##### edition  (gez)
=== chapter 1 ===
[Chapter 1]
1 ራእይ፡ ዘርእየ፡ ኢሳይያስ፡ ወልደ፡ አሞጽ፣፡ ዘርእየ፡ በእንተ፡ ይሁዳ፡ ወበእንተ፡ ኢየሩሳሌም፡ በመንግስተ፡ ዖዝያን፡ ወኢዮአታም፡ ወአካዝ፡ ወሕዝቅያስ፡ እለ፡ ነግሡ፡ ለይሁዳ።
2 ስማዕ፡ ሰማይ፡ ወአጽምዒ፡ ምድር፡ እስመ፡ እግዚአብሔር፡ ነበበ፡ ወይቤ፤ ውሉደ፡ ወለድኩ፡ ወአልሀቁ፤ እሙንቱሰ፡ ዐለዉኒ።
3 ላህምኒ፡ አእመረ፡ ዘአጥረዮ፡ ወአድግኒ፡ ምቅማሖ፡ ወቤተ፡ እግዚኡ፤ እስራኤልሰ፡ ኢያእመሩኒ፡ ወሕዝብየኒ፡ ኢጠየቁኒ።
4 አሌሎ፡ ለሕዝብ፡ ኃጥእ፣፡ ሕዝብ፡ ዘምሉእ፡ ዓመፃ፣፡ ዘርአ፡ እኩያን፣፡ ውሉድ፡ ጽልሕዋን፤ ኀደግምዎ፡ ለእግዚአብሔር፡ ወአምዐዕክምዎ፡ ለቅዱሰ፡ እስራኤል።
5 እፎ፡ እንከ፡ ትቈስሉ፡ እንዘ፡ ትዌስኩ፡ ኃጢአተ፡ በዲበ፡ ኃጢአት፤ ኵሉ፡ ርእስ፡ ለሕማም፡ ወኵሉ፡ ልብ፡ ለኃዘን።
6 እምእግር፡ እስከ፡ ርእስ፡ ዘኢኮነ፡ ቊስለ፡ ወዘኢኮነ፡ ፍቅዓተ፡ ወዘኢኮነ፡ ጸልዐ፡ ዘይመግል፤ ወአልቦ፡ ከመ፡ ይጠይዕዎ፡ ሥራየ፡ ወኢይፀምምዎ፡ ወኢይቀብእዎ።
7 ምድርክሙኒ፡ በድወ፡ ወአህጉሪክሙኒ፡ ውዕያ፡ በእሳት፤ ወለበሐውስቲክሙኒ፡ ፀር፡ ይበልዖ፡ በቅድሜክሙ፣፡ ያማስኖ፡ ወያመዘብሮ፡ ፀር፡ ነኪር።
8 ወትትኀደግ፡ ወለተ፡ ጽዮን፡ ከመ፡ ልገተ፡ ዓቃቤ፡ ቀምሕ፡ ወከመ፡ ዳሰ፡ ዓቃቤ፡ ወይን፡ ወከመ፡ ሀገር፡ ሕጽርት።
9 ወሶበ፡ አኮ፡ እግዚአብሔር፡ ጸባኦት፡ ዘአትረፈ፡ ለነ፡ ዘርአ፡ ከመ፡ ሰዶም፡ እምኮነ፡ ወከመ፡ ገሞራ፡ እመሰልነ።
10 ስምዑ፡ ቃለ፡ እግዚአብሔር፡ መላእክተ፡ ሰዶም፤ ወአጽምዑ፡ ሕገ፡ እግዚአብሔር፡ ሕዝበ፡ ገሞራ።
11 ለምንት፡ ሊተ፡ ብዝኀ፡ መሥዋዕቲክሙ፡ ይቤ፡ እግዚአብሔር፤ ጽጉብ፡ አነ፡ እመሥዋዕተ፡ ሐራጊት፡ ወሥብሐ፡ አባግዕ፤ ኢይፈቅድ፡ ደመ፡ ላህም፡ ወጠሊ።
12 ወእመኒ፡ አምጻእክሙ፡ ኢታስተርእዩኒ፤ መኑ፡ ኀሠሦ፡ ለዝንቱ፡ እምእዴክሙ፤ ወኢትድግሙ፡ እንከ፡ ከይደ፡ ዐፀድየ።
13 እመኒ፡ አምጻእክሙ፡ ስንዳሌ፡ ከንቱ፡ ወዕጣንክሙኒ፡ ርኩስ።
14 ወሠርቀ፡ ወርኅክሙኒ፡ ወበዓላቲክሙኒ፡ ጸልአት፡ ነፍስየ።
15 ወሶበሂ፡ ታነሥኡ፡ እደዊክሙ፡ ኀቤየ፡ እመይጥ፡ አዕይንትየ፡ እምኔክሙ፤ ወእመኒ፡ አብዛኅክሙ፡ ምህልላክሙ፡ ኢይሰምዐክሙ፡ እስመ፡ ደመ፡ ምሉእ፡ እደዊክሙ።
16 ተሐፀቡ፡ ወንጹሓነ፡ ኩኑ፡ ወአእትቱ፡ እከየ፡ ነፍስክሙ፡ እምቅድመ፡ አዕይንትየ፤ ኅድጉ፡ እከየክሙ።
17 ተመሀሩ፡ ገቢረ፡ ሠናይ፤ ኅሥዋ፡ ለጽድቅ፡ ወአድኅኑ፡ ግፉዓ፤ ፍትሑ፡ ለእጓለ፡ ማውታ፡ ወአጽድቁ፡ እቤረ።
18 ወንዑ፡ ንትዋቀሥ፡ ይቤ፡ እግዚአብሔር፤ ወለእመኒ፡ ኮነ፡ ኃጢአትክሙ፡ ከመ፡ ኳኳ፣፡ አጸዐድዎ፡ ከመ፡ በረድ፤ ወለእመኒ፡ ኮነ፡ ከመ፡ ለይ፣፡ አነጽሖ፡ ከመ፡ ፀምር።
19 ወእመሰ፡ ፈቀድክሙ፡ ወሰማዕክሙኒ፣፡ በረከተ፡ ምድር፡ ትበልዑ።
20 ወእመሰ፡ አበይክሙ፡ ሰሚዖትየ፣፡ ወጥባሕት፡ ትበልዐክሙ፤ እስመ፡ ከማሁ፡ ነበበ፡ አፉሁ፡ ለእግዚአብሔር።
21 እፎ፡ ኮነት፡ ዘማ፡ ሀገረ፡ ጽዮን፡ ማእምንት፡ እንተ፡ ምልእት፡ ፍትሐ፤ ወኀደረ፡ ውስቴታ፡ ጽድቅ፣፡ ይእዜሰ፡ ፈያት፡ ወቀተልት።
22 ወርቅክሙኒ፡ ተምያን፡ ወመያስያኒክሙኒ፡ ይቶስሑ፡ ማየ፡ ውስተ፡ ወይን።
23 መላእክቲክሙኒ፡ ከሐድያን፣፡ ሱቱፋነ፡ ሰረቀት፣፡ መስተናድኣን፡ ወያፈቅሩ፡ ሕልያነ፤ ወይፈቅዱ፡ ይሚጡ፡ ፍትሐ፡ ወኢያጸምዑ፡ እቤረ፡ ብእሲተ፡ ወኢይፈትሑ፡ ለእጓለ፡ ማውታ።
24 በበይነ፡ ዝንቱ፡ ከመዝ፡ ይቤ፡ እግዚአብሔር፡ ጸባኦት፤ አሌ፡ ሎሙ፡ ለኃያላነ፡ እስራኤል፤ ኢይቈርር፡ መዓትየ፡ እምላዕለ፡ ፀርየ፡ ወእትቤቀሎሙ፡ ለጸላእትየ።
25 ወአመጽእ፡ እዴየ፡ ላዕሌኪ፡ ወአረስነኪ፤ ወአውዕዮሙ፡ ለከሐድያን፡ ወአአትቶሙ፡ እምኔኪ፡ ለኵሎሙ፡ ዓማፅያን።
26 ወእሠይም፡ ለኪ፡ መኳንንተኪ፡ ከመ፡ ትካት፡ ወመማክርተኪ፡ ከመ፡ ቀዲሙ።
27 እስመ፡ በጽድቅ፡ ይድኅኑ፡ ፄዋኪ፡ ወበምጽዋት።
28 ወይትቀጥቀጡ፡ ኃጥኣን፡ ወዓማፅያን፡ ኅቡረ፤ ወይጠፍኡ፡ ኵሎሙ፡ እለ፡ ኀደግዎ፡ ለእግዚአብሔር።
29 ወይትኀፈሩ፡ በአማልክቲሆሙ፡ በዘመከሩ፡ ለሊሆሙ፡ ወይትኀፈሩ፡ በምሕራማቲሆሙ፡ ዘፈተዉ።
30 ወይከውኑ፡ ከመ፡ ዕፀ፡ ጠርቤንቶስ፡ እንተ፡ ነገፈት፡ ቈጽላ፡ ወከመ፡ ገነት፡ እንተ፡ አልባቲ፡ ማየ።
31 ወይከውን፡ ኃይሎሙ፡ ከመ፡ ብርዓ፡ ባሕሩስ፡ ወምግባራቲሆሙኒ፡ ከመ፡ አፍሀመ፡ እሳት፤ ወይውዕዩ፡ ኃጥኣን፡ ወዓማፅያን፡ ኅቡረ፡ ወየኀጥኡ፡ ዘያጠፍእ፡ ሎሙ፡ እሳቶሙ።
=== chapter 2 ===
[Chapter 2]
1 ቃል፡ ዘኮነ፡ ኀበ፡ ኢሳይያስ፡ ወልደ፡ አሞጽ፡ በእንተ፡ ይሁዳ፡ ወበእንተ፡ ኢየሩሳሌም።
2 ወይከውን፡ በደኃሪ፡ መዋዕል፡ ያስተርኢ፡ ደብረ፡ እግዚአብሔር፡ ወቤተ፡ እግዚአብሔር፡ ውስተ፡ አርእስተ፡ አድባር፡ ወይትሌዐል፡ መልዕልተ፡ አውግር፡ ወየሐውሩ፡ ኀቤሁ፡ ኵሎሙ፡ አሕዛብ።
3 ወይመጽኡ፡ ብዙኃን፡ አህዛብ፡ ወይብሉ፤ ንዑ፡ ንዕርግ፡ ውስተ፡ ደብረ፡ እግዚአብሔር፡ ወውስተ፡ ቤተ፡ አምላከ፡ ያዕቆብ፡ ወይንግሩነ፡ ፍኖቶ፡ ወንሖር፡ ወአሠሩ፡ ለእግዚአብሔር።
4 ወይኴንን፡ በማእከለ፡ አሕዛብ፡ ወይዛለፎሙ፡ ለብዙኃን፡ አሕዛብ።
5 ወይእዜኒ፡ ቤተ፡ ያዕቆብ፡ ንዑ፡ ንሖር፡ በብርሃነ፡ እግዚአብሔር።
6 እስመ፡ ሜጦሙ፡ ለሕዝቡ፡ እስራኤል፤ እስመ፡ መልአ፡ በሐውርቲሆሙ፡ ከመ፡ ትካት፡ ዘያሰግሉ፡ ከመ፡ ኢሎፍሊ፡ ወተወልዱ፡ ሎሙ፡ ብዙኅ፡ ደቂቀ፡ ካልኣን፡ አሕዛብ።
7 ወመልአ፡ ብሔሮሙ፡ ወርቀ፡ ወብሩረ፡ ወአልቦ፡ ኊልቈ፡ መዛግብቲሆሙ፤ ወመልአት፡ ምድሮሙ፡ አፍራሰ፡ ወአልቦ፡ ኊልቈ፡ ሠራዊቶሙ።
8 ወመልአት፡ ምድሮሙ፡ ጣዖቶሙ፡ ዘገብሩ፡ በእደዊሆሙ፡ ወሰገዱ፡ ለዘገብሩ፡ በአፃብዒሆሙ።
9 ወተቀጽዐ፡ አብእ፡ ወኀሠረ፡ እጓለ፡ እመሕያው፡ ወኢይሥኅቶሙ።
10 ወይእዜኒ፡ ባኡ፡ ውስተ፡ ኰኵሕ፡ ወተኀብኡ፡ ውስተ፡ ግበበ፡ ምድር፡ እምፍርሃተ፡ ገጸ፡ እግዚአብሔር፡ ወእምግርማሁ፡ ወእምስብሐተ፡ ኃይሉ፡ አመ፡ ተንሥአ፡ ይቀጥቅጣ፡ ለምድር።
11 እስመ፡ አዕይንቲሁ፡ ለእግዚአብሔር፡ ልዑል፤ ወሰብእሰ፡ ኅሡር።
12 እስመ፡ ዕለተ፡ እግዚአብሔር፡ ጸባኦት፡ ላዕለ፡ ኵሉ፡ ፀር፡ ጸዓሊ፡ ወዝኁር፡ ወላዕለ፡ ኵሉ፡ ነዋኅ፡ ወልዑል፡ ወያቴሕቶሙ።
13 ወላዕለ፡ ኵሉ፡ ዕፀወ፡ ሊባኖስ፡ ነዋኅ፡ ወልዑል፡ ወላዕለ፡ ኵሉ፡ ዕፀ፡ በለን፡ ዘባሳን።
14 ወላዕለ፡ ኵሉ፡ አድባር፡ ነዋኃት፡ ወዲበ፡ ኵሉ፡ አውግር፡ ልዑል።
15 ወዲበ፡ ኵሉ፡ ማኅፈድ፡ ነዋኅ፡ ወላዕለ፡ ኵሉ፡ አረፍት፡ ቀዋም።
16 ወላዕለ፡ ኵሉ፡ አሕማር፡ ዘውስተ፡ ባሕር፡ ወላዕለ፡ ኵሉ፡ ጣዖተ፡ አማልክት።
17 ወይቴሐት፡ ኵሉ፡ ሰብእ፡ ወይወድቅ፡ ሉዓሌ፡ እጓለ፡ እመሕያው፤ ወይትሌዐል፡ እግዚአብሔር፡ ባሕቲቱ፡ ይእተ፡ አሚረ።
18 ወየኀብኡ፡ ኵሎሙ፡ ጣዖቶሙ፡ ዘገብሩ፡ በእደዊሆሙ።
19 ወያበውእዎሙ፡ ውስተ፡ በአታት፡ ወውስተ፡ ንቅዓታተ፡ ኰኵሕ፡ ወውስተ፡ ግበበ፡ ምድር፡ እምቅድመ፡ ገጸ፡ ግርማሁ፡ ለእግዚአብሔር፡ ወእምስብሐተ፡ ኃይሉ፡ አመ፡ ተንሥአ፡ ይቀጥቅጣ፡ ለምድር።
20 ይእተ፡ አሚረ፡ ያወፅእ፡ ሰብእ፡ ጣዖተ፡ ርኩሰ፡ ዘወርቅ፡ ወዘብሩር፡ ዘገብሩ፡ ከመ፡ ይሰግዱ፡ ለከንቱ።
21 ከመ፡ ያብኡ፡ ውስተ፡ ግበበ፡ ምድር፡ ወውስተ፡ ንቅዓታተ፡ ኰኵሕ፡ እምቅድመ፡ ገጸ፡ ግርማሁ፡ ለእግዚአብሔር፡ ወእምስብሐተ፡ ኃይሉ፡ አመ፡ ተንሥአ፡ ይቀጥቅጣ፡ ለምድር።
=== chapter 3 ===
[Chapter 3]
1 ናሁ፡ እግዚአብሔር፡ ጸባኦት፡ ያአትት፡ እምኢየሩሳሌም፡ ወእምይሁዳ፡ ጽኑዓነ፡ ወጽንዓተ፣፡ ኃይለ፡ እክል፡ ወኃይለ፡ ማይ።
2 ወኃይለ፡ ያርብሕ፡ ወኃይለ፡ ብእሲ፡ መስተቃትል፡ ወመኰንነ፡ ወነቢየ፡ ወማእምረ፡ ወልሂቀ።
3 ወመስፍነ፡ ወመካሬ፡ ወጠቢበ፡ ሊቀ፡ ጸረብት፡ ወለባዌ፡ ወመጽምዔ፡ ነገር።
4 ወእሠይም፡ ወራዙተ፡ መላእክቲሆሙ፡ ወመስተሳልቃን፡ ይኴንንዎሙ።
5 ወይወድቅ፡ ሕዝብ፡ ዲበ፡ ሕዝብ፡ ወብእሲ፡ ዲበ፡ ብእሲ፡ ወሰብእ፡ ዲበ፡ ቢጹ፤ ወይትዐቀፍ፡ ደቂቅ፡ በልሂቅ፡ ወኅሡር፡ በክቡር።
6 ወይእኅዝ፡ ሰብእ፡ ቢጾ፡ ወሰብአ፡ ቤተ፡ አቡሁ፡ ወይብሎ፤ ለእመ፡ ብከ፡ ልብሰ፡ ኩነኒ፡ መልአከ፡ ወሴስየኒ።
7 ወይሠጠዎ፡ ውእተ፡ አሚረ፡ ወይብሎ፤ ኢይከውነከ፡ መልአከ፡ እስመ፡ አልብየ፡ እክለ፡ ውስተ፡ ቤትየ፡ ወኢልብሰ፣፡ ወኢይከውን፡ መልአከ፡ ለዝሕዝብ።
8 እስመ፡ ኀለፈት፡ ኢየሩሳሌም፡ ወይሁዳኒ፡ ወድቀት፡ ወልሳኖሙኒ፡ ዓማፂ፡ ዘይክሕድዎ፡ ለእግዚአብሔር።
9 እስመ፡ ይእዜ፡ ኀሥረት፡ ክብሮሙ፡ ወተኀፍረት፡ ገጾሙ፤ ወተቃወመቶሙ፡ ኃጢአቶሙ፡ ከመ፡ ኃጢአተ፡ ሰዶም፡ አስተርአየት፡ ወተዐውቀት፡ ላዕሌሆሙ።
10 ወይቤሉ፤ ንእስሮ፡ ለጻድቅ፡ እስመ፡ ዕጹብ፡ ወክቡድ፡ ውእቱ፡ ለነ።
11 አሌሎ፡ ለኃጥእ፡ በእከዩ፣፡ በከመ፡ እከየ፡ ምግባረ፡ እደዊሆሙ፡ ይረክቡ።
12 ሕዝብየ፣፡ መኳንቲክሙ፡ ያጽሕቡክሙ፡ ወይሤለጣ፡ ላዕሌክሙ፡ አንስት፤ ሕዝብየ፣፡ እለ፡ ያስተበፅዑክሙ፡ ያስሐቱክሙ፡ ወይደመስሱ፡ አሠረ፡ እገሪክሙ።
13 ወባሕቱ፡ ይእዜ፡ ይትነሣእ፡ እግዚአብሔር፡ ለኰንኖ፡ ወያቀውሞሙ፡ ለሕዝቡ፡ ከመ፡ ይትዋቀሦሙ።
14 ወይመጽእ፡ እግዚአብሔር፡ ለሊሁ፡ ምስለ፡ ሊቃውንት፡ ሕዝቡ፡ ወምስለ፡ መላእክቲሁ፡ ወይብል፤ አንትሙ፡ አውዐይክሙ፡ ወይንየ፡ ወበርበረ፡ ነዳይ፡ ውስተ፡ አብያቲክሙ።
15 ለምንት፡ ትገፍዕዎሙ፡ ለሕዝብየ፡ ወታስተኀፍሩ፡ ገጸ፡ ነዳይ።
16 ከመዝ፡ ይቤ፡ እግዚአብሔር፤ እስመ፡ ተዝኅራ፡ አዋልደ፡ ጽዮን፡ ወየሐውራ፡ እንዘ፡ ያገዝፋ፡ ክሳዶን፡ ወይትቃጸባ፡ በአዕይንቲሆን፡ ወያጽሕሳ፡ በእገሪሆን፡ ወይስሕባ፡ አዝፋረ፡ አልባሲሆን፡ ወየሐውራ፡ እንዘ፡ ይዘፍና።
17 ወያኀሥሮን፡ እግዚአብሔር፡ ለልሂቃተ፡ አዋልደ፡ ጽዮን፡ ወይቀፍጾን፡ እግዚአብሔር፡ አልባሲሆን።
18 ይእተ፡ አሚረ፡ ይሰልቦን፡ እግዚአብሔር፡ አልባሰ፡ ክብሮን፡ ወሠርጓቲሆን፡ ወሐብለታቲሆን፡ ወባዝግናቲሆን።
19 ወቀጸላቲሆን፡ ወባሕርያቲሆን፡ ወአውቃፊሆን።
20 ወአዕኑጊሆን፡ ወሕልቀታቲሆን፡ ወክብሶን፡ ወአልባሲሆን፡ ዘሜላት።
21 ወዘሢራይ፡ ወዘስግላጥ።
22 ወአልባሰ፡ ወርቅ፡ ወአልባሰ፡ ዐስቅ።
23 ወዐራዞን፡ ኵሎ፡ ወመዋጥሒሆን፡ ዘሰንሰሪቍ።
24 ወህየንተ፡ መዐዛ፡ ዕፍረትኪ፡ ጸበል፡ ይኩንኪ፡ ወህየንተ፡ ቅናትኪ፡ ዘወርቅ፡ ሐብለ፡ ቅንቲ፤ ወህየንተ፡ ቀጸላኪ፡ ዘወርቅ፡ ዘውስተ፡ ርእስኪ፡ ብርሐት፡ ትፃእኪ፡ በእንተ፡ እከየ፡ ምግባርኪ፤ ወህየንተ፡ መልበስኪ፡ ዘሜላት፡ ልበሲ፡ ሠቀ።
25 ወወልድኪ፡ ዘይልህቅ፡ ዘታፈቅርዮ፡ ይወድቅ፡ በኵናት፡ ወኃያላንኪ፡ በጸብእ።
26 ይትኀፈሩ፡ ወይላሕዉ፡ አስከሬናተ፡ ሠርጕኪ፤ ወትተርፊ፡ ባሕቲትኪ፡ ወይነፅኁኪ፡ ዲበ፡ ምድር።
=== chapter 4 ===
[Chapter 4]
1 ወይእኅዛሁ፡ ሰብዑ፡ አንስት፡ ለአሐዱ፡ ብእሲ፡ ወይብላሁ፤ እክለ፡ ዚአነ፡ ንሴሰይ፡ ወአልባሰ፡ ዘዚአነ፡ ንትዔረዝ፤ ዳእሙ፡ ስመ፡ ዚአከ፡ ይሰመይ፡ በላዕሌነ፡ ወአኅድገነ፡ ጽዕለተነ።
2 ይእተ፡ አሚረ፡ ያበርህ፡ እግዚአብሔር፡ በዲበ፡ ምድር፡ በምክረ፡ ስብሐቲሁ፡ ከመ፡ ይዕቀብዎሙ፡ ወያክብርዎሙ፡ ለእለ፡ ተርፉ፡ እምእስራኤል።
3 ወእለሂ፡ ተርፉ፡ እምጽዮን፡ ወተረፈ፡ ኢየሩሳሌምኒ፡ ቅዱሳነ፡ ይሰመዩ፡ ኵሎሙ፡ እለ፡ ተጽሕፉ፡ ይሕየዉ፡ በኢየሩሳሌም።
4 እስመ፡ የሐፅቦሙ፡ እግዚአብሔር፡ ርስሐቶሙ፡ ለደቂቀ፡ ጽዮን፡ ወለአዋልዲሃ፡ ወያነጽሕ፡ ደመ፡ እማእከሎሙ፡ በመንፈሰ፡ ኵነኔ፡ ወበመንፈሰ፡ መርቄ።
5 ወይመጽእ፡ ወይከውን፡ ኵሉ፡ በሐውርት፡ ለደብረ፡ ጽዮን፤ ወኵሉ፡ ዘዐውዳ፡ ይጼልል፡ ደመና፡ መዓልተ፣፡ ወከመ፡ ጢስ፡ ወብርሃነ፡ እሳት፡ ዘይነድድ፡ ሌሊተ፡ ወይትከደን፡ በስብሐት።
6 ወይከውን፡ ጽላሎተ፡ ለመርቄ፡ ወክዳነ፡ በዘይትገለበብ፡ እምጠል፡ ወዝናም።
=== chapter 5 ===
[Chapter 5]
1 አኀሊኬ፡ ማኅሌተ፡ ለፍቁርየ፡ ዘአፍቀርኩ፤ ዐፀደ፡ ወይን፡ ኮነ፡ ለፍቁር፡ በብሔር፡ ጥሉል፡ ውስተ፡ ማዕዘንቱ።
2 ወቈንኩ፡ ሎቱ፡ ፀቈነ፡ ወአግዘዝኩ፡ ወተከልኩ፡ ወስቴቱ፡ ወይነ፡ ኅሩየ፡ ዘሤሬቅ፤ ወሐነጽኩ፡ ማኅፈደ፡ ማእከሎ፡ ወአክረይኩ፡ ሎቱ፡ ምክያደ፤ ወእምዝ፡ ጸናሕክዎ፡ ይፍረይ፡ አስካለ፡ ወፈርየ፡ አሥዋከ።
3 ወይእዜኒ፡ ሰብአ፡ ይሁዳ፡ ወእለኒ፡ ትነብሩ፡ ኢየሩሳሌም፡ ፍትሑ፡ ማእከሌየ፡ ወማእከለ፡ ዐፀደ፡ ወይንየ።
4 ምንተ፡ እንከ፡ ዓዲ፡ እገብር፡ ለወይንየ፡ ዘኢገበርኩ፡ ሎቱ፤ ናሁ፡ ጸናሕክዎ፡ ይፍረይ፡ አስካለ፡ ወፈርየ፡ አሥዋከ።
5 ወይእዜኒ፡ እነግረክሙ፡ ዘእሬስዮ፡ ለወይንየ፤ እነሥት፡ ፀቈኖ፡ ወይትሐበለይዎ፤ ወአአትት፡ ጥቅሞ፡ ወይከውን፡ ምክያደ።
6 ወአኀድጎ፡ ወኢያጌምዶ፡ ወኢያከርዮ፤ ወይበቍል፡ ሣዕር፡ ወአሥዋክ፡ ውስቴቱ፡ ወይማስን፡ እንከ፤ ወእኤዝዝ፡ እንከ፡ ደመና፡ ከመ፡ ኢያዝንም፡ ዝናመ፡ ላዕሌሁ።
7 ዐፀደ፡ ወይኑሰ፡ ለእግዚአብሔር፡ ጸባኦት፡ ቤተ፡ እስራኤል፡ ጸባኦት፡ ቤተ፡ እስራኤል፡ ውእቱ፤ ወሰብአ፡ ይሁዳ፡ ውእቱ፡ ተክል፡ ሐዲስ፡ ዘአፍቀሩ፤ ወጸናሕክዎሙ፡ ከመ፡ ይግበሩ፡ ጽድቀ፡ ወገብሩ፡ ዓመፃ፣፡ ወአኮ፡ ርትዐ፡ ዘእንበለ፡ ገዐር።
8 አሌ፡ ሎሙ፡ ለእለ፡ ያስተእኀዙ፡ ቤተ፡ ምስለ፡ ቤት፡ ወለእለ፡ ያስተቃርቡ፡ ገራህተ፡ ምስለ፡ ገራህት፡ ከመ፡ ይቅሥጡ፡ ዘኮነ፡ እምገራህተ፡ ቢጾሙ፣፡ ወይፈቅዱ፡ ያግምርዋ፡ ለምድር፡ ለባሕቲቶሙ።
9 እስመ፡ ተሰምዐ፡ ዝንቱ፡ ውስተ፡ እዘኒሁ፡ ለእግዚአብሔር፡ ጸባኦት፤ ወእመኒ፡ አብዛኅክሙ፡ አብያተ፡ ይከውን፡ መዝበረ፤ ወእንዘ፡ ዓበይት፡ ወሠናያን፡ እሙንቱ፡ አልቦ፡ ዘይነብር፡ ውስቴቶሙ።
10 እስመ፡ ኢያሠልጡ፡ ፲ፅምደ፡ አባዕር፡ ወኢይገብር፡ አሐደ፡ ፃሕበ፤ ወዘዘርአ፡ ስድሰ፡ ያአቱ፡ ሥልሰ።
11 አሌ፡ ሎሙ፡ ለእለ፡ ይገይሡ፡ በጽባሕ፡ ቤተ፡ መያሲ፡ ወይውዕሉ፡ ውስተ፡ ስታይ፡ ወያነድዶሙ፡ ወይን።
12 ወይሰትይዎ፡ ለወይን፡ እንዘ፡ የኀልዩ፡ በመሰንቆ፡ ወበከበሮ፡ ወበዕንዚራ፤ ይሰትይዎ፡ ለወይን፡ ወኢይኔጽሩ፡ ግብረ፡ እግዚአብሔር፡ ወኢይሬእዩ፡ ተግባረ፡ እደዊሁ።
13 ወይእዜኒ፡ ተፄወዉ፡ ሕዝብየ፡ እስመ፡ ኢያእመርዎ፡ ለእግዚአብሔር፤ ወበዝኀ፡ ዐብድንቲሆሙ፡ በረኃብ፡ ወበጽምአ፡ ማይ።
14 ወአርሐበ፡ ሞት፡ ነፍሶ፡ ወአብቀወ፡ አፉሁ፡ ከመ፡ ኢያትርፍ፤ ወይወርዱ፡ ውስቴቱ፡ ክቡራን፡ ወዓበይት፡ ወአብዕልት፡ ወኃጥኣን።
15 ወየኀሥር፡ ሰብእ፡ ወየሐረትም፡ እጓለ፡ እመሕያው፡ ወየኀሥራ፡ አዕይንተ፡ ዕቡያን።
16 ወይትሌዐል፡ እግዚአብሔር፡ ጸባኦት፡ በጽድቅ፡ ወይሴባሕ፡ አምላክ፡ ቅዱስ፡ በርትዕ።
17 ወይትረዐዩ፡ ከመ፡ አስዋር፡ እለ፡ ተማህረኩ፤ ወይትረዐዩ፡ ከመ፡ አባግዕ፡ ሐቅለ፡ እንዘ፡ የኀሥሡ፡ ሲሳየ፡ ሐቅሎሙ።
18 አሌ፡ ሎሙ፡ ለእለ፡ ይስሕብዋ፡ ለኃጢአቶሙ፡ ከመ፡ ሐብል፡ ነዋኅ፡ ወየአስርዋ፡ ከመ፡ አርዑተ፡ ብዕራ፡ ለዓመፃሆሙ።
19 እለ፡ ይብሉ፤ ፍጡነ፡ ይግበር፡ ንርአይ፤ ወትምጻእ፡ ምክረ፡ ቅዱሰ፡ እስራኤል፡ ወናእምር፡ እንከ።
20 አሌ፡ ሎሙ፡ ለእለ፡ ይብልዎ፡ ለእኩይ፡ ሠናየ፡ ወለሠናይ፡ እኩየ፤ እለ፡ ይብልዎ፡ ለብርሃን፡ ጽልመተ፡ ወለጽልመት፡ ብርሃነ፤ እለ፡ ይብልዎ፡ ለጥዑም፡ መሪረ፡ ወለመሪር፡ ጥዑመ።
21 አሌ፡ ሎሙ፡ ለእለ፡ ይጠብቡ፡ ለእከይ፡ ወይብሉ፤ ንሕነ፡ ከመ፡ ጠቢባን።
22 አሌ፡ ሎሙ፡ ለጽኑዓን፡ እለ፡ ይሰትይዎ፡ ለወይን፡ ወለኃያላን፡ እለ፡ ይቶስሕዎ፡ ለሜስ።
23 ወያጸድቅዎ፡ ለኃጥእ፡ ወይነሥኡ፡ ሕልያነ፡ ወይዔምፅዎ፡ ለጻድቅ፡ ወይሤውርዎ፡ ለጽድቁ።
24 በእንተ፡ ዝንቱ፡ በከመ፡ ይነድድ፡ ሀሠር፡ በአፍሐመ፡ እሳት፡ ወይውዒ፡ በነበልባል፡ ከማሁ፡ ይበኈብኍ፡ ሥርዎሙ፣፡ ወጽጌሆሙ፡ የዐርግ፡ ከመ፡ ጸበል፤ እስመ፡ ኢፈቀዱ፡ ሕገ፡ እግዚአብሔር፡ ጸባኦት፡ ወአምዕዑ፡ ቃሎ፡ ለቅዱሰ፡ እስራኤል።
25 ወተምዐ፡ እግዚአብሔር፡ ጸባኦት፡ መዓተ፡ ዓቢየ፡ ላዕለ፡ ሕዝቡ፡ ወአንሥአ፡ እዴሁ፡ ላዕሌሆሙ፡ ወቀሠፎሙ።
26 ይእዜኒ፡ ያነሥእ፡ ትእምርተ፡ ላዕለ፡ አሕዛብ፡ ርኁቃን፡ ወይስሕቦሙ፡ እምአጽናፈ፡ ምድር፤ ወናሁ፡ ይመጽኡ፡ ፍጡነ፡ እንዘ፡ ይፈውጹ።
27 ኢይርኅቡ፡ ወኢይጸምኡ፣፡ ኢይደክሙ፡ ወኢይዴቅሱ፡ ወኢይፈትሑ፡ ቅናውቲሆሙ፡ እምሐቌሆሙ፡ ወኢይትበተክ፡ ቶታነ፡ አሣእኒሆሙ።
28 በሊኅ፡ መዓብሊሆሙ፡ ወውሱቅ፡ አቅስስቲሆሙ፤ ከመ፡ እብን፡ ጽኑዕ፡ እግረ፡ አፍራሲሆሙ፡ ወመንኰራኵረ፡ ሠረገላቲሆሙ፡ ከመ፡ ዐውሎ።
29 ይጥሕሩ፡ ከመ፡ አናብስት፡ ወይቀውሙ፡ ከመ፡ እጕለ፡ አናብስት፤ ይመሥጡ፡ ወይጥሕሩ፡ ከመ፡ አርዌ፡ ዘይወፅእ፡ ወአልቦ፡ ዘያድኅኖሙ።
30 ውእተ፡ አሚረ፡ የአወይዉ፡ በእንቲአሆሙ፡ ከመ፡ ድምፀ፡ ባሕር፡ ዘይትሀወክ፤ ወይኔጽሩ፡ ውስተ፡ ምድር፡ ወይሬእዩ፡ ጽልመተ፡ ጽፉቀ፡ ወይትመነደቡ።
=== chapter 6 ===
[Chapter 6]
1 ወእምዝ፡ በዓመት፡ በዘሞተ፡ ዖዝያን፡ ንጉሥ፡ ርኢክዎ፡ ለእግዚአብሔር፡ እንዘ፡ ይነብር፡ ዲበ፡ መንበሩ፡ ልዑል፡ ወነዋኅ፣፡ ወምሉእ፡ ቤተ፡ ስብሐቲሁ።
2 ወሱራፌም፡ ይቀውሙ፡ ዐውዶ፤ ለለ፡ አሐዱ፡ አሐዱ፡ ስድስቱ፡ ክነፊሆሙ፤ ወበክልኤቱ፡ ይከድኑ፡ ገጾሙ፡ ወበክልኤቱ፡ ይከድኑ፡ እገሪሆሙ፡ ወበክልኤቱ፡ ይሰሩ።
3 ወይኬልሑ፡ አሐዱ፡ አሐዱ፡ ምስለ፡ ካልኡ፡ ወይብሉ፤ ቅዱስ፡ ቅዱስ፡ ቅዱስ፡ እግዚአብሔር፡ ጸባኦት፣፡ መልአ፡ ኵሎ፡ ምድረ፡ ስብሐቲከ።
4 ወእምዝ፡ ተለዐለ፡ መርፈቀ፡ ኆኅት፡ እምቃል፡ ዘይኬልሑ፡ ወመልአ፡ ቤት፡ ጢሰ።
5 ወእቤ፤ ኦአነ፡ ሕርቱም፡ እስመ፡ ሰብእ፡ አነ፡ ወደንገፅኩ፡ እስመ፡ ርኩስ፡ ከናፍርየ፡ ወማእከለ፡ ሕዝብ፡ ዘርኩስ፡ ከናፍሪሁ፡ ሀለውኩ፡ አነ፤ ወእምዝ፡ ርኢክዎ፡ በአዕይንትየ፡ ለእግዚአብሔር፡ ጸባኦት፡ ንጉሥ።
6 ወተፈነወ፡ ኀቤየ፡ አሐዱ፡ እምሱራፌም፡ ወውስተ፡ እዴሁ፡ ፍሕም፡ ዘነሥአ፡ በጕጠት፡ እምሥዋዕ።
7 ወአልከፈኒ፡ ከናፍርየ፡ ወይቤለኒ፤ ናሁ፡ አልከፍኩከ፡ ከናፍሪከ፡ ዘንተ፡ ወአእተትኩ፡ ኃጣውኢከ፡ ወአበሳከሂ፡ ያነጽኀሐከ።
8 ወእምዝ፡ ሰማዕኩ፡ ቃለ፡ እግዚአብሔር፡ ጸባኦት፡ እንዘ፡ ይብል፤ መነ፡ እፌኑ፡ ወመኑ፡ የሐውር፡ ኀበዝ፡ ሕዝብ፤ ወእቤ፤ ነየ፡ አነ፡ እግዚእየ፡ ፈንወኒ።
9 ወይቤለኒ፤ ሖር፡ ኀበ፡ ዝንቱ፡ ሕዝብ፡ ወበሎሙ፤ ሰሚዐ፡ ትሰምዑ፡ ወኢትሌብዉ፤ ወርእየ፡ ትሬእዩ፡ ወኢተአምሩ።
10 እስመ፡ አግዘፉ፡ ልቦሙ፡ ዝንቱ፡ ሕዝብ፡ ወጤዑ፡ እዘኒሆሙ፡ ከመ፡ ኢይስምዑ፤ ወከደኑ፡ ዐይኖሙ፡ ከመ፡ ኢይርአዩ፡ በአዕይንቲሆሙ፡ ወከመ፡ ኢይስምዑ፡ በእዘኒሆሙ፡ ወኢይለብዉ፡ በልቦሙ፡ ወኢይትመየጡ፡ ወኢይሠሀሎሙ።
11 ወእቤ፡ አነ፤ እስከ፡ ማእዜኑ፡ እግዚኦ፤ ወይቤለኒ፤ እስከ፡ ይትመዘበር፡ አህጉር፡ ወአልቦ፡ እንከ፡ ዘይነብር፡ ውስተ፡ አብያት፣፡ ወትተርፍ፡ ባሕቲታ፡ ምድር፡ ከመ፡ በድው።
12 ወእምዝ፡ ያነውኆ፡ እግዚአብሔር፡ ለሰብእ፡ ወይበዝኁ፡ እለ፡ ተርፉ፡ ዲበ፡ ምድር።
13 ወይከውኑ፡ ትዕሥርተ፡ ወካዕበ፡ ይትሐበለይዋ፣፡ ወትከውን፡ ከመ፡ ዕፀ፡ ጠርቤንቶስ፡ ወከመ፡ ዕፀወ፡ ሊባኖስ፡ ሶበ፡ ይነግፍ፡ ቍጸሊሆሙ።
=== chapter 7 ===
[Chapter 7]
1 ወኮነ፡ በመዋዕለ፡ አካዝ፡ ወልደ፡ ኢዮአታም፣፡ ወልደ፡ ዖዝያን፡ ንጉሠ፡ ይሁዳ፤ ዐርገ፡ ረአሶን፡ ንጉሠ፡ አራም፡ ወፋቁሔ፡ ወልደ፡ ሮሜልዩ፡ ንጉሠ፡ እስራኤል፡ ይትቃተልዋ፡ ለኢየሩሳሌም፤ ወስእንዋ፡ ቀቲሎታ።
2 ወዜነውዎሙ፡ ለቤተ፡ ዳዊት፡ ወይቤልዎሙ፤ ኀብሩ፡ አራም፡ ምስለ፡ ኤፍሬም።
3 ወይቤሎ፡ እግዚአብሔር፡ ለኢሳይያስ፤ ሖር፡ ፃእ፡ ወተቀበሎ፡ ለአካዝ፡ አንተ፡ ወኢዮሳብ፡ ወልድከ፡ በኀበ፡ ምጥማቃት፡ እንተ፡ ላዕላይ፡ ፍኖተ፡ ገራህተ፡ መሀፒል።
4 ወበሎ፤ ተዐቀብ፡ ወአርምም፡ ወኢትፍራህ፡ ወኢትደንግፅ፡ ነፍስከ፡ እምእሉ፡ ክልኤ፡ ትንታጋተ፡ ዕፀው፡ እለ፡ ይጠይሱ፡ እስመ፡ እሠሀል፡ እምድኅረ፡ ቀሠፍኩ፡ በመዓትየ።
5 ወወልደ፡ አራምሰ፡ ወወልደ፡ ሮሜልዩ፡ ተማከሩ፡ ምክረ፡ እኩየ፡ ላዕሌከ።
6 ወይቤሉ፤ ንዕርግ፡ ይሁዳ፡ ወንትናገሮሙ፡ ወንሚጦሙ፡ ኀቤነ፡ ወይቤሉ፤ ናንግሥ፡ ሎሙ፡ ወልደ፡ ጣቤሔል።
7 ከመዝ፡ ይቤ፡ እግዚአብሔር፡ ጸባኦት፤ ኢትጻንዕ፡ ዛቲ፡ ምክሮሙ፡ ወኢትከውኖሙ።
8 ዳእሙ፡ ርእሰ፡ አራም፡ ደማስቆ፡ ወርእሰ፡ ደማስቆ፡ ረአሶን።
9 ወርእሰ፡ ኤፍሬም፡ ሰምሮን፡ ወርእሰ፡ ሰምሮን፡ ወልደ፡ ሮሜልዩ።
10 ወዳግመ፡ ነበቦ፡ እግዚአብሔር፡ ለአካዝ፡ ወይቤሎ።
11 ሰአል፡ ለከ፡ ትእምርተ፡ እምኀበ፡ እግዚአብሔር፡ አምላክከ፡ እመ፡ አኮ፡ ውስተ፡ ቀላይ፡ ወእመ፡ አኮ፡ ውስተ፡ አርያም።
12 ወይቤ፡ አካዝ፤ ኢይስእል፡ ወኢያሜክሮ፡ ለእግዚአብሔር፡ አምላኪየ።
13 ወይቤ፤ ስምዑ፡ ቤተ፡ ዳዊት፤ ቀሊልኑ፡ በቤክሙ፡ አስተፃብሶተ፡ ሰብእ፡ ወለእግዚአብሔርኒ፡ ታስተፃብስዎ።
14 ናሁኬ፡ በእንተ፡ ዝንቱ፡ ይሁበክሙ፡ እግዚአብሔር፡ ትእምርተ።
15 መዐር፡ ወቅብእ፡ ብልዑ፡ ዘእንበለ፡ ያእምር፡ ሕፃን፡ ሠናየ፡ ወእኩየ።
16 እስመ፡ ዘእንበለ፡ ያእምር፡ ሕፃን፡ ሠናየ፡ ወእኩየ፡ ይሜንን፡ እኩየ፡ ወየኀርያ፡ ለሠናይት።
17 ወያመጽእ፡ እግዚአብሔር፡ ላዕሌከ፡ ወላዕለ፡ ሕዝብከ፡ ወላዕለ፡ ቤተ፡ አቡከ፡ መዋዕለ፡ እለ፡ ዓዲ፡ ኢበጽሓ፡ እምአመ፡ አእተቶ፡ ኤፍሬም፡ ለንጉሠ፡ ፋርስ፡ እምይሁዳ።
18 ወውእተ፡ አሚረ፡ ይስሕቦሙ፡ እግዚአብሔር፡ ለጸናጺት፡ እለ፡ ይኴንኑ፡ መንፈቀ፡ ፈለገ፡ ግብጽ፡ ወለንህብኒ፡ ዘሀለወ፡ ደወለ፡ ብሔረ፡ ፋርስ።
19 ወይመጽኡ፡ ወየኀድሩ፡ ውስተ፡ ቈላት፡ ወውስተ፡ ኵሉ፡ በሐውርት፡ ወውስተ፡ ግበበ፡ ምድር፡ ወውስተ፡ ኵሉ፡ ንቅዓታተ፡ ኰኵሕ፡ ወውስተ፡ ኵሉ፡ ዕፀው።
20 ወውእተ፡ አሚረ፡ ይላጽዮ፡ እግዚአብሔር፡ በመላጼ፡ ስክርት፡ እንተ፡ ማዕዶተ፡ ፈለግ፡ ለንጉሠ፡ ፋርስ፡ ርእሶሂ፡ ወጸጕሮሂ፡ ወይገምዖ፡ ጽሕሞሂ።
21 ወውእተ፡ አሚረ፡ ያመገዝእ፡ ሰብእ፡ እጐልተ፡ እምውስተ፡ አልህምቱ፡ ወክልኤተ፡ አባግዐ።
22 ይበዝኅ፡ እንከ፡ ሐሊብ፡ ወይሴሰዩ፡ መዐረ፡ ወቅብአ፡ እለ፡ ተርፉ፡ ውስተ፡ ምድር።
23 ወወይንሂ፡ ይሠምር፡ ውእተ፡ አሚረ፡ ውስተ፡ ኵሉ፡ በሐውርት፡ ወይከውን፡ ወይን፡ ዐሠርተ፡ ምእተ፡ በዐሠርቱ፡ ምእት፡ ሰቅል፤ ወእምዝ፡ ካዕበ፡ ትማስን፡ ኵላ፡ ምድር፡ ወትመልአ፡ ሦከ፡ ወምጕህያ።
24 ወይበውእዋ፡ ምስለ፡ ሐፅወቀስት፤ እስመ፡ ትማስን፡ ኵላ፡ ምድር፡ ወትመልእ፡ ሦከ፡ ወምጕህያ።
25 ወለከኵሉ፡ ደብር፡ ሐሪሰ፡ የሐርስዎ።
=== chapter 8 ===
[Chapter 8]
1 ወይቤለኒ፡ እግዚአብሔር፤ ንሣእ፡ ለከ፡ ጦማረ፡ ክርታስ፡ ዓቢየ፡ ወሐዲሰ፡ ወጸሐፍ፡ ውስቴቱ፡ መጽሐፈ፡ በብረዓ፡ እጓለ፡ እመሕያው፡ ዘይብል፤ ፍጡነ፡ ፄውው፡ ወማህርክ።
2 ወአስምዕ፡ ሊተ፡ ሰብአ፡ ምእመናነ፡ አርያሃ፡ ወዘካርያስሃ፡ ወልደ፡ በራክዩ።
3 ወሖርኩ፡ በበ፡ ብእሲት፡ ነቢይት፡ ወፀንሰት፡ ወወለደት፡ ወልደ።
4 እስመ፡ ዘእንበለ፡ ያእምር፡ ሕፃን፡ ሰምየ፡ አቡሁ፡ ወእሙ፣፡ ይነሥእ፡ ኃይለ፡ ደማስቆ፡ ወምህርካ፡ ሰማርያ፡ በቅድመ፡ ንጉሠ፡ ፋርስ።
