ ይቤ፡ እግዚአብሔር።
31 ስምዑ፡ ቃለ፡ እግዚአብሔር፡ ከመዝ፡ ይቤ፡ እግዚአብሔር፡ መዝበረኑ፡ ኮንክዎሙ፡ ለደቂቀ፡ እስራኤል፡ አው፡ ምድረ፡ በድው፡ እስመ፡ ይቤሉ፡ ሕዝብየ፡ ኢንትቀነይ፡ ለከ፡ ወኢንመጽእ፡ እንከ፡ ኀቤከ።
32 ትረሥዕኑ፡ መርዓት፡ ሠርጓ፡ ወድንግል፡ ባዝግናሃ፡ ሕዝብየሰ፡ ረሥዑኒ፡ መዋዕለ፡ ዘአልቦ፡ ኁልቊ።
33 ምንት፡ እንከ፡ ዓዲ፡ ሠናይ፡ ዘትፈቅድ፡ በፍናዊከ፡ ከመ፡ ትኅሥሥ፡ ተፋቅሮ፡ አኮ፡ ከመዝ፡ ዓዲ፡ አንተሂ፡ አሕሰምከ፡ ከመ፡ ታርኵስ፡ ፍናዊከ።
34 ወተረክበ፡ ውስተ፡ እደዊከ፡ ከመ፡ እጓለማውታ፡ ወደመ፡ ነፍስ፡ ንጹሕ፡ ወአኮ፡ ውስተ፡ ግብ፡ ዘረከብክዎሙ፡ ዳዕሙ፡ ውስተ፡ ዖም።
35 ወትብሊ፡ ንጹሕ፡ አነ፡ ዳዕሙ፡ ይትመየጥ፡ መዓቱ፡ እምኔየ፡ ናሁ፡ አነ፡ እትዋቀሰኪ።
36 እስመ፡ ትብሊ፡ ኢአበስኩ፡ እስመ፡ አስተአበድክኒ፡ ጥቀ፡ ወአመክዓብኪ፡ ፍናውኪ፡ ወበግብፅ፡ ተሐፈርኪ፡ በከመ፡ ተሐፈርኪ፡ በአሦር።
37 እምዝየ፡ ትወፅኢ፡ ወእደውኪ፡ ዲበ፡ ርእስኪ፡ እስመ፡ አቅበጸኪ፡ እግዚአብሔር፡ ተስፋኪ፡ ወኢትረክቢ።
=== chapter 3 ===
[Chapter 3]
1 አመ፡ ሰደዳ፡ ብእሲ፡ ለብእሲቱ፡ ወጽአት፡ እም፡ ኀቤሁ፡ ወአውሰበት፡ ካልአ፡ ብእሴ፡ ትገብእኑ፡ ኀቤሁ፡ እንከ፡ ጋድመ፡ አኮኑ፡ እንከ፡ ረኵስ፡ ይእቲ፡ ብእሲት፡ ወአንቲኒ፡ ዘመውኪ፡ በብዙኃን፡ ኖሎት፡ ወተመየጢ፡ ኀቤየ፡ ይቤ፡ እግዚአብሔር፡ ወአንሥኢ፡ አዕይንትኪ፡ ርቱዐ፡ ይቤ፡ እግዚአብሔር።
2 ወነጽሪ፡ ወርእዪ፡ ኵሎ፡ ፍናወኪ፡ እስመ፡ ነበርኪ፡ ከመ፡ ቋዓተ፡ በድው፡ ወአርኰስኪያ፡ ለምድር፡ በዝሙትኪ፡ ወበእከይኪ።
3 ወነበርኪ፡ ምስለ፡ ብዙኃን፡ ኖሎት፡ ለኀሣርኪ፡ ገጸ፡ ዘማ፡ ኮንኪ፡ ወተኀፈርኪ፡ በኀበ፡ ኵሉ፡ ወተከልዐ፡ ጠል፡ ወተወን፡ በእንተዝ።
4 አኮ፡ አመ፡ እግዚእኪ፡ ወአቡኪ፡ ዘጸዋዕክኒወኢከመ፡ ምትኪ፡ ዘንእስኪ።
5 ወኢትነብሪ፡ ለዓለም፡ ናሁ፡ ነበብኪ፡ ወገበርኪ፡ ዘንተ፡ እኩየ፡ ወክህልኪ።
6 ወይቤለኒ፡ እግዚአብሔር፡ በመዋዕለ፡ ኢዮስያስ፡ ንጉሥ፡ ርኢከኑ፡ ዘረሰየተኒ፡ ዐእሉተ፡ እስራኤል፡ ሖረት፡ ውስተ፡ ኵሉ፡ ደብር፡ ነዋህ፡ ወታሕተ፡ ኵሉ፡ ዕፀው፡ ወዖም፡ ወዘመወት፡ በህየ።
7 ወእቤላ፡ እምድኅረ፡ ዘንተ፡ ኵሎ፡ ገብረት፡ ግብዒ፡ ኀቤየ፡ ወዐበየት፡ ገቢዓ፡ ኀቤሃ፡ ወርእየት፡ እኅጻ፡ ምርዕጸ፡ ይሁዳ፡ ከመ፡ ኀደገግዋ፡ ኵሎሙ፡ መሐዛኒሃ፡ እለ፡ ዘመወት፡ ምስሌሆሙ።
8 ወርኢኩ፡ ከመ፡ ላዕለ፡ ኵሉ፡ ዘመወት፡ ዕለተ፡ እስራኤል፡ ሰደድክዋ፡ ወወሀብክዋ፡ መጽሐፈ፡ ኅዳጋቲሃ፡ ውስተ፡ እዴሃ፡ ወኢኀፈረት፡ ኅሥርት፡ ይሁዳ፡ እኅታ፡ ሖረት፡ ወዘመወት።
9 ወከንቶ፡ ኮነ፡ ዝሙታ፡ ወዘመወት፡ በዕፀው፡ ወበአዕባን።
10 ወምስለ፡ ዝንቱ፡ ኵሉ፡ ኢተመይጠት፡ ኀቤሃ፡ ኅሥርተ፡ ይሁዳ፡ እኅታ፡ በኵሉ፡ ልባ፡ ዳዕሙ፡ ውስተ፡ ሐሰት፡ ይቤ፡ እግዚአብሔር።
11 ወይቤለኒ፡ እግዚአብሔር፡ አጽደቀት፡ ነፍሳ፡ ዕሉት፡ እስራኤል፡ እምነ፡ ኅሥርት፡ ይሁዳ።
12 ሑር፡ ወአንብብ፡ ዘነገረ፡ መንገለ፡ ሰሜን፡ ወበል፡ ተመየጢ፡ ኀቤየ፡ ዕሉት፡ እስራኤል፡ ይቤ፡ እግዚአብሄርወኢያጸንዕ፡ ገጸየ፡ ላዕሌክሙ፡ እስመ፡ መሐሪ፡ አነ፡ ይቤ፡ እግዚአብሔር፡ ወኢትመአዓክሙ፡ እስከ፡ ለዓለም።
13 ዳዕሙ፡ አእምሪ፡ ዓመፃኪ፡ ዘዓለውክኒ፡ ይቤ፡ እግዚአብሔር፡ አምላክኪ፡ ወዘረውኪ፡ ፍናወኪ፡ ኀበ፡ ነኪራን፡ ወታሕተ፡ ዕፀው፡ ወአዕባን፡ ወኢሰማዕኪ፡ ቃልየ፡ ይቤ፡ እግዚአብሔር።
14 ተመየጡ፡ ኀቤየ፡ ደቂቀ፡ ዓላውያን፡ ይቤ፡ እግዚአብሔር፡ እስመ፡ አነ፡ እቀንየክሙ፡ ወእነሥአክሙ፡ ዐሠርተ፡ ወአሐደ፡ እምሀገር፡ ወክልዔተ፡ እምብሔር፡ ወእወስደክሙ፡ ውተ፡ ጽዮን።
15 ወእሁበክሙ፡ ኖሎተ፡ ዘከመ፡ ልብየ፡ ወርዕዩክሙ፡ በጥበብ፡ ወበአእምሮ።
16 ወእምዝ፡ አመ፡ በዛኅክሙ፡ ውሰተ፡ ምድር፡ እንተ፡ ወሀበክዋ፡ ለአበዊክሙ፡ ይእቲ፡ አሚረ፡ ይቤ፡ እግዚአብሔር፡ ኢይብሉ፡ እንከ፡ ነያ፡ ታቦተ፡ ዐሠርቱ፡ እግዚአብሔር፡ ቅዱስ፡ እስራኤል፡ ወኢይኄልይዋ፡ በልቦሙ፡ ወኢይሰይምዋ፡ በአፉሆሙ፡ ወኢየኀሥሥዋ፡ እንከ፡ ውእተ፡ አሚረ።
17 ወበውእቱ፡ መዋዕል፡ ይሰምይዋ፡ ለኢየሩሳሌም፡ መንበረ፡ እግዚአብሔር፡ ወይትጋብኡ፡ ኵሉ፡ አሕዛብ፡ በስመ፡ እግዚአብሔር፡ ውስተ፡ እየሩሳሌም፡ ወኢይተልዉ፡ እንከ፡ ኅሊና፡ ልቦሙ፡ እኩየ።
18 ወበውእቱ፡ መዋዕል፡ ይመጽኡ፡ ቤተ፡ ይሁዳ፡ ምስለ፡ ቤተ፡ እስራኤል፡ ወኢመጽኢ፡ ኅቡረ፡ እምብሔረ፡ ሰሜን።
19 ወአነሂ፡ እቤ፡ ይኩን፡ እግዚኦ፡ እሰመ፡ አዘዝከ፡ ላዕለ፡ ውሉዶሙ፡ እሁበክሙ፡ ምድረ፡ ርስት፡ ርስተ፡ እግዚአብሔር፡ ዘኵሉ፡ ይመልክ፡ ዘአሕዛብ፡ ወትትመየጥ፡ ኀቤየ።
20 ወባሕቱ፡ ከመ፡ ተአልዎ፡ ብእሲት፡ ለምታ፡ ከማሁ፡ ክህዱኒ፡ ቤተ፡ እስራኤል፡ ይቤ፡ እግዚአብሔር።
21 ቃል፡ በአዕላፍ፡ ተሰምዐ፡ ብካየ፡ ገዓሮሙ፡ ለደቂቀ፡ እስራኤል፡ እስመ፡ ዐመፁኒ፡ በፍናዊሆሙ፡ ወረስዕዎ፡ ለአምላኮሙ፡ ለቅድሶሙ።
22 ተመየጡ፡ ደቂቅ፡ ዓላውያን፡ ወእፌውሰክሙ፡ ቊስለክሙ፡ ናሁ፡ ንሕነ፡ ንከውን፡ አግብርቲከ፡ እስመ፡ አንተ፡ አምላክነ።
23 በአማን፡ ሐሰት፡ ውእቱ፡ አውግሪነ፡ ወኃይለ፡ አድባሩነ፡ ወዳዕሙ፡ ኀበ፡ እግዚአብሔር፡ አምላክነ፡ መድኃኒተ፡ እስራኤል።
24 ወሐፍረቶሙ፡ አኅለቀት፡ ተግባሮሙ፡ ለአበዊነ፡ እምንእሶሙ፡ አባግዒሆሙ፡ ወአልሕምቲሆሙ፡ ወአዋልዲሆሙ፡ ወደቂቆሙ።
35 ወኖምነ፡ በኀፍረትነ፡ ወተከድነ፡ በሐሳርነ፡ እስመ፡ አበስነ፡ በቅድመ፡ እግዘዚአብሔር፡ አምላክነ፡ ንሕነ፡ ወአበዊነ፡ እምንእስነ፡ እስከ፡ ዛቲ፡ ዕለት፡ ወኢሰማዕነ፡ ቃለ፡ እግዚአብሔር፡ አምላክነ።
=== chapter 4 ===
[Chapter 4]
1 ለእመ፡ ገብአ፡ እስራኤል፡ ኀቤየ፡ ይቤ፡ እግዚአብሔር፡ ተመየጥ፡ ለእመ፡ አዕተተ፡ ርኵስ፡ እምአፉሁ፡ ወፈርኀ፡ እምገጽየ።
2 ወመሐለ፡ ሕያው፡ እግዚአብሔር፡ በርትዕ፡ ወፍትሕ፡ ወጽድቅ፡ ወይትባረኩ፡ ቦቱ፡ አሕዛብ፡ ወይሴብሑ፡ ቦቱ፡ እስራኤል፡ ዘእግዚአብሔር።
3 እስመ፡ ከመዝ፡ ይቤ፡ እግዚአብሔር፡ ለእደወ፡ ይሁዳ፡ እለ፡ ይነብሩ፡ ኢየሩሳሌም፡ ሐድሱ፡ ልበክሙ፡ ሐድሶተ፡ ወኢትዝርኡ፡ ውስተ፡ ሦክ።
4 ወተገዘሩ፡ ለአምላክክሙ፡ ወግዘሩ፡ እከዮ፡ ለልብክሙ፡ እደወ፡ ይሁዳ፡ እለ፡ ትነብሩ፡ ኢሩሳሌም፡ ወኢይፃእ፡ ከመ፡ እሳት፡ መዓትየ፡ ወትነድድ፡ ወአልቦ፡ ዘያጠፍእ፡ እምገጸ፡ ጌጋየ፡ እከይክሙ።
5 ዜንወው፡ በይሁዳ፡ ወአስምዑ፡ በኢየሩሳሌም፡ ወበሉ፡ ተአመሩ፡ በቃለ፡ ቀርን፡ ወንፍኡ፡ ቀርነ፡ ውስተ፡ ብሔር፡ ወስብኩ፡ ምሕላ፡ ዐቢየ፡ ተጋብኡ፡ ወባኡ፡ አህጉረ፡ ጥቅም።
6 ወንሥኡ፡ ጽዮን፡ ወአምሥጡ፡ ውስተ፡ ጽዮን፡ ሩጹ፡ ወኢትቁሙ፡ እስመ፡ ኢመጽአ፡ እኪተ፡ እምደቡብ፡ ወዐቢየ፡ ቅጥቃጤ።
7 አንበሳ፡ መጽአ፡ እምግቡ፡ ወሠረዎሙ፡ ለአሕዛብ፡ ተንሥአ፡ ወወጽአ፡ እምድሩ፡ ከመ፡ ያማስን፡ ብሔረከ፡ ወያንሕሎን፡ ለአሕጉሪከ፡ ከመ፡ አልቦ፡ ዘይነብር፡ ውስቴቶን።
8 ወበበይነ፡ ዝንቱ፡ ቅንቱ፡ ሠቀ፡ ብክዩ፡ ወአውይዉ፡ እስመ፡ ኢተመይጠ፡ መዓተ፡ እግዚአብሔር፡ ወመቅሠፍቱ፡ እምኔክሙ።
9 ወውእተ፡ አሚረ፡ ይቤ፡ እግዚአብሔር፡ ይጠፍእ፡ ልበ፡ ንጉሥ፡ ወቦሙ፡ ለመላእክት።
10 ወእቤ፡ እግዚኦ፡ በከኑ፡ ትየውሆሙ፡ ለአሕዛብ፡ ወለኢየሩሳሌም፡ ወእንዘ፡ ትብል፡ ሰላም፡ ሰላም፡ ወትረክቦሙ፡ በመጥባሕት፡ እስከ፡ ነፍሶሙ።
11 ይእተ፡ አሚረ፡ ይቤልዎሙ፡ ለዝ፡ ሕዝብ፡ እለ፡ ኢየሩሳሌም፡ ጋኔን፡ መስሕት፡ ውስተ፡ ገዳመ፡ ፍኖተ፡ ወለተ፡ ሕዝብየ፡ አኮ፡ ለዘሪው፡ ወአኮ፡ ለአስተጋብኦ።
12 ዳዕሙ፡ ጋኔን፡ መስሕት፡ ይመጽእ፡ ወይእዜኒ፡ አነ፡ እነግር፡ ቅስትየ፡ ሎሙ።
13 ናሁ፡ ከመ፡ ደመና፡ ወከመ፡ ዓውሎ፡ ሠረገላሁ፡ ይበድሩ፡ እም፡ አንስርተ፡ ሰማይ፡ አፍራሲሁ፡ አሌ፡ ለነ፡ እስመ፡ ኀሣርነ።
14 ኅፅቢ፡ እከየ፡ ልብኪ፡ ኢየሩሳሌም፡ ከመ፡ ትድኀኒ፡ እሰከ፡ ማዕዜኑ፡ የኀድር፡ ላዕሌኪ፡ ኀሊና፡ ዘየኀሥረኪ።
15 እስመ፡ መጽአ፡ ቃል፡ ዘይዜንወኪ፡ እምዳን፡ ወተሰምዕ፡ ሕማም፡ እምአድባረ፡ ኤፍሬም።
16 አዘክሩ፡ ለአሕዛብ፡ ወአስምዑ፡ ላዕለ፡ አሕዛብ፡ ኢየሩሳሌም፡ ወዜንዉ፡ መጽኡ፡ እምርኁቅ፡ ብሔር፡ ወይሁቡ፡ ቃሎሙ፡ ውስተ፡ አህጉረ፡ ይሁዳ።
17 ከመ፡ መዓቅበ፡ ሐቅለ፡ ዘርዕ፡ ኮኑ፡ ላዕሌሃ፡ እምዓውዳ።
18 እስመ፡ ተሀየይክኒ፡ ይቤ፡ እግዚአብሔር፡ ፍነናውኪ፡ ወምግባርኪ፡ ገብረ፡ ዘንተ፡ ወዝንቱ፡ ኵሉ፡ በእከይኪ፡ እስመ፡ መሪር፡ ረከባ፡ ለነፍስኪ።
19 ከርሥየ፡ ወሥርወ፡ ልብየ፡ አሕመመኒ፡ ወነፍስየ፡ ተአነብዝ፡ ወተአይስ፡ ወልብየኒ፡ ኢያረምም፡ እስመ፡ ሰምዐት፡ ነፍስየ፡ ቃለ፡ ቀርን፡ ወወውዓ፡ ቀትል።
20 ወሕርትምና፡ ቅጥቃጤ፡ በዲበ፡ ቅጥቃጤ፡ ተጸውዐ፡ እስመ፡ ኀሥረት፡ ኵላ፡ ምድረ፡ ግብተ፡ ወሐርተመ፡ ተዓይንየ።
21 እስከ፡ ማዕዜኑ፡ እሬኢ፡ ትእምርተ፡ ወእሰምዕ፡ ቀለ፡ ቀርን።
22 እስመ፡ ኢያእመሩኒ፡ መኳንንተ፡ ሕዝብየ፡ ደቂቅ፡ አብዳን፡ እሙንቱ፡ ወኢያእምሩ፡ ጠቢባን፡ እሙንቱ፡ እስመ፡ ኢያእመሩ፡ ገቢረ፡ ሠናይ።
23 ነጸርኩ፡ ምድረ፡ አልቦ፡ ወኢምንትኒ፡ ወአንቃዕኩ፡ ውስተ፡ ሰማይ፡ ወኢሀሎ፡ በብርሃን።
24 ወርኢኩ፡ አድባር፡ ወናሁ፡ ይርዕዱ፡ ወኵሉ፡ አውግር፡ ያንቀልቅሉ።
25 ነጸርኩ፡ ወአልቦ፡ ሰብእ፡ ወደንገጹ፡ አዕዋፈ፡ ሰማይ፡ ወነጸርኩ፡ ወርኢክዎ፡ ለቀርሜሎስ፡ መዝበረ፡ ወኵሉ፡ አህጉር፡ ውዕዩ፡ በእሳት፡ እምገጸ፡ እግዚአብሔር፡ እምገጸ፡ መቅሠፍተ፡ መዓቱ።
26 በለበለበለበ።
27 እስመ፡ ከመዝ፡ ይቤ፡ እግዚአብሔር፡ በድወ፡ ትኩን፡ ኵላ፡ ምድር፡ ወኢይገብር፡ ማኅለቅተ፡ ለእሉ።
28 በእንተ፡ ዝንተ፡ ትላሁ፡ ምድር፡ ወይጸልም፡ ሰማይ፡ በላዕሉ፡ እስመ፡ ነበብኩ፡ ወኢይኔሥሕ፡ አውረድክዋ፡ ወኢይትመየጥ፡ መዓትይ፡ እምኔሃ።
29 እምነ፡ ውውዓሆሙ፡ ለሰብዓ፡ አፍራስ፡ ወእለ፡ ወሰቁ፡ አቅስስቲሆሙ፡ ወተጉ፡ ኵሉ፡ በሐውርት፡ ወተጸወኑ፡ ውስተ፡ በአታት፡ ወተኀብኡ፡ ውስተ፡ ዖም፡ ወዐርጉ፡ ውስተ፡ ጸልዋት፡ ወዐርቁ፡ ኵሉ፡ አህጉር፡ ወአልቦ፡ ዘይነብር፡ ውስቴቶሙ፡ ሰብእ።
30 ምንት፡ ተሬስዪ፡ አንቲ፡ እመሂ፡ ለበስኪ፡ ለየ፡ ወተሠርገውኪ፡ ሠርጐ፡ ወርቅ፡ ወእመኒ፡ ተኵህልኪ፡ ኵህለ፡ አዕይንተኪ፡ አእምሪ፡ ከመ፡ ከንቶ፡ ተሠርገውኪ፡ ወከንቱ፡ ላህይኪ፡ ጸልዑኪ፡ መሐዛንኪ፡ ወየኀሥሥዋ፡ ለነፍስኪ፡ እስመ፡ ቃሉ፡ ዘይጽዕለኪ፡ ወሰማዕኩ፡ ገዓረኪ፡ ከመእንተ፡ ትውልድ፡ በኵራ፡ ቃለ፡ ወለተ፡ ጽዮን፡ ደክማመ፡ ወትሰፍሕ፡ እደዊሃ፡ አሌ፡ ሊተ፡ እስመ፡ ኀልቀት፡ ነፍስየ፡ በእንተ፡ እለ፡ ተቀትሉ።
=== chapter 5 ===
[Chapter 5]
1 ሩጹ፡ ውስተ፡ ፍናዊሃ፡ ለኢየሩሳሌም፡ ወርእዩ፡ ወአእምሩ፡ ወኅሥሡ፡ ውስተ፡ መርኅባ።
2 ወእሣሃሎሙ፡ ይቤ፡ እግዚአብሔር፡ እመይቤሉ፡ ሕያው፡ እግዚአብሔር፡ ዳዕሙ፡ በሐሰት፡ ይምሕሉ።
3 እግዚኦ፡ አዕይንቲከሰ፡ አኮኑ፡ ለሃይማኖት፡ ቀሠፍኮሙ፡ ወኢሐሙ፡ አኅለቆሙሂ፡ ወአበዩ፡ ተምህሮ፡ ወአጽንዑ፡ ገጾሙ፡ እምኰኵሕ፡ ወኢፈቀዱ፡ ይትመየጡ።
4 ወአነሂ፡ እቤ፡ አኮኑ፡ ነዳያን፡ እሙንቱ፡ እስመ፡ ስዕኑ፡ አእምሮ፡ ፍኖተ፡ እግዚአብሔር፡ ወፍትሐ፡ አምላኮሙ፡ አሐውር፡ ኀበ፡ ዐቢያን፡ ወእነግሮሙ።
5 ወባሕቱ፡ እሙንቱ፡ ቀጥቀጡ፡ ኅቡረ፡ አርዑተ፡ ወበተኩ፡ ማዕሠረ።
6 ወበእንተ፡ ዝንቱ፡ መጽኦሙ፡ አንበሳ፡ እምውስተ፡ ዖም፡ ወተኵላእምገዳም፡ ይሤርዎሙ፡ ወነምርሂ፡ ተግሀ፡ ላዕለ፡ አህጉሪሆሙ፡ ኵሉ፡ ዘወጽአ፡ እምኔሆሙ፡ ይትመሰጥ፡ እስመ፡ በዝኀ፡ ጌጋዮሙ፡ ወጸንዑ፡ በጣኦቶሙ።
7 በአይ፡ እላንቱ፡ እሣሀሎሙ፡ ለደቂቅኪ፡ እለ፡ ኀደጉኒ፡ ወይምሕሉ፡ በእለኢኮኑ፡ አማልክተ፡ ወወአጽገብክዎሙ፡ ወዘመዉ፡ ወኀደሩ፡ ቤተ፡ ዘማት።
8 አፍራሰ፡ ዘማውያነ፡ ኮኑ፡ አሐዱ፡ አሐዱ፡ ያረኵስ፡ ብእሲተ፡ ቢጹ።
9 በዘሂ፡ ኢትትቤቀልሁ፡ ነፍስየ።
10 ዕርጉ፡ ውስተ፡ አሕቃላቲሁሃ፡ ወአማሰኑ፡ ወኢትግበሩ፡ ማኅለቅትተ፡ ወአሰሰሉ፡ ትራፋቲሃ፡ እስመ፡ ኢኮኑ፡ ዘእግዚአብሔር፡ እሙንቱ፡ ወአትረፉ፡ ምስማካቲሃ፡ እሰመ፡ ዘእግዚአብሔር፡ እሙንቱ።
11 እስመ፡ ዐሊዎ፡ ዐለዉኒ፡ ቤተ፡ እስራኤል፡ ወቤተ፡ ይሁዳ፡ ወክህዱኒ፡ ይቤ፡ እግዚአብሔር።
12 ወሐሰዉ፡ ቤተ፡ ይሁዳ፡ በእግዚአብሔር፡ ወይቤሉ፡ ኢኮነ፡ ከመዝ፡ ወኢይረክበነ፡ እኵይ፡ ወኢይመጽአነ፡ መጥባሕት፡ ወረኀብ።
13 ነቢያትክሙኒ፡ ነፋሳት፡ እሙንቱ፡ ወአልቦ፡ ቃለ፡ እግዚአብሔር፡ ላዕሌሆሙ፡ ወከመዝ፡ ይከውን፡ በበይነዝ።
14 ከመዝ፡ ይቤ፡ እግዚአብሔር፡ ዘኵሎ፡ ይመልክ፡ እስመ፡ ይቤሉ፡ ናሆ፡ አነ፡ ወደይኩ፡ ቃልየ፡ ውስተ፡ አፉከ፡ እሳተ፡ ወዝሕዝብ፡ ዕፀው፡ ወትበልዖሙ።
15 ናሁ፡ አነ፡ አመጽእ፡ ላዕሌክሙ፡ ሕዝበ፡ ዘእምርኁቅ፡ ቤተ፡ እስራኤል፡ ይቤ፡ እግዚአብሔር፡ ወሕዝብ፡ እኩይ፡ ውእቱ፡ ሕዝብ፡ ዘኢትአምር፡ ልሳኖ፡ ወኢትሰምዕ፡ ቃሎ።
16 ወከናፍሪሁ፡ ከመ፡ መቃብር፡ ክሡት።
17 ወኵሎሙ፡ ጽኑዓን፡ ይበልዑ፡ ማእረረከ፡ ወእክለከ፡ ወይበልዑ፡ አባግዒከ፡ ወአልሕምቲከ፡ ወይበልዑ፡ ወይነከ፡ ወበለሰከኒ፡ ወዘይተከኒ፡ ወጥከይድዎን፡ ለአህጉሪከ፡ ጽኑዓት፡ በኲናት፡ እለ፡ ቦቱ፡ ትትአመኑ።
18 ወይከውን፡ ይእተ፡ አሚረ፡ ይቤ፡ እግዚአብሔር፡ አምላክከ፡ ኢይሬስየክሙ፡ ማኅለቅተ።
19 ወእምዝ፡ ሶበ፡ ይብሉ፡ በእንተ፡ ምንት፡ ገብረ፡ እግዚአብሔር፡ አምላክነ፡ ወዘንተ፡ ኵሎ፡ ላዕሌነ፡ ወትብሎሙ፡ እስመ፡ ኀደግሙኒ፡ ወትቀነይክሙ፡ ለአማልክተ፡ ነኪር፡ በብሔርክሙ፡ ከማሁ፡ ትትቀነዩ፡ ለፀር፡ በብሔረ፡ ባዕድ፡ ዘኢኮነ፡ ለክሙ።
20 ዜንውዎ፡ ዘንተ፡ ለቤተ፡ ያዕቆብ፡ ወይስምዕዎ፡ ቤተ፡ ይሁዳ።
21 ሰምዑ፡ ዘንተ፡ ሕዝብ፡ ዘአልቦ፡ ልብ፡ አዕይንት፡ ቦሙ፡ ኢይሬእዩ፡ እዝን፡ ቦሙ፡ ወኢይሰምዑ።
22 ቦኑ፡ ኪያየ፡ ኢትፍሩሁ፡ ይቤ፡ እግዚአብሔር፡ አው፡ ቅድመ፡ ገጽየ፡ ኢትደንግፁኑ፡ ሠራዕኩ፡ ኆፃ፡ ወሰነ፡ ለባሕር፡ ሥርዐተ፡ ዘለዓለም፡ ወኢይትትዐደው፡ ወኢይትነኀናኅ።
23 ወኮኖሙ፡ ለዝ፡ ሕዝብ፡ ልብ፡ ዘኢይሰምዕ፡ ወክህዱኒ፡ ወተመይጡ፡ ወሖሩ።
24 ወኢይብሉ፡ በልቦሙ፡ ንፈርሆ፡ ለእግዚአብሔር፡ አምላክነ፡ ዘይሁበነ፡ ዝናመ፡ ተወን፡ ወመፀው፡ ወይፌጽም፡ ለነ፡ በበዕድሜሁ፡ ወማዕረረ፡ ዘበሕጉ፡ ዐቀበ፡ ለነ።
25 ኀጢአተክሙ፡ ከልዐ፡ እሎንተ፡ ወጌጋይክሙ፡ አርሐቀ፡ ሠናያተ፡ እምኔክሙ።
26 እስመ፡ ተረክቡ፡ ውስተ፡ ሕዝብ፡ ዓማፅያን፡ ወሠርዑ፡ መሣግረ፡ ይቅትሉ፡ ሰብአ፡ ወየአኀዙ።
27 ከመ፡ ዔረግ፡ ዘምሉዕ፡ አዕዋፈ፡ ከማሁ፡ አብያቲሆሙኒ፡ ምሉዕ፡ ጒህሉትተ፡ በበይነዝ፡ ዐብዩሂ፡ ወብዕሉ፡ ወገዝፉ።
28 ወተዐደው፡ ነገርየ፡ ወዐለዉ፡ ፈትሐ፡ ወኢፈትሑ፡ ለእጓለ፡ ማውታ፡ ወኢኰነኑ፡ ኵነኔ፡ እቤር።
29 በዘሂ፡ ኢይኴንንሁ፡ ይቤ፡ እግዚአብሔር፡ ወኢትትቤቀሎሙኑ፡ ነፍስየ፡ ለሕዝብየ።
30 ወዘከመዝ፡ ድንጋፄ፡ ወነሦጣጥ፡ መጽአ፡ ውስተ፡ ብሔር።
31 ነብያትኒ፡ ይትኔበዩ፡ ሐሰተ፡ ወካህናትኒ፡ ይጠፍኡ፡ እደዊሆሙ፡ ወሕዝብኒ፡ ዘንተ፡ አፍቀሩ፡ ወምንተ፡ ይሬስዩ፡ እምድኅረ፡ ዝንቱ።
=== chapter 6 ===
[Chapter 6]
1 ጽንዑ፡ ደቂቀ፡ ብንያም፡ ዘማእከለ፡ ኢየሩሳሌም፡ ወበቴቁሔ፡ ንፍኡ፡ ቀርነ፡ ወንሥኡ፡ ትእምርተ፡ በቤተ፡ ካሬም፡ እስመ፡ ሐወጸት፡ እኪተ፡ እምነ፡ መስዕ፡ ወይከውን፡ ዐቢይ፡ ቅጥቃጤ።
2 ወያሐሥረኪ፡ ወለተ፡ ጽዮን፡ ልህደ፡ ተመሰልኪ፡ ወለተ፡ ጽዮን።
3 ወይመጽኡ፡ ላዕሌሃ፡ ኖሎት፡ ወመራዕይ፡ ወተክሉ፡ ምጽላሎሙ፡ በዐውዳ፡ ወርእዩ፡ ኵሎሙ፡ በእደዊሆሙ።
4 ቀደሱ፡ ቀትለ፡ ላዕሌሃ፡ ወይቤሉተንሥኡ፡ ንዕርግ፡ ዲቤሃ፡ ቀትረ፡ አሌ፡ ለነ፡ እስመ፡ ቈልቈለ፡ ፀሓይ፡ ወሐለፈ፡ ጽላሎተ፡ መዓልት።
5 ተንሥኡ፡ ንዕርግ፡ በሌሊት፡ ወናማስን፡ መሠረታቲሃ።
6 እስመ፡ ከመዝ፡ ይቤ፡ እግዚአብሔር፡ ኀያልግዝሙ፡ ዕፁዊሃ፡ ወከዐዉ፡ ኀይለ፡ ላዕለ፡ ኢየሩሳሌም፡ አህጉረ፡ ሐሰት፡ ወኵትዕግልት፡ ውስቴታ።
7 ከመ፡ ቊረ፡ አዘቅተ፡ ማይ፡ ከማሁ፡ ቆሪር፡ እከያ፡ ዓመፃ፡ ወግፍ፡ ተሰምዐ፡ በውስቲታ።
8 ወበመቅሠፍት፡ ትትቀሠፍ፡ ኢየሩሳሌም፡ ከመ፡ ትርኀቅ፡ ነፍስየ፡ እምኔሃ፡ ወእሬስየኪ፡ ምድረ፡ በድው፡ ዘአልቦ፡ ዘይነብሮ።
9 እስመ፡ ከመ፡ ዝ፡ ይቤ፡ እግዚአብሔር፡ ጸባዖት፡ ተቅራመ፡ ዘይትቄረምዎሙ፡ ከመ፡ ወይን፡ ለተረፈ፡ እስራኤል፡ ሚጥ፡ እዴከ፡ ከመ፡ ዘይቀሥም፡ ውስተ፡ ከረቦ።
10 ለመኑ፡ እነድር፡ ዘአሰምዕ፡ ወኢይሰምዑኒ፡ ናሁ፡ ጽሉል፡ ልቦሙ፡ ወእዘኒሆሙ፡ ወኦይክሉ፡ ሰሚዐ፡ ወናሁ፡ ቃለ፡ እግዚአብሄር፡ ኮኖሙ፡ ለጽዕለት፡ እስመ፡ ኢፈ፡ ፈቀዱ፡ ይስምዕዎ።
11 ወመላዕክዎሙ፡ መዓትየ፡ ወአሕለቅዎሙ፡ ወዕክዕዎ፡ ላዕለ፡ ሕፃናት፡ ኅቡረ፡ በአፍአ፡ ወላዕለ፡ ማኅበረ፡ ወራዙት፡ ኅቡረ፡ እስመ፡ ያሰግሩ፡ ብእሴ፡ ምስለ፡ ብእሲቱ፡ ወልሂቅ፡ ምስለ፡ ወሬዛ።
12 ወይትዌለጥ፡ አብያቲሆሙ፡ ለነኪራን፡ ገርሕቶሙ፡ ወአንስቶመሙኒ፡ ኅቡረ፡ እስመ፡ አንሥአ፡ እደውየ፡ ላዕለ፡ እለ፡ ይነብሩ፡ ውስተ፡ ዛቲ፡ ምድር፡ ይቤ፡ እግዚአብሔር።
13 እስመ፡ ንኡሶሙኒ፡ ወዐቢዮሙኒ፡ ገብሩ፡ ኀጢአተ፡ እምካህን፡ እስከ፡ ሐሳዊ፡ ኒይ፡ ኵሎሙ፡ ገብሩ፡ ሐሰተ።
14 ወይፌውሱ፡ ቅጥቃጠየሆሙ፡ ለሕዝብየ፡ ወይቤሉ፡ ሰላም፡ ሰላም፡ ወአልቦ፡ ሰላም።
15 ወተሐፍሩ፡ ወረኵሰ፡ ገብሩ፡ ወሐፊረኒ፡ ኢየኀፍሩ፡ ወኢየአምሩ፡ ኀሣሮሙ፡ በእንተ፡ ዝንቱ፡ ይወድቁ፡ ወአመእሔውጾሙ፡ ይደይክሙ፡ ይቤ፡ እግዚአብሔር።
16 ከመዝ፡ ይቤ፡ እግዚአብሔር፡ ቁሙ፡ ውስተ፡ ፍና፡ ወርእዩ፡ ወተሰአሉ፡ ፍኖተ፡ ቃለ፡ እግዚአብሄር፡ ዘለዓለም፡ ወአእምሩ፡ አይ፡ ፍኖት፡ ሠናይ፡ ወሑሩ፡ ባቲ፡ ወትረክቡ፡ መድኃኒተ፡ ነፍስክሙ፡ ወይቤሊ፡ ኢነሐውር።
17 ወሤምኩ፡ ላዕሌሆሙ፡ ሰብአ፡ ዐይን፡ ወሰምዑ፡ ቃለ፡ ቀርን፡ ወይቤሉ፡ ኢንሰምዕ።
18 በእንተ፡ ዝንቱ፡ ስምዑ፡ አሕዛብ፡ ወኖሎት፡ መርዕይ።
19 ወስምዒ፡ ምድር፡ ናሁ፡ አነ፡ አመጽእ፡ እኪተ፡ ላዕለ፡ ሕዝብ፡ በከመ፡ ፍሬ፡ ምግባሮሙ፡ እስመ፡ ዚያጸምዑ፡ ነገር፡ ወዐለዉ፡ ሕግየ፡ ወመነኑ፡ ኪያየ።
20 ለምንት፡ ታመጽኡ፡ ሊተ፡ ስሂነ፡ እምሳባ፡ ወቀናንሞስ፡ ሠናየ፡ እምቅሑቅ፡ ብሔር፡ መሥዋዕቲክሙኒ፡ ኢኮነ፡ ኅሩየ፡ ወቊርባንክሙኒ፡ ኢይኤድመኒ፡ በእንተ፡ ዘዝንቱ።
21 በእንተ፡ ዝንቱ፡ ይቤ፡ እግዚአብሔር፡ ወይደውዩ፡ ውስቴታ፡ አበው፡ ምስለ፡ ደቂቆሙ፡ ኅቡረ፡ ወይትሀጎሉ፡ ጎርምስለ፡ ቢጾሙ።
22 ከመዝ፡ ይቤ፡ እግዚአብሔር፡ ናሁ፡ ሕዝብ፡ ይመጽኡ፡ እምሰሜን፡ ወሕዝብ፡ ዐቢይ፡ ወነገሥትኒ፡ ብዙኃን፡ ይትነሥኡ፡ እምአጽናፈ፡ ምድር።
23 ወጥፀውሩ፡ ቀስተ፡ ወኲናተ፡ ወይነድፉ፡ ወኢምህኩ፡ ወውውዓሆሙ፡ ከመ፡ ድንፀ፡ ማዕበለ፡ ባሕር፡ በአፍራስ፡ ወበሠረገላት፡ ይፄዐኑ።
24 ወሰሚዐነ፡ ውውዓሆሙ፡ ደክማ፡ እደዊነ፡ ወሐዘነ፡ ምንዳቤ፡ ወሕማም፡ ከመእንተ፡ ትውልድ።
25 ኢትፃፁ፡ ሐቅለ፡ ወኢትሑሩ፡ መንገደ፡ እስመ፡ አገተክሙ፡ ኲናት፡ ፀርክሙ።
26 አዋልደ፡ ሕዝብየ፡ ቅንታ፡ ሠቀ፡ ወደያ፡ ሐመደ፡ ውስተ፡ ርእስክን፡ ወካህዋ፡ ላሀ፡ ፍቁር፡ እስመ፡ ድብተ፡ ይነጽአክሙ፡ ኀሠር።
27 ወመከራ፡ ረሰይኩከ፡ በሕዝብየ፡ ምኩራን፡ ወተአምር፡ ሶበ፡ አመከርከ፡ ፍኖቶሙ።
28 ኵሎሙ፡ ጽሙማን፡ እሙንቱ፡ ወየሐውሩ፡ መብእሰ፡ ከመ፡ ብርት፡ ሐፂን፡ ኵሎሙ፡ ዝኁላነ።
29 ደልማ፡ ዘያመበኵሕ፡ ምብኳሀ፡ እሳት፡ ወተክዕ፡ አረርኒ፡ ነሃ፡ ነሀቦሙ፡ ለእከዮሙ፡ ኢፀርየ፡ ወኢተመስወ፡ እስመ፡ መነኖሙ፡ እግዚአብሔር።
=== chapter 7 ===
[Chapter 7]
1 ቃል፡ ዘኮነ፡ እም፡ ኀበ፡ እግዚአብሔር፡ ኀበ፡ ኤርማያስ።
2 ወየወቤ፡ ቁሙ፡ ውስተ፡ አንቀጸ፡ ቤተ፡ እግዚአብሔር፡ ወአንብብ፡ ህየ፡ ዘንተ፡ ነገረ፡ ወበል፡ ስምዑ፡ ቃለ፡ እግዚአብሔር፡ ኵሉ፡ ይሁዳ፡ እለ፡ ትበውኡ፡ ውስተ፡ አንቀጽ፡ ውስቴታ፡ ትሰግዱ፡ ለእግዚአብሔር።
3 ከመዝ፡ ይቤ፡ እግዚአብሔር፡ ገያል፡ አማላከ፡ እስራኤል፡ ወአኀድር፡ ኀቤክሙ፡ ውስተ፡ ዝንቱ፡ ቤት።
4 ኢትትአመኑ፡ ርእሰክሙ፡ በነገረ፡ ሐሰት፡ እንዘ፡ ትብሉ፡ ቤተ፡ እግዚአብሔር፡ ንሕነ፡ አ›ውእቱ፡ እስመ፡ ኢይበቊአክሙ።
5 ለእመ፡ አርታእክ፡ ፍናዊክሙ፡ ወምግባሪክሙኒ፡ ርቱዐ፡ ለእመ፡ ገበርክሙ፡ ፍትሐ፡ ማእከለ፡ ብእሲ፡ ወማእከለ፡ ቢፁ።
6 ወኢተአገልክሙ፡ ዕቢረ፡ ወእጓለ፡ ማውታ፡ ወፈላሴ፡ ወኢከዐውክሙ፡ ደመ፡ ንጹሐ፡ ውስተ፡ ዝንቱ፡ ቤት፡ ወኢሖርክሙ፡ ወኢተለውክሙ፡ አማልክተ፡ ነኪር፡ ለእኪትክሙ።
7 አነብር፡ ውስተ፡ ብሔርክሙ፡ ውስተ፡ ምድር፡ እንተ፡ ወሀብክዎሙ፡ ለአበዊክሙ፡ እምዓለም፡ እስከ፡ ዓለም።
8 እመሰ፡ ተወከልክሙ፡ ላዕለ፡ ነገረ፡ ሐሰት፡ ዘለምንትሂ፡ ኢይበቊዐክሙ።
9 ወቀተልክሙ፡ ወሰረቅሙሂ፡ ወዘመውክሙ፡ ወመሐልክሙ፡ በኣመፃ፡ ወአጠንክሙ፡ ለበዓል፡ ወሖርክሙ፡ ወተለውክሙ፡ አማልክተ፡ ነኪር፡ ዘኢተአምሩ፡ በዝ፡ ይረክበክሙ፡ እኩይ።
10 ወመጻእክሙ፡ ወቆምክሙ፡ ቅድሜየ፡ ውስተ፡ ዝንቱ፡ ቤት፡ ኀበ፡ ተሰምየ፡ ውስቴቱበ፡ ስምየ፡ ህየ፡ ወትቤሉ፡ ሥልጣን፡ ብነ፡ ለገቢረ፡ ኵሉ፡ ርኵስ።
11 ቦኑ፡ በአተ፡ ፈያ፡ ውእቱ፡ ቤትየ፡ ኀበ፡ ተሰምየ፡ ስምየ፡ ውስቴቱ፡ ህየ፡ ወናሁ፡ ርኢክሙ፡ አንትሙ፡ አዕይንቲክሙ፡ ወአነሂ፡ ርኢኩ፡ ይቤ፡ እግዚአብሔር።
12 ሑሩ፡ ወርእዩ፡ ውስተ፡ ቤትየ፡ አሴሎ፡ ኀበ፡ ኀደረ፡ ስምየ፡ ህየ፡ ቀዲሙ፡ ወርእዩ፡ ዘገበርክዎ፡ ሎቱ፡ እምገጸ፡ እከዮሙ፡ ለሕዝብ፡ እስራኤል።
13 ወይእዜኒ፡ እስመ፡ ዘንተ፡ ኵሎ፡ ዘገበርክሙ፡ ይቤ፡ እግዚአብሔር፡ ነበብኩክሙ፡ ወኢሰማዕክሙኒ፡ ጸዋዕኩክሙ፡ ወኢያውሣእክሙኒ።
14 ወአነሂ፡ እሬስዮ፡ ለዝንቱ፡ ቤት፡ ኀበ፡ ተሰምየ፡ ስምየ፡ ውስቴቱ፡ ዘቦቱ፡ ትትዌከሉ፡ አንትሙ፡ ወብሔረኒ፡ ዘወሀብክዎሙ፡ ለአበዊክሙ፡ በከመ፡ ረሰይክዋ፡ ለሴሎ።
15 ወእገድፈክሙ፡ እቅድመ፡ ገጽየ፡ ከመ፡ ገደፍክዎሙ፡ ለአኀዊክሙ፡ ለኵሉ፡ ዘርዐ፡ ኤፍሬም።
16 ወይቤለኒ፡ እግዚአብሔር፡ አንተሂ፡ ኢትጼሊ፡ በእንተ፡ ዝንቱ፡ ሕዝብ፡ ወኢታስተበቊዕ፡ ከመ፡ እሣሃሎሙ፡ ወትጸሊ።
17 ኢትሬኢኑ፡ ዘገብሩ፡ በአህጉረ፡ ይሁዳ፡ ወበፍናዊሃ፡ ለኢየሩሳሌም።
18 ደቂቆሙ፡ ያመጽኡ፡ ዕፀወ፡ ወአበዊሆሙኒ፡ ያነድዱ፡ እሳተ፡ ወአንስቲያሆሙኒ፡ የሐርፃ፡ ከመ፡ ይገብራ፡ ዳፍንተ፡ ለንግሥተ፡ ሰማይ።
19 ወሞፃሕት፡ ያወጽሑ፡ ለአምልክቲሆሙ፡ ከመ፡ ያምዕዑኒ፡ ይቤ፡ እግዚአብሔር፡ ኪያየ፡ ያምዕዑኒ፡ አኮኑ፡ ለርእሶሙ፡ ከመ፡ ይትኀፈር፡ ገጾሙ።
20 ወባሕቱ፡ ወመቅሠፍትየ፡ ተክዕወ፡ ላዕለ፡ ዝ፡ ብሔር፡ ላዕለ፡ ሰብእ፡ ወላዕለ፡ እንስሳ፡ ወላዕለ፡ ዕፀው፡ ዘገዳም፡ ወላዕ፡ ኵሉ፡ ፍሬተ፡ ምድር፡ ትነድድ፡ ወኢትጠፍዕ።
21 ከመዝ፡ ይቤ፡ እግዚአብሔር፡ ጸባዖት፡ አምላከ፡ እስራኤል፡ አስተጋብኡ፡ መባዓክሙ፡ ላዕለ፡ ምሥዋዒክ፡ ወብልዑ፡ ሥጋ፡ እስመ፡ ኢይቤሉ።
=== chapter 8 ===
[Chapter 8]
1 ይእቲ፡ አሚረ፡ ይ፡ እግዚአብሔር፡ ያወጽኡ፡ አዕጽምተ፡ ነገሥተ፡ ይሁዳ፡ ወአዕጽምጸ፡ መላእክቲሆሙ፡ ወአዕጽምተ፡ ነቢያጽ፡ አዕጽተ፡ ካህናት፡ ወአዕጽምቲሆሙ፡ ለእለ፡ ይነብሩ፡ ውስተ፡ ኢየሩሳሌም፡ እምነ፡ መቃብሪሆሙ።
2 ወይሠጥዎ፡ ለፀሓይ፡ ወለወርኅ፡ ወለኲሉ፡ ከዋክብት፡ ወለኩሉ፡ ሠርጓተ፡ ሰማይ፡ ዘአፍቀሩ፡ ወዘሎሙ፡ ተቀንዩ፡ ወዘተለዉ፡ ደወኅሬሆሙ፡ ወዘፈቀዱ፡ ኢይበክይዎሙ፡ ወኢይቀብርዎሙ፡ ሕብልያ፡ ይከውኑ፡ ውስተ፡ ገጸ፡ ምድር።
3 እስመ፡ አብደሩ፡ ሞተ፡ እምነ፡ ሕይወት፡ ወከሎሙ፡ እለ፡ ትርፉ፡ ዘአትረፉ፡ እም፡ ይእቲ፡ ትውልድ፡ እኪት፡ በኩሉ፡ በሐውርት፡ ኀበ፡ እወስዶሙ፡ ህየ፡ ይቤ፡ እግዚአብሔር።
4 ወበሎሙ፡ ከመዝ፡ ይቤ፡ እግዚአብሔር፡ ዘወድቀአ፡ ኢይትነሣእኑ፡ ወዘስሕተ፡ ኢይትመየጥኑ፡ ወዘወጽአ፡ አፍአ፡ ኢይገብእኑ።
5 በእንተ፡ ምንት፡ ዐለዉ፡ ሕዝብየ፡ በኢየሩሳሌም፡ ማዕሌተ፡ እኩየ፡ ወአጽንዑ፡ ምክሮሙ፡ ወአቤ፡ ኀዲገ።
6 አጽማእኩ፡ ወሰማዕኩ፡ ይእዜኒ፡ አኮ፡ ከመዝ፡ ይቤሉ፡ እስመ፡ አልቦ፡ ሰብእ፡ ዘይኔስሕ፡ እምእከዩ፡ ወይብል፡ ምንተ፡ ገበርኩ፡ ዘይሜርድሂ፡ ደክመ፡ እንዘ፡ ይረውጽ፡ ከመ፡ ፈረስ፡ ውስተ፡ ጸብዕ።
7 ወሄሮድያኖስ፡ በሰማይ፡ የአምር፡ ዕድሜሁ፡ ወሕዝብየሰ፡ ኢየአምሩ፡ ኩነኔ፡ እግዚአብሔር።
8 ወእፎ፡ እንከ፡ ትብሉ፡ ተቢባን፡ ንሕነ፡ ወሐወገ፡ እግዚአብሔር፡ ምስሌነ፡ ከንቶ፡ ኮኑ፡ መጻሕፍቲክሙ፡ ወሐሰት።
9 ወተኀፍሩ፡ ጠቢባን፡ ተሰብሩ፡ ወደንገጹ፡ እስመ፡ መነኑ፡ ቃለ፡ እግዚአብሔር፡ ምንት፡ ውእቱ።
10 በእንተ፡ ዝንቱ፡ እሁብ፡ እንስቲያሆሙ፡ ለካልዓን፡ ወገራውሂሆሙ፡ ለመዋርሥት፡ እስመ፡ ንዑስ፡ ወዐቢይ፡ ኩሉ፡ ይትዔገል፡ እምነቢይ፡ እስከ፡ ካህን፡ ይትጌበሩ፡ ሐሰተ።
11 ወይትፌወሱ፡ ቅጥቃጤሃ፡ ለወለተ፡ ሕዝብየ፡ ለአስትቶ፡ ወይብሉ፡ ሰላም፡ ሰላም።
12 ወተሀፍሩ፡ እስመ፡ ሰቈራር፡ ገብሩ፡ ወኀፍረትሰ፡ ኢኀፍሩ፡ እስመ፡ ኢየአምሩ፡ ኀፍረተ፡ በእንተ፡ ዝንቱ፡ ይወድቁ፡ በድቀቶሙ፡ ሶ፡ ይሔውጽዎሙ፡ ይወድዩ፡ ይቤ፡ እግዚአብሔር።
13 አስተጋብኡ፡ እለ፡ ያስተጋብኡ፡ በማዕረር፡ ይቤ፡ እግዚአብሔር፡ አልቦ፡ አስካል፡ ውስተ፡ ወይን፡ ወአልቦ፡ በለስ፡ ውስተ፡ ሰግላ፡ ወተነግፈ፡ ቈጽሉሂ፡ አልቦ፡ አስካል፡ በውስተ፡ ወይን፡ ወወሀብክዎሙ፡ ወኀለፎሙ።
14 ለምንት፡ እንከ፡ ንነብር፡ ንሕነ፡ ተጋብኡ፡ ወንባእ፡ ውስተ፡ አህጉር፡ ጽኑዓት፡ ወንወረው፡ ህየ፡ እስመ፡ እግዚአብሄር፡ አምላክነ፡ ገደፈነ፡ ወአስተየነ፡ ማየ፡ ሕምዝ፡ እስመ፡ አበስነ፡ ለእግዚአብሔር።
15 ተሰፈውነ፡ ሰላመ፡ ወኀጣእነ፡ ሠናይ፡ ለጊዜ፡ ሣህል።
16 ናሁ፡ ይመጽእ፡ እምነ፡ ዳን፡ ናመጽእ፡ ድምፀ፡ ሩጸተ፡ አፍራሲሆሙ፡ እምቃለ፡ ሠራዊቱ፡ አድለቅለቀት፡ ምድር፡ በምልዓ፡ ወይመጽኡ፡ ወይበልዋ፡ ለኩሉ፡ ምድር፡ ወለሀገር፡ ወለእለ፡ ይነብሩ፡ ውስቴታ።
17 እስመ፡ አነ፡ እፌኑ፡ ለክሙ፡ አራዊተ፡ ምድር፡ ዘይቀትል፡ ዘአልቦ፡ ዘይረቅዮ፡ ወይነስኩክሙ፡ ይቤ፡ እግዚአብሔር።
18 እንዘ፡ ተሐምሙ፡ ልበክሙ።
19 ናሁ፡ ቃለ፡ አውያቲሃ፡ ለወለተ፡ ሕዝብየ፡ እርኁቅ፡ ብሔር፡ ወአኀዘኒ፡ ነኰላል፡ ወሐምም፡ ከመ፡ እንተ፡ ትውልድ።
20 ሀሀሀሀ።
21 ሀሀሀሀሀ።
22 አልቦኑ፡ ርጢን፡ ውስተ፡ ገለዓድ፡ ወኢሀሎኑ፡ ህየ፡ ዓቃቤ፡ ሥራይ፡ ለምንት፡ ኢዐርገ፡ ከመ፡ ይፈውሳ፡ ለወለተ፡ ሕዝብየ።
=== chapter 9 ===
[Chapter 9]
1 መኑ፡ ይሁበኒ፡ ማየ፡ ለርእስየ፡ ወፈልፈለ፡ አንብዕ፡ ለአእይንትየ፡ ወእብክዮሙ፡ ለሕዝብየ፡ መዓልተ፡ ወሌሊተ፡ ለቅቱላነ፡ ወለተ፡ ሕዝብየ።
2 መኑ፡ ይሁበኒ፡ ማኅደረ፡ ውስተ፡ በድው፡ ወእኅድጎሙ፡ ለሕዝብየ፡ ወእሑር፡ እምኔሆሙ፡ እስመ፡ ኩሎሙ፡ ዓለውያን፡ ወየሀውሩ፡ ብእሲተ፡ ብእሲ።
3 ወወሰቁ፡ ልሳኖሙ፡ ለሀሰት፡ ከመ፡ ቀስት፡ ወአኮ፡ እሙነ፡ ዘጸንዑ፡ ውስተ፡ ምድር፡ እስመ፡ እምእኪት፡ ኀበእኪት፡ የሐውሩ፡ ወሊተሰ፡ የአምኑኒ፡ ይቤ፡ እግዚአብሔር።
4 ኵልክሙ፡ ተአቀብዎ፡ ለቢጽክሙ፡ ወኢትእመንዎ፡ ለአኃዊክሙ፡ እስመ፡ ኵሉ፡ እኁ፡ አዕቅጾ፡ የአቅጽ፡ ወኵሉ፡ አርክ፡ ጠዋየ፡ የሐውር።
5 አሐዱ፡ አሀዱ፡ ይሣለቅ፡ ላዕ፡ ካልዑ፡ ወኢይትናገሩ፡ ጽድቀ፡ ወልሳኖሙ፡ ለመደ፡ ተናግሮ፡ ሐሰት፡ ዐመፁ።
6 ወኢኀደጉ፡ ነሢአ፡ ርዴ፡ ወይትሜየኑ፡ ወይገብሩ፡ ትምይንተ፡ ወይገብሩ፡ ተምኔተ፡ ወኢፈቀዱ፡ ያእምሩ፡ ይቤ፡ እግዚአብሔር።
