##### edition  (gez) — Text of the EOTC printed Bible
=== chapter 1 ===
[Chapter 1]
1 ተረፈ፡ ዘርእየ፡ ዕንባቆም፡ ነቢይ።
2 እስከ፡ ማእዜኑ፡ እዚኦ፡ እኬልሕ፡ ወኢትሰምዕ፡ አአወዩ፡ እኬልሕ፡ ወኢትሰምዕ፡ አእወዩ፡ ኀቤከ፡ ተገፊእየ፡ ወኢታድኀን።
3 አምንት፡ አርአይከኒ፡ ስራሐ፡ ወሕማመ፡ ከመ፡ አርአይ፡ ኀሳር፡ ወሕርትምና፡ ብቅድሜየ፡ ኮነ፡ ፍትሕ፡ ወመኮንንኒ፡ ይትሐለይ፡ ሕልያነ።
4 በእንተ፡ ዝንቱ፡ ዐለዉ፡ ህግ፡ ወኢይወ፡ ፅአ፡ ፍትሐ፡ ጽድቅ፡ እስመ፡ ይትዔገሎ፡ ኃጥእ፡ ለጻድቅ፡ በእንተ፡ ዝንቱ፡ ይወፅእ፡ ፍትሕ፡ ግፍቱዑ።
5 ርእዩኬ፡ እለ፡ ታስተሐቅሩ፡ ወነጽሩ፡ ወአንክሩ፡ መንክረ፡ ወትማስኑ፡ እስመ፡ ግብ፡ እገብር፡ አነ፡ በመዋዕሊክሙ፡ ዘኢተአምኑ፡ እመ፡ ነገሩክሙ።
6 ወናሁ፡ እፌኑ፡ ላዕሌክሙ፡ አነ፡ ፋርስሃ፡ ህዝበ፡ መሪራነ፡ ዋራዋድነ፡ እለ፡ የሐውሩ፡ በስፍሐ፡ ምድር፡ ከመ፡ ይረሰሱ፡ አብያተ፡ ዘኢኮነ፡ ዚአሆሙ።
7 ግሩም፡ ራእዩ፡ እምውስቴቶሙ፡ ይከውን፡ ፍትሑ፡ ወተረፋሂ፡ እምኔሁ፡ ይወፅእ።
8 ወይሰሩ፡ ከመ፡ ነምር፡ አፍራሲሆሙ፡ ወይበድሩ፡ እምተኲላተ፡ ዐረብ። ወይሩ፡ ከመ፡ ንስር፡ ዘይጐጒዕ፡ ለበሊዕ፡ ወይበጽሑ፡ እምርኁቅ፡ አፍራሲኖሙ።
9 ወይበጽሖሙ፡ ጥፍአት፡ ለኃጥኦን፡ እለ፡ ይትቃወሙ፡ ፍጽመ፡ ቅድመ፡ ገጾሙ፡ ወያስተጋብአኡ፡ ፄዋሆሙ፡ ከመ፡ ኖፃ።
10 ወውእቱሰ፡ ይንስ፡ ሎሙ፡ ወይፍግዕ፡ ላዕሆሙ፡ ወኃይላን፡ ተውኔቱ፡ ወይሣለቅ፡ ላዕለ፡ ኲሉ፡ አጽዋኒሆሙ፡ ወይደፍኖሙ፡ በመሬት፡ ወይእኀዞሙ።
11 ወእምዝ፡ ይመይጥ፡ መንፈሶ፡ ወየኀልፍ፡ ወያመስጥ፡ ለዛ፡ ኃይሉ፡ ለአምላኪየ።
12 አኮኑ፡ እንተ፡ ቀደምከ፡ እግዚኦ፡ አምላኪየ፡ ቅዱስ፡ ወኢንመውት፡ እግዚኦ፡ ለኲኔ፡ ሠራዕከሁ፡ ወተጠረኒ፡ ከመ፡ እዛለፍ፡ በተግሣጹ።
13 በዐይን፡ ንጹሕ፡ ኢይኔጽር፡ ውስተ፡ እይ፡ ወሕማም፡ ወጻዕር፡ ለምንት፡ ታረምም፡ እንዘ፡ ትሬእዩሙ፡ ለእለ፡ ያስተአክዩ፡ ወይውሕጦ፡ ኃጥእ፡ ለጻድቅ።