5 ወይቤለኒ፡ እግዚአብሔር፡ ዳግመ፡ ዓዲሂ።
6 እስመ፡ ኢፈቀዱ፡ ዝንቱ፡ ሕዝብ፡ ማየ፡ ሰሊሆም፡ ዘየሐውር፡ ጽሚተ፡ ወይፈቅዱ፡ ይርከብዎ፡ ለረአሶን፡ ወልደ፡ ሮሜልዩ፡ ያንግሡ፡ ለክሙ።
7 በእንተ፡ ዝንቱ፡ ናሁ፡ ያመጽእ፡ እግዚአብሔር፡ ላዕሌክሙ፡ ማየ፡ ፈለግ፡ ብዙኀ፡ ወኃይለ፣፡ ንጉሠ፡ ፋርስ፡ በኵሉ፡ ክብሩ።
8 ወያጠፍእ፡ እምይሁዳ፡ ብእሴ፡ ተባዕተ፡ ወያኀልቆሙ፡ ለኃያላን።
9 አእምሩ፡ አሕዛብ፡ ወተመውኡ፤ ስምዑ፡ እስከ፡ አጽናፈ፡ ምድር፡ ወተመውኡ፡ ኃያላን፤ ወእመሂ፡ ካዕበ፡ ጸናዕክሙ፡ ካዕበ፡ ትትመውኡ።
10 ወእመሂ፡ መከርክሙ፡ ምክረ፡ ይመይጥ፡ እግዚአብሔር፡ ምክረክሙ፤ ወነገርኒ፡ ዘተናገርክሙ፡ ኢይከውነክሙ፡ እስመ፡ እግዚአብሔር፡ ምስሌነ።
11 ከመዝ፡ ይቤ፡ እግዚአብሔር፡ ጸባኦት፡ እንዘ፡ ይጌሥጸኒ፡ በእዴሁ፡ ጽንዕት፡ ወይዛለፈኒ፡ በቃለ፡ አፉሁ፡ እንዘ፡ ይብል፤ ኢትሖር፡ በፍኖተ፡ ዝንቱ፡ ሕዝብ።
12 ኢትበሉ፡ ዕጹበ።
13 ለእግዚአብሔር፡ ቀድስዎ፡ ወውእቱ፡ ይከውነከ፡ ግርማከ።
14 ወእመሂ፡ ተወከልከ፡ ቦቱ፡ ይቄድሰከ፡ ወኢያዐቅፈከ፡ ከመ፡ እብነ፡ ዕቅፍት፡ ወኢከመ፡ ኰኵሕ፡ ዘያድኅፅ።
15 ወበበይነ፡ ዝንቱ፡ ይደክሙ፡ ብዙኃን፡ እምውስቴቶሙ፡ ወይወድቁ፡ ወይትቀጠቀጡ፡ ወይቀርቡ፡ ወያሠግሩ፡ ሰብአ።
16 ወያጸንዑ፡ ይእተ፡ አሚረ፡ እሙንቱ፡ እለ፡ የኀትምዋ፡ ለኦሪት፡ ከመ፡ ኢይትመሀርዋ።
17 ወይብል፤ እጸንሖ፡ ለእግዚአብሔር፡ ዘሜጠ፡ ገጾ፡ እምቤተ፡ ያዕቆብ፡ ወእትዌከል፡ ቦቱ።
18 ነየ፡ አነ፡ ወደቂቅየ፡ ዘወሀበኒ፡ እግዚአብሔር።
19 ወእመቦ፡ ዘይቤሉክሙ፤ ኅሥዎሙ፡ ለእለ፡ ይትናገሩክሙ፡ እምታሕተ፡ ምድር፡ ወለእለ፡ በፃውዕ፡ እለ፡ ይትናገሩ፡ ከንቶ፡ ወይነቡ፡ ሐሰተ፡ እምልቦሙ፤ አኮኑ፡ አሕዛብ፡ ይስእሉ፡ ኀበ፡ ጣዖቶሙ፤ እለ፡ የኀሡ፡ በእንተ፡ ሕያዋን፡ እምኀበ፡ ምውታን።
20 እስመ፡ ሕገ፡ ወሀበ፡ ለረድኤት፡ ከመ፡ ይበሉ፤ ኢኮነ፡ ከመዝ፡ ነገሩ፡ ወኢየሀቡ፡ ሐፍሠ፡ በእንቲአሁ።
21 ወበዝ፡ ይመጽእ፡ ላዕሌክሙ፡ ረኃብ፡ ወእምከመ፡ ርኅብክሙ፡ ትቴክዙ፡ ወትነቡ፡ ሕሡመ፡ ላዕለ፡ መላእክት፡ ወላዕለ፡ መኳንንት፡ ወትኔጽሩ፡ ላዕለ፡ ውስተ፡ ሰማይ።
22 ወታሕተ፡ ውስተ፡ ምድር፤ ወትሬእዩ፡ ጽፉቀ፡ ጽልመተ፡ ወትትመነደቡ፡ ዓቢየ፡ ምንዳቤ፤ ተሐሙ፡ ወትጼነሱ፤ ይጸልመክሙ፡ ቅድሜክሙ፡ ወኢትሬእዩ፡ ወኢይትበላሕ፡ ዘተመንደበ፡ እስከ፡ አመ፡ ይበጽሕ፡ ዕድሜሁ፡ ለዝ።
=== chapter 9 ===
[Chapter 9]
1 ዘንተ፡ ፍጡነ፡ ግበር፡ ወፍጡነ፡ ስተይ፡ ብሔረ፡ ዛብሎን፡ ወምድረ፡ ንፍታሌም፡ ወተረፈ፡ ጰራልዩ፡ ወማዕዶተ፡ ዮርዳኖስ፡ ወገሊላ፡ ዘአሕዛብ።
2 ሕዝብ፡ ዘይነብር፡ ውስተ፡ ጽልመት፡ ርእዩ፡ ብርሃነ፡ ዓቢየ፤ እለ፡ ይነብሩ፡ ውስተ፡ ብሔረ፡ ጽልመት፡ ወጽላሎተ፡ ሞት፡ ብርሃን፡ በርሀ፡ ላዕሌሆሙ።
3 ዘይበዝኅ፡ ሕዝበ፡ አውረድከ፡ በትፍሥሕት፤ ወይትኀሠዩ፡ በቅድሜከ፡ ከመዝ፡ እለ፡ ይትፌሥሑ፡ በማእረር፡ ወከመ፡ እለ፡ ይትካፈሉ፡ በርበረ።
4 እስመ፡ ተሥዕረ፡ አርዑቶሙ፡ ዘንቡር፡ ዲቤሆሙ፡ ወበትርኒ፡ እንተ፡ ዲበ፡ ክሳዶሙ፤ እስመ፡ ሜጠ፡ በትረ፡ እለ፡ ይትፈደዩ፡ ወዐለዎሙ፡ ለእለ፡ ያቀትዉ፡ ከመ፡ አመ፡ መዋዕለ፡ ምድያም።
5 ወአስተጋብእ፡ ዐራዘ፡ ኵሉ፡ በጕሕሉት፡ ዘተጋብአ፡ ወተፈድየ፡ አልባሰ፡ በተውላጥ፤ ወይፈቅዱ፡ ያውዕይዎ፡ በእሳት።
6 እስመ፡ ሕፃን፡ ተወልደ፡ ለነ፤ ወልድ፡ ተውህበ፡ ለነ፡ ወቅድመት፡ ኮነ፡ በመትከፍቱ፡ ወይሰመይ፡ ስሙ፡ ዓቢየ፡ ምክር፡ መልአክ፤ እስመ፡ አነ፡ አመጽእ፡ ሰላመ፡ ለመላእክት፡ ወሕይወተ፡ ዚአሁ።
7 ወዕበይ፡ ቅድሜሁ፡ ወአልቦ፡ ማኅለቅተ፡ ለሰላሙ፤ ዲበ፡ መንበረ፡ ዳዊት፡ ትጸንዕ፡ መንግሥቱ፡ ወይትዌከፍ፡ በጽድቅ፡ ወበርትዕ፡ እምይእዜ፡ ወእስከ፡ ለዓለም።
8 ወፈነወ፡ እግዚአብሔር፡ ሞተ፡ ላዕለ፡ ያዕቆብ፡ ወመጽአ፡ ላዕለ፡ እስራኤል።
9 ወያእምሩ፡ ኵሉ፡ ሕዝበ፡ ኤፍሬም፡ ወእለ፡ ይነብሩ፡ ሰማርያ፤ በኃሣሮሙ፡ እለ፡ ይብሉ፡ በትዝኅርተ፡ ልቦሙ።
10 ግንፋልሰ፡ ወድቀ፣፡ ንዑ፡ ንቀር፡ እብነ፤ ወንግዝም፡ ሠግላ፡ ወጽሕድ፡ ማኅፈደ፡ ለነ።
11 ወያንኅሎ፡ እግዚአብሔር፡ ዲበ፡ እለ፡ ይቀውሙ፡ ውስተ፡ ደብረ፡ ጽዮን፤ ወይመውጦሙ፡ ለፀር።
12 ለሶርያ፡ እምሥራቀ፡ ፀሐይ፡ ወለአረሚያንሂ፡ እምዕራበ፡ ፀሐይ፤ እለ፡ ይውሕጥዎሙ፡ ለእስራኤል፡ ወአብቀዉ፡ አፉሆሙ፡ ላዕሌሆሙ።
13 ወሕዝብኒ፡ ኢተመይጠ፡ እስከ፡ ተቀሥፈ፤ ወኢኀሠሥዎ፡ ለእግዚአብሔር፡ ኃያል።
14 ወመተረ፡ እግዚአብሔር፡ እምእስራኤል፡ ርእሰ፡ ወዘነበ፤ ዓቢየ፡ ወንኡሰ፡ በሐአቲ፡ ዕለት።
15 ወልሂቅሂ፡ ወእለ፡ ያደሉ፡ ላዕለ፡ ገጽ፡ ውእቱ፡ ርእስ፣፡ ነቢይሂ፡ ዘይሜህር፡ ዓመፃ፡ ውእቱ፡ ዘነብ።
16 ወይጌግዩ፡ እለ፡ ያስተበፅዕዎሙ፡ ለዝንቱ፡ ሕዝብ፤ ወያስሕትዎሙ፡ ከመ፡ የሐጥዎሙ።
17 በበይነ፡ ዝንቱ፡ ኢይትፌሣሕ፡ እግዚአብሔር፡ ወበራዙቲሆሙ፤ ወኢይሣሀል፡ እጓለ፡ ማውታሆሙ፡ ወእቤራቲሆሙ፤ እስመ፡ ኵሎሙ፡ እኩያን፡ ወጽልሕዋን፤ ወኵሉ፡ አፍ፡ ይነብብ፡ ዓመፃ።
18 ወይነድድ፡ ከመ፡ እሳት፡ ኃጢአት፡ ወከመ፡ ሐሠር፡ ይቡስ፡ ዘበልዐቶ፡ እሳት፤ ወይውዓ፡ ከመ፡ ሣዕረ፡ ገዳም፡ ወይበልዕ፡ ዘዐውደ፡ አውግር፡ ኵሎ።
19 መቅሠፍተ፡ መዓቱ፡ ለእግዚአብሔር፡ ታውዒ፡ ኵላ፡ ምድረ፤ ወይከውኑ፡ ሕዝብ፡ ከመ፡ ዋዕየ፡ እሳት፡ ወኢይምሕር፡ ብእሲ፡ እኅዋሁ።
20 ወይትመየጥ፡ የማኖ፡ እስመ፡ ይርኅብ፤ ወይበልዕ፡ ፀጋሞ፡ ወኢይጸግብ፡ ሰብእ፤ እንዘ፡ ይበልዕ፡ ሥጋ፡ መዝራዕቱ።
21 ወበዝኒ፡ ኢተመይጠት፡ መዓቱ፤ እዴሁ፡ ዓዲሃ፡ ልዕልት።
=== chapter 10 ===
[Chapter 10]
1 አሌ፡ ሎሙ፡ ለእለ፡ ይጽሕፉ፡ እኩየ፡ መጽሐፈ።
2 ወይመይጡ፡ ፍትሐ፡ ነዳይ፤ ወይመይጡ፡ ፍትሐ፡ ምስኪን፡ ሕዝብየ፤ ወየሀይዱ፡ እቤረ፡ ወይበረብሩ፡ እጓለ፡ ማውታ።
3 ወምንተ፡ ይሬስዩ፡ አመ፡ ዕለተ፡ ፍዳሆሙ፡ እስመ፡ እምርኁቅ፡ ይመጽኦሙ፡ ምንዳቤሆሙ፤ ወኀበ፡ መኑ፡ ትትመሐፀኑ፡ ወመኑ፡ ዘይረድአክሙ፤ ወአይቴ፡ ተኀደድጉ፡ ትርሲተክሙ።
4 ከመ፡ ኢትደቁ፡ ውስተ፡ ኃሣር፤ ወበዝኒ፡ ኵሉ፡ ኢተመይጠት፡ መዓቱ፤ ዓዲ፡ እድሂ፡ ልዕልት።
5 አሌ፡ ሎሙ፡ ለፋርስ፤ በትረ፡ መዓትየ፡ ወመንሱት፡ ውስተ፡ እዴሆሙ።
6 ወእፌኑ፡ መቅሠፍትየ፡ ላዕለ፡ ሕዝብየ፡ ኃጥኣን፤ ወእኤዝዞሙ፡ ለሕዝብየ፡ ከመ፡ ይበርብርዎሙ፡ ወየሐብልይዎሙ፡ ወይኪድዎን፡ ለአህጉሪሆሙ፡ ወይረስይዎን፡ ከመ፡ ጸበል።
7 ውእቱሂ፡ አኮ፡ በከመ፡ ተሐዘብዎ፡ በልብ፡ ወበነፍሱሂ፣፡ አኮ፡ በከመ፡ ሐለይዎ፤ ዳእሙ፡ ይሤሩ፡ አሕዛበ፡ ብዙኃነ፡ በምክሩ።
8 ወእመኒ፡ ይቤልዎ፤ ባሕቲትከኑ፡ መልአክ፡ አንተ።
9 ወይብል፤ ኢነሣእኩ፡ ብሔረ፡ ዘመልዕልተ፡ ባቢሎን፡ ወካልአኒ፡ ኀበ፡ ተሐንጸ፡ ማኅፈዳ፤ ወነሣእኩ፡ ዐረብ፡ ወደማስቆ፡ ወሰማርያ።
10 ወከመ፡ ነሣእኩ፡ እሎንተ፡ ከማሁ፡ እነሥእ፡ ኵሎ፡ በሐውርተ።
11 ወበከመ፡ ረሰይክዋ፡ ለሰማርያ፡ ወለግብረ፡ እደዊሃ፡ ከማሁ፡ እሬስያ፡ ለኢየሩሳሌምኒ፡ ወለጣዖታ።
12 ወእምዝ፡ ፈጺሞ፡ እግዚአብሔር፡ ዘንተ፡ ኵሎ፡ ገቢረ፡ በደብረ፡ ጽዮን፡ ወበኢየሩሳሌም፣፡ ይመጽእ፡ እግዚአብሔር፡ ላዕለ፡ ዘያዐቢ፡ ልቦ፡ ላዕለ፡ መልአከ፡ ፋርስ፡ ወዲበ፡ አዕይንቲሁ፡ ወዲበ፡ ትርሲቱ።
13 እስመ፡ ይቤ፤ በኃይልየ፡ እገብር፡ ወበምክረ፡ ጥበብየ፡ እነሥእ፡ በሐውርተ፡ አሕዛብ፡ ወእበረብሮ፡ ለኃይሎሙ።
14 ወአድለቀልቆን፡ ለአህጉር፡ እለ፡ ውስቴቱ፡ ይነብሩ፡ ወአስተጋብእ፡ ኵሉ፡ ዓለመ፡ ወእትሜጠዋ፡ በእዴየ፡ ከመ፡ ሕፃን፡ ወከመ፡ አንቆቅሖ፣፡ ወአልቦ፡ ዘያመሥጠኒ፡ ወአልቦ፡ ዘይትዋሥአኒ።
15 ይንእድዎኑ፡ ለጕድብ፡ ዘአልቦ፡ ዘይገዝሙ፡ ቦቱ፤ ይትሌዐልኑ፡ ሞሠርት፡ ዘአልቦ፡ ዘይወሥር፡ ቦቱ፡ ከመ፡ ዘይነሥእ፡ በትረ፡ ወዕፀ።
16 በእንተ፡ ዝንቱ፡ ይፌኑ፡ እግዚአብሔር፡ ኃሣረ፡ ዲበ፡ ክብርከ፡ ወእሳተ፡ ዲበ፡ ትርሲትከ፡ ዘይነድድ፡ ወያውዒ።
17 ወይከውን፡ ብርሃነ፡ እስራኤል፡ እሳተ፡ ወይትቄደሱ፡ በእሳት፡ ዘይነድድ፡ ወያውዒ፡ ወይበልዕ፡ ዖመ፡ ከመ፡ ሣዕር።
18 ይእተ፡ አሚረ፡ ይጠፍኡ፡ አድባር፡ ወአውግር፡ ወዖም፡ ወይበልዕ፡ ነፍሰ፡ ወሥጋ፤ ወይከውን፡ ዘይጐይይ፡ ከመ፡ ዘይጐይይ፡ እምነበልባለ፡ እሳት፡ ዘይነድድ።
19 ወእለ፡ ተርፉ፡ እምውስቴቶሙ፡ ይከውኑ፡ በኍልቍ፡ ወይጽሕፎሙ፡ ሕፃን።
20 ወይእተ፡ አሚረ፡ ኢይትዌሰኩ፡ እንከ፡ እለ፡ ተርፉ፡ እስራኤል፣፡ ወእለሂ፡ ድኅኑ፡ እምያዕቆብ፡ ኢይትአመንዎሙ፡ እንከ፡ ለእለ፡ አስሐትዎሙ፤ ዳእሙ፡ ይትዌከሉ፡ በእግዚአብሔር፡ ቅዱሰ፡ እስራኤል፡ በጽድቅ።
21 ወይጸንዑ፡ በእግዚአብሔር፡ እለ፡ ተርፉ፡ እምያዕቆብ።
22 ወእመ፡ ኮነ፡ ኍልቆሙ፡ ለደቂቀ፡ እስራኤል፡ ከመ፡ ኆፃ፡ ባሕር፣፡ እለ፡ ተርፉ፡ ይድኅኑ።
23 እስመ፡ ኅሉቀ፡ ወምቱረ፡ ነገረ፡ በጽድቅ።
24 በበይነ፡ ዝንቱ፡ ከመዝ፡ ይቤ፡ እግዚአብሔር፡ ጸባኦት፤ ኢትፍርሁ፡ ሕዝብየ፡ እለ፡ ትነብሩ፡ ውስተ፡ ጽዮን፡ እምነ፡ ፋርስ፡ እስመ፡ በበትር፡ ይዘብጠከ፤ እስመ፡ መቅሠፍትየ፡ አመጽእ፡ ላዕሌከ፡ ከመ፡ ትርአይ፡ ፍኖተ፡ ግብጽ።
25 እስመ፡ ዓዲ፡ ኅዳጠ፡ ወይቈርር፡ መዓትየ፡ ወመቅሠፍትየ፡ ላዕለ፡ ምክሮሙ።
26 ወያመጽእ፡ እግዚአብሔር፡ ዲቤሆሙ፡ መቅሠፍተ፡ ከመ፡ መቅሠፍተ፡ ምድያም፡ በውስተ፡ ብሔረ፡ ሕማም፤ ወሕምዙሂ፡ መንገለ፡ ፍኖተ፡ ባሕር፡ ወውስተ፡ ፍኖት፡ መንገለ፡ ግብጽ።
27 ወውእተ፡ አሚረ፡ ይሠዐር፡ አርዑት፡ እምክሳድከ፡ ወፍርሃት፡ እመኔከ፡ ወይትቀጠቀጥ፡ አርዑት፡ እመትከፍትከ።
28 እስመ፡ ይመጽእ፡ ውስተ፡ ሀገረ፡ ሐጌ፡ ወየኀልፍ፡ ውስተ፡ መጌዶን፡ ወያነብር፡ ንዋዮ፡ ውስተ፡ ምክማስ።
29 ወየኀልፍ፡ ቈላ፣፡ ወበጺሖ፡ ሐጌ፡ ይፈርሁ፡ ሬማት፡ ሀገረ፡ ሳኦል።
30 ወትጐይይ፡ ወለተ፡ ጋላን፡ ወይሰማዕ፡ በኤንሶን፡ ወይሰማዕ፡ በአናቶት።
31 ወይደነግፁ፡ መዴቤና፡ ወእለ፡ ይነብሩ፡ ጋቤር።
32 ያስተበቍዕዎሙ፡ በእንተ፡ ፍኖቱ፡ ከመ፡ የሀሉ፡ ምስለ፡ እዴሁ፤ ወያስተበቍዕዎ፡ ለደብረ፡ ወለተ፡ ጽዮን፡ ወለአውግረ፡ ኢየሩሳሌም።
33 ናሁ፡ እግዚአብሔር፡ ጸባኦት፡ የሀውኮሙ፡ ለክቡራን፡ በኃይሉ፡ ወይቀጠቅጦሙ፡ ለዓበይት፡ ኃሣር፡ ወየኀሥሩ፡ ዓበይት።
34 ወይወድቁ፡ ነዋኃት፡ በመጥባሕት፤ ወይወድቅ፡ ሊባኖስ፡ ምስለ፡ ነዋኃት፡ አርዝ።
=== chapter 11 ===
[Chapter 11]
1 ወትወፅእ፡ በትር፡ እምሥርወ፡ እሴይ፤ ወየዐርግ፡ ጽጌ፡ እምጕንዱ።
2 ወየዐርፍ፡ ዲቤሁ፡ መንፈሰ፡ እግዚአብሔር፤ መንፈሰ፡ ጥበብ፡ ወአእምሮ፤ መንፈሰ፡ ኃይል፡ ወምክር፤ መንፈሰ፡ ልቡና፡ ወጽድቅ።
3 ወይመልእ፡ ላዕሌሁ፡ መንፈሰ፡ ፍርሃተ፡ እግዚአብሔር።
4 ዳእሙ፡ በየዋህ፡ ኵነኔ፡ ይኴንን፤ ወይዛለፎሙ፡ ለክቡራነ፡ ምድር፤ ወይቀሥፋ፡ ለምድር፡ በቃለ፡ አፉሁ፤ ወበመንፈሰ፡ ከናፍሪሁ፡ ለኃጥእ።
5 ወይቀንት፡ ጽድቀ፡ ውስተ፡ ሐቄሁ፤ ወይትዐፀፍ፡ ርትዐ፡ ውስተ፡ ገቦሁ።
6 ወይትረዐዩ፡ ተኵላት፡ ምስለ፡ አባግዕ፤ ወየዐርፍ፡ ነምር፡ ምስለ፡ ጠሊ፤ ወይትረዐዩ፡ አልህምት፡ ምስለ፡ አናብስት፤ ወየሐስሎሙ፡ ሕፃን፡ ንስቲት።
7 ወይትረዐዩ፡ አልህምት፡ ምስለ፡ ድብ፡ ኅቡረ፣፡ ወይትሐፀኑ፡ እጐሊሆሙ፡ ኅቡረ፤ ወይቀምሕ፡ አንበሳ፡ ሐሠረ፡ ከመ፡ ላህም።
8 ወይወዲ፡ እዴሁ፡ ሕፃን፡ ንስቲት፡ ውስተ፡ ግበ፡ አርዌ፡ ምድር፤ ወውስተ፡ ግበበ፡ አፍዖት።
9 ወአልቦ፡ ዘይነክዮ፡ ወኢይክል፡ አሕሥሞ፡ ላዕሌሁ፡ ወኢላዕለ፡ መኑሂ፡ በደብረ፡ መቅደስየ፤ እስመ፡ መልአ፡ ላዕለ፡ ኵሉ፡ አእምሮ፡ እግዚአብሔር፡ ከመ፡ ማይ፡ ብዙኅ፡ ዘይደፍን፡ ባህረ።
10 ወይቀውም፡ ይእተ፡ አሚረ፡ ሥርወ፡ እሴይ፡ ወዘተሠይመ፡ ይከውን፡ መልአከ፡ አህዛብ፤ ወይትዌከሉ፡ ቦቱ፡ አሕዛብ፤ ወይከውን፡ ምዕራፈ፡ ዘዚአሁ፡ ክብር።
11 ወይእተ፡ አሚረ፡ ይደግም፡ እግዚአብሔር፡ አርእዮ፡ እዴሁ፤ ከመ፡ ይቅናእ፡ ተረፈ፡ እለ፡ ተርፉ፡ እምአሕዛብ፡ ዘአትረፉ፡ ፋርስ፡ ወግብጽ፡ ወባቢሎን፡ ወኢትዮጵያ፡ ወኢላሜጦን፡ ወእምሥራቀ፡ ፀሐይ፡ ወእምዕራብ።
12 ወያርኢ፡ ትእምርተ፡ ለአሕዛብ፡ ወያስተጋብኦሙ፡ ለእለ፡ ተርፉ፡ እስራኤል፤ ወለእለ፡ ተዘርዉ፡ ይሁዳ፡ ያስተጋብኦሙ፡ እምአርባዕቱ፡ አጽናፈ፡ ምድር።
13 ወይሠዐር፡ ቅንአተ፡ ኤፍሬም፡ ወትጠፍኡ፡ ፀረ፡ ይሁዳ።
14 ወይሰርሩ፡ በአሕማረ፡ ኢሎፍሊ፤ እንተ፡ ባሕር፡ ይመሀርኩ፡ ኅቡረ፣፡ እለ፡ እምሥራቀ፡ ፀሐይ፡ ወኢዶምያ፣፡ ወይቀድሙ፡ ያውርዱ፡ እዴሆሙ፡ ዲበ፡ ሞአብ፤ ወይቀድሙ፡ ደቂቀ፡ አሞን፡ ይግረሩ።
15 ወያነፅፋ፡ እግዚአብሔር፡ ለባሕረ፡ ግብጽ፡ ወያመጽእ፡ እዴሁ፡ ላዕለ፡ ፈለግ፡ በነፍስ፡ ኃይል፡ ወይቀሥፍ፡ ሰብዐተ፡ ቈላተ፡ ከመ፡ ይሖርዎን፡ በአሣእን።
16 ወይከውን፡ መጽያሕተ፡ ለሕዝብየ፡ እለ፡ ተርፉ፡ ውስተ፡ ግብጽ፤ ወይከውኖሙ፡ ለእስራኤል፡ ከመ፡ አመ፡ ወፅኡ፡ እምግብጽ።
=== chapter 12 ===
[Chapter 12]
1 ወትብል፡ ይእተ፡ አሚረ፤ አአኵተከ፡ እግዚኦ፡ እስመ፡ ተመዐዕከኒ፤ ወሜጥከ፡ መቅሠፍተከ፡ ወካዕበ፡ ተሠሀልከኒ።
2 ናሁ፡ አምላኪየ፡ ወመድኃንየ፡ ወእትዌከል፡ ቦቱ፤ አሐዩ፡ ወኢይፍራህ፤ እስመ፡ እግዚአብሔር፡ ክብርየ፡ ወትርሲትየ፤ ወውእቱ፡ ኮነኒ፡ መድኃንየ።
3 ወትቀድሕ፡ ማየ፡ በትፍሥሕት፡ እምዐዘቅተ፡ ሕይወት።
4 ወትብል፡ ይእተ፡ አሚረ፤ ሰብሕዎ፡ ለእግዚአብሔር፡ ወጸውዑ፡ ስሞ፤ ወንግርዎሙ፡ ለአሕዛብ፡ ስብሐቲሁ፤ ወተዘከሩ፡ ከመ፡ ተለዐለ፡ ስሙ።
5 ሰብሑ፡ ለስመ፡ እግዚአብሔር፡ እስመ፡ ገብረ፡ ዓቢያተ፤ ንግሩ፡ ዘንተ፡ በኵሉ፡ ምድር።
6 ይትፈሥሑ፡ ወይትኀሠዩ፡ እለ፡ ይነብሩ፡ ውስተ፡ ጽዮን፤ እስመ፡ ተለዐለ፡ በማእከሌከ፡ ቅዱሰ፡ እስራኤል።
=== chapter 13 ===
[Chapter 13]
1 ራእይ፡ ዘርእየ፡ ኢሳይያስ፡ ወልደ፡ አሞጽ፡ በእንተ፡ ባቢሎን።
2 ንሥኡ፡ ትእምርተ፡ ውስተ፡ አድባረ፡ ገዳም፤ አንሥኡ፡ ቃለክሙ፡ ወአጽንዑ፡ እደዊክሙ፣፡ ያርኅዉ፡ መላእክት።
3 አነ፡ እኤዝዞሙ፡ ወአነ፡ አመጽኦሙ፡ ለቅዱሳንየ፤ አነ፡ አመጽኦሙ፡ ለእለ፡ ያርብሕ፡ እንዘ፡ ይትፌሥሑ፡ ይመጽኡ፡ ኅቡረ፡ ወይፌጽሙ፡ መዐትየ፡ ወያኀሥርዎሙ።
4 ውውዓ፡ ብዙኃን፡ አሕዛብ፡ ላዕለ፡ አድባር፡ ከመ፡ ዘብዙኃን፡ አሕዛብ፡ ወሠራዊት፡ ወነገሥት፡ እለ፡ ተጋብኡ፤ እግዚአብሔር፡ ጸባኦት፡ አዘዘ፡ ለአሕዛብ፡ መስተቃትላን፡ ይምጽኡ።
5 እምርኁቅ፡ ብሔር፡ እምአጽናፈ፡ ምድር፡ መሠረተ፡ ሰማይ፤ እግዚአብሔር፡ ወመስተቃትላኒሁ፡ ያጠፍእዋ፡ ለዓለም።
6 ወውዑ፡ እስመ፡ ቀርበት፡ ዕለተ፡ እግዚአብሔር፡ ወይመጽእ፡ ተቀጥቅጦ፡ እምኀበ፡ እግዚአብሔር።
7 ወበእንተ፡ ዝንቱ፡ ኵሉ፡ እድ፡ ይደክም፡ ወኵሉ፡ ነፍስ፡ ይደነግፅ።
8 ወይትሀወኩ፡ ሊቃውንት፡ ወይእኅዞሙ፡ ማሕምም፡ ከመ፡ ብእሲት፡ እንት፡ ትወልድ፤ ወይትቃተሉ፡ በበይናቲሆሙ፤ ይትቀጽዑ፡ ወይትባረጽ፡ ገጾሙ፡ ከመ፡ እሳት።
9 እስመ፡ ናሁ፡ ትመጽእ፡ ዕለተ፡ እግዚአብሔር፡ እንተ፡ ምልእት፡ መዐተ፡ ወመቅሠፍተ፣፡ ከመ፡ ታጥፍእ፡ ዓለመ፡ ወታኀልቆሙ፡ ለብዙኃን፡ ኃጥኣን፡ እምኔሃ።
10 ወኢይበርሁ፡ እንከ፡ ከዋክብተ፡ ሰማይ፡ እለ፡ አርዮብ፡ ወኵሉ፡ ዓለመ፡ ሰማይ፤ ወፀሐይኒ፡ ሠሪቆ፡ ይጸልም፡ ወወርኅኒ፡ ኢይበርሀ።
11 ወእኤዝዝ፡ እንከ፡ እኪተ፡ ላዕለ፡ ኵሉ፡ ዓለም፡ ወላዕለ፡ ኃጥኣን፤ ወእሥዕር፡ ትዕቢቶሙ፡ ለኃጥኣን፣፡ ወበትዝኅርቶሙ፡ ለዕቡያን፡ አኀሥሮሙ።
12 ወእለ፡ ተርፉ፡ ይትበደሩ፡ እምወርቅ፡ ወእምብሩር፤ ወይትበደር፡ ሰብእ፡ እምእንቈ፡ ሰንፔር።
13 እስመ፡ ሰማይ፡ ይትመዐዕ፡ ወምድርኒ፡ ያንቀለቅል፡ እመሠረቱ፡ በእንተ፡ መዐተ፡ መቅሠፍተ፡ እግዚአብሔር፡ ጸባኦት፡ አመ፡ ይመጽእ፡ መዐቱ።
14 ወይከውኑ፡ እለ፡ ተርፉ፡ ከመ፡ ወይጠል፡ ዘያመሥጥ፡ ወከመ፡ በግዕ፡ ዘተኀጥአ፣፡ ወአልቦ፡ ዘያገብኦ፡ ዘይመይጦ፤ ይትመየጥ፡ ሰብእ፡ ከመ፡ ይእቱ፡ ብሔሮ።
15 ወእለሂ፡ ተዘርዉ፡ ይመውቱ፣፡ ወእለሂ፡ ተጋብኡ፡ ይወድቁ፡ በኵናት።
16 ወይነፅኁ፡ ውሉዶሙ፡ ወይበረብሩ፡ አብያቲሆሙ፡ በቅድሜሆሙ፡ ወይስሕቡ፡ አንስቲያሆሙ።
17 ናሁ፡ አነሥኦሙ፡ ላዕሌክሙ፡ ለፋርስ፡ እለ፡ ኢይፈቅድዎ፡ ለወርቅ፡ ወኢይሔልይዎ፡ ለብሩር።
18 እለ፡ ይቀጠቅጡ፡ ወየሐስዩ፡ ነፍሰ፡ ወሬዛ፤ ወኢይምሐሩ፡ ሕፃናቲክሙ፡ ወኢይምሕኩ፡ አዕይንቲሆሙ፡ ለውሉድክሙ።
19 ወትከውን፡ ባቢሎን፡ እንተ፡ ይብልዋ፡ ነገሥተ፡ ፋርስ፡ ክብርተ፡ ከመ፡ ሰዶም፡ ወገሞራ፡ እለ፡ ገፍትዖን፡ እግዚአብሔር።
20 ኢትሄሉ፡ ለዓለም፡ ወኢትነብር፡ እንከ፡ ለትውልደ፡ ትውልድ፤ ወኢይበውእዋ፡ በብዙኅ፡ ትውልድ፡ ወኢያኀልፍዋ፡ ዐረብ፡ ወኢያዐርፉ፡ ውስቴታ፡ ኖሎት።
21 ወየኀድርዋ፡ አራዊተ፡ ገዳም፡ ወይመልእ፡ ውስተ፡ አብያቲሃ፡ መጽአሞ፤ ወየዐርፉ፡ በውስቴታ፡ ፄደናታት፡ ወይዘፍኑ፡ በህየ፡ አጋንንት።
22 ወየኀድሩ፡ ህየ፡ እለ፡ ጽፍረ፡ ላህም፡ እገሪሆሙ፡ ወይትዋለዱ፡ በህየ፡ መራክብት፡ ውስተ፡ አብያቲሆሙ።
=== chapter 14 ===
[Chapter 14]
1 ወዝኵሉ፡ ይከውን፡ ፍጡነ፡ ወኢይጐነዲ፡ ዝንቱ፣፡ ወይሣሀሎ፡ እግዚአብሔር፡ ለያዕቆብ፡ ወየኀርዮ፡ ካዕበ፡ ለእስራኤል፤ ወየዐርፉ፡ ውስተ፡ ብሔሮሙ፡ ወይትዌሰኩ፡ ውስቴቶሙ፡ ፈላስያን፡ ወይትዌሰኩ፡ ውስተ፡ ቤተ፡ ያዕቆብ።
2 ወይነሥእዎሙ፡ አሕዛብ፡ ወያአትውዎሙ፡ ብሔሮሙ፣፡ ወይትካፈልዎሙ፡ ወይበዝኁ፡ ውስተ፡ ውእቱ፡ ብሔር፡ ወይከውኑ፡ በህየ፡ አግብርተ፡ ወአእማተ፣፡ ወይከውኑ፡ ፄዋ፡ እለ፡ ፄወውዎሙ፡ ወይትቀነዩ፡ እለ፡ ቀነይዎሙ።
3 ወይእተ፡ አሚረ፡ ያዐርፈከ፡ እግዚአብሔር፡ እምሕማምከ፡ ወእመዐትከ፡ ወእምቅኔከ፡ መሪር፡ ዘተቀነይከ፡ ሎሙ።
4 ወትነሥእ፡ ዘንተ፡ ነገረ፡ ላዕለ፡ መንግሥተ፡ ባቢሎን፡ ወትብል፡ ይእተ፡ አሚረ፤ እፎኑ፡ ተሥዕረ፡ ዘያቀቱ፡ ወእፎኑ፡ ተሥዕረ፡ ዘያሜምዕ።
5 እስመ፡ ቀጥቀጦ፡ እግዚአብሔር፡ ለአርዑተ፡ ኃጥኣን፡ ወለአርዑተ፡ መላእክት።
6 ወቀሠፎሙ፡ እግዚአብሔር፡ ለአሕዛብ፡ በመቅሠፍተ፡ መዐቱ፤ ወኢምሕኮሙ፡ ለአሕዛብ፡ እመቅሠፍተ፡ መዐቱ።
7 ወአዕረፈት፡ እንከ፡ ተአሚና፡ ኵላ፡ ምድር፣፡ ትኬልሕ፡ በትፍሥሕት።
8 ወይትኀሠዩ፡ ብከ፡ ዕፀወ፡ ሊባኖስ፡ ወአርዘ፡ ሊባኖስ፤ እምዘ፡ ሰከብከ፡ ኢዐርገ፡ እንከ፡ ዘይገዝመነ።
9 ሲኦልኒ፡ በታሕቱ፡ መረት፡ ወተቀበሉከ፤ ወተንሥኡ፡ ምስሌከ፡ ኵሎሙ፡ እለ፡ ያርብሕ፡ እለ፡ ኰነንዋ፡ ለምድር፣፡ እለ፡ አንሥእዎሙ፡ እመናብርቲሆሙ፡ ለኵሎሙ፡ ነገሥተ፡ ምድር።
10 ይሠጠዉከ፡ ወይብሉከ፡ ኵሎሙ፤ አንተሂጓ፡ ተሠገርከ፡ ከማነ፤ ተሥዕረጉ፡ ምክርከ።
11 ወደቀ፡ ውስተ፡ ሲኦል፡ እምክብርከ፣፡ ብዙኅ፡ ጥፍሥሕትከ፤ ወተነጸፍከ፡ ምስሐገ፡ በታሕቴከ፡ ወዐፅየት፡ ውዕየትከ።
12 እፎ፡ ወድቀ፡ እምሰማይ፡ ኮከበ፡ ጽባሕ፡ ዘይሠርቅ፡ ሶበ፡ ይገውሕ፤ ወተቀጥቀጠ፡ ውስተ፡ ምድር፡ ዘይልእክ፡ ኀበ፡ ኵሉ፡ አሕዛብ።
13 ወአንተሰ፡ ትቤ፡ በልብከ፤ አዐርግ፡ ውስተ፡ ሰማይ፤ ወአነብር፡ መንበርየ፡ መልዕልተ፡ ከዋክብተ፡ ሰማይ፤ እነብር፡ መልዕልተ፡ ደብር፡ ነዋኅ፡ ወውስተ፡ አድባር፡ ነዋኃት፡ ዘመንገለ፡ ደቡብ።
14 ወአዐርግ፡ መልዕልተ፡ ደመናት፡ ወእከውን፡ ከመ፡ ልዑል።
15 ይእዜሰኬ፡ ትጸድፍ፡ ውስተ፡ ሲኦል፡ ወትወርድ፡ ውስተ፡ መሠረታቲሃ፡ ለምድር።
16 ወያነክሩ፡ እለ፡ ርእዩከ፡ ወይብሉ፤ ዝንቱከ፡ ብእሲ፡ ዘአማሰና፡ ለምድረ፡ ጽዮን፡ ወለነገሥታ።
17 ወረሰያ፡ ለኵሉ፡ ዓለም፡ ሐቅለ፡ ወነሠተ፡ አህጉሪሃ፤ ወኢፈትሐ፡ ሙቁሓኒሃ።
18 ወአኖሞሙ፡ ለኵሎሙ፡ ነገሥተ፡ አሕዛብ፡ ለለ፡ ብእሲ፡ በክብሩ፡ ውስተ፡ ቤቱ።
19 ወኪያከኒ፡ ይገድፈከ፡ ውስተ፡ አድባር፡ ከመ፡ በድን፡ ርኩስ፤ ምስለ፡ ብዙኃን፡ አብድንት፡ እለ፡ ወጉኣን፡ በኲናት፤ እለ፡ ይወርዱ፡ ውስተ፡ ሲኦል።
20 ከመ፡ ልብስ፡ ዘምሉእ፡ ደመ፡ ዘኢኮነ፡ ንጹሐ፤ ከማሁኬ፡ አንተሂ፡ ኢኮንከ፡ ንጹሐ።
21 አስተዳሉ፡ ደቂቀከ፡ ይቅትልዎሙ፡ በኃጢአተ፡ አበዊሆሙ፤ ከመ፡ ኢይትነሥኡ፡ ወኢይረስዋ፡ ለምድር፤ ወከመ፡ ኢያብዝኁ፡ ቀትለ፡ ውስተ፡ ምድር።
22 ወእትነሣእ፡ ላዕሌሆሙ፡ ይቤ፡ እግዚአብሔር፡ ጸባኦት፡ ወአጠፍእ፡ ዘርኦሙ፡ ወስሞሙ፡ ወተረፎሙ።
23 እሬስያ፡ ለባቢሎን፡ ከመ፡ ይንበራሃ፡ አዕዋፍ፡ ውስቴታ፡ ወትከውን፡ ከመ፡ ኢምንት፤ ወእሬስያ፡ ከመ፡ ጽቡረ፡ ዐምዐም፡ ለሙስና።
24 ከመዝ፡ ይቤ፡ እግዚአብሔር፡ ጸባኦት፤ በከመ፡ ነበብኩ፡ ከማሁ፡ ይከውን፡ ወበከመ፡ መከርኩ፡ ከማሁ፡ ይነብር።
25 ከመ፡ አጥፍኦሙ፡ ለፋርስ፡ እምድርየ፡ ወእምደወልየ፤ ወይከይድዎሙ፡ ወይሠዐር፡ እምላዕሌሆሙ፡ አርዑቶሙ፣፡ ወጾሮሙ፡ ይትኀደግ፡ እመታክፍቲሆሙ።
26 ዛቲ፡ ይእቲ፡ ምክር፡ እንተ፡ መከረ፡ እግዚአብሔር፡ ላዕለ፡ ኵሉ፡ ዓለም፡ ወዛቲ፡ ይእቲ፡ እዴሁ፡ ልዕልት፡ ዲበ፡ ኵሉ፡ አሕዛብ።
27 ወመኑ፡ ይመይጥ፡ ምክሮ፡ ለእግዚአብሔር፡ ቅዱስ፤ ወመኑ፡ ይከልእ፡ እዴሁ፡ ልዑለ።
28 በዓመት፡ ዘሞተ፡ አካዝ፡ ንጉሥ፡ ኮነ፡ ዝንቱ፡ ነገር።
29 ኢትትፈሥሑ፡ ኵልክሙ፡ ኢሎፍሊ፡ ፤ እስመ፡ ተቀጥቀጠ፡ አርዑተ፡ ኃይልክሙ።
30 ወይትረዐዩ፡ ነዳያን፡ በውስቴቱ፤ ወየዐርፉ፡ ሰብእ፡ ነዳያን፡ በሰላም፤ ወያጠፍኦሙ፡ ረኃብ፡ ለዘርእከ፤ ወያኀልቆሙ፡ ለእለ፡ ተርፉ፡ እምኔከ።
31 ወውዑ፡ አናቅጸ፡ አህጉር፡ ወየአወይዋ፡ አህጉር፡ ድንጉፃት፡ ወኵሎሙ፡ ኢሎፍሊ፤ እስመ፡ እምደቡብ፡ መጽአ፡ ጢስ፤ ወኢይሄልዉ፡ እንከ።
32 ወምንተ፡ ይብሉ፡ ነገሥተ፡ አሕዛብ፤ ናሁ፡ እግዚአብሔር፡ ሣረራ፡ ለጽዮን፤ ወበእንተ፡ ዝንቱ፡ ይድኅኑ፡ ትሁታን፡ ሕዝብ።
=== chapter 15 ===
[Chapter 15]
1 በሌሊት፡ ያጠፍእዋ፡ ለሞአብ፡ ወበሌሊት፡ ያንኅልዋ፡ ለጥቅመ፡ ሞአብ።
2 ተክዙ፡ ለርእስክሙ፡ እስመ፡ ተሐጕለት፡ ዴቦን፡ ኀበ፡ ይነብር፡ ጣዖትክሙ፡ ወኀበ፡ ሀሎ፡ ምሥዋዓቲክሙ።
3 በውስተ፡ መርሕባ፡ ቅንቱ፡ ሠቀ፡ ወብክዩ፡ በውስተ፡ አንሕስቲሃ፡ ወአውይዉ፡ ውስተ፡ አስኳቲሃ፡ እንዘ፡ ትበክዩ።
4 እስመ፡ አውየወት፡ ሐሴቦን፡ ወነገረት፡ እስከ፡ ኢያሳ፡ ወተሰምዐ፡ ቃሎሙ።
5 ልባ፡ ለሞአብ፡ ተአወዩ፡ ባሕቲታ፡ እስከ፡ ሴጎር፤ እስመ፡ እጓለ፡ እጐልት፡ ይእቲ፡ ዘሠለስቱ፡ ክረምታ፤ በውስተ፡ ዐቀባ፡ ለሉዊት፡ ይበክዩ፡ ኀቤከ፡ ወየዐርጉ፡ ፍኖተ፡ አሮሜን።
6 ወይነፅፍ፡ ማየ፡ ኔምሬም፡ ወየኀልቅ፡ ሣዕራ፤ ወኢይትረከብ፡ ሐመልማል፡ በውስቴታ።
7 ወምስለ፡ ከመዝ፡ ሀለወከ፡ ከመ፡ ኢትድኅን፤ እስመ፡ አመጽእ፡ ውስተ፡ ቈላተ፡ ዐረባስ፡ ወይነሥኣ።
8 እስመ፡ ኀብረ፡ አውያታ፡ ምስለ፡ በሐውርተ፡ ሞአብ፡ ዘአጋሌም፡ ወወውዑ፡ እስከ፡ ዐዘቅተ፡ ኤሌም።
9 ወይመልእ፡ ደም፡ ውስተ፡ ማየ፡ ሮሞን፤ እስመ፡ አመጽእ፡ ላዕለ፡ ሮሞን፡ ዐረባስ፡ ወአነሥእ፡ ዘርአ፡ ሞአብ፡ ወአርያል፡ ወእለ፡ ተርፉ፡ እምአደማ።
=== chapter 16 ===
[Chapter 16]
1 እፌንዎሙ፡ ከመ፡ አራዊት፡ ውስተ፡ ምድረ፡ ኰኵሕ።