7 በእንተ፡ ዝንቱ፡ ከመዝ፡ ይቤ፡ እግዚአብሔር፡ ኀያል፡ እስመ፡ እገብር፡ እምቅድመ፡ ገጸ፡ ወለተ፡ ሕዝብየ።
8 ማዕበል፡ በሊህ፡ ልሳኖሙ፡ ወጒሕሉት፡ ቃለ፡ አፉሆሙ፡ ዳኅነ፡ ይትናገሩ፡ ለቢጾሙ፡ ወበልቦሙ፡ ይሠይሙ፡ ጽልዑ፡ አሐዱ፡ አሐዱ፡ ምስለ፡ ከልዑ።
9 በዝኒ፡ ኢይዋኢኑ፡ ይቤ፡ እግዚአብሔር፡ ወለሕዝብኒ፡ ዘከመዝ፡ ኢትትቤቀሎሙኑ፡ ነፍስየ።
10 ወላህዉ፡ ውስተ፡ አድባር፡ ወብክዩ፡ በውስተ፡ ፍና፡ በድው፡ ወአስቆቅዉ፡ እስመ፡ ኀለወቀ፡ ሰብእ፡ ዘአልቦ፡ ዘይንሶሱ፡ ወኢይሰምዕ፡ ቃለ፡ ዖፍ፡ ሰማይ፡ ወእስከ፡ እንስሳ፡ ሐለፉ፡ ድንጉፃኒሆሙ።
11 ወእሬስያ፡ ለኢየሩሳሌም፡ ለፍልሰት፡ ወለደበበ፡ አራዊት፡ ወማኅደረ፡ ሰገኖ፡ ወለአህጉረ፡ ይሁዳ፡ አማስኖን፡ ከመ፡ ኢይንበርዎን።
12 መኑ፡ ብእሲ፡ ጠቢብ፡ ዘይለብዎ፡ ለዝንቱ፡ ወቃለ፡ አፉሁ፡ ለእግዚአብሔር፡ ኀቤሁ፡ ይንግርክሙ፡ ወጠፍአት፡ ከመ፡ ምድረ፡ በድው፡ እስመ፡ አልቦ፡ ዘየአምራ።
13 ወይቤለኒ፡ እግዚአብሔር፡ እስመ፡ ኀደጉ፡ ሕዝብየ፡ ሕግየ፡ ዘወሀብክዎሙ፡ በቀቅድመ፡ ገጾሙ፡ ወኢሰምዑኒ፡ ቃልየ።
14 ወሐሩ፡ ወተለዉ፡ ፍትወተ፡ ልቦሙ፡ ወተለዉ፡ ጣዖተ፡ ዘመሐርዎሙ፡ አበዊሆሙ።
15 በእንተ፡ ዘዝንቱ፡ ከመዝ፡ ይቤ፡ እግዚአብሔር፡ ጸባዖት፡ አምላከ፡ እስራኤል፡ ናሁ፡ አነ፡ አበልዖሙ፡ ፃዕረ፡ ወአስትዮሙ፡ ሐሞተ።
16 ወእዝርዎሙ፡ ውስተ፡ በሐውርት፡ ኀበ፡ ኢየአምሩ፡ ኢእሙንቱ፡ ወኢአበዊሆሙ፡ ወእፌኑ፡ ላዕሌሆሙ፡ መጥባሕተ፡ እሰከ፡ አኀልቆሙ፡ ባቲ።
17 ከመዝ፡ ይቤ፡ እግዚአብሔር፡ ጸባዖት፡ ተደለዉ፡ ወጸውዕዎን፡ ለመስቆቅዋት፡ ወይምጻኣ፡ ወኀበ፡ ተቢባት፡ ለአኩ፡ ወይምጻኣ፡ ወይንግራክሙ፡ ፍጡነ።
18 ወያስቆቅዋክሙ፡ ወያኝብዓ፡ አዕንቲክ፡ ወየኀዝ፡ ማይ፡ እምነ፡ ቀራንብቲክሙ።
19 እስመ፡ ተሰምዓ፡ ቃለ፡ ብካይ፡ ውስተ፡ ጽዮን፡ እፎ፡ ሐሠርነ፡ ወተሐፈርነ፡ ጥቀ፡ እስመ፡ ኀደግነ፡ ብሔረነ፡ ወገደፍነ፡ አብያቲነ።
20 ስምዓ፡ አንስት፡ ቃለ፡ እግዚአብሔር፡ ወይትወከፍ፡ ዕዝነክን፡ ቃለ፡ አፉሁ፡ ወመሀራሆን፡ ለአዋልዲክን፡ ሰቆቃወ፡ ወብእሲትኒ፡ ለካልዕታ፡ ላሀ።
21 እስመ፡ ዐርገ፡ ሞት፡ ውስተ፡ ብሔርነ፡ ወቦአ፡ እተ፡ መሳክዊነ፡ ከመ፡ ይቀጥቅጥ፡ ሕፃናት፡ በአፍአ፡ ወወራዙትኒ፡ በመራህብቲነ።
22 ከመዝ፡ ይቤ፡ እግዚአብሔር፡ ወይከውን፡ አብድንተ፡ ሰብእክሙ፡ ወይሰጻሕ፡ ውስተ፡ ገጸ፡ ገዳም፡ ከመ፡ ተቅራም፡ ወከመ፡ ከላስስት፡ ድኅረዘየዐጽድ፡ ወአልቦ፡ ዘያስተጋብኦ።
23 ከመዝ፡ ይቤ፡ እግዚአብሔር፡ ኢይትመካህ፡ ጠቢብ፡ በጥበቡ፡ ወኢይዘኀር፡ ኀያል፡ በኀይሉ፡ ወኢይዘኀር፡ ባዕል፡ በብዕሉ።
24 ዘእንበለ፡ ዳዕሙ፡ በዝንቱ፡ ይትመካህ፡ ዘይትሜካህ፡ ተቢብ፡ ወየአምር፡ ኪያየ፡ ይቤ፡ እግዚአብሔር፡ ዘይገብር፡ ፍትሐ፡ ወጽድቀ፡ እስመ፡ አነ፡ እግዚአብሔር፡ እገብር፡ ሣህለ፡ ወጽድቀ፡ ወፍትሐ፡ ዲበ፡ ምድር፡ እስመዝ፡ ውእቱ፡ ፈቃድየ፡ ይቤ፡ እግዚአብሔር።
25 ናሁ፡ ይነጽእ፡ መዋዕል፡ ይቤ፡ እግዚአብሔር፡ እዋህዮሙ፡ ወእቤይኖሙ፡ ለኵሎሙ፡ እለ፡ ግዙራን፡ ወቈላፋን፡ ነፍስቶሙ።
26 ዘውስተ፡ ግብፅ፡ ወዘውሰተ፡ ይሁዳ፡ ወዘውስተ፡ ኤዶም፡ ወዘውስተ፡ ሞዓብ፡ ወኵሎሙ፡ እለ፡ ቅሩጻን፡ ገጾሙ፡ እለ፡ ይነብሩ፡ ሐቅለ፡ እስመ፡ ኵሎሙ፡ አሕዛብ፡ ቈላፍያን፡ ነፍስቶሙ።
=== chapter 10 ===
[Chapter 10]
1 ስምዑ፡ ቃለ፡ ዘነበበ፡ እግዚአብሄር፡ ላዕሌክሙ፡ ቤተ፡ እስራኤል።
2 ከመዝ፡ ይቤ፡ እግዚአብሔር፡ ኢትትመሀሩ፡ ፍኖተ፡ አረማውያን፡ ወኢትፍሩሁ፡ እምትምህርተ፡ ሰማይ፡ እስመ፡ ይፈርሁ፡ አህዛብ፡ እምኔሆሙ።
3 እስመ፡ ከንቱ፡ ውእቱ፡ ሕገ፡ አማልክቲሆሙ።
4 እስመ፡ ዕፀ፡ ዘገዘሙ፡ እምገዳም፡ ግብረ፡ ዕደ፡ ፀራቢ፡ በማኅፄ፡ ዘገዘሞ፡ በብሩር፡ ወበወርቅ፡ ቀፈልዎ፡ በሰፌልያ፡ ወበቀኖት፡ አጽንዕዎ፡ ከመ፡ ኢይትሐወስ።
5 ብሩር፡ ዘፍህቆ፡ እሙንቱ፡ ወኢይትናገሩ፡ ፀዊረ፡ ይጸውርዎሙ፡ ወኢየሐውሩ፡ ኢትፍርሁ፡ እምኔሆሙ፡ ኢየኀሥሙ፡ ወኢያሤንዩ።
6 አልቦ፡ ከማከ፡ እግዚኦ፡ ዐቢይ፡ አንተ።
7 ወመኑ፡ ዘይፈርሀከ፡ ወነገሥታተ፡ አህዛብ፡ ኵሎሙ፡ እስመ፡ ኀቤከ፡ ይመጽኡ፡ እስመ፡ ኵሉ፡ ጠቢባን፡ አሕዛብ፡ ወበኵሉ፡ መንግሥቶሙ፡ አልቦ፡ ከማከ።
8 ምዕረ፡ ይነድዱ፡ ወየአብዱ፡ ትምህርተ፡ ከንቶ።
9 ብሩረ፡ ሜሮቃስ፡ እምተርሴስ፡ ይመጽእ፡ ወወርቅ፡ እምአፌር፡ ግብረ፡ ኬንያ፡ ወእደ፡ ነሃቢ፡ ደርከኖ፡ ወሜላት፡ አልባሲሆሙ፡ ግብረ፡ ጠቢባን፡ ወኵሎሙ።
10 ወእግዚአብሔርሰ፡ አማለከ፡ ጻድቅ፡ ውእቱ፡ አምላከ፡ ሕያዋን፡ ወንጉሰ፡ ዓለማት፡ እመዓቱ፡ ታድለቅልቅ፡ ምድር፡ ወኢይክሉ፡ አሕዛብ፡ መዓቶ።
11 ከመዝ፡ በልዎ፡ ለአማልክት፡ እለ፡ ኢገብሩ፡ ሰማየ፡ ወምድረ፡ ለይደምሰሱ፡ ወይጥፍዑ፡ እምድር፡ እታሕተ፡ ሰማይ።
12 እግዙአብሔርሰ፡ ገብረ፡ ምድረ፡ በኀይሉ፡ ወአርትዐ፡ ዓለመ፡ በጥበቡ፡ ወሰፍሐ፡ ሰማየ፡ በምክሩ።
13 ወመልዓ፡ ማየ፡ ውስተ፡ ሰማይ፡ ላዕለ፡ ወአዕረገ፡ ደመናተ፡ እምአጽናፈ፡ ምድር፡ ወገብረ፡ መባርቅተ፡ ለጊዜ፡ ዘዝናም፡ ወአውጽአ፡ ነፋሳት፡ እመዛድብቲሆሙ።
14 ወለስሐ፡ ኵሉ፡ ምክረ፡ ዕጓለእመሕያው፡ ወተኀፍሩ፡ ኵሎሙ፡ ነሃብት፡ በእንተ፡ ግልፎሙ፡ እስመ፡ ሐሰተ፡ ሰበኩ፡ ወአልቦሙ፡ መንፈስ፡ ውስቴቶሙ።
15 ከንቱ፡ ውእቱ፡ ግብር፡ ዘያስተጣብቅዎ፡ እንተ፡ አመ፡ ሐወፆሙ፡ ይትሀጐል።
16 ኢኮነ፡ ከማሁ፡ መክፈልተ፡ ያዕቆብ፡ እስመ፡ ኵሎ፡ ፈጠረ፡ ውእቱ፡ ወእስራኤልሰ፡ በትረ፡ ርስቱ፡ እግዚአ፡ ኀያል፡ ስሙ።
17 አስተጋባዒ፡ እምአፍአ፡ ኀይለኪ፡ እንተ፡ ትነብሪ፡ ውስተ፡ ፀወን።
18 እስመ፡ ከመ፡ ዝ፡ ይቤ፡ እግዚአብሔር፡ ናሁ፡ አነ፡ አዐቅጾሙ፡ ለእለ፡ ይነብሩ፡ ውስተ፡ ዛቲ፡ ምድር፡ በሕማም፡ አመነድቦሙ፡ ከመ፡ ይትረከብ፡ መቅሠፍቶሙ።
19 በሊ፡ ወይሌ፡ ለቅጥቃጤየ፡ ጸልዐ፡ ደዌየ፡ ወአነሂ፡ እቤ፡ አማን፡ ዝንቱ።
20 ደብተራየ፡ ኀሥረ፡ ወኵሉ፡ አኅባል፡ ተበትከ፡ ወኢሀለዉ፡ ደቂቅየ፡ ወአባግዕየ፡ ወአልቦ፡ እንከ፡ ማኅደር፡ ለትእይንትየ።
21 እስመ፡ አበብዱ፡ ካህናት፡ ወኢ፡ ኀሠሥዎ፡ ለእግዚአብሔር፡ በእንተ፡ ዝንቱ፡ ኢያእመሩ፡ ኵሎ፡ ወኢዐቀቡ፡ ኵሎ፡ መራዕየ፡ ወተዘርዉ።
22 ቃል፡ ተሰምዓ፡ ናሁ፡ ይመጽእ፡ ድልቅልቅ፡ ዐቢይ፡ እምድረ፡ ሰሜን፡ ከመ፡ ያመስኖ፡ ለአህጉረ፡ ይሁዳ፡ ወይረስይዎ፡ ቤተ፡ ሰገኖ።
23 ናሁ፡ አእመርኩ፡ እግዚኦ፡ ከመ፡ ኢኮነ፡ ፍኖቱ፡ ለእግዚአብሔር፡ ከመፍናወ፡ ሰብእ፡ ወኢሐውራ፡ ብእሲ፡ ወኢጼሐ፡ መንገዳ።
24 መሐረነ፡ እግዚኦ፡ ወባሕቱ፡ በፍትሕ፡ ወአኮ፡ በመዓት፡ ከመ፡ ኢታኅልቀነ።
25 ከዓው፡ መዓትከ፡ ላዕለ፡ አሕዛብ፡ እለ፡ ኢየአምሩከ፡ ወላዕለ፡ መንግሥት፡ እንተ፡ ኢትጼውዓከ፡ እስመ፡ በልዎ፡ ለያዕቆብ፡ ወአማሰኑ፡ ብሔሮ።
=== chapter 11 ===
[Chapter 11]
1 ቃል፡ ዘኮነ፡ ኀበ፡ ኤርምያስ፡ እምኀበ፡ እግዚአብሔር።
2 ስምዑ፡ ነገረ፡ ዝ፡ ኪዳን፡ ወንግሮሙ፡ ለሰብአ፡ ይሁዳ፡ ወለእለ፡ ይነብሩ፡ ኢየሩሳሌም።
3 ወትብሎሙ፡ ከመዝ፡ ይቤ፡ እግዘዚአብሔር፡ አምላከ፡ እስራኤል፡ ሩጉም፡ ውእቱ፡ ሰብእ፡ ዘኢይሰምዕ፡ ነገረ፡ ዝ፡ ኪዳን፡ ዘአዘዝክዎሙ፡ ለአበዊክሙ፡ አመ፡ ዕለተ፡ ዘአውፃእክዎሙ፡ እምድረ፡ ግብፅ፡ ወእምዕቶነ፡ ሐፂን።
4 ወእቤ፡ ስምዑኒ፡ ቃልየ፡ ወግበሩ፡ ኵሉ፡ ዘአዘዝኩክሙ።
5 ከመ፡ ዓቅም፡ መሓላየ፡ ዘመሐልኩ፡ ለአበዊክሙ፡ ከመ፡ አሀቦሙ፡ ምድረ፡ እንተ፡ ታውኅዝ፡ ሀሊበ፡ ወመዓረ፡ በከመ፡ ዛቲ፡ ዕለት፡ ወአውሣእከኩ፡ ወእቤ፡ ለይኩን፡ እግዚኦ።
6 ወይቤለኒ፡ እግዚአብሔር፡ አንብብ፡ ዘነገረ፡ በአህጉረ፡ ይሁዳ፡ ወበአፍኣ፡ ለኢየሩሳሌም፡ ወበሎሙ፡ ስምዑ፡ ነገረ፡ ዝ፡ ኪዳን፡ ወግበርዎ።
7 እስመ፡ አስምዖ፡ አስማዕኩ፡ ለአበዊክሙ፡ በዕለተ፡ አውፃእክዎ፡ እምድረ፡ ግበረፅ፡ እስከ፡ ዛቲ፡ ዕለት፡ ጊሥ፡ ወአስምዕ።
8 ወኢይሰምዑ፡ ወኢያጸምኡ፡ በእዝኖሙ፡ ወየሐውሩ፡ ሰብእ፡ በፈቃደ፡ ልቦሙ፡ እኩይ፡ ወአምጻእኩ፡ ላዕሌሆሙ፡ ኵሎ፡ ነገረ፡ ዝ፡ ኪዳን፡ ዘአዘዝኩ፡ ይግበሩ፡ ወኢይገብሩ።
9 ወይቤለኒ፡ እግዚአብሔር፡ ተረክበ፡ ማዕሌት፡ ውስተ፡ ዕደወ፡ ይሁዳ፡ ወእለ፡ ይነብሩ፡ ኢየሩሳሌም።
10 ተመይጡ፡ ውስተ፡ ኀጢአት፡ አበዊሆሙ፡ ዘቀዲሙ፡ አለ፡ አበዩሰሚዐ፡ ቃልየ፡ ወናሁ፡ እሙንቱ፡ ሐውሩ፡ ወይተልዉ፡ አማልክተ፡ ነኪር፡ ከመ፡ ይጥቀነዩ፡ ሎሙወዐለዉ፡ ቤተ፡ እስራኤል፡ ወቤተ፡ ይሁዳ፡ ሕግየ፡ ዘሠራዕኩ፡ ለአበዊሆሙ።
11 በእንተ፡ ዝንቱ፡ ከመዝ፡ ይቤ፡ እግዚአብሔር፡ ናሁ፡ አነ፡ እመጽእ፡ እኪተ፡ ላዕለ፡ ሕዝብየ፡ ዘኢይክሉ፡ ወጺአ፡ እምኔሁ፡ ወይጸርሑ፡ ኀቤየ፡ ወኢይሰምኦሙ።
12 ወየሐውሩ፡ አህጉረ፡ ይሁዳ፡ ወእለ፡ ይነብሩ፡ ኢየሩሳሌም፡ ወይጸርሑ፡ ኀበ፡ አማልክቲሆሙ፡ እለ፡ የዐጥኑ፡ ሎሙ፡ ወአድኀኖ፡ ኢያድኅንዎሙ፡ አመ፡ ዕለተ፡ ምንዳቤሆሙ።
13 እስመ፡ ኊልቈ፡ አህጉሪክሙ፡ ከማሁ፡ አማልክቲክሙ፡ ወበኊልቈ፡ ፍናዊሃ፡ ለኢየሩሳሌም፡ ገበርክሙ፡ ምሥዋዓ፡ ለኀፍረት፡ ከመ፡ ትዕጥኑ፡ ለበዓል።
14 ወአንተሂ፡ ኢትጸሊ፡ ለዝ፡ ሕዝብ፡ ወኢታስተበቊዕ፡ ወኢትሰአል፡ በጸሎት፡ ሎሙ፡ እስመ፡ ኢይሰምእ።
15 ለምንት፡ ሊተ፡ ፍቅርትየ፡ ውስተ፡ ቤትየ፡ ገቢረ፡ ምሥዋዓ፡ ብዙኅ፡ ወሥጋ፡ ቅዱስ፡ የዐትት፡ እምላዕሌኪ፡ በእከይኪ፡ ወበዝኒ፡ ኢትድኅኒ፡ እስመ፡ እከይኪ፡ አሜሃ፡ ያፈርሃኪ።
16 ዕፀ፡ ዘይት፡ ሠናይት፡ ራእይ፡ ወፍሬሃኒ፡ ወአዕጹቂሃኒ፡ ብዙኀ፡ ጸውዐ፡ እግዚአብሔር፡ ስመኪ፡ እምቃለ፡ ምረታ፡ ዐቢይ፡ ነደ፡ እሳት፡ ላዕሌሃ፡ ወማሰኑ፡ አእፁቂሃ።
17 ወእግዚአብሔር፡ አምላከ፡ ኀይል፡ ዘተከለኪ፡ ነበበ፡ እኩየ፡ ላዕሌኪ፡ በእንተ፡ ኀጢአተ፡ እስራኤል፡ ወቤተ፡ ይሁዳ፡ እስመ፡ ገብሩ፡ በዘያምዕዑኒ፡ ወየዐጥኑ፡ ለበዓል።
18 እግዚኦ፡ አርእየኒ፡ ወአእምር፡ አሜሃ፡ አርአይክኒ፡ ምድባሮሙ።
19 ወአንሰ፡ ከመ፡ በግዕ፡ የዋህ፡ ዙወስድዎ፡ ዘይጠብሕዎ፡ ወኢያእመርኩ፡ ተማከሩ፡ ላዕሌየ፡ እኩየ፡ ምክረ፡ ወይቤሉ፡ ንዑ፡ ንደይ፡ ዕፀ፡ ውስተ፡ ኀረብስቱ፡ ወንቀጥቅጦ፡ እምድረ፡ ሕያዋን።
20 ወኢይዘዝክሩ፡ እንከ፡ ስሞ፡ እግዚአብሔር፡ መኮንነ፡ ጽድቅ፡ ዘይፈትን፡ ልበ፡ ወኵልያተ።
21 በእንተ፡ ዝንቱ፡ ከመዝ፡ ይቤ፡ እግዚአብሔር፡ ላዕለ፡ ሰብአ፡ አናቶት፡ እለ፡ የኀሥሥዋ፡ ለነፍስየ፡ አለ፡ ይብሉ፡ ኢትትነበይ፡ በስመ፡ እግዚአብሔር፡ አመ፡ አኮ፡ ትመውት፡ በእደዊነ።
22 በበይነ፡ ዝንቱ፡ ከመ፡ ዝ፡ ይቤ፡ እግዚአብሔር፡ ኀያል፡ ናሁ፡ አነ፡ እዋህዮሙ፡ ወራዙቶሙኒ፡ ይመውቱ፡ በኲናት፡ ወደቂቆሙኒ፡ ወአዋልዲሆሙኒ፡ የኀልቁ፡ በርኀብ።
23 ወአልቦ፡ ዘይተርፍ፡ እምኔሆሙ፡ እስመ፡ አመጽእ፡ እኪተ፡ ላዕለ፡ እለ፡ ይነብሩ፡ በአናቶት፡ በአመተ፡ እሔውፆሙ።
=== chapter 12 ===
[Chapter 12]
1 ጻድቅ፡ አንተ፡ እግዚኦ፡ ወባሕቱ፡ ፍትሐ፡ እትናገር፡ ለምንት፡ ፍኖተ፡ ኀጥኣን፡ ድሉተ፡ ይእቲ፡ ተፈሥሑ፡ ኵሎሙ፡ ዓላውያን፡ በማዕሌት።
2 ወተከልኮሙ፡ በስፍሐ፡ ሥርዎሙ፡ ወገብሩ፡ ፍሬ፡ ወሰፍሀ፡ ሥርዎሙ፡ ቅሩብ፡ አንተ፡ ውስተ፡ አፉሆሙ፡ ወርኁቅ፡ እምነ፡ ኩልያቲሆሙ፡ ወለሊከ፡ እግዚኦ፡ ተአምረኒ፡ ወትሌብወኒ።
3 ወፈተንኮ፡ ለልብየ፡ በቅድሜከ፡ ትጸንሖሙ፡ ከመ፡ በግዕ፡ ለተጠብሐ፡ ወትቄድሶሙ፡ ለዕለተ፡ ቀትል።
4 እስከ፡ ማዕዜኑ፡ ትላሁ፡ ምድር፡ የብሰ፡ ሣዕረ፡ ገዳም፡ በእከዮሙ፡ ለእለ፡ ይነብሩ፡ ውስቴታ፡ ወኀልቁ፡ እንስሳ፡ ወአዕዋፍ፡ እስመ፡ ይቤሉ፡ አልቦ፡ ዘይሬኢ፡ ደኀሪተነ።
5 አዕጋሪከ፡ ይረውጻ፡ ወይደክማከ፡ ለምንት፡ ታስተሬሲ፡ አፍራሰ፡ በብሔረ፡ ስንዕ፡ እንተ፡ ትትአመን፡ ወእፎ፡ ትገብር፡ በኀሣረ፡ ዮርዳኖስ።
6 እስመ፡ አኃዊከ፡ ወቤተ፡ አቡከ፡ እሙንቱ፡ ክህዱከ፡ ወወውዑ፡ ወአንገገለጉ፡ በድኅሬከ፡ ብዙኃን፡ ኢትእመኖሙ፡ አመ፡ ሠናየ፡ ነበቡ፡ ላዕሌከ።
7 ኀደጉ፡ ቤትየ፡ ወኀደጉ፡ ርስትየ፡ ወወሀብክዋ፡ ፍቅርተ፡ ነፍስየ፡ ውስተ፡ እደ፡ ፀራ።
8 ወኮነተኒ፡ ሊተ፡ ርስትየ፡ ከመ፡ አንበሳ፡ በገዳም፡ በእንተ፡ ዝንቱ፡ ጸላእክዋ።
9 ግበ፡ ዝዕብኑ፡ ቤትየ፡ ባሕቱ፡ ባአተ፡ ፈያት፡ እቲ፡ ርስትየ፡ ዘየዐውዱ፡ ዐውዳ፡ ወይትጋብኡ፡ ኵሎሙ፡ አራዊተ፡ ገዳም፡ ወይመጽኡ፡ ወይብልዋ።
10 ኖሎት፡ ብዙኃን፡ አማሰኑ፡ አጸደ፡ ወይንየ፡ ወአርኰሱ፡ መክፈልትየ፡ ወረሰይዋ፡ ለመክፈልትየ፡ እንተ፡ አፈቅር፡ በድወ፡ ወዐፀ።
11 ወኮነት፡ ለሙስና፡ ወለሀጒል፡ በላዕሌሃ፡ ወበእንቱኣየ፡ ኀልቀት፡ ኵላ፡ ምድር፡ ወማሰነት፡ እስመ፡ አልቦ፡ ሰብእ፡ ዘይሠይም፡ ጽድቀበልቡ።
12 ኀበ፡ ኵሉ፡ ገዳም፡ ባኡ፡ ወሑሩ፡ ገዳመ፡ ኅሡራን፡ እስመ፡ መጥባሕቱ፡ ለእግዚአብሔር፡ ትበልዕ፡ እምአጽናፈ፡ ምድር፡ እስከ፡ አጽናፊሃ፡ ወአልቦ፡ ሰላም፡ ለኵሉ፡ ዘሥጋ።
13 ትዘርዑ፡ ሥርናየ፡ ወተዓርሩ፡ አሥዋከ፡ ወኢይበቊዓክሙ፡ መክፈልትክሙ፡ ተሐፈርክሙ፡ እማዕረርክሙ፡ ወኀሠርክሙ፡ እመዓተ፡ መቅሠፍቱ፡ ለእግዚአብሔር።
14 እስመ፡ ከመዝ፡ ይቤ፡ እግዚአብሔር፡ በእንተ፡ ኵሉ፡ እኩይ፡ እለ፡ ይገስሱ፡ ርስትየ፡ ዘከፈልክዎ፡ ለሕዝብየ፡ እስራኤል፡ ናሁ፡ አነ፡ እመልሖሙ፡ እምነ፡ ምድሮሙ፡ ወአመጽኦሙ፡ ለቤተ፡ ይሁዳ፡ እምነ፡ ማእከሎሙ።
15 ወእምድኅረ፡ አውፃእክዎ፡ እትመየጦሙ፡ ወእሠሃሎሙ፡ ወአነብሮሙ፡ ለኵሎሙ፡ ውስተ፡ ርስቶሙ፡ ወለለአሐዱ፡ ውስተ፡ ምድሮሙ።
16 ወእምዝ፡ ለእመ፡ ተምህሮ፡ ተምህሩ፡ ፍኖትየ፡ ሕዝብየ፡ ከመ፡ ይምሐሉ፡ በስምየ፡ ሕያው፡ እግዚአብሔር፡ ከመመሐርዎሙ፡ ለሕዝብየ፡ መሓላ፡ በበዓል፡ ይትሐነጹ፡ በማእከለ፡ ሕዝብየ።
17 ወእመሰ፡ ኢተመይጡ፡ እሥሮሙ፡ ለእሙንቱ፡ ሕዝብ፡ ወዐተቶሙ፡ ወአጠፍኦሙ፡ ይቤ፡ እግዚአብሔር።
=== chapter 13 ===
[Chapter 13]
1 ከመዝ፡ ይቤለኒ፡ እግዚአብሔር፡ ሑር፡ ተመየጥ፡ ለጀ፡ ሞራዐ፡ አጌ፡ ወዕጥቆ፡ ውስተ፡ ሐቌከ፡ ወኢትጥዖ፡ ውስተ፡ ማይ።
2 ወተመየጥኩ፡ ሞራዐ፡ በከመ፡ ይቤለኒ፡ እግዚአብሔር፡ ወአጠቁ፡ ውስተ፡ ሐቌየ።
3 ወነበበኒ፡ እግዚአብሔር፡ ዳግመ፡ ወይቤለኒ።
4 ንሣእ፡ ዝኰ፡ ሞራዐ፡ ዘተሣየጥከ፡ ለሐቌከ፡ ተንሥእ፡ ወሑር፡ ኤፍራጥስ፡ ወኅብዖ፡ ህየ፡ ውስተ፡ ዐዘቅተ፡ ኰኵሕ።
5 ወሖርኩ፡ ወኀባዕክዎ፡ ውስተተ፡ ኤፍራጥስ፡ በከመ፡ አዘዘኒ፡ እግዚአብሔር፡ አምላክ።
6 እምድኅረ፡ ጒንዱይ፡ መዋዕል፡ ይቤለኒ፡ እግዚአብሔር፡ ተንሥእ፡ ወሑር፡ ኤፍራጥስ፡ ወንሥአ፡ እምህየ፡ ዝኰ፡ ሞራዐ፡ ዘአዘዝኩከ፡ ትኅባዕ፡ ህየ።
7 ወሖርኩ፡ ኤፍራጥስ፡ ወከረይኩ፡ ወነሣእኩ፡ ዝኰ፡ ሞራዐ፡ እምኀበ፡ ደፈንክዎ፡ ወረከብኩ፡ ብጻላቲሃ፡ ወአጽርቅተ፡ ዘለምንትሂ፡ ኢይበቊዕ።
8 ወኮነ፡ ቃለ፡ እግዚአብሔር፡ ኀቤየ።
9 ወይቤለኒ፡ ከመዝ፡ አኀሠራ፡ ለጽዕለተ፡ ይሁዳ፡ ወለጽዕለተ፡ ኢየሩሳሌም፡ ብዝኅት።
10 ወለዝኒ፡ ሕዝብ፡ እኩይ፡ እለ፡ ኢይፈቅዱ፡ ወኢይሰምዑቃልየ፡ ወየሐውሩ፡ በግዕዘ፡ ልቦሙ፡ እኩይ፡ ወየሐውሩ፡ ወይተልዉ፡ አማልክተ፡ ነኪር፡ ከመ፡ ይትቀነዩ፡ ሎሙ፡ ወያመልክዎሙ፡ ወይከውኑ፡ ከመ፡ ዝንቱ፡ ሞራዕ፡ ዘለምንትኒ፡ ኢይበቊዕ።
11 በከመ፡ ይጠግዕ፡ ዝ፡ ሞራዕ፡ ውስተ፡ ሐቌ፡ ብእሲ፡ ከማሁ፡ አቅረብክዎሙ፡ ለቤተ፡ እስራኤል፡ ኀቤየ፡ ይቤ፡ እግዚአብሔር፡ ወለኵሎሙ፡ ቤተ፡ ይሁዳ፡ ከመ፡ ኩነኒ፡ ሕዝበ፡ ለክብር፡ ወለምክህ፡ ወለስምዕ፡ ወኢሰምዑኒ።
12 ወትብሎሙ፡ ከመዝ፡ እግዚአብሔር፡ አምላክ፡ እስራኤል፡ ኵሉ፡ ዝቅ፡ መልዕኑ፡ ወይነ፡ ወለእመ፡ ይቤሉከ፡ እንዳዒ፡ ኢያእመርነ፡ ከመ፡ ይመልዕ፡ ወይነ፡ ኵሉ፡ ዝቅ።
13 ትብሉ፡ ከመ፡ ዝ፡ ይቤ፡ እግዚአብሔር፡ ናሁ፡ አነ፡ እመልዖሙ፡ ለኵሎሙእለ፡ ይነብሩ፡ ውስተ፡ ዝ፡ ምድር፡ ወለነገሥቶሙ፡ ለእለ፡ ይነብሩ፡ ውስተ፡ ኢሩሳሌም፡ እመልዖሙ፡ ስካረ፡ ወይሰክሩ።
14 ወይዘረዉ፡ በበአሐዱ፡ ብእሲ፡ ወአብ፡ እምወልዱ፡ ወይቤ፡ እግዚአብሔር፡ ኢይሠሃሎሙ፡ ወኢይምህኮሙ፡ ወኢይምህሮሙ፡ ወኢይትመየጦሙ፡ እምነ፡ ሙስናሆሙ።
15 ስምዑ፡ ወአጽምዑ፡ ወኢትተአበዩ፡ በስመ፡ እግዚአብሔር።
16 ሀቡ፡ ስብሐተ፡ ለእግዚአብሔር፡ አምላክክሙ፡ ዘእንበለ፡ ይጽልምክሙ፡ ወዘእንበለ፡ ይትዐቀፉ፡ እገሪክሙ፡ በውስተ፡ አድባረ፡ ጽልመት፡ ወትሴፈዉ፡ ብርሃነ፡ እስመ፡ ህየ፡ ጽላሎተ፡ ሞት፡ ወያነብሩክሙ፡ ውስተ፡ ጽልመት።
17 ወእመሰ፡ ኢሰማዕክሙ፡ ትበኪ፡ ነፍስየ፡ በኅቡዕ፡ እምቅድመ፡ ኀሣርክሙ፡ ወአንብኣኒ፡ ታነብዕ፡ ዐይንየ፡ ወይውኅዝ፡ አንብዕ፡ እስመ፡ ተረሥአ፡ መርዔተ፡ እግዚአብሔር።
18 በሎሙ፡ ለነገሥቶሙ፡ ወለዐበይቶሙ፡ አትሕቱ፡ ርስክሙ፡ ወንበሩ፡ እስመ፡ ይሰልቡክሙ፡ አክሊለ፡ ምክህክሙ፡ እምነ፡ ርእስክሙ።
19 ወይትዓፀዉ፡ አህጉር፡ ዘመንገለ፡ ናጌብ፡ ወአልቦ፡ ዘይርኅዎን፡ ወይሁዳኒ፡ ፈለሰ፡ ፍጹመ፡ ፍልሰተ።
20 አንሥኡ፡ አዕንቲክሙ፡ ወርእይዎሙ፡ ለእለ፡ ይመጽኡ፡ እምሰሜን፡ አይቴኑ፡ መርዔት፡ ዘወሀቡ፡ ለኪ፡ አባግኣ፡ ክብርኪ።
21 ምንት፡ ትብሊ፡ አመ፡ ይዋህዩኪ፡ ወአንቲኒ፡ መሀርኪዮሙ፡ ትምህርተኪ፡ ዘቀዲሙ፡ አኮኑ፡ ማሕምም፡ አኀዘኪ፡ ከመ፡ እንተ፡ እውልድ።
22 ወእመ፡ ትብሊ፡ በልብኪ፡ በእንተ፡ ምንት፡ ረከበኒ፡ ዝንቱ፡ ኵሉ፡ በእንተ፡ ብዝኀ፡ ኀጢአትኪ፡ ወተከሥተ፡ ሠኰናኪ።
23 የኀድግኑ፡ ዘይት፡ ጾታሞ፡ ወነብርሂ፡ ኅበሪሁ፡ ትክልኑ፡ አንትሙ፡ ገቢረ፡ ሠናይ፡ እስመ፡ ተምህርክሙ፡ እኩየ።
24 ወእዝርዎሙ፡ ከመ፡ ሐሠር፡ ዘይነሥእ፡ ነፋስ፡ ዘውስተ፡ ገዳም።
25 ዝ፡ ውእቱ፡ መክፈልትኪ፡ ወርስትኪ፡ እም፡ ኀቤየ፡ ይቤ፡ እግዚአብሔር፡ ዘከመ፡ ረሣእክኒ፡ ወተወከልኪ፡ በሐሰት።
26 ወአነ፡ እቀፍጸኪ፡ እምድኅሬኪ፡ መንገለ፡ ገጽኪ፡ ወያሠተርኢ፡ ኀሣርኪ።
27 ዝሙተ፡ ወምርዓተ፡ ዘምዎ፡ ዘመውኪ፡ ወአፈድፈድኪዮ፡ ለዝሙትኪ፡ በውስተ፡ አውግር፡ ወበውስተሂ፡ ገዳም፡ ወበውስተ፡ ገዳም፡ ርኢኩ፡ ርኵሰኪ፡ አሌ፡ ለኪ፡ ኢየሩሳሌም፡ እስመ፡ ኢነጻእኪ፡ ድኅሬየ፡ እስከ፡ ማእዜኑ፡ እንከ፡ ትነጽሒ።
=== chapter 14 ===
[Chapter 14]
1 ቃል፡ ዘኮነ፡ ኀበ፡ ኤርምያስ፡ እምኀበ፡ እግዚአብሔር፡ በእንተ፡ ዐባረ፡ ዝናም።
2 ወይቤ፡ በእንተ፡ ዝ፡ ሀለወት፡ ምድር፡ ዘይሁዳ፡ ወጸልመ፡ ላዕለለ፡ ምድር፡ ወአርገ፡ አውያቲሃ፡ ለኢየሩሳሌም።
3 ወፈለዉ፡ መኳንንቲሃ፡ መሐዛቲሆሙ፡ መንገለ፡ ሰማይ፡ ወሆሩ፡ ኀበ፡ አዘቅት፡ ወኢረለቡ፡ ማየ፡ ወአሦጡ፡ ቀሳውስቲሆሙ፡ ዕራቆሙ፡ ኀሥሩ፡ ወተኀፍሩ።
4 ወተገልበቡ፡ ርእሶሙ፡ በእንተ፡ ተግባረ፡ ምድር፡ ዘኀልቀ፡ ወአልቦ፡ ዘዝናም፡ ውስተ፡ ምድር፡ ተኀፍሩ፡ ሐረስት፡ ወገልበቡ፡ ርእሶሙ።
5 ወኀየላትኒ፡ ወለዳ፡ ውስተ፡ ገዳም፡ ወኀደጋ፡ ዕጐሊሆን፡ እስመ፡ አልቦ፡ ኀሣር።
6 ሐለስትዮታኒ፡ ቆሙ፡ ውስተ፡ በድው፡ ወአብቀዉ፡ ውስተ፡ ነፋስ፡ ከመ፡ ሰገኖ፡ ወደደክማ፡ አዕይንቲሆሙ፡ ኀጢአሙ፡ ሣዕረ።
7 ኀጢአተነ፡ ተቃወመነ፡ እግዚኦ፡ እስመ፡ በዝኀ፡ ኀጢአተነ፡ በቅድሜከ፡ ወለከ፡ አበስነ።
8 ወጸንሑ፡ እስራኤል፡ መድኀኒተ፡ በእለተ፡ ምንዳቤ፡ ለምንት፡ ኮንከ፡ ከመ፡ ፈላሲ፡ በዲበ፡ ምድር፡ ወከመ፡ ነግድ፡ ተግህሥከ፡ በውስተ፡ ማኅደር።
9 ለምንት፡ ትከውን፡ ከመ፡ ሰብእ፡ ዘይነውም፡ ወከመ፡ ዕጓለ፡ እመሕያው፡ ዘኢይክል፡ አድኅኖ፡ ወአንተሰ፡ እግዚኦ፡ ሀሎከ፡ ማዕከሌነ፡ ወስምከሂ፡ ተሰምየ፡ በላዕለሌነ፡ ወኢትርሥዓነ።
10 ከመዝ፡ ይቤ፡ እግዚአብሔር፡ ወኢይትሐከዩ፡ ወእግዚአብሔርኒ፡ ኢይፈቅዶሙ፡ ወይእዜሂይዜከር፡ ኀጢአቶሙ፡ ወይሔውጸ፡ ጌጋዮሙ።
11 ወይቤለኒ፡ እግዚአብሔር፡ ኢትጸሊ፡ ሎሙ፡ ለዝ፡ ሕዝብ፡ በእንተ፡ ሠናይ።
12 እስመ፡ እመሂ፡ ጾሙ፡ ኢይሰምዖሙ፡ ምህላሆሙ፡ ወእመሂ፡ አብኡ፡ መሥዋዕተ፡ ወቊራባነ፡ ኢይሠሃሎሙ፡ እስመ፡ በኲናት፡ ወበረኀብ፡ ወበብድብድ፡ አጠፍዖሙ፡ አነ።
13 ወእቤ፡ አነ፡ አሌ፡ ሊተ፡ እግዚኦ፡ እግዚኦ፡ ወናሁ፡ ነቢያት፡ ዓላውያን፡ ይቤልዎሙ፡ ኢይረክበክሙ፡ ኲናት፡ ወረኀብ፡ ወብድብድ፡ ወኢይመጽአክሙ፡ ዳዕሙ፡ ሰላመ፡ ወጽድቀ፡ እሁብ፡ ለዝ፡ ሕዝብ።
14 ወይቤለኒ፡ እግዚአብሔር፡ ሐሰዉ፡ ነቢይት፡ ዘተነበዩ፡ በስምየ፡ ኢፈነውክዎሙ፡ ወኢተናገርክዎሙ፡ እስመ፡ ሀሰዉ፡ ሰሀሎሙ፡ ወተዋርዶቶሙ፡ በከ፡ እምልቦሙ፡ ዘፈጠሩ፡ ወእምልቦሙ፡ ዘፈጠሩ፡ ይተኔበዩ።
15 በእንተ፡ ዝንቱ፡ ይቤ፡ ከመዝ፡ እግዚአብሔር፡ በእንተ፡ ነቢያት፡ እለ፡ ተነበዩ፡ በስምየ፡ ሐሰተ፡ ዘኢፈነውክዎሙ፡ አነ፡ ወይቤሉ፡ ኢይመጽኦ፡ ለዝ፡ ሕዝብ፡ ኲናት፡ ወረኀብ፡ ወሞት፡ እኩይ።
16 በመጥባሕት፡ ወረኀብ፡ የሐልቁ፡ እሙንቱ፡ ነቢያት፡ ወሕዝብኒ፡ እለ፡ ሎሙ፡ ትትነበዩ፡ ወእዘሩ፡ አብድንቲሆ፡ ውስተ፡ ፍናዊሃ፡ ለኢየሩሳሌም፡ እምገጸ፡ ኲናት፡ ወረኀብ፡ ወአልቦ፡ ዘይቀብሮሙ፡ እሙንቱኒ፡ ወአንስቶሙኒ፡ ወደቂቆሙኒ፡ ወአዋልዲሆሙኒ፡ ወእክዑ፡ ላዐሌሆሙ፡ እከዮሙ።
17 ወበሎሙ፡ ዘነገረ፡ አንብዕ፡ ይውኅዝ፡ እምአዕይንቲክሙ፡ መዓልተ፡ ወሌሊተ፡ ዘኢይነጽፍ፡ እስመ፡ ቅጥቃጤ፡ ትቅቀጠቀጥ፡ ድንግል፡ ወለተ፡ ሕዝብየ፡ በዐቢይ፡ ቀትል፡ ጥቀ።
18 እመሂ፡ መጻእኩ፡ ገዳመ፡ እረክብ፡ አብድንተ፡ በኲናት፡ ወእመሂ፡ ቦእኩ፡ ሀገረ፡ እስመ፡ ነቢያትኒ፡ ወካህናትኒ፡ ሖሩ፡ በፍኖት፡ በኢአምሩ።
19 ለእመ፡ መንኖ፡ መነንኮ፡ ለይሁዳ፡ ወለእመ፡ ጸልአታ፡ ነፍስከ፡ ለጽዮን፡ ለምንት፡ አውደቀነ፡ ወኃጥአነ፡ ፈውስ፡ ተሰፈውነ፡ ሰላመ፡ ወኀጥአይነ፡ ሠናይተ፡ ወሣህለ፡ በመዋዕሊነ፡ ዘእንበለ፡ ሐከክ።
20 አእመርነ፡ እግዚኦ፡ ኀጢአተነ፡ ወጌጋየ፡ አበዊነ፡ እስመ፡ አበስነ፡ በቅድሜከ።
21 ተመየጠነ፡ በእንተ፡ ስምከ፡ ወኢትግድፍ፡ መንበረ፡ ስብሐቲከ፡ ተዘከር፡ ወኢትንሥት፡ ሥርዐተ፡ ዘኀቤነ።
22 ቦኑ፡ ጣኦተ፡ አህዛብ፡ ዘያዘንም፡ ወእመሂ፡ ወሀበ፡ ሰማይ፡ ጠለ፡ ወአጽገበ፡ አኮኑ፡ አንተ፡ ውእቱ፡ አምላክነ፡ ወተሰፈውናከ፡ እስመ፡ አንተ፡ ገበርከ፡ ዘንተ፡ ኵሎ።
=== chapter 15 ===
[Chapter 15]
1 ወይቤለኒ፡ እግዚአብሔር፡ እመ፡ ቆሙ፡ ሙሴ፡ ወሳሙኤል፡ ቅድመ፡ ገጽየ፡ ኢኀሀለወት፡ ነፍስየ፡ ኀቤሆሙ፡ ፈንዎሙ፡ ዳዕሙ፡ ለዝ፡ ሕዝብ፡ ይሑሩ።
2 ወለእመ፡ ይቤሉከ፡ አይቴኑ፡ ነሐውር፡ በሎሙ፡ ከመዝ፡ ይቤ፡ እግዚአብሔር፡ ዘሂ፡ ውስተ፡ ሞት፡ ለሞት፡ ወዘሂ፡ ውስተ፡ ኲናት፡ ለኲናት፡ ወዘሂ፡ ውስተ፡ ረኀብ፡ ለረኀብ፡ ወዘሂ፡ ተፄውዎ፡ ለተፄውዎ።
3 ወእትቤቀሎሙ፡ አርባዕተ፡ በቀለ፡ ይቤ፡ እግዚአብሔር፡ እለሂ፡ በኲናት፡ ረገዝዎሙ፡ ከለባት፡ ይቤ፡ ጽልዕዎሙ፡ ወአእዋፈ፡ ሰማይ፡ ወአራዊተ፡ ገዳም፡ ይበልዕዎሙ፡ ወያማስንዎሙ፡ ወይፀይዑ፡ ወየዐጽዩ።
4 ወእሁቦሙ፡ ለማሳሌ፡ ለኵሎሙ፡ ነገሥተ፡ ምድር፡ በእንተ፡ ምናሴ፡ ወልደ፡ ሕዝቅያስ፡ ንጉሠ፡ ይሁዳ፡ በእንተ፡ ኵሉ፡ ዘገብረ፡ በኢየሩሳሌም።
5 አልቦ፡ ዘይምህከኪ፡ ኢይሩሳሌም፡ ወአልቦ፡ ዘይቴክዝ፡ በእንቲኣኪ፡ ወአልቦ፡ ዘይስእል፡ ዳህናኪ።
6 እስመ፡ ዐለውክኒ፡ ድኅሪተ፡ ተሐውሪ፡ ወአነሥእ፡ እዴኪ፡ ላዕሌኪ፡ ወአጠፍአኪ፡ ወኢይሴሕቶሙ፡ እንከ፡ ሞት።
7 ወእዝርዎሙ፡ ውስተ፡ አጽናፍ፡ ለሕዝብየ፡ ወኮንኩ፡ ነካነ፡ ወሀጐልኩ፡ ሕዝብ፡ እምፍኖቶሙ።
8 በዝኀ፡ እምኆፃ፡ ባሕር፡ መበለታቲሆሙ፡ ወአምጻእኩ፡ ወራዙተ፡ ላዕለ፡ እሞሙ፡ ወኀሣሮሙ፡ በጊዜ፡ መዓልት፡ ወአውረድኩ፡ ግብተ፡ ላዕሌሃ፡ ረዓደ፡ ወምምዓ።
9 ኀልቀት፡ እስመ፡ ሰብአተ፡ ወለደት፡ ወተቆጥዓት፡ ነፍሳ፡ ወዐረባ፡ ፀሓይ፡ ቀትረ፡ መዓልት፡ ወአውረድኩ፡ ግብተ፡ ላዕሌሃ፡ ረኣደ፡ ወምምዓ፡ ዐርቀት፡ እንተ፡ ሰብአተ፡ ወለደት፡ ወተኀፍረት፡ ወኀሥረት፡ ወለእለ፡ ተርፉ፡ እምውስቴቶሙ፡ ውስተ፡ ኲናት፡ አገብኦሙ፡ በቅድመ፡ ፀሮሙ፡ ይቤ፡ እግዚአብሔር።
10 አሌ፡ ሊተ፡ እምየ፡ እስመ፡ ወለድከኒ፡ ብእሴ፡ ዘእሤነን፡ ወእትዋቀስ፡ በኵሉ፡ ምድር፡ ኢበቋዕኩ፡ ወኢይበቊዐኒ፡ እስመ፡ ኵሎሙ፡ ይረግሙኒ።
11 ለይኩን፡ እግዚኦ፡ ለተሰርሖ፡ ዚኣሆሙ፡ እመ፡ ኢቆምኩ፡ ኀቤከ፡ በመዋዕለ፡ ምንዳቤሆሙ፡ ወበጊዜ፡ ሕማሞሙ፡ በሠናይ።
12 በኀበ፡ ፀር፡ ይትዐወቅኑ፡ ኀፂን፡ እምሰሜን፡ ወብርት፡ እምደቡብ፡ ኀይለከ፡ ወመዛግብቲከ፡ እሁብ፡ ሊተ፡ በርብሮ፡ አኮ፡ በቤዛ፡ በኵሉ፡ ኀጢአትከ፡ ወበኵሉ፡ ጌጋይከ፡ ወበኵሉ፡ በሀውርቲከ።
13 ወአቀንየከ፡ ለፀርከ፡ ዘዐውድከ፡ በብሔር፡ ዘተአምር፡ እስመእሳት፡ ትነድድ፡ እመዓት፡ ላዕሌክሙ፡ ወታውዒ።
14 ሀሀሀ።
15 አንተ፡ ተአምር፡ እግዚኦ፡ ተዘከረኒ፡ ወአድኅነኒ፡ እምእለ፡ ሮዱኒ፡ ወኢትትዓገሥ፡ በእንቲኣየ።
16 ተዘከር፡ ጽእለትየ፡ በእንቲኣከ፡ ለእለ፡ ዐለዉ፡ ቃለከ፡ ወሊተሰ፡ ይኩን፡ ነገርከ፡ ለፍሥሓየ፡ ወለሐሴተ፡ ልብየ፡ እስመ፡ ተሰምየ፡ ስምከ፡ በላዕሌየ፡ እግዚኦ፡ ዘኵሎ፡ ትመልክ።
17 ወኢነበርኩ፡ ውስተ፡ ዐውዶሙ፡ ለመስተሣልቃን፡ ዳዕሙ፡ እፈርህ፡ እም፡ ገጸ፡ እዴከ፡ ባሕቲየ፡ እነበብርወጸገብክዎ፡ ለዕጒሥታር።
18 ለምንት፡ ይጸንዑ፡ እለ፡ ይቴክዙኒ፡ ወዐብየ፡ ቊስልየ፡ ወአልቦ፡ ዘይፌውሰኒ፡ ከዊነ፡ ኮነኒ፡ ከመ፡ ማየ፡ ሐሰት፡ ዘአልቦ፡ ሃይማኖት።
19 በእንተ፡ ዝንቱ፡ ከመዝ፡ ይቤ፡ እግዚአብሔር፡ ለእመ፡ ጠመየጥከ፡ እመይጠከ፡ ወትቀውም፡ ቅድመ፡ ገጽየ፡ ወእመ፡ አውጻእከ፡ ክብረ፡ ሥጋዌ፡ ትከውን፡ ከመ፡ አፉየ፡ እምልብከ፡ ወይሠወጡ፡ እሙንቱ፡ ኀቤከ፡ ወአንተሰ፡ ኢትትመየጦሙ።
20 ወእሬስየከ፡ ለዝ፡ ሕዝብ፡ ከመ፡ ዐረፍተ፡ ብርት፡ ጽኑዕ፡ ወይፀብዑከ፡ ወኢይክሉከ፡ እስመ፡ አነ፡ ሐሎኩ፡ ምስሌከ፡ ወአነ፡ አድኅነከ፡ እምእደ፡ እኵያን፡ ወእባልሀከ፡ እምዕደ፡ ዓላውያን።
=== chapter 16 ===
[Chapter 16]
1 ወአንተሰ፡ ኢታውስብ፡ ብእሲተ።
2 ወኢትለድ፡ ወልደ፡ ወወለተበዝ፡ ብሔር።
3 እስመ፡ ከመ፡ ዝ፡ ይቤ፡ እግዚአብሔር፡ በእንተ፡ ደቂቅ፡ ወአዋልድ፡ እለ፡ ይትወለዱ፡ በዝ፡ ብሔር፡ ወበእንተ፡ እማቲሆሙ፡ እለሐረሳዊሆሙ፡ ወበእንተ፡ አበዊሆሙእለ፡ ወለድዎሙ፡ በዝ፡ ምድር።
4 ሞተ፡ እኩይ፡ ይመውቱ፡ ወኢይበክይዎሙ፡ ወኢይቀብርዎሙ፡ ዳዕሙ፡ ይትሀበለይዎሙ፡ ውስተ፡ ገጸ፡ ምድር፡ ወይወድቁ፡ ውሰተ፡ ኲናት፡ ወየኀልቁ፡ በረኀብ፡ ወይከውኑ፡ አብድንቲሆሙ፡ መብልአ፡ ለአእዋፈ፡ ሰማይ፡ ወለአራዊ፡ ገዳም።
5 እስመ፡ ከመዝ፡ ይቤ፡ እግዚአብሔር፡ ኢትብክዮሙ፡ ወኢትባእ፡ ውስተ፡ ቤተ፡ ላህ፡ ወኢትላህዎሙ፡ እስመ፡ አዕተትኩ፡ ሰላም፡ እምዝ፡ ሕዝብ፡ ቤ፡ እግዚአብሔር፡ ወምሕረትየሂ፡ ወሣህልየሂ።
6 ወይመውቱ፡ ንኡስ፡ ወዐቢይ፡ በዝ፡ ምድር፡ ወኢይቀብርዎሙ፡ ወኢይላህውዎሙ፡ ወኢይክርዩ፡ ሎሙ፡ ወኢይበክይዎሙ፡ ወኢትላዩ።
7 ወኢይናዝዝዎሙ፡ በእንተ፡ ዘሞቱ፡ ወኢይግዕቱ፡ ሎሙ፡ ወኢይፌትቱ፡ ሎሙ፡ ኅብስተ፡ ወጽዋዐ፡ ኢያሠትይዎሙ፡ በዘይትናዘዙ፡ በእንተ፡ አቡሆሙ፡ ወእሞሙ።
8 ወኢትባዕ፡ ምስሌሆሙ፡ ቤተ፡ ምስሐግ።
9 በእንተ፡ ዝንቱ፡ ይቤ፡ እግዚአብሔር፡ ኀያል፡ አምላከ፡ እስራኤል፡ ናሁ፡ አነ፡ እሥዕር፡ እምዝንቱ፡ እምዝንቱ፡ ብሔር፡ በቅድመ፡ አዕይንቲክሙ፡ ወበመዋዕሊክሙቃለ፡ ትፍሥሕት፡ ወቃለ፡ ሐሴት፡ ቃለ፡ መርዓዊ፡ ወቃለመርዓት።
10 ወሶበ፡ ነገርኮ፡ ለዝ፡ ሕዝብ፡ ዘንተ፡ ኵሎ፡ ነገረ፡ ወይብሉከ፡ ለምንት፡ ነበበ፡ እግዚአብሔር፡ ዘንተ፡ ኵሉ፡ ነገረ፡ እኩየ፡ ዐቢየ፡ ላዕሌነ፡ ምንት፡ ጌጋይነ፡ ወምንት፡ አበሳነ፡ ዘአበስነ፡ ለእግዚአብሔር፡ አምላክነ።
