##### edition  (gez) — Text of the EOTC printed Bible
=== chapter 1 ===
[Chapter 1]
=== chapter 2 ===
[Chapter 2]
1 ወአምጽአ፡ ኢዮስያስ፡ ፋሲካ፡ ለአምልኩ፡ ውስተ፡ ኢሩሳሌም፡ ወጠብሐ፡ ፋሲካ፡ አመ፡ ዐሡሩ፡ ወረቡዑ፡ ለቀዳሚ፡ ወርኅ።
2 ወአቀሞሙ፡ ለካህናት፡ በአልባሲሆሙ፡ ወሠርዖሙ፡ በበ፡ እብሬቶሙ፡ በቤተ፡ መቅደስ፡ ዘእግዚአብሔር።
3 ወይቤሎሙ፡ ለሌቃውያን፡ ተቀነዩ፡ ለካህናተ፡ እስራኤል፡ ወቀድስዎሙ፡ በሥርዐተ፡ ቅድስት፡ ታቦቱ፡ ለእግዚአብሔር፡ በውስተ፡ ቤት፡ ዘሐነጸ፡ ሰሎሞን፡ ወልደ፡ ዳዊት፡ ንጉሥ።
4 ወአልብክሙ፡ ጸዊሮታ፡ በውስተ፡ መታክፍቲክሙ፡ ወይእዜኒ፡ አምልክዎ፡ ለእግዚአብሔር፡ አምላክነ፡ ወአስተፈሥሑ፡ ሕዝበ፡ እስራኤል፡ መተደለዉ፡ በበ፡ በሓውርቲክሙ፡ ወበበአንጋዲክሙ።
5 ወከመ፡ መጽሐፉ፡ ለዳዊት፡ ንጉሠ፡ እስራኤል፡ በከመ፡ ዕበዩ፡ ለሰሎሞን፡ ወልዱ፡ ወቁሙ፡ ውስተ፡ ቤተ፡ መቅደሱ፡ በበደወልክሙ፡ ሌዋውያን፡ ቅድመ፡ አኀዊክሙ፡ ደቂቀ፡ እስራኤል፡ በሢመትክሙ።
6 ወጥብሑ፡ ፋሲካ፡ ወአስተዳልዉ፡ መሥዋዕተ፡ አኀዊክሙ፡ ወግበሩ፡ በሕገ፡ እግዚአብሔር፡ ዘተውህበ፡ ለሙሴ።
7 ወጸገዎሙ፡ ኢዮስያስ፡ ለሕዝብ፡ እለ፡ ሀለዉ፡ ህየ፡ አባግዐ፡ ወአጣሌ፡ ፫፼፡ ወአልህምተ፡ ፴፻፡ ወከመዝ፡ ወሀበ፡ ለህዝብ፡ ወለካህናት፡ ወለሌዋውያን፡ እምቤተ፡ ንጉሥ፡ ትእዛዘ።
8 ወወሀበ፡ ኬልቅያስ፡ ወዘካርያስ፡ ወሲያሎስ፡ ሊቃናተ፡ ቤተ፡ መቅደስ፡ ለካህናት፡ ለፈሰሲካሆሙ፡ አባግዐ፡ ፳፻ወ፮፻፡ ወአልህምተ፡ ፫፻።
9 ወኢኮንያስ፡ ወስምያስ፡ ወናትናኤል፡ እኁሁ፡ ወሳቢያስ፡ ወኪያሎስ፡ ወኢዮራም፡ መሳፍንት፡ ወሀብዎሙ፡ ለሌዋውያን፡ ለፋሲካሆሙ፡ አባግዐ፡ ፲፻፡ ወአልህምተ፡ ፯፻።
10 ወከመዝ፡ ገብሩ፡ ሠናየ፡ ዘበሕጉ፡ ካህናት፡ ወሌዋውያን፡ ወናእተኒ፡ ተሴሰዩ፡ በበነገዶሙ።
11 ወበበምስፍና፡ አበዊሆም፡ ቅድመ፡ ሕዝብ፡ አብኡ፡ ለእግዚአብሔር፡ በከመ፡ ጽሑፍ፡ ውስተ፡ መጽሐፈ፡ ሙሴ፡ ወከማሁ፡ በጽባሕኒ።
12 ጠብሑ፡ ፍሥሐ፡ በከመ፡ ሕጎሙ፡ ወመሥዋዕተ፡ አብሰሉ፡ በጽህርት፡ ወበመቃጽው፡ ወመዐዛ፡ ሠናይ።
13 ፈነዉ፡ ለኵሉ፡ ሕዝብ፡ ወእምድኅረ፡ ዝንቱ፡ ሠርዑ፡ ሎሙ፡ ወለአኀዊሆሙ፡ ካህናት፡ ደቂቀ፡ አሮን።
14 ወካህናትሰ፡ ገብሩ፡ መሥዋዕተ፡ ሥቡሕ፡ እስከ፡ ኀለፈ፡ እምጊዜሁ፡ ወሌዋዊያንኒ፡ ሠርዑ፡ ሎሙ፡ ወለአኀዊሆሙ፡ ደቂቀ፡ አሮን፡ ካህናት።
15 ወካህናተ፡ መዝሙርኒ፡ ደቂቀ፡ አሳፍ፡ በሢመቶሙ፡ በሥርዐተ፡ ዳዊት፡ ወአሳፍ፡ ወዘካርያስ፡ ወአዲኑስ፡ እለ፡ እምኀበ፡ ንጉሥ።
16 ወዐጸውትኒ፡ ዘኵሉ፡ ኆኃት፡ ወአልቦ፡ ዘያፀርዕ፡ እምእብሬቱ፡ እስመ፡ ሌዋዊያን፡ አኀዊሆሙ፡ ያስተዳልዉ፡ ሎሙ።
17 ወፈጸሙ፡ መሥዋዕተ፡ እግዚአብሔር።
18 ወውእተ፡ አሚረ፡ አብኡ፡ ፋሲካሆሙ፡ ወአብኡ፡ መሥዋዕቶሙኒ፡ ውስተ፡ ምሥዋዐ፡ እግዚአብሔር፡ በከመ፡ አዘዘ፡ ኢዮስያስ፡ ንጉሥ።
19 ወገብሩ፡ ደቂቀ፡ እስራኤል፡ እለ፡ ሀለዉ፡ በእማንቱ፡ መዋዕል፡ ፋሲካሆሙ፡ በዓለ፡ ናእት፡ ሰቡዐ፡ መዋዕለ።
20 ወኢተገብረ፡ ዘከማሁ፡ ፋሲካ፡ በውስተ፡ እስራኤል፡ እምአመ፡ ሳሙኤል፡ ነቢይ።
21 ወኵሎሙ፡ ነገሥተ፡ እስራኤል፡ ኢገብሩ፡ ዘከማሁ፡ ፋሲካ፡ ዘከመ፡ ገብረ፡ ኢዮስያስ፡ ወካህናት፡ ወሌዋውያን፡ ወአይሁድ፡ ወኵሉ፡ እስራኤል፡ እለ፡ ሀለዉ፡ ህየ፡ እለ፡ ፈለሱ፡ ኢየሩሳሌም።
22 አመ፡ ፲ወ፰፡ ዓመተ፡ መንግሥቱ፡ ለኢዮስያስ፡ ገብረ፡ ውእቱ፡ ፋሲካ።
23 ወቆመ፡ ግብሩ፡ ለኢዮስያስ፡ ቅድመ፡ አምላኩ፡ በልብ፡ ዘምሉእ፡ ፍርሀተ፡ እግዚአብሔር።
24 በከመ፡ ጽሑፍ፡ በመዋዕለ፡ ትካት፡ በእንተ፡ እለ፡ አበሱ፡ ወጌገዩ፡ ለእግዚአብሔር፡ እምነ፡ ኵሉ፡ አህዛብ፡ ወመንግሥት፡ ወአምዕዕዎ፡ ወአቀመ፡ እግዚአብሔር፡ ቃሎ፡ ላዕለ፡ እስራኤል።
25 ወምስለ፡ ዝንቱ፡ ኵሉ፡ ግብሩ፡ ለኢዮስያስ፡ ወተንሥአ፡ ፈርዖን፡ ንጉሠ፡ ግብጽ፡ ወነሥአ፡ ፀባኢተ፡ በከርቃሚስ፡ በኀበ፡ ፈለገ፡ ኤፍራጥስ፡ ወፅአ፡ ተቀበሎሙ፡ ኢዮስያስ።
26 ወለአከ፡ ኀቤሁ፡ ንጉሠ፡ ግብጽ፡ እንዘ፡ ይብል፡ ምንተአ፡ ብየ፡ ምስሌከአ፡ ንጉሠ፡ ይሁዳአ።
27 ኢኮነአ፡ ላዕሌከአ፡ ተፈነውኩ፡ እምኀበ፡ እግዚአብሔር፡ እግዚእ፡ እስመ፡ ፈለገ፡ ኤፍራጢስ፡ እፀብእ፡ ወይእዜኒ፡ እግዚአብሔር፡ ምስሌየ፡ ውእቱ፡ ወእግዚአብሔር፡ ኀቤየ፡ ሀሎ፡ ወውእቱ፡ ይረድአኒ፡ ተገሐሥ፡ ወኢትትቃወምአ፡ ምስለአ፡ እግዚአብሔርአ።
28 ወአበየ፡ ተግሕሦ፡ ኢዮስያስ፡ ምስለ፡ ሰረገላቲሁ፡ ወአኀዘ፡ ይትቃተል፡ ወአበየ፡ ሰሚዐ፡ ቃለ፡ አፉሁ፡ ለእግዚአብሔር፡ በኀበ፡ ኤርምያስ፡ ነቢይ።
29 አላ፡ ቆመ፡ ይትቃተሎ፡ በገዳም፡ ምስለ፡ አሐዱ፡ ወወረዱ፡ መላእክት፡ ኀበ፡ ኢዮስያስ፡ ንጉሥ።
30 ወይቤሎሙ፡ ንጉሥ፡ ለደቂቁ፡ አውፅኡኒ፡ እምውስተ፡ ቀትል፡ እስመ፡ ፈድፋደ፡ ደከምኩ። ወአውፅእዎ፡ ደቁ፡ በጊዜሃ፡ እምውስተ፡ ቀትል።
31 ወተጽዕነ፡ ዲበ፡ ካልእ፡ ሰረገላቲሁ፡ ወአተወ፡ ኢየሩሳሌም፡ በህየ፡ ሞተ፡ ወተቀብረ፡ ውስተ፡ መቃብረ፡ አቡሁ።
32 ወለሐውዎ፡ ለኢዮስያስ፡ በኵሉ፡ ይሁዳ፡ ወበከዮ፡ ኤርምያስ፡ ለኢዮስያስ፡ ወበከይዎ፡ ኵሎሙ፡ ምስለ፡ አንስት፡ እስከ፡ ዛቲ፡ ዕለት፡ ወተውህበ፡ ለኵሉ፡ ዘመደ፡ እስራኤል፡ ከማሁ፡ ይግበሩ፡ ለዝሉፉ።
33 ወተጽሕፈ፡ ዝንቱ፡ ውስተ፡ ነቢያተ፡ ነገሥተ፡ ይሁዳ፡ ወኵሎ፡ ዘከመ፡ ገብረ፡ ኢዮስያስ፡ ግብሮ፡ ወክብሮ፡ ወአእምሮቶ፡ ሕገ፡ እግዚአብሔር፡ ወዘቀዲሙኒ፡ ገብረ፡ ወዘድኅረኒ፡ ተጽሕፈ፡ ውስተ፡ መጽሐፈ፡ ነቢያቶሙ፡ ለነገሥተ፡ እስራኤል፡ ወዘይሁዳ።
34 ወነሥእዎ፡ ሕዝብ፡ ለኢኮንያስ፡ ወልደ፡ ኢዮስያስ፡ ወአንገሥዎ፡ ህየንተ፡ ኢዮስያስ፡ አቡሁ፡ እንዘ፡ ፳ወ፫፡ ዓመቱ፡ ሎቱ፡ እምልደቱ።
35 ወነግሠ፡ ለእስራኤል፡ በኢየሩሳሌም፡ ፫፡ አውራኀ፡ ወአተወ፡ ምስሌሁ፡ ንጉሠ፡ ግብጽ፡ ኢየሩሳሌም፡ ያንግሦ።
36 ወአቅተዎሙ፡ ለሕዝብ፡ ፻፡ መክሊተ፡ ብሩር፡ ወአሐተ፡ መክሊተ፡ ወርቅ።
37 ወአንገሦ፡ ንጉሠ፡ ግብጽ፡ ለኢዮአቄም፡ እኁሁ፡ ንጉሠ፡ ለይሁዳ፡ በኢየሩሳሌም።
38 ወሞቅሖሙ፡ ኢዮአቄም፡ ለመሳፍንት፡ ወአኀዞ፡ ለዛርዮን፡ እኁሁ፡ ወአእተዎ፡ እምነ፡ ብሔረ፡ ግብጽ።
39 ወ፳ወ፭፡ ዓመቱ፡ ሎቱ፡ እምልደቱ፡ ለኢዮአቄም፡ አመ፡ ይንግሥ፡ ለይሁዳ፡ በኢየሩሳሌም፡ ወገብረ፡ እኩየ፡ ቅድመ፡ እግዚአብሔር።
40 ወእምዝ፡ ዐርገ፡ ናቡደከነጾር፡ ንጉሠ፡ ባቢሎን፡ ወሞቅሖ፡ በመዋቅሕተ፡ ኀጢን፡ ወወሰዶ፡ ባቢሎን።
41 ወነሥአ፡ ናቡከደነጾር፡ ንዋየ፡ ቅድሳት፡ ዘእግዚአብሔር፡ ወአእተወ፡ ባቢሎን፡ ወሠርዐ፡ ውስተ፡ ጽርሑ።
42 ወተጽሕፈ፡ ውስተ፡ መጽሐፈ፡ ነቢያቲሆሙ፡ ለነገሥት።
43 ወእምዝ፡ አመ፡ ነግሠ፡ ኢዮአቄም፡ ወልዱ፡ በሳምንት፡ ዓመተ፡ ዚአሁ።
44 ነግሠ፡ ሠለስተ፡ አውራኀ፡ ወዐሡረ፡ መዋዕለ፡ በኢየሩሳሌም፡ ወገብረ፡ እኩየ፡ ቅድመ፡ እግዚአብሔር።
45 ወበይእቲ፡ ዓመት፡ ፈነወ፡ ናቡከደነጾር፡ ወአእተዎ፡ ባቢሎን፡ ምስለ፡ ንዋየ፡ ቅድሳት፡ ዘእግዚአብሔር።
46 ወአንገሦ፡ ለሴዴቅያስ፡ ለይሁዳ፡ ወለኢየሩሳሌም፡ እንዘ፡ ፳ወ፩፡ ዓመቱ፡ ሎቱ፡ እምልደቱ፡ ወነግሠ፡ ፲ወ፩፡ ዓመተ።
47 ወገብረ፡ እኩየ፡ ቅድመ፡ እግዚአብሔር፡ ወኢፈርሀ፡ እምነ፡ ቃለ፡ እግዚአብሔር፡ ዘነበበ፡ በአፈ፡ ኤርምያስ፡ ነቢይ።
48 ወአምሐሎ፡ ናቡከደነጾር፡ ንጉሥ፡ በስመ፡ እግዚአብሔር፡ ወሐሰዎ፡ ወአግዘፈ፡ ክሳዶ፡ ወአዕበየ፡ ልቦ፡ ወክሕደ፡ በሕገ፡ እግዚአብሔር፡ አምላከ፡ እስራኤል።
49 ወመሳፍንተ፡ ሕዝብኒ፡ ወካህናትኒ፡ ብዙኀ፡ አበሱ፡ ወፈድፋደ፡ ጌፈዩ፡ እምነ፡ ርኵሶሙ፡ ለኵሉ፡ አሕዛብ፡ ወገመኑ፡ ወቅደሶ፡ ለእግዚአብሔር፡ ዘተቀደሰ፡ በኢየሩሳሌም።
50 ወለአከ፡ እግዚአብሔር፡ ዘአበዊሆሙ፡ ምስለ፡ መልአኩ፡ ይገሥጾሙ፡ ወይሚጦሙ፡ እስመ፡ ይምህኮሙ፡ ወይምህክ፡ መቅደሶሙኒ።
51 ወእሙንቱሰ፡ ተሳለቁ፡ ላዕለ፡ መላእክቱ፡ ወአመ፡ ይነቦሙ፡ እግዚአብሔር፡ ይሥሕቅዎሙ፡ ለነቢያት።
52 እስከ፡ ተምዕዐ፡ ላዕለ፡ ሕዝቡ፡ እስመ፡ ምክዕቢተ፡ ያመልኩ፡ ወአዘዘ፡ ይዕርጉ፡ ላዕሌሆሙ፡ ነገሥተ፡ ፋርስ፡ ዘከላዴዎን።
53 ወመጽኡ፡ ወቀተሉ፡ ወራዙቶሙ፡ በኀጺን፡ ዐውደ፡ መቅደሶሙ፡ ወኢምህኩ፡ ወሬዛ፡ ወኢድንግለ፡ ወኢልሂቀ፡ ወኢንኡሰ፡ ኵሎ፡ ቀተሉ።
54 ወኵሎ፡ ንዋየ፡ ቅድሳት፡ ዘእግዚአብሔር፡ ዓቢየ፡ ወንኡሰ፡ ወታቦተኒ፡ ዘእግዚአብሔር፡ ወመዛግብተኒ፡ ዘቤተ፡ ንጉሥ፡ ነሥኡ፡ ወወሰዱ፡ ባቢሎን።