2 እስመ፡ ኮንኪ፡ ከመ፡ ዖፍ፡ እንተ፡ አስረረት፡ እጐሊሃ፡ ወኀደገት፤ ወኮንኪ፡ ወለተ፡ ሞአብ፤ ከመ፡ መሐስአ፡ አባግዕ፡ ስቡሕ።
3 ወትመክር፡ ብዙኀ፡ አርኖን፡ ከመ፡ ትግበር፡ ላቲ፡ ዳሰ፡ ኀበ፡ ትነብር፡ ውስተ፡ ምስሐግ፡ ወትረ፣፡ መዓልተ፡ ወሌሊተ፡ ይደነግፁ፡ ወይሜምዑ።
4 ወኢታንብሮሙ፡ ምስሌከ፡ ለእለ፡ ወተጉ፡ እምነ፡ ሞአብ፡ ከመ፡ ይኩኑክሙ፡ ሐፁረክሙ፡ ውስተ፡ ገጸ፡ እለ፡ ሮዱክሙ፤ እስመ፡ ኀልቁ፡ መስተቃትላን፡ ወተሐጕለ፡ መልአክ፡ ዘላዕለ፡ ኵሉ፡ ምድር።
5 ወይረትዕ፡ መንበሩ፡ በምጽዋት፡ ወይነብር፡ ውስቴቱ፡ በጽድቅ፣፡ ወይኴንን፡ በቤተ፡ ዳዊት፡ ወየኀሥሥ፡ ፍትሐ፡ ወይዴግን፡ ጽድቀ።
6 ሰማዕነ፡ ትዕቢተ፡ ሞአብ፡ ወጽዕለተ፡ ፈድፋደ፣፡ ወአእተትኩ፡ ትዕቢተ።
7 ወውዑ፡ ሞአብ፡ እስመ፡ በሞአብ፡ አውየዉ፡ ኵሎሙ፤ እለ፡ ይነብሩ፡ ዴሴም፡ ይስሕጡ፡ ወኢይትኀፈሩ።
8 ሐቅለ፡ ሐሴቦን፡ ይላሕዉ፤ ወይነ፡ ሴባማ።
9 በእንተ፡ ዝንቱ፡ እበኪ፡ ከመ፡ ብካየ፡ ኢያዜር፡ ወይነ፡ ሴባማ።
10 ወእሥዕር፡ ትፍሥሕተ፡ ወኃሴተ፡ እምወይን፡ ወኢይትፌሥሑ፡ እንከ፡ በወይን፡ ወኢያከይዱ፡ ወይነ፡ ውስተ፡ ምክያድ፡ እስመ፡ ጠፍአ።
11 በእንተ፡ ዝንቱ፡ ትነቁ፡ ከርሥየ፡ ከመ፡ መሰንቆ፡ በእንተ፡ ሞአብ፡ ወአዕፅምትየ፡ ከመ፡ አረፍት፡ እንተ፡ ገየሩ።
12 ወይከውነከ፡ ለኃሣር፡ እስመ፡ ሰርሐት፡ ሞአብ፡ በጣዖታ፡ ወተሐውር፡ ኀበ፡ አማልክቲሃ፡ ትጸሊ፣፡ ወኢይክሉ፡ እንከ፡ አድኅኖታ።
13 ዝንቱ፡ ነገር፡ ዘነበበ፡ እግዚአብሔር፡ በእንተ፡ ሞአብ፣፡ ዘነበበ፡ ቀዲሙ።
14 ወይእዜኒ፡ እብል፤ ዘሠለስቱ፡ ዓመተ፡ ዓሳብ፡ የኀሥር፡ ክብረ፡ ሞአብ፡ እምኵሉ፡ ብዕላ፡ ብዙኅ፡ ወኢትተርፍ፡ ኅዳጠ፡ ወኢትረክብ፡ እንከ፡ ክብራ።
=== chapter 17 ===
[Chapter 17]
1 ናሁ፡ ትጠፍእ፡ ደማስቆ፡ እምነ፡ አህጉር፡ ወትወድቅ።
2 ወትትመዘበር፡ ለዓለም፡ ወተዐርፍ፡ እንከ፡ ውስተ፡ አብያተ፡ ኖሎት፡ ወአልቦ፡ ዘይረውድ።
3 ወአልባ፡ ጸወነ፡ ኀበ፡ ትጼወን፡ ኤፍሬም፤ ወኢይነግሥ፡ እንከ፡ ንጉሥ፡ በደማስቆ፡ ወእለሂ፡ ተርፉ፡ እምሶርያ፤ ዘአኮ፡ አንተ፡ ትኄይስ፡ እምደቂቀ፡ እስራኤል፡ ወእምክብሮሙ፤ ከመዝ፡ ይቤ፡ እግዚአብሔር፡ ጸባኦት።
4 ውእተ፡ አሚረ፡ የኀልቅ፡ ክብሩ፡ ለያዕቆብ፡ ወያድለቀልቅ፡ ዘይበዝኅ፡ ትርሲቱ።
5 ወይከውን፡ ከመ፡ ዘያስተጋብእ፡ ማእረረ፡ ዘበጽሐ፡ ወዘየዐፅድ፡ ዘርኣ፡ ወሰዊተ፤ ወይከውን፡ ከመ፡ ዘያስተጋብእ፡ ሰዊተ፡ ዘበሰለ፡ በውስተ፡ ቈላት።
6 ወይተርፍ፡ ቀሪማ፡ በውስቴታ፤ ወከመ፡ ሕንባባተ፡ ዘይት፡ ክልኤቱ፡ ወእመአኮ፡ ሠላስ፡ በውስተ፡ ርእሰ፡ ነዋኅ፡ ወበውስተ፡ አዕጹቂሃ፣፡ እመአኮ፡ አርባዕ፡ ወእመአኮ፡ ኃምስ፡ ይተርፉ፤ ከመዝ፡ ይቤ፡ እግዚአብሔር፡ አምላከ፡ እስራኤል።
7 ውእተ፡ ዕለተ፡ ይትዌከል፡ ሰብእ፡ በፈጣሪሁ፡ ወይኔጽራ፡ አዕይንቲሁ፡ ኀበ፡ ቅዱሰ፡ እስራኤል።
8 ወኢይትአመኑ፡ እንከ፡ በጣዖቶሙ፡ ወኢበግብረ፡ እደዊሆሙ፡ በዘገብራ፡ አፃብዒሆሙ፤ ወኢይገዝሙ፡ ዕፀ፡ ለርኵሶሙ።
9 ውእተ፡ አሚረ፡ ይከውና፡ መዝብረ፡ አህጉርኪ፡ ከመ፡ መዝብረ፡ አሞሬዎን፡ ወኤዌዎን፡ እምቅድመ፡ ገጾሙ፡ ለደቂቀ፡ እስራኤል፡ ወትከውን፡ ገዳመ።
10 እስመ፡ ኀደጎ፡ ለአምላክከ፡ ወመድኃኒከ፡ ወኢተዘከርኮ፡ ለእግዚአብሔር፡ ዘአስተዘከርኮ፡ ለእግዚአብሔር፡ ዘአስተርአየከ፤ በእንተ፡ ዝንቱ፡ ትተክል፡ ተክለ፡ ሐሰት፡ ወትዘርእ፡ ዘርአ፡ ኃሣር።
11 ወአመ፡ ትተክል፡ ትጌጊ፡ ወይፈሪ፡ ዘዘራእከ፡ በጽባሕ፡ በማእረር፡ አመ፡ ዕለተ፡ ታወርስ፤ ወከመ፡ አብ፡ ለወልዱ፣፡ አንተኒ፡ ታወርስ፡ ለደቂቅከ።
12 አሌ፡ ሎሙ፡ ለብዙኃን፡ አሕዛብ፡ እለ፡ መልኡ፡ ከመ፡ ማዕበለ፡ ባሕር፡ ከማሁ፡ ትትከወሱ፤ ወከወለ፡ ብዙኃን፡ ሕዝበ፡ ከመ፡ ማይ፡ ይደምፁ።
13 ወከመ፡ ማይ፡ ብዙኅ፡ ከማሁ፡ ብዙኅ፡ ሕዝብ፣፡ ወከመ፡ ውኂዘ፡ ዓቢይ፡ ማይ፡ ዘይወርድ፡ በኃይል፡ እምውስተ፡ መንበሐብሐት፤ ወያጠፍእዎ፡ ወእምርኁቅ፡ ይወርዱ፡ ከመ፡ ጸበለ፡ ሐሠር፡ ዘቅድመ፡ ዐውሎ፡ ዘየሐፍሶ፡ ወከመ፡ ጸበለ፡ ሠረገላ፡ ዘይነሥኦ፡ ነፋስ።
14 ፍና፡ ሰርክ፡ ይላሕዉ፡ ዘእንበለ፡ ይጽባሕ፡ ወኢትከውኖሙ።
=== chapter 18 ===
[Chapter 18]
1 አሌላ፡ ለምድረ፡ አሕማር፡ እለ፡ ቦን፡ ክንፈ፡ ውስተ፡ አፍላገ፡ ኢትዮጵያ።
2 ወይፌኑ፡ ውስተ፡ ባሕር፡ ሐመረ፡ ወመጻሕፍተ፡ መልዕልተ፡ ማይ።
3 ወይሄልዉ፡ በሐውርቲሆሙ።
4 እስመ፡ ከመዝ፡ ይቤለኒ፡ እግዚአብሔር፤ ትጸንዕ፡ ሀገርየ፡ ከመ፡ ብርሃነ፡ ቀትር፡ ወከመ፡ ደመና፡ ዝናም፡ በመዋዕለ፡ ክረምት።
5 ዘእምቅድመ፡ ማእረር፣፡ ኀሊቆ፡ ጽጌ፡ ወቆዕ፡ ይፈሪ፡ ፍሬ፡ መፂፀ።
6 ወይትበውሑ፡ ላዕሌሁ፡ አዕዋፈ፡ ሰማይ፡ ወአርዌ፡ ገዳም።
7 ውእተ፡ አሚረ፡ ያበውኡ፡ መሥዋዕተ፡ ለእግዚአብሔር፡ ጸባኦት፡ ሕዝብ፡ ትሑታን፡ ወምሉሓን፡ ወእምሕዝብ፡ ዓቢይ፡ እምይእዜ፡ ወእስከ፡ ለዓለም።
=== chapter 19 ===
[Chapter 19]
1 ናሁ፡ እግዚአብሔር፡ ይነብር፡ ዲበ፡ ደመና፡ ቀሊል፡ ወይመጽእ፡ ውስተ፡ ግብጽ፡ ወያድለቀልቅ፡ ግብረ፡ እደዊሆሙ፡ ለግብጽ፡ እምቅድመ፡ ገጹ፡ ወይትቀጠቀጥ፡ ልቦሙ፡ በላዕሌሆሙ።
2 ወይትነሥኡ፡ ግብጽ፡ ላዕለ፡ ግብጽ፤ ወይቀትል፡ ብእሲ፡ እኁሁ፡ ወብእሲ፡ ቢጾ፣፡ ሀገር፡ ለሀገር፡ ወሕግ፡ ዲበ፡ ሕግ።
3 ወትደነግፅ፡ ነፍሶሙ፡ ለግብጽ፡ በላዕሌሆሙ፡ ወእመይጥ፡ ምክሮሙ፡ ወይሴአልዎሙ፡ ለአማልክቲሆሙ፡ ወለጣዖቶሙ፡ ወለእለ፡ ይትናገሩ፡ በታሕተ፡ ምድር፡ ወለእለ፡ በፃውዕ።
4 ወአገብኦሙ፡ ለግብጽ፡ ውስተ፡ እደ፡ ሰብእ፡ እለ፡ እኩየ፡ ቅኔ፡ ይቀንይዎሙ፡ ወለነግሥት፡ እለ፡ እኩየ፡ ኵነኔ፡ ይኴንንዎሙ፤ ከመዝ፡ ይቤ፡ እግዚአብሔር፡ ጸባኦት።
5 ይሰትዩ፡ ግብጽ፡ ማየ፡ ዘጥቃ፡ ባሕር፡ እስመ፡ ይነፅፍ፡ ፈለግ፡ ወይየብስ።
6 ወይነፅፍ፡ ኵሉ፡ ኀበ፡ ይቀውም፡ አፍላገ፡ ማይ፡ ወኵሉ፡ ዖመ፡ ብርዕ፡ ወህለት።
7 ወኵሉ፡ ሐመልማለ፡ ሣዕር፡ በጥቃ፡ ፈለግ፡ ወኵሉ፡ ዘይዘራእ፡ ድንጋገ፡ ፈለግ፡ ይየብስ፡ ወየዐብር።
8 ወይቴክዙ፡ መሠግራን፡ ወይበክዩ፡ ኵሎሙ፡ እለ፡ ያወርዱ፡ መሣግሪሆሙ፡ ውስተ፡ ፈለግ፡ ወእለ፡ ይረቡ፡ መርበብቶሙ፡ ወይላሕዉ፡ መሠግራን።
9 ወይትኀፈሩ፡ እለ፡ ያስተሐይዉ፡ መሣግረ፡ ብቱከ፡ ወእለሂ፡ ይትጌበሩ፡ ሜላተ።
10 ወየሐሙ፡ እለ፡ ይትጌበርዎ፡ ወይትመሰዉ፡ ኵሎሙ፡ እለ፡ ይትጌበሩ፡ በመዳልዉ፡ ወየሐሙ፡ ነፍሶሙ።
11 ወየአብዱ፡ መላእክተ፡ ጣኔዎስ፡ ወትለስሕ፡ ምክሮሙ፡ ለጠቢባን፡ ወለመካርያን፡ ነገሥት።
12 አይቴ፡ ሀለዉ፡ ይእዜ፡ ጠቢባኒከ፤ ይዜንዉከ፡ እስኩ፡ ወይንግሩከ፤ ምንት፡ ውእቱ፡ ምክሩ፡ ለእግዚአብሔር፡ ላዕለ፡ ግብጽ።
13 ኀልቁ፡ መላእክተ፡ ጣኔዎስ፡ ወተለዐሉ፡ መላእክተ፡ ሜምፌዎስ፡ ወስሕቱ፡ ግብጽ፡ በበሕዘቢሆሙ።
14 እስመ፡ እግዚአብሔር፡ ጋኔነ፡ መስሕተ፡ ፈነወ፣፡ ወስሕቱ፡ ግብጽ፡ በኵሉ፡ ምግባሮሙ፡ ከመ፡ ዘይስሕት፡ ስኩር፡ ወከመ፡ ዘአንኰለሎ፡ ደም።
15 ወኢይትረከብ፡ ለግብጽ፡ ውስተ፡ ግብሮሙ፡ ዘቦ፡ ርእሰ፡ ወዘነበ፡ በጥንቱ፡ ወበማኅለቅቱ።
16 ይእተ፡ አሚረ፡ ይከውኑ፡ ግብጽ፡ ከመ፡ አንስት፡ በፍርሃት፡ ወበረዓድ፡ እምቅድመ፡ ገጹ፡ ለእግዚአብሔር፡ ጸባኦት፡ እንተ፡ ያወርድ፡ ላዕሌሆሙ።
17 ወይከውኖሙ፡ ለግብጽ፡ መግረምቶሙ፡ ብሔረ፡ አይሁድ።
18 ውእተ፡ አሚረ፡ ኃምስ፡ አህጉረ፡ ግብጽ፡ ይነብባ፡ በነገረ፡ ከነዓን፡ ወየኀብራ፡ አህጉር፡ በስመ፡ እግዚአብሔር፡ እግዚአ፡ ኃያላን።
19 ውእተ፡ አሚረ፡ ይከውን፡ ምሥዋዑ፡ ለእግዚአብሔር፡ በብሔረ፡ ግብጽ፡ ወቤተ፡ እግዚአብሔር፡ ውስተ፡ ደወለ፡ ዚአሆሙ።
20 ወይከውን፡ ትእምርተ፡ ለእግዚአብሔር፡ ውስተ፡ ብሔረ፡ ግብጽ፡ እስከ፡ ለዓለም፤ እስመ፡ የአወይዉ፡ ኀበ፡ እግዚአብሔር፡ እምእለ፡ ይረውድዎሙ፡ ወይፌኑ፡ ሎሙ፡ ብእሴ፡ ዘያድኅኖሙ፤ ይኴንንሂ፡ ወያድኅንሂ።
21 ወትከውን፡ ግብጽ፡ እምርት፡ ለእግዚአብሔር።
22 ወይቀሥፎሙ፡ እግዚአብሔር፡ መቅሠፍተ፡ ወያሐይዎሙ፡ ሕይወተ፤ ወእምዝ፡ ይትመየጡ፡ ኀበ፡ እግዚአብሔር፡ ወይሰምዖሙ፡ ወይሠሀሎሙ።
23 ውእተ፡ አሚረ፡ ይከውን፡ ፍኖተ፡ ግብጽ፡ ኀበ፡ ፍኖተ፡ ፋርስ፡ ወፋርስኒ፡ የሐውሩ፡ ኀበ፡ ግብጽ፤ ወይበውኡ፡ ግብጽ፡ ኀበ፡ ፋርስ፡ ወይትቀነዩ፡ ግብጽ፡ ለፋርስ።
24 ውእተ፡ አሚረ፡ ይከውንዎሙ፡ እስራኤል፡ ሣልሶሙ፡ ለግብጽ፡ ወለፋርስ፣፡ ወይትባረኩ፡ በምድር።
25 እንተ፡ ባረከ፡ እግዚአብሔር፡ ጸባኦት፡ ወይብል፤ ብሩክ፡ ሕዝብየ፡ ዘውስተ፡ ግብጽ፡ ወዘውስተ፡ ፋርስ፡ ወርስትየኒ፡ እስራኤል።
=== chapter 20 ===
[Chapter 20]
1 በዓመተ፡ ቦአ፡ ጣንታን፡ አዛጦን፡ አመ፡ ፈነዎ፡ አርና፡ ንጉሠ፡ ፋርስ፡ ወቀተላ፡ ለአዛጦን፡ ወአስተጋብኣ።
2 ይእተ፡ አሚረ፡ ነበቦ፡ እግዚአብሔር፡ ለኢሳይያስ፡ ወልደ፡ አሞጽ፡ ወይቤሎ፤ ሖር፡ ወአእትት፡ መንጸፈ፡ እምሐቌከ፡ ወፍታሕ፡ አሣእነከ፡ እምእገሪከ፡ ወሖር፡ ዕራቀከ፡ ዘእንበለ፡ አሣእን፤ ወገብረ፡ ከማሁ፡ ወሖረ፡ ዕራቆ፡ ዘእንበለ፡ አሣእን።
3 ወይቤ፡ እግዚአብሔር፤ በከመ፡ ሖረ፡ ኢሳይያስ፡ ቍልዔየ፡ ዕራቁ፡ ዘእንበለ፡ አሣእን፡ ከማሁ፡ ይከውን፡ ትእምርተ፡ ወመንክረ፡ ሠለስተ፡ ዓመተ፡ ለግብጽሂ፡ ወለኢትዮጵያሂ።
4 ከመ፡ ከማሁ፡ ይወስዶሙ፡ ንጉሠ፡ ፋርስ፡ ለግብጽ፡ ወለኢትዮጵያ፣፡ ወይፄውውዎሙ፡ ለወራዙቶሙ፡ ወለአእሩጊሆሙ፡ ዕራቃኒሆሙ፡ ዘእንበለ፡ አሣእን፡ ወይትቀፈጽ፡ ኀፍረቶሙ፡ ለግብጽ።
5 ወይትመውኡ፡ ግብጽ፡ ምስለ፡ ኢትዮጵያ፡ ወይትኀፈሩ፡ ግብጽ፡ ምስለ፡ ዘተወከሉ፡ እለ፡ ቦሙ፡ ይዜኀሩ።
6 ወይብሉ፡ ውእተ፡ አሚረ፡ እለ፡ ይነብሩ፡ ውስተ፡ ዛቲ፡ ደሴት፤ ናሁ፡ ንሕነ፡ ተወከልናሆሙ፡ ያድኅኑነ፡ ወንትመሐፀን፡ ቦሙ፡ ኀቤሆሙ።
=== chapter 21 ===
[Chapter 21]
1 ከመ፡ ዐውሎ፡ እንተ፡ ገዳም፡ ኀለፈ፡ ውስተ፡ በድው፡ ወመጽአ፡ እምብሔር፡ ግሩም።
2 ዘአስተርአየኒ፡ ዕጹበ፡ ዜና፡ ነገረኒ፡ በእንቲአሁ።
3 በእንተ፡ ዝንቱ፡ ይቀጸቅጸኒ፡ ሐቌየ፡ ወአኀዘኒ፡ ማሕምም፡ ከመ፡ እንተ፡ ትወልድ።
4 ስሕተ፡ ልብየ፡ ወደፈነኒ፡ ኃጢአትየ፡ ወደንገፀኒ፡ ነፍስየ።
5 ሥርዑ፡ ማእደ፣፡ ብልዑ፡ ወስትዩ።
6 እስመ፡ ከመዘ፡ ይቤለኒ፡ እግዚአብሔር፤ ሑር፡ ፍጡነ፣፡ ፈኑ፡ ሰብአ፡ ዓይን፡ ወዘሰማዕከ፡ ዜኑ።
7 ወርኢኩ፡ ክልኤተ፡ መስተፅዕናነ፡ አፍራስ፡ እንዘ፡ ይፄዐኑ፤ አሕዱ፡ ይፄዐን፡ አድገ፡ ወአሐዱ፡ ይፄዐን፡ ገመለ።
8 ወጸውዖ፡ ለአርያስ፡ ሰብአ፡ ዓይን።
9 ወይመጽእ፡ መስተፅዕን፡ እምፍኖት፡ ወተሠጥወኒ፡ ወይቤ፤ ወድቀት፡ ባቢሎን፡ ወተቀጥቀጡ፡ ኵሉ፡ ጣዖታ፡ ወግብረ፡ እደዊሃ፡ ውስተ፡ ምድር።
10 ስምዑ፡ እለ፡ ተረፍክሙ፡ ወእለሂ፡ ተሐሙ፣፡ ስምዑ፡ ዘሰማዕኩ፡ በኀበ፡ እግዚአብሔር፡ ጸባኦት፡ አምላከ፡ እስራኤል፡ ዘዜነወኒ።
11 ጸውዖሙ፡ ኀቤየ፡ እምኀበ፡ ሴይር፤ ዕቀቡ፡ መዓቅብተ።
12 ዕቀቡ፡ መዓልተ፡ ወሌሊተ።
13 ወትበይት፡ ሌሊተ፡ ውስተ፡ ዖም፡ በፍኖተ፡ ዴዳን።
14 በቅድሜሆሙ፡ ለእለ፡ ጸምኡ፡ ማየ፡ አምጽኡ፡ እለ፡ ትነብሩ፡ ብሔረ፡ ቴማን፣፡ አምጽኡ፡ እክለ፡ ወተቀበልዎሙ፡ ለእለ፡ አምሠጡ።
15 እምነ፡ ብዙኃን፡ እለ፡ ተቀትሉ፤ ወእምነ፡ ብዙኃን፡ እለ፡ ጐዩ፤ ወእምብዙኃን፡ ሰብአ፡ ኵናት፡ ወእምብዙኃን፡ ሰብአ፡ ሐፅ፡ ወአቅስቲሆሙ፡ ውሱቃት፤ ወበእንተ፡ ብዙኃን፡ እለ፡ ወድቁ፡ በውስተ፡ ቀትል።
16 እስመ፡ ከመዝ፡ ይቤለኒ፡ እግዚአብሔር፤ ዓዲ፡ እምዓመት፡ እስከ፡ ዓመተ፡ ዓሳብ፡ የኀልቅ፡ ክብሮሙ፡ ለደቂቀ፡ ቄዳር።
17 ወእለ፡ ተርፉ፡ ነዳፍያን፡ ወጽኑዓን፡ እምደቂቀ፡ ቄዳር፡ የኀልቁ፡ ይቤ፡ እግዚአብሔር፡ አምላክ፡ እስራኤል።
=== chapter 22 ===
[Chapter 22]
1 ምንተ፡ ኮንክሙ፡ ይእዜ፡ ዘዐረግሙ፡ አንሕስተ፡ ኵልክሙ፡ ለከንቱ።
2 መልአት፡ ሀገር፡ አውያተ፣፡ ቅቱላንኪሂ፡ ኢኮኑ፡ ቅቱላነ፡ በኵናት፤ አብድንትኪሂ፡ ኢኮኑ፡ አብድንተ፡ ቀትል።
3 ኵሎሙ፡ መላእክትኪ፡ ጐዩ፤ ወእለሂ፡ ተፄወዉ፡ አህመምዎሙ፡ በመዋቅህት፡ ወኃያላንኪሂ፡ ነዋኃ፡ ጎዩ።
4 በእንተ፡ ዝንቱ፡ ኅድጉኒ፡ እብኪ፡ መሪረ፤ ኢታብዝኁ፡ አስተብቍዖትየ፡ በእንተ፡ ቅጥቃጤሃ፡ ለወለተ፡ ሕዝብየ።
5 እስመ፡ ዕለተ፡ ሀከክ፡ ወሐጕል፡ ወኪደት፡ ወስብረት፡ እምኀበ፡ እግዚአብሔር፡ ጸባኦት።
6 ወሰብአ፡ ኤላምኒ፡ ነሥኡ፡ ምጕንጳ፤ ወሰብአ፡ መስተፅዕናነ፡ አፍራስ፡ ወትዕይንተ፡ ጸባኢት።
7 ወይመልእ፡ ሠረገላ፡ ውስተ፡ ቈላትኪ፡ ወየዐግቱ፡ አፍራስ፡ አናቅጸኪ።
8 ወያርኅውዎን፡ ለአናቅጸ፡ ይሁዳ።
9 ወይሬእዩ፡ ከመ፡ በዝኁ፡ ወከመ፡ ተሠውጠ፡ ማየ፡ ምጥማቃተ፡ ሀገር፡ ዘትካት።
10 ወከመሂ፡ ነሠቱ፡ አብያቲሃ፡ ለኢየሩሳሌም፡ ወአረፍተ፡ ጥቅማሂ፡ ለሀገር።
11 ወአውፃእክሙ፡ ለክሙ፡ ማየ፡ ማእከለ፡ ክልኤቱ፡ አረፍተ፡ እለ፡ ውስተ፡ ምጥማቃት፡ ትካት፣፡ ወኢነጸርክምዎ፡ ለዘፈጠራ፡ ቅድመ፡ ወኢያእመርክምዎ፡ ለዘገብራ።
12 ወአምጽአ፡ እግዚአብሔር፡ ጸባኦት፡ ውእተ፡ አሚረ፡ ብካየ፡ ወላሐ፣፡ መንጸፈ፡ ወብልባሌ።
13 እሙንቱሰ፡ ገብሩ፡ በዓለ፡ ወፍሥሐ፡ ወኃሤተ፡ ወጠብሑ፡ አልህምተ፡ ወአባግዐ።
14 ወተሰምዐ፡ ዝንቱ፡ ነገር፡ ውስተ፡ እዘኒሁ፡ ለእግዚአብሔር፡ ጸባኦት፤ ኢትሰረይ፡ ለክሙ፡ ዛቲ፡ ኃጢአትክሙ፡ እስከ፡ አመ፡ ትመውቱ።
15 ከመዝ፡ ይቤ፡ እግዚአብሔር፡ ጸባኦት፤ ሖር፡ ቤተ፡ ሳምናን፡ ዓቃቤ፡ መዝገብ፡ ወበሎ።
16 ምንተአ፡ መጻእከ፡ ዝየ፡ ወምንተአ፡ ተኀበልከ፡ ዝየ፤ ትግበር፡ ለከ፡ መቃብረ፡ ወአውቀርከ፡ ለከ፡ ዝኅረ፡ ውስተ፡ ኰኵሕ፡ ዘውስተ፡ ወግር፡ ወገበርከ፡ ለከ፡ ቤተ።
17 ናሁ፡ እግዚአብሔር፡ ጸባኦት፡ ያወሰልበከ፡ አልባሲከ፡ ወአክሊለ፡ ክብርከ።
18 ወይገድፈከ፡ ውስተ፡ ብሔር፡ ዓቢይ፡ ዘአልቦ፡ ኍልቈ፡ ወትመውት፡ በህየ፤ ወየኀሥሮ፡ ለሠረገላከ፡ ሠናይ፡ ወይከይድዎ፡ ለቤተ፡ መልአክከ።
19 ወትሠዐር፡ እምግብከ፡ ወእምነ፡ ምኵናኒከ።
20 ወውእተ፡ አሚረ፡ እጼውዖ፡ ለቍልዔየ፡ ኤልያቄም፡ ወልደ፡ ኬልቅዩ።
21 ወአለብሶ፡ አልባሲከ፡ ወእሁቦ፡ አክሊለከ፡ ወአሜግቦ፡ ምግበከ፤ ወአኴንኖ፡ ምኵናኒከ፡ ወአገብእ፡ ኵሎ፡ ዘውስተ፡ እዴከ፡ ውስተ፡ እዴሁ፤ ወይከውኖሙ፡ አባሆሙ፡ ለእለ፡ ይነብሩ፡ ኢየሩሳሌም፡ ወለእለ፡ ይነብሩ፡ ይሁዳ።
22 ወእሁቦ፡ ክብረ፡ ዳዊት፡ ወይኴንን፡ ወአልቦ፡ ዘየአብዮ፡ ተኰንኖ፤ ወእሁብ፡ መራኁተ፡ ቤተ፡ ዳዊት፡ ዲበ፡ መታክፍቲሁ፤ ለእመ፡ አርኀወ፡ ውእቱ፡ አልቦ፡ ዘየዐጹ፤ ወለእመ፡ ዐጸወ፡ አልቦ፡ ዘያርኁ።
23 ወይሠይሞ፡ መልአከ፡ ለብሔር፡ ምእመን፡ ወአነብሮ፡ ዲበ፡ መንበረ፡ ክብር፡ ዘቤተ፡ አቡሁ።
24 ወይከውን፡ ምእመነ፡ ላዕሌሁ፡ ኵሉ፡ ክቡር፡ በቤተ፡ አቡሁ፡ ለንኡሶሙ፡ ወለዓቢዮሙ፣፡ ወይከውኑ፡ ስቁላነ፡ ሎቱ፡ ይእተ፡ አሚረ።
25 ከመዝ፡ ይቤ፡ እግዚአብሔር፡ ጸባኦት፤ ለያንቀልቅል፡ ብእሲ፡ ዘይቀውም፡ ውስተ፡ ብሔር፡ ጽኑዕ፡ ወይነሥእዎሂ፡ ወይወድቅ፣፡ ወይጠፍእ፡ ክብሩ፡ እምላዕሌሁ፡ እስመ፡ እግዚአብሔር፡ ነበበ፡ ከመዝ።
=== chapter 23 ===
[Chapter 23]
1 ለየአወይዋ፡ አሕማረ፡ ኬልቄዶን፡ እስመ፡ ተሐጕለ፡ ወኢያመጽኡ፡ እንከ፡ እምብሔረ፡ ኬጤዎን፡ ወያመጽእዎሙ፡ ፄዋ።
2 ምንተ፡ ይመስሉ፡ እለ፡ ይነብሩ፡ ደሴተ፡ ፈላስያን፡ እምፊንቄስ፣፡ እለ፡ ዐደዉ፡ ባሕረ፡ ማይ፡ ብዙኅ።
3 ከመ፡ ዘርእ፡ ዘይትዌለጥ፡ አመ፡ ማእረር፡ እለ፡ ቦኡ፡ አሕዛብ፡ ፈላስያን።
4 ተኀፈሪ፡ ሲዶና፡ ትቤ፡ ባሕር፤ ወትቤ፡ ኀይለ፡ ባሕር፤ ኢሐመምኩ፡ ወኢወለድኩ፡ ወኢያወርዘውኩ፣፡ ወኢያልሀቁ፡ ደናግለ።
5 እስመ፡ እምከመ፡ ተሰምዐ፡ በግብጽ፣፡ ይእኅዞሙ፡ ሕማማ፡ ለጢሮስ።
6 ሖሩ፡ ኬልቄዶን፡ ወየአወይዉ፡ ላቲ፡ እለ፡ ይነብሩ፡ ውስተ፡ ደሴት።
7 ዛቲ፡ እንከ፡ ኢኮነትኑ፡ እንቲአክሙ፡ እምትካት፡ ጽዕለተ፡ ዘእንበለ፡ ያስተጋብእዋ።
8 መኑ፡ ከመዝ፡ አምከረ፡ ላዕለ፡ ጢሮስ፤ ቦኑ፡ ይእቲ፡ ኢትኄይስ፡ ወቦኑ፡ ኢትክል፤ ሠያጢያኒሃ፡ ክቡራን፡ መላእክተ፡ ምድር።
9 እግዚአብሔር፡ ጸባኦት፡ መከረ፡ ይሥዐር፡ ኵሎ፡ ትዕቢቶሙ፡ ለክቡራን፡ ወየኀሥሮሙ፡ ለኵሎሙ፡ ዓበይተ፡ ምድር።
10 ተገበር፡ ምድረከ፡ እስመ፡ ኢይመጽኣ፡ እንከ፡ አሕማር፡ እምኬልቄዶን።
11 ወትደክም፡ እንከ፡ እዴከ፡ እንተ፡ መንገለ፡ ባሕር፣፡ እንተ፡ አምዕዐቶሙ፡ ለነገሥት።
12 ወይብሉ፤ ኢትደግሙ፡ እንከ፡ ወኢተዐምፅዋ፡ ለወለተ፡ ጽዮን፤ ወእመኒ፡ ሖርከ፡ ብሔረ፡ ኬጤዎን፡ በህየኒ፡ ኢተዐርፍ።
13 አስመ፡ ለብሔረ፡ ከልዴዎንሂ፡ አማሰንዋ፡ ፋርስ፡ ወወድቀ፡ አረፋቲሃ።
14 አውይዋ፡ አሕማረ፡ ዴልቄዶን፡ እስመ፡ ተሰብረ፡ ጸወንክሙ።
15 ወይእተ፡ አሚር፡ ትነብር፡ ጢሮስ፡ ሰብዓ፡ ዓመተ፡ መጠነ፡ መዋዕለ፡ ንጉሥ፡ ወመጠነ፡ መዋዕለ፡ ሰብእ፤ ወእምድኅረ፡ ሰንዓ፡ ዓመት፡ ትከውን፡ ጢሮስ፡ ከመ፡ ማኅሌት፡ ዘዘማ።
16 ንሥኢ፡ መሰንቆ፡ ወዑዲ፡ ሀገረ፡ ዘማ፡ እንተ፡ ተረስዐት፡ ሠናየ፡ ሰንቅዊ፡ ወብዙኀ፡ ኅልዪ፡ ከመ፡ ይዝክሩኪ።
17 ወእምድኅረ፡ ሰብዓ፡ ዓመት፡ ይሔውጻ፡ እግዚአብሔር፡ ለጢሮስ፡ ወትገብእ፡ ካዕበ፡ ከመ፡ ትካት፣፡ ወትከውን፡ ምቅዳሐ፡ ለኵሉ፡ ነገሥተ፡ ዓለም፡ ላዕለ፡ ገጸ፡ ምድር።
18 ወትከውን፡ መስተገብረ፡ ወዕሤተ፡ ለእግዚአብሔር፡ ቅዱስ፤ ወአኮ፡ ለእሙንቱ፡ ዘይትጋብኡ፡ ዳእሙ፡ ለእለ፡ ይነብሩ፡ ቅድመ፡ እግዚአብሔር፤ ወኵሉ፡ ተግባራ፡ ለበሊዕ፡ ወለሰቲይ፡ ወለጸጊብ፡ ወታጸግብ፡ ተዝካራ፡ በቅድመ፡ እግዚአብሔር።
=== chapter 24 ===
[Chapter 24]
1 ናሁ፡ እግዚአብሔር፡ ያማስና፡ ለዓለም፡ ወያመዘብራ፡ ወይቀፍጻ፡ ገጻ፣፡ ወይዘርዎሙ፡ ለእለ፡ ይነብሩ፡ ውስቴታ።
2 ወይከውን፡ ሕዝብ፡ ከመ፡ ካህን፣፡ ወገብር፡ ከመ፡ እግዚኡ፣፡ ወአመት፡ ከመ፡ እግዝእታ፤ ወዘይሣየጥ፡ ከመ፡ ዘይሠይት፣፡ ወዘይትሌቃሕ፡ ከመ፡ ዘይሌቅሕ፣፡ ወዘይፈዲ፡ ከመ፡ ዘበዓለ፡ ዕዳ።
3 ናሁ፡ ማስኖ፡ ትማስን፡ ምድር፡ ወበርብሮ፡ ትትበረብር፡ ምድር፡ እስመ፡ አፉሁ፡ ለእግዚአብሔር፡ ነበበ፡ ከመዝ።
4 ላሐወት፡ ምድር፡ ወማሰነት፡ ወተገፍትዐት፡ ዓለም፤ ላሕዉ፡ ዓበይተ፡ ምድር።
5 እስመ፡ አበሰት፡ ምድር፡ ምስለ፡ እለ፡ ይነብሩ፡ ውስቴታ፤ እስመ፡ ዐለዉ፡ ሕገ፡ ወወለጡ፡ ሥርዓተ፡ ወክሕዱ፡ ኪዳነ፡ ዘለዓለም።
6 በእንተ፡ ዝንቱ፡ እንጋ፡ ትውሕጦሙ፡ ምድር፡ እስመ፡ አበሱ፡ እለ፡ ይነብሩ፡ ውስቴታ።
7 ለይላሕዉ፡ ወይን፡ ወዓፀደ፡ ወይን፡ ወይበክዩ፡ ኵሎሙ፡ እለ፡ ይትፌሥሑ፡ በነፍሶሙ።
8 ኀልቀት፡ ትፍሥሕተ፡ ክብሮሙ፣፡ ኀልቀ፡ ትዝኅርት፡ ወብዕለ፡ ኃጥኣን፣፡ ኀልቀ፡ ቃለ፡ መሰንቆ።
9 ወተኀፍሩ፡ ወኢይሰትዩ፡ ወይነ፤ መሪረ፡ ኮነ፡ ሜስ፡ ለእለ፡ ይሰትይዎ።
10 ወመዝበራ፡ ኵሎን፡ አህጉር፡ ወተዐጽዋ፡ አብያት፡ ከመ፡ ኢይባኡ፡ ውስቴቶን።
11 ብክዩ፡ በእንተ፡ ወይን፡ እስመ፡ ተሥዕረ፡ ኵሉ፡ ትፍሥሕተ፡ ምድር።
12 ወይትኀደጋ፡ አህጉር፡ መዝበረ፣፡ ወአብያትኒ፡ የዐርቃ፡ ወይትኀደጋ፡ ወይትሐጐላ።
13 ዝንቱ፡ ኵሉ፡ ዘይከውን፡ ውስተ፡ ብሔር፡ ማእከለ፡ አሕዛብ።
14 ወእለሰ፡ ተርፉ፡ ውስተ፡ ምድር፡ ይትፌሥሑ፡ ኅቡረ፡ በስብሐተ፡ እግዚአብሔር፣፡ ይትከወስ፡ ማየ፡ ባሕር።
15 እንበይነዝ፡ ስብሐተ፡ እግዚአብሔር፡ ይከውን፡ በደሴያተ፡ ባሕር፣፡ ስመ፡ እግዚአብሔር፡ ይሴባሕ።
16 እግዚአብሔር፡ አምላከ፡ እስራኤል፡ እምአጽናፈ፡ ምድር፣፡ ሰማዕነ፡ መንክረ፡ ተስፋሁ፡ ለጻድቅ።
17 ፍርሃት፡ ወጸድፍ፡ ወመሥገርት፡ ላዕሌሆሙ፡ ለእለ፡ ይነብሩ፡ ውስተ፡ ምድር።
18 ወዘይጐይይ፡ እምፍርሃት፡ ይወድቅ፡ ውስተ፡ ጸድፍ፤ ወዘሂ፡ ወፅአ፡ እምጸድፍ፡ ይእኅዞ፡ መሥገርት።
19 ትደነግፅ፡ ምድር፡ ወትትሀወክ፡ ወተኀሥር፡ ምድር።
20 ወትተነትን፡ ከመ፡ ስኩር፡ ወከመ፡ ኅዳገ፡ ወይን፣፡ ወትጸንን፡ ወታድለቀልቅ፡ ከመ፡ ልገተ፡ ዓቃቤ፡ ቀምሕ፣፡ ወትወድቅ፡ ወኢትክል፡ ተንሥኦ፡ እስመ፡ ከብዳ፡ ኃጢአታ።
21 ይእተ፡ አሚረ፡ ያመጽእ፡ እግዚአብሔር፡ ዲበ፡ ሠርጐ፡ ሰማይ፡ እዴሁ፡ ወላዕለ፡ ነገሥተ፡ ምድር።
22 ወይትጋብኡ፡ ወይትዐጸዉ፡ ወይጸወኑ፡ ወይትአሰሩ፡ ወይሔውጾሙ፡ ለብዙኅ፡ ትውልድ።
23 ወይትመሰዉ፡ ብዝኆሙ፡ ወይወድቅ፡ አረፍቶሙ፤ እስመ፡ ይነግሥ፡ እግዚአብሔር፡ ዘሎቱ፡ ኃይል፡ በጽዮን፡ ወበኢየሩሳሌም፡ ወይሴባሕ፡ በቅድመ፡ ሊቃናት።
=== chapter 25 ===
[Chapter 25]
1 እግዚአብሔር፡ አምላኪየ፤ እሴብሐከ፡ ወአነብብ፡ ለስምከ፤ እስመ፡ ገበርከ፡ መንክረ፡ ግብረ፤ ወእሙነ፡ ኮነ፡ ምክረ፡ ትካት።
2 እስመ፡ ረሰይኮን፡ ለአህጉር፡ መሬተ፤ ወአውደቀ፡ አህጉረ፡ ጽኑዓተ፡ መሠረተ፡ ኃትኣን፡ ወኢይትሐነጻ፡ ለዓለም፡ አህጉሪሆሙ።
3 በበይነ፡ ዝንቱ፡ ይባርኩከ፡ ሕዝብ፡ ነዳያን፤ ወይባርኩከ፡ አህጉረ፡ አብእ፡ ግፉዓን።
4 እስመ፡ ኮንከ፡ ረዳኤ፡ ለኵሉ፡ አህጉር፡ ትሑራን፤ ወከደንኮሙ፡ ለእለ፡ ይቴክዙ፡ በተፅናሶሙ፤ እምሰብእ፡ እኩያን፡ ባላሕኮሙ፤ ወከደንኮሙ፡ ለጽሙኣን፡ ወነፍሰ፡ ሰብእ፡ ግፉዓን።
5 ከመ፡ ነፍሰ፡ ሰብእ፡ ዕንቡዛን፡ እለ፡ ጸምኡ፡ በጽዮን፤ እምሰብእ፡ ኃጥኣን፡ እለ፡ ሎሙ፡ መጠውከነ።
6 ወየገብር፡ እግዚአብሔር፡ ጸባኦት፡ ለኵሎሙ፡ አሕዛብ፡ ከመ፡ በዝንቱ፡ ደብር፡ ይስተዩ፡ ትፍሥሕተ፡ ወይስተዩ፡ ወይነ።
7 ወይትቀብኡ፡ ዕፍረተ፡ በዝንቱ፡ ደብር።
8 ውሕጠ፡ ሞት፡ ወኀየለ፣፡ ወካዕበ፡ ሠዐረ፡ እግዚአብሔር፡ እግዚእ፡ ኵሎ፡ አንብዐ፡ እምኵሉ፡ ገጽ፤ ወሠዐረ፡ ጽዕለተ፡ ሕዝብ፡ እምኵሉ፡ ምድር፡ እስመ፡ ነበበ፡ እግዚአብሔር፡ በአፉሁ።
9 ወይብሉ፡ ውእተ፡ አሚረ፤ ነዋ፡ እግዚአብሔር፡ አምላክነ፡ ዘኪያሁ፡ ተወከልነ፡ ወያድኅነነ።
10 ወይሁበነ፡ እግዚአብሔር፡ ዕረፍተ፡ በዝንቱ፡ ደብር፤ ወይከይድዎ፡ ለሞአብ፡ ከመ፡ ዘያከይዱ፡ እክለ፡ በመንኰራኵር።
11 ወያነሥእ፡ እዴሁ፡ ላዕሌሁ፡ በከመ፡ ውእቱ፡ አሕመመ፡ ወቀተለ፤ ወአኅሠረ፡ ጽዕለቶ፡ ዘአንሥአ፡ እዴሁ፡ ላዕሌሁ።
12 ወያንኅል፡ ልዕልና፡ አረፍተ፡ ጸወንከ፤ ወትቴሐት፡ እስከ፡ ምድር።
=== chapter 26 ===
[Chapter 26]
1 ይእተ፡ አሚረ፡ የኀልዩ፡ ዘንተ፡ ማኅሌተ፡ ላዕለ፡ ይሁዳ፤ ወይብሉ፤ ናሁ፡ ሀገር፡ ጽንዕት፤ ወመድኃኒትነ፡ ወዘትገብር፡ አረፍተ፡ ወጥቅመ።
2 አርኅዉ፡ አናቅጸ፡ ይባእ፡ ሕዝብ፡ ዘየዐቅብ፡ ጽድቀ፡ ወይትዌከፍ፡ ርትዐ።
3 ወይትመሐፀን፡ ሰላመ፡ እስከ፡ ለዓለም፣፡ ኪያከ፡ ተወከልነ።
4 እግዚኦ፡ አምላክ፡ ዓቢይ፡ ዘለዓለም።
5 ዘአትሐትኮሙ፡ ወአውረድኮሙ፡ ለእለ፡ ይነብሩ፡ ውስተ፡ አርያም፤ ወትነፅኆን፡ ለአህጉር፡ ጽኑዓት፡ ወታወርዶን፡ እስከ፡ ምድር።
6 ወይከይዶን፡ እግረ፡ የዋሃን፡ ወትሑታን።
7 ወይከውን፡ ፍኖተ፡ ርቱዐ፡ ለጻድቃን፡ ወትጸያሕ፡ ፍኖተ፡ ራትዓን።
8 እስመ፡ ርቱዕ፡ ውእቱ፡ ፍኖተ፡ እግዚአብሔር።
9 በሌሊት፡ ትገይስ፡ መንፈስየ፡ ኀቤከ፡ እግዚኦ፡ አምላኪየ፤ እስመ፡ ብርሃን፡ ትእዛዝከ፡ በዲበ፡ ምድር።