11 ትብሎሙ፡ እስመ፡ ኀደጉኒ፡ አበዊክሙ፡ ይቤ፡ እግዚአብሔር፡ ወሖሩ፡ ወተለዉ፡ አማልክተ፡ ነኪር፡ ወተቀን፡ ሎሙ፡ ወኪያየሰ፡ ኀደጉኒ፡ ወሕግየኒ፡ ኢዐቀቡ።
12 ወአንትሙ፡ አብዛኅክሙ፡ ገቢረ፡ እከይ፡ እምአበዊክሙ፡ ወናሁ፡ ኵልክሙ፡ ተለውክሙ፡ ፍትወተ፡ ልብክሙ፡ እኵየ፡ ወዐበይክሙ፡ ሰሚዖት።
13 ወእገድፈክሙ፡ እምዝ፡ ምድር፡ ውስተ፡ ብሔር፡ ዘኢትአምሩ፡ ኢአንትሙ፡ ወኢአበዊክሙ፡ ወትትቀነዩ፡ በህየ፡ ለባዕዳን፡ አማልክት።
14 በእንተ፡ ዝንቱ፡ ናሁ፡ ይመጽእ፡ መዋዕልይቤ፡ እግዚአብሔር።
15 ወኢይብሉ፡ እንከ፡ ሕያው፡ እግዚአብሔር፡ ዘአውጽኦሙ፡ እምደቂቀ፡ እስራኤል፡ እምድረ፡ ግብፅ፡ ዳዕሙ፡ ሕያው፡ እግዚአብሔር፡ ዘአውፅአ፡ ለቤተ፡ እስራኤል፡ እብሔረሰሜን፡ ወእምኵሉ፡ በሐውርት፡ ኀበ፡ ወሰድክምዎ፡ ህየ፡ አአትዎሙ፡ ውስተ፡ ምድሮሙ፡ ዘወሀብክዎሙ፡ ለአበዊሆሙ።
16 ናሁ፡ አነ፡ እፌኑ፡ ብዙኃነ፡ መሠግራነ፡ ያሥግርዎሙ፡ ይቤ፡ እግዚአብሔር፡ ወእምዝ፡ እፌኑ፡ ብዙኃነ፡ ነዓውያነ፡ ወይንዕውዎሙ፡ በላዕለ፡ ኵሉ፡ አድባር፡ ወበላዕለ፡ ኵሉ፡ አውግር፡ ወበላዕለ፡ ኵሉ፡ ንቅዓታተ፡ ኰኵሕ።
17 እስመ፡ አዕይንትየ፡ ይኔጽራ፡ ውስተ፡ ኵሉ፡ ፍናዊሆሙ፡ ወኢይሴወር፡ እምቅድመ፡ አዕይንትየ፡ ኀጢአቶሙ፡ ወኢይትኀባዕ፡ ጌጋዮሙ።
18 ወእፈድዮሙ፡ ካዕበተ፡ ዐመፃሆሙ፡ ወጌጋዮሙ፡ ዘአርኰሱ፡ ምድርየ፡ በእበደ፡ ርኵሶሙ፡ ወበኀጢአቶሙ፡ ዘአርኰሱ፡ ርስትየ።
19 እግዚአብሔር፡ ኀይል፡ ወረዳዕየ፡ ወፀወንየ፡ በእለተ፡ ምንዳቤየ፡ ይ፡ ነቢይ፡ ወይመጽኡ፡ አሕዛብ፡ ኀቤከ፡ እምአጽናፈ፡ ምድር፡ ወይብሉ፡ በከ፡ ወሐሰተ፡ ገብሩ፡ አበዊነ፡ ጣዖቶሙ፡ ዘለምንትሂ፡ ኢይበቊዖሙ።
20 ይገብርኑ፡ ሎቱ፡ ሰብእ፡ አማልክተ፡ ዘኢኮኑ፡ አማልክተ።
21 በእንተ፡ ዘዝንቱ፡ ናሁ፡ አነ፡ እነግሮሙ፡ በዝ፡ መዋዕል፡ ወአርእዮሙ፡ እዴየ፡ ወኀይልየኒ፡ ወየአምሩከመ፡ እግዚአብሔር፡ ስምየ።
=== chapter 17 ===
[Chapter 17]
1 ኀጢአታ፡ ለይሁዳ፡ ጽሑፍ፡ በቀለመ፡ ሐፂን፡ ውስተ፡ ሠሌዳ፡ ዕብን፡ ወግሉፍ፡ ውስተ፡ ጽሌ፡ ልቦሙ፡ ወበአቅርንት፡ ምሥዋዒሆሙ።
2 እሰከ፡ ይዜከሩ፡ ደቂቆሙ፡ ምሥዋዒሆሙ፡ ወምሕራማቲሆሙ፡ ውስተ፡ ዕፅ፡ ዘቦ፡ ጽላሎት፡ ዲበ፡ አውግር፡ ልዑላት፡ ወአድባረ፡ ገዳም።
3 ኀይለከ፡ ኵሎ፡ ወመዛግብቲከ፡ ለተበርብሮ፡ እሁብ፡ ወአውግረ፡ ጣዖትከ፡ በኀጢአትከ፡ ወለኵሉ፡ አድዋሊከ።
4 ወተኀልቅ፡ እም፡ ርስትከ፡ ዘወሀብኩከ፡ ለከ፡ ወአቀንየከ፡ ለፀርከ፡ ውውስተ፡ ምድር፡ ዘኢትአምር፡ እስመ፡ እሳት፡ ትነድድ፡ በመዓትየ፡ እሰከ፡ ለዓለም።
5 ከመዝ፡ ይቤ፡ እግዚአብሔር፡ ርጉመ፡ ለይኩን፡ ኵሉ፡ ሰብእ፡ ዘይትአመን፡ በእጓለእመሕያው፡ ወያሰምክ፡ መዝራዕቶ፡ ቦቱ፡ ወእምእግዚአብሔር፡ ይርኅቅ፡ ልቡ።
6 ወይከውን፡ ከመ፡ ኳሄላ፡ በውስተ፡ ገዳም፡ ወኢይሬኢ፡ ሠናየ፡ ሶበ፡ ይመጽእ።
7 ወቡሩክ፡ ብእሲ፡ ዘይትዌከል፡ በእግዚአብሔር፡ ወእግዚአብሄር፡ ተስፋሁ፡ ይከውን።
8 ወይከውን፡ ከመ፡ ዕፅ፡ እንተ፡ ትክልት፡ ኀበ፡ ሙኀዘ፡ ማይ፡ ወይጸንዕ፡ ሥርዉ፡ ወኢይፈፈርህ፡ ሶበ፡ ይመጽእ፡ ሐሩረ፡ ወኢይከውን፡ ንጉፈ፡ ቆጽለ፡ አዕጹቂሁ፡ በዓመተ፡ ዓባርኢይፈርህ፡ ወኢያንቀለቅል፡ ወኢያነትግ፡ ፈረየ።
9 ዕሙቅ፡ ልቡ፡ እምኵሉ፡ ሰብእ፡ ወመኑ፡ የአምሮ።
10 አነ፡ እግዚእበሔር፡ ዘእሬኢ፡ ልበ፡ ወእፈትን፡ ወኵልያተ፡ ከመአሀቡ፡ ለለአሐዱ፡ በከመ፡ ፍነኖቱ፡ ወበከመ፡ ፍሬ፡ ምግባሩ።
11 ነቀወት፡ ቆቃህ፡ ወአስተጋብአት፡ ወኢወለደት፡ ዘይገብር፡ ብዕሎ፡ ዘዘእንበለ፡ ጽድቅ፡ የኀግጎ፡ በመንፈቀ፡ መዋዕሊሁ፡ ወይከውን፡ አብደ፡ በደኀሪቱ።
12 መንበረ፡ ክብር፡ ልዑል፡ እምልዑላን፡ መካነ፡ መቅደስነ።
13 ተስፋሁ፡ ለእስራኤል፡ እግዚኦ፡ ኵሎሙ፡ እለ፡ ኀደጉከ፡ ተኀፍሩ፡ ወተገሠጹ፡ ዓላውያን፡ ውስተ፡ ምድር፡ ወተጽሕፉ፡ እለ፡ ኀደግዎ፡ ለእግዚአብሔር፡ ነቅዐ፡ ማ፡ ሕይወት።
14 ተሠሃለኒ፡ እግዚኦ፡ ይቤ፡ ነቢይ፡ ወአሕይወኒ፡ ወአድኅነኒ፡ ወእድኅን፡ እስመ፡ አንተ፡ ምህክየ።
15 ናሁ፡ ይብሉኒ፡ እሙንቱ፡ አይቴኑመ፡ ቃለ፡ እግዚአብሔር።
16 አንሰ፡ ኢደከምኩ፡ እንዘ፡ እትሉ፡ ድኅሬከ፡ ወኢያፍተወኒ፡ መዋዕለ፡ ሰብእ፡ ለሊከ፡ ተአምር፡ ዘይወፅእ፡ እም፡ ከናፍርየ፡ ቅድመ፡ ገጽከ፡ ውእቱ።
17 ወኢይኩነኒ፡ ሊተ፡ ተናክሮ።
18 ለይትፈሩ፡ እለ፡ ይሰድዱኒ፡ ወአንሰ፡ ኢይትኀፈር፡ ለይደንግፁ፡ እሙንቱ፡ ወአንሰ፡ ኢይገንግፅ፡ አምጽእ፡ ላዕሌሆሙ፡ እለተ፡ እኪተ፡ በምክዕቢተ፡ ቅጥቃጤ፡ ቀጥቅጦሙ።
19 ከመዝ፡ ይቤለኒ፡ እግዚአብሔር፡ ሑር፡ ወቁም፡ ውስተ፡ አንቀጸ፡ ደቂቀ፡ ሕዝብከ፡ እንተ፡ ኀበ፡ ይበውኡ፡ ኵሉ፡ ነገሥተ፡ ይሁዳ፡ ወእንተ፡ ኀበ፡ ይወፅኡ፡ እምውስቴቶሙ፡ ወበውስቴቶሙ፡ አናቅጸ፡ ኢየሩሳሌም።
20 ወበሎሙ፡ ስምዑ፡ ቃለ፡ እግዚአብሔር፡ ነገሥተ፡ ይሁዳ፡ ወኵሉ፡ እለ፡ ትነብሩ፡ ኢየሩሳሌም፡ ወእለ፡ ትበውኡ፡ ውስተ፡ ዛ፡ አንቀጽ።
21 ከመዝ፡ ይ፡ እግዚአብሔር፡ ዕቀቡ፡ ነፍስክሙ፡ ወኢታንሥኡ፡ ምንተኒ፡ ፆረ፡ ከረቡደ፡ በዕለተ፡ ሰንበት፡ ወኢታብኡ፡ እንተ፡ አናቅጸ፡ ኢየሩሳሌም።
22 ወኢታውፅኢ፡ ፆረ፡ እምአብያቲክሙ፡ ነዕለተ፡ ሰንበታት፡ ወኵሎ፡ ግብረ፡ ኢትግበሩ፡ ወቀድሱ፡ ዕለተ፡ ሰንበታት፡ በከመ፡ አዘዝክዎሙ፡ ለአበዊክሙ።
23 ወኢሰምዑኒ፡ ወኢያጽምዑኒ፡ በእዘኒሆሙወአግዘፉ፡ ክሣዶሙ፡ ከመ፡ ኢይሰምዑኒ፡ ወአበዩ፡ ተግሣፅየ።
24 ወይእዜኒ፡ አመ፡ ሰሚዐ፡ ሰማዕክሙ፡ ይቤ፡ እግዚአብሔር፡ ወኢያባዕክሙ፡ ፆረ፡ እንተ፡ ኆሃቲሃ፡ ለዛ፡ ሀገር፡ በዕለተ፡ ሰንበት፡ ወቀደስክሙ፡ ዕለተ፡ ሰንበት፡ ወኢገበርክሙ፡ ኵሎ፡ ግብረ።
25 ወይበውዑ፡ እንተ፡ አናቅጺሃ፡ ለዛ፡ ሀገር፡ ነግሥት፡ ወመላእክት፡ እለ፡ ይንብሩ፡ ውስተ፡ መንበረ፡ ዳዊት፡ ወይጼዓኑ፡ ውስተ፡ ሠረገላ፡ ወአፍራስ፡ እሙንቱ፡ ወመላእክሆሙኒ፡ ሰብአ፡ ይሁዳ፡ ወእለ፡ ይነብሩ፡ ኢየሩሳሌም፡ ወትነብር፡ ዛ፡ ሀገር።
26 ወይመጽኡ፡ እምአህጉረ፡ ይሁዳ፡ ወአድያመ፡ ኢየሩሳሌም፡ ወእምብሄረ፡ ብንያም፡ ወእምአህቃላት፡ ወእምአድባር፡ ወእምመንገለ፡ ሰሜን፡ ወያመጽኡ፡ መሠዋተ፡ ወቊርባነ፡ ወመሐና፡ ወስሒን፡ ወያመጽኡ፡ አኰቴተ፡ ለቤተ፡ እግዚአብሔር።
27 ወእመ፡ ኢሰማዕክሙኒ፡ ወኢቀደስክሙ፡ ዕለተ፡ ሰንበት፡ ወአባዕክሙ፡ ፆረ፡ እንተ፡ አናቅጺሃ፡ ለኢየሩሳሌም፡ በዐለተ፡ ሰንበት፡ አነድድ፡ እሳተ፡ ላዕለኆኀቲሃ፡ ወትበልዕ፡ መሠረታቲሃ፡ ለኢየሩሳሌም፡ ወትጠፍእ።
=== chapter 18 ===
[Chapter 18]
1 ቃል፡ ዘኮነ፡ እምኀበ፡ እግዚአብሔር፡ ኀበ፡ ኤርምያስ።
2 ወይቤሎ፡ ተንሥእ፡ ወረድ፡ ቤተ፡ ለብሐዊ፡ ወበህየ፡ አሰምዐከ፡ ነገርየ።
3 ወወረድኩ፡ ቤተ፡ ለብሐዊ፡ ግብሮ፡ ላዕለ፡ ኰኵሕ።
4 ወወድቀ፡ እምእዴሁ፡ ፃብሕ፡ ዘይገብር፡ ጽቡር፡ ወነሥኦ፡ ዳግመ፡ ወገብሮ፡ ፃብሕ፡ ካልአ፡ ዘከመ፡ አደሞ፡ በአዕይንቲሁ፡ ገብሮ።
5 ወነበበኒ፡ እግዚአብሔር፡ ወይቤለኒ።
6 ከመዝ፡ ጥቀ፡ መባሕት፡ ለለብሐዊ፡ ኢይክልኑ፡ ገቢረ፡ በቤተ፡ እስራኤል፡ ይቤ፡ እግዚአብሔር፡ ከመዝ፡ ጽቡረ፡ ለብሐዊ፡ ከማሁ፡ አንትሙሂ፡ ውስተ፡ እዴየ፡ ቤተ፡ እስራኤል፡ ዝንቱ።
7 ሕኩቀ፡ ምዕረ፡ እነግር፡ ላዕለ፡ ሕዝብ፡ ወላዕለ፡ ነገሥት፡ ከመ፡ እንሥቶሙ፡ ወአጥፍኦሙ፡ ወእደመስሶሙ።
8 ወእመሰ፡ ተመየጡ፡ እሙንቱ፡ ሕዝብ፡ እምኵሉ፡ እከዮሙ፡ ዘነበብኩ፡ ላዕሌሆሙ፡ ወእኔስሕ፡ በእንተ፡ እኩይ፡ ዘነበብኩ፡ ወመከርኩ፡ እግበር፡ ላዕሌሆሙ።
9 ምዕረ፡ እነብብ፡ ላዕለ፡ ሕዝብ፡ ወላዕለ፡ ነገሥት፡ በዘይትሐነጹ፡ ወይተክሉ።
10 ወገብሩ፡ እኩየ፡ ለሰዕሌየ፡ ወኢሰምኡኒ፡ ቃልየ፡ ወነሳሕኩ፡ በእንተ፡ ኵሉ፡ ሠናይ፡ ዘመከርኩእግበር፡ ላዕሌሆሙ።
11 ወይእዜኒ፡ በሎሙ፡ ለሰብአ፡ ይሁዳ፡ ወለእለ፡ ይነብሩ፡ ኢየሩሳሌም፡ ከመዝ፡ ይቤ፡ እግዚአብሔር፡ ናሁ፡ አነ፡ እፈጥር፡ እሁየ፡ ላዕሌክሙ፡ ወእመክር፡ እኩየ፡ ምክረ፡ ዲቤክሙ፡ ተመየጡ፡ ኵልክሙ፡ እምፍኖትክሙ፡ እኩይ፡ ወአሠንዩ፡ ፍኖትክሙ፡ ወምግባሪክሙ።
12 ወይቤሉ፡ አጥባዕነ፡ ንትሉ፡ አዕልወትነ፡ ወንሁር፡ ኵልነ፡ ወንግበር፡ እኩየ፡ ዘይሔውዛ፡ ለልብነ።
13 በእንተ፡ ዝንቱ፡ ከመዝ፡ ይቤ፡ እግዚአብሔር፡ ተሰአልዎሙ፡ ለአህዛብ፡ እመቦ፡ ዘሰምዑ፡ ዘከመዝ፡ መደንግፀ፡ ጥቀ፡ ዘገበብረት፡ ድንግለ፡ እስራኤል።
14 ይነጽፍኑ፡ ፈልፈል፡ እም፡ ኰኵሕ፡ ወአስሐትያ፡ እምሊባኖስ።
15 እስመ፡ ረስኡኒ፡ ሕዝብ፡ ወአጠኑ፡ ለከንቱ፡ ወደክሙ፡ በፍኖቶሙ፡ ድካመ፡ ዘለዓለም፡ ለሐዊር፡ ፍኖተ፡ ጠዋየ፡ ወመብዕሰ።
16 ወይከውና፡ አህጉሪሆሙ፡ ለተፋጽዮ፡ እስከ፡ ዓለም፡ ወኵሉ፡ ዘየኀልፍ፡ እንተ፡ ህየ፡ ይደነግፅ፡ ወየሐውስ፡ ርእሶ።
17 ከመ፡ ዐውሎ፡ መርቄ፡ እዘርዎሙ፡ በቅመ፡ ጸሮሙ፡ ዘባነ፡ ወአኮ፡ ገጸ፡ ወአርአዮሙ፡ ዕለተ፡ ሞቶሙ።
18 ወይሉ፡ ንዑ፡ ንምክር፡ ምክረ፡ ላዕለ፡ ኤርምያስ፡ እስመ፡ ኢይትረሣዕ፡ ሕግ፡ በኀበ፡ ካህን፡ ወምክር፡ በኀበ፡ ጠቢብ፡ ወኢነገር፡ በኀበ፡ ነቢይ፡ ወኢንስማዕኵሎ፡ ዘይብል።
19 ስምኣኒ፡ እግዚኦ፡ ወአጽምዕ፡ ቃለ፡ ስእለትየ።
20 ይፈድዩኒ፡ እኪተ፡ ህይንተ፡ ሠናይት፡ ከረዩ፡ ግበበ፡ ለነፍስየ፡ ተዘከር፡ እድዚኦ፡ ቁመትየ፡ ከመ፡ እትናገር፡ በእንቲኣሆሙ፡ ሠናየ፡ በቅድመ፡ ገጽከ፡ ከመ፡ ትሚጥ፡ መዓትከ፡ እምላዕሌሆሙ።
21 በእንተ፡ ዝንቱ፡ ፈኑ፡ ረኀብ፡ ላዕለ፡ ውሉዶሙ፡ ወአስተጋብኦሙ፡ ውስተእደ፡ ኲናት፡ ወይኩና፡ አንስቲያሆሙ፡ መካናተ፡ ወመበለታተ፡ ወያሕልቆሙ፡ ብድብደ፡ ለዕደዊሆሙ፡ ወወራዙቶሙ፡ ይደቁ፡ በውስተ፡ ቀትል።
22 ወይስማዕ፡ አውያት፡ ውስተ፡ አብያቲሆሙ፡ ወአምጽእ፡ ላዕሌሆሙ፡ ፈያተ፡ ግብተ፡ እስመ፡ ከረዩ፡ ግበ፡ የአኀዙኒ፡ ወመሥገርተ፡ ኀብኡ፡ ለእገርየ።
23 ለሊከ፡ እግዚኦ፡ ተአምር፡ ከመ፡ እኩየ፡ መከሩ፡ ላዕሌየ፡ ይቅትሉኒ፡ ኢትሥረይሎሙ፡ ኀጢአቶሙ፡ ወዚትደምስስ፡ ጌጋዮሙእምቅድመ፡ ገጽከ፡ ወይኩን፡ ሥዑለ፡ ቅድሜከ፡ ወረሰዮሙ፡ ለጊዜ፡ መዓትከ።
=== chapter 19 ===
[Chapter 19]
1 ከመዝ፡ ይቤለኒ፡ እግዚአብሔር፡ ሐሁር፡ ተሣየጥ፡ ለከ፡ ቀሱተ፡ ልሕኵት፡ ግብረ፡ እደ፡ ለብሐዊ፡ ወንሥአ፡ እምውስተ፡ ረበናቶሙ፡ ለሕዝብ፡ ወእምረበናተ፡ ካህናት።
2 ወተሐውርውስተ፡ ቈላተ፡ ወልደ፡ ሔኖም፡ ዘኆኅተ፡ አንቀጸ፡ ኰረራሲ፡ ወአንብብ፡ ሎሙ፡ በህየ፡ ኵሎ፡ ነገረ፡ ዘነገርኩከ።
3 ወበሎሙ፡ ስምዑ፡ ቃለ፡ እግዚአብሔር፡ ነገሥተ፡ ይሁዳ፡ ወእለ፡ ትነብሩ፡ ኢየሩሳሌም፡ ከመዝ፡ ይቤ፡ እግዚአብሔር፡ አምላከ፡ እስራኤልናሁ፡ አመጽ፡ ላዕለ፡ ዝ፡ ብሔር፡ እኩየ፡ ከመ፡ ኵሉ፡ ዘሰምዖ፡ ይደነግፅ፡ ወየአኀዝ፡ እዘኒሁ።
4 እስመ፡ ኀደጉኒ፡ ወተናከርዎ፡ ለዝ፡ ቤት፡ ወአጠኑ፡ በውስቴቱ፡ ለአማልክተ፡ ነኪር፡ ዘኢየአምርዎሙ፡ ኢእሙንቱ፡ ወኢአበዊሆሙ፡ ወነገሥተ፡ ይሁዳኒ፡ መልዕዎ፡ ለዝ፡ ቤት፡ ደመ፡ ጻድቃን።
5 ወሐነጹ፡ ምሥዋዐ፡ ለበዓል፡ ይሡዑ፡ ደቀቂቆሙ፡ በውስቴቱ፡ በእሳት፡ ዘኢአዘዝዎሙ፡ ወዘኢሐለይክዎ፡ በልብየ።
6 በእንተ፡ ዝንቱ፡ ናሁ፡ ይመጽእ፡ መዋዕል፡ ይቤ፡ እግዚአብሔር፡ ወኢይሰመይ፡ እንከ፡ ዝ፡ ቤት፡ ጣፌጥ፡ ወቈላተ፡ ወልደ፡ ሄኖም፡ ዘእንበለ፡ ቈላተ፡ ቅቱላን።
7 ወእከፍል፡ ምክረ፡ ይሁዳ፡ ወምክረ፡ ኢየሩሳሌም፡ በዝ፡ መካን፡ ወእነጽሖሙ፡ በኲናት፡ በቅድመ፡ ፀሮሙ፡ ወበእደ፡ እለ፡ የኀሥሥዋ፡ ለነፍሶሙ፡ ወእሬሲ፡ አብንድቲሆሙ፡ መብልዓ፡ ለአዕዋፈ፡ ሳማይ፡ ወለአራዊተ፡ ገዳም።
8 ወእሬስያ፡ ለዛ፡ ሀገር፡ ከመ፡ ኵሉ፡ ዘኀለፈ፡ እንተ፡ ላዕሌሃ፡ ይትፋጸይ፡ ወይደነግፅ፡ በእንተ፡ ኵሉ፡ መቅሠፍታ።
9 ወአበልዖሙ፡ ሥጋ፡ ደቂቆሙ፡ ወሥጋ፡ አዋልዲሆሙ፡ ወአሐዱ፡ አሐዱ፡ ይበልዕ፡ ሥጋ፡ ካልዑ፡ በምንዳቤ፡ አመ፡ ያመነድቦሙ፡ ጸሮሙ፡ ወአለ፡ የኀሥሥዋ፡ ለነፍሶሙ።
10 ወትቀጠቅጣ፡ ለዛ፡ ቀሱት፡ በቅድመ፡ አዕይንቲሆሙ፡ ለዕደው፡ እለ፡ የሐውሩ፡ ምስሌከ።
11 ወትብሎሙ፡ ከመዝ፡ ይቤ፡ እግዚአብሔር፡ ኀያል፡ ከመዝ፡ እቀተቅጦሙ፡ ለዝ፡ ሕዝብ፡ ወለዛ፡ ሀገር፡ በከመ፡ ተቀጥቀጠት፡ ዛቲ፡ ቀሱተ፡ ልሕኵት፡ ዘኢይክል፡ ሐይወ፡ እንከ፡ ወበጣፌጥ፡ ይትቀበሩ፡ እስመ፡ አልቦሙ፡ መካን፡ ለመቃብር፡ ዘይትቀበሩ።
12 ከመዝ፡ እሬስዮሙ፡ ለዝ፡ ሕዝብ፡ ወለዝ፡ ብሔር፡ ወለእለ፡ ይነብሩ፡ ውስቴታ፡ ይቤ፡ እግዚእብሔር፡ ወእሬስያ፡ ከመ፡ ጣፌጥ፡ ለዛ፡ ሀገር፡ ወአመ፡ ዘብራ።
13 ወይከውን፡ አብያተ፡ ኢየሩሳሌም፡ ወአብያተ፡ ነገሥተ፡ ይሁዳ፡ ከመ፡ መካነ፡ ጣፌጥ፡ ርኵሳነ፡ ወኵሉ፡ አብያት፡ ኀበ፡ የዐጥኑ፡ ዘዐጠኑ፡ ውስተ፡ አንስቲያሆሙ፡ ለከዋክብተ፡ ሰማይ፡ ወአውጽሑ፡ ሞፃሕቶሙ፡ ለአምላከ፡ ነኪር።
14 ወአተወ፡ ኤርምያስ፡ እምጣፌት፡ ዘፈነዎ፡ እግዚአብሔር፡ ይትነበይ፡ በህየ፡ ወቆመ፡ ውስተ፡ ዐጸደ፡ ቤተ፡ እግዚአብሔር።
15 ወይቤሎሙ፡ ከኵሎሙ፡ ሕዝብ፡ ለመዝ፡ ይቤ፡ እግዚአብሔር፡ አምላከ፡ እስራኤል፡ ናሁ፡ አመጽ፡ ላዕለ፡ ዛ፡ ሀገር፡ ወላዕለ፡ ኵሉ፡ አህጉሪሃ፡ ኵሎ፡ እኩየ፡ ዘነበብኩ፡ ላዕሌሃ፡ እስመ፡ አጽምዑ፡ ሐዳፎሙ፡ ከመ፡ ኢይስምዑ፡ ቃልየ።
=== chapter 20 ===
[Chapter 20]
1 ወሰምዓ፡ ጳስኮር፡ ወልደ፡ ኤሞር፡ ካህን፡ እስመ፡ ውእቱ፡ ተሠምየ፡ መኰንነ፡ ለቤተ፡ እግዚአብሔር፡ እንዘ፡ ይትኔበይ፡ ኤርምያስ፡ ዘ፡ ነገረ።
2 ወቀሠፎ፡ ጳስኮር፡ ለኤርምያስ፡ ነቢይ፡ ወሞቅሖ፡ ወወደዮ፡ ውስተ፡ አዘቅት፡ ኀበ፡ አንቀጸ፡ ብንያም፡ ላዕላይ፡ ዘውስተ፡ ቤተ፡ እግዚአብሔር።
3 ወእምዝ፡ በሳኒታ፡ አውጽኦ፡ ጳስኮር፡ ዘሰመየከ፡ እግዚአብሔር፡ ዳዕሙ፡ ፈላሲ፡ ዘየዐውድ።
4 እስመ፡ ከመዝ፡ ይቤ፡ እግዚአብሔር፡ ናሁ፡ አነ፡ አፈልሰከ፡ ምስለ፡ አኀዊከ፡ ወኵሉ፡ አአርከረቲከ፡ ወትወድቅ፡ በኲናተ፡ ፀርከ፡ እንዘ፡ ትሬኢ፡ በአዕይንቲከ፡ ወኪያነሂ፡ ወለኵሉ፡ ይሁዳ፡ አገብኦሙ፡ ውስተ፡ እደ፡ ንጉሠ፡ ባቢሎን፡ ያፈልስዎሙ፡ ወይወስድዎሙ፡ ባቢሎን፡ ወይቀትልዎሙ፡ በኲናት።
5 ወእሁብ፡ ኵሎ፡ ጽኑዓቲሃ፡ ለዛቲ፡ ሀገር፡ ወኵሎ፡ ፃማሃ፡ ወለኵሉ፡ ክብራ፡ ወለኵሉ፡ መዛግብተ፡ ነገደ፡ ይሁዳ፡ ውስተ፡ እደ፡ ጸላዕቶሙ፡ ይበርብርዎሙ።
6 ወአንተሰ፡ ጳስኮር፡ ወኵሉ፡ ቤተከ፡ ተሐውሩ፡ ወይፄውውክሙ፡ ባቢሎን፡ ወበህየ፡ ትመውት፡ አንተ፡ ወበህየ፡ ይቀብሩከ፡ ወኵሎሙ፡ አዕርክቲከ፡ ዘተነበይከ፡ ሎሙ፡ ሐሰተ።
7 ቀሠፍከኒ፡ እግዚኦ፡ ወተቀሠፍኩ፡ ወአጽናዕከኒ፡ ወክህልከ፡ አሕይወትየ፡ ወኮንኩ፡ ሠሐቀ፡ ወሥላቅ፡ በኵሉ፡ መዋዕል፡ ወኵሉ፡ ይሣቀለኒ።
8 እስመ፡ ለለተናገርኩ፡ አዐወዩ፡ በግፍዕ፡ ወበኀሣር፡ እጼውዕ፡ ወኮነኒ፡ ቃለ፡ እግዚአብሔር፡ በዘይትሐበቡኒ፡ ወይዘነጉጉኒ፡ ኵሎ፡ አሚረ።
9 እቤ፡ ኢይዜከር፡ እንከ፡ ስመ፡ እግዚአብሔር፡ ወኢይነግር፡ በስመ፡ ዚኣሁ፡ ወኮነ፡ ልብየ፡ ከመ፡ እሳት፡ ዘይነድድ፡ ወአውዔኒ፡ አዕፅምትየ፡ ወስእንኩ፡ ፀዊሮቶ፡ ወኢክህልኩ።
10 እስመ፡ ሰማዕኩ፡ ውውዓሆሙ፡ ለብዙኃን፡ እለ፡ ተጋብኡ፡ ላዕሌየ፡ ወአገቱኒ፡ ተንሥኡ፡ ወንትነሣእ፡ ይቤሉ፡ ኵሉ፡ ዕደው፡ ሰላምየ፡ እለ፡ ይትዓቀቡ፡ ቊስልየ፡ እመ፡ ይስሕት፡ ወንክል፡ ተመጥወቶ፡ በቀለነ፡ እምኔሁ።
11 ወእግዚአብሔር፡ ምስሌየከመ፡ ጽኑዕ፡ መስተቃትል፡ በእንተ፡ ዝንቱ፡ እለ፡ ይዴግኑኒ፡ ደክሙ፡ ወኢክህሉ፡ ወተሐፍሩ፡ ጥቀ፡ እስመ፡ ኢየአምሩ፡ ኀሣሮሙ፡ እንተ፡ ኢትትረሳዕ፡ ለዓለም።
12 እግዚአብሄር፡ ጸባዖት፡ ዘትጤይቃ፡ ለጽድቅ፡ ወተአምር፡ ልበ፡ ወኵልያተ፡ ፍትሀ፡ ሊተ፡ ፍትሕየ፡ ዘእምኀቤከ፡ እስመ፡ ለከ፡ ከሠትኩ፡ ቅሥትየ።
13 ሰብሕዎ፡ ለእግዚአብሔር፡ ወአዕኵትዎ፡ እስመ፡ አድኃና፡ ነፍሰ፡ ነዳይ፡ እምእደ፡ እኵያን።
14 ርግምት፡ ትኩን፡ ዕለት፡ እንተ፡ ባቲ፡ ተወለድኩ፡ አመ፡ ወለደተኒ፡ እምየ።
15 ወኢይኩን፡ ቡሩክ፡ ሩጉም፡ ለይኩን፡ ብእሲ፡ ዘዜነዎ፡ ለአቡየ፡ ወይቤሎ፡ ተባዕት፡ ተወልደ፡ ለከ፡ ፍሥሓ፡ ዘያሥተፌሥሖ።
16 ወይኩን፡ ውእቱ፡ ብእሲ፡ ከመ፡ አህጉር፡ እለ፡ ገፍተትዖን፡ እግዚአብሔር፡ ወኢተሣህሎን፡ ወይስማዕ፡ አውያ፡ በጽባሕ፡ ወብካይ፡ በመዓልት።
17 እስመ፡ ኢቀተለኒ፡ በውስተ፡ ማኅፀን፡ ትኩነኒ፡ እምየ፡ መቃብርየ፡ ወማኅፀናኒ፡ ነሣኢትየ፡ ለዓለም።
18 ወለምንት፡ ወፃእኩ፡ እማኅፀን፡ ከመ፡ እርአይ፡ ሕማመ፡ ወሥራኅ፡ ወኀልቀ፡ መዋዕልየ፡ በኀሣር።
=== chapter 21 ===
[Chapter 21]
1 ቃለ፡ እግዚአብሔር፡ ዘኮነ፡ ኀበ፡ ኤርሚያስ፡ እምኀበ፡ እግዚአብሔር።
2 ወይቤሎ፡ ሰአሎ፡ ለእግዚአብሔር፡ በእንቲኣነ።
3 ወይቤሎሙ፡ ኤርምያስ፡ ከመ፡ ዝ፡ በልዎ፡ ለሴዴቅያስ፡ ንጉሠ፡ ይሁዳ።
4 ከመ፡ ዝ፡ ይቤ፡ እግዚአብሔር፡ አምላከ፡ እስራኤል።
5 ወአነ፡ እትቃተለክሙ፡ በእድ፡ ጽንዕት፡ ወበመዝራዕት፡ ልዕልት።
6 በመዓት፡ ወበመቅሠፍት፡ ዓቢይ።
7 ወእም፡ ዝ፡ ከመ፡ ዝ፡ ይቤ፡ እግዚአብሔር።
8 ወበሎሙ፡ ለዝ፡ ሕዝብ፡ ከመ፡ ዝ፡ ይቤ፡ እግዚአብሔር።
9 ዘነበረ፡ ውስተ፡ ዛ፡ ሀገር፡ ይመውት፡ በኵናት፡ ወበብድብድ፡ ወበረኃብ።
10 እስመ፡ አጽናዕኩ፡ ገጽየ፡ ላዕለ፡ ዛ፡ ሀገር፡ ለእኩይ፡ ወአኮ፡ ለሠናይ።
11 ስምዑ፡ ቃለ፡ እግዚአብሔር፡ ቤተ፡ ዳዊት።
12 ከመ፡ ዝ፡ ይቤ፡ እግዚአብሔር።
13 ናሁ፡ አነ፡ ላዕሌከ፡ ዘትነብር፡ ውስተ፡ ቈላተ፡ ኰኵሕ፡ ወውስተ፡ ገዳም።
14 ወእዋኅያ፡ ለኀጢአትክሙ፡ በከመ፡ ፍሬ፡ ምግባሪክሙ፡ ይቤ፡ እግዚአብሔር።
=== chapter 22 ===
[Chapter 22]
1 ከመ፡ ዝ፡ ይቤ፡ እግዚአብሔር።
2 ወትብል፡ ስማዕ፡ ቃለ፡ እግዚአብሔር፡ ንጉሠ፡ ይሁዳ።
3 ከመ፡ ዝ፡ ይቤ፡ እግዚአብሔር።
4 ወይእዜኒ፡ እመ፡ ትገብሩ፡ ገቢረ፡ ዘ፡ ነገረ፡ ይበውዑ፡ ውስተ፡ ዛ፡ አንቀጽ፡ እለ፡ ይነብሩ፡ ውስተ፡ መንበረ፡ ዳዊት።
5 ወእመሰ፡ ኢትሰምዑ፡ ዘ፡ ነገረ፡ መሐልኩ፡ በርእስየ፡ ይቤ፡ እግዚአብሔር፡ ከመ፡ ይማስን፡ ዝ፡ ቤት።
6 እስመ፡ ከመ፡ ዝ፡ ይቤ፡ እግዚአብሔር፡ ላዕለ፡ ቤተ፡ ንጉሠ፡ ይሁዳ።
7 ወአመጽእ፡ ላዕሌከ፡ ብእሴ፡ ዘይሴርወከ።
8 ወይመጽኡ፡ ብዙኃን፡ አሕዛብ፡ እንተ፡ ዛ፡ ሀገር፡ ላዕለ፡ ዛ፡ ሀገር።
9 ወይብልዎሙ፡ እስመ፡ ኀደጉ፡ ሕገ፡ እግዚአብሔር፡ አምላኮሙ።
10 ኢትብክይዎ፡ ለዘሞተ፡ ወኢትላህውዎ።
11 እስመ፡ ከመ፡ ዝ፡ ይቤ፡ እግዚአብሔር፡ ላዕለ፡ ሳሌም፡ ወልደ፡ ኢዮስያስ፡ ንጉሠ፡ ይሁዳ፡ ዘነግሠ፡ ህየንተ፡ ኢዮስያስ፡ አቡሁ፡ ዘወጽአ፡ እምዝ፡ ብሔር፡ ኢይገብዕ፡ እንከ፡ ህየ።
12 እስመ፡ ይመውት፡ በብሔር፡ ኀበ፡ ፄወውዎ።
13 አሌ፡ ሎቱ፡ ዘየሐንፅ፡ ቤቶ፡ በዐመፃ፡ ወጽርሐ፡ ዘእንበለ፡ ጽድቅ።
14 ወይቤ፡ ሐነፅኩ፡ ሊተ፡ ቤተ፡ ዘዓቢይ፡ አምጣኑ፡ ወጽርሑ።
15 ቦኑ፡ ትነግሥ።
16 ፍታሕ፡ ፍትሐ፡ ነዳይ፡ ወምስኪን።
17 ናሁ፡ ኢኮነ፡ ሠናይ፡ አዕይንቲከ፡ ወልብከሂ።
18 በእንተ፡ ዝንቱ፡ ከመዝ፡ ይቤ፡ እግዚአብሔር።
19 ወይቀብርዎ፡ መቃብረ፡ መሪረ።
20 ዕርጊ፡ ውስተ፡ ሊባኖስ፡ ወጽርሒ።
21 21፡ ወነገርኩ፡ ኃሣረኪ፡ ወትቤሊ፡ እንብየ፡ ኢይሰምዕ።
22 ለኵሎሙ፡ ኖሎትኪ፡ ነፋስ፡ ይነሥኦሙ፡ ወለመሐዛንኪ፡ ይፄውውዎሙ፡ ወትትኀፈሪ፡ ሶቤሃ፡ ወተኀሥሪ፡ እምኵሎሙ፡ እለ፡ ያፈቅሩኪ።
23 እንተ፡ ትነብር፡ ውስተ፡ ሊባኖስ፡ ወታስቆቁ፡ ውስተ፡ አርዝ፡ ምንተ፡ ወሀበኪ፡ ሶበ፡ አኀዘኪ፡ ማሕምም፡ ከመ፡ እንተ፡ ትወልድ።
24 ሕያው፡ አነ፡ ይቤ፡ እግዚአብሔር፡ ከመ፡ ኢትሄሉ፡ እንከ፡ ኢኮንያን፡ ወልደ፡ ኢዮአቄም፡ ንጉሠ፡ ይሁዳ፡ ማኅተመ፡ ላዕለ፡ እዴየ፡ ዘየማን፡ እንተ፡ ባቲ፡ ከደንኩከ።
25 ወአገብአከ፡ ውስተ፡ እዴሁሙ፡ ለእለ፡ የኀሥሥዋ፡ ለነፍስከ፡ ወውስተ፡ እደ፡ እለ፡ ፈራህከ፡ እምገጾሙ፡ ወውስተ፡ እደ፡ ናቡከደነፆር፡ ንጉሠ፡ ባቢሎን፡ ወውስተ፡ እደ፡ ከለዳውያን።
26 ወእዌርወከ፡ ምስለ፡ እምከ፡ እንተ፡ ወለደተከ፡ ውስተ፡ ብሔር፡ ኀበ፡ ኢተወለድክሙ፡ ቦቱ፡ ወበህየ፡ ትመውቱ።
27 ወውስተ፡ ብሔር፡ እንተ፡ ትትሜነይ፡ ነፍስክሙ፡ ኢትገብኡ፡ እንከ፡ ህየ።
28 ኀሥረ፡ ኢኮንያስ፡ ወኮነ፡ ከመ፡ ግተት፡ ዘለምንትሂ፡ ኢይበቊዕ፡ ወኢይትፈቀድ፡ እስመ፡ ገደፍዎ፡ ወወረውዎ፡ ሎቱ፡ ወለዘርኡ፡ ውስተ፡ ብሔር፡ ዘኢየአምር።
29 ምድር፡ ምድር፡ ምድር፡ ስምዒ፡ ቃለ፡ እግዚአብሔር።
30 ከመዝ፡ ይቤ፡ እግዚአብሔር፡ ጸሐፊዮ፡ ለዝ፡ ብእሲ፡ እስመ፡ ኢይሤራኅ፡ በመዋዕሊሁ፡ ወኢይሤራኅ፡ እምዘርኡ፡ ዘይነብር፡ ውስተ፡ መንበረ፡ ዳዊት፡ መኰንነ፡ እንከ፡ ለይሁዳ።
=== chapter 23 ===
[Chapter 23]
1 ሰይሌ፡ ለኖሎት፡ ቀታልያን፡ እለ፡ ትዘርዉ፡ አባግዓ፡ መርዔትየ፡ ይቤ፡ እግዚአብሔር።
2 በእንተ፡ ዝንቱ፡ ከመዝ፡ ይቤ፡ እግዚአብሔር፡ አምላክ፡ እስራኤል፡ በእንተ፡ ኖሎት፡ እለ፡ ይርዕይዎሙ፡ ለሕዝብየ፡ አንትሙ፡ ዘረውክሙ፡ አባግዕየ፡ ወሰደድክምዎሙ፡ ወኢሐለይክምዎሙ፡ አንትሙ፡ ናሁ፡ አነ፡ እትቤቀለክሙ፡ በከመ፡ እከየ፡ ምግባሪክሙ፡ ይቤ፡ እግዚአብሔር።
3 ወአነ፡ አስተጋብኦሙ፡ ለእለ፡ ተርፉ፡ ሕዝብየ፡ እምኵሉ፡ በሐውርት፡ ኀበ፡ ዘረውክዎሙ፡ ወኀበ፡ ወሰድክዎሙ፡ ህየ፡ ወአገብኦሙ፡ ውስተ፡ ፂኦቶሙ፡ ወይበዝኁ፡ ወይመልኡ።
4 ወእሠይም፡ ሎሙ፡ ኖሎተ፡ እለ፡ ይርዕይዎሙ፡ ወኢይፈርሁ፡ እንከ፡ ወኢይደነግፁ፡ ይቤ፡ እግዚአብሔር።
5 ናሁ፡ ይመጽእ፡ መዋዕል፡ ይቤ፡ እግዚአብሔር፡ ወአቀውም፡ ለዳዊት፡ ሠርፀ፡ ጽድቅ፡ ወይነግሥ፡ ንጉሥ፡ ዘይሔሊ፡ ወይገብር፡ ጽድቀ፡ ወርትዓ፡ በዲበ፡ ምድር።
6 ወበመዋዕሊሁ፡ ይድኅን፡ ይሁዳ፡ ወእስራኤልኒ፡ ይነብር፡ ተአሚኖ፡ ወዝውእቱ፡ ስም፡ ዘሰመዮ፡ እግዚአብሔር፡ ኢዮሴዴቅ፡ በውስተ፡ ነቢያት።
7 በእንተ፡ ዝንቱ፡ ናሁ፡ ይመጽእ፡ መዋዕል፡ ይቤ፡ እግዚአብሐየር፡ ወኢይብሉ፡ እንከ፡ ሕያው፡ እግዚአብሔር፡ ዘአውፅኦሙ፡ ለቤተ፡ እስራኤል፡ እምድር፡ ግብጽ።
8 ዳእሙ፡ ሕያው፡ እግዚአብሐየር፡ ዘአዕተጎሙ፡ ወአውፅኦሙ፡ ለኵሎሙ፡ ዘርአ፡ እስራኤል፡ እምድረ፡ ሰሜን፡ ወእምኵሊ፡ በሐውርት፡ ኀበ፡ ወሰዶሙ፡ ወአግብኦሙ፡ ውስተ፡ ብሔሮሙ፡ ህየ፡ ወለነቢያትሂ።
9 ተቀጥቀጠኒ፡ ልብየ፡ በላዕሌየ፡ ወአንቀልቀለ፡ ኵሉ፡ አዕፅምትየ፡ ወኮንኩ፡ ከመ፡ ብእሲ፡ ቅጥቁጥ፡ ወከመ፡ ብእሲ፡ ዘያተነትኖ፡ ሰካረ፡ ወይን፡ እምቅድመ፡ ገጸ፡ ለእግዚአብሔር፡ ወእምቅድመ፡ ገጸ፡ ስብሐተ፡ ክብሩ።
10 እስመ፡ ዝሙቶሙ፡ መልአ፡ ምድር፡ ወእምገጸ፡ መርገም፡ ለሐወት፡ ምድር፡ ወዐብረ፡ ወፍር፡ ዘ፡ ውስተ፡ ገዳም፡ ማሰነ፡ ኵሉ፡ ተግባሮሙ፡ ወፃማሆሙ፡ አኮሁ፡ ከማሁ።
11 እስመ፡ ነቢይ፡ ወካህን፡ ረኵሱ፡ ወበቤትየኒ፡ ረከብኩ፡ እከዮሙ፡ ይቤ፡ እግዚአብሔር።
12 በእንተ፡ ዝንቱ፡ ዳኅፀ፡ ይከውን፡ ፍኖቶሙ፡ ወጽልመተ፡ ወይወድቁ፡ ቦቱ፡ ወናሁ፡ አመጽእ፡ እኪተ፡ ላዕሌሆሙ፡ በዓመተ፡ እዋህዮሙ፡ ይቤ፡ እግዚአብሔር።
13 ለነብያተ፡ ሰማርያኒ፡ ርኢኩ፡ ኃጢአቶሙ፡ ዘተነበዩ፡ በስምየ፡ ለበዓለ፡ ወአስሐትዎሙ፡ ለሕዝብየ፡ እስራኤል።
14 ወለነቢያተ፡ ኢየሩሳሌም፡ ርኢኩ፡ ዝሙቶሙ፡ መደንግፀ፡ ወየሐውሩ፡ በሐሰት፡ ወይትአኀዙ፡ እደዊሆሙ፡ ከመ፡ ኢይትመየጡ፡ እምፍኖተ፡ እከዮሙ።
15 በእንተ፡ ዝንቱ፡ ከመዝ፡ ይቤ፡ እግዚአብሔር፡ ኃያል፡ ላዕለ፡ ነቢያት፡ ናሁ፡ አነ፡ እሴስዮሙ፡ ሕማመ፡ ወአሰትዮሙ፡ ማየ፡ ዕጕስታር፡ እስመ፡ እምነቢያተ፡ ኢየሩሳሌም፡ ወፅአ፡ ርኵስ፡ ላዕለ፡ ኵሉ፡ ምድር።
16 ከመዝ፡ ይቤ፡ እግዚአብሔር፡ ኃያል፡ ኢትስምዑ፡ ነገሮሙ፡ ለነብያት፡ እለ፡ ይትኔበዩ፡ ለክሙ፡ እም፡ ከንቶሆሙ፡ እሙንቱ፡ ለክሙ፡ ይነግሩ፡ ዘኢኮነ፡ እምአፈ፡ እግዚአብሔር።
17 ወይብልዎሙ፡ ለእለ፡ የአብዩ፡ ቃለ፡ እግዚአብሔር፡ ሰላም፡ ይከውን፡ ለክሙ፡ ወለኵሎሙ፡ እለ፡ የሐውሩ፡ በግዕዞሙ፡ ወለኵሎሙ፡ እለ፡ የሐውሩ፡ በጌጋየ፡ ልቦሙ፡ ወይብልዎሙ፡ ኢይረክበክሙ፡ እኩይ።
18 እስመ፡ መኑ፡ ዘይቀውም፡ ውስተ፡ ምክረ፡ እግዚአብሔር፡ ወይሬኢ፡ ወይሰምዕ፡ ቃሎ፡ መኑ፡ አጽምዐ፡ ቃሎ፡ ወሰምዐ።
19 ናሁ፡ ይመጽእ፡ ድልቅልቅ፡ እምኀበ፡ እግዚአብሔር፡ ወይወፅእ፡ መቅሠፍት፡ ከመ፡ ያንቀልቅሎሙ፡ ወይገፈትዖሙ፡ ለኃጥኣን፡ ወይመኦሙ።
20 ወኢይትመየት፡ መዐተ፡ እግዚአብሔር፡ እስከ፡ ይገብር፡ ዘንተ፡ ወያቀውም፡ ዘሐለየ፡ በልቡ፡ ወበደኃሪ፡ መዋዕል፡ የአምርዎ።
21 ዘኢፈነውክዎሙ፡ ለነቢያት፡ ለሊሆሙ፡ የሐውሩ፡ ፤ወዘኢይቤሎሙ፡ ለሊሆሙ፡ ይትኔበዩ።
22 ሶበ፡ ቆሙ፡ በቃልየ፡ ወሰምዑ፡ በነገርየ፡ ይሚጥዎሙ፡ ለሕዝብየ፡ እምእኩይ፡ ምግባሮሙ።
23 አምላክ፡ ቅሩብ፡ አነ፡ ይቤ፡ እግዚአብሔር፡ ወኢኮንኩ፡ አምላከ፡ ርኁቀ።
24 ቦሁ፡ ሰብእ፡ ዘይትኀባእ፡ እምኔየ፡ ወቦሁ፡ ኀበ፡ ይሤወሩ፡ እምኔየ፡ ወኢይሬኢኑ፡ አነ፡ ይቤ፡ እግዚአብሔር፡ አኮኑ፡ አነ፡ ዘመላእኩ፡ ሰማየ፡ ወምድር፡ ይቤ፡ እግዚአብሔር።
25 ሰማዕኩኬ፡ ዘይብሉ፡ ነቢያት፡ ወይትኔበዩ፡ በስምየ፡ ነገረ፡ ሀሰት፡ ሐለምነ፡ ሕልመ፡ ይብሉ።
26 እስከ፡ ማእዜኑ፡ ዝንቱ፡ እንከ፡ ዘውስተ፡ ልበ፡ ነቢያት፡ ትንቢተ፡ ሐሰት፡ ወእለ፡ ይትኔበዩ፡ እምፈቃደ፡ ልቦሙ።
27 ዘሐለዩ፡ ከመ፡ ያርስዕዎሙ፡ ለሕዝብየ፡ ስምየ፡ በሕልሞሙ፡ ዘይትናገ፡ አሐዱ፡ አሐዱ፡ ምስለ፡ ካልኡ፡ በከመ፡ ረስዑ፡ አበዊሆሙ፡ ስምየ፡ እንበይነ፡ በዓል።
28 ነቢይ፡ ዘኀቤሁ፡ ሕልም፡ ይነግር፡ ሕልሞ፡ ወዘሂ፡ ቃልየ፡ ኀቤሁ፡ ይነግር፡ ቃልየ፡ በጽድቅ።
29 አኮኑ፡ ከመ፡ እሳት፡ ነገርየ፡ ይቤ፡ እግዚአብሔር፡ ወከመ፡ መፍጽሕ፡ ዘይፈጽሕ፡ ኰኵሐ።
30 በእንተ፡ ዝንቱ፡ ናሁ፡ አነ፡ ላዕለ፡ ነቢያት፡ ይቤ፡ እግዚአብሔር፡ እለ፡ ይሰርቁ፡ ቃልየ፡ አሐዱ፡ አሐዱ፡ በኀበ፡ ካልኡ።
31 ናሁ፡ አነ፡ ላዕለ፡ ነቢያት፡ ይቤ፡ እግዚአብሔር፡ እለ፡ ያወፅኡ፡ ተነብዮ፡ እምልሳኖሙ፡ ወይብሉ፡ ተረፈ፡ እግዚአብሔር።
32 ናሁ፡ አነ፡ ላዕለ፡ ነቢያት፡ እለ፡ ይትኔበዩ፡ ሕልመ፡ ሐሰት፡ ይቤ፡ እግዚአብሔር፡ ወይነግርዎሙ፡ ለሕዝብየ፡ ወያስሕዎሙ፡ በሐሰቶሙ፡ ወበጌጋዮሙ፡ ወአንሰ፡ ኢፈነ፡ ውክዎሙሂ፡ ወኢአዘዝክዎሙ፡ ወአልቦ፡ ዘይበቊዎሙ፡ ለሕዝብ፡ ወኢያረብሕዎሙ፡ ይቤ፡ እግዚአብሔር።
33 ወለእመ፡ ተስእሉከ፡ ሕዝብ፡ አው፡ ነቢይ፡ አው፡ ካህን፡ ወይቤ፡ ሉከ፡ ምንተ፡ ይቤ፡ እግዚአብሔር፡ ወትብሎሙ፡ በእንቲአክሙ፡ ውእቱ፡ ዝነገር፡ ወእነፅኀክሙ፡ ይቤ፡ እግዚአብሔር።
34 ለነቢይሂ፡ ወለካህንሂ፡ ወለሕዝብሂ፡ እለ፡ ይቤሉ፤ ቃለ፡ እግዚአብሔር፡ ወእትቤሎ፡ ለውእቱ፡ ብእሲ፡ ወለቤቱሂ።
35 ከመዝ፡ ትብሉ፡ አሐዱ፡ አሐዱ፡ ምስለ፡ ካልኡ፡ ወአሐዱ፡ አሐዱ፡ ምስለ፡ እኁሁ፡ ምንተ፡ ተሰጥወ፡ እግዚአብሔር፡ ወምንተ፡ ይቤ፡ እግዚአብሔር።
36 ወተረፈ፡ እግዚአብሔር፡ ኢትዝክሩ፡ እንከ፡ እስመ፡ ተረፍ፡ ይይከውን፡ ለብእሲ፡ ነገሩ።
37 ወምንተ፡ ነበበ፡ እግዚአብሔር፡ አምላክነ፡ ላዕሌነ።
38 በእንተ፡ ዝንቱ፡ ከመዝ፡ ይቤ፡ እግዚአብሔር፡ አምላክነ፡ እስመ፡ ትብሉ፡ ዘነገረ፡ ተረፈ፡ እግዚአብሔር፡ ለአኩ፡ ኀቤክሙ፡ ወእቤ፡ ለክሙ፡ ኢትበሉ፡ ተረፈ፡ እግዚአብሔር።
39 በእንተ፡ ዝንቱ፡ ናሁ፡ አነ፡ እነሥአክሙ፡ ወእነፅኀክሙ፡ ወለዛሂ፡ ሀገር፡ እንተ፡ ወሀብኩክሙ፡ ወላበዊክሙ።
40 ወእሁበክሙ፡ ኃሣረ፡ ወጽዕለተ፡ ዘለዓለም፡ ዘኢይትረሳዕ።
=== chapter 24 ===
[Chapter 24]