55 ወአውዐዩ፡ ቤተ፡ እግዚአብሔር፡ ወነሠቱ፡ አረፋቲሃ፡ ለኢየሩሳሌም፡ ወአውዐዩ፡ ማኅፈዲሃ፡ በእሳት።
56 ወአማሰኑ፡ ኵሎ፡ መሠንያ፡ ወፄወውዎሙ፡ ለእለ፡ ተርፉ፡ በኵናት።
57 ወወሰድዎሙ፡ ባቢሎን፡ ኀበ፡ ንጉሠ፡ ፋርስ፡ ሰብኦሙ፡ ወደቂቆሙ፡ ከመ፡ ይብጻሕ፡ ቃለ፡ እግዚአብሔር፡ ዘነበበ፡ በአፈ፡ ኤርምያስ።
58 ከመ፡ ትሠምር፡ ምድር፡ በሰናብቲሃ፡ ወበኵሉ፡ መዋዕለ፡ ሙስናሃ፡ ታሰነብት፡ ከመ፡ ይትፈጸም፡ ፸፡ ዓመት።
=== chapter 3 ===
[Chapter 3]
1 በመንግሥተ፡ ቂሮስ፡ ንጉሠ፡ ፋርስ፡ አመ፡ ቀዳሚ፡ ዓመት፡ ይበጽሕ፡ ቃለ፡ እግዚአብሔር፡ ዘነበበ፡ በአፈ፡ ኤርምያስ።
2 ወአንሥአ፡ እግዚአብሔር፡ መንፈሰ፡ ቂሮስ፡ ንጉሠ፡ ፋርስ፡ ወሰበከ፡ ውስተ፡ ኵሉ፡ መንግሥቱ፡ ወጸሐፈ፡ እንዘ፡ ይብል።
3 ከመዝአ፡ ይቤአ፡ ቂሮስ፡ ንጉሠ፡ ፋርስ፡ ኪያየ፡ አንገሠኒ፡ ለዓለም፡ እግዚአ፡ እስራኤል፡ እግዚአብሔር፡ ልዑል።
4 ወአቅደመኒ፡ ኪያየ፡ አሕኒጸ፡ ሎቱ፡ ቤተ፡ በኢየሩሳሌም፡ ዘይሁዳ።
5 እመቦ፡ እምኔክሙ፡ እምነ፡ ሕዝቡ፡ ወእግዚአብሔር፡ የሐሉ፡ ምስሌሁ፡ ወይዕርግ፡ ኢየሩሳሌም፡ ዘይሁዳ፡ ወይሕንጽ፡ ለእግዚአ፡ እስራኤል፡ ማኅደረ፡ እግዚአብሔረ፡ በኢየሩሳሌም።
6 ወኵልክሙ፡ እለ፡ ሀለውክሙ፡ በበ፡ በሐውርቲክሙ፡ ርድእዎ፡ በበ፡ ደወልክሙ፡ ወርቀ፡ ወብሩረ።
7 ወአፍራሰ፡ ወእንስሳ፡ ምስለ፡ ኵሉ፡ ዘቦ፡ ብፅዓት፡ ወወስኩ፡ አንትሙኒ፡ ለቤተአ፡ መቅደስአ፡ ዘእግዚአብሔርአ።
8 ወይበጽሑ፡ መሳፍንተ፡ ነገዶሙ፡ ለበሓውርተ፡ ይሁዳ፡ ወብንያምኒ፡ ሕዝብ፡ ወካህናትኒ፡ ወሌዋውያንኒ፡ ወኵሉ፡ ዘአንሥአ፡ እግዚአብሔር፡ መንፈሶ፡ ይዕርግ፡ ወይሕንጽ፡ ቤተ፡ እግዚአብሔር፡ ዘውስተ፡ ኢየሩሳሌም።
9 ወእለኒ፡ አድያሞሙ፡ ይረድእዎሙ፡ በኵሉ፡ ወርቀ፡ ወብሩረ፡ አፍራሰ፡ ወእንስሳ፡ ወእለኒ፡ ቦሙ፡ ብፅዓተ፡ ወዘኵሉ፡ ዘፈቀደ፡ ልቡ።
10 ወአውፅአ፡ ቂሮስ፡ ንጉሥ፡ ንዋየ፡ ቅድሳት፡ ዘእግዚአብሔር፡ ዘአእተወ፡ ናቡደከነጾር፡ እምነ፡ ኢየሩሳሌም፡ ወሠርዖ፡ ውስተ፡ ቤተ፡ አማልክቲሁ።
11 ወሶበ፡ አውፅአ፡ ቂሮስ፡ ንጉሠ፡ ፋርስ፡ አወፈዮ፡ ለሚተረዳቴ፡ ዐቃቢሁ።
12 እምኀቤሁ፡ ተመጠወ፡ ሳምናስ፡ ዘተሠይመ፡ ላዕለ፡ ይሁዳ።
13 ወከመዝ፡ ኊልቁ፡ መዋጽሕት፡ ዘወርቅ፡ ፲፻፡ መዋጽሕት፡ ዘብሩር፡ ፲፻፡ አጽሕልት፡ ዘብሩር፡ ፳ወ፱፡ ፍያላት፡ ዘወርቅ፡ ፴፡ ወዘብሩር፡ ፳፻፡ ወ፬፻ወ፲፡ ወባዕዳንሂ፡ ቊስቋሳት፡ ፲፻።
14 ወኵሉ፡ ንዋይ፡ ዘተመጠወ፡ ዘወርቅኒ፡ ወዘብሩርኒ፡ ድሙር፡ ፶፻ወ፬፻፡ ወ፷ወ፱።
15 ዘወሰደ፡ ሰምናሶር፡ ምስለ፡ ፄዋ፡ እምነ፡ ባቢሎን፡ አእተወ፡ ኢየሩሳሌም።
16 ወቦ፡ እምውስቴቶሙ፡ እለ፡ አጽሐፎሙ፡ አርጥርክስርክሴስ፡ ንጉሠ፡ ፋርስ፡ በበደወሎሙ፡ ለይሁዳኒ፡ ወበኢየሩሳሌምኒ፡ ቤልሞስ፡ ወሚጠረዳጤ፡ ወጤቤልዮስ፡ ወራቲሞስ፡ ወብሔልቢጢሞስ፡ ወሰሜልዮስ፡ ጸሓፊ፡ ወኵሎሙ፡ እለ፡ እምታሕተ፡ እሉ፡ እለ፡ ይነብሩ፡ ውስተ፡ ሰማርያ፡ ወእለኒ፡ ውስተ፡ ባዕድ፡ በሓውርት፡ ጸሐፉ፡ መጽሐፈ፡ እንዘ፡ ይብሉ።
17 ለንጉሥአ፡ ለአርጥርክስርክሴስአ፡ ለእግዚኦሙአ፡ እምኀበ፡ አግብርቲከ፡ ራቲሞስ፡ ዘይሰግድ፡ ለከ፡ ወሰሜልዮስ፡ ጸሓፊ፡ ወኵሎሙ፡ እለ፡ እምታሕቴሆሙ፡ ወእለኒ፡ ውስተ፡ ቄሌ፡ ዘሶርያ፡ ወፊንቄ።
18 ወይእዜኒአ፡ ከመ፡ ታእምር፡ እግዚኦሙ፡ ንጉሥ፡ ናሁ፡ አይሁድ፡ እለ፡ ዐርጉ፡ እምኀቤክሙ፡ ኀቤነ፡ ሖሩ፡ ኢየሩሳሌም፡ ሀገር፡ እኪት፡ ወዐላዊት፡ የሐንጽዋ፡ አረፋቲሃ፡ ወምሥያጣቲሃኒ፡ ወቤተኒ፡ መቅደስ፡ ያሐይዉ።
19 ወእምከመአ፡ ተሐንጸት፡ ይእቲ፡ ሀገር፡ ወኀልቀ፡ አረፋቲሃ፡ ኢያገብኡ፡ እንከ፡ ጸባሕተ፡ ወዓዲ፡ መንግሥተ፡ ይትሀየዱ።
20 ወይገብሩ፡ ቤተ፡ መቅደስ፡ ወያሤንዩ፡ ወይእዜኒ፡ ኢትጸመም፡ በበይነ፡ ዝንቱ።
21 ለአክ፡ ኀበ፡ ቂሮስ፡ ንጉሥ፡ ከመ፡ ይኅሥሡ፡ ውስተ፡ መጻሕፍተ፡ ነቢያት፡ ዘአበዊከ።
22 ወትረክብ፡ ጽሑፈ፡ በእንተ፡ ዝንቱ፡ እስመ፡ ይእቲ፡ ሀገር፡ ዐላዊተ፡ ነገሥት፡ ወሠቃዪተ፡ አህጉር።
23 ወአይሁድኒ፡ ዐላዊያን፡ ወከሓድያን፡ እምፍጥረቶሙ፡ ወበበይነ፡ ዝንቱ፡ ተማሰነት፡ ይእቲ፡ ሀገር።
24 ወይእዜኒ፡ እግዚኦሙ፡ ንጉሥ፡ ናበጽሕ፡ ለከ፡ ከመ፡ እምከመ፡ ተሐንጸት፡ ይእቲ፡ ሀገር፡ ወቆማ፡ አረፋቲሃ፡ ኢያኀልፉክሙ፡ ላዕለ፡ ቄሌ፡ ዘሶርያአ፡ ወፊንቂኣ።
25 ወእምዝ፡ ጸሐፈ፡ ሎሙ፡ ንጉሥ፡ ለራቲሞስ፡ ዘጸሐፈ፡ ሎቱ፡ ወለቤሔልሜተም፡ ወለሰሜልዮስ፡ ጸሓፊ፡ ወለእለ፡ ተርፉ፡ እለ፡ እምታሕቴሆሙ፡ እለ፡ ይነብሩ፡ ውስተ፡ ሰማርያ፡ ወፊንቂ፡ በከመ፡ ጸሐፉ፡ ሎቱ፡ እንተ፡ ትብል።
26 አንበብኩ፡ መጽሐፈአ፡ እንተአ፡ ፈነውክሙ፡ ሊተ፡ ወአዘዝኩ፡ ይትከሠቱ፡ ወረከቡ፡ ከመ፡ ይእቲ፡ ሀገር፡ እምፍጥረታ፡ ዐላዊተ፡ ነገሥት፡ ይእቲ።
27 ወሰብእኒ፡ ከሓድያን፡ ወቀቲል፡ ግብሮሙ፡ ወነገሥታኒ፡ ለኢሩሳሌም፡ ጽኑዓን፡ ወእኩያን፡ ወኰነኑ፡ ቄሌ፡ ዘሶርያ፡ ወፊንቂኒ፡ ወጸብሑ፡ ሎሙ።
28 ወይእዜኒ፡ ናሁ፡ አዘዝኩ፡ ይክልእዎሙ፡ ለእሙንቱ፡ ሰብእ፡ ሐኒጾታ፡ ለይእቲ፡ ሀገር፡ ወአልቦ፡ ዘይገብር፡ ውስቴታ፡ ወኢምንተ።
29 ከመ፡ ኢታብዝኅ፡ እኪተ፡ በዘ፡ ይሰርሑአ፡ ነገሥትአ።
30 ወእምዝ፡ ሶበ፡ አንበብዋ፡ ለይእቲ፡ መጽሐፍ፡ እንተ፡ ጸሐፈ፡ አርጥርክሴስ፡ ንጉሥ፡ ራቲሞስ፡ ወሰምልዮስ፡ ጸሓፊ፡ ወእለ፡ እምታሕቴሆሙ፡ አሮጹ፡ አፍራሲሆሙ፡ ጒጉአ፡ ውስተ፡ ኢየሩሳሌም፡ ምስለ፡ ብዙኅ፡ ሰብእ፡ ወአኀዙ፡ ይክልእዎሙ፡ ለእለ፡ የሐንጹ።
31 ወተፀርዐ፡ ሐኒጽ፡ ዘቤተ፡ መቅደስ፡ ዘኢየሩሳሌም፡ እስከ፡ ካልእት፡ ዓመተ፡ መንግሥቱ፡ ለዳርዮስ፡ ንጉሠ፡ ፋርስ።
=== chapter 4 ===
[Chapter 4]
1 ወገብረ፡ ዳርዮስ፡ ንጉሥ፡ በዓለ፡ ዐቢየ፡ ለኵሉ፡ መንግሥቱ፡ ወለኵሉ፡ ሰብኡ፡ ወለኵሉ፡ መኳንንተ፡ ሜዶን፡ ወፋርስ።
2 ወለኵሉ፡ መሳፍንት፡ ወመገብት፡ ወሥዩማን፡ እለ፡ ኵሉ፡ ህንደኬ፡ እስከ፡ ኢትዮጵያ፡ ዘምእት፡ ወዕሥራ፡ ወ፯፡ ምስፍና።
3 ወበልዑ፡ ወሰትዩ፡ ወጸግቡ፡ ወእምዝ፡ አተዉ፡ ወንጉሥሰ፡ ዳርዮስ፡ ቦአ፡ ጽርሐ፡ ወሰከበ፡ ወኖመ።
4 ወሀለዉ፡ ሠለስቱ፡ ወራዙት፡ ዐቀብተ፡ ርእሱ፡ እለ፡ የዐቅብዎ፡ ለንጉሥ፡ ተባሀሉ፡ በበይናቲሆሙ።
5 ሀቡ፡ ንበል፡ በበአሐቲ፡ ቃል፡ ኵልነ፡ ናስተኀይስ፡ ዘያሜኒ፡ ወዘኄይስ፡ ቃሉ፡ በጥበብ፡ እምቢጹ፡ የሀቦ፡ ንጉሥ፡ ዳርዮስ፡ ብዙኀ፡ ይፈትቶ፡ ዕሤተ፡ ዘሞአ።
6 ወሜላተ፡ ያልብሶ፡ ወበዘወርቅ፡ ይስተይ፡ ወዲበ፡ ወርቅ፡ ይስክብ፡ ወሰረገላተ፡ ዘወርቅ፡ ይጸዐን፡ ወይትዐጸፍ፡ ሜላተ፡ ወብዝጋና፡ ይዕነቅ።
7 ወእምታሕተ፡ ንጉሥ፡ ይንበር፡ በእንተ፡ ጥበቢሁ፡ ወዘመደ፡ ንጉሥ፡ ይኩን።
8 ወእምዝ፡ ጸሐፉ፡ ኵሎሙ፡ ቃሎሙ፡ ዘዘዚአሆሙ፡ ወኀተሙ፡ ወሤሙ፡ ታሕተ፡ ትርኣሲሁ፡ ለንጉሥ፡ ዳርዮስ።
9 ወይቤሉ፡ ሶበ፡ ነቅሀ፡ ንጉሥ፡ ነሀቦ፡ ዘንተ፡ መጽሐፈ፡ ወለዘፈቀደ፡ ንጉሥ፡ ወ፫መገብቱ፡ ዘፋርስ፡ ይፍትሑ፡ ወለዘ፡ ጠበበ፡ ቃሉ፡ ያግብኡ፡ ፍትሐ፡ በከመ፡ ጸሐፉ።
10 ወጸሐፈ፡ አሐዱ፡ እንዘ፡ ይብል፡ ወይን፡ ይመውእ።
11 ወጸሐፈ፡ ካልኡ፡ እንዘ፡ ይብል፡ ንጉሥ፡ ይመውእ።
12 ወጸሐፈ፡ ሣልስ፡ እንዘ፡ ይብል፡ አንስት፡ ይመውኣ፡ ወእምኵሉሰ፡ ጽድቅ፡ ትመውእ።
13 ወእምዝ፡ ሶበ፡ ነቅሀ፡ ንጉሥ፡ ነሥእዋ፡ ለይእቲ፡ መጽሐፍ፡ ወመጠውዎ፡ ወአንበበ።
14 ወለአከ፡ ይጸውዑ፡ ኵሎ፡ መገብቶ፡ ዘፋርስ፡ ወዘሜዶን፡ ወመሳፍንተኒ፡ ወሥዩማነ፡ ወመኳንንተ፡ ወመላእክተ።
15 ወነበሩ፡ ውስተ፡ ምቅራቡ፡ ወአንበብዋ፡ ለይእቲ፡ መጽሐፍ፡ በቅድሜሆሙ።
16 ወይቤ፡ ጸውዕዎሙ፡ ለእሉ፡ ወራዙት፡ ወለሊሆሙ፡ ይንግሩ፡ ቃሎሙ፡ ወጸውዕዎሙ፡ ወቦኡ።
17 ወይቤሎሙ፡ ንግሩ፡ ቃለክሙ፡ ወአኀዘ፡ ይንግር፡ ቀዳማዊ፡ ዘይቤ፡ ወይን፡ ይመውእ።
18 ወከመዝ፡ ይቤ፡ አንትሙ፡ ዕደው፡ ርእዩ፡ ከመ፡ ይመውእ፡ ወይን፡ ለኵሉ፡ ሰብእ፡ ዘሰትዮ፡ ያስሕቶ፡ ልቦ።
19 ዘንጉሥኒ፡ ወዘእጓለ፡ ማውታኒ፡ አሐደ፡ ይሬሲ፡ ልቦሙ፡ ዘገብርኒ፡ ወዘአግዓዚኒ፡ ዘነዳይኒ፡ ወዘባዕልኒ።
20 ልበ፡ ኵሉ፡ ይመይጥ፡ ውስተ፡ ሐሤት፡ ወያስተፌሥሕ፡ ወኢይዜከርዋ፡ ለኵሉ፡ ሐዘን፡ ወለኵሉ፡ ትካዝ።
21 ወልበ፡ ኵሉ፡ ባዕለ፡ ይሬሲ፡ ወኢይዜከርዎ፡ ለንጉሥ፡ ወኢየሐስብዎ፡ ለአምላክ፡ ወለኵሉ፡ በከብድ፡ ያስተናግሮሙ።
22 ወእምከመ፡ ሰትይዎ፡ ይረስዖ፡ ዐርክ፡ ለዐርኩ፡ ወእኅው፡ ለአኀዊሁ፡ ወያስተማልኆሙ፡ መጣብሒሆሙ።
23 ወሶበ፡ ጸሐዉ፡ እምወይኖሙ፡ ኢይዜከሩ፡ ዘገብሩ።