10 እስመ፡ ኀልቀ፡ ኃጥእ፡ ዘኢይሜሀር፡ ጽድቀ፡ በዲበ፡ ምድር፤ ወዘኢይገብር፡ ሠናየ።
11 እግዚኦ፡ ልዑለ፡ መዝራዕተከ፡ ኢያእመሩ፣፡ ወእምከመሰ፡ አእመሩ፡ ይትኀፈሩ።
12 እግዚኦ፡ አምላክነ፡ ሰላመ፡ ሀበነ፡ እስመ፡ ኵሎ፡ ወሀብከነ።
13 እግዚኦ፡ አምላክነ፡ አጥርየነ፤ እግዚኦ፡ ዘእንበሌከ፡ ባዕደ፡ ኢነአምር፤ ወስመ፡ ዚአከ፡ ንሰሚ።
14 ምውታንሰ፡ ኢይሬእይዋ፡ ለሕይወት፤ ወዓቀብተ፡ ሥራይኒ፡ ያነሥኡ።
15 ወስኮሙ፡ እግዚኦ፡ እኪተ፤ ወስኮሙ፡ እኪተ፡ ለክቡራነ፡ ምድር።
16 እግዚኦ፡ በሕማምነ፡ ተዘከርናከ፤ ወበኅዳጥ፡ ሕማም፡ ገሠጽከነ።
17 ወከመ፡ እንተ፡ ውስተ፡ ማሕምም፡ ወእንተ፡ አልጸቀት፡ ለወሊድ፡ ወአውየወት፡ በሕማማ፣፡ ከማሁ፡ ኮነ፡ ለፍቁርከ።
18 በእንተ፡ ፈሪሆትከ፡ እግዚኦ፡ ፀነስነ፣፡ ሐመምነሂ፡ ወወለድነ፡ መመንፈሰ፡ አድኅኖትከ፡ በዲበ፡ ምድር።
19 ምውታንሰ፡ ይትነሥኡ፡ ወየሐይዉ፡ እለ፡ ውስተ፡ መቃብር፤ ወይትፌሥሑ፡ እለ፡ ውስተ፡ ምድር።
20 ሖር፡ ሕዝብየ፡ ወባእ፡ ቤተከ፡ ወዕጹ፡ ኆኅጠከ፡ ወተኀባእ፡ ኅዳጠ፡ ምዕረ፡ እስከ፡ የኀልፍ፡ መዐቱ፡ ለእግዚአብሔር።
21 ናሁ፡ እግዚአብሔር፡ መቅደሱ፡ ያመጽእ፡ መቅሠፍተ፡ ዲበ፡ እለ፡ ይነብሩ፡ ውስተ፡ ምድር፤ ወትከሥት፡ ምድርኒ፡ ደማ፡ ወኢትከድኖሙ፡ ለቅቱላን።
=== chapter 27 ===
[Chapter 27]
1 ይእተ፡ አሚረ፡ ያመጽእ፡ እግዚአብሔር፡ መጥባሕተ፡ ቅዱሰ፡ ወዓቢየ፡ ወጽኑዓ፡ ላዕለ፡ ከይሲ፡ ወላዕለ፡ አርዌ፡ ምድር፡ ዘይጐይይ፡ ኀበ፡ ከይሲ፡ ወአርዌ፡ ምድር፡ ዘየአኪ፤ ወይቀትሎ፡ ለከይሲ፡ ዘውስተ፡ ባሕር።
2 ውእተ፡ አሚረ፡ ዐፀደ፡ ወይን፡ ሠናይ፡ ወመፍትው፡ ዘእምትካት፡ ዘዚአሃ።
3 አነ፡ ሀገር፡ ጽንዕት፤ አሐተ፡ ሀገረ፡ ይጸብኡ፡ ወከንቶ፡ አስተይክዋ፤ ሌሊተ፡ ትሠገር፡ ወመዓልተ፡ ይወድቅ፡ አረፍታ፤ ወአልቦ፡ ዘያነሥኣ።
4 መኑ፡ ይሠይመኒ፡ ዐቃቤ፡ ህለት፡ በገዳም፤ በእንተ፡ ዛቲ፡ ጸብእቄዕክዋ።
5 ወአውየዉ፡ እለ፡ ይነብሩ፡ ውስቴታ፡ ወንግበር፡ ሎቱ፡ ሰላመ።
6 እለ፡ ይመጽኡ፡ ደቂቀ፡ ያዕቆብ፡ እስመ፡ ይሠርጽ፡ ወይፈሪ፡ ያዕቆብ፡ ወእስራኤል፡ ወይመልእ፡ ዓለመ፡ ፍሬሁ።
7 ኢይትቀሠፍ፡ ዳእሙ፡ በከመ፡ ውእቱ፡ ቀሠፈ፤ ወበከመ፡ ውእቱ፡ ቀተለ፡ ከማሁ፡ ይትቀተል።
8 በባእስ፡ ወበዝንጓጔ፡ ይፌንዎሙ።
9 ወበእንተ፡ ዝንቱ፡ ይሠዐር፡ ኃጢአቱ፡ ለያዕቆብ፡ ወዝንቱ፡ ውእቱ፡ በረከቱ፡ አመ፡ አእተትኩ፡ ኃጢአቶ፣፡ አመ፡ አንበሩ፡ ኵሎሙ፡ እበኒሆሙ፡ ውቁረ፡ ከመ፡ ግብስስ፡ ድቁቅ።
10 ማኅደረ፡ መራዕይ፡ ያአትትዎ፡ ከመ፡ መርዔት፡ ዘኀደግዎ፣፡ ጕንዱየ፡ ዕለተ፡ ይትረዐይ፡ ወየዐርፍ፡ ህየ።
11 ወጕንዱየ፡ ይየብስ፡ ወኢይትረከብ፡ ውስቴታ፡ ኵሉ፡ ሐመልማል።
12 ወውእተ፡ አሚረ፡ የሐጽር፡ እግዚአብሔር፡ እምናሕበ፡ ፈለግ፡ እስከ፡ ሪኖንቆርሮን።
13 ወውእተ፡ አሚረ፡ ይነፍሑ፡ በቀርን፡ ዓቢይ፡ ወይመጽኡ፡ እለ፡ ተሐጕሉ፡ በብሔረ፡ ፋርስ፡ ወተሐጕሉ፡ በግብጽ፡ ወይሰግዱ፡ ለእግዚአብሔር፡ በደብረ፡ መቅደሱ፡ ዘኢየሩሳሌም።
=== chapter 28 ===
[Chapter 28]
1 አሌሎ፡ ለአክሊለ፡ ኃሣር፡ ዓሳቢሁ፡ ለኤፍሬም፤ ጽጌ፡ ዘይወድቅ፡ እምትርሲቱ፡ ውስተ፡ ርእሰ፡ ደብር፡ ግዙፍ፡ እለ፡ ይሰክሩ፡ ዘእንበለ፡ ወይን።
2 ናሁ፡ ጽኑዕ፡ ወዕጹብ፡ መቅሠፍተ፡ እግዚአብሔር፡ ከመ፡ በረድ፡ ዘይወርድ፡ ኀበ፡ አልቦ፡ ጠፈረ፣፡ ዘይወርድ፡ በኃይል፡ ከመ፡ ማይ፡ ብዙኅ፡ ወምሉእ፡ ዘይውኅዝ፡ ወይገብር፡ ዕረፍተ፡ ምድር፡ ወለብሔር።
3 ወይከይድዋ፡ በእገሪሆሙ፡ ወበእደዊሆሙ፡ ለአክሊለ፡ ጽዕለቶሙ፡ ለዓሳበ፡ ኤፍሬም።
4 ወይከውን፡ ጽጌ፡ ዘይወድቅ፡ እምትውክልተ፡ ክብሮሙ፡ ውስተ፡ ርእሰ፡ ደብር፡ ነዋኅ፤ ከመ፡ ዘርእየ፡ በኵረ፡ በለስ፡ ወይረውጽ፡ ኀቤሃ፡ ወይፈቅድ፡ ከመ፡ የኀሣ፡ ዘእንበለ፡ ይትመጠዋ፡ በእዴሁ።
5 ይእተ፡ አሚረ፡ ይከውኖሙ፡ እግዚአብሔር፡ ጸባኦት፡ አክሊለ፡ ስብሐት፡ ዘተጸፍረ፣፡ ለእለ፡ ተጽዕሉ፡ ሕዝብ፡ እለ፡ ተርፉ።
6 በመንፈሰ፡ ኵነኔ፡ ወበፍትሕ፡ ወበኃይለ፡ እግዚአብሔር፡ ወይነፅኁ፡ አንቆቅሖሙ።
7 እስመ፡ እሉ፡ ሰክሩ፡ በወይን፡ ወአስሐቶሙ፡ ሜስ፤ ወአደንገፆሙ፡ ሜስ፡ ለካህን፡ ወለነቢይ፣፡ ወአሥጠሞሙ፡ ወይን፡ ወጌገዩ፡ በሰኪይ፤ ወዝኒ፡ መትሕተ፡ ዐይን፡ ውእቱ።
8 ትትበላዕ፡ እንጋ፡ ዛቲ፡ ምክር፡ ዘመክሩ፡ ከመዝ፡ ከመ፡ ይትዐገሉ፡ ነዳየ።
9 ለመኑ፡ ዜነውነ፡ እኩየ፡ ወለመኑ፡ ዜነውነ፡ ዜና፤ እለ፡ አኅደግዎሙ፡ ጠቢወ፡ ጥብ፡ ወከልእዎሙ፡ ኢይትወግኡ፡ ሐሊበ።
10 ሕማመ፡ በዲበ፡ ሕማም፡ ተወክፉ፡ ወተመጠዉ፡ ተስፋ፡ በዲበ፡ ተስፋ፤ ወዓዲ፡ ኅዳጠ፡ ወዓዲ፡ ኅዳጠ።
11 በእንተ፡ ኃጢአተ፡ ከናፍር፡ ወበካልእ፡ ልሳን፡ ይነብብዎሙ፡ ለዝንቱ፡ ሕዝብ።
12 ወይብልዎሙ፤ ዝንቱ፡ ዕረፍቱ፡ ለዘይሰቲ፡ ወከመዝ፡ ቅጥቃጤሁ፤ ወአበዩ፡ ሰሚዐ።
13 ወይከውኖሙ፡ ቃለ፡ እግዚአብሔር፡ ሕማም፡ በዲበ፡ ሕማም፡ ወተስፋ፡ በዲበ፡ ተስፋ፤ ዓዲ፡ ኅዳጠ፡ ወዓዲ፡ ኅዳጠ፡ ከመ፡ ይሖሩ፡ ወይወድቁ፡ ድኅሪተ፡ ወይትቀጠቀጡ፡ ወይሠገሩ፡ ወይትመነደቡ።
14 በእንተ፡ ዝንቱ፡ ስምዑ፡ ቃለ፡ እግዚአብሔር፡ ዕደው፡ ትዉቃን፡ ወመላእክተ፡ ሕዝብ፡ ዘኢየሩሳሌም።
15 እስመ፡ ትብሉ፤ ተመሐልነ፡ ምስለ፡ ሲኦል፡ ወተካየድነ፡ ምስለ፡ ሞት፡ ከመ፡ ኢይብጽሐነ፡ ዐውሎ፡ ወኢይርከበነ፡ ለእመሂ፡ ኀለፈ።
16 በእንተ፡ ዝንቱ፡ ከመዝ፡ ይቤ፡ እግዚአብሔር፡ እግዚእ፤ ናሁ፡ አነ፡ እሠይም፡ ውስተ፡ ጽዮን፡ እብነ፡ ውስተ፡ መሠረታ፣፡ እብነ፡ ማዕዝንት፣፡ ኅሪተ፡ ወክብርተ፡ እንተ፡ ብዙኅ፡ ሤጣ፡ ዐውደ፡ መሠረታ፣፡ ወዘአምነ፡ ባቲ፡ ኢይትኀፈር።
17 ወእሬሲ፡ ተስፋ፡ በጽድቅ፡ ወሣሀልየኒ፡ በመዳልው፤ ወእለሰ፡ ይትዌከሉ፡ በከንቱ፡ ወበሐሰት፡ ኢያመሥጡ፡ እምዐውሎ።
18 ወየዐሉ፡ ለክሙ፡ ማሕላክሙ፡ ዘምስለ፡ ሞት፡ ወኪዳንክሙ፡ ዘምስለ፡ ሲኦል፡ ኢይቀውም።
19 ወእምከመ፡ መጽአ፡ የሐፍሠክሙ፣፡ ለለ፡ ጽባሑ፡ ትቀርበክሙ፡ ዕለትክሙ፡ ወሌሊትኒ፡ ትሕዝብት፡ እኩይ።
20 ኢንክል፡ ላኳ፡ ወጋእዘ፤ ለሊነ፡ ሰራሕነ፡ ከመ፡ ናስተጋብእክሙ።
21 ከመ፡ ወግረ፡ ኃጥኣን፡ ይትነሣእ፡ እግዚአብሔር፡ ወይሄሉ፡ ውስተ፡ ቈላተ፡ ገባኦን፣፡ ወይገብር፡ ግብሮ፡ በመዐት፣፡ መሪረ፡ ግብረ፤ ወመዐቱሰ፡ ዕጹበ፡ ይገብር፡ ወሕምዙኒ፡ ነኪር።
22 ወአንትሙኒ፡ ኢትትፈሥሑ፡ ወኢይጸንዕ፡ ቅጽርክሙ፤ እስመ፡ ኅሉቀ፡ ወምቱረ፡ ነገረ፡ ሰማዕኩ፡ በኀበ፡ እግዚአብሔር፡ ጸባኦት፡ ዘይገብር፡ በኵሉ፡ ምድር።
23 ስምዑ፡ ቃልየ፡ ወአጽምዑኒ፣፡ ለብዉ፡ ወስምዑ፡ ነገርየ።
24 ቦኑ፡ ኵሎ፡ አሚረ፡ የሐርስ፡ ዘየሐርስ፤ ያቀድምኑ፡ ዘሪአ፡ ዘእንበለ፡ ይሕርስ፡ ምድሮ።
25 አኮኑ፡ አቀምጢዖ፡ ገራህቶ፡ ሶቤሃ፡ ይዘርእ፡ ኅዳጠ፡ መለንሶ፡ ወከሚነ፣፡ ወካዕበ፡ ይዘርእ፡ ስርናየ፡ ወሰገመ።
26 ወትትሜሀር፡ ምድር፡ በኵነኔ፡ እግዚአብሔር፡ ወትትፌሣሕ።
27 እስመ፡ አኮ፡ በተኀይሎ፡ ዘያከይድዎ፡ ለመለንሶ፡ ወአኮ፡ በመንኰራኵረ፡ ሠረገላ፡ ዘየሐስይዎ፡ ለከሚን፤ ለከሚንሂ፡ በበትር፡ ይዘብጥዎ፡ ወለመለንሶሂ፡ በእክል፡ ይበልዕዎ።
28 ወአነሂ፡ አኮ፡ ለዓለም፡ ዘእትመዐዐክሙ፡ ወኢይከይደክሙ፡ ቃለ፡ ምረትየ።
29 ወዝንቱ፡ ዘወፅአ፡ እምኀበ፡ እግዚአብሔር፡ ጸባኦት፡ መንክር፤ ወአንትሙሰ፡ ትፈቅዱ፡ ታዕብይዎ፡ ለከንቱ፡ ተየውሆ።
=== chapter 29 ===
[Chapter 29]
1 አሌላ፡ ለአርኤል፡ ሀገር፡ እንተ፡ ጸብአ፡ ዳዊት።
2 እስመ፡ እሣቅዮ፡ ለአርኤል፡ ወትከውን፡ ዛቲ፡ ኃይል፡ ወዝንቱ፡ ብዕለ፡ ዚአየ።
3 ወአዐግተኪ፡ ከመ፡ ዳዊት፡ ወአሐርጸኪ፡ ወእሠይም፡ ዐውደኪ፡ ማኅፈደ።
4 ወይሠጠም፡ ውስተ፡ ምድር፡ ነገርኪ፡ ወይከውን፡ ቃልኪ፡ ከመ፡ ዘበታሕተ፡ ምድር፡ ይትናገር፤ ወትደክሚ፡ ወታቴሕቲ፡ ቃለኪ፡ ውስተ፡ ምድር።
5 ወይከውን፡ ከመ፡ ጸበል፡ ዘእምአረፍት፡ ብዕሎሙ፡ ለኃጥኣን፡ ወከመ፡ ንጉፍ፡ ዘያመጽኦ፡ ነፋስ፤ ወይከውን፡ በጊዜሃ፡ ለምዕር፡ እምኀበ፡ እግዚአብሔር፡ ጸባኦት።
6 እስመ፡ ይዋሒ፡ በፀዓዕ፡ ወበድልቅልቅ፡ ወበዓቢይ፡ ቃል፡ ወበዐውሎ፡ ዘይመጽእ፡ ወበነበልባለ፡ እሳት፡ በላዒ።
7 ወይከውን፡ ብዕሎሙ፡ ለኵሎሙ፡ አሕዛብ፡ ከመ፡ ዘየሐልም፡ ሕልመ፣፡ ወኵሎሙ፡ እለ፡ ይጸብእዎሙ፡ ለእስራኤል፡ ወኵሎሙ፡ እለ፡ ይጸብእዋ፡ ለኢየሩሳሌም፡ ወኵሎሙ፡ እለ፡ ተጋብኡ፡ ላዕሌሃ፡ ወሮድዋ።
8 ወይከውኑ፡ ከመ፡ እለ፡ ይበልዑ፡ ወይሰትዩ፡ በሕልሞሙ፣፡ ወሶበ፡ ይነቅሁ፡ ይሔስዎሙ፡ ሕልሞሙ፤ ወበከመ፡ ጽሙእ፡ ዘየሐልም፡ እንዘ፡ ይሰቲ፡ ማየ፣፡ ወነቂሆ፡ ዓዲሃ፡ ጽምእት፡ ነፍሱ፡ ወከንቶ፡ ተሰፈወ፤ ከማሁ፡ ውእቱ፡ ብዕሎሙ፡ ለኵሎሙ፡ አሕዛብ፡ እለ፡ ጸብእዎ፡ ለደብረ፡ ጽዮን።
9 ደክሙ፡ ወደንገፁ፡ ወሰክሩ፡ አኮ፡ በሜስ፡ ወአኮ፡ በወይን።
10 እስመ፡ አስተዮሙ፡ እግዚአብሔር፡ ጋኔነ፡ ዘያደነግፆሙ፡ ወይከድኖሙ፡ አዕይንቲሆሙ፡ ለነቢያቲሆሙ፡ ወለመላእክቲሆሙ፡ እለ፡ ይሬእዩ፡ ዘኅቡእ።
11 ወይከውነክሙ፡ ኵሉ፡ ዝንቱ፡ ነገር፡ ከመ፡ ነገረ፡ መጽሐፍ፡ ኅቱም፤ ወይሁብዎ፡ መጽሐፈ፡ ለብእሲ፡ ዘየአምር፡ መጽሐፈ፡ ወይብልዎ፤ አንብብ፡ ዘንተ።
12 ወይሁብዎ፡ መጽሐፈ፡ ለብእሲ፡ ዘኢየአምር፡ መጽሐፈ፡ ወይብልዎ፤ አንብብ፡ ዘንተ።
13 ወይቤ፡ እግዚአብሔር፤ ዝንቱ፡ ሕዝብ፡ ይቀርቡኒ፡ በአፉሆሙ፡ ወበከናፍሪሆሙ፡ ያከብሩኒ፣፡ ወበልቦሙሰ፡ ነዋኃ፡ ይርኅቁ፡ እምኔየ።
14 በእንተ፡ ዝንቱ፡ ናሁ፡ እደግም፡ አፍልሶቶ፡ ለዝንቱ፡ ሕዝብ፣፡ ወአፈልሶሙ፡ ወአሐጕሎሙ፡ ጥበቦሙ፡ ለጠቢባን፡ ወአኀብኦሙ፡ ምክሮሙ፡ ለመካርያን።
15 አሌ፡ ሎሙ፡ ለእለ፡ ይመክሩ፡ ዕሙቀ፡ ምክረ፡ ወአኮ፡ በበይነ፡ እግዚአብሔር።
16 አኮኑ፡ ከመ፡ ጽቡረ፡ ለብሐዊ፡ አንትሙ፤ ይብሎኑ፡ ኪን፡ ለኬንያሁ፤ ኢገበርከነ፡ አንተ፤ ወይብሎኑ፡ ግብር፡ ለገባሪሁ፤ ኢያሠነይከኒ፡ ገቢሮትየ።
17 አኮኑ፡ እንከ፡ ኅዳጠ፡ ወእምዝ፡ ይከውን፡ ሊባኖስ፡ ከመ፡ ደብረ፡ ከርሜል፡ ወይከውን፡ ከርሜል፡ ከመ፡ ዖም።
18 ወውእተ፡ አሚረ፡ ይሰምዑ፡ ጽሙማን፡ ቃለ፡ መጽሐፍ፡ ወእለሂ፡ ውስተ፡ ጽልመት፡ ወእለሂ፡ ውስተ፡ ጊሜ።
19 ወይትፌሥሑ፡ ነዳያን፡ በእግዚአብሔር፡ በኃሤት፡ ወይጸግቡ፡ ትፍሥሕተ፡ ሰብእ፡ ቅቡጻን፡ በቅዱሰ፡ እስራኤል።
20 እስመ፡ ኀልቀ፡ ኃጥእ፡ ወጠፍአ፡ ዕቡይ፡ ወተሠርዉ፡ እለ፡ ይዔምፁ፡ በእከይ።
21 ወአለ፡ ያስሕቱ፡ ሰብአ፡ በነገር፤ ወኵሎሙ፡ እለ፡ ይትዋቀሡ፡ በኀበ፡ አናቅጽ፡ ያመጽኡ፡ ማዕቅፍተ፡ ወጠወይዎ፡ ለጻድቅ፡ በዓመፃሆሙ።
22 በእንተ፡ ዝንቱ፡ ከመዝ፡ ይቤ፡ እግዚአብሔር፡ ለቤተ፡ ያዕቆብ፡ ዘአውፅኦ፡ እምቤተ፡ አብርሃም፤ አኮ፡ ይእዜ፡ ዘተፍር፡ ያዕቆብ፡ ወአኮ፡ ይእዜ፡ ዘይትዌለጥ፡ ገጽከ።
23 ወሶበ፡ ርእዩ፡ ደቂቆሙ፡ ምግባርየ፣፡ በእንቲአየ፡ ይቄድሱ፡ ስምየ፡ ወይቄድሱ፡ ቤተ፡ ያዕቆብ፡ ወለአምላከ፡ እስራኤልሂ፡ ይፈርህዎ።
24 ወየአምሩ፡ ጥበበ፡ እለ፡ ስህቱ፡ በመንፈሶሙ፡ ወእለሂ፡ ያንጐረጕሩ፡ ይትሜሀሩ፡ ትእዛዘ፡ ወይትሜሀር፡ አውሥኦ፡ ሰላም፡ ልሳን፡ ጸያፍ።
=== chapter 30 ===
[Chapter 30]
1 አሌ፡ ሎሙ፡ ለውሉደ፡ ዓላውያን፣፡ ከመዝ፡ ይቤ፡ እግዚአብሔር፤ ገበርክሙአ፡ ምክረ፡ ወአኮ፡ በእንቲአየ፣፡ ወሠራዕክሙ፡ አኮ፡ በእንተ፡ መንፈስየ፡ ከመ፡ ትወስኩ፡ ኃጢአተ፡ በዲበ፡ ኃጢአት።
2 እለ፡ ተሐውሩ፡ ወትወርዱ፡ ብሔረ፡ ግብጽ፡ ወኢሰአሉኒ፡ እርድኦሙ፡ እምግብጽ፡ ወእምፈርዖን።
3 ወይከውነክሙ፡ ፈርዖን፡ ወልታ፡ ኃሣር፡ ወለእለ፡ ተወከልክሙ፡ በግብጽ፡ ይከውኑ፡ ጽዕለተ።
4 መላእክተ፡ ኤንጣን፡ ሐዋርያት፡ እኩያን።
5 ወከንቶ፡ ይፃምዉ፡ ኀበ፡ አሕዛብ፡ እለ፡ ኢይበቍዕዎሙ፡ ለረድኤት፡ ዘእንበለ፡ ለኃሣር፡ ወለጽዕለት።
6 በሕማም፡ ወበምንዳቤ፡ አንበሳ፡ ወእጓለ፡ አንበሳ፣፡ ወእምህየ፡ አራዊተ፡ ምድር፡ ዘይሰርር፡ እለ፡ ይፄዕኑ፡ በአግማል፡ ወበአእዱግ፡ ብዕሎሙ፡ ወይወስዱ፡ ኀበ፡ አሕዛብ፡ ዘኢይበቍዕዎሙ፡ ለረድኤት፡ ዘእንበለ፡ ለኃሣር፡ ወለጽዕለት።
7 ከንቶኬ፡ ግብጽ፡ ኢይበቍዑክሙ፤ ንግሮሙ፡ ከመ፡ ከንቱ፡ ዘተማዐዱ።
8 ወይእዜኒ፡ ንበር፡ ወጸሐፎ፡ ለዝንቱ፡ ውስተ፡ ሰሌዳ፡ ወይከውን፡ በመዋዕለ፡ ዕድሜሁ፡ ወአስከ፡ ለዓለም።
9 እስመ፡ ሕዝብ፡ ዓላውያን፡ እሙንቱ፣፡ ውሉደ፡ ሐሰት፡ እለ፡ አበዩ፡ ሰሚዐ፡ ሕገ፡ እግዚአብሔር።
10 እለ፡ ይብልዎሙ፡ ለነቢያት፡ ኢትዜንዉነ፣፡ ወለእለሂ፡ ይሬእዩ፡ ራእየ፤ ኢትንግሩነ፣፡ ወመሰ፡ ትነግሩነ፡ ካልእተ፡ ጌጋየ፡ አይድዑነ።
11 ወሚጡነ፡ እምዛቲ፡ ፍኖት፤ ወአኅድጉነ፡ ዘንተ፡ አሠረ፡ ወሠዐሩ፡ እምኔነ፡ ትምህርተ፡ እስራኤል።
12 በእንተ፡ ዝንቱ፡ ከመዝ፡ ይቤ፡ ቅዱሰ፡ እስራኤል፤ እስመ፡ ክሕድክምዎ፡ ለዝንቱ፡ ነገር፡ ወተወከልክሙ፡ በሐሰት፡ ወአንጐርጐርክሙ፡ ወተአመንክሙ፡ በዝንቱ፡ ነገር።
13 እንከ፡ በእንተ፡ ዝንቱ፡ ትከውነክሙ፡ ዛቲ፡ ኃጢአትክሙ፡ ከመ፡ አረፍት፡ ውድቅት፡ እንተ፡ በጊዜሃ፡ ሀገር፡ ጽንዕት፡ ወወድቀት፡ ግብተ።
14 ወድቀታሂ፡ ከመ፡ ቅጥቃጤ፡ ጻሕበ፡ ልሕኵት፡ ወይከውኑ፡ ድቁቀ፡ አግልዕተ፡ ወኢይረክቡ፡ በውስቴቱ፡ ገልዓ፡ በዘይወስዱ፡ እሳተ፡ ወኢበዘያወክፉ፡ ማየ፡ ኅዳጠ።
15 ከመዝ፡ ይቤ፡ እግዚአብሔር፡ ቅዱሰ፡ እስራኤል፤ እምከመአ፡ ነሳሕከ፡ ወበከይከ፣፡ ተሐዩ፡ ወተአምር፡ ኀበ፡ ሀለውከ፤ እስመ፡ ተወከልከ፡ በከንቱ፡ ወከንቶ፡ ይከውነክሙ፡ ኃይልክሙ።
16 ወትቤሉ፤ በአፍራሲነ፡ ናመሥጥ፡ ወበእንተ፡ ዝንቱ፡ ትጐይዩ፡ ወትብሉ፤ ንፄዐን፡ ረዋጼ፡ ፈረሰ፤ በእንተ፡ ዝንቱኬ፡ ረዋጽያን፡ እሙንቱ፡ እለ፡ ይዴግኑክሙ።
17 ይሜምዑ፡ ፲፻፡ እምድምፀ፡ ፩ወእምቃለ፭፡ ይጐይዩ፡ ብዙኃን፡ እስከ፡ ትተርፉ፡ ከመ፡ ሐሠር፡ ውዑይ።
18 ወካዕበ፡ ይሣሀለክሙ፡ እግዚአብሔር፣፡ ወበእንተ፡ ዝንቱ፡ ተለዐለ፡ ከመ፡ ይምሐርክሙ፡ እስመ፡ እግዚአብሔር፡ አምላክነ፡ መኰንን፡ ውእቱ።
19 እስመ፡ ሕዝብ፡ ቅዱስ፡ የኀድር፡ ውስተ፡ ኢየሩሳሌም፡ በጽዮን።
20 ወይሁበክሙ፡ እግዚአብሔር፡ ሲሳየክሙ፡ በሕማም፡ ወማየክሙሂ፡ በምንዳቤ፣፡ ወኢይቀርብ፡ እንከ፡ ዘያስሕተክሙ፤ ወይሬእያ፡ አዕይንቲከ፡ ላዕለ፡ እለ፡ አስሐቱከ።
21 ወይስምዓ፡ እዘኒከ፡ ድምፆሙ፡ ለእለ፡ ስሕቱ፡ በድኅሬከ፣፡ እለ፡ ይብሉ፤ ንሖር፡ በዛቲ፡ ፍኖት፡ እመሂ፡ ለየማን፡ ወእመሂ፡ ለፀጋም።
22 ወምዕረኒ፡ መንገለ፡ ጣዖት፡ እለ፡ ቅፉላን፡ በብሩር፡ ወሥርግዋን፡ በወርቅ፤ ወትገብር፡ ደቃቀ፡ ወደመቀ፡ ወትክዕዎ፡ ከመ፡ ማይ፡ እንተ፡ ትነብር፡ ትክት፡ ወከመ፡ እዳዋት፡ ትገድፉ፡ ውስቴቶን።
23 ውእተ፡ አሚረ፡ ይዘንም፡ ለዘርአ፡ ምድርከ፡ ወይከውን፡ ጽጋብ፡ ለማእረረ፡ እክለ፡ ምድርከ፡ ወይሰብሕ፡ መራዕይከ፡ ወይትረዐይ፡ ብሔረ፡ ርሒበ፡ ወሥዑረ።
24 ወይቀምሑ፡ ብዕራይክሙ፡ ወአሥዋሪክሙ፡ እለ፡ ይትጌበርዋ፡ ለምድር፡ ሐሠረ፡ ዘተሖሰ፡ ምስለ፡ ሰገም።
25 ወይከውን፡ ዲበ፡ ኵሉ፡ አድባር፡ ነዋኃት፡ ወውስተ፡ ኵሉ፡ አውግር፡ ልዑል፡ ይውኅዝ፡ ማይ፡ ውእተ፡ አሚረ፣፡ አመ፡ ኀልቁ፡ ብዙኃን፡ ወአመ፡ ወድቀ፡ ማኅፈድ።
26 ወይከውን፡ ብርሃነ፡ ወርኅ፡ ከመ፡ ብርሃነ፡ ፀሐይ፣፡ ወይከውን፡ ብርሃነ፡ ፀሐይ፡ ምስብዒተ፡ ውእተ፡ አሚረ፣፡ አመ፡ ፈወሰ፡ እግዚአብሔር፡ ቍስለ፡ ሕዝቡ፡ ወይፌስስ፡ ሕማመ፡ መቅሠፍትከ።
27 ናሁ፡ ይመጽእ፡ ስመ፡ እግዚአብሔር፡ በጕንዱይ፡ መዋዕል፡ ወይነድድ፡ መዐቱ፤ ምስለ፡ ስብሐተ፡ ቃለ፡ ከናፍሪሁ፡ ወምሉእ፡ ቃለ፡ መዐቱ፡ ወትበልዕ፡ ከመ፡ እሳት፡ መቅሠፍተ፡ መዐቱ።
28 ወትውኅዝ፡ መንፈሱ፡ ከመ፡ ማይ፡ ውስተ፡ ሙራድ፡ ዘይበጽሕ፡ እስከ፡ ክሳድ፤ ይትናፈቅ፡ ከመ፡ ይሁኮሙ፡ ለአሕዛብ፡ ወያስሕቶሙ፡ ውስተ፡ ከንቱ፡ ወይዴግኖሙ፡ ጌጋይ፡ ወይእኅዞሙ፡ ወይትቤቀሎሙ፡ ውስተ፡ ገጾሙ።
29 ወትረኑ፡ ትትፌሥሑ፡ ወትበውኡ፡ ውስተ፡ መቅደስየ፡ እንዘ፡ ዘልፈ፡ ትገብሩ፡ በዓለ፣፡ ወከመ፡ ፍሡሓን፡ ትበውኡ፡ በዕንዚራ፡ ውስተ፡ ደብረ፡ እግዚአብሔር፡ ቅዱሰ፡ እስራኤል።
30 ወያሰምዕ፡ እግዚአብሔር፡ ቃለ፡ ስብሐቲሁ፡ ወያርኢ፡ መዐተ፡ መዝራዕቱ፡ ወመቅሠፍተ፡ መዐቱ፤ ወያነድድ፡ በእሳት፡ በላዒ፡ ወበኃይለ፡ ፀዓዕ፡ ከመ፡ ዝናም፡ ኃያል፡ ወበረድ፡ ዓበይት፡ ዘይወርድ።
31 በቃለ፡ እግዚአብሔር፡ ይትመውኡ፡ ፋርስ፡ በመቅሠፍት፡ ዘይቀሥፎሙ።
32 ወየዐግትዎ፡ እለ፡ ተሰፈወ፡ ከመ፡ ይርድእዎ፡ ወእለ፡ ኪያሆሙ፡ ተአመነ።
33 እስመ፡ ኢኮነ፡ እለ፡ እምቀዲሙ፡ ይትሐዘቦሙ።
=== chapter 31 ===
[Chapter 31]
1 አሌ፡ ሎሙ፡ ለእለ፡ ይወርዱ፡ ብሔረ፡ ግብጽ፡ ይርድእዎሙ፡ ወይትአመኑ፡ በአፍራሲሆሙ፡ ወበሠረገላቲሆሙ፤ እስመ፡ ምሉእ፡ አፍራሲሆሙ፡ ወበዝኀ፡ ፈድፋደ።
2 ወውእቱ፡ ጠቢብ፡ አምጽአ፡ እኪተ፡ ላዕሌሆሙ፡ ወኢይሔሱ፡ ቃሎ፣፡ ወይትነሣእ፡ ላዕለ፡ ቤተ፡ ዕደው፡ እኩያን፡ ወላዕለ፡ ትውክልቶሙ፡ ከንቱ።
3 ለግብጽ፡ እለ፡ ከንቶሙ፡ እጓለ፡ እመሕያው፡ ወአኮ፡ እግዚአብሔር፡ ፈረስ፡ ዘሥጋ፡ ወአኮ፡ ረድኤት፤ ወእግዚአብሔር፡ ያመጽእ፡ እዴሁ፡ ላዕሌሆሙ፤ ወይደክሙ፡ እለ፡ ረድእዎሙ፡ ወይትሐጐሉ፡ ኵሎሙ፡ ኅቡረ።
4 እስመ፡ ከማሁ፡ ይቤለኒ፡ እግዚአብሔር፤ በከመ፡ ይጥሕር፡ አንበሳ፡ ወእጓለ፡ አንበሳ፡ ላዕለ፡ ዘይመሥጥ፡ ወይኬልሕ፡ ላዕሌሁ፡ እስከ፡ ይመልእ፡ አድባረ፡ ቃሉ፤ ወይትመውኡ፡ ወእምብዝኀ፡ መዐቱ፡ ይደነግፁ፣፡ ከማሁ፡ ይወርድ፡ እግዚአብሔር፡ ጸባኦት፡ ይጽባእ፡ በደብረ፡ ጽዮን፡ በውስተ፡ አድባሪሃ።
5 ከመ፡ ዖፍ፡ ዘይሰርር፡ ከማሁ፡ ይጸብእ፡ እግዚአብሔር፡ ጸባኦት፡ በእንተ፡ ኢየሩሳሌም፣፡ ይረድእ፡ ወያድኅን፡ ወይባልሕ፡ ወያሐዩ።
6 ተመየጡ፡ እለ፡ ዕሙቀ፡ ምክረ፡ ትመክሩ፡ ከመ፡ ተዐምፁ።
7 እስመ፡ ውእተ፡ አሚረ፡ የዐልውዎሙ፡ ሰብእ፡ ለአማልክቲሆሙ፡ ዘወርቅ፡ ወዘብሩር፡ ዘገብሩ፡ በእደዊሆሙ።
8 ወይወድቁ፡ አሶር፤ ወአኮ፡ በኲናተ፡ ሰብእ፣፡ ወአኮ፡ መባሕተ፡ ብእሲ፡ ዘትበልዖሙ፡ ወአኮ፡ እምገጸ፡ ኲናት፡ ዘይጐይዩ።
9 ወኰኵሕ፡ ትውሕጦሙ፡ ወይትመውኡ፤ ወዘሂ፡ አምሠጠ፡ ይሠገር።
=== chapter 32 ===
[Chapter 32]
1 እስመ፡ ናሁ፡ ንጉሥ፡ ጻድቅ፡ ይነግሥ፡ ወመላእክትኒ፡ በጽድቅ፡ ይኴንኑ።
2 ወየኀብእ፡ ሰብእ፡ ቃሎ፡ ወይትኀባእ፡ ከመ፡ ዘይሠጠም፡ ውስተ፡ ቀላይ፤ ወያስተርኢ፡ በጽዮን፡ ከመ፡ ፈለግ፡ ዘይውኅዝ፡ ክብሩ፡ በምድር፡ ጽምእት።
3 ወኢይትዌከሉ፡ እንከ፡ በእጓለ፡ እመሕያው፡ ዳእሙ፡ ያጸምዑ፡ በእዝኖሙ።
4 ወልብ፡ ድኩም፡ ይሰምዕ፡ አእምሮ፤ ወልሳንኒ፡ ጸያፍ፡ ፍጡነ፡ ይትሜሀር፡ ነገረ፡ ሰላም።
5 ወኢያጽሕብዎ፡ እንከ፡ ለአብድ፡ ከመ፡ ይኩን፡ መልአከ፣፡ ወኢይብለከ፡ እንከ፡ ወዓሊከ፤ አርምም።
6 እስመ፡ አብድሰ፡ እበደ፡ ይነብብ፡ ወልቡኒ፡ ከንቶ፡ ይሔሊ፡ ከመ፡ ይግበር፡ ዓመፃ፡ ወከመ፡ ይንብብ፡ ኃጢአተ፡ በኀበ፡ እግዚአብሔር፡ ከመ፡ ይዝሩ፡ ነፍሰ፡ ርኅብተ፡ ወከመ፡ ያዕርቅ፡ ነፍሰ፡ ጽምእተ።
7 እስመ፡ ሕሊናሆሙ፡ ለእኩያን፡ ዓመፃ፡ ትመክር፡ ከመ፡ ይቅትልዎ፡ ለነዳይ፡ በነገረ፡ ዓመፃሆሙ፡ ወከመ፡ ይገፍትዑ፡ ፍትሐ፡ ምስኪናን።
8 ጻድቃንሰ፡ ጥበበ፡ ይመክሩ፡ ወትነብር፡ ይእቲ፡ ምክር።
9 አንስት፡ ብዑላት፡ ተንሥኣ፡ ወስምዓ፡ ቃልየ፤ አዋልድ፡ ምእመናት፡ አጽምዓኒ፡ ነገርየ።
10 ለለዓመት፡ ግበራ፡ ተዝካረ፡ ዕለተ፡ ሕማም፡ እንተ፡ ትትሐዘባ።
11 ደንግፃ፡ ወተክዛ፡ እለ፡ ትትአመና፣፡ ዕርቃ፡ ወተሰለባ፡ እስራ፡ ሐቌክን።
12 ኅፍጣ፡ አጥባተክን፡ በእንተ፡ ገራህት፡ መፍትው፡ ወበእንተ፡ ዐፀደ፡ ወይን፡ መፍርይ።
13 በእንተ፡ ምድረ፡ ሕዝብየ፡ መፍትው፡ ይበቍል፡ ሦክ፡ ወአሜከላ፡ ውስተ፡ ገራውሂሆሙ፡ ወይሠዐር፡ ትፍሥሕት፡ እምኵሉ፡ አብያቲሆሙ፤ ሀገር፡ ብዕልት፡ ትመዘብር።
14 አብያቲሃ፣፡ የኀድጉ፡ ሀገሪሆሙ፡ ብዕለ፡ ወትርሲተ፡ አብያቲሆሙ፣፡ ወይከውን፡ አህጉሪሆሙ፡ በአቃተ፡ እስከ፡ ለዓለም፣፡ በዓሎሙ፡ ለአእዱገ፡ ገዳም፡ ወለመራዕየ፡ እንስሳ።
15 እስከ፡ ይመጽእ፡ ላዕሌክሙ፡ መንፈስ፡ እምአርያም።
16 ወየዐርፍ፡ ፍትሑ፡ ውስተ፡ ገዳም፡ ወጽድቁሂ፡ ውስተ፡ ቀርሜሎስ፡ የኀድር።
17 ወይከውን፡ ሰላም፡ ወምግባረ፡ ጽድቅ፣፡ ወትእኅዝ፡ ጽድቅ፡ መካነ፡ ምዕራፍ፡ ወይትዌከሉ፡ ቦቱ፡ እስከ፡ ለዓለም።
18 ወይነብር፡ ሕዝብ፡ ውስተ፡ ሀገረ፡ ሰላም፡ ወይነብር፡ ተአሚኖ፡ ወየዐርፍ፡ ውስተ፡ ብዕል።
19 እመኒ፡ ወረደ፡ በረድ፡ ኢይበጽሐክሙ።
20 ብፁዓን፡ እለ፡ ይዘርኡ፡ ኀበ፡ ቦቱ፡ ማየ፡ ወኀበ፡ ይከይዶ፡ ላህም፡ ወአድግ።
=== chapter 33 ===
[Chapter 33]
1 አሌ፡ ሎሙ፡ ለእለ፡ ያኀሥሩክሙ፣፡ ወለክሙሰ፡ አልቦ፡ ዘያኀሥረክሙ፤ ዘሂ፡ ለክሙ፡ ዐለወ፡ አኮ፡ ኪያክሙ፡ ዘዐለወ።
2 እግዚኦ፡ ተሠሀለነ፡ እስመ፡ ኪያከ፡ ተወከልነ።
3 ወእምግርማ፡ ቃሉ፡ ደንገፁ፡ አሕዛብ፡ በፈሪሆትከ፡ ወተዘርዉ፡ አሕዛብ።
4 ወይእዜኒ፡ ናሁ፡ ይትጋብኡ፡ ምህርካክሙ፡ ንኡሱ፡ ወዓቢዩ፤ ከመ፡ ዘያስተጋብእ፡ አንበጣ፡ ከማሁ፡ ይትዌነይ፡ ብክሙ።
5 ቅዱስ፡ እግዚአብሔር፡ ዘየኀድር፡ ውስተ፡ አርያም፡ ወመልአት፡ ጽዮን፡ ጽድቀ፡ ወርትዐ።
6 ወያገብእዎሙ፡ በሕግ፡ ውስተ፡ መዛግብተ፡ መድኃኒትነ።
7 ናሁ፡ በግርማክሙ፡ ፈርሁክሙ፡ እለ፡ ቀዲሙ፡ ትፈርህዎሙ፡ አንትሙ፡ ወይርዕዱ፡ እምኔክሙ፤ ወይትፌነዉ፡ ሐዋርያት፡ እንዘ፡ መሪረ፡ ይበክዩ፡ ወይስእሉ፡ ሰላመ።
8 እስመ፡ ማሰነ፡ ፍኖቶሙ፡ ወኀለፈ፡ ግርማሆሙ፡ ለአሕዛብ፡ ወተሥዕረ፡ ኪዳኖሙ፡ ወኢትረስይዎሙ፡ ከመ፡ ዕደው።
9 ላሐወት፡ ምድር፡ ወተኀፍረ፡ ሊባኖስ፣፡ ዖመ፡ ኮነ፡ ሳሮን።
10 ናሁ፡ ይእዜ፡ እትነሣእ፡ ይቤ፡ እግዚአብሔር፣፡ ይእዜ፡ እሴባሕ፡ ወይእዜ፡ እትሌዐል፡ አነ።
11 ይእዜ፡ ትሬእዩ፡ ወይእዜ፡ ታነክሩ፤ ይከውን፡ ከንቶ፡ ኃይለ፡ መነፈስክሙ፡ ወእሳት፡ ትበልዐክሙ።
12 ወይከውኑ፡ አሕዛብ፡ ከመ፡ ዋዕየ፡ ሦክ፡ ዘገዳም፡ ውዑያነ፡ ወግዱፋነ።
13 ወይሰምዑ፡ ዘገበርኩ፡ እለሂ፡ እምርኁቅ፣፡ ወእለሂ፡ እምቅሩብ፡ የአምሩ፡ ኃይልየ።
14 ዐለዉኒ፡ እለ፡ ውስተ፡ ጽዮን፡ ወዐመፁኒ፤ ናሁ፡ ይእኅዞሙ፡ ረዓድ፡ ለኃጥኣን።
15 ዘየሐውር፡ በጽድቅ፡ ወዘይነብብ፡ ርቱዐ፣፡ ዘይጸልእ፡ ፍኖተ፡ ዓመፃ፣፡ ዘይጸልእ፡ ኃጢአተ፡ ወጽልሑተ፡ ወዘይመይጥ፡ እዴሁ፡ እምሕልያን፤ ዘይመይጥ፡ እዝኖ፡ ከመ፡ ኢይስማዕ፡ ኵነኔ፡ ነፍስ፡ ወይከድን፡ ዐይኖ፡ ከመ፡ ኢይርአይ፡ ግፍዓ።
16 ዘከመዝኬ፡ ይነብር፡ ውስተ፡ ልዑል፡ በአተ፡ ኰኵሕ፡ ጽኑዕ፤ ወይትወሀቦ፡ እክልሂ፡ ወማይሂ፡ በጽድቅ።
17 ወትሬእይዎ፡ ለንጉሥ፡ ምስለ፡ ስብሐት፡ ወይሬእያ፡ አዕይንቲክሙ፡ ምድረ፡ ርኁቀ።
18 ወትትሐዘብ፡ ነፍስክሙ፡ ፍርሃተ።
19 ንኡሱ፡ ወዓቢዩ፡ ሕዝብ፡ እለ፡ ኢመከሩ፡ ወእለ፡ ኢያእመሩ፡ ነገረ፡ ዕሙቀ፡ ከመ፡ ኢይስምዑ፡ ሕዝብ፡ ዓማፅያን፣፡ ወዘኒ፡ ይሰምዕ፡ ከመ፡ ዘአልቦ፡ ልበ።