14 ወትሬስዩሙ፡ ለሰብእ፡ ከመ፡ ዓሣተ፡ ባሕር፡ ወከመ፡ አርዌ፡ ዘአልቦ፡ መኮንነ።
15 በመስገርቱ፡ አውፅአ፡ ያኃልቆ፡ ወሰሐቦ፡ በመርበብቱ፡ ወስተጋብኦ፡ በመስገርቱ፡ በእንተ፡ ዝንቱ፡ ይትፌስህ፡ ወይትኀሠይ፡ ልቡ።
16 በእንተ፡ ዝንቱ፡ ይሠውዕ፡ ለመስገርቱ፡ ወየዐጥን፡ ለመርበብቱ፡ ወኀሩይ፡ ሲሳዩ።
17 በእንተ፡ ዝንቱ፡ ይረብብ፡ መስገርቶ፡ ወዘልፈ፡ ይቀትሎሙ፡ ለአሕዛብ፡ ወኢይምሕኮሙ።
=== chapter 2 ===
[Chapter 2]
1 ወእቀውም፡ ውስተ፡ ምእቃብየ፡ ወአዐርግ፡ ዲበ፡ ኮኲሕ፡ ወአጾዕ፡ አአምሮ፡ ዘይነብበነኒ፡ በእግዚአብሔር፡ አወስኦ፡ ለዘይዛለፈኒ።
2 ወአውስአኒ፡ እግዚአብሔር፡ ወይቤለኒ፡ ጸሀፍ፡ ነገረ፡ ራዕይ፡ ውስተ፡ ሰሌዳ፡ ከመ፡ ያፍጥን፡ ዘያነብብ።
3 እስመ፡ ዓዲሁ፡ ራእይ፡ በበዕድሜሁ፡ ወይሠርቅ፡ በማዕዶቱ፡ ወአኮ፡ ለከንቱ፡ ወአመኒ፡ በማዕዶቱ፡ ወአኮ፡ ለከንቱ። ወአመኒ፡ ጎንደየ፡ ጽንሖ፡ እስመ፡ ይመጽእ፡ ወይበጽሕ፡ ወኢይጎነዲ።
4 ወእመሰ፡ ተመይጠ፡ ኢትሠምር፡ ቦቱ፡ ነፍስየ፡ ጻድቅሰ፡ በአሚን፡ የሐዩ።
5 ወብእሲ፡ ነባቢ፡ ወመስተሐቅር፡ ኢየኀልፍ፡ ኢበምንትኒ፡ በከመ፡ አርሐበ፡ ኢበምንትኒ፡ በከመ፡ አርሐበ፡ ነፍሶ፡ ሲኦል፡ ወኢይጸግብ፡ ከመ፡ ሞት፡ ወያሰተጋብእ፡ ኀቤሁ፡ ኲሎሙ፡ አሕዛብ።
6 ዘንተ፡ ኲሎ፡ ይሜስሉ፡ ላዕሌሁ፡ ወይትናገሩ፡ ምሳሌሁ፡ ወይብሉ፡ አሌሎቱ፡ ለዘያስተጋብ፡ ዘኢኮነ፡ ዘዘአሀሁ፡ እስከ፡ ምንትኑ፡ ከብድ፡ ሎቱ፡ ጋለ፡ ዓቢየ።
7 እስመ፡ ግብተ፡ ይትነሳእ፡ ወይነስኮ፡ ወይተግሁ፡ መመክርቲከ፡ ወትከውኖሙ፡ እንተ፡ ሕብልያ፡ ወየሐበልዩከ።
8 እስመ፡ አንተ፡ ሐብለይከ፡ ብዙኃነ፡ አሕዛበ፡ ወየሐበልዩከ፡ ኰሎሙ፡ አለ፡ ተርፈ፡ ሕዝብ፡ በእንተ፡ ደመ፡ ሰብእ፡ ወዓመፃ፡ አህጉር፡ ወበሐውርት፡ ወዘኲሎሙ፡ እለ፡ ይነብር፡ ውስቴታ።
9 አሌሎ፡ ለዜትዔገል፡ ትዕግልተ፡ እኩየ፡ ለቤቱ፡ ከመ፡ ስርር፡ ውስተ፡ አርም፡ እጎሊሁ፡ ከመ፡ ይፃእ፡ እምእደ፡ እኪያን።
10 ወመከርከ፡ ኃሳረ፡ ለቤትከ፡ ወተዐደውከ፡ ብዙኀ፡ አሕዛበ፡ ወዐመፀት፡ ነፍስከ።