24 አንትሙ፡ ዕደው፡ ኢይመውእኑ፡ ወይን፡ ዘከመዝ፡ ይገብር፡ በግብር፡ ወእምዝ፡ አርመመ፡ ውእቱ፡ ከመዝ፡ ብሂሎ።
=== chapter 5 ===
[Chapter 5]
1 ወአኀዘ፡ ካልኡ፡ ይንግር፡ ዘይቤ፡ ንጉሥ፡ ይመውእ።
2 ወይቤ፡ አንትሙ፡ ዕደው፡ አኮኑ፡ ሰብእ፡ ይመውዕዋ፡ ለምድር፡ ወይኴንንዋ፡ ለባሕር፡ ወለኵሉ፡ ዘውስቴታ።
3 ወሎሙኒ፡ ንጉሥ፡ እግዚኦሙ፡ ወይቀንዮሙ፡ ወይኴንኖሙ፡ ወኵሎ፡ ዘአዘዞሙ፡ ይገብሩ።
4 ወለእመ፡ ይቤሎሙ፡ ቅትሉ፡ ቢጸክሙ፡ ይቀትሉ፡ ወእመኒ፡ ፈነዎሙ፡ ጸብአ፡ የሐውሩ፡ ወየሐርሱ፡ አድባረ፡ ወአረፋተ፡ ወማኅፈደ።
5 ይቀትሉሂ፡ ወይቀትልዎሙሂ፡ ከመ፡ ኢይእበዩ፡ ቃለ፡ ንጉሥ፡ ወለእመ፡ ሞኡ፡ ለንጉሥ፡ ዕልገቶያገብኡ፡ ወኵሎ፡ ዘፄወዉ፡ ወዘማህረኩ።
6 ወእለኒ፡ ኢይፀብኡ፡ ወኢይትቃተሉ፡ አላ፡ ምድረ፡ ይትጌበሩ፡ እሙንቱኒ፡ ሶበ፡ ዘርኡ፡ ወአረሩ፡ ያአትዉ፡ ጸባሕተ፡ ለንጉሥ፡ ወበግብር፡ ይዘብጡ፡ ቢጾሙ፡ ያእትዉ፡ ጸባሕተ፡ ለንጉሥ።
7 ወውእቱሰ፡ ፩ውእቱ፡ ባሕቲቱ፡ ወእመ፡ ይቤ፡ ቅትሉ፡ ይቀትሉ፡ ወእመኒ፡ ኅድጉ፡ ይቤ፡ የኀድጉ።
8 ወእመኒ፡ ቅሥፉ፡ ይቤ፡ ይቀሥፉ፡ ወእመኒ፡ ሕንጹ፡ ይቤ፡ የሐንጹ፡ ወእመኒ፡ አማስኑ፡ ይቤ፡ ያማስኑ።
9 ወእመኒ፡ ግዝሙ፡ ይቤ፡ ይገዝሙ፡ ወእመኒ፡ ትክሉ፡ ይቤ፡ ይተክሉ።
10 ወኵሉ፡ ሕዝብ፡ ወኵሉ፡ ሰራዊት፡ ሎቱ፡ ለ፩፡ ይትኤዘዙ፡ ወምስለ፡ ኵሉ፡ ዝንቱ፡ ውእቱሰ፡ ይረፍቅ፡ ወይበልዕ፡ ወይሰቲ፡ ወይነውም።
11 ወባዕድ፡ የዐቅቦ፡ ዐውዶ፡ ወአልቦ፡ ዘይክል፡ ሐዊረ፡ ወገቢረ፡ ትካዙ፡ ፩፡ እምኔሆሙ፡ ወኢይክልዎ፡ አቢዮቶ።
12 አንትሙ፡ ዕደው፡ ኢይመውእኑ፡ ንጉሥ፡ ዘከመዝ፡ ይትኤዘዙ፡ ሎቱ፡ ወእምዝ፡ አርመመ።
13 ወአኀዘ፡ ይንግር፡ ሣልስ፡ ዘይቤ፡ በእንተ፡ አንስት፡ ወበእንተ፡ ጽድቅ፡ ወውእቱ፡ ዘሩባቤል።
14 ወይቤ፡ አንትሙ፡ ዕደው፡ አኮኑ፡ ዐቢይ፡ ንጉሥ፡ ወሰብእኒ፡ ብዙኅ፡ ወወይንኒ፡ ጽኑዕ፡ መኑኬ፡ ውእቱ፡ ዘይቀንዮሙ፡ ወይኤዝዞሙ፡ አኮኑ፡ አንስት።
15 ወለዳሁ፡ ለንጉሥ፡ ወለኵሉ፡ ሕዝብ፡ እለ፡ ይቀንዩ፡ ባሕረ፡ ወምድረ።
16 ወእምኔሆን፡ ተወልዱ፡ ወእማንቱ፡ ሐፀናሆሙ፡ ለእለ፡ ይተክልዎ፡ ለዐጸደ፡ ወይን፡ ዘእምውስቴቱ፡ ይወፅእ፡ ወይን።
17 ወእማንቱ፡ ይገብራ፡ አልባሰ፡ ለሰብእ፡ ወእማንቱ፡ ይገብራ፡ ክብረ፡ ለዕደው፡ ወኢይክሉ፡ ዕደው፡ እንበለ፡ አንስት።
18 ወእመኒ፡ አስተጋብኡ፡ ወርቀ፡ ወብሩረ፡ ወኵሎ፡ ንዋየ፡ ሠናየ፡ ወርእዩ፡ አሐተ፡ ብእሲተ፡ ላሕይተ፡ እንተ፡ ሠናይ፡ ራእያ።
19 ይረስዑ፡ ኵሎ፡ ዝክተ፡ ወኪያሃ፡ ይኔጽሩ፡ ወይሬእይዋ፡ አፉሃ፡ ወኵሉ፡ ያስተአድማ፡ ወያበድርዋ፡ እምነ፡ ወርቅ፡ ወብሩር፡ ወእምኵሉ፡ ንዋይ፡ ሠናይ።
20 ወየኀድግ፡ ብእሲ፡ አባሁ፡ ዘአልሀቆ፡ ወየኀድግ፡ ብሔሮ፡ ወይተልዋ፡ ለብእሲቱ።
21 ወይሜጡ፡ ነፍሶ፡ በእንተ፡ ብእሲቱ፡ ወኢይዜከሮሙ፡ ለአቡሁ፡ ወለእሙ፡ ወለብሔሩ።
22 ወበዝሂ፡ ዓዲ፡ ታአምሩ፡ ከመ፡ አንስት፡ ይመውኣክሙ፡ አኮኑ፡ ጻሚወክሙ፡ ወሰሪሐክሙ፡ ኵሎ፡ ታአትዉ፡ ለአንስት፡ ወትሁብዎን።
23 ወይነሥእ፡ ብእሲ፡ ኵናቶ፡ ወይወፅእ፡ ወየሐውር፡ ወይሰርቅ፡ ወይነግድ፡ ባሕረ፡ ወአፍላገ።
24 ወውስተኒ፡ ጽልመት፡ የሐውር፡ ወእንዘኒ፡ ዐንበሳ፡ ይሬኢ፡ የሐውር፡ ወሶበ፡ ሰረቀ፡ ወመሠጠ፡ ወሄደ፡ ያአቱ፡ ላቲ።
25 ወያበድራ፡ ብእሲ፡ ለብእሲቱ፡ እምነ፡ አቡሁ፡ ወእሙ፡ እለ፡ ወለድዎ።
26 ወብዙኃን፡ እለ፡ ተሠጥዩ፡ ልቦሙ፡ በእንተ፡ አንስት፡ ወተቀንዩ፡ ወኮኑ፡ አግብርተ፡ በእንቲአሆን።
27 ወብዙኃን፡ እለ፡ ሞቱ፡ በእንተ፡ አንስት፡ ወእለ፡ ስሕቱ፡ ወእለ፡ አበሱ።
28 ወይእዜኒ፡ እመ፡ ኢተአምኑኒ፡ አኮኑ፡ ዐቢይ፡ ንጉሥ፡ በምኵናኒሁ፡ ወአኮኑ፡ ኵሉ፡ አሕዛብ፡ ይሬእይዎ፡ ወይፈርሁ፡ ለኪፎቶ።
29 ወናሁ፡ አጳሜን፡ ወለተ፡ በርጠቁ፡ ክቡር፡ ዕቅብቱ፡ ለንጉሥ፡ ትነብር፡ በየማነ፡ ንጉሥ።
30 ወትነሥእ፡ አክሊለ፡ እምርእሱ፡ ለንጉሥ፡ ወትወዲ፡ ዲበ፡ ርእሳ፡ ወትጸፍዖ፡ ለንጉሥ፡ በፀጋማ።
31 ምስለ፡ ዝንቱ፡ ኵሉ፡ ይኔጽራ፡ ንጉሥ፡ አፉሃ፡ እመ፡ ሥሕቀት፡ ይሥሕቅ፡ ወእመ፡ ተምዐት፡ ይዬውሃ፡ ከመ፡ ትንብብ፡ ወያቈርር፡ መዐታ።
32 አንትሙ፡ ዕደው፡ ኢይመውኣኑ፡ አንስት፡ እለ፡ ከመዝ፡ ይገብራ።
33 ወእምዝ፡ ተናጸሩ፡ ንጉሥ፡ ወመገብቱ፡ በበይናቲሆሙ፡ ወእምዝ፡ አኀዘ፡ ይንግር፡ በእንተ፡ ጽድቅ።
34 ወይቤ፡ አንትሙ፡ ዕደው፡ አኮኑ፡ ይመውኣ፡ አንስት፡ ዐቢይ፡ ምድር፡ ወልዑል፡ ሰማይ፡ ወፍጡነ፡ ይረውጽ፡ ፀሓይ፡ ተዐዊዶ፡ ሰማየ፡ እንዘ፡ ይረውጽ፡ ይገብእ፡ ውስተ፡ የማኑ፡ ወመካኑ፡ በአሐቲ፡ ዕለት።
35 አኮኑ፡ ዐቢይ፡ ዘከመዝ፡ ይገብር፡ ወጽድቅሰ፡ ትመውእ፡ ወተዐቢ፡ እምነ፡ ኵሉ።
36 ወኵሉ፡ ዓለም፡ ይጼውዓ፡ ለጽድቅ፡ ሰማይኒ፡ ይባርካ፡ ወኵሉ፡ ግብር፡ ይርዕድ፡ ወያድለቀልቅ፡ ወኢይትረከብ፡ ሕሡም፡ ውስተ፡ ጽድቅ።
37 ዐማፂ፡ ወይን፡ ወዐማፂ፡ ንጉሥ፡ ወዐማፂት፡ አንስት፡ ወዐማፂ፡ ኵሉ፡ እጓለ፡ እምሕያው፡ ወዐመፃ፡ ኵሉ፡ ግብሮሙ፡ ወኵሉ፡ ዝንቱ፡ አልቦ፡ ውስቴታ፡ ጽድቅ፡ ወበዐመፃሆሙ፡ ይመውቱ።
38 ጽድቅሰ፡ ትመውእ፡ ለዝሉፉ፡ ወሕይወት፡ ይእቲ፡ ወትቀውም፡ ወትጸንዕ፡ ለዓለመ፡ ዓለም።
39 ወአልቦ፡ በኀቤሃ፡ ፈሊጥ፡ ወአድልዎ፡ ለገጽ፡ አላ፡ ጽድቀ፡ ትገብር፡ ወኢትሄሉ፡ ውስተ፡ ዐመፃ፡ ወውስተ፡ እኩይ፡ ወለኵሉ፡ ያሠምር፡ ምግባረ።
40 ወአልቦ፡ ዐመፃ፡ ውስተ፡ ፍትሓ፡ ወይእቲ፡ ትመውእ፡ ወላቲ፡ መንግሥት፡ ወዕበይ፡ ወኵነኔ፡ ዘኵሉ፡ ዓለም፡ ይትባረክ፡ እግዚአብሔር፡ ዘሎቱ፡ መንግሥት፡ ይቤ።
41 ወአርመመ፡ ወእምዝ፡ ተባሀሉ፡ ኵሎሙ፡ ሕዝብ፡ ወይቤሉ፡ ዐባይ፡ ይእቲ፡ ጽድቅ፡ ወፈድፋደ፡ ትመውእ።
42 ወይቤሎ፡ ንጉሥ፡ ሰአል፡ ዘትፈቅድ፡ ፈድፋደ፡ እምነ፡ ዘጽሑፍ፡ ወእሁበከ፡ እስመ፡ ጠበብከ፡ አንተ፡ ወትነብር፡ ምስሌየ፡ እቱተ፡ ወዘመደ፡ ዚአየ፡ ትከውን።
43 ወይቤሎ፡ ውእቱ፡ ለንጉሥ፡ ተዘከር፡ ብፅዓተ፡ ዘበፃዕከ፡ አመ፡ ነገሥከ፡ ከመ፡ ተሐንጻ፡ ለኢየሩሳሌም።
44 ወከመ፡ ታገብእ፡ ኵሎ፡ ንዋየ፡ ዘነሥኡ፡ እምነ፡ ኢየሩሳሌም፡ ዘአግሐሠ፡ ቂሮስ፡ አመ፡ ፈቀደ፡ ይቅትላ፡ ለባቢሎን፡ ወበፅዐ፡ ያግብኡ፡ ህየ።
45 ወአንተኒ፡ በፃዕከ፡ ትሕንጽ፡ ቤተ፡ መቅደስ፡ ዘአውዐዩ፡ ኤዶማዊያን፡ አመ፡ አማሰንዋ፡ ፋርስ፡ ለይሁዳ።
46 ወይእዜኒ፡ ዳእሙ፡ ዝንቱ፡ ውእቱ፡ ዘአስተበቊዐከ፡ እግዚእየ፡ ንጉሥ፡ ወዘእስእለከ፡ ወዛቲ፡ ይእቲ፡ ዓባይ፡ እንተ፡ እምኀቤከ፡ ብቊዐኒ፡ እግዚኦ፡ ከመ፡ ትግበር፡ ብፅዓተከ፡ ዘበፃዕከ፡ ለንጉሠ፡ ሰማይ፡ ትግበር፡ ዘወፅአ፡ እምአፉከ።
47 ወእምዝ፡ ተንሥአ፡ ዳርዮስ፡ ንጉሥ፡ ወተአምኆ፡ ወሐቀፎ፡ ወጸሐፈ፡ ሎቱ፡ መጻሕፍተ፡ ኀበ፡ ኵሉ፡ መገብት፡ ወመላእክት፡ ወመሳፍንት፡ ወመኳንንት፡ ከመ፡ ይፈንውዎ፡ ወለኵሉ፡ እለ፡ ምስሌሁ፡ እለ፡ የዐርጉ፡ ኢየሩሳሌም፡ ይሕንጽዋ።
48 ወለኵሉ፡ መሳፍንተ፡ ቄሌ፡ ዘሶርያ፡ ወለእለ፡ ውስተ፡ ሊባኖስ፡ ጸሐፈ፡ መጻሕተ፡ ያእትዉ፡ ዕፀወ፡ ቄድሪኖስ፡ እምነ፡ ደብረ፡ ሊባኖስ፡ ውስተ፡ ኢየሩሳሌም፡ ወከመ፡ ይሕንጹ፡ ምስሌሁ፡ ሀገረ።
49 ወጸሐፈ፡ ለኵሉ፡ አይሁድ፡ እለ፡ የዐርጉ፡ እምውስተ፡ መንግሥት፡ ውስተ፡ ይሁዳ፡ ከመ፡ ያግዕዝዎሙ፡ እምቅኔሆሙ፡ ለኵሉ፡ ቢጽ፡ ጽኑዕሙ፡ ወኢይምጽኡ፡ ኀበ፡ አናቅጺሆሙ፡ ኢመገብቶሙ፡ ወኢመሳፍንቲሆሙ፡ ወኢመኳንንቲሆሙ።
50 ወለኵሉ፡ ደወሎሙ፡ ይኅድጉ፡ ሎሙ፡ ጸባሕቶሙ፡ ወለአይሁድኒ፡ ይኅድጉ፡ አዕጻዳቲሆሙ፡ ዘያጸንዑ።
51 ወከመ፡ የሀብዎሙ፡ ለሕንጻ፡ ቤተ፡ መቅደስ፡ ለለዓመት፡ ፳፡ መክሊተ፡ እስከ፡ አመ፡ የኀልቅ፡ ሕንጻ።
52 ወለምሥዋዕኒ፡ ለመሥዋዕት፡ ዘልፈ፡ ኵሎ፡ አሚረ፡ ዘያበውኡ፡ በከመ፡ ያለምዱ፡ ዘበሕጉ፡ ፲ወ፯፡ ለለዓመት፡ ፲፡ መክሊተ፡ ካልእተ።
53 ወለኵሎሙ፡ እለ፡ የዐርጉ፡ እምነ፡ ባቢሎን፡ ይግበሩ፡ ሀገረ፡ ያኅድግዎሙ፡ ቅኔሆሙ፡ ሎሙ፡ ወለውሉዶሙ።
54 ወለኵሉ፡ ካህናት፡ እለ፡ ዐርጉ፡ ጸሐፈ፡ ሎሙ፡ ሲሳዮሙ፡ ወአልባሰ፡ ግብሮሙ፡ በዘ፡ ይገብሩ።
55 ወለሌዋውያን፡ ጸሐፈ፡ ሎሙ፡ ሲሳዮሙ፡ የሀብዎሙ፡ እስከ፡ አመ፡ የኀልቅ፡ ቤተ፡ ኢየሩሳሌም፡ ሕንጻሁ።
56 ወለኵሉ፡ እለ፡ ይትቀነዩ፡ ወይገብሩ፡ ሀገረ፡ ጸሐፈ፡ ሎሙ፡ የሀብዎሙ፡ ሲሳዮሙ።
57 ወኵሎ፡ ንዋየ፡ ዘአግሐሠ፡ ቂሮስ፡ እምውስተ፡ ባቢሎን፡ ፈነወ፡ ወኵሎ፡ ዘከመ፡ አዘዘ፡ ቂሮስ፡ ይግበሩ፡ ከማሁ፡ ውእቱኒ፡ ይቤሎሙ፡ ይግበሩ፡ ወይፈንዉ፡ ኢየሩሳሌም።