20 ናሁ፡ ጽዮን፡ ሀገረ፡ መድኃኒትነ፣፡ ወትሬእዪ፡ በአዕይንትኪ፡ ኢየሩሳሌም፡ ሀገር፡ ብዕልት፤ ወአብያቲሃኒ፡ ዘኢያንቀለቅል፡ ወዘኢይትሐወስ፡ መታክለ፡ ደብተራሃ፡ ለመዋዕለ፡ ዓለም፡ ወአሕባሊሃኒ፡ ዘኢይትበተክ።
21 እስመ፡ ስመ፡ እግዚአብሔር፡ ዓቢይ፡ ለክሙ፤ ወይከውን፡ ለብሔርክሙ፡ አፍላግ፡ ወሙኃዘ፡ ማይ፡ ርሒብ፡ ወስፉሕ፡ ኢተሐውር፡ እንከ፡ ዘንተ፡ ፍኖተ፣፡ አሕማርኒ፡ ኢየሐውራ።
22 እስመ፡ ዓቢይ፡ ውእቱ፡ አምላኪየ፡ እግዚአብሔር፤ ወኢይትሄየየኒ፡ እግዚአብሔር፡ መኰንንነ፡ ወእግዚአብሔር፡ አምላክነ፡ ወእግዚአብሔር፡ ንጉሥነ፤ ውእቱ፡ እግዚአብሔር፡ ያድኅነነ።
23 ተበትከ፡ አሕባልኪ፡ እስመ፡ ኢረትዐ፤ ዓምድኪ፡ ጸነት፡ ወኢበጽሐ፡ ሠርዌኪ፤ ኢያነሥእ፡ ትእምርተ፡ እስከ፡ ይእኀዝዎ፡ ወይመሀርክዎ።
24 ወኢይብል፡ ደከምኩ፡ ሕዝብ፡ ዘይነብር፡ ውስቴቶሙ፤ እስመ፡ ይትኀደግ፡ ሎሙ፡ ኃጣውኢሆሙ።
=== chapter 34 ===
[Chapter 34]
1 ተጋብኡ፡ ሕዝብ፡ ወስምዑ፡ መላእክት፤ ወትስማዕ፡ ምድርኒ፡ ወእለ፡ ውስቴታ፡ ወዓለምኒ፡ ወኵሉ፡ ዘውስቴታ፡ አሕዛብ።
2 እስመ፡ መዐተ፡ እግዚአብሔር፡ ላዕለ፡ ኵሉ፡ አሕዛብ፤ ወመቅሠፍቱኒ፡ ዲበ፡ ኆልቆሙ፤ ከመ፡ ያጥፍኦሙ፡ ወይመጥዎሙ፡ ውስተ፡ እደ፡ ኲናት።
3 ወይትገደፍ፡ አብድንቲሆሙ፡ ለቅቱላን፤ ወይጼኑ፡ ጺዓቶሙ፤ ወይርሕሱ፡ አድባር፡ እምደሞሙ።
4 ወትጠወም፡ ሰማይ፡ ከመ፡ መጽሐፍ፤ ወይወድቁ፡ ኵሉ፡ ከዋክብት፡ ከመ፡ ቈጽለ፡ ወይን፡ ወከመ፡ ይወድቅ፡ ቈጽለ፡ በለስ።
5 ሰክረት፡ መጥባህትየ፡ በሰማይ፤ ነያ፡ ትነድድ፡ ዲበ፡ ኤዶምያስ፤ ወትወርድ፡ ዲበ፡ ሕዝብ፡ ሕጉላን፡ ምስለ፡ ኵነኔ።
6 መጥባሕተ፡ እግዚአብሔር፡ ጽግብት፡ ደመ፡ ወሥብሕት፡ ሥብሐ፡ አባግዕ፡ ወእምሥብሐ፡ አጣሊ፡ ወሐራጊት፤ እስመ፡ መሥዋዕተ፡ እግዚአብሔር፡ በባሶር፤ ወዓቢይ፡ ጥብሕ፡ በኤዶምያስ።
7 ወይወድቁ፡ ተባዕያን፡ ምስሌሆሙ፤ ወሐራጊትሂ፡ ወአሥዋር፤ ወትሰክር፡ ምድር፡ እምደሞሙ፤ ወትጠልቅ፡ እምሥብሖሙ።
8 እስመ፡ ዕለተ፡ ኵነኔሁ፡ ለእግዚአብሔር፤ ወዓመተ፡ ፍዳ፡ ኵነኔሃ፡ ለጽዮን።
9 ወይትመየጣ፡ ቈላቲሃ፡ ወይከውና፡ ፔሳ፣፡ ወይከውን፡ ምድራ፡ ተየ፤ ወይነድድ፡ ምድራ።
10 መዓልተ፡ ወሌሊተ፡ ከመ፡ ፔሳ፤ ወኢይጠፍእ፡ ለዓለም፤ ወየዐርግ፡ ጢሱ፡ ላዕለ፤ ወትማስን፡ ለትውልደ፡ ትውልድ፤ ወነዋኃ፡ መዋዕለ፡ ትጠፍእ።
11 ወየኀድሩ፡ ውስቴታ፡ አዕዋፍ፡ ወቋዓት፡ ወቅንፍዝ፡ ወሆባያት።
12 ወየኀልቁ፡ መላእክቲሃ፤ ወይትሐጐሉ፡ ነገሥታ፡ ወመሳፍንቲሃ።
13 ወይበቍል፡ ዕፀ፡ ሦክ፡ ውስተ፡ አህጉሪሃ፡ ወውስተ፡ አጽዋኒሃ፤ ወትከውን፡ ሀገረ፡ አጋንንት፡ ወዐፀደ፡ ሰገኖ።
14 ወይትራከቡ፡ በህየ፡ አጋንንት፡ ወፄደናታት፤ ወይጸርሑ፡ በህየ፡ ኵሎሙ፤ ወየኀድሩ፡ ህየ፡ እየ፡ ሰኰና፡ ላህም፡ ወይረክቡ፡ ሎሙ፡ ምዕራፈ።
15 በህየ፡ ይትዋለዱ፡ ቅንፍዝ፡ ወታድኅን፡ ምድር፡ ደቂቃ፡ በጽንዕ፤ ወይትራከቡ፡ በህየ፡ ሃየላት፤ ወይትረአዩ፡ ገጸ፡ በገጽ፡ በበይናቲሆሙ።
16 ወየኀልፉ፡ በበኆልቆሙ፡ ወኢይትሐጐል፡ አሐዱ፡ እምኔሆሙ፤ ወኢይትኀሠሡ፡ በበይናቲሆሙ፡ እስመ፡ እግዚአብሔር፡ አዘዞሙ።
17 ወውእቱ፡ ይሁቦሙ፡ መክፈልቶሙ፤ ወእዴሁ፡ አስተዋረሰቶሙ፡ ወይትረዐዩ፤ ወለዓለም፡ ይትዋረሱ፡ ለትውልደ፡ ትውልድ፡ ወየዐርፉ፡ ውስቴታ።
=== chapter 35 ===
[Chapter 35]
1 ለይትፈሣሕ፡ በድው፡ ጽሙእ፤ ወይትኀሠይ፡ ገዳም፡ ወይፍረይ፡ ከመ፡ ጽጌ።
2 ወይፍረይ፡ ወይትኀሠይ፡ ሐቅል፡ ዘዮርዳኖስ፤ ወክብረ፡ ሊባኖስ፡ ተውህበ፡ ላቲ፡ ወክብረ፡ ቀርሜሎስ፤ ወይሬእዩ፡ ሕዝብየ፡ ስብሐትየ፤ ወያሌዕልዎ፡ ለእግዚአብሔር።
3 ጽንዓ፡ እደው፡ ፅቡሳት፤ ወአእጋር፡ ሐንካሳት።
4 ናዝዝዎን፡ ለአልባቢክሙ፡ ዕንቡዛን፤ ጽንዑ፡ ወኢትፍርሁ።
5 ይእተ፡ አሚረ፡ የሐይዉ፡ አዕይንቲሆሙ፡ ለዕውራን፤ ወይሰምዑ፡ ጽሙማን።
6 ይእተ፡ አሚረ፡ ይረውጹ፡ ከመ፡ ሃየል፡ ሐንካሳን፤ ወይረትዕ፡ ልሳነ፡ በሀማን፤ እስመ፡ ነቅዐ፡ ማይ፡ በበድዉ፤ ወውኅዘ፡ በውስተ፡ ብሔረ፡ ጽምእ።
7 ወይበቍል፡ ዖም፡ በውስተ፡ በድው፤ ወይፈለፍል፡ በውስተ፡ ምድር፡ ጽምእት፤ በህየ፡ በዓሎሙ፡ ለአዕዋፍ፡ ብሔረ፡ ህለት፡ ወዖም፡ ህየ።
8 ወትሰመይ፡ ፍኖተ፡ ንጽሕተ፡ ወፍኖተ፡ ቅድስተ፡ ወኢየኀልፍ፡ እንተ፡ ህየ፡ ርኩስ፤ ወአልቦ፡ ፍኖተ፡ ርኵስ፡ ህየ፤ ወእለ፡ ተዘርዉ፡ የሐውሩ፡ ውስቴታ፡ ወኢይስሕቱ።
9 ወአልቦ፡ ህየ፡ አንበሳ፤ ወአርዌ፡ እኩይ፡ ኢየዐርግ፡ እንከ፡ ውስቴታ፡ ወኢይትረከብ፡ በህየ፤ ዳእሙ፡ እለ፡ አምሠጡ፡ የሐውሩ፡ ባቲ።
10 ወእለ፡ ተጋብኡ፡ በእንተ፡ እግዚአብሔር፡ ይሠወጡ፡ ባቲ፤ ወየአትዉ፡ ውስተ፡ ጽዮን፡ በትፍሥሕት፤ ወበኃሤት፡ ዘለዓለም፡ እንዘ፡ ውስተ፡ ርእሶሙ፡ ሀሎ፡ ክብር፤ ፍሥሐ፡ ወኃሤት፡ ይረክቦሙ፤ እስመ፡ ጠፍአ፡ ሕማም፡ ወትካዝ፡ ወኃዘን።
=== chapter 36 ===
[Chapter 36]
1 ወአመ፡ ፲ወ፬፡ ዓመተ፡ መንግሥቱ፡ ለሕዝቅያስ፣፡ ዐርገ፡ ሰናክሬም፡ ንጉሠ፡ ፋርስ፡ ላዕለ፡ አህጉረ፡ ይሁዳ፡ እለ፡ ቦን፡ ጥቅመ፡ ወነሥኦን፡ ወአስተጋብኦን።
2 ወፈነዎ፡ ንጉሥ፡ ፋርስ፡ ለራፋስቂስ፡ እምለኪስ፡ ውስተ፡ ኢየሩሳሌም፡ ኀበ፡ ሕዝቅያስ፡ ንጉሥ፡ ምስለ፡ ብዙኅ፡ ሠራዊት።
3 ወወፅኡ፡ ኀቤሁ፡ ኤልያቄም፡ ወልደ፡ ኪልቂያስ፡ መጋቢ፡ ወስምናስ፡ ጸሐፊ፡ ወኢዮአቄም፡ ወልደ፡ አሳፍ፡ ጸሐፌ፡ ተዝካር።
4 ወይቤሎሙ፡ ራፋስቂስ፤ በልዎ፡ ለሕዝቅያስ፤ ከመዝ፡ ይቤ፡ ንጉሠ፡ ፋርስ፡ ዓቢይ፤ በመኑአ፡ ትትዌከል።
5 በምክርከኑ፡ ወበነገረ፡ ከናፍሪከኑአ፡ ይከውን፡ ቀትል፤ ወይእዜኒአ፡ በመኑአ፡ ተወኪለከ፡ ወለውከኒአ።
6 ናሁአ፡ ተወከልከአ፡ በበትረ፡ ብርዕ፡ ቅጥቁጥ፡ እንተ፡ በግብጽ፡ ዘአስመከ፡ ብእሲ፡ ላዕሌሃ፣፡ ይበውእ፡ ስርዋጽ፡ ውስተ፡ እዴሁ፤ ከማሁ፡ ውእቱ፡ ፈርኦን፡ ንጉሠ፡ ግብጽ፡ ወኵሎሙ፡ እለ፡ ይትዌከሉ፡ ቦቱ።
7 ወእመሰ፡ ትብሉሁ፤ በእግዚአብሔር፡ አምላክነ፡ ተወከልነ።
8 ይእዜኒ፡ ግብኡ፡ ኀበ፡ እግዚእየ፡ ንጉሠ፡ ፋርስ፡ ወእሁበክሙ፡ ዕሥራ፡ ምእተ፡ አፍራሰ፡ እመ፡ ትክሉ፡ አምጽኦ፡ ዘይፄዐኖሙ።
9 እፎ፡ እንከ፡ ትክሉ፡ ተሠውጦ፡ ኀበ፡ መኳንንት፤ ኵሎሙ፡ እለ፡ ይትዌከሉ፡ በግብጽ፡ አግብርት፡ እሙንቱ፡ በአፍራሲሆሙ፡ ወመስተፅዕናን።
10 ወይእዜኒ፡ ዘእንበለ፡ እግዚአብሔርኑ፡ ዐረግነ፡ ውስተዝ፡ ብሔርክሙ፡ ከመ፡ ንቅትልክሙ፤ እስመ፡ እግዚአብሔር፡ ይቤለኒ፤ ዕርግ፡ ውስተ፡ ብሔሮሙ፡ ወቅትሎሙ።
11 ወይቤልዎ፡ ኤልያቄም፡ ወስምናስ፡ ወኢዮአቄም፡ ለራፋስቂስ፤ ንግሮሙ፡ ለአግብርቲከ፡ ሶርስተ፡ እስመ፡ ንሰምዕ፡ ወኢትንግረነ፡ በዕብራይስጢ፡ ወለምንት፡ ትነግር፡ በዘይሰምዑ፡ እሉ፡ ሰብእ፡ እለ፡ ዲበ፡ አረፍት።
12 ወይቤሎሙ፡ ራፋስቂስ፤ ቦኑ፡ ኀበ፡ እግዚእክሙ፡ ወኀቤክሙ፡ ፈነወኒ፡ እግዚእየ፤ አኮኑ፡ ኀበ፡ እሉ፡ ሰብእ፡ ከመ፡ እንግሮሙ፡ ዘንተ፡ ነገረ፡ ለእለ፡ ይነብሩ፡ ዲበ፡ አረፍት፡ ከመ፡ ይብልዑ፡ ኵስሖሙ፡ ወይስተዩ፡ ሥንቶሙ፡ ምስሌክሙ፡ ኅቡረ።
13 ወቆመ፡ ራፋስቂስ፡ ወከልሐ፡ በዓቢይ፡ ቃል፡ በነገረ፡ ዕብራይስጢ፡ ወይቤ፤ ስምዑ፡ ቃሎ፡ ለንጉሥ፡ ዓቢይ፣፡ ለንጉሠ፡ ፋርስ።
14 ከመዝ፡ ይቤ፡ ንጉሥ፤ ኢያስሕትክሙ፡ ሕዝቅያስ፡ በነገር፡ ዘኢይክል፡ አድኅኖተክሙ።
15 ወኢይበልክሙ፡ ሕዝቅያስ፡ አምላክክሙ፡ ያድኅነክሙ፤ ወኢትገብእ፡ ዛቲ፡ ሀገር፡ ውስተ፡ እዴሁ፡ ለንጉሠ፡ ፋርስ።
16 ወኢትስምዕዎ፡ ለሕዝቅያስ።
17 እስከ፡ እመጽእ፡ ወእነሥአክሙ፡ ውስተ፡ ብሔርየ፡ ዘከመ፡ ብሔርክሙአ፣፡ ብሔረ፡ እክል፡ ወወይን፡ ወስርናይ፡ ወዐፀደ፡ ወይንአ።
18 ኢያስሕትክሙአ፡ ሕዝቅያስ፡ በነገር፡ ወኢይበልክሙ፤ እግዚአብሔር፡ ያድኅሠንክሙ።
19 አይቴ፡ ውእቱ፡ አምላከ፡ ሒማት፡ ወአርፋት፤ ወአይቴ፡ ውእቱ፡ አምላከ፡ ሀገረ፡ ሴፋርሄም፤ ክህሉኑ፡ አድኅኖታ፡ ለሰማርያ፡ እምእዴየ።
20 መኑ፡ እንከ፡ እምኵሉ፡ አማልክተ፡ አሕዛብ፡ ዘአድኀነ፡ ብሔሮ፡ እምእዴየ፡ ከመ፡ ያድኅና፡ እግዚአብሔር፡ ለኢየሩሳሌም፡ እምእዴየ።
21 ወአርመሙ፡ ወኢተሠጥውዎ፡ ቃለ፡ እስመ፡ አዘዘ፡ ንጉሥ፡ ከመ፡ ኢይሠጠውዎ፡ ቃለ።
22 ወቦኡ፡ ኤልያቄም፡ ወልደ፡ ኪልቂያስ፡ መጋቢ፡ ወስምናስ፡ ጸሐፌ፡ ሠራዊት፡ ወኢዮአቄም፡ ወልደ፡ አሳፍ፡ ጸሐፌ፡ ተዝካር፡ ኀበ፡ ሕዝቅያስ፡ እንዘ፡ ሥጡጥ፡ አልባሲሆሙ፡ ወነገርዎ፡ ነገረ፡ ራፋስቂስ።
=== chapter 37 ===
[Chapter 37]
1 ወሰሚዖ፡ ሕዝቅያስ፡ ንጉሥ፡ ሠጠጠ፡ አልባሲሁ፡ ወለብሰ፡ መንጸፈ፡ ወዐርገ፡ ቤተ፡ እግዚአብሔር።
2 ወፈነዎሙ፡ ለኤልያቄም፡ መጋቢ፡ ወለስምናስ፡ ጸሐፊ፡ ወለረበናተ፡ ካህናት፡ እንዘ፡ ይለብሱ፡ መንጸፈ፤ ወበጽሑ፡ ኀበ፡ ኢሳይያስ፡ ነቢይ፡ ወልደ፡ አሞጽ።
3 ወይቤልዎ፡ ከመዝ፡ ይቤ፡ ሕዝቅያስ፤ ዕለተ፡ ምንዳቤአ፡ ወኃሣር፡ ወመንሱትአ፡ ዛቲ፡ ዕለት፡ ዮምአ፡ እስመ፡ አልባአ፡ ኃይለአ፡ ለእንተአ፡ ትወልድአ፡ ወአኀዛ፡ ማሕምምአ።
4 ለይስማዕአ፡ እግዚአብሔርአ፡ አምላክከአ፡ ቃሎአ፡ ለራፋስቂስአ፡ ዘለአኮአ፡ ንጉሠ፡ ፋርስ፡ ከመ፡ ይትዐየሮ፡ ለእግዚአብሔር፡ አምላክ፡ ሕያው፣፡ ወተዐየረ፡ በነገር፡ ዘሰምዐ፡ እግዚአብሔር፡ አምላክከ፣፡ ወጸሊ፡ ኀበ፡ እግዚአብሔር፡ አምላክከ፡ በእንተ፡ እሉ፡ እለ፡ ተርፉ።
5 ወበጺሖሙ፡ ደቂቀ፡ ሕዝቅያስ፡ ንጉሥ፡ ኀበ፡ ኢሳይያስ።
6 ወይቤሎሙ፡ ኢሳይያስ፤ ከመዝ፡ በልዎ፡ ለእግዚእክሙ፤ ከመዝ፡ ይቤ፡ እግዚአብሔር፤ ኢትፍራህአ፡ እምነገር፡ ዘሰማዕከ፡ ዘተዐየረኒ፡ ንጉሠ፡ ፋርስ።
7 ናሁአ፡ አነ፡ አመጽእ፡ ላዕሌሁ፡ ጋኔነ፡ ወይሰምዕ፡ ዜና፡ ወይሠወጥ፡ ብሔሮ፡ ወይመውት፡ በመጥባሕት፡ በብሔሩ።
8 ወተሠውጠ፡ ራፋስቂስ፡ ወረከቦ፡ ለንጉሠ፡ ፋርስ፡ እንዘ፡ ይትቃተላ፡ ለሎምና፤ ወሰሚዖ፡ ከመ፡ ግዕዘ፡ እምለኪስ።
9 ወፅአ፡ ተራቃታ፡ ንጉሠ፡ ኢትዮጵያ፡ ከመ፡ ይትቃተሎ፤ ወሰሚዖ፡ ተሠውጠ፡ ወፈነወ፡ ሐዋርያተ፡ ኀበ፡ ሕዝቅያስ፡ እንዘ፡ ይብል።
10 ከመዝ፡ በልዎ፡ ለሕዝቅያስ፡ ንጉሠ፡ ይሁዳ፤ ኢያስሕትከአ፡ አምላክከ፡ ዘቦቱ፡ ተወከልከ፡ እንዘ፡ ይብል፡ ኢትገብእ፡ ኢየሩሳሌም፡ ውስተ፡ እዴሁ፡ ለንጉሠ፡ ፋርስ።
11 ኢሰማዕከኑ፡ ዘገብሩ፡ ነገሥተ፡ ፋርስ፡ በኵሉ፡ በሐውርት፡ ዘከመ፡ አጥፍእዎሙ፡ ከመ፡ ትድኀን፡ አንተ።
12 ቦኑ፡ ዘአድኀንዎሙ፡ አማልክቲሆሙ፡ ለአሕዛብ፡ ዘቀተሉ፡ አበውየ፡ በብሔረ፡ ኀሳን፡ ወራሴን፡ ወካራን፡ ዘደወለ፡ ቴማን።
13 አይቴ፡ እሙንቱ፡ ነገሥተ፡ ሄማት፡ ወአርፋት፡ ወአህጉረ፡ ሴፋርሄም፡ ወምናሔ፡ ወጋዋን።
14 ወተመጠወ፡ ሕዝቅያስ፡ ይእተ፡ መጽሐፈ፡ በኀበ፡ ሐዋርያት፡ ወአንበባ፣፡ ወዐርገ፡ ቤተ፡ እግዚአብሔር፡ ወከሠታ፡ በቅድመ፡ እግዚአብሔር።
15 ወጸለየ፡ ሕዝቅያስ፡ ኀበ፡ እግዚአብሔር፡ ወይቤ።
16 እግዚአብሔር፡ ጸባኦት፡ አምላከ፡ እስራኤል፡ ዘትነብር፡ ዲበ፡ ኪሩቤል፤ አንተ፡ አምላክ፡ ባሕቲትከ፡ ዲበ፡ ኵሉ፡ ነገሥታተ፡ ምድር፣፡ አንተ፡ ፈጠርከ፡ ሰማየ፡ ወምድረ።
17 ስማዕ፡ እግዚኦ፡ ወረአይ፡ እግዚኦ፡ ነገሮ፡ ለሰናክሬም፡ ዘለአከ፡ ከመ፡ ይትዐየሮ፡ ለእግዚአብሔር፡ ሕያው።
18 አማን፡ አማሰኑ፡ ኵሎ፡ ዓለመ፡ ነገሥተ፡ ፋርስ፡ ወበሐውርቲሆሙ።
19 ወአማልክቲሆሙኒ፡ አውዐዩ፡ በእሳት፡ እስመ፡ ኢኮኑ፡ አማልክተ፡ አላ፡ ግብረ፡ እደ፡ ሰብእ፡ እሙንቱ፡ ዕፀው፡ ወአእባን፡ እሙንቱ፡ ወአጥፍእዎሙ።
20 ወአንተሰ፡ እግዚኦ፡ አምላክነ፡ አድኅነነ፡ እምእዴሁ፡ ከመ፡ ያእምሩ፡ ኵሎሙ፡ ነገሥተ፡ ምድር፡ ከመ፡ አንተ፡ እግዚአብሔር፡ ባሕቲትከ።
21 ወተፈነወ፡ ኢሳይያስ፡ ወልደ፡ አሞጽ፡ ኀበ፡ ሕዝቅያስ፡ ወይቤሎ፤ ከመዝ፡ ይቤ፡ እግዚአብሔር፡ አምላክ፡ እስራኤል፡ ሰማዕኩ፡ ዘጸለይከ፡ ኀቤየ፡ በእንተ፡ ሰናክሬም፡ ንጉሠ፡ ፋርስ።
22 ከመዝ፡ ይቤ፡ እግዚአብሔር፡ በእንቲአሁ፤ ጸዐለኪ፡ ወአስተአከየኪ፡ ድንግል፡ ወለተ፡ ጽዮን፤ ወአሖሰ፡ ርእሶ፡ ዲቤኪ፡ ወለተ፡ ኢየሩሳሌም።
23 መነ፡ ተዐየርከ፡ ወወሀከ፤ ወለመኑ፡ አንሣእከ፡ ርእሰከ፤ ወለመኑ፡ አዕበይከ፡ ቃለከ፤ ወኢታነሥእኑ፡ ውስተ፡ አርያም፡ ዐይነከ፡ ወትኔጽር፡ ኀበ፡ ቅዱሰ፡ እስራኤል።
24 ከመ፡ ትትዐየሮ፡ ለእግዚአብሔር፡ በሐዋርያቲከ።
25 ወሐጸርኩ፡ ወአንፀፍኩ፡ ማየ፡ ወኵሎ፡ ምቅዋመ፡ ማይ።
26 ኢሰማዕከኑ፡ ዘንተ፡ ዘገበርኩ፡ አነ፡ ትካት፡ በመዋዕለ፡ ቀዲሙ፡ ዘአዘዝኩ፣፡ ወይእዜሰ፡ አርአይኩ፡ ከመ፡ አጥፍኦሙ፡ ለአሕዛብ፡ በውስተ፡ አጽዋኒሆሙ፡ ወለእለኒ፡ ይነብሩ፡ ውስተ፡ አህጉር፡ ወይጼወኑ።
27 ወአመጽእ፡ እዴየ፡ ወይየብሱ፤ ወይከውኑ፡ ከመ፡ ሣዕር፡ ዘይየብስ፡ ውስተ፡ ናሕስ፡ ወከመ፡ ተሐግ።
28 ወይእዜሰ፡ አእመርኩ፡ ምብያቲከ፡ ወሙባአከ፡ ወሙፃአከ።
29 መዐትከሂ፡ ዘተመዐዕከ፡ ወምረትከሂ፡ ዐርገ፡ ኀቤየ፤ ወእወዲ፡ ለከ፡ ዝማማተ፡ ውስተ፡ አንፍከ፡ ወልጓመ፡ ውስተ፡ ከናፍሪከ፤ ወእመይጠከ፡ በፍኖት፡ እንተ፡ ባቲ፡ መጻእከ።
30 ወዝንቱ፡ ትእምርትከ።
31 ወይሠርጽ፡ ሥርዎሙ፡ ለእለ፡ ተርፉ፡ በይሁዳ፡ ወይፈሪ፡ ዘርኦሙ፡ በላዕሉ።
32 እስመ፡ እምኢየሩሳሌም፡ ይከውኑ፡ እለ፡ ተርፉ፡ ወእለሂ፡ ይድኅኑ፡ እምደብረ፡ ጽዮን፤ ቅንአቱ፡ ለእግዚአብሔር፡ ጸባኦት፡ ይገብር፡ ዘንተ።
33 በእንተ፡ ዝንቱ፡ ከመዝ፡ ይቤ፡ እግዚአብሔር፡ ለንጉሠ፡ ፋርስ፡ ኢይበውኣ፡ ለዛቲ፡ ሀገር፡ ወኢይነድፍ፡ ውስቴታ፡ ሐፀ፡ ወኢይሠይም፡ ላዕሌሃ፡ ወልታ፡ ወኢየሐጽራ።
34 ወይሠወጥ፡ በፍኖት፡ እንተ፡ ባቲ፡ መጽአ፡ ወኢይበውኣ፡ ለዛቲ፡ ሀገር።
35 እረድኣ፡ ለዛቲ፡ ሀገር፡ ወአድኅና፡ በእንቲአየ፡ ወበእንተ፡ ዳዊት፡ ቍልዔየ።
36 ወእምዝ፡ ወፅአ፡ መልአከ፡ እግዚአብሔር፡ ወቀተለ፡ እምትዕይንተ፡ ፋርስ፡ ዐሠርተ፡ ወሰመንተ፡ እምፈ፡ ወኃምሳ፡ ምእተ፡ ዕደወ፤ ወነቂሆሙ፡ በጽባሕ፡ ረከቡ፡ አብድንቲሆሙ፡ ኵሎሙ፡ በኀበ፡ ሞቱ።
37 ወተሠውጠ፡ ሰናክሬም፡ ንጉሠ፡ ፋርስ፡ ወነበረ፡ ነነዌ።
38 ወእንዘ፡ ይሰግድ፡ በቤተ፡ ሲድራክ፡ አምላኩ፣፡ አድራሜሌክ፡ ወሳራሳር፡ ደቂቁ፡ ቀተልዎ፡ በመጥባሕት፤ ወአምሠጡ፡ ውስተ፡ አርሜንያ፡ ሀገር።
=== chapter 38 ===
[Chapter 38]
1 ወውእተ፡ አሚረ፡ ደወየ፡ ሕዝቅያስ፡ ወበጽሐ፡ ለሞት።
2 ወሜጠ፡ ሕዝቅያስ፡ ገጾ፡ ኀበ፡ አረፍት፡ ወጸለየ፡ ኀበ፡ እግዚአብሔር።
3 ወይቤ፤ ተዘከር፡ እግዚኦ፡ ዘከመ፡ ሖርኩ፡ ቅድሜከ፡ በጽድቅ፡ ወበልብ፡ ርቱዕ፣፡ ወገበርኩ፡ ቅድሜከ፡ ሥምረተከ።
4 ወኮነ፡ ቃለ፡ እግዚአብሔር፡ ኀበ፡ ኢሳይያስ፡ ወይቤሎ።
5 ሖር፡ በሎ፡ ለሕዝቅያስ፤ ከመዝ፡ ይቤ፡ እግዚአብሔር፡ አምላኩ፡ ለዳዊት፡ አቡከ፤ ሰማዕኩአ፡ ጸሎተከ፡ ወርኢኩአ፡ አንብዐከ፤ ወናሁ፡ ወሰኩከ፡ በዲበ፡ ዓመታቲከ፡ ዐሠርተ፡ ወኃምስተ፡ ዓመተ።
6 ወአድኅነከ፡ እምእዴሆሙ፡ ለነገሥተ፡ ፋርስ፡ ወእቀውም፡ ላቲ፡ ለዛቲ፡ ሀገር።
7 ወዝንቱ፡ ትእምርቱ፡ እምኀበ፡ እግዚአብሔር፡ ከመ፡ ይግበር፡ እግዚአብሔር፡ ዘንተ፡ ነገረ።
8 ናሁ፡ አነ፡ እመይጥ፡ ጽላሎተ፡ መዓርጋት፡ ወሪዶ፡ ዲበ፡ ዐሠርቱ፡ መዓርጋት፡ ዘቤተ፡ አቡከ፤ ወይገብእ፡ ፀሐይ፡ ዲበ፡ መዓርጋት፡ ዐሠርቱ፤ ወየዐርግ፡ ፀሐይ፡ ዲበ፡ ዐሠርቱ፡ መዓርጋት፡ ኀበ፡ ወረደ፡ ዝኩ፡ ጽኩ፡ ጽላሎት።
9 አንሰ፡ እቤ፡ በኑኃ፡ መዋዕልየ፤ ውስተ፡ አናቅጸ፡ ሲኦል፡ አሐውር፤ ወአኀድግ፡ ዘተረፈ፡ ዓመታትየ።
10 ወእቤ፤ ኢይሬኢ፡ እንከ፡ መድኃኒተ፡ እግዚአብሔር፡ በምድረ፡ ሕያዋን፤ ወኢይሬኢ፡ እንከ፡ ሰብአ።
11 ኀልቀ፡ እምአዝማድየ፡ ወሐጐልኩ፡ ዘተረፈ፡ ሕይወትየ፤ ወፅአት፡ ወኀለፈት፡ እምኔየ፤ ከመ፡ ዘይተክል፡ ወይሥዕር፡ ደብተራሁ፤ ከማሁ፡ ኮነት፡ ነፍስየ፡ በላዕሌየ፡ ከመ፡ ዕጡፈ፡ ፀምር፡ ዘአልጸቀ፡ ይግምድዎ።
12 ውእተ፡ አሚረ፡ ተሀወኩ፡ ከመ፡ አንበሳ፡ እስከ፡ ይጸብሕ፤ ከማሁ፡ ተቀጥቀጣኒ፡ አዕፅምትየ፤ አኀዘኒ፡ እምነግህ፡ እስከ፡ ሰርክ።
13 ወከመ፡ ማዕነቅ፡ ከማሁ፡ እነቁ፣፡ ወከመ፡ ርግብ፡ ከማሁ፡ እነብብ።
14 እግዚኦ፡ በእንቲአሃ፡ እቤለከ፡ ወአንሣእካ፡ ለነፍስየ፤ ወተፈሣሕኩ፡ ወሐየውኩ።
15 ወተሠሀልካ፡ ለነፍስየ፡ ከመ፡ ኢትትሐጐል፤ ወገደፍከ፡ ድኅሬየ፡ ኵሎ፡ ኃጢአትየ።
16 እስመ፡ አኮ፡ እለ፡ ውስተ፡ ሲኦል፡ ዘይሴብሑከ፡ ወአኮ፡ እለ፡ ይመውቱ፡ ዘይባርኩከ፤ ወኢይሴፈው፡ ሣህለከ፡ እለ፡ ውስተ፡ ሲኦል።
17 ዳእሙ፡ ሕያዋን፡ ይባርኩከ፡ በከመ፡ አነ።
18 እግዚእየ፡ ወመድኃንየ፡ አንተ፣፡ ወአነሂ፡ ኢየኀድግ፡ ባርኮተከ፤ በመዝሙር፡ በኵሉ፡ መዋዕለ፡ ሕይወትየ፡ በቅድመ፡ ቤተ፡ እግዚአብሔር።
19 ወይቤሎ፡ ኢሳይያስ፡ ለሕዝቅያስ፤ ንሣእ፡ ዐጽቀ፡ በለስ፡ ወሕርፅ፡ ወተቀባእ፡ ወተሐዩ።
20 ወይቤ፡ ሕዝቅያስ፤ ዝንቱኑ፡ ትእምርቱ፡ ከመ፡ አዕርግ፡ ውስተ፡ ቤተ፡ እግዚአብሔር።
=== chapter 39 ===
[Chapter 39]
1 ይእተ፡ አሚረ፡ ለአከ፡ መሮዳክ፡ በልዳንሃ፡ ወልደ፡ በልዳን፡ ንጉሠ፡ ባቢሎን፡ መጻሕፍተ፡ ወተናብልተ፡ ወአምኃ፡ ኀበ፡ ሕዝቅያስ፤ እስመ፡ ሰምዐ፡ ከመ፡ ደወየ፡ ወበጽሐ፡ ለመዊት፡ ወሐይወ።
2 ወተፈሥሐ፡ ሕዝቅያስ፡ በእንቲአሆሙ፡ ዓቢየ፡ ፍሥሐ፡ ወአርአዮሙ፡ ቤተ፡ ኒቆታሁ፣፡ ወርቆ፡ ወብሩሮ፡ ወልብሶ፡ ወልብኖ፣፡ ዕንቆ፡ ወዕጣናተ፡ ወኵሎ፡ ንዋየ፡ ቤተ፡ ጊዛን፡ ወኵሎ፡ ዘውስተ፡ መዛግብቲሁ።
3 ወመጽአ፡ ኢሳይያስ፡ ኀበ፡ ሕዝቅያስ፡ ንጉሥ፡ ወይቤሎ፤ ምንተ፡ ይቤሉከ፡ እሉ፡ ዕደው፡ ወእምአይቴ፡ መጽኡ፡ ኀቤከ፤ ወይቤሎ፡ ሕዝቅያስ፤ እምርኁቅ፡ ብሔር፡ መጽኡ፡ ኀቤየ፡ እምነ፡ ባቢሎን።
4 ወይቤሎ፡ ኢሳይያስ፤ ምንተ፡ ርእዩ፡ በቤትከ፤ ወይቤሎ፡ ሕዝቅያስ፤ ኵሎ፡ ዘውስተ፡ ቤትየ፡ ርእዩ፡ ወአልቦ፡ ዘኢርእዩ፡ ዘውስተ፡ ቤትየ፡ ወዓዲ፡ ዘውስተ፡ መዛግብትየሂ።
5 ወይቤሎ፡ ኢሳይያስ፤ ስማዕኬ፡ ቃለ፡ እግዚአብሔር፡ ጸባኦት።
6 ናሁ፡ መዋዕል፡ ይመጽእ፡ ወይነሥኡ፡ ኵሎ፡ ዘውስተ፡ ቤትከ፣፡ ወኵሎ፡ ዘዘገቡ፡ አበዊከ፡ እስከ፡ ዛቲ፡ ዕለት፡ ይወስዱ፡ ባቢሎን፡ ወአልቦ፡ ዘየኀድጉ፡ ለከ።
7 ወዓዲ፡ ውሉደከሂ፡ ዘወለድከ፡ ዘወፅኡ፡ እምሐቌከ፡ ይነሥእዎሙ፡ ወይሬስይዎሙ፡ ደቀ፡ ጽርሕ፡ ወገዛእተ፡ ለቤተ፡ ንጉሠ፡ ባቢሎን።
8 ወይቤሎ፡ ሕዝቅያስ፡ ለኢሳይያስ፤ ሠናይ፡ ቃለ፡ እግዚአብሔር፡ ዘይቤ፤ ወባሕቱ፡ ይኩን፡ ጽድቅ፡ ወሰላም፡ በመዋዕልየ።
=== chapter 40 ===
[Chapter 40]
1 ገሥጽዎሙ፡ ለሕዝብየ፡ ይቤ፡ እግዚአብሔር።
2 ካህናትኒአ፡ ንብብዋ፡ ለኢየሩሳሌም፡ ውስተ፡ ልባ፡ ወገሥጽዋ፡ እስመ፡ ብዙኅ፡ ኃሣራ፤ ተፈትሐ፡ ኃጢአታ፡ ወተፈድየት፡ እምእደ፡ እግዚአብሔር፡ ካዕበት”ኃጢአታ።
3 ቃለ፡ አዋዲ፡ በገዳም፤ ጺሑ፡ ፍኖተ፡ እግዚአብሔር፡ ወዐርዩ፡ መጽያሕቶ፡ ለአምላክክሙ።
4 ኵሉ፡ ማዕምቅ፡ ይምላእ፡ ወኵሉ፡ ደብር፡ ወወግር፡ ይተሐት፤ ወይኩን፡ ኵሉ፡ መብእስ፡ መጽያሕተ፡ ወይኩን፡ ቈላት፡ ምድረ፡ ርሒበ።
5 ወያስተርኢ፡ ስብሐተ፡ እግዚአብሔር፡ ወይርአይ፡ ኵሉ፡ ዘነፍስ፡ መድኃኒተ፡ እግዚአብሔር፡ እስመ፡ እግዚአብሔር፡ ነበበ።
6 ቃለ፡ ዘይብል፤ ክላሕ።
7 ይየብስ፡ ሣዕሩ፡ ወይወድቅ፡ ፍሬሁ፡ እስመ፡ መንፈሰ፡ እግዚአብሔር፡ ይነብብ፡ ቦቱ፤ አኮኑ፡ ሣዕር፡ ሕዝብ።
8 ይየብስ፡ ሣዕር፡ ወይትነገፍ፡ ጽጌ፣፡ ወቃለ፡ እግዚአብሔርሰ፡ ይነብር፡ ለዓለም።
9 ውስተ፡ ደብር፡ ነዋኅ፡ ይዕርግ፡ ዘይዜንዋ፡ ለጽዮን፤ ክላሕ፡ በኃይልከ፡ ወአንሥእ፡ ቃለከ፡ ዘትዜንዋ፡ ለኢየሩሳሌም።
10 ወነዋ፡ እግዚአብሔር።
11 ከመ፡ ኖላዊ፡ ዘይሬዒ፡ አባግዒሁ፡ ወያስተጋብኦሙ፡ ለአባግዕ፡ በመዝራዕቱ፡ ወያስተፌሥሖን፡ ለፅኑሳት።
12 መኑ፡ ዘሰፈሮ፡ ለማይ፡ በሕፍኑ፡ ወለሰማይኒ፡ በስዝሩ፡ ወዘአኀዛ፡ ለኵላ፡ ምድር፤ መኑ፡ አቀሞሙ፡ ለአድባር፡ በመዳልው፡ ወለአውግርኒ፡ በመድሎት።
13 መኑ፡ አእመረ፡ ሕሊናሁ፡ ለእግዚአብሔር፡ ወመኑ፡ መማክርቲሁ፡ ዘአምከሮ።
14 ወምስለ፡ መኑ፡ ተማከረ፡ ወአምከሮ፤ ወመኑ፡ አርአዮ፡ ፍትሐ፤ ወፍኖተ፡ ጥበብኒ፡ መኑ፡ አርአዮ።
15 ኵሎሙ፡ አሕዛብ፡ ከመ፡ ነጥበ፡ ማሕየብ፡ ወከመ፡ እንተ፡ ታገብእ፡ ዐይነ፡ መዳልው፡ እሙንቱ፣፡ ከመ፡ ወኢምንት፡ እሙንቱ።
16 ወኢየአክል፡ ሊባኖስ፡ ለአንድዶ፣፡ ወኵሉ፡ እንስሳ፡ ኢየአክል፡ ለአቃርዮ።
17 ወኵሎሙ፡ አሕዛብ፡ ከመ፡ ወኢምንት፡ ወከመ፡ ዘኢሀለዉ፡ ይመስሉ።
18 በመኑ፡ ታስተማስልዎ፡ ለእግዚአብሔር፤ ወበአምሳለ፡ መኑ፡ ታስተዐርይዎ።
19 በምስልኑ፡ ዘገብሮ፡ ጸራቢ፤ ወሚመ፡ በወርቅኑ፡ ዘሰበኮ፡ ነሃቢ፤ ቀዘቀፈሎ፡ በወርቅ፡ ወገብሮ፡ ወመሰሎ።
20 እስመ፡ ዕፀ፡ ዘኢይነቅዝ፡ የኀሪ፡ ሎቱ፡ ጸራቢ፡ ወበጥበቡ፡ ያኀሥሥ፡ ዘከመ፡ ያቀውም፡ ምስለ፡ ከመ፡ ኢያንቀልቅል።
21 ወኢያእመርክሙኒ፤ ወኢሰማዕክሙኑ፤ ወኢነገረክሙኑ፡ ዘትካት፤ ወኢያእመርክሙኑ፡ መሠረተ፡ ምድር።
22 ዘያጸንዕ፡ አጽናፈ፡ ምድር፡ ወእለሂ፡ ይነብሩ፡ ውስቴታ፡ ከመ፡ አንበጣ።
23 ወይሬስዮሙ፡ ለመላእክት፡ ከመ፡ አልቦ፡ ዘይትኴነን፡ ሎሙ፤ ወገብራ፡ ለምድር፡ እምኀበ፡ ወኢምንት።
24 ኢይተክሉ፡ ወኢይዘርኡ፡ ወኢበቍለ፡ ሥርዎሙ፡ ውስተ፡ ምድር።
25 ወይእዜኒ፡ በመኑ፡ ታስተማስሉኒ፡ ወእትሜካሕ፡ ይቤ፡ እግዚአብሔር፡ ቅዱስ።
26 አንሥኡ፡ አዕይንቲክሙ፡ ውስተ፡ ሰማይ፡ ወርእዩ፡ መኑ፡ ገብረ፡ ዘንተ፡ ኵሎ፤ ዘይኌልቆሙ፡ ለከዋክብት፡ ወያመጽኦሙ፡ በዕድሜሆሙ፡ ወይጼውዖሙ፡ ለኵሎሙ፡ በበአስማቲሆሙ፡ በብዝኀ፡ ስብሐቲሁ፡ ወበጽንዐ፡ ኃይሉ፡ ወአልቦ፡ ዘተረስዐከ።
27 ቦኑ፡ ትብሉ፡ ያዕቆብ፡ ወምንተ፡ ነበብከኒ፡ እስራኤል፤ ተኀብአት፡ ፍኖትየ፡ እምእግዚአብሔር፣፡ ወርኅቀ፡ አምላኪየ፡ እምኔየ፡ ወኀደገ፡ ፍትሕየ።
28 ወይእዜኒ፡ ኢያእመርክሙኑ፡ ወኢሰማዕክሙኑ፡ ከመ፡ ውእቱ፡ አምላክ፡ ዘለዓለም፤ አምላክ፡ ዘፈጠረ፡ አጽናፈ፡ ምድር፡ ኢይርኅብ፡ ወኢይደክም፡ ወአልቦ፡ ዘየአምር፡ ምክሮ።
29 ወይሁቦሙ፡ ኃይለ፡ ለርኁባን፡ ወኢያቴክዞሙ፡ ለእለ፡ የሐምሙ።
30 ይርኅቡ፡ መሐዛት፡ ወይደክሙ፡ ወራዙት፡ ወይፀብሱ፡ ጽኑዓን።
31 እለሰ፡ ይሴፈውዎ፡ ለእግዚአብሔር፡ ይሔድሱ፡ ኃይሎሙ፡ ወይበቍሉ፡ ክነፊሆሙ፡ ከመ፡ አንስርት፣፡ ወይረውጹ፡ ወኢይደክሙ፤ የሐውሩ፡ ወኢይርኅቡ።
=== chapter 41 ===
[Chapter 41]
1 ተሐደሳ፡ መንሌየ፡ ደሰያት፡ እስመ፡ ይትዌለጥ፡ ኃይሎሙ፡ ለመላእክት፤ ይቅረቡ፡ ኅቡረ፡ ወይንግሩ፡ ወያይድዑ፡ ፍትሐ።
2 መኑ፡ አንሥኦ፡ ለጻድቅ፡ እምጽባሕ፡ ወጸውዖ፡ ወትትልዎ፡ ድኅረ፡ እገሪሁ፤ ወያመጽእ፡ ድንጋፄ፡ ቅድመ፡ አሕዛብ፡ ወነገሥት።
3 ወይዴግኖሙ፡ ወየሐውራ፡ እገሪሁ፡ ፍኖተ፡ ሰላም።
4 መኑ፡ ዘአጽንዐ፡ ወገብረ፡ ዘንተ፤ ወጸውዓ፡ ዘይጼውዓ፡ እምፍጥረተ፡ ዓለም።
5 ርእዩ፡ አሕዛብ፡ ዘአጽናፈ፡ ምድር፡ ወፍርሁ፤ ቅረቡ፡ ወምጽኡ፡ ኅቡረ።
6 ወኵሉ፡ ይትዋቀሥ፡ ለእኁሁ፡ ወኵሉ፡ ይረድእ፡ ቢጾ፡ ወይብል።
7 ያጸንዕ፡ ብእሲ፡ ጸራቢ፡ ወነሃቢ፡ ዘይዘብጥ፡ በሰፌልያ፡ ወኅቡረ፡ ይዘብጥዎሙ።