1 ወአርአየኒ፡ እግዚአብሔር፡ ፪አዕፁቀ፡ በለስ፡ ንቡራነ፡ ቅድመ፡ ቤተ፡ እግዚአብሔር፡ እምድኅረ፡ አፍለሶ፡ ናብከደነፆር፡ ንጉሠ፡ ባቢሎን፡ ለኢኮንያስ፡ ወልደ፡ ኢዮአቄም፡ ንጉሠ፡ ይሁዳ፡ ወለመላእክተ፡ ይሁዳ፡ ወለኬነትሂ፡ ወለሙቁሓን፡ ወለቢጾሙሂ፡ እምኢየሩሳሌም፡ ወወሰዶሙ፡ ባቢሎን።
2 ወአሐዱሰ፡ ዓፅቀ፡ በለስ፡ ሥሙር፡ ጥቀ፡ ከመ፡ በለሰ፡ ማእረር፡ ፤ ወካልኡሰ፡ ዓፅቀ፡ በለስ፡ ሙሱን፡ ጥቀ፡ ዘኢይትበላዕ፡ በእከዩ።
3 ወይቤለኒ፡ እግዚአብሔር፡ ምንተ፡ ትሬኢ፡ ኤርሚያስ፡ ወእቤ፡ በለሳተ፡ ቢጸ፡ ሠናዩኒ፡ ጥቀ፡ ሠናይ፡ ወሙሱኑኒ፡ እኩይ፡ ጥቀ፡ ዘኢይትበላዕ፡ በእከዩ።
4 ወነበበኒ፡ እግዚአብሔር፡ ወይቤለኒ።
5 ከመዝ፡ ይቤ፡ እግዚአብሔር፡ አምላክ፡ እስራኤል፡ ከመዝ፡ በለስ፡ ሠናይ፡ ከማሁ፡ እገብር፡ ለእለ፡ ፈለሱ፡ እምይሁዳ፡ እለ፡ ፈነውክዎሙ፡ እምዝ፡ ብሔር፡ ውስተ፡ ብሔረ፡ ፋርስ፡ ለሠናይ።
6 ወአጸንዕ፡ አዕይንትየ፡ ላዕሌሆሙ፡ በሠናይ፡ ወእሰውጦሙ፡ ውስተዝ፡ ምድር፡ ቡርክት፡ ወአሐንጾሙ፡ ወኢይነሥቶሙ፡ እምከ፡ ወእተክሎሙ፡ ወኢይመልሖሙ።
7 ወእሁቦሙ፡ ልበ፡ በዘየአምሩኒ፡ እስመ፡ አነ፡ ውእቱ፡ እግዚአብሔር፡ ወይከውኑኒ፡ ሕዝብየ፡ ወአነሂ፡ እከውኖሙ፡ አምላኮሙ፡ እስመ፡ ይትመየጡ፡ ኀቤየ፡ በኵሉ፡ ለወቦሙ።
8 ወከመ፡ በለስ፡ መሱን፡ ዘኢይበልዕዎ፡ በእንተ፡ እከዩ፡ ከመዝ፡ ይቤ፡ እግዚአብሔር፡ ከማሁ፡ እሬስዮሙ፡ ለሴዴቅያስ፡ ንጉሠ፡ ይሁዳ፡ ወለመገብቱሂ፡ ወለእለ፡ ተርፉ፡ እምእየሩሳሌም፡ ለእለ፡ ተርፉ፡ ውስተ፡ ዛሀገር፡ ወለእለ፡ ይነብሩ፡ ውስተ፡ ግብጽ።
9 ወእሬስዮሙ፡ ከመ፡ ይዘረዉ፡ ውስተ፡ ኵሉ፡ መንግሥታተ፡ ምድር፡ ወይከውኑ፡ ለጽዕለት፡ ወምሳሌ፡ ወይጸልእዎሙ፡ ወይረግምዎሙ፡ በኵሉ፡ በሐውርት፡ ኀበ፡ ወሰድዎሙ፡ ህየ።
10 ወእፌኑ፡ ላዕሌሆሙ፡ መጥባሕተ፡ ወረኃበ፡ ወብድብደ፡ እሰከ፡ የኀልቁ፡ እምላዕለ፡ ምድር፡ እንተ፡ ወሀብኩ፡ ሎሙ፡ ወለአበዊሆሙ።
=== chapter 25 ===
[Chapter 25]
1 ነገር፡ ዘኮነ፡ ኀበ፡ ኤርምያስ፡ በእንተ፡ ኵሉ፡ ሕዝበ፡ ይሁዳ፡ በራብዕ፡ ዓመተ፡ ኢዮአቄም፡ ወልደ፡ ኢዮስያስ፡ ንጉሠ፡ ይሁዳ፡ ወይእቲ፡ ዓመት፡ ቀዳሚተ፡ መንግሥቱ፡ ለናቡከደነፆር፡ ንጉሠ፡ ባቢሎን።
2 ዘነገረ፡ ኤርምያስ፡ ነቢይ፡ ለኵሎሙ፡ ሕዝበ፡ ይሁዳ፡ ወለኵሎሙ፡ እለ፡ ይነብሩ፡ ኢየሩሳሌም፡ ወይቤሎሙ።
3 እምእመ፡ ፲ወ፫፡ ዓመተ፡ ኢዮስያስ፡ ወልደ፡ አሞን፡ ንጉሠ፡ ይሁዳ፡ እስከ፡ ዛዕለት፡ ዝንቱ፡ ፳ወ፫፡ ዓመት፡ ኮነ፡ ቃለ፡ እግዚአብሔር፡ ኀቤየ፡ ወጌሥኩ፡ ኀቤክሙ፡ ወነገርኩክሙ፡ ወአይዳእኩክሙ፡ ወኢሰማዕክሙ።
4 ወፈነወ፡ እግዚአብሔር፡ ኀቤክሙ፡ ኵሎ፡ አግብርቲሁ፡ ነቢያተ፡ በጽባሕ፡ ጌሡ፡ ወፈነወ፡ ወኢሰማዕክምዎሙ፡ ወኢያጽማዕክሙ፡ እዘኒክሙ፡ ለሰሚዕ፡ ወይቤ።
5 ተመየጡ፡ ኵልክሙ፡ እምፍኖተ፡ እከይክሙ፡ ወእምጌጋየ፡ ምግባሪክሙ፡ ወትነብሩ፡ ውስተ፡ ምድር፡ እንተ፡ ወሀበ፡ እግዚአብሔር፡ ለክሙ፡ ወለአበዊክሙ፡ እምዓለም፡ ወእስከ፡ ለዓለም።
6 ወኢትሑሩ፡ ዳእሙ፡ ወኢትትልዉ፡ አማልክተ፡ ነኪር፡ ከመ፡ ትትቀነዩ፡ ሎሙ፡ ወትስግዱ፡ ሎሙ፡ ወኢታምዕዑኒ፡ በግብረ፡ እደዊክሙ፡ ወኢያሐሥም፡ ብክሙ።
7 ወኢሰማዕክሙኒ፡ ይቤ፡ እግዚአብሔር፡ ከመ፡ ታምዕዑኒ፡ በግብረ፡ እደዊክሙ፡ ለአእክዮ፡ ለክሙ።
8 በእንተ፡ ዝንቱ፡ ከመዝ፡ ይቤ፡ እግዚአብሔር፡ እስመ፡ ኢሰማዕክሙ፡ ነገርየ።
9 ናሁ፡ አነ፡ እፌኑ፡ ወአነሥእ፡ ኵሎ፡ በሐውርተ፡ ሰሜን፡ ይቤ፡ እግዚአብሔር፡ ወኀበሂ፡ ናቡከደነፆር፡ ንጉሠ፡ ባቢሎን፡ ገብርየ፡ ወአመጽኦ፡ ውስተዝ፡ ምድር፡ ወላዕለ፡ እለ፡ ይነብሩ፡ ውስቴታ፡ ወዲበ፡ ኵሎሙ፡ አሕዛብ፡ እለ፡ ዓውዳ፡ ወአጠፍኦሙ፡ ወአስማስኖሙ፡ ወይትፋጸይዋ፡ ወየኀሥሩ፡ ለዓለም።
10 ወእሥዕር፡ እምኔሆሙ፡ ቃለትፍሥሕት፡ ወቃለ፡ ኃሤት፡ ቃለ፡ መርዓዊ፡ ወቃለ፡ መርዓት፡ ቃለ፡ ማሕረፅ፡ ወብርሃነ፡ ማኅቶት።
11 ወትማስን፡ ኵላ፡ ምድር፡ ወይትቀነዩ፡ ለአረሚ፡ ፸ዓመተ።
12 ወኀሊቆ፡ ፸ዓመት፡ እትቤቀሎ፡ ለንጉሠ፡ ባቢሎን፡ ወለእሉ፡ አሕዛብ፡ ይቤ፡ እግዚአብሔር፡ በኃጢአቶሙ፡ ለብሔረ፡ ፋርስ፡ ወእሬስዮሙ፡ ሙሱናነ፡ ለዓለም።
13 ወአመጽእ፡ ላዕለ፡ ይእቲ፡ ምድር፡ ኵሎ፡ ነገርየ፡ ዘነበብኩ፡ በእንቲአሃ፡ ወኵሎ፡ ዘጽሑፍ፡ ውስተዝ፡ መጽሐፍ፡ ዘተነበየ፡ ኤርምያስ፡ ዲበ፡ ኵሉ፡ አሕዛብ።
14 እስመ፡ ይቀንይዎሙ፡ እሙንቱኒ፡ አሕዛብ፡ ብዙኃን፡ ወነገሥት፡ ዓበይት፡ ወእፈድዮሙ፡ በከመ፡ ምግባሮሙ፡ ወበከመ፡ ግብረ፡ እደዊሆሙ።
15 እስመ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ ንሣእ፡ ጽዋዓ፡ ወይን፡ ዘኢኮነ፡ ቱሱሐ፡ እምዴየ፡ ወአስትዮሙ፡ ለኵሎሙ፡ አሕዛብ፡ እለ፡ እፌንወከ፡ ኀቤሆሙ፡ አነ፡ ህየ።
16 ከመ፡ ይስተዩ፡ ወይንትዑ፡ ወይመምዑ፡ እምገጸ፡ ኵናት፡ እንተ፡ እፌኑ፡ አነ፡ ማእከሎሙ።
17 ወነሣእኩ፡ ውእተ፡ ጽዋዓ፡ እምእደ፡ እግዚአብሔር፡ ወአስተይክዎሙ፡ ለአሕዛብ፡ እለ፡ ኀቤሆሙ፡ ፈነወኒ፡ እግዚአብሔር።
18 ለኢየሩሳሌም፡ ወለአህጉረ፡ ይሁዳ፡ ወለነገሥተ፡ ይሁዳ፡ ወለመላእክቲሃ፡ ከመ፡ ያማስኖሙ፡ ወይኩኑ፡ ዓፀ፡ ወበድወ፡ ወለመርገም፡ ከመ፡ ዛቲ፡ ዕለት።
19 ወለፈርዖንሂ፡ ንጉሠ፡ ግብጽ፡ ወለደቂቁሂ፡ ወለመሳፍንቲሁ፡ ወለኵሉ፡ አሕዛቡ።
20 ወለኵሎሙ፡ እለ፡ ይዴመሩ፡ ወለኵሉ፡ ነገሥተ፡ ምድረ፡ ዖፅ፡ ወለኵሉ፡ ነገሥተ፡ ምድረ፡ ኢሎፍሊ፡ ወአስቃሎና፡ ወጋዛ፡ ወለአቃሮን፡ ወለእለ፡ ተርፉ፡ ዘአዛጦን።
21 ወኤዶምያስ፡ ወሞአብ፡ ወለደቂቀ፡ አሞን።
22 ወለነገሥተ፡ ጢሮስ፡ ወለነገሥተ፡ ሲዶና፡ ወለኵሉ፡ ነገሥተ፡ ደሴት፡ እለ፡ ማዕዶተ፡ ባሕር።
23 ወለዴዳን፡ ወቴማን፡ ወሮስ፡ ወለኵሎሙ፡ ቅሩጻነ፡ ገጽ።
24 ወለኵሉ፡ ነገሥተ፡ ዐረብ፡ ወለእለ፡ ይነብሩ፡ ሐቅለ።
25 ወለኵሉ፡ ነገሥተ፡ ዘምሪ፡ ወለኵሉ፡ ነገሥተ፡ ኤላም፡ ወለኵሉ፡ ነገሥተ፡ ሜዶን።
26 ወለኵሉ፡ ነገሥተ፡ ሰሜን፡ ለቅሩባን፡ ወለርኁቃን፡ ፩፩ምስለ፡ ካልኡ፡ ወለኵሉ፡ ነገሥት፡ እለ፡ ገጸ፡ ኵሉ፡ ምድር፡ ወንጉሠ፡ ሲሳር፡ ይስተይ፡ እምድኅሬሆሙ።
27 ወትብሎሙ፡ ከመዝ፡ ይቤ፡ እግዚአብሔር፡ ዘኵሎ፡ ይመልክ፡ አምላክ፡ እስራኤል፡ ስትዩ፡ ወስክሩ፡ ወተንትኑ፡ ወደቁ፡ ወኢትትነሥኡ፡ እምገጸ፡ ኵናት፡ እንተ፡ እፌኑ፡ አነ፡ ማእከኬክሙ።
28 ወዘኢፈቀደ፡ ይትመጠዎ፡ ለውእቱ፡ ጽዋዕ፡ እምእዴከ፡ ለሰቲይ፡ በሎሙ፡ ከመዝ፡ ይቤ፡ እግዚአብሔር፡ ጸባኦት፡ ሰትየ፡ ስትዩ።
29 እስመ፡ ናሁ፡ ሀገር፡ እንተ፡ ተሰምየ፡ ስምየ፡ በላዕሌሃ፡ አነ፡ እኴንኖሙ፡ በእኩይ፡ አንትሙኑ፡ ነጺሐ፡ ትነጽሑ፡ ኢትነጽሑ፡ እስመ፡ አነ፡ እጼውዕ፡ ኵናተ፡ ላዕለ፡ እለ፡ ይነብሩ፡ ውስተ፡ ምድር፡ ይቤ፡ እግዚአብሔር፡ ጸባኦት።
30 ወአንተ፡ ተነበይ፡ ሎሙ፡ ዘነገረ፡ ወበሎሙ፡ እግዚአብሔር፡ እምአርያም፡ ይጥሕር፡ ወእቤተ፡ መቅደሱ፡ ይሁብ፡ ቃሎ፡ ጥሒረ፡ ይጥሕር፡ ላዕለ፡ ማኅደሩ፡ ቃለ፡ ድንጋፄ፡ ከመ፡ እለ፡ ይቀሥሙ፡ ወያወሥእ፡ ኀበ፡ ኵሉ፡ እለ፡ ይነብሩ፡ ውስተ፡ ምድር።
31 ይመጽእ፡ ተሠርዎ፡ እስከ፡ አጽናፈ፡ ምድር፡ እስመ፡ ለሊሁ፡ እግዚአብሔር፡ ቅሥተ፡ ይትዋቀሦሙ፡ ለአሕዛብ፡ ወውእቱ፡ ይኴንን፡ ኵሎ፡ ዘሥጋ፡ ወለኃጥኣን፡ ያገብኦሙ፡ ለመጥባሕት፡ ይቤ፡ እግዚአብሔር።
32 ከመዝ፡ ይቤ፡ እግዚአብሔር፡ ጸባኦት፡ ናሁ፡ ትመጽእ፡ እኪት፡ እምሕዝብ፡ ውስተ፡ ሕዝብ፡ ወይወፅእ፡ ዐውሎ፡ ዓቢይ፡ እምአጽናፈ፡ ምድር።
33 ወይከውኑ፡ ቅቱላነ፡ እምኀበ፡ እግዚአብሔር፡ ውእተ፡ አሚረ፡ እምአጽናፈ፡ ምድር፡ እስከ፡ አጽናፈ፡ ምድር፡ ኢያስቆቅዉ፡ ወኢይትቀበሩ፡ ዳእሙ፡ ስጡሓነ፡ ውስተ፡ ገጸ፡ ምድር፡ ይከውኑ።
34 ክልሑ፡ ኖሎት፡ ወአውይዉ፡ አብሐኰ፡ አባግዕ፡ እስመ፡ በጽሐ፡ መዋዕሊክሙ፡ ከመ፡ ይጥብሑክሙ፡ ወይዝርዉክሙ፡ ወትወድቁ፡ ከመ፡ ንዋይ፡ መፍትው።
35 ወአልቦ፡ ዘኢይማስን፡ እም፡ ውስተ፡ ኖሎት፡ ወኢይድኅኑ፡ አብሐኰ፡ አባግዕ።
36 ቃለ፡ አውያቶሙ፡ ለኖሎት፡ ወገዓሮሙ፡ ለአብሐኰ፡ አባግዕ፡ እስመ፡ ሠረዎ፡ እግዚአብሔር፡ ለመ፡ ራዕይሆሙ።
37 ወይወድቅ፡ መሠንየ፡ ሰላም፡ እምገጸ፡ መቅሠፍተ፡ መዐቱ፡ ለእግዚአብሔር።
38 ኀደገ፡ ከመ፡ አንበሳ፡ ማኅደሮ፡ እስመ፡ ኮነት፡ ምድሮሙ፡ ዓፀ፡ እምገጸ፡ መዐተ፡ አረሚ፡ ወእምገጸ፡ መቅሠፍተ፡ መዐቱ።
=== chapter 26 ===
[Chapter 26]
1 በቀዳሚ፡ መንግስቱ፡ ለኢዮአቄም፡ ወልደ፡ ኢዮስያስ፡ ንጉሠ፡ ይሁዳ፡ ኮነ፡ ዝቃል፡ እምኅበ፡ እግዚአብሔር፡ ወይቤ።
2 ከመዝ፡ ይቤ፡ እግዚአብሔር፡ ቁም፡ ውስተ፡ ዐፀደ፡ ቤተ፡ እግዚአብሔር፡ ወንግር፡ ለኵሉ፡ አህጉረ፡ ይሁዳ፡ እለ፡ መጽኡ፡ ይስግዱ፡ ውስተ፡ ቤተ፡ እግዚአብሔር፡ ኵሎ፡ ነገር፡ ዘአዘዝኩከ፡ ከመ፡ ትንግሮሙ፡ ወኢታንትግ፡ እምኔሁ፡ ቃለ።
3 ለእመ፡ ይሰምዑ፡ ወይትመየጡ፡ አሐዱ፡ አሐዱ፡ እምፍቶሙ፡ እኩይ፡ ወአኅድግ፡ እንከ፡ ዝኰ፡ እኩየ፡ ዘሐለይኩ፡ እግበር፡ ላዕሌ፡ ሆሙ፡ አነ፡ በእከየ፡ ምግባሪሆሙ።
4 ወትብሎሙ፡ ከመዝ፡ ይቤ፡ እግዚአብሔር፡ እመ፡ ኢሰማዕክሙኒ፡ ወኢሖርክሙ፡ በሕግየ፡ ዘወሀብኩክሙ፡ ቅድመ፡ ገጽክሙ።
5 ከመ፡ ትስምዑ፡ ቃለ፡ አግብርየ፡ ነቢያት፡ እለ፡ ፈነውክዎሙ፡ አነ፡ ኅቤክሙ፡ ይጊሡ፡ ወኢሰማ፡ ዕክምዎሙ።
6 እሬስዮ፡ ለዝ፡ ቤት፡ ከመ፡ ሴሎም፡ ወእሬስያ፡ ለዛሀገር፡ ርግምተ፡ በኀበ፡ ኵሉ፡ አሕዛብ፡ ዘኵሉ፡ ምድር።
7 ወሰምዕዎ፡ ካህናት፡ ወሐሳውያን፡ ነቢያት፡ ወኵሉ፡ ሕዝብ፡ ለኤርምያስ፡ እንዘ፡ ይነግር፡ ዘነገረ፡ በቤተ፡ እግዚአብሔር።
8 ወእምዝ፡ አኅሊቆ፡ ኤርምያስ፡ ኵሎ፡ ነገረ፡ ዘአዘዞ፡ እግዚአብሔር፡ ይንግር፡ ለኵሉ፡ ሕዝብ፡ አኀዝዎ፡ ካህናት፡ ወሐሳውያነ፡ ነቢያት፡ ወኵሉ፡ ሕዝብ፡ ወይቤልዎ፡ ሞተ፡ ትመውት።
9 ለምንት፡ ተነበይከ፡ በስመ፡ እግዚአብሔር፡ ወትቤ፡ ከመ፡ ሴሎም፡ ይከውን፡ ዝቤት፡ ወትማስን፡ ዛሀገር፡ ወአልቦ፡ ዘይነብራ፡ ወአንገለጉ፡ ኵሉ፡ ሕዝብ፡ ላዕለ፡ ኤርምያስ፡ በቤተ፡ እግዚአብሔር።
10 ወሰምዑ፡ መላእክተ፡ ይሁዳ፡ ዘነገረ፡ ወዐርጉ፡ እምቤተ፡ ንጉሥ፡ ውስተ፡ ቤተ፡ እግዚአብሔር፡ ወነበሩ፡ ውስተ፡ አንቀጸ፡ ዴዴ፡ ቤተ፡ እግዚአብሔር፡ ሐዲስ።
11 ወይቤሎ፡ ካህናት፡ ወሐሳውያነ፡ ነቢያት፡ ለመላእክት፡ ወለኵሉ፡ ሕዝብ፡ ሞት፡ ኵነኔሁ፡ ለዝብእሲ፡ እስመ፡ ተነበየ፡ ላዕለ፡ ዝሀገር፡ ዘከመ፡ ሰማዕክሙ፡ በእዘኒክሙ።
12 ወነገሮሙ፡ ኤርምያስ፡ ለኵሉ፡ መላእክት፡ ወለኵሉ፡ ሕዝብ፡ ወይቤሎሙ፡ እግዚአብሔር፡ ፈነወኒ፡ እትነበይ፡ ላዕለዝ፡ ቤት፡ ወላዕለዝ፡ ሀገር፡ ኵሎ፡ ዘነገረ፡ ዘሰማዕክሙ።
13 ወይእዜኒ፡ አሠንዩ፡ ፍናዊክሙ፡ ወምግባሪክሙ፡ ወስምዑ፡ ቃለ፡ እግዚአብሔር፡ አምላክክሙ፡ ወየኀድግ፡ እግዚአብሔር፡ እኩየ፡ ዘነበበ፡ ላዕሌክሙ።
14 ወነየ፡ አነኒ፡ ውስተ፡ እደዊክሙ፡ ረስዩኒ፡ ዘፈቀድክሙ፡ ወዘይትዐክሙ፡ በአዕይንቲክሙ።
15 መዳእሙ፡ አእምሮ፡ አእምሩ፡ ወጠይቁ፡ ከመ፡ ለእመ፡ ቀተልክሙኒ፡ ፍዳ፡ ደም፡ ንጹሕ፡ ይገብእ፡ ላዕሌክሙ፡ ወላዕለ፡ ዛሀገር፡ ወላዕለ፡ እለ፡ ይነብርዋ፡ እስመ፡ እሙነ፡ ለአከኒ፡ እግዚአብሔር፡ ኀቤክሙ፡ እንግር፡ ዘነገረ፡ ውስተ፡ እዘኒክሙ፡ ኵሎ።
16 ወይቤሉ፡ መላእክት፡ ወኵሉ፡ ሕዝብ፡ ለካህናት፡ ወለሐሳውያነ፡ ነቢያት፡ አልቦ፡ ኵነኔ፡ ሞት፡ ላዕለዝ፡ ብእሲ፡ እስመ፡ በስመ፡ እግዚአብሔር፡ አምላክነ፡ ነገረነ።
17 ወተንሥኡ፡ ዕደው፡ እምሊቃናተ፡ ብሔር፡ ወይቤልዎሙ፡ ለኵሎሙ፡ ማኅበረ፡ አሕዛብ።
18 ሚኪያስ፡ ሞሮታዊ፡ ነበረ፡ ይትኔበይ፡ በመዋዕለ፡ ሕዝቅያስ፡ ንጉሠ፡ ይሁዳ፡ ወይቤሎሙ፡ ለኵሉ፡ ሕዝበ፡ ይሁዳ፡ ከመዝ፡ ይቤ፡ እግዚአብሔር፡ ጸባኦት፡ የሐርስዋ፡ ለጽዮን፡ ከመ፡ ገራህት፡ ወኢየሩሳሌም፡ ትከውን፡ ዓፀ፡ ወደብረ፡ ዝሂ፡ ቤት፡ ይከውን፡ ዖመ።
19 ቦኑ፡ እንከ፡ ቀቲለ፡ ዘቀተሎ፡ ሕዝቅያስ፡ ንጉሠ፡ ይሁዳ፡ ወኵሉ፡ ይሁዳ፡ አኮኑ፡ ፈርሁ፡ ለእግዚአብሔር፡ ወተማህለሉ፡ ለገጸ፡ እግዚአብሔር፡ ወኀደገ፡ እግዚአብሔር፡ እኩየ፡ ዘነበበ፡ ላዕሌሆሙ፡ ወንሕነኒ፡ ዓቢየ፡ እኩየ፡ ገበርነ፡ ላዕለ፡ ነፍስነ።
20 ወሀሎ፡ ብእሲኒ፡ ዘተነበየ፡ በስመ፡ እግዚአብሔር፡ አርያስ፡ ወልደ፡ ሴምዩ፡ ዘቀርያታርም፡ ወተነበየ፡ ላዕለ፡ ዛሀገር፡ ወላዕለ፡ ዛምድር፡ በከመ፡ ኵሉ፡ ነገሩ፡ ለኤርምያስ።
21 ወሰምዐ፡ ንጉሥ፡ ኢዮአቄም፡ ወኵሉ፡ ሰብኡ፡ ወኵሎሙ፡ መላእክት፡ ኵሎ፡ ነገሮ፡ ወፈቀደ፡ ንጉሥ፡ ይቅትሎ።
22 ወፈነወ፡ ንጉሥ፡ ኢዮአቄም፡ ዕደወ፡ ብሔረ፡ ግብጽ፡ ኤልናታንሃ፡ ወልደ፡ አቤኮር፡ ወዕደወ፡ ምስሌሁ፡ ግብጽ።
23 ወአምጽእዎ፡ እምህየ፡ ለኦርያስ፡ ወአብእዎ፡ ኀበ፡ ንጉሥ፡ ኢዮአቄም፡ ወቀተሎ፡ በመጥባሕት፡ ወወረወ፡ በድኖ፡ ውስተ፡ መቃብር፡ ዘደቂቀ፡ ሕዝቡ።
24 ወዳእሙ፡ እደ፡ ኬርኪቃም፡ ወልደ፡ ሳፋን፡ ሀለወ፡ ምስለ፡ ኤርምያስ፡ ከመ፡ ኢያግብእዎ፡ ለሕዝብ፡ ወኢይቅትልዎ።
=== chapter 27 ===
[Chapter 27]
1 በቀዳሚት፡ መንግስቱ፡ ለኢዮአቄም፡ ወልደ፡ ኢዮስያስ፡ ንጉሠ፡ ይሁዳ፡ ኮነ፡ ዝቃል፡ ኀበ፡ ኤርምያስ፡ እምኀበ፡ እግዚአብሔር፡ ወይቤ።
2 ከመዝ፡ ይቤለኒ፡ እግዚአብሔር፡ ግበር፡ ለከ፡ ጋገ፡ ወሐግለ፡ ወደዮ፡ ውስተ፡ ክሳድከ።
3 ወፈኑ፡ ኀበ፡ ንጉሠ፡ ኤዶምያስ፡ ወኀበ፡ ንጉሠ፡ ሞአብ፡ ወኀበ፡ ንጉሠ፡ ደቂቀ፡ አሞን፡ ወኀበ፡ ንጉሠ፡ ጢሮስ፡ ወኀበ፡ ንጉሠ፡ ሲዶና፡ በእደ፡ መላእክቲሆሙ፡ እለ፡ ይመጽኡ፡ ኢየሩሳሌም፡ ኀበ፡ ሴዴቅያስ፡ ንጉሠ፡ ይሁዳ።
4 ወአዝዞሙ፡ ይንግርዎሙ፡ ለአጋእዝቲሆሙ፡ ወይበሉ፡ ከመዝ፡ ይቤ፡ እግዚአብሔር፡ ጸባኦት፡ አምላክ፡ እስራኤል፡ ከመዝ፡ በልዎሙ፡ ለአጋእዝቲክሙ።
5 አነአ፡ ገበርክዋ፡ ለምድር፡ ሰብአ፡ ወእንስሳ፡ ዘላዕለ፡ ገጸ፡ ምድር፡ በኃይልየ፡ ዓቢይ፡ ወበመዝራዕትየ፡ ልዕልት፡ ወወሀብክዎ፡ ለዘአደመኒ፡ በአዕይንትየ።
6 ወይእዜኒ፡ አነ፡ አግባእክዋ፡ ለኵላ፡ ዛምድር፡ ውስተ፡ እዴሁ፡ ለናቡከደነፆር፡ ገብርየ፡ ንጉሠ፡ ባቢሎን፡ ወአራዊተ፡ ገዳምኒ፡ ወሀብኩ፡ ሎቱ፡ ከመ፡ ይትቀነይዎ።
7 ወይትቀነዩ፡ ሎቱ፡ ኵሉ፡ አሕዛብ፡ ለወልዱ፡ ወለወልደ፡ ወልዱ፡ እስከ፡ ይበጽሕ፡ ዕድሜ፡ ምድሩ፡ ፤ ወሎቱኒ፡ ይትቀነዩ፡ አሕዛብ፡ ብዙኃን፡ ወነገሥት፡ ዓበይት።
8 ወይከውን፡ ሕዝብ፡ ወመንግሥት፡ እለ፡ ኢይትቀነዩ፡ ሎቱ፡ ለናቡከደነፆር፡ ንጉሠ፡ ባቢሎን፡ ወኢይወድዩ፡ ክሳዶሙ፡ ታሕተ፡ አርዑተ፡ ንጉሠ፡ ባቢሎን፡ በመጥባሕት፡ ወበረኃብ፡ ወብድብድ፡ ይወድቁ፡ ወእዋህዮሙ፡ ይቤ፡ እግዚአብሔር፡ እስከ፡ የኀልቁ፡ በእዴሁ።
9 ወአንትሙኒ፡ ኢትስምዕዎሙ፡ ለሐሳውያነ፡ ነቢያቲክሙ፡ ወለእለ፡ ያሠግሉ፡ ለክሙ፡ ወለሐላምያኒክሙ፡ ወለረአይያኒክሙ፡ ወለሰብአ፡ ሥራይ፡ እለ፡ ይብሉክሙ፡ ኢትትቀነዩ፡ ለንጉሠ፡ ባቢሊን።
10 እስመ፡ ሐሰተ፡ ተነበዩ፡ ለክሙ፡ ከመ፡ ያርኅቁክሙ፡ እምብሔርክሙ፡ ወእዘርወክሙ፡ ወትጠፍኡ።
11 ወሕዝብሰ፡ ዘይወዲ፡ ርእሶ፡ ታሕተ፡ አርዑተ፡ ንጉሠ፡ ባቢሎን፡ ወይትቀነዩ፡ ሎቱ፡ አነብሮ፡ ውስረ፡ ምድሩ፡ ይቤ፡ እግዚአብሔር፡ ወይትጌበራ፡ ወየኀድር፡ ውስቴታ።
12 ወነገርክዎ፡ ኵሎ፡ ዘነገረ፡ ለሴዴቅያስ፡ ንጉሠ፡ ይሁዳ፡ ወእቤሎ፡ አትሕቱ፡ ክሳደክሙ፡ ውስተ፡ አርዑተ፡ ንጉሠ፡ ባቢሎን፡ ወተቀነዩ፡ ሎቱ፡ ወለሕዝቡ፡ ወተሐይዉ።
13 ለምንት፡ ትመውት፡ አንተ፡ ወሕዝብከ፡ በመጥባሕት፡ ወበረኃብ፡ ወበብድብድ፡ በከመ፡ ይቤ፡ እግዚአብሔር፡ ለሕዝብ፡ ዘኢተቀንየ፡ ለንጉሠ፡ ባቢሎን።
14 ወኢትትስምዑ፡ ቃሎሙ፡ ለነቢያት፡ እለ፡ ይቤሉክሙ፡ ኢትትቀነዩ፡ ለንጉሠ፡ ባቢሎን፡ እስመ፡ ሐሰተ፡ እሙንቱ፡ ይትኔበዩ፡ ለክሙ።
15 እስመ፡ ኢፈነውክዎሙ፡ ይቤ፡ እግዚአብሔር፡ ውእቶሙኒ፡ ሐሰተ፡ ይትኔበዩ፡ በስምየ፡ ከመ፡ ያሕጕሉክሙ፡ ወትጠፍኡ፡ አንትሙ፡ ወነቢያቲክሙ፡ እለ፡ ተነበዩ፡ ለክሙ፡ በሐሰት።
16 ወለካህናትኒ፡ ወለኵሉ፡ ሕዝብ፡ ዘንተ፡ ነገርክዎሙ፡ ወእቤ፡ ከመዝ፡ ይቤ፡ እግዚአብሔር፡ ኢትስምዑ፡ ቃሎሙ፡ ለነቢያት፡ እለ፡ ይትኔበዩ፡ ለክሙ፡ ወይብሉክሙ፡ ናሁ፡ ያገብኡ፡ ንዋየ፡ ቤተ፡ እግዚአብሔር፡ እምባቢሎን፡ ይእዜ፡ ፍጡነ፡ እስመ፡ ሐሰተ፡ ተነበዩ፡ ለክሙ።
17 ኢትስምዕዎሙ፡ ተቀነዩ፡ ለንጉሠ፡ ባቢሎን፡ ወተሐይዉ፡ አንትሙ።
18 ወእመሰ፡ ነቢያት፡ እሙንቱ፡ ወቦሙ፡ ቃለ፡ እግዚአብሔር፡ ላዕሌሆሙ፡ ይምጽኡኬ፡ ኀበ፡ እግዚአብሔር፡ ጸባኦት፡ ከመ፡ ኢይባኡ፡ እለ፡ ተርፉ፡ ንዋያት፡ ውስተ፡ ቤተ፡ እግዚአብሔር፡ ወቤተ፡ ንጉሠ፡ ይሁዳ፡ ወበኢየሩሳሌም፡ ባቢሎን።
19 እስመ፡ ከመዝ፡ ይቤ፡ እግዚአብሔር፡ ጸባኦት፡ በእንተ፡ አዕማድ፡ ወበእንተ፡ ባሕር፡ ወበእንተ፡ ሜኮኖት፡ ወበእንተ፡ ተረፈ፡ ንዋያት፡ እለ፡ ተርፋ፡ ውስተ፡ ዛቲ፡ ሀግር።
20 ዘኢነሥኦሙ፡ ናቡከደነፆር፡ ንጉሠ፡ ባቢሎን፡ አመ፡ አፍለሶ፡ ለኢኮንያን፡ ወልደ፡ ኢዮአቄም፡ ንጉሠ፡ ይሁዳ፡ እምኢየሩሳሌም፡ ባቢሎንሃ፡ ወለኵሉ፡ መላእክት፡ ይሁዳ፡ ወኢየሩሳሌም።
21 እስመ፡ ከመዝ፡ ይቤ፡ እግዚአብሔር፡ ጸባኦት፡ አምላክ፡ እስራኤል፡ በእንተ፡ ንዋያት፡ እለ፡ ተርፉ፡ ውስተ፡ ቤተ፡ እግዚአንሔር፡ ወቤተ፡ ንጉሠ፡ ይሁዳ፡ ወኢየሩሳሌም።
22 ይበውኡ፡ ውስተ፡ ባቢሎን፡ ወህየ፡ ይሄልዉ፡ እስከ፡ ዕለተ፡ እዋህዮሙ፡ ይቤ፡ እግዚአብሔር፡ ወተዐርጉ፡ ወትሰወጡ፡ ውስተዝ፡ ንሔር።
=== chapter 28 ===
[Chapter 28]
1 ወኮነ፡ በውእቱ፡ ዓመት፡ በቀዳሚት፡ መንግስቱ፡ ለሴዴቅያስ፡ ንጉሠ፡ ይሁዳ፡ በዓመት፡ ራብዒት፡ በኃምስ፡ ወርኅ፡ ይቤለኒ፡ ሐናንያ፡ ወልደ፡ ሐዞር፡ ሐሳዊ፡ ነቢይ፡ ዘገባኦን፡ በቤተ፡ እግዚአብሔር፡ በቅድመ፡ ካህናት፡ ወኵሉ፡ ሕዝብ፡ ይቤ።
2 ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ቀጥቀጥክዎ፡ ለአርዑተ፡ ንጉሠ፡ ባቢሎን።
3 እስከ፡ ፪፡ ዓመት፡ አነ፡ አገብእ፡ ውስተዝ፡ መካን፡ ኵሎ፡ ንዋየ፡ ቤተ፡ እግዚአብሔር፡ ዘነሥአ፡ ናቡከደነፆር፡ ንጉሠ፡ ባቢሎን፡ እምዝንቱ፡ ብሔር፡ ወወሰዶሙ፡ ባቢሎን።
4 ወለኢኮንያን፡ ወልደ፡ ኢዮአቄም፡ ንጉሠ፡ ይሁዳ፡ ወለኵሉ፡ ፄዋ፡ ይሁዳ፡ ዘወሰዶሙ፡ ባቢሎን፡ አነ፡ እመይጥ፡ ውስተዝ፡ ብሔር፡ ይቤ፡ እግዚአብሔር፡ እስመ፡ እሰብር፡ አርዑቶ፡ ለንጉሠ፡ ባቢሎን።
5 ወይቤሎ፡ ኤርምያስ፡ ነቢይ፡ ለሐናንያ፡ ነቢይ፡ በቅድመ፡ ኵሉ፡ ሕዝብ፡ ወበቅድመ፡ ካህናት፡ እለ፡ ይቀውሙ፡ ውስተ፡ ዐፀደ፡ ቤተ፡ እግዚአብሔር።
6 ወይቤ፡ ኤርምያስ፡ ነቢይ፡ አማን፡ ከመዝ፡ ይግበር፡ እግዚአብሔር፡ ወያቅም፡ እግዚአብሔር፡ ቃለከ፡ ዘተነበይከ፡ ከመ፡ ያግብኡ፡ ንዋየ፡ ቤተ፡ እግዚአብሔር፡ ወኵሎ፡ ዘአፍለሱ፡ እምነ፡ ባቢሎን፡ ኀበዝ፡ መካን።
7 ወባሕቱ፡ ስማዕ፡ ቃለ፡ እግዚአብሔር፡ ዘእነግር፡ አነ፡ ውስተ፡ እዝንከ፡ ወውስተ፡ እዝነ፡ ኵሉ፡ ሕዝብ።
8 ነቢያት፡ እለ፡ ኮኑ፡ እምቅድሜየ፡ ወእምቅድሜከ፡ እምዓለም፡ ተነበዩ፡ ለብዙኅ፡ በሐውርት፡ ወለ፡ መንግሥታት፡ ዓበይት፡ በእንተ፡ አጽባእት፡ ወሕማም፡ ወብድብድ።
9 ነቢይ፡ ዘተነበየ፡ በእንተ፡ ሰላም፡ በጺሖ፡ ነገሩ፡ የአምርዎ፡ ለውእቱ፡ ነቢይ፡ ከመ፡ በአማን፡ ፈነዎ፡ እግዚአብሔር።
10 ወነሥአ፡ ሐናንያ፡ ነቢይ፡ ጋገ፡ በቅድመ፡ ኵሉ፡ ሕዝብ፡ እምክሳዱ፡ ለኤርምያስ፡ ወቀጥቀጦ።
11 ወይቤ፡ ሐናንያ፡ በቅድመ፡ ኵሉ፡ ሕዝብ፡ ከመዝ፡ ይቤ፡ እግዚአብሔር፡ ከመዝ፡ እቀጠቅጥ፡ አርዑቶ፡ ለናቡከደነፆር፡ ንጉሠ፡ ባቢሎን፡ እምድኅረ፡ ፪መዋዕለ፡ ዓመት፡ እምክሳደ፡ ኵሉ፡ ሕዝብ።
12 ወኮነ፡ ቃለ፡ እግዚአብሔር፡ ኀበ፡ ኤርምያስ፡ እምድኅረ፡ ቀጥቀጠ፡ ሐናንያ፡ ነቢይ፡ ጋገ፡ እምላዕለ፡ ክሳዱ፡ ለኤርምያስ፡ ነቢይ፡ ወይቤሎ።
13 ሑር፡ ንግሮ፡ ለሐናንያ፡ ወበሎ፡ ከመዝ፡ ይቤ፡ እግዚአብሔር፡ ጋገ፡ ዘዕፅ፡ ቀጥቀጥከ፡ ወእገብር፡ ህየንቴሁ፡ ጋገ፡ ዘኃፂን።
14 እስመ፡ ከመዝ፡ ይቤ፡ እግዚአብሔር፡ ጸባኦት፡ አምላክ፡ እስራኤል፡ ጋገ፡ ዘኃፂን፡ ወደይኩ፡ ውስተ፡ ክሳደ፡ ኵሉ፡ ሕዝብ፡ ከመ፡ ይትቀነዩ፡ ለናቡከደነፆር፡ ንጉሠ፡ ባቢሎን፡ ወአራዊተ፡ ገዳምሂ፡ ወሀብኩ፡ ሎቱ።
15 ወይቤሎ፡ ኤርምያስ፡ ነቢይ፡ ለሐናንያ፡ ነቢይ፡ ስማዕ፡ ሐናንያ፡ ኢለአከከ፡ እግዚአብሔር፡ ወአንተ፡ አሰፈውከሙ፡ ለዝ፡ ሕዝብ፡ ሐሰተ።
16 በእንተ፡ ዝንቱ፡ ከመዝ፡ ይቤ፡ እግዚአብሔር፡ ናሁ፡ አነ፡ አአትተከ፡ እምገጸ፡ ምድር፡ ወትመውት፡ በዝንቱ፡ ዓመት፡ እስመ፡ ዓመፃ፡ ተናገርከ፡ ላዕለ፡ እግዚአብሔር።
17 ወሞተ፡ ሐናንያ፡ ነቢይ፡ በውእቱ፡ ዓመት፡ በሳብዕ፡ ወርኅ።
=== chapter 29 ===
[Chapter 29]
1 ወከመዝ፡ ውእቱ፡ ነገረ፡ መጽሐፍ፡ ዘፈነወ፡ ኤርምያስ፡ ነቢይ፡ እምኢየሩሳሌም፡ ኀበ፡ እለ፡ ተርፉ፡ ረበናት፡ እለ፡ አፍለስዎሙ፡ ወኀበ፡ ካህናት፡ ወሐሳውያን፡ ነቢያት፡ ወኀበ፡ ኵሉ፡ ሕዝብ፡ ዘአፍለሰ፡ ናቡከደነፆር፡ ንጉሠ፡ ባቢሎን፡ እምኢየሩሳሌም።
2 እምድኅረ፡ ወፅአ፡ ኢኮንያን፡ ንጉሥ፡ ወነጋሥያንት፡ ወሕፅዋን፡ ወመላእክተ፡ ይሁዳ፡ ወኢየሩሳሌም፡ ወኵሉ፡ አግዐዚ፡ ወሙቁሓን፡ ወኬነት፡ እምኢየሩሳሌም።
3 በእደ፡ ኤልሳዕ፡ ወልደ፡ ሳፋን፡ ወገማርዩ፡ ወልደ፡ ኬልቅዩ፡ እለ፡ ፈነወ፡ ሴዴቅያስ፡ ንጉሠ፡ ይሁዳ፡ ኀበ፡ ናቡከደነፆር፡ ንጉሠ፡ ባቢሎን፡ ውስተ፡ ባቢሎን፡ እንዘ፡ ይብል።
4 ከመዝ፡ ይቤ፡ እግዚአብሔር፡ እግዚአ፡ ኃያላን፡ አምላከ፡ እስራኤል፡ ለኵሉ፡ ፈላስያን፡ እለ፡ አፍለስኩ፡ እምኢየሬሳሌም፡ ውስተ፡ ባቢሎን።
5 ሕንጹአ፡ አብያተ፡ ወንበሩ፡ ወትክሉ፡ አቅማሓተ፡ ወብልዑ፡ ፍሬሁ።
6 ወአውስቡ፡ ብእሲተ፡ ወለዱ፡ ደቂቀ፡ ወአዋልደ፡ ወንሥኡ፡ አንስተ፡ ለደቂቅክሙ፡ ወሀቡ፡ አዋልዲክሙ፡ ለዕደው፡ ወይለዱ፡ ደቂቀ፡ ወአዋልደ፡ ወብዝኁ፡ በህየ፡ ወኢትውሐዱ።
7 ኅሥሡ፡ ሰላማ፡ ለሀገር፡ ኀበ፡ አፍለስኩክሙ፡ ህየ፡ ወጸልዩ፡ በእንቲአሃ፡ ኀበ፡ እግዚአብሔር፡ እስመ፡ በሰላመ፡ ዚአሃ፡ ይከውን፡ ሰላምክሙ።
8 እስመ፡ ከመዝ፡ ይቤ፡ እግዚአብሔር፡ እግዚአ፡ ኃያላን፡ አምላከ፡ እስራኤል፡ ኢያስሕቱክሙአ፡ ነቢያት፡ እለ፡ ኀቤክሙ፡ ወኢያስሕቱክሙአ፡ ሰብአ፡ ሠገልክሙ፡ ወኢትስምዕዎሙ፡ ለሐላምያኒክሙ፡ እለ፡ የሐልሙ፡ ለክሙ።
9 እስመ፡ ዓመፃ፡ ይትኔበዩ፡ ለክሙ፡ በስምየ፡ ወኢለአክዎሙ፡ ይቤ፡ እግዚአብሔር።
10 እስመ፡ ከመዝ፡ ይቤ፡ እግዚአብሔር፡ አመ፡ ፈጸምክሙአ፡ ፸ዓመተ፡ ውስተ፡ ባቢሎን፡ እሔውጸክሙ፡ ወአቀውም፡ ቃልየ፡ ኀበክሙ፡ ዘሠናይ፡ ወአሰውጠክሙ፡ ውስተ፡ ዝንቱ፡ ብሔርክሙ።
11 እስመ፡ አነ፡ አአምር፡ ሕሊና፡ ዘአነ፡ እሔሊ፡ ለክሙ፡ ይቤ፡ እግዚአብሔር፡ ሕሊና፡ ሰላም፡ ወአኮ፡ እኩየ፡ ከመ፡ አሀብክሙ፡ ዘንተ።
12 ትጼውዑኒ፡ ወተሐውሩ፡ ወትጼልዩ፡ ኀቤየ፡ ወእሰምዐክሙ።
13 ተኀሥሡኒ፡ ወትረክቡኒ፡ እምከመ፡ በኵሉ፡ ልብክሙ፡ ተኀሥሡኒ።
14 ወአስተርኢ፡ ለክሙ፡ ይቤ፡ እግዚአብሔር፡ ወእመይጥ፡ ፄዋክሙ፡ ወአስተጋብአክሙ፡ እምኵሉ፡ አሕዛብ፡ ወእምኵሉ፡ በሐውርት፡ ኀበ፡ ዘረውኩክሙ፡ ህየ፡ ይቤ፡ እግዚአብሔር፡ ወአገብአክሙ፡ ኀበ፡ መካን፡ እምኀበ፡ አፍለስኩክሙ፡ እምህየ።
15 እስመ፡ ትብሉ፡ አቀመ፡ ለነ፡ እግዚአብሔር፡ ነቢያተ፡ በባቢሎን።
16 እስመ፡ ከመዝ፡ ይቤ፡ እግዚአብሔር፡ ለንጉሥ፡ ዘይነብር፡ ዲበ፡ መንበረ፡ ዳዊት፡ ወላዕለ፡ ሕዝብ፡ እለ፡ ይነብሩ፡ ውስተ፡ ዛሀገር፡ ለአኃዊክሙ፡ እለ፡ ኢወፅኡ፡ ምስሌክሙ፡ ውስተ፡ ፍልሰት።
17 ከመዝ፡ ይቤ፡ እግዚአብሔር፡ እግዚአ፡ ኃያላን፡ ናሁ፡ አነ፡ እፌኑ፡ ላዕሌሆሙ፡ መጥባሕተ፡ ወረኃበ፡ ወብድብደ፡ ወእሜጥዎሙ፡ ከመ፡ በለሰ፡ ሱዓሪም፡ ዘኢይትበላዕ፡ እምእከዩ።
18 ወእዴግኖሙ፡ ድኅሬሆሙ፡ በኲናት፡ ወበረኃብ፡ ወበብድብድ፡ ፤ወእሜጥዎሙ፡ ውስተ፡ ኵሉ፡ ነገሥተ፡ ምድር፡ ካልኣን፡ ለመሐላ፡ ወለሙስና፡ ወለተፋጽዮ፡ ወለጽዕለት፡ በኀበ፡ ኵሉ፡ አሕዛብ፡ ኀበ፡ ዘረውክዎሙ፡ ህየ።
19 በእንተ፡ ዘኢሰምዑ፡ ቃልየ፡ ይቤ፡ እግዚአብሔር፡ እስመ፡ ፈነውኩ፡ አግብርትየ፡ ነቢያተ፡ በጽባሕ፡ ወፈነውኩ፡ ወኢሰምዑኒ፡ ይቤ፡ እግዚአብሔር።
20 ወአንትሙኒ፡ ስምዑኒ፡ ቃለ፡ እግዚአብሔር፡ ኵልክሙ፡ ፈላስያን፡ እለ፡ ፈነውኩ፡ እምኢየሩሳሌም፡ ውስተ፡ ባቢሎን።
21 ከመዝ፡ ይቤ፡ እግዚአብሔር፡ እግዚአ፡ ኃያላን፡ አምላከ፡ እስራኤል፡ ላዕለ፡ አክያብ፡ ወልደ፡ ቆልያ፡ ወላዕለ፡ ሴዴቅያስ፡ ወልደ፡ ማሴው፡ እለ፡ ይትኔበዩ፡ ለክሙ፡ በስምየ፡ በዓመፃ፡ ናሁ፡ አነ፡ እሜጥዎሙ፡ ውስተ፡ እደ፡ ናቡከደነፆር፡ ንጉሠ፡ ባቢሎን፡ ወይቀትሎሙ፡ በቅድመ፡ አዕይንቲክሙ።
22 ወይነሥኡ፡ እምኔሆሙ፡ መርገመ፡ በኵሉ፡ ፈላስያነ፡ ይሁዳ፡ ዘውስተ፡ ባቢሎን፡ ወይብሉ፡ ይረሲከ፡ እግዚአብሔር፡ ከመ፡ ረሰዮሙ፡ ለአክያብ፡ ወለሴዴቅያስ፡ እለ፡ ጤገኖሙ፡ ንጉሠ፡ ባቢሎን፡ በእሳት።
23 እስመ፡ ገብሩ፡ እኩየ፡ ላዕለ፡ እስራኤል፡ ወዘመዉ፡ በአንስትያ፡ ቢጾሙ፡ ወነገሩ፡ ነገረ፡ ሐሰት፡ በስምየ፡ ዘኢአዘዝክዎሙ፡ ወአነ፡ እዛለፎሙ፡ ይቤ፡ እግዚአብሔር።
24 ወትብሎ፡ ለሳሚያ፡ ኤልማዊ።
25 ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ እስመ፡ አንተ፡ ፈነውከ፡ መጻሕፍተ፡ በስምከ፡ ኀበ፡ ኵሉ፡ ሕዝብ፡ ዘውስተ፡ ኢየሩሳሌም፡ ወኀበ፡ ሶፎንያስ፡ ወልደ፡ ማሴው፡ ካህን፡ ወኀበ፡ ኵሎሙ፡ ካህናት፡ ወትቤ።
26 እግዚአብሔር፡ ሤመከ፡ ካህነ፡ ህየንተ፡ ዮዳሔ፡ ካህን፡ ሊቀ፡ በውስተ፡ ቤተ፡ እግዚአብሔር፡ ለኵሉ፡ ሰብእ፡ ዘይትኔበይ፡ ወለኵሉ፡ ሰብእ፡ ዘይትዌረድ፡ ከመ፡ ትዕጽዎ፡ ወታሥጥሞ፡ ውስተ፡ ውኂዝ።
27 ወይእዜኒ፡ ለምንት፡ ዘኢገሠጽኮ፡ ለኤርምያስ፡ ዘእምአናቶት፡ ዘተነበየ፡ ለክሙ።
28 አኮኑ፡ በበይኑ፡ ዝንቱ፡ ለአከ፡ ኀቤነ፡ ውስተ፡ ባቢሎን፡ ወይቤ፡ ሕንጹ፡ አብያተ፡ ወንበሩ፡ ወትክሉ፡ አቅማሓተ፡ ወብልዑ፡ ፍሬሁ።
29 ወአንበባ፡ ሶፎንያስ፡ ካህን፡ ለይእቲ፡ መጽሐፍ፡ ውስተ፡ እዝነ፡ ኤርምያስ፡ ነቢይ።
30 ወኮነ፡ ቃለ፡ እግዚአብሔር፡ ኀበ፡ ኤርምያስ፡ ወይቤሎ።
31 ለአክ፡ ኀበ፡ ኵሉ፡ ፈካስያን፡ እንዘ፡ ትብል፡ ከመዝ፡ ይቤ፡ እግዚአብሔር፡ ለሳምያ፡ ኤልማዊ፡ እስመ፡ ተነበየ፡ ለክሙ፡ ሳሚያ፡ ዘኢለአክዎ፡ አነ፡ ወአሰፈወክሙ፡ ሐሰተ።
32 በእንተ፡ ዝንቱ፡ ከመዝ፡ ይቤ፡ እግዚአብሔር፡ ናሁ፡ አነ፡ እዋህዮሙ፡ ለሳሚያ፡ ኤልማዊ፡ ወለዘርኡ፡ ወኢይሄሉ፡ ሎቱ፡ ብእሲ፡ ዘይነብር፡ ማእከለ፡ ዝንቱ፡ ሕዝብ፡ ወዘይሬኢ፡ ሠናይተ፡ ዘአነ፡ እገብር፡ ለሕዝብየ፡ ይቤ፡ እግዚዘብሔር፡ እስመ፡ ዓመፃ፡ ተናገረ፡ ላዕለ፡ እግዚአብሔር።
=== chapter 30 ===
[Chapter 30]
1 ነገር፡ ዘነገሮ፡ እግዚአብሔር፡ ለኤርምያስ፡ ወይቤሎ።
2 ከመዝ፡ ይቤ፡ እግዚአብሔር፡ አምላከ፡ እስራኤል፡ ጸሐፍ፡ ኵሎ፡ ነገረ፡ ዘነገርኩከ፡ ውስተ፡ መጽሐፍ።
3 እስመ፡ ናሁ፡ መዋዕል፡ ይመጽእ፡ ይቤ፡ እግዚአብሔር፡ ወእመይጥ፡ ፄዋ፡ ሕዝብየ፡ እስራኤል፡ ወይሁዳ፡ ይቤ፡ እግዚአብሔር፡ ዘኵሎ፡ ይመልክ፡ ወአገብኦሙ፡ ውስተ፡ ምድሮሙ፡ ዘወሀብክዎሙ፡ ለአበዊሆሙ፡ ወይኴንንዋ።
4 ወዝንቱ፡ ውእቱ፡ ነገር፡ ዘነበበ፡ እግዚአብሔር፡ ላዕለ፡ እስራኤል፡ ወላዕለ፡ ይሁዳ።
5 ከመዝ፡ ይቤ፡ እግዚአብሔር፡ ድምፀ፡ ግርማሁ፡ ትሰምዑ፡ ግሩመ፡ ወአልቦ፡ ሰላም።
6 ተሰአሉ፡ እስኩ፡ ወአእምሩ፡ እመ፡ ወለደ፡ ተባዕት።
7 አሌ፡ ሊተ፡ እስመ፡ ዓባይ፡ ይእቲ፡ ዕለት፡ ወአልቦ፡ ዘከማሃ፡ ወመዋዕለ፡ ምንዳቤ፡ ይእቲ፡ ለያዕቆብ፡ ወእምኔሁ፡ ይድኅን።