58 ወእምዝ፡ ሶበ፡ ወፅአ፡ ውእቱ፡ ወልድ፡ አልዐለ፡ አዕይንቲሁ፡ ውስተ፡ ሰማይ፡ መንገለ፡ ኢየሩሳሌም፡ አንጻሪሃ፡ ወባረኮ፡ ለንጉሠ፡ ሰማይ።
59 ወይቤ፡ እምኀቤከ፡ ሙአቱ፡ ወእምኀቤከ፡ ጥበብ፡ ወለከ፡ ውእቱ፡ ክብር፡ ወአነኒ፡ ገብረ፡ ዚአከ።
60 ቡሩክ፡ አንተ፡ ዘወሀብከኒ፡ ጥበበ፡ ወብከ፡ አአምን፡ እግዚአ፡ አበዊነ።
61 ወነሥአ፡ ውእተ፡ መጻሕፍተ፡ ወሖረ፡ ባቢሎን፡ ወዜነዎሙ፡ ለኵሎሙ፡ አኀዊሆሙ።
62 ወባረክዎ፡ ለአምላከ፡ አበዊሆሙ፡ ዘወሀቦሙ፡ ዕረፍተ፡ ወተሣሀሎሙ።
63 ከመ፡ የዕርጉ፡ ወይሕንጽዋ፡ ለኢሩሳሌም፡ ወለቤተ፡ መቅደስ፡ ዘተሰምየ፡ ስሙ፡ ውስቴቱ። ወነበሩ፡ ሰቡዐ፡ መዋዕለ፡ ይትፌሥሑ፡ በመሰንቆ፡ ወበዕንዚራ።
=== chapter 6 ===
[Chapter 6]
1 ወእምዝ፡ ፈለጡ፡ ዘየዐርግ፡ መሳፍንተ፡ አብያተ፡ አበዊሆሙ፡ በበሕዘቢሆሙ፡ ወአንስቶሙ፡ ወደቂቆሙ፡ ወአዋልዲሆሙ፡ ወአግብርቲሆሙ፡ ወአእማቲሆሙ፡ ወእንስሳሆሙ።
2 ወፈነወ፡ ምስሌሆሙ፡ ዳርዮስ፡ ፲፻፡ ሰብአ፡ አፍራስ፡ ያብጥሕዎሙ፡ ኢየሩሳሌም፡ በዳኅን፡ ምስለ፡ መሰንቆ፡ ወዕንዚራ፡ ወከበሮ።
3 ወኵሉ፡ ወኀዊሆሙ፡ አኅበሩ፡ ምስሌሆሙ፡ ወዐርጉ፡ እንዘ፡ ይትዋነዩ።
4 ወዝንቱ፡ አስማቲሆሙ፡ ለዕደው፡ እለ፡ ዐርጉ፡ በበ፡ በሓውርቲሆሙ፡ ወበበ፡ ሕዘቢሆሙ፡ ዘዘደወለ፡ ምስፍናሆሙ።
5 ካህናት፡ ደቂቀ፡ ፊንሐስ፡ ደቂቀ፡ አሮን፡ ኢዮስያስ፡ ወልደ፡ ዮሴዴቅ፡ ወልደ፡ ሰራህዩ፡ ወኢዮኣቄም፡ ወልደ፡ ዘሩባቤል፡ ወልደ፡ ሰላትያል፡ ዘእምቤተ፡ ዳዊት፡ ዘእምነገደ፡ ፋሬስ፡ ዘሕዝበ፡ ይሁዳ።
6 ዘተናገረ፡ ቃለ፡ ጥበብ፡ በቅድመ፡ ዳርዮስ፡ ንጉሠ፡ ፋርስ፡ አመ፡ ካልእ፡ ዓመተ፡ መንግሥቱ፡ በወርኀ፡ ኔሳን፡ ቀዳሚ፡ ወርኅ።
7 ወእሉ፡ እሙንቱ፡ እለ፡ እምነ፡ ይሁዳ፡ እለ፡ ዐርጉ፡ እምውስተ፡ ፄዋ፡ ፋርስ፡ ዘአፍለሰ፡ ናቡከደነጾር፡ ንጉሠ፡ ባቢሎን።
8 ወአእተዎሙ፡ ኢሩሳሌም፡ ወቦ፡ እለ፡ አተዉ፡ ውስተ፡ ይሁዳ፡ ወለኵሎሙ፡ ፈነዎሙ፡ በበአሕጉሪሆሙ፡ ወሖሩ፡ ምስለ፡ ዘሩባቤል፡ ወኢዮስያስ፡ ወልደ፡ ኔሔምዩ፡ ወልደ፡ ዘረዩ፡ ወልደ፡ ሪስዩ፡ ወልደ፡ ሕኔንዩስ፡ ወልደ፡ መርዴኬዎስ፡ ወልደ፡ ብዔልስር፡ ወልደ፡ አስፌራስ፡ ወልደ፡ ባሮልዩ፡ ወልደ፡ ሮሔሙ፡ ወልደ፡ በአና፡ ዘቀደምት፡ መሳፍንት፡ እለ፡ ቀደሙ፡ ተሠይሙ፡ ሎሙ።
9 ወኊልቆሙ፡ ለእለ፡ እምውስተ፡ ሕዝብ፡ ደቂቀ፡ ፈሮስ፡ ፳፻፡ ወ፩፻ወ፸ወ፪፡ ወደቂቀ፡ ሰፋን፡ ፫፻ወ፸ወ፪።
10 ደቂቀ፡ ሐርስ፡ ፯፻ወ፶ወ፮።
11 ደቂቀ፡ ፈተሊ፡ ሞአብ፡ ምስለ፡ ደቂቀ፡ ዮስስ፡ ወዘሮብዓኒ፡ ፳፻ወ፰፻ወ፪።
12 ደቂቀ፡ ዮለሙ፡ ፪፡ ደቂቀ፡ ዛጦን፡ ፱፻ወ፸፡ ደቂቀ፡ ኮሮቤ፡ ፯፻ወ፶፡ ደቂቀ፡ ባኒ፡ ፮፻ወ፵ወ፰።
13 ደቂቀ፡ ቤቤ፡ ፮፻ወ፴ወ፫፡ ደቂቀ፡ ሐርጌ፡ ፲፻ወ፫፻ወ፳ወ፪።
14 ደቂቀ፡ አዶኔቄም፡ ፴ወ፱፡ ደቂቀ፡ ቦሴ፡ ፳፻ወ፮፻ወ፮፡ ደቂቀ፡ አድሊዮ፡ ፬፻ወ፶ወ፬።
15 ደቂቀ፡ አዝሬዝቅዩ፡ ወደቂቀ፡ ቄላን፡ ወዘአዜጦስ፡ ፷ወ፯፡ ደቂቀ፡ አዘሩ፡ ፬፻ወ፴ወ፪።
16 ደቂቀ፡ ሐንያ፡ ፻ወ፩፡ ደቂቀ፡ አሮም፡ ወደቂቀ፡ በሴ፡ ፫፻ወ፳ወ፫፡ ደቂቀ፡ አርሲፋሪት።
17 ወደቂቀ፡ ቤጤሩስ፡ ፴፻ወ፭፡ ደቂቀ፡ ዔቀቤሔትሎሙን፡ ፻ወ፳ወ፫።
18 ወእለሰ፡ እምነ፡ ኔጤባስ፡ ፶፡ ወ፭፡ ወእለ፡ እምነ፡ ኤናጡ፡ ፻ወ፶ወ፰። ወእለ፡ እምነ፡ ቤጥሳሞን፡ ዘሞተ።
19 ቀጠርቲ፡ ሐርዮስ፡ ፳ወ፭፡ ወእለ፡ እምነ፡ ጲራስ፡ ወሮግ፡ ፯፻።
20 ወእለ፡ ከዲያስ፡ ወአሚዳውያን፡ ፬፻ወ፳ወ፪፡ ወእለ፡ ቀራመሲቃቤስ፡ ፮፻ወ፳ወ፩።
21 ወእለ፡ እምነ፡ መቃሎን፡ ፻ወ፳ወ፪፡ ወእለ፡ እምነ፡ ቤጣሊዮን፡ ፶ወ፪፡ ደቂቀ፡ ኒፋስ፡ ፻ወ፶፮።
22 ደቂቀ፡ ቀላሞለሉ፡ ወሑነስ፡ ፯፻ወ፳ወ፭፡ ደቂቀ፡ ዔርሔኩ፡ ፪፻ወ፵ወ፭።
23 ደቂቀ፡ አናሐስ፡ ፴፻ወ፫፻ወ፩።
24 ወካህናትሰ፡ ደቂቀ፡ ኢዮስስ፡ ምስለ፡ ደቂቀ፡ አናሲብ፡ ፰፻ወ፸ወ፪፡ ደቂቀ፡ ኤምሩት፡ ፪፻ወ፶ወ፪።
25 ደቂቀ፡ ፋሰሩ፡ ፲፻ወ፪፻ወ፵ወ፯።
26 ወሌዋውያንሰ፡ ደቂቀ፡ ኢዮስስ፡ ዘቆዶሔሉ፡ ወባኑ፡ ወሱድዩ፡ ፸፬።
27 ደቂቀ፡ ካህናተ፡ መዝሙር፡ ደቂቀ፡ አሳፍ፡ ፻ወ፳ወ፰።
28 ወጸውት፡ ፬፻፡ እስማኤላውያን፡ ወደቂቀ፡ ጠማን፡ ደቂቀ፡ ደቁበጡ፡ ፲፻፡ ደቂቀ፡ ጠቢስ፡ ኵሎሙ፡ ፻ወ፳ወ፱።
29 ወደቂቀ፡ ካህናት፡ ደቂቀ፡ ዔሳው፡ ደቂቀ፡ ጋሶፍ፡ ደቀ፡ ጠብሎት፡ ደቀ፡ ቄራስ፡ ደቀ፡ ሱሐ፡ ደቀ፡ ፈሊዮ፡ ደቀ፡ ሎቦና፡ ደቀ፡ አቢጋ።
30 ደቀ፡ ሐቁድ፡ ደቀ፡ ሐጡ፡ ደቀ፡ ቄጠብ፡ ደቀ፡ ዐቀባ፡ ደቀ፡ ሰባዊ፡ ደቀ፡ ሐና፡ ደቀ፡ ቂዓ፡ ደቀ፡ ጌዱር።
31 ደቀ፡ ያዕሩ፡ ደቀ፡ ዴሳን፡ ደቀ፡ ነሄቦ፡ ደቀ፡ ከሴባ፡ ደቀ፡ ቀዜራ፡ ደቀ፡ አዝዩ፡ ደቀ፡ ፍኑሕ፡ ደቀ፡ አስራን፡ ደቀ፡ ቤሴቴ፡ ደቀ፡ ሀሰና፡ ደቀ፡ ማኒ፡ ደቀ፡ ነፋሲ፡ ደቀ፡ አቁፍ፡ ደቀ፡ አኪባ፡ ደቀ፡ አሱር፡ ደቀ፡ ፈራቄም፡ ደቀ፡ ብሳሌም።
32 ደቀ፡ ድዳ፡ ደቀ፡ በኩስ፡ ደቀ፡ ሰራር፡ ደቀ፡ ቆሞሔ፡ ደቀ፡ ነሲ፡ ደቀ፡ አጤፋ።
33 ደቀ፡ ደቁ፡ ለሰሎሞን፡ ደቀ፡ እስፍያት፡ ደቀ፡ ፈሪዳ፡ ደቀ፡ የሔሊ፡ ደቀ፡ ሎዝን፡ ደቀ፡ የስድሔል፡ ደቀ፡ ሰፊ።
34 ደቀ፡ ሐጊያ፡ ደቀ፡ ፈቀሬታ፡ ሳባይ፡ ደቀ፡ ሰሮትዮ፡ ደቀ፡ መሢኀስ፡ ደቀ፡ ጋሲ፡ ደቀ፡ አዴስ፡ ደቀ፡ ሳብስ፡ ደቀ፡ ኣፌራ፡ ደቀ፡ ባሮድስ፡ ደቀ፡ ሰፈግ፡ ደቀ፡ ባዕዳን።
35 ኵሉ፡ እለ፡ ይትቀነዩ፡ ለካህናት፡ ወደቂቀ፡ ደቁ፡ ለሰለሞን፡ ፫፻ወ፸ወ፪።
36 እሉ፡ እለ፡ ዐርጉ፡ እምነ፡ ቴርሜሌት፡ ወእምነ፡ ቴሌርሰስ፡ ወመስፍኖሙ፡ ከራሐታላን፡ ወሐላር።
37 ወኢክህሉ፡ አይድዖ፡ በሐውርቲሆሙ፡ ወዘመዶሙ፡ እለ፡ ከመዝ፡ እምነ፡ እስራኤል፡ እሙንቱ፡ ወደቂቀ፡ ዳዳን፡ ወልደ፡ ጡባን፡ ወደቂቀ፡ ኔቆድን፡ ፮፻ወ፶ወ፪።
38 ወእለኒ፡ እምነ፡ ካህናት፡ እለ፡ ይገብሩ፡ ክህነቶሙ፡ ወኢተረክቡ፡ ደቂቀ፡ ሐቢያ፡ ወደቂቀ፡ ኢያዕቀቦስ፡ ወደቂቀ፡ ይሁድስ፡ ዘነሥኣ፡ ለአውግያ፡ አውሰባ፡ እምነ፡ አዋልደ፡ ፈርዜለው፡ ወተሰምየት፡ በስሙ።
39 ወኀሠሡ፡ ሎቱ፡ ውስተ፡ መጽሐፍ፡ አዝማዲሁ፡ ወኢተረክበ፡ ወአኅደግዎ፡ ክህነቶ።
40 ወይቤሎሙ፡ ናሐምያ፡ ወኢታርያ፡ ከመ፡ ኢየሀብዎሙ፡ ዘቅድስት፡ እስከ፡ አመ፡ ይሠይሙ፡ ሊቀ፡ ካህናት፡ ዘይለብስ፡ ልብሰ፡ ዴሎስን፡ ወዘጽድቅ።
41 ወኵሎሙ፡ እስራኤል፡ ዘእም፲ወ፪፡ ዓመት፡ ዘእንበለ፡ አግብርቲሆሙ፡ ወአእማቶሙ፡ ፬፼ወ፳፻ወ፫፻ወ፷።
42 አግብርቶሙሰ፡ ወአእማቲሆሙ፡ ፸፻ወ፫፻ወ፴ወ፯፡ መዘምራን፡ ወመዘምራት፡ ፪፻ወ፵ወ፭።
43 አግማላት፡ ፬፻ወ፴ወ፭፡ አፍራስ፡ ፸፻ወ፴ወ፮፡ አብቅልት፡ ፪፻ወ፵ወ፭፡ አእዱግ፡ ፶፻ወ፭፻ወ፳ወ፭።
44 ወእምነ፡ መሳፍንተ፡ በሓውርቲሆሙ፡ ወእምዝ፡ ሶበ፡ በጽሑ፡ ቤተ፡ መቅደሱ፡ ለእግዚአብሔር፡ ዘውስተ፡ ኢሩሳሌም፡ ጸለዩ፡ ያንሥእዎ፡ ለውእቱ፡ ቤት፡ በውስተ፡ መካኑ፡ በከመ፡ ይክሉ።
45 ወያብኡ፡ ለቤተ፡ መቅደስ፡ ውስተ፡ ሙዳየ፡ ምጽዋት፡ ለፃእፃእአ፡ ግብር፡ በፅዑ፡ ወርቀ፡ ፲፻ምናነ፡ ወብሩረ፡ ፶፻ምናነ፡ ወአልባሰ፡ ካህናት፡ ፻።
46 ወይነብሩ፡ ካህናት፡ ወሌዋውያን፡ ወእለኒ፡ እምውስተ፡ ሕዝብ፡ ኢሩሳሌም፡ ወውስተ፡ ብሔር፡ ካህናተ፡ መዝሙርኒ፡ ወዐጸውት፡ ወኵሉ፡ እስራኤል፡ በበ፡ አዕጻዳቲሆሙ።
47 ወአመ፡ ሠረቀ፡ ሳብዕ፡ ወርኅ፡ እንዘ፡ ሀለዉ፡ ደቂቀ፡ እስራኤል፡ ውስተ፡ በሓውርቲሆሙ፡ አንገለጉ፡ ኅቡረ፡ በውስተ፡ ዐጸድ፡ ዘጸናፊ፡ አንቀጽ፡ ጽባሓዊ።
48 ወቆመ፡ ኢዮስስ፡ ወልደ፡ ዮሴዴቅ፡ ወአኊሁኒ፡ ካህናት፡ ወዘሩባቤል፡ ወልደ፡ ሰላትያል፡ ወአኀዊሁሰ፡ ሎቱ፡ አስተዳለዉ፡ ምሥዋዐ፡ ለእግዚአብሔር፡ አምላከ፡ እስራኤል።
49 ከመ፡ ይግበሩ፡ መሥዋዕተ፡ ውስቴቱ፡ ዘበሕጉ፡ በከመ፡ ጽሑፍ፡ ውስተ፡ መጽሐፈ፡ ሙሴ፡ ብእሴ፡ እግዚአብሔር።
50 ወአንገለጉ፡ ወተጋብኡ፡ ምስሌሆሙ፡ ካልኣን፡ አሕዛበ፡ ምድር፡ ወተሠርዑ፡ በኀበ፡ ምሥዋዕ፡ በበበሃውርቲሆሙ፡ እስመ፡ ፅሩራን፡ እሙንቱ፡ ወእምዝ፡ ኰነንዎሙ፡ ኵሉ፡ አሕዛብ፡ ምድር፡ ወገብሩ፡ መሥዋዕቶሙ፡ ዘበበ፡ ጊዜሁ፡ ወቊርባኖሙ፡ ለእግዚአብሔር፡ ዘነግህ፡ ወዘሰርክ።
51 ወገብሩ፡ በዓለ፡ መጸለት፡ በከመ፡ ጽሑፍ፡ ውስተ፡ ኦሪት፡ ወመሥዋዕተ፡ ኵሎ፡ አሚረ፡ ከመ፡ ትካት።
52 ወዓዲ፡ ቊርባነ፡ ዘልፍ፡ ወመሥዋዕተ፡ ሰንበታተ፡ ወዘአሥራቀ፡ ወርኅ፡ ወቀደሱ፡ ዘኵሉ፡ በዓላት።
53 ወኵሎሙ፡ እለ፡ በፅዑ፡ ብፅዓተ፡ ለእግዚአብሔር፡ እምሠርቀ፡ ሳብዕ፡ ወርኅ፡ አኀዙ፡ ያብኡ፡ መሥዋዕተ፡ ለእግዚአብሔር፡ ወቤተ፡ እግዚአብሔርሰ፡ ኢተሐንጸ።