8 አንተሰ፡ እስራኤል፣፡ ገብርየ፡ ያዕቆብ፡ ዘኀረይኩከ፣፡ ዘርአ፡ አብርሃም፡ ዘአፍቀርኩከ።
9 ዘተመጠውኩከ፡ እምአጽናፈ፡ ምድር፡ ወጸዋዕኩከ፡ እምግበቢሃ፡ ወእቤለከ፤ ገብርየ፡ አንተ፡ ወኀረይኩከ፡ ወኢየኀድገከ።
10 ኢትፍራህ፣፡ ሀሎኩ፡ ምስሌከ፤ ዑቅ፡ ኢያስሕቱከ፤ አነ፡ ውእቱ፡ አምላክከ፡ ዘአጽናዕኩከ፡ ወረዳእኩከ፡ ወአኀዝኩከ፡ በየማነ፡ ጽድቅየ።
11 ናሁ፡ የኀፍሩ፡ ወየኀሥሩ፡ ኵሎሙ፡ እለ፡ ይትቃወሙከ፡ ወይከውኑ፡ ከመ፡ ዘኢተፈጥሩ፡ ወይትሐጐሉ፡ ኵሎሙ፡ ፀርከ።
12 ወተኀሥሦሙ፡ ወኢትረክቦሙ፡ ለሰብእ፡ እለ፡ ይሣቅዩከ።
13 እስመ፡ አነ፡ አምላክከ፡ ዘአጽናዕኩከ፡ በየማንየ፡ ወእቤለከ።
14 ኢትፍራህ፡ ያዕቆብ፣፡ ውሑድ፡ አንተ፡ እስራኤል፤ አነ፡ ረዳእኩከ፡ ይቤ፡ እግዚአብሔር፡ ዘአድኀነከ፡ ቅዱሰ፡ እስራኤል።
15 ናሁ፡ ረሰይኩከ፡ ከመ፡ መንኰራኵረ፡ ሠረገላ፡ ዘየሐርስ፣፡ ወትዌሥር፡ ወታደክም፡ አድባረ፡ ወተሐርፅ፡ አውግረ፡ ወትሬስዮሙ፡ ከመ፡ ጸበል።
16 ወትደምቆሙ፡ ወያነሥኦሙ፡ ነፋስ፡ ወይዘርዎሙ፡ ዐውሎ።
17 ወይትኀሠዩ፡ ነዳያን፡ እለ፡ የኀሥሡ፡ ማየ፡ ወኢይረክቡ፤ ወእለ፡ የብሰ፡ ልሳኖሙ፡ በጽምእ።
18 አነቅዕ፡ አፍላገ፡ በውስተ፡ አድባር፡ ወአፈለፍል፡ ማእከለ፡ ገዳም፤ ወአበቍል፡ ዖመ፡ ውስተ፡ በድው፡ ወአውኅዝ፡ ማየ፡ በብሔረ፡ ጽምእ።
19 ወእሬስያ፡ ለምድረ፡ በድው፡ ብሔረ፡ አርዝ፡ ወዕፀ፡ ጴቅሳን፡ ወመርሶንን፡ ወቄጵርሶን፡ ወሌውቄን።
20 ከመ፡ ያእምሩ፡ ወይለብዉ፡ ወይጠይቁ፡ ወይእመኑ፡ ከመ፡ እደ፡ እግዚአብሔር፡ ገብረ፡ ዘንተ፡ ወቅዱሰ፡ እስራኤል፡ አርአየ።
21 ወአልጸቀት፡ ኵነኔክሙ፡ ይቤ፡ እግዚአብሔር፡ አምላክ፤ ወቀርበ፡ ምክርክሙ፡ ይቤ፡ ንጉሠ፡ ያዕቆብ።
22 በጽሐክሙ፡ ዘይረክበክሙ፣፡ ንግሩኒ፡ ዘቀዲሙ፡ ወናእምር፡ ዘትሔልዩ፡ ወናእምር፡ ደኃሪተክሙ።
23 ወንግሩነ፡ ዘይመጽእ፡ ወዘይከውን፡ በደኃሪት፡ ወናእምር፡ ከመ፡ አማልክት፡ አንትሙ፤ አሠንዩ፡ ወአሕሥሙ፡ ወናንክርክሙ፡ ወንጠይቅ፡ ወናእምር።
24 እምአይቴ፡ አንትሙ፡ ወእምአይቴ፡ ግብርክሙ፤ አኮኑ፡ እምድር፡ ርኩስ፡ ኀረዩክሙ።
25 ወአንሰ፡ አንሣእኩ፡ ዘእምደቡብ፡ ወዘእምሥራቀ፡ ፀሐይ፡ ከመ፡ ይሰመዩ፡ በስምየ።
26 መኑ፡ ዘይዜኑ፡ ዘትካት፡ ከመ፡ ናእምር፡ ዘእምቅድሜሁ፤ ወንበል፤ እሙን፡ ውእቱ።
27 ቀዳሚ፡ እሁባ፡ ለጽዮን፡ ወአገብኣ፡ ውስተ፡ ፍኖታ፡ ለኢየሩሳሌም።
28 እስመ፡ አልቦ፡ እምአሕዛብ፡ ወእምአማልክቲሆሙ፡ ዘይዜኑ፤ ወእመሂ፡ ተስእልክዎሙ፤ እምአይቴ፡ እሙንቱ፤ ኢይሠጠዉኒ።
29 እለሂ፡ ይገብርዎሙ፡ ከንቶ፡ ይፈጥርዎሙ።
=== chapter 42 ===
[Chapter 42]
1 ናሁ፡ ቍልዔየ፡ ዘአኀዝክዎ፤ ወእስረራኤል፡ ኅሩይየ፡ ዘተወክፈቶ፡ ነፍስየ፡ ወወሀብኩ፡ መንፈስየ፡ ዲቤሁ፣፡ ያመጽእ፡ ፍትሐ፡ ለአሕዛብ።
2 ኢይኬልሕ፡ ወአኢይጤርዕ፡ ወኢይሰምዕዎ፡ ቃሎ፡ በአፍአ።
3 ብርዓ፡ ቅጥቁጠ፡ ኢይሰብር፡ ወሡዐ፡ ዘይጠፍእ፣፡ ዳእሙ፡ በጽድቅ፡ ያገብእ፡ ፍትሐ።
4 ወያበርህ፡ ወኢይጠፍእ፡ እስከ፡ ያገብእ፡ ፍትሐ፡ በውስተ፡ ምድር፡ ወይትዌከለሉ፡ አሕዛብ፡ በስሙ።
5 ከመዝ፡ ይቤ፡ እግዚአብሔር፡ አምላክ፡ ዘገብረ፡ ሰማየ፡ ወተከሎ፤ ወአጽንዓ፡ ለምድር፡ ወኵሎ፣፡ ዘውስቴታ፣፡ ወይሁቦሙ፡ መንፈሰ፡ ለአሕዛብ፡ ዘውስቴታ፡ ወነፍሰ፡ ለእለ፡ ይነብሩ፡ ዲቤሃ።
6 አነ፡ እግዚአብሔር፡ አምላክ፡ ዘጸዋዕኩከ፡ በጽድቅ፡ ወአኀዝኩከ፡ በእዴየ፣፡ ወአጸንዐከ፡ ወእሁበከ፡ ሥርዓተ፡ ለትውልደ፡ ትውልድ፡ ለብርሃነ፡ አሕዛብ።
7 ወትከሥት፡ አዕይንተ፡ ዕዉራን፡ ወታወፅኦሙ፡ ለሙቁሓን፡ እማእሰር፡ ወእምቤተ፡ ሞቅሕ፡ ወለእለ፡ ይነብሩ፡ ውስተ፡ ጽልመት።
8 አነ፡ እግዚአብሔር፡ አምላክ፣፡ ከመዝ፡ ስምየ፡ ወኢይሁብ፡ ለባዕድ፡ ክብርየ፡ ወስብሐትየ፡ ለግልፎ።
9 ናሁ፡ መጽአ፡ ዘትካት፡ ወዘሐዲስኒ፡ ዘነገርኩ፡ አነ፡ ወናሁ፡ ዘእንበለ፡ ይዜንዉክሙ፡ ነገርኩክሙ።
10 ሰብሕዎ፡ ለእግዚአብሔር፡ ስብሐተ፡ ሐዲስ፤ ቅድሜሁ፡ ስብሐቲሁ፡ እምአጽናፈ፡ ምድር፤ እለ፡ ይወርዱ፡ ውስተ፡ ባሕር፡ ወይነግድዋ፤ ወደሰያትኒ፡ ወእለሂ፡ ይነብሩ፡ ውስቴቶን።
11 ትትፌሣሕ፡ በድዉ፡ ወአህጉሪሃ።
12 ወይሴብሕዎ፡ ለእግዚአብሔር፤ ወይነግርዎሙ፡ ለደሰያት፡ ሠናይቶ።
13 እግዚአብሔር፡ አምላክ፡ ኃያል፡ ይወፅእ፤ ወይቀጠቅጥ፡ ጸብአ፡ ወያነሥእ፡ ቅንአተ፤ ወይዌውዕ፡ ዲበ፡ ፀሩ፡ በኃይሉ።
14 አርመምኩ፡ እምፍጥረተ፡ ዓለም፤ ቦኑ፡ ለግሙራ፡ እንከ፡ አረምም፤ ወእትዔገሥ፡ ከመ፡ እንተ፡ ትወልድ፡ ግብተ፤ እደመስስ፡ ወእውሕጥ፡ ኅቡረ።
15 እንከሰ፡ አየብስ፡ አድባረ፡ ወአውግረ፤ ወኵሎ፡ ሣዕሮሙ፡ አየብስ፡ ኅቡረ፤ ወአውኅዝ፡ አፍላገ፡ ውስተ፡ ደሰያት፡ ወአየብስ፡ ዖመ።
16 ወአመጽኦሙ፡ ለዕዉራን፡ በፍኖት፡ ዘኢየአምሩ፤ መጽያሕተ፡ ዘኢይሬእዩ፡ አከይዶሙ፤ ወእሬስዮሙ፡ እምጽልመት፡ ውስተ፡ ብርሃን፤ ወእጸይሕ፡ ሎሙ፡ መብእሰ።
17 ወእሙንቱሰ፡ ተመይጡ፡ ድኅሬሆሙ።
18 ስምዑ፡ ጽሙማን፡ ወርእዩ፡ ዕውራን።
19 ወመኑ፡ ዕዉር፡ ዘእንበለ፡ አግብርትየ፤ ወመኑ፡ ጽሙም፡ ዘእንበለ፡ መላእክቲሆሙ፤ ወዖሩ፡ አግብርተ፡ እግዚአብሔር።
20 ወትረ፡ ትሬእዩ፡ ወኢትትዐቀቡ፤ ወክሡታት፤ እዘነክሙ፡ ወኢትሰምዑ።
21 እግዚአብሔር፡ አምላክ፡ መከረ፡ ያጽድቅ፡ ወያዕቢ፡ ስብሐቲሁ።
22 ወርኢኩ፡ ወናሁ፡ ተፄወዉ፡ ሕዝብ፡ ወተበርበሩ፤ እስመ፡ መሥገርት፡ ውስተ፡ አብያት፡ በኵለሄ፡ ወውስተ፡ ውሣጥያት፡ ኀበ፡ ኀብእዎሙ፤ ወበርበርዎሙ፡ ወአልቦ፡ ዘያድኅኖሙ፣፡ ወይመሥጥዎሙ፡ ወአልቦ፡ ዘያነግፎሙ።
23 መኑ፡ እምኔክሙ፡ ዘያጸምዕ፡ ዘንተ፡ ከመ፡ ይስማዕ፡ ዘይመጽእ።
24 መኑ፡ ረሰዩ፡ ለያዕቆብ፡ ከመ፡ ይትማሠጥዎ፡ ወለእስራኤልኒ፡ ከመ፡ ይፄውውዎ፤ አኮኑ፡ እግዚአብሔር፡ ዘሎቱ፡ አበሱ፡ ወአበዩ፡ ሐዊረ፡ በፍኖቱ፡ ወኢሰምዑ፡ ሕጎ።
25 ወአምጽአ፡ ላዕሌሆሙ፡ መቅሠፍተ፡ መዐቱ፡ ወአጽንዐ፡ ላዕሌሆሙ፡ ቀትለ፤ ወእለሂ፡ የዐወይዉ፡ በዐውዶሙ፡ ኢየአምሩ፡ ኵሎሙ፡ ወኢይሔልዩ፡ በልቦሙ።
=== chapter 43 ===
[Chapter 43]
1 ወይእዜኒ፡ ከመዝ፡ ይቤ፡ እግዚአብሔር፡ አምላክ፡ ዘገብረከ፡ ያዕቆብ፡ ወዘፈጠረከ፡ እስራኤል፤ ኢትፍራህ፡ እንከ፡ እስመ፡ አድኅንኩከ፡ ወሰመይኩ፡ ስመከ።
2 ወእመኒ፡ ዐደውከ፡ ማየ፡ አነ፡ ሀለውኩ፡ ምስሌከ፡ ወአፍላግኒ፡ ኢያሰጥሙከ፤ ወእመኒ፡ ዐደውከ፡ እሳተ፡ ነበልባልኒ፡ ኢያውዕየከ።
3 እስመ፡ አነ፡ ምስሌከ፡ አምላክከ፡ ቅዱሰ፡ እስራኤል፡ ዘአድኀንኩከ፤ ወረሰይኩከ፡ ለከ፡ ተውላጠከ፡ ግብጸ፡ ወኢትዮጵያ፡ ወሴዎንሃ፡ ቤዛከ።
4 እስመ፡ ክቡር፡ አንተ፡ በቅድሜየ፡ ወከበርከ፣፡ ወአነ፡ አፍቀርኩከ፡ ወእሁበከ፡ ብዙኀ፡ ሰብአ፡ ቤዛከ፡ ወመላእክተሂ፡ ህየንተ፡ ርእስከ።
5 ኢትፍራህ፡ እንከ፡ እስመ፡ አነ፡ ሀለውኩ፡ ምስሌከ።
6 ወእብሎ፡ ለሰሜን፤ አምጽኦሙ።
7 ወለኵሎሙ፡ እለ፡ ተሰምዩ፡ በስምየ፤ እስመ፡ ለስብሐትየ፡ ፈጠርክዎሙ፡ ወገበርክዎሙ።
8 ወአውፃእኩ፡ ሕዝበ፡ ዕዉረ፡ እለ፡ እንዘ፡ ቦሙ፡ አዕይንተ፡ ኢይሬእዩ፡ ወእለ፡ እንዘ፡ ቦሙ፡ እዝነ፡ ኢይሰምዑ።
9 ወተጋብኡ፡ ኵሎሙ፡ አሕዛብ፡ ኅቡረ፡ ወተጋብኡ፡ መላእክቲሆሙኒ።
10 አንትሙ፡ ኩኑኒ፡ ሰማዕትየ፡ ወአነሂ፡ እከውነክሙ፡ ሰማዕተ፡ ይቤ፡ እግዚአብሔር፡ አምላክ፤ ወቍልዔየኒ፡ ዘኀረይክዎ፡ ከመ፡ ታእምሩ፡ ወትእመኑ፡ ወትለብዉ፡ ከመ፡ አነ፡ ውእቱ።
11 አነ፡ እግዚአብሔር፡ ወአልቦ፡ ባዕድ፡ አምላክ፡ ዘእንበሌየ፡ ዘያሐዩ።
12 ነገርኩሂ፡ ወአድኀንኩሂ፡ ወገሠጽኩሂ፡ ወአልቦ፡ እምውስቴትክሙ፡ ነኪረ።
13 እምፍጥረት፡ ወአልቦ፡ ዘያመሥጥ፡ እምእዴየ፤ ወዘገበርኩ፡ አልቦ፡ ዘይመይጥ።
14 ከመዝ፡ ይቤ፡ እግዚአብሔር፡ አምላክ፡ ዘአድኀነክሙ፡ ቅዱሰ፡ እስራኤል፤ ናሁ፡ በእንቲአክሙ፡ እፌኑ፡ ባቢሎን፡ መራደ፡ ወአነሥኦሙ፡ ለኲሎሙ፣፡ ወፋርስኒ፡ ይትአሰሩ፡ በመስዋሕት።
15 አነ፡ እግዚአብሔር፡ አምላክክሙ፡ ቅዱስ፡ ዘአርእዩ፡ ለእስራኤል፡ ንጉሥክሙ።
16 ከመዝ፡ ይቤ፡ እግዚአብሔር፡ አምላክ፡ ዘወሀበ፡ ፍኖተ፡ ውስተ፡ ባሕር፡ ወመጽያሕተ፡ ውስተ፡ ማይ፡ ብዙኅ።
17 ዘያወፅእ፡ ሠረገላ፡ ወአፍራሰ፡ ወሠራዊተ፡ ጽኑዓነ።
18 ኢትዜከሩ፡ ዘትካት፡ ወዘቀዲሙ፡ ኢትሔልዩ።
19 ናሁ፡ አነ፡ እገብር፡ ሐዲሰ፡ ዘይእዜኒ፡ ይሠርቅ፡ ከመ፡ ታእምሩ፤ ወእገብር፡ ፍኖተ፡ ውስተ፡ በድው፡ ወአውኅዝ፡ ማየ፡ ውስተ፡ ገዳም።
20 ወይድኅሩኒ፡ አራዊተ፡ ገዳም፡ ወእጕለ፡ አዕዋፍ፡ ወሴሪኒስ፣፡ እስመ፡ ወሀብኩ፡ ማየ፡ ውስተ፡ በድው፡ ወአውኀዝኩ፡ ውስተ፡ ገዳም፡ ከመ፡ አስትዮሙ፡ ለሕዝብየ፡ ለኅሩያንየ።
21 እለ፡ አጥረይኩ፡ ከመ፡ ይንግሩ፡ ስብሐትየ።
22 አኮ፡ ይእዜ፡ ዘጸዋዕኩከ፡ ያዕቆብ፡ ወኢያጽሐብኩከ፡ እስራኤል።
23 እስመ፡ አኮ፡ ሊተ፡ ዘሦዕከ፡ አባግዒከ፡ ወኢሰባሕከኒ፡ በመሥዋዕትከ፡ ወኢያገበርኩከ፡ ከመ፡ ትሡዕ፡ ሊተ፡ ወኢያጽሐብኩከ፡ በስኂን።
24 ወኢተሣየጥከ፡ ሊተ፡ በወርቅ፡ ዕጣነ፣፡ ወኢፈተውኩ፡ መሥዋዕተከ፡ ወኢሥብሐ፡ አባግዒከ፤ ዳእሙ፡ ቆምከ፡ በኃጢአትከ፡ ወበጌጋይከ።
25 አነኬ፡ ውእቱ፡ ዘእደመስሶን፡ ለኃጣውኢከ፡ ወኢይዜከሮን።
26 ወአንተሰ፡ ትዜከር፡ ወንትዋቀሥ።
27 ቀዳሚሁኒ፡ አበዊክሙ፡ ወመላእክቲክሙ፡ ዐለዉኒ።
28 ወአርኰሱ፡ መቅደስየ፡ ወእምዝ፡ አዘዝኩ፡ ያጥፍእዎ፡ ለያዕቆብ፡ ወከመ፡ ያኅሥርዎ፡ ለእስራኤል።
=== chapter 44 ===
[Chapter 44]
1 ወይእዜኒ፡ ስማዕ፡ ያዕቆብ፡ ቍልዔየ፤ ወእስራኤል፡ ዘኀረይኩከ።
2 ከመዝ፡ ይቤ፡ እግዚአብሔር፡ አምላክ፡ ዘፈጠረከ፤ በውስተ፡ ከርሥ፡ ዓዲ፡ እረድአከ፤ ኢትፍራህ፡ ያዕቆብ፡ ቍልዔየ፤ ወእስራኤል፡ ፍቁርየ፡ ዘኀረይኩ።
3 እስመ፡ አነ፡ እሁብ፡ ማየ፡ በውስተ፡ ጽምእ፤ ለእለ፡ የሐውሩ፡ በውስተ፡ በድው፤ ወእሠይም፡ መንፈስየ፡ ዲበ፡ ዘርእከ፤ ወበረከትየ፡ ላዕለ፡ ውሉድከ።
4 ወይበቍሉ፡ ከመ፡ ሣዕር፡ ማእከለ፡ ማይ፤ ወከመ፡ ኵሐ፡ ዘኀበ፡ ሙኀዘ፡ ማይ።
5 ወዝኒ፡ ይብል፤ ዘእግዚአብሔር፡ አነ፤ ወዝንቱኬ፡ ይኬልሕ፡ በስመ፡ ያዕቆብ፤ ወካልእ፡ ይጽሕፍ፡ በእዴሁ፤ ዘእግዚአብሔር፡ ውእቱ፤ ወበስመ፡ እስራኤል፡ ይጼውእ።
6 ከመዝ፡ ይቤ፡ እግዚአብሔር፡ ንጉሠ፡ እስራኤል፡ ወዘአድኀኖ፡ አምላክ፡ ጸባኦት፤ አነ፡ ቀዳማዊ፡ ወአነ፡ ደኃራዊ፤ ወአልቦ፡ ባዕድ፡ አምላክ፡ ዘእንበሌየ፡ ማሕየዊ።
7 ወመኑ፡ መድኅን፡ ከማየ፤ ይቁም፡ ወይጸውዕ፡ ወይንግር፡ ወያስተዳሉ፡ ሊተ፡ ዘእምአመ፡ ፈጠርክዎ፡ ለሰብእ፡ እስከ፡ ለዓለም፡ ወይንግርክሙ፡ ዘይመጽእ፡ ዘእንበለ፡ ይብጻሕ።
8 ኢትክብቱ።
9 ወኢሀለዉ፡ አሜሃ፡ እለ፡ ይፈጥሩ፡ ወይገልፉ፣፡ ወኵሎሙ፡ ከንቱ፡ እለ፡ ይገብሩ፡ ፍትወተ፡ ነፍሶሙ፡ በከ፡ ዘኢይበቍዖሙ፤ ወይትኀፈሩ፡ ኵሎሙ።
10 እለ፡ ይገብሩ፡ አማልክተ፡ ወይገልፉ፡ ዘኢይበቍዕዎሙ።
11 ወኵሎሙ፡ በኀበ፡ ተገብሩ፡ ይየብሱ።
12 እስመ፡ አብልኀ፡ ጸራቢ፡ ኀፂነ፡ ምሣሮ፡ ወገብሮሙ፣፡ ወበመድቅሑ፡ ደቅሖሙ፡ ወበኃይለ፡ መዝራዕቱ፡ ጸንዖሙ፤ ይርኅብኒ፡ ወይደክም፡ ወይጸምእኒ።
13 ወኀሪዩ፡ ጸራቢ፡ ዕፀ፡ ያቀውም፡ በአምጣኑ፡ ወያስተጣግዕ፡ በኵሉ፣፡ ወይገብሮ፡ በአምሳለ፡ ሰብእ፡ ወከመ፡ ራእየ፡ እጓለ፡ እመሕያው፡ ወያቀውሞ፡ ውስተ፡ ቤት።
14 ለዝኩ፡ ዕፅ፡ ዘገዘሞ፡ እምገዳም፡ ዘእግዚአብሔር፡ አብቈለ፡ ወበዝናም፡ አልሀቀ።
15 ዘያነድድ፡ ሰብእ፡ ወያነሥእ፡ እምኔሁ፡ ወይስኅን፡ ወያነድድ፡ ወያበስል፡ ቦቱ፡ ኅብስተ፤ ወዘተርፈ፡ እምኔሁ፡ ይገብር፡ ሎቱ፡ አማልክተ፡ ወይሰግዱ፡ ሎቱ፡ ለዝኩ።
16 ዘመንፈቆ፡ አንደደ፡ በእሳት፡ ወበመንፈቁ፡ ጠበሰ፡ ሥጋ፡ ወበልዐ፡ ጠቢሶ፡ ጥብስ፡ ወጸግበ፡ ወተማወቀ፡ ወይቤ፤ ሐወዘኒ፡ እስመ፡ ሞቁ፡ ወርኢኩ፡ እሳቶ።
17 ወዘተርፈ፡ ይገብር፡ ሎቱ፡ አማልክተ፡ ዘግልፎ፡ ወያስተባርክ፡ ወይሰግድ፡ ሎቱ፡ ወይጼሊ፡ ኀቤሁ፡ ወይብሎ፤ አድኅነኒ፡ እስመ፡ አምላኪየ፡ አንተ።
18 ኢየአምሩ፡ ወኢይሔልዩ፡ ወተጸለለ፡ አዕይንቲሆሙ፡ ወኢይሬእዩ፡ ወኢይሔልዩ፡ በልቦሙ።
19 ወኢይትሐዘቡ፡ በነፍሶሙ፡ ወኢየአምሩ፡ በምክሮሙ፡ ከመ፡ መንፈቆ፡ አንደዱ፡ በእሳት፡ ወአብሰሉ፡ ኅብስተ፡ ወበመንገቁ፡ ጠበሱ፡ ሥጋ፡ ወበልዑ፣፡ ወዘተርፈ፡ ገብሩ፡ ሎሙ፡ ርኩሰ፡ ወሰገዱ፡ ሎቱ።
20 አእምሩ፡ እንከ፡ ከመ፡ ሐመድ፡ ልቦሙ፡ ወይጌግዩ፡ ወአልቦ፡ ዘይክል፡ አድኅኖ፡ ነፍሱ፡ እምኔሆሙ።
21 ተዘከር፡ ዘንተ፡ ያዕቆብ፡ ወእስራኤልኒ፡ ቍልዔየ፡ አንተ፤ አነ፡ ፈጠርኩከ፡ ገብርየ፡ አንተ፡ እስራኤል፣፡ ኢትርስዐኒ።
22 ናሁ፡ ደምሰስክዎን፡ ከመ፡ ደመና፡ ለኃጣውኢከ፡ ወከመ፡ ቆባር፡ ለጌጋይከ፤ ተመየጥ፡ ኀቤየ፡ ወአድኅነከ።
23 ለይትፈሥሑ፡ ሰማያት፡ እስመ፡ ተሠሀሎሙ፡ እግዚአብሔር፡ ለእስራኤል፤ ወይንፍኁ፡ ቀርነ፡ መሠረታት፡ ምድር፡ ወይወዉዑ፡ አድባር፡ በፍሥሐ፡ ወአውግርኒ፡ ወኵሉ፡ ዕፀወ፡ ገዳም፡ ዘውስቴቶሙ፣፡ እስመ፡ አድኀኖ፡ እግዚአብሔር፡ ለያዕቆብ፡ ወእስራኤል፡ ተሰብሐ።
24 ከመዝ፡ ይቤ፡ እግዚአብሔር፡ ዘአድኀነከ፡ ወዘፈጠረከ፡ በውስተ፡ ከርሥ፤ አነ፡ እግዚአብሔር፡ ዘገበርኩ፡ ኵሎ፡ ባሕቲትየ፣፡ አነ፡ ሰፋሕክዎ፡ ለሰማይ፡ ወአጽናዕክዋ፡ ለምድር።
25 መኑ፡ ባዕድ፡ ዘይመይጥ፡ ምክሮሙ፡ ለእለ፡ ያነቅሑ፡ በፃውዕ፡ ወለእለ፡ ያሰግሉ፡ እምልቦሙ፤ ያገብኦሙ፡ ድኅሬሆሙ፡ ለጠቢባን፡ ወያለስሕ፡ ምክሮሙ።
26 ወያቀውም፡ ቃለ፡ ገብሩ፡ ወያጸድቅ፡ ምክረ፡ መላእክቲሁ፤ ወይብላ፡ ለኢየሩሳሌም፤ ትነብሪ፣፡ ወለአህጉረ፡ ይሁዳ፤ ትትሐነጹ፡ ወይበቍሉ፡ ገዳማቲሃ።
27 ዘይብላ፡ ለቀላይ፤ ይበሲ፡ ወይንፅፋ፡ አፍላጋትኪ።
28 ዘይብሎ፡ ለቂሮስ፤ ጥበብ፡ ወሐሊ፡ ወግበር፡ ኵሎ፡ ፈቃድየ፤ ዘይብላ፡ ለኢየሩሳሌም፤ ትትሐነጺ፡ ወእሣርራ፡ ለቤተ፡ መቅደስየ።
=== chapter 45 ===
[Chapter 45]
1 ከመዝ፡ ይቤ፡ እግዚአብሔር፡ አምላክ፡ ለመሢሕየ፡ ቂሮስ፡ ዘአኀዝክዎ፡ በእዴየ፡ ከመ፡ አግርሮሙ፡ ለአሕዛብ፡ በቅድሜሁ፡ ወእነፅኅ፡ ኃይለ፡ ነገሥት፤ ወአርኁ፡ አናቅጸ፡ በቅድሜሁ፡ ወኢይትዐጸዋ፡ አህጉር።
2 አነ፡ አሐውር፡ ፍጽመ፡ ቅድሜከ፡ ወአቴሕቶሙ፡ ለአድባር፣፡ ወእሰብር፡ አናቅጸ፡ ብርት፡ ወእቅጠቅጥ፡ መናሥግተ፡ ኀፂን።
3 ወእሁበከ፡ መዛግብተ፡ ኅቡአ፡ ወክቡተ፤ ዘኢያስተርኢ፡ እከሥት፡ ለከ፡ ከመ፡ ታእምር፡ ከመ፡ አነ፡ እግዚአብሔር፡ ዘሰመይኩ፡ ስመከ፣፡ አምላከ፡ እስራኤል።
4 በእንተ፡ ቍልዔየ፡ ያዕቆብ፡ ወእስራኤልኒ፡ ኅሩይየ፣፡ አነ፡ እጼውዐከ፡ በስምከ፡ ወእትዌከፈከ።
5 ከመ፡ አነ፡ እግዚአብሔር፡ አምላክከ፡ ወአልቦ፡ ባዕድ፡ አምላክ፡ ዘእንበሌየ።
6 ከመ፡ ያእምሩ፡ እለ፡ እምሥራቀ፡ ፀሐይ፡ ወእለሂ፡ እምዕራብ፡ ከመ፡ አልቦ፡ ባዕድ፡ አምላክ፡ ዘእንበሌየ።
7 አነ፡ ፈጠርኩ፡ ብርሃነ፡ ወገብርኩ፡ ጽልመተ፤ አነ፡ እፈጥር፡ ሰላመ፡ ወአመጽእ፡ እኪተ።
8 ትትፌሣሕ፡ ሰማይ፡ በላዕሉ፡ ወይነሰንሳ፡ ጽድቀ፡ ደመናት፣፡ ወታበቍል፡ ምድር፡ ወታበቍል፡ ሣህለ፡ ወርቱዐ፡ ኅቡረ፤ አነ፡ እግዚአብሔር፡ አምላክ፡ ዘፈጠርኩከ።
9 ወአኅየስኩከ፡ ወገበርኩከ፡ ከመ፡ ጽቡረ፡ ለብሐዊ፤ ቦኑ፡ ኵሎ፡ አሚረ፡ የሐርስ፡ ዘየሐርስ፡ ምድረ፤ ቦኑ፡ ዘይብሎ፡ ጽቡር፡ ለለብሐዊ፤ ምንተ፡ ትገብር፡ እስመ፡ ኢትክል፡ ገቢረ፡ ወአልብከ፡ እደወ፤ ይትዋሥኦኑ፡ ጽቡር፡ ለለሐኲሁ።
10 አሌሎ፡ ለዘይብሎ፡ ለአቡሁ፤ ምንተ፡ ወለድከኒ፤ ወለእሙኒ፤ ምንትኑመ፡ ማሕምምኪ።
11 እስመ፡ ከመዝ፡ ይቤ፡ እግዚአብሔር፡ አምላክ፣፡ ቅዱሰ፡ እስራኤል፡ ዘገብረ፡ ዘይመጽእ፤ ተሰአሉኒ፡ በእንተ፡ ደቂቅየ፡ ወአዋልድየ፣፡ ወበእንተ፡ ግብረ፡ እደውየ፡ አዝዙኒ።
12 አነ፡ ፈጠርክዋ፡ ለምድር፡ ወሰብአ፡ ዲቤሃ፤ አነ፡ በእዴየ፡ አጽናዕክዎ፡ ለሰማይ፤ አነ፡ አዘዝክዎሙ፡ ለኵሎሙ፡ ከዋክብት።
13 ወአነ፡ አንሣእክዎ፡ በጽድቅ፡ ወበርትዕ፡ ወሠራኅኩ፡ ኵሎ፡ ፍኖቶ፤ ወውእቱ፡ የሐንጽ፡ ሀገርየ፡ ወይመይጥ፡ ፄዋ፡ ሕዝብየ፣፡ አኮ፡ በቤዛ፡ ወአኮ፡ በሕልያን፡ ይቤ፡ እግዚአብሔር፡ ጸባኦት።
14 ከመዝ፡ ይቤ፡ እግዚአብሔር፡ ጸባኦት፤ ሰርሑ፡ ግብጽ፡ ወአህጉረ፡ ኢትዮጵያ፣፡ ወሰብአ፡ ሳባዕ፡ ዕደው፡ ነዋኅት፡ ይመጽኡ፡ ኀቤከ፣፡ ወይትቀነዩ፡ ለከ፡ ወይተልዉ፡ ድኅሬከ፡ እንዘ፡ ሙቁሓን፡ እደዊሆሙ፣፡ ወይሰግዱ፡ ለከ፡ ወይጼልዩ፡ ኀቤከ፤ እስመ፡ እግዚአብሔር፡ ምስሌከ፡ ወአልቦ፡ ባዕደ፡ እግዚአብሔር፡ ዘእንበሌከ።
15 አንተ፡ እግዚአብሔር፡ ወኢያእመርናከ፣፡ አምላከ፡ እስራኤል፡ ማሕየዊ።
16 ለይትኀፈሩ፡ ወይኀሠሩ፡ ኵሎሙ፡ እለ፡ ይትቃወምዎ፡ ወይሖሩ፡ ተኀፊሮሙ።
17 እስመ፡ ያድኅኖ፡ እግዚአብሔር፡ ለእስራኤል፡ መድኃኒተ፡ ዘለዓለም፤ ኢይትኀፈሩ፡ ወኢየኀሥሩ፡ እስከ፡ ለዓለም።
18 ከመዝ፡ ይቤ፡ እግዚአብሔር፡ ዘገብረ፡ ሰማየ፣፡ ውእቱኒ፡ እግዚአብሔር፡ ዘአርአያ፡ ለምድር፡ ወገብራ፡ ወውእቱ፡ ሠጠቃ፤ አኮ፡ ለከንቱ፡ ዘገብራ፣፡ ዳእሙ፡ ከመ፡ ይንበሩ፡ ውስቴታ፡ ፈጠራ።
19 አኮ፡ ጽምሚተ፡ ዘተናገርኩ፡ ወአኮ፡ በብሔረ፡ ጽልመት፡ ዘነበብኩ።
20 ተጋብኡ፡ ወንዑ፡ ወተማከሩ፡ ኅቡረ፡ እለ፡ ድኅንክሙ፡ እምአሕዛብ።
21 ወእመሰ፡ ይነግሩ፡ ይቅረቡ፡ ከመ፡ ያእምሩ፡ ኅቡረ፡ መኑ፡ ዘገብረ፡ ዘንተ፡ ስምዐ፡ እምትካት፤ ቦሁ፡ አመ፡ ነገሩክሙ፡ ከመ፡ አነ፡ እግዚአብሔር፡ ወአልቦ፡ ባዕደ፡ ዘእንበሌየ፤ ጻድቅ፡ ወማሕየዊ፡ ወአልቦ፡ እንተ፡ ከማየ።
22 ተመየጡ፡ ኀቤየ፡ ወተሐይዉ፡ እለ፡ እምአጽናፈ፡ ምድር።
23 መሐልኩ፡ በርእስየ፤ ኢይትመየጥ፡ ቃልየ፡ ዘወፅአ፡ እምአፉየ።
24 እስመ፡ ሊተ፡ ይሰግድ፡ ኵሉ፡ ብርክ፡ ወኵሉ፡ ልሳን፡ ይገኒ፡ ለእግዚአብሔር።
25 ወይብል፤ ስብሐት፡ ወጽድቅ፡ ኀቤሁ፡ ይምጽኡ፣፡ ወይትኀፈሩ፡ ኵሎሙ፡ እለ፡ ይትረኃቁ፡ እምእግዚአብሔር።
26 ይሴባሕ፡ ወይጸድቅ፡ ኵሉ፡ ዘርአ፡ ደቂቀ፡ እስራኤል፡ በእግዚአብሔር።
=== chapter 46 ===
[Chapter 46]
1 ወድቀ፡ ቤል፡ ወተቀጥቀጠ፡ ዳጎን፡ ወኮነ፡ ግልፎሆሙ፡ ከመ፡ እንስሳ፡ ወአራዊት፤ አንሥእዎሙ፡ እስመ፡ እሱራን፡ እሙንቱ፡ ከመ፡ ጾረ፡ ኵስሕ።
2 ወርኅቡ፡ ወደክሙ፡ ወአልቦሙ፡ ኃይለ፤ ወኢይክሉ፡ አድኅኖ፡ ነፍሶሙ፡ እምቀትል፡ ወለርእሶሙኒ፡ ዓዲ፡ ይፄውውዎሙ።
3 ስሙዑኒ፡ ቤተ፡ ያዕቆብ፡ ወኵልክሙ፡ እለ፡ ተረፍክሙ፡ እምእስራኤል፣፡ እለ፡ ይዜኀሩ፡ እምንእሶሙ፡ ወይትጌሠጹ፡ እምከርሠ፡ እሞሙ።
4 እስከ፡ ይረሥኡ።
5 በመኑ፡ እንከ፡ ታስተማስሉኒ፤ ርእዩ፡ ወተኬነዉ፡ ኵልክሙ፡ እለ፡ ትስሕቱ።
6 እለ፡ ታወፅኡ፡ ወርቀ፡ ወብሩረ፡ እምውስተ፡ ቍናማቲክሙ፡ ወትደልውዎ፡ በመዳልው፤ ወተዐስብዎ፡ ለነሃቢ፡ ወይገብር፡ ለክሙ፡ ግብረ፡ እደ፡ ሰብእ፡ ወትደንኑ፡ ወትሰግዱ፡ ሎሙ።
7 ወይሰከምዎ፡ ዲበ፡ መትከፍቶሙ፡ ወየሐውሩ፤ እምከመ፡ አንበርዎ፡ ኢይትሐወስ፡ እንከ፡ እምነ፡ ምንባሩ፤ ወእመኒ፡ አውየዉ፡ ኀቤሁ፡ ኢይሰምዕ፡ ወኢያድኅን፡ ርእሶ፡ እምእኩይ።
8 ተዘከሩ፡ ዘንተ፡ ወብክዩ፤ ወነስሑ፡ እለ፡ ስሕትክሙ፤ ተመየጡ፡ ወሚጡ፡ ልበክሙ።
9 ወተዘከሩ፡ ዘእምትካት፡ ወዘእምፍጥረተ፡ ዓለም፡ እስመ፡ አነ፡ ውእቱ፡ እግዚአብሔር፡ ወአልቦ፡ ባዕደ፡ ዘእንበሌየ።
10 እዜኑ፡ ዘትካት፡ ወዘሂ፡ ይከውን፡ በደኃሪ፡ ዘእንበለ፡ ይኩን፣፡ ወይከውን፡ ሶቤሃ።
11 እጼውዓ፡ ለዖፍ፡ እምጽባሕ፡ ወእምርኁቅ፡ ብሔር፡ በእንተ፡ ዘመከርኩ፤ ነበብኩ፡ ወአምጻእኩ፤ ፈጠርኩ፡ ወገበርኩ፡ አምጻእክዎ፡ ወሠራኅኩ፡ ፍኖቶ።
12 ስምዑኒ፡ እለ፡ ሐጐልክሙ፡ ልበክሙ፣፡ እለ፡ ትትረኃቁ፡ እምነ፡ ጽድቅ።
13 አምጻእክዋ፡ ለጽድቅየ፣፡ ወኢያጐነዲ፡ እንከ፡ መድኃኒትየ፡ ዘእምኀቤየ።
=== chapter 47 ===
[Chapter 47]
1 ረዲ፡ ወንበሪ፡ ውስተ፡ ምድር፡ አንቲ፡ ድንግል፡ ወለተ፡ ባቢሎን፤ ንበሪ፡ ውስተ፡ መሬት፡ ወአልብኪ፡ መንበረ፡ ወለተ፡ ፋርስ፤ ወኢትሰመዪ፡ እንከ፡ ልሕደ፡ ወስብሕት።
2 ንሥኢ፡ ማሕረፀ፡ ወሕርፂ፡ ሐሪፀ፤ ከሥቲ፡ ግልባቤኪ፡ ወያስተርኢ፡ ሢበትኪ፤ ሰሐቢ፡ አቍያጸኪ፡ ወዕድዊ፡ አፍላገ።
3 ይትቀፈጽ፡ ኃፍረትኪ፡ ወያስተርኢ፡ ኃሣርኪ፤ እስመ፡ ይነሥእዋ፡ ለጽድቅ፡ እምኔኪ፡ ወኢይሁብ፡ እንከ፡ ሰብአ፡ ህየንቴኪ።
4 ዘአድኀነኪ፡ እግዚአብሔር፡ ጸባኦት፡ ስሙ፣፡ ቅዱስ፡ እስራኤል።
5 ንበሪ፡ ድንግፅተኪ፡ ወባኢ፡ ውስተ፡ ጽልመት፡ ወለተ፡ ፋርስ፤ ወኢትሰመዪ፡ እንከ፡ ኃይለ፡ መንግሥት።
6 እስመ፡ ተዘኀርኪ፡ ዲበ፡ ሕዝብየ፡ ወአርኰስኪ፡ ርስትየ።
7 ወትቤሊ፤ እኴንኖሙ፡ ለዓለም።
8 ወይእዜኒ፡ ስምዒ፡ ዘንተ፡ አንቲ፡ ልሕድ፡ እንተ፡ ትነብሪ፡ ተአሚነኪ፣፡ እንተ፡ ትብሊ፡ በልብኪ፤ አነ፡ ይእቲ፡ ወአልቦ፡ እንተ፡ ከማየ፤ ኢይከውን፡ መበለተ፡ ወኢይመውቱ፡ ውሉድየ።
9 ይእዜኒ፡ ይመጽኡ፡ እሉ፡ ክልኤሆሙ፡ ኅቡረ፡ ላዕሌኪ፡ በአሐቲ፡ ዕለት፤ ወትከውኒ፡ መበለተ፡ ወይመውቱ፡ ውሉድኪ።
10 ዘቦቱ፡ ተአመንኪ፡ በዝሙትኪ።
11 ወይመጽእ፡ ሕርትምና፡ ላዕሌኪ፡ ወኢተአምሪ፤ ዕመቂሁ፡ ወትወድቂ፡ ውስቴቱ፤ ወይመጽአኪ፡ ኃሣር፡ ወኢትክሊ፡ አምሥጦ፤ ወይመጽአኪ፡ ግብተ፡ ሞት፡ ወኢተአምሪ።
12 ቁሚኬ፡ ይእዚ፡ በሰገልኪ፡ ወበብዝኅ፡ ሥራያትኪ፡ ዘተመሀርኪ፡ እምንእስኪ፡ ዘኢይበቍዐኪ፡ እመቦ፡ ዘይክል፡ አድኅኖተኪ።
13 ሰራሕኪ፡ በምክርኪ፡ እኩይ፤ እስኩ፡ ይቁሙ፡ ወያድኅኑኪ፡ እለ፡ ያሰግሉ፡ ለኪ፡ ወይኔጽሩ፡ ሰማየ፡ ወይሬእዩ፡ በኮከበ፡ ሰማይ፣፡ ወይንግሩኪ፡ ምንተ፡ አመጽእ፡ ላዕሌኪ።
14 ናሁ፡ ኵሎሙ፡ ይውዕዩ፡ ከመ፡ ሐሠር፡ ዘውስተ፡ እሳት፡ ወኢያድኅኑ፡ ነፍሶሙ፡ እምነበልባል፣፡ ወይከውኑኪ፡ አፍሐመ፡ እሳት፡ ወትነብሪ፡ ኀቤሆሙ።
15 እሙንቱሰ፡ ይከውኑኪ፡ ረድኤተኪ፤ ሰራሕኪ፡ እምንእስኪ፤ ሰብእኒ፡ ዘስሕተ፡ ለርእሱ፣፡ ወአንቲሰ፡ አልብኪ፡ መድኃኒተ።
=== chapter 48 ===
[Chapter 48]
1 ስምዑ፡ ዘንተ፡ ቤተ፡ ያዕቆብ፡ እለ፡ ተሰመይክሙ፡ በስመ፡ እስራኤል፡ ወእለ፡ ወፃእክሙ፡ እምይሁዳ፤ እለ፡ ትምሕሉ፡ በስመ፡ እግዚአብሔር፡ አምላከ፡ እስራኤል፡ ወተዘከርክሙ፣፡ አኮ፡ በጽድቅ፡ ወአኮ፡ በርትእ።
2 ወትሰመዩ፡ በስመ፡ ሀገር፡ ቅድስት፡ ወታሰምኩ፡ በአምላከ፡ እስራኤል፤ እግዚአብሔር፡ ጸባኦት፡ ስሙ።
3 ዘቀዲሙኒ፡ ነገርኩ፡ ወወፅአ፡ እምአፉየ፤ ወስምዓ፡ ኮነ፡ ዘገበርኩ፡ ግብተ፡ ወበጽሐሂ።
4 ወባሕቱ፡ አነ፡ አእመርኩከ፡ ከመ፡ እኩይ፡ አንተ፡ ወዘኀፂን፡ ሥርወ፡ ክሳድከ፡ ወፍጽምከኒ፡ ዘብርት።
5 ወነገርኩከ፡ ዘይመጽእ፡ ዘእንበለ፡ ይኩን፡ ወአስማዕኩከ፡ ከመ፡ ኢትበል፤ አማልክትየ፡ ወግልፎየ፡ ገብሩ፡ ዲቤየ፡ ወስብኮየ፡ አዘዙኒ።
6 ሰማዕክሙ፡ ኵሎ፡ ወኢያእመርክሙ፤ ወአስማዕኩከ፡ ሐዲሰኒ፡ ዘእምይእዜ፡ ይከውን።
7 ወኢትቤ፤ ይእዜ፡ ይበጽሕ፡ ወአኮ፡ ዘትካት፣፡ ወአኮ፡ ዘቀዲሙ፡ መዋዕል፡ ሰሚዐከ።
8 ኢያእመርካሁ፡ ወኢለበውካሁ፣፡ ወአኮሁ፡ ዘእምቀዲሙ፡ ከሠትኩከ፡ እዘኒከ፤ ወአእመርኩከ፡ ከመ፡ ክሒደ፡ ትክሕደኒ፡ ሀለወከ፡ እስመ፡ ዓማፂ፡ አንተ፡ እምከርሠ፡ እምከ፡ ተሰመይከ።