11 እስመ፡ እብንኒ፡ ትግዕር፡ እምውስተ፡ አረፍት፡ ወሦክ፡ ያወስእ፡ እምዕፅ።
12 አሌሎ፡ ለዘየሐንጽ፡ አህጉረ፡ በደም፡ ወያጸንዕ፡ አህጉረ፡ በዓመፃ።
13 ኢኮነኬ፡ ዝንቱ፡ እምኀበ፡ እግዚአብሔር፡ ዘኰሎ፡ ይመልክ፡ ወኀልቁቁ፡ በዙኃን፡ አህዛብ፡ በእሳት፡ ወተመንደቡ፡ በዙኃን፡ ህዝብ።
14 እስመ፡ መልአ፡ ኲሉ፡ ዓለመ፡ አእምሮ፡ ስብሐተ፡ እግዚአብሔር፡ ወይደፍኖሙ፡ ከመ፡ ማይ፡ ብዙኀ።
15 ጦቤሎ፡ ለዜሰትዩ፡ ሌቢጹ፡ በዘይመውት፡ ወያሰክሮ፡ በዘየኀስር፡ ከመ፡ ይነጽር፡ ውስተ፡ በአታተ፡ ምሕራሞሙ።
16 ስቴ፡ ኃሳረ፡ ለክብርከ፡ ወርዌ፡ ወአንተሂ፡ ልብ፡ ረዓድ፡ ዋእንቀለቅል፡ እስመ፡ ዐገተከ፡ ጽዋዐ፡ የማኑ፡ ለእዚአብሔር፡ ወታገብእ፡ ኃሳረ፡ ላዕለ፡ ክብርክ።
17 እስመ፡ ርኲሰ፡ ሊባኖስ፡ ይደፍንከ፡ ወሕርትማነ፡ ወአርዌ፡ ገዳም፡ ያደንግፀከ፡ በእንተ፡ ከመ፡ ሰብእ፡ ወኃጢአተ፡ ብሔር፡ ወአህገር፡ ወኲሎሙ፡ እለ፡ ይነብር፡ ውስቴታ።
18 ምንተ፡ ይበቊዕ፡ ገልፎ፡ መገለፋ፡ ወሰብኩ፡ ወገብሩ፡ ሐሰተምትሐተ፡ ዔን፡ ወይትአመኖ፡ ለገባሪሁ፡ በዘለ፡ ለሊሁ፡ ብረ፡ ከመ፡ ይግበር፡ ጣዖት፡ በሀመ።
19 አሌሎ፡ ለዘይቤሎ፡ ላዕፅ፡ ንቃህ፡ ወተንስእ፡ ወይቤሎ፡ ለእብን፡ ተለዐል፡ ወውርቅ፡ ወበብረር፡ ወአልቦ፡ ነፍሰ።
20 ወእግዚአብሔርሰ፡ ውስተ፡ ጽርሐ፡ መቅደሱ፡ ወትፈርሆለ፡ ኲላ፡ ምድር፡ እምቅድመ፡ ገጹ።
=== chapter 3 ===
[Chapter 3]
1 እግዚኦ፡ ሰማዕኩ፡ ድምጸከከ፡ ወፈራህኩ።
2 ርኢኩ፡ ግብከ፡ ወአንከርኩ፡ በማእከለ፡ ክልኤ፡ ለእንስሳ፡ ርኢኩከ፡ ሶበ፡ ይቀርብ፡ ዐመቲሁ፡ አአምረከ፡ ወሶበሰ፡ ይበጽሕ፡ ጊዜሁ፡ እሌብወከ፡ ወሶበ፡ ትደነግጽ፡ ነፍስየ፡ እመንሱት፡ ተዘከረኒ፡ በምሕረት።
3 እግዚአብሔርሰ፡ እምቴማን፡ ይመጽእ፡ ወቅዱስ፡ እምደብረ፡ ፋራን፡ ወእምአህገረ፡ ይሁዳ፡ ከደነ፡ ሰማያተ፡ ስኑ፡ ወመልአ፡ ምድረ፡ ስብሐቲሁ።
4 ወፀዳሉኒ፡ ከመ፡ ብርሃን፡ ውእቱ፡ አቅርንት፡ ውስተ፡ እደዊሁ፡ ወረሰየ፡ ፍቁረ፡ በጽንዐ፡ ኃይሉ።
5 ወየሐውር፡ ቃለ፡ ቅድመ፡ ገጹ፡ ወይወፅእ፡ ውስተ፡ ገዳም፡ እምድኅረ፡ እገሪሁ።