54 ወወሀብዎሙ፡ ለወቀርት፡ ወለጸረብት፡ ሲሳዮሙ፡ ወርቀ፡ ወብሩረ፡ ወመብልዐኒ፡ ወመስቴኒ።
55 ወለሰብአ፡ ሲዶና፡ ወለሰብአ፡ ቲሮስ፡ አስተፈሥሕዎሙ፡ ከመ፡ ያእትዉ፡ ሎሙ፡ እምነ፡ ሊባኖስ፡ ዕፀወ፡ ቄድሪና፡ በአሕማር፡ እንተ፡ ባሕር፡ ኢዮፔ፡ ወጸሐፉ፡ ሎሙ፡ መጽሐፈ፡ ትእዛዝ፡ እምኀበ፡ ቂሮስ፡ ንጉሠ፡ ፋርስ።
56 ወእምዝ፡ አመ፡ ካልእት፡ ዓመት፡ በጺሖሙ፡ ኢየሩሳሌም፡ ውስተ፡ ቤተ፡ እግዚአብሔር፡ በካልእ፡ ወርኅ፡ አኀዙ፡ ይግበሩ፡ ዘሩባቤል፡ ወልደ፡ ሰላትያል፡ ወኢዮስስ፡ ወልደ፡ ኢዮሴዴቅ፡ ወአኀዊሆሙኒ፡ ወካህናትኒ፡ ወሌዋዊያን፡ ወኵሎሙ፡ እለ፡ አተዉ፡ ኢየሩሳሌም፡ እምኀበ፡ ተፄወው።
57 ወሣረሩ፡ ቤተ፡ እግዚአብሔር፡ አመ፡ ርእሰ፡ ሠርቀ፡ ካልእ፡ ወርኅ፡ በካልእት፡ ዓመት፡ አመ፡ በጽሑ፡ ውስተ፡ ይሁዳ፡ ወኢየሩሳሌም።
58 ወሤምዎሙ፡ ለሌዋውያን፡ ላዕለ፡ ግብረ፡ እግዚአብሔር፡ ወቆመ፡ ኢዮስስ፡ ወደቂቁ፡ ወአኀዊሁ፡ ወአድምየልሂ፡ እኁሁ፡ ወደቂቁ፡ ለኢዮስስ፡ ሐየመደቦን፡ ወደቂቀ፡ ይሁዳ፡ ወልደ፡ ኤልያዶን፡ ምስለ፡ ደቂቁ፡ ወአኀዊሁኒ፡ ወኵሎሙ፡ ሌዋውያን፡ ኅቡረ፡ ተሠይሙ፡ ሐበይተ፡ ምግባር፡ ከመ፡ ያግብሩ፡ ግብረ፡ ቤተ፡ እግዚአብሔር።
59 ወካህናትኒ፡ ቆሙ፡ ልቡሳኒሆሙ፡ ምስለ፡ መሰንቆ፡ ወቀርን፡ ወሌዋውያንሂ፡ ደቂቀ፡ አሳፍ፡ ይሴብሕዎ፡ ለእግዚአብሔር፡ በጸናጽላት።
60 ወይባርክዎ፡ በመዝሙረ፡ ዳዊት፡ ንጉሠ፡ እስራኤል።
61 ወይጸርኁ፡ እንዘ፡ ያነብቡ፡ ወይባርክዎ፡ ለእግዚአብሔር፡ እስመ፡ ለዓለም፡ ስብሐቲሁ፡ ወሠናይቱ፡ ላዕለ፡ ኵሉ፡ እስራኤል።
62 ወነፍኁ፡ ቀርነ፡ ኵሉ፡ ሕዝብ፡ ወጸርኁ፡ በዐቢይ፡ ቃል፡ ወሰብሕዎ፡ ለእግዚአብሔር፡ በተንሥኦተ፡ ቤቱ፡ ለእግዚእ።
63 ወመጽኡ፡ እምውስተ፡ ካህናት፡ ሌዋውያን፡ እለ፡ ነበሩ፡ ትካት፡ ህየ፡ በበ፡ በሓውርቲሆሙ፡ ወሊቃናትኒ፡ እለ፡ ርእይዎ፡ ለውእቱ፡ ቤት፡ ኅንጻሁ፡ እንዘ፡ ይጸርኁ፡ ወይበክዩ፡ በዐቢይ፡ ቃል።
64 ወብዙኃን፡ እለ፡ ይትፌሥሑ፡ ወይነፍኁ፡ ቀርነ።
65 እስከ፡ ይሰምዕ፡ ሕዝብ፡ ወኢሰምዑ፡ ቃለ፡ ቀርን፡ እምነ፡ ብካዮሙ፡ ለሕዝብ፡ እስመ፡ ብዙኃን፡ ሰብእ፡ እለ፡ ይነፍኁ፡ ቀርነ፡ በዐቢይ፡ ድምፅ፡ እስከ፡ ይሰማዕ፡ እምርሑቅ።
66 ወሰሚዖሙ፡ ጸረ፡ ሕዝበ፡ ይሁዳ፡ ወብንያም፡ መጽኡ፡ ያእምሩ፡ ምንት፡ ውእቱ፡ ቃለ፡ ቀርን።
67 ወሶበ፡ አእመሩ፡ ከመ፡ እለ፡ አተው፡ እምኀበ፡ ተፄወዉ፡ እሙንቱ፡ የሐንጹ፡ ቤተ፡ እግዚአብሔር፡ አምላከ፡ እስራኤል።
68 ሖሩ፡ ኀበ፡ ዘሩባቤል፡ ወኀበ፡ ኢዮስስ፡ ወኀበ፡ መሳፍንተ፡ በሓውርቲሆሙ፡ ወይቤልዎሙ፡ ንሕንጽ፡ ምስሌክሙ።
69 እስመ፡ ንሕነኒ፡ ከማክሙ፡ ንትቀነይ፡ ለአምላክክሙ፡ ወሎቱ፡ ንሠውዕ፡ እምአመ፡ አሰበቀፈት፡ ንጉሠ፡ ፋርስ፡ አፍለሰነ፡ ዝየ።
70 ወይቤልዎሙ፡ ዘሩባቤል፡ ወኢዮስስ፡ ወመሳፍንተ፡ በሃውርቲሆሙ፡ ለእስራኤል፡ አኮ፡ ለነ፡ ወለክሙ፡ ዘይትሐነጽ፡ ቤተ፡ እግዚአብሄር፡ አምላክነ።
72 ወአሕዛብሰ፡ ሰብአ፡ ብሔር፡ እለ፡ ይሜኵዩ፡ ለእለ፡ ውስተ፡ ይሁዳ፡ አንገለጉ፡ ወተጋብኡ፡ ወተቃተልዎሙ።
73 ወሆክዎሙ፡ ወአፅርዑ፡ ሕንጻ፡ ወከልእዎሙ፡ ይሕንጹ፡ በኵሉ፡ መዋዕሊሁ፡ ለቂሮስ፡ ንጉሥ፡ ወአኅደግዎሙ፡ ሐኒጸ፡ እስከ፡ አመ፡ ፪፡ ዓመተ፡ መንግሥተ፡ ዳርዮስ።
=== chapter 7 ===
[Chapter 7]
1 ወአመ፡ ካልእ፡ ዓመተ፡ መንግሥቱ፡ ለዳርዮስ፡ ተነበዩ፡ ሐጌ፡ ወዘካርያስ፡ ወልደ፡ ሐዱን፡ ነቢያት፡ ላዕለ፡ አይሁድ፡ እለ፡ ውስተ፡ ይሁዳ፡ ወኢየሩሳሌም፡ በስመ፡ እግዚአብሔር፡ አምላከ፡ እስራኤል፡ ተነበዩ፡ ዲቤሆሙ።
2 ወእምዝ፡ ቆመ፡ ዘሩባቤል፡ ወልደ፡ ሰላትያል፡ ወኢዮስስ፡ ወልደ፡ ኢዮሴዴቅ፡ ወአኀዙ፡ ይሕንጹ፡ ቤተ፡ እግዚአብሔር፡ ዘውስተ፡ ኢየሩሳሌም፡ እንዘ፡ ሀለዉ፡ ምስሌሆሙ፡ ነቢያተ፡ እግዚአብሔር፡ ያረድእዎሙ።
3 በእማንቱ፡ መዋዕል፡ መጽኡ፡ ኀቤሆሙ፡ ሲሳንስ፡ መልአከ፡ ሶርያ፡ ወፊንቂስ፡ ወሰተራቡርዛኒስ፡ ወእለ፡ ምስሌሆሙ፡ ቢጾሙ፡ ወይቤልዎሙ።
4 መኑ፡ ዘአዘዘክሙ፡ ትሕንጹ፡ ዘንተ፡ ቤተ፡ ወትጥፍርዎ፡ ወዝንቱኒ፡ ኵሉ፡ ግብር፡ ወመኑ፡ እሙንቱ፡ ነደቅቱ፡ እለ፡ የሐንጽዎ።
5 ወወሀቦሙ፡ እግዚአብሔር፡ ሞገሰ፡ ለረበናተ፡ ይሁዳ፡ ውእተ፡ አሚረ፡ አመ፡ ተሣሀሎሙ።
6 ወኢከልእዎሙ፡ ሐኒጸ፡ እስከ፡ ይልእኩ፡ ኀበ፡ ዳርዮስ፡ ወእስከ፡ ያአትዉ፡ ሎሙ፡ መጽሐፈ።
7 ወጸሐፉ፡ ኀበ፡ ዳርዮስ፡ ወፈነዉ፡ እንዘ፡ ይብሉ፡ ሲሳንስ፡ መልአከ፡ ሶርያ፡ ወዘፊንቅስ፡ ወሳተራቡ፡ ርዘንስ፡ ወእለ፡ ምስሌሆሙ፡ ቢጾሙ፡ እለ፡ ውስተ፡ ሶርያ፡ ወፊንቂስ፡ መሳፍንት፡ ለንጉሥ፡ ዳርዮስ።
8 ከመ፡ ታእምርአ፡ ኵሎአ፡ እግዚኦሙ፡ ንጉሥ፡ በጻሕነ፡ ውስተ፡ ብሔረ፡ ይሁዳ፡ ወመጻእነ፡ ውስተ፡ ኢየሩሳሌም፡ ሀገር፡ ረከብናሆሙ፡ ለፄዋ፡ አይሁድ፡ ሊቃናቲሆሙ፡ ውስተ፡ ሀገረ፡ ኢየሩሳሌም።
9 የሐንጹ፡ ቤተ፡ እግዚአብሔር፡ ዐቢየ፡ ወሐዲሰ፡ በእብን፡ ግሉፍ፡ ዘብዙኅ፡ ሤጡ፡ ወዕፀወኒ፡ ሠርዑዘዘ፡ አብያቲሆሙ።
10 ወጒጉእ፡ ግብሩ፡ ወይፈጥን፡ በውስተ፡ እደዊሆሙ፡ እንዘ፡ ይገብሩ፡ ወበኵሉ፡ ክብር፡ ወበአስተሐምሞ፡ ይገብሩ።
11 ወእምዝ፡ ተስእልናሆሙ፡ ለሊቃናቲሆሙ፡ ወንቤሎሙ፡ መኑ፡ አዘዘክሙ፡ ትሕንጹ፡ ዘንተ፡ ቤተ፡ ወትሣርሩ፡ ዘንተ፡ ግብረ።
12 ወሐተትናሆሙ፡ ከመ፡ ንልአክ፡ ኀቤከ፡ ወንጽሐፍ፡ ለከ፡ ሰብኦሙ፡ ወሊቃናተ፡ ምግባሮሙ፡ በአስማቲሆሙ፡ ወተስእልናሆሙ፡ ለሊቃውንቲሆሙ።
13 ወአውሥኡነ፡ ወይቤሉነ፡ ንሕነ፡ አግብርተ፡ እግዚአብሔር፡ ንሕነ፡ ዘፈጠረ፡ ሰማየ፡ ወምድረ።
14 ወሐነጽዎ፡ ለዝንቱ፡ ቤት፡ ትካት፡ እምቅድመ፡ ብዙኅ፡ ዓመት፡ ሐነጾ፡ ንጉሠ፡ እስራኤል፡ ዓቢይ፡ ወጽኑዕ፡ ወፈጸሞ።
15 ወእስመ፡ አምዕዕዎ፡ አበዊነ፡ ወአበሱ፡ ሎቱ፡ ለእግዚአ፡ እስራኤል፡ ሰማያዊ፡ አግብኦሙ፡ ውስተ፡ እዴሁ፡ ለናቡደከነጾር፡ ንጉሠ፡ ባቢሎን፡ ንጉሠ፡ ፋርስ።
16 ወዘንተኒ፡ ቤተ፡ ነሠተ፡ ወአውዐየ፡ በእሳት፡ ወሕዝበኒ፡ ፄወወ፡ ወአእተትዎሙ፡ ባቢሎን።
17 ወአመ፡ ቀዳሚት፡ ዓመተ፡ መንግሥቱ፡ ለቂሮስ፡ በብሔረ፡ ባቢሎን፡ ጸሐፈ፡ ቂሮስ፡ ይሕንጽዎ፡ ለዝንቱ፡ ቤት።
18 ወንዋየ፡ ቅድሳትኒ፡ ዘወርቅ፡ ወዘብሩር፡ ዘአውፅአ፡ ናቡከደነጾር፡ እምነ፡ ቤት፡ ዘውስተ፡ ኢየሩሳሌም፡ ወሠርዖ፡ ውስተ፡ ጽርሑ፡ ወካዕበ፡ አውፅአ፡ ቂሮስ፡ ንጉሥ፡ እምነ፡ ጽርሑ፡ ዘባቢሎን፡ ወወሀቦ፡ ለዘሩባቤል፡ ወለሰንበሳሮ፡ መልአክ።
19 ወአዘዞሙ፡ ይሰድዎ፡ ለውእቱ፡ ንዋይ፡ ወይሢምዎ፡ ውስተ፡ ቤተ፡ መቅደስ፡ ዘኢየሩሳሌም፡ ወይሕንጹ፡ ቤተ፡ እግዚአብሔር፡ በውስተ፡ መካኑ።
20 ወእምዝ፡ በጽሑ፡ ውእቱ፡ ሰንባስሮስ፡ አኀዘ፡ ይሣርር፡ ቤተ፡ እግዚአብሔር፡ ዘኢየሩሳሌም፡ ወእምይእቲ፡ አሚር፡ እስከ፡ ም፡ የሐንጹ፡ ወኢያኀልቁ።
21 ወይእዜኒ፡ ኰንን፡ እግዚኦሙ፡ ንጉሥ፡ ወክሥት፡ መጻሕፍተ፡ ነቢያተ፡ መንግሥቱ፡ ለቂሮስ፡ ንጉሥ፡ ዘውስተ፡ ባቢሎን።
22 ወእመ፡ ረከብከ፡ ከመ፡ ፈቀደ፡ ቂሮስ፡ ንጉሥ፡ ይሕንጽ፡ ቤተ፡ እግዚአብሔር፡ ዘኢየሩሳሌም፡ ወዘከመ፡ ትፈቅድ፡ እግዚኦሙ፡ ንጉሥ፡ ለአክአ፡ ለነ፡ በእንተአ፡ ዝንቱአ።
23 ወእምዝ፡ አዘዘ፡ ዳርዮስ፡ ንጉሥ፡ ይኅሥሡ፡ ውስተ፡ መጻሕፍተ፡ ነቢያት፡ በውስተ፡ ባቢሎን፡ ወተረክበ፡ ውስተ፡ ብሔረ፡ በጣኒስ፡ ዘባሪ፡ ዘደወለ፡ ሜዶን፡ ብሔረ፡ አሐዱ፡ መካን፡ ኀበ፡ ዐጸዉ፡ ነቢያተ፡ ወከመዝ፡ ይብል።
24 አመ፡ ቀዳሚ፡ ዓመተ፡ መንግሥቱ፡ ለቂሮስ፡ ንጉሥ፡ አዘዘ፡ ይሕንጹ፡ ቤተ፡ እግዚአብሔር፡ ዘኢየሩዳሌም፡ በሐበ፡ ይሠውዑ፡ በእሳት፡ እንተ፡ ጸብሐት።
25 ዘቆሙ፡ ፷፡ በእምት፡ ወንድቁ፡ በእብን፡ ንሱቅ፡ እንተ፡ ሠላስ፡ ወማእሰሩ፡ እንተ፡ አሐቲ፡ በዕፀ፡ ብሔር፡ በሐዲስ፡ ወየሀብዎሙ፡ ፃእፃአ፡ እምቤተ፡ ቂሮስ፡ ንጉሥ።
26 ወንዋየኒ፡ ቅድሳት፡ ዘቤተ፡ እግዚአብሔር፡ ዘወርቅ፡ ወዘብሩር፡ ዘአውፅአ፡ ናቡከደነጾር፡ እምውስተ፡ ቤት፡ ዘኢየሩሳሌም፡ ወወሰደ፡ ባቢሎን፡ ያግብእዎ፡ ውስተ፡ ውእቱ፡ ቤት፡ ዘኢየሩሳሌም፡ ኀበ፡ ይነብር፡ ቀዲሙ፡ ህየ።
27 ወአዘዘ፡ ይግበሩ፡ ሲሳንስ፡ መልአከ፡ ሶርያ፡ ወፊንቂስ፡ ወሰተራቡርዛን፡ ወእለ፡ ምስሌሆሙ፡ ቢጾሙ፡ ወእለ፡ ሥዩማን፡ እሙንቱ፡ መሳፍንት፡ ለሶርያ፡ ወለፊንቂስ፡ ከመ፡ ይኅድጉ፡ ሎሙ፡ መካኖሙ፡ ወያብሕዎሙ፡ ለገብረ፡ እግዚአብሔር፡ ለዘሩባቤል፡ መልአከ፡ ይሁዳ፡ ወለረበናተ፡ ይሁዳ፡ ይሕንጽዎ፡ ለውእቱ፡ ቤተ፡ እግዚአብሔር፡ በውስተ፡ መካኑ።