8 ይእተ፡ አሚረ፡ ይቤ፡ እግዚአብሔር፡ ጸባኦት፡ አርዑተ፡ እሥዕር፡ እምክሳድከ፡ ወእሰብር፡ መዋቅሕቲከ፡ ወኢትትቀነይ፡ እንከ፡ ለነኪር።
9 ወይትቀነዩ፡ ለእግዚአብሔር፡ ለአምላኮሙ፡ ወለዳዊት፡ ንጉሦሙ፡ ዘአነሥእ፡ ሎሙ።
10 ወኢትፍራህ፡ አንተ፡ ገብርየ፡ ያዕቆብ፡ ይቤ፡ እግዚአብሔር፡ ወኢደንግፅ፡ እስራኤል፡ እስመ፡ ናሁ፡ አድኅነከ፡ እምርኁቅ፡ ወለዘርእከ፡ እምድረ፡ ፍልሰቶሙ፡ ወይትመየጥ፡ ያዕቆብ፡ ወየዐርፍ፡ ወይትአመን፡ ወአልቦ፡ ዘያደነግፆ።
11 እስመ፡ ምስሌከ፡ አነ፡ ይቤ፡ እግዚአብሔር፡ ከመ፡ አድኅንከ፡ እስመ፡ እገብር፡ ማኅለቅተ፡ ውስተ፡ ኵሉ፡ አሕዛብ፡ ኀበ፡ ዘረውኩከ፡ ወኪያከሰ፡ ኢይሬስየከ፡ ትኅልቅ፡ ወገሠጽኩከ፡ ለኵነኔ፡ ወአንጽሖ፡ ኢያነጽሐከ።
12 እስመ፡ ከመዝ፡ ይቤ፡ እግዚአብሔር፡ ተንሥአ፡ ጸልዐ፡ ቊስለ፡ መቅሠፍትከ።
13 ወአልቦ፡ ዘይፈትሕ፡ ፍትሐከ፡ ወኢይበቊዐከ፡ ዘተፈወስከ፡ ቊስለከ።
14 ኵሎሙ፡ አዕርክቲከ፡ ረስዑከ፡ ወኢኀሠሡከ፡ እስመ፡ አቊሰሉከ፡ ፀርከ፡ በመቅሠፍት፡ ጽኑዕ፡ ላዕለ፡ ኵሉ፡ ጌጋይከ፡ እስመ፡ ብዙኅ፡ ኃጣውኢከ።
15 ምንተ፡ ተአወዩ፡ በእንተ፡ ቊስልከ፡ ተንሥአ፡ ቊስልከ፡ በእንተ፡ ብዝኀ፡ ጌጋይከ፡ ጸንዑ፡ ኃጣውኢከ፡ ዘንተ፡ ገበርኩ፡ ለከ።
16 በእንተ፡ ዝንቱ፡ ኵሎሙ፡ እለ፡ ይበልዑከ፡ ይትበልዑ፡ ወኵሎሙ፡ እለ፡ ይፄውዉከ፡ ውስተ፡ ፄዋ፡ የሐውሩ፡ ወእለሂ፡ በርበሩከ፡ ይትበረበሩ፡ ወኵሎሙ፡ እለ፡ ማህረኩከ፡ እሁቦሙ፡ ለተማህርኮ።
17 እስመ፡ እፌውሰከ፡ እምቊስልከ፡ እኩይ፡ እስመ፡ አዐርግ፡ ለከ፡ ፈውሰ፡ ወእምቊስልከ፡ አሐይወከ፡ ይቤ፡ እግዚአብሔር፡ እስመ፡ ተሰመይኪ፡ ዝሩተ፡ አንቲ፡ ጽዮን፡ ወአልቦ፡ ዘይትኀሠሥ፡ ለኪ።
18 ከመዝ፡ ይቤ፡ እግዚአብሔር፡ ናሁ፡ አነ፡ እመይጥ፡ ፈላስያነ፡ ቤተ፡ ያዕቆብ፡ ወማኅደሪሁኒ፡ እሠሀል፡ ወትትሐነጽ፡ ሀገር፡ በኑኃ፡ ወኤሬሞን፡ በከመ፡ ሕጉ፡ ይገብእ።
19 ወይወፅእ፡ እምህየ፡ አኰቴት፡ ወቃለ፡ ተውኔት፡ ወአበዝኆሙ፡ ወኢይውሕዱ፡ እንከ።
20 ወይከውኑ፡ ደቂቁ፡ ከመ፡ ትካት፡ ወይረትዕ፡ ስምዖሙ፡ በቅድመ፡ ገጽየ፡ ወእዋህዮሙ፡ ለእለ፡ አስርሕዎሙ፡ ወይመውኡ።
21 ወመልአክሂ፡ ይሠየም፡ እምውስቴቶሙ፡ ወአስተጋብኦሙ፡ ወእመይጦሙ፡ መንገሌየ።
22 ወትከውኑ፡ ሊተ፡ ሕዝብየ፡ ወአነሂ፡ እከውነክሙ፡ አምላከ።
23 እስመ፡ መዐተ፡ እግዚአብሔር፡ ወፅአ፡ በመቅሠፍት፡ ወአምጽአ፡ መንሱተ፡ መዐቱ፡ ወአግብአ፡ ላዕለ፡ ኃጥኣን።
24 ወኢትመጥየ፡ መቅሠፍተ፡ መዐቱ፡ ለእግዚአብሔር፡ እስከ፡ ይገብር፡ ወእስከ፡ ያቀውም፡ ዘሐለየ፡ በልቡ።
=== chapter 31 ===
[Chapter 31]
1 ውእተ፡ አሚረ፡ ይቤ፡ እግዚአብሔር፡ እከውኖሙ፡ አምላኮሙ፡ ለሕዝበ፡ እስራኤል፡ እሙንሩኒ፡ ይከውኑኒ፡ ሕዝብየ።
2 ከመዝ፡ ይቤ፡ እግዚአብሔር፡ ረከበ፡ ሞገሰ፡ በገዳም፡ ሕዝብ፡ ድኅረ፡ ተቀትሉ፡ በመጥባሕት፡ ሑሩ፡ ወኢታጥፍእዎሙ፡ ለእስራኤል።
3 እስመ፡ እግዚአብሔር፡ አስተርአየኒ፡ እምርኁቅ፡ ፍቅረ፡ ዘለዓለም፡ አፍቀርኩከ፡ ወበእንተ፡ ዝንቱ፡ ውስተ፡ ሣህልየ፡ ሰሐብኩከ።
4 ወዓዲ፡ አሐንጸኪ፡ ወትትሐነጺ፡ ድንግለ፡ እስራኤል፡ ንሥኢ፡ ከበሮኪ፡ ወፃኢ፡ ምስለ፡ ማኅበር፡ እለ፡ ይትዋነዩ።
5 ዓዲ፡ ትተክሊ፡ አዕፃዳተ፡ ወይን፡ ውስተ፡ አድባረ፡ ሰማርያ፡ ትክሉ፡ እለ፡ ትተክሉ፡ ወሰብሑ።
6 እስመ፡ ሀለወት፡ ዕለተ፡ ጽዋዔሁ፡ ወታወሥኡ፡ ውስተ፡ አድባረ፡ ኤፍሬም፡ ተንሥኡ፡ ወንዕርግ፡ ውስተ፡ ጽዮን፡ ኀበ፡ እግዚአብሔር፡ አምላክነ።
7 እስመ፡ ከመዝ፡ ይቤ፡ እግዚአብሔር፡ ተፈሥሑ፡ ቤተ፡ ያዕቆብ፡ ትፍሥሕተ፡ ወክልሑ፡ ውስተ፡ አርእስተ፡ አሕዛብ፡ ወአስምዑ፡ ወበሉ፡ አድኀነ፡ እግዚአብሔር፡ ሕዝቦ፡ እለ፡ ተርፉ፡ እምእስራኤል።
8 ናሁ፡ አነ፡ አመጽኦሙ፡ እምሰሜን፡ ወአስተጋብኦሙ፡ እምአጽናፈ፡ ምድር፡ በበዓለ፡ ፋሲካ፡ ወይትወለዱ፡ ብዙኃን፡ አሕዛብ፡ ወይመጽኡ፡ ዝየ።
9 እንዘ፡ ይበክዩ፡ ኀለፉ፡ ወእንዘ፡ ይትፌሥሑ፡ አእተዎሙ፡ ወየኀድሩ፡ ውስተ፡ ሙኃዘ፡ ማይ፡ ውስተ፡ ፍኖተ፡ መጽያሕት፡ ወኢየዐይሉ፡ እንከ፡ እምኔሃ፡ እስመ፡ ኮንክዎ፡ ለእስራኤል፡ አባሁ፡ ወኤፍሬም፡ በኵርየ፡ ውእቱ።
10 ስምዑ፡ ቃለ፡ እግዚአብሔር፡ አሕዛብ፡ ወዜንዉ፡ ውስተ፡ ደሰያት፡ ዘርኁቅ፡ ወበሉ፡ ዘዘረዎ፡ ለእስራኤል፡ ያስተጋብኦ፡ ወየዐቅቦ፡ ከመ፡ ኖላዊ፡ ዘይርዒ፡ መርዔቶ።
11 እስመ፡ አድኀኖ፡ እግዚአብሔር፡ ለያዕቆብ፡ ወባልሖ፡ እምእደ፡ ዘይኄይሎ።
12 ወይመጽኡ፡ ወይትፌሥሑ፡ በደብረ፡ ጽዮን፡ ወይመጽኡ፡ ውስተ፡ ሠናይተ፡ እግዚአብሔር፡ ውስተ፡ ብሔረ፡ እክል፡ ወወይን፡ ወውስተ፡ ቅብእ፡ ወአልህምት፡ ወአባግዕ፡ ወትከውን፡ ነፍሶሙ፡ ከመ፡ ገነት፡ ርዊት፡ ወኢይርኅቡ፡ እንከ።
13 ውእተ፡ አሚረ፡ ይትፌሥሓ፡ ደናግል፡ በኃሤት፡ ወወራዙት፡ ወሊቃውንት፡ ኅቡረ፡ ወእሬስዮ፡ ለላሖሙ፡ ፍሥሐ፡ ወአስተፌሥሖሙ፡ ፍሥሐ፡ ከመ፡ ይትኀሠዩ።
14 ወአዐብዮሙ፡ ወአረውያ፡ ለነፍሶሙ፡ ለካህናት፡ ለደቂቀ፡ ሌዊ፡ ወይጸግቡ፡ ሕዝብየ፡ እምበረከትየ፡ ይቤ፡ እግዚአብሔር።
15 ከመዝ፡ ይቤ፡ እግዚአብሔር፡ ቃል፡ በራማ፡ ተሰምዐ፡ ብካይ፡ ወላሕ፡ ወገዓር፡ ራሔል፡ ትበክዮሙ፡ ለደቂቃወአበየት፡ ነጊፈ፡ ላሐ፡ ላዕለ፡ ደቂቀ፡ እስመ፡ ኢሀለዉ።
16 ከመዝ፡ ይቤ፡ እግዚአብሔር፡ ክልኢ፡ ቃለኪ፡ እምብካይ፡ ወአዕይንተኪ፡ እምአንብዕ፡ እስመቦ፡ ዕሤት፡ ለምግባርኪ፡ ይቤ፡ እግዚአብሔር፡ ወይሰወጡ፡ እምድረ፡ ፀር።
17 ወቦተስፋ፡ ለደኃሪትኪ፡ ይቤ፡ እግዚአብሔር፡ ወተመይጡ፡ ደቂቀ፡ ውስተ፡ ደወሎሙ።
18 ሰሚዐ፡ ሰማዕኩ፡ ኤፍሬም፡ እንዘ፡ ይግዕር፡ ገሠጽከኒ፡ ወተገሠጽኩ፡ ከመ፡ ላህም፡ ዘኢተምህረ፡ ሚጠኒ፡ ወእትመየጥ፡ እስመ፡ አንተ፡ እግዚኦ፡ አምላኪየ።
19 እምድኅረ፡ ተመጠውኩ፡ ተፈሣሕኩ፡ ወእምድኅረ፡ አእመርኩ፡ ጠፋሕኩ፡ እዴየ፡ ወኀፈርኩ፡ ወእትኀፈር፡ እስመ፡ ነሣእኩ፡ ጽዕለተ፡ ንእስየ።
20 ወልድ፡ ዘአፈቅር፡ ኤፍሬም፡ ሊተ፡ ከመ፡ ሕፃን፡ ልሕድ፡ ለለተናገርክዎ፡ ተዘክሮ፡ እዜከሮ፡ በእንተዝ፡ ተሀውከ፡ አማዑትየ፡ ሎቱ፡ ተሣህሎ፡ እሠሀሎ፡ ይቤ፡ እግዚአብሔር።
21 አቅሚ፡ ለኪ፡ ጸወናተ፡ ወግበሪ፡ ለኪ፡ ትእምርታተ፡ ደዪ፡ ውስተ፡ ልብኪ፡ መጽያሕተ፡ ፍኖት፡ እንተ፡ ሖርኪ፡ ከመ፡ ትሰወጢ፡ ውስተ፡ ሀገርኪ፡ ድንግለ፡ እስራኤል፡ ተሰወጢ፡ ውስተ፡ ሀገርኪ፡ እንዘ፡ ትላሕዊ።
22 እስከ፡ ማእዜኑ፡ ትገብኢ፡ ወለት፡ ዕሉት፡ እስመ፡ ገብረ፡ እግዚአብሔር፡ ሐዳሰ፡ ውስተ፡ ምድር፡ ወይመጽእ፡ ሰብእ፡ ውስተ፡ መድኃኒት።
23 ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ዓዲ፡ ይብሉ፡ ዘነገረ፡ በይሁዳ፡ ወበአህጉሪሁ፡ አመ፡ ሜጥኩ፡ ፄዋሆሙ፡ ይባርከከ፡ እግዚአብሔር፡ ማኅደረ፡ ጽድቅ፡ ደብረ፡ መቅደስከ።
24 ወእለ፡ ይነብሩ፡ ውስቴታ፡ ይሁዳ፡ ወኵሉ፡ አህጉሪሁ፡ ኅቡረ፡ ሐረሳውያን፡ ወያነሥኡ፡ መራዕየ።
25 እስመ፡ አርወይኩ፡ ኵሎ፡ ነፍሰ፡ ጽምእተ፡ ወአጽገብኩ፡ ኵሎ፡ ነፍሰ፡ ርኅብተ።
26 በእንተ፡ ዝንቱ፡ ነቃሕኩ፡ ወርኢኩ፡ ወጥዕመኒ፡ ንዋምየ።
27 በእንተ፡ ዝንቱ፡ ናሁ፡ መዋዕል፡ ይመጽእ፡ ይቤ፡ እግዚአብሔር፡ ወእዘርኦሙ፡ ለቤተ፡ እስራኤል፡ ወለቤተ፡ ይሁዳ፡ ዘርአ፡ እጓለ፡ እመሕያው፡ ወዘርአ፡ እንስሳ።
28 ወበከመ፡ ተጋህኩ፡ በእንቲአሆሙ፡ ከመ፡ እንሥቶሙ፡ ወአሕምሞሙ፡ ከማሁ፡ እተግህ፡ ከመ፡ እሕንጾሙ፡ ወእትክሎሙ፡ ይቤ፡ እግዚአብሔር።
29 ውእተ፡ አሚረ፡ ኢይብሉ፡ እንከ፡ አበው፡ በልዑ፡ ቆዓ፡ ወደቂቀ፡ ፀርሱ፡ ስነኒሆሙ።
30 ዳእሙ፡ ፩፩ይመውት፡ በኃጢአቱ፡ ወዘሂ፡ በልዐ፡ ቆዓ፡ ለሊሁ፡ ይፀርስ፡ ስነኒሁ።
31 ናሁ፡ መዋዕል፡ ይመጽእ፡ ይቤ፡ እግዚአብሔር፡ ወእሠርዕ፡ ለቤተ፡ እስራኤል፡ ወለቤተ፡ ይሁዳ፡ ሥርዓተ፡ ሐዲሰ።
32 ወአኮ፡ ከመ፡ ዝንቱ፡ ሥርዓት፡ ዘሠራዕኩ፡ ለአበዊሆሙ፡ አመ፡ አኀዝኩ፡ በእደዊሆሙ፡ ወአውፃእክዎሙ፡ እምድረ፡ ግብጽ፡ እስመ፡ እሙንቱኒ፡ ኢነበሩ፡ በኪዳንየ፡ ወአነሂ፡ ተሀየይክዎሙ፡ ይቤ፡ እግዚአብሔር።
33 ወከመዝ፡ ይእቲ፡ ሥርዓት፡ እንተ፡ እሠርዕ፡ ለቤተ፡ እስራኤል፡ እምድኅረ፡ እማንቱ፡ መዋዕል፡ ይቤ፡ እግዚአብሔር፡ እወዲ፡ ሕግየ፡ ውስተ፡ ልቦሙ፡ ወእጽሕፎ፡ ውስተ፡ ሕሊናሆሙ፡ ወእከውኖሙ፡ አምላኮሙ፡ ወእሙንቱኒ፡ ይከውኑኒ፡ ሕዝብየ።
34 ወአልቦ፡ ዘይሜህር፡ እንከ፡ ፩፩ለእኅዋሁ፡ ወ፩፩ለቢጹ፡ ወይብሎ፡ አእምሮ፡ ለእግዚአብሔር፡ እስመ፡ ኵሎሙ፡ የአምሩኒ፡ ንኡሶሙ፡ ወዓቢዮሙ፡ ይቤ፡ እግዚአብሔር፡ እስመ፡ እሰሪ፡ ሎሙ፡ ኃጢአቶሙ፡ ወኢይዜከር፡ እንከ፡ ሎሙ፡ አበሳሆሙ።
35 ከመዝ፡ ይቤ፡ እግዚአብሔር፡ ዘወሀበ፡ ፀሐየ፡ ያብርህ፡ በመዓልት፡ ወወርኃ፡ ወከዋክብተ፡ ያብርሁ፡ በሌሊተ፡ ዘያረምማ፡ ለባሕር፡ ወለድምፀ፡ ማዕበላ፡ እግዚአብሔር፡ ዘኵሎ፡ ይመልክ፡ ስሙ።
36 ወዝኒ፡ ኵሉ፡ ለእመ፡ ኀደጉ፡ ሥርዓቶሙ፡ እምቅድመ፡ ገጽየ፡ ይቤ፡ እግዚአብሔር፡ ዘርአ፡ እስራኤልኒ፡ ይትኀደጉ፡ እምከዊነ፡ ሕዝብየ፡ እምቅድመ፡ ገጽየ፡ በኵሉ፡ መዋዕል።
37 ከመዝ፡ ይቤ፡ እግዚአብሔር፡ ሶበ፡ ጥቀ፡ ይትሌዐል፡ ሰማይ፡ ወይትአተት፡ ይቤ፡ እግዚአብሔር፡ ወምድርኒ፡ ይወርድ፡ ወይተሐት፡ ወአነሂ፡ እሜንኖሙ፡ ለኵሉ፡ ዘርአ፡ እስራኤል፡ ይቤ፡ እግዚአብሔር፡ በእንተ፡ ኵኩ፡ ምግባሮሙ።
38 ናሁ፡ መዋዕል፡ ይመጽእ፡ ይቤ፡ እግዚአብሔር፡ ወትትሐነጽ፡ ሀገር፡ ለእግዚአብሔር፡ እማኅፈደ፡ አናምሔል፡ እስከ፡ ኆኅተ፡ ማዕዘንት።
39 ወይበጽሕ፡ አምጣኒሃ፡ እስከ፡ ወግረ፡ ጋሬብ።
40 ወኵሉ፡ አስሬሞት፡ እስከ፡ ፈለገ፡ ቄድሮስ፡ ወእስከ፡ ማዕዘንተ፡ ዴዴ፡ አፍራስ፡ እምጽባሕ፡ ቅዱስ፡ ለእግዚአብሔር፡ ወኢየኀልቅ፡ እንከ፡ ወኢይትነሠት፡ እምከ፡ ለዓለም።
=== chapter 32 ===
[Chapter 32]
1 ቃለ፡ እግዚአብሔር፡ ዘኮነ፡ ኀበ፡ ኤርምያስ፡ በዐሠርቱ፡ ዓመተ፡ መንግሥቱ፡ ለሴዴቅያስ፡ ንጉሠ፡ ይሁዳ፡ ወበ፲ወ፰፡ ዓመተ፡ መንግሥቱ፡ ለናቡከደነፆር፡ ንጉሠ፡ ባቢሎን።
2 አሜሃ፡ ሠራዊተ፡ ንጉሠ፡ ባቢሎን፡ ዐገትዋ፡ ለኢየሩሳሌም፡ ወየዐቅብዎ፡ ለኤርምያስ፡ በዐፀደ፡ ሞቅሕ፡ ዘቤተ፡ ንጉሠ፡ ይሁዳ።
3 ዘአዕቀቦ፡ ሴዴቅያስ፡ ንጉሠ፡ ይሁዳ፡ ወይቤሎ፡ ለምንት፡ ተነበይከ፡ አንተ፡ እንዘ፡ ትብል፡ ከመዝ፡ ይቤ፡ እግዚአብሔር፡ ናሁ፡ አገብኣ፡ ለዛቲ፡ ሀገር፡ ውስተ፡ እዴሁ፡ ለንጉሠ፡ ባቢሎን፡ ወይነሥኣ።
4 ወሴዴቅያስ፡ ንጉሠ፡ ይሁዳ፡ ኢይድኅን፡ እምእዴሆሙ፡ ለከለዳውያን፡ እስመ፡ ገቢአ፡ ይገብእ፡ ውስተ፡ እዴሁ፡ ለንጉሠ፡ ባቢሎን፡ ወይትናገሮ፡ አፈ፡ በአፈ፡ ወይሬእዮ፡ ዐይነ፡ በዐይነ።
5 ወይበውእ፡ ሴዴቅያስ፡ ባቢሎን፡ ወይነብር፡ ህየ፡ እስከ፡ አመ፡ እዋህየ፡ ይቤ፡ እግዚአብሔር፡ ለእመ፡ ትትቃተሉ፡ ምስለ፡ ከለዳውያን፡ ኤትሤርኁ።
6 ወኮነ፡ ቃለ፡ እግዚአብሔር፡ ኀበ፡ ኤርምያስ፡ ወይቤሎ።
7 ናሁ፡ አናምኤል፡ ወልደ፡ ሴሎም፡ እኁሁ፡ ለአቡከ፡ ይመጽእ፡ ኀቤከ፡ ወይብለከ፡ ተሣየጥ፡ ገራህትየ፡ ዘአናቶት፡ እስመ፡ አንተ፡ ርቱዕ፡ ታጥርያ።
8 ወመጽአ፡ ኀቤየ፡ አናምኤል፡ ወልደ፡ እኁሁ፡ ለአቡየ፡ በቃለ፡ እግዚአብሔር፡ ኀበ፡ ዐፀደ፡ ሞቅሕ፡ ወይቤለኒ፡ ተሣየጥ፡ ገራህተ፡ በምድረ፡ ብንያም፡ ዘአናቶት፡ እስመ፡ አንተ፡ ርቱዕ፡ ታጥርያ፡ ወአንተ፡ ዓቢይነ፡ ወአንተ፡ ትረሳ።
9 ወተሣየጥኩ፡ ውእተ፡ ገራህተ፡ እምአናምኤል፡ ወልደ፡ እኁሁ፡ ለአቡየ፡ ዘአናቶት፡ ወወሀብከዎ፡ ፲ወ፯፡ ጠፋልሐ፡ ዘብሩር።
10 ወጸሐፍኩ፡ መጽሐፈ፡ ወኀተምክዋ፡ ወአኬድኩ፡ ሰማዕተ፡ ወደለውኩ፡ ሎቱ፡ ብሩሮ፡ በመዳልው።
11 ወተመጠውኩ፡ መጽሐፈ፡ ማሕተትየ፡ ኅቱመ።
12 ወወሀብክዎ፡ መጽሐፈ፡ ማሕተትየ፡ ለባሮክ፡ ወልደ፡ ኔርዩ፡ ወልደ፡ ማሴው፡ በቅድመ፡ አናምኤል፡ እኁሁ፡ ለአቡየ፡ ወበቅድመ፡ ሰማዕት፡ እለ፡ ቆሙ፡ ወዐለሙ፡ ውስተ፡ ይእቲ፡ መጽሐፍ፡ ዘማሕተት፡ ወበቅድመ፡ አይሁድ፡ እለ፡ ይቀውሙ፡ ውስተ፡ ዐፀደ፡ ቤተ፡ ምቅሕ።
13 አዘዝክዎ፡ ለባሮክ፡ ወእቤሎ፡ በቅድሜሆሙ።
14 ከመዝ፡ ይቤ፡ እግዚአብሔር፡ ዘይነግሥ፡ ለኵሉ፡ አምላከ፡ እስራኤል፡ ንሣእ፡ ዘመጽሐፈ፡ ማሕተት፡ ዘኅቱም፡ ወአንብሮ፡ ወደዮ፡ ውስተ፡ ንዋየ፡ ልሕኵት፡ ይንበር፡ ብዙኀ፡ መዋዕለ።
15 እስመ፡ ከመዝ፡ ይቤ፡ እግዚአብሔር፡ ዓዲአ፡ ታጠርዩ፡ በዝብሔር፡ አብያተ፡ ወአዕፃዳተ፡ ወይን፡ ወገራውሀ።
16 ወጸለይኩ፡ ኀበ፡ እግዚአብሔር፡ እምድኅረ፡ መጠውክዎ፡ መጽሐፈ፡ ማሕተት፡ ለባሮክ፡ ወልደ፡ ኔርዩ፡ ወእቤ።
17 ወይሌ፡ እግዚኦ፡ እግዚአብሔር፡ ናሁ፡ አንተ፡ ፈጠርከ፡ ሰማየ፡ ወምድረ፡ በኃይልከ፡ ዓቢይ፡ ወበመዝራዕትከ፡ ልዑል፡ ዘአልቦ፡ ምንትኒ፡ ዘይሰአን፡ እምኔከ።
18 ወትገብር፡ ምሕረተከ፡ እስከ፡ አእላፍ፡ ወትፈዲ፡ ኃጢአተ፡ ወላዲ፡ ውስተ፡ ሕፅነ፡ ውሉዶሙ፡ ድኅሬሆሙ፡ አምላክ፡ ዓቢይ፡ ወኃያል።
19 እግዚአብሔር፡ ዓቢየ፡ ምክር፡ ወጽኑዓ፡ ምግባር፡ እግዚአብሔር፡ ዘይነግሥ፡ ለኵሉ።
20 ዘገበርከ፡ ትእምርተ፡ ወመንክረ፡ በምድረ፡ ግብጽ፡ እስከ፡ ዛዕለት፡ ወበውስተ፡ እስራኤልኒ፡ ወበውስተ፡ አሕዛብኒ፡ ወገበርከ፡ ለከስመ፡ እስከ፡ ዛ፡ ዕለት።
21 ወአውፃእከ፡ ሕዝበከ፡ እስራኤል፡ እምድረ፡ ግብጽ፡ በተአምራት፡ ወመንክራት፡ በእድ፡ ጽንዕት፡ ወበመዝራዕት፡ ልዕልት፡ ወበግርማ፡ ዓቢይ።
22 ወወሀብኮሙ፡ ዛተ፡ ምድረ፡ እንተ፡ መሐልክ፡ ለአበዊሆሙ፡ ምድረ፡ እንተ፡ ታውኅዝ፡ ሐሊበ፡ ወመዐረ።
23 ወቦኡ፡ ወነሥእዋ፡ ወኢሰምዑ፡ ቃለከ፡ ወኢሖሩ፡ በትእዛዝከ፡ ወኢገብሩ፡ ኵሎ፡ ዘአዘዝኮሙ፡ ወረከቦሙ፡ ዝኵሉ፡ እኩይ።
24 ወመጽኡ፡ አሕዛብ፡ ወነሥእዋ፡ ለዛ፡ ሀገር፡ ወገብኣት፡ ዛሀገር፡ ውስተ፡ እደ፡ ፋርስ፡ እለ፡ ጸብእዋ፡ እምገጸ፡ ኵናት፡ ወረኃብ፡ ወኮነ፡ በከመ፡ ነበብከ።
25 ወትቤለኒ፡ አንተ፡ እግዚኦ፡ እግዚአብሔር፡ ተሣየጥ፡ ገራህተ፡ በብሩር፡ ወአስምዕ፡ ሰማዕተ፡ ‹‹ወጸሐፍኩ፡ መጽሐፈ፡ ወኀተምክዋ፡ ወአኬድኩ፡ ሰማዕተ››፡ ወገብአት፡ ዛ፡ ሀገር፡ ውስተ፡ እደ፡ ፋርስ።
26 ወኮነ፡ ቃለ፡ እግዚአብሔር፡ ኀበ፡ ኤርምያስ፡ ወይቤ።
27 አነ፡ ውእቱ፡ እግዚአብሔር፡ አምላኩ፡ ለኵሉ፡ ዘሥጋ፡ ቦሁ፡ እንጋ፡ ምንትኒ፡ ዘይትኀባእ፡ እምኔየ።
28 በእንተ፡ ዝንቱ፡ ከመዝ፡ ይቤ፡ እግዚአብሔር፡ ገቢአ፡ ትገብእ፡ ውስተ፡ እደ፡ ፋርስ፡ ዛ፡ ሀገር፡ ወውስተ፡ እዴሁ፡ ለንጉሠ፡ ባቢሎን፡ ወይነሥኣ።
29 ወይመጽኡ፡ ፋርስ፡ እለ፡ ጸብእዋ፡ ለዛ፡ ሀገር፡ ወያውዕይዋ፡ ለዛ፡ ሀገር፡ በእሳት፡ ወያውዕዩ፡ አብያተ፡ እለ፡ በውስተ፡ አንሕስቲሆሙ፡ ዐጠኑ፡ ለበዓለ፡ ወአውጽሑ፡ ሞጻሕተ፡ ለባዕድ፡ አማልክት፡ ከመ፡ ያምዕዑኒ።
30 እስመ፡ ኮኑ፡ ደቂቀ፡ እስራኤል፡ ወደቂቀ፡ ይሁዳ፡ ባሕቲቶሙ፡ ገብሩ፡ እኩየ፡ በቅድሜየ፡ እምንእሶሙ፡ እስመ፡ ደቂቀ፡ እስራኤል፡ አኮኑ፡ ዘያምዕዑኒ፡ ኪያየ፡ በምግባረ፡ እደዊሆሙ፡ ይቤ፡ እግዚአብሔር።
31 እስመ፡ ውስተ፡ መዐትየ፡ ወመቅሠፍትየ፡ ሀለወት፡ ዛሀገር፡ እምአመ፡ ሐነጽዋ፡ እስከ፡ ዛ፡ ዕለት፡ ከመ፡ እሥዐራ፡ እምቅድመ፡ ገጽየ።
32 በእንተ፡ ኵሉ፡ እከዮሙ፡ ለደቂቀ፡ እስራኤል፡ ወደቂቀ፡ ይሁዳ፡ ዘገብሩ፡ ከመ፡ ያምዕዑኒ፡ እሙንቱ፡ ወነገሥቶሙኒ፡ ወመላእክቲሆሙኒ፡ ወካህናቲሆሙኒ፡ ወነቢያቲሆሙኒወሰብአ፡ ይሁዳ፡ ወእለ፡ ይነብሩ፡ ኢየሩሳሌም።
33 ወሜጡ፡ ኀቤየ፡ ዘባኖሙ፡ ወአኮ፡ ገጾሙ።
34 ወገብሩ፡ ርኵሶሙ፡ ውስተ፡ ቤትየ፡ ዘተሰምየ፡ ስምየ፡ ላዕሌሁ፡ ከመ፡ ያርኵስዎ።
35 ወሐነጹ፡ ምሥዋዓ፡ ለበዓል፡ በቈላተ፡ ወልደ፡ ሄኖም፡ ከመ፡ ይሡዑ፡ በህየ፡ ደቂቆሙ፡ ወአዋልዲሆሙ፡ ለሞሎሕ፡ ዘኢአዘዝክዎሙ፡ ወኢሐለይክዎ፡ በልብየ፡ ከመ፡ ይገብርዎ፡ ለዝንቱ፡ ርኵሶሙ፡ በዘያስሕትዎ፡ ለይሁዳ።
36 ወይእዜኒ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ ለዛሀገር፡ እንተ፡ ትብሉ፡ አንትሙ፡ ገብአት፡ ውስተ፡ እዴሁ፡ ለንጉሠ፡ ባቢሎን፡ በኵናት፡ ወበረኃብ፡ ወበብድብድ።
37 ወናሁ፡ አነ፡ አስተጋብኦሙ፡ እምነ፡ በሐውርት፡ ኀበ፡ ዘረውክዎሙ፡ ህየ፡ በመዐትየ፡ ወበመቅሠህትየ፡ ዓቢይ፡ ወእመይጦሙ፡ ውስተዝ፡ ብሔር፡ ወአነብሮሙ፡ ተአሚኖሙ።
38 ወይከውኑኒ፡ ሕዝብየ፡ ወአሃኒ፡ እከውኖሙ፡ አምላኮሙ።
39 ወእሁቦሙ፡ ካልእ፡ ፍኖተ፡ ወካልአ፡ ልበ፡ በዘይፈርሁኒ፡ በኵሉ፡ መዋዕሊሆሙ፡ ለሠናይ፡ ወለውዶሙሂ፡ እምድኅሬሆሙ።
40 ወእሠርዕ፡ ሎሙ፡ ሥርዓተ፡ ዘለዓለም፡ በዘኢየአትት፡ እምድኅሬሆሙ፡ ወእወዲ፡ ፍርሀተ፡ ውስተ፡ ልቦሙ፡ ከመ፡ ኢይርኀቁ፡ እምኑየ።
41 ወእሠሀሎሙ፡ ወአሤኒ፡ ሎሙ፡ ወእተክሎሙ፡ ውስተ፡ ዛምድር፡ በሃይማኖት፡ በኵሉ፡ ልብየ፡ ወበኵሉ፡ ነፍስየ።
42 እስመ፡ ከመዝ፡ ይቤ፡ እግዚአብሔር፡ በከመ፡ አምጻእኩ፡ ላዕለዝ፡ ሕዝብ፡ ኵሎ፡ ዝንተ፡ እኩየ፡ ዓቢየ፡ ከማሁ፡ አነ፡ አመጽእ፡ ሎሙ፡ ኵሎ፡ ሠናየ፡ ዘነበብኩ፡ ላዕሌሆሙ።
43 ወዓዲ፡ ያጠርዩ፡ ገራውሀ፡ በዛቲ፡ ምድር፡ እንተ፡ ትብል፡ አንተ፡ ዓፅ፡ ይእቲ፡ እምሰብእ፡ ወእም፡ እንስሳ፡ ወገብአት፡ ውስተ፡ እደ፡ ፋርስ።
44 ወይሣየጡ፡ ገራውሀ፡ በወርቆሙ።
=== chapter 33 ===
[Chapter 33]
1 ወኮነ፡ ቃለ፡ እግዚአብሔር፡ ኀበ፡ ኤርምያስ፡ ዳግመ፡ እንዘ፡ ሀሎ፡ ዓዲሁ፡ ውስተ፡ ዐፀደ፡ ሞቅሕ፡ ወይቤ።
2 ከመዝ፡ ይቤ፡ እግዚአብሔር፡ ዘገብራ፡ ለምድር፡ ወፈጠራ፡ ከመ፡ ያርትዓ፡ እግዚአብሔር፡ ስሙ።
3 ጽራሕ፡ ኀቤየ፡ ወአወሥአከ፡ ወእነግረከ፡ ዓቢያተ፡ ወኃይላተ፡ ዘኢተዘምር።
4 እስመ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ በእንተ፡ አብያተ፡ ሀገር፡ ዛቲ፡ ወበእንተ፡ አብያተ፡ ነገሥተ፡ ይሁዳ፡ እለ፡ ንኅሉ፡ በሠራዊት፡ ወእለ፡ ተመዝበሩ።
5 እስመ፡ መጽኡ፡ መስተቃትላነ፡ ፋርስ፡ ይትቃተሉ፡ እመልኣ፡ አብድንተ፡ ሰብእ፡ እለ፡ እቀትል፡ በመዐትየ፡ ወበመቅሠፍትየ፡ ወሜጥኩ፡ ገጽየ፡ እምኑሆሙ፡ በእንተ፡ ኵሉ፡ እከዮሙ።
6 ናሁ፡ አዐርግ፡ ላቲ፡ ፈውሰ፡ ወሥራየ፡ ወእከሥት፡ ሎሙ፡ ፍኖተ፡ ሰላም፡ ወጽድቅ።
7 ወእመይጥ፡ ፈላስያነ፡ ይሁዳ፡ ወፈላስያነ፡ እስራኤል፡ ወአሐንጾሙ፡ ከመ፡ ትካት።
8 ወአነጽሖሙ፡ እምኵሉ፡ ኃጢአቶሙ፡ ዘአበሱ፡ ሊተ፡ ወእሰሪ፡ ሎሙ፡ ኵሎ፡ ጌጋዮሙ፡ ዘዐለዉኒ።
9 ወይከውን፡ ፍሥሐ፡ ወክብር፡ ወዕበይ፡ ለኵሉ፡ አሕዛበ፡ ምድር፡ እለ፡ ሰምዑ፡ ኵሎ፡ ሠናየ፡ ዘገበርኩ፡ አነ፡ ወይፈርሁ፡ ወይደነግፁ፡ በእንተ፡ ኵሉ፡ ሠናየ፡ ወበእንተ፡ ኵሉ፡ ሰላም፡ ዘእገብር፡ ሎሙ፡ አነ።
10 ከመዝ፡ ይቤ፡ እግዚአብሔር፡ ዓዲ፡ ይሰማዕ፡ በዝ፡ ብሔር፡ ዘትብልዎ፡ አንትሙ፡ በድው፡ ውእቱ፡ እምሰብእ፡ ወእምእንስሳ፡ በአህጉረ፡ ይሁዳ፡ ወበአፍአሃ፡ ለኢየሩሳሌም፡ ጽብእት፡ ወአልቦ፡ ዘይነብር፡ ወአልቦ፡ ሰብእ፡ ወእንስሳ።
11 ቃለ፡ ፍሥሐ፡ ወቃለ፡ ኃሤት፡ ቃለ፡ መርዓዊ፡ ወቃለ፡ መርዓት፡ ወቃለ፡ ዘይብል፡ እመኑ፡ በእግዚአብሔር፡ ዘይነግሥ፡ ለኵሉ፡ እስመ፡ ኄር፡ እግዚአብሔር፡ ወለዓለም፡ ምሕረቱ።
12 ከመዝ፡ ይቤ፡ እግዚአብሔር፡ ኃያል፡ ዓዲ፡ ይሰማዕ፡ በዝ፡ ብሔር፡ ዘማሰነ፡ በኀጢአ፡ ሰብእ፡ ወእንስሳ፡ በኵሉ፡ አህጉሪሁ፡ ማኅደረ፡ ኖሎት፡ ወአዕፃደ፡ አባግዕ።
13 ውስተ፡ አህጉረ፡ አድባር፡ ወውስተ፡ አህጉረ፡ ሴፌላ፡ ወበአህጉረ፡ ናጌብ፡ ወበምድረ፡ ብንያም፡ ወበአድያመ፡ ኢየሩሳሌም፡ ወበአህጉረ፡ ይሁዳ፡ ወዓዲ፡ ይወፍራ፡ አባግዕ፡ በእደ፡ ዘይኌልቆን፡ ይቤ፡ እግዚአብሔር።
14 ናሁ፡ ይበጽሕ፡ መዋዕል፡ ይቤ፡ እግዚአብሔር፡ ወአቀውም፡ ቃልየ፡ ሠናየ፡ ዘተናገርኩ፡ ለቤተ፡ እስራኤል፡ ወለቤተ፡ ይሁዳ።
15 በአማንቱ፡ መዋዕል፡ ወይእተ፡ አሚረ፡ አሠርፅ፡ ለዳዊት፡ ሠርፀ፡ ጽድቅ፡ ወይገብር፡ ፍትሐ፡ ወጽድቅ፡ ውስተ፡ ምድር።
16 በእማንቱ፡ መዋዕል፡ ትድኅን፡ ይሁዳ፡ ወኢየሩሳሌም፡ ትነብር፡ ተአሚና።
17 እስመ፡ ከመዝ፡ ይቤ፡ እግዚአብሔር፡ ኢይትመተር፡ ለዳዊት፡ ብእሲ፡ ዘይነብር፡ ዲበ፡ መንበረ፡ ቤተ፡ እስራኤል።
18 ወለካህናት፡ ሌዋውያን፡ ኢይትመተር፡ ብእሲ፡ እምቅድሜየ፡ ዘያዐርግ፡ ቊርባነ፡ ወዘየዐጥን፡ መባአ፡ ወይዘገብር፡ መሥዋዕተ፡ ኵሎ፡ መዋዕለ።
19 ወኮነ፡ ቃለ፡ እግዚአብሔር፡ ኀበ፡ ኤርምያስ፡ ወይቤ።
20 ከመዝ፡ ይቤ፡ እግዚአብሔር፡ እመ፡ ይትዌለጥ፡ ሥርዓተ፡ ዕለት፡ ወሥርዓተ፡ ሌሊት፡ ከመ፡ ኢይኩን፡ ዕለት፡ ወሌሊት፡ በጊዜሆሙ።
21 ሥርዓትየሂ፡ ይትዌለጥ፡ ዘምስለ፡ ዳዊት፡ ገብርየ፡ ከመ፡ ኢይኩን፡ ሎቱ፡ ወልድ፡ ዘይነግሥ፡ በዲበ፡ መንበሩ፡ ወእምሌዋውያን፡ ካህናት፡ ዘይትለአከኒ።
22 ከመ፡ ኢይትኌለቁ፡ ኃይለ፡ ሰማያት፡ ወኢይሰፈር፡ ኆፃ፡ ባሕር፡ ከማሁ፡ አበዝኆ፡ ለዘርአ፡ ዳዊት፡ ገብርየ፡ ወለሌዋውያን፡ እለ፡ ይትለአኩኒ።
23 ወኮነ፡ ቃለ፡ እግዚአብሔር፡ ኀበ፡ ኤርምያስ፡ ወይቤ።
24 ኢርኢከኑ፡ ምንተ፡ ይትናገር፡ ዝንቱ፡ ሕዝብ፡ ለብሂል፡ ፪፡ ሕዝብ፡ ዘኀረዮሙ፡ እግዚአብሔር፡ ወመነኖሙ፡ ወለሕዝብየ፡ ያስተቌጥዕዎሙ፡ እምከዊነ፡ ሕዝብ፡ ቅድሜሆሙ።
25 ከመዝ፡ ይቤ፡ እግዚአብሔር፡ እመ፡ ይትመተር፡ ዕለት፡ ወሌሊት፡ ሥርዓተ፡ ሰማይ፡ ወምድር፡ ዘኢረሰይኩ።
26 ዘርአ፡ ያዕቆብኒ፡ ወዳዊት፡ ገብርየ፡ እሜንን፡ ከመ፡ ኢይትነሥኡ፡ እምዘርኡ፡ መኳንንት፡ ኀበ፡ ዘርአ፡ አብርሃም፡ ወይስሐቅ፡ ወያዕቆብ፡ እስመ፡ እመይጥ፡ ፄዋሆሙ፡ ወእምሕሮሙ።
=== chapter 34 ===
[Chapter 34]
1 ቃለ፡ ዘኮነ፡ ኀበ፡ ኤርምያስ፡ እምኀበ፡ እግዚአብሔር፡ ወናቡከደነፆር፡ ንጉሠ፡ ባቢሎን፡ ወኵሉ፡ ሠራዊቱ፡ ወኵሉ፡ መንግሥታተ፡ ምድር፡ ያነሥኡ፡ እደ፡ ወኵሉ፡ አሕዛበ፡ ምድር፡ ይትቃተልዋ፡ ለኢየሩሳሌም፡ ወለኵሉ፡ አህጉረ፡ ይሁዳ፡ ወይቤ።
2 ከመዝ፡ ይቤ፡ እግዚአብሔር፡ አምላከ፡ እስራኤል፡ ሑር፡ ኀበ፡ ሴዴቅያስ፡ ንጉሠ፡ ይሁዳ፡ ወበሎ፡ ከመዝ፡ ይቤ፡ እግዚአብሔር፡ ተውህቦ፡ ትትወሀብ፡ ዛሀገር፡ ውስተ፡ እደ፡ ንጉሠ፡ ባቢሎን፡ ወይነሥኣ፡ ወያውዕያ፡ በእሳት።
3 ወአንተ፡ እምእዴሁ፡ ኢትድኅን፡ ወተንሥኦ፡ ትትነሣእ፡ ውስተ፡ እዴሁ፡ ትትወሀብ፡ ወአዕይንቲከ፡ ለአዕይንቲሁ፡ ይእሬያ፡ ወአፉከ፡ ምስለ፡ አፉሁ፡ ይናገር፡ ወውስተ፡ ባቢሎን፡ ትበውእ።
5 ኢትመውት፡ በኵናት፡ በሰላም፡ ትመውት።
6 ወነበቦ፡ ኤርምያስ፡ ለሴዴቅያስ፡ ንጉሠ፡ ይሁዳ፡ ኵሎ፡ ዘነገረ፡ በኢየሩሳሌም።
7 ወኃይለ፡ ንጉሠ፡ ባቢሎን፡ ይጸብእ፡ ኢየሩሳሌም፡ ወዲበ፡ አህጉረ፡ ይሁዳ፡ እለ፡ ተርፉ፡ ወዲበ፡ ለኪሶ፡ ወዲበ፡ ዓዜቃ፡ እስመ፡ እማንቱ፡ ተርፋ፡ ውስተ፡ አህጉረ፡ ይሁዳ፡ አህጉር፡ ጽኑዓት።
8 ቃለ፡ ዘኮነ፡ ኀበ፡ ኤርምያስ፡ እምኀበ፡ እግዚአብሔር፡ እምዘ፡ አኅለቀ፡ ሴዴቅያስ፡ ንጉሥ፡ ኪዳነ፡ ኀበ፡ ኵሉ፡ አሕዛብ፡ ዘውስተ፡ ኢየሩሳሌም፡ ከመ፡ ይጸውዕ፡ ሎሙ፡ ኀድገተ።
9 ከመ፡ ይፈኑ፡ ፩፩ገብሮ፡ ወ፩፩፡ አመቶ፡ ዕብራውያነ፡ ወዕብራውያተ፡ አግዐዝያነ፡ ከመ፡ ኢይቅኒ፡ ሰብእ፡ በይሁዳ፡ ብእሲ፡ እኅዋሁ።
10 ወሰምዑ፡ ኵሉ፡ ዓበይት፡ ወኵሉ፡ ሕዝብ፡ እለ፡ ቦኡ፡ ውስተ፡ ኪዳን፡ ይፈኑ፡ ፩፩ገብሮ፡ ወ፩፩አመቶ፡ አግዐዝያነ፡ ከመ፡ ኢይቅንይዎሙ፡ እንከ፡ ወሰምዑ፡ ወፈነዉ።
11 ወተመይጡ፡ እንድኅረዝ፡ ወሜጡ፡ አግብርቲሆሙ፡ ወአእማቲሆሙ፡ እለ፡ ፈነውዎሙ፡ አግዐዝያነ፡ ወገቢኦሙ፡ ረሰይዎሙ፡ አግብርተ፡ ወአእማተ።
12 ወኮነ፡ ቃለ፡ እግዚአብሔር፡ ኀበ፡ ኤርምያስ፡ ወይቤ።
13 ከመዝ፡ ይቤ፡ እግዚአብሔር፡ አምላከ፡ እስራኤል፡ አነ፡ ሤምኩ፡ ኪዳነ፡ ኀበ፡ አበዊክሙ፡ በዕለተ፡ አውፃእክዎሙ፡ እምድረ፡ ግብጽ፡ እምቤተ፡ ቅኔ፡ ወእቤ።
14 አመ፡ መልአ፡ ፮ዓመት፡ ትፌኑ፡ እኅዋከ፡ ዕብራዌ፡ ዘተሠይጠ፡ ለከ፡ ወይትቀነይ፡ ለከ፡ ፮ዓመተ፡ ወትፌንዎ፡ አግዐዜ፡ እምኀቤከ፡ ወኢሰምዑኒ፡ አበዊክሙ፡ ወኢያጽምዑኒ፡ በእዝኖሙ።
15 ወተመየጥክሙ፡ አንትሙ፡ ዮም፡ ለገቢረ፡ ርትዕ፡ በቅድመ፡ አዕይንትየ፡ ከመ፡ ትጼውዑ፡ ኅድገተ፡ ፩፩ለቢጹ፡ ወኀልቀ፡ ኪዳን፡ በቤት፡ ዘተሰምየ፡ ስምየ፡ ዲቤሁ።
16 ወገባዕክሙ፡ ወአርኰስክሙ፡ ስምየ፡ ከመ፡ ያግብእ፡ ፩፩ቊልዔሁ፡ ወ፩፩ወለቶ፡ ዘፈነውክሙ፡ ግዑዛነ፡ ለነፍሶሙ፡ ወሜጥክምዎሙ፡ ከመ፡ ይኩኑክሙ፡ አግበርተ፡ ወአእማተ።
17 በእንተ፡ ዝንቱ፡ ከመዝ፡ ይቤ፡ እግዚአብሔር፡ ኢሰማዕክሙኒ፡ አንትሙኒ፡ ከመ፡ ትጸውዑ፡ ኅድገተ፡ ፩፩ለእኁሁ፡ ወ፩፩ለበጹ፡ ናሁ፡ አነ፡ እጼውዕ፡ ለክሙ፡ ኅደገተ፡ ይቤ፡ እግዚአብሔር፡ ውስተ፡ ኵናት፡ ወውስተ፡ ሞት፡ ወውስተ፡ ረኃብ፡ ወእዘርወክሙ፡ ውስተ፡ ኵሉ፡ ነገሥተ፡ ምድር።
18 ወእሁቦሙ፡ ለዕደው፡ እለ፡ ተዐደዉ፡ ኪዳንየ፡ እለ፡ ኢያቀውሙ፡ ቃለ፡ ኪዳንየ፡ ዘተካየዱ፡ ቅድመ፡ ገጽየ፡ ወላህመ፡ ዘመተሩ፡ ለ፪፡ ወኀለፉ፡ እንተ፡ ማእከለ፡ መክፈልቱ።
19 መላእክተ፡ ይሁዳ፡ ወመላእክተ፡ ኢየሩሳሌም፡ ሕፅዋን፡ ወካህናት፡ ወኵሉ፡ ሕዝበ፡ ምድር፡ እለ፡ ኀለፉ፡ እንተ፡ ማእከለ፡ መክፈልቱ፡ ለላህም።
20 ወእሁቦሙ፡ ውስተ፡ እደ፡ እለ፡ የኀሥሥዋ፡ ለነፍሶሙ፡ ወውስተ፡ እደ፡ ፀሮሙ፡ ወእሁቦሙ፡ አብድንቲሆሙ፡ መብልዓ፡ ለአዕዋፈ፡ ሰማይ፡ ወለአራዊተ፡ ገዳም።
21 ወለሴዴቅያስ፡ ንጉሠ፡ ይሁዳ፡ ወለመላእክቲሁ፡ እሁቦሙ፡ ውስተ፡ እደ፡ ፀሮሙ፡ ወውስተ፡ እደ፡ እለ፡ የኃሥሥዋ፡ ለነፍሶሙ፡ ወውስተ፡ እደ፡ ኃይለ፡ ንጉሠ፡ ባቢሎን፡ እለ፡ ዐርጉ፡ እምላዕሌክሙ።
22 ናሁ፡ አነ፡ እኤዝዝ፡ ይቤ፡ እግዚአብሔር፡ ወአገብኦሙ፡ በዛቲ፡ ምድር፡ ወይጸብእዋ፡ ወይነሥኡ፡ ኪያሃ፡ ወያውዕይዋ፡ በእሳት፡ ወለአህጉረ፡ ይሁዳሂ፡ እሁቦን፡ ለአብድዎ፡ እምእለ፡ ይነብሩ።
=== chapter 35 ===
[Chapter 35]
1 ቃል፡ ዘኮነ፡ ኀበ፡ ኤርምያስ፡ እምኀበ፡ እግዚአብሔር፡ በመዋዕለ፡ ኢዮአቄም፡ ወልደ፡ ኢዮስያስ፡ ንጉሠ፡ ይሁዳ፡ ወይቤ።
2 ሑር፡ ቤተ፡ ሬኬቤን፡ ወአምጽኦሙ፡ ቤተ፡ እግዚአብሔር፡ ወተናግሮሙ፡ ወአብኦሙ፡ ቤተ፡ እግዚአብሔር፡ ኀበ፡ አሐቲ፡ እምሕዋራት፡ ወአስትዮሙ፡ ወይነ።
3 ወነሣእክዎሙ፡ ወአውፃእክዎሙ፡ ለኢያዛንያን፡ ወልደ፡ ኢያራምያን፡ ወልደ፡ ከባሲን፡ ወለአኃዊሁ፡ ወለደቂቁ፡ ወለኵሉ፡ ቤተ፡ ሬኬቤን።
4 ወአባእክዎሙ፡ ውስተ፡ ቤተ፡ እግዚአብሔር፡ ውስተ፡ ጰስጠፎርያ፡ ዘደቂቀ፡ ሐናን፡ ወልደ፡ ገዶልያ፡ ብእሲ፡ ዘእግዚአብሔር፡ ዘውእቱ፡ ቅሩበ፡ ሕዋረ፡ መላእክት፡ መልዕልተ፡ ጰስጠፎርያ፡ ማሴው፡ ወልደ፡ ሴሎም፡ ዘየዐቅብ፡ አንቀጸ።
5 ወወሀብኩ፡ በቅድሜሆሙ፡ ለቤተ፡ ሬኬቤን፡ ጻሕባተ፡ ምሉኣነ፡ ወይን፡ ወጽዋዓተ፡ ወእቤ፡ ስትዩ፡ ወይነ።
6 ወይቤሉ፡ ኢንሰቲ፡ ወይነ፡ እስመ፡ ዮናዳብ፡ ወልደ፡ ሬኬብ፡ አቡነ፡ አዘዘነ፡ ወይቤለነ፡ ኢትስተዩ፡ ወይነ፡ አንትሙ፡ ወደቂቅክሙ፡ እስከ፡ ለዓለም።
7 ወቤተ፡ ኢትሕንጹ፡ ወዘርአ፡ ኢትዝርኡ፡ ወኢይኩንክሙ፡ ወይን፡ እስመ፡ በደባትር፡ ተኀድሩ፡ ኵሎ፡ መዋዕሊክሙ፡ ከመ፡ ትሕየዉ፡ ብዙኀ፡ መዋዕለ፡ ውስተ፡ ምድር፡ ዘሖርክሙ፡ አንትሙ፡ ውስቴታ።
8 ወሰማዕነ፡ ቃለ፡ ዮናዳብ፡ ወልደ፡ ሬኬብ፡ አቡነ፡ በዘኢንሰቲ፡ ወይነ፡ ኵሎ፡ መዋዕሊነ፡ ንሕነ፡ ወአንስቲያነ፡ ወደቂቅነ፡ ወአዋልዲነ።
9 ወኢለነዲቀ፡ አብያት፡ ለነቢር፡ ህየ፡ ወወይን፡ ወገራህት፡ ወዘርእኢኮነ፡ ለነ።
10 ወኀደርነ፡ በደባትር፡ ወሰማዕነ፡ ወገብርነ፡ ኵሎ፡ በከመ፡ አዘዘነ፡ ዮናዳብ፡ አቡነ።
11 ወኮነ፡ አመ፡ ዐርገ፡ ናቡከደነፆር፡ ንጉሠ፡ ባቢሎን፡ ዲበ፡ ምድር፡ ይቤሉነ፡ ባኡ።
12 ወኮነ፡ ቃለ፡ እግዚአብሔር፡ ኀበ፡ ኤርምያስ፡ ወይቤ።