9 በእንተ፡ ስምየ፡ አይእየከ፡ መዐትየ፡ ወአመጽእ፡ ግርማየ፡ ላዕሌከ፡ ከመ፡ ኢያጥፍእከ።
10 ናሁ፡ ሜጥኩከ፡ አኮ፡ በበይነ፡ ወርቅ፤ ወአውፃእኩከ፡ እምእቶን፡ ዘንዴት።
11 በእንቲአየ፡ ረሰይኩከ፡ እስመ፡ አርኰሱ፡ እሙንቱ፡ ስምየ፣፡ ወኢይሁብ፡ ስብሐትየ፡ ለባዕድ።
12 ስምዐኒ፡ ያዕቆብ፡ ወእስራኤልኒ፡ ዘአነ፡ ጸዋዕኩከ።
13 ወእዴየ፡ ሣረረታ፡ ለምድር፡ ወየማንየ፡ አጽንዐቶ፡ ለሰማይ።
14 ወይትጋብኡ፡ ኅቡረ፡ ኵሎሙ፡ ወይሰምዑ።
15 አነ፡ ነበብኩ፡ ወአነ፡ ጸዋዕኩ፣፡ አምጻእክዎ፡ ወረዳእክዎ።
16 ንዑ፡ ኀቤየ፡ ወስምዑ፡ ዘንተ፤ አኮኑ፡ እምትካት፡ ኢተናገርኩ፡ ጽሚተ፤ ወአመሂ፡ ኮነ፣፡ ህየ፡ ክመ፡ ሀለውኩ፣፡ ወይእዜኒ፡ እግዚአብሔር፡ እግዚእ፡ ፈነወኒ፡ ወመንፈሱ።
17 ከመዝ፡ ይቤ፡ እግዚአብሔር፡ ዘአድኀነከ፡ ወዘባልሐከ፣፡ ቅዱሰ፡ እስራኤል፤ አነኬ፡ ውእቱ፡ አምላክከ፡ ወአርአይኩከ፡ ፍኖተ፡ ኀበ፡ ትረክብ፡ እንተ፡ ባቲ፡ ተሐውር።
18 ወሶበሰ፡ ሰማዕከ፡ ትእዛዝየ፡ እምኮነ፡ ከመ፡ ውኂዝ፡ ሰላምከ፡ ወጽድቅከኒ፡ ከመ፡ ማዕበለ፡ ባሕር።
19 ወእምኮነ፡ ከመ፡ ኆፃ፡ ባሕር፡ ዘርእከ፡ ወከመ፡ ጸበለ፡ ምድር፡ ትውልደ፡ ከርሥከ።
20 ፃእኬ፡ እምባቢሎን፡ እንዘ፡ ትጐይይ፡ እምነ፡ ከላውዴዎን፤ ዜንዉ፡ ቃለ፡ ትፍሥሕት፡ ወይሰማዕ፡ ዝንቱ፤ ንግሩ፡ እስከ፡ አጽናፈ፡ ምድር።
21 ወእመኒ፡ ጸምኡ፡ ማየ፡ በድው፡ ወያወፅእ፡ ሎሙ፡ ማየ፡ እምኰኵሕ፡ ወትነቅዕ፡ ሎሙ፡ ኰኵሕ፡ ወይውኅዝ፡ ማይ፡ ወይሰትዩ፡ ሕዝብየ።
22 ወኢይትፌሥሑ፡ እንከ፡ ኃጥኣን፡ ይቤ፡ እግዚአብሔር።
=== chapter 49 ===
[Chapter 49]
1 ስምዑኒ፡ ደሰያት፡ ወአጽምዑኒ፡ አሕዛብ፣፡ በጕንዱይ፡ መዋዕል፡ ይቀውም፡ ይቤ፡ እግዚአብሔር፤ እምከርሠ፡ እምየ፡ ሰመየኒ፡ ስምየ።
2 ወረሰዩ፡ ለአፉየ፡ ከመ፡ መላጼ፡ በሊኀ፡ ወከደነኒ፡ ታሕተ፡ ጽላሎተ፡ እዴሁ።
3 ወይቤለኒ፤ ገብርየ፡ አንተ፡ እስራኤል፡ ወብከ፡ እሴባሕ።
4 ወአንሰ፡ እቤ፤ ከንቶ፡ ፃመውኩ፡ ወለዘአልቦ፡ ባቍዓ፡ ወኢምንተኒ፡ ወሀብኩ፡ ኃይልየ።
5 ወይእዜኒ፡ ከመዝ፡ ይቤ፡ እግዚአብሔር፡ ዘፈጠረኒ፡ በውስተ፡ ከርሠ፡ እምየ፡ ከመ፡ እኩን፡ ገብሮ፣፡ ከመ፡ አስተጋብኦ፡ ለያዕቆብ፡ ኀቤሁ፡ ወለእስራኤልኒ።
6 ወይቤለኒ፤ ዓቢይ፡ ለከ፡ ውእቱ፡ ዝንቱ፡ ከመ፡ ትሰመይ፡ ቍልዔየ፣፡ ከመ፡ ታቅም፡ ሕዝበ፡ ያዕቆብ፡ ወዝርወተ፡ እስራኤል፡ ከመ፡ ትሚጦሙ።
7 ከመዝ፡ ይቤ፡ እግዚአብሔር፡ ዘአድኀነከ፡ አምላከ፡ እስራኤል፤ ቀድስዎ፡ ለዘያሐምማ፡ ለነፍሱ፡ ዘያስተራኵስዎ፡ አሕዛብ፡ ለገብረ፡ መላእክት።
8 ከመዝ፡ ይቤ፡ እግዚአብሔር፤ በዕለት፡ ኅሪት፡ ሰማዕኩከ፡ ወበዕለተ፡ መድኃኒት፡ ረዳእኩከ፤ ወወሀብኩከ፡ ሥርዓተ፡ ለአሕዛብ፡ ከመ፡ ታስተራትዓ፡ ለምድር፡ ወትረስ፡ ርስተ፡ ገዳም።
9 ወትበሎሙ፡ ለሙቁሓን፤ ፃኡ፣፡ ወያብርህ፡ ሎሙ፡ ለእለ፡ ውስተ፡ ጽልመት።
10 ኢይርኅቡ፡ ወኢይጸምኡ፡ ወኢያሐምሞሙ፡ ላህበ፡ ፀሐይ፣፡ ዳእሙ፡ ዘይምሕሮሙ፡ ይሠሀሎሙ፡ ወያመጽኦሙ፡ እንተ፡ ኀበ፡ አንቅዕተ፡ ማያት።
11 ወእጸይሕ፡ ሎሙ፡ አድባረ፡ ወይከውኖሙ፡ ምርዓየ፡ ኵሉ፡ ፍኖት።
12 ናሁ፡ እለሂ፡ ይመጽኡ፡ እምርኁቅ፡ ወእለሂ፡ እምደቡብ፡ ወእምርኁቅ፡ ብሔር፣፡ ወቦ፡ እለሂ፡ እምአድባረ፡ ፋርስ።
13 ይትፌሥሓ፡ ሰማያት፡ ወትትኀሠይ፡ ምድር፤ ይፈለፍል፡ ትፍሥሕት፡ እምድር፡ ወእምአድባርኒ፡ እስመ፡ ተሠሀሎሙ፡ እግዚአብሔር፡ ለሕዝቡ፡ ወአስተፍሥሖሙ፡ ለነዳያነ፡ ሕዝቡ።
14 ወትቤ፡ ጽዮን፤ ኀደገኒኑ፡ እግዚአብሔር፡ ወረስዐኒኑ፡ እግዚአብሔር።
15 ትረስፅኑ፡ ብእሲት፡ እጓለ፤ ወኢትምሕርኑ፡ ዘወለደት፡ እምከርሣ፤ ወእመኒ፡ ረስዐት፡ ዘንተ፡ ብእሲት፡ አንሰ፡ ኢይረስዐኪ።
16 ናሁ፡ በእደውየ፡ ሰዐልኩ፡ አረፋተኪ፡ ወበቅድሜየ፡ አንቲ፡ ዘልፈ።
17 ወፍጡነ፡ ትትሐነጺ፡ እምዘ፡ ነሠቱኪ፡ ወይወፅኡ፡ እምኔኪ፡ እለ፡ አማሰኑኪ።
18 አንሥኢ፡ አዕይንተኪ፡ ወነጽሪ፡ ዘዐውድኪ፤ ናሁ፡ ተጋብኡ፡ ወመጽኡ፡ ኀቤኪ።
19 እስመ፡ መዝበርኪ፡ ወወደቂ፡ ወማሰንኪ፡ ወትጸብቢዮሙ፡ ይእዜ፡ ለእለ፡ ይነብሩ፡ ውስቴትኪ፡ ወይትረኀቁኪ፡ እለ፡ ኬዱኪ።
20 ወይብሉኪ፡ ደቂቅኪ፡ እለ፡ ኀጣእኪ፡ ውስተ፡ እዝንኪ፤ ይጸብበነ፡ ብሔር፤ ግበሪ፡ ለነ፡ ብሔረ፡ ኀበ፡ ንነብር።
21 ወአንቲኒ፡ ትብሊ፡ በልብኪ፤ መኑ፡ ወለደ፡ ሊተ፡ እሎንተ፤ ናሁ፡ አንሰ፡ መካን፡ ወመበለት፣፡ መኑ፡ አልሀቆሙ፡ ለእሉ፤ ናሁ፡ አንሰ፡ ባሕቲትየ፣፡ እምአይቴ፡ መጽኡ፡ እሉ።
22 ከመዝ፡ ይቤ፡ እግዚአብሔር፤ ናሁ፡ አነ፡ አነሥእ፡ እደውየ፡ መንገለ፡ አሕዛብ፡ ወእገብር፡ ትእምርተ፡ ውስተ፡ ደሰያት፣፡ ወያመጽእዎሙ፡ ለደቂቅኪ፡ በሕፅኖሙ፡ ወይጸውርዎን፡ ለአዋልድኪ፡ በመታክፍቶሙ።
23 ወነገሥት፡ አማሑትኪ፡ ወነጋሥያት፡ ሐፃንያትኪ።
24 ቦኑ፡ ዘየሀይድ፡ ንዋዮ፡ ለያርብሕ፡ ይድኅንኑ፡ ዘፄወወ፡ በዓመፃ።
25 ከመዝ፡ ይቤ፡ እግዚአብሔር፤ እመቦ፡ ዘፄወወ፡ ያርብሕ፡ ነሥአ፡ ምህርካ፤ ዘይኄይሎ፡ ለኃያል፡ ይድኅን።
26 ወይበልዑ፡ ሥጋሆሙ፡ እለ፡ ይሣቅዩኪ፡ ወይሰትዩ፡ ደሞሙ፡ ከመ፡ ፃዕፍ፡ ወይሰክሩ፣፡ ወየአምሩ፡ ኵሉ፡ ዘነፍስ፡ ከመ፡ አነ፡ እግዚአብሔር፡ ዘአድኀንኩኪ፡ ወዘተወከፍኩሂ፡ ኃይለ፡ ያዕቆብ።
=== chapter 50 ===
[Chapter 50]
1 ከመዝ፡ ይቤ፡ እግዚአብሔር፤ አይኑ፡ ዝንቱ፡ መጽሐፈ፡ ኅዳጋቲሃ፡ ለእምክሙ፡ ዘፈነውኩ፡ ላቲ፤ ወለመኑ፡ እፈዲ፡ ዕዳ፡ ዘሤጥኩክሙ፤ አኮኑ፡ በኃጢአትክሙ፡ ሤጥኩክሙ፡ ወበጌጋይክሙ፡ ፈነውክዋ፡ ለእምክሙ።
2 ናሁ፡ መጻእኩ፡ ወአልቦ፡ ሰብእ፤ ጸዋዕኩ፡ ወአልቦ፡ ዘተሠጥወኒ።
3 እገለብባ፡ ለሰማይ፡ በጽልመት፡ ወአለብሳ፡ ሠቀ።
4 እግዚአብሔር፡ እግዚእ፡ የሀበኒ፡ ልሳነ፡ ጥበብ፡ ከመ፡ አእምር፡ ቃለ፡ ዘእነብብ።
5 ወተግሣጸ፡ እግዚአብሔር፡ ይከሥተኒ፡ እዝንየ፡ አንሰ፡ ኢይክሕድሂ፡ ወኢይትዋሣእሂ።
6 መጠውኩ፡ ዘባንየ፡ ለመቅሠት፡ ወመልታሕትየኒ፡ ለጽፍዐት፤ ወኢሜጥኩ፡ ገጽየ፡ እምኃፍረተ፡ ምራቅ።
7 ወእግዚአብሔር፡ እግዚእ፡ ረዳእ፡ ኮነኒ፤ በእንተ፡ ዝንቱ፡ ኢተኀፈርኩ፡ ወረሰይኩ፡ ገጽየ፡ ከመ፡ ኰኵሕ፡ ጽኑዕ፡ ወአእመርኩ፡ ከመ፡ ኢይትኀፈር።
8 እስመ፡ አልጸቀ፡ ዘያጸድቀኒ።
9 ናሁ፡ እግዚአብሔር፡ ይረድአኒ፡ መኑ፡ ያሐሥም፡ ላዕሌየ፤ ናሁ፡ ኵልክሙ፡ ከመ፡ ልብስ፡ ትበልዩ፡ ወከመ፡ ፃፄ፡ ትትበልዑ።
10 መኑ፡ እምኔክሙ፡ ዘይፈርሆ፡ ለእግዚአብሔር፡ ይስማዕ፡ ቃለ፡ ገብሩ።
11 ናሁ፡ ኵልክሙ፡ ታነድዱ፡ እሳተ፡ ወአዕበይክሙ፡ ነበልባለ፤ ሖሩ፡ እንከ፡ በብርሃነ፡ እሳትክሙ፡ ወነበልባል፡ ዘአንደድክሙ፤ በእንቲአየ፡ ረከብክሙ፡ ዘንተ፡ ኵልክሙ፡ ትሰክቡ፡ በሕማምክሙ።
=== chapter 51 ===
[Chapter 51]
1 ስምዑኒ፡ ኵልክሙ፡ እለ፡ ትዴግንዎ፡ ለጽድቅ፡ ወእለ፡ ተኀሥሥዎ፡ ለእግዚአብሔር፤ ርእይዋ፡ ለኰኵሕ፡ ጽንዕት፡ እንተ፡ ወቀርክሙ፡ ወዐዘቅተ፡ ዕምቅተ፡ እንተ፡ ከረይክሙ።
2 ርእይዎ፡ ለአብርሃም፡ አቡክሙ፡ ወለሳራሂ፡ እንተ፡ ሐመት፡ በእቲአክሙ፤ እስመ፡ አሐዱ፡ ውእቱ፡ ወጸዋዕክዎ፡ ወባረክዎ፡ ወአፍቀርክዎ፡ ወአብዛኅክዎ።
3 ወይእዜኒ፡ አስተፌሥሐኪ፡ ለኪኒ፡ ኢየሩሳሌም፡ ወአስተፌሥሕ፡ ኵሎ፡ አሕቃላተኪ፣፡ ወእሬስያ፡ ለበድውኪ፡ ከመ፡ ገነት፡ ወአሕቃሊሃኒ፡ ከመ፡ ገነተ፡ እግዚአብሔር፤ ወይትረከብ፡ ውስቴታ፡ ትፍሥሕት፡ ወኃሤት፣፡ አሚን፡ ወቃለ፡ ስብሐት።
4 ስምዑኒ፡ ስምዑኒ፡ ሕዝብየ፣፡ ወአጽምዑኒ፡ ነገሥት፡ ተግሣጽየ፡ እስመ፡ ሕግ፡ ይወፅእ፡ እምኔየ፡ ወፍትሕየኒ፡ ለብርሃነ፡ አሕዛብ።
5 ትመጽእ፡ ፍጡነ፡ ጽድቅየ፡ ወትበጽሕ፡ መድኃኒትየ፡ ወይትዌከሉ፡ አሕዛብ፡ በመዝራዕትየ።
6 አንሥኡ፡ አዕይንቲክሙ፡ ወነጽሩ፡ ሰማየ፡ ወምድረሂ፡ በታሕቱ።
7 ስምዑኒ፡ እለ፡ ተአምሩ፡ ፍትሐ፡ ሕዝብየ፡ እለ፡ ውስተ፡ ልብክሙ፡ ሕግየ፤ ኢትፍርሁ፡ ጽዕለተ፡ ሰብእ፡ ወኢትግርምቶሙ፡ ወኢትትመውኡ።
8 እስመ፡ ከመ፡ ልብስ፡ ዘኢይጐነዲ፡ ፍጡነ፡ ይበልዩ፡ ወከመ፡ ብላዐ፡ ቍንቍኔ፡ ይከውኑ፤ ጽድቅየሰ፡ ለዓለም፡ ትቀውም፡ ወመድኃኒትየኒ፡ ለትውልደ፡ ትውልድ።
9 ተንሥኢ፡ ተንሥኢ፡ ኢየሩሳሌም፡ ወልበሲ፡ ኃይለ፡ መዝራዕትኪ፤ ተንሥኢ፡ ከመ፡ መዋዕለ፡ ትካት፡ ዘእምፍጥረተ፡ ዓለም።
10 አኮኑ፡ አንቲ፡ እንተ፡ አንፀፍኪያ፡ ለባሕር፡ ወአይበስኪ፡ ማየ፡ ቀላይ፡ ብዙኀ፤ ወረሰይኪያ፡ ለቀላየ፡ ባሕር፡ ፍኖተ፡ ወመጽያሕተ፡ ለእለ፡ ድኅኑ።
11 ወተባልሑ፤ ወሜጦሙ፡ እግዚአብሔር፡ ወአተዉ፡ ጽዮንሃ፡ በትፍሥሕት፡ ወበኃሤት፡ ዘለዓለም።
12 አነ፡ ውእቱ፡ ዘአስተፌሥሐኪ፤ አእምሪ፡ እንከ፡ አንቲሂ፡ መነሃ፡ ፈራህኪ፡ ሰብአ፡ መዋቴ፡ ወእጓለ፡ እመሕያው፡ ዘይየብስ፡ ከመ፡ ሣዕር።
13 ወአንቲሰ፡ ረሳዕኪዮ፡ ለእግዚአብሔር፡ ዘፈጠረኪ፡ ዘገብረ፡ ሰማየ፡ ወሣረረ፡ ምድረ፤ ወፈራህኪ፡ በኵሉ፡ መዋዕልኪ፡ እምገጸ፡ መዐቱ፡ ለዘሣቀየኪ።
14 እስመ፡ እምከመ፡ ድኅንኪ፡ ኢይሄሉ፡ እንከ፡ ወኢይጐነዲ።
15 እስመ፡ አነ፡ እግዚአብሔር፡ አምላክኪ፡ ዘአከውሳ፡ ለባሕር፡ ወአደምፃ፡ ለማዕበላ፤ ወስምየኒ፡ እግዚአብሔር፡ ጸባኦት።
16 እወዲ፡ ቃልየ፡ ውስተ፡ አፉኪ፡ ወእከድነኪ፡ ታሕተ፡ ጽላሎተ፡ እዴየ፡ እንተ፡ ባቲ፡ ሰፋሕክዋ፡ ለሰማየ፡ ወሣረርክዋ፡ ለምድር፤ ወእብላ፡ ለጽዮን፤ ሕዝብየ፡ አንቲ።
17 ተንሥኢ፡ ተንሥኢ፡ ኢየሩሳሌም፡ ወቁሚ፡ እንተ፡ ሰተይኪ፡ እምእደ፡ እግዚአብሔር፡ ጽዋዐ፡ መዐቱ፡ እስመ፡ ሰተይኪ፡ ጽዋዐ፡ መዐተ፡ ዘያወድቀኪ፡ ወሦጥኪዮ።
18 ወኀጣእኪ፡ ዘይናዝዘኪ፡ እምኵሉ፡ ደቂቅኪ፡ ዘወለድኪ፡ ወአልቦ፡ ዘይሜጥወኪ፡ እዴሁ፡ እምኵሉ፡ ደቂቅኪ፡ ዘአልሀቂ።
19 ወይእዜኒ፡ እሉ፡ ክልኤቱ፡ ይጸንሑኪ፤ መኑ፡ ይናዝዘኪ፤ ኃሣር፡ ወድቀት፣፡ ረኃብ፡ ወመጥባሕት፤ መኑ፡ እንከ፡ ዘይናዝዘኪ።
20 ደቂቅኪኑ፡ እለ፡ ጸማህየዩ፡ ወተነፅኁ፡ ውስተ፡ ኵሉ፡ ፍናዋት፡ ከመ፡ ሐምለ፡ ቅብእ፡ ዕቡር፡ ዘምሉእ፡ ላዕሌሁ፡ መዐተ፡ እግዚአብሔር፡ ወድኩማን፡ እምኀበ፡ እግዚአብሔር፡ እግዚእ።
21 በበይነ፡ ዝንቱ፡ ስምዒ፡ ኅሥርት፡ ወስክርት፡ አኮ፡ እምወይን።
22 ከመዝ፡ ይቤ፡ እግዚአብሔር፡ አምላክ፡ ዘፈትሐ፡ ለሕዝቡ፤ ናሁ፡ ነሣእኩ፡ እምእዴኪ፡ ጽዋዐ፡ ድቀትኪ፡ ወጽዋዐ፡ መዐትየ፡ ወኢትድግሚ፡ እንከ፡ ሰትዮቶ።
23 ወአገብኦ፡ ውስተ፡ እደ፡ እለ፡ ገፍዑኪ፡ ወእለ፡ አኅሠሩኪ፡ ወእለ፡ ይብልዋ፡ ለነፍስኪ፤ ድንኒ፡ ወንትዐደውኪ፤ ወአስከቡኪ፡ ውስተ፡ መሬት፡ በከብድኪ፡ ወኬዱኪ፡ ኵሉ፡ ኃላፌ፡ ፍኖት።
=== chapter 52 ===
[Chapter 52]
1 ተንሥኢ፡ ተንሥኢ፡ ጽዮን፤ ልበሲ፡ ኃይለኪ፡ ጽዮን፤ ወአንቲኒ፡ ኢየሩሳሌም፡ ልበሲ፡ ትርሲተኪ፡ ሀገር፡ ቅድስት፤ ወኢየኀልፍ፡ እንከ፡ እንተ፡ ኀቤኪ፡ ቈላፍ፡ ወርኩስ።
2 ተናገፊ፡ ጸበለኪ፡ ወተንሥኢ፤ ኢየሩሳሌም፡ ንበሪ፤ ወግድፊ፡ ጋገ፡ እምክሳድኪ፡ ወለተ፡ ጽዮን፡ ፄዋ።
3 እስመ፡ ከመዝ፡ ይቤ፡ እግዚአብሔር፤ በከንቱአ፡ ተሣየጥኩክሙ፣፡ ወአኮአ፡ በወርቅ፡ ዘእቤዝወክሙ።
4 ከመ፡ ይቤ፡ እግዚአብሔር፤ ግብጸአ፡ ወረዱ፡ ሕዝብየአ፡ ቀዲሙአ፡ ወፈለሱአ፡ ህየአ፡ ወእምዝ፡ ወሰድዎሙአ፡ ብሔረ፡ ፋርስ፡ በግብር።
5 ወይእዜኒ፡ ምንተ፡ አቀመክሙ፡ ዝየ፤ ከመዝ፡ ይቤ፡ እግዚአብሔር፤ እስመአ፡ ነሥእዎሙአ፡ ለሕዝብየ፡ በከንቱ፣፡ አንከርክሙ፡ ወከላሕክሙ።
6 በእንተ፡ ዝንቱ፡ የአምሩ፡ ሕዝብየ፡ ስምየ፡ ውእተ፡ አሚረ፡ ከመ፡ አነ፡ ውእቱ፡ ዘነበብኩ፡ ወሀሎኩ።
7 ከመ፡ ሠናይ፡ ውስተ፡ አድባር፡ ዘይዜኑ፡ ዜና፡ ሰላም፡ ዘከመ፡ ይዜኑ፡ ዜና፡ ሠናየ።
8 እስመ፡ ተለዐለ፡ ቃሎሙ፡ ለእለ፡ የዐቅቡኪ፡ ወኅቡረ፡ ይትፌሥሑ፡ በቃሎሙ፤ ዐይን፡ በዐይን፡ ይትራአዩ፡ አመ፡ ተሠሀላ፡ እግዚአብሔር፡ ለጽዮን።
9 ወይፈለፍል፡ ኃሤት፡ ኅቡረ፡ በድዋ፡ ለኢየሩሳሌም፤ እስመ፡ ተሠሀላ፡ እግዚአብሔር፡ ወአድኅና፡ ለኢየሩሳሌም።
10 ወይከሥት፡ እግዚአብሔር፡ መዝራዕቶ፡ ቅዱሰ፡ በቅድመ፡ ኵሉ፡ አሕዛብ፡ ወይሬእዩ፡ ኵሉ፡ አሕዛብ፡ መድኃኒተ፡ እግዚአብሔር።
11 ርኁቀ፡ ረኀቁ፡ ወፃኡ፡ እምህየ፡ ወኢትግስሱ፡ ርኩሰ፤ ወፃኡ፡ እምነ፡ ማእከላ፡ ወተፈለጡ፡ እለ፡ ታመጽኡ፡ ንዋየ፡ እግዚአብሔር።
12 እስመ፡ አኮ፡ በሁከት፡ ዘትወፅኡ፡ ወአኮ፡ በጕያ፡ ዘተሐውሩ።
13 ናሁ፡ ይሌቡ፡ ቍልዔየ፡ ወይትሌዐል፣፡ ወይከብር፡ ወይትፌሣሕ፡ ፈድፋደ።
14 በከመ፡ ያነክሩ፡ በእንቲአከ፡ ብዙኃን፡ ከመ፡ ዘነኪር፡ ራእዩ፡ እምሰብእ፡ ወክብርከ፡ እምእጓ፡ እመሕያው።
15 ኪያሁ፡ ያነክሩ፡ አሕዛብ፡ ብዙኃን፡ ወኢይፈትሑ፡ አፉሆሙ፡ ነገሥት፤ እስመ፡ ለእለ፡ ኢዜነውዎሙ፡ በእንቲአሁ፡ ያእምርዎ፡ ሀለዎሙ፣፡ ወእለኒ፡ ኢሰምዕዎ፡ ሀለዎሙ፡ ይለብውዎ።
=== chapter 53 ===
[Chapter 53]
1 እግዚኦ፡ መኑ፡ የአምነነ፡ ቃለነ፤ ወለመኑ፡ ተከሥተ፡ መዝራእቱ፡ ለእግዚአብሔር።
2 ወነገርነ፡ ከመ፡ ሕፃን፡ በቅድሜሁ፡ ወከመ፡ ሥርው፡ በውስተ፡ ምድር፡ ጽምእት፤ አልቦ፡ ራእየ፡ ወኢትርሲተ፤ ወርኢናሁ፡ ወአልቦ፡ ራእየ፡ ወአልቦ፡ ላህየ።
3 ወራእዩሂ፡ ምኑን፡ ወትሑት፡ እምኵሉ፡ ሰብእ።
4 ወውእቱሰ፡ ጾረ፡ ሕማመነ፡ ወበእንቲአነ፡ ሐመ፣፡ ወንሕነሂ፡ ርኢናሁ፡ ሕሙመ፡ ወቅሡፈ፡ በሕማም።
5 ወውእቱ፡ ቈስለ፡ በእንተ፡ ኃጣውኢነ፡ ወሐመ፡ በአንተ፡ ጌጋይነ፤ ትምህርተ፡ ሰላምነ፡ በላዕሌሁ፡ ወበቍስለ፡ ዚአሁ፡ ሐየውነ።
6 ኵልነ፡ ከመ፡ አባግዕ፡ ተገደፍነ፤ ብእሲኒ፡ ዘዘዚአሁ፡ ሖረ፡ በፍኖቱ፡ ወስሕተ።
7 ወውእቱሰ፡ ኢከሠተ፡ አፉሁ፡ በሕማሙ።
8 እስመ፡ ይነሥእዎ፡ ለፍትሑ።
9 ወእሁብ፡ እኩያነ፡ ህየንተ፡ መቅበርቱ፡ ወአብዕልተ፡ ህየንተ፡ ሞቱ፤ እስመ፡ ኢገብረ፡ ኃጢአተ፡ ወኢተረክበ፡ ሐሰት፡ ውስተ፡ አፉሁ።
10 ወይፈቅድ፡ እግዚአብሔር፡ ያንጽሖ፡ እምነ፡ መቅሠፍቱ።
11 ወይፈቅድ፡ እግዚአብሔር፡ ያአትት፡ ሕማመ፡ እምነፍሱ፡ ወያርእዩ፡ ብርሃነ፡ ወይፈልጦ፡ በጥበቡ፡ ወያጸድቆ፡ ለጻድቅ፡ ለዘይትቀነይ፡ ሠናየ፡ ለብዙኃን፡ ወኃጢአቶሙ፡ ውእቱ፡ ይደመስስ።
12 በእንተዝ፡ ውእቱ፡ ይወርሶሙ፡ ለእስራኤል፡ ወይመሀርኮሙ፡ ለጽኑዓን፤ እስመ፡ ተውህበ፡ ለሞት፡ ነፍሱ፡ ወተኈለቈ፡ ምስለ፡ ኃጥኣን፤ ወውእቱ፡ ያዐርግ፡ ኃጢአቶሙ፡ ለብዙኃን፡ ወበእንተ፡ ኃጢአቶሙ፡ ተውህበ፡ ውእቱ።
=== chapter 54 ===
[Chapter 54]
1 ትትፌሣሕ፡ መካን፡ እንተ፡ ኢትወልድ፤ ትኬልሕ፡ ወተአወዩ፡ እንተ፡ ኢተሐምም፤ እስመ፡ ብዙኅ፡ ውሉዳ፡ ለመዓስብ፡ እምእንተ፡ ባቲ፡ ምተ።
2 አርሒቢ፡ መታክለ፡ ዘደብተራኪ፤ ወትክሊ፡ ዐፀደኪ፡ ወኢትምሐኪ፤ አንኂኬ፡ አሕባለኪ፡ ወአጽንዒ፡ መታክለኪ።
3 ዓዲ፡ ለፀጋም፡ ወለየማን፡ አንጦልዒ፤ እስመ፡ ዘርእኪ፡ ይወርሱ፡ አሕዛብ፡ ወትነብሪ፡ አህጉረ፡ መዝበረ።
4 ኢትፍርሂ፡ እስመ፡ ተኀፈርኪ፡ ወኢትኅፈሪ፡ እስመ፡ ጸዐሉኪ፤ ወትረስዒ፡ ኃፍረተኪ፡ ዘለዓለም፡ ወኢትዜከርዮ፡ ለጽዕለትኪ፡ ዘአመ፡ ማዕሰብኪ።
5 እስመ፡ እግዚአብሔር፡ ዘገብረ፡ ለኪ፡ እግዚአብሔር፡ ጸባኦት፡ ስሙ፤ ወውእቱ፡ አምላከ፡ እስራኤል፡ ዘአድኀነኪ፡ ዘይሰመይ፡ በኵሉ፡ ምድር።
6 አኮ፡ ከመ፡ ብእሲት፡ ኅድግት፡ ወዕንብዝት፡ ዘጸውዐኪ፡ እግዚአብሔር፣፡ ወአኮ፡ ከመ፡ ብእሲት፡ ጽዕልት፡ እምንእሳ፡ ይቤ፡ አምላክኪ።
7 ኅዳጠ፡ መዋዕለ፡ ኀደጉኪ፡ ወበዓቢይ፡ ምሕረት፡ እሠሀለኪ።
8 በኅዳጥ፡ መዐት፡ ሜጥኩ፡ ገጽየ፡ እምኔኪ፡ ወበምሕረት፡ ዘለዓለም፡ እሠሀለኪ፡ ይቤ፡ እግዚአብሔር፡ ዘአድኀነኪ።
9 እምነ፡ ማይ፡ ዘአመ፡ ኖኅ፡ ዝንቱ፡ ውእቱ፡ ስምዕየ፤ ዘከመ፡ ቀዲሙ፡ መሐልኩ፡ ለምድር፡ ከመ፡ ኢይትመዐዓ፡ እንከ።
10 ወከመ፡ ኢይቅሥፎሙ፡ ለአድባር፡ ወኢያፈልሶሙ፣፡ ወከመ፡ ኢይትሐወሱ፡ አውግርኪ።
11 ወትነብብ፡ በእንተ፡ ሕምምት፡ ወትሕት፡ ወኅዝንት።
12 ወአረፋትኪ፡ ዘከርከዴን፡ ወአናቅጽኪ፡ ዘቢረሌ፡ ወአልባስኪኒ፡ ዘዕንቍ፡ ክቡር።
13 ወኵሎሙ፡ ደቂቅኪ፡ ምሁራን፡ በኀበ፡ እግዚአብሔር፤ ወውስተ፡ ብዙኅ፡ ሰላም፡ ደቂቅኪ።
14 ወናሁ፡ ትትሐነጺ፡ በጽድቅ።
15 ናሁ፡ ፈላስያን፡ ይመጽኡ፡ እንተ፡ ኀቤየ፡ ወይትመሐፀኑ፡ ብኪ።
16 ናሁ፡ አነ፡ እፈጥረኪ፤ አኮ፡ ከመ፡ ነሃቢ፡ ዘይበቍጽ፡ አፍሐመ፡ ወያወፅእ፡ ንዋየ፡ ምግባሩ፤ ወአንሰ፡ ፈጠርኩኪ፡ ለሠናይ፡ ወአኮ፡ ለሕርትምና።
17 ወይትነሣእ፡ ኵሉ፡ ቃል፡ ወይትዋቀሠኪ፣፡ ወባሕቱ፡ ትመውኢዮሙ፡ ለኵሎሙ፡ ወይወርስዎሙ፡ ሰብእኪ።
=== chapter 55 ===
[Chapter 55]
1 እለ፡ ጸምኡ፡ ይሖሩ፡ ኀበ፡ ማይ፡ ወእለሂ፡ አልቦሙ፡ ወርቀ፡ ይሖሩ፡ ወይሣየጡ፤ ወይስተዩ፡ ዘእንበለ፡ ወርቅ፡ ወይነ፡ ወሐሊበ።
2 ለምንት፡ ትሣየጡ፡ በወርቅ፤ ኢይከውነክሙኑ፡ ለጽጋብ፡ ፃማክሙ፤ ስምዑኒ፡ ወትበልዑ፡ በረከተ፡ ወትትፌሣሕ፡ በበረከት፡ ነፍስክሙ።
3 ወትልዉ፡ ፍኖትየ፤ ወስምዑኒ፡ ወተሐዩ፡ በበረከት፡ ነፍስክሙ፡ ወእሠርዕ፡ ለዳዊት፡ ሥርዓተ፡ ጽድቅ፡ ዘለዓለም።
4 እስመ፡ ናሁ፡ ምእመነ፡ ረሰይክዎ፡ ወስምዓ፡ ለአሕዛብ፣፡ መስፍነ፡ ወመኰንነ፡ ለአሕዛብ።
5 ሕዝብ፡ እለ፡ ኢየአምሩከ፡ ይጸውዑከ፤ ወሕዝብ፡ እለ፡ ኢይሌብዉከ፡ ይትመሐፀኑ፡ ኀቤከ፡ በእንተ፡ እግዚአብሔር፡ አምላክከ፡ ቅዱሰ፡ እስራኤል፡ እስመ፡ ውእቱ፡ አክበረከ።
6 ኅሥዎ፡ ለእግዚአብሔር፡ ወእምከመ፡ ረከብክምዎ፡ ጸውዕዎ።
7 ይኅድግ፡ ኃጥእ፡ ፍኖቶ፡ ወብእሲኒ፡ ዓማፂ፡ ምክሮ፤ ወይትመየጥ፡ ኀበ፡ እግዚአብሔር፡ ወይሠሀሎ፡ እንከ፡ እስመ፡ ብዙኀ፡ የኀድግ፡ ለክሙ፡ ኃጢአተክሙ።
8 እስመ፡ ኢኮነ፡ ምክርየ፡ ከመ፡ ምክርክሙ፣፡ ወኢኮነ፡ ፍኖትየ፡ ከመ፡ ፍኖትክሙ፡ ይቤ፡ እግዚአብሔር።
9 በከመ፡ ይርኅቅ፡ ሰማይ፡ እምድር፡ ከማሁ፡ ይርኅቅ፡ ፍኖትየ፡ እምፍኖትክሙ፡ ወሕሊናየ፡ እምሕሊናክሙ።
10 ከመ፡ ሶበ፡ ይወርድ፡ ዝናም፡ እምሰማይ፡ ወበረድ፡ ወኢየኀድግ፡ እስከ፡ ሶበ፡ ያረውያ፡ ለምድር፡ ወያበቍል፡ ወያሠምር፣፡ ወይሁብ፡ ዘርአ፡ ለዘራኢ፡ ወእክለ፡ ለሲሳይ።
11 ከማሁ፡ ውእቱ፡ ቃልየ፡ ዘይወፅእ፡ እምአፉየ፤ ኢይትመየጥ፡ እስከ፡ ይገብር፡ ኵሎ፡ ዘፈቀድኩ፡ ወእሤርኅ፡ ፍኖትየ፡ ወትእዛዝየ።
12 እስመ፡ በፍሥሐ፡ ትወፅኡ፡ ወበኃሤት፡ ትትሜሀሩ።
13 ወህየንተ፡ ሦክ፡ ይበቍል፡ ኤላጡኑስ፡ ወህየንተ፡ ክርዳድ፡ ዕፀ፡ ሕቍ።
=== chapter 56 ===
[Chapter 56]
1 ከመዝ፡ ይቤ፡ እግዚአብሔር፡ ዕቀቡ፡ ጽድቅ፡ ወርትዐ፡ እስመ፡ አልጸቀት፡ ሕይወትየ፡ ወበጽሐት፡ ወተከሥተት፡ ምሕረትየ።
2 ብፁዕ፡ ብእሲ፡ ዘይገብሮ፡ ለዝንቱ፡ ወዘይትዔገሥ፡ ቦቱ፣፡ ወየዐቅብ፡ ሰንበታተ፡ ወኢያረኵስ፡ ወኢይገብር፡ ዓመፃ።
3 ኢይበል፡ ፈላሲ፡ ዘገብእ፡ ኀበ፡ እግዚአብሔር፤ ይፈልጠኒኑ፡ እንጋ፡ እግዚአብሔር፡ እምሕዝቡ፤ ወኢይበል፡ ሕፅው፤ አንሰ፡ ከመ፡ ዕፅ፡ ይቡስ።
4 ከመዝ፡ ይቤሎሙ፡ እግዚአብሔር፡ ለሕፅዋን፤ እመ፡ ዐቀቡ፡ ሰንበታትየ፡ ወአብደሩ፡ ዘአነ፡ እፈቅድ፡ ወተዐገሡ፡ በሥርዓትየ።
5 እሁቦሙ፡ በቤትየ፡ ወበአረፍትየ፡ መካነ፡ ዘያሰሚ፡ ወዘይኄይስ፡ እምደቂቅ፡ ወእምአዋልድ፤ ወእሁቦሙ፡ ስመ፡ ዘለዓለም፡ ዘኢኀልቅ።
6 ወለእለ፡ ገብኡ፡ ኀበ፡ እግዚአብሔር፡ እምካልእ፡ ሕዝብ፡ ወተቀንዩ፡ ሎቱ፡ ወአፍቀሩ፡ ስመ፡ እግዚአብሔር፤ ወለእለ፡ ኮንዎ፡ አግብርቲሁ፡ ወአእማቲሁ፤ ወለኵሎሙ፡ እለ፡ የዐቅቡ፡ ሰንበታትየ፡ ወኢያረኵሱ፡ ወይትዔገሡ፡ በሥርዓትየ።
7 አበውኦሙ፡ ውስተ፡ ደብረ፡ መቅደስየ፡ ወአስተፌስሖሙ፡ በቤተ፡ ጸሎትየ።
8 ወውእቱ፡ ዘያስተጋብኦሙ፡ ለእለ፡ ተዘርዉ፡ እስራኤል።
9 ንዑ፡ ኵሉ፡ አራዊተ፡ ገዳም፤ ብልዑ፡ ኵልክሙ፡ አራዊተ፡ ገዳም።
10 ንዑ፡ ወትርአዩ፡ ከመ፡ ዖሩ፡ ኵሎሙ፡ ወኢሐለዩ፡ ዘይመክሩ፤ አክልብት፡ በሀማን፡ እለ፡ ኢይክሉ፡ ነቅዎ፤ እለ፡ የሐልሙ፡ በምስካቦሙ፡ ወይፈትዉ፡ ነዊመ።
11 ኵሎሙ፡ ከለባት፡ ርኩሳን፡ እሙንቱ፡ እለ፡ ኢይጸግቡ።
=== chapter 57 ===
[Chapter 57]
1 ርኢክሙሂ፡ ከመ፡ ተሐጕለት፡ ጽድቅ፡ ወኢሐለይክሙ፡ በልብክሙ፤ ወአእትቱ፡ ዕደወ፡ ጻድቃነ፡ ወአልቦ፡ ዘአእመረ፣፡ እስመ፡ እምገጸ፡ ዓመፃ፡ ተአተተ፡ ጻድቅ።
2 ይከውን፡ መቅበርቱ፡ በሰላም፡ እስመ፡ ይነሥእዎ፡ እማእከል።
3 አንትሙሰ፡ ንዑ፡ ዝየ፡ ደቂቀ፡ ኃጥኣን፡ ወዘርአ፡ ዘማውያን፡ ወዘማውያት።
4 ላዕለ፡ መኑ፡ ተፈጋዕክሙ፤ ወላዕለ፡ መኑ፡ አብቀውክሙ፡ አፉክሙ፡ ወላዕለ፡ መኑ፡ አንዋኅክሙ፡ ልሳነክሙ፤ አኮኑ፡ አንትሙ፡ እሙንቱ፡ ውሉደ፡ ሕርቱማን፡ ወዘርአ፡ ዓማፅያን።
5 እለ፡ ትትፌሥሑ፡ በጣዖት፡ ወትሠውዑ፡ በታሕተ፡ ዖመ፡ ቈጽል፣፡ ወትዘብሑ፡ ውሉደክሙ፡ ውስተ፡ ቈላት፡ ማእከለ፡ ጾላዓት።
6 ዝንቱ፡ ውእቱ፡ መክፈልትኪ፡ ወዝንቱ፡ ርስትኪሂ፡ እለ፡ ሎሙ፡ አውጻሕኪ፡ ሞጻሕተኪ፡ ወእለ፡ ሎሙ፡ አዕረጊ፡ መሥዋዕተኪ።
7 ውስተ፡ ደብር፡ ዓቢይ፡ ወነዋኅ፡ ህየ፡ ነጸፍኪ፡ ምስካበኪ፡ ወበህየ፡ አዕረጊ፡ መሥዋዕተኪ።
8 ወሠራዕኪ፡ ድኅረ፡ ማዕጾ፡ ጸብአተኪ።
9 ወአብዛኅኪ፡ ምስሌሆሙ፡ ዝሙተኪ፡ ወተማሐዝኪ፡ ብዙኃነ፡ እለ፡ ርኁቃን፡ እምኔኪ፤ ወፈነውኪ፡ ተናብልተ፡ ወአስተጓሕለውኪ፡ ምስሌሆሙ፡ ወተኀሥሪ፡ እስከ፡ ሲኦል።
10 ሰራሕኪ፡ በዐዊድ፡ ወዓዲ፡ ኢትቤሊ፤ አኀድግ፡ እንከሰ፡ እንዘ፡ ብየ፡ ኃይለ፡ እስመ፡ ዘንተ፡ ገበርኪ፡ ወኢኀፈርክኒ።
11 መነ፡ ተሐዘብኪ፡ ወፈራህኪ፤ ወሐሰውክኒ፡ ወኢተዘከርክኒ፡ ወኢሐለይክኒ፡ በልብኪ፤ ወአነሂ፡ ተሀየይኩኪ፡ እስመ፡ ኢፈራህክኒ።
12 እንከሰ፡ እወቅሥ፡ ዘዚአየሂ፡ ጽድቅየ፡ ወዘዚአኪኒ፡ ጌጋየኪ፡ ዘኢይበቍዐኪ።
13 እስኩኬ፡ ያድኅኑኪ፡ እምከመ፡ አውየውኪ፡ አመ፡ ተመንደብኪ፤ ናሁ፡ ይነሥኦሙ፡ ዐውሎ፡ ለኵሎሙ፡ ወየሐፍሦሙ፡ ነፋስ።
14 ወይብል፤ ጺሑ፡ ፍኖተ፡ ቅድመ፡ ገጹ፡ ወአእትቱ፡ እብነ፡ እምፍኖተ፡ ሕዝብየ።
15 ከመዝ፡ ይቤ፡ ልዑል፡ ዘየኀድር፡ ውስተ፡ አርያም፡ ለዓለም፣፡ ቅዱሰ፡ ቅዱሳን፡ ስሙ፣፡ እግዚአብሔር፡ ዘየዐርፍ፡ ውስተ፡ ቅዱሳን፡ ወይሁቦሙ፡ ትዕግሥተ፡ ለዕንቡዛን፡ ወያስተፌሥሖሙ፡ ለቍስላነ፡ ልብ።
16 ወአኮ፡ ለዓለም፡ ዘእቀሥፈክሙ፡ ወአኮ፡ ዘልፈ፡ ዘእትመዐዓክሙ፤ እስመ፡ እምኀቤየ፡ ይወፅእ፡ መንፈስ፡ ወአነ፡ ፈጠርኩ፡ መንፈሰ፡ ኵሉ።
17 ወበእንተ፡ ኅዳጥ፡ ኃጢአት፡ አሕመምክዎ፡ ወቀሠፍክዎ፣፡ ወሜጥኩ፡ ገጽየ፡ እምኔሁ፡ ወተከዘ፡ ወሖረ፡ ትኩዙ።
18 ወእምዝ፡ ርኢኩ፡ ፍናዊሁ፡ ወፈወስክዎ፡ ወአስተፈሣሕክዎ፡ ወወሀብክዎ፡ ፍሥሐ፡ ጽድቅ።
19 ወሰላመ፡ በዲበ፡ ሰላም፡ ለርኁቃን፡ ወለቅሩባን፡ ይቤ፡ እግዚአብሔር፤ እሠሀሎሙ።
20 ወኃጥኣንሰ፡ ከመዝ፡ ይትገፈትዑ፡ ወኢይረክቡ፡ ዕረፍተ።
21 ወአልቦሙ፡ ፍሥሐ፡ ለኃጥኣን፡ ይቤ፡ እግዚአብሔር።
=== chapter 58 ===
[Chapter 58]
1 ክላሕ፡ በኃይልከ፡ ወኢትምሐክ፤ ወአዕቢ፡ ቃለከ፡ ከመ፡ ቀርን፡ ወንግሮሙ፡ ለሕዝብየ፡ ኃጢአቶሙ፡ ወለቤተ፡ ያዕቆብ፡ ጌጋዮሙ።
2 ኪያየኒ፡ የኀሥሡኒ፡ እምዕለት፡ ዕለተ፡ ወይፈትዉ፡ ያእምሩ፡ ፍናውየ፡ ከመ፡ ሕዝብ፡ ዘይገብር፡ ጽድቀ፡ ወከመ፡ ዘኢየኀድግ፡ ፍትሐ፡ አምላኩ።