28 አነአ፡ አዘዝኩአ፡ በኵሉ፡ ይሕንጹ፡ ወይትራአዩ፡ ኅቡረ፡ ይግበሩ፡ እለ፡ አተዉ፡ እምኀበ፡ ተፄወዉ፡ ሰብአ፡ ይሁዳ፡ እስከ፡ ይፌጽሙአ፡ ቤተአ፡ እግዚአብሔር።
29 ወእምውስተ፡ ጸባሕትአ፡ ዘቄሌ፡ ዘሶርያ፡ ወዘፊንቂስ፡ አስተሐምሙ፡ ወሀብቆሙ፡ ለእሉ፡ ሰብእ፡ ለመሥዋዕተ፡ እግዚአብሔር፡ ዘበሕጉ፡ ለዘሩባቤል፡ መልአክ፡ አልህምተ፡ ወአጣሌ፡ ወአባግዐ።
30 ወከማሁ፡ ለዕፅኒ፡ ዘያነድዱ፡ ወለጼውኒ፡ ወለወይንኒ፡ ወለቅብእኒ፡ ፃእፃኦሙ፡ ዘዘልፍ፡ በበዓመት፡ ዘያወፅኦሙ፡ ሀብዎሙ፡ በአምጣነ፡ ይቤሉ፡ ካህናት፡ እለ፡ ኢየሩሳሌም፡ (ዘመጠነ፡ ያወፅኦሙ፡ በእንተ፡ ጸባሕት፡ ዘይቤሉክሙ፡ እሙንቱ፡ ሀብዎሙ፡ )፡ እንዘ፡ ኢትትዋሥእዎሙ።
31 ከመ፡ ያግብኡ፡ ቊርባነ፡ ለእግዚአብሔር፡ ልዑል፡ በእንተ፡ ንጉሥ፡ ወበእንተ፡ ደቂቁ፡ ይጸልዩ፡ ሎሙ፡ በእንተ፡ ሕይወቶሙ።
32 ወለእመቦ፡ ዘአበዩ፡ ገቢረ፡ በከመ፡ ጽሑፍ፡ ወዘኒ፡ ተሀደሙ፡ ይንሥኡ፡ ዕፀ፡ እምነ፡ ዘዚአሆሙ፡ ወቦቱ፡ ይስቅልዎሙ፡ ወንዋዮሙ፡ ይትበርበሩ፡ ወለቤተአ፡ ንጉሥአ፡ ይኩንአ።
33 በበይነ፡ ዝንቱ፡ ውእቱ፡ እግዚአብሔር፡ ዘተሰምየ፡ ስሙ፡ በህየ፡ ለያማስኖሙ፡ ለኵሉ፡ አሕዛብ፡ ወለኵሉ፡ መንግሥት፡ እለ፡ ያሌዕሉ፡ እዴሆሙ፡ ከመ፡ ይክልእዎሙ፡ ወከመ፡ ያሕሥሙ፡ ላዕለ፡ ውእቱ፡ ቤተ፡ እግዚአብሔር፡ ዘኢየሩሳሌም።
34 አነ፡ ዳርዮስ፡ አዘዝኩ፡ ያስተሐምሙ፡ ወከመ፡ ይግበሩ።
=== chapter 8 ===
[Chapter 8]
1 ወእምዝ፡ ሲሳንስ፡ መልአከ፡ ቄሌ፡ ዘሶርያ፡ ወዘፊንቂስ፡ ወሰተረቡርዛኒስ፡ ወቢጾሙ፡ አኀዙ፡ ይግበሩ፡ በከመ፡ አዘዘ፡ ዳርዮስ፡ ንጉሥ።
2 ወቆሙ፡ ለሊሆሙ፡ አስተሐሚሞሙ፡ ምስለ፡ ረበናተ፡ አይሁድ፡ ወይኤዝዙ።
3 ወተገብረ፡ ፍጡነ፡ መቅደስ፡ ወገብሩ፡ ቅድሳተ፡ እንዘ፡ ይትኔበዩ፡ ሐጌ፡ ወዘካርያስ፡ ነቢያት።
4 ወፈጸሙ፡ ገቢረ፡ በትእዛዘ፡ እግዚአብሔር፡ አምላከ፡ እስራኤል፡ በዘ፡ አእመሩ፡ ቂሮስ፡ ወዳርዮስ፡ ወአርጠርክስርክሴስ፡ ንጉሠ፡ ፋርስ፡ ወኀልቀ፡ አመ፡ ሳድስ፡ ዓመተ፡ መንግሥቱ፡ ለዳርዮስ፡ ንጉሠ፡ ፋርስ።
5 ወተፈጸመ፡ ቤቱ፡ አመ፡ ሰሙኑ፡ ለጽልመት፡ ወርኀ፡ አዳር፡ በሳድስ፡ ዓመተ፡ መንግሥቱ፡ ለዳርዮስ።
6 ወገብሩ፡ ደቂቀ፡ እስራኤል፡ ወካህናትኒ፡ ወሌዋዊያንኒ፡ ወኵሉ፡ ሕዝብ፡ እለ፡ አተዉ፡ እምኀበ፡ ተፄወዉ፡ ዘበሕጉ፡ በከመ፡ ጽሑፍ፡ ውስተ፡ መጽሐፈ፡ ሙሴ።
7 ወገብሩ፡ ለመድቅሐ፡ ቤተ፡ መቅደስ፡ ዘእግዚአብሔር፡ አልህምተ፡ ፻፡ ወአጣሌ፪፻፡ ወአባግዐ፡ ፬፻።
8 ሐራጊተ፡ በእንተ፡ ኵሉ፡ ኀጢአቶሙ፡ ለኵሉ፡ እስራኤል፡ ፲ወ፪፡ በኊልቈ፡ ሕዝብ፡ መሳፍንቲሆሙ፡ ለእስራኤል።
9 ወቆሙ፡ ካህናት፡ ወሌዋዊያንኒ፡ ልቡሳኒሆሙ፡ በበሕዘቢሆሙ፡ ለግብረ፡ እግዚአብሔር፡ አምላከ፡ እስራኤል፡ በከመ፡ ሕጎሙ፡ ዘውስተ፡ መጽሐፈ፡ ሙሴ፡ ወዐጸውትኒ፡ ቆሙ፡ በበአናቅጺሆሙ።
10 ወገብሩ፡ ፋሲካሆሙ፡ ደቂቀ፡ እስራኤል፡ እለ፡ አተዉ፡ እምኀበ፡ ተፄወዉ፡ አመ፡ ዐሥሩ፡ ወረቡዑ፡ ለሠርቀ፡ ቀዳሚ፡ ወርኅ፡ እስመ፡ አንጽሑ፡ ርእሶሙ፡ ካህናት፡ ወሌዋዊያን፡ ኵሎሙ፡ ኅቡረ።
11 ወደቂቆሙሰ፡ ለእለ፡ አተዉ፡ እምኀበ፡ ተፄወዉ፡ ኢያንጽሑ፡ ርእሶሙ፡ እስመ፡ ኵሎሙ፡ ሌዋዊያን፡ ኅቡረ፡ አንጽሑ።
12 ወጠብሑ፡ ፋሲካሆሙ፡ ለኵሎሙ፡ ደቂቀ፡ እለ፡ ተፄወዉ፡ ወለአኀዊሆሙኒ፡ ለካህናት።
13 ወበልዑ፡ ደቂቀ፡ እስራኤል፡ እለ፡ ተፄወዉ፡ ኵሎሙ፡ እለ፡ ተፈልጡ፡ እምርኵሶሙ፡ ለአሕዛበ፡ ምድር፡ ከመ፡ ይኅሥሥዎ፡ ለእግዚአብሔር።
14 ወገብሩ፡ በዓለ፡ ናእት፡ ሰቡዐ፡ መዋዕለ፡ እንዘ፡ ይትፌሥሑ፡ ቅድመ፡ እግዚአብሔር።
15 እስመ፡ ሜጠ፡ ልቦ፡ እግዚአብሔር፡ ለንጉሠ፡ ፋርስ፡ ወአጽንዐ፡ እደዊሆሙ፡ ለግብረ፡ አምላከ፡ እስራኤል።
=== chapter 9 ===
[Chapter 9]
1 ወእምድኅረ፡ ዝንቱ፡ መንግሥቱ፡ ለአርጠርክስርክሴስ፡ ንጉሠ፡ ፋርስ፡ መጽአ፡ ዕዝራ፡ ወልደ፡ አዛርያስ፡ ወልደ፡ ኤዜርዩ፡ ወልደ፡ ኬልቅዩስ፡ ወልደ፡ ሳሌም።
2 ወልደ፡ ሰዱሉቁ፡ ወልደ፡ አኪጦብ፡ ወልደ፡ አማርቲዩ፡ ወልደ፡ ዖዝያን፡ ወልደ፡ ቦቃ፡ ወልደ፡ አቢሴ፡ ወልደ፡ ፊንሐስ፡ ወልደ፡ አልዓዛር፡ ወልደ፡ አሮን፡ ቀዳማዊ፡ ካህን።
3 ውእቱ፡ ዕዝራ፡ እምባቢሎን፡ መጽአ፡ ወያአምር፡ ኵሎ፡ ኦሪተ፡ ሙሴ፡ ዘወሀቦ፡ አምላከ፡ እስራኤል፡ ወጸሓፊ፡ ውእቱ።
4 ወወሀቦ፡ ንጉሥ፡ ክብረ፡ አስመ፡ ረከበ፡ ሞገሰ፡ ቅድሜሁ፡ ወሤሞ፡ ላዕለ፡ ኵሉ።
5 ወዐርጉ፡ ደቂቀ፡ እስራኤል፡ ወካህናት፡ ወሌዋውያን፡ ወካህናተ፡ መዝሙር….፡ ወደቀ፡ ካህናት።
6 ዐርጉ፡ ኢየሩሳሌም፡ አመ፡ ሳብዕ፡ ዓመተ፡ መንግሥቱ፡ ለአጠርክስርክሴስ፡ በኃምስ፡ ወርኅ፡ ወፅኡ፡ እምነ፡ ባቢሎን፡ አመ፡ ርእሰ፡ ሠርቀ፡ ወርኅ፡ ቀዳሚ።
7 ወበጽሑ፡ ኢየሩሳሌም፡ አመ፡ ሠርቀ፡ ኃምስ፡ ወርኅ፡ በከመ፡ ሠርሖሙ፡ እግዚአብሔር።
8 ወዕዝራ፡ ብዙኀ፡ ትምህርተ፡ ያአምር፡ ወአልቦ፡ ዘይስሕት፡ እምሕገ፡ እግዚአብሔር፡ ወእምኵሉ፡ ትእዛዞሙ፡ ለእስራኤል፡ ወኵነኔሆሙ፡ ወፍትሖሙ።
9 ወለአከ፡ አርጠርክስርክሴስ፡ ንጉሥ፡ ሐበ፡ ዕዝራ፡ ካህን፡ ወጸሓፌ፡ ሕገ፡ እግዚአብሔር፡ ወከመዝ፡ ይብል፡ መጽሐፉ፡ ዘፈነወ።
10 እምኀበ፡ አርጠርክስርክዌስ፡ ንጉሥ፡ ለዕዝራ፡ ካህን፡ ወጸሓፌ፡ ሕገ፡ እግዚአብሔር፡ ሰላምአ።
11 አነአ፡ በአፍቅሮአ፡ ሰብእ፡ ኀሊይየ፡ አዘዝኩ፡ ኵሎሙ፡ እለ፡ ይፈቅዱ፡ እምውስተ፡ ሕዝበ፡ አይሁድ፡ ወካህናትኒ፡ ወሌዋውያን፡ እለ፡ ሀለዉ፡ ውስተ፡ መንግሥትየ፡ እምከመ፡ ፈቀዱ፡ ለይሑሩ፡ ኢየሩሳሌም።
12 ወኵሎሙ፡ እለ፡ ይፈቅዱ፡ ኢየሩሳሌም፡ ይሑሩ፡ ይርአዩ፡ ይሁዳ፡ ወኢየሩሳሌም፡ ይኅበሩ፡ ምስሌክሙ፡ እስመ፡ ከመዝ፡ አዘዝነ፡ አነ፡ ወ፯፡ አዕርክትየ፡ መማክርቲየ።
13 ከመ፡ ይሑሩ፡ ወይግበሩ፡ በከመ፡ ሕገ፡ እግዚአብሔር።
14 ወያብኡ፡ ቊርባነ፡ ለእግዚአብሔር፡ ለኢየሩሳሌም፡ ዘበፃዕነ፡ አነ፡ ወአዕርክቲየ፡ ወኵሎ፡ ወርቀ፡ ወብሩር፡ ዘተረክበ፡ ውስተ፡ ብሔረ፡ ባቢሎን፡ ለእግዚአብሔር፡ ዘበኢየሩሳሌም።
15 ምስለ፡ ዘያበውኡ፡ ሕዝብ፡ ለመቀቅደስ፡ ዘእግዚአብሔር፡ ዘኢየሩሳሌም፡ ያስተጋብእዎ፡ ወርቆ፡ ወብሩሮ፡ ለአልህምት፡ ወለአጣሊ፡ ወለአባግዕ፡ ወለኵሉ፡ መፈፍቅዶሙ።
16 በዘይገብሩ፡ መሥዋዕተ፡ በውስተ፡ ምሥዋዐ፡ እግዚአብሔር፡ ዘኢየሩሳሌም፡ በከመ፡ ሕጎሙ።
17 ወኵሎ፡ ዘትፈቅድ፡ ትግበር፡ ምስለ፡ ቢጽከ፡ በውእቱ፡ ወርቅ፡ ወብሩር፡ አግብር፡ በከመ፡ መፍቅዱ፡ ለአምላክከ።
18 ንዋየ፡ ቅድሳት፡ ዘይከውን፡ ለትካዘ፡ ቤተ፡ መቅደስ፡ ዘኢየሩሳሌም፡ ዘአምላክከ።
19 ወባዕደኒ፡ እመቦ፡ ዘፈቀድክሙ፡ ለትካዘ፡ ቅድሳት፡ ለአምላክከ፡ አብእ፡ እምነ፡ መዝገበ፡ ቤተ፡ ንጉሥ።
20 ።
21 ወአነ፡ አርጠርክስክሴስ፡ ንጉሥ፡ አዘዝኩ፡ እምውስተ፡ መዛግብትየ፡ ዘሶርያ፡ ወዘፊንቂስ፡ የሀቡ፡ ዘለአከ፡ ዕዝራ፡ ካህን፡ ወጸሓፊ፡ ዘሕገ፡ እግዚአብሔር፡ ልዑል፡ ሀቡ፡ ወኢታስትቱ።
22 እስከ፡ ምእት፡ መክሊተ፡ ብሩር፡ ወዓዲ፡ ሥርናየ፡ ምእት፡ በመስፈርተ፡ ቆሮስ፡ ወወይነኒ፡ ምእት፡ በመስፈርት።
23 ወይግበሩ፡ በሕገ፡ እግዚአብሔር፡ ልዑል፡ ከመ፡ ኢይምጻእ፡ መንሱት፡ ላዕለ፡ መንግሥቱ፡ ለንጉሥ፡ ወላዕለ፡ ውሉዱ።
24 ወኢትንሥኡ፡ ምንተኒ፡ ጸባሕተ፡ እምነ፡ ካህናት፡ ወሌዋውያን፡ ወካህናተ፡ መዝሙረ፡ ወዐጸውት፡ ወደቀ፡ ካህናት፡ ወእምኵሉ፡ ዘይትቀነይ፡ ለቤተ።
25 መቅደስ፡ ወኢምንተኒ፡ ወኢትቅንይዎሙ።
26 ወአንተኒ፡ ዕዝራ፡ በጥበበ፡ እግዚአብሔር፡ ሢም፡ መኳንንተ፡ ወመሳፍንተኒ፡ እለ፡ ይኴንኑ፡ ኵሎ፡ ሶርያ፡ ወፊንቂስ፡ እምውስተ፡ ኵሎሙ፡ እምእለ፡ ያአምሩ፡ ሕጎ፡ ለአምላክከ፡ ወለእለኒ፡ ኢያአምሩ፡ መሀሮሙ።
27 ወኵሎ፡ ዘይክሕድ፡ ሕገ፡ አምላክከ፡ ወዘንጉሥኒ፡ ኢታስትቱ፡ ኰንንዎ፡ ዘኒ፡ ለሞት፡ ወዘኒ፡ ለመቅሠፍት፡ ወዘኒ፡ ለፁማዴ፡ ወዘኒአ፡ ለተበርብሮአ፡ ለኵሉ፡ በበአ፡ ኵነኔሁአ።
28 ወይትባረክአ፡ እግዚአብሔርአ፡ ዘወደየ፡ ዘንተ፡ ውስተ፡ ልብየ፡ ሊተ፡ ለንጉሥ፡ ከመ፡ አክብር፡ ቤቶ፡ ዘኢየሩሳሌም።
29 እስመ፡ ኪያነኒ፡ አክበረኒ፡ እምነ፡ ነገሥት፡ ወእምነ፡ ኵሉ፡ አዕርክትየ፡ ወእምነ፡ ኵሉ፡ መኳንንት።
30 ወእምዝ፡ ተአመንኩ፡ በጸጋሁ፡ ለእግዚአብሔር፡ አምላኪየ፡ ወነሣእኩ፡ እምውስተ፡ እስራኤል፡ እለ፡ የዐርጉ፡ ምስሌየ፡ ዕደወ፡ ቢጸ።
31 ዓበይቶሙ፡ ዘዘበሐውርቲሆሙ፡ በበ፡ ምስፍና፡ ደወሎሙ፡ እለ፡ የዐርጉ፡ ምስሌየ፡ እምነ፡ ባቢሎን፡ በመንግሥተ፡ አርጠርክስርክሴስ፡ ንጉሥ።