13 ከመዝ፡ ይቤ፡ እግዚአብሔር፡ ጸባኦት፡ አምላክ፡ እስራኤል፡ ሑር፡ ወበሎሙ፡ ለሰብአ፡ ይሁዳ፡ ወለእለ፡ ይነብሩ፡ ኢየሩሳሌም፡ ኢትነሥኡኑ፡ ትምህርተ፡ ለሰሚዐ፡ ነገርየ፡ ይቤ፡ እግዚአብሔር።
14 ቆመ፡ ቃለ፡ ዮናዳብ፡ ወልደ፡ ሬኬብ፡ ዘአዘዘ፡ ለደቂቁ፡ ኢይስተዩ፡ ወይነ፡ ወኢሰትዩ፡ ወይነ፡ እንከ፡ እስከ፡ ዛዕለት፡ እስመ፡ ሰምዑ፡ ቃለ፡ ዮናዳብ፡ አቡሆሙ።
15 ወፈነውኩ፡ ኀቤክሙ፡ አግብርትየ፡ ነቢያተ፡ ወእቤ፡ ግብኡ፡ አሐዱ፡ አሐዱ፡ እምፍኖት፡ እኩይ፡ ወሕሊናክሙ፡ ሠናየ፡ ግበሩ፡ ወኢትሑሩ፡ ድኅረ፡ አማልክተ፡ ነኪር፡ ኢትትቀነዩ፡ ሎሙ፡ ወተኀድሩ፡ ዲበ፡ ምድር፡ እንተ፡ ወሀብኩ፡ ለክሙ፡ ወለአበዊክሙ፡ ወኢያጽማዕክሙ፡ በእዘኒክሙ፡ ወኢሰማዕክሙኒ።
16 ወአቀሙ፡ ደቂቀ፡ ዮናዳብ፡ ወልደ፡ ሬኬብ፡ ትእዛዘ፡ አቡሆሙ፡ ዘአዘዞሙ፡ ወኢሰምዑኒ፡ ዝንቱ፡ ሕዝብ።
17 በእንተ፡ ዝንቱ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ናሁ፡ አነ፡ አመጽእ፡ ለይሁዳ፡ ወለኵሉ፡ እለ፡ ይነብሩ፡ ኢየሩሳሌም፡ ኵሎ፡ እኩየ፡ ዘነበብኩ፡ ላዕሌሆሙ፡ እስመ፡ ተናገርክዎሙ፡ ወኢሰምዑኒ፡ ጸዋዕክዎሙ፡ ወኢያውሥኡኒ።
18 ወለቤተ፡ ሬኬቤን፡ ይቤ፡ ኤርምያስ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ እስመ፡ ሰማዕክሙ፡ ቃለ፡ ዮናዳብ፡ አቡክሙ፡ ወዐቀብክሙ፡ ኵሎ፡ ትእዛዞ፡ ወገበርክሙ፡ ኵሎ፡ ዘአዘዘክሙ።
19 በእንተ፡ ዝንቱ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ብእሲ፡ ኢየኀልቅ፡ እምደቂቀ፡ ዮናዳብ፡ ወልደ፡ ሬኬብ፡ ዘይቀውም፡ ቅድመ፡ ገጽየ፡ በኵሉ፡ መዋዕለ።
=== chapter 36 ===
[Chapter 36]
1 ወኮነ፡ በራብዒት፡ ዓመተ፡ መንግሥቱ፡ ለኢዮአቄም፡ ወልደ፡ ኢዮስያስ፡ ንጉሠ፡ ይሁዳ፡ ኮነ፡ ዝንቱ፡ ቃል፡ እምኀበ፡ እግዚአብሔር፡ ኀበ፡ ኤርምያስ፡ ወይቤ።
2 ንሣእ፡ ክርታሰ፡ መጽሐፍ፡ ወጸሐፍ፡ ውስቴታ፡ ኵሎ፡ ዘነበብኩ፡ ኀቤከ፡ ላዕለ፡ እስራኤል፡ ወላዕለ፡ ይሁዳ፡ ወላዕለ፡ ኵሉ፡ አሕዛብ፡ እምዕለት፡ ዘነበብኩ፡ ለከ፡ እንአመ፡ መዋዕለ፡ ኢዮስያስ፡ ንጉሠ፡ ይሁዳ፡ ወእስከ፡ ዛቲ፡ ዕለት።
3 እመ፡ ይሰምዑ፡ ቤተ፡ ይሁዳ፡ ኵሎ፡ እኩየ፡ ዘእገብር፡ ላዕሌሆሙ፡ ዘሐለይኩ፡ ከመ፡ ይሰወጡ፡ እም፡ እኩይ፡ ፍኖቶሙ፡ ወእሠሀል፡ ዲበ፡ ኃጢአቶሙ፡ ወጌጋዮሙ።
4 ወጸውዖ፡ ኤርምያስ፡ ለባሮክ፡ ወልደ፡ ኔርዩ፡ ወጸሐፈ፡ ባሮክ፡ እምአፈ፡ ኤርምያስ፡ ኵሎ፡ ቃለ፡ እግዚአብሔር፡ ዘነበበ፡ ኀቤሁ፡ በክርታሰ፡ መጽሐፍ።
5 ወአዘዞ፡ ኤርምያስ፡ ለባሮክ፡ ወይቤሎ፡ አነ፡ ሙቁሕ፡ ወኢይክል፡ በዊአ፡ ቤተ፡ እግዚአብሔር።
6 ወትበውእ፡ አንተ፡ ወታነብብ፡ ዘንተ፡ ክርታሰ፡ ዘጸሐፍከ፡ እምአፉየ፡ ነገረ፡ እግዚአብሔር፡ ውስተ፡ እዝነ፡ ሕዝብ፡ ውስተ፡ ቤተ፡ እግዚአብሔር፡ በዕለተ፡ ጾም፡ በእዝነ፡ ኵሉ፡ ይሁዳ፡ እለ፡ ይመጽኡ፡ እምአህጉሪሆሙ፡ ታነብብ፡ በቅድሜሆሙ።
7 እመቦ፡ ከመ፡ ይወድቅ፡ ሣህሎሙ፡ ቅድመ፡ እግዚአብሔር፡ ወይገብኡ፡ እምእኩይ፡ ፍኖቶሙ፡ እስመ፡ ዓቢይ፡ መቅሠፍተ፡ መዐቱ፡ ለእግዚአብሔር፡ ዘነበበ፡ በውእቶሙ፡ ሕዝብ።
8 ወገብረ፡ ባሮክ፡ ወልደ፡ ኔርዩ፡ በከመ፡ ኵሉ፡ ዘአዘዞ፡ ኤርምያስ፡ ነቢይ፡ ከመ፡ ያንብብ፡ በመጽሐፍ፡ ነገረ፡ እግዚአብሔር፡ በቤተ፡ እግዚአብሔር።
9 ወኮነ፡ በዓመት፡ ኃምሲት፡ እምዘ፡ ነግሠ፡ ኢዮአቄም፡ ወልደ፡ ኢዮስያስ፡ ንጉሠ፡ ይሁዳ፡ በታስዕ፡ ወርኅ፡ ሰበኩ፡ ጾመ፡ ቅድመ፡ እግዚአብሔር፡ ኵሉ፡ ሕዝብ፡ በኢየሩሳሌም፡ ወኵሉ፡ ሕዝብ፡ እለመጽኡ፡ እምይሁዳ።
10 ወአንበበ፡ ባሮክ፡ ውእተ፡ መጽሐፈ፡ ዘነገሮ፡ ኤርምያስ፡ በቤተ፡ እግዚአብሔር፡ በሕዋረ፡ ገማርዩ፡ ወልደ፡ ሳፋን፡ ጸሐፊ፡ በዐፀድ፡ ዘላዕሉ፡ በአንቀጽ፡ ውስተ፡ ዴዴ፡ ቤተ፡ እግዚአብሔር፡ ሐዲስ፡ በእዝነ፡ ኵሉ፡ ሕዝብ።
11 ወሰምዐ፡ ሚክያስ፡ ወልደ፡ ገማርዩ፡ ወልደ፡ ሳፋን፡ ዘኵሎ፡ ነገረ፡ እግዚአብሔር፡ እመጽሐፍ።
12 ወወረደ፡ ቤተ፡ ንጉሥ፡ ኀበ፡ ሕዋረ፡ ጸሐፊ፡ ወናሁ፡ ህየ፡ ኵሉ፡ መላእክቲሁ፡ ይነብሩ፡ ኤሊሲማ፡ ጸሐፊ፡ ወዳልያስ፡ ወልደ፡ ሴሌምዩ፡ ወዮናታን፡ ወልደ፡ አክበር፡ ወገማርዩ፡ ወልደ፡ ሳፋን፡ ሴዴቅያስ፡ ወልደ፡ ሐናንያ፡ ወኵሎሙ፡ መላእክት።
13 ወአይድዐ፡ ሚክያስ፡ ኵሎ፡ ነገረ፡ ዘሰምዐ፡ ሶበ፡ አንበበ፡ ባሮክ፡ በመጽሐፍ፡ ውስተ፡ እዝነ፡ ሕዝብ።
14 ወፈነዉ፡ ኵሎሙ፡ መላእክት፡ ኀበ፡ ባሮክ፡ ይሁዳሃ፡ ወልደ፡ ናታንዩ፡ ወልደ፡ ሴሌምዩ፡ ወልደ፡ ኩሲ፡ ወይቤልዎ፡ ክርታሰ፡ ዘአንበብከ፡ ውስተ፡ እዝነ፡ ሕዝብ፡ ንሣእ፡ በእዴከ፡ ወነዓ።
15 ወይቤልዎ፡ ንበር፡ እስኩ፡ ወአንብብ፡ በእዘኒነ።
16 ወኮነ፡ ሶበ፡ ሰምዑ፡ ኵሉ፡ ዘነገረ፡ ፈርሁ፡ ወተማከሩ፡ አሐዱ፡ ምስለ፡ ካልኡ፡ ወይቤልዎ፡ ለባሮክ፡ ነጊረ፡ ንነግር፡ ለንጉሥ፡ ዘንተ፡ ኵሎ፡ ነገረ።
17 ወተስእልዎ፡ ለባሮክ፡ ወይቤልዎ፡ ንግረነ፡ እስኩ፡ እፎኬ፡ ጸሐፍከ፡ ዘነገረ፡ ኵሎ።
18 ወይቤ፡ ባሮክ፡ እምአፉሁ፡ አይድዐኒ፡ ኤርምያስ፡ ዘኵሎ፡ ነገረ፡ ወጸሐፍኩ፡ በመጽሐፍ።
19 ወይቤልዎ፡ መላእክት፡ ለባሮክ፡ ሑር፡ ወተኀባእ፡ አንተ፡ ወኤርምያስ፡ ሰብእ፡ ኢይርአይክሙ፡ አይቴ፡ አንትሙ።
20 ወቦኡ፡ ኀበ፡ ንጉሥ፡ ዐፀደ፡ ወመጽሐፈኒ፡ አዕቀቡ፡ ውስተ፡ ሕዋረ፡ ኤሊሲማ፡ ጸሐፊ፡ ወነገርዎ፡ ለንጉሥ፡ ዘኵሎ፡ ነገረ።
21 ወፈነዎ፡ ንጉሥ፡ ለይሁዳ፡ ይንሣእ፡ ክርታሰ፡ ወነሥአ፡ እምሕዋረ፡ ኤሊሲማ፡ ጸሐፊ፡ ወአንበበ፡ ይሁዳ፡ ውስተ፡ እዝነ፡ ንጉሥ፡ ወውስተ፡ እዝነ፡ ኵሎሙ፡ መላእክት፡ እለ፡ ይቀውሙ፡ ቅድመ፡ ንጉሥ።
22 ወንጉሥ፡ ይነብር፡ ውስተ፡ ቤተ፡ ምክራም፡ በታስዕ፡ ወርኅ፡ ወአፍሐመ፡ እሳት፡ ቅድሜሁ፡ ይነድድ።
23 ወኮነ፡ ሶበ፡ አንበበ፡ ይሁዳ፡ ሠለስተ፡ ሰሌዳተ፡ ወዐርባዕተ፡ መተሮ፡ በመጥባሕተ፡ ጸሐፊ፡ ወወገሮ፡ ውስተ፡ እሳት፡ ዘአፍሐም፡ እስከ፡ ኀልቀ፡ ኵሉ፡ ክርታስ፡ በእሳት፡ ዘአፍሐም።
24 ወኢደንገፁ፡ ደቁ፡ ወኢሠጠጡ፡ አልባሲሆሙ፡ ንጉሥ፡ ወኵሉ፡ አግበርቲሁ፡ በሰሚዐ፡ ውእቱ፡ ነገር።
25 ወኤልያታንሂ፡ ወጎዶልያስ፡ ወገርዩ፡ ረሰይዎ፡ ለንጌሥ፡ ከመ፡ ኢያውዒ፡ ክርታሰ፡ ወኢሰምዖሙ፡ ንጉሥ።
26 ወአዘዞ፡ ንጉሥ፡ ለአሬምያል፡ ወልደ፡ ንጉሥ፡ ወለሴርያ፡ ወልደ፡ አዜርኤል፡ ወለሴሌምዩ፡ ወልደ፡ አብዶኤል፡ ይንሥእዎ፡ ለባሮክ፡ ጸሐፊ፡ ወለኤርምያስ፡ ነቢይ፡ ወሠወሮሙ፡ እግዚአብሔር።
27 ወኮነ፡ ቃለ፡ እግዚአብሔር፡ ኀበ፡ ኤርምያስ፡ እምድኅረ፡ አውዐየ፡ ንጉሥ፡ ክርታሰ፡ ቃለ፡ ነገር፡ ዘጸሐፈ፡ ባሮክ፡ እምአፈ፡ ኤርምያስ፡ ወይቤ።
28 ንሣእ፡ ለከ፡ ካዕበ፡ ክርታሰ፡ ካልእ፡ ወጸሐፍ፡ ውስቴታ፡ ኵሎ፡ ነገረ፡ ዘቀዳሚ፡ ዘሀሎ፡ ውስተ፡ ክርታስ፡ ዘአውዐየ፡ ንጉሥ፡ ኢየአቄም።
29 ወለኢዮአቄም፡ ንጉሥ፡ ትብሎ፡ ከመዝ፡ ይቤ፡ እግዚአብሔር፡ አንተ፡ አውዐይከ፡ ክርታሰ፡ እንዘ፡ ትብል፡ ለምንት፡ ጸሐፍከ፡ ቦቱ፡ እንዘ፡ ትብል፡ በዊአ፡ ይበውእ፡ ንጉሠ፡ ባቢሎን፡ ለሠርዎ፡ ምድር፡ ዝንቱ፡ ወየኀልቅ፡ ሰብእ፡ ወእንስሳ።
30 በእንተ፡ ዝንቱ፡ ከመዝ፡ ይቤ፡ እግዚአብሔር፡ ለኢዮአቄም፡ ንጉሠ፡ ይሁዳ፡ ኢይከውን፡ ሎቱ፡ ወልድ፡ ዘይነብር፡ ዲበ፡ መንበረ፡ ዳዊት፡ ወበድኑ፡ ይትገደፍ፡ ለላህበ፡ መዓልት፡ ወለቊረ፡ ሌሊት።
31 ወእሔውጽ፡ ላዕሌሁ፡ ወላዕለ፡ ዘርኡ፡ ወዲበ፡ አግብርቲሁ፡ ኃጢአቶሙ፡ ወአመጽእ፡ ላዕሌሆሙ፡ ወላዕለ፡ እለ፡ ይነብሩ፡ ኢየሩሳሌም፡ ወሰብአ፡ ይሁዳ፡ ኵሎ፡ እኩየ፡ ዘነበብኩ፡ ላዕሌሆሙ፡ ወኢሰምዑ።
32 ወተመጠወ፡ ኤርምያስ፡ ካልአ፡ ክርታሰ፡ ወወሀቦ፡ ለባሮክ፡ ወልደ፡ ኔርዩ።
=== chapter 37 ===
[Chapter 37]
1 ወነግሠ፡ ሴዴቅያስ፡ ወልደ፡ ኢዮስያስ፡ ህየንተ፡ ኢኮንያን፡ ወልደ፡ ኢዮአቄም፡ ዘአንገሦ፡ ናቡከደነፆር፡ ንጉሠ፡ ባቢሎን፡ በምድረ፡ ይሁዳ።
2 ወለሊሁ፡ ኢሰምዖ፡ ወደቁሂ፡ ወሕዝበ፡ ምድር፡ ዘነገረ፡ እግዚአብሔር፡ በእደ፡ ኤርምያስ፡ ነቢይ።
3 ወፈነዎ፡ ንጉሥ፡ ሴዴቅያስ፡ ለኢዮአካዝ፡ ወልደ፡ ሴሌምዩ፡ ወሰፎንያስ፡ ወልደ፡ ማሴው፡ ካህን፡ ኀበ፡ ኤርምያስ፡ እንዘ፡ ይብል፡ ጸሊ፡ በእንቲአነ፡ ኀበ፡ እግዚአብሔር፡ አምላክነ።
4 ወኤርምያስ፡ ይበውአ፡ ወይወፅእ፡ ማእከለ፡ ሕዝብ፡ ወኢያብእዎ፡ ውስተ፡ ቤተ፡ ሞቅሕ።
5 ወኮነ፡ ቃለ፡ እግዚአብሔር፡ ኀበ፡ ኤርምያስ፡ እንዘ፡ ይብል፡ ከመዝ፡ ይቤ፡ እግዚአብሔር፡ አምላከ፡ እስራኤል።
6 ከመዝ፡ ትብልዎ፡ ለንጉሠ፡ ይሁዳ፡ ዘፈነወክሙ፡ ኀቤየ፡ ይኅሥሠኒ፡ ናሁ፡ ኃይለ፡ ፈርዖን፡ ዘወፅአ፡ ለረዲኦትክሙ፡ ተመይጠ፡ ለምድሩ፡ ግብጸ።
7 ወይትመየጡ፡ ከለዳውያን፡ ወይትቃተልዋ፡ ለዛሀገር፡ ወይነሥእዋ፡ ወያውዕይዋ፡ በእሳት።
8 ከመዝ፡ ይቤ፡ እግዚአብሔር፡ ኢትየውህዋ፡ ለነፍስክሙ፡ እንዘ፡ ትብሉ፡ ኀሊፈ፡ የኀልፉ፡ እምኔነ፡ ከለዳውያን፡ እስመ፡ ኢየሐውሩ፡ ከለዳውያን።
9 ዘእንበል፡ ይቅትሉ፡ ኵሎ፡ ኀይለ፡ ከለዳውያን፡ እለ፡ ይትቃተሉ፡ ኪያክሙ፡ ወይተርፉ፡ ቦሙ፡ ዕደው፡ ርጉዛን፡ ለለ፩፡ በመካኑ፡ ይትነሥኡ፡ ወያውዕዩ፡ ዛተ፡ ሀገረ፡ በእሳት።
10 ወሶበ፡ ዐርጉ፡ ኃይለ፡ ከለዳውያን፡ እምኢየሩሳሌም፡ ለገጸ፡ ኃይለ፡ ፈርዖን።
11 ወፅአ፡ ኤርምያስ፡ እምኢየሩሳሌም፡ ለሐዊር፡ ምድረ፡ ብንያም፡ ይንበር፡ ህየ፡ ማእከለ፡ ሕዝብ።
12 ወኮነ፡ ውእቱ፡ በአንቀጽ፡ ዘብንያም፡ ወሀሎ፡ በህየ፡ ብእሲ፡ ዘየዐቅብ፡ አንቀጸ፡ ወስሙ፡ ስርዋስ፡ ወልደ፡ ሴሌምዩ፡ ወልደ፡ ሐናንያ፡ ወአኀዞ፡ ለኤርምያስ፡ ነቢይ፡ ወይቤሎ፡ ኀበ፡ ከለዳውያን፡ አንተ፡ ታመሥጥ።
13 ወይቤሎ፡ ኤርምያስ፡ ሐሰ፡ ኢያመሥጥ፡ ውስተ፡ ከለዳውያን፡ አነ።
14 ወተምዑ፡ መላእክት፡ ላዕለ፡ ኤርምያስ፡ ወዘበጥዎ፡ ወፈነውዎ፡ ውስተ፡ ቤተ፡ ሞቅሕ፡ ቤተ፡ የናታን፡ ጸሐፊ፡ እስመ፡ ኪያሁ፡ ገብሩ፡ ለቤተ፡ ሞቅሕ።
15 ወመጽአ፡ ኤርምያስ፡ ውስተ፡ ቤተ፡ ዓዘቅት፡ እስመ፡ ባቲ፡ ግብ፡ በቤተ፡ ወክሪት፡ ወነበረ፡ ኤርምያስ፡ ህየ፡ ብዙኀ፡ መዋዕለ።
16 ወፈነወ፡ ንጉሥ፡ ሴዴቅያስ፡ ወነሥኦ፡ ወተስእሎ፡ ንጉሥ፡ ውስተ፡ ቤቱ፡ በኅቡእ፡ ወይቤሎ፡ ቦኑ፡ ቃለ፡ እምኀበ፡ እግዚአብሔር፡ ወይቤሎ፡ ኤርምያስ፡ እወ፡ ቦ።
17 ወይቤሎ፡ ኤርምያስ፡ ለንጉሥ፡ ሴዴቅያስ፡ ምንት፡ ኃጢአትየ፡ ለከ፡ ወለአግብርቲከ፡ ወለዝንቱ፡ ሕዝብ፡ ከመ፡ ተሀቡኒ፡ በቤተ፡ ሞቅሕ።
18 ወአይቴ፡ ሀለዉ፡ ነቢያቲክሙ፡ እለ፡ ይትኔበዩ፡ ለክሙ፡ እንዘ፡ ይብሉ፡ ኢይበውእ፡ ንጉሠ፡ ባቢሎን፡ ላዕሌክሙ፡ ወላዕለ፡ ዛ፡ ምድር።
19 ይእዜኒ፡ እግዚኦ፡ ንጉሥ፡ ይደቅ፡ ሣህልየ፡ ቅድመ፡ ገጽከ፡ ወኢታብአኒ፡ ቤተ፡ ዮናታን፡ ጸሐፊ፡ ወኢይሙት፡ በህየ።
20 ወአዘዘ፡ ንጉሥ፡ ሴዴቅያስ፡ ወአዕቀቦ፡ ለኤርምያስ፡ በዐፀደ፡ ሞቅሕ፡ ወወሀብዎ፡ ኅብስተ፡ ለለዕለት፡ እምአፍአ፡ ኀባውዘ፡ እለ፡ የኀብዙ፡ እስከ፡ ኀልቀ፡ ኅብስት፡ እምሀገር፡ ወነበረ፡ ኤርምያስ፡ በዐፀደ፡ ሞቅሕ።
=== chapter 38 ===
[Chapter 38]
1 ወሰምዐ፡ ሰፎንያስ፡ ወልደ፡ ናታን፡ ወጎዶልያ፡ ወልደ፡ ጳስኮር፡ ወዮአክል፡ ወልደ፡ ሴሌምዩ፡ ወጳስኮር፡ ወልደ፡ ሜልያ፡ ነገረ፡ ዘነገረ፡ ኤርምያስ፡ ለኵሉ፡ ሕዝብ፡ ወይብል።
2 ከመዝ፡ ይቤ፡ እግዚአብሔር፡ ዘኀደረ፡ ውስተ፡ ዛሀገር፡ ይመውት፡ በኵናት፡ ወረኃብ፡ ወብድብድ፡ ወዘወፅአ፡ ኀበ፡ ከለዳውያን፡ የሐዩ፡ ወትከውን፡ ነፍሱ፡ ምርካበ፡ ወየሐዩ።
3 እስመ፡ ከመዝ፡ ይቤ፡ እግዚአብሔር፡ ተውህቦ፡ ትትወሀብ፡ ዛቲ፡ ሀገር፡ ውስተ፡ እደ፡ ንጉሠ፡ ባቢሎን፡ ወይነሥኣ።
4 ወይቤልዎ፡ መላእክት፡ ለንጉሥ፡ ይሙት፡ ዝንቱ፡ ብእሲ፡ እስመ፡ ውእቱ፡ ያደክም፡ እደወ፡ ሰብእ፡ ጸባእያን፡ ተረፈ፡ ሀገር፡ ወእደወ፡ ኵሉ፡ ሕዝብ፡ ዘነገሮሙ፡ ውእተ፡ ነገረ፡ ውእቱ፡ ብእሲ፡ ኢየኀሥሥ፡ ሰላመ፡ ለዝንቱ፡ ሕዝብ፡ ዘእንበለ፡ እኩይ።
5 ወይቤ፡ ንጉሥ፡ ሴዴቅያስ፡ ናሁ፡ ውእቱ፡ በእዴክሙ።
6 ወነሥእዎ፡ ለኤርምያስ፡ ወገደፍዎ፡ ለውእቱ፡ ውስተ፡ ዓዘቅተ፡ ሜልኪዩ፡ ወልደ፡ ንጉሥ፡ ዘበዐፀደ፡ ሞቅሕ፡ አውረድዎ፡ ለኤርምያስ፡ በአሕባል።
7 ወሰምዐ፡ አቤሜሌክ፡ ኢትዮጵያዊ፡ ብእሲ፡ ሕፅው፡ ወውእቱ፡ ውስተ፡ ቤቱ፡ ለንጉሥ፡ ከመ፡ ወሀብዎ፡ ለኤርምያስ፡ ውስተ፡ ዓዘቅት፡ ወንጉሥሰ፡ ይነብር፡ በዴዴ፡ ብንያም።
8 ወወፅአ፡ አቤሜሌክ፡ እምቤተ፡ ንጉሥ፡ ወነገረ፡ ኀበ፡ ንጉሥ፡ ወይቤ።
9 እግዚእየ፡ ንጉሥ፡ አሕሠሙ፡ እሉ፡ ዕደው፡ ኵሎ፡ ዘገብሩ፡ በኤርምያስ፡ ነቢይ፡ እለ፡ ገደፍዎ፡ ውስተ፡ ዓዘቅት፡ ይሙት፡ በህየ፡ እምገጸ፡ ረኃብ፡ እስመ፡ አልቦ፡ ዓዲ፡ ኅብስት፡ በሀገር።
10 ወአዘዞ፡ ንጉሥ፡ ለአቤሜሌክ፡ ኢትዮጵያዊ፡ ወይቤሎ፡ ንሣእ፡ በእደዊከ፡ እምዚአየ፡ ፴ሰብአ፡ ወአውፅኦ፡ ለኤርምያስ፡ ነቢይ፡ እምዓዘቅት፡ ዘእንበለ፡ ይሙት።
11 ወነሥአ፡ አቤሜሌክ፡ ሰብአ፡ በእዴሁ፡ ወቦአ፡ ቤተ፡ ንጉሥ፡ ውስተ፡ ቤተ፡ መዛግብት፡ ወነሥአ፡ እምህየ፡ አፅርቅተ፡ ብሉየ፡ ወአሕባለ፡ ብሉየ፡ ወወገረ፡ ኀበ፡ ኤርምያስ፡ ውስተ፡ ዓዘቅት፡ በአሕባል።
12 ወይቤሎ፡ አቤሜሌክ፡ ኢትዮጵያዊ፡ ለኤርምያስ፡ ደይ፡ አፅርቅተ፡ ወአሕባለ፡ ታሕተ፡ እዴከ፡ ወታሕተ፡ አሕባል፡ ወገብረ፡ ኤርምያስ፡ ከመዝ።
13 ወሰሐብዎ፡ በአሕባል፡ ወአውፅእዎ፡ እምዓዘቅት፡ ወነበረ፡ ኤርምያስ፡ በዐፀደ፡ ሞቅሕ።
14 ወፈነወ፡ ንጉሥ፡ ሴዴቅያስ፡ ወነሥኦ፡ ለኤርምያስ፡ ነቢይ፡ ኀበ፡ ምብዋእ፡ ሣልሳይ፡ ዘቤተ፡ እግዚአብሔር።
15 ወይቤሎ፡ ኤርምያስ፡ ለሴዴቅያስ፡ ንጉሥ፡ እመ፡ አይዳዕኩከ፡ ሞተ፡ እመውት፡ ወለእመ፡ አምከርኩከ፡ ኢትሰምዑኒ።
16 ወመሐለ፡ ንጉሥ፡ ሴዴቅያስ፡ ለኤርምያስ፡ በኅቢእ፡ ወይቤ፡ ሕያው፡ እግዚአብሔር፡ ዘገብረ፡ ለነ፡ ዛተ፡ ነፍሰ፡ ከመ፡ አይቀትለከ፡ ወኢይሁበከ፡ ውስተ፡ እደ፡ እሉ፡ ሰብእ፡ እለ፡ የኀሥሥዋ፡ ለነፍስከ።
17 ወይቤሎ፡ ኤርምያስ፡ ለሴዴቅያስ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ እመ፡ ወፂአ፡ ወፃእከ፡ ኀበ፡ ንጉሠ፡ ባቢሎን፡ ተሐዩ፡ ሕይወተ፡ ነፍስከ፡ ወዝንቱ፡ ሀገር፡ ኢይውዒ፡ በእሳት፡ ወተሐዩ፡ አንተ፡ ወቤትከ።
18 ወእመ፡ ኢወፃእከ፡ ኀበ፡ መላእክተ፡ ንጉሠ፡ ባቢሎን፡ ትትወሀብ፡ ዛቲ፡ ሀገር፡ በእደ፡ ከለዳውያን፡ ወትውዒ፡ በእሳት፡ ወእንተሂ፡ ኢትድኅን፡ እምእዴሆሙ።
19 ወይቤሎ፡ ንጉሥ፡ ሴዴቅያስ፡ ለኤርምያስ፡ አነ፡ እፈርሆሙ፡ ለአይሁድ፡ ዘአምሠጡ፡ ኀበ፡ ከለዳውያን፡ ከመ፡ ኢያግብኡኒ፡ ውስተ፡ እደዊሆሙ፡ ወኢይሣለቁኒ።
20 ወይቤ፡ ኤርምያስ፡ ኢይሁቡከ፡ ስማዕ፡ ቃለ፡ እግዚአብሔር፡ ዘአነ፡ እብል፡ ኀቤከ፡ ዘይኄይስ፡ ይከውን፡ ኀቤከ፡ ወነፍስከ፡ ለሕይወት።
21 ወእመ፡ ኢትፈቅድ፡ አንተ፡ ወፂአ፡ ዝንቱ፡ ቃል፡ ዘአርአየኒ፡ እግዚአብሔር።
22 ወናሁ፡ ኵሎን፡ አንስት፡ እለ፡ ተርፋ፡ ቤተ፡ ንጉሠ፡ ይሁዳ፡ ይወፅኣ፡ ኀበ፡ መላእክተ፡ ንጉሠ፡ ባቢሎን፡ እማንቱ፡ ይብላከ፡ አስሐቱከ፡ ወክህሉከ፡ ዕደወ፡ ሰላምከ፡ ወያገብኡከ፡ ውስተ፡ መአስረ፡ እገሪከ፡ ወገብኡ፡ ድኅረ፡ እምኔከ።
23 ወለኵሎሙ፡ አንስቲያከ፡ ወለደቂቅከ፡ ያወፅእዎሙ፡ ኀበ፡ ከለዳውያን።
24 ወይቤሎ፡ ንጉሥ፡ ሴዴቅያስ፡ ለኤርምያስ፡ ብእሲ፡ ኢያእምር፡ ዘንተ፡ ቃለ፡ ወአንተ፡ ኢትሙት።
25 ወእመ፡ ሰምዑ፡ መላእክት፡ ከመ፡ ተናገርኩ፡ ምስሌከ፡ ወመጽኡ፡ ኀቤከ፡ ይብሉከ፡ ንግረነ፡ እስኩ፡ ምንተ፡ ነገርኮ፡ ለንጉሥ፡ ወምንተ፡ ተናገረከ፡ ኢትኅባእ፡ እምኔነ፡ ወኢንቀትለከ።
26 ወበሎሙ፡ እገድፍ፡ አነ፡ ምሕረትየ፡ መንገለ፡ አዕይንተ፡ ንጉሥ፡ ከመ፡ ኢያግብአኒ፡ ቤተ፡ ዮናታን፡ ከመ፡ ኢይሙት፡ በህየ።
27 ወመጽኡ፡ ኵሎሙ፡ መላእክት፡ ኀበ፡ ኤርምያስ፡ ወተሰአልዎ።
28 ወነበረ፡ ኤርምያስ፡ በዐፀደ፡ ሞቅሕ፡ እስከ፡ ዕለተ፡ ተእኅዘት፡ ኢየሩሳሌም።
=== chapter 39 ===
[Chapter 39]
1 ወኮነ፡ በታስዕ፡ ዓመቱ፡ ለሴዴቅያስ፡ ንጉሠ፡ ይሁዳ፡ በዐሥር፡ ወርኅ፡ መጽአ፡ ናቡከደነፆር፡ ንጉሠ፡ ባቢሎን፡ ወኵሉ፡ ኃይሉ፡ ኀበ፡ ኢየሩሳሌም፡ ወዐገትዋ።
2 ወበ፲ወ፩ዓመተ፡ ሴዴቅያስ፡ በራብዕ፡ ወርኅ፡ በተሱዓ፡ ሠርቅ፡ ተናፈቀት፡ ሀገር።
3 ወቦኡ፡ ኵሎሙ፡ መሳፍንተ፡ ንጉሠ፡ ባቢሎን፡ ወነበሩ፡ ውስተ፡ አንቀጸ፡ ማሴው፡ መንገናሶር፡ ሰማጎት፡ ናቡሰኮር፡ ናቡሴሪስ፡ ናግርጎ፡ ስናሴር፡ ረብማግ፡ ኔሪጋል፡ ሰሪአጹር፡ ወኵሉ፡ እለ፡ ተርፉ፡ መሳፍንት፡ ዘንጉሠ፡ ባቢሎን።
4 ወኮነ፡ ሶበ፡ ርእዮሙ፡ ሴዴቅያስ፡ ንጉሠ፡ ይሁዳ፡ ወኵሉ፡ ሰብእ፡ መስተቃትላን፡ ጐዩ፡ በሌሊት፡ እምነ፡ ሀገር፡ ፍኖተ፡ ገነተ፡ ንጉሠ፡ በአንቀጽ፡ ማእከለ፡ አረፍት፡ ወፅአ፡ ፍኖተ፡ ዐረባ።
5 ወዴገንዎ፡ ኃይለ፡ ፋርስ፡ እምድኅሬሆሙ፡ ወአኀዝዎ፡ ለሴዴቅያስ፡ በአራቦት፡ ዘኢያሪኮ።
6 ወረገዞሙ፡ ንጉሠ፡ ባቢሎን፡ ለደቂቀ፡ ሴዴቅያስ፡ በዴብላታ፡ በቅድመ፡ አዕይንቲሁ፡ ወለኵሎሙ፡ መሳፍንተ፡ ይሁዳ፡ ረገዞሙ፡ ንጉሠ፡ ባቢሎን።
7 ወአዕይንቲሁ፡ ለሴዴቅያስ፡ አዖሮ፡ ወአሰሮ፡ በመዋቅተ፡ ኃፂን፡ ወወሰዶ፡ ባቢሎን።
8 ወቤተ፡ ንጉሥ፡ ወአብያተ፡ ሕዝብ፡ አውዐዩ፡ በእሳት፡ ከለዳውያን፡ ወአረፋቲሃ፡ ለኢየሩሳሌም፡ ነሠቱ።
9 ወተረፈ፡ ሕዝብ፡ እለ፡ ተርፉ፡ ውስተ፡ ሀገር፡ ወእለ፡ አምሠጡ፡ ወእለ፡ ገብኡ፡ ኀቤሁ፡ ወተረፈ፡ ሕዝብ፡ እለ፡ ተርፉ፡ አፍለሰ፡ ናቡ፡ ዛርዳን፡ ሊቀ፡ መበስላን፡ ባቢሎን።
10 ወእምሕዝብ፡ ነዳያን፡ ዘአልቦሙ፡ ምንትኒ፡ አትረፈ፡ ናቡዛርዳን፡ ሊቀ፡ መበስላን፡ በምድረ፡ ይሁዳ፡ ወወሀቦሙ፡ አዕፃዳተ፡ ወይን፡ ወምክያዳተ፡ ውእተ፡ አሚረ።
11 ወአዘዘ፡ ናቡከደነፆር፡ ንጉሠ፡ በእንተ፡ ኤርምያስ፡ በእደ፡ ናቡዛርዳን፡ ሊቀ፡ መበስላን፡ ወይቤሎ።
12 ንሥኦ፡ ወአዕይንቲከ፡ ሢም፡ ላዕሌሁ፡ ወኢትግበር፡ ሎቱ፡ ምንተኒ፡ እኩየ፡ ዘእንበለ፡ ዳእሙ፡ ከመ፡ ተናገረከ፡ ከማሁ፡ ግበር፡ ምስሌሁ።
13 ወፈነወ፡ ናቡዛርዳን፡ ሊቀ፡ መበስላን፡ ወኔቡሳዜኮን፡ ረበሳሪክ፡ ወኔሪጋል፡ ሰሪአጹር፡ ረብማግ፡ ወኵሉ፡ መላእክተ፡ ንጉሠ፡ ባቢሎን።
14 ወፈነዉ፡ ወነሥእዎ፡ ለኤርምያስ፡ እምዐፀደ፡ ሞቅሕ፡ ወወሀብዎ፡ ኀበ፡ ጎዶልያን፡ ወልደ፡ አቅማክ፡ ወልደ፡ ሳፋን፡ ያውፅኦ፡ ኀበ፡ ቤት፡ ወነበረ፡ ማእከለ፡ ሕዝብ።
15 ወኀበ፡ ኤርምያስ፡ ኮነ፡ ቃለ፡ እግዚአብሔር፡ አመ፡ ሀሎ፡ በዐፀደ፡ ቤተ፡ ሞቅሕ፡ እንዘ፡ ይብል።
16 ሑር፡ በሎ፡ ለአቤሜሌክ፡ ኢትዮጵያዊ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ናሁ፡ አነ፡ አመጽእ፡ ነገርየ፡ ለዛሀገር፡ ለእኩይ፡ ወአኮ፡ ለሠናይ፡ ወይከውኑ፡ በቅድሜከ።
17 ወአድኅነከ፡ በይእቲ፡ ዕለት፡ ይቤ፡ እግዚአብሔር፡ ወኢይሁበከ፡ ውስተ፡ እደ፡ ዕደው፡ ዘአንተ፡ ትፈርህ፡ እምገጾሙ።
18 እስመ፡ ድኂነ፡ አድኅነከ፡ ወበኵናት፡ ኢትወድቅ፡ ወትከውን፡ ነፍስከ፡ ምርካበ፡ እስመ፡ ተወከልከ፡ ብየ፡ ይቤ፡ እግዚአብሔር።
=== chapter 40 ===
[Chapter 40]
1 ቃለ፡ ዘኮነ፡ ኀበ፡ ኤርምያስ፡ እምኀበ፡ እግዚአብሔር፡ እምድኅረ፡ ፈነዎ፡ ናቡዛርዳን፡ ሊቀ፡ መበስላን፡ እምራማ፡ ሶበ፡ ነሥእዎ፡ እንዘ፡ እሱር፡ በማእሰር፡ በማእከለ፡ ኵሉ፡ ፈላስያን፡ ዘኢየሩሳሌም፡ ወይሁዳ፡ እለ፡ ተፄወዉ፡ ውስተ፡ ባቢሎን።
2 ወነሥኦ፡ ሊቀ፡ መበስላን፡ ለኤርምያስ፡ ወይቤሎ፡ እግዚአብሔር፡ አምላክከ፡ ነበበ፡ ዘንተ፡ እኩየ፡ በዝንቱ፡ መካን።
3 ወገብረ፡ እግዚአብሔር፡ በከመ፡ ነበበ፡ እስመ፡ አበስክሙ፡ ሎቱ፡ ወኢስማዕክሙ፡ ቃሎ፡ ወኮነ፡ ብክሙ፡ ዝንቱ፡ ነገር።
4 ወይእዜ፡ ናሁ፡ ፈታሕኩከ፡ እምነ፡ መዋቅሕቲከ፡ ዘእዴከ።
5 ወግባእ፡ ኀበ፡ ጎዶልያን፡ ወልደ፡ አኪቃም፡ ወልደ፡ ሳፋን፡ ዘረሰዮ፡ ንጉሠ፡ ባቢሎብን፡ ለምድረ፡ ይሁዳ፡ ወንበር፡ ምስሌሁ፡ ማእከለ፡ ሕዝብ፡ አው፡ ኀበ፡ ዘአደመከ፡ ለአዕይንቲከ፡ ሐዊረ፡ ተሐውር።
6 ወሖረ፡ ኤርምያስ፡ ኀበ፡ ጎዶልያን፡ ወልደ፡ አኪቃም፡ መሴፋ፡ ወነበረ፡ ማእከለ፡ ሕዝብ፡ ተራፍያን፡ በምድር።
7 ወሰምዑ፡ ኵሉ፡ መሳፍንተ፡ ኃይሎሙ፡ እለ፡ እምገዳም፡ እሙንቱ፡ ወዕደዊሆሙ፡ ከመ፡ ሤሞ፡ ንጉሠ፡ ባቢሎን፡ ለጎዶልያን፡ ወልደ፡ አኪቃም፡ ውስተ፡ ምድር፡ ወከመ፡ አዕቀቦ፡ ዕደወ፡ ወአንስተ፡ ወሕፃናተ፡ ወነዳያነ፡ ምድር፡ እለ፡ ኢፈለሱ፡ ባቢሎን።
8 ወሖሩ፡ ኀበ፡ ጎዶልያን፡ መሴፋ፡ ይስማኤል፡ ወልደ፡ ናታንዩ፡ ወዮሐናን፡ ወልደ፡ ቃርሔ፡ ወሳርያስ፡ ወልደ፡ ናታናሔሜት፡ ወደቂቀ፡ ዖፌ፡ ወልደ፡ ኔጦፋጤ፡ ወኢያዛንያስ፡ ወልደ፡ ሞቃጤ፡ እሙንቱ፡ ወሰብኦሙ።
9 ወመሐለ፡ ሎሙ፡ ጎዶልያን፡ ወልደ፡ አኪቃም፡ ወልደ፡ ሳፋን፡ በእንቲአሆሙ፡ ምስለ፡ ሰብኦሙ፡ ወይቤሎሙ፡ ኢትፍርሁ፡ እምተቀንዮ፡ ከለዳውያን፡ ንበሩ፡ ውስተ፡ ምድር፡ ወተቀነዩ፡ ለንጉሠ፡ ባቢሎን፡ ወይኄይሰክሙ።
10 ወነየ፡ አነ፡ እነብር፡ ማእከሎሙ፡ በመሴፋ፡ ወእቀውም፡ ውስተ፡ ገጾሙ፡ ለከለዳውያን፡ እለ፡ ይመጽኡ፡ ኀቤነ፡ ወአንትሙሰ፡ አስተጋብኡ፡ ወይነ፡ ወቀምሐ፡ ወቅብአ፡ ወደዩ፡ ውስተ፡ ቀሣውቲክሙ፡ ወኅድሩ፡ ውስተ፡ አህጉር፡ ዘአኀዝክሙ።
11 ወኵሉ፡ አይሁድ፡ እለ፡ ውስተ፡ ምድረ፡ ሞአብ፡ ወደቂቀ፡ አሞን፡ ወበኤዶም፡ ወኵሎሙ፡ እለ፡ ውስተ፡ ኵሉ፡ ምድር፡ ሰምዑ፡ ከመ፡ ወሀቦ፡ ንጉሠ፡ ባቢሎን፡ ተረፈ፡ ይሁዳ፡ ወከመ፡ ሤሞ፡ ላዕሌሆሙ፡ ለጎዶልያን፡ ወልደ፡ አኪቃም፡ ወልደ፡ ሳፋን።
12 ወተመይጡ፡ ኵሎሙ፡ አይሁድ፡ እምኵሉ፡ መካናት፡ እምኀበ፡ ተዘርዉ፡ ህየ፡ ወመጽኡ፡ ውስተ፡ ምድረ፡ ይሁዳ፡ ኀበ፡ ጎዶልያን፡ ውስተ፡ መሴፋ፡ ወአስተጋብኡ፡ ወይነ፡ ወቀምሐ፡ ብዙኀ፡ ፈድፋደ።
13 ወዮሐናን፡ ወልደ፡ ቃርሔ፡ ወኵሉ፡ መሳፍንተ፡ ኃይሎሙ፡ እለ፡ ውስተ፡ ገዳም፡ መጽኡ፡ ኀበ፡ ጎዶልያን፡ ውስተ፡ መሴፋ።
14 ወይቤልዎ፡ እመ፡ አእምሮ፡ ተአምር፡ ከመ፡ በዓሊም፡ ንጉሠ፡ ደቂቀ፡ አሞን፡ ፈነወ፡ ይስማኤልሃ፡ ወልደ፡ ናታንዩ፡ ኀቤከ፡ ከመ፡ ይቅትል፡ ነፍሰከ።
15 ወዮሐናን፡ ወልደ፡ ቃርሔ፡ ይቤሎ፡ ለጎዶልያን፡ በኅቡእ፡ በመሴፋ፡ እሑር፡ እቅትሎ፡ ለእስማኤል፡ ወልደ፡ ናታንዩ፡ እንዘ፡ አልቦ፡ ዘየአምር፡ ከመ፡ ኢይቅትል፡ ነፍሰከ፡ ወይዘረዉ፡ ኵሎሙ፡ አይሁድ፡ እለ፡ ተጋብኡ፡ ኀቤከ፡ ወይትሐጐሉ፡ እለ፡ ተርፉ፡ አይሁድ።
16 ወይቤሎ፡ ጎዶልያን፡ ወልደ፡ አኪቃም፡ ለዮሐናን፡ ወልደ፡ ቃርሔ፡ ኢትግበር፡ ዘንተ፡ ነገረ፡ እስመ፡ ሐሰተ፡ ትብል፡ አንተ፡ ላዕለ፡ ይስማኤል።
=== chapter 41 ===
[Chapter 41]
1 ወኮነ፡ በሳብዕ፡ ወርኅ፡ መጽአ፡ ይስማኤል፡ ወልደ፡ ናታንዩ፡ ወልደ፡ ኤሊሲማ፡ እምዘመደ፡ ነገሥት፡ ወመገብተ፡ ንጉሥ፡ ወ፲ሰብእ፡ ምስሌሁ፡ ኀበ፡ ጎዶልያን፡ ወልደ፡ አኪቃም፡ በመሴፋ፡ ወበልፁ፡ ህየ፡ እክለ፡ ኅቡረ፡ በመሴፋ።
2 ወተንሥአ፡ ይስማኤል፡ ወልደ፡ ናታንዩ፡ ወ፲ዕደው፡ እለ፡ ምስሌሁ፡ ወቀተልዎ፡ ለጎዶልያን፡ ወልደ፡ አኪቃም፡ ወልደ፡ ሳፋን፡ በመጥባሕት።
3 ወለኵሎሙ፡ አይሁድ፡ እለ፡ ምስሌሁ፡ ለጎዶልያን፡ በመሴፋ፡ ወለኵሎሙ፡ ከለዳውያን፡ እለ፡ ተረክቡ፡ በህየ፡ ወኵሎ፡ ዕደወ፡ መስተቃትላነ፡ ቀተለ፡ ይስማኤል።
4 ወኮነ፡ በሳኒታ፡ ዕለት፡ እምዘ፡ ቀተሎ፡ ይስማኤል፡ ለጎዶልያን፡ ወአልቦ፡ ሰብእ፡ ዘየአምሮ።
5 ወመጽኡ፡ ዕደው፡ እምሴኬም፡ ወእምሴሎ፡ ወእምሰማርያ፡ ፹ዕደው፡ ልጹያን፡ አጽሐሚሆሙ፡ ወሥጡጥ፡ አልባሲሆሙ፡ ወልሕዋን፡ ወመሐና፡ ወሊባኖስ፡ ውስተ፡ እደዊሆሙ፡ ለአብኦ፡ ቤተ፡ እግዚአብሔር።
6 ወወፅአ፡ ይስማኤል፡ ወልደ፡ ናታንዩ፡ ከመ፡ ይትቀበሎሙ፡ እመሴፋ፡ ወሖረ፡ ወይበኪ፡ እንዘ፡ የሐውር፡ ወኮነ፡ ሶበ፡ ቀርቦሙ፡ ይቤሎሙ፡ ባኡ፡ ኀበ፡ ጎዶልያን፡ ወልደ፡ አኪቃም።
7 ወኮነ፡ ሶበ፡ ቦኡ፡ ማእከለ፡ ሀገር፡ ቀተሎሙ፡ ይስማኤል፡ ወልደ፡ ናታንዩ፡ ወወረውዎሙ፡ ውስተ፡ ግበ፡ ውእቱ፡ ወዕደው፡ እለ፡ ምስሌሁ።
8 ወዐሠርቱ፡ ሰብእ፡ እለ፡ ተረክቡ፡ በህየ፡ ይቤልዎ፡ ለይስማኤል፡ ኢትቅትለነ፡ እስመ፡ ብነ፡ መዝገብ፡ በሐቅል፡ ስርናይ፡ ወስገም፡ ወመዐር፡ ወቅብእ።
9 ወዘወገረ፡ ይስማኤል፡ አብድንቲሆሙ፡ ለዕደው፡ እለ፡ ተቀትሉ፡ ምስለ፡ ጎዶልያን፡ ውስተ፡ ግብ፡ ዓቢይ፡ ውእቱኬ፡ ዘገብረ፡ ንጉሥ፡ ዓሣ፡ እምቅድመ፡ በአስ፡ ንጉሠ፡ እስራኤል፡ ዘንተ፡ መልአ፡ ወፈጸመ፡ ይስማኤል፡ ወልደ፡ ናታንዩ፡ ቅቱላነ።
10 ወሜጠ፡ ይስማኤል፡ ኵሎ፡ ሕዝበ፡ ተራፍያነ፡ ዘውስተ፡ መሴፋ፡ ወአዋልደ፡ ንጉሥ፡ ወኵሎ፡ እለ፡ ተርፋ፡ በመሴፋ፡ ሕዝበ፡ ዘአዕቀቦ፡ ናቡዛርዳን፡ ሊቀ፡ መበስላን፡ ለጎዶልያን፡ ወልደ፡ አኪቃም፡ ወጌሠ፡ ይስማኤል፡ ወልደ፡ ናታንዩ፡ ወመጽአ፡ ለዐዲው፡ ኀበ፡ ደቂቀ፡ አሞን።
11 ወሰምዐ፡ ዮሐናን፡ ወልደ፡ ቃርሔ፡ ወኵሉ፡ መላእክተ፡ ኃይሎሙ፡ እለ፡ ምስሌሁ፡ ኵሎ፡ እኩየ፡ ዘገብረ፡ ይስማኤል፡ ወልደ፡ ናታንዩ።
12 ወአስተጋብኡ፡ ኵሎ፡ ሠራዊተ፡ ወሖሩ፡ ይትቃተሉ፡ ምስለ፡ ይስማኤል፡ ወልደ፡ ናታንዩ፡ ወረከቦ፡ በኀበ፡ ማይ፡ ብዙኅ፡ በገባኦን።
13 ወኮነ፡ ሶበ፡ ርእዩ፡ ኵሉ፡ ሕዝብ፡ ዘምስሌሁ፡ ለእስማኤል፡ ዮሐናንሃ፡ ወልደ፡ ቃርሔ፡ ወኵሎ፡ ሠራዊተ፡ ዘምስሌሁ፡ ወተፈሥሑ።
14 ወተመይጡ፡ ኵሉ፡ ሕዝብ፡ ዘፄወወ፡ ይስማኤል፡ እመሴፋ፡ ወገብኡ፡ ወሖሩ፡ ኀበ፡ ዮሐናን፡ ወልደ፡ ቃርሔ።
15 ወይስማኤል፡ ወልደ፡ ናታንዩ፡ ድኅነ፡ ምስለ፡ ፰ዕደው፡ እምገጸ፡ ዮሐናን፡ ወዐደዉ፡ ኀብ፡ ደቂቀ፡ አሞን።
16 ወነሥአ፡ ዮሐንን፡ ወልደ፡ ቃርሔ፡ ወኵሎሙ፡ ሠራዊተ፡ ኃይሎሙ፡ እለ፡ ምስሌሁ፡ ኵሎሙ፡ እለ፡ ተርፋ፡ ሕዝብ፡ እለ፡ ገብኡ፡ እምኀበ፡ ይስማኤል፡ ወልደ፡ ናታንዩ፡ እመሴፋ፡ እምድኅረ፡ ቀተሎ፡ ለጎዶልያን፡ ወልደ፡ አኪቃም፡ ዕደው፡ ኃያላን፡ መስተቃላን፡ ወአንስቶሙ፡ ወሕፃናቲሆሙ፡ ወሕፅዋን፡ እለ፡ ገብኡ፡ እምገባኦን።
17 ወሖሩ፡ ወነበሩውስተ፡ ምድረ፡ ቤሮካማሐ፡ ዘቅሩብ፡ ኀበ፡ ቤተ፡ ልሔም፡ ከመ፡ ይሑሩ፡ ወይባኡ፡ ውስተ፡ ግብጽ።
18 እምገጸ፡ ከለዳውያን፡ እስመ፡ ፈርሁ፡ እምገጾሙ፡ እስመ፡ ቀተለ፡ ይስማኤል፡ ወልደ፡ ናታንዩ፡ ጎዶልያንሃ፡ ወልደ፡ አኪቃም፡ ዘሤሞ፡ ንጉሠ፡ ባቢሎን፡ በምድር።
=== chapter 42 ===
[Chapter 42]
1 ወመጽኡ፡ ኵሉ፡ መላእክተ፡ ኃይሎሙ፡ ወዮሐናን፡ ወልደ፡ ቃርሔ፡ ወኢዛንያስ፡ ወልደ፡ ሐናንዩ፡ ወኵሉ፡ ሕዝብ፡ ንኡስ፡ ወዓብይ፡ ኀበ፡ ኤርምያስ፡ ነቢይ።
2 ወይቤሎ፡ ይደቅ፡ ምሕረትነ፡ ቅድመ፡ ገጽከ፡ ወጸሊ፡ በእንቲአነ፡ ኀበ፡ እግዚአብሔር፡ አምላክከ፡ በእንተ፡ እሎንቱ፡ እለ፡ ተርፉ፡ እስመ፡ ተረፍነ፡ ኅዳጣን፡ እምብዙኅን፡ በከመ፡ አዕይንቲከ፡ ይኔጽራ።
3 ወያይድዐነ፡ እግዚአብሔር፡ አምላክከ፡ ፍኖተ፡ እንተ፡ ባቲ፡ ነሐውር፡ ወነገረ፡ ዘንገብር።
4 ወይቤሎሙ፡ ኤርምያስ፡ ነቢይ፡ ሰማዕኩ፡ ናሁ፡ አነ፡ እጼሊ፡ ኀበ፡ እግዚአብሔር፡ አምላክክሙ፡ በከመ፡ ቃልክሙ፡ ወዘአውሥአኒ፡ ቃለ፡ እግዚአብሔር፡ አየድዐክሙ፡ ወኢየኀብእ፡ እምኔክሙ፡ ቃለ፡ ወኢዘሐደ።
5 ወይቤልዎ፡ እሙንቱ፡ ለኤርምያስ፡ ይኩን፡ እግዚአብሔር፡ ስምዓ፡ ጽድቅ፡ ወምእመነ፡ ከመ፡ ኵሉ፡ በከመ፡ ለአከከ፡ እግዚአብሔር፡ አምላክከ፡ ነገረ፡ ኀቤነ፡ ከማሁ፡ ንገብር።
6 እመሂ፡ ሠናይ፡ ወእመሂ፡ እኩይ፡ ወቃለ፡ እግዚአብሔር፡ አምላክነ፡ ዘለሊነ፡ ለአክናከ፡ ኀቤሁ፡ ንሰምዕ፡ ከመ፡ ይኩን፡ ሠናይ፡ ላዕሌነ፡ እስመ፡ ንሰምዕ፡ ቃለ፡ እግዚአብሔር፡ አምላክነ።