3 ወይብሉ፤ በእፎ፡ ጾምነሂ፡ ወኢርኢከነ፤ ወአሕመምነ፡ ነፍሰነ፡ ወኢያእመርከነ፤ እስመ፡ አመ፡ ጾምክሙ፡ ትገብሩ፡ ፈቃደክሙ፡ ወትትፈደዩ፡ ዕዳክሙ።
4 ትሰክዩ፡ ወትትዋቀሡ፡ ወትትላኰዩ፡ ወትትጋአዙ፡ ወትጸውሙ፡ ወትዘብጡ፡ ወትትዔገሉ፡ ነዳየ፤ ለምንትኑኬ፡ ትጸውሙ፡ ሊተ፡ ከመ፡ ዮም፡ እንዘ፡ ታግዕሩ፡ ወታአወይዉ፡ ነዳየ።
5 አኮኬ፡ ዘንተ፡ ጾመ፡ ዘኀረይኩ፡ ወአኮ፡ ከመ፡ ዛቲ፡ ዕለት፡ ዘያሐምም፡ ነፍሶ፡ ሰብእ፣፡ ወኢእመ፡ አቍጠጠ፡ ክሳዶ፡ ከመ፡ ኅልቀት፡ ወሰከበ፡ ውስተ፡ ሠቅ፡ ወሐመድ፣፡ ኢኮነ፡ ኅሩየ፡ ዝንቱ፡ ጾም፡ በኀበ፡ እግዚአብሔር።
6 ወአኮ፡ ዘንተ፡ ጾመ፡ ዘኀረይኩ፡ አነ፡ ይቤ፡ እግዚአብሔር፡ ዳእሙ፡ ፍታሕ፡ ኵሎ፡ ማእሰረ፡ ዓመፃ፣፡ ወዕርቅ፡ ወአርትዕ፡ ኵሎ፡ ጠዋየ፡ ወባልሕ፡ ኵሎ፡ ምንዱበ፡ ወኅድግ፡ ኵሎ፡ መጽሐፈ፡ ዓመፃ።
7 ወአጽግቦ፡ ለርኁብ፡ እምእክልክ፣፡ ወአብእ፡ ነዳየ፡ ወአኅድሮ፡ ውስተ፡ ጽላሎተ፡ ቤትከ።
8 ወይገውሕ፡ ሶቤሃ፡ ብርሃንከ፡ ወይሠርቅ፡ ፍጡነ፡ አልባሲከ፤ ወየሐውር፡ ጽድቅከ፡ ቅድመ፡ ገጽከ፡ ወስብሐተ፡ እግዚአብሔር፡ ይከድነከ።
9 ሶቤሃኬ፡ ይሰምዐከ፡ እግዚአብሔር፡ በጊዜ፡ አውየውከ፤ ወእንዘሂ፡ ትነብብ፣፡ ነየ፡ ሀለውኩ፡ ይብለከ፤ እምከመ፡ አእተትከ፡ እምላዕሌከ፡ መአስረ፡ ዓመፃ፡ ወነጐርጓረ።
10 ወለእመ፡ ኢዘበጥከ፡ ወአንከይከ፡ እምሲሳየ፡ ነፍስከ፡ ወአፍአምኮ፡ ለነዳይ፣፡ ወለእመ፡ እጽገብከ፡ ነፍሰ፡ ርኅብተ፤ ሶቤሃ፡ ይሠርቅ፡ ማእከለ፡ ጽልመት፡ ብርሃንከ፡ ወይከውነከ፡ ጽልመትከ፡ ከመ፡ ብርሃነ፡ መዓልተ።
11 ወይሄሉ፡ እግዚአብሔር፡ ምስሌከ፡ ወትረ፤ ወየያጸግበከ፡ እምፍትወተ፡ ነፍስከ፣፡ ወያጠልለከ፡ አዕፅምቲከ፡ ወትከውን፡ ከመ፡ ገነት፡ ርውይት፡ ወከመ፡ ዐዘቅት፡ ዘኢይነፅፍ፡ ማዩ።
12 ወይትሐነጽ፡ መዝብርከ፡ ዘለዓለም፡ ወይከውን፡ መሠረትከ፡ ለትውልደ፡ ትውልድ፡ ወለዓለመ፡ ዓለም፣፡ ወትሰመይ፡ ሐናጼ፡ ጥቅም፡ ወጸያሔ፡ ፍኖት፡ ለኀዲር።
13 ለእመ፡ ሜጥከ፡ እግረከ፡ በሰንበት፡ ከመ፡ ኢትግበር፡ ፈቃደከ፡ በዕለት፡ ቅድስት፡ ወትሬስዮን፡ ትፍሥሕተ፡ ለሰንበታት፡ ወቀደስከኮን፡ ለእግዚአብሔር፤ ኢታንሥእ፡ እግረከ፡ ለገቢረ፡ ኵሉ፡ ፈቃድከ፡ ዘእኩይ፡ ወኢታውሥእ፡ ቃለ፡ ሕሡመ፡ እምአፈፉከ።
14 ወተወከል፡ በእግዚአብሔር፡ ወያዐርገከ፡ ዲበ፡ በረከታ፡ ለምድር፡ ወይሴስየከ፡ ርስተ፡ ያዕቆብ፡ አቡከ፤ እስመ፡ አፉሁ፡ ለእግዚአብሔር፡ ነበበ፡ ከመዝ።
=== chapter 59 ===
[Chapter 59]
1 ቦኑ፡ ኢትክል፡ አድኅኖ፡ እዴየ፤ ወቦኑ፡ ኢይሰምዕ፡ በእዝንየ።
2 አኮኑ፡ ኃጢአትክሙ፡ ይቀውም፡ ማእከሌክመሙ፡ ወማእከለ፡ እግዚአብሔር፤ ወበእንተ፡ ኃጢአትክሙ፡ ሜጥኩ፡ ገጽየ፡ እምነኔክሙ፡ ከመ፡ ኢይሠሀልክሙ።
3 እስመ፡ ደም፡ ምሉእ፡ እደዊክሙ፡ ወአጻብዒክሙ፡ በኃጢአት፤ ወበከናፍሪክሙኒ፡ ነበብክሙ፡ ዓመፃ፡ ወኃጢአተ፡ ተናገረት፡ ልሳንክሙ።
4 ወአልቦ፡ ዘይነብብ፡ ጽድቀ፡ ወዘይፈትሕ፡ ጽድቀ።
5 ወያነቅዑ፡ አንቆቅሆ፡ አርዌ፡ ምድር፡ ወየአንሙ፡ ፈትለ፡ ሣሬት፤ እስመ፡ ዘበልዖ፡ ለአንቆቅሆ፡ አርዌ፡ ምድር፡ ይመውት፡ ፍጡነ፣፡ ወእመ፡ አንቃዕከ፡ ይወፅእ፡ ከይሲ።
6 ወፈትለ፡ ሣሬት፡ ኢይበቍዕ፡ ለተዐፅፎ፡ ወኢይትዐፀፉ፡ በምግባሮሙ፤ እስመ፡ ግብረ፡ ዓመፃ፡ ግብሮሙ።
7 ወለኃጢአት፡ ይረውጻ፡ እገሪሆሙ፡ ወያፈጥና፡ ለክዒወ፡ ደም፡ ወይመክሩ፡ ለቀቲል፤ ኃሣር፡ ወቅጥቃጤ፡ ውስተ፡ ፍኖቶሙ።
8 ወኢየአምርዋ፡ ለፍኖተ፡ ሰላም፡ ወአልቦ፡ ጽድቅ፡ ውስተ፡ ፍኖቶሙ፤ እስመ፡ ጠዋይ፡ ፍኖቶሙ፡ ዘየሐውሩ፡ ወኢየአምርዎ፡ ለሰላም።
9 በእንተ፡ ዝንቱ፡ ርኅቀ፡ ጽድቅ፡ እምኔሆሙ፡ ወኢትረክቦሙ፡ ርትዕ፤ ወኮኖሙ፡ ጽልመተ፡ ብርሃኖሙ፡ ወእንዘ፡ ይጸንሑ፡ ብርሃነ፡ የሐውሩ፡ ውስተ፡ ጽልመት።
10 ወያረመስሱ፡ ውስተ፡ አረፍት፡ ከመ፡ ዕዉር፡ ዘአልቦ፡ ዐይነ፣፡ ወይወድቁ፡ መዓልተ፡ ከመ፡ ዘመንፈቀ፡ ሌሊት፡ ወይትመነደቡ፡ ከመ፡ ዘይመውቱ።
11 ወየሐውሩ፡ ኅቡረ፡ ከመ፡ ርግብ፡ ወከመ፡ ድብ፡ ጸናሕነ፡ ፍትሐ፡ ወአልቦ፡ ዘያድኅን፣፡ ርኁቀ፡ ቆመ፡ እምኔነ።
12 እስመ፡ ብዙኅ፡ ኃጢአትነ፡ በቅድሜከ፡ ወጌጋይነ፡ ተቃወመነ።
13 አበስነ፡ ወሐሰውናከ፡ ወኀደግነ፡ ተሊዎቶ፡ ለአምላክነ፤ ወነበብነ፡ ዓመፃ፡ ወክሕድናከ፤ ወፀነስነ፡ ወሐለይነ፡ በልብነ፡ ነገረ፡ ኃጢአት።
14 ወርኅቅነ፡ እምጽድቅ፡ ወኀደግነ፡ ርትዐ፤ ወተኀጥአት፡ ጽድቅ፡ እምፍኖቶሙ፡ ወስእኑ፡ ሐዊረ፡ በመጽያሕት።
15 ወተአተቱ፡ እምርትዕ፡ ወዐለዉ፡ ልቦሙ፡ ከመ፡ ኢየሐልይዎ።
16 ወርእየ፡ ከመ፡ አልቦ፡ ሰብአ፡ ወጠየቀ፡ ከመ፡ አልቦ፡ ዘይሠጠዎ፤ ወኰነኖሙ፡ በመዝራዕቱ፡ ወአጽንዖሙ፡ በምሕረቱ።
17 ወለብሰ፡ ጽድቀ፡ ከመ፡ ልብሰ፡ ኀፂን፡ ወወሰየ፡ ጌራ፡ መድኃኒት፡ ውስተ፡ ርእሱ፡ ወለብሰ፡ ልብሰ፡ በቀል።
18 ወተሞጥሐ፡ ሞጣሕተ፡ በቀል፡ ወፍዳ፡ በዘያኀሥሮሙ፡ ለፀር።
19 ወይፈርሁ፡ ስመ፡ እግዚአብሔር፡ እለ፡ እምዕራብ፡ ወእለ፡ እምሥራቅ፡ ፀሐይ፡ ለስሙ፡ ክቡር።
20 ወይመጽእ፡ እምጽዮን፡ መድኅን፡ ወያአትት፡ ኃጢአተ፡ እምያዕቆብ።
21 ወዛቲ፡ ይእቲ፡ ኪዳኖሙ፡ እንተ፡ እምኀቤየ፡ ይቤ፡ እግዚአብሔር፤ መንፈሰ፡ ዚአየ፡ ውእቱ፡ ዘዲቤከ፡ ወዘወደይኩ፡ ቃልየ፡ ውስተ፡ አፉከ፡ ወኢየኀልቅ፡ እምአፉከ፡ ወእምአፈ፡ ዘርእከ፤ ይቤ፡ እግዚአብሔር፡ እምይእዜ፡ ወእስከ፡ ለዓለም።
=== chapter 60 ===
[Chapter 60]
1 አብርሂ፡ አብርሂ፡ ኢየሩሳሌም፣፡ በጽሐ፡ ብርሃንኪ፡ ወስብሐተ፡ እግዚአብሔር፡ ሠረቀ፡ ላዕሌኪ።
2 ናሁ፡ ጽልመት፡ ከደና፡ ለምድር፡ ወቆባር፡ ላዕለ፡ አሕዛብ፤ ወለኪሰ፡ ብርሃነ፡ እግዚአብሔር፡ ወስብሐቲሁ፡ ነዋ፡ አስተርአያ፡ ላዕሌኪ።
3 ወየሐውሩ፡ ነገሥት፡ በብርሃንኪ፡ ወአሕዛብኒ፡ በፀዳልኪ።
4 አንሥኢ፡ አዕይንተኪ፡ ወነጽሪ፡ ዐውደኪ፡ ወርእዪ፡ ከመ፡ ተጋብኡ፡ ደቂቅኪ፤ ወመጽኡ፡ ኵሎሙ፡ ውሉድኪ፡ እምርኁቅ፡ ወለአዋልድኪኒ፡ ይጸውርዎን፡ በመታክፍት።
5 ወትሬእዪ፡ ሶቤሃ፡ ወትፈርሂ፡ ወይደነግፀኪ፡ ልበኪ፣፡ እስመ፡ ይትመየጥ፡ ኀቤኪ፡ ብዕለ፡ ባሕር፡ ወዘአሕዛብ፡ ወዘበሐውርት።
6 ወያመጽኡ፡ መራዕየ፡ አግማል፡ ወይከድኑኪ፡ አግማለ፡ ምድያም፡ ወኤፋ።
7 ወይትጋብኡ፡ አባግዐ፡ ቄዳት፡ ወያመጽኡ፡ ሐራጊተ፡ ዘናቤዎን፣፡ ወያዐርጉ፡ መሥዋዕተ፡ ኅሩየ፡ ውስተ፡ ምሥዋዕየ፡ ወይሴባሕ፡ ቤተ፡ ጸሎትየ።
8 መኑ፡ እሉ፡ እለ፡ ይሰርሩ፡ ከመ፡ ደመና፡ ወከመ፡ ርግብ፡ ምስለ፡ እጐሊሃ።
9 ኪያየ፡ ይሴፈዋ፡ ደሰያት፡ ወይቀድማ፣፡ ወያመጽኣ፡ አሕማረ፡ ተርሴስ፡ ደቂቀኪ፡ እምርኁቅ፡ ብሔር፡ ወምስሌሆሙ፡ ወርቆሙ፡ ወብሩሮሙ፡ በእንተ፡ ስመ፡ እግዚአብሔር፡ ቅዱሰ፡ እስራኤል፡ ክቡር።
10 ወአሕዛብ፡ የሐንጹ፡ አረፋተኪ፡ ወይቀውሙ፡ ቅድሜኪ፡ ነገሥቶሙ፤ እስመ፡ በመዐትየ፡ ቀሠፍኩኪ፡ ወበምሕረትየ፡ አቅረብኩኪ።
11 ወበኵሉ፡ ጊዜ፡ ይትረኀዉ፡ አናቅጽኪ፣፡ መዓልተ፡ ወሌሊተ፡ ኢይትዐጸው፣፡ ወይበውእ፡ ኀቤኪ፡ ኃይለ፡ አሕዛብ፡ ወነገሥቶሙ፡ እለ፡ ያመጽእዎሙ።
12 ወነገሥት፡ እለ፡ ኢይትቀነዩ፡ ለኪ፡ ይመውቱ፣፡ ወአሕዛብኒ፡ ጠፊአ፡ ይጠፍኡ።
13 ወይመጽእ፡ ኀቤኪ፡ ክብረ፡ ሊባኖስ፡ በኤላጡኑስ፡ ወበሕቍ፡ ወበአርዝ፡ ኅቡረ፣፡ ወይሴባሕ፡ ቤተ፡ መቅደስየ።
14 ወይመጽኡ፡ ኀቤኪ፡ እንዘ፡ ይፈርሁ፣፡ ወያመጽኡ፡ አምኃ፡ ደቂቆሙ፡ እልኩ፡ እለ፡ አምዕዑኪ፣፡ ወትሰመዪ፡ ሀገረ፡ እግዚአብሔር፡ ቅዱሰ፡ እስራኤል፡ ጽዮን።
15 እስመ፡ ኅድግተ፡ ኮንኪ፡ ወጽልእተ፡ ወኀጣእኪ፡ ዘይረድአኪ።
16 ወትትሐፀኒ፡ በሐሊበ፡ አሕዛብ፡ ወትበልዒ፡ ብዕለ፡ አሕዛብ፡ ወነገሥት፤ ወተአምሪ፡ ከመ፡ አነውእቱ፡ እግዚአብሔር፡ ዘአድኅነኪ፡ ወዘአነግፈኪ፡ አምላከ፡ እስራኤል።
17 ወናሁ፡ እሁበኪ፡ ህየንተ፡ ብርት፡ ወርቀ፣፡ ወህየንተ፡ ኀፂን፡ ብሩረ፣፡ ወህየንተ፡ ዕፅ፡ ብርተ፣፡ ወህየንተ፡ እብን፡ ኀፂነ።
18 ወኢይሰማዕ፡ እንከ፡ ዓመፃ፡ በውስተ፡ ምድርኪ፡ ወኢኃሣር፡ ወኢተቀጥቅጦ፡ በውስተ፡ ብሔርኪ፣፡ ወይሰመይ፡ አጽዋንኪ፡ መድኃኒተ፡ ወይትገለፍ፡ አናቅጽኪ።
19 ወአኮ፡ እንከ፡ ፀሐይ፡ ዘያበርህ፡ ለኪ፡ መዓልተ፣፡ ወአኮ፡ እንከ፡ ወርኅ፡ ዘይሠርቅ፡ ለኪ፡ ሌሊተ፣፡ ዳእሙ፡ ለኪሰ፡ ውእቱ፡ እግዚአብሔር፡ ብርሃንኪ፡ ለዓለም፡ ወአምላክኪ፡ ክብርኪ።
20 እስመ፡ ኢየዐርብ፡ ፀሐይኪ፡ ወኢየኀልቅ፡ ወርኅኪ፤ እስመ፡ እግዚአብሔር፡ ብርሃንኪ፡ ለዓለም፡ ወየኀልፍ፡ መዋዕለ፡ ላሕኪ።
21 ወይጸድቁ፡ ኵሎሙ፡ አሕዛብኪ፡ ወይወርሱ፡ ለዓለም፡ ምድረ፣፡ ወየዐቅቡ፡ ተግባረ፡ እደዊሁ፡ ለስብሐቲሁ።
22 ወእለሂ፡ ይውሕዱ፡ የአክሉ፡ እልፈ፣፡ ወእለሂ፡ ይቴሐቱ፡ ይከውኑ፡ ሕዝበ፡ ጽኑዓ፤ አነ፡ እግዚአብሔር፡ አስተጋብኦሙ፡ በበዕድሜሆሙ።
=== chapter 61 ===
[Chapter 61]
1 መንፈሰ፡ እግዚአብሔር፡ ላዕሌየ፡ በእንቲአሁ፡ ዘቀብአኒ፡ አስተፍሥሖሙ፡ ለነዳያን፡ ፈነወኒ፡ ወእፈውሶሙ፡ ለቍሱላነ፡ ልብ፡ ወእስብክ፡ ግዕዛነ፡ ለፂውዋን፡ ወይርአዩ፡ ዕዉራን።
2 ወእስምዮ፡ ለዓመተ፡ እግዚአብሔር፡ ኅሪተ፡ ወለዕለተ፡ ፍዳ፤ አስተፍሥሖሙ፡ ለልሕዋን።
3 ወአሀቦሙ፡ ክብረ፡ ለእለ፡ ይላሕውዋ፡ ለጽዮን፡ ህየንተ፡ ሐመድ፤ ዕፍረተ፡ ትፍሥሕት፡ ለእለ፡ ይላሕው፡ ወልብሰ፡ ክብር፡ ህየንተ፡ መንፈስ፡ ትኩዝ፤ ወይሰመዩ፡ ትውልደ፡ ጻድቃን፣፡ ተክል፡ ዘእምኀበ፡ እግዚአብሔር፡ ለስብሐት።
4 ወየሐንጹ፡ መዝበረ፡ ለዓለም፤ ያንሥኡ፡ ዘመዝበረ፡ ቀዲሙ፡ ወይሔድሱ፡ አህጉረ፡ ዘመዝበረ፡ ለትውልደ፡ ትውልድ።
5 ወእምዝ፡ ይመጽኡ፡ ካልኣን፡ አሕዛብ፡ ወይሬዕዩ፡ አባግዒከ፣፡ ወሕዝብ፡ ነኪራን፡ ይከውኑ፡ ሎሙ፡ ሐራስያነ፡ ወዓቃብያነ፡ ወይን።
6 ወአንትሙሰ፡ ትሰመዩ፡ ካህናቲሁ፡ ለእግዚአብሔር፡ ወአግብርተ፡ እግዚአብሔር፣፡ ወትበልዑ፡ ኃይለ፡ አሕዛብ፡ ወትትሬሰዩ፡ በብዕሎሙ።
7 ወይወርሱ፡ ካልእተ፡ ምድረ፡ ወውስተ፡ ርእሶሙ፡ ትፍሥሕት፡ ዘለዓለም።
8 እስመ፡ አነ፡ እግዚአብሔር፡ ዘአፈቅር፡ ጽድቀ፡ ወእጸልእ፡ ሀይደ፡ ወዓመፃ።
9 ወይትዐወቅ፡ ዘርኦሙ፡ በውስተ፡ አሕዛብ፡ ወትውልዶሙ፡ በማእከለ፡ አሕዛብ።
10 ወይትፌሥሑ፡ ትፍሥሕተ፡ በእግዚአብሔር።
11 ወከመ፡ ፍሬ፡ ገራህት፡ ስሙር፡ ወከመ፡ ዘርአ፡ ገነት፣፡ ከማሁ፡ ያሠርቅ፡ እግዚአብሔር፡ ጽድቀ፡ ወኃሤት፡ በቅድመ፡ ኵሉ፡ አሕዛብ።
=== chapter 62 ===
[Chapter 62]
1 ወኢያረምም፡ በእንተ፡ ጽዮን፡ ወኢየኀድግ፡ በእንተ፡ ኢየሩሳሌም፣፡ እስከ፡ ትወፅእ፡ ጽድቅየ፡ ከመ፡ ብርሃን፡ ወተኀቱ፡ መድኃኒትየ፡ ከመ፡ ማኅቶት።
2 ወይሬእዩ፡ አሕዛብ፡ ጽድቀኪ፡ ወነገሥትኒ፡ ስብሐተኪ፡ ወይሰመይ፡ ስመኪ፡ ሐዲሰ፡ ዘእግዚአብሔር፡ ሰመየኪ።
3 ወትከውኒ፡ አክሊለ፡ ሠናየ፡ ውስተ፡ እደ፡ እግዚአብሔር፡ ወቀጸላ፡ መንግሥት፡ ውስተ፡ እደ፡ አምላክኪ።
4 ወኢትሰመዪ፡ እንከ፡ ኅድግተ፡ ወኢትሰመይ፡ እንከ፡ ምድርኪ፡ በድወ።
5 ወከመ፡ ይነብር፡ ወሬዛ፡ ምስለ፡ ድንግል፡ ከማሁ፡ ይነብሩ፡ ደቂቅኪ፤ ወከመ፡ ይትፌሣሕ፡ መርዓዊ፡ በመርዓቱ፡ ከማሁ፡ ይትፌሣሕ፡ እግዚአብሔር፡ ብኪ።
6 ወአነብር፡ ኢየሩሳሌም፡ መዓቅበ፡ ዲበ፡ አረፋትኪ፡ መዓልተ፡ ወሌሊተ፡ እለ፡ ኢያረምሙ፡ እንዘ፡ ይዜከርዎ፡ ለእግዚአብሔር።
7 ኢታርምሙ፡ ሎቱ፡ እስከ፡ ይሠርዕ፡ ወእስከ፡ ይሬሲ፡ ትፍሥሕተ፡ ለኢየሩሳሌም፡ በዲበ፡ ምድር።
8 መሐለ፡ እግዚአብሔር፡ በስብሐቲሁ፡ ወበኃይለ፡ መንግሥቱ፡ ከመ፡ ኢይሁብ፡ እንከ፡ እክለኪ፡ ወስርነናየኪ፡ ለፀር፣፡ ወአኢይሰትይዎ፡ እንከ፡ ፀር፡ ለዓለም፡ ለወይንኪ፡ ዘተገበርኪ።
9 ዳእሙ፡ ዘአስተጋብኦ፡ ይበልዖ፡ ወይሴብሖ፡ ለእግዚአብሔር፣፡ ወእለ፡ አስተጋብእዎ፡ ይሰትይዎ፡ በአህጉርየ፡ ቅዱሳት።
10 ሖሩ፡ ባኡ፡ እንተ፡ አንቀጽየ፡ ወጺሑ፡ ፍኖተ፡ ለሕዝብየ፤ ወአእትቱ፡ እብነ፡ እምፍኖት፡ ወንሥኡ፡ ትእምርተ፡ ለአሕዛብ።
11 ናሁ፡ እግዚአብሔር፡ ይገብር፡ መንክረ፡ እስከ፡ አጽናፈ፡ ምድር።
12 ወትሰመዩ፡ ሕዝበ፡ ቅዱሰ፡ ዘአድኀነ፡ እግዚአብሔር፤ አንቲኒ፡ ትሰመዪ፡ ቅድስተ፡ ሀገረ፡ እንተ፡ ይፈቅድዋ፡ ወአኮ፡ እንተ፡ የኀድግዋ።
=== chapter 63 ===
[Chapter 63]
1 መኑ፡ ውእቱ፡ ዝንቱ፡ ዘበጽሐ፡ እምዔዶም፣፡ ቀይሐ፡ አልባስ፡ እምባሶር፤ መካሕ፡ ብእሲ፡ ወኃያል፡ ወግሩም፡ በልብሰቱ።
2 ለምንት፡ ቀይሕ፡ አልባሲከ፡ ወክዳንከኒ፡ ወፅአ፡ እምክያድ።
3 ወኬድክዎ፡ ለምክያድ፡ ባሕቲትየ፡ ወአልቦ፡ እምአሕዛብ፡ ምስሌየ።
4 እስመ፡ በጽሐቶሙ፡ ዕለተ፡ ፍዳሆሙ፡ ወመጽአት፡ ዕለተ፡ ቤዛ።
5 ወርኢኩ፡ ከመ፡ አልቦ፡ ዘይረድእ፣፡ ወአእመርኩ፡ ከመ፡ አልቦ፡ ዘይትወከፍ።
6 ወኬደቶሙ፡ መቅሠፍትየ፡ ወከዐውኩ፡ ደሞሙ፡ ውስተ፡ ምድር።
7 ወተዘከርኩ፡ ሣህሎ፡ ለእግዚአብሔር፡ በኵሉ፡ ዕሤቱ።
8 ወይቤ፤ አኮኑ፡ ሕዝብየ፡ ወውሉድየ፡ እሙንቱ፤ ወእመሰ፡ ኢክህዱኒ፡ ወአድኅኖሙ።
9 እምኵሉ፡ ምንዳቤሆሙ።
10 እሙንቱሰ፡ ዐለውዎ፡ ወአምፅዕዎ፡ ለመንፈስ፡ ቅዱስ።
11 ወተዘከረ፡ መዋዕለ፡ ዓለም።
12 ዘወሰዶሙ፡ በየማነ፡ ሙሴ፡ ወበመዝራዕተ፡ ስብሐቲሁ፤ ወጸንዐ፡ ማይ፡ እምቅድመ፡ ገጹ፡ ወረሰየ፡ ሎቱ፡ ስመ፡ ዘለዓለም።
13 ወአኀለፎሙ፡ እንተ፡ ማእከለ፡ ቀላይ፡ ከመ፡ ፈረስ፡ በገዳም፡ ወኢደክሙ።
14 ወከመ፡ እንስሳ፡ በሐቅል።
15 ተመየጥ፡ እምሰማይ፡ ወርኢ፡ እምቤተ፡ መቅደስከ፡ ወስብሐቲከ።
16 ወአንተ፡ ውእቱ፡ አቡነ፣፡ አብርሃምሰ፡ ኢያእመረነ፡ ወእስራኤልኒ፡ ኢጠየቀነ፣፡ አንተ፡ ዳእሙ፡ አቡነ፡ አድኅነነ፤ እምትካት፡ ስምከ፡ ላዕሌነ።
17 በእንተ፡ ምንት፡ አስሐትከነ፡ እግዚኦ፡ እምፍኖትከ፤ ወአጽናዕከ፡ ልበነ፡ ከመ፡ ኢንፍራህከ፤ ተመየጦሙ፡ ለአግብርቲከ፡ ወለሕዝበ፡ ርስትከ።
18 ከመ፡ ንርከብ፡ ኅዳጠ፡ መክፈልተ፡ ርስትከ፡ ውስተ፡ ደብረ፡ መቅደስከ።
19 እስመ፡ ኮነ፡ ከመ፡ ትካት፡ አመ፡ ኢኰነንከነ፡ ወአመ፡ ኢተሰምየ፡ ስምከ፡ በላዕሌነ።
=== chapter 64 ===
[Chapter 64]
1 ወእመሰ፡ አርኀውከ፡ ሰማየ፡ ይርዕዱ፡ አድባር፡ እምኔከ፡ ወይትወሰዉ።
2 ወከመ፡ ይትመሰው፡ መዓረ፡ ግራ፡ እምገጸ፡ እሳት፡ ከማሁ፡ ትበልዖሙ፡ እሳት፡ ለፀርከ፡ ወይትዐወቅ፡ ስምከ፡ በላዕሌሆሙ።
3 ወሶበሂ፡ ገበርከ፡ ስብሐቲከ፡ ይርዕዱ፡ አድባር።
4 እለ፡ እምፍጥረተ፡ ዓለም፡ ኢርኢነ፡ ወኢሰማዕነ፡ ባዕደ፡ አምላከ፡ ዘእንበሌከ፣፡ ወትገብር፡ ምሕረተከ፡ ላዕለ፡ እለ፡ ይሴፈዉ፡ ሣህለከ።
5 ወይረክቡከ፡ እለ፡ ይትዔገሡ፡ በጽድቅከ፡ ወእለ፡ ይዜከሩ፡ ፍኖተከ።
6 ወኮነ፡ ርኩሳነ፡ ኵልነ፡ ከመ፡ ፀርቀ፡ ትክቶ፡ ኵሉ፡ ጽድቅነ፤ ወተነገፍነ፡ ከመ፡ ቈጽል፡ በእንተ፡ ኃጢአትነ።
7 ወአልቦ፡ ዘጸውዐ፡ ስመከ፡ ወኢተዘከሩከ።
8 ወይእዜኒ፡ አንተሰ፡ እግዚእነ፡ ወአቡነ፤ ንሕነሰ፡ ጽቡር፡ ወአንተ፡ ፈጠርከነ፡ ወተግባረ፡ እደዊከ፡ ኵልነ።
9 ወፈድፋደሰ፡ ኢትትመዐዐነ፡ ወኢትዝክር፡ ለነ፡ ኃጢአተነ፡ ወይእዜኒ፡ ነጽረነ፡ እስመ፡ ሕዝብከ፡ ንሕነ፡ ኵልነ።
10 እስመ፡ ንኅረ፡ መቅደስከ፣፡ ወጽዮን፡ ከመ፡ መዝበር፡ ኮነት፡ ወኢየሩሳሌም፡ ለመርገም።
11 ቤተ፡ መቅደስከ፡ ውዕየ፡ በእሳት፣፡ ክብርነ፡ ዘባረኩ፡ አበዊነ፣፡ ወወድቀ፡ ኵሉ፡ ትርሲትነ።
12 ወበዝንቱ፡ ኵሉ፡ ተዐገሥከነ፡ እግዚኦ፡ ወአርመምከ፡ ወአኅሠርከነ፡ ፈድፋደ።
=== chapter 65 ===
[Chapter 65]
1 ረከቡኒ፡ እለ፡ ኢኀሠሡኒ፡ ወአስተርአይክዎሙ፡ ለእለ፡ ኢተስእሉኒ።
2 ኵሎ፡ አሚረ፡ እሰፍሕ፡ እደውየ፡ ለሕዝብ፡ ዓላውያን፡ ወከሐድያን፣፡ እለ፡ ኢሖሩ፡ በፍኖተ፡ ጽድቅ፡ ወተለዉ፡ ኃጢአቶሙ።
3 ዝንቱኬ፡ ሕዝብ፡ ዘአምፅዑኒ፡ ወትረ።
4 ይትኔወሙ፡ ውስተ፡ በአታት፡ ሐላምያን፣፡ ወይበልዑ፡ ሥጋ፡ ሐራውያ፡ ወያረኵሱ፡ ደመ፡ መሥዋዕቶሙ፡ ወኵሎ፡ ንዋዮሙ።
5 እለ፡ ይብሉ፤ ረኀቕ፡ እምኔየ፡ ወኢትቅረበኒ፡ እስመ፡ ንጹሕ፡ አነ።
6 ናሁ፡ ጽሑፍ፡ ቅድሜየ፤ ወኢያረምም፡ እስከ፡ እፈዲ፡ ወእትቤቀል፡ ወአገብእ፡ ሎሙ፡ ውስተ፡ ሕፅኖሙ።
7 ኃጢአቶሙ፡ ወዘአበዊሆሙ፡ ይቤ፡ እግዚአብሔር።
8 ከመዝ፡ ይቤ፡ እግዚአብሔር፤ በከመ፡ ይትረከብ፡ ሕንባበ፡ ወይን፡ ውስተ፡ አስካል፡ ወይብሉ፤ ኢታጥፍኦ፡ እስመ፡ በረከተ፡ እግዚአብሔር፡ ላዕሌሁ፡ ከመዝ፡ እገብር፡ በእንተ፡ ዘተቀንየ፡ ሊተ፡ በበይነ፡ ዝንቱ፡ ከመ፡ ኢያጥፍእ።
9 ወአመጽእ፡ ዘርአ፡ ያዕቆብ፡ ወዘርአ፡ ይሁዳ፡ ወይወርሱ፡ ደብረ፡ መቅደስየ፣፡ ወይወርሱ፡ ኅሩያንየ፡ ወአግብርትየ፡ ወይነብሩ፡ ህየ።
10 ወየኀድሩ፡ ማእከለ፡ ዖም፡ ወአዕፃዳተ፡ መራዕይ፡ ወውስተ፡ ቈላተ፡ አኮር፡ አዕፃዳተ፡ ወፍር፡ ዘሕዝብየ፡ እለ፡ ኀሠሡኒ።
11 አንትሙሰ፡ እለ፡ ኀደግሙኒ፡ ወረሳዕክሙ፡ ደብረ፡ መቅደስየ፡ ወትሠርዑ፡ ማእደ፡ ለአጋንንት፡ ወትቀድሑ፡ ለበፃውዕ፡ ወትመልኡ።
12 ወአነ፡ እሜጥወክሙ፡ ለኵናት፡ ወትመውቱ፡ ኵልክሙ፡ በመጥባሕት፤ እስመ፡ ጸዋዕኩክሙ፡ ወኢያውሣእክሙኒ፤ ወነበብከኩክሙ፡ ወተፀመምክሙኒ፣፡ ወገበርክሙ፡ እኩየ፡ በቅድሜየ፡ ወኢፈቀድክሙ፡ አድኅንክሙ።
13 በእንተ፡ ዝንቱ፡ ከመዝ፡ ይቤ፡ እግዚአብሔር፤ እለ፡ ይትቀነዩ፡ ሊተ፡ ይበልዑ፣፡ ወአንትሙሰ፡ ትርኅቡ፤ እለ፡ ይትቀነዩ፡ ሊተ፡ ይሰትዩ፣፡ ወአንትሙሰ፡ ትጸምኡ፤ እለ፡ ይትቀነዩ፡ ሊተ፡ ይትፌሥሑ፡ ወአንትሙሰ፡ ተኀሥሩ።
14 እለ፡ ይትቀነዩ፡ ሊተ፡ ይትፌሥሑ፡ በኃሤት፣፡ ወአንትሙሰ፡ ትግዕሩ፡ በሕማመ፡ ልብክሙ፤ ወበቅጥቃጤ፡ ነፍስክሙ፡ ተአወይዉ።
15 እስመ፡ ኀደግሙ፡ ስመክሙ፡ ወተጸገብክምዎሙ፡ ለኅሩያንየ፣፡ ወለክሙሰ፡ ያጠፍአክሙ፡ እግዚአብሔር፤ ወይሰመይ፡ ስመ፡ ሐዲሰ፡ ለእለ፡ ይትቀነዩ፡ ሊተ።
16 ወይትባረኩ፡ በዲበ፡ ምድር፤ እስመ፡ ይባርክዎ፡ ለአምላከ፡ ጽድቅ፤ ወዘይምሕሉ፡ ዲበ፡ ምድር፡ በአምላከ፡ ጽድቅ።
17 እስመ፡ ይከውን፡ ሰማይ፡ ሐዲሰ፡ ወምድርኒ፡ ሐዳሰ፤ ወኢይዜከሩ፡ እንከ፡ ዘቀዲሙ፡ ወኢይመጽኦሙ፡ በልቦሙ።
18 ዳእሙ፡ ትፍሥሕተ፡ ወኃሤተ፡ ይረክቡ፡ በውስቴታ፤ ወአነኒ፡ እገብር፡ ለኢየሩሳሌም፡ ትፍሥሕተ፡ ወኃሤተ፡ በኀበ፡ ሕዝብየ።
19 ወእትኀሠይ፡ በኢየሩሳሌም፡ ወእትፌሣሕ፡ በሕዝብየ፤ ወኢይሰማዕ፡ እንከ፡ በውስቴታ፡ ቃለ፡ ብካይ፡ ወቃለ፡ አውያት።
20 ወኢይሄሉ፡ እንከ፡ ሕፃን፡ ዘኅዳጥ፡ መዋዕል፡ ወረሢእ፡ ዘኢያብጽሐ፡ ጊዜሁ።
21 ወየሐንጹ፡ አብያተ፡ ወይነብሩ፡ ውስቴቶን፤ ወይተክሉ፡ ወይነ፡ ወይበልዑ፡ ቀምሖ።
22 ወኢየሐንጹ፡ ወይነብሩ፡ ባዕዳን፣፡ ወኢይተክሉ፡ ወይበልዑ፡ ባዕዳን፤ ወይከውን፤ መዋዕሊሆሙ፡ ለሕዝብየ፡ ከመ፡ መዋዕለ፡ ዕፀ፡ ሕይወት፤ ወይረሥኡ፡ ኅሩያንየ፡ ውስተ፡ ተግባተ፡ እደዊሆሙ።
23 ወኢይፃምዉ፡ እንከ፡ ለከንቱ፡ ወኢይወልዱ፡ ለመርገም፣፡ እስመ፡ ዘርአ፡ ብሩክ፡ ዘእምኀበ፡ እግዚአብሔር፡ እሙንቱ፡ ወውሉዶሙ፡ ምስሌሆሙ።
24 ወዘእንበለ፡ ይኬልሑ፡ እሠጠዎሙ፡ አነ፤ ወእንዘሂ፡ ይነበቡ፡ እብሎሙ፤ ነዋ፡ ሀለውኩ።
25 ውእተ፡ አሚረ፡ ተኵላት፡ ወአባግዕ፡ ይትረዐዩ፡ ኅቡረ፣፡ ወአንበሳሂ፡ ከመ፡ ላህም፡ ሣዕረ፡ ይቀምሕ፡ ወሲሳየ፡ አርዌ፡ ምድር፡ ሐመድ፤ ወአልቦ፡ ዘይነክዩ፡ ወአልቦ፡ ዘያሐሥም፡ በደብረ፡ መቅደስየ፡ ይቤ፡ እግዚአብሔር።
=== chapter 66 ===
[Chapter 66]
1 ከመዝ፡ ይቤ፡ እግዚአብሔር፡ ሰማይኒ፡ መንበርየ፡ ወምድርኒ፡ መከየደ፡ እገርየ።
2 ዝንቱሰ፡ ኵሉ፡ ግብረ፡ እደውየ፡ ወዝንቱሰ፡ ኵሉ፡ ዘዚአየ፡ ውእቱ፡ ይቤ፡ እግዚአብሔር።
3 ወኃጥእሰ፡ ዘይሠውዕ፡ ሊተ፡ ላህመ፡ ከመ፡ ዘይጠብሕ፡ ሊተ፡ ከልበ፤ ወዘሂ፡ ያበውእ፡ ሊተ፡ ስንዳሌ፡ ከመ፡ ዘደመ፡ ሐራውያ፣፡ ወዘሂ፡ ይሁብ፡ ስኂነ፡ ለተዝካርየ፡ ከመ፡ ዘፅሩፍ።
4 ወአነሂ፡ እፈቅድ፡ አኀሥሮሙ፡ ወእትበቀሎሙ፡ በእንተ፡ ኃጢአቶሙ።
5 ስምዑ፡ ቃለ፡ እግዚአብሔር፡ እለ፡ ትርዕዱ፡ እምቃሉ፤ በልዎሙ፡ አኃዊነ፡ ለጸላእትክሙ፡ ከመ፡ ይሰባሕ፡ ስመ፡ እግዚአብሔር፡ ወያስተርኢ፡ ትፍሥሕትክሙ፡ ወእሙንቱ፡ ይትኀፈሩ።
6 ቃለ፡ ጽራሕ፡ እምሀገር፣፡ ቃል፡ እምቤተ፡ መቅደስ፡ ወቃለ፡ እግዚአብሔር፡ ዘይትቤቀል፡ በቀለ፡ እምነ፡ ፀሩ።
7 ዘእንበለ፡ ትሕምም፡ ትለድ፡ እንተ፡ ውስተ፡ ማሕምም፡ ወወለደት፡ ተባዕተ።
8 መኑ፡ ሰምዐ፡ ዘከመዝ፡ ወመኑ፡ ርእየ፡ ዘከመዝ፡ ወወለደትኑ፡ ምድር፡ ለአሐቲ፡ ሰዓት፤ ይትወለዱኑ፡ አሕዛብ፡ በምዕር፡ እስመ፡ ወለደት፡ ጽዮን፡ ደቂቀ።
9 ወአነ፡ ወሀብኩኪ፡ ትፍሥሕተ፡ ወአንቲኒ፡ ኢተዘከርክኒ፡ ይቤ፡ እግዚአብሔር።
10 ተፈሥሒ፡ ኢየሩሳሌም፡ ወተኀሠዩ፡ ኵሎሙ፡ እለ፡ ያፈቅርዋ፤ ተፈሥሑ፡ ትፍሥሕተ፡ ኵልክሙ፡ እለ፡ ለሐውክምዋ።
11 ከመ፡ ትልሀቁ፡ ወትጽገቡ፡ እምአጥባተ፡ ትፍሥሕታ፡ ወከመ፡ ትትሐፀኑ፡ ወትትፈሥሑ፡ በክብራ።
12 ከመዝ፡ ይቤ፡ እግዚአብሔር፤ ናሁ፡ አነ፡ አመጽእ፡ ሰላመ፡ ሎሙ፡ ከመ፡ ውኂዝ፡ ወከመ፡ ማዕበለ፡ ባሕር፡ ክብረ፡ አሕዛብ።
13 በከመ፡ ታስፌሥሕ፡ እም፡ አነ፡ አስተፌሥሐክሙ፡ በኢየሩሳሌም።
14 ወትሬእዩ፡ ወይትፌሥሐክሙ፡ ልብክሙ፡ ወአዕፅምቲክሙ፡ ይሠርፃ፡ ከመ፡ ሣዕር።
15 ናሁ፡ ይመጽእ፡ እግዚአብሔር፡ ከመ፡ እሳት፡ ወከመ፡ ዐውሎ፡ ሠረገላሁ፡ ከመ፡ ይትበቀሎሙ፡ በመዐቱ፡ ወተግሣጹ፡ በነደ፡ እሳት።
16 እስመ፡ በእሳተ፡ እግዚአብሔር፡ ይትኴነኑ፡ ኵሉ፡ ምድር፡ ወበኲናቱ፡ ኵሉ፡ ዘነፍስ፤ እስመ፡ ብዙኃን፡ ቅቱላን፡ እምኀበ፡ እግዚአብሔር።
17 እለ፡ ይጸርዩ፡ ወይነጽሑ፡ በገነት፡ ወበምርፋቃት፡ እንዘ፡ ይበልዑ፡ ሥጋ፡ ሐራውያ፡ ወርኩሰ፡ ወአንጼዋ፣፡ ኅቡረ፡ ይማስኑ፡ ይቤ፡ እግዚአብሔር።
18 ወአነ፡ አአምር፡ ግብሮሙ፡ ወሕሊናሆሙ፡ ወናሁ፡ አነ፡ እመጽእ፡ ወአስተጋብእ፡ ኵሎ፡ አሕዛበ፡ ወይመጽኡ፡ ወይሬእዩ፡ ስብሐትየ።
19 ወእገብር፡ ሎሙ፡ ትእምርተ፡ ወእፌንዎሙ፡ ውስተ፡ አሕዛብ፡ እለ፡ ድኅኑ፡ እምውስተ፡ ሞት፣፡ ውስተ፡ ተርሴስ፡ ወፉድ፡ ወሉድ፡ ወሞሳሕ፡ ወቶቤል፡ ወኤላድ፡ ወውስተ፡ ደሰያት፡ ዘርኁቅ፡ እለ፡ ኢሰምዑ፡ ምግባርየ፡ ወኢርእዩ፡ ስብሐትየ።
20 ወያመጽእዎሙ፡ ለአኃዊሆሙ፡ እምኵሉ፡ በሐውርት፡ አምኃሁ፡ ለእግዚአብሔር፡ በአፍራስ፡ ወበሠረገላት፡ ወበለንጴኔ፡ ወበአግማል፡ ወበአብቅልት፡ ውስተ፡ ሀገር፡ ቅድስት፡ ይቤ፡ እግዚአብሔር፣፡ በከመ፡ አዕረጉ፡ ሊተ፡ ደቂቀ፡ እስራኤል፡ መሥዋዕቶሙ፡ በመዝሙር፡ ውስተ፡ ቤተ፡ እግዚአብሔር።
21 ወእነሥእ፡ እምውስቴቶሙ፡ ካህናተ፡ ወሌዋውያነ፡ ይቤ፡ እግዚአብሔር።
22 ወበከመ፡ ዘእገብር፡ አነ፡ ሰማየ፡ ሐዲሰ፡ ወምድረ፡ ሐዲሰ፡ ዘይነብር፡ ቅድሜየ፡ ይቤ፡ እግዚአብሔር፣፡ ከማሁ፡ ይቀውም፡ ዘርእክሙ፡ ወስምክሙ።
23 ወይከውን፡ ወርኃ፡ እምወርኅ፡ ወሰንበተ፡ እምሰንበት፤ ወይመጽእ፡ ኵሉ፡ ዘነፍስ፡ ቅድሜየ፡ ወይሰግድ፡ ሊተ፡ በኢየሩሳሌም፡ ይቤ፡ እግዚአብሔር።
24 ወይወፅኡ፡ ወይሬእዩ፡ አብድንቲሆሙ፡ ለእለ፡ ዐለዉኒ፤ ወዕፄሆሙኒ፡ ዘኢይነውም፡ ወእሳቶሙኒ፡ ዘኢይጠፍእ፤ ወይከውኑ፡ አርአያ፡ ለኵሉ፡ ዘሥጋ።