32 እምነ፡ ደቂቀ፡ ፎሮስ፡ ጠሮሲጢሞስ፡ ወእምነ፡ ደቂቀ፡ ኢየጠማሩ፡ ጋሜሎስ፡ ወዘእምነ፡ ደቂቀ፡ ዳዊት።
33 ፋሬስ፡ ወዘካርያስ፡ ወተጽሕፉ፡ ምስሌሁ፡ ፻ወ፶፡ ዕደው።
34 ዘእምነ፡ መዓት፡ ወሞአ፡ ወቤልያሐኒያስ፡ ወዘርዩ፡ ወምስሌሁ፡ ፪፻፡ ዕደው።
35 እምነ፡ ደቂቀ፡ ዘቶይሱ፡ ኢያካንስ፡ ኢያቴሉ፡ ወምስሌሁ፡ ፪፻፡ ዕደው፡ ወእምነ፡ ደቂቀ፡ አዲኑቤን፡ ዘዮናቱ፡ ወምስሌሁ፡ ፪፻ወ፶፡ ዕደው።
36 እምነ፡ ደቂቀ፡ ላሜስያስ፡ ዘጎቶልዩ፡ ወምስሌሁ፡ ፸ዕደው።
37 እምነ፡ ደቂቀ፡ ሶፍጢዩ፡ ዘዘካርያስ፡ ዘሚካኤሉ፡ ወምስሌሁ፡ ፸፡ ዕደው።
38 ወእምነ፡ ደቂቀ፡ ኢዮአብ፡ ዘበዲያስ፡ ዘኢያዜሉ፡ ወምስሌሁ፡ ፪፻ወ፲ወ፪፡ ዕደው።
39 ወእምነ፡ ደቂቀ፡ ባኒ፡ እሳሌ፡ ሞት፡ ዘኢዩሳፊዩ፡ ወምስሌሁ፡ ፻ወ፷፡ ዕደው።
40 እምነ፡ ደቂቀ፡ ቤዔር፡ ዘዘካርያስ፡ ዘቤቤ፡ ወምስሌሁ፡ ፳ወ፰፡ ዕደው።
41 ወደቂቀ፡ አስጠየት፡ ዮሐንስ፡ ዘዐቃጣን፡ ወምስሌሁ፡ ፻ወ፲፡ ዕደው።
42 እምነ፡ ደቂቀ፡ አዶንያ፡ ኵሉ፡ እለ፡ ተርፉ። ወዝንቱ፡ ውእቱ፡ አስማቲሆሙ፡ ኤሊፋላ፡ ዘጌሑኤል፡ ወስምያስ፡ ወምስሌሆሙ፡ ፸፡ ዕደው፡ እምነ፡ ደቂቀ፡ በኔዩ፡ በአስጦስቁሩ፡ ወምስሌሁ፡ ፸፡ ዕደው።
43 ወወሰድክዎሙ፡ ኀበ፡ ዘይብሉ፡ ፈለግ፡ ወኀደርነ፡ ህየ፡ ሠሉሰ፡ መዋዕለ፡ ወአስተፋቀድክዎሙ።
44 ወኢረከብነ፡ ውስቴቶሙ፡ ካህናተ፡ ወሌዋዊያነ።
45 ወለአኩ፡ ኀበ፡ አልዓዛር፡ ወነሣእኩ፡ ምስሌየ፡ መአስመን፡ ወአንዐጣን፡ ወሰሚያ፡ ወዮሪቦን፡ ዘናታን፡ ዘእናጣን፡ ዘዘካርያስ፡ ወነሣእኩ፡ ምስሌሆሙ፡ እምውስተ፡ መሳፍንቲሆሙ፡ ወጠቢባኒሆሙ።
46 ወእቤሎሙ፡ ይሑሩ፡ ኀበ፡ ያዴዮን፡ መጋቤ፡ መዝገብ።
47 ወአዘዝክዎሙ፡ ይንግርዎ፡ ለያዴዮን፡ ወለአኀዊሁ፡ ወለእለ፡ ውስተ፡ ውእቱ፡ ብሔር፡ ከመ፡ ይፈንዉ፡ ለነ፡ ካህናተ፡ ለቤተ፡ እግዚአብሔር።
48 ዕደው፡ ጠቢባነ፡ እምውስተ፡ ደቂቀ፡ ሞሐሊ፡ ሌዋዊ፡ እስራኤላዊ፡ አሴቢያን፡ ወደቂቁ፡ ወአኀዊሆሙ፡ ዐሠርቲሆሙ።
49 ወእለሂ፡ እምውስተ፡ ደቂቀ፡ ከናኔው፡ ወደቂቀ፡ ዚአሆሙ፡ ፳፡ ዕደው።
50 ወደቀ፡ ካህናትኒ፡ እለ፡ አብአ፡ ዳዊት፡ ወዓበይቶሙ፡ ለግብረ፡ ሌዋውያን፡ ፪፻ወ፳፡ ደቀ፡ ካህናት፡ ወተጽሕፉ፡ አስማቲሆሙ፡ ለኵሎሙ።
51 ወበፃዕነ፡ ንጹም፡ በህየ፡ ምስለ፡ ወራዙቲነ፡ ቅድመ፡ እግዚአብሔር፡ አምላክነ፡ ወንስአል፡ ሣህለ፡ ለውሉድነ፡ ወለእንስሳነ።
52 እስመ፡ ኀፈርኩ፡ እፈኑ፡ ሰብአ፡ አፍራስ፡ ወእግር፡ እለ፡ ያጸንዑ፡ ብሔረ፡ ወይሜኵዩ፡ እምነ፡ ፀርነ።
53 እስመ፡ ንቤሎ፡ ለንጉሥ፡ ከመ፡ ኀይሉ፡ ለእግዚእነ፡ ምስለ፡ እለ፡ የኀሥሥዎ፡ ከመ፡ ያርትዖሙ፡ በኵሉ።
54 ወካዕበ፡ ጸለይነ፡ ኀበ፡ እግዚአብሔር፡ በበይነ፡ ዝንቱ፡ ኵሉ፡ ወተሣሀለነ።
55 ወፈለጥክዎሙ፡ ለመሳፍንተ፡ ሕዝብ፡ ካህናት፡ ፲ወ፪፡ ዕደው፡ ወኤሴርያን፡ ወአሰሚያን፡ ወምስሌሆሙ፡ ፲፡ ዕደው፡ እምውስተ፡ አኀዊሆሙ።
56 ወደለውኩ፡ ሎሙ፡ ወርቆ፡ ወብሩሮ፡ ወንዋየ፡ ቅድሳትኒ፡ ዘቤተ፡ እግዚአብሔር፡ ዘጸገወ፡ ንጉሥ፡ ወመኳንንቱ፡ ወመማክርቲሁ፡ ወኵሉ፡ እስራኤል።
57 ወመጠውክዎሙ፡ ደሊውየ፡ ብሩረ፡ መክሊተ፡ ፮፻ወ፶፡ ወንዋየ፡ ብሩር፡ ፻፡ መክሊተ፡ ወወርቅኒ፡ ፻መክሊተ።
58 ወንዋየ፡ ወርቅ፡ ፳፡ ወንዋየ፡ ብርት፡ ቅድው፡ ሰናጒጐ፡ ዘከመ፡ ወርቅ፡ ፲።
59 ወእቤሎሙ፡ ተቀደሱ፡ አንትሙኒ፡ ለእግዚአብሔረ፡ ወንዋየ፡ ቅድሳትኒ፡ ወብሩረ፡ ወወርቀ፡ ብፅዓቶ፡ ለእግዚአብሔር፡ አምላከ፡ አበዊነ።
60 ትጉሁ፡ ወተዐቀቡ፡ እስከ፡ ትሜጥዉ፡ ለመሳፍንተ፡ ሕዝብ፡ ካህናት፡ ወሌዋውያን፡ ወመኳንንተ፡ በሓውርቲሆሙ፡ ለእስራኤል፡ ዘኢየሩሳሌም፡ በውስተ፡ ጽርሐ፡ ቤቱ፡ ለአምላክነ።
61 ወካህናት፡ እለ፡ ተመጠዉ፡ ወሌዋዊያን፡ ወርቀ፡ ወብሩረ፡ ወንዋየኒ፡ ዘኢየሩሳሌም፡ አእተዉ፡ ለቤተ፡ መቅደስ፡ ዘእግዚአብሔር።
62 ወተንሥኡ፡ እምውእቱ፡ ብሔር፡ ታራ፡ አመ፡ ዐሠሩ፡ ወሰኑዩ፡ ለሠረቀ፡ ቀዳሚ፡ ወርኅ፡ ወበጽሑ፡ ኢየሩሳሌም፡ በእዴሁ፡ ለአምላክነ፡ ጽንዕት፡ እንተ፡ ምስሌነ፡ ዘአድኀነነ፡ እምነ፡ ኵሉ፡ ፀርነ፡ ወበጽሑ፡ ኢየሩሳሌም።
63 ወአመ፡ ሣልስት፡ እምዘ፡ በጻሕነ፡ ደለውዎ፡ ወርቆ፡ ወብሩሮ፡ ወመጠዉ፡ ለቤተ፡ እግዚአብሔር፡ ለመርሞቲዩራ፡ ካህን፡ በበኊልቁ።
65 ወአምጣኑ፡ ኵሉ፡ ተጽሕፈ፡ በጊዜሃ፡ ድልወቱ።
64 ወሀለዉ፡ ምስሌሁ፡ አልዓዛር፡ ወልደ፡ ፊንሐስ፡ ወምስሌሆሙ፡ ይሳብዴስ፡ ወልደ፡ ኢዮሱስ፡ ወሞኤተሰበኑ፡ ሌዋዊያን።
66 ወእለሰ፡ አተዉ፡ እምኀበ፡ እለ፡ ተፄወዉ፡ አብኡ፡ መሥዋዕተ፡ ለእግዚአብሔር፡ አምላከ፡ እስራኤል፡ ፲ወ፪፡ አልህምተ፡ ፺ወ፮።
67 አባግዐ፡ ፸ወ፯፡ ሐራጊት፡ በእንተ፡ መድኀኒት፡ ፲ወ፪፡ መሐስአ፡ አባግዕ፡ ወሦዑ፡ ኵሎ፡ ለእግዚአብሔር።
68 ወእምዝ፡ መጠውዎሙ፡ መጻሕፍተ፡ ዘንጉሥ፡ ለመገብተ፡ አብያተ፡ ንጉሥ፡ ወለመኳንንተ፡ ሶርያ፡ ወፊንቄስ፡ ወአክበርዎሙ፡ ለመቅደሰ፡ እግዚአብሔር።
69 ወመጽኡ፡ ዓበይቶሙ፡ ወነገሩኒ፡ ዘከመ፡ ገብሩ። ወይቤሉኒ፡ ሕዝበ፡ እስራኤል፡ ኢተፈልጡ፡ ወኢመኳንንቲሆሙ፡ ወኢካሕናቲሆሙ፡ ወኢሌዋዊያን።
70 እምነ፡ ርኵሶሙ፡ ለባዕዳን፡ አሕዛበ፡ ብሔር፡ ከናኔዎን፡ ወኬጤዎን፡ ወፌሬዜዎን፡ ወኢያቡሴዎን፡ ወሞአቢጦን፡ ወግብጽ፡ ወኢዱሜዎን።
71 ወአውሰቡ፡ አዋልዲሆሙ፡ ወእምንቱኒ፡ ወደቂቆሙኒ፡ ተደመሩ፡ ዘርእ፡ ቅዱስ፡ ምስለ፡ ባዕዳን፡ አሕዛበ፡ ምድር፡ ወኀብሩ፡ መሳፍንቲሆሙ፡ ወመኳንንቲሆሙ፡ በይእቲ፡ ኀጢአት፡ እምቅድመ፡ ግብሮሙ።
72 ወእምዝ፡ ሶበ፡ ሰማዕኩ፡ ሠጠጥኩ፡ አልባስየ፡ ወአልባሰ፡ ካህናትየኒ፡ ወነጸይኩ፡ ሥእርተ፡ ርእስየ፡ ወጽሕምየ፡ ወነበርኩ፡ ሕዙነ፡ ወትኩዘ።
73 ወተጋብኡ፡ ኀቤየ፡ ኵሎሙ፡ እለ፡ ይፈርሁ፡ ቃለ፡ እግዚአብሔር፡ አምላከ፡ እስራኤል፡ እንዘ፡ ትኩዝ፡ አነ፡ በእንተ፡ ይእቲ፡ ኀጢአት፡ ወነበርኩ፡ ሕዙነ።
74 ወእምዝ፡ ጊዜ፡ መሥዋዕተ፡ ሰርክ፡ ተንሣእኩ፡ ጽውምየ፡ እንዘ፡ ሥጡጥ፡ አልባስየ፡ ወአልባሰ፡ ካህናትየ፡ ወአስተብረኩ፡ በብረክየ፡ ወአልዐልኩ፡ እደውየ፡ ኀበ፡ እግዚአብሔር።
75 ወእቤ፡ እግዚኦ፡ እግዚኦ፡ አኀፍር፡ ወእትኀፈር፡ እምቅድመ፡ ገጽከ።
76 እስመ፡ ብዙኅ፡ ኀጣውኢነ፡ ወተለዐለ፡ እምነ፡ ርእስነ፡ ወበጽሐ፡ እስከ፡ ሰማይ፡ ኢያእምሮትነ።
77 እምአመ፡ መዋዕሊሆሙ፡ ለአበዊነ፡ ወሀለውነ፡ እስከ፡ ም፡ በዓቢይ፡ ኀጢአት።
78 ወበእንተ፡ ኀጢአተ፡ ዚአነ፡ ወዘአበዊነ፡ ፄወዉነ፡ ነገሥተ፡ ምድር፡ ምስለ፡ አኀዊነ፡ መነገሥትነ፡ ወካህናቲነ፡ ወበርበሩነ፡ በኵናቶሙ፡ ወተኀፈርነ፡ እስመ፡ ዮም።
79 ወይእዜኒ፡ ፈድፋደ፡ ኮነት፡ ላዕሌነ፡ ምኅረቱ፡ ለእግዚአብሔር፡ ዘኀደገ፡ ለነ፡ ሥርወ፡ ወስመ፡ በዛቲ፡ መካን፡ ቅድስት።
80 ወውእቱ፡ ከሠተ፡ ለነ፡ ብርሃነ፡ በቤተ፡ አምላክነ፡ ወወሀበነ፡ ሲሳየነ፡ አመ፡ አግብርተ፡ ኮነ።
81 ወአመኒ፡ ተቀነይነ፡ ኢኀደገነ፡ ወወሀበነ፡ ሞገሰ፡ በቅድመ፡ ነገሥተ፡ ፋርስ፡ ከመ፡ የሀቡነ፡ ሲሳየነ።
82 ወያክብሩ፡ ቤተ፡ መቅደስነ፡ ወይሕንጹ፡ መዝበራ፡ ለጽዮን፡ ወረስዩነ፡ ለነ፡ ኀይለ፡ በይሁዳ፡ ወበኢየሩሳሌም።
83 ወይእዜኒ፡ ምንተ፡ ንበል፡ እግዚኦ፡ እንዘ፡ ዝንቱ፡ ላዕሌነ፡ ወክሕዱ፡ ትእዛዘከዘወሀብከ፡ በእደ፡ አግብርቲከ፡ ነቢያት።
84 ዘትቤሎሙ፡ ምድር፡ እንተ፡ ውስቴታ፡ ትበውኡ፡ ከመ፡ ትረስዋ፡ ምድር፡ ግምንት፡ ይእቲ፡ በርኵሶሙ፡ ለአሕዛበ፡ ምድር፡ ወመልእዋ፡ ግምኖሙ።
85 ወኢታስተዋስቡ፡ አዋልዲክሙ፡ በደቂቆሙ።
86 ወኢትሰነአዉ፡ ምስሌሆሙ፡ በኵሉ፡ መዋዕሊክሙ፡ ከመ፡ ትማእዎሙ፡ ወትብልዑ፡ በርከታ፡ ለምድር፡ ወታውርስዎሙ፡ ለውሉድክሙ፡ ለዓለም።
87 ወኵሉ፡ እንተ፡ ረከበተነ፡ በበይነ፡ እከየ፡ ምግባሪነ፡ ወበእንት፡ ዕበየ፡ ኀጣይኢነ፡ ወአንተ፡ እግዚኦ፡ ተዓገሥከ፡ ኀጢአተነ።
88 ወወሀበነ፡ ሥርወ፡ በዘ፡ ንገብእ፡ ካዕበ፡ ንክሕድ፡ ሕገከ፡ ወንዴመር፡ ውስተ፡ ርኵሶሙ፡ ለአሕዛበ፡ ምድር።
89 አኮኑ፡ እምተምዓዕከነ፡ ወእምቀተልከነ፡ እስከ፡ ኢታተርፍ፡ ለነ፡ ሥርወ፡ ወዘርአ፡ ወስመነኒ።
90 እግዚኦ፡ አምላከ፡ እስራኤል፡ አማን፡ አንተ፡ ኀደገ፡ ለነ፡ ሥርወ፡ ለዮም።
91 ወናሁ፡ ሀለውነ፡ ቅድሜከ፡ በኀጢአትነ፡ ዘኢይደልወነ፡ እንከ፡ ንቁም፡ ቅድሜከ፡ በበይነ፡ ዝንቱ።
92 ወሶበ፡ ይጼሊ፡ ዕዝራ፡ ወይትጋነይ፡ እንዘ፡ ይበኪ፡ አስተብሪኮ፡ ቅድመ፡ ቤተ፡ መቅደስ፡ ተጋብኡ፡ ኀቤሁ፡ ብዙኅ፡ ሰብእ፡ ወፈድፋደ፡ እለ፡ እምነ፡ ኢየሩሳሌም፡ ዕደው፡ ወአንስት፡ ወደናግል፡ ወዓቢይ፡ ብካይ፡ ኮነ፡ በላዕለ፡ ኵሎሙ።