7 ወኮነ፡ እምድኅረ፡ ዐሡር፡ ዕለት፡ ቃለ፡ እግዚአብሔር፡ ኀበ፡ ኤርምያስ።
8 ወጸውዖ፡ ለዮሐናን፡ ወልደ፡ ቃርሔ፡ ወለኵሉ፡ መላእክተ፡ ኃይል፡ እለ፡ ምስሌሁ፡ ወለኵሉ፡ ሕዝብ፡ ንኡስ፡ ወዓቢይ።
9 ወይቤሎሙ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ በእንተ፡ ዘፈነውክሙኒ፡ ኀቤሁ፡ ከመ፡ ይደቅ፡ ሣህልክሙ፡ ቅድሜሁ።
10 እመ፡ ነቢረ፡ ነበርክሙ፡ ውስተዝ፡ ምድር፡ አሐንጸክሙ፡ ወኢይነሥተክሙ፡ ወእተክለክሙ፡ ወኢይመልሐክሙ፡ እስመ፡ ነሳሕኩ፡ እምእኩይ፡ ዘሐለይኩ፡ እግበር፡ ላዕሌክሙ።
11 ኢትፍርሁ፡ እምገጸ፡ ንጉሠ፡ ባቢሎን፡ ዘአንትሙ፡ ትፈርሁ፡ እምቅድመ፡ ገጹ፡ ኢትፍርህዎ፡ ይቤ፡ እግዚአብሔር፡ እስመ፡ ምስሌክሙ፡ አነ፡ ከመ፡ አድኅንክሙ፡ ወእባልሕክሙ፡ እምእዴሁ።
12 ወእሁበክሙ፡ ሣህለ፡ ወእሠሀለክሙ፡ ወአነብረክሙ፡ ውስተ፡ ምድርክሙ።
13 ወእመሰ፡ ትቤሉ፡ አንትሙ፡ ኢንነብር፡ ውስተዛ፡ ምድር፡ ከመ፡ ኢንስማዕ፡ ቃለ፡ እግዚአብሔር፡ አምላክነ።
14 ዳእሙ፡ ንበውእ፡ ውስተ፡ ምድረ፡ ግብጽ፡ ወኢንሬኢ፡ ቀትለ፡ ወኢንሰምዕ፡ ቃለ፡ ቀርን፡ ወኢንጼነስ፡ እክለ፡ ወንነብር፡ ህየ።
15 በእንተ፡ ዝንቱ፡ ስምዑ፡ ቃለ፡ እግዚአብሔር፡ ተረፈ፡ ይሁዳ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ እስመ፡ አንትሙ፡ ወሀብክሙ፡ ገጽክሙ፡ ከመ፡ ትባኡ፡ ውስተ፡ ግብጽ፡ ወቦእክሙ፡ ከመ፡ ትንበሩ፡ ህየ።
16 ይከውን፡ ኵናት፡ ዘአንትሙ፡ ትፈርሁ፡ እምቅድመ፡ ገጹ፡ በህየ፡ ይረክበክሙ፡ በምድረ፡ ግብጽ፡ ወረኃብኒ፡ ዘአንትሙ፡ ፈራህክሙ፡ እምኔሁ፡ ህየ፡ ይተሉ፡ ድኅሬክሙ፡ ግብጸ፡ ወበህየ፡ ትመውቱ።
17 ወኮነ፡ ኵሎሙ፡ ዕደው፡ እለ፡ ረሰዩ፡ ገጾሙ፡ ከመ፡ ይሑሩ፡ ውስተ፡ ምድረ፡ ግብጽ፡ ይኅድሩ፡ ህየ፡ በኵናት፡ ወበረኃብ፡ ወበብድብድ፡ የኀልቁ፡ ወኢይድኅኑ፡ ወኢአሐዱ፡ እምእኩይ፡ ዘአነ፡ አመጽእ፡ ላዕሌሆሙ።
18 እስመ፡ ከመዝ፡ ይቤ፡ እግዚአ፡ ኃያላን፡ አምላከ፡ እስራኤል፡ በከመ፡ ወረደ፡ መዐትየ፡ ወመቅሠፍትየ፡ ላዕለ፡ እለ፡ ይነብሩ፡ ኢየሩሳሌም፡ ከማሁ፡ ይወርድ፡ መዐትየ፡ ላዕሌክሙ፡ እምከመ፡ ቦእክሙ፡ ውስተ፡ ግብጽ፡ ወትከውኑ፡ ለመሐላ፡ ወለተነሥቶ፡ ወለመርገም፡ ወለጽዕለት፡ ወኢትሬእይዋ፡ ዳግመ፡ ለዛቲ፡ መካን።
19 ከመዝ፡ ነበበ፡ እግዚአብሔር፡ ላዕሌክሙ፡ እለ፡ ተረፍክሙ፡ እምይሁዳ፡ ኢትባኡ፡ ውስተ፡ ግብጽ።
20 እስመ፡ ስሕትክሙ፡ በነፍስክሙ፡ እስመ፡ አንትሙኒ፡ ፈነውክሙኒ፡ ኀበ፡ እግዚአብሔር፡ አምላክሙ፡ እንዘ፡ ትብሉ፡ ጸሊ፡ ለነ፡ ኀበ፡ እግዚአብሔር፡ አምላክነ፡ ወበከመ፡ ኵሉ፡ ዘነበበከ፡ እግዚአብሔር፡ አምላክነ፡ ንግረነ፡ ወከማሁ፡ ንገብር።
21 ወነገርኩክሙ፡ ዮም፡ ወኢሰማዕክሙ፡ ቃለ፡ እግዚአብሔር፡ አምላክክሙ፡ በከመ፡ ኵሉ፡ ዘለአከኒ፡ ኀቤክሙ።
22 ወይእዜኒ፡ አእምሮ፡ አእምሩ፡ ከመ፡ በኵናት፡ ወበረኃብ፡ ወበሞት፡ ተኀልቁ፡ በመካን፡ ኀበ፡ አንትሙ፡ መከርክሙ፡ ትባኡ፡ ትኅድሩ፡ ህየ።
=== chapter 43 ===
[Chapter 43]
1 ወኮነ፡ ሶበ፡ አኅለቀ፡ ኤርምያስ፡ እንዘ፡ ይነግር፡ ለኵሉ፡ ሕዝብ፡ ኵሎ፡ ቃለ፡ እግዚአብሔር፡ በከመ፡ ፈነዎ፡ እግዚአብሔር፡ አምላኮሙ፡ ኀቤሆሙ፡ ዘንተ፡ ኵሎ፡ ቃላተ።
2 ይቤ፡ አዛርያ፡ ወልደ፡ ኢዮስያስ፡ ወዮሐናን፡ ወልደ፡ ቃርሔ፡ ወኵሎሙ፡ ዕደው፡ ዕቡያን፡ እለ፡ ይቤልዎ፡ ለኤርምያስ፡ ሕስወ፡ ተናገርከ፡ አንተ፡ ኢፈነወከ፡ እግዚአብሔር፡ አምላክነ፡ ኀቤነ፡ እንዘ፡ ይብል፡ ኢትባኡ፡ ውስተ፡ ግብጽ፡ ከመ፡ ትኅድሩ፡ ህየ።
3 አላ፡ ባሮክ፡ ወልደ፡ ኔርዩ፡ ያስሕተከ፡ በኀቤነ፡ ከመ፡ ይመጥወነ፡ ውስተ፡ እደ፡ ከለዳውያን፡ ከመ፡ ይቅትሉነ፡ ወያፍልሱነ፡ ውስተ፡ ባቢሎን።
4 ወኢሰምዑ፡ ዮሐናን፡ ወልደ፡ ቃርሔ፡ ወኵሎሙ፡ መላእክተ፡ ኃይሎሙ፡ ወኵሎሙ፡ ሕዝብ፡ ቃለ፡ እግዚአብሔር፡ ከመ፡ ይኅድሩ፡ ውስረ፡ ምድረ፡ ይሁዳ።
5 ወነሥአ፡ ዮሐናን፡ ወልደ፡ ቃርሔ፡ ወኵሎሙ፡ መላእክተ፡ ኃይሎሙ፡ ኵሎሙ፡ ተራፍያነ፡ ይሁዳ፡ ወእለ፡ ተጋብኡ፡ እምኵሉ፡ አሕዛብ፡ ኀበ፡ ተዘርዉ፡ ከመ፡ ይኅድሩ፡ ውስተ፡ ምድረ፡ ይሁዳ።
6 ዕደ፡ ወአንስተ፡ ወሕፃናተ፡ ወአዋልደ፡ ነገሥት፡ ወኵሎ፡ ነፍሳተ፡ ዘአትረፈ፡ ናቡዛርዳን፡ ሊቀ፡ መበስላን፡ ምስለ፡ ጎዶልያን፡ ወልደ፡ አኪቃም፡ ወልደ፡ ሳፋን፡ ወኤርምያስኒ፡ ነቢይ፡ ወባሮክኒ፡ ወልደ፡ ኔርዩ።
7 ወቦኡ፡ ውስተ፡ ግብጽ፡ እስመ፡ ኢሰምዑ፡ ቃለ፡ እግዚአብሔር፡ ወበጽሑ፡ እስከ፡ ጠፍናስ።
8 ወኮነ፡ ቃለ፡ እግዚአብሔር፡ ኀበ፡ ኤርምያስ፡ በጠፍናስ፡ እንዘ፡ ይብል።
9 ንሣእ፡ ለከ፡ አእባነ፡ ዓበይተ፡ በእደዊከ፡ ወድፍኖሙ፡ ውስተ፡ ኆኅተ፡ ቤተ፡ ፈርዖን፡ ውስተ፡ ጠፍናስ፡ በቅድመ፡ አዕይንቲሆሙ፡ ለዕደወ፡ ይሁዳ።
10 ወትብሎሙ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ናሁ፡ አነ፡ እፌኑ፡ ወአመጽኦ፡ ለናቡከደነፆር፡ ንጉሠ፡ ባቢሎን፡ ገብርየ፡ ወአነብር፡ መንበሮ፡ ላዕለ፡ ዝንቱ፡ አእባን፡ ዘኀባእኩ፡ ወያነሥእ፡ ላዕሌሆሙ፡ ወላትዊሁ።
11 ወይበውእ፡ ወይቀትላ፡ ለምድረ፡ ግብጽ፡ ወዘሂ፡ ለሞት፡ ውስተ፡ ሞት፡ ወዘሂ፡ ለተፄውዎ፡ ውስተ፡ ተፄውዎ፡ ወዘሂ፡ ለኵናት፡ ውስተ፡ ኵናት።
12 ወይውዒ፡ በእሳት፡ ቤተ፡ አማልክቲሆሙ፡ ለግብጽ፡ ወያውዕዮሙ፡ ወያፈልሶሙ፡ ወይቀምላ፡ ለምድረ፡ ግብጽ፡ ከመ፡ ዘይቀምል፡ ኖላዊ፡ አልባሲሁ፡ ወይወፅእ፡ እምህየ፡ በሰላም።
13 ወይትቀጠቀጥ፡ ዓምደ፡ ሀገረ፡ ፀሐይ፡ ዘውስተ፡ ምድረ፡ ግብጽ፡ ወያውዒ፡ ቤተ፡ አማልክቲሆሙ፡ ለግብጽ፡ በእሳት።
=== chapter 44 ===
[Chapter 44]
1 ቃል፡ ዘኮነ፡ ኀበ፡ ኤርምያስ፡ እምኀበ፡ እግዚአብሔር፡ ኀበ፡ ኵሎሙ፡ አይሁድ፡ እለ፡ ይነብሩ፡ ውስተ፡ ግብጽ፡ ወመግደሎ፡ ወጠፍናስ፡ ወውስተ፡ ሜምፍ፡ ውስተ፡ ምድረ፡ ፋቱሪ፡ ወይቤሎሙ።
2 ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ለሊክሙ፡ ርኢክሙ፡ ኵሎ፡ እኩየ፡ ዘአምጻእኩ፡ ላዕለ፡ ኢየሩሳሌም፡ ወላዕለ፡ አህጉረ፡ ይሁዳ፡ ዘኮነት፡ በድወ፡ እስከ፡ ዛ፡ ዕለት፡ እምእከዮሙ፡ ወአልቦ፡ ዘይነብሮሙ።
3 እምገጸ፡ እከዮሙ፡ ዘገብሩ፡ ወአምዕዑኒ፡ ወሖሩ፡ ይዕጥኑ፡ ወይትቀነዩ፡ ለአማልክተ፡ ነኪር፡ ዘኢየአምርዎሙ፡ ኢእሙንቱ፡ ወኢአበዊሆሙ።
4 ወፈነውኩ፡ ኀቤሆሙ፡ ኵሎ፡ አግብርትየ፡ ነቢያተ፡ በጽባሕ፡ እንዘ፡ እብል፡ ኢትግበሩ፡ ዘንተ፡ ምግባረ፡ ርኩሰ፡ ዘእጸልእ።
5 ወኢሰምዑኒ፡ ወኢሜጡ፡ እዝኖሙ፡ ከመ፡ ይትመየጡ፡ እምእከዮሙ፡ ከመ፡ ኢይዕጥኑ፡ ለአማልክተ፡ ነኪር።
6 ወወረደ፡ መዐትየ፡ ወመቅሠፍትየ፡ ወነደ፡ በአህጉረ፡ ይሁዳ፡ ወበአፍአሃ፡ ለኢየሩሳሌም፡ ወኮነ፡ በውደ፡ ወዓፀ፡ እስከ፡ ዛቲ፡ ዕለት።
7 ወይእዜኒ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ለምንት፡ ትገብሩ፡ አንትሙ፡ እኩየ፡ ዓቢየ፡ ለነፍስክሙ፡ ከመ፡ ትምትሩ፡ ብእሴ፡ ወብእሲተ፡ ደቂቀ፡ ወሕፃናተ፡ ወጠባዊተ፡ እማእከለ፡ ሀገረ፡ ይሁዳ፡ ከመ፡ ኢታትርፉ፡ ወኢአሐደ።
8 ከመ፡ ያምርሩኒ፡ በምግባረ፡ እደዊሆሙ፡ ከመ፡ ትዕጥኑ፡ ለአማልዕክተ፡ ባዕድ፡ በምድረ፡ ግብጽ፡ ኀበ፡ ቦእክሙ፡ አንትሙ፡ ትኅድሩ፡ ህየ፡ ከመ፡ ትትመተሩ፡ ወትኩኑ፡ መርገመ፡ ወጽዕለተ፡ በውስተ፡ ኵሉ፡ አሕዛበ፡ ምድር።
9 ቦኑ፡ ተረስዐክሙ፡ እከዮሙ፡ ለአበዊክሙ፡ ወእከዮሙ፡ ለነገሥተ፡ ይሁዳ፡ ወእከየ፡ መላእክቲሆሙ፡ ወእከዮን፡ ለአንስቲያክሙ፡ ዘገብሩ፡ በምድረ፡ ይሁዳ፡ ወበአፍአሃ፡ ለኢየሩሳሌም።
10 ወኢያዕረፋ፡ እስከ፡ ዛዕለት፡ ወኢፈርሁ፡ ወኢዐቀቡ፡ ሕግየ፡ ወኢሖሩ፡ በኵነኔየ፡ ዘወሀብኩ፡ ቅድመ፡ አበዊክሙ፡ ወቅድሜክሙ።
11 ወበበይነዝ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ ናሁ፡ አነ፡ አቀውም፡ ገጽየ፡ ላዕሌክሙ፡ በእኩይ፡ ከመ፡ አሥርዎሙ፡ ለኵሉ፡ ይሁዳ።
12 ወእነሥኦሙ፡ ለእለ፡ ተርፉ፡ እምይሁዳ፡ እለ፡ ወደዩ፡ ገጾሙ፡ ከመ፡ ይባኡ፡ ብሔረ፡ ግብጽ፡ ይኅድሩ፡ ህየ፡ ከመ፡ አሕጕሎሙ፡ ለኵሎሙ፡ በምድረ፡ ግብጽ፡ ወይወድቁ፡ በኵናት፡ ወበረኃብ፡ ወየኀልቁ፡ ንኡሶሙ፡ ወዓቢዮሙ፡ ወይወድቁ፡ በኵናት፡ ወበረኃብ፡ ይመውቱ፡ ወይከውኑ፡ ለመሐላ፡ ወለሐጕል፡ ወለመርገም፡ ወለጽዕለት።
13 ወእዋህዮሙ፡ ለእለ፡ ይነብሩ፡ ውስተ፡ ግብጽ፡ በከመ፡ ወሀይክዎሙ፡ ለእለ፡ ይነብሩ፡ ውስተ፡ ኢየሩሳሌም፡ በኵናት፡ ወበረኃብ፡ ወበሞት።
14 ወአልቦ፡ ዘይድኅን፡ ወይተርፍ፡ እምውስቴቶሙ፡ ለእለ፡ ተርፉ፡ እምይሁዳ፡ እለ፡ መጽኡ፡ ይኅድሩ፡ ውስተ፡ ግብጽ፡ ከመ፡ ይትመየጡ፡ ውስተ፡ ምድረ፡ ይሁዳ፡ በዘይትዌከሉ፡ እሙንቱ፡ በነፍሶሙ፡ ከመ፡ ይግብኡ፡ ህየ፡ ኢይገብኡ፡ ዘእንበከ፡ እለ፡ ጐዩ።
15 ወተሠጥውዎ፡ ለኤርምያስ፡ ኵሎሙ፡ ዕደው፡ እለ፡ የአምሩ፡ ከመ፡ የዐጥና፡ አንሰቲያሆሙ፡ ለአማልክተ፡ ነኪር፡ ወኵሎን፡ አንስት፡ እለ፡ ይቀውማ፡ ማኅበረ፡ ዓቢየ፡ ወኵሎሙ፡ ሕዝብ፡ እለ፡ ይነብሩ፡ ውስተ፡ ግብጽ፡ ውስተ፡ ምድረ፡ ፋቱርስ፡ እንዘ፡ ይብሉ።
16 ነገረ፡ ዘነገርከነ፡ በስመ፡ እግዚአብሔር፡ ኢንሰምዕ።
17 እስመ፡ ገቢረ፡ ንገብር፡ ኵሎ፡ ዘወፅአ፡ እምአፉነ፡ ወነዐጥን፡ ለንግሥተ፡ ሰማይ፡ ወሞጻሕተኒ፡ ናወጽሕ፡ ላቲ፡ በከመ፡ ገበርነ፡ ንሕነ፡ ወአበዊነ፡ ወነገሥትነ፡ ወመላእክቲነ፡ በሀገረ፡ ይሁዳ፡ ወበአፍአሃ፡ ለኢየሩሳሌም፡ ወጸገብነ፡ እክለ፡ ወኮነ፡ በሠናይ፡ ወኢርኢነ፡ እኩየ።
18 ወሶበ፡ ኀደግነ፡ ዐጢነ፡ ለንግሠተ፡ ሰማይ፡ ወአውጽሖ፡ ሞጻሕት፡ ላቲ፡ ውሕድነ፡ ንሕነ፡ ኵልነ፡ ወበረኃብ፡ ወበኵናት፡ ኀለቅነ።
19 ወይቤላ፡ አንስት፡ ንሕነሂ፡ ነዐጥን፡ ለንግሥተ፡ ሰማይ፡ ወሞጻሕተ፡ ናወጽሕ፡ ላቲ፡ ቦኑ፡ ዘእንበለ፡ ዕደዊነ፡ ዘገበርነ፡ ላቲ፡ ከዋኒመ፡ ወአውጻሕነ፡ ላቲ፡ ሞጻሕተ።
20 ወይቤሎሙ፡ ኤርምያስ፡ ለኵሎሙ፡ ሕዝብ፡ ለዕደው፡ ወለአንስት፡ ወለኵሎሙ፡ ሕዝብ፡ እለ፡ አውሥእዎ፡ ዘንተ፡ ቃለ።
21 ወይቤሎሙ፡ አኮኑ፡ ዕጣነ፡ ዘዐጠንክሙ፡ በአህጉረ፡ ይሁዳ፡ ወአፍአሃ፡ ለኢየሩሳሌም፡ አንትሙ፡ ወአበዊክሙ፡ ወነገሥትክሙ፡ ወመላእክቲሙ፡ ወሕዝበ፡ ምድርኒ፡ ኪያሆሙ፡ ተዘከረ፡ እግዚአብሔር፡ ወዐርገ፡ ውስተ፡ ልቡ።
22 ወኢክህለ፡ እግዚአብሔር፡ ኪያሆሙ፡ ጸዊረ፡ እምገጸ፡ እከይክሙ፡ ወርኵስክሙ፡ ዘገበርክሙ።
23 እምገጸ፡ ዕጣን፡ ዘዐጠንክሙ፡ ወአበስክሙ፡ ለእግዚአብሔር፡ ወኢሰመዕክሙ፡ ቃለ፡ እግዚአብሔር፡ ወበሕጉ፡ ወበስምዑ፡ ወበትዕዛዙ፡ ኢሖርክሙ፡ ወበእንተዝ፡ ረከበክሙ፡ ዝ፡ እኩይ፡ እስከ፡ ዛ፡ ዕለት።
24 ወይቤ፡ ኤርምያስ፡ ለኵሉ፡ ሕዝብ፡ ወለአንስት፡ ስምዑ፡ ቃለ፡ እግዚአብሔር፡ ኵልክሙ፡ አይሁድ፡ እለ፡ ውስተ፡ ምድረ፡ ግብጽ።
25 ከመዝ፡ ይቤ፡ እግዚአብሔር፡ አምላከ፡ እስራኤል፡ አንትሙ፡ ወአንስቲያክሙ፡ ነበብክሙ፡ በአፍክሙ፡ ወፈጸምክሙ፡ በእደዊክሙ፡ ወትቤሉ፡ ገቢረ፡ ንገብር፡ ዘበፃዕነ፡ ብፅዓቲነ፡ ከመ፡ ንዕጥን፡ ለንግሥተ፡ ሰማይ፡ ወናውጽሕ፡ ላቲ፡ ሞጻሕተ፡ ወገበርክሙ፡ ገቢረ፡ ብከመ፡ በፃዕክሙ፡ ወገቢረ፡ ገበርክሙ፡ ዘነበብክሙ።
26 በእንተ፡ ዝንቱ፡ ስምዑ፡ ቃለ፡ እግዚአብሔር፡ ኵልክሙ፡ አይሁድ፡ እለ፡ ትነብሩ፡ ውስተ፡ ግብጽ፡ ናሁ፡ መሐልኩ፡ በስምየ፡ ዓቢይ፡ ይቤ፡ እግዚአብሔር፡ እመ፡ ይከውን፡ እንከ፡ ስምየ፡ ለጸውዖ፡ በአፈ፡ ኵሉ፡ ይሁዳ፡ ዘይብሉ፡ ሕያው፡ እግዚአብሔር፡ ዘእምኵሉ፡ ምድረ፡ ግብጽ።
27 እስመ፡ አነ፡ እተግህ፡ በእንቲአሆሙ፡ ከመ፡ እሣቅዮሙ፡ ወኢያሤኒ፡ ላዕሌሆሙ፡ ወየኀልቁ፡ ኵሎሙ፡ አይሁድ፡ በምድረ፡ ግብጽ፡ በኵናት፡ ወበረኃብ፡ እስከ፡ የኀልቁ።
28 ወዘድኅኑ፡ እምኵናት፡ ይትመየጡ፡ እምግብጽ፡ ምድረ፡ ይሁዳ፡ ኅዳጣን፡ በኁልቊ፡ ወያእምሩ፡ እለ፡ ተርፉ፡ አይሁድ፡ በምድረ፡ ግብጽ፡ ከመ፡ ይንበሩ፡ ህየ፡ ነገረ፡ መኑ፡ ይቀውም፡ ዘዚአየኑ፡ ወሚመዘዚአሆሙ።
29 ወዝንቱ፡ ውእቱ፡ ትእምርትክሙ፡ ይቤ፡ እግዚአብሔር፡ ከመ፡ እሔውጸክሙ፡ በዝንቱ፡ መካን፡ ከመ፡ ታእምሩ፡ ከመ፡ ቀዊመ፡ ይቀውም፡ ላዕሌክሙ፡ ቃልየ፡ ዘእኩይ።
30 ከመዝ፡ ይቤ፡ እግዚአብሔር፡ ናሁ፡ አነ፡ እሜጥዎ፡ ለፈርዖን፡ ወፍራ፡ ንጉሠ፡ ግብጽ፡ ውስተ፡ እደ፡ ጸላእቱ፡ ወውስተ፡ እደ፡ እለ፡ የኀሥሥዋ፡ ለነፍሱ፡ በከመ፡ መጠውክዎ፡ ለሴዴቅያስ፡ ንጉሠ፡ ይሁዳ፡ ውስተ፡ እዴሁ፡ ለናቡከደነፆር፡ ንጉሠ፡ ባቢሎን፡ ወውስተ፡ እደ፡ ጸላእቱ፡ ወውስተ፡ እደ፡ የኀሥሥዋ፡ ለነፍሱ።
=== chapter 45 ===
[Chapter 45]
1 ነገር፡ ዘነገሮሙ፡ ኤርምያስ፡ ነቢይ፡ ለባሮክ፡ ወልደ፡ ኔርዩ፡ አመጸሐፈ፡ ዘንተ፡ ቃላተ፡ ውስተ፡ መጽሐፍ፡ እምአፈ፡ ኤርምያስ፡ በራብዕ፡ ዓመቱ፡ ለኢዮአቄም፡ ወልደ፡ ኢዮስያስ፡ ንጉሠ፡ ይሁዳ፡ ወይቤ።
2 ከመዝ፡ ይቤ፡ እግዚአብሔር፡ አምላከ፡ እስራኤል፡ ላዕሌከ፡ ባሮክ።
3 ትብል፡ አሌ፡ ሊተ፡ እስመ፡ ወሰከ፡ ወወሀበ፡ እግዚአብሔር፡ ስራሐ፡ ላዕለ፡ ሕማምየ፡ ወሰራሕኩ፡ በገዓርየ፡ ወኢረከብኩ፡ ዕረፍተ።
4 ትብል፡ ከመዝ፡ ይቤ፡ እግዚአብሔር፡ ናሁ፡ ዘሐነጽኩ፡ ለልየ፡ እነሥት፡ ወዘተከልኩ፡ ለልየ፡ እመልሕ፡ ወለኵላ፡ ምድር።
5 ወአንተ፡ ተኀሥሥ፡ ዓብያተ፡ ኢትኅሥሥ፡ እስመ፡ አነ፡ አመጽእ፡ እኪተ፡ ለኵሉ፡ ዘሥጋ፡ ይቤ፡ እግዚአብሔር፡ ወእሁብ፡ ነፍሰከ፡ ከመ፡ ትፄወው፡ በኵሉ፡ በሐውርት፡ ኀበ፡ ሖርከ፡ ህየ።
=== chapter 46 ===
[Chapter 46]
1 ቃለ፡ እግዚአብሔር፡ ዘኮነ፡ ኀበ፡ ኤርምያስ፡ ነቢይ፡ ላዕለ፡ አሕዛበ፡ ግብጽ።
2 ዲበ፡ ኃይለ፡ ፈርዖን፡ ኒካዑ፡ ንጉሠ፡ ግብጽ፡ ዘሀሎ፡ ኀበ፡ ፈለገ፡ ኤፍራጥስ፡ ውስተ፡ ኬርኬማስ፡ ዘቀተለ፡ ናቡከደነፆር፡ ንጉሠ፡ ባቢሎን፡ በራብዕ፡ ዓመተ፡ መንግሥቱ፡ ለኢዮአቄም፡ ወልደ፡ ኢዮስያስ፡ ንጉሠ፡ ይሁዳ።
3 ንሥኡ፡ ንዋየ፡ ሐቅል፡ ወልበሱ፡ ኃፂነ፡ ወፃኡ፡ ተቃተሉ።
4 ረሐኑ፡ አፍራሰ፡ ወይፀዐኑ፡ መስተፅዕናን፡ ወይደዩ፡ ጌራ፡ ውስተ፡ ርእሶሙ፡ ንሥኡ፡ ኰያንዊክሙ፡ ወልበሱ፡ ልብሰ፡ ኃፂን።
5 ለምንት፡ ርኢኩ፡ እንዘ፡ ይደነግፁ፡ ወይሜምዑ፡ ወይገብኡ፡ ድኅሬሆሙ፡ ወጽኑዓኒሆሙ፡ ይነትዑ፡ ወይጐይዩ፡ ወኢይትቃተሉ፡ ወኢሰውጡ፡ ወየዐግትዎሙ፡ ዐውዶሙ፡ ይቤ፡ እግዚአብሔር።
6 ኢይጐይይ፡ ረዋፂ፡ ወኢያመሥጥ፡ ጽኑዕ፡ ለመንገለ፡ ደቡብ፡ ላዕለ፡ ገቦ፡ ፈለገ፡ ኤፍራጥስ፡ ደክሙሂ፡ ወወድቁሂ።
7 መኑ፡ ዝንቱ፡ ዘይመጽእ፡ ከመ፡ ውኂዝ፡ ወማዕበሉ፡ ከመ፡ ውኂዘ፡ ማያት።
8 ግብጽ፡ ከመ፡ ፈለግ፡ የዐርግ፡ ወከመ፡ ማዕበል፡ ዘይትሀወክ፡ እምባሕር።
9 ተፀዐኑ፡ አፍራሰ፡ ወተረሰዩ፡ ሠረገላተ፡ ወይፃኡ፡ መስተቃላትን፡ ዘኢትዮጵያ፡ ወፉድ፡ ወሉድ፡ በንዋየ፡ ሐቅሎሙ፡ ተወልቲዎሙ፡ ወይንድፉ።
10 ወእይቲ፡ ዕለት፡ ለእግዚአብሔር፡ አምላክነ፡ ዕለተ፡ በቀል፡ በዘይትቤቀሎሙ፡ ለፀሩ።
11 ዕርጊ፡ ገለዓድ፡ ወንሥኢ፡ ርጢነ፡ ድንግል፡ ወለተ፡ ግብጽ፡ ለከንቱ፡ አብዛኅኪ፡ ፈውሰ፡ ዘለምንትሂ፡ አይበቊዐኪ።
12 ሰምዑ፡ አሕዛብ፡ ቃለኪ፡ ወመልአ፡ ምድረ፡ አውያትኪ፡ እስመ፡ ደክሙ፡ መስተቃትላን፡ ምስለ፡ መስተቃላን፡ ኅቡረ፡ ወድቁ፡ ኵሎሙ።
13 ቃለ፡ ዘነበበ፡ እግዚአብሔር፡ በእደ፡ ኤርምያስ፡ ነቢይ፡ ከመ፡ ይመጽእ፡ ናቡከደነፆር፡ ንጉሠ፡ ባቢሎን፡ ወይቀትላ፡ ለምድረ፡ ግብጽ።
14 ንግሩ፡ በግብጽ፡ ወዜንዉ፡ በመግዶሎን፡ ወአስምዑ፡ በሜንፍ፡ ወበጠፍናስ፡ ወበሉ፡ ቁሙ፡ ወተደለዉ፡ እስመ፡ በልዐት፡ ኵናት፡ ዐውደከ።
15 ለምንት፡ ተኀጥኡ፡ ኃያላኒከ፡ ወኢሀለዉ፡ እስመ፡ እግዚአብሔር፡ አድከሞሙ።
16 ወብዝኅከኒ፡ ደክመ፡ ወወድቀ፡ ወ፩፩፡ ይቤሎ፡ ለካልኡ፡ ተንሥእ፡ ንግባእ፡ ብሔረነ፡ ኀበ፡ ሕዝብነ፡ ወውስተ፡ ምድረ፡ ሙላድነ፡ እምገጸ፡ መጥባሕተ፡ አረሚ።
17 ወሰመይዎ፡ ስሞ፡ ለፈርዖን፡ ንጉሠ፡ ግብጽ፡ ኔካዑ፡ ሳኑን፡ ሔኤኬር፡ ሐሙኤድ።
18 ሕያው፡ አነ፡ ይቤ፡ እግዚአብሔር፡ ንጉሥ፡ ጸባኦት፡ ስሙ፡ ከመ፡ ኤጤቤርዮን፡ ዘውስተ፡ አድባር፡ ወከመ፡ ቀርሜሎስ፡ ዘውስተ፡ ባሕር፡ ይመጽእ።
19 ንዋይ፡ ዘአፍለሱ፡ ግባሪ፡ ለኪ፡ ወለተ፡ ግብጽ፡ እንተ፡ ትነብር፡ እስመ፡ ኖፍ፡ መዝበረ፡ ትከውን፡ እስመ፡ አልቦ፡ ዘይነብር፡ ውስቴታ።
20 እጐልት፡ ሠናይት፡ ግብጽ፡ እንተ፡ ነሥእዋ፡ እምደቡብ፡ ወአምጽእዋ።
21 ወዓሳቢሃ፡ ምስሌሃ፡ ከመ፡ አልህምተ፡ መጋዝዕት፡ እለ፡ የሐርስዎሙ፡ በውስቴታ፡ እስመ፡ እሙንቱኒ፡ ጐዩ፡ ወተሰውጡ፡ ኅቡረ፡ ወኢቆሙ፡ እስመ፡ በጽሐቶሙ፡ ዕለተ፡ ሞቶሙ፡ ወዓመተ፡ ይትቤቀልዎሙ።
22 ቃላ፡ ከመ፡ አርዌ፡ ምድር፡ እንተ፡ ተሐውር፡ በኃይል፡ ተሐውር፡ ወይመጽእዋ፡ በጕድብ፡ ከመ፡ ዘይሤፅር፡ ዕፀ።
23 ግዝሙ፡ ዖማ፡ ይቤ፡ እግዚአብሔር፡ እስመ፡ ትበዝኅ፡ እምአንበጣ፡ ወኢትትኌለቅ፡ ወአልቦ፡ ዓቅም።
24 ተኀፍረት፡ ወለተ፡ ግብጽ፡ ወገብአት፡ ውስተ፡ እደ፡ ሕዝብ፡ እለ፡ እምደቡብ።
25 ይቤ፡ እግዚአብሔር፡ ጸባኦት፡ አምላከ፡ እስራኤል፡ ናሁ፡ አነ፡ እትቤቀሎ፡ ለአሞንሜኖእ፡ ወለፈርዖን፡ ወለግብጽ፡ ወለአማልክቲሃ፡ ወለነገሥታ፡ ወለፈርዖን፡ ወለእለ፡ ይትዌከሉ፡ ቦቱ።
26 ወአገብኦሙ፡ ውስተ፡ እደ፡ እለ፡ የኀሥሥዋ፡ ለነፍሶሙ፡ ወውስተ፡ እደ፡ ናቡከደነፆር፡ ንጉሠ፡ ባቢሎን፡ ወውስተ፡ እደ፡ አግብርቲሁ፡ ወእምድኅረዝ፡ ትገብእ፡ ከመ፡ መዋዕል፡ ቀዲሙ፡ ይቤ፡ እግዚአብሔር።
27 ወአንተሰ፡ ገብርየ፡ ያዕቆብ፡ ኢትፍራህ፡ ወኢትደንግፅ፡ እስራኤል፡ እስመ፡ ናሁ፡ አነ፡ አድኅነከ፡ እምርኁቅ፡ ወለዘርእከኒ፡ እምኀበ፡ ፄወውዎሙ።
28 ኢትፍራህ፡ ገብርየ፡ ያዕቆብ፡ ይቤ፡ እግዚአብሔር፡ እስመ፡ አነ፡ ሀለውኩ፡ ምስሌከ።
=== chapter 47 ===
[Chapter 47]
1 ቃለ፡ እግዚአብሔር፡ ዘኮነ፡ ኀበ፡ ኤርምያስ፡ በእንተ፡ ኢሎፍሊ፡ ዘእንበለ፡ ይቅትላ፡ ፈርዖን፡ ለጋዛ።
2 ከመዝ፡ ይቤ፡ እግዚአብሔር፡ ናሁ፡ ማይ፡ የዐርግ፡ እምደቡብ፡ ወይከውን፡ ውኂዝ፡ ዘይደፍና፡ ወያሠጥማ፡ ለምድር፡ ወለሀገርኒ፡ በምልኣ፡ ወለእለ፡ ይነብሩ፡ ውስቴታ፡ ወየአወይዉ፡ ወይግዕሩ፡ ኵሉ፡ ሰብእ፡ ዘይነብር፡ ውስተ፡ ምድር።
3 እምድምፀ፡ መራደ፡ ኃያላኒሆሙ፡ ምስለ፡ ንዋየ፡ ሐቅሎሙ፡ ወእምድምፀ፡ መንኰራኵሩ፡ ወእምድልቅልቀ፡ ሠረገላቲሁ።
4 በዕለት፡ እንተ፡ ትመጽእ፡ ታጥፍኦሙ፡ ለኢሎፍሊ።
5 መጽአታ፡ ብርሐት፡ ለጋዛ፡ ወተገፍትዐት፡ አስቃሎና፡ ወእለሂ፡ ተርፉ፡ ውስተ፡ ኢማቂም።
6 ወይሌ፡ መጥባሕቱ፡ ለእግዚአብሔር፡ እስከ፡ ማእዜ፡ ኢታረምሚ፡ ግብኢ፡ ውስተ፡ ቀቀብኪ፡ ወአዕርፊ፡ ወአርምሚ።
7 እፎ፡ ታረምም፡ ዘእግዚአብሔር፡ አዘዘ፡ ላዕለ፡ አስቃሎን፡ ወላዕለ፡ ጰራልያስ፡ ዘባሕር፡ ህየ፡ ትነሣእ።
=== chapter 48 ===
[Chapter 48]
1 ዘበእንተ፡ ሞአብ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ወይሌ፡ ላዕለ፡ ናበው፡ እስመ፡ ጠፍአት፡ ወኀፍረት፡ ወተነሥአት፡ ቀርያታርም፡ ተኀፍረ፡ ጸወና፡ ወተመውአ።
2 አልባ፡ እንከ፡ ፈውስ፡ ለሞአብ፡ ላዕለ፡ ሐሴቦን፡ ሜጡ፡ ላዕሌሃ፡ እኩየ፡ ንዑ፡ ንምትራ፡ እምውስተ፡ አሕዛብ፡ ወኀዲገኒ፡ ትትኀደግ፡ እስመ፡ እምድኅሬሃ፡ ትመጽእ፡ ኵናት።
3 እስመ፡ ቃለ፡ እለ፡ ይዌውዑ፡ እምውስተ፡ አድባር፡ ቅጥቃጤ፡ ዓቢየ።
4 ተቀጥቀጠ፡ ሞአብ፡ ዜንዉ፡ ውስተ፡ ሴጎር።
5 እስመ፡ በዝኀ፡ ብካያ፡ እንዘ፡ የዐርጉ፡ ሉዊት።
6 ጕዩ፡ ወአድኅኑ፡ ነፍሰክሙ፡ ወንበሩ፡ ገዳመ፡ ከመ፡ ሐለስትዮ።
7 ወይነሥኡኪ፡ እስመ፡ ተወከልኪ፡ በምግባርኪ፡ ወበመዛግብትኪ፡ ወለኪኒ፡ ይእኅዙኪ፡ ወይወፅእ፡ ኮሞስ፡ ኀበ፡ ያፈልስዎ፡ ወገነውቱኒ፡ ወመላእክቲሁ፡ ኅቡረ።
8 ወይመጽእ፡ ተሠርዎ፡ ላዕለ፡ ኵሉ፡ አህጉር፡ ወአልቦ፡ ዘይድኅን፡ ይመውት፡ ዘውስተ፡ ሀገር፡ ወየኀልቅ፡ ዘውስተ፡ ገዳም፡ በከመ፡ ይቤ፡ እግዚአብሔር።
9 ሀቡ፡ ጽጌ፡ ለሞአብ፡ እስመ፡ ወፂአ፡ ትወፅእ፡ ወይመዘብር፡ ኵሉ፡ አህጉሪሃ፡ ወአልቦ፡ ዘይነብሮን።
10 ርጉመ፡ ለይኩን፡ ዘያሰትት፡ ግብረ፡ እግዚአብሔር፡ ወርጉም፡ ውእቱ፡ ዘይከልእ፡ መጥባሕቶ፡ እምደም።
11 ወአዕረፈት፡ ሞአብ፡ እምደቂቃ፡ ወተአመነ፡ ዓቃቢሁ፡ ወኢተሰውጠ፡ እምጸሕብ፡ ውስተ፡ ጻሕብ፡ ወኢሖረ፡ ወኢፈለሰ፡ በእንተ፡ ዝንቱ፡ ቆመ፡ ጣዕሙ፡ ወመዐዛሁኒ፡ የኀልቅ።
12 በእንተ፡ ዝንቱ፡ ናሁ፡ ይመጽእ፡ መዋዕል፡ ይቤ፡ እግዚአብሔር፡ እፌኑ፡ ሎቱ፡ ጠዋይያነ፡ ወይጠውይዎ፡ ወንዋዮሂ፡ ይቀጠቅጡ፡ ወይሰብሩ፡ አጽሕብቲሁ።
13 ወትትኀፈር፡ ሞአብ፡ እምነ፡ ኮሞስ፡ ከመ፡ ተኀፍረት፡ ቤተ፡ እስራኤል፡ እምነ፡ ቤቴል፡ ተስፋሆሙ፡ ዘተወከሉ፡ ቦሙ።
14 ወእፎ፡ ትብሉ፡ ጽኑዓን፡ ንሕነ፡ ዕደው፡ ኃያላን፡ በውስተ፡ ቀትል።
15 ወተሐጕለት፡ ሞአብ፡ በውስተ፡ ቀትል፡ ሀገሩ፡ ወኅሩያኒሁ፡ ወወራዙቱ፡ ወረዱ፡ ወተቀትሉ፡ ይቤ፡ እግዚአብሔር፡ ጸባኦት፡ ስሙ።
16 አልጸቀት፡ ትምጻእ፡ ተሐጕሎተ፡ ሞአብ፡ ወአፍጠነት፡ ጥቀ፡ እከዩሂ።
17 አንቀልቅሉ፡ ሎቱ፡ ኵልክሙ፡ እለ፡ ዐውዱ፡ ወኵልክሙ፡ እለ፡ ተአምሩ፡ ስሞ፡ በሉ፡ እፎ፡ ተቀጥቀጠት፡ ቀስታም፡ ጽንዕት፡ ወበትር፡ ዓቢይ።
18 ረዲ፡ እምነ፡ ክብርኪ፡ ወንበሪ፡ ውስተ፡ ርጡብ፡ ወለተ፡ ዴባን፡ ተቀጥቀጠት፡ ሞአብ፡ ዐርገ፡ ላዕሌኪ፡ ዘየኀሥሮ፡ ለአጽዋንኪ።
19 ቁሚ፡ ውስተ፡ ፍኖት፡ ወርእዪያ፡ ለእንተ፡ ትነብር፡ ውስተ፡ አሮኤል፡ ወተሰአልዮ፡ ለዘአምሠጠ፡ እንዘ፡ ይጐይይ፡ ወበልዮ፡ ምንተ፡ ኮነት።
20 ተኀፍረት፡ ሞአብ፡ ወተቀጥቀጠት፡ አውይዉ፡ ወገዐሩ፡ ወዜንዉ፡ ውስተ፡ አርኖን።
21 ወይመጽእ፡ ኵነኔ፡ ውስተ፡ ምድረ፡ ሜሳር፡ ወላዕለ፡ ከይሎን፡ ወኢያሳ፡ ወራባስ።
22 ወዴባን፡ ወናባው፡ ወላዕለ፡ ቤተ፡ ዴብላታ።
23 ወቀርያታርም፡ ወቤተ፡ ገማአብ፡ ወቤተ፡ ሜኦን።
24 ወቀርዮት፡ ወባሶር፡ ወላዕለ፡ ኵሉ፡ አህጉረ፡ ሞአብ፡ ዘቅሩብ፡ ወዘርኁቅ።
25 ወተሰብረ፡ ቀርነ፡ ሞአብ፡ ወቀጥቀጠት፡ እዴሁ፡ ይቤ፡ እግዚአብሔር።
26 አስከርዋ፡ እስመ፡ ተዐበየት፡ ላዕለ፡ እግዚአብሔር።
27 ወለእመ፡ ኢሰሐቅዋ፡ ትከውን፡ ለከ፡ እስራኤል፡ ከመ፡ ሰራቂ፡ ዘተረክበ፡ ለለተናገርከ፡ ባቲ፡ ትትሀወክ።
28 እስመ፡ ተኀድጉ፡ አህጉር፡ ወነበሩ፡ ውስተ፡ ኰኵሕ፡ እለ፡ ይነብሩ፡ ሞአብ፡ ወኮኑ፡ ከመ፡ ርግብ፡ እለ፡ የሐፅና፡ ውስተ፡ ኰኵሕ፡ ወውስተ፡ አፈ፡ ግበብ።
29 ሰማዕ፡ ጽዕለታ፡ ለሞአብ፡ ወዓቢየ፡ ኃሣረ፡ ዘአኅሠረ፡ ወትዕቦቶ፡ ዘአዕበየ፡ ልቦ።
30 ወአንሰ፡ አእመርኩ፡ ምግባሮሙ፡ ይቤ፡ እግዚአብሔር፡ ወአኮ፡ በአምጣነ፡ ኃይሉ፡ ዘገብረ፡ ከማሁ።
31 በእንተ፡ ዝንቱ፡ አአወዩ፡ ላዕለ፡ ሞአብ፡ እንተ፡ ኵለሄ፡ ወእግዕር፡ ላዕለ፡ ዕደወ፡ ቂራዲስ፡ አአወዩ።
32 ወብካየ፡ ኢያዜር፡ እበኪ፡ ለኪ፡ ወይነ፡ ሶባማ፡ አሕራግኪ፡ ዐደዉ፡ እምባሕር፡ ወእስከ፡ ባሕረ፡ ኢያዜር፡ በጽሑ፡ ላዕለ፡ ቀምሕኪ፡ ወላዕለ፡ ቀሥምቂ፡ ወረደ፡ ጥፋአት፡ ወአጥፍእዎ፡ ቀሠምት።
33 ወኀልቀ፡ ትፍሥሕት፡ ወኃሤት፡ እምከርሜል፡ ወእምድረ፡ ሞአብ፡ ወወይንሂ፡ እምነ፡ ምክያድ፡ ጠፍአ፡ ኢበነግህ፡ አልቦ፡ ዘይከይዱ፡ ወኢበሰርክ፡ አልቦ፡ ዘይገብሩ።
34 እምአውያተ፡ ሐሴቦን፡ እስከ፡ ኤሌዓል፡ ወእስከ፡ የሐፅ፡ ወሀቡ፡ ቃሎሙ፡ እምሴጎር፡ እስከ፡ ኃሮኔም፡ እጐልት፡ እንተ፡ ፫ክረምታ፡ እስመ፡ ማየ፡ ኔምሬም፡ ኮነ፡ በድወ።
35 ወአጠፍኦ፡ ለሞአብ፡ ይቤ፡ እግዚአብሔር፡ ወዘየዐርግ፡ ውስተ፡ ምሥዋዕ፡ ወዘየዐጥን፡ ለአማልክቲሁ።
36 በእንተ፡ ዝንቱ፡ ልብየ፡ ይነቁ፡ ለሞአብ፡ ከመ፡ ዕንዚራ፡ ወይልብየ፡ ላዕለ፡ ዕደወ፡ ቂራዲስ፡ ይነቁ፡ ከመ፡ ዕንዚራ፡ በእንተ፡ ዘገብረ።
37 እስመ፡ በርእሰ፡ ኵሉ፡ ሰብእ፡ ብርሐት፡ ‹‹፡ ወኵሉ፡ በሐውርት፡ ይትላጸዩ፡ ››፡ ወያአትቱ፡ ኵሎ፡ ጽሕሞሙ፡ ወይትቀጠቀጥ፡ ኵሉ፡ አእዳው፡ ወይቀንቱ፡ ሠቀ፡ ኵሎሙ፡ ውስተ፡ ሐቌሆሙ።
38 ውስተ፡ ኵሉ፡ አንሕስተ፡ ሞአብ፡ ወውስተ፡ ኵሉ፡ መርሕብሂ፡ ላሕ፡ እስመ፡ ቀጥቀጥክዋ፡ ለሞአብ፡ ከመ፡ ጻሕብ፡ ዘለምንትሂ፡ ኢይበቊዕ፡ ይቤ፡ እግዚአብሔር።
39 እፎ፡ ተለወጠት፡ ወሜጠት፡ ዘባና፡ ሞአብ፡ ወኮነት፡ ሰሐቀ፡ ወሥላቀ፡ ለኵሉ፡ አድያሚሃ።
40 እስመ፡ ከመዝ፡ ይቤ፡ እግዚአብሔር፡ ናሁ፡ ከመ፡ ንስር፡ ይሰርር፡ ወይሰፍሕ፡ ክነፊሁ፡ ኀበ፡ ሞአብ።
41 ተእኅዘት፡ ሐቌርዮት፡ ወተእኅዛ፡ አጽዋኒሃ፡ ወኮነ፡ ልበ፡ ሠራዊተ፡ ሞአብ፡ ውእቱ፡ አሚረ፡ ከመ፡ ልበ፡ ብእሲት፡ እንተ፡ ውስተ፡ ማሕምም።
42 ወትጠፍእ፡ ሞአብ፡ እምሕዝብ፡ እስመ፡ ተዐበየት፡ ላዕለ፡ እግዚአብሔር።
43 ፍርሃት፡ ወጸድፍ፡ ወመሥገርት፡ ላዕሌኪ፡ እንተ፡ ትነብር፡ ሞአብ፡ ይቤ፡ እግዚአብሔር።
44 ዘጐየ፡ እምገጸ፡ ፍርሃት፡ ይወድቅ፡ ውስተ፡ ጸድፍ፡ ወዘወፅአ፡ እምጸድፍ፡ ይእኅዞ፡ መሥገርት፡ እስመ፡ ዘንተ፡ አመጽእ፡ ላዕለ፡ ሞአብ፡ በዓመተ፡ እሔውጾሙ፡ ይቤ፡ እግዚአብሔር።
45 ውስተ፡ ጽላሎተ፡ ሐሴቦን፡ ቆሙ፡ እለ፡ ጐዩ፡ እምቀትል፡ እስመ፡ እሳት፡ ወፅአት፡ እምሐሴቦን፡ ወነድ፡ እማእከለ፡ ሴዎን፡ ወበልዐት፡ ገጸ፡ ሞአብ፡ ወርእሰ፡ ደቂቀ፡ ሳኦን።
46 አሌ፡ ለኪ፡ ሞአብ፡ ተሐጕለ፡ ሕዝበ፡ ኮሞስ፡ እስመ፡ ተነሥኡ፡ ደቂቅኪ፡ በተፄውዎ፡ ወአዋልድኪ፡ ተፄወዋ።
47 ወእመይጥ፡ ፄዋ፡ ሞአብ፡ በደኃሪ፡ መዋዕል፡ ይቤ፡ እግዚአብሔር፡ እስከ፡ ዝየ፡ ኵነኔ፡ ሞአብ።
=== chapter 49 ===
[Chapter 49]
1 በእንተ፡ ደቂቀ፡ አሞን፡ ከመዝ፡ ይ፡ እግዚአብሔር፡ አልቦ፡ ኑ፡ ደቂቅ፡ በውስተ፡ እስራኤል፡ ወአልቦኑ፡ ዘይወርስ፡ እምኔሆሙ፡ ከመ፡ ይረሶ፡ ሞሎክ፡ ለጋድ፡ ወሕዝቡ፡ ውስተ፡ አህጉሪሁ፡ ይንበር።
2 በእንተ፡ ዝንቱ፡ ናሁ፡ ይመጽእ፡ መዋዕል፡ ይቤ፡ እግዚአብሔር፡ ወአሰምዕ፡ ሀከከ፡ ወውዓ፡ ቀትል፡ ላዕለ፡ ራቦት፡ ዘደቂቀ፡ አሞን፡ ወይከውኑ፡ ለሐጕል፡ በድወ፡ ወአዋልዲሃ፡ ይውዕያ፡ በእሳት፡ ወይወርሶ፡ እስራኤል፡ ለወራሲ፡ ይቤ፡ እግዚአብሔር።
3 አውይዊ፡ ሐሴቦን፡ እስመ፡ ኀለፈት።
4 ምንተ፡ ትትኀሠዪ፡ ጠፍአ፡ ቈላትኪ፡ ወለት፡ ዕሉት፡ እንተ፡ ትትአመን፡ በመዛግብቲሃ፡ ወትብል፡ አልቦ፡ ዘይበውእ፡ ኀቤየ።
5 ናሁ፡ አመጽእ፡ አነ፡ ድንጋፄ፡ ላዕሌኪ፡ ይቤ፡ እግዚአብሔር፡ እግዚእ፡ ጸባኦት፡ እምኵሉ፡ ዐውድኪ፡ ወተዘርወ፡ ብእሲ፡ ቅድመ፡ ገጹ፡ ወአልቦ፡ ዘያስተጋብእ፡ ዘሖረ።
6 ወእምድኅረ፡ ዝንቱ፡ እመይጥ፡ ፄዋ፡ አሞን፡ ይቤ፡ እግዚአብሔር።
7 በእንተ፡ ኤዶምያስ፡ ከመዝ፡ ይቤ፡ እግዚአብሔር፡ ጸባኦት፡ አልቦ፡ እንከ፡ ጠቢብ፡ በውስተ፡ ቴማን፡ ወተኀጥአት፡ ምክር፡ እምደቂቃ፡ ወጠፍአ፡ ጥበቦሙ።
8 ወኬድዎ፡ ለብሔሮሙ፡ ጕዩ፡ ወተመየጡ፡ ወአዕምቁ፡ ለነቢር፡ እለ፡ ትነብሩ፡ ዴዳን፡ እስመ፡ ዕፁበ፡ ግብረ፡ አምጻእኩ፡ ላዕሌሁ፡ በዕለተ፡ እዋህዮ።
9 እመ፡ መጽኡ፡ እለ፡ ይቀሥሙ፡ እምኢያትረፉኑ፡ ለከ፡ ተቅራመ፡ ወእመኒ፡ ሰረቅት፡ በሌሊት፡ እምኢያጥፍኡኑ፡ ዘየአክሎሙ።
10 እስመ፡ አነ፡ ከሠትክዎ፡ ለኤሳው፡ ወከሠትኩ፡ ኅቡኣቲሁ፡ ወኢይክል፡ እንከ፡ ተኀብኦ፡ ግሙራ፡ ተቀጥቀጠ፡ ዘርኡ፡ ወኢሀለዉ፡ እኁሁ፡ ወጎሩ፡ ወአልቦ።
11 ተረፈ፡ ለእጓለ፡ ማውታከ፡ በዘየሐዩ፡ ወአንሰ፡ አሐዩ፡ ወመበለታቲከ፡ ላዕሌየ፡ ይትዌከላ።