6 ወሶበ፡ ቀውም፡ ታደለቀልቅ፡ ምድር፡ ወሶበ፡ ይኔጽር፡ ይትመሰዉ፡ አህዛብ። ወይትቀጠቀዉ፡ አድባር፡ በኃይሉ፡ ወይትመሰዉ፡ አውግር፡ ዘእምዓለም፡ ወፍኖቶሂ፡ ርኢኩ፡ ዝምዓለም።
7 ወደምገፁ፡ አዕጻዳት፡ ኢትዮጵያ፡ ወማህደረ፡ ምድር፡ ምድያም፡ ይደነግፃ።
8 ኢትትመዐዕ፡ ላዕለ፡ አፍላግ፡ እግዚኦ፡ ወኢይኩን፡ መዐትከ፡ ላእለ፡ እፍላግ፡ ወኢመቅሠፍትከ፡ ዲበ፡ አፍራሲከ፡ ወአፍራሲከኒ፡ መድኃኒት፡ ውእቱ።
9 ወተርከ፡ ወወሰቀ፡ ቃስተከ፡ ዲበ፡ አብትር፡ ይቤ፡ እግዚአብሔር፡ ወይሠጥቅ፡ ምድረ፡ አፍላለግ።
10 ይሬእዩከ፡ ወይፄዐሩ፡ አሕዛብ፡ ዋይዘሮማይ፡ በውስተ፡ ፍኖት፡ ወወሀበት፡ ቀላይ፡ ቃለ፡ ወአልዐለት፡ ግርማሃ።
11 ተንስኡ፡ ፀሐይ፡ ወወርኀ፡ ወቆሙ፡ በስርዓትከ፡ በመብረቀ፡ አኅፃከ፡ የሐውሩ፡ ወበብርሃነ፡ መብረቀ፡ ወልታከ።
12 በመዐትከ፡ ውሕደት፡ ምድር፡ ወታወረዶሙ፡ ለአሕዛብ፡ በመዐትከ።
13 ወፃእከ፡ ታድኀኖሙ፡ ለሕዝብ፡ ከመ፡ ታድኀኖሙ፡ ለቅቡኦኒከ፡ ወወደይከ፡ ውስተ፡ አርእስቲሆሙ፡ ለኃጥኦን፡ ሞተ። ወንሳእከ፡ ማእሰረከ፡ እስከ፡ ክሳዶሙ።
14 ወመተር፡ አርእስተ፡ ኃያላን፡ በድንጋፄ፡ ወያደለቀልቁ፡ ባቲ፡ ወያርኃው፡ ልጓማቲሆሙ፡ ከመ፡ ዜበልዕ፡ ነዳ፡ በጽምሚት።
15 ወተጽዕን፡ አፍራሲከ፡ በውስተ፡ ባሕር፡ ወየሀውኩ፡ ማየ፡ ብዙኀ።
16 ተዐቀብኩ፡ ወደንገፀኒ፡ ከርስየ፡ እምቃለ፡ ጸሎተ፡ ክናፍርየ፡ ወቦአ፡ ረዓድ፡ ውስተ፡ አዕጽምትየ፡ ወበመትሕት፡ አንቀልቀለ፡ ኃይልየ፡ ወአዐርፍ፡ በዕለተ፡ ምንዳቤየ፡ ከመ፡ እዕርግ፡ ውስተ፡ ሕዝብ፡ ዘፈለስ።
17 እስመ፡ በለስኒ፡ ኢትፈሪ፡ ወአልቦ፡ ቀምሐ፡ ውስተ፡ ዐጸደ፡ ወይን፡ ወሐሰወት፡ ግብራ፡ ዘይት፡ ወራውህኒ፡ ኢይፈሪ፡ እክለ። ወተሐጒሉ፡ አባግዕ፡ አመብልዕ፡ አመብልዕ፡ ወአልህምትኒ፡ ኢይትረከቡ፡ በውስተ፡ ጎል።
18 ወንሰ፡ ብግዚአብሔር፡ እትፌሣሕ፡ ወእትኀሠይ፡ በአምላኪየ፡ ወመድኃንየ።
19 እግዚአብሔር፡ አምላኪየ፡ ወኃይየ፡ ዘያቀውሞን፡ ለእገርየ፡ ለዝሎፋ፡ ወያዐርገኒ፡ ውስተ፡ መልዕልት፡ ካማ፡ እማእ፡ እማኃልይሁ።