93 ወጸውዖ፡ ኢኮንያስ፡ ወልደ፡ ኢያኤል፡ እምውስተ፡ ደቂቀ፡ እስራኤል፡ ወይቤሎ፡ ዕዝራ፡ ንሕነ፡ አበስነ፡ ለእግዚአብሔር፡ ዘአውሰብነ፡ አንስተ፡ እምነኪር፡ እምውስተ፡ ባዕድ፡ አሕዛበ፡ ምድር።
94 ወይእዜኒ፡ ላዕለ፡ ኵሉ፡ እስራኤል፡ ሀሎ፡ ዝንቱ። ወባሕቱ፡ ንትማሐል፡ ለእግዚአብሔር፡ ከመ፡ ናውፅኦን፡ እምኀቤነ፡ ለኵሉ፡ አንስቲያነ፡ እለ፡ አውሰብነ፡ እምውስተ፡ ባዕድ፡ አሕዛበ፡ ምድር፡ ምስለ፡ ደቂቆን።
95 በከመ፡ ኵነኔከ፡ ወለኵሎሙ፡ እለ፡ ይፈቅዱ፡ ሕገ፡ እግዚአብሔር፡ ተንሥእ፡ ወአምሕሎሙ።
96 እስመ፡ ላዕሌከ፡ ውእቱ፡ ዝንቱ፡ ግብር፡ ወንሕነኒ፡ ምስሌከ፡ ንርዳእ።
97 ወተንሥአ፡ ዕዝራ፡ ወአምሐሎሙ፡ ለመሳፍንተ፡ ሕዝብ፡ ካህናት፡ ወሌዋዊያን፡ ዘኵሉ፡ እስራኤል፡ ከመ፡ ይግበሩ፡ ከማሁ፡ ወመሐሉ።
=== chapter 10 ===
[Chapter 10]
1 ወተንሥአ፡ ዕዝራ፡ እምነ፡ ዐጸደ፡ መቅደስ፡ ወሖረ፡ ቤተ፡ ዮና፡ ወልደ፡ ናሲቡ።
2 ወነበረ፡ ወኢበልዐ፡ እክለ፡ ወኢሰትየ፡ ማየ፡ እንዘ፡ ይላሑ፡ በእንተ፡ ኀጣይኢሆሙ፡ ብዙኃት፡ ወዐቢያት።
3 ወእምዝ፡ ሰበኩ፡ ሎሙ፡ ለኵሉ፡ ይሁዳ፡ ወኢየሩሳሌም፡ ለኵሎሙ፡ እለ፡ አተዉ፡ እምኀበ፡ ተፄወዉ፡ ከመ፡ ይትረከቡ፡ በኢየሩሳሌም።
4 ወኵሎሙ፡ እለ፡ ኢተረክቡ፡ ወኢበጽሑ፡ እስከ፡ ሰኑይ፡ ወሠሉስ፡ መዋዕል፡ ይትኰነኑ፡ በኵነኔ፡ ሊቃናቲሆሙ፡ ዘበሕጎሙ፡ እንስሳሆሙኒ፡ ይትቀተሉ፡ ወኪያሆሙኒ፡ ያውግዝዎሙ፡ እምነ፡ ሕዝቦሙ።
5 ወተጋብኡ፡ ሕዝበ፡ ይሁዳ፡ ወብንያም፡ ውስተ፡ ኢየሩሳሌም፡ በሠሉስ፡ መዋዕል፡ አመ፡ ኀሙሱ፡ ለጽልመት፡ በታስዕ፡ ወርኅ።
6 ወነበሩ፡ ኵሎሙ፡ ውስተ፡ ዐጸደ፡ መቅደስ፡ ወይርዕዱ፡ በእንተ፡ ቊር፡ እስመ፡ ክረምት፡ ውእቱ።
7 ወተንሥአ፡ ዕዝራ፡ ወይቤሎሙ፡ አንትሙ፡ አበስክሙ፡ ዘአውሰብክሙ፡ አንስተ፡ እምባዕድ፡ አሕዛብ፡ ወወሰክሙ፡ ኀጢአት፡ ላዕለ፡ እስራኤል።
8 ወይእዜኒ፡ ግነዩ፡ ለእግዚአብሔር፡ ወአእኵትዎ፡ ለአምላከ፡ አበዊነ።
9 ወግበሩ፡ ሥምረቶ፡ ወተፋለጡ፡ እምነ፡ አሕዛበ፡ ምድር፡ ወእምነ፡ ካልእ፡ ዘመድ።
10 ወጸርሑ፡ ኵሎሙ፡ በምልኦሙ፡ ወይቤልዎ፡ በዐቢይ፡ ቃል፡ ኦሆ፡ ንገብር፡ ዘከመ፡ አዘዝከነ።
11 ወባሕቱ፡ ብዙኅ፡ ሰብኡ፡ ወክረምት፡ ብሔር፡ ወኢንክል፡ ፍጡነ፡ ገቢሮቶ፡ ወግብሩኒ፡ ኢኮነ፡ ዘአሐቲ፡ ዕለት፡ ወኢኮነ፡ ዘሰኑይ፡ መዋዕል፡ እስመ፡ ብዙኀ፡ አበስነ፡ በዝንቱ።
12 ወይእዜኒ፡ ይምጽኡ፡ መሳፍንት፡ ኵሎሙ፡ ወይትጋብኡ፡ ኵሉ፡ በሓውርት፡ ኵሎሙ፡ እለ፡ አውሰቡ፡ አንስተ፡ እምነ፡ ባዕድ፡ አሕዛብ፡ ይምጽኡ፡ ወዐድምዎሙ።
13 ለለ፡ በሓውርቲሆሙ፡ ወዐበይዎሙኒ፡ ወመኳንንቲሆሙኒ፡ ከመ፡ ይሰስል፡ እምኔነ፡ መዐተ፡ እግዚአብሔር፡ ዘበበይነ፡ ዝንቱ፡ ግብር፡ ረከበነ።
14 ወመጽአ፡ ዮናታን፡ ወልደ፡ አዛሄል፡ ወአዝያስ፡ ወልደ፡ ተቃኑ፡ ወኀብሩ፡ ከመዝ፡ ወሞሶን፡ ወልደ፡ ለሞስ፡ ወሌዊስ፡ ወሰበጤዎስ፡ ኀብሩ፡ እሙንቱኒ።
15 ወከመዝ፡ ገብሩ፡ ኵሎሙ፡ እለ፡ አተዉ፡ እምኀበ፡ ተፄወዉ።
16 ወኀረየ፡ ሎቱ፡ ዕዝራ፡ ካህን፡ ዕደወ፡ እምውስተ፡ ዐበይተ፡ በሓውርቲሆሙ፡ ወኵሎሙ፡ በበ፡ በሓውርቲሆሙ፡ ዘዘ፡ ዚአሆሙ፡ አስማቲሆሙ፡ ወተዓደሙ፡ እስከ፡ ሰርከ፡ ዓሥር፡ ወርኅ፡ ይግበሩ፡ ከመዝ።
17 ወአኅለቁ፡ ግብረ፡ እሙንቱ፡ ዕደው፡ እለ፡ አውሰቡ፡ አንስተ፡ እምነ፡ ባዕድ፡ አህዛብ፡ አመ፡ ሠርቀ፡ ቀዳሚ፡ ወርኅ።
18 ወእምውስተ፡ ካህናት፡ ተረክቡ፡ እለ፡ አውሰቡ፡ አንስተ፡ እምኀበ፡ ባዕድ፡ አሕዛብ።
19 ደቂቀ፡ ኢዮስስ፡ ወልደ፡ ኢዮሴዴቅ፡ ወአኀዊሁ፡ ማቴላስ፡ ወአልዓዛር፡ ወዮሪቦስ፡ ወዮአዳኖስ።
20 ወአኀዙ፡ ያውፅኡ፡ አንስቲያሆሙ፡ ወገብሩ፡ መሥዋዕተ፡ በእንተ፡ ኀጢአቶሙ።
21 ወእምነ፡ ደቂቀ፡ ኤሞር፡ ሐናንያ፡ ወዘብዴዎስ፡ ወማኔስ፡ ወሰማዎስ፡ ወኢየርሚያል፡ ወአዛርያ።
22 ወእምነ፡ ደቂቀ፡ ፌሶር፡ ኢሊዮኒስ፡ ወማስያስ፡ ወእስማኤሎስ፡ ወናታናኤሎስ፡ ወሐቂሌዶስ፡ ወሳልታስ።
23 ወእምነ፡ ሌዋውያን፡ ዮዘቤዶስ፡ ወሰሜይስ፡ ወቆኖስ፡ ዘይብልዎ…፡ ወጳጤዎስ፡ ወአሁድስ፡ ወዮሐናስ።
24 እምነ፡ ካህናተ፡ መዝሙር፡ ኤልያስቦስ፡ በኵሮስ።
25 ወእምነ፡ ወጸውት፡ ሴሎም፡ ወጥልባኔስ።
26 ወእምውስተ፡ እስራኤል፡ ወእምነ፡ ደቂቀ፡ ፎሮስ፡ ኢያርማ፡ ወኢየድያስ፡ ወመልክያስ፡ ወምያኤሎስ፡ ወአልዐዛር፡ ወአሴቢያስ፡ ወበኔያስ።
27 ወእምነ፡ ደቂቀ፡ ኤላ፡ መጠኒያስ፡ ወዘካርያስ፡ ወኢየዘርየሎስ፡ ወኢየአብዲዮስ፡ ወኢየሬሞት፡ ወአኤዲዮስ።
28 ወእምነ፡ ደቂቀ፡ ዘሞት፡ ኤሊያዳስ፡ ኤሊያሴሞስ፡ ኦታንያስ፡ ኢያሪሞት፡ ወሰበቶስ፡ ወዘርዴዎስ።
29 ወእምነ፡ ደቂቀ፡ ቤቤ፡ ዮሐንስ፡ ወሐናንያ፡ ወዘብዴዎስ፡ ወሔማቴስ።
30 ወእምነ፡ ደቂቀ፡ ማኒዮ፡ ለሞስ፡ ማሙኮስ፡ ኢያዴዎስ፡ ኢያሶብስ፡ ወአሰሔሎስ፡ ወኢያርሞት።
31 ወእምነ፡ ደቂቀ፡ አዲ፡ ናሐቶስ፡ ወሞሐስያስ፡ ለቊኖስ፡ ወኔዶስ፡ ወቤስቀስጰስሚስ፡ ሴእቴል፡ ወበልኑስ፡ ወሚናስያስ።
32 ወእምነ፡ ደቂቀ፡ ሐናን፡ ኤልዮላስ፡ ወኣስያስ፡ ወምልክያስ፡ ወሰብዎስ፡ ወስምዖን፡ ኮሠማዊ።
33 ወእምነ፡ ደቂቀ፡ አሶም፡ መልጠኔዎስ፡ ወመጣቲያስ፡ ወበኔዎስ፡ ወኢሊፍለብ፡ ወምናሴ፡ ወሴሜይ።
34 ወእምነ፡ ደቂቀ፡ በአኒ፡ አርሚያስ፡ ሞን…፡ ሰማዔል፡ ኢዮኤል፡ መምዴ፡ ወጴዲያስ፡ ወአናስ፡ ወቀሪቢሶን፡ ወአናሲቦስ፡ ወመንጠኔሞስ፡ አልያሐስ፡ በኑስ፡ ኤልያሊ፡ ሶማይስ፡ ሰሌምያስ፡ ናታንያስ፡ ወእምነ፡ ደቂቀ፡ ኤዛራስ፡ ሴሲ፡ ሴሪያ፡ አዛኤል፡ ሰማጢስ፡ ዞምብሪ፡ ኢዮሴጶስ።
35 እምነ፡ ነሐማ፡ ማዛጢያስ፡ ዘበዲያስ፡ ኤዴሴ፡ ኢዮኤል፡ በኔያስ።
36 ኵሎሙ፡ እከ፡ አውሰቡ፡ አንስተ፡ እምነ፡ ባዕድ፡ አሕዛብ፡ ወአውፅእዎን፡ ምስለ፡ ደቂቆን።
37 ወነበሩ፡ ካህናት፡ ወሌዋውያን፡ ወእስራኤልኒ፡ ውስተ፡ ኢየሩሳሌም፡ ወውስተ፡ በሓውርቲሆሙ፡ አመ፡ ሠርቀ፡ ሳብዕ፡ ወርኅ፡ ወደቂቀ፡ እስራኤልኒ፡ ገብኡ፡ በበደወሎሙ።
38 ወአንገለጉ፡ ኵሎሙ፡ ኅቡረ፡ በዐጸድ፡ ጽባሓዊ፡ ዘኀበ፡ አንቀጸ፡ ቤተ፡ መቅደስ።
39 ወይቤልዎ፡ ለዕዝራ፡ ካህን፡ ወጸሓፊ፡ ያምጽእ፡ ኦሪተ፡ ሙሴ፡ ዘወሀቦ፡ እግዚአብሔር፡ አምላከ፡ እስራኤል።
40 ወአንበበ፡ ሎሙ፡ ዕዝራ፡ ሊቀ፡ ካህናት፡ ኦሪተ፡ ለኵሉ፡ ሕዝብ፡ ለዕዶሙ፡ ወለአንስቶሙ፡ ወለኵሉ፡ ካህናት፡ ከመ፡ ይስምዑ፡ ሕጎሙ፡ አመ፡ ሠርቀ፡ ሳብዕ፡ ወርኅ።
41 ወአንበበ፡ ሎሙ፡ በኀበ፡ አንቀጸ፡ ቤተ፡ መቅደስ፡ በውስተ፡ ዐጸድ፡ እምነግህ፡ እስከ፡ ቀትር፡ በቅድመ፡ ኵሉ፡ ዕድ፡ ወአንስት፡ ወአፅምኡ፡ ኵሎሙ፡ ሕገ፡ ኦሪቶሙ፡ በኵሉ፡ ልቦሙ።
42 ወቆመ፡ ዕዝራ፡ ካህን፡ ወጸሓፌ፡ ኦሪት፡ ውስተ፡ መከየድ፡ ዘዕፅ፡ ዘገብሩ።
43 ወአቀመ፡ ምስሌሁ፡ መጠቲያስ፡ ሳሙስ፡ ወሀናንያ፡ አዛርያ፡ ወኡርያስ፡ ሕዝቅያስ፡ ወበአልሰሞስ፡ ወአቀሞሙ፡ እምየማኑ።
44 ወእምፀጋሙ፡ ፈሔልዴዎስ፡ ወሚሳኤል፡ ወሜልሎያስ፡ ወሎታሰብስ፡ ወነባሪያ፡ ወዘካርያስ።
45 ወነሥአ፡ ዕዝራ፡ ውእተ፡ መጽሐፈ፡ በቅድመ፡ ኵሎሙ፡ ወነበረ፡ ቅድሜሆሙ፡ ወያከብርዎ፡ ኵሎሙ።
46 ወሶበ፡ ከሠተ፡ ኦሪተ፡ ተንሥኡ፡ ኵሎሙ፡ ወቆሙ፡ ወባረኮ፡ አዛርያ፡ ለእግዚአብሔር፡ ልዑል፡ ዘኵሎ፡ ይመልክ።
47 ወአውሥእዎ፡ ኵሎሙ፡ በምልኦሙ፡ ወይቤሉ፡ አሜን፡ አሜን፡ ወአንሥኡ፡ እደዊሆሙ፡ ላዕለ፡ ወሰገዱ፡ ውስተ፡ ምድር፡ ለእግዚአብሔር።
48 ወኢዮስስ፡ ወሐኑሲ፡ ወሰራቢያስ፡ ወኢያዲኖስ፡ ወኢያቆብስ፡ ወሳብጣያስ፡ ወአውጥያስ፡ ወሜሐና፡ ወቀሊጦስ፡ ወአዛርያ፡ ወጠዘብዶስ፡ ወሐኒያስ፡ ወፊልጣስ፡ ሌዋዊያን።
49 መሀርዎሙ፡ ሕገ፡ እግዚአብሔር፡ ወሰምዑ፡ ኵሎሙ፡ ኅቡረ፡ ሶበ፡ አንበበ፡ ሎሙ።
50 ወይቤሎ፡ አጠራጤ፡ ለዕዝራ፡ ሊቀ፡ ካህናት፡ ወጸሐፊ፡ ወለሌዋዊያን፡ እለ፡ ይሜህርዎሙ፡ ለኵሎሙ።
51 ዛቲ፡ ዕለት፡ ቅድስት፡ ይእቲ፡ ለእግዚአብሄር፡ ወበከዩ፡ ኵሎሙ፡ ሶበ፡ ሰምዑ፡ ኦሪተ።
52 ወተባሀሉ፡ ሑሩ፡ ምስሑ፡ ወፈነዉ፡ ምጽዋተ፡ ለእለ፡ አልቦሙ።
53 እስመ፡ ቅድስት፡ ይእቲ፡ ዛቲ፡ ዕለት፡ ለእግዚአብሔር፡ ወኢትተክዙ፡ እስመ፡ እግዚአብሔር፡ ኢይገድፈክሙ።
54 ወአዘዙ፡ ሌዋዊያን፡ ለኵሉ፡ ሕዝብ፡ ወይቤልዎሙ፡ ዛቲ፡ ዕለት፡ ቅድስት፡ ይእቲ፡ ኢትተክዙ።
55 ወሐለፉ፡ ኵሎሙ፡ ይብልዑ፡ ወይስተዩ፡ ወይትፈሥሑ፡ ወየሀቡ፡ ምጽዋተ፡ ለእለ፡ አልቦሙ።
56 ወዐቢየ፡ ተፈሥሑ፡ ሶበ፡ ሰምዑ፡ ቃለ፡ ዘመሀርዎሙ፡ በኀበ፡ ተጋብኡ።