12 እስመ፡ ከመዝ፡ ይቤ፡ እግዚአብሔር፡ ናሁ፡ ዘኢኮነ፡ ኵነኔ፡ ለሰትየ፡ ጽዋዕ፡ ሰትየ፡ ይሰትዩ፡ ወአንተኑ፡ ነጺሐ፡ ትነጽሕ፡ ኢትነጽሕ፡ እንከ፡ እስመ፡ ሰትየ፡ ትሰቲ።
13 እስመ፡ በርእስየ፡ መሐልኩ፡ ይቤ፡ እግዚአብሔር፡ ከመ፡ ትከውን፡ ዓፀ፡ ወጽዕለተ፡ ወለመርገም፡ ትከውን፡ ባሶር፡ ወኵሉ፡ አህጉሪሃ፡ ይከውና፡ መዝበረ፡ ለዓለም።
14 ሰሚዐ፡ ሰማዕኩ፡ እምኀበ፡ እግዚአብሔር፡ ከመ፡ ፈነወ፡ ሐዋርያተ፡ ውስተ፡ በሐውርተ፡ አሕዛብ፡ ይትጋብኡ፡ ወይምጽኡ፡ ላዕሌሃ፡ ወይትነሥኡ፡ ወይትቃተልዋ።
15 ኅዳጠ፡ ረሰይኩከ፡ በኀበ፡ አሕዛብ፡ ከመ፡ ይመንኑከ፡ ወያስተአክዩከ፡ ሰብእ።
16 ተውኔትከ፡ አስተናሥአከ፡ ወትዕቢተ፡ ልብከ፡ ዘየኀድር፡ መልዕልተ፡ ኰኵሕ፡ ወይእኅዝ፡ መልዕልተ፡ ወግር፡ ልዑል፡ እስመ፡ አስረርከ፡ እጐሊከ፡ ከመ፡ ንስር፡ እምህየ፡ አጸድፈከ፡ ይቤ፡ እግዚአብሔር።
17 ወትከውን፡ ኤዶምያስ፡ ከመ፡ ዓፅ፡ ኵሉ፡ ዘየኀልፍ፡ እንተ፡ ህየ፡ ይደነግፅ፡ ወይትፋጸይ፡ በእንተ፡ ኵሉ፡ መቅሠፍታ።
18 ከመ፡ ተገፍትዑ፡ ሰዶም፡ ወገሞራ፡ ወአድያሚሃ፡ ይቤ፡ እግዚአብሔር፡ ዘኵሎ፡ ይመልክ፡ ወኢይነብር፡ ህየ፡ ሰብእ፡ ወኢየኀድር፡ ህየ፡ እጓለ፡ እመሕያው።
19 ናሁ፡ የዐርግ፡ ከመ፡ አንበሳ፡ እምዕበየ፡ ዮርዳኖስ፡ ውስተ፡ ብሔረ፡ ኤታም፡ እስመ፡ ፍጡነ፡ እሰድዶሙ፡ እምኔሃ፡ ወወራዙተ፡ እሠይም፡ ላዕሌሃ፡ መኑ፡ ከማየ፡ ወመኑ፡ ይትቃወመኒ፡ ወመኑዝ፡ ኖላዊ፡ ዘይትቃወም፡ ቅድመ፡ ገጽየ።
20 በእንተ፡ ዝንቱ፡ ስምዑ፡ ምክረ፡ እግዚአብሔር፡ ዘመከረ፡ ላዕለ፡ ኤዶምያስ፡ ወሕሊናሁ፡ ዘሐለየ፡ ላዕለ፡ እለ፡ ይነብሩ፡ ቴማን፡ እመ፡ ኢሐብለይዎሙ፡ ለትሑታን፡ አባግዕ፡ ወኢረሰይዎ፡ ዓፀ፡ ለማኅደሮሙ፡ ዘውስቴታ።
21 እስመ፡ ደንገፀት፡ ምድር፡ እምነ፡ ድምፀ፡ ድቀቶሙ፡ ወድምፀ፡ ባሕር፡ ኢተሰምዐ።
22 ናሁ፡ ከመ፡ ንስር፡ ይሰርር፡ ወይኔጽር፡ ወይሰፍሕ፡ ክነፊሁ፡ ላዕለ፡ ባሶር፡ ወይከውን፡ ልቦሙ፡ ለጽኑዓነ፡ ኤዶምያስ፡ በይእቲ፡ ዕለት፡ ከመ፡ ልበ፡ ብእሲት፡ እንተ፡ ውስተ፡ ማሕምም።
23 ዘበእንተ፡ ደማስቆ፡ ተኀፍራ፡ ኤርማት፡ ወአርፋድ፡ እስመ፡ እኩየ፡ ነገረ፡ ሰምዓ፡ ወደንገፃ፡ ከመ፡ ባሕር፡ ወተምዕዓ፡ ወኢይክላ፡ እንከ፡ አዕርፎ።
24 ተመስወት፡ ደማስቆ፡ ወመምዐት፡ ወጐየት፡ ወአኀዛ፡ ረዓድ፡ ወአኀዛ፡ ማሕምም፡ ከመ፡ እንተ፡ ትወልድ።
25 እፎ፡ ኢኀደጉ፡ ሀገረ፡ ላቲ፡ ወዐጸደ፡ ዘአፍቀሩ።
26 በእንተ፡ ዝንቱ፡ ይወድቁ፡ ወራዙቲሃ፡ ውስተ፡ መርሕባ፡ ወይወድቁ፡ ዕደውኪ፡ መስተቃትላን፡ ይእተ፡ አሚረ፡ ይቤ፡ እግዚአብሔር።
27 ወአነድድ፡ እሳተ፡ ላዕለ፡ አረፋቲሃ፡ ለደማስቆ፡ ወትበልዕ፡ አብድንቲሁ፡ ለወልደ፡ አዴር።
28 ዘበእንተ፡ ቄዳር፡ ወለነገሥተ፡ አዕፃዳት፡ እንተ፡ ቀተለ፡ ናቡከደነፆር፡ ንጉሠ፡ ባቢሎን፡ ከመዝ፡ ይቤ፡ እግዚአብሔር፡ ተንሥኡ፡ ወዕርጉ፡ ላዕለ፡ ቄዳር፡ ወአጥፍእዎሙ፡ ለደቂቀ፡ ቄዴም።
29 ተዓይኒሆሙኒ፡ ወአባግዒሆሙኒ፡ ይንሥኡ፡ ወራዕይሆሙ፡ ወኵሎ፡ ንዋዮሙ፡ ወአግማሊሆሙኒ፡ ይንሥኡ፡ ለርእሶሙ፡ ወጸውዑ፡ ፈላሴ፡ እምአድያም።
30 ወጕዩ፡ ወተሀወኩ፡ ጥቀ፡ አዕምቁ፡ ለነቢር፡ እለ፡ ትነብሩ፡ ውስተ፡ አዕፃዳት፡ ይቤ፡ እግዚአብሔር፡ እስመ፡ መከረ፡ ላዕሌክሙ፡ ንጉሠ፡ ባቢሎን፡ ምክረ፡ ወሐለየ፡ ሕሊና፡ እኩየ።
31 ተንሥኡ፡ ወዕርጉ፡ ላዕለ፡ ሕዝብ፡ ዘሠናየ፡ ይቀውም፡ ወዕሩፈ፡ ይነብር፡ ይቤ፡ እግዚአብሔር፡ እለ፡ አልቦሙ፡ ማዕጾ፡ ወኢመንሠግ፡ ወኢመዝግሕ፡ አላ፡ ባሕቲቶሙ፡ ይነብሩ።
32 ወይከውኑ፡ አግማሊሆሙ፡ ለምህርካ፡ ወእንስሳሆሙ፡ ለፄዋ፡ ወየሐፍሶሙ፡ ኵሉ፡ ነፋስ፡ ቅሩጻነ፡ ገጽ፡ ወአመጽእ፡ ሐጕሎሙ፡ ይቤ፡ እግዚአብሔር።
33 ወይከውን፡ አዕፃዳቲሆሙ፡ ማኅደረ፡ ለአዕዋፍ፡ ወዓፀ፡ ዘለዓለመ፡ ዓለም፡ ህየ፡ ሰብእ፡ ወኢየኀድር፡ ህየ፡ እጓለ፡ እመሕያው።
34 ቃለ፡ እግዚአብሔር፡ ዘኮነ፡ ኀበ፡ ኤርምያስ፡ ነቢይ፡ በእንተ፡ ኤላም፡ በቀዳሚ፡ መንግሥቱ፡ ለሴዴቅያስ፡ ንጉሠ፡ ይሁዳ፡ ወይቤ።
35 ከመዝ፡ ይቤ፡ እግዚአብሔር፡ ጸባኦት፡ ናሁ፡ እሰብር፡ ቀስተ፡ ኤላም፡ ቀዳሜ፡ ኃይሎሙ።
36 ወአመጽእ፡ ላዕለ፡ ኤላም፡ ፬ነፋሳተ፡ እም፬አጽናፈ፡ ሰማይ፡ ወእዘርዎሙ፡ ውስተ፡ ኵሉ፡ ነፋሳት፡ ወአልቦ፡ ሕዝብ፡ ዘኢይመጽእ፡ ህየ፡ እለ፡ ተሰዱ፡ እምኤላም።
37 ወአደነግፆሙ፡ ለኤላም፡ በቅድመ፡ ኵሉ፡ ፀሮሙ፡ ወበቅድመ፡ እለ፡ የኀሥሠዋ፡ ለነፍሶሙ፡ ወአመጽእ፡ መቅሠፍተ፡ ነዐትየ፡ ላዕሌሆሙ፡ ይቤ፡ እግዚአብሔር፡ ወአመጽእ፡ መጥባሕተ፡ ዲቤሆሙ፡ እስከ፡ አኀልቆሙ።
38 ወአነብር፡ መንበርየ፡ ውስተ፡ ኤላም፡ ወአጠፍእ፡ እምህየ፡ ነገሥተ፡ ወመሳፍንተ፡ ይቤ፡ እግዚአብሔር።
39 ወይከውን፡ በደኃሪ፡ መዋዕል፡ ወእመይጥ፡ ፄዋ፡ ኤላም፡ ይቤ፡ እግዚአብሔር።
=== chapter 50 ===
[Chapter 50]
1 ቃለ፡ እግዚአብሔር፡ ዘነበበ፡ ላዕለ፡ ባቢሎን፡ ኀበ፡ ምድረ፡ ከላዴዎን፡ በእደ፡ ኤርምያስ፡ ነቢይ።
2 ንግርዎሙ፡ ለአሕዛብ፡ ወአስምዑ፡ ወአንሥኡ፡ ትእምርተ፡ ወኢትክብቱ።
3 እስመ፡ ዐርጉ፡ ላዕሌሃ፡ ሕዝብ፡ ዘእምሰሜን።
4 ውእተ፡ አሚረ፡ ወበእማንቱ፡ መዋዕል፡ ይቤ፡ እግዚአብሔር፡ ይመጽኡ፡ ደቂቀ፡ እስራኤል፡ እሙንቲሂ፡ ወደቂቀ፡ ይሁዳ፡ ኅቡረ፡ የሐውሩ፡ እንዘ፡ ይበክዩ፡ የኀሥሥዎ፡ ለእግዚአብሔር፡ አምላኮሙ።
5 ጽዮንሃ፡ የሐትቱ፡ ፍኖቶ፡ ወገጾሙ፡ ለፌ፡ ይመይጢ፡ ወይነጽኡ፡ ወይትመሐፀኑ፡ ኀበ፡ እግዚአብሔር፡ አምላኮሙ፡ እስመ፡ ኪዳን፡ ዘለዓለም፡ ኢይትረሳዕ።
6 አባግዓ፡ ግዱፋነ፡ ኮኑ፡ ሕዝብየ፡ ኖሎቶሙ፡ አንጎገውዎሙ፡ ውስተ፡ አድባር፡ ወገደፍዎሙ፡ ወአንጎገዉ፡ እምደብር፡ ውስተ፡ ወግርሖሩ፡ ወረስዑ፡ ማኅደሮሙ።
7 ኵሉ፡ ዘረከበ፡ የኀልቆሙ።
8 ፃኡ፡ እማእከለ፡ ባቢሎን፡ ወእምድረ፡ ፋርስ፡ ይወፅኡ፡ ወይከውኑ፡ ከመ፡ አክይስት፡ በቅድመ፡ ገጸ፡ አባግዕ።
9 እስመ፡ ናሁ፡ አነሥእ፡ ወአዐርግ፡ ላዕለ፡ ባቢሎን፡ ሠራዊተ፡ አሕዛብ፡ ዓበይተ፡ እምድረ፡ ሰሜን፡ ወይትቃተልዋ፡ በህየ፡ ወይእኅዝዎሙ፡ ከመ፡ ሐፀ፡ መስተቃትል፡ ነዳፊ፡ ዘኢይሰወጥ፡ ዕራቁ።
10 ወይትበረበሩ፡ ፋርስ፡ ወኵሎሙ፡ እለ፡ ማህረኩኪ፡ ይጸግቡ፡ ይቤ፡ እግዚአብሔር።
11 እስመ፡ ተፈሣሕክሙ፡ ወተቈናደይክሙ፡ እስመ፡ ፄወውክምዎሙ፡ ለርስትየ፡ እስመ፡ ፈሐልኪ፡ ከመ፡ እጐልት፡ በኀበ፡ ምቅምሕ፡ ወወጋእኪዮሙ፡ ከመ፡ አሥዋር።
12 ተኀፍረት፡ እምክሙ፡ ጥቀ፡ ወተኀፍረት፡ ወላዲትክሙ፡ ናሁ፡ አኀሪተ፡ አሕዛብ፡ ማሰነት፡ ወበድወት፡ ወመዝበረት።
13 እመዐተ፡ እግዚአብሔር፡ ወኢትሄሉ፡ እንከ።
14 ተቃተልዋ፡ ለባቢሎን፡ ወዕግትዋ፡ ኵልክሙ፡ ወስቁ፡ ቀስተክሙ፡ ላዕሌሃ፡ ወንድፍዋ፡ ወኢትትሀከዩ፡ ነዲፎታ፡ እስመ፡ ላዕለ፡ እግዚአብሔር፡ አበሰት።
15 ዕግትዋ፡ እስመ፡ ደክመ፡ እደዊሃ፡ ወወድቀ፡ ጥቅማ፡ ወንኅለ፡ አረፋቲሃ፡ እስመ፡ እምኀበ፡ እግዚአብሔር፡ ይትቤቀልዋ፡ በቀለ፡ ወበከመ፡ ገብረት፡ ግበርዋ።
16 ወሠርዉ፡ ዘርኦሙ፡ ለባቢሎን፡ ወይእኅዝ፡ ማዕፀደ፡ በመዋዕለ፡ ማእረር፡ እምገጸ፡ መጥባሕተ፡ ዮናናዊ፡ ይሰወጥ፩፩ውስተ፡ ሕዝቡ፡ ወ፩፩ይእቱ፡ ብሔሮ።
17 በግዕ፡ ዘተገድፈ፡ እስራኤል፡ አናብስት፡ ዘረውዎ።
18 በእንተ፡ ዝንቱ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ናሁ፡ እትቤቀሎ፡ ለንጉሠ፡ ባቢሎን፡ ወለምድሩ፡ በከመ፡ ተበቀልክዎ፡ ለንጉሠ፡ ፋርስ።
19 ወእሰውጦ፡ ለእስራኤል፡ ውስረ፡ ፂኦቱ፡ ወይትረዐይ፡ ውስተ፡ ቀርሜሎስ፡ ወባሳን፡ ወውስተ፡ ደብረ፡ ኤፍሬም፡ ወውስተ፡ ገለዓድ፡ ወትጸግብ፡ ነፍሱ።
20 በእማንቱ፡ መዋዕል፡ ወበውእቱ፡ ጊዜ፡ ይቤ፡ እግዚአብሔር፡ የኀሥሥዋ፡ ለኃጢአተ፡ እስራኤል፡ ወኢትሄሉ፡ ወጌጋዩ፡ ለይሁዳ፡ ወኢትትረከብ፡ እስመ፡ እሠሀሎሙ፡ ለእለ፡ ተርፉ።
21 ውስተ፡ ምድር።
22 ውውዓ፡ ወቀትል፡ ወዓቢይ፡ ቅጥቃጤ፡ በምድር።
23 እፎ፡ ተቀጥቀጠት፡ ወተሰብረት፡ እንተ፡ ትፈጽሖ፡ ለኵሉ፡ ምድር፡ ወእፎ፡ ኮነት፡ ሙስንተ፡ ባቢሊን፡ በውስተ፡ አሕዛብ።
24 ተቀጥቀጥኪ፡ ወተእኅዝኪ፡ ባቢሎን፡ ወአንቲሂ፡ ኢያእመርኪ፡ ተረከብኪ፡ ወተእኅዝኪ፡ እስመ፡ ለእግዚአብሔር፡ ተቃወምኪዮ።
25 አርኀወ፡ እግዚአብሔር፡ መዝገቦ፡ ወአውፅአ፡ ንዋየ፡ መዐቱ፡ እስመ፡ እግዚአብሔር፡ አምላክ፡ ጸባኦት፡ ይገብር፡ በምድረ፡ ፋርስ።
26 እስመ፡ በጽሐ፡ ዕድሜሃ፡ አርኅዉ፡ መዛግብቲሃ፡ ፍትንዋ፡ ከመ፡ በአት፡ ወሠርውዋ፡ ወኢታትርፉ፡ ላቲ፡ ወኢምንተኒ።
27 ወአይብሱ፡ ኵሎ፡ ፍሬሃ፡ ወይረዱ፡ ወይትቃተሉ፡ አሌ፡ ሎሙ፡ እስመ፡ በጽሐቶሙ፡ ዕለቶሙ፡ ወጊዜ፡ ይትቤቀልዎ።
28 ቃለ፡ እለ፡ ይጐይዩ፡ ወአምሠጡ፡ እምድረ፡ ባቢሎን፡ ከመ፡ ይዜንዉ፡ በጽዮን፡ በቀለ፡ እግዚአብሔር፡ አምላክነ፡ ወበቀለ፡ መቅደሱ።
29 አስምዑ፡ ውስተ፡ ባቢሎን፡ ብዙኃን፡ እንተ፡ ኵለሄ፡ ይነድፍዋ፡ ወየዐግትዋ፡ ተዓይን፡ ወአልቦ፡ ዘያመሥጥ፡ እምኔሃ፡ ወተበቀልዋ፡ በከመ፡ ምግባራ፡ ወኵሎ፡ በከመ፡ ገብረት፡ ይግበርዋ፡ እስመ፡ ተቃወመቶ፡ ለእግዚአብሔር፡ አምላክ፡ ቅዱሰ፡ እስራኤል።
30 በእንተ፡ ዝንቱ፡ ይወድቁ፡ ወራዙቲሃ፡ በውስተ፡ መርሕባ፡ ወኵሎሙ፡ ዕደዊሃ፡ መስተቃትላን፡ ይትገደፋ፡ ውእተ፡ አሚረ፡ ይቤ፡ እግዚአብሔር።
31 ናሁ፡ አነ፡ ላዕሌኪ፡ ጽዕልት፡ ይቤ፡ እግዚአብሔር፡ ጸባኦት፡ እስመ፡ በጽሐ፡ ዕለትኪ፡ ወጊዜ፡ ይትቤቀሉኪ።
32 ወትደክሚ፡ ኅሥርት፡ ወትወድቂ፡ ወአልቦ፡ ዘያነሥአኪ፡ ወአነድድ፡ እሳተ፡ ውስተ፡ ዖምኪ፡ ወበልዕ፡ ኵሎ፡ ዘዐውድኪ።
33 ከመዝ፡ ይቤ፡ እግዚአብሔር፡ ጸባኦት፡ ተዐገልዎሙ፡ ለደቂቀ፡ እስራኤል፡ ወለደቂቀ፡ ይሁዳ፡ ኅቡረ፡ ወኵሎሙ፡ እለ፡ ፄወውዎሙ፡ ተኀየልዎሙ፡ ወአበዩ፡ ፈንዎቶሙ።
34 ወዘያድኅኖሙሰ፡ ኃያል፡ እግዚአብሔር፡ ዘኵሎ፡ ይመልክ፡ ስሙ፡ ቅሥተ፡ ይሳነኖሙ፡ ለእድዋኒሁ፡ ከመ፡ ታርምም፡ ምድር፡ ወያደነግፅዎሙ፡ ለእለ፡ ይነብሩ፡ ባቢሎን።
35 መጥሕባት፡ ላዕለ፡ ፋርስ፡ ይቤ፡ እግዚአብሔር፡ ወላዕለ፡ እለ፡ ይነብሩ፡ ባቢሎን፡ ወላዕለ፡ መሳፍንቲሃ፡ ወዲበ፡ ጠቢባኒሃ።
36 መጥባሕት፡ ላዕለ፡ መስተቃትላኒሃ፡ ወይደክሙ።
37 መጥባሕት፡ ላዕለ፡ አፍራሲሃ፡ ወላዕለ፡ ሠረገላቲሃ፡ መጥባሕት፡ ላዕለ፡ ኃያላኒሃ፡ ወላዕለ፡ እለ፡ ተደመሩ፡ ማእከላ፡ ወይከውኑ፡ ከመ፡ አንሰት፡ መጥባሕት፡ ላዕለ፡ መዛግብቲሃ፡ ወይዘረዉ።
38 መጥባሕት፡ ላዕለ፡ ማያቲሃ፡ ወይየብሱ፡ እስመ፡ ምድረ፡ ግልፎዋት፡ ይእቲ፡ ወይትቈናደዩ፡ ውስተ፡ ደሰያቲሃ።
39 በእንተ፡ ዝንቱ፡ ይነብሩ፡ ጺም፡ ምስለ፡ ኢም፡ ወየኀድራ፡ አዋልደ፡ ጼዴነታት፡ ወኢትሄሉ፡ እንከ፡ ለዓለም፡ ወኢይነብርዋ፡ ለትውልደ፡ ትውልድ።
40 በከመ፡ ገፍትዖን፡ እግዚአብሔር፡ ለሰዶም፡ ወለገሞራ፡ ወለአድያሚሆን፡ ይቤ፡ እግዚአብሔር፡ ወኢይነብር፡ እንከ፡ ሰብእ፡ ህየ፡ ወኢየኀድር፡ ባቲ፡ እጓለ፡ እመሕያው።
41 ናሁ፡ ይመጽእ፡ ሕዝብ፡ እምድረ፡ ደቡብ፡ ወዓቢይ፡ ሠራዊት፡ ወነገሥትሂ፡ ብዙኃን፡ ይትነሥኡ፡ እምአጽናፈ፡ ምድር።
42 ወቦሙ፡ ቀስት፡ ወቢዶን፡ ዘይእኅዙ፡ ተባዓን፡ እሙንቱ፡ ወኢይምሕሩ፡ ውውዓኒሆሙኒ፡ ከመ፡ ድምፀ፡ ባሕር፡ ይደምፁ፡ ወይፄዐኑ፡ በአፍራሲሆሙ፡ ወይትቃተሉኪ፡ ከመ፡ እሳት፡ ወለተ፡ ባቢሎን።
43 ወሰምዐ፡ ንጉሠ፡ ባቢሎን፡ ውውዒሆሙ፡ ወተመስወ፡ እደዊሁ፡ ወአኀዞ፡ ሕማም፡ ከመ፡ ማሕምም፡ እንተ፡ ትወልድ።
44 ናሁ፡ የዐርግ፡ ከመ፡ አንበሳ፡ እማዕዶተ፡ ዮርዳኖስ፡ ውስተ፡ ምድረ፡ ኤታን፡ እስመ፡ ፍጡነ፡ እሰድዶሙ፡ እምኔሃ፡ ወአቀውሞሙ፡ ላዕሌሃ፡ ለኵሉ፡ ወራዙት፡ እስመ፡ አልቦ፡ ከማየ፡ ወመኑ፡ ዘይትቃወመኒ፡ ወመኑ፡ ኖላዊ፡ ዘይቀውም፡ ቅድመ፡ ገጽየ።
45 በእንተ፡ ዝንቱ፡ ስምዑ፡ ምክሮ፡ ለእግዚአብሔር፡ ዘመከረ፡ ላዕለ፡ ባቢሎን፡ ወሕሊናሁ፡ ዘሐለየ፡ ላዕለ፡ ፋርስ፡ ለእመ፡ ኢያማሰኑ፡ መሐስአ፡ አባግዒሆሙ፡ ወእመ፡ ኢያማሰኑ፡ መርዔተ፡ እምኔሆሙ።
46 እስመ፡ እምውውዓሆሙ፡ ለእለ፡ ያሠግርዋ፡ ለባቢሎን፡ አድለቅለቀት፡ ምድር፡ ወተሰምዐ፡ ውውዓሆሙ፡ ለአሕዛብ።
=== chapter 51 ===
[Chapter 51]
1 ከመዝ፡ ይቤ፡ እግዚአብሔር፡ ናሁ፡ አነ፡ እነሥእ፡ ነፋሰ፡ ወመርቄ፡ ላዕለ፡ ባቢሎን፡ ወዲበ፡ እለ፡ ይነብሩ፡ ዘያማስኖሙ።
2 ወእፌኑ፡ ለባቢሎን፡ ጸዓልያነ፡ ወይጼዕልዋ፡ ወያረኵስዋ፡ ለምድራ።
3 ለይስሐብ፡ ዘይዌስት፡ ቀስቶ፡ ወይትሬሰይ፡ በንዋየ፡ ሐቅሉ፡ ወኢትምሐኩ፡ ወራዙቲሃ፡ ወአማስኑ፡ ኵሎ፡ ኃይላ።
4 ወይወድቁ፡ ቅቱላን፡ በምድረ፡ ፋርስ፡ ወርጉዛንሂ፡ በአፍአሃ።
5 እስመ፡ ኢኮነት፡ መበለተ፡ ወለተ፡ እስራኤል፡ ወይሁዳሂ፡ እምአምላኩ፡ እግዚአብሔር፡ ጸባኦት፡ እስመ፡ መልአት፡ ምድሮሙ፡ ዓፀ፡ እምቅዱሰ፡ እስራኤል።
6 ጕዩ፡ እማእከለ፡ ባቢሎን፡ ወአድኅኑ፡ ነፍሰክሙ፡ ፩፩እምኔክሙ፡ ወኢትትገደፉ፡ በኃጢአታ፡ እስመ፡ መዋዕለ፡ ይትቤቀልዋ፡ ውእቱ፡ እምኀበ፡ እግዚአብሔር፡ ወይፈድያ፡ ውእቱ፡ በከመ፡ ፍዳሃ።
7 ጽዋዓ፡ ወርቅ፡ ይእቲ፡ ባቢሎን፡ ውስተ፡ እደ፡ እግዚአብሔር፡ ወታሰክራ፡ ለኵሉ፡ ምድር፡ እምነ፡ ወይነ፡ መንሱታ፡ ሰትዩ፡ አሕዛብ፡ በእንተ፡ ዝንቱ፡ ተንተኑ፡ አሕዛብ።
8 ወግብተ፡ ወድቀት፡ ባቢሎን፡ ወተቀጥቀጠት።
9 ፈወስናሃ፡ ለባቢሎን፡ ወኢሐይወት፡ ንኅድጋ፡ እንከሰ፡ ወንእቱ፡ ኵልነ፡ ብሔረነ፡ እስመ፡ በጽሐ፡ እስከ፡ ሰማይ፡ ኵነኔሃ፡ ወሖረ፡ እስከ፡ ከዋክብት።
10 ወአውፅአ፡ እግዚአብሔር፡ ፍትሐነ።
11 አስተዳልዉ፡ ሐፀክሙ፡ ምልኡ፡ ምጕንጳክሙ።
12 ንሠኡ፡ ትእምርተ፡ ላዕለ፡ አረፋቲሃ፡ ለባቢሎን፡ ጽንዑ፡ ምስለ፡ ምጕንጳክሙ፡ ወአንሥኡ፡ ዓስባቢሃ፡ ወአስተዳልዉ፡ ንዋየ፡ ሐቅልክሙ፡ እስመ፡ እግዚአብሔር፡ አኀዘ፡ ይግበር፡ ዘነበበ፡ ላዕለ፡ እለ፡ ይነብሩ፡ ባቢሎን።
13 እለ፡ የኀድሩ፡ በማይ፡ ብዙኅ፡ ወብዝኀተ፡ መዛግብት።
14 እስመ፡ መሐለ፡ እግዚአብሔር፡ በርእሱ፡ ከመ፡ ይመልእ፡ ላዕሌኪ፡ ሰብአ፡ ከመ፡ አንበጣ፡ ወይረውፁ፡ ላዕሌኪ፡ እንዘ፡ ይረውዱ።
15 ዘፈጠራ፡ ለምድር፡ በኃይሉ፡ ወአጽንዓ፡ ለዓለም፡ በጥበቡ፡ ወበምክሩ፡ ሰፍሖ፡ ለሰምይ።
16 ወገብረ፡ ቃለ፡ ድምፀ፡ ማያት፡ በሰማይ፡ ወአዕረገ፡ ደመናተ፡ እምአጽናፈ፡ ምድር፡ ወገብረ፡ መባቅተ፡ ለጊዜ፡ ዝናም፡ ወአውፅአ፡ ነፋሳተ፡ እምነ፡ መዛግብቲሁ።
17 ወለስሐ፡ ምክረ፡ ኵሉ፡ ሰብእ፡ ወተኀፍረ፡ ኵሉ፡ ነሀቢ፡ በግልፎሁ፡ እስመ፡ ሐሰተ፡ ሰበኩ፡ ወአልቦ፡ መንፈሰ፡ ውስቴቶሙ።
18 ከንቱ፡ ውእቱ፡ ግብሮሙ፡ የኀሥሩ፡ ወይትሐጐሉ፡ አመ፡ ይሔውጾሙ።
19 አኮ፡ ከመዝ፡ መክፈልቱ፡ ለያዕቆብ፡ እስመ፡ ፈጣሬ፡ ኵሉ፡ ውእቱ፡ ርስቱ፡ ወኃይለ፡ መክፈልቱ፡ እግዚአብሔር፡ ጸባኦት፡ ስሙ።
20 ዘራዊት፡ አንቲ፡ ሊተ፡ ንዋየ፡ ሐቅል፡ ዘረውኩ፡ ብኪ፡ አሕዛበ፡ ወአአትት፡ እምውስቴትኪ፡ ነገሥተ።
21 ወእዘሩ፡ እምኔኪ፡ አፍራሰ፡ ወመስተፅዕናነ፡ ወእዘሩ፡ እምውስቴትኪ፡ ሠረገላተ፡ ወዘይፄዐኖሙ።
22 ወእዘሩ፡ እምኔኪ፡ ብእሴ፡ ወብእሲተ፡ ወእዘሩ፡ እምኔኪ፡ ልሂቀ፡ ወሕፃነ፡ ወእዘሩ፡ እምኔኪ፡ ወሬዛ፡ ወድንግለ።
23 ወእዘሩ፡ እምኔኪ፡ ኖላዌ፡ ወርዔቶ፡ ወእዘሩ፡ እምኔኪ፡ ሐረሳዌ፡ ወወፍሮ፡ ወእዘሩ፡ እምኔኪ፡ መላእክተ፡ ወመሳፍንተ።
24 ወእትቤቀላ፡ ለባቢሎን፡ ወለኵሉ፡ እለ፡ ይነብሩ፡ ውስተ፡ ከላውዴዎስ፡ በኵሉ፡ እኩይ፡ ዘገብሩ፡ ውስተ፡ ጽዮን፡ በቅድመ፡ አዕይንቲክሙ፡ ይቤ፡ እግዚአብሔር።
25 ናሁ፡ አነ፡ ላዕሌከ፡ ደብር፡ ኅሡር፡ ይቤ፡ እግዚአብሔር፡ ዘያማስና፡ ለኵላ፡ ምድር፡ ወእሰፍሕ፡ እዴየ፡ ዲቤከ፡ ወእነሥተከ፡ እምነ፡ ጾላዕት፡ ወእሬስየከ፡ ደብረ፡ ሐሩት።
26 ወኢይነሥኡ፡ እምኔከ፡ እብነ፡ ለማዕዘንት፡ ወእብነ፡ ለመሠረት፡ እስመ፡ ለዓለም፡ አማስነከ፡ ይቤ፡ እግዚአብሔር።
27 ንሥኡ፡ ትእምርተ፡ ዲበ፡ ምድር፡ ወንፍኁ፡ ቀርነ፡ ውስተ፡ አሕዛብ፡ ቀድሱ፡ ላዕሌሃ፡ አሕዛበ፡ ወአዝዙ፡ ላዕሌሃ፡ ነገሥተ፡ ወአንሥእዎሙ፡ እምኀቤሃ፡ ለእስከናዜዎስ፡ ወአቅሙ፡ ላዕሌሃ፡ ነዳፍያነ፡ ወአዕርጉ፡ ዲቤሃ፡ አፍራሰ፡ ዘከመ፡ አንበጣ፡ ብዝኁ።
28 ወቀድሱ፡ ላዕሌሃ፡ ሠራዊተ፡ ንጉሠ፡ ሜዶን፡ ወዘመሳፍንተ፡ ኵሉ፡ ምድር፡ ወዘኵሉ፡ መላእክቲሁ፡ ወዘኵሉ፡ በሐውርቲሁ።
29 አድለቅለቀት፡ ምድር፡ ወሐመት፡ እስመ፡ ተንሥአ፡ ምክረ፡ እግዚአብሔር፡ ላዕለ፡ ባቢሎን፡ ከመ፡ ያማስና፡ ለምድረ፡ ባቢሎን፡ ወአልቦ፡ ዘይነብራ።
30 ኀልቁ፡ መስተቃትላነ፡ ባቢሎን፡ ዘይጸብኡ፡ ወይነብሩ፡ ውስተ፡ ጥቅም፡ ወይትቀጠቀጥ፡ ኃይሎሙ፡ ወይከውኑ፡ ከመ፡ አንስት፡ ውዕያአብያቲሃ፡ ወተቀጥቀጠ፡ መናስግቲሃ።
31 ዘይረውዕ፡ ለተቀብሎ፡ ይረውፅ፡ ረዊፀ፡ ወዘይዜኑ፡ ለተቀብሎ፡ ይዜኑ፡ ከመ፡ ይዜንውዎ፡ ለንጉሠ፡ ባቢሎን፡ እስመ፡ አስተጋብእዋ፡ ለሀገር፡ ወለማዕዶታሂ፡ አኀዝዋ።
32 ወሐፁራሂ፡ አውዐዩ፡ በእሳት፡ ወፄወውዎሙ፡ ለዕደው፡ መስተቃትላን።
33 እስመ፡ ከመዝ፡ ይቤ፡ እግዚአብሔር፡ ጸባኦት፡ አምላከ፡ እስራኤል፡ ቤተ፡ ንጉሠ፡ ባቢሎን፡ ከመ፡ ዐውድ፡ ጊዜ፡ ዘያከይድ፡ ዓዲ፡ ኅዳጠ፡ ወአጽሐ፡ ጊዜ፡ ማእረራ።
34 በልዐኒ፡ ወተካፈለኒ፡ ናቡከደነፆር፡ ንጉሠ፡ ባቢሎን፡ ወረሰየኒ፡ ንዋየ፡ ከንቱ፡ ውሕጠኒ፡ ከመ፡ ከይሲ፡ ወጸግበ፡ ከርሡ፡ እምነ፡ ሥጋየ።
35 አርኀወ፡ መናስግትየ፡ ወአኅሠረኒ፡ ውስተ፡ ባቢሎን፡ ትቤ፡ እንተ፡ ትነብር፡ ጽዮን፡ ወደምየሂ፡ ላዕለ፡ እለ፡ ይነብሩ፡ ውስተ፡ ፋርስ፡ ትቤ፡ ኢየሩሳሌም።
36 በእንተ፡ ዝንቱ፡ ከመዝ፡ ይቤ፡ እግዚአብሔር፡ ናሁ፡ አነ፡ እኴንኖ፡ ለገፋዒኪ፡ ወእትቤቀል፡ በቀለኪ፡ አነጽፋ፡ ለባሕር፡ ወእደመስሶ፡ ለምእላዲሃ።
37 ወትከውን፡ ባቢሎን፡ ለፄዋዌ፡ ወማኅደረ፡ አክይስት፡ ህየ፡ ወይትፋጸይዋ፡ ወኢይነብርዋ፡ እንከ።
38 ኅቡረ፡ ከመ፡ አናብስት፡ ይጥሕሩ፡ ወይትነሥኡ፡ ወከመ፡ እጕለ፡ አናብስት።
39 ይትአረወዩ፡ ወአሰትዮሙ፡ ወአሰክሮሙ፡ ከመ፡ ይትቈናደዩ፡ ወይኑሙ፡ ንዋመ፡ ዘለዓለም፡ ወኢይነቅሑ፡ እንከ፡ ይቤ፡ እግዚአብሔር።
40 ወአወርዶሙ፡ ከመ፡ ይጥብሕዎሙ፡ ከመ፡ አባግዕ፡ ወይእኅዝዎሙ፡ ከመ፡ ሐራጊት፡ ወከመ፡ አብሐኵ፡ ወመሐስእ።
41 እፎ፡ ተገምረት፡ ወተእኅዘት፡ ምክሓ፡ ለኵሉ፡ ምድር፡ እፎ፡ ኮነት፡ ባቢሎን፡ ሙስንተ፡ ውስተ፡ ኵሉ፡ አሕዛብ።
42 ዐርገት፡ ባሕር፡ ላዕለ፡ ባቢሎን፡ በድምፀ፡ ማዕበላ፡ ወደፈነታ።
43 ወኮነ፡ አህጉሪሃ፡ ምድረ፡ በድው፡ ወዓፀ፡ ዘኢይነብሮ፡ ወኢመኑሂ፡ እምሰብእ፡ ወኢየኀድሮ፡ እጓለ፡ እመሕያው።
44 ወእትቤቀል፡ ላዕለ፡ ኵሉ፡ ባቢሎን፡ ወአቀይዓ፡ እምአፉሃ፡ ዘውሕጠት፡ ወኢይትጋብኡ፡ እንከ፡ ህየ፡ አሕዛብ፡ ወአረፋቲሃ፡ ይወድቁ።
45 ፃኡ፡ እማእከላ፡ ሕዝብየ፡ ወአድኅኑ፡ ነፍሰክሙ፡ ፩፩እመቅሠፍተ፡ መዐቱ፡ ለእግዚአብሔር።
46 ከመ፡ ኢይድክም፡ አልባቢክሙ፡ ወኢትፍርሁ፡ በሰሚዐ፡ ዜናሃ፡ ውስተ፡ ምድር፡ ወይመጽእ፡ በዓመተ፡ ዜናሃ፡ እምድኅረ፡ ዓመተ፡ ተሰምዖታ፡ ወአመጽእ፡ ውስተ፡ ምድር፡ ኵነኔ፡ በዲበ፡ ኵነኔ።
47 በእንተ፡ ዝንቱ፡ ናሁ፡ ይመጽእ፡ መዋዕል፡ ወእትቤቀል፡ ላዕለ፡ ግልፎ፡ ባቢሎን፡ ወኵሉ፡ ምድራ፡ ይየብስ፡ ወኵሎሙ፡ ቅቱላኒሃ፡ ይወድቁ፡ በማእከሌሃ።
48 ይትፌሥሑ፡ ላዕለ፡ ባቢሎን፡ ሰማያት፡ ወምድር፡ ወኵሎሙ፡ እለ፡ ይነብርዎሙ፡ እስመ፡ እምሰሜን፡ ይመጽኡ፡ ኀቤሃ፡ እለ፡ ያጠፍኡ፡ ይቤ፡ እግዚአብሔር።
49 ወባቢሎንሂ፡ ለድቀተ፡ ቅቱላነ፡ እስራኤል፡ ለባቢሎንሂ፡ ቅቱላነ፡ ኵሉ፡ ምድር።
50 እለ፡ ድኅንክሙ፡ እመጥባሕት፡ ፃኡ፡ ወኢትቁሙ፡ ወእለሂ፡ እንርኁቅ፡ ተዘከርዎ፡ ለእግዚአብሔር፡ ኢየሩሳሌምሃኒ፡ ሐልዩ፡ በልብክሙ።
51 ወተኀፈርነ፡ እስመ፡ ሰማዕነ፡ ጽዕለተነ፡ ወከደነነ፡ ኃሣር፡ ገጸነ፡ ቦኡ፡ ካልኣን፡ አሕዛብ፡ ውስተ፡ ቤተ፡ እግዚአብሔር፡ ቤተ፡ መቅደስነ።
52 በእንተዝ፡ ከመዝ፡ ይቤ፡ እግዚአብሔር፡ ናሁ፡ ይመጽእ፡ መዋዕል፡ ወእትቤቀሎሙ፡ ለግልፎሃ፡ ወይወድቁ፡ ቅቱላን፡ በኵሉ፡ ምድር።
53 እስመ፡ ለእመ፡ ዐርገት፡ ባቢሎን፡ እስከ፡ ሰማይ፡ ወእመሂ፡ አጽንዐት፡ ነፍሳ፡ በኃይል፡ ይመጽኡ፡ እምኀቤየ፡ እለ፡ ይሤርውዋ፡ ይቤ፡ እግዚአብሔር።
54 ቃለ፡ ውውዓ፡ ውስተ፡ ባቢሎን፡ ወዓቢይ፡ ቅጥቃጤ፡ ውስተ፡ ምድረ፡ ፋርስ።
55 እስመ፡ ሠረዋ፡ እግዚአብሔር፡ ለባቢሎን፡ ወአጥፍአ፡ እምኔሃ፡ ቃለ፡ ዓቢየ፡ ወደምፀ፡ ማዕበሎሙ፡ ከመ፡ ማይ፡ ብዙኅ፡ ወሀቡ፡ ድምፀ፡ ቃሎሙ።
56 መጽኣ፡ ኃሣር፡ ለባቢሎን፡ ተሠግሩ፡ መስተቃትላኒሂ፡ ወተሰብረ፡ ቀስቶሙ፡ እስመ፡ እግዚአብሔር፡ ተበቀሎሙ፡ ወእግዚአብሔር፡ ፈደዮሙ።
57 ወአስከሮሙ፡ ስካረ፡ ለመኳንንቲሃ፡ ወለጠቢባኒሂ፡ ወለነገሥታቲሃ፡ ወለዓቃብያኒሃ፡ ወለኃያላኒሃ፡ ወይነውሙ፡ ንዋመ፡ ዘለዓለም፡ ወኢይነቅሑ፡ ይቤ፡ ንጉሥ፡ እግዚአብሔር፡ ዘኵሎ፡ ይመልክ፡ ስሙ።
58 ከመዝ፡ ይቤ፡ እግዚአብሔር፡ ጸባኦት፡ ርሕብት፡ አረፍተ፡ ባቢሎን፡ ይነሥእዋ፡ ወያንኅልዋ፡ ወያውዕዩ፡ ዴዴሃ፡ ዓበይተ፡ በእሳት፡ ወይፃምዉ፡ አሕዛብ፡ በከንቱ፡ ወየኀልቁ፡ ቀደምቶሙ፡ ለአሕዛብ፡ በእሳት።
59 ነገረ፡ ዘአዘዞ፡ ኤርምያስ፡ ነቢይ፡ ለሴርያ፡ ወልደ፡ ኔርያ፡ ወልደ፡ ማሴው፡ አመ፡ ሖረ፡ እምኀበ፡ ሴዴቅያስ፡ ንጉሠ፡ ይሁዳ፡ ውስተ፡ ባቢሎን፡ አመ፡ ራብዕ፡ ዓመተ፡ መንግሥቱ፡ ወሴርያ፡ መልአከ፡ ጋዳ።
60 ጸሐፈ፡ ኤርምያስ፡ ውስተ፡ መጽሐፍ፡ ፩፡ ኵሎ፡ እኪተ፡ ዘይመጽእ፡ ውስተ፡ ባቢሎን፡ ወኵሎ፡ ዘንተ፡ ነገረ፡ ዘተጽሕፈ፡ በእንተ፡ ባቢሎን።
61 ወይቤሎ፡ ኤርምያስ፡ ለሴርያ፡ አመ፡ ቦእከ፡ ባቢሎን፡ ወርኢከ፡ አንብብ፡ ኵሎ፡ ዘነገረ።
62 ወበል፡ አንተ፡ እግዚኦ፡ ትቤ፡ ከመ፡ ትሠርዎ፡ ለዝብሔር፡ ከመ፡ ኢይንበሮ፡ ሰብእ፡ ወኢእንስሳ፡ ወይማስን፡ ለዓለም።
63 ወአንቢበከ፡ ይእተ፡ መጽሐፈ፡ ተአስር፡ እብነ፡ ውስቴታ፡ ወትዌርዋ፡ ውስተ፡ ፈለገ፡ ኤፍራጥስ።
64 ወትብል፡ ከመዝ፡ ትሠጠም፡ ባቢሎን፡ ወኢትትነሣእ፡ እብከ፡ እምገጸ፡ እኩይ፡ ዘአነ፡ አመጽእ፡ ላዕሌሃ፡ እስከ፡ ዝየ፡ ነገረ፡ ኤርምያስ።
=== chapter 52 ===
[Chapter 52]
1 ወልደ፡ ፳ወ፩ዓመት፡ ሴዴቅያስ፡ አመ፡ ነግሠ፡ ወ፲ወ፩ዓመተ፡ ነግሠ፡ በኢየሩሳሌም፡ ወስማ፡ ለእሙ፡ አምጣሄል፡ ወለተ፡ ኤርምያስ፡ እምሎምና።
2 ወገብረ፡ እኩየ፡ በቅድመ፡ አዕይንቲሁ፡ ለእግዚአብሔር፡ ከመ፡ ኵሉ፡ ዘገብረ፡ ኢዮአቄም።
3 እስመ፡ መዐተ፡ እግዚአብሔር፡ ኮነት፡ በኢየሩሳሌም፡ ወበይሁዳ፡ እስከ፡ ገደፎሙ፡ እምነ፡ ገጹ፡ ወዐለዎ፡ ሴዴቅያስ፡ ለንጉሠ፡ ባቢሎን።
4 ወኮነ፡ በታስዕ፡ ዓመት፡ ዘመንግሥቱ፡ በዐሥር፡ ወርኅ፡ ወበዐሡረ፡ ሠርቅ፡ በጽሐ፡ ናቡከደነፆር፡ ንጉሠ፡ ባቢሎን፡ ውእቱ፡ ወኵሉ፡ ኃይሉ፡ ላዕለ፡ ኢየሩሳሌም፡ ወተዐየነ፡ ላዕሌሃ፡ ወሐፀራ፡ ወነደቀ፡ ትርብዕተ፡ በዐውዳ።
5 ወተጸወነት፡ ሀገር፡ እስከ፡ ፲ወ፩ዓመተ፡ መንግሥቱ፡ ለሴዴቅያስ።
6 በራብዕ፡ ወርኅ፡ አመ፡ ተሱዑ፡ ለሠርቅ፡ ጸንዐ፡ ረኃብ፡ በሀገር፡ ወአልቦ፡ እክል፡ ለሕዝበ፡ ምድር።
7 ወተገፍትዐት፡ ሀገር፡ ወኵሉ፡ ሰብእ፡ መስተቃትላን፡ ጐዩ፡ ወወፅኡ፡ እምሀገር፡ በሌሊት፡ ፍኖተ፡ አንቀጽ፡ ማእከለ፡ ጥቅም፡ ዘማእከለ፡ አረፍተ፡ ገነት፡ ዘንጉሥ፡ ወከለዳውያን፡ ዐገቱ፡ ሀገረ፡ ወሖሩ፡ ፍኖተ፡ ዐረባ።
8 ወዴገንዎሙ፡ ኃይለ፡ ከለዳውያን፡ ድኅሬሁ፡ ለንጉሥ፡ ወረከብዎ፡ ለንጉሥ፡ ሴዴቅያስ፡ በዐራቦት፡ ዘኢያሪኮ፡ ወኵሎሙ፡ ኃይሉ፡ ተዘርዉ፡ እምኔሁ።
9 ወአኀዝዎ፡ ለንጉሥ፡ ወወሰድዎ፡ ኀበ፡ ንጉሠ፡ ባቢሎን፡ ውስተ፡ ዴብላታ፡ በምድረ፡ ኤማት፡ ወተናገሮ፡ ምስለ፡ ኵነኔ።
10 ወረገዞሙ፡ ንጉሠ፡ ባቢሎን፡ ለደቂቁ፡ በቅድመ፡ አዕይንቲሁ፡ ወለኵሙ፡ መላእክተ፡ ይሁዳ፡ ቀተሎሙ፡ በዴብላታ።
11 ወአውፅኦ፡ አዕይንቲሁ፡ ለሴዴቅያስ፡ ወአሰሮ፡ በሞቅሕ።
12 ወበኃምስ፡ ወርኅ፡ አመ፡ ዐሡሩ፡ ለሠርቀ፡ ይእቲ፡ ዓመት፡ ፲ወ፱ዓመት፡ ዘነግሠ፡ ናቡከደነፆር፡ ንጉሠ፡ ባቢሎን፡ መጽአ፡ ናቡዛርዳን፡ ሊቀ፡ መበስላን፡ ዘይቀውም፡ ቅድመ፡ ገጸ፡ ንጉሠ፡ ባቢሎን፡ ውስተ፡ ኢየሩሳሌም።
13 ወአውዐየ፡ ቤተ፡ እግዚአብሔር፡ ወቤተ፡ ንጉሥ፡ ወኵሎ፡ አብያተ፡ ኢየሩሳሌም፡ ወኵሎ፡ ዓበይተ፡ አብያተ፡ አውዐየ፡ በእሳት።
14 ወኵሎ፡ አረፍተ፡ ኢየሩሳሌም፡ ወነሠቱ፡ ጥቅማ፡ ኃይለ፡ ከለዳውያን፡ ዘሊቀ፡ መበስላን።
15 ወአምጽአ፡ ሊቀ፡ መበስላን፡ እምነዳያነ፡ ሕዝብ፡ ወተረፈ፡ ሕዝብ፡ እለ፡ ተርፉ፡ ውስተ፡ ሀገር፡ እለ፡ ገብኡ፡ ኀበ፡ ንጉሠ፡ ባቢሎን፡ ወእለ፡ ተርፉ፡ ሕዝብ፡ እምዘአፍለ፡ ናቡዛርዳን፡ ሊቀ፡ መበስላን።
16 እምነዳያነ፡ ምድር፡ አትረፈ፡ ለሐረስት፡ ወዓቀብተ፡ ወይን።
17 ወአዕማደ፡ ብርት፡ ዘቤተ፡ እግዚአብሔር፡ ወድዶነሂ፡ ወባሕረሂ፡ ዘብርት፡ ዘቤተ፡ እግዚአብሔር፡ ቀጥቀጡ፡ ፋርስ፡ ወነሥኡ፡ ኵሎ፡ ብርተ፡ ወወሰዱ፡ ባቢሎን።
18 ወጽሕርታተ፡ ወከከማተ፡ ወፍያላተ፡ ወአጽሕልተ፡ ወኵሎ፡ ንዋየ፡ ብርት፡ እለ፡ ይትለአኩ፡ ቦሙ፡ ነሥኡ።
19 መናብርተ፡ ወመስወደ፡ ወፍያላተ፡ ወጽሕርታተ፡ ወመራናተ፡ ወአጽሕልተ፡ ወመዳምሓተ፡ ዘወርቅ፡ ወርቀ፡ ወዘብሩር፡ ብሩረ፡ ነሥአ፡ ሊቀ፡ መበስላን።
20 አዕማደ፡ ፪፡ ባሕረ፡ ፩፡ ወአልህምተ፡ ፲ወ፪፡ ዘብርት፡ ዘመትሕተ፡ ሜኮኖት፡ ዘገብረ፡ ሰሎሞን፡ ንጉሥ፡ ለቤተ፡ እግዚአብሔር፡ ወአልቦን፡ መድሎት፡ ለእሉ፡ ንዋያተ፡ ብርት።
21 ወአዕማድ፡ ፲ወ፰በእመት፡ ቆሙ፡ ለ፩ዓምድ፡ ወአምጣን፡ ዘየዐውዶ፡ ፲ወ፪አመት፡ ወግዘፉ፡ አርባዕ፡ አፃብዕ፡ ዘከርካዕ።
22 ወኮታሪት፡ ላዕሌሁ፡ ዘብርት፡ ወቆሙ፡ ለኮታሪት፡ ፩፡ ኃምስ፡ በእመት፡ ወመሥገርት፡ ወሮማናት፡ ላዕለ፡ ኮታሪት፡ የዐውድ፡ ወኵሉ፡ ዘብርት።
23 ወኮኑ፡ ሮማናት፡ ፺ወ፮፡ ነፋሳት፡ ወኵሉ፡ ሮማናት፡ ፻፡ ላዕለ፡ መሥገርት፡ የዐውድ።
24 ወነሥኦ፡ ሊቀ፡ መበስላን፡ ለሴርያ፡ ዓቢይ፡ ካህን፡ ወለሶፎንያስ፡ ካህን፡ ዘእምታሕቴሁ፡ ወለ፫ዓቀብተ፡ አናቅጽ።
25 ወእምሀገር፡ ነሥአ፡ አሐደ፡ ሕፅወ፡ ዘኮነ፡ ጸሐፌ፡ ላዕለ፡ ዕደወ፡ ጸብእ፡ ወ፯ዕደወ፡ እምእለ፡ ይሬእዩ፡ ገጸ፡ ንጉሥ፡ እለ፡ ተረክቡ፡ ውስተ፡ ሀገር፡ ወለጸሐፊ፡ መልአከ፡ ኃይሎሙ፡ ለሕዝበ፡ ምድር፡ ወ፷ዕደወ፡ እምሕዝበ፡ ምድር፡ እለ፡ ተረክቡ፡ ውስተ፡ ሀገር።
26 ወነሥኦሙ፡ ናቡዛርዳን፡ ሊቀ፡ መበስላን፡ ወነሥኦሙ፡ ኀበ፡ ንጉሠ፡ ባቢሎን፡ ዴብላታ።
27 ወቀተሎሙ፡ ንጉሠ፡ ባቢሎን፡ ወሞቱ፡ በዴብላታ፡ በምድረ፡ ኤማት፡ ወአፍለሶ፡ ለይሁዳ፡ እምነ፡ ምድሩ።
28 ዝንቱ፡ ሕዝብ፡ ዘአፍለሰ፡ ናቡከደነፆር፡ በሳብዕ፡ ዓመት፡ አይሁድ፡ ፴፻ወ፳ወ፫።
29 በ፲ወ፷ዓመት፡ ዘናቡከደነፆር፡ እምኢየሩሳሌም፡ ነፍሰ፷፻፴ወ፪።
30 በዓመት፡ ፳ወ፫፡ ዘናቡከደነፆር፡ አፍለሰ፡ ናቡዛርዳን፡ ሊቀ፡ መበስላን፡ ነፍሰ፡ አይድ፡ ፯፻፵ወ፭፡ ወኵሉ፡ ነፍስ፡ ፵፻ወ፮፻።
31 ወኮነ፡ በ፴ወ፯፡ ዓመት፡ እምዘ፡ ፈለሰ፡ ኢኮንያስ፡ ንጉሠ፡ ይሁዳ፡ በ፲ወ፪፡ ወርኅ፡ አመ፡ ፳ወ፭፡ ለሠርቅ፡ መሥኦ፡ ኤዎልማሮዴቅ፡ ንጉሠ፡ ባቢሎን፡ በዓመተ፡ መንግሥቱ፡ ለኢኮንያስ፡ ንጉሠ፡ ይሁዳ፡ ወአውፅኦ፡ እምቤተ፡ ሞቅሕ።
32 ወተናገሮ፡ ሠናየ፡ ወረሰየ፡ መንበሮ፡ መልዕልተ፡ መንበረ፡ ነገሥት፡ እለ፡ ምስሌሁ፡ ባቢሎን።
33 ወወለጠ፡ ልብሰ፡ ተሞቅሖቱ፡ ወበልዐ፡ በቅድሜሁ፡ ኅብስተ፡ ዘልፈ፡ በኵሉ፡ መዋዕለ፡ ሕይወቱ።
34 ወፈተቶ፡ ፍተ፡ ዘዘልፍ፡ ተውህበ፡ ሎቱ፡ እምኀበ፡ ንጉሠ፡ ባቢሎን፡ እንተ፡ ጸብሐት፡ እስከ፡ ዕለተ፡ ሞቱ፡ በኵሉ፡ መዋዕለ፡ ሕይወቱ።